A tîra Pathianin lei leh vân a siam khân khawvêl chuan mu leh mal a la nei lo va, tuithûkpui chung pawh a thim mup a, Pathian Thlarau chuan tui chung chu a vil reng a. Pathian chuan, “Êng lo awm rawh se,” a ti a, êng a lo awm ta mai a. Pathianin êng a hmuh chuan ṭha a ti hle a, êng leh thim chu a ṭhen hrang a. Pathianin êng chu ‘chhûn’ a vuah a, thim chu ‘zân’ a vuah a. Tlai a lo ni a, zîng a lo ni leh a: a ni khatna chu. Pathian chuan, “Tui leh tui ṭhen tûrin boruak zau tak vân kumkulh awm rawh se,” a ti a. Pathian chuan vân kumkulh chu a siam a, kumkulh chunga tui awm leh a hnuaia tui chu a ṭhen ta a; chutiang chu a ni ta mai a. Pathianin kumkulh chu ‘vân’ a vuah a, tlai a lo ni a, zîng a lo ni leh a: a ni hnihna chu. Pathian chuan, “Vân hnuaia tui chu hmun khatah tling khâwm sela, khawmual lo lang rawh se,” a ti a. Chutiang chu a ni ta mai a. Pathianin khawmual chu ‘lei’ a vuah a, tui tling khâwm chu ‘tuifinriat’ a vuah a. Pathianin a han en a, ṭha a ti hle a. Pathian chuan, “Leiah thlai, a fang neia rah chi tinrêng te, thei, a mu neia rah chi hrang hrang ṭo ṭeuh rawh se,” a ti a. Chutiang chu a ni ta mai a. Lei aṭang chuan thlai tinrêng, fang neia rah chi tinrêng te, thei, mu neia rah hrang hrang te a lo ṭo ta a. Pathianin a han en chian chuan ṭha a ti hle a. Tlai a lo ni a, zîng a lo ni leh a: a ni thumna chu. Pathian chuan, “Chhûn leh zân awmtîr tûrin vân kumkulhah êntute awm teh se, chûng chu hun bi, ni te leh kum chhiar nân te ni sela, lei tiêng tûrin êntute chu vân kumkulhah chuan awm rawh se,” a ti a. Chutiang chu a ni ta mai a. Pathian chuan êntu lian pui pahnih leh arsite a siam a; êntu lian zâwk chu chhûna êng tûrin a ti a, a tê zâwk chu zâna êng tûrin. Lei ên tûr chuan Pathianin vân kumkulhah chuan êntute chu a dah a, thim leh êng ṭhena, chhûna êng tûr leh zâna êng tûrin. Pathian chuan a han en a, ṭha a ti hle a. Tlai a lo ni a, zîng a lo ni leh a: a ni lina chu. Pathian chuan, “Tuiah nungcha awm noh noh sela, vân kumkulh hnuaia lei chungah sava thlâwk sup sup bawk rawh se,” a ti a. Chutiang chu a ni ta mai a. Pathian chuan tuifinriata sa hlauhawm pui pui te, a ruala lêng dûl dûl tinrêng te leh sava thla nei chi hrang hrangte chu a siam a. Pathianin a han en a, ṭha a ti hle a. Pathian chuan mal a sâwm a, “Inthlah pung zêl ula, pung duah duah rawh u, tuifinriatah khat ula; leia savate pawh pung chiam rawh se,” a ti a. Tlai a lo ni a, zîng a lo ni leh a: a ni ngana chu. “Leian thil nung tinrêng, ran te, ramsa te, leia vâk chi te lo awm noh noh rawh se,” a ti a. Chutiang chu a ni ta mai a. Pathian chuan ramsa te, ran te leh leia vâk chi te, thil nung tinrêng te chu a siam a. Pathianin a han en chuan ṭha a ti hle a. Tin, Pathian chuan, “Keimahni ang, kan anpuiin mihring siam ila, tuifinriata sangha te, chunglêng sava te, ran te, ramsa te leh leia vâk chi zawng zawng chungah te thu nei teh se,” a ti a. Pathian chuan amah angin mihring, mipa leh hmeichhia a siam a, Pathian anpui ngeiin a siam a ni. Pathian chuan anni chu mal a sâwm a, an hnênah, “Fanau neiin lo pung deuh deuh rawh u; lei hi luah khat ula, nei vek rawh u; tuifinriata sangha te, chunglêng sava te leh leia thil nung awm zawng zawng chungah thu nei bawk rawh u,” a ti a. Pathian chuan heti hian a ti bawk: “Ngai teh u, in ei atân leia thlai, a fanga rah te; thei, a mu neia rah te ka pe a che u; leia ran zawng zawng te, chunglêng sava te leh nungcha lei chunga vâk chi te ei atân hnimhring ka pe bawk a ni,” tiin. Chutiang chu a ni ta mai a. Pathian chuan a thilsiam zawng zawng chu a hmuhin ṭha a ti êm êm a. Tlai a lo ni a, zîng a lo ni leh a: a ni rukna chu. Lei leh vân leh thil engkim siam chu zawh a ni ta a. A ni sarihna ni-ah Pathianin a thilsiam hna chu a zawh fel tâk avângin a ni sarih ni chuan a châwl ta a. A thilsiam hna zawng zawng a tih zawha a chawlhsan tâk avângin Pathian chuan a ni sarih ni chu mal a sâwm a, a serh ta a. Chu chu lei leh vân siam dân chanchin chu a ni. Lalpa Pathianin lei leh vân a siam lai khân thlai rêng rêng leiah a la ṭo lo va, hnim pawh a la chawr hek lo; Pathianin ruah a sûrtîr rih lo va, lo neitu tûr mihring pawh an la awm lo. Lei aṭangin tuihu a lo chhuak a, chu chuan lei chu a tihnâwng ṭhîn a ni. Lalpa Pathian chuan lei vaivutin mihring a siam a, a hnârah chuan nunna thaw a thaw lût a, mihring chu mi nung a lo ni ta a. Lalpa Pathian chuan khawchhak ram, Eden-ah huan a siam a; tah chuan a mihring siam chu a dah a. Lalpa Pathian chuan thing mawi tak tak leh rah tui tak huanah chuan a ṭotîr a, huan lai takah chuan nunna thing leh a chhia a ṭha thleina thing a ṭotîr bawk a. Huan tihnâwng tûr chuan lui pakhat a luang tlang a, huan pâwnah chuan pêng liin a pêng darh a. Pêng khat hming chu Pison a ni a, rangkachak tamna Havila ramah a luang a. Chu rama rangkachak chu a ṭha bîk a, lungmantam Bidela leh Soham pawh a awm. Lui pakhat hming chu Gihon a ni a, Kus ramah a luang tlang a. Lui pathumna chu Hidekal a ni a, Asuria chhak lamah a luang a. A palina chu Eufretis lui hi a ni. Lalpa Pathian chuan mihring chu a hruai a, huan enkawla vêng tûrin huanah chuan a dah a. Lalpa Pathian chuan mihring chu a hrilh a, “Huana thing rah hi i duh duh i ei thei ang. A chhia a ṭha thleina thei erawh hi chu ei tûr a ni lo, i ei phawt chuan i ei niin i thi ngei ang,” a ti a. Lalpa Pathian chuan, “Mihring, amah maia a awm hi a ṭha lo ve, ṭanpuitu tûr, a kawppui âwm tak ka siamsak teh ang,” a ti a. Lalpa Pathian chuan leiin ramsa tinrêng leh chunglêng sava tinrêng a han siam a. Mihring chuan engtin nge a lo koh dâwn hriat nân a hnênah a rawn hruai zêl a; mihringin a lo koh dân ang zêl chu thil nung tinrêng chuan hmingah an pu ta a. Mihring chuan ran te, chunglêng sava te leh ramsa tinrêng te chu hming a neihtîr a; mahse, mihring chuan amah ṭanpuitu tûr, kawppui âwm a hmu lo. Lalpa Pathian chuan mihring chu tui takin a muttîr a, a muthilh hlân chuan a nâkruh pakhat a lâksak a, tisain a tiping leh a. Mipa nâkruh a lâk aṭang chuan Lalpa Pathian chuan hmeichhia a siam a, mipa hnênah chuan a rawn hruai ve a. Ani chuan, “Hei zet zawng, ka ruh ang ruh nei, ka tisa ang tisa pu zu nia le! Mipa aṭanga lâk chhuah a nih avângin ‘hmeichhia’ tih tûr a ni,” a ti a. Hei vâng hian mipain a nu leh a pa a thlah a, a nupui a vuan a, tisa pumkhat an lo ni ta a ni. Mipa leh hmeichhia chu saruakin an awm a; mahse, an zak lêm lo. Lalpa Pathian siam ramsa zîngah rûl hi a fing vervêk ber a, hmeichhe hnênah chuan, “Huana thei rah rêng rêng hi Pathianin in ei a khap che u elo maw?” a ti a. Hmeichhia chuan rûl hnênah, “Huana thei rahte hi kan ei thei asin. Huan laia awm thing rah hi erawh chu Pathian chuan, ‘Ei suh u, tawh pawh tawk suh u, in thi mai ang,’ min ti a ni,” a ti a. Rûl chuan hmeichhe hnênah, “Thi teh suh e! In ei veleh in mit a lo vâr ang a, Pathian angin a chhia a ṭha in thlei ve tawh dâwn tih Pathian chuan a hria atin alâwm,” a ti a. Hmeichhia chuan thei tuihnai, tui âwm tak, fin theihna tûra thei îtawm tak a ni tih a hmuh chuan a lo va, a ei ta a; a ṭhen chu a pasal a pe ve a, ani pawh chuan a ei ta a. An pahnih chuan an mit a lo vâr a, saruak an nih an hrechhuak ta a; tichuan, theipui hnah an chilh khâwm a, fên tûr an insiam a. Tlai ni nêm chuan huana Lalpa lo lêng thâwm chu an hria a, mipa leh a nupui chuan thing zîngah Pathian chu an bihrûksan ta a. Lalpa Pathian chuan mihring chu a ko va, a hnênah, “Khawiah nge i awm tâk?” a ti a. “Huana i thâwm ka hria a, saruak ka nih avângin ka hlau che a, ka biru a ni,” tiin a chhâng a. “Saruak i nih tu nge hrilh che? Ei loh tûr ka tih thei kha i lo ei a ni maw?” a ti a. Mipa chuan, “Mi awmpui tûra i tih hmeichhia khân thei rah chu mi pe a, ka ei ta a ni,” a ti a. Lalpa Pathian chuan hmeichhe hnênah, “Engtiziaa hetiang thil hi ti nge i nih?” a ti a. Hmeichhia chuan, “Rûlin min tihder a, ka ei ta mai a ni,” a ti a. Lalpa Pathian chuan rûl hnênah, “He thil hi i tih tâk avângin ran zawng zawng leh ramsa tinrêng dawn aia nasa zâwk ânchhia i dawng dâwn a ni; leiah i tleng ang a, i dam chhûng zawng chu vaivut i ei ṭhîn ang. “Nang leh hmeichhia hi ka inhmêlmâktîr ang che u a, i thlahte leh a thlahte pawh an inhmêlmâk zêl ang. I luruh a vaw keh ang a, nangin a keartui i chuk ang,” a ti a. Hmeichhe hnênah chuan, “I nau vei na ka tizual ang a, na ti takin fa i hring dâwn a ni; mahse, i thlâkhlelh chu i pasal a ni ang a, ani chuan i chungah thu a nei ang,” a ti a. Adama hnênah chuan, ‘I nupui thu i zâwm a, ei loh tûr ka tih thei kha i ei a, i tân lei hi ânchhia ka lawh ta. I dam chhûng zawng hah takin ei tûr i thawk chhuak ang. Hnimhlîngnei te, hlohar te a ṭo vang a, chuta thlai chu i ei ang. I lo pian chhuahna leia i kîr leh hma chu thlansaphûlkaiin ei i zawng ang. Vaivut i ni a, vaivutah bawk i kîr leh tûr a ni,” a ti a. Mipa chuan a nupui chu mi zawng zawng nu a nih avângin a hmingah Evi a sa a. Lalpa Pathian chuan mipa leh a nupui tân savun puan a siam a, a sintîr a. Lalpa Pathian chuan, “Mihring chuan keimahni angin a chhia a ṭha a thlei ve ta si a, nunna thing rah chu lovin a ei ang a, a nung reng thei mai ang a!” a ti a. Tichuan, Lalpa, Pathian chuan a pian chhuahna ram chu lova nei tûrin Eden huan aṭang chuan a hnawt chhuak ta a. Mihring a hnawh chhuah hnu chuan Eden huan chhak lamah cherub-te leh khandaih vir tawn, huan vêng tûr chuan a dah a. Adama chuan a nupui Evi chu a pâwl a, nau a pai a; Kaina a hring a, “ Lalpa zârah fapa ka nei ta,” a ti a. A nau Abela chu a hring leh a. Abela chuan berâm a vulh a, Kaina chuan lo a nei a. Eng emawti hnuah chuan Kaina chuan a lova thlai thar chu Lalpa hnêna thilhlan atân a rawn la a. Abela pawh chuan a berâmno piang hmasa zînga mi a rawn la a, a sa ṭha lai ber chu a hlan a. Lalpa chuan Abela leh a thilhlan chu a lo lâwm a. Kaina chungah leh a thilhlanah chuan a lâwm lo. Kaina chu a thin a ur a, a hmêl a dur ta khup a. Lalpa chuan Kaina hnênah, “Engati nge i thin a ura, i hmêl a dur tâk le? Thil ṭha ti la, i hmêl pawh a hlim ang chu. Thil ṭha i tih loh avângin sual chuan kawngkaah nghâkhlel takin a châng reng che a ni; mahse, i hneh tûr a ni asin,” a ti a. Kaina chuan a nau Abela hnênah, “I feh ang hmiang,” a ti a. Lo an thlen chuan Kaina chuan a nau Abela chu a bei a, a that ta mai a. Lalpa chuan Kaina hnênah, “I nau Abela kha khawiah nge a awm tâk?” a ti a. Ani chuan, “Ka hre nâng, ka nau vêngtu ka ni em ni?” a ti a. Ani chuan, “Engtizia nge hetiang thil hi i tih le? I nau thisen aw chuan lei aṭangin min au asin. Chuvângin, nangma thah ngei i nau thisen lo dawngtu lei chungah hian i hmuingîl dâwn tawh lo a ni. Lo i neih pawhin a rah seng tûr i nei lo vang; leiah hian chanhai takin i vâkvai tawh ang,” a ti a. Kaina chuan Lalpa hnênah, “Min hrem na êm a, tuar zawh rual em ni? Vawiinah he ram ata hi min hnawt chhuak a, i hmuh loh tûrin ka awm dâwn ta a ni si a; leiah hian chanhai takin ka vâkvai dâwn ta a ni. Chuvângin, min hmu apiangin min that mai ang asin,” a ti a. Lalpa chuan a hnênah, “That lo ve, Kaina that chu a lêt sariha phuba lâk a ni ang,” a ti a. A hmu apiangin an thah mai loh nân Kaina chu chhinchhiahna a siamsak a. Lalpa hma ata Kaina chu a chhuak a, khawchhak lam Nod ramah chuan a awm ta a. Kaina chuan a nupui a pâwl a, nau a nei a. Enoka a hring a. Khua a siam a, a fapa hming chawiin ‘Enok’ a vuah a. Enoka chuan Irada fapa a nei a; Irada chuan fapa Mehujaela a nei a, Mehujaela chuan fapa Methusaela a nei a, Methusaela chuan fapa Lameka a nei a. Lameka chuan nupui pahnih a nei a, pakhat hming chu Adaii a ni a, pakhat hming chu Zillaii a ni. Adaii chuan Jabala a hring a, ani chu berâm vulha puan ina chêngho thlahtu a ni. Chu mi nau chu Jubala a ni a, ṭingṭang leh phênglâwng tum mite thlahtu a ni. Zillaii pawh chuan Tubal-kaina a hring a, ani chu dâr leh thîr hmanraw tinrêng chhertu a ni. Tubal-kaina chuan farnu Naamaii a nei. Lameka chuan a nupuite hnênah: “Adai, Zillai, ka thu hi ngaithla ula, Lameka nupuite u, ka sawi hi bengkhawn rawh u: Min tipemtu chu ka that a, min vawtu tlangvâl chu ka that bawk a ni. Kaina phuba laa mi pasarih an thih chuan, Lameka phuba lâk nân mi sawmsarih leh pasarih an that ang,” a ti a. Adama chuan a nupui chu a pâwl leh a, fapa a hring a, a hmingah Setha a sa a. “Kainan Abela min thahsak tâk avângin a aiah Pathianin fapa min pe leh ta a nih hi,” a ti a ni. Setha pawh chuan fapa a nei a, a hmingah Enosa a sa a. Chutih lai chuan a ni, miten Lalpa hming an lam ṭan tâk ni. Hetiang hi Adama thlahte chanchin chu a ni. Pathianin mihring a siam khân Pathian anpui ngeiin a siam a ni. Mipa leh hmeichhia a siam a, mal a sâwm a, a siam ni chuan an hmingah ‘mihring’ a vuah a. A anpui, amah ang taka fapa a hrin khân Adama chu kum za leh sawmthuma upa a ni a, a fapa hmingah chuan Setha a sa a. Setha a neih hnu chuan Adama chu kum zariat a dam a, fanu fapa dangte a nei a. Adama chu kum zakua leh sawmthum chhûng a dam a, a thi ta a. A fapa Enosa a pian khân Setha chu kum za leh pangaa upa a ni a. Enosa a pian hnuah Setha chu kum zariat leh pasarih a dam a, fanu fapa dangte a nei a. Setha chu kum zakua leh sâwm leh pahnih chhûng a dam a, a thi ta a. A fapa Kenana a pian khân Enosa chu kum sawmkuaa upa a ni a. Kenana a pian hnuin Enosa chu kum zariat leh sâwm leh panga a dam a; fanu fapa dangte a nei a, Enosa chu kum zakua leh panga chhûng a dam a, a thi ta a. A fapa Mahalalela a pian khân Kenana chu kum sawmsariha upa a ni a. Mahalalela a pian hnuin Kenana chu kum zariat leh sawmli a dam a; fanu fapa dangte a nei a. Kenana chu kum zakua leh sâwm chhûng a dam a, a thi ta a. A fapa Jareda a pian khân Mahalalela chu kum sawmruk leh pangaa upa a ni a. Jareda a pian hnuin Mahalalela chu kum zariat leh sawmthum a dam a; fanu fapa dangte a nei a. Mahalalela chu kum zariat leh sawmkua leh panga chhûng a dam a, a thi ta a. A fapa Enoka a pian khân Jareda chu kum za leh sawmruk leh pahniha upa a ni a. Enoka a pian hnuin kum zariat a dam a, fanu fapa dangte a nei a. Jareda chu kum zakua leh sawmruk leh pahnih chhûng a dam a, a thi ta a. A fapa Methusela a pian khân Enoka chu kum sawmruk leh pangaa upa a ni a. Methusela a pian hnuin Enoka chu kum zathum chhûng Pathian nên an lêng dûn ṭhîn; fanu fapa dangte a nei a. Enoka chu kum zathum leh sawmruk leh panga chhûng a dam a. Enoka chu Pathian nên an lêng dûn ṭhîn, Pathianin a lâk tâk avângin a awm ta lo a ni. A fapa Lameka a pian khân Methusela chu kum za leh sawmriat leh pasariha upa a ni a. Lameka a pian hnuin kum zasarih leh sawmriat leh pahnih a dam a; fanu fapa dangte a nei a. Methusela chu kum zakua leh sawmruk leh pakaw chhûng a dam a, a thi ta a. Fapa a neihin Lameka chu kum za leh sawmriat leh pahniha upa a ni. “He mi hian leia kut hna rim taka kan thawh, Lalpa ânchhia aṭang hian min tihahdam tawh ang,” tiin a fapa hmingah chuan Nova a sa a. Nova a pian hnuin Lameka chu kum zanga leh sawmkua leh panga a dam a; fanu fapa dangte a nei a. Lameka chu kum zasarih leh sawmsarih leh pasarih chhûng a dam a, a thi ta a. Kum zanga vêla upa a nih khân Nova chuan fapa Sema te, Hama te, Jafeta te a nei a. Leiah mihring an lo tam a, fanute pawh an ngah ta hle a. Pathian fate chuan mihring nulate hmêlṭhatzia an hmuh chuan an duh duh nupuiah an nei ta a. Lalpa chuan, “Mihring hi an dam kumkhua ka remti lo, an tisa mi êm mai; kum za leh sawmhnih erawh chu dam thleng rawh se,” a ti a. Chutih hun lai chuan, a hnu deuhvah pawh leiah hian Nefil-ho an awm a. Chûng chu Pathian faten mihring fate nupuia an neiha an thlah tâkte an ni. Chûng mite chu hmânlai mi hrâtkhawkhêng, mi hmingthang tak tak an ni. Lalpa chuan leia mihring sual nasatzia chu a hmu a, eng lai pawhin thil sual hlîr an ngaihtuah a ni. Leiah mihring a siam ta chu pawi a ti a, a rilru a na hle a. Lalpa chuan, “Mihring te, ramsa te, a tlenga tleng mi te, chunglêng sava ka siam te hi ka nuai bo mai teh ang, ka siam ta kha pawi ka ti êm mai,” a ti a. Nova erawh chu Lalpa chuan a ngaina hle a. Hei hi Nova thlahte chanchin chhuina a ni. Nova chu mi ṭha a ni a, a dam rualpuite zîngah sawisêl kai lo awm chhun a ni. Nova chu Pathian nên an lêng dûn ṭhîn. Nova chuan fapa pathum, Sema te, Hama te, Jafeta te a nei a. Pathian ngaihin lei chu a chhe let dêr a, inpâwngnêknain a khat a ni. Khawvêl chhiat tâkzia chu Pathian chuan a hmu a. Ngai teh, leia mi tin a sual zâwng hlîrin an khawsa a ni. Pathianin Nova hnênah, “Mihringte hi tihboral ka tum ta. Lei hi anmahni avângin inpâwngnêknain a khat ta si a, lei pawh hi ka tichhe vek dâwn a ni. Tichuan, thing ṭha chi hmangin lawng tuk rawh; lawngah chuan pindante siam la, a chhûng lam leh a pâwn lamah alkatra hnawih chhuak vek ang che. Lawng chu tawng zathuma sei, tawng sawmngaa zau, tawng sawmthuma sângin tuk ang che. Lawngah chuan tukverhte siam la, bang leh a chung inkâr chu inchi sâwm leh pariat a ni tûr a ni; lawng kawngka chu a sîrah hawng ang che, chhâwng thum neiin i siam tûr a ni. “Ngai teh, kei hian lei chîm pil tûr tui ka lêttîr dâwn a ni. Vân hnuaia nunna nei rêng rêng chu ka nuai bo vek dâwn; leia engkim a chhe nghâl ang. Nang nên erawh chuan thu ka thlung ang a, lawngah i lût ang a, i nupui leh i fate pawh, an nupuite nên lawngah chuan in lût tûr a ni. Thil nung tinrêng, tisa pu rêng rêng chu an him theih nân, pahnih zêl, a nu leh a pa hruai lût ve ang che. Sava chi tin nên ran leh a tlenga tleng chi hrang hrang nên an him theih nân pahnih zêl an lût ve tûr a ni. In tla tâwk tûr ei tûr la khâwm la, nangni leh anni ei atân chhêk khâwm ang che,” a ti a. Nova chuan Pathian thupêk ang chuan a ti ta vek a. Lalpa chuan Nova hnênah, “Nang leh i chhûngte nên lawngah lût vek rawh u; tûnlai mite zîngah nang chauh hi mi dik tak ka hmuh chhun i ni. Leia chi thlaha nung zêl tûrin sa thiang zînga mi tuak sarih zêl, a nu leh a pa; sa thiang lo zînga mi tuak khat zêl, a nu leh a pa; chunglêng sava zînga mi tuak sarih, a nu leh a pa, hruai lût bawk ang che. Tûn aṭanga ni sarih ralah ni sawmli chhûng chhûn leh zân ruah ka sûrtîr dâwn a ni. Thil nung ka siam tinrêngte chu lei ata ka timang vek dâwn,” a ti a. Nova chuan Pathian thupêk ang chuan a ti a, Lei chunga tui a lo lêt khân Nova chu kum zaruka upa a ni. Tui a lêt dâwn avângin Nova leh a nupui chu, an fate leh an nupuite nên lawngah chuan an lût a. Sa thiang leh thiang lo, chunglêng savate leh leia tleng ṭhîn chi tinrêngte chu, Pathianin Nova hnêna thu a pêk angin pahnih zêl, a nu leh a pa, Nova lawng chhûngah chuan an lût ta a. Ni sarih a ral hnu chuan lei chungah tui a lo lêt ta a. Nova kum zaruk a nih kum, thla hnihna, ni sâwm leh pasarih ni tak chuan tuithûkpui tuite chu a lo sah a, vân tukverhte chu a inhawng a. Ni sawmli leh zan sawmli chhûng ruahpuivânâwn a sûr ta chiam a. Chumi ni chuan Nova leh a fa pathum, Sema te, Hama te, Jafeta te, Nova nupuite leh a mo pathumte chu lawngah an lût a, chumi ni ngei chuan ramsa tinrêng, ran tinrêng, thil nung tinrêng - leia tleng te, sava chi tinrêng, thlâwk thei tinrêng te chu lawngah an lût ve a. Nunna thaw nei, tisa pu zawng zawng chu an lût kim a ni. Nova hnêna Pathianin thu a pêk angin nupa kawp zêlin an lût a. Lalpa chuan lawng chu a khârsak ta a. Leiah ni sawmli chhûng zawng tui a lo lêt ta a; tuiin a chîm ang zêlin lawng chu a lâng zêl a. Lei chungah tui chu a lo pung a, a chîm sâng tial tial a, lawng pawh chu a lâng zêl a. Lei chungah tui chu a tam tulh tulh a, a lei chîm chin pawh a sâng tial tial a, tlâng sâng berte pawh a chîm pil ta a. Tlâng sâng ber chhîp pawh chu tawng sâwm leh panga laia thûkin a pil a ni. Tisa pu, leia che thei awm zawng zawng, sava te, ran te, ramsa te, a ruala tla chi te, mihring te a chîm hlum zo ta a. Thaw thei tawh phawt, khawmuala chêng zawng zawng chu an thi zo ta a. Khawvêla awm zawng zawng, mihring te, ran te, leia tleng chi te, chunglêng sava te an boral ta vek a. Nova leh lawng chhûnga awmte chauh chu zuah an ni. Tui chuan lei chu ni za leh sawmnga chhûng a chîm ta pûng a. Pathian chuan Nova te, a awmpui ramsa te leh ran tinrêng chu a hre reng a. Pathian chuan lei chungah thli a tlehtîr a, tui chu a kâm ṭan ta a. Tuithûkpui sah leh vân tukverh inhawng chu a inkhâr a, vân aṭanga ruahpuivânâwn sûr chu a hân ta a. Zawi zawiin tui chu a kâm hret hret a, ni za leh sawmnga a ral hnu, a thla sarihna, ni sâwm leh pasarih ni chuan lawng chu Ararat tlângah a innghat ta a. A thla sâwmna thleng chuan tui chu a kâm zêl a, a thla sâwmna ni khat ni chuan tlâng chhîpte chu a lang thei ta a. Ni sawmli a ral hnu chuan lawng tukverh a siam chu Nova chuan a hawng a. Choak a chhuah a, leia tui a kâm fel nghâkin a thlâwk a thlâwk a. Tui a kâm zo tawh emaw hriat nân ṭhuro a chhuah leh a; ṭhuro chuan fûkna tûr leichâr a hmu lo va, lawngah chuan a lo kîr leh a, tui chuan lei chu a la chîm vek a ni. Tichuan, a kut a zen chhuak a, a man a, lawng chhûngah chuan a la lût a. Ni sarih dang a nghah hnuah lawng aṭang chuan ṭhuro a chhuah leh a. Tlai lamah chuan ṭhuro chu a lo kîr a, oliv hnah bal thar a rawn pu a. Nova chuan leia tui chu a kâm zo ta tih a hria a. Ni sarih dang a nghah leh hnu chuan ṭhuro chu a chhuah leh a, a lo kîr ta lo va. Nova kum zaruk leh pakhat kum, thla hmasa ber ni khat ni chuan lei ata tui chu a kang zo ta a. Nova chuan lawng chhîn chu a hawng a, lei chu a châr ta tih a hmu a. A thla hnihna, ni sawmhnih leh pasarih ni chuan lei chu a ro ta vek a. Pathian chuan Nova hnênah, “I nupuite, i fate leh an nupuite nên lawng ata hi chhuak rawh u. Savate leh rante pawh hi hruai chhuak ula, an inthlah ang a, leiah an awm darh dâwn nia,” a ti a. Tichuan, Nova chu a fa te, a nupui te leh a mo te nên an lo chhuak a. Rannung zawng zawng, leia tleng chi te, chunglêng sava te, leia tla ṭhînte chu a chi chiin an lo chhuak ve a. Nova chuan Lalpa tân maichâm a siam a, sa thiang leh sava thiang zînga mi a thlang ṭheuh va, maichâmah chuan hâlralah a hlân a. Lalpa chuan hâl ral rim chu tui a ti hle a; “Mihring avângin khawvêl pum pui hi ka sawisa leh tawh lo vang; mihring thinlung hi a naupan lai aṭangin suala khat a ni si a; thil nung dang pawh tûn ang chuan ka tihlum tawh lo vang. Lei hi a awm chhûng chu buh tuh hun te, a seng hun te, khaw vâwt leh khaw lum te, nipui leh thlasik te, chhûn leh zân te a tâwp lo vang,” a ti rilru a. Pathian chuan Nova leh a fate chu mal a sâwm a, “In chi ṭha sela, pung duah duah ula, lei hi luah khat ang che u. Leia ramsa zawng zawng leh tuipuia sangha zawng zawngin an ṭih ang che u a, an zah êm êm ang che u, in kutah ka dah a ni. In ei atân thlai hring tinrêng ka pe a che u, thil nung tinrêng, nunna nei zawng zawngte pawh in ei thei ang. Sa erawh chu a nunna thisen chawpin in ei tûr a ni lo. Tin, in nunna thisen chhuahtu chungah, ramsa an ni emaw, mihring an ni emaw, kut ka thlâk ang. Mihring nunna thisen chhuahtu chu, Mi dangin a thisen an chhuahsak ve ang. Mihring hi Pathian anga siam a ni si a; tichuan, in chi ṭha sela, Pung deuh deuh ula, Leilung dâp chhuak rawh u,” a ti a. Pathian chuan Nova leh a fate hnênah heti hian a ti bawk: “Ngai teh u, nangni leh in thlah zêlte tân thu ka thlung ta. Chu chu in hnêna awm, thil nung zawng zawng, sava te, ran te, ramsa te, lawng aṭanga lo chhuak, leia thil nung tinrêngte tân chuan a ni. Ka thuthlung, ka vawn reng tûr chu hei hi a ni: Thil nung tinrêng tihlum tûrin tui ka tilêt ngai tawh lo vang a, lei tichhe tûrin a lêt ngai tawh lo vang. “Tin, ka kumkhaw thuthlung, nangni leh thil nung zawng zawng nêna kan inkâra ka thuthlung chhinchhiahna chu hei hi a ni: Chhûmah chhimbâl ka zâmtîr hi, khawvêl nêna kan inkâra thuthlung chhinchhiahna chu a ni. Lei chunga chhûm ka zîntîr hunah chhimbâl chu a lo lang ang a; nangni leh thil nung tinrêng nêna kan inkâra thuthlung ka thlun chu ka hre reng ṭhîn ang a, tui lo lêtin mi nung zawng zawng a tihlum tawh dâwn lo nia. Chhûm zînga chhimbâl a lo lanin ka hmu ang a, nangni leh leia thil nung tinrêng nêna ka thuthlung chu ka hre reng ṭhîn ang. Chu chu nang leh leia thil nung tinrêng nên kan inkâra ka thuthlung chhinchhiahna a ni zêl ang,” tiin. Lawng aṭanga lo chhuak, Nova fate chu Sema te, Hama te, Jafeta te an ni; Hama chu Kanan mite thlahtu a ni. Hêng mi pathum hi Nova fate chu an ni, an thlahte chuan lei pum pui hi an dâp ta a. Nova chu lo nei mi a ni a, grep huan a siam a. Uain chu a in a, a rui a, a puan in chhûnga a mu chu a mu sual a. Kanan mite thlahtu Hama chuan a pa mu sual chu a va hmu a, a unaute chu a rawn hrilh a. Sema leh Jafeta chuan puan an la a, an kokia inzâwnin hnungtawlhin an kal a, an pa mu sual chu an va khuh a, an pa mu sual hmu lo tûrin lehlam an hawi tlat a ni. Nova rui chu a lo harh a, a fapa naupang ber Hama thil tih dân chu a han hriat chuan: Kanana chuan ânchhia dawng rawh se, A unaute zîngah chhiahhlawh tê ber ang ni rawh se. Sema Pathian chu fakin awm sela, Kanana chu mi dang chhiahhlawh ni rawh se. Pathianin Jafeta tân hmun zuah sela, Sema puan inahte pawh chêng sela, Kanana erawh chu an chhiahhlawh ni rawh se,” a ti a. Nova chu tuilêt hnuah kum zathum leh sawmnga a dam a. Nova chu kum zakua leh sawmnga chhûng a dam a ni, a thi ta a. Hei hi Nova thlah chhâwng zêlte chanchin a ni. Nova fa Sema te, Hama te, Jafeta te chuan tuilêt hnuah fa an nei hlawm a. Jafeta fate chu Gomera te, Magoga te, Madaia te, Javana te, Tubala te, Meseka te, Tirasa te an ni. Gomera fate chu Askenaza te, Rifata te, Togarma te an ni. Javana fate chu Elisa te, Tarsisa te, Kitima te, Dodanima te an ni. Anni chu tuipui kam leh thliarkâra awm hnamte thlahtu an ni. Khîngte khi Jafeta thlahte chu an ni, a chi chiin hmun hrang hrangah an awm a, mahni ṭawng bîk an hmang ṭheuh a ni. Hama thlahte chu Kusa te, Mizraima te, Puta te, Kanana te an ni. Kusa thlahte chu Seba te, Havila te, Sabta te, Raama te, Sabteka te an ni. Raama fate chu Seba leh Dedana an ni. Kusa chuan fapa Nimroda a nei a. Chu mi chu khawvêla râltu mi ropui tak a ni. Lalpa mit tlung, ramvâk mi a ni a. ‘Nimroda angin Lalpa mit tlung, ramvachal ni ve ang che,’ an inti ṭhîn a ni. A tîrah chuan Babulon-ah te, Erek-ah te, Akad-ah te a lal a, chûng zawng zawng chu Sinar rama awm vek an ni. Chu ram aṭang chuan Asuria ramah a kal a, Ninevi khua te, Rehobot-ir te, Kala khua te a din a. Ninevi leh Kala khaw inkârah an khawpui ber Resen pawh a siam a. Mizraima thlahte chu hêng mite hi an ni: Lud mi te, Anam mi te, Lebab mi te, Nafta mi te, Pathros mi te, Kaslu mi te. Hêng mite hi Filistia leh Kaftor mite thlahtu an ni. Kanana chuan fapa Sidona a nei hmasa a, Hetha pawh a nei leh a. Jebus mi te, Amor mi te, Girgas mi te, Hiv mi te, Arka mi te, Sin mi te, Arvad mi te, Zemar mi te leh Hamath mi te thlahtu a ni bawk. Nakin hnuah chuan Kanana thlahte chu an inzâr darh a, Sidon aṭanga Gaza bul Gerar thlengin an ram an zauh a; Sodom te, Gomora te, Adma te, Lasa bula Zeboim khaw thlengin an nei zêl a. Khîng khi Hama thlahte chu an ni, a hnam hnamin, mahni ram ramah an awm a, mahni ṭawng ṭheuh an hmang a ni. Eber mite thlahtu Jafeta u Sema pawhin fate a nei ṭeuh va. Sema fate chu: Elama te, Asura te, Arpaksada te, Luda te, Arama te an ni. Arama fate chu: Uza te, Hula te, Gethera te, Masa te an ni. Arpaksada chuan fapa Sela a nei a, Sela chuan fapa Ebera a nei a. Ebera chuan fapa pahnih a nei a, pakhat hming chu Pelega a ni, a hun laiin khawvêl mi an inṭhen ta a. A nau hming chu Joktana a ni. Joktana thlahte chu; Almodada te, Selefa te, Hazarmaveta te, Jera te, Hadorama te, Uzala te, Dikla te, Obala te, Abimaela te, Seba te, Ofira te, Havila te, Jobaba te an ni. Khîng zawng khi Joktana thlahte chu an ni. An ram luah chu Mesa aṭanga Sefar thleng zak a ni a, khawchhak lam tlângram zawng zawng khi a huam a ni. Khîng khi Sema thlahte chu an ni, mahni chi chi, mahni ram ramah a hnam hnamin an awm a, mahni ṭawng ṭheuh an hmang. Nova thlah hlâwm hrang hrangte chu an thlahtute leh an awmna ram ang zêlin khitiang khi a ni. Hnam dangte pawh tuilêt hnua an laka lo pianga darh ta an ni. Khawvêl pum puiah ṭawng khat an hmang a, an awphawi pawh a inang vek a. Khawchhak lam aṭangin mi an lo pêm a, Sinar phai “Hawh u, leirawhchan siam ila, chang takin i rawh ang u,” an ti a. Lung aiah leirawhchan chu an hmang a, hlum banin an châr a. “Hawh u, khawpui i din ang, in sâng tak, vân tawng sa ila, hmingṭha i chher ang u; chutilo chu, khawvêlah kan awm darh zo dah ang e,” an ti a. Lei miten khawpui an siam leh in sâng an sa chu en tûrin Lalpa chu a lo chhuk a. “Ṭawng khat hmang, hnam pumkhat thiltih duh dân heti hi a nih si chuan an tum ang ang tih theih loh an nei lo mai ang a! An thu sawi inhre tawn lo tûrin hawh u, an ṭawng i zu tihhransak ang u,” a ti a. Lalpa chuan chuta ṭang chuan khawvêl pum puiah a hnawt darh a, khua chu an sa thei ta lo va. Chuvâng chuan, chu hmun chu ‘Babel’ tih a ni ta a; khawvêl pum pui mite ṭawng chu inhre tawn thei lovin Lalpa chuan a tihrang ta a; chuta ṭang chuan ram tinah a hnawt darh ta a. Hei hi Sema thlah chhâwng zêlte chanchin chu a ni: Tuilêt zawh kum hnih hnua a fapa Arpaksada a pian khân Sema chu kum za a ni tawh a. Arpaksada pian hnuin Sema chu kum zanga chhûng a dam a, fanu fapa dangte a nei a. Kum sawmthum leh panga a nihin Arpaksada chuan fapa Sela a nei a, Sela a pian hnu chuan Arpaksada chu kum zali leh pathum chhûng a la dam a, fanu fapa dangte a nei a. Kum sawmthum a nihin Sela chuan fapa Ebera a nei a, Ebera pian hnu chuan Sela chu kum zali leh pathum chhûng a dam a, fanu fapa dangte a nei a. Kum sawmthum leh pali a nihin Ebera chuan fapa Pelega a nei a. Pelega pian hnu chuan Ebera chu kum zali leh sawmthum chhûng a dam a, fanu fapa dangte a nei a. Kum sawmthum a nihin Pelega chuan fapa Reua a nei a. Reua pian hnu chuan Pelega chu kum zahnih leh pakaw chhûng a dam a, fanu fapa dangte a nei a. Kum sawmthum leh pahnih a nihin Reua chuan fapa Seruga a nei a, Seruga a pian hnu chuan Reua chu kum zahnih leh pasarih a dam a, fanu fapa dangte a nei a. Kum sawmthum a nihin Seruga chuan fapa Nahora a nei a, Nahora pian hnu chuan Seruga chu kum zahnih chhûng a dam a, fanu fapa dangte a nei a. Kum sawmhnih leh pakua a nihin Nahora chuan fapa Tera a nei a. Tera pian hnu chuan Nahora chu kum za leh sâwm pakaw chhûng a dam a, fanu fapa dangte a nei a. Abrama te, Nahora te, Harana te an pian chuan Tera chu kum sawmsarih a tling tawh a. Tera thlah zêlte chanchin chu hetiang hi a ni: Tera chuan fapa Abrama te, Nahora te, Harana te a nei a, Harana chuan fapa Lota a nei a. Harana chu Kaldai ram Ur khuaah, a pianna ramah chuan, a pa Tera a la dam laiin a thi a. Abrama leh Nahora chuan nupui an nei a: Abrama nupui hming chu Saraii a ni a, Nahora nupui hming chu Milkaii a ni. Milkaii leh Iskaii chu Harana fanu an ni. Saraii chu a ching a, fa a nei lo. Tera chuan a fapa Abrama te, a tupa Lota, Harana fapa te, a monu Saraii, a fapa Abrama nupuite chu a hruai a, Kaldai ram Ur khua chu an chhuahsan a. Kanan rama kal tûrin an chhuak a; mahse, Haran khua an thlen chuan awmhmun an khuar ta a. Tera chu kum zahnih leh panga chhûng a dam a, Haran-ah chuan Tera chu a thi ta a. Lalpa chuan Abrama hnênah “In ram hi i laichînte leh i pa inte nên chhuahsan la, ka kawhhmuh tûr che ramah chuan kal rawh. Hnam ropui takah ka siam ang che: mal ka sâwm ang che a, i hming ka tithang ang a, malsâwmna i ni ang. Malsâwmsaktu che chu mal ka sâwm ang a, ânchhe lawhtu che chu ânchhia ka lawh ang; khawvêla hnam tinrêng i zârah an nihlawh ang,” a ti a. Lalpa thu ang chuan Abrama chu a thawk chhuak a, Lota pawh a rual chuan a kal ve a. Haran a chhuahsan khân Abrama chu kum sawmsarih leh pangaa upa a ni. Abrama chuan a nupui Saraii leh a nau fapa Lota chu a hruai a, Haran khuaa an awm chhûnga an sum deh chhuah zawng zawng kengin, ṭhuihruai an neih belh tâk zawng zawng nên Kanan ram an pan a, an va thleng ta a. Chu ramah chuan Abrama chu a kal zêl a, Sekem hmun More sasaw thing awmna chu a thleng a. Chutih lai chuan Kanan mite chu chu ramah chuan an la awm a ni. Abrama hnênah Lalpa chu a inlâr a, “He ram hi a ni i thlahte ka pêk tûr ram chu,” a rawn ti a. Chutah chuan a hnêna lo lang Lalpa tân maichâm a siam a. Chuta ṭangin Bethel chhak lam tlângah a insawn a; tah chuan bûk a khuar a, khawthlang lamah Bethel a awm a, khawchhak lamah Ai khua. Chutah chuan Lalpa tân maichâm a siam leh a, Lalpa hming chu a lam ta a. Negeb ram panin zawi zawiin a insawn zêl a. Chu ramah chuan ṭâm a tla a, ṭâm chu a nat êm avângin Abrama chuan ṭâm tlân tûrin Aigupta ram a pan a. Aigupta ram a thlen dâwn chuan a nupui Saraii hnênah, “Ngawi teh, i hmêlṭhatzia ka hria e. Aigupta miten an hmuh che chuan, ‘A nupui a ni,’ an ti ang a, min that mai ang a, nang an zuah si ang che; ‘A farnu ka ni,’ ti mai teh. Tichuan, nangmah avângin min ti ṭha ang a, min zuah dâwn nia,” a ti a. Abraman Aigupta ram a zu thleng a. Aigupta mite chuan a nupui chu hmêlṭha an ti êm êm a. Farawa khâwnbâwlte chuan an han hmu ve a, Farawa hriata an fak tâk êm avâng chuan Farawa inah chuan an la lût ta a. Amah avâng chuan Abrama chu an ti ṭha hle a; berâm te, ran te, sabengtung te, chhiahhlawh nula leh tlangvâl te, sabengtungpui te, sanghâwngsei te an pe a. Lalpa chuan Abrama nupui Saraii vâng chuan Farawa leh a chhûngte chu hri na tak a veitîr a. Farawa chuan Abrama chu a ko va, “Ka chunga i thiltih dân hi engtizia nge? I nupui a nih engtizia nge min hrilh loh? ‘Ka farnu a ni,’ i ti a, nupuiah ka la lût mai a ni lâwm ni? I nupui hi hruai la, hawpui daih rawh,” a ti a. Farawa chuan mi a tîr a, Abrama chu a nupui leh a neih zawng zawng nên an hnawt chhuak ta a. Aigupta ram aṭang chuan Abrama chu Negeb-ah, a nupui leh a neih zawng zawng nên, an chho va, Lota pawh a tel zêl a. Abrama chuan tangkarua leh rangkachak te leh ran rualte a ngah êm êm a. Negeb aṭang chuan a bûk khuarna hmun Bethel leh Ai inkâr panin Bethel lamah a inchhawp chho va. A hmaa maichâm a siamna hmun kha a thleng a; tah chuan, Lalpa hming a lam a. Abrama kalpui Lota pawh chuan berâm te, bâwng te a ngah hle a, chhûng hung tak an ni ve tawh a. Ran vulh an ngah êm a, awm dûn tûr chuan ramin a daih ta lo va; an awm ho hlei thei ta lo va ni. Abrama ran pute leh Lota ran pute inkârah innghirnghona a chhuak ta a. Chutih laiin chu ramah chuan Kanan mi leh Periz mite pawh an la awm si a. Abrama chuan Lota hnênah, “Nang leh kei, kan inkârah innghirnghona awm lul suh se, pafa kan nih hi. Ram lah hei a awm duai a, awm hran zai rêl mai teh; vei lam hi i duh zâwk leh ding lamah ka kal ang a, ding lam i duh zâwk leh vei lam ka pan mai ang,” a ti a. Lota chuan a han thlîr vêl a, Jordan lui ruam chu Zoar thlengin Lalpa huan ang mai, Aigupta ram anga ram ṭha, tui ṭhatna ram a ni tih a hmu a, Sodom leh Gomora pawh Lalpa chuan a la tichhe si lo va. Lota chuan Jordan lui ruam chu awmna atân a thlang a, khawchhak lam chu a pan a, an awm hrang ta a. Abrama chu Kanan ramah chuan a awm ta zêl a, Lota chuan phai ram khawpui zîngah, Sodom khaw bulah awmhmun a khuar ta a. Sodom mite chu Lalpa ngaiha mi sual buru tak an ni. Lota a awm hran tâk hnu chuan Lalpa chuan Abrama hnênah, “Han hawi kual la, chhim leh hmâr lam te, chhak leh thlang lam te thlîr vêl teh. I hmuh phâk ram zawng zawng hi i thlahte pawhin an neih kumkhua atân ka pe ang che. Leia vaivut anga tamin i thlahte ka tipung ang a, vaivut chhiar sên loh ang hian chhiar sên an ni lo vang. Tho la, ram dung leh vâng hi fang chhuak teh, ka pêk tawh che hi,” a ti a. Abrama chuan a puan in a sawn a, Mamre sasaw bul, Hebron kiangah awmhmun a khuar ta a. Chutah chuan Lalpa tân maichâm a siam a. Sinar lal Amrafela te, Elasar lal Arioka te, Elam lal Kedorlaomera te, Goim lal Tidala te pali chuan, Sodom lal Bera te, Gomora lal Birsa te, Adma lal Sinaba te, Zeboim lal Semebera te leh Zoar an tih tâk Bela lalte an rawn rûn a. Hêng lal pangate hi Sidim ruam, Tuipui Thi ruamah an lo ṭang tlâng a. Kum sâwm leh pahnih chhûng chu Kedorlaomera hnuaiah an awm a, a kum sâwm leh pathum kum chuan an hel a. Kum sâwm leh pali kum chuan Kedorlaomera leh a thurualpui lalte chu an lo thawk a, Asterot-Karnaim rama Refa-hote, Ham rama Zuzim-ho te, Seva-kiriathaim rama Enim-ho te leh thlalêr depa awm El-paran lui, Seir tlângrama awm Hor-ho te thleng chuan an rawn hneh a. An hawn pah chuan Kades an tih tâk En-mispat lamah an kual a, Amalek-ho ram zawng zawng leh Zazon-tamar rama Amor-ho te an tudawl bawk a. Chûng avâng chuan Sodom lal te, Gomora lal te, Adma lal te, Zeboim lal te, Zoar an tih tâk Bela lalte chu an lo thawk a, Sidim ruamah ṭan an lo khawh tlâng a. Tichuan, Elam lal Kedorlaomera te, Goim lal Tidala te, Sinar lal Amrafela te, Elasar lal Arioka te pali chu hêng lal pangate hian an lo bei a. Sidim ruamah chuan alkatra khur a awm thluah a, Sodom leh Gomora lal tlânchhia chu chûngah chuan an biru a; mi dang pawh an tlânchhia a, tlângramah an biru a. Sodom leh Gomora mite thil neih zawng zawng, an buh te nên an mansak a, an ṭinsan ta a. Abrama nau fapa Lota, Sodom khuaa awm pawh kha, a neih zawng zawng nên an man bawk a. Indonaa tlânchhia pakhat chuan chûng thu chu Hebrai-pa Abrama chu a rawn hrilh a. Chutih lai chuan Eskola leh Anera laichîn Amor mi Mamre-a sasaw kûng bulah Abrama chu a awm a. Abrama chuan a nau fapa Lota chu salah an man tih a hriat chuan a ina piang râlkai tawh mi zathum leh sâwm leh pariat a hruai a, Dan thlengin a ûmzui a. Zâna hmêlma bei tûra ruat, ama hote chuan an hneh a, Damaska hmâr lam Hoba khaw thlengin an ûm a. An sum lâk zawng zawng chu an chhuhsak a, a nau fa Lota leh a neih zawng zawng chu hmeichhia leh mi dangte nên a hruai haw leh ta a. Kedorlaomera leh a thurualpui lalte hneha a lo haw chu Sodom lal chuan Save ruamah a lo hmuak a, chu hmun chu ‘lal ruam’ an ti bawk. Salem lal Melkisedeka pawhin chhang leh uain kengin a rawn hmuak bawk a, ani chu Pathian Chungnungbera puithiam a ni. Mal a lo sâwmsak a, “Pathian Chungnungbera, lei leh vân neitu chuan Abrama hi malsâwm rawh se. A hmêlmate ngamtîrtu Pathian Chungnungbera chu Fakin awm rawh se,” a ti a. Abrama chuan a râllâk engkim aṭang chuan ani chu sâwma pakhat a pe a. Sodom lal chuan Abrama hnênah, “Thil dang chu nei la, ka mite kha erawh chu mi pe kîr rawh,” a ti a. Abrama chuan Sodom lal chu a chhâng a, “ Lalpa Pathian Chungnungbera, lei leh vân neitu hnênah ‘La zai khat tê pawh, pheikhawk hrui khat tê pawh, i ta rêng rêng pakhat mah ka la lo vang,’ tiin thu ka lo tiam tawh a ni; chutilo chu, ‘Abrama chu ka tihhausak alâwm,’ I ti dah ang e. Ka miten an eiral tawh chu ei ral ni sela, a dang chu eng mah ka la lo vang; ka thurualpui Anera mite, Eskola mite leh Mamre-a mite erawh chuan an chanvo tûr chu la rawh se,” a ti a. Chûng thil hnuah chuan Abrama chu zêlin a awm a, Lalpa chuan a rawn bia a. “Abram, thlaphâng suh, I tân phaw ka nih hi, I dawn tûr hi a ropui a ni,” a rawn ti a. Abrama chuan, “Aw Lalpa Pathian, fa ka nei lo hlen mai dâwn a, ka rokhâwmtu tûr lah Damaska mi Eliezara daih a ni ang a, eng nge mi dawntîr ang?” a ti a. Abrama chuan a sawi zêl a, “Ngai teh, fa min pe si lo va, ka ina piang ka chhiahhlawhin ka ro a luah ngei dâwn mai,” a ti a. Lalpa chuan a rawn chhâng a, “Chu mi chu i roluahtu tûr a ni lo, nangma fa ngeiin i ro a luah ang,” a ti a. Pâwnah a hruai chhuak a, “Vân lam khi thlîr teh, arsite khi i chhiar sêng em?” a ti a. “Khiti zât khi i thlahte an la ni dâwn” a ti a. Lalpa chu a ring a, chu chu a diknaah a lo pawmsak ta a. A hnênah chuan heti hian a ti ta a: “He ram hi neihtîr tûr chein Kaldai ram Ur khua aṭanga ko chhuaktu che Lalpa kha ka ni,” a ti a. Ani chuan, “Aw Lalpa Pathian, ka ta tûr a nih engtin nge ka hriat ang?” tiin a chhâng a. “Bâwngpa kum thum mi te, kêlpui kum thum mi te, berâmpa kum thum mi te, ṭhuro leh pârva no nên mi han lâk teh,” a ti a. Chûng chu a rawn lâksak a, a laiah a phel a, a phel chu inepin a tlarin a dah a; savate erawh chu a phel lo. Sa ruangahte chuan mu an lo ṭum ṭhîn a, Abrama chuan a lo hnawt zêl a. Ni a tlâk dâwn suar suar chuan a muhîl ta sulh a, hlauhawm thim takin a rawn bawh ta a. Abrama hnênah chuan, “I thlahte chu an hriat ngai loh ramah mikhual an ni dâwn; bawihah an tâng ang a, kum zali chhûng chu an tiduhdah ang tih hre rawh. Rawng an bâwlsak hnamte chu ka hrem ang a, chumi hnuah chu ram chu muk ṭânin an chhuahsan ang. Nang erawh chu, thlamuang takin i pi leh pute hnênah i châwl ve ang a, tarkûna damin an phûm ang che. Mi dang erawh chu chhuan li a ral hunah hetah hian an lo kîr leh ang, Amor mite suahsualna vâwrtâwp a thlen hunah chuan,” a ti a. Ni a tlâka, khua a thim tâk hle hnuin thuk, khu lût lût leh meichher alh hluah hluah chu sa ruang kârah chuan a vei a vei a. Chumi zân chuan Lalpan Abrama hnênah thu a thlung ta a, “He ram hi i thlahte hnênah ka pe ta. Aigupta ram lui aṭanga Eufretis luipui inkâr ram, Ken mi te, Kenis mi te, Kadmon mi te, Hit mi te, Periz mi te, Refaim te, Amor mi te, Kanan mi te, Girgas leh Jebus mi te ram hi,” a ti a. Abrama chu a nupui Saraii chuan fa a hrinsak lo va. Saraii chuan Aigupta mi, Hagari, bawih nula a nei a. Abrama hnênah Saraii chuan, “Ngai teh, Lalpa chuan fa neih min phalsak si lo va, ka bawihnu hi mutpui mai teh; ka fa ve tûr min hrinsak dâwn nia,” a ti a. Abrama chuan Saraii thu chu a zâwm a. Tichuan, Abrama chu kum sâwm Kanan rama a awm hnu chuan a nupui Saraii chuan a bawihnu Hagari, Aigupta mi chu, hmei atân a pasal chu a neihtîr ta a. A lo mutpui a, nau a pai ta a. Nau a pai tih a inhriat hnu chuan a pi chu a ngainêp ta a. Tichuan, Saraii chuan Abrama hnênah, “Heti taka min thamlo ta hi i thiam loh a ni. Ka bawihnu hi keimah ngeiin hmeiah ka neihtîr che a nih kha; nau a pai tih a inhriat aṭangin min ngainêp ta hle si a; chuvângin, Lalpa chuan nang nêna kan inkâr thu hi tifel teh se,” a ti a. Mahse, Abrama chuan Saraii chu a chhâng a, “I bawihnu chu i kuta awm alâwm, ṭha i tih ang angin ti rawh,” a ti a. Saraii chuan a tiduhdah ta a, a tlân bo phah ta hial a. Lalpa Vântirhkohvin Hagari chu thlalêrah Sur kawnga tuikhur kiangah a lo hmu a. A hnênah, “Saraii bawihnu Hagar, khawi aṭanga lo kal nge i niha, khawiah nge i kal dâwn?” a ti a. Ani chuan, “Ka pi Saraii ka tlân bosan a ni,” a ti a. Lalpa Vântirhkoh chuan, “I pi hnênah kîr leh rawh, a hau che pawhin tuar hrâm hrâm rawh,” a ti a. Lalpa Vântirhkoh chuan a sawi zêl a, “I thlahte ka tihpunsak ṭeuh dâwn che asin, tu man an chhiar sêng lo vang,” a ti a. Lalpa Vântirhkoh vêk chuan a sawi leh a, “Ngai teh, nau i pai hi; fapa i hring ang a, Lalpa chuan i manganzia a hre si a, a hmingah Ismaela sa ang che. Ani chu ram sabengtung ang a ni ang a, mi tu pawh a bei zêl ang a, anni pawhin an lo bei ang. A unaute tu mah a ngeih lo vang,” a ti a. A hnêna thusawitu Lalpa hmingah chuan, “El-roi’ a vuah a. “Min hmutu chu ka hmu ve ta a nih hi,” a ti a. Chuvâng chuan, chu tuikhur chu ‘Beer-lahai-roi’ tih a ni ta a, Kades leh Bered inkâra awm a ni. Hagari chuan Abrama chu fapa a hrinsak a, Abrama chuan Hagari fa hmingah chuan, ‘Ismaela’ a sa a. Abrama chu Hagarin Ismaela a hrinsak khân kum sawmriat leh paruka upa a ni. Abrama chu kum sawmkua leh pakua a nihin a hnênah Lalpa chu a rawn inlâr a, “El-Sadaia ka nih hi, ka duhzâwng angin nung la, sawisêlbovin awm rawh. Nang nêna kan inkârah thu ka thlung ang a, nasa takin ka tipung ang che,” a ti a. Abrama chu hmai lei siin a kûn a, a Pathian chuan a be zêl a. “Hei hi i tâna ka thuthlung chu a ni: Hnam tam tak thlahtu i ni ang a, i hming hi Abrama ni tawh lovin Abrahama a ni tawh zâwk ang; hnam tam tak paah ka siam tâk che hi. I chi ka tiṭha ang a, hnam tam tak thlahtu i ni ang a, lalte pawh i hring ang. Kan inkâra ka thuthlung chu i thlah lo awm zêlte thlengin ka tinghet tlat ang; i tân leh i thlah zêlte tân kumkhaw Pathian ka ni ang. “I thlah lo la awm tûrte rochun atân kumkhuaa an neih tûrin i mikhualna Kanan ram pum pui hi ka pe a che, an Pathian ka ni zêl bawk ang,” a ti a. Pathian chuan Abrahama hnênah thu a sawi zêl a, “Nang pawhin ka thuthlung hi i vawng reng tûr a ni, i thlah lo awm tûrte pawhin an zâwm zêl tûr a ni. Nang leh i thlahte nêna ka thuthlung, in zawm zêl tûr chu hei hi a ni: in zînga mipa tawh phawt chu an serh tan tûr a ni. In serh vun hmâwr in tan tûr a ni; chu chu kan inkâra thuthlung chhinchhiahna a ni ang. Kumkhuain in zînga mipa naupang chu ni riat a tlinah a serh in tan tûr a ni; in chhûng zînga piang, bawihte leh in chipui ni lo tangkaa in leite pawh an serh in tan tûr a ni. In ina piang bawih pawh in lei bawih pawh, an serh in tan ngei tûr a ni. In taksaah ka thuthlung chhinchhiahna chu kumkhuain a awm tûr a ni. Mipa tawh phawt, serh tan loh, a vun hmâwr tan loh chu a laichînte zîng ata tuithlâr tûr a ni, ka thuthlung a bawhchhiat avângin,” a ti a. Pathian chuan Abrahama hnênah heti hian a ti bawk: “I nupui Saraii pawh hi Saraii ti tawh suh, a hmingah Sari a ni tawh zâwk ang. Mal ka sâwm ang a, mal ka sâwm hnuah fapa a hrinsak ang che. Hnam tam tak nu a ni ang a, mi tam tak chunga lal tûrte pawh a thlah aṭangin an lo piang ang,” a ti a. Abrahama chu lei siin a kûn a, a nuih a za a, “Kum za mi hian fa ka nei ang a, kum sawmkaw mi Sari hian nau a pai ang maw?” a ti rilru a. Abrahama chuan Pathian hnênah, “Ṭha i tih chuan Ismaela hi dam zêl teh phawt se,” a ti a. Pathian erawh chuan a chhâng a, “I nupui Sari hian fa a hrinsak dâwn che alâwm, a hmingah Isaka i sa dâwn nia; ka thuthlung hi kumkhua atân amah leh a thlah zêlte tân ka vawng tlat dâwn a ni. Ismaela thu i sawi pawh ka hria e; ngai teh, ani pawh mal ka sâwm a, a chi ka tiṭha ang a, nasa takin ka tipung ang. Lal sâwm leh pahnih a hring ang a, hnam lian takah ka din dâwn a ni. Ka thuthlung erawh hi chu nakkum hetih huna Sarin a hrin tûr Isaka tân ka vawng ang,” a ti a. A sawi zawh chuan Pathian chuan Abrahama chu a chhohsan ta a. Tin, Abrahama chuan a fapa Ismaela leh a bawih, a ina piang leh a lei pawh, a ina awm mipa zawng zawng chu a hruai a, chumi ni chuan Pathianin a hrilh ang chuan an serh vun hmâwr chu a tansak ta a. A serh vun a tan chuan Abrahama chu kum sawmkua leh pakaw mi a ni. Ismaela pawh serh a tansak ni chuan kum sâwm leh kum thum mi a ni. Chumi ni ngei chuan Abrahama te, a fapa Ismaela te, a ṭhuihruai zawng zawng, a ina piang bawihte leh hnam dang, bawiha a leite chu an serh a tansak ta a. Mamre-a sasaw bula a puan in kawngkaah, chhûn ni sat lai takin Abrahama chu a ṭhu a, a hnênah Lalpa chu a rawn inlâr a. A han en chuan a bul maiah mi pathum an lo ding reng a; a han hmuh veleh chuan anni chu lâwm tûrin puan in kawngka ata chu a tlân chhuak a. Kûnin chibai a bûk a, “Ka pu, min khawngaih la, i chhiahhlawh hi min kal pêl lo hrâm teh. Tui tlêm han la ila, in kete sil ula, thing hlimah hian châwl rih teh u. In chhiahhlawh in rawn tlawh ta sa sa, chhâng tlêm ka han lâk ang che u a, in intiharh dâwn nia; chumi zawhah chuan in kal zêl a ni ang chu,” a ti a. “Chuti chu, i sawi ang chuan ti ta che,” an ti a. Abrahama chu puan inah a tlân lût a, Sari chu a ko va, “Chhangphut ṭha chi ṭîn khat la chhuak la, hmet la, chhangpêr siam thuai teh” a ti a. Abrahama chu bâwng rual awmnaah a tlân a, bâwngno chum thau tak a man a, chhiahhlawh a talhtîr a, a kang hmin ta thuai a. Bâwngsa kan chu bâwnghnute leh a dak nên a rawn la a, an hmaah a hlui a; an ei a, ani pawh chu an bulah, thing hlimah chuan a ding reng a. Anni chuan a hnênah, “Khawnge i nupui Sari a awm?” an ti a. “Puan in chhûngah hian,” a ti a. Pakhat chuan, “Thla kua a ral hunah ka lo kal leh ang a, i nupui Sari hian fapa a hring ang,” a ti a. A hnung maiah, puan in luhna phênah Sari chuan a lo ngaithla reng a. Abrahama leh Sari chu tar tawh tak, upa tak an ni; Sari pawh hmeichhe dân pangngaiin a awm tawh lo. Sari chu a nuih a za a, “Kei tarzûr tawh hian ka pasal ka la thlahlel ang maw, ani pawh a upa hle tawh si?” a ti rilru a. Lalpa chuan Abrahama hnênah, “Engtizia nge Sari nuih a zata, ‘Ka tar tawh vei nên fa ka la nei tak tak ang maw?’ a tih? Lalpa tân tih theih loh a awm em ni? Thla kaw ral hnuah ka lo kal leh ang a, Sari hian fapa a lo hring tawh ang,” a ti a. Sari chuan a hlau va, a pha chung a, “Ka nuih a za lo ve,” a ti a. Ani chuan, “I nuih a zat kha le!” a ti a. Chûng mite chu chuta ta chu an tho va, Sodom khaw lam chu an zu thlîr a. Thlah tûrin Abrahama pawh an rualin a kal ve a. Lalpa chuan, “Ka thiltih tum hi Abrahama lakah ka zêp ang em aw? Abrahama hi hnam lian, hnam ropui tak a la ni ngei dâwn a, khawvêl hnam zawng zawngin mal insâwmsak nân tak ani hi an lam dâwn a. A fate leh a thlah zêlte Lalpa duhzâwnga awma, thil ṭha leh thil dik zirtîr tûrin ani hi ka thlan chhuah a ni si a. Lalpa chuan Abrahama hnêna a thutiam chu a tihlawhtling ngei dâwn si a,” a ti a ni. Tin, Lalpa chuan, “Sodom leh Gomora khaw sual thu leh an thiltih râpthlâk thu ka beng a lo thleng hi a dik tak tak em tih en tûrin ka chhuk dâwn a ni, ka zu hre chiang teh ang,” a ti a. Mite chu Sodom khuaa kal tûrin an chhuk ta a. Abrahama erawh chu Lalpa bulah a ding khawtlai a. Abrahama chuan a hnaih a, “Mi sualte zînga awm mi ṭhate pawh chu i tiboral tel dâwn em ni? Khuaah chuan mi ṭha, mi pawi khawih lo sawmnga awm sela, chûng mi ṭha sawmngate avângin khawpui chu zuah lovin i tichhia ang maw? Mi ṭhate leh ṭha lote tuar inang rengin mi ṭhate chu mi sualte nên i tiboral êm lo vang chu! Lei chung zawng zawnga thuneitu, nang meuh chuan dik lo takin thil i ti âwm si lo va,” a ti a. “Sodom khuaah mi ṭha sawmnga ka hmuh chuan anmahni avângin khua chu ka zuah ang,” a ti a. Abrahama chuan a sawi leh a, “Kei vaivut leh meivâp mai hian Lalpa chu ka be pawp ta sa sa si che a, mi ṭha pangain sawmnga tling lo ta sela? Pangaa an tlin loh avângin khaw pum chu i tichhia ang maw?” a ti a. “Mi sawmli leh panga ka hmuh chuan ka tichhe lo vang,” a ti a. A la zâwt ta zêl a, “Mi sawmli chauh awm sela?” a ti a. “Mi sawmli avâng pawhin ka tichhe lo vang,” a ti a. “Ka sawi zêl pawhin Lalpa chuan ninawm ti teh suh se, mi sawmthum chauh lo awm sela?” a ti a. Ani chuan, “Mi sawmthum chauh pawh hmu ila ka tichhe lo vang,” a ti a. “ Lalpa chu ka zâwt ta law law che a, sawmhnih chauh awm sela?” a ti a. Ani chuan, “Mi sawmhnih avâng pawh chuan ka tichhe lo vang,” a ti a, a chhâng a. “ Lalpa chuan lung lovah neih teh suh se, hei bâk hi chu ka zâwt tawh lo vang che, mi sâwm chauh awm ta sela?” a ti a. “Chûng mi sâwmte avâng pawh chuan ka tichhe lo vang,” a ti a. Abrahama nên an inbiak zawh chuan Lalpa chu a kal ta a. Abrahama pawh a in lamah a kîr leh ta a. Vântirhkoh pahnih chuan tlaiah Sodom khua chu an zu thleng a, Lota chu Sodom khaw kulh kawngkhâr bulah a lo ṭhu a. Anni chu a hmuh chuan be tûrin a tho va, hmai lei si-a kûnin chibai a bûk a. “Pute u, in chhiahhlawh ina zân riak tûrin lo kal hrâm teh u. In kête in sil ang a, zîng takah in kal leh mai dâwn nia,” a ti a. “Ni lo ve, khawlaiah kan riak ang,” an ti a. A sâwm tlut tlut avângin an zui a, a inah chuan an lût ta a. Ei tûr a buatsaih a, chhangpêr a hem hmin a, an ei ta a. An mut hmain khuaa mi, Sodom khaw paho, a pui a pangin vêng tina mipa zawng zawng chuan a in chu an rawn hual a. Lota chu an au va, a hnênah, “Zânina i mikhualte kha khawiah nge an awm? Han hruai chhuak rawh, kan lo pâwl teh ang,” an ti a. Lota chu kawngkhârah chuan a va chhuak a, a khâr leh a, “Ṭhiante u, hetiang thil sual hi tih tum lul lo teh hrâm u. Mipa la khawih loh fanu pahnih ka nei a, ka rawn hruai chhuahsak ang che u, in duh duhin in lo ti dâwn nia. Ka mikhual, ka in rawn pante hi zawng, eng mah tih lul suh u,” a ti a. “Kiang rawh, nang mikhual mai mai, kan chunga thu neih i tum vei em ni? Anni aiin kan sawisa na zâwk mai tûr che nia,” an ti a. Lota chu an rawn chîm ta huk a, kawngkhâr chu chhut chhiat an tum a. Vântirhkohte chuan an ban a, Lota chu an man a, inah an hnûk lût a, kawng chu an khâr leh ta a. Kawngka bula awm a lian a tê chu an mit an chhun delsak a, kawngkhâr chu an hmu thei ta lo va. Mite chuan Lota hnênah, “He khuaah hian mi dang, fapa te, fanu te, laichîn hnai i neih apiangte khua aṭang hian hruai chhuak rawh. He khua hi kan tichhe dâwn, an chanchin Lalpa benga thleng chu a râpthlâk êm a, tichhe tûrin min tîr a ni,” an ti a. Tichuan, Lota chu a chhuak a, a fanu neitu tûr, a mâkpa hualte chu a va hrilh a, “Tho ula, kan khua hi tlânsan rawh u. Lalpa chuan a tichhe dâwn,” a ti a. A mâkpa hualte chuan fiamthu a thawhah an lo ngai a. Khawfîng a chahin vântirhkohte chuan Lota chu an tur sek a, “Hmanhmawh rawh, i nupui leh i fanu pahnih, heta awmte hi hruai chhuak teh, he khaw hremna hi in tuar ve dah ang e,” an ti a. Ani erawh chu muangchângin a che a. Tichuan, mite chuan a nupui leh a fanute kut chu a kut nên an chelh a, anni chu Lalpa chuan a lainat êm si a; chuvângin, khua ata chu an kai chhuak ta a. An hruai chhuah hnu chuan, “Kal thuai thuai rawh u, hnung lam pawh hawi suh u, phaiah hian khawiah mah châwl hek suh u, tlângahte sâwn tlân rawh u, in tuar ve hlauh dah ang e,” Lota hnênah chuan an ti a. Lota chuan, “Ni lo ve, ka pu, min chhanhima min khawngaih ta sa sa, i chhiahhlawh hi dawh hrâm teh; tlângram pana ka tlân chuan he thil ṭha lo hian min nang hman ang a, ka thi mai ang. Ka hmaa khaw te tak tê saw tlân nân a hnai ber a, tah sâwn ka tlân ang e, ngaihmawh tham pawh a nih loh saw. Kan thih loh nân tah sâwn kan tlân mai ang e,” a ti a. “I thu chu ka zâwm mai a ni ang chu, i khaw sawi chu ka tichhe lo nâng e. Hmanhmawh la, tah chuan tlân rawh; i thlen hma chu eng mah ka tih theih loh hi,” a ti a. Chuvâng chuan, he khua hian Zoar tih hming a pu ta a ni. Lotan Zoar khua a thlenin chu ramah chuan ni a chhuak ta a. Tichuan, vân aṭangin, Lalpa mei, kât kâng chu Lalpa chuan Sodom leh Gomora khuaah chuan a sûrtîr ta a. Chûng khuate chu a tichhe vek a, phaizâwla khuate leh a chhûnga chêngte chu leia thil ṭote lamin a tichhe ta vek a. Lota nupui erawh chuan a thlîr kîr vei a, chi khâwn dingah a chang ta a. Abrahama chu zîng takah a tho va, Lalpa bula a dinna hmunah khân a kal a. Sodom leh Gomora khua te leh a phairam pum chu a zu thlîr vêl a, meipui khu anga khu luih luih chauh chu a hmu thei a ni. Pathianin phairam khuate a tihchhiat khân Abrahama chu a hre reng a. Lota chênna khua a tihchhiat pawh khân Lota chu a chhan chhuahsak a ni. Zoar khuaa awm reng a hlauh avângin Lota chu a fanu pahnih nên tlângramah an chho va, an awm ta a. A fanu pahnih nên chuan pûkah an awm a ni. A upa zâwk chuan a nau hnênah, “Kan pa hi a tar tawh hle a, khawvêl pum pui tih dân anga min nei tûr mipa an awm tawh si lo. Ti rawh, kan pa hi uainin hrai ila, a bulah i mu ang; Tichuan, kan pa chi a mang dâwn lo nia,” a ti a. Chumi zân chuan an pa chu uainin an hrai rui a. A upa zâwk chu a pa bulah chuan a va mu a, ani chuan a lo mut lai emaw, a thawh leh lai emaw a hre lo. A tûkah chuan a upa zâwk chuan a nau hnênah, “Ngai teh, nizân khân kan pa bulah ka mu a, zâninah pawh uainin i hrai leh ang; a bulah va mu ve ang che; tichuan, kan pa chi a mang dâwn lo nia,” a ti a. An pa chu uainin an hrai a, a naupang zâwk chu a tho va, an pa bulah chuan a va mu a, a lo mut lai emaw, a thawh leh lai emaw a hre lo. Lota fanu pahnih chuan an pa fa chu an pai ve ve ta a. A upa zâwk chuan fapa a nei a, a hmingah ‘Moaba’ a sa a; chu mi chu tûnlaia Moab-ho thlahtu hi a ni. A naupang zâwk pawh chuan fapa a nei a, a hmingah ‘Ben-amona’ a sa a, tûnlaia Amon mite thlahtu hi a ni. Abrahama chu Negeb lamah a kal zêl a, Kades leh Sur inkârah awmhmun a khuar a, Gerar khuaa an awm laiin, Abrahama chuan a nupui Sari chu “Ka farnu a ni,” a ti a; tichuan, Abimeleka, Gerar lal chuan, mi a tîr a, Sari chu a inah a hruaitîr a. Zan khat chu mumangah Abimeleka hnênah Pathian chu a lo kal a, “He hmeichhia hi mi nupui a ni a, i lâksak vei a, i thi ngei ang,” a rawn ti a. Abimeleka chuan a kut hmâwr pawh a la dehsak lo va; “ Lalpa, pawi khawih lo pawh hi i tihlum tho dâwn em ni? Amah ngeiin, ‘Ka farnu a ni,’ ka hnênah a ti a, a hmeichhia lahin ‘Ka nuṭa a ni,’ a ti bawk si a, rilru thianghlim leh dik tak pua ti ka ni asin,” a ti a. Pathianin a mangah chuan a chhâng a, “Rilru thianghlim tak pua ti i nih ka hria e, ka laka thil sual i tih loh nân ka vêng tlat che atin alâwm a kut hmâwr i khawih pawh ka phal loh ni. He mi nupui hi tûnah pe kîr leh rawh, zâwlnei a nih hi. I nun theih nân a dilsak ang che, i pêk kîr leh loh chuan i thi ang, i mi zawng zawngte pawh an thi vek ang tih hre rawh,” a ti a. A tûk zîngah Abimeleka chuan a ṭhuihruaite a ko khâwm a, a thil hmuh chu a hrilh vek a, an hlau ta êm êm a. Abimeleka chuan Abrahama chu a ko va, a hnênah, “Kan chungah eng nge i tih tâk le? I pawi eng nge kan sawia, ka chungah leh ka ram chungah hetiang thiam lohna nasa tak hi i rawn thlen? Thil âwm lo tak i ti a nih hi,” a ti a. Abimeleka vêk chuan Abrahama hnênah, “Eng vângin nge kan chungah hetiang thil hi i rawn tih?” a ti leh a. Abrahama chuan, “He khuaah hian Pathian ṭih mi tu mah an awm ka ring lo va, ka nupui avâng hian min lo that mai ang tih ka hlau atin a ni. Ka farnu pawh a ni tak tak asin; nu hrang laka ka pa fanu a ni a, nupuiah ka nei ta a ni. Pathianin kan pa in leh lo aṭanga min vahvaihtîr tâk hnuah hi chuan, ‘Ka chunga i khawngaihna i lantîr dân tûr chu hmun tinah, ka nuṭa a ni, ti zêl rawh,’ ka ti rêng a ni,” a ti a. Abimeleka chuan berâm te, bâwngpa te, bawihpa te, bawihnu te a thlang chhuak a, Abrahama chu a pe a, a nupui Sari pawh a pe kîr a. Abimeleka chuan, “Hei, ka ram hi a awm duai alâwm, i duh duhnaah awm rawh,” a ti a. Sari hnênah pawh chuan, “Ngai teh, i nuṭa chu tangka sâng ka pêk tâk hi, in zaa tâna zângna dawmna ni rawh se, i fihlîm ta e,” a ti a. Abrahama chuan Pathian hnênah a ngensak a, Pathianin Abimeleka chu, a nupui te leh a chhiahhlawh te nên a tidam leh a, nau an nei thei ta a. Abrahama nupui Sari vâng chuan Abimeleka te chhûngkua chu Pathianin a tiching a ni. Lalpa chuan Sari chu a zu kan a. Lalpa chuan a tiam tawh ang khân Sari chu a tihsak ta a. Sari chuan nau a pai ta a, Pathianin a sawi hun takah khân Abrahama chu, pa upa tak a nih hnuin, fapa a hrinsak ta a. Abrahaman Sarin fapa a hrinsak hmingah chuan Isaka a sa a. Pathianin thu a pêk angin a ni riat ni chuan Abrahama chuan a fapa Isaka serh chu a tansak ta a. A fapa Isaka a pian chuan Abrahama chu kum zaa upa a ni. Sari chuan: “Pathianin min nuihtîr tâk hi, A hria apiangin min nuihpui ang,” a ti a. “Abrahama hnênah, ‘Sarin nau hnute a pe ang,’ tu nge tih nachâng hria ang? Mahse, a tar hnuin fapa ka hrinsak hi,” a ti bawk a. Nau chu a ṭhang lian a, hnute hnêk bântîr a lo hun ta a. Chumi ni chuan Abrahaman ruai ropui tak a ṭheh a. Aigupta mi Hagarin Abrahama fapa a hrinsak khân a fapa Isaka chu a chhaih lai Sari chuan a hmuhin, Abrahama hnênah, “He bawihnu hi, a fapa nên hnawt chhuak rawh. He bawih fa hian ka fapa Isaka hi ro a luahpui tûr a ni lo,” a ti a. Chu chuan Abrahama rilru a tihrehawm hle a, a fapa a ni ve bawk si. Mahse, Pathian chuan Abrahama hnênah, “Naupang chungchâng leh i bawihnu chungchâng hi lunglovah la suh. Sari sawi ang chu zâwm rawh, Isaka-ah hian a ni i thlahte chhui a nih dâwn. Bawihnu fapa pawh nangma thlah ngei a nih avângin hnam ropui takah ka din tho dâwn a ni,” a ti a. A tûk zîngah Abrahama chuan Hagari pêk tûr chhang leh savun tuithâwl tuia khat a la a, a phurhtîr a, a fapa nên chuan a tîr bo ta a, Beer-seba thlalêrah chuan kalna chin tûr hre lovin a vâk a vâk a. Savun tuithâwla tui chu an in zawh chuan naupang chu hnimbuk hnuaiah a dah a, hla fe, thal kah phâk tâwkah a kal a, a ṭhu a, “Naupang thi lai ka hmu ngam lo,” a ti a ni. Hla takah chuan a ṭhu a, a ṭap a. Naupang au râwl chu Pathianin a lo hria a, Pathian Vântirhkoh chuan vân aṭangin Hagari chu a au va, ‘Hagar, eng i ti nge ni? Thlaphâng suh, a awmna hmuna naupang râwl chu Pathianin a hria asin, ti rawh, naupang chu kaitho la, thlêm rawh, hnam ropui takah ka din dâwn a ni,” a ti a. Pathian chuan a mit a tihvârsak a, tuichhunchhuah a hmu ta a. A va pan a, tuithâwl chu a thâl khat a, naupang chu a intîr a. Naupang chu a lo ṭhang lian a, Pathianin a awmpui zêl a, thal kah a thiam êm êm a. Paran thlalêrah awmhmun a khuar a, Aigupta ram aṭangin a nu chuan nupui a neihsak a. Chutih hun vêl chuan Abimeleka chu a sipai hotu Fikola nên Abrahama hnênah an lo kal a, “I thiltih apiangah Pathianin a awmpui che hi. Chuvângin, ka tu leh fate chungah emaw, ka chungah emaw thil ṭha lo ti lo tûrin Pathian hming chhâlin chhia chham rawh. I chunga ka ṭhat ang bawkin ka chungah leh i chênna ram chungah hian ṭhat chhuah tiam rawh,” a ti a. Abrahama chuan, “Tiam e a,” a ti a. Abimeleka chhiahhlawhte chuan Abrahama tuichhunchhuah an chhuhsak a; chumi chungchângah chuan Abimeleka chu a khak a. Abimeleka chuan, “Chu, tu tih nge ka hre ve hlei nêm; min va hrilh lo ve, tûnah chauh a ni ka hriat,” a ti a. Abrahama chuan berâm leh bâwngpa a la a, Abimeleka chu a pe a, an pahnih chuan thu an thlung ta a. Abrahama chuan, berâm rual zînga mi berâmla pasarih pawh a dah hrang a. Abimeleka chuan, “Engtizia nge berâmla pasarih hi i dah hran le?” a ti a. “He tuichhunchhuah hi ka laih ngei a ni tih hriat nân hêng berâmla pasarih hi nei ang che,” a ti a. Chuvâng chuan, chu hmun chuan Beer-seba hming a pu ta a ni, an pahnihin thu an intiam tâk avângin. Thu an thlun zawh chuan Abimeleka chu a sipai hotu Fikola nên, an chhuak a, Filistia ramah an haw ta a. Abrahama chuan Beer-seba-ah chuan Esel thing a phun a, Lalpa chatuan Pathian hming chu a lam a. Abrahama chu Filistia ramah kum tam fe a awm ta a. Chûng thil hnuah chuan Pathianin Abrahama chu a fiah a, “Abraham,” a ti a. Ani chuan, “Eng nge ni?” a ti a. “I fapa mal, i duh êm êm Isaka hi hruai la, Moria ramah kalpui teh; ka hrilh tûr che tlângah hâlral thilhlan atân hlân rawh,” a ti a. Tin, Abrahama chu zîng takah a tho va; sabengtung a siam a, a naute zînga tlangvâl pahnih leh a fapa Isaka chu a ko va; hâlral thilhlana hman tûr thing a ek a; a tho va, Pathian hrilh hmun lam pan chuan an chhuak ta a. Ni thum ni chuan Abrahama chuan a han thlîr a, hla fe aṭang chuan chu hmun chu a hmu ta a. Abrahama chuan a naute hnênah, “Hetah hian sabengtung hi lo awmpui ula, sawtah sâwn naupang nên hian kan kal ang a, Pathian chibai kan va bûk ang a, kan lo kîr leh mai ang,” a ti a. Abrahama chuan hâlral thilhlan thing chu a la a, a fapa Isaka chu a puttîr a, ani chuan mei leh chem chu a keng a, an kal dûn ta a. Isaka chuan a pa Abrahama chu a bia a, “Ka pa,” a ti a. Ani chuan, “Eng nge ni, ka fapa?” a ti a. “En teh, mei leh thing chu kan keng a, hâl ral tûr berâmno chu khaw nge?” a ti a. Abrahama chuan a chhâng a, “Ka fapa, Pathianin hâl ral tûr berâmno chu a hmu mai dâwn alâwm,” a ti a. Tichuan, an kal dûn ta zêl a. Pathianin hmun a hrilh chu an thleng a; chutah chuan Abrahaman maichâm a siam a, thing chu a chhep a, a fapa Isaka chu a phuar a, maichâm thing chungah chuan a mut a. Abrahama chuan a ban a, chem chu a la a, a fa chu tihhlum a tum ta a. Vân aṭangin Lalpa tirhkohvin a rawn au va, “Abraham, Abraham,” a rawn ti a. Ani chuan, “Eng nge ni?” a ti a. “Naupang chungah i kut thlâk suh, eng mah tih hek suh. Pathian i ṭihzia ka hre ta, i fapa neih chhun meuh pawh ka tân i ui loh hi,” a rawn ti a. Abrahama chu a han hawi vêl a, a hnung lamah chuan berâmpa a hmu a, thingbukah a ki a lo tâng a. Abrahama chuan berâm chu a man a, a fapa aiah hâlral thilhlan atân a hlân ta hlauh a. Abrahama chuan chu hmun hmingah chuan, “ Lalpa Jireh” a sa a, tûn thlengin “ Lalpa tlângah chuan hmuh a ni,” tih a ni ta a. Lalpa tirhkoh chuan Abrahama chu vân aṭangin a rawn be nawn leh a. “I fapa neih chhun chu ka tân ui lovin he thil hi i ti a. Mal ka sâwm ang che a, i thlahte chu chunga arsi zât leh hnuaia ṭiauvaivut zâtin ka tipung ang tih mahni inchhâlin thu ka tiam e. I thlahte chuan an hmêlmate kulh kawngkaah thu an nei ang. Khawvêla hnam tinrêngin i thlahte chhâlin mal an insâwmsak ang, ka thu i awih avângin chûng chu tihsak che ka tiam a ni,” a ti a. Abrahama chu a naute hnênah chuan a kîr a, Beer-seba-ah an haw ta a. Abrahama chu Beer-seba-ah chuan a awm ta rih a. Chûng thil hnuah chuan, “Milkaii chuan i nau Nahora chu fate a hrinsak ṭeuh asin,” tiin Abrahama chu an rawn hrilh a. A fa tîr chu Uza a ni a, a naute chu Buza leh Kemuela, Arama pa chu an ni. Kheseda te, Hazoa te, Pildasa te, Jidlafa te, Bethuela te a hring bawk a. Bethuela chu Rebeki pa a ni. Hêng mi pasarihte hi Milkaii chuan Abrahama nau Nahora chu a hrinsak a ni. Tin, a hmei Reumi pawhin Teba te, Gahama te, Tahasa te, Maaka te a hrinsak bawk a. Sari chu kum za leh sawmhnih leh pasariha upa a ni. Sari dam chhûng kum zât chu chuti chu a ni. Kiriat-Arba khuaah, tûna Hebron khua an tih tâk, Kanan ramah chuan a thi a. Abrahama chu a sûn tûr leh ṭah tûrin a lo kal a. A nupui ruang bul aṭang chuan a tho va, Hit mite chu a bia a, “In zînga lo pêm mikhual mai ka la ni a, in ramah inphûmna tûr hmun min pe ve rawh u,” a ti a. Hit mite chuan Abrahama chu an chhâng a, “Ka pu, kan thu hi ngaithla teh, kan zîngah Pathian mi thlan i ni a, i duhna lai ber, kan thlân hmunah hian inphûm mai rawh u, tu man in inphûmna thlân hmun atân ram kan ui lo vang,” an ti a. Abrahama chu a tho va, chu ram hotute leh Hit mite hmaah chuan a kûn a, an hnênah, “Kan inphûmna tûr hmun min duhsak takzet a nih chuan Zohara fapa, Efrona ram, Makpela biala pûk awmna, a ram kila ram awm hi, a man tâwk a chhiar zâtin thlân hmuna ka neih atân min leitîr teh se, khawngaih takin min sawipui rawh u,” a ti a. Efrona chu Hit mite zîngah chuan a ṭhu ve reng a. Hit mite hriatah, Hit mi Efrona chuan, khaw kulh kawngkaa hotu ṭhute hmaah ngei chuan Abrahama hnênah, “Hralh lo ve, ka pu, ka thu hi ngaithla teh, pûk leh a awmna ram chu ka pe a che, ka laichînte hriat ngeiah ka pêk che hi, inphûm nân hmang mai rawh,” a ti a. Chûng mite hmaah chuan Abrahama chu a kûn a, an hriatah chuan Efrona hnênah, “Ngai teh, rem i tih chuan ram man chu ka pe zâwk ang che. La hrâm la; tichuan, inphûm nân ka nei dâwn nia,” a ti a. Efrona chuan Abrahama chu a chhâng a, “Ka pu, ka thu hi ngaithla hrâm teh. He ram hi tangka sekel zali bûk man lek a ni a, chu chu nang leh kei, kan inkârah sawi tham a ni hlei nêm, inphûmna thlân atân chuan nei rawh,” a ti a. Abrahama chuan Hit mite hriata Efrona sawi zât tangkarua chu a bûk chhuahsak ta a; an tangka hman lai, sekel bûk zali chu a pe ta a. Makpela-a Efrona ram, Mamre dep pûk awmna chu, a ri chhûnga thing awm zawng zawng nên, Abrahama chuan a nei ta a; Hit mite leh khaw kulh kawngkaa ṭhute hmaah chuan tihngheh a ni ta a. Makpela rama pûkah chuan Abrahama chuan a nupui Sari chu a phûm ta a. Chu hmun chu Hebron an tih tâk Mamre dep, Kanan rama awm a ni. Chu ram chu Hit mite kut aṭangin thlân hmun atân Abrahama chuan a nei hlen ta a. Abrahama chu a kum a lo tam a, a upa ta hle a, Lalpa chuan kawng tinrêngah Abrahama chu mal a sâwm a. Abrahama chuan a chhiahhlawh min ber, an chhûngkaw enkawltu hnênah, “Ka malpui kârah i kut dah la, Lalpa, vân Pathian leh lei Pathian chhâlin chhia ka chhamtîr dâwn che a ni. Ka chênna ram, Kanan nula zînga mi, ka fapa Isaka tân nupui i neihsak tûr a ni lo. Ka pianna ramah i kal ang a, ka laichînte zîngah, ka fapa Isaka nupui i va zawng zâwk tûr a ni,” a ti a. Chhiahhlawh chuan, “Hmeichhia chuan he ramah hian min rawn zui duh lo sela, i fapa hi i lo kalna ramah chuan ka hruai kîr leh tûr em ni ang?” a ti a. Abrahama chuan, “Chu ramah chuan ka fapa hi i hruai kîr hauh tûr a ni lo. Lalpa vân Pathian chuan ka pa in leh lo, ka pianna ram aṭangin min hruai chhuak a, ‘He ram hi i thlahte hnênah ka pe ang,’ tiin a tiam tlat a ni. Ani chuan i hmaah Vântirhkoh a tîr ang a, ka fapa nupui tûr i rawn hâwn thei mai ang. Hmeichhia chuan a zui duh tlat loh che erawh chuan ka hnêna i chhechham lakah i fihlîm ang; eng pawh ni se, ka fapa hi chutah chuan i hruai kîr tûr a ni lo,” a ti a. Tichuan, chhiahhlawh chuan a pu Abrahama malpui inkârah chuan a kut a dah a, chu thil thu-ah chuan a hmaah chhia a chham ta a. Chhiahhlawh chuan a pu sanghâwngsei sâwm a hruai a, thilpêk tûr chi tinrêng a keng a, Nahora awmna khua Aram-Naharaim lam chu a pan ta a. Hmeichhe tuichawi hun, tlai ni nêmah, chu khaw dai kianga tuichhunchhuah bulah chuan a sanghâwngsei chu a bawhtîr a. Heti hian a ti a: “Aw Lalpa, ka pu Abrahama Pathian, ka pu Abrahama chungah ngilneih chhuah la, ka kawng hi tihmuingîl ang che. Hei tuikhur bulah hian ka lo ding ang a, khuaa nulate chuan tui an rawn chawi ang a; ‘Khawngaih takin i tuibêl chu han la thla la, ka lo in teh ang,’ ka ti dâwn a ni. ‘In rawh, i sanghâwngseite pawh tui ka han chawisak ang e,’ tia mi chhângtu chu i chhiahhlawh Isaka nupui tûra i nula ruat chu ni rawh se, chu chu ka pu chungah i ngilneihna i lantîr a ni tih chhinchhiahnaah ka ngai ang,” a ti a. A sawi zawh hma chuan Abrahama nau Nahora fapa Bethuela fanu, Rebeki chu tuibêl kengin a lo kal a. Chu nula chu Milkaii fanu a ni a, nula hmêlṭha tak, nula thianghlim, mipa la khawih loh a ni. Tuikhurah chuan a chhuk a, a bêl chu a thâl khat a, a lo chhuak a. Chhiahhlawh chu a lam pan chuan a va tlân a, “I bela tui kha mi lo intîr teh,” a ti a. “Ka pu, in rawh,” a ti a, a tuibêl put chu a la thla a, a intîr ta a. Duh tâwka a intîr hnu chuan, “I sanghâwngseite pawh an duh tâwka an in tûr tui ka han chawisak ang e,” a ti a. A tuibêl chu ran tuikuangah chuan a chhûng thuai a, tuichhunchhuahah chuan a chhuk a, sanghâwngsei zawng zawng duh tâwka in tur a chawisak ta a. Chutih chhûng chuan a kal chhan Lalpa chuan a tihlawhtling a ni nge ni lo ngaihtuah chungin a ding a, a en ta reng a. Sanghâwngseite chuan duh tâwk tui an in hnu chuan, sekel chanvea rit rangkachak hnâr vuah a la chhuak a, a hnârah a vuahsak a; rangkachak ngûn pahnih, sekel sâwma rit a buntîr bawk a. “Tu fanu nge i nih, min hrilh teh, zân kan riahna tûr i pa inah a awm thei ang em?” a ti a. “Bethuela fanu ka nih hi, ani chu Milkaiin Nahora a hrinsak kha a ni. Buhpâwl leh ran chaw pawh kan ngah asin, riahna tûr pawh kan nei e,” a ti a. Chu mi chu a kûn a, Lalpa hmaah a bawkkhup a. “Ka pu chunga a ngilneihna danglam ngai lo Abrahama Pathian Lalpa chu fakin awm rawh se, ka pu chhûngte inah, kei pawh min hruai lût ta a nih hi,” a ti a. Chûng thil chu a nute hrilh tûrin nula chu a tlân a, Rebeki chuan nuṭa Labana a nei a; ani chu tuichhunchhuah rawn pan tûr chuan a tlân a. A farnu hnâr vuah leh ngûn a hmuha, ‘chutiang khatiang chuan min bia,’ tih a sawi a hriat khân chu mi lam pan chuan a tlân a ni. A va thlen chuan tuikhura sanghâwngsei bulah a lo la ding reng a. Labana chuan, “Nang, Lalpa duhsak, lo kal teh, thlenna tûr leh sanghâwngsei awmna tûr ka buatsaih vek tawh asin, pâwnah engati nge i la din reng le?” a ti a. Ani chu Labana chuan inah a zui lût a, sanghâwngsei phurte chu Labana chuan a hlân thlâksak a, buhpâwl leh ran chaw te chu sanghâwngseite pawh a pe a. A kalpuite nêna an ke silna tûr tui a rawn la bawk a. A hmaa chaw an han hlui dâwn lai chuan Abrahama chhiahhlawh chuan, “Ka sawi tûr ka sawi zawh hma chu eng mah ka ei lo vang,” a ti a. “Sawi ta che,” an ti a. Ani chuan, “Abrahama chhiahhlawh ka ni a, ka pu chu nasa takin Lalpa chuan mal a sâwm a. A neinung ta hle a ni. Berâm te, ran te, bawihpa te, bawihnu te, sanghâwngsei leh sabengtung te a pe ṭeuh va, tangkarua leh rangkachak nên. Ka pu nupui Sari chuan upa tak a nih hnuin fapa a hrinsak a, ani chu a neih zawng zawng a pe ta a. Ka pu chuan chhia min chhamtîr a; ‘Ka awmna ram Kanan mite nula zînga mi hi ka fapa tân nupui neihsak suh. Ka laichîn te, ka chhûngte hnênah i kal zâwk ang a, ka fapa tân nupui i zawng tûr a ni,’ min ti a. Ka pu hnênah chuan, ‘Hmeichhiain min zui duh lo ta sela engtin nge ni ang?’ ka ti a. Ani chuan, ‘ Lalpa duhzâwngin ka awm ṭhîn a, ani ngei chuan a tirhkoh i rualin a kaltîr ang a; i tih tûr chu a tihhlawhtlinsak ang che. Ka chhûngte, ka laichînte zînga mi ngei ka fapa tân nupui i zawng tûr a ni. Ka laichînte hnên i thlen hunah chauh i chhechham aṭangin i thiang ang. Ka laichînte hnêna i kala, nupui tûr an lo pêk duh loh che chuan i fihlîm ang,’ tiin min ti a, chhia ka chham ta a ni. “Vawiina tuikhur ka lo thlen khân heti hian ka ti a, ‘Aw Lalpa, ka pu Abrahama Pathian, ka thiltih tûrah min tihhlawhtlin takzet dâwn chuan heti hi ni teh se, tuikhur bula ka awm lai hian khuaa nula, tuichawi tûrin an lo kal ang a; ‘I bêla tui kha ka lo in teh ang,’ ka ti dâwn a ni. ‘In rawh, i sanghâwngsei in tûr pawh ka han chawisak ang e,’ titu chu ka pu fapa nupui atân Lalpa mi ruat chu ni rawh se,’ ka ti a. Rilrua ka sawi zawh hma chuan Rebeki a lo kal a, tuibêl a rawn pu a. Tuikhura tui chu a thâl zawh chuan, ‘Khawngaih takin i tui chu mi intîr teh,’ ka ti a. A tuibêl chu a chawi thla a, ‘In rawh, i sanghâwngseite in tûr pawh ka han chawi ang e,’ a ti a. Ka in a, ka sanghâwngseite pawh chuan duh tâwk an in ta a. A hnênah chuan, ‘Tu fanu nge i nih?’ ka ti a. Ani chuan, ‘Bethuela fanu ka ni, ani chu Nahora fapa a ni, a nu chu Milkaii a ni,’ a ti a. Hnâr vuah ka vuahsak a, ngûn ka buntîr bawk a. Lalpa hmaah chuan ka kûn a, ka pu Abrahama Pathian Lalpa chu ka fak a; ka pu fapa nupui atân a laichîn fanu hnêna min hruai vang vang hi ka fak a ni. Ka pu chu in khawngaih dâwn chuan min hrilh ula, in khawngaih thei lo a nih pawhin min hrilh bawk ula, ka hawi lam lam ka hawi dâwn nia,” a ti a. Labana leh Bethuela chuan an chhâng a, “He thil hi Lalpa tih a nih hi; keini remtih leh tih loh tûr pawh zu ni lo va! Rebeki chu i kuta awm a ni a, hruai la, Lalpa thu angin i pu fapa nupuiah nei ang che,” an ti a. Abrahama chhiahhlawh chuan an thutlûkna a hriat chuan lei siin Lalpa hmaah a kûn a. Tangkarua leh rangkachaka siam thil, thawmhnaw te a rawn phawrh chhuak a, Rebeki chu a pe a, a nuṭa leh a nu chu thil hlu tak tak a pe bawk a. A kalpuite nên chuan an eiin an in ta a. Zânah chuan an mu a, a tûk zînga an thawh veleh, “Ka pu hnênah min kîrtîr rawh u le,” a ti a. Rebeki nuṭa leh a nu chuan, “Kan nau hi ni sâwm emaw tal la awm rih sela, chutah in kal dâwn nia,” an ti a. Ani chuan, “Min chelh khawtlai suh u, Lalpa chuan ka kawng min tihtluansak ta si a, ka pu hnêna kîr min phal teh u,” a ti a. “Nula chu ko ila, a ngaih dân amah ngei pawh zâwt ila,” an ti a. Rebeki chu an ko va, “He mi hi i zui duh mai em?” an ti a. Ani chuan, “Duh e,” a ti a. Tichuan, an farnu Rebeki chu a awmtu nên Abrahama chhiahhlawh leh a kalpuite nên chuan an kaltîr ta a. Rebeki chu mal an sâwmsak a: “Kan farnu, a sînga sîng têl nu ni la, I thlahte chuan an hmêlmate kulh kawngkhârah Thu nei rawh se,” an ti a. Tichuan, Rebeki leh a chhiahhlawh nulate chu sanghâwngseiah chuan an chuang a, mi chu an zui ta a. Abrahama chhiahhlawh chuan Rebeki chu a hruai a, an kal ta a. An thang hlân chuan Isaka chu Beer-lahai-roi aṭangin a lo kîr a, Negeb lamah awmhmun a khuar a. Isaka chu tlaiah daiah a lêng chhuak a, sanghâwngsei lo kalte chu a hmu a. Rebekin Isaka a han hmuh chuan sanghâwngsei aṭangin a chhuk a. Abrahama chhiahhlawh hnênah chuan, “Saw, phûla min hmuak tûr lo kal saw tu nge ni?” a ti a. Chhiahhlawh chuan, “Saw saw ka pu chu alâwm,” a ti a. Tichuan, a hmai khuhna chu a phawrh a, a inkhuh ta a. Chhiahhlawh chuan a thil tawh zawng zawng chu Isaka a hrilh a. Isaka chuan Rebeki chu a nu Sari puan inah a hruai lût a, an innei a, a nupui a ni ta a. Isaka chuan a duh êm êm a, a nu thi a ngaih pawh chu a nêp thei ta a. Abrahama chuan nupui a nei leh a, a hming chu Keturi a ni. Fapa Zimrana te, Joksana te, Medana te, Midiana te, Isbaka te, Suaha te a hrinsak a. Joksana chuan fapa - Seba te, Dedana te a nei a. Dedana thlahte chu Asur-ho te, Letus-ho te, Leum-ho te an ni. Midiana fate chu Efa te, Efera te, Hanoka te, Abida te, Elda te an ni; hêngho hi Keturi thlahte chu an ni. Abrahama chuan Isaka chu a neih zawng zawng a rochuntîr a. A hmei fate erawh chu a dam lai ngeiin thilpêk a pe ṭeuh va, Isaka chîm buai lo tûrin khawchhak ram lamah a kaltîr a. Abrahama dam chhûng chu kum za leh sawmsarih leh panga a ni. Tarkûn khûp bihin a dam a, a hnuk a chat a, a thi ta a ni; a laichînte hnênah hruai a ni ve ta a. A fapa Isaka leh Ismaela chuan Makpela pûk, Hit mi Zohara fapa Efrona ram, Mamre depah chuan an phûm a. Chu ram chu Hit mite hnên aṭanga Abrahama ram lei kha a ni. Chutah chuan Abrahama leh a nupui Sari chu an phûm a ni. Abrahama thih hnu chuan Pathianin a fapa Isaka chu mal a sâwm a, Beer-lahai-roi bulah Isaka chuan awmhmun a khuar a. Hêng hi Abrahama fapa, Ismaela, Sari bawihnu, Aigupta mi Hagarin Abrahama a hrinsak thlahte chu an ni. Ismaela fate chu an indawt dân ang zêlin hêngte hi an ni: A fa tîr chu Nebaiota a ni a; Kedara te, Adbeela te, Mibsama te, Misma te, Duma te, Masa te, Hadada te, Tema te, Jetura te, Nafisa te, Kedema te an ni. Khîng khi Ismaela fate hming leh an chênna ram leh awmna bîk hming an put tâk chu a ni. Khîng hnam sâwm leh pahnih thlahtute khi an ni. Ismaela chu kum za leh sawmthum leh pasarih a dam a; a hnuk a chat a, a thi ta a; a chipuite hnêna hruai a ni ta a. Havila aṭangin Asur pan zâwngin Aigupta thlen hma lawk, Sur thlengin a fate chu an inzâr a, an unau dangte tu mah an ngeih lo. Hei hi Abrahama fapa Isaka chanchin chu a ni: Abrahaman fapa Isaka a nei a. Kum sawmli-a upa a nihin Isaka chuan Padanaram-a awm, Suria mi, Bethuela fanu Rebeki, Suria mi Labana farnu chu nupuiah a nei ta a. A chin avângin Isaka chuan a nupui tân Lalpa a dîlsak a. Lalpa chuan a aw chu a lo ngaithla a, Rebeki chuan nau a pai ta a. A pum chhûngah chuan nautête chu an insual nasa hle a, “Hetiang hi a nih chuan ka dam zo dâwn em ni?” a ti a. Lalpa râwn tûrin a kal a. Lalpa chuan a chhâng a, “I chhûlah hnam hnih an awm a, I kawchhûngah chi hnih inngeih lo an awm; Pakhat chuan pakhat chu a khûm ang a, A u zâwk chuan a nau rawng a bâwl ang,” a lo ti a. A hrin a lo hun chuan phîr a pai a lo ni a. A lo piang hmasa zâwk chu sahmul puan anga hmul sen thur a lo ni a, a hmingah ‘Esauva’ an sa a. Pakhat chu a lo chhuak ve a, Esauva keartui chu a vuan chial a, a hmingah ‘Jakoba’ an sa a. An lo pian chuan Isaka chu kum sawmruk mi a ni. Naupangte chu an lo ṭhang lian a, Esauva chu sa kâp thei, ramvachal tak a ni a; Jakoba erawh chu pa ti chet chawt, in lam ngaihsak mi tak a ni. Isaka chuan Esauva chu sa a kah theih êm avângin a duh hle a, Rebeki erawh chuan Jakoba chu a ngaina zâwk a. Vawi khat chu Jakoba chuan englo a chhûm a, ram aṭangin Esauva chu chau zetin a lo haw a. Jakoba hnênah chuan, “I thil sen chhum kha khawngaih takin mi lo eitîr teh, ka ṭâmchhâwl a ni e,” a ti a. Hemi avâng hian a hmingah Edoma an vuah bawk a ni. Jakoba chuan, “Fa tîr nihnain lei rawh,” a ti a. Esauva chuan, “Rilṭâmin ka thi mai dâwn alâwm, fa tîr nihna chu eng nge ka sâwtpui ang?” a ti a. Jakoba chuan, “Chhia chham rawh,” a ti a, chhia a chham ta a, a fa tîr nihna chu Jakoba hnênah chuan a hralh ta mai a. Jakoba chuan chhang leh a dailuah chhum chu a pe a, a ei a, a in a, a tho va, a kal ta a. Chutiangin, Esauva chuan a fa tîr nihna chu a ngainêp a ni. Abrahama dam laia ṭâm tla ni lo, chu ramah chuan ṭâm a lo tla leh a. Gerar khuaah, Filistia lal Abimeleka hnênah Isaka chu a kal ta a. Lalpa chu a hnênah a rawn inlâr a, “Aigupta ramah chuan chhuk suh, ka kawhhmuh tûr che ramah awm la, chu ramah chuan châm reng ang che. Ka awmpui ang che a, mal ka sâwm ang che. Hêng ram zawng zawng hi nang leh i thlahte ka pe dâwn a ni. I thlahte chu vâna arsi zât khian ka tipung ang a, hêng ram zawng zawng hi i thlahte chu ka pe ang. Abrahaman ka aw a ngaih pawimawha, ka thu a zâwma, ka thupêkte, ka dânte leh ka zirtîrnate a pawm avâng khân,” a ti a. Gerar khuaah chuan Isaka chu a awm ta reng a. Chuta mite chuan Rebeki chu a nupui a nih leh nih loh an hre duh a. “Ka farnu a nih hi,” a ti a. “Ka nupui ka tih chuan Rebeki vâng hian min that mai ang, a hmêl a ṭha hle si a,” a ti a ni. Chumi khuaa rei tak a awm hnu chuan Filistia lal Abimeleka chu tukverhah a han dâk a, Isakan a nupui Rebeki a chhaih lai chu a phâwk a. Abimeleka chuan Isaka chu a ko va, a hnênah, “I nupui a lo ni reng a ni maw? Engtiziaa ‘ka farnu a ni,’ ti nge i nih le?” a ti a. Isaka chuan, “Amah avângin min thah mai ka hlau atin a ni,” a ti a. Abimeleka chuan, “I nupui ni si mutpui tumte kan lo awm mai thei asin; tlêmah tlêmah thil sual min tihtîr ṭhelh alâwm le,” a ti a. Mi zawng zawng hnênah Abimeleka chuan, “Tu pawh, he mi hi emaw, a nupui hi emaw khawih tawh phawt chu tihhlum an ni ang,” a ti bawk a. Chu ramah chuan Isaka chuan thlai a chîng a. Chumi kum chuan a lêt za a thar a, Lalpa chuan mal a sâwm a ni. A neinung tial tial a, mi hausa tak a lo ni ta a. Berâm rual te, bâwng rual te, ṭhuihruai te a ngah ta êm êm a. Filistia-ho chuan an îtsîk ta a. Tichuan, a pa Abrahama dam laia, a pa chhiahhlawhte tuichhunchhuah laih zawng zawng chu Filistia-ho chuan an hnawhsak a, lei an chhûng khat ta vek a. Abimeleka chuan Isaka hnênah, “Kan aiin i chak ta hle si a, heta ta hi insawn rawh,” a ti a. Isaka chu chuta ṭang chuan a insawn a, Gerar ruamah awmhmun a khuar ta a. A pa Abrahama dam laia an tuichhunchhuah laih, Abrahama thih hnua Filistia-hovin an hnawhte chu a lai leh a, a pain hming a vuah te kha hmingah a puttîr leh zêl a. Isaka chhiahhlawhten an awmna ruama tuichhunchhuah an laihah chuan tui a lo awm ṭha hle a. Gerar berâm vêngtute chuan Isaka berâm vêngtute hnênah, “He tui hi kan ta a ni,” tiin an rawn chuh a. Tichuan, chu tuichhunchhuah hmingah chuan ‘Esek’ a vuah a, an rawn chuh buai avânga vuah a ni. Tuichhunchhuah dang an lai leh a, an rawn chuh leh a, a hmingah Sitna a vuah a. Chuta ṭang chuan a insawn a, tuichhunchhuah dang a lai leh a, chu zawng an rawn chuh ta lo va, a hmingah Rehobot a vuah a, “Tûnah zawng Lalpa chuan kan inzârzauna tûr hmun min pe ta,” a tihna a ni. Chuta ṭang chuan Beer-seba-ah a chho va. Chumi zân chuan a hnênah Lalpa a rawn inlâr a: “Kei hi i pa Abrahama Pathian ka ni, Thlaphâng suh, ka awmpui che alâwm. Mal ka sâwm ang che a, Ka chhiahhlawh Abrahama avângin i thlahte ka tipung ang,” a rawn ti a. Chutah chuan maichâm a siam a, Lalpa hming a lam a. Tah chuan bûk a khuar a, Isaka chhiahhlawhte chuan tuichhunchhuah an lai leh a. Chutih lai chuan Gerar aṭangin Abimeleka chu a ṭhian Ahuzatha leh a sipai hotu Fikola nên an lo kal a. Isaka chuan, “Min ngaithei lo va, in zîng ata min hnawt chhuak a, eng nge in duha in lo kal tâk le?” a lo ti a. “ Lalpa chuan a awmpui che tih kan hre ta a, sa-ui tan ho ila kan ti a ni, kan inkârah inremna thu i thlung teh ang, kan tibuai ngai lo che a, kan khawngaih hle ṭhîn che a, i insawn dâwn pawh khân ṭha takin kan kaltîr che a, nang pawhin kan pawi khawih bîk suh ang che,” an ti a. Ruai a ṭhehsak a, an ei a, an in a. A tûk zîngah chuan chhia an chham dûn ta a. Isaka chuan a thlah a, ṭha takin an inṭhen ta a. Chumi ni chuan Isaka chhiahhlawhte chu an lo kal a, an tuichhunchhuah laihah tui ‘kan hmu ta e,’ an rawn ti a. A hmingah Seba a vuah a, tûn thlengin chu khua chu Beer-seba an la ti a ni. Hit mi, Beeria fanu Judithi leh Hit mi Elena fanu Basemathi chu kum sawmli-a upa a nihin Esauva chuan nupuiah a nei a. Chûng mite chu Isaka leh Rebeki thin tina rengtute an ni. Isaka chu a upa ta hle a, a mit a thim a, khua a hmu thei ta lo hial a. A fapa upa zâwk Esauva chu a ko va, “Ka fapa,” a ti a. Ani chuan, “Eng nge ni?” a ti a. “Ka upa ta êm a, engtikah nge ka thih ang sawi theih a nih loh hi. I thal leh thalngul, i hriamhrei chu la la, va ramkal la, sakhi min va kahsak teh. Ka duhzâwng tak, hmui tui deuhvin siam la, mi han lâk ang che. Ka lo ei ang a, ka thih hma ngeiin ka malsâwmna i dawng dâwn nia,” a ti a. Isakan Esauva a bia chu Rebeki chuan a lo ngaithla reng a. Ramvâka a pa tân sakhi kâp tûra Esauva a chhuah veleh Rebeki chuan a fapa Jakoba hnênah, “I pain i u Esauva hnênah, ‘Sa kâp la, hmui tui takin min han siam teh, ka lo ei ang e; ka thih hma ngeiin Lalpa remtih zâwng angin mal ka lo sâwmsak ang che,’ a tih ka hre ru a ni. Chutichuan, ka hrilh ang che hian ti vat teh. Ran rual zîngah va kal la, kel no ṭha thlan chhuah pahnih han la ang che, i pa duhzâwng takin hmui tui deuhvin ka lo siam ang e. I pe ang a, a ei ang a, a thih hma ngeiin mal a sâwmsak dâwn che nia,” a ti a. Jakoba chuan a nu Rebeki hnênah, “Ka u Esauva chu mi hmulphurh chhe tak a ni a, kei lah hmul nei lo, sa mâm tak ka ni si a. Ka pa chuan min han dap hlauh se amah ka tiduhdah emaw a ti ang a, mal sâwmsak ahnêkin ânchhia min lawh ngei ang,” a ti a. A nu chuan, “Ka fapa, ânchhia i dawn leh ka chungah tla rawh se, ka sawi ang chuan ti phawt mai rawh. Kal la, va la thuai tawh,” a ti a. Tichuan, a chhuak a, a va man a, a nu hnênah chuan a rawn la a, a nu chuan a pa duhzâwng takin a lo siam a. Rebeki chuan ina a kawl, a fa u zâwk thawmhnaw ṭha chu, a la a, a fa naupang zâwk Jakoba chu a hâktîr a. A bân leh a nghâwng sam awm lo laite chu, berâmno vun chuan a tuamsak a. Sa leh a chhang siam chu Jakoba hnênah chuan a pe a. A pa hnênah chuan a va kal a, “Ka pa,” a ti a. “Eng nge ni? Ka fapa tu zâwk nge i nih?” a lo ti a. Jakoba chuan a pa chu a chhâng a, “Esauva, i fa tîr kha ka ni. Min tirh angin ka ti a, lo tho la, ṭhu kâng teh, ka sakhi sa hi ei rawh le; tichuan, i malsâwmsakna ka dawng dâwn nia,” a ti a. Isaka chuan a fapa hnênah, “Ka fapa, engtizia nge i va hlawhtling hma teh thut ve?” a ti a. “ Lalpa i Pathian chuan min tihmuingîl a ni,” a ti a. Isaka chuan Jakoba hnênah, “Ka fapa Esauva i ni nameuh emaw; ka lo dap teh ang che, lo kal hnai teh,” a ti hrâm a. Jakoba chuan a va hnaih a, a lo dap vêl a. “A aw chu Jakoba aw a ni a, a kutte erawh chu Esauva kut zawng a nih si hi,” a ti a. A bân chu a u Esauva bân angin a lo hmul si a, a hre hrang thei lo a ni. Mal a sâwmsak dâwn ṭêpah pawh chuan, “Ka fapa Esauva i ni ngei maw?” a ti a. “Ni e,” tiin a chhâng a. “Han la teh, ka fapa sakhi kah sa chu ka lo ei teh ang; tichuan, mal ka sâwmsak dâwn che nia,” a ti a. A hmaah chuan a hlui a, a ei a, uain a rawn lâk chu a in a. A pa Isaka chuan, “Ka fapa, lo kal hnai la, mi han fâwp teh,” a ti a. A va hnaih a, a fâwp a, a kawr rim chu a han hria a, mal a sâwmsak ta nge nge a: A! Ka fapa rim chu Lalpa malsâwm ram rim ang veng veng a ni, Vân daifîm chu Pathianin pe che sela, Lei hausaknate chu pe che rawh se. Buh leh uain nei thûr thûr bawk ang che, Hnam dangte chuan i rawng bâwl se, Hnam tinrêngten chibai bûk che rawh se. I unaute chungah lal la, I nu fate chu i hmaah kûn rawh se. Ânchhe lawhtu che chu ânchhia lawh a ni ang a, Mal sâwmsaktu che chu duhsak an ni ve ang,” a ti a. Isakan Jakoba mal a sâwmsak zo va, Jakoba chuan a pa a chhuahsan chiah tih chuan Esauva ramvâk chu a lo haw a. Ani pawh chuan hmui tui takin a siam a, a pa chu a rawn pe a, a pa hnênah chuan, “Ka pa chuan a fapa sakhi sa hi ei teh se; tichuan, mal a sâwmsak dâwn nia,” a ti a. A pa Isaka chuan, “Tu nge i nih?” a ti a. “I fa tîr Esauva,” a ti a. Isaka chu a khûr ta hlawk hlawk a, “Sa kâpa mi rawn petu kha tu nge ni ta ang le? I lo haw hma chiah khân ka lo ei zo hman a, mal ka sâwmsak tâk kha! Malsâwmna chu a chang hlen tho dâwn,” a ti a. A pa thu a han hriat chuan Esauva chu lungngai takin a ṭap ta zawih zawih a, “Ka pa, kei hi, mal min sâwmsak ve ta hrâm che,” a ti a. “I nau a lo kal a, min bum a ni, i dawn tûr malsâwmna chu a kalpui ta,” a ti a. “A hming Jakoba a ni rêng a, vawi hnih tlawng min bum tâk hi. Ka fa tîr nihna min neihsak a, malsâwmna ka dawn tûr pawh min dawn khalh ta a nih hi. Malsâwmna tlêm tal i la nei lâwm ni?” tiin a ngên a. Isaka chuan Esauva chu a chhâng a, “I chunga lal tûrin ka lo ti diam tawh, a laichîn zawng zawngte a bawih atân ka pe a, buh leh uain nei ṭeuh tûrin ka lo ti tawh bawk a. Chuvângin, ka fapa, eng nge maw tihsak tûr che ka la neih ang le?” a ti a. Esauva chuan, “Malsâwmna pakhat mai em ni i neih? Ka pa, kei hi, mal min sâwmsak ve hrâm teh,” a ti a. Esauva chu a ṭap chiam a. Isaka chuan a hnênah heti hian a ti leh a: I chênna chu ram ṭha aṭanga hla tak a ni ang a, Vân daifîmte chu i dawng lo vang. I khandaih hmangin i nung ang a. I nau rawng i bâwl ang. Tharum i thawh hunah chuan A nghâwngkawl i bah chu i thing thla ang,” a ti a. A pain mal a sâwmsak tâk avângin Jakoba chungah Esauva chu a lungnilo hle a. Esauva chuan, “Ka pa kan sûn ni chuan ka nau Jakoba chu ka that ve ngei ang,” a ti a. Chutiang chuan a fapa upa zâwk Esauva chu a ṭawng tih Rebeki an hrilh a, a fa naupang zâwk Jakoba chu a ko va, “Ngai teh, i u Esauva hian thah che tumin a inhnêm a ni. Chuvângin, ka thu hi ngaithla teh. Haran khuaah ka nuṭa Labana hnênah tlânchhe daih la, a hnênah chuan eng chen emaw va awm ang che. I u thinrim a daiha, i thiltih avânga i chunga a thin na chu a dam hma chu va awm ang che, chutih hunah chuan mi ka rawn tîr ang a, a rawn hruai kîr dâwn che nia. Tichuan, in pahnihin ni khatah ka sûn dâwn lo che u nia,” a ti a. Rebeki chuan Isaka hnênah, “Hêng Hit hmeichheho vâng hian dam pawh manhla ka ti ta lo; Jakoba hian hêng lai mi, Hit nula a neih ve lek phei chuan ka tân nun thlâkhlelh tlâk em ni ang?” a ti a. Tichuan, Jakoba chu Isakan a ko va, chibai a lo bûk a, hetiang hian a hrilh a: ‘Kanan nula nupuiah i nei tûr a ni lo. Tho la, Padan-aram-ah, i nu pa Bethuela inah kal la, i nu nuṭa Labana fanute zînga mi nupui va nei ang che. El-Sadaia chuan malsâwm che sela, i chi tiṭhain tipung che sela, tihtham tak hnam thlahtu ni ang che. Abrahama ang khân nang leh i thlahte chu malsâwm sela, Pathianin Abrahama a pêk, i mikhualna ram hi nei ang che,” a ti a. Isaka chuan Jakoba chu a kaltîr a, Padan-aram-a Suria mi Bethuela fapa, Jakoba leh Esauva nu nuṭa, Labana hnênah chuan a kal ta a. Jakoba chu Padan-aram lama nupui zawng tûra Isakan a tirh khân mal a sâwmsak a, mal a sâwmsak pah khân, “Kanan nula nupuiah i nei tûr a ni lo,” tiin a hrilh a, a nu leh pa thu awihin Jakoba chu Padan-aram lamah chuan a kal ta a. Chuvâng chuan, Kanan hmeichhiate chu Isaka chuan a ning hle ṭhîn a lo ni tih Esauva chuan a hre ta a. Chuvângin, Esauva chu Abrahama fapa Ismaela hnênah a kal a, a nupui neih sa bâkah Abrahama fapa Ismaela fanu Mahalathi, Nabaiotha farnu chu nupuiah a neih belh ta a. Jakoba chu Beer-seba ata chu Haran khuaa kal tûrin a chhuak ta a. Ni a tlâk chuan hmun pakhat chu a va thleng a, riah zai a rêl ta a. Lung pakhat hi a la a, a lukham a, a mu ta a. Mumang a nei a, lei aṭanga vân thleng kailâwn lo awm zur chu a hmu a. Pathian Vântirhkoh rual an lo chhovin an lo chhuk zut zut a. Lalpa chuan a lo dinchilh reng a, “Kei Lalpa hi, i pa Abrahama Pathian, Isaka Pathian ka ni. I mutna lei hi nang leh i thlahte ka pe dâwn a ni. I thlahte chu leia vaivut zât an ni ang a, chhak leh thlang, chhim leh hmârah an inzâr darh ang, leia hnam tinrêngin nang leh i thlahte chu induhsakna ṭawngkam takah an hmang ang che. Ngai rawh, ka awmpui a che, i kalna apiangah ka vêng ang che a, he ramah hian ka hruai kîr leh ang che, ka thutiam ka tihhlawhtlin hma chu ka thlahthlam lo vang che,” a ti a. Jakoba chu a lo ṭhangharh a, “Hetah hian Lalpa a lo awm a nih hi, ka lo hre si lo va,” a ti a. Hlauvin a khûr a, “He hmun hi hmun ṭihbaiawm tak a nih hi, Pathian in a lo ni reng mai, vân lama chhohna kawngka chu,” a ti bawk a. Zîngah chuan Jakoba chuan lung a lukham chu a la a, a phun a, a chhîpah hriak a leih a. Chu hmun hmingah chuan Bethel a vuah a, tûn hma chuan chu hmuna khaw awm hming chu Luz a ni. Jakoba chuan thu a tiam a, “Pathianin min awmpui a, ka khualzinna lama min vên zêla, ei tûr leh sin tûr min pêk zêla, ka pa ina him taka ka lo kîr leh chuan Lalpa hi ka Pathian a ni ang a. He ka lungphun pawh hi Pathian in a ni ang, i thil min pêk zawng zawng aṭangin sâwma pakhat ka pe ngei ngei ang,” a ti a. Jakoba chu a kal ta zêl a, khawchhak mite ram chu a thleng ta a. Chutah chuan tuichhunchhuah a va hmu a, a bulah chuan berâm rual pâwl thum an lo bawk chu a va hmu a. Chu tuichhunchhuah tui chu an intîr ṭhîn a ni. Tuichhunchhuah chhinna lung chu a lian hle a, berâm rual an rawn khalh thlen kim hunah chauh a chhîn chu an lum sawn thei a, tui an intîr ṭhîn a ni; an in zawhah an chhîn ṭha leh ṭhîn. Jakoba chuan berâm vêngtute hnênah, “Ṭhiante u, khawii khua nge in nih?” a ti a. Anni chuan, “Haran khua kan ni,” an ti a. “Nahora fapa Labana kha in hria em?” a ti a. Anni chuan, “Hria e,” an ti a. Ani chuan, “An dam lai em ni?” a ti a. “Dam e, a fanu Rakili pawh, saw, a berâm rual nên a lo kal saw,” an ti a. “Ni a la sâng hle si a, engati nge berâmte chu tui in intîr loh, an la tla leh hman alâwm,” a ti a. “Berâm rual zawng zawng an lo thlen kim vek hunah tui kan intîr thei chauh ṭhîn a ni,” a ti a. An inbiak lai chuan Rakili pawh chu, a pa berâm rual nên a lo thleng a, berâm a vêng ve rêng ṭhîn a ni. A nu nuṭa Labana fanu Rakili chu, a nu nuṭa Labana berâmte nên a hmuh chuan tuichhunchhuah chu a hnaih a, a chhinna lung chu a lum sawn a, a nu nuṭa Labana berâm rual chu tui a intîr ta a. Jakoba chuan Rakili chu a fâwp a, aw chhuahin a ṭap ta a. “I pa tupa, Rebeki fapa ka nih hi,” Rakili hnênah chuan Jakoba chuan a ti a. Ani chu a pa hrilh tûr chuan a tlân hâwng ta a. Labanan a farnu fapa Jakoba chanchin a hriat chuan lâwm tûrin a tlân chhuak a, a pawm a, a fâwp a, a inah a hruai lût ta a. Chanchin engkim Labana chu a hrilh a. Labana chuan a hnênah, “Ka thisen zawmpui ngei i ni alâwm,” a ti a. Jakoba chu Labana inah thla khat a awm ta a. Labana chuan a hnênah, “Ka tupa i nih avângin a thlâwna ka chhawr reng thu che a awm lo, eng nge hlawh i duh, min hrilh rawh,” a ti a. Labana chuan fanu pahnih a nei a, a upa zâwk hming chu Leaii a ni a, a naupang zâwk hming chu Rakili a ni. Leaii chu a meng mawi hle a; Rakili phei chu tituai ṭha deuh, hmêlṭha tak a ni. Jakoba chuan Rakili chu a ngaizâwng a. “Kum sarih min chhawr la, i fanu naupang zâwk Rakili hi ka hlawh ang e,” a ti a. Labana chuan, “Mi dang daih neihtîr ai chuan nang neihtîr che chu a ṭha zâwk ang,” a ti a. Jakoba chuan Rakili hlawh tûrin kum sarih a thawk a, a ngaihzâwn êm avângin ni rei lo tê lek niin a hria. Jakoba chuan Labana hnênah, “Ka hun ka tlâk ta bawk a, ka nupui tûr chu min neihtîr tawh rawh le,” a ti a. Labana chuan khuaa mite chu a sâwm a, ruai a ṭheh a. Zân thimah chuan a fanu Leaii chu a kai a, Jakoba hnênah chuan a hruai a, a lo mutpui a. Labana chuan a bawih nula Zilpaii chu Leaii a chhawmtîr a. Zîng a lo nih chuan Leaii a lo ni reng mai si a. Jakoba chuan Labana hnênah, “Min tih dân hi engtizia nge? Rakili hlawhah min chhawr a ni lâwm ni? Engati nge min bum?” a ti a. Ani chuan, “Fanu upa zâwk aiin a naupang zâwk kaltîr hmasak hi hêng lai ram dân a ni hlei nêm. Mo lawm hapta chhûng hmang tlingtla zet la, a nau zâwk pawh i nei mai dâwn nia; kum sarih dang ka chhawr leh ang che,” a ti a. Jakoba chuan a nupui hmasa zâwk lawmna hapta khat chu a tlingtla a, Labana chuan Rakili pawh chu nupuiah a neihtîr ta a. Labana chuan a chhiahhlawh nula Bilhaii chu a fanu Rakili a chhawmtîr a. Jakoba chuan a lo nei ta a, Leaii ai chuan a duh zâwk a. Labana chuan Jakoba chu kum sarih dang a chhawr zui ta a. Lalpa chuan Leaii chu a chuang hle tih a hriat chuan a chhûl a hawnsak a, Rakili erawh chuan nau a nei thei lo. Leaii chuan nau a nei a, fapa a hring a, a hmingah Reubena a sa a. “Tûnah chuan ka manganna a hmu” tihna a ni. “Ka pasal pawhin min duh deuh tawh ang,” a ti bawk a. Nau a nei leh a, fapa a hring a, “ Lalpa chuan hmangaih ka hlawh lo tih a hria a, hei pawh hi min pe a nih hi,” a ti a, a hmingah Simeona a sa a. Nau a pai leh a, fapa a hring a, “Tûnah zawng ka pasal fapa pathum ka hrinsak ta a, min lungrualpui tawh ang,” a ti a, a hmingah Levia a sa a. Nau a pai leh a, fapa a hring leh a, “Tûn ṭum chu Lalpa ka chawimawi dâwn e,” a ti a, a hmingah Juda a sa ta a ni. Nau a pai nawn leh ta lo va. Rakilin Jakoba chu fa rêng a hrinsak loh avâng chuan a laizâwnnu Leaii chu a îtsîk hle a. Jakoba hnênah Rakili chuan, “Fa min pe ve rawh; chutilo chu, ka thi mai ang,” a ti a. Jakoba chu Rakili chungah chuan a thinur a, “Fa nei thei lova siamtu che Pathian em ka nih?” a ti a. Rakili chuan, “Hei, ka chhiahhlawhnu Bilhaii hi mutpui teh, mal chunga ka chawi ve tûr fa min hrinsak dâwn nia,” a ti a. Hmei atân a chhiahhlawh Bilhaii chu Jakoba a neihtîr ta a. Bilhaii chuan nau a pai a, Jakoba chu fapa a hrinsak a. Rakili chuan, “Pathianin ro min rêlsak a, ka dîl angin fapa min pêk tâk hi,” a ti a, a hmingah Dana a sa a. Rakili chhiahhlawh Bilhaii chuan nau a pai leh a, Jakoba chu fa a hrinsak a. Rakili chuan, “Ka laizâwnnu nên namên lovin inchuh kan nei a, ka chan a ṭhat tâk hi,” a ti a, a hmingah Naftalia a sa a. Leaii chuan nau a pai thei ta lo tih a inhriat chuan a chhiahhlawh Zilpaii chu hmeiah Jakoba chu a neihtîr a. Leaii chhiahhlawh Zilpaii chuan Jakoba chu fapa a hrinsak a, Leaii chuan, “A va nihlawhthlâk êm!” a ti a, a hmingah Gada a sa a. Leaii chhiahhlawh Zilpaii chuan Jakoba chu fa dang a hrinsak leh a. Leaii chuan “Nihlawh min va ti dâwn e,” a ti a, a hmingah Asera a sa a. Ni khat chu huit seng laiin Reubena chu lovah a kal a, zâwlaidi a hmu a, a nu Leaii a hawnsak a. Rakili chuan Leaii hnênah, “I fapa zâwlaidi chu a ṭhen min pe ve hrâm teh,” a ti a. Leaii chuan, “Ka pasal min chhuh mah tihin ka fapa zâwlaidi leh zêl pawh min lâksak i tum em ni?” a ti a. Rakili chuan, “I fapa zâwlaidi min pe la, zâninah i bulah a mu dâwn nia,” a ti a. Tichuan, tlaia Jakoba feh haw chu Leaii chuan a lo hmuak a, “Zânin chuan ka hnênah i awm tûr a ni, ka fapa zâwlaidiin ka thleng tawh che a ni,” a ti a. Chumi zân chuan a bulah a awm ta a. Pathian chuan Leaii dilna chu a ngaithla a, nau a pai a, Jakoba chu a pangana tûr fapa a hrinsak ta a. Leaii chuan, “Pathianin ka pasal hmeia ka chhiahhlawh ka neihtîr man min pe ta a nih hi,” a ti a, a hmingah Isakara a sa a. Leaii chuan nau a pai leh a, Jakoba chu a parukna atân fapa a hrinsak leh a; “Pathianin thil hlu tak min pe a nih hi. Tûn ṭum hi chuan ka pasal fapa paruk ka hrinsak tâk avângin thilpêk hlu tak min pe ngei ang,” a ti a, a hmingah Zebuluna a sa a. A tâwp berah chuan fanu a hring a, a hmingah Dinaii a sa a. Pathianin Rakili chu a hre reng a, Pathianin a khawngaih a, a chhûl a hawnsak a. Nau a pai a, fapa a hring a. “Pathianin ka hmingchhia min chhilhsak ta,” a ti a. A hmingah Josefa a sa a. “ Lalpa chuan fapa min pêk belh ta a nih hi,” a ti a. Rakilin Josefa a hrin hnu chuan Jakoban Labana hnênah, “Kan ram, kan in leh lo lamah min hawtîr tawh rawh le. Ka thawh hlawh, ka nupui leh ka fate hi min pe la, ka kal chhuak dâwn nia, ka thawhsak nasatzia che i hria alâwm,” a ti a. Labana chuan, “Ngawi hrâm teh rih. Nangmah avângin Lalpa chuan min tihmuingîl a ni tih hriatna ka nei a ni. Chuvângin, hlawh i duh zât zât min dîl rawh, ka pe mai ang che,” a ti a. “Ka tha i hlâwkpuizia i hria a, ka enkawl chhûngin i ran lo pun tâkziate pawh i hria. Ka lo kal hmaa tlêm tê kha tûnah chuan a tam tâk êm hi; ka thawhna lam apiangah Lalpa chuan mal a sâwm zui zêl che a ni. Ka puala eng emaw ka tih chu a hun ta hle a ni e,” a ti a. “Eng nge ka pêk ang che?” a ti a. Jakoba chuan, “A hrana hlawh min pêk a ngai lo, hetiang hi i remtih theih chuan i rante hi ka thlah ang a, ka enkawl leh ang. Vawiin hian i ran rual va en chhuak ila, berâm zînga a dum te, kêl zînga a vâr pheuh pheuh leh a ṭiala vâr ṭhik ṭhek te la chhuak la, ka hlawh atân dah hran ni rawh se. Ka hlawh i rawn enfiah leh hunah ka rinawm leh awm loh chu rang takin i hre mai thei ang. Ka ran zîngah berâm dum ni lo, kêl pawh a vâr pheuh pheuh leh a ṭial ṭhik ṭhek ni lo i hmuh chuan ka rûkah ngai zêl ang che,” a ti a. Labana chuan, “Ni e maw le, i sawi ang chu ni rawh se,” a ti a. Nimahsela, chumi ni chuan kêlpa ṭial leh vâr pheuh pheuh, kêlpui vâr phoh phoh leh ṭial ṭhik ṭhek, a vâr kahte leh berâm dumte chu a la hrang a, a fate a enkawltîr a. Jakoba awmna aṭanga ni thum kalah a awmtîr a; Jakoba chuan Labana ran la awmte chu a khalh a, a enkawl zui ta a. Jakoba chuan chawngtlai ṭang te, theite ṭang te, sehawr ṭang te a la a, a pil a khawk ṭial thluah thluah hlawm a. Chûng thingṭang ṭial chu ran tui inna kuang bulah, an hmuh theih tûrin a dah a, tui in tûra an lo kal chu an inbawh ṭhîn a ni. Kêl chuan tiang ṭial en chunga an rai chuan ṭial phoh phoh te, ṭial ṭhik ṭhek te, a vâr kah te an hring a. Jakoba chuan berâm leh kêl chu a dah hrang a, tiang ṭial chu Labana kêl dumte hmuh tûrin a dah a. Chutiang chuan ama ta tûr chu a tipung a, Labana ta nên chuan a dah hrang zêl a. Ran hrisêl deuh chu an inbawh dâwnin tiang ṭial chu an hmuh tûrin tui kuang bulah chuan a dah zêl a. Ran sawngnawi deuhte hmaah chuan tiang ṭial chu a dah ve duh lo. Tichuan, a sawngnawi deuhte chu Labana chuan a nei ta zêl a, Jakoba chuan a pianṭha deuhte chu a nei ta zêl a. Ani chu a neinung ta hle a, ran a ngah ta êm êm a, chhiahhlawh, mipa leh hmeichhia pawh a ngah a, sanghâwngsei te leh sabengtung te pawh a nei a. Labana faten, “Jakoban kan pa thil neih zawng zawng a lâksak zêl a, kan pa ta tûrin a intihausa a ni,” an tih thâwm chu Jakoba chuan a lo hria a. Labanan a en dân pawh ni dang a ang ta lo tih a hmu bawk a. Lalpa chuan Jakoba hnênah, “I pianna, i pate ramah kîr leh tawh rawh, ka awmpui zêl ang che,” a ti bawk a. Jakoba chuan Rakili leh Leaii chu ran tlatna phûla lo kal tûrin a chah a; an hnênah, “In pa mi en dân hi tûn hma a ang ta lo tih ka hmu thei a ni; mahse, ka pa Pathian chuan min awmpui zêl a. In pa tân theihtâwp chhuahin ka thawk ṭhîn tih in hria e. Nimahsela, in pa hian a duh duhin min chawkzân a, ka hlawh tûr lah a nawm a mâkin a tidanglam a. Ka chhiat dêr erawh chu Pathianin a phal lo a ni. ‘A ṭial ṭhik ṭhek i hlawh dâwn nia,’ a tih leh ran rualte chuan a ṭial thik thek hlîr no an nei a; ‘a vâr phoh phoh i hlawh dâwn nia,’ tia a thu a thlâk leh pawhin ran rual chuan a vâr phoh phoh hlîr an nei a. Chutiangin Pathianin in pa ran chi ṭha chu a chhuhsak a, min pe zêl a ni. “Vawi khat ran rual hur laiin mumang ka nei a, a bawhtu kêlpa zawng zawng chu a ṭial ṭhik ṭhek te, a vâr phoh phoh te, a vâr kah zeuh zeuh te vek an lo ni a. Ka mumangah chuan Pathian Vântirhkohvin min lo bia a, ‘Jakob,’ a ti a. Kei chuan, ‘Eng nge ni?’ ka ti a. ‘Dâk la, en chiang teh, ran rual bawhtu, a pa zawng zawng saw, a ṭial ṭhik ṭhek te, a vâr phoh phoh te leh a vâr kah zeuh zeuhte an nih vek saw. Labanan i chunga thil a tih dân ka hmuh ve reng avângin sawtiang sâwn thil a awm a ni. Bethel-ah i lungphun hriak i hnawih a, thu i tiam a, khata i hnêna inlâr Pathian kha ka nih hi. Tho la, he ram hi chhuahsan la, i pianna ramah kîr leh tawh rawh,’ min ti a ni,” a ti a. Rakili leh Leaii chuan an chhâng a, “Kan pa ro kan chan ve tûr eng mah a awm tawh lo; mikhual ang lekah min ngai tawh a ni lâwm ni? Min hralh a, kan man te lah a ei zo vek tawh bawk si. Kan pa sum, Pathianin a chhuhsak zawng zawng hi kan chan tûr rêng a ni asin, Pathianin a hrilh che ang chuan ti zêl mai rawh,” an ti a. Tichuan, a fate leh a nupui te chu sanghâwngsei chungah a chuantîr a. A ran rualte chu a khalh a, a thil neih zawng zawng, Padan-aram-a a awm chhûnga a thil neih thar zawng zawng chu a keng a, Kanan ram, Isaka awmna ram chu pan tûr chuan a chhuak ta a. Chutih lai chu Labana, berâm hmul mêt tûra a thang bo hlân a ni a, Rakili chuan a pa chhûngkaw pathian milimte chu a rûksak a. Jakoba pawh chuan Suria mi Labana chu a thlim a, eng mah hrilh lovin ngaihngam takin a awmtîr a ni. Chutiang chuan a neih zawng zawng nên a kal ta a, Eufretis lui chu a kân sawk sawk a, Gilead tlângram chu a pan ta vang vang a. A ni thum ni chuan Jakoba tlânchhiat thu chu Labana an hrilh a. A ṭhuihruaite a khâwm a, a ûm ta a. Ni sarih a kal hnu chuan Gilead tlângramah a va ûmpha a. Suria mi Labana chuan zâna a mumangah Pathian a hmu a, “A chhia a ṭha Jakoba hnênah fîmkhur takin thu sawi rawh,” a rawn ti a. Labanan a ûmphâk khân Jakoba chuan tlâng sâng laiah puan in a lo zâr tawh a, Labana leh a ṭhuihruaite chuan Gilead tlângah bâwk an zâr ve ta a. Labana chuan Jakoba hnênah, “Ngaihngam takin min awmtîr a, min bum a, ka fanute hi engtizia nge râl man ang hrima i lâk daih le? Min hrilh duh lo va, min thlim a, a rûka i tlân bo mai hi engtizia nge? Benchhek te leh perhkhuangte tumin hlim takin kan thlah tûr che alâwm. Ka tu leh fate thlahin a fawh takngial pawh min fawhtîr phal lo va. I thil tih dân hi a âtthlâk lutuk a ni. Tichhe vek thei che ka ni asin; mahse, nizâna ka mumangah i pa Pathian ka hmu a, ‘Jakoba hnênah a chhia emaw, a ṭha emaw, fîmkhur takin thu sawi rawh,’ min rawn ti a. I pa in lam i ngai a, i haw châk êm a nih pawhin kan chhûngkaw pathian leh zêl engati nge min rûksak?” a ti a. Jakoba chuan a chhâng a, “I fanute hi min chhuhsak mai ang tih ka hlau êm a ni. In chhûngkaw pathian erawh chu kan zînga lo la an awm a niha, i hmuh chhuah chuan thah ni rawh se. Hêng kan unaute hmaah ngei hian, eng pawh i ta i hmuh chuan la zêl ang che,” a ti a. Jakoba chuan Rakilin a lo ru tih a hre si lo. Jakoba puan in chu Labana chuan a dap hmasa a, Leaii puan in leh an chhiahhlawhte puan in chu a dap zêl a, a hmu zo lo va. Leaii puan in ata a lo chhuak a, Rakili puan inah chuan a lût a. Rakili chuan milimte chu sanghâwngsei zângdam zîngah a lo thukru hman a, a ṭhut hnan a. Labanan puan in chhûng chu a dap vek a, eng mah a hmu lo va. Rakili chuan a pa hnênah, “Ka lalpa chuan a hmaa ka tho lo hi ngaih loh lamah ngai teh suh se, hmeichhe dân angin ka fel loh lai a ni atin a ni,” a ti a. A dap ngun hle na a, milimte chu a hmu lo. Jakoba chu Labana chungah chuan a thinur a, a âng ve ta thung a. “Eng nge ka bawhchhiata, thil eng nge ka tih suala min rawn ûm hi? Ka neih zawng zawng i dap chhuak a, in chhûngkaw thil pakhat tê pawh i hmu em ni? I hmu a nih chuan han phawrh teh; hêng kan unaute hian kan inkâr thu rêl mai teh se. “Kum sawmhnih i hnuaia ka thawh chhûng khân i berâm leh kêlpuite chuan no an chhiat ngai lo va, i berâmpa lah ka talh ngai hek lo. Ramsa seh ka sawi ngai lo, keiman ka rûl zêl a. A bo rêng rêng, zâna bo emaw, chhûna bo emaw, min rulhtîr zêl a. Chhûn nisain min em chau fo va, zân vûr tla khaw vawtin min hmet khawng fo bawk a, mutmu pawh ka tuah thei ṭhîn lo a ni. Kum sawmhnih i hnêna ka awm chhûng khân i fanute pahnih hlawh tûrin kum sâwm leh pali min chhawr a. Kum ruk, i ran hlawh tûra i ran ka vên chhûngin ka hlawh vawi sâwm i tidanglam a. Ka pa Pathian, Abrahama Pathian, Isaka Ṭiha chu ka lamah ṭang lo se kut bêngin min kaltîr dâwn a nih hi. Amaherawhchu, Pathianin ka hahzia te, ka thawhrimzia te a hmu a, nizân khân i hriat tûrin ka thu a lo rêl fel a nih chu,” a ti a. Labana chuan Jakoba chu a chhâng a, “Hêng hmeichhiate hi ka fanute an ni a, an fate pawh ka ta an ni, ran rual chen hian ka ta a ni, dân ang chuan i hmuh apiang hi ka ta a la ni. Ka fanute leh an fa hrinte hi vawiin hian eng nge ka tihsak tâk ang? Ti teh, keini pahnih hi, kan inkârah thu i thlung teh ang; lung rem vûm ila, chu chu a chhinchhiahna ni rawh se,” a ti a. Jakoba chuan lung a la a, a phun ta a. Jakoba chuan a ṭhuihruaite chu, “Lung pu khâwm teh u,” a ti a. Lung a la khâwm a, an rem vûm a, chutah chuan chaw an ei ho ta a. Labana chuan chu chu Jegarsahadutha a vuah a; Jakoba erawh chuan Galeed a vuah a. Labana chuan, “He lung rem vûm hi vawiin aṭangin kan inkâra thuthlung chhinchhiahna ni rawh se,” a ti a. Chuvâng chuan a ni, a hmingah Galeed an vuah tâk ni. Mizpa an ti bawk, Labana chuan, “Hmêl kan inhmuh loh chhûngin Lalpa chuan min vêng tawn rawh se. Ka fanute hi i tihnawmnah emaw, nupui dang i neihsan emaw a nih chuan tu dangin min hre lo mah se, kan inkâra thuhretu chu Pathian a ni tih hre reng ang che,” a ti a. Labana chuan Jakoba hnênah, “Hei, lung vawm vûm leh kan inkâra lungphuna ṭang tûr ka phun hi. Ka lung rem vûm leh lungphun hi ka pawi khawih tûrin i rawn pêl tûr a ni lo tih hriatna ni rawh se. Abrahama Pathian, Nahora Pathian, an pahniha Pathian chuan kan inkâr thuthlung hi vawng him rawh se,” a ti a. Jakoba chuan a pa Isaka Ṭiha chhâlin chhia a chham a. Tlâng sângah chuan Jakoban ran a hlân a, a sa ei tûrin a ṭhiante chu a sâwm a. An ei zawh chuan tlâng sângah chuan an riak a. A tûk zîngah chuan a fanute leh a tute chu Labana chuan a fâwp a, “Dam takin,” a ti a, a awmna lamah a haw ta a. Jakoba chu a kal zêl a, Pathian Vântirhkohte chuan an lo tâwk a. Anni chu a hmuhin Jakoba chuan, “He lai hi Pathian sipaite ṭanhmun a ni phawt mai,” a ti a, chu hmun chu Mahanaim a vuah a. A u Esauva chu Edom mite chênna Seir ramah a awm a, Jakoba chuan mi a tîr a, hetiang hian a hrilhtîr a: “Ka Lalpa Esauva hnênah chuan ‘I chhiahhlawh Jakoba chuan heti hian a ti: Labana hnênah ka han awm a, tûn thlengin min lo chelh reng a ni. Bâwng leh sabengtung, berâm pawh, chhiahhlawh mipa leh hmeichhia nên ka nei ve ta. Min lo lawm beiseiin ka Lalpa hnênah ka chanchin hi ka rawn than lâwk a ni,” tiin. A mi tirhte chu an lo haw leh a, Jakoba hnênah, “I u Esauva chu kan va hmu a, hmuak tûr chein amah ngei pawh a lo kal e, mi zali a rawn hruai,” an ti a. Jakoba chuan a hlau ta hle a, a thlaphâng mangang chuan a mi hruai te, a ran te, a bâwng te leh sanghâwngsei te chu pâwl hnihah a ṭhen a. Esauvan pâwl khat hi rawn nangchîngin bei mah se, pâwl khat hi an la insaseng thei ang,” a ti rilru a ni. Jakoba chu a ṭawngṭai a, “Aw Lalpa, ka pu Abrahama Pathian, ka pa Isaka Pathian, ‘in ramah, i laichînte hnênah haw tawh rawh, i chungah ṭhat ka chhuah zêl dâwn,’ min ti a. I chhiahhlawh chungah ngil i nei tlat zêl ṭhîn hi ka phu loh a ni. Jordan lui ka kân khân ka tiang chauh lo chu eng mah ka nei lo va; tûnah zawng, pâwl hniha ṭhen tham hial ka lo nih tâk hi. Ka u Esauva lakah hian min hum teh, ka ngên a che; chutilo zawng, nunau lamin mi a rawn sâm dah ang e. Nang chuan, ‘I chungah ṭhat ka chhuah ngei ang a, tuipui kama ṭiau chhiar sên loh angin i thlahte ka tipung ang,’ i tih kha,” a ti a. Chumi hmunah chuan a riak a, a ran kawl zîng ata a u Esauva pêk tûr a thlang chhuak a. Kêlpui zahnih leh a pa sawmhnih, berâmpui zahnih leh a pa sawmhnih, sanghâwngsei sâwr lai sawmthum an notê nên; bâwngpui sawmli leh a pa sâwm; sabengtungpui sawmli leh a pa sâwm a dah hrang a. Chûng chu a pâwl zêlin a chhiahhlawhte a khalhtîr a, an hnênah chuan, “Lo kal hmasa rawh u, kâr nei deuhvin kal ang che u,” a ti a. A pâwl hmasa ber khalhtu hnênah chuan, “Ka u Esauvan a lo hmuh che-a, ‘Tu mi leh sa nge i nih, khaw nge i kal dâwn? I ran khalh zozai kha tu ta nge?’ a tih che chuan, ‘I nau Jakoba mi ka ni a, ka lalpa Esauva pêk tûr min khalhtîr a ni, amah Jakoba pawh kan hnung lawkah sâwn a lo kal,’ ti ang che,” a ti a. Chutiang bawkin pâwl hnihna khalhtu chu a hrilh a, a pâwl dang dang pawh a hrilh vek a, “Chutiang tak chuan Esauva hnên in thlen hunah sawi ang che u. ‘I chhiahhlawh Jakoba pawh hnung lawkah sâwn a lo kal e,’ ti tel ngei ngei ang che u,” a ti a. “Thilpêktea ka tihlungawi hmasak chuan amah ka hmuh hunah mi ngaidam ngei ang,” a ti rilru a ni. A thilpêkte chu lui an khalh kai hmasa a, chumi zânah chuan Jakoba chu bûkah chuan a riak a. Chumi zân chuan a tho va, a nupui pahnihte leh a chhiahhlawhnu pahnihte chu, a fa sâwm leh pakhatte nên a hruai a, Jabok lui kaiah chuan a kaipui a. A kaipui hnu chuan a thil neih zawng zawng pawh a thiar kai vek a. Jakoba chu amah chauhvin a awm ta a; khawvâr hma chu mi pakhat hian a buan a. Jakoba chu a hneh tâk loh avângin a khêl a khawihsak a, a khêlruh chu an inbuanna lamah chuan a pelh ta a. “Ni a chhuak dâwn, mi thlah rawh,” a ti a. Jakoba chuan, “Mal mi sâwm hma chu ka thlah lo vang che,” a ti a. Ani chuan, “Tu nge i hming?” a ti a. “Jakoba,” a ti a. “Jakoba an ti tawh lo vang che, Israela i ni tawh zâwk ang. Pathian leh mihring i buan a, i hneh tâk zâwk avângin,” a ti a. Jakoba chuan, “Khawngaih takin i hming min hrilh teh,” a ti a. “Engati nge ka hming min zawh?” a ti a, mal a sâwm a, a kalsan ta a. Jakoba chuan chumi hmun chu Peniel a vuah a, “A hmai chhanah Pathian ka hmu a; mahse, nungdamin ka la awm a nih hi,” a ti a. Peniel a kalsan chuan ni a chhuak a, a khêl avâng chuan a bai ta suih suih a. Chuvângin, tûn thlengin Israela thlahte chuan khêlruh inzawmna lai tha hi an ei duh lo, Jakoba khêl tha thlung a khawihsak avângin. Jakoba chu a han dâk a, Esauva leh a mi hruai zali chu a hmu a. A fate chu an nute ṭheuh, Leaii te, Rakili te leh a hmeite bulah chuan a awmtîr a. A hmeite leh an fate chu an kal hmasa a, Leaii leh a fate chuan an dawt a, Rakili leh Josefa chu a hnuhnûng berah an kal a. Amah Jakoba chuan hma a hruai a, a u bul a thlen dâwn chuan vawi sarih lei si-a kûnin a u chu chibai a bûk a. Amah tâwk tûrin Esauva chu a lo tlân a, bek insiin an inpawm a, an infâwp a, an ṭap dûn ta a. Esauva chuan a han en vêl a, hmeichhiate leh naupangte chu a hmu a, “Hêng i mi hruaite hi tute nge ni?” a ti a. “Naupangte hi Pathianin i chhiahhlawh a khawngaih a, a pêkte an ni,” a ti a. Chhiahhlawhte chu an fate nên an lo kal a, Esauva hmaah chuan an kûn a, chibai an bûk a. Leaii leh a fate an lo kal a, a hmaah chuan an kûn a, a tâwp berah Josefa leh Rakili chu an lo kal a, an rawn kûn bawk a. Esauva chuan, “I hmaa ran i rawn khalhtîr zozai kha engtizia nge ni?” a ti a. “Min lo khawngaih theih nân ka ti a ni,” a ti a. Esauva chuan, “E, Mama, kei pawhin ka ngah asin, i ta chu nei zêl zâwk rawh,” a ti a. Jakoba chuan, “Ni lo ve, khawngaih takin ka thilpêk theih chhun che kha pawm hrâm teh, min lo lâwma, i hmêl ka hmu ngawt pawh hi Pathian hmu ang ka ni alâwm. Thilpêk ka rawn kensak che hi pawm hrâm teh. Pathianin min khawngaih a, ka la ngah alâwm,” a ti a. A tih tlat avâng chuan Esauva chuan a la ta a. Esauva chuan, “Ti rawh, i kal zêl ang, hma ka han hruaisak ang che,” a ti a. Ani chuan a chhâng a, “Naupangte hi an la tê hle a, berâm leh ran dangte pawh no hruai an ni tih ka lalpa chuan i hria, ni khat pawh khalh chak lui ila an thi mai ang. Chuvângin, ka lalpa chuan i chhiahhlawh hi lo kal hmasaksan la, kei chu zawi awiin naupang leh ran rual zai ngaiin Seir-ah ka lo kal ve ang e,” a ti a. Esauva chuan, “Ka rawn kalpui, mi ṭhenkhat hi ka hnutchhiah ang che,” a ti a. Ani chuan, “Engah nge ka tihhah ang che, a ṭûlna a awm lo ve,” a ti a. Esauva chu Seir lam pan chuan a haw ta a. Jakoba chu Sukot-ah a kal a, bâwk a khawh a, a rante awmna tûr a siam bawk a. Chumi avâng chuan chu hmun hming chu ‘Sukoth’ tih a ni ta a. Padan-aram aṭang chuan Jakoba chu Kanan ram Sekem khua chu dam takin a lo thleng a. Chu khaw bulah chuan awmhmun a khuar a. Chu hmun chu tangka sekel za-in Sekema pa Hamora thlahte hnên aṭangin a lei a. Tah chuan maichâm a siam a, a hmun hmingah chuan El-Elohe-Israel a vuah a. Leaiin Jakoba a hrinsak Dinaii chu, chu ram nulate tlawh tûrin a lêng a. Chu lai mite hotupa chu Hiv mi, Hamora a ni. A fapa Sekeman ani chu a lo man a, a mutpui lui a. Jakoba fanu Dinaii chu a ngaizâwng êm êm a, tihlâwm a tum ta a. Sekema chuan a pa hnênah, “Nula hi mi neihsak rawh,” a ti ta tlut tlut a. Jakoba chuan a fanu Dinaii chu Sekeman a lo tibawrhbâng tih a lo hria a, a fate kha ramhnuaiah ran rual nên an awm lai a ni a; an lo haw hma chu a ngawi mai a. Jakoba fanu dîl tûr chuan Sekema pa Hamora chu a lo kal a. Chutih lai chuan Jakoba fate chu ram aṭangin an lo haw a, chanchin an han hriat chuan an so sa phut a, an thin a ur ta êm êm a. Sekeman Jakoba fanu a lo pâwngsual mai chu Israel-te zîngah tih thiang lo a ni a, ngawihpui mai mai chi a ni lo. Hamora chuan an hnênah, “Ka fapa Sekema chuan in fanu hi duh tak têin a duh tlat a ni. Khawngaih takin neihtîr hrâm teh u. Inneih pawlh ila a ṭha ang. In fanute min neihtîr ula, kan fanute nei bawk ang che u. Tichuan, kan awm ho thei ang a, in duhna lai laiah in awm thei ang a, in duh angin in khawsa ang a, rante in nei thei dâwn nia,” a ti a. Nula pa leh a nuṭate hnênah Sekema chuan, “Min khawngaih teh u, in phût ang ang ka ti ang e. A man chu eng zât pawh min dîl ula, ka pe zêl ang che u, min neihtîr hrâm teh u,” a ti a. Jakoba fate chuan an farnu a tihbawrhbân avâng chuan Sekema leh a pa chu fing takin an chhâng a. “Kan remti thei lo; serh tan loh kan farnu kan neihtîr chuan kan tan thil zahthlâk a ni ang. Keimahni anga mipa zawng zawng serh in tan ve vek erawh chuan kan neihtîr thei ang che u. Tichuan, kan fanute in nei thei ang a, in fanute kan nei thei bawk ang a, in zîngah awmin laichîn unau kan ni thei ang. Serh in tan duh loh chuan kan farnu chu kan hruai ang a, kan kal daih ang,” an ti a. Hamora leh a fapa chuan an thil phût chu âwm an ti hle a. Jakoba fanu chu a duh êm kher a, tlangvâl chuan an thu chu a bawh zui ta chung chung a; a chipuite chuan ani chu an ngaisâng hle a ni. Hamora leh a fapa Sekema chu kulh kawngkaa khaw hotute hnênah chuan an kal a, an khaw mite hnênah chuan, “Hêngho hi nêlawm tak an ni. Ram hi kan thâwl bawk a, awm ve sela, an duh duhin sumdâwng teh se. An fanute nupuiah kan nei ang a, kan fanute pawh nupuiah nei ve rawh se. Hêng mite hian kan zînga awmin laichîn unau kan nih theih nân thil pakhat chauh an tih anga kan mipa zawng zawng serh tan an phût tlat a ni. An ran neih zozai, an sum leh pai, an sate nên hian kan ta a ni mai dâwn asin. Kan zînga an awm ve duh nân an phût ang chu i ti mai ang u,” an ti a. Hamora leh a fapa Sekema thu chu mi pangngai chin chuan rem an ti a, an zînga mipa pangngai chin chuan serh an tan ta vek a. A ni thum ni, a nat zual lai tak chuan Dinaii nuṭa Simeona leh Levia, Jakoba fapa pahnih chuan an khandaih an keng a, tu ma lo dan lohvin khuaah chuan an lût a, mipa zawng zawng chu an râwt ta vek a. Hamora leh a fapa Sekema pawh an sât hlum a, Sekema in aṭang chuan Dinaii chu an la chhuak a, an hâwn ta a. Jakoba fa dangte chuan an mi thahte an va hmuh chuan khua chu an suam ta a, an farnu tihbawrhbân man phuba an la a. An berâm te, bâwng te, sabengtung te, khaw chhûng leh pâwna an thil neih zawng zawng, an sum leh pai zawng zawng chu, an fate leh an nupuite nên an man a, an in chhûnga awm zawng zawng pawh an lâksak a. Jakoba chuan Simeona leh Levia hnênah, “He rama chêng Kanan mite leh Periz mite tana hnawksakah min siam a, mi timangang hle a ni. Kan tlêm si a, min rawn bei sela kan mi zawng zawngte nên hian min nuai bo ang asin,” a ti a. Anni chuan, “Kan farnu hi mihur anga lo sawisak tûr em ni?” tiin an chhâng a. Pathianin Jakoba hnênah, “Bethel-ah kal la, han awm rawh. I u Esauva i tlânbosan laia i hnêna inlâr Pathian kha maichâm siamsak ang che,” a ti a. Jakoba chuan a chhûngte leh an zînga awm zawng zawng chu a hrilh a. “Pathian dang lim in kawlte chu paih bo rawh u. Inthian thianghlim ula, silhfên thar inbel ang che u. Bethel-ah kan kal dâwn a, ka mangan laia min ngaihventu Pathian tân maichâm ka siam dâwn a ni; ani chuan ka kalna apiangah min awmpui ṭhîn,” a ti a. An zînga pathian dang lim awm zawng zawng chu Jakoba an pe a, an bengbehte pawh an pe a; Sekem sasaw thing hnuaiah an phûm a. An chhuak ta a, chûng lai hmuna awmte chu hlauhna nasa takin a man a, Jakoba hote chu an ûmzui ngam lo. Jakoba chuan Kanan ram Luz khua tih ṭhin Bethel chu a mite nên chuan an thleng ta a. Tah chuan maichâm a siam a, a u a tlân bosan laia chumi hmuna a hnêna Pathian a rawn inlâr avângin chu hmun chu El-bethel a vuah a. Tin, Rakili awmtu Debori chu a thi a, Bethel chuan hnuai sasaw bulah an phûm a, chu hmun chu Alon-bakut an vuah a. Padan-aram aṭanga Jakoba a lo hâwn khân a hnênah Pathian a inlâr a, mal a sâwm a. Pathian chuan a hnênah: “I hming Jakoba a ni a, Jakoba ka ti tawh lo vang che, I hming chu Israela a ni tawh ang,” a ti a. Chuvângin, Israela tih a ni ta a. Pathian chuan a hnênah: “El-Sadaia ka ni, I chi ṭha sela, pung duah duah ang che, Hnam, pung khâwm tih tham zet I thlah dâwn a ni. I ṭhâlbe aṭang tein lalte an lo chhuak ang. Abrahama leh Isaka ka pêk ram chu Tûnah ka pe a che, I thlah lo la awm tûrte tân He ram hi ka pe che a ni,” a ti a. A biakna hmun ata chu Pathian chuan a kalsan a. Jakoba chuan Pathianin a biakna hmunah chuan lung a phun a, inthawina uain a bun a, hriak a leih a. Pathianin a rawn biakna hmun chu Jakoba chuan Bethel a vuah a. Bethel aṭang chuan an chhuak a, Efratha khaw thlen hma deuh chuan Rakili chuan nau a vei a, a na hle a. A nau vei nat vânglai chuan nau chhartu chuan, “Thlaphâng suh, fapa i nei leh dâwn e,” a ti a. A thi a ni ta mai a, a ṭawng hnuhnûngah a fa hmingah chuan Benoni a ti a. A pa erawh chuan a hmingah Benjamina a sa a. Rakili chu a thi ta a, Efratha khaw kawngah chuan an phûm a, Efratha chu Bethlehem an tih tâk hi a ni. A thlânah chuan Jakoban hriatrengna lung a phun a, chu chu tûn thlengin Rakili thlânah chuan a la awm a ni. Israela chu a kal zêl a, Mig-dal-eder piahah bûk a khuar a, heta a awm lai hian Reubenan a pa hmei Bilhaii a lo mutpui a, Israela chuan chu chu a hria. Jakoba chuan fapa sâwm leh pahnih a nei a. Leaii hrinte: Jakoba fa u ber chu Reubena a ni a; a dawttu chu Simona te, Levia te, Juda te, Isakara leh Zebuluna te an ni. Rakili hrinte: Josefa leh Benjamina. Rakili bawih Bilhaii hrinte: Dana leh Naftalia. Leaii bawih Zilpaii hrinte: Gada leh Asera. Khîng khi Jakoba fa, Padan-aram-a a awm laia piangte chu an ni. Kiriat-arba, Hebron an tih tâk rama Mamre khua, a pa Isaka awmna chu, Jakoba chuan a thleng ta a. Chu hmun chu a ni Abrahama leh Isaka mikhualna hmun chu. Isaka chu kum za leh sawmriata upa a ni a. A hnuk a chat a, tarkûn khûp bihin a thi ta a; a laichînte hnênah hruai a ni a. A fapa Esauva leh Jakoba chuan an phûm a. Hei hi Esauva thlahte chanchin chhuina a ni; ani hi Edoma tih a ni bawk. Esauva chuan hêng Kanan hmeichhiate hi nupuiah a nei a: Hit mi Elona fanu Adaii te, Hiv mi Zibeona fapa Ana fanu, Oholibami te, Ismaela fanu Nebaiota farnu Basemathi te hi. Adaii chuan Esauva chu fapa Elifaza a hrinsak a; Basemathiin Reuela a hring a; Oholibami chuan Jeusa te, Jalama te, Kora te a hring a. Khîng khi Esauva fapa, Kanan rama piangte chu an ni. Esauva chuan a nupui te, a fanu leh fapa te, an chhûng zînga awm ve zawng zawng te, a ran vulh, ran chi hrang hrang te, Kanan rama sum leh pai a neih tâk te chu chhawmin, a nau Jakoba dîp lo tûrin, Seir tlângramah a pêm ta a. An neihnun dun tâk êm avângin an awm ho hlei thei tawh lo a ni, an mikhualna ram chuan an ran tlatna tûr a daih tawh ngang lo. Tichuan, Esauva chu Seir tlângramah chuan a awm ta a. Esauva chu Edoma tih a ni bawk. Seir tlângrama Edom-ho thlahtu Esauva thlahte chanchin chu hetiang hi a ni: Hêng hi Esauva fate chu an ni; Elifaza, Esauva nupui Adaii hrin; Reuela, Esauva nupui Basemathi hrin. Elifaza chuan fapa - Temana te, Omara te, Zefoa te, Gatama te, Kenaza te a nei a. Esauva fa Elifaza chuan hmei, Timnai a nei a; chu chuan Elifaza chu fapa Amaleka a hrinsak a. Chûng chu Esauva nupui Adaii thlahte chu an ni. Hêng hi Reuela fate chu an ni: Nahata te, Zera te, Sama te, Miza te: chûng chu Esauva nupui Basemathi thlahte chu an ni. Esauva nupui Oholibami, Zibeona fapa Ana fanu chuan Esauva chu fapa pathum - Jeusa te, Jalama te, Kora te a hrinsak a. Esauva thlah chi hrang hrangte chu hêng hi an ni: Esauva fa tîr Elifaza thlahte: Teman-ho te, Omar-ho te, Zefo-ho te, Kenaz-ho te, Kora-ho te, Gatam-ho te leh Amalek-ho te hi an ni. Khîng khi Elifaza chi, Edom rama awm, Adaii thlahte an ni. Esauva fa Reuela thlahte chu hêng hi an ni: Nahat-ho te, Zera-ho te, Sama-ho te leh Miza-ho te; khîng khi Reuela chi Edom rama awm, Esauva nupui Basemathi thlahte chu an ni. Esauva nupui Oholibami thlahte chu hênghote hi an ni: Jeusa chi te, Jalam chi te, Zera chi te, khîngho khi Ana fanu Oholibami, Esauva nupui thlahte an ni. Chûng chu Esauva, Edoma an tih bawk, thlah chi hrang hrang hmingte chu a ni. He rama lo awm sa Hor mi, Seira thlahte chu hêng hi an ni: Lotana te, Sobala te, Zibeona te, Ana te, Disona te, Ezera te, Disana te, Edom rama Hor hnam Seira thlahte chu khîngte khi an ni. Lotana fate chu Hora leh Hemana an ni. Lotana chuan farnu Timnai a nei bawk. Sobalan fa hêngte hi a nei: Alvana te, Manahata te, Ebala te, Zefoa te, Onama te. Zibeonan fapa pahnih Aia leh Ana a nei. Ana hi a ni, a pa Zibeona sabengtung thlaha thlalêra tuihna hmu chhuaktu chu. Ana chuan fapa Disona leh fanu Oholibami a nei. Disona chuan fapa Hemdana te, Esbana te, Ithrana te, Kherana te a nei a. Ezera chuan fapa pathum Bilhana te, Zavana te, Akana te a nei a. Disana chuan fapa - Uza leh Arana a nei a. Lotana chi te, Sobal chi te, Zibeon chi te, Ana chi te, Dison chi te, Ezer chi te, Disan chi te hi Hor hnam an ni. Seir rama Hor hnam awmte chu a chi chiin khîngte khi an ni. Israel rama lal an awm hmain hêngte hi Edom rama lal awm tawhte chu an ni. Beora fapa Bela chu Edom ram lalah a ṭang a, a khawpui hming chu Dinhaba a ni. Bela a thih chuan Bozra khaw mi Zera fapa Jobaba chuan a ai a awh a. Jobaba a thih chuan Teman-ho rama mi Husaman a ai a awh a. Husama a han thih ve chuan Bedada fapa Hadada chu a aiawhin a lal a, ani hi Moab rama Midian-ho hnehtu kha a ni; a khawpui hming chu Avit a ni. Hadada a thih chuan Masreka mi Samlaa chu a aiawhin a lal a. Samlaa a thih chuan Rehobot khaw awmna Luipui an tih aṭanga lo kal Saula chuan a ai a rawn awh a. Saula a thih chuan Akbora fapa Baal-hanana chu a aiawhin a lal a, a khawpui hming chu Pau a ni. A nupui chu Mehetabeli a ni a, Mezahaba fa Matredi fanu a ni. Hêng chi, Timna chi te, Alva chi te, Jethet chi te, Oholibam chi te, Ela chi te, Pinon chi te, Kenaz chi te, Teman chi te, Mibzar chi te, Magdiel chi te, Iram chi te hi Esauva thlahte an ni. An awmna bial chuan a awmte chi hming chu a pu ṭheuh zêl a. Chûng chu Esauva thlah, Edom mi, Edom rama chêngte chu an ni. Jakoba chu a pa mikhualna ram, Kanan ramah chuan a awm ta a. Hei hi Jakoba chhûngte chanchin chu a ni. Kum sâwm leh pasarih a tlinin Josefa chuan a ute berâm vênpuiin a pa hmei Bilhaii leh Zilpaii fate chu a zui ve ṭhîn a, an chanchin ṭha lo a pa hnênah a rawn thlen a. Israela chuan Josefa chu a tar lam fa a nih avângin a fa dang zawng aiin a duat zâwk a; kawrfual mawi tak a ṭhuisak a. An pa chuan a fa dang zawng zawng aiin ani chu a ngaina zâwk tih a ute chuan an hriatin an haw ta êm êm a, ṭawng ṭha pawhin an be duh ta lo hial a. Vawi khat chu Josefa chuan mumang a nei a, a ute chu a hrilh a, chumi avâng chuan an haw zual sauh va. An hnênah chuan, “Ka mumang hi lo ngaithla teh u. Lovah buhphal kan lo têl a, ka buhphal têl chu a ding hlut a, in buhphal têlte chuan an rawn din hual a, chibai bûkin zu rawn kûn a!” a ti a. A ute chuan, “Nang tehchai hian kan chungah ro i rêl ang maw? Kan hotu i ni vei ang maw?” an ti a; a mumang a sawi chu an huat lehzualna chhan a ni. Mumang dang a nei leh a, a ute chu a hrilh leh bawk a: “Ngai teh u, mumang dang ka nei leh asin. Tûn ṭuma ka mumangah chuan ni te, thla te leh arsi sâwm leh pakhatte khi ka hmaah lo zu kûn a!” a ti a. A pa pawh a hrilh a, ani chuan a lo zilh a, “I mumang hi engtihna nge ni ngai! Kei leh i nu te, i ute hi i hmaah lei siin kan la kûn ang maw!” a ti a. A ûte chu a chungah an lungni lo hle a, a pa erawh chuan a ngaihtuah neuh neuh ṭhîn a. Ni khat chu a ute chuan an pa berâm Sekem-ah an va thlah a. Israela chuan Josefa hnênah, “I uten Sekem-ah berâm an thlah kha. Ti teh, an hnênah ka tîr teh ang che,” a ti a. Ani chuan, “Mi tîr ta che,” a ti a. “Kal ta la, i ute leh an berâmte chu eng angin nge an awm va chian la, min rawn hrilh leh ang che,” a ti a. Hebron ruam aṭang chuan a tîr chhuak a, Sekem lam chu a pan ta a. Phûla a tei a tei lai chuan mi pakhat a lo kal a, “Eng nge i zawn?” a ti a. Ani chuan, “Ka ute ka zawng a ni, Khawiah nge berâm an thlah i hre lo maw?” a ti a. Ani chuan, “Heta ṭanga an insawn dâwn khân, ‘Dothan lamah i kal ang u,’ an ti ni âwmin ka hria e,” a ti a. Tichuan, Josefa chuan a ute chu a ûmzui a, Dathan-ah chuan a va ûm phâk a. Hla fea a la awm laiin a ute chuan an lo hmu a, a lo thlen hnaih hma chuan tihhlum zai an lo rêl a. “En teh u, mumang neia a lo kal saw. Engah nge kan thah mai loh vâng? Khurah kan paih ang a, sa-in a seh a ni kan ti mai tûr alâwm. A mumang kha eng meuh nge a nih phah dâwn kan hre mai ang,” an inti a. Chu chu Reubenan a lo hria a, an kut ata chhan chhuah a tum a, “A thah zawng i that êm lo vang u. Thisen zawng chhuah teh suh u. Saw lai thlalêra khurah sâwn i thlâk mai ang u. Nangni meuh chuan kut thlâk lo hrâm teh u,” a ti a; an kut ata chhan chhuaha, an pa hnêna hawtîr a tum rilru a ni. Josefa a lo thlen chuan a ute chuan a kawr hâk lai, a kawrfual mawi takte nên chuan an hlihsak a, an man a, khurah an thlâk ta a. Khurah chuan eng mah a awm lo, tui tlêm pawh a awm hauh lo. Tin, chaw an fâk lai chuan an han thlîr a, Ismael-ho, sanghâwngsei rual nên, Gilead aṭanga lo kal an hmu a, beraw te, thinghnai damdawi te, Mura te an phur a, Aigupta ramah an chhukpui dâwn a ni. Juda chuan a unaute hnênah, “Kan nau hi i that lo vang u, kan thah a nih thu zêp bo thei pawh ni ila eng nge kan tân hlâwkna? Ti rawh u, Ismael-ho hnênah i hralh mai ang u. Keimahni êm chuan kan nau, kan thisen zawmpui ngei chungah zawng kut i thlâk lo vang u,” a ti a. An unauza chuan an remti tlâng ta a. Chutih chhûng chuan Midian sumdâwng rual an lo kal a. Khur aṭang chuan Josefa chu an khai chhuak a, Ismael mite hnênah tangka sawmhnihin an hralh a. Josefa chu Aigupta ramah an hruai thla ta a. Reubena chu khurah chuan a va kal a, Josefa chu a lo awm tawh si lo va, a puan a pawtthlêr a, a unaute hnênah chuan a lo kîr a, “Ka nau a bo ta, engtin nge kan tih tâk ang?” a ti a. Josefa kawrfual mawi chu an la a, kêltê an talh a, a kawr chu thisenah chuan an hnim a. Kawrfual chu an pa hnênah an hâwn a, “Hei hi kan chhar ngawt a, i fapa kawr kha a ni nge ni lo en chiang teh,” an ti a. A lo hre mai a, “Ka fapa kawr zu nia le! Ramsain a seh a ni phawt ang. Josefa hi ramsa kutah a thi ta a nih hi,” a ti a. Jakoba chuan a puan a pawtthlêr a, saiip a vêng a, ni rei tak chhûng a fapa chu a sûn a. A fapa leh a fanu zawng zawng chuan hnem an tum a; mahse, hnem rual a ni lo. “Hnem mi ka ni lo, lusûnin Seol-ah ka fa hnênah ka liam dâwn e,” a ti a. Chutiang chuan a pa chu amah ngaiin a ṭap ṭhîn a. Chutih chhûng chuan Midian-ho khân Josefa chu Aigupta ramah an kalpui a, Farawa hmaa milian Potifara hnênah an hralh a. Ani chu vêngtu pâwla hotu ber a ni. Chutih lai vêl chuan Juda chuan a unaute chu a kalsan a, mi pakhat, Adulam mi Hira chu a zu kawp a. Juda chuan Sua fanu nula chu a hmu a, nupuiah a nei ta a. Nau a pai a, fapa a hrinsak a, a hmingah Era a sa a. Nau a pai leh a, fapa a hring a, a nu chuan a hmingah Onana a sa a. Fa dang a hring leh a, a hmingah Sela a sa a; chu mi pian lai chuan Juda chu Khezib khuaah a awm a. Juda chuan a fa tîr Era chu nupui Tamari a neihsak a. Juda fa tîr Era chu Lalpa hmuhin a sual hle a, Lalpa chuan a tihlum ta a. Juda chuan Onana hnênah, “I u nupui hi pâwl teh, pasalte nau tih tûr chu tihsak la, i u tân chi thlahsak rawh,” a ti a. Onana chuan chi thlah tûr chu ama fa a ni dâwn lo tih a hria a; a u nupui a pâwl apiangin a u tân chi a thlahsak lohna tûrin a chi chu leiah a titla ṭhîn a. A thiltih chu Lalpa ṭha tih loh zâwng tak a ni a, a tihlum ve ta mai a. Juda chuan a monu Tamari hnênah, “Ka fapa Sela hi a puitlin hma chu in in lamah pasal nei lovin va awm tawh,” a ti a; Sela pawh chu a ûte angin a thi ve mai ang tih a hlau a ni. Tamari chu a pate in lamah chuan a haw ta a. Rei fe hnuah chuan Sua fanu, Juda nupui chu a thi a. Lusûn hun bi a ral hnu chuan a ṭhianpa Adulam mi Hira nên chuan Timna khuaah berâm hmul mêt tûrin an chho va. Miin Tamari chu, “I pasala pa chu berâm hmul mêt tûrin Timna khuaah a lo chho dâwn,” tiin an hrilh a. A lusûn thawmhnaw chu a hlîp a, a hmêl hriat theih loh tûrin hmai khuhnain a intuam tlat a, Timna khaw kawnga kulh kawngah chuan a lo ṭhu a; Sela chu a puitling tawh si a, a pa chuan nupuiah a neihtîr lo zo ta a ni tih a hria a ni. Juda chuan ani chu a hmu a, a hmai a khuh tlat avângin nawhchizuar emaw a ti a: kawng sîra a ṭhu chu a pan a, “Ti teh, i mu dûn ang,” a ti a, a monu kha a ni tih reng a hre lo. “Min mutpui manah eng nge min pêk ang?” a ti a. “Ka ran rual zînga kêl notê ka pe ang che,” a ti a. Ani chuan a chhâng a, “Min rawn pêk hmain eng emaw hrên tûr dahkham i nei tûr a ni,” a ti a. “Eng nge dahkham ka pêk ang che?” a ti a. Ani chuan, “I hming nemna awrh leh i tiang kha le,” a ti a. Chûng chu a pe a, a mutpui a, nau a pai ta a. Tin, a tho va, a inkhuhna puan chu a hlîp a, a lusûn thuamhnaw chu a inbel leh ta a. Juda chuan a dahkham la kîr tûrin a ṭhian Adulam mi Hira chu kêltê kengin hmeichhe hnênah chuan a tîr a; a va hmu zo lo va. Chuta mite hnênah chuan, “Enaim kawng sîra hmeichhe inkhuh awm ṭhîn kha khaw nge a awm tâk?” a ti a. Anni chuan, “Chutiang hmeichhia hetah an awm ngai lo,” an ti a. Juda hnênah chuan a lo kîr a, “Ka hmu zo hauh lo mai. Khuaa mite pawh ka zâwt a, ‘chutiang hmeichhe inkhuh ṭhîn an awm ngai lo,’ an ti asin,” a ti a. Juda chuan, “Kan dahkham chu nei hlen mai rawh se; mi nuihzatbûr kan ni mai dâwn alâwm. Ka tiam angin kêltê chu kei chuan ka pe ngei a, ani chu i va hmu si lo va le,” a ti a. Thla thum vêl hnuah chuan Juda chu, “I monu Tamari chuan tlangvâl a nei a, sâwn a pai asin,” tiin an hrilh a. “Kai chhuak ula, hâl hlum rawh u,” a ti khu khu a. An kaih chhuah lai chuan a pasala pa hnênah Tamari chuan, “Hêng neitu fa hi a ni ka pai; hêng hming nemna awrh leh tiangte hi tu ta nge lo en teh se,” tiin mi a tîr a. Juda chuan a lo hre mai a, “Kei aiin thil a tidik zâwk a ni; ka fapa Sela hi ka neihtîr ta si lo va,” a ti a. Ani chu a pâwl leh ngai tawh lo. Nau hrin a lo hun chuan phîr a pai a lo ni a. A han hrin dâwn chuan pakhat bân a lo lang a, nau chhartu chuan bân lo lang chu piang hmasa tih hriat nân la sen a buntîr a. A bân chu a pil leh a, a pakhat zâwk chu a lo chhuak ta a. Nau chhartu chuan, “Nangma thuin i lo chhuak ta mai a ni maw,” a ti a, a hmingah Pereza a sa a. La sen bun zâwk pawh chu a lo piang a, a hmingah Zera a sa a. Josefa chu Ismael-ho chuan Aigupta ramah an hruai chhuk a, Aigupta mi, mi pakhat, Farawa hnuaia milian, vêngtu hotu Potifara hnênah an hralh a. Lalpa chuan a awmpui avângin Josefa chu a hmuingîl hle zêl a; a pu, Aigupta mi chuan, in chhûng lam hna a thawhtîr a. Lalpa chuan a awmpui a, a thiltih apiangah a hlawhtling zêl tih a pu chuan a hmu a. A duh hle a, amah viltu bîkah a ruat a. An chhûngkaw enkawltu leh a neih zawng zawng kawltua a dah chinah, Josefa avângin Lalpa chuan Aigupta mi chhûngkua chu mal a sâwm a, a neih zawng zawngah, in lam leh ram lamah, Lalpa malsâwmna chu a dawng a. A neih zawng zawng chu Josefa kutah a dah vek a, ani a awm phawt chuan eng mah a ngaihtuah lo, a ei tûr bîk tih chauh lo chu. Josefa chu tlangvâl tlâwntlai ṭha deuh, hmêlṭha tak a ni a. Nakin deuhvah chuan a pu nupui chuan Josefa chu a ngaizâwng a, mutpuiah a thlêm ta a. Ani chu a ṭang a, a pu nupui hnênah chuan, “Kei ka awm phawt chuan ka pu hian in chhûng lam thil eng mah a ngaihtuah lo; a neih zawng zawng min kawltîr vek a ni. He in chhûngah hian kei aiin thu a nei chuang lo; nang, a nupui tih chauh lo hi chu ka tân ui pawh eng mah a nei lo. Chuvângin, Pathian lakah hetiang thil sual hi engtin nge ka tih theih ang?” a ti a. Ni tin a thlêm ngut ngut a; mahse, a duh lo tlat a, a bul hnaia awm pawh a duh lo. Ni khat chu in chhûngah hna thawk tûrin a lût a, chhiahhlawh tu mah in chhûnga an awm loh lai a ni. A puanah chuan a lo man a, “Ti rawh, i mu dûn ang,” a ti a; mahse, a tlân chhuahsan ta a, a puan erawh chu a kutah chuan a tlânsan a. A tlân chhuak a, a puan a tlânsan tih a hriat chuan, chhiahhlawhte chu a au ta chiam a, “En teh u, Hebrai mi, mi timualpho tûr a rawn hruai lût a lo nih hi. Min mutpui tumin khum pindanah a lo lût a; mahse, theih tâwkin ka au va, puan pawh chuh lovin a tlân ta a ni,” a ti a. Josefa pu a lo haw hma chuan puan chu a kawl a. A hnênah, “Hebrai mi i rawn hawn khân min sual a tum a, a lo lût a. Mahse, ka au chiam a, a puan pawh chuh lovin a tlânchhe ta a ni,” tiin chanchin a lo hrilh a. ‘I bawihin chutin khatin min ti’ a tih a han hriat chuan Josefa pu chu a thinur ta hle a. Tichuan, Josefa chu a hruai a, lal lung in tâng dahna lung inah a tântîr ta a. Tân ina a awm pawh chu Lalpa chuan a awmpui a, a khawngaih a, tân in vêngtu chu a duhsaktîr a. Tân in vêngtu chuan lung in tâng zawng zawng enkawltuah a hmang a; tih tûr awm apiang a titu a ni ṭhîn. Lalpa chuan a awmpui avângin tân in vêngtu tân eng mah tih ve a ngai lo, a tih apiangah Lalpa chuan a tihmuingîl zêl a ni. Chûng thil hnuah chuan Aigupta lal no kengtu leh chhang siamtu chuan an pu Aigupta lal hmaah thil tih fel loh an nei a. Farawa chu a chhiahhlawh pahnih, no kengtu leh chhang siamtu chungah chuan a thin a ur hle a. Josefa tânna hmun, tâng vêngtu hotu awmnaah chuan anni chu an rawn tântîr a. Tâng vêngtu hotu chuan chûng mi pahnihte tirhkah atân Josefa chu a ruat a. Rei fe an tân hnu chuan Aigupta lal no kengtu leh chhang siamtute pahnih chuan zan khatah mumang awmze hrang nei an mang ve ve a. A tûk zînga Josefa a lo kal chuan an hmêl a lo ngui hle mai a. A pu, tâng vêngtu hotu ina tâng ve, Farawa miliante chu, “Engtizia nge vawiin chu in va ngui ve?” a ti a. “Mumang kan nei a, tu man min hrilh fiahsak thei lo va ni,” an ti a. Ani chuan, “Mumang hrilh fiahnate chu Pathian pêk alâwm, mi han hrilh teh u,” a ti a. No kengtu lu ber chuan Josefa hnênah, “Ka mumangah chuan grep hrui zâm hi ka hmu a. Pêng pathum a nei a, a kuhmûm chauh tih chuan a pâr parh a, a rah ta mai a, a rah bâwr chu a hmin a. Farawa no ka lo keng a, grep rah chu ka lo va, Farawa novah chuan ka sâwr a, Farawa kutah no chu lo zu pe ia,” a ti a. Josefa chuan, “A awmzia chu hetiang hi a ni. Pêng thum chu ni thum tihna a ni, ni thumah Farawa chuan i lu a chawikâng ang a, i hna ngai a thawhtîr leh ang che, a no kengtu i nih laia i tih ṭhin angin no chu Farawa i hlân dâwn a nih chu. I chan a ṭhat hunah chuan heta ka awm dân hi hre reng la, Farawa hnênah hemi aṭanga mi chhuah tûrin kamkhat talin mi han sawisak ang che. Hebrai mite ram aṭanga rûk bo ka ni a, tân ina dahna khawp thil sual eng mah tih ka nei bawk si lo,” a ti a. Chhang siamtu chuan ṭha takin mang chu a hrilh fiah tih a hria a, Josefa hnênah, “Ka mang ve chu, bâwm pathum ka lo chhîpchhuan a, a chung berah chuan Farawa ei tûr chhang tuihnai chi tinrêng a awm a. Ka chhîpchhuan lai chu savaten an rawn chu noh noh mai zu nia!” a ti a. Josefa chuan a chhâng a, “Hei hi a awmzia chu a ni: bâwm thum chu ni thum tihna a ni. Ni thum a nihin Farawa chuan i lu a tan ang a, i taksa chu thingah a khai ang a, savate chuan i sa chu an rawn tlân noh noh dâwn a nih chu,” a ti a. A ni thum ni chuan Farawa chuan a pian champha lâwmin a chhiahhlawh zawng zawng tân ruai a ṭheh a. A no kengtu leh chhang siamtu chu a hre chhuak a. No kengtu chu a no kengtuah a dah leh a, Farawa no a keng leh ta a. Chhang siamtu lal ber erawh chu Josefa sawi ang khân thingah a khai ta a. No kengtu lu ber chuan Josefa chu a ngaihsak ta awzâwng lo va, a theihnghilh hmin dêr a. Kum hnih hnuah chuan Faraw-an mumang a nei a. Nail lui kamah a lo ding a. Lui aṭang chuan bâwngpui pasarih, thau ṭha tak tak an lo chhuak a, lui kam rairuang hmunah chuan an tla ta a. An hnung maiah chuan bâwngpui pasarih chêr chhe êm êm an lo chhuak a, a hmasate bulah khân an lo ding a. Bâwng chêr chhe tak tak chuan bâwng thau tak tak chu an ei zo ta mai a. Farawa chu a ṭhangharh ta a. A han muhîl leh a, mang a nei zawm a: buh kûng khatah vui sarih, ṭha tak, bit deuh a lo awm a. A dawtah vui sarih, sîn tê tê, thli lum chhêm ro rim rem a lo awm bawk a. Buh vui pasarih, sîn tê tê chuan vui sarih, ṭha pui pui chu an ei zo ta mai a. Farawa chu a ṭhangharh a, a mumang a lo ni a. A tûk zîngah chuan Farawa chu a buai rilru hle a. Aigupta mi, arsi chhui thiam te leh mi fing zawng zawng chu a ko va. Farawa chuan a mang chu a hrilh a; mahse, tu man an hrilh fiah thei lo. No kengtu lu ber chuan Farawa chu a bia a, “Vawiin hian ka haihawtzia ka hriat chhuah chu. Vawi khat, Farawa chu a chhiahhlawh chungah a thinur a, vêngtu hotu ber awmnaah kei leh chhang siamtu kha min tântîr a. Zan khat chu kan pahnihin mumang kan nei ve ve a, a awmzia erawh chu a inang lo. Hebrai saltâng tlangvâl pakhat, vêngtu chhiahhlawh chu a awm ve a; kan mumang chu kan hrilh a, min hrilh fiahsak a. Min hrilh ang chiahin thil a lo awm ta a. Kei chu ka hna ngaiah min dah leh a, chhang siamtu erawh chu thingah khai a nih tâk kha,” a ti a. Farawa chuan Josefa chu a kohtîr ta nghâl a. Rip chhûng aṭangin an la chhuak vat a; a inmêt fai a, a silhfên a inthlâk a, Farawa hmaah a va inlan ta a. Farawa chuan Josefa hnênah, “Tu ma hrilh fiah theih loh mumang ka nei a ni; mahse, nang chuan i hriat veleh i hrilh fiah thei an ti che a ni,” a ti a. Josefa chuan Farawa chu a chhâng a, “Kei chuan thei lo ve; Pathian erawh chuan Farawa mumang chu dik takin a hrilh fiahsak ang,” a ti a. Farawa chuan Josefa hnênah, “Ka mumangah chuan Nail lui kamah ka lo ding a. Lui aṭang chuan bâwngpui pasarih, thau mûm ṭha tak tak an lo chhuak a, a kam rairuang hmunah chuan an tla a. An hnu lawkah chuan bâwngpui pasarih, berh êm êm, chêr chhe tak tak, thêp thin then hi an lo chhuak ve a - Aigupta ram zawng zawngah chutiang êma bâwng chêr chhia ka la hmu ngai lo. Bâwng chêr chhe êm êmte chuan bâwng thau tak lo chhuak hmasate chu an ei zo va. An ei zawh hnu pawh chuan a hma ang bawk khân an la thêp ta tho va: tu man a dangte kha an ei tih hriat tûr a ni lo. Tin, ka han harh ta a. Mumang ka neih lehah chuan buh kûng khatah vui sarih, lian tak tak leh pum ṭha tak tak ka hmu a. A dawtah buh vui pasarih, sîn tê tê, thli lum chhêm ro rim rem a lo chhuak leh a. Buh vui chhe tê tê chuan vui ṭha pui pui chu a lem zo ta maiin ka hmu a. Tin, arsi chhût thiam te ka hrilh a; mahse, tu mah hrilh fiah thei an awm lo,” a ti a. Josefa chuan Farawa hnênah, “Farawa mumang hi awmze thuhmun a ni. Pathianin a thil tih tûr Farawa hnênah a hrilh lâwk a nih hi. Bâwng thau tak tak pasarih kha kum sarih entîrna a ni, buh vui ṭha tak tak pasarih pawh kum sarih entîrna bawk a ni; mumang awmze thuhmun a ni. Bâwngpui chêr chhe tak tak rawn zuitu pawh chu kum sarih ṭâm tla tûr entîrna a ni. Chutiang bawkin buhvui sarih khawchhak thli chhêm ro, chhe tê tê kha kum sarih ṭâm tla tûr entîrna a ni. Farawa ka hrilh ang chiah khân Pathian chuan a thiltih tum Farawa hnênah a hrilh lâwk a ni. Kan hma kum sarih chhûng hian Aigupta ram zawng zawngah buh tawntawin a haw ang a; mahse, chu chu ṭâmpui mitthiin a zui ang a, tawntawa buh a haw lai kha an theihnghilh vek ang, ṭâm chuan ram chu a tichhia ang. Ramah ṭâm a nasat dâwn êm avângin buh tam lai hnuhma rêng rêng kha hmuh tûr a awm lo vang. Faraw-an awmze thuhmun mang a neih nawn hi Pathianin chu thil chu a nemnghet a, a rawn tithleng thuai dâwn tihna a ni. “Farawa chuan mi remhria leh fing zawng sela, Aigupta ram enkawltu atân siam rawh se. Farawa chuan hotute ruat sela, kum ṭhat kum, kum sarih chhûngin Aigupta ramah, buh chu hmun ngaa hmun khat chhûntîr sela. Kan hma kum sarih, kum ṭha tak lo awm tûr chhûng hian buh chu khawn khâwm sela, Farawa thupêkin buhte chu chhêk khâwm ni rawh se; khawpuia an la ei atân chhûn khâwm ni rawh se. Aigupta rama kum sarih ṭâm tla tûr atân chûng chu khêk ni rawh se, ṭam avânga ram pum a boral loh nân,” a ti a. Chûng thu chu Farawa leh a khâwnbâwlte chuan ṭha an tih zâwng tak a ni. Farawa chuan a hote hnênah, “Ani ang Pathian thlarau awmna hi kan hmu zo dâwn em ni?” a ti a. Farawa vêk chuan Josefa hnênah, “Pathianin hêng thil thleng tûr hi a hriattîr che a, nang anga thil hre thûk leh fing tu mah an awm lo vang. Ka ram enkawltu i ni ang a, ka mite chu i thu thuin an awm ang, thuneihnaa mi dawttu i ni ang,” a ti a. Farawa chuan Josefa hnênah heti hian a ti bawk: “Ngai teh, Aigupta ram zawng chunga hotu-ah ka siam tâk che hi,” a ti a. Farawa chuan a hming nemna zungbun chu a phawi a, Josefa chu a buntîr a. Puan zai sîn a sintîr a, rangkachak khaidiat a awrhtîr bawk a. A sakawrtawlailîr ṭha ber dawttuah a chuantîr a, a hmaah chuan, “Kiang ru,” tiin an au va. Chutiang chuan Aigupta ram chunga hotu-ah ruat a ni. Farawa chuan Josefa hnênah, “Farawa ni mah ila, i thu lo chuan Aigupta ram pumah tu mahin an kut an ke an lek tûr a ni lo,” a ti a. Farawa chuan a hmingah Zafenat-panea a vuah a, On khaw puithiam Potifara fanu Asenathi chu nupuiah a neihtîr a. Aigupta ram pumah Josefa chu an hre ta a. Josefa chu kum sawmthum a nihin Farawa hnuaiah a thawk ṭan a, Farawa bul aṭang chuan a chhuak a, Aigupta ram chu a fang chhuak a. Kum ṭhat kum sarih chhûng chuan buh tawntawin a haw a. Kum ṭhat kum sarih chhûnga thlai thar chi tinrêng chu a chhûng khâwm a, khawpuiahte chuan a chhêk a; khawpui tinah, a vêl lova buh haw chu, a chhêk zêl a. Josefa chuan buh tam tak, tuifinriat kama ṭiauvaivut anga tam a chhêk rui a, a tam êm avângin a zât pawh a chhiar sêng ta lo va. Ṭâm a tlâk hmain On khaw puithiam Potifara fanu Asenathi chuan Josefa chu fapa pahnih a hrinsak a. A fa tîr chu a hmingah Manasea a sa a, “Pathianin ka vânduaina leh ka nu leh pa min theihnghilhtîr ta a ni,” a tihna a ni. A fa pahnihna hmingah Efraima a sa a, “Ka hrehawm tuarna ramah Pathianin min tipung,” a tihna a ni. Aigupta rama buh tawntawa a haw hun chhûng chu a tâwp ta a, ṭam kum sarih chu Josefa sawi ang khân a inṭan ta a, ram tinah ṭâm a tla a, Aigupta ram zawng zawngah erawh chuan ei tûr a awm. Aigupta ram pumah pawh chuan an ṭam ve ta a. Farawa hnênah an kal a, ei tûr an dîl a. Farawa chuan Aigupta mite chu, “Josefa hnênah kal rawh u, a sawi ang apiang chu ti ang che u,” a ti zêl a. Ṭâm chu ram puma a tlâk tâk vek hnu chuan a buh chhêkna inte chu a hawng a, ṭâm chu Aigupta ramah chuan a nat êm avângin buh chu a leitîr a. Khawvêl pum puiah pawh an ṭâm nasat êm avângin Josefa hnênah ram tina mi an lo kal a, pûr an rawn chaw ṭhîn a ni. Jakoba chuan Aigupta ramah buh a awm tih a hriatin a fate hnênah, “Engati nge in inen mai mai. Aigupta ramah buh lei tûr a awm tih ka hria a ni; chhuk thla ula, tlêm azâwng tal zu lei rawh u; tichuan, rilṭâma thi lovin ṭâm hi kan tuar chhuak thei dâwn nia,” a ti a. Tichuan, Josefa u sâwmte chu Aigupta rama pûr chaw tûr chuan an kal ta a. Josefa pianpui, Benjamina erawh chu a ûte zîngah a pa chuan a kaltîr ve lo, tawh sual a tâwk palh hlauh ang tih a hlau a ni. Kanan ramah ṭâm a tlâk avângin pûr châwk tum mi dangte rual chuan Israela fate chu an kal ta a. Chu ram hotu ber chu Josefa a ni a, mi zawng zawng hnênah buh lei phalsak theitu a ni. Josefa ute chu an lo kal a, lei si-a kûnin chibai an bûk a. Anni a hmuh chuan Josefa chuan an hmêl a lo hre mai a; mahse, hnam dang angin a intilang a, ram takin a bia a, “Khawi lam mi nge in nih?” a ti a. “Kanan ram aṭangin pûr chaw tûra lo kal kan ni,” an ti a. Josefa chuan a unaute chu a hria a; a unaute erawh chuan a hmêl an hre ve lo. Josefa chuan an chungchâng mumanga a hmuh kha a hre chhuak a. Tichuan, an hnênah, “Enthlatute in ni ang. Ram dinhmun en thlithlai tûra lo kal in ni phawt mai,” a ti a. “Ni suh e, ka pu, i chhiahhlawhte hi pûr chaw tûr maia lo kal kan ni. Kan za hian mi pakhat fa kan ni a, mi hlauhawm kan ni lo, enthlatu kan ni awzâwng lo ve,” an ti a. “Ka awih lo, ram dinhmun en thlithlai tûra lo kal in nih hi maw,” a ti a. An ṭang hle a, “I chhiahhlawhte hi unau sâwm leh pahnih, mi pakhat hrin, Kanan ram mi kan ni. Kan tlum ber chu kan pa hnênah a awm a; pakhat erawh chu a awm tawh lo,” an ti a. Josefa chuan, “Ka sawi ang khân enthlatu zawng in nih ngei hi. Hetiang hian in thu a dik leh dik loh kan fiah ang. In tlum ber chu han hruai rawh u. In rawn hruai loh chuan, Farawa hming chhâlin ka sawi e, in haw leh tawh lo vang. In nau hruai tûrin in zînga pakhat intîr haw ula, mi dang chu tân inah ka khung ang che u. Chutiang chuan thu dik in sawi nge sawi lo fiah a ni ang. Chutilo chu, Farawa chhâlin ka sawi hi, enthlatu in lo ni ngei ang,” a ti a. Ni thum chhûng tân inah a tântîr a. A ni thum ni chuan Josefa chuan an hnênah, “Ka sawi ang khân ti ula, in him ang. Pathian ṭih mi tak ka nih hi. Thu dik sawi in nih chuan in zînga pakhat in zaa aiah hrên ni sela, mi dang chuan in chhûngte ei tûr nei lo tân, ei tûr phur haw ang che u. In nau tlum ber chu in rawn hruai ngei ngei tûr a ni; tichuan, in thu chu finfiah a ni ang a, in thi lo vang,” a ti a. Rem an ti ta a. “A va pawi êm! Kan nau avângin kan tuar ta a nih hi. Hrehawm a tih êm êm lai khân kan en mai mai a, khawngaih tûra min ngen ṭâwk ṭâwk lai khân kan ngaihsak hek lo. Chuvâng chu a nih hi he manganna hian mi a rawn tlâkbuak tâk ni,” an ti a. Reubena chuan, “In nau chungah thil dik lo ti suh u, ka ti che u a, in ngaithla lo va, a thisen mawh chu in phur ta a nih hi,” a ti a. Ṭawng lettute chu an inkâra an awm avângin Josefa chuan an thu sawi chu a lo hre reng tih an hre lo. An hmuh loh tûrin a hawi a, a ṭap a. Fel taka a ṭawng leh theih hnu chuan an zîng ata Simeona chu a thlang chhuak a, an hmuh lai chuan a phuar a. Josefa chuan an ipah buh dah khahsaka, an tangka pawh an ipa dah leh vek tûrin thu a pe a; kalkawnga an riah chaw tûr pawh a paitîr a. Chutiang chuan tih a ni ta a. An buh lei chu an sabengtungte chu an phurhtîr a, an haw ta a. An zînga pakhat chuan an zân riahnaah chuan sabengtung chaw pêk tumin a ip chu a han hawng a, a ip rawng bulah chuan a tangka chu a hmu a. “Tu-in emaw ka tangka mi pe kîr leh a ni, hei ka ipa hi a awm reng mai,” tiin a unaute chu a hrilh a. An hlauthâwng rilru hle a, khûr chungin “Pathianin engtizia nge kan chungah hetia a tih tâk le?” an ti a. Kanan rama an pa Jakoba hnên an thlen chuan an thil tawh zawng zawng chu an hrilh a. “Ram hotupa ber chuan min lo be ram hle a, ram enthlatuah min puh a. ‘Mi hlauhawm kan ni lo ve, enthlatu kan ni awzâwng lo, unau sâwm leh pahnih, pa pakhat hrin kan ni a; pakhat chu a awm tawh lo va, kan naupang ber erawh chu kan pa hnênah Kanan ramah a awm,’ kan ti a. Ram hotu ber chuan, ‘mi hlauhawm in ni lo tih heti hian kan hre thei ang; in zînga pakhat hnutchhiah ula, mi dang chuan in chhûng ei nei lote tân, eng emaw phur haw ang che u. In tlum ber nên in lo kîr leh hunah enthlatu in ni lo va, mi hlauhawm lah in ni hek lo tih kan hre thei ang; tin, in unau kan hrên chu ka chhuah ang a, in duh duhin in awm thei ang,’ a ti a ni,” an ti a. An ip an han phawrh chuan an tangka kha an ipah chuan a lo awm ṭheuh va. An tangka fûn an hmuh chuan an pa ho chuan an hlauthâwng hle mai a. An pa chuan, “Nangni hian ka fa zawng zawng min sûntîr a nih hi. Josefa chu a awm tawh lo va, Simeona a awm ta lo bawk a. Benjamina pawh min lâksak in tum leh zêl em ni? Kei hi a tuartu ber ka nih hi,” a ti a. Reubena chuan, “Ka rawn hruai kîr leh loh chuan ka fate pahnih hi i that mai dâwn nia. Ka kutah dah la, ka rawn hruai kîrsak leh ngei ang che,” a ti a. “Ka fapa hi in rual chuan a kal ve tûr a ni lo; a u a thi tawh a, amah chauh hi la dam chu a ni. In kalna tûrah tawh sual a tawh hlauh chuan kei lu ṭuak bum tawh hi lungngaiin thlânah min liamtîr dâwn a nih hi,” a ti a. Chumi ramah chuan ṭâm chu a na ta hle a. Aigupta ram aṭanga an buh zu phurh an ei zawh chuan an pa chuan, “Kal leh ta ula, buh zu lei leh rawh u,” a ti a. Juda chuan, “Mi chuan, ‘in nau in rawn hruai loh chuan ka hmaah lo lang tawh suh u,’ min ti a ni. Kan nau hi a kal ve i phal chuan kan zu kal ang a, buh chu kan rawn leisak mai ang che. I phal loh erawh chuan kan kal leh ngam lo va ni. Mi chuan, ‘in nau in rawn hruai loh chuan ka hmaah lo lang tawh suh u,’ min ti tlat a ni,” a ti a. “Engati nge min tihrehawm tûr rêng rênga ‘nau pakhat kan la nei,’ tia chu mi chu in hrilh kher kher le aw,” a ti a. “Kan chanchin leh kan chhûng chanchin min zâwt si a, chhân loh theih ni hek lo, ‘in nau chu han hruai ngei rawh u,’ a ti ang tih engtin nge kan hriat ang?” a ti a. Juda chuan a pa Israela hnênah, “Ka kutah naupang chu dah la; tu mah, nang emaw, keini emaw, i tute emaw thi lova kan dam khawchhuah theih nân kan zu kal leh mai ang e. A chungchângah a bul tumtu ka ni ang a, a mawh ka phur ang e, ka rawn hruai kîr lohva, i hmaa ka rawh thlen loh chuan min thiam lo kumkhua ang che. Kan muangchâng mai mai a ni, kal ta ila, vawi hnih lai kan vei hman tawh ang,” a ti a. An pa Israela chuan, “Chuti a nih si chuan heti hian ti rawh u: Chu mi hnêna pêk tûr chuan he rama thil ṭha ṭha hi in ipah khung ula, thinghnai damdawi te, khawizu tlêm te, beraw te, Mura te, khawkherh te leh theitê te kensak rawh u. Tangka pawh in ken lêt hnih keng ula, in ipa an dah kha in pe kîr tûr a ni, an tihsual palh a ni ang. In nau pawh chu hruai ula, chu mi hnênah chuan zu kal rawh u. El-Sadaian chu mi chu khawngaihtîr che u sela, in unaupa leh Benjamina pawh an lo haw phaltîr teh se. Ka fate chu ka chân a nih pawhin ka chân poh a ni ang chu,” a ti a. Tichuan, thilpêk tûrte chu an keng a, tangka pawh a lêt hnih an keng bawk a, Benjamina pawh an hruai a. Aigupta ramah chuan an chhuk a. Josefa hmaah chuan an va inlan a. Benjamina hruaia an lo kal a hmuh chuan, “Hêng mite hi ka inah hruai rawh, ran talh ula, chawchhûn ka eipui dâwn nia,” a in enkawltu hnênah chuan a ti a. Ani chuan a sawi ang chuan a ti a, anni chu a inah a hruai a. Josefa in lama an hruai ta chu an hlauthâwng hle a, “Kan kal hmasaka kan tangka ipa min dahsak leh vâng kha a ni phawt ang; min mana bawih atân kan rante nên min manna remchâng an zawng a ni ang,” an ti a. Josefa in enkawltu chu in luh dâwnah chuan an bia a, “Ka pu, buh lei tûrin vawi khat kan lo kal tawh a: kan zân riahna hmunah kan ip kan han hawng a, kan ip rawng bulah kan tangka kha a lo awm ṭheuh mai. Kan buh leina zât chiah vek kha a ni. Hei, chu chu kan rawn la kîr leh a. Buh leina tûr pawh tangka dang kan rawn keng asin. Kan ipah tu nge kan tangka kha dah kan hre lo a ni,” an ti a. “Chûng thil chu a fel vek alâwm, thlaphâng suh u. In Pathian, in pa Pathian chuan ro hlu a dahsak che u a nih chu. In buh leina chu ka dawng vek alâwm,” a ti a. Simeona pawh chu a rawn hruai chhuak nghâl a. Chu mi chuan Josefa inah a hruai lût a, an ke silna tûr tui a pe a, an ran ei tûr chaw a pe bawk a. Chhûna Josefa lo haw nghâkin thilpêk an kente chu inah an la lût a, chaw an ei ho dâwn tih an hre tawh a ni. Josefa a lo haw chuan thilpêk tûr an kente chu an pe a, lei siin chibai an bûk a. An chanchin a zâwt a, “In pa, tar tawh tak in sawi kha engtin nge a awm, a la ṭha zêl maw?” a ti a. “I chhiahhlawhte pa chu a dam a, la hrisêl tak a ni,” an ti a, zah takin a hmaah an kûn a. A nu fapa, a nau Benjamina chu a han hmuh chuan, “Hei hi em ni in tlum ber in sawi kha?” a ti a. “Mama, Pathianin khawngaih che rawh se,” a ti bawk a. Josefa chu a nau a han hmuh chuan a lung a chhia a, a ṭah a chhuak a, a tlân chhuak a, pindan dangah a kal a, a va ṭap a. A hmai a phih a, a lo chhuak leh chu a insûm thei tawh a ni. “Chaw ei siam rawh u,” a ti a. Ani chu a hrangin an eitîr a, anniho chu a hrangin an ei ho va, Aigupta mi, a ina chaw ei ṭhînte pawh chu a hrangin an ṭhu a. Aigupta mite chuan Hebrai mite nên chaw an ei ho thei lo a ni; Hebrai mite chu tenawm an ti êm êm a ni. A hmaah chûng mite chuan anniho chu a upat dân indawtin a naupang ber thlengin an ṭhuttîr thliah a; an inen a, mak an ti êm êm a. Dawhkân aṭang chuan ei tûr an rawn suahsak a, Benjamina chan chu mi dang chan lêt nga lai a ni. Josefa ho chuan ruai an ṭheh a, duh tâwkin uain an in ta a. Tin, Josefa chuan a in enkawltu hnênah, “Hêng mite ipah hian an phurh zawh tâwkin buh thun khat la, an pawisa pawh an ipah dahsak ṭheuh ang che, ka tangkaraw no kha, an naupang ber ipah, ama tangka nên dah bawk ang che,” a ti a. Josefa thupêk ang chuan a ti a. Khua a vâr veleh an rante nên an chhuahtîr a. Khua aṭanga thui an kal hmain Josefa chuan a in enkawltu hnênah, “Tho la, khâng mite kha va ûm rawh. I ûm phâk hunah, ‘Engtizia nge thil ṭha thil suala in rulh le, ka pu uain inna no, aien nâna a hman ṭhin asin in lâk kha; thil tenawm tak in ti a ni,’ va ti ang che,” a ti a. A va ûm phâk a, chutiang chuan a va ti a. Anni chuan, “Ka pu hian engtiziaa chutia rawn ti mai nge maw i nih le? I chhiahhlawhte hian chutiang chu kan ti teuh hlei nêm. Kan ipa tangka kan hmuh pawh kan ram aṭangin kan rawn keng vang vang a nih kha. I pu tangka emaw, rangkachak emaw han ru âwm kan ni nêm. I chhiahhlawhte zîngah chutiang lo titu kan awm a nih chuan tihhlum ni rawh se. Chu mai chu ni lovin, ka pu, i bawihah kan ṭang vek ang,” an ti a. “In thil sawi chu a âwm hle a; amaherawhchu, no latu chauh ka bawihah ṭang rawh se, mi dang chu in fihlîm vek ang,” a ti a. Mahni ip ṭheuh an hlâng thla a, a ṭâwnna chu an phelh sawk sawk a, A upa ber ip aṭangin a han zawng ṭan a, a naupang ber ip chu a zawng hnuhnûng ber a; no chu Benjamina ipah chuan a lo awm a. Chu veleh an silhfênte an pawtthlêr a, mahni phur an siam sawk sawk a, khawpui lamah an kîr leh ta a. Juda leh a unauten khua an luh chuan Josefa chu inah a la awm a. A hmaah chuan an bawkkhup a. Josefa chuan, “Thil in va han ti mak ve! Keini ang hi chuan aien kan thiam ang tih in hre na nge?” a lo ti a. Juda chuan a chhâng a, “Kan pu hnênah eng nge kan sawi tâk ang? I chhiahhlawhte thil sual tih tilangtu hi Pathian a lo ni e. Hei, ka pu, i bawihte kan nih tâk hi, i no latu mai ni lovin kan vai hian,” a ti a. “Chuti êm chu ni lo ve, ipa no an hmuhna chauh ka bawihah ka nei ang; mi dang chu in pa hnênah haw vang vang rawh u,” a ti a. Chu veleh Juda chuan Josefa chu a hnaih a, “Ka pu, khawngaih takin i chhiahhlawh hian ka pu Farawa tluka lal hnênah thu min sawitîr la, lo ngaithla hrâm teh. I chhiahhlawh hi ka pu chuan, ‘Pa in la nei em, unau dang in la nei em?’ tiin min zâwt a nih kha. Ka pu hnênah, ‘Upa tawh tak pa kan nei a, a upat lama a fapa, fa tlum ber pawh a la awm, a u erawh chu a thi tawh a; a nupui duat fa la dam chhun a nih avângin a ngai êm êm a ni,’ kan ti a. Nangin, ‘Han hruai thla rawh u, ka lo hmu duh e,’ i chhiahhlawhte hnênah i ti a. Ka pu, i hnênah, ‘Naupang chuan a pa a kalsan thei lo vang, a kalsan chuan a pa chu a thi mai ang,’ kan ti a. Mahse, nangin i chhiahhlawhte hnênah, ‘In nau tlum ber chu in rawn hruai loh chuan mi rawn hmu thei tawh lo vang,’ i ti miau si a. I chhiahhlawh, kan pa hnêna kan han thlen chuan, ka pu, chûng thu chu kan hrilh a. Nakin deuh hnuah kan pa chuan, ‘Kal ula, ei tûr zu lei leh rawh u,’ min ti a. ‘Kan kal a sâwt lo, kan tlum ber a tel ve erawh chuan kan kal mai ang; kan tlum ber tel lo chuan chu mi chu kan hmu thei dâwn lo a ni,’ kan ti a. I chhiahhlawh, kan pa chuan, kan hnênah, ‘Ka nupui khân fapa pahnih min hrinsak a, pakhat chu a awm ta lo va, ramsakawlhin an pawt sawm a ni ang ka ti ta a ni, vawiin thleng hian ka hmu leh tawh lo. He mi leh zêl hi zawng mi hruai bosak teh suh u, tawhsualte a tawh hlauh chuan lungngaiin kei putar hi mitthi khuaah min liamtîr dâwn a ni,’ a ti a. I chhiahhlawh, kan pa chuan, kan nau hi ngaih tak têin a ngai si a, a tel lova a hnêna kan kîr chuan, a tel ve lo tih a hriat veleh a thi mai ang, i chhiahhlawhte hian kan pa, i chhiahhlawh tar tawh tak chu lunglêngin mitthi khuaah kan liamtîr dâwn a ni. Chu lovah pawh, kan nau kan rawn hruai theih dân hetiang hi a ni; ka pa hnênah, ‘I hnêna ka rawn hruai kîr loh chuan i lakah thiam loh ka chang kumkhua ang,’ tiin mawhphurtuah ka insiam a ni. Chuvângin kei, i chhiahhlawh hi, kan nau aiah ka tâng mai zâwk ang e, ani chu a ute rualin haw rawh se. Ka nau tel lo hi chuan kan pa hnêna kîr leh thei ka ni lo. Ka pa chunga chhiatna thleng tûr min hmuhtîr lul suh,” a ti a. Josefa chu a ina awmte hmaah chuan a insûm zo ta ngang lo va, mi zawng zawng chu a chhuahtîr a. A unaute hnêna Josefa a insawi lai chuan tu mah an awm ve lo. A ṭap ta rawih a, Aigupta mite chuan an hre pha a, Farawa inah pawh an lo hria a. Josefa chuan a unaute hnênah, “Josefa kha ka ni alâwm. Ka pa a la dam maw,” a ti a. Mak an ti lutuk a, a unaute chuan chhân pawh an chhâng thei lo. Josefa chuan, “Lo hnai deuh teh u!” a ti a. An va hnaih deuh hnu chuan, In nau Josefa kha ka ni. Aigupta mite hnêna in hralh kha. In rilru mangang suh se, hetia min hralh avâng hian inthiam lo rilru hek suh u. Kan zavaia tân himna tûrin in hmaah Pathianin min tîr hmasa a lo nih hi. Ram pumah kum hnih chhûng kan ṭam tawh a, kum nga dang lei an let lo vang a, buh seng tûr a awm hek lo vang. Chuvângin, mak taka chhan tûr che uin Pathianin min lo tîr hmasa a ni; nangni leh in thlahte in mang lohna tûrin. Hetia min kaltîrtu hi nangni ni lovin Pathian a lo ni. Farawa tân pa angin min siam a, a chhûngkaw hotu ber Aigupta ram rorêltuah min siam a nih hi. “Ka pa hnênah chuan han kîr leh thuai ula, a hnênah, ‘I fapa Josefa chuan, Aigupta rama hotu-ah Pathianin mi dah hi, i tute leh i berâm te, i ran rual leh i neih zawng zawng nên ka bul hnaiah, Gosen ramah i awm dâwn nia. Ṭâm hian kum nga a la awh dâwn a, nang leh i chhûngte leh i ṭhuihruaiten eng mah tlâkchham an neih loh nân ka lo enkawl ang che u a ti,’ han ti rawh u. Nangmahni ngeiin min hmu a, ka nau Benjamin, hei min hmu a, in hnêna thusawitu, kei hi, Josefa ngei kha ka nih hi. Aigupta ramah dinhmun sâng takah ka din thu te, in thil hmuh te hi ka pa chu han hrilh ang che u. Kal thuai ula, ka pa chu hetah han hruai rawh u,” a ti a. Chutia a sawi zawh chuan a nau Benjamina chu a pawm a, a ṭap a, Benjamina pawh a ṭap a. A ute pawh a fâwp ṭheuh va, a ṭah khum zêl a. Chutia a tih zawh chuan thu an sawi tlâng thei ta a. Josefa unaute lo kal thu chu Farawa inah pawh an hre ta a. Farawa leh a upate chu an lâwm hle a. Farawa chuan Josefa hnênah, “I unaute chu hrilh rawh. Hetiang hian ti rawh se. An ran phurte chu siam sela, muangchâng lovin Kanan ramah kîr vat rawh se. In pa chu a chhûngte nên rawn hruai rawh se, hetah lo kîr leh sela, Aigupta rama ram ṭha ber laiah ka dah ang e, ram hausakna chu an tlân dâwn nia. Heti hian tihsak rawh: an fate, an nupuite leh in pa chuanna tûr Aigupta rama tawlailîrte hâwn sela, lo kîr leh rawh se. An thil neih dangte chu engto tehchiam suh se, Aigupta rama thil ṭha tinrêng an nei dâwn alâwm,” a ti a. Israela fate chuan chutiang chuan an ti a. Josefa chuan Farawa thupêk angin tawlailîr te, kalkawnga an riah chaw tûr te a pe a. An za chuan kawr thar a pe bawk a, Benjamina phei chu tangka sekel zathum leh inthlâkna tûr kawr panga a pe a. A pa tân Aigupta rama thil siam ṭha ber chi sabengtung phur sâwm leh buh te, chhang te leh ei tûr dang kalkawnga an riah chaw tûr sabengtungpui phur sâwm a thawn bawk a. Tichuan, a unaute chu a tîr haw a, “Kawngah va inmawhchhiat suh ang che u,” a ti a. Aigupta ram an chhuahsan a, an awmna Kanan ram chu an thleng a. “Josefa chu a la dam a, Aigupta ram pum puia rorêltu a ni,” tih an pa an han hrilh chuan a mit sulh a, a awih thei lo va. Josefa thu zawng zawng kha an han hrilh a, Josefan a chuanna tûr tawlailîr a rawn thawn te a han hmuh chuan a lo harh leh ta a. Israela chuan, “Ka fapa Josefa a la dam chu a tâwk e, ka thih hmain a hmêl hmu tûrin ka kal ngei tûr a ni,” a ti a. Israela chu a neih zawng zawng nên a chhuak a. Beer-seba a lo thleng a, hetah hian Pathian, a pa Isaka Pathian hnênah inthawina a hlân a. Zânah chuan Pathianin Israela chu inlârnaah a ko va, “Jakob, Jakob,” a rawn ti a. Ani chuan, “Eng nge ni?” a ti a. Pathian chuan, “I pa Pathian ka nih hi, Aigupta rama chhuk chu hreh suh; Aigupta-ah chuan ka kal thlâkpui ang che a, keimah ngeiin ka hruai kîr leh ang che. Josefa ngeiin a dawm hlum ang che,” a rawn ti a. Jakoba chuan Beer-seba chu a chhuahsan a, Israela fate chuan a chuanna tûra Farawa tawlailîr rawn thawnah chuan an pa Jakoba chu, an nupuite leh an fanaute nên an chuantîr a. An ran rualte chu an khalh a, Kanan rama an awm chhûnga an thil neih zawng zawng nên, Jakoba leh a thlahte chuan Aigupta ram chu an thleng ta a. A fapate, a tupate, a fanute, a tunute, a thlah zawng zawngte chu a rawn hruai vek a. Aigupta rama pêm, Israel mi, Jakoba leh a thlahte chu hêngte hi an ni: Jakoba fa tîr Reubena leh a fate chu: Hanoka, Palua, Hezrona leh Karmia. Simeona leh a fate chu: Jemuela, Jamina, Ohada, Jakina, Zohara, Kanan hmeichhe laka a hrin Saula te an ni. Levia fate chu: Gersona te, Kohata te, Meraria te hi an ni. Juda fate chu: Sela, Pereza, Zera; a fa upa Era leh Onana chu Kanan ramah an thi tawh. Pereza chuan fa Hezrona leh Hamula a nei. Isakara fate: Tola, Pua, Joba, Simrona. Zebuluna fate chu: Sereda, Elona, Jahleela. Chûngte chu Leaiin Padan-aram-a Jakoba a hrinsakte chu an ni; a fanu Dinaii nên, an vaiin sawmthum leh pathum an ni. Gada fate: Zefona, Hagia, Sunia, Ezbona, Eria, Arodia, Arelia. Asera fate: Imna, Isva, Isvia, Beria, an farnu Seri nên. Beria fate chu: Hebera, Malkiela. Chûng chu Labanan a fanu Leaii tân chhiahhlawha a pêk Zilpaiin Jakoba a hrinsakte chu an ni; an vaiin sâwm leh paruk an ni. Jakoba nupui Rakili fate: Josefa, Benjamina. Josefa chuan fa pahnih On puithiam Potifara fanu Asenathi hrinsak Manasea leh Efraima. Benjamina fate: Bela, Bekera, Asbela, Gera, Naamana, Ehia, Rosa, Mupima, Hupima, Arda, Hêng hi Rakili thlah, Jakoba fate chu an ni, an vaiin sâwm leh pali an ni. Dana fa: Husima. Naftalia fate: Jazeela, Gunia, Jezera, Silema. Hêng hi Labanan a fanu Rakili tân chhiahhlawh a pêk Bilhaiin Jakoba a hrinsakte chu an ni; an vaiin pasarih an ni. Jakoba ruala Aigupta rama pêm thlahte chu: ama fa ngei, an nupuite chhiar telin, mi sawmruk leh paruk an tling a ni. Aigupta rama Josefa fa pahnih leh Jakoba ho Aigupta rama pêm thla chu a lu nungin sawmsarih an ni. Jakoba chuan Juda chu Josefa hnênah Gosen rama lo kal hmasa tûrin a tîr a. Gosen ram an lo thlen chuan, Josefa chuan a tawlailîr a buatsaihtîr a, a pa Jakoba hmuak tûr chuan Gosen ramah chuan a kal ta a. A va hmuh veleh a pawm chawt a, rei fe a ṭap a. Israelan Josefa hnênah, “Nungdamin i la awm a, i hmêl ka hmu leh ta a, tûnah chuan duh leh thi tawh rawh i,” a ti a. Josefa chuan a pa leh a pa chhûngte hnênah chuan, “Ka kal ang a, Farawa ka va hrilh ang e. ‘Kanan rama awm ṭhîn ka unaute leh ka chhûngte chuan min rawn pan a, berâm vulh mi an ni a, ran vulh mi rêng an ni. Ani berâmte leh an ran rualte leh an neih zawng zawng pawh an rawn chhawm,’ ka va ti ang a. Faraw-an a koh che ua, in hna thawh ṭhinte a zawh hunah che u chuan ‘hmânlai aṭang tawhin tûn thlengin i chhiahhlawhte hi ran vulh mi kan ni, keini leh kan pate pawh,’ ti ang che u; tichuan, Gosen ramah a awmtîr dâwn che u nia, Aigupta miten berâmpute hi an ten êm êm a ni,” a ti a. Josefa chu a kal a, Farawa hnênah, “Ka pa leh ka unaute chu Kanan ram aṭangin an lo chhuk a, an berâm te, an ran rual te leh an neih zawng zawng nên Gosen ram an lo thleng ta,” tiin a hrilh a. A unaute panga a thlang chhuak a, Farawa hmaah chuan a hruai a. Farawa chuan, “Eng hnathawk ṭhîn nge in nih?” tiin a unaute chu a lo zâwt ta ngei a. Anni chuan, “I chhiahhlawhte hi berâm vêngtu kan ni ṭhîn, kan pate pawh chutiang mi chu an ni ṭhîn,” tiin Farawa chu an chhâng a. Farawa hnênah chuan hetiang hian an ti bawk a: “He ramah hian lo pêm kan duh a ni; ṭâm a nat êm avâng hian i chhiahhlawhte hian Kanan ramah kan ran peh tûr hnimhring kan hmu zo tawh lo va ni. Gosen ram vêlah hian kan lo awm min phalsak tûrin kan ngên a che,” an ti a. Farawa chuan Josefa hnênah, “I pa leh i unaute chuan an rawn pan che a. Aigupta ram chu a awm duai alâwm, ram ṭha berah i pa leh i unaute chu awmtîr rawh; Gosen bialah awm rawh se. An zînga fel fâl bîk i hriat chuan ka ran enkawltuah te dah ang che,” a ti a. Josefa chuan a pa Jakoba chu Farawa hnênah a hruai a, a hmaah chuan a dintîr a. Jakoba chuan Farawa chu chibai a bûk a. Farawa chuan, “Kum eng zât nge i nih tawh le?” tiin Jakoba chu a zâwt a. Jakoba chuan, Farawa chu a chhâng a, “Khualzin ka nih chhûng kum chu kum za leh sawmthum zawng a ni ve ta. Ka pate dam chhûng nêna teh chuan ka dam chhûng nite chu a la tlêm hle a; mahse, a hahthlâk hle a ni,” a ti a. Jakoba chuan Farawa chu chibai a bûk leh a, a chhuahsan ta a. Josefa chuan a pa leh a unaute chu Farawa thu ang chuan Ramases bialah, ram ṭha berah, ram a pe a, a awmtîr ta a. Josefa chuan a pa leh a unaute, a pa chhûngte chu a naupang ber thlengin an mamawh ang zêlin ei tûr a tumsak ta a. Ṭâm chu a nasa ta hle a, ram tinah ei tûr a awm ta lo va. Aigupta leh Kanan ram chu ṭâm tuarin an chau zo ta a. Aigupta leh Kanan rama pawisa awm zawng zawng chu an buh dawn manah a lâksak a, Farawa tangka inah a dah zêl a. Aigupta leh Kanan rama pawisa awm zawng zawng an hman zawh chuan Aigupta mite chu Josefa hnênah an lo kal a, “Buh min pe rawh, i hmuhah kan thih mai dâwn hi, pawisa lah kan nei tawh si lo,” an rawn ti a. Josefa chuan, “Pawisa in neih tawh si loh chuan buh manah in rante han pe ta che u, buh ka lo pe ang che u,” a ti a. Tichuan, Josefa hnênah an rante chu an rawn pe a. Sakawr te, berâm te, bâwng te leh sabengtungte chuan buh an lei ta a. Chumi kum chhûng tla chu an ran chuan an lei thei a. Chumi kum chu a ral a, kum tharah chuan Josefa hnênah an lo kal leh a, “Ka pu, kan pawisa leh rante chu buh manah kan pe zo tawh a. Ka pu, keimahni leh kan lo tih loh chu eng mah pêk tûr che kan nei ta lo tih hi zêp thei kan ni ta lo. Engah nge i mit hmuha kan thih anga, kan lote pawh a chhiat vek ang? Buh manah keimahni leh kan lote hi la mai la, kan ram nên Farawa bawihah kan ṭang mai ang. Buh chi tûr min pe la, boral lovin kan dam khawchhuak thei hlauh mahna, kan lote pawh a chhe hlen dâwn lo nia,” an ti a. Tichuan, Josefa chuan Farawa tân Aigupta rama lo zawng zawng chu a neihsak ta a. Ṭâm chu a nat tâk êm avângin Aigupta mi zawng zawngin an ram chu an hralh a. Aigupta ram dung leh vânga mi zawng zawng chu Farawa bawihah a siam ta a. Puithiamho ram erawh chu a lâksak ve lo; Farawa chuan buh pêk tâwk a ruat a, Farawa pêk ang chu an ei tâwk a ni; chuvângin, an ram chu hralh ve a ngai lo va ni. Josefa chuan mipui hnênah, “Farawa tân nangmahni leh in lote ka lei ta a; hei le, in tuh tûr buh chi ka pêk che u hi. Buh in seng hunah hmun ngaa ṭhena hmun khat chu Farawa hnênah in pe tûr a ni, a bâng hmun li chu a chi-ah te, in chhûngte nêna in eiah te, in fanaute châwm nân te hmang ang che u,” a ti a. “Kan nun i chhandam a, min khawngaih a, Farawa bawihah min siam hi, ka pu, i chungah kan lâwm êm êm a ni,” an ti a. Josefa chuan buh thar hmun ngaa hmun khat chu Farawa chanvo atân Aigupta ram dânah a siam ta a; tûn thlengin chu chu an la hmang ta zêl a ni; puithiamho ram chauh Farawa ta a ni lo. Aigupta rama Gosen bialah chuan Israela te chuan awmhmun an khuar ta a. Ramte an nei nghet a, an chi a ṭha a, an pung chak ta hle a. Jakoba chu Aigupta ramah kum sâwm leh pasarih a dam a, Jakoba dam chhûng chu kum za leh sawmli leh pasarih a ni. A thih hun a lo thlen hnaih chuan Israela chuan a fapa Josefa chu a ko va, a hnênah, “Min duhsak takzet a nih chuan ka thu angin i ti ang tih i tiam nân i kut ka malpui kârah dah la, Aigupta ramah min phûm lo tûrin tiam rawh. “Ka pate hnêna ka mut ve hunah Aigupta ram aṭangin min la chhuak la, an inphûmnaah min phûm ve ang che,” a ti a. “I sawi ang chuan ka ti ang e,” a ti a. Chhechhama tiam tûra a phût ang chuan a tiam ta a. Tichuan, Israela chu khum lu siin a kûn ta a. Chûng hnu deuhvah chuan Josefa hnênah, “I pa a chau ta hle,” an rawn ti a. A fa pahnih, Manasea leh Efraima chu a hnênah a hruai a. Jakoba hnênah chuan, “I fapa Josefa a lo kal e,” an ti a. Israela chu a intiharh a, khumah chuan a ṭhu chhuak a. Jakoba chuan Josefa hnênah, “Kanan ram Luz khuaah El-Sadaia ka hnênah a rawn inlâr a, mal min sâwm a. ‘I chi ka tiṭha ang a, ka tipung ang che, hnam tam tak pung khâwm tih thamah ka siam ang che; he ram hi kumkhuaa i thlahten an neih atân ka pe a ni,’ a rawn ti a. Aigupta rama ka rawn fin ve hma che-a Aigupta rama fa pahnih i hrinte kha ka ta an ni ang. Efraima leh Manasea chu Reubena leh Simona te ka ta an ni ang bawkin ka ta an ni ang. An pian hnua piangte leh i fate erawh chu i ta an ni ang, ro khâwm tûr chungchângah an ûte chan ai an chang ang. Padan aṭanga ka lo hawa, Kanan rama kan vahvaihna lamah i nu Rakili chuan Efratha bul lawkah min thihsan a; Efratha kawngah, Bethlehem-ah kan phûm ta a nih kha. I nu avângin chutiang chu ka remruat dân a ni,” a ti a. Josefa fate chu Jakoba chuan a han hmuh chuan, “Hêng hi tute nge an nih?” a ti a. Josefa chuan a pa hnênah, “He rama Pathianin min pêk ka fate chu an nih hi” a ti a. “Ka bulah han hruai hnai teh, mal ka lo sâwmsak teh ang,” a ti a. Israela chu a upat tawh avângin a mit a thim tawh a, khua a hmu thei tawh lo. Josefan a fate chu a rawn hruai hnai a, a lo fâwp a, a pawm a. Israela chuan Josefa hnênah, “I hmêl hmuh leh rêng ka inbeisei lo va, i fate lam Pathianin min hmuhtîr tâk hi,” a ti a. Josefa chuan a fate chu Israela malchung ata chu a la sawn a, lei siin a kûn a. Josefa chuan a ding lamin Efraima a chelh a, Israela kut vei lamah a dintîr a; Manasea chu a vei lamin a chelh a, Israela kut ding lamah a dintîr a. Israela chuan a ban kawkalh a, a kut ding lam chu a naupang zâwk Efraima lu-ah a nghat a, a vei lam chu a upa zâwk Manasea lu-ah a nghat a. Hetiang hian anni chu mal a sâwmsak ta a: Ka pa Abrahama te, Isaka te zui ṭhin Pathian, Ka pian ni aṭanga tûn thlenga min vêngtu Pathian, Thil ṭha lo zawng zawng laka min humtu Vântirhkoh chuan Hêng naupangte hi malsâwm sela, Anni hi ka hming leh ka pa Abrahama leh Isaka hming pu zêltu ni sela. Leiah hian lo pungin tam tak ni rawh se,” a ti a. Josefa chuan a pain a fapa naupang zâwk Efraima chunga a kut ding lam a nghat chu a tihpalh a nih ringin Efraima lu aṭangin Manasea lu-ah a kut ding lam chu sawnsak a tum a. A pa hnênah, “Ka pa, khati chuan ti teh suh, a upa zâwk lu-ah i kut ding lam kha nghat teh,” a ti a. A pa chuan a duh lo va, “Ka hria e, ka fapa. Ani pawh hnam ropui tak a la ni ang. A naupang zâwk hian a la khûm dâwn a ni, a thlahte pawh hnam lian tak tak an ni ve tho vang,” a ti a. Chumi ni chuan anni chu mal a sâwmsak a, “Israel mite chuan hetiang hian duhthu an insamsak tawn ang: ‘Efraima leh Manase angin Pathianin siam che rawh se,’ tiin. Efraim chu a dah pawimawh ta zâwk a ni. Israela chuan Josefa hnênah, “Ka thi mai dâwn ta, Pathianin a awmpui ang che u. I pate ramah a hruai kîr leh ang che. Amor mite ram, ka khandaih leh ka thala ka lâksak Sekem ruam ṭha chu i ute nêna in chan bâkah i tân ka pe chuang a che,” a ti a. Jakoba chuan a fate chu a ko khâwm a, “Nakin hnua in awm dân tûr ka lo hrilh ang che u, lo kal khâwm rawh u,” a ti a. “Jakoba fate u, lo kal khâwm ula, ngaithla rawh u, In pa Israela thu hi ngaithla teh u. Nang Reuben, ka fa tîr, ka chak ka vânglai fa, Mi dang aia chungnung leh zahawm i ni. Tui lian anga awm hle hle thei lo, Mi dang aiin i chungnung tawh lo vang, I pa khumpui i kaia, Ka khum i tihbawlhhlawh avâng khân. Simeona leh Levia hi unau phîr ang mai an ni, Dân bawhchhiat hi an hna a ni; An remruatah ka tel lo vang a, An punkhâwmnaah kei chu ka awm ve lo vang. An thinur a, tual an that a, An nawm an mâkin bâwngchal thate an chhat. An thin a chhiat êm avâng leh An thin a ram êm avângin Jakoba zîngah ka sem darh ang a, Israel-te zîngah ka tidarh ang. Juda, i unauten an fak ang che; I hmêlmate chu an ringah i rêk ang a, I unaute i hmaah an kûn ang. Juda zawng sakeibaknei tuai, Sa seh zo hlim, pûka lawi, Bawka zi awr awr ang hi a ni; Tu man an titho ngam lo va, Lal tiang a thlah lo vang a, A thlahte pawh an lal reng ang a, A ke kâr ata rorêltu tiang a insawn hek lo vang. Silo-a a lo kal hma chu miten a thu an awih ang. Grep hruiah sabengtungno a thlung a, A no ṭha chi chu grep rah tui ber kûngah. A kawr uain-ah a chiah a, grep tui senin a puan a su. Uain avângin a mit a sen rûm a, Hnutetui avângin a hâ a vâr. Zebulun chu tuifinriat kamah a awm ang a, Lawng rual tân chawlhhmun a ni ang, A ram chuan Sidon a ri ang. Isakara chu sabengtung chak tak, A puak phurh tûr kâra a bawk reng ang hi a ni, A chawlhna hmun chu ṭha a ti a. phur tûrin a hnungzâng a tihniam a bawih angin an chhawr ta. Dana chuan a mite ro a rêlsak ang a, Israel hnam dang ang bawk an ni ang. Dana chu kawngsîra rûl ang a ni, Rûlrial, kalkawng laia mi chu. Sakawr ke a chu a, hnung lamah a chungchuang a sêp thla. Aw Lalpa, min chhandam hlân kan va han nghâkhlel em! Gada chu sumdâwng rualin an bei ang a, A bei lêt ang a, a ûm nek ang. Asera chu a chênghnâwng hle ang, Lal ei tlâk thil tui a nei rei rui ang. Naftali hi zukpui tla chhuak No duhawm tak nei ang hi a ni. Josefa hi ram sakawr tui awmna rama sabengtung no, tlâng panga ram sabengtung tla ang a ni. Thal kâptuten an bei a, Thal nên an ûm nek mai. Mahse, a thalngul chu a che ngai lo. A ṭuan lah a ṭha, Jakoba Mi Chaka thahrui leh Israela Lungpui, Vêngtua vâng chuan. I pate Pathian chu a ni pui ṭhîntu che, El-Sadaia a ni, malsâwmtu che. Chung lam aṭanga malsâwm ruah, Lei hnuai aṭanga malsâwmna tuihna, Ran vulh leh fanauva hmuingîlna chu. Thil pâr leh buh vuia malsâwmna, Tlâng hlun malsâwmna te, Tlâng sânga thil duhawm tinrêng te, Josefa lu chungah awm rawh se, A unaute zînga thlan chhuah lu chungah chuan. Benjamina hi chinghne koham ang a ni, A sa seh chu zîngah leh tlaiah a tlân reng mai,” a ti a. Chûng mite chu Israel hnam sâwm leh pahnihte chu an ni; anmahni thlah nân chutiang chuan an pa chuan thu a sawi a ni; a mal malin a âwm tâwk zêlin mal a sâwmsak a. An hnênah hetiang hian thuro a chhiah bawk, “Ka laichînte hnênah min hruai lawk dâwn tawh a. Ka pate phûmna pûkah min phûm ve ang che u. Chu pûk chu Hit mi Efrona lova awm a ni. Makpela hmuna pûk, Mamre zâwn, Kanan rama mi, Abrahaman Hit mi Efrona hnên aṭangin thlân atân a lei a nih kha. Chutah chuan, Abrahama leh a nupui Sari chu an phûm a, Isaka leh a nupui Rebeki pawh an phûm a; kei pawhin Leaii ka phûm a ni. Chu pûk leh a bula lo chu Hit mite ta lei a nih tawh kha,” a ti a. Jakoban a fate thu a chah zawh chuan khumah a ke a hlâng kai a, a hnuk a chat ta a; a laichînte hnênah hruai a ni ta a. Josefa chuan a pa ruang chu a bawh a, a ṭah a, a fâwp a. Josefa chuan a hnuaia thawk damdawi thiamte ṭawih thei lo tûrin a pa ruang chu a siamtîr a. Chutianga ruang siam chuan ni sawmli a awh ṭhîn; Aigupta mite chuan ni sawmsarih chhûng an ṭah a. A sûn hun chhûng a ral hnuin Josefa chuan Farawa miliante hnênah, “Min khawngaih ula, Farawa hnênah hei hi min dîlsak teh u. Ka pa khân ‘Kanan rama ka thlân buatsaihah min phûm ngei ang che,’ a ti a; chhia min chhamtîr a. Chuvângin, tûnah ka pa chu han phûm tûrin ka chho thei dâwn lâwm ni? Ka lo kîr leh mai ang,” a ti a. Farawa chuan, “Chhia a chhamtîr che ang chuan kal la, i pa chu han phûm rawh,” a ti a. Josefa chu a pa phûm tûr chuan a chhuak a, a rual chuan Farawa sawrkâr hotu rual leh Aigupta ram milian zawng zawng pawh an chho ve a. Josefa chhûngte pawh, a unaute, a pa chhûngte nên, an kal ve vek a ni; an fanaute leh an ran rualte erawh chu Gosen ramah an hnutchhiah a. Tawlailîrte, sakawr chungchuang mite pawh a rual chuan an kal ve a, an kawi duah mai. Jordan ral hlîng hmun hruihzâwl an han thlen chuan urhsûn takin an sûn a, Josefa chuan a pa chu ni sarih chhûng a ṭah a. Kanan mite chuan chu hmuna an lusûn an hmuh chuan, “Aigupta mite lusûn dân a nih hi,” an ti a. Chuvângin, chu hmun hmingah chuan Abel-mizraim, ‘Aigupta mite lusûn mual’ an vuah a, Jordan râla awm a ni. Jakoba fate chuan an pa sawi angin an ti a. A fate chuan Kanan ramah an zâwn lût a Makpela hmuna pûk, Mamre zâwn, Hit mi Efrona hnên aṭanga Abrahaman thlân atân a leiah chuan an phûm ta a. A pa a phûm zawh chuan Josefa chu Aigupta ramah a haw leh a. A unaute leh a ruala a pa phûm tûra chho zawng zawng pawh an haw vek a. Josefa unaute chuan an pa a thih tâk hnu chuan, “Josefa hian min la haw rilru rengin a chunga thil dik lo kan tih ang khân kan chungah a ti ve mai ang a!” an ti a. Tichuan, Josefa hnênah thu an chah a, “A thih hma khân i pa chuan hetiangin thu min chah a ni. Josefa hnênah, ‘i ûte thil sual tih leh thil ṭha lo tak an tih ngaidam tûrin ka ngên a che, tiin in sawi tûr a ni,’ min ti a. Chuvâng chuan, i pa Pathian chhiahhlawhte thil sual tih kha khawngaih takin ngaidam ang che,” an ti a. An thu a lo hriat chuan Josefa chu a ṭap a. A ute chu anmahni ngei a hnênah chuan an va kal a, a hmaah an bawkkhup a, “I chhiahhlawhah kan ṭang mai ang e,” an ti a. Josefa erawh chuan, “Hlauthâwng suh u, Pathian tlukah ka insiam ngam hlei nêm. Min tihboral zawng in tum ngei a, Pathianin hmanraw ṭhaah a hmang ta hlauh zâwk a ni. Chuvângin, tûnah hlauthâwng rêng rêng suh u, nangni leh in fate ei tûr zawng ka tum zêl ang,” a ti a. An hnêna ngilnei taka thu a sawi chuan an thla a timuang ta a. Josefa chu a pa chhûngte nên chuan Aigupta ramah an awm ta reng a. Josefa chu kum za leh sâwm a dam a, Efraima fa, khûp thum thlengin a hmu a, Manasea fa Makira fa pawh a malchungah a chawi hman a ni. A tâwpah, Josefa chuan a unaute hnênah, “Ka thih a hnai ta, Pathianin a hre reng ang che u a, he ram aṭang hian Abrahama te, Isaka te, Jakoba te hnêna pêk a tiam ramah chuan a hruai chho vang che u,” a ti a. Josefa chuan Israel fate chu chhia a chhamtîr a, “Pathianin a rawn kan hunah che u ka ruhte hi heta ta la chhuak ngei ang che u,” a ti a. Josefa chu kum za leh sâwm mi a nihin a thi ta a. A ruang chu ṭawih thei lo tûrin an siam a, Aigupta ramah chuan kuangah an zalh a. Jakoba ruala Aigupta rama Israela fa, mahni nupui fanau nên ṭheuhva chhukte hming chu hêng hi a ni: Reubena te, Simeona te, Levia te, Juda te, Isakara te, Zebuluna te, Benjamina te, Dana te, Naftalia te, Gada leh Asera te. Israela thlahte chu a lu nungin sawmsarih an ni. Josefa chu Aigupta ramah a lo awm tawh sa a. Josefa leh a unaute chu an thi a, an hun laia mite pawh an thi fai vek a. Israela fate chu nasa takin an lo pung a, an chak deuh deuh va, ram pumah an khat ta a. Aigupta ramah Josefa hre lo lal thar a lo awm a. A mite hnênah, “Israel fate hi kan aiin an tamin an chak zâwk mai dâwn alâwm. Indo awm hlauh se kan hmêlmate an thlâwp ang a, min bei ang a, ram ata hi min chhuahsan mai dah ang e; ti rawh u, finrâwl chhuahin an pun zêl lohna tûr kawng i ngaihtuah teh ang u,” a ti a. Tichuan, rim taka chhawrtu tûr mi an ruat a. Farawa kudam hmun atân Pithom te, Ramases khuate an siam a. An chhawr rim poh leh an pung chak a, an darh zau ting mai a ni. Aigupta mite tân hlauhawm tham an lo ni ta a. Aigupta mite chuan rim lehzualin an chhawr ta a; hlum an siamtîr a, an rawhchantîr a; lovah te an chhawr a, thawh tûr chi tinrêng hah takin an thawhtîr a. Aigupta lal chuan Hebrai-ho nau chhartu Sifraii leh Puaii hnênah, “Hebrai nuho nau in chharin mipa a nih chuan that ula, hmeichhia a nih erawh chuan zuah ang che u,” a ti a. Nau chhartute chu Pathian ṭih mi tak an lo ni a, Aigupta lal thupêk ang chuan an ti duh lo va, mipa pawh an zuah ta zêl tho va. Nau chhartute chu Aigupta lal chuan a ko va, “engtizia nge hetianga thil in tih, mipate pawh in la zuah zêl hi?” a ti a. Nau chhartuten Farawa hnênah chuan, “Hebrai nuhovin Aigupta mi an ang ve lo, nau an awl bîk a, nau chhartu thlen hmain an hring zêl alâwm,” an ti a. Nau chhartute chu Pathianin a tiṭha ta hle a, Israel mite chu an pung chakin an lo tam ta hle a. Pathian an ṭih avângin nau chhartute pawh chu an chhûngkua an pung ve ta a. Farawa chuan a khua leh tuite chu thu a pe a, “Mipa fa piang hlim apiang Nail luiah paihsak ula, hmeichhe fa erawh chu zuah ang che u,” a ti vek a. Levia chia mi tlangvâl pakhatin Levia chi bawk nula nupuiah a nei a. Hmeichhia chuan nau a pai a, fapa a hring a. Nau duhawm tak a nih avângin thla thum chhûng chu a thukru a. A thuhrûk reng theih tâk loh hnuah chuan rairuang bâwm a la a, hlum a bel a, alkatra-in a zût phui a, a chhûngah chuan nau chu a dah a, luipui kama rairuang buk zîngah chuan a dah a. Engtin nge a awm zêl tih thlîrin hla fêah a farnu chu a ding reng a. Farawa fanu chu a ṭhuihruaite nên inbual tûrin luiah chuan an chhuk a, lui kamah chuan an kal a, rairuang zînga bâwm dah chu a hmu a; a chhiahhlawh nula chu a lâktîr a. A han hawng a, nautê a lo ni a; nausên chu a ṭap ta a. A khawngaih ta êm êm a, “Hebrai mi fa a ni phawt mai,” a ti a. A farnu chuan Farawa fanu hnênah chuan, “Hebrai hmeichhia, nau awm thiam ka va kohsak ang che chu, a awmsak dâwn che nia,” a ti a. Farawa fanu chuan, “Va ko ta che,” a ti a. Hmeichhe naupang chuan naute nu chu a ko va. Farawa fanu chuan hetiang hian a lo ti a, “He naute hi hâwn la, min pawmtlei sak rawh; hlawh ka pe ang che,” a ti a. Chu nu chuan nausên chu a la a, a pawm ta a. Nau chu a lo ṭhang lian a, Farawa fanu hnênah chuan a hruai a; ani chuan fapaah a lo nei ta a, “Tui aṭanga ka lâk chhuah a nih hi,” tiin a hmingah Mosia a sa a. Mosia chu a lo tlangvâl ta a. Ni khat chu a unaute hnênah a va lêng a, an thawh rimzia chu a va hmu a; a unau zînga Hebrai mi pakhat Aigupta miin a lo vua chu a hmu a. Lehlam lehlam a han hawi a, tu mahin an hmu lo nia a hriat chuan Aigupta mi chu a that a, ṭiau vaivutah a phûm ta a. A tûkah chuan a va kal leh a, Hebrai mi pahnih hi an lo insual a. A tisual hmasa zâwktu hnênah chuan, “Engtizia nge i unaupa i sual mai le?” a ti a. Ani chuan, “Tu nge kan chunga rorêla thuneitu atân ruat che? Aigupta mi i thah ang khân min thah i tum elo?” a ti a. Mosia chuan a hlauthâwng ta hle a. “Mi an lo hria a ni phawt mai,” a ti a. Faraw-an a lo hriat chuan Mosia chu thah a tum ta a. Farawa hmuh loh tûrin Mosia chu a tlân bo ta a; Midian mite ram a va thleng a, tuichhunchhuah bulah a ṭhu chawt a. Midian puithiam chuan fanu pasarih a nei a; tui an rawn chawi a, an pa berâm rual in tûr ran tuikuangah an chhûng khat ṭhîn a. Berâmpu dang an lo kal a, an rawn hnawt a. Mosia chuan a lo chhan a; an berâmte chu tui a intîr ta a. An pa Reuela hnên an thlen chuan, “Vawiin chu engtizia nge in va lo thleng hma ve,” a lo ti a. Anni chuan, “Aigupta mi, mi pakhatin Berâmpuho lakah min chhan a, amah ngeiin tui a chawi a, rante chu tui a pe atin a ni,” an ti a. A fanute hnênah chuan, “Khawiah nge a awm tâk? Engtizia nge in kalsan mai le? Va ko teh u, chaw te ei ve teh se,” a ti a. Chu mi hnêna awm chu Mosia chuan a remti ta a. Mosia chu a fanu Zipori nupuiah a neihtîr a. Ani chuan fapa a hrinsak a, “Mikhual, ram dang mi ka nih hi,” tiin a hmingah Gersoma a sa a. Rei fe hnuah chuan Aigupta lal chu a thi a; Israel fate chu bawih nihna phurrit avâng chuan an rûm a, ṭanpui dila an au thâwm chu Pathian hnênah a han thleng a. Pathian chuan an rûm chu a lo hria a; Abrahama te, Isaka te, Jakoba te hnêna a thuthlung kha a la hre reng a, Pathian chuan Israel fate dinhmun chu a hmu a, a ngaihsak hle a. Mosia chuan a puzawn, Midian puithiam Jethroa berâmte chu a vêng a; thlalêr thlang lamah a thlah a; Pathian tlâng, Horeb chu a va thleng ta a. Lalpa vântirhkoh chu a hnênah, thingbukah meialhin a rawn inlâr a, a han en chuan thingbuk chu a alh a; mahse, a kâng si lo. Mosia chuan, “He thil mak tak hi ka va en teh rêng ang, engtizia nge thingbuk hi a kan hauh si loh le?” a ti a. En tûra a va pan chu Lalpa chuan a hmu a, thingbuk aṭang chuan Pathian chuan, “Mosi, Mosi,” a rawn ti a. Ani chuan, “Eng nge ni?” a ti a. Pathian chuan, “Lo kal hnai suh, i pheikhawk kha hlîp rawh, i dinna kha hmun thianghlim a ni,” a rawn ti a. Heti hian a ti bawk, “I pate Pathian ka nih hi: Abrahama Pathian, Isaka Pathian, Jakoba Pathian chu,” tiin. Mosia chuan Pathian a hmu ngam lo va, a hmai a khuh a. Lalpa chuan, “Aigupta rama awm, ka mite tuar nasatzia ka hmu reng a ni; chhawrtute avânga an rûm thâwm pawh ka hria. Aigupta mite kut ata chhan chhuak tûrin tûnah ka lo chhuk a ni; chu ram ata chu ka hruai chhuak ang a, ram ṭha tak, thâwl tak, khawizu leh hnutetuia luang ramah ka hruai dâwn a ni; Kanan mite, Hit mi te, Amor mi te, Periz mi te, Hiv mi te leh Jebus mi te awmna ramah chuan. Ngai teh, Israel fate ṭap thâwm ka hnên a lo thleng a, Aigupta miten an tihnawmnahzia pawh ka hmu a ni. Chuvângin, ti rawh, Farawa hnênah ka tîr teh ang che. Ka mi, Israel fate chu Aigupta ram aṭangin i hruai chhuak dâwn nia,” a ti a. Mosia chuan Pathian hnênah, “Farawa hnêna kal âwm ka ni lo ve, Israel fate Aigupta ram aṭanga hruai chhuak thei tûr pawh ka ni lo ve,” a ti a. Ani chuan, “Ka awmpui zêl dâwn che alâwm; ka mite Aigupta ram aṭanga i hruai chhuah hunah, he tlângah hian Pathian chibai in rawn bûk ang; chu chu ka tîr che a ni tih i hriat chianna tûr chu a ni,” a ti a. Mosian Pathian hnênah, “Israel fate hnênah zu kal ila, ‘in pate Pathian chuan in hnênah min rawn tîr a ni,’ ti ila, ‘A hming eng nge?’ lo ti sela, engtin nge ka chhan ang?” a ti a. Pathianin Mosia hnênah chuan, “AWMA ka ni” a ti a. “Israel fate hnênah chuan, ‘AWMA chuan min tîr a ni,’ ti ang che,” a ti a. Mosia hnênah Pathian chuan, “Israel fate hnênah chuan heti hian i sawi tûr a ni: ‘ Lalpa in pate Pathian, Abrahama Pathian, Isaka Pathian, Jakoba Pathian chuan in hnênah min tîr a ni’ ti ang che. Chu hming chu ka hming a ni kumkhua a, ṭhang lo thar tûr zawng zawng pawhin chutiang chuan min hre tûr a ni. Kal ta la, Israel upate chu ko khâwm la, an hnênah, ‘ Lalpa, in pate Pathian, Abrahama Pathian, Isaka Pathian, Jakoba Pathian chu ka hnênah a inlâr a, ‘Ka hre reng che u alâwm, Aigupta rama an sawisak dân che u hi ka hmu reng a ni. Aigupta mite tihduhdahna lak ata Kanan mi te, Hit mi te, Amor mi te, Periz mi te, Hiv mi te leh Jebus mite awmna ram, khawizu leh hnutetuia luang ramah ka hruai ang che u, a ti,’ ti ang che. Ka mite chuan i thu an ngaithla ang; nang leh Israel upate chu Aigupta lal hnênah in kal ang a, a hnênah, ‘ Lalpa, Hebrai mite Pathian chu kan hnênah a rawn inlâr a; thlalêrah, ni thum kalah kan Pathian, Lalpa hnêna inthawina hlân tûrin min kaltîr ta che,’ in ti dâwn nia. Aigupta lal chuan a kaltîr phal dâwn lo che u tih ka hre sa a ni, na deuhva kar a ngai dâwn a ni. Ka kut ka lek ang a, Aigupta mite chu an zînga thil mak tak tak ka tih tûr chuan ka sawisa dâwn a ni. Chumi hnuah chuan in kal a phal ang. Aigupta mite chu ka mite hi ka duhsaktîr ang a, in chhuah hunah chuan kut ruakin in chhuak lo vang a, hmeichhia zawng zawngin an ṭhenawmte leh an ina awm vete tangkarua leh rangkachaka siam incheina leh thawmhnaw an dîl ang a, an fanu an fapate chu an chei ang a, chutiang chuan Aigupta mite chu in rawk a ni ngawt dâwn nia,” a ti a. Mosia chuan a chhâng a, “Ngai teh, ka thu an awih lo vang a, ka aw an ngaithla hek lo vang, ‘ Lalpa chu i hnênah a inlâr ngût lo vang,’ min tihsan mai ang,” a ti a. Lalpa chuan a hnênah, “I ken kha eng nge ni?” a ti a. “Tiang” tiin a chhâng a. “Leiah han tlûk teh,” a ti a. Leiah a han tlûk a, rûlah a chang ta mai a; hlauvin Mosia chu a tlânchhia a. Lalpa chuan Mosia hnênah, “I kutin ban la, a meiah man rawh,” a ti a. A han ban a, a meiah a man a, a kutah chuan tiang a ni leh ta mai a. “Chutianga i tih chuan an pate Pathian, Abrahama Pathian, Isaka Pathian, Jakoba Pathian chu i hnênah a inlâr ngei a ni tih an hria ang,” a ti a. Lalpa chuan heti hian a ti bawk a, “I kutin i kawrâwm kha zen teh,” a ti a. A han zen a, a phawi leh chuan a kut chu vûr anga vârin a lo phâr ta a. “I kutin i kawrâwm kha zen leh teh,” a ti a. A kawrâwm chu a zen leh a, a han lâk chhuah chuan a lehlam ang chiah a lo ni leh ta a. Lalpa chuan, “I thu an awih duh lohva, thil mak i tih hmasak an awih duh loh pawhin a hnuhnûng zâwk tal hi an awih ang chu. Hêng thil mak pahnihte hi an awih duh lohva, i aw an ngaihthlâk duh loh fo chuan, Nail lui tui suak la, leichârah leihbua ang che; lei a thlenah i tui suah chu thisenah a chang ang,” a ti a. Mosia chuan Lalpa hnênah, “Aw Lalpa, min biak hma pawhin ṭawnghmang thiam mi ka ni lo va, ka ṭawng a bah a, ka dang a âwk bawk a ni,” a ti a. Lalpa chuan a chhâng a, “Tu nge mihring kâ hi siamsak? Tu nge a beng tihngawnsaka, ṭawng theih lohtîr? Tu nge tihdelsaka, tihvârsaktu? Kei Lalpa hi ka ni lâwm ni? Chuvângin, kal mai rawh, i kâ chu ka thuam ang a, sawi tûr ka zirtîr dâwn che nia,” a ti a. Mosia chuan, “Aw Lalpa, i mi duhzâwng dang tîr mai teh,” a ti a. Mosia chungah Lalpa chu a thinur ta hle a, “Levia chi, i u Arona a awm a ni lâwm ni? Ṭawnghmang a thiam hle tih ka hria a ni. Tin, ngai teh, nangmah tâwk tûr chein a lo kal a, a hmuh che chuan a lâwm hle ang. A hnênah thu i sawi ang a, sawi tûr i hrilh zêl ang a, I kâ leh a kâ chu ka thuam ang a, in tih tûr chu ka zirtîr zêl ang che u. Mipui hnêna i thu sawi chhâwngtuah a ṭang ang a, i tân kâ ang a ni ang a, a tân nang pawh Pathian ang i ni dâwn nia. I tiang hi keng la, hei hian thil mak ti ṭhîn ang che,” a ti a. A puzawn Jethroa hnênah Mosia chu a kal a, a hnênah, “Ka unau, Aigupta rama awmte zu tlawh tûrin khawngaih takin min kaltîr teh,” a ti a. Jethroa chuan Mosia hnênah, “Dam takin zu kal ang che,” a ti a. Midian ramah Lalpan Mosia hnênah, “Kal la, Aigupta ramah lêt tawh rawh, nangmah thah tumtute kha an thi zo tawh e,” a ti a. Mosia chuan a nupui leh a fapate chu sabengtung chungah a chuantîr a, Aigupta ram lamah chuan a kîr ta a. Mosia chuan Pathian tiang kha a keng zêl a. Lalpa chuan Mosia hnênah, “Aigupta ram i thlen hunah, thil mak ka tihtîr tûr zawng zawng che chu Farawa hmaah ti ang che. Amaherawhchu, ka tiluhlul ang a, ka mite chu a kaltîr mai lo vang. Farawa hnênah chuan heti hian i ti tûr a ni: ‘ Lalpa chuan heti hian a ti: Israel chu ka fapa, ka fa tîr a ni. Ka fapa chu ka rawngbâwl tûrin kaltîr rawh ka ti che a, i kaltîr duh lo vei a; ngai teh, i fapa, i fa tîr chu ka tihhlumsak ang che, a ti e,’ ti ang che,” a ti a. Tin, an riahna tûr bûk kawnga an kal lai chuan Lalpa chuan a lo tâwk a, thah a lo tum a. Zipori chuan meilung a la a, a fapa serh vun hmâwr chu a tansak a, Mosia malpuiah a tât a, “Thisen lâwm tak pasal i nih hi le,” a ti a. Lalpa chuan Mosia nunna chu a zuah ta a. Zipori chuan “Serh tan thu-a thisen chhuah lâwm tak pasal i nih hi,” a ti bawk a. Lalpa chuan Arona hnênah, “Mosia hmuak tûrin thlalêrah chhuak rawh,” a ti a. A kal ta a, Pathian tlângah chuan a va hmu a, a fâwp a. Mosia chuan Arona hnênah Lalpa tirhna thute chu a hrilh a. Mosia leh Arona chu an kal a, Israel fate zînga an upate chu an khâwm a, Arona chuan Mosia hnêna Lalpa thu sawi zawng zawng chu a hrilh a; thil makte pawh an hmaah chuan a ti a. Mite chuan an ring a, Lalpa chuan Israel fate chu a hre reng a, an hrehawm tuarte chu a hmu a ni tih an hriat chuan an kûn a, chibai an bûk a. Chumi hnuah chuan Mosia leh Arona chu Farawa hnênah an kal a, “ Lalpa, Israel-te Pathian chuan heti hian a ti: ‘thlalêrah ka kût an hman theih nân ka mite hi chhuah rawh,’ a ti e,” an ti a. Farawa chuan, “ Lalpa in tih chu tu nge maw a niha, a thu awiha Israel-te ka han chhuah tehlul ang le? Lalpa in tih hi ka hre lo ve, Israel-te lah ka chhuah hek lo vang,” a ti a. Anni chuan, “Hebrai mite Pathian chu kan hnênah a rawn inlâr a, ni thum kala hla thlalêrah kan va kal ang a, kan Pathian Lalpa hnênah kan va inthawi ang e; chutilo zawng, hriin emaw, khandaihin emaw mi a rawn hrem dah ang e,” an ti a. Aigupta lal chuan Mosia leh Arona hnênah, “Engtizia nge nangni hian mite hnathawk lai in tihdâwngdah le? Hna thawk leh vat rawh se,” a ti a. Farawa chuan, “Aigupta mite aiin hêng mite hi an tam ta a, hna thawh lohtîr in tum a nih hi,” a ti bawk a. Chumi ni ngei chuan Farawa chuan chhawrtute leh Israel zînga hotute chu thu a pe a. “Leirawhchan an siam nân buhpâwl pe tawh suh u, anmahni ngeiin zawng chawp rawh se. An siam tûr bituk zât chu in siamtîr zêl tho tûr a ni; tihtlêmsak suh u, an thatchhiat chhuanlamin, ‘Kan Pathian hnênah inthawi tûrin i kal ang u,’ an ti a ni. Thawh tûr tam zâwk tuk tûr an ni; dâwngdah hman lovin thawk sela, hetiang thu lawilo hi ngaithla hman suh se,” a ti a. Chhawrtute leh Israel zînga hotute chu an chhuak a, mite hnênah, “Farawa chuan heti hian a ti: ‘buhpâwl ka pe tawh lo vang che u, nangmahniin in zawng chawp ang a, siam tûr tuk zât chu tihtlêmsak in ni hek lo vang,’ a ti,” an ti a. Aigupta ram tinah mite chu buhpâwl zawngin an vâk ta noh noh a. Chhawrtuho chuan an tur a, “buhpâwl pêk in nih lai ang khân in thawh tûr bituk chu tlâk thuai thuai rawh u,” an ti a. Chhawrtute chuan Israel zînga hotu atâna an ruatte chu an vau va, “Nimin leh vawiina in leirawhchan siam tûr zât engati nge in siam loh?” an ti a. Israel zînga hotua ruatte chu Farawa hnênah an kal a, “I chhiahhlawhte hi engtizia nge heti taka i tih tâk le? I chhiahhlawhte hi buhpâwl min pe si lo va, leirawhchan siam rawh u, min ti a, min vua a; kan thiam loh a ni hlei nêm, i mite tihdik loh alâwm,” an ti a. Ani chuan, “In thatchhia a ni, in thatchhiat chhuanlamah ‘ Lalpa hnênah i inthawi ang u,’ in ti a ni. Kal vat ula, in hna chu thawk mai rawh u, buhpâwl kan pe lo vang che u, leirawhchan in siam tûr tuk zât kha tihtlêm a ni hek lo vang,” a ti a. Ni tina leirawhchan siam tûr tuk zât chu tihtlêm a ni lo vang tih an han hriat chuan Israel zînga hotute chu an hrilhhai hle a. Farawa an biak zawh chuan anmahni nghâktu Mosia leh Arona chu an rawn pan a. “ Lalpa chuan in thiltih hi a hmu a, a tuartîr ngei ang che u. Lal leh a upate chuan min huat tâk hi. Min that mah se chhuanlam remchâng in siamsak ta a nih hi,” an rawn ti a. Mosia chuan Lalpa lam a hawi a; “ Lalpa, engtizia nge i mite hi i va han tinawmnah ve? Engah kher kher nge mi tirh le? I hminga Farawa hnêna thu sawi tûra ka kal chinah ka mite hi a tinawmnah lehzual sauh a ni; nang lahin i mite hi i chhan duh hauh si lo va,” a ti a. Lalpa chuan Mosia hnênah, “Farawa chunga ka thiltih tum i hmu dâwn ta e; anmahni chhuah tûrin chak takin ka nawr ang a, a ram ata a ûm chhuak ang che u,” a ti a. Pathianin Mosia hnênah, “ Lalpa ka nih hi, Abrahama hnênah te, Isaka hnênah te, Jakoba hnênah te El-Sadaia-in ka inlâr a; mahse, ka hming Lalpa hi ka hrilh lo. An mikhualna ram, Kanan ram chu pe tûrin an hnênah thu ka tiam a. Aigupta mite bawiha tâng Israel fate mangang au thâwm chu ka hre bawk a ni; ka thuthlung pawh ka hre reng a ni. Chuvângin, Israel fate chu hrilh rawh. Lalpa chu ka nih hi; Aigupta mite nghâwngkawl lak ata ka la chhuak ang che u a, an bawih ata ka chhuah ang che u. Ka bân tha chakin ka chhan chhuak ang che u a, anni chu na takin ka hrem ang. Ka mite in ni ang a, in Pathian ka ni bawk ang. Aigupta mite bawih ata ka lâk chhuah hun che u chuan kei hi in Pathian, Lalpa chu ka ni tih in hria ang. Abrahama te, Isaka te, Jakoba te hnêna bân phar meuhva pêk ka tiam ramah ka hruai ang che u a, in rochan atân ka pe ang che u, Lalpa ka nih hi,” a ti a. Mosia chuan Israel fate chu chutiang chuan a hrilh a; mahse, an bawih nghâwngkawl chu an tân a rih êm avâng chuan an bei a dawng a, Mosia thu chu an ngaithla duh lo va. Lalpa chuan Mosia chu a bia a, “Kal la, Aigupta lal Farawa chu a ram aṭanga Israel fate chhuah tûrin va hrilh rawh,” a ti a. Mosia chuan Lalpa hnênah “Israel fate pawhin ka thu an ngaithla duh lo va, Farawa phei chuan engtin nge ka thu a ngaihthlâk ang, ṭawnghmang lah ka thiam si lo,” tiin a ṭang a. Lalpa chuan Mosia leh Arona hnênah, “Aigupta ram ata Israel-te hruai chhuak tûrin ka ti che u tih Israel fate leh Farawa chu hrilh rawh u,” a ti a. Hêng hi a chi chia an hotute chu an ni: Reubena thlahte: Hanoka, Palua, Hezrona, Karmia; Simeona thlahte: Jemuela, Jamina, Ohada, Jakina, Zohara, Kanan hmeichhe laka a fa Saula; chûngho chu Simeon chite chu an ni. Hêng hi Levia thlah chhâwng zêlte chu an ni: Gersona, Kohata, Meraria. Levia chu kum za leh sawmthum leh pasarih a dam a. Gersona fate: Libnia, Simeia; anni hian fa an ngah hle a. Kohata fate: Amrama, Izara, Hebrona, Uziela. Kohata chu kum za leh sawmthum leh pathum a dam a. Meraria fate: Mahlia, Musia. Hêng hi Levia thlah chhâwng zêlte an ni. Amrama chuan a pa farnu Jokebedi nupuiah a nei a; Arona leh Mosia a hrinsak a. Amrama chu kum za leh sawmthum leh pasarih a dam a. Izara fate: Kora, Nefega, Zikria. Uziela fate: Misaela, Elzafana, Sithria, Nasona farnu, Aminadaba fanu Elisebi chu Aronan nupuiah a nei a. Nadaba te, Abihua te, Eleazara te, Ithamara te a hrinsak a. Kora fate: Asira, Elkana, Abiasafa. Hêng hi Kora thlahte chu an ni. Arona fapa Eleazara chuan Putiela fanute zînga pakhat nupuiah a nei a, Finehasa a hrinsak a. Chûngte chu Levia chi, a thlah chhûngkaw hotute chu an ni. Lalpa khân Arona leh Mosia hnênah, “Israel thlahte hi Aigupta ram ata an vaiin hruai chhuak vek rawh u” a ti a nih kha. Mosia leh Arona hi an ni Aigupta lal Farawa hnêna, “Israel-te hi chhuah vek rawh,” titute chu. Aigupta ramah Lalpa chuan Mosia a bia a. ‘ Lalpa ka ni a, ka hrilh apiang che Aigupta lal Farawa hrilh ang che,” a ti a. Mosia chuan Lalpa hnênah, “Ṭawnghmang ka thiam loh tehlul nên engtin nge Farawa chuan ka thu a ngaihthlâk duh ang?” tiin a ṭang a. Lalpa chuan Mosia hnênah, “Farawa tân Pathian angah ka siam dâwn che. I u Arona hi i zâwlneiah a ṭang ang. Thu ka pêk apiang che i hrilh ang a, i u Arona hian Farawa a hrilh chhâwng ang; ram ata Israel-te a chhuah tûr a ni. Farawa chu ka tiluhlul ang a, chhinchhiahna leh thil makte Aigupta ramah ka ti ṭeuh vang. Ani chuan in thu a ngaithla duh lo vang a, Aigupta chungah kut ka thlâk ang a, ka hrem vak ang a; ka mi Israel-te chu, Aigupta ram aṭangin ka hruai chhuak ang. Aigupta ram chunga ka kut ka leka, an zînga mi Israel fate chu ka lâk chhuah hunah chuan, Aigupta mite chuan Lalpa ka nih an hre mai ang,” a ti a. Mosia leh Arona chuan Lalpa thupêk ang chuan an ti a; Farawa hnêna thu an sawi khân Mosia chu kum sawmriata upa a ni a, Arona chu kum sawmriat leh pathum a ni. Lalpa chuan Mosia leh Arona hnênah: “Faraw-an, ‘thil mak eng emaw tal han ti teh u,’ a lo tih chuan Arona hnênah, I tiang kha la la, Farawa hmaah tlûk rawh, rûlah a chang mai ang’ i ti dâwn nia,” a ti a. Mosia leh Arona chu Farawa hnênah chuan an kal a, Lalpa thupêk ang chuan an ti a. Arona chuan Farawa leh a hote hmaah chuan a tiang chu a tlûk a, rûlah a chang ta a. Farawa chuan an rama mi fing te, dawithiam te a ko va, anniho chuan mitdawivaihin an tih ang chu an ti ve ta mai a, an tiang chu an tlûk a, rûlah a chang ve ta a; mahse, Arona tiang chuan anniho tiang chu a dawlh ta vek a. Lalpan a sawi ang khân Farawa chu a tiluhlul a, an thu chu a ngaithla duh lo va. Lalpa chuan Mosia hnênah, “Farawa chu a luhlul hle mai a, mite chu a chhuah duh lo va ni. Zîngah Farawa hnênah kal ang che; lui kamah a lêng ang a, lui kamah chuan a hmuh ngei tûrah lo ding la: i tiang rûla chang kha hawl ang che. “ Lalpa, Israel-te Pathian chuan i hnênah, ‘Ka mite hi thlalêra chibai min bûk tûrin chhuah rawh,’ ti tûrin min tîr a ni. Tûn thlengin a thu i awih lo va, Lalpa chuan heti hian a ti: A thiltih aṭangin Lalpa hi tu nge a nih i hre mai ang, en ta che, ka tiang hawl hian luia tui hi ka vua ang a, thisenah a chang mai ang. Sanghate chu an thi ang a, lui chu a rim a chhia ang a, Aigupta mite chuan tui chu an ten ang,” a ti a. Lalpa chuan Mosia hnênah, “Arona chu heti hian hrilh rawh, ‘I tiang la la, Aigupta rama lui chungahte lek rawh, an luipui chungah te, luite chungah te, dîl chungahte lek rawh, thisenah a chang dâwn nia,’ ti ang che,” a ti a. Mosia leh Arona chuan Lalpa thupêk ang chuan an ti a, a tiang chu a lek a, Farawa leh a hote hmuhah chuan luia tuite chu a vua a, luia tui zawng zawng chu thisenah a chang ta a. Luia sanghate chu an thi a, lui tui chu a uih ta hluah hluah a. Aigupta mite chuan lui tui chu an in thei ta lo va; Aigupta ram pum tui chu thisenah a chang vek a ni. Aigupta dawithiamte chuan mitdawivaih hmangin an ti ve ta mai a; Farawa chu a luhlul sauh va, Lalpa sawi ang khân an thu chu a ngaithla duh ta lo va. Farawa chu a inah a haw a, eng mah a pawisa chuang lo. Aigupta mite chuan lui tui chu an in theih loh avângin a kamah in tûr tui an hai chhuak a. Lalpan lui tui a vuak kha ni sarih a ni tawh a. Lalpa chuan Mosia a bia a, “Farawa hnênah kal la, a hnênah, ‘ Lalpa chuan heti hian a ti, ti rawh: ‘ka mite hi chhuah rawh; tichuan, ka rawng an bâwl dâwn nia. An kal i phal loh chuan i ram pum pui hi chungu-in ka rawn hrem ang che u. Luiahte chungu a khat ang a, an lo chhuak ang a, i inahte pawh an lût ang a, i mut pindan leh i khumah te, i chhiahhlawhte leh i mite inah te, i thukah te leh i chhang hmehna thlêngah te hial pawh an lo awm ang. Chungu chuan an rawn bâwm ang che, i mite leh i chhiahhlawhte pawh an rawn bâwm ang,” a ti a. Lalpa chuan Mosia hnênah, “Arona chu heti hian hrilh rawh: ‘I tiang kha lui chungah te, tui kawngah te, dîl chungahte lek rawh; tichuan, Aigupta ramah chungu a lo puang chiam dâwn nia, tiin,” a ti a. Arona chuan Aigupta ram tui chungahte chuan a tiang chu a lek a, chungu a lo chhuak ta chiam a, Aigupta ramah chuan an khat ta a. Dawithiamte pawh chuan mitdawivaih hmangin khawmualah chuan an tichhuak ve a. Farawa chuan Mosia leh Arona chu a ko va, “Chungu hi la bo tûrin Lalpa min ngensak rawh u; tichuan, Lalpa hnêna in inthawi theih nân in mite chu ka chhuah ang e,” a ti a. Mosia chuan, “Ngensak e a, nang leh i upate leh i mite in aṭanga chungu-in an ṭînsan che ua, luiah chauh an awm hun tûr ruat la, ka dîlsak ang che,” a ti a. “Naktûk aṭangin le,” a ti a. “ Lalpa kan Pathian ang rêng hi an awm lo tih i hriat theih nân i tih ang chu ni ang hmiang, Chungu chuan an chhuahsan ang che, i in aṭangin an chhuak ang a, luiah chauh an awm tawh ang,” a ti a. Mosia leh Arona chu Farawa hma ata chu an chhuak a, Mosia chuan Lalpa hnênah Farawa bâwmtu chungu chu lâk bosak tûrin a ngên a. Mosia thu ang chuan a ti a, chungute chu inah te, tualah te, lovah te an thi ta phung a. An vawm khâwm a, a ram pumin a uih ta vung vung a. Farawa chuan chungute chu an thi zo ta tih a hriat chuan luhlul a chhuah a, Lalpa sawi ang khân an thu chu a ngaithla duh chuang lo. Lalpa chuan Mosia hnênah, “Arona chu hrilh rawh, a tiang chu la sela, vaivut vaw rawh se, Aigupta ram pumah hrikah a chang dâwn a ni,” a ti a. Chutiang chuan an ti a; Arona chuan a tiang chu a lek a, lei vaivut chu a vua a, mihring leh rante chuan hrik chu an kai a; Aigupta rama vaivut zawng zawng chu hrikah a chang ta vek a. Dawithiamte chuan mitdawivaih hmangin tih ve an tum a; mahse, an ti thei lo. Ram pumah mihring leh sate chuan hrik an ngah ta êm êm a. Dawithiamho chuan, “Hei chu Pathian tih a ni,” an ti a; mahse, Farawa chuan a luhlul a chhuah a. Lalpa sawi ang khân an thu chu a ngaithla duh lo va. Lalpa chuan Mosia hnênah, “Zîngah tho la, Farawa lui kamah a lêng leh ang a, a hmaah va ding la, a hnênah, Lalpa chuan heti hian a ti; ‘Ka rawng an bâwl theih nân ka mite hi chhuah rawh. Ka mite hi i chhuah duh loh chuan thophurh rual, nang leh i hote leh i mite seh tûr ka rawn tipung dâwn, i in chhûngah te leh Aigupta mite inah te a awm nuai nuai ang a, ramah pawh a awm sup sup ang. Ka mite awmna Gosen ram erawh chu ka zuah ang a, kei Lalpa hian hêng hi ka tih a ni tih i hriat theih nân thophurh chu a awm ve lo vang. Ka mite leh i mite chu ka thliar hrang dâwn a ni - he thil mak hi naktûkah tih a ni ang,’ a ti, ti ang che,” a ti a. Lalpa chuan a rawn ti ta ngei a, Farawa inah te, a hote inah te, Aigupta ramah te thophurh a lo awm ta nuai nuai a; thophurh a tam êm avang chuan ram pum chu a chhe nasa hle a ni. Farawa chuan Mosia leh Arona chu a ko va, “Kal ula, ram chhûngah in Pathian hnênah chuan inthawi rawh u,” a ti a. Mosia chuan, “A dik lo vang, Lalpa kan Pathian hnêna kan inthawina tûr hian Aigupta mite thin a tiur ngei ang; an ngaih theih loh zâwng kan tih chuan lungin min dêng mai ang le, thlalêrah, ni thum kala hlaah, kan Pathianin thu min pêk angin kan va inthawi ang e,” a ti a. “ Lalpa in Pathian hnêna inthawi tûr chuan ka kaltîr ang che u, hla takah erawh chuan in kal tûr a ni lo, min ṭawngṭaisak rawh u,” a ti a. Mosia chuan a chhâng a, “Ngai rawh, ka chhuak ang a, thophurh rual hi naktûkah i hnên ata te, i hote leh i mite hnên ata te bo vek tûrin ka dîlsak ang che. Lalpa hnêna inthawi tûra kan kal phal lovin Farawa chuan min tihder tawh teh suh se,” a ti a. Mosia chu a chhuak a, Lalpa hnênah a ṭawngṭai a. Farawa hnên aṭang te, a hote leh a mite hnên aṭang te chuan thophurh chu a tihkiansak ta a, pakhat mah a awm ta lo va. Hemi ṭum pawh hian Farawa chuan luhlul a la chhuah ta tho va, mite chu a chhuah duh chuang lo va. Lalpa chuan Mosia hnênah, “Farawa hnênah kal la, heti hian hrilh rawh: ‘Hebrai mite Pathian Lalpa chuan heti hian a ti; ka rawng an bâwl theih nân ka mite hi chhuah rawh. I chhuah duh lohva, i chelh luih chuan Lalpa chuan rama ran tla, sakawr te, sabengtung te, sanghâwngsei te, bâwng te, berâm rualte chungah kut ka thlâk ang a, pûl hri na tak ka lêntîr ang,’ a ti: Lalpa chuan Israel mite ran leh Aigupta mite ran a thliar hrang ang a, Israel fate ran pakhat mah a thi ve lo vang. Lalpa chuan hun a ruat a, naktûkah Lalpa chuan he thil hi a ti ang,” a ti a. Lalpa chuan a tûkah chu thil chu a ti ta ngei a, Aigupta mite ran zawng zawng chu a thi ta a; Israel fate ran erawh chu pakhat mah a thi ve lo. Farawa chuan enthlithlai tûr mi a tîr a, Israel-te ran chu pakhat mah thi an hmu lo. Mahse, Farawa chuan luhlul a chhuah ta cheu va, mite chu a chhuah duh chuang lo. Lalpa chuan Mosia leh Arona hnênah: “Meipui chunga inṭing ṭhûm khat va la ula, Farawa hmuhah Mosian vânvawrh rawh se, vaivut khu angin Aigupta ram pumah a darh ang a, Aigupta ram chhûnga mi leh sa zawng zawng tân khawihli huaisualah a chang ang,” a ti a. Meipui inṭing chu an la a, Farawa hmaah chuan an ding a, Mosia chuan a vânvawrh ta a. Mi leh sa te tân khawihli huaisualah a chang ta a. Khawihli avângin dawithiamho chuan Mosia chu an chelh ta lo va; khawihli chu Aigupta mi zawng zawng leh dawithiamte chuan an vei vek a ni. Lalpa chuan Farawa chu a tiluhlul a, Mosia hnêna Lalpa sawi ang ngei khân an thu chu a ngaithla duh chuang lo va. Lalpa chuan Mosia hnênah, “Zîng takah tho la, Farawa hmaah va ding la, hetiang hian va sawi rawh: ‘Hebrai mite Pathian Lalpa chuan heti hian a ti: ka rawng an bâwl theih nân ka mite hi chhuah rawh. Tûn ṭum chu i hote leh i mite mai ni lovin nang ngei pawh ka khawih dâwn che a ni; khawvêlah hian keimah ang rêng tu mah an awm lo tih i hriat theih nân. Nang leh i mite chu hri chhia vei tûrin ka kut lek khum che ila chuan in boral vek tawh ang. Ka thiltihtheihzia entîr tûr chein i nun ka la zuah a ni; tichuan, khawvêl pumah ka hming a thang dâwn a ni. I lo chapo ta hle a, ka mite pawh i la chhuah duh lo cheu va. Ngai rawh, naktûk hetih hunah hian rial ka tlâktîr chiam dâwn; chutianga nasa chu Aigupta ramah engtik lai mahin a la awm ngai lo. I ran te leh i thil neih, ram palailênga awm apiang chu, khungtîr vek rawh, in khung ṭhat loh chuan mihring pawh ran pawh rialin a dêng ang a, an thi ang,’ a ti,” a ti a. Farawa upa ṭhenkhat chuan Lalpa thu chu an pawisa a, an chhiahhlawhte leh an rante chu inah an awmtîr a. Ṭhenkhat erawh chuan Lalpa thu chu an pawisa lo va, an chhiahhlawhte leh rante chu ram palailêngah an awmtîr a. Lalpa chuan Mosia hnênah, “Vân lamah i kut phar rawh; tichuan, Aigupta ram pumah rial a lo tla ang a; mihring te, ran leh thlai tinrêng a dêng ang,” a ti a. Mosia chuan a tiang chu vân lamah a lek a, Lalpa chuan khawpui a tiri a, rial a tlâktîr a, leiah ṭêkte a tla bawk a. Rial chu a tla ta chur chur a, kâwl te a phe zawr zawr a, tûn hma hriat phâk chinah chutianga nasa chu Aigupta ramah a la awm ngai lo. Ram palailênga awm zawng zawng, mihring pawh ran pawh rial chuan a dêng a, hnimte pawh a dêng a, thingte pawh a dêng bung rum a. Israel fate awmna ram, Gosen ramah chuan rial chu a tla ve hauh lo. Farawa chuan Mosia leh Arona chu a kohtîr a, an hnênah, “Tûn ṭum zawng ka tisual a ni e, Lalpa chuan a tidik a, kei leh ka mite hian kan tidik lo a ni. “Hêng khawpui ri dur dur leh rial tla chur chur hi titâwp tûrin Lalpa chu ngên teh u, mite chu ka chhuah ang a, kan chelh tawh lo vang che u,” a ti a. Mosia chuan a hnênah, “Khua ata ka chhuah veleh Lalpa hnênah ka bân ka phar ang a, khawpui a ri tawh lo vang. Lalpa a ni tih i hriat nân rial pawh a tla tawh lo vang. Nang leh i hote zawngin Lalpa chu in ṭih dâwn chuang lo tih ka hria a ni,” a ti a. La leh barli chu a chhe vek a, barli chu a vui a, la pawh a pâr lai a ni. Huit leh buhtun erawh chu a la vui lo va, a chhe ve lo. Farawa in aṭangin Mosia chuan khawpui a chhuahsan a, Lalpa lamah a bân a phar a, khawpui leh rial chu a bâng ta a; leia ruah lo sûr pawh a hân ta a. Ruah te, rial te, khawpui te a reh tâk hnu chuan Farawa chuan a suahsual a thawh a, a hote nên luhlul an chhuah leh ta zêl a. Mosia hnêna Lalpa sawi tawh ang khân Farawa chuan luhlul a chhuah a, Israel fate chu a chhuah duh chuang lo. Lalpa chuan Mosia hnênah, “Farawa hnênah kal rawh, ka thiltih makte an zînga ka tih theih nân a hote nên ka tiluhlul a; tin, nangnin in fate hnênah te, in tute hnênah te, in tuchhuante hnênah te Aigupta rama ka thiltih hi in inhrilh chhâwng zêl ang a, Lalpa hian chûng chu ka tih a ni tih in hriat theih nân,” a ti a. Mosia leh Arona chu Farawa hnênah an kal a, “Hebrai mite Pathian Lalpa chuan heti hian a ti: ‘Eng chen nge ka hmaah i inphahhniam duh loh dâwn? Ka rawng an bâwl theih nân ka mite hi chhuah rawh. Ka mite hi i chhuah duh loh chuan naktûkah in ram chhûngah hian khau ka tipuang ang. Ram chu an bawh khat tlat ang a, lei pawh a hmuh theih lo vang. Rial chhut chhiat loh, thil eng pawh la awm chu, an ei zo vek ang a; i inah te, i hote inah te leh Aigupta mi zawng zawng inah te an khat ang; in pate leh in pute pawhin, he rama in awm chinah chutiang khawpa tam khau puang chu an la hmu ngai lo vang,’ a ti e, ti rawh min ti,” an ti a. Farawa in ata chu an chhuak ta a. Farawa hote chuan a hnênah, “He pa hian eng chen nge min tihbuai dâwn le? Chhuah mai rawh, an Pathian Lalpa rawng chu va bâwl rawh se. Aigupta ram a chhiat zawh tawh hi i hre lâwm ni?” an ti a. Mosia leh Arona chu Farawa hnênah an rawn hruai leh a, an hnênah, “Kal ta ula, in Pathian Lalpa rawng chu va bâwl rawh u. Tute nge kal ang?” a lo ti a. Mosia chuan, “A pui a nawiin kan kal ang, kan fanu kan fapate nên, kan berâm leh ran rualte pawh kan hruai ang; Lalpa hmaah ruai ṭheh tûr a ni si a,” a ti a. Ani chuan, “In nupui fanaute nêna ka chhuah vek loh tûrzia che u chu Lalpa chhâlin ka sawi hi. Hel in tum rilru tih a lang chiang alâwm. In duh angin paho chu kal ula, Lalpa rawng chu va bâwl rawh u,” a ti a. Farawa in aṭang chuan Mosia leh Arona chu an hnawt chhuak ta a. Lalpa chuan Mosia hnênah, “Aigupta ram chungah i bân phar rawh; Aigupta ramah khau a lo puang ang a, rialin a chhut chhiat bâng kha an ei zo vek dâwn nia,” a ti a. Mosia chuan Aigupta ram chungah chuan a tiang chu a lek a. Lalpa chuan nilêng leh zankhuain khawchhak thli a tlehtîr a, zîngah chuan thli chuan khau chu a rawn lên ta a. Aigupta ramah khau chu a awm ta nuai nuai a, an fu tep tup a, an tam ngei mai! Chutiang khawpa tam chu tûn hma khân a la awm ngai lo, awm pawh a awm leh ngai hek lo vang. Ram pum an dâp a, khua an hliah thim khup a, rial den chhiat bâng thlai chi tinrêng leh thei chi tinrêng an khel fai vek a. Aigupta ram pum puiah hnim hring emaw, thing hring emaw hmuh tûr rêng a awm ta hauh lo va. Hmanhmawh takin Farawa chuan Mosia leh Arona chu a ko va, “In Pathian Lalpa chungah leh in chungah ka lo tidik lo a ni. Ka thil tihsual hi tûn ṭum chu min ngaidam teh u. In Pathian Lalpa chu thih theihna khawpa min hrem hi titâwp tûrin min ngensak rawh u,” a ti a. Farawa in aṭang chuan an chhuak a. Lalpa hnênah an dîlsak a. Lalpa chuan khawthlang thli na tak a tlehtîr a, khau chu a lên a, Tuipui Senah a lên lût ta vek a. Aigupta ram chhûngah chuan khau pakhat mah a awm ta lo va. Lalpa chuan Farawa chu a tiluhlul ta cheu va, Israel fate chu a chhuah duh chuang lo va. Lalpa chuan Mosia hnênah, “I bân vân lamah phar rawh; tichuan, Aigupta ram pum hi thim chhah mupin a khuh ang a, ai-mit-thlawn ang maiin a awm dâwn nia,” a ti a. Mosia chuan a kut chu a phar a, ni thum chhûng chu Aigupta ram a thim ta tlat a, tu mah an inhmu thei lo va, mahni awmhmun ata ni thum chhûng chu che sawn thei pawh an awm lo. Israel mite awmnaah erawh chuan êng a awm thung a. Farawa chuan Mosia chu a ko va, “Kal ula, Lalpa rawng chu va bâwl rawh u, in fanaute nên kal ula, in berâm leh bâwng rualte erawh chu hruai suh u,” a ti a. Mosia chuan, “Chuti a nih chuan thilhlan tûr leh hâlrala hman tûr ran min tumsak i peih ang emaw chu! Kan rante chu pakhat mah hnutchhiah lo zâwk ila a ṭha ang. Keimahni ngeiin kan Pathian Lalpa biakna tûr ran chu kan thlang zâwk tûr a ni. A hmun kan va thlen tê tê loh chuan ran eng ang nge hlan tûr kan hre rih si lo va,” a ti a. Lalpa chuan Farawa chu a tiluhlul leh a, a chhuah duh chuang ta lo va. Farawa chuan a hnênah, “Ka hmuh tûrah awm tawh suh, fîmkhur rawh, mi rawn hmuh tum tawh suh, ka hmuh leh vaih che chuan ka tihlum ngei ang che,” a ti a. Mosia chuan, “I sawi dik ang, ka rawn hmu leh tawh lo vang che,” a ti a. Lalpa chuan Mosia hnênah, “Farawa leh Aigupta ram chu ṭum khat dang ka khawih leh ang a, a chhuah tawh ang che u. A chhuah vêk vêk che u chuan a hnawhin a ni a hnawh chhuah dâwn che u ni. Chuvângin, mipui hnênah rangkachak leh tangkaraw thawmhnaw an ṭhenawmte ta, a hawh man pe lovin dîl rawh se,” a ti a. Israel mite chu Lalpa chuan Aigupta-ho chu a duhsaktîr a. Mosia chu Aigupta ram mi lâr tak a ni a, Farawa hote leh a mite chuan an ngaisâng êm êm a ni. Tin, Mosia chuan Farawa hnênah “ Lalpa chuan heti hian a ti; ‘Aigupta ram chu zanlaiah ka fang dâwn. Aigupta mite fa tîr, Farawa fa tîr, lalṭhutthlênga ṭhu aṭanga bawihnu, buh râwtsawmtu fa tîr thlengin, an ran fa tîrte nên lam an thi vek ang. Chumi zân chuan Aigupta ram pumah an ṭap chuah chuah ang a, chutianga nasa chu a awm ngai lo va, a awm leh tawh ngai hek lo vang. Israel fate erawh chu tu mah, an rante lamin ui pawhin a bauh lo vang. Lalpa chuan Aigupta mite leh Israel fate chu a ngai danglam ngei a lo ni tih in hria ang,’ a ti a. I hote ka hnênah an lo kal ang a, ka hmaah an rawn kûn ang; ka mite chu hruaia kal bo daih tûrin min rawn ngên ang. Chumi hun chuan ka mite chu ka chhuahpui ang,” a ti a. Thinur takin Farawa chu a chhuahsan ta a. Lalpa chuan Mosia hnênah, “Farawa chuan in thu a ngaithla chuang dâwn lo, Aigupta ramah thil mak tih belh a ngai dâwn a nih hi,” a ti a. Mosia leh Arona chuan chûng thil mak chu Farawa hmuh tûrin an ti a. Lalpa chuan Farawa chu a tiluhlul a, a ram ata Israel fate chu a chhuah duh lo. Aigupta ramah Lalpa chuan Mosia leh Arona hnênah, “Tûn thla hi thla chhiar ṭanna ni sela, kum khat chhûnga thla hmasa ber atân hmang ang che u. Israel pungkhâwmho hrilh rawh: Tûn thla ni sâwm ni hian chhûng tin mahni chhûng ei tâwk berâmno emaw, kêltê emaw thlang ṭheuh rawh se. Berâmno pakhat ei sêng lo khawpa chhûng tlêm an nih chuan an ṭhenawmte nên inthurual sela, an tam dân azir leh an ei theih tûr zât azirin insem rawh se. Berâm chu a hmêlhem tûr a ni lo, berâm rual emaw, kêl rual zînga mi emaw kum khat aia upa lo, a pa, hmêlhem lo, in duh zâwk zâwk in thlang thei ang. Ni sâwm leh pali ni thlengin in thlang ang a, chumi ni tlai lamah chuan Israel hnam pum pui chuan an talh tûr a ni. A thisen chu an la ang a, an eina tûr in kawngka biang tawnah leh kawngka lu chungah an tât tûr a ni. Chumi zân chuan sa chu an hem hmin ang a, an ei tûr a ni; dawidim telh loh chhang leh lambak nên an ei tûr a ni. A hela ei tûr a ni lo, chhum tûr a ni hek lo; a lu leh a ke te, a kawchhûngte nên lam meia hem hmin tûr a ni. In ei bâng chu zîng thlengin a awm tûr a ni lo; chutiang ei bâng in neih chuan in rawh ral tûr a ni. Pheikhawk bun diamin tiang in keng ang a, inchei fel sa vekin in ei sawk sawk tûr a ni. Lalpa chawimawi nâna kalhlên kût a ni e. Chumi zân chuan Aigupta ram ka fang chhuak ang a, Aigupta mi, fa tîr, mihring pawh ran pawh, a pa chu ka that vek dâwn; Aigupta pathiante pawh ka sawisa ang. Lalpa ka nih hi. Kawngka bianga thisen tah chu in awmna chhinchhiahna a ni ang a, thisen tah chu ka hmu ang a, chu in chu ka kal kân ang a; nangni chuan Aigupta mite angin in tuar ve lo vang. Chumi ni chu in tân ni serh a ni ang a, Lalpa thiltih in hriat reng nân in kût ṭhîn tûr a ni, ṭhangthar zêlte pawhin chu ni chu an serh kumkhua tûr a ni. Ni sarih chhûng chu dawidim telh loh chhang chauh in ei tûr a ni; a ni hmasa berah chuan in in chhûng ata dawidim rêng rêng in paih fai vek tûr a ni a, ni khat ni aṭanga a ni sarih ni inkâr chhûnga dawidim telh chhang ei chu Israel mite zînga chhiar tel loh tûr a ni. A ni khat ni leh a ni sarih ni chuan inkhâwmpui urhsûn in nei tûr a ni; chumi chhûng chuan eng hna mah in thawk tûr a ni lo; in ei tûr erawh chu in siam thei ang. Chhang dawidim telh loh kût hi in hmang ṭhîn tûr a ni, hemi ni hian Israel mipui chu Aigupta ram aṭangin ka hruai chhuak a ni; ṭhangthar zêlte pawhin dâna neihin he ni hi an hmang zêl tûr a ni; thla hmasa ber ni sâwm leh pali tlai aṭangin ni sawmhnih leh pakhat tlai thlengin dawidim telh chhang in ei tûr a ni lo. Ni sarih chhûng chu in in chhûngah dawidim pakhat mah a awm tûr a ni lo va. Dawidim telh chhang ei chu, in zînga châm mai a ni emaw, in zînga piang a ni emaw, Israel mipui zînga chhiar tel tûr a ni lo. Dawidim tel rêng rêng in ei tûr a ni lo, in awmna apiangah chhang dawidim telh loh in ei tûr a ni,” a ti a. Mosia chuan Israel upaho chu a ko khâwm vek a, “Berâmno emaw, kêltê emaw thlang thuai ula, in chhûnga ei tûrin kalhlên kût sa atân talh rawh u. Husop têl khâwm ula, maihûna thisenah chuan in hnim ang a, kawngka biang tawnah leh kawngka lu chungah thisen chu in tât dâwn nia; a tûk khua a vâr hma chu tu mah mahni in ata in chhuak tûr a ni lo. Aigupta mite that tûrin Lalpa chuan a rawn fang dâwn a ni. Kawngka lu chung leh a biang tawna thisen a hmuh chuan kawngka chu a kal kân ang a, tihlumtu chu nangni that tûrin a lo luh a phal lo vang. He thil hi dâna neihin in serh ang a, in fate pawhin an serh kumkhua tûr a ni. Lalpa thutiam anga ram a pêk tûr che u in thlen hunah pawh hetiang serh leh sâng hi in chhunzawm zêl tûr a ni. “In faten, ‘Hetiang serh leh sâng hi eng tihna nge?’ tia an zawh che u chuan, ‘ Lalpa chawimawina Kalhlên Kût a nih hi. Ani chuan Aigupta mite a thah lai khân Aigupta rama awm Israel-te in a kal hlên a, min zuah a ni; chumi chawimawina chu a ni,’ in ti dâwn nia,” a ti a. Mipui chu an kûn a, Pathian chibai an bûk a. Israel fate chu an tho va, Mosia leh Arona hnêna Lalpa thupêk ang chuan an ti ta a. Zânlaiah Lalpa chuan Aigupta rama an fa tîr zawng zawng chu a tihlum ta a. Farawa fa tîr, lalṭhutthlênga ṭhu tûr aṭanga ripa tâng fa tîr thlengin, ran, a pa piang hmasa ber te nên lam a that ta a. Zânlaiah Farawa chu a tho va, a hote zawng zawng leh Aigupta mi zawng zawng chu an tho va, mitthi awm lohna chhûng rêng a awm lo va, Aigupta mite chu ram pum puiah an ṭap ta chuah chuah a. A zân a zânin Mosia leh Arona chu Farawa chuan a ko va, “Ka mite hi chhuahsan ula, in sawi angin Israel fate nên Lalpa rawng chu va bâwl rawh u. In berâm te, in bâwng te pawh in duh angin hruai rawh u; chhuak thuai rawh u. Malsâwmna min dîlsak bawk ang che u,” a ti a. Aigupta mite chuan chhuak thuai thuai tûrin an tur ta sek a. “Kan thi zo mai dâwn alâwm,” an ti a. Mite chuan an chhang ur tûr hmeh sa dawidim la telh loh chu an fûn a, chhang hmeh thlêng chu puanin an tuam a, an kokiah an bât a. Mosia thu angin Israel fate chuan an ti a, Aigupta mite chu tangkarua leh rangkachak ṭhi leh thawmhnaw dangte an dîl a. Lalpa chuan mite chu Aigupta mite a khawngaihtîr a, an dîl apiang an pe a. Tichuan, Aigupta mite thil neih chu an rawk a ni ta ngawt a. Israel fate chu Ramases aṭangin Sukot an thleng a, kea kal chu an vaiin mi nuairuk an ni. Hnam dang tam tak an kal tel ve a, berâm te, kêl te, bâwngte nên an kawi duah mai. Aigupta ram aṭanga chhang hmeh sa dawidim telh loh an ken chu an kang a; Aigupta ram ata an hnawh chhuah tâk avângin an ei tûr pawh an siam ṭha hman lo a ni, an chhang hmeh sa pawh dawidim an phul hman lo. Israel fate Aigupta rama an awm chhûng chu kum zali leh sawmthum a ni. Kum zali leh sawmthum a ral ni ngei chuan Lalpa mite chuan Aigupta chu an chhuahsan leh ta a ni. Chumi zân chu Aigupta ram aṭanga hruai chhuah zân a ni a, Lalpa zân serh a ni. Hemi zân hi Israel fate pawhin ṭhangthar zêl thlenga zân serha an hman kumkhua tûr a ni. Lalpa chuan Mosia leh Arona hnênah, “Hei hi Kalhlên Kût hman dân tûr thupêk chu a ni: Hnam dang miten kût sa hi an ei ve tûr a ni lo. Amaherawhchu, in chhiahhlawh, pawisaa in lei, an serh in tansakte chuan an ei ve thei ang. Ram dang mi, in zînga awm vete leh in hnêna inhlawhfate pawhin an ei tûr a ni lo. In khatah in ei tûr a ni, hmun dangah in la ṭhen tûr a ni lo va, a ruh in titliak tûr a ni hek lo. Israel pungkhâwmho chuan chutiang chuan an ti tûr a ni. Mikhual, in ina chêngte chuan Lalpa tâna kût sa chu an ei ve duh chuan mipa zawng zawng serh chu tansak phawt tûr a ni; chumi hnuah chuan in zînga piang ve ang chiahin en tawh tûr an ni a; kût sa te pawh an ei ve thei tawh ang; serh tan loh erawh chuan an ei tûr a ni lo. In zînga piang in mite leh hnam dang, in zînga lo pêm lûtte chu angkhatin dân thuhmun in hmantîr tûr a ni,” a ti a. Mosia leh Arona hnêna Pathian thupêk ang tak chuan Israel fate chuan an ti ta a. Chumi ni ngei chuan Israel fate chu Aigupta ram aṭangin Lalpa chuan a hruai chhuak ta vek a ni. Lalpa chuan Mosia a bia a. “Israel-te zînga fa tîr, mipa, chhûl keu tawh phawt chu, an ran no, a pa, piang hmasa ber nên ka tân serh hrang rawh, ka ta an ni,” a ti a. Mosia chuan mipuite hnênah, “Vawiin hi hre reng rawh u, Aigupta ramah bawih in ni a, in chhuak ta a nih hi. He hmun aṭangin Lalpa chuan a chakna hmangin a hruai chhuak che u a ni. Chhang dawidim telh in ei hauh tûr a ni lo. Abib thla, vawiin hian in chhuak a nih hi, Kanan mite ram, Hit mi te, Amor mi te, Hiv mi te, Jebus mite awmna, khawizu leh hnutetuia luang ram, in pate hnênah pêk che u a lo tiam tawh ram a hruai thlen hunah che u chuan, hemi thlaah hian kût hi in hmang ṭhîn tûr a ni. Ni sarih chhûng dawidim telh loh chhang in ei tûr a ni a; a ni sarih ni chuan Lalpa chawimawi nân ruai ṭheh tûr a ni. Ni sarih chhûng chu dawidim telh chhang in ei tûr a ni lo, in ramah dawidim pawh, dawidim telh chhang pawh a awm tûr a ni lo. In fate hnênah, ‘Aigupta ram aṭanga kan chhuah dâwn laia Lalpa thiltih avânga hêng hi ti kan ni,’ tiin hrilh ang che u. “In kuta chhinchhiahna leh in mit kâra hriatrengna thil hrên in hrêng ang hian Lalpa dân chu lam nachâng in hriat theih nân in hmang ṭhîn dâwn nia. Aigupta ram aṭangin a thiltihtheihna ropui tak hmangin a hruai chhuak si che u a. Kum tin kût chu a hun takah in hmang ziah tûr a ni. “Kanan mite ram, in pate hnêna pêk che u a tiam chu Lalpa chuan a hruai thlen che ua, a pêk hunah che u chuan, in fa tîr apiang, mipa tawh phawt chu, Lalpa hnênah in hlân tûr a ni. In rante pawh an no hmasa, a pa tawh phawt chu, Lalpa hnênah in hlân tûr a ni. Sabengtungno hmasa ber erawh chu a aiah berâmno hlânin in tlan tûr a ni. In tlan duh loh chuan a ring elhtliak ang che u. In fa tîr te chu in tlan ngei tûr a ni. “Nakin hnuah in faten, ‘Hei hi eng tihna nge?’ tia an zawh che u chuan, ‘Aigupta rama bawiha kan awm, Lalpa chuan a chakna hmangin min hruai chhuak a. Faraw-an kan chhuah a phal loh lai khân, Aigupta rama fa tîr, mihring pawh ran pawh, a tihlum vek a; chuvângin, chhûl keu tawh phawt chu Lalpa hnênah kan hlân zêl a ni; keimahni fate erawh chu kan tlan ṭhîn a ni,’ in la ti dâwn nia. Chutia in tih chuan kut emaw, chal emaw hrên angin Aigupta ram aṭangin Lalpa chuan a chakna hmangin a hruai chhuak che u a ni tih in hre reng thei ang,” a ti a. Faraw-an mite a chhuah khân kawng hnai zâwk, Filistia mite rama kal tlang kawngah chuan a hruai lo va, miten indona an hmuhin an inchhîr palh ang a, Aigupta ramah an kîr leh mai ang tih a hlau a ni. Thlalêr lam, Tuipui Sen lamah a kual zâwngin a hruai ta zâwk a. Israel fate chu Aigupta ram aṭang chuan hriamhrei nên, a pâwl pâwlin an chhuak ta a. “Pathianin a hre reng ang che u a, ka ruhte hi in zâwn chho dâwn nia,” tia a chah anga tih an tiam tlat angin Mosia chuan Josefa ruhte chu a keng a. Sukot aṭang chuan an kal zêl a, thlalêr tâwp Etham-ah bûk an khuar a. Chhûn leh zâna an kal theih nân Lalpa chuan chhûnah chhûm dingin an hma a hruai a, zânah mei dingin an kawng a tieng a. Chhûna chhûm ding leh zâna mei ding chuan mite chu a kalsan ngai lo. Lalpa chuan Mosia hnênah, “Israel fate chu hrilh rawh; kîr leh sela, Migdol leh Tuipui Sen inkârah Pi-hahirot ep Baal-zefon bulah riahhmun khuar rawh se, Farawa chuan, ‘Heti hian Israel fate chu kalna mumal hre lovin thlalêrah an tâng ta,’ a ti rilru dâwn nia. Farawa chu ka tiluhlul ang a, a ûm ang che u a, Farawa leh a hote chungah ka ropuizia ka tilang ang a, Lalpa chu ka ni tih an hria ang,” a ti a. Chutiang chuan an ti ta a. Israel-te an tlân chhuah tâk thu chu Aigupta lal an hrilh a. Farawa leh a ṭhuihruaite chu Israel-te chungah an thu a khauh ta hle a; “Israel-te tha chhawr lova kan chhuah ta mai hi engtizia nge?” an ti a. Farawa chuan a sakawrtawlailîr a buatsaihtîr a, a sipaite chu a hruai a. Sakawrtawlailîr ṭha ṭha zaruk leh Aigupta ram tawlailîr khalh thiam thlante nên an ûm ta a. Lalpa chuan Aigupta lal Farawa chu a tiluhlul a, Israel faten inchhuang taka Aigupta an chhuahsan hum hum chu an ûm ta a. Farawa sakawr leh a tawlailîr te, a sipai te leh sakawr chungchuang, Aigupta mite chuan Pi-hahiroth ep, Baal-zefon bulah Tuipui kama an awm chu an va ûmphâk a. Israel fate chuan Farawa hoten an rawn ûm pha dâwn ta mai tih an hmuhin an hlau hle a. Lalpa chu ṭanpuiah an sâwm ta a. Mosia hnênah, “Thlân a awm loh avângin em ni thi tûra thlalêra min hruai chhuah hi? Eng atân nge Aigupta ram aṭang khân min lo hruai chhuah le?” Kan chhuah hma khân hetiangin thil a awm ang tih kan hrilh lo che em ni? Min nawr lui lo mai rawh, Aigupta mite rawng hi kan bâwl zêl mai ang e; thlalêra thihsâwn ai chuan Aigupta mite bawih nih a ṭha zâwk kan tih kha,” an ti a. Mosian mipui hnênah, “Hlau suh ula, zâm suh u, vawiina Pathianin a rawn chhanhim dân tûr che u hi thlîr mai rawh u. Vawiina Aigupta mi in hmuhte hi in hmu leh tawh ngai lo vang. Eng mah in tih ve a ngai lo vang, Lalpan a dosak dâwn che u alâwm,” a ti a. Lalpa chuan Mosia hnênah, “Engah nge min auh chûl le? Israel fate chu hma lama kal zêl tûrin hrilh rawh. I tiang kha lek la, tuipui chungah i bân phar la, tui chu tiṭhen rawh, Israel fate chu Tuipui mawng leichârah an kal dâwn nia. Keiin Aigupta mite chu ka tiluhlul ang a, in hnungah an rawn ûmzui ang che u. Tichuan, Farawa leh a sipaite, a tawlailîr leh sakawr chungchuang mite avângin ropuina ka chang dâwn a ni. Farawa te, a tawlailîr te leh a sakawr chungchuang mite chunga ka intihropui hunah chuan kei hi Lalpa chu ka ni tih in hria ang,” a ti a. Israel-te hmaa awm ṭhîn Lalpa vântirhkoh chu a insawn a, an hnung lamah a awm ta a, an hmaa chhûm ding pawh kha an hnung lamah a insawn a. Israel-te leh Aigupta mite awmna inkârah chuan a awm ta a. Israel mite awmna chu a chhun êng a, Aigupta mite awmna erawh chu a tithim a. Mosia chuan tuipui chungah a bân a phar a, Lalpa chuan zankhuain khawchhak thli na tak a tlehtîr a, tuipui chu a chhêm kiang a, tui chu a inṭhen a, tuipui mawng chu leichârah a chang ta a. Israel fate chu tuipui mawng leichârah chuan an kal ta a, an ding lam leh vei lamah tui chu bang angin a ding tawn a. Aigupta mite chuan an ûm zêl a, Farawa sakawr te, a tawlailîr te, a sakawr chungchuang mite chuan tuipui mawngah chuan an ûmzui zêl a. A tûk khawfîng chah hmain Lalpa chuan Aigupta sipaite chu chhûm ding leh mei ding kârah chuan a zu hmu a, a zuk timangang ta a. An tawlailîr ke te chu a titâng a, a lîr ṭha hlei thei ta lo va. Aigupta mite chuan, “ Lalpan Israel-te lama ṭangin min do a nih hi; hawh u, i hawsan thuai ang u,” an ti a. Lalpa chuan Mosia hnênah, “Tuipui chungah i bân phar rawh, tuite chuan Aigupta mi, an tawlailîrte leh an sakawr chungchuangte chu a chîm dâwn nia,” a ti a. Mosia chuan tuipui chungah a bân a phar a, ni a lo chhuah chuan tui chu a insuih zawm leh ta pûng a, Aigupta mite chuan tlânchhiat an tum a; mahse, Lalpa chuan anni chu tuiah chuan a paih lût a. Tui lo infin leh chuan tawlailîr te, sakawr chungchuang mi te, Farawa sipai zawng zawng, tuipui mawnga ûmzuitute chu a chîm ta vek a, pakhat mah chhuak an awm lo. Israel fate erawh chu tuipui mawng leichârah chuan an kal a, bang angin an sîr tuakah chuan tui chu a ding luah a. Chumi ni chuan Lalpa chuan Israel-te chu Aigupta mite kut ata chu a chhanhim a, Aigupta mi, tuipuia thi ruangte chu an hmu a. Aigupta mite chunga Lalpa thiltih râpthlâk tak chu Israel-te chuan an hmu a; Lalpa chu an hlau va. Lalpa leh a chhiahhlawh Mosia chu rinpuiah an neih ta a. Mosia leh Israel fate chuan Lalpa chawimawi nân he hla hi an sa ta dual dual a: “ Lalpa fakin hla ka sa ang, Ropui takin a hneh ta si a. Sakawr leh a chungchuang tuipuiah a paih thla. Lalpa chu mi tichaktu, Zaia ka fak chu a ni; Min chhandamtu a ni, Ani chu ka Pathian a ni a, ka chawimawi ang. Kan pate Pathian a ni a, a ropuizia ka hril ang. Lalpa chu râl do mi a ni a, A hming chu Lalpa a ni. Farawa leh a tawlailîr chu a sipai rualte nên tuipuiah a paih thla a, Sipai hotu ṭhate pawh Tuipui Senah an pil. Tui thûkah chuan an tla a, Lungtum angin tuipui mawngah an pil. Aw Lalpa, i kut ding lam chu a va chak êm! Aw Lalpa, i hmêlmate chu i râwt sawm tâk hi. Nangmah dotute chu ropui takin i hneh a, I thinur alh chuan buhpâwl angin a kâng ral ta. I thâwk khum a, tui chu a lo intiang a, Bang ang maiin a lo ding ta luah a, A thûk laite chu a lo châr zo ta. ‘Kan ûm ang a, kan nangchîng ang a, Duhtâwkin an chungah kan che ang a, An neih zawng zawng kan insem ang,’ hmêlmate chuan an ti vei a. I thli i han chhêmtîr a, Tuipui chuan a chîm pil ta a, Tui thûkah chuan suan tlang angin an pil zo ta. ‘Aw Lalpa, nang ang rênga thianghlim leh ropui, Fak tlâk leh thiltithei Pathian dang an awm em ni le?’ I kut ding lam i han phar a, Hmêlmate chu leiin a dawlh zo ta. I mi, i tlante chu lainatin i hruai a, I ram thianghlimah i chaknain i hruai thleng a. Miten an lo hriatin an khûr a, Filistia rama awmte an thauvah a man. Edom ram hotute an thlabâr a, Moab hruaitute an thlaphâng a, Kanan rama mite an zâm zo ta. I mi, i mi thlanten an kal pelh hma loh chuan I chakzia an hmuhin hlauvin an khûr a, Lungtum ang maiin an chechâng lo. Hlau leh khûrin an khawng. I tlâng thianghlimah chuan i hruai thleng a, I phun ta a; Aw Lalpa, nangma chênna tûr hmun i siam ngeiah chuan. Lalpa chu chatuan chatuanin a lal ang.” Farawa sakawrte chu, a tawlailîrte leh sakawr chungchuangte nên tuipuiah an tlân lût a; Lalpa chuan tuipui tui chu a tikîr a, a chîmtîr a, Israel fate erawh chu tuipui mawng leichârah an kal kai a ni. Arona u, zâwlnei Miriami chuan perhkhuang a keng a, hmeichhe dangte pawh chuan perhkhuang kengin an zui a, an lâm a. Miriami-te chuan hetiangin hla an sa a: “ Lalpa chu fakin awm rawh se, a ropui êm e, Sakawr leh a chungchuangte chu tuipuiah a paih thla,” an ti a. Mosia chuan Israel fate chu Tuipui Sen aṭang chuan a hruai zêl a, Sur thlalêr an thleng a, ni thum an kal a, tui a awm lo va. Tui awmna, Mara, an va thlen chuan a tui chu a khâk avângin an in thei si lo va, a hmingah pawh Mara an vuah rêng a ni. Mosia hnênah, “Eng nge kan in tâk ang?” tiin an phunnawi ta a. Mosia chuan Lalpa chu a au va, ani chuan thing pakhat a kawhhmuh a, chu chu tuiah chuan a chiah a, tui chu a lo tui ta a. Chutah chuan thupêk leh awm dân tûr a kawhhmuh a, anni chu hetiang hian a fiah ta a: “In Pathian Lalpa thu hi in ngaihthlâka, a mit hmuha thil dik in tih chuan, a thupêkte in zawma, a dânte in pawisak bawk chuan Aigupta mite tuar ang hri kha ka tuartîr ve lo vang che u; tidamtu che u Lalpa ka nih hi,” tiin. Tuikhur sâwm leh pahnih leh tûm kûng sawmsarih awmna hmun Elim chu an thleng a. Elim aṭang chuan an kal zêl a, Aigupta ram an chhuahsan aṭanga thla hnih leh ni sâwm an kal ni chuan Israel fate chu Elim leh Sinai inkâr Sin thlalêr an thleng a. Israel pungkhâwmho chu Mosia leh Arona chungah an phunnawi a. An hnênah Israel fate chuan, “Aigupta rama sa bêl bula kan ṭhut lai te, puar taka chaw kan ei lai te khân Lalpa chuan min lo tihlum mai se a ṭha zâwk tûr, thlalêra rilṭâma thi tûrin mi hei zozai hi min hruai chhuak a nih hi,” an ti a. Lalpa chuan Mosia hnênah, “Ngai rawh, in ei tûr vân aṭangin ka rawn sûrtîr dâwn; mite chuan an ni khat tla chiah chhar rawh se; ka thu an zâwm dâwn nge dâwn lo ka fiah dâwn a ni. A ni ruk nia an chhar chu ei atân an buatsaih ang a, ni danga an chhar lêt an chhar tûr a ni,” a ti a. Mosia leh Arona chuan Israel zawng zawng hmaah chuan, “ Lalpa chuan Aigupta ram aṭangin a hruai chhuak ngei che u a ni tih nakin tlaiah chuan in hria ang a, Lalpa ropuizia in hmu ang. Lalpa chunga in phunnawi kha a lo hria a ni, keini hi eng nge kan niha kan chunga in phunnawi ang le?” an ti a. Mosia chuan, “ Lalpan tlaiah sa a rawn pe dâwn che u a, zîngah puar tâwka in ei tûr chaw a pe bawk ang che u, a chunga in phunnawi thu hi a lo hria a, kan chunga in phun hi Lalpa chunga phunnawi in ni zâwk asin,” a ti a. Mosia chuan Arona hnênah, “Israel fa pungkhâwmho chu, ‘In phunnawina thu Lalpa chuan a lo hria a, a bulah lo kal hnai teh u,’ tiin hrilh rawh,” a ti a. Aronan Israel pungkhâwmho hnêna thu a sawi lai chuan, thlalêr lam an han thlîr a, chhûmah Lalpa ropuina a lo lang a. Lalpa chuan Mosia hnênah, “Israel-te phunnawina chu ka lo hria e, an hnênah, ‘zanriahah sa in ei ang, zîngah chaw puar takin in ei bawk ang, Kei Lalpa hi in Pathian chu ka ni tih in hria ang chu, a ti,’ ti rawh,” a ti a. Tlaiah chuan vahmîm an lo thlâwk a, an bûk vêlah chuan an fu khat tlat a; zîngah chuan an bûk vêl chu daiin a khuh vek bawk a. Dai chu a han hul chuan thlalêr leiah chuan thil vâr pan tê tê, vûr ang maia thianghlim hi a lo awm ṭeuh va. Israel fate chuan, “Eng nge ni ngai?” an ti a; eng nge a nih an hre lo va ni. Mosia chuan an hnênah, “ Lalpa chaw pêk che u a nih hi. Hei hi Lalpa thupêk chu a ni; mahni kham tâwk chiah chauh chhar ṭheuh rawh u; in ina awm zawng tân no hnih hisâpin chhar ang che u,” a ti a. Israel-te chuan chutiang chuan an ti ta a; ṭhenkhat chuan an chhar tam deuh va, ṭhenkhat erawh chuan an chhar tlêm deuh va. Nova an han teh chuan a chhar tam deuhte chuan an ngah bîk chuang lo va, a chhar tlêmte lahin an nei tlêm chuang bîk hek lo; mahni kham khawp chiah an chhar vek a ni. Mosia chuan, “A tûka ei atân tiin tu man khêk suh se,” a ti a. Mosia thu chu an awih duh chuang lo va, ṭhenkhat chuan an ei bâng chu a tûka eiah an khêk a; mahse, a lung a, a ṭawih chhia a; Mosia chu an chungah a thinur hle a. Tûk tin, mahni ei tâwk tûr chauh an chhar ta zêl a; ni a tlângsân chuan a tuiral vek ṭhîn. A ni ruk ni chuan a lehhniha tamin, mi pakhat tân no li zêl hisâpin an chhar a ni. Pungkhâwmho chunga rorêltute chuan Mosia chu an rawn hrilh a. Ani chuan an hnênah, “Hei hi Lalpa sawi kha a ni, naktûk hi ni serh, Lalpa tâna sabat thianghlim chu a ni. Vawiinah in ei duh zât chu hem hmin ula, chhum in duh zât chu chhûm rawh u; a bâng chu a tûk atân dah ṭha ang che u,” a ti a. Mosia thupêk ang chuan a tûk atân an khêk chu a ṭawih lo va, a lung hek lo. Mosia chuan an hnênah, “Chu chu vawiin chuan ei rawh u, vawiin hi Lalpa sabat a ni a, khawiah mah chhar tûr in hmu lo vang. Ni ruk chhûngin tûk tin in chhar ang a, a ni sarih ni erawh chu sabat a ni a, pakhat mah chhar tûr a awm lo vang,” a ti a. Ni sarih ni chuan mi ṭhenkhat chu an thil chhar ṭhin chhar tûrin an thawk chhuak a; mahse, chhar tûr rêng an hmu lo. Lalpa chuan Mosia hnênah, “Eng chen nge ka thupêk leh ka dânte hi in zawm duh loh dâwn? Kei Lalpa hian sabat ni ka siamsak che u a; chuvângin, a ni ruk niin in ei tûr ni hnih daih ka pe che u a ni; a ni sarih ni hi chuan mahni bûkah awm ṭheuh rawh u, tu mah kal chhuak suh u,” a ti a. Tichuan, mite chu ni sarih ni chuan an châwl a. Israel chhûngte chuan chu thil chu ‘Mana’ an vuah a, chhibung vâr chi ang hi a ni a, khawizu-a hmeh chhangpêr anga tui a ni. Mosia chuan, “ Lalpa thupêk chu hei hi a ni; in thlah zêlte hmuhah mana no khat dah ṭhat tûr a ni; Aigupta ram ata ka hruai chhuak che u a, thlalêra ka châwmna che u chaw a nih hi,” a ti a. Mosian Arona hnênah, “Bêl la la, Mana no khat dah rawh. Ṭhang lo thar zêlte hmuh atân Lalpa hmaah dah ang che,” a ti a. Mosia hnêna Lalpa thupêk ang chuan Arona chuan Lalpa hmaa thuthlung bâwmah chuan a dah ṭha a. Israel fate chuan mihring chênna ram, Kanan ram an thlen hma chu kum sawmli chhûng ngawt mana chu an ei a ni. Tehna no sawmhnih hi ṭîn khat vêl a ni. Israel fa pungkhâwmho chu Sin thlalêr aṭang chuan Lalpa thupêk angin an insawn zêl a; Refidim-ah bûk an khuar a, mipui tân tui in tûr a awm lo va. Mite chuan Mosia chu an nawr a, “Tui in tûr min pe rawh,” an ti a. Mite chuan Mosia chu an mawhchhiat a. Mite tui chu a hâl êm êm a, Mosia chungah an phunnawi a; “Engah nge tuihâla thi mai tûrin Aigupta ram aṭang khân kan fate leh kan rante nên min lo hruai chhuah le?” an ti a. Mosian Lalpa chu a au va, “Hêng mite tân hian eng nge ka tih tâk ang? Lungin min dêng hlum mai dâwn e,” a ti a. Lalpa chuan Mosia hnênah, “Israel upaho hruai la, Nail luipui i vuakna tiang kha kengin mipui hmaah kal ang che. I hmaah Horeb tlânga lungpui bulah ka lo ding ang; lung chu i vua ang a, mipuite in tûr tui a lo chik chhuak ang,” a ti a. Israel upate hnênah Mosian chutiang chuan a ti a. Chu hmun hmingah chuan Maasa tih leh Meriba tih a sa a; Israel faten an nawr avâng leh, ‘Kan zîngah Lalpa a tel meuh nge tel meuh lo,’ tia Lalpa an fiah avângin. Refidim-ah chuan Amalek-ho an lo kal a, Israel-te chu an rawn bei a. Mosia chuan Josua hnênah, “Mi ṭhenkhat thlang la, Amalek-ho bei tûrin kal rawh. Naktûkah chuan tlângchhîpah Pathian tiang kengin ka lo ding ang,” a ti a. Mosia sawi ang chuan Josua chuan Amalek-ho chu a bei a; Mosia chu Arona leh Hura nên tlângchhîpah an chho va. Mosian a bân a han phar chuan Israel-ho chu an chak a, a bân a lâk thlâk chuan Amalek-ho chu an chak a. Mosia bân chu a kham ta hle a, lungtum an rawn la a, Mosia chu a chungah an ṭhuttîr a, Arona leh Hura chuan Mosia bân chu lehlam lehlamah an chelh kânsak a, ni tlâk hma chu a bân a phar thei ta a. Amaleka leh a mite chu Josua chuan khandaihin a sawisa nek a. Lalpa chuan Mosia hnênah, “He thu hi hriat reng atân lehkhabu-ah ziak rawh. Vân hnuaia tu ma hriat zui loh tûrin Amalek-ho chu ka sawisa dâwn tih Josua hrilh rawh,” a ti a. Mosia chuan maichâm a siam a, a hmingah Lalpa Nisi a vuah a. “ Lalpa puanzâr chu lek sâng rawh u; Lalpa chuan Amalek-ho chu eng lai pawhin a bei reng dâwn a ni,” a ti a. Midian-ho puithiam, Jethroa, Mosia puzawn chuan, Mosia leh a mite tâna Pathianin thil a tihsak, Lalpa ngeiin Israel-te Aigupta ram ata a hruai chhuah thute chu a lo hria a. Mosia puzawn Jethroa chuan Mosia nupui Zipori, in lama a hnutchhiah kha, a fapa pahnih nên a rawn hruai a. A fapa upa zâwk chu Gersoma a ni, ‘ram dangah mikhual ka ni’ a tihna a ni. Pakhat zâwk hming chu Eliezara a ni, ‘ka pate Pathian chuan min pui ta a, Farawa khandaih lakah min chhanhim’ a tihna a ni. Pathian tlângah, bûk an khuarnaah chuan, Mosia puzawn chuan a fapa pahnih leh a nupui chu a rawn hruaisak a. Mosia hnênah, “Kei i puzawn, Jethroa hian ka rawn tlawh dâwn a che, i fapa pahnih leh i nupui pawh ka rawn hruai e,” a rawn ti a. Mosia chu a puzawn hmuak tûrin a chhuak a, a kûn a, chibai a bûk a, an dam leh dam loh te an inzâwt a; puan inah chuan an lût dûn ta a. Israel-te avânga Farawa leh Aigupta mite chunga Lalpa thil tih zawng zawng chu Mosian a puzawn chu a hrilh a; kalkawnga harsatna an tawh laka Lalpa chuan a chhanhim ṭhin dânte pawh a hrilh a. Aigupta mite kut ata leh Farawa kut ata Israel-te a chhan chhuak a, an chunga a ṭhat êm avângin Lalpa chungah chuan Jethroa chu a lâwm ta êm êm a. “Aigupta mite kut ata leh Farawa kut ata chhanchhuaktu che u Lalpa chu fakin awm rawh se. Israel mite chuti taka hmusita an sawisak lai a chhan tâk avângin Lalpa chu pathian dang zawng zawng aiin a ropui zâwk tih ka hre ta,” a ti a. Mosia puzawn Jethroa chuan Pathian hnênah hâlral thilhlan leh inthawinate a hlân a. Arona leh Israel upa zawng zawngte chu Pathian hmaa Mosia puzawn inthawina chawhlui kîl tûr chuan an lo kal a. A tûkah chuan Mosia chu mite thu rem tûrin a ṭhu a, mite chuan Mosia chu zîng aṭangin tlai thlengin an din hual a. Mosia puzawn chuan mipui ro a rêlsak dân chu a hmu a, “Engtizia nge mipui tân hetianga ro i rêl? Nangmah vekin rêl tumin i ṭhu a, zîng aṭanga tlai thlengin an din hual che hi,” a ti a. Mosian a puzawn hnênah chuan, “Pathian râwn tûrin mite hi ka hnênah an lo kal alâwm. Thu pawi an neihin ka hnênah an rawn thlen miau si ṭhîn a, an ṭhenawmte nêna an inkâr thu ka lo rêl felsak ṭhîn a ni. Pathian thuruatte leh a dânte ka lo hrilh ṭhîn a ni,” a ti a. Mosia puzawn chuan, “I thil tih dân hi a ṭha hauh lo mai. Nang leh hêng mite hi in intichau ngei ang; he hna hi i tân a hautak lutuk, nangmah mai chuan i thawk sêng lo vang. Ka thu hi ngaithla la, thurâwn ka han pe ang che a, Pathianin a awmpui ang che. Mipui aiawha Pathian hnêna kala, an thu Pathian hnêna thlentu tûr i ni. Pathian thuruatte leh a dânte chu i zirtîr ang a, an awm dân tûr leh an tih tûr i kawhhmuh ṭhîn tûr a ni. Mipui zîng ata mi fel deuh deuh, Pathian ṭih mi, thu dik ngaina, hlêprûk haw mi thlang chhuak la, sâng chin chunga rorêl tûr te, za chin chunga rorêl tûr te, sawmnga chin chunga rorêl tûr te, sâwm chin chunga rorêl tûr te ruat rawh. Chûng chu rorêltu nghet ni rawh se, thu tênau chu rêl zêl sela, thu lian deuh erawh chu i hnên lo thleng ṭhîn rawh se; tichuan, an chhâwk zâng ang chia, i hahdam deuh thei ang. Pathian thupêk anga chutianga i tih chuan i intichau lo vang a, mipui lah an zângkhai ang a, an thu an rem fel thuai thuai ang a, an haw mai thei ṭhîn ang,” a ti a. Tichuan, a puzawn thu chu Mosia chuan a zâwm a, a sawi ang chuan a ti ta a. Israel-te zînga a fel fel Mosian a thlang chhuak a, mipuite hotu-ah a ruat a; sâng hotu tûr te, za hotu tûr te, sawmnga hotu tûr te, sâwm hotu tûr te a ruat ta a. Eng lai pawhin mite chu ro an rêlsak a, thu lian erawh chu Mosia hnênah an thlen a, thu tenau chu an rêl fel mai a ni. Mosia chuan a puzawn chu a va thlah a, Jethroa chu an ram lamah a haw leh ta a. Aigupta ram an chhuahsan aṭanga thla thumna, ni khat ni chuan, Israel fate chuan Sinai thlalêr an thleng a. Refidim aṭanga lo thleng an ni, tlâng bul thlalêr ramah chuan bûk an khuar a, Mosia chu Pathian tâwk tûrin tlângah chuan a lâwn chho va. Tlâng aṭangin Lalpa chuan a rawn ko va, “Jakoba chhûngte bia la, Israel fate chu hrilh rawh: Aigupta mite ka sawisak dân in hmu a, thla zârin mupuiin a notê a chawi angin ka chawi che u a, keima tân ka hruai chhuak che u a. Chuvângin, ka aw in ngaihthlâk duh takmeuhva, ka thuthlung in vawn dâwn phawt chuan mi zawng zawng zînga ka ro hlu bîk in ni ang, khawvêl ram zawng zawng hi ka ta a ni si a. Ka tân hnam serh hran, puithiam in ni ang. Chûng chu Israel fate i hrilh tûr chu a ni,” a ti a. Mosia chu tlâng ata chu a lo chhuk a, Israel upaho chu a ko va, Lalpa thupêk angin chûng thu chu a hrilh a. Mi zawng zawng chuan, “ Lalpa sawi apiang chu kan ti ang,” an ti tlâng a. Mipui thu chu Mosian Lalpa a hrilh chhâwng a. Lalpa chuan Mosia hnênah, “Ngai rawh, chhûm chhah takah i hnênah ka lo kal dâwn, i hnêna thu ka sawi lai miin an lo hria ang a, nang pawh kumkhuain an rin phah ang che,” a ti a. Mosian mipuite chhânna chu Lalpa a hrilh a. Lalpa chuan Mosia hnênah, “Mite hnênah kal la, vawiinah leh naktûkah anni chu thian thianghlim ang che; an silhfênte su fai sela. A ni thum ni atân inpeih vek rawh se; a ni thum ni chuan mipui hmuh tûrin Sinai tlângah Lalpa chu a lo chhuk dâwn a ni. Tlâng hualin ri i kham kualsak tûr a ni. Tlâng va rap lo tûrin fîmkhur rawh se; a bul hnaiah pawh kal suh u; tlâng va rap chu tihhlum tûr a ni. Chumi chin chu tu man an khawih tûr a ni lo; lunga den hlum emaw, thala kah hlum tûr emaw a ni; hei hian mihring pawh ran pawh a huam a ni; tihhlum tûr an ni. Nimahsela, tawtawrâwt a rîk hunah mipui chuan tlâng chu an lo thleng tûr a ni,” a ti a. Mosia chu tlâng aṭang chuan a chhuk a, mipui chu a thian thianghlim a, an silhfênte chu an su fai a. Mipui hnênah, “Ni thum ni atân inpeih rawh u, in nupuite bulah mu suh ang che u,” a ti a. A ni thum ni zîngah chuan khawpui a ri dur dur a, kâwlte a phe a, tlâng chu chhûm chhah takin a khuh tlat a; tawtawrâwt a ri ruai ruai bawk a, mi zawng zawng chu hlauvin an khûr a. Pathian tâwk tûrin mite chu bûk aṭang chuan Mosia chuan a hruai chhuak a, tlâng bulṭhutah chuan an ding a. Sinai tlângah Lalpa chu mei nên a lo chhuk avângin a khu vung vung a, rawhtuina meipui khu ang maiin a khu a, tlâng chu a nghîng hluk hluk a. Tawtawrâwt chu a ri ring tial tial a, Mosia chuan thu a sawi a. Pathian chuan khawpui riin a rawn chhâng a. Lalpa chu Sinai tlângchhîpah chuan a lo chhuk a; tlângchhîpa chho tûrin Mosia chu Lalpa chuan a ko va; Mosia chu a chho ta a. Lalpa chuan Mosia hnênah, “Chhuk la, Lalpa hmêl hmuh tumin mipuiin ri kham kha rawn kân suh se, an kân vaih chuan mi tam tak an thi ang. Lalpa hmaa kal ṭhîn puithiamte pawh an inthian thianghlim tûr a ni; chutilo chu, ka rawn hrem ngei ang,” a ti a. Mosia chuan Lalpa hnênah, “Mipuite chuan Sinai tlâng an rap thei hlei nêm, ‘tlâng hualin ri kham ula, serh thianghlim rawh u,’ min tih kha,” a ti a. Lalpa chuan a hnênah, “Chhuk ta la, Arona nên lo chho leh rawh u; puithiamte leh mipuite chuan ri kham khu Lalpa panin rawn kân suh se; an kân chuan ka lo sawisa mai ang,” a ti a. Tichuan, Mosia chu mipui awmnaah chuan a chhuk a, chûng thu chu a hrilh a. Pathian chuan thu a sawi a, a sawite chu hêngte hi a ni: “Bawiha in awmna Aigupta ram aṭanga hruai chhuaktu che u Lalpa, in Pathian chu ka ni. Kei lo hi chu Pathian dang rêng rêng nei suh. I tân milem siam suh, chung lam vâna awm emaw, leia awm emaw lei hnuai tuia thil awm lem emaw i siam tûr a ni hek lo. Chûng chu kûnin chibai i bûk tûr a ni lo va, an rawng i bâwl tûr a ni hek lo. Kei Lalpa i Pathian hi Pathian thîkthuchhe tak ka ni, min hawtute chu an thlah chhuan thum chhuan li thleng pawhin ka hrem ṭhîn a; min hmangaiha ka thupêk zâwmtute erawh chu an thlah chhuan sâng tam tak chungah pawh ngil ka nei ṭhîn. I Pathian, Lalpa hming chhâlin dâwt sawi suh; dâwta a hming chhâltu chu Pathianin hrem lohvin a chhuah lo vang. Sabat ni hi thianghlim taka serh tûr a ni tih hre reng rawh. Ni ruk chhûng hna i thawk ang a, i hna zawng zawng i thawk thei ang. A ni sarih ni erawh hi chu Lalpa tâna sabat ni a ni a, hna eng mah i thawk tûr a ni lo; i fapa te, i fanu te, i bawihpa te, i bawihnu te, i ran te, in khaw chhûnga hnam dang awm te pawhin hna an thawk tûr a ni lo. Lalpa pawhin ni rûk chhûngin tuifinriat te, lei leh vân leh a chhûnga awm zawng zawng te a siam a, a ni sarih ni chuan a châwl a ni. Chuvângin, mal a sâwm a, a serh a ni. I nu leh i pa chawimawi rawh; tichuan, Lalpa i Pathianin ram a pêk che-ah chuan i dam rei dâwn nia. Tual that suh. Uire suh. Ru suh. I vêngte dâwtin hêk suh. I vêngte in leh lo awt suh; i ṭhian nupui pawh ît suh, a bawihpa emaw, a bawihnu emaw, a bâwng emaw, a sabengtung emaw, a neih eng mah i awt tûr a ni lo,” tiin. Mipui chuan kâwlphe te, tawtawrâwt rite an hriata, kâwlphe te, tlânga meikhu vung vung te an hmuh chuan hlauvin an khûr a, hla fêah an ding a. Mosia hnênah, “Kan hnênah thu sawi la, kan lo ngaithla ang e, Pathian meuh chuan kan hnênah thu sawi teh suh se, kan thi mai dâwn alâwm,” an ti a. Mosia chuan, “Hlau suh u, Pathian chu in ṭih renga, a thu sawi in awih reng dâwn leh dâwn loh fiah tûr che uin a lo kal mai a ni e,” a ti a. Mosia chuan Pathian awmna chu a va hnaih a, mipui erawh chu hla fêah an ding ta tlat a. Lalpa chuan Mosia hnênah, “Vân aṭangin ka rawn bia che tih Israel-te chuan an hria a, hetiang hian hrilh rawh. Tangkaruain emaw, rangkachakin emaw in tân kei bâk biak tûr siam suh u. Min biakna hmun tûr ka ruat apiangah ka tân hlum maichâm siam ula, chutah chuan hâlral thilhlan leh remna thilhlan berâm leh bâwngte chu hlân ang che u, ka lo kal ang a, mal ka sâwm ang che u. Ka tâna lung maichâm in siam chuan chher suh ang che u, in chher chuan in thîrkhen avângin a bawrhbâng tawh a ni. Kailâwn siam ngai khawpa sângin maichâm siam hek suh u, in lâwn chhoh zawngin in lang palh ang e,” tiin. “Hêng dânte hi Israel-te zawm atân pe rawh. Hebrai mi bawihah an lei chuan kum ruk chhûng bawihah a ṭang ang a, a kum sarih kum chuan man lova chhuah tûr a ni. Amah maia lei a nih chuan amah chu a chhuak ang a, a nupui nêna lei a nih chuan a nupui nên chuan an chhuak tûr a ni. A puin nupui a neihsaka, fanu fapa an hrin chuan, a nupui fanaute chu a pu ta an ni; ani erawh chu amah chauhvin a chhuak thei ang. ‘Ka pu hi ka ngaina a, ka nupui fanaute ka hmangaih bawk si a, ka chhuahsan lo mai ang,’ a tih tlat chuan, a pu chuan Pathian inah a rawn hruai ang a, kawngkaah, kawngka biang bulah chuan a dintîr ang a, thîr zumin a beng a verhsak ang a, kumkhuain bawih a ni tawh ang. “Miin a fanu bawihan hralh sela, mipa anga chhuah ve tûr a ni lo. A nupui atâna lei a niha, a duh leh si lo a nih chuan, a pa chu a tlantîr leh tûr a ni; a bum avângin mi dang hnêna a hralh a thiang lo. A fapa nupui atân lei a nih chuan a fanu angin a en tûr a ni. A fapa chu nupui dang a neihsak chuan a nupui lei hmasak chu a châwm man te, a silhfên man te leh a chan ai thil dangte pawh a tihtlêmsak tûr a ni lo. Hêng thil pathum hi a tihsak loh chuan man lovin a chhuah tûr a ni. “Miin mi dang vua sela, a vuaka chu a thih chuan ani pawh chu tihhlum ngei tûr a ni. Tum rêng ni lova vaw hlum palh a nih chuan a tân himna tûr hmun ka ruatah chuan a sa him nân tlân rawh se. Him nân ka maichâmah tlân suh se, thinura, tum râna mi dang that chu hnuh chhuaha, tihhlum tûr a ni. “Mahni nu chungah emaw, pa chungah emaw kutthlâk chu tihhlum tûr a ni. “Hralh atân emaw, ama bawih atân emaw mihring rutu chu tihhlum tûr a ni. “A nu emaw, a pa emaw ânchhia lawhtu chu tihhlum tûr a ni. “Mi insual sela, pakhat zâwk chuan lungtumin chhu sela emaw, kuttumin emaw hnek sela, a thih loh chuan hrem tûr a ni lo. Sila khum beta a nata, tiang hawla khawlai a lên leh theih chuan a sil chhûnga a tha ai chu a tisiltu chuan a dam vâr thlengin a rûl tûr a ni. Miin a bawihpa emaw, a bawihnu emaw tiangin vua se, a vuak hlum chuan hrem ngei tûr a ni, ni hnih khat a dam erawh chuan an pu chu hrem tûr a ni lo, sum a chân ta tihna a ni. “Mi an insuala, hmeichhe nau pai an khawih chuan, amah chu hliam lo mah se a nau pai chu a tlâk chuan hmeichhe pasal phût zât, rorêltu remtihpuiin chawitîr tûr a ni. Hmeichhia chuan hliam a tuar chuan nun aiah nun, mit aiah mit, hâ aiah hâ, kut aiah kut, ke aiah ke, mei kan aiah mei kan, hliam aiah hliam, vuak aiah vuak tuartîr tûr a ni. “Miin a bawihpa mit emaw, a bawihnu mit emaw vuak delsak sela, a mit chhiat manah a chhuah tûr a ni. An hâ a tihbalsak pawhin an ha manah a chhuah tûr a ni. “Bâwngpain mipa pawh, hmeichhia pawh si hlum sela, bâwng chu lunga den hlum tûr a ni, a sa chu ei tûr a ni lo; bâwng neitupa chu khawih zui tûr a ni lo. Bâwng chuan mi sîk a lo chîna, a neitupa chu an lo hrilh tawh ṭhina, thlung ṭha duh lova, mipa emaw, hmeichhia emaw a sîk hlum chuan bâwng chu lunga den hlum tûr a ni; a neitupa pawh tihhlum tûr a ni. “Amaherawhchu, a neitupa chu a nun tlan an phalsak chuan a nun tlanna tûr an tuk zât zât chu a pe tûr a ni. Bâwng chuan naupang, mipa emaw, hmeichhia emaw si hlum sela, puitling si hlum ang bawka rêl tûr a ni, bawihpa emaw bawihnu emaw si hlum sela, a neitu chuan tangka bûk sawmthum a chawi tûr a ni, a situ bâwng pawh den hlum tûr a ni. “Miin khur chhîn a hawn emaw, khur thar a laihin emaw, a chhin leh lohva, bâwngpa emaw, sabengtung emaw a tlâk hlum chuan, khur laitu chuan a chawi tûr a ni; a man a pêk hnuah erawh chuan a sa chu a nei thei ang. “Mi pakhat bâwngpa mi dang bâwngpain a tihhlum chuan a tihlumtu bâwngpa chu hralh tûr a ni, a man chu an insem ang a, a thi sa pawh an insem tûr a ni. “Bâwngpa chuan tûn hmaa mi sîk a chîn ṭhina, a neitu chuan thlung ṭha lo ni sela, a sîk hlum bâwngpa chu bâwngpa vêkin a rûl tûr a ni, a sa erawh chu a nei thei ang. “Miin bâwngpa emaw, berâm emaw a rûka, a talh emaw, a hralh emaw a nih chuan bâwngpa chu a lêt ngain a rûl ang a, berâm chu a lêt liin a rûl tûr a ni. Miin a ran a chhuaha, mi lovah emaw, grep hmunah emaw tla-in mi lova thlai chu ei chhia sela, a ei chhiat zât chu a ran neitupa chuan ama thlaiin emaw, grepin emaw a rûl tûr a ni. “Miin ramah mei chhêm sela, ram kâng chuan mi lo kâng kaiin buh ding lai emaw, zai tawh dah khâwm emaw kâng sela, mei chhuahtu chuan a kâng chhia chu a rûl tûr a ni. “Miin mi dang pawisa emaw, thil man tam tham emaw kawlsak sela, a kawl chhûng chuan bo ta sela, rûkru tih a niha, rûkru chu man a nih chuan a rutu chuan a lêt hnihin a rûl tûr a ni. A rutu man a nih loh erawh chuan a kawltu chu rorêltu hmaah hruai tûr a ni a, a ru lo tih hriat nân chhia a chhamtîr tûr a ni. “Thil inchuh rêng rêng, bâwngpa emaw, silhfên emaw, thil hloh chhar emaw a inchuhate chu rorêltu hmaa hruai tûr a ni. Rorêltuin thiam zâwka a ruat chu a thiam lo zâwk chuan a lêt hnih a pe tûr a ni. “Miin sabengtung emaw, bâwngpa emaw, berâm emaw, ran dang emaw, a ṭhianpa enkawltîr sela, lo thi palhin emaw, hliam emaw lo tuarin emaw, suamhmang rualin an chhuhsak emaw ni sela, hretu dang an awm si loh chuan a kawltu chu biak inah hruai tûr a ni, a ṭhianpa ran chu a rûk a ni lo tih hriat nân chhia a chham tûr a ni. Ran chu a rûk a nih loh chuan a neitu khân a chân mai ang a, a kawltu khân a rulh a ngai lo. A rûk a nih erawh chuan a rûl tûr a ni. Sa seh a nih chuan a ei bâng ṭhenkhat, sa seh a nih hriatna a rawn la tûr a ni, sa seh chu a rulh a ngai lo. Miin mi dang ran a chhawr hawha, a neitu hmuh lohva inhliam emaw, thi palh emaw a nih chuan a hawhtu chuan a rûl tûr a ni. A neitu chuan a hmuh ve reng erawh chuan a rulh a ngai lo. Man neia hawh a nih pawhin, a hawh man chuan a huam a ni. “Nula hnahkhat, tu ma la hual loh miin a ngaih chuan, nupui man pangngai a pe ang a, nupuiah a nei tûr a ni. Nula pain neih a phal tlat loh pawhin nula hnahkhat man pangngai a pe tho tûr a ni. “Mitthi thlûk chîng hmeichhia chu tihhlum tûr a ni. “Ran rîmtu chu tihhlum tûr a ni. “ Lalpa hnênah ni lo, pathian dang hnêna inthawi chu tihboral daih tûr a ni. “In zînga hnam dang awm vete in tinawmnahin in tiduhdah tûr a ni lo; nangni pawh Aigupta ramah mikhuala in awm kha. Hmeithai emaw, fahrah emaw in tinawmnah tûr a ni lo. In tihduhdah vaih chuan kei Lalpa hian an mangang au chu ka lo ngaithla ang a, ka thin a ur ang a, khandaiha sah hlum in ni ngei ang; in nupuite chu an hmeithai ang a, in fate pawh an fahrah ang. “Ka mite chu an retheih avânga tangka i pûktîr chuan tangka pûktîrtu dangte angin ti suh; a pung i ṭhîng tûr a ni lo. I vêngte puan dahkhama i hrên chuan ni a tlâkah i pe kîr leh tûr a ni. A mut huna intuamlumna a neih chhun a ni a; i pêk kîr loh chuan a mangang ka hnênah a lo au vang a, ka lo chhâng ngei ang, ka khawngaih ngei dâwn a ni. Pathian ânkhum suh; in chunga rorêltu pawh ânchhia lawh suh. “I thlai rah i seng zawhah, oliv hriak i sâwr zawh chuan min pêk tûr ang chu min pe thuai ang che. “I fapa hrin hmasak ber chu min pe tûr a ni. Chutiang bawkin i bâwng leh berâm no neih hmasak ber chu min pe tûr a ni; a pui hnute ni sarih a hne ang a, a ni riat ni chuan mi rawn pe tûr a ni. “Ka mite in ni a, in thianghlim tûr a ni; chuvângin, rama sa seh sa rêng rêng in ei tûr a ni lo, ui pe ang che u. “Dâwt thuthang mai mai pu darh suh la; mi sual chhan tûrin thu dik lo sawi suh. Thil sual ti tûr chuan, a tam lam pawh ni se, zui suh la; dâwta mi dang thiam loh an chantîrnaah pawh tel hek suh la, rorêlna hmunah mi rethei ṭan bîk suh. “I hmêlma bâwngpa emaw, sabengtung emaw tlân bo i hmuh chuan i kaih hâwnsak ngei tûr a ni. I mi huatzâwng tak pawh ni se a sabengtung chu a phurin lo delh sela, i kaihthawhsak tûr a ni, i kal pêl mai tûr a ni lo. “Mi rethei pawh, a thu chu dik takin i ngaihtuahsak tûr a ni. Dâwtin mi hek suh la, thiam lohna nei lo chu tihlum suh; chutiang ti apiang chu thiam loh ka chantîr ang. Thamna la suh, thamna chuan thil dik lakah mit a tidel ṭhîn a, mi dikte thu pawh a tichingpen ṭhîn, Ram dang mi i tiduhdah tûr a ni lo; nang pawh Aigupta ramah khân ram dang mi i ni tawh a, a hrehawmzia i hriat kha. “I lo chu kum ruk Chhûng nei la, a thar apiang seng ang che. A kum sarih kum erawh chuan i chawlhtîr tûr a ni. Chumi kum chhûnga seng tûr awm chu i hauh tûr a ni lo. Mi retheiten an chang ve tûr a ni; mi retheiho lâk bâng chu ramsain an tlân tûr a ni. Chutiang bawkin i grep leh oliv hmun chu i ti tûr a ni. “Ni ruk chhûng hna thawk la, a ni sarih ni erawh chuan i châwl tûr a ni; i bâwng te, i sabengtungte pawh an châwl tûr a ni. I bawihnute leh hnam dang hlawha i chhawrte pawh an châwl hahdam tûr a ni. “In hnêna ka sawi apiang pawisa rawh u, Pathian dang hming rêng rêng lam suh u, a sawi pawh sawi ri suh u. “Min chawimawi nân kum khatah vawi thum kût hmang rawh u. Abib thla, ka hun ruatah, chhang dawidim telh loh kût hmang ula, ni sarih chhûng dawidim telh loh chhang ei ang che u. Hemi hun hian Aigupta ram ata in lo chhuak a; chuvângin, ka hmaah tu mah kut ruakin in lo kal tûr a ni lo. Thlai thar hmasa thlai thar kût hmang ula, kum tâwpah in thil chîn zawng zawng in seng zawh hunah Pâwl Kût hmang bawk ang che u. In zînga mipa zawng zawng kum khatah vawi thum Lalpa Pathian hmaah in lo lang tûr a ni. “Dawidim telh chhang chu ka hnênah i thilhlan ran thisen nên i hlân tûr a ni lo. Inthawina ran hlan thau chu a tûk thlenga dah tûr a ni lo. In rama thlai rah hmasa, a ṭha ṭha chu, Lalpa i Pathian inah i rawn la tûr a ni. Kêlnote chu a pui hnutein chhûm suh. “Ngai teh, kawnga vêng tûr che leh ka hmun ruata hruai thleng tûr chein in hmahruaitu tûr vântirhkoh ka tîr a. A thu pawisa ula, ngaithla ṭhîn rawh u; ka tirh a ni asin. Amah chu dodâl suh u; chutilo chuan in bawhchhiatnate a ngaidam lo vang. “A thu in zawma ka sawi zawng zawng hi in tih chuan in hmêlmate hmêlma, a dotu che u dotu ka ni ang. Ka vântirhkoh chuan in hma a hruai ang a, Amor mi te, Hit mi te, Periz mi te, Kanan mi te, Hiv mi te, Jebus mi te ramah a hruai lût ang che u: anni chu ka tiboral dâwn a ni. An pathiante chu kûnin chibai in bûk ve tûr a ni lo va, an tih ang in ti ve tûr a ni hek lo; an pathiante chu in tichhe vek tûr a ni a; an thil phunte pawh tichhe vek ang che u. Lalpa, in Pathian chu chibai min bûk chuan ruahtuiah leh buhbâlah mal ka sâwm ang che u a, in zîng ata natna ka la bo bawk ang. In rama nu tu mahin nau an chhiat lo vang a, ching an awm hek lo vang; in nun pawh ka tisei ang. “In kalna tûr mite chu ka tithlabâr ang a, an chiai ang a, in hmêlmate chu in hmaah ka tlânchhiattîr ang. An hmaah khawinghal ka tîr ang a, Hiv mi te, Kanan mi te, Hit mi te chu an ûm darh ang. Kum khat chhûng maiin ka hnawt chhuak vek lo vang; an chhuah mai chuan engkim a ram chhe hman ang a, in tâna hnawk tham ram sakawlh pawh an pung hman ang. Ram pum luah tham in awm hma chu zawi zawiin ka hnawt chhuak chauh vang. In ram chu Tuipui Sen aṭanga Filistia-ho tuifinriat inkâr leh, thlalêr aṭanga Eufretis lui inkâr hi a ni ang. Chu rama chêngte chu in hneh vek ang a, ka hnawh chhuahtîr ang che u. Anni nên chuan thu in thlung tûr a ni lo, an pathiante pawh in ṭâwm tûr a ni hek lo. In ramah chuan hêng mite hi in awmtîr tûr a ni lo; ka lakah thil sual an tihtîr dah ang che u; an pathiante chibai in bûk ve vaih chuan in chhiatpui ang.” Lalpa chuan Mosia hnênah, “Arona te, Nadaba te, Abihua te leh Israel upa sawmsarih te kha ka hnênah rawn chhohpui la; hla fea dingin chibai mi bûk tûr a ni. Nang erawh chu ka hmaah, nangmah chauhvin i lo kal tûr a ni, mipui phei chu an lo chho ve tûr a ni lo,” a ti a. Mosia chu a lo chhuk a. Lalpa thu sawi leh an invawn dân tûra a ruat chu a hrilh vek a, mi zawng zawng chuan “ Lalpa sawi chu kan ti ang,” tiin an chham rual dual dual a. Mosia chuan Lalpa thu zawng zawng chu a ziak chhuak a, zîng takah a tho va, tlâng bulṭhutah chuan maichâm a siam a. Israel hnam zâtin lung sâwm leh pahnih a phun a. Israel fate zînga tlangvâl ṭhenkhat chu a tîr a, Lalpa hnênah hâlral thilhlan leh remna thilhlan bâwngpa an hlân a. Chûng thisen zâtve chu Mosia chuan chawhtawlhah a dah a, a zâtve chuan maichâm chu a theh a. Thuthlung ziakna bu chu a la a, mipui hriatah a chhiar a; anni chuan, “ Lalpa sawi chu kan ti ang a, kan zâwm ang e,” an ti a. Mosia chuan thisen chu a la a, mipui chu a theh a, “Ngai teh u, Lalpa chuan hêng thu ang hian nangni nên thu a thlung ta, hei hi a thuthlunna thisen a nih hi,” a ti a. Tin, Mosia te, Arona te, Nadaba, te Abihua te leh Israel upa sawmsarih te chu tlângah chuan an han chho va. Israel-te Pathian chu an han hmu a. A ke hnuaiah chuan lungmantam safir rem khâwm ang, vân anga thiang hi a awm a. Israel milianho chungah chuan kut a thlâk lo, Pathian chu an han hmu a, an eiin an in ho va. Lalpa chuan Mosia hnênah, “Tlângah ka hnênah lo chho la, i mi hruaite i zirtîr atân ka dân leh thupêkte ka ziakna lungphêk ka lo pe ang che,” a ti a. Mosia leh amah puitu Josua chu an chhuak a, Mosia chu Pathian awmna tlângah chuan a chho ta a. Israel upate hnênah chuan, “Kan lo kîr leh hma chu he laiah hian min lo nghâk reng rawh u. Thu eng emaw nei in awm pawhin, hei, Arona leh Hura te in zîngah an awm a, an hnênah thlen ang che u,” a ti a. Mosia chu tlângah chuan a chho ta a. Tlângah chuan chhûm a zîng phui tlat a. Lalpa ropuina chu tlângah chuan a châm reng a, ni ruk chhûng chu tlâng chu chhûmin a tuam hnuin a ni sarih ni chuan Mosia chu a rawn ko va. Tlângchhîpa Pathian ropuina chu Israel-te hmuhah chuan mit tidel thei khawpa êng a ni. Mosia chu chhûmah chuan a han lût a, tlângah chuan a chho va, tlângah chuan ni sawmli a han awm a. Lalpa chuan Mosia hnênah, “Israel fate chu thilpêk ka hnêna rawn hlân tûrin hrilh rawh. An phal ang ang rawn la rawh se. Rangkachak te, tangkarua te, dâr te, la dumpâwl te leh a sen te, la senlâr leh zai sîn te, kêl hmul te, berâm vun tihsen te, savun ṭha chi te; sitim thing te, chhit atân hriak te, hriak thiha telh tûr leh hâla telh tûr thil rimtui te; Efod leh âwmbela bel tûr Soham lung leh lungmantam te rawn keng rawh se. An zînga ka chên ve theih nân biakbûk min siamsak rawh se. Biakbûk chu a chhûng chei dân tûr nên lam a lem ka entîr che kha, khami ang chiah khân in sa tûr a ni. “Sitim thingin bâwm, a dung tawng hnih leh a chanve, a vâng tawng khat leh a chanve, a sân lam tawng khat leh a chanve in siam tûr a ni. A pâwn lam leh chhûng lam chu rangkachak ṭha chiin in luan ang a, a tlâng chu rangkachak hlang ngatin in tuam chhuak bawk tûr a ni. Rangkachak beng pali siam ula, a ke pali-ah chuan vuah ang che u, lehlam lehlamah beng pahnih ve ve vuah ang che u. Sitim thingtlâwn pahnih siam ula, rangkachakin luan bawk rawh u. Sitim thingtlâwn chu bâwm zâwn nân a sîr bengah chuan rawlh ve ve ang che u. Thingtlâwn chu bâwmah chuan vuah reng tûr a ni a, lak sawn tûr a ni lo. Lungphêka thupêk ziak ka pêk tûr che chu a chhûngah dah ang che. Bâwm khuhna atân a dung tawng hnih leh a chanve, a vâng tawng khat leh a chanve, rangkachak hlîr phêk siam la. Cherub lem pahnih, rangkachaka siam, a chhera chher ngei, a chhîn hmâwr tawna dah tûr siam bawk ang che; a chhîn rangkachak nên a hmâwra rangkachak cherub lem awm chu sakhat a ni tûr a ni. Cherub-te chu an inhawitawn ang a, an thla an zâr ang a, bâwm chhîn chu a khuh vek tûr a ni. Bâwm chhûngah lungphêk pahnih ka pêk tûr che chu dah la, a chhîn chuan i khuh dâwn nia. Bâwm bulah chuan kan intâwk ṭhîn ang a, cherub pahnih, Thuthlung Bâwm chunga awm inkâr aṭang chuan ka rawn bia ang che a, Israel-te hnêna thu ka pêk tûr zawng zawng chu ka rawn hrilh ṭhîn ang che. “Sitim thingphêkin dawhkân i siam bawk tûr a ni; a dung tawng hnih, a vâng tawng khat, a sân lam tawng khat leh a chanve. Rangkachak hlangin luan chhuak la, a tlâng chu rangkachakin kâwm rawh. Zung li bawka hlai a sîr kâwmna siam la, a tlâng chu rangkachakin kâwm rawh. “Rangkachak beng pali siam bawk la, a ke awmna kilah vuah thliah ang che. A zâwnfung rawlhna tûr beng chu a tlâng kâwmna bulah dah ang che. Thing tlâwn, zâwnfung tûr, siam la, rangkachak luan ang che. Thlêng te, bêl te, uain thâwl te, uain bunna tûr note rangkachak hlangin siam tûr a ni. Dawhkân chu Thuthlung Bâwm bulah hûn tûr a ni. Ka hmaa dawhkânah chuan chhang serh a awm reng tûr a ni. “Khâwnvâr dahna rangkachak hlîr hlakin i siam tûr a ni. A ngul leh a bul vâwng chu a chhera chher tûr a ni; a lu bâwk te, a chei mawina pangpâr kuhmûm leh pâr parh lemte nên chuan a inzawm vek tûr a ni. A kûngpui pêng aṭangin zâr paruk a pêng ang a, lehlam lehlamah zâr pathum ve ve. Zâr tinah a cheimawi nân theite pâr kuhmûm leh a pâr parh lem pathum zêl a awm tûr a ni. khâwnvâr ngul zidingah chuan a cheimawina theite pâr kuhmûm leh pâr parh lem pali a awm tûr a ni. A zâr chung zâwk leh hnuai zâwk inkârah pangpâr kuhmûm pakhat zêl a awm bawk tûr a ni. Pangpâr kuhmûm lem te, a zârte leh a zidingte chu rangkachak tlang sakhat aṭanga chher tûr a ni. Khâwnvâr zâr sarih lu bâwkte chu chhit tûrin siam la, han chhit chuan a hma lam ên rawh se. Khâwnvâr chhit vêl nâna hman tûr bakcheh leh meivâp dahna thlêng, rangkachak hlang hlakin siam bawk tûr a ni. Khâwnvâr bâwr leh a hmanruate siam nân rangkachak hlîr hlak kg. sawmthum leh panga hmang ang che. Tlânga a lem ka entîr che ang chiah khân uluk takin siam ang che. “La zai sîn thlûr leh a dumpâwl te, a senduk te, a senlâr tea tah Cherub lem mawi taka zeh puan sâwm, Biakbûk chhûngah chuan zâr ang che. Puanzâr chu a intiat vek tûr a ni, tawng sawmhnih leh pariata sei, tawng li-a hlai a ni tûr a ni. Panga chu a hlai zâwnga ṭhui zawm tûr a ni a, a dang panga pawh chu a hrana ṭhui zawm bawk tûr a ni. Panga ṭhui zawm sîr ber tlângah chuan a beng, la dumpâwl hrual vuah thliah tûr a ni. “Beng sawmnga ve ve, inzâwn thliaha vuah tûr a ni. A beng leh beng bah zawmna tûr thil kawm sawmnga rangkachakin siam la, chu chuan puan ṭhui khâwm pahnih chu bât zawm ang che; tichuan, Biakbûk chung zâr chu tlêp khat a ni dâwn nia. Biakbûk chung tûr kêl hmul puan sâwm leh pakhat tah tûr a ni. Kêl hmul puan chu a intiat vek tûr a ni, tawng sawmthuma sei, tawng li-a hlai ni rawh se. Chûng puan panga chu ṭhui zawm tûr a ni, a dang paruk pawh chu a hranga ṭhui zawm tûr a ni. Paruk ṭhui zawm chu biakbûk hma lamah zâr tûr a ni, a sîr ber chu thleh tûr a ni. Ṭhui khâwm sîr ber tlângah chuan beng sawmnga, inzâwn zêlin siam tawn bawk ang che. Dârin thil kawm siam la, chu chuan bât tawn la, biakbûk in chung zâr chu tlêp khat a ni dâwn nia. Biakbûk hnung lamah a khuhna sahmul puan lawr chu uai thla mai rawh se. A sîr tuaka a chunga lawr, tawng khat ve ve pawh chu uai thla mai rawh se. “A chung thuah belhna tûr berâm vun tihsen leh savun ṭha chi siam bawk ang che. “Biakbûk banga tun tûr sitim thing rem khâwm ang che. Tawng sâwma sâng, tawng khat leh a chanvea hlaiin rem ang che. Frêm pahnih ke chu inang chiahin tizuih la, a bulṭhuta a zu invuah hnuah a dangte nên a insi phui thei tûr a ni. Chhim lam bang atân chutiang remkhâwm chu sawmhnih siam la, a bulṭhut, a sîr zuih zu inphunna tûr tangkaraw tlang ker khuar, tlang sawmhnih siam bawk ang che. Biakbûk hmâr lama tun tûr chutiang sitim thing rem khâwm chu sawmhnih siam bawk ang che, a frêm ke zuih inphunna tûr tangkaraw tlang sawmli ker bawk la, tah chuan zu inphun rawh se. Biakbûk châr, khawthlang lamah chuan bang tun tûr thing rem khâwm paruk siam la, pahnih chu a kila ṭang tûr a ni. A kila ṭang tûrte chu a bul aṭangin a lêr thlengin kilh zawm tûr a ni, a kil bang tûr chu chutianga kilh zawm tûr chu a ni. Tichuan, a vaiin thing rem khâwm chu pariat a ni ang a, a bulṭhut ṭheuh tûr pawh tangkaraw tlang ker khuar bawk tûr a ni. A bang tun ṭhui khâwm tûr, bangrel, sitim thingtlâwn sâwm leh panga siam la. A bangah chuan rel panga awm zêl rawh se, a châr lamah panga, a sîr tuakah panga ve ve. A laia a rel dah chuan Biakbûk bang chu a hual chhuak tûr a ni. Thing rem khâwm tun chu rangkachaka luan vek tûr a ni; a ṭhuikhâwmna tûr bangrel vuah nân rangkachak beng siam bawk ang che, a bangrelte pawh chu rangkachaka luan tûr a ni. Biakbûk chu tlânga a lem ka entîr che ang chiah khân din ang che. “Pindana zâr tûr la zai sîn, a dumpâwl te, a senduk te, a senlâr tea tahin cherub lemte zeh tûr a ni. Rangkachaka luan sitim ban siam la, a innghahna tûr tangkaraw tlang siam bawk ang che. Banah chuan thil bahna tûr kawm siam la, puan chu zâr ang che. Puanzâr pindan chhûngah chuan Thuthlung Bâwm chu dah la, puanzâr chu Hmun Thianghlim Ber leh Hmun Thianghlim daidanna a ni ang. Thuthlung Bâwm chu a chhîn chuan i chhîn ang a, Hmun Thianghlim Berah chuan dah ang che. Puanzâr pâwn lamah dawhkân kha hmâr lam pangah dah la, khâwnvâr kha chhim lam pangah dah ang che. “Biakbûk kawngkaa zâr tûr la zai sîn, thlûr, a dumpâwl te, a senduk te, a senlâr te mawi taka tah tûr a ni. Chumi zârna tûr chuan sitim ban panga, rangkachaka luan, a bulṭhut dâr tlang ker khuar leh puan bahna tûr thil kawm rangkachakin siam bawk ang che. “Maichâm, kil li nei, tawng nga bial, sitim thingin siam ang che; tawng thuma sâng a ni tûr a ni. A kil tinah ki lawr chho a awm ṭheuh tûr a ni, maichâm nên chuan a inzawm vek tûr a ni; a vaiin dâr phêka tuam vek tûr a ni. Vut bâwm te, vutlawh te, maihûn te, thîrkut te, meilawh te dârin siam bawk ang che. Dâr tlâwn rem khâwm, a pangah chuan bel chhuak la, a kil li-ah chuan dâr beng dah zêl ang che. Chu dâr tlâwn rem khâwm chuan maichâm hnuai lam chanve thlengin a tuam tûr a ni. A zâwnfung tûr sitim tlâwn siam la, dârin tuam ang che. Zâwnfung pahnih chu maichâm panga beng chuan zâwn dâwnah vuah tûr a ni. Maichâm bangah thingphel bel la, a lai chu kawrawng rawh se; tlânga a lem ka entîr che ang khân siam ang che. “Biakbûk chu hung tûr a ni. Chhim lamah chuan la zai sîn thlûra tah puan tawng zaa sei zâr tûr a ni. Dâr ban sawmhnih leh a bulṭhut dâr tlang sawmhnih a awm tûr a ni. Banah chuan puanzâr bahna tûr thil kawm leh a zârna tûr thil tlâwn, tangkaruaa siam, dah bawk tûr a ni. Biakbûk hmâr lamah pawh puan tawng zaa sei zâr tûr a ni, ban sawmhnih leh a bulṭhut sawmhnih, a bahna tûr kawm leh a zârna tûr thil tlâwn, tangkaruaa siam a awm bawk tûr a ni. Khawthlang lamah chuan tawng sawmngaa sei puan zâr tûr a ni, ban sâwm leh a bulṭhut sâwm a awm ang a. Khawchhak lamah pawh a hungna chu tawng sawmngaa sei a ni bawk tûr a ni. Luhna tûr kawngka a awm ang a, luhna sîr bang chu tawng sâwm leh pangaa sei a ni ang, ban pathum leh bulṭhut pathum a nei ang. A luhna lehlam sîrah pawh bang, tawng sâwm leh pangaa sei, ban pathum leh bulṭhut pathum nei a awm bawk tûr a ni. A luhna kawngkaa zâr tûr la zai sîn thlûr, a dumpâwl te, a senduk te, a senlâr tea tah, mawi taka zeh, tawng sawmhniha sei a awm tûr a ni; a zârna atân ban pali, bulṭhut nei ṭheuh a awm bawk tûr a ni. Hungna ban zawng zawng chu tangkaraw tlâwna ṭhui zawm tûr a ni: puan bahna tûr thil kawm chu tangkarua a ni tûr a ni, a bulṭhut erawh chu dâr tlang a ni ang. A tual hungna chu a dung tawng za, a vâng tawng sawmnga, a sân lam tawng nga a ni ang a, a puanzâr tûr chu la zai sîn thlûr tah a ni ang, a ban bul erawh chu dâr a ni ang. Biakbûk sakna hmanrua zawng zawng, a kilh behna te, a hungna pal khen nghehna te chu dâr vek a ni tûr a ni. “Khâwnvâra chhit tûr oliv hriak thlit fîm rawn la tûrin Israel fate chu hrilh rawh; khâwnvâr chu tlaiah chhit ziah tûr a ni. Arona leh a fate chuan Biakbûka Thuthlung Bâwm awmna pâwnah khâwnvâr chu dah sela, tlai aṭanga zîng thlengin Lalpa hmaah chuan chhi rawh se; Israel fate leh an thlah zêlte chuan hei hi tih dân nghetah neih rawh se. “I u Arona chu a fa Nadaba te, Abihua te, Eleazara te, Ithamara te nên ko la, Israel mite zîng ata ka puithiam atân tihrang rawh. I u, Arona hâk tûr, kawr serh, amah tiropuia timawitu tûr siamsak ang che. Mi themthiam, pianpuia themthiamna ka pêkte chu ruai la, Arona inbel tûr thawmhnaw siam teh se, puithiam hna thawk tûra serh hran a ni dâwn si a. Hêng thawmhnawte hi an siam tûr a ni: âwmbel te, efod te, kawrfual te, kawrhnuai te, diar ṭial te, kâwnghrên te, i u Arona leh a fapate hâk atân puithiam kawr te hi siam sela, ka puithiamah an ṭang dâwn nia. Rangkachak te, la dumpâwl te, senduk te, senlâr leh la zai sîn te an hmang tûr a ni. Efod chu themthiam rual chuan rangkachak zai te, la zai sîn te, a dumpâwl te, a senlâr te, a senduk tein tah rawh se. Darbak pahnih, a hnung lam leh hma lama invuah, bah luh tlatna tûr siam sela. Kâwnghrên rangkachak zai sîn te, la zai sîn thlûr, a dumpâwl te, a senduk te, a senlârtea inchawih mawi taka tah tûr a ni. Kâwnga hrên behna tûr Efod kawr hmâwrah chuan efod puan ang chiaha zeh mawi tah zawm tûr a ni. Soham lungmantam pahnih la la, Israela thlah hnam sâwm leh pahnih hming ker ang che; an upat dân indawtin an hming chu ker ang che, pakhatah paruk ve vein. Mi themthiam kertîr la, rangkachakah phûm rawh se. Lungmantam pahnih chu dârbakah chuan Israel hnam sâwm leh pahnih hriat reng nân bel ang che; Arona chuan Lalpa hmaah an hming chu dârbakah chuan a bât tel ang a, Israel hnamte chu ka hre chhuak ṭhîn dâwn nia. Lungmantam phûmna tûr rangkachak pahnih chher la; rangkachak hlîr hlak khaidiat inherh siam bawk la, chûng phûmnaah chuan vuah ang che. “La zai sîn thlûr, a dumpâwl te, a senduk te, a senlâr te leh rangkachak zai tea efod anga tah, Pathian râwn huna puithiam âwma bel tûr mi themthiamte chu inchawih mawi takin tahtîr ang che. Thlep la, thleh hnuah chuan kil li nei, khâp bial ni rawh se. Lungmantam tlar li-a phûmna tûr siam la, tlar khatah chuan Odam lung te, Pitda lung te, Bareket lung te awm sela; tlar hnihnaah Nopek te, Safir te, Jahalom te awm sela, tlar thumnaah Lesem te, Sebo te, Ak-elama te awm sela; tlar linaah Tarsis te, Soham te, Jaspi te awm sela; chûng lungmantamte chu rangkachak phêka phûm ṭhêt tûr a ni. Lungmantam pakhatah hian Israel hnam sâwm leh pahnih hming pakhat zêl ker tûr a ni, nemna zungbun anga ker tûr a ni; chung lungmantam sâwm leh pahnih chuan Israel hnam sâwm leh pahnih a entîr ang. Âwmbel khai nân rangkachak hlîr hlak khaidiat herh siam la, rangkachak beng pahnih, âwmbel tlânga vuah tûr siam bawk ang che. Khaidiat herh hmâwr hnih chu âwmbel tlânga bengah chuan vuah tûr a ni. A hmâwr lehlam pahnih chu, lungmantam pahnih phûmnaah khân tibet la, efod dârbak nên inzawm rawh se. Efod dep, âwmbel chhûng tlângah chuan rangkachak beng pahnih bel bawk ang che. Efod dârbak vuahna zâwn, efod hrên behna mawi taka tah tlângah rangkachak beng dang pahnih bel bawk ang che. Âwmbel leh efod-a rangkachak beng chu la dumpâwl hrualin suih zawm ang che; âwmbel chu kâwng zâwnah bei tlat rawh se, a che sawn thei tûr a ni lo. “Arona chu Hmun Thianghlima a lo luhin âwmbel, Israel hnamte hming chuanna chu, a rawn bel tûr a ni; chu chu, kei Lalpa hian, ka mite ka hriat chhuah theihna tûr a ni ang. “Efod kawrah chuan Urim leh Thumim chu dah la, kei Lalpa hi, mi râwn tûra a lo kal apiangin, Arona thinlung zâwnah chuan a awm ṭhîn dâwn nia. Chutianga Arona a lo kal apiangin Efod chu a ha ṭhîn ang a, mipuite thu zawh chu a chhâng ṭhîn ang. “Efod hnuaia hâk tûr kawrfual chu la dumpâwl veka tah tûr a ni. A laiah lu rawlhna tûr rek pawp la, a reh pawh tlâng chu a thlêr loh nân a chehna tûr puan tah chuan chep ang che. Chu chu puithiam hna a thawh hunah Arona chuan a ha ṭhîn tûr a ni. Hmun Thianghlima Lalpa hmaa a luhin emaw, a chhuahin emaw tengeng chu a ri ṭhîn ang a, a thi lo tih a hriat dâwn a ni. “Rangkachak hlîr hlak phêkah nemna zungbun ker angin, ‘ Lalpa pual’ tih ker ang che. Puithiam diar hma lamah bel la, la dumpâwl hrualin thlung bet ang che. Arona chuan diar chawpin a chalah a khim ṭhîn tûr a ni; tichuan, kei Lalpa hian Israel-te inthawina thil ka hnêna an rawn hlan chu ka lo pawm ang a, thil hlana tihsual an neih pawhin Arona chuan a mawh a phur ang. “Arona hâk tûr, kawr hnuai te, a khim tûr diar te, la zai sîna tah tûr a ni a; a hrên tûr kâwnghrên pawh la zai sîn tah tûr a ni, mawi taka chei tûr a ni. “Kawrfual te, kâwnghrên te, lukhum te, Arona fate tân siamsak bawk rawh, tiropuia timawitu ni rawh se. I u Arona leh a fapate chu hâktîr la, ka rawngbâwl tûra puithiam atân oliv hriak thih la, hlân la, serh hrang ang che. La zai sîna tah, kekawr hnuai siamsak bawk ang che, malpui thlenga fual ni rawh se, chutilo chu an lang palh ang e. Arona leh a fate chuan, Biakbûka an lo luhin emaw, Hmun Thianghlima awm maichâma puithiam hna thawk tûra an lo kalin emaw chûng chu an ha ziah tûr a ni; an lan palh chuan an thi mai ang. Hei hi Arona leh a thlahte tân kumkhaw tih dâna hman tûr a ni. “Ka rawng bâwla puithiam hna thawk tûr chu hetiang hian serh hran tûr a ni; bâwngtuai pakhat leh berâmchal pahnih, hmêlhem lo kai la, dawidim telh loh chhang te, hriaka hmeh chhangpêr te, hriaka tâl chhang pan te, chhangphut ṭha chiin siam ang che. Chûng chu fawngah dah la, bâwng leh berâm hlan hunah i hlân tel dâwn nia. Arona leh a fate chu Biakbûk kawngka bulah awm sela, dân angin tuiah insiltîr ang che. “Puithiam silhfên chu la la, kawrfual te, efod kawr te, efod hnuai kawrfual te, âwmbel te, kâwnghrên te chuan Arona chu inthuam rawh se. ‘ Lalpa pual’ tih belna diar chu khimtîr bawk ang che. Thih atân bîka siam oliv hriak chu la la, a lu-ah leihin thih ang che. “Arona fapate pawh lo kal sela, kawr hâktîr la, kâwnghrên hrêngin lukhumte chu khum sela, puithiamah chutiang chuan nemnghet la, puithiam an ni kumkhua tawh ang. “Bâwngtuai chu Biakbûk hmaah rawn kai ula, Arona leh a fate chuan bâwng lu-ah chuan an kut nghat sela. Biakbûk kawngka bul Lalpa hmaah talh ang che. Bâwng thisen chu la la, kutzungṭangin maichâm kil ki-ah chuan tât ang che; tah bâng chu maichâm bulah leihbua ang che. A rîlbawh thau te, a kal te leh a bawhtu thau te, a thin hlâwm ṭha laite la la, sual thawina atân maichâmah hâl ral rawh. A sa te, a vun te, a kawchhûng te erawh chu daipâwnah hâl ral ang che, sual thawina thilhlan a ni a, hâl ral vek tûr a ni. “Berâmchal pakhat chu kai la, Arona leh a fate chuan a lu-ah an kut nghat rawh se. Talh la, a thisen chuan maichâm chu theh kual ang che. A sa chu chan sawm la; a kawchhûng leh a kete chu sil fai la, a lu nên dah khâwm ang che. A zavai chuan maichâmah hâl la, Lalpa tâna hâlral thilhlan a ni, a rim chu Lalpa rimtui tih zâwng tak a ni. “Berâm pakhat pawh chu kai la, Arona leh a fate chuan a lu-ah an kut nghat rawh se. Talh la, a thisen chu Arona leh a fate beng ding lam tengengah te, kut ding lam zungpui hmâwrah te, kezungpui ding lam hmâwrah te tât la, maichâmah pawh theh kual ang che. Maichâma thisen te, oliv hriak thih chi te chu a ṭhen la la, Arona chu a kawrah nên theh ang che; a fate pawh an kawrah nên theh ang che; tichuan, Arona leh a fate chu an thawmhnaw nên ka tâna serh hran an ni tawh ang. “Berâm mei thau tak chu hlep la, a rîlbawh thau te, a thin hlâwm ṭha lai leh a kal pahnih leh a thau bawhtu leh a bawp ding lam chu la la, chhang hlan, fawnga dah, chi khat zêl, dawidim telh loh chhang te, hriak nêna hmeh chhangpêr te, hriaka tâl chhang pan te pakhat ṭheuh la la, chûng chu Arona leh a fate chu pe la, Lalpa hmaah thêntîr rawh. I lâksak leh ang a, maichâma hâlral thilhlan chungah dah la, Lalpa tân hâl ral ang che; Lalpa rimtui tih zâwng tak a ni. “Berâm irno chu la la, Lalpa hmaah thênin hlân ang che; chu chu i chanpual ve tûr a ni. Puithiam ruat nghehna berâm irno leh a bawp hi thênin ka hnênah hlân ula, puithiamte chanpual ve tûr a ni. Israel faten remna thilhlan an hlanin a irno leh a bawp chu puithiamho chan kumkhua atân ka ruat tlat a ni; hei hi mipui thilpêk ka dawn ve chu a ni. Arona puithiam thuam serh hi a faten an chhawm zêl tûr a ni, puithiam hna thawk tûra serh hrannaah an ha ve zêl tûr a ni. Arona fa, a aiawha puithiama ruat chuan rawngbâwl tûra Hmun Thianghlima a lo kal hunah ni sarih chhûng a ha tûr a ni. “Puithiam ruat nghehnaa berâmpa in hman sa chu Hmun Thianghlimah chhûm ang che, Arona leh a fate chuan Biakbûk kawngka bulah, fawnga chhang hlan nên a sa chu ei rawh se. Anmahni ruat nghehnaa sual thawina sa chu anmahni chauhvin an ei tûr a ni; thil thianghlim a ni a, puithiam chauh ei tûr a ni. A sa leh chhang chu ei sên loh a awm chuan zîngah hâl tûr a ni, sa serh a ni a, a ṭhing chu ei tûr a ni lo. Thu ka pêk che ang chuan Arona leh a fate chu ni sarih chhûng i tihrang tûr a ni. Ni tin, sual thawi nân bâwngchal hlân ang che; sual thawina chu hlânin maichâm chu i thian ang a, oliv hriak i hnawih ang a, i tithianghlim tûr a ni. Chutiang chuan ni sarih chhûng, ni tin ti ang che; tichuan, maichâm chu a lo thianghlim kim vek ang a, mi narânin an khawih chuan an tuar ang. “Maichâmah chuan ni tin berâm kum khat vêla upa i hlân ziah tûr a ni. Zîngah pakhat i hlân ang a, tlaiah pawh a dang pakhat i hlân dâwn nia. Berâm pakhat rual chuan chhangphut ṭha chi kg. khat leh oliv hriak thlit fîm litar khat i hlân tûr a ni; thilhlan ruala uain leihbuak tûr litar khat hlân tel bawk ang che. Tlai lama berâm pakhat hlan rual pawh chuan chhangphut ṭha chi te, oliv te, uain te hlân tel ang che. Hei hi ei tûr thilhlan, kei Lalpa hnêna hlan chu a ni, a hâl rim chu a tui a ni. Lalpa Biakbûk kawngkaa hâlral thilhlan chu in hlân kumkhua tûr a ni; chutah chuan ka mite ka rawn hmu ang a, thu ka hrilh ṭhîn ang. Chutah chuan Israel fate chu ka be ṭhîn ang a, ka ropuina chu a châm reng ang. Biakbûk leh maichâm chu ka tithianghlim ang a, ka rawngbâwltu atân Arona leh a fate chu ka tihrang ang. Israel mite zîngah chuan ka chêng ve ang a, an Pathian ka ni ang. An zînga ka tel ve ṭhin nân Aigupta ram ata ka hruai chhuak a, kha Pathian, Lalpa kha ka ni tih an hria ang; Lalpa, an Pathian ka nih hi. “Sitim thingin rimtui hâlna tûr maichâm siam ang che. Kil li nei, tawng khat bial, a sân lam tawng hnih ni sela, kil tinah a ki lawr awm sela, inzawm vek rawh se. A chung zâwl te, a sîr te, a kîte chu rangkachak hlîr hlakin luan tûr a ni, a tlâng chu rangkachaka luan tûr a ni. A zâwnfung vuahna tûr rangkachak beng pali siam la, a sîr lehlam lehlamah, a tlâng bulah vuah ang che. A zâwnfung chu sitim thing ni sela, rangkachaka luan tûr a ni. Rimtui hâlna maichâm chu Thuthlung Bâwm dahna puanzâr pindan pâwnah hûng ang che. Thuthlung Bâwm chhîn chu ka rawn biak ṭhinna tûr che a ni. Tûk tin, Aronan khâwnvâr a rawn tihfai pahin thil rimtui a hâl ṭhîn tûr a ni. Tlaiah pawh, khâwnvâr a rawn chhit dâwnin rimtui chu a hâl ziah tûr a ni. Lalpa hnêna rimtui hâl hi kumkhuaa chhunzawm zêl tûr a ni. Maichâmah hian hâl khap thil rimtui te, hâlral thilhlan te, chhang hlante i hâl tûr a ni lo, in tûr uain hlan pawh i leihbaw tûr a ni lo. Kum tin, vawi khat, sual thawina thilhlan thisen chu, Arona chuan, maichâm then thianghlim nân a ki-ah a hnawih tûr a ni; kumkhuain hei hi kum tin vawi khat tih ziah tûr a ni; maichâm chu Lalpa tân a thianghlim reng tûr a ni.” Lalpa chuan Mosia hnênah, “Chhiarpui laia hri-a mi an thih loh nân Israel mite i chhiar huna tel zawng chuan nun tlanna an pe tûr a ni. Chhiarpuia tel zawng zawngin pêk tûr tuk zât chu an pe tûr a ni, Inbiakna bûka hman lai bûkna dik taka bûk sekel chanve, Gera sâwm an pe tûr a ni; chu chu LALPA hnêna thilhlan a ni ang. Chhiarpuia chhiar tel, kum sawmhnih leh a chung lam zawng zawng chuan Lalpa hnênah hei hi an hlân tûr a ni. An nun tlanna Lalpa hnêna an hlan hun chuan sekel chanve mi tinin an hlân ṭheuh tûr a ni; mi hausain a aia tam an hlân tûr a ni lo, mi rethei pawhin chu aia tlêm chu an hlân tûr a ni lo. Israel mite hnên aṭangin he nun tlanna hi i khawn ang a, Biakbûk enkawl nân i hmang dâwn nia. He nun tlanna hi Lalpa tân Israel fate a hriat reng vena tûr a ni,” a ti a. Lalpa chuan Mosia hnênah, “Insilna tui dah nân dâr chawhtawlh, a hûnna dâr nên siam ang che; hâlral hâlna maichâm leh Biakbûk inkârah hûng la, tui dah reng ang che. Arona leh a fate chuan an kut leh an ke hetah hian an sil ṭhîn tûr a ni. Biakbûk chhûnga an kal dâwnin emaw, thilhlan hâl tûra an kal hunah emaw an insil tûr a ni; tichuan, an thi lo vang. An thih loh nân an kut leh ke an sil ngei tûr a ni. Hei hi an thlahte pawhin kumkhaw dânah an neih ve zêl tûr a ni,” a ti a. Lalpan Mosia hnênah, “Thil rimtui tak tak, Mura tui kg. ruk, thakthîng rimtui kg. thum, Saitronela rimtui kg. thum, Tez-pata kg. ruk, Inbiakna bûka hman lai bûklunga bûk vek la khâwm la, oliv hriak litar li nên chawhpawlh ang che. Têl rimtui anga siam rimtui chawhpawlh chu hriak thianghlim hnawih atân hmang ang che. Biakbûk te, Thuthlung Bâwm te, dawhkân leh a hmanrua te, rimtui hâlna maichâm te, thilhlan hâlna maichâm leh a hmanrua te, insilna dâr chawhtawlh te leh a hûnna te hnawihah chu chu hmang ang che. Chu hriak chu chutianga hnawihin hêngte hi tithianghlim la, an lo thianghlim vek ang a, a khawih apiangin an tuar ang. Ka rawngbâwl tûrin Arona leh a fate chu he hriak hi thih la, tihrang ang che. Israel fate chu hrilh rawh; he hriak thianghlim hi ka rawngbâwltu tûr serh hran huna thih atân hman kumkhua tûr a ni. Mi narân thih tûr a ni lo; thil chi hrang hrang chawhpawlh tûr zât hi tihdanglam tûr a ni hek lo; thil thianghlim a ni a, in serh hle tûr a ni. Hetianga thih tûr hriak leh thil dang chawhpawlh lo siam vete emaw, puithiam tûr ni lo thihtu emaw chu Israel mite zîng ata tuithlâr tûr a ni,” a ti a. Lalpa chuan Mosia hnênah, “Hêng thil rimtui Netep te, Sekelet te, Kalbana te, Beraw fîmte inzât chiah zêlin la la, rimtuia hâl atân tel rimtui chawhpawlh angin chawhpawlh ang che, vêng hima tithianghlim tûrin chi tlêm telh ang che. A ṭhen chu râwt dip derh la, Biakbûkah, ka biak ṭhinna tûr che Thuthlung Bâwm bulah theh darh ang che; chu chu thil thianghlim berah neih tûr a ni. Nangma hman tûrin chutiang taka rimtui chawhpawlh chu i siam tûr a ni lo; thil thianghlim, Lalpa tâna serh hran a ni. Mahni hâl tûr chutianga rimtui chawhpawlh siam vetu rêng rêng chu a miten an tuithlâr tûr a ni,” a ti a. Lalpa chuan Mosia hnênah, “Uria fapa, Bezalela, Hura tupa, Juda hnam zînga mi chu ka thlang chhuak ta. Finna te, hriatna te, hmangchâng hriatna te, thil engkim siam tûra kut themthiamna te nei tûrin Pathian Thlarau ka pe ta. Thil mawi tûr ngaihtuah chhuaka, rangkachak te, tangkarua te leh dâr tea siam nghâl thiamna te, lungmantam kera phûm te, thing ker te, thil mawi chi tinrêng siam thiamna te ka pe a ni. Amah pui tûrin Dan hnama mi Ahisamaka fapa Oholiaba pawh ka thlang tawh a ni. Themthiam rual dang pawh, siam tûra ka tih zawng zawng siam thiamna ka pe a ni. Biakbûk an sa ang a, Thuthlung Bâwm leh a chhîn te, Biakbûk thuahna te, dawhkân leh a hmanrua te, rangkachak hlîr hlaka siam khâwnvâr bâwr leh a hmanrua te, rimtui hâlna maichâm te, thilhlan hâlna maichâm leh a hmanrua te, insilna tûr chawhtawlh leh a hûnna te, Arona leh a fate puithiam hna thawka ka rawng an bâwl huna an inthuamna tûr thuam ropui te, puithiam nemngheha thih tûr hriak te, Hmun Thianghlima rimtui hâl tûr te an siam dâwn nia. Ka sawi ang thlap khân hêng hi an siam tûr a ni,” a ti a. Lalpa chuan Mosia hnênah, “Israel fate chu hrilh rawh: Ka sabat ni hi an serh tûr a ni; in thlah zêlte thlengin kei Lalpa hi, nangmahni thlang chhuaktu che u ka nih in hriat rengna tûr a ni. Sabat hi in tân ni thianghlim a ni ang; in serh tûr a ni a, a bawhchhia chu tihhlum tûr a ni; hna thawk lui pawh chu in zîng ata tihboral tûr a ni. Ni ruk chhûng hna thawhna hun in nei a, a ni sarihna chu Lalpa tân ni serh a ni a, in châwl tûr a ni; sabat nia hna thawk chu tihhlum ngei tûr a ni. Chuvângin, Israel fate chuan, kan inkâra thuthlung an hriat reng nân kumkhuain an serh tûr a ni. Kei leh Israel fate, kan inkâra thuthlung chhinchhiahna a ni ang; kei Lalpa hian ni ruk chhûngin lei leh vân ka siam zo va, a ni sarih ni chuan hna ka bânsan a, ka châwl a ni,” a ti a. Pathianin Sinai tlânga Mosia a biak zawh chuan, a thupêk, amah Pathian ngeiin lungphêka a ziak chu Mosia hnênah chuan a pe a. Mosia chu tlâng aṭanga a lo chhuk tâk lawk loh avângin Arona hnênah mite chu an kal khâwm a, “Khai, min hruaitu tûr Pathian min siamsak teh; Aigupta ram aṭanga min hruai chhuaktupa Mosia lah hi a chanchin eng mah kan hre tawh si lo,” an ti a. Arona chuan, “In nupui te, in fapa te, leh in fanute rangkachak bengbeh thlawnsak ula, han la ta che u,” a ti a. Mi zawng zawng chuan an rangkachak bengbehte chu an thlawn a, Arona an pe a. Ani chuan a lo dawng a, rangkachak chu a rawh tui a, a chhûnna tûr a siamah chuan bâwngno, a pa lim a chhûng ta a. Mite chuan, “Aw Israel-te u, hei hi Aigupta ram aṭanga hruai chhuaktu che u pathian chu a ni,” an ti a. Chu chu Aronan a hriat chuan bâwngno lim hmaah chuan maichâm a siam a; “Naktûkah Lalpa chawimawina ruai kan ṭheh ang,” tiin a tlângautîr a. A tûk zîngah chuan hâlral thilhlan an hlân a, remna thilhlan an rawn la bawk a, an hlân a, mipuite chu ruai kîl tûr chuan an ṭhu a, inphalrai ruai a ni ta ngawt a. Lalpa chuan Mosia hnênah, “Chhuk thuai teh, Aigupta ram aṭanga i hruai chhuah, i mite khu an khawlo zo ta. An awm dân tûr ka hrilh ang khân an awm rei peih ta hauh lo mai; rangkachak bâwngno lim an chhûng a, chibai an bûk a, inthawina an hlân e, ‘Aw Israel-te u, hei hi Aigupta ram aṭanga hruai chhuaktu che u in pathian chu a ni, an ti,” a ti a. Lalpa chuan Mosia hnênah, “Hêng mite hi an luhlul hle mai ka ti! Ka thinur êm mai, khawi nge, ka zu tihlum vek teh ang, nang chauh hi hnam ropui takah ka han din teh ang che,” a ti a. Mosia chuan a Pathian, Lalpa chu a ngên a, “Aw Lalpa, ropui tak leh kut chak tak hmanga Aigupta ram ata i hruai chhuah i mite chungah engtizia nge chuti taka i thinur le! ‘Tlângrama tihhluma, tihchimih tumin a mite chu Aigupta ram ata a hruai chhuak a lo nih hi,’ Aigupta mite chuan an ti dâwn asin. Thinur tawh teh suh. I chhiahhlawh Abrahama te, Isaka te, Israela te kha hre reng teh; mahni inchhâlin an hnênah, ‘Arsi zâtin in thlahte ka tipung ang a, ka sawi ram zawng zawng hi in thlahte hnênah ka pe ang a, an nei kumkhua ang,’ tiin i tiam kha,” a ti a. Tichuan, Lalpa chuan a mite chunga thil ṭha lo tih a tum chu a ṭhulh ta a. Mosia chu tlâng aṭang chuan a chhuk thla a, a kut lehlam lehlam chuan thupêk ziakna lungphêk chu a keng a. Lungphêkte chu Pathian siam a ni; a ziak pawh chu Pathian ngeiin kerin a ziak a ni. Mipui au thâwm chu Josua chuan a han hria a, “Chu! riahhmuna thâwm chu indo thâwm a va ni âwm ve?” a ti a. Mosia chuan, “Hnehtu au thâwm a ni lo va, chan chau thâwm lah a ni hek lo, hlimhlawp zai thâwm a nih chu,” a ti a. Tin, riahhmun chu a zu thleng hnai a, Mosia chuan bâwngno lim leh mipui lâm huai huai chu a han hmu a, a thin a ur ta êm êm a. Tlâng bulṭhutah chuan a lungphêk ken chu a vawm keh a. Bâwngno lim an chhûn chu a la lawk a, a rawh a, a râwt dip a, tuiah a phul a, Israel fate chu a intîr ta a. Arona hnênah, “Engtin nge mipuiin an tih che a heti taka thil sual i tihtîr tâk le?” a ti a. Arona chuan a chhâng a, “Ka Lalpa thinur chu ka chungah alh teh suh se, hêng mite hian thil sual tih an châk zek zekzia i hria alâwm. ‘Min hruaitu tûr pathian min siamsak rawh, Aigupta ram aṭanga min hruai chhuaktu Mosia lah hi a chanchin pawh kan hre tawh si lo,’ an rawn ti a. Keiin an hnênah, ‘Rangkachak nei chuan thlawn sela, rawn dah rawh se,’ ka lo ti a. An rawn dah a, keiin ka rawh a, bâwngno limah a chang ta mai alâwm maw le!” a ti a. Mipui chu an duh duhin an tâl a, an hmêlmate hmuhsit hial khawpin Arona chuan a lo tâltîr mai mai a ni tih Mosian a hmuh chuan, riahhmun lamah a va ding a, “ Lalpa lama ṭang duh chu ka hnênah hian lo kal rawh se,” a ti a. Levia thlah zawng zawng chu a lamah chuan an kal ta a. An hnênah, “Israel-te Pathian, Lalpa chuan heti hian a ti: ‘mipa chuan khandaih pai ula, riahhmun luhnaah lûtin bûkte chu fang chhuak ula, mahni unau pawh, ṭhian pawh, ṭhenawmpa pawh that rawh se,’ a ti,” a ti a. Levia thlahte chuan Mosia sawi ang chuan an ti a; chumi ni chuan mi sângthum lai an that a. Mosia chuan, “Mahni fate leh unaute bei hial khawpin Lalpa tân in inpe a, mal a sâwm ngei ang che u,” a ti a. A tûkah chuan Mosian mipui hnênah, “Thil sual râpthlâk tak in ti a; mahse, tûnah hian Lalpa hnênah ka han chho leh tâng e, in sual a lo ngaidam thei mial mahna,” a ti a. Mosia chu Lalpa hnênah a kal chho leh a, “Hêng mite hian thil sual râpthlâk tak an ti a, rangkachak pathian an siam tâk hi. Mahse, an sual hi i ngaidam thei hrâm ang emaw chu? I theih lul loh chuan i mite hming ziakna bu ata ka hming kha thai bo mai ang che,” a ti a. Lalpa chuan Mosia chu a chhâng a, “Ka lehkhabu aṭangin ka chunga thil tisualtu hming chauh a ni ka thai bo dâwn ni. Kal ta la, ka hrilh tawh che hmunah he mite hi hruai rawh. Ngai teh, ka Vântirhkoh chuan i hma a hruai zêl ang a; ka rawn tlawh hunah chuan an sualna ngei chauhvah a ni ka rawn hrem dâwn ni,” a ti a. Tichuan, rangkachak bâwngno lim Arona an siamtîr avâng chuan Lalpa chuan mipui zîngah hri a lêntîr ta a. Lalpa chuan Mosia hnênah, “Aigupta ram aṭanga i mi hruai chhuahte hi chhuahpui la, Abrahama te, Isaka te, Jakoba te hnêna pêk ka tiam ramah chuan kal rawh. Ka Vântirhkoh chuan in hma a hruai ang a, Kanan mi te, Amor mi te, Hit mi te, Periz mi te, Hiv mi te leh Jebus mi te chu ka ûm chhuak ang. Chu ram, khawizu leh hnutetuia luang ramah chuan kal ula, kei erawh chu ka lo kal ve lo vang, in luhlul êm a, kawng lakah ka tichimit hlauh dah ang che u,” a ti a. Miten chu thu ṭha lo tak chu an hriat chuan an lungngai ta êm êm a, an inchei duh ta lo va. Lalpa chuan Mosia hnênah, “Mi luhlul tak in ni, in zînga ka kal ve zawngin ka tichimit mai ang che u. In chunga ka tih dân tûr ka han ngaihtuah ang e,” a ti a. Sinai tlâng an chhuahsan hnu chuan Israel fate chuan incheimawina an inbel tawh ngai lo. Israel-ten bûk an khuarna apiangah Mosia chuan Biakbûk chu bûk pâwn deuhvah a zâr ṭhîn a, Inbiakna bûk, a vuah a. Tu pawhin Lalpa an râwn duh chuan bûk pâwna Inbiakna bûkah chuan an pan ṭhîn. Inbiakna bûkah Mosia a kal dâwn chuan mi tin mahni puan in kawngkaah chuan an lo chhuak a, Inbiakna bûk a luh hma chu dingin Mosia chu an enzui ṭhap ṭhîn. Inbiakna bûka Mosia a luh vêleh chhûm ding kha a lo chhuk a, Inbiakna bûk kawngkaah chuan Mosia hnênah Lalpa chuan thu a sawi ṭhîn. Inbiakna bûk kawngkhâra chhûm ding an hmuh chuan mi zawng zawng chu an puan in kawngkaah chuan an kûn a, chibai an bûk ṭheuh ṭhîn. Miin a ṭhian a bia ang hian Lalpa chuan Mosia chu inhmachhawn meuhvin a be ṭhîn. Mosia chu bûkah a lo kîr ṭhîn a; amaherawhchu, amah puitu Nuna fapa tlangvâl Josua erawh chuan Inbiakna bûk chu a chhuahsan ngai lo. Mosia chuan Lalpa hnênah, “Hêng mite hi hruai chhuak tûrin min ti a, tu nge min kalpui dâwn tih min la hrilh si lo. Min hria a, min duhsak a ni tih min hrilh a. Khai le, min duhsak takmeuh a nih chuan i thiltum chu min hrilh teh; tichuan, i mit tlungin i rawng ka bâwl thei ang a, he mite hi i mi thlante chu an lo ni ngei tih ka hre thei bawk dâwn nia,” a ti a. Ani chuan a chhâng a, “In zîngah ka tel ve zêl ang a, ka chhâwk zâng zêl ang che,” a ti a. Mosia chuan, “Min kalpui ve zêl dâwn si loh phei chuan he hmun ata hi kan kal sawn lo mai ang. Kan zînga i tel ve zêl si loh chuan i mite leh ka chungah hian i lungawi a ni tih tu nge hria ang? I tel ve erawh chuan khawvêla mi tinin mi danglam bîk tak kan ni tih an hria ang,” a ti a. Lalpa chuan Mosia hnênah, “Ka hre chiang che a, mi tihlâwm hle avângin i ngen ang chuan ka ti ang e,” a ti a. Mosia chuan, “Khawngaih takin i hmêl chu min hmuhtîr ta che,” a ti a. Ani chuan, “I hnênah ka ṭhatzia ka tilang ang a, ka hming pawh i hriatah ka sawi ang, Lalpa ka nih hi. Ka duh apiang chungah ngil ka nei ang a, ka duh apiang chu ka khawngaih mai ang. Ka hmêl erawh chu i hmu thei lo vang; min hmu chu tu mah an nung thei lo a ni,” a ti a. Lalpa chuan a sawi zêl a, “En teh, ka bulah hian din theihna lungpui a awm a, lo ding la, ropui taka ka lo kal hunah lungpui kehkârah hian ka dah ang chia, ka kal pelh hma che chu ka kutin ka hliah ang chia, ka liam dâwn hunah ka kut chu ka la sawn ang a, ka hnung lam chu i hmu thei ang, ka hmêl chu i hmu thei lo vang,” a ti a. Lalpa chuan Mosia hnênah, ‘I tihkeh tâk lungphêk pahnih ang kha chher la, a hmaa ka thu ziak ang kha ka lo ziak leh ang e. Naktûk zîngah insiam la, Sinai tlângah rawn chhohpui la, ka hmaah rawn inlan rawh. Tu mah an lo kal ve tûr a ni lo; tlângah tu mah awm suh se, berâm rual leh bâwng rual pawh tlâng pangah tla suh se,” a ti a. Tichuan, a hmaa mi ang lungphêk pahnih Mosia chuan a chher a. Zîng takah a tho va, Lalpa thupêk ang chuan Sinai tlângah lungphêk chu a keng chho ta a. Chhûmah chuan Lalpa chu a lo chhuk a, a bulah a lo ding a, a hming Lalpa chu a ni tih a rawn puang ta a. Lalpa chu a hmaah a lo kal a, “Kei hi Lalpa chu ka ni, Pathian rinawm, khawngaih thei leh ngilnei, thinnel leh lainatna ngah, chhuan sâng thleng pawha khawngaih zui zêltu; khawlohna te, bawhchhiatna te, sualnate ngaidama, thiam loh changte erawh chu zuah lova, an pate khawlohna avânga an fate leh an tute, chhuan thum chhuan li thlêng pawha hrem ṭhîntu Pathian ka ni,” a ti a. Mosia chu rang zetin lei siin a kûn a, Lalpa chu chibai a bûk ta a. Heti hian a ti a, “Aw Lalpa, ka chungah i lâwm takzet a nih chuan Lalpa chu kan zîngah kal ve ngei teh se, hêng mite hi an luhlul hle na a, kan khawlohna leh kan sualna ngaidam la, i pual, i rochanah min nei ang che,” a ti a. Lalpa chuan Mosia hnênah, “Israel fate tân thu ka thlung e. Khawvêla tu hnam zîng maha la tih ngai loh an hmaah thil mak ka ti dâwn. In awmnaa mi zawng zawngin kei Lalpa hian thil ka tihtheihzia an hmu ang, thil mak elkhên ka tihsak dâwn che u a ni. “Vawiina ka thupêk che u hi zâwm tlat zêl ang che u; ngai teh u, in hmaah Amor mi te, Kanan mi te, Hit mi te, Periz mi te, Hiv mi te leh Jebus mi te ka ûm chhuak dâwn. Fîmkhur rawh u, in kalna tûr ram mite nên thu in thlung vaih ang e, in inâwk buai mai ang. An maichâm chu paih darh ula, an lung serh phunte chu vaw sawm ula, an pathiannu lim Aseri te chu kit vek ang che u. Pathian dang hmaah in kûn tûr a ni lo, Lalpa hi thîkthuchhia, Pathian thîkthuchhe tak a ni si a. Chu rama awmte nên thu in thlun hlauh chuan, an pathian chibai bûka an inthawina hmunah a sa ei tûrin an sâwm ang che u a, an pathian hnêna an thil hlan chu ei ve in châk mai dah ang e. In fate nupuiah an fanute in neihsak ang a, anni chuan ka hnên aṭangin an hruai bo ang a, an pathiante chu in fate chuan an be ve dah ang e. “I tân milem chhûn chawp pathian insiam suh. “Dawidim telh loh kût hmang ṭhîn rawh. Abib thla, ka hun ruatah, thu ka pêk che u angin ni sarih chhûng dawidim telh loh chhang in ei ṭhîn tûr a ni; Abib thla hi Aigupta ram in chhuahsan thla kha a ni. “Piang hmasa ber a pa tawh phawt chu ka ta a ni. I ran vulh, bâwng leh berâm no neih hmasak ber, a pa chu, min pe tûr a ni. Sabengtung no hrin hmasak ber, a pa chu, berâm novin i tlan tûr a ni; i tlan duh loh chuan a ring elh tliah tûr a ni. In fa tîr, mipa chu, in tlan zêl tûr a ni. Tu mah kut ruakin ka hnênah in lo kal tûr a ni lo. “Ni ruk chhûng hna in thawk ang a, a ni sarih ni chuan in thawk tûr a ni lo, leileh lai leh buh seng lai pawhin in châwl tho tûr a ni. “Huit seng tirhah Pentikos kût hmang ang che u, in theirahte in lawh fai vek hnu, favângah Bâwkte kût hmang ang che u. “ Lalpa Israel-te Pathian hmaah in zînga mipa zawng zawng chu kum khatah vawi thum an lo lang ziah tûr a ni. “In hmaa hnam dangte ka ûm chhuaha, in ramrite ka tihzauh hunah chuan in Pathian Lalpa chibai bûka ṭum thum in kal chhûng hian tu man in ram chu rawn lâk an tum lo vang. “Thilhlan in rawn hlanin dawidim telh chhang rawn hlân tel suh u. Kalhlên kût sa, a tûk atân a ṭhing pakhat mah dah suh u. “I lova thlai thar hmasa ber chu Lalpa, i Pathian inah han dah ang che. Kêl no chu a pui hnutein chhûm suh.” Lalpa chuan Mosia hnênah, “Hêng thu hi ziak chhuak rawh, hêng tlawhchhan hian a ni nang leh Israel-te hnêna thu ka thlun ni,” a ti a. Mosia chu ni sawmli leh zân sawmli eng mah ei lovin Lalpa bulah chuan a awm a, Lungphêkah chuan thuthlung, thupêk sâwm chu a ziak ta a. Thupêk sâwm ziakna lungphêk keng chuan Mosia chu Sinai tlâng aṭang chuan a lo chhuk a; a hmêl chu a êng sût a, Lalpa nên an inbiak avânga êng a ni, ani erawh chuan chu chu a hre lo. Arona leh Israel mipui chuan Mosia hmêl êng an hmuh chuan a bulah an kal hnai ngam ta lo va. Mosia chuan a au va, Arona leh Israel hotute chu an lo kîr a, Mosia chuan thu a lo hrilh a. Chumi hnu chuan Israel fate chu an vaiin Mosia bulah chuan an lo kal a, Sinai tlânga Lalpa thupêk zawng zawng chu a lo hrilh a. Mosian thu a sawi zawh chuan khuhnain a hmai chu a khuh a. Lalpa nêna inbe tûra Inbiakna bûka a kal apiangin, a lo chhuah leh hma chu, hmai khuhna chu a hlîp ṭhîn; a lo chhuahin Israel fate hnêna hrilh tûr thupêk chu a hrilh ṭhîn a. Israel faten Mosia hmêl an hmuhin a lo êng ta ṭhîn a, Pathian nêna inbe tûra a kal leh hma chu a inkhuh ṭhîn. Mosia chuan Israel fa pungkhâwmho chu a ko khâwm a, an hnênah, “Hêng hi in tih tûra Lalpa thupêk chu a ni. Ni ruk chhûng hna in thawk ang a, a ni sarih ni erawh chu in tân ni serh a ni ang a, Lalpa chawimawi nân urhsûn taka hman tûr a ni; hna thawk lui chu tihhlum tûr a ni. In awmna apiangah sabat ni chuan mei pawh in chhêm tûr a ni lo,” a ti a. Mosia chuan Israel fa pungkhâwmho hnênah, “ Lalpa chuan heti hian a ti: Lalpa tân thilpêk han pe rawh u, mahni phal ang ang han pe rawh u; rangkachak te, tangkarua te, dâr te, la dumpâwl te, la senduk te, la senlâr te, la zai sîn te, kêl hmul te, berâm vun tihsen te, savun ṭha chi te, sitim thing te, khâwnvâra chhit tûr oliv hriak te, thih tûr hriak te, hâl tûr thil rimtui te, soham lung te leh âwmbela dah tûr lungmantam te rawn dah khâwm rawh u. “In zînga mi themthiam rual lo thawk sela, Lalpa sawi angin hêng zawng zawng hi rawn siam rawh se. Biakbûk, a chung khuhna leh a thuahna te, a inbahna te, a bang tun te, a kaihna te, a ban te, a bulṭhut te, Thuthlung Bâwm leh a zâwnfung te, bâwm chhîn leh a zâr hliahna tûr puan te, dawhkân leh a zâwnfung te, a hmanrua zawng zawng leh chhang serh te, khâwnvâr bâwr chhit ên tûr leh a bungrua te, a chhitna tûr lu bâwk leh a tui tûr hriak te, rimtui hâlna dawhkân leh a zâwnfung te; hriak thih tûr te, hâl tûr thil rimtui te, Biakbûk luhna kawngka puanzâr tûr te; thilhlan hâlna tûr maichâm, a sîra dâr tlâwn nên, zâwnfung leh a bungrua zawng zawng te, dâr chawhtawlh leh a hûnna te, a hungna puanzâr tûr, a ban leh a bulṭhut te, a tual kawngka luhnaa zâr tûr puan te, Biakbûk khen nghehna leh hungna pal khen nghehna leh a pawhna hrui te; Hmun Thianghlima rawngbâwltute hâk tûr thawmhnaw zeh mawi te, puithiam Arona kawr serh te, puithiam hna an thawha Arona fate hâk tûr kawr te siam rawh se,” a ti a. Israel fa pungkhâwmho chu an ṭîn darh a, Biakbûk sakna tûr, a chung khuhna tûr te leh thawmhnaw thianghlim tûr te chu mahni phal ang ang Lalpa hnênah chuan an rawn hlân a. Pêk châkna nei chu a hmei a pain an lo kal a, hnâr vuah te, bengbeh te, pinmawi te, ṭhi te, rangkachaka siamte chu rangkachak tlangte nên Lalpa tân an rawn pe a. La dumpâwl te, la senduk te, la senlâr te, la zai sîn te; kêl hmul te, berâm vun tihsen te, savun ṭha chi neite chuan an rawn pe bawk a. Tangkaruate pawh a pe thei chuan Lalpa chu an rawn pe a; Biakbûka hman tûr sitim thing nei chuan an rawn dah bawk a. Nu themthiam tak takte chuan la zai sîn te, la dumpâwl te, la senduk te, la senlâr te an kai a, an rawn pe a. Nu themthiam bîkten kêl hmul an thlûr chu an rawn pe bawk a. An hotute chuan soham lung leh lungmantam dang, efod-a dah tûr leh âwmbela târ tûr an rawn keng a. Thil rimtui leh hriak, chhit atân te, thih atân te, hâl atân te an rawn thawh bawk a. Mosia hnêna Lalpan siam tûra a tih siam nân Israel zînga mi, a hmei a pa, a duh apiangin thilpêk an rawn hlân bawk a. Mosian Israel fate hnênah, “Juda hnam zînga mi, Hura tupa Bezalela, Uria fapa chu Lalpa chuan a thlang ta. Finna te, hriatna te, hmangchâng hriatna te, engkim siam tûra kut themthiamna nei tûrin Pathian Thlarauvin a pe a ni. Rangkachak te, tangkarua te, dâr tea thil mawi tinrêng ruahmana siam thiamna te, phûm atân lungmantam zai mawi te, thing ker mawite leh thil chi tinrêng siam thiamna te a pe a ni. Dana thlaha mi, Ahisamaka fapa Oholiaba nên, an pahnihin, mi dang hnêna thil siam zirtîr thiamna pawh Lalpa chuan a pe bawk a ni. Thil ker thiam te, thil mawi hria ten puan zai sîn, a dumpâwl te, a senduk te, a senlâr tea puan tah thiamte anga engkim tih thiamna a pe a ni. Engkim an siam thiam a, a rel vêl pawh thiam tak an ni. “Bezalela te, Oholiaba te leh mi themthiam rual, Lalpa chênna Biakbûk atâna thil ṭûl zawng zawng siam dân thiamna leh finna Lalpa pêkte chuan Lalpa thupêk ang chuan engkim an siam tûr a ni,” a ti a. Mosia chuan Bezalela leh Oholiaba chu, thawk ve châk themthiam rual, Lalpa thilpêk hmang hriatna dawngte nên a ko khâwm a. Hmun Thianghlima rawngbâwl nâna Israel fate thilpêk an rawn dah chu Mosia hnên aṭangin an la a, an siam ta zêl a. Tûk tin, Mosia hnênah, phal takin thilpêk an rawn keng zêl bawk a. Hmun Thianghlima thil hman tûr siamin tûk tin an thawk bawk a. Mosia hnênah chuan, “Hmun Thianghlima rawngbâwl nâna Lalpan siam tûr a tih siamna atâna mamawh aia tam daih miten an rawn pe tawh a ni,” an ti a. Mosian thu a pe a, riahhmunah chuan an tlângau va, “Mipa pawhin, hmeichhia pawhin, Hmun Thianghlim atân tu man thilpêk rawn pe tawh suh se,” tiin. Tichuan, Lalpa hnêna thilpêk rawn pe zêl lo tûrin mipui chu an khap ta a. An pêk sa chuan an siam tûr chu a daih zân tawh a ni, hman sên rual a ni tawh lo. Themthiam rual zînga a thiam thiam chuan Biakbûk chu an siam ta a; chung zâr tûr puan sâwm, la zai sîn thlûr, a dumpâwl te, a senduk te, a senlâr te an tah a, cherub lemte mawi takin an zep a. Puan pakhat chu tawng sawmhnih leh pariata sei, tawng li-a hlai intiat vek a ni. Puan panga chu an ṭhui zawm a, a dang panga pawh chu a hranin an ṭhui zawm a. Panga ṭhui khâwm sîr ber tlângah chuan a beng atân la dumpâwl kual an vuah a; panga ṭhui khâwm dang tlângah pawh beng chu an vuah bawk a. Beng sawmnga ve ve an vuah a, a bengte chu a inzâwn thliah a ni. Rangkachakin thil kawm an siam a, thil kawm chuan puan ṭhui khâwm pahnih chu an bah zawm a, a in chung chu phêk khat a ni ta a. Biakbûk chung thuahna tûr kêl hmul pawh sâwm leh pakhat an tah bawk a. Puan pakhat chu tawng sawmthuma sei, tawng li-a hlai a ni; puan chu a vaiin a intiat vek a. Panga chu an ṭhui khâwm a; a dang paruk pawh chu a hrangin an ṭhui zawm a. Puan panga ṭhui khâwm sîr ber tlângah chuan beng sawmnga an siam a; paruk ṭhui khâwm tlângah pawh beng sawmnga an siam bawk a. Dârin thil kawm sawmnga an siam a; chu chuan kêl hmul puan ṭhui khâwm pahnih chu phêk khatah an bah zawm a. Biakbûk chung thuah nawn lehna tûr berâm vun tihsen leh savun ṭha chi chu an siam bawk a. A bang thuahna tûr sitim thing an rem khâwm bawk a. An thil rem phêk khat chu tawng sâwma sâng, tawng khat leh a chanvea hlai a ni. A phêk tlâng kâwmna pahnih chu a hmâwr a zuih a, chu chu a bulṭhuta a inphunna tûr a ni; chutiang hmâwr zuih chu an neihtîr vek a ni. Biakbûk chhim lam bang thuahna tûrin chutiang phêk sawmhnih chu an siam a. A bulṭhut tûr tangkaraw tlang ker khuar sawmli an chhûng a, thing rem khâwm pakhat chu bulṭhut pahnihah a inphun a ni. Biakbûk hmâr lam bang thuahna tûrin phêk sawmhnih an siam bawk a, bulṭhut tangkaraw tlang ker sawmli an chhûng bawk; phêk khat chu bulṭhut pahnihah a inphun zêl a ni. Biakbûk kawmchâr, khawthlang lamah bang thuahna tûr phêk ruk an rem bawk a. A kila ṭang tûr phêk hnih an siam bawk. A kila ṭang tûra siamte chu a bul aṭanga a lêr thlengin an kilh zawm a. Tichuan, kawmchâr bang thuahna tûr chu phêk riat a ni a, a bulṭhut tûr tangkaraw tlang sâwm leh paruk kerah chuan a sîr zuihte kha a inphun thliah a ni, phêk khat chuan bulṭhut pahnih a nei zêl a ni. a bangrel laita ber chu biakbûk bang tluan chuan an inzawmtîr a ni. A bang thuahna thing rem khâwmte chu rangkachak tuiin an luan a, a bangrel rawlhna tûr rangkachak beng te an siam bawk a, a bangrel pawh rangkachaka luan a ni. La dumpâwl te, la senduk te, la senlâr te, la zai sîn thlûrte chu inchawih mawi takin an tah a, cherub lem mawi tak tak an zep bawk a; chu chu pindan zârah an hmang a. Sitim thing ban pali, rangkachaka luan, a inphunna tûr tangkaraw tlang pali nên an siam bawk a. Biakbûk luhnaa zâr tûr la dumpâwl te, la senduk te, la senlâr te leh la zai sîn thlûr te, inchawih mawi takin an tah a, a zârna tûr Sitim thing ban panga, thil bahna tûr kâwm nei ṭheuh an siam a, a chhîp chu rangkachakin an tuam a, a puan zârna tûr rangkachak tlâwn an vuah bawk a, a bulṭhut tûr dâr tlang panga an siam bawk a. Bezalela chuan Thuthlung Bâwm chu a dung tawng hnih leh a chanve, a vâng tawng khat leh a chanve, a sân lam tawng khat leh a chanve Sitim thingin a siam a. A chhûng lam leh pâwn lam chu rangkachak hlîr hlakin a luan chhuak ve ve a, a kotlângte chu rangkachak phêkin a kâwm a. A zâwnfung rawlhna tûr rangkachak beng pali a chhûng bawk, bâwm sîr lehlam lehlamah chuan pahnih ve vein a vuah a. A zâwnfung tûr Sitim thing tlâwnte chu rangkachaka luan bawk a ni. A zâwnfungte chu a sîr lehlam lehlama bengah te chuan a vuah a, bâwm chhîn tûr, rangkachak hlîr hlakin tawng hnih leh a chanvea sei, tawng khat leh a chanvea hlai a siam a. Cherub-te chuan thla an zâr a, Thuthlung Bâwm chhîn chu an thla chuan a khuh a; inhmatawnin an ding a, a chhîn chu an bih a. Sitim thing dawhkân, a dung tawng hnih, a vâng tawng khat, tawng khat leh a chanvea sâng a siam bawk a. Rangkachak hlîr hlakin a luan a, a kotlâng chu a vêlin rangkachakin a kâwm a. A tlâng khuahna, rangkachak phêk kutphah bawk, a tlângah lallukhum ang a tlarin a bel chhuak a. A zâwnfung rawlhna tûr rangkachak beng pali a chhûng a, dawhkân tlâng tuamna bulah chuan a vuah a. A zâwnfung tûr, Sitim thing tlâwn a siam a, rangkachakin a luan a. Thlêng te, bêl te, uain thâwl te, uain bunna tûr no te, rangkachak hlangin a siam bawk a. Rangkachak hlîr hlakin khâwnvâr dahna zâr sarih nei a chher a, a bulṭhut leh a kûngpui chu rangkachak tlanga chher a ni; a lu bâwk te, a pangpâr kuhmûm lem te, a pâr parh lem te nên chuan an inzawm vek a ni. Zâr paruk, a kûngpui aṭanga pêng, a sîr lehlam lehlamah pathum ve ve a awm a, a zâr hmâwr chhîp, a lu chu, theite pâr ang a ni; a sîra kuangah chuan a kuhmûm leh pâr parh lem pathum a awm ṭheuh va. A kûng zidingah chuan a lu bâwk a awm a, kuhmûm leh pâr parh pali lem a awm bawk. A zâr chungnung leh hnuai zâwk inkâr, a kûngpuiah chuan kuhmûm lem a awm zêl a. Hêng kuhmûm te, a lu bâwk te, a zârte hi a inzawm vek a, sakhat a ni. Rangkachak hlîr hlak tlang khat aṭanga chher a ni. A khâwnvâr bûr, a lu bâwk pasarih te, chaicheh te, meivâp dahna te, rangkachak hlîr hlakin a siam a. A khâwnvâr bâwr leh a hmanrua zawng zawng siam nân rangkachak kg. sawmnga vêl an hmang a ni. Sitim thing dawhkân kil li nei, tawng khat bial, tawng hniha sâng a siam bawk a, a kila kite nên chuan a inzawm vek a ni. Rangkachak hlangin dawhkân leh a ki chu a luan a, a tlâng chu rangkachakin a tuam a. A zâwnfung rawlhna tûr rangkachak beng a chher a, a tlâng kâwmna bul, a sîr tuakah pahnih ve ve a vuah a, A zâwnfung tûr sitim thing tlâwn a siam a, rangkachakin a luan a. Hriak thianghlim thih tûr te, rimtui hâl tûr, tel rimtui anga chawhpawlh te a siam bawk a. Thilhlan hâlna tûr maichâm, Sitim thingin a siam bawk a; kil li nei, tawng nga bial, tawng thuma sâng a ni. A kilah ki lawr chho a siam ṭheuh a, maichâm nên chuan an inzawm tlat vek a ni; dârin maichâm leh a ki chu a tuam a. maichâma hman tûr vut bâwm te, vutlawh te, maihûn te, thîrkut kawm te, meilawh te dârin a siam a. Dâr tlâwn ram a tlângah chuan a bel kual a, a maichâm zâtve dâwn lai a awh a. Zâwnfung rawlhna tûr beng pali a chhûng a, kil tinah a dah thliah a. A zâwnfung tûr Sitim thing tlâwn a siam a, dârin a tuam a. Maichâm bang sir tuaka bengah chuan zâwnfungte chu a rawlh a. Maichâm chhûng chu a kawrawng, a bang chu thingphel a ni. Inbiakna bûk kawngka bula rawngbâwl ṭhîn nuhovin dârthlalanga an hman ṭhin dâr tle mi aṭangin dâr chawhtawlh leh a hûnna chu a siam a. La zai sîna tah puanin Biakbûk chu a hung a. Biakbûk chhim lam hung nân tawng zaa sei puan a hmang a, Ban sawmhnih leh a bulṭhut dâr tlang sawmhnih, thil bahna tûr kawm te, a zâr nâna tangkaraw tlâwn te a siam a. Biakbûk hmâr lamah pawh puan tawng zaa sei, ban sawmhnih, a bulṭhut dâr tlang sawmhnih leh thil inbahna tûr kawm leh tangkaraw tlâwn a siam bawk a. Biakbûk kawmchâr khawthlang lamah chuan puan tawng sawmngaa sei a zâr a, ban sâwm leh a bulṭhut dâr tlang sâwm a siam a, a bana thil kawm leh puan bahna thil tlâwn chu tangkaruaa siam a ni. Khawchhak lam pawh tawng sawmngaa zau a ni. A hungna puanzâr chu la zai sîn thlûra tah vek a ni. A ban bulṭhut chu dâr a ni a, a kâwm te, a ngul te, a ban chhîp tuamna te chu tangkarua vek a ni. A hungna ban zawng zawng chu tangkaraw tlâwna vuak zawm vek a ni. A kawngka luhnaa puanzâr chu la zai sîn thlûr, a dumpâwl te, a senduk te, a senlâr te inchawih mawi taka tah a ni. A puanzâr chu tawng sawmhniha sei, tawng ngaa sâng, Biakbûk hungna puanzâr dang ang bawk a ni. Ban pali leh a bulṭhut dâr tlang pali te, a bahna kawm te, a ban lu bâwk te, a vuak zawmna tangkaraw tlâwn te chu tangkarua vek a ni. Biakbûk leh a hungna kilh khâwmna chu dâr vek a ni. Thupêk Sâwm ziakna lungphêk an dahna Biakbûk chu a sak nân hetiang hi an hmang. Mosia thupêkin puithiam Arona fapa Ithamara hovin Levia chiten a zât hi an chhût chhuak a ni. Juda hnama mi, Hura tupa Bezalela, Uria fapa chuan Mosia hnêna Lalpa thupêk ang zawng zawng chu a siam a. A thawhpui, Dan hnam, Ahisamaka fapa Oholiaba chu thil ker thiam, thil mawi hria, la zai sîn, a dumpâwl te, a senduk te, a senlâr tea tah pawlh dân hmang hre tak a ni a. Biakbûk thianghlim sak nâna Lalpa hmaa rangkachak an rawn dah chu chutih hun laia khawtlâng hman bûklung dik taka bûkin kg. sângkhat a ni. Chhiarpui an neiha mi tin thawh zât tûr an tuk anga tangkarua an rawn thawh chu khawtlâng hman lai bûklung dik taka bûkin kg. sângthum leh zali leh sawmthum a tling. Hei hi kum sawmhnih tling chin chhiarpuia chhiar tel mi nuairuk leh sângthum leh zanga leh sawmngaten sekel chanve an rawn pêk tluk kha a ni. Pindan puanzâr ban leh bang thuahna bulṭhut chu pakhat pawh tangkarua kg. sawmthum leh pali-a rit zêl a ni a, a vaiin kg. sângthum leh zali an hmang a ni. An hman bang tangkarua kg. sawmthum chuan Bezalelan puan zârna tlâwn te, a kawm te, a ban lu tuamna te a siam a. Lalpa tâna dâr an pêk chu kg. sânghnih leh zali leh sawmhnih leh panga a tling a. Hei hian Biakbûk hungna ban bul te, maichâma bel te, dâr tlâwn ram te, a bungbêl te, a luhna ban bul te, Biakbûk leh a hungna khen nghehna zawng zawng a siam a. Hmun Thianghlima rawng an bâwl huna puithiamho hâk tûr mawi tak leh Arona puithiam kawr serh chu Lalpa thupêk ang chuan la dumpâwl te, a senduk te leh a senlâr tein an siam a. Efod chu la zai sîn, a dumpâwl te, a senduk te, a senlâr te leh rangkachak zai tein an tah a. Rangkachak chu pan takin an chhu pêr a, la zai sîn te, a dumpâwl te, a senduk te, a senlâr te nêna zeh tûrin an zai thlêr seng a. Dârbak pahnih an siam a, efod kilah chuan a hmâwr an ṭhui belhbâwm a, chu chuan a man bet a ni. Kâwnga efod hrên behna tûr, efod ang chiah an tah a, Mosia hnênah Lalpa thupêk ang khân efod nên an tah zawm a. Soham lungmantam chu rangkachakah an phûm a, Jakoba fa sâwm leh pahnih hming chu mawi takin an ker a. Lalpa thupêk ang ngei khân efod dârbakah chuan an vuah a, chu chu Israel hnam sâwm leh pahnih entîrna a ni. Efod siam nâna an thil hman, la zai sîn thlûr te, a dumpâwl te, a senduk te, a senlâr te leh rangkachak zaite hmangin âwmbel pawh chu inchawih mawi takin an tah bawk a. An thlep a, thleh hnu chuan kil li nei, khâp khat bial a ni. Lungmantam tlar li an vuah a, tlar khatnaah chuan Odam te, Pitda te, Bareket lung te an dah a; tlar hnihnaah chuan Nopek te, Safir te, Jahalom lung te an dah a. Tlar thumnaah chuan Lesem te, Sebo te, Aklama lung te an dah a; tlar linaah chuan Tarsis te, Soham te, Jaspi lung te an dah a, lungmantam hi rangkachaka phûm tlar ṭhet a ni. Lung pakhatah Israel hnam pakhat hming a chuang zêl a, Israel hnam sâwm leh pahnih aiawh atân tih a ni. Âwmbel phuar behna tûr rangkachak hlîr hlak khaidiat herh a siam bawk a. Lungmantam phûmna rangkachak pahnih leh rangkachak beng pahnih an siam chu âwmbel kil chung lamah an vuah ve ve a. Rangkachak khaidiat herh chu a bengah chuan an thlung a; a hmâwr lehlam chu lungmantam phûmna rangkachak pahnih nên an zawm a; tichuan, âwmbel thlunna chu efod dârbak hma lamah a inthlung a ni. Rangkachak beng dang pahnih an siam a, âwmbel kil hnuai lam, a chhûng lamah, Efod depah an vuah a. Rangkachak beng dang pahnih a siam a, efod dârbak bul lam inbelna laia kâwnghrên chungah a vuah a. Mosia hnêna Lalpa thupêk angin âwmbela rangkachak beng leh efod rangkachak beng chu la dumpâwlin an suih belhbâwm a; tichuan, a kâwnghrên chungah âwmbel chu a bei tlat a ni. Efod hnuaia kawrfual chu la dumpâwl hlîra tah a ni. Lu rawlhna tûr a laiah an rek a, a reh tlang chu a ṭeh loh nân puan themin an chep a. A kawrfual tlângah chuan la zai sîn te, a dumpâwl te, a senduk te, a senlâr tea siam theibuhfai lem an khai a, rangkachak tengeng nên inthlâk chiatin an khai a ni. Mosia hnêna Lalpa thupêk angin rawngbâwlnaa hâk atân an siam a. Arona leh a fate tân kawrhnuai te, diar te, lukhum te, kekawr tûrte la zai sînin an tah a. La zai sîn thlûr te, a dumpâwl te, a senduk te, a senlâr te inchawih mawi takin kâwnghrên tûr an tah bawk, Mosia hnêna Lalpa thupêk ang khân. Rangkachak hlang hlakin lu hrên an siam bawk a; chutah chuan, “ Lalpa Pual” tih an ziak a. Diar hma lamah chuan la dumpâwl hrualin Mosia hnêna Lalpa thupêk ang chuan an thlung bet a. Biakbûk leh thil dangte chu an siam zo ta a. Israel fate chuan Mosia hnêna Lalpa thupêk ang zawng zawng kha an ti vek a. Mosia hnênah Biakbûk siamna tûr siam sa chu an rawn la a; thil kawm te, thingphel rem te, a ban te, a chehna te, a bulṭhut te, a chung khuhna berâm vun tihsen te, savun ṭha chi te, puan zâr tûr te, Thuthlung Bâwm leh a chhûnga lungphêk te, a zâwnfungte leh a chhîn te, dawhkân leh a bungrua zawng zawng leh Pathian tâna chhang serh te, khâwnvâr bâwr, rangkachak hlîr hlaka siam, a chhitna leh a bungraw dang te, a chhit tûr hriak te; rangkachak maichâm te, thih tûr hriak te, rimtui hâl tûr te, Biakbûk luhna kawngkaa puanzâr tûr te; dâra tuam maichâm leh a hûnna te; a hungnaa zâr tûr puan te, bante leh a bulṭhut tûr te, a hung chhûng luhna kawngkaa puanzâr leh a thlunna hrui te; Biakbûk khennghehna leh Biakbûk thuam nâna thil ṭûl zawng zawng te; Hmun Thianghlima puithiamho hâk tûr thawmhnaw mawi tak tak te, puithiam Arona leh a fate kawr serh te chu an rawn la a. Israel fate chuan Mosia hnêna Lalpa thupêk ang chiah khân engkim an ti a. Mosia chuan ngun takin a lo en vek a, Lalpa thupêk ang chiahin an siam tih a hmuh chuan malsâwm tûrin Pathian hnênah a hlân a. Lalpa chuan Mosia hnênah, “Thla hmasa ber, ni khatah Lalpa chênna tûr Biakbûk hi din ang che u. Thuthlung Bâwm, thupêk sâwm ziak awmna lungphêk chu a chhûngah dah ula, a pindan chu puan zâr hnan rawh u. Dawhkân chu la lût ula, a bungruate chu a chungah dah ula; khâwnvâr bâwr pawh la lût ula, a dahna tûrah dah rawh u. Rangkachak maichâm, rimtui hâlna tûr chu, Thuthlung Bâwm hmaah dah ula, Biakbûk luhna kawngkaa puan chu zâr rawh u. Hâlral hlanna maichâm chu Biakbûk kawtah dah ula, maichâm leh Biakbûk inkârah dâr chawhtawlh chu hûng ula, tui dah bawk ang che u. A tual chu hung ula, a luhna kawngka puanzâr pawh zâr rawh u. Biakbûk leh a chhûnga bungrua zawng zawng chu hriak thianghlim chulh la; tichuan, an lo thianghlim ve tawh ang a. Maichâm leh a bungbêlah te hriak thianghlim chu chulh bawk la, an lo thianghlim vek tawh ang. Insilna dâr chawhtawlh leh a hûnna pawh hriak thianghlim chu hnawihin thian thianghlim ang che. Arona leh a fate chu Biakbûk hung chhûngah ko lût la, dân angin insil rawh se. Arona chu puithiam thawmhnaw bel la, hriak thih la, puithiam hna thawk tûrin serh hrang rawh. A fate pawh ko lût la, kawrfual chu hâktîr ang che. An pa hriak i thih ang khân anni pawh puithiam hna thawk tûrin hriak thih ang che; hriak thih an nih hnu chuan puithiam an ni kumkhua tawh ang,” a ti a. Lalpa thupêk ang chiah chuan Mosia chuan a ti a. Aigupta an chhuahsan kum hnihna, thla hmasa ber ni khat ni chuan Biakbûk chu a sa fel a. Mosia chuan a bulṭhutte chu a hûng a, a bangte chu a tung a, a bangrelte a vuah a, a bante a phun a. Biakbûk chung puan pawh a zâr a, a thuahnate pawh a kaih a. Lalpa thupêk ang khân a ti a. Lungphêk pahnih chu Thuthlung Bâwmah a khung a, a zâwnfungte chu a rawlh a, a chhinna chuan a chhîn a. Biakbûk chhûngah Thuthlung Bâwm chu a dah a, pindan puan chu a zâr hnan a, Lalpa thupêk ang zêl chuan a ti a. Biakbûk chhûng, pindan pâwn zâwk hmâr lamah chuan dawhkân chu a hûng a, Lalpa thupêk angin a chungah chhang serh chu a dah a. Chhim lamah khâwnvâr bâwr chu dawhkân epah a hûng bawk a. Lalpa hmaah chuan a thupêk angin khâwnvâr chu a chhi a. Rangkachak maichâm chu pindan puanzâr bulah chuan a hûng a. Lalpa thupêk angin thil rimtuite chu a hâl a. Biakbûk luhna kawngka puanzâr chu a zâr a. Puanzâr pâwn, Biakbûk tualah chuan, hâlral hlanna maichâm chu a hûng a; chutah chuan hâlral thilhlan leh buhbâl thilhlante chu a hlân a. Dâr chawhtawlh leh a hûnna chu Biakbûk leh maichâm inkârah chuan a dah a, tui a chhûng khat a. Chutah chuan Mosia te, Arona te leh a fate chuan an kut leh ke an sil a. Biakbûk chhûngah emaw, maichâmah emaw an kal dâwn apiangin Lalpa thupêk angin an insil ṭhîn a ni. Mosia chuan Biakbûk leh maichâm chu a hung kual a, a hung chhûng luhna kawngka puanzâr pawh chu a zâr bawk a. Tih tûr zawng zawng chu a ti zo ta a. Inbiakna bûk chu chhûm chuan a chîm a, Biakbûk chhûng chu Lalpa ropuinain a khat ta a. Chuvâng chuan, bûk chhûngah Mosia chu a lût thei lo, Lalpa ropuinain a khat tlat a ni. Chhûmin Biakbûk chu a kiansan veleh Israel-te chuan an bûk an sawn ṭhîn. Chhûmin a chîm chhûng chu an insawn lo. Thlalêra an vah chhûng zawng khân Israel-te mit hmuhah Lalpa chhûm chuan chhûnah bûk chu a chîm a, zânah zânkhuain meialh a ni thung a. Inbiakna bûk aṭangin Mosia chu Lalpa chuan a ko va. “Israel fate hnênah heti hian ti rawh: ‘ Lalpa hnêna thilhlan in rawn kenin in ran vulh, bâwng zînga mi emaw, berâm leh kêl zînga mi emaw in rawn la ṭhîn tûr a ni. Thilhlan chu hâlral thilhlan tûr a nih chuan ranrual zînga a pa, hmêlhem lo a ni ang a, Lalpa lo pawm atân Inbiakna bûk kawtah a hlântu chuan a rawn la tûr a ni. Hâl ral tûr ran lu-ah a kut a nghat ang a, a sual thawina atân pawm a ni ang. Bâwngpa chu Lalpa hmaah a talh ang a, Arona fa, puithiamte chuan a thisen chu an hlân ang a, Inbiakna bûk luhna bula maichâm chu an theh kual chhuak tûr a ni. A vun chu a lip ang a, a sa chu a chan sawm ang a. Arona fa puithiamte chuan maichâmah thing an lo dah ang a, mei an chhêm ang. A sa chu a thau leh a lu nên puithiam chuan meiah chuan an rawh ang. A kawchhûng leh a bawpte chu sil fai tûr a ni a, a hlântu puithiam khân maichâmah a vaiin a hâl ral tûr a ni. Hei hi hâlral thilhlan tih dân tûr chu a ni; chu chu Lalpa lâwmzâwng tak a ni. ‘Berâm emaw, kêl emaw hâl rala a hlan dâwn chuan a pa, hmêlhem lo a ni ngei tûr a ni. Lalpa hmaah, maichâm hmâr lamah chuan a talh ang a, a thisen chu puithiamin maichâm a theh kual chhuak ang. A sa chu a chan darh ang a, maichâm chunga thing alh hluah hluahah chuan puithiamin a lu leh a thau nên a rawh ang. A kawchhûng leh a bawpte erawh chu sil fai phawt tûr a ni; a vai chuan puithiam chuan a hâl ral vek tûr a ni, hâlral thilhlan a ni a, Lalpa lâwmzâwng a ni. ‘ Lalpa hnêna thilhlan tûr chu sava hâlral thilhlan a nih chuan ṭhuro emaw, pârva emaw rawn keng sela, puithiam chuan a lo la ang a, maichâmah a hlân tûr a ni; a ring a ṭhuai chhum ang a, a thisen chu maichâm sîrah a far kangtîr ang a, a hâl ral tûr a ni. A chawkchaweng leh a chaw pai chu maichâm khawchhak lama vut dahnaah paih tûr a ni. Pawt thla lovin a thla ki-ah keu phel tûr a ni, maichâmah hâl ral vek rawh se, hâlral thilhlan a ni a, Lalpa lâwmzâwng tak a ni. ‘ Lalpa hnêna Buhbâl thilhlan pe chuan chhangphut ṭha chi han la sela, oliv hriak leh beraw telh rawh se. Puithiam chuan chhangphut chu a ṭhâm ang a, hriak tlêm leh beraw zawng zawng nên chuan maichâmah a hâl ral tûr a ni, chu chu a vaia hâl ral a ni tih entîrna a ni; hâlral thilhlan a ni a, Lalpa lâwmzâwng tak a ni. Thilhlana hâl bâng chu puithiam chanpual tûr a ni a, Lalpa hnêna hlan tawh, serh hran tlat a ni. ‘Buhbâl thilhlanah thuka hem hmin a rawn ken chuan dawidim telh loh chhang a ni tûr a ni, hriak nêna hmeh a nih loh pawhin pan taka nuai, hriak chulh ni rawh se. ‘Thîr thlêng kuma kan, buhbâl thilhlan chu chhangphut ṭha chi, dawidim telh loh, hriak nêna hmeh a ni tûr a ni. Hlan dâwnah tihsawma hriaka tâl tûr a ni. ‘Buhbâl thilhlan chu, chhangphut ṭha chi, thîrbêla hriaka kan a ni tûr a ni. Chutiang thil chu Lalpa hnêna i hlan dâwn chuan puithiam pe la, ani chuan maichâmah a keng ang a, a ṭhen a sâwk thla ang a, a sawh thlâk chu a hâl ral tûr a ni; chu chu a vaia hâl ral entîrna a ni ang. Hei hi hâlral thilhlan a ni a, Lalpa lâwmzâwng tak a ni. Hlan bâng la awm chu, puithiamte ta tûr a ni, Lalpa hnêna hlan a ni tawh a, serh hran tlat a ni. ‘Buhbâl thilhlan, Lalpa hnêna hlan rêng rêng chu dawidim telh tûr a ni lo; dawidim leh khawizu telh rêng rêng Lalpa hnênah hâl ral atân hlan tûr a ni lo. In buhbâl seng hmasak ber erawh chu Lalpa hmaah kum tin in rawn hlân tûr a ni, maichâmah hâl ve tûr a ni lo. Buhbâl thilhlanah hian chi a tel zêl tûr a ni, chi hi Pathian nêna in thuthlung entîrna a ni a, in thil hlanah telh zêl tûr a ni. ‘In buhbâl thar hmasa in rawn hlan hunah chuan chhangpêr hlan tel ṭhin tûr a ni a, oliv hriak leh beraw telh bawk tûr a ni. Puithiam chuan chhangpêr leh hriak tlêm, a vai aiawh tûrin, a la ang a, beraw nên chuan buhbâl thilhlanah Lalpa tân a hâl ral tûr a ni. ‘Remna thilhlan tûr miin an ran zînga mi an rawn hlan chuan a nu emaw, a pa emaw, hmêlhem lo, Lalpa hmaah an rawn hlân tûr a ni. A ran hlan lu-ah chuan a kut a nghat ang a, Inbiakna bûk tual luhna kawngka bulah a talh ang a, puithiamin a thisen chu maichâm a theh kual chhuak ang. Remna thilhlan aṭang chuan Lalpa tân hêngte hi hlan tûr a ni; a rîlbawh thau zawng zawng, a kal te, a bawhtu thau te, a thin hlâwm ṭha lai hleh te. Chûng chu puithiamin maichâmah hâlral thilhlan dang a hâl rualin a hâl ral tûr a ni; chu chu Lalpa lâwmzâwng tak a ni. ‘Remna thilhlan tûr miin a berâm emaw, a kêl emaw zînga mi a rawn hlan chuan a nu pawh, a pa pawh, hmêlhem lo a hlân tûr a ni. Berâm a rawn hlân a nih chuan a lu-ah a kut a nghat ang a, Inbiakna bûk kawtah Lalpa hmaah a talh tûr a ni; puithiam chuan a thisen chuan maichâm a theh kual chhuak tûr a ni. Remna thilhlan aṭang chuan Lalpa tân hêngte hi a hlân tûr a ni; a mei thau, a bul rêta tan, a rîlbawh thau zawng zawng, a kalte leh a bawhtu thau, a thin hlâwm ṭha lai hleh. Chûng chu puithiamin maichâmah, Lalpa hnênah ei tûr thilhlanah a hâl ral tûr a ni. ‘ Lalpa hnêna a thilhlan chu kêl a nih chuan, a lu-ah a kut a nghat ang a, Inbiakna bûk kawtah a talh ang a, a thisen chuan puithiamin maichâm a theh kual chhuak tûr a ni. Hêng hi ei tûr thilhlan atân Lalpa hnêna a hlan tûr chu a ni; a rîlbawh thau zawng zawng, a kal te, a bawhtu thau te, a thin hlâwm ṭha lai hleh te. Hêng hi ei tûr thilhlan atân puithiam chuan maichâmah Lalpa lo lawm atân a hâl ral tûr a ni. A thau zawng zawng hi Lalpa ta tûr a ni. ‘Israel mi tu mahin sa thau leh thisen an ei tûr a ni lo. Israel mite chuan khawiah pawh awm se he dân hi an zâwm kumkhua tûr a ni,’ ” a ti a. Lalpa chuan Mosia chu a bia a, “Israel fate hrilh rawh, mi tu pawhin Lalpa thupêk an bawhchhiat palh chuan hetia tih tûr hi a ni: Thil tisual palhtu chu puithiam lalber a nih a, mipuiin a sual mawh an phurh dâwn chuan, a sual thawi nân bâwngtuai, hmêlhem lo, Lalpa hnênah a hlân tûr a ni. Lalpa hmaah, Inbiakna bûk kawtah, bâwngtuai chu a rawn kai ang a, a lu-ah a kut a nghat ang a, a talh tûr a ni. A thisen ṭhen chu a keng ang a, Inbiakna bûk chhûngah a luhpui ang a, a kutzungchalin Hmun Thianghlim puanzâr chu thisen chuan vawi sarih a theh ang a; rimtui hâlna maichâm kila ki-ah chuan thisen ṭhen chu a tât ang a, a bâng zawng chu bûk kawta thilhlan hâlna maichâm bulah a leihbaw vek tûr a ni. Bâwng thau, a rîlbawh thau zawng zawng te, a kal te leh a bawhtu thau te, a thin hlâwm ṭha lai hlehte chu puithiam chuan a la ang a, a thaute chu remna thilhlan tih dân ang khân hâlral hlanna maichâmah a hâl ral tûr a ni. A vun te, a sa te, a lu te, a ke te, a kawchhûng zawng zawng leh a rîl te nên riahhmun daipâwnah hmun serh, maichâm vut paih khâwmnaah meipui a chhep ang a, a hâl ral tûr a ni. “Israel hnam pumin thil sual an tih palh a, hre chhuak mai si lovin Lalpa thupêk an bawhchhiat chuan, an thil sual tih chu an hriat chhuah veleh hnam pum chuan sual thawi nân bâwngtuai Inbiakna bûk kawtah an rawn la tûr a ni; hnam hotute chuan a lu-ah kut an nghat zet ang a, talh tûr a ni. Puithiam lalber chuan bâwng thisen chu Inbiakna bûkah a keng lût ang a, Hmun Thianghlim Ber puanzâr chu vawi sarih a zungchalin thisen chu a tât tûr a ni. Bûk chhûnga rimtui hâlna maichâm kila ki-ah chuan a tât bawk ang a; bûk kawta thilhlan hâlna maichâm bulah a bâng zawng chu a leihbaw tûr a ni. A thaute chu maichâmah chuan a hâl ral tûr a ni. Sual thawina bâwngtuai a cheibâwl ang khân a ti ve vek ang a, mipui sual thawina chu a hlân tûr a ni; tichuan, an sual chu ngaihdam a ni tawh ang. Bâwngtuai chu riahhmun daipâwnah, ama sual thawina ang bawk khân a hâl ral tûr a ni. Hei hi hnam pum sual thawina atâna thilhlan ṭhin tûr chu a ni. “Rorêltuin thil sual a tih palh a, Lalpa thupêk a bawhchhiat chuan, a thil sual tih chu an hrilh a, a hriat chhuah veleh, a sual thawi nân kêlpa, hmêlhem lo a hlân tûr a ni. Kêl lu-ah a kut a nghat ang a, maichâm hmâr lam, hâlral thilhlan an talhna hmunah chuan a talh tûr a ni. Puithiamin a thisen chu a la ang a, maichâm kila ki-ahte chuan a tât ang a, a tah bâng chu maichâm bulah chuan a leihbaw tûr a ni. A thau zawng zawng chu Remna thilhlan a tih angin maichâmah chuan a hâl ral tûr a ni; chutiang chu rorêltu sual thawina puithiamin a hlan dân tûr chu a ni; tichuan, a sual chu ngaihdam a ni ang. “Mi narânin thil sual a tih palh a, Lalpa thupêk a bawhchhiat chuan a thil sual tih a hriat chhuah veleh kêlnu, hmêlhem lo, a sual thawi nân a rawn hlân tûr a ni. Kêl lu-ah a kut a nghat ang a, hâlral maichâm hmâr lamah hâlral thilhlan an talhna hmunah chuan a talh tûr a ni. A thisen chu puithiamin maichâm kil kiahte chuan a zungchalin a tât ang a, a tah bâng chu maichâm bulah a leihbaw tûr a ni. A thau zawng zawng chu remna thilhlan a tih ang chiah khân maichâmah a hâl ral tûr a ni; chu chu Lalpa lâwmzâwng tak a ni. Chutiang chuan thil sual titu sual thawina chu a hlân ang a, ngaihdam a ni tawh ang. “Sual thawi nân berâm a rawn ken chu, a nu, hmêlhem lo a ni ngei tûr a ni. Berâm lu-ah chuan a kut a nghat ang a, hâlral thilhlan an talhna hmun, maichâm hmâr lamah chuan a talh tûr a ni. A thisen chu hâlral maichâm kila ki-ahte chuan a zungchalin puithiam chuan a tât ang a, a tah bâng chu maichâm bulah a leihbaw tûr a ni. Remna thilhlan berâm ang khân a thau zawng zawng chu a la ang a, Lalpa tâna buhbâl thilhlan nên khân a hâl ral tûr a ni. Chutiang chuan sual thawina chu puithiam chuan a hlansak ang a, a sual chu ngaihdam a ni tawh ang. “Hetiang thilah hian sual thawina hlan a ngai. Rorêlna hmuna thuhretua koh chuan a thil hmuh emaw, a thil hriat emaw puang tûra tih a nih a, a puan duh loh chuan thil sual a ti a ni, a mawh a phur tûr a ni. Miin thil thiang lo, ran ruang te, a lian emaw, a te emaw, ramsa tlaw ruang te emaw a khawih palh chuan thil sual a ti a ni a; a hriat chhuah chuan a mawh chu a phur tûr a ni, a bawlhhlawh ve ang. Mihring aṭanga chhuak, thil thiang lo rêng rêng a khawih palh chuan a thiltih chu a dik lo tih a hriat veleh a thiang lo ve nghâl a ni. “Miin thil ṭha emaw, ṭha lo emaw ti tûrin ngaihtuah chiang lovin chhia chham sela, a thiltih chu a ngaihtuah chian hnuah chauh a tihsual mawh chu a phur tawh ang. “Miin thil sual a tih chuan, a thil sual tih chu a inpuang ang a, a thil sual tih hrem nân Lalpa hnênah berâm emaw, kêl emaw, a nu a rawn hlân tûr a ni. Puithiam chuan chu mi sual thawina chu a hlansak tûr a ni. Berâm emaw, kêl emaw a neih loh chuan a sual mana pêkah Lalpa hnênah ṭhuro pahnih emaw, pârva pahnih emaw a rawn hlân tûr a ni. Pakhat chu sual thawina thilhlan a ni ang a, pakhat chu hâlral thilhlan atân a ni ang. Puithiam hnênah a rawn dah ang a, sual thawina chu a hlân hmasa tûr a ni. Ṭhuai bung lovin a ring a elh tliak ang a, a thisen ṭhen chu maichâm pangah a theh ang a, maichâm bulah a thisen chu a far kang tûr a ni. Hei hi sual thawina thilhlan a ni. Pakhat chu dân angin hâlral thilhlanah a hlân tûr a ni. Chutiangin Puithiam chuan mi thil sual tih thawina chu a hlân ang a, ngaihdam a ni tawh ang. “Ṭhuro pahnih emaw, pârva pahnih emaw pawh a nei zo lo a nih chuan sual thawina thilhlan chhangphut ṭha chi kg. khat a rawn hlân tûr a ni. Oliv hriak emaw, beraw emaw a rawn telh tûr a ni lo; hâlral thilhlan a ni lo va, sual thawina thilhlan a ni. Puithiam hnênah a rawn dah ang a, ei tûr thilhlan angin Lalpa hnêna hlan vek a nih entîr nân a ṭhen a lo ṭhâm ang a, maichâmah ei tûr thil hlan angin a hâl ral ang. Sual thawina thilhlan a ni. Chutiang chuan thil sual titu tân puithiam chuan a lo hlansak ang a, ngaihdam a ni ang. Buhbâl thilhlan ang bawk khân a hâl bâng chhangphut chu puithiam chanpual tûr a ni,” a ti a. Lalpa chuan Mosia hnênah: “Miin Lalpa chanpual thil serh chu pe lo palh sela, a sual a ni. A sual manah thilhlan Lalpa hmaah berâm emaw, kêl emaw, a pa, hmêlhem lo a rawn keng tûr a ni, ran man zât chu biakbûk dân hman lai anga chhût tûr a ni. A pêk loh zât hu chu a pe ang a, chu bâkah hmun ngaa ṭhena hmun khat a pêk belh tûr a ni. Puithiam hnênah a pe ang a, berâmno chu anin bawhchhiat man thilhlanah a lo hlansak ang a, ngaihdam a ni ang. “Tih loh tûr thu-a Lalpa thupêk lo ti palh chuan thil sual a ti a ni, a mawh chu a phur ang. Puithiam hnênah bawhchhiat man thilhlan atân berâm emaw, kêl emaw a pa, hmêlhem lo a rawn kai tûr a ni, ran man bi zât chu biakbûka dân hman lai anga chhût tûr a ni. Puithiam chuan bawhchhiat man thilhlan chu a thiltih sual palh thawi nân a lo hlansak ang a, a sual chu ngaihdam a ni ang. Lalpa laka a bawhchhiat man thilhlan a ni,” a ti a. Lalpa chuan Mosia hnênah, “Israel mi tu pawhin a chipui hnêna thil a kawltîr te, a dahkham te pe kîr duh lo ta se, rûk ṭhensakin emaw, bum emaw ta sela; tin, thil bo a chhar si chhar lo angin chhia a chham chuan, Bawhchhiat man Lalpa hnêna hlan atân puithiam hnênah berâm emaw, kêl emaw, a pa, hmêlhem lo, a rawn kai tûr a ni; a man chu Hmun Thianghlima hman lai tangka hisâpa chhût tûr a ni. Puithiam chuan Lalpa hnênah sual thawina chu a hlansak ang a, a sualna chu ngaihdam a ni tawh ang.” a ti a. Lalpa chuan Mosia a bia a: “Arona leh a fate chu hâlral thilhlan chungchânga tih dân tûr hi hrilh rawh. Hâlral thilhlan chu zankhuain maichâmah chuan dah tûr a ni a, mei chu tihnun reng tûr a ni. A tûkah puithiam chuan a puan zai sîn kawr leh kekawr hnuai ha-in thuka thil rawh vâpte chu a rût ang a, maichâm sîrah chuan a dah tûr a ni. A thawmhnaw chu a thlâk ang a, riahhmun daipâwn hmun serhah vut chu a paih tûr a ni. Maichâma mei chu chhawm nun reng tûr a ni, a mit tûr a ni lo. Puithiam chuan tûk tin thing a tuah belh ang a, hâlral thilhlan tûrte chu a hâl ang a; remna thilhlan thaute pawh chu a hâl ral nghâl ang. Maichâma mei chu chhawm nun reng tûr a ni; a mit hauh tûr a ni lo. “Hetiang hi buhbâl thilhlan tih dân tûr chu a ni: Arona thlah puithiamin buhbâl thilhlan chu maichâmah Lalpa hmaah a hlân tûr a ni. Hriak leh chhangphut veikhat a la ang a, beraw nên maichâmah a hâl ang; chu chu a vaiin Lalpa hnêna hlan a ni tih entîrna a ni, Lalpa lâwmzâwng tak chu a ni. Hlan bâng chu puithiamho ei tûr a ni. Inbiakna bûk tual hmun thianghlimah dawidim tel lova ei tûr a ni. Dawidim nêna hmeh pawlha kan tûr a ni lo. Buhbâl thilhlan aṭanga an chanpual atân ka pêk a ni. Sual thawina leh bawhchhiat man thilhlan anga thil serh, serh hran tlat tawh chu a ni. Arona thlah mipa tawh phawt chuan an ei thei ang. Lalpa hnêna ei tûr hlan kumkhuaa an chanpual tûra ruat a ni. Mi dang tu pawhin ei tûr thilhlan chu an khawih ve chuan an thiang lo nghâl ang,” a ti a. Lalpa chuan Mosia hnênah, “Arona leh a fate hriak thih ni chuan Lalpa hnênah chhangphut ṭha chi kg. khat, ni tina buhbâl thilhlan hlan tel zât, zîngah kg. chanve, tlaiah kg. chanve rawn hlân ṭheuh rawh se. Oliv hriak nên hmeh pawlha chhang ur thlênga ur hmin tûr a ni a, sih sawma buhbâl thilhlan anga hlan tûr a ni. Arona thlah, a aiawhtu tûra hriakthih, Puithiam lalber chuan he thilhlan hi a hlân ṭhîn tûr a ni; hei hi kumkhuaa tih dân tûr a ni, Lalpa tân hâl ral vek tûr a ni. Puithiamin buhbâl thilhlan a hlan hi ei tûr a ni lo, hâl ral vek tûr a ni,” a ti a. Lalpa chuan Mosia hnênah, “Arona leh a fate chu hrilh rawh: ‘Hetiang hi sual thawina thilhlan hlan dân tûr chu a ni: hâlral thilhlan tûr talhna hmunah sual thawina thilhlan chu Lalpa hmaah talh tûr a ni, thil serh tlat a ni. A hlântu puithiam chuan a sa hi Inbiakna bûk tual hmun thianghlimah a ei tûr a ni. ‘He sa hi a khawih apiang an thiang lo nghâl ang. Thawmhnaw eng pawh a thisenin a per chuan hmun thianghlima sûk tûr a ni. A sa chhumna bêl chu hlumbêl a nih chuan tihkeh tûr a ni; dârbêl a nih erawh chuan nawh fai hliauva tuia sil tûr a ni. Puithiam thlah mipa tawh phawt chuan a sa hi an ei thei ang, thil serh a ni. Inbiakna bûk hung chhûng hmun thianghlimah thisen chu sual thawina atân lâk luh a nih chuan a sa chu hâl ral vek tûr a ni. ‘Hei hi Bawhchhiat man thilhlan tih dân tûr chu a ni: Hâlral thilhlan ran talhna hmunah ran chu talh tûr a ni a, a thisen chu maichâma theh tûr a ni. A mei thau te, a rîlbawh thau te, a kal te leh a bawhtu thau te, a thin hlâwm ṭha lai hleh te chu Puithiamin maichâmah a hâl ral tûr a ni, bawhchhiat man thilhlan a ni. Puithiam chi, mipa tawh phawt chuan a sa chu an ei thei ang, serh hran tlat a nih avângin hmun thianghlima ei tûr a ni. ‘Sual thawina thilhlan leh bawhchhiat man thilhlan hi a hlan dân a inang reng tûr a ni; a hlântu puithiam hian a sa hi a nei tûr a ni. Hâlral thilhlana hman ran vun chu a hlântu puithiam neih tûr a ni. Buhbâl thilhlan thuka hem hmin te, chhang ur thlênga ur hmin te, thîrbêla kan te chu a hlântu puithiam neih tûr a ni. Buhbâl thilhlan la tihhmin loh, hriak telh pawh, telh loh pawh Arona thlah puithiamte ta tûr a ni: an insem zêl tûr a ni. ‘ Lalpa hnêna remna thilhlan chu hetianga hlan tûr hi a ni. Remna thilhlan chu Pathian hnêna lâwmthu sawina atân miin a rawn hlan chuan, ran hlan rualin chhang, dawidim telh loh leh oliv hriak nêna hmeh emaw, chhang pan oliv hriaka tâl emaw, oliv hriaka kan emaw a rawn hlân tel tûr a ni. Chûng bâkah chuan dawidim telh chhang tlang ur hmin a pe tel tûr a ni. Chhang chi hrang hrang a hlan zînga pakhat zêl chu Lalpa tân a pe tûr a ni, maichâma ran thisen thehtu puithiam neih tûr a ni ang. A sa chu a hlan nia ei zawh vek tûr a ni; a tûk atân dah tûr a ni lo. ‘Remna thilhlan chu thutiam hlawhtlinna avâng emaw, mahni duh thu-a thilhlan hrim hrim emaw a nih chuan, a sa chu a hlan niâ ei vek kher tûr a ni lo, a tûkah pawh ei theih a la ni ang. Ei sên loh, a ni thum ni pawha la awm ta cheu chu hâl ral tûr a ni. A ni thum nia an la ei chuan Pathianin a thilhlan chu a pawm lo vang, a hlântu thil tih ṭhatah chhiar ahnêkin bawlhhlawhnaa ngaih a ni ang a, a eitu chuan a mawh a phur ang. A sa-in thil bawlhhlawh a khawih chuan ei tûr a ni lo, hâl ral tûr a ni. Mi bawlhhlawh lai lo chuan a sa chu an ei thei ang. Mi bawlhhlawh laiin remna thilhlan sa hi a ei ve chuan ensan tûr a ni. Mihring emaw, ran aṭangin emaw thil bawlhhlawh chhuak khawihtu chuan he sa hi a ei ve chuan ensan tûr a ni,’ ” a ti a. Lalpa chuan Mosia hnênah, “Israel fate chu hrilh rawh: Berâm te, bâwng te, kêl te, a eng thau mah an ei tûr a ni lo. Ran tlaw emaw, sa seh emaw thau chu ei tûr a ni lo; thil dangah erawh chuan hman theih a ni ang. Ei tûr thilhlan Lalpa hnêna a thau hlan tawh ei chu ensan tûr a ni. Israel fate chu khawiah pawh awm se ran thisen emaw, sava thisen emaw an ei tûr a ni lo. He dân hi bawhchhia apiang ensan tûr an ni,” a ti a. Lalpa chuan Mosia hnênah, “Israel mite chu hrilh rawh. Remna thilhlan Lalpa hnêna hlântu chuan a ṭhen Lalpa hnêna thilpêkah an pe tûr a ni. Amah ngeiin ei tûr thilhlan chu a rawn hlân tur a ni. Ran thau leh a irno chu a thên ang a, Lalpa hnênah a rawn hlân tûr a ni. Puithiamin a thau chu maichâmah a hâl ang a, a irno erawh chu puithiam neih tûr a ni. Remna thilhlanah chuan a bawp ding lam chu puithiam pêk tûr a ni. Remna thilhlan thau leh thisen hlântu puithiam chuan a bawp ding lam chu a nei ang. Israel-ten Lalpa hnêna remna thilhlan an hlanin a irno an thên leh a bawp hi puithiamte kumkhaw chanpual tûr a ni,” a ti a. Hei hi ei tûr Lalpa hnêna pêk aṭanga Arona leh a fate, puithiama ruat ngheh hnua an chanpual atâna pêk tûr chu a ni. Chumi ni chuan a ni Lalpa chuan Israel mite hnênah he thên thilhlan hi an hnêna pe ṭhîn tûra thu a pêk ni. He dân hi Israel miten kumkhuain an zâwm tûr a ni. Tichuan, hâlral thilhlan te, buhbâl thilhlan te, sual thawina thilhlan te, bawhchhiat man thilhlan te, Puithiam nemngheh thilhlan te leh remna thilhlante chu chutianga hlan ṭhin tûr chu a ni. Thlalêra Sinai tlângah Israel-te thilhlan dân tûr a hrilh ṭuma Mosia hnêna Lalpa thupêkte chu chûng chu a ni. Lalpa chuan Mosia hnênah, “Arona leh a fate chu Inbiakna bûk luhnaah lo kal sela, puithiam thawmhnaw te, thih tûr hriak te, sual thawina tûr bâwngpatuai te, berâmchal pahnih leh dawidim telh loh chhang, fawngin han keng rawh se. Israel pungkhâwmho chu ko vek ang che,” a ti a. Lalpa thupêk ang chuan Mosia chuan a ti a, an lo pun khâwm hnu chuan an hnênah, “Kan tih tûr hi Lalpa thupêk a ni,” a ti a. Mosia chuan Arona leh a fate chu a rawn hruai a, dân angin a insiltîr a. Kawrhnuai te, kawrfualte chu a hâktîr a, kâwnghrên pawh a hrêntîr a. Efod a hâktîr bawk a, a hrênna mawi taka tah chuan a kâwngah a hrêng bet a, âwmbel chu a bel a, tah chuan Urim leh Thumim pawh chu a dah a. Diar chu a khimtîr a, a chalah rangkachak phêk ‘ Lalpa Pual’ tih ziakna kha a inbel a. Chûng chu Lalpa thupêk angin a ti vek a. Mosia chuan hriak thih mi chu a la a, Biakbûk leh a chhûnga awm zawng zawng chu a chulh a, a tithianghlim a. Hriak ṭhen chuan maichâm leh a bungbêl te, dâr chawhtawlh leh a hûnna te chu tihthianghlim nân vawi sarih a theh a. Hriak ṭhenkhat chu Arona lu-ah a leih a, a serh hrang ta a. Arona fate pawh chu Mosia chuan a hruai a, kawr ṭial a hâktîr a, kâwnghrên a hrêntîr a, lukhum a khumtîr bawk a; chûng chu Lalpa thupêk angin a ti a. Mosia chuan sual thawina bâwng chu a kai a, Arona leh a fate chuan a lu-ah an kut an nghat a. Mosia chuan a talh a, a thisen ṭhen chu zungchalin maichâm kila ki-ahte chuan tihthianghlim nân a tât a. A tah bâng chu maichâm bulah a leihbua a; chutiang chuan maichâm chu a serh hrang a, a tithianghlim a ni. Mosia chuan a rîlbawh thau zawng zawng te, a thin hlâwm ṭha lai hleh te, a kal te leh a bawhtu thau te chu maichâmah chuan a hâl a. Lalpa thupêk angin a vun te, a sa te, a rîlte chu riahhmun pâwnah a hâl a. Hâlral thilhlan tûr berâm pawh chu Mosia chuan a kai a, Arona leh a fate chuan a lû-ah an kut an nghat a. Mosia chuan a talh a, maichâm chu thisen chuan a theh kual a. Mosia chuan berâm pakhat zâwk, puithiam nemnghehna chu a kai a. Arona leh a fate chuan a lu-ah an kut an nghat a. Mosia chuan a talh a, a thisen ṭhenkhat chu Arona beng ding lam tengengah a hnawih a, a kutzungpui leh kezungpui ding lam hmâwr ve ve-ah a hnawih a. Arona fate pawh chuan an rawn pan a, an beng ding lam tengengah te, an kut leh an kezungpui ding lam hmâwr ve ve-ah te a lo hnawih bawk a; a hnawih bâng chuan maichâm chu a theh kual a. Berâm thau, a mei thau tak te, a rîlbawh te, a thin hlâwm ṭha lai hleh te, a kal te leh a bawhtu thau te leh a bawp ding lam chu a la a. Lalpa hnênah Buhbâl thilhlan, dawidim telh loh chhang tlang khat leh chhang, hriak nêna hmeh te, hriaka chhang pan tâl te chu ran thau leh a bawp chungah chuan a dah a. Arona leh a fate kutah a hlân a, Lalpa hmaah chuan an thên a, an hlân a. Mosia chuan chûng chu a la leh a, hâlral thilhlan chungah nemnghehna thilhlanah a hâl ta a. Hei hi ei tûr thilhlan a ni; chu chu Lalpa lâwmzâwng tak chu a ni. Mosia chuan a irno chu a la a, Lalpa hmaah chuan a thên a, a hlân a; chu chu puithiam nemnghehna berâm aṭanga Mosia chanpual ve chu a ni. Lalpa thupêk ang chuan Mosia chuan engkim a ti a. Mosia chuan hriak thih tûr ṭhen chu maichâma theh thisen ṭhen nên chuan a la a, Arona leh a fate chu an kawrah nên a theh a. Chutiang chuan an kawrte nên Lalpa tân a serh hrang ta a. Mosia chuan Arona leh a fate hnênah, “Inbiakna bûk kawngka bulah a sa hi la ula, chhûm ula, fawnga nemnghehna thilhlan chhang nên khân Lalpa thupêk angin ei rawh u. In ei bâng chu, sa pawh, chhang pawh hâl vek tûr a ni. Nemnghehnaa tih tûr tih kim a nih hnu, ni sarih chhûng chuan Inbiakna bûk aṭangin pâwnah in chhuak tûr a ni lo. Lalpa thupêk angin khâng thil kha in sual thawina tûrin ka ti a ni. Lalpa thupêk ang chuan ni sarih leh zan sarih Inbiakna bûk luhna bulah in awm tûr a ni. In awm duh loh chuan in thi ang, chu chu Lalpa thupêk a ni,” a ti a. Tichuan, Arona leh a fate chuan Mosia hnêna Lalpa thupêk zawng zawng chu an ti ta vek a. Ni riat ni chuan Mosian Arona leh a fate chu Israel upate nên a ko va, Arona hnênah, “Bawngpatuai leh berâmchal hmêlhem lo kai la, bâwng chu sual thawina thilhlanah Lalpa hnênah hlân la, berâm chu hâlral thilhlanah hlân ang che. Israel mite chuan sual thawina thilhlanah kêlpa rawn kai sela; bâwngno leh berâmno, kum khat vêla upa, hmêlhem lo, hâlral thilhlan atân rawn kai bawk rawh se. Bâwngchal leh berâmchal, remna thilhlan atân rawn kai sela, buhbâl thilhlan hriak nêna pawlh Lalpa hnênah rawn hlân bawk rawh se. Vawiin hian kei, Lalpa hi, in hmaah ka rawn inlan dâwn a ni,” a ti a. Mosia thupêk ang chuan Inbiakna bûk kawtah chûng chu an rawn kai a, hnam pum chu Lalpa chibai bûk tûrin an pung khâwm a. Mosia chuan an hnênah, “Hei hi ti tûrin Lalpa chuan thu a pe che u a ni: Lalpa ropuina êng chu a lo lang dawn si a,” a ti a. Tin, Arona hnênah chuan, “Maichâmah i sual thawina tûr leh hâlral thilhlan hlân ang che, mipui sual thawina tûr pawh hlân bawk ang che, Lalpa thupêk angin mipui sual thawina chu hlansak rawh,” a ti a. Arona chu maichâmah a kal a, ama sual thawina bâwngpatuai chu a talh a. A fate chuan a thisen an rawn lâksak a, a zungchal a chiah a, maichâm kila ki-ah chuan a tât a, a tah bâng chu maichâm bulah a leihbua a. A thau te, a kal te, a thin hlâwm ṭha lai hleh te chu Mosia hnêna Lalpa thupêk ang khân maichâmah chuan a hâl a. A vun leh a sa erawh chu riahhmun pâwnah a hâl ral a. Ama puala hâlral thilhlan pawh chu a talh a, a thisen chu a faten an rawn lâksak a, maichâm a theh kual chhuak a. A lu leh a sa dangte pawh an rawn la a, maichâmah a lo hâl a. A rîlte leh a bawp chu a sil fai a, maichâmah chuan a dang chunga dahin a hâl ta bawk a. Chumi hnu chuan mipui thilhlan chu a hlân ve ta a. Mipui sual thawina thilhlan chu a talh a, ama sual thawina a hlan ang chiah khân a ti a. Hâlral thilhlana hlan tûr ran pawh chu a tih dân tûr tuk angin a ti a. Buhbâl thilhlan chhangphut chu a ṭhâm a, maichâmah chuan ni tin hâlral thilhlan zîngah chuan a hâl tel a. Remna thilhlanah bâwngpa leh kêlchal mipuiin an rawn ken chu a talh a, ran thisen chu a faten an rawn la a, maichâm chu a lo theh kual chhuak a. Arona chuan bâwng leh berâm thau, berâm mei thau tak leh a rîlbawh thau te, a kal te, a thin hlâwm ṭha lai hleh te chu, a irno chungah a dah a, maichâmah a rawn hlân a. Mosia sawi angin a irno leh a bawp chu Lalpa hmaah a thên a. Aronan hêng hi a hlan zawh chuan mipui chungah a kut a phar a, malsâwmna a sawi a, maichâm ata chu a lo chhuk a. Mosia leh Arona chu Inbiakna bûkah chuan an lût a, an lo chhuah chuan mipui tân malsâwmna an sawi a. Lalpa ropuina êng chu mite hmuhah a lo lang ta a. Lalpa hnên aṭang chuan mei a lo chhuak a, maichâma hâlral thilhlan leh sathaute chu a rawn kâng ral ta a. Mipuiin chu chu an hmuhin an au va, an hmaia lei siin an bawkkhup ta a. Nadaba leh Abihua, Arona fate chuan, an meilawhin meiling an rût a, rimtui hâl chi an phul a, Lalpa hmaah mei thiang lo chu an hmang a. Chutiang hman chu Lalpan a khap a ni. Lalpa hnên aṭangin mei a lo chhuak zawk a, Lalpa hmaah an pahnih chuan an kâng hlum ta a. Mosia chuan Arona hnênah, “ Lalpa chuan hemi thu-ah hian heti hian a ti, ‘Ka rawngbâwltute chuan ka thianghlimna hi an pawisa tûr a ni. Ka mite hmaah ka ropuizia ka tilang dâwn,’ a tih rêng kha,” a ti a. Arona chu a ngawi reng a. Mosia chuan Arona pami Uziela fa Misaela leh Elzafana te chu a ko va, an hnênah, “Lo kal ula, in unaute ruang hi bûk thianghlim aṭang hian la chhuak ula, riahhmun pâwnah dah chhuak rawh u,” a ti a. Tichuan, an lo kal a, Mosia sawi angin an ruang chu an puithiam kawr fual chuan riahhmun pâwnah an zâwn chhuak ta a. Mosia chuan Arona leh a fa Eleazara leh Ithamara hnênah, “Lu in sûnin in sam thlah suh ula, in puan pawh pawtthlêr ve hek suh u; chutianga in tih chuan in thi ngei ang a, Lalpa chu hnam pum chungah a thinur ang. Lalpa meiin a kan hlumte chu in unau Israel dangte erawh chuan an ṭah thei ang. Nangni chuan Inbiakna bûk hi chhuahsan suh u, in thi dah ang e, Lalpa hriak thih in nih tawh kha,” a ti a. Mosia sawi ang chuan an ti ta a. Lalpa chuan Arona hnênah “Inbiakna bûka in lo luh dâwnin nang leh i fate hian uain leh zu in in tûr a ni lo, in in chuan in thi ang. Hei hi inthlah zawng zawngten an zâwm tûr a ni. Thil serh leh serh loh, thiang leh thiang lo in thlei thiam tûr a ni. Mosia hnêna dân ka pêk zawng zawng che u chu Israel mite chu in zirtîr tûr a ni,” a ti a. Mosia chuan Arona leh a fapa pahnih la dam, Eleazara leh Ithamara-te hnênah, “Buhbâl thilhlan aṭanga Lalpa hnêna hlan bâng kha la ula, maichâm bulah ei rawh u: serh hran tlat a ni tawh si a. Hmun thianghlimah chuan ei ula, Lalpa hnêna ei tûr hlan aṭanga in fate nêna in chanpual a ni. Hei hi Lalpa thupêk a ni. A irno leh a bawp, Lalpa hmaa thên kha chu hmun thianghlimah chuan in fapate leh in fanute nên in ei thei ang. Hêng thilhlante hi in fate nêna in ei atân remna thilhlan aṭanga in chanpual tûr chu a ni. Lalpa hmaa a bawp leh a irno an thên kha meia thilhlan Lalpa hnêna a thau an hlan rualin an rawn la tûr a ni. Lalpa thupêk angin hêng hi in fate nêna in kumkhaw chanvo tûr a ni,” a ti a. Mosia chuan sual thawina thilhlan kêl chungchâng thu chu dîlchhût takin a zâwt a, an lo hâl dêr tawh tih a hre ta a. Eleazara leh Ithamara chungah chuan a thinur ta hle a. “Engtizia nge sual thawina thilhlan kêlpa sa chu hmun thianghlimah in ei loh, serh hran tlat tawh a nih kha; mipui sual thawina aṭanga in chan tûra Lalpa pêk che u a nih kha. Inbiakna bûkah a thisen chu lâk luh a ni si lo va, ka hrilh tawh che u ang khân chutah chuan a sa in ei tûr alâwm,” a ti a. Arona chuan a chhâng a, “Vawiin hian sual thawina sa chu ei ila, Lalpa chuan a remti meuh ang maw? Mipuite chuan Lalpa hnênah sual thawina chu an rawn hlân a, chuti chung pawhin hêng thil râpthlâk tak hi ka chungah a thleng a ni,” a ti a. Chûng chu Mosian a han hriat chuan a lungawi ta a. Lalpa chuan Mosia leh Arona hnênah, “Israel mite chu hetiang hian hrilh rawh u. ‘Khawmuala chêng hêng sate hi in ei thei ang: a tin kâk chhuak, chaw ṭhial nawn sa tawh phawt chu in ei thei ang. Vawksa ei suh u, sa bawlhhlawh a ni, a ketin chu a kâk chhuak a; mahse, chaw chu a ṭhial nawn lo a ni. Hêng ran sate hi ei suh u, a thi ruang pawh khawih suh u, a bawlhhlawh a ni. ‘Sangha chi tinrêng, luia awm te, tuifinriata awm te, dîla awm te, phuhlip leh pângparh neite chu in ei thei ang. Tuia chêng si phuhlip leh pângparh nei lo chu ei loh tûr a ni. Chûng chu an tenawm a ni: an sa in ei tûr a ni lo va, a khawih pawh in khawih tûr a ni lo. Tuia chêng, phuhlip leh pângparh nei lo chu in ei tûr a ni lo. ‘Hêng savate hi sava tenawm an ni, an bawlhhlawh a, ei loh tûr a ni: mupui te, lungdûp te, mutê te, ngawihûp chi rêng rêng te, choak chi rêng rêng te, sava sâng te, vabak te, tuifinriat sava te, mu chi rêng rêng te, hrângkir te, luidung mu te, chingpirinu te, chhimbuksialki nei te, mulukawlh te, kânghlai te, dîl sava chi rêng rêng te, chhuangtuarte leh bâk te. ‘Rannung thla nei, ke pali-a vâk chi rêng rêng chu in tân a tenawm a ni. Zuankah theihna tûr bawppui nei chi erawh chu in ei thei ang. Khaukhuap chi te, khauchher chi te, perhpâwng chi te, khau ṭial chi te in ei thei ang. Thla nei, ke pali-a vâkte chu in tân a tenawm a ni. A thi khawih apiang tlai thlengin an bawlhhlawh ang. A thi sa pawh silhfênin a khawih chuan sûk tûr a ni, tlai thlengin a neitu chu a bawlhhlawh ang. ‘Ran eng pawh tin kâk mah se chaw ṭhial nawn lo emaw, a tin kâk chhuak lo emaw chu a bawlhhlawh a ni, a ruang khawih apiang chu a bawlhhlawh ang. ‘Ke pali nei, ke bâwr nei chi chu an bawlhhlawh a ni, an ruang khawih chu tlai thlengin an bawlhhlawh ang. An ruang latu chuan a thawmhnaw a su tûr a ni, tlai thlengin a bawlhhlawh ang; hêng ruangte hi in tân a tenawm a ni. ‘Leia a vaha vâkho hi in tân a bawlhhlawh bawk a ni: bui te, sazu te, tangkeu chi rêng rêng te, chawke te, daidêp te, laikîng te, laitel te, kâwlchawr te; hêng bawkvâka kalte hi in tân a bawlhhlawh a ni. A thi khawih chu tlai thlengin an bawlhhlawh ang. Tin, a thi chuan thing emaw, thawmhnaw emaw, savun emaw, ip emaw, thil dahnaa hman tawh phawt chu a delh chuan a bawlhhlawh ang a; tuia hnim tûr a ni, tlai thlengin a bawlhhlawh ang a, a thianghlim leh mai ang. Hlumbêl chhûnga a tlâk chuan a chhûnga awm zawng zawng chu a bawlhhlawh ang a, a bêl chu vuak keh tûr a ni. Thil ei theih chi rêng rêngah chutiang bêla tui lo awm chu leih a nih chuan a bawlhhlawh ve ang; chutiang bêla in theih chi awm rêng rêng pawh a bawlhhlawh ve a ni. Hêngho thi ruang hi chhang ur bêlah emaw, khuhhriangah emaw a tlâk chuan a bawlhhlawh a, tihkeh sawm tûr a ni. A thi ruang chu eng pawhin khawih se a khawihtu chu a bawlhhlawh a; mahse, tuikhuahah te, tuizêmahte tla se a bawlhhlawh ve lo. Chîn atân thlai chi dah chungah tla pawh ni se thlai chi chu a bawlhhlawh ve lo. Thlai chi chu tuia an chiah laiin hêng thi ruang hi a tlâk chuan a bawlhhlawh a ni. ‘Sa ei thiang thi sela, a ruang khawih apiang tlai thlengin an bawlhhlawh ang. A sa ei chuan a thawmhnaw a su tûr a ni: tlai thlengin a bawlhhlawh ang. A sa phurtu pawhin a thawmhnaw a su tûr a ni: tlai thlengin a bawlhhlawh ang. ‘Rannung, leia bawkvâk chi te hi in ei tûr a ni lo. A tlenga tleng te, ke pali emaw, a aia tam emaw nei leia vâk chi rêng rêng hi in ei tûr a ni lo, a tenawm a ni. Hêng hi in ei chuan in tenawm ve ang a, in bawlhhlawh ang. Kei Lalpa hi in Pathian ka ni a, invawng uluk ula, kei hi ka thianghlim a, nangni pawh in thianghlim ve tûr a ni. Leia vâk chi rêng rêng hian intibawlhhlawh suh u. ‘In Pathian ni tûrin Aigupta ram aṭanga hruai chhuaktu che u Lalpa ka ni. In thianghlim tûr a ni, kei ka thianghlim ang hian. ‘Hei hi ramsa te, sava te, tui chhûngte leh lei chunga vâkte chungchânga dân chu a ni. A bawlhhlawh leh bawlhhlawh lo, ei thiang leh thiang lo in thliar tûr a ni.’ ” Lalpa chuan Mosia hnênah, “Israel-te chu hrilh rawh, ‘Hmeichhiain nau a paia, mipa a hrin chuan ni sarih chhûng a bawlhhlawh ang, thi neih chhûnga a bawlhhlawh ang khân. A ni riat ni chuan nausên serh chu tan tûr a ni. A thisen chhuak avângin nu chu ni sawmthum leh pathum dang a ral hma chu a thiang lo vang a, a inthen thianghlim hma chu thil thianghlim eng mah a khawih tûr a ni lo. ‘Fanu hring chu ni sâwm leh pali chhûng, thi neih lai ang bawkin, a bawlhhlawh ang a, a thisen chhuak avâng chuan ni sawmruk leh paruk dang a ral hma chu a thiang lo vang. Mipa fa emaw, hmeichhe fa emaw avânga inthen fai hun a tlingtlâk hnuah Inbiakna bûk luhnaah kum khat vêla upa berâmno hâlral thilhlanah a rawn la ang a, sual thawina atân pârva emaw, ṭhuro emaw puithiam hnênah a rawn keng tel tûr a ni. Puithiam chuan Lalpa hnênah thilhlan chu a hlân ang a, bawlhhlawh inthenna chu a lo tihsak ang. Hei hi hmeichhiain fa a neiha a tih tûr chu a ni. ‘Hmeichhia chuan berâmno a neih zawh loh chuan ṭhuro pahnih emaw, pârva pahnih emaw a rawn hlân tûr a ni; pakhat chu hâlral thilhlan a ni ang a, pakhat chu sual thawina thilhlan a ni ang. Puithiam chuan a bawlhhlawh thenna chu a hlansak ang a, a lo thianghlim tawh ang,’ ” a ti a. Lalpa chuan Mosia leh Arona hnênah, “Vuna pân emaw, bawl emaw, vûng emaw a awma, dam mai thei lo tûr chi anga a lan chuan puithiam entîr tûr a ni. Puithiamin pân chu ngun takin a han en ang a, a pân laia hmul chu a vâr a, a pân dân chu a vêl vun aia thûk hlea a lan chuan phâr natna chi a ni a, puithiam chuan mi bawlhhlawh a nih a puang ang. A pân chu a vâr a, pâwnlâng hlea a lan a, a hmul pawh a vâr loh bawk chuan puithiamin ni sarih chhûng a awm hrantîr ang a. Ni sarih hnuah puithiam chuan a en leh ang a, a pân chu a ngai reng a niha, a darh loh chuan ni sarih dang a awm hrantîr leh ang. Ni sarih ral hnuah a en leh ang a, pân chu a lo hila, a darh loh chuan mi bawlhhlawh a ni lo tih puithiam chuan a puang ang. Pân narân mai a ni a, a silhfênte chu a su ang a, a thiang ang. Puithiamin a ena, a thiang tia a puan tawh hnuin pân chu darh sela, a inentîr leh tûr a ni. Puithiam chuan a en leh ang a, a lo darh zau chuan mi bawlhhlawh a nih a puang ang: phâr natna chi a ni. “Tu pawhin phâr natna chi hi an vei chuan puithiam hnêna hruai ngei tûr a ni; ani chuan ngun takin a lo en ang a, pân chu a vâr piapa, a hmul a vâr a, a hnai a awm bawk chuan phâr dam har chi a ni: puithiam chuan mi bawlhhlawh a ni tih a puang ang, en leh tûra awm hrantîr a ngai lo vang: a bawlhhlawh tih a chiang sa a ni. Chu natna chu a darha, puithiam hmuh phâk chin, a ke aṭanga a chhîp thleng a awh chhuah tawh chuan, puithiamin ngun takin a en ang a, a taksa puma a darh chhuah zawh tawh chuan chu mi chu a thiang tawh tih a puang ang: a vun chu a vâr chhuah vek chuan a thianghlim tawh a ni. Amaherawhchu, lâwng a lo awm chuan a bawlhhlawh a ni. Puithiam chuan a en leh ang a, lâwng lai a hmuh chuan bawlhhlawh a ni tih a puang ang. Taksaa lâwng awm hi phâr natna a ni a, a bawlhhlawh a ni. Lâwng chu a reha, a lo vâr chuan puithiam a entîr tûr a ni. Anin a lo en ang a, lâwng kha a lo vâr chuan chu mi chu a thianghlim a ni tih a puang ang. “Khawihli dam tawh, a lo vûnin emaw, a sen a a lo durhin emaw puithiam entîr tûr a ni. Puithiam chuan a bawlhhlawh tih a puang ang: khawihli aṭangin phâr natna a insiam a ni. A hmul chu a vâr lohva, a vêl vun aṭanga thûk lêm lova puithiamin a hriat chuan chu mi chu ni sarih chhûng khung hran tûr a ni. Chu thil chu a ṭaidarh chuan puithiam chuan a bawlhhlawh a ni tih a puang ang: hri ṭha lo a ni. A danglam lohva, a darh bawk loh chuan, khawihli aṭanga ser satliah a ni: puithiam chuan a thiang tih a puang ang. “Kângmei tuar chu a kâng lai a sen vêt emaw, a sendâng emaw a nih chuan puithiamin a lo ensak ang a, a hmul a lo vâra, a vun pâwn aṭanga thûk viauva a lan chuan, a kâng hliam lai kha phâr natnaah a insiam ta a ni. Puithiamin chu mi chu a bawlhhlawh tih a puang ang. A hmul a vâr lohva, thûk tehchiam pawh niin lang lo mah se, a duk deuh chuan puithiamin ni sarih chhûng a khung hrang tûr a ni. A ni sarih niin puithiam chuan a en leh ang a, a ṭaidarh chuan phâr natna a ni: puithiam chuan chu mi chu a bawlhhlawh tih a puang ang. A ngai reng a niha, a ṭaidarh lohva, a duk bawk loh chuan phâr natna a ni lo; kang ser satliah a ni a: puithiamin chu mi chu a thiang tih a puang ang. “Mipa pawh hmeichhia pawh, an lû-ah emaw, an khabeah emaw pân a awm chuan puithiamin a en ang a, a vêl vun aṭanga thûk hlea a lana, a hmulte chu a en deuh piap chuan phâr natna a ni: chu mi chu a bawlhhlawh tih a puang ang. Pân chu thûk tehchiamin lang lo mah se, a hmul te chu a dum ṭhat lêm loh chuan ni sarih chhûng khung hran tûr a ni. A ni sarih ni-ah puithiam chuan a pân chu a en leh ang a, a ṭaidarh lohva, thûk tehchiama a lan bawk loh chuan, a pân bul vêla sam chu ziah kâwn tûr a ni, puithiam chuan ni sarih chhûng a khung hrang leh tûr a ni. Ni sarih niin puithiam chuan a pân chu a en leh ang a, a ṭaidarh lohva, thûk tehchiama a lan loh chuan, a thianghlim tih a puang ang; chu mi chuan a silhfên chu a su ang a, a thianghlim tawh ang. A thianghlim tih puan hnuah pân chu a ṭaidarh chuan puithiamin a en leh ang a, pân chu a lo ṭaidarh ngei a nih chuan chu mi chu a bawlhhlawh a ni; a hmul a eng nge eng lo tih en a ngai lo vang. Pân chu a ṭaidarh lohva, sam chu sam dum ṭha nia puithiamin a hriat chuan pân chu a dam ta tihna a ni; puithiam chuan a thianghlim ta tih a puang ang. “Mipa pawh, hmeichhia pawh, an vuna vâr a lo awm chuan, puithiamin a ensak ang a, a vâr lai chu a thîm deuh chuan thil mawi lo satliah mai chauh a ni: amah chu a thianghlim tho a ni. A tukkhum lam leh a chal lam sam tla fai sela, lukawlh satliah mai a ni a, a thianghlim tho a ni. A chal leh beksam tla fai sela, chalkawlh satliah a ni, a thianghlim tho. A kawlh laiah eng emaw sendâng deuh emaw a awm chuan phâr natna a ni. Puithiamin a lo en ang a, sendâng deuh a awm chuan, chu mi chu a lu-a phâr natna a awm avâng chuan a bawlhhlawh tih a puang ang. “Phâr natna vei chuan kawr ṭet a ha ang a, a sam a thlah ang a, a hmai chanve, a khabe lam chu a tuam ang a, “Bawlhhlawh, bawlhhlawh,” tiin a au ṭhîn tûr a ni. Chu phâr natna thak chu a neih chhûng chuan a bawlhhlawh a, mi dang bula awm ve lovin daipâwnah a awm tûr a ni. “Sahmul puanah emaw, puan zai sînah emaw, la phiarah emaw, sahmul la phiarah emaw, savunah emaw, savuna siam thil dangah emaw hmuar a kaia, hring deuh emaw, sen deuh emaw nia a lan chuan hmuar darh chi a ni a, puithiam entîr tûr a ni. Puithiam chuan a en ang a, ni sarih chhûng a dah hrang ang a, ni sarih ni chuan a en leh ang a; hmuar chu a lo darh chuan chu thil chu a bawlhhlawh a ni. Puithiam chuan a hâl tûr a ni; hmuar, meia hâl tûr chi a ni. A ena, a lo darh loh chuan a sûk faitîr ang a, ni sarih dang a dah leh ang a, a en leh ang a, hmuar chu darh lo mah se a hmuar rawng chu a danglam loh chuan a la bawlhhlawh tho a ni; a hmuar chu a pâwn lam chauhvah emaw, a chhûng lam chauhva awm emaw a nih pawhin. A han en leh a, hmuar chu a lo nêp chuan a awmna lai chu puan aṭangin emaw, savun aṭangin emaw chuan a hlep thla ang. Hmuar kha a lo lan leha, darh zêla a lan chuan puan neitu khân a hâl mai tûr a ni. A han sûka a reh mai chuan a su nawn leh ang a, a thianghlim tawh ang. La zai sîn puan emaw, sahmul puan phiarah emaw, savuna siam thil rêng rêngah emaw hmuar a kai a, a thianghlim leh thianghlim loh thliar dân tûr chu chutiang chu a ni,” a ti a. Lalpa chuan Mosia hnênah, “Phâr dam leh then fai dân tûr chu hetiang hi a ni. A thianghlim ta tih puan ni chuan puithiam hnênah a kal ang a. Puithiamin daipâwnah a hruai ang a, ngun taka a en hnuah a dam ngei a ni tih a hriat chuan sava thiang pahnih, sidar thing leh lazai senduk leh husop têl nên rawn keng tûrin a hrilh ang a. Khuhhriangin tui luang lai suak sela, chumi chungah chuan sava pakhat chu talh tûr a ni. A thisen farna tuiah chuan sava pakhat zâwk kha sidar thing te, lazai senduk te, husop têl te nên chuan a chiah ang a. Tihthianghlim tûra chu thisen chuan vawi sarih a theh ang a, a thianghlim ta tih a puang ang a, sava chu ramhnuaiah a chhuah ang. Chu mi chuan a silhfênte chu a su ang a, a lu a mêt ang a, a inbual hnuah a thianghlim mai ang a, riahhmunah a lût ve thei tawh ang; amaherawhchu, ni sarih chhûng ama bûk pâwnah a riak tûr a ni. Ni sarih hnuah a lu te, a hmuihmul te, a mitko hmul te leh a hmul dang te pawh a ziat fai ang a, a thawmhnaw a su ang a, a inbual hnu chuan a lo thianghlim tawh ang. “Ni riat ni chuan berâmno, a pa pahnih leh a nu pakhat, kum khat vêla upa, hmêlhem lo leh chhangphut kg. thum, hriak telh loh oliv hriak litar hmun thuma ṭhena hmun khat a rawn la ang a, puithiam chuan chu mi chu a thilhlante nên Inbiakna bûk kawngkaah chuan a hruai tûr a ni. Berâmno pakhat, a pa chu, oliv hriak litar hmun thuma ṭhena hmun khat nên chuan bawhchhiat man thilhlanah a hlansak ang a, Lalpa hmaah a thên ang. Berâmno chu sual thawina leh hâlral thilhlan tûr talhna hmun thianghlimah a talh ang a, hetiang bawhchhiat man thilhlan hi sual thawina thilhlan angin puithiam tân serh hran tlat a ni. Puithiam chuan berâmno thisen chu a hlântu beng ding lam tengengah te, a kut leh kezungpui ding lam hmâwrah ve ve te a tahsak ang. Puithiam chuan oliv hriak ṭhenkhat chu a kutphah vei lamah a bun ang a, a kut ding lam zungchal a hnim ang a, Lalpa hmaah hriak chu vawi sarih a theh tûr a ni. A kuta hriak leh berâmno thisen ṭhenkhat chu a chawhpawlh ang a, a beng ding lam tengengah te, a kut leh a kezungpui hmâwrahte a hnawihsak ang. A kuta hriak la awm chu tihthianghlim tûra lu-ah chuan a thih ang a, chutiang chuan inthenna chu a tihsak ang. Sual thawina thilhlan chu a hlansak ang a, chu mi chu a thian thianghlim ang. Chumi zawhah chuan hâlral thilhlan chu a talh ang a, buhbâl thilhlan nên maichâmah a hlân ang a, chutiang chuan a thian thianghlim ang a, chu mi chu a thianghlim tawh ang. “Chutiang zât nei zo lo pachhia chuan inthenna berâmno pakhat, bawhchhiat man thilhlan atân a rawn la ang a, sual thawi nân thên tûr a ni; chumi rual chuan chhangphut hriak nêna pawlh kg. khat leh oliv hriak litar hmun thuma ṭhena hmun khat a hlân tel tûr a ni. A neih theih zâwk zâwk, ṭhuro pahnih emaw, pârva pahnih emaw, pakhat chu sual thawina thilhlanah, pakhat chu hâlral thilhlanah a rawn hlân tûr a ni. A inthen ni riat ni chuan Lalpa hmaah Inbiakna bûk kawngkaah a rawn la tûr a ni. Puithiam chuan berâm leh oliv hriak chu a la ang a, Lalpa hmaah a thên tûr a ni. Berâmno chu a talh ang a, a thisen ṭhenkhat chu a beng ding lam tengengah te, a kut leh a kezungpui ding lam hmâwrah te a tahsak ang a. Puithiam chuan oliv hriak ṭhenkhat chu a kutphah vei lamah a bun ang a, a kut ding lam zungchal a chiah ang a, Lalpa hmaah vawi sarih a theh tûr a ni. Hriak ṭhenkhat chu, chu mi beng ding lam tengengah te, a kut leh a ke ding lam zungpui hmâwrah te a tât tûr a ni. A kuta hriak la awm chuan chu mi lu chu a thih tûr a ni. Chutiang chuan inthenna chu a tihsak tûr a ni. Chumi zawhah chuan ṭhuro emaw, pârva emaw pakhat chu, sual thawina atân, buhbâl thilhlan nên a hlân ang a, chutiang chuan a thian thianghlim ang. Hetiang hi phâr natna, inthenna tûr tuk zât nei zo lo tân inthen ve dân tûr chu a ni,” a ti a. Lalpa chuan Mosia leh Arona hnênah, “In neih atâna ka pêk tûr che u Kanan ram in thlen hunah, in ram neiha in in chhûnga hmuar ka kaitîr chuan, in neitu chuan puithiam a ko vang a, ‘Ka in chhûngah hmuar ni âwm tak a kai e,’ a ti ang a. Puithiam chuan in chhûnga a luh hmain a chhûnga thil awm zawng zawngte chu a bawlhhlawh tih a puan hnan loh nân a thiar chhuahtîr zet ang a, en chiang tûrin in chhûngah chuan a lût ang. Hmuar hri chu ngun takin a en ang a, a hring emaw, a sen ṭhip ṭhep emaw a awm a, bang chu mawih ṭana a hriat chuan, in chu a chhuahsan ang a, ni sarih chhûng a kalhtîr ang. Ni sarih ni chuan in chu a tlawh leh ang a, bangah a lo ṭaidarh chuan, hmuar kaina lung chu khaw pâwn bawlhhlawh paihnaah a paihtîr ang. Chumi hnu chuan in chhûng lam bang bel mâmna zawng zawng chu a ziah khawhtîr ang a, a khawk chu khaw pâwn bawlhhlawh paihnaah paih tûr a ni. Lung paih kha a thara thlâk tûr a ni, a lung bang pawh a thara zût mâm tûr a ni. Hêng hi paih a niha, zût mâmna ziah khawh vek hnua a thara thlâk a nih hnua hmuar kai leh a nih chuan, puithiam chuan a va en leh ang a, a lo ṭaidarh chuan a reh thei lo chi a ni a, in chu a bawlhhlawh a ni. Ṭhiat vek tûr a ni, lung te, thing te, a zût mâmna te chu paih tûr a ni. In chu kalh a nih chhûnga lût an awm chuan tlai thlengin an bawlhhlawh ang. Chu in chhûnga mu emaw, thil ei emaw chuan a silhfên chu a su ngei tûr a ni. “In chhûng lung chu an zût mâm thar hnu chuan puithiamin a va en leh ang a, hmuar kai chu a awm tawh lohva, a reh fel tawh chuan in chu a thianghlim tih a puang ang. Chu in thian thianghlim tûr chuan sava pahnih a man ang a, sidar thing te, la senduk te leh husop têl a inchhawp bawk ang a. Sava pakhat chu lui tui dahna khuhhriang chungah, sava pakhat zâwk chu sidar thing te, la zai senduk te leh husop têl te nên chuan khuhhrianga lui tui, sava pakhat thisen farnaah chuan a chiah ang a, in chhûng chu vawi sarih a theh ang. Sava thisen leh tui luang lai te, sidar thing te, la senduk te leh husop têl te hmang chuan in chu a thian thianghlim ang. Sava la nung zâwk chu khua aṭangin ramhnuaiah a chhuah ang a, chutiang chuan in then faina chu a ti ang a, a lo thianghlim tawh ang. “Hêng hi taksaa phâr tih dân tûr a ni. Thawmhnaw emaw, in chhûng emawa phâr hri te, Lalpa chuan Mosia leh Arona hnênah, “Israel mite chu hrilh rawh u; mipa tu pawh, an zahmawh aṭanga thil pût a awm chuan a bawlhhlawh a ni. A pût zui zêl emaw, a tâwp leh mai emaw pawh ni se, a bawlhhlawh tawh a, hetianga tih tûr a ni: Chutiang mi mutna khum leh a ṭhutna apiang chu a bawlhhlawh ve a ni. A taksa khawihtu pawhin a thawmhnaw a su ang a, a inbual tûr a ni, tlai thlengin a bawlhhlawh ang. Chu mi chuan mi bawlhhlawh ni lo chil chhâk se, a chhâka chu a bawlhhlawh ve ta a, a silhfên a su ang a, a inbual tûr a ni; tlai thlengin a bawlhhlawh ang. Chu mi chuanna sakawr zîn chu a bawlhhlawh ang a, a ṭhut hnan tawh phawt khawihtu pawh chu tlai thlengin a bawlhhlawh ang; chûng thil chawi sawntu pawh chuan a silhfên a su ang a, a inbual tûr a ni: tlai thlengin a bawlhhlawh ang. Thil pût neitu chuan kut sil zet lovin mi dang a khawih chuan, a khawiha chuan a silhfên a su ang a, a inbual tûr a ni: tlai thlengin a bawlhhlawh ang. Hlumbêl a khawih chu tihkeh tûr a ni, thing thlêng erawh chu ngun taka sil tûr a ni. “A thil pût vei chu a dam aṭangin a thianghlim leh nân ni sarih a nghâk ang a, a silhfênte a su ang a, tui luang laiah a inbual tûr a ni; tichuan, a lo thianghlim thei ang. A ni riat ni chuan ṭhuro pahnih emaw, pârva no pahnih emaw Lalpa hmaah Inbiakna bûk kawngkaah a rawn la ang a, puithiam a pe ang. Pakhat chu sual thawina thilhlanah, pakhat chu hâlral thilhlanah, a hlansak ang a; chutiang chuan a bawlhhlawhna chu a tihthianghlimsak ang. “Mipa chu a chi a tlâk ringawt chuan a inbual tûr a ni; tlai thlengin a bawlhhlawh ang. A chi tlâkna puan emaw, savun emaw a thil siam tawh phawt chu sûk ngei tûr a ni: tlai thlengin an bawlhhlawh ang. “Mipa leh hmeichhiain inpâwlna an neih zawhin an inbual fai ziah tûr a ni: tlai thlengin an bawlhhlawh ang. Hmeichhia, thi nei chu, ni sarih chhûng a bawlhhlawh ang. Amah khawih apiang tlai thlengin an bawlhhlawh ve ang. A thi neih laia a ṭhutna te, a mutna te chu a bawlhhlawh vek a ni. A mutna emaw, a ṭhutna emaw rêng rêng khawihtu chu tlai thlengin a bawlhhlawh a ni. “Hmeichhe thi nei lai pâwltu chuan a bawlhhlawhna chu a kai ve a, ni sarih chhûng a bawlhhlawh ve ang, a mutna khum pawh a bawlhhlawh ang. “Hmeichhia chu a thi neih hun pangngai ni lovah, a thi a pût emaw, a thi neih ṭhin chhûng aia rei emaw thi a neih chuan, a thî a chhuah chhûng chu a bawlhhlawh a ni. A thî â puh chhûnga a mutna leh a ṭhutna chu a bawlhhlawh a ni, a thi neih pangngai lai ang chiah khân. Hêng khawihtu chuan a silhfên a su ang a, a inbual tûr a ni: tlai thlengin a bawlhhlawh ang. A thi pût chu a tâwp hunah ni sarih chhûng a inenthla ang a, a thianghlim thei ang. A ni riat ni-ah ṭhuro pahnih emaw, pârva pahnih emaw Inbiakna bûk kawngkaah puithiam hnênah a rawn dah ang a; puithiam chuan pakhat chu sual thawina thilhlanah, pakhat chu hâlral thilhlanah a hlansak ang a, Lalpa hmaa inthen thianghlimna chu a tihsak ang. “Israel mipuite bawlhhlawh laiin an inkiltawih tûr a ni; Inbiakna bûk bul maia awm an ni a, an rawn tibawlhhlawh hlauh ang e, an thi mai ang. “Hei hi, mipa, a zahmawha thil pût nei emaw, a chi a tlâkin emaw, hmeichhia pawh a thla tin thi neih leh a bawlhhlawh laia pâwltu chungchâng tih dân tûr chu a ni.” Arona fate pahnihin Lalpa hmaa mei thiang lo hmanga rimtui an hâl avânga an thih tâk hnu khân Lalpa chuan Mosia hnênah, “I u Arona chu hrilh rawh: Thuthlung Bâwm chhîn chunga chhûma ka lo kal ṭhin avângin Hmun Thianghlim Ber pindan zâr chhûngah a lo lût mai mai tûr a ni lo; chu chu a pawisak loh chuan a thi mai ang. Hmun Thianghlim Berah chuan bâwngpatuai, sual thawina thilhlanah leh berâm hâlral thilhlan rawn hlân tûrin a lo lût thei ang. A inbual zet ang a, silhfên thianghlim a inbel tûr a ni; puan zai sîn kawr te, kekawr te a ha ang a, puan zai sîn kâwnghrên a hrêng ang a, puan zai sîn diar a khim bawk tûr a ni. Israel pungkhâwmho chuan sual thawina thilhlan tûr kêlpa pahnih leh hâlral thilhlan tûr berâm pachal pakhat an pe tûr a ni. Arona chuan bâwngpa chu amah leh a chhûngte sual thawi nân sual thawina thilhlanah a hlân ang. Inbiakna bûk luhnaah kêl pahnih chu a kai ang a, a eng zâwk nge Lalpa tân ni ang a, a eng zâwk nge Azazela tân ni ang tih hriat nân ṭhum a vâwr ang a, Lalpa thlan zâwk chu sual thawina thilhlanah a hlân ang. Azazela tâna thlan kêl chu Lalpa hnênah a nung chunga hlan phawta, mipuite sual lâk bo nân Azazela hnênah thlalêrah chhuah tûr a ni. “Arona chuan bâwngpa chu a hlân ang a, amah leh a chhûngte sual thawi nân sual thawina thilhlan a hlân tûr a ni. Meilawhin maichâma meiling chu a lâwk ang a, rimtui hâl chi ṭhûm khat nên Hmun Thianghlim Berah a rawn dah tûr a ni. Lalpa hmaah rimtui chu meiah chuan a phul ang a, rimtui khu chuan Thuthlung Bâwm chhîn chu a hliah dawn nia; tichuan, a hmu thei lo vang a, a thi mai dâwn lo nia. Bâwngpa thisen chu a kutzungchalin Thuthlung Bâwm chhîn chhak lamah chuan a theh ang a, Thuthlung Bâwm hmaah pawh vawi sarih a theh tûr a ni. Chumi hnuah chuan kêl kha mipui sual thawina thilhlanah a talh ang a, a thisen chu Hmun Thianghlim Berah chuan a rawn dah ang a, bâwngpa thisen a tih ang khân Thuthlung Bâwm hma lamah leh a chhînah a theh tûr a ni. Chutiang chuan Hmun Thianghlim Ber chu Israel mipuite bawhchhiatna leh an sualna aṭangin a thian thianghlim tûr a ni. Inbiakna bûk chu riahhmun bul maia awm a ni a, riahhmun bawlhhlawhna avângin chutia tihthianghlim chu a ṭûl a ni. “Hmun Thianghlim Ber thian fai tûra Arona a luh leh a lo chhuah leh inkârah Inbiakna bûk chhûngah tu mah an awm tûr a ni lo. Amah leh a chhûngte sual leh Israel pungkhâwmho sual thawina a tih zawh chuan pâwnah a lo chhuak ang a, maichâmah hâlral thilhlan a hlân ang a, a thian thianghlim ang. Bâwngpa thisen leh kêl thisen ṭhenkhat chu maichâm kila ki-ahte chuan a tât tûr a ni. A zungchalin thisen ṭhenkhat chu maichâmah vawi sarih a theh ang, Israel mite sualna avângin a thian thianghlim tûr a ni. Hmun Thianghlim Ber te, Inbiakna bûk chhûng zawng zawng te, maichâm te a then thianghlim hnu chuan Azazela tâna kêl kha Lalpa hmaah a hlân ang. Kêl lu-ah chuan a kut khing hnih a nghat ang a, Israel miten thil ṭha lo leh sual an tihte leh an khawlohna zawng zawng chu a puang ang a, kêl lu-ah chuan a nghat ang; a ti tûra mi ruat chuan thlalêrah kêl chu a kalpui ang a. Kêl chuan an bawhchhiatna zawng zawng chu a phur ang a, thlalêrah chuan a chhuah ang. “Chumi zawhah Arona chu Biakbûk chhûngah a lût ang a, Hmun Thianghlim Bera a luh dâwna puithiam kawr a hâkte kha a hlîp ang a, a hnutchhiah ang. Hmun Thianghlimah chuan a inbual ang a, ama thawmhnaw a inbel leh ang a, hâlral thilhlan, ama pual leh mipui pualin a hlân ang a, ama sual leh mipui sual chu a thawi dâwn a ni. Sual thawina thilhlan ran thaute chu maichâmah a hâl ang. “Thlalêra Azazela tâna kêl va thlahtu kha a lo haw hunah a thawmhnaw a su ang a, a inbual bawk tûr a ni. “Bâwngpa leh kêl, sual thawina thilhlan atâna talh, sual lâk bo nâna an thisen, Hmun Thianghlim Bera lâk luhte sa chu, a vun te, a kawchhûngte nên daipâwnah hâl vek tûr a ni. Va hâl raltu chuan a silhfên a su ang a, bûk lama a kîr hmain a inbual tûr a ni. “He dân hi zawm kumkhua tûr a ni. Thla sarihna, ni sâwm ni chuan Israel mi zawng zawng leh an zînga hnam dang awm vete chuan chaw an nghei ang a, hna rêng an thawk tûr a ni lo. Hemi ni hian a ni, an lo thianghlim theih nân an sual zawng zawng thawina thilhlan an hlan ni. “He ni hi ni serh, serh tlat tûr, chaw ngheia hna pawh thawh lohna tûr ni a ni. He dân hi kumkhuaa zawm tûr a ni. “Puithiam lalber tûra hriakthih, a pa aiawh tûra nemngheh chuan puithiam kawr thianghlim ha-in hêng thil hi a ti tûr a ni. Hmun Thianghlim Ber te, Inbiakna bûk chhûng te, maichâm te, puithiamte leh pungkhâwmho then faina hna chu a tih tûr a ni. Hêng dânte hi kumkhua a zawm tûr a ni. Israel mite sualna zawng zawng then faina hna hi kum tin vawi khat tihsak ngei tûr a ni,” a ti a. Mosia chuan Lalpa thupêk ang chuan a ti ta a. Lalpa chuan Mosia hnênah, “Arona leh a fate leh Israel mite chu hrilh rawh, hei hi Lalpa thupêk a ni. Israel miin riahhmunah pawh, daipâwnah pawh bâwngpa emaw, berâm emaw, kêl emaw a talha, Lalpa hnêna hlan tûr si Inbiakna bûk kawngka-a a talh loh chuan dân bawhchhia a ni. Thisen chhuah ang a ngaih tûr a ni a, a chipuiten an ensan tûr a ni. Ramhnuaia inthawina ran talh an chîn ṭhin te hi Lalpa hnêna hlân tûrin puithiam hnênah Inbiakna bûk kawngkaah an rawn kai ang a, Lalpa hma-a remna thilhlanah an rawn hlân tawh ṭhîn tûr a ni. Puithiam chuan a thisen chu Inbiakna bûk luhna bula maichâmah a theh ang a; a thaute chu a hâl ral tûr a ni, chu chu Lalpa duhzâwng tak a ni. Kêl hmêl pu ramhuai an be tawh tûr a ni lo; chutiang bia chu Lalpa lakah an uire a ni. He dân hi Israel miten an zâwm kumkhua tûr a ni. “Israel mi emaw, hnam dang an zînga awm emaw, tu pawhin Lalpa hnênah hâlral thilhlan pawh, thilhlan chi dang rêng rêng pawh, Inbiakna bûk kawngka bulah chauh an hlân tûr a ni; hmun danga hlan chu Pathian miten an ensan tûr a ni. “Israel chhûngkaw zînga mi emaw, an zînga hnam dang awm emaw, a thisen chawpa sa ei tawh phawt chungah Lalpa a ṭuan ang. Pathian mite zîng ata hnawh chhuah tûr a ni. Thil nung rêng rêng, an nunna chu an thisenah a awm a; chuvâng chuan, mite sual la botu tûr thisen chu maichâma leihbuak tûr, Lalpan a ti a ni. Thisen chu nunna a ni a, chu chuan sual chu a la bo va ni. Chuvângin a ni, Lalpa chuan Israel mite leh an zînga hnam dang awm vete chuan a thisen chawpin sa an ei tûr a ni lo a tih ni. “Israel miin emaw, an zînga hnam dangin emaw, sa thiang pawh, sava thiang pawh ramvahnaah man sela, a thisen chu leiah a far kangtîr ang a, vaivutin a chhilh leh tûr a ni. Thil nung tinrêng nunna chu a thisenah hian a awm si a; chuvângin Lalpa chuan Israel mite chu a thisen chawpa sa eng mah ei lo tûrin a ti a ni. Tu pawh, ei lui chu, Israel zîng ata ensan tûr a ni. Israel mi emaw, an zînga chêng hnam dang mi emaw, tu pawhin ran thisâwn sa emaw, sa seh sa emaw a ei chuan an silhfên an su ang a, an inbual ngei tûr a ni, tlai thlengin an bawlhhlawh ang; chutah an thiang chauh vang. Insu duh lo emaw, inbual duh lo emaw chuan an tuar ang,” a ti a. Lalpa chuan Mosia hnênah, “Israel mite chu in Pathian, Lalpa ka nih hi hrilh rawh. In chên tawhna Aigupta mite tih dân chîng ve suh ula, ka hruai luhna tûr che u Kanan ram mite awm dân pawh la hek suh u. Ka dânte hi in zâwm ang a, ka thupêk angin in awm zâwk tûr a ni. Lalpa in Pathian ka nih hi. Ka dânte hi zâwm ula, tih tûra ka tihte hi ti rawh u; chu chu mihring tân nunna tûr a ni; Lalpa ka nih hi. “Tu man mahni laichîn hnai pâwl tûr a ni lo, Lalpa ka nih hi. I pa timualpho tûrin i nu i pâwl tûr a ni lo, i nu a ni a, ani pawh i timualpho tûr a ni lo. I pa nupui dang tu pawh pâwlin i pa i timualpho tûr a ni lo. In khata awm ho in ni emaw, ni lo emaw i farnu, nu hrang emaw, pa hrang emaw hrin pawh i pâwl tûr a ni lo. “I fapaa fanu te, i fanu hrin i tunute pâwl suh, mahni intimualpho i ni. I pa nupui fanu chhawm pawh i pâwl tûr a ni lo, i farnu a ni tho asin. “I ni i pâwl tûr a ni lo. I nu laizâwn pawh i pâwl tûr a ni lo, inlaichîn hnai in ni. I pami nupui pawh pâwl suh, ani pawh i nu bawk a ni. I fapa nupui, i mo chu pâwl suh. I unaupa nupui pawh pâwl suh. “I hmeichhe pawl tawh fanu emaw, tunu emaw pâwl suh, thil sual a ni; i laichîn hnai an ni. I nupui dam chhûngin a laizâwn nupuiah nei suh. “Hmeichhe thi nei lai pâwl suh, a bawlhhlawh lai a ni. Mi nupui pâwl suh, mahni i intibawlhhlawh a ni. “Moleka biak nâna hâl ral tûrin i fa i pe rêng rêng tûr a ni lo, i Pathian hming i tibawrhbâng ang e, Lalpa ka nih hi. “Mipain mipa vêk a mutpui tûr a ni lo, a tenawm a ni. Mipa pawhin, hmeichhia pawhin ran an mutpui tûr a ni lo; chutiang chîng chu piangsual an ni a, intibawlhhlawh ve suh u. In hmaa ka ûm chhuah tûr hnamte kha hêng thil hian an intibawlhhlawh ṭhîn a, hêng thil hian intibawlhhlawh ve suh u. An thil chîn avangin ram chu an tibawrhbâng a, an sual avâng chuan ram chu ka hrem ang a, anniho chu ka hnawt chhuak dâwn a ni. Nangni chuan ka dânte leh ka thupêkte hi zâwm ula, in zînga tu mahin, in zînga chêng hnam dangte lam pawhin, hêng thil tenawm hi ti ve suh u. In awm hmaa hêng rama awmte hian hêng thil tenawm hi an ti ṭhîn a, ram chu an tibawlhhlawh ta a. Chumi rama awm in hmaa mite hnawh chhuaha an awm ang khân, ram chu in tihbawlhhlawh ve chuan hnawh chhuah in ni ve ngei ang. In zînga hêng thil ti ve chu ensan ngei tûr a ni. Hêng thil tenawm in hmaa mite chîn ṭhin hi ti ve lo tûrin ka ti che u a ni, intibawlhhlawh ve rêng rêng suh u, Lalpa in Pathian ka nih hi,” a ti a. Lalpa chuan Mosia hnênah, “Israel mipui pungkhâwmho chu hrilh rawh: In thianghlim tûr a ni, kei Lalpa in Pathian hi ka thianghlim si a. Mahni nu leh pa in zah ṭheuh tûr a ni, ka thupêk angin ka sabat ni in serh tûr a ni, Lalpa in Pathian ka nih hi. Milem lamah thle suh u, biak atân milem chhûn siam hek suh u, Lalpa in Pathian ka nih hi. “ Lalpa hnêna remna thilhlan in hlanin tih dân tûr ka sawi ang hian ti ula, ka lo pawm ang. A sa chu in talh ni-in emaw, a tûkah emaw ei zawh tûr a ni a; a ni thum ni thlênga la awm chu hâl tûr a ni. A ni thum nia in ei chuan, a bawlhhlawh tawh avângin in thil hlan chu ka pawm lo vâng. Chutiang ei chuan thil thianghlim an tibawrhbâng a, a mawh an phur tûr a ni, an chipuite chuan an ensan tûr a ni. “Buh in sengin vau fêm chenin seng suh u, in lâk hmaih vai tûrin kal leh hêk suh u. Grep vawi khat lawh hnu emaw, a rah tla emaw vai suh u, mi retheite leh hnam dangte tân hnutchhiah rawh u, Lalpa in Pathian ka nih hi. “Ru suh, bum suh, dâwt sawi hek suh. Ka hming chhâlin dâwt sawi suh, i Pathian hming i tihliau tûr a ni lo, Lalpa ka nih hi. “I vêngte nêkchêp suh la, an thil neih chhuhsak hek suh. I hnêna inhlawhfa hlawh chu zan khat pawh hrênsak suh. Bengngawng bechhawhchhi suh; mitdel hmaah inchhuih tlûk theihna tûr eng mah dah suh. In Pathian hi ṭih rawh u, Lalpa ka nih hi. “Dik takin i vêngte thu rêlsak ṭhîn la, mi rethei duhsak bîk lo la, mi hausa hlau chuang hek suh. Mi chungchâng, dâwt thu pudarhtu ni suh; thi mai thei dinhmuna ding chu chhan tûrin i thu hriat ang ang sawi hreh suh: Lalpa ka nih hi. Tu mah haw rilru suh, tlang taka thu sawi chhuakin in inkâr thu tifel ang che; chutichuan, thil sual i ti dâwn lo nia. Tu ma chungah phuba la suh, haw reng hek suh; i vêngte chu nangmah i inhmangaih ang bawkin hmangaih ve rawh. Lalpa ka nih hi. “Ka thupêkte hi zâwm rawh. Ran chi hrang hrang no thlah pawlhtîr tum lui suh. Lo pakhatah thlai chi hrang hrang chîng suh. Thil chi hnih kaih pawlha tah kawr ha suh. “Bawih nula chu miin hmei atân hual sela, a man la pêk loh emaw, la chhuah loh emaw a nih chuan mi dangin lo ngai mah se, bawih mai an ni a, tihhlum tûr a ni lo, hrem tûr erawh chu an ni. A mipa chuan bâwhchhiat man thilhlan, Inbiakna bûkah a rawn hlân tûr a ni. Chu mi sual thawina tûr inthenna chu puithiamin a lo hlansak ang a, Pathianin a ngaidam ang. “Kanan ram in lo thlen hunah, thei in phun rêng rêng a rah tirh aṭanga kum thum chhûng bawlhhlawha ngaih tûr a ni a, ei suh ang che u. A kum linaah theirah zawng zawng chu Lalpa in Pathian hnêna lâwmthu hrilh nân in hlân tûr a ni. A kum nganaah erawh chuan theirah chu in ei thei tawh ang; chutianga in tih chuan in thei chu a rah duh hle ang; Lalpa in Pathian ka nih hi. “Sa rêng rêng a thisen chawpin ei suh u. Mitthi thlûk te, aien te chîng suh u. Bak sam ziah kawlh te, hmuihmul meh te, inziak ṭial te, inzai kak te lusûn entîr nân chîng ve suh u. “I fanu chu Tempul nawhchizuara pein tihmingchhe suh; hnam dang pathian lam i hawi hlauh vang a, ram chu suahsualnain a khat dah ang e. Sabat ni serh la, chibai mi bûkna hmun chu zah rawh, Lalpa ka nih hi. “Ramhuaizâwl emaw, mitthi thlûk thiam emaw râwn tûrin kal suh; chutiang i tih chuan i bawlhhlawh ang. Lalpa in Pathian ka nih hi. Lu-a kêlsam ṭo tawhte hmaah din nachâng hria la, upate chu zah rawh. In Pathian ṭih rawh u, Lalpa ka nih hi. “In rama hnam dang awm ve te chu tinawmnah suh u. In Israel-puite angin en ula, mahni in inhmangaih angin hmangaih ve rawh u. Nangni pawh Aigupta ramah mikhual in nih ṭhin kha hre reng rawh u. Lalpa in Pathian ka nih hi. “Tehna dik lote, bûklung dik lote, tehkhâwng dik lote hmangin mi bum suh u. Tehna dik tak, bûklung dik tak, tehkhâwng dik tak hmang ṭhîn rawh u. Aigupta ram aṭanga hruai chhuaktu che u Lalpa, in Pathian ka nih hi. “Ka dân zawng zawng leh ka thupêkte hi zâwm rawh u, Lalpa ka nih hi” ti in. Lalpa chuan Mosia hnênah, “Israel mite hrilh rawh; Israel miin emaw, in zînga chêng ram dang miin emaw Moleka hnêna mahni fa a hlan chuan tihhlum tûr a ni, pungkhâwmho chuan lungin an dêng hlum tûr a ni. Mahni fa Moleka hnêna hlâna ka Hmun Thianghlim tibawrhbânga, ka hming thianghlim tichhetu chu ka hawisan ang a, ka ensan ang. Israel mipuiten chu thil chu an ngaihthaha, an tihhlum duh loh chuan, keimah ngei hi chu mi chungah leh a chhûngte chungah ka ṭuan ang a, Moleka bia-a ka laka rinawm lo zawng zawng chu ka mite zîngah ka telh tawh lo vang. “Ramhuaizâwl leh mitthi thlûk thiam râwntute chu ka hawisan ang a, ka mite zîngah ka telh tawh lo vang. Lalpa in Pathian ka nih avângin invawng thianghlim rawh u. Ka dânte hi zâwm ula, ti ṭhîn rawh u. Lalpa in Pathian chu ka ni, a tihrangtu che u ka ni. “Mahni nu leh pa ânchhe lawhtu chu tihhlum tûr a ni; a thisen mawh chu amahin a phur ang. “A Israel-pui nupui uiresaktu chu a hmeichhia nên tihhlum tûr an ni. Miin a pa nupui zînga pakhat pawh a lo pâwl chuan a pa a timualpho a ni a, a hmeichhia nên tihhlum tûr an ni a, an thisen mawh chu anmahniin an phur ang. Miin a mo a mutpui chuan a hmeichhia nên tihhlum tûr an ni. Laichîn hnai inngai an ni a, an thisen mawh chu anmahniin an phur ang. Mipain mipa dang a pâwl chuan thil zahthlâk tak an ti a ni, an pahnihin tihhlum tûr an ni, an thisen mawh chu anmahniin an phur ang. Miin nufa nupuia a neih kawp chuan thil zahthlâk tak an ti a ni, an pathum chuan hâl hlum tûr an ni; hetiang thil hi in zîngah ti an awm tûr a ni lo. “Miin ran a pâwl chuan ran nên chuan tihhlum tûr an ni. Hmeichhia pawh ran pâwl tuma mutpui chu ran nên chuan tihhlum tûr a ni, an thisen mawh chu anmahniin an phur ang. “Miin a farnu, nu hrang hrin emaw, pa hrang hrin emaw nupuia a neih chuan vântlâng zînga tihmualpho tûr a ni; khua ata hnawh chhuah tûr a ni. Mahni farnu a ngai a, a mawh chu a phur tûr a ni. “Miin hmeichhe thi nei lai a pâwl chuan an pahnihin ensan tûr an ni, bawlhhlawh lai chungthu-a dân an bawhchhia a ni. Miin mahni ni emaw, nute laizâwn emaw a pâwl chuan an pahnihin an sual mawh chu an phur tûr a ni. Miin a pami nupui a pâwl chuan a pami chu a timualpho va, a hmeichhia nên chuan an sual mawh chu an phur ang, fa rêng an nei lo vang. Mahni unau nupui chhuhsaktu chuan fa rêng a nei lo vang, thil bawlhhlawh tak a ti a, a unaupa a timualpho a ni. “Ka dân leh ka thupêk zawng zawngte hi zâwm ula, ti ṭhîn rawh u; tichuan, in awmna tûr ram ka hruai thlen hunah che u chuan chu ram ata chu hnawh chhuah in ni dâwn lo nia. Chûng hmuna lo awm, ka hnawh chhuahsak tûr che u te awm dân la ve suh ang che u; hêng hi tih an chîng a, ka tenzâwng tak an ni. He ram, khawizu leh hnutetuia luang ram hi, in neih atân pêk che u ka lo tiam tawh a, ka pe ngei ang che u; Lalpa, in Pathian ka ni, hnam dang zîng ata ka la hrang che u a ni. Chuvângin, rante leh savate chu a thiang leh thiang lo thliar ngun ula, ran thiang lo emaw, sava thiang lo emaw ei suh u; thiang lo ka tih in ei chuan in thiang lo ve ang. Ka ta bîk in ni a, kei Lalpa hi ka thianghlim a, nangni pawh in thianghlim tûr a ni, ka pual bîk atân hnam dang zîng ata ka thlang chhuak che u a ni. “Mipa pawh, hmeichhia pawh, ramhuai zâwl leh mitthi thlûk chîng chu lunga den hlum tûr an ni, an thisen mawh chu anmahniin an phur ang,” a ti a. Lalpa chuan Mosia hnênah, “Arona fa, puithiamte chu hrilh rawh, an zînga mite chu tu mah an chipuite ruang khawihin an intibawlhhlawh tûr a ni lo. Mahni nu emaw, pa emaw, fapa emaw, fanu emaw, unau emaw, farnu emaw pasal nei lo; in khata awmpui ruang erawh chu an khawih thei ang. Nupuia chhûngte ruang pawh khawihin an intibawlhhlawh tûr a ni lo. Puithiam tu mahin lusûn entîr nân an lu pangkhing an ziat kawlh tûr a ni lo, an hmuihmul an mêt tûr a ni lo va, an inzai kak tûr a ni hek lo. An thianghlim tûr a ni, ka hming an tihliau tûr a ni lo; hâlral thilhlan hâltu an ni a, ka hnêna ei tûr hlântu an ni bawk a, an invawng thianghlim tûr a ni. Puithiam chu an thianghlim a, nawhchizuar hnu te, mâk hnu te, tlangvâl ngai tawh te nupuiah an nei tûr a ni lo. In Pathian hnêna ei tûr hlântu, ka mite zîng ata ka tihhran an ni. Puithiam fanu nawhchizuar chuan a pa a timualpho va, hâl hlum tûr a ni. “Puithiam lalber chu hriakthih a ni a, puithiam thawmhnaw inbel tûra serh hran a ni; chuvângin, lusûn entîr nân khuih lovin a sam a thlah tûr a ni lo va, a puan a pawtthlêr tûr a ni hek lo. Mitthi ruang awmnaah a kal tûr a ni lo; a nu leh a pa ngei ruang pawh khawihin a intibawlhhlawh tûr a ni lo. Chutianga ti tûrin ka hmun thianghlim chhuahsanin a intibawlhhlawh tûr a ni lo, ka tâna serh hran tawh, hriak thih a ni, Lalpa ka nih hi. Nula thianghlim chauh nupuiah a nei tûr a ni. Pasal sûn te, mâk hnu te, tlangvâl ngai tawh te, nawhchizuarte nupuiah a nei tûr a ni lo, ama chipui zînga mi nula thianghlim a nei tûr a ni. Chutilo chu, a fate an bawlhhlawh ang e; anni pawh an thianghlim tûr a ni. Lalpa ka nih hi, kei hian ka puithiam lalber chu ka serh hrang tawh a ni.” Lalpa chuan Mosia a hrilh a; “Arona hrilh rawh; in thlah zînga mi piangsual tu mahin ei tûr thilhlan hi eng lai mahin an rawn hlân tûr a ni lo. Piansualna nei chuan thilhlan a rawn hlân tûr a ni lo; mitdel te, kebai te, hmêl tihchhiat te, ruhrel danglam bîk pu te, kut bûl te, ke bûl te, êlkûn te, tawngchham te, mit terh te, uithak vei phuhlip neite leh tilmu keh te chuan thilhlan an hlân tûr a ni lo. Puithiam Arona thlah, taksaa piansualna nei chuan hâlral thilhlan hâl tûrin emaw, ei tûr thilhlan hâl tûrin emaw a lo kal tûr a ni lo. Chutiang mi chuan Pathian tâna thilhlan thianghlim leh puithiam chanvo thil thianghlim chu a ei ve thei chauh vang. Piansualna a neih avângin Hmun Thianghlim Ber puanzâr bulah a lo kal tûr a ni lo; maichâm a rawn hnaih tûr a ni hek lo. Hêng thil thianghlim hi a tibawrhbâng tûr a ni lo, Lalpa ka nih hi, ka tihthianghlim tawh a ni si a.” a ti a. Hêng thu hi Mosia chuan Arona leh a fate chu a hrilh a, Israel mite pawh a hrilh a. Lalpa chuan Mosia hnênah, “Arona leh a fate chu hrilh rawh; Israel miten ka hmaa thil serh an rawn hlante chu urhsûn takin lo dawng sela, ka hming timualpho suh se, Lalpa ka nih hi. Israel miten ka tâna thil thianghlim an rawn hlan chu in thlah zêlte tu pawhin an bawlhhlawh laia an khawih chuan puithiama bân tûr an ni; Lalpa ka nih hi. Arona thlah, vuna phâr natna vei emaw, a zahmawh aṭanga thil pût nei emaw chuan a bawlhhlawhna a reh hma chu thilhlan thianghlim hi a khawih tûr a ni lo. Puithiamin mitthi ruang khawihtu a khawihin emaw, ama chi a tlâkin emaw a bawlhhlawh ve ta a ni. Bawkvâka kal ran bawlhhlawh emaw, mi bawlhhlawh emaw a khawih pawhin a bawlhhlawh a ni; a inbual hma chu thilhlan thianghlim a ei ve thei lo vang. Puithiam chutianga bawlhhlawh tawh phawt chu tlai thlengin a bawlhhlawh a, a inbual hma chu thilhlan serh thianghlimte chu a ei ve thei lo vang. Ni a tlâk hnu chuan a thianghlim ang a, thilhlan thianghlim chu a ei ve thei tawh ang, a chanpual tûra tih a ni si a. Ran thisâwn emaw, sa seh emaw a ei tûr a ni lo, a bawlhhlawh phah dâwn a ni, Lalpa ka nih hi. “Thil tih dân tûr ka sawite hi an zâwm vek tûr a ni, an zawm duh loh chuan a mawh an phur ang a, an thi ang; anmahni tihrangtu Lalpa ka nih hi. Puithiam chhûngte chauhvin thilhlan thianghlim hi an ei thei ang; puithiam awmpui emaw, a mi rawih emaw, mi dang tu mahin an ei ve tûr a ni lo. Puithiam bawih, ama pawisa ngeia a lei emaw, a in chhûnga piang ngei emaw te chuan an ei ve thei ang. Puithiam fanu pawh ni se, puithiam ni lo pasala a neih chuan thilhlan thianghlim hi a ei ve thei lo vang. Pasal sûn emaw, mâk emaw, fa nei lova a pa ina tlulût leh emaw chuan a ei ve thei ang; puithiam thlah chauhvin ei thian a ni. Puithiam thlah ni lovin puithiam chanvo thil thianghlim chu lo ei palh sela, a rûl vek tûr a ni, hmun ngaa ṭhena hmun khat a pêk belh tûr a ni. Puithiamte chuan thilhlan thianghlim hi an tibawrhbâng tûr a ni lo. Ei ve thiang loho an eitîr tûr a ni lo; an eitîr chuan thiam loh an chang ang a, an tuar ang. Hêng thilhlan tithianghlimtu Lalpa chu ka ni,” a ti a. Lalpa chuan Mosia hnênah, “Arona te, a fa te leh Israel mi te chu hrilh rawh: Israel mi pawhin, an zînga chêng hnam dang pawhin, thutiam hlen thilhlan emaw, mahni duh thu-a thilhlan emaw Lalpa hnêna hâl ral tûr an rawn hlan dâwn chuan, a lo pawm theih tûr chu bâwngpa emaw, berâm emaw, kêl emaw, a pa hmêlhem lo a ni. Hmêlhemna nei chu hlân mah se Lalpa chuan a pawm lo vang. “Miin thutiam hlen nâna thilhlan emaw, mahni duh thu-a thilhlan emaw remna thilhlan atân Lalpa hnêna an rawn hlan chuan an ran hlan chu hmêlhem lo a ni tûr a ni; tichuan, a lo pawm thei ang. Ran mitdel te, a kebai te, a silawng te, pânhnaila nei te, a tangseh te, a phâr te Lalpa hnênah hlân suh. Mahni duh thu-a thilhlanah chuan bâwng emaw, berâm emaw, fere deuh pawh hlan theih a ni; thutiam hlen nâna thilhlanah erawh chuan pawm a ni lo vang. Ran til lâk te, sawhkeh te, tihthlêr palh te, hleh te emaw chu Lalpa hnênah hlan tûr a ni lo. In ram chhûngah hei hi tih khap a ni. Hnam dang ran chu ei tûr thilhlanah hlan loh tûr a ni; chutiang hlan chu hmêlhemna neia chhiar tûr a ni, pawm theih a ni lo vang.” Lalpa chuan Mosia hnênah, “Berâm emaw, bâwng emaw, kêl emaw, a pa chu a pui bulah ni sarih a awm ang a, a ni riat ni aṭang chuan hâl ral atân hman theih a ni tawh ang. Bâwng pui leh a notê, berâm pui leh a notê, kêl pui leh a notê; ni thuhmunah thilhlana hlan tûr a ni lo. Lâwmthu sawina thilhlan i hlanin dân ang takin engkim ti rawh, pawm theih a ni ang, ei zo vek ula, a tûk atân ei bâng suh u. “Ka thupêkte hi zâwm ula, ti rawh u, Lalpa ka nih hi. Ka hming hi in tibawrhbâng tûr a ni lo, Israel mite chuan ka thianghlim tih an hre tûr a ni; Lalpa, a tihrangtu che u ka ni. In Pathian ni tûrin Aigupta ram aṭangin ka hruai chhuak che u a ni, Lalpa chu ka ni,” a ti a. Lalpa chuan Mosia hnênah, “Israel mite chu hrilh rawh: Lalpa chawimawina kût atâna hun ruatah awmni khamin in hmang ho ṭhîn tûr a ni. Chûng chu hêngte hi a ni: Ni ruk chhûng hna in thawk ang a, a ni sarih ni chu sabat a ni a, chawlh dêr tûr a ni. Hna thawk lovin Pathian chibai bûkin in inkhâwm tûr a ni. Sabat ni hi Lalpa pual a ni, in awmna apiangah in serh tûr a ni. Lalpa tâna kût ruatte chu hêng hi a ni, a hun ruatah in hmang ṭhîn tûr a ni. “Thla hmasa ber ni sâwm leh pali ni tlai lam hi Lalpa Kalhlên kût a ni. Chumi thla vêk ni sâwm leh panga ni chu chhang dawidim telh loh kût inṭan ni a ni, ni sarih chhûng dawidim telh loh chhang in ei tûr a ni. A ni khat ni chuan inkhâwmpui in nei ang a, hna pangngai eng mah in thawk tûr a ni lo. Ni sarih chhûng chu ni tin Lalpa hnênah ei tûr thilhlan in hlân tûr a ni. Ni sarih ni chuan inkhâwmpui in nei leh ang a, hna pângngai eng mah in thawk tûr a ni lo,” a ti a. Lalpa chuan Mosia hnênah, “Israel mite chu hrilh rawh: ka pêk tûr che u ram in thlen hun chuan puithiam hnênah in buh thar hmasa phal chu in rawn dah tûr a ni. Ani chuan Lalpa hmaah a thên ang a, a lo pâwm dâwn che u nia. Sabat ni a nih chuan a tûkah puithiam chuan a thên ṭhîn tûr a ni. Buhphal thên ni chuan berâmno, a pa, hmêlhem lo, kum khat vêla upa, hâlral thilhlanah in hlân tûr a ni. Chumi rual chuan buhbâl thilhlanah chhangphut ṭha chi kg. hnih, oliv hriak pawlh in hlân tel tûr a ni; chu chu Lalpa lâwmzâwng tak chu a ni; uain litar khat pawh in tûr thilhlanah in hlân tel bawk tûr a ni. In buh thar, puithiamho hnêna in rawn hlan hma chu in ei tûr a ni lo. In thlahte pawhin he dân hi an zâwm kumkhua tûr a ni. “Buhphal, Lalpa hmaa in thên ni, sabat zawh aṭanga chhiar ṭanin hapta sarih a ral ang a, sabat vawi sarih zawh tûk, ni sawmnga ni chuan buhbâl thilhlanah in thlai thar chu in hlân tûr a ni. Chhûng tinin mahni hmun ṭheuhvah dawidim telh chhang in ur tûr a ni. Lalpa hmaa thên tûr tlang hnih in rawn keng tûr a ni, chhang tlang khat chu kg. hniha rit, chhangphut thar ṭha chi-a in siam hmasak ber a ni tûr a ni. Chumi rual chuan kum khat vêla upa berâmno pasarih, bâwngpa pakhat, berâmchal pahnih, hmêlhem lo vek, vântlângin Lalpa tân an thawh ang a, an buhbâl thilhlan nên, in tûr thilhlan nên, hâlral thilhlanah an hlân tûr a ni; chu chu Lalpa lâwmzâwng tak chu a ni. Sual thawina thilhlanah kêl pakhat in hlân ang a, remna thilhlanah berâmno pahnih, kum khat vêla upa ve ve, in hlân bawk tûr a ni. Puithiamin chhang leh berâmno pahnih chu Lalpa hmaah a thên ang a, puithiam chan tûr chu serh hran a ni ang. Chumi ni chuan tu man in hna pangngai in thawk tûr a ni lo, Pathian chibai bûk tûrin in inkhâwm tûr a ni. He dân hi in thlahte pawhin an awmna apiangah an zâwm kumkhua tûr a ni. Buh in sengin vau fêma mi hlep zo vek suh u, lâk hmaih in neih pawh vai leh suh u. Mi retheite leh hnam dangte tân dah rawh u, Lalpa in Pathian chu ka ni.” Lalpa chuan Mosia hnênah, “Israel mite chu hrilh rawh; thla sarihna, ni khat ni chuan awmni kham ula, tawtawrâwt hâm ula, inkhâwmpui nei ang che u. Lalpa hnênah buhbâl thilhlan in hlân tûr a ni, in hna pangngai tu man in thawk tûr a ni lo.” Lalpa chuan Mosia hnênah, “Thla sarihna, ni sâwm ni hi kum tina hnam pum sual thawina ni ropui a ni a, chaw ngheiin in inkhâwm tûr a ni. Lalpa hnênah hâlral thilhlan in hlân tûr a ni. Hemi ni hian hna thawh loh tûr a ni, in sual thawina hlan ni a ni si a. Hemi nia thil eng emaw lo ei chu a chipuite zîng ata hnawh chhuah tûr a ni. Hemi nia hna thawk chu Lalpa ngei chuan a tihlum ang. He dân hi in awmna apiangah in thlahte pawhin an zâwm kumkhua tûr a ni. Ni kaw tlai, ni tlâk aṭanga ni sâwm tlai ni tlâk thlengin chawlh ni-ah in hmang tûr a ni,” a ti a. Lalpa chuan Mosia hnênah, “Thla sarihna, ni sâwm leh panga ni aṭangin ni sarih chhûng Bâwkte kût in hmang tûr a ni. A ni hmasa ber ni chuan khâwmpui urhsûn in nei ang a, in hna pângngai in thawk tûr a ni lo. Ni sarih chhûng chu ni tin buhbâl thilhlan in hlân ṭhîn ang a, a ni sarih ni chuan khâwmpui in nei leh ang a, buhbâl thilhlan pawh in hlân tûr a ni, Pathian chibai bûk ni a ni, hna in thawk tûr a ni lo. Hêngte hi Lalpa chawimawi nâna kût in hman tûrte chu a ni, khâwmpui in nei ang a, ei tûr thilhlan te, hâlral thilhlan te, buhbâl thilhlan te leh inthawina chi dang leh in tûr thilhlan te, a hunbi tak a in hlan tûr chu a ni. Hêng kût hi sabat serh bâka serh tûr a ni; tin, hêng thilhlante hi Lalpa hmaa in thil hlan ṭhin thutiam hlen thilhlan te, mahni duh thu-a thilhlan te bâka tih tûr a ni. “Buh in seng zawhah, thla sarihna ni sâwm leh panga ni aṭangin kût hi ni sarih chhûng in hmang tûr a ni. A ni hmasa ber chu chawlh dêrna ni a ni ang. Chumi ni chuan in thlairah ṭha ber te han la ula, tûmkau te leh thingbuk ṭha chhâwl te sât ula, Lalpa hmaah hlim takin awm ang che u. Chutiang chuan ni sarih chhûng ti ang che u. He dân hi in thlahte pawhin kumkhuain an zâwm tûr a ni. Israel mi zawng zawng chu hemi ni sarih chhûng hian chhâwlbûkah an awm tûr a ni. Israel mite Aigupta ram aṭanga Lalpa chuan a hruai chhuah khân bâwkte chhe tê tê-ah a awmtîr ṭhîn tih in fate pawhin an hre dâwn nia, Lalpa, in Pathian ka nih hi.” Chutiang tak chuan Mosian Israel mite chu Lalpa chawimawina kût hmang tûrin dân a siamsak a ni. Lalpa chuan Mosia hnênah, “Israel mite chuan oliv hriak thlitfîm khâwnvâr tui atân rawn dah sela, a hun takah chhit ziah tûr a ni. Inbiakna bûk chhûnga Hmun Thianghlim Ber, thuthlung dahna, puanzâr pindan pâwnah tlai tin Arona chuan a chhî ang a, a tûk khawvâr thlengin a chhi reng tûr a ni. He thil hi tih kumkhua tûr a ni. Rangkachak hlîr hlaka siam khâwnvâr dahna-a khâwnvârte chu Arona chuan a chei ang a, Lalpa hmaah chuan a hun takah a chhi ziah tûr a ni. “Chhangphut ṭha chiin chhang tlang sâwm leh pahnih, kg. khat zêla rit siam ang che. Rangkachak hlîr hlaka luan dawhkânah chuan tlar hnih, paruk zêlin dah ang che. Beraw hlîr hlak, eng emaw zât chhang dah tlarah chuan dah ve ve ang che, chu chuan chhang chu Lalpa hnêna ei tûr thilhlan a nih a entîr ang. Sabat ni apiangin Lalpa hmaah chhang thar dah ziah tûr a ni. Hei hi Israel-te tân kumkhua-a tihmâkmawh a ni. Chhang chu Arona leh a thlahte ei tûr, an chanpual a ni, hmun thianghlimah chuan an ei ṭhîn tûr a ni, Lalpa hnêna thilhlan, puithiamte tâna serh hran tlat chu a ni.” Aigupta mi laka Israel nu pakhat fapa leh Israel mi an insual a. Chu hmeichhia chu Selomiti fanu a ni, Dan hnam Dibria tunu a ni. Israel nu fapa chuan Lalpa hming a sawichhia a, ânchhia a lawh bawk a. Mosia hnênah an rawn hruai a. Engtia tih tûr nge tih Lalpa an râwn a, a rawn chhân hma chu an vêng tlat a. Lalpa chuan Mosia hnênah, “Kha mi kha daipâwnah hruai la, Pathian ânchhia a lawh lai hretute khân a lu chungah an kut nghat sela, mipuiin lungin dêng hlum rawh se. Israel mite chu hrilh rawh: Pathian ânchhelawhtu chuan a tuar ngei tûr a ni. Pathian pawi sawi chu tihhlum tûr a ni; Israel pungkhâwmho zawng zawng chuan lungin an dêng hlum tûr a ni; Israel mi pawh, an zînga hnam dang chêng ve pawh, Pathian pawi sawi chu tihhlum tûr a ni. “Tual that chu tihhlum ve tûr a ni. Mi dang ran talhsaktu chuan a rûl tûr a ni, nun aiah nun. Mi dang tihmêlhemtu chu a tih ang chiahin a chungah tih ve tûr a ni. Ruh pakhat a tihtliah chuan a ruh pakhat tihtliah ve tûr a ni: Mit aiah mit, hâ aiah hâ, tihhmêlhem aiah tihhmêlhem ve, ran talh rutu chuan a rûl ang a, mihring thattu chu thah ve tûr a ni. He dân hi Israel mi zawng zawng tân a ni: in zînga chêng hnam dangte pawh a huam ang, Lalpa, in Pathian ka nih hi,” a ti a. Hêng thu hi mite a hrilh hnu chuan Pathian ânchhelawhtu kha riahhmun ata an hruai chhuak a, an dêng hlum ta a. Mosia hnêna Lalpa thupêk ang chuan Israel mite chuan an ti ta a. Sinai tlângah Lalpa chuan Mosia hnênah, “Israel mite chu hrilh rawh: ka pêk tûr che u ram in thlen hun chuan Lalpa chawimawi nân a kum sarihna zêlah ram chu chawlhtîr ang che u. Kum ruk chhûng thlai in chîng ang a, in grep te in sât ang a, a rah in seng ang. A kum sarih kum erawh chuan Lalpa chawimawi nân chawlhtîr tûr a ni, in lovah te thlai chîng suh u, in grep sât no hek suh u. In buh hli pawh hlep suh u. In grep sah no loh rahte pawh lo suh ang che u, ram tân chawlh dêr kum a ni. Ram chu chawlhtîr mah ula in bawih tân te, hlawhfa in chhawr tân te, hnam dang in awmpui tân te leh in tân te ei tûr chu a awm tho vang. In ran vulh te, in rama ramsate tân pawh ei tûr a awm tho vang. “Kum sarih vawi sarih, kum sawmli leh pakaw ral hnu kum, thla sarihna ni sâwm ni, sual thawina ni ropuiah chuan mi tîr ula, ram pum puiah tawtawrâwt hâm rawh se. Kum sawmngana chu in lâwm ang a, ram chhûnga awm zawng zawng tân zalênna thu in puang tûr a ni: in tân Jubili kum a ni ang. In leh lo hralh tawh zawng zawng chu a neitu bul hnênah emaw, a thlahte hnênah emaw pêk kîr leh tûr a ni, bawiha hralh pawh an chhuak vek tûr a ni, mahni in leh lovah an kîr leh ang. Chumi kum chuan eng mah in chîng tûr a ni lo, a hli in seng tûr a ni lo va, in grep sah no loh rah pawh in lo tûr a ni lo. Kum tluanin chu kum chu in tân kum serh a ni ang a, in lova hâwng kha in ei tûr a ni lo. He Jubili kum hian mahni ram ṭheuh in nei kîr leh tûr a ni. Chuvângin, ram in hralhin emaw, in leiin emaw, i chipui Israel mi chu âwm lo takin i ti tûr a ni lo. Jubili kum a thlen hmaa rama thlai haw thei zât tûr hisâpin a ram man chu chhût tûr a ni. Kum a la tam chuan a man a sâng ang a, kum tlêm tê chauh la awm a nih leh a man a tlêm tûr a ni; ram kha hralh tak tak a ni lo va, thlai thar thei chauh kha hralh tûr a ni. In Israel-puite bum suh u, Pathian ṭih rawh u, Lalpa in Pathian ka nih hi. “ Lalpa dân hi zâwm ula, a thupêkte hi awih ula, ramah chuan mangang lovin in awm dâwn nia. Ramah thlai a haw ṭha ang a, in duh tâwk tâwk ei tûr in nei ang a, thlamuang takin in awm thei ang. ‘A kum sarih kum chuan eng mah kan chin lohva, kan seng bawk si loh chuan eng nge kan ei tâk ang?’ in ti a ni thei a. A kum ruknaah ram chu mal ka sâwm ang a, kum hnih ei tûr a haw ang. Kum riatna a in thlai chîn rah in seng hma chu kum rukna a haw kha in tla tâwk tûr a awm dâwn a ni. In ram chu in hralh hlen thei lo, ram chu ka ta a ni; nangni hi mikhual mai in ni. Ram chu in hralh a nih pawhin a neitu bul khân a lei kîr leh thei ngei tûr a ni. Israel mi chu a lo retheih hle a, a ram hralh hial a ṭûl a nih pawhin a laichîn hnaiin a tlan tûr a ni. Tlansaktu laichîn hnai nei lo chu, amah a lo hmuingîl leh thei a, amah ngeiin a lei kîr leh thei tûr a ni. Chutiang thilah chuan Jubili kum thlen hmaa thlai thar thei zât man hisâpin lei kîr theih tûr a ni, Jubili kum chuan a nei kîr leh tho dâwn si a. Ram lei kîrna tûr pawisa a neih zawh loh chuan a leitu khân Jubili kum thlengin a nei ang a, Jubili kum chuan a neitu bul chu a pe kîr leh tûr a ni. “Kulh nei khawpuia in neiin a in chu a hralh chuan a hralh aṭanga kum khat chhûng chuan a tlan leh thei ang. Kum khat chhûnga a lei kîr leh theih loh chuan lei kîr leh theih a ni tawh lo ang a, leitu khân a thlahte thlengin a in chu a nei thei tawh ang; Jubili kumah pawh pêk kîr tûr a ni lo. Khua kulh nei lo, thingtlâng khuaa in chu ram inlei anga ngaih tûr a ni, a neitu bul chuan a lei kîr leh thei ang a, Jubili kumah pêk kîr leh tho tûr a ni. Levia chite erawh chuan an awmna tûr ruat khuaa an thil neih chu eng lai pawhin an lei kîr leh thei ang. Hêng khuaa awm Levia chiten in an hralh chu lei kîr leh thei lo mah se, Jubili kum chuan pêk kîr leh tûr a ni; Levia chiten an awmna tûr ruat khuaa an in neih chu Israel-te zînga an kumkhaw thil neih ngheh ve chu a nih avângin. Levia chite khaw bula ran tlatna hmun chu eng lai mahin hralh tûr a ni lo: thil neih ngheh an neih ve chhun a ni. “In unau Israel, i bula awm chu, a lo retheih viauva, mahni pawh a inchâwm theih loh chuan inhlawhfa angin emaw, mikhual angin emaw i enkawl tûr a ni; tichuan, i bulah a awm ve reng thei dâwn nia. A hnên aṭangin a pung ûm suh, Pathian ṭih la, i unaupa chu amahin a khawsa ve thei dâwn nia. Pawisa i pûktîr pawhin a pung neihtîr suh la, i buh a leiin eng mah hlêp suh. Kanan ram hi ka pe che u a, in Pathian ni tûrin Aigupta ram aṭanga hruai chhuaktu che u Lalpa in Pathian ka nih hi. I chipui Israel chu a lo retheih êm avângin i bawihah rawn inhralh mah se, bawih angin i chhawr tûr a ni lo. Inhlawhfa leh mikhual angin i enkawl ang a, Jubili kumah i chhuah leh tûr a ni. Chumi hnuah chuan a fate nên an chhuahsan ang chia, an chhûngte hnênah an awm leh tawh ang a, an in leh lo chu an luah leh ang. Israel mite hi ka bawih an ni, Aigupta ram aṭangin ka lei chhuak a, bawihah hralh tûr an ni lo. Dim lo baksakin an chungah in che tûr a ni lo, Pathian chu ṭih rawh u. Mipa emaw, hmeichhia emaw bawih in mamawh chuan in vêla hnam zînga mi lei ang che u. In zînga awm hnam dang fate chu in lei thei ang; chutiang mi fa, in ina piangte chu in ta an ni zêl ang. In faten an rochung thei ang, an nei ang a, an dam chhûng chu an bawih an ni ang. Amaherawhchu, in chipui Israel chu in tinawmnah tûr a ni lo. “In zînga chêng hnam dang chu lo hausa ta hle sela, in chipui Israel mi ve thung chu a rethei hle a; chu hnam dang mi hnênah emaw, ama chipui hnênah emaw bawihah a inhralh a; inhralh tawh pawh ni se, lei kîr leh theih a ni, ama unau zînga pakhatin emaw, a pamiin emaw, a pami fapain emaw, a laichîn hnai mi dangin emaw a lei kîr thei ang. Amah leitu nên an inbia ang a, a inhralh kum aṭanga Jubili kum thlengin inhlawhfa pangngaiin eng zât nge a hlawh hman ang tih hisâpin a intlanna tûr man chu tuk a ni ang. Inhlawhfa, kum khat atâna rawih ang zêlin an inchhawr tûr a ni. A pu chuan a tinawmnah tûr a ni lo. Engti kawng maha lei chhuah a nih loh pawhin Jubili kum chuan chhuah ngei tûr a ni, a fate nên. Israel mi rêng rêng, tu ma bawihah an tâng kumkhua tûr a ni lo; Israel mite chu Lalpa bawih, Aigupta ram aṭanga a lei chhuahte an ni si a; Lalpa, an Pathian chu ka ni. “Eng mah ni hlei lo, milem chher te, lung milem te, chibai bûk atân in insiam chawp tûr a ni lo, Lalpa, in Pathian ka nih hi. Chawlh tûr ka tih nite serh ula, chibai mi bûkna hmun chu zah rawh u, Lalpa ka nih hi. Ka dânte hi in zawma, ka thupêkte in awih chuan a hun takah ruah ka sûrtîr ang a, in lo a hlâwk ang a, in theite pawh a rah duh êm êm ang. Grep rah lawh hun thlengin buh seng a ṭûl ang a, buh tuh hun thlengin in grep rah lawh a ṭûl bawk ang. Duh tâwk tâwka ei tûr in nei ang a, in ramah chuan thlamuang takin in chêng ang. In ramah remna ka lêntîr ang a, hlauh nei lovin in mu siai siai ang a, ram sakawlhte in ram ata ka tirêm ang a, hmêlmain an rawn rûn hek lo vang che u. In hmêlmate chu in ûm ang a, khandaihin in that ang. Mi pangain mi za in hneh ang a, mi za chuan mi sîng in hneh thei ang. Mal ka sâwm ang che u a, fanaute ka pe ṭeuh ang che u; ka thuthlung angin keiin ka tih tûr ka tihsak zêl ang che u. Buh hlui in ei sên loh chu a thar dah nân paih a ngai ang a. In zîngah ka chêng a, ka thlahthlam tawh lo vang che u. Ka awmpui ang che u a, in Pathian ka ni ang a, ka mite in ni ang. Kei Lalpa, in Pathian hian, bawih ni tawh lo tûrin Aigupta ram ata ka hruai chhuak che u a, in nghâwngkawlte chu ka tihtliahsak che u a, thawveng takin in lêng thei ta a ni. “Ka thu in ngaihthlâk duh lohva, ka thupêkte in awih duh lohva, ka dânte in hnâwla, awm dân tûr ka tih hmusita tih tûr ka tihte in tih duh lohva ka thuthlung in bawhchhiat chuan, in chungah chhiatna ka rawn thlen ang, ngawr leh khawsikpuiin in na ang a, in mitte pawh a tichhia ang a, in dam khawchhuak thei lo vang. Thlai chite pawh chîng mah ula in chîng thlâwn mai mai a ni ang; in hmêlmate ei tûr lek a ni ang. Ka hawisan ang che u a, nangmahni hawtute chu in chunga rorêltute an ni ang a, ûm loh pawhin in tlânchhe dâwr dâwr ang. Chutiang pawha ka thu in la ngaihthlâk duh loh fo chuan, a lêt sarihin ka hrem ang che u. In chhuan êm êm, in chakna chu, ka tihchhiatsak ang che u; in tân vân chu thîr anga ruah pai lovin ka siam ang a, in lote pawh dâr angin a châr ang. In thawk hah thlâwn dâwn a ni, in lovah seng tûr a awm lo vang, in thei kûngte lah a rah hek lo vang. Mi do zâwnga in awma, ka thu in la pawisak duh loh fo chuan in sual phû tâwk lêt sarihin ka hrem ang che u. Ramsa nghal tak tak ka rawn tîr ang a, in fate leh in rante an rawn seh ang, kawngṭum zawh bel tham pawh in awm lo vang. “Hêng hremna in tawh hnu pawha ka lam hawi lova min la do fo chuan, in chungah ka ṭuan ang a, a leh sariha nain ka hrem leh ang che u. In zîngah hmêlma ka rawn tîr ang a, thuthlung in bawhchhiatna phuba an rawn la ang. In khawpui kulh chhûngahte in bîk pawhin hri ka lentîr ang a, hmêlmate chuan an rawn la tho vang. In ei tûr lâkna ka tiping ang a, thuk sâwm hmanga eirawng bâwl ṭhîn nuho khân thuk khat chauh hmangin eirawng an bâwl tawh ang. An sem ker ker ang a, an chan ai an ei zawh hnuah pawh an ril a la ṭâm tho vang. Chutichung pawha ka thu in ngaihthlâk duh lohva, min la do luih zêl chuan, thinurin in chungah ka ṭuan ang a, a lêt sariha nâin ka hrem ang che u. In fapate leh in fanute sa in ei hial ang. In pathian biakna hmunsângte chu ka tichhia ang a, in rimtui hâlna maichâmte chu ka ṭhiat ang a, in milemte chu ka titlu ang a, an chungah in ruang chu ten takin ka paih ang. In khawpuite chu ka tiram ang a, in pathian biakna te chu ka tichhia ang a, in inthawinate chu ka lo pawmsak lo vang che u. In ram chu ka tichereu vek ang a, a luahtu in hmêlmate chuan mak an ti êm êm ang. Indona a lo thleng ang a, hnam dang ramah an hruai darh ang che u, in khawpuite chu a chim rem rum ang. In hmêlmate rama in awm chhûngin in ram chu a châwl dêr dâwn a ni. In awm chhûngin in ram chu in chawlhtîr duh lo va, in awm loh chhûng chu a châwl dâwn ta a ni. In hmêlmate rama la awmte chu an ṭi êm êm ang a, hnahthel lêng maiah pawh an tlânchhia ang a, khandaiha ûm ang hialin tu ma ûm loh pawhin an tlu ang. Khandaiha ûm ang maiin an inpaltlu rem rum ang a, hmêlma lo do lêt tûr tu mah in awm lo vang. Mi ramah in thi ang a, chûngah chuan an phûm ang che u. In hmêlmate rama la dam chhunte chu in sualna avâng leh in pate sualna avângin an zuih ral ang. “Chûng mite chuan an pate nên mi do va, mi hawisanin thil an tisual a ni tih an inhre chhuak ang a, anmahni avângin ka hawisan a, an hmêlmate ramah ka hnawt chhuak a ni tih an hria ang a; tichuan, an inphahhniam ang a, an suahsual man an tlâk hnu chuan, Jakoba te, Isaka te leh Abrahama te hnêna ka thutiam kha ka hre reng ang a, ka mite chu he ram hi ka pêk tûr thu ka hrilh thar leh ang. Amaherawhchu, ram chu a chawlh dêr theih nân ram ata mite chu lâk chhuah zet tûr a ni. Ka dânte leh ka thupêkte hnâwla an thil sual tih man chu an tuar zet tûr a ni. Chuti tak chuan hrem mah ila an hmêlmate rama an awm chu ka hlamchhiah dêr lo vang a, ka tiral vek hek lo vang. An thlahtute nêna ka thuthlung chu ka tithar leh ang. Aigupta ram aṭang khân hnam tin hmuhah ka mite chu, kei Lalpa hi an Pathian ka nih theihna tûra Aigupta ram ata hnam tin mit hmuha ka mite hruai chhuaktu ka nih hi. Kei hi Lalpa chu ka nih hi.” Hêng hi Sinai tlânga Mosia hnêna Lalpa dân leh a thupêk, Israel mite tâna a pêk chu a ni. Lalpa chuan Mosia hnênah, “Israel mite chu hrilh rawh: Miin Lalpa hnêna pêkah mihring pêk tiam sela, chu mihring tlanna man chu hetianga hisâp tûr a ni: Mipa, kum sawmhnih chin, kum sawmruk thlengin, tangkarua sekel sawmnga bûk a ni ang. Hmeichhe puitling tawh chu tangkarua sekel sawmthum bûk a ni ang. Mipa naupang, kum nga chin kum sawmhnih thlengin tangkarua sekel sawmhnih bûk a ni ang, hmeichhia a nih chuan tangkarua sekel sâwm bûk a ni ang. Nausên thla khat chin kum nga thlengin mipa chu tangkarua sekel nga bûk a ni ang a; hmeichhia chu tangkarua sekel thum bûk a ni ang. Kum sawmruk chung lam mipa chu tangkarua sekel sâwm leh panga bûk a ni ang a, hmeichhia chu tangkarua sekel sâwm bûk a ni ang. “A petu chu a retheih êm avângin a tlan chhuahna man tuk zât khi a pêk theih loh chuan pêk a tiam mihring kha puithiam hnênah a rawn hruai ang a, puithiam chuan bituk aia tlêm deuh, a pêk theih tâwk âwm, a lo tuk ang. “ Lalpa hnêna thilhlana hman tlâk miin ran pêk a lo tiam chuan Lalpa hnêna pêk chu serh hran tlat a ni tawh. A petu chuan a pêk thlâkna tûr emaw, a aiah thil dang emaw a pe thei tawh lo vang; chutianga tih a tum chuan a pahnihin Lalpa ta tûr a ni ang. “Ran, ei thiang lo, Lalpa hnêna thilhlan atâna hman tlâk loh pe a nih chuan puithiam hnênah a rawn kai ang a, Puithiam chuan a man âwm zât bi a lo tuk ang a, chumi zât chu a manah chhiar tûr a ni. A petu chuan tlan a duh chuan a man tuk zât leh chumi hmun ngaa ṭhena hmun khat belhin a tlan thei ang. “Miin ama in Lalpa hnêna pêk tiam sela, puithiamin a in chu a ṭhat leh ṭhat loh athuin a man a tuk ang a; a tuk zât chu in man atân chhiar a ni ang. A in chu tlan a duh chuan a man tuk zât chu a pe ang a, hmun ngaa ṭhena hmun khat a pêk belh bawk tûr a ni. “Miin ama ram ṭhenkhat Lalpa tân pêk a tiam chuan thlai haw thei zât aṭangin a man chu tuk a ni ang; barli ṭin sawmli hâwnna chu tangkarua sekel sâwm bûk mana chhiar a ni ang. Jubili kum zawh chiaha pe a nih chuan a man puitling chhiar tûr a ni. Kum danga pêk a nih chuan puithiamin Jubili thlengin eng zât nge ramah haw thei tih a chhût ang a, chu ang chuan a man chhiar a ni ang. A neituin ram chu a tlan duh chuan a man chhiar zât chu a pe ang a, hmun ngaa ṭhena hmun khat a pêk belh bawk tûr a ni. A lo chu amahin a tlan duh loh emaw, mi dang leitîr emaw a nih chuan tlan theih a ni tawh lo vang. Jubili kumah chu ram chu Lalpa tân serh hran a ni ang a, pêk a nih avângin puithiam ta tûr a ni tawh ang. “A ram lei, a rochan ram ni lo a pêk chuan, puithiamin Jubili thlengin a man a chhût ang a, chumi ni ngei chuan a zât chu a pe ang a, a pawisa chu Lalpa ta a ni. Jubili kum chuan a neitu bul hnênah emaw, a thlahte hnênah emaw pêk kîr leh tûr a ni. Hêng thil man chhût hi Tempul bûklung hman lai anga chhût tûr a ni. Sekel khat chu Gera sawmhnih tluk a ni. “Ran piang hmasa ber chu Lalpa ta a ni sa a, mahni duh thu-a thilhlanah emaw pêk tûr a ni lo: bâwngno pawh, kêlno pawh Lalpa ta sa a ni. Ran ei thiang lo no hmasa ber erawh chu a man tuk zât leh hmun ngaa ṭhena hmun khat belhin tlan leh theih a ni; a petuin a tlan duh loh chuan mi dang hnênah a man bituk ang chuan hralh tûr a ni. “ Lalpa tân liau liauva miin a neih ang ang, mihring emaw, ran emaw, a rochun ram emaw a serh hran tawh chu hralh theih a ni lo va, tlan theih a ni hek lo, Lalpa ta a ni kumkhua tawh ang. “Mihring pawh ni se, chutianga pêk tawh chu tlan chhuah theih a ni tawh lo, tihhlum mai tûr a ni. “Ram chhûnga thil thar chhuah rêng rêng, buh pawh, thei pawh, sâwma pakhat chu Lalpa ta a ni. Miin chu chu a tlan duh chuan a man pangngai bâkah hmun ngaa ṭhena hmun khat pêk belhin a tlan thei ang. Ran vulh rêng rêng sâwma pakhat chu Lalpa ta a ni. Ran neitu chuan a chhe deuh apiang a sâwmnaah a dah tûr a ni lo, a ṭha deuh chu a chhe deuhvin thlâk tûr a ni hek lo, thlâk a tum chuan Lalpa ta ve ve a ni ang a, tlan pawh a tlan thei lo vang,” a ti a. Hêng thupêkte hi Sinai tlângah Mosia hnêna Israel-te tân Lalpa pêk a ni. Israel-ten Aigupta ram an chhuahsan aṭanga kum hnihna, thla hnihna, ni khat niin thlalêra Inbiakna bûkah chuan Lalpan Mosia hnênah, “Arona nên Israel mipui hi a chi leh a chhûngkuaa thliarin mipa zawng zawng chhiar ula. Mipa, râlkai chin, kum sawmhnih chung lam chu upat dân indawtin an hming ziak vek rawh u. Hnam tina chhûngkaw hotu pakhat zêlin an pui tûr che u a ni. Hêng mite hi a puitu tûr che u chu an ni: “Reuben hnama mi Sedeura fapa Elizura te, Simeona hnama mi Zurisadaia fapa Selumiela te, Juda hnama mi Aminadaba fapa Nasona te, Isakara hnama mi Zuara fapa Nathanela te, Zebulun hnama mi Helona fapa Eliaba te, Josefa thlah Efraim hnama mi Amihuda fapa Elisama te, Manasea hnama mi Pedazura fapa Gamaliela te, Benjamin hnama mi Gideonia fapa Abidana te, Dan hnama mi Amisadaia fapa Ahiezera te, Aser hnama mi Okrana fapa Pagiela te, Gad hnama mi Deuela fapa Eliasafa te, Naftali hnama mi Enana fapa Ahira te hi.” Hêng mite hi mipui zîng aṭanga hotua thlan, hnam hruaitu, Israel chhûngkaw chunga rorêltute chu an ni. Mosia leh Arona chuan hming ziakte khi an hruai a; thla hnihna, ni khat ni chuan mipui an ko khâwm a, a chi leh a chhûngkuaa thliarin mipa kum sawmhnih a chin chung lam zawng zawng chu an upat dân indawtin an hming an rawn inziaktîr a. Mosia hnêna Lalpa thupêk angin Sinai thlalêrah chuan mite chu an chhiar ta a. Jakoba fapa upa ber Reubena thlahte chu a chi leh a chhûngkuaa thliarin mipa râlkai chin, kum sawmhnih chung lam chu an upat dân indawtin an hming an ziak a, Reubena thlah chu mi sîngli leh sângruk leh zanga an ni. Simeona thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a. Simeona thlah chu mi sîngnga leh sângkua leh zathum an ni. Gada thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a. Gada thlahte chu sîngli leh sângnga leh zaruk leh sawmnga an ni. Juda thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a. Juda thlah chu mi sîngsarih leh sângli leh zaruk an ni. Isakara thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a. Isakara thlahte chu mi sîngnga leh sângli leh zali an ni. Zebuluna thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a. Zebulun thlahte chu sîngnga leh sângsarih leh zali an ni. Josefa thlahte: Efraim thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a, Efraim thlahte chu sîngli leh zanga an ni. Josefa fa Manasea thlahte chu a chi leh a chhûngkuaa thliarin mipa râlkai chin kum sawmhnih chung lam chu a upat dân indawtin an hming an ziak a. Manasea thlahte chu mi sîngthum leh sânghnih leh zahnih an ni. Benjamina thlahte chu a chi leh a chhûngkuaa thliarin mipa râlkai chin, kum sawmhnih chung lam chu upat dân indawtin an hming an ziak a. Benjamina thlahte chu mi sîngthum leh sângnga leh zali an ni. Dana thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a. Dana thlahte chu mi sîngruk leh sânghnih leh zasarih an ni. Asera thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a. Asera thlahte chu mi sîngli leh sângkhat leh zanga an ni. Naftalia thlahte chu a chi leh chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a. Naftalia thlahte chu mi sîngnga leh sângthum leh zali an ni. Israel hnam hruaitu sâwm leh pahnih, mahni hnam ṭheuh hotute nên, Mosia leh Arona chuan mipui hming chu an ziak chhuak a. Israel mi zawng zawng, a chi leh a chhûngkuaa thliarin râlkai chin, mipa kum sawmhnih chung lam zawng chu an chhiar a. An vai chuan mi nuairuk leh sângthum leh zanga leh sawmnga an ni. Levia thlahte erawh chu chhiar tûr an ni ve lo. Lalpa chuan Mosia hnênah: ‘Levia, chi zawng chhiar ve suh, Israel mite khawchhiar bu-ah telh ve tûr an ni lo. Levia thlahte chu Biakbûk chhûngah Thuthlung Bâwm te, bûk cheina leh a chhûnga thil awm zawng zawng enkawltuah hmang ang che. Inbiakna bûk leh a bungrua zawng zawng chu an zâwn ṭhîn ang a, an enkawl ang. Inbiakna bûk vêlah an awm ṭhîn tûr a ni. Inbiakna bûk chu in sawn dâwn apiangin Levia chite hian an ṭhiat ang a, in zâr leh dâwn pawhin Levia chite hian an zâr ṭhîn tûr a ni; mi dang lo inrawlh ve tum chu tihhlum tûr an ni. Israel mite chuan mahni hnam puanzâr zârna bul ṭheuhvah bûk an rem ang a, Levia chite erawh chuan Inbiakna bûk vêlah bûk an rem tûr a ni. Inbiakna bûk chu an vêng ang a, chutilo zawng miin an rawn hnaih ang a, Israel-te chungah thinurna a lo thleng dah ang e,’ a ti a. Chutiang chuan Israel-te chuan an ti a; Mosia hnêna Lalpa thupêk ang chuan an ti ta a. Lalpa chuan Mosia leh Arona hnênah chuan, Israel mite chu a pâwl leh chhûngkaw chhinchhiahna puanzâr târin Inbiakna bûk hawia bûk rem tûrin a hrilh a. Khawchhak lamah chuan Juda pâwl an awm ang: Juda thlahten an chhûngkaw puanzâr an târ ang a, a bulah an bûk an rem ang; an hruaitu chu Aminadaba fapa Nasona a ni, mi sîngsarih leh sângli leh zaruk an tling. An dawta bûk rem tûr chu Isakar thlahte an ni; an hruaitu chu Zuara fapa Nathanela a ni. Mi sîngnga leh sângli leh zali an tling. Anni dawt leha bûk rem tûr chu Zebulun thlahte an ni, an hruaitu chu Helona fapa Eliaba a ni. Mi sîngnga leh sângsarih leh zali an tling. Anni pâwl hi Juda pâwla chhiar an ni, mi nuaikhat leh sîngriat leh sângruk leh zali an tling. Anniho hi kal hmasa zêl tûr an ni. Chhim lamah chuan Reubena pâwlho an awm ang. Reubena thlahte chuan an chhûngkua leh an pâwl puanzâr zârnaah bûk an rem ang, an hotu chu Sedeura fapa Elizura a ni. Mi sîngli leh sângruk leh zanga an tling. An dawta bûk rem tûr chu Simeona thlahte an ni, an hotu chu Zurisadaia fapa Selumiela a ni. Mi sîngnga leh sângkua leh zathum an tling. An dawta bûk rem tûrte chu Gada thlahte an ni, an hotu chu Reuela fapa Eliasafa a ni; mi sîngli leh sângnga zaruk leh sawmnga an tling. Anniho hi Reubena pâwla chhiar an ni; mi nuaikhat leh sîngnga leh sâng khat leh zali leh sawmnga an ni. Anni hi Juda pâwl dawta kal ṭhîn tûr an ni. Inbiakna bûk chu zâwn a hunah Levia chite chu a laiah an kal ang a, an awmna zir zêlin pâwl dangte chu an kal ṭhîn tûr a ni. Khawthlang lam pangah Efraim pâwlho an awm ang a, an pâwl chhinchhiahna puanzâr an zâr ang a, a bulah Efraim-ho chuan bûk an rem ang; an hruaitu chu Amihuda fapa Elisama a ni, mi sîngli leh zanga an tling. An dawta bûk rem tûrte chu Manasea thlahte an ni, an hruaitu chu Pedazura fapa Gamaliela a ni; mi sîngthum leh sânghnih leh zahnih an tling. Anni dawta bûk rem tûr chu Benjamina thlahte an ni, an hruaitu chu Gideona fapa Abidana a ni; sîngthum leh sângnga leh zali an tling. Anniho hi Efraim pâwla chhiar an ni, mi nuaikhat leh sângriat leh za an ni. Hmâr lam pangah Dan pâwlho an awm ang. An pâwl chhinchhiahna puanzâr an zâr ang a, a bulah Dan-ho chuan bûk an rem ang. An hotu chu Amisadaia fapa Ahiezera a ni; mi sîngruk leh sânghnih leh zasarih an tling. An dawta bûk rem tûr chu Asera thlahte an ni, an hruaitu chu Okrana fapa Pagiela a ni; mi sîngli leh sângkhat leh zanga an tling. A dawt leha bûk rem tûr chu Naftalia thlahte an ni; an hruaitu chu Enana fapa Ahira a ni, mi sîngnga leh sângthum leh zali an tling. Anniho hi Dan pâwla chhiar an ni, mi nuaikhat leh sîngnga leh sângsarih leh zaruk an ni. Anni hi hnu dâla kal tûr an ni. Hêng hi Israel mi, a chhûngkuaa thliara hming an ziakte chu an ni, an zaa fin khâwmin mi nuairuk leh sângthum leh zanga leh sawmnga an tling. Mosia hnêna Lalpa thupêk angin Levia thlahte chu Israel-te chhiarnaah an telh ve lo. Mosia hnêna Lalpa thupêk angin Israel-te chuan an ti a, a pâwl pâwlin bûk an rem a, chhûngkaw indawtin an kal ṭhîn. Sinai tlânga Lalpan Mosia a biak lai khân Arona leh Mosia thlahte chu hêng hi an ni. Arona fapa upa ber chu Nadaba a ni, a dangte chu Abihua te, Eleazara te, Ithamara te an ni. Puithiam atâna hriakthih, serh hran an ni. Nadaba leh Abihua erawh hi chu Sinai thlalêra mei thiang lo hmanga rimtui an hâl avângin, Lalpa hmaah an thi a, fa an nei lo; Eleazara leh Ithamara chauh chu an pa Arona dam laia puithiam hna thawk chu an ni. Lalpa chuan Mosia hnênah, “Levia chite chu han hruai la, puithiam Arona rawngbâwlsaktuah dah rawh. Inbiakna bûka hna thawh tûr awm apiang an thawk ang a, puithiam leh mipuite rawng an bâwl tûr a ni. Inbiakna bûk chhûnga thil awm zawng zawng an enkawl ang a, Inbiakna bûka Israel mite an lo kalin an lo dawngsawng tûr a ni. Levia chite chauh hi Arona leh a fate chhawr atân Israel hnam zînga mi ka pêkte chu an ni. Arona leh a fate chauh hian puithiam hna an thawk ang a, mi dang lo inrawlh ve chu tihhlum tûr an ni,” a ti a. Lalpa chuan Mosia hnênah, “Israel-te thlah, an fa tîr, piang hmasa, ka ta tûrte aiah Levia chite hi ka la ta a ni, anni chu ka ta, ka pual an ni ang. Aigupta mite fa tîr ka thah ni aṭang khân fa hrin hmasa berte hi ka ta an ni; Israel-te chu an fa tîr, an ran piang hmasate nên ka zuah a, ka ta tûr vek an ni, Lalpa ka nih hi,” a ti a. Sinai thlalêrah Lalpan Mosia hnênah, “Levia thlahte chu a chi leh a chhûngkuaa thliarin an hming ziak rawh; mipa chu thla khat a chin chung lam chu telh vek ang che,” a ti a. Mosia chuan Lalpa thupêk ang chuan a ti a. Levia fapate chu Gersona te, Kohata te, Meraria te an ni, an hming hi an thlahte chuan hnam hmingah an pu a. Gersona fate chu Libnia leh Simeia an ni. Kohata fate chu Amrama te, Izara te, Hebrona te, Uzela te an ni. Meraria fate chu Malia leh Musia an ni. Hêngho hming hi an thlahte chuan hnam hmingah an pu a ni. Gersona chia chhiarte chu Libni chi leh Simei chite hi an ni. Mipa zawng zawng thla khat a chin chung lam chu sângsarih leh zanga an tling. Gersona chite chuan Inbiakna bûk khawthlang lamah bûk an rem tûr a ni. An hruaitu chu Laela fapa Eliasafa a ni. Inbiakna bûka Gersona chite tih tûr chu Inbiakna bûk enkawltu ber an ni a, a in chung te, a thuahna te, a pindan puanzâr te, a tual hungna puanzâr te, a tual luhna puanzâr te an kutah a awm ang a, hêng thil chungchângah tih tûr awm apiang titu an ni ang. Kohata chia chhiarte chu Amram chi te, Izar chi te, Hebron chi te, Uziel chite hi an ni. Mipa zawng zawng, thla khat a chin chung lam chu sângriat leh zaruk an tling, Hmun Thianghlim enkawltu tûrte an ni. Kohata thlahte chu bûk chhim lamah an awm tûr a ni. An hruaitu chu Uziela fapa Elizafana a ni. An enkawl tûr chu Thuthlung Bâwm te, dawhkân te, khâwnvâr dahna te leh Hmun Thianghlim Ber luhna puanzâr te a ni ang. Puithiam Arona fapa, Eleazara chu Levia chite hotu a ni; Hmun Thianghlim enkawltute thu lâkna tûr a ni. Merari chia chhiarte chu Mali chi te leh Musi chite hi an ni. Mipa zawng zawng, thla khat a chin chung lam chu mi sângruk leh zahnih an tling. An hruaitu chu Abihaila fapa Zuriela a ni, Inbiakna bûk hmâr lamah bûk an rem tûr a ni. Meraria chite enkawl tûr chu Inbiakna bûk ban rem khâwm te, a kaihna hrui te a ni ang. Hêng thila tih tûr awm zawng zawng chu an tih tûr a ni. A hungna ban te, a bulṭhut te, a khen nghehna te, a kaihna hruite pawh an enkawl tûr a ni. Inbiakna bûk khawchhak lam, a kawtah Mosia te, Arona te leh an fate chuan bûk an rem tûr a ni. Anni chauh hi a ṭûl hun apianga Israel-te aiawha Hmun Thianghlima rawngbâwltu tûr an ni; mi dang lo tel ve chu tihhlum tûr a ni,’ a ti a. Lalpa thupêk ang chuan Mosia leh Arona chuan Levia chite chu, an chhûngkuaa thliarin an chhiar a, mi sînghnih leh sânghnih an tling. Lalpa chuan Mosia hnênah, “Israel thlah fa tîr zawng zawng, mipa thla khat a chin chung lam hming ziak chhuak rawh. Levia thlahte chu Israel-te fa tîr zawng zawng aiah ka ta an ni ang. Israel-te ran piang hmasa ber aiah Levia chite ran chu ka tân dah bawk rawh, Lalpa chu ka nih hi,” a ti a. Lalpa thupêk angin Mosia chuan a ti a. Israel-te fa tîr zawng zawng chu a chhiar a, a upat dân indawtin thla khat a chin chung lam mipa zawng zawng hming chu a ziak chhuak a, sînghnih leh sânghnih leh zahnih leh sawmsarih leh pathum an tling. Lalpa chuan Mosia hnênah, “Israel-te fa tîr zawng zawng aiah Levia chite chu ka ta an nih tâk thu puang rawh. Israel-te ran no piang hmasa ber aiah pawh Levia thlahte ran chu ka ta a ni. Israel-te fa tîrho hi Levia chite ai chuan mi zahnih leh sawmsarih leh pathumin an tam a, chûngho zât tlanna chu Israel-te chuan an pe tûr a ni. Mi pakhat tlanna man chu sekel nga a ni ang, sekel chu Tempula hman lai ang chiaha rit tûr a ni. Tangka chu Arona leh a fate pe ang che,” a ti a. Mosia chuan intlanna tangka an lo lâk chuante chu a la khâwm a. Israel zînga fa tîr aṭangin tangkarua biakbûk tehna anga sekel sângkhat leh zathum leh sawmruk leh panga a la khâwm a. Lalpan thu a pêk angin Arona leh a fapate a pe a. Lalpa chuan Mosia leh Arona hnênah, “Levia chi zînga Kohata thlahte a chi leh chhûngkuaa thliarin, kum sawmthum aṭanga kum sawmnga inkâr, Inbiakna bûka hna thawk tlâk zawng zawng hming ziak chhuak rawh. Inbiakna bûka Kohata thlahte thawh tûr chu thil thianghlim berte enkawl a ni. “Awmhmun sawn dâwn apiangin Arona leh a fate chu bûk chhûngah an lût ang a, Hmun Thianghlim Ber pindan puanzâr chu an hlîp ang a, chu chuan Thuthlung Bâwm kha an khuh tûr a ni. Savun ṭha chiin an khuh leh ang a, chu chu puan dumpâwlin an khuh leh tûr a ni; chumi zawhah a zâwnfung an vuah ang. Chhang serh dahna dawhkân chungah puan dumpâwl an phah ang a, chutah chuan thlêng te, bêl te, berhbu te, uain thâwl leh a bun chhuahna tûr note chu an dah ang a; chatlak lova chhang serh dah ṭhin chu chutah chuan an dah tûr a ni. Puan sendukin an khuh ang a, savun ṭha chiin an khuh leh ang a, a zâwnfung an vuah ang. khâwnvâr zâr kha a bâwrin chaicheh te, dawnthlêng te, hriak bûr zawng zawng nên puan dumpâwlin an khuh tûr a ni. A hmanrua zawng zawng nên savun ṭha chiin an khuh ang a, a zâwnnaah an dah tûr a ni. “Rangkachaka luan maichâm chu puan dumpâwlin an khuh ang a, savun ṭha chiin an khuh leh ang a, a zâwnfung an vuah tûr a ni. Hmun Thianghlima rawngbâwlna bungbêl zawng zawng chu puan dumpâwlin an fûn ang a, a zâwnnaah an dah tûr a ni. Maichâma meivâp chu an lâwk fai ang a, puan sendukin an khuh ang a; a chungah chuan an rawngbâwlna bungbêl zawng zawng, meilawh te, thîrkut te, vutlawh te, chawhtawlh te leh maichâm bungbêlte an dah vek ang a, savun ṭha chiin an khuh ang a, a zâwnfung an vuah tûr a ni. “Awmhmun sawn hunah Arona leh a faten hêng hmanrua leh bungbêl thianghlimte hi an khuh fel hunah Kohata fate chuan an zâwn tûr a ni; mahse, thil thianghlimte hi an khawih tûr a ni lo, an thi ang e. Chu chu Inbiakna bûka Kohata fate thawh tûr chu a ni. Chhit tûr hriak te, rimtui te, buhbâl thilhlan te, hriak thih mi te, Inbiakna bûk pum leh a chhûnga thil awm zawng zawng, Lalpa tâna serh hrante chu Eleazara kutah a awm ang.” Lalpa chuan Mosia leh Arona hnênah, “Kohata thlahte chu, thil thianghlimte hi an khawih palha Levia chite zîng ata an thih fai mai loh nân, Arona leh a fate chuan an tih tûr leh an zâwn tûr ṭheuh an kawhhmuh ṭhîn tûr a ni. Puithiamin thil thianghlim zâwn tûra an buatsaih lai en tûrin Kohata thlahte chu Inbiakna bûk chhûngah an lût tûr a ni lo, an thi mai ang,” a ti a. Lalpa chuan Mosia hnênah, “Gersona thlahte pawh, a chi leh a chhûngkuaa thliarin kum sawmthum aṭanga kum sawmnga inkâr mi, Inbiakna bûka rawngbâwl tlâk zawng zawng hming ziak vek rawh. Gersona thlahte chuan hêng hi an enkawl ang a, an zâwn ṭhîn ang: Inbiakna bûk puanzâr te, a chung khuhna te, a thuahna te, a khuhna savun ṭha chi te, kawngka puanzâr te, bûk leh maichâm tual hungna puanzâr te, bûk luhna kawngka puanzâr te, a hrui te leh a hmanrua zawng zawng an zâwn ang a; tih ṭûl apiang an ti tûr a ni. Arona leh a faten tih tûra an ruatsak apiang chu Gersona thlahte chuan an ti ang a, zâwn tûr chu an zâwn ang a, in enpui ṭhîn dâwn nia. Hêng hi Inbiakna bûk chungchânga Gersona thlahte tih tûr pual chu a ni; an tih tûr ṭheuh chu puithiam Arona fapa Ithamaran a kawhhmuh ṭhîn ang. “Meraria thlahte chu a chi leh a chhûngkuaa thliarin kum sawmthum aṭanga kum sawmnga inkâr mi, Inbiakna bûka rawngbâwl tlâk zawng zawng hming ziak chhuak vek rawh. Inbiakna bûk chungchânga an tih tûr pual leh an thil phurh tûr te chu hêng hi a ni: Bûk hmanrua, a bangrel te, a ban leh a bulṭhut te, tual hungna ban te leh a bulṭhut te, bûk kilh behna te, a kaihna hrui te leh a hmanrua zawng zawng te a ni; mi tin phurh tûr hming hmerha ruatsak ṭheuh tûr a ni. Chûng chu Meraria thlahte tih tûr chu a ni, puithiam Arona fapa Ithamaran an tih tûr chu a kawhhmuh ṭhîn ang,” a ti a. Mosia te, Arona te leh mipui hruaitu te chuan Kohata thlahte chu a chi leh a chhûngkuaa thliarin, Inbiakna bûka rawngbâwl tlâk, kum sawmthum aṭanga kum sawmnga inkâr mi zawng zawng hming chu an ziak chhuak a. Hêng an hming ziakte hi mi sânghnih leh zasarih leh sawmnga an tling. Mosia hnêna Lalpa thupêk zâwmin Mosia leh Aronan Kohata thlahte, Inbiakna bûka rawngbâwl tlâk an ziak zât chu heti hi a ni. Gersona thlahte chu a chi leh a chhûngkuaa thliarin, Inbiakna bûka rawngbâwl tlâk kum sawmthum aṭanga kum sawmnga inkâr mi zawng zawng hming chu an ziak chhuak a. Hming ziak hi mi sânghnih leh zaruk leh sawmthum an tling. Lalpa thupêk zâwma Mosia leh Aronan Gersona thlahte, Inbiakna bûka rawngbâwl tlâk an ziak zât chu heti hi a ni. Meraria thlahte chu a chi leh a chhûngkuaa thliarin, Inbiakna bûka rawngbâwl tlâk, kum sawmthum aṭanga kum sawmnga inkâr mi zawng zawng hming an ziak chhuak a. Hming ziak zawng chu mi sângthum leh zahnih an tling. Mosia hnêna Lalpa thupêk awiha Mosia leh Aronan Meraria thlahte an ziak zât chu heti hi a ni. Levia chite chu a chi leh a chhûngkuaa thliarin Mosia leh Arona leh Israel hruaitute chuan, kum sawmthum aṭanga kum sawmnga inkâr, Inbiakna bûka rawngbâwl tlâk, thil phur thei te hming chu an ziak chhuak a, mi sângriat leh zanga leh sawmriat an tling. Mosia hnêna Lalpa thupêk angin Mosia chuan mi tin an thawh tûr leh phurh tûr ṭheuh a ruatsak a, an hming pawh a chhinchhiah vek a. Lalpa chuan Mosia hnênah; “Israel-te chu hrilh rawh: vuna phâr natna vei te, thipût lai te, mitthi ruang khawih vânga bawlhhlawhte chu riahhmun ata an hnawt chhuak tûr a ni. Chutianga bawlhhlawhna nei chu hnawt chhuak vek rawh u; riahhmunah kei pawh ka awm ve si a, an tibawrhbâng ang e”, a ti a. Israel mite chuan Mosia hnêna Lalpa thu sawi chu an awih a, daipâwnah an hnawt chhuak ta vek a. Lalpa chuan Mosia hnênah, “Israel-te chu hrilh rawh: Lalpa thu bawhchhiain tu pawhin mi chungah thil sual ti sela, thupha a chawi tûr a ni. A thil sual tih man chu kim takin a rûl ang a, tihsualna pa chu hmun ngaa ṭhena hmun khat a pêk belh tûr a ni. Pêk tûra chu thi sela, laichîn hnai a neih bawk si loh chuan a rulhna tûr sum chu puithiam chanpual atân Lalpa hnêna pêk tûr a ni. Hei hi sual thawina thilhlana berâmchal bâka pêk tûr a ni. Israel miten chutiang thilpêk chu an rawn hlan chuan a dawngtu puithiam chuan a nei ang. Puithiamte chuan thilhlan an lo dawn rêng rêng an nei zêl tûr a ni,” a ti a. Lalpa chuan Mosia hnênah, “Israel-te chu hetiang hian thu hrilh rawh: Tu nupui pawh rinawm lovin mi dangin mutpuiin uire sela, a pasal chuan a hriat chiah lohva, chesual ngei si, inpuang si lo, kut man ni bawk si lo chu, a pasalin a rinhlelha, a thîka, a nupui chu a chesual emaw, sual lo emaw a rinhlelh tlat si chuan, a nupui chu puithiam hnênah a hruai ang a, barli chhangphut kg. khat thilhlan tûra tuk zât chu, hriak telh loh, rimtui hâl tûr pawh tel lovin a rawn keng bawk tûr a ni; chu chu nupui rinhlelhawmte fiah nân thilhlan, an pasalten an rawn ken ṭhin tûr chu a ni. “Puithiam chuan hmeichhia chu a hruai ang a, Lalpa hmaah a dintîr ang a, hlumbêlin tui thianghlim a la ang a, Biakbûk chhuata vaivut chu a sâwk ang a, tuiah chuan a phul tûr a ni. Hmeichhia chu Lalpa hmaah chuan a dintîr ang a, a sam thlahin thîkthu avânga fiahna tûr chhangphut thilhlan ṭhenkhat chu a hûmtîr tûr a ni. Puithiam chuan hmeichhia chu chhia a chhamtîr tûr a ni. ‘Tu man an mutpui loh chea, i pasal laka thil bawlhhlawh i tih loh chuan ânchhe thlentu tui chhe lak ata hi i fihlîm ang; amaherawhchu, i pasal laka khaw dang i hawia, i pasal ni lo mipain an mutpui chea, an tihbawrhbân che chuan i fihlîm lo vang,’ a ti ang a. Puithiam chuan hmeichhia chu a vau ang a, chhia a chhamtîr ang a, a hnênah, ‘ Lalpa chuan i chipuite ânchhe dawngah siam che rawh se; ânchhe tuichhia i in tûr hian, i pum tipuar sela, i malpui inkâr tisâwng rawh se,’ a ti ang a, hmeichhia chuan, ‘Amen, Amen,’ a lo ti ang. Puithiam chuan ânchhe dawn tûr a chhamte chu lehkhaah a ziak ang a, tui chhiaah chuan a tleuh fai tûr a ni. A pum tina mai thei tui chhia chu a intîr hmain, thîkthu avânga fiahna tûr thilhlan chhangphut a hûmtîr kha puithiam chuan a lâksak ang a, Lalpa hmaah a thên ang a, maichâmah a rawn dah tûr a ni. Chhangphut thilhlan kha a vaia hlan vek a nih entîr nân a thên a thên ang a, maichâmah a hâl ral tûr a ni. Chumi zawhah chuan hmeichhia chu tui chhia kha a intîr tawh ang, a bawrhbâna a lo uire ngei a nih chuan tui chhia a in veleh a pum a na ang a, a dul a puar ang a, a mal inkâr a sâwng ang; mi ânchhedawngtu a ni ang. Hmeichhia chu a bawrhbân lohva, a thianghlim chuan eng mah a ti lo vang: nau a pai leh mai tûr a ni. Hetiang hi nupui, pasalte laka khaw dang hawi intibawrhbângte chungthu rêl dân tûr chu a ni. A pasalin mi dang laka a nupui chu a thîk miau si chuan puithiamin hmeichhia chu Lalpa hmaah a dintîr ang a, hêng thil hi a lo ti ang. A pasal chuan thiam lohna a nei lo vang a, a hmeichhia chuan thiam lohna a neih chuan a tuar tûr a ni,” a ti a. Lalpa chuan Mosia hnênah, “Israel-te chu heti hian hrilh rawh: Mipain emaw, hmeichhiain emaw Nazarit-ho thutiam anga Lalpa hnênah a inhlan chhûng chuan, uain leh zu a nghei tûr a ni; uain thûr leh zu thûrte pawh a in tûr a ni lo, grep rah sâwr tui pawh a in tûr a ni lo, a rah pawh, a tharlâm emaw, pho ro emaw pawh a ei tûr a ni lo. Nazarit thutiama a inphuar chhûng chu grep aṭanga siam eng mah, a sâwr fu pawh a ei tûr a ni lo va. Nazarit thutiama a inphuar chhûng chu a lu pawh ziah kâwn tûr a ni hek lo; Lalpa tâna a inhlan chhûng chuan serh hran a ni a, a samte pawh a ṭhan ṭhanin a ṭhang mai tûr a ni. Lalpa tâna a inhlan chhûng hian mitthi ruang a khawih tûr a ni lo. A nu leh pa ruang pawh, a unaupa leh a farnu ruang pawh khawihin a intibawlhhlawh tûr a ni lo, a inserh hran lai a ni si a. Nazarit mi a nih chhûng chu Lalpa tâna serh hran a ni. A bula mi thi thut sela, a ruangin a sam chu khawih palhin tibawlhhlawh sela, ni sarih a nghâk ang a, a sam chu a ziat kawlh vek tûr a ni; tichuan, a thianghlim leh thei ang. A ni riat ni chuan ṭhuro pahnih emaw, pârva no pahnih emaw Inbiakna bûkah puithiam hnênah a rawn keng ang a, ani chuan sual thawi nân pakhat chu a lo hlansak ang a, pakhat chu hâlral thilhlanah a hâl ang a, mitthi ruangin a khawih avânga amah thenna chu a tihsak ang a, chumi ni vek chuan a sam chu a serh thar leh tûr a ni. Nazarit mi atân Lalpa hnênah a inhlân thar leh ang a, kum khat vêla upa berâmno, a pa, bawhchhiat man thilhlanah a hlân ang. A inserhhranna kha tihbawlhhlawh a nih avângin tûn hmaa Nazarit mi a nih chhûng kha a thlâwn mai a ni ang. “Nazarit miin a hun a tlâk hnuin hetiang hian thil a ti tûr a ni: Inbiakna bûkah a lo kal ang a, Lalpa hnêna thilhlan atân hêngte hi a rawn keng tûr a ni: hâlral thilhlan atân berâmno, a pa, kum khat vêla upa, hmêlhem lo; sual thawina thilhlan atân berâmno, a nu, kum khat vêla upa, hmêlhem lo; remna thilhlan atân berâmchal hmêlhem lo; buhbâl thilhlan atân kho chhûngah dawidim telh loh, chhangphut ṭha chia siam, hriak nêna hmeh, chhang tlang te, hriaka tâl chhang pan te, in tûr thilhlan atân uain te hi. Puithiam chuan Lalpa hmaah a rawn keng ang a, sual thawina te, hâlral thilhlan te chu a hlân ang. Berâmchal chu remna thilhlanah a hlân ang a, a rual chuan buhbâl thilhlanah dawidim telh loh chhang kho khat chu in tûr thilhlan uain nên chuan a hlân bawk ang. Tin, Nazarit mi chuan a sam serh chu Inbiakna bûk kawngka bulah chuan a ziat fai ang a, remna thilhlan hâlnaah chuan a rawh tûr a ni. Puithiam chuan berâmchal dâr chhum hmin leh khova dah dawidim telh loh chhang tlang pakhat leh chhang pan pakhat chu a la ang a, Nazarit mi hnênah chuan, a lu a meh fai hnuah, a pe tûr a ni. Chu chu puithiam chuan thên thilhlanah a thên ang a, puithiam tâna serh hran a ni ang, a bawp leh a irno, puithiam chan tûra serh hran ṭhinte nên. Chumi zawh chuan Nazarit mi khân uain a in thei tawh ang. “Hei hi Nazarit mi tih tûr chu a ni; mahse, chu mi chuan tih tûr tuk bâk thilhlan pêk a lo tiam chuan, a tiam ang chu a ti ngei tûr a ni,” a ti a. Lalpa chuan Mosia hnênah: “Arona leh a fate chu hrilh rawh, hetiang hian mipui tân malsâwmna an dîl tûr a ni: Lalpa chuan malsâwm che uin vêng che u rawh se, Lalpa hmêl chu in chungah êng sela, khawngaih che u rawh se. Lalpa chuan in lam lo hawi sela, thlamuanna pe che u rawh se. Chutiang chuan Israel mite chungah ka hming in chham ang a, keiin mal ka sâwm ang,” a ti a. Mosian Biakbûk a din zawh chuan, Biakbûk leh a bungrua zawng zawng chu maichâm leh a bungbêl zawng zawng nên hriak a hnawih a, a thian thianghlim a. Israel hnam hruaitu, hotua an neih, chhiarpui titute kha, an lo kal a, thilhlan an rawn keng a. An thilhlan chu bâwngtawlailîr chung nei paruk leh bâwngpa sâwm leh pahnih a ni, hruaitu pahnihin bâwngtawlailîr pakhat an thawh ṭâwm a, hruaitu tinin bâwngpa pakhat ṭheuh an tum a ni; Biakbûk kawtah chuan an rawn kai a. Lalpa chuan Mosia hnênah, “Inbiakna bûk rawngbâwlna atân a ṭangkai ang, lo dawnsak la, an hna tam dân athuin Levia chite hnênah sem ang che,” a ti a. Mosia chuan tawlailîrte leh bâwngpate chu a lo dawng a, Levia chite chu a sem a. Tawlailîr pahnih leh bâwng pali chu Gersona thlahte hnênah, an hna azirin a pe a. Tawlailîr pali leh bâwng pariat chu Meraria thlahte hnênah, an hna azirin a pe a; puithiam Arona fapa Ithamara kutah hêng hi dah a ni. Kohata thlahte erawh chuan chan an nei lo; thil thianghlimte chu anmahni ko ngeia zâwn tûra tih an nih avâng khân. Hruaitute chuan maichâm serh thianghlim lawm nân thilhlan tûr an rawn la a. Lalpa chuan Mosia hnênah, “Hruaitu pakhat zêl hian, a ni indawtin maichâm serh hran lawm nân an thilpêkte chu rawn dah thliah thliah rawh se,” a ti a. A ni hmasa berah chuan Juda thlah hruaitu Aminadaba fapa Nasona chuan a thilpêkte chu a rawn dah a. Tangkaraw thlêng, kg. khat leh a chanvea rit leh tangkaraw chawhtawlh gram zariata rit, buhbâl thilhlan tûr chhangphut ṭha chi hriaka hmeh, a vûm thâr ve ve; rangkachak berhbu gram za leh sâwm bûk, rimtui hâl tûra khat nên - hêng hi Tempula bûkna hman laia bûk vek a ni. Hâlral thilhlan atân bâwngtuai pakhat, berâmchal pakhat, kum khat vêla upa berâmno pakhat; sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Aminadaba fapa Nasona thilpêk rawn kente chu a ni. A ni hnih ni chuan Isakara thlah hruaitu, Zuara fapa Nethanelan a thilpêk chu a rawn keng a; hêng hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, vûm thâr ve ve; rangkachak berhbu gram za leh sâwm bûk rimtui hâl tûra khat, hêng hi Tempula hman lai bûknaa bûk vek a ni. Hâlral thilhlan atân bâwngtuai pakhat, berâmchal pakhat, kum khat vêla upa berâmno a pa pakhat, sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Nathanela, Zuara fapa thilpêkte chu a ni. Ni thum ni chuan Zebulun thlah hruaitu Helona fapa Eliaba chuan a thilpêkte chu a rawn keng a; hêng hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk; hêng hi Tempula hman lai bûknaa bûk vek a ni. Hâlral thilhlan atân bâwngtuai pakhat, berâmchal pakhat, kum khat vêla upa berâmno a pa pakhat; sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga hêngte hi Helona fapa Eliaba thilpêk rawn kente chu a ni. Ni li ni chuan Reubena thlah hruaitu Sedeura fapa Elizura chuan a thilpêkte chu a rawn keng a; hêng hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk; hêng hi Tempula hman lai bûknaa bûk vek a ni. Hâlral thilhlan atân bâwngtuai pakhat berâmchal pakhat, kum khat vêla upa berâmno a pa pakhat; sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêng hi Sedeura fapa Elizura thilpêk rawn kente chu a ni. Ni nga ni chuan Simeona thlah hruaitu Zurisadaia fapa Selumiela chuan a thilpêkte chu a rawn keng a; hêng hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh, gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk - hêng hi Tempula hman lai bûknaa bûk vek a ni; hâlral thilhlan atân bâwngtuai pakhat, berâmchal pakhat, kum khat vêla upa berâmno a pa pakhat; sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Zerusadaia fapa Elizura thilpêk rawn kente chu a ni. Ni ruk ni chuan Gada thlah hruaitu Deuela fapa Eliasafa chuan a thilpêkte chu a rawn keng a; hêngte hi a thilpêkte chu a ni: tangkaraw thlêng kg. khat leh a chanve bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk - hêngte hi Tempula hman lai bûknaa bûk vek a ni. Hâlral thilhlan atân bâwngtuai pakhat, berâmchal pakhat, kum khat vêla upa berâmno a pa pakhat; sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Deuela fapa Eliasafa thilpêk rawn kente chu a ni. Ni sarih ni chuan Efraima thlah hruaitu Amihuda fapa Elisama chuan a thilpêkte chu a rawn keng a; hêngte hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk - hêngte hi Tempula hman lai bûknaa bûk vek a ni. Hâlral thilhlan atân bâwngtuai pakhat, berâmchal pakhat, kum khat vêla upa berâmno, a pa pakhat, sual thawina thilhlan atân kêl pakhat, remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Amihuda fapa Elisama thilpêk rawn kente chu a ni. Ni riat ni chuan Manasea thlah hruaitu Pedazura fapa Gamaliela chuan a thilpêkte chu a rawn keng a; hêngte hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk - hêng hi Tempula bûkna hman laia bûk vek a ni; hâlral thilhlan atân bâwngtuai pakhat, berâmchal pakhat, kum khat vêla upa berâmno a pa pakhat, sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Pedazura fapa Gamaliela thilpêk rawn kente chu a ni. Ni kua ni chuan Benjamina thlah hruaitu Gideona fapa Abidana chuan a thilpêkte chu a rawn keng a; hêngte hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk - hêng hi Tempula bûkna hman laia bûk vek a ni. Hâlral thilhlan atân bâwngtuai pakhat, berâmchal pakhat, kum khat vêla upa berâmno a pa pakhat; sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Gideona fapa Abidana thilpêk rawn kente chu a ni. Ni sâwm ni chuan Gada thlah hruaitu Amisadaia fapa Ahiezera chuan a thilpêkte chu a rawn keng a; hêngte hi a thilpêkte chu a ni: tangkaraw thlêng, kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk - hêngte hi Tempula hman lai bûknaa bûk vek a ni. Hâlral thilhlan atân bâwngtuai pakhat, berâmchal pakhat, kum khat vêla upa berâmno a pa pakhat, sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Amisadaia fapa Ahiezera thilpêk rawn kente chu a ni. Ni sâwm leh ni khat ni chuan Asera thlah hruaitu Okrana fapa Pagiela chuan a thilpêkte chu a rawn keng a; hêngte hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk - hêngte hi Tempula bûkna hman laia bûk vek a ni; hâlral thilhlan atân bâwngtuai pakhat, berâmchal pakhat, kum khat vêla upa berâmno a pa pakhat; sual thawina thilhlan atân kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Okrana fapa Pagiela thilpêk rawn kente chu a ni. Ni sâwm leh pahnih ni chuan Naftalia thlah hruaitu Enana fapa Ahira chuan a thilpêkte chu a rawn keng a; hêngte hi a thilpêkte chu a ni: tangkaraw thlêng kg. khat leh a chanve bûk, tangkaraw chawhtawlh gram zariat bûk, buhbâl thilhlan tûr chhangphut ṭha chi hriaka hmeh, a vûm thâr ve ve; rimtui hâl tûra khat rangkachak berhbu gram za leh sâwm bûk - hêngte hi Tempula bûkna hman laia bûk vek a ni; hâlral thilhlan tûr bâwngtuai pakhat, berâmchal pakhat, kum khat vêla upa berâmno a pa pakhat; sual thawina thilhlan tûr kêl pakhat; remna thilhlan atân bâwngtuai pahnih, berâmchal panga, kêl panga leh berâmno a pa kum khat mi vêl panga - hêngte hi Enana fapa Ahira thilpêk rawn kente chu a ni. Hriak hnawiha maichâm hlan ni chuan a lawm nân hruaitute chuan hêng thilpêk hi an rawn keng a ni: a vaiin tangkaraw thlêng sâwm leh pahnih, tangkaraw chawhtawlh sâwm leh pahnih, rangkachak berhbu sâwm leh pahnih; thlêng hi kg. khat leh a chanve zêl bûk a ni; chawhtawlh hi gram zariat zêla rit a ni; Tempula hman lai bûknaa bûkin tangkarua hi kg. sawmhnih leh pasarih leh gram zaruk a tling a ni. Rimtui hâl tûra khat rangkachak berhbu sâwm leh pahnih, gram za leh sâwm bûk zêl, a vaiin Tempula hman lai bûknaa bûkin kg. khat leh gram za leh sawmhnih a ni. Hâlral thilhlana hlan tûr bâwngtuai sâwm leh pahnih, berâmchal sâwm leh pahnih, kum khat vêla upa berâmno a pa sâwm leh pahnih leh chûng ruala telh tûr tuk zât buhbâl thilhlan chhangphut ṭha chi nên; sual thawina thilhlan atân kêl sâwm leh pahnih; remna thilhlan atân bâwngtuai sawmhnih leh pali, berâmchal sawmruk; kêl sawmruk, kum khat vêla upa berâmno a pa sawmruk. Hêng hi hruaituten hriak hnawiha maichâm hlan nia an thilpêkte chu a ni. Mosia chu Lalpa be tûrin Inbiakna bûkah chuan a lût a. Thuthlung Bâwm chhîn, cherub pahnih aṭang chuan Lalpa ṭawng chu a hria a. Lalpa chuan Mosia hnênah, “Arona chu hrilh rawh, khâwnvâr a hâlin a khâwnvâr pasarih chuan a hma lam a ên tûr a ni,” a ti a. Arona chuan chutiang chuan a ti a, Mosia hnêna Lalpa thupêk ang chuan hma lam ên tûr chuan khâwnvârte chu a chhi a. Khâwnvâr dahna chu a bul vâwng leh a zâr, pangpâr lema chei te nên chuan, rangkachaka chher a ni; siam dân tûr Mosia hnêna Lalpa sawi ang chiaha chher a ni. Lalpa chuan Mosia hnênah, “Israel mite zîng aṭangin Levia chite hi tihrang la, thian thianghlim rawh. Hetiang hian thian ang che: tlenfaina tui theh la, an hmul zawng zawng ziat fai rawh se, an puan su sela, inbualtîr rawh. Bâwngtuai rawn la sela, a ruala hlan tel tûr buhbâl thilhlan atân chhangphut ṭha chi hriaka hmeh rawn la tel rawh se; sual thawina thilhlana hlan tûr bâwngtuai dang la bawk ang che. Israel-ho chu pung khâwm tûrin ko la, Levia chite chu Inbiakna bûk hmaah chuan dintîr ang che. Israel mite chuan Levia chite lu-ah chuan an kut an nghat ang a, Lalpa rawngbâwltu an nih theih nân Arona chuan Levia chite chu Israel-te zîng ata chu ka ta ni tûrin thên thilhlanah a hlân tûr a ni. Levia chite chuan bâwngtuai lu-ah chuan an kut an nghat ang a, an sual thawina tûrin bâwngtuai pakhat chu sual thawina thilhlanah hlansak tûr a ni, pakhat chu hâlral thilhlana hâl tûr a ni. “Levia chite chu Arona leh a fate kaihhruai tûrin Lalpa tân thên thilhlanah i hlân tûr a ni. Israel mite zîng aṭang chuan Levia chite chu i tihrang ang a, ka ta an lo ni tawh ang. I tihthianghlima i hlan hnu chuan Levia chite chu Inbiakna bûka rawngbâwl tlâk an ni tawh ang. Israel-te fa tîr, chhûl keuho, ka neih tûrte aiah anni hi ka nei dâwn a ni, anni neitu chu keimah chauh hi ka ni. Aigupta mite fa tîr ka tihhlum lai khân Israel mite fapa upa berte leh an ran piang hmasa berte chu ka tân ka zuah a ni. Tûnah Israel-te fa tîr aiah Levia chite hi ka nei dâwn a ni. Arona leh a fate puitu atân an hnêna Israel-te thilpêk an ni; Israel mite tân Hmun Thianghlimah rawng an bâwl ang a; Israel mite chungah thil ṭha lo a thlen loh nân Inbiakna bûka an kal tûr anni hian an lo vêng ṭhîn ang,” a ti a. Mosia hnêna Lalpa thupêk ang chuan Mosia te, Arona te leh Israel pungkhâwmho chuan Levia chite chu an hlân a. Levia chite chu an intifai a, an puante an su a, Arona chuan Lalpa hnêna thên thilhlanah anni chu a hlân a. Sual thawina thilhlan pawh chu a tihsak a. Levia chite chungchânga Lalpa thupêk zawng zawng chu mite chuan an ti a. Tichuan, Levia chite chu Hmun Thianghlima Arona leh a fate hnuaia rawngbâwltu an ni ta a. Lalpa chuan Mosia hnênah, “Kum sawmhnih leh panga an tlinin Levia chite chu Inbiakna bûkah hna an thawk ṭheuh tûr a ni; kum sawmnga an tlin chuan an châwl tûr a ni. Hemi hnu hi chuan an Levia chipui, Inbiakna bûka hna thawk an pui ve thei ang: anmahni pual chuan eng mah an ti tûr a ni tawh lo; Levia chite thawh dân tûr chu hetianga rel tûr a ni,” a ti a. Aigupta an chhuahsan hnu kum hnihna, thla khatnaah chuan Sinai thlalêrah Lalpa chuan Mosia hnênah, “Israel-te chuan Kalhlên kût a hun takah hmang rawh se. Tûn thla ni sâwm leh pali ni hian ni tlâk aṭangin tih dân tûr rêl diam tawh angin in hmang tûr a ni,” a ti a. Tichuan, Mosia chuan mipui chu Kalhlên kût hmang tûrin a hrilh a, thla khatna, ni sâwm leh pali tlaiah, Sinai thlalêrah chuan an hmang ta a. Mosia hnêna Lalpa thupêk ang chiah zêl chuan mite chuan engkim an ti a. Mi ṭhenkhat, mitthi ruang an khawih avânga bawlhhlawh an awm a, chûng mite chuan a ni tak chuan Kalhlên kût chu an hmang ve thei lo va. Mosia leh Arona hnênah an lo kal a, “Mitthi ruang kan khawih a ṭûl avânga bawlhhlawh kan ni a; Israel mi dangte ang bawkin Lalpa hnênah thil kan hlân ve thei dâwn lâwm ni?” an rawn ti a. Mosia chuan, “ Lalpa thu ka dawn hma chu lo nghâk teh u,” a ti a. Lalpa chuan Mosia hnênah, “Israel mite chu hrilh rawh. In zînga mi emaw, in thlahte emaw mitthi ruang an khawih avânga an bawlhhlawhin emaw, ram hla taka an zinin emaw, Kalhlên kût hman an duh ve si chuan, thla khat hnuah, thla hnihna ni sâwm leh pali ni tlai lamah an hmang ve thei ang. Chhang dawidim telh loh leh lambak nên hmang ang che u. A sa in ei bâng chu a tûk thlengin dah tûr a ni lo, a ruhte pawh pakhat mah titliak suh u; Kalhlên kût hman dân tûr tuk ang takin in hmang tûr a ni. Bawlhhlawh ni lo, ram hla taka zin pawh ni si lovin Kalhlên kût hi a hman duh loh chuan a mite zîng ata hnawh chhuah tûr a ni, a hun ruatah ka hnêna thilhlan a rawn hlan duh loh avângin a thil sual tih mawh chu a phur tûr a ni. “In zînga chêng hnam dangin Kalhlên kût hi a hman ve duh chuan a dân ang thlapin a hmang tûr a ni. Tu tân pawh, a khual a tualin, a hman dân tûr a thuhmun a ni,” a ti a. Biakbûk an din zawh ni chuan chhûmin a rawn khuh a, tlaiah chuan a tûk zîng thlengin mei anga êng a awm a. Chutiang chuan chhûmin a khuh a, zânah mei anga êng chu a awm ziah a. Chhûm a kian apiangin Israel-te chuan awmhmun an sawn a, chhûmin a rawn khuhna hmunah chuan awmhmun an khuar leh ṭhîn. Lalpa thupêk ang zêlin bûk an sawn a, a thu vêkin bûk an khuar a. Chhûmin Biakbûk a khuh chhûng chu an awmna ngaiah an awm reng ṭhîn a ni. Chhûm chuan rei tak chhûng Biakbûk chu a khuh pawhin Lalpa thu chu an awih a, an insawn lo. A châng chuan Biakbûk chu chhûmin ni rei lo tê chauh a khuh pawhin Lalpa thupêk angin an insawnin an insawn lo. Zan khat chauh, tlai aṭanga a tûk zîng thleng chauhva a awm châng a awm a, chhûm a kian veleh an insawn mai ṭhîn a ni. Ni hnih khat mai emaw, thla khat dâwn lai emaw, kum khat emaw, a aia rei emaw Biakbûk chunga chhûm a awm chhûng chu an insawn lo, a kian veleh an insawn ṭhîn. Mosia hnêna Lalpa thupêk ang zêlin bûk an khuar a, awmhmun an insawn ṭhîn. Lalpa chuan Mosia hnênah, ‘Tangkaraw tawtawrâwt pahnih chher rawh; mipui koh khâwm nân leh kal chhuah a hunah in hâm dâwn nia. A ruala an ham chuan Israel-ho chu Inbiakna bûkah, i bulah an lo pung khâwm ang a, pakhat chauh an ham erawh chuan hruaituho, sâng chunga hotute chauh khân an rawn pan tûr che a ni. Rang taka an ham sek sek chuan khawchhak lama bûk neiho kha tawlh chhuak rawh se. Rang taka an ham nawn leh hunah chhim lama bûk neiho kha an tawlh chhuak tûr a ni. An ham sek sek chuan tawlh chhuah tûr tihna a ni. Rei tak thlûka an ham chuan kal khâwm tûr tihna a ni. Arona leh a thlahte hi tawtawrâwt hâmtu tûrte chu an ni. Hetiang hi kumkhaw tih dân tûr a ni. “In ramah indona a awma, in hmêlma rawn beitute laka lo ṭang zâwk in nih chuan, tawtawrâwt chu hâm sek sek ula, kei Lalpa hian ka lo hria ang a, in hmêlmate lak ata ka rawn chhan ang che u. In lâwmna nikhuaah, thla thar kûtahte leh hun serh in hman ṭuma hâlral thilhlan in hlantein hâm bawk ang che u, chu chu ka lo hria ang a, ka ngaihven ang che u, Lalpa, in Pathian ka nih hi. Aigupta an chhuahsan kum hnihna, thla hnih, ni sawmhnih ni chuan Inbiakna bûk chunga Lalpa chhûm chu a kiang a, Sinai aṭang chuan zawi zawiin an inchhawp sawn a; Paran thlalêr an thlen chuan chhûm chu a ding leh ta a. Mosia hnêna Lalpa thupêk angin a pâwl indawtin an chhuak a. Juda pâwla chhiarho chu an puanzâr nên an chhuak hmasa ber a, Juda thlahte chu Aminadaba fapa Nasonan a ho va. Isakara thlahte chu Zuara fapa Nethanelan a ho va. Zebuluna thlahte chu Helona fapa Eliaban a ho va. Biakbûk chu an ṭhiat a, Gersona fate leh Meraria faten an zâwn a, an zui a. Reubena pâwla chhiarte pawh chu an puanzâr nên an chhuak a, Reubena thlahte chu Sedeura fapa Elizuran a ho va. Simeona thlahte chu Zurisadaia fapa Selumielan a ho va. Gada thlahte chu Deuela fapa Elisafan a ho va. Kohata thlahte chuan bûk chhûnga thil thianghlimte an zâwn a, a dawtah an kal a, an bûk khuarna tûr hmun an va thlen ve chuan bûk chu an lo zâr zo tawh ṭhîn. Efraim pâwlhova chhiarte chuan an puanzâr nên an zui a. Efraima thlahte chu Amihuda fapa Elisaman a ho va. Manasea thlahte chu Pedazura fapa Gamalielan a ho va. Benjamina thlahte chu Gideonia fapa Abidanan a ho va. Dana pâwla chhiarte chu an puanzâr nên an chhuak hnuhnûng ber a. Dana thlahte chu Amisadaia fapa Abiezeran a ho va. Asera thlahte chu Okrana fapa Pagielan a ho va. Naftalia thlahte chu Enana fapa Ahiran a ho va. Chutianga pâwl indawt thliah chuan Israel fate chu awmhmun an insawnin an kal ṭhîn. Mosia puzawn, Midian mi, Reuela fa Hobaba hnênah Mosia chuan, ‘ Lalpa chuan ram min pêk a tiam a; chu ram chu kan thleng ṭhelh ṭhelh tawh a ni. Israel mite chu tihhmuingîl a tiam a, lo tel ve la, kan zâr i zo dâwn nia,’ a ti a. Hobaba chuan, ‘Tel ve lo ve, kan ram lamah ka haw leh dâwn,’ a ti a. Mosia chuan, ‘Min hâwnsan lo hrâm teh. Nang chuan thlalêra bûk khuarna hmun ṭha i hre vek a. I lo tel ve phawt chuan Lalpa malsâwmna kan dawn zawng zawng kan sem ve zêl ang che,’ a ti a. Lalpa tlâng aṭang chuan ni thum an kal a, Lalpa Thuthlung Bâwm chu an hmaah, an riahna tûr hmun zawngin a kal zêl a. An riahhmun ata an chhuah chuan Lalpa chhûm chu an chungah a awm zêl a. Thuthlung Bâwm a chêt sawn dâwn apiangin Mosia chuan, ‘Aw Lalpa, tho la, i hmêlmate chu ûm darh la, a hawtu che chu tlânchhe rawh se,’ a ti ṭhîn a. Bâwm chu an nghah veleh, ‘Aw Lalpa, Israel chhûngkaw sâng tam tak zîngah hian lo haw leh rawh,’ a ti ṭhîn. Mipui chu an hahin an mangang a, Lalpa chungah an vui a. Lalpa chuan a lo hriatin a thinur hle a, mipui zîngah chuan mei a chhuahtîr a, an riahhmun hmâwrtawng ber thlêr khat chu a kâng chhe vek a. Mite chuan Mosia an au va, ani chuan Lalpa hnênah a dîl a, mei chu a rêm ta a. Lalpa mei an zînga a chhuah avângin chu hmun hmingah chuan Tabera an vuah a. Israel-te zîngah hnam dang tel ve zêl an awm a, chûng chuan sa an châk hle a, Israel mite pawh chuan, “Sa kan va châk ve le: Aigupta ramah lah khân duh duhin sangha kan ei a, a man sawi tham a ni si lo; fanghma te, dawnfawh te, zo-purûn te, vai-purûnsen te, vai-purûnvâr te tak kha aw: Kan va râwp ta ve, mana mai lo hi chu thil dang lah a awm si lo,” an ti a. Mana chu chhibung vâr ang deuh, tuikeplung anga vâr hi a ni. An chhar khâwm a, râwt lungah te an râwt dip a, sumah te an dêng a, a chângin an chhûm a, a chângin chhangah an siam a, an ur a, a tui dân chu oliv hriaka hmeh chhang kan ang a ni. Zânah dai tlâk rualin mana chu a lo tla ve ṭhîn. A chhûng chhûngin an phun a, an bûk kawngka bula an âng sup sup chu Mosian a lo hria a. Lalpa chu an chungah a thinur viau tih a hriat chuan Mosia chu a mangang ta hle a. Lalpa hnênah, “Engtizia nge min va timangang ve? Hêng mite mawh hi engtizia nge min phurhtîr, min va khawngaih lo ve? Hêng mite hi ka fate pawh an ni lo va, engtizia nge nau hnute hne lai nuin a pua ang hrima an pate hnêna pêk i tiam ram paw thleng tûra min tih le? Khawi lama sa nge kei tehlulin ka pêk ang? ‘Sa kan châk êm mai, min pe rawh,’ tiin ṭap chungin min rawn nawr buai hi? Keimah mai zawngin hêng mite hi ka tuar dâwn lo, a hahthlâk lutuk. Hetianga min tih dâwn zawngin min khawngaih la, min tihlum zâwk mai teh, heti taka tihretheih hi zawng ka peih ta lo,” a ti a. Lalpa chuan Mosia hnênah, “Mipui zînga hruaitu deuh deuh mi sawmsarih han khâwm la, Inbiakna bûkah rawn hruai la, i bulah lo ding teh se. Ka lo chhuk ang a, ka rawn be dâwn che nia. I chunga thlarau awm kha ka sem ve ang, mipui enkawlna mawh chu nangmah maiin i phur tawh lo vang a, an phurhpui tawh ang che. Mipui hnênah, ‘Naktûk atân inserh thianghlim rawh u, sa in ei dâwn e; ‘sa ei tûr nei teh ila aw, Aigupta rama a tam ṭhin vei nên,’ tia in sa châk ṭap thâwm chu Lalpa beng a thleng a ni; Lalpa chuan sa a pe ngei dâwn a che u, in ei mawlh ang. Ni hnih khat mai ni lo, ni nga emaw, ni sâwm emaw, ni sawmhnih emaw mai pawh ni lo, a thlaa thla khat pumhlûm, luakchhuak hlui khawpin in ei ang a, a ngei hluah hluah ang che u, ‘Engtiziaa Aigupta ram chhuahsan ta mai nge maw kan nih le?’ tiin in zînga awm Lalpa chu in hnâwl a, ṭapin in nawr buai si a,’ ti ang che,” a ti a. Mosia chuan, “Ka mi hruaite hi, mahni kea kal thei ngawt pawh, mi nuairuk zet an ni a, ‘thla khat pumhlûm an ei tûr sa ka pe dâwn’ i ti a, berâm leh ran rual zawng zawng pawh talh ila, an ei khawp a tling dâwn em ni? Tuifinriat sangha zawng zawng pawh man ila, an kham dâwn em ni?” a ti a. Lalpa chuan Mosia hnênah, “Tih theih loh ka nei ta em ni? Ka sawi anga thil a awm dâwn leh dâwn loh i hre mai ang,” a ti a. Mosia chu a chhuak a, Lalpa thu chu mipuite a hrilh a, an upa sawmsarihte chu a hruai a, Biakbûk vêlah chuan a dintîr a. Lalpa chu chhûmah a lo chhuk a, a rawn bia a; a chunga thlarau dah ṭhenkhat chu a la a, mi sawmsarihte chungah chuan a dah a; chutia an chunga thlarau a lo awm veleh chuan zâwlnei angin thu an sawi ta a, rei erawh chu an sawi lo. Sawmsarih zînga tel mi pahnih Eldada leh Medada chu Biakbûk kal ve lovin an riahhmunah an awm a, anni pawh chuan zâwlnei angin thu an sawi ve bawk a. Tlangvâl pakhat hi Mosia hnênah a lo tlân a, “Eldada leh Medadan riahhmunah thu an sawi bual bual mai,” a rawn ti a. Mosia puitu Josua, Nuna fapa chuan, “Ka pu, khap teh,” a ti a. Mosia chuan, “Ngaimawh viauvin mi ring a ni maw? Lalpa chuan a thlarau chu mi zawng zawng pe se, zâwlnei ni vek se tih nâk alai a,” a ti a. Mosia leh upa sawmsarihte chu riahbûk lamah an haw a. Lalpa chuan thli a tlehtîr a, tuifinriat aṭang chuan vahmîm a rawn lên a, tawng hnih vêl leka sânga thlâwkin an bûkah leh a vêl ni khat kal hual chhûngah chuan an ṭum a. Chumi ni leh a tûkah chuan nilêng zânkhuain vahmîm chu an man khâwm a, a man tlêm ber pawhin kuintal sâwm vêl an man a ni; an bûk vêlah chuan ni sa-ah an rêp a. A sa an ei mêk lai chuan Lalpa thin an tiur a, an zîngah hri na tak a lêng ta a. Mi râwp tak takte chu chutah chuan an phûm avângin chu hmun chu Kibrot-hatava an vuah a. Kibrot-hatava aṭang chuan Hazaroth-ah an insawn a, chutah chuan an châm rei ta deuh va. Miriami leh Arona chuan Mosian Kus mi nupuia a neih avângin an hmusit a. “ Lalpa hian Mosia hnênah chauh em ni thu a sawi bîk? Keini pawh min be lo vem ni?” an ti a. Lalpa chuan chu chu a lo hria a. Mosia chu mi inngaitlâwm tak a ni a, khawvêla mi inngaitlâwm thei ber a ni hial ang. Lalpa chuan Mosia te, Arona te leh Miriami te chu a ko va, “Inbiakna bûkah in pathumin lo kal teh u,” a ti ta thut mai a, an kal ta a. Lalpa chu chhûm dingah chuan a lo chhuk a, bûk kawngkaah chuan a ding a. Arona leh Miriami chu a ko va, an va pan a. An hnênah, “Ka thu hi ngaithla teh u, in zînga zâwlneite chuan zêlin emaw min hmu a, mumangah emaw an hnênah thu ka sawi chauh ṭhîn. Ka chhiahhlawh Mosia hnênah chuan chutiangin ka ti ve ngai lo, a kutah ka mi Israel-te ka dah a, inhmatawnin kan inbe ṭhîn a ni, fiah takin thu ka sawi a, tehkhin thu leh thu awmze rûk neiin ka be ngai lo, ka riruang pawh a hmu a ni. Engtizia nge ka chhiahhlawh Mosia hi in hmuhsit ngam le?” a ti a. An chungah chuan a thinur hle a, a kalsan ta mai a. Biakbûk aṭanga chhûm a kian chuan Miriami chu vûr anga vârin a phâr vâr ta uar a. Arona chuan Miriami chu a han en a, a lo phâr reng mai a. Arona chuan Mosia hnênah, “Ka pu, kan ât leh kan sual mawh hi min phurhtîr lo hrâm ang che. Thi leh dam kâra lêng, piangsual saa piang ang êm chuan awm lul suh se,” tiin a ngên a. Mosia chuan Lalpa a au va, “Aw Pathian, tidam hrâm teh, ka ngên a che,” a ti a. Lalpa chuan Mosia hnênah, “A pain a hmaiah chil chhâk sela, zakin ni sarih chu a biru dâwn lâwm ni? Ni sarih chhûng chu daipâwnah dah rawh, chutah in hruai lût leh dâwn nia,” a ti a. Miriami chu daipâwnah ni sarih an dah a, a lo luh leh hma chu an insawn lo. Hazerot chu an chhuahsan a, Paran thlalêrah bûk an khuar a. Lalpa chuan Mosia hnênah, “Hnam tin aṭangin mi fel tak pakhat zêl thlang chhuak la, Israel mite ka pêk tûr Kanan en thlithlai tûrin tîr rawh,” a ti a. Israel mite zînga hotu deuh deuh chu Lalpa thupêk angin hêng mite hi Paran thlalêr aṭang chuan a tîr a. Reubena thlah aṭangin Zakura fapa Samua; Simeona thlah aṭangin Horia fapa Safata; Juda thlah aṭangin Jefunea fapa Kaleba, Isakara thlah aṭangin Josefa fapa Igala; Efraima thlah aṭangin Nuna fapa Hosea; Benjamina thlah aṭangin Rafua fapa Paltia; Zebuluna thlah aṭangin Sodia fapa Gadiela; Josefa fa Manasea thlah aṭangin Susia fapa Gadia; Dana thlah aṭangin Gemalia fapa Amiela; Asera thlah aṭangin Mikaela fapa Sethura; Naftalia thlah aṭangin Vopsia fapa Nabia; Gada thlah aṭangin Makia fapa Geuela. Hêng mite hi ram en thlithlai tûra a mi tirhte chu an ni. Nuna fapa Hosea hming hi a thlâksak a, Josua a vuah a. Mosia chuan Kanan ram en thlithlai tûrin a tîr a, “Heta ṭangin hmâr lamah kal ula, tlângramah khian chho vang che u, eng ang ram nge en thlithlai ula, mi an tam nge tam lo, an chak nge chak lo tih te, an ram chu a ṭha nge ṭha lo, khawpui kulh neiahte nge an chên bûk mai maiah; ram chu a chênghnâwng nge chênghnâwng lo tih te, ngaw a ṭha nge ṭha lo tihte han en thlithlai rawh u, an thei rah ṭhenkhat chu han hâwn ngei ang che u,” a ti a. Grep rah vânglai a ni. Zin thlalêr aṭangin Hamath kalkhân bul Rehob thlengin an fang a. Chhim lam an tlawh chhuak hmasa a, Hebron-ah an kal a. Hetah hian Anaka thlah Ahiman hnam te, Sesai hnam te, Talmai hnam te an la awm a. Hebron khua hi Aigupta khawpui pakhat Zoan khua aiin kum sariha din hmasak a ni. Eskol phai an thleng a, grep bâwr khat chu a ṭang nên an hlep a, pahnihin an zâwn a, theibuhfai te, theipui rahte pawh an lo va. Chu hmun chu an grep rah bâwr chawiin Eskol an vuah a ni. Ni sawmli an thang a, ram an en thlithlai hnu chuan an kîr leh ta a. Mosia te, Arona te leh Israel mipui awmna hmun Paran thlalêra Kades chu an lo thleng a, an thei lawhte chu an entîr a. “Min tirhna ramah chuan kan han kal a, khawizu leh hnutetuia luang ram a lo ni teh meuh mai; thei rahte hi en teh u. A mi chêngte erawh chu mi kawlhsen tak tak an ni, khaw lian tak tak, kulh ṭha deuh deuhvah an awm a, Anak thlah miliante pawh kan hmu ṭeuh mai. Chhim lamah Amalek-ho an awm a, thlang lam ramah Hit mi te, Jebus mi te, Amor mi te an awm a, Mediteranean tuipui kamah leh Jordan lui ruamah Kanan mite an awm,” an ti a. Kaleba chuan Mosia hmaa mipui phun mur mur chu a tingawi ṭhuap a, “I rûn nghâl ang u, an ram chu kan luahlân mai ang, kan tam tâwk a ni,” a ti a. Kaleba kalpuite chuan, “Keini aiin an tam a, kan ngam hauh lo vang,” an ti a. Israel mite zîngah chuan a ṭha lo lamin ram chanchin chu an sawi a. “Kan ram han en thlithlai chu ei khawp thar theihna pawh a ni lo, kan mi hmuhte lah pa lian pui pui an ni. Milian chi, Anak thlahte pawh kan hmu; an lakah khau ang lek kan ni a, anni pawhin khau ang lekin min hmu âwm e,” an ti a. Israel pungkhâwmho chu mangangin an ṭap zânkhua a. Mosia leh Arona chu an dem a, “Aigupta ramah khân lo thi ta zâwk ila a ṭha tûr, he thlalêrah pawh hian thi mai ila a ziaawm zâwk ang. Engtizia nge Lalpa hian indonaa thi tûr leka he rama min hruai le? Kan nupui fanau tê tê pawh hian an tuar ngei dâwn; Aigupta ramah kîr leh zâwk mai ila a ṭha ang,” an ti a. An inrâwn tlâng a, “Aigupta ramah min kîrpui thei tûr hruaitu i ruat ang u,” an ti a. Mosia leh Arona chu Israel pungkhâwmho hmaah chuan hmaia lei siin an kûn a. Ram en thlithlaitute zînga mi Nuna fapa Josua leh Jefunea fapa Kaleba pawh chuan pawi an ti a, an puan an pawtthlêr a, Israel pungkhâwmho hmaah chuan, “Kan ram en chu ram ṭha tak asin. Kan chungah Lalpa a lungnih phawt chuan min hruai ang a, khawizu leh hnutetui luanna ram chu min pe ngei ang. Lalpa lakah nuar lo hrâm rawh u: chûng ram mite chu hlau hek suh u, Lalpa chuan an rinchhan pathian lemte chu a hneh tawh a, bêl chhûnga sa ang mai an ni; hlau suh u,” an ti a. Mahse, pungkhâwmho chuan lunga den hlum an tum a, chutih lai chuan Israel mi zawng zawng hmuh tûrin Lalpa êng chu Inbiakna bûk chungah chuan a êng ta pum a. Lalpa chuan Mosia hnênah, “Eng chen nge maw hêng mite hian min hmuhsit reng dâwn le? Thil mak heti zozai ka tihsak hnu pawhin min la ring lo fo em ni? Hri ka lêntîr ang a, ka tiboral vek mai dâwn e; i fate aṭangin an aia tam zâwk leh thil ti thei zâwk ka din mai teh ang,” a ti a. Mosia chuan Lalpa hnênah, “Aigupta ram aṭangin ropui takin i hruai chhuak a, Aigupta miten an chunga thil tih i tum chu an hriat chuan, he rama awmte hi heti hian an hrilh ngei ang. Hêng mite hian nang, Lalpa hi kan zîngah i tel ve zêl a, chhûma bûk i rawn khuh apiangin nang pawh an hmu ṭhîn che a, chhûnah chhûm dingin i hruai a, zânah pawh mei dingin an hma i hruai ṭhîn tih an lo hre daih tawh a ni. I mite hi i tihhlum vek mai chuan, i hming ṭhatzia hretute chuan, ‘Pêk a tum ramah a hruai thleng thei lo va, an thi zo ta a ni,’ an ti ngei ang le! Tichuan, aw Lalpa, i thiltihtheihzia han tilang la, i thutiam angin han ti teh. ‘Kei, Lalpa hi thinnel tak ka ni a, ngilnei tak, an sualna leh bawhchhiatna ngaidam ṭhîntu ka ni; amaherawhchu, thil tisual ngeite chu ka chhuah lo vang, an pate sualna avângin an fate, an tûte, chhuan thum chhuan li thleng thlengin ka hrem ang,’ i tih kha. I ngilneih avâng leh hêng mite hi Aigupta ram ata tawh i ngaihdam ṭhîn ang khân tûnah pawh ngaidam leh tûrin ka ngên a che,” a ti a. Lalpa chuan, “Mi dîl angin ka ngaidam ang e, Kei, Lalpa hi mi nung ka nih hi, ka ropuina leiah a khat a ni. Ka ropuina hmutu, Aigupta ramah leh thlalêra ka thiltih mak hmututen vawi sâwm chuang min fiah a, ka thu ngaithla duh lotute leh min pawisa lotute hian an pate hnêna pêk ka tiam ram chu an lût ve tawp lo vang. Ka chhiahhlawh Kaleba hi chuan rilru dang a pu a, ka thu a awih êm avângin a va en thlithlai ramah chuan ka hruai ang a, a thlahte chuan chu ram chu an nei ang. Chu ram phaiah chuan Amalek leh Kanan mite an awm avângin naktûkah chuan Tuipui Sen panin kîr rawh u,” a ti a. Lalpa chuan Mosia leh Arona hnênah, “Hêng mi sual tak tak, phunchiar êm êmte hi eng chen nge ka dawh theih ang? Ka laka an phunchiarzia ka hria. An hnênah, ‘Mi nung ka nih hi, in duh ang chu ka tihsak ang che u, kei Lalpa hian ka sawi tawh hi, in thi ang a, in ruang chu thlalêrah hian a let pheng phung ang. In phunchiar êm avângin Nuna fapa Josua leh Jefunea fapa Kaleba te chauh lo hi chuan, kum sawmhnih a chin chung lam rêng rêng chu in hnêna pêk ka tiam ramah chuan in lût tawp lo vang. ‘Kan fanau tê tê hian an tuar ang a’ in tihte hi chu ka hruai lût ang a, a chanchin chauh in hriat ram chu an luah ang. Nangni erawh hi zawng thlalêrah in ruang a thal rem rum dâwn a ni. In fate chu thlalêrah kum sawmli an vâkvai ang a, in thih zawh hma chu in suahsual man in tuar dâwn a ni. Ram en thlithlai tûrin ni sawmli an thang a, ni khat aiah kum khat, a vaiin kum sawmli an vâkvai dâwn a ni, ka lâwm lo a ni tih in hria ang. Nangni mi sual pungkhâwmho, min kalh min kalh vei ṭhînte u, thlalêrah hian in thi phiar ang; kei, Lalpa hian ṭawng ka thlah tâk hi,” a ti a. Ram en thlithlai tûra tirh an lo kîra a ṭha lo zawnga ram chanchin sawia, mipui tilunghnûrtute chu, Lalpa hmaah hri veiin an thi ta a. Ram en thlithlaitute zîngah Nuna fapa Josua leh Jefunea fapa Kaleba chauh chu a dam chhun an ni ta a. Mosian chûng thu chu Israel mite a hrilh a; an lungawi lo hle a. A tûk zîngah chuan an tho va, tlângram lam pan an tum a, “Heti thleng hi kan lo kal tawh a, tûnah zawng Lalpa sawi rama luh kan inpeih ta, kan lo tisual a ni,” an ti a. Mosia chuan, “In hlawhtling dâwn lo tih hre reng chungin engtizia nge Lalpa thupêk in awih loh? Lalpa chuan a awmpui lo vang che u; in hmêlmate lo thah mai mai tûrah chho duh ting suh u. Amalek mite leh Kanan mite in beih ni chuan an khawlaiah in thi ngei ang, Lalpa in zui duh si lo va, a pui lo vang che u,” a ti a. Mahse, tlângram chu bei tûrin an pan lui hrâm a. Thuthlung Bâwm leh Mosia erawh chu an kal ve lo. Amalek leh Kanan mi, chu laia awmte chuan an rawn bei a, an hneh a, Horma thlengin an ûm a. Lalpa chuan Mosia hnênah, “Israel mite chu hrilh rawh. In awmna atân ka pêk tûr che u ram ka hruai thlen hunah che u chuan, bâwngpa te, berâmchal te, berâmpui te, kêl te, Lalpa hnênah hâlral thilhlan atân te, mahni duh thu-a thilhlanah te, kût nikhuaa thilhlanah te in hmang tûr a ni, hêng thil hlan rim hi Lalpa lâwmzâwng tak chu a ni. Berâmchal in hlan dâwn chuan buhbâl thilhlan atân chhangphut ṭha chi kg. hnih leh Oliv hriak litar khat leh a chanve in rawn keng tel tûr a ni. In tûr thilhlanah uain litar khat leh a chanve han keng tel bawk ang che u. Hêng thilhlan hâl hi Lalpa lâwmzâwng tak chu a ni. Hâlral thilhlan atân Lalpa hnêna bâwngpa in rawn hlanin emaw, tiamkam tlâkna thilhlan atân emaw, remna thilhlan atân emaw inhlan rualin chhangphut ṭha chi kg. thum, oliv hriak litar hnih in rawn keng tel tûr a ni. Uain litar hnih pawh in rawn keng tel tûr a ni. Hêng thilhlan rim hi Lalpa lâwmzâwng tak chu a ni. “Bâwngpa te, berâmchal te, berâmpui te leh kêlte in rawn hlan rualin pakhat hisâp zêla in rawn hlan tel tûr chu hêng zât hi a ni. In ran hlan a tam dân azirin hêng thil dang pawh hi in telh tam tûr a ni. Israel mi tawh phawt chuan ei tûr thilhlan Lalpa lawmzâwng hâl tûr a rawn lâk chuan khitiang khian tih tûr a ni. Hnam dang, in zînga piangin emaw, lo awm ve zawkin emaw ei tûr thilhlan Lalpa lawmzâwng an hlan chuan khitiang bawk khian an ti tûr a ni. Mikhual leh khawtual pawhin in thlahte thleng pawhin tih dân thuhmun in hmang tûr a ni. Lalpa hmaah in thuhmun vek si a. Nangni leh in zînga hnam dangte pawhin chûng chu kumkhuain in zâwm tûr a ni,” a ti a. Lalpa chuan Mosia hnênah, “Israel mite chu hrilh rawh: ram ka pêk tûr che u in lo thlena, in buh thar hmasa in ei hunah chuan Lalpa hnêna hlan tûr a ṭhen in dah hrang tûr a ni. In barli thar aṭanga in chhang siam hmasak ber tlang khat pawh Lalpa hnênah in hlân tûr a ni; in buh vuak hmasa Lalpa hnêna in pêk ang bawk khân pêk tûr a ni. Kumkhuain in chhang siam hmasak tlang khat chu Lalpa hnênah in pe ziah tûr a ni. “Mosia hnêna Lalpa thil tuk hi tuin emaw ti lo palh se emaw, hnam pum puiin Mosia hnêna thupêk zawng zawng hi an tih loh palhin emaw, an thil tihsual palh chu chinchâng an hriat loh vâng a nih chuan hâlral thilhlan atân bâwngpa an hlân tûr a ni; a telh tûr bituk zât buhbâl thilhlan leh in tûr thilhlan uain nên; chu chu Lalpa lâwmzâwng chu a ni si a. Sual thawina thilhlan atân kêlpa an hlân tel bawk tûr a ni. Puithiam chuan hnam pum sual chu a thawi ang a, an thil tihsual chu an tih palh tak tak a ni si a; sual thawina thilhlan Lalpa hnêna an hlan tawh avângin ngaihdam an ni tawh ang. Israel hnam pum pui chu, an zînga hnam dang awm vete nên lam ngaihdam an ni ang, an za-in thil an tisual palh a ni. Mi mal pawhin hre lova thil sual a tihpalh chuan, sual thawina thilhlan atân kêlno, a nu, kum khat vêla upa, a hlân tûr a ni. Puithiam chuan maichâmah chu mi sual thawina thilhlan chu a tihsak ang a, ngaihdam a ni tawh ang. Mi malin emaw, a hnam pumin emaw thil tihsual palh thu-ah Israel-te zîngah chuan a khual a tualin he dân hi an zâwm tûr a ni. “Tu pawh, hre reng chunga thil tisual chu khawtual pawh, mikhual pawh, Lalpa sawichhia a ni: in tihlum ngei tûr a ni. Lalpa thu chu a pawisak lova, a thupêkte a bawhchhiat luih avângin tihhlum daih tûr a ni, a sual mawh chu a phur ang.” Vawi khat chu Israel-te thlalêra an awm lai khân mi pakhatin sabat ni-ah thing a fawm a. Mosia te, Arona te leh pungkhâwmho hnênah chuan an hruai a. Engtia tih tûr nge tih a chian mai loh avângin ripah an khung a. Lalpa chuan Mosia hnênah, “Tihhlum tûr a ni, vântlângin daipâwnah lunga den hlum tûr a ni,” a ti a. Lalpa thupêk angin vântlâng chuan daipâwnah an hruai a, lungin an dêng hlum ta a. Lalpa chuan Mosia hnênah, “Israel-te chu hrilh rawh: In silhfên tlâng kilah pehbuk siam ṭhîn rawh u, la dumpâwlin siam ula, thil chîn kumkhuaah in neih dâwn nia. Chu pehbuk chuan ka thupêkte a hriat chhuahtîr ang che u a, in zâwm ṭhîn ang; tichuan, min hawisan lo vang a, mahni duh thu leh mahni châk zâwng angin in khawsa dâwn lo nia. Pehbuk chuan ka thupêk zawng zawng zâwm tûr in ni tih te, ka tâna invawng thianghlim tlat tûr in nih te a hriat chhuahtîr ṭhîn ang che u. In Pathian ni tûrin, kei, Lalpa in Pathian hi Aigupta ram aṭanga hruai chhuaktu che u kha ka ni. Lalpa in Pathian ka nih hi,” a ti a. Levia chi, Kohata thlah, Izara fapa Kora chuan Mosia luahlan a tum a. Reubena thlah Dathana leh Abirama, Peleta fa, Eliaba leh Ona fate chuan an thlâwp a. Israel mi, hruaitua an thlan, pa fel tak tak mi zahnih leh sawmngain an thlâwp bawk a. Mosia leh Arona hnênah a rualin an lo thawk a, “I inlek lu ta, mi tin Lalpa ta kan ni vek a, Lalpa chuan min awmpui ve ṭheuh alâwm. Chuvângin, nang Mosia, eng vangin nge Lalpa mite zînga lal bika i indah?” an rawn ti a. Mosian a lo hriat chuan a bawkkhup a, a ṭawngṭai a. Kora leh a ṭhiante hnênah chuan, “Naktûk zîngah Lalpa chuan ama ta te chu a rawn tifiah mai ang; a mi thlante chauh maichâma an lo kal a phal dâwn a ni. Kora, i ṭhiante nên hian in meilawh keng ula, meiling dah ula, naktûk zîngah Lalpa hmaah rimtui hâl ang che u. Lalpa chuan tu nge a thlan kan hre mai ang. Nangni Levia thlahte hi a ni inlek lu ta chu,” a ti a. Mosia chuan Kora hnênah, “Levia thlahte u, ngaithla teh u. Israel mipui zîng ata a bula awma, Lalpa Biakbûka rawngbâwl tûr te, thil ṭûl apiang mipui lo tihsak tûr tea a serh hrang che u hi thil nêp tak em ni? Chu chanvo ropui tak chu nang leh Levia thlah dangte hi a chantîr che u a, puithiam nih leh zêl in tum a ni maw? Arona chunga i hote nên in vui hi Pathian laka vui in ni asin” a ti a. Mosia chuan Eliaba fa Dathana leh Abirama chu a ko va, anni chuan, “Kan lo kal lo vang, khawizu leh hnutetuia luang ram ata hetiang thlalêr hmuna thi mai tûra min hruai chhuak hi thil nêp tak em ni? I intilal hle lehnghâl a. Khawizu leh hnutetuia luang ram awzâwngah min hruai loh hi; lo te, grep hmun te lah kan nei teuh si lo. Meng ve reng si min bum i tum a nih hi, kan lo kal lo vang,” an ti a. Mosia chu a thinur hle a, Lalpa hnênah, “An thilhlan eng mah lo pawm suh ang che; an chungah eng mah tihsual ka nei lo va, tu sabengtung mah ka lâksak ngai hlei nêm,” a ti a. Mosia chuan Kora hnênah, “Naktûkah i hote nên, Inbiakna bûkah lo kal ula, Arona pawh a lo kal ang. Mahni meilawh rawn keng ṭheuh ula, meiling dah ula, rimtui hâl tûr chu phul ula, maichâmah han keng ang che u, Arona pawhin a rawn keng ang,” a ti a. Tichuan, mahni meilawhah meiling an dah ṭheuh va, rimtui chu an phul a, Inbiakna bûk luhnaah chuan Mosia leh Arona te nên an ding tlâng a. Kora chuan a hote lo kal khâwm chu Inbiakna bûk kawngkaah chuan Mosia leh Arona te chu a hmachhawntîr a, Lalpa ropuina chu mi tin hmuhah a lo lang ta thut a. Lalpa chuan Mosia leh Arona hnênah, “Hêng pungkhâwmho hi inthiar fihlîmsan teh u, ka han tiboral phiar teh ang,” a ti a. Anni chu an bawkkhup a, “Aw Pathian, mi tin nunna hnâr i ni a, mi pakhat sual avângin mi zawng zawng chungah i thinur dâwn em ni?” an ti a. Lalpa chuan Mosia hnênah, “Mipui chu Kora te, Dathana te Abirama te bûk aṭanga insaseng tûrin hrilh rawh,” a ti a. Mosia chu Israel hruaitute chuan an zui a, Dathana leh Abirama hnênah chuan an kal a. Mosia chuan mipui hnênah, “Hêng mi sualho bûk bulah hian tu mah awm suh u, an thil eng mah khawih hek suh u, an sual avângin nangni pawh in ral mai ang,” a ti a. Tichuan, Kora te, Dathana te leh Abirama te bûk aṭang chuan an insaseng a; Dathana leh Abirama pawh an bûk aṭang chuan an lo chhuak a: kawngka bulah chuan an nupui leh an fanau te nên chuan an ding a. Mosia chuan mipui hnênah, “Pathianin hêng thil hi ti tûrin min tîr a ni tih in hria ang, ka duh thu-a ti ka ni lo ve. Hêng mite hi thih dân pangngaia an thiha, danglam deuhva hrem an nih loh chuan min tîr a ni lo vang. Lalpa hian thil la hriat ngai loh a rawn tiha, lei a khîk phuka, an thil neih zawng zawng nên a nung chunga mitthi khuaa an chhuk chuan hêng mite hian Lalpa chu an hnâwl ngei tihna a ni ang,” a ti a. A sawi zo hman chiah a, Dathana leh Abirama awmna lei chu a kak phuk a, an chhûngte leh Kora ho mi dangte pawh chu an neih zawng zawng nên an tla pil ta vek a. Tichuan, an neih zawng zawng nên mitthi khuaah an chhuk ta a ni: lei kak chu a ping leh a, anni chu an pil bo ta a. Chuta awm ve Israel mi zawng zawng chuan ṭê teng tung thâwm an hriat chuan an tlânchhia a, “Tlân rawh u, kan tla pil ve mai ang e,” an ti a. Lalpa chuan mei a rawn tîr a, rimtui hâltu mi zahnih leh sawmngate chu a rawn kâng hlum ta vek a. Lalpa chuan Mosia hnênah, “Puithiam Arona fapa Eleazara hrilh rawh: Kâng hlum tate dâr meilawh ken kha chhar khâwm sela, a meihawlte chu daipâwnah paih rawh se; dâr meilawh zawng zawng kha serh hran tawh a ni si a. Lalpa maichâma hlan an nih khân thil thianghlim an lo ni ta si a. An sual vânga kâng hlum tate meilawh chu la khâwm la, chhu pêr la, maichâm chhînah siam rawh, Israel mite tân ṭihkhai a ni dâwn nia,” a ti a. Puithiam Eleazara chuan meilawh chu a la khâwm a, a chher phêktîr a, maichâm chhîn chu a siam ta a. Arona thlahte tih loh chuan maichâmah Lalpa tân tu man rimtui an rawn hâl tûr a ni lo tih Israel-ten an hriatna tûr a ni ta a. Kora leh a fate angin an thi ve mai ang. Eleazara hnêna thupêk, Mosia hnêna Lalpa sawi ang chuan hêng hi an ti a. A tûkah chuan Israel pungkhâwmho zawng zawng chuan Mosia leh Arona chu an dem a, “ Lalpa mite in tihlum vei a,” an ti a. Mipuiin Mosia leh Arona an zim luai luai lai chuan Inbiakna bûk an han en a, chhûmin a lo khuh a, Lalpa ropuina chu an hmu a. Mosia leh Arona chu bûk kawtah an kal a. Lalpa chuan Mosia hnênah: “Mipui zîng ata kha lo kal hrang teh, ka han tihlum phiar teh ang,” a ti a. An pahnih chuan hmai lei siin an kûn a. Mosia chuan Arona hnênah, “I meilawh kha keng la, maichâm mei saw va rût la, mipui zîngah, an sual thawi nân rimtui va hâl thuai teh; Lalpa thinurna chu a lo thleng dêr tawh a nia; hmanhmawh rawh, hri an vei ṭan e,” a ti a. Arona chuan Mosia thu chu a awih a, mipui zîngah a va kal chuan hri an lo vei nual tawh a; rimtui chu a hâl a, mipui sualna chu a thawi ta a. A thi leh a la damte inkârah chuan a ding a, hri chu a kiang ta a. Kora helna avânga thite chu an vaiin mi sîngkhat leh sângli leh zasarih an ni. Hri a reh hnu chuan Arona chu Inbiakna bûkah Mosia hnênah chuan a kal leh ta a. Lalpa chuan Mosia hnênah, “Israel mite hrilh rawh: tiang sâwm leh pahnih, hnam tin hruaitu tân pakhat zêl rawn la teh se. Levia chite tiangah chuan Arona hming ziak ang che; hnam khat hruaitu hming an tiangah chuan a chuang zêl tûr a ni. Inbiakna bûkah, Thuthlung Bâwm hma, kan inbiakna ṭhinah, i dah dâwn nia. Ka mi thlan chu tu ber hi nge in hriata, tu mah in vui tawh loh nân ka mi thlan tiang chu ka chawrtîr dâwn a ni,” a ti a. Mosia chuan Israel-te chu a hrilh a, hnam hruaitute chuan tiang pakhat ṭheuh an rawn pe a, a vaiin sâwm leh pahnih a ni; Arona tiang pawh a tel ve. Mosia chuan bûk chhûng Thuthlung Bâwm hmaah chuan a dah a. A tûk zîngah chuan Mosia chu Inbiakna bûkah chuan a lût a, Arona tiang Levia thlahte hminga dah chu a lo chawr a, a kuhmûm a, a pâr a, theitê a lo rah a. Mosia chuan tiang zawng zawng chu Lalpa hma ata chu a la chhuak a, Israel-te chu a entîr a, mahni tiang tiang an la ta sang sang a. Lalpa chuan Mosia hnênah, “Thuthlung Bâwm hmaah Arona tiang chu dah leh rawh; Israel mi, hel chîngho hi an vui leh chuan an thi mai ang tih hriatna tûrin dah reng ang che,” a ti a. Lalpa thupêk ang chuan Mosia chuan a ti ta a. Israel mite chuan Mosia hnênah: “Chuti chu kan va thi rem rum mai âwm ve? Lalpa Biakbûk bul hnaihtu ngawt pawh an thih chuan kan va mang mai âwm ve!” an ti a. Lalpa chuan Arona hnênah, “Nang leh i fate leh Levia chite hian Inbiakna bûka rawngbâwl hna tihdik lohvah mawh in phur ang; puithiam rawngbâwlna bîka tihsual mawh chu nang leh i fate chauhvin an phur ang. In laichîn, Levia chite chu, bûka in rawngbâwl hna thawh ṭanpui tûr che uin pun rawh u. An puibâwm ang che u a, bûk enkawl hna hi an mawhphurhna a ni ang; amaherawhchu, hmun thianghlim leh maichâm thil serh chu an khawih ve tûr a ni lo, an khawih hlauh chuan nangni pawh, anni pawh in thi mai ang. Bûka rawngbâwl hna zawng zawngah an pui ang che u a, an hna chu anmahni ngeiin an tifel tûr a ni; mi dang mi narânin an pui tûr che u a ni lo. Nang leh i fate chauhvin Hmun Thianghlim leh maichâm chu in enkawl tûr a ni, Israel-te chungah ka thinur leh thut loh nân. I laichîn Levia chite hi nangmah ṭanpui tûra Israel-te zîng ata ka thlang chhuak a, thilpêka petu che kei hi ka ni. Inbiakna bûka thawk tûrin ka tâna serh hran an ni tawh, Hmun Thianghlim Bera awm leh maichâma puithiam rawngbâwl hna erawh hi chu nang leh i fate chauhvin in ti tûr a ni. Puithiam hna hi ka pe che u a; chuvângin, hêng hi in mawhphurhna a ni, mi narânin an tih ve chuan tihhlum tûr an ni,” a ti a. Lalpa chuan Arona hnênah, “Israel miten ka hnênah thên thilhlan an rawn hlan, serh hran tawh rêng rêng chu nang leh i fate hnênah puithiam sa atân kumkhuain ka pe a che u. Buhbâl thilhlan te, sual thawina thilhlan te, bawhchhiat man thilhlan te an rawn hlân a, maichâma hâl bâng zawng zawng chu in chan tûr a ni. Hmun Thianghlimah ngei chûng sa chu in ei tûr a ni, mipa chauhvin ei tûr a ni: thil serh a ni e. “Israel mite thilhlan chi hrang hrang, thêna hlan rêng rêng chu, in fapate in fanute nêna kumkhuaa in chanpual atân ka pe a che u, in chhûng zînga mi thiang apiang chuan in ei thei ang. “Oliv hriak fîm ber te, uain thlum ber te, vaimîm ṭha ber te Israel miten min pêk ṭhin tûr chu ka pe a che u, in ta tûr a ni; An ram chhûnga an theirah hmin hmasa Lalpa hnêna an rawn hlante pawh in chan tûr a ni. In chhûng zînga a thiang apiangin in ei thei ang. Israel-te zînga kawh bîk nei thilhlan tih loh chu in ta vek tûr a ni. “Mihring pawh, ran pawh, a piang hmasa ber, chhûl keutu, Israel-ten Lalpa an pêk ṭhin chu, in ta tûr a ni; mihring leh ei thiang lo ran chu, tlan theih a ni ang. Naupang thla khat chin tlanna tûr chu biakbûka an hman lai mêk tangkaraw sekel nga bûk a ni ang. Bâwng no te, berâmno te, kêlno te, hrin hmasak chu tlan theih a ni lo vang, serh hran an ni. Talh tûr a ni a, a thisen chu maichâma theh tûr a ni a, a thau pawh maichâma hâl ral tûr a ni: chu chu Lalpa lâwmzâwng tak chu a ni. Thên thilhlan angin a irno leh a bawp chu in ei ve tûr a ni. “Israel-ten ka hnêna thên thilhlan an rawn ken chu in fanu leh in fapate nêna in chan kumkhua atâna ka ruat a ni. Hei hi nang leh i thlahte nêna ka kumkhaw thuthlung bawhchhiat loh tûr chu a ni.” Arona hnênah Lalpa chuan, “Ro atân ram i nei ve tûr a ni lo va, Israel miten ram an sem ve tûr che a ni hek lo. Kei hi i ro, Israel-te zînga i chanvo chu ka ni. “Levia chite chu Inbiakna bûk an enkawl hah manah Israel miten sâwma pakhat an pêk hi an chanvo atân ka ruatsak a ni. Tûn chinah chuan Israel-te hi Inbiakna bûk bulah an lo kal tûr a ni tawh lo, thil sual an tipalh ang a, an thi dah ang e. He dân hi in thlahte tân pawh a ni. Israel ramah Levia chite hian in-lo-ram nghet an nei ve tûr a ni lo. Israel miten sâwma pakhat ka hnêna an pêk chu, an tân dah hran a ni; chuvângin alâwm, ‘ram insemnaah chan in nei ve tûr a ni lo’ tia ka sawi ni,” a ti a. Lalpa chuan Mosia hnênah, “Levia chite chu hrilh rawh: Israel mite hnên aṭanga in dawn, in chan atâna Lalpa ruat aṭanga sâwma pakhat chu Lalpa tân in pe ve tûr a ni. Chu chu hruiha an buh vuakte leh uain khura an uain tling an pe ṭhîn ang bawkin in pe ve ang a, pawmsak in ni ang. Israel mite hnên aṭanga sâwma pakhat in dawn, Lalpa hnêna sâwma pakhat in pêk ve chu, puithiam Arona hnênah in pe ve tûr a ni. In thil dawn zînga a ṭha berte chu Lalpa tân hlân ve leh zêl rawh u; buh thar leh uain thar anga ngaih a ni ang. Lo neituin a ṭhen a nei ta angin nangni pawhin in pêk bâng chu in nei ve dâwn nia. Chûng chu Biakbûk enkawl hna in thawh hlawh a ni a, in chhûngte nên in duh duhnaah in ei thei ang. A ṭha ber Lalpa hnêna in hlan tawh chuan a bâng chu ei mah ula, in tisual lo ve; in hlan loh erawh chuan Israel-te thilpêk thianghlim tibawrhbâng in ni ang a, in thi mai ang,” a ti a. Lalpa chuan Mosia leh Arona hnênah, “Israel-te hnênah Lalpa thupêk hi hrilh rawh u. Bâwngla sen, hmêlhem lo, leileta la chhawr ngai loh, in hnêna rawn kai tûrin hrilh rawh u. Puithiam Eleazara pe sela, ani chuan riahhmun pâwn, daiah a kalpui ang a, a hmuh ngeiah a talhtîr tûr a ni. Puithiam Eleazaran a thisenah chuan a zungṭang a chiah ang a, Inbiakna bûk kawt lam hawiin vawi sarih a theh tûr a ni. Bâwngla chu a vun te, a sa te, a thisen te leh a ek te nên a hmuh ngeiah a hâltîr tûr a ni. Puithiam chuan sidar thing te, husop te, la sen te a la ang a, bâwngla hâlna meiah chuan a rawh tûr a ni. Puithiam chuan a silhfênte chu a su ang a, a inbual tûr a ni; chumi zawhah riahhmunah a lo lût thei ang; mahse, tlai thlengin a bawlhhlawh ang. Bâwngla hâltu pawh khân a silhfênte chu a su ang a, a inbual tûr a ni: tlai thlengin a bawlhhlawh ang. Mi thiang, bawlhhlawh lovin, bâwngla vâp chu a rût khâwm ang a, Israel pungkhâwmho tâna hman tûrin hmun serhah chuan a dah ṭha ang; sual tlenfaina tui theh tûrah phul ṭhin tûr a ni. Bâwngla vâp rût khâwmtu pawh chuan a silhfên a su ang a, tlai thlengin a bawlhhlawh ang. Hei hi Israel mite leh an zînga hnam dang chêng vete tân kumkhaw dânah neih tûr a ni. “Tu ruang pawh ni se, mitthi ruang rêng rêng khawih chu, ni sarih chhûng an bawlhhlawh ang. Chu mi chuan a ni thum ni-ah leh a ni sarih ni-ah thenfaina tui khân a inthehtîr tûr a ni; tichuan, a lo thiang tawh ang; a ni thum ni-ah leh a ni sarih ni-ah tuia theh thianghlim a nih loh chuan a bawlhhlawh reng ang. Tu ruang pawh ni se, mitthi ruang rêng rêng khawih chuan tui hmang hian a intithianghlim tûr a ni; tui hi theh a nih loh chuan a bawlhhlawh a, a bawlhhlawhna chu a la reh lo a ni; Lalpa hmun thianghlim chu a tibawrhbâng a, Israel mite zîng ata ensan tûr a ni. “Bûk chhûngah mi a thihin a chhûnga awmte leh a bula lo lût apiang ni sarih chhûng an bawlhhlawh ang. Bungbêl te, tuibêlte pawh chhin loh chu ni sarih chhûng a bawlhhlawh a ni. Indonaa thi ruang te, tâmlaka tlu hlum ruang te, mihring ruh te, thlân te khawih apiang chu ni sarih chhûng an bawlhhlawh ang. “Chutiang bawlhhlawh chu hetianga then fai tûr a ni: Novin tui luang lai an suak ang a, sual thenna tûr bâwngla vâp kha phul tûr a ni. Mi thiangin tuiah chuan husop a chiah ang a, chu chuan bûk te, a chhûnga thil awm zawng zawng te, a chhûnga mi zawng zawng te a theh ang a; chutiang bawkin râl thi ruang te, tlu hlum ruang te, mihring ruh leh thlân khawihtute chu a theh tûr a ni. Mi thiang chuan mi bawlhhlawh chu a ni thum ni leh a ni sarih ni-in tui chuan a theh tûr a ni; ani chuan a silhfên a su ang a, a inbual bawk ang a, tlaiah a lo thianghlim tawh ang. Chutianga bawlhhlawh chu a inthen fai duh lohva, thenfaina tuia theh a nih loh chuan a bawlhhlawhna chu a reh lo va, Lalpa Hmun Thianghlim a tibawrhbâng a ni a, Israel miten an ensan tûr a ni. Tui theh tûr thehtu pawh chuan a silhfên a su tûr a ni, tui theh tûr khawihtute chu tlai thlengin an bawlhhlawh a ni. Mi bawlhhlawhin a khawih apiang a bawlhhlawh ve a, chu mi bawlhhlawh khawihtu pawh chu tlai thlengin a bawlhhlawh a ni.” Thla khatnaah chuan Israel mite chu an za-in Zin thlalêr an thleng a. Kades-ah chuan an châm a, Miriami chu a thi a, an phûm ta a. Israel mite chuan tui an nei lo va, Mosia leh Arona chu an rawn hual a, Mipui chuan Arona chu an chhâl a, “Kan unaute thih rual khân Biakbûk kawtah khân lo thi ve ila a ṭha zâwk tûr. Engtizia nge kan rante nêna thi mai tûra he thlalêra Lalpa mite hi min hruai luh le? Engah nge Aigupta ram ata hetiang ram ro takah hian min hruai le? Buh chîn theihna tûr pawh a nih loh hi, theipui te, grep te, theibuhfaite han ṭha rual a ni hlei nêm, in tûr takngial pawh tui a awm loh hi,” an ti a. Mosia leh Arona chuan mipui chu an kalsan a, Inbiakna bûk kawngkaah lei siin an kûn a, Lalpa ropuina chu an hmuhah a lo lang a, Lalpa chuan an hnênah, “Tiang kha la la, Israel-te chu i u Arona nên ko khâwm rawh u; an hmaah, saw lungpui saw, tui tichhuak tûrin hrilh ang che u; lung aṭang chuan pungkhâwmho leh an rante in tûr tui a lo chhuak mai ang,” a ti a. Lalpa thupêk angin Mosia chu a kal a, tiang chu a la a, Arona nên Israel pungkhâwmho chu lungpui bulah chuan a ko khâwm a, Mosia chuan, “Hel hmangte u, in in tûr tui lungpui aṭang hian kan lâk chhuahsak dâwn che u em ni?” a ti a. Mosia chuan a bân a phar a, tiang chuan lungpui chu vawi hnih a vua a, tui a lo chhuak ta hawk hawk a; pungkhâwmho leh an rante chuan an in ta a. Lalpa chuan Mosia leh Arona hnênah, “Min ring lo va, Israel-te hmaah min chawimawi loh avângin ka pêk tûr ramah chuan hêng mite hruai lûttu in ni dâwn lo ve,” a ti a. Israel miten Lalpa an chhuahchhalhna hmuna tui hi Meriba tui an vuah ta a ni; anmahni avâng chuan a thianghlimzia a tilang ta a. Kades aṭang chuan Edom lal hnênah Mosian palai a tîr a, “In unau Israel-ten hrehawm tam tak an tuar thu in lo hre tawh châwk ang a. Min thlahtute chu Aigupta ramah an pêm lût a, kum tam fe kan awm a, Aigupta mite chuan kan pate nên min tiduhdah hle a. Kan mangangin Lalpa kan au va, anin kan aw a lo ngaithla a, Aigupta ram aṭangin min hruai chhuak tûr vântirhkoh a rawn tîr a; ngai teh, in ram chhim tâwp Kades kan lo thleng ta. Kan ngên a che, in ram hi kalkawngah ka rawn hmang ang e; lovah te, grep hmunahte kan kal lo vang a, in tuikhur pawh kan rawn ṭâwm lo vang che u. Lamlianpuiah kan kal ang a, in ram kan kal pelh hma chu ding lamah emaw, vei lamah emaw kan pêng hauh lo vang,” tiin thu a chah a. Edom lal chuan, “Ka rama in lo luh vaih chuan khandaihin ka bei ang che u,” a lo ti a. Israel mite chuan, “Lamlianpuiah kein kan kal ang, kan rante nên in tui kan in chuan a man kan pe ang che u, in pawi kan khawih hauh lo vang,” an tih pawhin Edom lal chuan, “In kal ka phal lo,” a ti tlat a. Anni lo dang tûrin Edom lal chu mi tam fe nên a lo thawk chhuak a. Edom lal chuan an rama an kal tlang a phal tâk loh avâng chuan Israel-te chu an kîr ta a. Israel fate chu an vaiin an kal leh ta a, Hor tlâng an va thleng a. Edom ramri bul a la ni a, tah chuan Mosia leh Arona hnênah Lalpa chuan, “Israel mite hnêna pêk ka tiam ramah chuan Arona hi a lût ve dâwn lo, in pahnihin Meriba-ah khân ka thupêk in awih loh avâng khân. Arona leh a fapa Eleazara chu Hor tlângah hruai la, chutah chuan Arona puithiam kawr chu hlihsak la, Eleazara hâktîr ang che, Arona chu a thi mai dâwn a ni,” a ti a. Lalpa thupêk ang chuan Mosia chuan a ti a, mipui hmuhah tlângah chuan an chho va. Mosia chuan Arona puithiam kawr chu a hlihsak a, Eleazara chu a hâktîr a. Tlângchhîpah chuan Arona chu a thi ta a; Mosia leh Eleazara chu an lo chhuk a. Israel pungkhâwmho chuan Arona thih thu chu an hria a, ni sawmthum an sûn a. Kanan ram chhim lama Kanan mi Arad lal chuan Israel-te chu Atharim lamah an lo kal tih a hriatin a lo bei a, mi ṭhenkhat chu a man a. Israel-ho chuan Lalpa hnênah thu an intiamkam a. “Hêng mite hi min hnehtîr chuan i tân an khuate lamin kan hlân vek ang a, kan tiboral vek ang,” an ti a. Lalpa chuan a lo hria a, chûng Kanan mite chu a hnehtîr a. Israel-te chuan an that vek a, an khuate pawh chu an tichhe vek a, a hmun hmingah Horma an vuah a. Hor tlâng aṭang chuan an kal zêl a, Edom ram hêlna, Tuipui Sen kawng lamah chuan an kal a, a kawng a kual avângin an ning a. Mipui chu Pathian leh Mosia lakah an vui a, “Engah kher nge Aigupta ram ata he thlalêra thi mai tûra min hruai chhuah? Chaw a awm si lo, tui lah a awm hek lo, he mana chhang teivet lah hi kan ning hlui tawh si,” an ti a. Lalpa chuan rûl chuk na tak a tipuang a, Israel mi tam tak chu an chu hlum a. Mipui chu Mosia hnênah an lo kal a, “Thil sual kan ti a ni, Lalpa chungah leh i chungah kan vai hian thil dik lo kan ti a ni; rûl tirêm tûr hian Lalpa min ngensak rawh,” an ti a. Mosian mipui chu a ṭawngṭaisak a. Lalpa chuan Mosia hnênah, “Dârin rûl lem siam la, mi tin hmuh theih tûrin thingtlâwn lêrah khai rawh; rûl chuk apiangin chu chu an en chuan an dam zêl ang,” a ti a. Mosia chuan dârin rûl lem a siam a, thingtlâwn lêrah a khai a, rûl chuk apiangin dâr rûl chu an en phawt chuan an dam ta zêl a. Israel-te chu an kal zêl a. Obot-ah bûk an khuar a; chu hmun chu an chhuahsan a, Moab ram chhak lam thlalêrah Abarim khaw ramah bûk an khuar leh a. Zered ruamah bûk an khuar leh a, chuta ṭang chuan an insawn leh a, Arnon lui hmâr lamah bûk an khuar leh a; Arnon lui chu Amor ram dep thlenga awm a ni, Amor leh Moab ramri lui a ni. He lai ram hi ‘ Lalpa indona’ tih lehkhabu-ah chuan ‘Sufa ruama Vahep khua Arnon ruam te, Ar khaw lama thluang, Moab ri dep ram awihtlân pangpêr,’ tih a ni. Chuta ṭang chuan Beer an tih chu an thleng a; chu hmun chu tuichhunchhuah awmna a ni. Lalpa chuan, “Mipui ko khâwm rawh, tui ka pe dâwn,” a ti a, chu tuichhunchhuah chu a pe a nih kha. Israel-te chuan he hla hi an sa a, ‘Aw tuichhunchhuah, lo chik chhuak teh, Zaiin kan lo awi ang che. Mi lian leh hnam hruaitute laih Lal tiang leh talhfiak leka an laih chu,’ tiin. Thlalêr aṭang chuan Matana-ah an insawn a. Nahaliel-ah an kal zêl a, Bamot an thleng a. Bamot aṭang chuan Moab ram phai, Pisga tlâng ṭhut an thleng a. Chu tlângchhîp aṭang chuan thlalêr chu a lang vek a ni. Israel fate chuan Amor lal Sihona hnênah palai an tîr a. “I ramah kan kal tlang ang e, kan rante nên in lovah te, in grep hmunahte kawngpui ata kan pêng lo vang a, in tuichhunchhuah tui pawh kan chawi lo vang, in ram kan pelh hma chu Lamlianpuiah chauh kan kal ang,” an ti a. Sihona chuan Israel-ten an ram an kal tlang chu a lo phal bîk awzâwng lo va, lo dang tûrin a mite a khâwm a, thlalêr Jahaz hmunah a lo kal a, Israel-te chu a lo bei a. Israel-te chuan an lo that ṭeuh va, an ram hmâr lam, Arnon lui aṭanga Jabok lui thlengin an neihsak ta a. Jabok hmâr lam chu Amon mite ram a ni; anni chuan an ramri chu an lo vêng hneh hle a ni. Israel-te chuan Amor-ho khawpuite chu an la vek a; khawpuiahte chuan Israel-te chu an awm ta a. Hesbon leh a chhehvêl khuate pawh an luahsak vek a. Hesbon chu Amor lal Sihona khawpui a ni. Tûn hmain Moab lal nên an inbei a, Arnon lui thlengin Moab ram chu a lo chhuhsak tawh a ni. Chuvângin, hetiangin hla an phuah a: Sihona khawpui Hesbon-ah lo kal ula, I din ṭhain i sa ṭha leh ang u; Hesbon aṭangin mei a chhuak a, Sihona khawpui chu a kâng a, Moab ram Ar khua a kai a, Arnon lui hmârthlang ramte chu a kâng fai e. Moab mite tak chu aw! Khemosa betute chu an chhe zo ta, A betute chu an râltlân a; A fanute chu salah an man, Amor lal Sihona hote chuan. Hesbon chu a chhe ta, Dibon thlengin thalin kan kâp; Nofa thlengin kan tiram, Medeba bula awm chu. Israel-te chu Amor ramah chuan an awm ta a. Jazer khaw beih dân tûr en thlithlai tûrin Mosian mi a tîr a. Israel-te chuan a chhehvêl khuate nên an la a, chûng khuaa awm Amor mite chu an hnawt chhuak vek a. An lo kual a, Basan lal Oga chuan lo dan a tum a, a mite a pun ṭeuh va. Edrei hmunah Israel-te chu a va bei a. Lalpa chuan Mosia hnênah, “Ani chu hlau suh, a mi zawng zawngte leh a ram chu i kutah ka pe tawh a che; Hesbon khaw lal Sihona chunga i tih ang khân a chungah pawh ti ang che,” a ti a. Tichuan, ani chu a fate nên an that a, a mite pawh bâng awm miah lovin an tihlum a, a ram chu an neihsak ta a. Israel mite chu an insawn zêl a, Moab ram phai, Jordan lui chhak lam Jeriko zâwnah bûk an khuar ta a. Zipora fapa Balaka chuan Amor mite chunga Israel-te thil tih chu a hmu a. Israel mite chu an tam êm avângin Moab mite chuan an hlau hle a. Moab-ho chuan Midian hotute hnênah, “Bâwngin hnim a pet duak duak ang hian hêng mite hian kan chhehvêl mi zawng zawng hi min ei zo vek dâwn alâwm,” an ti a. Chutih laia Moab lal chu Zipora fapa Balaka a ni. Eufretis lui kama Pethor khua, a laichînte awmna rama awm, Beora fapa Balaama ko tûrin mi a tîr a. “Aigupta ram aṭangin mi tam deuh an lo chhuak a, ram an dâp a ni ngawt mai. Kan ram min chhuhsak vek dâwn alâwm; khawngaih takin lo kal la, hêng mite hi ngam rual an ni si lo va, ânchhia min lawhsak teh, kan ngamin kan ram ata kan ûm bo thei mial mahna, mal i sâwmsakte chu an nihlawh ṭhîn a, ânchhia i lawhte chu an chan a chhe ṭhîn tih ka hre si a,” ti tûrin a tîr a. Moab upate leh Midian upate chu aien man tûr kengin an kal ta a. Balaama hnên an thleng a, Balaka thu chu an hrilh a. Ani chuan an hnênah, “Zânin chu riak ula, Lalpa thu ka dawng mahna, ka hrilh ang che u,” a ti a. Moab miliante chu Balaama inah chuan an riak ta a. Balaama hnênah Pathian a lo kal a, “I mikhualte khu tute nge ni?” a rawn ti a. Balaaman Pathian hnênah chuan, “Moab lal Zipora fapa Balaka mi tirhte an ni. ‘Aigupta ram aṭangin mi tam deuh an lo chhuak a, ram an dâp a ni ngawt mai; lo kal la, ânchhia mi han lawhsak teh, kan hneh theiin kan ram ata kan ûm bo thei mahna, an rawn ti,” a ti a. Pathian chuan Balaama hnênah, “Kal suh, chûng mite chu ânchhia i lawh tûr a ni lo, ka mi duhsakte an ni e,” a ti a. Zînga an thawh chuan Balaaman Balaka miliante hnênah, “In ramah haw leh mai rawh u, Lalpa chuan ka kal a phal lo ve,” a ti a. Moab miliante chu an tho va, Balaka hnênah an kîr a, “Balaama chu a lo kal duh lo,” an ti a. Balaka chuan mi zahawm zâwk mi dang a tirh belh leh a. Balaama hnên an lo thleng a, “Zipora fapa Balaka chuan heti hian a ti. ‘Eng mahin ka hnêna i lo kal dâl suh se. Nasa takin ka chawimawi ang chia, i sawi apiang ka ti zêl ang, hêng mite hi ânchhia min lawhsak phawt mai teh’ a ti,” an ti a. Balaka ṭhuihruaite chu Balaama chuan a chhâng a, “Balaka chuan a in khat tangka leh rangkachak mi pe mah sela, ka Pathian Lalpa thu chu, a tê emaw, a lian emaw, ka bawhchhe thei lo. Zânin chu riak phawt mai teh u, Lalpa chuan eng nge a sawi ka han ngaichâng ang e,” a ti a. Zânah chuan Pathian chu Balaama hnênah a lo kal a, “Hêng mite hi ko tûr che-a lo kal an nih chuan, zui mai rawh; mahse, ka hrilh che chauh i ti tûr a ni,” a ti a. Zîngah Balaama chu a tho va, a sabengtung a siam a, Moab miliante chu a zui ta a. A kal ve tâk mai avâng chuan Pathian chu a thinur hle a, lo dang tûrin Lalpa vântirhkoh chu kawngah a lo ding a. Sabengtung chunga chuang a ni a, a chhiahhlawh pahnihin an zui bawk a. Sabengtung chuan Lalpa vântirhkoh khandaih kenga kawnga a ding chu a hmu a; rampalailêngah hêl a tum a; kawnga kîr leh tûrin Balaama chuan a vua a. Lalpa vântirhkoh chu grep huanpal leh pal inkârah, kawng laiah a lo ding a. Sabengtung chuan Lalpa vântirhkoh chu a hmu a, pal nêkin a kal a, Balaama ke chu palah chuan a nghêng bet a, Balaama chuan a vaw leh a. Lalpa vântirhkoh chu a insawn a, kawng zîm lai, inpelh theih hauh lohna laiah chuan a lo ding leh a. Sabengtung chuan Lalpa vântirhkoh chu a hmu a, Balaama chu a bawhpui ta ngawt a. Balaama chu a thinur hle a, sabengtung chu a vaw ta ṭhuai ṭhuai a. Lalpa chuan sabengtung chu a ṭawngtîr a, “Thil sual eng nge ka tih vawi thum tlawng mi vuak tâk le?” a ti a. Balaama chuan sabengtung hnênah, “Min pawisa lo êm alâwm, khandaih phei chu keng ila, ka sât hlum hial tawh ang che,” a ti a. Sabengtung chuan Balaama hnênah, “I sabengtung, tûn thleng pawha i chuanna reng ṭhin ka ni a, hetiang hian ka ti ngai em ni?” a ti a. Ani chuan, “Ti ngai lo ve,” a ti a. Lalpa chuan Balaama mit chu a tihvârsak a, khandaih kenga Lalpa vântirhkoh kawnga ding chu a hmu ve ta a, a kûn a, lei siin a bawkkhup ta a. Lalpa vântirhkoh chuan, “Engtizia nge ṭum thum ngawt i sabengtung i vuak le: Ka duh loh anga i kal luih avângin kawnga dang tûr chein ka lo thawk chhuak a ni. Sabengtung chuan min hmu a, ṭum thum min pelh a tum a, pêng ṭhîn lo se ka lo that mai ang che, ani erawh chu ka zuah ang,” a ti a. Balaama chuan Lalpa vântirhkoh hnênah, “Thil ka tisual a ni e, mi lo dang tûrin kawngah i ding tih ka hre lo a ni; chuvângin, i lâwm loh zâwng ti ka nih chuan ka kîr leh mai ang,” a ti a. Lalpa vântirhkoh chuan Balaama hnênah, “Hêng mite hi zui rawh, i hnêna ka sawi chauh i sawi chhâwng tûr a ni,” a ti a. Tichuan, Balaama chu Balaka miliante rual chuan a kal ve ta zêl a. Balaama a lo kal tih a hriat chuan Balakan an ramri tâwp, Arnon lui kama Ir-Moab khuaah hmuak tûrin a kal a. Balaka chuan, “Ṭhahnemngai takin ka rawn kohtîr che a, engtizia nge i lo kal duh mai loh le? Mi ropui takah ka siam thei lo che em ni?” a ti a. Balaama chuan Balaka hnênah, “Ngai teh, ka lo kal na a, thu dang sawi thei em ka nih? Pathian min sawitîr chauh ka sawi ang,” a ti a. Balaama chu Balaka rual chuan a kal ve ta a, Kiriat-huzot an thleng a. Balaka chu bâwngpate leh berâmtein a inthawi a. Balaama leh a kalpui miliante chu a sa ei atân a sâwm a. A tûkah chuan Balaka chuan Balaama chu a hruai a, Bamot-baal-ah a kalpui a; chuta ṭang chuan Israel mite chu an hmu thei a. Balaama chuan Balaka hnênah, “Maichâm pasarih mi siamsak teh, bâwngchal pasarih leh berâmchal pasarih han la bawk ang che,” a ti a. Balaama sawi ang chuan Balaka chuan a ti a; an pahnih chuan maichâm tinah bâwngchal leh berâmchal pakhat zêl an hlân a. Balaama chuan Balaka hnênah, “Mi be tûrin Lalpa a lo kal dâwn nge dâwn lo ka va ngaichâng ang e. Hâlral thilhlan hi in lo vil dâwn nia, min hrilh apiang ka hrilh leh ang che,” a ti a. Pathian chu a lo kal a, Balaama chuan a hnênah, “Maichâm chu ka siam a, bâwngchal pakhat leh berâmchal pakhat pawh ka hlan ta e,” a ti a. Lalpa chuan Balaka hnêna sawi tûr Balaama chu a hrilh a. Balaka hnênah chuan a kîr a, a zu thlen chuan Balaka leh Moab miliante chu hâlral thilhlan maichâm bulah chuan an lo la ding reng a. Balaama chuan hetiang hian thu a chham ta a: “Aram tlângram ata Moab lal Balakan min ko va, ‘Jakoba hi ânchhia min lawhsak teh Israela hi min hausak rawh,’ min ti a. Lalpa ânchhe lawh loh keiin engtin nge ânchhia ka lawh theih ang? Lalpa huat loh, engtin nge ka huat theih ang? Anni chu lungpui aṭangin ka hmu pha a, Tlângchhîp aṭangin an lang vek a ni. A hlanga awm tûr hnam an ni a, Hnam dang ang mai an ni lo. Israel thlahte chu ṭiauvaivut anga tam an ni a, Chhiar sên rual an ni lo; Thil dik tih vânga thi ka nih chuan Thlamuang takin a ni ka thih dâwn ni,” a ti a. Balaka chuan Balaama hnênah, “Engtizia nge chutianga min tih le? Ka hmêlmate ânchhia lawh tûrin ka pun che a, mal i sâwmsak tâk hlauh mai le?” a ti a. Ani chuan, “ Lalpa min hrilh ang chiah ka sawi tûr a ni dâwn lâwm ni?” a ti a. Balaka chuan, “Ti rawh, hmun dangah i kal teh ang, an vaia i hmuh vek theih lohna hmun, a ṭhen chauh i hmuh theihna tûrah i kal ang; tichuan, ânchhia i lawh ngam ang,” a ti a. Pisga tlângchhîpa Zofim hmunah chuan a hruai a; maichâm pasarih a siam a, bâwngchal leh berâmchal maichâmah chuan a hlân ṭheuh va. Balaka hnênah chuan, “Hâlral thilhlan hi lo vil la, saw laiah sâwn Pathian ka va hmu tâng e,” a ti a. Lalpa chuan Balaama chu a rawn tâwk a, sawi tûr a hrilh a, “Balaka hnênah kîr la, ka hrilh che kha hrilh rawh,” a ti a. A hnên a lo thleng a, Moab miliante nên chuan maichâm bulah an la ding reng a. Balaka chuan, “ Lalpan eng nge a lo sawi?” a ti a. Balaama chuan hetiang hian a chham a: “Balak, tho la, ngaithla teh, Zipora fapa, ka thu hi bengkhawn teh: Pathian hi daw mai mai ṭhîn mihring ang a ni lo va, Lamlêt leh hni hne hringfa ang a ni hek lo. A sawi tawh chu a ti dâwn lâwm ni? A ṭawng tawh chuan a hlen dâwn lâwm ni? Mal sâwmsak tûrin min tîr a, Mal a sâwm tawh chu keia sût rual em ni? Jakoba hian thil ṭha lo a tawng dâwn lo, Israelan harsatna a tâwk lo vang. Lalpa, an Pathian chuan a awmpui a, Lalah an neih tlat si a. Aigupta ram aṭanga hruai chhuaktu Pathian chu An tân vêngtu ṭha tak, selechal ang a ni. Jakoba chu dawi hneh rual a ni lo va, Israela chu ânchhe ngam loh a ni. Miten Israel mite an hmuhin, ‘Pathian hian a va ti mak em!’ an ti ang. Sakeibaknei zîng tho, Sapêl tûra thawk chhuak, Sa a seh a ei zawha, A thisen a liah fai hma chu Bawk leh ngai lo ang hi a ni,” a ti a. Balaka chuan Balaama hnênah, “Ânchhia i lawh ngam loh pawhin mal chu sâwmsak lul teh suh,” a ti a. Balaama chuan Balaka chu a chhâng a, “ Lalpa min hrilh ang chiah ka sawi ang tih ka hrilh che kha,” a ti a. Balaka chuan Balaama hnênah, “Ngawi teh, hmun dangah i kal teh ang, chuta ṭang chuan Pathianin hêng mite hi ânchhia i lawh a remti mahna,” a ti a. Peor tlângchhîpah Balaka chuan Balaama chu a hruai a, chuta ṭang chuan thlalêr chu a lang thei vek a. Balaama chuan, “Maichâm pasarih mi siamsak leh rawh, bâwngchal pasarih leh berâmchal pasarih pawh han la leh bawk ang che,” a ti a. Balaka chuan Balaama thu ang chuan a ti a, maichâmah chuan bâwngchal pakhat leh berâmchal pakhat a hlan ta ṭheuh va. Israel-te chu Lalpa chuan mal a sâwm duh tlat a ni tih Balaaman a hriat chuan a hma ang khân aien tûrin a kal hrang duh ta lo va. Thlalêr lam chu a thlîr a, Israel-ten a chi chi-a bûk an inzâr dul chu a hmu a, Pathian thlarau chu a chungah a lo thleng a, hetiang hian a chham ta a: “Beora fapa Balaama thu: Mit tihvâra thu chu, Pathian thu ngaithlatua thu Engkimtitheia inlârna dawngtu, Tlua, mit vâr taa thu chu: Aw Jakob, in puan inte chu a va mawi êm! Aw Israel, in bûkte chu a mawi mang e! Tûm thing tlar ṭhut ang mai, Lui kama huan hring dup; Lalpa phun thingrai hmun chu, Lui kam sidar hmun ang a ni. Ruahtui tam tâwk an dawng ang a, Tui ṭhatna hmunah thlai an chîng ang. An lal chu Agaga aiin a ropui a, A ram chu a ropui hle ang. Aigupta ram aṭanga hruaichhuaktu Pathian chu An tân ki ṭha tak nei sele ang a ni. A hmêlma, hnamte chu a phîn darh ang a, A thalte chuan a chhun hlum ang. Sakeibaknei angin chhûnah a bawk a, Tu nge titho ngam ang? Mal sâwmsaktu che chu an nihlawh e, ânchhe lawhtu che chuan ânchhia an dawng ve ang,” a ti a. Balaka chu Balaama chungah chuan a thinur ta hle a, a inhûm ruh a, “Ka hmêlma ânchhe lawh tûrin ka pun che a, vawi thum lai mal i sâwmsak vei maw?” a ti a. “In khaw lamah haw vat rawh, ropui taka chawimawi che ka lo tum a, Lalpa chuan a phalsak lo che a nih hi,” a ti a. Balaama chuan Balaka hnênah, “I mi tirhte hnênah, ‘Balaka chuan a in khat tangka leh rangkachak min pe mah se, Lalpa thu chu a chhia ka tih angin emaw, a ṭha ka tih angin emaw ka tidanglam thei lo, Lalpa min hrilh ang chu ka sawi ang,’ ka tih rêng kha. Ka haw tâng e” a ti a. Balaama chuan Balaka hnênah, “En teh, ka chhûngte hnênah ka haw dâwn; ka kal hmain hêng mite hian nakin lawka i mite chunga an thil tih tûr ka hrilh ang che,” a ti a. Heti hian a chham ta a: “Beora fapa Balaama thu: Mit tihvâra thu chu, Pathian thu ngaithlaa thu, Chungnungbera thurûk hriaa thu, Engkimtitheia inlârna dawngtu, Tlua, mit vâr taa thu chu: Ani chu ka hmu, tûnah zawng ni lovin, Ka han en a, a hnaih zawng a hnai lo. Jakoba aṭangin arsi a lo lang ang a, Israela aṭangin lal tiang a lo chawr ang. Moab ram kil tin a hâwl nek ang a, Setha thlahte a vaw hrep ang. Edom ram chu a ta tûr a ni a. A hmêlma, Seir-ho chu, a nei ang, Israel chu tu man an ngam lo vang. Jakoba laka chhuak lal chuan, Khuaa thi bângte chu a nuai bo vang.” Amalek lam a hawi a, hetiang hian a chham a: “Amalek chu hnam ropui tak ni ṭhîn mah se, A tâwpah an chhe hlen ang,” tiin. Ken mite lam a hawi a, hetiang hian a chham a: “In chênna chu him hle mah se, Khâm sângah bu nei mah ula, Ken mite u, in boral ang, Asuria lalin salah a man lawk dâwn a che u,” a ti a. Hetiang hian thu a chham bawk: “Pathian a chêt hunah tu nge dam khawchhuak awm ang? Kitim aṭangin lawngin an lo kal ang a, Asuria te, Eber te an tirethei ang, Anmahni pawh an la boral ang,” tiin. Balaama chu a tho va, a haw ta a; Balaka pawh a haw ta a. Israel-te Sitim ruama an awm lai chuan Moab nulate an ngai a, chûng chuan an pathian biakna ruai ṭhehahte an sâwm a, an kîl ve a, milemte chibai an bûk ve ta mai a. Israel miten Peor-a Baal an be ve ta mai chu Lalpa chuan a haw hle a. Mosia hnênah, “Israel hruaitu zawng zawng ko la, thu ka pêk che angin hêng mite hi chhûn êngah khai hlum rawh; tichuan, Lalpa thinur na tak chu Israel-te hian an pumpelh dâwn nia,” a ti a. Mosian Israel hotute hnênah chuan, “In hote zînga Peor-a Baal be vete kha that vek rawh u,” a ti a. Inbiakna bûk kawngkaa pawiti taka an ṭah lai chuan Mosia leh Israel pungkhâwmho hmuhah, Israel mi pakhatin Moab nula a bûkah a rawn hruai lût a. Arona tupa Finehasa, Eleazara fapa chuan a hmu a, pungkhâwmho zîng aṭang chuan a chhuak a, fei a la a, Moab nula hruaitu, Israel tlangvâl chu, a bûkah a zui lût a, an pahnih chuan an dulah a chhun tlang a. Tichuan, Israel-te zîngah hri lêng chu a tâwp ta a. Hri vei avânga thi chu mi sînghnih leh sângli an tling hman a ni. Lalpa chuan Mosia hnênah, “Eleazara fapa Finehasa chuan ka tân ṭhahnem a ngaih êm avângin kei pawh Israel mite laka ka thinur a dai ta a; chuvângin, ka tiboral vek ta lo a ni. Tichuan, a tân leh a thlahte tân inṭhianna thu ka thlung ta e; a thlahte nên ka puithiam an ni kumkhua ang a; ka tân ṭhahnem a ngai êm a, Israel-te an sual avânga thi tûr a chhanhim tâk avâng hian,” a ti a. Israel tlangvâl Moab nula avânga thi ta chu Simeona thlah zînga hotu Salua fapa Zimria a ni. Moab nula chu Midian hnam lal pakhat, Zura fanu, Kusii a ni. Lalpa chuan Mosia hnênah, “Midian-ho hi bei ula, tu tlâwm dêr rawh u; Peor-ah an bum che u a, hri lên laia an chhun hlum, an lal fanu Kusii hmangin in chungah thil ṭha lo tak an tih kha,” a ti a. Hri lêng a reh chuan Lalpa chuan Mosia leh Arona fapa puithiam Eleazara hnênah, “Israel pungkhâwmho zînga râlkai chin, kum sawmhnih chung lam chu a chhûng chhûnga thliarin chhiar rawh u,” a ti a. Tichuan, Mosia leh Eleazara chuan Moab phai, Jeriko zâwn, Jordan lui kamah chuan mipui hnênah, Mosia hnêna thupêk ang khân, Israel mi, kum sawmhnih chin chung lam, Aigupta ram aṭanga lo kalte kha chhiar rawh u,” an ti a. Israela fa tîr chu Reubena a ni; Reubena thlahte: Hanoka, Hanok hnam thlahtu; Palua, Palu hnam thlahtu; Hezrona, Hezron hnam thlahtu; Karmia, Karmi hnam thlahtu. Hêng hi Reubena thlahte chu an ni, an za-in mi sîngli leh sângthum leh zasarih leh sawmthum an ni. Palua hian fapa Eliaba a nei a, Eliaba hian Nemuela te, Dathana te, Abirama te a nei a. Dathana leh Abirama chu Kora pâwla mite kha an ni. Anniho hi Lalpa lakah an hel a, Mosia leh Arona beitute kha an ni. Lei kakah Kora hovin an tla hlum a, mi dang zahnih leh sawmnga pawh meiin a kan hlum kha. Chu chu Israel-te ṭihkhai atân a ni. Kora fate erawh chu an thi ve lo. A chhûngkua diat diatin Simeona thlahte chu: Nemuela, Nemuel hnam thlahtu; Jamina, Jamin hnam thlahtu; Jakina, Jakin hnam thlahtu; Zera, Zer hnam thlahtu; Saula, Saul hnam thlahtu; hêngho hi Simeona thlahte chu an ni, mi sînghnih leh sânghnih leh zahnih an ni. A chhûngkua diat diatin Gada thlahte chu: Zefona, Zefon hnam thlahtu; Hagia, Hagi hnam thlahtu; Sunia, Suni hnam thlahtu; Oznia, Ozni hnam thlahtu; Eria, Eri hnam thlahtu; Aroda, Arod hnam thlahtu; Arelia, Areli hnam thlahtu. Hêngho hi Gada thlahte chu an ni, mi sîngli leh zanga an ni. Juda chuan fapa Era leh Onana a nei a; Era leh Onana chu Kanan ramah an thi a. A chhûngkua diat diatin Juda thlahte chu: Sela, Sela hnam thlahtu; Pereza, Perez hnam thlahtu; Zera, Zer hnam thlahtu. Tin, Pereza thlahte chu: Hezrona, Hezron hnam thlahtu; Hamula, Hamul hnam thlahtu. Hêngho hi Juda thlahte chu an ni, mi sîngsarih leh sângruk leh zanga an ni. A chhûngkua diat diatin Isakara thlahte chu: Tola, Tol hnam thlahtu; Pua, Pu hnam thlahtu; Jasuba, Jasub hnam thlahtu; Simrona, Simron hnam thlahtu. Hêngho hi Isakara thlahte chu an ni, mi sîngruk leh sângli leh zathum an ni. A chhûngkua diat diatin Zebuluna thlahte chu: Sereda, Sered hnam thlahtu; Elona, Elon hnam thlahtu; Jaleela, Jaleel hnam thlahtu. Hêngho hi Zebuluna thlahte chu an ni, mi sîngruk leh zanga an ni. A chhûngkua diat diatin Josefa thlahte; Josefa chuan fapa Manasea leh Efraima a nei a. Manasea thlahte: Makira, Makir hnam thlahtu; Makira chuan fapa Gileada a nei, Gilead-ho thlahtu chu. Hêngho hi Gileada thlahte chu an ni: Iezera, Iezer hnam thlahtu; Heleka, Helek hnam thlahtu; Asriela, Asriel hnam thlahtu; Sekema, Sekem hnam thlahtu; Semida, Semid hnam thlahtu; Hefera, Hefer hnam thlahtu. Hefera fapa Zelofehada chuan fapa a nei lo; a fanute chu Malaii te, Novaii te, Hoglaii te, Milkaii te, Tirzaii te an ni. Hêngho hi Manasea thlahte chu an ni, mi sîngnga leh sânghnih leh zasarih an ni. A chhûngkua diat diatin Efraima thlahte chu: Suthela, Suthel hnam thlahtu; Bekera, Beker hnam thlahtu; Tahana, Tahan hnam thlahtu; Suthela chuan Eran hnam thlahtu fapa Erana a nei a. Hêngho hi Efraima thlahte chu an ni, mi sîngthum leh sânghnih leh zanga an ni. Chûng zawng zawng chu Josefa thlahte an ni. A chhûngkua diat diatin Benjamina thlahte chu: Bela, Bel hnam thlahtu; Asbela, Asbel hnam thlahtu; Ahirama, Ahiram hnam thlahtu; Sefufama, Sefufam hnam thlahtu; Hufama, Hufam hnam thlahtu. Tin, Bela hian fapa Arda leh Naamana a nei a. Arda chu Ard hnam thlahtu a ni; Naamana chu Naaman hnam thlahtu a ni. Hêngho hi Benjamina thlahte chu an ni, mi sîngli leh sângnga leh zaruk an ni. A chhûngkua diat diatin Dana thlahte chu: Suhama, Suham hnam thlahtu; Hêngho hi Dana thlahte chu an ni, mi sîngruk leh sângli leh zali an ni. A chhûngkua diat diatin Asera thlahte chu: Imnaa, Imna hnam thlahtu; Isvia, Isvi hnam thlahtu; Beria, Beri hnam thlahtu; Beria thlahte chu: Hebera, Heber hnam thlahtu; Malkiela, Malkiel hnam thlahtu. Asera fanu chu Seri a ni. Hêngho hi Asera thlahte chu an ni, mi sîngnga leh sângthum leh zali an ni. A chhûngkua diat diatin Naftalia thlahte: Jazeela, Jazeel hnam thlahtu; Gunia, Guni hnam thlahtu; Jezera, Jezer hnam thlahtu; Silema, Silem hnam thlahtu. Hêngho hi Naftalia thlahte chu an ni, mi sîngli leh sângnga leh zali an ni. Israela thlah chhiar tling chin chu mi nuairuk leh sîngkhat leh zasarih leh sawmthum an ni. Lalpa chuan Mosia hnênah, “Ram chu an ro atân a chhûngkua diat diatin, an tam dân athuin sem rawh. Chhûng tam deuh chu ram i pe zau deuh vang a, a tlêm deuh chu i pe zîm deuh dâwn nia, tûna hming ziak hi an tam lam chhûtna tûr a ni. “An thlahtu hmingin an chan tûr ram chu ṭhumvâwra sem tûr a ni. A hnam tam deuh leh tlêm deuh athuin ram chu ṭhumvâwra sem tûr a ni,” a ti a. A chhûngkua diat diatin Levia chia chhiarte chu hêng hi an ni: Gersona, Gerson hnam thlahtu; Kohata, Kohat hnam thlahtu; Meraria, Merari hnam thlahtu. Hêng chite pawh hi Levia thlahte an ni: Libna chi te, Hebron chi te, Mahlia chite, Musia chi te, Kora chi te. Tin, Kohata khân fapa Amrama a nei a. Amrama nupui Jokebedi chu Levia thlah, Aigupta rama piang a ni; ani chuan Arona te, Mosia te leh an farnu Miriami te chu Amrama a hrinsak a. Arona chuan fapa Nadaba te, Abihua te, Eleazara te, Ithamara te a nei a. Nadaba leh Abihua hian hman thiang lo mei, rimtui hâl nân an hmang a, an thih phah a nih kha. Levia thlahte hi mipa, thla khat chin chung lam an chhiar chin chu: mi sînghnih leh sângthum an ni; Israel hnam zîngah ro atân ram sem ve an nih loh avângin an hming hi Israel khawchhiarbu-a telh ve loh a ni. Moab ram, Jeriko khaw zâwn, Jordan chhak lam lui kama an awm laia Mosia leh puithiam Eleazaran Israel-te an chhiar khân khiti zât khi an ni. Sinai thlalêra Mosia leh puithiam Aronan Israel mi an chhiarte kha dam an awm tawh lo. Lalpa chuan, ‘Thlalêrah an thi ngei ang,’ tia a sawi ang khân Jefunea fapa Kaleba leh Nuna fapa Josua chauh lo chu tu mah dam an awm tawh lo. Josefa thlah, Manasea chuan fapa Makira a nei a; chu mi fa chu Gileada a ni; Gileada chuan fapa Hefera a nei a, chu mi fa Zelofehada chuan fanu hêngte hi a nei: Malaii te, Novaii te, Hoglaii te, Milkaii te, Tirzaii te. Anni chu Inbiakna bûk kawngkaah Mosia te, puithiam Eleazara te, hruaitute leh pungkhâwmho hmaah an lo kal a. “Kan pa chu Kora ho, Lalpa laka helte zîngah khân a tel ve lo va; mahse, thlalêrah a thi ta a, fapa a nei lo va, ama sual vânga thi a ni a. Fapa a neih loh avângin kan pa hming hi chhungkaw chhiarna zîngah a bo bîk tûr em ni? Kan pa chhûngte zîngah chanvo atân ram min pe ve rawh u,” an rawn ti a. Mosia chuan chu thu chu Lalpa hnênah a thlen a. Lalpan Mosia hnênah, “Zelofehada fanute thu hi a dik e, an pa unaute zîngah chanvo tûr ram in pe ve tûr a ni; an pa chan ai chu chang rawh se. Israel-te chu hrilh rawh: Mi fapa nei lovin thi sela, a ram chu a fanuin a chang tûr a ni. Fanu a neih loh chuan a unauten an nei ang. Unau a neih loh chuan a pamiten an chang ang; pami a neih loh chuan a laichîn chhûng hnaiin a chang ang a, a nei hlen ang. Mosia hnêna Lalpa thupêk angin he dân hi Israel-te tân dân nghet a ni ang,” a ti a. Lalpa chuan Mosia hnênah: “Abarim tlângah chho la, Israel mite ka pêk tûr ram chu thlîr rawh. I thlîr zawhah i u Arona ang khân i chipuite hnênah hruai i ni ve ang. Zin thlalêrah, ka thupêk ang chiaha in tih loh avâng leh ka chunga Israel pungkhâwmho Meriba hmuna an vui khân, in pahnihin, an hmuhah min chawimawi lo a nih kha. Meriba tui hi Zin thlalêr, Kades bula awm kha a ni,” a ti a. Mosia chuan Lalpa hnênah, “Mi zawng zawng nunna petu Lalpa chuan Israel pungkhâwmho hruaitu tûr mi ruat teh se. Ani chuan an hma hruaiin an hnung dâl ṭhîn sela, Lalpa mi, Israel pungkhâwmho hi vêngtu nei lo berâm ang mai ni suh se,” a ti a. Lalpa chuan Mosia hnênah, “Nuna fapa Josua, pa rilru nei tak chu hruai la, a lu-ah i kut nghat ang che. Puithiam Eleazara hnênah hruai la, a hmaah leh Israel pungkhâwmho hmaah, an hma ngeiah, i aiawhtuah ruat rawh. I thuneihna chu hlân rawh; tichuan, Israel mi, pungkhâwmho chuan a thu an zâwm dâwn nia. Urim leh Thumim hmanga Pathian râwn hi puithiam Eleazara tih tûr a ni ang a; a thu ngaichângin Josua chuan Israel pungkhâwmho chu bûk khuar tûrin emaw, insawn tûrin emaw a hrilh ṭhîn ang,” a ti a. Lalpa thupêk ang chuan Mosia chuan a ti a, Josua chu puithiam Eleazara leh Israel pungkhâwmho hmaah a dintîr a. Lalpa thupêk ang chuan Josua lu-ah Mosia chuan a kut a nghat a, a aiawhtu atân a ruat ta a. Lalpa chuan Mosia hnênah; “Israel mite chu hrilh rawh: a hun ruat takah Pathian hnêna buhbâl thilhlante chu hlan ṭhin tûr a ni, a lâwmzâwng tak chu hlân ṭhîn rawh u. Buhbâl thilhlan, Lalpa hnêna hlan ṭhin tûr chu hetiang hi a ni: Ni tin hâl ral atân berâmno a pa pahnih, kum khat vêla upa, hmêlhem lo hâlral thilhlan hlan tûr a ni. Berâm pakhat chu zîngah hlân ula, pakhat chu tlaiah. Pakhat rual chuan buhbâl thilhlanah chhangphut ṭha chi kg. khat, oliv hriak thlit fîm litar khat nêna pawlh hlan tel tûr a ni. Hei hi Sinai tlâng ata ni tina hâl ral vek tûra an buhbâl thilhlan ṭhin chu a ni; chu chu Lalpa lâwmzâwng tak chu a ni. Berâm pakhat hlan rualin in tûr thilhlan uain litar khat maichâmah bun ṭhin tûr a ni. Tlaiah berâm pakhat pawh chu, zîng lama mi ang chiah khân hlan tûr a ni, in tûr thilhlan uain nên. Hei hi ei tûr thilhlan, Lalpa lâwmzâwng tak chu a ni. “Sabat ni chuan berâmno a pa pahnih, kum khat vêla upa, hmêlhem lo te, buhbâl thilhlan, chhangphut ṭha chi kg. hnih, Oliv hriak nêna chawhpawlh te, uain thilhlante hlan tûr a ni. Sabat ni apiangin hâlral thilhlan pangngai bâkah he hâlral thilhlan hi uain nên hlan ṭhin tûr a ni. “Thla thar ni apiangin Lalpa hnêna hâlral thilhlanah hêngte hi han keng ṭhîn ang che u: bâwngtuai pahnih, berâmchal pakhat, berâmno a pa pasarih, kum khat vêla upa, hmêlhem lo vek. Buhbâl thilhlanah chhangphut ṭha chi oliv hriak nêna pawlh in rawn hlân bawk tûr a ni. Bâwngtuai pakhatah chhangphut kg. thum, berâmchal pakhatah kg. hnih; berâmno pakhatah kg. khat; hêng hâlral leh buhbâl thilhlante hi Lalpa lâwmzâwng tak chu a ni. In tûr thilhlan chu bâwngtuai pakhatah uain litar hnih, berâmchal pakhatah litar khat telh zêl tûr a ni. Hei hi kum tluanin thla thar ni apianga hâlral thilhlana hlan ṭhin tûr chu a ni. Ni tina in tûr thilhlan uain nên hâlral thilhlan in hlan ṭhin bâkah sual thawina thilhlan atân Lalpa hnênah kêlpa pakhat in hlân bawk tûr a ni. “ Lalpa chawimawi nân Kalhlên kût chu thla hmasa ber, ni sâwm leh pali niin hmang ṭhîn ang che u. Ni sâwm leh panga niin kûtpui chu ṭan a ni ang a, ni sarih chhûng chhang dawidim telh loh chauh ei tûr a ni. Ni hmasa berah chuan inkhâwmpui urhsûn in nei tûr a ni, in hna pangngai in thawk hauh tûr a ni lo. Ei tûr thilhlan atân bâwngtuai pahnih, berâmchal pakhat, berâmno a pa pasarih, kum khat vêla upa, hmêlhem lo vek in hlân tûr a ni. Hêng rual hian buhbâl thilhlan bâwngtuai pakhatah kg. hnih, berâmno pakhat zêlah kg. khat hlan tel bawk tûr a ni. Sual thawina thilhlanah kêlpa pakhat hlân ula, chutiangin in sual chu thian fai ṭhîn ang che u. Hêng hi tûk tin thil hlan ṭhin bâka hlan tûr a ni. Chutiangin ni sarih chhûng chu Lalpa hnênah ei tûr thilhlan hi hlan ziah tûr a ni; chu chu Lalpa lâwmzâwng tak chu a ni. Ni tin hâlral leh in tûr thilhlan ṭhin bâkah hêng hi hlan tûr a ni. A ni sarih ni chuan inkhâwmpui urhsûn nei leh ula, mahni hna pangngai in thawk tûr a ni lo. “In barli thar, buhbâl thilhlana Lalpa hnêna in rawn hlan hun, Chawlhkâr Kûtah pawh inkhâwmpui urhsûn, in nei tûr a ni: in hna pangngai in thawk hauh tûr a ni lo. Hâlral thilhlanah bâwngtuai pahnih, berâmchal pakhat, kum khat vêla upa berâmno a pa pasarih, hmêlhem lo vek, hlân ang che u; chu chu Lalpa lâwmzâwng tak chu a ni. Buhbâl thilhlanah chhangphut ṭha chi, oliv hriak pawlh, bâwngtuai pakhatah kg. thum, berâmchal pakhatah kg. khat leh a chanve, berâmno pakhatah kg. khat hlan tel zêl tûr a ni. Sual thawina thilhlanah kêlpa pakhat hlân bawk ang che u, chutiang chuan mipui sual in thian fai dâwn nia. Ni tina hâlral thilhlan bâkah hêng hi uain thilhlan nên in hlân ṭhîn tûr a ni. “Thla sarihna, ni khat ni chuan, inkhâwmpui urhsûn nei ang che u. In hna pangngai in thawk tûr a ni lo. Hemi ni hian tawtawrâwt in hâm ṭhîn tûr a ni. Hâlral thilhlanah bâwngtuai pakhat, berâmchal pakhat, berâm a pa pasarih, kum khat vêla upa, hmêlhem lo vek hlân ang che u. Buhbâl thilhlanah chhangphut ṭha chi oliv hriak nêna pawlh, bâwngtuai pakhatah kg. thum, berâmchal pakhatah kg. hnih, berâmno pakhatah kg. khat hlân tel bawk ang che u. In sual thawina tûr kêlpa, sual thawina thilhlanah hlân ang che u. Chûng chu thla thar hâlral leh buhbâl thilhlan ṭhin leh ni tina hâlral leh buhbâl thilhlan ṭhin leh a dân tûr anga in tûr uain hlan ṭhinte bâka hlan tûr a ni. Chûng chu meia thilhlan, Lalpa tâna rimtui a ni. “Thla sarihna, ni sâwm ni chuan inkhâwmpui urhsûn in nei tûr a ni; chaw nghei ula, in hna pangngai thawk suh u. Lalpa hnênah hâlral thilhlanah bâwngtuai pakhat, berâmchal pakhat, berâmno a pa pasarih, kum khat vêla upa, hmêlhem lo vek, hlân ang che u. Buhbâl thilhlanah chhangphut ṭha chi oliv hriak nêna pawlh, bâwngtuai pakhatah kg. thum, berâmchal pakhatah kg. hnih, berâmno pakhatah kg. khat hlân bawk ang che u. In sual thawina tûr kêlpa, sual thawina thilhlanah in hlân bawk tûr a ni; mipui sual thenfaina tûr kêlpa hlan ṭhin bâkah leh ni tin hâlral thilhlan, buhbâl leh in tûr thilhlan ṭhin bâkah in hlân tûr a ni. “Thla sarihna, ni sâwm leh ni nga ni chuan inkhâwmpui urhsûn nei ṭhîn rawh u; in hna pangngai in thawk tûr a ni lo, ni sarih chhûng chu Lalpa chawimawiin kût in hmang tûr a ni. A ni khat ni chuan hâlral thilhlanah bâwngtuai sâwm leh pathum, berâmchal pahnih, kum khat vêla upa berâmno a pa sâwm leh pali, hmêlhem lo vek, Lalpa lâwmzâwng tak chu in hlân tûr a ni. Chûng rual chuan buhbâl thilhlanah chhangphut ṭha chi, Oliv hriak pawlh, bâwngtuai pakhatah kg. thum, berâmchal pakhatah kg. hnih, berâmno pakhatah kg. khat in hlân tel bawk tûr a ni. Sual thawina thilhlanah kêlpa pakhat pawh in hlân tûr a ni. Ni tina hâlral leh buhbâl thil hlan ṭhin, in tûr thil hlan nên tiam lovin in hlân tûr a ni. A ni hnih ni chuan hâlral thilhlanah bâwngtuai sâwm leh pahnih, berâmchal pahnih, berâmno a pa sâwm leh pali, kum khat vêla upa, hmêlhem lo vek, Lalpa hnênah in hlân tûr a ni. Bâwng tuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni. Ni tina hâlral leh buhbâl thilhlan leh in tûr thilhlan bâkah sual thawina thilhlanah kêlpa in hlân bawk tûr a ni. “A ni thum ni chuan hâlral thilhlanah bâwngtuai sâwm leh pakhat, berâmchal pahnih, berâmno a pa sâwm leh pali, kum khat vêla upa, hmêlhem lo vek, Lalpa hnênah in hlân tûr a ni. Bâwngtuai te, berâmchal te, leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni. Ni tina hâlral leh buhbâl thilhlan leh in tûr thilhlan ṭhin bâkah sual thawina thilhlanah kêlpa in hlân bawk tûr a ni. “A ni li ni chuan hâlral thilhlanah bâwngtuai sâwm, berâmchal pahnih, berâmno a pa sâwm leh pali, kum khat vêla upa, hmêlhem lo vek, Lalpa hnênah in hlân tûr a ni. Bâwngtuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni. Ni tina hâlral leh buhbâl thilhlan leh in tûr thilhlan ṭhin bâkah sual thawina thilhlanah kêlpa in hlân bawk tûr a ni. “A ni nga ni chuan hâlral thilhlanah bâwngtuai pakua, berâmchal pahnih, berâmno a pa sâwm leh pali, kum khat vêla upa, hmêlhem lo vek, Lalpa hnênah in hlân tûr a ni. Bâwngtuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni. Ni tina hâlral leh buhbâl thilhlan leh in tûr thilhlan ṭhin bâkah sual thawina thilhlanah kêlpa in hlân bawk tûr a ni. “A ni ruk ni chuan hâlral thilhlanah bâwngtuai pariat, berâmchal pahnih, berâmno a pa sâwm leh pali, kum khat vêla upa, hmêlhem lo vek, Lalpa hnênah in hlân tûr a ni. Bâwngtuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi, oliv hriak pawlh in hlân tel tûr a ni. Ni tina hâlral leh buhbâl thilhlan leh in tûr thilhlan ṭhin bâkah sual thawina thilhlanah kêlpa in hlân bawk tûr a ni. “Ni sarih ni chuan hâlral thilhlanah bâwngtuai pasarih, berâmchal pahnih, berâmno a pa sâwm leh pali, kum khat vêla upa, hmêlhem lo vek, Lalpa hnênah in hlân tûr a ni. Bâwngtuai te, berâmchal te leh berâmno rual chuan buhbâl thilhlan tûr tuk zât chhangphut ṭha chi oliv hriak pawlh in hlân tel tûr a ni. Ni tin hâlral leh buhbâl thilhlan leh in tûr thilhlan bâkah sual thawina thilhlanah kêlpa in hlân bawk tûr a ni. “A ni riat ni chuan inkhâwmpui urhsûn in nei leh ang a, in hna pangngai in thawk tûr a ni lo. Hâlral thilhlanah bâwngchal pakhat, berâmchal pakhat, berâmno a pa pasarih, kum khat vêla upa, hmêlhem lo vek, Lalpa lâwmzâwng tak chu in hlân tûr a ni. Bâwngchal te, berâmchal te, berâmno te chu buhbâl thilhlan leh in tûr thilhlan, ran chi hrang hrang pakhat ruala telh tûr tuk zât in hlân tel zêl bawk tûr a ni. Ni tina hâlral leh buhbâl leh in tûr thilhlan ṭhin bâkah sual thawina thilhlanah kêlpa in hlân bawk tûr a ni. “Intiamkam hlen thilhlan te, mahni duh thu-a thilhlan te, hâlral thilhlan te, buhbâl thilhlan te, in tûr thilhlan te, remna thilhlan te in hlan ṭhin bâkah khîng khi in hlân ngei tûr a ni,” a ti a. Lalpa thupêk zawng zawng chu Mosian Israel-te chu a hrilh a. Mosia chuan Israel hnam hruaitute hnênah, “Miin Lalpa hminga thil eng emaw a hnêna pêk a intiamkamin emaw, thil eng emaw ti lo tûra a intiamkamin emaw a thu chu a bawhchhe tûr a ni lo, a sawi ang chuan a hlen ngei tûr a ni. “Nula pate ina la awm pawhin Lalpa hnênah eng emaw pêk intiamkamin emaw, eng emaw ti lo tûra a intiamkamin emaw, a pain a lo hriata, a ngawihsan mai chuan a thu chu a hlen ngei tûr a ni. A pain a thu chu hlen a phalsak loh tlat chuan, a fihlîm mai ang. A pain a thutiam hlen a phalsak loh avângin Lalpa chuan a ngaihhnathiam ang. “Hmeichhia pasal nei lovin tum lui rânin emaw, ngaihtuah chiang mang lovin emaw, thil eng emaw pêk intiamkamin emaw, thil eng eng emaw ti lo tûra intiamkam chungin emaw pasal nei ta sela, a pasalin a hriata, a ngawihsan mai chuan, a thu chu a hlen ngei tûr a ni. A pasalin a hriata, hlen a phalsak loh chuan a intiamkamna ata chu a fihlîm ang. Lalpa chuan a ngaihhnathiam ang. “Hmeithaite leh mâkchhiat tâwkte erawh chuan pêk an tiam chu an pe tûr a ni a, ti lo tûra an tiam chu an ti lo tûr a ni. “Pasal nei laiin eng emaw pêk te, eng emaw ti lo tûr tein intiamkam sela, a pasalin a hriata a hnial loh chuan a thu chu a hlen vek tûr a ni. A pasalin a hriata, a khapsak chuan a fihlîm mai ang. A pasalin a thutiam chu a khapsak tlat avângin Lalpa chuan a ngaihhnathiam ang. Hmeichhiain thil pêk, tih loh tûr emaw, intiamkamna a neih rêng rêng chu a pasalin a phalin a phal lo thei a ni. A pasalin a intiamkam tih a hriat ni ngeia a hnial loh chuan pêk a tiam emaw, tih loh a tiam emaw chu a hlân ngei tûr a ni, a pasalin a intiamkamna thu a nemnghehsak tihna a ni. A hnu deuhvah a pasalin a intiamna chu a sûtsak chuan a hlen loh mawh chu a pasal chuan a phur ang.” Hei hi pasal nei lo, pate ina la awm emaw, pasal nei laiin emaw intiamkamna an neiha tih dân tûr Lalpan Mosia a hrilh chu a ni. Lalpa chuan Mosia hnênah, “Israel-te phuba chu Midian-ho chungah la zet la, i laichînte hnêna hruai i ni dâwn nia,” a ti a. Mosia chuan mipui hnênah, “Midian-ho do tûrin râlthuam inbel rawh u; Midian-ho chungah Lalpa phuba in la tûr a ni. Israel hnam tin aṭangin mi sâng ṭheuh, indonaa kal tûr, indâwk chhuak rawh u,” a ti a. Tichuan, Israel hnam tin aṭangin mi sâng ṭheuh an indâwk chhuak a, an vaiin sîngkhat leh sânghnih an ni. Indonaa kal tûr chuan hnam tin zînga mi sâng dawh chhuah chu puithiam Eleazara fapa Finehasa hovin indo tûr chuan a tîr ta a, bungbêl thianghlimte leh tawtawrâwt ham tûr chu an keng a. Mosia hnênah Lalpa sawi ang khân Midian-ho chu an bei a, mipa zawng zawng an that a. Mi dang rualin Midian lal panga Evia te, Rekema te, Zura te, Hura te, Reba te pawh hi an that a, Beora fapa Balaama pawh indonaah chuan an that a. Israel mite chuan Midian hmeichhiate chu an fate nên an man a, an bâwng te, berâm leh kêl rualte leh an thil neih dang pawh an lâksak vek a. Chûng rama an chênna khuate leh an bûkte chu an hâlsak vek bawk a. An thil lâk leh man, mihring leh ran nên, an kawi vek a. Mosia te, puithiam Eleazara te leh Israel pungkhâwmho hnênah, an riahhmun Moab phaizâwl Jeriko zâwn Jordan lui kamah chuan an rawn hâwn a. Mosia te, puithiam Eleazara te leh Israel pungkhâwmho te chu riahhmun pâwnah anni chu hmuak tûrin an lo chhuak a. Indona aṭanga lo haw sipai sâng hotute leh za hotute chungah Mosia chu a thin a ur ta hle a. Mosia chuan an hnênah, “Hêng hmeichhiate hi engati nge in la zuah? Balaama fuihpawrhin Peor-ah khân Israel mite chu Lalpa lakah thil sual a tihtîr a nih kha. Mipa tawh phawt chu, naupang tê pawh that vek ula, hmeichhia pawh mipa pâwl tham tawhho zawng chu that vek rawh u. Hmeichhe naupang, mipa la pâwl tham lohho kha erawh chu zuah ula, nei mai rawh u. Mi that leh mitthi ruang khawih zawng zawng chu riahhmun pâwnah riak rawh u; ni thum ni-ah leh ni sarih ni-ah in mi mante nên inthianfai ang che u. Silhfên te, savuna siam thil rêng rêng te, kêl hmula siam zawng zawng te, thinga siam zawng zawngte nên tihthianghlim zet tûr a ni,” a ti a. Puithiam Eleazara chuan indonaa kalte hnênah, “Mosia hnêna Lalpa thupêk chu hei hi a ni: Rangkachak te, tangkarua te, dar te, thîr te, ṭin te, suan te, meia rawha chhe mai thei lo chu meiah in rawh ang a, a thianghlim ang, tlenfaina tui erawh chu theh tûr a ni. Meia rawh theih loh chu sil tûr a ni. In silhfênte pawh a ni sarih niin in su ang a, in thianghlim ang a, chumi hnuah riahhmunah in lo lût thei ang,” a ti a. Lalpa chuan Mosia hnênah, “Nang nên, Puithiam Eleazara nên, Israel pungkhâwmho hruaitute nên râllâk thil an rawn hawn, mihring leh ran te chu chhiar ula, inzâtin hmun hnihah ṭhen phawk ula, ṭhen khat chu indonaa kalte pe ang che u; a dang chu Israel pungkhâwmho hnênah pe ang che u. Indonaa kalhote chan aṭangin mihring te, bâwng te, sabengtung te, berâm leh kêl te, zanga zêlah pakhat Lalpa tân lâksak la, Lalpa tâna serh hran chu Eleazara pe ang che. A zâtve, Israel pungkhâwmho chan aṭang chuan mihring te, bâwng te, sabengtung te, berâm leh kêl te, sawmngaa pakhat zêl lâksak la, Lalpa biakbûk enkawltu Levia chite pe ang che,” a ti a. Lalpa thu ang chuan Mosia leh puithiam Eleazara chuan an ti a. Anmahni puala an thil lâk chhiar lovin indonaa kalte thil rawn hawn chu heti zât hi a ni: Berâm leh kêl nuairuk leh sîngsarih leh sângnga; bâwng sîngsarih leh sânghnih, sabengtung sîngruk leh sângkhat, hmeichhe naupang mipa la pâwl loh sîngthum leh sânghnih; a zâtve indonaa kalte chan chu berâm leh kêl nuaithum leh sîngthum leh sângsarih leh zanga a ni; Lalpa tâna lâk chu zaruk leh sawmsarih leh panga a ni. Bâwng chu sîngthum leh sângruk a ni a, Lalpa tâna lâk chu sawmsarih leh pahnih a ni. Sabengtung chu sîngthum leh zanga a ni a, Lalpa tâna lâk chu sawmruk leh pakhat a ni. Hmeichhe naupang chu sîngkhat leh sângkhat an ni, Lalpa tâna lâk chu mi sawmthum leh pahnih an ni. Lalpa thupêk angin Lalpa tâna serh hran chu puithiam Eleazara chu an pe a. Indonaa kalte thil hawn zâtve, Israel mipuite hnêna Mosian a sem chu kêl leh berâm nuaithum leh sîngthum leh sângsarih leh zanga a ni. Bâwng chu sîngthum leh sângruk a ni; sabengtung chu sîngthum leh zanga a ni. Hmeichhe naupang chu sîngkhat leh sângruk an ni. Israel mipuite chan aṭang chuan sawmngaa pakhat zêl, ran pawh mihring pawh a la a; Lalpa Biakbûk enkawltu Levia chite hnênah Lalpa thu ang chuan a pe a. Sipai sâng hotute leh za hotute chu Mosia hnênah an lo kal a, Mosia hnênah, “Kan hote kan han chhiar a, pakhat mah kan inhloh lo. Rangkachaka siam incheina: bânbun te, ngûn te, khaidiat ṭhi te, nemna zungbun te, bengbeh te, kâwnghrên te, mahni pual atâna kan lâkte hi, Lalpa chuan kan nun min vênhimsak manah Lalpa hnênah kan rawn hlân a ni,” an ti a. Mosia leh Eleazara chuan rangkachak chher sa chu an lo dawng a. Sipai hotuten Lalpa hnêna thilpêk an rawn ken rangkachak chu kg. zathum lai a ni. Sipai narânho erawh chuan mahni puala an lâk chu an nei mai a. Mosia leh puithiam Eleazara chuan rangkachak chher sate chu Lalpa chuan a mite a hriat reng theih nân Biakbûkah chuan an dah a. Reubena leh Gada thlahte chuan kêl leh berâm an ngah hle a. Jazer leh Gilead ram chu ran tlat nâna ṭha tak a ni tih an hmuhin Mosia te, puithiam Eleazara te leh Israel pungkhâwmho hruaitu te hmaah an lo kal a, “Atarot te, Dibon te, Jazer te, Nimra te, Hesbon te, Elealeh te, Sebam te, Nebo te, Beon ram te, Lalpa min hnehsak ramte hi, ran tlatna chi a ni a, keini lahin ran kan ngah a, rem in tihzâwng a nih chuan Jordan lui râl kai ve lovin he ram hi kan chanvo atân min pe mai teh u” an ti a. Mosian Reubena leh Gada thlahte hnênah chuan, “In unauten râl an bei ang a, nangni he laiah in lo ṭhu mai mai bîk ang maw? Engtizia nge Israel mite hi Lalpa ram pêka an kal tûr rilru in tihhnual le? Kades-barnea aṭanga ram en thlithlai tûra mi ka tirh pawh khân in paten mi dang rilru an tihnual a nih kha. Eskol ruam an han thlena ram chu an han hmuh chian khân Lalpa pêk rama kal ngam lo tûrin Israel mite rilru an tizâm a. Chutah Lalpa chu a thinur ta hle a. ‘Aigupta ram aṭanga lo chhuak kum sawmhnih aia upaho chuan Abrahama te, Isaka te, Jakoba te hnêna pêk ka tiam ram chu an thleng ve tawp lo vang, mi zui tak tak lo a ni; Keniz mi Jefunea fapa Kaleba leh Nuna fapa Josua-te pahnih chauh hi an thleng ve ang, anni hi chuan min zui tak tak a ni,’ tiin thu a tiam hial a nih kha. Lalpa chu a thinur tâk êm avângin thil ṭha lo titute an thih mang hma chu thlalêrah kum sawmli zet kan vâkvai a nih hi. In pate ang hlauh kha in nih hi, mi sual rual, Israel-te chunga Lalpa thinur tizualtu in nih hi. Ani chu tûnah in zui duh lo tak tak a nih chuan thlalêrah min hnutchhiah leh ang a, nangni hian Israel mite hi in tihlum vek dâwn a nih hi,” a ti a. Mosia lam chu an hawi a, “Kan berâm rual tân huang kan siam ang a, kan fanaute awmna tûr kulh nei khua kan din ang. Keiniho hian hriamhrei kengin kan unau Israel-te hma kan hruai zêl ang a, an awmna tûr hmun chu kan thlen ang. Kan nupui fanaute erawh chu hêng lai mite avângin kulh nei khuaahte chuan lo awm mai rawh se. Israel mi tinin an ram neih tûr an luah hma chu, in lamah kan kîrsan lo vang. Jordan lui râl ram chu kan neihpui ve lo vang e, Jordan he lam kamah kan chanvo tûr zawng a awm hi,” an ti a. Mosia chuan, “Chutiangin in ti meuh ang maw? Indo peiha Lalpa hmaa hriamhrei in kena, Lalpa hmaa Jordan lui kânin hmêlmate a hnawh chhuah hma chu in tel ve zêla, Lalpan ram chin a hneh hnua kîr leh chauh tûr in nih chuan, Lalpa leh Israel-te chungah thiam lohna in nei lo vang a, he lai ram hi Lalpa chuan in neih a remti ngei ang. In duh loh erawh chuan Lalpa chungah thil in tisual a ni ang; in sual mawh chu in phur ngei ang. In fanaute tân khawpui kulh neite chu din ula, berâm huangte siam ula, in duh ang chuan ti ta che u,” a ti a. Gada leh Reubena thlahte chuan Mosia hnênah, “Ka pu, i thu ang chuan i chhiahhlawhte hian kan ti ang. Kan nupui fanau te, kan bâwng te, kan berâm leh kêlte chu Gilead ram khaw kulhahte hian an awm ang a. I chhiahhlawh te, indonaa hriamhrei keng tlâk zawng zawng te hi chuan i thu angin Jordan lui kan kai ve vek ang,” an ti a. Mosia chuan puithiam Eleazara te, Nuna fapa Josua te leh Israel hnam hruaitu te chu thu a chah a. “Gada leh Reubena thlah indonaa hriamhrei keng tlâkte hian Lalpa hmaa Jordan an kaipui che ua, ram chu in hnehpui chuan Gilead ram hi an chanvo-ah pe ang che u. Hriamhrei kenga Jordan an kânpui duh loh che u erawh chuan Kanan ramah, in zîngah, chanvo an nei ve mai tûr a ni,” a ti a. Gada leh Reubena thlahte chuan, “I chhiahhlawhte hnêna Lalpa sawi ang chuan kan ti ang a, Kanan ramah, Lalpa hmaah chuan hriamhrei kan keng ang a, kan ram chanvo ve tûr erawh chu khawchhak lama mi hi ni rawh se,” an ti a. Mosia chuan Gada leh Reubena thlahte chu Manasea thlah zâtvete nên Amor lal Sihona leh Basan lal Oga ram chu an khawpui leh a chhehvêl ramte nên chuan a sem a. Gada thlahte chuan kulh nei khua - Dibon khua te, Atarot khua te, Aroer khua te, Atrot-sofan khua te, Jazer khua te, Jogbeha khua te, Bethnimra khua te, Beth-haran khaw kulh te chu an din ṭha leh a, berâm huangte pawh an siam a. Reubena thlahte chuan Hesbon khua te, Elealeh khua te, Kiriathaim khua te, Nebo khua te, Baal-meon khua te, Sibma khaw kulh te an siam ṭha a, hming an sa thar a. Manasea fa, Makira thlahte chu, Gilead khuaah an kal a, an la a. Chuta awm Amor mite chu an hnawt chhuak a. Mosian Gilead khua chu Manasea fa, Makira chu a pe a, chutah chuan a awm ta a. Manasea fa vêk, Jaira chu a thawk chhuak a, a chhehvêl khuate chu a la a, Havot-jair a vuah a. Noba pawh a thawk chhuak a, Kenat leh a chhehvêl khuate chu a la a, ama hming chawiin Noba a vuah a. Mosia leh Arona hovin Aigupta ram aṭanga Israel mite, a huhova an kal zêl dân chu hetiang hi a ni: Mosia chuan Lalpa thupêk angin an chhuahna aṭanga an kalna apiang kha a indawtin a ziak zêl a. Thla khatna, ni sâwm leh panga niin Rameses aṭangin Israel-te chu Kalhlên Kût tûk khân Aigupta mite hmuh ngeiah anmahni thamlo takin an chhuak hlawm a. Aigupta mite lah chu an fa tîr Lalpa tihhlumte kha phûmin an ṭûl a, an pathian pawhin Lalpa chu a ngam lo a ni. Israel mite chu Ramases aṭang chuan Sukot-ah an riak a, thlalêr dep Etham-ah an riak leh a. Etham aṭang chuan Baal-zefon ep Pi-hahirot-ah an kual a, Migdol depah bûk an khuar a. Pi-hahirot aṭang chuan tuipui an kân a, Etham thlalêrah ni thum an kal a, Mara-ah bûk an khuar a. Mara aṭang chuan tuihna sâwm leh pahnih awmna, tûm thing sawmsarih ṭona Elim an thleng a, bûk an khuar a. Elim aṭangin Tuipui Sen kamah an riak a. Chuta ṭangin Sin thlalêrah bûk an khuar a, Sin thlalêr aṭang chuan Dofka-ah an riak a. Alus-ah an riak leh a, chuta ṭang chuan tui in tûr awm lohna, Refidim-ah bûk an khuar a. Refidim aṭang chuan Sinai thlalêr an thleng a, an kal zêl a, Kibrot-hatava-ah bûk an khuar leh a. Hazerot-ah bûk an khuar leh a. Chuta ṭangin Ritma-ah an riak a, Rimon-perez-ah an riak leh a. Chuta ṭangin Libna-ah bûk an khuar a, Risa-ah bûk an khuar leh a. An kal zêl a, Kehela-ah an riak a, Sefer tlângah an riak leh a. Chuta ṭangin Harada-ah bûk an khuar a, Mekhelot-ah bûk an khuar leh a. An kal zêl a, Tahat-ah an riak a, Tera-ah an riak leh a. An kal zêl a, Mitka-ah an riak a, Hasmona-ah bûk an khuar leh a. An kal zêl a, Moserot-ah an riak a, Bene-jaakan-ah an riak leh a, An kal zêl a, Hor-hagidgad-ah bûk an khuar a, Jotbata-ah bûk an khuar leh a. An kal zêl a, Abrona-ah an riak a, Ezion-geber-ah an riak leh a. Chuta ṭangin Zin thlalêr Kades-ah bûk an khuar a. Kades aṭang chuan Edom ramri Hor tlâng an thleng a. Lalpa thu angin Aigupta ram Israel-ten an chhuahsan aṭangin kum sawmli, thla ngana, ni khat ni chuan he tlângah hian Arona chu a thi ta a. Arona a thih chuan kum za leh sawmhnih leh pathuma upa a ni. Kanan ram chhim lama awmho, Kanan mi, Arad lal chuan Israel mite lo kal thâwm chu a lo hria a. Hor tlâng aṭang chuan an kal zêl a, Zalmon-ah bûk an khuar a. Punon-ah bûk an khuar leh a. An kal zêl a, Obot-ah an riak a, Moab ramria Iye-abarim hmunah an riak leh a. An kal zêl a, Dibon-gad-ah bûk an khuar a. Almon-diblathaim-ah bûk an khuar leh a. An kal zêl a, Nebo tlâng bul Abarim tlâng an thleng a. Chuta ṭangin Jordan lui kam, Jeriko khaw zâwnah, bûk an khuar ta a. Jordan lui dung, Moab phairuamah chuan Beth-jesimot aṭanga Abel-sitim thlengin an inzâr a. Jordan lui kam Jeriko khaw zâwn, Moab phaiah Lalpa chuan Mosia hnênah, “Israel mite chu hrilh rawh: Jordan lui kâna Kanan ram an thlen hun chuan, chuta awmte chu in hnawt chhuak vek ang a, an lung milim te, an phun milim te tihchhiatsak vek tûr a ni; an hmunsângte pawh ṭhiat vek ang che u. Chûng rama chêngte chu hnawt chhuak vek ula, in luahlân tûr a ni, in neih atâna ram ka pêk che u chu a ni. In chhûngkaw tam dân athuin in insem ang. Ṭhumvâwrin sem ula, in chan chu in nei zêl ang, chhûngkaw tam deuh chuan an chang zau deuh vang a, a tlêm deuh chuan an nei zîm deuh vang. Chûnga lo awmte chu in hnawh chhuah vek duh loh chuan in tân hlîng ang an ni ang a, an kâp reng ang che u a, in ramah chuan an tibuai fo dâwn che u a ni. Anni chu hnawh bo daih ka tiam a, in hnawh bo duh loh chuan nangni pawh ka hnawt bo vang che u,” a ti a. Lalpa chuan Mosia hnênah, “Israel mite chu hrilh rawh. Kanan ram in thlen hun chuan in ram atâna ka pêk tûr che u ram chin chu hetiang hi a ni ang. Chhim lam ri chuan Zin thlalêr aṭangin Edom ram a chhun ang a, khawchhak lam ri chu Tuipui Thi tâwpah a inṭan ang a, chhim zâwngin Akrabim kalkhânah kal tlangin Zin thlalêra Kades-barnea a chhun ang. Hmâr zawngin Hazar-adar thlengin a kal ang a, Azmon a pan ang a, Aigupta ramri luite hawiin a inher ang a, Mediteranean tuipui a chhun ang. “Khawthlang lam ri chu Mediteranean tuipui a ni ang. Hmâr lam ramri chu Mediteranean tuipui aṭangin Hor tlâng chhunin a kal ang a, chuta ṭangin Hamath kalkhânah a kal ang a, Zedad leh Zefron kal tlangin Hazar-enan a chhun ang, chu chu hmâr lam ramri chu a ni ang. “Khawchhak lam ramri chu Hazar-enan aṭangin Sefam-ah a kal ang a. Ain chhak lam Ribla panin a chhuk ang a, Galili dîl chhak lam tlâng pangah a chhuk zêl ang a; Jordan luidungah, Tuipui Thi a chhun ang. Ramri hual chhûng ram hi in ram tûr chu a ni,” a ti a. Mosia chuan Israel mite chu a hrilh a, “He ram hi a ni in insem tûr ram, hnam kua leh a chanve hnêna Lalpa pêk chu. Reubena leh Gada thlahte leh Manasea thlah zâtve te chuan an chhûngkaw tam dân azirin ram an insem tawh a, Jordan lui, Jeriko zâwn, khawchhak lam ram chu an nei tawh a ni,” a ti a. Lalpa chuan Mosia hnênah, “Puithiam Eleazara leh Nuna fapa Josua chuan i ai awhin ram chu an sem tûr a ni. Hnam tin aṭangin hruaitu thlang chhuak la, chûng mite chuan sempui rawh se. Chûng mite chu hêngte hi an ni ang: Juda hnamah Jefunea fapa Kaleba; Simeona hnam aṭangin Ammihuda fapa Semuela; Benjamina hnam aṭangin Kislona fapa Elidada; Dan hnam aṭangin Joglia fapa hotu Bukia; Josefa thlah Manasea hnam aṭangin Efoda fapa hotu Haniela, Efraim hnam aṭangin Siftana fapa hotu Kemuela; Zebulun hnam aṭangin Parnaka fapa hotu Elizafana; Isakara hnam zîng aṭangin Azana fapa hotu Paltiela, Asera hnam aṭangin Selomia fapa hotu Ahihuda; Naftali hnam aṭangin Amihuda fapa hotu Pedahela,” a ti a. Hêng mite hi Lalpa chuan Kanan ram Israel-ten an chan ṭheuh tûra semtu atân a ruat a ni. Jeriko zâwn, Jordan râlah, Lalpa chuan Mosia hnênah, “Israel mite chu hrilh rawh: an ram chan chhûngah Levia chite tân khaw ṭhenkhat, a chhehvêla ran tlatna tûr nên an pe tûr a ni. Chûng khuate chu Levia chite ta a ni ang a, chutah chuan an awm khâwm tûr a ni. Ran tlatna tûr ramah chuan an bâwng te, kêl te, berâmte an tlattîr tûr a ni. Levia chite in hleh tûr ram âwl chu khua aṭanga tawng sângkhat thleng tûr a ni. Ram âwl zawng zawng chuan kil li a nei ang a, kil tin tawng sânghnih a ni ang a, a laiah khua chu a awm tûr a ni. Levia chite in pêk khaw ruk chu tualtlânna khuaah hman tûr a ni. Hêng khaw paruk bâkah khaw dang sâwm li leh pahnih, a chhehvêl ram âwl nên, in pe bawk tûr a ni, a vaiin khaw sawmli leh pariat a nih chu. Hnam tinin, an ram chan a zau leh zau loh athuin Levia chite awmna tûr khua an siamsak tûr a ni,” a ti a. Lalpa chuan Mosia hnênah, “Israel mite chu hrilh rawh: Jordan lui in kaia, Kanan ram in thlen hun chuan, tual that palhte humhimna tûr tualtlân lehna khua ruat ang che u; Israel pungkhâwmhovin an thu an rêl fel hmain chûng khuaahte chuan an tlân ang a, thisen phuba latuin a that mai dâwn lo nia. Chutianga tualtlânna tûr khua paruk ruat ang che u, Jordan ral chhak lamah khaw thum in ruat ang a, Kanan ramah khaw thum bawk in ruat dâwn nia, chûng chu tualtlânna khua a ni ang. Israel mi te, ram dang mi te leh in zînga lo pêm te tân hêng khaw rukte hi an tualtlânna tûr a ni, mi that palh chu, tu pawh chutah chuan an tlân thei ang. “Miin thîr hmanga mi a beiha a tihhlum chuan tual that a tling a, tual that chu tihhlum ngei tûr a ni. Lunga chhu hlum a nih pawhin tual that a ni, tual that chu tihhlum ngei tûr a ni. Talhtuma vaw hlum a nih chuan tual that a ni, tual that chu tihhlum ngei tûr a ni. A laichîn hnai, thisen phuba latu tûr chuan a hmuhna apiangah tualthattu chu a that ve thei ang. A huat avângin mi a namthlu chawrh thei a, lo chângruin engin emaw a vawm thei a, an inhuat avângin a hnek chawrh thei bawk a, chutianga mi a tih chu a thih chuan tual a that a ni: tual that chu tihhlum ngei tûr a ni; thisen phuba latu chuan a hmuhna apiangah a that thei ang. “Huat vâng ni lovin mi a nêk thut thei a, chângru lêm lovin mi a vawm palh thei a, hmu lovin a lung vawm chuan mi a dêng palh thei a; inhmêlmâkna pawh an nei ngai lo va, tihnat pawh a tum ngai lo va; mahse, a mi tih chu a thi hlauh thei. Chutiang thilah chuan dân angin an ngaihtuah ang a. Phuba latu lakah an hum tûr a ni; a tualtlânna khuaah khân an tlântîr ang a, puithiam lalber ṭang lai thih thlengin chutah chuan a awm tûr a ni. Mi tihlumtu chuan a tualtlânna khua chu a kalsan vaih chuan thisen phuba latuin a lo thah pawhin a thisen mawh chu a phur lo vang. Puithiam lalber ṭang lai a thih erawh chuan ama in leh lovah a haw leh thei ang. He dân hi in awmna apiangah i hmang kumkhua tûr a ni. “Mihring that chu hretu eng emaw zât thu avâng chauhva tihhlum tûr a ni; thuhretu pakhat chauh thu avângin mi tihhlum tûr a ni lo. Tual that, tihhlum ngei tûr chu tlan theih a ni lo, a thi ngei tûr a ni. Tualtlânna khuaa tlân chu puithiam lalber ṭang lai a thih hma chuan an khaw lamah haw duh mah se, a nun humna tûrin a intlanchhuah phal tûr a ni lo. In awmna ram chu tibawrhbâng suh u: thisen chhuah hian ram a tibawrhbâng a ni; thisen luanna ram chu thisen chhuahtu thisen ngawt lo chuan tihthianghlim leh theih a ni lo. Ka ram, in chên vena ram chu, in tibawrhbâng tûr a ni lo; kei Lalpa hi, ka mi Israel-te zîngah ka awm zêl ṭhîn a ni,” a ti a. Josefa thlah, Manasea fa, Makira fapa Gileada thlahte chhûngkaw hotute chu an lo kal a. Mosia leh hruaituho, Israel chhûngkaw puipate hnênah chuan, “ Lalpa chuan kan pu hi Israel mite zîngah ṭhumvâwra ram sem tûrin a ti che a. Lalpa vêkin kan pu chu kan unaupa Zelofehada chan ai a fanute hnêna pe tûrin a ti bawk che a. Israel hnam dang zînga mi pasalah nei ta se, an ram chu an chhawm ang a, an pasalte hnam ramah a bei dâwn a, kan hnam chanpual aṭangin an ram chu hnam dang chanah suan tûr tihna a ni ta a. Israel-te tâna Jubili kumah pawh an ram chu kan rama belh ni lovin an pasalte hnam rama bei tûr a ni ta si a, kan hnam ram chan chu kan hloh hlen dâwn a ni,” an ti a. Mosia chuan Lalpa thupêk chu Israel-te a hrilh a, “Josefa thlahte hian an sawi dik a ni. Zelofehada fanute chungchânga Lalpa thupêk chu hetiang hi a ni: An chi zînga mi chauh pasalah duh duh an nei thei ang. Tichuan, Israel hnam khat ram chu hnam dang ramah suan theih a ni lo vang. Israel-te chuan an hnam ram chu, chu hnam ngei chuan an nei reng tûr a ni. Tu fanu pawhin ram chu rochung sela, a ram neitu hnam zînga mi pasalah a nei ngei tûr a ni. Hnam khat ram chu hnam dang ramah suan tûr a ni lo, mahni hnam ram chu an nei tlat tûr a ni,” a ti a. Josefa fa, Manasea fate zînga mi an neih avângin an ram chu an pate ram a ni ta reng a. Moab phai, Jeriko zâwn, Jordan lui kamah hêng thupêkte leh dânte hi Israel-te tân Mosia hnêna Lalpa pêk chu a ni. Hei hi Jordan lui chhak lam thlalêra Israel-ho an awm laia an hnêna Mosia thu sawi ziakna bu a ni. Jordan lui phai, Sufa ruama Tofel khua te, Laban khua te, Hazerot khua te, Dizahab khua te leh Paran thlalêr inkâra an awm lai a ni. Horeb tlâng aṭangin Kades-barnea chu Edom tlângrama kalin ni sâwm leh pakhat kal a ni. Aigupta ram an chhuahsan kum sawmlina, thla sâwm leh pakhat, ni khat ni chuan an hnêna hrilh tûr Lalpa sawi zawng zawng chu Mosia chuan Israel-te chu a hrilh a. Lalpa chuan Amor mi, Hesbon khaw lal Sihona chu a hneh a, Basan rama Astarot leh Edrei khaw lal Oga pawh a hneh tawh a. Moab ram, Jordan lui chhak lama an awm lai khân Pathian dân leh thupêkte chu Mosian a sawi fiah a ni. Ani chuan, “Horeb tlânga kan awm lai khân Lalpa kan Pathian chuan, ‘He tlângah hian in awm rei tâwk ta. In bûk ṭhiat ula, tawlh sawn rawh u. Amor-ho ram, tlângramah chuan kal ula, a vêl ramte fang rawh u. Jordan lui phai te, tlângram te, chhim lam ram te, Mediteranean tuipui kam thlengin kal rawh u. Kanan-ho ram te, Lebanon tlâng piah Eufretis lui thlengin kal rawh u. He ram hi a ni, in thlahtu Abrahama te, Isaka te, Jakoba te leh an thlahte hnêna pêk ka tiam ram chu, fang ula, va hneh rawh u le,” a ti a. Mosia chuan mipui hnênah, “Horeb tlânga kan awm lai khân ka hrilh che u kha. Keimah ngawt chuan rit ka ti lutuk ta che u a, ka tlin ta lo. Lalpa, in Pathian chuan vâna arsi zâtin a titam ta che u a. In thlahtute Pathian, Lalpa chuan tûna in lêt sângin tipung che u sela, a tiam angin tihmuingîl che u rawh se. In thubuai rem chu hahthlâk tham a ni ta; keimah maia tih sên a ni ta lo. Mi fing, thil chhût thiam leh hre zau, hnam tin aṭangin thlang chhuak ula, an kutah ka hlân ang che u: chu chu thil tih âwm tak a nih pawh in hria a. Tichuan, mi fing leh thil hre zau te, in hnam zawng zawng zînga thlan chhuahte chu ka kawltîr ta che u a; ṭhenkhat chu mi sâng chungah rorêl tûr an ni a, a ṭhen chu za chungah, a ṭhen chu sawmnga chungah. Chûng bâkah pawh hnam tina hotu tûr ka ruatsak bawk che u a. “Anni chu hetiang hian ka hrilh a: In mite zînga thubuai awm rêng rêng chu ngun takin ngaithla ula, nangmahni mi chauh inkâr thu a ni emaw, in zînga hnam dang awm vete nêna in inkâr thu emaw dik takin, hleih nei lovin rêl ṭhîn ang che u. Duhsak bîk nei suh ula, tu pawh ni se, thuhmun veka enin an thu rêlsak ang che u. Tu mah vênthâwn nei suh ang che u, in thu rêl thlûk chu Pathian aṭanga lo chhuak a ni. In tâna rêl khirh lutuk chu ka hnênah in rawn thlen ṭhîn ang a, ka lo rêl ang. In tih tûr dangte pawh ka hrilh che u kha. “Kan Pathian Lalpa thu ang chuan kan ti a. Horeb tlâng kan chhuahsan a, thlalêr ram zau tak leh râpthlâk taka Amor-ho awmna tlângram kawng chu kan kal tlang a, Kades-barnea kan va thleng a. Kei chuan, ‘Amor-ho tlângram in lo thleng ta, Lalpa kan Pathian min pêk ram chu. En teh u, Lalpa, in Pathian chuan ram chu a pharh duai hi, lût ula, in pate Pathian, Lalpa sawi angin nei rawh u, hrilhhaiin hlauthâwng suh u,’ ka ti a. “Mahse, in zain in lo kal a, ‘Ram chu va ena, kan kalna tûr te, kan luhna tûr khawpui chanchin te rawn thlen leh tûrin en thlithlaitu i tîr ang u,’ in ti a. Ṭha ka ti ve bawk a, hnam tin zîng aṭangin mi pakhat zêl, mi sâwm leh pahnih kan thlang chhuak a. An kal ta a, tlângramah chuan an han chho va, Eskol ruam an thleng a, an en thlithlai vek a. Theirahte chu an rawn hâwn a, thu an rawn thlen a, ‘ Lalpa, kan Pathian min pêk ram chu a lo ṭha kher mai!’ an ti a. “Nimahsela, in kal duh lo va, Lalpa in Pathian thupêk chu in nawrhsan ta a. In phunnawi a, ‘ Lalpa hian min hua a ni; Aigupta ram aṭangin min hruai chhuak a, Amor-ho kutah min pe dâwn a lo ni, min tihchhiat a lo tum a nih hi. Engah tehlul nge kan chhoh vang, chuta awmte chu keini aia lian leh sâng pui pui an ni a, an khuate lah a lian a, vân tawng tawnga kulh nei an ni; Anak-ho pawh kan hmu, tia kan unauten an rawn sawi kha kan hlau a ni’ in ti a. Anniho chu hlau suh ula, zâm phah hek suh u, Lalpa in Pathian chu in hmahruaitu a ni a, ani chuan a dopui dâwn che u alâwm; Aigupta ramah in hmuh ngeiah in tân thil a tih ṭhin ang khân a ti zêl dâwn a ni. Thlalêra in thang chhûng zawng pawh khân kawng engkimah a hruai che u a, pain a fa a pua angin he hmun hi a paw thleng che u tih in hre reng si a. He thilah hian Lalpa in Pathian chu in ring ngam lo a ni; in hma a hruai zêl a, in bûk khuarna tûr a zawn chhuahsak che u a, zânah mei êng, chhûnah chhûm dingin a hruai ṭhîn che u a nih kha. “ Lalpa chuan in thâwm a lo hria a, a thinur hle a. ‘He chhuan sual tak zînga pakhat mah hian, ram ṭha tak an pate hnêna pêk ka tiam chu an hmu hauh lo vang. An zînga mi pakhat Jefunea fapa Kaleba chauh hian a hmu ang, a rah apiang ram chu a fate rochan zêl tûrin ka pe ang, Lalpa chu a zui tlat avângin’ tiin thu a tiam tlat a. Nangmahni avângin Lalpa chu ka chungah pawh a thinur a, ‘Nang pawhin ram chu i hmu lo vang, Nuna fapa, i kaihza vêngtu Josua erawh hi chuan a hmu ang: fuih sauh sauh rawh, he ram hi Israel-te a neihtîr dâwn a ni. In fanau tê tê, ‘râl man mai mai tûr’ in tihte, a chhia a ṭha la hre pha lote erawh hi chu, chu ramah chuan an lût ang a, an nei ang. In za hian kîr leh ula, Tuipui Sen lam panin thlalêrah kal rawh u,’ a ti a. “Nangni chuan ka hnênah, ‘ Lalpa chungah thil sual kan ti a ni, tlângramah chuan kan han chho vang a, kan Pathian, Lalpa thupêk ang chuan kan han bei ang e,’ in ti a. Hriam in keng ṭheuh va, tlângrama han chhoh chu awlsam hle tûrah in ngai vei a. Lalpa chuan ka hnênah, ‘Chho teh suh u, han bei hek suh u, in zîngah ka awm lo, an lo that ngei ang che u,’ tiin hrilh rawh min ti a. Chu chu ka hrilh che u a, in ngaithla duh lo va; Lalpa thupêk chu in zâwm duh lo va, tlângramah chuan in kal chho lui ta a. Chûng lai tlângrama awm, Amor mite chuan an rawn bei lêt che u a, khuaiin mi a ûm ang maiin an ûm che u a. Horma thleng rawkin an ûm thla che u a, Edom tlângramah an hneh ta che u a nih kha. Lalpa lam in lo hawi a, a hnênah in ṭap a; mahse, Lalpa chuan in aw a lo hre duh lo va, a lo ngaithla duh hek lo. Tichuan, Kades-barnea-ah chuan rei tak in awm ta a. “A tâwpah zawng Lalpa thupêk angin kan kîr leh ta nge nge a; Tuipui Sen lam kan pan a, Edom tlângram chu rei tak kan hêl a. Lalpa chuan, ‘Hêng tlâng hi in hêl rei lutuk ta, hmâr lam pan rawh u,’ min ti a. Edom tlângram in kal tlang dâwn a, in laichîn hla tawh tak, Esauva thlahte ram chu in kal tlang dâwn, an lo hlau hle ang che u. Mahse, in bei tûr a ni lo, an ram chu tawng hnih khat lek pawh ka pe dâwn lo a che u. Seir tlângram chu Esauva thlahte tân ka pe tawh a ni. Chaw leh tui in duh chuan an hnên aṭangin in lei tûr a ni,” a ti a. “ Lalpa in Pathian chuan kawng tinrêngah mal a sâwm che u a, thlalêr zau taka in vah lai te khân a enkawl zêl che u a, in Pathian Lalpa chuan kum sawmli chhûng chu a awmpui che u a, eng mah in tlâkchham loh kha. “Tichuan, kan kal zêl a, kan unau Esauva thlah, Seir tlânga awmte chu kan hêl a. Elath leh Ezion-geber aṭangin Jordan phai kawngah kan kal a; hmârchhak lam hawiin Moab ram kan pan ta a. Lalpa chuan ka hnênah, ‘Lota thlah, Moab-ho chu tibuai suh u, in bei tûr a ni lo. Ar khawpui chu an neih atâna ka pêk a ni, an ram chhetê pawh ka pe dâwn lo che u a ni,’ a ti a. (Ar khuaah hian milian chak tak tak Em an tihte chu an awm ṭhîn. Milian chi dang, Anak an tihho tluka sâng bawk an ni. Refa-ho tih an ni bawk, mahse, Moab-ho chuan Em-ho an ti ṭhîn. Edom ramah hian Hor-ho an awm ṭhîn a; mahse, Esauva thlahte hian an ûm chhuak a, an tidarh vek a, an ram chu an luah ta a ni. Chutiang bawkin Israel pawhin Lalpan ram a pêka lo awmte chu an hnawt chhuak a ni.) “ Lalpa thupêk angin Zered lui kan kân a, Kades-barnea kan chhuahsan aṭang khân kum sawmthum leh pariat a vei tawh a; khatih laia râlkai chin zawng zawng chu Lalpa sawi ang ngei khân an thi vek tawh a ni. Lalpan chûng mite chu a ngaimawh tlat a, an thi zo ta nge nge a ni. “An thih zawh vek hnuin, Lalpa chuan ka hnênah, ‘Vawiin hian Moab-ho ramri, Ar khawpui kiangah in kal tlang dâwn a. Amon-ho, Lota thlahte ram in va thleng ang a, anni chu chawk buai suh ula, bei hek suh ang che u, an ram chu an awmna atân ka pe tawh a ni, chhetê pawh ka pe lo vang che u,’ a ti a. (Chûng ram chu Refa-ho ram tih a ni ṭhîn. Amon-ho chuan hêng mite hi Zamzum-ho an ti. Anak-ho ang bawka sâng an ni, tam tak an ni a, hnam chak tak an ni ṭhîn; mahse, Lalpa chuan a tihlum zo va; Amon-hovin an ram chu an nei a, an luah ta a ni. Esauva thlah, Edom mite tân Seir chu Lalpan chutiang bawk chuan a tihsak a ni. Lalpa chuan Hor-ho chu a tiral a; Edom-hovin an ram chu an luah ta a ni. Mediteranean tuipui kamah Kret thliarkâr mite an lo awm a, a tîra awm Av-ho chu an tiboral a, an ram chu an luah a, Gaza thlengin an neihsak ta vek a ni.) “Moab ram kan pelh hnuin Lalpa chuan, ‘Tho la, Arnon lui hi kân rawh u, Amor lal Sihona, Hesbon khaw lal chu, a ramte nên, in kutah ka pe ta a; bei ula, a ram chu chhuhsak rawh u. Vawiin aṭang hian in hmaah vân hnuaia awm zawng zawng ka tizâm dâwn a ni, in hming mai pawh an hriatin an khûr zawih zawih ang,’ min ti a. “Kedemot thlalêr aṭangin Hesbon lal Sihona hnênah remthu kengin palai ka tîr a. ‘I ramah kan lo kal tlang ang e, lamlianpui chauh kan zawh ang a, ding lam leh vei lamah kan pêng lo vang. Kan ei tûr chaw leh kan in tûr tui pawh in hnên aṭangin kan lei vek ang; kan Pathian Lalpa min pêk ram, Jordan râl kan thlen hma hian kan lo kal tlang ang e. Seir rama chêng Esauva thlahte leh Ar khuaa Moab awmte hnêna kan tih ang bawk khân i ram kan kal tlang ringawt min phalsak teh khai’ ka ti a. Hesbon lal Sihona chuan a rama kan kal tlang chu a phal lo va; kan hneha a ram kan neihsak theih nân Lalpa chuan a rilru a tikhauh va, a tiluhlul a ni; tûn thlengin a ram chu kan neihsak ta rêng a. “ Lalpa chuan, ‘Sihona leh a ram chu i kutah ka pêk tâk che hi, a ram pawh neihsak ula, luah rawh u,’ a ti a. Sihona leh a ho zawng zawngte chuan Jahaz-ah min rawn bei a. Kan Pathian, Lalpa chuan ani chu a fate leh a ho zawng zawngte nên min pe a, kan that vek a. A khua zawng zawng kan la a, khuaa awmte chu a hmei a pa, a lian a te, kan tiboral vek a, tu mah kan zuah lo. An rante erawh chu râllâk sumah kan la a, khuaa râllâk sum dangte nên kan nei a. “Arnon luiruam chung tlânga khua Aroer aṭanga a luidunga khawpui awmte chu Gilead thlengin kan lâk theih loh rêng a awm lo, Lalpa kan Pathianin min pe vek a ni. Amon-ho ram erawh chu kan tlawh lo, Jabok lui kan kai lo; luidunga khawpuite leh tlângrama khawpuite, Lalpa kan Pathianin tlawh a khapah te chuan kan kal lo. “Hmâr lam panin Basan ram kan thleng a. Edrei khaw bulah an lal Oga chuan a mi zawng zawng nên min lo bei a. Lalpa chuan, ‘Huphurh suh, a mite leh a ram hi, amah chawpin ka pe tawh a che. Amor lal Sihona, Hesbon khaw lal i sawisak ang bawk khân sawisa ang che,’ min ti a. Tichuan, Lalpa kan Pathianin Basan lal Oga chu a mite nên min pe a, pakhat mah zuah lovin kan that vek a. Argob bial, Basan lal Oga ram chhûnga awm khawpui zawng zawng chu kan la a, khaw sawmruk zet a ni, a khua lâksak loh rêng kan nei lo. Hêng khuaahte hian kulh bang sâng pui pui, kawngkhâr leh a kalhna ṭha tak tak a awm vek a, an chhehvêl khuate pawh kan la vek a ni. Hesbon lal Sihona kan sawisak ang bawk khân an khuate chu kan tichhe vek a, a hmei a pa, naupangte nên lam kan that vek a. An rante leh an thil neihte erawh chu râllâk sumah kan nei zêl a. “Hêng Amor lal pahnih ram, Jordan lui chhak lama mi hi Arnon lui aṭanga Hermon tlâng thlengin kan chhuhsak a. Hermon hi Sidon-ho chuan Sirion an ti a, Amor-ho erawh chuan Senir an ti. Basan lal Oga ram zawng zawng chu kan chhuhsak vek a ni; tlângchhîp zâwla khua te, Gilead biala mi te chu Basan bial pum pui Saleka leh Edrei thlengin kan nei ta a. Refa-ho zînga la dam chhun chu Basan lal Oga hi a ni; ngai teh, a kuang chu lung kuang a ni a, tawng pangngai tawng kuaa sei, tawng li-a zau a ni: tûn thlengin Amon-ho khua Raba-ah a la awm. “Hêng ram kan lâk hnu hian Reubena leh Gada thlahte hnênah Arnon lui ruam chung tlânga Aroer khaw hmâr lam ram chu Gilead tlângram chanve nên kan pe a. Gilead ram la awm leh Basan ram chu Manasea thlah zâtve hnênah kan pe bawk a. Basan ram pum pui hi Refa-ho ram tih a ni ṭhîn. Manasea thlah Jaira chuan Argob bial, Basan ram hi, Gesur-ho leh Maaka-ho ramri thlengin a la a; khuate chu a hming chawiin hming thar a sa a, Havot-jair tûn thlengin an la ti. “Gilead ram chu Makira, Manasea fa ka pe a. Reuben leh Gad thlahte chu Gilead leh Arnon lui inkâr ram hi ka pe a. Chhim lama an ramri chu Arnon lui lai tak zêl a ni a, hmâr lamah chuan Jabok lui a ni, Amon-ho nên an inri. Khawthlang lam ri chu Jordan lui hi a ni a, Galili dîl aṭangin Tuipui Thi, Pisga tlâng bulṭhut a thleng. “Chûng lai chuan thu ka pe che u a, ‘ Lalpa in Pathianin he ram hi in chanpual atân a pe che u a, in zînga hriam keng thei chin chu in unau Israel nâwlpui hmaah Jordan lui in lo kai hmasa tûr a ni. Ran in ngah hle a, in ran te, in nupui fanaute hi chu hêng ka pêk che u khuaahte hian an lo awm ang a, nangmahni ang bawka in unaute hian Jordan thlang lam ram Lalpa pêk tûrah râlmuang taka an awm ve theih hma chu in unaute hi in pui tûr a ni. Chumi hnuah chuan ka pêk tûr che u in ram chanpualah hian in haw thei ang. Josua hnênah pawh ka hrilh a, in mit ngeiin lal pahnih chunga Lalpa in Pathian thiltih chu in hmu a; chutiang bawkin in kalna tûra lalte chu Lalpa chuan a sawisa dâwn a ni. Anni chu huphurh suh ang che u, Lalpa in Pathian chuan a dopui zêl dâwn che u a ni. “Chutih lai chuan Lalpa hnênah, ‘Aw Lalpa Pathian, i chhiahhlawh hi i ropuizia leh i thiltihtheihzia i entîr ṭan chauh a la ni. Leiah leh vânah hêng thil ropui i tih ang ti thei ve hi pathian dang rêng an awm lo. Aw Lalpa, Jordan lui kal kaiin ram ṭha tak, tlângram mawi tak tak, Lebanon tlângte chu, khawngaih takin min hmuhtîr ve teh,’ tiin ka ngên. “Nangmahni avângin Lalpa chu ka chungah a thinur a, ka thu chu a ngaithla duh lo va, Lalpa chuan, ‘A tâwk e, sawi pawh sawi tawh suh. Pisga tlângchhîpah chho la, khawthlang lam te, hmâr lam te, chhim lam te, khawchhak lam te thlîr vêl ang che; i mit chuan hmu la, a rah zawng i rap ve dâwn lo a ni, Jordan lui i kai ve lo vang. Josua chu a tum tiruh tûrin fuih sauh sauh la, i hmuh ramah hian he mite hi a hruai ang a, a neihtîr dâwn a ni,’ a ti a. Tichuan, Beth-peor khaw ep ruamah chuan kan awm ta rih a. “Khai le, Israel-te u, thuruat leh awm dân tûr ka zirtîr che u kha pawisa ula, in fate hnênah Lalpa in thlahtute Pathianin a pêk che u ram chu dam taka in luah theih nân zâwm rawh u. Thu ka pêk che u hi in belhchhah tûr a ni lo va; Lalpa in Pathian thu ka hrilh che u chu hmaih in nei tûr a ni hek lo. Peor tlânga Lalpa thiltih in hmuh ṭheuh kha, Peor tlânga Baal betute a tihhlum vek kha. Nangni Lalpa vuan tlattute erawh chu tûn thlengin in la dam hi. “Ngai teh u, kan Pathian Lalpa min hrilh ang ngeiin, a thuruatte leh awm dân tûr ka zirtîr che u kha, in luah tûr ram in thlen hunah zâwm ngei ang che u. Hêng dânte hi pawisa ula, zâwm tlat ang che u; hnam dangten an hriat ve hunah, ‘He hnam hi hnam fing tak leh changkâng tak an lo nih hi,’ an ti ang a, in finzia leh in changkân bîkzia an hria ang. Lalpa kan Pathian, a mite au lo chhâwn zêl ṭhîntu ang hi, hnam dang, hnam ropui berte pawhin an nei ve hlei nêm. Vawiina dân ka zamsak che u anga dân leh thupêk ṭha pawh hi hnam ropui ber te pawhin an nei ve em ni? Tichuan, fîmkhur ula, in mit ngeia in thil hmuhte kha in dam chhûnga in theihnghilh loh nân vawng tlat ula, in fate leh in tute pawh, hrilh ṭhîn ang che u. Horeb tlângah khân Lalpa chuan ka hnênah, ‘Mite chu ko khâwm la, an damchhûng zawnga ka thu an awih a, an fate pawh min ṭih dân an zirtîr theih nân ka thu sawi hi hria se ka duh a ni’ mi ti a; chutiang ngei chuan tlângah khân in Pathian Lalpa hmaah in ding a ni tih theihnghilh lovin, in fate chu hrilh ṭhîn ang che u. Tlâng chu a kâng a, meikhu chhah takin a khuh tlat a, a thim mup a, vân thlengin a thim a, a bulṭhutah in va kal a nih kha. Lalpa chuan mei aṭangin a rawn bia che u a, a aw chu in hria a; mahse, a riruang hmuh tûr a awm lo va, a aw chauh in hria a nih kha. A thuthlung chu vawng tlat tûrin a hrilh che u a, thupêk sâwm, lungphêk pahniha a ziak chu zâwm tlat tûrin a ti che u a. Lalpa chuan a dân zawng zawng chu zirtîr tûr che uin min ti a. In awmna tûr ram in thlen hunah chûng chu in zawm tlat tûr a nih thu te in fate in hrilh ṭhîn tûr a ni. “Horeb tlângah khân mei aṭangin Lalpa chuan in hnênah thu a sawi a; mahse, a riruang chu in hmuh loh kha; fîmkhur hle rawh u. Milem, in biak atân milim siamin intibawlhhlawh suh u; mipa lem emaw, hmeichhe lem emaw tuk suh ula, chher bawk hek suh u. Leia awm rannung rêng rêng lem te, chunglêng sava lem te, leia bawkvâka kal lem te, lei hnuai tuia sangha lem te, in biak atân in siam tûr a ni lo. Vân lam in han thlîr ang a, ni te, thla te, arsi te leh vâna thil dang awm rêng rêng te khi chibai bûka an rawngbâwl in châk hlauh dah ang e; fîmkhur rawh u - Lalpa in Pathian chuan khîngte khi hnam dang biak ve atân lek a dah a ni. Nangni zawng, Aigupta ram, rawhtuina meipui ata chu a la chhuak che u a, tûna in awm anga ama pual ni tûrin Lalpan a hruai chhuak che u a ni. Kei zawng, nangmahni avângin Lalpa in Pathianin luah atâna a pêk tûr che u ram, ram ṭha taka kal tûrin Jordan lui ka kai ve a phal tlat lo a ni. Kei chu Jordan kal kai ve lovin he lai ramah hian ka thi dâwn a ni, nangni erawh chu kai ula, ram chu in va nei tûr a ni. Lalpa in Pathianin thu a thlunpui che u kha in theihnghilh hlauh ang e. Eng lem mah in biak atân Lalpa in Pathianin in siam a phal loh kha. In Pathian, Lalpa hi kan ral hmang mei ang a ni a, Pathian thîkthu chhe tak a ni. “Chu rama rei tak in awm hnu, fate neia tuchhuan, chhuan hnih chhuan thum in neih hunah pawh milem rêng rêng in siam a, Lalpa in Pathian duh loh zâwng in tih chuan, lei leh vân chhâlin ka sawi hi, Jordan lui kâna in va luah tûr ramah chuan in dam rei lo vang a, in boral mai ang. Lalpa chuan hnam tin zîngah a tidarh ang che u a, chûngah chuan a dam khawchhuak chu tlêm tê chauh in ni ang. Chûng ramah chuan mihring siam milim, thing emaw, lung emaw, ṭawng thei hlei lo, hre thei bawk si lo, hmu thei lo leh thil rim pawh hre thei lo in bia ang. Mahse, chûng ram aṭang chuan, Lalpa in Pathian in ṭih takzeta, rilru zawng zawng nêna amah in zawn chuan in hmu leh ang. Ni hnuhnûngahte chuan hrehawm in tuar ang a, a thu in awih tawh ang. In Pathian, Lalpa hi Pathian ngilnei tak a ni a, a hlamchhiah lo vang che u a, a tichhe hek lo vang che u; in pate hnêna thu a tiam tlat chu a theihnghilh bawk hek lo vang. “Tûn hma, in pian hma daih, Pathianin leia mihring a siam aṭang khân chhui teh u; khawvêl pum pui hi zâwt chhuak ula, in thil hmuh ang leh in thil hriat ang hi an hre ve ngai em zâwt teh u. Nangni anga mei aṭanga Pathian thu sawi ngaithlaa dam khaw chhuak hnam dang tu nge awm ve le? Aigupta ram ata in Pathian Lalpa chuan a mi atân a hruai chhuak che u ang khân tu Pathianin nge hmun khat aṭangin a mi tûr hnam hruai chhuak ve ngai? Nangni zawng, in Pathian chuan, a thiltihtheihzia leh a chakzia in hmuhah a tilang a; hri te leh indona te a awmtîr a; thil mak leh chhinchhiahna mak tak tak a ti a; thil hlauhawm pui puite thlentu a nih kha. Lalpa hi Pathian chu a ni a; amah lo hi Pathian dang rêng an awm lo tih in hriat theih nân chûng chu a hmuhtîr che u a ni. A zirtîr theih nân che u vân aṭangin a aw a hriattîr che u a, leiah ngei a mei ropui chu a hmuhtîr che u a, chuta ṭang chuan a rawn bia che u a nih kha. In pate kha a ngainat êm avângin an thlahte chu a thlang che u a, Aigupta ram aṭangin amah ngeiin hneh takin a hruai chhuak ta che u a ni. In hmaah, in aia hnam lian zâwk leh thiltithei zâwkte a ûm chhuak a, an awmnaah a hruai lût ang che u a, ro atân an ram chu a pe dâwn che u a ni. Tûn thlengin chûng chu in ta a la ni ngai lo. Chuvângin, vawiin hian hre rawh u, theihnghilh hauh suh ang che u: Lalpa hi chung lam vân leh hnuai lam leia Pathian awm chhun a ni, Pathian dang rêng an awm lo. Chuvângin, a thuruat te leh a thupêk te chu zâwm rawh u, in tân a ṭha ang a, in fate tân pawh a ṭha ang; kumkhuaa in neih atâna a pêk che u ramah chuan in dam rei bawk ang.” Jordan lui chhak lamah inhumhimna tûr khawpui pathum a ruat a. Chûng khuaah chuan miin a hmêlma pawh ni lo, mi a tihhlum palh chuan a tlân thei ang a; an lo hum dâwn a ni. Reuben thlahte ramah, tlâng zâwl Bezer khua te, Gad thlahte ramah Gilead biala awm Ramot khua te, Manasea thlahte ramah Basan bial Golan khua te chu a ruat a. Hei hi Israel-te tân Mosian Dân a târlan chu a ni. Hêng thupêk te, thuruat te leh awm dân tûr te hi Aigupta ram aṭanga Israel-te an lo chhuah lai khân Mosian a hrilh a. A hrilhna hmun chu Beth-peor tlâng ep, Jordan lui chhak lam Amor lal Sihona ram chhûngah a ni a, ani chu Mosia leh Israel-ten an hneh a nih kha. Chu ram chu an neihsak a, Basan lal Oga ram pawh an neihsak bawk a. Hêng Amor lal pahnihte hi Jordan lui chhak lama awm an ni. An ram lâk chu Arnon luiruam ko chunga awm Aroer khua aṭanga Hermon tlâng an tih inkâr ram hi a ni. Jordan lui kam chhak lam phai pawh Tuipui Thi thlengin tlâng pang nên a huam. Mosia chuan Israel mi zawng zawng chu a ko khâwm a, an hnênah “Israel-te u, hêng thuruat leh awm dân tûr in beng hriata ka sawite hi ngaithla rawh u, zir ula, zâwm rawh u. Kan Pathian, Lalpa chuan Horeb tlângah thu min thlunpui a. Lalpa thuthlung hi kan pate tân a ni lo, keini, vawiina heta awmte tân hian a ni zâwk. Tlânga mei aṭang khân Lalpa chuan inhmachhawnin in hnênah thu a sawi a nih kha. Khatih lai khân Lalpa leh nangni inkârah ka ding a, mei in hlauh avângin tlângah in lâwn ngam ve si lo va, Lalpa thu sawi sawichhâwngtuah ka ṭang a nih kha. “ Lalpa chuan hetiang hian a ti, ‘Bawiha in awmna Aigupta ram aṭanga hruaichhuaktu che u Lalpa, in Pathian chu ka ni. “Kei lo hi chu Pathian dang rêng rêng nei suh. “I tân milem siam suh, chung lam vâna awm emaw, leia awm emaw, lei hnuai tuia thil awm lem emaw i siam tûr a ni lo. Chûng chu kûnin chibai i bûk tûr a ni lo va, an rawng i bâwl tûr a ni hek lo. Kei Lalpa, i Pathian hi, Pathian thîkthu chhe tak ka ni; min hawtute chu an thlahte chhuan thum chhuan li thleng pawhin ka hrem ṭhîn a, min hmangaiha ka thupêk zâwmtute erawh chu an thlah, a sânga sâng thleng chungah pawh ngil ka nei ṭhîn. “I Pathian, Lalpa hming chhâlin dâwt sawi suh; dâwta a hming chhâltu chu Lalpa chuan hrem lohvin a chhuah lo vang. Lalpa i Pathianin thu a pêk che angin sabat ni hi hmang la, serh ang che. Ni ruk chhûng hna i thawk ang a, i hna zawng zawng i thawk tûr a ni. A ni sarih ni erawh hi chu Lalpa tâna sabat ni a ni a, hna eng mah i thawk tûr a ni lo; i fapa te, i fanu te, i bawihpa te, i bawihnu te, i bâwngpa te, i sabengtung te, i ran rêng rêng te leh in khaw chhûnga hnam dang awm ve te pawhin hna an thawk tûr a ni lo; nangmah ang bawkin, a hmei a pa, an châwl ve tûr a ni. Aigupta ramah, mi chhiahhlawh in nih kha hre reng rawh u. Chuta ṭang chuan Lalpa in Pathian hian a thiltihtheihna ropui tak hmangin a hruai chhuak che u a nih kha. Chuvângin, Lalpa in Pathian chuan sabat ni hi serh tûrin a ti che u a ni. “ Lalpa i Pathianin thu a pêk che ang khân i nu leh i pa chawimawi rawh; chutichuan, i dam rei ang a, Lalpa i Pathian pêk che ramah i hmuingîl ang. Tual that suh. Uire suh. Ru suh. “I vêngte dâwtin hêk suh. I vêngte nupui i ît tûr a ni lo, a in te, a bawihpa te, a bawihnu te, a bâwngpa te, a sabengtung te, a ta rêng rêng i awt tûr a ni lo. Lalpa chuan hêng thupêkte hi a ni Horeb tlâng bula in lo kal khâwm laia a hrilh che u kha. Mei aṭang leh chhûm chhah thim mup aṭangin hêng thu hi ring takin a sawi a nih kha; thu dang sawi a nei tawh lo. Lungphêk pahnihah a ziak a, min pe a nih kha. “Tlâng chu a alh hluah hluah a, thim chhah mup aṭanga aw in hriat khân, hnam tin hruaitute leh in upate nên ka hnênah in lo kal a; ‘ Lalpa kan Pathian chuan a ropuizia leh a lenzia min hmuhtîr ta, mei aṭanga a aw chu kan hria a, vawiin hian Pathianin mihring a bia a, mihring chu a thi kher lo tih kan hre ta a ni. Amaherawhchu, engah nge thi mai theia kan awm leh ang? Mei râpthlâk tak khân min rawn kâng ral ang a, Lalpa kan Pathian aw chu kan hriat leh chuan kan thi tawh ngei ang. Mei aṭanga Pathian aw hre si mihring dam khawchhuak rêng an awm ve em ni? Lalpa kan Pathianin a sawi zawng zawng chu min hrilh la, kan lo ngaithla ang a, kan zâwm ang,’ an ti a. “ Lalpa chuan ka hnêna in thu sawi chu a lo hria a. Lalpa chuan ka hnênah, ‘Hêng miten i hnêna an thu sawi hi ka lo hria a, an sawi dik e. Chutiang rilru chu pu fo ṭhîn sela a va ṭha dâwn em! Min ṭih ang a, ka thupêkte an zâwm ang a, an fate nên lam an hmuingîl kumkhua tûr: An hnênah zuk chhuk la, an bûkah hawtîr rawh. Nang erawh chu ka bulah hian lo ding la, ka thupêk zawng zawng te, ka thuruat te leh awm dân tûr ka tih ka lo hrilh ang che; chu chu anniho hi i zirtîr dâwn nia; tichuan, ro atâna ram ka pêk tûrah chuan in zâwm ṭhîn dâwn nia,’ a ti a. “ Lalpa in Pathian thupêk hi in zâwm fîmkhur hle tûr a ni; pakhat mah in hmaih tûr a ni lo va, in belh tûr a ni hek lo. Lalpa in Pathianin in kalna tûr a tihah chuan in kal zêl tûr a ni; tichuan, in dam ang a, in hmuingîl ang a, in ram neih tûrah chuan rei tak in dam dâwn nia. “Hêng thupêk te, thuruat te leh awm dân tûr te hi Lalpa, in Pathian chuan zirtîr tûr che uin min ti a ni. Chu ram chu in luah hunah zâwm ṭhîn ang che u. In fate leh in tûte pawhin Lalpa in Pathian thuruat leh thupêk ka hrilh che u hi an zâwmin an ti tûr a ni; tichuan, an dam rei dâwn nia. Chuvângin, aw Israel-te u, hria ula, ti ngei tûrin inpuahchah rawh u; in tân a ṭha ang a, khawizu leh hnutetuia luang ramah hian in pate hnêna Lalpa in Pathianin a tiam ang khân nasa takin in pung dâwn nia. “Aw Israel-te u, ngaithla teh u, Lalpa, Lalpa chauh hi kan Pathian chu a ni. Lalpa in Pathian chu in thinlung zawng zawngin, in theihtâwpin hmangaih rawh u. Vawiina he ka thupêk che u hi in thinlungah châm tlat sela, ngun takin in fate zirtîr ang che u. In chhûnga in ṭhut lai te, kawnga in kal lai te, in mut dâwnah te, in thawh dâwnah te sawi sawi ang che u. In hriat reng theih nân in bânah te hrêng ula, chalhrênah te hmang ang che u. In kawngka biangah te ziak ula, in tual kawngkaah te pawh târ ang che u. “In pu Abrahama te, Isaka te, Jakoba te hnêna pêk a tiam ram chu Lalpa in Pathianin a pe dâwn che u a; khawpui lian tak tak leh mawi tak tak, in din ni hauh lo chu in nei dâwn a ni. Chuta in chhûngah chuan thil ṭha tak tak in dah ni lo a awm ang a; in laih hah loh tuichhunchhuah te a awm bawk ang a; grep huan leh Oliv hmun, in siam hah ni lo te in nei ang. Lalpan chu rama a hruai thlen hunah che u chuan ei tûr eng mah in tlachham lo vang. Fîmkhur ang che u, bawih in nihna, Aigupta ram aṭanga hruaichhuaktu che u Lalpa hi in theihnghilh hlauh ang e. “ Lalpa in Pathian chu ṭih ula, amah chauh chibai bûk ula, a hming chauh chhâlin thu tiam ṭhîn ang che u. In vêla awmte pathian chu pakhat mah be ve suh u. In zînga chêng Lalpa in Pathian hi Pathian thîkthu chhe tak a ni, in chungah Lalpa in Pathian hi a thinur chuan khawvêl ata hi a tibo daih mai ang che u. “Masa tui hmuna in tih ang khân Lalpa in Pathian hi fiah suh u. Lalpa in Pathian thupêk chu uluk takin zâwm ula, a thupêkte leh a thuruat a hrilh che u chu awih ṭhîn ang che u. Lalpa ṭha tihzâwng leh dik a tih chu ti ula, in tân a ṭha ang a, in pate pêk a tiam tawh ramah in lût ang a, in nei dâwn nia. Lalpa sawi tawh angin in hmêlmate chu in hmaah a hnawh chhuahsak vek ang che u. Nakin hnuah in faten, ‘Hêng thupêk te, thuruat te, awm dân tûr te, Lalpa kan Pathian hrilh che u hi engtizia nge?’ tia an zawh hunah che u chuan, hetiang hian chhâng ang che u, ‘Aigupta ramah Farawa bawih kan ni a, Lalpa chuan Aigupta ram ata chu min hruai chhuak a. Lalpa chuan thil mak te, chhinchhiahna ropui tak tak leh râpthlâk tak tak Aigupta ramah te, Farawa leh a hote chungah te a ti a. Chuta ṭang chuan min hruai chhuak ta a, he ram, kan pate hnêna pêk a tiam ramah hian min hruai luha min pêk a tum a ni. Lalpa chuan hêng thuruatte hi ti vek tûrin thu min pe a, kan ṭhatna tûrin Lalpa kan Pathian chu ṭih fo tûrin min ti a; tichuan, kan za-in vawiin thleng hian min la zuah ta zêl a nih hi. Hêng a thupêk min hrilh zawng zawng hi ngun taka kan zawm chuan kan tân a ṭha ang,’ ti ang che u. “ Lalpa in Pathian chuan in neih tûr ramah chuan a hruai lût ang che u a, chûnga awm hnam sarih, nangni aia tam zâwk leh chak zâwk, Hit mi te, Girgas mi te, Amor mi te, Kanan mi te, Periz mi te, Hiv mi te leh Jebus mi te chu a hnawh chhuahsak ang che u. Lalpa in Pathianin in kuta a pêk hunah che u chuan in hneh ang a, in that vek tûr a ni. Thu thlunpui suh ula, lainat hek suh u. Inneih pawlh suh u, in fate nupui pasalah neihsak hek suh u. In fate an hruai kawi ang a, pathian dang an biaktîr mai ang; tichuan, Lalpa chu in chungah a thinur ang a, a tiboral mai ang che u. Chuvângin, an maichâmte chu ṭhiatsak vek ula, an lungphunte tichhia ula, an Aseri lim phunte chu kit ula, an thing milimte chu hâl vek ang che u. “Nangni zawng, Lalpa, in Pathian tâna serh hran in ni a; Lalpa, in Pathian chuan khawvêla hnam tinrêng zîng ata a pual bîk ni tûrin a thlang tawh che u a ni. Hnam dang aia in tam zâwk avânga hmangaiha thlang che u a ni lo va; hnamah chuan a tlêm ber in ni asin. Lalpa chuan a hmangaih hrim hrim avâng che u leh in pate hnêna a thutiam tihpuitlin a duh avângin, Aigupta lal Farawa bawih ata, kut chak takin a tlan chhuak che u a ni. Chuvângin, hre rawh u, Lalpa, in Pathian chauh chu Pathian a ni a, Pathian rinawm, a thutiam vawng tlat a, amah hmangaiha a thupêk zâwmtute chunga chhuan sâng thlênga ngilnei ṭhîn chu a ni. Amah hawtute erawh chu tichhe tûrin a thungrûl ang a, amah hawtu chu a zuah lo vang a, an dam chhûng la lain a hrem ang. Chuvângin, thupêk te, thuruat te leh awm dân tûr te vawiina ka hrilh che u hi in zâwm tûr a ni. “Hêng awm dân tûrte hi in pawisak a, hetianga in awm a, in zawm chuan Lalpa, in Pathian chuan in pate hnêna a tiam ang khân a thuthlung chu in tân a hlen ang a, in chungah ngil a nei ang. A hmangaih ang che u a, malsâwmin a tipung ngei ang che u. In pate hnêna pêk a tiam ramah chuan in fate chu mal a sâwm ang a, in rama in thei phunte a tirah tiar tuar ang a, in buh te, in uain te, in hriak te a tihlâwk ang a, in kêl leh berâm te tam takin a tipung ang. Hnam dang zawng zawng aiin in hmuingîl ang a, in zînga mipa emaw, hmeichhia emaw ching an awm lo vang. Lalpa chuan in zîng ata natna tinrêng a la bo ang a, Aigupta rama hri te kha in vei ve lo ang a, nangmahni hawtuten an vei thung ang. Lalpa in Pathianin a pêk che u rama hnamte chu tiboral ula, khawngaih suh u, an pathiante pawh in be ve tûr a ni lo; chu chu in awhna tûr thang a ni si a. “Hêng hnamte hi keini aiin an tam a, engtin nge kan hnawh chhuah theih ang?’ ti rilru suh u. Anni chu in hlau tûr a ni lo. Farawa leh Aigupta mite, Lalpa, in Pathianin a sawisak dân kha hre reng ang che u. Râpthlâk tak taka Farawa a hrem te kha in hmu a, thil mak leh chhinchhiahna te tiin ama kut chak tak hmangin a hruai chhuak che u a nih kha: khatiang bawk khân in mi hlauhte chungah ti ve leh rawh se. Chu lo pawh chu, Lalpa, in Pathianin in zîngah khawinghal a tîr ang a, in thah bângte leh biru in hmuh lohte chu an zûk hlum vek ang. Anni chu hlau rêng rêng suh u, Lalpa in Pathian, Pathian ropui tak leh hlauhawm tak hian a awmpui reng che u a ni. “ Lalpa, in Pathian chuan chûng hnamte chu zawi zawiin a ni a hnawh chhuah dâwn ni; anni chu in tihboral thuai a phal dâwn lo; chutilo chuan ram sakawlh an pung chak lutuk ang. Lalpa, in Pathian chuan anni chu a pe ngei dâwn che u a; a tichiai chiam ang a, an chhe zo tho dâwn a ni. An lalte chu in kutah a pe ang a, vân hnuaia an hming hriat tawh hauh loh tûrin a tiboral ang; tu mah lo dang thei che u an awm lo vang a; in tichhe vek dâwn a ni. Thing milim, an tuk chawpte chu in hâl ang a, a tuamna tangkarua leh rangkachakte chu ît suh ula, la hek suh u; in tân awhna thang hlauhawm tak a ni thei ang. Lalpa, in Pathian tân thil tenawm a ni. Chutiang thil tenawm chu in inah in la lût tûr a ni lo, nangni pawh chûng ang mai chuan in tenawm ve dah ang e. In ten êm êm ang a, in haw hle bawk tûr a ni, Lalpa ânchhe dawng an ni si a. “In pate hnêna Lalpa, in Pathianin ram pêk a tiam chu dam taka in luah a, in neiha, in pun theih nân vawiina thupêk ka hrilh che u hi zâwm vek ang che u. Lalpa, in Pathian chuan kum sawmli chhûng thlalêrah a vahvaihtîr che u kha hre reng rawh u; a tirethei che u a, a fiah che u a, a thupêkte chu in zâwm dâwn nge dâwn lo in rilru hriat a duh a ni. A tirethei che u a, a tirilṭâm che u a, a chângin in hriat ngai loh, in pi pute pawhin an hriat ngai loh chawin a hrai che u a; mihring hi chaw ring ringawtin a nung tûr a ni lo va, Lalpa kâ aṭanga thu tinrêng chhuakte chu a ring bawk tûr a ni tih in zir a duh avâng a ni. Hêng kum sawmli chhûng hian kawr pakhat mah in ha chhe lo va, in keruh a nâin a vûng hek lo. Miin a fa a thunun a, a hrem ang hian, Lalpa, in Pathian chuan a thunun ṭhîn che u a ni tih in hre reng tûr a ni. Lalpa, in Pathian thupêk chu in zâwm ang a, a duh angin in nung ang a, ani chu in ṭih tûr a ni. Lalpa, in Pathian chuan ram ṭha takah a hruai dâwn che u a ni, luite tui luang hawk hawk tamna, tuihna leh lei chhûngrila tui lo chik chhuak tamna, tlâng leh ruam nuam tak tak te, huit leh barli ṭhatna ram, grep te, theipui te, theibuhfaite rah duhna, Oliv leh khawizu tamna ramah chuan a hruai dâwn che u a; chutah chuan, tlâkchham nei lovin duh tâwkin chaw in ei ang a; chûng rama lungte chu thîr a ni a, tlângah te chuan dâr laih chhuah tûr a tam mai. Kham tâwk ei tûr in neih a, ram ṭha tak a pêk che u avângin Lalpa, in Pathian chu in fak ang. “A thupêk te, awm dân tûr a tih te, a thuruatte vawiina ka hrilh che u hi zâwm duh lovin Lalpa, in Pathian hi in theihnghilh hlauh ang e, fîmkhur rawh u. Puar tâwk leh kham tâwk ei tûr in neih a, in ṭha tak tak in saka in luah hunah, in bâwng te, berâm leh kêl te a lo puna, tangka leh rangkachak in lo ngah a, in neih apiang a lo hmuingîl viau hunah, in chapo anga Aigupta bawih aṭanga hruaichhuaktu che u Lalpa, in Pathian chu in theihnghilh hlauh dah ang e. Ani chuan thlalêr ram zau tak leh hlauhawm pui puiah a hruai tlang che u a, rûl te, rûl chuk na mi te leh khawmualkaikuang tamna ramah te, tui awm lohna ram rovah te in kal khân lungpui chang tak aṭangin tui a pe che u a nih kha. Thlalêrah khân in pate pawhin an hriat ngai loh Mana chuan a châwm che u a, fiah nân che u leh in tân a ṭha dâwn nge dâwn lo in hriat theih nân hrehawm a tuartîr ṭhîn che u a ni. Tichuan, in chak avâng leh thil in tih theih avânga hausa emaw inti suh ang che u. Lalpa, in Pathianin hausa thei tûrin a tichak che u a ni tih hre reng ang che u; in thlahtute hnêna a thutiam chu ani chuan a la thlah loh avâng a ni e. Lalpa, in Pathian chu theihnghilh rêng rêng suh u, pathian dangte ngaihsakin chibai bûksan hek suh u; chutianga in tih vaih chuan, ka hrilh lâwk a che u, in boral ngei ngei ang. Lalpa, in Pathian aw hi in pawisak loh chuan, Lalpan in luahlan tûr hnamte a tiboral angin nangni pawh a tiboral ngei ang che u. “Aw Israel-te u, ngaithla teh u, vawiin hian Jordan lui in kân dâwn ta a; nangni aia tam leh chak zâwk hnam luahlan tûr leh khawpui lian tak tak, an kulh bang vân tawng hial te chu in lâksak dâwn a ni. A mi chêngte lah mi lian pui pui, sâng tak tak, Anak-ho thlahte an ni a, ‘tu nge Anak-hote chu dang zo vang?’ an tih ṭhinte chu an ni. Vawiin hian hre rawh u, Lalpa, in Pathian chu in hmahruaitu a ni, in hmaah meialh chak tak angin a kal zêl dawn, a tichhia ang a, in hmaah a titlâwm zêl dâwn. Lalpa lo sawi tawh angin in hnawt chhuak vek ang a, an boral thuai ang. Hêng mite hi Lalpa, in Pathianin a hnawh chhuah hunah, ‘kan ṭhat avângin Lalpa chuan he ram hi min pe a, hêng hnamte hi an sual avângin a hnawt chhuak a ni,’ in ti ang e. In ṭhat avâng leh in nun a ngîl avânga an ram hi neihsak in ni lo; hêng hnamte hi an sual êm avângin Lalpa, in Pathian hian a hnawt chhuak a ni; Abrahama te, Isaka te, Jakoba te hnêna a thutiam kha tihpuitlin a tum a ni. Chuvângin, Lalpa, in Pathianin ram ṭha tak hi, in ṭhat avânga pe che u a ni lo tih hre reng rawh u, mi luhlul tak in nih hi. “Thlalêrah khân Lalpa, in Pathian chu in tihthinur ṭhin kha hre reng ula, theihnghilh suh u. Aigupta ram in chhuahsan ni aṭanga tûn thlengin Lalpa lakah hel in chîng hle a ni. Horeb tlângah pawh khân Lalpa chu in tithinur a, tihboral vek che u duh hial khawpin a thinur a nih kha. Nangni nêna Lalpa thuthlung, lungphêka ziak chu, la tûrin tlângah ka han kal a, ni sawmli leh zan sawmli eng mah ka ei lo va, ka in hek lo. Inkhâwmpui lai khân mei aṭangin Lalpa chuan in hnênah thu a sawi a, chûng zawng zawng chu lungphêkah, Pathianin ama kut ngeiin a ziak a, Lalpa chuan mi pe a. Ni sawmli leh zan sawmli a ral hnu chuan thuthlung ziakna lung phêk pahnih chu Lalpa chuan mi pe a. “ Lalpa chuan ka hnênah, ‘Tho la, chhuk thla vat teh, Aigupta ram aṭanga i mi hruai chhuahte khu an che khawlo nasa mai, awm dân tûr ka hrilh an pênsan a, milim chhûn chawp an siam tâk khu,’ a ti a. “ Lalpa chuan, ‘Hêng mite luhlulzia hi ka hria alâwm. Lo ngawi mai rawh, tu ma hriat tawh hauh loh tûrin ka han tiboral teh ang. Nangma thlahte aṭangin anni aia thil ti thei zâwk leh tam zâwk hnam ka din mai teh ang,’ a ti bawk a. “Tlâng aṭang chuan ka kîr thla a, thuthlung ziakna lungphêk pahnih chu ka keng a. Lalpa, in Pathianin awm dân tûr a hrilh che u kha in lo pênsan dêr tawh a, bâwngno lim chhûng chawpin in Pathian lakah thil sual in ti ta tih ka hmu a. Lungphêk pahnih chu ka keng a, in hmuh ngeiah ka vawm keh ta a nih kha. In sualna avâng leh Lalpa tithinur tûra a pawi in khawih luih avângin Lalpa hmaah chuan ni sawmli leh zan sawmli eng mah eia in lovin ka bawkkhup leh a. Nuai bo vek che u duh khawp hialin Lalpa chu a thinur a; a thinurna nasa tak chu a lo thawk ang tih ka hlau a ni; mahse, chumi ṭum pawh chuan ka thu chu Lalpa chuan min lo ngaihthlâksak a. Tihhlum duh hial khawpin Arona chungah pawh Lalpa chu a thinur a, a tân pawh ka ngensak a. In thil sual tih bâwngno lim chu ka la a, meiah ka rawh a; vaivut anga dipin ka râwt a, tlâng aṭanga lui lo luang thlaah chuan ka phul a. “Tabera-ah te, Masa-ah te, Kibrot-hatava-ah te khân Lalpa in Pathian chu in tithinur a. Kades-barnea-ah khân, ‘Kal ula, ram ka pêk tûr che u chu han luah rawh u le,’ tiin Lalpa chuan a tîr che u a; mahse, Lalpa in Pathian thupêk chu in do tlat a, a thu chu in ring ngam lo va, in ngaithla duh lo a nih kha. Ka hriat tirh che u aṭangin Lalpa lakah in hel reng mai. “Tihhlum vek che u a tum avângin ni sawmli leh zan sawmli chu Lalpa hmaah ka bawkkhup a; Lalpa hnênah chuan ka ṭawngṭai a, ‘Aw Lalpa Pathian, i mi, i rochante hi tihlum vek teh suh, Aigupta ram ata chu ropui takin i tlan chhuak a, kut chak takin i hruai chhuak a nih kha. I chhiahhlawh Abrahama te, Isaka te, Jakoba te hre reng la, hêng mite luhlulna te, an sualna leh an khawlohnaah te ngawt hian en teh suh. Chutilo zawng, Aigupta miten, ‘ Lalpa chuan pêk a tiam ram chu a hruai thleng zo lo a ni; a huat avângin thlalêra thah atân a hruai chhuak a lo nih zâwk hi,’ an ti ang asin. I mi, i rochante an ni miau a, kut chak leh bân phar meuhva i hruai chhuahte kha an ni si a,’ ka ti a. “ Lalpa chuan ka hnênah, ‘Lungphêk pahnih, a hmaa mi ang kha chher la, tlângah ka hnênah lo chho leh ang che; a bâwm tûr thingrem siam bawk rawh. I tihkeh tâk lunga chuang ang kha, chûng lungah chuan ka lo ziak leh ang e, bâwmah chuan i dah dâwn nia’ a ti a. Tichuan, Sitim thingin thingrem ka siam a, a hmaa mi angin lungphêk pahnih ka chher a, a pahnih chuan ka chhohpui ta a. Lungphêkahte chuan a hmaa thu ziak ang chiah, thupêk sâwm kha a lo ziak leh a; tlâng bula in pun khâwm ni-a mei aṭanga in hnêna a thu sawi chu Lalpa chuan min pe a. Tlâng aṭang chuan ka lo kîr a, bâwm ka siamah chuan Lalpa min hrilh angin lung phêkte chu ka dah a, tûn thlengin a la awm ta a ni. “Israel-te chu Beerot-bene-jaakan aṭangin Mosera-ah an insawn a, chutah chuan Arona chu a thi a; kan phûm a, a fapa Eleazara chuan puithiam lalber hna chu a thawk ta a. Chuta ṭang chuan Gudgod-ah an insawn a, tui tam tak awmna hmun Jotbata-ah chuan an insawn a. “Chutih lai chuan Levia thlahte chu Lalpa chuan Thuthlung Bâwm enkawltu atân leh zâwn ṭhîntu atân a ruat a; Lalpa hmaa dinga, a rawng bâwl a, a hminga mipui mal sâwmsak ṭhîn tûrin tûn thlengin a ruat ta a ni. Chuvâng chuan, Levia chite chuan an unau dangte angin ram bîk leh chanpual hran an nei ve dâwn lo va, Lalpa in Pathian sawi angin Lalpa hnêna thilhlan hi an chanpual ve tûr chu a ni. “Tlângah chuan ni sawmli leh zan sawmli ka awm a, Lalpa chuan chumi ṭum pawh chuan ka thu a lo ngaithla a, Lalpa chuan tihhlum loh che u a remti ta a. Lalpa chuan, ‘Tho la, i mite hma hruai rawh, an pate hnêna pêk ka tiam tawh ram chu luah tûrin kal zêl rawh se,’ mi ti a. “Khai le, Israel-te u, Lalpa in Pathian hian in lakah eng nge a phût? Lalpa, in Pathian chu ṭih a, a duhzâwng apiang tih a, tihtakzeta rilru zawng zawnga amah chauh hmangaih leh a rawngbâwl te, in ṭhatna tûra vawiina ka hrilh che u, a thupêk leh a thuruat zawm te hi a ni lâwm ni? Vân pum pui te, lei leh a chhûnga awm zawng zawng te neitu hi Lalpa chu a ni; chuti taka mi ropui chuan in pute chu a hmangaih êm êm a, hnam dang zawng zawng aiin a thlang ta hial che u a ni. Tichuan, tûn chinah zawng Lalpa thu chu awih ula, luhlul tawh suh u. Lalpa in Pathian hi pathiante Pathian, lalte Lal, Pathian ropui, thiltithei leh ṭihbaiawm tak chu a ni; tu mah thlei bîk a nei lo va, tlawn lungawi theih lah a ni hek lo. Fahrahte leh hmeithaite thu chu dik takin a ngaihtuahsak ṭhîn a, in zînga hnam dang awmte pawh a hmangaih a, an ei tûr te, silh tûr te a pe tho a ni. Chuvângin, in zînga awm ram dang mite chu hmangaih ve ula, Aigupta ramah mikhual in zu nih tawh kha. Lalpa in Pathian chu ṭih ula, a rawng bâwl ula, amah chu vuan tlat rawh u; intiamkam nân a hming chauh chhâl ṭhîn ang che u. In mit ngeia in hmuh, thil ropui tak tak leh mak tak tak tia chawimawitu che u chu in Pathian hi a ni. In pute, mi sawmsarih chu Aigupta ramah an chhuk a, tûnah zawng Lalpa in Pathian chuan arsi zâta tamin a tihpun tâk che u hi. “Tin, Lalpa in Pathian chu hmangaih ula, a thuruat te, awm dân tûr a tih te, a thupêk te chu zâwm reng rawh u. Lalpa chungchâng, nangmahni ngeiin in hriatte kha ngaihtuah ṭhîn rawh u. Chûng thil hretute chu in fate an ni lo, nangmahni ngei hi in ni, Lalpa in Pathian thununna natzia te, a ropuizia te, thu a neihzia te leh thil a tihtheihzia te in hmu a; Aigupta lal Farawa leh a ram chhûnga chhinchhiahna thil mak tak tak a tih te, Aigupta sipaiho, an sakawrte leh an sakawrtawlailîr a sawisak dân te leh an ûm lai che ua Tuipui Sen a chîmpiltîr dân te, vawiin thlenga a tihchhiat tâk thu te in hre vek a ni. He hmun in lo thlen hma, thlalêra in awm laia in chunga a thiltih te, Reubena thlah zînga Eliaba fa Dathana leh Abirama te chu an chhûng te, an puan in te, an chhiahhlawh te leh an ran te nên lam bûk dang kiang maia awm an ni na a, lei a lo kak a, an tlâk tâk bîkzia te kha in hria a, Lalpa thil ropui tak tak tihte chu in mit ngeiin in hmuh kha. “Thupêk, vawiina ka hrilh zawng zawng che u hi zâwm ula; tichuan, in lo chak ang a, in kalna tûr ramah chuan in lût ang a, in nei mai thei ang a, khawizu leh hnutetuia luang ram, in pate hnên pawha pêk a tiam tawh che u ramah chuan in dam rei thei ang. In ram, in neih tûr hi, in awmna ṭhin Aigupta ram ang kha a ni ve lo; chuta in thlai chînte chu tuia châwmin in duat a ṭûl ṭhîn. In neih tûr ram chu tlâng leh ruama khat a ni a, vân ruahtui dawng tam ram a ni. Lalpa in Pathian chuan chu ram chu a duat hle a, kum tîr aṭanga kum tâwp thlengin a vil reng a ni. “Tichuan, vawiina ka hrilh che u thupêkte hi zâwm rawh u, Lalpa in Pathian hi hmangaih ula, tihtakzetin a rawngbâwl rawh u. Ruah hmasa leh ruah hnuhnûngte chu in ramah a hun takah a sûrtîr ang a, in buh te, in grep te, in oliv te, a hun takah in seng thei ang a; in ran ei tûr hnimte pawh a tiduah ang. Nangni pawhin puar taka ei tûr in nei reng ang a, in tlai hle ang. “Fîmkhur rawh u, mahni inbum chawpin in pêng hlauh ang e, pathian dangte chibai bûkin an rawng in bâwl ve dah ang e. Lalpa chu a thinur ang a, vânte khi khârin ruahte a sûrtîr lo vang a, leiah eng mah a rah lo mai ang. Lalpa pêk che u ram ṭha tak aṭang hian in boral thuai mai ang. Chuvângin, a thute hi in rilru leh in thinlungah vawng ṭha ula, hlut hle rawh u, in hriat reng theih nân in bânah te phuar bet ula, in mit inkâr chalhrênah te dah rawh u. In fate pawh zirtîr rawh u, in chhûnga in ṭhut lai te, kawnga in kal lai te, in mut dâwnah te leh in thawh dâwnah te sawi sawi ṭhîn ang che u. In kawngka biangah te ziak ula, in tual kawngkhârah te târ ang che u; tichuan, in pate hnêna pêk a tiam ramah hian, lei hi vânin a khuh chhûng chu in fate nên rei tak in dam ang. “A thupêk ka hrilh zawng zawng che u hi zâwm ula, ti ṭhîn rawh u. Lalpa in Pathian chu hmangaih ula, a duh ang chuan awm ula, amah chu vuan tlat rawh u. Lalpa chuan in hmaah hêng hnam zawng zawng hi a ûm chhuak ang a, in aia hnam tam zâwk leh chak zâwkte chu an ram in luhchhuahsak ang. In rah apiang chu in ram a ni zêl ang. Thlalêr leh Lebanon inkâr, Eufretis lui leh Mediteranean tuipui inkâr ram chu in ram a ni vek ang. Tu mah lo dang thei che u an awm lo vang. Lalpa in Pathian chuan a sawi tawh angin in kalna apiangah in hmaah mite a tizâm zêl dâwn a ni. “Ngai teh u, vawiinah hian malsâwmna dawn theihna leh ânchhe dawn theihna kawng ka hrilh che u hi. Vawiina ka hrilh che u Lalpa, in Pathian thupêk zawm hi malsâwm dawn theihna kawng chu a ni. Vawiina ka hrilh che u Lalpa in Pathian thupêk awih duh lo te, tih tûr ka hrilh che u ti lova pêng bo te, in la hriat ngai hleih loh pathian dang biakte hi ânchhe dawnna kawng chu a ni. “ Lalpa in Pathianin in luah tûr ram a hruai thlen hunah che u chuan Gerizim tlângah malsâwmna kawng hi puang ula, Ebal tlângah ânchhe dawnna kawng hi puang bawk ang che u. Hêng tlângte hi Jordan lui thlang lam, Kanan ram chhûnga awm Jordan ruam khawthlang lam, More sasaw thing kiang, Gilgal khaw bula awm a ni. Jordan lui in kân ṭêp tawh a, Lalpa in Pathianin ram a pêk che u chu in luah dâwn hnai ta. Chûng ram chu in lâka, awmhmun in benbel hunah chuan, thuruatte leh awm dân tûr vawiina ka hrilh che u zawng zawng hi zâwm ngei ang che u. “ Lalpa in Pathian pêk che u ram in luaha, in dam chhûnga ngun taka in zawm tûr thuruatte leh awm dân tûrte chu hêng hi a ni: In va luahlan tûr hnamten an pathian an biakna hmun, tlâng sâng tak taka mi te, muala mi te, thingbuk tinrêng hlima mi te chu in tihchhiatsak vek tûr a ni. An maichâmte chu in theh darh ang a, an lungphunte chu in chhu chhia ang a, Aseri lem an thingphunte chu in hâl ang a, thinga milim an tukte chu in chêk chhe vek ang a, hêng hmaahte hian chibai bûka an kûn leh tawh lohna tûr khawpin tichhe hlauh ang che u. “Hêng mite biak dân ang hi chuan Lalpa in Pathian chu in be ve tûr a ni lo. Israel hnam zawng zawng ram chanpual aṭangin Lalpa chuan a hming awmna tûr hmun pakhat a thlang ang a, chutah chuan, a hmaah in lo kal khâwm ṭhîn tûr a ni. Chutah chuan in hâlral thilhlante leh in thilhlan dangte in rawn hlân tûr a ni; in sâwma pakhat te, in thilpêk te, in intiamkam tlâkna thilhlan te, mahni duh thu-a thilhlan te, in ran no piang hmasa ber te in rawn dah ṭhîn tûr a ni. Chutah chuan Lalpa in Pathian hmaah, in hnathawh mal a sâwm avânga in thil ṭha neihte chu in chhûngin hlim takin in ei ṭhîn dâwn nia. “Chumi hunah chuan tûna mahni duh duha in tih ang hian in ti tawh tûr a ni lo. Tûnah zawng, Lalpa, in Pathianin a pêk tûr che u ramah lûtin in la châwl rih lo va. Jordan lui in kai a, Lalpa in Pathianin a pêk tûr che u rama in chên a, in vêla in hmêlmate laka râlmuang taka in awm hunah erawh chuan, Lalpa in Pathianin a hming awmna tûr hmun a thlanah chuan, ka hrilh zawng zawng che u kha in rawn keng tûr a ni in hâlral thilhlan te, in inthawina te, in sâwma pakhat te, in thilpêk te, Lalpa hnêna intiamkam tlâkna thilhlan te chu rawn keng ṭhîn ang che u. In fanu fapa te, in bawihpa leh in bawihnu te, in khuaa awm Levia chite nên Lalpa, in Pathian hmaah hlim takin eiin bâr ang che u. In duh duhna hmunah in hâlral thilhlante hi in hlân tûr a ni lo. In zînga hnam khat ram chanpual Lalpa hmun thlanah chauh in hâlral thilhlante hi in hlân ang a, tih tûr ka hrilh zawng zawng che u hi in ti tûr a ni. “In ran vulhte erawh chu in awmna apiangah in talh thei ang. Lalpa in Pathianin sa a pêk apiang che u chu in ei thei ang; mi bawlhhlawh leh mi thiangte pawhin sakhi leh sazuk sa angin in ei thei ang. Sa thisen erawh chu in ei tûr a ni lo, leiah a luang ral tûr a ni. Sâwma pakhat in pêk buh te, uain te, oliv hriak te, in ran no neih hmasak te, in intiamkam tlâkna sa te, mahni duh thua thilhlan sa te leh in thên thilhlan sa rêng rêng te chu mahni khuaah in ei tûr a ni lo. Lalpa in Pathian hmun thlanah chuan a hmaah ngei in ei tûr a ni. In fanu in fapa te, in bawihpa leh in bawihnu te, in khuaa awm Levia chi te nên, Lalpa hmaah chuan in thawhrah te chu hlim leh lâwm takin in ei tûr a ni. In rama in awm chhûng chuan Levia chite hi ngaihthah hauh suh ang che u. Lalpa in Pathianin a tiam anga in ramri a tihzau hunah chuan in duhna apiangah in sa châkzâwng chu in ei thei ang. Lalpa in Pathianin a hming dahna tûr hmun a thlan chu, in awmna aṭanga a hlat viau chuan Lalpa pêk che u in ran vulhte chu ka hrilh che u ang hian in talh thei ang: in duh tâwkin mahni inah a sa chu in ei thei ang. Sakhi leh sazuk sa in ei angin mi thiangte leh mi bawlhhlawh lai te pawhin a sa chu an ei thei ang. Sa thisen erawh chu ei rêng rêng suh u, nunna chu thisenah a awm a, a nunna chawpin in ei tûr a ni lo. Thisen chu tui angin leiah leihbua ula, ei suh u. A thu anga in tih chuan, Lalpa chu a lâwm ang a, in thlahte leh in tân a la ṭha ang. Lalpa hnêna hlan in tiam thil serhte erawh chu a hmun ruatah chuan in rawn dah tûr a ni. Lalpa, in Pathian maichâma hâlral thilhlan chi te, maichâma thisen theha, a sa ei ho tûr chite chu, chutah ngei chuan in rawn dah tûr a ni. Hêng ka thu hrilh zawng zawng che u hi zâwm thlap ula, Lalpa ṭha tihzâwng leh a lâwmzâwng chu in ti a ni ang a, in thlahte leh nangni hian kumkhuain in ṭhatpui ang. “ Lalpa, in Pathianin, in va luhchhuah tûr hnamte chu a tihboral a, an ram in neih a, in luahsak hunah chuan, a tihboral phahna ang thil kha in ti ve hauh tûr a ni lo; an biak pathiante chu zawng chhuakin, ‘Engtin nge an biak ṭhin le?’ tiin, an tih anga biak ve tum suh ang che u. An pathiante an biak angin Lalpa in Pathian hi in be tûr a ni lo; Lalpa tenzâwng, thil chi tinrêng tih an chîng ṭhîn. An maichâmahte chuan an fanu leh fapate ngei pawh hâlral thilhlanah an hâl ṭhîn a ni. Ka hrilh zawng zawng che u hi ti ngei ang che u; eng mah belh suh ula, eng mah hmaih bawk hek suh ang che u. “In zînga zâwlneiin emaw, mang neih chîngin emaw thil mak tak tak leh chhinchhiahna hrilh lâwk che u sela, an hrilh lâwk ang thil mak tak tak leh chhinchhiahna te chu thleng dik ṭhîn mah se, ngaihven suh u. ‘Ti rawh u, pathian dang biak tûr i zawng ang, in la hriat ngai lohte rawng i bâwl ang,’ ti mah se; chutianga ti zâwlnei leh mang neih chîngte thu chu bengkhawn suh ang che u; Lalpa in Pathian chu tihtakzet leh rilru zawng zawngin in hmangaih nge hmangaih lo tih Lalpa in Pathianin a fiahna che u a ni. Lalpa in Pathian hnung chu zui ula, a rawng chu bâwl rawh u. Chutiang zâwlnei leh mang neih chîngho chu in tihlum tûr a ni, Lalpa in Pathian, Aigupta ram aṭanga hruaichhuaktu che u lakah an heltîr che u a, Lalpa in Pathianin awm dân tûr a kawhhmuh che u ata an pêntîr che u a ni, in zînga chutiang mi sual awm chu in thian fai tûr a ni. “In unau, in nu hrin ve ngeiin emaw, in fapain emaw, in fanuin emaw, in nupui pawm laiin emaw, in ṭhian bul berin emaw in nu leh in pate la hriat ngai loh pathian be tûra an thlêm che u chuan duh suh ang che u. In bul hnaia chêngte pathian emaw, ram hla taka awmte pathian emaw, leia chêng rêng rêng mi dang pathian emaw be tûra an sâwm che u chuan, an thu chu ngaithla suh ula, ngaihven hek suh ang che u; anni chu khawngaih suh ula, lainat hek suh u, hum pawh tum hek suh u. Chûngho chu in tihlum tûr a ni, nangin kut i thlâk hmasa ang a, an chungah mipui an che ve dâwn nia. Bawih in nihna Aigupta ram aṭanga hruaichhuaktu che u Lalpa in Pathian laka pên botîr che u an tum avângin lungin in dêng hlum tûr a ni. Tichuan, Israel mi zawng zawngin an hria ang a, an hlau vang; in zîngah chutiang thil sual chu a awm leh tawh ngai lo vang. “ Lalpa in Pathianin a pêk che u khawpuiah te in awm hunah, in zînga mi sual, tlâktlai lo tak takten an awmna khuaa mite chu in la biak ngai loh pathian be tûrin an thlêm thlu ta tih in hriat chuan, in chhui ang a, ngun takin in zâwt vêl ang a, in zîngah chutiang thil tenawm ti chu an awm ngei a ni tih in hriat chuan, chu khuaa mite chu khandaihin in that tûr a ni, a chhûnga mi zawng zawng leh an rante chu in that vek tûr a ni. An thil neih zawng zawng in lâkte chu khawpui tual zau laiah in la khâwm ang a, an khua leh an sum in lâksakte chu in hâl vek tûr a ni; Lalpa tâna serh hran tawh chu tu man la suh se; Lalpa in Pathian tâna hâlral thilhlana hâl ral vek tûr a ni; chu khua chu thil chim chhe awm khâwm mai a ni kumkhua ang a, tu man an din leh tûr a ni lo. Lalpa tâna serh hran tawh chu tu man la suh se; tichuan, Lalpa thinur chu a dai ang a, a khawngaih ang che u a, in chungah ngil a nei ang a, in pate hnêna a tiam tawh angin a tipung leh ang che u. Lalpa in Pathian aw hi ngaithla ula, a thupêk ka hrilh che u hi zâwm ula, Lalpa in Pathian duhzâwng chu ti phawt mai teh u. “ Lalpa in Pathian mite in ni a, lu in sûnin inzai thi suh ula, in chalsam ziat kawlh ve hek suh u. Khawvêla awm zawng zawng zîngah nangni hi Lalpa in Pathian tâna hnam serh, a pual bîk atâna Lalpa thlan chhuah chu in ni e. “Thil tenawm rêng rêng in ei tûr a ni lo. An sa in ei theih tûr rante chu hêngte hi a ni: bâwng, kêl leh berâm, sakhi, sangai, sazuk, sathâr, saza, ramsial, ram berâm te hi. Sa tinrêng, a ke tin kâk phak leh chaw ṭhial nawn chi chu in ei thei ang. Chaw ṭhial nawn a, tin kâk lo, tin kâka chaw ṭhial nawn lo sa chu in ei tûr a ni lo. Sanghâwngsei te, sazupui te, sangawi te hi in ei tûr a ni lo; chaw chu an ṭhial nawna, an tin a kâk lo a ni; in tân a bawlhhlawh a ni. Vawk hi a tin a kâk; mahse, chaw a ṭhial nawn lo va, a sa in ei tûr a ni lo, in tân a bawlhhlawh a ni. An sa in ei tûr a ni lo va, a thisâwn chu khawih pawh in khawih tûr a ni lo. “Tuia awm hêngte hi in ei thei ang: phuhlip leh pângparh nei zawng zawng sa in ei thei ang. Pângparh nei lo, phuhlip pawh nei lo sa chu in ei tûr a ni lo, in tân a tenawm a ni. “Sava ei thiang apiang chu in ei thei ang. Hêngte erawh hi chu in ei tûr a ni lo: mupui, lungdûp, muârla, mulukawlh, ngawihûp, mutê chi rêng rêng te, choak chi rêng rêng te; sava sâng vabak, tuifinriat sava mu chi rêng rêng, hrângkir, chhimbuk, chingpirinu, chhimbuksialki, tuivalawng, mulukawlh, luidung mu, kânghlai, dîl sava chi rêng rêng, chhuangtuar, bâk te hi. Rannung thla nei, ke pali-a vâk chi rêng rêng chu in tân a bawlhhlawh a, ei tûr a ni lo. Thlâwk thei chi sa thiang tawh phawt chu in ei thei ang. “Amaha thi chu eng sa mah in ei tûr a ni lo, in khaw chhûnga ram dang mi awm vete ei atân an hnênah in pe thei ang a, in hralh thei bawk ang. Lalpa in Pathian tâna inserh thianghlim tûr hnam in ni. Kêl notê chu a pui hnutein in chhûm tur a ni lo. “In lo rama thlai tharte chu sâwma pakhat kum tin dah hrang rawh u. Lalpa in Pathianin a hming awmna tûra a thlan hmunah chuan kalpui ula, a hmaah chuan in buh te, uain te, oliv hriak te; in bâwng leh berâmno hrin hmasak ber sâwma pakhat in pêkte chu ei ṭhîn ang che u. Lalpa in Pathian chu ṭih nachâng in lo hriat theih nân. In awmna chu a hlat hle a, Lalpa, in Pathian malsâwmna in dawn chu ken a harsat chuan, hralh ula, a man chu têl ula, Lalpa in Pathianin a thlan hmunah chuan kalpui ang che u. Chu chuan bâwng te, berâm te, uain te, zu te, in châk zawng apiang lei ula, in chhûngkuain Lalpa in Pathian hmaah hlim leh lâwm takin ei ho ang che u. In khuaa Levia chi awm vete chu in ngaihthah tûr a ni lo, in zîngah ram chanpual an nei ve lo a nih kha. “Kum thum kuma in sâwma pakhat chu in awmna khuaa hmun pakhatah la khâwm ṭhîn ang che u. Ram chanpual an neih ve loh avângin Levia chite chuan chu chu an ei ang; mikhual te, fahrah leh hmeithai, in khaw chhûnga awmte pawhin an ei tûr a ni; puar takin an ei ve tûr a ni. Hetiang hian ti ula, Lalpa, in Pathian chuan in thiltih apiang a tihmuingîl ang che u. “Kum sarih dan zêlah in leiba in ngaidam tûr a ni. Hetiang hi ngaihdam dân tûr chu a ni: Israel mi rêng rêngin a Israel-pui tangka pûktîr sela, a kum sarih tâwpah chuan a ngaidam tûr a ni, a tangka ba chu a ṭhîng tûr a ni lo; Lalpa ngeiin a ba chu a nuai bosak tawh a ni. Hnam dangin in lei an bat chuan in ṭhîng thei ang; nangmahni miin in hnêna lei an bat chu in ṭhîng tûr a ni lo. Lalpa in Pathianin a pêk che u ramah chuan mal a sâwm dâwn che u avângin in zîngah tu mah rethei in awm tûr a ni lo. Lalpa in Pathian aw chu ngaithla ula, vawiina ka hrilh che u, a thupêk zawng zawng hi zâwm phawt mai teh u. Lalpa in Pathian hian a tiam tawh angin mal a sâwm ang che u a, hnam tam tak in pûktîr ang a, nangni chuan in pûksak lo vang; hnam tam tak chungah thu in nei ang a, in chungah erawh chuan thu an nei lo vang. “ Lalpa in Pathianin a pêk che u ramah chuan in khaw chhûnga awm ve, in chipui ngei tlachham lakah inchhungêng suh ula, ṭanpui hreh suh ang che u. Phal takin an mamawh zât zât chu pûktîr rawh u. Rilru sual pu suh ang che u, ‘Kum sarihna, leiba ngaihdamna hun a lo hnai ta si,’ tiin in unau rethei chu huphurhin melh suh ula, eng mah kawmpui suh ang che u; in chunga a vui thu Lalpa hnêna a sawi hlauh chuan thil sual ti in ni mai ang. Ui rilru chungin pe suh u, phal takin pe ula; chutianga in tih chuan Lalpa in Pathian chuan in kutkawih mal a sâwm ang a, in tih apiangah in hmuingîl ang. In ramah rethei an awm reng dâwn a; chuvângin, thu ka pe a che u, in rama rethei te, tlachham te leh in unau te lakah thilphal hle rawh u. “In Israel-pui, mipa emaw, hmeichhia emaw bawihah an rawn inhralh chuan, kum ruk in chhawr ang a, in chhuah tûr a ni. A kum sarihnaah chuan in zalêntîr tûr a ni. Chutia in chhuahtîr chuan, kut ruakin in kaltîr tûr a ni lo. Berâm emaw, uain emaw Lalpa hnên aṭanga malsâwmna in dawn chu phal takin pe ve ang che u. Aigupta ramah khân bawih in nih kha hre reng rawh u; Lalpa in Pathianin bawih ata a chhuahtîr che u a nih kha. “In bawih chuan nangni leh in chhûngkua a ngainat che u avângin ‘Ka chhuak lo vang’ lo ti ta sela. Chuti a nih chuan in kawngka bulah in dintîr ang a, a beng in verh ang a; tichuan, a dam chhûng chuan in bawih a ni tawh ang. In bawihnu pawh chutiang bawk chuan ti ang che u. Ui chungin in bawih chu chhuah suh u; in hna kum ruk a thawk tawh a, hlawhfa ruai ni ula in sum let hnih in sêng tawh ang. Chutiang chuan ti ula, kawng engkimah in Pathian chuan a tihmuingîl ang che u. “In bâwng leh berâmno hrin hmasak berte chu Lalpa in Pathian tân dah hrang ang che u. Bâwng chu chhawr suh ula, berâm pawh a hmul mêt hek suh u. Kum tin Lalpa hun ruatah chuan, Lalpa in Pathian hmaah in chhûngkuain in ei ṭhîn tûr a ni. A kebai emaw, a mitdel emaw, hmêlhem nasa deuh emaw chu Lalpa in Pathian hnênah chuan in hlân tûr a ni lo. In khaw chhûngah erawh chuan in ei thei ang, sakhi sa leh sazuk sa in ei angin mi thiangte leh bawlhhlawh lai te pawhin an ei thei ang. A thisen erawh chu in ei tûr a ni lo; tui angin leiah leihbaw rawh u. “Abib thla hian Lalpa, in Pathian chuan Aigupta ram aṭangin zânah a hruai chhuak che u a; Abib thla hian Lalpa in Pathian tân Kalhlên kût hi hmang ṭhîn rawh u. A hming awmna tûr Lalpa hmun thlanah chuan, in bâwng emaw, berâm emaw, kêl emaw Kalhlên kût atân Lalpa in Pathian hnênah hlân rawh u. A sa chu chhang dawidim telh nên in ei tûr a ni lo; Aigupta ram in chhuahsan dâwna hmanhmawh taka in ei ang khân tuarna entîrna chhang dawidim telh loh chu, ni sarih chhûng in ei tûr a ni. In dam chhûngin Aigupta, in retheihna ram in chhuahsan ni in hriat reng nân ei ṭhîn ang che u. “In ram chhûngah rêng rêng ni sarih chhûng chu dawidim a awm tûr a ni lo. A ni hmasa ber tlaia in thilhlan, in ran talh in ei bâng sa a tûk atân dah tûr a ni lo. Lalpa in Pathianin luah tûra a pêk che u khaw chhûngah pawh Kalhlên kût sa hi in hlân tûr a ni lo; Lalpa in Pathianin a hming awmna tûra a thlanah ngei chuan in Kalhlên kûtna tûr chu, tlai ni tlâk dâwn, Aigupta ram in chhuahsan hun angah khân in hlân ṭhîn tûr a ni. Lalpa, in Pathian hmun ruatah chuan in chhûm ang a, in ei ang a, a tûk zîngah chuan in puan in lamah in haw leh tûr a ni. Ni ruk chhûng chu dawidim telh loh chhang in ei ang a, a ni sarih ni chuan Lalpa in Pathian tân inkhâwmpui urhsûn tak nei ula, chumi ni chuan hna rêng rêng thawk suh ang che u. “Favaha buh in hleh ṭan ni aṭangin hapta sarih chhiar ula; tichuan, Pentikos kût chu hmang ang che u. Lalpa in Pathianin malsâwmna tam tak a vûr che u aṭangin amah chawimawi nân in thilthlâwn pêkte chu hlân rawh u. Lalpa hmaah chuan in fa te, in chhiahhlawh te, a hmei a pain in khuaa Levia chi te, hnam dang te, fahrah te leh hmeithai te in zînga awm ve te nên chuan hlim takin Lalpa in Pathianin a hming awmna tûra a thlanah chuan ruai ṭheh rawh u. Hêng thuruatte hi ngun takin zâwm ula, Aigupta ramah bawih in nih ṭhin kha hre reng ang che u. “Buh te in seng zawh vek a, in grepte in sâwr zawh vek hnuah, ni sarih chhûng Bâwkte kût hmang ṭhîn ang che u. In fa te, in bawihnu leh bawihpa te, Levia chi te, ram dang mi awm ve te, fahrahte leh hmeithai, in khuaa awm te nên hlim takin ruai ṭheh ang che u. Lalpa in Pathianin a hming awmna tûra a thlanah chuan ni sarih chhûng hmang ang che u. Lalpa in Pathian chuan in kutkawihte chu mal a sâwm a, a tihhmuingîl che u avângin in lâwm hle tûr a ni. “In zînga mipa zawng zawng chu Lalpa in Pathian hmun thlanah chuan kum tin ṭum thum in lo kal ṭhîn tûr a ni: Kalhlên kûtah te, Pentikos kûtah te, Bâwkte kûtah te, Lalpa hmaah chuan eng mah keng lovin in lo kal tûr a ni lo. Mi tinin Lalpa in Pathian malsâwmna in dawn ang zêlin in theih ang ang in pe tûr a ni. “ Lalpa in Pathianin khawpui a pêk che u apiangah rorêltu leh hotu tûrte ruat ṭhîn ang che u. Dik takin ro an rêl ang a, hleih an nei tûr a ni lo. Thamna an la tûr a ni lo, thamna hian mi fingte mit pawh a tidel ṭhîn a, mi dikte chungthu pawh dik lo takin a rêltîr ṭhîn. Eng lai pawhin a âwm tâwk tak leh dik takin thil ti ṭhîn ang che u; tichuan, Lalpa in Pathianin ram a pêk che u hi dam takin in luah reng thei ang. Lalpa in Pathian maichâm in siamna bulah chuan Aseri lim, thing in phun tûr a ni lo. Lalpa in Pathian huatzâwng lung pawh in phun tûr a ni lo. “ Lalpa in Pathian hnênah hmêlhemna nei bâwng emaw, berâm emaw in hlân tûr a ni lo, a tenzâwng tak a ni. Lalpa in Pathianin khua a pêk che u chhûngah rêng rêng chuan mipain emaw, hmeichhiain emaw in Pathian ngaimawh zawng tak tiin a thuthlung bawhchhiain, pathian dangte ûmin an rawng a bâwla, biak loh tûr ka tih - nî te, thla te leh thil dang tam tak te khi bia sela, chutiang mi chu an awm tih in hriat chuan ngun takin in zâwt chhuak ang a, Israel-te zîngah chutiang thil tenawm ti in hriat chian chuan, kulh kawngkaah, chutiang mi, mipa emaw, hmeichhia emaw chu in rawn hruai ang a, chu mi chu lungin in dêng hlum tûr a ni. Thuhretu pahnih tal thu avâng chauhvin in tihlum thei ang; mi pakhat thu avâng mai chuan in tihlum tûr a ni lo. Thuhretute chuan lung chuan an dêng hmasa ang a, mipuiin an dêng ve chauh vang. Chutiang chuan in zînga thil ṭha lote chu in thian fai tûr a ni. “Mihring thah chu tihpalh a nih leh nih loh thu-ah te, rûkrûk leh rûk loh thu ah te, invuak palh leh palh loh thu-ah te dânin a huam loh tihthlûk harsa in khuaa in neih chuan, Lalpa in Pathianin a thlan hmunah chuan in kalpui tûr a ni. Levia chi, puithiamte leh chûng laia rorêltu tûra ruatte chu in râwn ang a, anni chuan a rêl dân tûr an hrilh ang che u. Lalpa hmun thlan aṭanga tih dân tûr an hrilh che u ang ngei chuan in rêl tûr a ni. An hrilh che u ang ngei leh an thu tihthlûk ang chiah chuan in rêl ṭhîn tûr a ni. “ Lalpa, in Pathian rawngbâwltu puithiam thu emaw, rorêltu tûra dah thu emaw duh lova tidanglam hlektu chu tihhlum tûr a ni, Israel ram chhûngah chutiang thil ṭha lo chu in thian fai tûr a ni. Mi tinin an hria ang a, an hlau vang a, thil an ti mai mai tawh lo vang. “ Lalpa in Pathianin ram a pêk tûr che u in thlena, in neiha, awmhmun in benbel hnu chuan, ‘Kan vêla hnamte angin lal i nei ve ang,’ in la ti ang. In lal tûr chu Lalpa in Pathian mi thlan ngei ni rawh se; nangmahni mi a ni ngei tûr a ni; hnam dang chu in lalah siam suh u. Lal chuan a sipaite tân sakawr a ngah viau tûr a ni lo, Aigupta ramah sakawr lei belh tûrin mi a tîr tûr a ni hek lo; Lalpa chuan ‘Chu lamah chuan in kîr leh tawh tûr a ni lo,’ a ti si a. Nupui pawh a nei ṭeuh tûr a ni lo, Pathian a hawisan phah ang e. Tangka leh rangkachak pawh a ngah viau tûr a ni lo. “A ram lalṭhutthlênga a ṭhut hun chuan Levia chi, puithiamhovin an kawl Dân bu hi a ziak chhâwntîr ang a; chu chu a kawl ang a, a dam chhûngin a chhiar ṭhîn tûr a ni; hênga dânte leh thuruatte hi uluk takin a zâwm ang a, Lalpa a Pathian chu a chawimawi ṭhîn tûr a ni. Chutichuan, a chipui Israel dangte aiin a indah sâng lo vang a, Lalpa thupêk pakhat tê pawh a namnûl lo vang a, rei tak a dam ang a, a thlahte pawhin Israel-te chungah ro an rêl reng ang. “Israel-te zîngah Levia chi, puithiamte chuan ram chanpual an nei ve tûr a ni lo, Lalpa hnêna thil hlan hâl bâng chu an nei ang a, chu chu an chanpual tûr chu a ni. Hnam dangin ram chanpual an nei angin ram an nei ve tûr a ni lo, Lalpan a tiam angin an chanpual chu Lalpa chu a ni. ‘Bâwng emaw, berâm emaw miin Lalpa hnêna an hlan apiang a dâr te, a khabe khing hnih te leh a pumpui te chu puithiam sa tûr a ni. In buh thar hmasa te leh in uain sâwr hmasak te leh in oliv hriak her chhuah hmasak ber te chu puithiam in pe tûr a ni; in berâm hmul meh hmasak ber pawh pe ang che u. Lalpa in Pathian chuan in zîng ata anni hi an thlah zêlte nên a hmaa ding a, a rawngbâwl tûrin kumkhua atân a ruat a ni. “A duh phawt chuan Levia chi rêng rêng chu, khawii khua aṭang pawhin Lalpa hmun ruatah chuan a lo kal thei ang. Chutah chuan Levia chi mi dangte ang bawkin Lalpa a Pathian rawng chu a bâwl ve thei ang. Puithiam dangte dawn ang ei tûr chu a dawng ve vek tûr a ni, ama chhûngten thil an rawn thawn erawh chu a nei bil thei ang. “ Lalpa in Pathianin a pêk che u ram in thlen hunah, chuta lo awmte thil tenawm tih ang chu ti ve suh ang che u. In zînga tu mahin maichâma hâl ral tûrin in fate in hlân ve tûr a ni lo; aien te, ṭhumvâwr te, aisân te, dawi te, kêl mei awrh te, ramhuaizâwl rawih te, thlarau zâwl te, mitthi thlûk te chîng ve suh u. Chutiang tih chîng chu Lalpa tenzâwng tak an ni; chuvâng alâwm Lalpa, in Pathianin hêng thil tenawm tih chîngte hi in hmaa a hnawh chhuah ni. Lalpa, in Pathian hmaah chuan hêng thil tenawm lakah hian in fihlîm vek tûr a ni. “Hêng hnam, in luhchhuah tûrte hian aisân an chîng a, ramhuaizâwl thu an ngaithla ṭhîn; nangni zawng Lalpa in Pathian hian chutiang in tih ve a phal lo. In zînga mi, keimah ang, zâwlnei a rawn pe ang che u, ani thu chu in zâwm dâwn nia. “Horeb tlâng bula in pun khâwm ni khân Lalpa in Pathian hmaah, ‘ Lalpa kan Pathian aw chu hre tawh lo ila, a mei râpthlâk tak pawh chu hmu tawh lo ila, kan thi mai dâwn alâwm,’ tiin in ngên a. Lalpa chuan ka hnênah, ‘An sawi chu a dik e, An zînga mi ngei zâwlnei ka ruatsak ang a, an hnêna sawi tûr ka hrilh ang a, ka thupêk chu a hrilh chhâwng ang. Ka hminga thu sawi ngaithla duh lo apiang chu keiman a chungthu ka ngaihtuah ang. Ka tirh ni si lova, ka hminga thu sawitu zâwlnei emaw, pathian dang hming sawitu zâwlnei emaw chu tihhlum tûr a ni,’ a ti a. ‘ Lalpa sawi a nih leh nih loh engtin nge kan hriat ang?’ in tih chuan, hei hi a thliar dân tûr chu a ni. Zâwlneiin Lalpa hminga thu a sawi chu a lo thlen lohva, a dik loh chuan, chu chu Lalpa hminga sawi a ni lo vang, ama duh thu-a sawi a ni, hlau suh ang che u. “In luahlan tûr hnamte chu Lalpa in Pathian chuan a tihborala, an ram chu in lâk a, an khuate in neih a, an inahte in chên hunah chuan, Miin mahni hmêlma ni lo, mi dang that palh sela, chûng khuaah chuan an tlân ang a, an him thei ang. Mi pakhat chuan a ṭhian nên thing kit dûn sela, a hreipui fang chu chêk thlawnin, a ṭhianpa chu dêng hlum ta sela, hêng khaw eng berah hian emaw a tlân ang a, a him thei ang. A tualtlânna tûr khua chu a hlat viau chuan a tihhluma thisen phuba latu thinur ling chuan a ûm pha ang a, tûn hma pawha inhuatna nei lo thah ve kher loh tûr chu a that mai dah ang e. Chuvângin, khaw pathum ruat tûrin ka ti che u a nih kha. “ Lalpa in Pathian chuan a tiam ang ngeia ram a pêk belh che u a, in pate hnêna pêk a tiam ram zawng zawng a pêk hunah che u chuan, khawpui pathum dang thlan belh leh ang che u. ( Lalpa in Pathian chu in hmangaih takzeta, a thu anga awm in tum tlat a, vawiina ka hrilh che u zawng zawng hi in zawm phawt chuan ram chu a pe ngei dâwn si che u a ni.) Lalpa in Pathianin ram a pêk che u-ah hian chutiang chuan ti ula, pawi khawih lo thisen chhuah suh u, a mawh in phurh loh nân. “Miin a hmêlma chu lo châng ruin lo beiin, lo tihlum ta sela; hêng tualtlânna khuaah hian tlân ve mah sela, chutiang thilah chuan ama awmna khaw upaten an ko ang a, a thaha laichîn hnai, thisen phuba latu tûr hnênah chuan an pe ang a, a lo tihlum ang. Khawngaih hauh suh u, Israel-te zîngah tual thah tibo rawh u; tichuan, kawng engkimah in hmuingîl ang. “ Lalpa in Pathianin ram hi a pêk lai che ua phun tawh, in ṭhenawmte ramri lung chu sawn suh. “Thuhretu pakhat mai avângin mi an thil tihah thiam loh chantîr tûr a ni lo; mi pahnih pathum thu-a nemngheh tûr a ni. Mi pakhatin mi dang tihchhiat tumin dâwtin hêk sela, an pahnih chuan Lalpa hmun ruatah chuan an kal ang a, chuta puithiamte leh rorêltu tûra ruatte hmaah chuan an ding dûn tûr a ni. Rorêltu chuan ngun takin a chhui ang a, a hêktu chuan dâwta hêk a nih chuan, a hêka tihchhiat a tumna ang chiah chuan a hêktu chungah chuan an ti tûr a ni; chutiang thil ṭha lo chu in zîng ata in tibo tûr a ni. Chutiang ti ve lote chuan an hriatin an hlau ang a, chutiang thil ṭha lo chu in zînga tu mahin an ti ve dâwn lo nia. In lainat tûr a ni lo, nun aiah nun, mit aiah mit, hâ aiah hâ, kut aiah kut, ke aiah ke a ni ang. “Indo tûra in thawh chhuahin sakawr-tawlailîr te, sakawr te leh in aia tam sipai in hmuhin in hlau tûr a ni lo. Lalpa in Pathian, Aigupta ram aṭanga hruaichhuaktu che u chu in lamṭang a ni si a. Hmêlma bei tûra in chhuah dâwn hunah chuan puithiam lalber a lo kal ang a, mite chu a rawn fuih ang. ‘Aw Israel-te u, hre rawh u, vawiin hian in hmêlma in do dâwn ta a, zâm suh ula, hlau hek suh u; thlaphâng suh ula, huphurh hek suh u. Lalpa in Pathianin a awmpui che u a, a chhan him dâwn a che u,’ a ti ang. Mipui hotute chuan mite hnênah, ‘In thar sa, la hlân lo in awm em? A in lamah haw rawh se, indonaah a thi palh ang a, a in sak chu mi dangin an hlansak dah ang e. Grep phuna a rah la ei lo in awm em? A in lamah haw rawh se, a grep rah chu mi dangin an ei dah ang e. Nupui huala, la nei si lo in awm em? Inah haw rawh se, chutilo chuan indonaah a thi hlauh ang a, mi dangin an neihsak dah ang e,’ an ti tûr a ni. Chumi zawhah chuan sipai hotute chuan, ‘Zâm leh hlau in awm em? In awm chuan in lamah haw mai rawh u, a sipaipuite rilru a tizâm dah ang e,’ an ti ang. Sipai hotuten chutia an tih zawh hnu chuan sipai pâwl tin tân hruaitu ruat thliah tûr a ni. “Khawpui in beih dâwnin khuaa mite chu inpe tûrin ngên hmasa ṭhîn ang che u. An kulh kawngkhâr an lo hawnsak che u a, in hnêna inpe an nih chuan in bawihah an awm ang a, duh duhin in chhawr thei ang. An inpêk duh lohva, indo an thlan chuan in hual tlat tûr a ni. Lalpa in Pathianin khua chu a lâktîr hunah che u chuan mipa zawng zawng chu that vek ang che u. Hmeichhia te, naupang te, ran te leh khaw chhûnga thil dang te chu mahni tân in nei thei ang. In hmêlmate thil chu Lalpa in Pathian chuan a pe tawh che u a, in duh duhin in ti thei ang. In luah tûr rama khawpui ni lo, ram pâwn daiha khawpuite in lâk hunah pawh chutiang chuan in sawisa tûr a ni. “ Lalpa in Pathianin in rochan atâna a pêk che u khawpuite in lâk hunah chuan, a chhûnga mi thaw thei tawh phawt chu pakhat mah zuah suh u. In that fai vek tûr a ni. Hit mi te, Amor mi te, Kanan mi te, Periz mi te, Hiv mi te, Jebus mi te chu Lalpa in Pathian thupêk awihin that vek ang che u. An pathian biaknaa thil tenawm tak tak an tih ṭhinte chu an zirtîr loh nân che u, that ula, Lalpa in Pathian lakah thil sual in ti dâwn lo nia. “Khua lâk in tum a, rei tak hual a ṭûl pawhin a vêla thei kûng chu kit suh ang che u. A rah chu in ei thei ang, a kûng erawh chu kit suh u, thingte chu in hmêlma an ni lo ve. A rah ei theih a ni lo tih in hriat chian thing erawh chu in kit thei ang, hmêlma khua chu in lâk hma chuan in hmêlmate beihna hmanruaah in hmang thei ang. “ Lalpa in Pathianin a pêk che u ram chhûngah mi ruang hmu ula, a thattu hre si lo ula, in hruaitute leh rorêltuten ruangin tu khua nge a hnaih ber tih an teh tûr a ni. A hnaih ber khaw hotute chuan bâwngla, la chhawr ngai loh, an thlang chhuak ang a. Lui kang ngai lo bulah an kai chhuk ang a, lei la leh ngai lohvah, eng mah la chînna ngai lovah bâwngla ring chu an elhtliak tûr a ni. Levia chi puithiam pawh an tel ve tûr a ni; tual thah thubuai rêng rêng hi a remtu tûr an ni si a. Lalpa in Pathianin ama rawngbâwltuah leh a hminga malsâwmna sawi ṭhîntuah a ruat a ni. Tual thi ruang hnaih ber khaw upate chuan, lui kama bâwngla, a ring an elhtliah chungah chuan an kut an sil ang a, ‘He mi hi kan thah a ni lo va, a thattu pawh kan hre lo. Aw Lalpa, i mi Israel, Aigupta ram aṭanga i hruai chhuahte hi ngaidam teh. Ngaidam la, pawi khawih lote thisen mawh chu i mite phurhtîr suh ang che,’ an ti ang. Chutia Lalpa tuk anga an tih chuan tual thah mawh chu in phur lo vang. “ Lalpa in Pathianin indona a hnehtîr che u a, mi in man ṭeuhva, chûng zînga nula hmêlṭha in tih zâwng tak nupuia in duh in hmuh chuan hâwn ula, an lu an ziat kawlh ang a, an tin an hlep vek bawk ang a. Man laia a kawr hâk chu an thlâk ang a, in inah chuan an awm reng tawh ang, thla khat chhûng chu an nu leh pate an hmuh tawh loh tûrte chu an sûn ang. Chumi hnu chuan nupuiah in nei thei ang a, in nupui an ni tawh ang. Nupuia in duh loh leh chuan an duhna apiangah in kaltîr ang a, nupuia in neih tawh avângin, bawih angin in en tûr a ni tawh lo va, in hralh tûr a ni hek lo. “Miin nupui pahnih nei sela, fapa hrinsak ve ve sela; a nupui ngainat loh zâwka fa chu a ngainat zâwka fa ai chuan upa zâwk sela, a fate hnêna ro a sem dâwn hunah, a nupui ngainat zâwk fa chu, duhsakin fa u chan a pe tûr a ni lo, a fapa upa zâwk chu, a nupui ngainat zâwka fa ni lo mah sela, chan hnih a pe tûr a ni. Fa tîrte hi ngaih pawimawh tûr an ni a, dân ang taka an chanvo pêk tûr a ni. “Miin fapa luhlul, tihmawh deuh mai nei sela, a nu leh a pate chuan hrem ṭhîn mah se, sâwt si lo sela; a nu leh pate chuan an awmna khaw hotute ṭhu khâwm hmaah chuan an rawn hruai ang a; upate hnênah chuan, ‘Kan fapa hi a luhlul a, mi ngawltâwt tak a ni, kan thu rêng rêng a awih duh lo va, zu leh sa ngawt a ngaihtuah mai,’ an ti ang a. Khuaa mi zawng zawng chuan lungin an dêng hlum tûr a ni; chutiang thil ṭha lo chu in zîng ata in thian fai vek tûr a ni. Israel mi zawng zawngin an hria ang a, an hlau ang. “Thil eng emaw a tihsual avânga tihhlum chu thinglêra khai a nih chuan, a ruang chu a zânriak tûr a ni lo, a thih ni la lain phûm tûr a ni. Chutiang mi khai hlum chu Pathian ânchhe dawng a ni a, Lalpa in Pathianin a pêk che u ram hi in tibawrhbâng tûr a ni lo. “I chipui, Israel mi bâwng emaw, berâm emaw thlun chhuak i hmuh chuan hai der suh, khalh hâwnsak rawh. A neitu chu khaw dang hla taka awm a nihin emaw, a neitu i hriat bawk si loh emaw chuan i inah kai haw ang che. A sabengtung bo i hmuhin emaw, a puan hloh i chharin emaw, thil eng pawh, i unau Israel thil hloh i hmuh chuan, chutiang chuan ti ang che. “In unau Israel bâwngpa emaw, sabengtung emaw kawnga tlu i hmuh chuan haider suh, kaihthawhpui ang che. “Hmeichhiain mipa thawmhnaw a inbel tûr a ni lo; mipain hmeichhe thawmhnaw a inbel tûr a ni hek lo; Lalpa in Pathianin chutiang chu a ten a ni. “Thingah emaw, leiah emaw sava bu awp lai, a tui keu tawh emaw, keu lo emaw i hmuh chuan a pui man suh, a notê chu i la thei ang, a pui erawh chu i chhuah tûr a ni; tichuan, i tân a ṭha ang a, i dam rei bawk ang. “In i sak chuan chungzâwl khuaptu i siam tûr a ni; tichuan, tu emaw pawh tla palhin thi sela, a mawh i phur lo vang. “Grep huanah thei dang phun suh, i phun kawp chuan i grep rah pawh, i thil phun rah pawh Pathian tâna serh hran a ni ang. Bâwngpa leh sabengtung lei rih duntîr suh. La leh sahmul kaih pawlh kawr ha suh. I puan sin kil li-ah pehbuk siam ṭhîn ang che. “Miin nupui a nei a, nakin deuhvah chuan a ning ta a. Dâwt phuahchawpin thil ṭha lo pui pui a puh a, ‘nula thianghlim a nihna pawh ka hmu lo’ tiin a timualpho va. Chutiang thilah chuan hmeichhe nu leh pate chuan an induh zâna an âwngphah thisen kai chu nula thianghlim ngei a ni tih fiah nân khaw upate hnênah an thlen tûr a ni. Hmeichhe pa chuan upate hnênah, ‘He mi hi ka fanu ka neihtîr a, a duh leh ta si lo va. Dâwtin thil ṭha lo pui pui a puh a, ‘ka neih khân nula thianghlim a lo ni lo’ te a ti a. Kan fanu hi nula thianghlim ngei a ni tih fiah nân hei, an induh zâna an âwngphah thisen kai hi en teh u,’ a ti ang a; upaho hmaah chuan a phawrh ang. Khaw upate chuan chu pa chu an vua ang. Israel nula thianghlim hming a tihchhiat avângin tangkaraw tlang za an chawitîr ang a, hmeichhe pa hnênah chuan an pe ang, a nupui a ni reng ang a, a dam chhûng chuan a ma thei lo vang. Chu pa chuan thu dik a sawi a, nula thianghlim a nihna fiahna a awm loh chuan, a pa kawtah an hruai ang a, khuaa mite chuan lungin an dêng hlum tûr a ni. Israel mite zîngah thil tenawm tak a ti a ni, a pa ina a la awm lai, pasal a la neih hmain tlangvâl a lo nei a ni. Chutiang chuan Israel zîngah thil ṭha lo in thian fai tûr a ni. Mi dang nupui mutpuitu chu a hmeichhia nên an pahnihin tihhlum tûr an ni. Chutiang chuan Israel zîngah thil ṭha lo in thian fai tûr a ni. “Nula thianghlim, pasal hual nei chu, khaw chhûngah miin a lo mutpui chuan, an pahnih chuan khaw kulh kawngka bulah in hruai ang a, lungin in dêng hlum tûr a ni; hmeichhia chu khaw chhûnga awm siin a au lo va, mipa pawh chu mi nupui hual a lo mutpui avângin den hlum tûr a ni. “Nula thianghlim pasal hual nei, ram hnuaiah miin lo sual sela, a mipa chauh chu den hlum tûr a ni. Hmeichhe chungah chuan kutthlâk tûr a ni lo, thihna khawp eng mah thil sual a ti lo; mi pakhatin mi dang a bei a, a that ta mai ang hi a ni. A mipa khân mi nupui hual ramhnuaiah a sual lui a, a hmeichhia chu au mah se tu mah chhan tûr an awm lo va ni. “Miin nula thianghlim, pasal hual la nei lo, sual sela, mipa chuan hmeichhe pa hnênah nupui man pangngai tangkaraw tlang sawmnga a pe tûr a ni; a sual lui a, a nupui a ni nghâl ang. A dam chhûngin a ma thei lo vang. “Tu man, mahni pa nupuite zînga mi mutpuiin a pa chu a timualpho tûr a ni lo. “Tilmu keh emaw, zahmawh tan emaw chu Lalpa mite pung khâwm zîngah an tel ve tûr a ni lo. Sâwn chu Lalpa mite pung khâwm zîngah an tel tûr a ni lo, a thlah, chhuan sâwmna pawh Lalpa mite pung khâwm zîngah an tel thei lo vang. “Amon mite leh Moab mite chu Lalpa mite pung khâwm zîngah an tel tûr a ni lo; an mite chu chhuan sâwm pawh ral mah se, Lalpa mite pung khâwm zîngah an tel hauh tûr a ni lo. Aigupta ram ata in lo chhuah khân ei tûr leh tuisik takngial pawh kengin an lo hmuak duh lo che u a; Mesopotamia ram, Pethor khaw mi Beora fapa Balaama kha ânchhe lawh tûr che uin an ruai zâwk a nih kha. Lalpa in Pathian chuan Balaama thu chu a bengkhawn duh lo va, Lalpa in Pathian hian a hmangaih êm che u avângin a ânchhia chu malsâwmnaah a chantîr ta hlauh va; chuvângin, eng lai mahin anni nên hian inremna siam suh ula, an hmuingîlna tûr pawh in dam chhûng chu eng mah tihsak suh u. “Edom mite chu in ten tûr a ni lo, in unaute an ni; Aigupta mi pawh in ten tûr a ni lo, an ramah an lo mikhual che u kha. An fa chhuan thumnate chu Lalpa mite pung khâwm zîngah an tel ve thei tawh ang. “Hmêlma do tûra in thawh chhuah a, bûka in riah khâwm chuan, thil ṭha lo tinrêng lakah in inthiarfihlîm tûr a ni. In muthilh hlânin in zînga mi tu pawh, a chi tla sela, riahhmun pâwnah nilêngin a awm tûr a ni; bûkah a lo lût tûr a ni lo. Tlaiah a inbual ang a, ni a tlâk chuan bûkah a lo lût leh thei tawh ang. “Riahhmun pâwnah daikalna tûr hmun bîk in nei tûr a ni. Thil zum in keng ang a, chu chuan lei in cho khuar ang a, in vûr leh tûr a ni. “In bûkah chuan vêng tûr che u leh in hmêlmate hnehtîr tûr che uin Lalpa in Pathian chu a lo kal ve ṭhin avângin in bûk chu in vawng thianghlim tûr a ni, thil tenawm a hmuh hlauh chuan a kalsan mai ang che u. “A pu hnên ata bawih tlân bo chu in hnêna a lo tlân luh chuan tîr kîr suh u. In zîngah chuan awm ve sela, in khaw pakhat, a duhna berah awm ve rawh se, tinawmnah suh u. “Israel mi tu mah, mipa pawh, hmeichhia pawh, Tempula nawhchizuarah an ṭang tûr a ni lo. Mipa pawh, hmeichhia pawh, an inzawrh hlawh chu intiamkam tlâkna atân Lalpa in Pathian inah ken luh tûr a ni lo; chutiang mite chu Lalpa in Pathian tenzâwng tak an ni. “In unau Israel-te hnênah tangka te, buh te leh thil dang rêng rêng, a pung neiin in pûktîr tûr a ni lo. Hnam dang chu a pung i ṭhîng thei ang, in unau Israel-te erawh chu a pung in ṭhîng tûr a ni lo; tichuan, Lalpa in Pathianin a pêk tûr che u ramah in awm hunin in thil tih apiangah in hmuingîl thei ang. “ Lalpa in Pathian hnêna pêk in tiam tawh chuan, muang lovin pe thuai rawh u. Lalpa in Pathian chuan in tiam anga in tih a phût dâwn si a; chutilo chuan, thil sual ti in lo ni mai ang. Thil pe tûra intiam loh hi sual a ni lo, in tiam vêk vêk si chuan in hlen ngei ngei tûr a ni. “Mi grep huana in kalin in duh tâwk in ei thei ang; amaherawhchu, pakhat mah in êmah in khung tûr a ni lo. Mi buh ding lai lova in kalin an buh vui chu duh tâwk in thliak thei ang; amaherawhchu, favahin in hlep tûr a ni lo. “Miin nupui nei sela, nakin deuhvah a duh loh zâwng thil eng emaw a hmuh avângin duh leh ta lo sela, inmâkna lehkha a ziak ang a, a pe ang a, a in ata a chhuahtîr ang. Chu hmeichhia chuan pasal dang nei leh sela, chu mi pawh chuan duh lo leh ta se, inmâkna lehkha ziaksakin a in ata chhuahtîr ve leh sela; a nih loh leh, a pasal pahnihna chu a sûn pawh a ni thei; a enga pawh chu ni se, a pasal hmasa khân a nei leh tûr a ni lo; tihbawrhbânah a ngai tûr a ni; chutiang chu Lalpa tenzâwng tak a ni a, Lalpa in Pathianin a pêk che u ramah chutiang thil ṭha lo chu in ti tûr a ni lo. “Nupui nei hlim chu indonaah a kal ve tûr a ni lo, vântlâng hnaah pawh phût tûr a ni lo; kum khat chhûng chu a nupui nên hlim takin an awm dûn tûr a ni. “Tu man chhangphut râwtna lung emaw, a chung zâwk chauh emaw pawh, thil pûk dahkhamah hrênsak suh u, an chhûng eizawnna in lâksak tihna a ni. “Israel miin Israel mi dang ruin bawihah chhawr sela emaw, salah emaw a hralh chuan chu mi chu tihhlum tûr a ni; chutiang chuan in zînga thil ṭha lo chu in thian fai tûr a ni. “Phâr natna in vei chuan Levia chi puithiamin tih tûr a tih chu ngun takin ti ula, an hnêna ka hrilh ang khân ti ang che u. Aigupta ram aṭanga in lo chhuah kawngah Miriami chunga Lalpa in Pathian thiltih kha hre reng rawh u. “I ṭhenawm thil i pûktîrin a dahkham tûr, a in aṭangin va la suh, pâwnah i ding ang a, i thil pûktu chuan a dahkham tûr chu a rawn la chhuak tûr a ni. Mi rethei tak a nih chuan a puan dahkham chu mut nân hmansak suh. Ni a tlâk chuan i kîr leh tûr a ni; ama puan ngei chuan a intuam lum ang a, i chungah a lâwm bawk ang; Lalpa, in Pathian chuan thil ṭha ti-ah a lo pawmsak ang che. “Mi rethei leh pachhia chu, nangmahni chipui a ni emaw, in khaw chhûnga awm ve hnam dang a ni emaw hna thawka in chhawr chuan tinawmnah suh ang che u; a tlâkbal êm avângin a hlawh chu a nî la lain, ni tlâk hma ngeiin in pe tûr a ni. In laka vuiin Lalpa hnênah a thlen hlauh ang a, thil sual ti in ni mai ang. “An fate sualna avângin pate chu tihhlum tûr a ni lo; pate sualna avângin an fate pawh tihhlum tûr a ni hek lo; mi chu ama sualna avâng chauhvin tihhlum tûr a ni. In zînga awm ve hnam dang emaw, fahrah emaw chanvo chu tihheusak suh. Hmeithai puan chu dahkhamah lâksak suh. Aigupta ramah nangni pawh bawih in nih kha hre reng rawh u; Lalpa in Pathianin a tlan chhuak che u a nih kha; chuvângin, hêng thu hi ka pe che u a ni. “Buh in sengin buhphal lâk hmaih in neih chuan vai leh tawh suh u; hnam dang te, fahrah te leh hmeithai te chan ve tûr a ni; tichuan, Lalpa in Pathian chuan in kutkawih zawng zawngah mal a sâwm ang che u. In oliv rah, duh tâwka in sâwi ṭilh hnu chuan sawi ṭilh tum leh tawh suh u; hnam dang te, fahrah te leh hmeithai te tân khêk rawh u. In grep rah in lawh pawhin in lawh hmaih chu vai leh tawh suh u, hnam dang te, fahrah te leh hmeithai te tân zuah rawh u. Aigupta ramah bawih in nih kha hre reng rawh u; chuvângin, hêng thu hi ka pe che u a ni. “Israel mi, thubuai nei, rorêltu hmaa an inkhin chuan, pakhat zâwk chuan thiam a chang ang a, pakhat zâwk chuan a chang lo vang. Thiam chang lo chu vuaka hrem tûr a nih chuan rorêltu chuan a hmuh ngeiah a thil sual tih phu tâwk a vuaktîr tûr a ni. Vawi sawmli chin vuak theih a ni, a aia tam chu vuak tûr a ni lo; a aia tam in vuak chuan in unau chu in hmusit a ni. “Bâwngpa buh i chîltîr laiin a hmui chu phuar suh. “Unauza chhûng khatah awm ho sela, pakhat chu fapa nei lovin thi sela, a nupui chu an chhûngkaw zînga mi ni lo, mi dang neihtîr tûr a ni lo. A pasala unau tu emaw chuan nupuiah a nei ang a, a unau thi ta ai kha a awh ang. Fapa an neih hmasak ber chu a unaupa thi ta fapa anga ngaih tûr a ni ang a, Israel inthlah chhâwng hming chhiarnaah te a hming chu a bo bîk tûr a ni lo. Thi ta-a unaupain a neih duh loh chuan, khaw hotute hnênah hmeichhia chu a kal ang a, ‘Ka pasala unau hian unaupa tih tûr, a unau thi ta thlah, Israel zînga an mang loh nân chi a thlahsak duh lo,’ a ti tûr a ni. Khaw upate chuan an ko ang a, an lo sawipui ang a; a la duh chuan loh chuan, khaw hotute hmaah a pheikhawk pakhat chu hmeichhia chuan a hlihsak ang a, ‘Mahni unau chi thlahsak duh lo chu hetianga tih a ni ang’ a ti ang a, a hmaiah chil a chhâk tûr a ni. “Chu mi thlahte chu Israel zîngah, ‘Pheikhawk hlihsak chhûng’ an ti ang. “Pa pahnih insual sela, pakhat nupui chuan a pasal chhan tumin a sualpuipa zahmawh pawhsak sela, chu hmeichhia chu khawngaih hauh lovin a kut tansak tûr a ni. “Bâwmah bûklung rit deuh leh zâng deuh kawl kawp suh. Tehna no lian deuh leh tê deuh pawh nei kawp suh. Bûklung dik tak, tehna no dik tak in hmang tûr a ni; tichuan, Lalpa in Pathianin ram a pêk che u-ah hian in dam rei ang. Chutianga thil dik lo tia mi bum chîngte chu Lalpa tenzâwng tak an ni. “Aigupta ram aṭanga in lo chhuaha, kawnga in awm laia Amalek-ho thil tih dân kha hre reng rawh u. Pathian ṭihna rêng an nei lovin, in kal hah lai leh in chauh lai khân hnung lam aṭangin an rawn bei che u a; in zînga chau zual, hnufual deuhte chu an thah vek kha. Chuvângin, Lalpa in Pathianin ram a pêk che u-ah in hmêlmate laka râlmuang taka a awmtîr hunah che u chuan Amalek-ho hi in that fai vek tûr a ni, vân hnuaiah an sûlhnu hmuh tûr pakhat mah in zuah tûr a ni lo. Theihnghilh rêng rêng suh u. “ Lalpa in Pathianin ram a pêk tûr che u in va thlen a, in hneha, awmhmun in benbel hunah, Lalpa in Pathianin ram a pêk che u a thil in thar hmasak ṭhenkhat chu êmah in dah ang a, Lalpa in Pathian hming awmna tûra a hmun thlanah chuan keng ang che u. Chuta puithiam lo awm hnênah chuan, ‘Kan pate hnêna Lalpa ram pêk tiam chu kan va luah ta tih vawiinah hian Lalpa i Pathian hmaah ka puang e,’ i ti tûr a ni. Puithiam chuan êm chu a la ang a, Lalpa in Pathian maichâm hmaah chuan a hûng ang. “ Lalpa in Pathian hnênah hetiang hian in sawi bawk tûr a ni: ‘Ka pa chu mi vâkvai, Aram mi a ni a. Aigupta ramah a chhuk a, tah chuan a awm ta a; an la tlêm hle a; mahse, chutah chuan hnam ropui tak, chak tak leh rual tak an ni ta a. Aigupta mite chuan bawihah min siam a, min tinawmnah a, min chhawr rethei êm êm a. Lalpa, kan pate Pathian chu kan au ta a, Lalpa chuan a lo ngaithla a, min tihretheihzia te, kan rimzia te, min tihduhdahzia te chu a hmu a. Lalpa chuan Aigupta ram ata chu, a bân tha chak hmangin, thil mak leh chhinchhiahna râpthlâk tak tak a ti a, min hruai chhuak ta a, khawizu leh hnutetui luanna ram hi min pe ta a. Aw Lalpa i ram min pêka thar hmasa ber chu, hei, ka rawn kensak a che,’ i ti ang a; Lalpa i Pathian hmaah chuan i dah ang a, a hmaah chuan i kûn tûr a ni. Lalpa, in Pathianin thil ṭha, nang leh i chhûngte a pêk avângin lâwmthu sawi la, in zînga awm leh Levia chiten lâwm takin in zâr zo rawh se. “A kum thumnaah in thlai thar sâwma pakhat chu, in zînga awm Levia chi te, hnam dang te, fahrah te leh hmeithai te pe ang che u; tichuan, khaw tinah ei tûr an nei ṭheuh dâwn nia. Chutia in tih hnu chuan, ‘Thil serh, sâwma pakhat chu, ka inah tûnah pakhat mah ka kawl tawh lo; thu min pêk angin Levia chi te, hnam dang te, fahrah te, hmeithai te hnênah ka pe tawh a ni; sâwma pakhat pêk chungchânga i thupêk zawng zawng zawm loh rêng ka nei lo va, theihnghilh ka nei hek lo. Lusûn laiin pakhat mah ka ei lo va, mitthi chaw atân pakhat mah ka hlân hek lo; aw Lalpa, i thu ka awih a, sâwma pakhat pêk chungchânga i thupêk zawng zawng chu ka ti ta vek a ni. I vân hmun thianghlim aṭang chuan han thlîr thla la, i mi Israel-te hi mal han sâwm ang che. Min thlahtute hnêna pêk i tiam tawh ram, khawizu leh hnutetui luanna ram hi malsâwm ang che,’ in ti tûr a ni. “Vawiin hian Lalpa in Pathian chuan hêng thuruatte leh awm dân tûrte hi zâwm tûrin a tih che u hi. Rilru zawng zawngin, tihtakzetin zâwm rawh u. Vawiin hian Lalpa chu Pathianah in pawm ta a, a thuruat te, a thupêk leh awm dân tûr a tih te chu zâwma tih in tiam a. Vawiin hian Lalpa chuan a tiam angin a mi atân a pawm ta tak tak che u a ni. A siam, hnam dang zawng zawng aiin a tiropui che uin, fak in hlawh ang a, in hming a thang bawk ang a, miin an chawimawi ang che u, a tiam ang ngeiin Lalpa in Pathian tân hnam thianghlim in ni ang” a ti a. Mosia chuan Israel upate nên mite hnênah, “Vawiina thupêk ka hrilh zawng zawng che u hi zâwm vek ang che u. Jordan lui in kân a, Lalpa, in Pathianin ram a pêk che u in va luh hunahin chuan lung hlai tak tak phun ang che u; chinaiin zût mâm ula; tah chuan, hêng Dân zawng zawng hi ziak ang che u. Lalpa in Pathianin pêk a tiam che u, khawizu leh hnutetui luanna ram chu in luh a, Jordan thlang lam rala in awm hunah vawiina ka hrilh che u ang hian Ebal tlângah lung pathum phun ula, chinaiin zût mâm ang che u. Thîra chher loh lungin maichâm siam ang che u. Lalpa in Pathian tâna maichâm in siam rêng rêngin lung chher loh hman tûr a ni; chutah ngei chuan hâlral thilhlan chu in hâl tûr a ni, Remna thilhlan pawh chutah chuan in hlân ang a, in ei tûr a ni, Lalpa hmaah chuan hlim takin awm ang che u. Lungphunah chuan hêng Dân thute hi in ziak tûr a ni,” a ti a. Mosia chuan Levia thlah puithiamte nên Israel mi zawng zawng hnênah, “Aw, Israel-te u, in beng chhi ula, ka thu hi ngaithla teh u. Vawiin hian in Pathian, Lalpa mite in nih tâk hi. A thu awih ula, a thuruat, vawiina ka hrilh zawng zawng che u hi zâwm rawh u,” a ti a. Mosia chuan Israel-te chu thu a pe a: “Jordan lui kai hnuah chuan mipuite malsâwm tûrin hêng hnam - Simeon-ho te, Levia chi te, Juda-ho te, Isakar-ho te leh Benjamin-ho te hi Gerizim tlângah an ding ang a; ânchhia puang chhuak tûrin hêng hnam: Reuben-ho te, Gad-ho te, Aser-ho te, Zebulun-ho te, Dan-ho leh Naftali-ho te hi Ebal tlângah an ding tûr a ni. Hêng thu hi Levia chite chuan ring takin an sawi tûr a ni: ‘Themthiam kut chhuak Lalpa tenzâwng milem chher chawp emaw, chhûn chawp emaw kawl ru a, chibai bûktu chuan ânchhia dawng rawh se,’ an ti ang a. Mipui zawng zawngin, ‘Amen’ tiin an lo chhâng ang. ‘A nu emaw, a pa emaw, zah lo chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. ‘Ṭhenawmte ramri lung sawntu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. ‘Kawng ni lova mitdel kaltîrtu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. ‘Hnam dang te, fahrah te leh hmeithai te laka hleih neih chîng chuan ânchhia dawng rawh se,’ an ti ang a. Mipui zawng zawng chuan, ‘Amen’ tiin an lo chhâng ang. ‘Mahni pa nupuite zînga mi lo mutpui a, pate timualphotu chuan ânchhia dawng rawh se,’ an ti ang a. Mipui zawng zawng chuan, ‘Amen’ tiin an lo chhâng ang. ‘Ran pâwltu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. ‘Nu hrang emaw, pa hrang emaw pawh ni se, mahni farnu sualtu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. ‘Mahni pizawn mutpuitu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. ‘A rûka tualthattu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. ‘Pawi khawih lo that tûra thamna latu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. ‘Hêng Dânte hi pawm ṭha duh lova, zâwm duh lotu chuan ânchhia dawng rawh se,’ an ti ang a, Mipui zawng zawng chuan, ‘Amen’ tiin an lo chhâng ang. “ Lalpa in Pathian thu hi in awih a, a thupêk vawiina ka hrilh zawng zawng che u hi in zawm thlap chuan khawvêla hnam dang zawng zawng aia ropuiin a siam ang che u. Lalpa, in Pathian thu chu awih phawt ula, hêng malsâwmna zawng zawng hi in dawng ang a, in dawng zui zêl ang. In lam leh ram lamah Pathianin mal a sâwm ang che u. “Fanau malsâwmna in dawng ang a, in buhbâl a tihlâwk ang a, in ran vulhte a tihhmuingîlsak ang che u. “Pathianin in êm te, in chawthlêng te mal a sâwm ang. “In thiltih apiangah a tihmuingîl ang che u. “In hmêlmate nêna in inbeihin Lalpa chuan a hnehtîr ang che u; a huhovin rawn bei che u mah sela, kil tinah an tlânchhia ang a, an darh vek ang. “ Lalpa in Pathian chuan in hnathawh apiang mal a sâwm ang a, in buh inte a tikhat ang a, Lalpa in Pathianin ram a pêk che u chu a tihhlâwksak ang che u. “ Lalpa in Pathian thu hi in awih a, a thupêkte in zawm takzet chuan a tiam angin ama pual, a mi thianghlim atân a tinghet ang che u. Khawvêla mi zawng zawngin Lalpa mi thlante in ni tih an hria ang a, an hlau ang che u. In pate hnêna pêk a tiam ramah Lalpa chuan fa te, ran rual te, buhbâl te a neihtîr ṭeuh ṭeuh ang che u. Lalpa chuan a robâwm ata a hun takah ruah a rawn sûrtîr ang a, in thiltih mal a sâwm ang a, hnam tinrêng in thil neih in pûktîr ang a; an thil erawh chu in pûk a ngai ve lo vang. Lalpa in Pathian chuan hnam dangte zuitu ni lovin, an hruaituah a siam ang che u; a thupêk vawiina ka pêk che u hi rinawm taka in zawm phawt chuan in lo hmuingîl ang a, in hlawhchham ngai lo vang. Engti kawng mahin in bawhchhe tûr a ni lo va, pathian dangte biain an rawng in bâwl tûr a ni hek lo. “ Lalpa in Pathian thu in awih lohva, a thupêkte leh a thuruatte vawiina ka hrilh che u hi in zawm duh lohva, in tih duh hek loh chuan hêng thil ṭha lo hi in chungah a thleng ang: “In lam leh ram lamah chhiatna in tâwk ang. “ Lalpa chuan in êm leh in chawthlêng a leihbuaksak ang che u. “ Lalpa chuan ânchhia a lawh ang chia, fa thu-ah te, buhbâl thu-ah te, ran vulh thu-ah te in hmuingîl lo vang. “In thiltih apiangah in hlawhchham ang. “Thil in tihsual a Lalpa in kalsan chuan ânchhia in dawng ang a, in hnathawh rêng rêngah in hmuingîl lo vang a, in buaiin in beidawng ang a, rang takin in chhe vek ang. “In ram neih tûrah chuan vânduaina hlîrin a tlâkbuak ang che u a, dam khawchhuak tu mah in awm lo vang. Lalpa chuan hri a veitîr ang che u a, khawsikpui te in vei ang a, in vûng bawk ang. Khua a tikhêng ang a, in thlai te a tiro bawk ang a, in thi mai ang. Ruah rêng a sûr lo vang a, in lote chu thîr angin a châr ang. In lovah lei dip leh vaivut a sûrtîr ang a, a rawn tichhe vek ang che u. “ Lalpa chuan in hmêlmate chu hnehtu zâwkah a ṭantîr ang a, a huhovin bei mah ula, kil tinah in tlânchhia ang a, in darh vek ang. Khawvêla mi zawng zawngin in chunga thil thleng chu râpthlâk an ti ang. In thih hunah in sa chu sava leh ramsaten an rawn tlân ang a, tu mah lo hnawttu an awm lo vang. Aigupta-ho vei ang dam thei lo khawihli te, ngâwt te, pânchhia te, uithak te Lalpa chuan a veitîr ang che u. Lalpa chuan a ti-â ang che u a, in mit a tidel ang a, a timangang hle ang che u. Mitdel angin chhûn êngah pawh in dap dun dun ang; in thil tih rêng rêngah in hmuingîl lo vang a, an tirethei hle ang che u, an tichêp hle ang che u; an rawk fo ang che u a, chhantu rêng in nei lo vang. “Nupui in hual ang a, mi dangin an nei hlauh vang; in in sa ang a, in luah lo vang; grep huan in siam ang a, a rah in ei lo vang. In bâwngpa chu an talh ang a, a sa pawh in ei ve lo vang; in hmuh lai ngeiin in sabengtung chu an lâksak ang che u, tu man an chhan lo vang che u. In fanu in fapate chu in hmuh lai ngeiin hnam dang bawihah an pe ang a; ni tin anmahni ngaiin in thlîr ang a, in mit a vai zo vang. Hah taka in thlawh chhuah chu in hriat ngai loh hnam dangin an rawn lâksak ang che u; a manah tihduhdah leh chêksawlh mai lo chu eng mah in têl lo vang. In thil hmuhte chu in ât phah ang. Lalpa chuan in ke-ah pân dam thei lo a veitîr ang che u a, kephah aṭanga in chhîp thlengin khawihli in vei ang. “ Lalpa chuan in lalte nên, hnam dang ram, in pi pute la awm ngai lohna ramah chuan salah a hruai ang che u; chûng ramah chuan thing leh lunga siam pathiante in bia ang. Lalpa tihdarhna che u ramah chuan a hmu apiang che u chuan in chunga thil thleng chu mak an ti ang a, an hmusit ang che u a, nuihza siam nân an hmang ang che u. “Thlai chi in chîng ṭeuh ang a, tlêm tê chauh in seng si ang; khauvin a ei zawhsak ang che u. Grep huan in siam duai ang a, ngun takin in enkawl ang a; mahse, a rah lawh tûr emaw, uain in tûr emaw in hmu lo vang a, a ngêt zo vek ang. In ram pumah oliv thing awm chûk mah se, a hriak thih tûr pawh in nei lo vang, a hlamtla zo vek ang. Fanu fapa in ngah hle ang a, an tha in chhawr si lo vang, salah an awm vek ang. In thei kûng leh thlai dangte chu khauvin a ei kawlh vek ang. “In zînga hnam dang awm vete chu an lal tual tual ang a, nangni chan erawh chu a chau tial tial ang. Tangka an pûktîr ang che u a, nangni chuan pûktîr tûr tangka in nei ve lo vang. A tâwpah chuan in pute an la ni ang. “ Lalpa in Pathian thu in awih lohva, a thupêk leh a thuruat an hrilh che u kha in zawm lohva, in tih duh loh chuan hêng thil ṭha lo zawng zawng hian a tlâkbuak ang che u, in tuar zêl ang. In chungah leh in fate chungah Pathian a lungawi lo tih in hriat theih nân chhinchhiahna a ni ang; malsâwmna tinrêngin a vûr che u a, hlim leh lâwm taka Lalpa, in Pathian rawng chu bâwl tûr in ni asin. Rilṭâm leh tuihâlin, saruak leh engkim tlachhamin Lalpa tirh, in hmêlmate rawng chu in bâwl ang a, in chauh dêr thlengin in nghâwngah thîr nghâwngkawl an bahtîr ang che u. “An ṭawng pawh in hriat ngai loh mi râwng pui pui, kâwlkil aṭangin Lalpa chuan a rawn beihtîr ang che u, mu angin an lo bir thut ang. Naupang pawh, tar pawh, tu mah rêng an khawngaih lo vang. In ran te, in thlaite an ei zo vang a, rilṭâmin in thi ang; in buh te, in uain te, in oliv hriak te, in ran te an zuah lo vang; rilṭâmin in thi ang. Lalpa in Pathianin a pêk tûr che u rama in chênna khua zawng zawng an bei ang a, in kulh sâng tak tak, nghet in tih êm êmte chu an tichim vek ang. “In hmêlmaten in kulhte an hual hunah chuan in ril a ṭâm khawp ang a, Lalpa in Pathianin a pêk che u in fate sa in ei ang. Mi ṭha leh mi neinung ber ṭhîn, eng mah ren nei ngai lo chuan a unaupa emaw, a nupui pawm lai ngei emaw, a fa la dam chhunte emaw pawh ei tûr pe phal lovin a rûkin a ei duh ang a; hmêlmaten in khua an hual rei êm avângin ei tûr a nei lo mangangin a fate sa ngei a ei ang a, mi dang a pe ve phal lo vang. Hausanu, lei pawh rap ngai lo, ngilnei tak tak ṭhînte pawhin an pasalte, an fanu leh fapate hriat lohvin a rûkin an ei ang. Hmêlmaten an hual rei êm avângin eng mah ei tûr a awm tawh lo vang a, an rilṭâm mangangin an nau hrin leh an chhûl chu a rûkin an ei ang. “He lehkhabua ziak Dân thu chuang zawng zawng hi ṭha taka in zawm lohva, in tih duh lohva, Lalpa hming ropui tak leh hlauhawm tak hi in chawimawi duh loh chuan, in thlahte nên tihdam theih loh hri a veitîr ang che u a, in pûl puk puk ang. Aigupta rama an vei ang hri hlauhawm tak tak in hmuh kha a veitîr ang che u a, in dam khawchhuak tawh lo vang. He Dân lehkhabua chuang tel lo, natna chi hrang hrang Lalpa chuan a veitîr bawk ang che u. Lalpa, in Pathian thu in zawm loh chuan vâna arsi zâtin tam mah ula, dam chhuak in awm pheuh pheuh lek ang. Lalpa chuan thil ṭha tihsak che u leh tihpunsak che u a châk ṭhîn; chutiang bawkin tihchhiata tihhlum che u a châk dâwn a ni. In luah tûr ram aṭang hian a la chhuak dâwn a che u. “ Lalpa chuan khawvêl pum puiah, hnam tin zîngah a tidarh ang che u; chûngah chuan thinga siam leh lunga siam pathiante chibai in bûk ang a, in pi pute pawhin an biak ngai lohte chu in be dâwn a ni. Khawiah mah râlmuang taka awm hle hle theihna hmun in nei lo vang. Lalpa chuan a tithlaphâng reng ang che u a, in beidawngin in beisei a bo hial ang. Thih hlau rêng rêngin in awm ang a, a chhun a zânin thlabâr takin in awm ang a, in dam khawchhuak dâwn nge dâwn lo pawh in hre lo vang. In thil hlauh leh in mita hlauhawm in hmuhte avâng chuan zîngah, ‘Tlai ni tawh se,’ in ti ang a, zânah chuan, ‘Khua vâr tawh mai se,’ in ti ang. Lalpa chuan Aigupta ramah lawngin a tawlh thla ang che u; in chhuk leh tawh lo vang, ka ti na a; mahse, in chhuk ang a, in hmêlmate lei tûrin bawihpa emaw, bawihnu atân emaw in inzuar ang a; mahse, tu man an lei duh lo vang che u.” Lalpa chuan Mosia hnênah Israel-te nên Moab ramah hetianga thu thlung tûr hian a hrilh a; Horeb tlânga a thuthlung belhchhahna a ni. Mosia chuan Israel mi zawng zawng chu pung khâwm tûrin a hrilh a, an hnênah, “In mit ngeiin Aigupta lal Farawa leh a ṭhuihruaite leh an ram chhûnga Lalpa thiltih kha in hmu a. Hri hlauhawm pui pui te, thil mak tak takte leh thil ropui tak tak a tihte kha in hmu a. Vawiin thlengin in thil hmuhte kha a ngaihna in hre lo va, a awmzia tak in la hre hek lo. Kum sawmli chhûng Lalpa chuan thlalêrah a vahvaihtîr che u a; mahse, in kawrte leh in pheikhawkte chu a hlui chuang lo va. Chaw pângngai ei tûr nei lovin, uain leh zu in tûr pawh in nei lo va; mahse, Lalpa chuan ei tûr a tumsak che u a ni; Lalpa hi in Pathian chu a ni tih in zir theih nân. He hmun in lo thlen khân Hesbon lal Sihona leh Basan lal Oga chuan min lo bei a, kan hneh a; an ram pawh kan neihsak a; Reubena thlah te, Gada thlah te leh Manasea thlah zatve te chu an chanpualah kan pe a. Chuvângin, he thuthlung thute hi zâwm ula, in thil tih apianga in hmuingîl theih nân ti rawh u. “Vawiin hian Lalpa in Pathian hmaah in hruaitu te, in hotu te, in mipa te, in hmeichhia te, in fa te, in zînga awm ve hnam dang te, thing phura tuichawisaktu che u te nên in vaiin in ding a nih hi. Vawiin hian Lalpa in Pathian chuan thu a thlunpui dâwn che u a ni; tichuan, Abrahama te, Isaka te, Jakoba te hnêna thu a tiam angin a mite atân a tinghet ang che u a, in Pathian a ni bawk ang. “Nangni nên chauh he thuthlung hi a siam a ni lo. Vawiina heta dingte tân mai ni lovin kan thlah lo la piang tûrte tân pawh he thuthlung hi a siam a ni. “Aigupta rama kan awm laia kan nun dân kha in hria e, kan lo chhuah kawnga hnam dang lo awmte khawsak dân te in hria, thingtum te, lungtum te, tangkarua leh rangkachaka siam milem tenawm tak tak te an bia a, mipa pawh, hmeichhia pawh, chhûngkua emaw, hnam pum emaw pawhin, Lalpa kan Pathian hawisanin hêng hnam dang pathiante hi in be hlauh dah ang e, thil zung chawr, tûr kha tak paia ṭhang lian ta ang hi a ni ang. “Vawiina thu urhsûn tak tak kan ngaihthlâk hi kan zînga ngaithla vetu tu mahin, ‘Luhlul taka mahni duh ang anga awm pawh a pawi lo a nih chu,’ ti rilru suh se; chumi avâng chuan mi sual emaw, mi ṭha emaw in boral vek mai ang. Chutiang mi chu Lalpan a ngaidam lo vang, a chungah Lalpa thinur chu a alh zâwk ang. He lehkhabua ziak thil ṭha lo zawng zawngte hian a tlâkbuak ang a, Lalpa chuan a tiboral vek ang. Lalpa Dân bu thuthlung ziaknaa ânchhe dawn tûr chuang zawng zawng chhiatna chu a chungah a thlentîr ang. “Rei fe hnuah chuan, in thlahte leh hnam dangte, ram hla tak taka awmte chuan in rama chhiatna leh tuarna; Lalpa thlentîr chu an hmu ang a; in lote chu ram ṭiau, kât leh chi tamna ram a ni ang a, eng mah phun theih a ni lo vang, hnim takngial pawh a ṭo thei lo vang. In ram chu Sodom leh Gomora te, Adma leh Zeboim te, Lalpan thinur taka a tihchhiat tak khuate ang kha a ni ang. Khawvêla mi zawng zawngin, ‘ Lalpa hian engtiziaa he ram hi heti taka sawisa nge maw a nih le? Eng nge chuti taka a thinur chhan?’ an ti huai huai ang. Hetiang hian an chhâng ang: ‘An thlahtute Pathian chuan Aigupta ram ata a hruai chhuah lai khân thuthlung a siampui a, Lalpa mite chuan chu chu an bawhchhia a; tûn hmaa an biak ngai loh hnam dang pathian, Lalpan biak a khapte chu an be ta a; chuvângin, Lalpa chu a mite chungah a thinur a, he lehkhabua chhiatna ziak zawng zawngte hi an ramah a thlentîr ta a ni, Lalpa chuan a thinur êm avângin a hnawt chhuak a, hnam dang ramah an awm ta daih a ni,’ an ti ang. Lalpa kan Pathian hian thurûk ṭhenkhat chu a puang lo; amaherawhchu, a Dân chu a rawn puang a, kan thlahte nên chu chu kan zâwm tûr a ni. “Malsâwmna dawn nge in duh ânchhia, in thlan tûr ka siamsak che u a ni. Lalpa chuan in chungah hêng thil ṭha lote hi a thlentîr a, a hnawhchhuahna che u hnam dang rama in awm hunah duh thlang thei in nih kha hre reng ang che u. In thlahte nên Lalpa lam in lo hawi leh a, vawiina ka hrilh che u, a thupêkte hi tihtakzeta in awih chuan, Lalpa in Pathian chuan in chungah ngil a nei leh ang a, hnam hrang hrang zînga a tihdarhna che u ram aṭangin a rawn hruai kîr leh ang che u a, a tihmuingîl leh ang che u. Khawvêl ram hla berah kal daih mah ula, Lalpa in Pathian chuan a hruai khâwm leh ang che u a, a rawn hruai kîr leh ang che u; tichuan, in pi leh pute awmna ṭhin ram chu in nei leh ang a, in thlahtute ai khân in tam zâwk ang a, in neinung zâwk bawk ang. Lalpa in Pathian chuan in thlahte nên thu awih theihna thinlung a pe ang che u a; tichuan, ani chu tihtakzetin in hmangaih ang a, chu ramah chuan in awm reng thei dâwn nia. Hêng ânchhia zawng zawng hi in hmêlma, nangmahni hawtu leh tiduhdahtute hi a dawntîr ang a; a thu in awih tawh ang a, vawiina a thupêk ka hrilh zawng zawng che u hi in zâwm tawh bawk ang. Lalpa chuan in thiltih apiangah a tihmuingîl ang che u a, fate in ngah ang a, in ran vulhte nasa takin a pung ang; in lote chu a hlâwk êm êm ang. In pi leh pute tihhmuingîl a châk ang bawk khân nangni pawh tihhmuingîl che u a châk ang. A thu erawh chu in zâwm thlap tûr a ni a, a Dân bu-a chuang thuruat leh thupêk zawng zawng chu in awih vek tûr a ni a, tihtak meuhvin a lam in hawi bawk tûr a ni. “Vawiina thu ka pêk che u hi in tân zawm har lutuk a ni lo va, hriat phâk loh tûr a ni hek lo. ‘A thu kan hriat a kan zawm tûrin tu nge vânah han lâwn ang a min rawn lâksak ang?’ tih tûrin vâna awm daih a ni lo. ‘Kan hriata kan zawm tûrin tu nge tuifinriat râlah kal ang a min rawn lâksak ang?’ tih tûra tuifinriat râl daiha awm a ni hek lo. Thu chu hetah, i bula hi a awm reng alâwm, i hriat fo tawh, sawi pawh i sawi fo ṭhin kha a ni a, zâwm mai rawh. “Vawiin hian eng nge in thlan duh, thil ṭha nge thil ṭha lo, nun nge thih, thlang rawh u. Lalpa in Pathian thupêk vawiina ka hrilh che u hi in awih a, ani chu in hmangaih a, a thu in ngaihthlâk a, a dânte in zawm chuan in hmuingîl ang a, hnam ropui tak in ni ang. A thu in awih lohva, in ngaihthlâk duh lohva, pathian dangte in biak phawt chuan, chiang takin ka hrilh a che u: in boral ngei ang; Jordan râl, in luah tûr ramah chuan in dam rei lo vang. Vawiinah hian nunna nge in duh thihna, Pathian malsâwm dawn nge in duh ânchhia, a eng zâwk nge in thlan, hretuah lei leh vân ka sâwm e. Nangmahni leh in thlahte in dam zêl theih nân nunna thlang rawh u. Lalpa in Pathian chu hmangaih ula, a thu awih ula, amah chu vuan tlat rawh u; tichuan, in thlahtu Abrahama te, Isaka te, Jakoba te hnêna pêk a tiam ramah chuan in thlahte nên in dam rei dâwn nia,” a ti a. Mosia chuan Israel mite hnênah thu a sawi zêl a, “Kum za leh sawmhniha upa ka ni ta a, duh duha chhuakvâk thei pawh ka ni ta lo; Lalpa chuan ‘Jordan lui i kân ve dâwn lo,’ min ti si a. Lalpa in Pathian chuan in hma a hruai zêl dâwn a, chûnga hnam awmte chu a tihboralsak ang che u; in luahlân dâwn a ni; Lalpa sawi tawh angin Josua hian a ho ang che u. Lalpa chuan Amor-ho lal Sihona te, Oga te leh an ram te a tichhia a, an mite a tihhlum vek ang khân anni pawh a tiboral ve ang. Lalpa chuan anni chu a pe ang che u, thu ka pêk che u ang tak hian in tiboral tûr a ni. Intipaukhauh ula, ṭang sauh sauh rawh u; hlau suh ula, zâm hek suh u; anni chu huphurh hek suh u; amah Lalpa, in Pathian ngei chuan a kalpui zêl ang che u a, a thlahthlamin a kalsan hek lo vang che u,” a ti a. Josua chu Mosian a ko va, Israel mi zawng zawng hriatah, “Intipaukhauh la, ṭang nasa rawh, an pate hnêna pêk Lalpa tiam ramah chuan Israel mite hi i hruai lût ang a, i luahtîr tûr a ni. Amah ngei, Lalpa chuan a kalpui dâwn che u a, a awmpui zêl ang che u; a thlahthlam lo vang che u a, a kalsan bawk hek lo vang che u, hlau suh ula, zâm hek suh u,” a ti a. Mosia chuan he Pathian Dân hi lehkhabu-ah a ziak a, Levia chi, Thuthlung Bâwm zâwntu puithiamte chu a pe a, Israel upate pawh a pe a, Mosia chuan an hnênah, “Kum sarihna tâwp, leiba ngaihdamna hun ruat apiangah Bâwkte kût laiin, Israel-ho chu Lalpa in Pathian hmun ruatah a hmaah an rawn inlan tûr a ni. Mipui khâwm ula, Lalpa, in Pathian ṭih nachâng an hriat a, ka dân bu-a thu chuang zawng zawng hi an zawm theih nân paho te, nuho te, naupang te leh hnam dang in khuaa awm te chuan ngaithla rawh se. Chutiang chuan Lalpa in Pathian dân la hre ve lo, in thlahte pawhin an hre ve ang a, Jordan lui kâna in luah tûr rama in awm chhûng zawng chu Lalpa in Pathian ṭih nachâng an hre ve dâwn nia,” a ti a. Lalpa chuan Mosia hnênah, “I dam rei dâwn tawh lo; Josua ko la, Inbiakna bûkah rawn hruai rawh, a tih tûr ka lo hrilh ang e,” a ti a. Mosia leh Josua chu Inbiakna bûkah chuan an kal a, an va inlan a. Lalpa chu Inbiakna bûkah chuan chhûm dingin a lo lang a, bûk kawngkaah chuan chhûm chu a ding luah a. Lalpa chuan Mosia hnênah, “Ngai teh, i pi leh pu hnênah i mu ve thuai dâwn ta; hêng mite hian i thih hnu chuan min uiresan ang a, thu ka thlunpuite kha an bawhchhia ang a, min kalsan ang a; an va chênna tûra lo awm hnam dangte pathian chu min biaksan ang. An chungah ka thin a rim ang a, ka kalsan ang a, an chhe vek ang. Thil ṭha lo pui puiin a tlâkbuak ang a; kei an Pathianin ka awmpui tawh loh avângin hêng thil hi an tuar a ni tih an hria ang. Thil ṭha lo tak an ti a, Pathian dang an biak tâk avângin an lakah ka hmêl ka thup daih dâwn a ni. “Chuvângin, he hla hi ziak chhuak la, Israel mite chu zirtîr rawh; an chunga ka lungnih lohzia an hriatna tûr a ni ang. An thlahtute hnêna pêk ka tiam, khawizu leh hnutetuia luang ram chu ka hruai thleng ngei ang. Amaherawhchu, duh tâwk tâwk ei tûr an neia an thau mûm tul hunah chuan, pathian dangte lam an hawiin chibai an bûk ang a; min hmusitin ka thuthlungte chu an bawhchhia ang. Thil râpthlâk tak takin a tlâkbuak hnuah pawh he hla hi an fate pawhin an la chham thei zêl ang a, chu chuan an sualzia a hriattîr ang. Pêk ka tiam ka hruai thlen hma pawh hian, an rilru put dân chu ka hre reng alâwm,” a ti a. Chumi ni ngei chuan Mosia chuan hla chu a ziak chhuak a, Israel-te chu a zirtîr ta tlut tlut a. Lalpa chuan Nuna fapa Josua hnênah, “Intipaukhauh la, ṭang nasa rawh, Israel mite hi pêk ka tiam ramah chuan hruai ang che, ka awmpui zêl nâng che,” a ti a. Mosia chuan Pathian Dân chu lehkhabu-ah kimchang takin a ziak a. A ziak zawh chuan Lalpa Thuthlung Bâwm zâwntu Levia chite chu a pe a. “He Dân bu hi la ula, Lalpa in Pathian Thuthlung Bâwm bulah dah rawh u, in awm dân tehna-ah a ṭang dâwn nia. In tihmawhzia leh in luhlulzia ka hria, kei ka la dam lai ngei pawhin Lalpa lakah in nuar a, ka thih hnu phei chuan eng ang takin awm ang che u maw. In upate leh in hruaitute chu lo pung khâwm sela, hêng hi ka lo hrilh ang e; lei leh vân ka thuhretu atân ka koh hi. Ka thih hnu chuan in che khawlo hle ang a, ka thu zirtîr che u kha in zâwm duh lo vang. Nakin deuhvah phei chuan Lalpa khap chu in ti lui ang a, a thin in tiur ang a, in boral mai ang,” a ti a. Mosia chuan he hla hi a sawi chhuak a, Israel mi zawng zawng chuan an ngaithla ṭhuap a. “Vânte u, ka thu hi bengkhawn ula, leilung pawh hian ka thu hi ngaithla rawh se. Ka zirtîrna hi ruah angin a sûr ang a, ka thu hi dai angin a tla ang. Hlobet chunga ruah si tla, thlai chawrno nan seng seng ang hian. Lalpa hming chu ka puang ang a, Kan Pathian chu chawimawi rawh u. Engkim ṭha taka titu, Lungpui a ni, Dik takin ro a rêl ṭhîn, Pathian rinawm, khawlohna nei lo, Thil ṭha leh dik ti ṭhîntu a ni. Khawlohna a nei em ni? Nei suh e, A fate a ni demawm chu, Chhuan bengtla lo leh tihmawhte chu. Mi â leh mi chhâwte u, hetiang hian em ni Lalpa in thungrulh dâwn? A hringtu che u, in pa a ni, a siam che u a, a tipuitling che u a ni. Tûn hma kha ngaihtuah chhuak teh u, Hun liam daih tawhte kha, Eng thil nge thleng in pate zâwt ula, Hmânlai lal chanchin in upate sawitîr teh u. Chungnungberan hnamte ram a sem a, Mite awmna tûr a ruatsak lai khân, Pathian fate zâtin an ramri a khamsak a. Lalpa chuan a chanpual atân Jakoba thlahte a thlang a ni. Thlalêra an vâkvai a hmu a, Ram ṭiau, thlichhe tlehnaah chuan A hliahkhuh a, a duat hle a, A mitnautê angin a vêng; Mupuiin a bu a thai darh a, A note vilin a thlâwk vut vut a; A thla zârin a dâwm a dâwm a, A thlawhpui ṭhîn ang hian. Lalpa chauh chu an hruaitu a ni a, Hnam dang pathian an tel ve lo. Tlângramah a chuanchhuahtîr a, Rama thil ṭote chu an ei a, Lung kârah khawizu an la a, Lung hmunah pawh an oliv a rah tiar tuar. Hnutetui an ngah, an bâwngte leh kêlte nên; An berâmte lah an thau, Basan ram berâm leh kêlchal ang, Buh tui ber leh uain ṭha ber an nei. Israel-te chu an lo hausa a, An induh ta hle a, An thau mûm tûl a, Siamtu, an Pathian chu an kalsan a, Chhandamtu, an Lungpui chu an ngainêp. Milem an bia chu a haw êm êm a, Thil tenawm an tihte chuan a tithinur. Pathian ni lo, ramhuai an bia a, An pate hriat ngai loh leh hlauh ngai loh An be ta, pathian tharlâm tê tê chu. Anmahni hringtu Lungpui chu an pawisa lo va, Anmahni siamtu Pathian chu an kalsan ta. Lalpa chuan a hmuhin a thin a ur a, A fanaute chu a hnâwl ta. ‘Ka bîkbosan ang a, Engtin nge an awm dâwn ka thlîr teh ang, Chhuan tihmawh tak leh Fa sual rin tlâk loh tak an ni. Pathian ni hlei lo an bia, Ka thîkthu an chawk tho va, An milemte chuan min tithinur. Chî anî-a chhiar tham lohte ka thîktîr ang, Hnam â takte hmangin ka tithinur bawk ang. Ka thinur chu mei angin a alh ang a, Leia thil zawng zawng a kâng ral ang. Seol pawh a kâng thleng ang a, Tlâng nghahchhante a kâng ral ang. Chhiatna tinrêng an chungah ka thlentîr ang a, Thalin ka kâp ang. Rilṭâm khawsikin an thi ang a, Hri râpthlâk tak tak an vei ang. Ram sakawlhten an seh ang a, Vaivuta tleng rûl tûr neiten an chu ang. Tuallaiah khandaih an tawng ang a, In chhûngah thil râpthlâk tak tak nên, Nula tlangvâl, ṭhalai an that ang a, Naupang pawh, tar pawh an zuah lo vang. Tu ma hriat tawh loh tûrin Tihmang dêr ka tum hial a. Mahse, an hmêlmaten uangthuang takin, ‘A mite chu kan sawisa nek,’ an tih ka hlau a ni. Hnam â tak zawng an lo ni, Thil rêng an hrethiam lo. Fing deuh se chu an hrethiam tûr An awm dân tûr an thlîr thiam ang a. An Lungpui chuan kalsan lo se, An Pathian, Lalpa chuan thlauhthla lovin, Pakhatin sâng têl a ûm dâwn em ni? Pahnih lekin sîng têl an ngam ang maw? An hmêlmate pawhin an pathian chu Israel-te Pathian ai chuan a nêp zâwk tih an hria. An hmêlmate chu Sodom leh Gomora anga sual, Grep kha, tûr nei ang hi an ni. An uain pawh chu rûl tûr ang, Rûl chuk anga hlauhawm a ni. Lalpa chuan an hmêlmate thil tih chu a hre reng a, Phuba lâk hun remchâng a zawng. An ke rah chu a tleu hunah, Phuba ka la ang a, ka thungrûl ang, An chhiat hun chu a lo hnai ta; An chunga lo thleng tûr chu an tuar thuai ang. Lalpa chuan a mite a chhan ang a, A chhiahhlawhte chan chauhzia te, Bawih leh bawih lo te pawh; Thi bâng tlêmzia a hmuhin a lainat ang a, A chhan chhuak ang. A mite chu, ‘In pathian thiltithei, In rin ṭhinte chu khawiah nge? In thilhlante chuan in châwm a, Uain in tûr nên lam in chhawpsak kha? Lo kal sela, chhan che u rawh se, Lo tlân sela, hum che u rawh se,’ Keimah chauh hi Pathian chu ka ni. An awm tak tak lo, pathian dang zawng, Ka tihlum a, ka tinung a, Ka hliam a, ka tidam a, Ka ta min chhuhsak thei tu mah an awm hlei nem. Pathian nung ka nih hi, Bân pharin thu ka tiam ṭhîn. Khandaih ka tât hriam ang a, Dik takin ro ka rêl ang. Ka hmêlmate chungah phuba ka la ang a, Min hawtute chu ka hrem ang. An thisen chu ka thalah a luang ang a, Ka khandaih chuan thisen a chhuah ang a, Hmêlma sam sei tak takte chu a sât hlum ang. Hnam tinte u, Lalpa mite hi fak rawh u, Anni thattute chu a hrem zêl a, A hmêlmate chungah phuba a la, A mite sual a ngaidam ṭhîn.” Mosia leh Nuna fapa Josua chuan chu hla chu mipui hriatah an sawi a. Mosian hêng thu hi Israel mite hnêna a sawi zawh chuan, ‘Hêng, thu ka pêk zawng zawng che u hi ngaihtuah ngun ula, hêng dân thute hi zâwm tûrin in fate zirtîr rawh u. Hêng thu hi thu mai mai a ni lo, nunna thu a ni. Jordan lui kal kâna in va neih tûr ram in thlen hunah chuan zâwm ula, in dam rei ang,’ a ti a. Chumi ni chuan Lalpan Mosia hnênah, “Moab ram, Jeriko ep, Abarim tlânga Nebo tlângchhîpah chuan chho la, an chanpual atân Israel-te ka pêk Kanan ram chu thlîr ang che; I u Arona Hor tlângah a thi a, a mite hnênah hruai a ni ta ang khân tah chuan i thi ang a, i pi leh pute hnênah i kal ve ang. Zin thlalêr, Meriba-kades tui hmunah khân, Israel-te zîngah ka thu i bawhchhia a, Israel-te hmaah min chawimawi lo a ni. Chumi avâng chuan ram chu hla tak aṭang chauhvin i hmu thei ang; Israel mite awmna tûra ka pêk ram chu i rap ve lo vang,” a ti a. Pathian mi Mosia chuan a thih hmain hetiang malsâwmna hi Israel mite tân a dîlsak a. “ Lalpa chu Sinai tlâng aṭangin a lo kal a, Ni angin Edom ramah a chhuak. Paran tlâng aṭangin a mite a rawn chhun êng a, Vântirhkoh sâng sâwmin an zui a, Mei a alh hluah hluah mai, a ding lamah. Lalpa chuan a mite a lainat a, A tâte chu a vêng. A thupêkte an dawng a, A hniakhnung an zui a, Mosian Dân thu min pe a, Jakoba thlahte ro hlu ber chu. Lalpa chu a mi Israel-te lal a ni, Hnam hruaitute leh Israel pungkhâwmho chungah chuan a lal.” Reubena chungchâng hetiangin a sawi: “Reubena chu thi mang suh se, Tlêm hle tawh mah se.” Juda chungthu sawiin: “Aw Lalpa, Juda mangang au ngaithla la, A unaute fin leh rawh se, A hmêlmate beihpui ang che.” Levia chungthu a sawi a: “I chhiahhlawh rinawm Levia thlahte chuan, Urim leh Thumim kawl se, i thu hrilh ṭhîn ang che, Masa-ah khân i fiah a, Meriba tuiah in inchhuahchhalh kha. A nu leh pa, a unaute leh a fate pawh Hrechang lovin a vuan che a. I thupêk a awih a, I thuthlung a vawn tlat kha. Jakoba thlahte chu i thuruatte an zirtîr ang a, Israel fate chu i dân an zirtîr ang. I hmaah rimtui an hâl ang, I maichâmah hâlral thilhlan an hâl ṭhîn ang. Aw Lalpa, a neihte chu malsâwm la, A thiltihte lo lâwm ang che. A hmêlmate chu an tha chhahsak la, A hawtute chu dingchhuak suh se.” Benjamin thlahte chungchâng hetiangin a sawi: “ Lalpa duhsak leh lainat, A thla hnuaiah a khawsa, Nilênga a vên, a puak tlat ṭhin a ni.” Josefa thlahte chungchâng hetiangin a sawi: ‘An ram chu Lalpa chuan vân daifîmin châwm sela, Lei chhûngril aṭanga tui nên. An theirahte chuan ni hmu ṭha sela, A hun takah hmin tiar tuar rawh se, An tlâng chhuanawm tak tak leh mualte chu Thei tui tak takin khat rawh se. An ramah chuan thil ṭha khat sela, Hnimbuka thusawitu khân malsâwm rawh se, A malsâwmna chu Josefa lu-ah rawn vûr sela, A unaute kaihruaitu a ni asin. Josefa zawng, bâwngchal anga chak a ni, Sele ki ang ki ṭha a nei, A kîte chu Manasea thlah sâng rual Efraim thlah sîng rual an ni. Hnam dang a si ang a, Kâwlkil thlengin a vawrh darh ang.” Zebulun leh Isakar chungchâng hetiangin a sawi: “Tuifinriata sumdâwng, Zebulun chu hmuingîl rawh se, Isakar pawh in lamah a chan ṭha rawh se. An tlângrama awm tûrin hnam dang an sâwm a, Tah chuan inthawina dikin an inthawi ang. Tuifinriat hausakna an chaw a, A kam ṭiauva thil ṭha an khâwm.” Gada chungchâng hetiangin a sawi: “Gad ram tizautu chu fak rawh u; Bân seh chhûma, lu vun hîk tûra Sakeibaknei biru ang hi a ni. Ram ṭha ber an thlang a, Israel hruaitute an pun khâwm khân Hotu chanvo an chantîr a, Lalpa thupêk leh dân an zâwm.” Dana thlah chungchâng hetiangin a sawi: “Dana chu sakeibakneituai; Basan ram aṭangin a lo zuang chhuak a ni.” Naftali chungchâng hetiangin a sawi: “Naftali chuan Lalpa malsâwmna a dawng a, Hnianghnârin duhsakna a dawng; A ram chuan dîl aṭangin chhim lam a thleng.” Asera chungchâng hetiangin a sawi: “Fa dangte aiin Asera chu a nihlawh e, A unaute duhsakna dawng sela, A ke chu hriakah chiah rawh se. Thîr leh dârin an khua chu an kalh ang a, Him takin chêng reng rawh se.” “Israel-te u, in Pathian ang hi pathian dang an awm lo, Ṭanpui tûr che u-in ropui taka chhûm chunga chuangin Vân khi a fang zung zung. Chatuan Pathian chu in vêngtu a ni, A bân chak chuan a hum ṭhîn che u a, In hmaah hmêlma a hnawt chhuak a, ‘Tiral vek rawh u,’ a ti. Jakoba thlah Israel-te chu muang takin an awm ta a, Buh leh uain tamna ramah an awm der der, Vân daifîm châwm len te chu an ring. Aw Israel, i va nihlawh kher êm! Nang ang rêng tu mah an awm lo, Lalpa chhandam hnam i ni a, I himna tûr leh hnehtu i nih theih nân Lalpa chu i phaw leh i khandaih a ni. I hmêlmaten khawngaih an dîl ang che; Nangin i lo rapbet ang.” Mosia chu Moab phai, Jeriko khaw ep aṭang chuan Nebo tlângchhîp, Pisga an tihah chuan a lâwn chho va. Lalpa chuan ram chu Gilead aṭangin Dan thlengin a entîr a. Naftalia te, Manasea te, leh Efraima te ram chu Mediteranean tuipui thlengin a thlîr a. Judai ram chhim lam ram, Zoar aṭanga Tûm khawpui Jeriko khaw thlengin a thlîrtîr bawk a. Lalpa chuan a chhiahhlawh Mosia hnênah, “Abrahama te, Isaka te, Jakoba te hnêna an thlahte pêk ka tiam ram chu hei hi a ni. Ka entîr che a, i kal erawh chu ka phal lo,” a ti a. Lalpa sawi angin Moab ramah chuan Mosia chu a thi ta a. Beth-peor khaw dep, Moab phaiah chuan a phûm a, tûn thlengin tu man a thlân awmna chu an hre lo. A thih chuan Mosia chu kum za leh sawmhnih a upa a ni a, a mit pawh a la thim lo, a la chak hle a ni. Moab phaiah chuan Israel-te chuan ni sawmthum an sûn a. Nuna fapa Josua chu Mosian a aiawhtua a ruat a nih avângin a fing êm êm a, Israel-te chuan Josua thu chu an zâwm a, Mosian Lalpa thupêk a hrilhte pawh an ti a. Israel zîngah Mosia ang zâwlnei an awm ngai lo; Lalpa chuan hmaichhanah a be ṭhîn a ni. Aigupta lal leh a ṭhuihruaite mit hmuhah leh an ram chhûngah te Mosia hmanga thil mak leh chhinchhiahna ropui a tih ang ti tûrin zâwlnei dang tu mah a hmang ngai lo. Israel-te hmuha thil ropui leh hlauhawm, Mosia tih ang ti ve zâwlnei dang an awm hek lo. Lalpa chhiahhlawh Mosia thih hnuin Mosia puitu, Nuna fapa, Josua hnênah Lalpa chuan, “Ka chhiahhlawh Mosia chu a thi ta a, Israel mi zawng zawng hi Jordan lui kânpui rawh, ka pêk tûr rama kal tûrin inpuahchah rawh u. Mosia hnêna ka hrilh tawh ang khân in kephaha in rah apiang, nangni, ka mite hi ka pe ang che u. Chhim lam thlalêr aṭanga hmâr lam Lebanon tlâng chhak lam Eufretis luipui aṭanga khawthlang lam Hit mite ram, Mediteranean tuipui thlengin in ram a ni ang. Josua, i dam chhûngin, tu man an chelh lo vang che. Mosia hnêna ka awm ang khân i hnênah pawh ka awm reng ang a, ka awmpui reng ang chia, ka thlahthlam tawp lo vang che. Huai takin ṭan la rawh; tichuan, an thlahtute hnêna pêk ka tiam tawh ram chu i luahpui dâwn nia. Huai takin ṭan la vak phawt mai rawh; Mosian ka dân a hrilh che kha zâwm vek la, pakhat tê mah ngaihthah suh; tichuan, kawng engkimah i hmuingîl ang. Eng lai mahin ka dân bu chhûnga thu ziakte chu chhiar theihnghilh suh, i zawm vek theih nân a chhûn a zânin sawi ṭhîn ang che; tichuan, kawng engkimah i tluang ngei ang. Huai takin ṭang rawh ka tih che kha hre reng rawh, hlau suh la, zâm hek suh; kei, Lalpa hian i kalna apiangah ka awmpui zêl che a ni,” a ti a. Josua chuan Israel-ho hruaitute hnênah, “Riahhmunah kal vek ula, mite hnênah, ‘Ni thum chhûngin, Lalpa in Pathianin a pêk che u ram luah tûrin Jordan lui in kai dâwn a, ei tûrte buatsaih rawh u’ ti ang che u,” a ti a. Reuben-ho te, Gad-ho te leh Manase-ho zâtve te hnênah Josua chuan, “ Lalpa chhiahhlawh Mosian in hnênah hetiangin a sawi a nih kha hre reng rawh u, ‘In Pathian, Lalpa chuan Jordan lui chhak lamah in ram chanpual tûr a pe ve ang che u; in nupui te, in fanau te, in ran vulh te chu he laiah hian an lo awm ang a, in zînga râlthuam kengte hi chuan lui in lo kai hmasa ang a, in unau Israel-te hi in pui tûr a ni. Lalpa in Pathianin a pêk tûr che u ram, Jordan lui khawthlang lam chu an luah fel a, Israel hnamten an awmna tûr ṭheuhva him taka an awm hunah chauh in kîr thei ang a, Jordan chhak lam ram, Lalpa chhiahhlawh Mosian a pêk che u-ah hian in awm thei ang,’ a tih kha,” a ti a. Josua chu an chhâng a, “Min hrilh apiang kan ti ang e, kal rawh u i tihna apiangah kan kal zêl ang. Mosia thu kan awih ṭhîn ang khân i thu pawh kan awih ang; Lalpa i Pathian chuan Mosia a awmpui ṭhîn ang khân awmpui zêl che rawh se. I thu kalha, i thupêk zâwm duh lo chu tihlum mai ang che. Huai takin ṭan la sauh sauh phawt mai teh,” an ti a. Nuna fapa Josua chuan Sitim ruam aṭang chuan enthlatu tûr mi pahnih a tîr a, “Ram chu a rûkin va en thlithlai teh u, Jeriko khua phei chu en chiang zual ang che u,” a ti a. Khua an va thlen chuan riah tumin nawhchizuar Rahabi in an pan a. Jeriko lal chuan, Israel-te tirh enthlatute chu chumi zân chuan an lo thleng tih a lo hriatin Rahabi hnênah, “I ina lo thlengte kha ram en thlithlai tûra lo kal an ni, han hruai rawh,” ti tûrin mi a tîr a. Chu nu chuan mikhual pahnihte chu a hruai a, a thukru a, “Mi pahnih chu an lo thleng ngei mai a, khawi lam mi nge an nih ka hre hauh lo. Khaw thim dâwn ṭêp, kulh kawngka khâr hma chiah khân an chhuak leh ta a nih kha: khawi lamah nge an kal dâwn ka hre miah lo; ûm thuai ula, in la ûm pha hman ang,” a ti a. Chu mite chu in chungah a hruai a, ziza kuang a pho zîngah chuan a thukru a ni. Lal mi tirhte chu Israel-te ûm tûr chuan an tlân chhuak a, kulh kawngkapui chu an khâr leh a, Jordan lui thlengin an ûm a. An mut hmain Rahabi chu in chungah a chho va. An hnênah, “ Lalpa chuan ram hi a pe tawh che u tih ka hria. Hêng lai mite hi hlau lo che u tu mah an awm lo, an zâm zo ta. Aigupta ram in chhuahsan a, Lalpa chuan in hmaa Tuipui Sen a tihchah thu te kan lo hria a, Jordan chhak lama Amor lal Sihona leh Oga in thah dânte pawh kan lo hria a. Chûng chu kan hriatin kan zâm chhia a, nangmahni hlauvin mu leh mal pawh kan nei tawh lo; in Pathian, Lalpa hi lei leh vâna rorêltu a ni si a. Ka tih ṭhat che u ang bawkin kan chhûnga min ti ṭha ve tûrin in Pathian hming chhâlin thu tiam ula, chumi hriatna tûr chuan chhinchhiahna min pe ang che u. Ka pa te, ka nu te, ka nuṭate leh ka laizâwn te, an chhûngkuain zuah ang che u, min that lo tûrin thu tiam rawh u,” a ti a. Chûng mite chuan, “Min hum chuan kan hum ngei ang che; kan lo kal dân hi tu mah i hrilh loh chuan, ram hi Lalpan min pêk hunah, ṭha takin kan ti ang che u,” an ti a. Khaw kulh bang ringa in nei a ni a, tukverh aṭang chuan anni chu hruizênin a thlâk thla a. “Tlâng lamah in kal loh chuan ûmtuten an hmu mai ang che u, ni thum biru ula, a rawn ûmtu che u an lo kîr hunah in duh duhnaah in kal dâwn nia,” a ti a. Mite chuan, “I tih ang chuan thu kan tiam ang a, hetianga i tih ve loh erawh chuan a mawh kan phur lo vang. He ram kan lo thlen hunah he la sen hi min thlâkna tukverhah ṭâwn bet ang che. I pa te, i nu te, i nuṭate leh i pa chhûngte i inah hian ko khâwm la; khawlaiah tu mah chhuak suh se; chhuak an awm chuan an thisen mawh chu anmahniin an phur ang. Kan thu hi tu mah i hrilh tûr a ni lo, i hrilh vaih chuan keini pawhin thu min tiamtîr ang hian kan ti bîk lo vang,” an ti a. Ani chuan, “In thu ang chuan ni rawh se,” a ti a. A kaltîr a, an chhuak ta a. La sen chu tukverhah chuan a ṭâwn bet a. Tlâng lamah chuan an kal a, ni thum an biru a. Ûmtute chuan an rawn zawng haw zêl a; mahse, an hmu lo. Chu mite pahnih chu tlâng lam ata an lo chhuak a, lui an kân a, Josua hnên an lo thleng a, an thil tawh zawng zawng chu an hrilh a. Josua hnênah, “ Lalpa chuan ram chu min pe ngei a lo ni, kan thâwmah mi an zâm chhe zo vek mai,” an ti a. A tûkah Josua hovin Israel-te chu zîng takah an tho va, Sitim zâwl aṭang chuan lui bulah an insawn a, lui an kân hmain an riak a. Chumi tûk tûk lehah chuan hotute chuan bûk chu an fang a, “ Lalpa in Pathian Thuthlung Bâwm chu puithiamten an zâwn in hmuh hunah intêl fel ula, in zui nghâl dâwn nia. In kalna ngai lohva kal tûr in ni a, an hnung in zui zêl dâwn nia; amaherawhchu, Thuthlung Bâwm hnaih lutuk suh ang che u, tawng sânghnih vêl in inkârah tla rawh se,” an ti a. Josua chuan mipui hnênah, “Inthian thianghlim rawh u, naktûk hian Lalpa chuan kan zîngah thil mak tak a ti dâwn e,” a ti a. Josua chuan puithiamho hnênah, “Thuthlung Bâwm chu zâwn ula, kal hmasa rawh u le,” a ti a. Lalpa chuan Josua hnênah, “Vawiin hian Israel-te hmuhah ka chawimawi dâwn che a ni, Mosia hnêna ka awm ang khân i hnênah pawh ka awm ṭhîn dâwn tih an hre dâwn nia. Puithiamte chu Jordan lui kamah tui daia ding tûrin hrilh rawh,” a ti a. Josua chuan Israel mite hnênah, “Lo kal ula, Lalpa in Pathian thu hi ngaithla teh u,” a ti a. Josua chuan, “Pathian nung chu in zîngah a awm tih leh Kanan mite leh Jebus mite chu in hmaah a hnawt chhuak ngei dâwn tih hetiang hian in hria ang. Jordan luiah in hma hruaiin khawvêl zawng zawng Lalpa Thuthlung Bâwm chu a kal hmasa ang a. Mi sâwm leh pahnih, Israel hnam tina mi pakhat ṭheuh thlang chhuak ula, khawvêl zawng zawng Lalpa Thuthlung Bawm zâwntu puithiamte ke-in Jordan lui a dai vêleh, Jordan lui tui luang chu a chat ang a, chhak lam aṭanga lo luang zawng zawng chu a tling khâwm vek ang,” a ti a. Mipui chu Jordan kai tum chuan an puan in aṭang chuan an chhuak a; Thuthlung Bâwm zâwntu puithiamte chu an kal hmasa a. Chutih lai chu buh seng hun, Jordan lui len lai a ni a, a kuang a liam hial a. Thuthlung Bâwm zâwntuten Jordan lui an han dai chuan, chhak lam aṭanga tui lo luang chu a chat a, a hnâr lamah Zarethan bul Adam khawpui thlengin a tling khâwm a. Araba lam Tuipui Thi a luang lût ṭhîn chu a kang chat ta vek a; Jeriko khaw bul maiah mipui chuan lui chu an kal kai ta a. Israel mite chu an zavaiin lei chârah Jordan lui chu an kal kai a; Thuthlung Bâwm zâwntute chu li laiah chuan leichârah mipui kai zawh hma chu an ding a. Hnam puma Jordan lui an kai zawh vek hnu chuan Lalpa chuan Josua hnênah, “Israel hnam tin zînga in thlan chhuah mi sâwm leh pahnihte khân, Jordan luia puithiamte dinna aṭangin lung sâwm leh pahnih, pakhat ṭheuhvin, pu chhuak sela, zânina in riahna tûrah dah teh se,” a ti a. Josua chuan hnam tin aṭanga Israel miten an thlan chhuah mi sâwm leh pahnihte chu a ko va, an hnênah, “ Lalpa in Pathian Thuthlung Bâwm chu kal pêl ula, lung pakhat ṭheuh, a vaiin Israel hnam zât, Jordan lui lai aṭangin pu ula, chûng lung chu Lalpa thiltih hriat reng nân a ni ang. Nakin hnuah in faten, ‘Hêng lungte hi engtihna nge’ an tih hunah, ‘ Lalpa Thuthlung Bâwmin Jordan lui a kai dâwn khân Jordan lui luang chu a chat a, kumkhuaa chumi hriatrengna tûr a nih hi,’ in la ti dâwn nia,” a ti a. Josua thu ang chuan Israel-te chuan an ti a, Jordan lui ata lung sâwm leh pahnih, Josua hnêna Lalpa thupêk ang khân, an pu chhuak a; Israel hnam sâwm leh pahnih zât chu an riahna tûrah chuan an dah a. Josua chuan Thuthlung Bâwm zâwntute dinnaah tak, Jordan luiah chuan, lung a dahtîr bawk a, tûn thlengin chûng chu a la awm a ni. Bâwm zâwntu puithiamte chu luiah chuan an ding a, mipui chu an kal kai sawk sawk a. An kai vek hnu chuan Lalpa Thuthlung Bâwm zâwntu puithiamte chu mipui hmaah an kal ta a. Reuben-ho te, Gad-ho te leh Manase-ho zâtve te chuan hriamhrei kengin, Mosia hnêna thupêk ang khân, mipui hma an hruai a. Lalpa hmaa indo peih reng mi sîngli laiin Jeriko bul zâwl an va thleng ta a. Chumi ni chuan Israel zawng zawng hmuhah Lalpa chuan Josua chu a chawimawi a, a dam chhûng chu Mosia ang bawkin an ngaisâng a. Lalpa chuan Josua hnênah, “Thuthlung Bâwm zâwntu puithiamte kha Jordan lui ata lo chhuak rawh se,” a ti a. Josuan puithiamho hnênah, “Jordan lui ata kha lo chhuak rawh u le,” a ti a. Lalpa Thuthlung Bâwm zâwntute Jordan lui ata an lo chhuaha, lui kam lei an rah veleh Jordan tui chu a luang leh ta dûl dûl a, a hma ang khân a kuang a liam hial a. Jordan lui chu thla khatna ni sâwm ni-in an kal kai a ni. Jeriko chhak lam ramri bul Gilgal-ah bûk an khuar a. Jordan lui aṭanga an lung lâk chu Josua chuan Gilgal-ah chuan a phun a. Israel mite hnênah chuan, “Nakin hnuah in faten an pate hnênah, ‘hêng lung hi engtihna nge?’ tia an zawh che u hunah, ‘He laiah hian Israel-ten leichârah lui an kal kai a ni,’ in ti dâwn nia. Tuipui Sen kân hmaa tuipui tui a tichat ang bawk khân Lalpa chuan Jordan lui kan kai vek hma chu lui tui luang a tichat a. Hêng avâng hian khawvêla hnam tinin Lalpa thiltihtheihzia an hria ang a, kumkhuain in Pathian, Lalpa hi in chawimawi dâwn nia,” a ti a. Jordan lui thlang lama awm, Amor lal zawng zawng leh Mediteranean kama Kanan lal awm zawng zawngin Israel-ten Jordan an kân chhûng zawng lui tui chu a tihchahsak tih an lo hriat chuan an zâm chhe zo ta a. Chutih lai chuan Lalpan Josua hnênah, “Meilung hriam siam la, Israel mi serh la tan lohho serh tansak rawh,” a ti a. Josua chuan meilung hriam a siam a, Israel-te chu Gibeat-haaralot-ah an serh a tantîr a. Aigupta ram aṭanga râlkai chin lo chhuak zawng zawng chu thlalêrah an thi vek tawh a, an chhuah tirh khân serh an tan vek a ni; an lo kal chhûnga piangte erawh chu an serh la tan loh a ni. Israel mite chu thlalêrah kum sawmli an vâkvai a, Aigupta ram ata an chhuah aṭanga râlkai tawh chin chu an thi hman vek a ni. Lalpa thu an ngaihthlâk loh chuan khawizu leh hnutetuia luang ram pêk a tiam chu an thleng ve lo vang tia a sawi tawh ang khân. An aiah, an fate a tipuitling a, chûng mite chu a ni Josuan serh a tansakte chu; kawngah an serh an la tan lo a ni. Mi zawng zawng serh an tan hnu chuan an dam hma chu bûkah an awm a. Lalpa chuan Josua hnênah, “Vawiin hian Aigupta miten an hmuhsitna che u kha ka nuai bo ta e,” a ti a. Chumi hmun chu tûn thlengin Gilgal an ti ta a ni. Gilgal-ah chuan Israel-ten bûk an khuar a, Jeriko phaizâwlah chuan chumi thla, ni sâwm leh pali ni chuan Kalhlên kût an hmang a. Kalhlên kût zawh tûkah chuan, chu rama thar barli chhangphut, dawidim telh loh chhang leh chhangpêr an ei ve ta a. Chu ram buh an ei tûk aṭang chuan mana pawh a tla ta lo va. Israel-te chuan mana ei tûr an nei ta lo va, chumi kum aṭang chuan Kanan ram buhbâl thar an ring ta a. Jeriko bul lawka a awm laiin Josua chuan a han en a, mi pakhat, khandaih keng hi a hmaah a lo ding reng a, a han hnaih a, “Kan sipai nge i nih a, hmêlma sipai?” a ti a. “A khawia mah ka ni lo, Lalpa sipaite ho tûra lo kal ka nih hi,” a ti a. Josua chu lei siin a kûn a, “I chhiahhlawh hnênah eng nge sawi i duh?” a ti a. Lalpa sipai hotu chuan Josua hnênah, “I pheikhawk kha phelh rawh, i dinna kha hmun thianghlim asin,” a ti a, Josua chuan a phelh ta a. Israel-te luh theih loh tûrin Jeriko kulh chu a inkhâr tlat a; tu mah an chhuak thei lo va, an lût thei hek lo. Lalpa chuan Josua hnênah, “Jeriko khua chu an lal leh a sipai huaite nên ka pe tawh a che. Khua chu hual la, ni tin vawi khat, râlkai chin chuan kal hual ṭhîn rawh se; chutiangin ni ruk in ti ang a, a ni sarih ni chuan puithiam pasarihin berâmpa ki tawtawrâwt kengin Thuthlung Bâwm zâwntute hma an hruai ang a, berâm ki chu an hâm ang a, vawi sarih in kal hual tûr a ni. Tawtawrâwt chu fân ruaiin an hâm ang a, chu chu in hriat veleh theihtâwp chhuahin mi zawng zawng au dur dur ula; kulh chu a chim rup mai ang; mahni hma zâwn ṭheuhvah in tlân lût mai thei ang,” a ti a. Nuna fapa Josua chuan puithiamho chu a ko va, “ Lalpa Thuthlung Bâwm chu zâwn ula, tawtawrâwt keng ṭhiau puithiam pasarihin hma hruai sela, zui ang che u,” a ti a. Mipui hnênah, “Kal ula, khua chu kal hual rawh u, Lalpa Thuthlung Bâwm hmaah râlthuam keng kal hmasa rawh se,” a ti a. Josuan mipui hnêna thu a sawi zawh chuan, a tih ang chuan an ti a; tawtawrâwt keng puithiam pasarih chuan tawtawrâwt chu an hâm a; Lalpa Thuthlung Bâwm zâwntute chuan an zui a. Tawtawrâwt hâmho puithiam hmaah râlthuam keng an kal a, Thuthlung Bâwm hnungah râlthuam kengten hnung an dâl a. Tawtawrâwt chu chhum lo chat lovin an hâm a. Josua chuan mipui hnênah, “Au rawh u’ ka tih hunah theihtâwpin in au dâwn nia, chumi hma chuan au tûr a ni lo,” a ti a. Lalpa Thuthlung Bâwm zâwn chung chuan khua chu vawi khat an kal hual a, bûkah an kîr leh a, zân an riak a. A tûkah Josua chu zîng takah a tho va, puithiamho chuan bâwm chu an zâwn leh a. Râlthuam kengin hma an hruai a, puithiam pasarih, tawtawrâwt kengin an zui a, tawtawrâwt chu chhum lo chat lovin an hâm a; Thuthlung Bâwm zâwntute chu râlthuam kengin an rawn chhawm a. A ni hnihnaah pawh khua chu vawi khat an kal hual a, bûk lamah an haw leh a. Chutiang hlîr chuan ni ruk an ti a. A ni sarih ni erawh chuan kâwl ênah an tho va, an tih dân pângngaiin khua chu an kal hual leh a; chumi ni erawh chuan vawi sarih an kal hual a. An kal hual vawi sarihnaah chuan Josuan, “Au rawh u le, Lalpa chuan khua hi a pe ta che u; a khaw pum leh a chhûnga awm zawng zawng te hi tihchhiat tûra Lalpa tâna serh hran vek a ni. Kan mi tirhte lo humtunu avângin Rahabi leh a ina mi awm zawng zawng erawh chu zuah tûr a ni. Serh hran tlat tawh chu in awt palh ang e, pakhat tê pawh in la tûr a ni lo, in lâk chuan Israel-ho bûkah chhiatna râpthlâk tak in tithleng ang. Tangkarua te, rangkachak te, dâr te leh thîr te erawh chu Lalpa sum bâwmah dah ṭhat tûr a ni,” a ti a. Tichuan, puithiamte chuan tawtawrâwt chu fân ruaiin an han hâm a, miten chu chu an hriatin an au chiam a, kulh bang chu a chim ta a; mahni hma zâwn zâwnah an lût ta sung sung a, khua chu an la ta a. Khua chu an tichhe vek a, a chhûnga awm a hmei a pa, a pui a pang, bâwng te, berâm te, sabengtung te nên khandaihin an sât hlum vek a. Ram enthlatute hnênah, Josua chuan, “Nawhchizuar inah kal ula, kha nu kha a neih zawng zawng nên va hruai chhuak rawh u,” a ti a. Enthlatu tlangvâl, a ina thlengte khân Rahabi chu a pa te, a nuṭa te leh a laichîn hnai a awmpui te chu a neih zawng zawng nên an hruai chhuak a, Israel riahhmunah chuan an hruai a. Khua leh a chhûnga awm zawng zawng chu an hâl vek a; tangkarua te, rangkachak te, darbêl te, thîr te erawh chu Lalpa ina sum bâwmah an dah ṭha a. Jeriko enthla tûra Josua mi tirhte a lo hum avângin nawhchizuar Rahabi chu a pa chhûngte nên, a neih zawng zawng nên Josua chuan a zuah a, Israel zîngah tûn thlengin an la tel ta reng a ni. Chûng zawh chuan Josuan mipui chu a vau ta a: “Jeriko khaw din leh tumtu chuan Lalpa ânchhia dawng rawh se, A lungphûm rem lehtu chuan a fa tîr chân sela, A kulh kawngka siamtu chuan a fa tlum chân rawh se,” a ti a. Lalpa chuan Josua chu a awmpui a, ram pumah a hming a thang ta a. Israel-te chuan thil serh hran tlat chu an pawisa lo va; Juda thlah Zera fa, Karmia fapa Akana chuan thil serh tlat ṭhenkhat chu a lo la a, Israel-te chungah Lalpa chu a thinur ta hle a. Bethel chhak lam Beth-aven bula awm Ai khua en thlithlai tûrin Josua chuan Jeriko aṭangin mi a tîr a. Anni chu an chho va, Ai chu an han en thlithlai a. An lo haw a, Josua hnênah, “Mi zawng zawng chho teh suh se, mi sânghnih sângthum vêl chauh chho sela, Ai chu han bei rawh se, an tlêm khawp mai; mi zawng zawng tihhah a ṭûl lo,” an ti a. Mi sângthum vêl chuan an han bei a, Ai khaw mite hmaah chuan an tlânchhe ta a. Ai khaw mite chuan kulh aṭangin Sebarim thleng rawkin an ûm a, an tlân chhuk chu mi sawmthum leh paruk lai an that a. Israel-ho rilru chu a hnual a, an zâm ta hle a. Josua leh Israel upate chuan an puan an pawtthlêr a, Lalpa Thuthlung Bâwm hmaah chuan an bawkkhup a, an lu-ah vaivut an phul a, tlai thlengin an bawk a. Josua chuan, “A va pawî em, Lalpa Pathian, Amor mite sawisak tûr leh tihral mai tûrin engah kher nge Jordan lui min kal kaitîr teh rêng le? Jordan chhak lama awm kha lo lungawi tâwk mai ila a ṭha tûr. Aw Lalpa, Israel-te chu an hmêlmaten an ûm ta mai si a, ṭawngna tûr pawh kan neih tâk loh hi. Kanan mite leh hêng rama awmten an hriatin min hual ang a, min that vek ang a, a mite pawh a hum zo lo an ti ngei ang che le,” a ti a. Lalpa chuan Josua hnênah, “Tho teh, bawk reng teh suh, Israel-ten thil sual an ti alâwm. Ka thuthlung zâwm tûra ka tih chu an bawhchhia a, thil serh hran tlat aṭangin lâk an nei, an ru a, an zêp a, an thawmhnaw zîngah an thukru lehnghâl a. Chuvâng alâwm Israel-te hian an hmêlmate an ngam lohva, an tlânchhiat ni; ânchhia an dawng a ni. Lâk loh tûr in lâk kha in tihboral hma chu in hnênah ka awm lo vang. Tho la, mipuite chu thian fai la, an hnênah, naktûkah chuan inthian fai tûrin hrilh rawh. Israel-te Pathian chuan, ‘Israel-te u, in zîngah ânchhia a awm a ni, chu chu in zîng ata in then fai hma chuan in hmêlmate in ngam lo vang,’ a ti e, tiin hrilh rawh. Tichuan, zîngah a hnam hnamin lo kal sela, Lalpa lo man hnam chu a chi chiin an lo kal leh tûr a ni; Lalpan chi a lo man aṭang chuan chhûngkuain an lo kal ang a, chhûngkua a lo man aṭang chuan, paho an lo kal leh tûr a ni. Thil serh tlat latu man chhuah chu hâl tûr a ni, a neih zawng zawng nên, Lalpa thupêk, lâk loh tûr a tih chu a bawhchhia a, Israel tân thil zahthlâk tak a ti a ni,” a ti a. Josua chu zîng takah a tho va, a hnam hnamin Israel-ho chu an lo kal a, Juda thlahte chu man an ni ta a. Juda thlah zîngah Zer chi man an ni leh a, Zer-ho zîng aṭang chuan Zabdia chhûng man an ni leh a. Chu mi chhûngte zîng aṭang chuan Karmia fapa Akana, Zabdia tupa chu man a ni ta a. Josua chuan Akana hnênah, “Ka fapa, Israel-te Pathian, Lalpa hmaah thu dik tak sawi rawh aw: Thupha chawi mai teh, eng nge i tih, zêp lovin min hrilh teh,” a ti a. Akana chuan Josua chu a chhâng a, “Israel-te Pathian, Lalpa lakah thil sual ka lo ti a ni. Kan thil man zîngah Babulon puan mawi tak, tangkarua sekel za bûk vêl leh sekel sawmnga vêl bûk rangkachak nên ka hmu a, ka awt êm a, ka la ta mai a ni. Ka puanin chhuatah ka phûm a, a hnuaihnung berah tangkarua chu ka dah kha,” a ti a. Josua chuan mi a tîr a, puan inah chuan an kal a, a lo thukru ngei rêng a, a hnuai berah tangkarua chu a lo awm a. Puan in ata chu an la a, Josua leh Israel-te hmaah chuan an rawn la a, Lalpa hmaah chuan an dah a. Josua leh Israel-te chuan Zera fapa Akana chu puan te, tangkarua te, rangkachakte leh a nupui fanau te, a bâwng te, a sabengtung te, a berâm te leh a neih zawng zawng nên Akor ruamah an hruai a. Josua chuan, “Min timangang hle mai a, Lalpa chuan vawiin hian a timangang ve dâwn che a nih hi,” a ti a. Mi zawng zawngin Akana leh a chhûngte chu lungin an dêng a, an neih zawng zawng nên chuan an hâl ta a. A chungah chuan lung an vawm vûm thûr a, Lalpa thinur chu a dai ta a. Vawiin thlengin chu ruam chu Akor ruam tih a la ni ta reng a. Lalpa chuan Josua hnênah, “Hlau suh la, beidawng hek suh; Israel-te zînga indo thiam hruai vek la, Ai khua bei tûrin chho rawh. Ai khaw lal te, a mi te, a khawpuite leh a ramte chu i kutah ka pe tawh a che. An khua leh an lal chu Jeriko khua leh an lal i sawisak ang khân sawisa ang che; tûn ṭum hi chuan an berâm leh an rante chu mahni tân in lâksak dâwn nia. Khaw hnung lam aṭangin bei thut ang che u,” a ti a. Ai khua bei tûr chuan Josua leh a hote chu an insiam a. Josua chuan mi fel deuh deuh sîngthum a thlang chhuak a, zânah a kal chhohtîr a. “Khua chu a hnung lamah châng ru ula, khua aṭanga hla lovah biru ang che u, inring reng ang che u. Ka mite nên khua chu a hma lamah kan rawn bei ang a, min bei tûrin an lo chhuak ang a; a hma angin kan tlânchhe der ang a; khua aṭanga hla fe thleng min ûm hnuah, a hma ang khân kan tlânchhe tak tak emaw an ti ang. In bihrûkna ata in lo chhuak ang a, khua chu la ang che u. In Pathian, Lalpa chuan a pe ang che u. Khua in lâk hnu chuan Lalpa thu angin hâl rawh u. In tih tûr chu, chu chu a ni,” a ti a. Josua chuan anni chu a kaltîr a, Ai khaw thlang lam Bethel nêna an inkârah chuan an hual ru a, zânah Josua ho chu puan inah an riak a. Josua chu zîngah a tho va, a mite chu a ko khâwm a, Israel upate nên Ai khua chu an pan ta a. Khaw kawtchhuah, hmâr lam tlângah a hote chuan ṭanhmun an khuar a, Ai khua nêna an inkârah chuan ruam a awm. Ai khawthlang lam, Bethel nêna an inkârah a rûka châng tûr mi sângnga a dah a. A sipai bupui chu hmâr lam aṭanga Ai khua bei tûr chuan an inrâlring a, khaw thlang lama lo châng tâwk an awm bawk a. Chumi zân chuan Josua chu ruamah chuan a kal a. Ai khaw lal chuan a lo hmu a, a mite nên zîngah an tho va; Israel-ho nêna an inbeihna Araba ruamah khân Israel-ho bei tûr chuan an chhuk leh ta a, an hnung lam aṭangin khawpui bei tûr biru an awm tih an hre lo. Josua leh Israel-te chu hlau âwm takin thlalêr lam panin an tlânchhe der a, Ai khuaa mite chu ûm tûrin an inpun khâwm a, Josua chu an ûm a, khua chu an chhuahsan ta vek a. Ai khaw mi zawng zawngin Israel-te chu an ûm a, khaw vêngtu pakhat mah an awm lo, khua chu a inhawng huai mai. Lalpa chuan Josua hnênah, “I fei khân Ai khua tin rawh, khua chu ka pe dâwn che a ni,” a ti a. Josuan a fei ken chuan Ai khua chu a tin a. Chutia a han tin vêleh chângtute kha an bihrûkna ata an lo zuang chhuak a, khuaah an lût a, an la ta mai a; khua chu an hâl ta hluah hluah a. Ai khaw mite chu an han lehhawi a, an khaw kâng khu ngun ngun chu an hmu a, thlalêr pana tlânho khân an rawn bei lêt bawk a, tlânna tûr lam rêng an hre ta lo va. Josua leh Israel-te chuan châng rutute khân khua chu an la a, an hâl khu ngun ngun ta tih an hmuh chuan an lêt leh a, Ai mite chu an that ṭan ta a. Khaw latute khân an rawn ûm bawk a, Israel-te chuan an kârcheh a, tu mah dam emaw, tlân chhuak emaw awm miah lovin an that a. Ai khaw lal erawh chu a nungin an man a, Josua hnênah an rawn hruai a. Ai khaw mi, Israel ûmtute kha, thlalêrah an lo that vek a, an sah hlum zawh chuan Ai khuaah Israel mi zawng zawng chu an kal a, chuta mi zawng zawng chu khandaihin an that vek a. Ai khaw mi, chumi nia an thah chu a hmei a pain mi sîngkhat leh sânghnih an tling. Ai khaw mi an thah zawh fai phiar hma chu Josua chuan a fei kha a lek reng a. Josua hnêna Lalpa thupêk angin ran an mansak te, an râllâk sumte chu mahni tân an nei a. Tin, Josua chuan Ai khua chu a hâl chim vek a, tûn thlengin a ram a, bawlhhlawh vûm mai a ni ta. Ai khaw lal chu a khai hlum a, tlai thlengin thingah a khai a, ni a tlâk chuan Josua thu angin a ruang chu an la thla a, khaw kulh kawngka sîrah chuan an paih a, lung an vawm hnan thûr a, tûn thlengin chûng chu a la awm. Josua chuan Israel-te Pathian, Lalpa tân Ebal tlângah maichâm a siam a. Lalpa chhiahhlawh Mosian Israel-te hnêna thu a pêk, Mosia Dân bu-a ziak angin lung chher loh, thîra chher lohvin maichâm an siam a, Lalpa hnênah hâlral thilhlan leh remna thilhlan an hlân a. Israel-ho hmuh lai ngeiin Josua chuan Mosia dân chu lungah chuan a ziak chhuak a. Israel-ho chu an upa te, hruaitu te, rorêltu te leh an zînga hnam dang awm vê te nên puithiam Levia-ho zâwn, Thuthlung Bâwm hawiin, lehlam lehlamah chuan an ding a. A zâtve chuan Gerizim tlâng an hmachhawn a, a zâtve chuan Ebal tlâng chu an hmachhawn a. Israel mipuite mal an sâwmsak dâwnin hetianga din ṭhin tûr tih Mosia thupêk ang khân an ding a. An din fel chuan Dân bu-a thu zawng zawng, malsâwmna thu te, ânchhe dawn tûr thu te chu Josuan a chhiar chhuak a. Israel mipui hmaah, hmeichhia te, naupangte leh an zînga kal ve hnam dang mite hmaah Mosia thupêk zawng zawng chu chhiar hmaih a nei hauh lo. Jordan thlang lam tlângrama awm te, tlâng bulṭhut rama awmte leh Mediteranean tuipui kama Lebanon tlâng thlenga awm Hit-ho lal te, Amor lal te, Kanan lal te, Periz lal te, Hiv-ho lal te, Jebus lal te chuan Israel-ho chakzia an lo hria a. An inko khâwm a, Josua leh Israel-te chu lo beih rawn zai an rêl a. Gibeon khuaa awm Hiv mite chuan Jeriko leh Ai khua Josuan a sawisak dân an hriat chuan, finrâwl an thawh ve ta a. Palai ni âwm tak tak an insiam a, ip hlui tak hi sabengtung an phurhtîr a, an uain savun ip, hlui peh ver vurte chu bel ṭup a ni a, pheikhawk hlui, bel ṭiam ṭuam an bun a, kawr hlui tak tak an ha a. An chhang kente chu a khirin a hmuar uar a. Israel-te riahhmun Gilgal-ah chuan Josua an rawn pan a, a hnênah, “Ram hla tak aṭangin kan lo kal a, inremna thu i thlung ang u,” an ti a. Israel mite chuan, “He lai hnaia mite in nih chuan thu kan thlunpui thei lo vang che u,” an ti a. Josua hnênah, “I chhiahhlawh kan nih hi,” an ti a. Josua chuan, “Tute nge in nih? Khawi lam aṭanga lo kal nge in nih?” a ti a. Anni chuan, “I chhiahhlawhte hi ram hla tak aṭanga lo kal kan ni. In Pathian, Lalpa chanchin kan lo hria a, Aigupta rama a thil tih hmingthang tak tak te, Jordan râla Amor lal Sihona, Hesbon lal chungah te, Basan lal Astarot khua Oga chunga a thil tih te kan lo hria a. Kan upate leh kan ram mite chuan, ‘Zan riak chaw keng ula, anni chu va hmu ula, in chhiahhlawh kan ni a, thu min thlunpui rawh u, va ti ang che u,’ min ti a. Kan chhang kente hi kan lo chhuah tûk chuan a la lum thar thar a; tûnah zawng a khirin a hmuar tawh hi. Kan savun ip tharte pawh a peh zo tawh a, kan thawmhnaw te, kan pheikhawkte pawh kan lo kal thui êm tawh avângin a hniar veng vung tawh a nih hi,” an ti a. Israel mite chuan an chhang chu an lo eisak a. Lalpa an râwn lo. Josua chuan ṭhiana inhmang tûrin thu a thlunpui a, tihhlum loh a tiam a, Israel pungkhâwmho hruaitute pawh chuan an tiam a. Thu an tiam hnu ni thum lekah chuan chûng mite chu an ṭhenawm, an bul lawka awmte an ni tih an hre ta a. Tichuan, Israel-hote chu ân insawn a, ni thum an kal a; chung mite awmna khua Gibeon te, Kafira te, Kiriat-jearim te chu an va thleng a. Chûng mite chu Israel mite chuan an khawih thiang lo, Israel-te Pathian, Lalpa hmingin an hotute chuan thu an lo tiam tlat tawh si a. Pungkhâwmho chuan an hotute chu an dem hle a. Hruaitute chuan pungkhâwmho hnênah, “Israel-te Pathian, Lalpa hming chhâlin thu kan lo tiam a, kan khawih a thiang tawh lo. Kan thutiam avângin an nun kan zuah tûr a ni: chutilo chu, Pathian kut kan tuar ang. Zuah ila, kan thing phurtuah leh tui chawitu-ah an ṭang dâwn nia,” an ti a. Gibeon mite chu Josuan a ko va, “Kan bul hnai maia awm si, ram hla tak aṭanga lo kal kan ni tiin engtizia nge min bum le? Hetianga in tih avângin Pathian ânchhia in dawng ta, Pathian ina tuah tûr thing phurtu leh tui chawitu atân chhiahhlawh in ni reng dâwn a ni,” a ti a. Josua chu an chhâng a, “ Lalpa, in Pathian chuan a chhiahhlawh Mosia chu ram pum pui hi pe tûr che uin a ti a, in kalnaa awm apiang that vek tûrin a ti ngei bawk che u a. Chu chu kan lo hria a, kan hlau êm êm che u a, khati khân kan ti ta mai a nih kha, kan hlauh vâng che u a ni. In kutah kan awm hi, ṭha in tih ang chuan min ti ang chu,” an ti a. Josua chuan hetiang hian a ti ta a: anni chu a hum a, Israel-ten an thah a khap a, bawihah a siam thung a. Israel mipuite leh Lalpa maichâm tâna thing phurtu leh tui chawitu-ah a dah ta a. Vawiin thleng hian amah an biakna tûr Lalpa hmun ruatah chuan chûng hna chu an thawk ta a ni. Chutih lai chuan Jerusalem khaw lal chu Adoni-zedeka a ni a. Josuan Ai khua a lâk a, a tihchhiat vek thu te, Jeriko leh an lal a sawisak ang khân Ai khua leh an lal a sawisa tih thu te a lo hria a; Gibeon mite pawhin Israel-te nên inremna an nei a, an zîngah an tel ve ta tih te an lo hre bawk a. Chuvângin, Jerusalem mite chuan an hlau hle a; Gibeon khua phei chu lal nei khaw dang tluk bawka tam an ni a. Ai khua ai pawhin an tam, indo pawh an thiam hle a ni. Jerusalem lal Adoni-zedeka chuan Hebron lal Hohama te, Jarmut khaw lal Pirama te, Lakis lal Jafia te, Eglon lal Debira te chu thu a chah a. “Lo kal ula, Gibeon-ho hi i bei teh ang, Josua leh Israel-te nên inremna an lo siam reng alâwm,” a ti a. Amor-ho lal panga, Jerusalem lal te, Hebron lal te, Jarmut lal te, Lakis lal te, Eglon lal te chu an ṭang rual a, Gibeon khua chu an hual a, an bei ta a. Gibeon mite chuan Gilgal-ah Josua hnênah zualko an tlântîr a, “I chhiahhlawhte hi thlahthlam teh suh, lo chho vat la, min han pui rawh,” an ti a. Tichuan, Josua chu Gilgal aṭang chuan indo mi, mi huaisen rualte chu hruaiin a chho ta a. Lalpa chuan Josua hnênah, “Huphurh suh, anni chu ka pe tawh a che; tu mahin an lo dang hauh lo vang che,” a ti a. Gilgal aṭang chuan zankhuain Gibeon thlengin an kal a. Amor mite chu an bei ta thut a. Amor mite chuan Israel-te an hmuh chuan Lalpan a tizâm a, Gibeon-ah chuan Israel-te chuan an that chiam a, a ṭhen chu Beth-horon kalkawngah an ûm thla a, chhak lamah Azeka leh Makeda thleng zakin an ûm a. Kalkawnga an tlân laiin Lalpa chuan rial lian pui pui a dentîr a, Azeka thleng rawkin a dêng a. Israel-ho thah ai chuan rial dena thi chu an tam zâwk mah. Lalpa chuan Israel mite chu Amor-ho a hnehtîr ni chuan Josuan Lalpa chu a bia a, Israel-te hriatah: “Chungtûrni, ding reng rawh, Gibeon chungah Chhawrthlapui, nang pawh Aijalon ruamah ding ve rawh,” a ti a. Ni chu a ding a, thla chu a che bawk lo. An hmêlmate an sawisak nek hma chu. ‘Jasar lehkhabu’ an tihah chu thu chu ziak a ni. Vânlaizâwlah ni chu a ding a, ni khat hu lai a ding. Chutiang khawpa mihring thu mai Lalpa chuan a zawm ni a la awm ngai lo, awm pawh a awm leh hek lo vang. Lalpa chuan Israel-te chu a dopui a ni. Chûng hnu chuan Josua leh a hote chu an riahhmun Gilgal-ah an kîr leh ta a. Amor lal panga kha an tlânchhia a, Makeda pûkah an biru a. Josua hnênah, “Lal pangate kha kan hmu ta, Makeda pûkah an biru a ni,” an rawn ti a. Josua chuan, “Pûk kawngka chu lung lian pui puiin chhîn ula, mi ṭhenkhat vêng tûrin dah rawh u. Nangni erawh chuan hmêlmate chu tlân khalh ula, an khaw kulha an tlân lût tûr dang tlat rawh u, Lalpa, in Pathian chuan a hnehtîr che u hi,” a ti a. Josua leh Israel-te chuan an hmêlmate chu an that chiam a, an that fai a ni deuh mai, an thah bâng tlêm chu an khaw kulhahte an tlân lût a. Josua bûk khuarna Makeda-ah chuan a hote chu râlmuang takin an lo kal a; Israel-ho chu hnialkalh ngam rêng an awm lo. Josua chuan, “Pûk kawngka kha hawng ula, lal pangate kha han hruai chhuak teh u,” a ti a. Jerusalem lal te, Hebron lal te, Jarmut lal te, Lakis lal te leh Eglon lal te chu pûk ata an rawn hruai chhuak a. Hêng lal pangate hi a hnêna an rawn hruai chuan Israel mite chu a ko khâwm a, a sipai hruai hotute hnênah chuan, “Lo kal ula, hêng lal pangate hi an nghâwngah rap rawh u,” a ti a. An lo kal a, an nghâwngah an rap a. Josua chuan, “Hlau mah ta che u, zâm pawh zâm suh u, huai takin ṭang sauh sauh rawh u. Lalpa chuan in do apiang hetiang hian a tihsak dâwn che u asin,” a ti a. Chumi hnu chuan lalte chu Josua chuan a that a, thing pangaah a khai a; tlai thlengin an ruang chu a inkhai a. Ni a tlâk dâwnah an ruang chu a lâk thlâktîr a, an bihrûkna pûkah chuan a paihtîr a, pûk kawngka chu lung lian pui puiin an chhîn a, tûn thlengin a la awm. Chumi ni chuan Makeda khua chu Josua chuan a bei a, a la a, an lal pawh a man a, khuaa mi zawng zawng chu Jeriko lal a thah ang khân a that a. Josua chu Makeda aṭang chuan Israel-hote nên Libna-ah an kal a, khua chu an bei a. Lalpa chuan chu khua leh an lal chu Israel-te kutah a pe a; khuaa mi zawng zawng chu an sât hlum a, tu mah nungdamin an chhuah lo. An lal pawh Jeriko lal an thah angin an that a. Libna khua aṭang chuan Josua leh Israel-te chu Lakis khuaah an kal a, an hual a, an bei a. Israel-te kutah Lakis khua chu Lalpan a pe a, a ni hnih ni-ah an la ta mai a. Libna khua an tih ang bawk khân khuaa mi zawng zawng chu a sât hlum vek a. Gezer khaw lal Horama chu Libna khua pui tûrin a lo chho va, Josua chuan ani chu a sipaite nên a lo hneh a, pakhat mah hmaih lovin a lo that a. Josua leh Israel-te chu Libna aṭang chuan Eglon khuaah an kal a, an hual a, an bei a. Chumi ni vêk chuan an la a, chumi ni chuan mi awm zawng zawng an sât hlum phiar a, Lakis an sawisak ang bawk khân an sawisa a. Josua leh Israel-te chu Eglon aṭang chuan Hebron khuaah an chho va, an bei a. Khua chu an la a, chuta awm zawng zawng chu an lal nên lam an sât hlum a, an chhehvêl khuaa awmte pawh an sât hlum a. Eglon khua an tih ang khân Hebron pawh chu an tichhe vek a, tu mah nungdamin an chhuah lo. Josua leh Israel-te chu an kir a, Debir khua an bei a. Khua chu an la a, an lal chu an man a; an chhehvêl khuate pawh an la a. Chûnga awm zawng zawng chu an sât hlum vêk a, Josua chuan Debir khua leh an lal chu Libna khua leh an lal an tih ang khân a ti a. Josua chuan ram chu a la ta vek a. Tlângram te, khawchhak tlâng pang te, khawthlang tlâng bulṭhut phai te, chhim lam ramte nên lam a la a, an lalte chu a hneh vek a, tu mah a zuah lo. Israel-te Pathian, Lalpa thupêk angin thaw thei tawh phawt chu a that vek a. Kades-barnea aṭangin Gaza inkâr ram zawng zawng, Gosen ram pawh, Gibeon thlengin Josua chuan a la a. Chûng rama lal zawng zawng leh an ram chu, Israel-te Pathian, Lalpa chuan a beihpui avângin ṭum khatah Josua chuan a la a ni. Josua leh Israel-te chu an riahhmun Gilgal-ah chuan an haw leh ta a. Hêng thu hi Hazor lal Jabinan a lo hriat chuan Madon khaw lal Jobaba te, Simron khaw lal te, Aksaf khaw lal te, hmâr lam tlângram lal te, Galili dîl chhim Araba khaw lal te, Mediteranean tuipui kam Dor khaw lal te, khawchhak lam leh khawthlang lama Kanan lal awm te, Amor-ho lal te, Hit-ho lal te, Periz-ho lal te, tlângrama Jebus-ho lal te, Mizpa ram Hermon tlâng bula Hiv-ho lal te chu a pun khâwm a. An sipaite nên an lo thawk a, tuipui kama ṭiau zât hiala tam an ni. Sakawr te, sakawr-tawlailîr te pawh an rawn keng ṭeuh va. Hêng lalte hi an ṭangrual a, Israel-te bei tûrin Merom lui kamah ṭanhmun an khuar a. Lalpa chuan Josua hnênah, “Hêngho hi huphurh suh, naktûk hetih hunah hian tihlum vekin Israel-te hnênah ka hlân ang, an sakawrte chu an tha chhahsak la, an tawlailîrte hâl ang che,” a ti a. Josua leh a hruai ṭhin indo mite chu an thawk chhuak a, Merom luiah chuan an va bei thut a. Lalpa chuan Israel-te kutah a pe a, an bei a, an thah zawh vek hma chu Misrefotmaim leh Sidon thleng rawkin an ûm a, chhak lamah Mizpa ruam thlengin an ûm bawk a. Lalpa thupêk angin Josua chuan an sakawr tha te chu a chhahsak a, an tawlailîrte chu a hâl a. Josua chu a kîr a, Hazor khua a la a, an lal chu a sât hlum a, tûn hma chuan hêng lai khuaah Hazor hi khaw lian ber a ni ṭhîn. Khuaa mi zawng zawng chu a sât hlum vek a, thaw thei tawh phawt chu zuah rêng a nei lo. Hazor khua chu a hâl a. Josua chuan hêng khua zawng zawng hi a la vek a, an lalte pawh a man a, Lalpa chhiahhlawh Mosia thu ang khân a tihlum vek zêl a. Hazor khua, Josua hâl tih loh chu, Israel-te chuan an khaw tihchhiata in la dingte chu an hâl lo. Hêng khuaa an râllâk sum leh rante chu Israel-te chuan mahni tân ṭheuh an nei a, mihring erawh chu an sât hlum vek a ni; thaw thei tawh phawt chu hmaih rêng an nei lo. A chhiahhlawh Mosia hnênah Lalpa chuan thu a pe a. Mosia chuan chutiang bawkin Josua chu thu a pe a; chutiang tak chuan Josua chuan a ti a. Mosia hnêna Lalpa sawi, thil bawlhhlawh rêng rêng chu, tihbo loh eng mah a nei lo. Josuan ram zawng zawng chu a la a, Negeb leh tlângram te, Gosen ram phai te, tlâng bulṭhut phai te, Jordan ruam te, Israel tlângram te, a vêl tlâng bulṭhut phai te chu a la vek a. A ram lâk chuan chhim lamah Halak tlâng, Seir bul aṭangin hmâr lamah Baalgad, Lebanon ruam Hermon tlâng bul a thleng a. An lalte chu a hneh a, a man a, a that a. Josua leh hêng lal zawng zawng hi rei tak an indo a ni. Gibeon khuaa awm Hiv-ho chauh lo chu Israel-te nêna inbe rem khaw pakhat mah an awm lo, a lâkin an la vek a ni. Lalpa chuan Israel-te bei tûrin hêngho hi a tiluhlul a ni; Mosia hnêna Lalpa thupêk angin lainat miah lova tihmang vek an nih phah ta a. Josua chu a kal zêl a, tlângrama Hebron khuaah te, Debir khuaah te, Anab khuaah te, milian Anak an tih la awmte chu a that vek a. Judai leh Israel tlângrama awmte pawh an zavaiin, an khuate nên a tiral vek a. Israel mite ramah chuan milian rêng an awm tawh lo. Gaza khuaah te, Gath khuaah te, Asdod khuaah te erawh chuan an la awm pheuh pheuh. Mosia hnêna Lalpa thupêk ang khân Josua chuan ram a lâka a lâk vek hnuin an ramro atân Israel-te chu a hnam hnamin a sem ta a. Ramah chuan indona a awm ta lo va. Jordan chhak lam Arnon lui aṭanga Hermon tlâng thlengin Jordan luiruam ramte chu Israel-te chuan an hneh a, an neihsak tawh a. Amor mi, Hesbon lal Sihona leh Basan lal Oga an hneh a. Sihona ram chuan Gilead chanve a huam a ni; Arnon luiruam ko chunga Aroer khua leh Arnon lui kama khua aṭangin Jabok lui a thleng a, chu chu Amon-ho nêna an inrina a ni. An ram chuan Jordan kam chhak lam, Galili dîl aṭanga chhim lam lui phai zawng zawng, Beth-jesimot, Tuipui Thi chhak lam Pisga thlengin a huam bawk. Basan lal Oga chu milian, Refaim an tih la dam awmchhun zînga mi a ni, Astarot leh Edrei khuaah a lal a. A ram chuan Hermon tlâng te, Seleka te leh Basan ram zawng zawng, Gezer leh Maaka ramri thleng a huam a; Gilead ram zâtve leh Hesbon lal Sihona ramri thlengin a huam bawk. Hêng lal pahnihte hi Mosia hovin Israel-te chuan an hneh a, Lalpa chhiahhlawh Mosia chuan Reubena thlah leh Gada thlahte leh Manasea thlah zâtve te hnênah an ram chanpual atân a pe a. Hmâr lama Baal-gad, Lebanon ruama awm leh chhim lam Seir tlâng bula Halak tlâng inkâr ram zawng zawng, Jordan lui khawthlang lama awm leh an lalte chu Josua leh Israel-te chuan an hneh a. Chûng ram chu Josuan Israel hnamte hnênah ram chanpual atân a sem a. Hei hian hêngte hi a huam: tlângram te, khawthlang lam tlâng bulṭhut te, Jordan luiruam te, a dawt tlâng bulṭhut zâwl te, chumi chhak tlâng te leh Negeb thlalêr te hi. Chûng rama lo awmte chu Hit mi te, Amor mi te, Kanan mi te, Periz mi te, Hiv mi te leh Jebus mi te an ni. Lal an hneh, an thahte chu hêng hi an ni: Bethel khaw bula Ai khaw lal, Gezer lal; Jerusalem lal, Hebron lal, Jarmut lal, Lakis lal; Eglon lal, Gezer lal; Debir lal, Geder lal; Horma lal, Arad lal; Libna lal, Adulam lal; Makeda lal, Bethel lal; Tapua lal, Hefer lal; Afek lal, Saron lal; Madon lal, Hazor lal, Simron-meron lal, Aksai lal; Taanak lal, Megido lal; Kades lal, Karmel tlânga Jokneam lal; Mediteranean tuipui kam Dor lal, Gilgal-a Goim lal; Tirza lal te hi. An lal thah zawng zawng chu an vaiin sawmthum leh pakhat an ni. Josua chu a lo upa a, a tar ta hle a; Lalpa chuan a hnênah, “I lo upain i tar ta hle a, ram lâk tûr lah chu a la tam mai si a. Filistia leh Gesur-ho awmna ram te, chhim lam ram Avim-ho awmna te la lâk loh a ni. Aigupta ramri Sihor lui aṭanga hmâr lam Ekron thleng hian Kanan mite rama ngaih a ni. Filistia-ho chu Gaza-ah te, Asdod-ah te, Askelon-ah te, Gath-ah te lalah an ṭhu a ni. Kanan-ho ram leh Sidon-ho ram Meara chu Amor ramri Afek thlengin la lâk loh a ni. Gebal mite ram, Lebanon tlâng chhak lam Hermon tlâng bula Hamath kalkawng thleng lâk loh a la ni bawk. “Lebanon tlâng leh Misrefot-maim inkâr tlângrama awm zawng zawng Sidon mite chu, keiman Israel mite hmaah ka la ûm chhuak ang; thu ka pêk che angin an ram chanpual atân Israel-te chu pe phawt mai rawh. Khai le, ram hi Israel hnam kua leh Manasea thlah zâtve te hnênah, an ram chanpual atân sem rawh,” a ti a. Manasea thlah zâtve te nên Reubena thlah leh Gada thlahte chuan Jordan chhak lamah ram chanpual tûr Lalpa chhiahhlawh Mosia pêk kha an nei a. Arnon luiruam ko chunga khua Aroer leh luidung khua aṭangin tlâng zâwl, Medeba leh Dibon inkâr, Amor mi, Hesbon khaw lal Sihona ram zawng zawng Amon-ho ramri thlengin a huam a. Gilead ram huamin Gesur-ho leh Maakat-ho awmna nên, Hermon tlâng leh Basan rama Seleka a thleng a. Astarot leh Edrei lal Oga ram Basan te a huam a, ani chu Refaim la awmchhunte zînga mi a ni; Mosia khân chûngho chu a hneh a, a ûm chhuak a ni. Gesur mite leh Maakat mite chu Israel-te chuan an ûm chhuak lo, tûn thlengin Israel-ho zîngah an la awm ve a ni. Levia thlahte erawh chu ram chanpual an pe ve lo. Israel-te Pathian, Lalpa hnêna an thilhlan hâl bâng chu an chanpual atân pe tûrin Lalpa chuan Mosia chu a hrilh a nih kha. Mosian Reubena thlahte chu a chhûng chhûnga insem tûr ram a pe a nih kha. An ram chhim lam ri chu Arnon luiruam ko chung Aroer khua leh lui kama khaw awm kha a ni; Medeba tlâng zâwl te, Hesbon khua leh a chhehvêl khua, tlâng zâwla awm te, Dibon te, Mamoth-baal te, Beth-baal-meon te, Jahaz leh Kedemot te, Mefaat te; Kiriathaim te, Sibma te, Zereth-sahar, ruam zâwla awm te; Beth-peor te, Pisga tlâng pang te, Beth-jesimot te a huam a. Tlâng zâwl khua zawng zawng leh Amor mi Hesbon lal Sihona ram zawng zawng a huam bawk a. Ani chu Mosian a hneh a, Midian hotu Evia te, Rekema te, Zura te, Hura te leh Reba te pawh a huam tel a; hêngho hi Sihona hnuaia rorêltu an ni. Israel miten Beora fapa Balaama, aienthiam chu an that bawk. Khawthlang lama an ramri chu Jordan lui a ni. Reubena thlahte neih atân khîng khawpuite leh an chhehvêl khuate khi an pe a. Mosia chuan Gada thlahte chu a chhûng chhûnga insem atân an ram chanpual tûr a pe a. An ram chuan Jahaz leh Gilead khawpui zawng zawng a huam a, Amon-ho ram zâtve, Raba chhak lama awm Aroer a huam thleng a. Hesbon leh Ramat-mizpa leh Betonim inkâr ram te, Mahanaim aṭanga Lo-debar ri inkâr te a huam bawk a. Jordan luidungah chuan Beth-haram te, Beth-nimra te, Sukot te, Zafon te leh Hesbon lal Sihona ram ṭhînte a huam tel bawk a. Khawthlang lama an ramri chu Jordan lui, Galili dîl thlengin a ni. Gada thlahte neih atân khîng khawpuite leh a chhehvêl khuate khi an pe a. Mosia chuan Manasea thlah zâtve tân a chhûng chhûnga insem atân ram chanpual an neih tûr a pe a. An ram chuan Mahanaim aṭanga Basan ram, Basan lal Oga ram zawng zawng a huam a, Basan ram Jair bial khaw sawmruk pawh a huam a ni. Gilead bial zâtve, Astarot te, Edrei te, Oga ram Basan khawpuite chu a pe tel bawk a. Manasea fa Makira thlahte hnênah khîng ramte khi a pe a ni. Moab phaia an awm lai khân, Jeriko khaw chhak lam ram chu khitiang khian Mosian a sem a. Mosian Levia thlahte chu ram a ruatsak ve lo. Israel-te Pathian, Lalpa hnêna thilhlan chu an chanpual atân a ruat a ni. Jordan lui thlang lama Kanan ram chu Israel mite hnênah puithiam Eleazara te, Nuna fapa Josua te leh Israel hnam hruaitute chuan hetiang hian an sem a. Lalpa thupêk angin hnam kua leh a chanve chan tûrin ṭhum an vâwr a, an sem a. Jordan chhak lama hnam hnih leh a chanve chu Mosian ram chanpual tûr a pe tawh a; an zîngah Levia chite ram a pe ve lo. Josefa thlahte kha hnam hnih, Manasea leh Efraim hnamah ṭhen an ni a; mahse, Levia thlahte chu ram chanpual a pe ve lo. Awmna khua erawh chu an bâwngte leh berâm leh kêl tlatna tûr ram nên an pe a. Mosia hnêna Lalpa thupêk ang chuan Israel-te chuan ram chu an insem ta a. Gilgal-a an awm laiin Juda thlah zînga mi ṭhenkhat Josua hnênah an lo kal a. An zînga pakhat, Keniz mi, Jefunea fapa Kaleba chuan Josua hnênah, “Kades-barnea kan awm laia Pathian mi Mosia hnêna kan pahniha chungchâng Lalpa sawi kha i hria a. Lalpa chhiahhlawh Mosian he ram hi en thlithlai tûra min tirh khân kum sawmli-a upa ka ni a, thil ka hmuh dân ang chiah ka hrilh a nih kha. Ka kalpui, ka unaute khân, mipui an tilunghnûr a, kei erawh chuan ka Pathian, Lalpa thu ka zâwm tlat a nih kha. Kan Pathian, Lalpa thu i zawm tlat avângin i kein a rah ram chu in ram chanpual atân i nei ngei ang,’ tiin Mosian khami ni khân thu a tiam a nih kha. Khai le, tûnah khatia Mosia hnêna Lalpa thu sawi kha kum sawmli leh panga lai a ni ta a, Israel-te thlalêra an tei an tei lai ata tûn thlengin Lalpa chuan a sawi angin nungdamin min la zuah tâk rêng hi; en teh, kum sawmriat leh panga zu ni ta ia! Mosian min tirh lai ang mai khân vawiinah pawh ka la chak a ni. Indonaah pawh kala, duh duha chhuakvâk theiin ka la chak a ni. Chuvângin, kan kalpuite nêna thu kan thlen laia Lalpa sawi, he lai tlângram hi, min pe ta mai che, Anak mi, milianho chu kulh lian pui puiah an awm tiin kan hrilh che kha; Lalpa chuan min awmpui ang a, Lalpa thupêk angin ka luhchhuak vek mai thei asin,” a ti a. Josua chuan mal a sâwmsak a, Jefunea fapa Kaleba chu ram chanpual atân Hebron chu a pe ta a. Tichuan, Israel-te Pathian, Lalpa thu chu a awih tak tak avângin tûn thlengin Hebron chu Jefunea fapa, Keniz mi Kaleba ram chanpual a ni ta a. Hebron chu tûn hma chuan Kiriat-arba tih a ni ṭhîn a, chu chu Arba khua tihna a ni. Arba chu Anak-ho zîngah chuan lal ropui ber a ni. Ram chu a râlmuang ta a. Juda thlahte, a chhûng chhûnga an insem tûr ram chuan chhim tâwpa Edom ram leh Zin thlalêr a thleng a. Chhim lam ramri chu Tuipui Thi chhim lam kil tâwpah a inṭan a. Chhim lam panin Akrabim kalkawng a kal a, Zin thlalêrah a lût a, Kades-barnea chhim lamah Hezron thlengin a kal a, Adar-ah a chho va, Karka lamah a inher a, Azmon-ah a kal zêl a, Aigupta ramri luiah a chhuk a, lui chu zuiin Mediteranean tuipui a zu chhun a. Hei hi Judai ram chhim lam ri chu a ni. Khawchhak lam ri chu Tuipui Thi a ni, Jordan lui chhuah thlengin a ni. Hmâr lam ramri chu Jordan lui chhuahah a inṭan a, Beth-hogla-ah a chho va, Beth-araba hmâr lamah a kal a, Bohana lung a chhun a. Bohana hi Reubena fa a ni. Akor ruam aṭangin Debir khuaah a chho va, hmâr lam panin chumi ram chhim tâwpa Adumin kalkawng hawi zâwnga awm Gilgal a thleng a. En-semes tuikhurah a kal zêl a, En-rogel-ah a kal a. Jebus-ho khua Jerusalem awmna chhim lam ruam Hinom chu a thleng a. Hinom thlang lam tlângah ri chu a kal zêl a, Refaim ruamah a chhuk a: Neftoa tuikhurah a kal a, Efron tlânga khuaahte chuan a kal tlang a; Baala khaw lamah a inher a; chu khua chu Kiriat-jearim an ti bawk. Thlang lam hawiin Baala a kal hual a, Seir tlâng a thleng a, Jearim tlâng hmâr lam pangah a kal a, Beth-semes-ah a chhuk a, Timna a kal pêl a, Ekron khaw hmâr lam tlâng a zui a, Sikeron lamah a inher a, Baala tlâng pêlin Jamnia khua a thleng a, chuta ṭangin Mediteranean tuipuiah a tâwp a. Tuipui zau tak chu khawthlang lama a ramri a ni. Chu ramri chhûng chu Juda thlahte awmna tûr chu a ni. Lalpa thupêk angin Josua chuan Jefunea fapa Kaleba chu Juda thlahte ram chan zîngah ram chanpual a pe ve a. Hebron khua, Kiriat-arba an tih, Arba khua chu a nei a, Arba chu Anaka pa a ni. Kaleba chuan Anaka fate pathum Sesaia te, Ahimana te, Talmaia te chu a ûm chhuak a. Tûn hmaa Kiriat-sefer an tih ṭhin Debir khua chu a han bei zui a. Kaleba chuan, ‘Kiriat-sefer han beia latu chu ka fanu Aksaii nupuiah ka pe ang,’ a ti a. Kenaz mi, Kaleba nau, Othniela chuan khua chu a la a, Aksaii chu nupuiah a nei ta a. A lawi ni chuan a pa hnêna ram dîl tûrin a lo fuih a. A sabengtung ata a chhuk a; Kaleba chuan a hnênah, “Eng nge i duh ang?” a ti a. “Min khawngaih la, i ram min pêk hi ram ro a ni a, tui awmna min pe tel ta che,” a ti a. Chuanchung leh chuanhnuai tuihna awmna chu a pe ta a. A chhûng chhûnga an insem tûr Juda thlahte chan chu hêng hi a ni: A chhim berah Edom ramri bâka an neihte chu hêng hi a ni: Kabzeel, Eder, Jagur, Kina, Dimona, Adada, Kedes, Hazor, Itnan, Zif, Telem, Bealot; Hazor-hadata, Kiriot-hezron, Hazor an ti bawk, Amam, Sema, Molada; Hazar-gada, Hesmon, Beth-pelet; Hazar-sual, Beer-seba, Biziothia; Baala, Iim, Ezem; Eltolad, Kesil, Horma; Ziklag, Madmana, Sansana, Lebaot, Silhim, Ain, Rimon leh an chhehvêl khuate nên, a vaiin khawpui chu sawmhnih leh pakua a ni. Tlâng bulṭhuta awmte chu: Estaol, Zora, Asna, Zanoa, En-ganim, Tapua, Enam; Jarmut, Adulam, Soko, Azeka; Saaraim, Adithaim, Gedera, Gederothaim leh an chhehvêl khuate nên, khawpui chu sâwm leh pali a ni. Hêng khuate pawh hi a ni: Zenan, Hadasa, Migdalgad, Dilean, Mizpa, Joktheel, Lakis, Boskat, Eglon, Kabon, Lahmam, Kitlis, Gederot, Beth-dagon, Naama, Makeda leh an chhehvêl khuate nên, khawpui sâwm leh paruk a ni. Hêng khuate pawh hi a tel: Libna, Ether, Asan, Ifta, Asna, Nezib, Keila, Akzib, Maresa leh an chhehvêl khuate nên khawpui pakua a ni. Ekron pawh a chhehvêl khuate nên a tel. Asdod bula khawpui leh a chhehvêl khuate, Ekron leh Mediteranean tuipui inkâra khuate pawh a tel. Asdod leh Gaza, an chhehvêl khuate nên, Aigupta ramri lui nêna an inkâr Mediteranean tuipui kama khaw awmte a tel bawk. Tlângramah hêng khuate hi a tel bawk: Samir, Jatir, Soko, Danna, Kiriat-sana, Debir tih a ni bawk; Anab, Estemo, Anim, Gosen, Holon, Gilo leh an chhehvêl khuate nên, khawpui sâwm leh pakhat a ni. Hêng khuate pawh hi a tel: Arab, Duma, Esan, Janim, Beth-tapua, Afeka, Humta, Hebron, Zior leh an chhehvêl khuate nên, khawpui pakua a ni. Hêng khuate pawh hi a tel: Maon, Karmel, Zip, Juta, Jezreel, Jokdeam, Zanoa, Kain, Gibea, Timna leh an chhehvêl khuate nên, khawpui sâwm a ni. Hêng khuate pawh hi a tel: Halhul, Beth-zur, Gedor, Maarat, Beth-anot, Eltekon leh an chhehvêl khuate nên, khawpui paruk a ni. Hêng khuate pawh hi a tel: Kiriat-baal, Kiriat-jearim an ti bawk, Raba leh an chhehvêl khuate nên, khawpui pahnih a ni. Thlalêrah hêng khuate hi a awm: Beth-araba, Midin, Sekaka, Nibsan, chi khawpui (Ir-hmalak), Engedi leh an chhehvêl khuate nên, khawpui paruk a ni. Juda thlahte chuan Jebus-ho, Jerusalema awmte chu an hnawt chhuak zo lo. Juda thlahte nên, Jebus-ho chu tûn thlengin an la awm ho ta reng a ni. Josefa thlahte ram chan chhim lam ri chu Jordan luia Jeriko lui chhuah bulah a inṭan a, Jeriko kal tlangin thlang lam tlâng lamah a chho va, thlalêr kal tlangin Bethel a chhun a. Luz khaw thlengin Ark-ho awmna Atarot-ah a kal a, thlang lam hawiin Jaflet-ho awmna ram a kal tlang a, Beth-horon chuanhnuai a chhun a. Gezer kal tlangin Mediteranean tuipui a chhun a ni. Josefa thlahho, Efraim leh Manasea thlahte chuan hei hi ram chanpual atân an chang a ni. Efraim thlahte, a chhûng chhûnga an insem tûra an chan hmâr lam ramri chu hetiang hi a ni: Chhak lama awm Atarot-adar leh Beth-horon inkâr a ni. Hmâr tâwp khua Mikmethat aṭangin khawchhak lam panin ri chu Tanat-silo-ah a kal a, Janoa khuaah te, Atarot khuaah te, Naara khuaah te a kal a, Jeriko a chhun a, Jordan lui a thleng a. Khawthlang lamah Mikmethat khua aṭangin Tapua khuaah, Kana luia chhuakin luidung chu a zui a, Mediteranean a zu thleng a. Chumi chhûng ram chu Efraima thlahten a chhûng chhûnga an insem tûra an chan ram chu a ni. Manasea thlahte chan aṭangin Efraim-ho chu khawpui ṭhenkhat, an chhehvêl khuate nên an pe bawk a. Gezer khuaa lo awm Kanan mite chu an ûm chhuak lo, tûn thlengin chûng Kanan mite chu Efraim-ho zîngah an la awm, chhiahhlawhah an chhawr a ni. Josefa fa tîr, Manasea thlahte ram chan chu hei hi a ni: Josefa fapa upa zâwk Manasea fapa Makira, Gileada pa chu, mi huaisen a ni a. Jordan chhak lama Gilead leh Basan ram chu a chanpualah an pe a. Jordan thlang lamah Manasea fa dangte tân ram an pe bawk a, chûng mite chu: Abiazera, Heleka, Asriela, Sekema, Hefera leh Semida te an ni. Hêngho hi Josefa fapa Manasea fa, mipaho chhûngkaw lute chu an ni. Hefera fapa Zelofehada chuan fapa nei lovin fanu chauh a nei a. A pu chu Makira, Manasea fa a ni. Zelofehada fanute chu, Mahlaii te, Novaii te, Hoglaii te, Milkaii te, Tirzaii te an ni. Puithiam Eleazara te, Nuna fapa Josua te leh Israel hnam hotu te hnênah an lo kal a, “ Lalpa chuan kan unau mipate ang bawkin ram min pe ve tûrin Mosia a hrilh kha,” an rawn ti a. Lalpa thupêk ang chuan an unau mipate ang bawkin ram chu an chang ve ta a. Jordan chhak lama Gilead leh Basan ram telin Manasea thlahte chan sâwm an nei bîk a ni. Mipa ang bawka an fa hmeichhiaten ram an chan ve tâk avângin Gilead ram chu Manasea thlah dangten an chang ta a ni. Manasea thlahte ram chan chu Aser-ho ram chan aṭangin Sekem khaw chhak lam Mikmethat khaw inkâr chu a ni. Chhim zâwngin ramri chu a kal a, Entapua-a awmte chu a huam a. Tapua ram hi Manase-ho chan a ni, a khawpui Tapua erawh hi chu Efraim-ho ta a ni. Ramri chu Kana luitêah a chhuk a. Luite kam chhim lama khuate chu Efraim-ho ta a ni, Manase-ho ram chhûnga awm ni mah se; ramri chu luite hmâr lam kamah a kal zêl a, Mediteranean tuipuiah a chhuak a. Chhim lamah Efraim-ho an awm a, hmâr lamah Manase-ho an awm a nih chu; Aser-ho chu hmârthlang lamah an awm a, an ram hmârchhak lamah Isakar-ho an awm a. Aser-ho leh Isakar-ho chan chhûngah Manase khua Beth-sean leh Ibleam khawpui, an chhehvêl khuate nên a awm. Tuipui kama Dor khua te, Endor te, Taanak te, Megido te leh an chhehvêl khuate pawh a awm. Hêng khuaa awmte hi Manasea thlahte chuan an ûm chhuak thei lo; chuvângin, Kanan-ho chu an la awm ta zêl a ni. Israel-ho an lo chak hle hnu pawh khân an hnawt chhuak chuang lo, hna thawk tûr erawh chuan an phût lui ṭhîn. Josefa thlahte chuan, “ Lalpa chuan mal min sâwm a, kan rual ta hle si a, hmun khat chauh engati nge min pêk le?” an ti a. Josua chuan, “In rual viau a, Efraim tlângram hi a zîm deuh a nih chuan Periz leh Refaim-ho awmna ram ngâwte han tu-dar mai rawh u,” a ti a. Anni chuan, “A tlângram ngawt chu a zîm deuh vang; phaia Kanan-ho lahin thîr-tawlailîr an nei a; Jezreel phaia awmte leh Beth-sean khawpui leh a chhehvêl khuate chuan indo thîr-tawlailîr an nei vek a ni,” an ti a. Josua chuan Efraim leh Manasea thlahte chu a chhâng a, “In parual hle a, in chak hle bawk alâwm. Chan khat mai ni lo in nei dâwn nia. Tlângram khi in chan tûr a ni ang. Ngaw hlîr ni mah se, tu-dar ula, a pumin hneh ang che u, Kanan-ho chu an thîr-tawlailîrte nên chak hle mah se, in ûm chhuak mai ang,” a ti a. Israel mite chu Silo-ah an lo pung khâwm a, Inbiakna bûk kha an zâr a, ram chu an la tawh a. Israel zîngah hnam sarih an chan tûr sem ve loh an la awm a. Josua chuan an hnênah, “ Lalpa, in pate Pathianin ram a pêk che u hi in va luah har ve? Hnam tinin mi pathum thlang chhuak ula, anni chu ram fang chhuak tûrin ka lo tîr ang e; hnam tin chanpual tûr ruat sela, ka hnênah rawn thlen rawh se. Ram chu hmun sarihah ṭhen sela, Juda leh Josefa thlahte chu an chan ram chhûngah an awm mai ang. Ram hmun sariha ṭhen dân tûr chu an ziak chhuak ang a, an rawn keng ang a, keiin Lalpa, kan Pathian hmaah ṭhum ka lo vâwrsak ang che u. Levia chite chu sem ve suh u, Lalpa puithiam hna hi an chanvo ve tûr chu a ni si a. Reubena te, Gada te leh Manasea thlah zâtve te lahin Jordan chhak lamah, Pathian chhiahhlawh Mosia khân an chan tûr chu a pêk tawh kha,” a ti a. Josua sawi anga ti tûr chuan mite chu an thawk chhuak a, an hnênah, “Ram pum fang chhuak ula, chhinchhiah vek ang che u; chutah in lo haw leh dâwn nia. Keiin Lalpa hmaah ṭhum ka lo vâwrsak ang che u,” a ti a. Chûng mite chu an chhuak a, ram chu an fang vek a, khawpui awmte chhinchhiah vekin hmun sarihah an sem a, an ziak chhuak a. Silo khuaa riahhmunah Josua hnênah an ziakna bu chu an rawn hâwn a. Silo khuaah chuan Josuan Lalpa hmaah ṭhum a vâwr a, Israel mite chu a hnam hnamin ram chu a sem ta a. Benjamin thlahte chan tûr, a chhûng chhûnga insem tûr chu ruat hmasak ber a ni a, Juda leh Josefa thlahte inkârah an awm ta a. An hmâr lam ramri chu Jordan lui aṭangin Jeriko ep tlâng pangah a chho va; khawthlang zâwngin Beth-aven thlalêr a thleng a. Luz khuaah (Bethel an ti bawk) a kal zêl a, chhim lam zâwngin a kal a, Atarot-adar, Beth-horon tlâng chuanhnuaia khua chu a thleng a. He tlâng thlang lamah, chhim zâwngin ramri chu a inher a, Kiriat-baal khua, Kiriat-jearim an tih bawk chu a thleng a; he khua hi Juda thlahte chan khawpui a ni. Hei hi khawthlang lama a ramri chu a ni. Chhim lam ramri chu Kiriat-jearim aṭangin a inṭan a, chhak lam panin Nefto tuikhurah a kal a. Hinom chhuntu tlângdunga kalin Refaim phai luhnaah a chhuk a, Hinom ruam a pan a, Jebus-ho khaw chhim lamah a kal a, En-rogel a thleng a. Hmâr lamah a inher a, En-semes a thleng a; Adumin kalkawng epa Gelilot khuaah a kal a, Bohana lungah (Bohana chu Reubena fapa a ni) a kal zêl a. Jordan dep tlâng hmâr lama kalin ruamah a chhuk a, Beth-hogla tlângdung hmâr lamah a kal zêl a, Jordan lui chhuah Tuipui Thiah a chhuak a ni. Hei hi Benjamina thlah chhûng tin ram chan tûr ramri chu a ni. Benjamina thlah, a chhûng chhûnga an insem tûr khuate chu hêng hi a ni: Jeriko, Beth-hogla, Emek-kezia; Beth-araba, Zemaraim, Bethel; Avim, Para, Ofra; Kefaramoni, Ofni, Geba leh an chhehvêl khuate nên khawpui sâwm leh pahnih a ni. Gibeon te, Rama te, Beerot te, Mizpa te, Kafira te, Moza te, Rekem te, Irpeel te, Tarala te, Zela te, Haelef te, Jebus te (Jerusalem an ti bawk), Gibea te, Kiriat-jearim te leh an chhehvêl khua te nên, khawpui sâwm leh pali a ni. Hêng hi Benjamin thlah chhûng tin chan tûr khua chu a ni. Chan hnihna chu Simeona thlahten a chhûng chhûnga an insem tûrin an chang a. An ram chan chu Juda thlahte ram chan chhûnga mi a ni. Hêng hi a huam: Beer-seba, Seba, Molada; Hazar-sual, Bala, Ezem; Eltolad, Bethul, Horma; Ziklag, Beth-markabot, Hazar-susa; Beth-lebaot, Saruhen leh an chhehvêl khuate nên, khawpui chu sâwm leh pathum a ni. Hêng pawh hi a tel: Ain, Rimon, Ether, Asan leh an chhehvêl khuate, khawpui pali a ni. Hei hian an chhehvêl khua Balat-beer (Rama an tih bawk) chhim lam thlengin a huam a ni. Simeona thlahte chuan he lai ram hi an chanpual atâna an dawn chu a ni. Juda thlahte hian an mamawh aia zau ram an neih avângin an ram ṭhenkhat chu Simeona thlahte hnêna pêk a ni. Zebuluna thlahten a chhûng chhûnga insem tûr ram chan thumna chu an chang a, a chhim tâwpah Sarid khua a awm. Chuta ṭangin thlang lamah Marala a pan a, Dabeset pal tlangin Jokneam chhak lama luiah a chhuak a. Sarid chhak lamah Kislot-tabor ramri a han chhun a, Daberat pal tlangin ramri chu Jafia-ah a chho va. Chhuk zâwngin Gath-hefer-ah a kal zêl a, Eth-kazin thlengin Rimon kawnga Nea panin a kual a. Hmâr lam panin ramri chu Hanathon-ah a kal a, Iftahel ruamah a tâwp a ni. Kata te, Nahalal te, Simron te, Idala te, Bethlehem te leh an chhehvêl khuate nên khawpui sâwm leh pahnih a huam tel a ni. Zebulun-ho chan ramah chuan hêng khawpui leh an chhehvêl khuate hi a awm a ni. Chan lina chu Isakara thlahte chuan a chhûng chhûnga insem tûrin an chang a. Hêng hi a huam: Jezreel, Kesulot, Sunem; Haferaim, Sion, Anaharat, Rabit, Kision, Ebez; Remet, En-ganim, En-hada, Beth-pazez. An ramri chuan Tabor tlâng a kal tlang a, Sahazumai leh Beth-semes kal tlangin Jordan a thleng a, khawpui sâwm leh paruk leh an chhehvêl khuate nên a huam a. Isakara thlahte chuan chhûng tin insem tûrin hêng khawpuite hi, an chhehvêl khuate nên an chang a ni. Chan ngana chu Asera thlahte chuan a chhûng chhûnga insem tûrin an chang a. Hêng hi a huam tel: Helkat, Hali, Beten, Aksaf; Alam Melek, Amad, Misal. Khawthlang lama a ramri chuan Karmel leh Sihor-libnat a pal tlang a, khawchhak zâwngin a inher a, Beth-dagon pal tlangin Zebulun ram a chhun a, Iftahel ruamah a lût a, hmâr lam panin Beth-emek leh Neiel a pan a, Kabul a thleng a. Ebron-ah te, Rehob-ah te, Hamon-ahte, Kana-ah te a kal a, Sidon khawpui a chhun a. Ramri chu a inher a, Rama leh Tura khawpui kulh a chhun a, Hosa-ah a inher a, Mediteranean tuipuiah a tâwp a. Mahalab te, Akzib te, Uma te, Afek te, Rehob te leh an chhehvêl khuate nên, khawpui sawmhnih leh pahnih a ni. Hêng khawpui leh an chhehvêl khuate hi Asera thlahte chuan chhûng tin insem atân an ram chan chu a ni. Chan rukna chu Naftalia thlahte chuan a chhûng chhûnga an insem tûrin an chang a. Hmâr lam ramri chu Helef-ah a inṭan a, chhak lamah Elon-Bazananim kal tlangin Adami-nekeb-ah a kal a, Jabneel tlawhin Lakum a thleng a, Jordan-ah a tâwp a. Khawthlang lam panin Aznot-tabor-ah a kal a, Hukok a thleng a, chhim lamah Zebulun hrûlah a kal a, Aser-ho ram a va chhun a. Chhak lamah Jordan, thlang lamah Aser-ho ram a ri a. Kulh nei khua te: Zidim, Zer, Hamath, Rakat, Kineret; Adama, Rama, Hazor; Kedes, Edrei, En-hazor; Iron, Migdalel, Horem, Bethanat, Beth-semes leh an chhehvêl khuate nên, khawpui sâwm leh pakua a huam tel. Hêng khawpuite leh an chhehvêl khuate hi Naftali thlahte chuan chhûng tin insem atân an chang. Chan sarihna chu Dana thlahten a chhûng chhûnga insem atân an chang a. Hêng hi a huam: Zora, Estaol, Ir-semes; Saalabin, Aijalon, Ithla; Elon, Timna, Ekron; Elteke, Gibethon, Baalat; Jehud, Bene-berak, Gath-rimon; Mejarkon, Rakon leh Jopa khaw vêl ramte nên. Dana thlahte hi hmêlmaten an ram an lâksak a, Lais khuaah an kal a; an bei a, an la a, mite chu an that a; anmahni tân an nei ta a. A khaw hming hi an thlahtu hming chawiin Dan an ti a. Hêng khawpuite leh an chhehvêl khuate hi Dana thlahte chuan chhûng tin insem tûrin an chang a. Ram an insem zawh chuan, Israel mite chuan Nuna fapa Josua chu a hranpain ram an pe ve a. Lalpa thupêk angin a duhthlan Timnat-sera khua an pe a, Efraim tlângrama awm a ni; khua chu a din ṭha a, a awm ta a. Puithiam Eleazara te, Nuna fapa Josua te leh Israel hnam hruaitu te chuan hêng ram hrang hrang hi ṭhumvâwrin Silo khuaah chuan Inbiakna bûk kawngkaah an sem fel ta a ni. Lalpa chuan Josua hnênah “Israel mite hrilh rawh, Mosia ka hrilh ang khân inhumhimna tûr khua ruat rawh u. Tihpalh emaw, hmuh loh avâng emawa mihring tihlum palhte thisen phuba latu laka an tlân a, an him theih nân. Chûng khuaah chuan an tlân ang a, khawpui luhnaah an ding ang a, chu khaw upate hnênah chuan an lo tlân chhan an hrilh tûr a ni; anni chuan hmun an lo ngaihtuahsak ang a, an zîngah an awmtîr ang. Thisen phuba latuin an rawn ûm pawhin an lo hum tûr a ni; an tihpalh a ni a, huat vânga tihlum an ni lo. Chu khuaah chuan Israel pungkhâwmin a chungthu an rêl fel hma emaw, puithiam lalber ṭang lai a thih hma emaw a awm tûr a ni; chumi zawhah chuan mi that palhtu chu a lo kalna, an khuaah, ama inah ngei a haw leh thei tawh ang. Hêng khuate hi Israel mite tân leh an zînga awm hnam dangte tân inhumhimna tûra an ruatte chu a ni; Kades khua, Naftali ram tlângram Galili bialah; Sekem khua, Efraim-ho ram tlângramah; Kiriat-arba khua (Hebron an ti bawk), Juda thlahte ram chhûng tlângramah. Jordan chhak lamah: Bezer khua, Reuben-ho ram tlâng zâwl thlalêr khuaah; Ramot khua, Gad-ho bialah; Golan khua, Manasea-ho ram Basan bialah. Khîng khi a ni Israel mite leh an zînga hnam dang awmte tâna inhumhimna tûr khua an ruatte chu. Tu pawhin mi tihlum palh sela, hêng khuaah hian an tlân thei ang; an chungthu Israel pung khâwmin an rel fel hma chu thisen phuba latu kutah an thi mai dâwn lo nia. Levia chi hruaitute chu, puithiam Eleazara te, Nuna fapa Josua te leh Israel hnam hruaitute hnênah, Kanan ram Silo khuaah chuan an lo kal a, “ Lalpa chuan kan awmna tûr, khawpuite leh a chhehvêl ran tlatna tûr ram âwl pe tûrin Mosia chu a hrilh kha,” an rawn ti a. Israel mite chuan, an ram chan chhûngah hêng khawpuite hi, a chhehvêl ram âwl, ran tlatna tûr nên, Lalpa thu angin Levia chite chu an pe a. Levia thlah zîngah Kohata thlahte chu khawpui an sem hmasa ber a. Arona thlah puithiamho chu Juda thlah te, Simeona thlahte leh Benjamina thlahte ram chan aṭangin khawpui sâwm leh pathum an pe a. Kohata thlahte chu Efraim te, Dan te leh khawthlang lama Manase thlah zâtve ram aṭangin khawpui sâwm an pe a. Gersona thlahte chu Isakar te, Naftali te, khawthlang lama Manase te chan aṭangin khawpui sâwm leh pathum an pe a. Meraria thlahte chu Reuben te, Gad te leh Zebulun ram aṭang tein khawpui sâwm leh pahnih an pe a. Mosia hnênah Lalpa thupêk angin Israel mite chuan ṭhumvâwrin hêng khuate hi a chhehvêl ram âwl, ran tlatna tûr nên Levia chite chu an pe a. Juda leh Manasea thlahte ram aṭangin hêng khawpuite hi Levia thlah Kohata fa Arona thlahte hnêna an pêk chu a ni a; anni hi khua an sem dawng hmasa ber an ni. Juda tlângram khawpui Anaka pa, Arba khua, Hebron an tih bawk chu, a chhehvêla ram âwlte nên an pe a. A khawpui chhehvêla ram leh khuate chu Jefunea fapa Kaleba hnêna pêk a nih tawh kha. Inhumhimna tûr khuaa ruat Hebron khaw bâkah hêng khawpuite hi puithiam Arona thlahte tân an ruat: Libna, Jatir, Estemoa, Holon, Debir, Ain, Juta, Beth-semes, an chhehvêl ram âwlte nên Juda leh Simeona thlahte ram chan aṭangin khawpui pakua an pe a. Benjamin ram aṭangin hêng khawpui pali hi an pe bawk: Gibeon, Geba, Anathot, Almon leh an chhehvêl ram âwlte nên. A vaiin khaw sâwm leh pathum, an chhehvêl ram âwl, ran tlatna tûr nên puithiam Arona thlahte chu an pe a. Levia fa Kohata thlah dangte hnênah Efraim-ho ram aṭangin khaw ṭhenkhat an pe bawk. Khawpui pali an pe; inhumhimna tûra ruat Efraim tlângrama khawpui Sekem te, Gezer te, Kibzaim te, Beth-horon te leh an chhehvêl ram âwlte nên. Dan ram aṭangin khaw pali an pe bawk: Elteke te, Gibethon te, Aijalon te, Gath-rimon te leh an chhehvêl ram âwlte nên. Thlang lama awm Manasea thlahte ram aṭangin khawpui pahnih an pe: Taanak leh Gath-rimon leh an chhehvêl ram âwlte nên. Kohata thlah dangte hnênah chuan hêng khaw sâwm leh an chhehvêl ram âwl; ran tlatna tûr te nên an pe a. Levia chi, pâwl khat, Gersona thlahte chu chhak lam Manasea thlahte rama mi khawpui pahnih an pe a; inhumhimna tûra ruat Basan biala Golan leh Beestera te leh an chhehvêl ram âwl, ran tlatna tûr nên. Isakara thlahte ram aṭangin khawpui pali - Kision te, Daberat te, Jarmut te, En-ganim te, an chhehvêl ram âwl, ran tlatna tûr nên an pe a. Aser-ho ram aṭangin khawpui pali - Misal te, Abdon te, Helkat te, Rehob te leh an chhehvêl ram awl, ran tlatna tûr nên an pe a. Naftali-ho ram aṭangin khawpui pathum - inhumhimna tûra ruat Galili rama Kedes te, Hamot-dor te, Kartan te leh an chhehvêl ram âwl ran tlatna tûr nên an pe a. Gersona thlah chhûngkaw hrang hrang chuan khawpui sâwm leh pathum leh a vêl ram âwl ran tlatna tûr nên an chang. Levia chi mi dang, Meraria thlahte chu Zebulun-ho ram aṭangin khawpui pali - Jokneam te, Karta te, Dimna te, Nahalal te leh an chhehvêl ram âwl, ran tlatna tûrte nên an pe a. Reuben-ho ram aṭangin khawpui pali - Bezer te, Jahaz te, Kedemot te, Mefaat te leh an chhehvêl ram âwl; ran tlatna tûr nên an pe a. Gad-ho ram aṭangin khawpui pali - inhumhimna tûra ruat Gilead biala Ramot te, Mahanaim te, Hesbon te, Jazer te, an chhehvêl ram âwl; ran tlatna tûr te nên an pe a. Meraria thlahte chu a vaiin khawpui sâwm leh pahnih an pe. Israel mite ram chhûnga Levia chite khawpui atâna ruat chu khaw sawmli leh pariat a ni, an chhehvêl ram âwl, ran tlatna tûr nên. Lalpa chuan an thlahtute hnêna ram pêk a tiam tlat ram zawng zawng chu Israel mite hnênah chuan a pe ta a. An lâk hnu chuan an luah ta a. An thlahtute hnêna pêk a lo tiam tawh ram chu Lalpa chuan Israel-te chu a pe a, an lâk hnu chuan awmhmun an khuar ta a. Lalpa chuan a tiam angin ram pum chu a tirâlmuang a; an hmêlmate a hnehtîr zêl ṭhin avângin tu mahin an lo dang zo lo. Israel-te hnêna thu a tiam tawh phawt chu Lalpa chuan a hlen zêl a ni. Josua chuan Reubena thlah te, Gada thlahte leh Manasea thlah zâtve te chu a ko va, an hnênah, “ Lalpa chhiahhlawh Mosia thu in awih a, ka hrilh apiang che u in zâwm zêl a; in unaute chu hun rei tak chhûng hâwnsan mai lovin in Pathian, Lalpa thupêk in zâwm thlap zêl a. Tûnah zawng, Lalpa, in Pathianin a tiam angin in unau Israel-te chu râlmuang takin a awmtîr tâk hi. Chuvângin, Lalpa, in Pathian chhiahhlawh Mosian Jordan râla ram a pêk che u-ah haw tawh rawh u le. Lalpa chhiahhlawh Mosian dân a pêk che u kha zâwm ngei ula, in Pathian, Lalpa chu hmangaihin a thupêkte chu awih ula, a duhzâwng ti ṭhîn ula, amah chu vuan tlatin, tihtak zet leh ṭhahnemngai takin a rawng bâwl ang che u,” a ti a. Tichuan, Josuan mal a sâwm a, a hawtîr a; in lamah an haw ta a. Mosia khân Manasea thlah zâtve chu Jordan chhak lamah Basan ram a pe a, a zâtve dang hnênah Josuan Jordan thlang lamah ram a pe bawk a. Josuan a hâwntîr khân mal a sâwm a, “Berâm leh kêl te, tangka leh rangkachak te, dâr leh thîr te leh thawmhnaw tam tak nên, hausa hnawkin in haw dâwn a, in hmêlmate thil in lâksakte chu in unau dangte sem ve ang che u,” a ti a. Reubena thlah te, Gada thlah te leh Manasea thlah zâtve te chu Silo khua aṭang chuan an haw ta a. Israel dangte chu Kanan rama Silo khuaah chuan an kalsan a. Mosia hnêna Lalpa thupêk angin an ram chan Gilead ram chu an pan ta a. Reubena thlah te, Gada thlahte leh Manasea thlah zâtve te chuan Jordan thlang lama awm, Kanan rama Galilot chu an thleng a, lui kamah chuan hmuhnawm tham taka ropuiin maichâm an siam a. Israel mi dangte chu, “Reuben-ho te, Gad-ho te leh Manase-ho te chuan Kanan ram Jordan lui kamah, Israel mite ram lamah chuan maichâm an siam luah mai,” tiin an rawn hrilh a. Israel pungkhâwmhovin an lo hriatin beih an tum a, Silo-ah an lo kal khâwm a. Reuben-ho te, Gad-ho te, Manase-ho zâtve te chu Gilead-a an awm laiin Israel mite chuan puithiam Eleazara fapa Finehasa chu, Israel hnam sâwm hruaitute, khawthlang lam hnam sâwm hruaitu ber pakhat zêl nên an tîr a. Gilead an lo thleng a, Reuben-ho te, Gad-ho te leh Manase-ho zâtve te hnênah chuan, “Pungkhâwmho, Lalpa mite chuan, he thil sual tak hi Israel-te Pathian chungah engtiziaa ti nge in nih? He maichâm in siam hi Lalpa chungah in hel ta tihna a ni, a thu in awih ta lo a nih hi. Peor hmuna thil sual kan tih kha in la hre reng lâwm ni? Lalpa chuan ama mite ngei pawh hri a veitîr a, a hrem a nih kha. Lalpa chu engtizia nge in zui duh loh? Vawiina Lalpa chunga in hel avângin naktûkah chuan Israel pungkhâwmho chungah a thinur dâwn asin. In ram hi amah biakna tlâk loh khawpa bawlhhlawh a nih chuan Lalpa bûk, Inbiakna bûk awmna lamah lo kal ula, kan zîngah ram in nei ve mai tûr alâwm; Lalpa lakah leh kan laka helin kan Pathian maichâm lo chu maichâm dang siam teh suh u. Zera fapa Akana khân thil serh a bawhchhia a, Israel pungkhâwmho chungah thinurna a thleng a, amah mai ni lovin mi dang pawh an thih kha,” an ti a. Reuben-ho te, Gad-ho te, Manase-ho zâtvete chuan Israel hotute chu an chhâng a, “ Lalpa chu pathiante Pathian a ni. Pathiante Pathian, Lalpa chuan kan tih chhan a hria alâwm; nangni pawhin hre ve ula kan duh asin. Lalpa laka hel kan niha, a laka rinawm lo kan nih chuan, min zuah lo mai rawh u. Lalpa thu awih lovin hâlral thilhlan te, buhbâl thilhlan te, remna thilhlante kan hlanna tûr keimahni maichâm kan siam a nih hrim chuan Lalpa ngei chuan min hrem rawh se. Chutiang a ni lo; nakinah in thlahten kan thlahte hnênah hetiang hian an la ti ang tih kan hlau a ni zâwk: ‘ Lalpa, Israel-te Pathian chu be ve tûr em in nih? Jordan lui chu Reuben leh Gad-ho nêna kan inri atân a siam a, Lalpa hi be ve tûr in ni lo’ tiin in thlahte chuan kan thlahte an la khap mai ang. Tichuan, hâlral thilhlan leh inthawina chi dang hlan nân maichâm hi siam kan ni lo. In mite leh kan mite, ṭhangthar zêlten, Lalpa hnênah ngei kan hâlral thilhlan te, remna thilhlante leh inthawinate kan hlân ṭhîn tih an hriat theih nân leh in thlahten kan thlahte hnênah, ‘ Lalpa rawn be tûr in ni lo,’ an tih loh nâna siam kan ni. Chuvângin, chutianga kan thlahte hnêna an tih tâkin ‘Min thlahtute hian Lalpa maichâm ang chiahin he maichâm hi an lo siam a ni, hâlral thilhlan emaw, inthawina emaw kan hlanna tûr a ni lo,’ tia an chhân theih nân siam kan ni. Lalpa lakah hel kan tum awzâwng lo, amah hawisanin kan thilhlan hâlna, kan buhbâl thilhlan leh inthawinate hlanna tûr maichâm hrang siam kan tum a ni hek lo, kan Pathian maichâm, a Bâwkte kawta mi lo kha chu maichâm hrang kan din dâwn hauh lo,” an ti a. Puithiam Finehasa leh pungkhâwmho hruaitu, khawthlang lama awm hnam hruaitu sâwmte chuan Reuben-ho te, Gad-ho te, Jordan chhak lam Manase-ho zâtve te thu chu an hriatin an lungawi ta a. Finehasa, Puithiam Eleazara fapa chuan an hnênah, “ Lalpa zawngin min lo awmpui ngei zawng a lo ni tih kan hre ta e; Lalpa lakah in lo hel loh hi; Lalpa pawhin Israel-te a hrem dâwn lo a nih chu,” a ti a. Reubena leh Gada thlahte awmna Gilead aṭang chuan puithiam Eliazara fapa Finehasa leh Israel hotute chu Israel mite awmna Kanan ramah chuan an kîr a, an thu chu an thlen a. Israel mite chu an lung a awi ta a, Pathian an fak a; Reubena leh Gada thlahte chu an awmna ram aṭanga nuai bo tûra thawh chhuah thu an sawi ta lo va. Reubena thlah leh Gada thlahte chuan chu maichâm chu “Kan inkârah Lalpa hi Pathian chu a ni tih hretu a ni,” an ti a, Thuhretu an vuah a. Lalpa chuan Israel-te chu an hmêlmate laka rei fe râlmuang taka a awmtîr hnu chuan Josua chu a kum a tamin a lo upa ta hle a. Israel mi zawng zawng - upa te, hruaitu te, rorêltu te leh hotu te chu a ko khâwm a, an hnênah, “Ka lo upain ka lo tar ta hle mai a: Nangmahni avângin hêng lai hnamte chunga in Pathian, Lalpa thiltihte in hmu a; Lalpa, in Pathian chu in hmêlmate dosaktu che u a ni. Kan hneh tawhho hnam awmna ram leh kan la hneh lohte awmna ram chu in ram chanpual atân ka sem fel vek tawh che u a ni; khawchhak lamah Jordan lui aṭanga khawthlang lama Mediteranean tuipui thlengin. Lalpa in Pathianin in hmaah a tlânchhiattîr zêl ang a, a ûm bo vek ang; Lalpa, in Pathianin a tiam tawh angin an ram chu in neihsak ngei ang. Chuvângin, Mosia dân lehkhabua ziak apiang awih tum tlat ula, ti ngei ang che u, pakhat mah hmaih suh ang che u. In zînga hnam dang la awmte nên hian inchiahpiah suh u; an pathian lam suh ula, an hming chhâlin chhia chham hek suh u: chibai bûkin an hmaah kûn tawp suh ang che u. Lalpa chu vuan tlat zâwk ang che u, tûn thleng pawha in la vuan ang hian. Hnam tam tak leh chak pui pui in hmaah Lalpa chuan a hnawt chhuak zêl a, tu mah lo dang thei che u an awm lo a ni. “A tiam angin Lalpa in Pathian chuan in hmêlmate a dosak che u avângin mi pakhat pawhin sâng têl in ûm a nih kha. Lalpa, in Pathian chu hmangaih ngei ngei ang che u. In hawisana, in zînga hnam dang lo awmte nên in inchiahpiaha, in inneih pawlh vaih chuan, Lalpa, in Pathian chuan hêng hnamte hi in hmaah a hnawh chhuahsak tawh hauh lo vang che u. Lalpa, in Pathianin he ram ṭha tak a pêk che u aṭanga in boral vek hma chu in tân thang leh tlâkna khur hlauhawm an ni ang a, vuakna hruihrual leh mita chhuntu hlîng an ni ang tih hre chiang rawh u. “Ngai teh u, tûnah zawng, leilung dân angin ka kal a hun ta. Tu pawhin ngun taka in chhût chuan Lalpa, in Pathian chuan thil ṭha a tiam zawng zawng che u chu a pe zêl che u tih in hria ang. A tiam ang chuan a ti zêl a, pakhat mah tih loh a nei lo. Lalpa, in Pathian chuan thil ṭha a tiam chu a hlen zêl ang ngeiin a pêk che u ram aṭanga in boral vek hma chu thil ṭha lo tih a tiam pawh chu a ti ngei ang. Lalpa, in Pathianin zâwm tûra a tih che u, a thuthlung chu in bawhchhiata, pathian dangte in pana, an rawng in bâwl chuan, Lalpa thinur chu a alh ang a, ram ṭha tak a pêk che u aṭang hian in boral mai ang,” a ti a. Josua chuan Israel hnamte chu Sekem khuaah a ko khâwm a. Israel upa te, an hnam hruaitu te, rorêltu te leh hotu te chu Pathian hmaah an rawn inlan a. Josua chuan mi zawng zawng hnênah, “ Lalpa, Israel-te Pathian chuan heti hian a ti: ‘Hmânlaiin in thlahtute chu Eufretis lui piahah an awm ṭhîn a, pathian dangte an be ṭhîn. Chûng zînga pakhat chu Abrahama leh Nahora pa Tera a ni. In pu Abrahama chu Eufretis lui piah aṭang chuan Kanan ram pumah ka hruai kual a, fapa Isaka ka pe a, a thlahte ka tipung a. Isaka chu fapa Jakoba leh Esauva ka pe a, Seir tlângte chu Esauva hnênah a chênna atân ka pe a. Jakoba leh a fate erawh chu Aigupta ramah an chhuk a. Nakinah chuan Mosia leh Arona chu ka tîr a, Aigupta mite chu ka timangang nasa hle a; nangni erawh chu ka hruai chhuak ta che u a. In pute chu Aigupta ram aṭangin ka hruai chhuak a, Aigupta mite chuan sakawrtawlailîr nên, sakawr chungchuang mite nên an rawn ûm a; mahse, Tuipui Sen an lo thlen khân mangangin Lalpa an au va, Aigupta mite nêna an inkârah thim a awmtîr a, tuipui chuan Aigupta mite chu a chîm a, an pil ta a. Aigupta rama ka thiltihte chu in hria a, thlalêrah rei fe in awm a. Jordan chhak lama awm Amor mite awmna chu ka hruai thleng che u a, in indo va, ka hnehtîr che u a; an ram chu in nei ta a. In hmaah anni chu ka tiboral a nih kha. ‘Zipora fapa Balaka, Moab lal chuan Israel-te chu a lo bei a; Beora fapa Balaama chu ânchhia lawh tûr che uin a pun a. Balaama thiltum chu ka remti lo va, mal a sâwmsak ta hlauh zâwk che u a; chutiang chuan Balaka kut ata ka chhan che u a, Jordan lui in kai a, Jeriko khuaa mite chuan an lo bei che u a; Amor mi te, Periz mi te, Kanan mi te, Hit mi te, Girgas mi te, Hiv mi te leh Jebus mi te pawhin an lo bei che u a; mahse, ka hnehtîr vek che u a. Amor lal pahnih phei chu khandaih emaw, thal emaw hman ngai lovin in hmaah khawinghal ka ûm chhuahtîr a. In chei hah ni hauh lo ram ka pe che u a, in sak hah loh khawpuiah ka awmtîr che u a. Tûnah zawng in phun loh grep rah in tlân a, in phun loh oliv rah in ei hi.’ “Chuvângin, Lalpa chu zah ula, tihtak zetin a rawng bâwl tlat rawh u. Mesopotamia ram leh Aigupta rama in pute biak ṭhin pathian lemte kha paih vek rawh u. Lalpa rawngbâwl hi ṭha in tih loh chuan in thlahtute biak, Mesopotamia rama pathiante rawng kha nge in bâwl duh, tûna in awmna rama Amor-ho pathiante hi, vawiin hian in duh zâwk chu thlang rawh u. Kei leh ka chhûngte erawh hi zawngin Lalpa rawng a ni kan bâwl dâwn ni,” a ti a. Mipui chuan, “ Lalpa rawngbâwl hi ṭha lo kan ti awzâwng hlei nêm: pathian dangte rawng chu kan bâwl hauh lo vang. Aigupta rama bawiha kan awm min hruaichhuaktu chu Lalpa, kan Pathian hi a ni alâwm; kan hmuhah thil ropui tak tak te a ti a, hnam tin chi tin zînga kan kalna apiangah min hum zêl ṭhîn a ni. He ram kan lo thlen pawh khân Lalpa chuan kan hmaah hênga awm Amor-hote a hnawt chhuak vek a nih kha. Chuvângin, Lalpa rawng a ni kan bâwl dâwn ni, amah chauh hi kan Pathian chu a ni,” an ti a. Josua chuan mipui hnênah, “ Lalpa rawng hi in bâwl thei ngût ang emaw chu: Mi thianghlim a ni a, pathian dang rêng a ngaithei lo va, in bawlhhlawhnate, in sualte a ngaidam lo vang. Lalpa chu hawisanin pathian dang rawng in bâwl vaih chuan a hawisan ang che u a, a hrem ang che u; in chungah ṭha hle ṭhîn mah se, a tiboral mai ang che u,” a ti a. Mipui chuan Josua hnênah, “Pathian dangte rawng zawng kan bâwl hauh lo vang; Lalpa rawng a ni kan bâwl dâwn ni,” an ti a. Josua chuan an hnênah, “ Lalpa rawngbâwl in thlang ngei a ni tih hretu chu nangmahni hi in ni e,” a ti a. Anni chuan, “Ni e, thuhretute kan ni e,” an ti a. Josua chuan, “Chuti chu hnam dang pathian lim in kawlte kha paih bo rawh u le: Israel-te Pathian, Lalpa chauh chu pawm rawh u,” a ti a. Mipui chuan Josua chu an chhâng a, “Kan Pathian, Lalpa rawng chu kan bâwl ang a, a thu pawh kan zâwm zêl ang,” an ti a. Tin, chumi ni chuan Josua leh mipui chuan thu an thlung a; an zawm tûr dân leh thupêk a siamsak a. Josuan chûng chu Pathian dân bu-ah chuan a ziak lût a; lung lian tak a la a; Sekem khuaa Lalpa Hmun Thianghlim sasaw thing bulah chuan a phun a. Josua chuan mipui hnênah, “En teh u, he lung hi kan thuhretu a ni; kan hnêna Lalpa thu sawi zawng zawng kha a hre vek a, in Pathian in kalsan loh nân in thuhretu a ni,” a ti a. Josua chuan mipui chu a hawtîr a, mahni ram ṭheuhvah an haw ta a. Chumi hnu chuan kum za leh sâwm a nihin Josua chu a thi ta a. Gaza tlâng hmâr lam, Efraim tlângrama ama chanpual Timat-sera-ah chuan an phûm ta a. Josua dam chhûng chuan Israel-te chuan Lalpa rawng an bâwl a, a thih hnuah pawh, anmahni mit ngeia Lalpa thiltih zawng zawng hmutute dam chhûng chu an bâwl zêl a. Josefa ruang, Israel-ten Aigupta ram aṭanga an rawn lâk chhoh kha Sekem khuaah, Jakoban tangkaraw tlang zaa Sekema pa Hamora thlahte hnên aṭanga a leiah khân an phûm a. He ram hi Josefa thlahte khân an rochung zêl a ni. Arona fapa, Eleazara pawh a thi a, Efraim-ho tlângrama awm, a fapa Finehasa puala an pêk ram Gibea khuaah an phûm a. Josua thih hnu chuan Israel-te chuan Lalpa an râwn a, “Kanan-ho bei tûrin kan zîngah tu hnam nge thawk chhuak hmasa ber ang?” an ti a. Lalpa chuan, “Juda thlahte thawk chhuak hmasa ber rawh se; ram hi an kutah ka pe a ni,” a ti a. Juda thlahte chuan, an unau Simeona thlahte hnênah, “Kan chanpuala ruat ramah hian lo kal ula, Kanan mite hi i beih rawn ang u; keini pawh, chutiang bawkin in ram chanpualah kan lo kal ve ang,” an ti a. Simeon-ho chu an thawk ve ta a. Lalpa chuan Kanan mite leh Periz mite chu a hnehtîr a, Bezek-ah mi sîngkhat an hneh a. Chutah chuan Adoni-bezeka a lo awm a, an bei a; a tlân chhuak a, an ûmzui a, an man a, a kutzungpui leh a kezungpui an tansak a. Adoni-bezeka chuan, “Lal sawmsarih kutzungpui leh kezungpui ka tansak a, chûng chuan ka buhmal tla an chhar ṭhîn. An chunga ka tih angin Pathianin ka chungah a ti ve ta a nih hi,” a ti a. Jerusalem-ah an hruai a, chutah chuan a thi ta a. Juda thlahte chuan Jerusalem an bei a, an la a, mi an that a, khua chu an hâl a. Chumi zawhah Juda thlahte chu tlângram te, tlâng bulṭhut te leh Negeb hmuna awm Kanan-ho chu bei tûrin an thawk chhuak a. Hebron khua, Kiriat-arba tih ṭhin chu an bei a, Sesai-ho te, Ahiman-ho te leh Talmai-ho te chu an hneh a. Chuta ṭang chuan Juda thlahte chu Debir bei tûrin an kal a; tûn hma chuan chu khua chu Kiriat-sefer tih a ni ṭhîn. Kaleba chuan, “Kiriat-sefer beia, han la thei chu, ka fanu Aksaii nupuiah ka pe ang,” a ti a. Kaleba nau Kenaza fapa Othniela chuan a la a; a fanu chu nupuiah a pe ta a. An inneih ni chuan a pa hnêna ram dîl tûrin Othniela chuan a lo nawr a. A sabengtung chung aṭang chuan a lo chhuk a, Kaleba chuan, “Eng nge i duh ang?” a ti a. Ani chuan, “Mal min sâwmsak teh; chhim lam ram rovah min awmtîr a, tuihna awmna min pe tel rawh,” a ti a. Kaleba chuan chuanchung leh chuanhnuai tuihna awmna chu a pe ta a. Mosia puzawn thlah, Ken-hote chu Juda thlahte nên Tûmzâwl khua an tih Jeriko aṭang chuan Arad khaw chhim lam Judai ram thlalêrah an kal a, chûnga awmte zîngah chuan an awm ve ta a. Juda thlahte chu Simeon-ho nên an thawk chhuak a, Zefat khuaa awm Kanan mite chu an bei a; khua chu an tichhe vek a, a hmingah Horma an vuah a. Gaza te, Askelon te, Ekron te leh an chhehvêl khuate chu Juda thlahte chuan an la a. Lalpa chuan Juda thlahte chu a awmpui a, a tlângrama awmte chu an hnawt chhuak a; phaia awmte erawh chuan thîr tawlailîr an nei a; Juda thlahte chuan an hnawt chhuak thei lo. Mosia thu angin Hebron chu Kaleba an pe a; ani chuan Anaka fa pathumte chu a hnawt chhuak a. Benjamina thlahte chuan Jerusalem a awm Jebus mite chu an luhchhuak lo; Jebus mite chu Benjamina thlahte nên Jerusalem-ah tûn thlengin an la awm. Josefa thlahte pawh Lalpa chuan a awmpui a, Bethel bei tûrin an thawk a. Tûn hma chuan Bethel chu Luz tih a ni. Khaw en thlithlai tûr an kal a. Mi pakhat hi khua aṭangin a lo chhuak a, enthlatute chuan, “Khawpui luh rûkna min hrilh la, eng mah kan tih lo vang che,” an ti a. Khawpui luhna chu a kawhhmuh a, khua chu an la a, khandaihin mi an that ṭeuh va; chu mi erawh chu a chhûngte nên an zuah a. Ani chu Hit ramah a pêm a, khua a siam a, a hmingah Luz a vuah a; tûn thlengin chu chu hmingah a la pu a ni. Manasea thlahte chuan Beth-sean khuaa awm te, Taanak khuaa awm te, Dor khuaa awm te, Ibleam khuaa awmte leh Megido khuaa awm te, Kanan-ho chu, an chhehvêl khuaa awmte nên an hnawt chhuak lo. Kanan mite chu an la awm ve ta reng a ni. Israel mite an lo chak deuh hnu erawh chuan chhiah khuaah an siam a, an hnawt chhuak lo. Efraim-ho chuan Gezer khuaa Kanan mi awmte chu an hnawt chhuak lo. Kanan mite chu an zîngah Gezer khuaah chuan an awm ve ta zêl a ni. Zebulun-ho chuan Kitron leh Nahalal khuaa awmte an hnawt chhuak lo. Kanan-ho chu an zîngah an la awm ta zêl a; mahse, chhiahhlawhah an siam. Aser-ho chuan Ako khuaa awm te, Sidon khuaa awm te, Ahlab khuaa awm te, Akzib khuaa awm te, Helba khuaa awm te, Afek khuaa awm te, Rehob khuaa awmte an hnawt chhuak lo. Aser-ho chu Kanan-ho zîngah an awm ve mai a, an hnawt chhuak lo a ni. Beth-semes khuaa awm te, Beth-anat khuaa awmte chu Naftali-ho chuan an hnawt chhuak lo; chûng laia Kanan-ho awmte nên an awm ho va; Beth-semes leh Beth-anata awmte erawh chu chhiah khuaah an siam a. Amor-ho chuan Dana thlahte chu tlângramah an hnawt tawm a, an awmnaa an luh an phal lo a ni. Harhares-ah te, Aijalon-ah te, Saalabin khuaah te chuan Amor-ho an ṭang tlat a; mahse, Josefa thlahte chu an chak zâwk deuh va, chhiah khuaah an siam ta a. Sela hmâr lamah Amor-ho ramri chu Akrabim kalkhân a kal tlang a ni. Gilgal aṭangin Lalpa Vântirhkoh Bokim khuaah a lo kal a, Israel-te hnênah chuan, “Aigupta ram aṭangin ka hruai chhuak che u a, in pate hnêna pêk ka tiam ramah chuan ka thlen che u a; ‘ka thuthlung hi ka bawhchhe ngai lo vang; rama lo awmte nên chuan thuthlung in siam tûr a ni lo va, an maichâmte in ṭhiatsak tûr a ni’ ka ti a; mahse, ka thu awih duh lovin eng thil nge in tih tâk le? Chuvângin, ka hrilh a che u, in hmaah hêngho hi ka hnawt chhuak dâwn lo: in tân hmêlma an ni ang a, an pathiante be tûrin an zâwl thlu ngei ang che u,” a ti a. Lalpa Vântirhkohvin chûng thu a han sawi zawh chuan Israel-te chu an ṭap ta hawm hawm a. Chuvângin, chu khua chu Bokim an ti ta a ni. Chutah chuan Lalpa hnênah thilhlan an hlân a. Josua chuan Israel mite chu a ṭintîr a; mahni chan ram ṭheuh luah tûrin an kal ta sang sang a. Josua dam chhûng zawng chuan Israel mite chuan Lalpa rawng an bâwl a. Josua thih hnuah pawh, Israel upaho, Lalpa thiltih hmu phâkte dam chhûng chu a rawng an bâwl zêl a. Lalpa chhiahhlawh Nuna fapa Josua chu kum za leh sâwma upa a nihin a thi a. Gaza tlâng hmâr lam, Efraim tlângrama ama ram chanpual Timnat-heres-ah an phûm ta a. Chûng upaho pawh chu an thi fai a, Lalpa hre ngai lo, Israel-te tâna a thiltih hre ve pha lo, ṭhangthar an lo ṭhang lian a. Tichuan, Israel-te chuan Lalpa ngaihmawhzâwng thil sual an ti a, Baal-te kha an be ve ta mai a. Aigupta ram aṭanga hruai chhuaktu, an pate Pathian, Lalpa chu an hawisan a, an chhehvêla awm pathiante lam chu an hawi a, an be ve ta a: Lalpa chu an tithinur ta a ni. Lalpa hawisanin Baal te, Astarte te chibai an bûk ta a. Israel-te chungah, Lalpa chu a thinur ta êm êm a, suamhmangte a rawktîr a; an vêla awm hnam dangte kutah a pe a, an ngam ta lo a ni. Indo tûra an thawh chhuah apiangin a sawi ang ngeiin Lalpa chu an lamah a ṭang ta awzâwng lo va, an mangang êm êm ṭhîn. Lalpa chuan anmahni sawisatute laka chhantu tûr hruaitute zawng a pe ṭhîn; mahse, chûng hruaitute thu chu an ngaithla duh lo va, pathian dang an ûm a, chibai an bûk leh mai ṭhîn. An pate chuan Lalpa thupêkte chu an zâwm a; mahse, an pate awm dân chu an zâwm ve duh ṭhîn lo. Lalpa chuan hruaitute a rawn pêk khân, a pêka chu a awmpui a, a dam chhûng chu an hmêlmate lakah a hum ṭhîn; anmahni tiretheia rapbettute avânga an rûm chu Lalpa chuan a khawngaih ṭhîn a ni. An hruaitu chu a thih chuan an lamlêt a, an pate ai mahin an khawlo zâwk ṭhîn; pathian dang biak leh chibai bûk an uar sauh va, hnam dang tih dân tinrêng an la a, an luhlul a zual ṭhîn. Israel-ho chungah Lalpa thinrim chu a alh ṭhîn a, “An pate zâwm tûra ka tih ka thuthlung chu he chite hian an bawhchhia a, ka aw lah an ngaithla duh hek lo; Josua a thiha, hnam dang a hnawh chhuah lohte kha kei pawhin ka hnawt chhuak tawh bîk lo vang; chûngho chu, an pate angin ka kawng an zawh dâwn nge dâwn lo fiah nân ka hmang dawn a ni,” a ti a. Chuvângin, Josua kha, hêngho hi a hnawhchhuahtîr mai lo va, a awmtîr ta zêl a ni. Kanan ram rûnnaa tel pha lote fiah nân hêng hnam ṭhenkhat hi Lalpa chuan a la zuah a ni. Israel thlah, ṭhang lo thar zêl te, indonaa la tel ngai lohoten indo an zir theih nân a zuah a ni. Chûngte chu: Filistia lal panga te, Kanan mi zawng zawng te, Zidon mi te, Lebanon tlâng, Baal-hermon leh Hamat kalkhâna awm Hiv-ho te an ni. An pate hnêna Lalpa thupêk, Mosia a hrilh kha, Israel-te chuan an zâwm dâwn nge dâwn lo tih tilang chiang tûrin hêng mite hi a ruat a ni. Israel-te chu Kanan mi te, Hit mi te, Amor mi te, Periz mi te, Hiv mi te leh Jebus mi te zîngah an chêng a. Chûnghote nên chuan nupui pasal an inneih pawlh a, an pathiante chu an be ve ta a. Tichuan, Israel-te chuan Lalpa ngaihmawhzâwng thil sual an ti a, an Pathian, Lalpa chu an hawisan a, Baal-te leh Aseri-te chu an be ve ta a. Chuvângin, Lalpa chu Israel-te chungah a thinur a, Aram-Naharaim ram lal Kusan-risathaima a hnehtîr a. Israel-ho chu a thuhnuaiah kum riat an awm a. Israel-te chuan Lalpa chu an au va; Kenaza fapa, Kaleba nau, Othniela chu Lalpa chuan Israel-te chhan chhuak tûrin a tîr a. Lalpa thlarau chu a chungah a awm a, Israel-te chu a ho ta a. Indo tûrin a thawk chhuak a, Lalpa chuan Aram-Naharaim lal Kusan-risathaima chu a hnehtîr a, a kut ata Israel-te chu a chhan chhuak ta a. An ram chu kum sawmli chhûng a râlmuang a. Kenaza fapa Othniela chu a thi ta a. Israel-te chuan Lalpa ngaihmawhzâwng thil sual an ti leh a. Lalpa chuan Moab lal, Eglona chu Israel-te ai chuan a tichak ta a. Amon mite leh Amalek mite a ṭanrualpui a, Israel-te chu a bei a, a hneh a; tûmzâwl khawpui Jeriko chu a chhuhsak a. Israel-te chu Moab lal Eglona hnuaiah kum sâwm leh kum riat an awm a. Mahse, Israel-ten Lalpa chu an au va, chhantu tûr a pe a. Chu mi chu Benjamin thlah, Gera fapa, Ehuda, veikhawr a ni. Israel mite chuan Moab lal Eglona chu thilpêk an thawn a. Ehuda chuan chemte hriam tawn, tawng khat dâwn laia sei a chher a, a puan hnuai, a malpui ding lamah chuan a thukru a. Moab lal Eglona chu pa thau zet hi a ni a. Ehuda chuan thilpêk chu a han pe a; thilpêk a pêk zawh chuan a kengtute chu a tîr haw a. Gilgal lung khur aṭangin ani chu a kîr leh a, “Lalber hnênah thurûk thlen tûr ka nei e,” a ti a. Ani chuan a ṭhuihruaite hnênah, “Min chhuahsan teh u,” a ti a. An chhuahsan ta a. A pindan chungnung thawveng takah chuan amah chauhvin a lo ṭhu a. Ehuda chuan, “I hnênah Pathian thuchah sawi tûr ka nei,” a ti a. A ṭhutna ata chu a lo tho va. Ehuda chuan a vei lam chuan a khêl ding lama chemte chu a phawi a, a dulah chuan a vit ta thawih a. Chemte fawng chu a tlum hial a, a fawng a pil avâng chuan a phawi lo; hnung lamah chemte lu chu a lawr tut mai a. Bathlarah Ehuda chu a chhuak a, pindan chungnung chu a khâr a, a kalh hnan ta a. A chhuah daih hnu chuan lal chhiahhlawhte chu an lo kal a, pindan kawngka chu a lo inkalh a. ‘A pindan rilah a daikal a ni ngei ang,’ an ti a. Rei tâwk ta nia an hriat hnu chuan chabi an la a, kawngka chu an han hawng a, an pu chu a thi a; chhuatah a lo lum reng a. An buai liai liai chhûng chuan Ehuda chu a chhuak a, lung khur a kal pêl a, Seira-ah a tlân ta a. Efraim tlângram a han thlen chuan tawtawrâwt a hâm a, Israel-te chuan tlângram aṭang chuan an zui chhuk a, anin hma a hruai a. An hnênah, “Min zui rawh u, in hmêlma Moab-ho chu in kutah Lalpa chuan a pe ta e,” a ti a. Ani chu an zui chhuk a, Jordan lui kai chu Moab-ho an chhuhsak a, tu mah an kaitîr lo. Chumi ni chuan Moab-ho chu mi sîngkhat lai an that a ni, mi hleitling tak tak, an pasalṭha rualte chu; tu mah tlân chhuak an awm lo. Chumi ni chuan Israel-te chuan Moab-ho chu an titlâwm a. Ramah chuan kum sawmriat chhûng râlmuangin an awm a. Ani thih hnu chuan Anata fapa Samgara pawhin Filistia mi zaruk zet bâwng chhunna tiangin a vaw hlum a, ani pawhin Israel-te chu a chhan chhuak ve a ni. Ehuda thih hnu chuan Israel-ten Lalpa ngaihmawhzâwng thil sual an ti leh ta a. Lalpa thuin Kanan lal Jabina chuan Israel-te a hneh a, Hazor khuaah a lal a; a sipai hotu chu Haroset-goim-a awm Sisera a ni. Thîr-tawlailîr zakua a nei a, kum sawmhnih chhûng chu Israel-te a tirethei êm êm a, Israel-te chuan Lalpa an au va. Zâwlneinu, Debori, Lapidota nupui chu Israel-ho zînga thusa ber a ni. Efraim tlângrama Bethel leh Rama khaw inkâr, Debora khuaa tûm thing hnuaiah a ṭhu a, Israel mite chuan a hnênah thu an rawn thlen ṭhîn. Kedes-naftali-a awm Abinoama fapa Baraka chu a ko va, a hnênah, “Israel-te Pathian chuan ‘Naftalia leh Zebulun thlahte aṭangin mi sîngkhat hruaiin Tabor tlâng lamah kal rawh,’ a ti che a ni lâwm ni? Kanan lal Jabina sipai hotu Sisera chu a thîrtawlailîrte leh a sipaite nên Kison luiah ka rawn hruai ang a, i kutah ka rawn pe dâwn a che a tih kha,” a ti a. Baraka chuan, “I kal ve dâwn chuan ka kal ang a, i kal dâwn loh chuan ka kal bîk lo vang,” a ti a. Debori chuan, “Ka kal ve nâng e; i kal pawhin i ropui phahna tûr a nih dâwn loh hi; Lalpa chuan Sisera chu hmeichhia a thahtîr dâwn e,” a ti a. Debori chu a tho va, Baraka nên Kedes an pan a. Baraka chuan Naftali leh Zebulun-ho a ko khâwm a, mi sîngkhat chuan an zui a, Debori pawh a kal ve a. Ken mi Hebera chu Mosia puzawn Hobaba thlah a ni a, Ken-ho zîng ata chu a tla hrang a, Elon-Bazananim bul Kedes vêlah chuan bûk a rawn khuar a. Tabor tlâng lamah Abinoama fapa Baraka a kal thu Sisera chu an hrilh a. Sisera chuan a thîr-tawlailîr zakua chu a khalh khâwm a, Haroset-goim aṭanga a sipai zawng zawng chu Kison luiah chuan a hruai a. Debori chuan Baraka hnênah, “Tho teh, vawiin hian Lalpa chuan i kutah Sisera hi a pe dâwn. Lalpa chuan i hma a hruai a ni lâwm ni?” a ti a. Tichuan, Baraka chu Tabor tlâng aṭang chuan a sipai sîngkhat nên an chhuk a. Baraka chuan Sisera chu khandaihin a bei thut a, Lalpa chuan Sisera chu a thîr-tawlailîrte leh a sipaite nên a tichiai zo ta a. Sisera chu a tawlailîr ata a chhuk a, kein a tlânchhia a. Baraka chuan tawlailîrte leh sipaite chu a ûm a, Haroset-goim thlengin a ûm a, Sisera sipaite chu a sât hlum vek a, pakhat mah tlân chhuak an awm lo. Sisera chu Ken mi, Hebera nupui Jaeli puan inah a tlân lût a, Hazor lal Jabina leh Hebera chhûngte chu an inrem rêng a ni. Sisera hmuak tûrin Jaeli chu a tlân chhuak a, “Lo tlân teh, ka pu, ka hnênah lo biru rawh; hlau rêng rêng suh,” a ti a. A puan inah chuan a tlân lût a, puanin a khuh a. Sisera chuan, ‘Tui in tûr mi han pe teh, ka tui a hâl e,” a ti a. Bâwnghnute bûr a hawng a, a intîr a; amah chu a khuh leh ta a. Sisera chuan, “Puan in kawngkaah khân awm la, mi an lo kala, ‘Hetah awm an awm êm?’ tia an zawh che chuan, ‘awm lo’ i ti dâwn nia,” a ti a. Hebera nupui chuan puan in khenbehna leh tuboh a la a; a muthilh hnu chuan zawi têin a va lût a; a bekah khenbehna chu a khêng lût a, leiah a khêngbêt ta tlat a; a mu nghet hle a, a thi nghâl ta a. Baraka chuan Sisera chu a rawn ûm a, Jaeli chu hmuak tûrin a lo chhuak a, a hnênah, “Lo kal teh, i mi zawn chu ka entîr ang che,” a ti a. An lût dûn ta a, Sisera chu a lo thi reng a, puan in khenbehna chu a bekah a bûr ngur mai a. Chumi ni chuan Israel-te hmaah Kanan lal Jabina chu Lalpa chuan a titlâwm a. Kanan lal Jabina chu Israel-te chuan an hneh zui ta zêl a, a tâwpah phei chuan an tiboral thei ta a. Chumi ni chuan Debori leh Abinoama fapa Baraka chuan hetiang hian hla an sa a: Hotu ṭhaten an ho meuh chuan Mipuiin an zui dûl dûl mai, châk takin, Lalpa chu fak rawh u. Lalte u, ngaithla ula, Hotute u, bengchhi teh u; Lalpa fakin zai ka vâwr dâwn e. Israel-te Pathian, Lalpa chu ka chawimawi ang. Aw Lalpa, Seir tlâng i kalsan a, Edom ram i chhuahsan khân, Lîrpui a nghîng a, khuangruah a sûr a, Ruahthimpui a lo hâwn kha. Lalpa hmaah chuan tlângte an khûr a, A saw Sinai tlângpui meuh pawh saw A sai hlawk hlawk e, Israel-te Pathian, Lalpa hmaah. Anata fa Samgara leh Jaeli vânglai khân Lampui a ṭhing ṭhuap a, Khualzinte chuan kawngṭum an zawh. Debori a lo chêt hmaa, Israel-nu a lo thawh hma khân, An awm lo ve, Israel zîngah, An awm lo thusa thei. Miten pathian dang biak an thlang, Kan ramah hian indo a chhuak ta a. Israel mi sîngli zîngah Phawsial leh fei chawi awm maw? Ka va han lainat êm, Israel hruaitute; Châk taka zuitute pawh chu: Lalpa chu fak rawh u. Sabengtung vâr chunga chuang ṭhînte u, Nangni ṭhutphah dûpa ṭhute pawhin. Lamtluang zawhtute nên he thu hi puang rawh u. Tuikhura zai mite thâwm chu: Lalpa thil tih ṭhatzia an sawi, Israel rama thil ropui a tih chu an hril, Kulh kawngkaahte pawh an pung khâwm e. Harh teh, harh teh, Debor, Harh la, zai han vâwr teh: Abinoama fapa, tho teh, Barak, tho teh, Râl tam tak salah hruai dum dum rawh. Mi lian rualte pawh chuan an zui ve a, Hmêlma dopui tûrin Lalpa mite an chhuk thla. Efraim ram aṭangin lui lam an pan, An unau Benjamin-ten an rawn pui a, Makir-ho mi liante an chhuk thla ve Zebulon-ho lal liante nên. Isakar mi lianten Debori an zui; Berâm huanga ṭhut mai a hun ta lo, An sûl zuiin luipui kamah an pung. Ran rual awihna phênglâwng tum ngaithlaa, Berâm huanga ṭhut mai a hun ta lo, Reuben-ho lah an inhnial buai e. Gad-ho pawh Jordan râlah an awm daih si. Dana chuan lawng chauh a lungkham a, Aser pawh tuipui kamah, Vaukamah a vuaicha hle. Zebulun leh Naftali erawh chuan Thih dâwn lovin an bei. An lalte chuan an rawn bei ve, Kanan ram lalte chu an ṭang hle a, Megido lui kam Tanak-ah chuan Râllâk tûr rêng an nei lo ve. Vâna arsite pawh an che ve a, Lamtluang an zawh pahin Sisera chu an bei. Kison lui lian chuan a la a, A ni, hmânlai Kison lui chuan a lên a, Khawi nge, ka’n ûm duai duai teh ang. Sakawrten phei an vâwr a, An ter ut ut mai e. ‘Meroz khua chu ânchhia lawh r’u; A chhûnga mite chu lawh bawrh bawrh r’u,’ Lalpa pui tûrin an lo kal duh lo va, hmêlma an bei duh lo va ni. Jaeli nge nge a chhuanawm e, hmeichhia azawngah, Hebera nupui, Ken-nu mawlh hi Puan ina chêng zîngah a lawr fâl e. Tui a dîl a, hnutetui a intîr a, No mawi takin a dak a rawn kensak. Puan in khenbehna a rawn keng a, Themthiam tuboh a chawi, Dim lo lêkin a chhu, Sisera chu, a tuboh chuan Thlunglu pawpin a chhu, A bekbawrah a khêng tlang zawk. A awp rup a, a let thla e, A ke bulah a thal dêr a, A thi bul mai. Sisera nu chuan a lo thlîr a, Tukverhah te a bih thla a, ‘A tawlailîr a lo va haw har ve, A sakawrte chu an va muang awm vei êm,’ a ti. A ṭhiannu fing ber chuan a lo hnêm a, Mahni a inṭawng thlamuan ta a. ‘Man belh tûr an zawng a ni ngei ang, An insem khawtlai a ni phawt ang: Nula pahnih khat man belh tûr an vai a ni ang e, Sisera hawn atân puan mawi deuh an dap a ni ang, Lalnu bah tûr an zawng khawtlai a ni ang e,’ Aw, Lalpa, i hmêlmate chutiang chuan ral sela, I ṭhiante erawh chu ni chhuak angin êng phût rawh se,’ tiin. Kum sawmli chhûng a ram chu a râlmuang a. Israel mite chuan Lalpa ngaihmawhzâwng thil sual an ti a; kum sarih chhûng Midian-ho hnuaiah a awmtîr a. Midian-ho chu Israel-te ai chuan an chak a, tlâng pangah bihrûkna tûr kua an siam a, pûkah te an biru a, kulh te an siam a. Midian-ho te, Amalek-ho te leh thlalêra chêngho te chu an lo kal ṭhîn a. Bûk an khuar a, Israel-te thlai chînte chu an tichhe zêl a, Gaza thlengin Israel ramah chuan ei tûr a awm lo; berâm te, bâwng te, sabengtung te an la zêl a ni. An ran rualte an rawn khalh a, puan inte an rawn keng a, khau puang ang mai an ni; ram chu an tikawlh fer fur a. Israel-te chu an rethei ta êm êm a. Israel-te chuan Lalpa an au va. Midian-ho vânga Israel-te mangang au chu Lalpan a lo hria a, Israel-te hnênah zâwlnei pakhat a tîr a, “Israel-te Pathian, Lalpa chuan heti hian a ti: ‘Aigupta ram aṭangin bawiha in awm kha ka hruai chhuak che u a. Aigupta hotu leh nangmahni tiduhdahtute kut ata ka chhan chhuak che u a, he ram hi ka pe che u a ni: Lalpa, in Pathian chu ka ni. Amor-ho rama awm in ni a, an pathiante chu zah suh u ka ti che u a, ka thu in awih duh lo,’ a ti e” a ti a. Lalpa Vântirhkoh chu Ofra khuaah a kal a, Abiezer mi Joasa sasaw bulah chuan a ṭhu ta a; Joasa fapa Gideona chuan uain sâwr khurah Midian-ho hmuh loh tûrin buh a chîl a. Lalpa Vântirhkoh chu a hmu a, ani chuan a hnênah, “Nang mi huaisen, Lalpa chu i hnênah a awm.” a ti a. Gideona chuan, “Ka pu, Lalpa chu kan hnêna a awm si chuan hêng thil zawng zawng hi engtizia nge kan chunga a thlen le? Kan paten a thiltih ropui tak tak min hrilhte kha khawiah nge a awm tâk? Lalpa chuan Aigupta ram aṭangin min hruai chhuak maw? Tûnah zawng, Lalpa hian min paihthla a, Midian-ho kutah min pe ta a nih hi,” a ti a. Lalpa chuan a lam a hawi a, “I chak khawp alâwm, Israel-te chu Midian-ho kut ata hi chhan chhuak ta che, ka tîr che a ni lâwm ni?” a ti a. Gideona chuan, “Ka pu, engtin nge Israel-te chu ka chhan chhuah ang le? Manasea thlah zînga pachhe ber chhûng kan ni a, kan chhûng zîngah lah a naupang ber ka ni si,” a ti a. Lalpa chuan, “Ka awmpui zêl dâwn che alâwm. Midian-ho chu mi pakhat ang lekin i hneh mai ang,” a ti a. Gideona chuan, “Min khawngaih la, Lalpa chu i ni ngei tih hriatna tûr min tihsak ang che. Kal bo mai lo la, thilpêk ka han la ang a, i ke bulah ka han dah ang e,” a ti a. Ani chuan, “I lo kal leh hma loh chu ka lo awm reng ang e,” a ti a. Gideona chu inah a lût a, keltê a talh a, dawidim telh loh chhangphut kg. sâwm a keng bawk a. Sa chu fawngah a dah a, a tui chu bêlah. Sasaw thing hnuaiah chuan a rawn kensak a. Lalpa Vântirhkoh chuan, “A sa leh chhang dawidim telh loh kha la la, lung chungah khân dah la, a tui kha leih rawh,” a ti a. Chutiang chuan a ti a. Lalpa Vântirhkoh chuan a tiang ken hmâwr chuan sa leh chhang dawidim telh loh chu a khawih a; lung aṭang chuan mei a lo chhuak a, sa leh chhang chu a kâng ral ta a. Lalpa Vântirhkoh chu a kal bo ta a. Gideona chuan Lalpa Vântirhkoh ngei a ni tih a hre ta a, “Khai aw, Aw Lalpa P athian, lalpa Vântirhkoh nên inhmachhawnin kan inhmuh tâk chu!” a ti a. Lalpa chuan, “Thlaphâng suh, thlamuang takin awm rawh, i thi lo vang,” a ti a. Chutah chuan Gideona chuan Lalpa tân maichâm a siam a, Lalpa Salom a vuah a. Abiezer mite rama Ofra khuaah chu chu tûn thlengin a la awm. Chumi zân chuan Lalpan a hnênah, “I pa bâwngpa leh bâwngpa dang kum sariha upa kai la, i pa siam Baal maichâm chu tichhia la, a bula Aseri phun pawh chu kit rawh. Maichâm chhe chim vûm chungah chuan i Pathian, Lalpa tân maichâm rinawm tak siam la, bâwngpa pahnihna kha hâlral thilhlanah hlân rawh; a hâlna thingah i kih thlûk Aseri kha hmang ang che,” a ti a. Tichuan, Gideona chuan a chhiahhlawh sâwm a hruai a, Lalpa sawi ang chuan a ti a. A chhûngte leh khuaa mite a hlauh avângin chhûnah chuan a ti lo, zânah a ti ta a. A tûk zînga mite an han thawh chuan Baal maichâm chu a lo chim a, a bula Aseri lim thing phun a lo tlu chu an hmu a; maichâm tharah chuan bâwngpa pahnihna kha hâlral thilhlanah an lo hlân a. “Tu tih nge?” an inti a. An han zâwt chiang a, “Joasa fapa Gideona tih a ni,” an ti a. Khuaa mite chuan Joasa hnênah, “I fapa kha han hruai chhuak rawh, kan that dâwn a ni. Baal maichâm a ṭhiat a, a bula Aseri phun pawh a kit a ni,” an ti a. Joasa chuan chutia rawn titute chu a chhâng a, “Baal hi in ṭan a, chhan in tum em ni? Baal ṭan apiang chu tûkin zîngah la la hian thah in ni ang. Pathian a nih tak tak chuan amah inhum ang hmiang, ama maichâm alâwm an tihchhiatsak,” a ti a. Chuvângin, chumi ni chuan a hmingah Jerubaala an sa ta a, ‘a maichâm a tihchhiat avângin Baala chuan rawn bei ang hmiang’ an ti a ni. Midian-ho te, Amalek-ho te leh thlalêra chêng te chu an pung khâwm a, Jezreel ruamah bûk an rawn khuar a. Lalpa thlarau chu Gideona hnênah a awm a, Abiezer mite koh khâwm nân tawtawrâwt a hâm a. Manase-ho te, Aser-ho te, Zebulun-ho te leh Naftali-ho te chu a chah khâwm a, amah tâwk tûrin an lo kal a. Gideona chuan Lalpa hnênah “Min hmanga Israel mite hi chhan chhuah i duh tak meuh a nih chuan, en teh, hruihah berâm hmul hi ka dah ang a, berâm hmulah chauh dai a tlâka, a vêl lei a ro si chuan i sawi angin min hmangin Israel-te hi i chhan chhuak dâwn a ni tih ka hria ang,” a ti a. A tûk zîngah an han thawh chuan berâm hmul chu a han sâwr a, no khat dâwn lai dai a sâwr chhuak a. Gideona chuan, “Ka chungah thinrim suh aw, ka han sawi leh teh ang, ka han en chhin leh ang e: Zânin chu berâm hmul hi ro phak sela, a vêl lei hi chu daiin huh hnêp teh se,” a ti a. Chumi zân chuan Pathianin berâm hmul chu a tihul phiang a, leiah erawh chuan dai a tlâktîr ṭeuh va. Jerubaala an tih Gideona chuan a hnêna lo kal zawng zawng chu zîng takah a thawhpui a, Harod bulah bûk an khuar a. Midian-ho chuan an awmna hmâr lam ruam More-ah bûk an khuar ve bawk a. Lalpa chuan Gideona hnênah, “I mite hi an tam êm mai, in kuta Midian-ho ka pêk chuan, Israel-te hian min uankhum ang e, anmahni hneh emaw an ti mai ang asin. Mipui hnênah, ‘Tu pawh, indo huphurha thlaphâng apiang chu Gilead tlâng aṭang hian haw mai rawh se,’ tiin tlângau rawh se,” a ti a. Mi sînghnih leh sânghnih chu an haw a, sîngkhat chu an la awm a. Lalpa chuan Gideona hnênah, “Mi an la tam lutuk fo, luiah hruai thla la, ka thlan chhuahsak ang che. ‘Hei hi kal rawh se,’ ka tih chu kalpui la, ‘hei chu kal suh se,’ ka tih chu hawtîr ang che,” a ti a. Tichuan, luiah a hruai thla a, Lalpa chuan Gideona hnênah, “Ui anga tui liak chu dah hrang la, ṭhingṭhia tui dâwt chu i dah hrang bawk dâwn nia,” a ti a. Kuta tui thâla liak chu mi zathum an ni a, mi dang zawng chuan ṭhingṭhiin tui an dâwt a ni. Lalpa chuan Gideona hnênah, “Mi zathum, kuta tui thâla liakho hmang hian ka chhan dâwn che u a, Midian-ho chu in kutah ka pe ang,” a ti a. Ei tûr kengtute leh tawtawrâwt pûte leh mi zathum tih loh, mi dang chu an in lamah a hâwntîr ta vek a. Midian-ho bûk chu an thlang lawk phaiah a awm a ni. Zânah Lalpa chuan a hnênah, “Tho la, an bûkah zu chhuk rawh, i kutah ka pe tawh a ni. Nangmaha kal i hlauh deuh chuan i tlangvâl hruai Pura kha hruai ang che. An titi zu ngaithla la, chumi hnu chuan an bûk zu beih i châk hle ang,” a ti a. Pura nên chuan hmêlma sipai awmna hmâwrtawng berah chuan an zu kal a. Midian-ho te, Amalek-ho te leh thlalêra chêng te chu zâwlah chuan an awm hmur mai a, khau puang ang mai an ni, an sanghâwngseite pawh ṭiau vaivut anga chhiar sên loh a ni. Gideona te an zu thlen thlâk chuan mi pakhatin a ṭhian chu a mumang a lo hrilh a, “Mumang ka nei a, kan bûkah hian barli chhang a lo lum a, bûk chu a rawn delh a, a delh thal dêr a, a pêr vek mai zu nia,” a ti a. A ṭhian chuan “Joasa fapa Gideona khandaih lo chu eng nge ni ta ang? Chu Israel-pa kutah chuan Midian-ho hi Pathianin a pe ta a nih chu!” a ti a. Gideonan mumang leh a awmzia an sawi chu a hriatin Pathian chibai a bûk a; Israel-te bûkah a chho va, an hnênah, “Tho teh u, Midian-ho rual chu Lalpa chuan in kutah a pe ta,” a ti a. Mi zathum chu pâwl thumah a ṭhen a; bêl ruak leh a chhûnga meichher awm, tawtawrâwt nên a pe ṭheuh va; an hnênah, “Min en ula, ka tih angin ti ve zêl ang che u, an bûk sir ber ka thlen huna ka tih ang chu in ti ve dâwn nia. Kei leh ka kalpuiten tawtawrâwt kan ham chuan kil tinah hâm ve ula, ‘ Lalpa leh Gideona tân’ tiin au dur dur ang che u,” a ti a. Gideona leh a ho mi za te chu zânlaiah, râl vêng an inthlâk fel hlim hlawlah bûk hmâwrtawng chu an thleng a; an tawtawrâwt chu an hâm a, an bêl ken chu an vaw keh a. Pâwl dangte chuan an tawtawrâwt chu an hâm a, bêl chu an tikeh a, meichher chu kut lehlamin an chhi a, tawtawrâwt chu lehlama vuanin an hâm a, “Khandaih chu, Lalpa leh Gideona tân!” tiin an au ta chiam a. Hmêlma bûk hual chuan mahni dinna tûr ṭheuhvah an ding a; bûka sipaite chu an au ruan ruan a, an tlânchhe ta chum chum a. Tawtawrâwt zathum chu an hâm tuar tuar a; Lalpa chuan hmêlma zawng zawng chu anmahni leh anmahni a insahtîr ta sawk sawk a. Zarethan lamah Beth-sita thlenga tlânchhiate an awm a, Tabat bul Abel-mehola ri thlenga tlânchhia pawh an awm. Naftalia thlah te, Asera thlah te leh Manasea thlah, Jordan chhak lam leh thlang lama awm te chu Midian-ho ûm tûrin an pun a. Gideona chuan Efraim tlângramah mi a tîr chhuak bawk a, “Lo chhuak ula, Midian-ho rawn bei ula, Midian-hovin Jordan leh lui dang an kân tûr lo châng rawh u,” a ti a. Midian hotu pahnih Oreba leh Zeeba chu an man a, Oreb lung hmunah Oreba chu an that a, Zeeb grep sâwrkhurah Zeeba chu an that a. Jordan râlah Oreba leh Zeeba lu chu Gideona hnênah an rawn keng a. Efraim mite chuan Gideona hnênah, “Midian-ho bei tûra min sâwm ve lo hi engtizia nge?” an ti a, an hau na hle a. Ani chuan, “Nangnin in tih ṭhin ai chuan ka thil tih ve chhun hi eng tham mah a ni nêm! Nangni Efraim-hovin in tih chhunte pawh keini hnam tê, Abiezer-ho tih ai chuan a ropui daih alâwm. Pathianin in kutah Midian hotu lian Oreba te, Zeeba te a pe che u a, kei chuan eng tham mah tih ka nei hlei nem,” a ti a. Chutianga a ṭawng hnu chuan an thinur pawh chu a dai ta a. Gideona leh a mi zathum chuan Jordan an kai a, an chau hle mai a, hmêlmate chu an ûm zêl bawk si a. Sukoth khaw mite hnênah chuan Gideonan, “Midian lal Zeba leh Zalmuna kan ûm a, ka hote hi an hah hle tawh a, khawngaih takin ei tûr lo pe teh u,” a ti a. Sukoth khaw hotute chuan, “Zeba leh Zalmuna chu in kuta awm em an nih a, i sipai chaute ei tûr kan han pêk na tûr?” an ti a. Gideona chuan, “ Lalpan Zeba leh Zalmuna ka kuta mi pêk hun chuan thlalêra hlîng leh râlsamkuaiin in vun ka kai thlêr vek ang maw le,” a ti a. Chuta ṭang chuan Penuel-ah an kal a, an hnênah chuan Sukoth mite a tih ang bawk khân a ti a; anni pawh chuan an chhân ang bawk khân an lo chhâng a. Penuel-a mite hnênah pawh chuan, “Ralmuanga ka lo kîr leh hun chuan in khua hi ka tichim ngei ang maw le,” a ti a. Zeba leh Zalmuna chu Karkor khuaah, an sipaite nên an awm a. Thlalêra chêngho chu mi nuaikhat leh sînghnih indonaah an thi tawh a, a thi bâng mi sîngkhat leh sângnga lai chuan an la zui zêl a ni. Gideona chu Noba leh Zogbeha chhak lam thingtlâng kawngah a kal a, hmêlma inring lo chu a bei thut a. Midian lal Zeba leh Zalmuna chu an tlân bo va; mahse, an ûm a, an man a; an sipaite chu an buai ta nuai nuai a. An inbeih zawh chuan Gideona chu Heres kalkhân lamah a lo haw a. Sukoth tlangvâl pakhat hi a man a, an khaw hotute leh upate hming a zâwt a, tichuan Sukkoth khuaa mi lianhote leh upate hming chu a ziaksak vek a, sawmsarih pasarih an ni a. Sukoth a thlen chuan an hnênah, “Zeba leh Zalmuna hi en teh u, ‘Zeba leh Zalmuna chu in kuta awm em an niha i sipai chaute ei tûr kan han pêk na tûr’ tia min tihel vei kha,” a ti a. Thlalêr hlîng leh râlsamkuai a la a, khaw hotute chu a man a, Sukoth mite hmaah hlîng chuan a hrût ta nek a. Penuel kulh bangte chu a tichim bawk a, a chhûnga mite chu a that a. Gideona chuan Zeba leh Zalmuna chu, “Tabor tlânga in mi thahte mi eng ang nge an nih?” tiin a zâwt a. Anni chuan, “An ang khawp mai che, lal fa ni âwm tak an ni,” an ti a. Ani chuan, “Ka unau, ka nu hrin ve te ngei an nih chu. Lalpa hming chhâlin ka sawi hi, zuah ula chuan nangni pawh ka that lo tûr che u,” a ti a. A fapa upa ber Jethera hnênah, “Tho la, that teh,” a ti a. Mahse, khandaih chu a phawi lo, a that ngam lo a ni, a la naupang êm a ni. Zeba leh Zalmuna chuan, “Nangmah kha lo tho la, pa leh pa inbeih tûr alâwm,” an ti a. Gideona chu a tho va, Zeba leh Zalmuna chu a that a, an sanghâwngsei nghâwngawrh pawh a lâksak a. Israel mite chuan Gideona hnênah, “Midian-ho lakah min chhanhim a, kan chunga rorêltuah ṭang rawh, i fate, i tute pawh ṭang zêl rawh se,” an ti a. Gideona chuan, “In chunga rorêltuah ka ṭang lo vang; ka fate pawh an ṭang lo vang. In chunga rorêltu tûr chu Lalpa a ni,” a ti a. Gideona chuan an hnênah, “Mi tinin râl bengbeh in lâk kha pakhat min pe ṭheuh ula ka va ti êm!” a ti a. Râlte chu Ismael mi an nih avângin rangkachak bengbeh an lâksak ṭeuh a ni. Anni chuan, “Kan ui hauh lo, kan pe ang che,” an ti a. Puan an phah a, râl bengbeh an lâk chu an pe ṭheuh va. Chutianga an pêk khâwm rangkachak bengbeh chu kg. sawmhnih dâwn lai a ni. Midian lalho incheina, ṭhi te, puan senduk te leh an sanghâwngsei nghâwngawrh a neih te chu chûng zîngah chuan chhiar tel a ni lo. Gideona chuan chûng chuan Efod a siam a, a awmna khua Ofra-ah a dah a. Israel-te chuan an pên bo phah a, Gideona leh a chhûngte tân thang hlauhawm tak a lo ni ta a. Midian-ho chu Israel-te chuan an tudawl a, a inlek leh ngai tawh lo. Gideona dam chhûng zawng kum 40 chhûng ram chu a râlmuang a. Gideona, Zerubaala an tih bawk chu, ama inah a haw a. Gideona chuan nupui a ngah hle a; fapa sawmsarih a nei a. Sekem khuaa a hmei chuan fapa a hrinsak bawk a, a hmingah Abimeleka a sa a. Joasa fapa Gideona chu a tar hle hnu chuan a thi a, Abiezer mite ram Ofra khuaah, a pa Joasa thlânah an phûm ve ta a. Gideona chu a thi ta chauh tihin Israel mite chu Baal lamah an pêng leh a, Baal-berith chu pathianah an neih ta a. Kil tina an hmêlmate kut ata chhanchhuaktu Lalpa, an Pathian chu Israel-te chuan an hre reng duh lo va; Gideonan Israel-te a khawngaih ṭhîn ang khân anni chuan Gideona chhûngte chu an khawngaih ve duh lo va. Gideona fapa, Abimeleka chu Sekem khuaa a nu inah chuan a kal a, a nu chhûngte leh a nu pa chhûngte hnênah, “Sekem mite hian, ‘Gideona fa sawmsarihten in chungah rorêl se nge in tih pakhat chauhvin, sawi rawh u,’ in ti dâwn nia; kei hi a fate zînga in thisen zawmpui awm chhun ka nih hi hre reng bawk ang che u,” a ti a. A nu nuṭate chuan Sekem mite hnênah chûng thu chu an hrilh a, Abimeleka hnung zui chu an châk ta a, “Kan unaupa a ni tak alâwm,” an ti a. Tichuan, Baal-berith an biakna in ata tangkaraw tlang sekel sawmsarih an pe a. A ṭhuihruai atân mi bengtlalo leh pâwngpawrh tak tak chu Abimeleka chuan tangka chuan a ruai a. A pa chhûngte awmna Ofra khuaah chuan a va kal a, Gideona fa sawmsarihte chu lung pakhat chungah a that a; an naupang ber Jothama erawh chu a biru a, a that ve lo. Sekem mi leh Beth-milo mi zawng zawng chu an pung khâwm a, Sekem bula sasaw thing hnuaiah Abimeleka chu lalah an siam ta a. Chu chu Jothama an hrilh a, Gerizim tlângchhîpah chuan a kal a, theihtâwpin a au va, heti hian a ti a, “Sekem mite u, ka thu hi ngaithla teh u; tichuan, Pathian pawhin in thu a ngaithla dâwn nia. Vawi khat chu lal thlan tumin thing zawng zawng an pung khâwm a, Oliv thing hnênah ‘Kan lalah ṭang ta che’ an ti a. Oliv thing chuan, ‘In lal ka niha, ka tei ka tei chuan ka hriak, Pathian leh mihring chawimawi nâna an hman ṭhin chu, ka nei thei tawh lo vang asin,’ a ti a. Theipui hnênah, ‘A nih, nang lo kal la, kan lalah lo ṭang ta che,’ an ti a. Mahse, theipui chuan, ‘In lala ṭangin tei tei ila, thlum tak tak leh tui tak takin ka rah hman hlei ang,’ a ti a. Grep hrui hnênah an kal a, ‘Nang tal lo kal la, kan lalah lo ṭang rawh,’ an ti a. Grep hrui chuan, ‘In lalah ṭangin tei tei ila, Pathian leh mihring tilâwmtu uaina sâwr tûr grep rah ka nei hman nâng,’ a ti a. “Thing zawng zawng chu hmupa hnênah an kal a, ‘Nang hi zawng kan lalah i ṭang ngei tûr a ni,’ an ti a. Hmupa chuan, ‘Lala min duh tak meuh chuan ka buk hnuaiah lo kal rawh u; in lo kal loh chuan ka ṭang hlîng ata mei a lo chhuak ang a, Lebanon sidarte lam a kang fai ang,’ a ti a.” Jothama chuan a sawi zêl a, “Abimeleka lala in siam hi duh tak meuhva ti em in nih? Gideona chu ngaisângin a phu ang ngeiin a chhûngte pawh tihtakmeuhvin in chawimawi duh em ni? Ka pa, Gideona chuan Midian-ho lakah a chhan chhuak che u a, thih huamin a ṭang a nih kha. Tûnah zawng, ka pa chhûngte chungah in inlek a, a fapa sawmsarih chu lung pakhat chungah in that a, a chhiahhlawhnu fapa, in chipui fa a nih avângin lalah in siam tâk hi. Gideona leh a chhûngte chunga thil dik tak ti nia in inhriat chuan Abimeleka chu lâwm takin zui ula, ani pawhin lâwm takin ho che u rawh se. Chutiang a nih loh chuan Abimeleka aṭangin mei lo chhuak sela, Sekem leh Beth-milo khua chu kâng rawh se. Sekem leh Beth-milo kâng chuan Abimeleka chu kâng rawh se,” a ti a. A unaupa Abimeleka chu a hlauh avângin Jothama chu a tlân bo va, Beer khuaah a awm ta a. Abimelekan Israel-te chu kum thum a ho va. Abimeleka leh Sekem mite chu Pathianin a inhuattîr a, Sekem mite chuan Abimeleka chu vervêk takin an ti ta a. Gideona fa sawmsarih râwng taka a thah avângin an thisen mawh chu Abimeleka leh amah thlâwptu Sekem mite chungah chuan a tla ta a ni. Sekem mite chuan tlângah, rawlrâlin Abimeleka chângtute an dah a, chûng mite chuan lo kal apiang an lo rawk ṭhîn. Chu chu Abimeleka an hrilh a. Ebeda fapa Gaala chu a unaute nên Sekem-ah an lo kal a; Sekem mite chuan an lo ring hle a. Lovah te an kal a, grep rah te an lo va, kût an hmang a, an pathian inah an lût a, an eiin an in a, Abimeleka chu ânchhia an lawh a. Ebeda fapa Gaala chuan, “Sekem mite hian eng nge maw an hriata Abimeleka rawng an bâwl le? Gideona fapa kha a ni lâwm ni? Zebula lah hi a thu thu-a awm a ni si a. In pu Hamora thlahte rawng bâwl ta zâwk che u. Hruaitu che u ni ila chu Abimeleka hi ka hnawt bo ngei ang; ‘Abimelek, sipai lâk belh la, lo chhuak rawh, inbei ang’ ka ti ngei ang,” a ti a. Khaw hotu Zebula chuan Ebeda fapa Gaala thu sawi a hriat chuan a thinur hle a. Abimeleka hnênah a rûk têin Aruma-ah zualko a tîr a, “Sekem-ah Ebeda fapa Gaala leh a unaute an lo kal a, khuaa mite hi i lakah an tihel zo dâwn. Chuvângin, a zân a zânin lo kal la, i hote kha han hruai la, daiah châng ru ang che u. Zîng takah in tho ang a, khawpui chu rawn ṭhâwng thut ula; bei tûr che ua a mite nêna an lo chhuak chu duh tâwkin in lo ching dâwn nia,” a ti a. Abimeleka chu a hote nên a zân a zânin an thawk chhuak a, Sekem khua chu hmun li-ah an châng a. Ebeda fapa Gaala chu a lo chhuak a, kulh kawngkaah chuan a ding a. Abimeleka leh a hote chu an bihrûkna aṭang chuan an lo chhuak a. Anni chu Ebeda fapa Gaala chuan a han hmuhin Zebula hnênah, “Tlâng aṭangin, saw, mi an lo kal chhuk ka ti,” a ti a. Zebula chuan, “Tlâng hlim saw mi emaw tiin i hmusual a ni ang e,” a ti a. Gaala chuan, “En mah teh, tlâng bula saw! Mi an lo chhuk ngei alâwm, pâwl khat dang pawh Meonenim lam aṭangin an lo kal saw!” a ti a. Zebula chuan heti hian a ti ta a, “Abimeleka hi tu nge maw a nih a a rawng kan bâwlna tûr!’ i tihna hmui kha khawiah nge a awm tâk? I hmuhsit êm êmte kha an nih saw. Chhuak la, va bei ta che,” a ti a. Gaala chuan Sekem mite chu a hruai chhuak a, Abimeleka chu a bei a. Abimeleka chuan a ûm a, a tlânchhe ta a. Kulh kawngka bul thlengin hliam tam tak an tlu phung a. Abimeleka chu Aruma khuaa awm a ni a. Zebula chuan Gaala leh a unaute chu Sekem aṭang chuan a hnawt chhuak a, an awm thei ta lo va. A tûk chuan Abimelekan Gaala leh a unaute chu Sekem khaw pâwnah an tlân chhuak dâwn tih a hriatin a mite chu a hruai a, pâwl thumah a ṭhen a, pâwnah chuan a lo châng a. Mite chu an lo chhuak a, a tho va, a bei ta a. Abimeleka leh a hote chu kulh kawngka bulah an tlân a, a ṭhiante pâwl hnih chuan pâwna chhuak tawhte chu an bei zui a, an that phiar a. Abimeleka chuan khua chu nilêngin a bei a, a la ta a. A chhûnga mite chu a that a, khua chu a tichhia a, chi a phul chiam a. Sekem khuaa hotu lian deuh deuhte chu Baal-berith biakna in kulhbîngah chuan an tlân khâwm a. Khaw hotu deuh deuh an tlân khâwm thu chu Abimelekan a lo hria a. Zalmon tlângah chuan Abimeleka chu a chho va, a hote zawng zawng chuan an zui a. Abimeleka chuan hreipui a la a, thing ṭang a chêk thla a, a pu chho va; a hote hnênah chuan, “Ka tih ang hian han ti ve sawk sawk teh u,” a ti a. A hote zawng zawng chuan thing ṭang an thlâk ṭheuh va, Abimeleka tih angin kulhbîngah chuan an dah zêl a, kulhbîng chu a hâl hnan ta a; khaw hotu deuh deuhte pawh chu an thi ve ta vek a, mipa leh hmeichhia sângkhat lai an thi. Abimeleka chu Thebes khuaah a kal a: a hual a, a la ta a. Khuaah chuan in sâng pakhat, rinawm tak hi a awm a. Chutah chuan mi zawng zawng, a hmei a pa, khaw hotute nên an tlân khâwm a, an inkalhkhum tlat a. In sâng chhîp zâwlah chuan an chho va, Abimeleka chu in sâng bulah chuan a lo kal a, kawngka chu hâl tumin a va hnaih a. Nu pakhat hian buh râwtna lung chungnung zâwk hi a lu-ah a zu thlâk a, a luruh chu a tlâk keh a. Tlangvâl, a râlthuam kengtu chu a han ko thuai a, “I khandaih kha phawi la, min that rawh, hmeichhe tihhlum min ti khanglâng dah ang e,” a ti a. Tlangvâl chuan a chhun hlum ta a. Israel mite chuan Abimeleka a thi ta tih an hriat chuan mahni in lamah an haw ta ṭheuh va. Chutiang chu a pa leh a unau sawmsarih chunga a thil sual tih avângin Pathianin a tuartîr a; Sekem mite pawh an thil sual tih avângin Pathianin a tuartîr a, Gideona fapa Jothama ânchhia chu an chungah a tla ta a ni. Abimeleka a thih hnu chuan Isakara thlah zînga mi Pua fapa Tola, Dodoa tupa, Efraim tlângram Samir khuaa awm chu Israel-te chhan chhuak tûrin a lo thawk a. Kum sawmhnih leh pathum chhûng Israel-te chu a ho va, a thi a, Samir khuaah chuan an phûm a. Tola thih hnuah Gilead mi Jaira a lo awm leh a. Israel-te chu kum sawmhnih leh pahnih a ho va. Fapa sawmthum a nei a, chûngte chuan chuanna tûr sabengtung an nei ṭheuh va. Gilead ramah chuan khawpui sawmthum an nei a, chung khaw hming chu ‘Jair khua’ tih a ni vek a. Jaira chu a thi a, a awmna Kamon-ah an phûm a. Israel mite chuan Lalpa ngaihmawhzâwng thil sual an ti leh a; Baal te, Astarte te, Aram-ho pathian te, Zidon-ho pathian te, Moab-ho pathian te, Amon-ho pathian te, Filistia-ho pathian te an be ve a. Lalpa chu an hawisan a, a rawng an bâwl duh lo va. Lalpa chu Israel chungah a thinur hle a, Filistia-ho leh Amon-ho kutah a pe a. Amon-ho chuan kum sâwm leh pariat chhûng chu Jordan chhak lama Amor-ho ram Gilead-a Israel awmte chu an tiduhdah a, an tirethei êm êm a. Amon-ho chuan Jordan lui kânin Juda thlah te, Benjamin-ho te leh Efraim-ho te chu an bei a, an timangang êm êm ṭhîn a. Israel-ho chuan Lalpa an au va, “Kan Pathian kan hawisan a, Baal rawng kan bâwl a, a chungah thil sual kan ti a ni,” an ti a. Lalpa chuan Israel-te hnênah, “Aigupta mi te, Amon mi te, Amor mi te, Filistia mi te, Zidon mi te, Amalek mi te leh Maon mi te chuan an tiduhdah che u a, min au va, ka chhan chhuak che u a nih kha. Chuti chung pawhin min hawisan a, pathian dang rawng min bâwlsan a; chuvângin, ka chhan chhuak tawh lo vang che u. In duh zâwk pathian dangte hnênah chuan kal rawh u; chhan chhuak tûr che uin ngên ta che u, in mangang hi rawn chhan che u rawh se,” a ti a. Israel-te chuan Lalpa hnênah, “Kan sual a ni: âwm i tih ang angin min ching mai rawh; hêngho lakah hian min chhan chhuak phawt mai teh,” an ti a. Pathian dang lim an kawlte chu an paih a, Lalpa chu chibai an bûk ta zâwk a; Israel-te retheihzia a hmuh chuan a lainat hle a. Amon-ho chu an pung khâwm a, Gilead-ah bûk an khuar a, Israel-te pawh an pung khâwm a, Gilead biala Mizpa khuaah bûk an khuar ve bawk a. Israel mite leh Gilead-a an hruaitute chuan, “Amon-ho bei tûrin tu nge hma hruai ang? Hma hruaitu chu Gilead ram hotu a ni ang” an ti a. Gilead mi, Jeftha chu pa huai tak a ni a; a nu chu nawhchizuar a ni. Gileada fa a ni. Gileada nupui chuan fapa a hring ṭeuh va, chûngte chu an lo puitlin chuan Jeftha chu an hnawt chhuak a, ‘Kan pa ro chang ve tûr i ni lo, nu dang fa i nih hi,” an ti a. Jeftha chu a unaute khua aṭang chuan a tlân chhuak a, Tob ramah a awm ta a. Jeftha chu mi ho tak takten an zui a. Amon-hovin Israel-te an rawn bei a, Gilead hruaitute chu Tob khuaa awm Jeftha chu hruai tûrin an kal a. “Ti rawh, min ho la, Amon-hote kan han bei dâwn nia,” an ti a. Jeftha chuan Gilead upate chu a chhâng a, “Min huat avângin in pa in ata min hnawt chhuak a, in mangan veleh engtizia nge min rawn pan leh si le?” a ti a. Gilead upate chuan Jeftha chu an chhâng a, “Chuvâng chuan alâwm, Amon-ho beihnaa min ho tûra kan duh che, Gilead mite hi i ho dâwn nia,” an ti a. Jeftha chuan, “Amon-ho bei tûra min hruai kîra, Lalpan min hnehtîr chuan in hotu-ah ka ṭang ang,” a ti a. Gilead upate chuan, “I duh ang chuan kan ti ang, Lalpa chu kan thuhretu a ni,” an ti a. Tichuan, Jeftha chuan Gilead upate chu a zui a, mite chuan an hotu-ah leh hruaituah an siam ta a, Jeftha chuan a thil phût chu Mizpa khuaah chuan Lalpa hmaah a puang a. Jeftha chuan Amon lal hnênah palai a tîr a, “Kan ram bei tûrin engtizia nge i rawn inrawlh le,” a ti a. Amon lal chuan palaite hnênah “Aigupta ram ata Israel-te an lo chhuah khân ka ram min chhuhsak ṭeuh va, chuvâng alâwm. Arnon lui leh Jabok lui inkâr, Jordan ruam chu min lâksak a, hênga khuate hi sawi tam lovin min pe kîr tûr a ni,” a ti a. Jeftha chuan palaite chu Amon lal hnênah a tîr kîr leh a, “Moab leh Amon ram Israel-ten an chhuhsak hlei nêm. Aigupta ram aṭanga Israel-te an lo chhuah khân thlalêra kal tlangin Tuipui Senah an kal a, Kades an thleng a. Edom lal hnênah, ‘I ramah kan lo kal tlang ang e,’ tia an dîl khân a lo phal lo va. Chutiang bawkin Moab lal pawh an dîl a, a phal lo va; Israel-te chu Kades-ah chuan an châm ta reng a. Edom kal tlang lovin thlalêrah a kual zawngin an kal a, Moab ram pawh an hêl a, Moab khawchhak lamah an kual a; Moab ram lût lovin an ramri lui Arnon phai, an ram lo lamah, bûk an khuar a. Israel-te chuan Amor mi, Hesbon lal Sihona hnênah pawh, ‘Kan rama kal tûrin i ramah kan lo kal tlang ang e,’ tia an dîl chu, Sihona chuan a phal lo va, a mite a ko khâwm a, Jahaz-ah bûk a khuar a, Israel-te chu a bei ta a. Israel-te Pathian Lalpa chuan Sihona leh a mite chu Israel-te kutah a pe a, an that a; chu lai rama Amor mite awmna chu an nei ta vêk a. Tichuan, Amor-ho ram, Arnon lui leh Jabok lui inkâr, thlalêr leh Jordan lui inkâr ram chu an nei ta a ni. Lalpa, Israel-te Pathianin Amor mite a pêk chu nangin neihsak i tum em ni? I pathian Khemosa ram pêk che chu nei mai la, kan Pathian Lalpa min pêk chin ram chu keinin kan nei ang. Moab lal Zipora fapa Balaka ai khân chakin i inhria em ni? Kum zathum zet chu Israel-te hian Hesbon khawpui leh Aroer khawpui hi, an chhehvêl khuate nên, Arnon lui kam khawpui zawng zawng nên hian an lo luah tawh a, chumi chhûng zawng chuan chhuhsak rêng i tum ngai si lo. Chuvângin, keinin tihsual kan nei hlei nem, nangin mi rawn bei mai hi i ti dik lo zâwk a ni. Lalpa, Rorêltu chuan, Israel mite leh Amon mite inkâr thu hi rel fel mai teh se,” a ti a. Amon lal chuan Jeftha thu chu a ngaithla duh chuang lo. Lalpa thlarau chu Jeftha chungah a lo thleng a, Gilead leh Manasea ram chu a fang a, Gilead bial Mizpa khuaah chuan a lo kîr leh a. Amon-ho ramah chuan a kal ta a. Jeftha chu Lalpa hmaah a inṭawng tiam a, “Amon mite hi mi hnehtîr phawt chuan, in aṭanga râl ram kan haw min hmuak tûra lo chhuak hmasa ber chu tu pawh ni se, Lalpa tâna serh hran tlat a ni ang a, hâlral thilhlanah ka hmang ang,” a ti a. Jeftha chu Amon mite ramah chuan a kal ta a; a va bei a, Lalpa chuan a hnehtîr ta a. Aroer khua aṭanga Minit bial khaw sawmhnih, Abel-Keramim thlengin a la kîr a, a that ṭeuh va. Israel mite hmaah chuan Amon-ho chu an tlâwm ta a. Jeftha chu Mizpa khuaa a inah a lo haw a. Ngai teh, amah hmuak tûrin a fanu chu benchhek nên a lo lâm chhuak a. Ani chu a fa neihchhun a ni; mipa emaw, hmeichhia emaw fa dang rêng a nei lo. A fanu a han hmuh chuan a puan a pawtthlêr a, “A va pawi em! Ka fanu, nang ber kher chu! Ka lung i tichhiain min va timangang tak êm! Lalpa hnênah ṭawng ka lo thlah tawh a, sût leh rual a ni si lo,” a ti a. Ani chuan, “Ka pa, Lalpa hmaa ṭawng i thlah tawh si chuan i thu ang chuan ti rawh; Lalpa chuan i hmêlma Amon-ho chungah phuba a la tawh alâwm,” a ti a. A pa hnênah chuan, “Heti hian i ti ang; thla hnih chhûng chu min thlah fâl la, ka ṭhiante nên tlângah te kan kal ang a, nulât laia ka thi mai tûr hi ka sûn ang e,” a ti a. A kaltîr a, thla hnih chhûng chu a thang botîr a. A ṭhiante nên chuan tlângah an kal a, fa nei lova a thi tûr chu an sûn a. Thla hnih hnu chuan a pa hnênah a lo haw a, Lalpa hnêna a thutiam chu a hlen ta a; nula thianghlimin a thi ta a. Israel-te zîngah, Israel nulate chuan, kum tin Gilead mi Jeftha fanu sûn tûrin ni li an thang bo ṭhîn, dânah an neih ta a. Efraim-ho chu an inpun khâwm a, Jordan ral Zafon-ah an kai phei a. Jeftha hnênah, “Amon mite bei tûrin ramri i pêl a, engtizia nge tel ve tûra min sâwm loh? I in kan hâlsak ang che,” an ti a. Jeftha chuan, “Amon mite leh kan mite hi kan inhal hle a ni. Min ṭanpui tûrin ka sâwm che u a, min rawn chhan duh lo a nih kha. Mi pui dâwn lo tih ka hriatin thih dâwn lovin ramri ka kân ta a; kan va bei a, Lalpa chuan min hnehtîr ta a ni. Chuvângin, min bei tûrin engtizia nge in lo thawh mai le?” a ti a. Jeftha chuan Gilead mite chu a ko khâwm a, Efraim-ho chu a bei a, a hneh ta a. Efraim-ho chuan, “Nangni Gilead-ho hi Efraim leh Manasea ram aṭanga dawihzepho tlân khâwm in ni’ an ti ṭhîn. Gilead-ho chuan Jordan dai kai theihna lai apiang an luah a, Efraim mi, tlânchhia tawh phawtin dai kai rawn dîl apiangte chu Gilead-ho chuan, “Efraim mi i ni em?” an lo ti zêl a. “Ni lo ve,” a tih chuan, “Shibolet han ti teh,” an ti a; a lam fiah theih lohva, ‘Sibolet’ a tih chuan an man a, Jordan lui kaiah chuan an that mai ṭhîn. Chumi nia Efraim mi thi zawng zawng chu sîngli leh sânghnih an ni. Jeftha chuan Israel-te chu kum ruk a ho va, a thi a, Gilead-a a awmna khuaah an phûm a. Jeftha hnuah Bethlehem khaw mi Ibzana chuan Israel-te chu a ho va. Fapa sawmthum leh fanu sawmthum a nei a. A fanu sawmthumte chu a chipui ni lo khaw dang mi pasal a neihtîr a; a fapa sawmthumte pawh a chipui ni lo nupuiah a neihsak a. Ibzana chuan Israel-te chu kum riat a ho va. A thi a, Bethlehem-ah an phûm a. Ibzana hnu chuan Zebulun mi Elona chuan Israel-te chu kum sâwm a ho va, A thi a, Zebulun ram Aijalon khuaah an phûm a. Elona hnu chuan Pirathon khaw mi Hilela fapa Abdona chuan Israel-te chu a ho va. Fapa sawmli leh tupa sawmthum a nei a, an chuanna ṭheuh tûr sabengtung sawmsarih a nei a. Abdona chuan Israel-te chu kum riat a ho va. A thi a, Efraim ram, Amalek-ho awmna tlângram Pirathon khuaah an phûm ta a. Israel mite chuan Lalpa ngaihmawhzâwng thil sual an ti leh a, kum sawmli chhûng chu Filistia hnuaiah Lalpa chuan a awmtîr a. Zora khuaah Dana thlah, mi pakhat, Manoa a awm a; a nupui chu a ching a, fa rêng an nei lo. Hmeichhe hnênah chuan Lalpa vântirhkoh a inlâr a, “Ngai teh, fa nei thei lovin i ching na a, nau i pai ang a, fapa i hring ang. Chuvângin, fîmkhur la, uain emaw, zu emaw in suh la, sa thiang lo pawh ei hauh suh ang che. I nau pai, fapa i hrin tûr chu, a lu ziah kawlh bawk loh tûr a ni. Pathian tân a pian aṭangin Nazarit mi a ni ang. Ani chuan Filistia mite lakah Israel-te chhan chhuah hna a thawk ṭan ang,” a ti a. Hmeichhia chu a kal a, a pasal hnênah, “Pathian mi ka hnênah a lo kal a, Lalpa vântirhkoh hmêl pu a ni, a hlauhawm khawp mai. Khawi lam mi nge a nih ka zâwt lo va, a hming pawh min hrilh hek lo, ‘Ngai teh, nau i pai ang a, fapa i hring dawn, uain emaw, zu emaw in hauh suh, sa thiang lo pawh ei rêng rêng suh, i nau hrin chu a pian aṭanga a thih thlengin Pathian tân Nazarit mi a ni ang,’ tiin min hrilh a ni,” a ti a. Manoa chuan Lalpa hnênah, “Aw Lalpa, Pathian, mi i rawn tirh kha lo kal leh sela, nau lo piang tûr chu engtin nge kan enkawl ang, min zirtîr teh se,” a ti a. Pathian chuan Manoa dilna chu a ngaithla a, lova a ṭhut laiin hmeichhe hnênah Pathian vântirhkoh chu a rawn inlâr leh a, a pasal Manoa chu a awm ve lo. Hmanhmawh takin hmeichhia chu a pasal hnênah a tlân a, “Hmân ni-a lo kal ka sawi kha a lo kal leh ta e,” a va ti a. Manoa chu a tho va, a nupui chu a zui a, mi chu an va hmu a, “Hmeichhe hnêna thusawitu kha i ni em?” a ti a. “Ni e” a lo ti a. Manoa chuan, “I thu anga thil a lo thlen hunah nau chu engtia enkawl tûr nge ni anga, eng angin nge a khawsak ang?” a ti a. Lalpa vântirhkoh chuan, “Hmeichhe hnêna ka hrilh ang khân awm sela, grep kûng aṭangin thil eng mah a ei tûr a ni lo, uain emaw, zu emaw in hek suh se. Ka hrilh zawng zawng kha zâwm sela, thil thiang lo pawh ei suh se,” a ti a. Manoa chuan Lalpa vântirhkoh hnênah, “Kan han chelh lawk teh ang che, kêltê kan han talh ang e,” a ti a. Lalpa vântirhkoh chuan, “Min chelh mah ula in chaw chu ka ei lo vang, hâlral thilhlan i hlân dâwn a nih chuan Lalpa tân hlân ang che,” a ti a. Manoa chuan Lalpa vântirhkoh hnênah, “I thu anga thil a lo thlen hunah kan chawimawi theih nân che i hming min hrilh teh,” a ti a. Lalpa vântirhkoh chuan, “Engah nge ka hming mi zawh, sawi mi a ni hlei nêm,” a ti a. Tichuan, Manoa chuan kêltê chu a talh a, buhbâl thilhlan nên hâlral thilhlanah lungpui chungah chuan Lalpa tân a hlân ta a. Thil mak tak lo awm ta chu Manoa te nupa chuan an en reng a. Lungpui maichâm aṭanga mei khu vân lama a han chhoh chuan Lalpa vântirhkoh chu meiah chuan vânah a chho ta a. Manoa te nupa chuan chu mi chu Lalpa vântirhkoh a ni tih an hre ta a; hmai lei siin an kûn ta a. Vântirhkoh chu an hmu leh tawh lo. Manoa hnênah emaw, a nupui hnênah emaw Lalpa vântirhkoh chu a inlâr leh tawh lo. Manoa chuan Lalpa vântirhkoh ngei a ni tih a hre ta a. Manoa chuan a nupui hnênah, “Pathian kan hmu a, kan thi ngei dâwn a nih hi,” a ti a. A nupui erawh chuan, “ Lalpa chuan min tihlum duh ni se kan hâlral thilhlan leh buhbâl thilhlan kha a pawm lo vang a, hêng thil hi min hrilh lo vang,” a ti a. Hmeichhia chuan fapa a hring a, a hmingah Samsona a sa a; nau chu a lo ṭhang lian a, Lalpa chuan mal a sâwm a, Lalpa thlarau chuan Zora leh Estaol inkâr Mahane-dan-ah Samsona chu a rawn pâwl ṭan ta a. Samsona chu Timna khuaah a zu chhuk a, Timna khuaa Filistia nula pakhat chu a zu hmu a: A haw chho va, a nu leh a pa hnênah, “Timna khuaah Filistia nula pakhat ka hmu a, nupuiah min neihsak rawh u,” a ti a. A nu leh a pa chuan, “Kan chipuite zîngah emaw, kan mite zîngah emaw nupui tûr an awm lo em ni? Engtizia nge serh tan loh Filistia-ho fa nupuia neih i duh tâk?” an ti a. Samsona chuan, “Min neihsak mai teh u, hmêlṭha ka tihzâwng tak a ni,” a ti a. Filistia mite chunga chêtna tûr remchâng zawngin Lalpa chuan Samsona chu a hmang a ni tih a nu leh pa chuan an hre lo. Chutih lai chuan Filistia-ho chu Israel-te chunga rorêltu an ni. A nu leh pa hruaiin Samsona chu Timna khuaah chuan a zu chhuk a. Timna-ho grep huan an thleng a, sakeibaknei tuai hian a lo rûm khum a. Lalpa thlarau chuan a rawn man thut a, eng mah ken a nei lo na a, kêltê ang lekin a lo pawt sawm vêk a, a nu leh pa pawh a hrilh lo. Khuaah chuan a kal a, nula chuan a tilâwm hle a. Hun eng emawti hnuah chuan hruai tumin a chhuk leh a, sakeibaknei ruang kha en tûrin a pêng zawk a, khuai an lo awm mur mur a, a zu pawh a tam hle a. Khuai chu a la a, kal pahin a ei zêl a, a nu leh pa pawh a pe a, an ei a; sakeibaknei ruang aṭanga a lâk a ni tih a hrilh lo. A pa chu nula inah chuan a zu lêng a; tlangvâlho tih ṭhin dân angin Samsona chuan ruai a ṭheh a. Filistia-ho chuan a ṭhianah tlangvâl sawmthum an ruatsak a. Samsona chuan an hnênah, “Thu khirh ka han hrilh ang che u, ruai ṭheh chhûng ni sariha a awmzia in hriat chuan puan zai sîn sawmthum, inthlâkna tûr nên, ka pe ang che u. In hriat loh erawh chuan puan zai sîn sawmthum leh inthlâkna tûr sawmthum min pe a ni ang chu,” a ti a. “I thu khirh chu han sawi la, kan lo ngaithla ang chu,” an ti a. An hnênah chuan, “Eitu aṭangin ei tûr a lo awm a, Chak tak aṭangin thil thlum a lo chhuak,’ tih hi,” a ti a. Ni thum an ngaihtuah pawhin a awmzia an hre thei lo va. A ni sarih ni chuan Samsona nupui hnênah an kal a, “I pasal chu a thu khirh hrilh tûr chein ngên rawh; chutilo chu, nang leh i chhûngte hi kan hâl hlum ang che u. Min tikawnkâw tûrin em ni ṭhianah min sâwm?” an ti a. Samsona nupui chu a hmaah a ṭap a, “Min lo hmangaih tawp lo va, min haw zâwk a nih hi; kan mi, tlangvâlte thu khirh i zâwt a, a awmzia pawh min hrilh duh si lo,” a ti a. A hnênah chuan, “Ka nu leh pa pawh ka hrilh lo va, nang ka hrilh ang che maw?” a ti a. Ruai an ṭheh chhûng ni sarih chhûng chu a ṭap a ṭap a; a ngen tlut tlut avâng chuan a ni sarih ni chuan a hrilh ta nge nge a. A nupui chuan a mite chu a hrilh ta a. Chu khaw tlangvâlte chu a ni sarih ni, ni tlâk hmain a hnênah an lo kal a, “Khawizu aia thlum eng nge awm? Sakeibaknei aia chak zâwk eng nge ni?” an ti a. Samsona chuan, “Ka bâwngla hi lei rîtah chhawr lo ula chu Ka thu khirh in hre hauh lo vang,” a ti a. Lalpa thlarau chuan a rawn man thut a. Askelon-ah a chhuk a, mi sawmthum a zu that a, an thawmhnaw chu a lâksak a; a thu khirh hretute kha inthlâkna puante chu a pe a. A thinur hle a, a pa inah a haw chho va. Samsona nupui chu a ṭhian pakhat kha an lo neihtîr ta mai a. Nakin deuhah chuan huit seng hun laiin Samsona chuan kêltê kengin a nupui chu a zu tlawh dâwn a, “Ka nupui pindanah ka va lût ang e,” a ti a; mahse, a puzawn chuan a phal lo va, “I duh ta hauh lo a nih hi kan ti a, i ṭhian pakhat kha kan lo neihtîr ta asin. A nau hi a hmêl a ṭha zâwk a, khawngaih takin a aiah nei mai rawh,” a ti a. Samsona chuan, “Tûn ṭum chu Filistia mite pawi khawih mah ila, dem theih ka ni lo vang,” a ti a. Samsona chu a chhuak a, sihal zathum a man a, pahnih zêl mei a ṭawn zawm a, a ṭawn zawmnaah chuan meichher a dah a. Meichher chu a chhi a, Filistia-ho lova huit hmunah chuan sihalte chu a chhuah a. Huit phal leh a ding lai chu a kâng ta duai duai a, oliv hmunte pawh a kâng tel a. Filistia mite chuan, “Tu tih nge?” an ti a. “Timna khaw mi mâkpa Samsona tih alâwm. A nupui a lâksak a, a ṭhianpa a pe vei a nih kha,” an ti a. Filistia-ho chu an lo kal a, chu hmeichhia leh a pa chu an hâl hlum ta a. Samsona chuan, “Hetianga in tih chuan in chungah ka ṭuan zet ang a, ka ti tawh lo vang,” a ti a. Tichuan, an chungah a che ta chiam a, a that ṭeuh va, Etam khâm pûkah a chhuk a, a awm ta reng a. Filistia mite chu an chho va, Judai ramah bûk an khuar a, Lehi hmunah an inzâr darh a. Judai ram mite chuan, “Engtizia nge min bei tûra in lo chhoh mai le?” an ti a. Anni chuan, “Samsona phuara, min sawisak anga sawisa ve tûrin kan lo thawk a ni,” an ti a. Judai ram mi sângthum Etam khâm pûkah chuan an chhuk a, Samsona hnênah, “Filistia-ho hi kan chunga thuneitute an ni tih i hre na nge? Kan chunga i thiltih hi engtizia nge ni ta ngai?” an ti a. “Min tih angin an chungah ka han ti ve a nih kha,” a lo ti a. “Filistia mite pêk atân kan rawn phuar dâwn che a ni,” an ti a. Samsona chuan, “Nangmahniin ka chunga kut thlâk loh tiam phawt rawh u,” a ti a. A hnênah chuan, “Ni e, kan phuar ang che a, an kutah kan pe ang che, kan that tawp lo vang che,” an ti a. Hruizên thar pahnihin an phuar a, pûk ata chu an rawn hruai chho va. Lehi an lo thlen chuan Filistia-ho chuan an lo hmuak a, an au dur dur a; Lalpa thlarau chuan a rawn man thut a, an phuarna hrui chu la zai kâng ang maiin a chat hmek hmek a. Sabengtung khaberuh tharlâm tak hi a hmu a, a la a, mi sângkhat zet a vaw hlum a. Samsona chuan, “Sabengtung khaberuh maiin ka talh vûm thûr a, A sâng têl ka vaw hlum, Sabengtung khaberuh rovin,” a ti a. Chutia a sawi zawh chuan sabengtung khaberuh chu a paih a, chu hmun chu Ramat-lehi an vuah a. A tui a hâl êm êm a, Lalpa chu a au va, “I chhiahhlawh hi ropui takin min hnehtîr a, tuihâlin ka thi mai dâwn alâwm, serh tan lohhovin min rawn that mai ang e,” a ti a. Lehi hmuna khuar awm chu Lalpa chuan a tikhi a, tui a lo chhuak a; a han in chuan a chau chu a reh a, a harh ta huai a. Chu tuikhur chu En-hakore an vuah a, Lehi-ah chuan tûn thlengin a la awm. Filistia-ho vânglaiin Samsona chuan Israel mite chu kum sawmhnih a ho va. Samsona chu Gaza khuaah a kal a, nawhchizuar a hmu a, a mutpui a. Gaza khaw hotute chuan Samsona a lo kal tih an hriat chuan an hual a, “Khawvâr hunah aw kan thah ang,” an ti a; ngawi ṭhapin kulh kawngka bulah an châng a. Samsona chu zanlai thleng chauhvin a awm a; zânlaiah chuan a tho va, khawpui kulh kawngka chu a vuan a, a ban chawpin a pawt phawng a, a kalhnate nên lam a pu a, Hebron tlâng ep chhîpah a dah ta a. Chumi hnu chuan Sorek ruama awm nula pakhat, Delili chu a ngaizâwng a. Filistia hotute chu a hnênah an lo kal a, “Eng vânga heti taka chak nge a niha, engtin nge kan hneh theih ang hriat tum teh; kan phuar ang a, kan ching nek dâwn nia. Tangka sângkhat leh za ṭheuh kan pe ang che,” an rawn ti a. Delili chuan Samsona hnênah, “Eng vânga heti taka chak nge maw i nih min hrilh teh; engtin nge phuar che ila, kan sawisak theih ang che?” a ti a. Samsona chuan a hnênah, “Thal hrui thar pasarih, la tihro lohvin min phuar sela, ka chau dêr ang a; mi dang ang mai ka ni ang,” a ti a. Filistia hruaitute chuan thal hrui thar pasarih, la tihro loh Delili hnenah an rawn keng a, chung chuan Samsona chu a phuar a. A pindan chhûngrilah châng rutu an awm a. A hnênah chuan, “Samson, tho teh, Filistia-hovin an rawn bei dâwn a che,” a ti a. Thal hruite chu mei linga la zai deh chhum ang maiin a tichat ta a. A chak chhan chu an la hre ta chuang lo va. Delili chuan Samsona hnênah, “Min va han thamlo ve, dâwt min han hrilh le; engin nge maw phuar beh theih i nih ang, min hrilh teh,” a ti a. Ani chuan, “Hruizên thar, la hman hlek lohvin min phuar sela, ka khawng reng mai ang, mi dang ang mai bawk ka ni ang,” a ti a. Delili chuan hruizên thar la hman hlek loh chu a la a, a phuar a, “Samson, Filistia miten an rawn bei dâwn a che,” a ti a. Chângtute chu pindan chhûngrilah an awm a, an lo chhuak a. La zai ang maiin hruizên pawh chu a tichat ta mai a. Delili chuan, “Min lo thamlo hle zawng a nih hi, dâwt bawk min hrilh leh ta. Engti takin nge maw phuar che ila i chak theih loh vang le?” a ti a. Samsona chuan, “Ka sam phiar sarih hi puanah tah hnan la, kilh bet tlat la, a ni mai,” a ti a. A sam chu a kilh bet a, a hnênah, “Samson, Filistia-hovin an rawn bei dâwn a che,” a ti a. Ani chu a lo harh a, a tah hnanna puanbute chu a pawt phawng a, a sam chu a pawt dâwk a. Delili chuan, “Vawi thum ngawt dâwt min hrilh a, chuti chungin engtin nge ka hmangaih che min la tih theih le? Min lo hmangaih tak tak loh hi, i chak chhan pawh min hrilh duh si lo,” a ti a. Ni tin a nawr a, a zawh tlut tlut avâng chuan a ning tawngkhawng chuan a hrilh ta mai a. Engkim a hrilh ta a, “Ka pian tirh ata Pathian tâna Nazarit mi ka ni a, ka sam hi ziah kawlh a la ni lo. Ka lu hi meh ni sela ka chakna hi a bo vang a, mi dang ang bawkin ka chak lo ve ang,” a ti a. Delili chuan engkim a hrilh ta tak tak a ni tih a hriat chuan Filistia hotute chu a ko va, “Lo chho thuai teh u, engkim min hrilh ta e,” a ti a. Filistia hotute chu an lo kal a, tangka chu an rawn keng a. A mal chung lukhamin a muttîr a, mi pakhat a ko va, a sam phiar pasarih chu a hlehtîr a; a han beng harh a, a chakna chu a lo bo ta a. “Samson, Filistia-hovin an rawn bei dâwn che,” a ti a. A muhîl chu a lo harh a, “Tûn hma ang khân ka chak ang a, ka haw mai ang,” a ti a. Lalpa chuan a kalsan tih a hre lo. Filistia-ho chuan an man a, a mitmu an kherchhuahsak a. Gaza khuaah an hruai thla a, dâr kawl an buntîr a; tân inah chuan chhangphut an râwtdiptîr ṭhîn a; a lu an mehsak chu a lo hnim leh ṭan ta a. Filistia hotute chu an pathian Dagona hnênah thilhlan tam tak hlân tûrin an lo pung khâwm chiam a, “Kan hmêlma Samsona chu kan pathianin min mansak ta,” tiin an lâwm dâwn a ni. Samsona an hmuh chuan an pathian an fak a, “Min that ṭeuh va, kan ram tichhetu kha pathian chuan min mansak ta,” an ti a. An hlim hle a, “Samsona kha han hruai teh u, nuihza siam nân i hmang ang u,” an ti a. Tân in aṭang chuan Samsona chu an la chhuak a, nuihza siam nân an hmang ta a, ban pahnih inkârah an thlung a. Samsona chuan a kaitu naupang hnênah chuan, “He in innghahna banpui ber hi min dehtîr hrâm teh, ka han nghêng teh ang?” a ti a. Inah chuan Filistia hruaitu, mipa leh hmeichhia an awm khat hmur a; a chhâwng chungah pawh chuan mipa leh hmeichhia sângthum lai an awm a. Samsona nuihza siam nâna an hmang chu an thlîr a. Samsona chuan Lalpa a au va, “Aw Lalpa Pathian, min hre reng la, mi han tichak teh; aw Pathian, tûn ṭum chauh hi mi han tichak teh; ka mit khinghnih phuba hi Filistia mite chungah hian ka han la teh ang,” a ti a. Chu in innghahna banpui pahnih chu a bân ding lam leh vei lamin a kuah a, a rinchhan a, “Filistia mite hi ka han thihchilh teh ang,” a ti a, ban chu theihtâwpin a nawr vak a, in chu a chim ta rup a, an hruaitute leh a chhûnga awm zawng zawng chu a delh hlum ta a. A dam laia a thah ai chuan a thihchilhte chu an tam zâwk a ni. A unaute leh a pa chhûngte chu an lo chhuk a, a ruang chu an la chho va, a pa Manoa thlân Zora leh Estaol inkârah chuan an phûm ta a. Israel-te chu kum sawmhnih a ho a ni. Efraim tlângramah mi pakhat a awm a, a hming chu Mika a ni. A nu hnênah chuan, “Miin i tangkaraw tlang sângkhat leh za an rûksak che a, ânchhia i lawh a, kei pawh min hrilh kha, ka lâk a ni e, ka la kawl vek asin,” a ti a. A nu chuan, “E, ka fapa, Lalpa chuan mal sâwm che rawh se,” a ti a. Tangkaraw sângkhat leh za chu a nu a pe leh a, a nu chuan, “Ka ânchhia ka fapa chunga a tlâk loh nân keimah ngeiin hêng tangka hi Lalpa tân ka hlân a ni. Thing milem luan nân leh a chhûna chhûn milem siam nân hman tûr a ni. Tangkarua chu ka pe kîr leh ang che,” a ti a. A nu a pêk kîr tangka chu a nu chuan tlang zahnih a la a, themthiam hnênah thing milem tangkaruaa luan tûr leh a chhûna chhûn tangkaraw milem siam nân a pe a; Mika inah chuan an dah a. Mika chuan pathian in a sa a, Efod leh milem a siam a, a fapa pakhat chu puithiam atân a ruat a. Chûng hun lai chuan Israel ramah lal an nei lo, ṭha an tih ang angin mi tin an awm mai a ni. Judai rama Bethlehem khuaah tlangvâl pakhat Levia chi hi a awm a. Chu mi chuan awmna tûr zawngin Judai rama Bethlehem khua chu a chhuahsan a, Efraim tlângramah a lo kal a, Mika in chu a lo thleng a. Mika chuan, “Khawi aṭanga lo kal nge i nih?” a ti a. Ani chuan, “Judai rama Bethlehem khuaa awm Levia chi ka ni a, awmna tûr zawngin ka lo kal a ni” a ti a. Mika chuan a hnênah, “Ka hnênah awm ve mai la, ka pa leh puithiam atân ṭang ta mai che; kum khatah tangka tlang sâwm ka pe ang che, i silhfên sin khat leh ei pawh ka tum ang,” a ti a. Levia chi tlangvâl chu a awm ve ta a. Chu mi inah chuan Levia chi chu lungawi takin a awm a, a fapa pakhat ang maiin a awm ve ta a. Mika chuan Levia chu a serh hrang a, tlangvâl chu a puithiamah a ṭantîr ta a; Mika inah chuan a chêng ve a. “Levia chi ngei puithiamah ka nei ta a, Lalpa chuan min tiṭha ngei ang maw le!” a ti a. Chûng lai chuan Israel ramah lal an nei lo. Israel zînga ram chanpual tûr an sem lai khân Dana thlahte chu ram chanpual tûr an ruatsak ve lo va, ram chanpual luah tûr an zawng reng a ni. Chuvâng chuan, Dana thlahte chuan an chite zîng aṭangin mi panga fel tak tak, Zora leh Estaol khua aṭangin an thlang chhuak a, ram ṭha zawnga en thlithlai tûrin an tîr a. Efraim tlângram an han thlen chuan Mika inah an kal a, an riak ta a. Mika ina Levia chi tlangvâl ṭawng an han hriat chuan a aw phawi chu an hre ta a, an pan a, “Eng nge hetah i tih? Tu nge hruai che?” an ti a. Ani chuan a chhâng a, “Mika inah ka lo kal a, puithiam atân min ruat a ni,” a ti a. “Kan kalna tûrah hian kan hmuingîl dâwn nge dâwn lo Pathian min râwnsak teh,” an ti a. Puithiam chuan, “Ngaihngam takin kal rawh u, Lalpa chuan in kalna tûrah hian in hma a hruai e,” a ti a. Mi panga chu an kal a, Lais khua an va thleng a. Sidon mite ang bawkin chu khaw mite chu ngaihngam takin an awm tih an hmu a. Mi nunnêm, awm mai mai, tu mah tai nei lo, engkima intodelh an ni. Sidon khua aṭang chuan hla tak a ni a, mi dang hnêk hnai an nei hek lo. Mi panga chu Zora leh Estaol khuaa mite hnên an thlen leh chuan, “Ti rawh u, Lais khua chu i han bei ang u, a ram kan han hmu a, ram ṭha tak a ni. Hetah awm mai mai teh suh u; hmanhmawh ila, i han la ang u. Han thleng mah ila, an lo inrâlring lo vang. A ram pawh zau tâwk tak a ni; mihring mamawh engkim an hnianghnâr a ni; Lalpa chuan a pe tawh a che u,” an ti a. Tichuan, Dana thlahte, hriamhrei keng mi zaruk chu Zora leh Estaol khua aṭang chuan an thawk chhuak a. Judai ramah an chho va, Kiriat-jearim-ah bûk an khuar a; chuvângin, chu khua chuan Mahane-dan tih hming a la pu ta reng a ni. An kal zêl a, Efraim tlângram Mika in chu an han thleng a. Lais leh a vêl ram han en thlithlaitu mi panga khân an ṭhiante hnênah, “Hêng in pakhat chhûngah hian thing milem tangkaruaa luante a awm tih in hria em? Milem dangte leh Efod pawh a awm, engtin nge ti ila ṭha ang?” an ti a. Levia chi tlangvâl awmna Mika inah chuan an kal a, chu tlangvâl chu, “I dam em?” an ti a. Kawngkhâr bulah chuan hriamhrei kengin Dana thlahte chu mi zaruk an ding a. Mi pangate kha erawh chu inah chuan an lût a, tangkaraw luan thing milem te, a chhûna chhûn milem te leh Efod te chu an la a; puithiam chu mi zaruk zîngah chuan an dintîr a. Mi pangaten Mika ina thil serh awmte chu an lâk laiin puithiam chuan, “Engtin nge in tih dâwn?” a ti a. “Ngawi mai rawh, ṭawng ve suh, kan hnênah lo kal zâwk la, kan puithiamah ṭang ang che, Israel hnam pum puithiam nih chu chhûng khat puithiam mai nih ai chuan i duh zâwk lâwm ni?” an ti a. Puithiam chu a lâwm hle a; tichuan, thil serhte chu amah chuan a keng a, an zîngah chuan a kal ve ta a. An lo kalna lamah an kîr a, an naupangte leh rante nên chuan an chhuak ta a; a kal hmasaten an bungruate chu an lo kalpui a. Thui fe an kal tawh a, Mika chuan a ṭhenawm khawvêngte a pun a, bei tûrin a ûm a. Dana thlahte chu an va ûm pha a, an au va. Dana thlahte chu an lo hawi a, Mika hnênah, “Eng nge ni ta, in va tam ve?” an ti a. “Eng nge ni ta te in han ti a; ka puithiam min chhuhsak a, pathian, ka siamte chu min rûksak a, eng mah hnutchhiah in nei hlei nêm,” a ti a. Dana thlahte chuan, “Thu dang eng mah sawi teh suh, hêng mite hi an thinur hlauh ang a, an bei mai ang che. In chhûngkuain an timang mai ang che u asin,” an ti a. An kal ta zêl a, Mika chuan a aiin an chak zâwk hle tih a hriatin a kîr a, a haw leh ta a. Mika milem siam leh a puithiam chu an hruai a, Lais an va thleng a, ngaihngam taka an awm hle hle chu an bei a, khandaihin an sât hlum a, khua chu an hâl a. Rawn chhan tûr tu mah an awm lo, Sidon khua aṭangin hla tak a ni a. Khua chu an din ṭha leh a, an awm ta a. An thlahtu Dana, Israela fa hming chawiin chu khaw hmingah chuan Dan an sa a, a hming hmasa chu Lais a ni. Dana thlahte chuan thing milem tangkaruaa luan chu an be ta a. Mosia fa Gersoma fapa Jonathana chu puithiamah an hmang a; chu mi thlahte chu saltân thleng khân Dan-ho puithiamah an ṭang a; Mika milem siamte chu a awm ta reng a. Inbiakna bûk, Pathian an biakna kha erawh chu Silo khuaah a awm. Israel rama lal an neih hma khân Levia chi mi pakhat Efraim tlângram tâwpah a awm a, Judai ram Bethlehem khuaa mi hmei a nei a. A hmei chuan a kalsan a, a pa in lamah, Judai ram Bethlehem khuaah chuan a haw a, thla li lai a awm a. A pasal chu a tho va, ṭawng ṭhaa thlêma hruai kîr leh tumin chhiahhlawh pakhat leh sabengtung pahnih nên a va kal a. Hmeichhia chuan a pa inah a hruai lût a; hmeichhe pa chu a lâwm hle a. Hmeichhe pa, a puzawn chuan a chelh a; ni thum chu an eiin an in a. A ni li ni chuan zîngah an tho va; ani pawh chu chhuah tumin a tho va; mahse, a puzawn chuan, “Eng emaw tal ei zet ula, in chhuak dâwn nia,” a ti a. Tichuan, an ṭhu ho va, an eiin an in ta a. A puzawn chuan, “Zânin chu riak leh mai rawh u, hmanhmawh tehchiam a ṭûl lo ve,” a ti a. Chumi ni chuan chhuah an han tum leh a; mahse, a puzawn chuan a chelh leh a, an châm leh ta a. A ni nga ni chuan chhuak tawh tûrin zîng takah a tho va, a puzawn chuan, “Ni nêm deuh hma chu awm rih ula, eng emaw tal chu ei rih teh u,” a ti a. A hmei nên, a chhiahhlawh nên kal tûra an han thawh chhuah chuan a puzawn chuan, “Ngawi teh u, khua a va tlai ta ve, châm leh rih mai teh u; ni a tla dâwn mai tawh si a, hetah riak ula, chaw te i ei ho leh teh ang u. Naktûk zîngah in tho vang a, in khaw ban tûrin in chhuak dâwn nia,” a ti a. Mahse, châm leh chu a duh lo va, a tho va, a chhuak ta a. Jebus-ho khua Jerusalem khaw bul chu, a thawmhnaw phur sabengtungte nên chuan an thleng a, a hmei pawh chu a tel ve a. Jebus-ho khua an thlen chuan ni a hniam hle tawh a, a chhiahhlawh chuan, “En teh, Jebus-ho khuaah hian i riak mai ang u,” a ti a. A pu chuan, “Israel mi ni lo, hnam dang khuaah kan riak tûr a ni lo. Gibea khua i pan ang u,” a ti a. A chhiahhlawh hnênah chuan, “Gibea khuaah emaw, Rama khuaah emaw kan riak ang chu,” a ti a. An kal ta zêl a Gibea khua an thlen chuan ni a tla ta a. Gibea chu Benjamin-ho khua a ni. Riah tumin Gibea khua chu an pan a, thleng tûra lo sâwm tu mah an awm loh avângin khawpui tual laili chu an pan a, an ṭhu ta a. Tlaiah putar pakhat feh haw hi a lo kal a; amah chu Efraim tlângram mi a ni a, Gibea khuaah a awm ve mai a ni; Gibea mite chu Benjamina thlahte an ni. Chu mi chuan khawpui tual laili chu a han en chuan mikhual ṭhu a hmu a, “Khawi lamah nge i kal dâwn? Khawi aṭanga lo kal nge i nih?” a ti a. Ani chuan, “Judai ram Bethlehem-ah kan va kal a, Efraim tlâng ram tawpa kan awmnaah kîr leh tur kan ni a, Lalpa inah kal kan tum a ni; tu mah min thleng duh an awm lo va ni. Sabengtung ei tûr buhpâwlte pawh kan intodelh a, kei leh i bawihnu leh tlangvâl tân pawh chaw ei tûr kan nei: neih loh eng mah kan nei lo,” a ti a. Putar chuan, “Mangang hauh suh u, in mamawh zawng zawng chu ka tum vêk ang, khawlaiah zawng riak lul teh suh u,” a ti a. Tichuan, a inah a hruai lût a, sabengtungte chu buhpâwl a pe a, an ke an sil a, an eiin an in ta a. Hlim taka chaw an ei lai chuan khawpuia mi sual rual chuan in chu an rawn hual a, kawngka chu an rawn chhuih dawt dawt a, in neitu putar hnênah, “I mikhualpa kha han hruai chhuak teh, kan lo pâwl ang e,” an ti a. In neitupa chu a chhuak a, “Ni lo ve, ka unaute u, chutiang thil ṭha lo tak chu tih tum teh suh u; he mi hi ka ina thleng a ni a, he thil ṭha lo hi a chungah ti suh u. En teh u, ka fanu, mipa la pâwl loh leh he mi hmei hi, ka rawn la chhuak ang a, in duh leh in tlâwm ang a, in duh ang angin in sawisa dâwn nia; he mi chungah erawh hi chuan thil ṭha lo ti teh suh u,” a ti a. Mite chuan a thu an ngaithla duh lo va; chutichuan, kha mi khân a hmei chu a hruai chhuak a, an lo pâwl a, zânkhuain an sawisa a, zîng a lo niha, ni a lo lan dâwn chuan an chhuah ta a. Hmeichhia chu zîngah a pasal thlenna inah chuan a lo kal a, kawngka bulah chuan a tlu tawp a, khaw ên hma chu a awm ta a. A pasal chu zîngah a tho va, kal chhuah tumin kawngka chu a han hawng a, a hmei chu kawngka bulah chuan a lo let dêr a, a kut chuan kawngka chu a ban a. A hnênah, “Tho teh, i kal ang,” a ti a; chhâng tûr a lo awm tawh lo va. A sabengtung chungah chuan a dah a, a tho va, a in lamah chuan a haw ta a. In a va thlen chuan chem a la a, a hmei fuke chu sâwm leh pahnihah a chan sawm a, Israel ram chhûngah chuan a thawn darh ta vek a. A lo hmu apiang chuan, “Israel-te zîngah Aigupta ram ata an lo chhuah aṭanga tûn thlengin hetiang thil hi a la awm ngai lo; ngaihtuah ula, inrawn khâwmin ngaih dân i sawi teh ang u,” an ti a. Israel mi zawng zawng chu thukhat vuain Mizpa khuaah Lalpa hmaah an pung khâwm a, Dan leh Beer-seba khaw inkâra mi zawng zawng leh Gilead ram mite nên an lo kal khâwm a ni. Israel hnam tin hruaitute pawh Pathian mite pungkhâwmho zîngah chuan an tel a. Khandaih lek thei ṭhalh mi nuai li an tling a. Benjamina thlahte chuan Israel-te chu Mizpa khuaah an pung khâwm tih an lo hria a. Israel mite chuan, “Engtin nge he thil ṭha lo tak hi a lo thlen dân han sawi chiang teh,” an ti a. Levia chi, an thah tak hmeichhe pasal chuan, “Benjamin-ho khua Gibea ka va thleng a, ka hmei nên hian kan riak a. Gibea mite chu zânah mi bei tûrin an lo thawk a, ka thlen in an rawn hual a; min thah an tum a, ka hmeinu chu an sual lui a, a thi ta hial a ni. Ka hmei chu inah ka hâwn a, a fuke chu ka chan a, Israel ramah ka thawn darh a nih kha; hetiang khawpa tenawmin an hur a ni. Ngai teh u, Israel fate u, hetah in awm kim vek a, engtia tih tûr nge in ngaih dân sawi teh u,” a ti a. Mipui zawng zawng chu thukhat vuain an tho va, “Puan ina awm kan ni emaw, ina awm kan ni emaw, tu mah kan haw lo vang. Hetiang hian Gibea chu kan sawisa ang: ṭhumvâwrin kan inbeih chhâwk ang a. Israel-te zinga mi sawma pakhat zelin mipuite ei tur an hlân ang a, mi dang chuan Gibea mite chu hetiang hurna thil tenawm hi an tih avâng hian an ching nek dâwn a ni,” an ti a. Tichuan, Israel rama mipa zawng zawng chu lungrual takin khua chu tihchhiat tumin an pung khâwm a. Israel hnamte chuan Benjamin-ho hnam ram tinah zualko an tîr a, “Engtizia nge hetiang thil sual hi in tih le? Gibea khaw mi, hetiang mi khawloho hi han hruai ula, kan lo that ang e, hetiang thil sual hi Israel zîngah kan tiboral tûr a ni,” an ti a. Mahse, Benjamin-ho chuan Israel-ho thu chu engah mah an ngai lo va. Benjamin-ho khaw tin aṭang chuan Israel mi dangte lo bei tûrin Gibea khuaah an lo kal khâwm a. Gibea khuaa mite bâkah Benjamin mi khaw hrang hrang aṭanga lo kalte chu khandaih keng ṭhalh sînghnih leh sângruk an ni. Gibea mi pawh, thlan chhuah ṭhalh zasarih an ni. Hêng mi thlan chhuah zînga zasarih chu veikhawr an ni a, virvawmin samzai pawh ṭhelh lovin an vawm chhum thei a ni. Israel mi, Benjamin-ho bei tûr chu mi nuaili, khandaih keng ṭhalh, indonaa kal tawh vek an ni. Israel mite chu an tho va, Bethel-ah an kal a, Pathian an râwn a, “Benjamin-ho bei tûrin tu hnam nge kal hmasa ang?” an ti a. Lalpa chuan, “Juda thlahte kal hmasa rawh se,” a ti a. Israel mite chu zîngah an tho va, Gibea khua hualin bûk an khuar a. Benjamin-ho bei tûr chuan an thawk chhuak a, khaw ep chuan an sipaite an tlar a. Benjamin-ho chu Gibea khua aṭang chuan an lo chhuak a, chumi ni chuan Israel mite chu mi sînghnih leh sânghnih an that a. Israel mite chu an infuih sauh sauh va, a hma nia bei tûra an han insiamna hmunah vêk khân an han intlar a. Chumi ni hma chuan Israel-te chu Lalpa hmaah ṭapin tlai thlengin an awm a, “Kan unau Benjamin-ho bei tûrin kan thawk leh ang em?” tiin an zâwt a. Lalpa chuan, “Bei leh rawh u,” a ti a ni. A ni hnih ni pawh chuan Israel-te chu Benjamin-ho bei tûr chuan an thawk leh a. Benjamin-ho chu a ni hnih ni pawh chuan Gibea khua aṭangin an lo chhuak a, khandaih keng ṭhiau mi sîngkhat leh sângriat an that leh ta a. Israel mi zawng zawng chu Bethel-ah an chho va, Lalpa hmaah an ṭap a, an ṭhu a, tlai thlengin chaw an nghei a, hâlral thilhlan leh remna thilhlan an hlân a. Chûng lai chuan Pathian Thuthlung Bâwm chu chutah chuan a awm a, Lalpa chu an râwn a. Arona fa Eleazara fapa Finehasa chu bâwm hmaah chuan a ding a, “Benjamin-ho, kan unaute bei tûrin kan thawk leh dâwn nge dâwn lo?” tiin a zâwt a. Lalpa chuan, “Kal leh rawh u, naktûk chuan in kutah ka pe ang,” a ti a. Israel mite chuan Gibea khaw bulah chângrutu an dah a. Ni dang ang bawkin Israel-te chu, a ni thum ni chuan Benjamin-ho bei tûr chuan an han intlar a. Benjamin-ho chu bei lêt tûrin an lo thawk a, khua ata chu an tlân chhuak a; ni dang ang bawk khân lovah te, kawngpui - Bethel leh Gibea panna kawngah te chuan Israel mi sawmthum zet an that leh ta mai a. Benjamin-ho chuan, “Tûn hma ang bawk khân kan that leh ta e,” an ti a. Israel-te chuan, “Tlânchhia ila, khawpui ata kawngpuiah hian min rawn ûm sela, lo chhuak teh se,” an ti a ni. Israel sipai nâwlpui chu Baaltamar-ah an tlân khâwm a, ṭan an lo la ta a; tin, Gibea khaw huala lungpui kâra biruho kha an lo zuang chhuak bawk a. Chûng mi thlan bîk sîngkhat chuan Gibea khua chu an bei ta chiam a, Benjamin-ho chuan an ralthum dâwn tih rêng an inhre lo. Lalpa chuan Israel-te chu Benjamin-ho a hnehtîr a, Israel-te chuan mi sînghnih leh sângnga leh za lai an that. Benjamin-ho chuan an chan a chhe ta dêr tih an inhre ta a. Israel sipai bupui chuan Gibea khua huala châng rutu an dahte kha rinchhanin an tawlh kîr a ni. Gibea khuaah chuan an tlân lût a, an insem darh a, an hmuh apiang an that a. Israel sipai bupui leh biruho khân rem an insiam a, khua aṭangin mei khu luih luih an hmuh chuan, indona hmuna Israel awmte chu lo lêt tûr an ni. Benjamin-ho khân Israel mi sawmthum an that hman tawh a, “Tûn hmaa kan tih ang bawkin kan ti leh dâwn e,” an ti a. Khua aṭanga mei a khûk chhoh ngut ngut veleh Benjamin-ho chuan an han thlîr lêt a, khua a kâng ta vek tih an hmuh chuan mak an ti êm êm a. Israel-te pawh an lo lêt a; Benjamin-ho chuan tihhlum vek an ni mai dâwn tih an inhriat chuan an chiai zo ta a. Israel-ho lak aṭang chuan an tawlh kîr a, tu ma awm lohna lamah tlân an tum a; mahse, an tlân chhuak thei lo, sipai nâwlpui leh khua aṭanga lo tlân chhuakte khân lehlam lehlamah an bei a ni. Israel-te chuan an hmêlmate chu ruangchaicheh an thlâk hnan a, Gibea chhak lamah an tlân a, an ûm a, an that zêl a. Benjamin sipai ṭha ṭha mi sîngkhat leh sângriat an that a. A ṭhen chu Rimon pûk panin an tlân a, kawngah mi sângnga lai chu an thi bawk a. Israel-te chuan Gidom thlengin an ûm a, mi sânghnih chu an that a. A vaiin Benjamin-ho chu mi sînghnih leh sângnga, indo mi hlîr, an thi a ni. Mi zaruk erawh chu Rimon pûkah an tlân a, thla li lai chutah chuan an awm a. Israel-te chu Benjamin-ho chungah chuan an che zêl a, mipa pawh, hmeichhia pawh, naupang pawh, an rante chenin an that fai vek a. Chûng lai vêla an khua zawng chu an hâl vek bawk a. Israel-te Mizpa khuaa an pun khâwm khân Lalpa hmaah thu an tiam tlat a, “Tu mahin kan fanute Benjamin-ho kan neihtîr lo vang,” an ti a. Israel mite chu Bethel-ah an kal a, Pathian hmaah tlai thlengin an ṭhu a, ring tak leh lungchhe takin, “Aw Lalpa, Israel-te Pathian, hetiang thil hi engtia lo thleng nge ni le, Israel-te zîngah Benjamin thlah an boral mai bîk dâwn hi,” an ti a. A tûkah chuan zîng takah maichâm an siam a, remna thilhlan leh hâlral thilhlan an hlân a. “Israel hnam zîngah Mizpa khuaa kal khâwmnaa tel ve lo an awm em?” tiin an inzâwt a. Mizpa khuaa kal lo chu tihhlum tûr an ti a, kal lo an awm lo a ni. Israel-te chuan an unau Benjamin-ho chu an khawngaih a, “Vawiin hian Israel-te chuan kan zînga hnam pakhat kan chân dâwn alâwm. Benjamin hnam la damte tân nupui engtin nge kan zawnsak ang? Lalpa hmaah kan fanute chu neihtîr tawp lo tûrin thu kan lo tiam tlat tawh si a,” an ti a. Mizpa khuaa inkhâwmpuia kal ve lo hnam an awm em tia an han inzawh chian chuan Gilead ram, Jabes khaw mi lo chu an awm vek a. Hming an han lam khân Jabes khaw mi chhâng tûr an awm lo. Pungkhâwmho hotute chuan an zînga mi huaisen sîngkhat leh sânghnih an tîr a, “Kal ula, Jabes khuaa mi zawng zawng, hmeichhia leh naupang lamin va that rawh u. Mipa that vek ula, hmeichhia pawh, mipa pâwl tawh chu that vek ang che u,” an ti a. Jabes-ho zîngah chuan nula, mipa la pawl loh zali an hmu a, Silo-ah Kanan ramah chuan an rawn hruai a. Rimon pûka awm Benjamin-ho hnênah palai an tîr a, beih an tum tawh loh thu an hrilh a. Benjamin-ho chu an lo kîr a, Israel-te chuan Jabes nula, an thah lohho chu, nupuiah an pe a; mahse, an indaih lo. Lalpa chuan Israel inpumkhatna a tihdarh tâk avângin mite chuan pawi an ti a, Benjamin-ho chu an lainat a. Pungkhâwm hotute chuan, “Benjamin zîngah nupui tûr hmeichhia an awm tawh si lo, nupui tûr la nei ve lote tân engtin nge nupui kan zawnsak ang? Israel-te hian kan zînga hnam pakhat mang kan phal tûr a ni lo. Benjamin-ho din chhuah lehna ngaihtuahpui tûr a ni; kan fanute lah kan neihtîr thei si lo: ‘mahni fanu Benjamin mi neihtîr chu ânchhia dawng rawh se,’ kan lo ti tawh si a,” an ti a. “Ngai teh u, Lalpa tâna kum tin Silo khuaa kût awm ṭhîn chu a hun leh ṭêp tawh alâwm,” tiin an ngaihtuah a. (Silo hi Bethel hmâr lam, Bethel aṭanga Sekem panna lamlian khawchhak lama awm, Lebona chhima awm a ni). Benjamin thlahte chu thu an pe a, “Kal ula, grep huanah te lo châng ru ula, Silo khaw nulate lâm tûr an lo chhuak ang a, grep huan aṭang chuan lo chhuak ula, Silo nulate chu mahni nupui tûr ṭheuh lo man ula, Benjamin ramah in hâwnpui dâwn nia. An paten emaw, an nuṭaten emaw an rawn sawi buai dâwn pawhin, ‘Khawngaih takin neih hlentîr mai teh u, râl anga inbeiin nupuiah an man pawh a ni lo va; nangni lahin in duh thu-a in pêk a ni hek lo va, in thutiam pawh in bawhchhe hlei nem,’ kan lo ti ang e,” an ti a. An sawi ang chuan Benjamin-ho chuan an ti a, Silo khuaa nula lâm zînga mi mahni nupui tûr ṭheuh an man a, an ramah an hâwnpui a, an awm ta a. Israel dangte chu mahni ram chanpualah an chi leh hnam ram ṭheuhvah an haw ta a. Chutih lai chuan Israel ramah lal an awm lo, ṭha an tih ang angin mi tin an awm mai a ni. Rorêltuten ro an rêl lai khân, Israel ramah ṭâm a tla a. Judai ram Bethlehem khuaa mi pakhat chu a nupui leh a fapa pahnih nên Moab ramah ṭâm tlân tûrin an kal a. Chu mi hming chu Elimeleka a ni a, a nupui hming chu Naomi a ni; an fate hming chu Mahlona leh Kiliona a ni. Judai ram Bethlehem khuaa Efrata mi an ni. Moab ramah chuan an kal a, chutah chuan an awm ta reng a. Naomi pasal Elimeleka chu a thi a; tichuan, Naomi chu a fapa pahnihte nên chauh an awm ta a. A fate chuan Moab mi nupuiah an nei a, pakhat hming chu Orpi a ni a, a dang hming chu Ruthi a ni. Chuta kum sâwm lai an awm hnu chuan Mahlona leh Kiliona chu an thi ve leh ta a, chu nu chu a pasal leh a fapate chuan an thihsan ve leh ta a. Tin, Lalpa chuan a mite a ṭanpui a, ei tûr a pe tih Moab ram aṭang chuan an lo hria a, a mote nên chuan Moab ram ata haw tûrin an insiam ta a. A mo pahnih nên chuan an awmna hmun chhuahsanin Judai ram an pan ta a. Nakinah chuan Naomi chuan a mo pahnihte hnênah chuan, “In nute in lamah haw ve ve zâwk rawh u, ka chungah leh in pasal thi tate chunga khawngaihna in lantîr ang khân, Lalpa chuan khawngaih che u rawh se. Lalpan in pahnihin thlamuang taka pasal te hmua in awm theih nân khawngaih che u rawh se,” a ti a. Anni chu a fâwp a, râwl chhuah meuhvin an ṭap ta a. A mote chuan, “Kan haw lo vang, i mite hnêna i kal tûr hi kan zui ve zâwk ang che,” an ti a. Naomi chuan, “Ka fanute u, haw zâwk rawh u. Engah nge ka hnênah chuan in kal ve kher ang? In pasal tûr fapa ka nei leh thei dâwn em ni? Ka fanute u, in in lamah haw leh rawh u. Pasal han nei tûrin ka upa lutuk tawh si a, ‘ka bei a la sei reng e,’ tiin zâninah pawh hian pasal neiin fapa te pawh han nei tehrêng ila, an puitlin thlengin in nghâk dâwn em ni ang? Pasal lovin in awm reng dâwn em ni? Ni lul lo ve, ka fanute u, nangmahni avâng hian ka rilru a na êm êm a ni, Lalpa kut ka tuar ta si a,” a ti a. Chu veleh râwl chhuah meuhvin an ṭap leh ta a, Orpi chuan a pi chu a fâwp a, a kîrsan ta a. Ruthi erawh chuan a vuan tlat a. Naomi chuan, “En teh, i mopui pawh a chite leh a pathian hnênah a hâwn leh tâk saw, i mopui saw zui haw ve rawh,” a ti a. Ruthi erawh chuan, “Nangmah ṭhen tûr leh kîrsan tûr che chuan min thlêm lo hrâm rawh; i kalna apiangah ka kal ang a, i riahna apiangah ka riak ang; i chite chu ka chite an ni ang a, i Pathian chu ka Pathian a ni ang. I thihnaah ka thi ang a, chutah chuan min phûm ve mai rawh se. Nang leh kei hi thihna chauh lo chuan thil dangin min ṭhen dâwn ai chuan Lalpan eng ang pawhin; a duh duhin min ti rawh se,” a ti a. A hnêna kal ve a tum tlat tih a hriatin Naomi chuan a ngawihsan ta a. Tichuan, Bethlehem thlengin an kal dûn ta a. Bethlehem an han thlen chuan a khuain an phu ta mur mur a, nuho chuan, “Hei Naomi kha a ni maw?” an ti a. Naomi chuan an hnênah, “Naomi min ti tawh suh u, Marai min ti zâwk rawh u. Engkimtitheia chuan na takin min thunun ta si a. Kokim takin kan kal chhuak a, Lalpa chuan kutbêngin min hruai hâwng leh ta a nih hi. Engati nge, Naomi min la tih cheu le, Lalpa chuan min thunun a, Engkimtitheia chuan ka chungah chhiatna a thlentîr ta si a,” a ti a. Naomi chu a monu Moab mi nên Moab ram aṭangin an lo kîr a, barli seng ṭan tirh laiin Bethlehem khua chu an lo thleng a ni. Naomi chuan a pasal Elimeleka laichîn, a hming Boaza, mi neinung tak chhûng hnai a nei a. Moab mi Ruthi chuan Naomi hnênah, “Ka va feh ang a, buhṭo ka va zawng ang e, min lo khawngaih thei an lo awm mahna,” a ti a. Naomi chuan, “Kal ta che, ka fanu,” a ti a. Tichuan, a kal ta a, buhsengtute buh lâk hmaih chu a va zawng a. Elimeleka laichîn Boaza lovah a va kal fuh hlauh va. Boaza pawh Bethlehem aṭang chuan a lo thleng ve a, buhsengtute hnênah chuan, “ Lalpa in hnênah awm rawh se,” a ti a. Anni chuan, “ Lalpa chuan malsâwm che rawh se,” tiin an lo chhâng a. Boaza chuan a chhiahhlawh, buhseng hotu hnênah chuan, “Hei, khawi lam hmeichhia nge ni le?” a ti a. A chhiahhlawh, buhseng hotu chuan, “He mi hi Moab hmeichhia, Naomi ruala Moab ram aṭanga lo kal kha a ni. ‘Buhsengtute buhphal khâwm hmaih ka zawng ang e,’ tiin min dîl a; rei lo tê bûka a han châwl zawk tih loh chu zîng aṭangin tûn thlengin rim takin a thawk reng a nih hi,” a ti a. Boaza chuan Ruthi hnênah chuan, “Ka fanu, ka hrilh a che. Lo dangah buhṭo zawng suh la, heta ta hi kal sawn suh ang che. Chhiahhlawh nulate hnênah hian awm ve reng la; khawi lamah nge buh an seng en thlithlai la, nulate hi zui zêl ang che. Tlangvâlte pawh eng mah tih lo tûr chein thu ka pe a; i tui a hâl chângin tuibêla tlangvâlte tui chawi sa hi i in ṭhîn dâwn nia,” a ti a. Tichuan, ani chu hmai lei siin a kûn a, “Kei hnam dang mi lehnghâl min hre duh a, heti taka min khawngaih hi engtizia nge ni le?” a ti a. Boaza chuan heti hian a chhâng a, “I pasal thih a chin tûn thlengin i pi chunga i thil tih zawng zawng miin min hrilh a; i nu te, i pa te, i pianna ram te kalsana, i la hriat loh mite zînga chêng tûra i lo kal dân te pawh min hrilh a ni. Lalpa chuan i thiltih man rûl che sela; Lalpa, Israel-te Pathian, inhumhim nâna a thlahnuai i rawn chuha chuan i ṭhat man pe ṭeuh che rawh se,” tiin. Ani chuan, “Ka pu, nangin min khawngaih avângin ka thla a muang ta. I chhiahhlawh nulate zînga mi ni lo mah ila, i chhiahhlawhnu hi ṭha takin i be ta si a,” a ti a. Chawfâk a lo hun chuan Boaza chuan a hnênah, “Hetah lo kal la, chhang te hi ei ve la, chhang hi uain thûrah te han chiah ve rawh khai,” a ti a. Tichuan, buhsengtute kiangah chuan a ṭhu ve a, chhangpêr a lo pe a, puar taka a ei hnuin a la ei bâng ta cheu va. Buhṭo chu a han zawng leh a, Boaza chuan tlangvâlte hnênah chuan, “Buh ahna zînga mi pawh la sela, hau suh ang che u. A têl aṭangin buhvuite phawichhuahsak ula, a chhar tûrin hnutchhiah ang che u, hau rêng rêng suh u,” a ti a. Lovah chuan tlai thlengin buhṭo chu a zawng a, a zawn sa chu a vua a, efa khat lai a ni. A phur a, khuaah a hâwnpui ta a, a pi chuan a buhṭo lâk chu a lo hmu a, Ruthi chuan an chhang ei bâng chu a phawrh a, ani chu a pe a. A pi chuan a hnênah, “Vawiinah khawi lama buhṭo nge i zawn a, tu lovah nge i va thawh le? A lo khawngaihtu che chu malsâwmin awm rawh se,” a ti a. Ruthi chuan a pi hnênah chuan a va thawhna chu hetiang hian a hrilh a: “Vawiina ka va thawhna pa chu a hming Boaza a ni,” a ti a. Naomi chuan a monu hnênah chuan, “ Lalpa, mi nung leh mitthi chunga a khawngaih bâng chuang ngai lova chuan ani chu malsâwm rawh se, chu mi chu kan chipûi, kan laichîn hnai tak a ni asin,” a ti a. Moab mi Ruthi chuan, “ ‘Buh hi an seng zawh thlengin hnathawktute zîngah hian thawk ang che’ min ti nghe nghe asin,” a ti a. Naomi chuan a monu Ruthi hnênah chuan, “A ṭhat chu, a hnathawk nulate zîngah hlîr thawk la, lo dangah zawng an khawih buai palh ang che,” a ti a. Tichuan, Ruthi chu Boaza nula chhawrte zîngah chuan barli leh huit seng zawh thlengin buhṭo zawng chuan a awm a, a pi hnênah chuan a awm ta reng a. Chumi hnu chuan a pi Naomi chuan a hnênah, “Ka fanu, ngaihngam taka i khawsak theihna tûr ka ngaihtuahsak ang che. A chhiahhlawh nulate nêna hna i va thawhna pa kha kan laichîn bul Boaza a ni. Ngai teh, zânin hi hruihah barli a zah fai zân a ni a. Inbual la, rimtui te inchulh la, i thawmhnaw ṭha ber inbelin hruihah chuan zu kal rawh. Amaherawhchu, a eia a in zawh hma chuan a hnênah inlan suh ang che. A mut hunah a mutna chhinchhiah la, a ke chu hlim la, mu ve ang che. Tichuan, i tih tûr chu a lo hrilh mai ang che,” a ti a. Ruthi chuan, “I sawi ang chuan ka ti ang e,” a ti a. Tichuan, hruih lamah chuan a chhuk a, a pi hrilh ang chuan a ti ta a. A eia a in zawh hnu chuan Boaza chu hlim takin buh vûm sirah chuan a mu ta a. Nakinah chuan Ruthi chu dîm têin a va kal a, a ke chu a hlîm a, a mu ve ta a. Zanlaiah chuan Boaza chu a lo ṭhangharh a, a han hawi a, a ke bula hmeichhe lo mu reng chu a hmu ta a. “Tu nge i nih?” a ti a. Ani chuan, “I chhiahhlawhnu Ruthi ka ni. Kan laichîn bul i ni bawk a, i puan kha mi han zâwn teh,” a ti a. Ani chuan, “ Lalpa chuan malsâwm che rawh se; tlangvâl rethei emaw, hausa emaw i zui mai mai loh dânah hian, tûnhma ai mahin tûnah hian i chhûngte laka i rinawmzia i tilang ta a ni. Hlauthâwng suh aw, i thil duh chu ka tihsak vek ang che. Kan khaw mipuite hian hmeichhe fel tak i nih an hria asin. Eng pawh ni se, in laichîn bul chu ka ni ngei mai; amaherawhchu, kei aia bul zâwk a la awm. Zânin chu hetah mu ve phawt la, naktûkah laichîn bul tih tûr a tih duh loh erawh chuan keiman ka ti ang tih Lalpa chhâlin tûnah ka tiam a che, khawvâr hma chu mu ve phawt mai rawh,” a ti a. Khawvâr hma chu a ke bulah chuan a mu a, zîng takah tu ma hriat hmain a tho va; Boaza chuan, “Hruiha i lo kal hi tu man hre suh se,” a ti a. Tin, a hnênah, “I puan bah lai kha han la la, dawh rawh le,” a ti a. Tichuan, a phah a, barli ṭîn khat zet a ruhsak a, puanah chuan a chhûng a, Ruthi chuan khuaah a hâwnpui ta a. A pi hnên a han thlen chuan, “Ka fanu, eng nge i an le?” a lo ti a. Ruthi chuan a chunga Boaza thil lo tih zawng zawng chu a hrilh a. “I pi hnênah chuan saruakin haw suh, tiin he barli ṭîn khat hi min pe a ni,” a ti a. Naomi chuan, “Ka fanu, thil inher dân tûr i hriat hma chu nghâk hle hle mai rawh; thil a chin fel hma chu a ngawi mai mai dâwn si lo,” a ti a. Boaza chu rorêlna hmun kulh kawngkaah chuan a chho va, a ṭhu a. An laichîn bul, a chungchâng Boazan a sawi kha a lo kal a. Boaza chuan, “Unaupa, hetah lo kal la, ṭhu teh khai,” a ti a. A lo kal a, a ṭhu ta a. Boaza chuan chu khuaa upa sâwm a khâwm a, an hnênah, “Hetah hian ṭhu teh u khai,” a ti a, an ṭhu ta a. An laichîn bul bera hnênah chuan, “Moab ram aṭanga lo kîr Naomi chuan kan unaupa Elimeleka ram kha hralh a duh a; nang hi hrilh hmasak che ṭhain ka hria a, i tlan duh chuan hêng upaho hriatah hian tlan ta che; i tlan duh loh erawh chuan min hrilh rawh; nang lo chu tu mah tlantu tûr an awm lo; tin, kei hi i dawt chu ka ni,” a ti a. Ani chuan, “Ka tlan ang e,” a ti a. Boaza chuan, “Naomi hnên aṭanga ram i lei hun chuan mitthi hming dai lova ram chanpual luahtu tûr an awm zêl theih nân Moab hmeichhia, mitthi nupui chu, i nei tel bawk tûr a ni,” a ti a. An laichînpa chuan, “Ka tân chuan ka tlan thei lo, chutilo zawng, ka roluah chungchângah harsatna ka siam dah ang e, tlantu tûr ka nihna pawh nangman chang mai la, ka tlan thei lo a ni e,” a ti a. Hmânlaiin Israel-ho zîngah thil an leiin emaw, an inthlengin emaw a nemngheh nân a hralhtuin a pheikhawk a phelh a, a leitu hnênah a pe ṭhîn. Hei hi Israel-te zîngah tih ṭhin dân a ni. An laichînpa chuan Boaza hnênah, “I tân nangman lei mai rawh,” tiin a pheikhawk a phelh a, a pe a. Boaza chuan upaho leh mipui zawng zawng hnênah, “Vawiin hian Elimeleka thil neih zawng zawng te, Kiliona leh Mahlona thil neih zawng zawng nên Naomi hnên aṭangin ka lei ta tih hretu in ni e. Chu bâkah, mitthi hming chu dai lova, a ro luahtu siamsak tûr leh mitthi chu a chipuite zîngah leh a awmna khaw kulh kawngkaa hriat reng a nih theih nân, Moab hmeichhia, Mahlona nupui chu, ka nupui atân ka nei ta a; tûnah, nangniho hi a hretute in ni e,” a ti a. Tichuan, kulh kawngkaa upaho leh mipui awm zawng zawng chuan, “Hretute kan ni e, i ina hmeichhia lo lawi chu, Israel chhûngkaw dintu pahnih Rakili leh Leaii ang khân Lalpa chuan siam rawh se. Nang pawh, he hnam zîngah hian mi ropui tak ni la, Bethlehem mi hmingthang tak ni ang che. Lalpan he hmeichhe lakah hian fate pe che sela, i chhûngkua chu Juda-in Tamari laka fa a hrin Pereza chhûngkua ang lo ni rawh se,” an ti a. Boaza chuan Ruthi chu nupui atân a hruai a, an awm dûn ta a. Lalpa chuan nau a paitîr a, fapa a hring ta a. Chuta hmeichhiate chuan Naomi hnênah, “Vawiina laichîn bul chham lova awmtîrtu che Lalpa chu fakin awm rawh se; I tupa chu Israel ram pum puiah a hming lo thang sela, ani chu i nun tihlimtu leh i tar châwmtu lo ni rawh se. I monu, nangmah hmangaihtu, fapa pasarih aia tama hlu zâwk chuan ani hi a hrinsak ta si che a,” an ti a. Naomi chuan nau chu a la a, a pawm a, a awm ta a. An vênga hmeichhiate chuan a hming an sa a, “Naomi tân fapa a lo piang ta,” tiin a hmingah Obeda an sa a, chu mi chu Davida pu, Jesaia pa a ni. Hei hi Pereza chhûngkua inthlah chhâwn dân chu a ni. Hezrona chu Rama pa a ni, Rama chu Aminadaba pa a ni a. Aminadaba chu Nasona pa a ni a, Nasona chu Salmona pa a ni. Tin, Salmona chu Boaza pa a ni a, Boaza chu Obeda pa a ni, Obeda chu Jesaia pa a ni a, Jesaia chu Davida pa a ni. Efraim tlângrama Ramathaim-zofim khuaah mi pakhat a awm a, a hming chu Elkana a ni. Chu mi chu Jehorama fapa a ni a, Jehorama chu Elihua fapa a ni. Elihua chu Tohua fapa a ni. Nupui pahnih a nei a, pakhat hming chu Hani a ni a, pakhat hming chu Penini a ni. Penini chuan fate a nei a, Hani erawh chuan fa a nei ve lo. Chu mi chu Engkim Lalpa chibai bûk tûr leh a hnêna thilhlan hlân tûrin kum tin a awmna khua aṭang chuan Silo khuaah a chho ṭhîn. Chutah chuan Elia fapa pahnih, Hofnia leh Finehasa, Lalpa puithiamte chu an awm a. Elkanan thilhlan a hlan ni chuan a fapa te, a fanu te tân chanvo a siamsak ṭheuh va. Hani chu hmangaih hle mah se, Lalpa chuan fa nei thei lova a siam avângin chan khat chauh a siamsak ṭhîn. Fa a neih theih loh avânga a lungngaihna tizual tûrin amah ertu Penini chuan a deusawh ṭhîn a. Chutianga kum tin Lalpa ina an kal ṭhin lai chuan a ertunu chuan a tilungngai hle ṭhîn a ni. Chuvâng chuan, a ṭap a ṭap a, chaw pawh a ei lo va. A pasal Elkana chuan, “Hani, engtizia nge chaw i ei duh loh? Engati nge i rilru a nat le? Fapa sâwm aiin i tân ka hlu zâwk lo em ni?” a ti ṭhîn a. Vawi khat chu Silo khuaa an eia an in zawhin Hani chu a tho va. Chutih lai chuan puithiam Elia chu Lalpa in kawngka ban bul ṭhutthlêngah a ṭhu a. Hani chu lungchhe taka ṭap chungin Lalpa hnênah a ṭawngṭai a. Hetiang hian thu a tiam ta a, “Aw Engkim Lalpa, i bawihnu chan chhiatzia hi min hriatsak a, i bawihnu hi thlahthlam lova fapa min pêk chuan a dam chhûng zawng Lalpa ka pe ang a, a lu pawh meh a ni rêng rêng lo vang,” a ti a. Chutianga Lalpa hnêna a ṭawngṭai lai chuan a hmui phun chu Elia chuan a lo en reng a, Hani chu ṭhahnemngai takin a ṭawngṭai a, ri lovin a hmui chauh a phun a, Elia chuan zu a rui emaw a ti a. Elia chuan a hnênah, “Eng chen nge i ruih dâwn le? I uain in chu dah bo teh khai,” a ti a. Hani chuan, “Ka pu, ka rui lo asin, hmeichhe lungngai tak ka nih hi, uain pawh, zupui pawh ka in rêng rêng lo; Lalpa hnênah ka rilru natna ka thlen a nih hi. I bawihnu hi hmeichhe sualah puh suh; lungngai leh mangang takin ka ṭawngṭai a nih hi,” a ti a. Elia chuan, “Thlamuang takin kal la, a hnêna i dîl chu Israel-te Pathian chuan pe che rawh se,” a ti a. Ani chuan, “I chhiahhlawhnu hi min duhsak zêl rawh aw,” a ti a. Tichuan, Hani chu a chhuak a, chawte a ei a, lungngai hmêl a pu ta lo va. A tûkah chuan zîng takah an tho va, Lalpa hnênah an ṭawngṭai a, Rama khuaa an in lamah chuan an haw ta a. Elkana chuan a nupui Hani chu a pâwl a. Lalpa chuan ani chu a hre reng a. Chumi hnu chuan Hanin nau a pai a, fapa a hring a, “ Lalpa hnêna ka dîl chhuah a ni” tiin a hmingah Samuela a sa a. Elkana leh a chhûngte chu Lalpa hnêna an kum tin thilhlan hlân tûr leh an thutiam hlen tûrin an chho va, Hani erawh chu a kal ve lo. A pasal hnênah chuan, “Naupang hian hnute hnêk a bân hunah ani chu ka hruai ang a, Lalpa hnênah ka hlân ang a, chutah chuan a awm reng tawh ang,” a ti a. A pasal Elkana chuan a hnênah, “Ṭha i tih ang chuan ti rawh, hnute hnêk i bântîr thlengin awm la, Lalpa chuan i tih ang chuan thlentîr rawh se,” a ti a. Hani chuan a fapain hnute hnêk a bân hma chuan inah a awmpui ta a. Hnute hnêk a bântîr hnu chuan a fapa chu a hruai a, chhangphut kg. sâwm leh uain bûr khat a keng a, bâwngpa kum thuma upa kaiin Silo khuaa Lalpa inah chuan a kal ta a, a fa chu a la naupang hle a. Bâwngpa chu an talh a, naupang chu Elia hnênah chuan an hruai a. Tin, ani chuan, “Aw ka pu, nangmah ngeiin i hria a; ih e, ka pu, kei hi he laia i hmaa Lalpa hnêna ṭawngṭai hmeichhia kha ka ni asin. He naupang dîl hian ka ṭawngṭai a; tichuan, Lalpan ka dîl chu min pe ta a. Chuvângin, ani chu Lalpa hnênah ka hlân a ni. A dam chhûng zawng Lalpa tâna hlan a ni,” a ti a. Chutah chuan Lalpa hmaah an kûn ta a. Hani chu hetiang hian a ṭawngṭai a: Lalpa chungah ka va lâwm êm! Thil ropui tak mi tihsak ta si a. Ka hmêlmate laka uanna tûr ka nei ta, A chhandamnaah chuan ka lâwm êm êm a ni. Lalpa anga thianghlim an awm lo, Nangmah ang rêng an awm si lo, Kan Pathian ang hi humhimtu dang an awm lo. Chapo takin ṭawng mai mai suh la, Chaltlai takin thu sawi suh. Lalpa chu engkim hretu Pathian a ni, Ani chuan mi tin thiltih a bûk fel ṭhîn. Mi chakte thalngul a titliak a, Mi chak lote a tichak thar leh ṭhîn. Tlai taka awm ṭhînte chu ei tûr zawngin an inhlawhfa a, Rilṭâm taka awm ṭhînte chu tlai takin an awm ta. Chingin fa pasarih a nei a, Fa tam tak hringtu chu khawharin a awm ta. Lalpa chuan a tihlum ṭhîn a, a tinung bawk ṭhîn. Thlânah a chhuktîr a, a hruai chhuak bawk ṭhîn. Lalpa chuan a tipachhia a, a tihausa ṭhîn; A titlâwm a, a chawisâng bawk ṭhîn. Retheite chu vaivut ata a kaitho va, Pachhiate chu êkdûr ata a chawikâng ṭhîn. Anni chu milian zîngah a teltîr a, Chawimawina lalṭhutthlêng a chantîr ta. Leilung nghahchhan chu Lalpa ta a ni a; A chungah khawvêl hi a nghat a ni. A mi thianghlimte ke chu a vêng ang a, Mi sualte erawh chu thim zîngah an boral ang. Tu mah, an chak avângin an dingchang lo vang. Lalpa dotute chu an thlabâr ang a, Vân aṭangin khawpui riin a do vang a, A ruat, lal chu a tichak ang a, A hriakthiha chu a chawimawi ang,” tiin. Chutichuan, Elkana chu Rama khuaa a inah a haw ta a, naupang erawh chu Lalpa rawng bâwlin puithiam Elia hnênah chuan a awm ta a. Elia fapate chu an sual hle a, Lalpa pawh an pawisa lo. Mipui laka puithiamte awm dân tûr angin an awm lo va. Thil hlân tûra mi an lo kalte hian an chhiahhlawhte chu thîrkut kengin an lo kal a, bêl rawng zau emaw, bêl dâwt nei emaw, bêl khaina nei emaw, bêl pangngai emaw chhûng chu an zu chhun a, sa thurna thîrkuta an lâk chhuah apiang chu puithiamin a nei ṭhîn a. Chutiang chuan Israel mi Silo khuaa lo kal zawng zawngte chu an lo tihsak ṭhîn a ni. Chu chauh a ni lo, a thau chu an hâl hmain chhiahhlawhte chu an lo kal a, inthawina hlântu hnênah chuan, “Puithiam tâna hem hmin tûr sa min pe rawh, i sa chhum hminsa a duh lo, a hel a ni a duh ni,” an ti ṭhîn. Inthawina hlântu chuan a hnênah, “A thau chu hâl phawt sela, chumi hnuah i duh zât zât la ang che,” an lo tih pawhin, “Ni lo, min pe nghâl rawh, min pêk loh chuan ka la lui rêng rêng dâwn,” an ti ṭhîn. Tichuan, Lalpa hnêna thilhlan chu miten an lo ngainêp ta hle a; chuvângin, tlangvâlte sualna chu Lalpa mit hmuhah a huatthlala êm êm a ni. Samuela chu la naupang hle mah se, puithiam kawr, puan zaisîna siam hâ-in Lalpa rawng a bâwl a. Kum tinin a nuin kawrfual a ṭhuisak a; kum tin a pasal nên thil hlân tûra an kal apiangin a kensak ṭhîn. Elia chuan Elkana leh a nupui chu mal a sâwm a, “ Lalpa tâna fa in hlan rulh nân he hmeichhia hi fa dang pe rawh se,” a ti a; tichuan, an in lamah an haw ta a. Lalpa chuan hmeichhia chu a kan a; tichuan, nau a pai leh a, fapa pathum leh fanu pahnih a hring ta a. Tin, naupang Samuela chu Lalpa kiangah chuan a seilian ta a. Elia chu a lo tar ta hle a; a fapaten Israel mite chunga an thil sual tih zawng zawng leh Inbiakna bûk kawngka bula rawngbâwltu hmeichhiate an lo mutpui ṭhin thute chu a lo hria a. Tichuan, an hnênah, “Engati nge hetiang thil hi in tih le? Hêng thil ṭha lo in tih hi mi tinin min hrilh asin. Ka fate u, ti tawh rêng rêng suh u, Lalpa mite zînga thuthang ka hriat hi thil ṭha lo tak a ni. Mi pakhat mi dang chunga a sual chuan Pathianin a sawipui ṭhîn; amaherawhchu, Lalpa chunga mi a sual chuan tu nge hum ta ang le?” a ti a. Chuti chung pawhin an pa thu chu an awih duh chuang lo va; chuvangin, Lalpa chuan anni chu tihhlum a tum ta a ni. Tin, naupang Samuela chu a lo ṭhang lian deuh deuh va; Lalpa leh mihringte duhsak a hlawh a. Tin, Elia hnênah chuan Pathian mi, mi pakhat a lo kal a, a hnênah, Lalpa chuan heti hian a ti, “Aigupta rama Farawa bawiha an awm lai khân in pate hnênah ka inlâr a ni lâwm ni? Arona chu Israel hnam zawng zawng zîng ata ka maichâma kala, rimtui hâla, puithiam kawr haa ka hmaa puithiam ni tûrin ka ruat a ni lâwm ni? Tin, i pute chu Israel mite hâlral thilhlan zawng zawng ka pe a ni lâwm ni? Ka hnêna inthawina leh ka tâna thilhlan, ka chanpual atâna ka ruat chu engati nge in hmuhsit le? Engati nge kei aia i fate i dah pawimawha mahni intihthau nâna ka mi Israel-te inthawina, a ṭha ṭha in ît le? I chhûngte leh i pa chhûngte chuan kumkhuain ka hmaah rawng an bâwl ang, tiin ka lo tiam tawh na a; tûnah, Lalpa thuchhuak chuan heti hian a ti; ‘In bâwl tawp lo vang, mi chawimawi apiang ka chawimawi ang a, mi hmusittu chu ka hmusit ang. Ngai teh, i chakna te, i pa chhûngte chakna te ka tihchhiat ni chu a lo thleng dâwn ta; in chhûng zîngah tarkûna dam rêng in awm lo vang. Israel mi dangte mal ka sâwmna chu i hmuhin i awt ang a, i thîk ang, i fate tu mah tarkûna dam an awm lo vang. Tin, ngai teh, i thlah, ka maichâma rawngbâwl tûra ka zuah chhun chu i mit tikhamtu leh i rilru tinatu mai a ni ang; i thlah i ina lo piang dang zawng zawng chu an vânglai takin an thi ang. Hei hi i tâna chhinchhiahna lo thleng tûr chu a ni: I fapate pahnih Hofnia leh Finehasa hi ni khatah an thi dûn ang. Ka tân puithiam rinawm tak ka din thar leh ang a, chu chuan ka duhzâwng takin thil a ti ang. An chhûngkua nghet takin ka din ang a, ka hriakthiha hmaah chuan rawng a bâwl reng ang, Tin, i thlah la dam chhunte chu a hmaah chuan chhang nawi leh pawisa dîlin an kûn ang a, ‘Ei tûr kan hmuh theih nân puithiam hna eng emaw tal min thawhtîr ta che,’ an ti ang,” a ti a. Naupang Samuela chuan Elia kaihhruaiin Lalpa rawng a bâwl a. Chûng lai chuan Lalpa thu a thleng khât hle a, inlârna pawh a thleng zen zen lo. Tin, Elia mit chu a chak tawh lo va, khua pawh a hmu ṭha tawh lo va, a dân pangngaiin a mut hmunah chuan a mu a. Samuela chu Lalpa in, Thuthlung Bâwm hûnna bulah chuan a mu a. Khua a vâra, khâwnvâr an tihmih hmain, Lalpa chuan Samuela chu a ko va. Samuela chuan, “Eng nge ni?” a ti a. Elia hnênah chuan a kal a, a hnênah, “Eng atân nge min koh?” a va ti a. Elia chuan, “Ka ko lo che, va mu leh tawh,” a ti a. Tichuan, a kal a, a va mu leh ta a. Lalpa chuan Samuela chu a ko leh a; tichuan, Samuela chu a tho va, Elia hnênah chuan a kal leh a, “Eng atân nge min koh?” a ti a. Samuela chuan Lalpa aw a ni tih a la hre rih lo, Lalpa aw chu a la hre ngai lo va ni. Lalpa chuan Samuela chu a ko leh a, chu chu a vawi thumna a ni. Tichuan, a tho va, Elia hnênah a kal leh a, “Eng atân nge min koh?” a ti a. Elia chuan naupang chu Lalpan a ko a ni tih a hre ta a. Elia chuan Samuela hnênah chuan, “Kal la, va mu leh la, a koh leh che chuan, ‘Aw Lalpa, thu sawi rawh, i chhiahhlawh hian a ngaithla e,’ ti ang che,” a ti a. Samuela chu a kal a, a va mu leh ta a. Lalpa chu a lo kal a, a ding a, a hmaa a koh ang khân, “Samuel, Samuel,” a rawn ti a. Samuela chuan, “Thu sawi rawh, i chhiahhlawh hian a ngaithla e,” a ti a. Lalpa chuan Samuela hnênah, “Ngai teh, Israel ramah hian a hria apiang thin tiṭhâwng zawk tûr ka thlentîr dâwn. Chumi ni chuan Elia chhûngkaw chungchânga ka lo sawi tawh chu a bul aṭanga a tâwp thlengin ka thlentîr ang. A fapaten Pathian laka thil sual an tih hre reng chunga a khap loh avângin an chhûngkua chu ka hrem kumkhua dâwn tih ka hrilh tawh si a. Chuvângin, Elia chhûngkaw bawhchhiatna chu inthawinain emaw, thilhlanin emaw engtikah mah tihkian theih a ni lo vang’ tiin Elia chhûngkaw chungchâng thu ka lo tiam tawh a ni,” a ti a. Samuela chu zîng thlengin a mu a, Lalpa in kawngkhârte chu a hawng a, inlârna thu chu Elia hrilh a hreh hle a. Nimahsela, Elia chuan Samuela chu a ko va, “Samuel, ka fapa,” a ti a. Ani chuan, “Eng nge ni, ka pu?” a ti a. Elia chuan, “Eng thu nge i hnênah a sawi? Ka hnênah eng mah zêp suh; i hnêna a sawi eng pawh ka laka i zêp chuan Pathianin na takin a hrem ang che,” tiin a vau va. Tichuan, Samuela chuan eng mah zêp lovin a hrilh ta vek a. Elia chuan a hnênah, “ Lalpa a nih chu, ṭha a tih ang zêlin ti rawh se,” a ti a. Samuela chu a lo ṭhang lian deuh deuh va, a hnênah Lalpa chu a awm a, a sawi apiang a lo thleng dik zêl a. Dan aṭanga Beer-seba thlengin Israel mi zawng zawng chuan Samuela chu Lalpa zâwlnei dik tak a ni tih an lo hre ta a. Silo khuaah chuan Lalpa chu a inlâr zui zêl a. Silo-ah chuan Lalpa chu thuin Samuela hnênah a inlâr a. Samuela thu chu mi zawng zawngin an ngaichâng a. Israel mite chu Filistia mite do tûrin an lo chhuak a, Ebenezer-ah ṭanhmun an khuar a. Filistia mite pawhin Afek-ah ṭanhmun an khuar bawk a. Filistia sipaite chu Israel-te bei tûrin an inzâr pharh a, an han inbei a, Filistia mite chuan Israel-te chu an hneh a, indona hmunah chuan mi sângli lai an that a. An ṭanhmuna sipaite an lo kîr hnu chuan Israel upate chuan, “Engtizia nge vawiinah Lalpan Filistia mite hmaah min tihtlâwm aw. Hawh u, Silo khuaa Lalpa Thuthlung Bâwm kha han la ila; tichuan, kan keng zêl ang a, kan hmêlmate lakah min chhanhim dâwn nia,” an ti a. Mite chuan Silo-ah mi an tîr a, Cherub chunga ṭhu Lalpa Engkimtitheia Thuthlung Bâwm chu an va la a; chutah chuan Elia fa Hofnia leh Finehasa pawh an tel a. Lalpa Thuthlung Bâwm chu an riahhmun an rawn thlenpui veleh Israel mi zawng zawng chu lei nghawr ri dur dur khawpin an au va. An au thâwm chu Filistia mite chuan an lo hria a, “Hebrai-ho bûkah chuan engtizia nge an au chiam mai le?” an ti a. An bûkah Lalpa Thuthlung Bâwm a lo thleng a ni tih an hre ta a. Filistia mite chuan an hlau va, “An riahhmunah an Pathian a lo kal ta a nih chu! Kan boral dâwn ta, tûn hmain hetiang hi a la awm ngai lo. Kan chung a va pik êm, chu Pathian chak tak kut ata chu tu nge min chhan chhuak ang? Chu Pathian chu a ni thlalêra Aigupta mite hri ṭha lo pui puia tihlumtu kha. Mahse, Filistia mite u, zâm lovin huaisen takin bei rawh u, intimipa ula, bei rawh u, in chhiahhlawha an awm ang khân Hebrai-hote chhiahhlawha in awm loh nân,” an ti a. Tichuan, Filistia mite chuan an han bei vak a, Israel mite chu an tlâwm ta a, mi tin mahni in lamah an tlân haw ta a. Indonaah chuan Israel sipaite chu an that chiam a, sîngthum lai an thi a. Pathian Bâwm chu an lâksak a, Elia fa pahnih Hofnia leh Finehasa pawh chu an that bawk a. Chumi ni tak chuan Benjamina thlah mi pakhat indona hmun aṭang chuan a lo tlan haw a, a puan a pawtthlêr a, a luah vaivut a phul a, Silo khua a lo thleng a. A lo thlen chuan Elia chu kawng sîra ṭhutthlêngah a lo ṭhu a. Pathian Bâwm chu a ngaihtuah êm êm avângin a lo thlîr reng a; chu mi chuan khua a lo thlen chuan thil awmzia chu a rawn sawi a, a khuain an ṭap ta chuah chuah a. Elia chuan an ṭap thâwm chu a lo hriatin, “Engtizia ta mur mur nge?” a ti a. Chu pa chu Elia hnênah hmanhmawh takin a lo tlân a, a hrilh ta a. Elia chu kum sawmkua leh pariat lai a ni a, a mit a chak tawh lo va, khua pawh a hmu ṭha thei lo. Chu mi chuan Elia hnênah, “Indona hmun aṭangin ka lo haw a, vawiinah chu hmun aṭangin ka lo tlânchhia a ni,” a ti a. Elia chuan, “Ka fapa, eng angin nge thil a awm le?” a ti a. Chanchin thar rawn thlentu chuan, “Israel mite chu Filistia-ho hmaah an tlânchhia a, mi tam tak an that bawk a. I fate pahnih Hofnia leh Finehasa pawh an thi a, Pathian Bâwm pawh an chhuhsak ta,” a ti a. Pathian Bâwm chanchin a sawi lai tak chuan kawngka bula a ṭhutna aṭang chuan a zangthalin a tlu a, a ring a tliak a, a thi ta a. Tar tak a ni a, a inzo tawh lo va ni. Kum sawmli chhûng Israel-te chu a kaihruai a. Tin, a monu, Finehasa nupui chuan nau a pai a, a hrin a hun ṭêp tawh a. Pathian Bâwm an lâksak thu te, a pasala pa leh a pasal thih thu te a han hriat chuan nau a vei a, a hring ta nghâl a, a chau hle a. A hnuk a chat ṭêp a, nau chhartu hmeichhiate chuan, “Hlau suh, fapa i nei a nia,” an ti a; mahse, a chhâng miah lo va, a ngaihsak hek lo. “A hmingah Ikaboda ni rawh se, Israel ropuina chu a chuai ta si a,” a ti a. Pathian Bâwm an lâksak a, a pu leh a pasal an thi ta si a, Pathian Bâwm an lâksak avângin ‘Israel ropuina chu a chuai ta,’ a ti a ni. Filistia miten Pathian Bâwm an lâksak hnu chuan Eben-ezer aṭangin Asdod khuaah an kalpui a, Filistia mite chuan Pathian Bâwm chu Dagona biak inah an la lût a, Dagona bulah an dah a. A tûk zînga Asdod mite an han thawh chuan, ngai teh, Dagona chu bawkkhupin Lalpa Bâwm hmaah chuan a lo tlu dêr a. Tichuan, Dagona chu an la a, a hmun ngaiah an dah leh a. A tûk leh zînga an thawh chuan, ngai teh, Dagona chu Lalpa Bâwm hmaah chuan bawkkhupin a lo tlu leh dêr a. Dagona lu leh a kut bungte chu kawngka bulah a lo lum reng bawk a, a taksa chauh chu a lo awm reng a. Chu thil avâng chuan Dagona puithiamte leh Dagona biak ina lo kal ṭhîn zawng zawng chuan Asdod khuaa Dagona biak in kawngka bul chu tûn thlengin an la rap ngam lo va ni. Lalpa chuan Asdod-a mite chu na takin a hrem a, ngâwt na chi a veitîr a. Chu thil thleng chu Asdod miten an hmuh chuan, “Israel-te Pathian Bâwm chu kan hnênah awm tawh suh se, kan Pathian Dagona chungah leh kan chungah a kutthlâk a na êm mai,” an ti a. Tichuan, Filistia lal zawng zawng an ko khâwm a, “Israel-te Pathian Bâwm hi engtin nge kan tih tâk ang le?” an ti a. Anni chuan “Israel-te Pathian Bâwm hi Gath khuaah kalpui rawh u,” an ti a; tichuan, Israel-te Pathian Bâwm chu an va kalpui ta a. Khua an thlenpui hnu chuan Lalpa chuan chu khua chu a hrem a, khuaa mite chu natna râpthlâk tak a tuartîr a, a tê ber aṭanga a lian ber thlengin ngâwt na chi an vei ta a. Tin, Pathian Bâwm chu Ekron khuaah an thawn a, Pathian Bâwm a lo thlen chuan Ekron khuaa mite chuan, “Israel-te Pathian Bâwm chu keini leh kan mite tihlum tûrin an rawn la ta a nih hi,” tiin an au chiam a. Filistia lal zawng zawng chu an ko khâwm a, “Israel-te Pathian Bâwm hi la sawn ula, keini leh kan mite min tihhlum loh nân a awmna ngaiah dah leh rawh u,” an ti a. Pathian hremna chu a nat êm avângin khaw pum pui chu an buai nuai nuai a. A thi bangte chuan ngâwt na chi chu an vei a, chu khaw ṭap thâwm chuan vân a thleng a ni. Lalpa Bâwm chu Filistia ramah chuan thla sarih a awm a. Filistia mite chuan, puithiam te, aienthiam te an râwn a, “ Lalpa bâwm hi engtin nge kan tih dâwn le, a hmun ngaia thawn kîr leh dân tûr min hrilh rawh u,” an ti a. Anni chuan, “Israel-te Pathian Bâwm hi in thawn kîr a nih chuan a ruakin thawn kîr suh u, a hnênah tihsual man thilhlan hlân ngei ngei ang che u. Tichuan, tihdam in ni ang a, eng vânga a kut tuar nge in nih in hria ang,” an ti a. Mipui chuan, “Kan bawhchhiat thawi nâna a hnêna kan hlan tûr chu engte nge ni ang?” an ti a. Anni chuan, “Filistia lal zâtin ngâwt lem panga leh chaichîm lem panga rangkachakin siam rawh u; in hripui vei leh in lalte hri vei hi a thuhmun reng a ni. Ngâwt lem panga leh in ram tichhetu chaichîm lem panga in siamte chuan Israel-te Pathian chu chawimawi rawh u. Tichuan, nangni leh in puithiamte chu, in rante nên a hrem nêp deuh che u mahna. Farawa leh Aigupta miten an rilru an tikhauh ang khân engah nge in rilru in tihkhauh le? Na taka a sawisak hnuah Israel-te chu an chhuahtîr a, an kal ta a ni lo vem ni? “Tichuan, tûnah tawlailîr thar buatsaih ula, bâwngpui pahnih, a hnute sâwr lai, nghâwngkawl la bât ngai lo buatsaih bawk ula. Bâwng chu tawlailîr hnuhtîr ula, an note erawh chu in lamah hruai hawsak rawh u. Lalpa Bâwm chu la ula, tawlailîrah chuan dah rawh u. Tin, tihsual man thawina rangkachaka siam in pêkte kha bâwm dangah thun ula, Lalpa Bâwm sîrah dah ula, tawlailîr chu kaltîr rawh u. En reng ula, a awmna ram lam a pana, Beth-semes khaw lam pana a kal chuan hêng chhiatna nasa tak, kan chunga lo thleng hi ama tih a ni ngei ang. A kal loh erawh chuan min hremtu chu amah ni lovin kan chunga vânduaina lo thleng ve hrim hrim a ni ang,” an ti a. An hrilh ang chuan an ti ta a; bâwngpui hnute sâwr lai pahnih chu tawlailîr an hnuhtîr a, an note chu in lamah an khung a. Lalpa Bâwm chu tawlailîrah chuan an dah a, rangkachaka siam ngâwt leh chaichîm lem nên chuan an dah a. Bâwngpuite chu Beth-semes panin dîng takin an kal a, bû chung zêlin kawngpui chu an zawh a, ding lamah emaw, vei lamah emaw an pêng hauh lo. Filistia lalte chuan Beth-semes ramri thlengin an zui a. Beth-semes mite chuan ruamah buh an lo seng a; an han dâk a, bâwm chu an hmu ta a, an hlim hle a. Tawlailîr chuan Beth-semes khuaa mi Josua lo a va thleng a, lungpui lian tak awmnaah chuan a ding ta reng a, tawlailîr thing chu an ek a, bâwngpuite chu Lalpa hnêna hâlral thilhlanah an hmang a, Levia chite chuan Thuthlung Bâwm leh rangkachak ngâwt leh chaichîm dahna bâwm chu an chawi sawn a, lungpuiah chuan an hûng a. Beth-semes khuaa mite chuan chumi ni vêk chuan hâlral leh thilhlan dangte chu Lalpa hmaah an hlân a. Filistia lal panga chuan an en reng a, chumi ni chuan Ekron khaw lamah an haw leh ta a. An khawpui panga Asdod te, Gaza te, Askelon te, Gath te leh Ekron pual ṭheuhvin Filistia-ho chuan rangkachaka siam ngâwt lem panga Lalpa tân sual manah an hlân a. Kulh nei leh nei lo khuaa an lal panga hming kimin rangkachak chaichîm lem panga an telh bawk a. Lalpa Thuthlung Bâwm chu Beth-semes khaw mi Josua lova lungpui chungah an rawn dah a; chu lungpui chu tûn thlengin a la awm reng a ni. Lalpa Bâwm chhûng an en avâng chuan Beth-semes khuaa mite chu a hrem a, mi sawmsarih lai a tihlum a. Lalpan a hrem nasat êm avâng chuan mite chu an mangang hle a. Beth-semes mite chuan, “He Pathian thianghlim Lalpa hmaah hian tu nge ding thei ang le? Kan hnên ata tu hnênah nge a kal leh tâk ang?” an ti a. Tichuan, Kiriat-jearim mite hnênah mi an tîr a, “Filistia mite chuan Lalpa Bâwm an rawn dah leh ta a, lo chhuk thla ula, in hnênah i dah chho vang u,” an ti a. Tichuan, Kiriat-jearim mite chu an lo kal a, Lalpa Bâwm chu an la chho va, tlânga Abinadaba inah chuan an la lût a, a fapa Eliezara chu Lalpa Bâwm enkawltu atân an serh hrang ta a. Kiriat-jearim-ah chuan Bâwm chu kum rei tak, kum sawmhnih lai a awm ta a. Israel mite chuan Lalpa chu an ngai hle a. Samuela chuan Israel chhûng tin hnênah, “Thinlung leh tihtakzetin Lalpa lam hawi ula, ram dang pathiante leh Astarte limte chu dah bo ula, Lalpa hnênah chauh thilhlante hlân ula, a rawng chauh bâwl rawh u; tichuan, Filistia mite kut ata hi a chhan chhuak dâwn che u nia,” a ti a. Tichuan, Israel-te chuan Baal pathiante leh Astarte limte chu an paih bo va. Lalpa rawng chauh an bâwl ta a. Samuela chuan, “Israel mi zawng zawng Mizpa khuaah lo kal khâwm ula, Lalpa hmaah ka ṭawngṭaisak ang che u,” a ti a. Mizpa khuaah chuan an kal khâwm a, tui an chawi a, Lalpa hmaah an leihbua a, chumi ni chuan chaw an nghei a; chutah chuan “ Lalpa lakah kan lo sual ta a ni,” tiin an inpuang a. Mizpa khuaah chuan Samuela chu Israel-te chunga rorêltuah a ṭang ta a. Filistia mite chuan Mizpa khuaah Israel-te an kal khâwm tih an hriat chuan, Filistia rorêltute chu anmahni bei tûrin an lo chho va. Chu chu Israel-ten an hriat chuan Filistia-hote chu an hlau ta hle a. Samuela hnênah chuan, “Filistia mite laka kan him theih nân kan Pathian, Lalpa hnênah min dîlsak ngat ngat rawh,” an ti a. Samuela chuan, berâmno hnute hne lai a la a, hâlral thilhlanah Lalpa hnênah a hlân a, Israel mite tân Lalpa hnênah a dîlsak a. Lalpa chuan a chhâng a, Samuelan hâlral thilhlan a hlan lai tak chuan Israel-te bei tûrin Filistia mite chuan an rawn pan a; nimahsela, Lalpa chuan chumi ni chuan Filistia mite chungah khawpui nasa takin a rîktîr dur dur a, chu chuan a timangang a, Israel-te hma ata chu an tlân darh ta vek a. Israel mite chu Mizpa khua aṭang chuan an lo chhuak a, Filistia mite chu an ûm ta a, Beth-kar hnuai thlengin kawngah chuan an that zêl a. Samuela chuan lung a la a, Mizpa leh Sen inkârah chuan a phun a, “Hei chen hi Lalpan min pui a ni,” tiin a hmingah Eben-ezer a vuah a. Tichuan, Filistia mite chu an tlâwm ta a, Israel ram chu an rûn leh ta lo va. Samuela dam chhûng zawng Lalpa chuan Filistia mite lakah Israel-te chu a vêng a. Filistia miten Ekron leh Gath inkâra Israel-te khua an lâksak zawng zawng chu an pe kîr leh a. Israel-te chuan an ram chu Filistia mite kut ata an la leh a. Israel mite leh Amor mite pawh an inrem ta bawk a. Samuela chu a damchhûng zawng Israel-te rorêltu a ni a. Kum tin, Bethel te, Gilgal te, Mizpa khua te a tlawh kual a; chûng khuaa Israel-te chu ro a rêlsak ṭhîn. A in awmna, Rama khuaah chuan a lo kîr leh ṭhîn a, chuta awm Israel mite chu ro a rêlsak a; tin, chutah vêk chuan Lalpa maichâm a siam a. Samuela chu a lo upa ta hle a, a fapate chu Israel-te chunga rorêltuah a ruat a. A fa tîr hming chu Joela a ni a, a dawttu chu Abija a ni. Anni chuan Beer-seba-ah ro an rêl a. A fate chuan an pa chu an chhûn lo va, dik lo takin ro an rêl a. Chûng vâng chuan Israel upa zawng zawng chu Rama khuaa Samuela hnênah chuan an lo kal khâwm a, a hnênah, “Hei le, i lo upa ta hle si a, i fapate lah nangmah angin an khawsa si lo va; hnam dangte angin kan chunga rorêltu tûr lal min ruatsak rawh,” an ti a. A hnênah, “Ro min rêlsaktu tûr lal min ruatsak rawh,” an tih avâng chuan Samuela chu a lungni lo hle a, Lalpa hnênah a thlen ta a. Lalpa chuan Samuela hnênah, “Mipuiin i hnêna thil an sawi zawng zawng chu ngaithla teh; nang an duh lo che a ni lo, kei hi an lal atân min duh lo tihna a ni zâwk e. Aigupta ram ata ka hruai chhuah ni aṭanga tûn thlengin an thiltih dân zawng zawnga min hawisana, pathian dangte rawng min bâwlsan ṭhîn ang khân i chungah pawh an ti ve ta a nih hi. Tûnah, an thu ngaithla la, an chunga rorêltu lal chêt dân tûr ngunthlûk takin hrilh vek rawh,” a ti a. Samuela chuan Lalpa thu sawi zawng zawng chu lal dîltu mipui chu a hrilh a. An hnênah, “Hetiang hian in rorêltu lal chu a awm dâwn a ni: In fapate chu a sakawr-tawlailîr leh a sakawr enkawltuah a hmang ang a, a sakawr-tawlailîr hma lamah an tlân ṭhîn ang. Ṭhenkhat sipai sâng hotu-ah te, sawmnga hotu-ah te a ruat ang a; ṭhenkhat a leilettuah te, buh sengtuah te a ruat ang. Ṭhenkhatin indo hmanrua te, a sakawr-tawlailîr thuamte an siam ang a. In fanute chu rimtui siamtuah te, chawchhûmtu atân te, chhang siamtu atânte a hmang ang. In lo te, in grep huan te, in oliv huan te, a ṭha ṭha a chhuhsak ang che u a, a ṭhuihruaite hnênah a pe ang. In thlai leh in grep thar aṭangin sâwma pakhat a la ang a, hotute leh a ṭhuihruaite a pe ang. In chhiahhlawh mipa te, in chhiahhlawh hmeichhia te, in tlangvâl chak te, in sabengtung te a hna thawktu atân a lâksak ang che u. In berâm rual zîng ata sâwma pakhat a lâksak ang che u a, a chhiahhlawhah in ṭang ang. In thlan lalte lakah chhantu dîla in au hun a lo thleng dâwn; chutih hunah chuan Lalpa chuan a chhâng lo vang che u,” a ti a. Mahse, mipui chuan Samuela thu chu an ngaithla duh lo va, “Ni lo, lal kan nei ngei tûr a ni; tichuan, hnam dang zawng zawng ang kan lo ni ang a, kan lal chuan ro min rêlsak ang a, kan râl dote min dopui dâwn a ni,” an ti a. Samuela chuan mipui thu sawi zawng zawng chu a hria a, Lalpa hnênah a thlen leh a. Lalpa chuan Samuela hnênah, “An thu chu zâwm la, lal chu ruatsak rawh,” a ti a. Tichuan, Samuelan Israel mite hnênah, “Mi tin mahni khuaah haw ṭheuh rawh u,” a ti a. Benjamin thlah, mi pakhat huaisen tak leh chak tak a awm a, a hming chu Kisa a ni. Kisa chu Abiela fapa a ni, Abiela chu Zerora fapa a ni a, Zerora chu Bakorata fapa a ni, Bakorata chu Afia fapa a ni. Kisa chuan fapa a nei a, a hming chu Saula a ni. Ani chu tlangvâl hmêlṭha tak a ni a, Israel-te zîngah a tluka hmêlṭha tu mah an awm lo va, a koki thleng pawh an awm hek lo. Saula pa sabengtungte chu a bo va. Kisa chuan a fapa Saula hnênah, “Chhiahhlawh zînga pakhat hruai la, sabengtung bo va zawng teh khai,” a ti a. Tichuan, Efraim tlângram an fang vek a, Salisa ramte pawh an fang a; mahse, an hmu chuang lo. Saalim ram an fang leh a, chutah pawh chuan a awm lo va; tichuan, Benjamin mite ram an fang leh a; mahse, chutah pawh chuan an hmu ta lo fo va. Zufa ram an thlen chuan Saulan a chhiahhlawh hruai hnênah, “Khai, i hâwng teh ang, ka pain sabengtung ai mahin keimahni min ngaihtuah dah ang e,” a ti a. Ani chuan, “E taka, he khuaah hian Pathian mi, mi zahawm tak a awm a, a sawi apiang a thleng dik ṭhîn. Tûnah a hnênah kal ila, kan thil zawn kan hmuh theihna tûr kawng min hrilh thei mial mahna,” a ti a. Saula chuan a chhiahhlawh hnênah, “Kal ila, ani chu eng nge kan pêk ang? Kan chhang bâwm a ruak vek tawh si a, Pathian mi hnêna pêk tûr eng mah kan nei hauh lo, eng nge kan la neih le?” a ti a. A chhiahhlawh chuan ani chu a chhâng a, “En teh, hei, pawisa tlêm chu kan la nei e, Pathian mi chu ka pe ang a; tichuan, kan kalna tûr chu min hrilh mai ang,” a ti a. Tûn hmain Israel-te zîngah miin Pathian râwn an duh chuan, ‘hawh teh, hmutheitua hnênah i kal teh ang,’ an ti ṭhîn. Tûnlaia zâwlnei hi tûn hma chuan hmutheitu an ti ṭhîn a ni. Saulan a chhiahhlawh hnênah, “A ṭhat chu, i kal teh ang hmiang,” a ti a. Pathian mi awmna khuaah chuan an kal ta a. Khawpui pana tlânga an chhoh lai chuan nula rual tuichawi tûr an tâwk a, “Hetah hian hmutheitua a awm em?” an ti a. Anni chuan, “Awm e, in lo thlen hma lawk khân a lo thleng a; hmanhmawh ula, vawiinah hmunsângah mi an inthawi a, kan khuaah a lo thleng chiah a ni. Khua in han luh veleh inthawina hmuna chaw a ei hmain in han hmu mai ang. A thlen hma chuan miten chaw an ei lo vang; chu inthawina malsâwmna sawitu tûr chu a ni a, chumi zawhah mi sâwmte chuan chaw an ei thei a ni. Chho zêl ula, in han hmu mai ang,” an ti a. Khuaah chuan an chho va, an han luh chuan inthawina hmuna Samuela kal tûr chu an han hmu a. Saula lo thlen hma ni chuan Lalpa chuan Samuela chu a lo hrilh a, “Naktûk tûn ang hunah Benjamin chi mi pakhat i hnênah ka rawn tîr dâwn; ani chu ka mi Israel-te hotu atân hriak thih la; ani chuan Filistia mite kut ata ka mite chu a chhan chhuak ang. Ka mite au thâwm ka beng a lo thleng ta a, ka ngaihven dâwn a ni,” a ti a. Samuelan Saula a hmuh veleh Lalpa chuan a hnênah, “I hnêna ka sawi kha he mi hi a ni; ani chuan ka mite ro a rêlsak ang,” a ti a. Saula chuan kulh kawngka bula Samuela awm chu a va hnaih a, “Hmutheitua in hi khawiah nge a awm, khawngaih takin min hrilh thei em?” a ti a. Samuela chuan, “Hmutheitua chu keimah hi ka ni, inthawina hmun panin ka hmaah chho ve la, vawiinah ka hnênah chaw ei ang che u. Naktûk zîngah in thil duh chu ka hrilh ang che u a; tichuan, in kal dâwn nia. In sabengtung, ni thum lai bo tawh chu lungkham suh u, an hmu tawh e. Israel-te mamawh ber chu tu nge ni? Nang leh i pa chhûngte hi an ni lâwm ni?” a ti a. Saula chuan, “Israel hnam zînga te ber, Benjamina hnam ka ni a, kan chhûngkua pawh Benjamin chi zînga tê ber kan ni asin. Engtizia nge ka hnêna chutiang thu i sawi le?” a ti a. Samuela chuan Saula leh a chhiahhlawh chu pindan lian takah a hruai lût a, an mi sâwm sawmthum zîngah chuan a hmun ṭha berah a ṭhuttîr a. Samuela chuan chawchhûmtu hnênah chuan, “Dah hran tûr ka tih che sahrang kha han la rawh,” a ti a. Tichuan, chawchhûmtu chuan a bawp a rawn la a, Saula hmaah chuan a hlui a. Samuela chuan, “Hei hi i chanpual tûr a ni, ei rawh, ka mi sâwmte nên tûna kan ei ho atân kan khêk a nih kha,” a ti a. Chumi ni chuan Saula chu Samuela te nên chaw an kîl ho ta a. Inthawina hmun aṭanga khuaa an chhuk hnu chuan Samuela chuan Saula chu in chung zâwlah a titipui a. Zîng takah an tho va, Samuela chuan in chunga Saula awm chu a ko va, “Insiam la, ka kaltîr tawh ang che” a ti a. Saula chu a insiam a, Samuela nên chuan an chhuak ta a. Kawtchhuah an zu thlen chuan Samuelan Saula hnênah, “I chhiahhlawh hi kal hmasaktîr teh,” a ti a; chhiahhlawh chu a kal ta a. “Nang chu hetah ding rih la, Pathian thu lo thleng ka hrilh ang che,” a ti a. Samuela chuan hriak bâwm chu a la a, Saula lu-ah chuan a leih a, a fâwp a, “A mi Israel-te chunga rorêltu atân Lalpa chuan hriak a thih ta che. Lalpa mite chungah ro i rêl ang a, anni chu an vêla an hmêlmate kut ata i chhan chhuak ang. Tin, hei hi, a mi Israel-te chunga rorêltu atân Lalpa chuan hriak a thih che a ni tih chhinchhiahna a ni ang: Vawiina min kalsan hnu hian Benjamin ramri Zelza hmun, Rakili thlân kiangah, mi pahnih i tâwk ang a, anni chuan i hnênah, ‘I sabengtung zawnte kha an hmu tawh e; i pa pawhin sabengtungte chu a ngaihtuah tawh lo, nangmah mawlh hi a ngaihtuah che a ni, ‘ka fapa chu engtin tak awm ang maw, a ti a ti mai,’ an ti ang. “Chuta ṭang chuan kal zêl la, Tabor hmuna sasaw thing dinna i va thleng ang a, chutah chuan Bethel hmuna Pathian be tûr mi pathumin an tâwk ang che a, pakhat chuan kêlno pathum a pawm ang a, pakhatin chhang tlang thum a keng ang, pakhat leh chuan uain bûr a keng bawk ang. Chibai an bûk ang che a, chhang tlang hnih an pe ang che a, la ang che. Chumi hnuah Gibea hmuna Pathian tlâng, Filistia sipaiho hmun i va thleng ang a; tin, khua i luh dâwn chuan zâwlnei rual an hmahruaituten perhkhuang te, benchhek te, phênglâwng te, ṭingṭang te tum chungin hmunsâng aṭanga lo chhuk i tâwk ang, thu an sawi dual dual ang. Lalpa thlarau chu nasa takin i chungah a lo thleng ang a, an ṭawng ang chuan i ṭawng ve ang a; tichuan, i nun a lo danglam ang. Tin, hêng chhinchhiahna hi i chunga a lo thlen kim hunah Pathianin a awmpui dâwn che a, a hruai ang zêl chein awm ang che. Gilgal-ah lo zu kal hmasa la, kei pawh hâlral thilhlante leh remna thilhlante hlân tûrin i hnênah ka lo chhuk ve ang. I hnêna ka lo kala, tih tûr ka rawn hrilh hma che chuan ni sarih thleng min lo nghâk ang che,” a ti a. Saulan Samuela a kalsan veleh Pathianin Saula chu thinlung thar a pe a, chung chhinchhiahna zawng zawng chu chumi ni chuan a chungah a lo thleng ta a. Gibea tlâng an han thlen chuan zâwlneiho chuan an lo tâwk a; tichuan, Pathian thlarauvin a man thut a, anmahni angin thu a sawi a, a lâm ve ta a. Tûn hmaa amah lo hre tawhten zâwlneiho angin thu a sawi ve ta tih an hmuh chuan, “Kisa fapa chungah hian eng thil nge lo thleng ta le? Saula chu zâwlnei zîngah a tel ve ta a ni maw?” tiin an inzâwt a. Chu khuaa mi pakhat chuan a chhâng a, “Hêng zâwlneiho pawh hi, an pate tute nge an nih bîk?” a ti a. “Saula zâwlnei a ni ve ta elo?” tih chu ṭawngkam takah an neih ta a ni. Zâwlnei anga thu a sawi zawh chuan Saula chu hmunsâng lamah a chho ta a. Saula pami chuan Saula leh a chhiahhlawh chu, “Khawi lamah nge in kal?” tiin a zâwt a. Ani chuan, “Sabengtung kan zawng a; kan hmuh zawh tâk loh avângin Samuela hnênah kan kal ta a ni,” a ti a. Saula pami chuan, “Samuela chuan in hnênah thu eng nge a sawi min hrilh teh,” a ti a. Saula chuan, “Sabengtung chu an hmu leh tawh tih min lo hrilh,” a ti a. Samuelan lal tûra a lo tih thu erawh chu a pami chu a hrilh lo. Samuela chuan mipui chu Mizpa khuaah Lalpa be tûrin a ko khâwm a. Israel fate hnênah chuan, “Israel-te Pathian, Lalpa chuan heti hian a ti: ‘Israel-te chu Aigupta ram aṭangin ka hruai chhuak a; Aigupta-ho kut ata leh nangmahni tiduhdahtu lal zawng zawng lak ata ka chhan chhuak che u a. In manganna leh chhiatna tinrêng laka chhanchhuaktu che u in Pathian ka ni a; nimahsela, tûnah min duh lo va, rorêlsaktu tûr lal min dîl a. Chuvângin, tûnah, a hnam leh a chi chiin Lalpa hmaah rawn inlan ṭheuh rawh u,’ a ti e,” a ti a. Samuela chuan Israel hnam zawng zawng chu a rawn inlantîr a; Benjamina hnam chu ṭhumvâwra thlan an lo ni ta a. Benjamin hnam chu a chhûng chhûngin an rawn inlan leh a, Matria chhûngte chu thlan an lo ni leh ta zêl a. A tâwpah Kisa fapa Saula chu thlan a ni ta a. Ani chu an han zawng a, an hmu ta lo va. Lalpa an râwn nawn leh a, “Ani hi a lo kal em ni?” an ti a. Lalpa chuan, “Kal e, bungraw zîngah a biru a ni,” a ti a. Tichuan, an tlân a, an va hruai chhuak a, mi zînga a han din chuan a sâng ber a, a koki pêl pawh an awm hauh lo va. Samuelan mi zawng zawng hnênah chuan, “ Lalpa mi ruat hi in hmu em? Mi zawng zawng zîngah amah ang rêng an awm loh hi,” a ti a. Mipui chu an au va, “Lal chu dam reng rawh se,” an ti a. Samuela chuan mipuite chu lal dinhmun leh a tih tûrte a hrilh a; lehkhabu-ah a ziak a, Lalpa inah a dah ta a. Samuela chuan mite chu an in lamah a hâwntîr ta ṭheuh va. Saula pawh Gibea khuaa a inah a haw ve ta a, mi huaisen, an thinlung Pathianin a khawihte chuan an zui a. Mi ṭhenkhat, kawhmawhbâwlho erawh chuan, “Engtin nge he pa hian min chhanhim theih tehlul ang?” an ti a. Ani chu an hmusit hle a, thilpêk eng mah an pe duh lo va. Saula erawh chu a ngawi reng a. Amon mi Nahasa chu Gilead rama Jabes khua bei tûrin a lo thawk a, a rawn hual a. Jabes mi zawng zawng chuan, “Kan hnênah thu thlung la, i rawng kan bâwl ang e,” an ti a. Amon mi Nahasa chuan, “In hnêna thu ka thlun dân tûr chu hetiang hi a ni ang: In mitmu ding lam ka kher chhuak vek ang a, chu chu Israel mi zawng zawng ka tihmualpho dân tûr a ni,” a ti a. Jabes khaw upaho chuan a hnênah, “Israel ram pumah zualko kan tlântîr theih nân ni sarih chhûng hun min pe rawh; chutah min chhantu tûr tu mah an lo lan loh chuan i hnênah kan inpe ang,” an ti a. Tin, zualkote chuan Saula awmna Gibea khua an va thleng a, mipui hnênah chuan chu thu chu an hrilh a. Mi zawng zawng chu mangangin an ṭap ta chuah chuah a. Chutih lai chuan Saula chu a bâwng khalhin lo lam aṭangin a lo hâwng a. Saula chuan, “Engati nge mipui chu an ṭah chuah chuah le?” a ti a. Jabes khaw mite thu rawn thlen chu an hrilh a. Chûng thu chu Saulan a hriat veleh Pathian thlarau chu a chungah a lo thleng chiam a, a thin a rim ta hle a. Bâwngpa pahnih a talh a, a sa chu a chansawm a, ram pumah a semtîr a, “Tu pawh Saula leh Samuela zui duh lo chu an bâwng hetianga tihsak a ni ang,” tiin a hrilh vek a. Mipui chuan Lalpa chu an hlau ta hle a, thukhat vuain an lo thawk chhuak a. Tin, Bezek hmunah a lo chhiar a, Israel mi chu nuaithum an ni a, Juda mi chu sîngthum an ni. Mi tirhte hnênah chuan, “Jabes mite chu ‘Naktûk ni tlângsân hmain kan chhan chhuak ang che u,’ tiin va hrilh rawh u,” an ti a. Mi tirhte chu an hâwng ta a, Jabes mite chu an va hrilh a; anni chu an lâwm ta hle a. Jabes mite chuan, “Naktûkah in hnênah kan inpe ang a; tichuan, in duh duhin min ti dâwn nia,” an ti a. A tûkah chuan Saula chuan mipui chu pâwl thumah a ṭhen a, vârṭianah Amon mite riahhmun an luhchilh a, ni tlângsân fe thlengin an that ta chiam a. An thah bangte chu an tlân darh vek a, pahniha awm dûn rêng rêng an awm lo. Mite chuan Samuela hnênah, “ ‘Saulan kan chungah ro a rêl tehlul ang maw’ titute kha tute nge ni? Chûng mite chu rawn hruai la, kan lo that ang e,” an ti a. Saula erawh chuan, “Vawiinah tu mah tihhlum tûr a ni lo; vawiinah hian Israel-te chu Lalpan a chhan chhuak ta si a,” a ti a. Samuela chuan mipui hnênah, “Hawh u, Gilgal-ah kal ila, chutah chuan lal neih hi i tinghet ang u,” a ti a. Mipui chu Gilgal-ah chuan an kal ta a, Saula chu Lalpa hmaah lal atân an tinghet ta a; tin, Lalpa hnênah inthawina an hlân ho va, Saula leh Israel mi zawng zawng chu an lâwm hle a. Samuela chuan Israel mi zawng zawng hnênah, “Ngai teh u, ka hnêna in sawi apiang ka ngaithla a, lal ka ruatsak ta che u a. Tûnah hian nangmahni hruaitu tûr lal in nei ta a. Kei chu ka lo tarin ka lute pawh a lo ṭuak ta a, ka fapate pawh in zîngah an awm a. Ka tleirâwl aṭanga vawiin thlengin ka kaihruai che u a. Khai le, Lalpa hmaah leh a hriakthih lal hmaah hian ka sualna han sawi teh u. Tu bâwngpa nge ka chhuhsaka, tu sabengtung nge ka chhuhsak ngai le? Tu nge ka buma, tu nge ka tihduhdah in hria em? Ka mit tidel tûrin thamna ka la ngai em ni? Hêng hi ka lo ti a nih chuan ka rûl leh vek ang,” a ti a. Anni chuan “Min bum ngai lo,” an ti a. Samuela chuan an hnênah, “Vawiin hian ka tihsual eng mah in hmu lo tih Lalpa leh a hriakthih lal chu hretu an ni e,” a ti a. Samuela chuan mipui hnênah, “ Lalpa chu Mosia leh Arona ruattu leh in pute Aigupta ram ata hruai chhuaktu a ni. Chutichuan, ngun takin ngaithla rawh u, Lalpan in pute leh in chunga dik taka thil a tih ṭhin dân Lalpa hmaah ka hrilh ang che u. Aigupta rama Jakoba a luh hnu khân in pute chuan puitu atân LALPA an au va; LALPA chuan Mosia leh Arona a tîr a, in pute chu Aigupta ram ata a hruai chhuak a, he ramah hian a awmtîr ta a. Nimahsela, Lalpa, an Pathian chu an theihnghilh a, ani chuan Hazor khaw sipai hotu Sisera kutah te, Filistia-ho kutah te, Moab lal kutah te a pe a, anni chuan an rawn hneh a. Tin, Lalpa chu an au va, ‘ Lalpa kan hawisan a, Baal te, Aseri rawngte kan bâwl avângin kan lo bawhchhe ta a ni. Tûnah kan hmêlmate lak ata min chhan chhuak la; tichuan, i rawng kan bâwl ang,’ an ti a. Lalpa chuan, Jerubaala te, Bedana te, Jeftha te, Samuela te a tîr a, anni chuan hmun tina in hmêlmate lak ata an chhan chhuak che u a, him takin in awm ta ṭhîn a. Tin, Amon mite lal Nahasa chu nangmahni do tûra a lo kal in hmuhin Lalpa in Pathian chu in lal a ni reng chungin ka hnênah, ‘Kan chunga rorêltu tûr lal kan duh ve,’ in ti a. Tûnah hian lal in dîl leh in thlan chu en teh u. Lalpa chuan lal a pe ta che u a nih hi. Lalpa in ṭih a, a rawng in bâwla, a thu in awih a, a dân in zawm a, nangni leh in lal, in chunga rorêltute nên chuan Lalpa in Pathian in zui chuan a ṭha ang. Amaherawhchu, Lalpa aw in pawisak lohva, a dân in zawm loh chuan in puten Lalpa kut an tuar ang khân nangni pawhin in tuar ve ang. Tûnah, ngaithla ngun rawh u, in tân thil ropui tak in mit hmuha a tih tûr hi lo en rawh u. Vawiinah hian huit an seng a ni lâwm ni? Khawpui rîktîr tûr leh ruah sûrtîr tûrin Lalpa chu ka au vang a; tichuan, lal dîl thu-ah hian Lalpa lakah thil in tihsual nasatzia in hria ang,” a ti a. Samuela chuan Lalpa chu a au va, chumi ni chuan Lalpa chuan khawpui a rîktîr a, ruah a sûrtîr bawk a; tichuan, mi zawng zawngin Lalpa leh Samuela chu an hlau ta hle a. Mite chuan Samuela hnênah, “Kan thih loh nân i chhiahhlawhte hi Lalpa, i Pathian hnênah min dîlsak teh, kan sualna dang zawng zawng belhchhahin he thil ṭha lo tak, lal hi kan lo dîl ta si a,” an ti a. Samuela chuan mipui hnênah, “He thil ṭha lo tak hi in lo ti ngei tak a; mahse, Lalpa chu hawisan chuang lo ula; tih tak zetin Lalpa rawng chu bâwl zâwk rawh u. Ṭangkaina nei lo milem chu be suh u, thil ṭha an tihsak lo che u a, an chhan chhuak thei hek lo che u a ni, engmah lo mai mai an ni si a. A hming ropui tak avângin Lalpa chuan a mite a paihthla dâwn lo. Lalpa chuan a mi atâna siam che u hi a lawmzâwng tak a ni si a. Kei pawhin ṭawngṭaisak che u bânsana, Lalpa chunga sual chu ka tân tih theih a ni lo. Thil dik leh ṭha chu ka kawhhmuh zêl ang che u. Amaherawhchu, Lalpa hi ṭih ula, rinawm tak leh ṭhahnemngai takin a rawng hi bâwl ang che u; in tân thil ropui tak a tihte kha hre reng rawh u. In sual luih zêl erawh chuan in lalte nên lam in boral vek ang,” a ti a. Saula chuan kum hnih chhûng Israel ramah ro a rêl a. Saula chuan Israel mi sângthum a thlang chhuak a. Mikmas-ah leh Bethel tlângramah a hovin an awm a, sângkhat chu Benjamin bial Gibea khuaah Jonathana hovin an awm a, mi dang chu a hâwntîr vek a. Jonathana chuan Geba hmuna Filistia sipai hmun chu a la a; chu chu Filistia mite chuan an lo hria a, Saula chuan “Hebrai mite khân lo hre rawh se,” tiin ram pumah tawtawrâwt a hamtîr a. Israel mi zawng zawng chuan, “Saulan Filistia sipai awmna hmun a bei a, Israel-te chungah chuan Filistia mite chu an thinur hle,” tih thu an lo hria a. Tichuan, Saula pui tûrin Gilgal-ah mipui an lo kal khâwm ta chiam a. Filistia mite pawh Israel-te do tûrin an lo pung khâwm bawk a; tawlailîr sîngthum, sakawr chungchuang mi sângruk leh sipai, tuifinriat kama ṭiau zât lai an ni, Beth-aven chhak lam Mikmas hmunah an lo chho va, ṭanhmun an khuar a. Israel mite chuan an dinhmun hlauhawmzia leh dan chêp an nih an inhriatin pûkah te, lei kuaah te, lungpui phênah te, tuichhunchhuahah te an biru a. Hebrai mi ṭhenkhat chu Jordan râla Gad ram leh Gilead ramah te an tlânchhia a. Saula chu Gilgal-ah a awm reng a, a hnêna sipai awm zawng zawng chu hlauvin an khûr an khûr a. Samuelan a lo tiam angin ni sarih a nghâk a, mahse, Samuela chu Gilgal-ah a lo kal lo va; tichuan, mite chuan an tlânchhiatsan ta a. Saula chuan, “Hâlral thilhlan tûr leh remna thilhlan tûrte chu ka hnênah han la rawh u” a ti a, hâlral thilhlan chu a hlân ta a. Hâlral thilhlante a hlân zo chiah tihah Samuela chu a lo thleng a, lo dawngsawng tûrin Saula chu a chhuak a. Samuela chuan, “Eng nge i tih le?” a ti a. Saula chuan, “Miten min tlânsan tawh tih ka hria a, nang lah chu i ni ruatah i lo thleng bawk si lo. Filistia mite chu Mikmas-ah an pung khâwm luih tawh mai si a. Gilgal-ah min rawn bei ṭêp a ni a; min pui tûrin Lalpa ka la ngên bawk si lo; chuvângin, hâlral thilhlan chu hlân lo thei ka ni lo va ni,” a ti a. Samuela chuan, “I thil tih dân hi a âtthlâk hle a ni. Lalpa, i Pathianin dân a pêk che hi i zâwm lo va, zâwm la chu Lalpan Israel-te chungah kumkhuain a laltîr tûr che a ni a le. Nimahsela, i lalna chu a tâwp dâwn ta, Lalpa thupêk i zawm loh avângin Lalpa chuan a mi duhzâwng tak a zawng a, a mite chunga rorêltu tûr a ruat tawh a ni,” a ti a. Samuela chuan Gilgal chu a chhuahsan a, Benjamin biala Gibea khuaah chuan a chho va, Saula chuan a hnêna la awm ve chu a chhiar a, zaruk lai an la ni. Saula leh a fapa leh an hnêna mi la awmte chuan Benjamin biala Gibea khuaah ṭan an la a, Filistia-ho erawh chuan Mikmas-ah ṭanhmun an khuar a. Filistia zînga râl hrât zualte chu pâwl thumah an inṭhen a, an bûk aṭang chuan pâwl khatin Sual rama Ofra lam an pan a, pâwl khatin Beth-horon lam an pan a; pâwl dang leh chuan thlalêr dep Zeboim ruam lam hawi ramri kawng an zawh a. Filistia mite chuan Israel ram pum puiah thîrdêng awm an phal lo va, “Hebrai mite hian, khandaih te, fei te an siam dah ang e,” an ti a ni. Israel mite chu bâwngtuthlawh te, leilehna thîr te, hreipui te, leilehna hmanrua te tah hriamtîr tûrin Filistia mite hnênah an chhuk ṭhîn. Bâwngtuthlawh leh lungrâl tihhriam man chu duli pahnih a ni a. Thîr hmâwr zum te, hreipui te, chhuntiang te tihhriam man chu duli a ni. An indo ni chuan Saula leh a fapa Jonathana chauh lo chuan an hote tu mahin khandaih emaw, fei emaw an nei lo. Filistia mite chuan an sipai pâwl khat chu Mikmas kalkhân vêng tûrin an tîr a. Ni khat chu Saula fapa Jonathana chuan a râlthuam kengtu hnênah, “Hawh, râl lehlama Filistia sipai hmunah sâwn i va kal teh ang,” a ti a. A pa chu a hrilh lo va. Saula chu Gibea ram hmâwr Migron hmuna theibuhfai buk hnuaiah a awm a. A hnêna awm sipaite chu zaruk lai an ni. Puithiam Ahija pawh puithiam kawr hain a awm bawk a. Ani hi Silo khuaa Lalpa puithiam, Elia fa Finehasa fapa Ikaboda unaupa Ahituba fa a ni. Jonathana chu râl lehlamah a kal tawh tih tu mahin an hre lo. Filistia sipai bûk Jonathanan a panna khân sîr tawnah chuan lungpui tohlâwt a awm a: a pakhat hming chu Boze a ni a, pakhat dang chu Senea a ni. Pakhat chu hmâr lam Mikmas lam hawi zâwngin a awm a, pakhat chu chhim lam Geba hawi zâwngin a awm a. Jonathanan a râlthuam kengtu tlangvâl hnênah chuan, “Hawh, serh tan lohho awmnaah sâwn i kal teh ang, Lalpan min ṭanpui ngei ang. An tam emaw, an tlêm emaw Lalpa tân min hnehtîr harsatna eng mah a awm lo,” a ti a. A râlthuam kengtu chuan, “I duh ang chuan ti la, ka zui zêl ang che. Ka phatsan lo vang che,” a ti a. Jonathana chuan, “Aw le, hnaih ila, hmuh tûrin i va inlan ang. ‘In hnêna kan lo kal hma chu lo awm rawh u,’ min tih chuan kan hmunah kan awm reng ang a, an hnênah kan chho lo vang. ‘Lo chho teh rêng u,’ min tih chuan kan chho vang a, chu chu Lalpan anni chu kan kutah min pe tawh a ni tih chhinchhiahna a ni ang,” a ti a. Tichuan, an pahnihin Filistia sipaiho hmuh tûrin an va inlan a. Filistia mite chuan, “En teh u, Hebrai mite an bihrûkna hmun ata an lo chhuak e,” an ti a. Vênbûka sipaite chuan Jonathana leh a râlthuam kengtu chu an au va, “Lo chho teh rêng u, in hre mai ang,” an ti a. Jonathana chuan a râlthuam kengtu hnênah chuan, ‘Mi rawn zui chho rawh, Lalpa chuan anni chu Israel-te kutah a pe ta e,” a ti a. Jonathana chu a vâk chho ta a, a râlthuam kengtu chuan a zui zêl a. Jonathana hmaah chuan anni chu an tlu ta zawih zawih a, a hnungah a râlthuam kengtu chuan a rawn that zêl a. Inbeih hmasak ber ni chuan Jonathana leh a râlthuam kengtu chuan fîng chanve vêl chhûngah chauh mi sawmhnih lai an that a. Sipai zawng zawng, riahbûka awm te, phûla awm te, vênbûka awm te, hmatâwng pâwlte chu an chiai a, an buai ta mur mur a. Lîr te a nghîng a, Pathianin manganna nasa tak a thlentîr ta a. Benjamin bial Gibea khuaa Saula râlvengtu sipaite chuan an han thlîr a; ngai teh, Filistia-ho chu mangang takin an tlân darh chum chum a. Saula chuan a sipaite hnênah, “Inchhiar ula, tute nge kim lo han en teh u,” a ti a. An han inchhiar chuan Jonathana leh a râlthuam kengtu chu an lo awm ve lo va. Saula chuan Ahija hnênah, “Puithiam kawr kha han phawrh teh,” a ti a. Ani chuan puithiam kawr chu Israel-te hmaah a ha a ni. Saulan puithiam a biak lai chuan Filistia riahhmuna an buaina chu a zual tawlh tawlh a, Saulan puithiam hnênah chuan, “Dah leh mai rawh,” a ti a. Tichuan, Saula leh a hnêna mipui awmte chu an pung khâwm a, indona hmunah an kal ta a. Ngai teh, Filistia mite chu anmahni leh anmahni khandaihin an lo inbei chiam a, an buai nuai nuai a. Tûn hma lama Filistia ṭan ṭhîn Hebrai mite leh riahhmuna lo awmte chu Israel lamah an lo pakai a, Saula leh Jonathana lamah an ṭang ta a. Chutiang bawkin Efraim tlângrama Israel mi, biru zawng zawng pawh chu Filistia mite an tlânchhia tih an hriatin indonaah chuan an lo tel ve a, an rawn ûm ve nghâl a. Chumi ni chuan Israel-ho chu Lalpan a hnehtîr a, Beth-aven thleng rawkin an bei zui a. Saulan mipuite chu a vau va, “Ka hmêlmate chunga phuba ka lâk ni hian khaw thim hmaa chaw ei chuan ânchhia dawng rawh se,” a tih avângin chumi ni chuan tu man eng mah an ei lo, Israel-te chu an chau hle a. Mipui chuan ngaw an va thleng a, khawizu a lo tam hle a. Mipuiin ngaw chhûng an luh chuan khawizu chu a lo far zawih zawih a, ânchhe dawn an hlauh avângin tu man an pir lo. Jonathana erawh chuan a pain mipui a vauna kha a hre ve lo va, tiang hmawrin khawithlâr chu a chhun a, a han tem a, a lo harh ta sawt a. An zînga mi pakhat chuan a hnênah, “I pain hetiangin min vau asin, ‘Tu pawh, vawiina chaw ei apiangin ânchhia dawng rawh se,” a tih avângin mite chu an chau zo ta a nih hi,” a ti a. Jonathana chuan, “Ka pa hian mite tân harsatna a siam mai mai a nih hi; en ta che u, kei pawhin khawizu tlêm tê ka han tem a, ka harh tâk hi,” a ti a. “Mite hian an hmêlmate laka an thil lâk hi an duh duhin vawiin hian ei sela chu an chak phah ang a, Filistia mite hi kan that tam lehzual tûr’” a ti a. Chumi ni chuan Filistia mite chu an hneh a, Mikmas aṭangin Aijalon thlengin an ûm a, Israel-te pawh chu an chau ve ta hle a. Mite chuan an râllâk thil: berâm te, bâwngpa te, bâwngno te chu an la sawk sawk a, leiah an phet thlu a, an talh a, a thisen chawpin an ei ta mai a. Saula hnênah, “Mite chuan thisen chawpin sa an ei a Lalpa lakah thil an tisual ta e,” tiin an sawi a. Ani chuan, “Dik lo takin thil in ti ta a ni, hetah hian lung min han lâk teh u,” a ti a. Saulan chûng mite hnênah chuan, “Vâk darh ula, mi hnênah, ‘mi tinin bâwngpa leh berâm han la sela, hetah hian talh sela, ei rawh se. A thisen chawpa eiin Lalpa chungah thil tisual suh u,’ tiin hrilh rawh u,” a ti a. Chumi zân chuan an bâwngpa an rawn kai ṭheuh va, chutah chuan an talh a. Saula chuan Lalpa tân maichâm a siam a, chu chu Lalpa tâna a maichâm siam hmasak ber a ni. Saula chuan, “Zânah Filistia mite chu bei ila, zîng khaw ên thlengin i bei ang u, tu mah zuah tûr a ni lo,” a ti a. Anni chuan, “Ṭha i tih ang chuan ti rawh,” an ti a. Puithiam erawh chuan, “Pathian i râwn rih ang u,” a ti a. Saula chuan, “Filistia mite chu ka zu bei ang em? Israel-te kutah i pe ang em?” tiin a zâwt a. Chumi ni chuan Pathianin a chhâng lo. Saula chuan, “Nangni mipui hotu zawng zawngte u, lo hnai ula, vawiin hian eng nge kan tihsual hriat chhuah i tum teh ang. Lalpa, Israel-te chhanhimtu, mi nunga chhâlin ka sawi e, ka fapa Jonathana tihsual pawh ni se, a thi ngei tûr a ni,” a ti a. Nimahsela, mipui zîng aṭangin tu mahin an chhang lo. Israel mi zawng zawng hnênah chuan, “Inbûk ila, nangniho hi lehlamah ṭang ula, kei leh ka fapa Jonathana hi lehlamah kan ṭang ang e,” a ti a. Mite chuan Saula hnênah, “Ṭha i tih ang chuan ti mai rawh,” an ti a. Saula chuan Israel-te Pathian hnênah chuan, “A dik tak chu han tar lang ta che,” a ti a. Ṭhumvâwr chu Saula leh Jonathana chungah chuan a tla a, mipui chu an fihlîm ta a. Saula chuan, “Kei leh ka fapa Jonathana thlei nân ṭhumvâwr rawh u,” a ti a. Jonathana chungah chuan a tla ta a. Saula chuan Jonathana hnênah, “Eng nge i tihsual min hrilh rawh” a ti a. Jonathana chuan a hnênah, “Ka tiang hmâwra khawizu tlêm chu ka tem ngei alâwm; chuvângin, ka thi mai tûr a ni,” a ti a. Saula chuan, “Jonathan, i thi ngei tûr a ni, i thih loh chuan na deuh pawhin Pathianin a tih tihin min ti rawh se,” a ti a. Mite chuan Saula hnênah, “Israel-te tâna hnehna ropui tak thlentu Jonathana hi a thi ang maw? A thi tawp lo vang. Lalpa nunna chhâlin kan sawi e, a samzai pakhat pawh leiah a tla lo vang,” an ti a. Mipui chuan Jonathana chu thi lo tûrin an chhan chhuak ta a. Chumi hnu chuan Saulan Filistia mi a ûm chu a kîrsan a, Filistia mite pawh an ram lamah an haw ta a. Saula chu Israel lal a lo nih chuan kil tina an hmêlma Moab mi te, Amon mi te, Edom mi te, Zoba lal te, Filistia mite chu a do va. A hawina lam apiangah a hneh zêl a. Huai takin a bei a. Amalek mite pawh a hneh a, Israel-te chu rapbettute kut ata a chhan chhuak a. Saula fate chu Jonathana te, Isvia te, Malkisua te an ni; a fanu upa zâwk chu Merabi a ni a, a naupang zâwk chu Mikali a ni. Saula nupui hming chu Ahinoami, Ahimaaza fanu a ni. A sipai hotu ber hming chu Abnera a ni, a pami Nera fapa a ni. Kisa chu Saula pa a ni a, Abnera pa Nera chu Abiela fapa a ni. A dam chhûng zawng, Saula chu Filistia mite nên nasa takin an indo ṭhîn a, Saula chuan mi chak emaw, mi huaisen emaw a hmuh apiang lamṭang atân a siam zêl ṭhîn. Samuela chuan Saula hnênah, “ Lalpan a mi Israel-te chunga rorêltu atân hriak thih tûr chein min tîr a; chuvângin, Lalpa thu hi ngaithla rawh le. Engkim Lalpa chuan heti hian a ti, ‘Israel-te chu Aigupta ram ata an lo chhuah lai khân Amalek-hovin kawng lakah an lo tihbuai avângin ka hrem dâwn a ni. Amalek-ho bei tûrin chhuak la, an thil neih zawng zawng tiboral vek ang che. A hmei a pa, nausên hnute hne lai chenin, an bâwngpa te, berâm te, sanghâwngsei te, sabengtung te nên tihlum vek ang che,’ a ti e” a ti a. Tichuan, Saulan Telem khuaah mipui a ko khâwm a, Israel mi nuaihnih leh Juda mi sîngkhat lai an ni. Saula chuan Amalek khawpui chu a pan a, ruamah lambun tumin a lo châng a. Aigupta ram aṭanga Israel-te an lo chhuah khân, Ken mite chuan an lo khawngaih hle a, Saula chuan an hnênah, “Lo chhuak ula, Amalek mite zîng ata inthiarfihlîm rawh u; chutilo zawng an zîngah ka tiboral ve dah ang che u,” a ti a. Chutichuan, Ken mite chu Amalek mite zîng ata chu an chhuak a. Saula chuan Amalek mite chu Havila aṭanga Aigupta ram dep Sur thlengin a hneh a. Amalek lal Agaga chu a nung chungin a man a, mi dang zawng chu khandaihin a that a. Saula leh a mite chuan Agaga te, berâm ṭha ṭha te, bâwngpa ṭha leh thau thau te, berâmno ṭha ṭha te chu an tihlum duh lo va, ṭha lo deuh leh an duh loh chauh chu an that vek a. Lalpa thu chu Samuela hnênah a lo thleng a, “Saula, lal atân ka lo ruat ta chu pawi ka ti hle mai; min hawisan a, ka thupêk a zâwm si lo,” a ti a. Samuela chu a thin a ur hle a, zankhuain Lalpa a au va. A tûkah chuan Samuela chu zîng takah a tho va, Saula hmuh tumin a chhuak a; mahse “Saula chu Karmel-ah a kal a, chutah chuan dam lai lung a phun a, a lo kîr leh a, Gilgal-ah a chhuk leh ta,” tiin Samuela chu miin an lo hrilh a. Samuela chuan Saula hnên a lo thleng a, Saula chuan, “ Lalpan malsâwm che rawh se; Lalpa thupêk ang chuan ka ti ta e,” a lo ti a. Samuela chuan, “Chûng berâm bê leh bâwng bû ka hriatte chu engtizia nge ni?” a ti a. Saula chuan, “Amalek mite ta an rawn lâksak a ni. Mite chuan berâm leh bâwng, a ṭha ṭha chu Lalpa, i Pathian hnêna thilhlan atân an rawn la a, a dang zawng chu kan tihlum vek e,” a ti a. Samuela chuan Saula hnênah, “Nizâna Lalpan ka hnêna thu a sawi ka hrilh teh ang che,” a ti a. Saula chuan, “Sawi ta che,” a ti a. “Inngai pawimawh lo mah la, Israel hnam hotu atân ruat i ni lâwm ni? Lalpan Israel lal atân hriak a thih che a. Lalpan thil ti tûrin a tîr chhuak che a, ‘Kal la, mi sualho, Amalek mite chu tihlum vek rawh, an boral vek hma chuan bei zêl rawh,’ a ti che a. Engati nge Lalpa thu zâwm lova râllâk thil i lâk bawrh bawrha, Lalpa mit hmuha thil ṭha lo i tih le?” a ti a. Saula chuan Samuela hnênah, “ Lalpa thu chu ka zâwm alâwm. Lalpa min tirhnaah chuan ka kal a, Amalek lal Agaga ka rawn man a, Amalek mite chu ka that vek asin. Amaherawhchu, mite chuan râllâk thil - berâm leh bâwngte tihboral tûr zînga a ṭha ṭha chu Lalpa i Pathian hnêna Gilgal-a hlan atân an rawn la a ni,” a ti a. Samuela chuan: “Hâlral thilhlan leh inthawinate aiin: Lalpa chuan a thu awih a lâwm zâwk lo vem ni? Ngai teh, thilhlan aiin thu awih a ṭha zâwk a, Berâmno thau aiin a thu pawm a ṭha zâwk. Hei hi aien sualte nên thuhmun a ni. Luhlul hi milem biak tluk a ni. Lalpa thu i zawm loh avângin Ani pawhin lal atân a duh bîk ta lo a che,” a ti a. Saula chuan Samuela hnênah, “Ka lo tisual dêr mai a, Lalpa thupêk leh i thu ka zâwm lo a ni e, mipui ka hlau va, an thu ka zâwm mai a ni. Tûnah ka ngên a che, ka sual ngaidam la, Lalpa ka biak theih nân min hawpui leh rawh aw,” a ti a. Samuela chuan Saula hnênah, “Ka hawpui tawp lo vang che, Lalpa thu i duh lo va, Lalpa pawhin Israel-te lal atân a duh bîk ta lo che a ni,” a ti a. Samuela chu kal tuma a han her chuan, Saulan a puan fêmah a lo chelh a, a thlêr ta a. Samuelan a hnênah, “Vawiin aṭang hian Lalpan Israel ram chu a chhuhsak ta che a; mi, nang aia ṭha zâwk mi dang hnênah a pe ta a ni. Israel Miropuia chu a daw lo vang, a lamlêt hek lo vang; mihring anga lamlêt leh mai mi a ni si lo,” a ti a. Saula chuan, “Ka lo tisual ta a ni; mahse, ka mite zînga upaho leh Israel-te hmaah min zahder hrâm la, min hâwnpui leh rawh; Lalpa i Pathian chu ka bia ang,” a ti a. Tichuan, Samuelan Saula chu a hâwnpui a, Saula chuan Lalpa chu chibai a bûk ta a. Samuela chuan, “Amalek lal Agaga chu ka hnênah han hruai rawh,” a ti a. Agaga chu khûr chungin a hnênah a va kal a, “Thihna râpthlâk chu ka pumpelh tawh a ni ang chu maw?” a ti a. Samuela chuan, “I khandaihin hmeichhiate fa nei lova i siam ṭhîn ang khân i nu pawh hmeichhe zînga fa nei lo nu a ni ang,” a ti a. Samuela chuan Gilgal khuaah Lalpa mit hmuhin a sât sawm ta berh a. Samuela chu Rama khuaah a kal a, Saula pawh a awmna Gibea khuaah ama inah a haw chho ta a. Samuela chuan a dam chhûngin Saula chu a tlawh leh ta lo va. Samuela chu Saula avâng chuan a rilru a na hle a; Lalpa chuan, Israel lal atân Saula a lo siam chu pawi a ti hle a. Lalpa chuan Samuela hnênah, “Israel lal atâna Saula ka duh loh avâng hian eng chen nge i lungngaih dâwn le? I hriak ûmah hriak thun khat la, kal rawh. Bethlehem mi Jesaia hnênah ka tîr ang che. A fapate zînga mi lal tûr ka ruat diam tawh e,” a ti a. Samuela chuan, “Engtin nge ka kal theih ang, Saulan a lo hriat chuan min that mai ang,” a ti a. Lalpa chuan, “Bâwngla kai la, ‘ Lalpa hnêna thil hlân tûrin ka lo kal a ni,’ ti ang che. Thilhlannaah chuan Jesaia sâwm la; tichuan, i tih tûr chu ka hrilh ang che, a hming ka hrilh che chu hriak min thihsak dâwn nia,” a ti a. Samuela chuan Lalpa thupêk ang chuan a ti a, Bethlehem-ah a kal ta a. Chumi khuaa upaho chuan khûr chungin an lo hmuak a, “Ṭha lam thu-a lo kal i ni em le?” an ti. Ani chuan, “Ṭha lam thilah ni e, Lalpa hnêna thil hlân tûra lo kal ka ni. Intifai ula, thilhlannaah chuan lo kal ve rawh u,” a ti a. Jesaia leh a fapate chu a thian fai a, thilhlannaah chuan a sâwm a. Tin, an lo thlen chuan Eliaba chu ngun takin a en a, “ Lalpa hmaa ding hi a hriak thiha chu a ni phawt ang,” a ti a. Nimahsela, Lalpan a hnênah, “A hmêl ṭhat lam emaw, a sân lam emaw en suh, ani hi chu ka duh lo. Lalpa chuan mihring thlîr dân angin a thlîr ve si lo; mihring chuan pâwn lam lan dân an en ṭhîn a, Lalpa erawh chuan thinlung lam a en ṭhîn” a ti a. Tichuan, Jesaian Abinadaba a ko leh a, Samuela hnênah a rawn hruai a, ani chuan, “Hei pawh hi Lalpa thlan a ni lo,” a ti a. Jesaia chuan Sama a va kaltîr leh a, ani chuan, “Ani pawh hi Lalpa thlan chu a la ni chuang lo,” a ti a. Chutiang chuan Jesaia chuan a fapa pasarihte chu a hmaah a inlantîr a, Samuela chuan Jesaia hnênah, “Hêngho hi Lalpa thlan an la ni ta lo cheu mai,” a ti a. Samuela chuan Jesaia hnênah, “I fate hetah an awm kim em?” a ti a. Ani chuan, “A tlum ber a la awm ve lo; tûnah hian berâm a vêng a ni,” a ti a. Samuela chuan Jesaia hnênah, “Va kohtîr rawh, a lo thlen hma chu inthawina kan hlân lo vang,” a ti a. A va ko va, a hmaah a rawn hruai a. Ani chu sâr veng vawng, meng mawi tak, hmêlṭha tak a ni. Lalpa chuan, “Hriak thih rawh le, hei ngei hi a ni e,” a ti a. Samuela chuan a hriak ûm chu a la a, a unaute hmaah ani chu hriak a thih ta a. Chumi ni aṭang chuan Lalpa thlarau chu nasa takin Davida chungah a lo thleng ta a. Samuela chu a tho va, Rama khuaah a kal ta a. Lalpa thlarau chuan Saula chu a chhuahsan a, Lalpa tirh thlarau sualin ani chu a tibuai ta a. Saula chhiahhlawhte chuan a hnênah, “Ngai teh, Pathian tirh thlarau sualin a tibuai ta che a nih hi. Ka pu, i chhiahhlawh, i tirhkahte hi thu min pe la, ṭingṭang tum thiam kan zawnsak ang che, Pathian tirh thlarau sualin a man hunah che ani chuan ṭingṭang a tumsak ang che a; tichuan, i ṭha leh mai ang,” an ti a. Saula chuan a chhiahhlawhte hnênah chuan, “Chutiang tum thiam tak chu mi zawnsak ula, ka hnênah rawn hruai rawh u,” a ti a. An zînga tlangvâl pakhat chuan a chhâng a, “Ngai teh, Bethlehem mi, Jesaia fapa, ṭingṭang tum thiam tak, mi huaisen, indo thiam, thu sawi thiam tak, hmêlṭha tak a awm a, a hnênah Lalpa chu a awm a ni,” a ti a. Saula chuan Jesaia hnênah mi a tîr a, “I fapa, Davida, berâm vênga awm chu, han kaltîr rawh,” a ti a. Jesaia chuan sabengtung phur khat chhang leh uain bûr khat leh kêlno, Saula pêk atân a fapa Davida chu a kentîr a. Davida chu Saula hnênah chuan a va kal a, a bulah chuan a awm ta a. Saula chuan a lo ngaina hle a, a râlthuam kengtuah a ṭang ta a. Saula chuan Jesaia hnênah, “Davida hi ka mit a tlung hle a; chuvângin, ka hnênah awm reng mai rawh se,” tiin mi a tîr a. Pathian tirh thlarau sualin Saula chu a man châng apiangin Davida chuan ṭingṭang a la a, a tumsak ṭhîn a, thlarau sual chuan a chhuahsan a, Saula chu a lo harhin a lo ṭha leh ṭhîn. Filistia mite chuan indo tûrin an sipaite an khâwm a, Judai ram chhûng Soko khuaah an kal khâwm a. Efes-damim an tih hmun, Soko leh Azeka inkârah chuan ṭanhmun an khuar a. Saula leh Israel mite pawh an inpun khâwm a, Ela ruamah ṭanhmun an khuar a. Filistia mite lo dang tûrin an inzâr darh a. Filistia mite chu tlângah an awm a, Israel-te pawh a râl lehlam tlângah an awm bawk a, an inkârah chuan ruam a awm a. Filistia mite ṭanhmun aṭang chuan an mi chak Goliatha, Gath khuaa mi hi a lo chhuak a, Dâr lukhum a khum a, dâr âwmphaw a ha bawk a, a âwmphaw rih lam chu kg. sawmnga leh pasarih a ni a, tawng ruk leh khâp khata sâng a ni. A ngalah chuan dâr ngalphaw a bun a, a dârah dârfei a pai a. A fei ngul chu suk tiat a ni a, a fei lu chu kg. sariha rit a ni, a phaw kengtu chu a hmaah a kal a, A ding a, Israel sipaiho chu a au va, an hnênah, “Indo tûra inep reng a ṭûl em ni? Kei Filistia mi ka ni a, nangni Saula chhiahhlawh in ni. In zîng ata mi thlang chhuak ula, ka hnênah lo chhuk teh se. Min hneha min tihhlum chuan in chhiahhlawh kan ni ang a, keiin ka ngama ka tihhlum chuan kan chhiahhlawh in ni ang a, kan bawihah in awm ang,” a ti a. Filistia mi chuan, “Vawiin hian Israel-ho sipaite chu ka cho a ni, mi pakhat han thlang chhuak ula, kan lo inbei ang e,” a ti a. Saula leh Israel mi zawng zawngin chu Filistia mi thu sawi chu an hriatin an zâm a, an hlau ta êm êm a. Davida chu Judai ram Bethlehem khua Efratha mi, Jesaia fapa a ni. Jesaia chuan fapa pariat a nei a, Saula a lo lal khân upa tak, tar tawh tak a ni. Jesaia fapa pathumin Saula chu indonaah an zui a. A fapa pathum indonaa kalte chu a upa ber Eliaba te, a dawttu Abinadaba te, a pathumna Sama te an ni. Davida chu a naupang ber a ni a, a upa pathumte chuan Saula chu an zui a ni. Davida chu Saula hnên aṭangin a pa berâm enkawlin Bethlehem-ah a va kal ṭhîn a. Filistia mi chuan ni tin, zîng leh tlaiah, a va pan a, ni sawmli chhûng a va intâr lang ṭhîn a. Jesaia chuan a fapa Davida hnênah, “Buhfai kan ro kg. sâwm leh chhang tlâwn sâwm keng la, i ûte riahhmuna awm va pe thuai rawh khai. Tin, bâwnghnute khal tlang sâwm hi an pâwla sâng hotu kensak la, i ûte engtin nge an awm han zâwt la, an chanchin han hre ngei ang che. Saula leh i ûte chu Israel mi zawng zawng nên Filistia mite beiin Ela ruamah an awm e.” a ti a. Davida chu zîng takah a tho va, berâm chu vêngtu pakhat kutah a hnutchhiah a, Jesaia thupêk ang chuan a keng a, a kal ta a. Indona hmun pana chhuak mêk sipaiho chu inbei tûra an lo au dur dur laiin ani chuan riahbûk chu a va thleng a. Israel-ho leh Filistia mite chu inbei tûrin an lo inzâr a, sipai leh sipai chu an lo inep ut mai a, Davida chuan a thil ken chu bungraw enkawltu hnênah chuan a dah a, sipaiho zîngah chuan a va tlân a, a ûte chu chibai a va bûk a. Anni chu a biak laiin, ngai teh, an mi chak Gath khuaa Filistia mi, a hming Goliatha chu Filistia sipaiho zîng aṭang chuan a lo chhuak a, a thu sawi ngai bawk kha a han sawi a. Chu chu Davida chuan a lo hria a. Israel mi zawng zawngin chu mi chu an hmuhin an tlânsan a, an hlau êm êm a. Israel mite chuan, “Kha pa lo chhuak kha in hmu em? Israel mite cho tûra lo chhuak a nih ngei kha. Tu pawh amah tihlum chu lalin sum tam tak a pe ang a, a fanu a neihtîr bawk ang; tin, a pa chhûngte chuan Israel ramah chhiah an awl ang,” an ti a. Davida chuan a kianga dingte hnênah chuan, “Israel-te tithlabârtu, he Filistia mi thattu hi eng lâwmman nge an pêk dâwn? Pathian nung sipaiho cho veitu, he serh tan loh Filistia mi hi tu nge maw a nih le?” a ti a. Mite chuan an chhâng a, “A tihlumtu apiang chu kan sawi ang khân tihsak a ni ang,” an ti a. Tichuan, an u ber Eliaba chuan chutianga mi hnêna a thu sawi chu a lo hriatin Davida chungah a thin a ur ta hle a. “Engah nge i lo chhuk ve? Thlalêra berâm tlêm tê kha tu nge i vêntîr? I luhlul leh chapozia hi, indo en tûrin i lo kal mai mai a nih hi,” a ti a. Davida chuan, “Eng dang ti lo ve, thu ka zâwt a ni ve mai alâwm,” a ti a. Davida chuan mi dang hnên lam a hawisan a, a sawi ngai bawk a sawi leh a, mite chuan a hmaa an chhân ang bawkin an chhâng leh a. Davida thu sawi chu an hriatin Saula an hrilh a, ani chuan a ko ta a. Davida chuan Saula hnênah chuan, “He pa avâng hian tu mah zâm suh se, i chhiahhlawh hian he Filistia mi hi ka va bei ang e,” a ti a. Saula chuan Davida hnênah, “He Filistia mi hi bei tûrin i kal thei em lo vang a, i la naupang si a, ani zawng a tleirâwl lai ata indo mi a ni tawh asin,” a ti a. Davida chuan Saula hnênah, “I chhiahhlawh hian ka pa berâm ka vêng ṭhîn a, sakeibaknei emaw, savawm emaw an lo kala berâm rual zîng ata berâmno an lâk te hian, ka ûm ṭhîn a, ka bei a, an sa seh chu ka chhuhsak ṭhîn. Min rawn beih dâwnte hian an baksamah ka man a, ka ṭhuai a, ka that ṭhîn a ni. I chhiahhlawh hian sakeibaknei leh savawmte ka that tawh a, he serh tan loh Filistia mi pawh hi chutiang chuan ka sawisa dâwn a ni, Pathian nung sipaite a cho vei a,” a ti a. Tin, Davida chuan, “Sakeibaknei lak ata leh savawm lak ata min chhanchhuaktu Lalpa chuan Filistia mi lak ata chu min chhan chhuak ang,” a ti a. Saula chuan, “Kal ta che le, Lalpan ṭanpui che rawh se,” a ti a. Saula chuan Davida chu ama râlthuam a bel a, dâr lukhum a khumtîr a, âwmphaw a hâktîr bawk a. Davida chuan a phaw chungah khandaih a pai a, kal a han tum chhin a; chutiang chuan a la inthuam ngai si lo va. Davida chuan Saula hnênah, “Ka kalpui thei hauh lo mai a, hetiang hi ka la inbel ngai si lo va,” a ti a. Davida chuan a hlîp ta a. Tichuan, tiang a la a, luitêa ṭiau lung panga a thlang a, a berâm vên iptêah chuan a ak a, virvawm chu a keng a, Filistia mi chu a pan ta a. Filistia mi chu a lo kal a, Davida chu a rawn pan a, a phaw kengtu chu a hmaah a kal zêl a. Filistia mi chu a han hawi a, Davida a han hmuh chuan a hmusit hle a; tleirâwl tê, sâr veng vawng a ni a, a zaidam hmêl hle bawk si a. Filistia mi chuan Davida hnênah, “Uicho em ka niha, engati nge tiang nêna min rawn pan le?” a ti a. Filistia mi chuan a pathiante chhâlin Davida chu ânchhia a lawh a. Filistia mi chuan Davida hnênah, “Lo kal teh, i sate kha chunglêng savate leh ramsate ka han eitîr teh ang,” a ti a. Davida chuan Filistia mi hnênah chuan, “Khandaih te, thal te, fei te kengin i lo thawk a; kei zawng Engkim Lalpa, Israel-te Pathian, i chova hmingin ka lo thawk a ni. Vawiinah hian Lalpan nang hi ka kutah min pe a ni; ka that ang che a, i lu ka tansak ang che, Filistia sipai ruangte chu vawiin hian chunglêng savate leh ramsate ka pe ang a; tichuan, mi zawng zawngin Israel-te zîngah Pathian a chêng reng a ni tih an hria ang. Indona hneh nân Lalpa chuan khandaih leh fei, hmanruaah a hmang chuang lo tih heta pung khâwm zawng zawngin an hria ang; ani chuan nangniho hi ka kutah min pe dâwn a ni,” a ti a. Filistia mi chu Davida bei tûra a lo kal hnaih lai chuan Davida chu inbeihna hmun lam panin Filistia mi chu tâwk tûrin a tlan vat a. Davida chuan a ip a zen a, lung a han phawrh a, a virvawm chuan a han vawm a, Filistia mi chu a chaldârah tak a fuh a, lung chu a chalah a lût a, bawkkhupin a tlu ta dêr a. Davida chuan Filistia mi chu virvawm leh lungin a bei a, Filistia mi chu a vawm a, a that ta a. Davida chuan khandaih a keng lo. Davida chu a tlân a, Filistia mi kiangah chuan a va ding a, a khandaih chu a pai ata a phawisak a, a lu a tansak ta a. Filistia mite chuan an mi chak a thi tih an hriat chuan an tlânchhe ta a. Israel mite leh Juda mite erawh chu an tho va, an au va, Filistia mite chu Gath leh Ekron kulh kawngkhâr thleng rawkin an ûm ta a. Filistia mi, hliam tuarte chu Saraim aṭanga Gath leh Ekron thlengin kawng tluanin an tlu rum a. Israel mite chuan Filistia mite an ûm chu an kîrsan a, an riahhmun chu an suam a. Davida chuan Filistia mi lu chu a la a, Jerusalem-ah a kalpui a, a râlthuam erawh chu a puan inah a dah a. Filistia mi bei tûra Davida a kal lai chu Saulan a lo hmu a, a sipaihotu Abnera hnênah, “Abner, he tlangvâl hi tu fa nge?” a ti a. Abnera chuan, “Aw lalber, ka lo hre hauh lo mai a,” a ti a. Lal chuan, “He naupang hi tu fa nge a nih zâwt chhuak rawh,” a ti a. Davida chuan Filistia mi a that haw chu Abnera chuan a hruai a, Filistia mi lu keng chungin Saula hnênah a kalpui a. Saula chuan a hnênah, “Tlangvâl, tu fapa nge i nih?” a ti a. Davida chuan a chhâng a, “I chhiahhlawh Jesaia, Bethlehem mi fapa ka ni,” a ti a. Davidan Saula a biak hnu chuan Jonathana leh Davida chu an inngaina ta hle a. Jonathana chuan amah tlukin ani chu a hmangaih a. Chumi ni aṭang chuan Saula chuan a hnênah a awmtîr a, a pa hnênah a hawntîr phal ta lo va. Jonathana chuan amah ang chiaha a hmangaih avângin Davida nên chuan thu an thlung ta a. Jonathana chuan a thuam inbel lai a hlîp a, Davida a pe a, a âwmphaw te, a ngûnhnâm te, a thal te, a kâwnghrên te nên lam a pe a. Davida chu Saulan a tirhna lam apiangah a kal a, a hlawhtlin zêl avângin a sipaihotu pakhatah a dah a. Chu chu mi zawng zawng ngaihah leh Saula sipaihote ngaihah pawh tih âwm tak a ni rêng a. Davidan Filistia mi a thah hnu khân an lo haw a, Israel khawpui tin aṭangin hmeichheho hla saa lâm chungin, benchhek leh perhkhuang tumin hlim takin Saula hmuak tûrin an lo chhuak a. Hmeichhiate chuan lâm chungin hlain an inchhâwn a, “Saulan sâng tam tak a that a, Davidan sîng tam tak a that,” an ti a. An hla sak chuan Saula chu a tithinur ta hle a, “Davida chu sîng thattu an ti a, kei sâng chauh thattu min ti a, hetiang a nih chuan ka ram hi a chang mai dâwn alâwm,” a ti a. Tichuan, chumi ni aṭang chuan Saula chuan Davida chu a îtsîk ta hle a. A tûkah chuan Pathian tirh thlarau sualin ina Saula awm chu a man ta a, a ṭawng ta bual bual a. Davida chuan ni dang ang bawkin ṭingṭang a tum a, Saula chuan a fei chu a hûm reng a. Saula chuan a fei a lek a, “Bangah sâwn Davida hi ka khawh bet tlat teh ang,” a ti a. Davida chu ṭum hnih a kiang hman a. Lalpa chu Davida hnênah a awm avângin Saulan a hlau ta hle a, ani lah chu Lalpan a kalsan tawh si a. Tichuan, Saula chuan ani chu a sawn bo va, a sipai sâng chunga hotu-ah a dah a, sipai zîngah Davida chu a khawsa ta a. Lalpan a awmpui zêl avângin Davida chu a thiltih apiangah a hmuingîl zêl a. Saulan chu chu a hriatin a hlau lehzual a. Israel mite leh Juda mite erawh chuan a thil tih apiangah a kaihhruai zêl ṭhin avângin Davida chu an ngaina hle a. Saula chuan Davida hnênah, “Ka fanu upa zâwk Merabi hi nupui atân ka pe ang che, huaisen takin min ṭan la, Lalpa tân bei zêl ang che,” a ti a. Saula chuan, “Ka kut tuar lovin Filistia mite kut tuar zâwk rawh se,” a ti rilru a ni. Davida chuan Saula hnênah, “Tu nge maw ka niha, Israel rama ka pa chhûngte pawh eng mi nge an niha lal mâkpa ka han nihna tûr chu le?” a ti a. Saula fanu Merabi chu Davida neihtîr a lo hun chuan Meholat mi Adriela nupui atân a pe ta thên a. Saula fanu Mikali chuan Davida chu a hmangaih hle a. Saula an hrilh a, chu thu chuan a tilâwm hle a. Saula chuan, “A awhna thang atân leh Filistia mite kut a tuar theih nân ani hi ka pe teh ang,” a ti a. Saula chuan Davida hnênah “Tûnah chuan ka mâkpa i ni tawh ang,” a ti leh a. Saula chuan a chhiahhlawh a tîr a, “Davida chu a rûk têin bia ula, lal hi i chungah a lâwm hle a, a chhiahhlawh zawng zawng pawhin an ngaina che a, tûnah chuan lal mâkpa i ni tawh ngei ang,” tiin a hrilhtîr a. Davida chuan, “Mi rethei leh tu ma ngaihsân hlawh lo, keini ang tâna lal mâkpa han nih chu tih rual em ni ang?” a ti a. Saula chhiahhlawhte chuan Davida chhân dân chu an hrilh a. Saula chuan, “Davida hnênah hetiangin sawi rawh u, ‘Lal chuan a hmêlma phuba lâk nân Filistia mite serh vun za tih loh chu a fanu man atân eng mah a la duh lo’ ti rawh u,” a ti a. Saula chuan Filistia mite kuta thihtîr a tum tlat a ni. A chhiahhlawhten chu thu chu Davida an han hrilh chuan lal mâkpa a ni tûr chu a lâwm hle a. Hun tiam chu a la thleng rih lo. Davida chu a mite nên an vâk chhuak ta a, Filistia mi zahnih an va that a, an serh vunte chu Davida te chuan an rawn hâwn a; tin, lal mâkpa a nih theihna tûr chuan kim takin an pe ta a. Saula chuan a fanu Mikali chu nupuiah a neihtîr ta a. Saula chuan Davida hnênah Lalpa chu a awm reng tih a hre chiang ta a, a fanu Mikali chuan Davida chu a duh hle a. Saula chuan Davida chu a hlau ta tawlh tawlh a, a dam chhûng zawngin Saula chu Davida hmêlma a ni ta reng a. Filistia sipaiten an rawn beih châng apiangin Davida chu Saula sipai hotute aiin a che ṭhain a hlawhtling ṭhîn a, a hming chu a lo thang ta hle a. Saula chuan a fapa Jonathana leh a chhiahhlawh zawng zawng chu Davida that tûrin a ti a. Nimahsela, Saula fapa Jonathana chuan Davida chu a hmangaih hle a. Jonathana chuan Davida hnênah, “Ka pa hian thah a tum che a; chuvângin, naktûk zîngah chuan fîmkhur la, hmun fianrialah biru la; tah chuan awm rêng ang che. Tin, ka pa chu ka hruai chhuak ang a, i bihrûkna lam phûlah kan lo kal ang a, i chungchâng ka sawipui ang a, kan inbiak dân chu ka hrilh leh ang che,” a ti a. Jonathana chuan a pa Saula kiangah chuan Davida chu a va fak a, a hnênah, “lalber, i chhiahhlawh Davida chungah chuan thil sual ti lul suh. I chungah eng mah a tisual lo va, i tân thil ṭha hlîr a ti zâwk ṭhîn asin. Thih huamin Filistia mi kha a bei a, Israel mi zawng zawng tân Lalpan hnehna a siamsak a; chu chu nang pawhin i hmu a, i lâwm hle kha. Eng vângin nge pawi khawih awm lova Davida chu i thah mai ang?” a ti a. Saula chuan Jonathana thu sawi chu a pawm a, “Davida chu ka that lo vang,” tiin Lalpa hming chhâlin thu a tiam a. Jonathana chuan Davida chu a ko va, chûng thil zawng zawng chu a hrilh a. Tichuan, Davida chu Saula hnênah a hruai a, tûn hma ang khân a hnênah a awm leh ta a. Indona a lo awm leh a, Davida chu a thawk chhuak a, Filistia mite chu a va bei a, a that chiam a, a hmaah chuan an tlânchhe ta vek a. Saula chu ama fei kenga a ṭhut laiin Lalpa tirh thlarau sual a chungah a lo thleng leh a; chutih lai chuan Davida chuan ṭingṭang a tum a. Saula chuan Davida chu bangah feia khawh beh tlat a tum a; mahse, Davida chu a kiang hman a, fei chu bangah chuan a khawh bûr ta ngur a. Davida chu a tlân chhuak a, a him ta a. Saula chuan Davida chu a ina va huala, a tûk zînga that tûrin mi a tîr a. Davida nupui Mikali chuan, “Zânina i tlân chhuah loh chuan naktûkah an that dâwn che a ni,” tiin a hrilh a. Tichuan, Mikali chuan Davida chu tukverhah a thlâk thla a, a tlân chhuak a, a him ta a. Mikali chuan milem a la a, khumah a zalh a, a lû lamah kêl hmul lukham a dah a, puanin a khuh ta a. Davida hruai tûra Saula mi tirhte hnênah chuan, “A dam lo a ni,” a ti a. Saula chuan Davida va en tûrin mi a tîr leh a, “A khum chawpin han zâwn ula, ka lo that ang e,” a ti a. Mi tirhte chu an va luh chuan, ngai teh, milem chu a lu lama kêl hmul lukhamin a lo mu a. Saulan Mikali hnênah, “Engtizia nge hetianga mi buma, ka hmêlma chu i tlân chhuahtîr le?” a ti a. Mikali chuan, “Ka kaltîr loh chuan mi thah a tum si alâwm,” tiin Saula chu a chhâng a. Davida chu a tlânchhia a, a him ta a. Rama khuaah Samuela hnênah a va kal a, a chunga Saula thil tih dân zawng zawng chu a hrilh a. Tin, Samuela nên chuan Naioth-ah an kal a, tah chuan an awm ta a. Saula hnênah chuan, “Ngai teh, Davida chu Rama khuaa Naioth-ah a awm,” tiin an hrilh a. Saula chuan Davida man tûrin mi a tîr a. Zâwlnei rual thu sawi dual dual Samuelan a hruai lai chu an va hmu a, Saula mi tirhte pawh chuan thu an sawi ve ta a. Chu thu chu Saula an hrilh a, mi dang a tîr leh a, chung mite pawh chuan thu an sawi ve leh ta a. Ani pawh chu Rama khaw lamah chuan a kal ve ta a; Seku hmuna tuichhunchhuah lian tak a va thlen chuan, “Samuela leh Davida hi khawiah nge an awm?” a ti a. Mi pakhat hian, “Ngai teh, Rama khuaa Naioth-ah an awm,” a ti a. Tichuan, Naioth-ah chuan a va kal a, Pathian thlarau a chungah a lo thleng ve ta a, Rama khuaa Naioth a thlen thlengin thu a sawi ve ta a. A silhfênte a hlîp a, Samuela hmaah chuan thu a sawi ve ta a. Chumi ni chuan nilêng leh zankhuain saruakin a awm a; chuta ṭang chuan, “Saula pawh zâwlnei a ni ve ta elo?” tih hi an chîng hlen ta a ni. Davida chu Rama khuaa Naioth aṭang chuan a tlân chhuak a, Jonathana hnênah a kal a, “Eng nge ka tih a, eng nge ka bawhchhiat le? I pa chungah eng nge ka tihsuala hetia mi thah a tum mai le?” a ti a. Ani chuan, “A that tawp lo vang che, i thi hauh lo vang. Ngai teh, ka pa chuan thil lian emaw, thil tê emaw min hrilh lovin eng mah a ti ngai lo. Engah tehlul nge hêng thu hi ka hnênah a zêp ang? A zêp hauh lo vang,” a ti a. Davida chuan, “Nangin min hmangaihzia hi i pa chuan a hre chiang hle a; chuvângin, i rilru tihnat a hlauh avângin ‘He ka thiltih tum hi chu hre suh se,’ a ti a ni ang. Nimahsela, Lalpa nunna leh i nunna chhâlin ka hrilh a che, tlêmah tlêmah ka thi lo chauh a ni,” tiin a chhâng a. Jonathana chuan Davida hnênah, “I duh apiang chu ka tihsak zêl ang che,” a ti a. Davida chuan Jonathana hnênah, “Ngai teh, naktûk hi thla thar tûk a ni dâwn a, lal hnêna chaw kîl ngei tûr ka ni a; mahse, ni thum ni tlai lam thlengin phûlah biru tûrin ka kal ang a. Tin, i pain ka awm lo a ni tih a hre ta a nih chuan, ‘Davida chuan an khua Bethlehem-ah an chhûngkuaa an kum tin thilhlan hlân tûrin kal min dîl ngawih ngawih a, a kal ta a ni,’ ti la; ani, a ṭha alâwm a tih chuan i chhiahhlawha tân a muanawm ang a, a thinrim erawh chuan ka chungah thil ṭha lo tih a tum tih hria ang che. I chhiahhlawh hi khawngaih rawh, Lalpa hmaah thu i thlunpui si a; ka lo bawhchhia a nih chuan nangman min that mai rawh; engah nge i pa hnênah chuan min hlan kher ang?” a ti a. Jonathana chuan, “Chutiang chu ring rêng rêng suh, ka pain i chungah thil ṭha lo tih a tum ka hriat phawt chuan ka hrilh loh che i ring em ni?” a ti a. Davida chuan Jonathana hnênah, “I pain bung takin a chhâng che tih tuin nge min hrilh ang?” a ti a. Jonathana chuan Davida hnênah, “Hawh teh, phûlah sâwn i kal teh ang,” a ti a. Tichuan, phûlah chuan an va kal ta a. Jonathana chuan Davida hnênah, “Israel-te Pathian Lalpa chu thuhretu ni rawh se, naktûk hetih hunah hian emaw, a tûk lehah emaw, ka pa ka han dâwp vêl ang a, i chungchâng ṭha taka a sawi chuan mi ka rawn tîr ang a, ka rawn hrilh ngei ngei ang che. Ka pain i chungah thil ṭha lo tih a tum tih ka hriata, ka rawn hrilh lo che a nih phawt chuan Lalpa chuan a tih tihin min ti sela, chutiang thil ṭha lo chu ka chungah ti ve rawh se. Him taka i awm theihna kawng ka zawnsak ngei ngei ang che. Lalpa chu ka pa hnêna a awm ṭhîn angin i hnênah pawh awm zêl rawh se. Ka damchhûng zawng Lalpa angin ka chungah ngilneihna tilang zêl la; ka thiha Lalpan Davida hmêlmate lei ata a tibo vek a nih pawhin, ka chhûngte chu i lo khawngaih kumkhua dâwn nia,” a ti a. Jonathana chuan Davida chhûngte tân pawh thu a thlung tel a, “ Lalpa chuan tu pawh Davida chunga thil sual ti chu hrem zêl rawh se,” a ti a. Jonathana chuan amah a inhmangaih angin Davida chu a hmangaih a, chutianga amah chu hmangaih ve tûrin Davida chu a tiamtîr a. Jonathana chuan a hnênah, “Naktûk hi thla thar a ni a, i ṭhut hmun a ruah dâwn avângin i awm loh a lang ngei ang. Naktûk tûklehah chuan hmâna i bihrûkna hmunah khân biru leh la, lungpui phênah khân awm reng ang che. Inthemthiam ni âwm takin a sîrah thal pathum ka rawn kâp ang a. Tin, ‘Kal la, thal va chhar rawh,’ tiin naupang ka rawn tîr ang a; naupang hnênah, ‘En teh, thal chu i sîrah khân a awm; kal la, la rawh’ ka tih chuan i tân a muanawm a, hlauh tûr a awm lo tih Lalpa chhâlin ka sawi a ni. Amaherawhchu, naupang hnênah, ‘En teh, thalte chu i piah lamah sâwn a awm’ ka tih chuan kal bo vang che, Lalpa chuan a kal botîr che a ni ang. Tin, nang nêna kan sawi dun tâk chungchângah chuan Lalpa chu thuhretu ni kumkhua rawh se,” a ti a. Tichuan, Davida chu phûlah chuan a biru a, thla a lo thar chuan lal chuan chawhlui a rawn kîl a. Lal chu ni danga a ṭhutna ngai bang bulah chuan a ṭhu a, Jonathana chu a hma zâwnah a ṭhu a. Abnera chu Saula kiangah a ṭhu a, Davida ṭhuthmun erawh chu a ruak a. Chumi ni chuan Saula chuan eng mah a sawi rih lo. ‘Eng emaw thiam lohna a nei a ni ang a’ a ti rilru a. Thla thar ni hnih ni chuan Davida ṭhuthmun a la ruak ta cheu va. Saula chuan a fapa Jonathana hnênah, “Engati nge Jesaia fapa Davida hi niminah leh vawiinah chawhlui kîl tûra a lo kal loh?” a ti a. Jonathana chuan Saula chu a chhâng a, “Davida chuan Bethlehem-a kal mi dîl ngawih ngawih a, ‘Min kaltîr hrâm rawh, khuaah chuan kan chhûngkuain inthawina kan hlân dâwn a, ka unaupain chuta awm ve ngei tûr chuan min ti si a; chuvângin, min khawngaih la, min kaltîr hrâm rawh, ka unaute ka va tlawh ang e,’ a ti a; chuvângin, lal chaw kîl tûrin a lo kal lo a ni,” a ti a. Saula chu Jonathana chungah chuan a thinur ta thut a, “Nang hmeichhe lepchiah leh luhlul fapa, i mualpho nân i nu a hringtu che tizak tûrin Jesaia fapa hi i ṭan tih ka hre chiang a ni. Jesaia fapa hi a dam chhûng chuan nang leh kan ram hi a ding chhuak dâwn lo tih hre ta che; tûnah, mi kohtîr la, ka hnênah han hruai rawh, a thi ngei tûr a ni,” a ti a. “Eng vânga thi tûr nge a nih, eng nge a tihsual?” tiin Jonathana chuan a pa chu a chhâng a. Tichuan, Saula chuan khawh hlum tumin a tin a, a pa chuan Davida chu thah a lo tum ngei a ni tih a hre ta a. Jonathana chuan thinur takin a chaw kil chu a thawhsan a, chumi thla thar ni hnih ni chuan chaw chu a ei duh ta lo, a pain Davida a tihmualpho nasat êm avângin a rilru a na hle a. A tûkah chuan Jonathana chu naupang hruaiin phûl lamah Davida nêna an hmun ruatah chuan a kal ta a. A naupang hruai hnênah, “Tlân la, ka thal kahte kha va zawng rawh,” a ti a. Naupang tlân lai chuan a piah lamah thal a kâp leh a, Naupangin Jonathana thal kahna hmun a va thlen chuan Jonathanan naupang chu a au va, “Thal chu i piah lamah khân a awm lo maw?” a ti a. Jonathana chuan naupang chu a au va, “Hmanhmawh la, kal thuai thuai la, muang suh,” a ti a. Jonathana hruai naupang chuan thalte chu a va chhar a, a pu hnênah chuan a rawn la a. Naupang chuan eng mah a hre lo va, Jonathana leh Davida erawh chuan thil kalhmang chu an hria a. Jonathana chuan naupang hnênah a thalte chu a pe a, “Kal ta la, khuaah hâwnpui rawh,” a ti a. Naupang chu a kal liam veleh Davida chu a bihrûkna lung phên aṭang chuan a lo chhuak a, bawkkhupin vawi thum chibai a rawn bûk a; tin, an infâwp a, an ṭap dûn ta a. Davida chu a lung a chhe lehzual a. Jonathana chuan Davida hnênah, “Thlamuang takin kal rawh aw, nang nêna kan inṭhianna chu Lalpa hminga thu kan thlun tawh kha. Lalpa chu nang nêna kan inkârah te, i thlahte leh ka thlahte inkârah te, thuhretu ni kumkhua rawh se,” a ti a. Davida chu a tho va, a kal ta a, Jonathana pawh khuaah a haw ta a. Davida chu Nob khaw puithiam Ahimeleka hnênah a kal a. Ahimeleka chuan khûr chungin Davida chu a lo hmuak a, a hnênah, “Engtizia nge tu mah hruai lova i lo kal le?” a ti a. Davida chuan puithiam Ahimeleka hnênah chuan, “Lalin tih tûr min tuk a, ka hnênah, ‘Ka tirhna che leh tih tûr ka tuk che hi tu mah hrilh suh,’ a ti tlat a. Tlangvâlte nên kan thiltih tûr leh kan tihna hmun tûr kan ruat diam a. Tûnah, engte nge i neih le? Chhang tlang nga min pe la, thil dang i neih apiang pawh,” a ti a. Puithiam chuan Davida chu a chhâng a. “Chhang panga chu ka nei lo va, chhang thianghlim chauh ka nei; tlangvâlte chu hmeichhe lakah an thianghlim emaw chu?” a ti a. Davida chuan, puithiam chu a chhâng a, “Kan rammut dâwn apiangin tlangvâlho chu hmeichhe lakah an intibawlhhlawh ngai lo; tûnah lek phei hi chuan an intihbawlhhlawh loh tûrzia mai chu,” a ti a. Tichuan, puithiam chuan chhang thianghlim chu a pe ta a, chutah chuan Pathian hnêna an hlan chauh lo chu chhang dang a awm si lo va; Lalpa hnêna an hlan chhang hlui chu ni tin chhang tharin an thlâk ṭhîn a ni. Chumi ni chuan Saula chhiahhlawh pakhat a awm ve a, ani chu Lalpa hnêna thutiam nei lai mêk a ni. A hming chu Doega a ni: Edom mi, Saula ran rual veng hotu ber a ni. Davida chuan Ahimeleka hnênah, “Fei emaw, khandaih emaw i kawl lo maw? Lalin hmanhmawh taka min tirh avângin ka khandaih leh ka hriamhrei, a eng mah ka rawn keng hman ta lo va ni,” a ti a. Puithiam chuan, “Filistia mi, Ela ruama i thaha khandaih chu en teh, puithiam kawr phênah hian tuamin a awm reng mai. Chu chu i duh chuan la rawh, chu lo chu hetah eng mah dang a awm lo,” a ti a. Davida chuan, “Chu lo liam, min pe mai rawh,” a ti a. Tichuan, Davida chu a tho va, chumi ni chuan Saula hlauvin a tlân bo va, Gath lal Akisa hnênah a kal ta a. Akisa chhiahhlawhte chuan a hnênah, “He mi hi an ram lal Davida kha a ni lâwm ni? ‘Saulan sâng tam tak a that a, Davidan sîng tam tak’ tia lâm chunga hlaa an awih kha a ni lâwm ni?” an ti a. Hêng thu avâng hian Davida chu a râlṭi ta a, Gath lal Akisa chu a hlau hle a. Chuvângin, an mit hmuhah a awm dân a tidanglam a, an hmaah a â der ta chiam a. Kawngkhârte a ham vak vak a, a chilthli chu a khabehmulahte a luang duah duah a. Akisa chuan a chhiahhlawhte hnênah, “En teh u, he mi hi mi â a nih hre reng chungin engati nge ka hnêna in rawn hruai? Mi â tlachham min tih vâng em ni he mi hi ka hmaah âtso tûra in rawn hruai? He mi hi ka inah a lo lût ang maw?” a ti a. Chuta ṭang chuan Davida chu a chhuak a, Adulam pûkah a awm ta a. A unaute leh a pa chhûngten chu chu an hriatin an zu fin ve ta a. Hnehchhiah tuar te, lei bat nei te, lungawi lote chuan an rawn bêl a, an hotu-ah a ṭang ta a. Tichuan, mi zali lai a hnênah chuan an awm ta a. Chuta ṭang chuan Davida chu Moab rama Mizpa-ah a kal a, Moab lal hnênah chuan, “Pathianin eng nge min tihsak dâwn tih ka hriat hma chuan ka nu leh ka pate hi i hnênah lo awm rawh se aw,” a ti a. Tichuan, anni chu Moab lal hnênah chuan a hnutchhiah a, pûk hima Davida a awm chhûng chu chutah chuan an awm a. Zâwlnei Gada chuan Davida hnênah, “Pûkah hi chuan awm reng suh; chhuak la, Judai ramah kal rawh,” a ti a. Davida chu a chhuak a, Heret ngâwah a lût ta a. Saula chuan Davida awmna an hre ta tih a lo hria a. Chutih lai chuan Saula chu Gibea khuaah a awm a, tlâng panga Esel thing hnuaiah a fei kengin a ṭhu a, a ṭhuihruai zawng zawng chu a kiangah an ding a. Saula chuan a kianga ding a ṭhuihruaite hnênah chuan, “Nangni Benjamin mite u, ngaithla rawh u. Jesaia fapa chuan lo te, grep huante pe che uin za hotu-ah te, sâng hotu-ah te a siam vêk dâwn che u em ni? In vaiin min phiar a ni lâwm ni? Ka fapain Jesaia fapa thu a thlunpui thu tu mahin min hrilh lo va, tu mahin pawi min tihpui hek lo. Ka fapain ka chhiahhlawh Davida hi mi do tûr leh vawiinah pawh min châng ru tûrin a fuih thu hi tu mahin in sawi duh si lo va,” a ti a. Edom mi, Doega, Saula chhiahhlawh zînga ding ve chuan a chhâng a: “Jesaia fapa chu Nob khuaah, Ahituba fapa Ahimeleka hnêna a lo kal ka hmu a. Tin, ani chuan Lalpa a râwnsak a, ei tûr a pe a, Filistia mi Goliatha ngûnhnâm a pe bawk a,” a ti a. Lal chuan puithiam Ahimeleka, Ahituba fapa leh a pa chhûngkua, Nob khuaa puithiam zawng zawng chu a kohtîr a, Saula chuan, “Ahituba fapa tûnah ngaithla rawh,” a ti a. Ani chuan, “Eng nge ni ka pu?” tiin a chhang a. Saula chuan a hnênah, “Engati nge nang leh Jesaia fapa hian min phiar le? Chhang leh khandaih i pe a. Pathian i râwnsak a; chuvângin, min do va, vawiinah hetiangin min châng ta a nih hi,” a ti a. Ahimeleka chuan lal chu a chhâng a, “Lal mâkpa, vêngtu hotu, in chhûngkaw chawimawitu leh i chhiahhlawhte zînga mi rinawm ber Davida ang hi tu nge awm? Vawiin hi Pathian ka râwnsak ni hmasa ber em ni? A ni lo, lal chuan a chhiahhlawh hi ka pa chhûngte nên nangmah phiarruah min puh lo hrâm rawh. I chhiahhlawh hian hêng thil hi a eng mah ka hre lo tak meuh a ni,” a ti a. Lal chuan, “Ahimelek, i thi ngei tûr a ni, nang leh i pa chhûngte zawng zawng nên,” a ti a. Tin, lal chuan a kianga vêngtu sipai dingte hnênah chuan, “Kal ula, Lalpa puithiamte hi that rawh u; Davida lamah an ṭang a, a tlân bo tih hre reng sia ka hnêna an sawi loh avângin,” a ti a. Nimahsela, vêngtu sipaite chuan Lalpa puithiamte chungah kut an thlâk duh lo va. Lal chuan Doega hnênah, “Kal la, puithiamte chu va that rawh,” a ti a. Edom mi Doega chu a kal a, puithiamte chu a va bei a, chumi ni chuan puithiam kawr ha chin sawmriat leh panga a that a. Tichuan, puithiam khua Nob chu khandaihin a bei a, a hmei a pa, naupang hnute hne lai lamin, bâwng te, sabengtung te, berâm te nên lam khandaihin a sât hlum a. Ahimeleka fate zînga Ahitupa fapa, Abiathara chu a tlân chhuak a, Davida hnênah a tlan ta a. Abiathara chuan Lalpa puithiamte Saulan a thah thu chu Davida a hrilh a. Davida chuan Abiathara hnênah, “Khami nia Doega ka hmuh khân, Saula a hrilh ang tih ka ring rêng a ni. I pa chhûngte zawng zawng chu keimah avânga thi an ni. Ka hnênah awm la, hlau suh, mi thah tumtu chuan nang pawh thah a tum che a ni, ka hnêna i awm chuan i him ang,” a ti a. “Filistia miten Keila khua an bei a, hruihzâwla an buhte an lâksak vek mai,” tiin Davida chu an rawn hrilh a. Ani chuan Lalpa hnênah, “Hêng Filistia mite hi ka zuk bei ang em?” tiin a zâwt a. Lalpa chuan, “Kal la, Filistia mite chu bei la, Keila khua chu chhan chhuak rawh,” a ti a. Davida mite chuan a hnênah, “Judai ram aṭang pawhin kan hlau a ni a, Keila khuaa zuk kala, Filistia sipaiho zuk beih chu a va hlauhawm lehzual âwm ve?” an ti a. Davida chuan Lalpa chu a râwn leh a, Lalpa chuan a chhâng a, a hnênah, “Keila khuaah chuan chhuk rawh, Filistia mite chu i kutah ka pe ang che,” a ti a. Davida leh a mite chu Keila khuaah chuan an kal ta a, Filistia mite chu an zuk bei a, an rante an lâksak a, an that chiam a; chutiang chuan Keila khuaa mite chu Davida chuan a chhan ta a. Ahimeleka fapa Abiathara chu Keila khuaa Davida hnênah chuan puithiam kawr kengin a tlân a. Tin, Keila khuaah Davida a kal tih Saula an hrilh a, Saula chuan, “Pathianin ka kutah min pe ta a nih chu; kulh kawngka kalhna nei khuaah amah a inkhung ta si a,” a ti a. Saula chuan mi zawng zawng, Keila khua zuk beia Davida leh a hote hual tûrin a ko khâwm a. Saulan beih a tum tih Davida chuan a lo hria a, puithiam Abiathara hnênah, “Puithiam kawr kha han la teh,” a ti a. Davida chuan, “Aw Lalpa Israel-te Pathian, Saula chuan kei i chhiahhlawh avâng hian Keila khuaa lo kala, rawn tihchhiat vek a tum tih ka lo hria a. Keila khuaa mite hian a kutah min pe dâwn em? I chhiahhlawhin ka lo hriat ang hian Saula chu a lo chhuk dâwn em? Aw Lalpa, Israel-te Pathian, hei hi min hrilh teh,” a ti a. Lalpa chuan, “Lo kal a tum,” tiin a chhâng a. Davida chuan a zâwt leh a, “Keila mite hian kei leh ka hote hi Saula kutah min pe ang em?” a ti a. Lalpa chuan, “An pe dâwn che,” a ti a. Davida leh a hote, mi zaruk emaw lai chu an tho va, Keila khua ata chu a remchânna lai apiangah an chhuak ta a. Davida chu Keila khua ata a tlân chhuak ta tih Saulan a hriat chuan Keila khuaa kal chu a tum ta lo va. Davida chu Zif tlângram thlalêrah chuan a rawl a, a awm ta reng a. Saula chuan ni tin a zawng a; Pathianin a kutah a pe lo va. Davida chu Zif thlalêr Hores hmuna a awm lai chuan amah thah tumin Saula a lo thawk tih a hria a. Saula fapa Jonathana chu a lo thawk a, Davida hnênah Hores-ah chuan a lo kal a. “Pathianin a vêng zêl dâwn che a ni,” a rawn ti a. A hnênah chuan, “Hlau rêng rêng suh, ka pa Saula chuan i chungah kut a thlâk lo vang. Israel lalah i ṭang ang a, kei i dawttu ka ni ang, ka pa pawhin chu chu a hria a ni,” a ti a. An pahnih chuan Lalpa hmaah thu an thlung a, Jonathana chu in lamah a hâwng a, Davida erawh chu ramhnuaiah a awm ta reng a. Zif mite chuan Gibea khuaah Saula chu an han hmu a, a hnênah, “Davida chu Hakila tlângram, Jesimon chhim lam Hores hmunah kan bul maiah a awm reng alâwm. Tûnah, aw lalpa, lo chhuk la, i duhthusâm ang takin ani chu lal kutah kan lo hlân mai tûr alâwm,” an ti a. Saula chuan, “Mi in ṭanpui ṭhin avângin Lalpa chuan mal sâwm che u rawh se. Kal ta ula, va hre chiang lehzual rawh u. Khawi lamah nge a kal ṭhina, tu nge chutah chuan hmu ṭhîn va zawng chhuak rawh u, mi bum a thiam hle tih ka hre si a. A bihrûkna ṭhinte zawng chhuak vek ula; tichuan, engkim hre chiangin ka hnênah lo kîr leh ang che u. Tin, in rualin ka lo kal ve ang a, chu lai rama a la awm phawt chuan Juda hnam tam tak zîng aṭangin ani chu ka man chhuak ngei ang,” a ti a. Tichuan, an tho va, Saula kal hmain Zif-ah chuan an kal a, Davida leh a mite chu Jesimon chhim Araba rama Maon thlalêrah chuan an awm a. Saula leh a mite chuan an zawng ṭan ta a, chu thu chu Davida an hrilh a; tichuan, Maon thlalêr lungpui hmunah a chhuk a, chutah chuan a awm ta reng a. Chu chu Saulan a lo hriat chuan Maon thlalêr lamah Davida chu a ûm ta a. Saula chuan tlâng pang lehlam kawngṭum a zawh a, Davida leh a hote chu chu tlâng pang lehlam kawngah Saula hlauvin hmanhmawh takin an kal a. Saula leh a hote chuan Davida leh a hote chu an man teuh hle tawh a. Zualko pakhat hi Saula hnênah a lo kal a, “Rang takin lo haw rawh, Filistia miten ram an rûn e,” a rawn ti a. Saulan Davida a ûm chu a kîr a, Filistia mite bei tûrin a kal ta a. Chuvângin, he hmun hi Sela-hamalekot an ti ta a. Chuta ṭang chuan a chho va, Engedi hmunah a biru ta a. Saulan Filistia mite a ûm chu a lo haw chuan, “Ngai teh, Davida chu Engedi thlalêrah a awm e,” tiin an hrilh a. Saula chuan Israel mi sângthum a thlan chhuahte nên chuan sathâr chênna lungpui hmuna Davida leh a hote awm chu a zawng ta a. An kalna kawng sirah chuan berâm huang a lo awm a. Chutah chuan pûk a awm, Saula chu inthiar tûrin a va lût a, Davida leh a hote chu pûk chhûngril lamah chuan an lo awm reng a. Davida hote chuan, “ Lalpan i hnêna a sawi, ‘Ngai teh, i hmêlma chu i kutah ka pe ang che, a chungah ṭha i tih angin ti ang che,’ a tih kha a lo thleng ta a nih hi,” an ti a. Davida chu a tho va, a rûk têin Saula kawrfual hmâwr chu a va hlep a. Chumi hnu chuan Davida chuan Saula kawrfual hmâwr a hleh avâng chuan a inthiam lo hle a. A hote hnênah chuan, “ Lalpa hriakthih, ka pu chunga kut ka lo lek hi ka tih loh tawp tûr ka lo ti a ni; ani chu Lalpa hriakthih a ni ngei si a,” a ti a. Davida chuan hêng thu hian a mite chu a thlêm dai a, Saula beih chu a remti ta lo va. Saula pawh chu a tho va, pûk aṭang chuan a chhuak a, a kal leh ta a. Chumi hnu chuan Davida pawh chu a lo tho va, pûk aṭang chuan a lo chhuak a, “Lalpa, ka lalpa,” tiin Saula chu a au zui a, Saula chu a lo hawi a, Davida chuan bawkkhupin zah takin chibai a bûk a. Davida chuan Saula hnênah, “Ngai teh, ‘Davidan i chhiatna a zawng a ni,’ tia miten i hnêna an sawi chu engah nge i awih ṭhin le? Ngai teh, vawiin hian he pûk chhûng ngeiah hian Lalpan ka kutah a hlân che tih nangmah ngeiin i hria. That tûr chein mi ṭhenkhatin min nawr a; mahse, ka zuah che a ni. ‘Ka lalpa chungah kut ka thlâk lo vang, Lalpa hriakthih a ni si a;’ ka ti a ni. En teh, ka pu, i puan fêm ka ken reng hi, i puanfêm pawh ka hlep ngei a; mahse, ka that duh lo che a ni; i chungah ka hel lo va, thil sual tih pawh ka nei hek lo. Thah tumin min zawng mah la, kei chuan i chungah thil sual tih ka duh lo tih hria ang che. Lalpa chuan nang nêna kan inkâr thu hi rêl sela, kei zawngin i chungah kut ka thlâk dâwn lo, Lalpa chuan i lakah phuba la zâwk rawh se. Hmânlai thufingin, ‘Mi sualin thil sual an ti ṭhîn,’ a ti a; kei chuan i chungah kut ka thlâk lo vang. Israel lal chu tu beih tumin nge a lo chhuah? Tu nge i ûm le, ui thisâwn nge uihli? Lalpa chuan nang nêna kan inkâr thu rêl sela, tifel rawh se. Ka chungthu hi ngaihvenin mi sawipui sela, i kut ata mi chhan chhuak rawh se,” a ti a. Chûng thu chu Davidan Saula hnêna a sawi zawhin Saula chuan, “Ka fapa David, i aw a ni maw?” a ti a, ring takin a ṭap chhuak a. Davida hnênah chuan, “Kei ai chuan i fel zâwk daih a ni, nang chuan ka chungah thil ṭha i ti a, kei erawh chuan thil ṭha lo ka ti a ni. Vawiin hian ka chunga i ṭhatzia i tilang ta, Lalpan i kuta min pêk pawhin min that duh lo va. Miin a hmêlma hmu fuh sela, a khawih duh lo vang em ni? Vawiina ka chunga i thil tih dânah hian Lalpa chuan thil ṭhain rûl che rawh se. Ngai teh, lal i la ni ngei dâwn a, Israel-te lalram chu i kutah tihngheh a la ni ngei dâwn tih ka hre ta. Ka thlahte tiboral lo tûr leh ka pa chhûngkaw zîng ata ka hming thai bo lo tûrin tûnah Lalpa hming chhâlin chhia chham rawh khai,” a ti a. Tichuan, Davida chuan Saula hnênah chhia a chham a; Saula chu in lamah a hâwng a, Davida leh a hote chu an bihrûkna lamah an chho ta thung a. Samuela chu a thi a, Israel mi zawng zawng chu amah sûn tûrin an lo kal khâwm a. Rama khuaa a in kiangah chuan an phûm a. Tin, Davida chu a tho va, Paran thlalêrah chuan a chhuk a. Maon khuaah chuan mi pakhat a awm a, Karmel-ah ram a nei a, a hausa hle a ni. Kêl sângkhat leh berâm sângthum a nei a, Karmel tlângah chuan a berâm hmulte chu a mêt a. Chu pa hming chu Nabala a ni a, a nupui hming chu Abigaili a ni. Chu hmeichhia chu a felin a hmêl a ṭha hle a, a pasal erawh chu mi kawm tak leh thinbutut nei a ni. Ani chu Kaleba thlah a ni a. Chutah chuan Nabalan berâm hmul a mêt tih Davida chuan thlalêr aṭangin a lo hria a. Davida chuan a hnênah tlangvâl sâwm a tîr a, a mi tirhte hnênah chuan, “Karmel tlânga Nabala hnênah chho ula, ka hmingin chibai bûk ang che u. ‘I chungah te, in chhûngkaw chungah te, i neih zawng zawng chungah te thlamuanna awm rawh se. He laiah berâm hmul i mêt tih ka lo hria a, i berâmpute pawh kan zîngah an khawsa ṭhîn a, an pawi eng mah kan khawih ngai lo, Karmel tlânga an awm chhûngin an thil eng mah a bo ngai hek lo. I hote zâwt la, an hrilh thei ang che. Chuvângin, ka hote hi lo khawngaih la, hei in ruai ṭheh ni takin an lo kal hi, i neih ang ang, i chhiahhlawhte leh i fapa Davida hi lo pe tûrin ka ngên a che,’ va ti rawh u,” a ti a. Davida hote chu an kal a, chûng thu zawng zawng chu Davida hmingin an sawi a; tichuan, an nghâk ta a. Davida hote chu Nabala chuan a chhâng ta a, “Davida chu tu nge maw ni le: Jesaia fapa chu tu nge ni? Tûnlai hian chhiahhlawh pute tlân bosan an tam mai a. Ka chaw te, ka tui te, ka berâm hmul mêttu te tâna ka talh sa te hi tute nge maw an nih pawh ka hriat hleih loh hnênah ka pe tehlul ang maw” a ti a. Davida tirh tlangvâlte chu an lo kîr leh a, chûng thu zawng zawng chu an hrilh a. Davida chuan a mite hnênah, “Khandaih pai ṭheuh rawh u,” a ti a. Tichuan, khandaih an pai ta sang sang a, Davida pawh chuan a khandaih a pai a, mi zali laiin an zui chho va, mi zahnih chu bungraw vêngin an awm a. Chhiahhlawh pakhatin Nabala nupui Abigaili hnênah, “Ngai teh, Davida chuan thlalêr aṭangin kan pu chibai bûk tûrin mi a rawn tîr a, ani chuan a lo hau va. Chûng mite chu an ṭha hle a, kan pawi eng mah an khawih lo va, phûla kan awm ho chhûng zawng khân eng mah kan hloh ngai hek lo. Berâm vênga an bula kan awm chhûngin kan tân chhûn leh zânah kulh an ni ngawt mai a. Tûnah, he thil hi engtin nge i tih dâwn ngaihtuah teh; chutilo chu kan pu chungah leh a chhûngkaw chungah thil ṭha lo a thleng mai ang e; kan pu lah hi a sual khawp a, thu hrilh theih pawh a ni si lo,” a ti a. Abigaili chuan hmanhmawh takin chhang tlang zahnih leh uain bûr hnih leh berâm panga, a hmin sa te, vaikan kg. sâwm leh pasarih leh grep pho ro bâwr te, theipui hlâwm zahnih nên a rawn la a, sabengtung a phurhtîr a. A chhiahhlawh tlangvâlte hnênah chuan, “Lo kal hmasa ula, ka rawn zui ang che u,” a ti a. A pasal Nabala erawh chu a hrilh lo. Sabengtung chungah chuan a chuang a, a kal ta a. Leisekawt a thlen laiin Davida leh a hote chuan an rawn pan a, an intâwk ta a. Davida chuan, “He pa thil neih zawng zawng hi pakhat mah bo lovin thlalêrah khân a thlâwnin ka lo vênsak a nih hi le, a chunga ka ṭhatna hi thil ṭha lovin min rûl ta si a. Khawvâr hmaa an zînga mipa naupang pakhat tê pawh ka zuah chuan Pathianin a tih tihin, na tak pawhin min ti rawh se,” a ti rilru a ni. Abigaili chuan Davida a hmuh veleh a sabengtung aṭangin a chhuk a, Davida chu bawkkhupin chibai a bûk a. A ke bulah a kûn a, a hnênah, “Ka pu, keima thiam loh vâng chauh a ni e, a mawh chu ka phur ang. I chhiahhlawhnuin i hnêna ka ngen hi khawngaih takin min ngaihthlâksak ang che. Ka pu, he mi sualpa thu hi ngaimawh suh, a hming Nabala a ni ang ngei hian mi â a nih hi, â takin thil a ti ṭhîn a ni, kei i chhiahhlawhnu hian ka pu mi tirhte ka lo hmu lo atin a ni. Tûnah ka pu, Lalpa mi nung leh i hming chhâlin ka sawi e, “Thisen chhuah lo tûr leh phuba la lo tûrin Lalpa chuan a vêng che a, i hmêlma, i ṭhat lohna zawngtute chu Nabala ang hian awm rawh se. Tin, hei ka pu, i chhiahhlawhnuin i tân thilpêk ka rawn ken hi i ṭhuihruai tlangvâlte hian min dawnsak sela, i chhiahhlawhnu sualna hi khawngaih takin ngaidam ang che. Lalpa chuan ka pu lalna chu tinghet sela; ka pu hi Lalpa tâna do i ni si a, i dam chhûngin thil ṭha lo i tih hmuh tûr awm suh se. Miten tihhlum tumin ûm che mah sela, ka pu nunna chu Lalpa i Pathian chuan vênghim tlat sela, i hmêlmate nunna erawh chu lungtê an perh bo daih ang hi ni rawh se. Israel-te hruaitu atân a ruat tawh si che a, Lalpa chuan i tâna thil ṭha a lo tiam tawh zawng zawng chu thlentîr rawh se. Chhan awm lova thisen i chhuah ngai loh leh phuba i lâk ngai loh hi, ka pu, i inchhîr rêng rêng lo vang. Lalpan ka pu hi a tihhlawhtlin hunah i chhiahhlawhnu hi min hre reng ang che aw,” a ti a. Davida chuan Abigaili hnênah, “Vawiina mi lo hmuak tûra tîrtu che Israel-te Pathian Lalpa chu fakin awm rawh se. I remhriatna avângin duhsakna dawng ang che, thisen chhuah sualna lak ata min vên avâng leh phuba la lo tûra vawiina ka kut i chelh avâng hian. Tina lo tûr che ua min khaptu Israel-te Pathian Lalpa, mi nung hmingin ka sawi e. Nang chuan mi lo hmuak lo la chu Nabala leh a mite chu tu mah zuah lovin naktûk zîng khaw ên hmain thah vek ka lo tum asin,” a ti a. Davida chuan a thil rawn ken chu a lo dawnsak a, “Thlamuang takin haw rawh, i dîl chu ka hria e, i duh ang chuan ka tihsak ang che,” a ti a. Abigaili chu Nabala hnênah chuan a hâwng ta a, inah chuan ruai ropui tak an lo ṭheh a, Nabala chu a rui hle a, a lo ṭawng lûng lûng a. chuvângin, a tûk khawvâr hma chuan a hnênah eng mah a sawi lo. A tûkah chuan Nabala pawh a rui tawh lo va, a nupui chuan thil awmzia zawng zawng chu a han hrilh chuan a mit sulh a, a che thei ta lo va. Ni sâwm hnuah Nabala chu Lalpa kut tuarin a thi ta a. Nabala thih thu Davidan a lo hriat chuan, “Nabalan min hmuhsitna phuba min lâksak a, thil sual ti lo tûra a chhiahhlawh min vêngtu Lalpa chu fakin awm sela, Lalpa chuan Nabala chu a thil tihdik loh avângin a tuartîr a nih hi,” a ti a. Davida chuan Abigaili chu a nupui atâna va be tûrin mi a tîr a. Davida chhiahhlawhte chu Karmel tlângah Abigaili hnênah chuan an va kal a, a hnênah, “Davida chuan a nupui atân hruai tûr chein min tîr a ni,” an ti a. Tichuan, Abigaili chu a tho va, bawkkhupin chibai a bûk a, “Ngai teh, i chhiahhlawhnu hi ka pu chhiahhlawhte ke sil tûr pawhin ka inpeih e,” a ti a. A tho thuai a, sabengtung chungah a chuang a, a tirhkah nula panga nên chuan Davida mi tirhte chu an zui a; tichuan, a nupuiah a awm ta a. Davida chuan Jezreel mi, Ahinoami a lo nei tawh bawk a, an pahnih chuan nupuiah a nei ta a. Saula khân a fanu Mikali, Davida nupui kha, Galim khaw mi Laisa fapa Paltia a lo neihtîr tawh reng a ni. Zif-ho chu Gibea khuaa Saula hnênah an lo kal a, “Davida chu Jesimon thlalêr bul Hakila tlângah a biru,” an rawn ti a. Tichuan, Saula chu Israel mi zathum thlan chhuah hruaiin thlalêr lamah chuan Davida zawng tûrin a chhuk ta a. Saula chuan Jesimon thlalêr bul Hakila tlâng kawng sîrah riahhmun a khuar a; Davida erawh chu thlalêrah a awm a, Saulan a rawn zawng a ni tih a hria a. Enthlatu a tîr a, Saulan a rawn zawng ngei tih a hre chiang ta a. Davida chu a tho va, Saula riahhmun khuarnaah chuan a va kal a; Saula leh a sipai hotu Abnera, Nera fapa mut hmun chu a va hria a. Saula chu an riahhmun lai takah a mu a, a vêlin a sipaite an mu a. Davida chuan Hit mi Ahimeleka leh Joaba u, Zeruii fapa Abisaia hnênah, “Saula awmnaah tu zâwkin nge mi zui dâwn?” a ti a. Abisaia chuan, “Keiman ka zui ang che,” a ti a. Davida leh Abisaia chu zânah sipai awmnaah chuan an kal a, Saula chu an riahhmun lai takah chuan a mu a, a lu bulah a fei a vit bûr a, Abnera leh a sipaite chuan an lo mut hual a. Abisaia chuan Davida hnênah, “Hei le, Pathianin i kutah i hmêlma hi a pe ta che a nih hi, khawi nge fei hian leiah ka han chhun bet tlat ang e, nawn leh a ngai tawh lo vang,” a ti a. Davida chuan Abisaia hnênah, “That suh, Lalpa hriakthih chunga kutthlâk tu nge thiam chang awm ang?” a ti a. Davida vêk chuan, “ Lalpa nunna chhâlin ka sawi e, Lalpan a chungah kutthlâk zâwk sela; a nih loh leh a thih ni a lo thleng emaw, indonaah a la boral mai emaw a ni ang. Lalpa hriakthih chungah hian kut ka thlâk tawp lo vang, a lu bula fei leh a tuithâwl erawh hi chu la ila, i kal ang,” a ti a. Tichuan, Davida chuan Saula lu bula fei leh tuithâwl chu a la a, an kalsan ta a. Tu man an hmu lo va, an hre hek lo. Davida chu râl lehlamah a kal a, tlângchhîpah a ding a, an inkâr chu hla tak a ni. Davida chuan sipaiho leh Abnera chu a au va, “Abner, mi han chhâng dâwn na nge?” a ti a. Abnera chuan a chhâng a, “Lal han au veitu chu tu nge maw i nih le?” a ti a. Davida chuan Abnera hnênah, “Mipa i ni na nge? Israel zîngah tu nge nang tluk awm? Engati nge lal, i pu chu i vên ṭhat loh? I pu that tûrin mi an lo luh kha le. I tih dân hi a ṭha lo, Lalpa, mi nung chhâlin ka hrilh a che, Lalpa hriakthih i vên ṭhat loh avângin thi tlâk i ni, lal fei leh a tuithâwl, a lu bula mi kha khawiah nge a awm tâk?” a ti a. Saula chuan Davida aw a ni tih a hria a, “Ka fapa David, nang i ni maw?” a ti a. Davida chuan, “Ni e, lalber, ka pu, keimah ka ni e,” a ti a. Davida chuan, “Eng vângin nge ka pu hian a chhiahhlawh hi a ûm le? Eng thil nge ka tiha, eng nge ka tihsual? Lal, ka pu chuan, a chhiahhlawh thu hi lo ngaithla teh se. Min bei tûra tithinurtu che hi Lalpa a nih chuan ka inpe mai tûr alâwm; mihring an nih erawh chuan ânchhia dawng rawh se. Chûng mite chuan kan ram Judai ram ata hi min ûmchhuaka, ‘Kal la, pathian dang rawng va bâwl rawh’ min ti a ni ngawt mai alâwm. Chuvângin, Lalpa awm lohna ramah chuan min that suh se; miin tlânga varung an veh ṭhîn ang hian Israel lal chuan kei uihli mai hi min rawn veh a nih hi,” a ti a. Saula chuan, “Thil ka lo tisual a ni, ka fapa David, lo hâwng leh rawh. Vawiinah ka nun i zuah avângin i chungah kutthlâk ka tum leh tawh ngai lo vang. Â takin ka lo ûm che a, ka lo tidik lo a nih hi,” a ti a. Davida chuan, “Aw Lalpa, heta hi i fei a awm e, i mite zînga pakhat lo kal sela han la rawh se, Lalpa chuan mi tin an fel leh rinawm man a pe dâwn si a. Vawiinah nang hi Lalpan ka kutah min pe a, Lalpa hriakthih chungah kut ka thlâk duh lo va ni. Vawiina i nunna ka zuah ang bawk hian Lalpa chuan ka nunna min zuahsak sela, buaina lak ata hi min chhan chhuak rawh se,” a ti a. Saula chuan Davida hnênah, “Ka fapa David, lo hmuingîl zêl la, i thil tih apiangah hlawhtling zêl ang che,” a ti a. Davida chu a kal ta a, Saula pawh a hmun lamah a haw ta a. Davida chu hetiang hian a inngaihtuah a, “Engtikah emaw chuan Saula hian min that ngei dâwn zawng a nih hi, Filistia rama tlan bo aia ṭha hi ka tân a awm dâwn lo a ni; tichuan, Saulan Israel ram chhûngah min zawn a beidawng ang a, a kut ata ka him thei ang,” a ti a. A insiam a, amah leh a ho mi zaruk chu Gath lal Maoka fapa Akisa hnênah an kal ta a. Davida chu Gath khuaa Akisa hnênah chuan a mite, an chhûngkua ṭheuh nên, a nupui pahnih Jezreel mi Ahinoami leh Karmel tlânga awm Nabala thihsan Abigaili te nên chuan an awm ta a. Davida chu Gath khuaah a tlân tih Saula an hrilh a; tichuan, a zawng zui ta lo va. Davida chuan Akisa hnênah, “Min khawngaih la, i rama khaw pakhat min pe la; tah chuan, kan lo awm ang e: engah nge lal khuaah hian i kiangah kan awm ve reng ang?” a ti a. Chumi ni chuan Akisa chuan Ziklag khua chu a pe a; tûn thlengin Ziklag khua chu Juda lalten an chang hlen ta a. Filistia rama Davida a awm chhûng chu kum khat leh thla li a ni. Davida leh a mite chu Gesur mite, Girzi mite, Amalek mite beiin an thawk chhuak ṭhîn a, chûng hnamte chu hmânlai ata tawh Sur ram leh Aigupta ram thlenga lo awm ṭhîn an ni. Davida chuan chûng ram chu a beih châng apiangin a hmei a pain a that vek ṭhîn a, an berâm te, an bâwng te, an sabengtung te, an sanghâwngsei te, an silhfen te nên a lâksak a. Akisa hnênah a rawn hâwn ṭhîn. Akisa chuan, “Vawiinah tu nge i va rûn le?” a lo ti a. Davida chuan, “Judai ram chhim lam te, Israel-ho chênna chhim ram te, Kanan-ho chênna chhim ram te ka va rûn a ni,” a ti a. Davida chuan a hmei a pain tu mah a zuah ngai lo va; a chhan chu, ‘Davida chu hetiangin a che ṭhîn,’ tiin kan chanchin an sawi dah ang e,” a ti a ni. Chu chu Filistia rama a awm chhûnga a tih dân a ni. Akisa chuan Davida thu sawi chu a awih hle a, “A mi Israel-te huatah a insiam ta si a; chuvângin, kan thuhnuaiah an awm reng tawh dâwn a nih hi,” a tih phah a. Chûng lai chuan Filistia mite chuan Israel-te do tûrin an sipai an khâwm chiam a, Akisa chuan Davida hnênah, “Nang leh i mite chuan ka sipaite in dopui ngei ang chu,” a ti a. Davida chuan, “Dopui e, i chhiahhlawh hian eng nge ka tih ṭhin i hre mai ang,” a ti a. Akisa chuan Davida hnênah, “A ṭhat chu! Mi vêngtu atân i awm kumkhua mai dâwn nia,” a ti a. Samuela chu a thi a, Israel mi zawng zawngin an ṭah a; a chênna khua Rama-ah chuan an phûm tawh a. Saula chuan aienthiam te, dawithiam te a ram ata a hnawt chhuak vek tawh bawk a. Filistia mite chu an pung khâwm a, Sunem-ah ṭanhmun an khuar a. Saula chuan Israel mi zawng zawng a khâwm a, Gilboa khuaah ṭanhmun a khuar bawk a. Saulan Filistia sipaiho a hmuh chuan a hlau va, a zâm ta a. Lalpa a râwn a, Lalpa chuan mumangin emaw, Urim-in emaw, zâwlnei emaw pawhin a chhâng rêng rêng lo va. Saula chuan a ṭhuihruaite hnênah, “Ka va râwn tûr mitthi thlûk thiam hmeichhia min zawnsak rawh u,” a ti a. Anni chuan, “E tak a, mitthi thlûk thiam hmeichhia pakhat chu Endor khuaah a awm asin,” an ti a. Tichuan, Saula chu a inbâwl danglam a, thawmhnaw dang a inbel a, mi pahnih hruaiin hmeichhe hnênah chuan zânah an va kal a, a hnênah, “Thlarau min râwnsak la, a hming ka lam chu min koh chhuahsak teh,” a ti a. Hmeichhia chuan a hnênah, “Ngai teh, Saula thiltihte chu i hria a, engati nge ka thihna tûrin ka tân thang i kam le?” a ti a. Saula chuan, “ Lalpa hmingin ka tiam e, Lalpa mi nung chhâlin he thil avâng hian i thi lo vang tih ka tiam a che,” a ti a. Hmeichhia chuan, “Tu nge ka koh chhuahsak ang che?” a ti a. Ani chuan, “Samuela mi koh chhuahsak rawh,” a ti a. Hmeichhia chuan Samuela a han hmuh chuan a ṭê ṭhawt a, Saula hnênah, “Engati nge Saula ni reng si-a mi bum?” a ti a. Lal chuan hmeichhe hnênah chuan, “Hlau suh, eng nge i hmuh le?” a ti a. Hmeichhia chuan Saula hnênah, “Lei ata Pathian ni âwm tak lo chhuak ka hmu,” a ti a. Ani chuan, “Eng ang nge a nih?” a ti a. Hmeichhia chuan, “Putar a ni, kawrfual a ha,” a ti a. Saula chuan Samuela a ni tih a hre ta a, bawkkhupin chibai a bûk a. Samuela chuan Saula hnênah, “Engati nge min koh chhuaha, mi tihbuai le?” a ti a. Saula chuan, “Ka mang a ang êm êm a, Filistia miten min rawn bei a, Pathian lah chuan min hawisan ta si a; zâwlnei emaw, mumang emaw pawhin min chhâng ta si lo va; chuvângin, ka tih tûr min hrilh tûrin ka ko ta che a ni,” a ti a. Samuela chuan, “Chutia Pathianin a hawisan chea, a hmêlma i nih tawh si chuan engtizia nge kei mi la rawn koh cheu va? Lalpan ka hnêna a sawi tawh ang khân i chungah a ti a nih chu, Lalpa chuan i lalna a chhuhsak che a, i lam hnai a pe tawh. Lalpa thu i zâwm lo va, Amalek-ho kha i tihchimih vek loh avângin tûnah he thil hi i chungah a lo thleng ta a nih hi. Lalpa chuan nang leh Israel-te chu Filistia mite kutah a pe che u ang a, naktûkah, nang leh i fate chuan min rawn zui ve ang a, Lalpa chuan Israel sipaite chu Filistia mite kutah a pe ang,” a ti a. Chu veleh Saula chu leiah a tlu a, Samuela thu sawi avâng chuan a hlau ta êm êm a, nilêng leh zankhuaa chaw ei lo a nih avângin a chau hle a. Hmeichhia chu Saula hnênah a lo kal a, a mangang hle tih a hria a, a hnênah, “En teh, i chhiahhlawhnu hian i thu ka zâwm a, thih leh thih tiin mi hrilh angin ka ti a. Tûnah, i chhiahhlawhnu thu awih ve la, ei tûr ka siam ang che a, chu chu ei la, i lo harh ang a, i hâwng thei mai ang,” a ti a. “Ka ei dawn lo,” tiin a hnial a. A ṭhuihruaite chuan hmeichhe sawi ang chuan ei tûrin an tur a, an thu chu a zâwm ta a; tichuan, lei ata a lo tho va, khumah chuan a ṭhu a. Hmeichhia chuan inah bâwngno chawm thau a nei a, a va talh sawk sawk a, chhangphut a la a, a hmet a, dawidim tel lovin chhang a siam a. Saula leh a ṭhuihruaite hmaah chuan a hlui a, an ei ta a. Tichuan, an tho va, chumi zân chuan an kal chhuak leh ta a. Filistia mite chuan an sipai zawng zawng chu Afek-ah an ko khâwm a. Israel-te chuan Jezreel ruam tuikhur bulah ṭanhmun an khuar a. Tichuan, Filistia lalho chu za rual te, sâng rual tein an lo kal duah duah a, Davida leh a mite chuan Akisa hovin hnu an dâl a. Filistia sipai hotute chuan, “Hêng Hebrai-te hian hetah eng nge an tih ve?” an ti a. Akisa chuan Filistia sipai hotute hnênah chuan, “He mi hi Israel lal Saula ṭhuihruai Davida a nih hi, kum khat zet ka hnênah a awm tawh a, ka hnêna a lo tlûkluh ni ata tûn thlengin a dik lohna rêng rêng ka hmu lo,” a ti a. Nimahsela, Filistia sipai hotute chu Akisa chungah an thinur hle a, a hnênah, “Ani chu i khaw pêkah chuan hâwntîr rawh, indonaah kan zîngah a chhuk ve tûr a ni lo, kan hmêlmate lama ṭangin kan mite lu a la ang a, a pu nên an inrem leh hlauh si ang e. He Davida hi a ni lâwm ni lâm chunga: ‘Saulan sâng tam tak a that a, Davidan sîng tam tak a that,’ tia hlaa an awih kha?” an ti a. Tichuan, Akisa chuan Davida chu a ko va, a hnênah, “ Lalpa hmingin ka sawi e, mi rinawm tak i ni a, kei chuan indonaah kan hnêna kal ve atân ka duh hle che a; ka hnên i lo thlen ni ata vawiin thlengin i dik lohna ka hmu rêng rêng lo; mahse, lalhote hian an duh lo che a ni. Chuvângin, Filistia lal dangte hi i tihlungawi si loh chuan kîr leh ta mai la, lungawi takin kal ang che,” a ti a. Davida chuan Akisa hnênah, “Eng nge ka tihsual? I hnêna ka lo thlen ni ata vawiin thlengin thil fel lo eng nge i chhiahhlawh chungah i hmuh? Ka pu, lal hmêlma dopui tûra ka kal theih loh chhan hi eng nge ni?” a ti a. Akisa chuan Davida chu heti hian a chhâng a, “Pathian vântirhkoh ang maiin ka mit hmuhah i fel a; nimahsela, Filistia lal dangte hian: ‘Indonaah kan zîngah a lo tel ve tûr a ni lo,’ an ti tlat si a. Chuvângin, zîng takah tho la, i hnêna i pu chhiahhlawhte nên hian naktûk zîngah, khua a ên veleh, chhuak vat rawh u,” a ti a. Tichuan, Davida leh a mite chu Filistia rama kîr leh tûrin a tûk zîng takah chuan an tho va, Filistia mite erawh chu Jezreel-ah an chho ta a. Ni thum nia Davida leh a mite chuan Ziklag an va thlen chuan Amalek mite chuan chhim lam ram leh Ziklag khua chu an lo rûn a, Ziklag khua an lo la a, an hâl vek a. Hmeichhiate leh chu khuaa awm zawng zawng, naupang aṭanga tar thlengin salah an man a; tu mah that lovin an hruai a, an lo hâwnpui vek a. Davida leh a miten khua an va luh chuan a lo kâng chhe vek a, an nupui te, an fanu leh fapate chu salah an lo hruai vek a. Davida leh a mite chu nasa takin an ṭap a, chau hnêp khawpin an ṭap a. Davida nupui pahnih, Jezreel mi Ahinoami leh Karmel tlânga awm Nabala nupui thihsan Abigaili pawh salah an hruai bawk a. An fanute leh an fapate sala an hruai avângin mite chu an thin a rim êm êm a, Davida chu den hlum an rawt a; chu thil avâng chuan Davida pawh a mangang hle a; mahse, Lalpa, a Pathian chuan a tichak thar a. Davida chuan puithiam Abiathara, Ahimeleka fapa hnênah chuan, “Puithiam kawr kha han la teh,” a ti a. Abiathara chuan Davida hnênah puithiam kawr chu a rawn la a. Davida chuan, “Min rûntute chu ûm ila, ka la ûm pha ang em?” tiin Lalpa a râwn a. Ani chuan, “Ûm rawh, i ûm pha ang a, i chhan chhuak vek ang,” tiin a chhâng a. Tichuan, Davida chu a hnêna mi zaruk awmte nên chuan an thawk chhuak ta a, Besor lui an va thleng a. Chutah chuan mi ṭhenkhat a hnutchhiah a. Davida chuan mi zali hruaiin a ûm zêl a, mi zahnih erawh kha chu an chauh lutuk avângin Besor lui chu an kai ve thei lo va, an hnutchhiah ta a ni. Phûlah chuan Aigupta mi an va hmu a, Davida hnênah an rawn hruai a. Tui in tûr leh chaw ei tûr an pe a. Theipui chhang hlâwm khat leh grep rah pho ro bâwr hnih an pe bawk a. Tin, chûng chu a han ei a, a lo harh ta a, ni thum leh zan thum lai ei leh in lovin a lo awm tawh a ni. Davida chuan a hnênah, “Tu mi nge i niha, khawi aṭangin nge i lo kal?” a ti a. Ani chuan, “Aigupta mi, Amalek-ho chhiahhlawh ka ni. Ni thum lai a ni ta, ka dam loh avângin ka puin min kalsan ta mai a ni. Keret mite chênna ram chhim lam te, Judai ram chhim lam te, Kaleb-ho ram chhim lamte kan rûn a, Ziklag khua pawh kan bei bawk,” a ti a. Davida chuan a hnênah, “Chûng ram rûntute hnênah chuan min hruai thei ang em?” a ti a. Ani chuan, “Min that lo tûr leh ka pu kuta min hlân lo tûra in Pathian hming chhâla thu min tiam chuan an hnênah ka hruai ang che,” a ti a. An hnênah chuan a zu hruai ta a, anni chuan Filistia ram leh Judai ram aṭanga an râllâk tam tak chu lâwmin ruai an lo ṭheh a, hmun tinah an lo awm darh a. Davida chuan khawvâr tirh aṭangin a tûk tlai lam thlengin anni chu a bei a; tlangvâl zali, sabengtung chunga chuanga tlânchheho chauh lo chu tu mah dama chhuak reng an awm lo. Davida chuan Amalek miten an lâksak zawng zawng chu a chhuh leh vek a, a nupui pahnih te pawh a chhan chhuak a. Tichuan, naupang leh tar te, an fanu leh fapate leh an thil an lâksak tawh zawng zawng chu kim takin an la kîr leh vek a. Davida chuan a vaiin a hâwnpui leh ta a. Davida chuan berâm rual leh ran rual zawng zawng chu a la a, a mite hma lamah chuan an kaltîr a, “Hei hi Davida râllâk a nih hi,” an ti a. Mi zahnih, an chauh lutuk avânga Davida zui thei ta lo, Besor lui kama an hnutchhiah tâkte hnên chu Davida chuan a va thleng a. Anni chu Davida leh a hnêna kal vete hmuak tûrin an lo chhuak a, Davida leh a mite chuan an rawn pan a, anni chu chibai an bûk a. Amaherawhchu, Davida zuitute zînga mi sualho leh kawhmawh bâwl ṭhînte chuan, “Anni hi kan hnêna an kal ve loh avângin râllâk thil kan va lâkte chu kan pe ve lo vang, an nupui leh an fate erawh chu an hâwnpui thei ang,” an ti a. Davida chuan a chhâng a, “Ka unaute u, chutiang chu a ni lo ve. Lalpa min pêk hi chutianga tih tûr a ni lo. Ani chuan min hum a, min beitute chu kan kutah min pe a ni si a. He thilah hian tu nge in thu pawm thei ang le? Indonaa zuk kalte chan ang bawk bungraw vênga lo awmte hian an chang ve tûr a ni; inang vekin chan tûr a ni e,” a ti a. Davida chuan Israel-te tân chutiang chuan dân leh thupêk a siam nghâl a, tûn thlengin an zâwm ta a ni. Davida chuan Ziklag khua a thlen chuan a râllâk sumte chu Judai ram hruaitu, a ṭhiante chu a sem ṭheuh va, “Hei, Lalpa hmêlmate laka râllâk ka rawn thawn che u a ni,” a ti a. Tichuan, Bethel-a awm te, Rama chhima awm te, Jatira-a awm te, Aroer-a awm te, Sifmot-a awm te, Estamo-a awm te, Rakal-a awm te, Jerami-ho te, Ken-ho te, Horma-a awm te, Borasan-a awm te, Athak-a awm te, Hebron-a awmte leh Davida chettlat ṭhinna hmuna awm zawng zawng te pawh a thawn vek a. Filistia mite chuan Israel-hote chu an bei a; tichuan, Israel-te chu Filistia-ho lakah an tlânchhia a, mi tam tak Gilboa tlângah chuan an that a. Saula leh a fate chu Filistia mite chuan an rawn nangchîng a, a fapa pathum Jonathana te, Abinadaba te, Malkisua te chu an that a. Nasa lehzualin Saula chu an rawn bei a, thal kâptute chuan na takin an hliam ta a. Saula chuan a râlthuam kengtu hnênah, “I khandaih khân min han chhun tlang teh, chuti lo zawng, serh tan lohho an lo kal ang a, min rawn chhun ang a, nuihza siam nân min rawn hmang dah ang e,” a ti a. A râlthuam kengtu chuan a hlauh êm avângin chu chu a ti duh lo va; tichuan, Saula chuan a khandaih chu a la a, a bawh ta a. A râlthuam kengtu chuan Saula a thi tih a hriat chuan a khandaih chu a bawh ve ta a, an thi dûn ta a ni. Chumi ni chuan Saula te, a fapa pathum te, a râlthuam kengtu te leh a mite chu an za-in an thi a. Phairuam râl lehlama Israel mite leh Jordan râla awmte chuan Israel sipaite an tlânchhia tih leh Saula leh a fapate an thi tih an hriat chuan an khua an chhuahsan a, an tlan bo va, Filistia mite chuan an luahsak ta a. A tûkah chuan Filistia mite chu an râlthuamte hlîp tûrin an va chhuak a, Saula leh a fa pathum, Gilboa tlânga thi chu an va hmu a. Saula lu chu an tan a, râlthuam chu an hlîp a. Chu thu chu mi zawng zawng hrilh tûrin an milem biakna inah te, Filistia ram pumpuiah mi an tîr bawk a. Saula râlthuam chu Astoret biak inah an dah a, a ruang chu Beth-san kulh bangah an phuar bet a. Jabes-gilead miten Saula chunga Filistia mite thiltih chu an lo hriat chuan, mi huaisenho chu an lo thawk a, zankhuain Beth-san panin an kal a. Saula leh a fate ruang chu Beth-san kulh bang ata an la thla a, Jabes-ah an rawn la a; tichuan, an hâl a. An ruhte chu an la a, Jabes hmuna Esel thing hnuaiah an phûm a, ni sarih chaw an nghei a. Saula a thih hnuin Davida chuan Amalek-ho a va hneh a, a lo haw a, Ziklag khuaah ni hnih a châwl a. A ni thum ni chuan mi pakhat, Saula riahhmun aṭangin a lo kal a, a kawrte a thlêr vek a, a lu-ah lei a kai luam a. Davida hnên a lo thlen chuan leia bawkkhupin chibai a bûk a. Davida chuan, “Khawi aṭanga lo kal nge i nih?” a ti a. Ani chuan, “Israel-te riahhmun aṭangin ka lo tlân chhuak a ni,” a ti a. Davida chuan, “Eng thil nge lo thleng ta le, min hrilh teh,” a ti a. Ani chuan, “Indonaah mite chu an tlânchhia a, mi tam tak an that a; Saula leh a fapa Jonathana pawh an thi asin,” a ti a. Davida chuan chu thu rawn hrilhtu tlangvâl hnênah chuan, “Saula leh a fapa Jonathana engtin nge an thi tih i hriat?” a ti a. A hrilhtu tlangvâl chuan, “Gilboa tlângah ka va kal hlauh va, Saula chu a fei rinchhanin a ding a; chutih lai chuan tawlailîr leh sakawr chungchuang mite chuan an rawn nangchîng ṭêp a. Tichuan, a hawi vêl ruai a, mi hmu ta a, mi han au va, ‘Eng nge ni ta le?’ ka ti a. Ani chuan, ‘Tu nge i nih?’ min ti a. Keiin, ‘Amalek mi ka ni,’ tiin ka chhâng a. Ani chuan ka hnênah, ‘Lo kal la, mi han that mai teh; eng mah ka ni ta lo, ka dam zo dâwn lo ve,’ a ti a. Tichuan, ka va kal a, a dam zo dâwn lo tih ka hriat avângin ka that ta a. A lallukhum khum lai leh a bânbun lai chu ka la a, hei ka pu, i hnênah ka rawn thlen a nih hi,” a ti a. Davida chuan a silhfênte a pawtthlêr a, a hnêna mi awm zawng zawngte pawh chuan an puan an pawtthlêr ve a. Saula leh a fapa Jonathana te leh Lalpa mi, Israel-te chu khandaiha an thah avângin an sûn a, an ṭah a, tlai thlengin chaw an nghei a. Davida chuan chûng thu rawn hrilhtu tlangvâl hnênah chuan, “Khawi lam mi nge i nih?” a ti a. Ani chuan, “Ram dang mi, Amalek hnam ka ni,” a ti a. Davida chuan, “ Lalpa hriakthih tihlum tûra a chunga kutthlâk engtiziaa hlau lo nge i nih?” a ti a. Davida chuan a mite zînga mi pakhat a ko va, “Kal la, va that rawh,” a ti a. Tichuan, a va sât hlum ta a. Davida chuan a hnênah, “I thisen chhuah man chu nangmah ngeiin tuar ang che; nangmah ngeiin, ‘ Lalpa hriakthih chu ka that a ni’ tiin i sawi si a,” a ti a. Davida chuan Saula leh a fapa Jonathana chu heti hian a ṭah a. Chu ṭah hla chu Juda thlahte zirtîr tûrin a hrilh a, chu chu Jasar bu-ah ziak a ni. “Israel mi ropui chu tlângah an that a, mi chak, huaisente pawh an tlûk tâk hi! Gath khuaah hril suh ula, Askelon kawtthlêrah puang hek suh u; Filistia nuho an lâwm ang a, Serh tan lohho fanute an hlim dah ang e. Gilboa tlângahte chuan ruah leh dai tla suh se, Loahte eng mah rah suh se, Tah chuan mi huaisen phaw mualpho takin an thehthal a, Saula phaw chu an tuaihnûm ta lo. Jonathana thalah mi huaisen thau leh thisen A kai luai ṭhîn, Saula khandaih pawhin râl a hlah ngai hek lo. Saula leh Jonathana chu an inhmangaih êm êm a, An thih pawhin, an dam pawhin an inṭhen lo, Mupui aiin an ṭuan a ṭha, Sakeibaknei aiin an chak zâwk bawk. Nangni, Israel nute u, Saula hi ṭah teh u, Puan senduk mawi takin a tuam che u a, Rangkachaka cheimawi puan a sintîr che u kha. Mi huaisente indonaah an thi ta e, Jonathana pawh tlângah chuan an that ta, Aw, ka unaupa Jonathan, ka va han lainat tak che êm! Ka tân i hlu êm êm a, I mi hmangaihna chu a mak a, Nu hmangaihna pawhin a tluk lo. Mi huaisente chu an tlu a, An râlthuamte pawh an thlah ta e,” tiin. Chumi hnu chuan Davidan Lalpa hnênah, “Judai ram khaw puiahte chuan ka han chho ang em?” tiin a zâwt a. Lalpa chuan, “Chho ta che,” a ti a. Davida chuan “Khawiah nge ka han kal ang?” a ti a. Ani chuan, “Hebron-ah” a ti a. Tichuan, Davida chu a nupui pahnih, Jezreel mi Ahinoami leh Karmel tlânga Nabala nupui thihsan Abigaili hruaiin chutah chuan a han chho va. Davida chuan a mi, a ṭhuihruaite chu, an chhûngte ṭheuh nên a hruai bawk a; Hebron leh a chhehvêl khuaahte chuan an awm ta a. Judai ram mite chu an lo kal a, Davida chu Judai ram lal atân hriak an thih ta a. Jabes-gilead mite chuan Saula an phûm tih Davida chu an hrilh a. Ani chuan Jabes-gilead mite hnênah mi a tîr a, “In pu, Saula chungah in rinawm hle a, ani chu in lo phûm tâk avângin Pathianin malsâwm che u rawh se. Lalpa chuan khawngaih che uin a rinawmzia in chungah lantîr zêl sela, he thil in lo tih avâng hian kei pawhin in chungah ṭhat ka chhuah ve ang. Tûnah ngaihngam takin awm ula, zâm rêng rêng suh u. In pu Saula chu thi tawh mah se, kei hi Juda mite chuan an lal atân hriak min thih ta a ni,” a ti a. Chutih lai chuan Nera fapa Abnera, Saula sipai hotu chuan Isboseta chu Jordan ral Mahanaim hmunah a rawn hruai a. Gilead-ah te, Aser-ah te, Jezreel-ah te, Efraim-ah te, Benjamin ramah te leh Israel ram zawng zawng chunga lal atân a siam a. Saula fapa Isboseta chu Israel lal a nih tirh chuan kum sawmlina upa a ni; kum hnih chhûng a lal a. Juda mite erawh chuan Davida chu lalah an pawm a. Davida chu Hebron khuaah kum sarih leh thla ruk lai Juda mite chungah a lal ta a. Nera fapa Abnera chu Saula fapa Isboseta mite nên Mahanaim aṭangin Gibeon-ah an lo kal a. Zeruii fapa Joaba leh Davida mite pawh an lo kal a, Gibeon dîl kamah an intâwk a. Ho khat dîl râl lehlamah an ṭhu a, a ho dang râl lehlamah an ṭhu bawk a. Abnera chuan Joaba hnênah, “Tlangvâlte chu zât leh zâtin thlang chhuak ila, kan hmaah han inbei teh se,” a ti a. Tichuan, Benjamin lamṭangte chu mi sâwm leh pahnih an lo chhuak a, chutiang bawkin Davida lamṭangte pawh an lo chhuak bawk a. Mahni khingpui ṭheuh lu-ah an ṭhâm a, an bitum ṭheuhte nên chuan an invit a, an thi za ta vek a. Chuvâng chuan, chu hmun chu Helkat-Hazurim an ti ta a, chu chu Gibeon-a awm a ni. Chumi ni chuan nasa takin an inbei ta a, Davida mite chuan Abnera leh Israel mite chu an hneh a. Chu inbeihnaah chuan Zeruii fapa pathum Joaba te, Abisaia te, Asahela te an tel a, Asahela chu zukpui ang maia ngalchak a ni. Asahela chuan ding lamah emaw, vei lamah emaw pawh pêng lovin Abnera chu a ûm ngat ngat a. Abnera chu a han lehhawi a, “Nang i ni maw, Asahel,” a ti a. Ani chuan, “Ni e,” tiin a chhâng a. “Ding lamah emaw, vei lamah emaw min pênsan la, tlangvâl pakhat kha man mai la, a râlthuam hlihsak rawh,” a ti a. Asahela chuan a ûm chu a bânsan duh lo. Abnera chuan Asahela hnênah, “Min ûm tawh suh, ka that palh ang che, i u Joaba hmêl ka hmu ngam dâwn em ni?” a ti leh a. Mahse, Asahela chuan a ûm lui zêl a; Abnera chuan a fei hmâwr zum lo lamin a pumah a lo chhun a, fei chu a hnungah a tlang a, chumi hmunah chuan a tlu tawp a, a thi ta a. Asahela a tlûka, a thihna hmun lo thleng apiang chu an ding chawt zêl a. Joaba leh Abisaia chuan Abnera chu an la ûm zêl a, Gibeon thlalêr panna Gia chhak lama Ama tlâng an thlenin ni a tla a. Benjamin thlahte chu Abnera bulah chuan an pung khâwm a, pâwl khata insiamin tlângchhîpah ṭanhmun an khuar a. Abnera chuan Joaba chu a au va, “Kan inbei reng dâwn em ni? Hei hian a tâwpa inhuatna mai lo chu eng mah sâwtna a awm lo tih i ngaihtuah na nge? Engtikah nge mite chu an unaute ûm tawh lo tûra i hrilh dâwn?” a ti a. Joaba chuan, “Pathian nung chhâlin ka sawi e, eng mah sawi lo la chu, mite chuan naktûk zîng thlengin an unaute an la ûm dâwn asin le’” a ti a. Tichuan, Joaba chuan tawtawrâwt a han hâm a, a mite chu an ding ṭhup a, Israel-te chu an ûm ta lo va, an bei leh ta hek lo. Abnera leh a mite chu zankhuain an kal a, Araba an kal tlang a, Jordan lui an kân a, nilêngin an kal leh a, Mahanaim chu an thleng ta a. Joaba chuan Abnera a ûm chu a kîrsan a, a mite chu a ko khâwm vek a, Asahela bâkah Davida mite sâwm leh pakua lai an kim lo tih a hre ta a. Davida hote erawh chuan Benjamin hnam Abnera hote chu mi zathum leh sawmruk lai an that a. Asahela ruang chu an la a, Bethlehem-a a pa thlânah an phûm a, Joaba leh a mite chu zankhuain an kal a, a tûk khawvârah chuan Hebron an thleng ta a. Saula chhûngte leh Davida chhûngte chu rei tak an indo va, Davida chu a chak tial tial a, Saula chhûngte chu an chak lo tial tial a. Davida chuan Hebron-a an awm laiin fapa paruk a nei a. A u ber chu Amnona, Jezreel mi Ahinoami laka mi a ni. A dawttu chu Kileaba, Karmel tlânga Nabala thihsan a nupui Abigaili laka mi a ni. A pathumna chu Absaloma, Gesur lal, Talmaia fanu Maaki laka mi a ni. A palina chu Adonija, Hagiti hrin a ni. A pangana chu Sefatia, Abitali hrin a ni. A parukna chu Ithreama, Davida nupui Ekli laka mi a ni; hêng hi Davida fa, Hebron-a piangte chu an ni. Saula chhûngte leh Davida chhûngte chu an indo zêl a, Saula chhûngte zîngah Abnera chuan thu a nei ta tial tial a. Saula chuan hmei a nei a, a hming chu Rizpii a ni a, Aii fanu a ni a. Isboseta chuan Abnera hnênah, “Engtizia nge ka pa hmei i mutpui le?” a ti a. Isboseta thu sawi avâng chuan Abnera chu a thinrim hle a, a hnênah, “Juda lamṭang uicho em ka nih, tûn thlengin i pa Saula chhûngte, a unaute leh a ṭhiante tân rinawm takin ka thawk a, nang pawh Davida kutah ka hlân lo che a; mahse, nang chuan he hmeichhe laka sualah min puh vei maw? Lalpa thu lo thlun tawh, lalna chu Saula chhûngte hnên ata chhuhsaka Israel leh Judai ram, Dan aṭanga Beer-seba thlenga Davida lalṭhutthlêng tungding tûra ka tihhlawhtlin loh vaih chuan Pathianin Abnera chu na takin khawih sela, tihlum hial rawh se,” a ti a. Isboseta chuan kamkhat pawhin a chhâng lo, Abnera chu a hlau hle si a. Tichuan, Abnera chuan Davida hnênah palai a tîr ta a, a hnênah, “He ram hi tu ta nge? Inremna siam ila, Israel mi zawng zawng i lama ṭang tûrin ka beihpui ang che,” a ti ta a. Davida chuan, “Aw le, nang nêna inremna kan siam dân tûr chu hetiang hi ni rawh se: mi hmu tûra i lo kal hunah Saula fanu Mikali rawn hruai ngei ngei ang che,” a ti a. Davida chuan Saula fapa Isboseta hnênah, “Ka nupui, Mikali, Filistia mi serh vun zaa ka lei kha min rawn pe rawh,” tiin mi a tîr bawk a Isboseta chuan, a pasal Paltiela, Laisa fapa hnên ata chu chhuhsak tûrin mi a tîr a. A pasal chuan ṭap chungin Bahurim thlengin a zui a, Abnera chuan a hnênah, “Kîrsan tawh rawh,” a ti a: tichuan, a kîr ta a. Abnera chuan Israel upaho chu a berâwn a, an hnênah, “Tûn hma khân Davida chu in lalah in duh ṭhîn a. Tûnah lalah nei tawh rawh u le, Lalpa chuan Davida hnênah thu a thlung a, ‘Ka chhiahhlawh Davida chuan, ka mi Israel-te chu Filistia mite kut ata leh an hmêlmate kut ata a chhan chhuak ang,’ a tih kha,” a ti a. Abnera chuan Benjamina thlahte pawh a bia a. Tichuan, Israel mite leh Benjamin chhûngte chuan ṭha an tih thu hrilh tûrin Hebron khuaa Davida hnênah an va kal ta a. Abnera chu mi sawmhnih hruaiin Hebrona Davida hnênah a kal ta a, Davida chuan ruai a lo ṭhehsak a. Abnera chuan Davida hnênah, “Ka va chhuak ang a, ka pu, lal tân hian Israel mi zawng zawng ka va ko khâwm ang a; tichuan, anni nên chuan inremna in siam ang a, a ṭha i tih ang takin an chungah ro i rêl dâwn nia,” a ti a. Davida chuan Abnera chu ngaihṭha takin a kal chhuahtîr ta a. Chumi hnu chuan Joaba leh Davida sipai ṭhenkhat, an rammu an lo hâwng a, râllâk sum tam tak an rawn hâwn a. Abnera chu Hebron khuaah Davida hnênah a lo awm tawh lo va; ani chu Davida chuan a chhuahtîr a, ngaihngam takin a kal chhuak a. Joaba leh a sipaite an lo thlen chuan, “Nera fapa Abnera chu lal hmaah a lo kal a, lal chuan a chhuahtîr a, ngaihngam takin a kal ta,” tih an lo hrilh a. Joaba chu lal hnênah a kal a, “I thil lo tih hi engtizia nge ni le? Ngai teh Abnera chu i hmaah a lo kal a, engtizia nge i chhuahtîr leh mai? Hei, a bo leh daih tawh hi. Nera fapa Abnera hi tu nge a nih i hria a, nangmah bum tumin, i chettlat dân leh i thiltih zawng zawng hriat tumin a lo kal a nih hi,” a ti a. Davida hnên ata a chhuah hnu chuan Joaba chuan Abnera ûm tûrin mi a tîr a; Sira tuichhunchhuah aṭangin ani chu an rawn hruai kîr a. Davida chuan chu chu a hre lo. Abneran Hebron a lo thlen chuan Joaba chuan kulh kawngkhâr bulah a fâla biak tum ni âwm takin a hruai a; tichuan, a unau Asahela a lo thah phuba chu a la ta a, Joaba chuan a dulah a vit a, a thi ta a. Davidan chu thu chu a lo hriat chuan, “Nera fapa Abnera thah thu-ah kei leh ka ram chu Lalpa mit hmuhin kan thiang kumkhua ang. A thisen mawh chu Joaba leh a pa chhûngte chungah tla rawh se, Joaba chhûngte zîngah panchhe vei te, phâr te, ramtuileilo te, khandaiha thi te, ṭâm tuarte awm reng rawh se,” a ti a. Joaba leh a u Abisaia chuan Gibeon indonaah an nau Asahela chu Abneran a thah avângin an that ve a ni. Davida chuan Joaba leh a hnêna sipai zawng zawng hnênah, “In puante pawtthlêr ula, saiip puan sinin Abnera vui tûrin a hmaah kal rawh u,” a ti a. Lal Davida pawhin hlâng chu a zui a. Abnera chu Hebron-ah an phûm a; a thlânah lal chu ring takin a ṭap a, mipui zawng zawng an ṭap bawk a. Lal chuan Abnera chu hetiangin a ṭah a: “Engtizia nge Abnera chu mi â thiha a thih tâk le? I kut phuar a ni lo, i ke hlin a ni hek lo, mi sualte kut tuar ang maiin i thih tâk le?” a ti a; tichuan, mi zawng zawng chuan an ṭah leh a. Chhûnah chuan Davida chu eng emaw tal ei tûrin an ngên a; mahse, hetiangin thu a lo tiam tawh a, “Ni tlâk hma chu chaw pawh, thil dang pawh, eng mah ka ei lo vang, ka ei chuan Pathianin a tih tihin min ti rawh se, na tak pawhin ka chungah ti rawh se,” tiin. Mi zawng zawngin chutianga a tih chu an hria a, an lâwm a, lal thiltih dân chuan mipui a tilâwm hle a. Chumi ni chuan mipui leh Israel mi zawng zawngin Nera fapa Abnera thah chungchângah lalin inhnamhnawihna a nei lo tih an hre chiang ta a. Lal chuan a mite hnênah, “Vawiin hian Israel milian, mi ropui tak a thi tih in hre na nge? Lal atân hriak min thih hlim a ni a, ka la chak lo va, Zeruii fate hi an huangtau lutuk ta deuh a ni. Lalpa chuan thil sual titute chu an thiltihin a phu ang ngeiin hrem rawh se,” a ti a. Saula fapa Isboseta chuan Abnera chu Hebron-ah an that tih a lo hriat chuan a thlaphâng ta hle a. Israel mi zawng zawng pawh an mangang a. Saula fapa Isboseta chuan rammu pâwl hotu pahnih a nei a, an hming chu Baana leh Rekaba an ni. Chûng mite chu Benjamin thlah Beerot mi Rimona fapate an ni. Beerot chu Benjamin ram chhûnga ngaih a ni. Beerot khuaa awmte chu Gitaim-ah an tlân a, tûn thlengin chutah chuan an awm ta a. Saula fapa Jonathana chuan fapa a nei a, ani chu a ke a bai a. Saula leh Jonathana thih thu Jezreel aṭanga an hriat lai chuan ani chu kum nga mi a ni. A awmtunu chuan a pawm a, a tlânchhia a, a hmanhmawh lutukna lamah a thlauh a; tichuan, a ke a lo bai ta a ni. A hming chu Mefiboseta a ni. Beerot khaw mi Rimona fapa Rekaba leh Baana chu Isboseta in lam panin an chhuak a; chu chu ni sat vânglai tak a ni. Isboseta chu a chhûn chawlh lai a ni a. Kawngkhâr vêngtu hmeichhia chu a mut a chhuak hle a, a buhthlei lai chu a lo muthlu a; chutih lai chuan Rekaba leh a nau Baana chu an lût a. Pindanah an lût a, Isboseta chu a mut pindana tui taka a mu lai chu a dulah an vit a, an that ta a. A lu an tansak a, an la a, Araba lam kawngah zânkhuain an kalpui a. Isboseta lu chu Hebron khuaa Davida hnênah an rawn thlen a, lal hnênah chuan, “Hei, i hmêlma, thah tumtu che Saula fapa Isboseta lu kan rawn hâwn e. Ka pu, lal phuba chu, Lalpa chuan vawiin hian Saula leh a thlahte chungah a la ta a ni,” an ti a. Davida chuan Berot khaw mi Rimona fapa Rekaba leh a nau Baana chu heti hian a chhâng a, “Ka manganna tinrêng laka min chhanchhuaktu Lalpa, mi nung hmingin ka sawi e; thu lâwmawm rawn thlenah inngaiin, ‘Saula chu a thi ta’ tih thu rawn sawitu chu ka lo man a, Ziklag khuaah ka that a, chu chu a thu ‘Lâwmawm’ a rawn thlen mana ka pêk chu a ni. Pawisawi lo, ama in chhûng lum, a khumlaizâwla mu lai ngei thattu, nangni mi sual lakah hian a thisen phuba chu ka va han la dâwn tehrêng êm! Tûnah hian leilung ata ka tiboral dâwn che u a ni,” a ti a. Davida chuan a sipaite chu thu a pe a, an kut leh kete an tan a, an ruang chu Hebron dîl kamah an khai a, Isboseta lu erawh chu an la a, Hebron khuaah, Abnera thlânah chuan an phûm ta a. Israel hnam zawng zawng chu Davida hnênah Hebron-ah chuan an lo kal a, a hnênah, “I thisen zawmpuite kan ni a. Tûn hmaa Saula kan chunga a lal lai khân Israel-te chu an rammutnaah i hruai ṭhîn a. Lalpa chuan i hnênah, ‘Ka mi Israel-te hi i kaihruai ang a, an chungah i lal ang,’ a tih che kha,” an ti a. Tichuan, Israel upa zawng zawng chu Hebron khuaah lal hnênah an lo kal a, lal chuan anni chu Hebron khuaah chuan thu a lo thlunpui a, Davida chu Israel lal atân hriak an thih ta a. Davida chu lal a lo nih khân kum sawmthuma upa a ni, kum sawmli chhûng ro a rêl a. Hebron-ah Juda-te chungah kum sarih leh thla ruk a lal a, Jerusalem-ah Israel leh Juda-te chungah kum sawmthum leh pathum a lal bawk a. Lal leh a mite chu, chu lai hmuna chêng Jebus-ho bei tûrin Jerusalem an pan ta a. Davida chu a luh theih loh ringin a hnênah, “Hetah hian i lo lût tawp lo vang, mitdel leh kebaite pawhin an lo dang thei ang che,” an lo ti a. Mahse, Davida chuan Zion kulh chu a la ta mai a, chu chu Davida khawpui a ni. Chumi ni chuan Davidan a hote hnênah, “Tu pawh Jebus-hote ka huat anga huaa thah duh chu anmahni bei tûrin tuiluankawr lamah chho sela, ka hmêlma, mitdel leh kebaite chu bei rawh se,” a ti a. Chuvâng chuan alâwm, ‘mitdel leh kebaite chu’ Lalpa inah an lût ve thei lo vang,” an tih tâk ni. Davida chu kulhah chuan a awm a, “Davida khawpui” tih a lo ni ta a. Davida chuan a vêlin kulh a siam a, Milo aṭangin lal in thlengin a siam ṭha a. Davida chu a lo ropui deuh deuh va, Engkim Lalpa chu a hnênah a awm reng a. Tura lal Hirama chuan Davida hnênah mi a tîr a, Sidar thing te, kut themthiam te, lungchher thiamte a thawn a, Davida in chu an saksak a. Davida chuan amah chu Israel-te lal atân Lalpan a tinghet a, a mi Israel-te avângin ram chu a chawimawi a ni tih a hre ta a. Hebron a chhuahsan hnu chuan Davida chuan hmei leh nupui, Jerusalem-ah a neih belh a, fanu fapa a nei ta ṭeuh va. Hêng hi Jerusalem-a a fa neihte chu an ni: Samua te, Sobaba te, Nathana te, Solomona te, Ibhara te, Elisua te, Nefega te, Jafia te, Elisama te, Eliada te, Elifeleta te an ni. Israel miten Davida chu lal atân hriak an thih tih an hriatin Filistia mi zawng zawng chu Davida bei tûrin an lo thawk a, chu chu Davidan a lo hria a, kulhbîngah a chhuk a. Filistia mite chu Refaim ruamah an inzâr a. Davida chuan Lalpa hnênah, “Filistia mite chu ka zu bei ang em, ka kutah anni chu mi pe dâwn em?” tiin a zâwt a. Lalpa chuan, “Kal rawh, Filistia-ho chu i kutah ka pe ngei dâwn,” a ti a. Tichuan, Davida chu Baal-perazim-ah a kal a, chutah chuan Filistia-ho chu a hneh a, “Tuikhuah sah ang maiin Lalpa chuan ka hmêlmate min tihdarhsak ta,” a ti a, chu hmun chu Baal-perazim a vuah ta a. Filistia mite chuan an pathian lemte an tlânchhiatsan a, Davida leh a mite chuan an la a. Filistia mite chu an lo chho leh a, Refaim ruamah an inzâr leh a. Davida chuan Lalpa chu a râwn leh a, ani chuan, “Va pan mai suh, an hnung lamah hual la, thingtheihmu hmun aṭangin anni chu bei ang che. Tin, thingtheihmu lêr aṭanga kal ri ṭhup ṭhup ang thâwm i hriat veleh bei thut rawh, chu chu Filistia-ho bei tûrin Lalpa chu i hmaah a kal tihna a ni ang,” a ti a. Davida chuan Lalpa thupêk ang chuan a ti a, Filistia mite chu Geba aṭanga Gezer thlengin a ûm ta a. Davida chuan Israel-te zîng aṭanga mi sîngthum a thlante chu a ko khâwm a. Davida leh a mite chu Judai rama Baala khuaa Pathian Bâwm, Engkim Lalpa, cherub chunga chuang hming chuanna chu la tûrin an thawk chhuak a. Pathian Bâwm chu tawlailîr tharah an dah a, tlânga Abinadaba in ata chu an la chhuak a, Abinadaba fapa Uza leh Ahioa chuan tawlailîr thar chu an khalh a. Ahioa chu Pathian Bâwm hma lamah chuan a kal a. Davida leh Israel mi zawng zawng chuan ri thei chi hrang hrang: ṭingṭang te, perhkhuang te, khuangtê te, darbenthek te leh tawtawrâwt te nên nasa takin Lalpa an fak a. Nakona hruihzâwl an thlen chuan bâwngpa chu a petek avângin Uza chuan a kut a phar chhuak a, Pathian Bâwm chu a va dawm a. Lalpa chu, Uza chungah, a tih dik loh avâng chuan, a thinur ta thut a; chutah chuan Pathianin a tihlum a, Pathian Bâwm bulah chuan a thi ta a. Lalpa thinur chu Uza chunga a tlâk avângin Davida chu a thinur hle a, chu hmun chu Perez-uza a vuah a, tûn thlengin a hmingah a la pu ta reng a ni. Chumi ni chuan Lalpa chu a hlau hle a, “Engtin nge Lalpa Bâwm chu ka hawn theih tâk ang le?” a ti a. Tichuan, Pathian Bâwm chu Davida khawpuiah chuan a hâwnpui duh ta lo va. Git mi Obed-edoma inah a dah ta zâwk a. Lalpa Bâwm chu Git mi, Obed-edoma inah chuan thla thum a awm a, Obed-edoma te chhûngkua chu Lalpa chuan mal a sâwm a. “Pathian Bâwm avângin Lalpan Obed-edoma chhûngkua leh a in-leh-lo zawng zawng chu mal a sâwm a ni,” tiin Davida an hrilh a. Davida chuan Pathian Bâwm chu Obed-edoma in aṭangin Davida khawpuiah lâwm takin a la ta a. Lalpa Bâwm zâwntuten bâwm chu pên ruk an han kalpui a, Davida chuan a dintîr rih a, bâwngpa leh ran chawm thau inthawina a hlân a. Davida chuan puan zai sîna siam puithiam kawr a inbel a, a theihtâwpa nasain Lalpa hmaah chuan a lâm a. Davida leh Israel mite chuan hlim taka auva, tawtawrâwt hâm chung zêlin Lalpa Bâwm chu an la chho ta a. Lalpa Bâwm chu Davida khawpuia an luhpui lai chuan Saula fanu Mikali chuan tukverh aṭangin a lo thlîr a; Lalpa hmaa Davida zuang leh lâm chu a hmusit rilru hle a. Lalpa Bâwm chu an la lût a, a dahna tûra Davida zâr, puan in chhûngah chuan an dah a; Davida chuan Engkim Lalpa hnênah hâlral thilhlan te, remna thilhlan te a hlân a. A hlan zawh chuan Engkim Lalpa hmingin mipui tân malsâwmna a dîlsak a. Israel mipui zawng zawng, a hmei a pain, mi tin hnênah chhang hlawm khat leh sahrang khat leh grep rah pho ro hlawm khat a pe a. Tichuan, mahni in lamah an hâwng ta ṭheuh va. A chhûngte tân malsâwmna dîlsak tûrin Davida chu a lo haw chuan Saula fanu Mikali chu amah hmuak tûrin a lo chhuak a, a hnênah, “Vawiin chu Israel lal a va han intiropui ve le! Zah nachâng hre lo mite ang maiin a chhiahhlawh nulate hmuhah saruaka a tal chiam le!” a lo ti a. Davida chuan Mikali hnênah, “I pa leh a chhûngte zawng zawng aia Israel-te chunga lala min thlangtu Lalpa hmaah asin ka lâm; Lalpa chu ka chawimawi zêl dâwn. Tûn ai mah hian zahpuiawm min la ti ang; engah mah min ngai lo na ang a, hêng chhiahhlawh nula i sawite hian min ngaisâng ang,” a ti a. Tichuan, Saula fanu Mikali chuan a thih thlengin fa a nei ta lo va. Lal chu a inah a awm a, Lalpa chuan a hmêlma zawng zawng lakah râlmuang takin a awmtîr a. Lal chuan zâwlnei Nathana hnênah, “Kei chu Sidar thinga sak inah ka awm a, Pathian Bâwm erawh chu puan in maiah a awm si a,” a ti a. Nathana chuan lal hnênah, “Ṭha i tih ang chuan va ti rawh, Lalpa chu i hnênah a awm alâwm,” a ti a. Chumi zan vek chuan Lalpa chuan Nathana hnênah, “Ka chhiahhlawh Davida chu hetiang hian va hrilh rawh. Lalpa chuan heti hian a ti: ‘Ka chên nân in mi saksak i tum em ni? Israel fate Aigupta ram ata ka hruai chhuah aṭangin tûn thlengin inah ka awm lo va, hmun hrang hrangah te awm sawnin puan inah te ka awm zâwk ṭhîn. Hmun hrang hranga ka vah kualpui Israel fate leh ka mi Israel-te enkawltu atâna ka ruat rorêltute hnenah, ‘Engati nge Sidar thing in min saksak loh?’ ka ti ngai em ni? Tûnah ka chhiahhlawh Davida chu hetiang hian hrilh rawh: Engkim Lalpa chuan heti hian a ti: ‘I berâm vênna hmun ata, ka mi Israel-te chunga rorêl tûrin ka ko che a. I vahvêlna apiangah i hnênah ka awm ṭhîn a, i hmaa hmêlma awmte chu ka hnehsak ṭhîn che a; tûnah, leia mi ropuite angin i hming ka tiropui dâwn. Ka mi Israel-te chu an awm hlenna tûr ram ka pe ang a, tu ma tihbuai lohvin thlamuang takin an awm tawh ang. Tûn hma ang khân mi sualten an hnehchhiah tawh lo vang. Ka mite chunga rorêltute ka ruat ṭhin lai ang khân an awm hek lo vang. In hmelmate lak ata thlamuang takin in awm tawh ang a; chu bâkah, kei Lalpa hian i chhûngkua chu ka tungding ang tih ka hrilh a che. I ni a kina i pute hnêna i chawlh hunah nangmah thlâktu zînga mi, i rîla rah ngei chu, ka tungding ang a, a ram chu ka tinghet ang. Ani chuan ka tân in mi saksak ang a, a ram chu kumkhua atân ka tinghet ang. A pa ka ni ang a, ani chu ka fapa a ni ang. Thil a tihsual chuan pain an fate an tiang hmanga an thunun angin ka thunun ang. “I hma ata Saula ka la bo va, ka khawngaihna a hnên ata ka la kîr angin ani zawng ka khawngaihna chuan a kalsan lo vang. I chhûngkua leh i ram chu kumkhuain ka tinghet ang a, i lalṭhutthlêng chu nghet takin a awm reng ang,’ ” a ti a. Pathianin a hrilh zawng zawng chu Nathana chuan Davida chu a hrilh vek a. Lal Davida chu Lalpa inah a lût a, a ṭhu a, hetiang hian a ṭawngṭai a. “Aw, Lalpa Pathian, kei leh ka chhûngte hi eng nge maw kan niha, hetiang taka min ngaihnat le? Aw Lalpa Pathian, chu chu tâwk ti lovin i chhiahhlawh thlahte leh zêl pawh din ngheh i la tum ta fo va. Aw Lalpa Pathian, hei hi i mite i hruai dân a lo ni maw? Davida chuan i hnênah eng nge a sawi leh chuan tâk ang? Aw Lalpa Pathian, i chhiahhlawh hi i hre vek a. I thu leh i duh dân angin he thil ropui tak hi i ti a, i chhiahhlawh i hriattîr ta. Aw Lalpa Pathian, i va ropui tak êm! Nang ang hi tu mah an awm kan hre lo, nang lo chu Pathian dang an awm hek lo. An saltânna ata i mi atâna i hruai chhuah Israel hnam ang hi khawvêlah an awm lo. An tân thil ropui leh mak tak tak i ti a, lei pum puiah i hming a lo thang ta. Aigupta ram ata i pual atân i hruai chhuahte hmaah chuan hnam dangte chu an pathiante chawpin i hnawt bo va. I mi Israel-te chu kumkhuaa i ta ni tûrin i tinghet a; Aw Lalpa, nang chu an Pathian i lo ni ta. Tûnah, Lalpa Pathian, i chhiahhlawh leh a chhûngte chungchânga thu i lo tiam tawh chu kumkhua atân hlen la, i lo sawi tawh ang chuan ti ang che. Engkim Lalpa chu Israel-te Pathian a ni, tiin i hming chawimawi kumkhua sela; tichuan, i chhiahhlawh Davida chhûngte chu i tân din nghet ang che. Aw Engkim Lalpa, Israel-te Pathian, i chhiahhlawh hnênah hian, ‘I chhûngkua chu ka tungding ang,’ tiin i lo hrilh tawh a, chuvâng alâwm ngênngâwl taka hei hi ka dîl che ni. Aw Lalpa Pathian, nang chu Pathian i ni a, i thute chu a rinawm a, i chhiahhlawh hnênah he thu hlu tak hi i tiam ta si a. I chhiahhlawh chhûngte hian i duhsakna an dawn reng theih nân khawngaih takin malsâwm ang che. Aw Lalpa Pathian, nangin i tiam tawh a, i chhiahhlawh chhûngte hi kumkhuain malsâwm ang che,” a ti a. Chumi hnuah Davida chuan Filistia mite a hneh a, an tlâwm ta a. Metheg-ama chu Filistia mite a chhuhsak a. Moab mite a hneh bawk a, mi an mante chu leiah a muttîr a, hruiin a hlîng a, a chhiar vek a, pathuma pahnih chu a that a, a dang zawng chu a zuah a. Moab mite chu Davida thuhnuaiah an awm ta a, a hnênah chhiah an chawi a. Zoba lal Rehoba fapa Hadadezera chu Eufretis chhak lama a ram la lêt leh tûrin a kal a, Davida chuan a lo bei bawk a; Davida chuan sakawr chungchuang mi sângkhat leh zasarih leh sipai sînghnih a mansak a, tawlailîr za hnûktu atân sakawr za a zuah a, a dang zawng chu an tha a chhahsak a. Damaska khua aṭanga Zoba lal, lal Hadadezera chhan tûra Suria mi lo kalte chu sînghnih leh sânghnih a that a. Tin, Suria ram Damaska khuaah chuan a sipaite a dah a, Suria mite chu a thuhnuaiah an awm ta a, a hnênah chhiah an chawi ṭhîn a. Lalpan a ṭanpui avângin Davida chuan a râl do a hneh zêl a ni. Davida chuan Hadadezera hote chu an rangkachak phawte a lâksak a, Jerusalem-ah a hâwn a. Tin, Hadadezera awp khua Beta leh Berothai aṭangin lal Davida chuan dâr tam tak a hâwn bawk a. Hamath lal Toia chuan Hadadezera sipai zawng zawng Davidan a hneh tih a lo hria a. Toia chuan vawi tam tak a lo do ṭhin Hadadezera chu a hneh avângin lawmpuina chibai bûk tûrin a fapa Jorama chu a tîr a. Jorama chuan tangkarua leh rangkachak leh dâra siam hmanraw tam tak a pe a. Chûng chu ram hrang hrang a hnehte hnên ata tangkarua leh rangkachak a lâkte nên lal Davida chuan Lalpa a hlân a. A hneh rama mite chu, Edom mi te, Moab mi te, Amon mi te, Filistia mi te, Amalek-ho te an ni. Zoba lal Rehoba fapa Hadadezera laka a râllâk pawh a hlân bawk a. Davida chuan chi ruamah Edom mi sîngkhat leh sângriat lai a that a, chuta chin chu a hmingthang ta hle a. Edom ram hmun hrang hrangah sipai a dah a, Edom mite chu Davida khua leh tui an lo ni ta a. Lalpa chuan Davida chu a kalna apiangah a hnehtîr zêl a. Davida chuan Israel ram pum puiah ro a rêl a, a mite chungah chuan dik tak leh ṭha takin ro a rêl a ni. Zeruii fapa Joaba chu sipai hotu a ni a, Ahiluda fapa Jehosafata chu chanchin ziaktu a ni. Ahituba fapa Zadoka leh Abiathara fapa Ahimeleka chu puithiam an ni a, Seraia chu ziaktu a ni. Jehoiada fapa Benaia chu Keret mi leh Pelet mite hotu a ni. Davida fapate chu khâwnbâwl an ni. Davida chuan, “Saula chhûngte zîngah dam an la awm em aw? Jonathana avângin ka khawngaih dâwn a ni,” a ti a. Saula chhûngkuate chhiahhlawh, a hming Ziba a awm a, Davida hnêna kal tûrin an ko va, lal chuan a hnênah, “Ziba i ni em?” a ti a. Ani chuan, “Ni e,” a ti a. Lal chuan, “Pathian khawngaihna a chunga ka lantîr theih nân, Saula chhûngte zîngah dam an la awm em? a ti a. Ziba chuan lal hnênah, “Jonathana fapa pakhat a awm, a ke a bai nghe nghe asin,” a ti a. Lal chuan a hnênah, “Khawiah nge a awm?” a ti a. Ziba chuan lal hnênah, “Amiela fapa Makira in Lo-debar khuaah a awm,” a ti a. Lal Davida chuan Amiela fapa Makira in Lo-debar khua ata chu hruai tûrin mi a tîr a. Saula fa Jonathana fapa Mefiboseta chu Davida hnênah chuan a lo kal a, kûnin chibai a bûk a, Davida chuan, “Mefiboset,” a ti a. Ani chuan “Eng nge ka pu?” a ti a. Davida chuan a hnênah, “Hlau suh aw, i pa Jonathana avângin i chungah ṭhat chhuah ka duh a ni. I pu Saula ram zawng zawng chu ka pe ang chia, ka hnênah i eiin i in bawk ang,” a ti a. Mefiboseta chuan chibai a bûk leh a “Kei, ui thisâwn ang lek, i chhiahhlawh hi eng emaw ka niha, heti taka mi i ngaihsak le?” a ti a. Lal chuan Saula chhiahhlawh Ziba chu a ko va, a hnênah, “I pu Saula ram zawng zawng leh an chhûngkaw thil neih zawng zawng hi a tupa hnênah hian ka pe a ni. Nang leh i fate leh i chhiahhlawhte chuan ram chu in enkawlsak ang a, thlai thar chu i pu tupa chhûngte tân in rawn la ang a, Mefiboseta erawh chuan ka hnênah a eiin a in ve ang,” a ti a. Ziba chuan fapa sâwm leh panga leh chhiahhlawh sawmhnih a nei a. Ziba chuan lal hnênah, “I chhiahhlawh hian, ka pu, nang lalin tih tûr min ruatsak apiang chu ka ti zêl ang,” a ti a. Mefiboseta erawh chu lal fate ang bawkin Davida inah chuan a eiin a in ve ta a. Mefiboseta chuan fapa la naupang tak a nei a, a hming chu Mika a ni. Ziba ina awm zawng zawng chu Mefiboseta chhiahhlawh an ni. Mefiboseta chu Jerusalem-ah a awm ve ta a, lal inah chuan a eiin a in ṭhîn a, a ke khinghnih a ṭha lo a ni. Chûng hnu chuan Amon mite lal chu a thi a, a fapa Hanuna chu a aiah a lal a. Davida chuan, “A pain min lo khawngaih angin kei pawhin Nahasa fapa Hanuna chu ka khawngaih ve ang,” tih thu hrilh tûrin Hanuna hnênah mi a tîr a. Davida mi tirhten Amon ram an lo thlen chuan, Amon thlah hruaitute chuan an pu Hanuna hnênah, “Davida hian i pa a zah avângin nangmah thlamuantu tûr i hnênah a rawn tîr a nih i ring em? Davida hian khawpui rawn en thlithlaia tihchhiatna zawngin enthlatu a rawn tîr a ni mai lo vang maw?” an ti a. Hanuna chuan Davida mi tirhte chu a man ta mai a, an khabehmul ṭhenkhat a mehsak a, an silhfênte chu a laiah a tanbunsak a, mawng lang rengin a hâwntîr ta a. Chu thu chu Davida an hrilh a, ani chuan hmuak tûrin mi a tîr a, anni chu an zak hle a. Lal chuan, “In khabehmul a chawr sei hma chu Jeriko-ah awm rih ula, chumi hnuah in lo hâwng dâwn nia,” a ti a. Amon mite chuan Davida hmêlma an ni ta tih an inhriat chuan Beth-rehob leh Zoba-a mi, Suria sipai sînghnih leh Maaka-a mi sângkhat leh Tob mi sîngkhat leh sânghnih an chah a, an ruai ta a. Chu thu chu Davidan a hriat chuan Joaba chu, a sipai indo mi zawng zawng nên a tîr a. Amon mite chu an lo thawk a, khawpui luhna kawngkhâr bulah ṭanhmun an rem a; mi dang, Zoba leh Rehob aṭanga Suria mite, Tob mite leh Maaka mite erawh chu a hrangin phûlah an awm a. Joaba chuan an hma lamah leh an hnung lamah an rawn bei dâwn tih a hriatin Israel zînga sipai ṭha ṭha a thlang chhuak a, Suria mite bei tûrin ṭanhmun a lo rem a. Mi dang zawng zawng chu a u Abisaia kutah a dah a, Amon mite bei tûrin a ti a. Joaba chuan, “Suria-ho hi ka hneh dâwn loh chuan min rawn pui ang a, Amon-ho hi i hneh dâwn loh chuan ka rawn pui ang che. Ṭan la la, kan mite leh kan Pathian khawpui tân huaisen takin i bei ang. Lalpa chuan ṭha a tih ang zêlin ti rawh se,” a ti a. Tichuan, Joaba leh a sipaite chu Suria-ho bei tûrin an lo thawk a, anni chu an tlânchhe ta a. Amon miten Suria-ho tlânchhia an hmuh chuan anni pawh chu Abisaia hmaah chuan an tlânchhe ve ta a. Khawpuiah chuan an tlân lût ta a. Tichuan, Joaban mi a ûm chu a kîrsan a, Jerusalem-ah a haw ta a. Suria mite chuan Israel-ten an hneh tih an inhriatin an inpun khâwm ṭha leh ta a. Hadadezera chuan Eufretis lui ral lehlama Suria mite chu a va hruai chhuak a, Helam-ah an kal a. Chutah chuan Hadadezera sipai hotu Sobaka chuan an hma a hruai a. Chu thu chu Davida an hrilh a; tichuan, Israel mi zawng zawng a khâwm a, Jordan lui kânin Helam-ah chuan a va kal a. Suria mite chuan Davida do tûrin ṭan an lo rem a. Mahse, Suria mite chu Israel mite hmaah chuan an tlânchhe ta a. Davida chuan Suria-ho sakawr chungchuang mi zasarih leh sipai kea kal sîngli a that a. An sipai hotu Sobaka pawh na takin a hliam a, chutah chuan a thi ve ta a. Tichuan, Hadadezera chhiah khaw lal zawng zawngten Israel-te hmaah an chan a chhe ta tih an hriatin Israel-ho nên inremna an siam a, Israel khua leh tuiah an awm ta a. Suria mite chuan Amon mite chu an pui ngam ta lo va. Khua a lo ṭhâl a, indo tûra lalte an feh chhuah ṭhin hun a lo thleng a, Davida chuan Joaba chu, hotute leh Israel sipai zawng zawng nên a tîr chhuak a. Amon mite an va hneh a. Raba khua chu an hual a; Davida erawh chu Jerusalem-ah a awm reng a. Tlai khat chu Davida chhun mu chu a tho va, lal in chung zâwlah chuan a lêng vêl a. Chuta ṭang chuan hmeichhe pakhat inbual lai hi a hmu a, hmeichhia chu a hmêl a ṭha hle a. Davida chuan tu nge a nih zâwt tûrin mi a tîr a. A mi tirh chuan, “Eliama fanu Bathsebi, Hit mi Uria nupui a ni,” a ti a. Davida chuan va hruai tûrin mi a tîr a; ani chu a hnênah an rawn hruai a; a lo mutpui a (a felloh zawha a inthen hlim a ni) Bathsebi chu a haw leh ta a. Hmeichhia chu a lo rai ta a. “Nau ka pai ta,” tiin Davida chu a hrilh a. Davida chuan Joaba hnênah, “Hit mi Uria kha rawn hâwntîr rawh,” a ti a. Joaba chuan Uria chu Davida hnênah a kaltîr a. Uria chu Davida hnên a lo thlen chuan Joaba chanchin te, sipaihote dinhmun te leh indona chungchâng a lo zâwt a. Davida chuan Uria hnênah, “I inah hâwng la, va châwl hahdam rawh khai,” a ti a. Uria chu lal in ata a chhuak a, lal chuan ei tûrte a pe bawk a. Nimahsela, Uria chu a pu chhiahhlawhte nên lal in kawngka bulah a mu ve a, a inah a riak duh lo va. Davida chu, “Uria a in lamah a haw duh lo,” tia an hrilh chuan Davida chuan a hnênah, “Rei tak i thangbo tawh si a, engah nge i in lamah i hâwn loh?” a ti a. Uria chuan Davida hnênah, “Pathian Bâwm te, Israel-te leh Juda mite chu puan inah an awm a, ka pu Joaba leh kan hotute pawh ramhnuaiah an inkulh a; kei ina hâwngin ka eiin ka in ang a, ka nupui bulah ka mu bîk ang maw? Chutiang thil tih âwm loh chu ka ti tawp lo vang,” a ti a. Davida chuan a hnênah, “Vawiin chu hetah châwl rih la, naktûkah i kal leh dâwn nia,” a ti a. Chutichuan, Uria chu chumi ni leh a tûk thlengin Jerusalem-ah a awm a. Davida chuan zanriah a eipui a, rui hnêp khawpin a hrai a. Chumi zân pawh chuan a ina hâwng lovin lal chhiahhlawhte zîngah chuan mu tûrin a chhuak a. A tûk zîngah Davida chuan Joaba hnênah lehkha a thawn a, Uria chu a kentîr a. Lehkhaah chuan, “Uria chu râl zualna lai berah hma tâwntîr la, an rawn beiha an thah theih nân tawlh kîrsan ang che u,” tiin a ziak a. Khua chu Joaba chuan a hual ta a, Uria chu inbeihna nasatna lai ber, hmatâwngah a ṭantîr a. Khuaa mite chu an lo chhuak a, Joaba chu an rawn bei a. Davida sipai ṭhenkhat chu an rawn that a, Hit mi Uria pawh a thi tel ve a. Joaba chuan Davida hnênah indo chanchin a hrilh a. A mi tirh hnênah chuan, “Indo chanchin zawng zawng lal chu i hrilh zawhin, ani chu a thinur thut thei a, i hnênah, ‘Engati nge hnai têa khua chu in va beih? Kulh bang aṭangin an kâp mai ang che u tih in hre lâwm ni? Jerubeseta fapa Abimeleka kha tu nge that kha? Hmeichhiain kulh bang aṭangin buh râwtsawmna lungin a zu vawm a, Thebez-ah khân a thi ta a ni lâwm ni? Engati nge kulh bang bula in va kal?’ tia thu a lo zawh che chuan, ‘I chhiahhlawh Hit mi Uria pawh kha a thi asin,’ ti ang che,” a ti a. Mi tirh chu a kal a, a va thleng a, Joaban sawi tûr a tih zawng zawng chu Davida a hrilh a. Mi tirh chuan Davida hnênah, “Mite chuan min rawn nawr a, phûlah min rawn bei a; mahse, kulh kawngkhâr bul thlengin kan nawr lêt a. Thal kâptute chuan kulh bang aṭangin i chhiahhlawhte chu an rawn kâp a, ṭhenkhat an thi a, i chhiahhlawh, Hit mi Uria pawh kha a thi tel ve asin,” a ti a. Davida chuan mi tirh hnênah chuan, “Joaba hnênah heti hian va sawi rawh, ‘He thil hi tu man pawiti tehchiam suh u, indonaah chuan tu nge thi dâwn tih tu man an hre lâwk hlei nêm. Nasa lehzualin khua chu bei ula, tichhe vek rawh u,’ tiin Joaba chu va fuih rawh,” a ti a. Uria nupui chuan a pasal a thi ta tih a hriat chuan ani chu a sûn a. A sûn hun bi a kim chuan Davida chuan a inah a hruai a, nupui atân a nei ta a. Fapa a hrinsak a, Lalpa chu Davida thil tih dânah chuan a lâwm lo hle a. Lalpa chuan Nathana chu Davida hnênah a tîr a, Nathana chu a kal ta a. Davida hnênah chuan, “Khaw pakhatah mi pahnih an awm a; Pakhat chu a hausa hle a, pakhat erawh chu a rethei hle a. A hausa zâwk chuan berâm tam tak leh bâwng tam tak a nei a. A rethei zâwk erawh chuan ama suma a lei berâmnotê, a nu pakhat a nei a. A duat êm êm a, a fate zîngah an inah chuan a puitlin thlengin a chêntîr a. An ei ang ang a eiin a in ve a. A pawm a, a fanu ang maiin a duat a. Mikhual pakhat hi mi hausa hnênah chuan a thleng a, chu mi chuan a mikhual eipui atân ama berâm leh ran chu talh phal lovin mi rethei berâmno chu a chhuhsak a, a mikhual eipui atân a talhsak ta a,” a ti a. Chu mi hausaa chungah chuan Davida chu a thinur ta hle a, Nathana hnênah chuan, “ Lalpa hming chhâlin ka sawi e, chu mi chu thi tlâk a ni. Chu thil chu a tih avâng leh khawngaihna a neih loh avângin berâmno chu a lêt liin a rûl leh tûr a ni,” a ti a. Nathana chuan Davida hnênah, “Chu mi chu nangmah hi i ni alâwm. Lalpa, Israel-te Pathian chuan heti hian a ti: Israel-te lal atân hriak ka thih che a, Saula kut ata ka chhan chhuak che a. I pu in leh lote, i pu nupuite i kutah ka pe a. Israel chhûng te leh Juda chhûng te pawh ka pe bawk che a. Hêng hi a la tlêm lutuk a nih chuan a dang pawh ka pêk belh zêl tûr che alâwm. Engati nge Lalpa thupêk zâwm lova, a mit hmuha thil ṭha lo chu i tih le? Hit mi Uria chu i that a, Amon mite khandaih chuan i tihlum a, a nupui i neihsak a. Ka thu i awih loh avâng leh Hit mi Uria nupui i neihsak avângin i thlahte chu khandaihin an thi an thi ang. Lalpa chuan heti hian a ti: ‘I chhûngkua aṭang ngeiin i chungah buaina ka thlentîr ang. I hmuh reng laiin i nupui ka lâksak ang che a, mi dang hnênah ka pe ang a, chhûn êngah i nupuite chu an mutpui ang. Nang chuan a rûkin i ti a, kei erawh chuan Israel mi zawng zawng hmuh tûrin chhûn êngah ka ti ang,’ a ti e,” a ti a. Davida chuan Nathana hnênah, “ Lalpa chungah thil sual ka lo ti ta a ni,” a ti a. Nathana chuan, “ Lalpa chuan a ngaidam ta che a, i thi lo vang. Amaherawhchu, he i thiltih hian Lalpa chu nasa taka a tihhmingchhiat avângin i fa chu a thi ang,” a ti a. Nathanan a in lama Davida a hâwnsan hnuin Lalpa chuan Uria nupui laka Davida fa chungah chuan kut a thlâk ta a, a dam lo ta a. Davida chuan naupang tân Pathian hnênah a ngên chiam a; chaw te a nghei a, a pindanah a lût a, zankhuain chhuatah a mu a. A ina upaho a mutna ata kaihthawh tumin a kiangah an rawn ding a; mahse, a tho duh lo va, an hnênah pawh chaw a kîl duh lo. A ni sarih ni chuan naupang chu a thi ta a. Davida chhiahhlawhte chuan naupang thih thu hrilh chu an huphurh hle a, “Naupang a la dam lai pawh khân a hnênah thu kan sawi a, a ngaithla duh si lo va, engtin nge naupang chu a thi ta tih kan hrilh ngam ang?” an ti a. A chhiahhlawhte an inbekbawr chu a hmuhin Davida chuan naupang chu a thi a ni tih a ring a, a chhiahhlawhte hnênah chuan, “Naupang chu a thi ta elo?” a ti a. Anni chuan, “Thi ta e,” an ti a. Davida chu chhuat aṭangin a lo tho va, a inbual a, hriak a thih a, a thawmhnaw a inthlâk a, Lalpa inah a kal a, chibai a bûk a, inah a haw leh a, chaw ei tûr a lam a, an rawn hlui a, a ei ta a. A chhiahhlawhte chuan a hnênah, “Engtiziaa hetianga ti nge i nih? Naupang chu a dam lai khân chaw te i nghei a, i ṭap a; mahse, naupang chu a thih veleh i lo tho va, chaw te i ei ta zâwk mai si a,” an ti a. Davida chuan, “Naupang chu a la dam lai khân chaw te ngheiin ka ṭap ngei tak a, Lalpa chuan min khawngaih ang a, naupang chu a dam leh mial mahna ka tih vâng a ni. Mahse, tûnah a thi ta a, engah nge chaw ka nghei tawh ang? Ka ko kîr leh thei em ni? Kei pawh a hnênah ka la kal dâwn, ani zawng ka hnênah a lo kîr leh dâwn tawh lo,” a ti a. Davida chuan a nupui Bathsebi chu a hnêm a, a hnênah a kal a, a mutpui a; tichuan, fapa a hring a, a hmingah Solomona a sa a. Lalpa chuan naupang chu a hmangaih hle a. Lalpa chuan a hmangaih avângin chu nau hmingah chuan Jedidia sa tûrin zâwlnei Nathana chu a chah a. Joaba chuan Amon mite khawpui Raba chu a rûn a, lal inte a la ṭêp a. Davida hnênah mi a tîr a, “Raba khua ka bei a, an tui tlan dîl lian pawh ka la ta. Tûnah, sipai la awm zawng zawng khâwm la, khua chu rawn hual la, rawn la rawh. Chutilo zawng, khawpui chu ka la ang a, a hmingṭhatna ka khum dah ang e,” a ti a. Davida chuan sipai zawng zawng a khâwm a, Raba chu a pan a, a bei a, a la ta a. An milim pathian Milkoma rangkachak lallukhum chu a la a, a rih lam chu kg. sawmthum leh panga a ni; lunghlua chei a ni a; tin, Davida chu an khumtîr a, khawpuia mi sum tam tak a la bawk a. Chu khuaa mite chu a kawi chhuak a, thingzaina te, leilehna thîr te, hreipui te hmangin hna a thawhtîr a, leirawhchan te a siamtîr bawk a. Amon mi, khawpui danga awm zawng zawng pawh chutiang chuan a thawhtîr a. Tichuan, Davida leh a hote chu Jerusalem-ah an haw leh ta a. Davida fapa Absaloma chuan farnu hmêlṭha tak a nei a, a hming chu Tamari a ni. Davida fapa Amnona chuan ani chu a ngaizâwng ta hle a. A farnu Tamari a ngaihzâwn êm avângin Amnona chuan a âtchilh ta a. Tamari chu nula thianghlim a ni a, tihngaihna a hre lo va. Amnona chuan ṭhian a nei a, a hming chu Jonadaba a ni. Ani chu Davida u Sama fapa a ni. Jonadaba chu fing vervêk tak a ni. Amnona hnênah chuan, “Nang, lal fapa hi, engtizia nge a ni têla i chêr tulh tulh chu le? Eng vâng nge ni min hrilh teh,” a ti a. Amnona chuan a hnênah, “Ka unaupa Absaloma farnu Tamari hi ka ngaizâwng êm atin a ni,” a ti a. Jonadaba chuan a hnênah, “Na der la, khumah mu reng la, i pain a rawn en hunah che a hnênah, ‘Khawngaih takin ka farnu Tamarin min rawn kan sela, ei tûr min rawn pe teh se, ka mit hmuhah ei tûr mi siamsak sela, a siam ngei chu ka lo ei ang e,’ lo ti rawh,” a ti a. Tichuan, Amnona chu a mu a, a na der ta a. Tin, lal chuan a va kan a, Amnona chuan lal hnênah, “Khawngaih takin ka farnu Tamari lo kal sela, ka mit hmuhah chhang min siamsak sela, a siam ngei chu ka lo ei ang e,” a ti a. Lal chuan lal in chhûnga awm Tamari hnênah chuan, “I nuṭa Amnona inah kal la, ei tûr va siamsak teh,” tiin mi a tîr a. Tamari chu a nuṭa Amnona inah chuan a kal ta a, ani chu a lo mu reng a. Chhangphut a la a, a hmet a, chhangpêr a siam a, a hmuh lai chuan a ur hmin ta a. A urna thlêng ata a la chhuak a, chhang chu a hmaah a hlui a; mahse, a ei duh lo va. Amnona chuan, “Mi dang zawng zawng hi heta ta chhuahtîr vek rawh,” a ti a. Amnona chuan Tamari hnênah, “Ka mut pindanah hian chaw chu han la rawh le, i mi pêk ngei ka lo ei ang e,” a ti a. Tamari chuan a chhang siam chu a la a, a nuṭa Amnona chu a mut pindanah chuan a rawn pe a. Ei tûr a pêk lai tak chuan Amnona chuan a lo man a, a hnênah, “Ka farnu, lo mu ve teh,” a ti a. Ani chuan a chhâng a, “Ni lo ve, ka nuṭapa, mi tilui suh, hetiang thil hi Israel-te zîngah tih tûr a ni lo, he thil sual tak hi ti lul suh khai. Ka tân mualphona tâwp a ni a, ka meng ngam dâwn em ni? Nang pawh Israel-te zînga mi sual tâwpa ngaih i ni dâwn asin. Khawngaih takin lal hnênah sawi zâwk la, kan inneih a hnial lo vang,” a ti a. Nimahsela, a thu sawi chu a ngaithla duh lo va, a aiin a chak si a, a mutpui lui ta a. Amnona chuan ngei tak têin a ngei leh ta si a, a hnênah, “Tho la, chhuak vat rawh,” a ti a. Tamari chuan a hnênah, “Chuti mai tûr chu a ni lo vang; min hnawh chhuah hi ka chunga i tih tâk ai mah khân a sual zâwk a ni,” a ti a. Nimahsela, a ngaithla duh chuang lo va. A tirhkah chhiahhlawh chu a ko va, a hnênah, “He hmeichhia hi heta ta hi hnawt chhuak la, kawng hi kalh tlat rawh,” a ti a. A chhiahhlawh chuan ani chu a hnawt chhuak a, kawng chu a kalh ta a. Tamari chuan kawrfual ze hrang hranga ṭial mawi a ha a, chutiang kawrfual chu lal fanu thianghlimten an ha ṭhîn a. Tamari chuan a lu-ah vaivut a phul a, kawrfual ze mawi tak a hâk lai chu a pawtthlêr a, a chhîpah a kut a suih a, ring taka ṭap chungin a kal ta a. A nuṭa Absaloma chuan, a hnênah, “I nuṭa Amnona chuan a khawih che a ni maw? Ka farnu, ngawi hrâm hrâm rawh, i nuṭa a ni alâwm. I rilru tina duh suh,” a ti a. Tichuan, Tamari chu a nuṭa Absaloma inah khawhar takin a inkhung ta a. Chûng thu chu Davidan a lo hriatin a thin a ur hle a. Absaloma chuan Amnona chu biak pawh a be ṭha duh ta lo va, a farnu Tamari a tihmualpho avângin Amnona chu a haw ta hle a. Kum hnih a ral hnu chuan Efraim khaw kianga Baal-hazar-ah Absaloma chuan berâm hmul a mêt a, Absaloma chuan lal fapa zawng zawng chutah chuan a sâwm a. Absaloma chu lal hnênah a kal a, a hnênah, “Ngai teh, i chhiahhlawhin berâm hmul ka mêt a, lal leh a ṭhuihruaite chu i chhiahhlawh hnênah hian kal ve teh se,” a ti a. Lal chuan Absaloma hnênah, “Ni lo ve, ka fapa, kan za chuan kal lo ve, kan tihautak lutuk dah ang che,” a ti a. Absaloma chuan a sâwm lui a; mahse, a kal duh chuang lo va, mal a sâwmsak ta zâwk a. Absaloma chuan, “A nih loh leh ka unaupa Amnona tal ka hnênah kal ve rawh se,” a ti a. Lal chuan a hnênah, “Engah nge a kal bîk ang?” a ti a. Nimahsela, Absaloma chuan a ngên luih tlat avângin Amnona leh lal fapa dang zawng zawng chu a kaltîr ta a. Absaloma chuan a chhiahhlawhte hnênah, “Amnonan uain a ruih thatho lai takin, ‘Amnona that rawh u’ ka ti ang a; tichuan, in that dâwn nia. Hlau rêng rêng suh u, hei hi in hnêna ka thupêk a ni, ngaihṭha takin awm ula, thlaphâng suh u” tiin a lo hrilh diam a. Absaloma mite chuan an pu thupêk ang chuan Amnona chu an that ta a, lal fapa dang zawng zawng chu an sakawr chungah an zuangkai a, an tlânchhe ta vek a. Kawng laka an la awm lai chuan, “Absaloman lal fapa zawng zawng chu pakhat mah zuah lovin a that vek mai,” tiin Davida chu an rawn hrilh a. Lal chu a tho va, a silhfênte a pawtthlêr a, leiah a mu a, a kianga a chhiahhlawh awm zawng zawng pawhin an silhfênte chu an pawtthlêr ve a. Davida u Sama fapa Jonadaba chuan, “Ka pu chuan lal fapa tlangvâl zawng zawng chu an thah vek ring suh se, Amnona chauh a ni thi ni. A farnu Tamari a tihhmingchhiat avâng hian hetianga tih hi Absaloma chuan a tum rêng a ni. Chuvângin, ka pu, Lalpa chu lal fapa zawng zawng an thi emaw tiin lungngai duh suh se, Amnona chauh a ni thi ni,” a ti a. Absaloma erawh chu a tlân bo ta a. Râlvêngtu tlangvâl chu a han hawi vêl a, a hnung lam tlângah chuan mi tam tak lo kal a hmu a. Jonadaba chuan, lal hnênah chuan, “Ngai teh, lal fapate chu an lo hâwng a, i chhiahhlawhin a sawi ang chiah kha a ni e,” a ti a. Chu thu a sawi zawh chuan lal fate chu an lo thleng a, an ṭap hawm hawm a, lal leh a chhiahhlawhte pawh chu lungchhe takin an ṭap a. Absaloma chu a tlân bo va, Gesur lal Amihuda fapa Talmaia hnênah a kal a. Lal chuan Amnona chu rei tak a sûn a. Absaloma chu a tlân bo va, Gesur ramah a kal a, chutah chuan kum thum a awm a. Lalin Amnona a ngaih chu a reh ta a, Absaloma erawh chu a ngai êm êm a. Zeruii fapa Joaba chuan Absaloma chu lalin a ngai hle tih a hria a. Joaba chuan Tekoa khuaa hmeichhe fel tak pakhat a kohtîr a. Hmeichhe hnênah chuan, “Lusûn angin awm la, lusûn thuam inbel bawk la, hriak pawh thih suh. Rei tak lusûn tawh angin awm rawh. Tin, lal hnênah va kal la, hetiangin thu va sawi ang che,” a ti a, sawi tûr nên lam a hrilh vek a. Tekoa khua hmeichhia chu lal hnênah a kal ta a, bawkkhupin chibai a bûk a, a hnênah, “Aw lalber, mi pui rawh,” a ti a. Lal chuan, “Engtizia nge ni ta?” a ti a. Ani chuan “Hmeithai rethei tak ka ni a, ka pasalin min thihsan a. I bawihnu hian fapa pahnih ka nei a, lovah an insual a; tu mah ṭhelhtu an awm si lo va, pakhat zâwk chuan a unaupa chu a that ta a. A thi-a chhûngte zawng zawng chuan i bawihnu hi min do rawn a, ‘A unaupa thattu kha, a unaupa a thah phuba laa kan thah ve theih nân min pe rawh; roluahtu nei lovin kan han siam teh ang,” an ti a. Chutianga ka innghahna awm chhun an thah leh zêl chuan ka pasal thlah a mang ang a, leiah hian a hming a dai mai dâwn a ni,” a ti a. Lal chuan hmeichhe hnênah, “Va hâwng ta la, i chungthu chu ka tihfelsak mai ang che,” a ti a. Tekoa khaw hmeichhia chuan lal hnênah, “Aw lalber, ka pu, eng pawh ti la, a mawh chu kei leh ka pa chhûngten kan phur ang, lal leh a ram chuan phur suh se,” a ti a. Lal chuan, “Mi tu pawhin an vau che chuan ka hnênah han hruai la, an tibuai leh tawh lo vang che,” a ti a. Hmeichhia chuan, “Phuba lâk tumtuten ka fapa dam chhun hi an thaha, chhiatna nasa lehzual an thlentîr loh nân lal chuan, Lalpa, i Pathian min ngensak rawh,” a ti a. Lal chuan, “ Lalpa mi nung hmingin ka tiam a che, i fapa chu engtin mah an tina lo vang,” a ti a. Hmeichhia chuan, “Khawngaih takin i bawihnu hian, ka pu, lal hnênah thu kam khat chauh ka sawi leh thei ang em?” a ti a. Ani chuan, “Sawi ta che,” a ti a. Hmeichhia chuan, “Engtizia nge Pathian mite chunga hetiang thil dik lo hi i tih? Lal chuan a fapa tlân bo chu a hruai hâwn leh duh loh chuan tûna a ṭawngka chhuak ngei khân thiam loh a chantîr a ni lâwm ni? Kan la thi ṭheuh dâwn, leia tuisik bua, ruh leh theih loh ang hi kan ni. Pathian pawhin mitthi tawh chu a nuntîr leh lo. Lal erawh hi chuan a hnên ata ram hla taka tlân bo chu hruai hâwn zai rêl teh se. Aw lalber, ka pu, miten min vau avângin he thu hi i hnênah ka rawn sawi ngam a ni. I bawihnu hian, ‘Lal hnênah ka thlen ang a, ka dîl hi min lo tihsak mahna,’ ka ti a ni. Lal chuan kei i bawihnu leh ka fapa hi Pathianin min pêk ram aṭanga min tihboral tumtute laka min chhanhim ka beisei a ni. Lalber, ka pu, ka ngên a che, i bawihnu hi min thlamuan la, lalber ka pu chu Pathian tirhkohte anga engkim hre vektu i ni si a, Lalpa, i Pathian chu i hnênah awm zêl rawh se,” a ti a. Lal chuan hmeichhe hnênah, “Ka zawh apiang eng mah zêp lovin min chhâng teh aw,” a ti a. Hmeichhia chuan, “Ka pu lalber chuan sawi ang hmiang,” a ti a. Lal chuan, “Hêng hi Joaba tihtîr che em ni?” a ti a. Hmeichhia chuan, “ Lalpa ka pu, i hmaah ka puang e, i thu zawh chu dik taka chhân loh theih a ni lo. Ni e, i chhiahhlawh Joaba chuan i bawihnu hi hêng thu zawng zawng hrilh tûr chein min tîr a ni. I chhiahhlawh Joaba chuan thil siam ṭhat a tum a ni. Ka pu chu Pathian tirhkohte angin a fing a, ram chhûng thil thleng tinrêng a hre vek si a,” a ti a. Tichuan, lalin Joaba hnênah, “I remruat chu a ṭha e; kal la, tlangvâl Absaloma chu va hruai hâwng rawh,” a ti a. Joaba chuan bawkkhupin zah takin chibai a bûk a, lal chu a fak a. Joaban, “Lal chuan a chhiahhlawh ngenna a hlawhtlintîr avângin i chhiahhlawh hian lalber, ka pu mit ka tlung tih vawiinah hian ka hre ta,” a ti a. Joaba chu Gesur-ah a kal a, Absaloma chu Jerusalem-ah a rawn hruai hâwng a. Lal chuan, “A in lamah kal sela, ka hmêl rawn hmu suh se,” a ti a. Israel-te zîngah Absaloma anga hmêlṭha chungchuang an awm lo va, a ke phah aṭanga a chhîp thlengin sawisêl tûr rêng a awm lo. A sam a ṭha êm êm a, a sei a, a buk lutuk châng apiangin a mêt ṭhîn a. A sam rih zâwng chu kg. hnih lai a ni ṭhîn. Absaloma chuan fapa pathum leh fanu pakhat a nei a, a fanu hming chu Tamari a ni a, a hmêl pawh ṭha tak a ni. Absaloma chu kum hnih lai lal hmêl hmu lovin Jerusalem-ah a awm a. Lal hnêna tirh atân Absaloma chuan Joaba chu a chah a; mahse, a lo kal duh lo va. A chah nawn leh pawhin a lo kal duh chuang lo va. A tâwpah a chhiahhlawhte hnênah, “Ka lo kiang kha Joaba lo a ni a, barli a chîng a, kal ula, va hâl rawh u,” a ti a. Absaloma chhiahhlawhte chuan lo chu an va hâl ta a. Joaba chu Absaloma inah a kal a, a hnênah, “Engtizia nge i chhiahhlawhten ka lo an hâl mai le?” a ti a. Absaloma chuan Joaba chu a chhâng a, “Ka hnêna lo kala, lal hnênah, “Eng atân nge Gesur ata ka lo hâwn? Chutah chuan awm reng ila, ka tân a ṭha zâwk tûr,’ tia sawi tûrin ka chah che a ni lâwm ni? Tûnah, lal hnênah min hruai la, thil ka tisual a nih chuan min that mai rawh se,” a ti a. Tichuan, Joaba chu lal hnênah a kal a, chûng thu chu a hrilh a. Lal chuan Absaloma chu a ko va, ani chu a lo kal a, bawkkhupin lal chu chibai a bûk a. Lal chuan Absaloma chu a lo fâwp a. Chumi hnuin Absaloma chuan amah vêng tûrin tawlailîr te, sakawr te, mi sawmnga lai nên a buatsaih a. Absaloma chu zîng takah a tho va, kulh kawngka bulah chuan a lo ding ṭhîn a, lal hnêna thubuai sawi tûr neite chu Absaloma chuan a lo ko va, “Khawii khua nge i nih le?” a lo ti ṭhîn a. Anni chuan, “I chhiahhlawh hi Israel hnam zînga mi ka ni,” an ti zêl a. Absaloma chuan, “I thu hi a dik khawp mai; mahse, lo ngaihtuahsak tûr che tu mah lal chuan a ruat si lo a nih hi,” a lo ti ṭhîn a. Absaloma vek chuan, “Rorêltu chu han ni ve ila chuan thubuai nei te, beisei neite chu dik takin ka lo rêlsak tûr,” a ti bawk a. Amah chibai bûk tuma rawn pantute chu a vuan a, a kuah a, a lo fâwp ṭhîn a. Israel mi, lal hnêna thubuai sawi tûra lo kal apiangte hnênah Absaloma chuan chutiang chuan a lo ti zêl a. Tichuan, Israel miten Absaloma chu an ngaina ta hle a. Kum li a vei hnuin Absaloman lal hnênah chuan, “ Lalpa hnêna ka thutiam hlen tûrin Hebron-ah min kaltîr rawh. I chhiahhlawh hi Suria ram Gesura ka awm lai khân, ‘ Lalpa chuan Jerusalem-a min hruai kîr leh chuan Hebron khuaah Lalpa chibai ka bûk ang,’ tiin ka lo tiam tawh si a,” a ti a. Lal chuan, “Thlamuang takin kal ta che,” a ti a. Hebron-ah chuan a kal ta a. Absaloma chuan Israel hnam tin hnênah a rûkin mi a tîr a, “Tawtawrâwt ri in hriat veleh, ‘Absaloma chu Hebron-ah a lal ta’ ti ang che u,” a ti a. Tin, mi zahnihin Absaloma chu Jerusalem aṭangin an zui a. Chûng mite chu a sâwm chhuah an ni, thil awmzia eng mah an hriat loh avângin rilru thianghlim takin an zui a. Absaloman inthawina a hlan lai chuan Gilo mi, Ahitofela, Davida rorêlpui chu, a awmna khua Gilo aṭangin a chah a. Lal an phiarna chu a nasa tawlh tawlh a, Absaloma lamṭang chu an pung tual tual a. Mi pakhat hian Davida hnênah, “Israel-te chu Absaloma lamah an ṭang ta,” tiin a rawn sawi a. Davida chuan a ṭhuihruai Jerusalem-a awmte hnênah, “Hawh u, i tlânchhia ang, tu mah Absaloma lakah kan him lo vang. I chhuak thuai ang u; chutilo zawng, min rawn nangchîng ang a, khua hi khandaihin a rawn bei ang a, min that dah ang e,” a ti a. Lal ṭhuihruaite chuan, “I chhiahhlawhte hi kan pu lalin a sawi apiang ti tûrin kan inpeih e,” an ti a. Lal chu a chhuak a, a laina zawng zawngin an zui a, a hmei sâwm erawh chu lal in nghâk tûrin a hnutchhiah a. Lal chu a chhuak a, a mite chuan an zui vek a, khaw hmâwr in bulah chuan an innghâkkhâwm a. A chhiahhlawh Keret mi te, Pelet mi te, Git mi te leh mi zaruk, Gath aṭanga amah rawn zuitute nên lal chu an bêl a, an kal a. Lal chuan Git mi Itaia hnênah, “Engtizia nge kan zîngah i lo kal ve? Kîr la, lal thar hnênah chuan awm rawh. Nang zawng, ram dang mi, i ram ata râltlân mai i ni si a. Nimin lawkah i lo kal a, engah nge vawiinah ka vahvaihpui ang che? Ka thangna tûr chin pawh ka hre lo. Chuvângin, kîr la, i mite kha hruai ang che. Lalpa chuan khawngaih che uin vêng zêl che u rawh se,” a ti a. Itaia chuan lal chu a chhâng a, “ Lalpa nunna leh ka pu lal nunna chhâlin ka sawi e, khawiah pawh ka pu lal awmna tawh phawtah chuan thih leh thih, dam leh dam, i chhiahhlawh hi a awm ve zêl ang,” a ti a. Davida chuan Itaia hnênah, “Chuti chu i kal zêl ang u,” a ti a. Tichuan, Git mi Itaia chu a hote leh an chhûngte nên chuan an kal ve ta a. An kal ta chu a ram ṭahin an ṭap a, Lal chuan Kidron lui a kân a, a mite chuan an zui a, thlalêr lam panin an kal ta a. Zadoka leh Levia chite chuan Pathian Bâwm zâwnin an zui ve a, mipuiin khua an chhuahsan vek hma chu Bâwm chu an nghat a. Abiathara chu maichâmah a chho va. Lal chuan Zadoka hnênah, “Pathian Thuthlung Bâwm chu khawpuiah kîrpui leh rawh u, Lalpa mit ka tlun chuan min hruai hâwng leh ang a, Pathian Thuthlung Bâwm chu a hmun ngaiah ka hmu leh ang. “I chungah ka lâwm lo a ni,” a tih chuan ṭha a tih ang angin min ti mai rawh se,” a ti a. Lal chuan puithiam Zadoka hnênah, “Zâwlnei i ni alâwm, in fate pahnih, i fapa Ahimaaza leh Abiathara fapa, Jonathana te nên thlamuang takin khawpuiah haw leh rawh u. Kei chu, chanchin min rawn hrilh hma chu thlalêra lui kaiah kan lo awm ang e,” a ti a. Zadoka leh Abiathara chuan Pathian Thuthlung Bâwm chu Jerusalem-ah an kîrpui a, chutah chuan an awm ta a. Davida chu ṭap chungin oliv tlângah a chho va, a lu a khuh a, ke lâwngin a kal a. A hnêna awm zawng zawng pawhin an lu an khuh a, ṭap chungin an chho ve a. Davida hnênah chuan, “Ahitofela chu phiarrutute Absaloma hote zîngah chuan a tel ve ta,” tiin an hrilh a. Davida chu, “Aw Lalpa, Ahitofela thurâwn chu engmahlovah chantîr ang che,” tiin a ṭawngṭai a. Davida chuan miten pathian an biakna ṭhin hmunsâng chu a han thlen chuan Ark mi Husaia chuan thawmhnaw thlêr phung inbelin, lu-a vaivut kai luam chungin a lo hmuak a. Davida chuan a hnênah, “Ka hnêna i kal ve chuan ka tân phurrit mai i ni ang. Khawpuiah kîr leh zâwk la. Absaloma hnênah, ‘Aw Lalpa, i chhiahhlawhah ka awm ang e; tûnhma khân i pa chhiahhlawh ka ni ṭhîn a; mahse, tûnah i chhiahhlawhah ka awm tawh ang e,’ ti la; tichuan, Ahitofela remruat chu i hnial ṭhîn ang a, min ṭanpui thei zâwk ang. Puithiam Zadoka leh Abiathara pawh chutah chuan i kiangah an awm ang a, lal ina thil thleng i hriat apiang anni chu hrilh ang che. An fate pahnih, Zadoka fapa Ahimaaza leh Abiathara fapa Jonathana pawh chutah chuan an awm kha. I thil hriat apiang mi rawn hrilh tûrin anni chu rawn tîr ṭhîn ang che,” a ti a. Absaloman Jerusalem khua a luh ni chuan Davida ṭhian Husaia pawh chu a lo thleng ve a. Davida chuan tlângchhîp a pêl chauh tihin Mefiboseta chhiahhlawh Ziba chuan a lo hmuak a. Ani chuan sabengtung pahnih, thuam bel sa, chhang tlang zahnih, grep pho ro bâwr za, theirah bâwr za leh uain peng khat nên a rawn keng a. Lal chuan Ziba hnênah, “Eng atân nge hêng hi i rawn ken duh le?” a ti a. Ziba chuan “Sabengtung hi lal chhûngkuate chuan nân ka ti a, chhang leh thei hi chu tlangvâlte ei atân a ni, uain erawh hi chu thlalêra chau apiang in atân a ni e,” tiin a chhâng a. Lal chuan, “Khawiah nge i pu fapa chu?” a ti a. Ziba chuan lal hnênah chuan, “Jerusalem-ah a awm. ‘Vawiin hian Israel-te chuan ka pa ram chu min pe leh dâwn,’ a ti nghe nghe asin,” a ti a. Lal chuan Ziba hnênah, “Mefiboseta thil zawng zawng chu i ta a ni e,” a ti a. Ziba chuan, “Ka pu, i chhiahhlawh tlâwm tak ka ni e, i mittlunga awm zêl ka tum ang,” a ti a. Lal Davidan Bahurim a lo thlen chuan Saula laichînte zînga mi, a hming Simeia, Gera fapa chu a lo chhuak a, kal pahin ânchhia a rawn lawh bawrh bawrh a. Davida chu a sipaiten a ding lam leh vei lamah an vêng na a, Simeia chuan Davida leh a ṭhuihruaite chu lungin a rawn vawm a. Simeia chuan heti hian ânchhia a lawh a, “Kal bo daih rawh, kal bo daih rawh, tual thah chîng leh mi sualpa, Saula ram chu i chhuhsak vei a, a chhûngte chunga thisen i chhuah man Lalpa chuan a thungrûl ta che a nih hi. Lalpa chuan ram chu i fapa Absaloma hnênah a hlân ta. Thisen chhuah i chîn chu i chhiat phah ta a nih hi,” a ti a. Zeruii fapa Abisaia chuan lal hnênah, “He uicho hian engtizia nge, Lalpa ka pu hi ânchhia a lawh? Khawi nge, a lu ka va lâksak teh ang,” a ti a. Lal chuan, “E! Zeruii fate u, ka chungchângah lo inrawlh ve suh u. Lalpa chuan, ‘Davida ânchhia lawh rawh’ a hnêna a tih chuan ânchhia chu min lawh mai rawh se. ‘Engati nge hetianga i tih le,’ ti thei tu nge awm?” a ti a. Davida chuan Abisaia leh a chhiahhlawhte hnênah chuan, “Ka fapa, ka rîla rah ngei pawhin mi thah a tum si chuan he Benjamin mi phei hi chuan a tum lehzual âwm rêng alâwm. Eng mah tih suh u, ânchhia chu min lawh mai rawh se, Lalpa tihtîr a ni si a. Lalpa chuan ka lungngaihna min hriatpui ang a, vawiina ânchhia min lawh hi malsâwmnaah a chantîr mai thei asin,” a ti a. Davida leh a mite chu kawngah chuan an kal zêl a, ral lehlam tlâng aṭangin Simeia chuan kal chungin ânchhia a lawh reng a, lungin a vawm a, vaivutte a rawn theh bawk a. Lal leh a mite chuan Jordan lui an lo thleng a, an chau hle a; chutah chuan an châwl hahdam a. Absaloma chu a hnêna Israel awm zawng zawng nên Jerusalem-ah an lo lût a. Ahitofela pawh an zîngah a tel ve a. Ark mi, Husaia, Davida ṭhian chu Absaloma hnênah a lo kal a, a hnênah, “Lal chu dam reng rawh se,” a ti a. Absaloma chuan Husaia hnênah, “I ṭhian i hmangaih dân chu hetiang hi a ni maw? Engtizia nge i ṭhian hnêna i kal loh?” a lo ti a. Husaia chuan Absaloma hnênah, “Ka kal lo vang, Lalpa leh hêng mipuite leh Israel mi zawng zawngin an thlana lamah ka ṭang ang a, a hnênah ka awm zâwk ang. Tu dang rawng nge ka bâwl ang? A fapa rawng chu ka bâwl dâwn lâwm ni? I pa rawng ka bâwl ang bawkin i rawng pawh ka bâwl ang,” a ti a. Absaloma chuan Ahitofela hnênah, “Rem mi han ruatpui teh, eng nge ka tih ang le?” a ti a. Ahitofela chuan, “I pa hmei, lal in nghâka a dahte chu mutpui la; tichuan, Israel mi zawng zawngin i pa pawi lian tak i khawih tih an hria ang a; nangmah zuitute chuan an ṭan sauh ang che,” a ti a. Tichuan, Absaloma tân lal in chungah puan in an zâr a, Israel mi zawng zawng mit hmuhin Absaloma chu a pa hmei mutpui tûrin a lût a. Chûng lai chuan Ahitofela thurâwn chu mite chuan Pathian thu chhuak ang maiin an ngaisâng a, Davida leh Absaloma ngei pawh chuan Ahitofela thurâwn zawng zawng chu an pawisa ṭhîn. Ahitofela chuan Absaloma hnênah, “Mi sîngkhat leh sânghnih ka thlang chhuak ang a, zâninah Davida ka va ûm teh ang. A chauh chhiat lai tak ka va nangchîng ang a, ka ṭhâwng thut ang a, a mite zawng zawngin an tlânchhiatsan ang a, amah chu ka va that mai ang. Tichuan, mite chu, mo, a pasal hnêna a lawi angin i hnênah ka rawn hruai kîr vek ang. Thah i tum mi pakhat bâk chu an him vek ang,” a ti a. Chu thurâwn chu Absaloma leh Israel upaho chuan ṭha an ti hle a. Absaloma chuan, “Ark mi Husaia han ko ula, eng nge sawi tûr a neih i lo ngaithla ve phawt teh ang,” a ti a. Husaia chu a lo kal a, Absaloma chuan a hnênah, “Ahitofela chuan hetiangin thu min râwn a, a sawi ang hian kan ti ang em? Ṭha i tih loh chuan i ngaih dân han sawi ve teh,” a ti a. Husaia chuan Absaloma hnênah, “Tûn ṭuma Ahitofela remruat hi a ṭha lo va ni. I pa mite chu i hria a, râl beih thiam, savawm a notê an lâksak ang maia kawlhsen an ni a. Chu bâkah, i pa hi râl rêl thiam a ni a, a sipaite zîngah a riak kher lo vang. Tûnah pawh pûkah emaw, hmun dangah emaw a biru daih ang. In inbei chauh tiha i mite an thih hlauh phei chuan a hria apiangin, ‘Absaloma sipaite an that chiam mai,’ an ti ang a. Sipai huaisen, sakeibaknei rilru pute pawh hlauvin an khûr ang a, Israel mi zawng zawngin i pa indo thiamzia, a hotute huaisenzia te an hre vek si a. Hetiangin ti zâwk teh: Israel mi, Dan leh Beer-seba inkâra awm zawng zawng chu tuifinriat ṭiauvut zât ngawt ko khâwm la, nangmah ngeiin indonaah chuan hma hruai la; tichuan, kan hmuhna apiangah kan bei ang a, leia dai tla ang maiin ani chu kan bei tluar tluar ang a; a hote nên pakhat mah kan zuah lo vang. Khuaa a tlân luh chuan Israel mi zawng zawng hruizên nên kan thawk ang a, a khaw chawpin kawrah kan hnuk thla mai ang, lungtê pakhat pawh kan zuah lo vang,” a ti a. Absaloma leh Israel mite chuan “Ark mi Husaia remruat chu Ahitofela remruat aiin a ṭha zâwk,” an ti a. Absaloma chhiatna tûrin Ahitofela remruat ṭha tak chu Lalpa chuan dâl a lo tum rêng a ni. Husaia chuan puithiam Zadoka leh Abiathara hnênah chuan Ahitofelan Absaloma leh Israel upate rem a ruatpui dân te, amah pawhin rem a ruatpui dânte a hrilh bawk a. “Zâninah thlalêr lui kaia riak tawh lovin lui chu kân ngei rawh se. Chutilo zawng, lal leh a hote chu an rawn man vek mai ang’ tiin Davida chu hrilh thuai rawh u,” a ti a. Jonathana leh Ahimaaza chu Jerusalem daifêm, En-Rogel-ah an awm a. Bawihnu pakhat hian anni chu thu thar a va hrilh ṭhîn a, annin Davida an hrilh chhâwng leh ṭhîn a ni. Khawpuia an lût chu tu man an hmu tûr a ni si lo va. Naupang pakhat hian a lo hmu hlauh va, Absaloma a hrilh a; tichuan, anni pahnih chu an tlân bo ta thuai a, Bahurim-a mi pakhat inah an tlân lût a. Ani chuan a tualah tuichhunchhuah a nei a, a chhûngah chuan an lût ta a. In neitupa nupui chuan a chhinnain tuichhunchhuah chu a chhîn a, a chungah buh a pho va; tu man an hmu lo va. Absaloma chhiahhlawhte chu hmeichhe hnênah chuan an va kal a, a hnênah, “Ahimaaza leh Jonathana te kha khawiah nge an awm?” an ti a. Hmeichhia chuan, “Lui râl an kai daih tawh ang,” a ti a. Mite chuan an va zawng a; mahse an hmu lo va, Jerusalem-ah an kîr leh ta a. Chûng mite kal liam hnu chuan anni chu tuichhunchhuah ata chu an lo chhuak a, lal Davida chu an hrilh ta a, a hnênah, “Tho la, lui hi kân thuai rawh u, Ahitofela chuan in chhiatna a zawng rêng si a,” an ti a. Davida leh a hote chu an chhuak a, Jordan lui chu varṭianah an kai vek a. Ahitofelan a remruat an zâwm lo tih a hriatin a sabengtung a thuam a, a khaw lamah a hâwng ta daih a. A chhûngkaw awm dân tûr a rel fel a, a inâwkhlum ta a. A ruang chu a pa thlânah an phûm a. Absaloma leh a hnêna Israel awm zawng zawngin Jordan lui an kai lai chuan Davida chuan Mahanaim a thleng a. Absaloma chuan Joaba aiah Amasa chu sipai hotu-ah a dah a. Amasa chu Ismael mi Jethera fapa a ni a, Nahasa fanu Abigaili hrin a ni, Abigaili chu Joaba nu Zeruii laizâwn a ni. Israel mite leh Absaloma chuan Gilead ramah ṭanhmun an khuar a. Davida chuan Mahanaim khua a thlen chuan Amon mi, Raba khuaa Nahasa fapa Sobia te, Lo-debar khua aṭanga Amiela fapa Makira te, Rogelim aṭanga Gilead mi Barzilaia te chuan puanthuah te, thleng te, eirêlna bungbêl te an rawn ken a, huit te, barli te, chhangphut te, vaikan te, bê te, thlaihnah te, khawizu te, bâwnghnute dak te, berâm te, bâwnghnute um te, Davida leh a mite ei atân an rawn ken a, “Mite chu thlalêrah rilṭâm leh tuihâlin an chau hle tawh,” tih an lo hre si a. Davida chuan a hotute chu a ko khâwm a, sâng chunga hotu te, za chunga hotute a ruat a. Davida chuan sipai chu pâwl thumin a tîr chhuak a. Pâwl khat chu Joaban a ho va, pâwl khat chu Joaba u, Zeruii fapa Abisaian a ho va, pâwl thumna chu Git mi Itaian a ho va. Lal chuan sipaiho hnênah, “Kei pawh in hnênah ka kal ve dâwn a ni,” a ti a. Mite chuan, “Kal lo ve; keiniho hi chu tlânchhia pawh ni ila min ngaimawh vak lo vang. A zâtve lai va thi pawh ni ila pawi an ti tehchiam lo vang. Nang erawh zawng keiniho sîng tlukin i hlu si a, khua aṭanga min lo ṭanpui hi a ṭha zâwk e,” an ti a. Lal chuan, “Ṭha in tih ang chuan ka awm ang e,” a ti a. Lal chu kulh kawngka bulah a ding a; sipaite chu za rual te, sâng rual tein an chhuak ta nguah nguah a. Lal chuan Joaba te, Abisaia te, Itaia te hnênah, “Keimah avângin tlangvâl Absaloma chu va tina suh u aw,” tiin thu a pe a. Mi tinin Absaloma chungchânga lalin sipai hotute thu a pêk lai chu an hria a. Sipaite chu Israel-te bei tûrin indona hmun panin an chhuak ta a, an inbeihna hmun chu Efraim ngawpuiah a ni. Davida mite chuan Israel sipaite chu an hneh a, chumi ni chuan mi sînghnih zet an that a. Chu lai ram kil tinah chuan an inbei a, khandaiha thah ai mahin ram ngawa tluhlum an tam a. Absaloma chuan Davida mite a va tâwk ta thut a. Absaloma chu sabengtung chungah a chuang a, sabengtung chu sasaw thing hnuaiah a tlân lût a, Absaloma lu chu thingzârah a tâng a, a chuanna sabengtung chu a tlân zêl si a, thingzârah chuan a inkhai ta reng a. Mi pakhat hian Joaba hnênah, “Absaloma sasaw thing zâra a inkhai reng ka hmu,” tiin a hrilh a. Joaba chuan a rawn hrilhtu hnênah, “I hmu maw? Engati nge i tihhlum nghâl mai loh? That la chu tangka sâwm leh kâwnghrên ka pe tûr che a,” a ti a. Ani chuan, “Tangka sâng pawh mi pe dâwn mah la, lal fapa chu ka that chuang lo vang, ka hriat lai ngeiin lalin i hnênah te, Abisaia hnênah te, Itaia hnênahte, ‘Tlangvâl Absaloma chu tu man khawih suh ang che u!’ a tih kha. Lal thu zâwm lovin lo that pawh ni ila, lalin a hre leh tho vang a; nang lah chu i inthiarfihlîm leh daih âwm si a,” a ti a. Joaba chuan, “Chutiang mai mai, ka nghâk khawtlai hman lo che,” a ti a; fei pathum a la a, sasaw thingzâra Absaloma dama la inkhai reng chu a thinhnûnah a chhun a. Joaba râlthuam kengtu sâwmin an rawn hual a, an chhun hlum ta a. Joaba chuan tawtawrâwt a hâm a, sipaiten Israel-te an ûm chu an bânsan a, a ko kîr ta vek a. Absaloma ruang chu an la thla a, ngaw chhûnga khuarkhurum thûk takah an paih a, a chungah lung an vawm khâwm thûr a. Israel mi zawng zawng chu mahni in lamah an tlân hâwng ta vek a. Absaloma khân “Lal Ruam” an tihah a dam lai khân dam lai lung a phun a, “Ka hming daih loh nân, fapa pawh ka nei si lo va,” a ti a ni. Chu lung dawh pawh chu a hming chawiin “Absaloma Hriatrêngna Lung” an ti a, tûn thlengin hmingah a la pu ta reng a ni. Zadoka fapa Ahimaaza chuan, “Ka va tlân ang a, Lalpa chuan a hmêlma laka lal phuba a lâksak dân ka va hrilh teh ang,” a ti a. Joaba chuan, “Vawiin chuan chanchin thar chu va hrilh suh. Ni dangah i la hrilh dâwn nia. Lal fapa chu a thi si a, vawiinah zawng va hrilh rêng rêng suh u,” a ti a. Joaba chuan Kus mi hnênah, “Kal la, lal chu i thil hmuh va hrilh rawh,” a ti a. Kus mi chuan Joaba chu kûnin chibai a bûk a, a tlân ta a. Zadoka fapa Ahimaaza chuan Joaba hnênah, “Eng pawh ni se, Kus mi hnungah ka va tlân ve ang e,” a ti leh a. Joaba chuan, “Ka fapa, engah nge i tlân ve kher ang? Chanchin hrilh man i dawng dâwn si lo va,” a ti a. Ani chuan, “Eng pawh ni rawh se, ka tlân rêng rêng dâwn,” a ti a. Joaba chuan “Tlân ta che,” a ti a. Ahimaaza chu phaizâwl lam kawngah a tlân a, Kus mi chu a lehpêl a. Davida chu kulh kawngka chhûng zâwk leh pâwn zâwk inkârah a lo ṭhu a. Râlvêngtu chu kulh kawngka pâwn zâwk chung lamah chuan a lâwn chho va, a han hawi vêl a, mi pakhat lo tlân hi a hmu a. Râlvêngtu chu a au va, lal chu a hrilh a, lal chuan “Pakhat mai a nih chuan thu ṭha rawn thlen tûr a ni ang,” a ti a. Mi chu a lo hnai telh telh a. Râlvêngtu chuan mi dang lo tlân a hmu leh a, kawngkhâr vêngtu chu a au va, “En teh, mi pakhat a lo tlân leh e,” a ti a. Lal chuan, “Ani pawh thu ṭha rawn thlen tûr a ni ang,” a ti a. Râlvêngtu chuan, “A hmasa zâwk tlân dân chu Zadoka fapa Ahimaaza tlân dân a ang mang e,” a ti a. Lal chuan, “Ani zawng mi ṭha a ni a, thu ṭha a rawn thlen ngei ang,” a ti a. Ahimaaza chuan lal chu a au va, “A ṭha e,” a ti a. Bawkkhupin chibai a bûk a, a hnênah, “Ka pu, lal laka helho, i kuta petu Lalpa, i Pathian chu fakin awm rawh se,” a ti a. Lal chuan, “Tlangvâl Absaloma chu a him alâwm maw?” a ti a. Ahimaaza chuan, “I chhiahhlawh hi Joaban min tirh chhuah laiin an buai mur mur ka hmu a; mahse, eng vang nge tih chu ka hre lo,” a ti a. Lal chuan, “Lo kal hnai teh,” a ti a. A bulah chuan a va ding a. Kus mi chu a lo thleng ve a, lal hnênah chuan, “Ka pu, lal tân chanchin lâwmawm ka rawn thlen e; Lalpa chuan i laka helho zawng zawng phuba chu a lâksak ta che,” a ti a. Lal chuan Kus mi hnênah chuan, “Tlangvâl Absaloma chu a dam alâwm maw?” a ti a. Kus mi chuan, “Ka pu, lal hmêlmate leh thah tumtu che chu, he tlangvâl ang hian awm rawh se,” a ti a. Lal chu a mangang ta hle a, kulh kawngka chunga pindanah a chho va, a ṭap a, kal chungin, “Aw ka fapa Absalom, ka fapa, ka fapa Absalom, i aiah han thi zâwk ila aw, Absalom, ka fapa, ka fapa,” tiin a ṭap a. Joaba hnênah, “Lalin Absaloma a sûn a, a ṭap a ṭap mai” an ti a. Chu mi nia an hnehna chu sipai zawng zawng tân lungngaihna a ni ta zâwk a. Lal chu a fapa ngaiin a ṭap a ṭap mai tih an hre vek si a. Chumi ni chuan mite chu indonaa sipai tlânchhia ang maiin zak takin khuaah an lût nghiai nghiai a. Lal chuan a hmai a hup a, “Aw ka fapa Absalom, aw Absalom, ka fapa,” tiin a ṭap hawm hawm a. Joaba chu lal awmna inah chuan a lût a, a hnênah, “Vawiinah hian nang leh i fanu leh i fapate, i nupui leh i hmei te nunna chhanhimtute chu i tizak hle mai. Nang mah hawtute chu i hmangaih a, nangmah hmangaihtute i hua a, i hote leh sipaiho chu engmahlovah min ngai tih vawiinah hian i tilang chiang hle mai. Absaloma chu dam sela, keini zawng zawng hi thi vek zâwk ila, chu chu i duh dân niin ka hria. Tûnah kal chhuak la, i mite fuih harh rawh, Lalpa chhâlin ka hrilh a che, i va chhuah loh zawngin naktûk zîngah chuan tu mah i hnênah an awm tawh lo vang. Chu chu i tleirâwl lai ata vawiin thlenga i chunga chhiatna lo thleng tawh zawng zawng ai daiha pawi thui zâwk a ni ang,” a ti a. Lal chu a ṭhu chhuak ta a, kulh kawngka bulah chuan a ṭhu a, “Lal chu kulh kawngka bulah a ṭhu e,” tiin mite chu an va hrilh a. Chu chu an hriatin a mite chu an lo pung khâwm ta a. Israel-te erawh chu mahni puan in ṭheuhvah an tlân hâwng a. Israel zawng zawng chuan, “Davida chuan kan hmêlmate lak ata min chhan chhuak a, amah ngeiin Filistia mite lak ata min humhim a; tûnah Absaloma râl hlauvin ram hi a chhuahsan a. Kan rorêltu atâna hriak kan thih Absaloma lah chu a thi ta si a. Engtizia nge lal chu hruai hâwn leh zai kan rêl loh?” an ti a, an inhnial mur mur a. Lal Davida chuan Zadoka leh Abiathara hnênah mi a tîr a, “Juda upate hnênah heti hian va sawi rawh u, ‘Lal a in lama hruai hâwn thu-ah engtizia nge a muang bera in ṭan le? Israel miten lal hruai hâwn an rawt thu chuan lal beng a thleng tawh si a. Ka unaute u, ka thisen zawmpui in ni a, lal hruai hâwn thu-ah a zawiawi bera ṭang tûr em in nih?’ ti ula; Amasa hnênah pawh, ‘Ka thisen zawmpui i ni lo vem ni? Tûn aṭangin ka sipai hotu atân Joaba aiah ka dah loh che chuan Pathianin a tih tihin mi ti sela, na tak pawhin min sawisa mai rawh se, a ti e,’ va ti rawh u,” a ti a. Davida chuan Juda mi zawng zawng rilru chu aikhatah a luantîr ta dual a, lal hnênah chuan, “I mite zawng zawng nên lo haw leh rawh u,” tia hrilh tûrin mi an tîr ta a. Lal chu a lo hâwng a, Jordan lui thlengin a lo kal a, Jordan luia hruai kai tûrin Juda mite chu Gilgal an lo thleng a. Gera fapa Simeia, Benjamin hnam, Bahurim khuaa mi chu lal Davida hmuak tûrin Juda mite rualin hmanhmawh takin a lo chhuak ve a. A rual chuan Benjamin mi sângkhat leh Saula chhûngkaw enkawltu Ziba te, a fapa sâwm leh panga leh a chhiahhlawh sawmhnih lai lal thlen hmain Jordan an lo thleng a. Lal chhûngkuate hruai tûr leh ṭûl a tih a piang ti tûrin lui chu an kal kai a. Gera fapa Simeian Jordan lui a kai veleh lal hmaah a bawkkhup a, Lal hnênah chuan, “Ka pu, khawngaih takin min ngaidam rawh; ka pu, Jerusalem i chhuahsan nia i chhiahhlawhin i chunga ka tihsual chu min theihnghilhsak tûrin ka ngên a che. Kei, i chhiahhlawh hian thil ka tisual tih ka hria; mahse, vawiinah ka pu lal lo hmuak tûrin Josefa chhûngte zînga he hmun rawn thleng hmasa ber hi ka ni,” a ti a. Zeruii fapa Abisaia chuan, “ Lalpa hriakthih ânchhia a lawh avângin Simeia hi tihhlum tûr a ni lâwm ni?” a ti a. Davida chuan, “Zeruii fate u, min rêlpui tûr eng nge awm? Min hnial min hnial mai a. Vawiinah, Israel mi rêng rêng, tu mah tihhlum tûr a ni lo; kei hi Israel-te lal ka ni lo vem ni?” a ti a. Lal chuan Simeia hnênah, “I thi lo vang,” tiin a tiam a. Saula tupa Mefiboseta chu lal hmuak tûrin a lo chhuak a. Lalin Jerusalem a chhuahsan aṭanga dam taka a lo hâwn leh thlengin ani chuan a kete a sil lo va, a khabehmul a mêt lo va, a puante a su hek lo. Lal hmuak tûrin Jerusalem aṭang chuan a lo kal a, lal chuan a hnênah, “Mefiboset, engati nge ka hnênah i lo kal ve loh?” a ti a. Ani chuan, “ Lalpa, ka pu, ka chhiahhlawhin min bum atin a ni, a hnênah, ‘lal hnêna ka kalna tûr sabengtung buatsaih rawh,’ ka ti a, kei lah hi ka ke a zeng si a. Ani chuan, ka pu lal hnênah chuan min hêk a; mahse, Lalpa, ka pu chu Pathian vântirhkohte ang a ni a, ṭha i tih ang angin ti ang che. Ka pa chhûngte zawng zawng chu, Lalpa, ka pu chuan tihlum vek âwm rêng a ni; mahse, i chhiahhlawh hi i chaw kîlpuiah min siam a. Chuvângin, lal hnênah hian eng dang han dîl ngam tûr ka ni em ni?” a ti a. Lal chuan a hnênah, “In chungchâng thu hi engah nge i sawi leh ṭhin? Nang leh Ziba chuan Saula ram chu insem rawh u ka tih tawh kha,” a ti a. Mefiboseta chuan lal hnênah, “Ziba chuan ram chu nei vek rawh se, ka pu lal chu ama in ngeiah râlmuang takin a lo thleng tawh si a,” a ti a. Gilead mi Barzilaia chu Rogelim aṭangin Jordan luia lal hruai kai tûrin lal rualin a lo chhuk ve a. Barzilaia chu upa tak, kum sawmriat mi lai a ni a. Mi awm thei tak a nih avângin Mahanaim-a lal Davida a chawlh chhûng zawng zawng khân ei tûr a tumsak a. Lal chuan Barzilaia hnênah, “Jerusalem-ah lo kal ve la, ka bulah awm ang che,” a ti a. Barzilaia chuan lal hnênah, “Ka dam rei tawh awm si lo va, eng vângin nge Jerusalem-ah lal hnêna ka han chhoh ve kher ang? Kum sawmriat lai ka ni tawh a, eng mah hi ka tâna nuam a awm tak tak tawh lo va, i chhiahhlawh hian a tui leh tui lo pawh ka hre tawh lo va, nula tlangvâl zai ri lah ka hre thei tawh si lo. Engah nge i chhiahhlawh hian, ka pu lal ka tihhautak ang che? I chhiahhlawh hian, lal hi, Jordan lui kaipui che ka tum mai a ni. Engah nge lal chuan chutianga lâwmman min pêk i tum le? Khawngaih takin i chhiahhlawh hi min hâwntîr mai la, ka nu leh pa thlân bul, kan khuaah ka thi ang e. Amaherawhchu, hei, i chhiahhlawh, ka fapa Chimhama hi hruai la; ka pu lalin ṭha i tih angin i chhawr atân awm rawh se,” a ti a. Lal chuan a chhâng a, “Chimhama chuan min zui sela, ṭha i tih apiang ka tihsak ang a, eng pawh i dîl apiang ka lo pe zêl ang che,” a ti a. Mi zawng zawngin Jordan lui an kal kai a, lal pawhin a kai ve a; lal chuan Barzilaia chu a fâwp a, mal a sâwmsak a; tichuan, a in lamah a haw leh ta a. Lal chuan Gilgal a lo thleng a, Chimhama pawh a hruai a, Juda mi zawng zawng leh Israel hnam zâtve laiin lal chu an vêng ta a. Israel mi zawng chuan lal hnênah, “Engati nge kan unau Juda-te hian nang leh i chhûngte chu i hote nên Jordan lui a rûka an lo hruai kai bîk mai che le?” an ti a. Juda mi zawng zawng chuan, “Lal hi kan lamhnai a nih avâng chauhva hruai kai kan ni a; engtiziaa thinur mai nge in nih le? Lal neih kan eiin lâwmman kan dawng a ni bîk hlei nêm,” an ti a. Israel-te chuan Juda-te chu an chhâng a, “Davida lala siam thu-ah in lamhnai ni mah se, a lêt sâwmin thu kan nei asin. Lala hruai kîr leh rawt hmasatu kan nih kha hre ta rêng che u,” an ti a. Mahse, Juda mite thu chu Israel mite thu ai chuan a rum ta zâwk mah a. Gilgal-ah chuan Benjamin hnam, Bikria fapa Seba, mi sual tak a lo awm kher a. Ani chuan tawtawrâwt a hâm a, “Davida hnênah chan kan nei lo va, Jesaia fapa hnênah eng mah chan tûr kan nei lo. Aw Israel mite u, inah haw vek rawh u,” a ti a. Chutichuan, Israel mi zawng zawngin Davida zui duh lovin Seba chu an zui ta a. Juda mite erawh chuan Jordan aṭangin Jerusalem thlengin an lal chu rinawm takin an zui tlat a. Davida chuan Jerusalem-a lal in chu a lo thleng a, a in nghâka a dah, a hmei sâwmte chu a hruai a, a vêng tlat a, a châwm a; mahse, an hnênah a lût lo. An damchhûngin a khung tlat a, hmeithai angin an awm a. Lal chuan Amasa hnênah, “Ni thum chhûngin Juda mite hi ko khâwm la; tah chuan, nang pawh lo awm ve ang che,” a ti a. Amasa chu Juda mi ko khâwm tûrin a chhuak a; mahse, hun ruat aiin a va thang rei a. Davida chuan Abisaia hnênah, “Bikria fapa Seba hian Absaloma ai mahin min tibuai dâwn alâwm le; i pu vêngtute hruai la, ûm rawh u; chutilo zawng, kulh nei khuaahte a lût ang a, kan hmuh phâk lovah a chhuak hlauh dah ang e,” a ti a. Joaba hote, Keret mi te, Pelet mi te leh an mi chak zawng zawng te chuan Abisaia chu an zui a, Jerusalem aṭang chuan Bikria fapa Seba ûm tûr chuan an chhuak ta a. Gibeon lungpui lian an va thleng a, Amasa chuan a lo hmuak a. Joaba chuan indo thuam a inbel a, a kâwnghrênah khandaih, a pâi chawpin a pai a. A kal zâwng chuan khandaih chu a dawk chhuak a. Joaba chuan Amasa hnênah, “Unaupa, i dam zêl alâwm maw?” a ti a. Joaba chuan Amasa chu fawh tum awm takin a khabehmul a kut ding lamin a chelhsak a, Amasa chuan Joaban khandaih a keng tih a hre lo va, Joaba chuan a pumah a vit a, a rîlte a tla ta nuai a, vih nawn ngai lovin Amasa chu a thi ta a. Joaba leh a unaupa Abisaia chuan Bikria fapa Seba chu an ûm zêl a. Joaba mite zînga pakhat Amasa ruang bulah chuan a ding a, “Tu pawh Joaba leh Davida lama ṭang apiangin Joaba zui rawh se,” a ti a. Amasa ruang chu kawng laiah a awm a, thi-in a bual nasa hle mai a, lo kal apiang chuan an en a, an ding zêl a; chu mi chuan mi zawng zawngin an dinchilh zêl tih a hmuhin Amasa ruang chu kawng ata phûlah a hnûk thla a, puanin a khuh ta a. Kawng ata a lâk sawn hnu chuan Bikria fapa Seba ûm tûrin mi zawng zawng chuan Joaba chu an zui ta a. Seba chuan Israel hnam tin ram chu a fang chhuak a, Abel-beth-maaka khua a lo thleng a, Bikri mite chu an pung khâwm a, ani chu an pui ta a. Joaba mite chu an lo thleng a, Abel-beth-maaka chu an rawn hual a, kulh bang pâwnah chuan lei an chhûng pâwng a, a kulh bang tihchim tumin an chhu bur bur a. Hmeichhe fing tak hi kulh aṭang chuan a rawn au va, “Khaih, Joaba kha lo kal hnai sela, thu ka lo hrilh ang e, tih han hrilh teh u khai,” a ti a. Tichuan, hmeichhe hnênah chuan a va kal hnai a, hmeichhia chuan a hnênah, “Joaba i ni em?” a lo ti a. Ani chuan, “Ni e,” a ti a. Hmeichhia chuan a hnênah, “I bawihnu thu sawi hi ngaithla teh,” a ti a. Ani chuan, “Ka ngaithla e,” a ti a. “Hmânlai chuan ‘Abel’ khuaah thurâwn va dawng rawh,’ an ti ṭhîn a, chutiang chuan thu an titlu ṭhîn. Keini hi Israel zînga inremna duhtu leh rinawm taka awm ṭhîn kan ni a; mahse, nang chuan Israel ram khaw hlun, Lalpa pual chu tihchhiat i tum a nih hi le,” a ti a. Joaba chuan, “Chutiang a ni awzâwng lo, tihchhiat leh nuai bo ka tum hlei nêm. Chutiang lam a ni lo. Amaherawhchu, Efraim tlângram mi, Bikria fapa Seba kha lal Davida lakah a hel a, ani chu min pe ula, khua chu ka tawlh kîrsan ang e,” a ti a. Hmeichhia chuan Joaba hnênah, “Aw le, a lu chu kulh bang pâwnah ka rawn vawm chhuak ang e,” a ti a. Hmeichhia chuan fing takin mipui chu a va hmin a, Bikria fapa Seba lu chu an tansak a, Joaba hnênah an rawn theh chhuak ta a. Tin, Joaba chuan tawtawrâwt a hâm a, khawpui chu an ṭînsan ta a. Mite chu mahni in lamah an haw ṭheuh va, Joaba pawh lal hnênah Jerusalem-ah a haw ta a. Joaba chu Israel sipai zawng zawng hotu a ni a; Jehoiada fapa Benaia chu Keret mite leh Pelet mite hotu a ni a. Adorama chu kuli hotu a ni a, Ahiluda fapa Jehosafata chu chanchin la khâwmtu a ni. Seva chu ziaktu a ni a, Zadoka leh Abiathara te chu puithiam an ni. Jair mi Ira pawh chu Davida puithiam a ni. Davida lal laiin kum thum a zâwnin ṭâm nasa tak a tla a. Davida chuan Lalpa a râwn a. Lalpa chuan, “Saula leh a chhûngten thisen an chhuah vâng a ni e, Gibeon mite a that a ni,” a ti a. Gibeon mite chu Israel thlah an ni lo va. Amor mi la dam chhunte thlah an ni, Israela thlahte chuan zuah an lo tiam tawh a; mahse, Saulan Israel-te leh Juda-te tâna ṭhahnem a ngaih êm avângin tihchimih a tum a ni. Davida chuan Gibeon mite hnênah, “Eng nge ka tihsak ang che u, in chunga Saula thil sual tih man ka rûl ang che u; tichuan, Lalpa mite hi mal in sâwmsak dâwn nia,” a ti a. Gibeon mite chuan a hnênah, “Saula leh a chhûngte nêna kan inkâr thu hi tangka leh rangkachaka tihfel mai chi a ni nêm. Keinin Israel-te tihhlum a thiang si lo va,” an ti a. Ani chuan, “In duh apiang ka tihsak ang che u,” a ti a. Anni chuan lal hnênah, “Israel ram puma kan boral chimih vekna tûr ruahmantu, Saula fapa pasarih min pe la, Lalpa mi ruat Saula khua Gibea-ah Lalpa hmaah kan khai hlum ang e,” an ti a. Lal chuan, “Ka pe ang che u,” a ti a Lal chuan Saula fa, Jonathana fapa Mefiboseta chu Saula fapa Jonathana nên Lalpa hmaa thu an lo tiam tawh avângin a hum a. Lal chuan Aii fanu Rizpii laka Saula fapa pahnih Armonia leh Mefiboseta erawh chu a hruai a; Meholat mi Barzilaia fapa Adriela leh Saula fanu Mikali fapa panga nên. Gibeon mite hnênah a hlân a; tichuan, tlângah Lalpa hmaah chuan an khai hlum a. An pasarih chuan an thi ta a. An thah hun chu buhseng ṭan tirh, barli seng ṭan tirh lai a ni. Aii fanu Rizpii chuan saiip puan a la a, Lungpui hmun, mitthi ruang awmnaah chuan a zâr a, chutah chuan buhseng tirh aṭangin ruahtui tlâk thlengin a awm a. Chhûnah chunglêng sava lo kalte chu a vêng a, zânah ramsate a vêng bawk a. Saula hmei, Rizpii, Aii fanu thiltih chu Davida chu an hrilh a. Davida chu a chhuak a, Saula ruh leh a fapa Jonathana ruh chu Jabes Gilead mite hnên ata a la a. (Chûng mite chuan Filistia miten Gilboa tlânga Saula an thah ni khân Beth-san muala an khai chu an ru a ni) chuta ṭang chuan Saula leh Jonathana ruhte chu an la a, an khaihlumte ruh nên chuan an chhar khâwm a. Saula ruh te, Jonathana ruhte nên Benjamin rama Zela khuaa a pa Kisa thlânah an phûm ta a. Lalin thu a pêk ang chuan an ti ta a. Chumi hnu chuan ram tâna an dîlna chu Pathianin a chhâng ta a. Filistia mite leh Israel mite chu an indo leh a. Davida leh a hote chu an chhuk a, Filistia mite chu an bei a, Davida pawh a chau hle a. Milian fate zînga mi Isbibenoba chu dâr fei kg. thum leh a chanvea rit leh khandaih thar pai chuan Davida thah a tum a. Mahse, Zeruii fapa Abisaian a lo chhan a, Filistia mi chu a bei a, a that ta a. Davida mite chuan a hnênah, “Israel-te khâwnvâr a mih loh nân indo tûrin kan zîngah i chhuk ve tawh hauh lo vang,” tiin chhia an chham a. Chumi hnu chuan Filistia mite nên indona Gob khuaah a awm leh a. Husa mi Sibekaia chuan milian fate zînga mi Safa a that a. Filistia mite nên Gob khuaah bawk an indo leh a. Bethlehem mi Jaira fapa Elhana chuan Git mi Goliatha chu a that a, a fei ngul chu kechâwn tiat lai a ni. Gath khuaah indona a awm leh a, chutah chuan milian tak, kutzungṭang leh kezungṭang paruk ve ve nei, a vaia sawmhnih leh pali nei a awm a, ani pawh chu milian thlah a ni. Israel mite chu a cho va. Davida u Simeia fapa Jonathana chuan a lo that a. Chûng mi palite chu Gath khuaa milian thlah an ni a, Davida leh a mite chuan anni chu an that a. Davida chuan Lalpan a hmêlmate kut ata leh Saula kut ata a chhan chhuah ni chuan Lalpa fak nân he hla hi a sa a. “ Lalpa chu ka lungpui leh ka kulhbîng, Min chhandamtu a ni. Ka Pathian chu min humhimtu, ka hahchawlhna a ni, Ka phaw leh ka himna ber, ka kulhbîng sâng, Ka tlûkluhna tûr a ni. Min beitu laka chhantu chu i ni. Fak tlâk Lalpa chu ka ko vang a, Ka hmêlmate lakah ka him ang. Thihna tuifâwnte chuan min chîm a, Chhiatna tuifâwnte chuan min khuh zo ta. Seol hrualhruite chuan mi phuar a, Thihna chuan thangin min hual vêl. Mangang takin Lalpa chu ka au va, Ka Pathian chu ka ko va, Ani chuan a Tempul aṭangin ka aw a lo hria a, Ka au thâwm chu a lo ngaithla. A thinur avângin lei hi a nghîng a, A che hlawk hlawk a, Vân innghahna chu a nghîng a, a khûr dur dur a. A hnâr aṭangin meikhu a lo chhuak ngut ngut a, A kâ aṭanga lo chhuak mei chu a alh hluah hluah a, A ṭêk chuai chuai mai. Ani chuan vânte chu a tihawng a, a lo chhuk a, A ke hnuaiah thim chhah mup a awm. Cherub chunga chuangin a thlâwk a, Thli chuan a thlawhpui. Thim chhah mupin a hual vêl a, Chhûm chhah tak ruah pai chhûm chuan a hual a. A hmaa êng awmah chuan, Meilingte chu a alh hluah hluah. Lalpa chuan vânah khawpui a tiri dur dur a, Chungnungbera chu a au va. Hmêlmate chu thalin a kâp a, ṭêk a dentîr a, a ûm darh zo ta. Lalpa chuan a hau va, A hnâra thawin a chhêm vak a, Tuipui mawngte leh leilung nghahchhante chu A lang zo ta. Chung lam aṭangin mi rawn ban a, mi chelh a, Tui thûk tak ata min hnûk chhuak a. Ka hneh loh, ka hmêlma hlauhawm tak tak, Mi hawtute laka ta chu mi chhan chhuak a. Anni chuan ka mangan laiin min bei a, Lalpa chuan mi hum a. Ani chuan hmun râlmuangah min dah a, Ka chunga a lâwm avângin mi chhanhim ta. Lalpa chuan dik taka ka tih avângin mal min sâwm a, Pawi ka khawih loh avângin mi zuah ta. Lalpa kawngte chu ka zawh a, Ka Pathian chu ka sual bosan ngai lo. Awm dân tûra a tih zawng zawng ka pawisa a, A thuruatte chu ka zâwm lo ngai lo. A hmaah chuan sawisêlbovin ka awm a, Sual lakah ka invêng ṭhîn. Lalpa chuan dik taka ka tih avângin mal min sâwm a, Pawi ka khawih lo, A hmu reng a ni. Mi ngilneite chungah ngil i nei a, Sawisêlbote lakah sawisêlbo i ni. Mi thianghlimte tân i thianghlim a, Mi luhlulte lakah i luhlul a. Mi tlâwmte chu i chhan a, Mi chapote chu i titlâwm ta. Aw Lalpa, nang hi ka êng i ni a, Lalpa chuan ka nun thimte a tiêng ta. A ni, râl bei tûrin min tichak a, Ka Pathian ṭanpuinain an kulh bangte ka ṭhiat. Pathian hi zawng a dik famkim a, Lalpa thute chu innghahna tlâk a ni. Amah pantute tân ani chu phaw a ni. Lalpa lo chu tu nge Pathian dang awm, Kan Pathian lo chu tu nge lungpui dang awm? He Pathian hi ka tlûkluhna kulh nghet, Ka kawng tihimtu chu a ni. Ka kete chu zukpui anga chakin a siam a, Tlâng sângah te him takin mi awmtîr a. Ka kutte hi râl do a zirtîr a, Ka bânte hian dâr thalngul a kuai zo ta hial a. Min hmu a, i phawin min khuh ta; Min ṭanpui avângin ka ropui ta. Ka ke pên i tisau va, Min man phâk ta lo. Ka hmêlmate ka ûm a, ka hneh a, Ka tihboral vek hma chu ka kîrsan lo. Ka thehthlu a, ka thehthal rum a, An tho leh tawh ngai lo, Ka rapbet ta a ni. Indo tûrin min tichak a, Ka hmêlmate chu min tihtlâwmsak ta. Ka hmêlmate ka ûm a, Min hawtute chu ka tiboral ta. An hawi vêl a; mahse, chhantu an nei si lo, Lalpa an au va; mahse, a chhâng duh lo. Leia vaivut angin ka vaw dip a, Kawtthlêra chirh angin ka rap pherh a. Nangin ka laka helhote kut ata min chhan chhuak a, Israel-te hotu atân mi humhim a, Ka hriat ngai lohte pawh ka khualehtui an lo ni ta. Ram dang mite chuan min rawn tlawn a, Ka sawi apiang an awih. Hnam dangte chu an zâm a, An kulhbîng ata khûr chungin an lo chhuak ta. Lalpa mi nung, ka lungpui chu fakin awm rawh se, Ka inhumhimna lungpui, Pathian chu chawimawiin awm rawh se. Ani chu phuba mi lâksaktu Pathian a ni, Hnamte chu ka ke hnuaiah a dah. Ka hmêlmate lak ata min chhan chhuak a, A ni, mi dotute chungah mi dah ta, Mi nunrâwngte lakah chuan min chhan ta. Chuvângin, aw Lalpa, hnam tin zîngah ka fak ang chia, I hming fakin ka zai ang. A lal thlan chu ropui takin a hnehtîr a, A hriakthih Davida chungah leh a thlahte chungah, Kumkhuain a ngilneihzia a lantîr ang,” a ti a. Hei hi Davida thu sawi hnuhnûng ber chu a ni, Jesaia fapa Davida thu sawi chu: Sâng taka Pathian chawisân, Jakoba thlah Pathian hriakthih, Israel tâna hla mawi tak tak phuahtu thute chu. “ Lalpa thlarau chuan ka hnênah thu a sawi a, A thute chu ka kâah a dah ta. Israel-te Pathian, an lungpui chuan ka hnênah thu a sawi: ‘Mite chunga dik taka rorêla, Pathian ṭih chunga ro rêl ṭhîntu hnênah chuan. Chu mi chu khaw thiang ni chhuak mawi tak ang hi a ni, Ruahsûr bân khaw thianga thlai lo harh sêrh ang hi.’ Chu chu Pathianin kan chhûngkua min din dân a ni lâwm ni? Kumkhua atân ka hnênah thu a thlung a, Tihdanglam leh tawh loh tûr chu. Min chhandamin duhthusâm min pe lo vang em ni? Mi suaksualte erawh chu hlîng anga paih bo an ni ang, Kut lâwnga khawih ngam an ni si lo va. Khawihtu tûr chuan thîr leh feingul hmang sela, Hâl ral vek tûr an ni. Hêng hi Davida sipai huaisente hming chu a ni: Takemon mi Joseb-basebeta chu ‘huaisen pathum’ zînga chhuanvâwr ber a ni, Ezni mi Adinoa tih a ni bawk. Ani chuan fei a lek a, an inbeihnaah ṭum khatan mi zariat a that a ni. A dawt chu Eleazara, Aho chi, Dodoa fapa a ni. Chumi chu Filistia mite indo tûra an pun khâwma Israel-te an tlân darh vek lai khân Davida nêna hmêlmate chotu, ‘sipai huaisen pathumte’ zînga mi kha a ni. A thawk lawk a, Filistia mite a that chiam a, a kut kham lutuk avângin a khandaih pawh a thlah thei lo hial a ni. Chumi ni chuan Lalpan ropui takin a hnehtîr a, Israel sipaite chu râllâk sum chuh tûr ngawtin an lo kîr leh a nih kha. A dawt lehtu chu Sama, Harar mi, Agea fapa a ni. Filistia mite chu dailuah tamna hmun Lehi-ah an pung khâwm a, Israel-te chu hmêlma hmaah an tlânchhia a, ani erawh chu a ṭanhmunah a ding tlat a, Filistia mite chu a that a, Lalpa chuan ropui takin a hnehtîr a. Buhseng ṭan tirh laiin mi huaisen sawmthum zînga pathumte chu Davida awmna Adulam pûkah an chhuk a. Filistia sipai pâwl khat chuan Refaim-ho hmunah ṭanhmun an khuar a. Chutih lai chuan Davida chu kulhbîngah a awm a, Filistia sipaiho erawh chu Bethlehem-ah an awm a. Davida chuan, “Aw, Bethlehem kulh kawngkhâr kianga tuichhunchhuah tui kha tuin emaw min va chawisak se ka va ti em!” a ti a. Sipai huaisen pathumte chuan Filistia-ho riahhmun chu an tâwn tlang a, kulh kawngkhâr kianga tui chu an va chawi a, Davida hnênah an rawn la a. Nimahsela, ani chuan a lo in duh ta lo va. Lalpa tân a bun chhuak ta zâwk a. Heti hian a ti a, “Aw Lalpa, hei hi ka in loh tûrzia mai chu. Thih huama kalte thisen chu ka in ang maw?” a ti a. Tichuan, a in duh ta lo va. Chûngte chu huaisen pathumte thiltih chu a ni. Zeruii fa Joaba u Abisaia chu ‘mi huaisen sawmthum’ zînga hotu ber a ni a. Mi zathum a feiin a that a, ‘huaisen sawmthumte’ zîngah chuan hmingṭhat a hlawh a. Mi huaisen sawmthum zînga chhuanawm ber a ni a, chuvângin, an hotu-ah an siam a; mahse, mi huaisen pathum an tihte zîngah a tel pha lo. Jehoiada fapa Benaia, Kabzeel khaw mi pawh a huaisen hle, thil ropui tak a ti, Moab mi huaisen pahnih a that a. Tin, vûr tlâk laiin pûka tawm sakeibaknei a that bawk a. Aigupta mi, palian tak a that bawk. Aigupta mi chuan fei a keng a, Benaia chuan tiang nên a pan thla a, Aigupta mi fei chu a chhuhsak a, a fei ngei chuan a chhun hlum a. Jehoiada fapa Benaia chuan chutiang thil chu a tih avângin ‘Sipai huaisen sawmthum’ zînga chhiar tel a ni. ‘Mi huaisen sawmthum’ zîngah chuan a hming a ṭha ber a; mahse, mihuaisen pathumte zîngah chuan a tel pha lo. Davida chuan amah vêngtu hotu-ah a dah a. Joaba nau Asahela chu mi huaisen sawmthum zînga mi a ni a. Bethlehem khuaa mi Dodoa fapa Elhanana te, Harod mi Sama te, Harod mi Elika te, Pelet mi Heleza te, Tekoa mi Ikesa fapa Ira te, Anathot mi Abiezera te, Husa mi Mebunaia te, Aho mi Zalmona te, Netofa mi Maharaia te, Netofa mi Baana fapa Heleba te, Benjamina thlah Gibea khaw mi Ribaia fapa Itaia te, Pirathon mi Benaia te, Gaas luitêa mi Hidaia te, Arabat mi Abi-Albon-a te, Bahurim mi Azmaveta te, Salbon mi Eliaba te, Jasena fapate zînga mi Jonathana te, Harar mi Sama te, Harar mi bawk Sarara fapa Ahiama te, Maaka mi Ahasbaia fapa Elifeleta te, Gilo mi Ahithofela fapa Eliama, Karmel mi Hezroa te, Arba mi Paaraia te, Zoba mi Nathana fapa Igala te, Gad mi Bania te, Amon mi Zeleka te, Joaba râlthuam kengtu Beerot mi Naharaia te, Jatir mi Ira leh Gareba te, Hit mi Uria te an ni. An za chuan sawmthum leh pasarih an ni. Israel-te chungah chuan Lalpa chu a thin a ur ta a. Davida chu an chunga buaina thlen tûrin a chawk tho va, a hnênah, “Kal la, Israel-te leh Juda-te chhiar rawh,” tiin. Lal chuan a sipai hotu Joaba hnênah, “I sipai hotute nên Israel mite awmna hmun tin, Dan aṭanga Beer-seba thlengin fang chhuak ula, mi eng zât nge an nih hre tûrin chhiar vek rawh u,” a ti a. Joaba chuan lal hnênah, “ Lalpa, i Pathian chuan i mite chu a lêt za aia tamin tipung sela, i mit ngeiin chu chu hmuhtîr che rawh se; amaherawhchu, eng atân nge chu chu ka pu lal hian hriat i duh kher le?” a ti a. Nimahsela, Joaba leh a sipai hotute chuan lal thu chu an hnial ngam si lo va, Joaba leh sipai hotute chu Israel-te chhiar tûr chuan lal hnên ata chu an chhuak ta a. Jordan lui an kân a, Gad mite lui ruama Aroer khaw chhim lamah awmhmun an khuar a, hmâr lam panin Jazer-ah an kal a. Gilead-ah te, Hit-ho ram Kades-ah te an kal a, Dan an pan a, khawthlang lama inherin Sidon an thleng a, chhim lam an pan a, Tura kulh an tlawh a, Hiv leh Kanan-ho khua an tlawh vek a, Judai ram chhim lam Beer-seba an thleng a. Ram an fan chhuah hnu, thla kua leh ni sawmhnih hnu chuan Jerusalem-ah an lo kîr a. Joaba chuan mihring an chhiar chhuah zât chu lal a hrilh a, Israel ramah chuan khandaih keng mi, mi huaisen nuai riat an awm a, Juda mi chu nuai nga an awm tih a hrilh a. Chhiarpui an zawh hnu chuan Davida chu a inthiam lo ta hle a. Davida chuan Lalpa hnênah, “Thil ka lo tisual nasa hle mai; mahse, tûnah hian, Aw Lalpa, i chhiahhlawh khawlohna hi la bo tûrin ka ngên a che, thil âtthlâk takin ka lo ti a ni,” a ti a. Zînga Davida a lo thawh chuan Lalpa thu chu Davida zâwlnei Gada hnênah a lo thleng a. “Thil chi thum thlan tûr ka ruatsak a; kal la, a chunga ka tih tûr ber pakhat thlang tûrin Davida chu hrilh rawh,” a ti a. Gada chu Davida hnênah a kal a, chûng thu chu a hrilh a, a hnênah, “A eng ber chu nge i thlan dâwn inngaihtuah rawh le: I rama kum thum chhûng ṭâm tuar nge, i hmêlmaten thla thum chhûng an ûm che nge, i rama ni thum chhûng hripui lêntîr? Mi tîrtu engtin nge ka chhân ang min hrilh rawh,” a ti a. Davida chuan Gada hnênah, “Thlan ngaihna ka va hre lo ve. Lalpa kutah tlulût phawt mai ila, a lainatna a nasa a, mihring kutah chuan min tlûkluhtîr lul suh ang che,” a ti a. Lalpa chuan Israel-te chungah ni thum chhûng hripui a lêntîr ta a, Dan aṭanga Beer-seba thlengin mi sîngsarih an thi a. Vântirhkohvin tichhe tûra Jerusalem lama a kut a han lek chuan Lalpan chu thil ṭha lo tak tih a tum chu a sût a, mite tiboraltu Vântirhkoh hnênah chuan, “A tâwk tawh e, i kut lek tawh suh,” a ti a. Lalpa tirh Vântirhkoh chu Jebus mi Arauna hruih bulah a awm a. Davidan mite tiboraltu Vântirhkoh chu a hmuhin Lalpa hnênah, “Ngai teh, ka lo sual a ni, dik lo takin ka lo ti ta a; mahse, hêng berâmte hian eng nge an tihsual? Kei leh ka chhûngte hi min hrem zâwk tûrin ka ngên a che,” a ti a. Chumi ni chuan Gada chu Davida hnênah a lo kal a, a hnênah, “Chho la, Jebus mi Arauna hruihzâwlah Lalpa tân maichâm siam rawh,” a ti a. Lalpa thupêk, Gadan a hrilh ang chuan Davida chu a chho ta a. Arauna chu a han hawi a, lal leh a chhiahhlawhte a lam pana an lo kal chu a hmu a, Arauna chuan a pan a, bawkkhupin lal chu chibai a bûk a. Arauna chuan, “Engtiziaa Lalpa, ka pu chu, a chhiahhlawh hnênah lo kal nge a nih le?” a ti a. Davida chuan, “Mipui zînga hri lêng a kian theih nân Lalpa maichâm siamna tûrin i hruihzâwl rawn lei ka tum a ni” a ti a. Arauna chuan Davida hnênah, “Ka pu, lal chuan ṭûl i tih chu hmang la, i duh apiang chu hlân rawh. Hei hâlral thilhlan atân bâwngpa te, thingtuah atân hruih hmanrua te leh bâwng nghâwngkawl te a awm a. Hêng zawng zawng hi, aw lalber, ka pe vek a che,” a ti a. Arauna chuan lal hnênah, “ Lalpa i Pathian chuan i thilhlan chu lo pawm rawh se,” a ti bawk a. Lal chuan Arauna hnênah, “Chutiang zawng ni lo ve, a leiin ka lei zâwk ang e; eng mah insêng lovin Lalpa ka Pathian hnênah hâlral thilhlan ka hlân tawp lo vang,” a ti a. Tichuan, Davida chuan hruihzâwl leh bâwngpate chu tangka tlang sawmngain a lei ta a. Davida chuan chutah chuan Lalpa tân maichâm a siam a, hâlral thilhlan leh remna thilhlan a hlân a, Lalpa chuan ram tâna a dîlna chu a chhâng a, Israel rama hri lêng chu a reh ta a. Davida chu a lo upain a lo tar ta hle a, puan an sintîr pawhin a mu lum zo ta lo va. A chhiahhlawhte chuan a hnênah, “Ka pu, i kianga awma enkawl tûr che nula kan zawng ang e. Ani chu i bulah a mu ang a, kan pu hi i mu lum thei dâwn nia,” an ti a. Tichuan, Israel ram pumah nula hmêlṭha an zawng ta a. Sunam mi, Abisagi an va hmu a, lal hnênah an rawn hruai a. Chu nula chu hmêlṭha tak a ni. Lal chu a enkawl a, a kiangah a awm reng a; mahse, lal chuan a pâwl lo. Hagiti laka Davida fapa Adonija chu lal fa la damte zînga upa ber a nih avângin lal tûrah a lo inngai a. Tawlailîr te, sakawr chungchuang mite leh amah vêngtu mi sawmnga a ruat diam a. A pa lah chuan, “Engati nge hetianga i khawsak le?” tiin a kamkhat ngai si lo va. Tlangvâl hmêlṭha tak Absaloma dawt chiah a ni. Adonija chuan Zeruii fapa Joaba leh puithiam Abiathara te chu a râwn a, anni chu a lamah an ṭang a, an pui ṭhîn a. Puithiam Zadoka te, Jehoiada fapa Benaia te, zâwlnei Nathana te, Simeia te, Reia te leh mi huaisen, Davida vêngtu te erawh chuan Adonija chu an zui ve lo. Adonija chuan En-rogel kianga Zebelet lungpui zâwlah chuan inthawi nân berâm te, bâwngpa te, ran châwm thau te a talh a. A unau lal fapa zawng zawng leh Judai rama lal khâwnbâwl zawng zawng a sâwm a. Zâwlnei Nathana te, Benaia te, mi huaisen lal vêngtu te leh a unau Solomona erawh chu a sâwm ve lo. Nathana chuan Solomona nu Bathsebi hnênah, “Hagiti fapa Adonija hi kan pu Davida hriat lohvin a lal ta tih i hre na nge? Tûnah, i himna tûr leh i fapa Solomona himna tûr ka hrilh ang che. Lal Davida hnênah va lût la, a hnênah, ‘Aw lalber, ka pu, i chhiahhlawh hnênah hian, ‘Solomona hi ka aiawha lal tûr a ni, ka lalṭhutthlêng a luah ang’ tiin i tiam a ni lâwm ni? Engtizia nge Adonija hi a lal tâk mai le?’ va ti la, Lal chu i biak laiin ka lo lût ve ang a, i thu sawi chu ka rawn nemnghet dâwn nia,” tiin thu a râwn a. Bathsebi chu lal pindanah a va kal a, lal chu a tar hle tawh a, Sunam mi Abisagi chuan a lo awm a. Bathsebi chuan lal chu kûnin chibai a bûk a, Lal chuan, “Eng nge i duh le?” a lo ti a. Ani chuan, “Ka pu, i bawihnu hnênah hian Lalpa, i Pathian hming chhâlin, ‘I fapa Solomona hi ka aiawhin a la lal ang a, ka lalṭhutthlêng a luah ang’ tiin i tiam a; mahse, hei, Adonija a lal ta reng mai. Ka pu lah hian i hre ve si lo. Bâwngpa te, ran châwm thau te a talh ṭeuh va, lal fapa te, puithiam Abiathara te, sipai hotu Joaba te a sâwm a, i chhiahhlawh Solomona erawh chu a sâwm ve lo. Ka pu, Israel mi zawng zawng hian lalṭhutthlêngah tu nge i ṭhuttîr dâwn tih an thlîr reng a ni. Hei hi i tihfel loh chuan, ka pu hi, i thih hunah kei leh ka fapa Solomona chu phiarrutuah min puh dâwn a ni,” a ti a. Chutia lal a biak lai tak chuan zâwlnei Nathana chu a lo lût a. “Zâwlnei Nathana pawh a lo kal e,” tiin lal chu an hrilh a. Lal hnênah chuan a va kal a, a kûn a, bawkkhupin chibai a bûk a. Nathana chuan, “Ka pu lalber hian ‘Adonija chu ka aiawhin a lal ang a, ka lalṭhutthlêng a luah ang,’ a ti em ni? Vawiin hian a thawk chhuak a, bâwngpa tam tak te, ran châwm thau te, berâm te a talh a, lal fapa zawng zawng leh sipai hotu te, puithiam Abiathara te a sâwm a. Tûnah hian an eiin an in ho va, ‘Lal Adonija dam reng rawh se,’ tiin an au va. Kei i chhiahhlawh hi puithiam Zadoka te, Jehoiada fapa Benaia te leh i chhiahhlawh Solomona te nên min sâwm ve lo. Hei hi ka pu lalber thu-a tih a nih si chuan, ka pu hian a thih hnua a lalṭhutthlêng luahtu tûr a chhiahhlawhte a hrilh ve lo a ni maw?” a ti a. Lal Davida chuan, “Bathsebi han ko teh u,” a ti a. Ani chu lal hnênah chuan a va kal a, a hmaah a ding a. Lal chuan heti hian a sawi a, “Manganna tinrêng laka min humhimtu Lalpa hming chhâlin ka tiam a che, Israel te Pathian Lalpa hming chhâla i hnêna ka tiam tawh chu tûnah ka hlen ngei ngei dâwn. I fapa Solomona chu ka aiawhin a lal ang a, ka lalṭhutthlêng hi a luah ang,” a ti a. Bathsebi chuan bawkkhupin lal chu chibai a bûk a, “Ka pu, lal Davida chu dam reng rawh se,” a ti a. Lal Davida chuan, “Puithiam Zadoka te, zâwlnei Nathana te, Jehoiada fapa Benaia te han ko teh u,” a ti a. Lal hnênah chuan an lo kal a, Lal chuan an hnênah, “Mi lianho hruai ula, ka fapa Solomona chu ka sabengtung chungah chuantîr ula, Gihon-ah hruai thla rawh u. Chutah chuan Puithiam Zadoka leh zâwlnei Nathana chuan Israel lal atân hriak thih rawh se. Tawtawrâwt hâm ula, ‘Lal Solomona chu dam reng rawh se,’ tiin au rawh u. Ani chu in rawn zui ang a, ka lalṭhutthlêngah ṭhu sela, ka aiah a lal ang. Ani hi Israel leh Judai ram chunga rorêltu atân ka ruat a ni,” a ti a. Jehoiada fapa Benaia chuan, “Amen, ka pu, i Pathian, Lalpa chuan nemnghet rawh se. Lalpa chu, ka pu lalber hnêna a awm ṭhîn angin Solomona hnênah pawh awm sela; ka pu lal Davida lalṭhutthlêng aiin a lalṭhutthlêng chu tinghet zâwk rawh se,” a ti a. Puithiam Zadoka te, zâwlnei Nathana te, Jehoiada fapa Benaia, Keret mite leh Pelet mite chu an kal a, Solomona chu Davida sabengtung chungah an chuantîr a, Gihon-ah chuan an hruai thla a. Puithiam Zadoka chuan Hmun Thianghlima hriak dahna ki chu a la a, Solomona chu a thih a. Tawtawrâwt an hâm a, mi zawng zawng chuan, “Lal Solomona dam reng rawh se,” an ti a. Mi zawng zawngin ani chu an zui chho va, phênglâwngte an tum a, an hlim êm êm a, an thâwm chuan lei a nghawr dur dur a. Adonija leh a mi sâwm, a hnêna awm zawng zawngin ruai an ṭheh zawh chuan thâwm chu an hria a. Tawtawrâwt ri an hriatin Joaba chuan, “Khawpui chhûnga thâwm ri dur dur chu engtizia nge ni ta le?” a ti a. Chu thu a sawi lai mêk chuan puithiam Abiathara fapa Jonathana a lo thleng a. Adonija chuan, “Lo kal teh khai, nang zawng tlangvâl fel tak i ni a, chanchin lâwmawm i rawn thlen châwk ang chu maw?” a lo ti a. Jonathana chuan, “Thlen awzâwng lo, kan pu lal Davida chuan Solomona chu lalah a siam ta. Lal chuan puithiam Zadoka te, zâwlnei Nathana te, Jehoiada fapa Benaia te, Keret mi te, Pelet mi te chu vêng tûrin a tîr a. Ani chu lal sabengtung chungah an chuantîr a. Puithiam Zadoka leh zâwlnei Nathana chuan Gihon-ah lal atân hriak an thih ta. Chuta ṭang chuan hlim takin an lo chho va, an thâwm chu khawpui a khat a, chu chu in hriat hi a ni e. Solomona chuan lalṭhutthlêng a luah ta a ni. Milianho pawh an lo kal a, kan pu lal Davida hnênah, “I Pathian chuan Solomona chu nang aiin tiropui sela, a lalṭhutthlêng pawh i lalṭhutthlêng aiin tiropui rawh se,” tiin an rawn lawmpui a. Lal pawhin a khumlaizâwl aṭangin chibai a bûk a, ‘ Lalpa, Israel-te Pathian, vawiina ka lalṭhutthlênga ka aiawhtu tûr ka mit ngeia min hmuhtîrtu chu fakin awm rawh se,’ tiin a sawi a ni,” a ti a. Chu veleh Adonija mi sâwmho chuan an hlau va, an tlân darh ta vek a. Adonija chuan Solomona chu a hlau ta hle a, a tho va, maichâm ki a vuan ta a. Solomona hnênah chuan, “Adonija chuan lal Solomona a hlauh êm avângin maichâm ki a vuan reng mai. ‘Lal Solomonan a chhiahhlawh hi khandaiha that lo tûrin chhia chham teh se,’ a ti,” tiin Solomona chu an va hrilh a. Ani chuan, “Rinawm taka a awm phawt chuan a samzai pakhat pawh ka khawih lo vang. A sualna hmuh a nih erawh chuan a thi ang,” a ti a. Lal Solomona chuan mi a tîr a, maichâm ata an va hruai chhuak a, Adonija chu a lo kal a, Lal Solomona chu kûnin chibai a bûk a, ani chuan, “In lamah va haw tawh,” a ti a. Davida thih hun chu a lo hnai a, a fapa Solomona chu hetiang hian thu a chah a. “Mi dangte ang bawkin ka lo thi ve dâwn ta a, patling takin awm la, zâm rêng rêng suh. Lalpa, i Pathianin a phûtte chu zâwm la, a kawng zawh la, a thuruat te, a thupêk te, awm dân tûr a tih te leh a thu hriattîr, Mosia Dân bu-a ziak te chu zâwm la; tichuan, i thiltih apiangah te, i kalna apiangah te i lo hmuingîl thei ang. Lalpa chuan, ‘I thlahte chu fîmkhur taka an khawsaka, thinlung leh tih tak zeta ka thupêkte an zawm chuan Israel-te lalṭhutthlêng hi an luah reng ang,’ tia a tiam kha a hlen ang. Zeruii fapa Joaba hian ka pawi a khawih kha hre reng rawh; Israel sipai hotu pahnih, Nera fapa Abnera leh Jethera fapa Amasa a thah kha. Râlmuan laiin indo lai ang ziazângin thisen phuba a la a, pawi khawih lo thisen a chhuah hi a mawh ka phur a, ka tân a pawi hle a ni. Tih dân tûr chu i hre mai ang, tarkûnin dam suh se. Gilead mi Barzilaia fate chu lo khawngaih la, i dawhkânah chaw kîltîr ve ang che. I unaupa Absaloma hlauva ka tlânchhiat lai khân min lo khawngaih si a. “Tin, hei, Bahurim khuaa mi Benjamina thlah, Gera fapa Simeia hi i hnênah a awm a; ani hi Mahanaim pana ka kal lai khân ânchhia min lawh a; mahse, Jordan-ah mi hmuak tûrin a lo chhuk a, chutah chuan, “Khandaihin ka that lo vang che,” tiin Lalpa hming chhâlin a hnênah thu ka tiam a. Mahse, hrem loh chuan chhuah suh ang che, patling i ni a, tih dân tûr chu i hre mai ang. A tar hunah i that dâwn nia,” a ti a. Davida chu a thi a, Davida khawpuiah an phûm a. “Israel-te chungah kum sawmli a lal a, kum sarih Hebron-ah, kum sawmthum leh pathum chu Jerusalem-ah. Solomona chu a pa aiawhin a lal ta a, ram chu a nghet ta hle a ni. Hagiti fapa Adonija chu Solomona nu Bathsebi hnênah a kal a, ani chuan, “Ṭha lam thu-a lo kal em i nih?” a ti a. Adonija chuan, “Aw, ṭha lam thu ni e,” a ti a. Ani chuan, “I hnênah eng emaw sawi tûr ka nei e,” a ti a. Bathsebi chuan, “Sawi ta che,” a ti a. Ani chuan, “Ram hi ka ta a ni tawh zet a, Israel-ho zawng zawng pawhin an lal angah min en tih i hria a; mahse, thil a inher danglam a, ram chu ka unaupa chan a lo ni leh ta zâwk a, chu chu Lalpa remruat a ni. Tûnah, thil pakhat dîl che ka duh, mi remtihsak hrâm rawh;” a ti a. Ani chuan, “Eng nge ni a?” a ti a. Adonija chuan, “Khawngaih takin lal Solomona mi biaksak rawh, i thu zawng a hnial âwm si lo va, Sunam mi Abisagi hi nupuiah mi neihtîr teh se,” a ti a. Bathsebi chuan, “Ni e, lal chu ka lo biaksak ang che,” a ti a. Bathsebi chu Adonija biaksak tûrin lal Solomona hnênah a kal a; lal chu amah lo lâwm tûrin a tho va, kûnin chibai a bûk a, lalṭhutthlêngah chuan a ṭhu leh ta a. Lal nu tân ṭhutthlêng dang an rawn la a, a ding lamah chuan an ṭhuttîr a. Lal nu chuan, “Thil tê tham tê ka dîl duh che a, min remtihsak hrâm ang che,” a ti a. Lal chuan, “Eng nge ni le? Ka nu, ka remtihsak ngei ang che,” a ti a. Ani chuan, “Sunam mi Abisagi hi i unaupa Adonija nupui atân pe rawh,” a ti a. Lal Solomona chuan a nu hnênah, “Engtiziaa Sunam mi Abisagi hi Adonija tâna dîl nge i nih? Lalṭhutthlêng pawh hi dilsak ta law law che. Ka u a ni a, a tân te, a lamṭang puithiam Abiathara leh Zeruii fapa Joaba tân te pawh,” a ti a. Lal Solomona chuan Lalpa hming chhâlin hetiangin chhia a chham a, “Adonija chuan a thihna tûr a dîl a nih loh nâ chuan Pathianin a tih tihin min ti sela, na tak pawhin,” a ti a. “Tûnah, Lalpa, a thutiam anga ka pa lalṭhutthlênga min ṭhuttîra min tinghettu, kan chhûngkua lalna min dinsaktu nunna chhâlin ka sawi e, vawiinah Adonija hi tihhlum tûr a ni,” a ti a. Lal Solomona chuan Jehoiada fapa Benaia chu a tîr a, Adonija chu a bei a, a va that ta a. Lal chuan, Abiathara hnênah, “I khua Anathot-ah haw rawh, thi mai tlâk zawng i ni a; mahse, tûnah zawng ka that rih lo vang che. Ka pa Davida hmaa Engkim Lalpa Bâwm i lo zâwn ṭhin avâng leh harsatna a tuarte i tuarpui ve avângin,” a ti a. Solomona chuan Abiathara chu Lalpa puithiam a nihna a bân a, Elia chhûngte chungchâng Silo khuaa Lalpa sawi chu a lo thleng ta a. Chu thu chu Joaban a lo hria a, Absaloma lamah a ṭang lo na a, Adonija lamṭang a ni si a. Tichuan, Lalpa inah a tlân lût a, maichâm ki a vuan ta a. “Joaba chu Lalpa puan inah a tlân lût a, maichâm bulah a tawm,” tiin lal Solomona an hrilh a. Solomona chuan Jehoiada fapa Benaia hnênah, “Kal la, va that rawh,” a ti a. Benaia chu Lalpa puan inah a lût a, Joaba hnênah chuan, “Lalin lo chhuak rawh a ti,” a va ti a. Ani chuan, “Ni lo ve, hetah hian ka thi mai ang e,” a ti a. Benaia chuan, “Joaba chuan hetiangin min lo chhâng e,” tiin lal chu a va hrilh a. Lal chuan, “A sawi ang chuan va that la, phûm nghâl rawh. Kei leh ka pa chhûngte hi Joaban pawi khawih lo thisen a chhuah lak ata kan fihlîm thei ang. Ka pa Davida hriat lohvin mi pahnih a bei a, khandaihin a that a, Lalpa chuan a thisen chhuah man thungrûl rawh se. Chûng mi pahnih, Nera fapa Abnera, Israel sipai hotu leh Jethera fapa Amasa, Juda sipai hotute kha, amah aia ṭha leh tling an ni si a. An thisen chhuah man chu Joaba leh a thlahte lu chungah tla kumkhua rawh se. Davida te, a thlah te, a chhûngkua leh a lalṭhutthlêng te erawh chu Lalpa chuan tihmuingîl zêl rawh se,” a ti a. Jehoiada fapa Benaia chu a han chho va, Joaba chu a bei a, a that ta a; thlalêra ama inah chuan an phûm ta a. Lal chuan Jehoiada fapa Benaia chu sipai hotu ber atân Joaba hmunah a dah a, puithiam Zadoka chu Abiathara ai a awhtîr bawk a. Lal chuan Simeia a kohtîr a, a hnênah, “Jerusalem-ah in sa la; tah chuan awm la, khawiah mah kal chhuak suh. I chhuaha Kidron ruam i kân ni chu i thih ni a ni mai tih hre rawh; i thisen mawh chu nangman i phur ang,” a ti a. Simeian lal hnênah, “Ni e, Lalpa, ka puin i sawi ang chuan i chhiahhlawhin a ti zêl ang,” a ti a. Simeia chu Jerusalem-ah a awm ta rêng a. Kum thum hnuah chuan Simeia chhiahhlawhte zînga mi pahnih chu Gath khaw lal Maaka fapa Akisa hnênah an tlân a. Miin Simeia hnênah, “I chhiahhlawhte Gath khuaah an awm e,” tiin an hrilh a. Chu veleh Simeia chuan a sabengtung a thuam a, a chhiahhlawhte chu zawng tûrin Gath khuaa Akisa hnênah a kal ta a. Simeia chuan chhiahhlawhte chu Gath ata a rawn hruai hâwng leh a. Simeia chu Jerusalem aṭangin Gath khuaah a kal a, a lo kîr leh tih Solomona chu an hrilh a. Lal chuan Simeia chu a ko va, a hnênah, “Hmun danga i chhuah chuan i kal ni la lain i thi ang tiin Lalpa hming chhâlin chhia ka chhamtîr che a, ka hrilh lâwk che a ni lâwm ni? Chutih lai chuan nang pawhin ka hnênah, ‘Ni e, ka zâwm ang e,’ i ti a. Engati nge Lalpa hnêna i thutiam chu i zawm lohva, thu ka pêk che chu i bawhchhiat?” a ti a. Lal chuan Simeia hnênah, “Ka pa Davida chunga i sualzia kha i la hre vek a, tûnah Lalpa chuan i suahsual man a thungrûl ve ang che. Kei erawh chu mal min sâwm ang a, Davida lalṭhutthlêng chu Lalpa hmaah nghet takin a ding reng ang,” a ti a. Lal chuan Jehoiada fapa Benaia chu thu a pe a, ani chuan a va bei a, a that ta a. Solomona chu nghet takin a lal ta a. Solomona chuan Aigupta lal Farawa nên inkûngkaih nân a fanu chu nupuiah a nei a; lal in te, Tempul te, Jerusalem khaw kulh bangte a siam zawh hma chuan a nupui chu Davida khawpuiah a dah a. Mite chu hmunsângahte an inthawi ṭhîn a, Lalpa Tempul sak a la nih rih loh avângin. Solomona chuan Lalpa chu a hmangaih a, a pa Davida zirtîrnate chu a zâwm a; mahse, hmunsângahte thilhlante a hlân a, rimtui te a hâl ṭhîn. Lal chu thilhlan hlân tûrin Gibeon-ah a kal a, chu chu thilhlanna hmunpui ber a ni. Solomonan chuta maichâmah chuan hâlral thilhlan atân ran sângkhat zet a hlân a. Gibeon-ah chuan Solomona mangah Lalpa chu a inlâr a, Pathian chuan, “I duh apiang min dîl rawh, ka pe ang che,” a ti a. Solomona chuan, “I chhiahhlawh Davida, ka pa chu i lakah a rinawm a, dik tak leh thinlung thianghlim taka a awm avângin i ngaina êm êm ṭhîn a, a chunga i ngilneihna nasa tak avângin tûnah a lalṭhutthlênga ṭhu tûr fapa i pe a. Tûnah hian, aw Lalpa ka Pathian, i chhiahhlawh hi ka pa Davida aiawhin min laltîr a, kei lah naupang mai ka ni a, ka tih tûr hlen chhuah dân pawh ka hre si lo. I chhiahhlawh hi i mi, i thlan, eng zât nge an nih pawh hriat lohte chungah lalah mi siam a. Thu dik leh dik lote thliara fel taka i mite ro ka rêlsak theih nân i chhiahhlawh hi finna pe ang che. Chuti lo zawng, mi heti zozai hi ro ka rêlsak thei lo vang,” a ti a. Solomona thil dîl avâng chuan Lalpa chu a chungah a lâwm ta hle a. Pathian chuan a hnênah, “Dam reina te, hausakna te, i hmêlmate thihna tûr dîl lovin dik taka rorêl thiamna i dîl zâwk avângin, i dîl chu ka pe ang che, i hmaa mi tu ma neih ngai loh i hnua mite pawhin an neih loh tûr finna leh rorêl thiamna ka pe ang che. I dîl loh hausakna leh hmingthanna ka pe bawk ang che. I dam chhûngin lal tu mahin an tluk lo vang che. I pa Davida anga ka kawngte i zawha, ka thuruat leh ka thupêkte i zawm chuan rei tak ka damtîr ang che,” a ti a. Solomona chu a lo harh a, a mumangah Pathianin thu a sawi a ni tih a hria a. Jerusalem-ah a lo hâwng a, Lalpa Thuthlung Bâwm hmaah a ding a, hâlral thilhlante leh remna thilhlante a hlân a, a chhiahhlawh zawng zawng tân ruai a ṭheh a. Ni khat chu nawhchizuar pahnih lal hnênah an lo kal a, a hmaah an ding a. Pakhat chuan, “Ka pu, he hmeichhia nên hian in khatah kan chêng dûn a; chuta kan awm lai chuan nau ka nei a. Ka nau neih aṭanga ni thum niah he hmeichhia hian nau a hring ve a. Chu inah chuan tu mah dang an awm lo va, kan pahnih chauhvin kan awm dûn a ni. Zânah he hmeichhia hian a fapa chu a delh hlum a. Zan laiah a tho va, i bawihnu hi ka muthilh laiin ka fapa, ka kianga mu chu, a la a, a pawm ta a, a fapa thi chu mi pawmtîr ta a ni. Zînga hnute pe tûra ka han thawh chuan nautê thi chu ka hmu a, ka han en chian chuan ka fapa, ka hrina kha a ni ta hauh lo mai a,” a ti a. Pakhat zâwk chuan, “Ni lo, a dam zâwk hi ka fapa a ni a, a thi hi i fapa a ni,” a ti a. A hmasa zâwk chuan, “Ni lo, a thi hi i fapa a ni a, a dam zâwk hi ka fapa a ni,” a ti tlat a. Chutiang chuan lal hmaah an inhnial a. Lal chuan, “He nu hian, ‘A dam zâwk kha ka fapa a ni a, a thi kha i fapa a ni,’ a ti a. Ani lah hian, ‘Chutiang a ni lo, a thi zâwk hi i fapa a ni a, a dam hi ka fa zâwk a ni,’ a ti si a. Khandaih mi han pe teh u,” a ti a. Khandaih chu an han pe a, lal chuan, “Naute la dam chu bung hnihah chhuah ula, a chanve pakhat pe ula, a chanve dang chu hmeichhe pakhat kha pe rawh u,” a ti a. Naupang dam zâwka nu chuan a fapa chu a lainat êm avângin lal hnênah chuan, “Ka pu, khawngaih takin nautê chu he mi hi pe mai rawh; that lul suh ang che,” a ti a. Pakhat zâwk chuan, “Bung hnihah chhuah mai rawh, tu mah mahin kan chang lo mai ang,” a ti a. Lal chuan hetiangin thu a rem ta a; “Nausên dam chu he nu, thu rawn sawi hmasatu hi pe rawh u, that suh u, hei hi a nu tak a ni e,” a ti a. Israel mi zawng zawngin lal thurem chu an hriatin lal chu an zah ta hle a, Pathianin dik taka rorêl thiamna a pe tih an hria a. Lal Solomona chu Israel mi zawng zawng lal a ni a. Hêng hi a miliante chu an ni: An puithiam chu Zadoka fapa Azaria a ni. Ziaktu lian chu Elihorefa leh Sisa fapa Ahija an ni. Ahiluda fapa Jehosafata chu chanchin ziaktu a ni. Jehoiada fapa Benaia chu sipai hotu a ni. Zadoka leh Abiathara te chu puithiam an ni. Nathana fapa Azaria chu ram bial ṭhen enkawltute chunga hotu ber a ni. Nathana fapa Zabuda chu lal puithiam leh lal kaiza vêngtu a ni. Ahisara chu lal in enkawltu a ni a; Abda fapa Adonirama chu hnathawka rawih luihte hotu a ni. Solomona chuan Israel ram pum pui chu bial sâwm leh pahnihah a ṭhen a, an chungah hotu a ruat vek a. Chûngte chuan lal tân leh lal chhûngkaw tân ei tûr an pe ṭhîn. Hotu pakhatin thla khat chhûng tumin kum tluanin ei tûr an tumsak ṭhîn. Hêng hi hotute hming leh an thawhna bial hming chu a ni: Efraim tlângramah Ben-Hura. Makaz te, Salbim te, Beth-semes te, Elon te leh Beth-hanan khaw hotu chu Ben-dekera a ni. Arubot leh Soko te leh Hefer ram zawng zawng nêna enkawltu chu Ben-heseda a ni. Dor bial pum enkawltu chu Ben-Abinadaba a ni. Ani chuan Solomona fanu Tafati nupuiah a nei a. Tanak leh Megido te, Zerethan dep Jezreel hnuai, Beth-sean aṭanga Abel Mehola leh Jokmeam thlengin, Beth-sean ram pum nêna enkawltu chu Ahiluda fapa Baana a ni. Gilead rama Ramot khua te, Manasea thlah, Jaira chhûngte chênna khua Gilead rama mi te, Basan ram, Argob biala kulh leh dâr tlâwn kawngkhâr kalhna nei khaw sawmruk te enkawltu chu Ben-gebera a ni. Mahanaim bial enkawltu chu Idoa fapa Ahinadaba a ni. Naftali bial enkawltu chu Ahimaaza a ni. Ani chuan Solomona fanu Basemathi nupuiah a nei a. Aser leh Bealoth bial enkawltu chu Husaia fapa Baana a ni. Isakar bial enkawltu chu Parua fapa Jehosafata a ni. Benjamin bial enkawltu chu Ela fapa Simeia a ni. Gilead ram, Amor lal Sihona ram Gilead te, Oga ram Basan te huama enkawltu chu Uria, Gebera fapa a ni. Hêng mi sâwm leh pahnih bâkah a ram pum pui chunga hotu pakhat a la awm bawk. Juda-te leh Israel-te chu tuifinriat kama ṭiau zât zetin an tam a. An eiin an in a, an hlim hle a. Solomona chuan Eufretis lui aṭanga Aigupta ram dep Filistia ram thlengin ro a rêl a. Chûng lai ram zawng zawng chuan Solomona hnênah chhiah an pe a, Solomona dam chhûng chu a khua leh tui an ni. Solomona ni khat ei ral chu chhangphut ṭha chi kg. sângnga, chhangphut narân kg. sîngkhat; ran châwm thau sâwm, rama tla ṭhîn bâwngpa sawmhnih, berâm za leh sakhi te, sazuk te, saza te, âr châwm thau te a ni. Solomona chuan Eufretis luipui khawthlang Tifsa khua aṭanga Gaza thlengin ro a rêl a. A chhehvêla ram dangte nên an inrem a. Solomona dam chhûng chuan Juda-te leh Israel-te chu Dan aṭanga Beer-seba thlengin mi tin mahni grep huanah leh theipui hmunah thlamuang takin an awm a. Solomona chuan tawlailîr hnûktu sakawr sîngli leh sakawr chungchuang mi sîngkhat leh sânghnih a nei a. Ramawptute chuan mahni chan thla ṭheuhvah lal Solomona leh a dawhkâna chaw kîltute tân ei tûr an ngaihtuah a, eng mah an tlachham ngai lo. Chûng mite chuan a indawtin sakawr te, tawlailîr hnûk sakawrte tân an tla tâwk buhpâwl leh barli an rawn pe ṭhîn. Pathianin Solomona chu finna leh hriatna thûk tak a pe a, rilru zau tak, chhui chhuah rual loh khawp a pe bawk. Solomona chu khawchhak mi fingte leh Aigupta mi fingte aiin a fing a. Khawvêla mi fing ber a ni. Ezra mi Ethana te, Mahola fa Hamana te, Kalkola te leh Darda te aiin a fing zâwk a, a chhehvêl ram tinah a hming a thang hle a. Thufing sângthum a siam a, hla sângkhat leh panga a phuah a. Thlai chanchin, Lebanon tlânga sidar thing aṭanga kulh banga ṭo husop chenin a zir vek a. Ramsa te, sava te, bawkvâka kal leh sangha chanchin te pawh a hre hle a ni. Khawvêla lal zawng zawng chuan Solomona finzia zir tûrin an mite a hnênah an tîr ṭhîn. Tura lal Hirama chuan Solomona chu a pa Davida aiawh tûra hriakthih a ni tih a lo hriatin a hnênah palai a tîr a. A pa Davida nên an lo inṭhian si a. Solomona chuan Hirama hnênah hetiangin thu a thawn lêt a: “Ka pa Davida kha, a chhehvêl ramte nên an indo ṭhîn a, Lalpa chuan a hmêlmate a hnehtîr vek hma chuan, Lalpa, a Pathian a biakna tûr Tempul a sa thei lo tih i hria. Tûnah, Lalpa, ka Pathianin kan chhehvêl ramte nên min inremtîr a, hmêlma leh min tibuaitu tûr an awm ta lo. Lalpa chuan ka pa Davida hnênah, ‘I fapa, lalṭhutthlêng luahtu tûr chuan ka hming chawimawi nân Tempul a la sa ang,’ tia a lo tiam tawh angin Lalpa, ka Pathian hming ropui nân Tempul sak ka tum ta a ni. Tûnah, Lebanon tlânga sidar thing mi rawn pe tûrin thu pe rawh; ka mite leh i miten thawk ho sela, i mite chu i tih zât zât hlawh ka lo pe ang e. Sidon mite anga thing kih thiam tu mah ka nei lo tih i hre si a,” a ti a. Hiraman Solomona thu a lo hriat chuan a lâwm hle a, a hnênah, “He hnam ropui tak chunga rorêl tûra fapa fing tak Davida hnêna petu Lalpa chu vawiin hian fakin awm rawh se,” a ti a. Hirama chuan Solomona hnênah, “I thu mi chah chu ka lo hria a, sidar thing leh fâr thing chu i duh zât zât ka pe ang che. Ka mite chuan thing chu Lebanon tlâng aṭangin tuifinriatah an rawn hnûk thla ang a, an têl khâwm ang a, dahna tûr i tih hmunah an rawn tawlh thleng ang a, chutah chuan an phelh darh hnuah i mite chuan an lo la dâwn nia. Nang pawhin ka mite hi ei tûr i lo tumsak ve a ni ang chu,” a ti a. Hirama chuan sidar leh fâr thing a mamawh zât chu a lo pe ta a. Solomona pawhin Hirama chu chhangphut ṭin nuai li leh oliv hriak ṭha chi ṭin zali a mite ei atân a pe a. Chutiang chuan kum tin Solomona chuan Hirama chu a pe a. A lo tiam tawh angin Lalpa chuan Solomona chu finna a pe a, Hirama leh Solomona inlaichînna chu a ṭha hle a, inremna thu an thlung a. Solomona chuan Israel ram pumah hna thawka rawih luih pâwl a siam a, chûng chu mi sîngthum lai an ni. Adonirama chu chûngho enkawltu chu a ni. Anni chu pâwl thumah a ṭhen a, a inchhâwkin sîngkhat zêl Lebanon-ah thla khat chhûng an han thang a, thla hnih in lamah an awm leh ṭhîn. Solomona chuan thuamphur mi sîngsarih leh lung chher mi sîngriat tlângramah chuan a nei a. Chûng bâkah hnathawkho vêngtu mi sângthum leh zathum a nei bawk. Lal thupêk ang chuan lung ṭha chi lian tak tak Tempul lungphûma rem tûr an rawn la a. In satuho Solomona mi te, Hirama mi te leh Biblos khuaa mi te chuan lung te, thing te chu Tempul hmanrua atân an buatsaih ta a. Israel faten Aigupta an chhuahsan aṭanga kum zali leh sawmriat, Israel-te chunga Solomona a lal kum lina thla hnihna Ziv thlaah Solomona chuan Lalpa Tempul a sa ṭan a. Solomonan Lalpa tâna Tempul a sak chu a dung tawng sawmruk, a vâng tawng sawmhnih a ni a, a sân lam chu tawng sawmthum a ni. Tempul Hmun Thianghlim ber hma lamah chuan pindan hmasa, a in vâng tawng sawmhniha zau leh a thûk lam tawng sâwm a awm a. Tempul bangah chuan tukverh tê tak tê tê a siam a. Tempul bang rinchhanin pindan chhâwng thuma sâng a siam a. A hnuaihnung ber chu tawng ngaa zau a ni a, a laita chu tawng ruk, a chhâwng chung ber chu tawng sariha zau a ni. Tempul pindan chungnung bangte chu a hnuai bang aiin a pan zâwk avângin kalkhangte chu a chhawrdawhah a innghat mai a ni. Tempul sakna lungte chu lunglâkna hmuna chher sa vek a nih avângin Tempul sak lai chuan tuboh ri te, thîrkhen ri te hriat tûr a awm lo. In chhâwng hnuai ber luhna chu Tempul chhim lamah a siam a, chhâwng hnihna leh chhâwng thumna kal nân kailâwn a dawh bawk a. Chutiang chuan Tempul chu an sa zo ta a, a chhûng lam chu sidar thingphelin a thuah vek a. Tempul bang nghênga pindan sak chu chhâwng tin tawng ngaa sâng a ni; chhâwng tinah sidar kalkhang a hmang vek a. Lalpa thu chu Solomona hnênah a lo thleng a. “Tûnah Tempul chu i sa zo ta a, ka dân leh ka thuhriattîr i pawisaka, ka thupêkte i zawm chuan i pa Davida hnêna ka thutiam kha i lakah ka hlen ang. Israel-te zîngah ka awm ang a, ka mi Israel-te chu ka thlahthlam lo vang,” a ti a. Solomona chuan Tempul chu a sa zo ta a. Tempul chhûng bang thuah nân sidar thingphel a hmang a, a chhuat aṭanga a chung thlengin thingphel a bel vek a, a chhuat atân fâr thingphel a phah a. Pindan chhûngril Hmun Thianghlim Ber an tih chu Tempul kawmchâr lamah tawng sawmhnih bialin a siam a, a chhuat aṭanga a chung thlengin a chhûng lamah sidar thingphelin a thuah vek a. Hmun Thianghlim Ber luh dâwn chiaha pindan chu tawng sawmli-a sei a ni. Tempul chhûng thuahna sidar thingphelah chuan pangpâr kuhmûm lem leh a pâr parh lem an ker a, a chhûng chu sidar thinga chei vek a nih avângin a bang lung chu a lang lo. Tempul chhûng hmun ril ber chu Lalpa Thuthlung Bâwm dahna atân a siam a. Chu pindan chu tawng sawmhnih bial, a sân lam tawng sawmhnih bawk a ni. A chhûng chu rangkachak hlîr hlakin a luan a. Sidar thinga siam maichâm pawh chu rangkachakin a luan bawk a. Solomona chuan Tempul chhûng chu rangkachakin a luan vek a, pindan chhûngril ber luhna kawngkaah chuan rangkachak khaidiat a thlung a, kawngka pawh chu rangkachaka luan a ni. Tempul chhûng lam zawng zawng leh Hmun Thianghlim Bera maichâm awm chu rangkachaka luan vek a ni. Hmun Thianghlim Berah chuan Oliv thinga siam cherub thla pahnih nei, tawng sâwma sâng ve ve a awm a. Cherub pakhat thla chu tawng ngaa sei a ni a, a thla lehlam pawh tawng ngaa sei a ni. A thla hmâwr lehlam aṭanga a hmâwr lehlam chu tawng sâwm a nih chu. Cherub-te chu an pianhmang leh an lenzâwng a inang a, tawng sâwma sâng ve ve an ni. Tempul chhûng Hmun Thianghlim Berah chuan Cherub-te chu a dah tlar a, an thla an zâr duai a. Cherub thla pahnih chu a laiah a insi a, Cherub pakhat zâwk thla lehlam hmâwr chuan bang a dek a, Cherub dang thla lehlam hmâwr chuan bang lehlam a dek bawk. Chûng Cherub-te chu rangkachaka luan vek a ni. Tempul chhûng lam bangah te, Hmun Thianghlim Ber chhûng lam bangah te chuan Cherub lem te, tûm thing lem te, pangpâr lem te an ker thluah a. Hmun Thianghlim Ber chhuat leh pindan dang chhuatte pawh chu rangkachaka luan a ni. Hmun Thianghlim Ber luhna kawngkhârte chu oliv thinga siam a ni. Kawngka lu chung chu a zum a. Oliv thingin kawngkhâr pahnih a siam a, Cherub lem te, tûm thing lem te, pangpâr lem te kerin a cheimawi a. Cherub lem te, tûm thing lem te, pang pâr lem te chu rangkachakin a luan a. Tempul chhûng luhnaah chuan kawngkhâr kil li nei, kil tin inchen vek, oliv thingin a siam a. Kawngkhâr kaihthleh theih pahnih fâr thingin a siam bawk a. Chûngah chuan cherub thla nei lem te, tûm thing lem te, pangpâr lem te a ker a, rangkachakin a luan leh vek a. Tempul hma lamah chuan kawt zâwl chhûngril zâwk a siam a, lungchher chhâwng thum leh sidar thingphêk thuah khatin a hung a. Solomona lal kum lina, Ziv thlaah Tempul lung chu an phûm a. Solomona lal kum sâwm leh pakhatna, thla riatna, Bul thlaah ruahman lâwk ang ngeiin Tempul chu an sa zo a ni. Kum sarih chhûng an sa a ni. Solomona chuan a in chu kum sâwm leh pathum chhûngin a sa zo va. In lian tak, ‘Lebanon Ngawpui In’ a tih chu a dung tawng za, a vâng tawng sawmnga, a sân lam tawng sawmthumin a sa bawk a. Sidar ban tlar thum a phun a, a chungah sidar liang a chhuang a, a siling chu sidar thing a ni. Tlar khatah ban sâwm leh panga zêl a awm a, ban sawmli leh panga a nei a. Sâng takah tukverh tlar thum a siam a, a bang chhak lama mi leh thlang lama mi chu a inzâwn vek a. Tukverh leh kawngkate pawh kil li nei, intiat vekin a siam a, hma lama tukverh tlar thumte leh hnung lama tukverh tlar thumte chu a inzâwn thliah bawk. Ban neiin hulhliap a siam a, a dung tawng sawmnga, a vâng tawng sawmthum a ni, bathlâr ban neiin a siam bawk a, a luhna kailâwn nên. Rorêlna pindan a siam leh a, chutah chuan lalṭhutthlêng a hûng a, chu chu rorêlna hmun a ni. A chhuat aṭanga a chung thlengin sidar thingphelin a thuah vek a. Rorêlna in hnungah chuan ama chênna tûr, in dang a sak ang bawkin a sa leh a. Tin, a nupui, Farawa fanu pualin in dang a sa bawk a. Chûng in zawng zawng chu, a kawtzâwl chenin, a lungphûm aṭanga liang thlengin lung ṭha chi a ni a, lungkhura chher, a chhûng lam leh pâwn lam mâm taka nawh sa vek a ni. A lungphûm atân lung ṭha chi, lian pui puia chher tawng sâwm te, tawng riatte a hmang a. A chungah chuan lung ṭha chi, a tâwk chiah tûra chher sa a rem chho va, liang atân sidar thing a hmang a. Kawtlai zau tak chu a vêlin lungchher chhâwng thum leh sidar thing thuah khatin a hung a, Lalpa Tempul kawtzâwl anga chei a ni. Lal Solomona chuan Tura khuaa mi pakhat, Hurama chu a chah a. A nu chu Naftali hnam, hmeithai a ni. A pa chu Tura khaw mi, dâr chhûn thiam tak a ni. Hurama pawh chu mi themthiam, dâr chi hrang hrang rei tak lo chher tawh a ni. Lal Solomona hnênah a lo kal a, thawh tûr an ruatsak zawng zawng chu a thawhsak ta a. Hurama chuan dâr ban pahnih, tawng sâwm leh pariata sâng ve ve, teh kuala tawng sâwm leh pahniha lian, Tempul luhna bulah a phun a. Ban chhîpah chuan dârin lu bâwk a siam leh a, ban lu bâwk chu tawng nga laia sâng a ni ve ve a. Ban lu bâwk chu khaidiat lem, vawi sariha vêtin a cheimawi a. Theibuhfai lem tlar, ban lu bâwkah chuan a siam chhuak ve ve a. Hulhliap ban lu bâwkte chu lili pâr ang maiin a mawi a, tawng lî-a sâng a ni. Ban lu bâwk pahnih, mûm pul, khaidiat lema veh chhuah chung chiahah chuan theibuhfai lem zahnih a kual chhuakin a siam a. Tempul hma lama dâr ban pahnih a hûnte chu a chhim lama mi chu Jakin ban an ti a, hmâr lama mi chu Boaza ban an ti. Ban lu bâwk chu lili pâr anga mawi a ni. Chutiang chuan bante chu a siam zo ta a. Hurama chuan dâr tuizêm lian pui a siam bawk a, a laia hawlh tlangin tawng sâwm a ni a, a thûk zâwng chu tawng nga a ni. A tlânga teh kualin tawng sawmthum a ni. A tlâng hnuai chu kuhmûm lem hian a vêl chhuak a, kuhmûm lem chu tlar hnihin a awm a; chûng chu a tuizêm nên a ruala chhûn nghâl vek a ni. Tuizêm chu bâwngpa lem sâwm leh pahnih chungah a innghat a, pathumin hmâr lam a hawi a, pathumin chhim lam a hawi a, pathumin chhak lam a hawi a, pathumin thlang lam a hawi a. An chungah chuan tuizêm chu a hûng a, bâwngpa lem mawng lam chu a inchhawn vek a. Tuizêm chhah zâwng chu kutphah bawk a ni, a kotlâng chu no tlâng ang a ni, lili kuhmûm angin a mûm a, tui litar sîngli lai dawng a ni. Hurama chuan dârin bâwm nawrlirh sâwm a siam a, kil li nei, tawng li bial a ni a. A sân lam chu tawng thum a ni. A bang chuan kâwm a nei ṭheuh va, a bangah chuan sakeibaknei lem te, bâwngchal lem te, cherub lem te a chuang a. A kâwm chung lam leh hnuai lam sakeibaknei leh bâwng lem inkâr chu an chhûng vial chiat a. Bâwm tinah chuan a ke pali, dâra siam, dâr tlâwn vuah a awm ṭheuh va. Bâwm chhûng kil tinah tuizêm inhûnna tûr dâr, inherh chiata chhûn a awm ṭheuh va. Bâwm chhînah chuan tuizêm chelhtu tûr dâr belvâl a awm a; tuizêm chu a chung lamah tawng khat a lawr a, bâwm chhûngah chuan tawng khat leh a chanve a pil a. A ke palite chu dâr a ni a, tawng khat leh a chanve hawlh tlang a ni, a bâwm bang hnuaia awm a ni. A ke vir chu sakawrtawlailîr ke ang a ni; a vuahna bâwr te, a kual dotu te leh a ke kual te chu dâr veka siam a ni. A bâwm kil tinah chuan, bâwm nêna inzawm, dotu pali a awm ṭheuh va. A tlâng vêttu tawng chanvea hlai a awm bawk. A dotu bante chu a bâwm bangte nên chhûn zawm vek a ni. A donaah te leh a bâwm bangah te chuan hmun âwl lai apiangah cherub lem te, sakeibaknei lem te, tûm thing lem te an chuantîr zêl a, a lem huam loh chin a tlâng te chu inherh chiatin an siam zêl a. Huraman chutiang chuan nawrlirh bâwm sâwm a siam a, an inang vek a, an intiat vek bawk. Hurama chuan tuizêm sâwm, nawrlirh bâwm tina dah tûr a siam bawk a. Tuizêm chu a bial a, tawng li hawlh tlang a ni a, tui litar zariat vêl a dawng ṭheuh. Nawrlirh panga chu Tempul chhim lamah a dah a, panga dang chu hmâr lamah. Dâr tuizêm kha Tempul chhimchhak kilah an hûng a. Hurama chuan insilna bêl te, vutlawh te, maihûn te a siam a. Tichuan, Lalpa Tempul atâna lal Solomona a siamsak zawng zawng chu a peih ta a. Dâr ban pahnih, ban lu bâwk, no bial anga kum te, ban lu bâwka khaidiat lem tlar hnih awm kual te, ban lu bâwka theibuhfai lem zali, tlar hnih, za zêla kual chhuak te chu a siam a. Bâwm nawrlirh sâwm leh tuizêm sâwm te, bâwngpa sâwm leh pahnih chunga dâr tuizêm te, bêl te, vutlawh te, thîrkutte nên; Lalpa Tempul bungrua Huraman lal Solomona a siamsak zawng zawng chu dâr tle mia siam vek a ni. Lal chuan Jordan phaizâwl Sukoth leh Zereda inkâr bellei hmunah chûng chu a chhûntîr a. Hêng bungbêlte hi a tam êm avângin Solomona chuan bûk lovin a dah mai a, a zât hriat a ni lo. Solomonan Lalpa Tempul bungbêl a siamte chu rangkachak maichâm te, Pathian hnêna hlan tûr chhang serh dahna tûr rangkachak dawhkân te, rangkachak hlîr hlaka siam khâwnvâr dahna zâr sarih nei sâwm, Hmun Thianghlim Ber hma lamah a hûng a, chhim lamah panga, hmâr lamah panga, pangpâr te, khâwnvâr te, chaicheh te nên. Rangkachak no te, khâwnvâr huh hlumna te, rimtui hâlna berhbu te, meilawh te nên rangkachak vekin a siam a. Tempul Hmun Thianghlim Ber leh pâwn lam pindan indaidanna kawngkhâr leh a kalhnate chu rangkachaka siam vek a ni. Lal Solomonan Lalpa Tempul a sak zawh hnu chuan a pa Davidan Lalpa tâna a lo serh hran tawh tangkarua te, rangkachak te, bungbêl te chu Tempul sum dahnaah chuan a dah ta a. Lal Solomona chuan Israel upate, hnam hruaitute chu Davida khawpui Zion aṭanga Jerusalem, a chênna hmuna Thuthlung Bâwm chu laa Tempul-a dah sawn tûrin a ko khâwm a. Israel mi zawng zawng chu thla sarihna, Ethanim thlaah kût hmang tûrin lal Solomona hnênah chuan an lo kal khâwm a. Israel upate an lo thlen chuan puithiamte chuan Bâwm chu an zâwn a. Lalpa Bâwm te, Inbiakna puan in te, bungbêl thianghlim zawng zawng te chu tempulah chuan an dah ta a. Puithiam leh Levia chite chuan an zâwn chho va. Israel mi, a hnêna awm zawng zawng chu lal Solomona hovin Thuthlung Bâwm hmaah chuan an lo kal khâwm a; berâm leh bâwng chhiar sên rual lohvin an inthawi a. Puithiamho chuan Lalpa Bâwm chu Tempul chhûngah an zâwn lût a, a awmna tûra ruat Hmun Thianghlim Berah, cherub thlazâr hnuaiah chuan an dah a. Cherub thlazâr chuan Bâwm leh a zâwnfung chu a khuh a. A zâwnfung hmâwr chu Hmun Thianghlim Ber kawngka hmazâwn taka din chuan a lang thei, pâwn lam aṭang erawh chuan a lang thei lo. A zâwnfungte chu tûn thlengin a la awm reng a ni. Bâwm chhûngah chuan eng mah dang a awm lo, Israel fate Aigupta ram aṭanga an lo chhuah laia Horeb tlânga Lalpa Thuthlung ziakna lungphêk pahnih Mosia dah chauh kha a awm a ni. Puithiamhovin Hmun Thianghlim Ber an chhuahsan veleh Lalpa Tempul chu chhûmin a khuh ta a. Chhûm avâng chuan puithiamte chuan rawng an bâwl thei ta lo va, Lalpa ropuina chuan Tempul chu a tikhat vek si a. Solomona chu a ṭawngṭai a, “ Lalpa chuan, ‘Thim chhah mupah ka awm ang,’ i lo ti a. Tempul ropui tak i tân ka sa ta e, kumkhuaa i chên nân a ni e,” a ti a. Israel mi zawng zawng chu chutah chuan an ding a, Solomona chuan an lam a hawi a, Pathian malsâwmna a dîlsak a. Hetiangin a sawi a: “Israel-te Pathian, Lalpa chu fak rawh u, ani chuan ka pa Davida hnêna a thutiam a rawn tihpuitlin tâk hi. Lalpa chuan, “Ka mite Aigupta ram ata ka hruai chhuah ni aṭang khân tûn thlengin Israel khawpui khawiah mah min biakna tûr Tempul sakna hmun ka la thlang lo. David, nang erawh hi chu ka mite rorêltu atân ka thlang che a ni, a tih kha,” a ti a. Solomona chuan a sawi zêl a, “Ka pa Davida khân Lalpa, Israel-te Pathian biak nân Tempul sak a lo tum ṭhîn a. Mahse, Lalpa chuan ka pa Davida hnênah, ‘Tempul min saksak i tum ṭhîn a, i ti ṭha e. Mahse, nang chuan ka Tempul i sa lo vang; i fapa, i rîla rah ngei chuan ka Tempul chu a sa zâwk ang,’ a ti a nih kha. “ Lalpa chuan thu a lo tiam tawh chu a vawng reng a, ka pa Davida ai ka awh a, tûnah Israel-te lal ka lo ni ta a, Lalpa lo tiam tawh angin Israel-te Pathian, Lalpa chibai bûk nân Tempul chu ka sa ta a ni. Thuthlung Bâwm, min thlahtute Aigupta ram ata an lo chhuaha Lalpa nên thu an thlun ziakna lungphêk pawh tempulah dah a ni ta e,” a ti a. Solomona chu mipui hma lam, Lalpa maichâm bulah a ding a, bân phar chungin a ṭawngṭai a, “Aw Lalpa, Israel-te Pathian, chung lam vânah te, hnuai lam leiah te, nang ang Pathian dang rêng an awm lo. I mite nêna i thuthlung chu i vawng reng a; tih tak zeta i thu an zawm phawt chuan i hmangaihzia i lantîr ṭhîn. Ka pa Davida hnênah i thutiam i hlen a, vawiin hian i tipuitling ta a ni. “Aw Lalpa Israel-te Pathian, ka pa Davida khân i dânte a pawisak ṭhin anga a thlahten an pawisak ve phawt chuan a thlah pakhat tal chu Israel lalṭhutthlêngah an ṭhu reng ang tih i tiam pawh kha hlen bawk ang che. Ka pa Davida, i chhiahhlawh hnêna i tiam zawng zawng kha, Aw Lalpa, Israel-te Pathian, vawiina i tihhlawhtlin ang hian tihlawhtling zêl ang che. “Mahse, nang Pathian meuh chu lei mite zîngah i chêng duh ngût ang emaw chu? Vânah meuh pawh i leng lo a ni a, ka Tempul sakah hian i leng dâwn em ni le? Aw Lalpa, ka Pathian, i chhiahhlawh ka ni a, vawiina i hnêna ka dîl hi ngaithla la, ka ngen hi min phalsak ang che. He Tempul, nangmah biak nâna i thlan hi, a chhûn a zânin vêng la, he Tempul lam hawia ka ṭawngṭai hi lo ngaithla ang che. Ka ṭawngṭai ngaithla la, i mite pawh he Tempul lam hawia an ṭawngṭai chuan ngaithla ang che. I chênna vân aṭangin lo hria la, min ngaidam ang che. “Tu pawh, thil tisuala puh, i maichâm hmaa a lo kala, a tihsual lohzia chian nâna chhia a rawn chham chuan, Aw Lalpa, vân aṭangin lo ngaithla la, i chhiahhlawhte chungthu chu dik takin rêlsak la, thil tisualtu chu a phu angin hrem la, pawi khawih lo chu chhuah ang che. I chunga an sual avânga, i mi Israel-te chu hmêlmaten an hneha, i lam an lo hawia, he Tempula inngaitlâwma ngaihdam an rawn dîl chuan vân aṭangin lo ngaithla ang che. I mite sualna chu ngaidam la, an thlahtute hnêna i pêk ramah hian hruai kîr leh ang che. I miten thil an tihsual avânga khua i khêntîra, an sual sima he Tempul lam hawia an ṭawngṭai chuan, vân aṭangin lo ngaithla ang che. Lalte sualna leh Israel mite sualna ngaidam la, thil dik tih zirtîr ang che. Tichuan, Aw Lalpa, i mite chên rengna tûra i pêk ramah hian ruah sûrtîr ang che. He ramah hian ṭâm a tlâka, hri a lêna, thli lumin thlai a chhêm chhiata, khaute a puana, hmêlmaten i mite an rawn do hun leh damloh hritlân an tawh hunah, an ṭawngṭaina chu lo ngaithla ang che. I mi Israel tu pawh, sim takzeta he Tempul lam hawia bânphara a ṭawngṭai chuan, an ṭawngṭaina chu lo ngaithla ang che, i chênna vân aṭangin lo ngaithla la, ngaidam la, ṭanpui ang che. Nang chauhvin mihring ngaihtuahna chhûngril i hre thei a. Mi tin an phu tâwk zêlin rêlsak la; tichuan, he ram, kan pute hnêna i pêkah hian an dam chhûngin i mite chuan i thu an zâwm zêl dâwn nia. an dîl chu ngaithla la, i chênna vân aṭang chuan lo ngaithla la, an ngen chu tihsak ang che. Tichuan, khawvêla mi zawng zawngin i mi Israel-te ang bawkin an hria ang chia, i thu an zâwm dâwn nia. He Tempul ka sak hi nangmah chibai bûkna hmun a ni tih an hria ang a. An hmêlmate do tûra i mite an chhuaha, khawi aṭang pawha i thlan he khua emaw, i tâna ka Tempul sak lam hawi emawa an ṭawngṭai chuan, an dîl chu lo hria la, vân aṭangin ngaithla la, an hmêlmate hnehtîr ang che. “I miten i laka thil an tihsuala, (tu mah thil tisual lo an awm si lo) i thinura an hmêlmate i hnehtîra, sala an hruaiin an hruaina ram chu hla hle mah se, i mite ṭawngṭai chu ngaithla ang che. Chu ramah chuan an sual an sima, an sualna leh an khawlohna thupha an chawi chuan aw Lalpa, an ṭawngṭai ngaithla ang che. Chu rama an awm hnua an sual an sim takzeta, inchhîra an thlahtute hnêna i pêk ram lam te, i khawpui thlan lam te, i tâna ka sak he Tempul lam hawi tea an ṭawngṭai chuan, lo ngaithla la, i chênna vânsâng aṭang chuan lo hria la, an chungah zahngai ang che. I mite sualna leh an bawhchhiatna zawng zawng chu ngaidam la, an hmêlmate chu an chungah ṭhat chhuahtîr ang che. Rawhtuina mei, Aigupta ram aṭanga i hruai chhuah, nangma mite ngei an nih hi. Engkim Lalpa, i mi Israel-te leh an lalte chungah zah ngai la, ṭanpui dîla an koh hun apiangah lo ngaithla ang che. Anni chu khawvêl hnam zawng zawng ata i pual atân i thlang a, i chhiahhlawh Mosian kan pute Aigupta ram aṭanga a hruai chhuah lai khân an hnênah i sawi tawh si a,” tiin. Solomona chu Lalpa hnêna a ṭawngṭai zawh chuan bân phara a ṭawngṭaina hmun maichâm hma ata chu a lo ding chhuak a. Mipui pung khâwm zawng zawng tân Pathian malsâwmna ring takin a dîlsak a. “A lo tiam tawh anga a mite hnêna remna petu Lalpa chu fakin awm rawh se. A chhiahhlawh Mosia hmanga a thutiam hlu tak tak chu a vawng reng a, kan pute hnêna a awm ṭhîn angin Lalpa kan Pathian chu kan hnênah awm rawh se. A thu awih thei tûrin min pui sela; tichuan, a duh angin kan nung ang a; kan pute hnêna dân leh thupêkte chu kan zâwm thei ang. Lalpa, kan Pathian chuan kan ṭawngṭaina leh a hnêna kan dîlte chu hre reng rawh se. Israel-te leh an lalte khawngaih sela, an mamawh pe zêl rawh se. Tichuan, khawvêla hnam tinin Lalpa chauh hi Pathian a ni tih an hria ang. Nangni, a mite u, Lalpa, kan Pathian lakah rinawm takin awm ula, a dân leh a thupêkte chu vawiina in zâwm ang hian zâwm zêl ang che u,” a ti a. Lal Solomona leh chuta Israel mi awm zawng zawng chuan Lalpa hnênah thilhlan an hlân a. Remna thilhlan atân bâwngpa sînghnih leh sânghnih leh berâm nuaikhat leh sînghnih an hlân a. Tichuan, lal leh Israel mipui chuan Tempul chu an hawng ta a. Chumi ni bawk chuan Solomonan tual hung chhûng kawtlai, Tempul kawta mi chu a hawng bawk a. Hâlral thilhlan te, buhbâl thilhlan te leh remna thilhlana ran thau te chu a hâl a. Dâr maichâm a siam kha hêng zawng zawng hlan nân hian a tê lutuk a, maichâma leng lo chu tualah chuan a hâl mai a ni. Lal Solomona leh Israel mipui chuan tempulah chuan Bâwkte kût, ni sarih chhûng an hmang a. Chutah chuan Israel ram hmâr tâwp Hamath kalkhân aṭanga Israel ram chhim lam Aigupta lui inkâra mi zawng zawng an lo kal khâwm a, mi an tam kher mai. A ni riat ni chuan Solomona chuan mite chu an in lamah a hawtîr a, Lalpa chuan a chhiahhlawh Davida leh a mite chu mal a sâwm avângin hlim takin an ṭin a, Solomona chu an fak a. Lal Solomonan Tempul te, lal in te, in dang te a sak zawh hnu chuan Gibeona a awm lai ang khân Lalpa chu a hnênah a inlâr leh a. Lalpa chuan a hnênah, “I ṭawngṭai ka lo ngaithla a, he Tempul i sak hi kumkhuaa min biakna hmun atân ka thlang ta e. Ka vil ang a, ka vêng reng ang. I pa Davida angin rinawm tak leh dik taka ka rawng i bâwl a, ka dânte leh i hnêna ka thupêkte i zawm chuan, i pa Davida hnêna ka thutiam, a thlahte chu Israel-te lalah an ṭang reng ang, tia ka tiam kha ka hlen ang. Nang leh i thlahten min zui in bânsana, in tâna ka dân leh thupêkte hi in zawm lohva, pathian dangte in biak erawh chuan, ka mi Israel-te chu an tâna ka pêk ram ata ka paih chhuak ang. He Tempul, min biakna hmun atâna ka tihthianghlim tawh pawh hi ka rauhsan ang. Khawvêla hnam tinin Israel-te chu an hmusitin an nuihzat ang a, he Tempul hi a chhe vek ang a, a kianga kal apiangin mak ti takin, ‘Engtizia nge Lalpa hian he ram leh he Tempul hi heti taka a sawisak le?’ an ti ang a, mite chuan, ‘An thlahtute Aigupta ram aṭanga hruai chhuaktu Lalpa an Pathian chu an kalsan atin alâwm maw le, pathian dangte an vuan a, an rawngte an bâwlsan avângin Lalpa hian a sawisa a nih hi,’ tiin an chhâng ang,” a ti a. Solomona chuan Lalpa Tempul leh ama in chu kum sawmhnih chhûng a sa a, Tura lal Hirama chuan sidar thing te, fâr thing te, rangkachak te, a mamawh apiang hêng in sak nân hian a pe a. In sak a zawh hnu chuan Lal Solomona chuan Hirama chu Galili ram bial chhûnga khaw sawmhnih a pe a. Hirama chuan khuate chu a va hmuh chuan a lâwm lo hle a. Tichuan, Solomona hnênah, “Unaupa, hetiang hi a ni maw min pêk le? Eng atân maha hman tlâk loh, Kabul ram a nih hi,” a ti a. Tûn thlengin chu hming chu a pu hlen ta a. Hirama chuan Solomona chu rangkachak kg. sângli lai a lo thawn tawh si a. Lal Solomona chuan Tempul te, ama in te, khawpui chhak lam khuar hnawh khat tûr te, kulh bang siam tûr tein hnathawktu rawih luih pâwl a siam a. Tin, hêng khua Hazor te, Megido te, Gezer te hi a din ṭha bawk a. Aigupta lal Farawa khân Gezer khua a rûn a, a hâl vek a, khawpuia chêng chu a that vek bawk a. A fanu, Solomona nupui chu a chhawmtîr a. Solomona chuan a din ṭha a; hna thawka a chhawr luihte chu Beth-horon chuanhnuai te; Baalat khua te, Judai ram thlalêra Tamar khua te a din ṭhattîr bawk a. Kudâm awmna khua te, sakawr leh sakawr-tawlailîr dahna khua te, Jerusalem-ah te, Lebanon-ah te leh ram chhûng hmun tinah sak ṭûl a tih zawng zawng chu a sa zo ta a. Hêng hnam Amor te, Hit te, Periz te, Hiv te, Jebus mite hi Israel-ten Kanan ram an luh khân an that vek lo va, Solomona khân hnathawka chhawr luih atân an thlahte chu a hmang a, tûn thlengin bawih an ni ta zêl a ni. Solomona chuan Israel mi tu mah bawihah a chhawr lo, sipai atân te, hotu atân te a chhawr thung a. Solomona in sak hrang hranga mi chhawrte enkawltu mi zanga leh sawmnga an awm a. Solomona nupui Aigupta lal fanu chu Davida khawpui aṭangin a puala in a sakah chuan a sawn chho va, chumi hnu chuan khawpui chhak lam ruam chu a chhûng khat a. Solomona chuan Lalpa tâna maichâm a siamah chuan hâlral thilhlan leh remna thilhlan, kum khatah vawi thum a hlân a. Lalpa tân rimtui a hâl bawk a. Tichuan, Tempul sak chu a zo ta a. Lal Solomona chuan Edom rama Eloth kiang, Agaba litengsâwl Ezion-geber khuaah lawng rual a siam a. Lal Hirama chuan a lawng mite chu Solomona mite pui tûrin a tîr a. Ofir ramah an kal a, rangkachak kg. sângkhat leh zali an va la a. Solomona chu an rawn pe a. Seba lalnuin Solomona hming thanzia a lo hriatin thu har tak tak zâwta fiah tûrin Jerusalem-ah a lo kal a. Ṭhuihruai tam tak a nei a, sanghâwngsei tam tak a hruai a; mosola te, lungmantam te, rangkachak te a keng ṭeuh bawk a. Solomona nên an inhmuh chuan zawh tûr a neih zawng zawng chu a zâwt vek a. A zawh apiang Solomona chuan a chhâng thei zêl a, chhân harsa tih rêng a nei lo. Seba lalnu chuan Solomona finzia chu a hria a, a in sak ropuizia te a hmu a; Solomona ei tûr an rawn hlui te, a chhiahhlawhho awmna in te, lal hna thawktu hna insem dân te, an thawmhnaw hâk mawizia te, a viltute inchei mawizia te, Tempula hâlral thilhlan a hlan hnemzia te a han hmuh chuan mak a ti a, awm ngaihna rêng a hre ta lo va. Lalnu chuan Solomona hnênah, “I thil tihte leh i finzia te kan rama ka lo hriat kha a lo dik ngei a nih hi. Ka lo kal a, keimah ngeiin ka rawn hmuh hma chuan an sawi chu ka lo awih ṭhîn lo va; mahse, i finzia leh i hausakzia hi a zâtve pawh an lo sawi hlei nêm, an sawi ai daihin a ropui a ni. I nupuite chu an va nihlawh êm! I chhiahhlawh, ni tin i bula awma i finzia ngaithla ṭhînte pawh hi an va nihlawh êm! I Pathian, Lalpa chu fakin awm rawh se. Ani chu i chungah a lâwm a, Israel-te lalah a siam che a nih hi. I Pathian chuan Israel-te a hmangaih a, dik taka an chunga rorêltu atân lalah a duh che a nih hi,” a ti a. Thilpêk tûr a ken chu a pe a, rangkachak kg. sângli chuang, mosola tam tak, lungmantam pawh tam tak a pe a ni. Mosola thil rimtui chutiang zât chu tûn hma zawng zawngin a la dawng ngai lo. Hirama lawng rual, Ofir ram aṭanga rangkachak rawn phurte chuan almug thing leh lungmantam an rawn phur ṭeuh bawk a. Lal chuan chûng thing chu Lalpa Tempul leh lal in hung nân a hmang a, zaipâwl ṭingṭangte leh perhkhuang siam nân a hmang bawk a. Chutianga tam almug thing chu Israel ramah lâkluh a la ni ngai lo, hmuh pawh an hmu leh tawh ngai hek lo. Lal Solomona chuan Seba lalnu chu a dîl leh a duh apiang a pe a; chu bâkah, a thil rawn kensak do lêt nân thil tam tak a lo pe ve a. Tichuan, a ṭhuihruaite nên an ram lamah an haw leh ta a. Solomona chuan kum tin rangkachak kg. sîngthum bûk lai a dawng ṭhîn a. Sumdâwngtute leh dâwrkaiten chhiah an pe a, Arabia lalte leh Israel ram bial tina ram awptuten rangkachak leh tangka an pe bawk a. Solomona chuan phaw lian pui pui, rangkachak den phêk zahnih a siam a, phaw pakhatah rangkachak kg. sarih zêl a hmang. Phaw tê deuh, rangkachak kg. hnih vêl zêla luan zathum lai a siam bawk a, phâwte chu ‘Lebanon ngawpui In’ an tih pindanah chuan a dah a. Lalṭhutthlêng ropui, sainghovin a siam a, rangkachak hlîr hlakin a luan a. Lalṭhutthlêng lâwn chhohna kailâwn, rahka paruk nei a siam a, vawnbân a nei a. Rahka sîr tawnah chuan sakeibaknei lem a dintîr a, a vaiin sâwm leh pahnih a nih chu. Lalṭhutthlêng hnung lamah chuan bâwngpa lu lem a awm a, a sîr tuakah chuan sakeibaknei lem a awm bawk a. Chutiang khawpa lalṭhutthlêng ropui chu khawii ramah mah a awm lo. Solomona no chu rangkachak vek a ni. ‘Lebanon ngawpui In’ an tih pindan chhûnga an thil eina bungbêlte phei chu rangkachak hlîr hlaka siam a ni. Solomona hun lai chuan tangkaruate hi an ngaihlu vak lo va, engah mah an hmang lo. Lawng rual a nei bawk a, Lal Hirama lawng rualte nên a inkawp a, Tarsis-ah te kalin kum thum danah an lo haw a, rangkachak te, tangkarua te, saingho te, zâwng te, ârâwn te an rawn hâwn ṭhîn. Lal Solomona chu khawvêl lal dang zawng zawng aiin a hausa a, a fing zâwk bawk a. Pathianin a hnêna finna a pêk chu zir tûrin khawvêl ram tin aṭangin mi an lo kal huai huai a. A hnêna lo kal apiangte chuan tangkarua leh rangkachaka thil siam te, puan te, râlthuam te, mosola te, sakawr te, sakawr puakphur chi te an rawn pe zut zut a. Hetiang hian kum tin an rawn pe ṭhîn. Solomona chuan sakawrtawlailîr sângkhat leh zali leh sakawr chungchuang mi sîngkhat leh sânghnih lai a nei a. A ṭhen Jerusalem-ah a dah a, a dang chu khawpui hmun hrang hrangah a dah a. A lal chhûng chuan tangkarua chu lungtê ang maiin Jerusalem-ah chuan a tam a, sidar thing pawh tlâng bulṭhut khawthlang lama theipui thing ang maiin a tam bawk. Lal mi rawihte chuan Musri leh Kue aṭangin sakawr an tawlh chhuak a. Aigupta rama sakawr-tawlailîr an tawlh chhuak bawk. Hit mite leh Suria lalte hnênah sakawr-tawlailîr pakhat tangkaraw tlang zaruk leh sakawr pakhat tangkaraw za leh sawmnga zêlin an hralh ṭhîn. Solomona chuan Farawa fanu chang lo pawh hnam dang nula a hmangaih a, nupui atân Moab mi te, Amon mi te, Edom mi te, Sidon mi te leh Hit mi te pawh a nei bawk a. Lalpa chuan Israel-te hnênah, “Hnam dang nulate nupuiah nei suh u, an pathiante in zui palh ang e,” a ti chungin nupuiah a nei a. Solomona chuan lal fanu zasarih nupuiah a nei a, hmei zathum a nei bawk a; a nupuite chuan ani chu an hruai kawi ta a ni. A lo tar hnu chuan a nupuite chuan an pathian lamah an hruai ta a, a pa Davida ang khân Lalpa, a Pathian lakah a rinawm ve ta lo va. Sidon mite pathiannu Astarte leh Amon mite pathian tenawm tak Milkoma te chu a zui ve ta a. Solomona chuan Lalpa mit hmuhin thil sual a ti a, a pa Davida ang khân a rinawm ve ta lo va. Jerusalem chhak tlângah Moab mite pathian tenawm tak Khemosa biakna a siam a, Amon mite pathian tenawm tak Milkoma biakna a siam bawk a. Hnam dang mi nupuia a neihte tân an pathian hnêna rimtui hâlna leh inthawina hmunte a siamsak bawk a. Lalpa, Israel-te Pathian chu, a hnênah vawi hnih lai a inlâr a, hnam dang pathiante be lo tûra a tih pawhin, Solomona chuan Lalpa thu a zâwm lo va, Pathian a hawisan ta a. Lalpa chu Solomona chungah a thin a ur ta hle a, a hnênah, “Nang nêna kan thuthlung i bawhchhe lui a, ka thupêk i zâwm loh avângin ram chu ka chhuhsak ang che a, i hote zînga mi pakhat ka pe ang tih ka hrilh a che. Amaherawhchu, i pa Davida avâng khân i dam chhûng ni lovin i fapa rorêl chhûngin chu thil chu ka ti ang. Ram pum pui chu ka chhuhsak lo vang a, ka chhiahhlawh Davida leh ka tâna ka din Jerusalem avângin hnam khat chu a la chang ang,” a ti a. Lalpa chuan Solomona do tûrin Edom lal thlah Hadada chu a chawk tho va. Tûn hmain Davida leh Edom mite an indo va, Davida sipai hotu Joaba chu an mi thahte phûm tûrin a han chho va. Joaba leh a sipaite chu Edom ramah thla ruk an awm a, chumi chhûng chuan mipa zawng zawng an that vek a. Hadada chu a pa chhiahhlawhte nên Aigupta ramah an tlânchhia a, ani chu naupang tê a la ni nghe nghe a. Midian ram an chhuahsan a, Paran-ah an kal a, mi ṭhenkhatin an zâwm a. Aigupta-ah an chhuk a, lal chuan chênna tûr ram te, in te leh ei tûr te a lo pe a. Hadada chuan lal rin a kai a, lalnu Tahpenesi laizâwn chu Aigupta lal chuan nupuiah a neihtîr a. A nupui chuan fapa, Ganubata a hrinsak a, lal fapa dangte angin lalnu chuan a enkawl a. Davida thih thu leh a sipai hotu Joaba thih thu Hadadan Aigupta ram aṭang chuan a lo hria a, lal hnênah chuan, “Kan ramah min hâwntîr tawh rawh le,” a ti a. Lal chuan, “Engah maw? Eng nge i tlâkchhama in rama hâwn i duh tâk mai le?” a ti a. Hadada chuan, “Eng mah tlâkchham ka nei lo; mahse, min hâwntîr mai teh,” a ti a. Edom lal Hadada chu Israel-te hmêlma tawh khirh ber a lo ni ta a. Pathianin Eliada fapa Rezona chu Solomona a huattîr bawk a. Rezona chu a pa Hadadezera, Zoba lal hnên aṭangin a tlân bo va, helho hruaitu a lo ni ta a. Hei hi Davidan Hadadezera a hneh a, a hmêlma Suria-ho a thah chiam hnua thil thleng a ni. Rezona leh a mite chu an chhuak a, Damaska khuaah an awm a, a zuitute chuan Suria ram lal atân an ruat ta a. Solomona dam chhûng zawng Israel-te hmêlma a lo ni ta a ni. Solomona dotu dang pakhat chu a ṭhuihruai zînga mi, Jeroboama, Nebata fapa, Efraim ram Israel khuaa mi a ni. A nu chu Zeruii, hmeithai a ni. A hel dân chu hetiang hi a ni. Solomonan Jerusalem chhak lam ruam a chhûng khat a, kulhte a siam ṭha a. Jeroboama chu tlangvâl fel tak leh taima tak a ni tih hriain Manasea bial leh Efraim bial chunga hna thawktu chhawr luihte enkawltu atân a ruat a. Ni khat chu Jerusalem aṭangin Jeroboama chu a lo kal a, Silo khua aṭanga lo kal zâwlnei Ahija nên ramhnuaiah an intâwk a. Ahija chuan a kawrfual thar hâk chu a hlîp a, phel sâwm leh pahnihah a pawtthlêr a. Jeroboama hnênah, “Phel sâwm hi nei rawh; Lalpa, Israel-te Pathian chuan heti hian a ti: Ngai teh, Solomona ram hi ka chhuhsak ang a, hnam sâwm hi ka pe ang che. Ka chhiahhlawh Davida avâng leh Israel ram puma ka puala ka thlan Jerusalem avângin hnam khat chu a chang ve ang chu. Ani chuan Sidon mite pathiannu Astarte te, Moab mite pathian Khemosa te, Amon mite pathian Milkoma te min zuisan a, a pa Davida angin ka dân leh thupêk a pawisa lo va, ka kawng a zawh lo va, ka mite hmuha thil dik a tih hek loh avângin. Mahse, Solomona chu ram pum pui ka chhuhsak lo vang. Ka chhiahhlawh Davida, ka thlan leh ka dân leh thupêkte zâwmtu avângin a dam chhûng chuan ka laltîr ang. A fapa kut ata ram chu ka chhuhsak ang a, hnam sâwm ka pe ang che. Hnam khat erawh chu a fapa ka pe ang a, min biakna hmun atâna ka thlan Jerusalem khuaah Davida thlahte chuan ro an rêl ang. Nang erawh chu ram zau tak chungah ro i rêl ang a, Israel-te lalah i awm ang. Ka chhiahhlawh Davida anga ka thu zâwma, ka dân pawisaa, ka mithmuha ṭha taka i awm chuan i hnênah ka awm reng ang. Israel-te lalah ka siam ang che a, Davida hnêna ka tiam angin i thlahten i hnuah pawh ro an rêl zêl ang. Solomona sualna avângin Davida thlahte chu ka hrem dâwn, kumkhua erawh chuan ka hrem lo vang,” a ti a. Solomona chuan Jeroboama chu thah a tum ta a, Jeroboama chu Aigupta lal Sisaka hnênah a tlân a, Solomona thih hma chuan a awm ta reng a. Solomona chanchin dang, a thiltihte leh a finna thute chu Solomona chanchin ziakna bu-ah a chuang a. Israel ram pum puiah kum sawmli chhûng Jerusalem-ah ro a rêl a. Solomona chu a thi a, a pa Davida khawpuiah an phûm a, a fapa Rehoboama chu a hmunah a lal ta a. Rehoboama chu Sekem khuaah a kal a, chutah chuan lala siam tûrin Israel-ho hmâr lama awmte chu an lo pung khâwm a. Nebata fapa Jeroboama chu Solomona hlauvin Aigupta ramah a tlân bo va, a thih thu a hriatin a lo haw leh ta a. Hmâr lama Israel-te chuan an va pun a, Rehoboama hnênah chuan an kal ho ta a, a hnênah, “I pa khân min chhawr nasa hle a, kan phur a tirit êm êm a, nang chuan min chhawr nêpin kan phur min tihzânsak deuh la, i khua leh tuiah kan awm ang e,” an ti a. Rehoboama chuan, “Ni thum hnuah lo kal leh ang che u,” a ti a. Mite chu an ṭîn ta a. Lal Rehoboama chuan a pa Solomona dam laia a bula awm ṭhîn upate chu a râwn a, “Hêng mite hi engtia chhân tûr nge ni le?” a ti a. Anni chuan, “Hêng mite hi ṭha taka enkawl i duh chuan an dîl hi ṭha takin chhâng la; tichuan, i lakah an rinawm kumkhua ang,” tiin an chhâng a. Upaho thurâwn chu a pawm duh lo va, tlangvâl, ama rualpui, a kawm ṭhînte chu a râwn a. “Hêng mi, kan phur min tihzânsak deuh rawh titute hi engtin nge ka chhân ang?” a ti a. A rualpui tlangvâlho chuan, “Hêngho, ‘I pain kan phur a tirit êm a, min tihzânsak rawh,’ titute hi heti hian chhâng mai rawh: ‘ka kutzungtê pawh hi ka pa kâwng ai chuan a khauh vang. Ka pain in phur a tirit hle a nih chuan kei chuan ka belhchhah ang. Tiangin a vua che u a, kei chuan khawmualkaikuangin ka hrem ang che u,’ ti ang che,” an ti a. Ni thum hnuah chuan Jeroboama leh Israel mite chu Rehoboama sawi ang khân an lo kal a. Lal chuan upaho thurâwn kha a zâwm duh lo va, mite chu ram takin a lo bia a. Tlangvâlte thurâwn ang khân mite hnênah chuan, “Ka pa khân in phur a tirit hle maw? Kei chuan ka belhchhah ang. Tiangin a vua che u a, kei chuan khawmualkaikuangin ka hrem ang che u,” a ti a. Silo khuaa zâwlnei Ahijan Nebata fapa Jeroboama hnêna a sawi a thlen theih nân Lalpa chuan a tihtîr a ni. Hei vâng hian lal chuan mipuite chu a lo chhâwn ṭha duh lo va. Israel mite chuan lalin an thu a ngaihsak lo tih an hriatin lal chu an chhâng a, “Davida ramah chan eng nge kan neih ve le? Jesaia thlahte zîngah chanvo eng nge kan neih? Davida thlahte chu an awm awmin awm rawh se,” an ti a. Israel mi zawng zawng chu in lamah an haw ta a. Judai rama awm Israel mite chungah chauh chuan Rehoboama chu a lal ta a. Lal Rehoboama chuan hna thawka chhawr luih pâwl hotu Adonirama chu Israel-ho ko tûrin a tîr a. Ani chu lungin an lo dêng hlum a. Chu veleh Rehoboama chu a tawlailîrah a chuang sawk sawk a, Jerusalem-ah a tlân haw ta a. Chutichuan, hmâr lam rama awm Israel mite chu Davida thlahte lakah tûn thlengin an hel ta a ni. Israel miten Jeroboama chu Aigupta ram aṭangin a lo haw tih an hriat chuan an pun khâwmnaah an sâwm a, ani chu Israel lalah an siam ta a. Juda hnam chauh chu Davida thlahte lamah an ṭang ta a. Lal Rehoboaman Jerusalem a thlen chuan Benjamin mi leh Juda mi zînga sipai ṭha ṭha nuaikhat leh sîngriat a khâwm a, hmâr lama awm Israel-te chu a thuhnuaia dah leh tûrin beih a tum ta a. Mahse, Pathian mi, Simeia hnênah Lalpa thu a lo thleng a. Juda lal Solomona fapa Rehoboama hnênah te, Juda hnam pum pui leh Benjamin hnam hnênah te leh mi dang awm vete hnênah, “ Lalpa chuan heti hian a ti, ‘in unau, Israel-te chu han bei suh u, in vaiin haw vek rawh u, an thil tih hi keima tih a ni e,’ tiin a sawi,” a ti a. Tichuan, Lalpa thupêk chu pawmin mahni inah an hâwng ta vek a. Israel lal Jeroboama chuan Efraim tlângrama Sekem khua chu kulhin a hung a, chutah chuan rei lo tê a awm a. A chhuak leh a, Penuel khua chu kulhin a hung leh a. Jeroboama chuan, “Ram hi Davida chhûngten an chang leh mai ang a!” a ti rilru a ni. “Mite chu Jerusalem-ah Lalpa hnêna inthawi tûra an chhoh fo chuan an pu Rehoboama, Juda lal an bêl ang a, min that mai ang,” a ti bawk a. Chutiang thil a ngaihtuah hnu chuan rangkachakin bâwngno lem pahnih a siam a. A mite hnênah chuan, “In tân Jerusalem-a chhoh fo a harsa si a, hei hi in pathian, Aigupta ata hruai chhuaktu che u kha a ni e,” a ti a. Pakhat chu Bethel-ah a dah a, pakhat chu Dan khuaah a dah a. Mite chuan Bethel leh Dan khuaahte kalin thil an lo tisual ta a. Jeroboama chuan tlângchhîpahte pathian biakna hmun a siam a, Levia chi pawh ni lo, a duh duh puithiamah a ruat a. Jeroboama chuan Judai rama kût an neih ṭhin angin thla riatna, ni sâwm leh panga ni chu kût ni atân a ruat a. Bethel-a maichâmah chuan rangkachaka siam bâwngno, ama kutchhuak hnênah a inthawi ta a. Tlângchhîp inthawina hmunah puithiamte a dah ang khân Bethel-ah chuan puithiamte a dah a. Thla riatna, ni sâwm leh panga ni, Israel mipui tâna kût ni a ruatsakah chuan Bethel-ah a kal a, maichâmah chuan inthawina a hlân a. Jeroboama chu thil hlân tûra maichâm hmaa a din lai chuan Lalpa mi tirh, zâwlnei, Judai ram aṭangin Bethel-ah a lo thleng a. Lalpa thupêkin zâwlnei chuan maichâm chu hetiangin a hau va: “Maichâm, maichâm, Lalpa chuan heti hian a ti: Davida thlah aṭangin a hming Josia a lo piang ang a, i chunga milem pathian hnêna rimtui hâl ṭhîntu puithiamte chu a rawn sâm ang a, i chungah an ruhte nên a rawn hâl ang,” tiin. Zâwlnei chuan a sawi zêl a, “He maichâm hi a phel phawk ang a, a chunga meivâpte pawh a la darh vek ang. Tichuan, Lalpa chuan keimah mi hmangin thu a sawi a ni tih in hria ang,” a ti a. Bethel-a maichâm chu Pathian miin a hau tih lal Jeroboama chuan a hriatin maichâm bul aṭang chuan ani chu a kâwk a, “Man rawh u,” a ti a. Chu veleh lal bân chu a khawng a, a la thla thei ta lo va. Maichâm chu a phel phawk a, meivâpte chu Lalpa hminga zâwlneiin a sawi ang khân leiah a darh ta vek a. Lal Jeroboama chuan zâwlnei hnênah, “Khawngaih takin, Lalpa, i Pathian hnênah ka bân damna hi min dilsak rawh,” a ti a. Zâwlnei chu Lalpa hnênah a ṭawngṭai a, lal bân chu a dam ta a. Lal chuan zâwlnei hnênah, “Ka inah lo kal la, ka hnênah eiin in la; tichuan, lâwmman ka pe ang che,” a ti a. Zâwlnei chuan lal hnênah, “I sum zâtve pawh min pe dâwn mah la, i inah chuan ka kal lo vang a, i eng mah ka eiin ka in lo vang. Lalpa chuan eng mah eia in lo tûr leh ka lo kalna kawngah pawh kîr leh tawh lo tûrin min ti a ni,” a ti a. Tichuan, Bethel panna, a lo kal kawnga hâwng lovin kawng dangah a hâwng ta a. Zâwlnei putar pakhat hi Bethel-ah chuan a awm a. A fapa pakhat chuan chumi nia Judai ram aṭanga zâwlnei lo kalin Bethel-a a thil tih leh lal Jeroboama hnêna a thu sawite chu a hrilh a. Zâwlnei putar chuan a fate hnênah, “Khawii lamah nge a kal tâk?” a ti a. A kalna lam an hrilh a. Sabengtung buatsaihsak tûrin a fate chu a ti a, an buatsaih zawh chuan, Judai ram aṭanga zâwlnei lo kal chu a ûm ta a. Ani chu sasaw thing hlimah a lo ṭhu a, “Judai rama zâwlnei kha i ni em?” a ti a. Ani chuan, “Ni e,” a ti a. Zâwlnei putar chuan, “Lo kal la, ka inah chaw rawn ei rawh,” a ti a. Judai ram zâwlnei chuan, “I ruala lo kîr thei ka ni lo, i hnêna ei leh in thei ka ni hek lo. Lalpa chuan eng mah ei lo tûr leh ka lo kalna kawng ngaia kîr leh lo tûrin min ti tlat a ni,” a ti a. Bethel zâwlnei putar chuan a hnênah, “Kei pawh nang ang bawkin zâwlnei ka ni a, Lalpa tirh Vântirhkohvin ka hnênah, ‘I ina eia in tûrin ani chu rawn hruai hâwng rawh,’ min ti a ni,” tiin dâwt a hrilh a. Judai ram zâwlnei chuan zâwlnei putar chu a zui a, a hnênah chaw a ei ta a. Chaw an kîl lai chuan Lalpa thu chu zâwlnei putar hnênah a lo thleng a. Judai ram aṭanga zâwlnei hnênah chuan, “ Lalpa thu i zâwm lo va, a thupêk angin i ti hek lo. I kîr leha, ei leh in lo tûra a tihna hmunah i eia i in avângin i thi ang a, i ruang chu in chhûngkaw thlânah phûm a ni ve lo vang,” a ti a. An ei kham chuan zâwlnei putar chuan Judai ram zâwlnei tân a sabengtung a buatsaih a, a chuantîr ta a. Kawngah chuan sakeibaknei a va tâwk a, a lo seh hlum a. A ruang chu kawngah a lo thal reng a, a sîrah sabengtung leh sakeibaknei chu an lo ding reng bawk a. Kawnga mi lo kalin a ruang chu an va hmu a, sakeibaknei a bula ding nên chuan. Bethel khuaah an va tlân a, an thil hmuh chu an va sawi a. A rawn hruai kîrtu zâwlnei putarin a lo hriat chuan, ‘E, Lalpa thupêk zâwm lotu zâwlnei kha a nih chu. Lalpa sawi tawh angin ani chu seh hlum tûrin sakeibaknei a tîr a nih chu,” a ti a. A fate hnênah chuan, “Ka sabengtung kha min han buatsaihsak teh u,” a ti a. An buatsaih zawh chuan a tlân a, zâwlneipa ruang, kawnga lo thal reng leh a bula sabengtung leh sakeibaknei lo ding reng chu a va hmu a. Sakeibaknei chuan zâwlnei chu a ei lo va, sabengtung pawh a bei zui hek lo. Zâwlnei putar chuan a ruang chu a hlâwm a, sabengtung chuan a phur a, Bethel-a phûm tûrin a la ta a. Zâwlnei putar chuan an chhûngkaw thlânah a phûm a, “Aw ka unaupa, ka unaupa,” tiin a fate nên an ṭah a. An vui zawh chuan zâwlnei chuan a fate hnênah, “Ka thih hun chuan he thlânah hian min phûm ve ula, he mi bulah hian min zalh ang che u. Lalpa thupêka Bethel maichâm thu leh Samaria khawpuia inthawina hmun zawng zawng chungthu a sawite chu a lo thleng dik ngei dâwn a ni,” a ti a. Israel lal Jeroboama chuan a nun sual a sim duh chuang lo va; mi narân zîng aṭangin a maichâm dina rawngbâwl tûr puithiamte a ruat belh zêl a. Puithiam nih duh apiang hmunsânga rawngbâwl tûrin a ruat a. He thil sual a tih hian ama chhiatna leh a thlahte thlenga boralna a thlen ta a ni. Jeroboama fapa Abija chu a damlo va. Jeroboama chuan a nupui hnênah, “Ka nupui i ni tih tu man an hriat theih loh nân inchei danglam la, Israel lal ka nih tûr thu min hrilhtu zâwlnei Ahija, Silo khuaa awm hnênah va kal teh. Chhang tlâwn sâwm leh kêk tlêm azâwng leh khawizu ûm khat kensak la, naupang awm dân tûr hi a lo hrilh thei ang che,” a ti a. A hrilh ang chuan Jeroboama nupui chu Silo khuaa Ahija inah chuan a va kal a, Ahija chu a upat tawh avângin a mit a fiah tawh lo va. Lalpa chuan Ahija hnênah, “Jeroboama nupui, a fa damlo chungchâng zâwt tûr chein a lo kal a, hetiangin lo chhâng ang che. Mi narân angin a inchei danglam a ni,” a ti a. Kawngkaa lo lût thâwm Ahijan a hriat chuan, “Lo lût rawh, Jeroboama nupui i ni lâwm ni? Engtiziaa inchei danglam nge i nih? Chanchin lâwmawm lo tak ka lo hrilh ang che. Kal la, Lalpa, Israel-te Pathian thuchhuak hi Jeroboama hnênah hetiangin va sawi rawh. ‘Mipui zîng ata ka chawisâng che a, ka mi Israel-te hruaitu atân ka dah che a. Davida chhûngte ram ka chhuhsak a, ka pe che a. Mahse, ka chhiahhlawh Davida angin i awm lo va, ani chuan ka thupêkte a zâwm a, tih tak zetin mi zui a, ka mit hmuhah thil dik chauh a ti ṭhîn. Nang zawng, i hmaa mite zawng zawng aiin i sual a; ka huatzâwng tak, pathian dangte leh milem chhûnte i siam a, mi hawisan ta a. Hêng avâng hian i thlahte, mipa fa tawh phawt chu naupang aṭanga puitling thlengin ka tiboral vek dâwn. Bawlhhlawh phiah fai ang maiin i chhûngkua chu ka la bo vek ang. ‘Jeroboama chhûngte, khawpuia thite chu, ui-in an ei ang a, tâmlaka thi chu chunglêng savaten an tlân ang,’ chu chu Lalpa thuchhuak a ni,” a ti a. “Nang pawh haw la, khuaa i luh veleh naupang chu a thi ang. Israel mi zawng zawngin an sûn ang a, an phûm ang. Jeroboama chhûngte zîngah ani hi zawng Lalpa, Israel-te Pathian mit hmuha ṭha a nih avângin amah chauh hi Jeroboama chhûngte zîngah thlâna phûm a ni ang. Jeroboama chhûngkaw tiboral tûrin Lalpa chuan Israel-te chunga rorêltu a mi duhzâwng tak a ruat thuai dâwn. Lalpa chuan Israel-te chu a hrem ang a, lui kam phairuang angin a tinghîng dual dual ang. Israel mite chuan pathiannu Aseri lemte an siam a, Lalpa an tihthinur avângin an pute hnêna a pêk ram ṭha tak aṭangin a sawn chhuak ang a, Eufretis lui râlah a sawn darh vek ang. Israel-te chu Jeroboaman a hruaisual avângin Lalpa chuan a hawisan ang,” a ti a. Jeroboama nupui chu Tirza khuaah a hâwng leh ta a, in a thlen veleh an fa chu a thi ta a. Lalpa chhiahhlawh Ahijan a lo sawi tawh ang khân Israel mite chuan naupang chu an ṭah a, an phûm ta a. Jeroboama chanchin dang, a râl beih thu te, a rorêl dân te chu Israel lalte chanchin ziakna bu-ah a chuang. Jeroboama chu kum sawmhnih leh pahnih chhûng a lal a, a thi a, an phûm a, a fapa Nadaba chuan a ai a awh ta a. Solomona fapa Rehoboama chu kum sawmli leh pakhat a nihin Judai ramah a lal ṭan a. Israel pum puia amah biakna hmun tûr Lalpa thlan Jerusalem-ah kum sâwm leh pariat ro a rêl a. A nu chu Naami, Amon hnam a ni. Juda mite chu Lalpa mit hmuhah an sual hle a, an pute ai mahin Lalpa an tithinur zual a. Milem pathian biakna hmun tam tak an siam a, tlângah te, thingbuk hnuaiah te lung serh leh pathiannu Aseri lim te an phun a. Chu aia la sual zâwk chu an milem biaknaah chuan mipa leh hmeichhiate bawlhhlawh takin an khawsa ho va. Israel fate Kanan ram an lo luha, an hmaa an hnawh chhuah tâk hnamte awm dân mawi lo zawng chu Juda mite hian an la ve ta a ni. Lal Rehoboama lal kum nganaah Aigupta lal Sisaka chuan Jerusalem a rûn a. Lalpa Tempula ro te, lal ina ro te, Solomonan rangkachaka phaw a siamte nên a phur hâwng chiam a. Lal Rehoboama chuan chûng phaw an lâksak tâk aiah dârin phaw dang a siam leh a, lal in kawngka vêngtute a kawltîr a. Lal chu Lalpa Tempula a kal apiangin vêngtute chuan phaw chu an keng a, chumi hnuah pindanah an dah leh hlawm ṭhîn a. Rehoboama chanchin dangte leh a thiltih zawng zawng chu Juda lalte chanchin ziakna buah a chuang a. A lal chhûng zawngin Rehoboama leh Jeroboama chu an indo reng a. Rehoboama chu a thi a, Davida khawpuiah an phûm a. A nu chu Naami, Amon hnam a ni. A fapa Abija chuan a ai a awh ta a. Nebata fapa Jeroboama, Israel lal chu kum sâwm leh pariat a lal kumin Judai ramah Abija a lo lal ve a. Jerusalem-ah kum thum a lal a, a nu chu Maaki, Absaloma fanu a ni. A pa angin thil sual a ti a, a pu Davida hlan ang khân a thinlung chu Lalpa hnênah a hlân ve lo. Nimahsela, Davida avângin Lalpa, a Pathian chuan Abija chu a thih hnua Jerusalem-a lal tûr fapa a pe a, Jerusalem khua pawh a humhimsak a. Hit mi, Uria chunga thil sual a tih bâk chu Davida chuan Lalpa thupêkte a bawhchhe ngai lo va, a mit hmuha thil ṭha a ti ṭhîn a. Abija rorêl chhûng zawng Jeroboama leh Abija chu an indo reng a. Abija chanchin dang, a thiltihte chu Juda lalte chanchin ziaknaah a chuang. Abija chu a thi a, Davida khawpuiah an phûm a, a fapa Asa chu a pa aiawhin a lal a. Israel lal Jeroboama kum sawmhnih a lal kumah, Asa chu Judai ramah a lo lal a. Kum sawmli leh pakhat Jerusalem-ah a lal a, a pi chu Absaloma fanu Maaki a ni. Ani chuan a pu Davida angin Lalpa lâwmzâwng a ti ṭhîn. Milem pathian biakna hmuna mipa leh hmeichhe inzuarte chu ram chhûng ata a hnawt chhuak a, a puten milem pathian an siam zawng zawng chu a tichhia a. A pi Maakin Aseri lim tenawm tak chu a phun avângin, lalnu a nihna a hlihsak a, Asa chuan milem pathiante chu a kit a, Kidron ruamah a hâl a. Ram chhûnga pathian dang an biakna hmun zawng zawng chu lal Asa chuan tibo vek lo mah se, a dam chhûng zawng Lalpa chauh a vuan a. A pain Pathian hnêna a thilpêk zawng zawng chu Asa chuan tempulah a dah a; amah ngeiin rangkachak leh tangkarua a hlante chu a dah bawk a. Juda lal Asa leh Israel lal Baasa chu an lal chhûng zawng an indo va. Israel lal Baasa chuan Judai ram a han rûn a, Judai ram aṭanga mi an lo chhuaha, mi dang Judai rama an luh theih loh nân Rama khuaah kulh a siam a. Asa chuan Tempul sum bâwm ata leh lal ina rangkachak leh tangkaruate chu a la chhuak a, Damaska khuaa awm Suria lal Ben-hadada hnênah a thawn a. Ben-hadada chu, Heziona tupa, Tabrimona fa a ni. A mi tirhte chuan hetiangin an sawi a: “Ka pa leh i pa an ṭang dûn ang khân keini pawh i ṭang dûn teh ang. En teh, rangkachak leh tangkarua ka rawn thawn a che: Israel lal Baasa nên in inṭhianna titâwp la, kan ram chhûnga a sipaite hnûk kîr teh se,” a ti a. Ben-hadada chuan Asa thu rawt chu a lo remti a, a sipai hotu a ko va, a sipaite chuan Israel ram chu an rûn ta a. Izon te, Dan te, Abel-beth-maaka te an la a, Galili dîl kiang ramte leh Naftali bial pum pui chu an lâksak ta a. Chûng thu chu Lal Baasan a hriatin Rama khaw kulh a siam chu a chawlhsan a, Tirza khuaah a awm ta a. Lal Baasan Rama khaw kulh a siam nân lung leh thing a hmante chu la tûrin Asa chuan Juda ram mi zawng zawng chu a pun a. Benjamin biala Geba leh Mizpa khaw kulh siam nân a hmang ta a. Lal Asa thil tih dang, a huaisenzia te, khaw kulh a siam thu te Juda lalte chanchin ziakna bu-ah a chuang. A tar hnuin a ke-ah hri ṭha lo a vei a, a bawksawp ta a. Asa chu a thi a, Davida khawpuia lal chhûngkaw thlânah an phûm a, a fapa Jehosafata chu a aiawhin a lal ta a. Juda lal Asa lal kum hnihnaah, lal Jeroboama fapa Nadaba chu Israel ramah a lal a, kum hnih ro a rêl a. A pa ang bawkin Lalpa mite hmuha thil sual a ti a, Israel-te chu a hruai sual ta a. Ahija fapa Baasa, Isakar hnama mi chuan Nadaba chu a phiar ru a, Nadaba leh a sipaite chuan Filistia rama Gibethon khua an hual laiin Baasa chuan Nadaba chu a that a. Juda lal Asa lal kum thumnaah Baasa chuan Nadaba chu a that a, a aiawhin Israel ramah chuan a lal ta a. A lal ṭan chauh tihin Jeroboama chhûngte chu a that vek a. Lalpa chuan a chhiahhlawh Ahija, Silo khuaa mi hnêna a sawi tawh ang khân Jeroboama chhûngte chu tu mah zuah lovin a that ta a. Jeroboama thil sual tih chuan Israel te chu a hruai sual a, chu chuan Lalpa, Israel-te Pathian a tithinur a ni. Nadaba chanchin dang, a thiltih zawng zawng chu Israel lalte chanchin ziakna bu-ah a chuang a. Juda lal Asa leh Israel lal Baasa chu an lal chhûng zawng an indo a ni. Juda lal Asa lal kum thumnaah Ahija fapa Baasa chu Israel mi zawng zawng chungah a lal a, Tirza khuaah kum sawmhnih leh pali ro a rêl a. Lalpa mit hmuhah thil sual a ti a, Jeroboama angin Israel-te hruai sualtu a ni. Baasa chungchâng, Zâwlnei Jehua, Hanania fapa hnênah Lalpa thu hetiangin a lo thleng a, “Eng mah ni lo kha, Israel-te rorêltu atân ka ruat che a. Tûnah Jeroboama anga thil sual tiin ka mi Israel-te i hruai sual a, an sualna chuan min tithinur ta a ni. Chuvângin, Nebata fapa Jeroboama chhûngte chunga ka tih angin nang leh i chhûngte hi ka tiboral vek dâwn. I chhûngte zînga mi khawpuia thi chu ui-in an sa an tlân ang a, ramhnuaia thite chu chunglêng savaten an tlân ang,” a ti a. Baasa chanchin dang, a thiltih te, a huaisenzia te chu Israel lalte chanchin ziakna buah a chuang. Baasa chu a thi a, Tirza khuaah an phûm a, a fapa Ela chu a aiawhin a lal a. Baasa leh a chhûngte chuan Lalpa mit hmuha thil sual an tih nasat êm avângin Hanania fapa zâwlnei Jehua hnênah Lalpa thu a lo thleng a. Lal Jeroboama anga thil sual a tih avâng leh Jeroboama chhûngte a thah vek avângin Lalpa chu a chungah a thinur ta hle a ni. Juda lal Asa kum sawmhnih leh paruk a lal kumah Baasa fapa Ela chu Israel ramah a lal a. Tirza khuaah kum hnih a lal a. A hote zînga pakhat, Zimria, a tawlailîr zâtve lai chunga hotu chu a lakah a hel a. Chutih lai chuan Ela chu Tirza khuaah a awm a. Lal in enkawltu Arza inah zu a lo rui a. Zimria chu inah chuan a va lût a, Ela chu a that a, a aiah a lal ta a. Chu chu Juda lal Asa kum sawmhnih leh pasarih a lal kum a ni. Zimrian lalṭhutthlêng a luah veleh Baasa chhûngte chu a that vek a, a laichîn leh a ṭhian, mipa tawh phawt chu tu mah a zuah lo. Baasa chungchânga zâwlnei Jehua hnêna Lalpa thu lo thleng ang chuan Zimria chuan Baasa chhûngte chu a that vek a. Milem pathian an bia a, Israel-te an hruai sual avângin Baasa leh a fapa Ela chuan Lalpa, Israel-te Pathian chu an tithinur atin a ni. Ela thiltih zawng zawng chu Israel lalte chanchin ziakna buah a chuang. Juda lal Asa, kum sawmhnih leh pasarih a lal kum chuan Zimria chu Tirza khuaah ni sarih chhûng Israel-te chungah a lal a. Israel sipaite chuan Filistia khua Gibethon chu an hual a. Zimrian lal a phiara, lal chu a that tih an hriat chuan chu khaw hualtute chuan, an riahhmunah chuan an hotupa Omria chu Israel lalah an siam ta a. Omria leh a hnêna mi awm zawng chuan Gibethon an ṭînsan a, Tirza khua chu an han hual ta a. Khua an la tih a hriat chuan Zimria chu lal in chhûnga kulhah a tlân lût a, lal inah chuan a inkalhkhum a, a kâng hlum ta a. Lalpa mit hmuhin thil a tisual a, Jeroboama kawng a zawh a, Israel-te a hruai sual avângin chu thil chu a chungah a lo thleng ta a ni. Zimria chanchin dang te, a phiar rûk thu te chu Israel lalte chanchin ziakna bu-ah a chuang. Israel mipui chu pâwl hnihah an inṭhen a, a zâtve chuan Ginata fapa Tibnia chu lala siam an duh a, a zâtve chuan Omria an zui a. Omria zuitute chuan Ginata fapa Tibnia zuitute chu an hneh ta a. Tibnia chu a thi a, Omria chu a lo lal ta a. Juda lal Asa lal kum sawmthum leh pakhat kumin Omria chu Israel-te chungah a lo lal ṭan a. Kum sâwm leh pahnih a lal a, a hun hmasa lam kum ruk chhûng chu Tirza khuaah a lal a. Semera hnên aṭangin Samaria tlâng tangkarua sângrukin a lei a, chutah chuan khawpui a din a, kulh a siam a. Tlâng neitu hmasa Semera hming chawiin a khaw hmingah Samaria a sa a. Omria chuan Lalpa mit hmuhah thil sual a ti ṭhîn a, a hmaa mite zawng zawng aiin a sual a. Nebata fapa Jeroboama awm dân ṭha lo zawng zawng a la a, Israel-te chu a hruai sual a, an milem biakte avâng chuan Lalpa, Israel-te Pathian chu an tithinur hle a. Omria chanchin dang, a thil tih theihzia te chu Israel lalte chanchin ziakna buah a chuang. Omria chu a lo thi ve ta a, Samaria khuaah an phûm a, a fapa Ahaba chu a aiawhin a lal ta a. Juda lal Asa chu kum sawmthum leh pariat a lal kumin Omria fapa Ahaba chu Israel-te chungah a lal ṭan a, Omria fapa Ahaba chu Samaria khuaah kum sawmhnih leh pahnih a lal a. Omria fapa Ahaba chuan a hmaa lal zawng zawng ai khân thil sual a ti nasa zâwk a. Nebata fapa Jeroboama anga sual chu tâwk a ti lo va, Sidon lal Ethbaala fanu Jezebeli chu nupuiah a nei a. Baal pathiante a be ve ta zêl a. Samaria khuaah Baal pathian maichâm a din a, Baal biakna inte a sa a. Ahaba chuan Aseri lim a phun bawk a, a hmaa Israel lal zawng zawng aiin Lalpa, Israel-te Pathian chu a tithinur a. Ahaba lal laiin Bethel mi Hiela chuan Jeriko khua a din ṭha a; Nuna fapa Josua hnêna Lalpa sawi tawh ang khân Hiela chuan lungphûm a phûm avângin a fapa upa ber Abirama a chân a, kulh kawngkhâr a siam ṭhat avângin a fapa naupang ber Seguba a chân bawk. Gilead ram Tisbe mi Elija chuan Ahaba hnênah, “ Lalpa, Israel-te Pathian rawng ka bâwl ṭhina hmingin ka hrilh a che, kum hnih kum thum chhûng chu ka thu lo chuan leiah ruah leh dai a tla lo vang,” a ti a. Lalpa thu chu Elija hnênah a lo thleng a. “Heta ta hi chhuak la, khawchhak lam pan la, Jordan chhaka Kerith lui kamah han biru rawh. Luite tui chu i tlân ang a, nangmah châwmtu tûrin choakte thu ka pe tawh e,” a ti a. Lalpa sawi ang chuan a ti a, Jordan chhaka Kerith lui chu a pan a, tah chuan a awm ta a. Zîng leh tlaiah choakte chuan chhang leh sa an rawn lâksak ziah ṭhîn a, luite tui chu a tlân a. Chu ramah chuan ruah rêng a sûr tâk loh avângin luite tui chu a kang ta a. Lalpa chuan Elija hnênah, “Tho la, Sidon biala Zarefat khuaah kal la, tah chuan awm rawh, châwm tûr chein hmeithai pakhat ka ruat tawh e,” a ti a. Zarefat khuaah chuan a kal ta a. Chu khaw kulh kawngka a va thlen chuan hmeithai pakhat hian thing a lo fawm a, Hmeithai chu a han au va, “Tui tlêm min han suahsak la, ka lo in ang e,” a ti a. La tûra a kal lai chu, “Khawngaih takin chhang tlêm min han pe bawk ang che,” a ti zui a. Hmeithai chuan, “ Lalpa, i Pathian nung hmingin ka hrilh a che, chhang zawng ka nei lo, bêlah chhangphut vei khat lek leh bûrah hriak tlêm tê chauh ka nei a. Ka fapa nêna kan ei tûr siam nân thingṭang tlêm tê ka fawm a, chu chu kan ei zawhah rilṭâmin kan thi tawh mai ang,” a ti a. Elija chuan, “Mangang suh, hâwng la, in ei tûr chu va siam rawh. Amaherawhchu, chhang tlêm min han siamsak phawt la, mi han pe ang che, a bâk chu i tân leh i fapa tân i siam dâwn nia. Lalpa, Israel-te Pathian chuan heti hian a ti: ‘Ruah ka sûrtîr hma chu chhangphut bêl chu a ruak lo vang a, hriak bûr chu a kang hek lo vang’ a ti e,” a ti a. Hmeithai chu a kal a, Elija sawi ang chuan a va ti a; tichuan, an vaia ni rei tak ei tûr chhang a lo awm ta a. Lalpan Elija hnêna a sawi ang chuan chhangphut bêl chu a ruak lo va, hriak ûm pawh a kang hek lo. Chumi hnu chuan hmeithai fapa chu a dam lo va, a na chu a zual tawlh tawlh a, a thi ta hial a. Hmeithai chuan Elija hnênah, “Pathian mi, engati nge hetianga mi tih le? Pathian hmaa ka sualna târ lang tûr leh ka fapa tihlum tûra lo kal i nih hi le,” a ti a. Elija chuan, “I fapa chu mi han pe teh,” a ti a. A nu pawm lai chu a lâksak a, a chênna pindan chungnungah a pawm chho va, ama khumah a muttîr a. Ring takin a ṭawngṭai a, “Aw Lalpa, ka Pathian, engtizia nge he thil ṭha lo tak hi he hmeithai chungah hian i thlentîr le? He nu hi a ngilneiin min ti ṭha hle si a, engati nge a fapa hi i tihhlum mai le?” a ti a. Tichuan, naupang chungah chuan vawi thum a bawk a, a ṭawngṭai a, “Aw Lalpa, ka Pathian, he naupang hi tidam leh teh,” a ti a. Lalpa chuan Elija ṭawngṭai chu a chhâng a, naupang chu a lo thaw chhuak a, a dam leh ta a. Elija chuan naupang chu a nu hnênah a chhukpui a, a hnênah, “Hei i fapa chu a dam leh ta e,” a ti a. Hmeithai chuan, “Pathian mi i ni a, Lalpa chuan i hnênah thu a sawi tih tûnah ka hre ta,” a ti a. Kum thum lai khua a khen hnu chuan Lalpa thu chu Elija hnênah a lo thleng a, “Ahaba hnênah va kal rawh, ruah ka sûrtîr dâwn e,” a ti a. Elija chu Ahaba hmu tûrin a kal ta a, Samaria ramah chuan ṭâm chu a na hle a. Ahaba chuan lal in enkawltu Obadia a ko va, ani chu Lalpa ṭih mi tak a ni a. Jezebelin Lalpa zâwlnei a thah chiam lai khân Obadia hian zâwlnei za a hruai a, pâwl hniha siamin sawmnga ve vein pûkah a thukru a, chaw leh tui a pe ṭhîn a. Ahaba chuan Obadia hnênah, “Hawh teh, luikawr zawng zawng fang ila, tui i va zawng teh ang. Sakawr leh sabengtungte hi kan chhanhim theih nân hlobet awmnate i va zawng teh ang; chutilo zawng, rante hi kan chân vek dah ang e,” a ti a. Fan tûr ram an insem a, Ahaba leh Obadia chu mual hran ve veah an kal ta a. Obadia chu a kal zêl a, kawngah chuan Elija a tâwk thut a, Obadia chuan ani chu a hria a, kûnin chibai a bûk a, a hnênah, “Ka pu Elija, nang i ni maw?” a ti a. Ani chuan, “Ni e, keimah ka ni; kal la, i pu hnênah, Elija hetah a awm tih va hrilh rawh,” a ti a. Obadia chuan, “Eng nge ka tihsuala i chhiahhlawh hi thi tûra Ahaba kuta mi hlan i tum? Lalpa, i Pathian nung chhâlin ka sawi e, ka puin ram tin mi tin zîngah a zawng mêk che asin. ‘Hetah a awm lo’ titu chu lalin an hmu lo ngei che a ni tih fiah nân chhia a chhamtîr ziah ṭhîn. Nang erawh chuan ka pu hnênah kala, ‘Elija chu hetah a awm,’ tih hrilh tûrin mi ti a. Ka kalsan hnu chein Lalpa Thlarauvin ka hriat lohna lamah a hruai daih ang che a, Ahaba ka va hrilha, a hmuh si loh che chuan min that mai dâwn asin. Kei i chhiahhlawh hi ka tleirâwl chhuah ata Lalpa betu ka ni a. Ka pu hian Jezebelin Lalpa zâwlneite a thah chiam laia ka thiltih kha i hria a ni lâwm ni? Lalpa zâwlnei za, pâwl hniha siamin sawmnga ve ve pûkah ka thukru a, chaw leh tui ka pêk ṭhin kha. Tûnah ka pu hnêna kal a, ‘Elija hetah a awm,’ tih thu va hrilh tûra min ti mai hi min lo that ngei dâwn asin,” a ti a. Elija chuan, “A rawng ka bâwl, Lalpa, Engkim Lalpa, mi nung hmingin vawiinah Ahaba hnênah ka inlan ngei ngei tûr a ni,” a ti a. Obadia chu Ahaba hmu tûr chuan a kal ta a, a va hrilh a; Ahaba chu zâwlnei Elija hmu tûrin a kal ta a. Ahaban Elija a hmuh chuan a hnênah, “Israel ram chawkbuaitu chu hetah hian a ni maw i lo awm?” a ti a. Elija chuan, “Israel-te ka tibuai hlei nêm; nangmah leh i pa hi a tibuaitute chu in ni zâwk e. Lalpa thupêk in pawisa lo va, Baal te in be vei a. Tûnah, Israel mi zawng zawng min hmu tûrin Karmel tlângah ko khâwm rawh; Baal zâwlnei zali leh sawmnga leh Aseri zâwlnei zali, Jezebeli châwmte chu rawn hruai ang che,” a ti a. Ahaba chuan Israel ram pumah thu a than a, Baal zâwlneite chu Karmel tlângah a ko khâwm a. Elija chu mipui zîngah a lo ding chhuak a, an hnênah, “Tuilairapin eng chen nge in awm dâwn? Lalpa chu Pathian a nih chuan bia ula. Baal chu Pathian a nih leh bia ang che u,” a ti a, Mipui chu an ngawi reng a. Elija chuan mipui hnênah, “ Lalpa zâwlnei la dam chhun ka ni a, Baal zâwlneite erawh chu zali leh sawmnga lai an ni. Bâwngpa pahnih han la ula, pakhat chu Baal zâwlneite pual atân talh sela; chan sawm sela, thing chungah dah sela hâl rih suh se. Bâwngpa dang chu keiin ka buatsaih ve ang a, thing chungah ka dah ang a, ka hâl bîk lo vang. Nangni Baal zâwlneiten in pathian in ko vang a, keiin Lalpa ka ko vang a, meia rawn hâltu zâwk chu Pathian dik a ni ang,” a ti a. Mipui chuan, “Ni ang hmiang,” an ti a. Elija chuan Baal zâwlneite hnênah, “Nangni in tam zâwk a, bâwngpa pakhat hi buatsaih hmasa rawh u, in pathian chu ko ula hâl erawh chu hâl suh u,” a ti a. An puala bâwngpa ruat chu an la a, an buatsaih a, “Aw Baal, min han chhâng teh,” tiin zîng aṭangin chhûn thlengin an au an au va, an maichâm siam chu an lâm hual an lâm hual a; mahse, a rawn chhâng lo. Chhûnah chuan Elija chuan nuihzatbûr chungin, “Au ta vak vak che u, pathian a ni lâwm ni? A inngaihtuah mêk emaw, a inthiar emaw, a zin emaw a ni mai thei! A muhîl a ni ang, kaitho rawh u,” a ti a. An au ring tawlh tawlh a, an tih ṭhin dân angin chemte leh feiin thisen chhuak zawih zawih khawpin an invit a. Ni a lo thlang her a, tlai lam inthawi hun thlengin an au dual dual a, tu mah chhângtu an awm lo va, thâwm eng mah hriat a ni lo. Elija chuan mipui hnênah, “Lo kal hnai teh u khai,” a ti a. Mite chuan an va hnaih a, Lalpa maichâm chim rem rum chu a siam ṭha a. Lalpan, “I hming chu Israela an ti ang,” tia a lo sawi Jakoba fa sâwm leh pahnih pualin lung sâwm leh pahnih Elija chuan a la a. Chûng lung chuan Lalpa tân maichâm a siam a. Maichâm vêl chuan lei a lai khuar a, chu chu tui litar sâwm leh pali dawng lai a ni. Maichâm chungah chuan thing a chhep a, bâwngpa chu a chan sawm a, thing chungah chuan a dah a. Mite hnênah, “Bêl pali-ah tui chhûng khat ula, hâlral thilhlan leh thing hi leih huh vek rawh u,” a ti a. An leih huh ta vek a, vawi thum an leih nawn a, maichâm vêla lei laih khuar khat vek khawpin maichâm chu an leih huh hnêp a. Tlai lam inthawi hunah zâwlnei Elija chuan maichâm chu a rawn pan hnai a, a ṭawngṭai a, “Aw Lalpa, Abrahama te, Isaka te, Jakoba te Pathian, Israel Pathian i nih te, i thupêka hêng thil hi ti ka nih te tûnah han târ lang teh. Aw Lalpa, ka ṭawngṭai ngaithla la, min han chhâng teh! Tichuan, hêng mite hian Lalpa Pathian chu i ni tih an hria ang a, simin i lamah an lo kîr leh dâwn nia,” a ti a. Lalpa chuan mei a rawn tîr a, hâlral thilhlan te, thing te, lung te chu a kâng ral vek a, lei pawh a kâng sen huam a, khuara tui tling chu a hîp kang vek a. Mipuiin chu chu an hmuhin leiah an bawkkhup a, “ Lalpa hi Pathian chu a ni, Lalpa hi Pathian chu a lo ni ngei e,” tiin an au chhuak a. Elija chuan mipui hnênah, “Baal zâwlneite hi tu mah chhuah lovin man vek rawh u,” a ti a. Mite chuan an man a, Elija chuan Kison ruamah a hruai thla a, chutah chuan a that ta vek a. Elija chuan Ahaba hnênah, “Khai le, eiin in tawh rawh, ruah a lo sûr dâwn tawh e,” a ti a. Ahaba chu ei leh in tûrin a kal ta a. Elija erawh chu Karmel tlâng chhîp lamah a chho va, a khûp kârah a kûn reng a. A chhiahhlawh hnênah chuan, “Kal chhuak la, tuifinriat lam han thlîr teh,” a ti a. Ani chu a tho va, a han hawi vêl a, “Eng mah ka hmu lo,” a ti a. Elija chuan chutianga hawi vêl tûrin vawi sarih lai a kaltîr a. A vawi sarihnaah chuan a chhiahhlawh chuan, “Tuifinriat aṭangin kuttum tiat lek chhûm a lo chho nel nel e,” a ti a. Elija chuan a chhiahhlawh hnênah, “Kal la, Ahaba chu a tawlailîr buatsaiha chhuak vat tûrin hrilh rawh, ruahin a dang dah ang e,” a ti a. Rei lo teah chhûm dum vânah a lo lang tup tup a, thlite a lo tleh ta hum hum a, ruahpuivânâwn a lo sûr ta a; Ahaba chu a tawlailîrah a zuang lût a, Jezreel lamah a tlân haw ta a. Lalpa thiltihtheihna chu Elija chungah a lo thleng a, a kawrfual chu a kâwngah a vêt chhîng sauh sauh va, Jezreel panin Ahaba chu a tlân pêl ta a. Ahaba chuan Jezebeli hnênah Elija thiltih zawng zawng, zâwlneiho khandaiha a thah thute chu a hrilh a. Jezebeli chuan Elija hnênah, “Zâwlneiho chunga i tih angin naktûk tûn ang huna ka thah loh vaih che chuan pathianten an tih tihin min ti sela, nasa tak pawhin min sawisa rawh se, a ti,” tia hrilh tûrin mi a tîr a. Elija chuan a hlau va, himna zawngin a tlânchhe ta a. Judai rama Beer-seba a lo thleng a, chutah chuan a chhiahhlawh chu a hnutchhiah a. Ani chu thlalêrah nilêngin a kal leh a, thingbuk hnuaiah a ṭhu a, thih a dîl ta a, “Ka tlin ta lo, aw Lalpa, ka nun hi la mai teh, ka tân thih a ṭha zâwk e,” a ti a. Thingbuk hnuaiah chuan a mu a, a lo muhîl ta a. Vântirhkoh hian a rawn khawih harh a, a hnênah, “Tho la, ei rawh,” a ti a. A han hawi a, a lu bulah chuan chhang ur hmin sa leh tuithâwl a lo awm a. Chhang chu a ei a, tui a in bawk a, a mu leh ta a. Lalpa tirhkoh chu a lo kal leh a, a rawn khawih harh a, “Tho la, ei rawh, i kalna tûr a la hla hle si a,” a ti a. A tho va, a eiin a in a, a thil ei chuan a tichak thar leh ta a. Pathian tlâng Horeb a thlen thlengin ni sawmli leh zan sawmli a kal a. Chuta pûk pakhatah chuan riak tûrin a lût a. Tin, Lalpa chuan a hnênah, “Elija, hetah hian eng nge i tih?” a rawn ti a. Ani chuan, “Engkim Lalpa tân ṭhahnem ka ngai êm êm ṭhîn a; mahse, Israel-te chuan i thuthlung an bawhchhia a, i maichâm an tichim a, i zâwlneite khandaihin an that a; kei chauh hi ka la dam a, kei pawh hi min thah an tum a nih hi,” a ti a. Lalpa chuan a hnênah, “Lo chhuak la, tlângchhîpah lo kal la, Lalpa hmaah lo ding rawh,” a ti a. Lalpa chu a lo kal a, thlipui na tak a rawn tlehtîr a, tlâng chu a chhêm chim a, lungpuite a chhêm keh rem rum a; mahse, thliah chuan Lalpa chu a awm lo. Thli chu a reh a, lîr a nghîng leh dur dur a, lîrnghîngah chuan Lalpa chu a awm lo. Lîr nghîn zawh chuan mei a lo chhuak a; mahse meiah pawh chuan Lalpa chu a awm lo. Mei a lo chhuah zawhah chuan ri lo aw a lo chhuak a. Elijan a han hriat chuan a kawrfualin a hmai a hup a, pûk kawngkaah a lo ding chhuak a, aw chuan, “Elija, hetah hian eng nge i tih?” a ti a. Ani chuan, “Engkim Lalpa tân ṭhahnem ka ngai êm êm a; mahse, Israel-te chuan i thuthlung an bawhchhia a, i maichâmte an tichim a, i zâwlneite khandaihin an that a, kei chauh hi ka la dam a, kei pawh hi min thah an tum a nih hi,” a ti a. Lalpa chuan a hnênah, “Thlalêr kawngah kîr leh la, Damaska khuaah lût la, Hazaela chu Suria lal atân hriak thih la, Nimsia fapa Jehua pawh Israel lal atân hriak thih bawk ang che. Tin, Abel Mehola khuaah Safata fapa Elisa chu i aiawha zâwlnei ni tûrin hriak thih bawk ang che. Hazaela khandaih pumpelh apiang Jehuan a that ang a, Jehua khandaih pumpelh chu Elisan a lo that ang. Israel ramah hian Baal hmaa la ṭhingṭhi ngai lo leh la fâwp ngai lo mi sângsarih ka tân ka zuah dâwn a ni,” a ti a. Elija chu a chhuak a, Safata fapa Elisa ho chuan bâwngpa tuak sâwm leh pahnih lei letah an lo chhawr a, a tuak sâwm leh pahnihna chu Elisa chuan a khalh a. Elija chuan a va pan a, a puan sin lai chu a bahtîr a. Elisa chuan a bâwngte chu a tlânsan a, Elija chu a ûm ta a. Elija hnênah chuan, “Ka nu leh pa ka va chibai zet ang e; tichuan, ka rawn zui ang che,” a ti a. Elija chuan, “Va kal rawh, i chunga ka thiltih kha i hria alâwm maw?” a ti a. Elisa chu a kîr leh ta a, a bâwng chhawr laite chu a va talh a, leilehna hmanruate chu a sa chhum nân a hmang a, sa chu mite a pe a, an ei a. Tichuan, Elija zui tûrin a chhuak a, a rawng a bâwlsak ta a. Suria lal Ben-hadada chuan a sipai rual a khâwm a, lal sawmthum leh pahnihin an sakawr leh tawlailîrte nên an ṭanpui a. Samaria khua an pan a, an bei ṭan ta a. Ani chuan khawpui chhûngah mi a tîr a, Israel lal Ahaba hnênah chuan, “I hausakna zawng zawng leh in nupui fanaute nên khân inpe rawh u,” tiin a vau va. Israel lal chuan “Aw lalber ka pu, i sawi ang chuan kei leh ka neih zawng zawng hi i ta a ni e,” a ti a. Ben-hadada chuan Ahaba hnênah mi a tîr leh a, “In tangkarua leh rangkachak te, in nupui fanau te nên inpe rawh u ka ti tak na a, naktûk tûn ang hunah ka mite ka rawn tîr zâwk ang e; lal in leh milianhovin an rawn dap ang a, in ro hlu zawng zawng an rawn lâksak ang che u,” a ti a. Israel lal chuan ram hruaitu zawng zawng a ko khâwm a, an hnênah, “He mi hian mi tihboral a tum tih in hria e, ka nupui leh fanau te, ka tangkarua leh rangkachak te a rawn ngên a, ka lo remti a ni,” a ti a. Hruaituho leh mipui chuan, “A thu pawisa suh la, a dîl pawh eng mah pe suh,” an ti a. Ahaba chuan Ben-hadada hnênah mi a tîr a, “Lalber ka pu chu hetiangin va hrilh rawh u, ‘I chhiahhlawh hian i dîl hmasak zâwk chu ka remti a, a hnuhnûng erawh chu ka remti thei lo,’ a ti,” tiin mi tirhte chuan a sawi ang chuan an va sawi a. Ben-hadada chuan hetiangin a rawn sawi lêttîr leh a. “Samaria khua tichhe vek tûrin ka mite tam tak ka rawn tîr ang, eng mah an zuah lo vang. Chutianga ka tih loh vaih chuan pathianten an duh tâwkin min sawisa mai rawh se,” a ti a. Israel lal chuan, “Sipai huaisen zawng indo hma ni lovin indo zawhah a nia an uan ṭhin tih va hrilh rawh u,” a ti a. Ben-hadada leh a ṭanrualpui lalte chuan an puan ina zu an in lai chuan chu thu chu an lo hria a, a sipaite chu khawpui bei tûrin thu a pe a, an insiam ta a. Chutih lai chuan zâwlnei pakhat hi lal Ahaba hnênah a lo kal a, “ Lalpa chuan heti hian a ti: ‘Hêng sipai rual tam tak hi hlau reng reng suh, vawiinah i kutah ka pe dâwn a ni; tichuan, Lalpa ka ni tih i hria ang,’ a ti,” a rawn ti a. Ahaba chuan, “Tu-in nge ho vang?” a ti a. Zâwlnei chuan, Lalpan heti hian a ti: ‘Ram bung hrang awptu hnuaia sipaiho thlan chhuahten an ho vang,’ a ti,” a ti a. Ahaba chuan, “Tu nge hruai ang?” a ti a. Zâwlnei chuan “Nangin le,” a ti a. Ahaba chuan ram bung hrang hrang awptute hnuaia sipai thothâng ṭha tak takte chu a ko khâwm a, an vaiin zahnih sawmthum pahnih an ni. Israel sipai zawng zawng a ko khâwm leh a, an vaiin sângsarih an ni a. Chhûnah an bei ṭan a, Ben-hadada leh a ṭanrualpui lal sawmthum leh pahnih chu an puan inah an lo rui hle a. Ram bung hrang awptute hnuaia sipai thlante chuan an rawn pan a, Ben-hadada dah râlvêngtu chuan, “Samaria khua aṭangin sipai an lo thawk chhuak e,” a ti a. “Rem thu sawi tûr an ni emaw, min rawn bei tûr an ni emaw a nung chungin lo man rawh u,” a ti a. Ram bung hrang awptute hnuaia sipai thlante chuan an rawn bei a, anmahni zuitu sipai dangte chuan an rawn pui a. Mi tinin an bitum chu an that ta ṭheuh va, Suria-ho chu an tlânchhe ta a. Israel-hote chuan an ûm a, Suria lal Ben-hadada chu a sakawr chungchuang mi ṭhenkhat nên an tlân chhuak hrâm a. Israel lal chuan a va pan a, sakawr leh tawlailîrte chu a bei a, Suria mite chu a that ṭeuh va. Lal Ahaba hnênah zâwlnei chu a lo kal leh a, a hnênah, “Hâwng la, sipai lâk belh sauh sauh rawh, fîmkhur takin thil ruahman ang che, nakkum ṭhâlah Suria lal hian a rawn bei leh dâwn che a ni,” a ti a. Suria lal hnênah a ṭhuihruaite chuan, “Israel Pathiante chu tlângram Pathian an ni a; chuvângin, alâwm kan hneh loh, phaizâwlah bei ila kan hneh ngei ngei ang. Lal sawmthum leh pahnihte chu an thuneihna chhuhsak vek la, an aiawhtu tûr hruaitu dang ruat rawh. Sipai i hloh zât chiah la thar leh la; chutiang bawkin sakawr leh sakawr-tawlailîrte pawh buatsaih leh ang che. Tichuan, Israel-te chu phaizâwlah kan bei ang a, kan hneh tawh ang,” an ti a. Benhadada chuan an thurâwn ang chuan a ti a. A kum leh ṭhalah chuan Ben-hadada chuan a sipaite chu a khâwm a, Israel-te bei tûrin Afek khuaah a chho va. Israel-te pawh chu an pung khâwm a, ei tûrte an chhêk a. An lo thawk chhuak a, Suria-ho epah chuan hmun hnihah ṭanhmun an khuar a. Suria-ho lakah chuan Israel-te chu kêlno tlêm tê bawk khâwm ang lek an ni a. Suria-ho erawh chu a ram khahin an khat mup a. Zâwlnei pakhat hi Israel lal Ahaba hnênah a lo kal a, “ Lalpa chuan heti hian a ti: ‘Suria-hovin Lalpa chu tlângram Pathian a ni a, phaizâwl Pathian zawng a ni lo an tih avângin hêng sipai tam tak hi i kutah ka pe ang a, nang leh i mite hian Lalpa chu ka ni tih in hria ang,’ a ti e,” a ti a. Ni sarih chhûng Suria-ho leh Israel-te chu an ṭanhmunah chuan an inep a, a ni sarih ni chuan an inbei ṭan ta a. Israel sipaite chuan Suria sipai nuai khat lai ni khat chhûngin an that a. A la dam zawng chu Afek khaw chhûngahte an tlân lût a, kulh bang chimin mi sînghnih leh sângsarih a delh hlum leh a; Ben-hadada chu khawpuiah a tlân lût a, pindan chhûngrilah a biru a. A hote chuan a hnênah, “Ngai teh, Israel lalte chu an ngilnei hle ṭhîn tih kan hria a, saiip puan vengin kan lu-ah hruizên kan vêt ang a, Israel lal hnênah min va kaltîr la, anin a zuah mial mahna che,” an ti a. Tichuan, saiip puan an fêng a, an nghâwngah hruiin an hlîng a, Israel lal hnênah chuan an va kal a, a hnênah, “I chhiahhlawh ‘Ben-hadada chuan, khawngaih takin min zuah hrâm rawh se,’ a ti e” an ti a. Ahaba chuan, “A la dam a ni maw? Ka unaupa a ni alâwm,” a ti a. Mite chuan ngaihṭha takin, “Aw, i unaupa a ni e,” an lo ti ve var a. Lal chuan, “Va kal ula, rawn hruai rawh u,” a ti a. Ben-hadada chu a lo chhuak a, Ahaba chuan a bulah tawlailîra chuang ve tûrin a sâwm a. Ben-hadada chuan, “Ka pain i pa khua a lo lâksakte chu ka pe kîr leh ang che a, ka pain sumdâwnna hmun Samaria khuaa a siam ang khân Damaska khuaah i siam ve dâwn nia,” a ti a. Ahaba chuan, “Chutianga thu i tiam avâng chuan ka chhuah leh ang che,” a ti a. Zâwlneiho zînga pakhat hian Lalpa thupêkin a zâwlneipui pakhat hnênah, “Mi han vaw teh khai,” a ti a. Ani chuan a vaw duh lo va. Zâwlnei chuan, “ Lalpa thu i awih loh avângin mi kalsan veleh sakeibakneiin a lo seh ang che,” a ti a. Chu mi chu a kal chhuak a, sakeibaknei chuan a lo seh hlum a. Zâwlnei chuan mi dang a va hmu a, a hnênah, “Mi han vaw teh,” a ti leh a. Ani chuan na takin a vua a, a sil ta a. Zâwlnei chuan a hmêl thup nân a hmai puanin a tuam a, Israel lal lo kal nghâkin kawng sîrah chuan a ding a. Lal a lo kal chuan zâwlnei chuan a lo au va, a hnênah, “I chhiahhlawh hi indona hmunah ka kal a, mi pakhat hi a sal man nên a lo kal a, ‘He mi hi vêng rawh, a tlân bo chuan a aiah ka that ang che, anih loh leh tangka zathum i chawi ang,’ min ti a. I chhiahhlawh hian thil dang ka tih buai laiin ani chu a tlân bo ta daih mai si a,” a ti a. Israel lal chuan, “I thiam lo a nih chu, a mawh chu nangman i phur tûr a ni,” a ti a. Chu veleh zâwlnei chuan a mit tuamna a phelh a, Israel lal chuan zâwlneiho zînga pakhat kha a ni tih a hre ta a. Lal hnênah, “ Lalpa chuan heti hian a ti: ‘Mi thi tûra ka ruat i chhuah avângin a thih ai i thi ang a, a mite tuar ai i miten an tuar ang,’ a ti,” a ti a. Israel lal chu thinur ṭeuh leh lunghnûr takin Samaria khuaah a haw ta a. Jezreel khuaa Samaria lal Ahaba in kiangah chuan Jezreel mi Nabota an tih chuan grep huan a nei a. Ahaba chuan Nabota hnênah, “Ka in kianga i grep huan hi thlai huan atân min pe rawh. A aiah grep huan ṭha zâwk ka pe ang che, i duh zâwk phei chuan, a man âwm tâwk tangka ka pe ang che,” a ti a. Nabota chuan Ahaba hnênah, “Kan pute hun lai aṭanga kan huan ro a ni a, chutiang han pêk che chu Lalpa ngaihin a âwm lo ve,” a ti a. Jezreel mi Nabotan, “Kan pute huan ro ka pe thei lo vang che,” a tih avângin lunghnûr tak leh thinur ṭeuhvin Ahaba chu a in lamah a hâwng ta a. Bang lam hawiin a khumah a mu a, chaw a ei duh ta lo va. A nupui Jezebeli chu a va kal a, a hnênah, “Engtizia nge i ngui bûra, chaw i ei duh loh le?” a ti a. Ani chuan, “Jezreel mi Nabota chu a grep huan leiah ka dîl a, a duh zâwk phei chuan a aiah grep huan dang ka pe ang che ka ti a. Ani chuan, ‘Ka grep huan zawng ka pe lo vang che,’ tiin min chhâng alâwm maw le,” a ti a. A nupui Jezebeli chuan a hnênah, “Tho la, hlim takin chaw ei rawh, Jezreel mi Nabota grep huan neihsak dân tûr keiman ka ngaihtuahsak ang che,” a ti a. Tichuan, Ahaba hmingin lehkha a ziak a, a chhinchhiahna a chhu a, Nabota awmna khuaa awm ve upate, rorêltute chu a thawn a. Heti hian a ziak a, “Chaw nghei ni puang ula, mipui ko khâwmin Nabota chu mipui hmaah ṭhuttîr ula, mi sual pahnih amah hêktu tûr a hma zâwnah ṭhuttîr ula, ‘Pathian leh lal i sawichhia a ni,’ tiin hêk sela, khua ata hnûkchhuak ula, dêng hlum ang che u,” tiin. Tin, Nabota chênna khaw upate leh rorêltute chuan Jezebelin tih dân tûr a hrilh ang chuan an ti ta a. Chaw nghei ni an puang a, mipui an ko khâwm a, Nabota chu a laiah an ṭhuttîr a. Mi sual pahnih hian, “Pathian leh lal a sawichhia a ni,” tiin an hêk a. Nabota chu khua ata an hnûk chhuak a, an dêng hlum ta a. Jezebeli hnênah chuan, “Nabota chu a thi ta,” tiin an hrilh a. Jezebelin Nabota an dêng hlum ta tih a hriat veleh Ahaba hnênah chuan, “Tho la, Jezreel mi Nabota grep huan, a leitîr phal loh che kha, va neihsak rawh le, ani chu a thi tawh e,” a ti a. Ahaba chuan Nabota a thi tawh tih a hriat chuan a grep huan neihsak tûr chuan a chhuak ta a. Lalpa thu chu Tisbe mi Elija hnênah a lo thleng a, “Tho la, Samaria khuaa awm Israel lal Ahaba hmu tûrin kal tawh. Tûnah Nabota grep huan neihsak tumin chutah chuan a awm e. A hnênah, Lalpa chuan heti hian a ti: ‘Nabota tihhlum tâwk ti lovin a huan leh zêl neihsak i tum elo?’ va ti rawh, Lalpa chuan heti hian a ti: ‘Ui-in Nabota thisen an liahna hmun ngeiah hian i thisen an liak ang,’ ” a ti a. Ahaba chuan Elija hnênah, “Mi hre chhuak ta a ni maw ka hmêlma pa?” a ti a. Elija chuan, “Aw, ka rawn hre ta che a nih hi, Lalpa mit hmuha thil dik lo ti tûrin inhralh ta hek che. I chungah chhiatna ka rawn thlentîr dâwn a ni. In chhûngkuaa mipa fa tawh phawt chu naupang leh tar pawh, nangmah nên ka tiboral vek ang che u. I chhûngkua chu Nebata fapa Jeroboama chhûngkua ang leh Ahija fapa lal Baasa chhûngkua angin ka sawisa ang; min tithinur tûra Israel-te i hruai sual tâk avângin. Lalpa chuan Jezebeli chungthu pawh heti hian a ti: ‘Jezreel khawpuiah ui-in a sa an la ei ang. Ahaba chhûngkaw zînga mi khawpuia thi apiang ui-in an ei ang a, ramhnuaia thi apiang chunglêng savaten an tlân ang,’ ” a ti a. A nupui Jezebeli fuihpawrha Lalpa mit hmuha thil ṭha lo ti tûra inpe Ahaba ang hi tu mah an awm rêng rêng lo. Israel-te hmaa Lalpa hnawh chhuah Amor-ho angin Ahaba hian milemte a bia a, thil tenawm tak tak a ti ṭhîn. Elijan chutiang thu a hrilh zawh chuan Ahaban a puan a pawtthlêr a, saiip puan a sin a, chaw a nghei a, saiip puan chungah a mu a, ngui takin a awm ta a. Lalpa thu chu Tisbe mi Elija hnênah a lo thleng a, “Ahaba ka hmaa a inngaihtlâwmzia hi i hria maw? Hetianga a inngaihtlâwm avângin a dam chhûng chuan a chungah chhiatna ka thlentîr lo vang a, a fapa hun chhûngin a chhûngte chungah chhiatna ka thlentîr ang,” a ti a. Kum thum chhûng chu Suria-ho leh Israel-te chu indo lovin an awm a. A kum thum kum chuan Juda lal Jehosafata chu Israel lal Ahaba hnênah a zu kal a. Israel lal chuan a upate hnênah, “Gilead rama Ramot khua hi kan ta a ni reng si a, engtizia nge Suria lal hnên ata kan lâk lêt loh?” a ti a. Jehosafata hnênah chuan, “Ramot khua mi han beihpui peih em?” a ti a. Jehosafata chuan Israel lal hnênah chuan, “Kal i peih hun hunah kei leh ka sipaite chu kan inpeih alâwm, kan pui ang che. Amaherawhchu, Lalpa, i râwn hmasa zet teh ang,” a ti a. Ahaba chuan zâwlnei zali rual lai chu a ko va, “Ramot khua ka han bei ang em?” tiin a râwn a. Anni chuan, “Bei rawh, Lalpa chuan a hnehtîr ang che,” an ti a. Jehosafata chuan, “Zâwlnei dang, Lalpa min râwnsak tûr an awm lâwm ni?” a ti a. Israel lal chuan Jehosafata hnênah, “Imla fapa Mikaia chu a awm. Ani hian thil ṭha eng mah min hrilh lâwksak ngai lo va, ka ngei hle asin. Thil ṭha lo eng emaw a hril lâwk zêl ṭhîn a ni,” a ti a. Jehosafata chuan, “Lal meuhvin chuti êma tih tûr em ni le?” a ti a. Lal chuan hotu pakhat a ko va, Mikaia hruai tûrin a tîr a. Lal pahnih chu Samaria khawpui kawngkhâr pâwn hruihah, lalṭhutthlêng an chhawpah chuan an ṭhu a, zâwlnei rual chuan an kal hual a, thu an hril bual bual a. An zînga pakhat, Kenaana fapa Zedekia chuan thîr, seki lem a siam a, Ahaba hnênah, “ Lalpa chuan heti hian a ti: ‘Suria-ho chu hêng hian i bei ang a, i tudawl dêr ang,’ a ti,” a ti a. Zâwlnei dangte pawh chuan chutiang bawk chuan an ti a, “Kal la, Ramot khua chu han bei rawh, i hneh ngei ang, Lalpa chuan a hnehtîr ang che,” an ti a. Mikaia hruaitu tûra an tirh chuan a hnênah, “Zâwlnei dang zawng zawngin a ṭha lamin lal hnênah thu an puang a, nang pawhin chutiang chuan ti ve mai ta che,” a ti a. Mikaia chuan, “ Lalpa, mi nung hming chhâlin ka sawi e, Lalpa chuan sawi tûra min tih chauh ka sawi ang,” a ti a. Lal Ahaba hnên a va thlen chuan lal chuan, “Mikai, Gilead rama Ramot khua hi kan han bei ang nge bei lo vang?” a ti a. Mikaia chuan, “Han bei teh rêng u, in hneh mawlh ang, Lalpa chuan hnehtîr che u ang hmiang,” a ti a. Ahaba chuan, “ Lalpa hminga ka hnêna thu i sawiin thu dik chauh min hrilh rawh vawi eng zât nge ka tih dâwn che,” a ti a. Mikaia chuan, “Vêngtu nei lo berâm angin Israel mite chu tlânga an darh chum chum ka hmu, Lalpa chuan heti hian a ti: ‘Hêng mite hian hruaitu an nei lo, thlamuang takin mahni in lamah hâwng mai rawh se,’ a ti e,” a ti a. Ahaba chuan Jehosafata hnênah, “Ngai ta che, ka tâna thil ṭha tûr eng mah a sawi ngai lo tih ka hrilh che kha, thil ṭha lo lam hlîr a ni a sawi ṭhin,” a ti a. Mikaia chuan a sawi zêl a, “ Lalpa thu hi lo ngaithla teh. Vâna a lalṭhutthlêngah Lalpa ṭhu ka hmu a; Vântirhkohte chuan an din hual a. ‘Tu nge Ahaba hnênah zu chhuk ang a, Ramot beia thi tûrin zu bum ang?’ Lalpa chuan a ti a. Vântirhkoh ṭhenkhat chuan thu khat an sawi a, a dangin thu dang an sawi bawk a. Thlarau pakhat hi a lo kal a, Lalpa hmaah chuan a va ding a, ‘Ka zu bum ang e,’ a ti a. Lalpa chuan, ‘Engtin nge i bum ang?’ a ti a. Thlarau chuan, ‘Ka zu kal ang a, Ahaba zâwlneite chu dâwt ka hrilh ang,’ a ti a. Lalpa chuan, ‘Kal la, zu bum rawh, i hlawhtling ngei ang,’ a ti a.” Mikaia chuan, “Chutiang chu a ni, Lalpa chuan hêng zâwlneite hi i hnênah dâwt a sawitîr a ni, Lalpa ngeiin i chhiatna tûr a ruat tawh a ni e,” a ti a. Zâwlnei Zedekia chuan Mikaia chu a pan a, a bêng a, “Engtik lai khân nge Lalpa thlarauvin min kalsana, i hnêna thu a sawi tâk le?” a ti a. Mikaia chuan a chhâng a, “Pindan chhûngrila i bihrûk hunah i hre mai ang,” a ti a. Ahaba chuan hotu pakhat hnênah, “Mikaia kha man la, khaw awptu Amona hnênah hruai la, Lal fapa Joasa pawh hmuhtîr rawh u. Dam têa ka lo kîr leh hma chu ripah khung sela, chhang leh tui chauh pe rawh se,” a ti a. Mikaia chuan, “Nungdama i lo haw chuan Lalpa hian mi be lo a ni ang. Ka sawi hi mi tinin hre rawh se,” a ti a. Lal Ahaba leh lal Jehosafata chu Gilead biala Ramot khua bei tûr chuan an kal ta a. Ahaba chuan Jehosafata hnênah, “Kan inbeih hunah, ka inchei danglam ang a, nang chu lal incheiin inchei zêl ang che,” a ti a. Lal Ahaba chu a inchei danglam a, inbeihnaah chuan a tel ve ta a. Suria lal chuan tawlailîr khalhtu hotu sawmthum leh pahnih chu, “Israel lal chauh lo chu tu mah bei suh ang che u,” a ti a. Chûngho chuan Jehosafata an hmuh chuan Israel lal emaw an ti a, an rawn bei ta a. Jehosafata chu a au chiam a, Tawlailîr khalhtu hotu chuan Israel lal a ni lo tih a hre ta a, a rawn ûm duh ta lo va. Suria sipai thal kâp mai mai hian lal Ahaba chu a râlthuam inkârah a kâp fuh palh a. A tawlailîr khalhtu hnênah chuan, “Hliam ka tuar e, lêt la, inbeihna hmun ata tlân chhuak rawh,” a ti a. An inbeih mup mup lai chuan Ahaba chu a tawlailîr bang nghêngin Suria mite lam hawiin an tung a. Thisen chu tawlailîr chhuata tling rui khawpin a chhuak a, tlai lamah chuan a thi ta a. Ni tlâk dâwn ruai chuan Israel sipai zawng zawng hnênah thu a lo thleng a, “Mi tin mahni khaw lamah hâwn vek tûr,” an ti a. Lal Ahaba chu a thi ta a, a ruang chu Samaria khuaah an hâwnpui a, an phûm ta a. A tawlailîr chu nawhchizuarte insilna ṭhin Samaria dîlah chuan an sil fai a; uite chuan a thisen chu an liak a, Lalpa sawi ang chu a lo thleng ta a ni. Lal Ahaba thiltih dangte, a lal in sainghova a chei dân te, khawpui a din ṭan te chu Israel lalte chanchin ziakna buah a chuang a. A thih hnu chuan a fapa Ahazia chu a aiawhin a lal ta a. Israel lal Ahaba lal kum linaah Asa fapa Jehosafata chu Judai ramah a lal ṭan a, Jehosafata chu a lal tirh chuan kum sawmthum leh panga a ni. Jerusalem-ah kum sawmhnih leh panga chhûng ro a rêl a. A nu chu Azubi, Silhia fanu a ni. A pa angin Pathian mit hmuha thil ṭha a ti ṭhîn. Milem biakna hmunsâng erawh chu a tichhe lo va; chuvângin, mipuite chu hmunsângahte chuan an la inthawi reng a, rimtuite an hâl ṭhîn. Jehosafata chu Israel lal nên an inrem a. Jehosafata thil tih dang, indonaa a huaisenzia te chu Juda lalte chanchin ziakna buah a chuang a. A pa Asa dam laia mipa leh hmeichhia milem biakna hmuna inzuar ṭhînte chu a tibo vek a. Edom ram chuan lal an nei lo va, Juda lalin a aiawhtu a dah a. Ofir rangkachak phur tûrin lal Jehosafata chuan lawng rual a siam a; mahse, Ezion-geber-ah a chhiat tâk avângin an zin ngai ta lo. Israel lal Ahazia chuan a mite chu Jehosafata mite nên zin ho se a ti a; mahse, Jehosafata chuan a duh lo va. Jehosafata chu a thi ta a, Davida khawpuia lalho thlânah an phûm a, a fapa Jehorama chu a aiawhin a lal ta a. Juda lal Jehosafata lal kum sâwm leh pasarih kumin Ahaba fapa Ahazia chu Israel-te chunga ro rêl tûrin Samaria khuaah a lo lal a. Kum hnih chhûng ro a rêl a. Lalpa duh loh zâwng thil sual a ti a; a pa Ahaba te, a nu Jezebeli te, lal Jeroboama te ang bawkin thil sual a ti a, Israel-te hruai sualtu a ni. A pu ang bawkin Baal pathian rawng a bâwl avângin Israel-te Pathian, Lalpa chu a tithinur hle a. Israel lal Ahaba a thih hnuin Moab-ho chu Israel lakah an hel a. Lal Ahazia chu Samaria khuaa a in chung zâwl aṭangin a tla a, a na hle a, a dam dâwn leh dâwn loh thu-ah Filistia-a Ekron khaw pathian Baal-zebuba râwn tûrin mi a tîr a. Lalpa Vântirhkoh chuan Tisbe mi Elija chu, “Tho la, Samaria lal mi tirhte tâwk tûrin kal rawh. Israel ramah Pathian a awm lo vem ni? Engtizia nge Ekron pathian Baal-zebuba râwn tûra in kal le? Lalpa chuan, ‘I kaina khum aṭang khân i lo chhuk leh tawh lo vang, i thi ngei dâwn,’ a ti,” ti tûrin a tîr a. Elija chu a kal ta a. Lal mi tirhte chu a hnênah an lo haw leh vat a; an hnênah, “Engtizia nge in lo kîr leh mai?” a lo ti a. Anni chuan, “Mi pakhatin min rawn tâwk a, ‘A tîrtu che u lal hnênah chuan kîr leh ula, Lalpa chuan heti hian a ti: Israel ramah Pathian a awm lo vem ni? Ekron pathian Baal-zebuba râwn tûra mi i tirh le? I kaina khum ata kha i lo chhuk leh tawh lo vang, i thi ngei ang, tiin hrilh rawh u,’ min ti,” an ti a. “Hêng thu sawia rawn tâwktu che u chu eng ang mi nge maw a nih le?” a ti a. Anni chuan, “Pa hmulphurh chhe tak a ni; savun kâwnghrên a hrêng,” an ti a. Ani chuan, “Tisbe mi Elija a nih chu,” a ti a. Lal chuan sipai hotu, a sipai sawmnga nên a tîr a. Ani chuan tlâng chhîpa Elija lo ṭhu chu a va hmu a, a hnênah, “Nang Pathian mi, lalin, ‘Lo chhuk rawh,’ a ti a che,” a ti a. Elija chuan, “Pathian mi ka nih tak zet chuan vân ata mei lo tla sela, nang leh i hote kha rawn kâng hlum che u rawh se,” a ti a. Vân aṭang chuan mei a lo tla a, sipaite chu an hotu nên chuan an kâng hlum ta a. Lal chuan sipai dang sawmnga leh an hotu a tîr leh a. Ani chu a chho va, Elija hnênah, “Nang Pathian mi, lal chuan lo chhuk thuai tûrin a ti a che,” a ti a. Elija chuan, “Pathian mi ka nih tak zet chuan vân ata mei lo tla sela, nang leh i hote kha kâng hlum che u rawh se,” a ti a. Pathian mei chu a lo tla ta nghâl a, sipai hotu chu a hote nên chuan an kâng hlum ta a. Lal chuan sipai sawmnga dang, an hotu nên a tîr leh a. Tlângah chuan a han chho va, Elija hmaah chuan a ṭhingṭhi a, “Aw Pathian mi, kei leh ka hote hi min khawngaih la, kan nunna hi min zuahsak teh. Sipai hotu pahnih lah an hote nên vân aṭanga lo tla meiah an kâng hlum a, keini hi chu khawngaih takin min zuah teh,” a ti a. Lalpa vântirhkoh chuan Elija hnênah, “A rualin chhuk rawh, hlau suh,” a rawn ti a. Tichuan, a tho va, a rual chuan a chhuk a, lal hmu tûr chuan a kal ve ta a. Lal hnênah chuan, “Ekron pathian Baal-zebuba râwn tûrin mi i tîr vei maw? Israel ramah râwn tûr Pathian a awm lo vem ni? I kaina khum ata kha i lo chhuk leh tawh lo vang, i thi ngei ang,” a ti a. Elija sawi Lalpa thu ang chuan Ahazia chu a thi ta a. Ahazia chuan fapa a nei lo va, Judai ram lal Jehosafata fapa Jehorama a lal kum hnih kum chuan a nau Jorama chu a aiah a lal ta a. Lal Ahazia thiltih dang zawng chu Israel lalte chanchin ziakna buah a chuang. Lalpa chuan Elija chu ṭhâwngaleivira vâna a lâk chhoh hun a lo thleng ta a. Elija leh Elisa chu Gilgal aṭang chuan an kal chhuak a, kawnga an kal lai chuan, “Hetah hian lo awm teh, Lalpa chuan Bethel-a kal tûrin min tîr e,” Elija chuan a ti a. Elisa erawh chuan, “Pathian nung leh i nunna chhâlin ka sawi e, ka awmsan tawp lo vang che,” a ti a. Bethel-ah chuan an kal dûn ta a. Chumi laia zâwlnei rual awmte chu Elisa hnênah an lo kal a, “Vawiin hian i pu hi Lalpa chuan a la dâwn tih i hria em?” an ti a. Ani chuan, “Hria e, ngawi mai teh u,” a ti a. Elija chuan Elisa hnênah, “Hetah hian lo awm rawh, Lalpa chuan Jeriko-a kal tûrin min ti e,” a ti a. Elisa erawh chuan, “Pathian nung leh i nunna chhâlin ka sawi e, ka awmsan tawp lo vang che,” a ti a. Tichuan, Jeriko-ah chuan an kal dûn ta a. Chuta zâwlnei rual awmte chu Elisa hnênah an lo kal a, “Vawiin hian Lalpa chuan i pu hi a lâksak dâwn che tih i hria em?” an ti a. Ani chuan, “Hria e, ngawi mai teh u,” a ti a. Elija chuan Elisa hnênah, “Hetah hian lo awm rawh, Lalpa chuan Jordan luia kal tûrin min ti e,” a ti a. Elisa erawh chuan a chhâng a, “Pathian nung leh i nunna chhâlin ka sawi e, ka awmsan tawp lo vang che,” a ti a. An kal dûn ta zêl a, zâwlnei sawmnga chuan an zui a, hla fe aṭangin an thlîr a. Jordan lui kamah chuan an ding a. Elija chuan a puan a hlîp a, a têl a, lui tui chu a vua a, a inṭhen phak a, leichârah an kal kai ta a. Lui an kal kai hnu chuan Elija chuan Elisa hnênah, “I hnên ata lâk ka nih hmain eng nge tihsak che ila i duh?” a ti a. Elisa chuan, “I thlarau chan leh hnih dawng ila ka duh e,” a ti a. Elija chuan, “Thil harsa tak i ngên a ni; amaherawhchu, min lâk lai i hmuh chuan i chang ngei ang, i hmuh loh erawh chuan i chang lo vang,” a ti a. An kal paha an titi dun lai chuan mei-sakawr, mei-tawlailîr hnûk an lo kal thut a, an rawn su ṭhen a. Elija chu ṭhâwngaleivirah vânah a la chho ta a. Elisa chuan a hmu a, “Ka pa, ka pa, Israel-te chhantu ropui, i kal ta maw?” a ti a. A hmu ta lo va, a puan sin lai chu a phelh a, phel hnihah a pawtthlêr a. A chunga Elija puan lo tla chu a la a, a kîr leh ta a. Jordan lui kamah chuan a ding a, a chunga Elija puan lo tla chu a la a, tui chu a vua a, “Khaw nge Elija Pathian Lalpa chu?” a ti a; tui a han vuak chuan tui chu a inṭhen a, Elisa chuan râl lehlam chu a kai ta a. Jeriko-a zâwlnei awm sawmngate khân an hmuhin, “Elija thlarau dawn kha Elisa chungah a fu ta a nih hi,” an ti a. Amah tâwk tûrin an kal a, a hmaah leiah an bawkkhup a, “Ngai teh, hei mi chak tak tak sawmnga kan awm a, I pu chu Lalpa thlarau chuan a la a, khawi lai tlângah emaw, ruamah emaw a hnutchhiah ta mai te hi a ni ang e, khawngaih takin kan va zawng ang e,” an ti a. Elisa chuan a chhâng a, “Kal duh suh u,” a ti a. A tân zahthlâk khawpa an nawr takah chuan, “Kal ta che u,” a ti a. Chutichuan, mi sawmnga chuan ni thum an zawng a, an hmu lo va. Jeriko-a Elisa a la awm lai chuan an lo haw a, “Kal duh suh u ka tih rêng kha,” a ti a. Jeriko khaw mi ṭhenkhat chu Elisa hnênah an lo kal a, “Kan khua hi i hmuh angin khaw nuam tak a ni a; amaherawhchu, tui hi a ṭhat loh avângin nau an chhiat zêl mai,” an ti a. Ani chuan, “Berhbu tharah chi dah ula, han la teh u,” a ti a. An rawn lâksak a. Tuikhurahte chuan a kal a, chi chu a phul a, “ Lalpa chuan tui chu a titui ta, tu man an thih phah tawh lo vang,” a ti a. Tûn thlengin Elisa sawi ang chuan tuite chu a tui ta a. Chuta ṭang chuan Bethel khuaah a chho va; kawnga a chhoh lai chuan khua aṭangin naupang an lo kal a, nuihza siam nân an lo hmang a, “Lu kawlh, lu kawlh, tlân bo rawh,” an ti a. A han lehhawi a, anni chu a hmu a, Lalpa hmingin ânchhia a lawh a. Ngâw aṭangin savawm pui hnih an lo chhuak a, an zînga naupang sawmli leh pahnih chu an seh hlum ta a. Chuta ṭang chuan Samaria khuaah a haw leh ta a. Judai rama Jehosafata kum sâwm leh pariat a lal kum khân, Ahaba fapa Jehorama chu Israel ramah a lal ṭan a. Samaria khuaah kum sâwm leh pahnih a lal a. Lalpa hmuhah thil sual a ti a, a nu Jezebeli leh a pa ang êm zawngin a sual lo. A pa milem, Baal biakna hmuna a dahte chu a tichhia a; mahse, a hmaa lal Nebata fapa Jeroboama thil sual tihte chu a bânsan duh lo, Israel-te chu a hruai sual a, a sim duh lo. Moab lal Mesa chuan berâm a vulh a, kum tin Israel lal hnênah chhiah angin berâmno nuaikhat leh berâmchal nuaikhat hmul a pe ṭhîn a. Israel lal Ahaba a thih khân Moab lal chu Israel lakah a hel a. Lal Jehorama chu Samaria khua aṭang chuan a chhuak vat a, a sipaite chu a khâwm a. Juda lal Jehosafata hnênah, “Kan lakah Moab lal a hel ta a, min beihpui thei ang em?” tiin thu a thawn a. Lal Jehosafata chuan, “Ka rawn pui ang che; ka mite leh i mite chu pumkhat kan ni alâwm. Khawi lam kawng aṭangin nge ka rawn beih ang?” a ti a. Jehorama chuan, “A hla lam Edom thlalêr aṭangin ka rawn bei ang e,” a ti a. Lal Jehorama te, Juda lal leh Edom lalte chu an thawk chhuak a, ni sarih an kal hnuin tui an tlachham ta a. Mihring in tûr pawh, an puakphur ran in tûr pawh a awm hiau tawh lo. Jehorama chuan, “ Lalpa, kan Pathian hian Moab lal duh duha tih tûrin min hruai khâwm a lo nih hi, a va pawi êm!” a ti a. Lal Jehosafata chuan, “ Lalpa min râwnsak thei tûr zâwlnei an awm em?” a ti a. Jehorama sipai hotu pakhat chuan, “Safata fapa Elisa he laiah hian a awm, zâwlnei Elija hnungzui ṭhîntu kha,” a ti a. Lal Jehosafata chuan, “Zâwlnei dik tak a nih chu,” a ti a. Lal pathum chu zâwlnei Elisa hnênah chuan an kal ta a. Elisa chuan Israel lal hnênah, “Engah nge ka ṭanpui ang che, i nu leh pate biakrâwn zâwlneite kha va râwn la a ni mai alâwm,” a lo ti a. Jehorama chuan, “Amah, Lalpa hi alâwm he lai lal pathum hi Moab lal kuta min dahtu chu,” a ti a. Elisa chuan, “A rawng ka bâwl, mi nung Lalpa chhâlin, Judai ram lal Jehosafata hi pawisa lo ila chu, kawng eng mahin ka pui lo vang che, ka lo ti asin le,” a ti a. Elisa chuan, “Ṭingṭang tum thiam han tîr teh u,” a ti a. Ṭingṭang tum thiamin ṭingṭang a han tum chuan, Lalpa kut chuan Elisa chu a rawn khawih a. “ ‘Hemi ruamah hian khur lai chuk rawh u,’ Lalpa chuan a ti e; Lalpa chuan heti hian a ti: ‘Thli tleh lovin chhûm hmu lo mah ula, ruam chu tuiin a khat dâwn; chu chu in rante leh in sate nên in in dâwn nia,’ a ti e. Chutiang lek chu Lalpa tân tih harsa tham a ni lo, in kutah Moab-ho pawh a pe dâwn. Kulh nei khua leh khaw nuam deuh deuh tawh phawt chu in tichhia ang a, thing ṭha deuh deuhte chu in kit ang a, tuikhur zawng zawng in hnawh ang a, lo ṭha laiah lung in dah thluah dâwn nia,” a ti a. A tûk zîng hâlral thilhlan an hlan ṭhin hun lai chuan Edom ram lam aṭangin tui a lo luang a, ruamah chuan tui a khat ta a. Moab-ho chuan anmahni bei tûr lal pathumte chu an lo kal tih an hriat chuan mipa râlkai chin tawh phawt chu, naupang ber pawh, upa ber pawh an pung khâwm a, an ramri an lo vêng a. A tûk zîng khua a lo vâra, ni a lo chhuah chuan tui chu a rawn chhun sen phût a, thisen ang maia senin a lang a. “Thisen a nih khu, sipai pâwl thumho an inbei ang a, an inthat a ni ngei ang. Ti rawh u, an bûk i zu suam ang,” an ti a. Hmêlma bûk an zu thlenin Israel-te chuan an lo bei a, an ûm kîr a, Israel-ho chuan an ûm zêl a, Moab-ho chu an that ṭeuh va. An khuate chu an tihchhiatsak a, an lo ṭha laiah te chuan Israel-ho veivâk chuan lung an paih zêl a, an lote chu lunghmun a ni ta ngawt a. Tuikhurte chu an hnawh a, thei kûngte an kit a, a tâwpah chuan khawpui ber ‘Kir-hareset’ chauh a la chhe lo va, chu pawh chu virvawma beituten an hual a. Moab lal chuan hmêlmate chu a hneh dâwn lo tih a hriat chuan khandaih keng sipai zasarih nên hmêlma rual chu sut tlanga, Suria lalrama tlân a tum a; mahse, a thei lo. Tichuan, a fapa upa ber, a aiawhtu tûr chu a man a, Moab-ho pathian hnênah kulh bang bulah chuan a talh a, a hlân a. Israel miten an hmuh chuan an hlau hle a, khua chu an kalsan a, an ram lamah an haw ta a. Zâwlnei pâwl khat zînga mi pakhat nupui chu zâwlnei Elisa hnênah a lo kal a; “Ka pu, i chhiahhlawh, ka pasal chu a thi a, i hriat angin Pathian ṭih mi tak a ni a. A leibatna pain a fapa pahnih bawih atân ka pasal leiba aia lâk tumin a lo thawk e,” a ti a. Elisa chuan, “Eng nge ka tihsak ang che le! Inah neih i nei em?” a ti a. Ani chuan, “Eng mah ka nei lo, Oliv hriak bûr tê tak tê pakhat chauh a ni ka neih,” a ti a. Elisa chuan, “Haw ta la, i ṭhenawmte bûr va hawh tawh, i hawh theih zât hawh ang che. I fate nên inkhârkhum ula, bûrah chuan hriak chu ruak zêl ula, a khah veleh dah sawn zêl ang che u,” a ti a. A haw ta a, a fate nên kawng an inkhârkhum a, bûr chu a fate chuan an rawn la a, ani chuan a lo thun khat zêl a. An bûr hawh a thun khah hnu chuan, “Bûr dang han la zêl rawh u,” a ti a. Anni chuan, “Bûr a awm tawh lo,” an ti a. Hriak pawh chu a kang ta a. Pathian mi chu a va hrilh a, ani chuan, “Kal la, hriak chu va hralh rawh, in leiba chu rûl ula, a bâng chu i fate nên ei ang che u,” a ti a. Ni khat chu Sunam khuaah Elisa chu a kal a; chu khuaah chuan nu hausa tak pakhat hi a awm a. Elisa chu chaw eiah a sâwm a. Chumi hnu chuan Sunam khuaa a kal apiangin a hnênah chaw a lam ṭhîn a. A pasal hnênah, “Heta min rawn pal fotu hi Pathian mi thianghlim tak a ni phawt ang. Ti teh, in chungah a riahna tûr pindan siamsak ila, khum te, dawhkân te, ṭhutthlêng te dah ila, mi a rawn tlawh apiangin a awm ṭhîn dâwn nia,” a ti a. Ni khat chu Elisa a lo kal leh a, pindanah chuan a mu hahdam a. Sunam hmeichhia chu ko tûrin a hnungzui Gehazia chu a tîr a, hmeichhia chu a lo thleng a, Elisa chuan Gehazia hnênah, “He nu hian min duat hle mai a, eng nge kan tihsak ve ang le? Lal emaw, sipai hotu emaw biaksak a duh em zâwt teh,” a ti a. Chu nu chuan, “Mahni chipuite zînga awm ka ni alâwm, mamawh ka nei lo ve,” a ti a. Elisa chuan Gehazia hnênah, “Eng nge ka tihsak tak ang?” a ti a. Ani chuan a chhâng a, “Fapa a nei lo asin, a pasal lah a tar hle tawh si a,” a ti a. Elisa chuan, “Hetah hian lo kal teh se,” a ti a. A lo kal a. Kawngkaah chuan a ding a. Elisa chuan a hnênah, “Nakkum hetih hunah hi chuan fapa i pawm tawh ang,” a ti a. Ani chuan, “Khai, Pathian mi i ni a, dâwt min hrilh teh suh,” a ti a. Elisa sawi ang chuan nau a pai a, a kum leh chutih hun lai vêl chuan fapa a hring ta a. Naupang chu a lo ṭhang lian a, tûk khat chu a pa hnênah buhsengtute nên buh an sengnaah a kal a. A pa hnênah chuan, “Ka lu, ka lu,” a ti ta chûl a. A chhiahhlawh hnênah chuan, “A nu hnênah paw haw rawh,” a ti a. Chhiahhlawh chuan a nu hnênah a paw haw ta a. Chhûn lai thlengin a nu chuan a chawi a, a thi ta a. Elisa pindanah a luhpui a, a khumah chuan a mut a; a chhuak a, kawng chu a khâr hnan a. A pasal chu a ko va, “Chhiahhlawh pakhat leh sabengtung pakhat han tîr teh, Pathian mi hnênah ka va kal ang a, ka lo kîr leh mai ang,” a ti a. Ani chuan, “Thla thar kût emaw, sabat ni emaw a ni si lo va, eng atân nge vawiin ber khera a hnêna kal i duh le?” a ti a. “Kal a ṭûl a ni e,” a ti a. Sabengtung chu an buatsaih fel hnu chuan chhiahhlawh hnênah, “A chak thei ang berin sabengtung hi khalh ang che; ka hrilh loh che chuan muang hauh suh ang che,” a ti a. Elisa awmna Karmel tlâng lam pan chuan an chhuak ta a. Hla fea a la awm lai chuan Elisa chuan a lo hmu a, a hnungzui Gehazia hnênah, “En teh, Sunam-nu kha a lo kal e. A pasal te, a fate an za-in an dam emaw lo zâwt tûrin va hmuak vat rawh,” a ti a. Ani chuan, “Kan dam e,” tiin a lo chhâng a. Tlânga Pathian mi hnên a lo thlen chuan a ke chu a vuan ta tlat a, Gehazia chuan rawn nam kian a tum a; mahse, Pathian mi chuan, “Eng mah tih suh, a rilru a na hle a nih hi, Lalpa lah chuan ka lakah a la thup a, min la hrilh si lo,” a ti a. Hmeichhia chuan, “Ka pu, fapa ka dîl che em ni kha? ‘Min tihder suh’ ka ti che a ni lâwm ni?” a ti a. Gehazia hnênah chuan, “In siam la, ka tiang hi kengin kal rawh. Mi i tawh rêng rêng chibai bûk suh la, chibai an bûk che pawhin chhâng hek suh. Ka tiang hi naupang hmaiah va kham rawh,” a ti a. Naupang nu chuan, “ Lalpa, mi nung leh i nunna chhâlin ka sawi e; i tel lo chuan ka haw hauh lo vang,” a ti a. Tichuan, a tho va, hmeichhia chu a zui ta a. Gehazia chu an hmaah a kal a, naupang hmaiah tiang chu a han kham a; mahse, thâwm rêng a nei lo va, a ngawi reng mai a. Elisa tâwk tûrin a lo kîr leh a, “Naupang chu a tho hauh lo mai,” a rawn ti a. Elisa chu inah a lo thleng a, naupang chu a thi a, a khumah khân an lo mut a. A lût a, an pahnih chauh chuan a inkhârkhum a. Khumah chuan a lâwn a, naupang chu a bawh a, a hmui leh a hmui, a mit leh a mit, a kut leh a kut a chuktuah a; chutia a bawh lai chuan naupang pang chu a lo lum leh ṭan ta a. Khum ata a lo chhuk a, chhuatah vawi hnih khat a vei hnuin a lâwn leh a, naupang chungah chuan a bawk leh a, naupang chu vawi sarih a hahchhiau dawt dawt a, a lo nung ta a. Gehazia chu a ko va, “Sunam-nu kha han ko teh,” a ti a. A han ko va, a lo kal chuan, “I fapa hi, kha, pawm rawh,” a ti a. Pindan chhûngah chuan a lût a, a ke bulah chuan a bawkkhup a, a fapa chu a pawm chhuak ta a. Ṭum khat, ram puma ṭâm a tlâk laiin Elisa chu Gilgal-ah a haw a; zâwlnei rual a zirtîr a; a chhiahhlawh hnênah chuan, “Bêl lian kha la la, zâwlnei zirho hi sawhchiar siamsak teh,” a ti a. An zînga pakhat chu thil thlâk tûr zawngin ramah a kal a, ram hruizâm a hmu a, a rah chu a theih tâwk a rawn pawm hâwng a; an chan a, eng tih an hre si lo va, sawhchiarah chuan an thlâk ta a. Ei tûr an suak chhuak a, an han ei dâwn chuan, “E heu, Pathian mi, bêlah hian tûr a awm a ni,” an ti a, an ei thei ta lo va. Ani chuan, “Chhangphut han la teh u,” a ti a. Bêlah chuan a phul a, mite hnênah chuan, “Suak ula, a ei theih tawh e,” a ti a. Baal-salisa aṭangin mi pakhat a lo kal a, Pathian mi chu barli thar chhang tlang sawmhnih leh buh vui a rawn kensak a. “Hêng mite hi eitîr rawh,” a ti a. A chhiahhlawh chuan, “Eng â ni? Hei hi patling za zet ka hlui ang maw?” a ti a. Ani erawh chuan, “Hlui rawh, ei rawh se, Lalpa chuan ‘Ei sela, an ei sêng lo vang,’ a ti e,” a ti a. Tichuan, a han hlui a, an ei a, Lalpa thu ang chuan an ei sêng ta lo va. Suria sipai hotu ber Naamana chu Lalpa chuan Suria hmêlma hnehsaktua a hman ṭhin avângin lal chuan a ngaisâng a, a duhsak hle bawk a. Mi chak, mi huaisen ni mah se phâr a ni. Suria sipaite chu a pâwl pâwlin an rammu ṭhîn a, Israel ram aṭangin hmeichhe naupang tê hi an man a. Naamana nupuiin chhiahhlawhah a chhawr a. A pi hnênah chuan, “Ka pu hi Samaria khuaa zâwlnei hnênah va kal se ka va ti êm, a phâr hi a dam ngei ang,” a ti a. Naamanan chu chu a hriat chuan a pu lal hnênah a kal a, “Israel rama hmeichhe naupang chuan chutiang chuan zu sawi a le,” a ti a. Suria lal chuan, “Va kal ta che, Israel lal hnêna pêk tûr lehkha ka kentîr ang che,” a ti a. A kal ta a, tangka tlang sîngthum, rangkachak tlang sângruk leh puan zai sîn sin sâwm a keng a. Israel lal hnênah lehkha chu a pe a, hetianga ziak a ni: “He lehkha kengtu, ka chhiahhlawh Naamana hi a phâr a, i tihdam tûrin ka rawn tîr a ni,” tiin. Israel lalin lehkha a han chhiar chuan a puan a pawtthlêr a, “Mi thata tidam thei Pathian em ka niha, he mi hian phâr tidam tûra mi rawn tih hi? Min beihna remchâng chhuanlam a zawng a ni phawt mai,” a ti a. Lal mangangin a puan a pawtthlêr hial tih Pathian mi Elisa chuan a lo hriatin lal hnênah chuan mi a tîr a, “Engati nge i puan i pawhthlêr le? Ka hnênah lo kal sela, Israel ramah zâwlnei a awm tih a hre mai ang,” a ti a. Naamana chu a sakawr leh a sakawr-tawlailîr nên chuan Elisa hnênah a lo kal a. Elisa chuan mi a tîr a, “Kal la, Jordan luiah vawi sarih va inbual ang che, i vun chuan a ngai a awh leh ang a, i thianghlim tawh ang,” a ti a. Naamana erawh chu thinur deuhvin a kal tau ta a, “A lo chhuak ang a, ka hmaa dingin a Pathian, Lalpa hming a lam ang a, a na lai chungah a kut han dahin a tidam dâwn emaw tih nâk alai a; Damaska bula Abana leh Pharpar lui tui kha Israel lui tui ai chuan a thianghlim zâwk a ni lâwm ni? Chûngah chuan inbualin ka thianghlim thei tho dâwn lâwm ni?” a ti a. A lehhawi a, thinrim deuhvin a haw dâwn ta a. A chhiahhlawh te chu a hnênah an lo kal a, “Ka pu, zâwlnei khân thil khirh tak tih tûr tuk che sela i ti dâwn lâwm ni? ‘Va inbual la, i thianghlim ang,’ a tih chuan tih mai tûr a ni lâwm ni?” an rawn ti a. Zâwlnei sawi ang chuan Naamana chu Jordan luiah a chhuk a, vawi sarih a inhnim a, a vun chu naupang vun ang a lo ni leh a, a thianghlim ta a. A hote zawng zawng nên Pathian mi hnênah a lo kîr a, a hmaah chuan a ding a, “Israel ramah lo chuan ram dangah Pathian a awm lo tih ka hre ta, en teh, i chhiahhlawhin thil a pêk che hi khawngaih takin la teh,” a ti a. Ani chuan, “A hmaa ka awmna ṭhin mi nung, Lalpa chhâlin ka sawi e, ka la tawp lo vang,” a ti a. La hrâm tûrin a ngên a, mahse, a duh lo tlat a. Naamana chuan, “I lâk duh si loh chuan i chhiahhlawh hi sabengtung phur hnih lei min pe rawh; i chhiahhlawh hian Lalpa hnênah lo chuan eng pathian dang hnênah mah hâlral thilhlan ka hlân dâwn tawh lo. Amaherawhchu, Suria pathian Rimona be tûra ka pu a kalin a hnung ka zui a ṭûl ṭhîn a; chutianga Rimona tempula ka kala, ka ṭhingṭhit ve pawhin Lalpa chuan min ngaidam a ni ang chu,” a ti a. Ani chuan, “Thlamuang takin kal rawh,” a ti a. Tichuan, a kal ta a. Thui a kal hmain Pathian mi Elisa hnungzui Gehazia chuan, ‘Ka pu hian Naamana chu eng mah sêng lovin a kaltîr tâk mai hi: kha Suria pain pêk a tum kha la se a ṭha tûr. Khawi nge, Lalpa mi nung chhâlin ka sawi e, ka ûm ang a, eng emaw tal chu ka lâksak teh ang,” a ti a. Tichuan, Naamana chu Gehazia chuan a ûmzui ta a. Naamanan mi pakhat rawn ûmtu a hmuh chuan lo hmuak tûrin a tawlailîr aṭang chuan a lo chhuk a, a hnênah, “A ṭha lam em ni?” a lo ti a. Ani chuan, “Ṭha lam ni e, ka pu chuan, ‘Efraim tlângram aṭangin zâwlnei pahnih an lo kal a, tangka tlang sângthum leh puan sin hnih i pe thei lâwm ni?’ a ti a che,” a ti a. Naamana chuan, “Tangka sângruk tal hi la teh,” a ti a. La tûrin a nawr chiam a, tangka chu ip hnihah a khung a, puan sin hnih nên a chhiahhlawhte a phurhtîr a, an kal ta a. Tlângchhîp a lo thlen chuan an kut ata chu a la a, in chhûngah a dah ṭha a, mite chu a tîr haw leh ta a. Ani chu inah a lût a, a pu hmaah chuan a va ding a, Elisa chuan, “Gehazi, khawi aṭanga lo kal nge i nih?” a ti a. Ani chuan, “Khawiah mah ka kal hlei nêm,” a ti a. Ani chuan, “Mi, nangmah hmuak tûra a tawlailîr ata a lo chhuk lai khân ka thlarau chu i hnênah a awm lo vem ni? Tangka leh puan kha i la a ni lâwm ni? Grep huan te, berâm leh bâwng te, chhiahhlawh mipa leh hmeichhiate pawh lei ta mai che. Naamana phâr hi nang leh i thlahten in kai hlen ang,” a ti a. A pu hma ata chu a chhuak a, vûr angin a vun a phâr vâr ta a. Zâwlnei zirho chuan Elisa hnênah, “I hova kan khawsakna in hi a chêp hle si a, Jordan lui kamah zuk kal ila, thing kan la ang a, kan awmhona tûr in kan zu sa ang e,” an ti a. “Kal ta che u,” a ti a. An zînga pakhat chuan, “Khawngaih takin lo kal ve ta che,” a ti a. Ani chuan, “Kal ve e maw le,” a ti a; an rual chuan a kal ve ta a. Jordan lui an zu thlen chuan thing chu an kit ta a. Mi pakhatin thing a kih lai chuan a hrei chu a thlawn a, tuiah a tla ta a; “Ka pu, a va pawi em! Mi ta kan hawh a ni si a,” a ti a. Pathian mi chuan, “Khawiah tak nge a tlâk?” a ti a, a tlâkna lai chu a kawhhmuh a. Thingṭang a tan a, a khawh lût a, hreifang chu a tilâng ta a, “La rawh le,” a ti a, a han ban a, a la ta a. Suria lal chuan Israel lal a rûn dâwn a, khawi khawia chân rûk nge ṭha ang tih a hote nên an sawi tlâng a. Pathian mi Elisa chuan Israel lal hnênah, “Hêngah te hian kal suh, Suria lal hovin an châng ru dâwn che a ni,” tiin a hrilh zêl a. Israel lal chuan Pathian miin a sawi hmuna awmte chu a hrilh a, an inrâlring hman zêl a ni; chutiang chuan vawi tam tak an ti a. Suria lal chu a mangang ta a, a hote chu a ko va, “Israel lal lamṭang ru kan zîngah tu hi nge min hrilh teh u,” a ti a. A hotu zînga pakhat chuan, “Kan zîngah chutiang pakhat mah kan awm lo, aw lalber, Israel zînga zâwlnei Elisan i pindan chhûngrila i thu sawi chen khân Israel lal a hrilh ṭhîn alâwm,” a ti a. Ani chuan, “Khaw nge a awm va zawng teh u, mi ka tîr ang a, va man teh se,” a ti a. “Dothan khuaah a awm,” an ti a. Tichuan, sakawr te, tawlailîr te, sipai tam tak nên a tîr ṭeuh va, khua chu zânah an va hual a. Pathian mi chhiahhlawh tlangvâl chu zîngah a tho va, a va chhuah chuan sipai tam takin sakawr leh tawlailîrte nên khua an hual chu a va hmu a, a pu hnênah chuan, “Ka pu, a va pawi em! Engtin nge kan tih tâk ang?” a ti a. “Thlaphâng suh, kan lamṭang chu an lamṭang aiin an tam zâwk asin,” a lo ti a. Elisa chu a ṭawngṭai a, “Aw Lalpa, a mit hi han tihmensak teh,” a ti a. Lalpa chuan tlangvâl mit chu a tihmensak a, a hmu ve ta a, Elisa awmna chhak tlâng khatin mei-sakawr leh mei-tawlailîr a lo awm khup mai a. Elisa hualtute a hnêna an lo chhuk chuan Elisa chu Lalpa hnênah a ṭawngṭai a, “An mit tihdelsak teh,” a ti a. Elisa thu ang chuan an mit chu a tihdelsak ta a. Elisa chuan an hnênah, “Hei hi kawng a ni lo ve, in mi zawn awmna khua lah a ni hek lo, a awmnaah ka hruai ang che u,” a ti a. Samaria khuaah a hruai lût ta a. Samaria khua an va thleng a, Elisa chuan, “Aw Lalpa, hêng mite mit hi tihmensak teh, hmu teh se,” a ti a. Lalpa chuan an mit a tihmensak a, an hmu thei ta a. An han hawivêl chuan Samaria khaw chhûngah an lo awm reng a. Israel lal chuan Elisa hnênah, “Kan that mai dâwn lâwm ni?” a ti a. Ani chuan a chhâng a, “That lo ve, khandaih leh thala inbeiha in mi mante mah in that hlei nêm. Ei tûr chaw leh tui pe la, eiin in sela, an pu hnênah haw rawh se,” a ti a. Chaw tam tak a chhumsak a, an eia an in kham hnu chuan a chhuah a, an pu hnênah an kal ta a. Suria lal sipaite chuan Israel ram chu an rawn rûn leh tawh lo. Chumi hnu fê chuan Suria lal Ben-hadada chuan sipai a khâwm a, Samaria khuaah a chho va, a hual ta a. An hual rei avângin Samaria khua chu an ṭâm ta hle a, sabengtung lu hi tangka tlang sawmriatin an hralh a, ṭhuro êk gram zahnih tangka tlang nga man a ni bawk. Israel lal chu kulh bang fangin a kal a, nu pakhat hian, “Min pui teh, aw lalber, ka Lalpa,” a ti a. “ Lalpa chuan a puih ngawt loh che chuan hruiha buh emaw, khura hriak emaw eng mah ka nei tawh bîk hlei nêm,” a ti a. Lal chuan, “Eng i ti nge?” a ti leh a. Ani chuan, “He hmeichhia hian, ‘I fa kha han thawh la, vawiinah kan ei ang a, naktûkah ka fa kan ei dâwn nia,” a ti a. Ka fa chu kan chhûm a, kan ei ta a. A tûkah chuan, ‘I fa chu han la la, kan ei dâwn nia,’ ka ti a; mahse, a fa chu a thukru ta daih si,” a ti a. Lalin chu thu chu a han hriatin a puan a pawtthlêr a; kulh bang a fang a ni a, mipuiin an han en chuan a puan hnuaiah saiip puan a lo sin reng mai a. “Vawiin ni a tlâk hmain Safata fapa Elisa lu hi ka lâka ka lâk loh hrim chuan Lalpa chuan a duh duhin, na tak pawhin min sawisa rawh se,” a ti a. Elisa chu a inah a ṭhu a, upaho pawh an ṭhu ve a. Lal chuan mi a tîr a, chu mi lo thlen hma chuan Elisa chuan upaho hnênah, “Ngai teh u, he tual thah chîngpa hian ka lu lâk tumin mi a rawn tîr a nih hi. A mi tirh chu kawngkhâr hnan ula, lo dang tlat ang che u. Chu! A rawn zuitu thâwm chu a pu, lal kal thâwm a ni lâwm ni?” a ti a. A la ṭawng lai chuan lal chu a lo thleng ve ta nghâl mai a: “Heti khawpa mi timangangtu chu Lalpa hi a ni a, engah nge Lalpa thu ka la ngaih cheu vang?” a ti a. Elisa chuan, “ Lalpa thu hi ngaithla teh; naktûk hetih hunah hian Samaria khuaah chhangphut ṭha chi kg. thum pawh, barli chhangphut kg. ruk pawh tangka tlang khatin in lei thei ang,’ a ti e,” a ti a. Lal vêngtu bîk sipai hotu chuan, Pathian mi chu a chhâng a, “ Lalpa chuan vân tukverh pawh hawngin ruah sûrtîr mah se, chutiang êm chu a thleng ngût lo vang e!” a ti a. Elisa chuan, “A hmuh zawng i hmu ang a, a ei zawng i ei ve dâwn lo a nih chu,” a ti a. Samaria khaw kulh pâwnah chuan phâr pali hi an awm a; “Eng atân nge maw thih nghâk ngawta kan ṭhut reng le? Khaw chhûngah lût ila, rilṭâmin kan thi ve mai âwm si a, hetah pawh awm reng ila kan thi mai bawk dâwn si a. Ti teh u, Suria-ho bûkah i tlulût mai teh ang; a thah leh min lo that mai ang chu; min lo zuah mial mai thei asin,” an ti a. Thimhlimah chuan Suria-ho bûka kal tûrin an thawk chhuak ta a. Suria-ho bûk fêm an va thlen chuan tu mah an lo awm lo va. Lalpa chuan Suria-ho chu sakawr-tawlailîr tlân leh sakawr tlân ri dur dur thâwm te, sipai tam tak kal ṭhup ṭhup thâwmte a hriattîr a, “Israel lal hian Hit lal te, Aigupta lal te, min bei tûrin a pun a ni phawt mai,” an ti a ni. Chuvângin, khaw thim dâwnah chuan baklêngin an tlânchhia a, an bûk te, an sakawr te, an sabengtung te, an bûka an thil chhêk te chu an hnutchhiah a, an tlânsan pheng phung a. Phârhovin bûk an thlen chuan bûk pakhatah an han lût a, an eiin an in a; tangka te, rangkachak te leh silhfên te chu an la a, an va thukru a, bûk dangah an lût leh a, chuta mi pawh chu an chheprelh leh a. An inbia a, “Kan tih dân hi a ṭha hauh lo mai. Vawiin hi ni lâwmawm a ni, kan ngawih mai maia, khawvâr kan nghah chuan hrem kan tuar ngei ang; chuvângin, chanchin ṭha hi lal chhûngte i va hrilh ang u,” an ti a. Khaw kulh kawngkhârah chuan an kal a, kawngkhâr vêngtu hnênah chuan, “Suria-ho bûkah kan va kal a, tu mah an lo awm lo, han biak tûr pawh pakhat mah an awm lo. An sakawr te, an sabengtung te chu an la thlung vek a ni, an bûk te pawh a ngai ngaiin a la ding vek,” an ti a. Kawngkhâr vêngtute chu lal in chhûngah an kal a, an va hrilh a. Zânah lal chu a tho va, a hote hnênah chuan, “Suria-hovin min tihder an tum dân hi ka hrilh ang che u. Khua kan ṭâmzia an hria a, bûk chhuahsanin ram hnuaiah an biru a ni ngei ang, ‘khua ata an lo chhuak ang a, a nung chungin kan man ang a, khua chu kan la mai ang,’ an ti a nih hi,” a ti a. A hote zînga mi pakhat chuan, “He khuaa mite hi kan chan a chau ta sa reng reng mai a, tam tak kan thi tawh a. Ti rawh u, sakawr panga la dam kan nei a, a chunga chuang tûr i ruat ang u, he thil hi finfiah teh se,” a ti a. Mi an thlang chhuak a, lal chuan sakawr-tawlailîr pahnih a pe a, Suria sipaite chanchin en fiah tûrin a tîr ta a. Chûng mite chu Jordan lui thlengin an kal a, Suria sipai tlânchhiain an kawr leh thawmhnaw an thlauh zel zul chu an hmu zêl a; an lo haw leh a, lal hnênah thu an rawn thlen a. Samaria mite chu khua ata an tlân chhuak a, Suria-ho bûk chu an rawk ta chiam a. Lalpa sawi ang khân chhangphut ṭha chi kg. thum pawh, barli chhangphut kg. ruk pawh tangka tlang khatin an hralh ta a. Israel lal chuan amah vêng ṭhîntu sipai hotu kha kawngkhâr vêng tûrin a lo ti kher a. Elisa hmu tûra lal nên an kala, a lo sawi ang khân chu sipai hotu chu mipui chuan an chîl a, a thi ta a. Elisa chuan, “Naktûk hetih hunah chhangphut ṭha chi kg. thum pawh, barli chhangphut kg. ruk pawh tangka tlang khat man a ni ang,” a ti a, kha sipai hotu khân, “ Lalpa chuan vân tukverh pawh hawngin ruah sûrtîr mah se, chutiang êm chu a thleng ngût lo vang,” a ti a, Elisa chuan a chhâng a, “A hmuh zawng i hmu ang a, a ei zawng i ei ve dâwn lo a nih chu,” a ti a nih kha. Chutiang tak chuan thil a lo awm ta a, khaw kulh kawngkhârah chuan mipuiin an chîl a, an chîlhlum ta a ni. Lalpa chuan kum sarih chhûng Israel ramah chuan ṭâm a tlâktîr dâwn tih Elisa chuan Sunam-nu, a fapa a tihdamsak kha a hrilh a, an chhûnga hmun danga insawn tûrin a hrilh a. Pathian mi thu chu a zâwm a, an chhûng chuan Filistia ramah an kal a, kum sarih an thang bo va. Kum sarih a ral hnu chuan hmeichhia chu Israel ramah a lo kîr leh a, lal hnênah a in leh a ram kha pêk kîr leh a rawn dîl a. Lal leh Elisa hnungzui Gehazia chu an lo inbia a, Elisa thil mak tih lal chuan a hre duh a, a lo zâwt a. Elisan mitthi a tihnun leh thu Gehazian a hrilh lai chuan chu hmeichhia chu lal hmaah a lo kal ve chiah a. Gehazia chuan, “Ka pu, ka sawi hmeichhia kha he nu hi a ni; Pathian mi Elisan a tihnun leh pawh kha hei, a fapa hi alâwm,” a ti a. Lalin a dik leh dik loh a han zawh ve chuan, “Dik e,” a ti a. Lal chuan a thu ngaihtuah fel tûr hotu pakhat a ruatsak a, “A neih ṭhin zawng zawng chu pe kîr la, a awm loh chhûnga a ram aṭanga thil thar zawng man chhûtin pêk tûr zât chu pe ang che,” a ti a. Suria lal Ben-hadada a dam loh laiin Elisa chu Damaska khuaah a kal kher a, “Pathian mi a lo kal e,” tiin an hrilh a. Lal chuan Hazaela hnênah, “Thilpêk tûr eng emaw keng la, Pathian mi chu va hmu teh, ka dam chhuak dâwn nge dâwn lo, Lalpa min râwnsak teh se,” a ti a. Tichuan, Hazaela chu amah hmu tûrin a kal ta a. Damaska khuaa thil ṭha ṭha, thilpêk a keng ṭeuh va, sanghâwngsei phur sawmli lai a keng a ni. A lo kal a, a hmaah chuan a ding a, “I fapa, Suria lal, Ben-hadada chuan i hnênah min tîr a ni. ‘Ka nâ hi ka dam leh ang em?’ a ti e,” a ti a. Elisa chuan a hnênah, “Kal ta la, a dam leh ngei ang tih hrilh rawh. Amaherawhchu, Lalpa chuan a thi ngei dâwn tih min hmuhtîr e,” a ti a. Hazaela chu zahthlâk khawpin a melh ta rûn a, Pathian mi chu a ṭap ta a. Hazaela chuan, “Ka pu, engtizia nge i ṭah tâk le?” a ti a. Ani chuan, a chhâng a, “Israel mite chunga thil ṭha lo i tih tûr ka hmu a ni, an kulh te i hâlsak dâwn a, an tlangvâlte khandaihin i sât hlum ang a, an nausênte leichârah i vaw hlum ang a, an hmeichhia, nau pai laite chu an dul i pir ṭehsak dâwn,” a ti a. Hazaela chuan, “Kei, i chhiahhlawh uicho mai hi chutiang ti tûr em ka nih?” a ti a. Elisa chuan a chhâng a, “ Lalpa chuan Suria lala i ṭang min hmuhtîr a ni,” a ti a. Elisa chu a chhuahsan a, a pu hnênah chuan a kal ta a. Ani chuan, “Elisa chuan eng nge a lo hrilh che?” a ti a. “I dam leh ngei dâwn thu min lo hrilh e,” a ti a. A tûkah chuan Hazaela chuan puan a la a, tuiah a chiah a, lal chu a hup hlum ta a. Hazaela chu Ben-hadada aiah Suria ram lal a lo ni ta a. Israel lal Ahaba fapa Jorama lal kum nga kum chuan Jehosafata fapa Jehorama chu Judai ram lal a lo ni ta a. Kum sawmthum leh pahnih a nihin a lal ṭan a, Jerusalem-ah kum riat a lal a. A nupui chu Ahaba fanu a ni. Ahaba chhûng dangte ang bawkin Israel lalte awm dân ṭha lo chu a la a. Lalpa hmuha thil sual a ti a. Lalpa chuan Juda-te chu tihboral vek a hreh a ni, a chhiahhlawh Davida hnênah, “I thlahte chu lalah an ṭang reng ang,” tia a lo tiam tlat tawh avângin. Jehorama lal lai hian Judai ram lakah Edom-ho an hel a, mahni lal an nei a, Jehorama chu Zair lamah a sakawr-tawlailîr nên a kal a. Edom-ho chuan an lo hual a, zânah a tawlailîr pute nên an tlân chhuak thei hrâm a, a sipaite chu an darh a, in lamah an haw ta a. Chuta chin chu Edom hi Juda-ho hnuaiah an awm lo hlen ta a. Hetih hun lai bawk hian Libna khua pawh an hel a. Jehorama thil tih dang zawng zawng chu Juda-te lal chanchin ziakna bu-ah a chuang. Jehorama chu a thi a, Davida khawpuia lal thlânah an phûm a, a fapa Ahazia chu a aiah a lal a. Israel lal Ahaba fapa Jorama lal kum sawm pahnih kumah Jehorama fapa Ahazia chu Judai ram lal a lo ni a, kum sawmhnih leh pahnih a nihin a lal ṭan a, Jerusalem-ah kum khat a lal a. A nu chu Ahaba fanu Athali, Israel lal Omria tunu a ni. Ahazia chuan Ahaba thlahte zînga mi fanu nupuia a neih avângin Ahaba chhûng dangte ang bawkin Lalpa hmuha thil sual an ti a. Lal Ahazia leh Israel lal Jorama chu Suria lal Hazaela bei tûrin an inthurual a. Gilead biala Ramot khuaah an sipaite chu an inbei a; Jorama chuan indonaah hliam a tuar a. Awm dam tûrin Jezreel khuaah a lo kal a, Ahazia chuan a va tlawh a. Chûng lai chuan zâwlnei Elisan zâwlnei la tlangvâl tak hi a ko va, “Insiam la, he hriak bûr hi keng la, Ramot-gilead-ah va kal rawh. I va thlen chuan Nimsia tupa, Jehosafata fapa Jehua zawng chhuak ang che. A awmna inah lût la, a ṭhiante zîng ata pindan chhûngrilah luhpui la. A lu-ah he oliv hriak hi i leih ang a, ‘ Lalpa chuan Israel-te lal atân hriak a thih ta a che,’ ti ang che. Kawngkhâr chu hawng la, chhuak vang vang la, muangchâng suh ang che,” a ti a. Zâwlnei tlangvâl chu Ramot-gilead-ah chuan a kal a. A va thlen chuan sipai hotute chu an lo ṭhu khâwm a. “I hnênah thu sawi tûr ka nei e, sipai hotu,” a ti a. Jehua chuan, “Kan zînga tu hi nge i biak duh?” a ti a. Ani chuan, “Aw sipai hotu, nang kha a ni ka biak duh chu,” a ti a. A tho va, in chhûngah chuan a lût a, a lu-ah hriak chu a leih a, “Israel-te Pathian chuan, ‘ Lalpa mi, Israel-te chunga lal tûrin hriak ka thih ta a che,’ a ti e” a ti a. “I pu Ahaba chhûngte chu i that ang a, ka chhiahhlawhte thisen leh Lalpa chhiahhlawhte thisen Jezebeli chhuahte phuba chu ka la dâwn a ni. Ahaba thlahte chu an boral vek ang a; naupang pawh, upa pawh mipa zawng zawng chu ka tiboral vek dâwn a ni. Ahaba chhûngte chu Nebata fapa Jeroboama chhûngte leh Ahija fapa Baasa chhûngte ang khân ka sawisa ang. Jezebeli chu Jezreel-ah ui-in a sa an ei ang; tu mah phûmtu an awm lo vang,” a ti a. Kawngka chu a hawng a, a chhuak ta vang vang a. Jehua chu a pu hote zîngah chuan a lo chhuak a, pakhat chuan, “A ṭha lam em ni? Mi â-pa kha engah nge i hnêna a lo kal le?” a ti a. Jehua chuan, “A duh chu in hria alâwm,” a ti a. Anni chuan, “Hre suh e, han sawi teh,” an ti a. “ Lalpa chuan, ‘Israel lal atân hriak ka thih ta a che, a ti e,’ min ti alâwm,” Jehua chuan a ti a. A sipai hotupuite chuan an puan an hlîp sawk sawk a, kailâwn chungah Jehua din nân an phah a, tawtawrâwt an hâm a, “Jehua hi lal a ni ta,” an ti a. Nimsia tupa, Jehosafata fapa Jehua chuan Jorama chu a phiar a. Jorama chu Suria lal nên Ramot khuaa an inbeih lai khân an hliam a, Jezreel khuaah awm dam tûrin a kal a ni. Jehua chuan a ṭhiante hnênah, “Ka lama in ṭan phawt chuan Ramot khua aṭang hian Jezreel mite hnêna chanchin hrilh tûr tu mah chhuah suh ang che u,” a ti a. A tawlailîrah chuan a chuang a, Jezreel lam a pan ta vang vang a. Jorama chu a la dam chiang lo va, Juda lal Ahazia chuan a tlawh a; tah chuan a lo awm ve a. Jezreel in sânga râlvêngtu chuan Jehua leh a hote lo kal chu a hmu a, “Sakawr chunga chuang mi ṭhenkhat lo kal ka hmu e,” a ti a. Jorama chuan, “Hmêlma an ni nge ni lo hre tûrin sakawr chungchuang pakhat tîr teh u,” a ti a. An mi tirh chu Jehua-te hnên a va thleng a, “Lalin ṭhian ṭha anga lo kal i nih leh nih loh a hre duh e,” a ti a. Jehua chuan, “I hriat ve tûr a awm lo ve, hnung lamah khân kal rawh,” a ti a. Râlvêngtu chuan, “Mi lo kalte chu kan mi tirh chuan a va fin a, a lo kîr leh rih lo,” a ti a. Mi dang an tîr leh a, ani chuan Jehua chu thu ngai bawk a zâwt leh a, Jehua chuan, “I hriat tûr a awm lo ve, hnung lamah khân kal rawh,” a ti leh a. Râlvêngtu chuan an mi tirh chu, “Mi lo kalte chu kan mi tirh chuan a va fin a, a lo kîr bîk lo,” a ti a. “An hruaitu chuan a tawlailîr chu mi â ang maiin a khalh ka ti, Jehua ang maiin,” a ti bawk a. Lal Jorama chuan, “Ka tawlailîr buatsaih teh u,” a ti a. An siam zawh chuan Juda lal Ahazia nên mahni tawlailîr ve vea chuangin Jehua tâwk tûr chuan an chhuak dûn a. Nabota huanah an va tâwk a. Jorama chuan, “Jehu, ṭha lam thil em ni?” a ti a. Jehua chuan, “I nu Jezebeli chîn chhuah milem biak leh dawi heti taka a hluar chhûng chu engtin nge a ṭha lam a nih theih ang?” a ti a. Jorama chuan, “Ahazia, min thah an tum a ni e,” tiin a au va, a tawlailîr chu a kai her a, a tlânchhe ta a. Jehua chuan a thalngul chu theihtâwpin a kuai a, Jorama hnung lamah a kâp a, a thal chuan a lung a fuh a, tawlailîrah chuan a thi ta a. Jehua chuan a hnungzuitu Bidkara hnênah, “A ruang saw Nabota huanah paih ang che. Jorama pa Ahaba hnungzuia sakawra kan chuan laia Ahaba chungthu Lalpa sawi kha hre reng ang che. ‘Nabota leh a fate nimina an tualthih dân kha ka hmu ve reng a ni; hemi hmunah ngei hian ka hrem ve ang che,’ a tih kha. Jorama ruang chu la la, Nabota huan ngeiah, Lalpa sawi angin paih ang che,” tiin a hnungzuitu chu a hrilh a. Juda lal Ahazia chuan hêng thil hi a hmuhin a tawlailîr nên Beth-hagan lamah a tlân a, Jehua chuan a ûmzui a, a hote hnênah, “A tawlailîr chuang saw that rawh u,” a ti a. Ibleam khaw bul Gur chhova a tlân lai chuan an kâp hliam a, Megido-ah a kal a; tah chuan a thi ta a. A hote chuan tawlailîrin a ruang chu Jerusalem-ah an phur chho va, Davida khawpui, lal thlânah an phûm a. Ahaba fapa Jorama chu Israel rama kum sâwm leh pakhat a lal kumin Ahazia chu Judai ramah a lal ṭan a. Jehua chuan Jezreel a lo thleng tih Jezebeli chuan a hriatin a mit ko a hnawih dum a, a sam a chei danglam a, lal insâng tukverh aṭangin a lo dâk chhuak a. Kulh kawngkhâra Jehua a lo luh chuan, “Mahni pute thattu Zimri, a ṭha lam duha lo kal em i nih?” tiin a lo au va. Jehua chu a han dâk a, “Ka lamṭang in awm em?” a ti a. Hotu pahnih pathum tukverhah an lo dâk a. Jehua chuan an hnênah, “Han nam thla rawh u,” a ti a. Tichuan, Jezebeli chu an nam thla a, a thisen a per uai a, bangahte a kai a, sakawrte pawh chu a per berh a, a ruang chu an rap nawk nawk a. In chhûngah Jehua chu a lût a, a eiin a in tê tê a, “Kha hmeichhe sual ruang kha phûm rawh u, lal fanu a ni khanglâng si a,” a ti a. Phûm tûrin an va kal a, a luruh, a kut leh keruh chauh an va hmu tawh a. Jehua chu an rawn hrilh a, “ Lalpan a chhiahhlawh Tisbe mi Elija kâa a sawi, ‘Jezebeli chu Jezreel khuaah ui-in an ei ang a; an ei bâng chu tu ruang nge tih hriat rual loh khawpin lei vaivutah a darh ang,’ a tih kha a lo thleng ta a nih chu,” a ti a. Samaria khuaah chuan Ahaba fapa sawmsarih an awm a. Samaria khaw upate, hotute leh Ahaba fa enkawltu te hnênah Jehua chuan lehkha a thawn a, hetiang hian a ziak a: “Lal fate chu in kutah an awm a, tawlailîr te, sakawr te, râlthuam te, kulh nei khua te in thu thu-a hman tûr in nei a. Ka lehkha hi in hmuh veleh lal fate zînga fel ber thlang chhuakin lalah siam ula; in lal thar tân chuan do rawh u,” tiin. Samaria khaw hotute chuan an hlau êm êm a. “Lal pahnih pawhin an ngam lo va, keini tehlulin engtin nge kan ngam ang?” an ti a. Lal in enkawltu te, khaw hotute, upate leh lal fa enkawltute chuan an chhâng a, “I chhiahhlawh kan ni a, tih tûr i tih apiang ti tûrin kan inpeih reng e. Tu dang mah lala siam kan tum lo, ṭha i tih ang angin ti mai rawh,” an ti a. Jehua chuan lehkha dang a thawn leh a, “Ka lamṭang in niha, ka thu in awih dâwn chuan naktûk hetih hunah Jezreel khuaah hian lal fate lu kha han la rawh u,” tiin. Ahaba fa sawmsarihte chu Samaria khaw hotu, anmahni enkawl seiliantute kuta awm an ni a. Jehua lehkha an hmuh chuan Samaria khaw hotu te chuan Ahaba fa sawmsarihte chu an that vek a, an lu chu bâwmah an khung a, Jezreel-ah Jehua hnênah an thawn ta a. Ahaba fate lu chu an rawn la ta tih Jehua chu an hrilh a. Ani chuan, “Khawpui kulh kawngka bulah hmun hnihah tiang khâwm ula, naktûk thlengin awm rawh se,” a ti a. A tûkah kulh kawngka bulah chuan a va kal a, chu laia lo awmte hnênah chuan, “Lal Jorama phiara thattu ka ni, chu mi mawh chu nangni phurh tûr a ni lo. Hêng mite hi tu thah nge? Ahaba fate chungchânga Lalpa thu sawi kha a thlâwn lo va ni tih hre rawh u. Lalpa chuan a zâwlnei Elija hnêna a sawi zawng zawng kha a rawn ti ta a nih hi,” a ti a. Jezreel-ah chuan Ahaba laichîn hnai te, sipai hotu te, a ṭhian bul te leh a puithiam te chu pakhat mah zuah hlek lovin a that fai vek a. Jehua chuan Jezreel a chhuahsan a, Samaria khuaah kal a tum a. Kawngah, ‘Berâmpu bûk,’ an tihah chuan, Juda lal Ahazia chhûngte a tâwk a, “Tute nge in nih?” a ti a. “Ahazia laichîn kan ni, lalnu Jezebeli fate leh lal chhûngte chibai bûk tûrin Jezreel khuaah kan kal dâwn a ni,” an ti a. Jehua chuan a hote hnênah, “A nung chungin man teh u,” a ti a. An man a, chumi kiang, Beth-eked khur bulah chuan a that ta a. An vaiin mi sawmli leh pahnih an ni, pakhat mah an zuah lo. Jehua chu a kal zêl a, Rekaba fapa Jehonadaba chuan a rawn tâwk a. Jehua chuan chibai a lo bûk a, “I chunga rilru ka put ang hian ka chungah rilru ṭha i pu ve em?” a ti a. Jehonadaba chuan, “Pu e,” a ti a. “Chuti chu i kutin mi han ban teh,” Jehua chuan a ti a. Kut an insuih a, Jehua chuan tawlailîrah a kai lût ta a. “Ka rualin kal ve la, Lalpa tâna ṭhahnem ka ngaihzia nangmah ngeiin hmu ang che,” a ti a. Samaria khuaah tawlailîr chuan an chuang lût ta a. An va thlen chuan Ahaba laichîn zawng zawng chu pakhat mah zuah lovin a that ta phiar a. Elija hnêna Lalpa sawi kha a lo thleng ta a ni. Jehua chuan Samaria mite chu a ko khâwm a, an hnênah, “Lal Ahaba khân nêp takin Baal rawng a bâwl ṭhîn a, Jehua erawh chuan a uar hle dâwn a ni. Baal zâwlnei te, a betu zawng zawng te leh a puithiam zawng zawng ko khâwm teh u; tu mah hmaih tûr a ni lo. Baal hnênah thilhlan ropui tak ka hlân dâwn, a lo tel ve lo chu tihhlum vek tûr an ni,” a ti a. Baal betute tihhlum vek a tum avângin chutiang chuan fin vervêk a chhuah a ni. “Baala biakna tûr ni ruat rawh u,” Jehua chuan a ti a. Ni an ruat ta a. Jehua chuan Israel rama mite chu a chah khâwm a; Baal betu zawng zawng chu an lo kal a, lo kal lo rêng an awm lo. Baal tempulah chuan an ṭhu khat hmur a. Puithiam kawr enkawltute hnênah, “Baal betu zawng zawng bah tûr puan han la teh,” a ti a. Puan bah tûr chu a rawn la a. Jehua leh Rekaba fapa Jehonadaba chu Baal tempulah chuan an lût ve a, “Baal betu ni lo, Lalpa betu hetah hian an awm ve nge awm ve lo zawng ngun teh u,” a ti a. Hâlral thilhlan leh thilhlan chi dang dang hlân tûrin Baala tempulah chuan an lût ve ta a ni. Jehua chuan mi sawmriat pâwnah a dah ru a, an hnênah, “Hêngho hi in thah vek tûra ka tih an ni; in chhuah vaih chuan a chhuahtu chu a chhuaha aiah thah ve tûr a ni,” a ti a. Hâlral thilhlan a hlan zawhin Jehua chuan a sipaite leh an hotute hnênah, “Lût ula, tu mah zuah lovin that vek rawh u,” a ti a. Baal tempulah chuan khandaih phawisa nên an lût a, an that ta vek a; an ruang chu an rawn hnûk chhuak a; Tempul chhûngrilah an lût a; chutah Baal lim thingtum an phunte chu an la chhuak a, an hâl a. Baal lim lung phunte chu an titliak a, Tempul chu an ṭhiat a, tûn thlengin miin inthiarna takah an hmang ta a ni. Chutiang chuan Israel ramah Baal biakna chu tihchhiat a ni a. Nebata fapa Jeroboama suahsualna, Israel-te a hruai khawlohna sual chu Jehua chuan a thlah vek lo. Bethel-ah leh Dan khuaa rangkachak bâwngno limte kha an la be ta zêl a ni. Lalpa chuan Jehua hnênah, “Ka hmuha thil ṭha i tih a, ka duh angin Ahaba chhûngte i sawisak avângin i thlahte chhuan li thlengin Israel ramah an lal ang,” a ti a. Nimahsela, Jehua chuan Lalpa, Israel-te Pathian dân chu tihtakzetin a zâwm duh lo va; Jeroboama sualna, Israel-te a hruai khawlohna sual kha a thlah phal lo. Chûng lai chuan Israel ram chu Lalpa chuan a tihzîmsak a. Suria lal Hazaela khân Israel ram a rawn rûn a. Jordan lui chhak lam ram, Gilead te, Gad-ho te, Reuben-ho te leh Manase-ho te awmna ram Arnon luiruama Aroer te, an khawpui Gilead leh Basan thlengin a la ta a. Jehua thiltih dang zawng zawng, a chakzia te, Israel lalte chanchin ziakna bu-ah a chuang vek a ni. Jehua chu a thi a, Samaria khuaah chuan an phûm ve ta a. A fapa Jehoahaza chu a aiah a lal a. Kum sawmhnih leh pariat chhûng Samaria khuaah chuan Jehua chu a lal a ni. Lal Ahazia thih thu a nu Athali chuan a hriat veleh lal chhûngte chu a thahtîr vek a. Ahazia fapa Joasa chiah a thah hmaih a. Lal Jehorama fanu Jehosebi, Ahazia farnu chuan a thukru a ni. A awmtu nên Tempul pindan pakhatah Athali hmuh loh tûrin a thukru a, thah a ni ve ta lo a ni. Athali lal chhûng kum ruk chu Jehosebi chuan tempulah a dah a, a rûkin a enkawl a. A kum sarih kum chuan puithiam lalber Jehoiada chuan lal vêngtu Keret sipai za rual hotute leh lal in vêngtu sipai hotute chu a ko va, a thil tih tum chu a hrilh a, Tempul chhûngah chhia chhamin an remtihpui a, lal Ahazia fapa Joasa chu a hmu a. Hetiang hian a hrilh a: “Sabat nia hna thawk tûra in lo kal hunah hmun thuma ṭhen hmun khat chuan lal in vêng ula, hmun thuma ṭhena hmun khat chuan Sur kawngkhâr vêng ula; a dang hmun thuma ṭhena hmun khat chuan vêngtuho hnung kawngkhâr vêng ang che u. Vêngtu pâwl hnih Sabat nia châwl tûrte chu lal vêng tûrin tempulah an awm tûr a ni. Lal Joasa hi khandaih phawi sa kengin in vêng tûr a ni, a kalna apiangah zui ang che u. Rawn hnaihtu chu lo that zêl ang che u,” a ti a. Sipai hotute chuan Jehoiada thu chu an zâwm a, an sipai sabat nia châwl tûrte leh thawk tûrte chu an rawn hruai a. Tempul chhûnga dah ṭhat lal Davida feite leh phâwte chu sipai hotute a pe a. Tempul hma lamah khandaih phawi sa kengin lal vêng tûrin a din tlartîr bawk a. Jehoiada chuan Joasa chu a hruai chhuak a, lallukhum chu a khumtîr a, lal awm dân tûr ziakna dân bu chu a pe a. Joasa chu hriak an thih a, lalah an puang ta a. Mipui chuan kut an beng dur dur a, “Lal chu dam reng rawh se,” an ti a. Lalnu Athali chuan vêngtuho sipaite leh mipui thâwm chu a hriatin mipui punkhâwmna Tempul lamah chuan hmanhmawh takin a kal a. Lal thar chu lal din ṭhinna tûra ruat Tempul luhna ban bulah chuan a lo ding a. Sipai hotute leh tawtawrâwtpute chuan an lo din hual a, mipuite chu hlim takin an au dur dur a, tawtawrâwtte an hâm a. Athali mangang chuan a puan a pawtthlêr a, “Min phiar ru a nih hi,” a ti a. Jehoiada chuan Tempul hung chhûnga Athali thah chu a remti lo va, sipai hotute hnênah, “Sipai intlar kârah hruai chhuak ula, rawn chhan tum apiang lo that zêl ang che u,” a ti a. Athali chu an man a, lal in lamah an hruai a. Sakawr kawngkhâr an tihah chuan an that ta a. Puithiam Jehoiada chuan lal Joasa leh mipui chu Lalpa mi ni tûrin thu a tiamtîr a. Lal leh mipui inkârah pawh thuthlung a siam a. Mipuite chu Baal tempulah an kal a, an ṭhiat a, maichâmte chu an tichim a, milimte chu an vaw sawm vek a. Baal puithiam Matana chu a maichâm bulah chuan an that a. Puithiam Jehoiada chuan Tempul vêng tûr a dah a. Lal vêngtu Keret sipai za rual hotute, lal in vêngtu sipai hotute nên chuan Tempul aṭangin lal chu lal inah an hruai a, mipuiin an zui a. Vêngtu kawngkhârah Joasa chu a lût a, lalṭhutthlêngah chuan a ṭhu ta a. Mipui chu an hlim êm êm a, Athali chu lal ina an thah tâk avângin khuaah buaina eng mah a awm lo. Joasa chu kum sarih mi a nihin Juda lalah a ṭang. Israel rama Jehua kum sarih a lal kumin Joasa chu Judai ram lalah a ṭang a, Jerusalem khuaah kum sawmli a lal a. A nu chu Beer-seba mi Zibi a ni. Puithiam Jehoiada khân a kaihhruai ṭhin avângin a dam chhûngin Lalpa lawmzâwng a ti ṭhîn. Mahse, hnam dang pathian biakna hmunsângte chu a tibo lo va, chûngah chuan miten thilhlan an la hlân zêl a ni. Jehoiada chuan puithiamte chu a ko khâwm a, Tempula thilhlan rualin miten thilpêk an rawn keng ṭhîn, a ṭhen chu thilhlan zînga pêk tel ngei tûra tihte a ni a, a ṭhen erawh chu mahni duh thu-a thilpêk a ni; chûng chu dah ṭha zêl tûrin a hrilh a. An rawng an bâwlsakten chutianga pawisa an rawn ken chu rawngbâwltu puithiam chuan a lo dawng ang a, Tempul siam ṭhat nân hman tûr a ni. Kum sawmhnih leh pathum chhûng Joasa a lal tawh hnu pawh chuan Tempul chu siam ṭhat a la ni ta lo va. Jehoiada leh puithiam dangte chu a ko va, “Engtizia nge Tempul in la siam ṭhat loh? Tûn aṭang chuan in pawisa dawn chu kawl tawh suh u, in dah khâwm ngei tûr a ni; tichuan, Tempul chu siam ṭhat a ni thei ang,” a ti a. Puithiamte chuan pawisa kawl loh chu an remti a, Tempul tlabal la siam rih loh pawh ṭha an ti a. Puithiam lalber Jehoiada chuan bâwm a siam a, a chhîn a tiâwng a; maichâm bulah, Tempul luh dâwn ding lamah a dah a. Tempul luhna bula puithiam an dah chuan Pathian hnêna petute thilpêk an rawn ken chu an lo dawng a, bâwmah chuan an thlâk zêl a. Bâwma tangka a awm tam deuh veleh lal lehkhaziaktu leh puithiam Jehoiada chu an lo kal a, tangka chu an rawh tui a, a bûk zât an chhinchhiah zêl a. A zât chiah an chhinchhiah hnu chuan Tempul siam ṭhat hna enkawltute kutah an pe a, anni chuan hnathawktu mistirite hlawh an pe ṭhîn. Lungchher mite leh lungla mite chuan Tempul siam ṭhatna tûr thingte leh lungte an lei a, pawisa hman ṭûlna apiangah pawisa an pe chhuak a. Thawhlâwm pawisa chu tangkaraw no te, berhbu te, tawtawrâwt te, khâwnvâr enkawlna hmanrua te, tangkarua leh rangkachaka thil hrang hrang siam nân chuan an hmang hauh lo. Hnathawktute hlawhah leh hmanraw lei nân chauh hman a ni. Hnathawktute chu an rinawm êm êm a, an pawisa hman dân pawh enpui a ngai lo. Sual thawina leh bawhchhiat man thilhlan ruala an rawn pêkte erawh chu dah tel ve a ni lo, puithiamho chan a ni. Chutih hun lai chuan Suria lal Hazaela chuan Gath khua a bei a, a la a. Jerusalem beih zêl a rêl a. Juda lal Joasa chuan a hmaa lal Jehosafata te, Jehorama te leh Ahazia ten Lalpa tâna an thilpêk dah khâwmte chu a la a, amah ngeiin a pêk pawh chu a belhchhah a; Tempul leh lal in sum bâwma rangkachak zawng zawng chu a vaiin lal Hazaela chu thilpêk atân a pe a, a sipaite chu Jerusalem ata a hruai kîr leh ta a. Lal Joasa thil tih dang zawng zawng chu Juda lalte chanchin ziakna bu-ah a chuang. Joasa chu a hote pahnihin an phiar a, Beth-milo an tih Silo chhuknaah an that a. A thattute chu Simeata fapa Jozakara leh Somera fapa Jehozabada an ni. A thi a, Davida khawpuiah lal thlânah an phûm a. A fapa Amazia chu a lo lal ta a. Ahazia fapa Joasa chu Judai rama kum sawmhnih leh pathum a lal kumin Jehua fapa Jehoahaza chu Israel ramah a lal ṭan a, Samaria khuaah kum sâwm leh pahnih a lal a. Lal Jeroboama, Nebata fapa ang bawkin Lalpa laka thil sual a ti a. Israel-te a hruai sual a, a thil ṭha lo tihte chu a sim duh lo. Chuvângin, Israel-te chungah Lalpa chu a thinur a, Suria lal Hazaela leh a fapa Ben-hadada chuan Israel chu an hneh leh ṭhin a phal a ni. Jehoahaza chu Lalpa hnênah a ṭawngṭai a, Suria lalin Israel-te a tihhrehawmzia a hmuhin a ṭawngṭaina chu a rawn chhâng leh ṭhîn a. Lalpa chuan Israel-te hnênah chhantu a tîr ṭhîn a. Suria-ho lakah chuan a chhan chhuak a, tûn hma angin thlamuang takin an awm leh ṭhîn. Nebata fapa Lal Jeroboama chhûngten Israel-te an hruai khawlohna sual kha an la sim chuang lo va, an ti lui zêl a, Aseri lim chu Samaria khuaah chuan a la awm ta reng tho mai. Jehoahaza chuan sipai tihtham a nei tawh lo, sakawr chungchuang mi sawmnga, tawlailîr sâwm leh kea kal sipai sîngkhat chauh a nei a ni. Suria lalin a thahsak zo va, kea vaivut chîl ang maiin a chîl darhsak a ni. Jehoahaza thil tih dang zawng zawng, a huaisenzia te chu Israel lalte chanchin ziakna bu-ah a chuang. A thi a, a fapa Joasa chu a lo lal ta a. Judai rama Joasa kum sawmthum leh pasarih a lal kumin Joasa chu Israel ramah a lal ṭan a. Samaria khuaah kum sâwm leh paruk a lal a. Ani pawhin Lalpa hmuha thil sual, Israel lal Nebata fapa Jeroboaman Israel-te a hruai khawlohna sual kha a bân bîk lo, a ti lui ve zêl a. Joasa thil tih dang, Juda lal Amazia nên an indova a huaisenzia thute chu Israel lalte chanchin ziakna bu-ah a chuang. Joasa chu a thi a, Samaria khuaah lal thlânah an phûm a. A fapa Jeroboama pahnihna chu a lo lal ta a. Zâwlnei Elisa chu a thihpui tûr natna tuarin a mu a, a thih dâwn hnaih chuan lal Joasa chuan a va tlawh a; “Ka pa, ka pa, Israel-te chhantu ropui,” tiin a ṭah ta a. Elisa chuan a hnênah, “Thalngul leh thal ṭhenkhat han la teh,” a ti a. Thalngul leh thal ṭhenkhat chu a rawn la a. Israel lal hnênah chuan, “Thalngul kha chelh teh,” a ti a, a chelh hnu chuan Elisa chuan lal kut chungah a kut a nghat a, “Khawchhak lam tukverh kha hawng teh,” a ti a, a han hawng a. “Thal kha kâp teh,” a ti a. A han kâp a, zâwlnei Elisa chuan, “Suria hnehna tûr Lalpa thal i ni e, Suria-ho nên Afek-ah in inbei ang a, a hnehtu zâwk i ni ang,” a ti a. Elisa chuan lal hnênah, “Thal dang kha la leh teh,” a ti a, a han lâk chuan, “Lei kha chhun teh,” a ti a, vawi thum a han chhun a, a bâng ta a. Pathian mi chu a thinur a, “Vawi nga vawi ruk chhun la, Suria-ho chu an ral dêr thlengin i hneh tûr, vawi thum chauh in hneh dâwn a nih hi,” a ti a. Elisa chu a thi a, an phûm ta a. Kum a lo thar apiangin Moab-hovin Israel ram an rawn rûn ṭhîn a. Mi pakhat hi a thi a, an phûm dâwn laiin Moab rual khat lo kal an hmu a, Elisa thlânah chuan an vawm lût rawk a, an tlân ta a. Chu mi ruang chuan Elisa ruh a deh veleh a lo nung leh a, a ding thei ta mai a. Jehoahaza dam chhûng chu Suria lal Hazaela chuan Israel-te chu a tirethei hle a. Mahse, Lalpa chuan a khawngaih a, an chhiat ṭhak a phal lo va, Abrahama te, Isaka te leh Jakoba te hnêna a thuthlung avângin a lainat a, a ngaihsak leh ṭhîn, tûn thlengin a la thlauhthla lo va. Suria lal Hazaela chu a thi a, a fapa Ben-hadada chu a lo lal ta a. Jehoahaza fapa Joasa chuan Hazaela fapa Ben-hadada kut ata, a pa Jehoahaza khua an lâksakte chu a la kîr leh a, an indonaah vawi thum a hneh a, Israel ram khuate chu a chhuhsak leh ta a ni. Jehoahaza fapa Joasa chu Israel lal a nih kum hnih kumin Joasa fapa Amazia chu, kum sawmhnih leh pangaa upa a nihin Judai ram lal a ni ṭan a, Jerusalem-ah kum sawmhnih leh pakua a lal a. A nu chu Jerusalem khaw mi Jehoadini a ni. Lalpa hmuha thil ṭha a ti a, a pu lal Davida erawh chu a tluk lo, a pa Joasa tih ang a ti ve zêl mai. Hnam dang pathian an biakna hmunsângte chu a tichhe lo, mipuite chuan chûngah chuan thilhlan an hlân a, rimtuite an la hâl ta cheu a ni. Amazia chuan, a lal ngheh veleh, a pa thattute chu a that ve a. An fate erawh chu a that lo; Mosia Dân bu-a Lalpa thupêk, ‘Fate chu an pate sual avânga tihhlum tûr an ni lo, pate pawh an fate sual avânga tihhlum tûr an ni lo; mi tin mahni sual avâng chauhva thi tûr an ni,’ a tih kha a zâwm a ni. Amazia chuan ‘Chi ruamah’ Edom mi singkhat a that a, Sela khua a bei a, a la a, a hmingah Joktheel a vuah a, tûn thlengin hmingah a la pu. Amazia chuan Jehoahaza fapa Joasa, Israel lal hnênah palai a tîr a, “Ti teh, pa leh pa i han inhmachhawn teh ang,” a ti a. Israel lal Joasa chuan Juda lal Amazia chu thu a thawn a, “Lebanon tlânga sidar thing hnênah Lebanon tlâng lênhlîng chuan, ‘I fanu ka fapa nupuiah min neihtîr rawh,’ a ti a. Ramsa tei mai mai hian lênhlîng chu a pal thlu ta mai a. ‘Edom-ho ka zu hneh e’ i ti a, i inchhuang ta vei hle a ni maw: lungawi takin inah tawm hle hle tawh mai rawh. Nang leh Judai ram chhiatna tûr buaina chawk chhuak teh suh,” a ti a. Amazia chuan a pawisa lo va, Israel lal Joasa chu a thawk chhuak a, Juda lal Amazia nên chuan Judai ram chhûng Beth-semes khuaah chuan ‘pa leh pa an inhmachhawn’ ta a. Juda-ho chan chu a chau ta zâwk a, mahni in lamah an tlân haw ta a. Israel lal Joasa chuan Juda lal Amazia chu Beth-semes-ah chuan a man a. Jerusalem-ah a chho va, kulh bang, Efraim kawngkhâr aṭanga kulh Kawina kawngkhâr thlengin, tawng zali zet chu a tichhia a. Lalpa Tempul chhûng leh lal sum in aṭanga tangka leh rangkachak leh bungbêl awm zawng zawng chu a la a, a sal mante nên chuan Samaria khuaah a haw leh ta a. Joasa thil tih dang, a ropuizia te, Juda lal Amazia nêna an indo thu te Israel-te lal chanchin ziakna bu-ah a chuang. Joasa chu a thi a, Samaria khuaa lalho thlânah an phûm a. A fapa Jeroboama pahnihna chu a lo lal ta a. Israel lal Jehoahaza fapa Joasa thih hnuin Amazia chu kum sâwm leh panga a dam a. Amazia thil tih dangte chu Juda lal chanchin ziakna bu-ah a chuang a ni. Jerusalem-ah Amazia chu an phiar a, Lakis khuaah a tlân a; mahse, a hmêlmate chuan an ûm a, an that ta tho va. A ruang chu Jerusalem-ah sakawrin an phur haw a; Davida khawpuiah, lal thlânah an phûm a. Judai ram mite chuan a fapa kum sâwm leh paruka upa Uzia chu a pa Amazia aiah lalah an siam a. A pa thih hnu chuan Uzia chuan Elath khua chu Judai ramah a la kîr a, a din ṭha leh ta a. Joasa fapa Amazia chu Juda lal kum sâwm leh panga a nih kumin Joasa fapa Jeroboama pahnihna chu Israel lal a ni ṭan a, Samaria khuaah kum sawmli leh pakhat a lal a. Lalpa hmuha thil sual chu a ti a, an pu Nebata fapa Jeroboama thil sual tih, Israel-te a hruai khawlohna sual chu a bân chuang lo. Israel ram ni ṭhîn, Hamath kalkhân aṭanga Tuipui Thi inkâr ramte chu a la kîr a. Chu chu, a chhiahhlawh Gathhefer mi, Amitaia fapa zâwlnei kâa Lalpa, Israel-te Pathianin a sawi kha a ni. Israel-te tuar hrehawmzia chu Lalpa chuan a hmu a, naupang pawh puitling pawh, tu mah tuar lo an awm lo va, ṭanpuitu rêng rêng an awm lo. Lalpa chuan Israel-te chu tihchhiat hlen dêr zawng a tum lo, chhantu atân Jeroboama pahnihna hi a rawn hmang a ni. Jeroboama thil tih dang zawng zawng, indonaa a huaizia te, Damaska leh Hamath kalkhân Israel rama a lâk kîr thu te, Israel lalte chanchin ziakna bu-ah a chuang. Jeroboama chu a thi a, Samaria khuaa lalho thlânah chuan an phûm a, a fapa Zekaria chu a lo lal ta a. Jeroboama pahnihna chu Israel rama kum sawmhnih leh pasarih a lal kumin Amazia fapa Uzia chu kum sâwm leh paruk a ni a, Juda lalah a ṭang ṭan a, Jerusalem-ah kum sawmnga leh pahnih a lal a. A nu chu Jerusalem mi Jekoli a ni. A pa Amazia angin Lalpa hmuha thil ṭha a ti ṭhîn a. Hnam dang pathian biakna hmunsângte erawh chu a tibo lo va, chûngah chuan miten thil an la hlânin rimtui an la hâl cheu a ni. Chuvângin, lal chu Lalpa chuan a rawn khawih a, a dam chhûngin a phâr ta a, in hrangah a inkhung ta a. A fapa Jothama chuan lal chhûngkua chu a ho va, Judai ram chu a awpsak a. Uzia thiltih dangte chu Juda lalte chanchin ziakna bu-ah a chuang. Uzia chu a thi a, Davida khawpuia lal thlânah an phûm ve a, a fapa Jothama chu a lo lal ta a. Uzia chu Judai rama kum sawmthum leh pariat a lal kumin Jeroboama fapa Zekaria chu Israel ramah a lal ṭan a. Samaria khuaah thla ruk a lal a. A hmaa lal dangte ang bawkin Lalpa hmuha thil sual chu a ti ve a, Nebata fapa Jeroboama thil sual tih, Israel-te a hruai khawlohna sual kha a bân chuang lo. Jabesa fapa Saluma chuan Zekaria chu a phiar a, Ibleam-ah a that a, a aiah a lal ta a. Zekaria thil tih dangte chu Israel lalte chanchin ziakna bu-ah a chuang. Jehua hnêna Lalpa thu sawi, “I thlah chhuan li thlengin Israel lal in ni ang,” a tih ang kha a ni ta a ni. Uzia chu Juda lal kum sawmthum leh pakua a nih kumin Jabesa fapa Saluma chu Israel lal a ni ṭan a. Samaria khuaah thla khat a lal a. Gadia fapa Menahema chu Tirza aṭangin Samaria khuaah a lo kal a. Saluma chu a that a, a lo lal ta a. Saluma thil tih dang zawng zawng chu Israel-te lal chanchin ziakna bu-ah a chuang. Tirza aṭanga Menahema a lo kal khân Tapua khua chu a hnêna an inpêk duh loh avângin a tichhe vek a, a chhûnga chêngte leh a vêl rama mite chu a that a, hmeichhe rai laite pawh an dul a pîrthlêrsak a. Uzia chu Juda lal kum sawmthum leh pakua a nih kumin Gadia fapa Menahema chu Israel ramah lal a ni ṭan a, Samaria khuaah kum sâwm a lal a. Lalpa hmuha thil sual a ti a, Nebata fapa Jeroboama thil sual tih, Israel-te a hruai khawlohna sual kha a dam chhûng chuan a thlah lo. Lal Tiglat Pilesera chuan Israel ram a rawn rûn a, Menahema chuan tangkarua kg. sîngthum leh sângli a lo pe a, Israel rama nghet lehzuala lala ṭhu tûrin a puih duh a beisei a ni. Menahema chuan Israel mi hausate tangka tlang sawmnga zêl a lâksak a, chu chu a pe a ni. Tichuan, Tiglat Pilesera chu an ram lamah a haw leh ta a. Menahema thiltih dang zawng zawng chu Israel lalte chanchin ziakna bu-ah a chuang. A thi a, an phûm a, a fapa Pekahia chu a lo lal ta a. Uzia chu Juda lal kum sawmnga a nih kumin Menahema fapa Pekahia chu Israel ramah lal a ni ṭan a, Samaria khuaah kum hnih a lal a. Lalpa hmuha thil sual a ti a, Nebata fapa Jeroboama thil sual tih, Israel-te a hruai khawlohna sual kha a thlah chuang lo. A sipai hotu pakhat Remalia fapa Peka chuan Gilead khaw mi sawmnga nên an phiar a, Pekahia chu Samaria khaw kulhbîng Argob leh Aria bulah an that a, a aiah a lo lal ta a. Pekahia thil tih zawng zawng chu Israel lalte chanchin ziakna bu-ah a chuang. Uzia chu Juda lal kum sawmnga leh pahnih a nih kumin Remalia fapa Peka chu Israel ramah lal a ni ṭan a, Samaria khuaah kum sawmhnih a lal a. Lalpa hmuha thil sual a ti a, Nebata fapa Jeroboama thil sual tih, Israel-te a hruai khawlohna sual kha a thlah chuang lo. Peka lal lai hian Asuria lal Tiglat Pilesera chuan Ijon te, Abel-beth-maaka te, Janoa te, Kades te leh Hazor khua te chu a la a, Gilead ram te, Galili ram te, Naftali ram te a la bawk a, mite chu Asuria ramah salah a hâwn a. Uzia fapa Jothama chu Judai lal kum sawmhnih a nih kumin Ela fapa Hosea chuan Peka chu a phiar ru a, a bei a, a that a; a aiah a lo lal ta a. Peka thil tih dangte chu Israel lalte chanchin ziakna bu-ah a chuang. Remalia fapa Peka chu Israel lal kum hnih a nih kumin Uzia fapa Jothama chu, kum sawmhnih leh panga a ni a, Juda lal a ni ṭan a, Jerusalem-ah kum sâwm leh paruk a lal a, a nu chu Zadoka fanu Jerusi a ni. A pa Uzia tih angin Lalpa hmuha thil ṭha a ti a. Hnam dang pathian biakna hmunsângte erawh chu a tiral lo; miten thil an hlân a, rimtui an hâl ta cheu a ni. Tempul hmâr lam kawngkhâr hi Jothama siam a ni. Jothama thil tih dangte chu Juda lalte chanchin ziakna bu-ah a chuang. A lal lai hian Lalpa chuan Suria lal Rezina leh Israel lal Peka chu Judai ram bei tûrin a rawn tîr a ni. Jothama chu a thi a, Davida khawpui lalho thlânah an phûm a, a fapa Ahaza chu a lo lal ta a. Remalia fapa Peka chu Israel lal kum sâwm leh pasarih a nih kumin Jothama fapa Ahaza chu kum sawmhnih a nihin Judai ramah a lal ṭan a. Jerusalem-ah kum sâwm leh paruk a lal a. A pu Davida angin Lalpa hmuha thil ṭha a ti ve lo; Lalpa lâwm loh zâwng a ti thung a. Israel lalho tih dân ṭha lo a zâwm ve a ni. Ama fapa ngei pakhat pawh hâlral thilhlan atân a talh a, milem hmaah a hlân a; Israel-te hmaa Lalpa hnawh chhuah hnam danghote thiltih tenawm tak tak tih an chînte kha tih a chîng ve ta a ni. Tlâng tinrênga hnam dang pathian biakna hmunsângah te, thingbuk ṭha hlim apiangah te thilhlante a hlân a, rimtuite a hâl ṭhîn. Suria lal Rezina leh Israel lal Peka chuan Jerusalem an bei a; mahse, an la thei lo. Hetih lai hian Suria lal Rezina chuan Elath khua a la leh a, Juda-ho va awmte chu a hnawt chhuak a, Edom-ho chu Elath khuaah chuan tûn thlengin an awm ta a ni. Ahaza chuan Asuria lal Tiglat Pilesera hnênah palai a tîr a, “I chhiahhlawh, i fa ka nih hi, Suria lal leh Israel lalin min bei a, an kut ata min rawn chhan chhuak ta che,” a ti a. Ahaza chuan Lalpa Tempul leh lal sum dahna in ata tangka leh rangkachak awm chu Asuria lal biak tlawn nân a thawn a. Asuria lal chuan Ahaza ngen angin Damaska khua chu a sipaite nên a bei a, a la a, Rezina chu a that a, mite chu a khawpui Kir-ah salah a hâwn a. Asuria lal Tiglat Pilesera hmu tûrin Ahaza chu Damaska khuaah a kal a, Damaska khuaa maichâm chu a en a, puithiam Uria a ko va, maichâm an siam dân hmang chu chipchiar takin a entîr a. Uria chuan Damaska khuaa mi ang chiah maichâm a siam a, Ahaza lo kîr hmain a siam zo va. Damaska khua aṭanga a lo hâwn chuan Ahaza chuan maichâm siam zawh tawh chu a rawn hmu a. Lal chuan hâlral thilhlan te, buhbâl thilhlan te a hlân a, uain thilhlan te a bun a, remna thilhlan thisen te chu maichâmah chuan a theh a. Dâr maichâm, Lalpa hnêna hlan tawh chu maichâm thar leh Tempul inkâra awm a ni a, a la sawn a, maichâm thar hmâr lamah a dah sawn ta a. Uria hnênah, “Ka maichâm hi a lian zâwk a, zîng hâlral thilhlan leh tlai hâlral thilhlan hâl nân hmang la, lal leh mipui puala hâlral leh buhbâl thilhlante pawh hâl ṭhîn la, mipui uain thilhlante chu bun ṭhîn ang che. Hâl ral atân leh thil dang atâna ran hlan thisen chu he maichâmah hian theh ang che. Dâr maichâm erawh chu Pathian ka rawn biak nân khêk tlat ang che,” a ti a. Uria chuan lal thu ang chuan a ti a. Lal Ahaza chuan dâr nawrlirh chu a phelh darh a, tui bâwm chu a la thla a. Dâr tuizêm, bâwngpa sâwm leh pahnih chunga inhûng pawh kha a sawn a, lungrem chungah a hûng a. Asuria lal tlawn lungawi nân Ahaza chuan Tempul aṭangin lalṭhutthlêng hûnna tûr dawhkân pawh chu a la sawn a, Tempula lal luhna tûr bîka siam kawngka pawh a hnawh ta a. Lal Ahaza thiltih dang zawng zawng chu Juda lalte chanchin ziakna bu-ah a chuang. Ahaza chu a thi a, Davida khawpuia lal thlânah an phûm a, a fapa Hezekia chu a lo lal ta a. Ahaza chu Juda lal kum sâwm leh pahnih a nih kumin Ela fapa Hosea chu Israel lal a lo ni a, Samaria khuaah kum kua a lal a. Lalpa hmuha thil sual a ti a, a hmaa Israel lalte ang êm erawh chu a ni lo. Asuria lal Salmanesera chuan a rawn bei a, Hosea chu a lo inpe a, kum tin chhiah a chawi ta a. Kum khat chu Hosea chuan Aigupta lal Soa hnênah palai a tîr a, ṭanpuiah a sâwm a; kum tin chhiah Asuria hnêna a pêk kha a pe duh ta lo va. Salmaneseran chu chu a hriatin Hosea chu a man a, tân inah a khung ta a. Salmanesera chuan Israel ram chu a rûn ta a, Samaria khua chu a hual a. An hual kum thumna, Hosea kum kua a lal kumah Samaria khua chu Asuria lal chuan a la ta a; Israel-te chu salah a man a, Asuria ramah a hruai a. Ṭhenkhat chu Hala khuaah te a awmtîr a, ṭhenkhat chu Gozan bial Habor lui kamah te, Media ram khuaah te a awmtîr a. Israel-ten an Pathian, Lalpa laka thil sual an tih avângin Samaria khua chu a chhe ta a ni. Aigupta lal kut ata a chhan chhuak a, Aigupta ram aṭang chuan a hruai chhuak a; mahse, Pathian dang an biaksan a, hnam dang, an hmaa a hnawh chhuahte awm dân kha an la a, Israel lalten thil ṭha lo tak an chîn chhuahte chu an chîng ve ta zêl a ni. An Pathian remtih loh zâwng Israel-te chuan an ti a; an khaw tê ber leh lian berah pawh hnam dang pathian biakna hmunsâng an siam zêl a; mual tinah mai, thingbuk ṭha deuh hlim apiangah lung milem leh pathiannu Aseri lem thing an phun thliah thluah a. Ram ata Lalpa hnawh chhuahte tih dân ṭhin angin hnam dang maichâmahte chuan rimtui an hâl a. An thil sual tihte chuan Lalpa chu an tithinur a. Lalpa thupêk, milem biak loh tûr a tih chu an awih duh lo. Lalpa chuan Israel-te leh Juda-te chu hrilh tûrin a tirhkoh leh zâwlneite a tîr ṭhîn a, “In khawsak dân tenawm tak hi bânsan ula, in thlahtute hnêna ka dân pêk ziakna bu-a chuang ka chhiahhlawh zâwlneite sawi, ka thupêkte leh ka thuruatte kha zâwm zâwk rawh u,” tiin. Mahse, an awih duh tlat lo, an pute angin luhlul an chhuah a, an Pathian, Lalpa chu an ring duh mawlh lo. A thuruatte chu an hnâwl a, an pate nêna a thuthlung chu an bawhchhia a, a zilhna pakhat mah an bengkhawn duh lo. An ho êm a, milem ho tak takte an be mai mai a, Lalpa chuan, ‘an awm dân la suh u’ a tih, an vêla hnam dangte awm dân chu an la a. Lalpa, an Pathian thupêk zawng zawng an hnâwl a, dârin bâwngno lem pahnih an chhûng a, chibai an bûk a. Pathiannu Aseri limte an siam a, arsite chibai an bûk a, Baal rawng an bâwl a. An fanu an fapate chu hnam dang pathian hnêna hâlral thilhlanah an hlân a, ramhuaizâwl leh mitthi thlûk thiamte an râwn a. Lalpa hmuha thil ṭha lo tinrêng ti tûrin an inpumpêk a ni; chuvângin, an tithinur ta a ni. Israel mite chungah Lalpa chu a thinur a, a hmuh phâk lohvah a hnawt bo va, Juda-ho chauh an la awm ta a ni. Juda-ho pawh chuan an Pathian, Lalpa thupêkte chu an zâwm chuang bîk lo, Israel-te tih dân kha an la ve zêl zâwk a. Lalpa chuan Israel zawng zawngte chu a hnâwl ta a, a hrem a, hmêlma râwng pui pui kutah a pe a, a hmuh phâk loh tûrah a tîr bo ta a ni. Lalpa chuan Israel-te kha Juda-ho laka a tihhran hnu khân Nebata fapa Jeroboama chu an lalah an siam a. Lalpa bânsan tûrin Israel-te chu a ti a, sual râpthlâk tak a tihtîr a nih kha. Jeroboama hnung chu an zui a, thil sual a tih ang apiang chu an ti ve ta a. A chhiahhlawh zâwlneite hmanga a sawi ang khân a hmuh phâk loh tûrah a hnawt bo ta nge nge a ni. Tichuan, Israel mite chu Asuria ramah tûn thlengin salah an la tang a ni. Asuria lal chuan Babulon te, Kutha te, Iva te, Hamath te leh Sefarvaim khuaa awm te chu a hruai a, Israel sala hruai tâkte aiah Samaria ramah chuan a awmtîr a; chûnga khuate chu an luah a, an chêng ta a. An lo awm tirh chuan Lalpa biak nachâng an hre lo va; sakeibakneite a tîr a, a seh ṭhîn a. Asuria lal chu, Samaria ram khuaa a mi dahte chuan chu ram pathian dân chu an hre lo va; chuvângin, chu pathian chuan seh tûrin sakeibakneite a tîr a ni tih an hrilh a. Lal chuan, “Sala kan man puithiam pakhat kha chhuah ula, an ram pathian dân zirtîra, an zînga awm ve tûrin kîrtîr teh u,” a ti a. Tichuan, Israel puithiam pakhat Samaria khua aṭanga sala an man chu a kal a, Bethel-ah a lo awm a; chuta ṭang chuan mite chu Lalpa biak dân tûr a zirtîr a. Samaria rama awm tate chuan anmahni milem an siam ta zêl a. Israel-hovin Pathian biakna hmun tûr an siamah chuan an dah a, pâwl hrang hrang khân mahni awmna khuaah milem an siam ṭheuh zêl a. Babulon aṭanga lo kalte chuan Sukot-benot lim an siam a, Kutha mite chuan Nergala lim an siam a, Hamath-ho chuan Asima lim, Iva mite chuan Nibhaza lim, leh Tartaka lim te, Sefarvaim-ho te chuan an pathian Andramelek leh Anamelek lim hmaah an fanu leh an fapate hâlral thilhlan atân an hlân. Hêng mite hian Lalpa chu an be ve tak a, an zînga mi tu pawh puithiamah an ṭantîr a, hnam dang pathian biakna hmunsângah te puithiam hna an thawhtîr a, an thilhlante an lo hlansak ṭhîn. Lalpa chu an bia a, an lo kalna ram tih dân angin anmahni pathiante chu an be tho va ni. Vawiin thlengin an tih dân hlui chu an la chîng a ni. Lalpa chu an be tak tak lo, a dân leh a thupêk, Jakoba thlah, Israel tih tâkte hnêna a pêk chu an zâwm hek lo. Israel mite nên Lalpa chuan thu a thlung a, “Pathian dang be suh u; chibai bûk suh ula, an rawng bâwl suh ula, an hnênah thilhlan hlân hek suh u. Zo tak leh thei taka Aigupta ram aṭanga lachhuaktu che u thu hi awih rawh u, chibai min bûk ang a, thilhlante ka hmaah in hlân tûr a ni. In tâna ka ziak, dânte leh thupêkte hi in zâwm fo tûr a ni, pathian dangte thu in awih tûr a ni lo. Thuthlung ka siamsak che u hi in theihnghilh tûr a ni hek lo. Kei in Lalpa, in Pathian thu hi in awih tûr a ni; tichuan, in hmêlmate lakah ka chhan chhuak ang che u,” a ti a. Amaherawhchu, chûng mite chuan an bengkhawn lo, an tih ṭhin chu an ti zêl mai a ni. Hêng mite hian Lalpa chu chibai zawng an bûk na a, an milemte chu an be tho mai, an thlahte pawhin tûn thlengin chutiang chuan an la ti zêl a ni. Ela fapa Hosea chu Israel lal kum thum a nih kumin Ahaza fapa Hezekia chu kum sawmhnih leh pangaa upa a nihin Juda lal a ni ṭan a, Jerusalem-ah kum sawmhnih leh pakua a lal a. A nu chu Zekaria fanu Abijai a ni. A pu Davida angin Lalpa hmuha thil ṭha a ti a. Hnam dang pathian biakna hmunsângte a tichhia a, lungphunte a tibung a, pathiannu Aseri lim thing phunte chu a kit a. Mosia dâr rûl siam Nehustan an tih chu a chhu chhia a. Chumi hun thleng chuan Israel-ten dâr rûl lem tân rimtui an hâl ṭhîn. Hezekia chuan Lalpa, Israel-te Pathian chu a ring a, Juda lal, amah ang hi an awm ngai lo, an awm leh tawh hek lo vang. Lalpa chu a vuan tlat a, a thu a hnial ngai lo. Mosia hnêna Pathian thupêk kha ngun takin a zâwm ṭhîn. Chuvângin, Lalpa chuan a awmpui a, a thiltih apiangah a hmuingîl zêl a ni. Asuria lakah a hel a, a thu a awih duh lo. Filistia mite a sawisa ṭhîn, an awmna apiang a rûn a; khaw tê ber pawh, khaw lian ber pawh Gaza leh a chhehvêl ramte pawh a hrût ṭhîn. Hezekia kum li a lal kum chuan Hosea chu Israel lal kum sarih a ni hman tawh a, Asuria lal Salmanesera chuan Israel ram a rawn rûn a; Samaria khua chu a hual a. An hual kum thum kum, Hezekia lal kum ruk kum chuan an la ta a, chu chu Hosea lal kum kuana a ni. Asuria lal chuan Israel-te chu salah a man a, Asuria ramah a hruai a, a ṭhen erawh chu Gozan bial Habor lui kamah te, Media khuaah te a awmtîr a. Israel-ten an Pathian Lalpa thu an awih loh avângin Samaria khua chu an la a ni, thuthlung a siamte kha an bawhchhia a, Lalpa chhiahhlawh Mosia dân pakhat mah an zâwm duh hek lo. An ngaithla duh lo va, an pawm duh lo va. Hezekia kum sâwm leh pali a lal kumin Asuria lal Senakeriba chuan Judai rama kulh nei khuate chu a bei a, a la ta hlawm a. Lakis khuaa Senakeriba awm chu Hezekia chuan, “Thil ka lo tidik lo a ni; min kîrsan la, i phût ang ang ka pe ang che,” tiin thu a thawn a. Asuria lal chuan tangkarua kg. sîngkhat leh rangkachak kg. sângkhat a lo phût a. Tempul leh lal sum bâwma tangka awm zawng zawng chu a thawn a, Tempul kawngkhâra rangkachak belte chu a khawk a, amah ngeiin kawngka biang a tuamna rangkachak pawh chu a khawk a, Senakeriba chu a thawn a. Asuria lal chuan Lakis aṭangin Jerusalem-a Hezekia chu bei tûrin sipai tam tak a tîr a, a sipai hotu lian lian pathum-Tartana te, Rab-Saria te leh Rab-Sakea te chuan an ho va. Jerusalem an han thlen chuan dîl chhakta zâwk aṭanga tuikawng kam, puansutu hmun panna kawngah chuan an awm a. Lal chu an au va, lal in enkawltu Hilkia fapa Eliakima te, lehkhaziaktu Sibna te, Asafa fapa, thil chhinchhiahtu Joa te chu an lo chhuak a. Rab-Sakea chuan an hnênah, “Hezekia hi han hrilh rawh u, lal ropui Asuria lal chuan heti hian a ti: ‘Tu nge maw rinchhan i neiha, heti taka i inchhutngên le! Hmui themthiam ringawtin sipai chakna leh indo thiamna i ngam thei dâwn em ni? Asuria lal laka i hel vei hi tu nge rawn pui dâwn che? Aigupta-in a rawn pui ang che maw? Luang tiang hawl ang lek a ni asin, a tliak ang a, i kut a chhun mai ang. Aigupta lal Farawa chu amah rinchhantute tân chutiang lek chu a ni asin. “In Pathian Lalpa chu kan rinchhan a ni in ti elo? Juda mite leh Jerusalem mite chu ‘Jerusalem-ah chauh Lalpa chu biak tûr a ni’ in ti vei a, hmun danga Lalpa maichâm leh a biakna hmun tichhetu kha Hezekia hi a nih kha. Tichuan, ka pu, Asuria lal nên inremsiam mai rawh u; a chuang tûr mihring i hmuh zawh dâwn phei chuan sakawr sânghnih ka pe nghâl mai ang che. Asuria sipai hotu neu ber pawh in tluk si lo va, sakawr-tawlailîr te, sakawr chungchuang te Aigupta chuan a rawn thawn tehlul ang che maw? In ram ka rawn bei a, ka rawn la hi Lalpa thu a ni lâwm ni? Amah Lalpa ngei chuan, ‘Han bei la, la vek rawh,’ min ti a ni,” a ti a. Eliakima te, Sebna te leh Joa te chuan, “Suria ṭawngin thu sawi rawh, kan hre thei e; Juda ṭawng chu hmang suh, kulh banga ṭhute hian an ngaithla ṭhup a ni,” an ti a. Ani chuan, “Asuria lal hian nangni leh in lal Hezekia hnênah chauh thu sawi tûrin mi tîr em ni? Ni suh e; mipui, tûna kulh banga ṭhu, nangmahni ang bawka mahni zun leh êk eia in tûrte hnênah pawh thu ka sawi a nih hi,” a ti a. Tin, Rab-Sakea chu a ding a, Juda ṭawngin a au va, “Lal ropui Asuria thu hi ngaithla teh u: ‘Hezekia chuan bum che u suh se, ka lakah a hum thei chuang lo vang che u,’ lal chuan a ti e. ‘ Lalpa chuan min chhan dâwn alâwm, Asuria lal chuan he khua hi a la lo vang’ tiin Lalpa ring tûrin bum che u suh se. Hezekia thu ngaichâng duh suh u, Asuria lal chuan, ‘Inremsiam ang u, lo chhuak ula, ka lo kal leh hma chu mahni grep rah in ei ang a, mahni theipui rah in tlân ang a, mahni tuizêm tui in in ṭheuh dâwn nia,’ a ti a. Lal chuan in ram anga ram ṭhaah, grep huan ṭha tak tak, uain tamna ramah a la awmtîr ang che u a, chhangphut tûr buh ṭhat duhna ram, oliv kûng te, a hriak te, khawizu tamna ramah chuan a awmtîr ang che u. A thu in awih chuan nungdamin in chhuak ang, in thi lo vang. ‘ Lalpa chuan min chhan chhuak ngei dâwn e,’ tiin Hezekia chuan bum che u suh se, Hnam dang pathiante zingah Asuria lal laka chhanhim thei an awm em ni? Hamath leh Arpad pathiante kha khaw nge an awm tâk? Sefarvaim pathian te, Hena leh Iva pathiante kha khaw nge an awm tâk? Samaria khua chhan thei an awm em ni? Hêng ram zawng zawng pathiante hian engtikah khân nge an ram chu an chhan ngai? Lalpa pawhin Jerusalem khua hi a chhan thei bîk dâwn em ni?” a ti a. Lalin, “Tu man chhâng suh u,” a tih avângin an ngawi ṭhuap a, kam khat mahin an chhâng lo. Lal chhûngkaw enkawltu Hilkia fapa Eliakima te, ziaktu Sebna te, thil chhinchhiahtu Asafa fapa Joa te chuan an puan an pawtthlêr a, an lo kal a, Rab-Sakea thu chu Hezekia an hrilh a. Lal Hezekia chuan chûng thu chu a hriatin a puan a pawtthlêr a, saiip puan a sin a, Lalpa Tempulah a lût ta a. Lal chhûngkaw enkawltu Eliakima te, ziaktu Sebna te leh puithiam zînga upate chu saiip puan sinin zâwlnei Isaia hnênah a tîr a. “Lal Hezekia chuan heti hian a ti: ‘Vawiin hian kan tân manganna ni a lo thleng ta; min hmuhsit a, min diriam tâk êm hi! Nau hrin hun tawh a nu chau lutuk tawh si ang mai kan nih hi. Pathian nung sâwt tûra Asuria lal mi tirh, Rab-Sakea thu sawi kha, Lalpa, i Pathian chuan a lo hre châwk ang a; Lalpa, i Pathian chuan hriain hrem teh se. Kan mi la dam chhunte tân nang ṭawngṭai rawh khai,’ a ti e,” an va ti a. Lal Hezekia mi tirhte chu Isaia hnên an va thleng a, Isaia chuan an hnênah, “ Lalpa chuan heti hian a ti: ‘Asuria lal chhiahhlawhten min diriam dân thu i hriat kha hlau suh. Ngai teh, a rilru ka tizâm ang a, thuthang ka hriattîr ang; a ramah a kîr ang a, a ram ngeiah khandaihin an sât hlum ang,’ tiin in pu hnênah sawi rawh u,” a ti a. Rab-Sakea chu a ṭîn a, Lakis aṭangin Asuria lal chu a insawn a, Libna khua a bei tih a hriatin chu lam chu a pan a, a va hmu a. Ethiopia lal Tirhaka chanchin Asuria lal chu an hrilh a; amah bei tûrin a lo thawk tih a hriatin Hezekia hnênah zualko a tîr a, lehkha a thawn a. Judai ram lal Hezekia hnênah, “I rinchhan in Pathian chuan, ‘Asuria lal kutah Jerusalem chu a pe lo vang,’ tiin bum che u suh se. Asuria lalten an ram luah dang zawng zawnga an thiltih, an ram an tihchhiat vek dânte i hria a. Nang tehlul hi i him bîk dâwn em ni? ‘Ka paten an tihchhiat hnam Gozan te, Haran te, Rezep te leh Telasar-a awm Edom-ho te kha an pathianten an chhan thei em ni? Khawiah nge Hamath lal te, Arpad lal te, Sefarvaim-a khaw awm lal te, Hena lal te, Iva lal te kha an awm tâk?’ va ti rawh u,” a ti a. Zualko lehkha rawn ken chu Hezekia chuan a hmuhin a han chhiar a, Lalpa Tempulah a chho va, Lalpa hmaah chuan a pharh a. Hezekia chu Lalpa hnênah a ṭawngṭai a, “Aw Lalpa, Israel-te Pathian, Cherub chunga ṭhu, nang chauh hi Pathian chu i ni, ram luah zawng zawng rorêltu i ni a, lei leh vân pawh hi i siam a ni. Aw Lalpa, i beng lo chhi la, ngaithla teh. Aw Lalpa, meng la, han en teh; Pathian nung sâwt tûra Senakeriban thu a rawn sawi zawng zawng hi ngaithla teh. Aw Lalpa, Asuria lalte hian hnam tin an bei a, an ramte an tihchhiat tâk hi. An pathiante chu meiah an rawhsak a, chu chu Pathian an ni lo rêng a, mihring kuta siam thing leh lung mai mai an ni a, chhe ngei tûr phei zawng an ni. Aw Lalpa, tûnah a kut aṭang hian min chhan chhuak la; tichuan, khawvêl ram luah zawng zawnga miten nang chauh hi Pathian, Lalpa chu i ni tih an hre dâwn nia,” a ti a. Amoza fapa Isaia chuan Hezekia hnênah mi a tîr a: “A hnêna i ṭawngṭaina chungchâng leh Asuria lal Senakeriba chungchânga Israel-te Pathian, Lalpa thu sawi chu hei hi a ni: ‘Zion fanuin a hmusit che a, a nuihzat che. Jerusalem fanuin I tlânchhia chu lu a thinkhum che. Tu nge i nuihzata, i sâwt le? Tu lakah nge i râwl i rin? Tu lakah nge i hawi chapo hle le? Israel Mi Thianghlima lakah a ni. I chhiahhlawhte hmangin Lalpa i sâwt vei a, ‘Tawlailîr tam tak nên tlâng sâng sângah ka lâwn a, Lebanon tlâng kil tin ka fang; Sidar thing sâng ka kit a, Fâr thing ṭha ṭha ka kit asin. A tlâng sâng lai ngaw rilte pawh ka fang vek a. Tuite ka chhun chhuak a, ka in bawk a, Aigupta luite ka kephahin ka dai kang vek a ni,’ i ti vei a. Hmân aṭanga tih ka tum tawh a ni, I hre na nge? Tûna thil lo thleng hi hmâna ka rêl daih tawh a ni. Kulh nei khuate i tihchhiata, A chhûnga chêng an zâmzia te leh thlabâr taka an mualpho te, Phûl leh muala hlobet, In chung zâwla hnim ṭiak tîr te, Thli lum chhêm vuai tâk te, Ka rêl lâwk vek a ni. Ka chunga i ânhla te, I ṭhut, i luh leh chhuahte ka hria asin. Ka chungah hian i âng vei a, I chapozia ka beng a lo thleng ta, I hnârah chuan hnâr kawl ka vuah ang a, Lakam ka barh ang che a, I lo kalna lamah ka hnûk kîr leh ang che,” tiin. Lal Hezekia hnênah, “Hei hi i tân chhinchhiahna a ni ang. Kuminah buh hli in ring ang a, nakkumah pawh chumi hli chu in ring leh ang. A kum thumnaah chuan thlai chîng ula, a rah in seng dâwn nia. Grep phun ula, a rah in ei bawk ang, Judai rama la dam chhunte chu theikûng, thûk taka zung thlâk, rah tup ang hi an la ni ang. Jerusalem aṭangin dam chhuak tûr an awm a, Zion tlângah thi bâng an awm ngei dâwn a ni. Lalpa ṭhahnemngaihna chuan chu chu a ti ngei ang. Chuvângin, Asuria lal chungchâng chu Lalpa chuan heti hian a ti: ‘He khawpuiah hian a lût lo vang a, thal khat pawh a thlah lo vang, phaw nên a rawn bei lo vang a, lei kulh a lai hek lo vang. A lo kalna kawngah ngei a haw leh ang, khuaah a lo lût tawp lo vang.’ He khua hi keimah avâng leh ka chhiahhlawh Davida avângin ka vêng ang a, ka hum dâwn a ni,” a ti a. Chumi zân chuan Lalpa tirhkoh chu Asuria-ho bûkah chuan a kal a, mi nuaikhat leh sîngriat leh sangnga a that a, zînga an han thawh chuan mitthi ruang hlîr a lo thal phung a. Asuria lal Senakeriba chu a ṭîn a, a haw a, Ninevi khuaah a awm ta a. Nisroka tempula a pathian biaa a kûn lai chu a fa Andrameleka leh Sarezera te chuan khandaihin an sât hlum a, Ararat ramah an tlân ta a. A fapa Esarhadona chu a lo lal ta a. Chûng lai chuan lal Hezekia chu thih ngamin a na a. Amoza fapa Isaian a rawn tlawh a, a hnênah, “ Lalpa chuan heti hian a ti: ‘I chhûngkaw thu rêl fel rawh, i thi dâwn si a, i dam chhuak dâwn lo ve,’ a ti,” a rawn ti a. Hezekia chuan bang lam a hawi a, a ṭawngṭai a, “Aw Lalpa, i hmaah dik takin ka awm ṭhîn a, thinlung thianghlim puin i mit hmuha thil ṭha ka tih ṭhin kha khawngaih takin hre reng ang che,” a ti a, a ṭap ta zawih zawih a. Isaia chu a haw a, lal in tual chu a pelh hmain Lalpa mite chunga rorêltu Hezekia hnênah chuan Lalpa chuan a tîr kîr a, “‘Kei Lalpa, i pu Davida Pathian hian i ṭawngṭaina ka lo hria a, i mittui pawh ka hmu. Ka tidam ang che, a ni thum ni chuan Tempulah i kal thei ang. Kum sâwm leh pangain i dam chhûng hun ka pawtsei bawk ang. Asuria lal lakah nang leh he khua hi keimah avâng leh ka chhiahhlawh Davida avângin ka humhim dâwn a ni, a ti,’ va ti rawh,” a ti a. Isaia chuan, “Theipui rah hmin hlâwm han la teh u,” a ti a. Theipui rah hlâwm chu a khawihliah chuan an belsak a, a lo dam ta a. Lal Hezekia chuan, “ Lalpa chuan min tidam ang a, ni thum ni chuan Tempulah ka kal thei ang tih engtin nge ka hriat ang?” a ti a. Isaian, “ Lalpa chuan a tidam dâwn che tih hriatna tûr chhinchhiahna a entîr ang che. I rahkaa hlim saw, rahka sâwm kîr nge i duh rahka sâwm kal belh se, i duh zâwk thlang rawh,” a ti a. Hezekia chuan, “Rahka sâwm kaltîr chu a awl em mai, rahka sâwm kîr rawh se,” a ti a. Isaia chu a ṭawngṭai a, lal Ahaza rahka siama hlim chu Lalpa chuan rahka sâwm a tikîr a. Chumi lai chuan Babulon lal Baladana fapa Merodak-baladana chuan Hezekia chu a dam leh tih a hriatin thilpêk leh lehkha a rawn thawn a. Hezekia chuan anni chu a lo lâwm hle a, a sum dahna in te a entîr a, a tangkarua leh a rangkachak te, a mosola leh a thil rimtui te, a râlthuam dahkhâwmna in leh a ram chhûng hmun hrang hranga a ro dahte chu entîr loh rêng rêng a nei lo. Zâwlnei Isaia chu Hezekia hnênah a lo kal a, “Hêng mite hi khawi aṭanga lo kal nge an niha, eng nge an rawn sawi?” a ti a. Hezekia chuan, “Ram hla tak, Babulon aṭanga lo kal an nih hi,” a ti a. Isaia chuan, “Lal ina thil eng eng nge an hmuh?” a ti a. Lal chuan, “Engkim an hmu vek, thil dahnaa kan dah entîr loh rêng ka nei lo,” a ti a. Lal hnênah Isaia chuan, “ Lalpa thu hi ngaithla teh, ‘Ngai teh, i ina thil awm zawng zawng, i paten vawiin thlenga an dah khâwmte nên, Babulon-a an lâk vek hun a lo thleng lawk dâwn, eng mah hnutchhiah an nei lo vang,’ Lalpa chuan a ti e. Nangma hrin ngei, i fapate chu an man ang a, an til an rehsak ang a, Babulon lal rawng an bâwl ang,” a ti a. Lal Hezekia chuan a dam chhûng chu muang takin an awm ang a, an him dâwn tihna niin a ngai a, “ Lalpa thu i rawn thlen chu a ṭha alâwm,” a ti a. Lal Hezekia thil tih dang zawng zawng, a huaizia te, tui khuapin tui kawng a kera khuaa tui a lâk luh thu te, Juda lalte chanchin ziakna bu-ah a chuang vek a ni. Hezekia chu a thi a, a fapa Manasea chu a lo lal ta a. Kum sâwm leh pahnih a nihin Manasea chu Juda lalah a ṭang ṭan a, Jerusalem-ah kum sawmnga leh panga a lal a. A nu chu Hefzibi a ni. A mite hmaa Lalpa hnawh chhuah hnamte tih dân tenawm tak tak chu Manasea chuan a ti ve a, Lalpa lakah thil sual a ti a. A pa Hezekia tihchhiat, hnam dang pathian biakna hmunsângte chu a din ṭha leh a, Baal tân maichâm a siam a, Israel lal Ahaba ang khân Aseri limte a phun a, vâna arsite pawh a bia a. ‘Jerusalem khua hi min biakna hmun tûr chu a ni,’ tiin Lalpa chuan a hmun hi a thlang a; chuta Lalpa Tempulah chuan maichâm chi tinrêng a dah a. Tempul chhûng pindan pahnihah chuan vâna arsi rual tân te maichâm a dah thluah a. A fapa pakhat chu hâlral thilhlanah a hlân a. Aien te, ṭhumvâwrte a chîng a, ramhuaizâwl leh mitthi thlûk thiamte a ruai ṭhîn. Lalpa hmuha thil sual nasa tak a ti a, a tithinur a ni. Davida leh a fapa Solomona hnênah Lalpa chuan, ‘He Jerusalem khuaa Tempul hmun hi Israel hnam sâwm leh pahnih ram zawng zawng zîngah min biakna hmun tûra ka thlan a ni,’ a tih, Tempul chhûngah khân Aseri lim thing a phun a. ‘Israel mite chuan ka thupêk zawng zawng an awiha, ka dân, Mosia hrilh kha an zawm vek chuan an thlahte hi ram ka pêk ata chu ka hnawt chhuak lo vang,’ a ti bawk a. Judai rama mite chuan Lalpa thu chu an awih lo va, an hmaa Lalpa hnawh chhuah hnamte tih ṭhin aia sual zâwk ti tûrin Manasea chuan a hruai a ni. Lalpa chuan a chhiahhlawh a zâwlneite hmangin hetiang hian a sawi: “Manasea chuan thil tenawm tak tak, he rama an awm hmaa awm Kanan mite tih aia tenawm zâwk a ti ṭhîn, a milem siam chawpin Juda-te chu a hruai sual a ni. Tichuan, Kei, Lalpa, Israel-te Pathian hian, a hria apiangin mak an tih êm êm tûr Jerusalem leh Judai ramah chhiatna ka thlentîr ang. Samaria khua leh Israel lal Ahaba leh a thlahte ka sawisa ang khân Jerusalem pawh ka sawisa ang. Thlêng hrûk fai an khup ang hian Jerusalem pawh a chhûnga awmte chu ka hru fai ang. Ka mi, la thi bângte pawh chu ka hnâwl ang a, an hmêlmate kutah ka pe ang a, chûng chuan an duh duhin an rawk ang a, an sawisa ang. An thlahtute Aigupta ram aṭanga an lo chhuah aṭang tawh khân tûn thlengin, ‘hei chu thil sual a ni’ ka tih chu an ti ṭhîn a, min tihthinur avângin chutiang chuan ka mite chu ka sawisa dâwn a ni,” a ti a. Manasea chuan pawi khawih lo a that tam khawp a, Jerusalem khaw laiah thisen a luang zuih ṭhîn; Juda mipuite chu milem biak a chîntîr a, Lalpa lakah thil sual an tih phah ta a. Manasea thil tih dang, thil sual a tihte chu Juda lalte chanchin ziakna bu-ah a chuang. Manasea chu a thi a, lal huan, lal Uzia huanah an phûm a, a fapa Amona chu a lo lal ta a. Amona chu kum sawmhnih leh pahniha upa a nihin Juda lalah a ṭang ṭan a, Jerusalem-ah kum hnih a lal a. A nu chu Jotba khaw mi Haruza fanu Mesulemeti a ni. A pa Manasea angin Lalpa hmuha thil sual a ti a. A pa tih dân a la a, a pa biak ṭhîn milemte kha a be ve zêl a. An thlahtute Pathian, Lalpa chu a hnâwl a, Lalpa thupêkte chu a awih duh lo. A hote zînga miin an phiar ru a, lal in chhûngah an that a. Juda-ho chuan Amona fapa Josia chu lalah an siam a. Amona thil tih dangte chu Juda lalte chanchin ziakna bu-ah a chuang. Amona chu Uzia huana thlânah chuan an phûm a, a fapa Josia chu a lo lal ta a. Josia chu kum riat a nihin Juda lal a ni ṭan a, Jerusalemah kum sawmthum leh pakhat a lal a. A nu chu Bozkat khaw mi Adaia fanu Jedidi a ni. Josia chuan Lalpa lawmzâwng a ti a, a pu lal Davida awm dân a la a, Pathian dânte chu uluk takin a zâwm thlap ṭhîn. Kum sâwm leh pariat a lal kumin Josia chuan ziaktu Safana, Azalia fapa, Mesulama tupa chu Lalpa Tempulah a tîr a, “Puithiam lalber Hilkia hnênah kal la, Tempul kawngkhâra mipui thawhlâwm puithiamhovin an dawn kha eng zât nge tling tawh va zâwt teh. Tempul siam ṭha tûra mi ruatte kutah pe sela, anni chuan, mistiri te, in satu te leh lung chher mi te pe rawh se; Tempul siam ṭhatna tûr thing te, lung te lei teh se. Hêng kan mi ruatte hi mi rinawm tak tak an ni, en zuipui an ngai lo vang,” a ti a. Puithiam lalber Hilkia chuan ziaktu Safana hnênah, “Tempulah dân bu ka chhar e, hei,” a ti a, a pe a. Safana chuan a han chhiar a, Lal hnênah a lo kîr leh a, “I chhiahhlawhte chuan in chhûnga tangka an hmuhte chu an phawrh a, Lalpa Tempul siam ṭha tûra mi ruatte kutah an pe tawh e,” a ti a. Lal hnênah chuan, “Puithiam Hilkia chuan hei lehkhabu hi mi lo pe asin,” a ti a, lal hriat tûr chuan Safana chuan a chhiar ta a. Lalin Dân lehkhabua thu chu a han hriat chuan a puan a pawtthlêr a. Puithiam Hilkia te, Safana fapa Ahikama te, Mikaia fapa Akbora te, ziaktu Safana te, lal in enkawltu Asaia te hnênah lal chuan, “Kal ta ula, mipui leh Judai ram mi zawng zawng tân he Dân bu chhara zirtîrna chungchâng hi Lalpa min va râwnsak teh u. Kan pute chuan heta thu chuangte hi an ngaihsak lo va, tih tûrte hi an tih loh avângin Lalpa chu a thinur a ni,” a ti a. Puithiam Hilkia te, Ahikama te, Akbora te, Safana te, Asaia te chu zâwlneinu, Mika fapa Saluma nupui Huldaii hnênah an kal a. A pasal Saluma hi Tikva fapa a ni, lal thawmhnaw enkawltu a ni a, Harhasa tupa a ni, Jerusalem vêng thara awm an ni. An hnênah chuan, “Israel-te Pathian, Lalpa chuan, ‘A rawn tîrtu che u chu hrilh rawh u. Juda lalin a chhiar lehkhabua thu chuang ang khân Jerusalem leh a chhûnga chêngte chu ka sawisa dâwn. Min hawisan a, pathian dang hnênah thilhlan an hlân a, an thiltihte chuan min tithinur a ni. Jerusalem chungah ka thinur a alh ang a, a mit mai mai lo vang,’ a ti. Lalpa râwn tûra rawn tîrtu che u lal hnênah chuan sawi rawh u, Israel-te Pathian, Lalpa chuan, ‘Lehkhabua thu chuang chu i ngaihven a, Jerusalem leh a chhûnga chêngte ka sawisak dân tûr i hriatin pawi i ti a, Lalpa hmaah i inphahhniam a, puan pawtthlêrin i ṭap a. Hmuh râpthlâk khawp leh ânchhia inlawhna hiala hman tûrin khawpui chu ka sawisa dâwn a ni; mahse, i ṭawngṭaina chu ka lo hria a. I thih hma chuan Jerusalem chu ka tichhe lo vang; nang zawng thlamuang takin i thi ang,’ a ti e,” a ti a. Chu thu chu lal hnênah an rawn thlen leh a. Lal chuan Judai ram leh Jerusalem-a upate chu a ko khâwm a. Judai ram leh Jerusalem-a awm puithiam leh zâwlnei te, mipui, mi rethei leh hausate nên, an za chuan tempulah an lo kal a, Tempula an chhar Thuthlung bu chu an hriatah lal chuan a chhiar a. Dinna tûra an siamah chuan lal chu a ding a, Lalpa hnung zuia a thupêkte zâwma, a thuruatte leh a thupêkte chu ti tûrin Lalpa hmaah thu a tiam a. Rilru tak tak leh tihtakzetin thuthlung thu lehkhabua chuangte chu pawm tlat a tiam a. Mipui zawng zawng pawh chuan dingin thuthlung chu pawm an tiam ve a. Lal chuan puithiam lalber Hilkia te, a dawttu puithiamte leh kawngkhâr vêngtute chu Lalpa Tempul chhûnga Baal te, Aseri te leh vân arsi an biakna thil hman zawng zawng chu a lâk chhuahtîr a, Jerusalem dai Kidron luiruamah chuan a hâl a, a vâp chu Bethel-ah a kentîr a. Judai khawpuiah te, Jerusalem kiang vêla hnam dang pathian biakna hmunsânga thil hlântu atâna Juda lalten puithiam an lo dah, Baal hnênah te, ni leh thla hnênah te, arsi leh vâna thil awm hnênah te thil hlân ṭhîntu zawng zawng chu a bân a. Lalpa Tempul chhûnga pathiannu Aseri lim an phunte chu a la chhuak a, Jerusalem daiah Kidron ruamah chuan a hâl a, a vâp chu a râwt sawm a, vântlâng thlânmualah chuan a theh darh a. Tempula nawhchizuarho awmna, Aseri biakna tûr, nu hovin puan an tahna hmun chu a ṭhiat bawk a. Judai ram khawpui hrang hranga Geba leh Beer-seba inkâra awm puithiamte chu a hruai khâwm a, hnam dang pathian hnêna thil an hlanna ṭhin hmunsângte chu a tihbawlhhlawhsak a. Khawpui luhna kawngkhâr vei lam, khawpui awptu Josua siam kawngkhâr bula maichâm, kêlhuai lim an biaknate chu a ṭhiat a. Chûnga puithiama ṭang ṭhînte chu Tempula rawng an bâwl an phal lo, an puithiamte puala dah chhang dawidim telh loh erawh chu an ei ve thei. Moleka hnênah hâlral thilhlana pêk atân an fanu te, an fapa te an hlan tawh loh nân Hinom ruama Tofet chu a sawisa nek a. Juda lalten ni hnêna hlan tûr sakawr an pêkte chu Tempul tual kawngka bul, sawrkâr milian tak Nathan-meleka chênna in aṭanga hnai têah an dah ṭhîn, chûng chu a dah bo va, ni pathian an hnuh ṭhinna tawlailîrte chu a hâl a. Lal inahte leh Ahaza in chung chhâwng zâwla an maichâm te, Tempul pindan pahnihna Manasean maichâm a siam belhte nên chuan a ṭhiat a, a chhu chhe vek a, Kidron ruamah a paih a. Jerusalem khawchhak lam Oliv tlâng chhim lama Sidon pathian tenawm Astarte lim te, Moab pathian tenawm Khemosa te, Amon-ho pathian ngeiawm tak Milkoma lim an biakna tûr hmunsâng, Israel lal Solomona siamte kha a tibawlhhlawh zo vek a. Josia chuan lungphunte chu a chhu sawm a, pathiannu Aseri lim, an thingtum phunte chu a kit a; chûng awmna hmunah chuan mihring ruh a dah phung a. Israel hruai khawlotu Nebata fapa Jeroboaman Bethel khuaa pathian biakna tûra maichâm a siamte pawh Josia chuan a ṭhiat a, a lungte chu a tikeh a, a chhu dip vek a. Aseri limte pawh chu a hâl a. Josia chu a han hawi vêl a, mualah chuan thlân a hmu a, a phawrh a, mihring ruhte chu maichâmah chuan a hâl a, a tibawrhbâng ta a. Chutiang a nih tûr thu chu tûn hma, kût an hman ṭuma lal Jeroboaman maichâma thil a hlan laia zâwlneiin a hrilh lâwk kha. Josian a han en vêl chuan chu thu lo hrilh lâwktu zâwlnei thlân chu a hmu a. “Tu thlân nge?” a ti a. Bethel khaw mite chuan, “Judai ram aṭanga lo kal zâwlnei, hêng i thil tih tâk lo sawi lâwktu thlân a ni,” an ti a. Josia chuan, “Khawih ve suh u, a ruhte chu awm mai mai teh se,” a ti a. Tichuan, tu man a ruhte chu an khawih lo, Samaria khua aṭanga lo kal zâwlnei ruh pawh an khawih lo. Israel ram khaw tinah Israel lalhovin hnam dang pathian biakna hmunsâng an lo siamte chu a tichhia a, chûng lalte chuan Lalpa chu an tithinur a ni. Bethel khuaa a tih ang khân an hâl a. Chûnga rawngbâwltu puithiamte chu a that a, maichâmah chuan mihring ruhte a hâl a, Jerusalem-ah a lo kîr leh ta a. Thuthlung bu-a ziak angin an Pathian, Lalpa chawimawi nân mipuite chu Kalhlên kût hmang tûrin lal Josia chuan a ti a. Hemi ṭuma mi ang rêngin Israel lal pawh, Juda lal pawh, Kalhlên kût hmang ropui, rorêltuten ro an rêl lai ata tu mah an la awm lo. Chutiangin Josia lal kum sâwm leh pariat kum chuan Jerusalem-ah Kalhlên kût an hmang ta a ni. Puithiam lalber Hilkian Tempula Dân bu a chhara chuang Dânte chu an zawm theih nân Josia chuan Jerusalem khua leh Judai ram ata chu aienthiam te, mitthi thlûk chîngte a hnawt chhuak a, chhûngkaw pathian an biak te, milem te leh hnam dangin pathian an biak te pawh chu a paihtîr vek a. Rilru leh tihtakzetin theihtâwp chhuaha Lalpa rawngbâwl leh Mosia dâna mi ang zâwm hi tûn hmain tu mah lal an la awm ngai lo, tûn hnuah pawh an awm tawh lo vang. Lal Manasea thiltihte avâng khân Juda-ho chungah Lalpa thin a ur a, tûn thleng pawhin a thinur a la dai lo a ni. “Israel-te chunga ka tih ang kha Juda-ho chungah pawh ka ti ve ang, Juda-ho chu ka hmuh phâk loh tûrah ka hnawt chhuak ang. Ka hmun thlan, Jerusalem chu ka hnâwl ang a, min biak ṭhinna tûra ka ruat Tempul chu ka chhuahsan bawk ang,” a ti a ni. Josia thil tih dangte chu Juda lalte chanchin ziakna bu-ah a chuang. Josia lal lai hian Aigupta lal Nekoa chuan a sipaite Eufretis luiah Asuria lal ṭanpui tûrin a hruai a. Lal Josia hian lo dan a tum a. Megido-a an inbeihnaah a thi ta a. A hote chuan a ruang chu tawlailîrah an dah a, an hâwn a, lal thlânah an phûm ta a. Juda-ho chuan Josia fapa Jehoahaza lalah an thlang a, hriak an thih a. Jehoahaza chu kum sawmhnih leh pathum a nihin Juda lal a lo ni a, Jerusalem-ah thla thum a lal a. A nu chu Libna khaw mi Jeremia fanu Hamutali a ni. A pute ang bawkin Lalpa hmuha thil sual a ti a. Aigupta lal Nekoan Hamath bial Ribla hmunah salah a man a, a lal a tâwp ta a. Aigupta lal chuan Juda-te chu tangkarua kg. sângnga leh rangkachak kg. sawmnga a chawitîr a. Lal Nekoa chuan Josia fapa pakhat Eliakima chu a pa aiawh tûrin lalah a dah a, a hming a thlâksak a, Jehoiakima a vuah a. Jehoahaza chu Aigupta ramah a hruai a, a thi ta a. Lal Jehoiakima chuan Aigupta lalin chhiah a phût pe tûrin mipui hnênah, an hausak leh hausak loh athuin a khawn ve thung a. Jehoiakima chu kum sawmhnih leh panga a nihin Juda lal a lo ni a; Jerusalem-ah kum sâwm leh pakhat a lal a. A nu chu Ruma khaw mi Pedaia fanu Zebidi a ni. A pute ang bawkin Jehoiakima chuan Lalpa hmuha thil sual a ti a. Jehoiakima a lal lai hian Babulon lal Nebukadnezara chuan Judai ram a rûn a, a hnuaiah Jehoiakima chu kum thum chhûng a lal a, a hel ta a. Lalpa chuan Babulon sipai rual te, Moab te, Amon sipai rual te chu Jehoiakima beia, Judai ram tichhe tûrin a tîr a. Hetianga a tih tûr thu hi Lalpa chuan a zâwlneite hmangin a lo sawi lâwk tawh rêng a ni. Jehoiakima thil tih dang zawng zawngte chu Juda lalte chanchin ziakna bu-ah a chuang. Jehoiakima chu a thi a, a fapa Jehoiakina chu a lo lal ta a. Eufretis lui leh Aigupta hmâr lam ramri inkâr zawng zawng hi Babulon lal thuhnuaia a awm tâk avângin, Aigupta lal leh a sipaite chu an lo thawk chhuak leh tawh lo. Jehoiakina chu kum sâwm leh pariat a nihin Juda lal a lo ni a, Jerusalem-ah thla thum a lal a. A nu chu Jerusalem mi Elnathana fanu Nehusti a ni. A pa ang bawkin Jehoiakina chuan Lalpa hmuha thil sual a ti a. A lal lai hian lal Nebukadnezara sipaite chuan Jerusalem an rawn hual a. An hual lai chuan lal Nebukadnezara chu Jerusalem-ah a lo kal ve a. A nu te, a fa te, a sipai te leh lal ina milian te nên Jehoiakina chu Babulon lal kutah a inpe a. Nebukadnezara chuan a lal kum riat kum chuan Jehoiakina chu salah a man a. Tempul leh lal ina sum awm zawng zawng nên Babulon khuaah a hâwn a, Lalpa sawi lâwk angin lal Solomonan Tempula hman tûr rangkachak bungbêl a siam zawng zawng chu a tichhia a. Lal Nebukadnezara chuan Jerusalem khaw mi, lal chhûngkua zawng zawng, milian zawng zawng, mi sîngkhat salah a hruai a. Mi themthiam rual, thîrdêngte pawh a hruai vek a, Judai ramah chuan mi mâwl tê tê chauh a hnutchhiah a. Nebukadnezara chuan Jehoiakina chu a nu te, a nupui te, a milian te leh Judai rama milian deuh deuh te nên Babulon-ah salah a hruai a. Nebukadnezara chuan sipaia ṭang tlâk zawng zawng chu Babulon-ah a hruai vek a ni; mi sângsarih leh mi themthiam rual, thîrdêng te nên sângkhat zet nên a hruai a ni. Chûng chu sipaia ṭang tlâk vek an ni. Nebukadnezara chuan Jehoiakina pa nau Matania chu Juda lalah a dah a, a hming a thlâksak a, Zedekia a sa a. Zedekia chu Kum sawmhnih leh pakhat a nihin Juda lal a lo ni a, Jerusalem-ah kum sâwm leh pakhat a lal a. A nu chu Libna khaw mi Jeremia fanu Hamutali a ni. Lal Jehoiakina angin Lalpa mit hmuha thil sual Zedekia chuan a ti a. Lalpa chu Jerusalem leh Judai ram mite chungah a thinur êm a, a hmuh phâk lohvah a hnawt chhuak ta a ni. Zedekia chu Babulon lal lakah a hel a. Tichuan, Zedekia kum kua a lal kum, thla sâwmna, ni sâwm niin Nebukadnezara chu a sipaite nên an lo kal a, Jerusalem chu an rawn bei a, khaw daiah chuan bûk an khuar a, bang an theu hual a. Zedekia lal kum sâwm leh pakhatna thlengin an hual a. Chumi kum, a thla lina, ni kua ni chuan khuaah ṭâm a nasa ta hle a, mite chuan ei tûr an nei ta lo va. Khaw kulh chu an tiâwng ta a. Babulon-ho chuan an hual tlat nâ a, a chhûnga sipai zawng zawng chu lal hovin zânah an chhuak ru vek a. Lal huan bulah an kal a, kulh bang pahnih inkâr kawngkhârah an chhuak a, Jordan lui lamah an tlân a. Babulon sipaite chuan lal Zedekia chu an ûm a, Jeriko bul phaiah an man a, a sipaite chuan an tlânsan ta vek a. Zedekia chu Ribla khuaa Nebukadnezara hnênah an hruai a, a chungah ro a lo rêl nghâl a. A hmuh lai ngeiin a fate chu Nebukadnezara chuan a thahsak a, Zedekia mitmu pawh a kherchhuahsak bawk a; kawl a buntîr a, Babulon-ah a hruai ta a. Babulon lal Nebukadnezara lal kum sâwm leh pakuana thla nga, ni sarih ni chuan Nebukadnezara vêngtu pâwl hotu Nebuzaradana chu Jerusalem khuaah a lût a. Tempul chu a hâl a, lal inte leh Jerusalem-a milianho zawng zawng inte pawh a hâl a. A sipaite chuan khaw kulh bang chu an ṭhiat a. Nebuzaradana chuan khawpuia mi la awmte chu Babulon-ah a hruai a, mi themthiam, Babulon-a la kal ve lote pawh salah a hruai. Mi berh tê tê chauh grep huante leh lote thlo atân Judai ramah chuan a hnutchhiah a ni. Kaldai-ho chuan Tempul dâr ban te, tawlailîrte leh dâr tuizêm te chu an chhuchhia a, a dâr tlangin Babulon-ah an hâwn a. Maichâma vutlawh leh vut dahna te, khâwnvâr chhitna hmanrua te, thilhlan thisen lo dawhna no te, rimtui hâlna bûr te, Tempul rawngbâwlnaa thil hman dâr chi rêng rêng chu an la vek a. Rangkachak leh tangkaruaa thil siam rêng rêng chu, berhbu tê tak tê tê, meilawh chenin an la a. Solomonan Tempul atân dâra a siam ban te, tawlailîr te, tuizêm te chu bûk hleih theih loh khawpa rit a ni. Ban pahnihte chu an inang chiah a, tawng sâwm leh pariata sâng an ni ve ve bawk. Sipai hotu ber Nebuzaradana chuan puithiam lalber Seraia te, a dawttu puithiam Zefania te leh Tempula hotu lian pathumte pawh Babulon-ah a hruai a. Khuaa hotu la awm te, sipai hotu dawttu sipai lam chanchin vawng ṭhatu te leh mi dang, mi pawimawh, mi sawmruk te chu Nebuzaradana chuan Hamath bial Libna khua, Nebukadnezara awmna khuaah chuan a hruai a. Lal chuan a vua a, a lo tihlum hlawm a. Chutiang chuan an ram aṭangin sala hruai an ni ta a. Babulon lal Nebukadnezara chuan Ahikama fapa Gedalia, Safana tupa chu Judai ram awptuah a ruat a, Babulon-a hruai ve lohte kha a kutah a dah a. Juda sipai leh an hotu Babulon lal hnêna inpe ve duh loten an hriatin Mizpa khuaa Gedalia hnênah an kal a; chûng sipaite chu Nethania fapa Ismaela te, Karea fapa Johanana te, Netofa khaw mi Tanhumeta fapa Seraia te, Maaka khaw mi Jazania te, an mite nên an ni. Gedalia chuan an hnênah leh an mite hnênah chuan, “Kaldai sawrkâr hnathawkho hi hlau suh u. Ramah hian awm ve mai ula, Babulon lal hnuaiah kûn ula in tân a ṭha ang,” a ti a. Chumi kum, a thla sarihnaah Nethania fapa Ismaela, Elisama tupa, lal thlah zînga mi chu mi sâwm nên Mizpa khuaah a kal a, Gedalia chu a bei a, a that ta mai a. A bula awm Israel leh Babulon mite pawh chu a that bawk a. Israel mi zawng zawng, rethei tak takte leh sipai hotu ni ṭhînte chu Babulon-ho an hlauh avângin Aigupta ramah an kal ta a. Evil-merodaka, Babulon lal a nih kumin, Judai lal Jehoiakina chu a khawngaih a, tân in ata a chhuah a, Jehoiakina chu kum sawmthum leh pasarihna, thla sâwm leh pahnihna, ni sawmhnih leh pasarih a tân hnu chuan a chhuak ta a. A be ṭha hle a, lalṭhutthlêng chu a tânpui lal dang lalṭhutthlêng aiin a tihsânsak a. A tân in kawrte chu a hlîp a, a dam chhûng chuan lal bulah chaw a kîl ve ta a. A dam chhûng chu a mamawh tûr ni tin bithliah neiin an pe ṭhîn a. Adama thlahte, a chhuan indawt zêlin: Setha, Enosa, Kenana, Mahalalela, Jareda, Enoka, Methusela, Lameka leh Nova, Nova, chuan fapa pathum Sema te, Hama te, Jafeta te a nei. Jafeta fate: Gomera, Magoga, Madaia, Javana, Tubala, Meseka, Tirasa, Gomera hi Askenaz-ho te, Difat-ho te, Togarma te thlahtu a ni. Javana hi Elisa-ho te, Tarsis-ho te, Kitim-ho te, Rode-ho te thlahtu a ni. Hama hi Kusa-ho te, Mizraim-ho te, Puta-ho te, Kanan-ho te thlahtu a ni. Hama fa Kusa hi Seba-ho te, Havil-ho te, Sabta-ho te, Raama-ho te, Sabteka-ho te thlahtu a ni. Raama hi Seba-ho leh Dedan-ho thlahtu a ni. Kusa hian fapa, khawvêla hnehtu ropui hmasa ber Nimroda a nei. Mizraima hi Aigupta mi Lud-ho te, Ana-ho te, Lehab-ho te, Naftu-ho te, Pathros-ho te, Kaslu-ho te thlahtu a ni. Filistia-ho leh Kaftor-ho hi Kaslau thlahte an ni. Kanana fapa upa ber Sidona leh Heta hi Sidon-ho leh Het-ho thlahtu an ni. Kanana hi Jebus-ho te, Amor-ho te, Girgas-ho te, Hiv-ho te, Arka-ho te, Sin-ho te, Arvad-ho te, Zemar-ho te, Hamat-ho te thlahtu a ni bawk. Sema thlahte chu: Elam-ho te, Asur-ho te, Arpaksad-ho te, Lud-ho te, Aram-ho te, Uzi-ho te, Hul-ho te, Gether-ho te, Mesek-ho te hi an ni. Arpaksada chuan fapa Sela a nei a, Sela chuan Ebera, Ebera chuan fa pahnih a nei a, pakhat chu a dam laia mihringte an inṭhen darh avângin a hmingah Pelega an sa a, pakhat zâwk chu Joktana a ni. Joktana hi hêngho thlahtu hi a ni: Almodad te, Selef te, Hazarmavet te, Jera te, Hadoram te, Uzal te, Dikla te, Ebal te, Abimael te, Seba te, Ofir te, Havil te, Jobab te. Sema thlah chhâwng zêl Abrama thlengin hetiang hi a ni: Arpaksada, Sela, Ebera, Pelega, Reua, Seruga, Nahora, Tera, Abrama, Abrahama tih hming pu ta kha. Ani chuan fapa Isaka leh Ismaela a nei a. Ismaelan fapa sâwm leh pahnih a nei a, a upa ber chu Nebaiota a ni. A fate hi hêngho thlahtute hi an ni: Nebaiot-ho te, Kedar-ho te, Adbeel-ho te, Mibsam-ho te, Misama-ho te, Duma-ho te, Masa-ho te, Hadad-ho te, Tema-ho te, Jetur-ho te, Nafis-ho te, Kedem-ho te. Abrahama hmei Keturi hian fapa paruk a nei: Zimrana te, Joksana te, Medana te, Midiana te, Isbaka te, Sua te. Joksana chuan fapa Seba leh Dedana a nei a. Midiana hian fapa Efa te, Efera te, Hanoka te, Abida te, Elda te a nei a, chûng chu Keturi thlahte chu an ni. Abrahama fa Isaka chuan fa pahnih Esauva leh Jakoba a nei a. Esauva fate chu: Elifaza te, Reuela te, Jeusa te, Jalama te, Kora te an ni. Elifaza hi Teman-ho te, Omar-ho te, Zefi-ho te, Gatam-ho te, Kenaz-ho te, Timna-ho te, Amalek-ho te thlahtu a ni. Reuela hi Nahat-ho te, Zera-ho te, Sama-ho te, Miza-ho te thlahtu a ni. Edom rama lo awm hmasate chu Seira fate thlah an ni. Seira fate chu: Lotana te, Sobala te, Zibeona te, Ana te, Disona te Ezera te, Disana te. Lotana hi Hori-ho leh Homam-ho thlahtu a ni, a farnu chu Timnai a ni. Sobala chu Alian te, Manahat te, Ebal te, Sefi te leh Onam-ho thlahtu a ni. Zibeonan fa pahnih Aia leh Ana a nei a. Ana chuan fapa Disona a nei a, Disona chu hêngho thlahtu hi a ni: Hamran, Esban, Ithran, Keran-hote hi. Ezera chu Bilhan-ho te, Zavanho te, Jaakan-ho te thlahtu a ni. Disana chu Uz-ho te leh Aran-ho te thlahtu a ni. Israel rama lal an awm hmain hêngte hi Edom rama lal awm tawhte chu an ni: Beora fapa Bela chu Edom ram lalah a ṭang a, a khawpui chu Dinhaba a ni. Bela a thih hnu chuan Bozra khaw mi Zera fapa Jobaban a ai a awh a. Jobaba thih hnuah Teman-ho ram mi Husaman a ai a awh a. Husama a thih chuan Bedada fapa Hadada chuan a ai a awh a, ani hi Moab rama Midian-ho hnehtu kha a ni, a khawpui chu Avit a ni. Hadada a thih chuan Masreka mi Samlaa chu a aiawhin a lal a. Samlaa a thih chuan Rehobot khaw awmna, ‘luipui’ an tih aṭanga lo kal Saula chu a aiawhin a lal a. Saula a thih chuan Akbora fapa Baal-hanan a ai a awh a. Baal-hanana a thih chuan Hadadan a ai a awh a, a khawpui hming chu Pai a ni. A nupui chu Mehetabeli a ni a, Matreda fanu a ni, a pu chu Mezahaba a ni. Hadada chu a thi a. Edom-ho chi hrang hrang hetiang hi an awm: Timna te, Alva te, Jethet te, Oholibama te, Ela te, Pinon te, Kenaz te, Teman te, Mibzar te, Magdiel te, Iram te. Jakoban fapa Reubena te, Simeona te, Levia te, Juda te, Isakara te, Zebuluna te, Dana te, Josefa te, Benjamina te, Naftalia te, Gada te, Asera te a nei a. Juda hian fapa panga a nei: Kanan hmeichhia Batsuaii lakah fa pathum Era te, Onama te, Sela te a nei a. A fapa upa ber Era hi a sual êm avângin Lalpa chuan a tihlum a. A monu Tamari lakah fa pahnih Pereza leh Zera a nei leh bawk. Pereza hian fapa Hezrona leh Hamula a nei a. Zera hian fapa panga: Zimria te, Ethana te, Hemana te, Kalkola te, Dara te a nei a. Zera thlah zînga mi Karmia fapa Akana chuan Pathian tâna serh hran tlat tawh a lâk avângin Israel-hoten an tuar phah a nih kha. Ethana hian fapa Azaria a nei a. Hezrona hian fa pathum Jerameela te, Rama te, Kelubaia te a nei a. Rama hian fapa Aminadaba a nei a, ani hian Juda hnam zînga mi ropui tak, fapa Nasona a nei a. Nasona hian fapa Salmona a nei a, ani chuan Boaza a nei a. Boaza fapa chu Obeda a ni, Jesaia pa chu. Jesaia hian fapa pasarih a nei: an upat dân indawtin: Eliaba, Abinadaba, Simea, Nethanela, Radaia, Ozema, Davida. An farnute chu Zeruii leh Abigaili an ni. Zeruii hian fapa pathum Abisaia te, Joaba te, Asahela te a nei. Abigaili hian fapa Amasa a nei a, a pasal chu Ismaela thlah Jethera a ni. Hezrona fapa Kaleba chuan Azubi nupuiah a nei a, fanu Jerioti a nei a, fapa pathum Jesera te, Sobaba te, Ardona te a hrinsak a. Azubi thih hnuah Kaleba chuan Efrati nupuiah a nei a, fapa Hura an nei a. Hura chuan fapa Uria a nei a; ani chuan fapa Bezalela a nei a. Kum sawmruk a nihin Hezrona chuan Makira fanu, Gileada farnu, nupuiah a nei a, fapa Seguba a nei a. Seguba chuan Jaira a nei a, chu mi chu Gilead rama khaw sawmhnih leh pathum chunga lal a ni. Gesur-ho leh Aram-ho chuan chûng lai ram khaw sawmruk chu an la a, Jaira leh Kenat te khua leh an khawperte pawh an la tel a. Chûng khuaa chêngte chu Gileada pa Makira thlahte vek an ni. Hezrona chu a thi a, a fapa Kaleba chuan a pa nupui thihsan Efrati chu nupuiah a nei a, fapa Asura a nei a, ani hi Tekoa khaw zuan hmasatu a ni. Hezrona fapa upa ber Jerameela chuan fapa panga a nei; a upa ber chu Rama a ni, a dang chu Buna te, Orena te, Ozema te, Ahija te an ni. Rama hian fapa pathum, Maaza te, Jamina te, Ekera te a nei a. Jerameela hian nupui dang, Atari a nei a, fapa Onama a nei a. Onama hian fapa pahnih, Samaia leh Jada a nei a. Samaia pawh hian fapa pahnih, Nadaba leh Abisura a nei a. Abisura hian nupuiah Abihaili a nei a, fapa pahnih, Abana leh Molida a nei a. Abisura u Nadaba pawh hian fapa pahnih, Seleda leh Apaima a nei a, Seleda chu fa nei lovin a thi a, Apaima chuan fapa Isia a nei a, Isia chuan Sesana, Sesana chuan fapa Ahlaia a nei a. Samaia nau Jada chuan fapa pahnih, Jethera leh Jonathana a nei a. Jethera chu fa nei lovin a thi a. Jonathana chuan fapa pahnih, Peleta leh Zaza a nei a. Hêngho hi Jerameela thlahte chu an ni. Sesana hian fapa a nei lo, fanu chauh a nei. Chhiahhlawh, Aigupta mi Jarha a nei a, ani hi a fanu a neihtîr a, fapa Ataia an nei a. Ataia hian fapa Nathana a nei a, ani chuan fapa Zabada a nei a. Zabada hian fapa Eflala a nei a, ani chuan fapa Obeda a nei a. Obeda chuan fapa Jehua a nei a, Jehua chuan fapa Azaria a nei a. Azaria chuan fapa Haleza a nei a, ani chuan fapa Eleasa a nei a. Eleasa chuan fapa Sismaia a nei a, ani hian fapa Saluma a nei a. Saluma hian fapa Jekamia a nei a, ani hian fapa Elisama a nei a. Jerameela u, Kaleba fapa upa ber chu Mesa a ni, Zifa pa a ni a. Zifa chuan fapa Maresa a nei a, ani chuan fapa Hebrona a nei a. Hebrona chuan fapa pali - Kora te, Tapua te, Rekema te, Sema te a nei a. Sema chu Rahama pa a ni, Rahama chuan fapa Jorkeama a nei a, Sema u Rekema chuan fapa Samaia a nei a, ani chuan fapa Maona a nei a, Maona chuan fapa Betzura a nei a. Kaleba chuan hmei, Efaii a nei a, ani nên chuan fa pathum Harana te, Moza te, Gazeza te an nei a. Harana pawh hian fapa Gazeza bawk a nei. Mi pakhat Jadaia chuan fapa paruk, Regema te, Jothama te, Gesana te, Peleta te, Efaa te, Saafa te a nei a. Kaleba chuan hmei dang Maaki a nei a; fapa pahnih, Sebera leh Tirhana a neihsak a. Nakin deuhvah fa pahnih, Saafa leh Seva a neihsak leh a. Saafa hi Madmana khaw dintu a ni a, Seva hi Makbena leh Gibea khaw zuan hmasatu a ni. Kaleba hian fanu Aksaii a nei bawk. Hêngho pawh hi Kaleba thlahte an ni: Kaleba leh a nupui Efrati fapa upa ber chu Hura a ni. Hura fapa Sobala chu Kiriat-jearim khaw dintu a ni. A fapa, an milai Salma chu Bethlehem khaw dintu a ni, a fa tlum Harefa chu Beth-gadar khaw dintu a ni. Kiriat-jearim dintu Sobala chu Haroe leh Menuhot-a awm zâtve thlahtu a ni. Kiriat-jearim-a awmho Ithra-ho te, Put-ho te, Sumat-ho te, Misra-ho te hi a thlahte an ni bawk. Zera leh Estaol khuaa awmte pawh hêng chi pêngte hi an ni. Bethlehem khaw dintu Salma chu Netofat te, Atrot-beth-Joab khuaa awmte thlahtu a ni. Manahat-a awm zâtve dâwn lai, Zor-ho thlahtu pawh a ni. Lehkha ziak mi, Jabes khuaa awm Tirat-ho te, Simeat-ho te, Sukat-ho te, Ken-ho te nên chi khat an ni. Rekab-ho nên an inneih pawlh. An upat dân indawtin hêng hi Davida fa, Hebrona a awm laia piangte chu an ni: Amnona, a nu chu Jezreel mi Ahinoami a ni; Daniela, a nu chu Karmel mi Abigaili a ni. Absaloma, a nu chu Gesur lal Talmaia fanu Maaki a ni; Adonija, a nu chu Hagiti a ni; Sefatia, a nu chu Abitali a ni; Ithreama, a nu chu Egli a ni. Hebron khuaa kum sarih leh a chanve a lal chhûngin Davida chuan fapa paruk a nei hman a. Jerusalem-ah kum sawmthum leh pathum a lal a, fa pawh tam tak a nei. Amiela fanu Bathsebi lakah fapa pali, Simea te, Sobaba te, Nathana te, Solomona te a nei a. Fapa dang pakua, hêngte hi a nei bawk: Ibhara, Elisua, Elifeleta, Noga, Nefega, Jafia, Elisama, Eliada, Elifeleta; hêng bâkah hian a hmeiho lakah fapa a nei nual bawk. Fanu Tamari pawh a nei bawk. Lal Solomona thlah zêlte chu a chhuan indawtin hêngte hi an ni: Rehoboama, Abija, Asa, Jehosafata, Jehorama, Ahazia, Joasa, Amazia, Uzia, Jothama, Ahaja, Hezekia, Manasea, Amona, Josia, Josia hian fapa pali, Johanana te, Jehoiakima te, Zedekia te, Saluma te a nei a. Jehoiakima hian fapa pahnih Jehoiakina leh Zedekia a nei a. Babulon sala hruai lal Jehoiakina khân fapa pasarih, Sealtiela te, Malkirama te, Pedaia te, Senazara te, Jekamia te, Hosama te, Nedabia te a nei a. Pedaia hian fapa pahnih, Zerubabela leh Simeia a nei a. Zerubabela hian fapa pahnih Mesulama leh Hanania a nei a, fanu Selomithi a nei bawk. Fapa dang panga Hasuba te, Ohela te, Berekia te, Hasadia te, Jusab-heseda te a nei bawk. Hanania hian fapa pahnih Pelatia leh Jesaia a nei a; Jesaia hian fapa Refaia a nei a, chu mi chuan fapa Arnana a nei a; Arnana hian fapa Obadia a nei a, ani hian fapa Sekania a nei a. Sekania hian fapa pakhat Semaia a nei a, tu panga - Hatusa te, Igala te, Baria te, Nearia te, Safa te a nei a. Nearia hian fapa pathum, Elioenaia te, Hizkia te, Azrikama te a nei a. Elioenaia hian fapa pasarih, Hodavia te, Eleasiba te, Pelaia te, Akuba te, Johanana te, Delaia te, Anania te a nei a. Hêng hi Juda thlah ṭhenkhatte an ni: Pereza te, Hezrona te, Karmia te, Hura te, Sobala te. Sobala chuan fapa Reaia a nei a, ani chuan fapa Jahata a nei a. Jahata hian fapa Ahumaia leh Lahada, Zora khuaa awmte thlahtute chu a nei a. Kaleba leh Efrati fa hmasa chu Hura a ni, Bethlehem khaw dintu chu. Hura chuan fapa pathum Etama te, Penuela te, Ezera te a nei a. Etama chuan fapa pathum Jezreela te, Isma te, Idbasa te a nei a, fanu pakhat Hazelelponi a nei bawk. Penuela hi Gedor khaw dintu a ni a, Ezera hi Husa khaw dintu a ni. Tekoa khaw dintu Asuran nupui pahnih - Heli leh Naari a nei a, Naari nên fapa pali - Ahuzama te, Hefera te, Temenia te, Hahastaria te an nei a. Heli nên fapa pathum - Zereta te, Izara te, Ethnana te an nei a. Haruma fapa Aharhela thlahte neitu Koza chuan fapa Anuba leh Zobeba a nei bawk. An chhûng zînga zahawm fâl mi pakhat Jabeza a awm a, a nuin, “Na ti taka ka hrin a ni,” tiin a hmingah Jabeza a sa a ni. Israel-te Pathian hnênah Jabeza chu a ṭawngṭai a, “Aw Pathian, mal min sâwm la, ram zau tak min pe teh, nâ ka tuar loh nân thil ṭha lo lakah min vêng la, min awmpui reng ang che,” a ti a. Pathian chuan a dîl angin a tihsak a. Suha unaupa Kaleba chuan fapa Mehira a nei a, Mehira chuan fapa Estona a nei a, ani chuan fapa pathum - Bethrafa te, Pasea te, Tehina te a nei a, Tehina hi Nahas khaw dintu a ni. Hêngho thlahte hi Reka-ah an awm. Kenaza chuan fapa pahnih - Othniela leh Seraia a nei a. Othniela pawhin fapa pahnih, Hathata leh Meonothaia a nei a. Meonothaia hian fapa Ofra a nei a, Seraia hian fapa Joaba hi a nei a, Joaba hi ‘Themthiam Ruam’ an tiha awmte thlahtu a ni. Heta awmte hi mi themthiam tak tak hlîr an ni. Jefunea fapa Kaleba chuan fapa pathum Irua te, Ela te, Naama te a nei a. Ela chuan fapa Kenaza a nei a. Jehalelan fapa pali - Zifa te, Zifaia te, Tiria te, Asarela te a nei a. Ezra chuan fa pali - Jethera te, Mereda te, Efera te, Jalona te a nei a. Mereda hian Aigupta lal fanu Bithiai nupuiah a nei a; fanu pakhat Miriami leh fapa pahnih - Samaia leh Isba an nei. Isba hi Estemo khaw dintu a ni. Mereda chuan Juda hnam nupui a nei bawk a, fapa pathum - Jereda te, Hebera te, Jekuthiela te an nei a. Jereda hi Gedor khaw dintu a ni, Hebera hi Soko khaw dintu a ni; Jekuthiela hi Zano khaw dintu a ni. Hodia chuan Nahama farnu nupuiah a nei a; an fate chu Keila khuaa Garm-ho leh Estemoa khuaa awm Maaka-ho thlahtute an ni. Simona chuan fapa pali Amnona te, Rina te, Ben-hanana te, Tilona te a nei a. Isia hian fapa Zoheta leh Ben-zoheta a nei a. Juda fapa Sela thlahte chu hêngte hi an ni: Era, Leka khaw dintu; Laada, Maresa khaw dintu; a thlahte chu Beth Asbea khuaa awmte hi an ni, la dek mi an ni. Jokima, Kozeba khuaa awmte nên hian; Joasa leh Sarafa; anni hian Moab nula nupuiah an nei a. Bethlehem khuaah an awm ta a (an chanchin chhuina hi hmânlaia mi a ni). Lal mi rawih, bêl vaw mi an ni, Netaim leh Gedera khuaah an awm. Simeonan fapa panga - Nemuela te, Jamina te, Jariba te, Zera te, Saula te a nei a. Saula hian fapa Saluma a nei a, ani chuan fapa Mibsama a nei a, Mibsama hian fapa Misma a nei a. Misma hian fapa Hamuela a nei a, ani chuan fapa Zakura a nei a, Zakura chuan fapa Simeia a nei a. Simeia chuan fapa sâwm leh paruk leh fanu paruk a nei a, a laichîn dangte erawh chuan fa an nei tam ve lo; Simeona thlahte chu Juda thlahte angin an hung ve lo. Davida hun thleng kha chuan Simeona thlahte hi Beer-seba-ah te, Molada-ah te, Hazar-sual-ah te, Bilha-ah te, Ezem-ah te, Tolad-ah te, Bethuel-ah te, Horma-ah te, Ziklag-ah te, Beth-markabot-ah te, Hazar-susim-ah te, Beth-biri-ah te, Saaraim khuaah te an awm ṭhîn. Etam-ah te, Ain-ah te, Rimon-ah te, Token-ah te, Asan khuaah te leh an chhehvêl khuaah te, Baalat khaw chhimthlang thlengin an awm bawk. An chhûngkaw chanchin leh an awm ṭhinna ziakna bu-ah chuan an hnam hruaitute chu hêngte hi an ni: Mesobaba te, Jamleka te, Amazia fapa Josa te, Joela te, Jehua te (Jehua hi Josibia fa a ni, chu mi pa chu Asiela fapa Seraia a ni). Elioenaia te, Jaakoba te, Jesohaia te, Asaia te, Adiela te, Jesimiela te, Benaia te, Ziza te. Ziza hi Sifia fa a ni; chu mi chu Alona fa a ni. Alona hi Jedaia fa a ni, chu mi pa chu Semaia fa Simria a ni. Hêng chhûngkuate hi an pung chak hle a. Khawthlang lamah Gerar thlengin an inzâr darh a, chu khaw awmna ruam khawchhak lamahte an berâmte an zu tlattîr ṭhîn. Ram awl zau, hnim ṭhatna hmun, ram reh muanawm tak an hmu ṭeuh a ni. Hêng laiah hian Ham-ho an awm ṭhîn. Judai ram lal Hezekia hun lai khân khîngte khi Gerar-ah an kal a, chuta awmte puan in leh an bûkte chu an tihchhiatsak a. An berâm tlatna tûr hnim a ṭhat êm avângin chuta lo awmte chu an hnawt chhuak a, anmahni an awm hlen ta a ni. Isia fa Pelatia te, Nearia te, Refaia te leh Uziela te hovin Simeona thlahte zînga mi zanga chu khawchhak lam Edom ramah an kal a. Amalek-ho la awmte chu an that a, tûn thlengin an awm ta zêl a. Jakoba fapa upa ber Reubena thlahte chu hêngte hi an ni. (Reubena hian a pa hmei a mutpui avângin fa u ber nihna lâksak a ni a, Israela fa Josefa fate hnêna pêk a ni a; chuvângin, fa tîr chhiarnaah a hming a tel ta lo va ni). Juda thlahte hian an unaute an khûm a, an zîng aṭangin lal a lo chhuak na a, fa tîr nihna chu Josefa chan a ni. Israela neih hmasak Reubena chuan fapa pali, Hanoka te, Palua te Hezrona te, Karmia te a nei a. Joela thlahte chu a chhuan indawtin hêngte hi an ni: Semaia, Goga, Simeia, Mika, Reaia, Baala, Beera; Beera hi Reubena thlahte zînga hotu ber a ni. Asuria Lal Tilgat-pilnesera a man a, salah a hâwn a; an chhûngkaw chanchin ziaknaah Reubena thlah chi hrang hruaitute hming hêng chauh hi a chuang: Jeiela, Zekaria, Bela hi Azaza fa a ni, a pu chu Sema, Joel chi a ni. Joel chite hi Aroer khuaah an awm. Hmâr lam ram Nebo leh Baal-meon thlengin an chan a ni. Gilead ramah hian berâm leh kêl an ngah hle a; chuvâng chuan, khawchhak lam thlalêr ram, Eufretis lui thlengin an luah a ni. Lal Saula hun lai khân Reuben-ho hian Hagar-ho an bei a, an that a, Gilead ram chhak lama an ram chu an neihsak ta a. Reuben-ho dawt Basan ramah Gada thlahte hi an awm, khawchhak lamah Saleka thlengin an inzâr a. Joela thlahte hi an tam ber a, Sefama thlahten an dawt a. Janaia leh Sefata thlahte hi Basan rama chi hlâwm dang awm vete chu an ni. Gad hnam zîngah hêng chi sarihte pawh hi chhiar tel an ni: Mikael, Mesulam, Seba, Jorai, Jakan, Zia, Eber. Hêngho hi Huria fapa Abihaila thlah an ni. Huria pa chu Jaroa a ni, chu mi pa chu Gileada a ni a, a pa chu Mikaela a ni. Mikaela pa chu, Jesisaia a ni, chu mi pa chu Jahdoa a ni, a pu chu Buza a ni. Hêng chite zînga hruaitu ber chu Abdiela fapa Ahia a ni, chu mi pa chu Gunia a ni. Gilead leh Basan rama khuaahte an awm a, Saron ram phûlah te an awm darh bawk. Juda lal Jothama leh Israel lal Jeroboama te hun laiin hêng inthlahchhâwng chanchin hi an chhui chhuak a ni. Reuben-ho te, Gad-ho te leh khawchhak lama awm Manase hnam zâtve te chuan phaw te, khandaih te leh thal hman dân thiam sipai sîngli leh sângli leh zasarih leh sawmruk an nei a. Hagar hnam Jetur te, Nafis te, Nodab te nên an indo va. Pathian an ring a, ṭanpui an dîl a, Pathianin an ṭawngṭaina chu a chhâng a, Hagar-ho chu, an thurualpuite nên an hneh a. An hmêlmate sanghâwngsei sîngnga, berâm nuaihnih leh sîngnga, sabengtung sanghnih leh mi nuaikhat an man a. Pathian hminga indo an ni a, mi tam tak an that a ni. Sala an tân hma chu chûngho ramah chuan an awm ta a. Khawchhak lama Manasea thlah awmte chu Basan ramah leh a hmâr lam ramah Baal-hermon-ah te, Senir-ah te, Hermon tlâng thlengin an awm a, mi an pung chak hle. An zînga chi hrang hrang hruaitute chu Efera te, Isia te, Eliela te, Azriela te, Jeremia te, Hodavia te, Jadiela te an ni. Sipai huai tak tak an ni a, an chite zînga hotu challang tak vek an ni. Mite chuan an pate Pathian chu an hawisan a; chûng rama lo awm, Pathianin a hnawh chhuahte pathian chu an be ta a. Chuvângin, Pathianin Asuria lal Pula, Tilgatpilnesera an tih bawk chu, an ram a rawn rûntîr a, Reuben thlah te, Gad thlah te leh khawchhak lama awm Manase thlah te chu a kawi chhuak a, Hala-ah te, Habor-ah te, Hore-ah te leh Gozan lui kamah te chuan a awm hlentîr ta a. Levia chuan fa pathum - Gersona te, Kohata te, Meraria te a nei a. Kohata hian fa pali - Amrama te, Izara te, Hebrona te, Uziela te a nei a. Amrama chuan fapa pahnih - Arona leh Mosia a nei a, fanu Miriami a nei bawk. Arona hian fa pali - Nadaba te, Abihua te, Eleazara te, Ithamara te a nei a. Eleazara thlahte chu a chhuan indawtin hêngte hi an ni: Finehasa, Abisua, Bukia, Uzia, Zerahia, Meraiota, Amariah, Ahituba, Zadoka, Ahimaaza, Azaria, Johanana, Azaria (Jerusalem Tempul, Solomona saka rawngbâwltu kha), Amaria, Ahituba, Zadoka, Saluma, Hilkia, Azaria, Seraia, Jehozadaka. Jehozadaka hi lal Nebukadnezaran salah Judai ram leh Jerusalem-a mi dangte zîngah a hruai ve a, Lalpa chuan salah a tântîr a ni. Levia chuan fa pathum - Gersona te, Kohata te, Meraria te a nei a. Chûng chuan fapa an nei ṭheuh va. Gersona chuan Libna leh Simeia a nei a. Kohata chuan Amrama te, Izara te, Hebrona te, Uziela te a nei a. Meraria hian Mahlia leh Musia a nei a. Gersona thlahte, a chhuan indawtin hêngte hi an ni: Libnia, Jahata, Zima, Joa, Idoa, Zera, Jeatheraia. Kohata thlahte, a chhuan indawtin hêngte hi an ni: Aminadaba, Kora, Asira, Elkana, Ebiasafa, Asira, Tahata, Uriela, Uzia, Saula. Elkana chuan fapa Amasaia leh Ahimota a nei a. Ahimota thlah, a chhuan indawtin hêngte hi an ni: Elkana, Zofaia, Nahata, Eliaba, Jerohama, Elkana. Samuela fapa upa zâwk chu Joela a ni a, a naupang zâwk chu Abija a ni. Meraria thlah, a chhuan indawtin hêngte hi an ni: Mahlia, Libnia, Simeia, Uza, Simea, Hagia, Asaia. Jerusalem khuaa Thuthlung bâwm an lâk luh hnu chuan lal Davidan hêng mite hi Pathian biak huna zaipâwl huaihawt tûrin a ruat. Lal Solomonan Tempul a sak hnu chuan hêng mite hi pâwla insiamin Inbiakna bûka hla sa tûrin an inkalchhâwk ṭhîn. Chûng mite inthlah chhâwn dân chu hetiang hi a ni: Kohata thlahte: Zaipâwl khat hotu chu Joela fapa Hemana a ni. Hemana thlahtute chu an chhuan indawtin hêngte hi an ni: Joela, Samuela, Elkana, Jerohama, Eliela, Toa, Zufa, Elkana, Mahata, Amasaia, Elkana, Joela, Azaria, Zefania, Tahata, Asira, Ebiasafa, Kora, Izara, Kohata, Levia, Jakoba. Asafa chu zaipâwl dang hotu a ni. Asafa thlahtute chu an chhuan indawtin hêngte hi an ni: Berekia, Simea, Mikaela, Baaseia, Malkija, Ethnia, Zera, Adaia Ethana, Zima, Simeia, Jahata, Gersona, Levia. Meraria thlah Ethana chu zaipâwl dang hotu a ni. Ethana thlahtute chu an chhuan indawtin hêngte hi an ni: Kisia, Abdia, Maluka, Hasabia, Amazia, Hilkia, Amzia, Bania, Semera, Mahlia, Musia, Meraria, Levia. An chipui, Levia chi dangte chu, Pathian biakna hmuna tih tûr hrang hrang ti tûrin hna an ruatsak bawk a. Arona leh a thlahte hi maichâma rimtui hâl a, hâlral thilhlan hlântu an ni. Hmun Thianghlima Pathian biak hi an hova tih tûr a ni. Pathianin a mite sual a ngaihdam nân, thilhlan pawh anni hian an hlân tûr a ni. Pathian chhiahhlawh Mosia sawi ang chiah zêlin chûng chu an ti ṭhîn. Arona thlahte chu a chhuan indawtin hêngte hi an ni: Eleazara, Finehasa, Abisua, Bukia, Uzia, Zerahia, Meraiota, Amaria, Ahituba, Zadoka, Ahimaaza. Arona thlah Kohat-ho awmna ram chu hei hi a ni: Levia chite awmna tûra an ruatsak hmasaah an awm a ni. Judai ramah chuan Hebron-ah an awmtîr a, a vêl ran tlatna pawh an chan a ni. He khaw huam chhûnga khawperte leh lo ramte chu Jefunea fapa Kaleba chan a ni. Arona thlahte awmna tûra an ruat chu hêng hi a ni: Hebron, inhumhimna khua a ni nghâl bawk; Libna, Jatir, Estamoa, Hilen, Debir Asan, Beth-semes khaw dai, ran tlatnate nên. Benjamin-ho bialah hêng khuate leh an dai ran tlatnate hi an behtîr a: Geba, Alemet, Anathot. An chhûngkua zawng zawng awmna tûra an ruat chu khaw sâwm leh pathum a ni. Khawthlang lam Manasea thlahte bialah Kohata thlah mi dangte awmna tûr ṭhumvâwrin a chhûng chhûngin khaw sâwm an ruatsak a. Gersona thlahte, a chhûng chhûnga an awmna tûr, Isakara-ho ramah te, Aser-ho ramah te, Naftali-ho ramah te leh khawchhak lama Manasea thlahte awmna Basan ramah te khaw sâwm leh pathum an ruatsak a. Chutiang bawkin Reuben-ho te, Gad-ho te leh Zebulun-ho awmna ramah khaw sâwm leh pahnih Meraria thlahte, a chhûng chhûnga an awmna tûr an ruatsak a. Chutiang bawkin Israel mite chuan Levia chite awmna tûr khua, a dai vêl ran tlatna tûrte nên an ruatsak a (Juda-ho te, Simeon-ho te, Benjamin-ho te ram chhûng khua an ruatsak pawh kha ṭhum vâwra tih a ni). Kohata thlah chhûng ṭhenkhat chu Efraim-ho awmna ramah khaw ṭhenkhat leh a dai vêl ran tlatnate an awmna atân an ruatsak a. Efraim tlângrama awm inhumhimna khua Sekem te, Gezer te, Jokmeam te, Beth-horon te, Aijalon te leh Gath-rimon te hi. Khawthlang lam Manase-ho ramah pawh Aner leh Bileam khuate chu a dai vêl ran tlatnate nên an chanah an ruatsak bawk. Gersona thlahte awm nân hêng khuate hi, a dai vêl ran tlatna nên an ruat bawk: Khawchhak lam Manase-ho awmna Basan bialah Golan leh Astarot khuate hi. Isakar-ho awmnaah: Kedes khua te, Daberat khua te, Ramot khua te, Anem khua te hi. Aser-ho awmnaah: Masal khua te, Abdon khua te, Hukok khua te, Rehob khua te hi. Naftali-ho awmnaah: Galili-a Kedes khua te, Hamon khua te, Kiriathaim khua te hi. Meraria thlah dangte chu, hêng khua leh a dai vêl ran tlatnate hi an ruatsak a: Zebulun-ho awmna Rimon leh Tabor khua te. Jordan chhak lam Jeriko zâwn Reuben-ho awmnaah: Tlâng zâwla Bezer khua te, Jahza khua te, Kedemot khua te, Mefaat khua te hi. Gad-ho awmnaah: Gilead biala Mahanaim khua te, Hesbon khua te, Jazer khua te hi. Isakara khân fapa pali - Tola te, Pua te, Jasuba te, Simrona te a nei a. Tola hian fapa paruk, Uzia te, Refaia te, Jeriela te, Jamaia te, Ibsama te, Semuela te a nei a. Chûng chu Tola thlahte chhûngkaw hotu an ni a, mi huaisen hmingthang tak tak an ni; Davida hun laiin an thlahte chu mi sînghnih leh sânghnih leh zaruk an ni. Uzia hian fapa pakhat Izrahia a nei a, Izrahia leh a fa pali Mikaela te, Obadia te, Juda te, Isahia te hi chhûngkaw hotu an ni ṭheuh va. Nupui an ngah a, fate pawh an nei tam a, indo mi sîngthum leh sângruk an awm. Isakara thlah chhûngkaw zîngah sipaia ṭang thei mi sîngriat leh sângsarih hming ziak a ni. Benjaminan fapa pathum - Bela te, Bekera te, Jediaela te a nei a. Bela hian fa panga - Ezbona te, Uzia te, Uziela te, Jerimota te, Iria te a nei a, thlah khat zîngah hotu an ni ṭheuh, an thlahte chu mi sînghnih leh sânghnih leh sawmthum leh pali sipaia chhawr theih an awm. Bekera hian fapa pakua, Zemira te, Joasa te, Eliezara te, Elioenaia te, Omria te, Jeremota te, Abija te, Anathota te, Alemeta te a nei a. Thlah tin chhiarnaah sipaia ṭang tlâk mi sînghnih leh zahnih hming ziak a ni. Jediaelan fapa pakhat, Bilhana a nei a. Bilhana hian fapa pasarih, Jeusa te, Benjamina te, Ehuda te, Kenaana te, Zethana te, Tarsisa te, Ahisahara te a nei a. Thlah khat lu ṭheuh an ni a, huaisenah an hming a thang. An thlahte zîngah sipai ṭang tlâk mi sîngkhat leh sângsarih leh zahnih an awm. Supim leh Hupim-ho pawh hêng chi zînga chhiar tel hi an ni. Husima chu mi dang thlah a ni. Naftali hian fapa pali - Jaziela te, Gunia te, Jezera te, Saluma te, a nei a (Bilhaii thlahte an ni). A nupui Aram mi nên Manasean fa pahnih Asriela leh Makira a nei a. Makira hi Gileada pa a ni. Makira hian Hupima leh Supima tân nupui a zawnsak a. A farnu chu Maaki a ni. Makira fa pahnihna chu Zelofehada a ni, ani hian fa hmeichhia chauh a nei a. Makira nupui Maaki hian fapa pahnih - Peresa leh Seresa a nei a. Peresa hian fapa pahnih - Ulama leh Rekema a nei a. Ulama hian fa pakhat Bedana a nei a. Hêngho hi Gileada thlahte chu an ni. Gileada pa chu Makira a ni a, a pu chu Manasea a ni. Gileada farnu Hamoleketi chuan fapa pathum - Isoda te, Abiezera te, Malaa te a nei a (Semida chuan fapa pali - Ahiana te, Sekema te, Likhia te, Aniama te a nei). Efraima thlahte chu a chhuan indawtin hêngte hi an ni: Suthela, Bereda, Tahata, Eleada, Tahata, Zabada, Suthela, Efraima hian fapa Ezera leh Eliada a nei bawk a; mahse, Gath khaw mite berâm an ru lai an lo that a. An pa Efraima chuan a sûn a, a unaute chuan an rawn lênpui a, an thlamuan a. A nupui chu a pâwl leh a, nau a pai a, fapa a hring a, an chunga buaina a thlen avângin a hmingah Beria an sa a. Efraima chuan fanu Seeri a nei bawk; Beth-horon chuanchung leh chuanhnuai khua leh Uzen-seer khuate hi a siam a ni. Efraima hian fapa dang Refaa a nei bawk a, chu mi thlahte chu a chhuan indawtin hêngte hi an ni: Resefa, Tela, Tahana, Ladana, Amihuda, Elisama, Nuna, Josua. An ram lâk, an awm tâkna ram chuan Bethel leh a chhehvêl khua aṭangin chhak lamah Naaran khua a thleng a, thlang lamah Gezer leh a chhehvêl khua a thleng bawk. Sekem leh Aia khua, an chhehvêl khua te nên a huam bawk. Hêng khawpui Beth-sean te, Taanak te, Megido te, Dor te leh an chhehvêl khuate hi Manasea thlahte thuhnuaiah an awm, khîng hmunahte khian Jakoba fa Josefa thlahte chu an awm a ni. Hei hi Aser thlah chhuina a ni. Fapa pali - Imna te, Isva te, Isvia te Beria te a nei a; fanu Seri a nei bawk. Beria hian fapa Hebera leh Malkiela a nei a. Malkiela hian Birzait khua hi a din a ni. Hebera hian fapa pathum - Jafleta te, Somera te, Hothama te a nei a, fanu Suai a nei bawk. Jafleta hian fapa pathum - Pasaka te, Bimhala te, Asvata te a nei. A nau Somera pawh hian fapa pathum - Roga te, Jehuba te, Arama te a nei bawk. An tlum ber Hothama hian fapa pali - Zofa te, Imna te, Selesa te, Amala te a nei. Zofa thlahte chu a chhuan indawtin hêngte hi an ni: Sua, Harnefera, Suala, Beria, Imra, Bezera, Hoda, Sama, Silsa, Ithrana, Beera. Jethera thlahte chu Jefunea te, Pispa te, Ara te an ni. Ula thlahte chu Ara te, Haniela te, Rizia te an ni. Khîng khi Asera thlahte chu an ni. A chi hrang hotute chu indonaa hmingthang, hruaitu fel tak tak an ni. Asera thlahte zîngah sipaia ṭang tlâk mi sînghnih leh sângruk an awm. Benjaminan fapa panga a nei a, an upat dân indawtin, hêngte hi a nei: Bela, Asbela, Ahara, Noha, Rafa. Bela chuan fapa hêngte hi a nei: Adara, Gera, Abihuda, Abisua, Naamana, Ahoa, Gera, Sefufana, Hurama. Ehuda thlahte chu Naamana te, Ahija te, Gera te hi an ni. Geba khuaa chi hrang hrang awmte hotu an ni; salah Manahat-ah an hruai a, chutah chuan an awm ta a, Uza leh Ahihuda pa Gera hovin an chhuak a ni. Saharaima chuan a nupui pahnih Husimi leh Baari chu a ṭhen a; chumi hnu chuan Moab ramah a awm a. Nupuiah Hodesi a nei a, fapa pasarih - Jobaba te, Zibia te, Mesa te, Malkama te, Jeuza te, Sakia te, Mirma te a nei a. A fate chu an chi hruaitute an ni hlawm. Husimi nên khân fapa pahnih Abituba leh Elpaala an nei. Elpaala hian fapa pathum - Ebera te, Misama te, Semeda te a nei a. Semeda hian Ono leh Lod hi an chhehvêl khuate nên a din a. Beria leh Sema hi Aijalon khuaa awm tate chi hrang hrang hotute an ni, Gath khuaa awm ṭhînte chu an ûm chhuak a. Beria thlahte chu hêng hi an ni: Ahioa te, Sasaka te, Jeremota te, Zebadia te, Arada te, Edera te, Mikael te, Ispa te, Joha te. Elpaala thlahte chu: Zebadia te, Mesulam te, Hizkia te, Hebera te, Ismerai te, Izlia te, Jobaba te an ni. Simeia thlahte chu: Jakim te, Zikri te, Zabdi te, Elienai te, Zilethai te, Eliel te, Adaia te, Beraia te, Simrata te an ni. Sasaka thlahte chu: Ispan te, Eber te, Eliel te, Abdon te, Zikri te, Hanan te, Hanania te, Elam te, Anthothiza te, Ifdeia te, Penuela te an ni. Jerohama thlahte chu: Samseraia te, Seharia te, Athalia te, Jaaresia te, Eliza te, Zikria te an ni. Chûng chu hêng hnam thlahtu bulte chu an ni, an thlahte hi Jerusalem khuaah an awm. Jeielan Gibeon khua hi a din a, a awm ta a. A nupui chu Maaki a ni. A fa upa ber chu Abdona a ni, a fa dangte chu Zura te, Kisa te, Baala te, Nera te, Nadaba te, Gedora te, Ahioa te, Zekera te, Miklota te an ni. Miklota hi Simea pa a ni. Hêngho thlahte hi an chipuite bul, Jerusalem-ah an awm. Nera hian fapa Kisa a nei a, Kisa hian fapa lal Saula a nei a. Saula hian fapa pali - Jonathana te, Malkisua te, Abinadaba te, Esbaala te a nei a. Mika pa Merib-baala chu Jonathana fa a ni. Mika hian fapa pali - Pithona te, Meleka te, Tarea te, Ahaza te a nei a. Ahaza chuan fapa Jehoada a nei a, ani chuan fapa pathum - Alemeta te, Azmaveta te, Zimria te a nei a. Zimria chuan fapa Moza a nei a. Ani chuan fapa Binea a nei a, Binea chuan fapa Rafa a nei a, ani chuan fapa Eleasa a nei a, Eleasa chuan fapa Azela a nei a. Azela hian fapa paruk: Azrikama te, Bokerua te, Ismaela te, Searia te, Obadia te, Hanana te a nei a. Azela nau Eseka chuan fapa pathum - Ulama te, Jeusa te, Elifeleta te a nei a. Ulama fate chu sipai huai tak tak an ni, thal kah an thiam êm êm. Tu leh fa za leh sawmnga a nei. Hêngho hi Benjamin hnam zînga mi vek an ni. Israel mi zawng zawng hming chu a chhûng chhûngin ziak vek a ni a. “Israel lalte Lehkhabu” tihah chuan ziak luh a ni. Judai rama mi zawng zawng chu an sual avânga hrem nân Babulon-ah sala hruai vek an ni. An in leh lo awmna khuaa lo kîr hmasate chu Israel mi narân te, puithiam te, Levia chi te, Tempul enkawltu te an ni. Juda hnam te, Benjamin hnam te, Efraim hnam te leh Manase hnam te chu Jerusalem khuaah awm tûrin an kal a. Juda fa, Pereza thlahte hruaitu chu Amihuda fapa Uthaia a ni, a pu chu Omria a ni. A thlahtute zîngah Imria leh Bania an tel. Juda fa Sela thlahte hruaitu chu Asaia a ni, an chhûngkaw hotu ber a ni. Juda fa Zera thlahte hruaitu chu Jeuela a ni, Juda thlah Jerusalem-a awmte chu mi zaruk leh sawmkua an ni. Benjamin hnam hrang hrang Jerusalem-a awmte chu hêngte hi an ni: Mesulama fa Salua te chhûng: Mesulama pa hi Hodavia a ni, a pu chu Hasenua a ni; Jehorama fapa Ibneia te chhûng; Uzia fapa, Mikria tupa Ela te chhûng; Sefatia fapa Mesulama te chhûng: Sefatia hi Reuela fa Ibnija tupa a ni. He hnam hi Jerusalem-ah chhûngkaw zakua leh sawmnga leh paruk an awm. An hming sawite khi chhûngkaw hotu vek an ni. Hêng puithiamte hi Jerusalem-ah an awm: Jedaia te, Jehoiariba te, Jakina te, Hilkia fapa Azaria te, Ani hi Tempul hnaa hotupa ber a ni. A pute chu a chhuan indawtin: Mesulama, Zadoka, Meraiota, Ahituba. Jerohama fapa Adaia te; ani hi a pute chu Pasura te, Malkija te an ni. Adiela fapa Maasaia te, a pute chu Jazera te, Mesulama te, Mesilemita te, Imera te an ni. Puithiam, chhûngkhat hotute chu mi sângkhat leh zasarih leh sawmruk an ni. Tempula tih tûr ti thiam vek an ni. Hêng Levia chite hi Jerusalem-ah an awm: Hasuba fapa Semaia: A pate chu Azrikama te, Hasabia te an ni, Meraria thlah an ni; Bakbakara te, Heresa te, Galala te. Mika fapa Matania te: A pute chu Zikria te, Asafa te an ni. Semaia fapa Obadia te, a pute chu Galala te, Jeduthuna te an ni; Asa fapa Berekia te: a pu chu Elkana a ni, Netofa khaw ram chhûnga awm ṭhîn an ni. Hêng Tempul Pulis-te hi Jerusalem-ah an awm: Saluma te, Akuba te, Talmona te, Ahimana te; Saluma hi an hotu a ni. Hetih hun thleng hi chuan lal kawngkhâr an tih khawchhak lamah an awmtîr ṭhîn a. Tûn hnuah erawh hi chuan Levia chite awmna kawngkhâr an vêng ṭhîn. Korea fapa Saluma, Ebiasafa tupa chu Kora chite nên biakbûk kawngkhâr vêngtu an ni; an thlahte pawh Lalpa chênna bûk vêngtu an nih kha. Eleazara fapa Finehasa chu ( Lalpa chuan awmpui teh se) an hotu a ni ṭhîn. Meselemia fapa Zekaria pawh Biakbûk kawngkhâr vêngtu a ni. Kawngkhâr vêngtuah mi zahnih leh sâwm leh pahnih an thlang chhuak a. An awmna khaw indawtin an hming an ziak a. Lal Davida leh zâwlnei Samuelan an hna hi an siamsak a ni. Anniho leh an thlahte hian Tempul kawngkhâr an vêng ta zêl a ni. Chhim lam te, hmâr lam te, chhak lam te, khawthlang lam hawi tein kawngkhâr a awm a, chûng vêngtute chuan hotu hran an nei ṭheuh a ni. Hêng kawngkhâr vêngtute hi an chhûngte, thingtlânga awmte pawhin an ṭanpui ṭhîn. Hêng hotu pali, thuneitu berte hi Levia chi an ni. Tempula pindan hrang hrang te, a chhûnga thil dah vên him te an mawhphurhna a ni. Tûk tin zîngah Tempul kawngka an hawng a, a vêngtu an nih nghâl bawk avângin Tempul bul hnaiah an awm ṭhîn. Levia chi ṭhenkhatte chu Tempula bungbêl hman enkawltu an ni. An hman dâwnin an lo chhinchhiah vek a, an hman zawha an rawn dah kîr lehin an lo chhinchhiah leh vek ṭhîn. Ṭhenkhat chu Tempul thil serh enkawltu an ni; chhangphut te, uain te, oliv hriak te, rimtui hâl tûr te, mosola te an kutah a awm. Rimtui hâl tûr mosola chawhpawlh erawh hi chu puithiam tih tûr a ni. Kora thlah Saluma fapa upa ber Matithia chu thilhlana telh tûr chhang kang hotu a ni. Kohata thlahte hi sabat apianga Tempula dah tûr chhang serh siamtu tûr an ni. Levia chi bawk, mi ṭhenkhat chu Tempula rimawi tumtu an ni. A chhûn a zânin, eng lai pawha koh theih an nih avângin an hotute chu Tempul pindan ṭhenkhatah an awm ṭhîn, hna dang an thawk lo. Hêng hi anmahni chhuan zawng zawnga hotu, Levia chhûngkaw hotute an ni. Jerusalem khuaah an awm a. Gibeona ho hruaitu Jeiela chu Gibeon khuaah a awm a, a nupui chu Maaki a ni. A fapa upa ber chu Abdona a ni. Chu mi naute chu Zura te, Kisa te, Baala te, Nera te, Nadaba te, Gedora te, Ahioa te, Zekaria te, Miklota te an ni. Miklota hi Simea pa a ni a. Chûngho chu Jerusalem-ah an thlahte nên an chipui dangte awmna bulah an awm. Nera hian fapa Kisa a nei a, chu mi chu Saula pa a ni. Saula hian fapa pali Jonathana te, Malkisua te, Abinadaba te, Esbaala te a nei a. Jonathana hian fapa Merib-baala a nei a, ani chu Mika pa a ni. Mika hian fapa pali - Pithona te, Meleka te, Tarea te, Ahaza te a nei a. Ahaza chuan fapa Jara a nei a, ani hian fapa pathum - Alemeta te, Asmaveta te, Zimria te a nei a. Zimria hian fapa Moza a nei a. Moza fapa chu Binea a ni. Binea hian fapa Refaia a nei a, chu mi chuan fapa, Azela pa Eleasa a nei a. Azela hian fapa paruk - Azrikama te, Bokerua te, Ismaela te, Searia te, Obadia te, Hanana te a nei. Filistia leh Israel-te chu Gilboa tlângah an inbei a. Israel mi tam tak chu an that a, mi dang chu Saula leh a fate nên an tlânchhia a. Filistia-ho chuan an nangchîng a, Saula fa pathum - Jonathana te, Abinadaba te, Malkisua te chu an that a. Saula bulah chuan an inbei nasa hle a, hmêlmain thalin an kâp fuh a, a hliam na viau va. Tlangvâl, a râlthuam kengtu hnênah, “I khandaih phawi la, min that mai teh, Filistia serh tan lohho hian min uankhum dah ang e,” a ti a; mahse, râlthuam kengtu chuan a hlau êm a, a that thei lo. Chuvângin, Saula chuan ama khandaih chu a la a, a bawh ta a. Tlangvâl chuan Saula thi a hmuh chuan a khandaih ken chu a bawh a, a thi ve ta a. Saula leh a fate pathum chu an thi a, an lalna pawh chu a tâwp ta a. A sipaite chu an tlânchhia a, Saula leh a fate pawh an thi tih an hriatin Jezreel ruama awmte chuan an khua chu an tlânchhiatsan a, Filistia mite chu an lo kal a, an rawn luah ta a. A tûkah Filistia-ho chu an mi thahte râlthuam hlihsak tûrin an lo kal a, Gilboa tlângah chuan Saula leh a fate ruang chu an va hmu a. Saula lu chu an la a, an râlthuam chu an hlihsak a, Filistia ram tinah, he thil lâwmawm tak hi an milemte leh an mite hrilh tûrin mi an tlântîr a. Saula râlthuamte chu an pathian Tempulahte an dah a, a lu chu an pathian Dagon tempulah an târ a. Gilead rama Jabes khaw miten Filistia-hovin Saula an sawisak dân an han hriat chuan, an pasalṭhaho chu an thawk chhuak a, Saula leh a fate ruang chu an va hlâwm a, Jabes khuaah an rawn hâwn a, chutah chuan sasaw buk hnuaiah an phûm a, ni sarih chaw an nghei a. Lalpa laka a bawhchhiatna avângin Saula chu a thi ta a. Lalpa thu chu a awih lo va, Lalpa râwn lovin mitthi thlûk thiam a râwn; chuvângin, Lalpa chuan a tihlum ta a, a ram chu Jesaia fapa Davida hnênah a pe ta a ni. Hebron khuaa Davida hnênah Israel mi zawng zawng chu an kal a, “I thisen zawmpui kan ni a, Saula lal a nih lai pawh khân Israel mite chu indonaah i ho ṭhin kha. Lalpa i Pathian pawhin, ‘Ka mi Israel-te hi i kaihruaiin an rorêltu i ni ang,’ tiin a tiam che kha,” an ti a. Israel hotu zawng zawng chu Hebron-ah Davida hnênah an lo kal a, Davida chuan Lalpa hmaah anni nên chuan thu a thlung a, hriak an thih a, Samuela hmanga Lalpa tiam ang khân Israel-te lal a ni ta a. Lal Davida leh Israel-te chu an kal a, Jerusalem khua bei tûrin an han kal a; chutih lai chuan Jebus tih a ni ṭhîn. Jebus mi, a tîr aṭanga lo awmte an la awm reng a ni. Jebus-ho chuan, “Khuaah i lo lût thei hauh lo vang,” an lo ti a; mahse, Davida chuan Zion kulh chu a la ta a, chu kulh awmna mual chu ‘Davida khawpui’ tih a ni ta a. Davida khân, “Jebus mi that hmasa ber chu sipai hotu-ah ka dah ang,” a ti a. Zeruii fapa Joaba chuan khaw bei tûr chuan hma a hruai a, sipai hotu berah a ṭang ta a ni. Chumi kulhah chuan Davida a awm tâk avângin ‘Davida khawpui’ tih a ni ta a. Khaw kulh chu Milo an tih tlâng chhak lam ruama lei chhûn khahna lai aṭangin a siam ṭan a, a dang zawng chu Joaban a chhunzawm a. Lal Davida chu a chak tulh tulh a, Engkim Lalpa chuan a awmpui tlat a ni. Hêng hi Davida sipai hmingthangte chu an ni a; anni hian Israel mi zawng zawng nên lalah an siam a, Lalpa thu ang zêlin ram an dinpui a, a ram chu an tiropui hle a ni. ‘Pasalṭha pathum’ an tih zînga hotu deuh ber chu Hakmon mi Jasobeama a ni. Mi zathum feiin a bei a, ṭum khatah a that vek a ni. Pasalṭha pathum an tih zînga pakhat leh chu Aho chi, Dodoa fapa, Eleazara a ni. Pasdamim-ah Filistia-ho leh Davida-hote an inbei a, ani chu Davida lamṭang a ni; Barli hmuna an awm laiin Israel-te chu an tlânchhe ta mai a. A fate nên an lo ding a, Filistia-ho chu an that a, Lalpa chuan a hnehtîr ta a. Ni khat chu Davida awmna Adulam pûkah a pasalṭha sawmthum chu an awm ve a, Filistia rual khat chuan Refa-ho awmna phaiah bûk an khuar tlat a. Chu hmun hima Davida a awm lai chuan Filistia mite chu Bethlehem khuaah an inkulh a. Davida chuan a khua Bethlehem chu a ngai hle a, “Bethlehem kawngka bula tuikhur tui min va chawisaktu awm teh sela ka va ti em,” a ti a. Pasalṭha pathumte chuan Filistia sipaihote chu an tâwn tlang a, Bethlehem kulh kawngka bula tuikhur tui chu an va thâl a, Davida chu an rawn pe a; mahse, ani chuan a lo in duh lo. Lalpa hnênah a hlân a, a bun chhuak ta zâwk a. “He tui hi ka in thei lo, mi huaisen thih huamte thisen in ka ni ngawt dâwn alâwm, thih huama va chawi an ni si a,” a ti a. Chûng chu ‘Pasalṭha Pathum’ an tihte thil tih chu a ni. Joaba u Abisaia chu, ‘Pasalṭha sawmthum’ an tih zînga hotu ber a ni. Feiin mi zathum a bei a, a that vek a, a hming a ṭha ta hle a ni. ‘Pasalṭha sawmthum’ an tih zînga hmingthang ber a ni, an hotu berah a ṭang ta a. ‘Pasalṭha pathum’ an tih zîngah erawh chuan a tel pha lo. Kabzeel khaw pasalṭha, Jehoiada fapa Benaia pawhin thil mak tak tak a ti. Moab chhuan êm êm milian pahnih a that a, vûr tlâk laiin a pûka sakeibaknei tawm a that bawk. Aigupta mi pa lian tak, tawng ngaa sâng a that bawk a ni. He pa hian kechâwn tiat dâwn laia lian fei hi a hmang a, Benaia hian talhtum nên a bei a, a fei chu a chhuhsak a, chu fei chuan Aiguptapa chu a chhun hlum a ni. Pasalṭha sawmthum zînga mi Jehoiada fapa Benaia chuan hêng thil hi a ti a, ‘Pasalṭha sawmthum’ zîngah chuan a hming a ṭha hle a, ‘Pasalṭha pathum’ zîngah erawh chuan a tel pha lo. Davida chuan amah vêngtute hotu-ah a dah a. Pasalṭha dangte: Joaba nau Asahela te, Bethlehem mi Dodoa fapa Elhanana te, Haror mi Samota te, Pelon mi Heleza te, Tekoa mi Ikesa fapa Ira te, Anathot mi Abiezera te, Husa mi Sibekaia te, Aho mi Ilaia te, Netofa mi Maharaia te, Netofa mi Baana fa Heleda te, Benjamina thlah Gibea khaw mi Ribaia fa Itaia te, Pirathon mi Benaia te, Nahale-gaas mi Huraia te, Arbat mi Abiela te, Baharum mi Asmaveta te, Saalbon mi Eliaba te, Gizon mi Hasema te, Herar mi Sagea fapa Jonathana te, Harar mi Sakara fa Ahiama te, Ura fa Elifala te, Mekerat mi Hefera te, Pelon mi Ahija te, Karmel mi Hezroa te, Ezbaia fa Naaraia te, Nathana unaupa Joela te, Hagria fa Mibhara te, Amon mi Zeleka te, Berot mi Naharaia te: ani hi Zeruii fapa Joaba râlthuam kengtu a ni; Jatir mi Ira leh Gareba te, Hit mi Uria te, Ahlaia fa Zabada te, Siza fa Adina te: ani hi Reubena thlahte zînga hotu a ni, a chipuite a ho, mi sawmthum nên; Maaka fa Hanana te, Mithna mi Josafata te, Asterat mi Uzia te, Aroer mi Hothama fa Sama leh Jeiela te, Tiz mi Simria fapa Jediaela leh a unau Joha te, Mahava mi Eliela te, Elnaama fa Jeribaia leh Josavia te, Moab mi Ithma te, Eliela te, Obeda te, Mezobia mi Jaasiela te. Lal Saula hlauva Ziklag khuaa Davida a tlân lai khân, Saula chu an chipui Benjamin chi ni mah se, indo ṭhang sipai rinawm tak tak Benjamin chia miten an rawn pan a. Ding lam leh vei lam inang rengin thal kah nân an hmang thiam a, virvawmte an vawm thei a ni. Gibea mi Sama fa Ahiezera leh Joasa te chuan an ho va. Chûng sipaite chu hêngte hi an ni: Azmaveta fa Jeziela leh Peleta, Anathot khaw mi Beraka leh Jehua. ‘Pasalṭha sawmthum’ tih zînga tel sipai hmingthang Gibea mi Ismaela, Gedera mi Jeremia, Jahaziela, Johanana leh Jozabada, Harif mi Eluzaia, Jerimota, Bealia, Semaria, Sefatia. Kora thlah Elkana, Isia, Azarela, Joezera, Jasobeama. Gedor mi Jerohama fa Joela, Zebadia. Thlalêra a bîkna hmuna a awm laiin Gada thlah zînga indo ṭhang sipai hmingthang tak tak hêng mite hian an rawn pan a, phaw leh fei an hmang thiam êm êm a, sakeibaknei hlauhawm hmêl an pu a, khâm saza anga chak an ni. An lal dân indawtin an hming chu: Ezera te, Obadia te, Eliaba te, Mismana te, Jeremia te, Ataia te, Eliela te, Johanana te, Elzabada te, Jeremia te, Makbanaia te an ni. Gada thlah sipai ṭhenkhat chu sâng hotu an ni a, a thar deuhte erawh chu za hotute an ni. Kum tîr, thla hmasa ber, Jordan lui len laiin lui chu an rawn kai a, lui chhak leh thlang lama awmte chu an ûm darh a. Benjamin leh Juda thlah mi ṭhenkhat chu Davida awmna pûkah an kal a. Davida chuan a lo hmuak a, “Ka lamṭanga min pui tûra lo kal in nih chuan lâwm takin ka lo pawm ang che u; thil ṭha lo eng mah in chunga ka tih loh pawha ka hmêlmate kuta min pêk tum in nih chuan, kan pate Pathian chuan a hria a, a hrem ngei ang che u,” a ti a. An zînga hruaitu pakhat Amasaia chu Pathian thlarauvin a thuam a, hetiang hian thu a chham ta a: “I mi kan ni e, David, Jesaia fapa, I lamṭang kan ni. Thlamuanna i hnênah awm sela, I lamṭangte hnênah pawh awm sela, Pathianin ṭanpui che rawh se,” a ti a. Davida chuan a lo lâwm a, a sipai hotu-ah te a dah hlawm a. Filistia mite nên Lal Saula bei tûra Davida a thawh chhuah ve lai khân Manasea thlah zînga mi sipai ṭhenkhat chu Davida lamah an ṭang a. Filistia-ho hi a pui tak tak hman lo, an lal ṭhenkhatten an ringhlel a, a pu Saula lamah a ṭan thut an hlau va, Ziklag khuaah an tîr kîr a nih kha. Chutia a kîr lai chuan hêng Manasea thlah sipaite hian an rawn belh a ni: Adna te, Jozabada te, Jediaela te, Mikaela te, Jozabada te, Elihua te, Zilethaia te. Hêngho hi Manasea thlah zîngah sâng hotu ṭhalh an ni. Davida sipaiah an ṭang ta a, sipai hotu-ah te a lo dah a, sipai ṭha tak tak an ni. Ni tin deuhthaw mai Davida lama ṭang tûr mi an lo kal a, sipai tam tak a nei ta a. Lalpa thu anga Saula aia Davida chu lala siam tum, sipai râlthuam nêna Hebron khuaa Davida rawn pantu zât chu hetiang hi a ni: Juda thlah aṭangin phaw leh fei keng mi sângruk leh zariat, Simeona thlah zînga indo thiam tak tak sipai sângsarih leh za. Levia chi aṭangin mi sângli leh zaruk. Arona thlah, Jehoiada ho, mi sângthum leh zasarih. Tlangvâl huai tak Zadoka leh a ṭhian sipai hotu mi sawmhnih leh pahnih. Saula chipui, Benjamina thlahte, mi sângthum (Benjamina thlah tam tak chu Saula lama ṭang an ni), Efraim thlah zînga hmingthang tak tak mi sînghnih leh zariat. Jordan thlang lama awm Manasea thlah, Davida lala siam tûra thlan chhuah mi sîngkhat leh sângriat. Isakara thlah, hotu zahnih leh an hote. Hêng hotute hian Israel-te tih tûr leh an tih hun tûr an hre êm êm a ni. Zebulun thlah mi sîngnga, hriam chi tinrêng hmang thiam; mi rinawm, rilru nghet pu mi an ni hlawm. Naftalia thlah - hotu rual sângkhat leh an ho phaw leh fei keng ṭhalh mi sîngthum leh sângsarih. Dana thlah, indo thiam mi sînghnih leh sângriat leh zaruk. Asera thlah, indo tûra inpeih reng, mi sîngli. Jordan chhak lama awm Reuben te, Gad te leh Manasea thlah te, hriam chi tinrêng hmang thiam mi nuaikhat leh sînghnih. Hêng sipai rual, indo tûra inpeih rengte hi Davida chu Israel lala siam tum tlatin Hebron khuaah an lo kal a. Israel hnam dangte pawh Davida lala siam tûrin an lungrual hle a ni. Davida ho chuan ni thum chhûng an chipuite tân ruai an lo buatsaih chu an ei a, an in a. Hmâr lama awm Isakar-ho te, Zebulun-ho te, Naftali-ho te chuan chhangphut te, theipui te, grep pho ro te, uain te, oliv hriak te an rawn la a, sabengtung te, sanghâwngsei te, sakawr puakphur chi te, bâwng te an rawn phurhtîr zut zut a. Talh tûr berâm te, bâwng te an rawn khalh zut zut bawk a. Israel ram mite chu an lâwm êm êm a ni. Sipai sâng hotute, za hotute leh hruaitute chu Davida chuan a berâwn a. Israel pungkhâwmho hnênah chuan “ Lalpa, kan Pathian duhzâwng a niha, nangni pawhin ṭha in tih chuan kan mi zawng zawng, khaw tina puithiam te leh Levia chi awmte hnênah mi tîr ila, hetah hian lo kal khâwm teh se. Kan za-in kal ila. Pathian Thuthlung Bâwm kha i la ang u; Saula lal lai khân a ngaihsak si lo va,” a ti a. Mipui chuan ṭha an ti a, lâk chu an remti ta a. Chhim lam Aigupta ramri aṭangin hmâr lam ramri, Hamath kalkhân thlengin Kiriat-jearim aṭanga Jerusalem-a Thuthlung Bâwm la tûr chuan Israel mite chu an ko khâwm a. Davida leh mipuite chuan Judai rama Baala khua, Kiriat-jearim an tih bawkah chuan an kal a, cherub chunga ṭhu Lalpa hming chuanna Thuthlung Bâwm chu la tûrin an kal ta a. Abinadaba in aṭang chuan Thuthlung Bâwm chu an la chhuak a, bâwng-tawlailîr tharah an dah a, Uza leh Ahioa chuan bâwng chu an khalh a. Davida leh mipuite chu Pathian chawimawiin theihtâwp chhuahin an lâm a. An zai a, ṭingṭangte an tum a, khuangtê te an vua a, darbenthek te an bêng a, tawtawrâwt te an hâm a. Kidona hruih an thlen chuan bâwngte chu an inpal a, Uza chuan Thuthlung Bâwm chu a lo chelh a. Thuthlung Bâwm a khawih avâng chuan Uza chungah Lalpa chu a thinur a, a tihlum ta nghâl a. Pathian hmaah chuan a thi ta a, chu lai hmun chu ‘Perez-uza’ an ti ta a ni. Davida chu a thinur a, Uza chu Lalpa chuan thinura a hrem avângin. Davida chuan Pathian chu a hlau ta hle a, “Thuthlung Bâwm chu ka hâwn ngam dâwn em ni?” a ti a. Chuvângin, Davida chuan Thuthlung Bâwm chu Jerusalemah a hâwn ta lo va, Gath khaw mi ve rêng Obed-edoma inah a dah ṭha ta zâwk a. Chutah chuan thla thum a awm a, Obed-edoma te chhûngkua leh an thil neih zawng zawngte chu Lalpan mal a sâwm a. Insumdâwn tawn thuah Tura lal Hirama chuan Davida hnênah palai a tîr a. Lal in sak nân sidar thingtumte a pe a, lungchher thiam te leh thing dek thiam mistiri a ngaihtuahsak bawk a. Lalpa chuan Israel-te chunga a lalna chu a tinghetin a mi Israel-te avângin a ram pawh a chawimawi ta hle tih Davida chuan a hria a. Davida chuan Jerusalem-ah nupui tam tak a neih belh a, fanu fapa pawh a neih belh ṭeuh bawk. Jerusalem-a a fate chu hêngte hi an ni: Samua, Sobaba, Nathana, Solomona, Ibhara, Elisua, Elpeleta, Noga, Nefega, Jafia, Elisama, Beeliada, Elifeleta. Filistia mite chuan Davida chu Israel ram pumah a lal ta tih an hriatin amah chu man tumin an sipaite an tîr a. Davida chuan a lo hriatin bei lêt tûrin a thawk chhuak a, Filistia sipaite chuan Refa-ho ruam an tih chu an lo thleng a, mite chu an rawk ta a. Davida chuan, “Filistia-ho hi ka bei ang em? Min hnehtîr ang em?” tiin Pathian a râwn a. Lalpa chuan, “Bei rawh, ka hnehtîr ang che,” a ti a. Davida chuan Baal-Perazim-ah a bei a, a hneh ta a. “Hmêlma sipaite chu tuilian hrût ang hrimin Pathianin min sawisaktîr hi,” a ti a. Chu hmun chu Baal-Perazim an vuah ta a. Filistia-ho chuan an pathian lemte chu an tlânchhiatsan a, Davida chuan a hâltîr vek a. Rei lo tê hnuah, chu hmunah bawk chuan Filistia-ho an lo kal leh a, chûng lai mite chu an rawk a. Davida chuan Pathian a râwn leh a, Ani chuan, “He lam aṭang hi chuan bei mai suh, râl lehlama thingtheihmu hmunah sâwn kal kual la, chuta ṭang chuan bei ang che, Thingtheihmu lêra kal thâwm ang ri ṭhup ṭhup i hriat veleh chê ang che. Filistia sipaite sawisa tûrin i hnênah ka lo kal dâwn a ni,” a ti a. Pathian thupêk ang chuan Davida chuan a ti a, Gibeon aṭangin Gezer thleng rawkin Filistia-ho chu a ûm ta a. Davida hming chu ram tinah a thang ta a, Lalpa vângin hnam tinin an hlau a ni. Davida chuan ama chên nân “Davida khawpuiah” in a sa hlawm a. Pathian Thuthlung Bâwm dahna tûr hmun a buatsaih a, puan in a kaih bawk a. “Levia chi chauhvin Thuthlung Bâwm chu an zâwn tûr a ni, a zâwntu atân leh kumkhuaa a rawngbâwltu atân Lalpa chuan anni hi a thlang a ni,” a ti a. Davida chuan Israel mi zawng zawng chu Jerusalem-ah, Thuthlung Bâwm dahna tûr a buatsaihah chuan dah tûrin a pun khâwm a. Arona thlah leh Levia chite chu a ko khâwm a, Levia chi, Kohata thlahte chu mi za leh sawmhnih, Uriela hovin an lo kal a. Meraria thlah aṭangin mi zahnih leh sawmhnih, Asaia hovin an lo kal a. Gersona thlah aṭangin mi za leh sawmthum, Joela hovin an lo kal a; Elizafana thlah aṭangin mi zathum, Semaia hovin an lo kal a. Hebrona thlah aṭangin mi sawmriat, Eliela hovin an lo kal a. Uziela thlah aṭangin mi za leh sâwm leh pahnih, Aminadaba hovin an lo kal bawk a. Davida chuan puithiam Zadoka leh Abiathara chu a ko va, Levia chi mi paruk, Uriela te, Asaia te, Joela te, Semaia te, Eliela te, Aminadaba te pawh chu a ko va, an hnênah, “Levia chi hruaitute in ni a, inthian thianghlim ula, in Levia chipuite pawh thian thianghlim rawh u. Lalpa, Israel-te Pathian Thuthlung Bâwm chu a dahna tûr ka buatsaihah in zâwn thleng tûr a ni. Lâk kan tum hmasak ṭum khân in tel ve lo va, Lalpa kan Pathian chu a tih dân tûr kan râwn lo va, min sawisa ta a nih kha,” a ti a. Lalpa, Israel-te Pathian Thuthlung Bâwm la sawn tûr chuan puithiamte leh Levia chite chu an inthian thianghlim ta a. Mosia hnêna Lalpa sawi angin Levia chite chuan bâwm chu a zâwnfungin an zâwn ta a ni. Levia chite chu zaipâwl te, perhkhuang tuma dârbenthek bêng pâwl te insiam tûrin an hotute chu Davida chuan a hrilh a. Dârbenthek ring taka bêng tûrin hêng mite hi an ti a: Joela fapa Hemana te, a unau Berekia fapa Asafa te, an unau Meraria thlah zînga mi Kusaia fapa Ethana te. Anniho hi ṭanpuia perhkhuang fiak chi perh tûrin hêng Levia chite hi an ruai a: Zekaria, Aziela, Semiramota, Jehiela, Unia, Eliaba, Maaseia, Benaia. Perhkhuang ri thum perh tûrin Levia chi hêngte hi an thlang chhuak: Matithia, Elifelehua, Mikneia, Azazia, Tempul pulis Edoma leh Jeiela te nên. Kenania chu thil tum thiam tak a ni a, Levia chi, rimawi tumtute chu an hotîr a. Berekia leh Elkana chu Obed-edoma leh Jehia nên Thuthlung Bâwm vêngtuah an ruat a. Puithiam Sebania te, Josafata te, Nethanela te, Amasaia te, Zekaria te, Benaia te, Eliezara te chu Thuthlung Bâwm hmaa kal a, tawtawrâwt hâmtuah an thlang a. Lal Davida te, Israel upa te leh Sipai sâng hotute chu Obed-edoma inah Thuthlung Bâwm la tûr chuan hlim takin an kal a. Lalpa chuan Levia chi, Thuthlung Bâwm zâwntu tûrte a ṭanpui duh nân a hnênah bâwngpa pasarih leh berâm pasarih an hlân a. Davida chuan puan zai sîn ṭha ber chi a sin a, hla satute pawh, an hotu Kenania leh Bâwm zâwntute nên chutiang chuan an inthuam a; Davida chuan puan zai sîn Efod a inbel bawk a. Israel mi zawng zawng chu hlim takin an au va, tawtawrâwt te, berâm kîte an hâm a, dârbenthek te an bêng a, perkhuang te perh chungin Thuthlung Bâwm chu Jerusalem-ah an chhawm chho ta a. Khuaa Bâwm an zâwn luh lai chuan Saula fanu Mikali chuan tukverhah a lo thlîr a, Lal Davida lâwma a lâm leh a zuang vêl chu a zu hmu a, a hmusit rilru hle a. Thuthlung Bâwm chu Davida buatsaih puan inah chuan an zâwn lût a, an dah ta a. Lalpa hnênah hâlral thilhlan leh remna thilhlan an hlân a. Davida chuan thilhlan a tih zawh chuan Lalpa hmingin mipui tân malsâwmna a sawi a; ei tûr a sem vek a, Israel rama mi zawng zawng, mipa pawh, hmeichhia pawh, chhang tlang khat leh sa hem hmin hrang khat, grep pho ro tlêm nên a pe ṭheuh va. Thuthlung Bâwm hmaa Lalpa biakna hruaia, fakna hla sa tûrin Levia chi mi ṭhenkhat chu Davida chuan a ruat a. Asafa chu an hotu ber a ni; Zekaria chu a dawttu a ni; Jeiela te, Semiramota te, Jehiela te, Matithia te, Eliaba te, Benaia te, Obed-edoma te, Jeiela te chu perhkhuang leh ṭingṭang tum tûr an ni a, Asafa chu dârbenthek ring taka bêngtu tûr a ni. Puithiam pahnih, Benaia leh Jahaziela chu Thuthlung Bâwm hmaa a khât tâwka tawtawrâwt hâm ṭhîn tûra ruat an ni. Asafa leh a Levia chipuite Lalpa fakna hla sak kaihruaitu atâna ruat hmasa bertu chu Davida hi a ni. Lalpa chu lâwmthu hrilh ula, A hming lam bawk rawh u. A thiltih hi hnam tinrêng hrilh rawh u. Amah fakin zai ula, Thil mak a tih zawng zawng hi hril rawh u. A hming thianghlim hi chhuang ula, Lalpa zawngtute chu hlim hle rawh se. Lalpa chu zawng ula, a chakna dîl rawh u. Ani chu pan fo rawh u. A thiltih ropui tak te, Thil mak a tih leh a rorêl dân te chu, Hre reng rawh u, Aw, a chhiahhlawh Israela thlahte leh A thlan Jakoba fate u, hre reng rawh u. Ani chu Lalpa kan Pathian a ni, Khawvêl pum puia rorêltu a ni. A thuthlung chu hre reng rawh u, Chhuan sâng tâna a thupêk chu. Abrahama hnêna a thuthlung leh Isaka hnêna a thutiam chu a hre reng a ni. Chûng chu Jakoba thlahte Dân atân a nemnghet a, Israel-te kumkhaw thuthlung atân. “Khai le, Kanan ram hi ka pe ang che u, Ro atân in nei thliah ang,” a ti a. Eng tham ni lo, mi tlêm tê, Mikhual mai an nih lai pawh khân, Hnam tinrêng zînga vâkvaiin, Khaw tin chhiarin an pêm ṭhîn a. Mahse, tu ma nêkchêp a phal lo va, Anmahni avângin lalte a zilh zâwk a. “Ka hriakthih hi khawih suh ula, Ka zâwlnei hi a pawi khawih hek suh u,” a ti. Khawvêla mi zawng zawngte u, Lalpa fakin hla sa ula, Min chhandam thu lâwmawm hi ni tin puang rawh u. A ropuizia hnam tin hnênah hril ula, Mi tin hnênah thil mak a tihte chu puang rawh u. Lalpa chu a ropui a, fak chiam tûr a ni, Pathian dang zawng zawng aiin zah tûr a ni. Hnam dang pathiante chu a lem mai an ni a, Lalpa hi zawng vân siamtu a ni. Ropuina leh chawimawina chuan a hual vêl a, A Hmun Thianghlim chu thiltihtheihna leh lâwmnain a khat. Khawvêla hnam tinrêngte u, Lalpa chu chawimawi ula, Lalpa ropuina leh chakna chu fak rawh u. Lalpa hming ropui chu fak fo ula, Thilpêk kengin a inah lo haw rawh u, Thianghlim leh mawia inthuamin Lalpa hmaah lo kûn rawh u. Lei mi zawng zawngte u, a hmaah khûr ula, Lei pawh hi a nghîn theih lohna tûrin tihngheh a ni si a. Vânte u, hlim ula, aw leilung, nang pawh lâwm rawh, Lalpa hi lal a nih hnam tin hrilh rawh u. Tuifinriat leh a chhûnga awmte chu au dur dur rawh se, Ram leh a chhûnga awm zawng zawng hlim se, Ngawa thing zawng zawng pawh au hluah hluah rawh se, Leia rorêl tûra a lo kal hunah chuan. Lalpa chu a ṭhat êm avângin lâwmthu hrilh rawh u, Ngil a nei kumkhua si a. Aw Lalpa, kan Pathian, min chhan chhuak la, Hnam dang zîng ata min hruai khâwm leh ang che. I hming thianghlim kan fak ang a, Ropui takin kan chawimawi ang che. Lalpa, Israel-te Pathian chu fak ula, Chatuan chatuanin fak rawh u. Mi zawng zawng chuan, ‘Amen,’ an lo ti a. Lalpa chu an fak a. Lalpa Thuthlung Bâwm an dahna hmuna Pathian biaknaa rawngbâwltuah Asafa leh a chipui Levia chite chu Davida chuan a dah nghet a, ni tin hnaah an neih ta a. Jeduthuna fapa leh a chipui mi sawmruk leh pahnih chuan an pui ṭhîn a ni. Hosia leh Obed-edoma chu kawngkhâr vêngtu an ni. Puithiam Zadoka leh a puithiampui dangte chu Lalpa an biakna hmun Gibeon khuaah chuan inkhâwmna hruaitu an ni. Israel-te hnêna Lalpa thupêk, Lalpa dân bu-a ziak angin tûk leh zân maichâmah hâlral thilhlan an hâl ṭhîn tûr a ni. Hemana leh Jeduthuna pawh, mi dang thlan chhuahte nên an awm ve a, a hmangaihna dai ngai lo avânga Lalpa fak hla sa tûr an ni. Fakna hla an sak lo rem tûr tawtawrâwt te, dârbenthek te leh rimawi tumtute hotu chu Hemana leh Jeduthuna te hi an ni. Jeduthuna chipuite chu kawngkhâr vêngtu an ni. Mi tin mahni in lamah an haw a, Davida pawh a chhûngte uap tûrin a hâwng a. Lal Davida chu inah a awm ta deuh reng a. Ni khat chu zâwlnei Nathana a ko va, a hnênah, “Sidar thinga sak inah ka awm a, Lalpa Thuthlung Bâwm lah puan in mai maiah a awm si,” a ti a. Nathana chuan, “I vei rilrûk ang chu ti ta che, Pathianin a awmpui zêl ang che,” a ti a. Nimahsela, chumi zân chuan Pathianin Nathana hnênah, “Kal ta la, ka chhiahhlawh Davida hnênah ka thu hi va hrilh rawh, ‘Nang zawng, ka chênna tûr Tempul satu tûr i ni lo ve. Israel mite Aigupta ram ata ka hruai chhuah aṭanga tûn thleng hian tempulah ka la awm ngai lo. Puan in mai maiah hlîr ka awm a, hmun hrang hrangah ka insawn ka insawn ṭhîn. Israel mite ka kalpui ṭhin laite khân, hruaitua ka ruat tu mah, sidar thinga Tempul min siamsak tûrin ka phût ngai lo. “ ‘Chuvângin, ka chhiahhlawh Davida chu hrilh rawh; Kei, Engkim Lalpa hnênah, ‘phûla i berâm vêng lai ka la che a, ka mi Israel-te lalah ka siam ta che a ni. I kalna apiangah ka awmpui che a, i do, i hmêlma zawng zawngte chu ka hnehtîr zêl che a, khawvêla lal hmingthang berah ka siam dâwn che a ni. Tu man an tihduhdah tawh lohna tûr hmun, ka mi Israel-te tân ka thlang a, ka awmtîr tawh a, mi kawlh pui puiin an bei ṭhîn a; mahse, an bei tawh lo vang. Ka mi Israel-te tân chuan rorêltute ka ruatsak a. I hmêlma zawng zawng hnehpui che leh thlah tam tak pêk che ka tiam a. I thih hunah, i pate hnêna i kal hnu chuan i fate zînga pakhat chu lalah ka siam ang a, ka tilal êm êm ang. Ani chuan in mi saksak dâwn a ni, kumkhuaa lal tûrin ka dah nghet ang. A pa ka ni ang a, ka fapa a ni bawk ang. I lal hmaa lal ka hawisan ang khân ka hawisan lo vang. Ka mite leh ka ram chunga rorêltuah ka dah ang a, a thlahte ngeiin lalṭhutthlêng chu an chhawm zêl ang,’ ” a ti a. Pathianin thu a hrilh leh a sawi zawng zawng chu Nathana chuan Davida a hrilh a. Lal Davida chu Biakbûkah chuan a kal a, a ṭhu a, a ṭawngṭai a, “Aw Lalpa Pathian, kei leh ka chhûngte tehlul hi engtizia nge heti taka min duat le? Chu chu tâwk ti mai lovin ka thlahte pawh la tihṭhat zêl i tiam lehnghal a; a ni, aw Lalpa Pathian, mi ropui tak angin min cheibâwl hi. Eng nge ka ngen leh chuan ang? I chhiahhlawh hi i hre tlang vek a ni. Aw Lalpa, i chhiahhlawh hi ka ṭhatna tûrin, nangma thu ngeiin min chawimawi i tum a lo ni; ka thlahte pawh i chawimawi zêl dâwn tih min hrilh hi. Aw Lalpa, kan hriat phâkah chuan nang ang tu mah an awm lo va, nang chauh hi Pathian chu i ni. Israel mite ang pawh hi khawvêlah hnam dang an awm lo; bawih ata i tlan a, Aigupta ram ata i hruai chhuak a, thil ropui leh mak tak tak tiin khawvêl pumah i hming i chher tâk hi. Israel mite chu i mi ni kumkhua tûrin i ti ta a, Aw Lalpa, nang hi an Pathian chu i nih tâk ngei hi. “Khai le, aw Lalpa, kei leh ka thlahte chungthua i thutiam hi i duh ang angin han tipuitling teh le. I hming a lo ropui ang a, i mite chuan ‘Engkim Lalpa hi Israel-te tân zawng Pathian a lo nih ngei hi,’ an ti dâwn nia. Ka lalna pawh hi kumkhua atân i tinghet dâwn a. I chhiahhlawh chu hêng thil hi i hrilha, ka thlahte pawh an lal zêl dâwn tih i sawi avângin i hnênah hêng hi ka rawn sawi ngam a ni. Nang zawng, Aw Lalpa, Pathian i ni a, he thil ropui tak hi min tihsak i tiam ta si a. An chunga ngil i neih zêlna tlâk an nih theih nân ka thlahte hi malsâwm la. Aw Lalpa, nang chuan mal i sâwm tawh a, i malsâwmna chu an chungah awm reng rawh se,” a ti a. Nakin deuhvah chuan Filistia-ho chu Davida chuan a rûn a, a hneh a, Gath khawpui leh a vêl khuate chu a chhuhsak a. Moab-ho pawh a hneh a, a thuhnuaiah an awm a, a hnênah chhiah an chawi ṭhîn. Hamath dep, Zoba lal Hadadezera chuan Eufretis lui hmâr lam ram neih a tum a, a beih avâng hian Davida chuan a rûn a. Davida chuan a sakawr-tawlailîr sângsarih leh sakawr chuang mi sângsarih leh kea kal sipai sînghnih a mansak a. Tawlailîr za hnûk thei tûr sakawr chu a zuah a, a dang chu an tha a chhahsak a. Suria mi, Damaska lal chuan Hadadezera chu pui tûrin sipai a tîr a. Davida chuan a lo bei a, sipai sînghnih leh sânghnih a lo thahsak a. Suria ramah chuan sipai a dah a, Davida khualehtui an ni ta a, a hnênah chhiah an chawi a, Lalpa chuan Davida chu kil tinah a tichak zêl a. Hadadezera ho rangkachak phawte chu a lâksak a, Jerusalem-ah a hâwn a, Hadadezera khua Tibhat leh Kun khua aṭang pawhin dâr tam tak a la a, chûng chuan Solomonan Tempula tuizêm te, dâr ban te, leh bêl te a siam a. Hamath lal Toia chuan Hadadezera leh a sipaite chu Davidan a hneh tih a lo hria a. Toia leh Hadadezera hi an indo fo tawh ṭhîn a, Davida hian a hneh tâk avângin lo hmuak tûr leh lâwmpui tûrin a fapa Jorama chu Toia chuan a tîr a. Jorama chuan rangkachak te, tangkarua te leh dâra siam thil tam tak te a pe a. Davida chuan, Edom-ho te, Moab-ho te, Amon-ho te, Filistia-ho te leh Amalek-ho te a chhuhsak, rangkachak te, tangkarua te leh dâr te chu Tempul sak nân a pe vek a. Zeruii fapa Abisaia chuan Chikhur ruamah Edom-ho sîngkhat leh sângriat a that a. Edom ramah chuan sipai a dah thluah a, Davida khualehtui an ni ta a. Lalpa chuan Davida chu khawiah pawh a tichak ta zêl a ni. Davida chu Israel zawng zawng lal a ni ta a; tu mah hleih nei lovin ro a rêlsak ṭhîn. Zeruii fapa Joaba chu sipai hotu lal ber a ni a, Ahiluda fapa Jehosafata chu Ziaktu lian a ni. Ahituba fapa Zadoka leh Abiathara fapa Abimeleka chu puithiam hotu an ni; Seraia chu ziaktu a ni. Jehoiada fapa Benaia chu Keret leh Pelet, lal vêngtute hotu a ni. Lal Davida fapate pawh ram chhûnga mi lian tak tak an ni. Tin, Amon-ho lal Nahasa chu a thi a, a fapa chuan a ai a awh a. Davida chuan, “Khawi nge, Nahasa khân min khawngaih a, a fapa Hanuna khawngaih hi ka ba ve a ni,” a ti a, a pa râl tûrin mi a tîr a. Hanuna râl tûr chuan Davida chhiahhlawhte chu an kal a, Amon-ho rama Hanuna in chu an va thleng a. Amon milianho chuan Hanuna hnênah, “Davida hian i pa hi sûn tak taka râl tûr chein mi a rawn tîr niin i ring em ni? Kan ram hi an lâk mai theih nân a chhiahhlawhte hi en thlithlai tûrin a rawn tîr a ni zâwk dâwn lâwm ni?” an ti a. Davida palaite chu Hanuna chuan a man a, an hmuihmul a ziahkâwnsak a, an kawrfual chu a kâwng chinah a tansak bawk a, a hâwntîr leh ta a. An lo sawisak dân chu Davida hrilh tûrin mi an tîr a, anmahni chu an zak lutuk a, lal hnênah chuan an kal hreh a ni. Davida chuan, “Jeriko khuaah awm ula, in hmuihmul a chawr buk leh deuh hunah in lo haw dâwn nia,” tiin mi a chah a. Lal Hanuna leh Amon mite chuan Davida thinurzia an hriat chuan Mesapotamia rama mi te, Suria rama Maaka leh Soba mite chu sakawr-tawlailîr leh sakawr chungchuang rawih nân tangka kg. sîngthum leh sângli an pe a. Tawlailîr sîngthum leh sânghnih an ruai a, chu nên chuan Maaka lal leh a sipaite chuan Medeba bulah bûk an rawn khuar a. Amon mite pawh khaw tin aṭangin indo tûrin an lo thawk chhuak a. Chu chu Davida chuan a lo hria a, a sipai hotu Joaba chu a ko va, a sipai huaisen rual pawh chu a ko khâwm a. Amon-ho chu an insiam a, an lal awmna khawpui Raba kulh pâwnah ṭanhmun an siam a; an lama ṭang tûr lalte leh sipai lo thawkte chuan ram palailêngah ṭanhmun an siam a. Joaba chuan hma lamah leh hnung lamah hmêlmaten an rawn bei dâwn tih a hriatin a sipai ṭha zualte chu a thlang chhuak a, Suria ram aṭanga lo kal sipaite bei tûrin a tlar a. Sipai dangte chu a u Abisaia a hotîr a, Amon-ho bei tûrin an intlar a. Joaba chuan, “Suria ram mite ka hneh loh chuan min rawn pui la, Amon-ho i hneh loh chuan ka rawn pui ang che. I tum tiruh la, kan mite leh kan Pathian mite awmna khuate i chhan teh ang; Lalpa chu ṭha a tih angin a lo che ang chu,” a ti a. Joaba leh a mite chuan Suria mite chu an bei a, an hmaah chuan an tlânchhe ta a. Amon miten Suria mite an tlânchhia an hmuh chuan Joaba u Abisaia hmaah chuan an tlânchhe ve a, an khaw kulh chhûngah chuan an tlân lût a, Joaba chuan Jerusalem-ah a hâwnsan ta a. Suria mite chuan Israel-te chu an ngam lo tih an hriatin Eufretis lui râla Suria mi dangte chu an pun a, Zoba lal Hadadezera sipai hotu Sofaka hovin an lo thawk a. Chu thu chu Davida an hrilh a, Israel mite chu a khâwm a, Jordan a kân a, an awmna chu a va thleng a. Suria mite nên chuan an inbei a. Suria mite chu Israel-te hmaah chuan an tlânchhia a, Davida chuan tawlailîr khalhtu sângsarih a that a, kea kal sipai sîngli nên; an hotu Sofaka pawh chu a that a. Hadadezera hote chuan Israel-te chu an ngam lo a ni tih an hriat chuan Davida nên an inberem a, a khua leh tuiah an awm ta a; Amon-ho pawh an pui duh tawh lo. Kum a lo thar a, nipui a lo thaw dâwn a, lalhote rammut ṭhin hun chu a lo thleng a. Joaba chuan sipai a hruai a, Amon-ho ram chu a va rûn a. Lal Davida erawh chu Jerusalem-ah a awm rih a. Raba khua chu an hual a, an bei a, an tichhe ta a. An pathian lim Milkoma lukhum chu rangkachak kg. sawmthum leh pali laia rit a ni a, chutah chuan lunghlu pawh an phûm nual a; chûng chu Davida chuan a lallukhumah chuan a phûm a; khua aṭang chuan thil tam tak, râllâk sumah a la a. Khuaa mite chu a kawi a, thingzaiah te, leiletah te leh hreia thing tanah te a chhawr a. Amon khaw danga mite pawh chutiang bawk chuan a chhawr a. A hote nên Jerusalem-ah Davida chu a kîr leh ta a. Nakin deuhvah chuan Filistia mite nên Gezer-ah an indo leh a, Hamath mi Sibekaia chuan Filistia mi zînga milian thlah Sifaia a that a, Filistia-ho chu an tlâwm ta a. Filistia mite nên an inbei leh a, Jaira fapa Elhanana chuan Goliatha nau Lahmia, Gath khaw mi chu a that a; chu mi fei chu kechâwn tiat dâwn laia hrawl a ni. Gath khuaah hian an inbei leh a. Milian pakhat, kutzungṭang paruk leh kezungṭang paruk ve ve nei a awm a, hmânlai miliante thlah a ni. Israel-te chu a cho vei a, Davida u Sama fapa Jonathanan a that a. Davida leh a hote thah miliante hi Gath khuaa awm milian thlah an ni. Setana chuan Israel-te sawisak a duh a, Davida chu Israel-te chhiarpui a neihtîr a. Joaba leh hotu dangte hnênah, “Israel ram hi a kil tâwp Beer-seba aṭanga Dan thlengin fang chhuak ula, Israel mi eng zât nge awm ka hre duh a ni,” a ti a. Joaba chuan, “ Lalpa hian tûna awm lêt za aia tam Israel-te chu awmtîr teh se. Ka pu, i mite vek an ni a, engtizia nge hetiang thil tih hi i duh a, hnam pumin thiam loh kan chan ang?” a ti a. Nimahsela, lal thu chu a tlang ta zâwk a. Joaba chuan Israel ram chu a fang chhuak a, Jerusalem-ah a lo haw leh a. Joaba chuan Israel mi zât chu a hrilh a, “Sipaia ṭang thei mi maktaduaikhat leh nuaikhat Israel ramah an awm a, Judai ramah mi nuai li leh sîngsarih an awm,” a ti a. Lal thu chu ṭha a tih loh avângin Joaba chuan Levia chite leh Benjamin chite a chhiar tel ve lo. An thiltih avâng chuan Pathian chu a lâwm lo va, Israel mite chu a hrem a. Davida chuan Pathian hnênah, “Thil ka tisual nasa a, a âtthlâk hle a ni, min ngaidam rawh,” a ti a. Lalpa chuan Davida zâwlnei Gada hnênah, “Kal la, ‘Kawng thum, a eng ber emaw a thlan tûr ka ruatsak a ni; a thlan ber chu ka tihsak dâwn’ tih Davida chu va hrilh rawh,” a ti a. Gada chu Davida hnênah a kal a, Lalpa thu sawi chu a hrilh a, “A eng nge i duh ber thlang rawh le, kum thum ṭâm tuar nge, thla thum hmêlma ûm nge, ni thum Lalpa Vantirhkohvin Israel ram pum khandaiha a sawisaka, hri-a a hrem? Mi tîrtu Lalpa chu engtin nge ka chhân dâwn?” a ti a. Davida chuan Gada chu a chhâng a, “A ngaihna ka va hre lo ve! Mihring kut tuar zawng ka duh lo, Lalpa kut tuar ka thlang zâwk e, ani chuan ngil a nei si ṭhîn a,” a ti a. Tichuan, Israel-te zîngah hri a rawn lêntîr a; mi sîngsarih an thi a. Lalpa chuan Jerusalem tichhe tûrin Vântirhkoh a rawn tîr bawk a; mahse, a duh leh ta lo va, Vântirhkoh hnênah chuan, “A tâwk e, ti tawh suh,” a ti a. Jebus mi Arauna hruihah chuan Vântirhkoh chu a ding a. Davida chuan a han en a, Jerusalem tichhe tûr Vântirhkoh khandaih keng, lei leh vân inkâra ding chu a hmu a, Davida leh mipui hruaitute chuan saiip puan an sin vek a, hmaia lei siin an kûn a. Davida chu a ṭawngṭai a, “Aw Pathian, thil sual titu chu kei hi ka ni; chhiarpui kha keima tihtîr a ni; hêng mipui, eng mah ti ve lote hian tihsual an nei hlei nêm. Kei leh ka chhûngte hi min hrem mai ta che, I mite hi chu zuah rawh,” a ti a. Lalpa Vântirhkoh chuan Gada hnênah, “Davida chu Jebus mi Arauna hruihah maichâm siam tûrin hrilh rawh,” a ti a. Davida chuan Lalpa thu chu a zâwm a, Gada sawi ang chuan a kal ta a. Hruihah chuan Arauna leh a fapa pali chuan huit an lo vua a, Vântirhkoh an hmuh chuan a fate chu an biru a. Araunan Davida lo kal a hmuh chuan hruih ata chu a lo kal a, bawkkhupin chibai a lo bûk a. Davida chuan, “Hri hi a reh theih nân i hruihah hian maichâm ka siam ang e, min leitîr rawh, a man tûr chu ka pe ang che,” a ti a. Arauna chuan, “Ka pu, nei mai rawh, ṭha i tih ang angin ti rawh. Maichâma thilhlan tûr hei bâwngpa a awm a, a hâlna tûr thing pawh buh vuakna hmanrua a awm a; chhangphut thilhlan tûr huit pawh hi ka pe a che, engkim ka tum vek ang e,” a ti a. Lal Davida chuan a chhâng a, “Ni lo ve, a man dik tak ka pe ang che, Lalpa hnêna thilhlan atân i ta eng mah a thlâwnin ka la lo vang; a man pe lovin hâlral thilhlan tûr pawh ka hlân lo vang,” a ti a. Davida chuan Arauna chu a hruih manah rangkachak tangka zaruk a pe ta a. Chumi hmunah chuan Lalpa tân maichâm a siam a, hâlral thilhlan leh remna thilhlan a hlân a. A ṭawngṭai a, Lalpa chuan a rawn chhâng a, maichâma hâlral thilhlan chu vân aṭanga meiin a rawn kâng ral ta a. Lalpa chuan Vântirhkoh chu a khandaih dah bo tûrin a hrilh a, a thu ang chuan a ti a. Lalpa chuan a ṭawngṭaina a rawn chhâng a ni tih Davida chuan a hria a, Arauna hruiha maichâmah chuan thilhlan a hlân ṭhîn ta a. Chutih lai chuan Biakbûk leh thilhlanna maichâm Mosia siam chu Gibeon-ah a la awm a; mahse, Lalpa khandaih tuar a hlauh avângin Pathian be tûrin chutah chuan Davida chu a kal ngam lo va ni. Davida chuan, “He laiah hian Lalpa, Pathian Tempul chu a awm tûr a ni. He lai maichâm hi a ni Israel-ten hâlral thilhlan an hlan ṭhinna tûr chu,” a ti a. A ram chhûnga hnam dang awm zawng zawng chu Davida chuan a ko khâwm a, hnathawkah a chhawr a. Ṭhenkhat chuan Tempul sakna tûr lung an chher a. A kawngkhâra hman tûr thîrkilhna te, kawpza te, thîr tam tak leh dâr tam tak, bûk chhuah sên loh a chhertîr a. Tura leh Sidon mite chu sidar thing tam tak rawn tawlh tûrin a ti a. Davida chuan, “Ka fapa Solomona sak tûr Tempul chu ropui tak, khawvêla hmingthang tham a ni tûr a ni. A la naupang a, chinchâng a la hre tâwk lo va, a châk ka lo chhuahsak tûr a ni,” a ti rilru a. Tichuan, a thih hmain Tempul sakna tûr châk tam tak Davida chuan a lo chhêk khâwm hman a ni. A fapa Solomona chu a ko va, Lalpa, Israel-te Pathian tân Tempul saksak tûrin a hrilh a. Davida chuan, “Kei pawhin ka Pathian, Lalpa hminga in sak chu ka châk êm êm a; amaherawhchu, Lalpa chuan ‘Thisen i chhuah nasa êm a, indo lah i uar si. Nangmah avângin leia thisen luang ka hmu tam êm mai; nang chuan ka in chu i sa lo vang. Inrem ngaina tak fapa Solomona i nei a, a hming hi ‘muanna’ tih a nih ang ngei hian a vêla a hmêlmate lakah thlamuang takin ka awmtîr ang a, a lal chhûngin Israel ram a râlmuang ang a, thlamuang takin an awm ang. Ani chuan ka in tûr chu a sa ang a, ka tân fapa a ni ang a, a tân pa ka ni bawk ang; Israel-te chunga a lalṭhutthlêng chu kumkhua atân ka tinghet ang,’ tiin mi hrilh a ni. “Chuvângin, ka fapa, Lalpa chu i hnênah awm sela, malsâwm che sela, a tih ang ngei chuan Lalpa i Pathian in tûr chu sa rawh le; Finna leh hmang hriatna pe phawt mai che sela, Israel mite chu Lalpa, i Pathian dân hmangin ro i rêlsak thei ang a; Israel-te tâna Lalpa thuruatte leh a Dân, Mosia a hrilhte kha zâwm la, kawng engkimah i hlawhtling ang. Huai takin ṭan la sauh sauh rawh; hlauthâwng suh la, beidawng mai hek suh. Lalpa in sak nân rangkachak quintal nuaithum leh sângli, tangkarua quintal nuaithum leh sîngli ka lo khâwl hrâm hrâm tawh a, dâr leh thîr phei chu bûk sên a ni lo; thing leh lung pawh ka la ṭeuh tawh, lâk belh erawh chu a la ngai ang. Hnathawk tûr mi tam tak an awm a; lungchher mi te, thing dek mi te, rangkachak te, tangkarua te, thîr leh dâr chher thiam tak takte pawh an tam mai. Hma la ṭan rawh le, Lalpa chuan malsâwm che rawh se,” a ti a. Davida chuan Solomona pui tûrin Israel hruaitute chu a hrilh a, “ Lalpa, in Pathian chuan a awmpui che u a, kil tin kil tangah râlmuang takin a awmtîr che u hi. He rama lo awm ṭhînte chu Lalpa chuan min tukdawltîr a, ram hi in thuhnuaia awm a nih tâk hi. In rilru zawng zawngin Lalpa, in Pathian rawng chu tihtakzetin bâwl rawh u. Lalpa Thuthlung Bâwm leh Pathian bungbêl thianghlim dahna in tûr sa rawh u le,” a ti a. Davida chu a upain a tar ta hle a. Solomona chu Israel-te lalah a dah ta a. Israel hruaitute, puithiamte leh Levia chi zawng zawngte chu Davida chuan a ko khâwm a. Levia chi, kum sawmthum chin chung lam chu a chhiar a, mi sîngthum leh sângriat an tling. Mi sînghnih leh sângli chu Tempul sak hna enkawltuah a dah a; mi sângruk chu thil ziak fela thubuaite rem tûrin a ti a. Mi sângli chu pulis hna thawk tûrin a ti a; mi sângli dang chu lalin a pêk thil tum rîk theihte tuma Lalpa fak hla sa ṭhîn tûrin a ti a. Davida chuan Levia chite chu an thlahtu athuin pâwl thumah a ṭhen a, Gerson te, Kohat te, Merari pâwlte an ni. Gersona khân fapa - pahnih Ladana leh Simeia a nei a. Ladana chuan fapa pathum - Jehiela te, Zethama te, Joela te a nei a. Hêngho hi Ladana thlah chi hrang hrang hruaitute an ni ta a (Simeia chuan fapa pathum - Selemota te, Haziela te, Harana te a nei a). Simeia thlahte chu a upat dân indawtin hêngte hi an ni: Jahata, Zina, Jeusa, Beria. Hêng mi palite hi Simeia fate chu an ni a. Jahata chu hotu ber a ni a, Ziza chu a dawttu a ni; Jeusa leh Beria hian fa an ngah lo va, thlah khat anga chhiar an ni. Kohata hian fapa pali - Amrama te, Izara te, Hebrona te, Uziela te a nei. Amrama hi Arona leh Mosia pa a ni. Arona hi a thlahte nên, Lalpa biaknaa rimtui hâltu, thilhlante hlâna bungraw thianghlim enkawltu leh Lalpa hminga mipuite tân malsâwmna sawi thîntu atân serh hran an ni. Pathian mi Mosia thlahte erawh chu Levia chite zînga chhiar tel an ni. Mosia chuan fapa pahnih - Gersoma leh Eliezara a nei a. Gersoma thlahte zînga mi lâr chu Sebuela a ni. Eliezara hian fapa pakhat chauh Rehabia a nei a. Rehabia erawh hi chuan fa a ngah hle. Kohata fa upa dawttu Izara chuan fapa Selomita a nei a; ani chu an chi hotu a ni. Kohata fa dawt leh Hebrona chuan fapa pali - Jeria te, Amari te, Jahaziela te, Jekameama te a nei a. Kohata fa tlum Uziela chuan fapa pahnih Mika leh Isia a nei. Meraria chuan fapa pahnih - Mahlia leh Musia a nei a. Mahlia hian fapa pahnih Eleazara leh Kisa a nei a. Eleazara hian fanu chauh a nei, fapa nei lovin a thi a. A fanute hian pasalah Kisa fate an nei a. Meraria fapa Musia zâwk chuan fapa pathum - Mahlia te, Edera te, Jeremota te a nei a. Hêngho hi a chi chi leh a chhûng chhûnga an hming ziak vek, Levia thlahte chu an ni; kum sawmhnih chin chung lam tawh phawt chuan Lalpa inah thawh an nei a ni. Davida chuan, “ Lalpa, Israel-te Pathian chuan a mite chu râlmuang takin a awmtîr ta a; Jerusalem-ah a awm reng dâwn tawh a. Levia chite tân chuan Lalpa chênna bâwkte leh bungraw dangte chu zâwn fo a ngai dâwn tawh lo,” a ti a. Davida thu ang chuan Levia chi rêng rêng chu kum sawmhnih an tlinin rawngbâwla koh theih tûrin an hming ziak vek a ni. Hêng hnate hi an thawh tûr chu a ni: Arona thlah puithiamho Pathian biaknaa ṭanpui te, Tempul tualzâwl leh pindan chhûnga bungraw thianghlim vawn thianghlim te, Pathian tâna chhang serh hlan tûr siam te; dawidim telh loh chhang kan te, chhangphut oliv hriak nêna hmeh te, Tempula thilpêk lo lâka teh fel te, a chhûn a zâna Lalpa ropuina faka zai te hi a ni. Sabat ni te, thla thar ni te leh kût nikhuaa hâlral thilhlan an hlan laia fak hla lo sa tûr mi eng emaw zât inchhâwk tûr an ruat thliah a, chûng chuan fak hla an sa reng tûr a ni. Hmun Thianghlima biakbûk chu an enkawl ang a, Puithiam Arona thlah, an unaute rawng pawh an bâwlsak tûr a ni. Hêngho hi Arona thlah chi hrang hrangte chu an ni: Arona chuan fapa pali - Nadaba te, Abihua te, Eleazara te, Ithamara te a nei a. Nadaba leh Abihua hi an pa thih hmain fa nei lovin an thi a, Eleazara leh Ithamara chu puithiam an ni ta a. Lal Davida chuan puithiamho chu an tih tûr azirin pâwl hrang hrangah a ṭhen a. Eleazara thlah Zadoka leh Ithamara thlah Ahimelekan Davida chu an tihpui a. Eleazara thlahah hian hruaitu tûr mipa an tam zâwk avângin pâwl sawmparuk an ṭhen a, Ithamara thlahte erawh chu pâwl riatah an ṭhen a. Tempula hotute leh Pathian rawngbâwl hnaa hotute an nih avângin rawngbâwltu tûr ṭhumvâwrin Eleazara leh Ithamara thlahte chu a indawtin an ruat a. Eleazara thlahte leh Ithamara thlahte chu ṭhumvâwrin hna an inchhâwk kual ṭhîn a ni. Nethanela, Levia chia mi, ziaktu chuan, lal te, a ṭhuihruai hotu lian te, puithiam Zadoka leh Abiathara fapa Ahimeleka hriatah a chhinchhiah a, puithiam zînga hotu te, Levia chi zînga hotute pawhin an hre ṭhîn. Pâwl sawmhnih leh pali chuan hetianga indawtin hna an thawk diat diat tûr a ni: Jehoiariba pâwl, Jedaia pâwl, Harima pâwl, Seorima pâwl, Malkisa pâwl, Mijamina pâwl, Hakosa pâwl, Abija pâwl, Jesua pâwl, Sekania pâwl, Eliasiba pâwl, Jakima pâwl, Hupa pâwl, Jesebeaba pâwl, Bilga pâwl, Imera pâwl, Hezira pâwl, Hapizeza pâwl, Pethahia pâwl, Jehezkela pâwl, Jakina pâwl, Gamula pâwl, Delaia pâwl, Maazia pâwl. Lalpa, Israel-te Pathian thupêk anga an thlahtu Aronan tih tûr a lo ruat chu Tempula an kal hunah hian an rawn ti ṭhîn tûr a ni. Levia thlah chhûngkaw dang hotute chu hêng hi an ni: Amrama thlah zînga mi Subaela thlah Jedeia te, Rehabia thlah Isia te, Izara thlah zînga mi Selomota thlah Jahata te; Hebrona fa, a upat dân indawtin - Jeria te, Amaria te, Jahaziela te, Jakameama te; Uziela thlah zînga mi Mika thlah Samira te, Uziela thlah zînga mi Mika unau Isia thlah Zekaria te. Meraria thlah Mahlia te, Musia te, Jaazia te; Jaazia hian fapa pathum - Sohama te, Zakura te, Ibria te a nei a. Mahlia hian fapa pahnih - Eleazara leh Kisa a nei a. Eleazara hian fapa a nei lo va; Kisa hian fapa pakhat Jerameela a nei. Musia hian fapa pathum - Mahlia te, Edera te, Jeremota te a nei. Hêng zawng hi Levia thlahte chu an ni. An unau Arona thlahte tih dân ang khân an chhûngkaw hotu ber leh a naute zînga pakhat chuan Levia chite zînga rawngbâwltu tûr hriat nân ṭhum an vâwr ṭhîn; Lal Davida te, Zadoka te, Abimeleka te, puithiam zînga hotu te leh Levia chi zînga hotu te pawh an hriattîr ṭhîn. Lal Davida leh Levia chi zînga hotute chuan hêngho hi Pathian biak kaihruaitu atân an ruat; Asafa te, Hemana te, Jeduthuna te; ṭingṭang leh perhkhuang an tum bawk ang a, dârbenthek an bêng bawk ang; Pathian thuchah an puang ṭhîn ang. Pathian biak kaihhruainaa an tih tûr bîk ruat dân chu hetiang hi a ni: Asafa chuan a fapa pali - Zakura te, Josefa te, Nethania te, Asarela te chu a kaihruai ang a. Lalin Pathian thu puang tûra a tih apiangin thu an sawi tûr a ni. Jeduthuna chuan a fapa paruk Gedalia te, Zeria te, Jesaia te, Simeia te, Hasabia te, Matithia te a ho vang a, perhkhuang tumin Pathian thu an puang ang a, fak hla leh lâwmthu sawi hla an sa ṭhîn ang. Hemana hian fapa sâwm leh pali - Bukia te, Matania te, Uziela te, Sebuela te, Jerimota te, Hanania te, Hanana te, Eliatha te, Gidaltia te, Romamti-ezera te, Josbekasa te, Malothia te, Hothira te, Mahaziota te a nei a. Hemana hi lal zâwlnei a ni a, tihropui a tiam avângin Pathianin fapa sâwm leh pali leh fanu pathum a pe a ni. A fa zawng zawngte hian an pa hovin ṭingṭang te, perhkhuang te leh dârbenthek tein Tempula zai an rem thiam vek a. Asafa te, Jeduthuna te, Hemana te hi lal ruat an ni. Hêng mi sawmhnih leh palite hi thil tum thiam vek an ni. An chipui Levia chi dang, hla sa thiamte nên, an vaiin mipa zahnih leh sawmriat leh pariat an ni. An thawh tûr hriat nân la naupang deuh emaw, upa tawh deuh emaw, zirtîrtu emaw, zirtu emaw, an zaa tân ṭhum an vâwr ṭhîn. Hei hi pâwl tin hotu, an fate leh an unaute nên mi sâwm leh pahnih zêl thawh hun ruat indawt dân chu a ni: Asafa fa Josefa ho, Gedalia ho, Zakura ho, Isria ho, Nethania ho, Bukia ho, Jesarela ho, Jesaia ho, Matania ho, Simeia ho, Azarela ho, Hasabia ho, Subaela ho, Matithia ho, Jeremota ho, Hanania ho, Josbekasa ho, Hanana ho, Malothia ho, Eliatha ho, Hothira ho, Gidaltia ho, Mahaziota ho, Romamti-ezera ho. Levia chi, Tempul pulis-a chhawr mi hrang hrang hetiang hi an ni: Kora thlahte zînga mi Korea fapa; Asafa chhûngte zînga mi Meselemia chuan fapa pasarih a nei a, an upat dân indawtin hêngte hi an ni: Zekaria, Jediaela, Zebadia, Jathniela Elama, Jehohanana, Eliehoenaia. Obed-edoma pawh Pathianin mal a sâwm a, fapa pariat a nei a. Chûngte chu a upat dân indawtin: Semaia te, Jehozabada te, Joa te, Sakara te, Nethanela te, Amiela te, Isakara te, Peulethaia te an ni. Obed-edoma fapa upa Semaia hian fapa paruk Othnia te, Refaela te, Obeda te, Elzabada te, Elihua te, Semaia te a nei a. An chite zîngah chuan mi âwmkhauh, mi chhuanawm tak tak an ni: a naupang pahnihte phei hi chu huai tak an ni. Obed-edoma thlahte aṭang hian an hna atâna mi fel tak tak mi sawmruk leh pahnih an awm. Meselemia thlah zîngah mi tling tak tak mi sâwm leh pariat an awm. Meraria thlah Hosa chuan fapa pali - Simria te (a fa u ber a ni lo nâ a, a pain chhûngkaw hotu-ah a ruat a ni), Hilkia te, Tebalia te, Zekaria te. Hosa thlah zîngah Tempul pulis sâwm leh pathum an awm. Tempul pulis-te chu an thlahtu azirin pâwl hrang hrangah an inṭhen a, Levia chi dangte ang bawkin Tempula hna thawh hun an ruatsak a. Thla tinin, an tam emaw, an tlêm emaw khawii kawngkhâr nge an vên dâwn tih hriat nân ṭhum an vâwr ṭhîn. Selemia-ho chuan khawchhak kawngka an chang a, a fapa Zekaria chuan hmâr lam kawngka a chang a; Zekaria hi rorêl pâwla pa fing tak a ni. Obed-edoma hovin chhim lam kawngka an chang a, a fate chuan Tempul kudâm an chang a. Supima leh Hosa chuan khawthlang lam kawngka an chang a, kawng chunga Saleket kawngka an chang bawk. Hna chu a indawtin an inthawh chhâwk ṭhîn. Khawchhak lam kawngkaah chuan ni tin mi paruk an ding ṭhîn a, hmâr lam kawngkaah mi pali, chhim lam kawngkaah mi pali bawk an ding a, kudâm vêng tûr ni tin mi pali; kudâm pakhat hi mi pahnihin an vêng ṭhîn a ni. Khawthlang lam pindante kawng bulah mi pali, pindan chhûngah vêngtu pahnih an dah bawk. Chûng chu Kora leh Meraria thlahte vên tûr chu a ni. Levia chi, mi ṭhenkhat chu Tempul thawhlâwm bâwm leh thilpêk dahkhâwmna pindan enkawltu an ni. Gersona fapa pakhat Ladana chu ama fa Jehielia thlahte telin Gerson-ho lu ber a ni. A fapa pahnih Zethana leh Joela chuan Tempul thawhlâwm bâwm leh thilpêk dahkhâwmna an enkawl a. Amrama thlah te, Izara thlah te, Hebrona thlah te leh Uziela thlah te tân pawh thawh tûr an tuk a. Gersoma fapa Sebuela, Mosia tupa chu Tempul sum enkawltu lu ber a ni. Gersoma unaupa Eleazara vângin Selomit-ho nên an inchhûngkhat hnai hle. Eliezara chuan fapa Rehabia a nei a, ani chuan fapa Jesaia a nei a; Jesaia hian fapa Jorama a nei a, ani chuan fapa Zikria a nei a, Zikria hian fapa Selomita hi a nei a ni. Selomita leh a fate chuan lal Davida te, chhûngkaw hotute, chi hrang hrang hotute leh mipui hotuten Pathian tâna thilpêk an pêk khâwmte chu an lo enkawl fel a, Tempul sak nân indonaa an râllâk sumte kha an rawn pe ṭhîn a ni. Selomita leh a fate hian Tempula hman tûr miin an rawn pêk rêng rêng chu an lo enkawl a ni. Zâwlnei Samuela rawn pêk te, lal Saula pêk te, lal Davida pêk te, Nera fapa Abnera pêk te, Zeruii fapa Joaba pêkte pawh an enkawl a ni. Izara thlah zînga mi Kenania leh a fate chu khawpui pâwn ram awp hna an thawhtîr a; chanchin vawn ṭhat te, Israel mite thubuaite an remsak tûr a ni. Hebrona thlahte zînga mi Hasabia leh a chhûngte mi sângkhat leh zasarih chu Jordan thlang lam ram awptuah an dah a, sakhaw lam thu leh vântlâng thil ngaihtuah ṭhîntu tûr an ni. Hebrona thlah hotu ber chu Jeria a ni. Davida lal kum sawmlinaah Hebrona thlahte chanchin hi an chhui a. He mi thlah zîngah sipai huai tak tak Gilead bial Jazer khuaah an lo awm hlawm a. Jeria laichînte zîng aṭangin lal Davida chuan mi sânghnih leh zasarih, hotu fel tak tak a thlang chhuak a, Jordan lui chhak lam bial zawng zawng, Reubena thlah te, Gada thlah te leh khawchhak lam Manasea thlah te awmna bial sakhaw thil leh khawvêl thil lama ramawptuah a dah a. Israel mi zât - chhûngkaw hrang hotu te, sâng pâwl hotu te, za pâwl hotu te leh lehkha ziaktu te, lal bula sawrkâr hna thawktu pâwl khat mi sînghnih leh sângli zêl an ni; kum tluanin thla tin hotu hrang neiin an inthlâk kual ṭhîn. Thla khatnaa thawk pâwl, mi sînghnih leh sângli chu Zabdiela fapa Jesobeaman a ho va. Ani hi Juda fa Pereza thlaha mi a ni. Thla hnihnaa thawk pâwl mi sînghnih leh sângli chu Aho mi Dodaian a ho va. He pâwl hotu ber dawttu chu Miklota a ni. Thla thumnaa thawk pâwl, mi sînghnih leh sângli chu Puithiam Jehoiada fapa Benaian a ho va. “Pasalṭha sawmthum’ tih zînga tel kha a ni. A fapa Amizabada chuan he pâwl hi a ho chhâwk ṭhîn. Thla linaa thawk pâwl, mi sînghnih leh sângli chu Joaba nau Asahelan a ho va. A fapa Zebadia chuan he pâwl hi a ho ve bawk ṭhîn. Thla nganaa thawk pâwl, mi sînghnih leh sângli chu Izra mi Samhutan a ho va. Thla ruknaa thawk pâwl, mi sînghnih leh sângli chu Tekoa khaw mi Ikesa fapa Ira-an a ho va. Thla sarihnaa thawk pâwl, mi sînghnih leh sângli chu Pelon mi Efraima thlah Helezan a ho va. Thla riatnaa thawk pâwl, mi sînghnih leh sângli chu Hosa mi Sibekaian a ho va. Ani hi Juda thlah zînga Zera thlaha mi a ni. Thla kuanaa thawk pâwl, mi sînghnih leh sângli chu Benjamin bial Anathot khaw mi Abiezeran a ho va. Thla sâwmnaa thawk pâwl, mi sînghnih leh sângli chu Netofa khaw mi Maharaian a ho va. Ani hi Zera thlah zînga tel ve a ni. Thla sâwm leh pakhatnaa thawk pâwl, mi sînghnih leh sângli chu Efraim bial Pirathon mi Benaian a ho va. Thla sâwm leh pahnihnaa thawk pâwl, mi sînghnih leh sângli chu Netofa khaw mi Othniela thlah Heldaian a ho va. Reuben thlah hotu chu Zikria fapa Eliezara a ni. Simeon thlah hotu chu Maaka fapa Sefatia a ni. Levia thlah hotu chu Kemuela fapa Hasabia a ni. Arona thlah hotu chu Zadoka a ni. Juda thlah hotu chu Davida u Elihua a ni. Isakara thlah hotu chu Mikaela fapa Omria a ni. Zebulun thlah hotu chu Obadia fapa Ismaia a ni. Naftalia thlah hotu chu Azriela fapa Jeremota a ni. Efraim thlah hotu chu Azazia fapa Hosea a ni. Khawthlang lama awm Manasea thlah hotu chu Pedaia fapa Joela a ni. Khawchhak lam, Gilead-a awm, Manasea thlah hotu chu Zekaria fapa Idoa a ni. Benjamin thlah hotu chu Abnera fapa Jaasiela a ni. Dana thlah hotu chu Jerohama fapa Azarela a ni. Chûng chu Israel hnam hrang hrang hotute chu an ni. Chhiarpuiah khân lal Davida chuan kum sawmhnih hnuai lam mi chu a chhiar tel ve lo; mite chu vâna arsi angin an tam ang tih Lalpa chuan a tiam tlat avângin. Zeruii fapa Joaban chhiarpui chu a ho va; mahse, a zo hman lo; chhiarpui avâng hian Pathianin Israel-te chu a sawisa a, mi eng zât chiah nge awm tih lal Davida chanchin ziaknaah pawh ziak a ni lo. Lal kudâm chu Adiela fapa Azmavetan a enkawl a, khaw hrang hranga lal pual dahna inte chu Uzia fapa Jonathanan a enkawl a. Lal lova hnathawktute chu Keluba fapa Ezrian a enkawl a. Lal grep enkawltu chu Rama mi Simeia a ni. Uain dah khâwm enkawltu chu Sefam mi Zabdia a ni. Khawthlang lam tlâng bulṭhuta lal Oliv leh theipui huante chu Geder mi Baal-hananan a enkawl a. Oliv hriak enkawltu chu Joasa a ni. Saron phaia lal ran tlattîrtute chu Saron mi Sitraian a enkawl a. Phai dang danga ran tlattîrtute chu Adlaia fapa Safatan a enkawl a. Sanghâwngsei enkawltu chu Ismael mi Obila a ni. Sabengtung enkawltu chu Meronota mi Jehdeia a ni. Berâm leh kêl rual chu Hagri mi Jaziza enkawl a ni. Hêng mite hi Davida mi, a sum leh pai enkawltute chu an ni. Davida pami, Jonathana, mi fing tak, lehkha thiam tak chu thurâwntu a ni. Hakmona fapa Jehiela nên lal fate zirtîrtu an ni. Ahitofela chu lal thurâwntu a ni a, Ark mi Husaia chu lal ṭhian a ni. Ahitofela thih hnuah Benaia fapa Jehoiada leh Abiathara chu lal thurâwntute an ni; Joaba chu lal sipai hotu a ni. Davida chuan Israel upate, hnam hrang hrang hruaitute, lal bula lal hna thawka thla tina inthlâk kual pâwl, sâng chunga thuneitute, za chunga thuneitute, an hotute, lal sum leh pai leh ran enkawltute, ama fate nên, sawrkâr hna thawk zawng zawng leh pasalṭha rualte chu Jerusalem-ah a ko khâwm a. Davida chu an hmaah a ding a, an hnênah, “Ka unau, ka mite u, ka thu hi ngaithla teh u. Lalpa Thuthlung Bâwm dahna, a ke nghahna tûr in sak ka châk êm êm a, châkte pawh ka la tawh a; amaherawhchu, sipai ka ni a, thisen ka chhuah tam êm avângin Pathian chuan ka sak a phal lo va. Lalpa, Israel-te Pathian chuan, ka unaute zîngah ka dam chhûnga lal tûrin min thlang chhuak a, hnam hruaituah Juda thlahte hi a ruat a ni. Juda-ho zîngah kan chhûng hi min thlang a, kan chhûng zîngah kei hi min duhsak a, Israel-te lalah min siam a ni. Fapa ṭhahnem tâwk tak min neihtîr a, chûng zînga mi Solomona hi Lalpa rama Israel-ho chunga lal atân a thlang a ni. “ Lalpa chuan ka hnênah, ‘I fapa Solomona hian ka Tempul chu a sa ang, ka fapa atân ka thlang a, a pa ka ni ang a. Ka thuruatte, ka thupêkte a zawm tlat chuan a lalna chu kumkhua atân ka tinghet ang,’ a ti a. Chuvângin, Israel zawng zawng, Lalpa mi pung khâwm leh kan Pathian thupêkte chu ngaihvenin fîmkhur takin awm rawh u; tichuan, he ram ṭha tak hi in nei ang a, in fate pawhin an rochung kumkhua thei dâwn nia,” a ti a. Solomona hnênah chuan, “Nang, ka fapa Solomona, i pa Pathian hi pawm la, châk tak leh tihtakzetin a rawng bâwl ang che, kan ngaihtuah leh kan tumte hi a hre vek a ni. Ani chu i zawn phawt chuan i hmu ngei ang a, i ngaihsak loh erawh chuan a paihthla hlen ang che. A Hmun Thianghlima in sa tûrin Lalpa chuan a thlang che tih hre rawh, ṭan la la, thawk ṭan rawh,” a ti a. Davida chuan a fapa Solomona hnênah Tempul sak dân tûr ruahmanna: kudâm tûr te, pindan chi hrang hrang te, Hmun Thianghlim Ber te, sual ngaihdamna hmun rem dân tûrte chu a pe a. Tual hungchhûng chei dân tûr te, a vêla in sak dân tûr te, Tempula hman bungbêl dah ṭhatna tûr te, Lalpa hnêna thilpêk dah ṭhatna sak dân tûr a lo ruahman dânte a hrilh vek a. Puithiamho leh Levia chiten an hna an thawha, Tempul chhûnga rawng an bâwl dân tûr te, Tempula bungbêl awm enkawl dân tûra a ruahman dânte a hrilh bawk a. Bungbêl siam nân tangkarua leh rangkachak eng zât nge hman tûr tih te, khâwnvâr leh a dahna siamna tûr zât te, tangkaraw dawhkân te, Pathian tâna chhang serh dahna tûr dawhkâna tangkaraw hman zât tûrte a hrilh bawk a. Thîrkut te, maihûnte leh uain thâwl siam nân rangkachak hlîr hlak hman zât tûr te, thlêng siam nân tangkarua leh rangkachak hman zât tûrte a hrilh vek a. Rimtui hâlna dawhkân siam nâna rangkachak hlîr hman tûr zât te, Lalpa Thuthlung Bâwm chunga Cherub thla zâr tawlailîr siam nâna rangkachak hlîr hlak hman tûr zât te pawh a hrilh a. Lal Davida chuan, “ Lalpa min hrilh ang ngeia tih tûr ruahman ziaknaah chûng chu ziak vek a ni,” a ti a. Lal Davida chuan a fapa Solomona hnênah, “I tum tiruh la, ṭan la rawh, hna chu thawk ṭan rawh, tu man tikhawtlai che suh se. Ka Pathian, a rawng ka bâwl ṭhîn, Lalpa Pathian chuan a awmpui ang che, Lalpa chuan a Tempul i sak zawh hma chu a thlah lo vang che a, a hawisan hek lo vang che. Tempula puithiamte leh Levia chite thawh tûr ruat fel a ni tawh a. Mi themthiam, thawk châk tak tak an tam a, mite leh an hruaitute chu i thu nghâkin an awm ṭhuap a ni,” a ti a. Lal Davida chuan pungkhâwmho hnênah, “Ka fapa Solomona hi Pathian mi thlan chu a ni; mahse, a la naupang hle a, chinchâng a la hre tâwk lo. Hna thawh tûr hi a tam hle a ni, a sak tûr hi mihring in tûr a ni lo, Lalpa, Pathian in tûr a ni. Ka theih chin chin chu châk ka lo chhuah tawh a, rangkachak te, tangkarua te, dâr te, thîr te, thing te, lunghlu te, lungmantam te, lungmawi te leh sailungvâr te ka la khâwm tawh. Hêng bâkah hian keima sum aṭangin tangkarua leh rangkachak ka pe bawk a ni. Pathian Tempul tûr hi ka vei êm avângin. Ofir rangkachak ṭha chi kg. nuaikhat, rawh thianghlim tangkarua kg. nuaihnih leh sîngli dâwn lai Tempul chhûng lam bang chei nân te, themthiamhovin an duh anga an cheimawi nânte ka pe a ni. Lalpa tân tu nge thilpêk ṭhahnem tâwk pe ve phal le?” a ti a. Hnam tin hotu te, chi tin hruaitu te, sâng hotu te, za hotu te leh sawrkâr hna thawkho chuan phal takin thilpêk an pe ve ta a. Tempul sak nân chuan rangkachak kg. nuaikhat leh sîngsarih, tangkarua kg. nuai zathum leh sawmli, dâr kg. nuai zaruk leh sawmhnih, thîr kg. nuai sângthum leh zali aia tam mah an pe a. Lungmantam neite pawhin Lalpa Tempul atân an pe a, Gersona thlah Jehielan a enkawl a. Mipui chu an hlim hle mai, phal taka mahni thu ngeia Lalpa tâna pe an nih avângin an lâwm a ni, lal Davida pawh namên lovin a lâwm a. Chuvângin, Davida chuan Israel pungkhâwmho hmaah Lalpa chu a fak a, “Aw Lalpa, kan pu Israela Pathian, kumkhuaa chawimawi tlâk i ni. I ropui a, thil i ti thei a, i chungnung a, i mawi a, lei leh vâna thil zawng zawng hi i ta a ni a, Aw Pathian, i lalber a, engkim chunga thuneitu i ni. Hausakna leh chawimawina zawng zawng hi i hnên aṭanga lo kal a ni a, chakna leh thiltihtheihna i kawl a, mi i siam lian a, i tichak ṭhîn. Chuvângin, kan Pathian, lâwmthu kan hrilh a che, i hming ropui tak chu kan fak a ni. Kei leh ka mite tehlul hian hetiang khawpa tam i hnêna thilhlan kan pe thei che hi kan theih avânga pe che kan ni lo ve; engkim hi i ta a ni a, i ta chu kan rawn pe mai che a nih hi. Aw Pathian, i hmaah chuan kan pi leh pute ang khân keini pawh mikhual, rei lo tê châm ang lek kan ni a, kan dam chhûng nite chu hlimthla ang lek a ni a, a ral mai ṭhîn. Aw Lalpa, kan Pathian, i hming chawimawi tûra i in sak nân châk kan lo chhuahte pawh hi i hnên aṭanga lo kal, i ta vek a ni. Mi thinlung chhûngril i fiah ṭhîn a, mi nun ngîlte chu i lâwm ṭhîn. Kei chuan hêng thilte hi phal tak leh rilru ṭha tak puin i hnênah ka rawn hlân a ni; i mi, lo pungkhâwmte pawhin thilhlan rawn pêk che an châkzia ka hmu a ni. Aw Pathian, min thlahtu Abrahama te, Isaka te, Jakoba te Pathian, hetiang rilru hi i mite puttîr reng la, i laka an rinawm reng theih nân vêng ang che. Ka fapa Solomona hi i thupêk châk taka zâwm zêl thei tûrin vêng la, i Tempul, a châkte ka lâk ṭeuh tawh chu sa puitling tûrin ṭanpui ang che,” a ti a. Davida chuan mipuite chu, “In Pathian Lalpa hi fak rawh u,” a ti a. Pungkhâwmho chuan an thlahtu Pathian Lalpa chu an fak a, an kûn a, Lalpa chu an chawimawi a, lal pawh an chawimawi a. A tûkah chuan ran an talh a, Lalpa hnênah thilhlan an hlân a, mipui pawh an eitîr a. Bâwngpa sâng, berâmchal sâng, berâmno sâng an talh a, maichâma hâlral thilhlan pawh an rawn hlân a. Uain thilhlan pawh an rawn hlân a. Chumi ni chuan Lalpa hmaah hlim takin an eiin an in ta a. Solomona chu lalah an puang nawn leh a, Lalpa hmingin rorêltuah hriak an thih a, Zadoka pawh puithiamah hriak an thih a. Tichuan, Solomonan a pa lalṭhutthlêng, Lalpa dinsak chu a luah ta a, lal tling tak a ni, Israel mi zawng zawngin a thu an awih a ni. Sawrkâr milian, sipaite leh Davida fa dangte pawhin Solomona chu an lala pawm tûrin thu an tiam a. Solomona chu Lalpa chuan hnam pum pui a ngaihsântîr a, Israel chunga rorêltu zawng zawng aiin Solomona chu a chawimawi a ni. Jesaia fa Davida chu Israel zawng zawng chungah, kum sawmli a lal a, Hebron-ah kum sarih, Jerusalem-ah kum sawmthum leh pathum. Tarkûna damin a thi ta a; a hausa êm êm a, mi zah a kai a, a fapa Solomona chu a aiah a lal ta a. Davida chanchin, a tîr aṭanga a tâwp thlengin zâwlnei pathum Samuela, Nathana leh Gada te lehkhabu-ah ziak vek a ni. A ro rêl dân te, thil a tih theihzia te, a chunga thil thleng te, Israel leh an chhehvêl ram chunga thil thlengte an ziak vek a ni. Lal Davida fapa Solomona chuan Israel ram chu a chang nghet ta hle a. Lalpa, a Pathian chuan mal a sâwm a, a lo chak ta êm êm a. Mi sâng hotu te, za hotu te, sawrkâr hnathawk te, hnam tin hruaitu te, Israel chhûng tin lu leh Israel-ho te chu Gibeon khuaa kal vek tûrin a hrilh a; chutah chuan Lalpa nêna Inbiakna Bûk, Lalpa chhiahhlawh Mosian thlalêra a siam kha a la awm ta reng a ni. Thuthlung Bâwm erawh chu Davida khân Kiriat-jearim aṭangin a la a, Jerusalem khuaa puan in a kaihsakah khân a dah a nih kha. Uria fapa, Bezalela, Hura tupa siam dâr maichâm pawh kha Gibeon-ah hian Biakbûk kawtah a la awm a ni. Bûk kawtah chuan Solomona leh mipuite chuan Lalpa chibai an bûk a. Lal chuan Lalpa hnênah hâlral thilhlanah ran sângkhat a hlân a, bûk kawta dâr maichâmah a hâl ral a. Chumi zân chuan Solomona hnênah Pathian a inlâr a, “Eng nge pe che ila i duh?” a rawn ti a. Solomona chuan a chhâng a, “Ka pa Davida chu i ngaina êm êm ṭhîn a; tûnah, a ai awhah min dah ta a. Aw Lalpa Pathian, ka pa hnêna i thutiam kha tihlawhtling teh. Leia vaivut zât ngawta tam chungah lalah min siam a; chuvângin, an chunga ro ka rêl thiamna tûrin finna leh hmangchâng hriatna min pe ang che. Chutilo chu, engtin nge i mi heti zozai hi ro ka rêlsak theih ang?” a ti a. Pathian chuan Solomona chu a chhâng a, “Hausakna te, neihnunna te, hmingthanna te, i hmêlma tihhlumsak te, dam reina te dîl lovin an chunga lala ka siamna che ka mite chunga ro i rêlsak thiam nân finna leh hmangchâng hriatna dîl nachâng i hria a. Finna leh hmangchâng hriatna chu ka pe ngei ang che; i hmaa lo lal tawhte pawhin an neih phâk loh hausakna te, neihnunna te leh hmingthanna te pawh ka pêk belh ang che,” a ti a. Solomona chuan Gibeon khuaa hmunsâng, Lalpa nêna Inbiakna Bûk awmna chu a chhuahsan a, Jerusalem-ah a hâwng a, Israel-te chungah a lal ta a. Sakawr-tawlailîr sângkhat leh zali leh indo sakawr sîngkhat leh sânghnih a nei a, a ṭhen chu Jerusalem-ah a kawl a, khawpui hrang hrangah a dang chu a dah darh a. A lal chhûng hian Jerusalem-ah chuan rangkachak leh tangkarua chu lungte tlukin a tam a, sidar thing pawh khawthlang lam tlâng ṭhuta theipui kûng zât zetin a tam a. Solomona sakawrte chu Aigupta leh Kilikia aṭanga tawlh khâwm a ni. Lal aiawha sumdâwngte chuan sakawr-tawlailîr tangka zaruk zêlin an lei a, sakawr pawh tangka za leh sawmngain an lei khâwm a; Hit mite leh Suria mite hnênah an hralh chhâwng ṭhîn. Lal Solomona chuan Lalpa an biakna tûr Tempul leh ama awmna tûr lal in sak a tum ta a. Thil thiar khâwm tûrin mi sîngsarih a chhawr a, lung la tûrin mi sîngriat a chhawr bawk a. Hnathawkho vêngtu tûr mi sângthum leh zaruk a ruat bawk a. Solomona chuan Tura lal Hirama hnênah palai a tîr a, “Ka pa Davida tân sidar thing i tawlhsak ang khân kei pawh min tawlhsak teh khai. Ka Pathian chawimawi nân Tempul ka sa dâwn a, kei leh ka mite tân hmun serh a ni ang a, chutah chuan rimtuite hâlin kan Pathian chu kan be ṭhîn dâwn a ni; chhang serhte pawh kan dah reng ang a, zîng leh tlaiah te, sabat ni-ah te, thla thar kûtah te leh kût ni dangah te hâlral thilhlan, Lalpa kan Pathian hnêna kan hlanna tûr ka sa dâwn a ni; chutianga amah chawimawi tûrin Israel-te chu kan Pathian hian thu a pe a ni. Tempul ropui tak sak ka tum a, kan Pathian hi pathian dang zawng aiin a ropui si a. Dik tak chuan Pathian tân tu man in han sak rual a ni lo va, vânah pawh khian a leng lo a ni si a; Pathian tâna rimtui hâlna hmun tih mai loh chu kei tehlul hi a in han sa rual ka ni hlei nêm. “Thil ker thiam, rangkachak te, tangkarua te, dâr leh thîr chher thiam te, la dumpâwl te, la senduk te leh la senlâr te siam thiam han tîr la, ka pa Davida khân Judai ram leh Jerusalem-a mi themthiam a lo thlan chhuahte nên khân hna an thawk ho dâwn nia. Mi themthiam tak tak i ngah hle tih ka hria a ni, Lebanon tlânga sidar thing te, far thing te, algum thing te min han thawn bawk ang che. I mite pui tûrin mi pawh ka rawn tîr mai ang. Tempul sak ka tum hi a lianin a ropui dâwn êm a, thingzai kan mamawh ṭeuh dâwn a ni. I mi chhawrte tân huit fai ṭin nuaili, barli ṭin nuaili, uain ṭin sîngli, oliv hriak ṭin sîngli ka rawn tum ang e,” a ti a. Lal Hirama chuan Solomona chu lehkha a thawn a, “ Lalpa chuan a mite a hmangaih avângin an lalah a siam che a. Israel-te Pathian, Lalpa, lei leh vân siamtu chu fakin awm rawh se. Lal Davida chu fapa fing tak leh remhre tak a pe a, ani chuan Lalpa Tempul leh ama awmna tûr in sak a tum a ni. Mi fing, kut themthiam tak, Hurama ka rawn tîr a. A nu chu Dana thlah a ni a, a pa erawh chu Tura khaw mi hlun a ni. Rangkachak te, tangkarua te, dâr te, thîr te, lung te, thing te a dek thiam êm êm a; la zai sîn vâr te, dumpâwl te, senduk leh senlâr te pawh a dek thiam êm êm a ni. Thil ker mawite a thiam a, sawi ang apiang a thiam zêl a ni. I mistiri themthiam rualte leh i pa Davida mi rawihte nên thawk rawh se. Huit te, barli te, uain te leh oliv hriak pêk i tiam chu han thawn ta che. Lebanon tlâng aṭangin i duh zât zât sidar thing kan kit ang a, kan ṭâwn khâwm ang a, Jopa thlengin tuifinriatah kan rawn tawlh ang. Chuta ṭang chuan nangin Jerusalem-ah i la chho dâwn nia,” a ti a. Lal Solomona chuan a pa tih ang khân Israel rama hnam dang awm zawng zawng a chhiar a, in leh lo nei mi nuaikhat leh sîngnga leh sângthum zaruk an lo awm a. Mi sîngsarih chu thil a thiartîr a, mi sîngriat chuan tlânga lung an la a, hnathawk viltu tûr mi sângthum leh zaruk a dah bawk. Solomona pa, Lal Davida khân, Jerusalem khaw chhûng Moria tlânga Jebus mi Ornana hruihzâwlah Tempul sakna tûr hmun a lo buatsaih diam tawh a, chutah chuan Solomonan a lal kum lina thla hnihnaah Tempul chu a sa ṭan ta a. Solomonan Pathian tâna Tempul a rel chu a dung tawng sawmruk, a vang tawng sawmhnih a ni. A pindan hmasa chu tawng sawmhnih bial a ni; a chung chu tawng za leh sawmhniha sâng a ni, a chhûng lam chu rangkachaka chei a ni. A pindan laita chu Sidar thinga thuah vek a ni; tûm thing leh khaidiat lem, rangkachak ṭha chia siam a bel chhuak vek a, chutah chuan tûm thing leh khaidiat lem a chuantîr a. Lal chuan lungmantam mawi tak tak leh Parvaim ram rangkachakin Tempul chu a chei a. A bang te, a khanchhuk te, a pindan hmasa leh a kawngkhâr te chu rangkachakin a luan a, bangahte chuan themthiamho chuan Cherub lemte an ker bawk, Pindan chhûngril, Hmun Thianghlim Ber an tih chu tawng sawmhnih bial a ni, Tempul vâng lam tiat a nih chu. He Hmun Thianghlim Ber bang thuah nân hian rangkachak kg. sânghnih an hmang a, rangkachak thîrkilhna zanga leh sawmsarih an hmang a, pindan chhûng lam pawh rangkachaka tuam chhuah vek a ni. Lalin themthiamho chu dârin Cherub pahnih lem a siamtîr a, rangkachakin an tuam a, Hmun Thianghlim Berah chuan a dahtîr a. Pindan luhna lam hnungchhawnin a dahtîr a, thla pahnih an nei a, pakhat thla zâr chu tawng sâwm a ni. Pakhat dang thla zâr pawh chu tawng sâwm a ni a, an thla hmawr chu a inkhawih a, a hmawr lehlam chuan bang a khawih ve ve a. Tichuan, Cherub thla zâr chu tawng sawmhnih a ni a, a luhna lam hnungchhawnin an ding a. Hmun Thianghlim Ber luhna puanzâr chu puan zai sîn a ni a, a dumpâwl te, a senduk te leh a senlâr tea tah a ni; Cherub lem an zep thluah bawk a. Lal chuan dâr ban mûm pahnih, tawng sawmthum leh pangaa sâng, hma lamah a phun a, a ban lu bâwk chu tawng nga hawlh tlanga lian a ni. A ban lu bâwk chu khaidiat anga chei kual a ni, khaidiat lem chhûngah chuan theibuhfai lem a chuang a, a vaiin za a awm. Bante chu Tempul luhna bula phun a ni a, chhim lama ban chu Jakina ban an ti a, hmâr lama mi chu Boaza ban an ti a. Solomona chuan dâr maichâm tawng sawmhnih bial, tawng sâwma sâng a siam a. Tuizêm, teh kuala tawng sawmthum, tawng sâwm hawlh tlang, tawng ngaa sâng, dârin a siam a. Tuizêm bang pâwn lam chu tlar hnihin an cheimawi a, an cheina chu bâwngchal lem a ni a, zêm chhûn ruala chhûn tel nghâl a ni. Tuizêm chu bâwngchal lem sâwm leh pahnih chungah a innghat a, pathumin chhim lam an hawi a, chutiang pathum zêl chuan hmâr lam te, chhak lam te, thlang lam te an hawi a, an hnung lam chu a insi a. Tuizêm bang chu kutphah bawka chhah a ni, a tlâng chu no tlâng arh, lilipâr ang hian a arh a. Dâr chawhtawlh sâwm a siam bawk a, panga chu Tempul hmâr lama dah tûr a ni, panga dang chu chhim lamah; an kût nia thilhlan sil faina tûr tui dah nân a ni; dâr tuizêma tui chu puithiamho insilna tûr a ni. A siam dân pangngaia siam khâwnvâr dahna sâwm rangkachakin a siam a; a hûnna tûr dawhkân sâwm a siam bawk a. Pindan laitaah khân a dah a, a sîr tuakah panga ve vein a hûng a, rangkachak chawhtawlh za a siam bawk. Puithiamho awmna tûr pindan te leh tualzâwl te a siam a. Pindan kawngkhârte a siam a, dârin a tuam a. Tuizêm chu Tempul chhimchhak kilah an hûng a. Hurama chuan bêl te, vutlawh te, chawhtawlh te a siam a. Pathian Tempula hman tûr ṭûl zawng zawng chu Solomona a siamsak ta a. Hêng hi a thil siamte chu a ni: Dâr ban pahnih, ban lu bâwk nei, no bial anga kûm, khaidiat lem a kuala tlar hniha awm; ban lu bâwkah chuan theibuhfai lem zali, khaidiat kual chhûng zêlah tlar hnih a awm; chawhtawlh sâwm leh a nawrsawnna tawlailîr sâwm; tuizêm lian, a hûnna bâwngchal lem sâwm leh pahnih nên; bêl te, vutlawh te, dâr thîrkut te a siam a ni. Chûng thil chu Huraman dârin Lalpa ina hman atân Solomona chu a siamsak a. Sukot leh Zereda inkâr, Jordan lui phaizâwl bellei khurah chûng chu lal chuan themthiamho chu a chhûntîr a ni. Hêng bungbêl hi a tam êm a, a bûk zât hriat sên a ni lo va; Solomona chuan Pathian Tempul chhûnga thil awm zawng zawng chu a siam a, rangkachak maichâm, chhang serh dahna tûr te, Hmun Thianghlima chhit reng tûrin khâwnvâr leh a dahnate rangkachak hlîr hlakin a siam a; pangpâr lem te, chaicheh te, khâwnvâr huh hlumna te, rimtui hâlna berhbu te, meilawh te, rangkachak vekin a siam a. Tempul luhna kawngkhâr leh Hmun Thianghlim Ber luhna kawngkhâr pawh chu rangkachakin a siam a. Lalpa Tempul hna zawng zawng chu Solomona chuan a thawk zo ta a. A pa Davidan thil a lo serh hran tawh, tangkarua te, rangkachak te leh bungbêl te chu Solomona chuan Tempul sum dahnaah chuan a dah ta a. Solomona chuan Israel upa te, hnam hruaitu te, chhûng tin puipa te chu Davida khawpui Zion aṭanga Lalpa Thuthlung Bâwm laa, Tempul chhûnga dah tûrin a ko khâwm a. Thla sarihna, Bâwkte kûtah chuan, Israel mi zawng zawng chu an lo kal khâwm a. Israel upate an lo thlen chuan Levia chite chuan Thuthlung Bâwm chu an zâwn a, Tempul an zâwn thleng a, Puithiamte leh Levia chite chuan Biakbûk leh a hmanrua zawng zawng chu tempul-ah an la lût a. Israel mi zawng zawng chu lal Solomona hovin Thuthlung Bâwm hmaah chuan an lo kal khâwm a, berâm leh bâwng chhiar sên loh thilhlanah an talh a. Puithiamho chuan Thuthlung Bâwm chu Tempul chhûngah an zâwn lût a, Hmun Thianghlim Bera Cherub thla zâr hnuaiah chuan an dah a. An thla zâr chuan bâwm leh a zâwnna chu a khuh a ni. A zâwnfung hmâwr chu Hmun Thianghlim Ber kawngka zâwn taka din chuan a lang thei, hmun dang aṭang chuan a lang thei lo. A zâwnfung chu tûn thlengin a la invuah a ni. Bâwm chhûngah chuan eng mah dang a awm lo, Aigupta ram aṭanga an lo chhuah laia Lalpa thuthlung, Horeb tlânga ziakna lungphêk pahnih Mosia dah chauh kha a awm. Eng pâwla tel ṭhîn pawh ni se puithiamho chu an inthian thianghlim sa vek a. Hmun Thianghlim Ber aṭang chuan an lo chhuak a. Levia chi, zaipâwla tel - Asafa te, Kenana te, Jeduthuna te chu an hote nên puan zai sîn vâr silhfên inbelin dârbenthek te, ṭingṭang te, perhkhuang te an rawn keng a, maichâm bul khawchhak lamah an ding a, tawtawrâwt tum tûr puithiam za leh sawmhnih an tel bawk. Tawtawrâwt pute leh zaipâwlte chu Lalpa fakna hla saa, a hnêna lâwmthu sawina hla sa tûr an ni. Tawtawrâwt te, dârbenthek te leh thil ri thei dangte nên zaipâwl chuan Lalpa fakna hla, ‘ Lalpa chu fak rawh u, a ṭha si a. Kumkhuain min lainat reng a ni’ tih an sa ta tuar tuar a. Lalpa in Tempul chhûngah chuan, chhûm a khat ta a. Lalpa ropuina chhûm chu Tempul chhûnga a khah tlat avângin puithiamte chuan rawng an bâwl thei lo. Solomona chu a ṭawngṭai a, “Chhûm thim zînga awm i duh a, tûnah zawng, Tempul ṭha tak ka siamsak tâk che hi, kumkhuaa i awmna tûr chu,” a ti a. Israel mi zawng zawng chu chutah chuan an ding a, Solomona chuan an lam a hawi a, Pathian malsâwmna a dilsak a. An hnênah chuan, “Israel-te Pathian, Lalpa chu fak rawh u, Ani chuan ka pa Davida hnêna a thutiam a rawn tihpuitlin tâk hi. “ Lalpa chuan, ‘ka mite Aigupta ram ata ka hruai chhuah aṭanga tûn thlengin Israel khawpui khawiah mah min biakna tûr Tempul sakna hmun ka la thlang lo. Chumi ti tûr chuan ka mi Israel tu mah ka la thlang hek lo. Tûnah zawng, min biakna hmun atân Jerusalem hi ka thlang ta a, nang David, ka mite chunga lal atân ka ruat a che,’ a ti a. “Ka pa, Davida khân Israel-te Pathian, Lalpa biakna tûr Tempul sak a tum a; mahse, Lalpa chuan ka Pa Davida hnênah, ‘Ka chênna tûr in min siamsak i tum hi i ti ṭha e. Mahse, nang chuan i sa lo vang, i fapa, i hrin ngeiin a ni Tempul chu sa dâwn ni,’ a ti a. “ Lalpa chuan a thutiam chu a tipuitling ta a, a tiam angin ka pa Davida aiah lal ka lo ni a, a lalṭhutthlêng mi luahtîr a; he in hi Israel Pathian, Lalpa hming awmna atân ka sa zo ta a ni. Israel mite nêna thuthlung a siam dahna bâwm pawh a chhûngah ka dah fel ta,” a ti a. Mipui hmaah Solomona chu maichâm bulah a kal a, bân pharin a ṭawngṭai a. Solomona khân dâr dawhkân, tawng nga bial, tawng thuma sâng a siam a, Tempul tuallaiah chuan a dah a. Dawhkân chungah chuan a lâwn a, vân lam hawia bân a phar chu mi tinin an hmu thei a ni. A ṭawngṭai a: “Aw Lalpa, Israel-te Pathian, lei leh vânah nang ang rêng Pathian an awm lo. I mite nêna i thuthlung chu i vawng ṭhîn a, i thu an awih phawt chuan i hmangaihzia i lantîr ṭhîn. Ka pa, Davida hnêna i thutiam chu i hlen a, vawiin hian i tipuitling ta a ni. Khai le, Lalpa, Israel-te Pathian, ka pa Davidan i dânte a pawisaka, a thlahten an pawisak ve phawt chuan ‘a thlah pakhat tal chu Israel lalah an ṭang reng ang,’ tih i tiam pawh kha han hlen teh le. I chhiahhlawh Davida hnêna i tiam zawng zawng kha, aw Lalpa, Israel-te Pathian, han tihlawhtling teh le. “Pathian meuh chu lei mihringte zîngah hian i chêng duh ngût dâwn em ni? Vânah pawh i leng si lo va, ka Tempul sakah hian leng rual em i nih? Aw Lalpa, ka Pathian, i chhiahhlawhin ka dîl hi lo ngaithla la, ka ngen hi min phalsak ang che. I hming awmna tûra i thlan, he in hi a chhûn a zânin vêng la, i lam hawia ka ṭawngṭai hi lo ngaithla ang che. Ka ṭawngṭaina hi ngaithla la, i mi Israel-te, he Tempul hawia an ṭawngṭai chuan ngaithla la. I in vân sâng aṭang chuan lo hria la, kan sual ngaidam ang che. “Tu pawh, thil sual tia puh, i maichâm hmaa lo kala, tihsual a neih lohzia hriat nân chhia a rawn chham chuan, Aw Lalpa, i vân sâng aṭangin lo ngaithla la, i chhiahhlawh chungthu chu dik takin rêlsak la, mi sual chu hrem la, pawi khawih lo chu chhuah ang che. “An sual avânga i mi Israel-te chu an hmêlmaten an sawisaka, i lam an lo hawia, i Tempul hawia ngaihdam an rawn dîl chuan, I vân sâng aṭangin lo ngaithla la, i mite sual chu ngaidam la, an hnêna i pêk, an thlahtute i pêk ramah chuan hruai kîr leh ang che. “I mite sual avângin khua i khêntîr a, an sual sima Tempul hawia an rawn ṭawngṭai chuan, aw Lalpa, an thu chu ngaihthlâksak la, i chhiahhlawh Israel-te sual chu ngaidam la; thil dik tih zirtîr ang che. Tin, aw Lalpa, i mite neih hlen tûra i pêk i ramah chuan ruah sûrtîr ang che. “Ṭam tlâk te, hri lên te, thli lumin thlai a chhêm chhiata, khau te a puana, râl an lo lente leh i mite an dam loh hritlân hunah te, an ṭawngṭaina chu ngaithla ang che. I mi Israel tu pawh sim takzeta i Tempul lam hawia a ṭawngṭai chuan, a dîl chu lo hria la, i vân sâng aṭangin ngaithla la, ngaidam ang che. Nangmah chauh hian mihring thinlung chhûngril chu i hmu thei a, min thlahtute i pêk rama an awm chhûng chu nang hi an ṭih che a, i thu an awih theih nân an phu tâwk zêlin an chungah ti ang che. “Hnam dang, Israel mi ni lo, ram hla taka awmte pawhin i ropuizia leh i thiltihtheihzia chu an hriata, i ṭanpui peih reng tih hriaa lo kalin he in lam hawia an ṭawngṭai chuan, an dîl chu ngaithla la, i chênna vân sâng aṭang chuan lo ngaithla la, an ngen chu tihsak ang che; khawvêla mi zawng zawngin i mi Israel-te angin an hre dâwn che nia. He ka Tempul sakah hian chibai an rawn bûk che a ni tih an hria ang. “An hmêlmate do tûra i mite an chhuaha, khawi aṭang pawhin i thlan he khua emaw, i tâna ka Tempul sak lam emaw hawia an ṭawngṭai chuan lo ngaithla la, vân aṭangin lo hria la, an hmêlmate chu hnehpui ngei ang che. “I miten i laka thil sual an tiha, thil sual ti lo an awm si lo, i thin an tih-ura, an hmêlmate kuta i pêka, sala an hruaiin, an hruaina ram chu hla hle mah se, i mite ṭawngṭai chu ngaithla ang che, chu ramah chuan an sual an sima, an sualna leh an khawlohnaah thupha an chawi chuan, aw Lalpa, an ṭawngṭaina chu ngaithla ang che. Chûng rama an awm hnuin an sual an sim takzeta, inchhîra an thlahtute hnêna i pêk ram lam te, i tâna i khawpui thlan lam te, i tâna ka sak he Tempul lam hawi tea an ṭawngṭai chuan, lo ngaithla la, i vân sâng aṭang chuan lo hria ang che; an chungah ngilnei la, i mite sualna zawng zawng chu ngaidam ang che. “Aw ka Pathian, min rawn thlîr la, he hmuna kan ṭawngṭai hi ngaithla ang che. Aw Lalpa Pathian, lo thawk chhuak la, I chênna tûrah hian lo kal teh, I ropuizia lanna bâwm nên lo lût rawh, Aw Lalpa Pathian, i puithiamte chu an thiltih apiangah malsâwm la, I mi thianghlimte chu i thil ṭha tihsakah lâwm rawh se. Aw Lalpa Pathian, I hriakthiha hi hawisan suh la, I chhiahhlawh Davida thil ṭha tihte hre reng ang che,” a ti a. Lal Solomona a ṭawngṭai zawh chuan vân aṭangin mei a lo tla a, thilhlante chu a rawn kâng ral ta a; Tempul chhûng chu Lalpa ropuina chuan a khat ta tlat a. Lalpa in chhûng chu a ropuinaa a khah tlat avâng chuan puithiamte chu Lalpa Tempulah chuan an lût thei lo. Vân aṭanga mei lo tla leh in chhûng Lalpa ropuinaa a khat chu, Israel miten an han hmuh chuan tualah an bawkkhup a, Pathian chibai an bûk a, a ṭhatna avâng leh ngil a neih kumkhua ṭhîn avângin an fak a, Solomona leh mite chuan Lalpa hnênah thilhlan an hlân a. Remna thilhlan atân bâwng sînghnih leh sânghnih, berâm nuaikhat leh sînghnih an hlân a. Chutianga tiin Solomona leh a mite chuan Tempul chu an hawng ta a. Puithiamho chu an dinna hmun tûra ruatah chuan an ding a, Levia chite chuan Davida pêk thil tum rîk theihte nên Lalpa fak hla, ‘Kumkhuaa min hmangaihtu a ni,’ tih hla, Davidan sa tûra a tih ang ngeiin an sa ta tuar tuar a, Puithiamte pawhin mipui ding hmaah tawtawrâwt an hâm ruai ruai a. A hung chhûng kawtlai pawh chu Solomona chuan a hawng a, hâlral thilhlan te, buhbâl thilhlan te, remna thilhlan ran thau te chu a hâl a, dâr maichâm a siam kha hêng zawng zawng hlan nân a tê lutuk a, a leng lo chu tualah chuan an hâl mai a ni. Lal Solomona leh mi dangte chuan Bâwkte kût, ni sarih chhûng an hmang zui a, Israel ram hmâr tâwp lam Hamath kalkhân leh chhim lam Aigupta lui inkâra mi zawng zawng chu an lo kal khâwm a, mi an tam hle mai. Maichâm lawmin ni sarih a awh a, Bâwkte kût hian ni sarih dang a awh leh a, kût ni hnuhnûng berah chuan kût khârna inkhâwm ropui tak an nei a. A tûk leh thla sarihna, ni sawmhnih leh pathum ni chuan Solomona chuan mipuite chu a ṭintîr ta a. Lalpa chuan a mi Israel-te mal a sâwm a, Davida te, Solomona te mal a sâwm avâng chuan mipui chu an hlim êm êm a. Ruat a nih ang ngeia lal Solomonan Tempul leh lal in a sak zawh fel vek hnu chuan, zânah Lalpa chu a hnênah a rawn inlâr a, “I ṭawngṭaina ka lo hria a, Tempul hi ka hnêna thilhlan in rawn hlanna hmun atân ka thlang ta e. Khua ka tikhêng emaw, thlai ei chhe tûr khau ka tipuang emaw, hri ka lêntîr hunah emaw, ka hming putu ka mite hian thuhnuairawlh taka ka hnêna an rawn ṭawngṭaia, min rawn pana, an sualna ata an lo hawi kîr chuan vân aṭangin ka lo hria ang a, an sualte chu ka ngaidam ang a, an ramte pawh ka tungding leh ang. Tempul hi ka vil ang a, heta an ṭawngṭai chuan ka beng ka lo chhi ang. Kumkhuaa min biakna hmun atân ka thlang a, ka tihthianghlim tawh avângin ka vil ang a, ka vêng tlat ang. Nang pawh, i pa Davida tih anga i tiha, ka thupêkte i awiha, ka thuruatte i zawma, awm dân tûr ka tih anga i awm chuan, I pa Davida hnêna ka thutiam kha ka hlen ang; a thlahte chu Israel-te lalah an ṭang reng ang tih ka tiam a nih kha. In tâna ka thupêk te, ka thuruat te in ngaihsak lohva, in zâwm duh lohva, pathian dangte in biaka, an rawng in bâwl vaih chuan, ka pêk che u ram ata hi ka paih chhuak ang che u a, min biak ṭhinna tûra ka Tempul ka tihthianghlim tawh pawh hi ka rauhsan ang a, mi tinin an nuihzat ang a, an hmusit bawk ang. “Tûnah chuan he in hi mi tinin an ngaisâng a, chutih hunah chuan a kianga kal apiangin mak an ti ang a, ‘Engtizia nge Lalpa hian he ram leh he Tempul hi heti taka a sawisak le!’ an ti ang. Mi ṭhenkhatin, ‘An thlahtute Aigupta ram aṭanga hruai chhuaktu Lalpa, an Pathian chu an kalsan atin alâwm maw le; pathian dangte an vuan a, an rawngte an bâwlsan avângin Lalpa chuan a sawisa a nih hi,’ tiin an chhâng ang,” a ti a. Lalpa Tempul leh ama in a sak chhûng kum sawmhnih a lo vei chuan Solomonan, Hirama pêk khawpuite chu a din ṭha a, Judai rama mite a luahtîr a. Solomona chuan Hamath-zoba a bei a, a la a. Thlalêra Tadmor kulh chu a siam ṭha a, Hamath biala khuate chu kudâm awm nân a siam ṭha bawk a. Solomona chuan Beth-horon chuanchung leh chuanhnuai kulh bangte chu a rem ṭha a, kawngkhârte pawh a kalhnate nên a siam a. Baalat khawpui te leh kudâm a dahna khawpui te, a sakawrte leh a tawlailîr a dahna khawpui te pawh a siam ṭha leh vek a. Jerusalem-ah te, Lebanon-ah te leh a ram chhûng rêng rêngah in sak a tum tawh phawt chu a sa vek a. Israel mi ni lo, Hit mi te, Amor mi te, Periz mi te, Hiv mi te, Jebus mi te, Kanan rama lo awm, Israel-ten Kanan ram an luaha, an thah bângte thlahte kha Solomona chuan bawih anga chhawr tûrin hnathawk pâwl a din a, chûng chu tûn thlengin an la awm. Israel mite erawh chu hnathawk tûra phût luih an ni lo; sipaiah te, hotu-ah te, tawlailîr khalhtuah te leh sakawr chungchuang mi atân te an ṭang thung a. In sak hna enkawltu mi zahnih leh sawmnga an awm. Solomona chuan a nupui, Aigupta lal fanu tân in a sa a, Davida khawpui aṭang chuan a la chhuak a, a in sakah chuan a awmtîr ta a. “Ka nupui hi Israel lal Davida inah a awm tûr a ni lo. Thuthlung Bâwm awmna apiang hi Hmun Thianghlim a ni si a,” a ti a. Tempul kawta maichâm a siamah Solomona chuan hâlral thilhlan a hlân a. Mosia dân bu-a chuang angin ni tina hlan tûr te, sabat nia hlan tûr te, thla thara hlan tûr te leh kum khat chhûnga kût vawi thum chhang dawidim telh loh kût te, Pentikos kût te, Bâwkte kûttea hlan tûr bi tukte chu a hlân a. A pa Davida ruat tawh angin puithiamte ni tin tih tûr a tihfelpui a, puithiamho zaia lo pui tûr Levia chite thawh tûr pawh a tihfelsak a. Tempul pulis-ho ni tin hna tûr te, kawngkhâr an vên tûr te, Pathian mi Davida sawi ang khân a ruat vek a. Kudâm leh thil dang chungchâng puithiamte leh Levia chite hnêna Davida thupêk zawng zawng kha engkim a ti vek a. Lalpa Tempul an sakna tûr lung an phûm ni aṭanga an peih fel thlenga Solomonan tih tûr a ruahman zawng zawng chu an ti ta vek a, Lalpa Tempul chu an puitlin ta a. Agaba litengsâwl, Edom rama Ezion-geber leh Eloth khuaah Solomona chu a kal a. Lal Hirama chuan lawng leh lawngpu thiam tak tak a rawn thawn a, Solomona mite nên Ofir ramah an kal a, rangkachak kg. sîngkhat leh sângnga aia tam mah an rawn hâwn a, lal Solomona hnênah an rawn thlen a. Seba lalnuin Solomona hmingthanzia a hriat chuan thu har tak tak zâwta fiah tûrin Jerusalem-ah a kal a. Ṭhuihruai tam tak a nei a, mosola phur sanghâwngsei tam tak a hruai a, mosola te, lungmantam te, rangkachak te a keng ṭeuh bawk a. Solomona nên an inhmuh chuan zawh tûr a neih zawng zawng chu a zâwt ta vek a. A zawh zawng zawng chu Solomona chuan a chhâng thei vek a, chhan harsa tih rêng a nei lo. Seba lalnu chuan Solomona finzia chu a hria a, a in sak ropuizia te chu a hmu a, Solomona ei tûr an rawn hlui te, a chhiahhlawh awmna in te, lal ina thawktu hna insem dân te, an thawmhnaw hâk mawizia te; chawhlui kîlpuitute leh a viltute inchei mawizia te, Tempula hâlral thilhlan a hlan hnemzia te a han hmuh chuan mak a ti a, awm ngaihna rêng a hre ta lo va. Lalnu chuan, “I thil tihte leh i finziate kan rama ka hriat kha a lo dik ngei a nih hi. Ka lo kal a, ka rawn hmuh hma chuan an sawi chu ka awih lo va; mahse, i finziate hi a zâtve pawh an sawi hlei nem, an sawi ai daihin a ropui hi. I nupuite chu an va nihlawh êm! I chhiahhlawh, ni tina i bula awma, i finzia ngaithla ṭhîntute pawh hi an va nihlawh êm! I Pathian, Lalpa chu fakin awm rawh se, ani chu i chungah a lâwm a, a aia rorêltu, lalah a ruat che a ni. I Pathian chuan Israel-te hi a hmangaih a, an chungah dik taka rorêltu lalah a dah che a nih hi,” a ti a. Thilpêk tûr a rawn ken rangkachak kg. sângli chuang leh mosola tam tak, lungmantam ṭhahnem tâwk tak nên Solomona chu a pe a. Seba lalnuin Solomona a pêk mosola anga ṭha rêng rêng hi a awm lo. Lal Hirama hote leh Solomona hote chuan Ofir rangkachak an rawn hâwn a, algum thing leh lungmantam pawh an rawn hâwn a. Algum thing chuan Tempul pindan chung leh ama in kailâwn a siam a, thing chu perhkhuang leh ṭingṭang siam nân a hmang bawk a, Judai ramah hetiang thing hi an la hmu ngai rêng rêng lo. Lal Solomona chuan Seba lalnu chu a duh leh a dîl apiang chu a pe a; chu bâkah thilpêk a rawn kensak lo do lêtna a pe tel bawk a; an ram lamah a ṭhuihruaite nên an haw leh ta a. Solomona chuan kum tin rangkachak kg. sînghnih leh sângthum dâwn lai a dawng ṭhîn a. Sumdâwngte leh dâwrkaiten chhiah an pêk bâkah Arabia lalte leh Israel-te rama bial tin awptute chuan Solomona chu rangkachak leh tangka an rawn pe ṭhîn. Phaw lian pui pui, rangkachak den phêk zahnih a siam a, phaw pakhatah rangkachak kg. sarih vêl zêl a hmang a ni. Phaw tê deuh rangkachak den phêk kg. thuma rita tuam a siam bawk a, ‘Lebanon ngaw in’ an tih pindanah chuan a dah a. Lal chuan saingho lalṭhutthlêng ropui tak a siam a, rangkachak hlîr hlakin a tuam a. Lalṭhutthlêng lâwn chhohna tûr rangkachak rahka paruk, rah chhan tûr nên a siam a. Ṭhutthlêng chuan bân a nei a, a bân sîr tawnah sakeibaknei lem a dintîr a. Sakeibaknei lem sâwm leh pahnih, rahka sîr tawnah chuan a bawhtîr bawk a, chutiang khawpa ropui chu khawi ramah mah a awm lo. Solomona no chu rangkachak vek a ni, ‘Lebanon ngaw in’ an tih pindana an thil eina bungbêlte pawh chu rangkachak hlîr hlaka siam a ni. Solomona hun lai chuan tangkaruate hi chu engah mah an ngai lo. Lawngrual a nei bawk a, lal Hirama lawng rualte nên an inkawp a, Tarsis-ah te kalin kum thum danah an lo haw a, rangkachak te, tangkarua te, saingho te, zâwng te, ârâwn te an rawn hâwn ṭhîn. Lal Solomona chu khawvêl lal dang zawng zawng aiin a hausa a, a fing zâwk bawk a. Solomona hnêna Pathianin finna a pêk chu hre duhin an rawn pan huai huai a. Tangkarua leh rangkachaka thil siam te, puan te, râlthuam te, mosola te, sakawr te, sakawr puakphur chi te an rawn pe zut zut a, kum tin hetianga rawn ti hi an awm zêl a ni. Lal Solomona chuan sakawr vulhna hmun sângli a nei a, chûngah chuan a sakawr tawlailîr leh a sakawrte chu a dah a, indo sakawr pawh sîngkhat leh sânghnih a nei a, a ṭhen chu Jerusalem-ah a kawl a, a dang chu khaw hrang hrangah a dah a. Eufretis luipui leh Filistia ram inkâr, Aigupta lui thleng ram chhûnga lal ber a ni a, Solomona lal laiin Jerusalem khuaah chuan tangkarua chu lungtê ang lek a ni a, sidar thing lah tlâng bulṭhut khawthlang phaia theipui thing ang maiin a tam a ni. Solomona chuan Aigupta ram leh hmun hrang hrang aṭangin sakawr a tawlh ṭhîn. A bul aṭanga a tâwp thlengin Solomona chanchin hi zâwlnei Nathana lehkhabu-ah te, Silo mi Ahiza thu sawi ziakna bu-ah te, Nebata fapa Israel lal Jeroboama chungchânga zâwlnei Idoa inlârna ziakna bu-ah te a chuang. Solomona chu Jerusalem-ah Israel zawng zawng chungah kum sawmli a lal a, a thi a, Davida khawpuiah an phûm a, a fapa Rehoboama chu a lo lal ta a. Rehoboama chu Sekem khuaah a kal a, chutah chuan lala siam tûrin Israel-ho, hmâr lama awmte chu, an lo pung khâwm a. Nebata fapa Jeroboama, Solomona hlauva tlân bo chu, Solomona thih hnu chuan a lo hâwng leh a. Hmâr lama Israel-te chuan an va pun a, Rehoboama hnênah chuan an kal ho ta a, a hnênah, “I pa khân min chhawr nasa a, kan phur a tirit êm êm a; nangin min chhawr nêpin kan phur min tihzânsak deuh la, i khua leh tuiah kan awm ang e,” an ti a. An hnênah chuan, “Ni thum hnuah lo kal leh ang che u,” a ti a, mite chu an chhuak ta a. Lal Rehoboama chuan a pa Solomona dam laia a bula awm ṭhîn upate chu a râwn a, “Hêng mite hi engtin nge chhâng ila min tih?” a ti a. Anni chuan, “Hêng mite chungah hian ngilnei la, ṭha takin bia ang che, I mi an ni kumkhua ang,” tiin an chhâng a. Upaho thurâwn chu a ngaithla duh lo va, tlangvâl, ama rualpui, a kawm ṭhînte chu a râwn a, “ ‘I pa khân kan phur a tirit êm êm mai, min tihzânsak rawh,’ rawn titute hi engtin nge ka lo chhân ang?” a ti a. A rualpui tlangvâlte chuan, “Hêngho, ‘i pain kan phur a tirit êm a, min tihzânsak rawh,’ titute hi heti hian chhâng mai rawh, ‘Ka kutzungtê pawh hi ka pa kâwng ai chuan a khauh ang; ka pain in phur a tirit hle a nih chuan kei chuan ka belhchhah ang; vuakna hruia a hrem ṭhinnaah che u kei chuan khawmualkaikuang ka ruai ang,’ ti ang che,” an ti a. Ni thum hnuah chuan Jeroboama leh Israel-te chu Rehoboama hnênah, a sawi ang khân an lo kal a. Lal chuan upaho thurâwn kha zâwm duh lovin mite chu ram takin a bia a. Tlangvâlho thurâwn ang khân Rehoboama chuan mite hnênah, “Ka pa chuan in phur a tirit hle maw? Kei chuan ka belhchhah ang. Vuakna hruiin a hrem ṭhîn che u a, kei chuan khawmualkaikuangin ka hrem ang che u,” a ti a. Lal chuan mipui thu chu a ngaihthlâksak duh ta lo va, Silo mi zâwlnei Ahija hnêna Nebata fapa Jeroboama chungchâng Pathianin a sawi kha Lalpa chuan a tihhlawhtlin theih nân Pathianin a tihtîr a ni. Israel mite chuan lalin an thu a ngaihsak duh lo tih an hriatin lal chu an chhâng a: “Davida ramah chan eng nge kan neih ve le? Jesaia thlahte zîngah chanvo eng nge kan neih? Davida thlahte chu an awm awmin awm rawh se,” an ti a. Israel mi zawng zawng chu in lamah an haw ta a. Judai rama awm Israel mite chungah chauh chuan Rehoboama chu a lal ta a. Lal Rehoboama chuan Hadorama, hnathawka phût luih pâwl hotu chu Israel-ho ko tûrin a tîr a, anni chuan lungin an lo dêng hlum a. Chumi avâng chuan Rehoboama chu a tawlailîrah a chuang sawk sawk a, Jerusalem-ah a tlân ta a. Chuta chin chu Israel mite chu Davida thlahte lakah tûn thlengin an hel ta a ni. Lal Rehoboaman Jerusalem a thlen chuan Benjamin mi leh Juda sipai ṭha ṭha nuaikhat leh sîngriat a khâwm a, hmâr lama awm Israel-te chu a thuhnuaia dah leh tûrin beih a tum a ni. Mahse, Pathian mi, Semaia hnênah Lalpa thu a lo thleng a: Lal Rehoboama te, Juda leh Benjamin mite hnênah chuan heti hian a hrilhtîr a: “In unau Israel-te chu bei suh u, haw rawh u. An thil tih chu ka thu-a ti an ni,” tiin. Lalpa thupêk chu an awih a, Jeroboama chu an bei ta lo va. Rehoboama chu Jerusalem-ah a awm a, Judai ram leh Benjamin-ho ram chhûnga hêng khuate hi kulhin a hung a: Bethlehem te, Etam te, Tekoa te, Beth-zur te, Soko te, Adulam te, Gath te, Maresa te, Zif te, Adoraim te, Lakis te, Azeka te, Zora te, Aijalon te, Hebron te. Hêng khaw kulhte hi rinawm takin a siam a, khaw tin tân hotu a ruat a, khaw tinah buh te, oliv hriak te, uain te a chhêk bawk a. Fei te, phaw te a dah bawk a; chutiang chuan Judai ram leh Benjamin ram mite chu a thuhnuaiah a dah thei a ni. Israel-ho rama bial tina awm puithiamte leh Levia chite chuan chhim lam an pan a, Judai ramah an lût a. Levia chite chuan an ran tlatna leh an ram chante chu an kalsan a, Judai ramah te, Jerusalem-ah te an lo kal a. Jeroboama leh a aiawhtute khân Lalpa puithiamah an hmang duh lo va. Jeroboama khân hnam dang pathian biakna hmunsânga rawngbâwl tûr, bâwngpa lem a siam chawpte leh ramhuai biakna hmuna thawk tûr ama puithiam a ruat a ni. Israel hnam zînga Lalpa, Israel-te Pathian be tak tak duhtute chuan Jerusalem-ah Levia chite chu an rawn zui a, an thlahtute Pathian, Lalpa hnênah thilhlan an hlan theih nân an lo kal ve a ni. Hemi avâng hian Judai ram chu Solomona fapa Rehoboama lamah chuan an ṭang a, lal Davida leh Solomona lal lai ang mai khân an khawsa a ni. Rehoboama chuan Davida fa, Jeremota fanu Mahalati nupuiah a nei a, a nu chu Eliaba fanu, Jesaia tunu Abihaili a ni. Fapa pathum - Jeusa te, Semaria te, Zahana te an nei a. Nakin deuhvah chuan Absaloma fanu Maaki a nei leh a, fapa pali - Abija te, Ataia te, Ziza te, Selomita te an nei a. Rehoboama hian nupui sâwm leh pariat leh hmei sawmruk a nei a, fapa sawmhnih leh pariat leh fanu sawmruk a nei a. A nupui leh a hmei zawng zawng zîngah Maaki hi a duh ber a. Abija hi a fa zawng zawng zîngah a duat ber a, a aiawha lal atân a thlang a ni. Rehoboaman a fate chhawr dân a thiam hle, Judai leh Benjamin ram chhûng khawpui kulh nei zawng zawngah hotu-ah a dah darh a. An lakah a thilphal hle a, nupuite pawh a neihsak thluah hlawm a. Rehoboama chuan a lo lal ngheh tâk veleh a mite nên Lalpa dân chu an ngaihthah ta a. Rehoboama kum nga a lal kum chuan Lalpa an thlahthlam avângin hrem an tuar ta a, Aigupta lal Sisaka chuan, sakawr-tawlailîr sângkhat leh zahnih, sakawr chungchuang mi sîngruk leh sipai chhiar sên loh, Lub te, Suki te leh Sudan sipai rual te nên Jerusalem chu a rawn bei a. Judai ram khaw kulh neite chu a la tawh a, Jerusalem pawh a lo thleng a. Lal Rehoboama leh Judai ram hruaitu, Sisaka hlauva Jerusalem-a lo tlânte hnênah chuan zâwlnei Semaia chu a kal a, an hnênah, “Hei hi Lalpa thu chu a ni. Min kalsan a, kei pawhin Sisaka kuta awm tûrin ka kalsan ta che u a ni,” a rawn ti a. Lal leh hotute chuan, “Thil sual kan ti a ni, Lalpa hian a tidik e,” an ti a. An thiltih chu a hriatin Lalpa thu chu Semaia hnênah a lo thleng leh a, a hnênah, “ ‘Thil sual kan ti’ an tih tâk avângin ka tiboral lo vang. Sisakan Jerusalem a rawn beih hunah, ka thinurna chu Sisaka hmangin an chungah ka leihbaw vek lo vang a, a ṭhen chu an dam khawchhuah ka phal dâwn a ni. Sisaka chuan khua chu a la ang a, lei lal rawngbâwl leh ka rawngbâwl inan lohzia an hria ang,” tiin. Sisaka chuan Jerusalem chu a rawn bei a, a Tempul leh lal ina thil hlu awmte chu a la vek a. Lal Solomonan rangkachak phaw a siamte nên, engkim a la vek a. Chûng aiah chuan Rehoboama chuan dâr phawte a siam a, lal in kawngkhâr vêngtute kutah a hlân a. Lal chu Tempula a kal apiangin vêngtute chuan phawte chu an keng a, an zui a; vênbûkah an dah kîr leh ṭhîn. Lalpa hnêna tlâwm taka a intukluh tâk avângin, Lalpa thinur chuan a sawisa hrep ta lo. Judai ram mite pawh an khawsa nuam viau va. Rehoboama chu Jerusalem-ah a lal a, a intinghet ta hle. Lal a nihin kum sawmli leh pakhat a ni a, Jerusalem-ah kum sâwm leh pasarih ro a rêl a. Israel ram zawng zawngah chu khua chu amah chibai bûkna hmun atân Lalpa chuan a thlang a ni. Rehoboama nu chu Amon mi, Naamaii a ni. Lalpa duhzâwng a ngaihtuah lo va, thil sual a ti a. A bul aṭanga a tâwp thlengin Rehoboama thiltih leh a chhûngte chanchin chu ‘Zâwlnei Semaia chanchin’ ziakna lehkhabu-ah a chuang. Rehoboama leh Jeroboama chu an indo reng a ni. Rehoboama chu a thi a, Davida khawpuiah an phûm a, a fapa Abija chu a lo lal ta a. Israel lal Jeroboama kum sâwm leh pariat a lal kumin Abija chu Judai ram lal a ni ṭan a, Jerusalem-ah kum thum a lal a, a nu chu Gibea khaw mi Uriela fanu Mikaii a ni. Abija leh Jeroboama chu an indo ta a. Abija chu sipai huai thlan ṭhalh nuai li nên a thawk a, Jeroboama chuan sipai huai ṭhalh bawk nuai riat nên a rawn bei a, Efraim tlângram Zemaraim tlângchhîpah Abija chu a ding a, Jeroboama leh Israel-te chu a au va, “Ka thu hi lo ngaithla teh u, Lalpa, Israel-te Pathian chuan, Davida leh a thlahte hnênah Israel mite chunga lal nihna chu thu thlung meuhvin a pe tawh a ni tih in hre na nge? Davida fapa, Solomona chhiahhlawh Nebata fapa Jeroboama chu a pu lakah a hel ta mai a, mi lawilo pui puiin an ṭawiawm a. Solomona fapa Rehoboama chu an pawisa lo va; ani lah a la naupangin chûngho ngam tûrin a rilru a la puitling si lo va. Davida thlahte hnêna lal thuneihna Lalpa pêk dodâlin in sipai ngah leh Jeroboama bâwng lem, in pathian atâna a siam chhuangin in lo thawk a. Lalpa puithiamte leh Levia chite chu in hnawt chhuak a, hnam dang tih dân angin puithiam tûr in ruat chawp a. Bâwngpa rawn kai nazawng leh berâm pasarih emaw rawn khalh apiang chu, ‘kan puithiam’ in tih atân puithiamah in lo serh hrang duh zêl mai bawk si. “Keini zawngin kan Pathian Lalpa rawng a ni kan la bâwl, kan la hawisan lo, Arona thlah puithiam ngeiin an tih tûr an ti a, Levia chi ngatin an pui a ni. Tûk tin leh tlai tin Lalpa tân rimtui an hâl a, hâlral thilhlante pawh an hlân ṭhîn a ni. Chhang serh chu dawhkân thianghlimah an dah ziah a, tlaiah rangkachak khâwnvâr pawh an la hâl ziah a ni. Keini chuan Lalpa thupêk kan la zâwm zêl a, nangni erawh chuan ani chu in thlah ta a ni. Pathian chu min hruaitu a ni a, a puithiamte pawh inbeihna tawtawrâwt hâm tûrin an inpeih reng a ni. Aw Israel-te u, in thlahtute Pathian, Lalpa hi do lul suh u, in ngam lo vang,” a ti a. Chutih chhûng chuan Jeroboama chuan a sipai ṭhenkhat chu Juda sipaite ep tûrin a dah a, a ṭhen chu an hnung lama châng ru tûrin a kaltîr bawk a. Juda-ho chuan an han thlîr vêl a, an hmêlmate chuan an lo hual vek tawh a, Lalpa chu an au va, puithiamte chuan tawtawrâwt an hâm a. Juda-te chu an au chiam a, Abija chuan hma a hruai a, an bei a, Pathian chuan Jeroboama leh Israel-te chu a hneh ta a. Israel-te chu Juda-te hmaah chuan an tlânchhia a, Pathian chuan Juda-te chu a tichak ta zâwk a ni. Abija leh a sipaite chuan Israel sipaite chu an titlâwm dêr mai a. Israel sipai ṭha ṭha nuainga zet chu an that a ni. Juda-te chuan an thlahtute Pathian, Lalpa chu an rinchhan avângin Israel-te chu an hneh ta a ni. Abija chuan Jeroboama sipaite chu a ûm a, an khawpui ṭhenkhat Bethel te, Jesana te, Efron te chu an chhehvêl khuate nên a chhuhsak a. Abija dam chhûngin Jeroboama chu a ding chhuak leh hman lo, Lalpa chuan a tihlum ta nge nge a ni. Abija erawh chu a chak tial tial a, nupui sâwm leh pali a nei a, fapa sawmhnih leh pahnih leh fanu sâwm leh paruk a nei a. Abija chanchin dang, a thu sawi leh a thil tihte chu zâwlnei Idoa chanchin ziakna bu-ah a chuang. Lal Abija chu a thi a, Davida khawpuia lal thlânah an phûm a. A fapa Asa chu a lo lal a. Asa lal kum sâwm chhûng chu râlmuang takin an awm a, Asa chuan thil dik leh thil ṭha, a Pathian, Lalpa hmuhah chuan a ti ṭhîn. Hnam dang maichâmte leh an pathian biakna hmunsângte chu a tibo va, an lung milemte chu a tibung a, Aseri lim an phunte chu a kit a. Judai ram mite chu an thlahtute Pathian, Lalpa duhzâwng ti tûr leh a dânte leh a thupêkte zâwm tûrin a hrilh a. Judai ram khaw tina hnam dang Pathian biakna hmunsângte leh an rimtui hâlna maichâmte chu a tibo va, a lal lai chuan râlmuang takin an awm a ni. Lalpa chuan râl a tihmuansak a, indona a awm loh chhûng hian Judai ramah kulhte a siam a. Judai ram mite hnênah, “Ti rawh u, kan khuate hi din ṭha ila, lung kulh siam hnan ila, râlvênbûk in sângte, kawngkhâr leh a kalhna te i siam ang u. Lalpa, kan Pathian chu bulpuia kan neih avângin he ramah hian thu kan la nei a ni; amah chu kan pawm avângin kil tinah râlmuang takin min awmtîr a nih hi,” a ti a. Kulhte chu an siam a, ṭha takin an zo ta a. Lal Asa chuan phaw leh fei keng, Judai ram aṭangin sipai nuaithum leh Benjamin ram aṭangin indo thiam, awmphaw ha leh thal keng sipai nuaihnih leh sîngriat a nei a; mi huai indo thiam tak vek an ni. Ethiopia mi Zera chuan sipai maktaduai khat leh sakawr-tawlailîr zathum hruaiin Judai ram a rawn rûn a, Maresa a lo thleng hial tawh a. Lo do tûrin lal Asa chu a thawk chhuak a, Maresa bul, Zefata ruamah chuan an inep ta a. Asa chu a Pathian, Lalpa hnênah a ṭawngṭai a, “Aw Lalpa, sipai chak lo zâwk a chak zâwk aia tichak theitu, nang ang an awm lo. Aw Lalpa kan Pathian, min rawn ṭanpui teh, nangmahah kan innghat a, i hming chhâlin hêng mite hi bei tûrin kan lo thawk a ni. Aw Lalpa, kan Pathian i nih hi, mihringin ngam che suh se,” a ti a. Lalpa chuan Ethiopia mite chu Asa leh Juda sipaiho hmaah chuan a hneh a, an tlânchhe ta chum chum a. Asa leh a hote chuan Gerar thleng rawkin an ûm a, Ethiopia mite chu an that hnem khawp a, lo ṭang tham pawh an awm tawh lo. Lalpa leh a sipaite chu an ngam hlawl lo va ni, sipaiho chuan râllâk sum tam tak an la a. Gerar leh a chhehvêl khawpuia awmte chuan Lalpa chu an hlauh tâk êm avângin chûng khuate chu an tichhe thei ta vek a. Khuate chu an rawk a, râllâk sum tam tak an la a. Berâmpu bûkte pawh an hâl a, berâm tam tak an man a, sanghâwngsei te an man a, Jerusalem-ah an haw leh ta a. Obeda fapa Azaria chungah Pathian Thlarau a lo thleng a. Lal Asa hmu tûrin a kal a, a au va, “Lal Asa, nangni Judai leh Benjamin mite u, ka thu hi ngaithla teh u. A lama in ṭan chhûng chuan Lalpa pawh in lamah a ṭang ang; in zawn chuan in hmu ang a, in hawisan chuan a hawisan ang che u. Israel-te chu Pathian tak be lovin rei tak an awm a, zirtîrtu tûr puithiam an nei lo va, dân an hre hek lo. Mahse, manganna an tawhin Lalpa, Israel-te Pathian lam chu an hawi a, Amah chu an zawng a, an hmu ṭhîn a nih kha. Chûng lai chuan ram chu a buai a, a mumal loh êm avângin vâk chhuak ṭha ngam pawh an awm ngai lo. Hnam khatin hnam dang an tirethei a, khaw khatin khaw dang an tirethei bawk a. Pathian chuan buaina leh manganna an chungah a thlentîr a ni. Nangni erawh chuan zâm lovin ṭan la rawh u. In thil tih rah chu in hmu ngei ang,” a ti a. Lal Asa chuan Obeda fapa zâwlnei Azaria thu a han hriat chuan a huai phah sawt a, Judai leh Benjamin rama milem awm zawng zawng chu a tibo vek a, a pain tlângram khua a lâk zawng zawnga mi pawh a tibo vek a. Tempul tuala Lalpa maichâm pawh a siam ṭha a. Lalpa chuan a awmpui tih an hriatin Efraim ram aṭang te, Samaria-ho ram aṭangte chuan a lamṭang mi tam takin Asa chu an rawn bêl a. Asa chuan chûngho chu Judai ram leh Benjamin rama mite nên a ko khâwm a. Asa lal kum sâwm leh panga kum, a thla thumnaah chuan Jerusalem-ah an pung khâwm a. Chumi ni chuan an râllâk bâwng zasarih leh berâm sângsarih Lalpa hnênah an hlân a. An thlahtute Pathian, Lalpa chu rilru tak leh tihtakzeta be tûrin thu an thlung a. ‘Puitling pawh, naupang pawh, mipa pawh, hmeichhia pawh, Israel-te Pathian, Lalpa be duh lo chu tihhlum tûr,’ an ti a. Aw ring taka auvin Lalpa hming chhâlin chhia an chham a; an thu thlun chu vawn tlat an tiam a, an au va, tawtawrâwt an hâm bawk a. Tihtakzeta thu an thlun tlân tâk avângin Judai ram mite chu an lâwm êm êm a. Lalpa rawngbâwl chu nuam an ti a, ani chuan a lo pawm a, kil tinah rem a lêntîr a. Lal Asa chuan, a pi lalnu Maakin Aseri lim tenawm tak chu a phun avângin lalnu a nihna a hlihsak a. Aseri lim chu a kit a, a ek a, Kidron lui ruamah a hâl vek a. Ram chhûnga hmunsâng, pathian dang an biakna zawng zawng chu Lal Asa chuan tibo vek lo mah se a dam chhûng chuan Lalpa chauh a vuan a ni. A pa Abijan Pathian hnêna a thilpêk zawng zawng chu Asa chuan Tempulah a dah a; amah ngeiin rangkachak leh tangkarua a hlante pawh chu a dah tel a. Asa chuan kum sawmthum leh panga ro a rêl chhûng chuan indona a awm leh ta lo. Judai rama Asa kum sawmthum leh paruk a lal kumin Israel lal Baasa chuan Juda lal Asa ram aṭanga tu mah an lo chhuah loh nân leh tu mah an luh theih loh nân Rama-ah kulh a siam a. Asa chuan Tempul sum bâwm ata tangkarua leh rangkachak a la chhuak a, Damaska khuaa awm Suria lal Ben-hadada hnênah a thawn a, a hnênah, “Ka pa leh i pa an ṭangrual ang khân keini pawh i ṭangrual teh ang. En teh, tangkarua leh rangkachak ka rawn thawn a che, Israel lal Baasa nên in inṭhianna titâwp la, ka ram ata a sipaite hnuk kîr teh se,” a ti a. Ben-hadada chuan Asa thu rawt chu ṭha a ti a, sipai hotu a ko va, Israel ram chu an rûn ta a; Ijon te, Dan te, Abel-maim te leh Naftali-ho biala kudâm awmna khua zawng zawng chu a la a. Chûng thil chu lal Baasan a hriatin Rama khaw kulh a siam chu a chawlhsan ta a. Rama kulh siamna tûr lung leh thingte chu la lutin Juda ram mi zawng zawng chu Asa chuan a pun a, Geba leh Mizpa kulh siam nân a hmang ta a. Chutih lai chuan zâwlnei Hanania chu lal Asa hnênah a lo kal a, a hnênah, “ Lalpa i Pathian rinchhan lovin Suria lal i rinchhan vei a; chuvângin, Israel lal sipaite chu i chhuah ta a ni. Ethiopia leh Libua mite khân sipai leh sakawr-tawlailîr tam tak leh sakawr chungchuang mi tam tak an nei a ni lâwm ni kha? Mahse, Lalpa chu i rinchhan a, a hnehtîr che a nih kha. Lalpa chuan amah ring tlattute chu ṭanpui tûrin khawvêl pum puiah a mit a lên ruai ruai ṭhîn a ni. Tûn aṭang chuan do tûr i nei reng ang. Âtthlâk takin thil i ti a nih hi,” a ti a. Zâwlnei chungah chuan Asa chu a thinur ta hle a, kawl a buntîr a, ripah a khung a, chuta chinah chuan mi dang chungah pawh râwng taka kut thlâk a chîng ta a. Asa lal ṭan tirh aṭanga a tâwp thleng chanchin chu ‘Juda leh Israel lalte chanchin’ ziakna bu-ah a chuang. Asa chu kum sawmthum leh pakua a lal hnuin a ke a pân a, a ke a lo bai ta a. Mahse, Lalpa pan lovin daktor a pan zâwk a. Kum hnih hnu chuan a thi ta a. Davida khawpuiah, a thlân atâna a kerah chuan an phûm ta a. Phûm hmain mosola te, tel rimtuite an hnawih a, amah sûn nân meipui an chhêm hluah hluah a. Jehosafata chu a pa Asa hnuah a lo lal a, Israel-te do thei tûrin a intichak a. Judai ram kulh awmna khuaahte sipai a dah a, Judai ram thingtlâng leh Efraim rama khawpui, a pa Asan a lo hneh tawh khuaahte pawh sipai hmunpui a dah bawk a. A pain a lal tirh laia a tih ang khân Jehosafata pawhin a ti a, Baal a be duh lo va. Chuvângin, Lalpa chuan mal a sâwm a. A pate Pathian rawng a bâwl a, Pathian thupêk a zâwm a, Israel lalte angin a khawsa ve hek lo. Tichuan, Lalpa chuan Jehosafata chu Judai ramah a lal nghehtîr ta hle a, mite chuan chhiah an rawn pe zut zut a, a hausa ta viau va, mite pawhin an ngaisâng hle. Lalpa rawngbâwl chu a châkzâwng a ni a, Judai rama an milem pathian biakna hmunsângte, Aseri limte chu a tibo vek a. Kum thum a lal hnu chuan Ben-haila te, Obadia te, Zekaria te, Nethanela te, Mikaia te chu Judai ram khawpuiah zirtîrtuah a tîr chhuak a. Levia chi mi pakua leh puithiam pahnih an kal ve a, Levia chite chu Semaia te, Nethania te, Zebadia te, Asahela te, Semiramota te, Jehonathana te, Adonija te, Tobija te, Tobadonija te an ni a, puithiamte chu Elisama leh Jehorama an ni. Lalpa dân lehkhabu chu kengin Judai ram khua chu an fang chhuak a, mite chu an zirtîr a. An vêl ram zawng zawng chu Jehosafata do ngam lo tûrin Lalpa chuan a tidawih a. Filistia mi ṭhenkhat chuan chhiahah tangkarua leh thilpêk tam tak Jehosafata chu an rawn kensak a. Arab mi ṭhenkhat pawhin berâm sângsarih leh zasarih leh kêl sângsarih leh zasarih an rawn pe bawk a. Tichuan, Jehosafata chu a lal tulh tulh a, Judai ram dung leh vângah kulhte a siam a, khawpuite a din a. Chûngah chuan ei tûr a chhêk ṭeuh bawk a. Jerusalem khuaah a sipai hotu lian huaisen tak tak chu a dah a. A chi chiin mahni chi hotu an nei a, Juda thlah sipai hotu ber chu Adna a ni, sipai nuaithum a ho va. A dawttu chu Jehohanana a ni, sipai nuaihnih leh sing riat a ho va. A pathumna chu Zikria fapa Amasia a ni, sipai nuaihnih a ho va (Amasa hi hetianga Lalpa rawngbâwl tûra inpe a ni). Benjamin thlah sipai hotu ber chu, sipai chhuanawm tak Eliada a ni, sipai nuaihnih, âwmphaw leh thal keng a ho va. A dawttu chu Jehozabada a ni, indo inpeih reng sipai nuaikhat leh sîngriat a ho va. Judai rama kulh nei khuatea sipai a dah bâkah hêng hi Jerusalem-a a sipai awmte chu an ni. Juda lal Jehosafata chuan a lo hausaka, a hmingthan tâk hle hnu chuan Israel lal Ahaba nên inkawp zai an rêl a, an fate an inneihtîr a. Kum eng emaw zât hnuah Jehosafata chu Samaria khuaah Ahaba tlawh tûrin a chhuk a. Jehosafata leh a ṭhiante lawm nân Ahaba chuan berâm leh bâwng tam tak a talh a, ruai a ṭheh a. Gilead biala Ramot khua bei tûrin a sâwm a. “Ramot khua chu bei tûrin i kal ve thei ang em?” a ti a. Jehosafata chuan, “I inpeih hun hunah kei leh ka sipaite chu kal kan inpeih e, kan pui ang che,” a ti a. “ Lalpa i râwn hmasa zet ang,” a ti bawk a. Ahaba chuan zâwlnei zali dâwn lai rual chu, “Ramot khua ka bei ang nge bei lo vang?” tiin a zâwt a. Anni chuan, “Bei rawh, Pathian chuan a awmpui ang che,” an ti a. Jehosafata chuan, “Zâwlnei dang Lalpa min râwnsak thei tûr an awm lâwm ni?” a ti a. Ahaba chuan, “Mi pakhat, Imla fapa Mikaia chu a la awm a. Mahse, thil ṭha eng mah min hrilh lâwksak ngai lo va, ka haw hle a ni. Thil ṭha lo tak tak hrilh lâwk a chîng a,” a ti a. Jehosafata chuan, “Lal meuhvin chuti êma tih tûr emaw ni le?” a ti a. Lal chuan hotu pakhat a ko va, Mikaia hruai tûrin a tîr a. Lal pahnih chu Samaria khawpui kawngka pâwn hruihah, lalṭhutthlêng an chhawpah chuan an ṭhu a; zâwlnei rual chuan an kal hual a, thu an sawi bual bual a. An zînga pakhat, Kenaana fapa Zedekia chuan thîr, seki lem a siam a, Ahaba hnênah, “Suria-ho chu hêng nên hian i bei ang a, i tudawl dêr ang,” a ti a. Zâwlnei dangte pawh chuan chutiang bawk chuan an ti a. “Kal la, Ramot khua chu han bei rawh, i la ngei ang. Lalpa chuan a hnehtîr ang che,” an ti a. Mikaia hruaitu tûra an tirh chuan a hnênah, “Zâwlnei dang zawng zawngin a ṭha lamin lal hnênah thu an sawi a, nang pawhin chutiang chuan sawi ve mai ta che,” a ti a. Mikaia chuan, “ Lalpa, mi nung hming chhâlin ka sawi e, ka Pathianin sawi tûra min hrilh chu ka sawi ang” tiin a chhâng a. Lal Ahaba hma a va thlen chuan lal chuan, “Mikai, lal Jehosafata nên Ramot khua kan han bei ang nge bei lo vang?” a ti a. Mikaia chuan, “Han bei teh rêng u, in hneh mawlh ang, Lalpa chuan hnehtîr che u ang hmiang,” a ti a. Ahaba chuan, “ Lalpa hminga ka hnêna thu i sawiin thu dik chauh mi hrilh tûrin vawi eng zât nge ka hrilh dâwn che?” a ti a. Mikaia chuan, “Vêngtu nei lo berâm rual angin tlânga Israel-ho an darh ka hmu a ni. ‘Hêngho hian hruaitu an nei lo; mahni in lamah dam têin haw dial mai rawh se,’ Lalpa chuan a ti e,” a ti a. Ahaba chuan Jehosafata hnênah, “Kha maw, ka tâna thil ṭha tûr eng mah a sawi ngai lo ka tih rêng kha. Thil ṭha lo lam hlîr a ni a sawi ṭhin,” a ti a. Mikaia chuan, “ Lalpa thu hi lo ngaithla teh. Lalpa chu vâna a lalṭhuthlêngah a ṭhu ka hmu a, vântirhkohte chuan an din hual a. ‘Tu nge Ahaba chu Ramot beia thi tûrin zu bum ang?’ Lalpa chuan a ti a. Vântirhkoh ṭhenkhat chuan thu khat an sawi a, a dang chuan thu dang an sawi a. Thlarau pakhat hi a lo kal a, Lalpa hmaah a va ding a, ‘Ka zu bum ang e’ a ti a. Lalpa chuan, ‘Engtin nge i bum ang?’ a ti a. Thlarau chuan, ‘Ahaba zâwlneite chu dâwt ka zu sawitîr ang,’ a ti a. Lalpa chuan, ‘Kal la, chutiang chuan zu ti rawh, i bum ngei ang,’ a ti a. Chutiang chuan a ni Lalpa chuan hêng zâwlneiho hi i hnêna dâwt a sawitîr ni. Lalpa ngeiin i chhiatna tûr a ruat tawh a ni e,” a ti a. Zâwlnei Zedekia chuan Mikaia chu a va pan a, a bêng a, “Engtik lai khân nge Lalpa thlarauvin min kalsana i hnêna a awm tâk le?” a ti a. Mikaia chuan a chhâng a, “Pindan chhûngrila i bihrûk hunah i hre mai ang,” a ti a. Ahaba chuan hotu pakhat hnênah, “Mikaia kha man la, khaw awptu Amona hnênah hruai la, lal fapa Joasa pawh hmuhtîr ang che. Dam taka ka lo kîr leh hma chu ripah khung sela, chhang leh tui chauh pe rawh se,” a ti a. Mikaia chuan, “Dam taka i lo kîr leh hrim chuan Lalpa hian min be lo a ni ang; ka sawi hi mi tinin hre rawh se,” a ti a. Lal Ahaba leh lal Jehosafata chu Gilead biala Ramot khua bei tûr chuan an kal ta a. Ahaba chuan Jehosafata hnênah, “Kan inbeih hunah ka inchei danglam ang a, nang chu lal incheiin inchei zêl ang che,” a ti a. Lal Ahaba chu a inchei danglam a, an inbeihnaah chuan a tel ve ta a. Suria lal chuan tawlailîr khalhtu hotu chu, “Israel lal chauh lo chu tu mah bei suh ang che,” a ti a. Chûngho chuan Jehosafata an hmuh chuan Israel lal emaw an ti a, an rawn bei ta a. Jehosafata chu a au chiam a, Lalpa Pathian chuan a rawn chhâng a, a rawn beitute chu a tihkîrsak a. Tawlailîr khalh hotute chuan Israel lal a ni lo tih an hriat chuan an ûm duh ta lo va. Suria sipai thal kâp mai mai hian lal Ahaba chu a râlthuam inkârah a kâp fuh palh a. A tawlailîr khalhtu hnênah chuan, “Hliam ka tuar e, lêt la, inbeihna hmun ata tlân chhuak rawh,” a ti a. An inbeih mup mup chhûng chuan Ahaba chu a tawlailîrah chuan Suria mite lam hawiin a ṭhu a, ni a tlâk chuan a thi ta a. Jerusalem-a a inah Jehosafata chu dam takin a haw a. Zâwlnei pakhat, Hanana fapa, Jehua chuan lal chu a hmu a, a hnênah, “Mi sual ṭanpuia Lalpa hawtute lama ṭan hi dik i ti em ni? I thiltih hian Lalpa thin a tiur hle a ni. Chuti chung pawhin ṭhat vena zawng i nei e; miin an biak Aseri lim zawng zawng i ti bo va, Pathian duhzâwng zawn i tum hi,” a ti a. Jehosafata chu Jerusalem-ah a awm a, a taima hle a; chhim tâwp Beer-seba aṭanga hmâr lam Efraim tlâng tâwp thlengin a khuate chu an thlahtute Lalpa Pathian lama hawi kîrtîr tumin a tlawh ṭhîn. Judai rama kulh nei khuaah tawh phawt chuan rorêltute a dah a, hetiang hian a hrilh zêl a: “Thu pawtchat mai mai suh ang che u, in hna hi mihring thu-a thawk in ni lo va, Lalpa thu-a rêl in ni a, in thu rêl chu Lalpa rêl a ni tih hria ang che u. Lalpa chu ṭih ula, fîmkhur takin engkim ti ang che u, Lalpa, kan Pathian chuan hlêprûk te, hleih neih te, thamna lâk te a hua a ni,” a ti ṭhîn a. Jerusalem khuaah chuan Levia chite, Puithiamte leh khaw hotu deuh ṭhenkhat chu rorêltu atân a ruat a; Lalpa dân bawhchhiat thu te, vântlâng zînga thubuai ngaihtuahtu tûr an ni. Heti hian a ti a, “ Lalpa ṭih chungin in hna hi in thawk tûr a ni; in tih apiang rinawm takin ti zêl ang che u. Khawii khua aṭang pawhin in chipuiten mihring thah thu emaw, dân leh thupêk bawhchhiat thu emaw an rawn thlen chuan, an thu ngaihtuah chhûnga an awm dân tûr ngun takin hrilh ṭhîn ang che u; tichuan, Lalpa lakah thil sual in ti dâwn lo nia. Sakhaw lam thilah chuan puithiam lalber Amaria thu a lalber ang a, khawtlâng thilah chuan Judai ram awptu thu a lal ber a ni. Levia chite hian hêng rorêltute thu hi an kengkawh tûr a ni. Huai takin hêng hi zâwm sela, Lalpa chu mi dik lamah a ṭang ṭhîn a ni,” tiin. Nakin deuhvah chuan Moab leh Amon-ho chuan an kawppui Meun-ho nên Jehosafata ram chu rûn tûrin an lo thawk a. Mi ṭhenkhat an lo kal a, Jehosafata hnênah, “Tuipui Thi râla, Edom ram aṭangin sipai tam takin an rawn bei dâwn a che, Hazazon-tamar khua pawh an la dêr tawh,” an ti a (Chu khua chu Engedi tih a ni bawk). Jehosafata chu a thlaphâng hle a, thil tih dân tûrah Lalpa chu a râwn a. Ram pumah chaw nghei tûr a ti a. Judai ram khaw tin aṭangin Lalpa râwn tûrin Jerusalem-ah mi an lo kal zut zut a. Chûngho leh Jerusalem-a mite chu Tempul tual siam tharah chuan an pung khâwm a, lal Jehosafata chu an hmaah a va ding a. Ring takin a ṭawngṭai a, “Aw Lalpa, min thlahtute Pathian, thiltithei tak i ni, tu ma chelh rual i ni lo. He rama lo awm ṭhînte kha i mi Israel-te hmaah i hnawt chhuak a, i ṭhian, Abrahama thlahte neih kumkhua atân i pe a ni lâwm ni kha, aw kan Pathian? He ramah hian an awm ta a, nangmah biakna tûr Hmun Thianghlim an sa a. Min hrem nân indona te, hri te, ṭâm te, thil ṭha lo tinrêng te lo thleng mah se, nangmah biakna tûra i ruat he in kawtah hian kan ding ang a, kan mangannaah chuan kan au vang che a, nangin min ngaihthlâksakin min chhanhim ang,’ an ti a. Min thlahtute Aigupta ram ata an lo chhuah pawh khân Amon-ho te, Moab-ho te, Edom-ho te kha rûn i phal lo va, an rama kal i phalsak lo va. Kan pute chuan an ram chu an kal hual a, an tichhe lo a nih kha. Ngai teh, tûnah hian ro atâna ram min pêk ata min hnawh chhuah tumin an lo thawh tâk thung hi. Aw kan Pathian, an chungah ro han rêl teh; min bei tûr sipaite hi an tam êm a, kan chêt theih tâk hlek lah hi. Tihngaihna rêng kan hre ta lo va, i hmaah kan rawn thlen ngawt mai a nih hi,” a ti a. Judai ram mi zawng zawng chu an nupui fanaute nên Tempul kawtah chuan an ding a. Chuta awm ve Levia chi mi pakhat, Zekaria fapa Jahaziela chungah Lalpa thlarau a lo thleng a. Ani chu Asafa thlaha mi a ni a, Zekaria chu Benaia fa a ni a. Benaia chu Jeiela fa a ni a, Jeiela chu Matania fa a ni. Jahaziela chuan, “Judai ram mi zawng zawng leh Jerusalem-a chêngte leh nang, Jehosafat, Lalpa chuan heti hian a ti, ‘Sipai an tam avângin zâm suh ula, huphurh hek suh u. Indona chu Pathian kuta awm a ni, in kuta awm a ni lo. Naktûkah Zif kalkhâna an lo chho chu lo bei ang che u. Phaizâwl thlen hmaa Jeruel bul, ram chhengchhe laiah lo châng ang che u. In beih a ṭûl lo vang. In awmna tûrah chuan lo châng ringawt mai rawh u. Lalpa chuan a hnehsak dâwn che u a ni. Judai ram leh Jerusalem mite u, zâm suh ula, huphurh hek suh u, bei tûrin thawk chhuak rawh u, Lalpa chu in lamah a ṭang e,” a ti a. Lal Jehosafata chu a bawkkhup a, mipui pawh an kûn a; Lalpa chibai an bûk a. Levia chi, Kohata leh Kora pâwlte chu an ding a, Israel-te Pathian Lalpa chu fakin ring takin an zai a. A tûkah chuan zîng takah an tho va, Tekoa khaw bul ram chhengchhe lam an pan a. Chutia an kal chhuah dâwn lai chuan Jehosafatan an hnênah, “Juda leh Jerusalem tlangvâlte u, Lalpa, in Pathian chu rinchhan ula, in dingchang ang. A zâwlnei thu sawi kha ring ula, in hlawhtling ang,” a ti a. Lal chuan mite chu a berâwn a, Levia chi zaipâwlte chu hun serha an hâk tûr thawmhnawte inbela sipaiho hma hruai tûrin a ti a; ‘ Lalpa chu fak rawh u, kumkhuain ngil a nei si a,’ ti rawh u,” a ti a. Chutia Pathian faka hla an han sak lai chuan Juda-te bei tûra lo thawk Amon-ho te, Moab-ho te, Edom-ho te châng ru tûrin Lalpan a dah a; tichuan, an hmaah chuan an hmelmate chu an tlâwm ta a. Amon-ho leh Moab-ho chuan Edom-ho chu an bei a, an that phiar a; anmahni leh anmahni pawh chu intiboral tûrin an inbei ve leh ta chiam a. Judai ram sipaiten thlalêr in sâng an va thlen chuan, an hmêlmate lam chu an han thlîr a. An za chuan leiah an tlu thal phung a, an lo thi vek mai a, pakhat mah tlân chhuak an awm lo va ni. Jehosafata leh a hote chu râllâk sum la tûrin an kal a. Chûng zîngah chuan bâwng tam tak te, ei tûr te, thawmhnaw te leh thil hlu tak tak an hmu ṭeuh va. Râllâk sum lâk tûr a tam khawp a, ni thum chhûng ngawt an la khâwm a, an phurh sên loh khawp an la a ni. A ni li ni chuan ‘Beraka’ ruamah an pung khâwm a, an tâna a thiltih zawng zawng avângin Lalpa chu an fak a; chuvâng chuan chu hmun chu ‘Beraka’’ an ti ta a ni. Lalpa chuan an hmêlmate a hnehsak tâk avâng chuan Jehosafata leh a hote chu hlim takin Jerusalem-ah an haw ta a. Jerusalem an thlen dâwn chuan ṭingṭang te, perhkhuang te leh tawtawrâwt ri te nên Tempul an pan a. Lalpa Pathianin Israel-te chu an hmêlmate a dosak tih an chhehvêl hnamte chuan an lo hriatin Pathian chu an hlau ta a. Jehosafata chu râlmuang takin a lal a, Lalpa chuan kil tinah a vêng tlat a ni. Kum sawmthum leh panga a nihin Jehosafata chu Judai ramah a lo lal a, Jerusalem-ah kum sawmhnih leh panga a lal a. A nu chu Azubai, Silhia fanu a ni. A pa Asa ang bawk khân Lalpa hmaah thil ṭha a ti a. Amaherawhchu, hnam dang pathian biakna hmunsâng a tichhe vek lo va, mipuite pawhin an thlahtute Pathian biak an la uar tehchiam hek lo. Jehosafata thil tih dang zawng zawng, a lal tirh aṭanga a thih thleng thu chu Hanania fapa ‘Jehua chanchin’ tih bu-ah ziak vek a ni. Israel lalte chanchin ziakna bu zîngah a tel. Chumi hnuah chuan Judai ram lal Jehosafata leh Israel lal Ahazia, thil dik lo ti ṭhîntu chu ṭhianah an insiam a. Ezion-geberah Tarsis khuaa kal tûr lawng rual an tuk a. Maresa khaw mi, Dodavahua fapa Eliezara chuan Jehosafata hnênah, “Israel lal Ahazia te i thurualpui avângin Lalpa chuan i thil tih a tichhia ang,” a ti a. An lawng rual chu a keh zo va, Tarsis khuaa kal tûr awzâwng a awm ta lo va. Jehosafata chu a thi a, Davida khawpuiah an phûm a, a fapa Jehorama chu a lo lal ta a. Judai ram lal Jehosafata fapa Jehorama chuan nau paruk - Azaria te, Jehiela te, Zekaria te, Azaria te, Mikaela te, Sefatia te a nei a. An pa chuan rangkachakte leh ro hlu tam tâwk tak a pe ṭheuh va, Judai ram khawpui kulh nei, an enkawl tûr a ruatsak vek bawk a. Jehorama chu a fapa upa ber a nih avângin Jehosafata chuan a aiah a laltîr a. Jehorama chu a han lal ngheh chuan, a naute chu a thahtîr vek a. Israel zînga hotu ṭhenkhat pawh a thahtîr bawk a. Kum sawmthum leh pahnih a nihin Jehorama chu a lal ṭan a, Jerusalem-ah kum riat a lal a. Israel lal Ahaba leh lal dang sual tak tak angin a awm ve a, Ahaba fanu pawh nupuiah a nei a ni. Lalpa chungah thil sual a ti a. Mahse, Lalpa chuan Davida hnêna a thuthlung avâng leh a thlahte chu laltîr reng a tiam tlat avângin Davida thlahte chu a tiral mai hreh a ni. Jehorama lal laiin Juda-ho lakah Edom-ho chu an hel a, lal an nei hrang ta a. Jehorama leh a hote chuan sakawr-tawlailîr nên Edom chu an va rûn a. Edom sipaite chuan an lo hual a; mahse, zân khaw thimah an pût ru thei hrâm a. Chuta chin chu Edom chuan Juda-ho hnuaia awm lovin tûn thlengin lal hran an nei ta reng a ni. Jehorama chuan, Lalpa, a thlahtute Pathian chu a ngaihsak loh avângin chutih hun lai vêl bawk chuan Libna khua chu an hel a. Judai ram tlângramah pathian dang biakna hmunsâng a siam thluah nghe nghe a. Judai ram leh Jerusalem mite chu Lalpa laka hela, thil sual ti tûrin a kaihruai a. Zâwlnei Eliza chuan lehkha a thawn a, “I thlahtu Davida Pathian, Lalpa chuan i pa Jehosafata leh i pu Juda lal Asa te awm dân ang khân i awm ve loh avângin a thiam lo che a ni. Israel lalte khawsak dân angin i khawsa zâwk hlauh va, Ahaban Israel mite pathian dang hnêna a uirepui ang khân nang pawhin Judai ram mi leh Jerusalem mite chu i uirepui a. Nang aia ṭha ṭha, i naute lah i that vek bawk a. Hemi avâng hian Lalpa chuan i mite, i fa te, i nupui te hripuiin a hrem dâwn, i neih zawng zawng a tihchhiatsak ang che. Nangmah ngei pawhin rîl natna benvawn na tak i tuar ang a, ni tin a zual tulh tulh ang,” tiin. Filistia mi leh Arab mi ṭhenkhat, tuipui kama Ethiopia mi lo awmte bulah an awm a. Lalpa chuan chûngho chu Jehorama bei tûrin a chawk tho va. Judai ram chu an han rûn ta a. Lal inte chu an rawk a, lal nupuite leh a fapate chu salah an man vek a. A fa tlum Ahazia erawh chu an man ve lo. Chumi hnu chuan Lalpa chuan an lal pum chu a tina chiam a, kum hnih dâwn lai chu a ni têlin a na tulh tulh a, a rîl a tla ta a, na tak tuarin lal chu a thi ta a. A pute thiha an tih angin a thih chuan a mite chuan amah sûn nân meipui an chhep ve lo. Jehorama chu kum sawmthum leh pahnih a nihin a lal ṭan a, Jerusalem-ah kum riat a lal a, a thihin pawi an ti lo. Davida khawpuiah chuan an phûm a, lal thlânah erawh chuan an phûm lo. Arab mi ṭhenkhatin Jehorama chu an rûn a, a fa tlum Ahazia tih loh a fapa dang zawng zawng chu an thahsak avângin Jerusalem mite chuan a pa aiawh tûrin Ahazia chu lalah an siam a. Ahazia chu kum sawmhnih leh pahnih mi a nihin a lal ṭan a, Jerusalem-ah kum khat a lal a. A nu chu Athali, Israel lal Ahaba fanu, Omria tunu a ni. Ani pawh a nu thurâwn ṭha lo tak a zawm ṭhîn avângin Ahaba chhûngte khawsak angin a khawsa ve ṭhîn a ni. Lalpa hmuha thil sual a ti ṭhîn. A pa thih hnu chuan Ahaba chhûngte zînga mi ṭhenkhat chu a thu lâkna ber an ni ta a, a chhiat phah ta nghe nghe a ni. An thurâwn angin Suria lal Hazaela do tûrin Israel lal Ahaba fapa Jorama a thurualpui a, Gilead biala Ramot khua an beih a, an inbeihnaah lal Jorama chu an hliam a. Ramoth-gilead-a Suria lal Hazaela a va beihnaa a hliam enkawl dam tûrin Jezreel-ah chuan a lo kîr a. Tichuan, Juda lal Jehorama fapa Ahazia chu Ahaba fapa Jorama dam lo tlawh tûrin Jezreel-ah a zu kal a. Jorama a va tlawh chu Pathianin Ahazia chhiatna tûra a thil ruat a ni. An awm dun lai chuan mi pakhat Nimsia fapa Jehua a lo kal a; ani hi Ahaba chi timang tûra Lalpa mi tirh a ni. Jehua chuan Ahaba thlahte chunga kut a thlâk lai chuan Jorama dam lo en tûr Ahazia ho - Juda hotute leh Ahazia laichînte chu Jehua chuan a hmu a, a that ve ta vek a. Ahazia chu a han zawng a, Samaria khuaah a lo biru a, Jehua hnênah an hruai a, a lo that ta a. Theihtâwp chhuaha Lalpa zawng ṭhîntu a pu Jehosafata chu an zah avângin a ruang chu ṭha takin an phûm a. Ahazia chhûng zînga mi lal tûr rêng an awm ta lo. A nu Athali chuan Ahazia tualthih thu a hriat veleh Judai lal chhûngte zawng zawng a thahtîr a. Ahazia khân farnu Jehosebi a nei a, puithiam Jehoiada chu pasalah a nei a. Ahazia fapa pakhat, Joasa chu, a rûkin a hum a, lal fa dang, tualthi mai tûrte zîng ata chu a la chhuak a, Tempula mutna pindan pakhatah a thukru a, a enkawl ta a. A thuhrûk tlat avângin Athali chuan a that ve lo. Chutah chuan kum ruk a thukru a, Athali chu lalah a ṭang ta a. A kum sarihnaah chuan puithiam Jehoiada leh sipai za hotu pangate chu an inrâwn ngam ta a. Chûng mite chu Jehorama fapa Azaria te, Jehohanana fapa Ismaela te, Obeda fapa Azaria te, Adaia fapa Maaseia te, Zikria fapa Elisafata te an ni. Judai ram an fang kual a, Levia chite leh hnam hruaitute chu Jerusalem-ah an hruai khâwm a. Tempulah chuan an kal khâwm a, Joasa, lal fapa nên chuan thu an intiam a. Jehoiada chuan an hnênah, “ Lalpa chuan Davida thlahte chu lal tûrin a ruat a, hei hi lal thi ta-a fapa, lal tûra chu a ni. Hetiang hian thil kan ti ang: Sabat nia lo kal ṭhîn puithiamte leh Levia chi hmun thuma ṭhena hmun khat chuan Tempul kawngkhârte an vêng ang a. Hmun thuma ṭhena hmun khat chuan lal in an vêng ang a, a dang zawng zawng chu ‘Lungphûm’ kawngkhâr bulah an awm tûr a ni. Mipui chu Tempul tualah an lo kal khâwm tûr a ni. Tempul chhûngah puithiam leh Levia chi, rawngbâwl lai tih loh chu, tu mah an lût tûr a ni lo. Anni chu serh hran an ni a, an lût thei ang; mi dang erawh chu Lalpa thu awihin an lût tûr a ni lo. Levia chite chuan lal hi an din hual ang a, khandaih phawi sa kengin an vêng tûr a ni, lal kalna apiangah an zui zêl tûr a ni. Tempula luh tum tawh phawt chu thah tûr an ni,” a ti a. Jehoiada chuan châwl tûrte chu a la chawlhtîr loh avângin, Sabat nia rawngbâwl tûrte leh châwl tûrte pawh chu an rawn hruai vek a, Davidan Tempula a dah, fei leh phawte chu Jehoiada chuan sipai hotute hnênah a sem a. Tempul kawtah khandaih phawi sa kengin mi a din kualtîr a, lal chu a vêntîr tlat a. Jehoiada chuan Joasa chu a hruai chhuak a, lal tih tûr dân bu chu a pe a, lalah an siam ta a. Puithiam Jehoiada leh a hote chuan Joasa chu hriak an thih a, “Lal hi dam reng rawh se,” tiin an au va. Athali chuan lal an chawimawi thâwm chu a han hriat chuan mipui punkhâwmna Tempul lam chu a pan a. Lal thar chu lal dinna tûra an ruat Tempul chhûng luhna kiang ban bula a ding chu a han hmu a, sipai hotute leh tawtawrâwtpute chuan an din hual a. Mipui chu hlim takin an au dual dual a, tawtawrâwt an hâm a, Tempul zaipâwlte chuan an thil tum rîkte nên zai an hruai a. Chûng chu a han hmuhin mangangin a puan a pawtthlêr a, “Min phiarru a lo nih hi,” tiin a au va. Jehoiada chuan Tempula thah a duh lo va, sipai hotute chu a ko va, “Vêngtu sipai kârah rawn hruai chhuak ula, chhan tum apiang chu lo that zêl ang che u,” a ti a. Athali chu an man a, lal in lamah an hruai a, Sakawr kawngkhâr an tih bulah chuan an that ta a. Lalpa mi ni ngei tûrin puithiam Jehoiada chuan lal Joasa leh mipui chu thu a thlunpui a. Baal an biakna hmunah chuan an za-in an kal a, an ṭhiat ta a. Maichâm chu an tichim a, milemte chu an chhu keh a, Baal puithiam Matana chu maichâm bulah an that a. Jehoiada chuan puithiamte leh Levia chite chu Tempula an hna tûr a thawhtîr a, lal Davida remruat angin tih tûr an semsak a, Mosia dân bu-a ziak angin Lalpa hnênah hâlral thilhlante an hlân a. Rimawi tum te, zai te leh zai hruai te pawh an tih tûr a ni. Jehoiada chuan Tempul kawngkhârte pawh a vêntîr a, mi bawlhhlawh tu mah an luhtîr tûr a ni lo. Sipai hotute, ram hruaitute leh mipuite chuan Jehoiada hovin kawng an zawh a. Lal chu Tempul aṭangin lal inah an hruai a, kawngkapuiah an luhpui a, lalṭhutthlêngah chuan lal chu a ṭhu ta a. Mi zawng zawng chu an hlim hle a ni. Athali chu khandaiha an thah tâk avângin khuaah chuan buaina a reh ta a. Joasa chu kum sarih a nihin Judai ramah a lal ṭan a, Jerusalem-ah kum sawmli a lal a, a nu chu Zibi, Beer-seba mi a ni, Puithiam Jehoiada dam chhûng chuan Joasa chuan Lalpa lawmzâwng hlîr a ti ṭhîn. Jehoiada chuan lal Joasa chu nupui pahnih a neihsak a, fanu leh fapa an hrinsak ṭeuh va. Chûng hnuah chuan Joasa chuan Tempul chei ṭhat zai a rêl ta a. Puithiam leh Levia chite chu Judai ram khawpuite a fantîr a, kum tina Tempul chei ṭhatna daih tûr thawhlâwm a khawntîr a. Hmanhmawh tûrin a ti a; mahse, Levia chite chu an vuaicha hle a. Tichuan, Jehoiada chu a ko va, “Levia chite hian Judai ram leh Jerusalem mite hnên aṭangin ‘Biakbûk’ enkawlna tûr Lalpa chhiahhlawh Mosia tuk kha an khawn ṭhat leh ṭhat loh engati nge i enpui loh?” a ti a. Mi sualnu Athali zuitute kha Tempulah an lût lui a, thil thianghlim tam tak Baal biaknaa hmanah an la chhuak a ni. Lal chuan Levia chite chu thawhlâwm bâwm siama, Tempul luhna kawngkhâr bula dah tûrin a ti a. Jerusalem leh Judai ram zawng zawngah Pathian chhiahhlawh Mosian thlalêra mipui thawh tûr bi a ruat ang kha rawn keng zêl tûrin thu an than a. Mipuite leh an hruaitute chuan lâwm takin thawh tûr bituk zât chu an rawn keng a, bâwm chu an thlâk khat ta hial a. Levia chite chuan bâwm chu ni tin, a enkawltu tûra lalin a ruat hnênah chuan an rawn dah ṭhîn a; bâwm chu a khah veleh puithiam lalber Jehoiada aiawhtu leh lal mi ruat ziaktu chuan an lo la chhuak a, bâwm chu a dahnaah an dah kîr leh ṭhîn. Tangka tam tâwk tak an thawh khâwm ta a. Lal leh Jehoiada chuan Tempul chei ṭhat hna enkawltute hnênah pawisa chu an pe chhuak ṭhîn a; annin lung chher mi te, thing dek thiam te, thîrdêng te Tempul chei ṭha tûr chuan an ruai a. Ngawrh takin mistiri te chuan hna an thawk a, Tempul chu a tîra mi anga nghet khân an chei ṭha leh ta a. Hna thawh tûr an tih zawh chuan rangkachak leh tangkarua an hman bâng chu lal Joasa leh puithiam lalber Jehoiada an pe a; anni chuan Tempula rawngbâwl nân leh hâlral thil hlanna atân bungbêl te, rimtui hâlna thlêng te, rangkachak leh tangkarua a siam bungbêl te siam nân an lo hmang a. Jehoiada dam chhûng chu ni tin Tempulah chuan thilhlan an hlân ziah ṭhîn a. Tarkûnin a dam a, kum za leh sawmthum a tlinin a thi ta a. Israel mite zîngah Pathian tân leh Tempul tân thil a tih ṭhat êm avângin Davida khawpuia lal thlânah an phûm ve ta a. Jehoiada a thih tâk hnu chuan Judai ram mipui hruaitute chuan an thu ngaithla zâwk tûrin lal chu an hmin ta a. Mipui chuan an thlahtute Pathian, Lalpa chu Tempulah chuan an be duh ta lo va, milem te, pathiannu Aseri lemte an be ta zâwk a. An sualna avângin Judai ram mite leh Jerusalem mite chungah Lalpa chu a thinur ta hle a. Lalpa chuan anni chu hruai kîr tûrin zâwlneite a tîr a; mahse, mite chuan an thu an lo ngaithla duh lo. Puithiam lalber Jehoiada fapa Zekaria hnênah Pathian thlarau a lo thleng a, mipuiin an hmuh theihna tûrah chuan a ding a, ring takin a au va, “ Lalpa Pathian chuan heti hian a ti: ‘Engtizia nge ka thupêkte zâwm duh lovin mahni chungah chhiatna in thlentîr dâwn le? Lalpa chu in kalsan avângin ani pawhin a kalsan che u a ni,” a ti a. Zekaria chu an er hle a, lal thupêkin Tempul tualah chuan lungin an dêng hlum ta a. Lal chuan Zekaria pa Jehoiada kha a tân a ṭangkaizia kha a theihnghilh a, Zekaria chu a tihhlumtîr ta mai a ni. Zekaria thi tûr chuan, “I thil tih hi Lalpa chuan hmu sela, phuba la teh se,” a ti a. Kum a lo thar chuan Suria sipaite chuan Judai ram leh Jerusalem an rawn rûn a, hotu tam tak an that a, râllâk sum tam tak Damaska khuaah an hâwn a. Suria sipaite chu an tlêm hle nâ a, an aia tam daih Juda sipaite chu an hneh a ni. An thlahtute Pathian, Lalpa chu an kalsan avângin an chak lo va, Lal Joasa pawhin a tuar phah ta a ni. Joasa chuan hliam na tak a tuar a, hmêlmate chuan an kalsan ta a, a hote pahnih an inthurual a, puithiam lalber Jehoiada fapate a thah phuba chu an la a, khuma a mu chu an that a; lal thlânah ni lo, Davida khawpuiah an phûm ta a. Inthuruala thattute kha Amon mi Simeata fapa Zabada leh Moab mi Simriti fapa Jehozabada te an ni. Lalte lehkhabu hrilhfiahna bu-ah Joasa chanchin te, a chungchânga zâwlnei thu hril lâwk te, Tempul a chei ṭhat thu te a chuang. A fapa Amazia chu a lo lal ta a. Kum sawmhnih leh panga a nihin Amazia chu a lal ṭan a, Jerusalem-ah kum sawmhnih leh pakua a lal a, a nu chu Jerusalem chhuak Jehoadini a ni. Lalpa duhzâwng a ti ṭhîn; mahse, hreh tak chungin a ni a tih ṭhin ni. Lala a ṭhut ngheh veleh a pa thattute kha a that ve a. An fate erawh chu a khawih lo, Mosia Dân bu-a Lalpa thu, ‘Nu leh pate chu an fate sualna avânga tihhlum tûr an ni lo; fate pawh an pate sualna avânga tihhlum tûr an ni lo; anmahni sualna avâng chauhvin mi tihhlum tûr an ni,’ tih kha a zâwm a ni. Lal Amazia chuan Juda mite leh Benjamin mite chu a chi chiin sipai pâwl hrang hrangah a siam a; sâng rual te, za rual te hotu tûr a ruat thliah bawk a. Mipa kum sawmhnih chin chung lam chu an tel vek a ni, an vaiin nuaithum an tling. Hêngho bâkah hmâr lam Israel-ho, mi nuai khat, tangkarua kg. sângthum leh zali bûk laiin a ruai bawk a. Nimahsela, lal hnênah chuan zâwlnei pakhat a lo kal a, “Israel sipaite hi hruai ve suh. Hêng Hmâr lam ram mite lamah hian Lalpa chu a ṭang lo ve. Indonaah i chak phah i inbeisei a ni ang e. Indonaa chak leh chak loh hi Pathian thu thu a ni asin; hmêlmaten an hneh phah zâwk ang che,” a rawn ti a. Amazia chuan zâwlnei hnênah, “Tangka ka pêk tawh zozai kha engtin nge ni ta ang?” a ti a. Zâwlnei chuan, “ Lalpa chuan a aia tam zâwk a pe leh thei che alâwm,” a ti a. Amazia chuan a sipai rawih, Efraim ram aṭanga lo kalte chu a bân a, a hawtîr ta a; Juda-ho chunga thinrim engphiarin an haw ta a. Amazia chuan huphurh lo deuhvin a sipaite chu Chi Ruamah a kalpui a. Edom sipaite nên chuan an inbei a, mi sîngkhat an that a. Mi sîngkhat an man bawk a; Sela khaw khâm kovah chuan an hruai a, an nam thla a, an tlahlum ta vek a. Amazian indonaa kal ve a phal loh sipai a tirh hâwnte khân Samaria leh Beth-horon inkâra Juda khawpuite chu an bei a, mi sângthum zet an that a, râllâk sum tam tak an la a. Amazian Edom-ho a hneh a, a lo haw chuan, an milemte a rawn hâwn a, a dahna a siam a, chibai a bûk a, an hmaah rimtui a hâl ta a. Hei vâng hian Lalpa chu a thinur a, Amazia hnênah zâwlnei a tîr a. Zâwlnei chuan, “I laka an mite pawh chhan thei hlei lo hnam dang pathiante chu engtizia nge i biak tâk mai?” a ti a. Lal chuan, “Engtik lai khân nge lal thurâwntu atân ka ruat che le? Ngawi mai rawh, ka that mai tûr che a nia,” a ti a. Zâwlnei chuan, “Ka thurâwn ngaithla lova hêng hi i tih avângin Pathianin tihboral che a tum tih ka hre ta,” a ti a, a ngawihsan ta a. Judai lal Amazia leh a upate chuan Israel beih an rawt a, Jehua fapa, Jehoahaza fa Israel lal Jehoasa hnênah, “Pa leh pa, i han inbei teh ang,” tia cho tûrin mi a tîr a. Jehoasa chuan hetiang hian a chhâng a, “ ‘Vawi khat chu Lebanon tlânga lenhlîng hian Lebanon sidar thing hnênah, ‘ka fapa nupuiah i fanu min pe rawh,’ a ti a. Ramsa veivâkin lenhlîng chu a pal thlu ta mai a.’ Amazia, Edom mite i zu hneh hi i chhuang a nih vei hi; inah tawm hle hle mai rawh. Nang leh i mite tâna pawi tûr thil chawkchhuak mah ta che,” a lo ti a. Amazia chuan a thu chu a pawisa lo va, Edom mite pathian lem a biak avângin Pathianin Israel-ho kuta pêk a lo tum a ni. Israel lal Jehoasa leh Juda lal Amazia chu inbei tûrin an thawkchhuak a; Judai ram Beth-semes khaw bulah an inbei ta a. Juda sipaite chu an chak lo ta zâwk a, mahni in lam panin an tlânchhia a. Israel lal Jehoasa chuan Juda lal Amazia, Joasa fapa, Ahazia tupa chu a man a, Jerusalem-ah a hruai a; khawpui kulh bang chu ‘Efraim kawngkhâr aṭanga bangkil kawngkhâr’ an tih thlengin kulh bang tawng zali chu a ṭhiat a. Râllâk sumah Tempula rangkachak leh tangkaruate, Obed-edoma thlahten an vên ṭhin Tempul bungbêl leh lal ina sum dah ṭhatte chu a hâwn a, dahkhama hrên tûr mi a hruai hâwng bawk a. Juda lal Amazia chu Israel lal Jehoasa ai chuan kum sâwm leh pangain a dam rei zâwk a. A lal tirh aṭanga a lal tâwp thlenga Amazia thil tihte chu ‘Israel leh Juda lalte chanchin’ tih ziakna bu-ah a chuang. Lalpa laka a hel chinah kha chuan amah thah tum Jerusalem khaw mi an awm zeuh zeuh reng a ni. A tâwpah phei chuan Lakis khuaah a tlân a; mahse, a hmêlmate chuan an ûmzui a, an va that ta tho va. A ruang chu sakawr an phurhtîr a, Davida khawpuiah lal thlânah an phûm ta a. Judai ram mi zawng zawng chuan kum sâwm leh paruka upa Amazia fapa Uzia chu a pa aiawha lal tûrin an thlang a. Amazia thih hnuin Uzia hian Elat khua hi a la lêt leh a, Judai ram a belhin a din ṭha a ni. Uzia chu kum sâwm leh paruk a nihin a lal ṭan a, Jerusalem-ah kum sawmnga leh pahnih a lal a. A nu chu Jerusalem mi Jekoli a ni. Amazia angin Lalpa lawmzâwng a ti ṭhîn. Pathian thu lama kaihruaitu Zekaria dam chhûng chuan Lalpa chu a pawm tlat a, Pathian pawhin a tihmuingîl a. Uzia chuan Filistia-ho chu a rûn a, Gath khaw kulh bang te, Jabne leh Asdod kulh bang te pawh a tichhia a; Askelon bulah leh Filistia ram hmun hrang hrangah kulh a siam a. Pathian chuan Filistia mi te, Gurbaal-a awm Arab-ho te leh Meun-ho te chu a hnehpui a, Amon-ho pawhin Uzia hnênah chhiah an chawi a; a lo ropui a, Aigupta ram thlengin a hming a thang ta a. Jerusalem kulh bang chu a thuam thar bawk a; ‘Bangkil kawngkhâr’ an tihah te, ‘Ruam kawngkhâr’ an tihah te, kulh kawina lai kawngkhârah te in sâng a sa a. Ram palailêngah te pawh kulh nei khua a din a; tui a lai chhuak thluah bawk a ni; khawthlang lam, tlang ṭhut phairuamah bâwng a vulh ṭeuh bawk a. Lo neih lamah a tui hle a, tlângramah pawh grepte a phuntîr a, phai ram ṭhate chu leiletah a neihtîr a. Sipai tam tak, indo thei mai a nei reng a. An chanchin ziakna chu ziaktu Jeiela leh Maaseian, lal milian Hanania hovin an vawng a. Hotu sânghnih leh zarukin a sipaite chu an ho va. An hnuaiah chuan sipai chak tak, râl bei mai thei nuaithum leh sângsarih leh zanga a nei bawk a. Uzia chuan a sipaite chu phaw te, fei te, thîrlukhum te, thîrkawr te, thal te, virvawma hman tûr lungte mûm te a pe bawk a. Jerusalem-ah chuan a mi themthiamte siam thal kahna khâwl te, lung lian pui pui vawmna tûr khâwl te, in sângah te leh kulh kilah te a bun a. A hming pawh a thang thui ta hle a. Pathianin a ṭanpui avânga chuti taka ropui chu a ni. Lal Uzia chu a ropui tâk hle hnu chuan a lo chapo ta deuh va, chu chu a chhiat phah ta a ni.A Pathian, Lalpa thu pawisa lovin rimtui hâlna dawhkâna rimtui hâl tûrin Tempulah a lût a. Puithiam chak leh huaisen tak tak sawmriatin khap tumin an zui a, “Uzia, Lalpa hnêna rimtui i hâl a thiang lo. Puithiam atâna serh hran Arona thlahte chauhvin hetiang thil hi an ti tûr a ni. He Hmun Thianghlim hi chhuahsan rawh, Lalpa chu i tithinur a, a duhsakna i dawng tawh chuang lo vang,” an ti a. Uzia chu Tempul chhûng rimtui hâlna dawhkân bulah chuan a ding a, rimtui hâlna bûr chu a keng a, puithiamho chungah chuan a thinur hle a; mahse, an hmaah ngei, Lalpa in chhûnga rimtui hâlna dawhkân bulah chuan a chalah pânchhia a kai ta thut a. Azaria leh puithiamte chuan lal chal an en chuan an phâwk ta hru vek a, Tempul chhûng ata chu an hnawt chhuak ta a. Lalpa chuan a hrem tâk avângin hmanhmawh takin a chhuak ta a. A natna avâng chuan lal Uzia chu a dam chhûng chuan a bawlhhlawh ta a, Tempula a luh thian tak loh avângin ama inah a awm ta reng a, a hna a thawk tawh lo, a fapa Jothaman ram a awp ta zâwk a. A lal chhûnga Uzia thiltih zawng zawng chu zâwlnei Isaian a ziak a. Uzia chu a thi a, lalho thlânmualah an phûm a, a pân vei avâng chuan lalho thlânah an dah duh lo. A fapa Jothama chu a lo lal ta a. Jothama chu kum sawmhnih leh panga a nihin a lal ṭan a, Jerusalem-ah kum sâwm leh paruk a lal a. A nu chu Zadoka fanu Jerusaii a ni. A pa ang bawkin Lalpa lawmzâwng a ti ṭhîn; a pain Tempul chhûnga rimtui a hâl ang kha chuan a ti ve lo. Mipuite erawh chu an sual ngaiin an sual reng mai a. Tempul hmâr lam kawngka hi Jothama siam a ni, khaw kulh bang pawh a siam ṭha tam khawp mai; ‘Ofel’ an tih hmun phei chu a chei nasa hle a ni. Judai ram chhûngah khuate a siam a, ngawah te kulh leh râlvênbûk te a siam thluah bawk a. Amon lal nên an inbei a; a tudawl a, tangkarua kg. sângthum leh zali, huit quintal sîngkhat, barli quintal sîngkhat, kum thum chhûng kum tin chhiah a chawitîr a. Jothama chuan Lalpa, a Pathian thu a awih avângin a ropui ta hle a. Jothama lal laia thil thleng chanchin - an indo thute leh a thiltih dangte chu, ‘Israel leh Juda lalte chanchin’ ziakna bu-ah a chuang vek a ni. Jothama chu kum sawmhnih leh panga a nihin a lal ṭan a, Jerusalem-ah kum sâwm leh paruk a lal a. A thi a, Davida khawpuiah an phûm a, a fapa Ahaza chu a lo lal ta a. Ahaza chu kum sawmhnih a nihin a lal ṭan a, Jerusalem-ah kum sâwm leh paruk a lal a. A pu Davida tih dân ang zâwm duh lovin Lalpa duh loh zâwng a ti a. Israel lalte tih dân a la a, Baal lim a chhûntîr a. Hinom ruamah rimtui a hâl a, Israel mite hmaa Lalpa hnawh chhuah hnam dang tih dân tenawm tak takte chu a chîng ve a, a fapate ngei pawh milem hmaah hâlral thilhlan atân a hlân a. Tlânga hnam dang pathian biakna hmunsângah te, thingbuk ṭha deuh hlim hnuaiah te Ahaza chu a inthawi ṭhîn a, rimtuite a hâl ṭhîn. Ahaza chuan thil sual a tih avângin Suria lal kutah Lalpa, Pathian chuan a pe a; Damaska khuaah Juda mi tam tak Suria lal chuan a hâwn a. Israel lal Remalia fapa Peka pawhin Ahaza chu a bei a, a hneh a, Juda sipai huai ṭha ṭha mi nuaikhat leh sînghnih a that a. Judai ram mite chuan an thlahtute Pathian, Lalpa chu an kalsan avângin Lalpa chuan chûng thil chu an chungah a thlentîr a ni. Israel sipai Efraim pasalṭha Zikria chuan Ahaza fapa Maaseia chu a that a, lal in enkawltu Azrikama a that bawk a; lal dawttu Elkana pawh a that a. Juda-te chu an unaute an ni na a, Israel sipaite chuan hmeichhia leh naupang nuaihnih salah an man a. Samaria khuaah an khalh khâwm a, râllâk sum tam tak an hâwn bawk a. Samaria khuaah chuan Lalpa zâwlnei pakhat Odeda a awm a, Israel sipai ruala Judai rama an sal mante Samaria khua an lût tûr chu a lo hmu a, an hnênah, “In thlahtute Pathian, Lalpa chu Juda-ho chungah a thinur a, a hnehtîr ta che u a ni; mahse, in that a, an chunga in nun a râwn lutukzia a hmu reng asin. Jerusalem leh Judai rama awm mipa pawh, hmeichhia pawh bawiha siam in tum leh zêl a nih hi. Nangni pawhin Lalpa, in Pathian lakah thil sual in ti tih in hre na nge? Ka thu hi ngaithla teh u, hêng in sal mante hi in unau, in farnute an ni asin; chhuah vek rawh u, chutilo chu Lalpa a thinur ang a, a sawisa ang che u,” a ti a. Hmâr lam lalrama hotu lian, Jehohanana fapa Azaria te, Mesilemota fapa Berekia te, Saluma fapa Zehiskia te, Hadlaia fapa Amasa te pawhin sipaiho thiltih chu ṭha an ti lo va. An hnênah, “In sal mante hetah han hruai suh u, Lalpa lakah thil sual kan ti dêr tawh a, min hrem duh hial khawpin kan tithinur a ni. Kan thil sual tih tawh bâkah la tih belh leh zêl in tum em ni?” an ti a. Tichuan, sipaite chuan an sal man leh râllâk sum an hawnte chu mipui leh an hotute kutah an hlân ta a. Chûng hming sawi tâkte chu an râllâk sum aṭanga sal an mante hnêna thawmhnaw pe tûrin an ruat a. Silhfên te, pheikhawk bun tûr te an pe a; an hliam chulh tûr oliv hriak an sem bawk a. Mahni kea kal thei lo khawpa chaute chu sabengtung chungah an chuantîr a; an sal man zawng zawng chu Judai ram Jeriko, tûm khua an tihah chuan an hruai kîr leh ta vek a. Tin, Israel-ho chu Samaria lamah an haw ta a. Chûng lai chuan lal Ahaza chuan amah ṭanpui tûrin Asuria lalte a ko va, Edom-hovin Judai ram an rawn rûn a, an hneh a, mi tam tak an man a ni. Filistia-ho lahin thlang lam tlâng ṭhut phai khua te leh Judai ram Negeb te an rawn bei bawk a. Anni phei chuan Beth-semes te, Aijalon te, Gederot te, Soko leh a chhehvêl khua te, Timna leh a chhehvêl khua te, Gimzo leh a chhehvêl khua te an la a, an luah ta tlat a. Juda lal Ahaza chuan a mite ṭhatna tûr a ngaihtuah miah lo va, Lalpa chu a pawisak dêr loh avângin Juda-ho chu a titlâwm a ni. Asuria lal Tiglat-Pilesera chuan Ahaza chu puih ahnêkin harsatna a siamsak ta zâwk a. Ahaza chuan Tempula rangkachak te, lal ina mite leh mi hausa deuh ina mi te chu a la a, Asuria lal chu a pe a; mahse, a sâwt lo. A mangan vânglai tak pawh chuan Ahaza chu Lalpa lakah a sual sauh va. Amah hnehtu Suria-ho pathiante chu chibai a bûk ve ta mai a, ‘Suria pathiante hian Suria lal an ṭanpui a; chuvângin, an hnênah thilhlan hlân ila min pui ve ngei ang,’ a ti a ni. Chu chu a mite nên chuan chhiat zual phah sauhna a ni. Chûng bâkah, Tempula hmanrua a la chhuak a, a tichhia a. Tempul chu a khâr a; Jerusalem khuaah maichâm a siam thliah thluah a; Judai ram khawpuiah leh khuaahte chuan hnam dang pathian biakna hmunsâng, rimtui hâlna tûr a siam fer fur a. Hetiang hian a thlahtute Pathian, Lalpa chu a tithinur a ni. A rorêl chhûng chanchin dangte chu a bul aṭanga a tâwp thlengin ‘Juda leh Israel lalte chanchin’ ziakna bu-ah a chuang. Ahaza chu a thi a, lal thlânah ni lo, Jerusalem-ah an phûm a, a fapa Hezekia chu a lal ta a. Hezekia chu kum sawmhnih leh panga a nihin Judai ramah a lal ṭan a, Jerusalem-ah kum sawmhnih leh pakua a lal a. A nu chu Zekaria fanu Abijai a ni. A pu Davida angin Lalpa lâwmzâwng a ti ṭhîn. A lal tirh kum, thla hmasa berah Hezekia chuan Tempul kawngkhârte chu a hawng leh a, a chhiate chu a siam ṭhattîr a. Tempul khawchhak lam tualah chuan puithiamte leh Levia chite chu a ko khâwm a, an hnênah, “Nangni Levia chite u, inthian thianghlim ula, in pate Pathian, Lalpa in hi thian thianghlim rawh u; Tempul aṭang hian thil bawlhhlawh zawng zawng paih chhuak vek rawh u. Kan pate chu Lalpa, kan Pathian lakah an rinawm lo va, a duh loh zâwng an ti a. An helsan a, a awmna in chu hawisanin an hnuchhawn ta a. Tempul kawngkhâr chu an kalh a, khâwnvâr an timit a, rimtui an hâl lo va, Hmun Thianghlimah Israel-te Pathian tân hâlral thilhlan an hlân hek lo. Hei vâng hian Lalpa chu Juda leh Jerusalem mite chungah a thinur a, mi tin mak tih leh chekkhum hial khawpin a sawisa ta a ni; chu chu nangni pawhin in hmu reng a. Kan pate chu khandaiha sah hlum an ni a, kan fanu kan fapa, kan nupuite nên salah an man kha. Kan chunga a thinur hi a tihkian beiseiin Israel-te Pathian, Lalpa nên thu thlun ka tum ta a ni. Ka fate u, awm mai mai teh suh u, Lalpa chuan a hmaa dinga, a rawngbâwl atân a thlang che u a; chuvângin, a rawng bâwl ula, thilhlante hlân rawh u,” a ti a. Chûng zîngah chuan Levia chi hêngte hi an tel: Kohata thlahte zînga mi Amasaia fapa Mahata leh Azaria fapa Joela. Meraria thlah zînga mi Abdia fapa Kisa leh Jahalelela fapa Azaria; Gersona thlahte zînga mi Zima fapa Joa leh Joa fapa Edena. Elizafana thlah zînga mi Simria leh Jeuela; Asafa thlah zînga mi Zekaria leh Matania; Hemana thlah zînga mi Jehuela leh Simeia; Jeduthuna thlah zînga mi Semaia leh Uziela. Hêng mite hian an chipui Levia chite chu an pun khâwm a, an inthian thianghlim a; lal thupêk ang chuan Tempul chu an thian a. Lalpa Dân bu-a sawi angin an thian fai ta a. Lalpa Tempul chhûngah puithiamho chu an lût a, thil bawlhhlawh an hmuh rêng rêng chu Lalpa in tualah chuan an rawn dah chhuak a; Levia chite chuan chûng chu Kidron luiah an paih a. Thla khatna, ni hmasa berah Tempul chu an thian ṭan a, ni riat ni chuan Tempul pindan hmasa thlengin an thian zo va. Ni riat dang, ni sâwm leh paruk thlengin Tempul chhûng chu Pathian biakna tlâk tûrin an thian leh a, an tithianghlim ta a. Levia chite chu lal Hezekia hnênah an kal a, “Tempul chhûng chu kan thian thianghlim ta. Hâlral thilhlan hâlna maichâm te, chhang serh dahna dawhkân te leh hmanrua zawng zawng pawh kan tithianghlim ta. Ahazan Lalpa laka suahsual a bâwl laia Tempul bungbêl a lâk chhuahte kha kan dah kîr a, kan tithianghlim vek tawh a, Lalpa maichâm bulah engkim dah fel a ni tawh,” an rawn ti a. Lal Hezekia chuan Jerusalem-a hotu deuh deuh chu a ko khâwm rum rum a, Lalpa Tempulah chuan an kal a. Bâwngpa pasarih, berâmchal pasarih, berâmno pasarih leh sual thawina thilhlanah kêlpa pasarih an rawn dah a; Arona thlah puithiamte chu Lalpa maichâma hlân tûrin a ti a. Bâwngte chu an talh a, an thisen chu maichâmah an theh a, berâmte pawh chu an talh a, an thisen chu maichâmah an theh bawk a. Lal leh pungkhâwmho hmaah chuan sual thawina thilhlan atân kêlpate chu an rawn kai a, an lu-ah an kut an nghat a; Puithiamte chuan an talh a, an thisen chu sual thawi nân an hlân a, Israel mi zawng zawng sual thawi nân an hlân a ni. Lal thu angin hâlral thilhlan leh sual thawina thilhlan chu Israel mi zawng zawng tân an hlân a ni. Lal zâwlnei Gada leh zâwlnei Nathana hmanga Davida hnêna Lalpa sawi ang khân Levia chite chu perhkhuang te, dârbenthek leh ṭingṭang te nên Tempulah chuan a dah a. Davida tum ṭhin ang thiltum chite an keng bawk a. Puithiamte pawh tawtawrâwt kengin an ding a, Lal Hezekia chuan hâlral thilhlan chu hlân tawh tûrin a hrilh a; an han hlan chuan mipuiin Lalpa fak hla an sa a, tawtawrâwt te an hâm a, tum rîk chi dangte pawh chu an tum ta a. Chuta awm apiang chuan Pathian chibai an bûk a, hla an sa a, an thilhlan a kan zawh hma chu rimawi an tum zui zêl a. Lal Hezekia leh mipuite chu an ṭhingṭhi a, Pathian chibai an bûk a. Lal leh hotute chuan Davida leh zâwlnei Asafa hla phuah, Lalpa fakna hla kha, Levia chite chu an saktîr a. Ṭhingṭhia Pathian chibai bûkin an za chuan hlim takin an awm zui ta a. Hezekia chuan mipui hnênah, “ Lalpa tân in inthian thianghlim ta bawk a; thilhlan te, lâwmthu sawina te Lalpa Tempulah han la rawh u le,” a ti a. Pungkhâwmho chuan thilhlan te, lâwmthu sawina te an rawn hlân a, a duh apiangin hâlral thilhlan tûr te an rawn keng bawk a. Pungkhâwmhovin hâlral thilhlan tûr an rawn lâkte chu bâwngpa sawmsarih, berâmno zahnih leh berâm za a ni. Bâwng zaruk leh berâm sângthum pawh thilhlan chi dangah an hlân a. A talhtu tûr puithiam an indaih loh avângin an talh zawh hma chu Levia chiten an pui a. A tâwp lamah chuan puithiam tam zâwk pawh an inthian thianghlim hman a; Levia chite hi puithiamho ai chuan an lo invawng thianghlim thei zâwk a lo ni. Mipui thilhlan hâl hi puithiam tih tûr a ni a. An ran talh mipui ei thaute pawh an hâl tûr a ni; hâlral thilhlan ruala uain an rawn hlante pawh puithiamin an bun chhuak tûr a ni. Tichuan, Tempul rawngbâwlna chu an ṭan leh ta a. Lal Hezekia leh mipuite chu Pathianin hetianga ti leh thei mai tûra a ṭanpui avângin an hlim ta êm êm a. Puithiam tam tak an inthian thianghlim hman lo va, mipui lah Jerusalem-ah an pung khâwm hman hek lo; chuvângin, Kalhlên Kût chu a hun takah an hmang thei ta lo va. Lal Hezekia leh a hote leh Jerusalem mite chu an inrâwn khâwm a, Kalhlên Kût chu a thla hnihnaah hman an rêl ta a. Lal chuan Israel ram leh Judai ramah thu a thawn darh ta chiam a. Efraim leh Manase-ho te phei chu Jerusalem Tempula lo kala, Lalpa chawimawia Kalhlên kût hmang tûrin lehkhain a sâwm nghe nghe a. Lal leh mipuite chuan an thil rawt chu tifuh an inti hle a. Hmâr lam, Dan aṭanga chhim lam Beer-seba inkâra Israel mi zawng zawng chu Jerusalem-ah a tam thei ang ber lo kala, Kalhlên kût rawn hmang tûrin an sâwm a. Lal leh a hote chuan Judai ram leh Israel ramah lamkal an tlântîr a, ngenna lehkha hetiang hi an thawn darh a: “Israel mite u, Abrahama te, Isaka te, Jakoba te Pathian, Lalpa lam hi hawi teh u; keini, Asuria kut tuar lova, nungdama la awmte lam hi a lo hawi ve dâwn nia. In pate leh in unau te, in thlahtute Pathian, Lalpa laka an che khawlo ang khân che ve suh u, in hmuh angin a hrem nat êm kha. Anni angin luhlul suh u, Lalpa thu chu zâwm zâwk rawh u. In Pathian Lalpa tihthianghlim tawh Jerusalem-a a Tempulah hian lo kal ula; hetah hian amah chu chibai han bûk rawh u, in laka a thinur a reh dâwn nia. Lalpa lam in lo hawi phawt chuan in hmêlmaten sala an man in lainate kha an lo khawngaih ang a, an rawn hâwntîr ngei ang. Lalpa, in Pathian hi Pathian ngilnei a ni asin, a lam in lo hawi chuan a hawisan tawp lo vang che u,” tiin an ziak a. An mi tirhte chu Efraim leh Manasea thlahte awmna ram khaw tinah an kal a, Zebulun ram pawh an thleng a; mahse, mite chuan an lo nuihsawh a. Chuti chung pawh chuan Aser-ho te, Manase-ho te, Zebulun-ho te Jerusalem-a lo kal duh an awm nual a. Judai ramah pawh Pathian chuan hna a thawk a, lal leh a hote thu angin lungrual taka Pathian duhzâwng tih an châk ta hle hlawm a. Thla hnihnaah chuan chhang dawidim telh loh kût hmang tûrin Jerusalem khuaah chuan mi tam tak an lo kal khâwm a. Jerusalem-a pathian dang biakna maichâm awm zawng zawng, rimtui an hâlna maichâmte nên an la a, Kidron luiah an paih a. Ni sâwm leh pali ni chuan Kalhlên kûta thilhlan berâmno chu an talh a. Puithiam leh Levia chi te pawh kha, an zah êm êm avângin Lalpa tân an lo inthian thianghlim fel vek tawh a, hâlral thilhlan pawh Tempulah an hlân ve thei tawh a ni. Pathian mi Mosia Dân bu-a sawi ang khân an awmna tûr hmun ruatah an awm ṭhap a. Levia chite chuan thilhlan thisen chu puithiamho an pe a, anni chuan maichâmah an lo theh a. Mi tam tak chu an bawlhhlawh avângin Kalhlên kût berâmno an talh a thiang lo va, Levia chite khân an talhsak a, Lalpa hnênah an hlân a. Efraim-ho te, Manase-ho te, Isakar-ho te, Zebulun-ho te zînga mi tam tak phei chu an inthen thianghlim loh avângin dân ang lovin Kalhlên kût chu an hmang a ni. Lal Hezekia chu chûngho tân chuan a ṭawngṭai a, “Aw Lalpa, min thlahtute Pathian, bawlhhlawh kai an ni chung pawhin thinlung taka chibai bûktu che chu i ṭhat avângin ngaidam ang che,” a ti a. Lalpa chuan Hezekia ṭawngṭai chu a ngaithla a, mite chu a ngaidam a, engtin mah a khawih lo. Hlim takin ni sarih chhûng chu Jerusalem-a lo kalte chuan chhang dawidim telh loh kût chu an hmang a, ni tin mai Levia chite leh puithiamte chuan awrâwl tâwp chhuahin Lalpa fak hla an sa a. Lalpa biaknaa an tumrîk neihte nên inkhâwm kaihhruai an thiam êm avâng chuan Levia chite chu lal Hezekia chuan a fak a. An thlahtute Pathian, Lalpa chu an fak a, remna thilhlante hlânin ni sarih kût ruai an ṭheh a. Tin, mipui chuan ni sarih dang kût nawn an rawt a; tichuan, hlim takin ni sarih an kût leh ta a. Lal Hezekia chuan bâwngpa sângkhat leh berâm sângsarih, mipui thilhlana ruai ṭheh nân a thawh a, an hotute chuan bâwngpa sângkhat leh berâm sîngkhat an thawh bawk a. Puithiam tam tak an lo inthian thianghlim tawh a. Judai rama mi lo pung khâwm te, Levia chi te, puithiam te, Israel ram aṭanga lo kal te, Judai ram leh Israel rama hnam dang chêng lo kal vete nên an vaiin an hlim êm êm a. Jerusalem khuaah chuan mi tin an lâwm a, Davida fapa Solomona thih hnuah chutiang khawpa hlimna a la awm lo. Levia chite leh puithiamte chuan mipui tân malsâwmna an sawi a, Lalpa chuan a lo ngaithla a, an ṭawngṭaina chuan Hmun Thianghlim vân a thleng a ni. Kût an ṭiak chuan Israel mi zawng zawng chu Judai ram khaw tinah an kal darh a, an lungphun te, an pathiannu Aseri lim an phun te chu an nam tlu a, maichâmte leh hmunsâng, hnam dang pathian an biakna hmunte chu an tichim a. Judai ram bâkah Benjamin te, Efraim te leh Manase biala mi te pawh an tichhia a, mahni in lamah an haw leh ta hlawm a. Lal Hezekia chuan puithiam te leh Levia chi te chu hna an insem thliah ṭhîn ang khân an thawh dân tûr a remfelsak leh a. An hna tûr chu hâlral thilhlan hlan te, remna thilhlan hlan te, Tempula Pathian biak hruai te, Tempul kawngkhâr bula Lalpa fak hla saa lâwmthu sawi te a ni. Hezekia chuan ama bâwng leh berâm rual aṭangin tûk tin zan tin hâlral thilhlan tûr te, sabat ni te, thla thar ni te leh kût huna hâlral thilhlan Lalpa dân bu-a hlan tûr tih te chu a tum vek a. Lalpa Dânin a phût ang chuan, an hun zawng zawng an hman theih nân, puithiamte leh Levia chite chanvo thilhlan chu pe ṭhîn tûrin Jerusalem mite chu Hezekia chuan a hrilh a. Chutianga thu a pêk veleh Israel mite chuan an thilpêk chhangphut ṭha chi te, uain te, oliv hriak te, khawizu te leh an thil thar te leh an neih apiang an sâwma pakhat nên an rawn la a. Judai ram khawpuia awm zawng zawng chuan an ran sâwma pakhat te, an Pathian, Lalpa hnênah thil tam tak an pêkte chu an rawn keng a. A thla thumna aṭangin an rawn pe ṭan a, thla sarihna thlengin an rawn pêk chu a vûm thûr mai a ni. Lal Hezekia leh hruaituten thilpêk tling khâwm tamzia an hmuh chuan Lalpa an chawimawi a. Israel mipuite pawh an fak a. Lal chuan puithiamte leh Levia chite hnênah thilpêk tling khâwm chu an khawpkham leh kham loh a zâwt a. Zadoka thlaha puithiam lalber Azaria chuan, “Miten an thilpêkte Tempula an rawn ken tâk hnu hi chuan ei tûr kan nei ta a, ei sên loh tam tak a bâng bawk a ni. Lalpa chuan a mite mal a sâwm a, hetiang hi kan nei thei ta a ni,” a ti a. Lal thupêk angin Tempul ram chhûngah chuan kudâm an sa a. An thilpêk leh sâwma pakhat chu a bothlau loh nân an dah ṭha a. A enkawl tûrin Levia chi Konania an ruat a, a nau Simeian a ṭanpui a. An kaihhruaia thawk tûrin Levia chi Jehiela te, Azazia te, Nahata te, Asahela te, Jerimota te, Jozabada te, Eliela te, Ismakia te, Mahata te, Benaia te chu lal Hezekia leh puithiam lalber Azaria chuan an ruat a. Imna fapa Korea, Tempul khawchhak lam kawngka vêngtu hotu chu Lalpa hnênah anmahni duh thua thilhlan leh thil serh hran bîkte dawnga sem ṭhîn tûrin an ruat a. Khaw dang, puithiam awmnaah chuan hêng Levia chi Edena te, Miniamina te, Jesua te, Semaia te, Amaria te, Sekania te chuan ei tûr chu ṭha takin an sempui a, an Levia chipuite pawh, a pawimawh leh pawimawh lo deuh sawi lovin an sem thliah thliah ṭhîn. Mipa, kum sawmthum chung lam, Tempula rawngbâwl theite chuan an dinhmun azirin an dawng a. Puithiamho chu a chi chia inchhâwk tûr hna an sem a; Levia chi kum sawmhnih chung lamte erawh chu a pâwl pâwlin hna thawk tûrin an ruat ṭhîn a ni. An hming chu an nupui te, an fate leh an awmpui nghette nên an ziak vek a, eng lai pawha an hna thawk tûrin koh mai theih an ni. Arona thlahte awmna tûr, thingtlâng khua leh a chhehvêl ran tlatna ram ruata awm puithiamte hnêna ei leh bar tûr semtu tûr an ruat bawk a, Levia chi chhiarnaa hming chuangte pawh an pe ṭhîn. Judai ram pumah lal Hezekia chuan a Pathian, Lalpa hmuha ṭha leh dik chu rinawm takin a ti ṭhîn. Tihtakzetin a Pathian rawng a bâwl a, Tempul a ngaihsaka, dânte a zawm êm avângin, kawng engkimah a hmuingîl a ni. Hezekia chuan Lalpa rawng ṭha takin a bâwl tâk hnu chuan Asuria lal Senakeriba chuan Judai ram a rawn rûn a. Kulh nei khuate chu a sipaite chuan an hual a, kulh bangte chu a tihchhiattîr a. Hezekia chuan Jerusalem pawh rawn beih zêl a tum tih a hriat chuan, a hote nên an inrâwn tlâng a, Asuria-hovin Jerusalem an rawn hnaih hnua tui in tûr an neih loh nân khaw pâwn hnaia tuikhur zawng zawng chu hnawh zai an rêl a. Hotute chuan mi tam tak an hruai a, tuikhur zawng zawng chu luang chhuak tûr awm lovin an hnawh ta vek a. Lal chuan khaw kulh bang derdêp laite chu a thuam ṭha a, in sângte a sak belh a, Jerusalem khaw hlui Milo an tih, lei an chhûn khahna lai kulh bangte pawh chu a siam ṭha a. Fei leh phaw tam tak a siamtîr bawk a. Khaw mite chu sipai hotuten an ho va, khawpui luhna kawngkhâr tualzâwl zau laiah chuan mite chu an rawn hruai khâwm a, a lo fuih a. An hnênah chuan, “Huai takin awm ula, ṭan la sauh sauh rawh u: Asuria leh a sipai zozaite hi hlau suh ula, zâm hek suh u, an aia ropui kan zîngah a awm a ni; ani zawng mihring chaknaah a innghat a, keini zawng Lalpa, kan Pathianin min pui dâwn a, râl chu min dosak dâwn a ni,” a ti a. Mipui chu Juda lal Hezekia thu avâng chuan an thlamuang ta hle a. Senakeriba leh a sipaite Lakis khuaa an awm hnu chuan Hezekia leh Judai ram mi, Jerusalem-a awm zawng zawngte hnênah chuan palai a rawn tîr a, “Asuria lal Senakeriba chuan heti hian a ti: ‘Eng nge maw in beiseia, Jerusalem hual in tuar dâwn le? Lalpa, kan Pathian chuan Asuria lal kut ata min chhan dâwn’ tiin. Hezekia hian tuihâl leh rilṭâma thi tûrin a bum che u elo maw? In Pathian biakna hmunsângte leh maichâmte ṭhiatin Jerusalem leh Judai ram mite chu, ‘maichâm pakhatah Pathian chu chibai in bûk ang a, chutah chuan thil in hlân tûr a ni,’ titu kha he Hezekia hi a ni lâwm ni? Kei leh ka pate chuan ram tina hnam tinrêng kan sawisak ṭhin dân kha in hria em? Chûngho pathiante chuan an mite chu kan kut aṭangin an chhan thei ngai em ni? Ka pa chuan chûngho pathiante chu a titlâwm vek a, Pathian pawh hian a kut ata a chhan che uin in ring elo? Chuvângin, Hezekia hian bum che u suh se, bual â che u hek suh sela, a thu ring suh u. Asuria lal laka a betute chhan theitu hnam pathian pakhat mah an awm lo. In Pathian pawh hian a va chhan rua lo che u êm!” a ti a. Asuria sipai hotu chuan Lalpa, Pathian leh a chhiahhlawh Hezekia chu a sâwt lehzual a. Asuria lal chuan a lehkhaah chuan Israel-te Pathian, Lalpa chu thamlo takin, “Hnam dang pathiante pawh ka kut ata an mite chhan thei rêng an awm lo, Hezekia Pathian pawhin a mite chu ka lakah a chhan thei bîk dâwn em ni?” tiin a ziak bawk a. Khaw lâk a awlsam zâwk beiseiin Jerusalem kulh bula awmte tihzâm a tum a, Hebrai ṭawngin thu a sawi a ni. Jerusalem Pathian chu hnam dang pathian, mihring siam ang lekin a sawi a ni. Lal Hezekia leh Amoza fapa zâwlnei Isaia chu an ṭawngṭai a, Pathian an au va. Lalpa chuan Vântirhkoh a rawn tîr a, Asuria sipaite leh an hotute chu an riahhmunah chuan a rawn tihlum a. Asuria lal chu mualpho takin an khaw lamah a haw ta a. Ni khat chu an pathian biak ina a awm laiin a fate zînga mi ngeiin khandaihin an sât hlum a. Lal Hezekia leh Jerusalem mite chu chutiang chuan Asuria lal Senakeriba leh an hmêlmate kut ata Lalpa chuan a chhan chhuak a. An chhehvêl ramte nên inrem ṭha takin a awmtîr a. Lalpa hnêna thilhlan hlân tûrin Jerusalem-ah mi tam tak an lo kal a. Hezekia hnênah pawh thilpêk an rawn pe zut zut a, hnam tinin Hezekia chu an ngaisâng hle a ni. Hetih hun lai vêl hian Hezekia chu thih ngamin a na a. A ṭawngṭai a, a dam leh tûr thu chhinchhiahna Lalpa chuan a siamsak a. Lalpa thiltihsak avâng chuan lâwm nachâng a hre lo va, a chapo avâng chuan Judai ram leh Jerusalem chuan an tuar ta a. A tâwpah erawh zawng Hezekia leh Jerusalem mite chu an inchhîr a, an inngaitlâwm a, Hezekia dam chhûng chuan Lalpa thinurna chu an chungah a thleng ta lo. Lal Hezekia chu a hausa ta hle a, tu pawhin an ngaisâng a, a rangkachak te, tangkarua te, lungmantam te, thil rimtui te, phaw te leh thil dang hlu tak tak te dahna tûr in te a sa a. A buh te, uain te, oliv hriak te dahna tûr chhêk in a saktîr a; bâwng in te, berâm huangte a siam bawk a. Hêng bâkah hian Pathianin berâm te, sum leh pai chi tinrêng a pe a, khua te a siam thluah a. Hezekia hian Gihon tuiluanna chhakta zâwk chu a tiping a, tui kawng a siam a, Jerusalem khaw chhûng thlang lam pangah a luan luhtîr a ni. Hezekia chu a thil tih engkimah a hmuingîl zêl a. A chunga thil mak thleng zâwt fiah tûrin Babulon lalin palai a rawn tirh lai kha chuan mi eng ang nge a nih fiah nân Pathianin a thlahfâl a nih kha. Lal Hezekia thil tih dang te, a thil tih ṭhat te chu, Amoza fapa zâwlnei Isaia lehkhabu-ah leh Israel leh Judai lalte chanchin ziakna bu-ah a chuang. Hezekia chu a thi a, lal thlânmual chuanchungah an phûm a. A thih chuan Judai ram leh Jerusalem-in an chawimawi nasa hle a. A fapa Manasea chu a lo lal ta a. Kum sâwm leh pahnih a nihin Manasea chu Judai ramah a lal ṭan a, Jerusalem-ah kum sawmnga leh panga a lal a. Israela thlahte hmaa Lalpan a hnawh chhuah hnamte thil tenawm tak an tih ang chu a ti ve ṭhîn a. A pain a tihchhiat, hnam dang pathian biakna hmunsângte kha a siam ṭha leh a. Baal hnêna inthawina hlanna tûr maichâmte a siam a, pathiannu Aseri lim te a siam a, arsi te chibai a bûk a. Kumkhuaa Lalpa biakna tûr Tempul a ruatah chuan hnam dang pathian maichâm a siam a. Tempul pindan pahnihah chuan arsi biakna tûr maichâm te a siam a. Hinom ruamah hâlral thilhlanah a fapa te a hlân a; aien te, kutze en te, arsi biak te a chîng a, mitthi thlûk thiam te, aisân chîng te a râwn ṭhîn a. Lalpa ṭha tih loh zâwng a ti a, a tithinur ta a ni. A milem chhûn chu tempulah a dah a, Pathianin Davida leh Solomona hnênah, “Israel hnam zawng zawng ram zîngah Jerusalem leh he in hi ka hming lamna hmun tûra ka thlan a ni. Kumkhuaa ka thupêk zawng zawng an zawma, ka thuruatte leh ka dânte, ka chhiahhlawh Mosian a hrilhte kha an zawm chuan Israel-ho hi engtikah mah an pate hnêna ka pêk tawh ram aṭang hian ka hnawt chhuak lo vang,” a ti si a. Manasea chuan Judai ram leh Jerusalem mite chu thil dik lo a tihtîr a, Israel-te hmaa a hnawh chhuah hnamte tih ṭhin aia sual nasa zâwk an ti ta a ni. Lalpa chuan Manasea leh a mite hnênah chuan thu a sawi ṭhîn a, an ngaithla duh si lo va. Chuvâng chuan Asuria sipai hotute chu Lalpa chuan Judai ram chu a rûntîr a. Manasea chu an man a, khaidiatin an hlîng a, a hnârah thîr kawm an vuah a, Babulon-ah an hruai ta a. A mangan êm avâng chuan Lalpa a Pathian hmaah chuan nasa takin a intitlâwm a, ṭanpui a dîl ta a. Manasea ṭawngṭai chu a lo ngaihthlâksak ta a, a dîlna chu chhângin Jerusalem-ah a hâwntîr leh ta a. Manasea chuan Lalpa chu Pathian a lo ni ngei tih a hre chiang ta a. Chumi hnu chuan Davida khawpui, khawchhak lam panga kulh bang pâwn zâwk chu Manasea chuan a zawm sâng a, Gihon tui awmna ruam hmâr lam Sangha Kawngkhâr bul ‘Ofel’ an tih hmun thlengin a siam a. Judai rama kulh nei khaw tinah sipai pâwl khat, hotu pakhat nên a dah vek a. Hnam dang pathian lem leh milim chhûn amahin Tempula a dahte chu a paih bo va. Tempul mual leh Jerusalem khuaa hnam dang pathian biakna maichâm awmte pawh chu a la a, khawpui ata a paih chhuak a. Lalpa biakna maichâm chu a siam ṭha a, remna thilhlan te, lâwmthu sawina thilhlan te a hlân a, Judai ram mi zawng zawng chu Israel-te Pathian, Lalpa a biaktîr a. Mipuite chu an inthawina hmun pangngaiah la inthawi reng mah se, Lalpa hnênah chauh an inthawi ta a ni. Manasea thil tih dang zawng zawng, Pathian hnêna a ṭawngṭaina te, Israel-te Pathian, Lalpa hminga zâwlneiten a hnêna thu an sawi te chu Israel lalte chanchin ziakna bu-ah a chuang. Lal Manasea ṭawngṭaina leh Pathian chhânna te, a sim hmaa thil sual a tih chanchin te, hnam dang pathian biakna hmunsâng te siama, Aseri lim siama, a milem chhûn a biak thu te, zâwlneiho chanchin ziakna bu-ah a chuang vek bawk a ni. Manasea chu a thi a, lal inah an phûm a, a fapa Amona chu a lo lal ta a. Amona chu kum sawmhnih leh pahnih a nihin Judai ramah a lal ṭan a, Jerusalem-ah kum hnih a lal a. A pa Manasea ang bawkin Lalpa chungah thil sual a ti a, a pa milem chhûnte chu chibai a bûk ta mai a. A pa ang khân a inngaitlâwm ve duh lo va, Lalpa lam a hawi duh hek lo, a pa ai mah khân a sual a ni. A hoten an phiar a, a inah an that a, Judai ram mite chuan Amona thattute chu an that ve a, a fapa Josia chu lalah an siam a. Kum riat a nihin Josia chu Judai ramah a lal ṭan a, kum sawmthum leh pakhat Jerusalem-ah a lal a. Lalpa lawmzâwng a ti ṭhîn a, a thlahtu Davida awm dân angin a awm a. Pathian dânte chu uluk takin a zâwm a. Josia chuan kum riat a lal kumin, la naupang hle mah se, a thlahtu Davida Pathian chu a be ve ṭan ta a; kum li hnuah phei chuan hnam dang pathian biakna hmunsâng te, Aseri lim te leh milim dang te chu a tichhe vek a. A thuin a hote chuan Baal biakna maichâmte chu an chhu chhia a, a bula rimtui hâlna maichâmte pawh an tichhia a; Aseri limte leh milim dangte chu an chhu dip vek a, chûng betute thlânah chuan an phul a. Hnam dang puithiamho ruhte chu an pathian biakna maichâmah chuan an hâl a. Tichuan, Judai ram leh Jerusalem-ah khua chu an thian thianghlim ta a. Chutiang bawkin Manase leh Efraim te, Simeon leh hmâr lama Naftali ram thlengin an khawpuia mi leh an khaw ram tawh hnua mite chu a thian fai a. Hmâr lam bial Israel chhûnga maichâmte leh Aseri limte a tichhia a, milimte chu a chhu dip a, rimtui an hâlna maichâmte pawh chu a tichhe vek a, Jerusalem-ah a haw leh ta a. Hnam dang pathian biak a tihtâwpa, ram leh Tempul a tihthianghlim hnu kum sâwm leh pariat a lal kum chuan Josia chuan Tempul chhûng siam ṭha tûrin mi pathum, Azalia fapa Safana te, Jerusalem khaw awptu Maaseia te, Joahaza fapa hotu lal tak Joa te a tîr a. Levia chi, kawngka vêngtuten Tempul sum tûr an khawn ṭhin kha puithiam lalber Hilkia hnênah an hlân zêl a. Efraim mi te, Manase mi te leh Israel hmâr lam ram mite hnên aṭang leh Judai ram te, Benjamin ram te leh Jerusalem mite hnên aṭangin an khawn ṭhîn a ni. He tangka hi, he mite pathum kutah hian an pe a, anni chuan mistirite leh in sa mite kutah lung leh thing lei nân te, thil lo tlabal tawh, Juda lalten an lo ngaihsak loh, bangrel te, khanchhuk te siam ṭhat nân an pe a. Hnathawktute chuan uluk takin hna an thawk a, Levia chi, mi pali Meraria thlah Jahata leh Obadia te, Kohata thlah Zekaria leh Mesulama te chuan an ho va. Hêng Levia chite hi thil tum thiam tak vek an ni. Levia chia mi ṭhenkhat chuan thil thiartute an vêng a, hna hrang hrang thawktu an ho va. Ṭhenkhatin senso lam an lo chhinchhiah fel a, ṭhenkhatin vên hna an thawk a. Sum dahkhâwmna ata tangka an lâk chhuah chuan Lalpa dân bu, Mosia hnêna Pathian pêk kha, Hilkia chuan a chhar a. Safana hnênah, “Hei Tempul chhûngah, Dân bu ka chhar e,” a ti a, a pe a. Safana chuan lal hnênah a kalpui a, “I sawi ang zawng zawng chu kan ti zo ta. Tempula kawl ṭhat tangka chu kan la a, hnathawktute leh a enkawltute hlawhah kan pe tawh a. Hei Hilkia mi pêk, lehkhabu ka rawn keng e,” a ti a. Lal hriat tûr chuan a chhiar ta a. Lalin Dân thu an chhiar a han ngaihthlâk chuan a puan a pawtthlêr a, Hilkia te, Safana fapa Ahikama te, Mika fapa Abdona te, lehkha ziaktu Safana te, lal enkawltu Asaia te chu a ko va. “He Dân bu chungchâng thu-ah hian ka tân te, Israel leh Judai rama la dam chhun tân te Lalpa chu min va râwnsak teh u, min thlahtute chuan Lalpa thu an zâwm duh lo va, he lehkhabua tih tûr sawite chu an tih duh loh avângin kan chungah Lalpa a thinur a ni,” tiin a tîr a. Hilkia leh lal mi tirh dangte chu Tokhata fapa Saluma nupui zâwlnei Huldaii hnênah chuan an kal a, Tokhata hi Hasra fapa a ni, Saluma hi Tempula puithiam thawmhnaw enkawltu Jerusalem vêng thara awm a ni a, thil awm dân chu Huldaii an hrilh a. Ani chuan an hnênah, “ Lalpa Israel-te Pathian chuan heti hian a ti. Ka hnêna nangmahni rawn tîrtu chu hrilh rawh u. Lalpa chuan, ‘Lal hriata an chhiar chhuah lehkhabu ziala ânchhia zawng zawng kha Jerusalem leh a chhûnga chêngte chungah ka tlâktîr dâwn. Min hnâwl a, pathian dang hnênah thilhlante an hlân a, an thiltih chuan min tithinur ta a ni. Jerusalem chungah ka thin a ur êm êm a, a dai mai lo vang. Lal chungchâng erawh chu, kei, Lalpa, Israel-te Pathian hian heti hian ka ti a ni: Lehkhabu thu ziak chu i ngaithla a, i sim a, i inphahhniam ta a. Jerusalem leh a chhûnga mi ka hrem dâwn ka tih khân pawi tiin i puan i pawtthlêr a, i ṭap a. Jerusalem chu i thih hnuah chauh a ni ka hrem dâwn ni, thlamuang takin ka thihtîr ang che a, he hmun leh a chhûnga awmte chunga ka rawn thlentîr tûr thil ṭha lo zawng zawngte chu i hmu lo vang,’ a ti,” a lo ti a. Chu thu keng chuan mite chu lal hnênah an lo kîr leh a. Lal Josia chuan Judai ram leh Jerusalem-a upate chu a ko khâwm a. Puithiamte leh Levia chite nên Tempulah an kal a, mi rethei leh mi hausate pawhin an zui a. Lal chuan Tempul chhûnga Thuthlung bu an chhar chu mipui hmaah chuan a chhiar chhuak a. Lal dinna tûra ruat ban bulah chuan a ding a, LALPA hnênah thu a thlung a, a thu awiha, rilru taka tihtakzetin a dânte leh a thupêkte chu zawm a tiam a, lehkhabua thu chuang zawng zawng pawisak vek a tiam a ni. Benjamin-ho leh Jerusalem-a awm tawh phawt chu thuthlung zâwm tûrin thu a tiamtîr a. An pute Pathian nêna thuthlung lo siam tawha tih tûr awmte chu Jerusalem mite chuan an ti a. Lal Josia chuan Israel mite ram chhûnga milem tenawm tak tak chu a tichhe vek a, a dam chhûng chuan mite chu an thlahtute Pathian, Lalpa rawng a bâwltîr a. Lalpa, an pi leh pute Pathian an zui chu a pênsan lo. Lal Josia chuan Lalpa hmingin Jerusalem-ah Kalhlên kût a hmang a. Thla khatna, ni sâwm leh pali ni chuan kûtna tûr ran a talh a. Puithiamho chu Tempula an thawh tûr hna a sem a, ṭha taka thawk tûrin a fuih a, Lalpa tâna serh hran, Dân zirtîrtu Levia chite pawh hetiang hian a hrilh a: “Davida fapa Solomona in sak chhûngah Thuthlung Bâwm hi dah rawh u, zâwn sawn chhên a ngai tawh lo. In Pathian, Lalpa leh a mi Israel-te rawng in bâwl tûr a ni. A chi chi-in Tempula in awmna tûrah awm ula, in tih tûr lal Davida leh a fapa Solomonan an ruat ang kha ti ang che u. Hna in insem hunah Israel chhûngkawho ṭanpuitu tûr Levia mite ruat ṭhîn ang che u. Kalhlên Kût sa tûr berâm leh kêl in talh tûr a ni. Tûnah inthian thianghlim rawh u, an thilhlan tûrte hlanpui ula, Mosia hnêna Lalpa thupêk ang kha in unau Israel-te chuan an zawm theih nân,” a ti a. Kalhlên Kûta mipui hman atân Josia chuan ama ran rual zînga mi ngei berâm te, berâmno te leh keltê sîngthum, bâwngpa sângthum a thawh a. A miliante pawh chuan mipui te, puithiam te leh Levia chi te ei tûr an thawh bawk a. Tempul hotu puithiam lalber Hilkia te, Zekaria te leh Jehiela te chuan berâmno leh keltê sanghnih leh zaruk leh bâwngpa zathum, kût chhûnga thilhlana an hlan tûrin puithiamte chu an pe a. Levia chi hotu Konania te, Semaia te leh a unau Nethanela te, Hasabia te, Jeiela te, Jozabada te chuan berâmno leh keltê sângnga leh bâwngpa zanga, Levia chiten thilhlana an hman tûr an thawh bawk a. Kalhlên Kût hmanna tûr engkim an tihfel hnu chuan lal thu angin puithiamte leh Levia chite chu an hmun ṭheuh tûrah an awm a. Kêl leh berâm an talh zawh chuan Levia chite chuan a vun an lip a, puithiamten a thisen chu maichâmah an theh a. Hâlral thilhlana hman tûr chu chhûng tin tân Mosia Dân bu-a ziak anga an hlan tûrin an sem a. Levia chite chuan Dân angin Kalhlên kût sa chu an hem hmin a, sa thianghlim ṭhenkhat chu bêlah te, thîrbêlah te, bêlpuiah te an chhûm a, a sa chu mipui an sem a. Chumi hnu chuan anmahni leh Arona thlah puithiamte ei tûr sa an siam leh a, puithiamho khân hâlral thilhlan leh an thilhlan thau hâlna mei chu an vil zânkhua si a. Lal Davida thupêk angin Asafa te, Hemana te leh lal zâwlnei Jeduthuna te chuan thil tum mi Asafa thlahte chu an awmna hmun tûrah an awmtîr a. Tempul vêngtute tân pawh kal sawn a ngai lo, an ṭhian Levia chi, mi dangte khân Kalhlên Kût sa chu an lo buatsaihsak a ni. Lal Josia thu ang chuan Lalpa chu an bia a, tih tûr zawng zawng, Kalhlên Kût hman te, maichâma hâlral thilhlan hlan te chu an ti a. Ni ruk chhûng, Kalhlên Kût leh chhang dawidim telh loh kût chu Israel mi zawng zawngin an hmang a. Zâwlnei Samuela thih hnu kha chuan heti taka ropui hian Kalhlên Kût an hmang ngai lo. Lal Josia te, puithiam te, Levia chi te, Juda leh Israel rama awmte leh Jerusalem-a awmten Kalhlên Kût an hman ang hian an la hmang ngai lo. Lal Josia kum sâwm leh pariat a lal kum khân an hmang a ni. Lal Josian heti taka Tempul a chei hnu hian Aigupta lal Nekoa chuan Eufretis lui kamah, Karkhemis-ah, indo tûrin a sipaite a hruai a. Josia chuan lo dan a tum a. Nekoa chuan, “Nang Juda lal, he thilah hian i lo inrawlhna tûr a awm lo. Nang bei tûr chein ka lo kal lo, ka hmêlma bei tûra lo kal ka ni. Pathian chuan hmanhmawh tûrin min ti a ni, ka lamṭang a ni a, mi lo dan tum teh suh, a tichhe palh ang che,” tiin palai a rawn tîr a. Josia chuan lo beih chu a tum ta tlat a, Nekoa hmanga Pathian thu sawi chu a awih duh lo va, a inchei danglam a, Megido phaia an inbeihnaah chuan a kal ve ta a. An inbeih lai chuan Aigupta sipai thal chuan Josia chu a fuh ta a. A tawlailîr khalhtu hnênah, “Min hliam na hle mai, indona hmun ata hi min chhuahpui rawh,” a ti a. Ama tawlailîr ata chu an zâwn chhuak a, tawlailîr dang a hruaiah chuan an dah a; Jerusalem-ah an hâwn ta a. A thi a, lal thlânah an phûm a, Judai ram leh Jerusalem mite chuan an ui a, an sûn a. Zâwlnei Jeremia chuan Josia sûnna hla a phuah a, Israel zîngah chuan hla sa mi, mipa leh hmeichhiaten lal sûn hlaah an sa ṭhîn. Sûnna hla ziak khâwmna bu-ah chu hla chu a chuang. Josia thil tih zawng zawng, Lalpa a ngainatzia te, Dân thu a awihzia te, a bul aṭanga a tâwp thleng chanchin chu Israel leh Juda lalte chanchin ziakna bu-ah a chuang vek a ni. Judai ram mite chuan Josia fapa Jehoahaza chu lalah an thlang a, Jerusalem-ah hriak an thih a. Jehoahaza chu kum sawmhnih leh pathum a nihin Judai ramah a lal ṭan a, thla thum a lal hman a. Aigupta lal Nekoa chuan salah a man a, Judai ram chu, chhiah, tangkarua kg. sângthum leh zali leh rangkachak kg. sawmthum leh pali a chawitîr a. Nekoa chuan Jehoahaza u Eliakima chu Judai ram lalah a dah a, a hmingah Jehoiakima a sak tharsak a, Jehoahaza chu Aigupta ramah a hruai a. Jehoiakima chu kum sawmhnih leh panga a nihin Judai ramah a lal ṭan a. Jerusalem-ah kum sâwm leh pakhat a lal a. Lalpa, a Pathian mit hmuhah thil sual a ti ṭhîn. Babulon lal Nebukadnezara chuan Judai ram a rûn a, Jehoiakima chu a man a, khaidiata phuar chungin Babulon-ah a hâwn a. Nebukadnezara chuan Tempula thil hlu ṭhenkhat chu a hâwn bawk a, Babulon khuaa a inah a dah a. Jehoiakima thil tih zawng zawng, thil tenawm tak tak a tih te leh thil sual a tihte chu Israel leh Juda lalte chanchin ziakna bu-ah a chuang vek a ni; a aiah a fapa Jehoiakina chu a lal ta a. Jehoiakina chu kum sâwm leh pariat a nihin Judai ramah a lal ṭan a, Jerusalem-ah thla thum leh ni sâwm a lal hman a. Ani pawh Lalpa lakah thil sual a ti a. Nipui a thâwk dâwn lai vêl chuan lal Nebukadnezara a lo kal a, Babulon-ah salah a hruai a; Tempula thil hlu zawng zawng pawh a hâwn vek a. Nebukadnezara chuan Jehoiakina nau Zedekia chu Judai ram leh Jerusalem lalah a dah a. Zedekia chu kum sâwm leh pariat a nihin Judai ramah a lal a. Jerusalem-ah kum sâwm leh pakhat chhûng a lal a. Lalpa lakah thil sual a ti a; Lalpa thu thlentu zâwlnei Jeremia thu lah ngaihthlâk thamah a ngai hek lo. Zedekia chu Nebukadnezara lakah a hel ta mai a. Pathian hminga thu a tiamtîr, lalah a dah a ni si a. Luhlul a chhuah a, a sim duh lo va, Israel-te Pathian, Lalpa lam a hawi duh hek lo. Juda upa te, puithiam te leh mipui te lah chuan an vêla hnam sualho tih dân an la a, Lalpa tihthianghlim tawh Tempul chu milem biain an tibawrhbâng a. Lalpa an thlahtute Pathian chuan Tempul leh a mite chu chhan a duh avângin mipui zilh tûrin zâwlneite a tîr fo va ni. Mahse, Pathian tirhte chu an lo deusawh a, an thute lah engah mah an ngai hek lo. Zâwlneite chu an nuihzatbûr a, a tâwp a tâwpah chuan Lalpa chu pumpelh rual lohvin a thinur ta a. Chuvângin, Lalpa chuan anmahni sawisa tûrin Babulon lal chu a rawn tîr a, lal chuan Judai ram tlangvâlte chu Tempul chhûngah meuh pawh a that ta zêl a. Naupang te, tar te, a hmei a pa, hrisêl leh hrisêl lo pawh tu mah lainat a nei lo. Pathianin a kutah a pe vek a ni. Babulon lal chuan Tempul chu a rawk a, thil hlu dah khâwmte chu a la a, lal in leh milian ina thil awm zawng zawng chu Babulon-ah a hâwn vek a. Tempul leh khuaa inte chu a hâl a, khawpui kulh bangte chu a ṭhiat a. Thi bâng zawng zawng chu Babulon-ah a hruai haw a, Persia-ho an lo len thleng khân amah leh a hote bawihah an awm a. Jeremia kâa Lalpa thu sawi lâwk, ‘kum sawmsarih chhûng in ram chu a châwl dêr dâwn a ni,’ a tih kha a lo thleng ta a ni. Persia rama lal Kura a lal ṭan tirh kumin, Lalpa chuan Jeremia kâa a thu sawi kha a rawn tipuitling ta a. Lal Kura chu a thunun a, hetiang hian thu a pêktîr a, a ram chhûng hmun tina chhiar theih tûrin ziakin thu chu a thawn chhuak a: “Hei hi Persia lal Kura thupêk a ni. Lalpa, vân Pathian chuan khawvêl puma rorêltuah mi siam a. Judai ram Jerusalem-ah a tân Tempul sa tûrin min ti bawk a ni. Chuvângin, Pathian mite u, in za-in tah chuan kal rawh u, in Pathian, Lalpa chuan awmpui che u rawh se,” tiin. Persia lal Kura lal ṭan tirh kumin zâwlnei Jeremia kâa Lalpa thu lo sawi tawh chu a thlen kim theih nân; Lalpa chuan Persia lal Kura rilru chu a tiharh a, a ram pum puiah ziakin thu puan a chhuah a, hetiangin: “Persia lal Kura chuan heti hian a ti: Vân Pathian, Lalpa chuan khawvêl ram pum pui hi min pe ta a. Judai ram Jerusalem khuaah a tân in sa tûrin min ti a ni. Nangni, a mi zawng zawngte hnênah Pathian chu awm rawh se. Judai ram Jerusalem khuaah chuan haw chho ula, Israel-te Pathian, Jerusalem khuaa in biak ṭhin Lalpa Tempul chu han sa ṭha rawh u le. A mi, saltâng tu pawh ṭanpui ngai chu an ṭhenawmten tangka te, rangkachak te leh sabengtung tein ṭanpui rawh se; Jerusalem khuaa Pathian Tempula thilhlan tûr pawh pe rawh se,” tiin. Juda leh Benjamin hnam hruaitu te, puithiam leh Levia chi te leh mi dang, Pathianin an rilru a tihphûrsak te chu, Jerusalem-a Lalpa in sa tûr chuan an insiam ta a. An vêla awmte chuan tangkaraw bungbêl te, rangkachak te, thawmhnaw te, sabengtung te an pe a, chûng bâkah Tempul sak nâna an thawhlâwmte pawh an pe bawk a. Nebukadnezaran Lalpa in aṭanga bungbêl a lâk zawng zawng kha an pathian inah a dah a; chûngte chu lal Kura chuan, lal sum enkawltu Mithredata chu a lâk chhuahtîr a, an ziak chhuak a, Juda-ho zînga hotu ber Sesbazara a pe a, chûngte chu: rangkachak maihûn sawmthum, tangkaraw maihûn sângkhat; chem sawmhnih leh pakua. Rangkachak no sawmthum; tangkaraw no zali leh sâwm; bungbêl chi dang sângkhat. A vaiin rangkachak leh tangkaruaa siam no leh thil dang chi hrang chu kg. sângnga leh zali a ni a; Sesbazara leh saltâng dangte chuan chûng chu Babulon aṭangin Jerusalem-ah an chhohpui a. Saltâng tam tak chuan Babulon chu an chhuahsan a, Jerusalem-ah leh Judai ramah, mahni awm ṭhinna ṭheuhvah an haw a. Lal Nebukadnezaran a man aṭang khân Babulon-ah an chhûngin salah an awm a ni. An zînga hruaitu deuh deuhte chu: Jerubabela te, Jesua te, Nehemia te, Seraia te, Reelaia te, Mordekaia te, Bilsana te, Mispara te, Bigvaia te, Rehuma te, Baasa te an ni. Israel mi, chi hrang hrang lo kîr zât chu hetiang hi a ni: Parosa chi mi sânghnih leh za leh sawmsarih leh pahnih; Sefatia chi mi zathum leh sawmsarih leh pahnih; Ara chi mi zasarih leh sawmsarih leh panga; Pahat-Moab chi, Jesua leh Joaba thlah mi sânghnih leh zariat leh sâwm leh pahnih; Elama chi mi sângkhat leh zahnih leh sawmnga leh pali; Zatu chi mi zakua leh sawmli leh panga; Zakai chi mi zasarih leh sawmruk; Bania chi mi zaruk leh sawmli leh pahnih; Bebai chi mi zaruk leh sawmhnih leh pathum; Azgad chi mi sângkhat leh zahnih leh sawmhnih leh pahnih; Adonikam chi mi zaruk leh sawmruk leh paruk; Bigvai chi mi sânghnih leh sawmnga leh paruk; Adin chi mi zali leh sawmnga leh pali; Ater chi, Hezekia thlahte mi sawmkua leh pariat; Bezai chi mi zathum leh sawmhnih leh pathum; Jora chi mi za leh sâwm leh pahnih; Hasum chi mi zahnih leh sawmhnih leh pathum; Gibar chi mi sawmkua leh panga. Bethlehem khaw chhuak mi za leh sawmhnih leh pathum; Netofa khaw chhuak mi sawmnga leh paruk; Anathot khaw chhuak mi za leh sawmhnih leh pariat; Azmavet khaw chhuak mi sawmli leh pahnih; Keriat-jearim te, Kafira te leh Beerot khaw chhuak mi zasarih leh sawmli leh pathum; Rama leh Geba khaw chhuak mi zaruk leh sawmhnih leh pakhat; Mikmas khaw chhuak mi za leh sawmhnih leh pahnih; Bethel leh Ai khaw chhuak mi zahnih leh sawmhnih leh pathum; Nebo khaw chhuak mi sawmnga leh pahnih; Magbis khaw chhuak mi za leh sawmnga leh paruk; Elam khaw dang chhuak mi sângkhat leh zahnih leh sawmnga leh pali; Harim khaw chhuak mi zathum leh sawmhnih; Lod te, Hadid te, Ono khua te mi zasarih leh sawmhnih leh panga; Jeriko khaw chhuak mi zathum leh sawmli leh panga; Sena khaw chhuak mi sângthum leh zaruk leh sawmthum. Puithiamho, lo kîr vete chu heti hi an ni: Jesua chhûng, Jedaia thlah mi zakua leh sawmsarih leh pathum; Imera thlah mi sangkhat leh sawmnga leh pahnih; Pasura thlah mi sângkhat leh zahnih leh sawmli leh pasarih; Harima thlah mi sângkhat leh sâwm leh pasarih. Levia chi: Jesua leh Kadmiela fa, Hodavia thlah mi sawmsarih leh pali; Asafa thlah, hla sa mi, za leh sawmhnih leh pariat; Tempul pulis: Saluma thlah te, Atera thlah te, Talmona thlah te, Akuba thlah te, Hatita thlah te, Sobaia thlah te mi za leh sawmthum leh pakua. Tempul enkawltu Netin-ho lo hâw vete chu: Ziha fa te, Hasufa fa te, Tabaota fa te, Kerosa fa te, Siaha fa te, Padona fa te, Lebana fa te, Hagaba fa te, Akuba fa te, Hagaba fa te, Samlaia fa te, Hanana fa te, Gidela fa te, Gahara fa te, Reaia fa te, Rezina fa te, Nekoda fa te, Gazama fa te, Uza fa te, Pasea fa te, Besaia fa te, Asna fa te, Meunima fa te, Nefisima fa te, Bakbuka fa te, Hakufa fa te, Harhura fa te, Bazluta fa te, Mehida fa te, Harsaa fa te, Barkosa fa te, Sisera fa te, Tema fa te, Nezia fa te, Hatifa fa te. Solomona chhiahhlawh thlah te: Sotaia fa te, Hasofereta fa te, Peruda fa te, Jaala fa te, Darkona fa te, Gidela fa te, Sefatia fa te, Hatila fa te, Pokeret-hazebaima fa te, Amia fa te; Netin-ho leh Solomona chhiahhlawh thlahte chu mi zathum leh sawmkua leh pahnih an ni. Telmela khua te, Tel-harsa khua te, Kerub khua te, Adam khua leh Imer khua te aṭanga chho vete chu heti hi an ni: Hêngho hian Israel thlah an nihna chiah, an chi leh kuang an chhui thei lo; Delaia thlah te, Tobia thlah te, Nekoda thlahte mi zaruk leh sawmnga leh pahnih an ni. Hêng puithiamho hian an thlahtu tak an chhui chhuak thei lo: Habaia fa te, Hakoza fa te, Barzilaia fa te. Puithiam Barzilai-ho thlahtu Barzilaia hian Gilead mi Barzilai hmeichhia nupuiah a nei a, a puzawn chhûng hming chu an pu zâwk ta a ni. An thlahtu tak an chhui chhuah theih loh avângin puithiamah pawm an ni ta lo va. Juda zînga hotu ber ramawptu chuan, “Puithiam, Urim leh Thumim kawltu a awm hma chu Pathian hnêna thilhlan hi ei ve suh u,” a ti a. An zavai chuan mi sîngli leh sânghnih leh zathum leh sawmruk an ni. An chhiahhlawh, mipa leh hmeichhia mi sângsarih leh zathum leh sawmthum leh pasarih; Hla sa mi mipa leh hmeichhia zahnih; Sakawr zasarih leh sawmthum leh paruk, sakawr puakphur zahnih leh sawmli leh panga; Sanghâwngsei zali leh sawmthum leh panga, Sabengtung sângruk leh zasarih leh sawmhnih. Saltânghovin Jerusalem-a Lalpa Tempul hmun an lo thlen chuan an hnam hotu ṭhenkhat chuan phal takin a hmun ngaia Tempul sak ṭhat lehna tûr thilpêk an pe a. An neih ang ang chu an pe a, a vaiin rangkachak kg. zanga, tangkarua kg. sânghnih leh zariat leh puithiam hâk tûr puan za a ni. Puithiamho te, Levia chite leh mi ṭhenkhat chu Jerusalem leh a chhehvêl hnaiah hmun an bêngbel a; hla sa mi te, Tempul pulis te, Tempul enkawltu te chu khawpui hnaiah hmun an bêngbel a; Israel-ho mi dangte chuan an thlahtute awm ṭhinna khua an pan a. Thla sarih chhûngin Israel-te chu mahni awmna tûr ṭheuhvah an awm fel hman a, Jerusalem-ah an kal khâwm ta vek a. Jozadaka fapa Jesua leh a puithiam nihpui Sealtiela fapa Zerubabela leh an unaute chu an tho va; Israel-te Pathian maichâm, Pathian mi Mosia Dân bu-a ziak anga hâlral thilhlan an hlanna tûr an siam a. Chu rama mi lo awmte chu saltâng chhuakte chuan hlau bawk mah se, maichâm chu a awm ṭhinnaah khân an din leh ta a; zîngah leh tlaiah hâlral thilhlan an hâl leh ta a. Bâwkte kût an hmang a, kût chhûng chuan ni tin thilhlan tûr tuk zât, dân bu-a ziak ang chu an hlân a. Ni tina hâlral thilhlan an hlan bâkah thla thar apianga an thilhlan ṭhin te, Lalpa hminga inkhâwmpui urhsûn an neih ṭuma an thilhlan te, an mahni duh thu-a thilhlan te chu an hlân ṭan leh ta a. Thla sarihna, ni khat ni aṭang chuan Lalpa hnênah hâlral thilhlan an hâl leh ṭan a, Lalpa Tempul erawh chu a lung pawh an la phûm lo. Mite chuan an thawhlâwm a, lung chher mi te, thing mistiri te hlawh neiin an ruai a. Lebanon tlânga sidar thing, tuifinriata tawlha, Joppa khua rawn thlen tûrin Sidon leh Tura mite chu buh te, uain te, oliv hriak te an pe bawk a. Chûng chu Persia lal Kura phalna veka tih a ni. Jerusalem khuaa Lalpa in awmna ṭhin an lo thlen kum hnihna, thla hnihnaah chuan Sealtiela fapa Zerubabela leh Jozadaka fapa Jesua chuan Tempul sak leh hna chu an ṭan a; an unau dangte - puithiam te leh Levia chi te, saltâng chhuak zawng zawngte pawh chu Jerusalem-ah an lo kal khâwm a, Levia chi kum sawmhnih chin chung lam chu Tempul sak enkawltuah an ruat a. Levia chi Jesua chu a fate leh an laichînte nên, Kadmiela leh a fate nên, Hadavia thlahte nên chuan Lalpa in satu hotu-ah an ruat a. Levia chi, Henadada leh a fate leh an unaute pawh chuan, an ṭanpui bawk ṭhîn. Lalpa Tempul tân lung an phûm dâwn ni chuan, puithiamho chuan an puithiam kawr an inbel a, tawtawrâwt an keng a, Israel lal Davida remruat angin Asafa thlah Levia chite chu Lalpa fak hla sa tûrin dârbenthekte nên an lo thawk bawk a. Lalpa chu an fak a, lâwmthu an hrilh a, hla sa-in an inchhâwn a; “Ani chu a ṭha si a, Israel-te chungah ngîl a nei kumkhua dâwn a ni,” an ti a. Lalpa in sakna tûr lung an han phûm chuan Lalpa fakin mipui zawng zawng chu an au dur dur a. Upaho, puithiamte leh Levia chi tam tak leh hnam hruaitute, Tempul a din lai hmu phate erawh chuan Tempul sakna tûr lung an phûm an han hmuh chuan ring takin an ṭap a, mi tam tak erawh chu lâwmin an au va. Lâwma au thâwm leh lungchhiaa ṭap thâwm chu hriat hran hleih theih pawh a ni lo, an au ring êm a, hla tak aṭang pawhin an thâwm chu a hriat theih a ni. Juda leh Benjamin thlah ertute chuan, saltâng kîr lehten Israel-te Pathian, Lalpa tân Tempul an sa ṭha tih an hriat chuan Zerubabelâ leh hnam hruaitute hnênah an lo kal a, “Tempul saknaah hian kan tel ve ang e; in biak Pathian bawk hi kan bia a, Asuria lal Esar-hadonan hêng laia awm tûra min hâwntîr hnuah phei chuan a hnênah hlîr inthawina pawh kan hlân ṭhîn a ni,” an rawn ti a. Zerubabela te, Jesua te leh hnam hruaitu te chuan, “Kan Pathian, Lalpa Tempul hi min sakpui a ngai lo ve; keimahniin kan sa mai ang. Babulon lal Kuran thu min pêk angin,” tiin an chhâng a. Chûng lai rama mi lo awmte chuan Juda-te in sa chu an tibuai ta a. Persia sawrkâr mite chu an hna tibahlah tûrin an tham a. Chutiang chuan Kura lal chhûng zawng Daria a lo lal thleng khân an tibuai a ni. Ahasuera a lo lal phei kha chuan an hmêlma, Jerusalem leh Judai rama awmte chuan ziak meuhvin an hêk a. Artazerzia kha Persia rama Babulon lal a lo nih khân Bislama te, Mithredata te leh Tabeela te chuan lal hnênah ziakin an hêk bawk a, an hêkna lehkha chu Aramaik ṭawngin, Aramaik hawrawpa ziak a ni. Ramawptu Rehuma leh chu ram ziaktu Simsaia pawhin lal Artazerzia chu Jerusalem mite chungchâng hetiangin lehkha an thawn bawk: Ramawptu Rehuma te, Ziaktu Simsaia te, an hna thawhpui, rorêltute leh sawrkâr hna thawk dang - Babulon bial Erek leh, Elam bial Susa khaw mite leh, Asurbanipal ropuia leh thiltitheian an in leh lo aṭanga Samaria khua leh Eufretis lui khawthlang lama a awmtîrte hminga an lehkha ziak chu hetiang hi a ni: “Lal Artazerzia chu, a chhiahhlawh Eufretis lui khawthlang lama awmte chuan chibai kan bûk a che. Juda-ho, i ram hmun hrang hrang aṭanga lo kal, Jerusalem-a awm tâte chuan khaw luhlul tak leh hel hmang tak chu an din leh dâwn a; a kulh bang an rem tawh a, an sa zo mai dâwn tih i hriat kan duh a ni. Ka pu, he khua hi din leh a niha, a kulh bangte an rem zawh chuan mite chuan chhiah an pe duh lo vang che a, leiman leh thil dang an chawi duh lo vang a, lal sum tûr a kiam hle ang tih lal chuan hre teh se. Lal zârzotute kan ni a, chutianga lal tâna thil ṭha lo chu thleng lo se tiin lal chu hetianga ti tûrin kan ngên a che. I pate thil hlui chhinchhiahna chu zawn chhuahtîr mah teh, he khawpuia mite hi mi tihmawh tak an ni a, hmânlai aṭang tawhin lal leh ramawptute tân awp an khirh êm êm ṭhîn a ni; chuvângin alâwm khua an chhut chhiat vek ni. He khua hi an sak ṭhat leha, a kulh bangte an rem zawh chuan Eufretis khawthlang lam ram hi lal chuan a thunun thei lo mai ang tih kan ring tlat a ni,” tiin. Lal chuan hetiang hian a chhâng a: “Ramawptu Rehuma te, Ziaktu Simsaia te, an thawhpui Samaria-a awm leh Eufretis lui thlang lama awmte hnênah: Lehkha in rawn thawn chu fiah takin kan hriatah an chhiar a. Chanchin ziaknate chu chhui tûrin ka han ti a; hmânlai aṭang tawhin Jerusalem khua chu an lalte lakah hel an chîng a; khuaah chuan hel chîng, buaina chawk chhuak peih tak tak an awm ṭeuh a ni. Lal chak tak takte chuan Eufretis khawthlang lam ramahte chuan ro an rêl a, chhiah te, leiman te an chawitîr ṭhîn. Thu leh awm hma chu hêng mite hi khaw din hna titâwp tûrin thu pe rawh u. Muangchâng lovin khap vat rawh u, lal tâna thil ṭha lo zual a thlen loh nân.” Rehuma te, Simsaia te leh an thawhpui te hriata lal Artazerzia lehkha an chhiar zawh chuan an kal nghâl a, Juda-ten khaw din an tum chu an han titâwp ta a. Persia lal Daria a lo lal kum hnihna thlengin Tempul sak pawh an chawlhsan a. Chutih hun lai chuan zâwlnei pahnih Hagaia leh Ido-a fapa Zakaria chuan Israel-te Pathian hmingin Jerusalem leh Judai rama awm Juda-ho hnênah thu an sawi a. Sealtiela fapa Zerubabela leh Jozadaka fapa Jesua chuan Jerusalem-a Pathian in chu an sa ṭan leh ta a; zâwlnei pahnihte pawh chuan an ṭanpui a. Eufretis khawthlang lam ram awptu Tatenaia te, Sethar-bozenaia te leh an thawhpuite chu Jerusalem-ah an lo kal vat a. “Tu nge Tempul saa chei tûrin phalna pe che u?” an rawn ti a. Tempul satute hming pawh an zâwt a. Pathian chuan Juda hotute chu a vêng a; sawrkâr hotute chuan lal Daria hnêna lehkha thawna, a chhânna an hmuh hma chu engtia tih mah an tum lo. Hetiang hian lehkha chu an thawn a: “Lal Daria chuan thlamuang takin ro rêl reng rawh se. Lal chuan hei hi hria se kan ti a ni. Judai ramah kan han kal a; Pathian ropui tak Tempul chu lung lian pui pui hmangin an lo sa ṭha leh mêk a; thing tlâwn khanchhukte bangah an kham a, an sa uluk hle, hna pawh an thawk chak viau a ni. An hruaitute chu, tu nge Tempul sak ṭhata, chei leh phalna petu tih kan zâwt a. An hruaitute hming pawh i hriat ve atân kan zâwt bawk a. Anni chuan, ‘Lei leh vân Pathian chhiahhlawh kan ni a, Israel lal ropui takin tûn hma rei tak tawha a saka, a chei Tempul chu kan sa ṭha leh a ni. Kan pate chuan vân Pathian chu an tithinur a, Babulon lal, Kaldai mi, Nebukadnezara kutah a pe a, ani chuan he in hi a tichhia a, mite chu Babulon-ah a hruai a. Babulon-ah lal Kura a lal ṭan tirh khân he Pathian in hi sak leh tûr thu a pe a ni. Jerusalem Tempul aṭanga Nebukadnezaran a lâk, Babulon ram Tempula a dah tâk rangkachak leh tangkaruaa siam bungbêlte chu lal Kura chuan Babulon Tempul aṭang chuan a la chhuak a, ramawptu atâna a ruat Sesbazara kutah a hlân a, a hnênah, ‘Hêng bungbêlte hi la la, Jerusalem Tempulah chuan han dah rawh, Pathian in chu a hmun ngaiah han sa rawh u,’ a ti a. Sesbazara chu a lo kal a, Jerusalem-a Pathian in dinna tûr lung chu a phûm a, a in sak chu chhunzawm zêl a ni a, kan la zo lo a nih hi,’ tiin min chhâng a. Chuvângin lalin ṭha a tihzâwng a nih chuan Babulon khuaa lal thil hlui chhinchhiah dahna hmunah hetiang thupêk, Jerusalem khuaa Pathian in sa ṭha tûr hian lal Kura chuan thu a lo pe rêng em ni, zawn chhuah ni teh se. Tin, he thila lal duhzâwng chu min rawn hrilh teh se,” tiin. Lal Daria chuan thu a pe a, Babulon khuaa lal thil hlui dahna chu a zawntîr a. Media biala Ekbatan khuaah zâwk chuan he thu chuanna hi an hmu chhuak a: “Lal Kura chuan a lal ṭan tirh kumin Jerusalem Tempul chu inthawina leh hâlral thilhlan hâlna hmun atân sak ṭhat tûr thu a pe a ni. Tempul chu tawng sawmruka sâng ni sela, tawng sawmruka zau ni bawk rawh se. Lung lian pui pui thuah thumin rem ni se, thingphel thara thuah tûr a ni; a senso hi lal sum aṭanga pêk ni rawh se. Jerusalem Tempul aṭanga rangkachak leh tangkaraw bungbêl zawng zawng, lal Nabukadnezaran Babulon-a a rawn hawnte kha tûn hmaa a awmna ṭhîn Jerusalem Tempulah dah kîr leh tûr,” tiin lal thupêk chu an lo ziak a. Lal Daria chuan hetiang hian a chhâng a: “Eufretis khawthlang lam ram awptu Tatenaia te, Sethar-bozenaia te leh an thawhpui Eufretis thlang lama awm te u: Tempul chu han hnaih suh u, an sa ṭha lai chu tibuai hek suh u. Judai ram awptu leh Juda hruaitute chuan Pathian Tempul chu a awmna ngaiah sa ṭha leh rawh se. Juda hotuten Pathian in an sa ṭha chu nangni pawhin ṭanpui rawh u; an hna hi a bahlah loh nân Eufretis khawthlang lama chhiah lâk, lal chanpual tûr aṭangin an senso tûr lo pe zat zat ang che u. Ni tina an mamawh bâwngtuai te, berâmchal te, berâmno te vân Pathian tâna hâlral thilhlana an hlan tûr chhangphut te, chi te, uain te, oliv hriakte nên Jerusalem puithiamte sawi apiang chu pe zêl ang che u. Tichuan, an Pathian lâwmzâwng thilhlan an hlân thei ang a, kei leh ka fate tân malsâwmna min dîlsak dâwn nia. He thupêk hi awih duh lo an awm chuan a in chung inchhun chu pawh dawha, a hmâwr lehlam zuma, chu chuan a taksa chu chhun tlang tûr a ni; a in chu ṭhiata, bawlhhlawh dah khâwma chantîr tûr thu ka pe nghâl a ni. He thupêk hi awih lova Tempul chu tihchhiat tum hnamte leh lalte chu, amah chibai bûkna hmuna Jerusalem khua thlangtu chuan paihthla rawh se. Kei Daria hian thu ka pêk tawh hi, zâwm thlap rawh u,” tiin. Ramawptu Tatenaia te, Sethar-bozenaia te leh an thawhpui te chuan lal thupêk ang thlap chuan engkim an ti a. Zâwlnei Hagaia leh Zakaria chuan an fuih bawk a. Juda hruaitute Tempul sa chu an chak hle mai. Pathianin thu a pêk ang leh Persia lal Kura te, Daria te, Artazerzia te pawhin thu an pêk angin Tempul chu an sa zo ta a. Lal Daria lal kum rukna Adar thla, ni thum niin an sa zo ta a. Israel mi, puithiam te, Levia chi te, saltâng lo kîr leh zawng zawng chuan Tempul chu hlim takin an hawng a. A hawn ni chuan bâwngchal za, berâmchal zahnih, berâmno zali hâlral thilhlanah an hlân a. Israel hnam hming kimin sual thawina kêlpa sâwm leh pahnih an hlân bawk a. Mosia dân bu-a ziak angin puithiamte leh Levia chite chu Tempula an hna tûr an sem felsak bawk a. A kum leh thla tîr, ni sâwm leh pali ni chuan saltâng lo haw lehte chuan Kalhlên kût an hmang a. Puithiamte leh Levia chite chu an inthian thianghlim tlâng tawh a, an za chuan an thiang a ni. Saltângte chu Kalhlên kût berâmno an talhsak a, a ṭhen chuan puithiam leh Levia chi dangte chu berâmno an talhsak bawk a. Saltâng lo haw Israel-te leh chu rama hnam dang bawlhhlawhna ata inthiarfihlîma, Lalpa Israel-te Pathian pawmtute chuan an ei ta a. Chhang dawidim telh loh kût ni sarih chu hlim takin an hmang a. Lalpa chuan a tilâwm a ni; Asuria lal thinlung pawh a tihmensak a, Israel-te Pathian, an Pathian in sakna pawh nasa takin a pui a ni. Kum tam fe hnuah Artazerzia chu Persia ram lal a lo nih khân, mi pakhat Seraia fapa, Ezra pawh Jerusalem-ah a lo chho va. Ezra chu Seraia fa, Azaria fa, Hilkia fa, Saluma fa, Zadoka fa, Ahituba fa, Amaria fa, Azaria fa, Meraiota fa, Zerahia fa, Uzia fa, Bukia fa, Abisua fa, Finehasa fa, Eleazara fa, Puithiam lalber Arona fa a ni. He mi, Ezra hi, Babulon aṭangin Jerusalem-ah a lo chho ve a, Israel-te Pathian, Lalpa pêk Mosia Dân hre tak a ni. Lalpa, a Pathian chuan a awmpui avângin a duh apiang lal chuan a phalsak a. Artazerzia lal kum sarih kum thla khatnaah chuan Israel mi puithiam te, Levia chi te, Tempul pulis te leh Tempul enkawltu Netin-ho te leh mi ṭhenkhat te nên Jerusalem-ah an chho va. Artazerzia lal kum sarihna, thla khatna ni khat ni-in Babulon an chhuahsan a, Pathianin a awmpui a; thla ngana ni khat ni chuan Jerusalem an thleng a. Ezra chuan Pathian dân chu a dam chhûnga zir tûrin a inpe a, a tiha tihin thuruatte leh awm dân tûrte chu Israel mite zirtîr a châk hle a ni. Lal Artazerzia chuan Ezra chu he lehkha hi a kentîr a; Ezra chu lehkha thiam, Israel-te hnêna Lalpa thupêkte leh Israel-te tâna a thuruatte hre tak a ni. “Lalte lal Artazerzia chuan puithiam Ezra, Vân Pathian Dân hretu hnênah: Ka ram chhûnga Israel mi, puithiamte leh Levia chite nên, a duh apiang Jerusalem khuaa an chhoh ka phal e. Kei leh thu min râwntu pasarihte chuan Jerusalem leh Judai rama thil awm dân en thlithlai tûrin kan tîr che a ni, Pathian Dân i kuta kawltîr chu an zâwm ṭha meuh em tih te i en dâwn nia. Kei leh thu min râwntuten, Israel-te Pathian, Jerusalem-a Tempul neitu tân tangka leh rangkachak kan pêkte hi i keng dâwn nia. Babulon biala tangka leh rangkachak thawhlâwm khawn zawng zawng te, Israel mite leh an puithiamten Jerusalem khuaa an Pathian Tempul sak nâna an thilpêk te pawh i keng dâwn nia. “Tangka chu uluk takin hmang la, bâwngpa te, berâmchal te, berâmno te, chhangphut te, uain te leh oliv hriak te lei la, Jerusalem Tempula awm maichâmah chuan hlân ang che. Tangka leh rangkachak in hman bâng chu, nang leh i chipuite chuan in Pathian duhzâwng anga ṭûl in tihna apiangah hmang ang che u. Tempula hman tûr bungbêl ka pêk zawng zawng che u kha Jerusalem-a in Pathian hnênah chuan hlân ang che. Tempula hman tûr thil dang in mamawh chuan a leina tûr chu lal sum aṭangin la mai ṭhîn ang che u. “Kei, Artazerzia hian, thu ka pe a che u: Eufretis lui thlang lam ram biala lal tangka vawngtu chuan puithiam Ezra, vân Pathian Dân chungchânga mi thiam hi, a dîl apiang lo pe nghâl vat ang che u. Tangkarua kg. sângthum leh zali chin, chhangphut kg. sîngkhat chin, uain litar sânghnih chin, oliv hriak litar sânghnih chin leh chi a ṭûl zât zât in lo pe zêl tûr a ni. Vân Pathianin a Tempul atân a phût ang chiah chu in pe zêl tûr a ni, kan ram leh kan fate chungah a thinur tûr a ni lo. Puithiam te, Levia chi te, hla sa mi te, Tempul pulis te, Tempul enkawltu te, Tempula cheho rêng rêng lakah chhiah eng mah la suh u. “Tin, nang Ezra, i Pathianin finna a pêk che chu hmang la, Eufretis lui khawthlang lam biala awm, in Pathian dân zâwm duhtute tân rorêltute siam la, anmahni awptu tûr mi ruat ang che, a la hre lo apiangte chu in Pathian Dân chu zirtîr la, in Pathian Dân zâwm duh lotu emaw, ram dân zâwm duh lotu emaw tawh phawt chu hrem nat hle zêl tûr a ni; tihhlum emaw, ram ata hnawh chhuah emaw, a thil neih chhuhsak emaw, lung ina khungin emaw hrem tûr a ni,” tiin. Ezra chuan, “ Lalpa, mi thlah lotu chu fak rawh u, Jerusalem-a awm Lalpa in chei ropui nân lal thinlung heti tak hian a tithilphal a. Lal leh a thurâwntute chu ka chungah ngîl a neihtîr a, hotu lian dangte pawhin min duhsak a; Lalpa, ka Pathian chuan min tihuai a, Israel hnam hruaitu tam tak ka ruala haw tûrin ka thlêmthlu thei a ni,” a ti a. Hêng hi Israel hnam, Babulon sala tâng, lal Artazerzia lal laia Ezra ruala Jerusalem-a hawte chu an ni: Finehasa thlahte zînga mi Gersoma te; Ithamara thlahte zînga mi Daniela te, Davida thlahte zînga mi Sekania fa Hatusa te. Parosa thlahte zînga mi Zakaria, mi za leh sawmnga nên (an thlah chanchin ziakna bu a awm). Pahat-moaba thlahte zînga mi Zerahia fa Eliehoenaia, mi zahnih nên. Zatua thlahte zînga mi Jahaziela fa Sekania, mi zathum nên. Adina thlahte zînga mi Jonathana fa Ebeda, mi sawmnga nên. Elama thlahte zînga mi Athalia fapa Jesaia, mi sawmsarih nên. Sefatia thlahte zînga mi Mikaela fa Zebadia, mi sawmriat nên. Joaba thlahte zînga mi Zehiela fa Obadia, mi zahnih leh sâwm leh pariat nên. Bania thlahte zînga mi Josifia fa Selomita, mi za leh sawmruk nên. Bebaia thlahte zînga mi Bebaia fa Zekaria, mi sawmhnih leh pariat nên. Azgada thlahte zînga mi Hakatana fa Johanana, mi za leh sâwm nên. Adonikama thlahte zînga mi: Elifeleta te, Jeuela te, Semaia te, mi sawmruk nên (anniho hi a hnu deuhva lo haw ve an ni). Bigvaia thlahte zînga mi Uthaia leh Zakura, mi sawmsarih nên. Ahava khaw bula tuikawng kamah chuan saltâng lo chhuakte chu ka ko khâwm a, ni thum chhûng kan châm a. Saltâng chhuakho zîngah chuan puithiam chu an lo awm a, Levia chi erawh chu an awm lo. An hotu pakua, Eleazara te, Ariela te, Semaia te, Elnathana te, Jariba te, Elnathana te, Nathana te, Zekaria te, Mesulama te chu ka ko va, zirtîrtu Joiariba leh Elnathana pawh ka ko va. Kasifia hmuna an hotu ber Ido-a leh Tempula a thawhpuite hnênah Pathian rawngbâwl tûr, Tempula che thei tûr mi rawn zawng tûrin chûng mite chu ka tîr a. Pathianin min khawngaih a, mi fel tak Serebia, Levia chi, Mahlia thlah an rawn tîr a; a fate leh a unaute mi sâwm leh pariat an lo kal tel ve a. Meraria thlah Hasabia leh Jesaia pawh an chhûngte mi sawmhnih nên an rawn tîr bawk a. Chûng mite bâkah chuan Tempul enkawltu Netin-ho mi zahnih leh sawmhnih an rawn tîr tel bawk a; chûngho thlahtute chu lal Davida leh a hote khân Levia-ho ṭanpuituah an dah a nih kha, an hming ziakna bu pawh a la awm vek a ni. Ahava khaw bula tuikawng kamah chuan kan zaa tân chaw nghei tûr thu ka puang a; kan Pathian hmaa inphahhniamin kalkawnga min hruaia, kan thil neih leh kan fate nên min vêng tûrin kan ṭawngṭai a. ‘Kan Pathian chuan amah ringtu apiangte chu mal a sâwm ṭhîn a, amah hawisantute erawh chu a lâwm lo va, a hrem ṭhîn’ tiin lal chu ka lo hrilh ṭhin avângin kalkawnga râl laka min vêngtu tûr sakawr chungchuang sipai rual ka dîl zak a ni. Tichuan, chaw kan nghei a, min vêng tûrin Pathian hnênah kan ṭawngṭai a, kan ṭawngṭaina chu a rawn chhâng ta rêng a. Puithiam zînga hotu deuh deuh Serebia te, Hasabia te leh mi dang sâwm ka thlang chhuak a; lal leh a thurâwntute, a miliante leh Israel miten Tempula hman tûr tangkarua te, rangkachak te leh bungbêl an pêkte chu ka bûk chhuak a, puithiamte hnênah chuan ka sem a: Tangkarua chu kg. sînghnih leh sânghnih a ni, tangkaraw bungbêl za, kg. sawmsarih bûk, rangkachak chu kg. sângthum leh zali, rangkachak maihûn sawmhnih, kg. riat leh tlem a rit; dâr chawhtawlh mawi tak pahnih, rangkachak maihûn tluka hlu a ni. An hnênah, “ Lalpa tâna serh hran in ni, hêng bungbêlte pawh hi bungbêl thianghlim an ni; hêng thil thlâwn pêk tangkarua te, rangkachak te hi Lalpa, in Pathian tâna pêk a ni. Vêng ula, kawl ṭha rawh u; Jerusalem-a Lalpa in pindan pakhata puithiam leh Levia chi hotute leh Israel hnam hotute hnêna in hlan hunah in bûk leh tûr a ni,” ka ti a. Tichuan, puithiamte leh Levia chite chuan tangkarua te, rangkachak te leh bungbêl te chu Jerusalem Tempula ken tûr chuan an la ta a. Thla hmasa ber ni sawmhnih ni chuan Ahava tuikawng chu Jerusalem pan tûrin kan chhuahsan a. Kan kalnaah chuan hmêlma min rawn bei tûr lakah te, min châng rutute lakah te kan Pathian chuan min vêng zêl a. Jerusalem kan thlen chuan ni thum kan hahchâwl a. A ni li ni chuan Tempulah kan kal a, tangkarua te, rangkachak te, leh bungbêl kan ken te chu kan bûk chhuak a, Uria fapa puithiam Meremota kutah kan hlân a. Finehasa fapa Eleazara leh Levia chi mi pahnih, Jesua fapa Jozabada leh Binuia fapa Noadia pawh an awm ve a. Engkim kan chhiar a, kan bûk vek a, kan chhinchhiah vek a ni. Saltâng lo haw zawng zawng chuan Israel Pathian hnênah hâlral thilhlan an hlân ṭheuh va, Israel hnam hming kimin bâwngpa sâwm leh pahnih, berâmchal sawmkua leh paruk leh berâmno sawmsarih leh pasarih; sual thawi nan kelpa sawm leh pahnih an hlân a. Chûng sa zawng zawng chu Lalpa tân hâlral vek a ni. Lalin lehkha a kentîr pawh chu Eufretis lui khawthlang bial ram awptu leh mi lian dangte chu an entîr a; anniho chuan Tempul sakna leh Pathian biaknaah mipuite an ṭanpui ta zêl a. Chûng thil chu kan tih zawh chuan Israel hotute chu an lo kal a, “Israel mite hian, puithiam leh Levia chite pawhin an chhehvêl hnam Amon te, Moab te, Aigupta mi te, Kanan mi te, Hit mi te, Periz mi te, Jebus mi te, Amor mite lak aṭanga inthiarfihlîm lovin thil tenawm an tih ṭhin chu an ti ve zêl mai. Anmahni leh an fate pawhin, hnam dang an nei a, chi thianghlim chu an tidal ta a. Hnam hruaitute leh hotute hi a ti hmasa sa an ni lehnghâl a,” an rawn ti a. Chu thu chu ka han hriat chuan pawi ka ti êm êm a, ka silhfênte ka pawtthlêr a, ka sam leh khabehmul ka tikawlh a, hrilhhai deuhvin ka ṭhu ta reng a. Lungngai takin tlai hâlral thilhlan an hâl thlengin ka ṭhu a, saltâng kîr lehte khawsak pawlawh êm avânga Israel-te Pathian thu sawi hlau apiang chuan min rawn pan khâwm a. Tlai lam hâlral thilhlan an hlan lai chuan chaw ngheia ka ṭhu chu ka tho va, ka silhfên thlêrte chu ka la inbel zêl a, ṭawngṭaiin ka ṭhingṭhi a, Lalpa, ka Pathian lamah chuan ka bân ka phar a. “Aw ka Pathian, i lam lo hawi hi ka zak a, ka hmai pawh a sen ṭâwn ṭâwn a ni. Kan sualna intiang khâwm chuan kan lu a khûm a, vân a tawng tâk hial hi. Kan pate hun aṭanga tûn thlengin i mite hi kan demawm hle a ni. Kan sual avângin kan lalte leh kan puithiamte nên hnam dang lalte kutah min pe a, an duh leh min talh a, an duh leh min rawk a, salahte min man a, vawiin thlengin kan mualpho let dêr a nih hi. “Aw Lalpa kan Pathian, nangin min lainat a, heta awm chhunte hi bawih ata kan chhuah i phal a, rei lo tê chhûng chu i Hmun Thianghlimah hian min awmtîr a, mi tihlimin sala kan awm nun ngui chu mi tihharhsak hi. Bawih kan ni a; mahse, kan Pathian hian bawiha kan awm reng zawng a phal lo va ni. A zârah Persia lal chuan min khawngaih a, kan Pathian in sa tûrin min tiphûr a, a chhe tawh chu din leh min phalsak a, Judai ram leh Jerusalem-ah him takin min awmtîr ta a ni si a. “Aw Pathian, heti hi a ni si a, eng nge kan sawi tâk ang le? I thupêkte kan zâwm duh lo va, i chhiahhlawh zâwlneiten, ‘In ram neih tûr chu a rama awmte bawlhhlawhna avâng leh thil tenawm tak tak an tih ṭhin avângin, a kil tâwp aṭanga a lehlam tâwp thlengin a bawlhhlawh a ni. Chuvângin, hêng mite nên hian inneih pawlh suh u, in fate pawh nupui pasalah innei suh se; inbe rem suh ula, an ṭhatna tûr eng lai mahin tihsak suh ang che u; tichuan, in chak ang a, rama thil ṭha haw chu in tlân ang a, in thlahten an rochung zêl thei ang’ tiin min hrilh min hrilh a ni. “Kan sualna avâng leh kan bawhchhiatna avânga hrem kan tuar tawh hnu pawh hian kan phu anga nasain, nang kan Pathian hian, min hrem lo tih kan hria, a ṭhen chu min la zuah a nih hi. I thupêk chu engtin nge kan ngaihthah theih tawh anga, hêng thil tenawm tiho nên hian kan inneih pawlh theih ang? Pakhat mah thi bâng awm lova min tichhe khawpin i thinur hial dâwn lâwm ni? Aw Lalpa, Israel-te Pathian, nang chu i dik a; mahse, tlêm zawng min la zuah hrâm hi. Ngai teh, kan sual thupha kan chawi a nih hi, tu mah i hmaa ding tlâk kan awm lo,” ka ti a. Chutia Ezra chu sual thupha chawia ṭap chunga Pathian hmaa bawkkhupa a ṭawngṭai laiin Israel mi tam tak, nu te, pa te leh naupang te a bulah chuan an lo pung khâwm a, an ṭap ve ta tlawk tlawk a. Elam chi zînga mi Jehiela fapa Sekania chuan Ezra hnênah, “Kan Pathian hawisanin hnam dang, he rama mi, nupuiah te kan lo nei ngei tak a; mahse, Israel-te zîngah chuan kan la insiam ṭha leh thei alâwm. Kan Pathian hmaah hêng kan nupuite leh kan fate hi hnawh chhuah i tiam tlat ang u. Nang leh kan Pathian thupêk awihho thu ang zêlin kan ti ang a, Pathian thu chu kan zâwm ang e. Tho teh, i kutah engkim kan dah e, i lamah kan ṭang zêl ang, intipaukhauh la, tih tûr tûr chu tifel mai rawh,” a ti a. Ezra chu a tho va, puithiamte, Levia chite leh Israel hotute chu chutianga ti ngei tûr chuan thu a tiamtîr a, an tiam ta a. Ezra chu Pathian in ata chu a chhuak a, Eliasiba fapa Jehohanana awmna pindanah chuan a kal a, saltâng chhuakho sualna avânga pawi tiin zânkhuain chaw a ei duh lo va, tui pawh a in duh lo. Hnam hruaitute chuan Jerusalem leh Judai rama awm, saltâng chhuak zawng zawng chu, Jerusalem-ah lo kal tûrin an chah khâwm a. “Ni thum chhûnga lo kal lo chu a neih zawng zawng chhuhsak a ni ang a, Israel mite zînga a tel ve phal a ni lo vang,” an ti a. Ni thum chhûng chuan an lo kal khâwm a, thla kuana ni sawmhnih ni chuan Juda leh Benjamina thlah rama awm zawng zawng chu Jerusalem-ah an lo kal a, Tempul tualah chuan an lo pung khâwm a. Ruah a sûr chiam a, an inkhâwmna chu a pawimawh si a, khaw vâwt avângin an khûr an khûr hlawm a. Puithiam Ezra chu a ding chhuak a, an hnênah, “In uire a, Israel-te suahsualna belhchhahin nupuiah hnam dang in nei a. Lalpa, in pate Pathian hnênah in sual thupha chawi ula, a duhzâwng ti rawh u; he rama mite lakah hian inthiarfihlîm ula, hnam dang mi in nupuite chu hnawt chhuak rawh u,” a ti a. Pungkhâwmho zawng zawng chuan ring takin an chhâng a, “I sawi ang chuan kan ti ang a. Hei, mi kan tam a, ruah lah a tam si, pâwnah kan ding reng hlei thei ta lo; thil tisual kan tam hle si a, ni hnih khat thila tihfel mai chi a ni chuang lo vang. Kan hotu ṭheuhte hi Jerusalem khuaah châmbâng sela, hnam dang nupui neite chu hun ruatah Jerusalem-ah lo kal sela; helaiah rorêltute leh hotute nên an chungchâng lo rêl rawh se; tichuan, he thil chungchânga kan chunga Pathian thinurna chu a reh dâwn nia,” an ti a. Chu thu chu Asahela fapa Jonathana te, Tikva fapa Jahzeia te chauhvin an hnial a. Levia chi Mesulama leh Sabethaia te pawhin an remti lo. Saltâng hawte chuan an thu rawt chu ṭha an ti a, puithiam Ezra chuan chi tin hotute zîng aṭangin mi a ruat a, an hmingte a ziak vek a. Thla sâwmna, ni khat ni chuan an thawk ṭan a, thla thum chhûngin hnam dang nupui nei zawng zawng chungchâng an chhût fel hman a. Puithiamho zînga hnam dang nupui lo neite chu hêngte hi an ni: Maaseia te, Eliazara te, Jariba te, Gedalia te hi; anniho hi Jehozadaka fa Jesua leh a unaute fa an ni. An nupuite chu mâk ngei an tiam a, an sual man thilhlanah berâmchal an hlân a. Imera fate: Hanania te leh Zebadia. Harima fate: Maaseia te, Elija te, Semaia te, Jehiela te leh Uzia. Pasura fate: Elioenaia te, Maaseia te, Ismaela te, Nathanela te, Jozabada te leh Elasa. Levia thlah zînga hnam dang nupuia neite chu: Jozabada te, Simeia te, Kelaia te (Kelita an ti bawk), Pethahia te, Juda te leh Eleazara te an ni. Hla satute zînga hnam dang nupuia neite chu: Eliasiba; Tempul pulis zîngah Saluma te, Telema te leh Uria. Israel mi dang, hnam dang nupuia neite chu: Parosa thlahte zînga mi: Ramia te, Izia te, Malkija te, Mijamina te, Eleazara te, Malkija te leh Benaia. Elama thlahte zînga mi: Matania te, Zekaria te, Jehiela te, Abdia te, Jeremota te leh Elija. Zatua thlahte zînga mi: Elioenaia te, Eliasiba te, Matania te, Jeremota te, Zabada te leh Aziza. Bebaia thlahte zînga mi: Jehohanana te, Hanania te, Zabaia te leh Athlaia. Bania thlahte zînga mi: Mesulama te, Maluka te, Adaia te, Jasuba te, Seala te leh Jeremota. Pahat-moaba thlahte zînga mi: Adna te, Kelala te, Benaia te, Maaseia te, Matania te, Bezalela te, Binuia te leh Manasea. Harima thlah zînga mi: Eliezara te, Isija te, Malkija te, Semaia te leh Simeona. Benjamina te Maluka te leh Semaria. Hasuma thlahte zînga mi: Matenaia te, Matata te, Zabada te, Elifeleta te, Jeremaia te, Manasea te leh Simeia. Bania thlahte zînga mi: Maadaia te, Amrama te, Uela te, Benaia te, Bedeia te, Keluhia te, Vania te, Meremota te, Eliasiba te. Matania te, Matenaia te, Jaasua te, Bania te, Binuia te, Simeia te, Selemia te, Nathana te, Adaia te, Maknadebaia te, Sasaia te, Saraia te, Azarela te, Selemia te, Semaria te, Saluma te, Amaria te leh Josefa. Neboa thlahte zînga mi: Jeiela te, Matithia te, Zabada te, Zebina te, Jadaia te, Joela te leh Benaia. Hêngho zawng hian nupuiah hnam dang an lo nei a, fapate pawh an lo nei hman tawh a ni. Hei hi Nehemia thiltih chanchin ziakna bu a ni. Lal Artazerzia lal kum sawmhnihna, Kislev thla chuan lal khawpui Susa khuaah ka awm a. Ka unau zînga mi Hanania leh mi dang ṭhenkhat Jerusalem aṭangin an lo kal a, Juda saltâng, Babulon aṭanga hâwng chanchin leh Jerusalem khaw chanchin ka lo zâwt a. “Judai rama haw, saltâng chhuakho chu an rethei hle mai; an vêla awm hnam dangte chuan an hmusit êm êm a ni. Jerusalem kulh bang pawh a chim chhe vek a, a kawngkhârte pawh a kâng zo,” an ti a. An thu ka hriat chuan ka ṭhu a, ka ṭap a, lungngai takin ni tam fe chu ka awm a, chaw ngheiin vân Pathian hnênah ka ṭawngṭai a. “Aw Lalpa, Pathian ropui leh hlauhawm, nangmah hmangaihtu leh i thupêk zâwmtute tân i thuthlung chu i vuan tlat ṭhîn. Min rawn en la, ka lamah i beng han chhi teh; i chhiahhlawh, i mi Israel-te tân a chhun a zân i hnênah ka rawn ṭawngṭai hi. Keini Israel-te hian i lakah thil kan tisual a ni. Kei leh min thlahtute hi kan sual a ni. I lakah khawlo takin kan khawsa a, Mosia hnêna i hrilh, i thupêk te, i thuruatte, awm dân tûr i tih te kan zâwm duh lo va. I chhiahhlawh Mosia hetiang thu i hrilh kha hre reng ang che, ‘Khawlo taka in awm chuan hnam tinrêng zîngah ka tidarh ang che u. Ka hnêna in lo kîr duha, ka thupêkte in pawma in zawm chuan vân tâwp daihah pawh kal darh ula, chuta ṭang chuan ka hruai ang che u a, ka hming awmna tûra ka thlan ramah chuan ka hruai khâwm leh ang che u,’ i tih kha. Hêng i chhiahhlawhte hi i mite chu an ni, ropui taka i bân tha chaka i tlanchhuahte an nih kha. Aw Lalpa, i chhiahhlawh ṭawngṭaina hi lo ngaithla teh, nangmah ṭihtu i chhiahhlawhte dîlna hi lo ngaihven ang che. Vawiinah pawh hian lal chuan min lo khawngaih teh se,” ka ti a. Chûng lai chuan lal no petu ka ni. Ni khat chu lal Artazerzia chuan a lal kum sawmhnihna, Nisan thlaah chaw a ei a, uain chu ka pe a, lungngai hmêl ka put a la hmu ngai lo. Chuvângin, “Engtizia nge i hmêl a va ngui ve? Lungngaih rûkna i nei em ni? I dam lo pawh a ni si lo,” tiin min zâwt a. Ka phu zawk a. Lal hnênah chuan, “Lal chu dam reng rawh se; ka pa thlân awmna khawpui chu tihram a ni a, a kulh kawngkhârte a kâng zo vek si a, ngui lo thei em ka nih?” ka ti a. Lal chuan, “Eng nge i tih duh?” min ti a. Vâna Pathian hnênah chuan ka ṭawngṭai ta a. Lal hnênah chuan, “Lal remtih zâwng a niha, min duhsak takmeuh chuan Judai ramah min kaltîr la, ka pa thlân awmna khuaah ka han kal ang a, ka han siam ṭha ang e,” ka ti a. Lalnu pawh a bulah a ṭhu a, lal chuan, “Eng chen nge i thang ang a, engtikah nge i lo kîr leh ang?” min ti a. Ka hâwn leh hun tûr ka hrilh a, lal chuan ka kal a phal ta a. Lal hnênah chuan heti hian ka ti bawk: “Lalin rem a tih chuan Eufretis lui khawthlang lam bial awptute chu Judai ram ka thlen thlenga an biala ka kal phal tûrin hrilh ni sela. Lal ngawpui vêngtu Asafa hnênah pawh Tempul luhna kawngkhâr tûr te, khawpui bangah te leh ka awmna tûr in sak nân thing min pe tûrin hrilh ni teh se,” ka ti a. Pathianin min awmpui avângin lal chuan ka dîl apiang chu rem a ti zêl a. Lal chuan sakawr chungchuang mi sipai rual khat leh an hotute ka ruala kal tûrin a tîr a; Eufretis lui thlang lam ram bialah chuan kan kal ta a, ramawptute hnênah lehkha chu ka pe zêl a. Beth-horon khaw mi Sanbalata leh Amon biala sawrkâr milian pakhat chuan an lo hriatin Israel mite ṭhatna tûra thawktu tûr lo kal chu an duh lo hle a ni. Jerusalem khua chu ka han thleng a, ni thum ka châwl a. Pathianin Jerusalem khaw tâna thil tih tûr min pêk chu tu mah ka hrilh lo. Zanlaiah ka tho va, ka ṭhian ṭhenkhatte nên kan chhuak a, ka chuanna sabengtung tih chauh lo chu chuanna tûr sakawr pakhat mah kan keng lo. Zânah chuan khawthlang lam ruam panin kawngkaah khua kan chhuahsan a, chhim lam panin Dragon Tuikhur lamah kan kal a. Bawlhhlawh paihna Kawngka kan thleng a, kal pah chuan kulh bang chim chu ngun takin ka en zêl a; kawngkhâr kâng chhiate pawh chu ka en a. Khawpui chhak lamah, hmâr lam panin kan kal zêl a; Tuikhur Kawngka leh lal tuikhuah kan va thleng a, ka chuanna sabengtung chu lung chim rem rum zîngah chuan a kal tlang thei lo va. Chuvâng chuan, Kidron lui ruam lamah kan kal a, kulh bang chu ka thlîr zui zêl a. Ka kalna hnuah khân ka kîr leh a, Ruam luhna kawngkhârah khân khuaah chuan ka lût leh ta a. Khuaa sawrkâr mi tu mahin khawiah nge ka kala, eng nge ka tih an hre lo. Ka Juda-pui, puithiam te, hruaitu te, sawrkâr mi te leh kan hna thawh tûr hmabâk thawktu tûrte hnênah pawh eng mah ka la sawi lo va ni. An hnênah chuan heti hian ka han ti ta a: “Jerusalem kulh chu a chhe vek a, kawngkhârte lah a kâng zo va, thil ṭha lo tinrêngin min tlâkbuak ta a nih hi. Khawpui kulh hi i siam ṭha ang u khai. Heti taka nuihzatbûr hi kan ni dâwn lo nia,” ka ti a. Pathianin min awmpui a, min ṭanpui dân te, leh lalin thu min pêkte chu ka hrilh ta a. Anni chuan, “Kulh bang chim i siam ṭha tak ang u hmiang,” tiin min chhâng a. Hna thawk ṭan tûr chuan an insiam ta a. Beth-horon mi Sanbalata te, Amon mi Tobia te leh Arab mi pakhat Gesema ten kan thiltih tum chu an lo hriat chuan min nuihzatbûr a, hmusit takin, “Eng nge tih in tum vei le? Lal lakah hel in tum elo maw?” an ti a. Kei chuan, “Vân Pathianin min ṭanpui dâwn alâwm. A chhiahhlawhte kan ni a, kulh bang hi kan siam ṭha dâwn a ni. Jerusalem khaw chhûngah hian neih eng mah in nei lo va, Jerusalem mi nihna lah in nei ve hek lo,” tiin ka chhâng a. Hetiang hian Jerusalem khaw kulh bang chim chu siam leh a ni: Puithiam lalber Eliasiba leh a puitu puithiamte tum chu Berâm Kawngkhâr siam ṭhat a ni. An siam a, an hlân a, an vuah a, kulh bang pawh Hamea in sâng leh Hananela in sâng thleng ve vein an siam ṭha a, an hlân a. A dawt siam ṭhat chu Jeriko mite tum a ni. Chumi dawt chu Imria fa Zakura ho tum a ni. Hasena thlahten Sangha Kawngkhâr chu an siam a; a kawngka biangte an vuah a, a kalhnate leh a bahnate an siam a. A dawt chu Uria fa, Hakoza tupa Meremota hovin an siam a. Chumi dawt leh chu Berekia fa, Mesezebela tupa Mesulama hovin an siam a, a dawt chu Baana fapa Zadoka hovin an siam a. A dawt leh chu Tekoa khaw mite tum a ni; khaw milianho chuan hotute tuk ang chuan an thawk ve duh lo. Pasea fapa Joiada leh Besodeia fapa Mesulama hovin Jesana Kawngkhâr an siam a. A kawngkabiang te, a kawngkhâr te, a kalhna te leh a bahna te an vuah vek a. Gibeona mi Melatia te, Meronot mi Jadona te chuan Gibeon leh Mizpa khaw mite nên a dawt, Eufretis thlang lam ramawptu awmna zâwn thlengin an siam a. Rangkachak chher mi Harhaia fapa Uziela hovin a dawt leh chu an siam a. Chumi dawt chu bang chhah lai thlengin rimtui siam mi Hanania hovin an siam a. Jerusalem khua leh a chhehvêl ram zâtve hotu Hura fapa Refaia hovin a dawt chu an siam ṭha a. Chumi dawt leh chu Harumafa fapa Jedaia hovin ama in bul chu an siam a. A dawt leh chu Hasabneia fapa Hatusa hovin an siam a. Harima fapa Malkija leh Pahat-moaba fapa Hasuba te chuan a dawt chu Meichhehna In sâng an tih nên chuan an siam a. Jerusalem leh a chhehvêl ram zâtve hotu Halohesa fapa Saluma hovin a dawt leh chu an siam a, a fanute pawhin an thawk ve. Ruam kalna kawngkhâr chu Hanuna leh Zanoa khaw miten an siam a. A kawngka te, a biang te, a kalhna te, a bahna te an vuah vek a; kulh bang pawh Bawlhhlawh Kawngkhâr thlengin tawng sângkhata sei an siam bawk. Rekaba fapa Malkija, Hakerem bial hotu chuan Bawlhhlawh Kawngkhâr chu a siam a. Kawngkhâr chu a vuah a, a kalhnate leh a bahnate pawh a siam vek a. Kolhozea fapa Saluma, Mizpa bial hotu chuan Tuikhur Kawngka chu a siam a. Kawngka luchung bang pawh a rem a, a kawngkhâr chu a kalhnate leh a bahnate nên a vuah a, Lal huan bula Sela dîl zâwn bang chu Davida khaw panna kailâwn awmna thlengin a siam a. Azbuka fapa Nehemia, Beth-zur bial zâtve awptu chuan a dawt leh chu Davida thlân te, tuikhuah te leh sipai bûk thleng chuan a siam a. Hêng Levia chite hian a dawt, ṭhen tam fe chu an siam a ni. Bania fapa Rehuma hovin a dawt chu an siam a. Hasabia, Keila bial zâtve awptu chuan a bial hmingin a dawt chu a siam a. Henadada fapa Bavaia, Keila bial zâtve awptu chuan a dawt chu a siam a. Jesua fapa Ezera, Mizpa bial hotu chuan râlthuam dahna zâwn chu kulh bang kawi ṭanna thlengin a siam a. Zabaia fapa Baruka hovin phûr takin a dawt chu Puithiam lalber Eliasiba awmna thlengin an siam a. Uria fa, Hakoza tupa Meremota hovin a dawt chu Puithiam lalber Eliasiba in tâwp zâwn thlengin an siam a. Hêng puithiamho hian a dawt leh, ṭhen tam fe chu an siam ṭha a ni. Jerusalem khaw chhehvêla puithiam awmho chuan a dawt chu an siam a. Benjamina leh Hasuba chuan a dawt bang, an in zâwn chu an siam a. Maaseia fapa, Amazia tupa Azaria chuan a dawt, ama in zâwn chu a siam a. Henadada fapa, Binuia hovin a dawt, Azaria in zâwn aṭanga kulh bang kawina thlengin an siam a. Uzia fapa Palala hovin bang kawina aṭang chuan vêngtuho awmna, lal in chungnung zâwk bul thlengin an siam a. Parosa fapa Pedaia hovin a dawt khawchhak lam chu Tuikhur Kawngka, Tempul bula in sâng awmna thlengin an siam a. He lai vêl hi Tempul enkawltu Netin-ho awmna a ni, a hmingah ‘ofel’ an vuah. Tekoa khaw mite chuan an chan hnihna, a dawt chu an siam a; Tempul bula In sâng leh Ofel mual tâwp inkâr chu an siam a ni. Mi ṭhenkhat, kulh bang bula in neite chuan, a dawt leh, anmahni in zâwn ṭheuh, Sakawr Kawngka aṭanga hmâr lam chu an siam a. Imera fapa Zadoka chuan a dawt, a in zâwn chu a siam a. Chumi dawt chu Sekania fapa Semaia, khawchhak kawngka vêngtu chuan a siam a. Selemia fapa Hanania leh Zalafa fapa parukna Hanuna te chuan a dawt, an chan hnihna chu an siam a. Berekia fapa Mesulama chuan a dawt, ama in zâwn chu a siam a. Rangkachak chher mi Malkija chuan, a dawt leh chu Tempul enkawltute leh sumdâwngho riahna in, Hamifkad an tih kawngka bul, hmârchhak bang kil thlengin a siam a. A kil aṭanga Berâm Kawngka thleng chuan rangkachak chhertu leh sumdâwngte chuan an siam a. Sanbalatan kulh siam kan tum a hriat chuan a thin a rim nasa mai a, Juda-te chu min sâwt ta a. A thawhpuite leh Samaria khuaa sipaite hnênah, “Hêng Juda-ho, pa pawr tak tak hian eng nge maw an hriata Jerusalem khawpui din leh an tum le? Inthawina hlânin ni khat thil thu-ah siam zawh mai an tum em ni? A chim chhe vûm, kâng nek tawh lungte chu siam ṭhat leh theih an inbeisei em ni le!” a ti a. Tobia chu a bulah a ding a, “Eng ang kulh bang nge an din theih ang? Sihal pawh lâwn se a chim mai ang!” a lo ti ve a. Kei chu ka ṭawngṭai ta a, “Aw Pathian, hêng mite min deusawhzia hi lo ngaithla teh, min hmuhsitna chu an chungah lêt teh se. An neih zawng zawng miin rawk sela; ram dang daihah sal atân man ni rawh se. An thil sual tih hi theihnghilh suh la, an sualna pawh hai suh ang che; kulh bang siamṭhatute hmaah an chêksawlh hle che kha,” ka ti a. Kulh bang siam ṭhat hna chu ngawrh takin kan thawk a, a zâtve dâwn laia sâng chu kan zo ta mai a. Sanbalata te, Tobia te, Arabia mi te, Amon mi te leh Asdod mi te chuan Jerusalem kulh chu kan siam ṭha sâwt hle a, a bal chhe laite chu kan thawm leh vek tawh tih an hriat chuan an thinur hle a. Jerusalem-a lo kala, min rawn beiha, min tihbuai tumin an thurual a. Pathian hnênah kan ṭawngṭai a, a chhûn a zâna vêngtu tûr kan insiam a. Judai rama mite chuan hla an phuah a, “Rit tak tak kan phur a, kan hah zo ta, A chhe nawi paih tûr a tam êm a, Bang pawh kan rem hman lo!” tiin. Kan hmêlmate lah chuan min zuam hle a, “Kan han beiha kan thaha, an hna kan tihtâwpsak hma chu eng mah an hre lo vang, hmuh pawh min hmu lo vang,” an ti a. Nimahsela, an zînga Juda awm vete chuan an thil tum chu a rûkin min rawn hrilh zêl a. Chuvângin, mipuite chu khandaih te, fei te, thal te ka pe a; a chi chiin, bang la rem zawh loh bulah vêngtu atân ka sem darh a. Mipuite chu an thlaphâng hle tih ka hriat chuan an hruaitute leh an hotute nên an hnênah, “Anniho hi hlau suh u; Lalpa ropuizia leh a hlauhawmzia hre reng rawh u. In unaute hi vêng ula, in nupui fanau leh in in leh lo tân ṭang rawh u,” ka ti a. Kan hmêlmate chuan an thil tih tum chu kan lo hria tih an hriat chuan Pathianin an thiltum chu a tibahlah a ni tih an hria a; keini chuan kan za-in kulh bang siam chu kan chhunzawm leh ta sauh sauh va. Chuta chin chu ka mite zâtve chuan an thawk a, a zâtve chuan fei te, phaw te, thal te an keng a; awmphaw te an ha a. Hnam hruaitute chuan kulh bang siamtute chu theihtâwp chhuahin an pui zêl bawk a. Hnathawktute pawh chuan khingkhatin hna an thawk a, khingkhatin hriam an keng a. Tu pawhin, khandaih a kawm nên an pai ṭheuh va. Tawtawrâwtpu, râlkhêl hâmtu tûr chu ka bulah a awm a. Mipuite chu an hruaitute leh hotute nên, “Kan hna thawh hi hmun hrang hranga thawk kan ni a, kan thawhna lai bang a inhlat hle hlawm a. Chuvângin, tawtawrâwt ri in hriat chuan ka awmnaah lo tlân khâwm ang che u, kan Pathian chuan râl chu min dopui dâwn a ni,” tiin ka hrilh a. Ni tin, khâwvâr aṭanga arsi lan thlengin a zâtve chuan hna kan thawk a, a zâtve chuan fei nên min vêng a. Hnathawk hotute hnênah chuan, “Nangni leh in chhiahhlawhte chu Jerusalem khaw chhûngah riak ve mai ula a ṭha ang,” ka ti a. Ka ṭhian te, ka ṭhuihruai te, ka chhiahhlawh te, kei ngei pawhin, zânah pawh kawr kan hlîp lo va, râlthuam kan dah hek lo. Rei fe hnuah chuan mipa pawh, hmeichhia pawh, an Juda-puite chungah an vui ta a. “Kan chhûng kan rual a, rilṭâma kan thih loh nân ei tûr kan duh a ni,” an ti a. A ṭhen chuan, “Kan lo te, kan grep huan te, kan in te, rilṭâma thih ai chuan kan lo ineiba tawh a ni,” an ti a. A ṭhen chuan, “Kan lo te, grep huan te dahkhamin lal chhiah pêk tûr tangka kan pûk a, Juda mi ve bawk kan ni si a, kan fate pawh Juda dang fate ang bawk an ni lâwm ni? Nimahsela, hei kan fate chu bawihah kan tântîr a, kan fanute phei chu bawihah kan hralh dêr tawh a ni. Kan lote leh grep huante min neihsak zo tawh a, kan che hlei thei ta hauh lo mai,” an ti a. An vui thu ka hriatin ka thinur hle a, Ka rilru ka siam a, mipui hruaitute leh an hotute chu ka khak ta a, “In unaute ngei in lo tiduhdah hle a lo nih hi,” ka ti a. Chumi chungchâng chu ngaihtuah tûrin vântlâng ka ko khâwm a. “Kan theih ang angin kan Juda-pui, hnam dang hnêna inhralh hialte chu tlan chhuah kan tum hrâm ṭhîn a. In unaute hi anmahni Juda-puite hnênah in inhralhtîr ta hial a nih hi,” ka ti a. Hruaitute chuan min chhâng thei lo va, an ngawi ta reng a. “In thil tih hi a dik hauh lo, Pathian ṭih ula, thil dik ti rawh u. Tichuan, kan hmêlma, Jentail-ho hian min hmusit lo vang. Kei pawhin mite chu pawisa leh buhte ka lo pûktîr tawh ṭhîn a; chutiangin ka ṭhuihruaite pawhin an ti ṭhîn. Kan leibate chu i ngaidam teh ang u. An ba zawng zawng, tangka te, buh te, uain te, oliv hriak te ngaidam vek ila, an lo te, an grep huante leh an oliv hmunte chu pe kîr leh vek rawh u,” ka ti a. Hruaitute chuan, “I sawi ang chuan kan ti ang e, an thil chu kan pe kîr ang a, an ba chu kan ngaidam ang,” an ti a. Puithiamho chu ka ko va, an hmaah chuan hruaitute chu an sawi ang chuan thu ka tiamtîr a. Ka puan ven chu ka thing thla a. “In thutiam anga ti duh lo chu Pathianin a thing ang a, a inte leh a neih zawng zawng a thin thlâksak ve ang a, eng mah a nei lo vang,” ka ti a. Chuta awm ve zawng zawng chuan, “Amen” an ti a. Lalpa an fak a, hruaitute chuan an tiam ang chuan an ti ta a. Lal Artazerzia lal kum sawmhnihna aṭanga kum sawmthum leh pahnihna, Judai ram awptua kum sâwm leh kum hnih ka ṭan chhûng chuan ka chhûngte nên Ramawptu ei tûr ang kan ei lo. Ka hmaa Ramawptute chu mipui tân an rit hle a, ni tin, tangka sawmli man chaw leh uain an phût ṭhîn a; an chhiahhlawhte pawh rit tham tak an ni. Pathian ka zah avângin chutiang chu ka ti ve lo. Kulh bang chu theihtâwp chhuahin kan siam zêl a, ram lei ve zai pawh ka rêl hman lo. Ka hnuaia thawktute pawhin kulh bang siam ngawt an ngaihtuah a ni. Kan vêla mi, kan mikhual ṭhînte bâkah, Juda hruaitute leh mi dang mi za leh sawmnga vêl chu chaw ka eipui ziah ṭhîn. Ni tin bâwngpa pakhat leh berâm thlan chhuah paruk kan talh a ngai a, ârte pawh min talhsak ṭhîn; ni sâwm danah uain chi tinrêng kan chhawp bawk ṭhîn; mipui tân a rih êm avângin Ramawptu phût theih chin chu ka phût ve ngai lo. “Aw ka Pathian, he mite tâna ka thiltih zawng zawng hi ka chan ṭhat nân hre reng ang che,” ka ti a. Sanbalata te, Tobia te, Arab mi Gesema te leh kan hmêlma te chuan Jerusalem kulh bang chu kan siam ṭha a, a kawngkhârte la vuah lo mah ila a chim chhe laite chu kan thawm zo vek tih an lo hriat chuan Sanbalata leh Gesema chuan thu an rawn thawn a, “Lo kal la, Ono phaia khaw pakhatah i inbe teh ang,” an rawn ti a, min khawih theih nân min bum an tum a ni. Lamkal ka tîr a, “Hna pawimawh tak ka thawk a, ka lo kal chhuk thei lo. Nangni be tûrin ka lo chhuak hman lo, ka hna ka tibahlah thei lo,” ka tihtîr a. Vawi li, thu ngai hlîr an rawn sawi a, a ngai hlîrin ka lo chhâng a. Sanbalata chuan a chhiahhlawh pakhat lehkha kengin, a vawi nganaah chuan a rawn tîr a, a lehkha chu châr loh a ni. Hetiang hian a ziak: “Gesema chuan, nang leh Juda-ho hian lal lakah hel in tum a; chuvângin, Jerusalem khaw kulh pawh in siam ṭha leh a ni, tih kan chhehvêl hnamho zîngah hian thu a thang huai huai a ni. Nang lahin lal i tum a, Jerusalem khuaah Judai ram lala puang tûr che zâwlnei pawh i nei reng tawh a ni, tih min hrilh a. Lal ropuia chuan a lo hre ve ngei ang a; chuvângin, he thil hi chîk takin i lo sawi dûn teh ang,” tiin. Hetiang hian ka chhâng a, “I sawi hi dâwt vek a ni, i phuahchawp a ni ta ve ang,” tiin. Ka hna tihtâwp tumin min vau a ni, ka ṭawngṭai a, “Khai le, aw ka Pathian, min tichak teh,” ka ti a. Delaia fa, Mehetabela tupa, Semaia inah ka kal a, a in aṭangin a lo chhuak thei lo va ni. Ani chuan Hmun Thianghlimah kan pahnihin kan biru ang a, kawngkhâr kan inkalh hnan tûr a ni; thah tum chein an lo kal dâwn, eng zânah pawh an lo kal mai thei a ni,” a ti a. “Chutianga tlânchhiaa biru mai âwm mi ka ni lo ve, inhumhim nân Tempul chhûnga biru duhin min ring em ni? Ka biru hauh lo vang,” ka ti a. Ka han inngaihtuah chiang a, Semaia chu Pathianin a be awzâwng lo tih ka hre ta a. Tobia leh Sanbalatan chutianga min tihṭhaih tûr chuan an tham a lo ni. Thil sual ti tûra min tihṭhaih tûrin an ruai a lo ni a; ka hming tihchhiata, min tihmualpho an tum a ni. Ka ṭawngṭai a, “Aw ka Pathian, Tobia leh Sanbalata thil tih dân hi hre reng la, tuartîr ang che, Zâwlneinu Noadii leh zâwlnei dang min tihzâm tumtute pawh hi hre reng ang che,” ka ti a. Ni sawmnga leh pahnih hna kan thawh hnu, Elul thla, ni sawmhnih leh panga ni chuan kulh bang chu kan siam ṭha ta vek a. Kan hmêlmate leh kan vêla awm hnamte chuan an lo hriatin an hlau hle a, kan Pathian hna thawh a ni tih an hriatin an meng hnuai ta hle a. Hêng hun lai hian Tobia leh Juda hruaitute chu lehkha an inthawn fo ṭhîn a lo ni a. Judai rama mi tam tak chu a puzawn Sekania, Ara fapa avângin a lamṭang an ni. Tobia fapa Johanana chuan Berekia fapa Mesulama fanu nupuiah a nei nghe nghe a. Mi tam takin ka hriat ngei tûrah Tobia ṭhatzia sawi nuam an ti hle a; ka sawi apiang pawh an lo hrilh zêl bawk ṭhîn. Mi tihṭhaih tumin lehkha pawh min rawn thawn fo va ni. Kulh bang chu an siam zo va, kulh kawngkhârte pawh chu an vuah fel vek a, Tempul pulis te, zaipâwl te leh Levia chi te chu an tih tûr an ruat fel vek a. Jerusalem khaw awptu tûr mi pahnih ka ruat a, pakhat chu ka nau Hanania a ni a, pakhat chu sipai pâwl hotu Hananaia, tu ma tluk loh, mi rin tlâk tak, Pathian ṭih mi a ni. Jerusalem kulh kawngkhârte chu zîngah, ni chhuah hnu chauhva hawng tûrin ka ti a; tlaiah pawh ni tlâk, vêngtuho ṭina khâr tûrin ka ti a. Jerusalem khuaa mi ṭhenkhat pawh kawngkhâr vên bîk nei tûr leh khawlai vênga fang ṭhîntu ruat tûrin ka ti bawk a. Jerusalem hi khaw zau tak a ni a, mi an tam lo va, in pawh an la sa ṭan leh lo. Mipui chu an hruaitute leh an hotute nên ka khâwm a, an chhûngkaw chanchin ziakna chhui feltîr tûrin Pathianin min ti a. Saltâng chhuak hmasate hming ziakna ka zawng chhuak a, hei hi ka hmuh dân chu a ni. Saltâng tam tak chu Babulon bial aṭangin Jerusalem leh Judai ramah mahni awmna ṭhin khuaah an haw a. An chhûngkuain lal Nebukadnezaran sala a man aṭang khân Babulon-ah an tâng reng a ni. An hruaitute chu Zerubabela te, Jesua te, Nehemia te, Azaria te, Raamia te, Nahamania te, Mordekaia te, Bilsana te, Mispereta te, Bigvaia te, Nehuma te leh Baana te an ni. Israel mi, chi hrang hrang lo kîr zât chu hetiang hi a ni: Paros chi aṭangin mi sânghnih leh za leh sawmsarih leh pahnih. Sefatia chi aṭangin mi zathum leh sawmsarih leh pahnih. Ara chi aṭangin mi zaruk leh sawmnga leh pahnih, Pahat-moab chi, Jesua leh Joaba thlah aṭangin mi sânghnih leh zariat leh sâwm leh pariat. Elam chi aṭangin mi sângkhat leh zahnih leh sawmnga leh pali. Zatu chi aṭangin mi zariat leh sawmli leh panga. Zakai chi aṭangin mi zasarih leh sawmruk. Binui chi aṭangin mi zaruk leh sawmli leh pariat. Bebai chi aṭangin mi zaruk leh sawmhnih leh pariat. Azgad chi aṭangin mi sânghnih leh zathum leh sawmhnih leh pahnih. Adonikam chi aṭangin mi zaruk leh sawmruk leh pasarih. Bigvai chi aṭangin mi sânghnih leh sawmruk leh pasarih. Adin chi aṭangin mi zaruk leh sawmnga leh panga. Ater (Hezekia an ti bawk) chi aṭangin mi sawmkua leh pariat. Hasum chi aṭangin mi zathum leh sawmhnih leh pariat. Bezai chi aṭangin mi zathum leh sawmhnih leh pali. Harif chi aṭangin mi za leh sâwm leh pahnih. Gibeon chi aṭangin mi sawmkua leh panga. Bethlehem leh Netofa khaw chhuak mi za leh sawmriat leh pariat. Anathot khaw chhuak mi za leh sawmhnih leh pariat. Beth-azmavet khaw chhuak mi sawmli leh pahnih. Kiriat-jearim te, Kafira te leh Beerot khaw chhuak mi zasarih leh sawmli leh pathum. Rama leh Geba khaw chhuak mi zaruk leh sawmhnih leh pakhat. Mikmas khaw chhuak mi za leh sawmhnih leh pahnih. Bethel leh Ai khaw chhuak mi za leh sawmhnih leh pathum. Nebo khaw dang chhuak mi sawmnga leh pahnih. Elam khaw dang chhuak mi sângkhat leh zahnih leh sawmnga leh pali. Harim khaw chhuak mi zathum leh sawmhnih. Jeriko khaw chhuak mi zathum leh sawmli leh panga. Lod te, Hadid te leh Ono khaw chhuak mi zasarih leh sawmhnih leh pakhat. Sena khaw chhuak mi sângthum leh zakua leh sawmthum. Puithiamho lo kîr vete chu heti hi an ni: Jesua chhûng, Jedaia thlah mi zakua leh sawmsarih leh pathum. Imera thlahte mi sângkhat leh sawmnga leh pahnih. Pasura thlahte mi sângkhat leh zahnih leh sawmli leh pasarih. Harima thlahte mi sângkhat leh sâwm leh pasarih. Levia chi saltâng lo kîrte chu heti hi an ni Jesua te, Kadmiela te, Hodavia thlahte, mi sawmsarih leh pali. Tempula hla sa mi: Asafa thlahte mi za leh sawmli leh pariat. Tempul pulis: Saluma te, Atera te, Talmona te, Akuba te, Hatita te leh Sobaia te thlah mi za leh sawmthum leh pariat. Tempul enkawltute: Ziha te, Hasufa te, Tabaota te, Kerosa te, Sia te, Padona te, Lebana te, Hagaba te, Salmaia te, Hanana te, Gidela te, Gahara te, Reaia te, Rezina te, Nekoda te, Gazama te, Uza te, Pasea te, Besaia te, Meunima te, Nefusesima te, Bakbuka te, Hakufa te, Harhura te, Bazlita te, Mehida te, Harsa te, Barkosa te, Sisera te, Tema te, Nezia te leh Hatifa te hi an ni. Solomona chhiahhlawh thlahte: Sotaia te, Sofereta te, Perida te, Jaala te, Darkona te, Gidela te, Sefatia te, Hatila te, Pokeret-hazebaima te, Amona te hi an ni. Tempul enkawltu leh Solomona chhiahhlawh, saltâng haw zawng zawng mi zathum leh sawmkua leh pahnih an ni. Tel-mela khua aṭang te, Tel-harsa khua aṭang te, Kerub khua aṭang te, Adoa khua aṭang te, Imer khua aṭang tea lo kal chho vete chu heti hi an ni. Hêngho hian Israel thlah an nihna chiang leh an chi leh kuang an chhui thei lo: Chûng chu Delaia thlah te, Tobia thlah te, Nekoda thlah te, an vaiin mi zaruk leh sawmli leh pahnih. Hêng puithiamho hian an thlahtu tak an chhui thei lo: Hobaia fate, Hakosa fate, Barzilaia fate. Puithiam Barzilaia fate thlahtu Barzilaia hian Gilead mi Barzilai hmeichhia a nei a, a puzawn chhûng hnam hming chu an pu zawm ta a ni. An thlahtu tak an chhui chhuah theih loh avângin puithiamah pawm an ni ta lo va. Juda zînga an hotu ber, Tirsatha chuan, “Urim leh Thumim kawltu puithiam a awm hma chu Pathian hnêna thilhlan hi lo ei ve suh u,” a ti a. Saltâng haw chu an vaiin mi sîngli leh sânghnih leh zathum leh sawmruk an ni. An chhiahhlawh, mipa leh hmeichhia sângsarih leh zathum leh sawmthum leh pasarih. Hla sa mi, mipa leh hmeichhia zahnih leh sawmli leh panga; Sakawr zasarih leh sawmthum leh paruk; sakawr puakphur zahnih leh sawmli leh panga; sanghâwngsei zali leh sawmthum leh panga, sabengtung sângruk leh zasarih leh sawmhnih an rawn hruai bawk. Hnam tin hruaitute chuan Tempul sakna thawhlâwm an pe ṭheuh va. An Tirsatha chuan rangkachak kg. riat, maihûn sawmnga, puithiam kawr tûr puan zanga leh sawmthum a pe a. Israel hnam hruaitute chuan rangkachak kg. za leh sawmruk leh pariat, tangkarua kg. Sângkhat leh zahnih leh sawmnga an pe a. Mipuite chuan: Rangkachak kg. za leh sawmruk leh pariat, tangkarua kg. za leh sawmli, puithiam kawr tûr puan sawmruk leh pasarih an pe bawk. Puithiam te, Levia chi te, Tempul pulis te, hla sa mite leh mi dang leh Tempul enkawltute - Israel mi zawng zawng chuan Judai ram khuaahte chuan awmhmun an bêngbel ta a. Thla sarihnaah chuan Israel mite chu an awmna tûr khuaah an awm fel hman a; Jerusalem khaw Tuikhur Kawngkhâr bul tualzâwl laiah chuan, chumi thla, ni khat ni chuan an lo pung khâwm a; Israel te zawm tûr, Lalpa dân, Mosia hnêna pêk chu hre tak puithiam Ezra chu an ngên a, Dân bu chu an lâktîr a. Ezra chuan mipui punkhâwmnaah, mipa leh hmeichhia, naupangte pawh, a hrethiam pha âwm chin hmaah chuan Dân bu chu a rawn keng a. Kawngkhâr bul tualzâwl zau laiah chuan khawvâr aṭangin chhûn lai thlengin, Dân bu chu a chhiar a, ngun takin an ngaithla ṭhuap a. An thingphel dawhkân siamah chuan Dânhremi Ezra chu a ding a, a ding lamah Matithia te, Sema te, Anaia te, Uria te, Hilkia te, Maaseia te an ding a; a vei lamah Pedaia te, Misaela te, Malkija te, Hasuma te, Hasbadana te, Zekaria te, Mesulama te an ding a. Ezra dinna chu a sâng bîk a, mi zawng zawngin an hmu thei a. Dân bu chu a han phelh chuan mipui chu an ding vek a. Ezra chuan Lalpa, Pathian ropui chu a fak a, mipui chuan, “Amen, Amen,” tiin an lo chhâwn a, an kûn a, Lalpa hmaah chuan an bawkkhup a. An tho va, mahni hmun ṭheuhvah an ding a, Levia chi Jesua te, Bania te, Serebia te, Jamina te, Akuba te, Sebethaia te, Hodia te, Maaseia te, Kelita te, Azaria te, Jozabada te, Hanana te, Pelaia te chuan an lo sawi fiah zêl a. Dân bu thu chu an tualṭawngin an let chawp a, mipui hriat theih tûrin an sawi fiah a. An tih tûra Dân bu-in a phût chu mipuiin an han hriat chuan an rilru a khawih hle a, an ṭap ta hlawm a. Tichuan, an Tirsatha Nehemia te, puithiam leh Dânhremi Ezra te, Dân thu sawifiahtu Levia chite chuan mite hnênah, “Vawiin hi Lalpa, in Pathianni thianghlim a ni, in ṭap tûr a ni lo va, in ngui tûr a ni hek lo. Haw ula, ruai ṭheh rawh u. In uain leh chaw chu a nei ve lote eipui ang che u. Vawiin hi kan Lalpa tân ni serh a ni a, ngui suh u, Lalpa -a in lâwmna chu in chakna a ni si a,” an ti a. Levia chite chuan mipui chu, “Vawiin ni thianghlim angah hian ṭap teh suh u, a ngui pawh ngui hek suh u,” tiin mipui ṭap chu an thlêm a. Mite chu an in lamah an haw a, hlim takin an eiin an in a, mi dangte pawh an neih ang chu an pe a, an hnêna Dân thu an chhiar kha an hriat avângin an lâwm a ni. A tûkah chuan hnam tin hruaitu te, puithiam te leh Levia chi te chu Dânhremi Ezra hnênah Dân thu zir tûrin an kal a. Lalpa chuan Mosia hmangin Israel-te zawm tûr Dân a pe a, chu Dân bu-ah chuan Bâwkte kût chhûng chhâwlbûkah an awm ṭhîn tûr a ni tih an hmu chhuak a. Chuvâng chuan, Jerusalem leh khaw dang zawng zawngah hetiang hian thu an pe a; “Tlângahte kal ula, oliv zâr te, umkhal zâr te, lenhmui zâr te, tumkau te leh thingbuk chhah te sât ula, dân bu-a chuang angin chhâwlbûk siam rawh u,” an ti a. Mite chuan chhâwl chu an sât a, an in chung zâwlah te, an tualah te, Tempul tualah te, khawlai zau laiah Tuikhur Kawngkhâr leh Efraim Kawngkhâr bulah te chuan chhâwlbûk an sa ta a. Saltâng lo haw zawng zawng chuan bûk an sa a, tah chuan an riak a, Nuna fapa Josua thih hnu kha chuan hetianga an tih hmasak ber ṭum a ni a; an tha a thovin an phûr hle a. Kût ṭan tirh ni aṭanga a tâwp ni thlengin ni tin Dân bu-a mi an chhiar ziah a ni. Ni sarih chhûng chu kût an hmang a, a ni riat ni chuan inkhâwm urhsûn tak neiin kût chu an ṭiak ṭhîn. Chumi thla, ni sawmhnih leh pali ni chuan Israel mite chu an kal khâwm a, saiip puan sinin chaw an nghei a, an lu-ah lei an phul a, Israel mite chu hnam dang lakah an inthiarfihlîm tawh a, an ding a, anmahni sualna leh an thlahtute khawlohna avângin thupha an chawi a. Lalpa, an Pathian Dân chu dârkâr thum vêl an chhiar a, dârkâr thum dang an sual thupha chawi nân an hmang a, Lalpa an Pathian chu chibai an bûk a. Levia chite tâna an dawhkân siamah chuan Jesua te Bania te Kadmiela te Sebania te Bunia te Serebia te Bania te Kenania te pawh an ding ve a. Lalpa, an Pathian hnênah ring takin an au va. Levia chi Jesua te, Kadmiela te, Bania te, Hasabneia te, Serebia te, Hodia te, Sebania te, Pethahia te chuan mipui chu Pathian be tûrin an sâwm a: “Ding ula, Lalpa, in Pathian chu kumkhuain fak rawh u. Fak sên rual ni lo mah se, a hming ropui chu mi tinin fak rawh se,” an ti a. Israel mite chu hetiang hian an ṭawngṭai a: “Aw Lalpa, nang chauh hi Lalpa chu i ni, Vânte leh a chhûnga awm zawng zawngte, Lei leh tuifinriatte leh a chhûnga awm zawng zawng te hi i siam vek a ni; An za-in i vawng ṭha ṭhîn a. Vâna awmhote chuan chibai an bûk ṭhîn che a. Aw Lalpa, nang Pathian chuan Abrama i ko va, Kaldai ram Ur khua ata i hruai chhuak a, A hmingah Abrahama i sa ta a. A zui tlat che avângin thuthlung i siamsak ta a, Kanan ram chu pêk i tiam a, Hit mi leh Amor mite awmna ram Periz-ho te, Jebus-ho te, Girgas-ho te awmna ram chu, A thlahte awm nân i pêk kha. I rinawm a, i thutiam i hlen ta a. Min thlahtute Aigupta rama an retheihzia i hria a, Tuipui Senah an mangang au i ngaihthlâk kha. An lal leh hotute chungah, an ram chungah nên Thil mak tak tak i ti ṭeuh va, I mite an tihduhdahzia i hria a ni, Tûn thlengin i hmingthan phah ta a ni. I mite tân tuipui laiah kawng i siam a, Leichârah i hruai kai kha. Ûmtute chu tui thûkah an pil a, Tuipui fâwn vêla lungtum pil ang vang vang an ni. Chhûnah chhûm dingin i hruai a, Zânah mei êngin. Vân ata i lo chhuk a, Sinai tlângah khân, I mite chu i rawn bia a, Awm dân tûr thuruat ṭha te, Thupêk leh Dân nghet te i pe. Sabat ni chu serh ṭha tûrin i ti a, I chhiahhlawh Mosia hmangin i dân chu i hrilh. An rilṭâm khân vân chaw i pe a, An tuihâl khân lungpui ata in tûr i pe. An hnêna pêk i tiam ram chu nei tûrin thu i pêk kha. Min thlahtute chu an inchhuang a, an luhlul hle, I thupêkte chu an awih duh ta lo va. I thu an awih lo va, thil mak i tihsakte an hre duh lo, Luhlul an chhuah a, an hel ta a. Aigupta bawiha hruai lût leh tûr hotu an thlang. Lainatnaa khat thinnel i ni a, I ngaidam peih zêl a, i thlahthlam lo. Milem, bâwngno lem an siam a, “Hei hi Aigupta ram ata min hruaichhuaktu, Thil mak tam tak min tihsaktu kha a ni,” an ti. Aw Lalpa, an va tinawmnah che êm! Ngil i neih êm avângin Thlalêrah khân i thlahthlam lo. Chhûn leh zâna hruai ṭhîntu chhûm ding leh mei chu i la bo lo. Dawhthei takin i zirtîr hrâm hrâm a, Mana-in i châwm a, in tûr i pe bawk a. Kum sawmli chhûng thlalêrah khân An mamawh zawng zawng i tumsak a, An silhfênte lah a chul thei lo, An keruh pawh a na ngai lo. Hnamte i hnehtîr a, an ram te i pe a, Hesbon lal Sihona ram an neihsak a, Basan lal Oga ram pawh an nei. Vâna arsi zâtin an fate i tipung a, An pate hnêna pêk i tiam ram chu An la a, an awm ta a. Kanan ram chu an la a, Chûnga awmte chu i tihtlâwmsak a, Kanan mi leh an lalte chu An duh tâwkin i sawisaktîr ta a. I mite chuan kulh nei khuate an la a, Ram ṭha ṭha chu an nei ta a, In nuam tak takte chu an luah zêl a. Tuizêm siam sa an ring a, Thei tinrêng, oliv leh grep rah sa an tlân. An duh tâwk tâwk an ei, an sa a mâm thul mai. I thilpêk, thil ṭhate chu an tlân a ni. I mite chuan i thu an awih duh ta lo va, An hel a, i Dân an pawisa lo. I lam hawi tûra fuihtu zâwlneite chu An that zêl a, an thamlo hle reng che. Chuvâng chuan, an hmêlmate kutah i pe a, An lo timangang êm êm a, An rawn au che a, vân aṭangin i lo chhâng ṭhîn, I khawngaih a, hruaitute i pe a, Hmêlma lakah an vêng him ṭhîn. Râlmuanga an awm chuan thil sual an ti leh mai ṭhîn a, An hmêlmate kutah i pe leh ṭhîn. An sima ṭanpui an dîl che chuan I lo khawngaih a, vân aṭangin i lo ngaithla a, I chhan chhuak leh mai ṭhîn. I Dânte chu zâwm tûrin i hrilh ṭhîn a, An inchhuan êm avângin I thupêkte an zâwm duh lo. Mihring nun theih nâna awm dân tûr i ruatte chu An tihmawh leh luhlul avângin an zâwm duh lo. A kum a têlin i zilh fo va, I zâwlneite thu i sawitîr ṭhîn, I mite chuan an beng an chhungawng a, An hmêlmate kutah i pe leh ṭhîn. I lainat êm avângin i thlahthlam lo va, I tiboral mai hek lo. Pathian ngilnei tak leh Mi khawngaih thei tak zawng i lo nih hi. Nang zawng kan Pathian, Pathian ropui, Thil i titheiin i va hlauhawm êm!” I thuthlung chu i chelh tlat a, Asuria lalten min rawn lâk ata Tûn thlengin kan va rethei tak êm! Kan lal te, hruaitu te, puithiam te, zâwlnei te, Min thlahtute nên kan tuar tlâng a, Kan retheihzia hi ngainêp teh suh. Nang chuan dik takin thil i ti a, Min hrem pawh hi i tidik e, Kan sual a ni. Min thlahtu te, kan lal te, Puithiam te leh hruaitu te chuan I Dân chu an zâwm duh lo. I thupêkte leh i thuruatte an pawisa lo. I pêk ram zau tak leh ṭha takah chuan an awm a, I duhsak a, lalte i pe a, Mahse, an sual an sim duh lo, I rawng an bâwl duh bawk hek lo. Tûnah pawh hian i ram min pêkah chuan bawih kan ni a, He ram ṭha tak, ei tûr tamna ramah hian. Kan sual vânga kan chunga lal i dahte chuan Rama thil haw apiang an hui a, An duh duhin min sawisak hi, kan rante nên; Kan mangang êm êm mai.” Kan chunga thil lo thlengte avâng chuan min hruaitu te, Levia chi te, Puithiam te leh keini Israel mi te hian thu nghet takin kan tiam a, hming kan ziak a ni. Ramawptu Nehemia, Hakalia fapa chuan an thutiamah chuan hming a ziak hmasa ber a, Zedekian a ziak leh a. Hming ziaktu dangte chu hêngte hi an ni: Puithiamho zînga mi: Seraia, Azaria, Jeremia, Pasura, Amaria, Malkija, Hatusa, Sebania, Maluka, Harima, Meremota, Obadia, Daniela, Ginethona, Baruka, Mesulama, Abija, Mijamina, Maazia, Bilgaia leh Semaia. Levia chi zînga hêngho hian hming an ziak bawk: Azania fapa Jesua, Henadada fate zîngah Binuia leh Kadmiela, An unau Sebania, Hodia, Kelita, Pelaia, Hanana, Mika, Rehoba, Hasabia, Zakura, Serebia, Sebania, Hodia, Bania leh Beninua. Mipui hruaitu, hming ziak vete chu hêngte hi an ni: Parosa, Pahat-Moaba, Elama, Zatua, Bania, Bunia, Azgada, Bebaia, Adonija, Bigvaia, Adina, Atera, Hezekia, Azura, Hodia, Hasuma, Bezaia, Harifa, Anathota, Nebaia, Magpiasa, Mesulama, Hezira, Mesezabela, Zadoka, Jadua, Pelatia, Hanana, Anaia, Hosea, Hanania, Hasuba, Halohesa, Pilha, Sobeka, Rehuma, Hasabna, Maaseia, Ahia, Hanana, Anana, Maluka, Harima leh Baana. Israel mi, puithiam te, Levia chi te, Tempul pulis te, zaipâwl te, Tempul enkawltu te leh mi dang, keiniho, Pathian Dân zâwm duhtute hian kan vêla awm hnam dangte laka inthiarfihlîma, chinchâng hre pha chin, kan nupui fanaute leh min hruaitute nên hian Pathian Dân, a chhiahhlawh hmanga min pêk chu, zâwm tûrin chhia kan chham ta a ni. Lalpa kan lal thupêk zawng zawngte chu kan awih ang a, a thuruatte kan ti ang a, awm dân tûr a tih ang ngeia awm kan tiam ta a ni. Kan rama hnam dang awm vete nên kan inneih pawlh lo vang. Hnam dangin sabat ni-ah leh ni serh dangah buh emaw, thil dang emaw min rawn zawrh pawhin kan lei lo vang. Kum sarih kumin lo kan nei lo vang a, miin kan thil an bat zawng zawng kan ngaidam ang. Kum tin, Tempula senso tûr tangkarua gram nga ṭheuh pêk kan tiam e. Tempula rawngbâwlna tûr hêng pawh hi kan tum ang: Chhang serh, ni tina hâlral thilhlan tûr chhangphut, ni tina hâl ral tûr ran; sabat ni te, thla thar ni te, kût ni tea hâl ral tûr rante, Israel hnam pum sual thawina tûr ran te leh thil ṭûl apiang kan tum ang. Dân bu-a sawi angin keini mipui te, puithiam te, Levia chi te hian Lalpa, kan Pathian hnêna thilhlan hâlna tûr thing tumtu kum tin ṭhumvâwrin kan thlang ṭhîn ang. Kum tin, kan buh seng hmasak ber leh kan theirah lawh hmasak berte chu Tempulah kan rawn hlân ṭhîn ang. Fapa kan neih hmasak ber chu Tempula puithiam hnêna hruaiin, Dânin a phût angin Pathian tân kan hlân ang. Kan bâwngno hmasa ber te, kan berâm leh kêl no hrin hmasak ber te pawh Lalpa hnênah kan hlân ang. Tempula puithiam hnênah buh thar aṭanga kan chhang siam hmasak ber chu kum tin kan keng ang a, kan uain te, oliv hriak te leh thei dang rahte kan hlân bawk ang. Kan lova sâwma pakhat chu a chang tûra ruat Levia chite kan pe ang a, sâwma pakhat lâk hunah Arona thlah puithiamte pawh pêk tûr an ni. Tempula dah tûrin Levia chite chuan an dawn apiang sâwma pakhat chu an pe ve ṭhîn tûr a ni. Israel mite leh Levia chite chuan buh te, uain te, oliv hriak an pêkte chu Jerusalem Tempulah, bungbêl dahnaah an dah ṭhîn tûr a ni; Tempula rawngbâwl tûr puithiam te, Tempul pulis te leh Tempul zaipâwl te awm ṭhinnaah chuan. Pathian in chu kan thlahthlam hauh lo vang. Hnam hruaitute chu Jerusalem khuaah an awm a, chhûng sâwm zêla chhûng khat chu Jerusalem khaw thianghlima awm tûrin ṭhumvâwrin an thlang a; mi dang erawh chu khaw danga awm tûrin thingtlâng khuaahte an kal a. Jerusalem khuaa awm tûra inpe peihte chu an ngaisâng hle a. Israel rama khawpui deuhvah leh khaw tê deuhva awm puithiam te, Levia chi te, Tempul enkawltute leh Solomona chhiahhlawh thlahte chu an awmna khuaah mahni in ngeiah an awm a ni. Judai rama mi, mi lâr deuh deuh Jerusalem khuaa awmte chu hêng hi an ni: Juda thlahte zînga mi: Zekaria tupa, Uzia fa Athaia; ani hi Juda fapa Pereza thlah a ni, a pute chu Amaria te, Sefatia te, Mahalalela te an ni. Kolhozea tupa, Baruka fapa Maaseia; ani hi Juda fa Sela thlah zînga mi a ni. A pute chu Hazaia te, Adaia te, Joiariba te leh Zekaria te an ni. Pereza thlah mi zali leh sawmruk leh pariatin Jerusalem khuaah in leh lo an nei. Benjamina thlahte zînga mi: Joeda tupa Mesulama fa Salua; a pute chu Pedaia te, Kolaia te, Maaseia te, Ithiela te leh Jesaia te an ni. Salua laichîn hnai Gabaia leh Salaia pawh Jerusalem-ah an awm. Benjamina thlah Jerusalem-a awm zawng zawng mi zakua leh sawmhnih leh pariat an ni. Zikria fapa Joela chu an hotu ber a ni a, Hasenua fapa Juda chu hotu ber dawttu a ni. Hêng puithiamte hi Jerusalem-ah an awm bawk: Joiariba fapa Jedaia leh Jakina. Mesulama tupa Hilkia fa Seraia. Ani hi a pute chu Zadoka te, Meraiota te leh Puithiam lalber Ahituba te an ni. He mite chi zariat leh sawmhnih leh pahnihin Tempulah rawng an bâwl ṭhîn. Pelaia tupa Jerohama fapa Adaia. Ani hi a pute chu Amazia te, Zekaria te, Pasura te leh Malkija te an ni. An vaiin he chite hi an chhûngkaw hotute nên mi zahnih leh sawmli leh pahnih a ni. Ahzaia tupa, Azarela fa Amasaia. Ani hi a pute chu Mesilemota te leh Imera te an ni. He chi hi mi za leh sawmhnih leh pariat an awm, sipai huai tak tak an ni. An hotu chu chhûngkaw hung tak zînga mi Zabdiela a ni. Levia chi Jerusalem-a awmte: Azrikama tupa, Hasuba fa Semaia. Ani hi a pute chu Hasabia te leh Bunia te an ni. Sabethaia leh Jozabada. Anni hi Levia chi, mi lâr tak, Tempul pâwn lam hna enkawltu an ni. Asafa thlah, Zabdia tupa, Mika fapa Matania. Ani hi Tempul zaipâwl lâwm hla sak hruaitu a ni. Bakbukia: ani hi Matania puitu a ni. Galala tupa, Samua fa, Abda: ani hi Jeduthuna thlaha mi a ni. Jerusalem khaw thianghlima Levia chi awm zawng zawng chu mi zahnih leh sawmriat leh pali an ni. Tempul pulis Jerusalem-a awmte: Akuba te, Talmona te leh an chhûngte nên; an vaiin mi za leh sawmsarih leh pahnih an ni. Israel mi dang chu puithiamte leh Levia chi dangte nên Judai ram khawpui deuhvah te leh khaw tê deuhvah te mahni inah an awm a. Tempul enkawltute chu Jerusalem khaw chhûng ‘ofel’ an tih laiah chuan a bingin an awm a ni: Ziha leh Gispa hovin hna an thawk ṭhîn. Levia chite zînga an hotu ber Jerusalem-a awm chu Hasabia tupa, Bania fa Uzia a ni. A pute chu Matania te leh Mika te an ni. Asafa thlahte zînga mi a ni a, Tempula thil ri thei tumtu an ni. Ni tina an inthlâk kual dân tûr lal thupêk chu ziakin an dah ṭha a. Juda hnama mi, Zera thlah Mesezabela fa Pethahia chu Persia sawrkâra Israel mite aiawhtu a ni. Mi tam tak chu an huan ramah an awm thlih thliah a. Juda thlahte chu Judai ram khawpui Kiriat-arba-ah te, Dibon-ah te, Jekabzeel leh an khawperah te an awm ber a. Jesua khuaah te, Molada khuaah te leh Beth-pelet khuaah te, Hazar-sual khawpuiah te leh Beer-seba-ah leh a chhehvêl khuaah te an awm a, Ziklag leh Mekona khua leh a chhehvêl khuaah te. En-rimon-ah te, Zora-ah te, Jarmut-ah te, Zanoa-ah te, Adulam-ah te leh an chhehvêl khuaah te pawh an awm a. Lakis-ah leh a chhehvêl huanah te, Azeka leh a khawperah te an awm bawk a. Juda thlahte chu chhim lamah Beer-seba, hmâr lamah Hinom ruam inkâr ramah an awm ber a ni. Benjamina thlahte chu Geba-ah te, Mikmas-ah te, Ai-ah te, Bethel-ah te leh an vêl khawperah te an awm a. Anathot-ah te, Nob-ah te, Anania-ah te, Hazor-ah te, Rama-ah te, Zeboim-ah te, Nebalat-ah te, Hadid-ah te, Zeboim-ah te, Nebalat-ah te, Lod-ah te, Ono-ah te, themthiamho ruamah te an awm a. Judai rama awm ṭhîn Levia chi mi ṭhenkhat chu Benjamin-ho zîngah an awmtîr a. Sealtiela fapa Zerubabela leh puithiam lalber Jesua ruala saltâng haw vete chu hêng hi an ni: Puithiamho: Seraia, Jeremia, Ezra, Amaria, Maluka, Hatusa, Sekania, Rehuma, Meremota, Ido-a, Ginethoia, Abija, Mijamina, Maadia, Bilga, Semaia, Joiariba, Jedaia, Salua, Amoka, Hilkia leh Jedaia. Hêngho hi Jesua hun laia puithiam thlah hrang hotute chu an ni. Levia chite: Tempula inkhâwmnaah lâwmthu sawina hla hruaitu Levia chite chu hêng hi an ni: Jesua, Binuia, Kadmiela, Serebia, Juda leh Matania te hi. Hêngho hi zaipâwl hla sak lo chhâwn ṭhîntute chu an ni: Bakbukia te leh Unoa te leh an Levia chipui te. Jesua fa chu Joiakima a ni, chu mi fa chu Eliasiba a ni, ani chu Joiada pa a ni. Joiada fa chu Jonathana, Jadua pa a ni. Joiakima hun laia puithiam thlah hrang hrang hotute chu hêng hi an ni: Seraia thlah zînga hotu chu Meraria a ni a, Jeremia thlah zînga hotu chu Hanania a ni. Ezra thlah zînga hotu chu Mesulama a ni a, Amaria thlah zînga hotu chu Johanana a ni. Maluka thlah zînga hotu chu Jonathana a ni a, Sebania thlah zînga hotu chu Josefa a ni. Harima thlah zînga hotu chu Adna a ni a, Meraiota thlah zînga hotu chu Helkaia a ni. Ido-a thlah zînga hotu chu Zekaria a ni a, Ginethona thlah zînga hotu chu Mesulama a ni. Abija thlah zînga hotu chu Zikria a ni a, Miniamina thlah zînga hotu chu Moadia thlah zînga hotu chu Piltaia a ni. Bilga thlah zînga hotu chu Samua a ni a, Semaia thlah zînga hotu chu Jehonathana a ni. Joiariba thlah zînga hotu chu Matenaia a ni a, Jedaia thlah zînga hotu chu Uzia a ni. Salaia thlah zînga hotu chu Kalaia a ni a, Amoka thlah zînga hotu chu Ebera a ni. Hilkia thlah zînga hotu chu Hasabia a ni a, Jedaia thlah zînga hotu chu Nethanela a ni. Hêng puithiam lalber Eliasiba te, Joiada te, Johanana te, Jadua te hun lai hian Levia chite leh puithiamhote chu an thlahtute chhui chhuaha, chhinchhiah fel a ni. Daria kha Persia lal a lo nih kha chuan ziak chhuah fel a ni tawh. Eliasiba tupa Johanana hun aṭang chauhvin Levia chite chu an chhûngkaw hotu hming chhui chhuaha ziak fel a ni. Hasabia te, Serebia te, Jesua te, Binuia te leh Kadmiela te kaihhruaiin Levia chite hi a pâwl pâwlin an inṭhen a, ṭum khatah pâwl hnihin Pathian fak hla an sa ṭhîn, pâwl khatin an sa phawt a, pâwl dangin an lo chhâwn ṭhîn. Lal Davida remruat ang khân an la ti zêl a ni. Hêngho hi Tempul pulis hotu, Tempul kudâm leh kawngkhâr vêngtute chu an ni: Matania te, Bakbukia te, Obadia te, Mesulama te, Talmona leh Akuba te. Jesua fapa Joiakima, Jozadaka tupa te, Ramawptu Nehemia te, puithiam leh lehkhathiam Ezra te hun laiin hêng mite hian hna an thawk ṭan a ni. Jerusalem khaw kulh bang siam zawh an lawm dâwn chuan dârbenthek te, perhkhuang te nêna lâwm hla sa tûrin Levia chite chu khawia awm pawh an chah khâwm a. Levia chi, hla sa mi, Jerusalem leh a chhehvêla awmte leh Netofa khawpui leh a chhehvêla awmte chu an lo pung khâwm a. Beth-gilgal aṭang te, Geba aṭang te, Asmavet khua aṭang te pawhin an lo kal a. Puithiamte leh Levia chite chu an inthian thianghlim a, mipui te leh kulh bang te pawh an thian thianghlim a. Judai rama hotute chu kulh bang chung zâwlah chuan ka hruai a, pâwl hnihah an inṭhen a. Khawpui kulh bang chung zâwlah chuan Pathian fak chungin an kal kual a. Pâwl khat chu bang chung zâwla kalin Bawlhhlawh Kawngkhâr lam, ding lam panin an kal a. Zaipâwlin hma an hruai a, Hosaia hovin Judai ram hotu zâtve chuan an zui a. Hêng puithiam - Azaria te, Ezra te, Mesulama te, Juda te, Benjamina te, Semaia te leh Jeremia te hian an zui a. Tawtawrâwt nên hêng puithiam fapate hian an zui: Jonathana fapa Zekaria, Semaia tupa (Ani hi a pute chu Matania te, Mikaia te leh Zakura te. Asafa thlah an ni) chuan hma a hruai a, a chipui Semaia te, Azarela te, Milalaia te, Gilalaia te, Maaia te, Nethanela te, Juda te, Hanania te chuan an zui a. Pathian mi, lal Davida tum ṭhin ang perhkhuang te kha an keng bawk a, lehkhathiam Ezra chuan hma a hruai bawk a. Tuikhur Kawngkhâr an thlen chuan Davida khaw chhohna kailâwnah an chho va, Davida in an kal pêl a, khawpui chhak lam dep Meipui Kawngka bulah chuan an lo kal kual a. Pâwl dang, lâwm hla saho chu kulh bang chung zâwlah chuan vei lam panin an kal a. Mipui pung khâwm zâtve dangte nên chuan kan zui a. Meichhehna In sâng kan kal pêl a, kulh bang chhah kan thleng a, Efraim Kawngkhâr te, Jesina Kawngkhâr te, Sangha Kawngkhâr te, Hananela in sâng te, Hamea in sâng te, Berâm Kawngkhâr te kan kal pêl a, Tempul bul kawngkhâr kan thleng a. Tichuan, Pathian faka kalhote chu Tempul tualah kan intâwk khâwm ta a. Ka bula kal hruaitute bâkah hêng mite hi ka ruala kal vete chu an ni: puithiam rual tawtawrâwt hâmtute chu Eliakima, Maaseia, Miniamina, Mikaia, Elioenaia, Zekaria leh Hanania. Hêng mite hian an rawn dawt a: Maaseia, Semaia, Eleazara, Uzia, Jehohanana, Malkija, Elama leh Ezera. Zaipâwl Jezrahia ho chuan an râwl tâwpin hla an sa a. Chumi ni chuan thil tam tak kan hlân a, Pathianin min tihlim a, mipui chu an lâwm êm êm a ni. Hmeichhia leh naupangte pawh a lawmnaah hian an tel a, an thâwm chu hla tak aṭang pawhin a hriat a ni. Tempul thawhlâwm te, buh leh thei hmin hmasa sâwma pakhat te dah khâwma enkawltu tûrte kan ruat bawk a. Dânin a phût ang, puithiamte leh Levia chite hlawh tûr khaw tina lo leh huan aṭanga khawntu atân chûng mite chu ruat an ni nghâl a. Judai rama mite chu puithiam leh Levia chite chungah an lâwm hle a ni, inthen thianghlim hnate leh Pathian thupêk anga tih tûr dang taima taka an tih ṭhîn avângin. Tempul zaipâwl te leh Tempul pulis te pawhin lal Davida leh a fapa Solomona dân siam ang khân engkim an ti thlap zêl a. Hmânlai ata lal Davida leh thil tum thiam Asafa hun aṭang tawh khân thil tum thiam mite hian Tempula lâwmthu sawina leh fakna hla sakte hi an hruai ṭhîn a ni. Zerubabela leh Nehemia hun aṭangin mipuiin Tempul zaipâwl leh Tempul pulis te hlawh tûr ni tin thawhlâwm an pe ṭhîn, Levia chite tân pawh thilhlan an pe ṭhîn; Levia chite chuan puithiamte chu thilhlan an sem ve ṭhîn. Mosia dân bu an han chhiar chuan Amon mite leh Moab mite chu Israel-ho zînga telh ve ngai loh tûr an nih thu a lo chuang reng mai a. Amon mite leh Moab mite hian, Israel-te Aigupta ram aṭanga an lo chhuah khân chaw leh tui in tûr takngial pawh an lo pe duh lovin Israel-te ânchhe lawh tûrin Balaama an ruai zâwk a nih kha; mahse, Pathianin ânchhia chu malsâwmnaah a chantîr ta hlauh zâwk pawh a ni. He dân hi Israel miten an hriat chuan an zîng aṭangin hnam dangte chu an thlauhthla ta a. Puithiam Eliasiba, Tempul kudâm enkawltu leh Tobia hi rei tak an lo inkâwmngeih tawh a. Pindan zau tâwk tak pakhat, buh leh rimtui te, Tempula bungbêl hman tûr te, puithiamte tâna thilpêk te, buh te, uain te leh oliv hriak, sâwma pakhat, Levia chiten Tempul zaipâwl te leh Tempul pulis te tâna an pêk dahkhâwmna tûrah chuan Tobia chu a thlentîr ṭhîn a. Chutianga a thlentîr ṭhin lai chuan kei chu Jerusalem-ah ka awm lo; Babulon-ah lal Artazerzia lal kum sawmthum leh pahnih kum chuan chanchin hrilh tûrin ka hâwng a ni. Nakin deuhvah chuan kîr leh min phalsak a. Jerusalem-ah chuan ka haw leh ta a. Eliasiban Tempul pindan pakhata Tobia a lo awmtîr ka hmuh chuan mak ka ti êm êm a. Ka thin a ur hle a, Tobia thawmhnaw zawng zawng chu ka theh chhuak a. Pindan chu thian thianghlim tûrin thu ka pe a, Tempul bungbêl te, buhbâl thilpêk te, rimtui hâl tûrte dah kîr leh tûrin thu ka pe bawk a. Mipuiin ei tûr tâwk an pêk ṭhat loh avângin Tempul zaipâwl te leh Levia chi te chu an awmna ṭhin an in leh lovah an lo haw deuh vek tawh tih ka hre bawk a. Tempul an ngaihsak loh avângin hotute chu ka hau va, Levia chite leh zaipâwlte chu Tempulah ka ko kîr a; an hna an thawk ṭan leh ta a. Israel mi zawng zawng chuan an buh te, an uain te, an oliv hriak sâwma pakhat te chu tempulah an rawn keng leh ta bawk a. Tempul kudâm enkawl tûr chuan hêng mite hi ka dah a: Puithiam Selemia te, Dân thiam Zadoka te, Levia chi Pedaia te hi. Anni puituah Zakura fapa Hanana, Matania tupa chu ka dah bawk a. Anni hi an thawhpuite hnênah dik taka thil sem tûra ka rinte an ni. Aw ka Pathian, i Tempul rawngbâwlna atâna ka thiltihte hi hre reng ang che. Chûng lai chuan Judai ramah mi ṭhenkhat chuan sabat niin grep an rap sâwr a, ṭhenkhatin sabengtungte chu Jerusalem-a zawrh tûrin buh te, uain te, oliv hriak te, sabat niah an phurhtîr a. Chuvângin, sabat nia thil hralh chu kan khap ta a. Tura khaw mi, Jerusalem-a awmte chuan, sanghate leh thil dang chi hrang hrang Jerusalem khuaah sabat nia hralh tûr an rawn la ṭhîn a. Juda hruaitute chu ka hau va, “Thil sual tak in ti alâwm, sabat ni in bawhchhiat hi! In thlahtuten hetianga sabat an bawhchhiat avângin alâwm a hrem che ua, khua hi a rawn tihchhiat kha! Sabat ni bawhchhiain Israel-te chungah Pathian thinurna tihthlen belh in tum tlat a nih hi!” ka ti a. Chuvângin, sabat ni a inṭan aṭangin khawpui kulh kawngkhâr chu ka khârtîr a, sabat ni a ral hma chu kawng hawng lo tûrin thu ka pe bawk a. Sabat niin khawpuiah tu man eng mah an lâk luh theih loh nân kawngkhâr zawng zawng chu keima mite ngei ka vêntîr a. Ṭum hnih khat chu thil tinrêng rawn zuar ṭhînte chu khawpui kulh pâwnah Zirtâwpni zân chu an riak a. “Khatah riak tawh suh u, a sâwt lo, khatianga in tih leh chuan in chungah kut ka rawn thlâk tawh ang,” ka ti a. Chuta chin chu sabat niin an lo kal leh tawh ngai lo. Levia chite chu inthian thianghlim tûrin ka hrilh a, sabat ni chu serh ngei a nih theih nân kawngkhârahte chuan ka chântîr a. Aw ka Pathian, hei vâng pawh hian min hre reng la, khawngaih takin min zuah ang che. Chutih lai chuan Juda pa tam tak chuan Asdod nula te, Amon nula te, Moab nula te nupuiah an nei tih ka hmu chhuak bawk a. An fa zâtve dâwn lai chuan Asdod-ho ṭawng emaw, ṭawng dang emaw an hmang a, kan ṭawngin an ṭawng hlei thei lo. Chûng mite chu ka hau va, ânchhia ka lawh a, a ṭhen phei chu ka vua a, an samte pawh ka pawhsak a. Hnam dangte nên, an fate chen pawhin, inneih pawlh loh tûrin Pathian hming chhâlin chhia ka chhamtîr a. “Hnam dang hmeichhiaten alâwm lal Solomona pawh kha thil sual tihtîr. Hnam dang lal zawng zawng aia ropui a ni a, Pathian pawhin a hmangaih a, Israel zawng zawng lalah a siam a; mahse, he thil sual hi a tih tâk kha. Pathian thu awih lovin hnam dang hmeichhia nangni angin kan nei ve mai dâwn em ni ang?” tiin ka chhâl a. Puithiam lalber Eliasiba fapa Joiada chuan Sanbalata fanu nupuiah a nei a, ani chu Beth-horon mi a ni. Jerusalem khua ata Joiada chu ka hnawt chhuak a. Aw ka Pathian, hêng mite hian puithiam hming an tichhia a, puithiamte leh Levia chite nêna in thuthlung an bawhchhiat dân hi hre reng ang che. Hnam dangte nêna inhnamhnawihna zawng zawng ata mipui chu ka thian thianghlim a, puithiam leh Levia chite chu mahni tih tûr an hriat ṭheuh theih nân dân ka siamsak thlap a. Hâlral thilhlan hâlna tûr thingte chu a hun taka rawn keuh ziah tûrin hna ka sem a, mipui pawh buh thar hmasa leh thei hmin hmasa rawn ken hun tûr ka hrilh bawk a. Aw ka Pathian, hêng zawng zawng hi hre reng la, ka thiltih ṭhatah min pawmsak ang che. Lal Ahasuera India aṭanga Sudan thlenga ram bial za leh sawmhnih leh pasarih chunga rorêltu hun laiin hêng thil hi a lo thleng a ni. Hetih lai hian lal chu Susa khawpuiah a awm a, a lal kum thum kum chuan a ram milian te, a ṭhuihruai te, Persia leh Media sipai hotu te, bial tina Ramawptu te leh bial tina milian te tân ruai a ṭheh a. Thla ruk chhûng ngawt a ram ropui tak hausakzia te, a lalzia leh a neihnunzia te a entîr a. Chûng hnu chuan a chênna khawpui Susa khuaa lo kal, milian leh mitê te tân lal in hual chhûngah ni sarih ruai a ṭheh leh a. Chutah chuan la zai sîn puan vâr chi te, a dumpâwl chi te, a senduk chite an zâr a, a zârna hruihrual chu sailungvâr bana tangkaraw khângah chuan an thlung a. Rangkachak leh tangkaruaa siam ṭhutthlêng dûp an hûng thluah a; a tualzâwlah chuan sailungvâr te, lungmawi chi hrang hrang - a sen te, a hring te, a dumpâwl te an phah bawk a. An zu semna no chu rangkachak no a ni a, inang pakhat mah a awm lo; lal chuan uain chu a ren lo hle. In tâwk chin tuk a awm lo; tu pawh, an duh zât zât intîr tûrin lal chuan a chhiahhlawhte chu a hrilh diam a ni. Lalnu Vasti pawhin lal Ahasuera in pakhatah a hrangin nuho tân ruai a ṭheh ve bawk a. A ni sarih ni chuan lal chu a rui lungpuam ta deuh va, mi tilreh pasarih - Mehumana te, Biztha te, Harbona te, Bigtha te, Abagtha te, Zethara te, Karkasa te leh ama chhiahhlawh bîkte chu a ko va. Lalnu Vasti chu a lallukhum khum chunga rawn hruai tûrin a tîr a. Lalnu chu nu hmêlṭha tak a ni a, lal chuan a chhuang êm êm a, a miliante leh a ruai chhimtute chu a hmêl ṭhatzia entîr a duh a ni. Lal thupêk an han hrilh chuan lalnu Vasti chu a kal duh ta lo va. Lal chu a thinur êm êm a. Lalte hian dân leh a kenkawh dân tûr chungchângah dânhremite an râwn ziah ṭhîn a. Lal Ahasuera pawh chuan dânhremite chu a ko va. Chûngte chu Karsena te, Sethara te, Admatha te, Tarsisa te, Meresa te, Marsena te, Memukana te, Persia leh Media rama milian, lal bula awm ṭhîn te an ni. Lal chuan, “Lal Ahasueran a chhiahhlawhte lalnu Vasti a kohtîr a, a thu a lo awih duh lo va. Hetiang chungchânga kan ram dân eng nge ni, engtia tih tûr nge ni ang?” tiin anni chu a zâwt a. Memukana chuan lal leh milian dang hmaah, “Lalnu Vasti hian lal hi a thamlo mai ni lovin a rama miliante leh ram pum chhûnga paho hi a lo thamlo hle tihna a ni. Lalnu thil tih dân hi nuhovin an hriat hunah an pasalte chu an pawisa lo vang a, ‘Lal Ahasueran lalnu Vasti a koh pawhin a kal duh bîk hlei nêm,’ an ti ang. Ni tlâk hmain Persia leh Media ram milian nupuite pawhin lalnu thiltih dân an hriatin an pasalte thu an awih duh bîk lo vang a, paho chu an thin a rim ṭeuh mai ang. Lalin rem a tihzâwng a nih chuan lalnu Vasti hian, ‘lal hmêl a hmu leh tawh lo tûr a ni,’ tiin thupêk chhuah rawh. Sût leh mai mai chi loh Persia leh Media dân bu-ah ziak ni rawh se. Lalnu atân mi dang tha zâwk i nei leh mai dâwn nia. Chu thupêk chu i ram zau taka puan a nih hnu chuan nuho chuan an pasalte chu an rethei emaw, an hausa emaw an pawisa ang,” a ti a. Lal leh miliante chuan chu chu ṭha an tih zâwng tak a ni a. Memukana rawt angin lal chuan a ti ta a. A ram bial tinah, a bial ṭawng leh hawrawp ṭheuh hmangin thu a thawn darh ta a; “Chhûng tinah pa a lal ber ang a, a thu chu awih vek tûr a ni,” tiin. A thinur a daih hnu pawhin lal chuan Vasti thil tih dân leh a chungchânga thupêk chu a ngaihtuah neuh neuh ṭhîn a. Lal thurâwntute chuan a hnênah, “Lal tân nula hnahkhat, hmêlṭha tak zawn ni teh se. Bial tinah hotu ruat la, chûng chuan an bial nula hmêlṭha zawng chhuak sela, i khawpui Susa khuaah lal inah rawn hruai khâwm teh se, lal ina hmeichhe pindan enkawltu mi tilreh Hegaia hnênah rawn hruai sela, inchei zirtîr rawh se. I nula duh ber i thlang ang a, Vasti aiah lalnu-ah i dah dâwn nia,” an ti a. Lal chuan ṭha a ti a, chutiang chuan an ti ta a. Susa khuaah chuan Juda pakhat, Zaira fapa Mordekaia a awm a, Benjamin hnam Kisa fa Simeia thlah a ni. Babulon lal Nebukadnezaran Jerusalem aṭanga Judai ram lal Jekonia leh a mi mante sala a hruai ṭum khân Mordekaia pawh hi a tel ve a ni. A pamite nupa chu an thih tawh avângin an fanu Estheri, Hebrai ṭawnga Hadasi an tih chu, a enkawl seilian a, ama fanu ang chiahin a en a ni, nula hmêlṭha tak a ni. Lal thupêk an puan chhuah hnu chuan Susa khawpuiah Hegaia lo enkawl tûrin nula an rawn hruai zut zut a. Estheri pawh chu lal inah hmeichhe pindan vêngtu Hegaia hnênah chuan an rawn hruai ve a. Hmêlṭha a lo ti êm êm a, a lo duhsak ta hle a. A incheina tûrte chu a pe zung zung a, ei tûr tuihnai hnai a pe a, a chhiahhlawhah, amah cheitu atân lal ina nula pasarih a ruatsak bawk a. Lal ina hmeichhe awmna pindan nuam berah a chhiahhlawhte nên chuan a awmtîr ta a. Estheri chuan eng hnam nge a niha, tute nge a chhûngte tih a sawi lo; Mordekaia khân sawi a khap tlat a ni. Estheri chuan eng nge a tiha, engtin nge a awm zêl tih hre tûrin ni tin lal ina hmeichheho awmna pindan kawtah chuan Mordekaia chu a kal ziah ṭhîn. Lal nupui tûr an chei chhûng hian kum khat a awh ṭhîn. Thla ruk chhûng chu Mura hriak an chulh a; chumi zawhah thla ruk chhûng bawk rimtui chi dang an chulh leh ṭhîn a ni. Chutia an chei hnu chauh chuan lal hnênah an kal ṭhîn a ni. Lal hnêna an kal dâwn chuan chhiahhlawh nula, an duh ber pakhat, an hruai thei ṭhîn. Zân lamah lal hnênah chuan an hruai a, zîngah chuan lal nupuiho awmnaah mi tilreh Saazgasa kutah an dah ṭhîn a; lalin a lo duh hlea, a hming lam meuhva a koh loh chuan an kal leh tawh ngai lo. Estheri chu lal hnêna a kal hun a lo thleng ta a, Estheri hi Mordekaia pami fanu a ni a, fanu anga a neih tâk a ni a. Estheri chuan lal hnêna a kal dâwn chuan hmeichhe pindan enkawltu Hegaian tâwk a tih ang chiahin a inchei a, a hmu apiangin hmêlṭha an ti êm êm vek a. Lal Ahasuera lal kum sarihna, thla sâwmna, Tebet thla chuan Estheri chu lal hnênah chuan an hruai a. Lal chuan nula dang zawng zawng ai chuan Estheri chu a lo duh a, a lo duhsakin a ngaina bîk ta hle a; lallukhum a khumtîr a, Vasti aiah lalnu-ah a dah ta a. Estheri lawm nân lal chuan ruai ropui tak a ṭheh a, milian leh lal ṭhuihruai zawng zawng an awm a, chumi ni chu a ram puma chawlhni-ah a puang a. A hausa bawk a, pêk âwm tak tak thilpêk a sem ur ur bawk a. Lal chuan Mordekaia chu hna lian tak a thawhtîr tawh a. Estheri pawh chuan Juda mi a nih tu mah a hrilh lo, Mordekaian tu mah hrilh loh tûr a tih kha, a naupan têt aṭanga a thu a zâwm ṭhîn ang khân a zâwm zêl a ni. Mordekaia chu lal ina hna lian tak lalin a thawhtîr avâng chuan lal in kawngka vêngtu mi tilreh pahnih Bigthana leh Teresa chu lal Ahasuera chungah chuan an thinur a, lal chu thah tumin an phiar ta a. Chu thil chu Mordekaia chuan a lo hre ru a, Estheri chu a hrilh a. Thil awm dân an han chhui chiang a, a lo dik ngei a, an pahnih chuan an khai hlum ta a. Chu thu chu lal thiltih chhinchhiahna bu-ah an ziak lût a. Chumi hnu chuan Agag mi Hamedata fapa Hamana chu lal Ahasuera chuan a kaisântîr a, hotu dang zawng zawng chungah a dah a. Lal thupêk angin lal ina thawk zawng zawng chuan Hamana chu a lo kalin ṭhingṭhiin chibai an bûk ṭhîn tûr a ni. Mordekaia erawh chuan a ti ve duh lo. Lal ina thawktute chuan Mordekaia hnênah, “Lal thupêk engtizia nge i zawm duh loh le?” an ti a. Lal thu chu zâwm ve mai tûrin an hrilh ṭhîn a; mahse, Mordekaia chuan, “Juda ka ni a, Hamana hmaah ka kûn thei lo,” a ti a. Tichuan, Mordekaia awm dân chu a ngaithei dâwn nge dâwn lo hriat nân Hamana chu an hrilh ta a. Mordekaia chu a hmaah a kûn duh lo va, chibai pawh a bûk duh lo tih a han hriat chuan a thinur hle a. Tin, Mordekaia chu Juda mi a ni tih a han hriat chuan Mordekaia mai sawisa lovin Persia rama Juda awm zawng zawng chu tihmang vek a tum ta a. Ahasuera lal kum sâwm leh pahnihna, thla hmasa ber, Nisan thla chuan a thiltum tihhlawhtlin nân eng ni leh eng thla nge ṭha ber ang tih hriat nân ai a entîr a; chu aien ni chu ‘Purim’ an ti ta a ni. Thla sâwm leh pahnih, ni sâwm leh pathum ni chu ni remchâng berah an ngai ta a. Hamana chuan lal hnênah, “I ram pum hmun hrang hranga awm zîngah hian hnam pakhat inzep an awm a, bial tinah an awm darh a ni. Hnam dang dân ang ni lo, anmahni dân bîk an nei a, ram dân pawh an zâwm ve duh lo. Hetianga i awmtîr zêl chuan i tân a ṭha lo hle ang. Lalin rem a tih chuan tihhlumtîr vek mai teh. Chutianga i tih chuan ram awp nân lal sumah tangkarua kg. nuaithum leh sîngli ka rawn chhûng thei ngei ang,” a ti a. Thupuan nemnghehna zungbun chu lal chuan a phawi a, Juda-ho hmêlmapa Agag mi Hamedata fapa Hamana chu a pe a. “Mipuite leh an tangka chu i kutah ka pe a che, i duh duhin ti rawh,” a ti a. Thla hmasa ber ni sâwm leh pathum ni chuan lal lehkhaziaktute chu Hamana chuan a ko va, lal thupuan chu a ziaktîr a, ram chhûnga ṭawng chi hrang hrang leh an hawrawp hmangin a ziaktîr nghâl a. Lal aiawhtu te, ramawptu te leh rorêltu te hnênah lal zungbuna nem chu thawn chhuah tûrin a buatsaih ta a. Ram puma bial tinah, lal thupêk chu an tlânpui a. Chûng thupêk chu ni thuhmun, thla sâwm leh pahnih, Adar thla, ni sâwm leh pali niin hman tûr a ni - Juda zawng zawng, ṭhalai leh tar te, naupang leh hmeichhiate lam pawh thah vek tûr thu a ni; an thil neihte pawh râllâk sum anga neihsak vek tûr a ni. Bial tinah chu thupêk chu an chhiar chhuak tûr a ni, a hun takah, thupêk angin mi an chêt theih nân. Susa khawpuiah pawh thupêk chu lal chuan a puantîr a; bial hrang hrangah erawh chuan lehkha chu an tlânpui a. Lal leh Hamana te chuan zu an in veng veng lai chuan Susa khuaa mite chu an mangangin an chiai hle a. An thil tih tâk zawng zawng chu Mordekaian a lo hriat chuan a puan a pawtthlêr a, saiip puan a sin a, a lu-ah vaivut a phul a, lungngai takin a ṭap tlawk tlawk a; chuti chung chuan khua chu a fang a, Lal in tual luhna kawngka chu a va thleng a; saiip sin tu mah an luhtîr phal loh avângin lal in hung chhûngah chuan a lût lo. Ram bial tina lal thupêk an puanna apiangah, Juda-ho chu an ṭap chuah chuah mai; chaw an nghei a, mi tam tak chu saiip puan sinin vaivutah an ṭhu a. Mordekaia awm dân chu chhiahhlawh nulate leh mitilrehte chuan Estheri chu an rawn hrilh a, lalnu chu a mangang hle a, Mordekaia chu saiip puan hlîpa a sin tûrin puan a pêktîr a; a lo duh lo. Amah enkawltu tûra lalin mi tilreh pakhat a ruatsak Hathaka chu a ko va, chinchâng zâwt chiang tûrin Mordekaia hnênah chuan a tîr a. Hathaka chu lal in luhna kawngka tualzâwlah chuan a va chhuak a. Mordekaia chuan thil awm dân zawng zawng a lo hrilh a, Juda-ho tihchimih an nih phawt chuan lal sum bâwma Hamanan tangka chhûn luh a tum zâtte pawh chu a lo hrilh a. Juda-te râwt tûr thupêk Susa khawpuia an puan kawpi pawh Hathaka chu a pe a. Mordekaia chuan lehkha chu Estheri pe tûrin a ngên a, thil awm dân zawng zawng chu a hrilhtîr a. Hathaka chuan thu chu a va thlen a. Estheri chuan hetiang thu hi Mordekaia hrilh tûrin a tîr leh a. “Ram chhûng mi tu pawhin, mipa pawh, hmeichhia pawh, koh lohva lal in chhûngrila lûta, lal va hmu chu, a ṭhuihruaite ngei pawh, tihhlum tûr tih mi zawng zawngin an hria, lalin a rangkachak laltiang a lo lekchhuahsakte chauh chuan chu dân chu an pumpelh thei a ni. Ni sawmthum zet chu min la ko leh ta lo a ni,” tiin Mordekaia chu a hrilhtîr a. Estheri thu chu Mordekaia an hrilh a. Mordekaia chuan hetianga hrilh tûrin Estheri hnênah chuan a tîr leh a, “Lal in chhûnga i awm avângin nangmah chauh hi him bîk tûrah inngai suh. Tûn hun anga i ngawih mai mai chuan hmun danga Juda awmte chu engtin tin emaw chhan chhuah an nih hlauh pawhin; nang leh i pa chhûngte chu kan thi vek dâwn a ni. Hetiang hun atân ngei hian lalnu-ah i lo ṭang a ni dâwn lâwm ni?” tiin. Estheri chuan Mordekaia hnênah a tîr leh a, “Kal la, Susa khuaa Juda awm zawng zawng ko khâwm la, ka tân a chhûn a zânin chaw ngheiin ni thum chhûng ṭawngṭai teh u. Ka chhiahhlawh nulaho nên keini pawhin chutiangin kan ṭawngṭai ang. Chumi hnuah chuan dân ni lo mah se lal hnênah chuan thih leh thih ka kal ang,” a ti a. Mordekaia chu a hâwng a, Estheri tih ang chuan a ti ta vek a. Ni thum chaw a nghei ni chuan Estheri chuan lal thuam a inbel a, lal pindan hual chhûng tual, lalṭhutthlêng awmna kawtah chuan a kal a. Kawngka hawi zâwngin lalṭhutthlêngah chuan lal chu a lo ṭhu a. Lalin pâwna lalnu Estheri ding chu a hmu a, a lo khawngaih a, a rangkachak laltiang chu a lekchhuahsak a, Estheri chuan a va pan a, a tiang hmâwr chu a va khawih a, “Lalnu Esther, eng nge ni i duh min hrilh teh, ka ram chanve pawh ni se ka pe ang che,” a lo ti a. Estheri chuan a chhâng a, “Lalin rem i tih chuan zâninah Hamana nên ka ruai siamsak che rawn ei teh u,” a ti a. Lal chuan Hamana chu lalnu ruai kîl tûra lo kal vat tûrin a chah a, Lal leh Hamana chu lalnu ruai kîl tûr chuan an kal ta a. Uain an in laiin lal chuan, “Eng nge i duh, ka ram chanve hial pawh ni se ka pe ang che,” a ti leh a. Estheri chuan, “Lalin min khawngaiha, ka thil dîl tûr chu i phal dâwn chuan naktûk zânah ruai ka lo buatsaih leh ang a, Hamana nên rawn ei leh ula ka lo hrilh ang che,” a ti a. Hamana ruai ṭheh zo chu rilru hlim tak leh lâwm takin a haw a; mahse, Mordekaia chu lal in hual chhûng kawngka bulah a hmu a, zah derna lantîr tûrin din pawh a lo ding duh lo va; chu chu a han hmuh chuan Hamana chu a thinur ta hle a. A insûm hrâm hrâm a, a haw ta a. A ṭhiante leh a nupui Zeresi a kohtîr a. A hausakzia te, fapa a ngahzia te, lalin a kaisântîr thu te, lalin milian dang zawng zawng aia a ngaihsânzia te sawiin a ina lêng tûra a sâwm a ṭhiante chu a uankhum a. “Lalnu meuh pawhin lal leh kei chauh a ruai chhim tûrin min sâwm a ni, naktûk zân atân pawh min sâwm dêr tawh. Amaherawhchu, lal in luhna kawngkaa Mordekaia ṭhu ka hmuh chhûng chu hêng zawng zawng hi engah mah ka ngai lo,” a ti a. A nupui leh a ṭhiante chuan, “Tawng sawmngaa sâng, khaihlumna tûr ban phuntîr la, naktûk zîngah lal hnênah Mordekaia chu khai hlum dîl la, hlim takin ruai chu i kîl thei mai ang chu,” an ti a. Hamana chuan ṭha a ti hle a, inkhai hlumna tûr chu a siamtîr ta a. Chumi zân vêk chuan lal chu a muhîl thei lo va, thil hlui chhinchhiahnate chu a lâk chhuahtîr a, an chhiar chu a ngaithla a. Lal ina mi tilreh Bigthana leh Teresa te pahnihin lal thah tuma an phiar thute kha an chhiar kher a. Lal chuan, “Hemi avâng hian Mordekaia hi chawimawiin lâwmman kan pe em?” a ti a. A chhiahhlawhte chuan, “Eng mah kan tihsak lo,” an ti a. Lal chuan, “Tu nge lal in tuala awm saw?” a ti a. Hamana chuan Mordekaia khaihlumna tûr ban a siamtîr a, khai hlum dîl tûrin lal in hual chhûngah a lo kal a ni. Lal chhiahhlawhte chuan, “Biak tum chein Hamana a lo kal a ni,” an ti a. “Lo lût rawh se,” a ti a. Hamana a lo luh chuan, “Mi pakhat chawimawi ka duh a, engtin nge ka tih ang?” lal chuan a lo ti a. ‘Lal chuan kei lo chu tu dang nge chawimawi a duh ang le,’ a ti rilru a. Lal hnênah chuan, “Lalin chawimawi a duha tân chuan, lal hâk ṭhin kawr han la chhuak sela, a chuanna ṭhin sakawr rawn kai sela, a chawimawina lukhum khumtîr ni rawh se. I miliante zînga ropui ber ko la, ani chuan lal kawrte chu hâktîr sela, sakawrah chuantîr bawk sela, khua fanpui rawh se. An kal pah chuan, ‘Lalin chawimawi a duha chu hetiang hian a chawimawi a ni,’ ti zêl rawh se,” a ti a. Lal chuan Hamana hnênah, “Hmanhmawh la, lal kawrte leh sakawrte chu la la, Juda mi Mordekaia hi i sawi ang chuan chawimawi rawh. I sawi ang zawng zawng khân ti ang che, lal tual luhna kawngka bulah a awm saw,” a ti a. Hamana chuan lal kawrte chu a la a, Mordekaia chu a hâktîr a; Mordekaia chu sakawrah chuan a chuang a; khawpui kawtthlêrah chuan Hamanan sakawr chu a kaihsak a, an kal pah chuan mipui hnênah, “Lalin chawimawi a duha chu hetiang hian a chawimawi a ni,” tiin a au luah luah zêl a. Mordekaia chu lal tual luhna bulah chuan a kal leh a; Hamana erawh chu zaka hmai khuhin inah a hâwng a. A nupui leh a ṭhiante chu a chunga thil thleng zawng zawng chu a hrilh vek a. A nupui leh a ṭhian fing tak takte chuan, “Mordekaia hi i chelh lo ṭan ta a nih hi. Juda a ni a, i ngam lo vang; i tlâwm zâwk ngei ang maw le,” an ti a. Chûng thu an sawi lai chuan Hamana chu lal ina Estheri ruai chhim tûra hruai nghâl tûrin mi tilrehte an lo kal a. Lal leh Hamana chu Estheri ruai buatsaih ei tûr chuan an kal a. Uain an in lai vêkin lal chuan, “Lalnu Esther, eng nge i duh min hrilh tawh teh le, ka ram chanve hial pawh ni se, min hrilh la, ka pe ang che,” a ti a. Lalnu chuan a chhâng a, “Aw Lalpa, lalin min khawngaiha ṭha i tih zâwng a nih chuan ka nunna zuah tûrin ka dîl a che; ka mite nunna pawh zuah tûrin ka ngên a che. Tihhluma tihboral vek tûrin kei leh ka mite chu tih kan ni tawh. A hmei a pain bawihah min hralh ni lek sela chu ka ngawi thei ang a, ka tibuai lo vang che; tûnah zawng, kan hmêlmate hian min that chimit vek dâwn a ni,” a ti a. Lal Ahasuera chuan Estheri hnênah, “Chutianga lo ti ngam ta mai chu tu nge a nih a, khawia awm nge a nih?” a ti a. Estheri chuan, “Kan hmêlma leh min ertu chu he misualpa Hamana hi a ni alâwm,” a ti a. Hamana chu lalnu hmaah chuan a khûr chhe ta mai a. Uain an in lai chuan lal thinur chu a tho va, lal huanah chuan a kal chhuak a, Hamana erawh chu lalnu hnêna a nunna zuah ngên tûrin in chhûngah chuan a awm a, lal hmêl a hmuhin a tân a hlauhawm tih a hria a ni. Lal chu huan aṭang chuan uain an inna pindanah chuan a lo lût leh a, Estheri ṭhutnaa Hamana lo bawk chu a hmu a, “Ka inah, ka mit hmuh ngeiah pawh lalnu hi sual a tum vei a ni maw?” a ti a. Lal a han ṭawng chhuah chuan Hamana hmai chu an khuhsak a. Lal bula awm ṭhînte zînga mi tilreh pakhat Harbona chuan, “Lal tâna thil ṭha titu Mordekaia khai hlum nân tawng sawmngaa sâng Hamana hian a in bulah ban a phun asin,” a ti a. Lal chuan, “Chutah chuan va khai hlum rawh u,” a ti a. Mordekaia khai hlumna tûra a siamah chuan Hamana chu an khai hlum a, lal thinur chu a dai ta a. Chumi ni chuan Juda-te hmêlma Hamana in leh lo chu lal Ahasuera chuan lalnu Estheri chu a pe a. Estheri chuan lal hnênah Mordekaia nêna an inchhûngkhat dânte a hrilh a. Chuta chin chu lal hnênah duh duhin Mordekaia chu a kal thei ta a. Lal zungbun Hamana bun kha lal chuan a la a, Mordekaia chu a buntîr a. Estheri chuan Hamana in leh lo chu Mordekaia kutah a dah a. Estheri chuan lal hnênah sawi tûr a la nei cheu va. A ke bulah a bawkkhup a, Hamana thil tihpawi, Juda-te tihmang a tum chu, sût tûrin mittui nên a ngên a. Lal chuan Estheri chu a tiang a lekchhuahsak a; tichuan, Estheri chu a tho va, lal hmaah chuan a ding ta a. “Lalin ṭha a tiha, min khawngaih takzet chuan, lal ram bial tinah Juda awmte that tûra Agag mi Hamadata fapa Hamanan lehkha a thawn kha sût lehna ziak ni teh se. Ka mite chunga hetiang thil ṭha lo thleng tûr hi ka ngai ngam lo, ka laichîn ngeite an that tûr hi hmuh pawh ka ngam lo vang,” a ti a. Lal chuan lalnu Estheri leh Juda mi Mordekaia hnênah, “Hamana chu Juda-te chunga kut thlâk a tum avângin ka khai hlum a, a in leh lo pawh lalnu Estheri ka pe bawk a. Lal thu-a ziak, zungbuna nem hnan tawh chu sût leh mi a ni hlei nêm. In duh ang angin Juda mite hnênah ka hmingin ziak ula, zungbunin nem rawh u,” a ti a. Thla thumna Sivan thla ni sawmhnih leh pathum ni chuan lal lehkha ziaktute chu a ko va, Juda-te chungchânga a duh ang chu a ziaktîr a. India ram aṭanga Sudan ram thleng, lalram bial za leh sawmhnih leh pasariha lal aiawhtu te, ramawptu te leh bial hotu te chu anmahni ṭawng leh an hawrawpa ziakin a thawn nghâl a. Lal Ahasuera hmingin lehkha chu an ziak a, a zungbun chuan an nem a. Sakawr tlân chak chi, lalin thu thawn darh nâna a vulh chunga chuangte kutah an pe a, an tlânpui ta a. Chu lal lehkhaah chuan: Juda-te chu an awmna khua apiangah lo inpun khâwma anmahni leh an nupui fanaute rawn beih tumtute an lo beih lêt ve lal chuan a phalsak a. An awmna bial tina anmahni rawn beitute chu an bei lêtin an that thei ang a, an thahte in leh lo pawh râllâk sum angin an nei thei ang. Thla sâwm leh pahnihna Adar thla, ni sâwm leh pathum ni chuan lal Ahasuera ram chhûnga bial zawng zawngah, Juda-ho thah tûr tih ni-ah, he thupêk thar hi Juda-te chuan an hmang thei ang. He thu hi dân ngheta hman tûr leh Juda-te pawh an hmêlmate chungah phuba la tûra an inrâlrin theih nân bial tina mite hnênah puan tûr a ni,” tiin an ziak a. Lal thupêkin sakawr chungchuang mite chu lal sakawr chakah an chuang a, an tlân ta zut zut a. Chu thupêk chu Susa khawpuiah pawh an puang a. Mordekaia chuan puan zai sîn senduk kawrfual a ha a, lal puan bah dumpâwl leh vâr chu a bât a, chawimawina rangkachak lukhum a khum a; lal in ata chu a lo chhuak a, Susa khawpui kawtthlêrah mi tin lâwmin an lo au dur dur a. Juda-te chu an hlim hle a, an ngaih a ṭhain an thla a muang bawk a. Lal thupêk an chhiarna bial leh khua apiangah Juda-te chu an lâwm a, hlim takin ruaite an ṭheh a. Juda-te chu an hlauh ve thung tâk avângin mi tam tak chu Juda-ah an inleh phah ta nghe nghe a. Lal thupêk hman ni tûr Adar thla ni sâwm leh pathum ni chu a lo thleng a. Chumi ni chuan an hmêlmate chuan Juda-te chu tihchimih an tum a nih kha; mahse, Juda-te chan chu a ṭha ta zâwk a. Lal Ahasuera ram chhûngkaw tina Juda-te vêngah chuan Juda-te chu an pung khâwm a, anmahni rawn beih tumtu bei lêt tûrin an lo inrâlring a. Tu hnam pawhin Juda-ho chu an hlau va, an khawih ngam ta lo va. Bial hotu - lal aiawh te, ramawptu te leh sawrkâr hnathawk dang te chuan Mordekaia an hlauh avângin Juda-te chu an pui ta zâwk a. Lal inah Mordekaia chuan ngaih ropui a hlawh ta hle mai tih ram pumah a lo thang ta a, thil a tithei ta deuh deuh va. Chuvângin, Juda-te chuan an hmêlmate chu duh duhin an sawisa thei a, khandaih nên an bei a, an hmêlma zawng zawng an that ta a. Susa khawpuiah pawh Juda-te chuan mi zanga lai an that a. Hêng Parsandata te, Dalfona te, Aspata te, Porata te, Adalia te, Aridata te, Parmasta te, Arisaia te, Aridaia te, Vaizata te, Juda hmêlma Hamedata fapa Hamana fa sâwmte pawh hi Juda-te chuan an that a; amaherawhchu, tu mah an rawk lo. Chumi ni chuan lal khawpui Susa khuaa mi an thah zât chu lal an hrilh a. Lal chuan lalnu Estheri hnênah, “Lal khawpui Susa-ah pawh Juda-te chuan mi zanga, Hamana fa sâwmte nên an that a, ram chhûng bial dangah eng ang takin che ang maw! Duh dang i la nei em? Min hrilh teh, ka tihsak zêl ang che,” a ti a. Estheri chuan, “Lalin rem a tih chuan vawiina an tih angin Susa khuaa Juda-te chuan naktûkah pawh ti leh sela, Hamana fa sâwmte chu thinga khai ni rawh se,” a ti a. Chutianga ti tûr chuan lal chuan thu a pe a, Susa khuaah chuan an puang a. Hamana fa sâwmte pawh chu thingah an khai a. Susa khuaa Juda awmte chu Adar thla ni sâwm leh pali ni chuan an pung khâwm leh a, Susa khuaah mi zathum an that leh a; mahse, tu mah an rawk lo. Ram chhûng bial tina Juda-te pawh chu mahni invênghim tûrin an pung khâwm a. Anmahni hawtu, an hmêlma, mi sîngsarih leh sângnga an that a; amaherawhchu, tu mah an rawk lo. Chutiang chuan Adar thla ni sâwm leh pathum ni chuan an ti a. A tûk ni sâwm leh pali ni chuan tu mah an that tawh lo, hlim taka ruai ṭheh ni-ah an hmang a ni. Susa khuaa Juda-te erawh chuan ni sâwm leh panga ni chuan awmni an kham a, ni sâwm leh pathum leh ni sâwm leh pali ni-ah an hmêlmate an that a, ni sâwm leh panga ni chuan an tâwp chauh a ni. Chumi avâng chuan thingtlâng khaw lama Juda-te chuan Adar thla, ni sâwm leh pali ni hian awmni an kham a, hlim takin ruaite an ṭheh a, thilpêkte an inpe tawn ṭhîn. Mordekaia chuan hêng thute hi lehkhabu-ah a ziaktîr vek a, Persia ram chhûnga Juda awm zawng zawng, a kilkhâwr bera awmte chenin lehkha a thawn a. Adar thla ni sâwm leh pali ni leh ni sâwm leh panga ni, kum tin awmni khama, kût tûr a ni. Hêng ni-ahte hian a ni Juda-ten an hmêlmate laka an intihfihlîma, lungngaihna leh manganna thla chu hlimna leh lâwmna thlaa an chantîr ni. Ruaite ṭheha, hlim taka hmangin ei tûr thilte inpe tawn tûrin a hrilh a; mi retheite pawh ei tûr pe ve tûrin a hrilh bawk a. Juda-te chuan Mordekaia thupêk chu an zâwm a, kum tin kûtah an neih ta a. Agag mi Hamadata fapa Hamana, Juda-te hmêlma khân Juda-te râwt nân eng ni nge ṭha ber ang tih hriat nân ai a entîr a. Juda-te chu tihchimih a tum a ni. Nimahsela, Estheri chu lal hnênah a kal a, lal chuan thupêk a chhuah ta a. Chu thupêk avâng chuan Juda-te tuar tûra a buatsaih chu Hamana chuan a fate nên an tuar ta a, thingah an khai ta a. An chunga thil thlengte avâng leh Mordekaia lehkha avâng chuan chu kût chu Purim ‘Aien’ Kût an vuah ta a ni. Juda-te chuan an thlah zêlte tân pawh, a hun takah, Mordekaia sawi angin hêng ni hnihahte hian kum tin awmni an kham ziah tûr a ni tih dân an siam ta a. Juda chhûngkua tu pawhin, ṭhang lo thar zêlte chuan bial tinah leh khaw tinah Purim kût ni te hi kumkhuain an hmang ṭhîn tûr a ni tih thu an titlu a. Lalnu Estheri, Abdaia fanu chuan, Purim kût chungchânga Mordekaia lehkha chu a nemnghet a ni tih thu chu Mordekaia lehkhaah chuan an thawn chhuak tel a. Lehkha chu Juda zawng zawng hnêna thawn a ni; Persia ram bial za leh sawmhnih leh pasarih hnênah a kawpi an pe bawk a; Juda-te chu thlamuang tak leh râlmuang taka awm tûrin an chah a. Juda-te chu, a hun takah, an thlah zêlte nên, chaw nghei leh lusûn tih dân an neih ṭhin angin Purim ni te chu hmang ṭhîn tûrin an chah bawk a. Chu chu Mordekaia leh lalnu Estheri thu a ni; Lalnu Estherin Purim kût chungchâng a nemnghehna thu chu lehkhabu-ah ziak a ni. Lal Ahasuera chuan a ram kilkhâwr bera awmte leh tuipui kama awmte chu chhiah a chawitîr vek a. A thiltih ropui leh mak tak tak te, sawrkâr milian bera Mordekaia a siam thu te chu Persia leh Media lalte chanchin ziakna bu-ah ziak a ni. Mordekaia chu lalber Ahasuera dawttu a ni. A Juda-puite pawhin an ngaina a, an ngaisâng êm êm a ni. A mite ṭhatna tûrin hna a thawk a, an thlahte pawh him taka an awm theih nân kawng a zawng zêl ṭhîn. Uz ramah mi pakhat a awm a, a hming chu Joba a ni. Chu mi chu sawisêlbo, Pathian ngaihsak tak, thil ṭha lo laka insûm thei mi a ni. Fapa pasarih leh fanu pathum a nei a. A hausak dân chu hetiang hi a ni: berâm sângsarih, sanghâwngsei sângthum, bâwng tuak zanga, sabengtungpui zanga leh chhiahhlawh tam tak a nei a. Khawchhak mite zîngah chuan mi hausa ber a ni. A fapate chuan mahni in ṭheuhvah ruai an inṭheh chhâwk ṭhîn a, an farnu pathumte chu an hnêna ei leh in tûrin an sâwm ṭhîn. Chutia an ruaiṭhehte an zawh chuan Joba chuan anni chu a ko va, a thian ṭhîn. Zîng takah a tho va, an hming kimin hâlral thilhlan a hlân ṭhîn. Joba chuan, “Ka fate hian thil sual tiin Pathian an lo sawichhiat tâk dahah,” a ti a ni. Joba chuan hetiang hian a ti ziah ṭhîn. Tin, vântirhkohte Lalpa hmaa an inlan ni a lo thleng a. Setana pawh chu an zîngah a lo tel ve a. Lalpa chuan Setana hnênah, “Khawi aṭangin nge i lo kal?” a ti a. Setana chuan Lalpa chu a chhâng a, “A chhuk a chhova lei ka fan kual vêlna aṭangin,” a ti a. Lalpa chuan Setana hnênah, “Ka chhiahhlawh Joba hi i hre chiang em? Lei chungah hian amah anga sawisêlbo, mi dik, Pathian ṭih mi, thil ṭha lo laka insûm thei an awm lo asin,” a ti a. Setana chuan Lalpa chu a chhâng a, “Joba chuan a chhan awm lovin a ngaihsak che em ni? “Amah chu a in nên, a neih zawng zawng nên kil tinah i hual vêl tlat a ni lâwm ni? A kut hnathawh mal i sâwm a; tichuan, a ran rualte chu ram pumah an khat ta a ni. Tûnah, i kut lek la, a neih zawng zawng han lâksak teh mah, i hmaichhanah a sawichhe ngei ang che,” a ti a. Tichuan, Lalpa chuan Setana hnênah, “Aw le, tûnah a neih zawng zawng chu i kutah a awm e, amah tak erawh chu khawih suh ang che,” a ti a. Setana chu Lalpa hma aṭang chuan a chhuak ta a. Ni khat chu a fanu leh fapaten an u ber ina chaw an eia uain an in lai chuan, Joba hnênah zualko a lo tlân a, “Bâwngpaten lei an leha, sabengtungte kan kianga an tlat laiin, Seba miten min rawn bei thut a, chhiahhlawhte chu khandaihin an that a, rante chu min chhuhsak a, keimah chauh hi a hrilh tûr chein ka lo chhuak a ni,” a ti a. A la sawi lai mêkin mi dang a lo tlân leh a, “Vân aṭangin Pathian mei a lo tla a, berâmte leh chhiahhlawhte a kâng ral vek a, keimah chauh hi a hrilh tûr chein ka lo chhuak a ni,” a ti a. A la sawi lai mêkin mi dang a lo tlân leh a, “Kaldai-ho pâwl thuma insiamin sanghâwngseite chu an rawn bei a, an la vek a, chhiahhlawhte pawh khandaihin an that a, keimah chauh hi a hrilh tûr chein ka lo chhuak thei a ni,” a ti a. A la sawi lai mêkin mi dang a lo tlân leh a, “I fanu leh I fapaten an u ber ina chaw an eia uain an in laiin, ngai teh, thlalêr aṭangin thlipui a lo tleh a, in chu kil li-ah a rawn nam a, nula leh tlangvâlte chu a delh a, an thi ta vek mai. Kei chauh hi hrilh tûr chein ka lo chhuak thei a ni,” a ti a. Tichuan, Joba chu a tho va, a kawrfual a pawtthlêr a, a lu a ziat kawlh a, lei si-a bawkkhupin Pathian a bia a: “Ka nu pum ata saruakin ka lo piang a, Saruak vêkin ka kîr leh dâwn a nih hi. Lalpa chuan a pe a, Lalpa chuan a la leh ta a nih hi, Lalpa hming chu fakin awm rawh se,” a ti a. Hêng zawng zawngah hian Joba chu a sual lo, Pathian a sawichhe hek lo. Vântirhkohte Lalpa hmaa inlan hun a lo awm leh a, Setana pawh Lalpa hmaa inlan tûrin an zîngah a lo tel ve a. Lalpa chuan Setana hnênah, “Khawi aṭanga lo kal nge i nih?” a ti a. Setana chuan Lalpa chu a chhâng a, “A chhuk a chhova lei ka fan kual vêlna aṭangin,” a ti a. Lalpa chuan Setana hnênah chuan, “Ka chhiahhlawh Joba hi i hmu chiang em? Leiah hian amah anga sawisêlbo, mi dik, Pathian ṭih, thil ṭha lo laka insûm thei an awm lo asin. Chhan awm lova amah i tihchhiat ka phal hnu pawhin a la rinawm tlat a ni,” a ti a. Setana chuan Lalpa chu a chhâng a, “Sa him nân meuh chuan min eng pawh an huam ang chu. Tûnah, i kut thawhin a ruh leh a tisa ngei han khawih teh, i hmaichhanah a sawichhe ngei ang che,” a ti a. Tichuan, Setana hnênah, “Aw le, amah chu i kutah a awm a, a nunna erawh chu zuah ang che,” a ti a. Tichuan, Setana chu Lalpa hma aṭang chuan a chhuak a, Joba chu a kephah aṭanga a chhîp thlengin pânchhia a veitîr a, Joba chu a chhuak a, inhiah nân bêl keh them a la a, vut zîngah a ṭhu a. A nupui chuan a hnênah “I rilru ngai i pu reng dâwn em ni? Pathian sawichhia la, thi la a ni mai,” a ti a. Joba chuan a hnênah, “Nang hian hmeichhe â tak angin thu i sawi a nih hi. Pathian hnên aṭangin thil ṭha kan dawng a, thil ṭha lo pawh kan dawng lo vang em ni?” a ti a. Hêng zawng zawngah hian Joba chuan thu sual a sawi lo. Joba ṭhian pathumte chuan a chunga thil ṭha lo thleng chu an lo hria a, amah en tûrin mahni hmun ṭheuh aṭangin an lo kal a. Chûng mite chu Elifaza, Teman mi te, Bildada, Sua mi te, Zofara, Naama mi te an ni. Amah tuarpui leh thlamuan tûrin a hnêna kal hun an ruat angin an lo kal a. Hla tak aṭangin an rawn thlîr a, an hre lo va, an râwl chhuahin an ṭap a; an puan an pawtthler a, an lu chungah vaivut an vânvawrh a. Chutichuan, leiah ni sarih leh zân sarih an ṭhutpui a; tu mahin a hnênah thu kamkhat pawh an sawi lo. A tuar chu na êmin an hria a ni. Chumi hnu chuan Joba chu a lo ṭawng chhuak a, a pian ni chu ânchhia a lawh a. Hetiangin Joba chuan thu a sawi a ni: Ka pian ni chu boral rawh se, ‘Fapa a nei e,’ an tih zân nên. Chumi ni chu thimah lo chang se, Chung lam aṭangin Pathianin ngaihsak lo se, êng pawh a chungah êng suh se. Lungngaihna leh thim chhah mup chuan An pualah hauh sela, Chhûmin khuh reng sela, Chhûn tithimtu chuan tithlabâr rawh se. Chu zân chu thim chhah mupin tuam tlat se, Chumi kuma nite zîngah tel ve lo se, Thla chhiarnaah pawh tel ve suh se. Chu zân chu zân khawhar lo ni se, Tah chuan hlimna au thâwm awm suh se. Ânchhe lawh thiamte chuan Chu ni chu ânchhia lawh sela, Leviathan thunun thiamte chuan. Thim hlim arsite lo thim sela, Êng zawng mah se, hmu suh se, Zîng khawvâr pawh hmu suh se. Chu zân chuan ka nu chhûl kawngka a lo khâr loh avâng leh Buaina min pumpelhtîr loh avângin. Engati nge chhûlah khân ka lo thih mai lohva, Ka pian chhuah hlima ka thaw a tâwp mai loh? Engati nge malchunga min chawia, Ka hnêk tûr hnutein min lo hmuah? Tichuan, ka mu ang a, ka reh riai ang a, Ka muhîl ang a, ka châwl hmiah tawh tûr; Lei lalte leh rorêltute, Mahni tâna in ram dintute nên chuan. Rangkachak tam tak nei lal fapate leh, An in tangkaruaa tikhattute nên chuan. Engati nge thi saa piang nau anga phûm bo ka lo nih loh, Nausên, êng hmu ta lo ang hian? Chutah chuan mi sualten an chawk buai pha tawh lo va, Chaute an châwl tawh ang. Mi tângte an châwl hahdam tawh ang a, Vêngtu vîn aw an hre tawh lo vang. Tah chuan milian leh mitê an inang tlâng a, Chhiahhlawh pawh a pu lakah a fihlîm tawh a ni. Engati nge hrehawm tuarten hrehawm an hmuh renga, Mi lungngaite an dam reng le? Thih châk êm êm thi thei si lo, Ro phûm zawn aia nasa zâwka thih zawngtute, Thi se hlim leh lâwm êm êm tûrte, Kawng tinrênga Pathian dan beh tlat, Awm ngaihna hre tawh lote an dam reng le? Chaw ka ei leh ka thaw a pik a, Ka rûm thâwm chu lui luang ri ang hi a ni. Ka hlauhzâwng tak ka tawng a, Râpthlâk ka tih zâwng takin mi nangchîng ta. Ka thla a muang lo va, ka awm hle hle thei lo, Ka hah a dam lo va, ka buai deuh deuh ta zâwk a ni. Elifaza, Teman mi chuan heti hian a han sawi a; “I hnênah thu kam khat sawi ila i hua ang em? Ngawih mai theih a ni bîk si lo va le! Ngaihtuah teh, mi tam tak i lo zirtîr a, Kut chak lote i lo tichak tawh a. I thu chuan tlute a tungding a, Khûp zâwite a tichak ṭhîn. Harsatna i chungah a lo thleng ve ta a, I chau ta dêr a, A han tlâkbuak che a, I buai chhe ta a. Sakhaw mi i nihna hian a thlamuan lo che em ni? I nun ngîl avângin i ngaih a ṭha chuang na nge? Ngaihtuah vang vang teh, Pawi khawih si lo tu nge chhiatna tâwka, Khawiah nge mi ṭha ngaihthah an nih i hriat? Ka lo hmuh ve dân chuan, Tu pawh, khawlohna, lei anga leta, Buaina chi theh chuan a ngai vêk an seng leh ṭhîn. Pathianin a thâwk khum a, an boral ṭhîn a, A thinurna thli chuan a chhêm bo ṭhîn. Sakeibaknei rûm te, sakeibaknei kawlh hâhum te a titâwp a, Sakeibakneituai hâte a tibal a. Sakeibaknei tar chu ei tûr tlachhamin a boral a, A pui no hruaite chu an tidarh ta. A rûk têin ka hnênah thu a lo thleng a, Ka beng bulah a rawn phun ser ser a, Chu chu mut ngheh hun lai takin Ka lo mangphan a. Hlauvin ka khûr ta zawih zawih a, Ka tirilah min man a. Thlâ-in ka hmai a rawn thawi a, Ka hmulthi a ding sung sung a, A han ding a; mahse, a hmêl ka hmu fiah thei lo, A riruang chu ka hmu a, A ngawi reng a, aw ka hre ta a. Mihring hi Pathian hmuhin a fel tâwk em ni? A siamtu hmaah a thianghlim tâwk a maw? A chhiahhlawhte pawh a ring zo lo va, A tirhkohte fel lohna pawh hmu ṭhîntu chuan Leia chêngte chu a va ring lo lehzual dâwn êm! Vaivuta siam mai an ni si a, Phêngphehlep anga râwp ral mai tûr an ni, Ni khat thil thuah an boral mai a, Tu khaw ngaihsak lohvin an ral hlen ṭhîn. An neih zawng pawh a ral a, Fing chuang lovin an thi a ni lâwm ni? Han ko teh rêng, chhângtu tûr che an awm meuh vem? Mi thianghlim tu ber nge i pan dâwn teh rêng? Mi â chu vui reng chungin a thi a, Mi mâwl chu îtsîk nei reng chungin a boral ṭhîn. Mi â, inti ngêlnghet tak ka hmu a, Mahse, a chênna chu ânchhia ka lawh ta nghâl a. A fate chu an him hauh lo vang a, An tiduhdah ang a, Rorêlnaah chuan an chhan lo vang. Rilṭâmten a buhbâl an eisak ang a, Hlînga a hungte pawh. A hausakna chu mi duhâmten an ît ang. Tuarna hi vaivut aṭanga lo piang a ni lo va, Buaina pawh hi lei aṭanga chawr chhuak a ni lo. Meisî chung lama a chho zêl ang hian, Mihring hi buai tûr rênga lo piang a ni. Kei zawngin Pathian ka zawng ang a, Pathian hnênah ka chungthu ka thlen ang. Ani chu thil ropui tak, hriat phâk rual loh te, Thil mak chhiar sên rual loh te titu a ni. Lei chungah ruah sûrtîrin Lote chu tuiin a châwm ṭhîn. Chutiangin mi tlâwmte chu a chawisâng a, Lungngaite chu a hnêm ṭhîn. Bum hmangte thil ruahman a tihlawhchham a, An thiltih a puitling lo vang. Mi fingte chu an fin vervêkna ngeiah an âwk a, Mi fing vervêk thil ruahmante chu engmahlovah a chantîr. An tân chhûn êngah khua a thim a, Chhûn laiah pawh zân ang maiin an dap dun dun. An kâa khandaih lakah retheite chu a hum a, Mi chak kut ata a chhan chhuak ṭhîn. Tichuan, retheite chu beiseina a neihtîr leh a, Mi sualte erawh chu an kâ a huhsak. Pathianin mi a thunun chu a nihlawh e, Chuvângin, Engkimtitheia thupêk chu ngainêp suh. Ani chuan a hliam a, a tuam leh ṭhîn. A kutin a tina a, a tidam leh ṭhîn a ni. Vawi ruk vawi sarih pawh buaina tâwk la, A chhan chhuak ang che a, Thil ṭha lo chuan a khawih lo vang che. Ṭâmpui mitthiah a chhanhim ang che a, Indonaah pawh khandaih lakah a hum ang che. Ṭawng na tak lakah a vêng ang che a, Chhiatna lo thleng pawh i hlau lo vang. Chhiatna lo thleng leh ṭâm tla chu i nuihsan mai ang a, Ram sakawlhte pawh i hlau lo vang. Lovah lung a awm tawh lo vang a, Ram sakawlhte pawhin an rawn khawih lo vang che. I puan inah râlmuang takin i awm ang a, I berâm huang i tlawh pawhin kim lo a awm lo vang. I thlah tam tak i hmu phâk ang a, I rîla rahte chu ram hnim angin an tlim hmur ang. A hun taka buhphal an seng angin Tarkûna damin thlânah i liam ve ang. Ngaihtuah chiang teh, han chhût ngun la, Chutiang ngei chu a lo ni. Ngai ngun la, i ṭhat phah mahna. Tin, Joba chuan a chhâng a: Ka manganna leh vanduaina hi teh theih ni se, Tuipui ṭiau aiin a rit zâwk ang, Chuvâng chuan, ka thu a bung a ni. Engkimtitheia thal chuan min chhun a, A tûr chuan mi fan chhuak a, Pathian hlauhnain ka khat ta. Ram sabengtung chu hlobet a peh laiin A hrâm ngai em ni? Bâwngpa pawh buhpâwl a ei Laiin a bû em ni? Hânna nei lo chu chi tel lovin a ei tlâk em ni? Artui pâwn vâr a hâng em ni? Chutiang chaw chu châkna rêng ka nei lo, Mi ngei hluah hluah a ni. Aw, ka dîl chu hmu thei teh ila, Pathianin ka duhzâwng chu min pe teh se. Pathianin mi râwtsawm vek duhin A kut thawhin min tan chhûm hmawk mah se, Chuti chung pawhin ka thla a la muang cheu vang, Mi zuah lovin na tuar nek mah ila, Ka lâwm zêl ang, Mi Thianghlima thu chu ka pênsan si lo va. Thlâkhlelh tlâk chakna eng nge ka neih? Beisei leh chuan tûr nei si lovin engah nge ka dam reng? Lung anga sak em ka nih? Ka tisa pawh ngên ang em ni? Mahni inchhan thei rual ka ni ta lo, Ka thiltihtheihna a bo zo ta. Engkimtitheia hawisan mah se, Mangan tâwpah miin ṭhian ṭha an mamawh ṭhîn. Ka unaute erawh zawng, Kawrte rum anga bumhmang, Ṭhâla kangchat mai ṭhîn ang hi an ni. Luipui, vûr tuia dum kûk, Vûr tlang inphûm rûkna, Khua a lo luma tuirala, Nipuia kangchat ta ṭhîn ang hi an ni. Khualzinte chu tui zawngin an vâk kual an vâk kual a, Thlalêrah chuan vâkin an boral ṭhîn. Teman sumdâwng rualte pawhin an zawng a, Seba khualzinte phei chuan hmuh ngei an beisei ṭhîn. Beisei taka an zawn chu an hlawhchham a, Hrilhhai takin an kal ta ṭhîn. Ka chungah chutiang chu in ni, Ka hrehawm tuar min hmu a, in hlau. Thilpêk dîl che uin, ‘In sum leh pai a thlâwnin min pe teh u’ ka ti em ni? Hmêlma kut ata min chhan chhuak tûrin emaw Ka ngên che u em ni? Min zirtîr ula, ka lo ngaithla ang e, Ka dik lohna min hrilh teh u. Thu dik hian mi a hneh ṭhîn, Mahse, min hnialna hi hnialhrât thu mai a ni lâwm ni? Hnial hrât hrim hrima min ngaiin, Mangang taka ka thu sawi hi sawi mai maiah min ngai em ni? Fahrahte chu in lilâm duh a, In ṭhian bulte meuh pawh in hralh duh ṭhîn. Tûnah mi han en teh u, In hmaichhanah ka daw lo vang. Lamlêt ula, thil dik lo ti suh u, Ka thu ngaihtuah ṭha rawh u, ka thu hi a dik a ni. Ka sawiah hian eng nge dik lo awm? Thil ṭha lo chu ka thliar hrang thei lo vem ni? Leiah mihring hi hna hahthlâk tak thawk tûr a ni lo vem ni? A damchhûng chu inhlawhfa ang maia thawk tûr a ni lâwm ni? Chhiahhlawh, tlai ni nêm nghâkhlel tak ang, Inhlawhfa, a hlawh tûr thlîr reng ang hi a ni. A thla têlin ka bei a dawng tial tial a, Zan tinin ka hah hluah hluah a ni. Ka han mu a, engtikah harh leh tak ang i maw ka ti a, Mahse, zankhuain ka let ka let a, Khawvâr hlân ka nghâkhlel êm êm. Ka taksa a pumin a pân lung nuai nuai a, A khir luai a, a khawk a, a hnai ṭuam ṭuam. Ka dam chhûng nite chu puantahtu khawhthei aiin a liam rang a, Beisei tûr nei lovin a liam mai ṭhîn. Ka nunna hi thli ang lek a nih hre reng la, Ka mit hian thil ṭha a hmu lo mai dâwn si. Tûna mi hmutu hian mi hmu tawh dâwn lo va, Min hmuh tum mah se hmuh tûr ka awm lo vang. Chhûm a kiang a, a ral ṭhîn ang hian, Thlâna lût tawh chu an kîr leh ngai lo ve. In lamah a lo hâwng tawh lo vang a, Tu man an hre reng tawh hek lo vang. Chuvângin, insûmkâr lovin ka ṭawng ang a, Lungchhe takin ka sawi dâwn e, Rilru na takin ka phun dâwn a ni. Tuipui nge maw ka niha tuipui sakawlh? Min vêng tlat tûr i ruat tâk hi? Khumah ka mu hahdam ang a, muhîl ila, Ka na a nuam deuh mahna ka tih leh Nangin mang hlauhawm pui pui min neihtîr a, Thil râpthlâk tak tak min hmuhtîr si. Hetia na tuara dam reng ai chuan Reh hlum hial ka thlang zâwk e. Nun hi ka ning takzet a, Dam rei ka duh tawh lo, Min kalsan rawh u, mûmal ka nei tawh lo ve. Mihring hi eng nge maw a niha, i ngaihmawha, I ngaihsak hle le? Tûk tin i kana, Eng lai pawhin i fiah ṭhîn hi? Khaw dang hawi lo lêkin, chil lem chhûng takngial pawh Min en lovin i awm ngai em ni? Nang, mihringte vêngtu, Ka sual a nih pawhin eng nge ka tihsuala, Ninawm khawpa min en bîk le? Engah nge ka bawhchhiatna i ngaihdam lohva, Ka khawlohna i lâk bo mai loh le? Kei zawng ka thi thuai dâwn a, Min zawng mah la, ka awm lo mai dâwn a ni. Tichuan, Bildada, Sua mi chuan heti hian a sawi ve a: Eng chen nge hêng hi i sawi dâwn? I va han ṭawng rum ve? Pathianin a rêl tawh chu a tidanglam ngai em ni? Engkimtitheia chuan a dik chu a sawhsawn dâwn em ni? I fate a chungah an sual a nih chuan An sual man a tuartîr ang a. Tihtakzeta Pathian i zawna, Tihtakmeuhva Engkimtitheia i dîl chuan, Anin a rawn ngaihsak ngei ang che a, Mal a sâwm ngei ang che. Thianghlim leh dik taka i nun phawt chuan, A rawn ngaihsak ngei ang che a, Mal a sâwm bawk ang che. I bul ṭanna tê hle mah se, I hun hnuhnûngah tihropui i ni ngei ang. Hmânlai nite kha han dâwn kîr la, An pi pute thil hriatte kha chhui chiang teh, Nimina mi ang lek kan ni a, eng mah kan lo hre lo, Kan lei nun hi a tawi hle si a. Chûng mite chuan an lo zirtîr ang che a, An thil hriatte chu an lo hrilh ang che. Chirhdûp lovah pumphîr a ṭo ngai em ni? Tui awm lohnaah phairuang a ṭo thei em ni? Sah tliah lohvin duah hle pawh ni se, Thlai dangte aiin a vuai hma ṭhîn. Pathian pawisa lote chu chutiang chuan an awm ang a, Pathian ngaihsak lote chu an beidawng ang. An innghahna chu a derdêp êm êm a, Maimawm rîl ang lek a ni. Chu chu nghêng sela a sâwt dâwn em ni? Vuan sela a tuar dâwn em ni? Mi sual chu, thlai, ni êng hmu ṭha, duah hluah hluah Pêng ṭuam ṭuam ang hi a ni. Lung keh kârah zung a thlâk a, Lungah chuan zung a kaih tlat a. Mahse, an pawh phawn hnu chuan Tu man a awmna rêng an hre tawh lo. Ngai teh, hei hi mi sual hlimna awm chhun chu a ni mai; Mi dangin a hmun an rawn luah dâwn a ni. Ngai teh, Pathianin mi ṭha a paihthla lo vang a, Thil sual titute a tungding hek lo vang. Hlim takin a nuihtîr leh ang che a, Lâwm takin i awm leh ang. I hmêlmate chu zakin an kun reng ang a, Mi suaksualte chênna in pawh a awm tawh lo vang. Joba chuan heti hian a chhâng a: I sawite chu a dik tih ka hria. Mahse, Pathian mit hmuhin mihring hi a dik tâwk thei em ni? Pathian chu hnial dâwn ta sela, Vawi sângah vawi khat pawh a hnial hneh lo vang. Ani chu finnaa khat, engkim tithei a ni, Amah dodâl ṭhîn tu mah hmuingîl an awm ngai lo. An hriat loh hlânin tlângte a sawn a, A thinur chângin a tichhe ṭhîn. Lei chu a awmna hmunah a sâwi nghîng a, A nghahchhan bante chu a nghîng dur dur a, Ni chu thu a pe a, a chhuahtîr lo va, Arsite pawh a khuh vek a. Mahni chauhvin vân khi a kaipharh a, Tuifâwnte pawh a rap bet a. Zângkhua te, chhohreivûng te, siruk te, Chhim lam arsi bâwr te khi a siam an ni. Thil ropui chhui chhuah rual loh te, Thil mak chhui sên lohte titu a ni. Ngai teh, ka bulah a lo kal a, ka hmu si lo, Min kal pêl a, ka hre si lo. A ni, a duh apiang a lâk pawhin tu nge dâl thei? ‘Eng nge i tih’ a hnênah tu nge ti ngam? Pathianin a thinur a sût lo vang, Rahab puitu, a hmêlmate chu a rapbet ang. Engtin nge kei tehlul hian ani chu ka chhân anga, Ka hnial thiam tehlul ang? Dik mah ila, ani chu ka chhâng lo vang, Ka chunga thuneitu chu khawngaih ka dîl zâwk ang. Ka au va, anin a lo hria a nih pawhin Ka thu a dawnsawn ka ring chuang lo. Thlipui hmangin min nuai nek a, Chhan awm lovin min hliam belhchhah a. Thaw la hman lêk lovin min siam a, Hrehawmna hlîrin ka khat ta. Chak zâwngah chuan tu nge tluk ang? Inkhing dâwn ila, tu nge do pha ang? Sual inti lo mah ila, ka ṭawngkamin thiam loh mi chantîr a, Demawm lo ni mah ila, ka dik lohna a hmu tho vang. Sawisêlbo pawh ni ila, ka inngaisâng chuang lo, Ka nun hi ka ngainêp a ni. Chuvâng alâwm, mi ṭha leh mi sual pawh Thuhmun vekin a tiboral dâwn ka tih hi. Thil ṭha lovin thihna a thlentîr thut a, Mi dik mangang chu Pathianin a nuih ṭhîn. Khawvêl hi mi sual kuta pêk a ni a, Rorêltute mit pawh tihdel a ni; A tih ni lo se, tu tih nge ni ang? Ka damchhûng nite hi a liam thuai a, Thil ṭha tawng lovin a ral mai ṭhîn. Lawng chak tak angin a kal liam a, Mupui sa hmu bir ang hian. “Ka vuina hi ka theihnghilh ang a, Ka lungngaihna hlîpin ka intihlim teh ang, ka tih pawhin, Ka tuarna zawng zawng avâng hian ka thla a phâng a ni, Nangnin mi sualah mi ngai si a. Mi suala chhiar ka nih ahnu, Engah nge ṭûl lovah ka intihhah ang le? Sahbawnin inbual fai mah ila, Ka kutte chingalin sil fai mah ila, Nangnin bawlhhlawh khurah min paih ang a, Ka silhfênte pawhin mi ten dâwn si. Rorêlna hmaah han khing rual em ka nih? Ani zawng, kei anga mihring mai a ni ve si lo. Kan pahniha chunga thu rawn neia, Kan inkâr thu pawtchat thei tu mah an awm si lo, Min vuakna tiang chu la sawn sela, A ṭihbaiawmna chuan mi tihlau tawh suh se. Tichuan, amah hlau lovin thu ka sawi ang a, Mahse, chutiang chuan ka awm thei si lo. Nun hi ka ning tawh a, ka phun ka phun mai dâwn a nih hi, Rilru na tak chungin thu ka sawi dâwn a ni. Pathian hnênah, “Mi dem mai lo la, Engti-ah nge min puh, min hrilh teh,” ka ti ang. I kut chhuakte hmusita tiduhdahin, Mi suaksualte remruat i lâwmpui hi Ṭha i ti em ni? Mihring mit ang maiin, Mihring angin i hmu ve em ni? Mihring anga damchhûng ni leh kumte Nei ang ziazânga, Ka khawlohna i chhui chiama, Ka sualnate i zawn tehchiam le? Mi sual ka ni lo tih i hria a, I kut ata mi chhan thei tu mah an awm loh pawh i hria. I kutin min din a, nangma siam ngei ka ni, Nangmah bawkin min tiboral leh dâwn em ni? Nangin hlumin min siam tih hre reng la, Vaivutah mi chantîr leh mai dâwn em ni? Nangin hnutetui angin mi bun a, Hnute khal angin mi hlâwm a ni lâwm ni? Vun leh tisain mi tuam a, Ruh leh thain mi phuar khâwm a. Nunna mi pe a, mi duat êm êm a, Min enkawl a, min hualhim zêl a ni. Chuti chung chuan hêng thil hi I lo tum ru rêng a ni tih ka hre chhuak ta. Thil sual ti ila, nangin i chhinchhiah ang a, Ka khawlohna avângin mi zuah lo vang. Mi suaksual ni ila ka chan a va chau dâwn êm! Mi dik pawh ni ila, ka inchhuang thei chuang lo, Mualpho takin ka awm a, ka tuar tlawk tlawk a nih hi. Lo chapo ila, nangin sakeibaknei an pêl angin mi pêl ang a, Min tina tûrin thil mak tak tak i ti. Min bei min bei a, ka chungah i thinur i tipung a, Min beih dân tûr kawng thar i dap zêl a. Eng vângin nge chhûl ata mi lâk chhuah? Tu ma hmuh lohvin lo thi daih ila a ṭha tûr. Lo piang lo law law ila, chhûl aṭangin Thlân pan nghâl ila a ṭha zâwk tûr. Ka damchhûng nite hi a ral ṭêp lo vem ni? Min kiansan hrâm teh, rei lo tê tal ka han hahchâwl hlek teh ang. Kîr tawh lohna ram thim, Thim chhah mup rama ka kal hma hian. Thim chhah mup ram, lungngaihna zân thim, Manganna hmun chu, êng pawh thima a channa hmunah chuan. Zofara, Naama mi chuan heti hian a han sawi ve a: Hetiang thu zozai chhân loh theih em ni? Ṭawng tam avângin miin thiam a chang ang maw? I ṭawng tam avângin miin an ngawihsan chein Mi dang thamlo taka i ṭawng hian Timualpho tûr che an awm lo vang maw? I ṭanna hi dik berah i ngai a, Pathian hmuhah, ‘Ka thianghlim e’ i ti a. Mahse, Pathian chu han ṭawng sela, I chungthu han sawi ve se ka va ti êm! Tichuan, finna thurûk a hriattîr ang che a, Finna dik, mihring hriat phâk rual loh chu. Hre ta che, i khawlohnain a phu aia nêpin a hrem che hi. Pathian ropuizia i hre chhuak zo vem ni? Engkimtitheia chu i hre theia maw? Vân aia sâng a ni, i hriat phâk rual em ni? Leilâwt aia thûk a ni, i hmuh phâk rual em ni? A zauzia chu khawmual leh tuifinriat aiin A zau zâwk a. Pathian chu lo kalin man che sela, I chungthu rêl ta mai se, tu nge dâl thei ang? Tute hi nge mi sualte chu a hria, An sualna a hmu vek a, a ngaihtuah dâwn lâwm ni? Ram sabengtungno sâwi hmin mai theih a ni lo ang hian, Mi mâwl pawh a fing mai thei lo. I rilru put dân a dika, A lama i kut i phar chuan, I kuta khawlohna awm a nih chuan paih bo la, I ina sualna a awm i phal loh chuan. Ngaihngam takin i lêng vêl thei ang a, I dinhmun a nghet ang a, hlauh tûr i nei lo vang. I hrehawmna i theihnghilh ang a, Tui luang angin i hre zui tawh lo vang. I nun chu chhûn êng aiin a êng ang a, A thim lai pawh zîng êng aiin. Beiseiawm a awm avângin i thla a muang ang a, I hawi vêl ang a, ngaihngam takin i châwl ang. I muzâl ang a, tu man an tibuai ngam lo vang che, Mi tam tak biaktlawn i hlawh bawk ang. Mi sualte erawh chu an hawihai ang a, Tlân chhuahna kawng rêng an hmu lo vang. An nghah ber chu thih a ni mai. Tichuan, Joba chuan heti hian a sawi leh a: Ni e, mi fing zawng in lo nih hi, Thi ta hlauh ula, mi fing an awm dâwn tawh hlei nêm! Mahse, nangni angin hriatna ka nei ve a, In aiin ka nêp hlei nêm, Tu nge hêng thilte hi hre lo bîk le? Pathian ka au va, min chhâng ṭhîn a, Mahse, ka ṭhianten min nuihzat a, Mi dik leh demawm lo hi nuihzatbûr ka nih tâk hi. Mi nuamsate chuan mi vânduai an hmusit a, Rahbi tleute an chhuih zui ṭhîn. Suamhmangte bûk a hnianghnâr a, Pathian tithinurtute an nuamsa. Mahni chakna pathiana neihtute chu. Ram sate zâwt teh, an zirtîr ang che, Chunglêng savate pawh zâwt la, an hrilh ang che. Leilung pawh bia la, a zirtîr ang che, Tuipui sanghate pawhin hei hi an hrilh ang che. Hêng zawng zawng zîngah hei hi Lalpa tih a nih hre lo tu nge awm? Thil nung tinrêng nunna leh mihringte thlarau hi A kuta awm a ni. Kâ hian thil tui a hria angin Beng hian thu chhia leh ṭha a chian ṭhîn lo vem ni? Upate an fing nge nge a, Dam reiten thil hriat an ngah. Pathian erawh chu a fingin a chak a, Remruat a thiam a, engkim a hria. A ṭhiat tawh chu tundin leh theih a ni lo. Mihring a khâr hnan chu tu man an chhuah thei lo. Ruah sûr a khap chuan khua a khêng a, A sûrtîr leh ram a chîm chhe ṭhîn. Ani chu a chak a, a chhan ṭhîn a, Bumtu pawh, bum tuar pawh, a kuta awm an ni. Remruattute remhriatna a la bo va, Rorêltute mi â angin a awmtîr. Lalte thuneihna a chhuhsak a, An kâwngah hruiin a hlîng. Puithiamte saruakin a kaltîr a, Mi hlunte a paihthla. Mi râwnte chu a hnâwl a, Upate finna a chhuhsak ṭhîn. Mi liante a hmusit a, Mi chakte a titlâwm a. Thima thil thûkte a hailang a, Thim chhah mup pawh a tiêng ṭhîn. Hnamte a tilian a, a tichhe leh a, Hnamte a tipung a, a tidarh leh ṭhîn. Ram hruaitute ngaihtuahna a tibo va, Thlalêr kawng awm lohnaah a vahvaihtîr a. Thimthamah an dap dun dun a, Zu rui angin an pai an pai. Chûng zawng zawng chu ni tin ka hmu a, Bengin ka hria a, ka hrethiam ta. In hriat chu ka hre ve bawk a, In aiin ka neu bîk lo. Mahse, El Sadaia hnênah ngei sawi ka duh, Ka chungchâng hi Pathian nên sawi dun ka châk a ni. Nangni hi dâwta insawimawi ṭhîn, Tidam thei lo daktor ang hi in ni. Ngawi hmiah ula, In tân a finthlâk zâwk ang. Ka ṭanna hi hre chiang ula, Ka thu hi ngaihtuah chiang ve teh u. Pathian hminga dâwt sawiin Thu dik lo in sawitîr dâwn em ni? Amah ṭanin hleih in nei ang maw? Pathian tân in pâwng ṭan dâwn em ni? Hmu chiang che u sela, In tân a ṭha ang em? A rûka duhsak bîk in neih chuan A hrem ngei ang che u. A ropuina chu râpthlâk in ti êm êm ang a, A ṭihbaiawmna chuan a fan lo vang che u maw? In upate thufing chu meivâp ang lek a ni a, In ṭan chhante pawh hlumbêl ang lek a ni. Lo ngawi ula, ṭawng hun mi kian teh u, A nih nih ni rawh se. Eng vângin maw? Ka awm awmin ka awm mai ang. Mi tihlum dâwn mah se, ani chu ka ring tho vang. A hmaah ka awm dân ka ṭan zêl dâwn. Pathian hmaah mi sual an lang ngam si lo va, Kei zawng, ka ngampatna avâng hian ka him hlauh mai thei asin! Ka thute hi ngun takin ngaithla ula, Ka thu sawite hi ngaihtuah ngun rawh u. Ngai teh, thiamthu sawi tûrin ka inpeih tawh reng a ni, Thiam ka chang dâwn tih ka hre si. Tu nge ka sualna rawn phawrh thei awm? Phawrh a nih chuan ngawi rengin ka thi mai ang. Thil pahnih chauh mi tihsak la, I hmêl êngah chuan ka hmai ka thup dâwn lo nia. Ka chunga i kutthlâk hi bâng la, I ṭihbaiawmna hian mi thlah rawh se. Mi ko la; tichuan, ka chhâng ang che. A nih loh leh, kei ṭawng ila, Nangin mi chhâng ang che. Ka khawlohna leh ka sualna eng zâta tam nge? Ka bawhchhiatna leh ka sualnate mi hrilh ang che. Engtizia nge mi hawisana, I hmêlma anga mi ngaih? Hnahthel thlâwk i chhaihin, Buhsi lêng i ûm dâwn em ni? Ka chungchâng ṭha lo tak takin i ziak a, Ka tleirâwl ât lai sual mawh mi phurhtîr hi; Ka ke-ah kawl mi buntîr a, Ka awm dân tinrêng i enthla a, Ka hniak lam pawh i chhinchhiah hi; Thil ṭawih ral mai tûr leh Silhfên thîm ei ang lek ka ni chung hian. Hmeichhe hrin mihring hi Sual rêng rênga thi thuai mai tûr a ni. Pangpâr angin a lo pâr chhuak a, a vuai leh ṭhîn, Hlimthla angin a ral mai a, a awm hlen lo. Chutiang mi chu ngaihmawha Rorêlnaah khing tûr chea hruai tham em ni? Tu nge bawlhhlawh aṭangin thil thianghlim la chhuak ngai? Tu mahin. A dam chhûng nite chu i ruatsak a, A thlahte lamin i kuta awm an ni. A pelh theih loh ramri i khamsak bawk. Hawisan la, hahchâw teh se, Hlawhfa angin a damchhûng nite a tlingtlâk theih nân. Thing chuan beisei tûr a la nei, Kit mah se a lo chawr leh a, Zîk thar chhuah a bâng chuang lo. A zung lo tar mah se, A bul lei seh chinah thi mah se, A lei hnâwn avângin a lo chawr leh ang a, Thingphun angin a lo buk ang. Mahse, mihring chu a thi a, A ni, a thaw a tâwp a, khawiah nge a awm tâk le? Tuipui kang, tui awm ta lo leh Luipui kang chat, ro châr ta ang hian, Mihring chu a mu a, a tho leh lo. Vân a boral hma chuan a harh lo vang, A muhîl chu kaihthawh a ni lo vang. Aw, Seol-ah mi thukru la ka va ti êm! I thinur reh hma chu mi thukru la, Amaherawhchu, min hriat chhuah leh hun nei ngei ang che. Mi a thih hian a nung leh dâwn em ni? Ka chhuah hun a thlen hma hian Rawng ka bâwl fan fan ang. Min ko la, ka chhâng ang che, I kut chhuakte i ngaina hle si ṭhîn. Tichuan, ka pên i vêng ang a, Ka sual i chhui zui duh lo vang. Ka bawhchhiatna i phûm bo va, Ka sualte i ngaidam bawk a. Tlângte a min a, Lungpuite a minpui a, Luite chuan lungte chu a hrual a, Tui lian chuan lei a hrût hêk ṭhîn; Chutiangin mihringte beisei i tibo ṭhîn. Ani chu kumkhua atân i titlâwm a, I hnawt bo ta a ni. A fate chawimawi an nih pawhin a hre lo va, Chhiat an tawh lahin a ngaihsak tawh hek lo. Ama taksa na chauh kha a hria a, Amah a inkhawngaih ṭhîn a ni. Tin, Elifaza, Teman mi chuan heti hian a chhâng a: Mi fing an ṭawng ve mai mai ngai em ni? Thu lawilo mai maiin an khat hlei nêm! Mumal nei lovin an ṭawng ang em ni? Thil sâwt lo tûr an sawi peih dâwn em ni? A ni, Pathian ṭihna rêng i nei lo va, A hnênah i inhlân duh hlei nêm! I sualzia i thu sawiah a lang a, Thuveivîr i thlang a nih hi. Kei ni lovin, i ṭawngka ngeiin a thiam lo che a, I hmui ngeiin a hêk che a nih hi. Piang hmasa ber em i nih? Tlâng awm hmain i awm tawh a maw? Pathian remruat i hre pha em ni? Finna hi i ta bîk em ni? Kan hriat loh eng nge i hriat? Kan hmuh loh eng nge i hmuh bîk? Kan zîngah luṭuak vâr tawh leh tar te, I pa aia upate pawh an awm asin! Pathianin a thlamuan che leh Dimdawi taka a enkawlna che hi i ngainêp em ni? Engah nge i thin a thawh thuta, I men rum tâk hle le? I nunin Pathian i dodâl a, I kâin i sawichhia a ni lâwm ni? Mihring hi a thianghlim tâwk thei em ni? Hmeichhe hrin hi Pathian hmaah a ṭha tâwk thei em ni? Pathian chuan a mi thianghlimte pawh a ring zo lo va, A mit hmuhah vânte pawh a thianghlim tâwk lo. Mihring, sual leh bawlhhlawha khat, Tui in anga sual intu chu a va ring dâwn lo êm! Mi ngaithla la, ka hrilh ang che, Ka hmuh chu ka sawi dâwn e. Mi fingten an pi pute hnêna an dawn, Zêp nei lova min hrilh chhâwn chu. Ram dang mite awm ve lovin Chu ramah chuan, mahni chauhvin an awm tûr a ni, tih thu chu. Mi sual chuan a damchhûng zawng hrehawm a tuar ang, Mi nunrâwng chuan a tuar kumkhua ang. Hlauhawm thâwm chu a hria a, Mahse, hima a inhriat laiin Suamhmangin a rawn bei ang. Thim ata chhuah a inring lo, Khandaihin a hmuak reng si a. Ei tûr zawngin a vâk vêl a, ‘Khawiah nge?” tiin; A tân khua a vâr lo tih a hria. Hrehawm leh lungngaihna chuan a rawn bawh a, Lalin a râl do a bei ang hian. Pathian dova kut a lek avângin, El Sadaia a pawisak loh avângin. Luhlul takin Pathian chu a dodâl a, A phaw chhah tak leh khauh tak chu a chhuang a ni. A hmai a mawm a, a dulah thau a tla. Mahse, khawpui ṭiau hnuahte a chêng ang a, Tu ma luah loh inahte chuan. Chûngte pawh chu tlusawp leh tho tûr a ni. A hausa lo vang a, a sum leh pai a awm hlen lo vang, Zâr zo tum a nei tawh hek lo vang. Thim ata a chhuak lo vang a, A zârte chu a kâng ro vang a, A pârte chu thliin a lên bo vang. Mahni inbumin, engmahlovah innghat suh se, Eng mah a hmu dâwn chuang si lo. A hun lovah a ro vang a, A ṭangte pawh a chawr leh tawh lo vang. Grep rah hlamtla ang a ni ang a, Oliv pâr ṭil ang a ni ang. Pathian ngaihsak lo mite chu an zuihral ang a, Thamna hmanga in an sakte pawh a kâng ral ang. Pawi khawih tûr an dap a, thil an tisual nge nge a, An thinlung chu bumnaa khat a ni. Joba chuan heti hian a chhâng a: Chutiangte chu ka hre ve vek alâwm, In vai hian mi thlamuan thiam lo tak in ni. Thu puarpawlêng mai mai i sawi i sawi dâwn em ni? Engin nge tiphûr che, i ṭawng i ṭawng le? Ka chan ang hi chang ve ula, In sawi ang hi ka sawi ve ṭeuh thei ang. Lu ka thinkhum ang che u a, Ka ânkhum zêk ang che u. Mahse, ka tithatho zâwk ang che u a, Ka ṭawng thlamuan bawk ang che u. Sawi sawi mah ila ka na a dam chuang lo, Ka ngawih reng pawhin a nêp chuang bawk hek lo. Aw Pathian, nangin min nghaisa a, Kan chhûngin min timang ta. Ka vun zûr hian mi sawisak dân a tilang a, Ka chêrzia hian ka natzia a tilang bawk. Nangin thinurin min pawtthlêr a, min hua a, Hachang mi ṭhial khum a, Mi dotuten rum takin min melh. Miten min chhiatkhum a, Diriam takin biangah min bêng a, Mi bei tûrin an inhâwr khâwm a, Amah ngaihsak lote hnênah Pathianin min hlân a, Mi sualte kutah min pe ta. Thlamuang taka ka awm der der lai Min rawn ṭhuai nawk nawk a, Ka ringah min rêk a, mi nawr nek a. A chhia zawng zawng min bûrbun ta. A thal kâptuten mi hual tlat a, Dîm lêk lovin ka kalah min kâp a, Ka mît chu leiah an leihbaw ta. Mi nghaisa mi nghaisa a, Râwng takin min chîl nek a. Saiip puan ka sîn a, Mualpho takin vaivutah ka ṭhu a. Ka ṭahna lamah ka meng sen rûm a. Ka mitte pawh a vûng bûr mai. Mahse, ka kutte hian thil sual a khawih lo va, Tihtakzetin ka ṭawngṭai ṭhîn. Aw leilung, ka thisen an chhuah hi ngawihpui mai suh la, Ka mangang au thâwm hi tâwp mai suh se. Tûnah ka thuhretu vânah a awm a, Min sawisaktu chu chung lama mi a ni. Ka ṭhianten min nuihsan mah se, Mittui nên Pathian lam ka hawi zâwk ang. Miin a ṭhian tân a ngaihsak ang hian, Pathian hnêna min sawisaktu awm teh sela aw! Ka kumte chu a ral ṭêp a, Kîr tawh lohna kawng chu ka zawh mai dâwn si a. Ka thaw hleithei ta lo, ka dam rei tawh lo vang, Thlân lo chu hmabâk ka nei ta lo. A ni, hmusittuten mi hual vêl a, Min diriamna chu ka hmu reng mai. Nangmah ngei ka lamah ṭang teh, Nang lo chu belh tûr ka neih loh hi. Nangin an thinlung i tidel a, An inchhuan phal suh ang che. Hlâwkna ûma ṭhiante fakdertu chu A fapa mit tideltu a ni. Miten kamchhe tleuh nân min hmang a, Ka hmaiah chil min chhâk. Lungngaih avângin ka mit a thim zo va, Ka kutke pawh ruhkawl mai a ni ta. Mi nun ngîlte chuan hei hi mak an ti a, Pawi khawih lote pawhin mi sualte chu an dem. Mi ṭha chuan a awm dân chu a thlah lo vang, Kut faite chu an nghet tial tial bawk ang. In vaiin lo hawiin lo kal mah ula, In zîngah mi fing rêng ka hmu lo vang. Ka hun a ral dâwn ta, ka thil tumte a hlawhchham a, Ka duhsâm a thlâwn ta. Zân chu chhûn an vuah a, Thim chu êng hmahruaitu an ti. Seol chu ka hmabâk a ni ta, Thima ka mutna hmun tûr chu. Thlân chu, ‘Ka pa’ ka ti ang a, Ka taksa lungte chu, ‘Ka nu, ka farnu’ ka ti ang. Chu mai lo chu beisei tûr dang eng nge ka neih? Beisei tûr dang a awm em ni? Mitthi khuaa ka chhuk hun chuan, Beiseina nên vaivutah chuan kan chêng dûn ang. Tichuan, Bildada, Sua mi chuan heti hian a sawi ve a: Eng chen nge sawi tûr i dap i dap dâwn? Ngaithla ve la, ka han sawi ve ang e. Eng vângin nge ramsa ang leka min ngaiha, Mi mâwl tê tê ang chauhva min hmuh? I thinur avângin mahni i intihrehawm a, Nangmah avângin lei hi hnuchhawn a ni ang maw? A ni, mi sual êng chu a chuai a, A meidê pawh a mit zo ta. A puan ina êng chu a thim ang a, A meichher pawh a thi bawk ang. Ngal tha chak chu a dul zo va, Ama remruat chu a chhiat phah ta. Lên chhûngah a pên lût a, Thangah chuan a âwk a, Thang chuan a kerêkah a âwk ang a, A hrui chuan a hlîng tlat ang. A tlâk nân hum an lai a, A awh nân thang an kam. Kil tin aṭangin hlauhawmin a ûm a, A kalna apiangah a zui. Rilṭâmin a chau ta a, Chhiatna chuan a hual tlat a ni. Natna hlauhawm takin a bâwm a, A kutke chu a ṭawih zo ta. A himna puan in aṭangin an hnûk chhuak a, Hlauhawm Lal hnênah an hruai lût. A puan inah mi dang an chêng ang a, A then fai nân kât an theh ang. A zungte chu a mawih ang a, A zârte pawh a ro zo vang. Leiah tu man an hre reng tawh lo vang a, Kawtthlêrah a hming rêng a lang tawh lo vang. Ani chu êng aṭangin thimah an paih lût a, Khawvêl ata an paih chhuak ta. A mite zîngah tu leh fa a nei lo vang a, A chênna in rochungtu pawh a nei lo vang. A chan chu khawthlang lam mite chuan râpthlâk an ti a, Khawchhak lam mite pawhin hlauhawm an ti. A ni, chu chu mi sualte chan tûr chu a ni, Chu ngei chu Pathian hre lote awm dân tûr chu a ni. Joba chuan heti hian a chhâng a: Eng chen nge na taka min ṭawng khum anga, Min tihhrehawm dâwn le? Vawi sâwm ngawt min hau ta a, Zah nachâng hre lêk lovin min ânkhum. Ka lo dik lo ngei a nih chuan Ka sual man chu ka têl ang chu. Kei aia ṭha zâwka in inruata, Ka sual vânga mualpho nia min ngaih tlat chuan. Hre ta che u, Pathian chuan mi hnâwl a, A lênin min khuh ta. “Min sawisa,” tia ka au pawhin tu man min chhâng si lo va, Ka au chiam pawhin ngaihsaktu rêng ka nei lo ve. Ka kawng mi pinsak avângin ka kal tlang thei lo, Ka kawngte chu a tithim zo ta. Ka ropuina mi hlihsak a, Ka lallukhum mi lâksak ta. Kil tinah min tichhia a, eng mah ka ni ta lo, Thing angin ka beiseina a phawng. Ka chungah a thinur êm êm a, A hmêlmate zîngah min chhiar ta e. A sipai rual an lo kal a, Ṭan hmun an rawn khuar a, Ka puan in vêlah bûk an sa. Ka unaute min tihhlatsak a, Ka ṭhiante pawh mi hrang an chang zo ta. Ka laichînten min kal bosan a, Ka ṭhian bulten min theihnghilh ta. Ka mikhualte leh ka chhiahhlawh nulaten Mikhualah min ngai a, An hmêlhriat loh, ram dang miah min ngai. Ka chhiahhlawh pawh ka au ei zo ta lo, Ṭawngkam thlum thawh a ngai ta e. Ka nupuiin ka kâ rimchhia a ti a, Ka unau pianpuite tân tenawm mai ka lo ni ta. Naupangchhia lamin min hmusit a, Ka han tho te hi min lo eu va, Ka ṭhian ṭha zawng zawngten min ten a, Ka hmangaih berte pawhin min hawisan ta. Ruhkawl leh vun mai ka ni ta, Ka nung chang chang a ni. Mi khawngaih rawh u, ka ṭhiante u, mi khawngaih rawh u, Pathianin min khawih ta a nih hi. Pathian ang ziazângin nangnin engati nge min tihduhdah ve le? Ka tuarna hi tâwk in la ti na nge? Aw, ka thute hi ziak ni sela, Lehkhabu-ah chuang ve teh sela aw! Ziakna thîrkhen leh suanin Kumkhua atân lungpuiah ker ni teh se. Mi tlantu chu a nung tih ka hria, Nakinah chuan vaivutah hian a lo ding ang. Ka vunte hi a chhiat hnuin Ka tisain Pathian ka la hmu ang. Kei ngei hian ka la hmu ang a, Ka mit ngei hian amah tak chu a la hmu ang. Ka thinlung a chau ta, “Engtin nge amah chu kan tihduhdah ang, Buaina bul chu amah hi a ni,” in tih avângin. Khandaih chu hlau rawh u, Khandaiha hremna hi Pathian thinur lanna a ni, Tichuan, rorêltu a awm tih in hria ang. Tichuan, Zofara, Naama mi chuan a chhâng a: Ngun taka ka ngaihtuahin chhân ka châk a, Chhân hlân pawh ka nghâkhlel a nih hi. Min zilh dân chuan min va tai ve, Chhân dân tûr che ka hre reng asin. Hmasâng leia mihring awm chin ata tûn thlengin He thu hi i hre ngai lo vem ni? Mi sual chu rei a hlim lo va, Pathian hre lo mi lâwmna chu mitkhapkâr chauh a nih hi. A inngaih ropuina chuan vân tawng mah se, A lu pawh chuan chhûm thleng mah se, Ama êk angin a ral vang vang ang, Amah hmu ṭhînte chuan “Khawiah nge a awm tâk?” an ti ang. Mumang angin a ral ang a, an hmu leh tawh lo vang, Zân inlârna angin a bo thuai ang. Mit ngeia hmu ṭhînte khân an hmu leh tawh lo vang a, A awmna ṭhîn hmunah an hmu leh tawh lo vang. Retheite a rûksak a, A faten chûng mite chu tihlâwm an tum ang a, A sum lâk chu an pe kîr ang. A tleirâwl thazatna nên Vaivutah an la chang ang. Sual hi a kâin tui ti hlein A lei hnuaiah thukru tlat mah se, Lem phal lovin hmuam tlat mah se, A thil ei chuan a pum a tilumlet ang a, A kawchhûngah rûl tûr a chang ta e. Hausakna a dawlhte chu a luak chhuak a, Pathianin a pum aṭangin a luak chhuahtîr a ni. Rûl tûr a fâwp a, Tûr chuan ani chu a tihlum ta. Lui tui luang chu a hmu ve tawh lo vang. khawizu leh hnutetuia luang chu. A thawhrim rah chu ei lovin a chân ang a, A khâwl khâwm pawh a chên chuang lo vang. Retheite a tiduhdah a, a hnuchhawn a, Mahni in sa lovin mi sak sa a chhuhsak a. A duhâmna chuan chin lêm a nei lo ve, Mahse, a ro chuan a chhan thei dâwn si lo. Ei lohva hleih a nei lo va, A sum leh pai chuan a daih lo vang. A hausak vânglai takin a tlachhe thut ang a, Vânduaina chuan a hual vêl ang. In ei thau hle mah se, Pathian thinurna nasa tak chu a chungah a tla ang, A kawchhûnga khat khawpin a sûr ang. Thîr-fei hlauvin tlânchhe mah se, Dâr thal chuan a chhun tlang a, A phawi a, a hnung lamah a chhuak a, A hmâwr tlê-ah thisen a kai, Hliampui a tuar ta a ni. Thim nasa takin a hmuak ang a, A rote chu mihring chhêm ni lo meiin a kâng ang a, A puan ina la awmte pawh a kâng ral vek bawk ang. Vânte chuan a khawlohna a puang ang a, Lei pawhin thiam loh a chantîr ang. Tui lianin a in a lên bo vang a, Pathian thinur ni-ah a neih zawng zawng a ral vek ang. Chûng chu mi sual chan tûr Pathian ruatsak chu a ni, An ro chan tûra Pathian ruat chu a ni. Tichuan, Joba chuan, a chhâng a: Ka thu sawi ngun takin ngaithla ula, Chu chu min thlamuanna ni rawh se. Min ngaithla ula, ka han sawi ang e, Ka sawi zawhah in duh leh min nuih dâwn nia. Mihring chungah em phunnawi ka nih? Han dawhthei rual ka ni lo asin. Min en ula, mak in ti hle ang, In kâ in hup ang. Ka chunga thil thleng hi ka ngaihtuahin ka mangang a, Hlauhnain ka thauvah a man ṭhîn. Engtizia nge mi sualte an nun renga, Tarkûna damin an hmuingîl hle le? An tu leh fate hlawhtling takin an dampui a. An in leh lo hlauhawm lakah a him a, Pathian lahin a hrem hek lo. An bâwngpate chî a ṭha a, An bâwngpuiten no an chhiat ngai lo. Ran rual angin an fate an chhuahtîr dem dem a, Hlim takin an tualchai a, Dârbenchhek leh ṭingṭang remin an zai a, An phênglâwng nên hlim takin an ri bûng bûng. An damchhûngin nuam takin an khawsa a, Thlamuang takin mual an liam ṭhîn. Pathian hnênah, “Mi kalsan rawh, I kawngte hriat kan duh lo ve, Engkimtitheia chu tu nge maw a niha, A rawng kan bâwlna tûr chu? A hnêna kan ṭawngṭaiin hlâwkna eng nge kan hmuh ang,” an ti a. An sum leh pai chu an thawh chhuah a ni lo va, Mi sualte remruatnaah chuan ka tel ve lo a ni. Mi sual khâwnvâr chu a mit fo va, Vânduaina an chungah a thleng fo bawk a, Pathian thinurna chuan chhiatna a thlentîr a ni lâwm ni? Thli chhêm lên buhpâwl ang an ni a, Thlipuiin buhsi a len bo ang hi an ni. A sualna avângin a fate a hrem in ti a, Amah ngei chuan tuar ang hmiang, a inhriat chhuah theih nân. A mit ngeiin a chunga chhiatna lo thleng chu hmu sela, Engkimtitheia thinurna chu tuar rawh se. A damchhûng nite a liam tawh hnuah chuan, A kalsan tâk a chhûngte a ngaihtuah ngai em ni? Chung lam vâna thil awmte chunga rorêltu Pathian chu Tu nge hriatna zirtîr thei? Ṭhenkhat erawh chu thil ṭha chên lovin Hrehawm takin an awm a, An thi a. Vaivutah an mu tlâng a, A lungin a bâwm ṭhîn. I ngaihtuahte ka hria asin, Mi diriamzia pawh ka hria. “Khawiah nge mi ropui in chu a awm tâk? Mi sualte chênna puan in pawh khawiah nge,” in ti a. Zin vêl mite in zâwt ngai lo vem ni? An sawite chu in awih na nge? Mi sual chu vânduai ni atân khêk a ni a, Thinur ni-ah hruai chhuah a ni,’ tih hi. Tu nge a hmaichhanah a sualna chachhuah anga, A thil lo tih tu nge thungrûl ngam ang? Thlânah phûm a ni a, Ngun takin an vêng a, Ruama lei chuan ṭha takin a khuh a, A hmaah mi tam tak an kal tawh angin Mi tam takin a hnung an zui. Engtin tehlulin nge nangnin dâwtin min thlamuan theih ang? In sawite chu engmahlo mai a ni si a. Tichuan, Elifaza, Teman mi chuan heti hian a chhâng a: Mihring hian Pathian tân ṭangkaina a nei em? Mi fing ber pawh a hlâwkpui dâwn em ni? A dikna chu Engkimtitheian a ṭangkaipui em? Sawisêlbova i nun avângin hlâwkna eng nge a neih? Pathian i ṭih avânga hrem i ni lo va, Rorêlnaa hruai i ni hek lo. I sualna a nasat êm avâng a ni, I sualnain tâwpintai a nei si lo. Eng mah tham lovah i unaute lakah dahkham i phût a, An silhfên hlihsakin saruakin i awmtîr a. Chaute chu in tûr tui i pe lo va, Rilṭâmte tân chaw i ui a. I thiltihtheihnain mi ram i lâksak a, I duhsakzâwngte i pe a. Hmeithaite chu kutruakin i kal botîr a, Fahrahte pawh i rapbet a. Chuvâng alâwm i vêlin thangin a hual che a, Chhiatna nasa tak leh hlauhawmin a hual che ni. Khua a thim a, i hmu thei lo va, Tui lian chuan a khuh ta che a nih hi. “Pathian chu vânsângahte hian a awm lo vem ni? Arsite khi sâng hle mah se, a rawn chhuk en a, Eng nge Pathianin a rawn hriat ang le? Chhûmin a hliah tlat a, engtin nge min rêlsak theih? “Min hmuh theih loh nân chhûm chhah takin a khuh a, Vânlaizâwlah a lêng vêl a,” i ti a. Mi sualten an zawh ṭhin kawng hlun chu I zawh ve dâwn em ni? A hun lovah sawn bo an ni a, An innghahna pawh tui lianin a lên bo ta. Pathian hnênah, “Min kalsan rawh, Engkimtitheia chuan eng nge min tih theih?” an ti a. Chuti chungin an inte thil ṭhain a tihkhahsak a, Chuvângin, mi sualte remruat chu ka hrethiam thei lo. Mi dikte chuan an hmuhin an lâwm a, Pawi khawih lote pawhin an nuihsan a; “Kan hmêlmate chu tihchhiat an ni ta, Mei chuan an hausakna a kâng ral ta,” tiin. Pathian hnênah inhlân la, amah nên inrem rawh, Tichuan, i hmuingîl ang. A kamchhuak zirtîrna chu pawm la, I thinlungah vawng tlat ang che. Engkimtitheia hmaa inngaitlâwma i kîra, I in ata thil sual i dah bo daih chuan A tungding ngei ang che. I rangkachak chu vaivut ang leka i ngaiha, I rangkachak ṭha chi pawh, Luikawr lungte ang maia i ngaih chuan, Engkimtitheia chu i rangkachak leh tangkaraw tlang, I tâna hlu tak chu a ni ang. A ni, Engkimtitheia chu i ring tlat ang a, Amah chu i lâwmna ber a ni ang. A hnênah i ṭawngṭai ang a, anin a ngaithla ang che, Tichuan, i thutiamte lâwm takin i hlen ang. I thil ruahman chu a hlawhtling ang a, I kawngte pawh a tiêng ang. Pathianin mi chapote a hnûkhniam a, Inngaitlâwmte a chhanhim ṭhîn. Mi pawi khawih lo chu a chhan chhuak ang a, I kut a thianghlim chuan Nang pawh a chhan chhuak bawk ang che. Tichuan, Joba chuan a chhâng a: Ka manganna vawiin thlengin ni tin a zual zêl a, Ka rûm hian ka natzia pawh a hril zo lo. Aw, amah ka hmuh theihna tûr lam chu hria ila, A thut hmunah chuan ka kal tûr a. Ka chungthu a hnênah chuan ka thlen ang a, Ka tanfung zawng zawng hi ka sawi chhuak vek ang. Mi chhân dân ka hre duh a, A sawi tûr chu hriat ka châk a ni. A thiltihtheihna nasa tak nên min bei dâwn em ni? Dâwn lo, ka lamah beng a chhi zâwk ang. Kei mi nun ngîl hian a hmaah thu ka thlen ang a, Thiam changin ka chhuak hlen tawh ang. Khawchhak lamah ka kal a, ani chu a awm si lo, Khawthlang lam ka zawn leh ka hmu si lo. Hmâr lama a chêt laiin ka hmu lo va, Chhim lam a pan pawhin ka hmu thei chuang lo. Ka kawng zawh chu a hria. Mi fiah hnuah rangkachak angin ka chhuak dâwn si a. Ka kete hian a hniakhnung a zui zêl a, Pêngbo lovin a kawng ka zawh zêl a. A kam chhuak thupêk chu ka pênsan lo va, A thu chhuakte chu chaw aiin ka ngaihlu zâwk. Mi rilru nghet a ni, tu nge khawih her thei ang? A duhzâwng chu a ti mai a ni. Ka chan tâwka a rêl chu a hlen ang a, Chutiang chu a la nei teuh a ni. Chuvângin, a hmaah hlauvin ka khûr a, Ka ngaihtuah chângin ka hlau zual thîn. Engkimtitheia chuan engati nge rorêl hun a ruat loh? Engah nge amah hretuten chu ni chu an hmuh loh? Mi ṭhenkhat chuan ramri lung an sawn a, Mi ran rual an chhuh chu anmahni ta angin an vulh a, Fahrahte sabengtung an lâksak a, Dahkham atân hmeithai bâwngpa an hrêng. Retheite awm ngaihna hre lovin an siam a, Ram chhûnga tlachhamte chu biru tûrin an tlânchhia, Thlalêr ram sabengtung angin Ṭhahnemngai takin chaw an zawng ṭâwk ṭâwk a, Thlalêrah chuan an fate tân chaw an hmu hrâm ṭhîn. Mi lova buh sengin an inhlawh a, Mi sualte pawhin an grep lo tûrin an chhawr. Puan sin lovin saruakin zankhuain an mu a, Khawvâwta intuam lumna eng mah an nei lo. Tlânga ruahpui sûrin a nan huh a, Phen tûr zawngin lungpui an bêl. Pa nei lo hnute hne laite chu an pawtthla a, Mi retheite chu an leiba aiah an fate an lâksak. Silhfên an tlachham a, saruakin an vâkvai a, Rilṭâm chungin an buhphalte an pu. Oliv huanah hriak an her a, Uain khurah grep an rap sâwr a, Tuihâl dangchârin hna an thawk. Khawvêla mi tam tak thichhâwnga rûm te, Ṭanpui dîla hliam tuar au te, Pathian lahin a ngaihsak lo. Mi ṭhenkhat chuan êng an hua a, êngah an kal duh lo. Khaw êngah pawh an awm duh lo. Varṭianah tualthattu chu a tho va, Rethei leh chanhaite a that a, Zânah pawh rûkru angin a che vêl ṭhîn. Uire chuan khaw thim a thlîr a, “Tu man min hmu tawh lo vang,” tiin. A hmai a khuh a. Chûng mite chu zânah in rek pawpin an lût ru a, Chhûnah an inkalhkhung a, Êngah an awm duh lo. Thim chhah mup chu an tân zîng a ni a, Thim hnuaia hlauhawmte nên an innêl êm a ni. Tui lian chuan chak takin a lên bo va, A ram chan chu ânchhe dawng a ni a, A grep huana thawk tûrin tu mah an kal lo. Khawkhêng ni saah vûr a tuiral angin Mi sualte pawh thlânah an ṭawih ral ang. A nu chuan a theihnghilh tawh ang a, A lung tân chaw tui tak a ni ang. Mi sualte chu hriat reng an ni tawh lo vang a, Thing anga tihtliah an ni ang. Ching, fa hring thei lote chu rethei takin a chhawr a, Hmeithaite a khawngaih ngai lo. Pathianin a thiltihtheihnain mi chakte a hnawt kiang a, An tho chhuak nain dam rêng an beisei lo. Him tak leh thlamuang âwm takin a chawlhtîr a, Mahse, an kawng chu a mitin a en reng si. Rei lo tê atân chawisân an ni a, An ral leh ṭhîn, tihhniamin an awm a, Mi dangte angin mual an liam a, Buhvui anga ah chhum an ni. Chu chu a dik lo a nih pawhin Tu nge, “I daw’” min ti thei ang? “I thute hi eng mah a ni lo,” tu nge ti thei ang? Bildada, Sua mi chuan heti hian a chhâng a: Pathian chu a lalin a va zahawm êm, Vân sângte khi muanawm takin a vêng. A sipai rualte chu chhiar sên rual an ni lo, A ênga a chhun loh tu nge awm? Engtin nge Pathian hmaah miin thiam a chan theih ang? Engtin nge hmeichhe hrin a thianghlim theih ang? A mit hmuhah chuan thla meuh pawh khi a êng lo va, Arsite pawh an thianghlim lo. Mihring lek phei chu thil lung mai a ni, Mihring fapa pawh changpât mai a ni. Tichuan, Joba chuan a chhâng a: Mi chak lo i han ṭanpui dân leh Bân tha chak lo i han chhân dân chu le! Mi mâwl i han zilh fing a, Thu ril tak tak i va han sawi tam ve! Tu thlarau nge i chana Tu nge maw i han hrilh vei le? Mitthi thlaraute chu lei hnuaiah an khûr a, Chuta chêngte nên chuan. Mitthi khua chu Pathianin a hmu vek a, Chhiatna hmun chuan hliahtu a nei lo. Hmâr lamah vân a pharh a, Engmahlovah lei chu a khai kâng a. A chhûm chhah tak chuan ruahtuite a fûn khâwm a, A tui paite avângin chhûmte chu a ṭet chuang lo. A lalṭhutthlêng chu chhûmin a khuh a. A vêlin a zîng mup mai. Thim leh êng inrina atân Tui chungah kâwlkil a siam a. Vân dona bante chu a nghîng dur dur a, A zilhhauna chu mak an ti a. A thiltihtheihnain tuifinriat a thunun a, Thiam takin Rahab a tan chhum a. A thawin vân chu a tithiang a, A kutin rûlpui tlânchhia a that. Ngai teh, hêng hi a thiltih hmatheh mai a la ni, A chanchin kan hriat hi a va beitham êm, A thiltihtheihna thâwm ri chu tu nge hre zo thei ang? Joba chuan heti hian a chhâng a: Ka dikna ngainêpa, ka nun tilungngaitu, Engkimtitheia, Pathian nung chhâlin ka sawi e, Ka damchhûnga Pathian thaw Ka hnâra a awm chhûng chu, Ka hmuiin thu lawilo a sawi lo vang a, Ka leiin dâwt a sawi hek lo vang. Ka thiam dâwn teuh lo mai che u, Ka thih thlengin ka dik tih ka ṭan tlat dâwn. Ka dikzia ka ṭan tlat ang a, Ka thu ka zûk lo vang. Ka dam chhûng zawng inthiam lohna ka nei lo vang. Ka hmêlma chu mi sual angin, Mi dotu chu mi dik lo angin hrem ni teh se. Pathian ngaihsak lo tân beisei tûr eng nge awm? Pathianin a hnâwla, a nun a lâksak bawk si chuan. Buainain a chîm laiin Pathianin an au thâwm a ngaithla dâwn em ni? Engkimtitheia chungah a lâwm ang em? Pathian chu eng lai pawhin a ko vang em? Pathian thianghlimzia chu ka zirtîr ang che u, Engkimtitheia remruat chu ka zêp lo vang. Nangmahni ngeiin hêng hi in hmu vek si a, Engtizia nge mumal nei lo taka in ṭawng mai le? Pathianin mi sualte chan tûra a ruat leh, Engkimtitheian hnehchhiahte chan tûra a ruat chu hei hi a ni: Fa tam tak nei mah se, khandaih tuar tûr mai an ni, A rîla rahten chaw kham khawp an nei lo vang. A thlah la dam chhunte pawh hriin an thi ang. An nupuite pawhin sûnna hun an nei lo vang. Vaivut anga tam tangkarua khâwlin, Silhfên pawh hlum angin tiang khâwm mah se, A tian khâwm chu mi dikten an la inbel ang a, A tangka pawh pawi khawih loten an la insem ang. A in sak chu maimawm rîl zam ang lek a ni, Vêngtuin chhâwlbûk a sak ang lek hi. Hausa takin a mu a, a mut hlânin a sum a ral zo va, A han harh chuan eng mah a nei tawh lo. Tui lian angin hlauhawmin a nangchîng ang a, Zâna thlipui lo tlehin a la bo vang. Khawchhak thliin a lên bo vang a, a awm tawh lo vang, A hmun ata a nuai bo dâwn si a. Zahngai lovin a nuai chiam ang a, A thiltihtheihna hmaah chuan a tlânchhe rawk rawk ang. Miten an kut an ben khum ang a, Chek khumin a hmun aṭangin an ûm chhuak ang. Tangkaraw laihchhuahna hmun a awm a, Rangkachak tihthianghlimna hmun pawh a awm. Thîr chu lei aṭanga lâk chhuah a ni a, Dâr sen chu lung aṭanga rawhtui a ni. Miten thimah êng an chhi zêl a, Khur thûk tak takah an lût a, Thim chhah mupa lung awmte chu lai chhuak tûrin. Mite chên lohnaah khur an lai a, A chunga kalte pawhin an hre lo. Mi hriatpui lohvah an inkhai a, an inthên vêl ṭhîn. Lei pâwnlâng hi buh tân a ni a, A chhûngril erawh chu mei kan ang a ni. Lei chhûnga lungah te chuan safir lunghlu a awm a, A dipahte rangkachak a tel bawk. Chumi kalna chu mulukawlh pawhin a hre lo, Mu pawhin a hmu ngai hek lo. Ramsa kawlhte pawhin an tlawh lo va, Sakeibakneite pawh an kal ngai lo. Mite chuan lung changte chu an la a, Tlângte chu a bulṭhutah an hai let a. Lungpuite pawh an verh tlang a, Thil hlu tak tak an hmu chhuak a. Luite chu pût hauh lovin an khuap a, Thil lang lote chu an tilang a. Mahse, finna chu khawiah nge an hmuh ang a, Hriatna chu khawiah nge a awm ang? Mihringin a hlutzia an hre lo va, Mi nung ramah hian an hmu hek lo. Tuithûkpui chuan, “Ka hnênah a awm lo,” a ti a. Tuifinriat chuan, “Ka hnênah a awm lo,” a ti bawk a. Rangkachaka lei theih a ni lo va, A man atân tangkarua bûk chhuah chi a ni hek lo. Ofir rangkachakin a tluk thei lo va, Onix leh safir lunghlute pawhin an tluk thei lo. Rangkachak leh lung fîmin a hen lo va, Rangkachak nomawia thleng theih a ni hek lo. Berul leh Krustal lunghlute nên tehkhin rual a ni lo. A ni, finna man chu lunghlu man aiin a tam zâwk. Ethiopia ram lunghlu topaz pawhin a khan lo va, Rangkachak thianghlim ai pawhin a hlu zâwk. A nih, finna chu khawi aṭanga lo kal nge? Hriatna chu khawiah nge a awm? Thil nung pakhat mahin an hmuh theih loh tûra thup a ni a, Chunglêng savate lakah thuhrûk tlat a ni. Boralna leh thihna chuan “A thâwm zawng kan bengin kan hria,” an ti a. Pathian chauhvin a kawng chu a hria a. Amah chauh a ni a awmna hmun pawh hria. Lei tâwp thlengin a thlîr a, Vân hnuaia thil tinrêng hi a hmu. Thli chak dân a teh lai leh Tuite a teh lai khân Ruahtui tlâk dân tûr a ruahman lai leh, Khawpui ri leh kawlphe kawng a siam lai khân. Tichuan, finna chu a hmu a, a puangzâr a, A tinghet a, a chhui chhuak a. Mihring hnênah chuan, “Ngai rawh, Lalpa ṭih hi finna a ni, Thil ṭha lo kalsan hi hriatthiamna chu a ni,” a ti a. Joba chuan a thu sawi chhunzawmin heti hian a ti a: Tûn hma thla ral ta, Pathianin min vênhim laite ang khân awm ka va châk êm! A khâwnvâr chu ka lu chungah a êng a, A êng ringin thim chu ka kaltlang ṭhîn. Ka vânglai ni-ah te Pathianin ka puan ina min pâwl laite khân. Engkimtitheian min châmchilh a, Ka fate ka kianga an awm lai khân. Ka kawngahte hnutetui a luan dûl dûl lai leh, Lungpuia hriak kan sâwr tluk tluk laite khân. Khawpui kawngka pana ka kal chhuaha, Kawtthlêra rorêlna ṭhuthmun ka rem laite khân. Tlangvâlten min hmu a, an bibo va, Upate an tho va, an ding a. Hotute ṭawng lai pawh an châwl a, An kutin an kâ an hup a. Miliante pawh an ngawi ṭhuap a, An lei chu an dangah a bet a, Ka thu sawi hriaten min fak a, Min hmututen min chawimawi a, Mi rethei ṭanpui ngai, ṭapte ka chhan chhuak a, Ṭanpuitu nei lo fahrahte pawh. Thi dâwn ṭêpin an duhsakna min hlân a, Hmeithaite pawh hlim takin ka zaitîr. Diknain ka inthuam a, Rorêlna dik chu ka kawrfual leh lallukhum a ni. Mitdel tân mit ka ni a, Kebai tân ke ka ni. Tlachham tân pa ka ni a, Ka hmêlhriat lohte thubuai pawh ka ngaihtuahsak ṭhîn. Mi sualte ngho chu ka tihtliahsak a, An thil seh chu ka pawh chhuahsak bawk. A rei thei ang ber dam ka tum a, “Keima in ngeiah ka thi ang,” ka ti a. Ka zungte chu hmun hnâwngah a zâm lût ang a, Ka zârah chuan zânkhuain dai a châm tawh ang. Ka ropui deuh deuh vang a, Ka chak telh telh bawk ang. Miten beisei takin ka lamah beng an dawh a, Ka thurâwn nghâkin an ngawi ṭhuap a. Ka han sawi zawh chuan eng mah an sawi tawh lo, Ka thu sawi chu an ei a ni. Ruahtui tla tîr miin an nghâkhlel angin min nghâk a, Ruah hnuhnûng duh angin ka thu an hre duh a, An beidawn laiin ka tihlim a, Ka hlim hmêl chuan anni chu a tiharh; An kawng zawh tûr ka thlansak a, An hotu-ah ka ṭhu a. Sipai rual zînga lal angin ka awm a, An tân lusûnte hnêmtu ang ka ni. Tûnah zawng ka aia naupangten min nuihzat a, An pate pawh ka ran rual vêngtu, Ui zînga telah pawh ka duh lohte an ni. Chûng thaṭhum tawhte bân tha chu Ka la ṭangkaipui dâwn em ni? Tlachham leh rilṭâmin thing zung an khel a, Thim hnuaiah thlalêr hnuchhawn ramah an vâk vêl ṭhîn. Thlalêr builukham an pawt a, Juniper zungte an chaw a ni. Mi zîng aṭangin hnawh chhuah an ni a, Rûkru angin an au zui a. Ruam kumkârahte an awm a, Khuarkhurum leh lungpui phênah te chuan. Hnimbuk hnuaiahte mangangin an râk chûl a, Kangṭhai buk hnuaiahte an tawm khâwm. Mi tlâktlailo leh bengtlalo, Mihringa chhiar tlâk loh an ni. Tûnah zawng hlaah min phuah el a, An kamchhe tleuhna ka ni ta. Min ten a, ka lakah an inthiarfihlîm a, Ka hmaia chil chhâk tak an nâp a. Tûnah Pathianin ka chakna min lâksak a, Chuvângin, ka thu engah mah an ngai ta lo. Ka ding lamah mipui an lo thawk a, Ka ke-ah min kalh thlu a, Ka chhiatna tûr an belhchhah a. Ka tlân chhuahna tûr an tichhia a, Ka vânduaina an tizual a. Tu man an khap si lo. Kulh bang chim zau laiah an lo lût a, A chimte chuan mi delh bet a. Thil râpthlâk takin mi nangchîng a, Ka zahawmna thli angin a liam a. Ka hamṭhatna pawh chhûm angin a kiang zo ta. Tûnah ka thi dâwn ta a nih hi, Tuarna chuan min thlah si lo. Zankhuain ka ruhte a na ngut ngut a, Mi kher ngur ngur hi a châwl lo. Ka na hian nghâwnga reh angin min rêk a, Ka tâl ka tâl a, Ka silhfênte pawh ka tâl chuar zo vek a ni. Pathianin chirhdûpah min paih lût a, Vaivut leh vut ang chauh ka ni ta. Nang ka ko che a, mi chhâng lo va, Ka din pawhin mi hawi si lo. Ka lakah i nun a râwng ta a, Dîm lo tawpin min khawih. Nangin thli mi lentîr a, sâng takah min vawrh a, Thlipuiin mi lên mi lên. Nangin min tihlum dâwn a, Mi nung zawng zawng tâna hmun ruatah chuan Min hruai dâwn tih ka hria. Chhiat tâwk chungah engah nge kut i thawha, Eng mah ti thei lo, khawngaih dîltu chungah hian? Buaina tâwkte tân ka ṭap ṭhîn lâwm ni? Tlachhamte ka khawngaih ṭhîn lo maw? Thil ṭha ka beisei laiin thil ṭha lo a lo thleng a, Êng ka nghâk a, thim a lo thleng a. Ka thin a phu hlawp hlawp a, a reh thei si lo, Hrehawm tuarna hun chuan mi rawn nang ta. Ni em vâng ni lovin ka hmêl a thu a, Pungkhâwmho zînga dingin ṭanpui ka dîl a. Sihalte unaupa ka ni, Ostrich-te tân ṭhian ṭha ka ni. Ka vunte a lo dum a, a khawk a, Ka taksa pawh a lum vung vung mai. Ka ṭingṭang a ri kuai ruai a, Ka phênglâwng ri pawh ṭah hlaah a chang. Nula ngaihmelh lo tûrin thu ka tiam a, Chung Pathian hnêna mihring chan tûr leh Sadaia, vân sânga awm hnêna rochan tûr eng ang nge ni? Mi sualte tân chhiatna leh Thil sual titute tân vânduaina a ni dâwn lo vem ni? Ka kawngte a hmu vekin Ka kepênte a chhiar lo vem ni? Dâwt sawi ka chîna, Mi bum tuma hmanhlel ṭhîn ka nih chuan, Bûkna dik takin min teh sela, Ka dikzia hi Pathian chuan a hre mai ang. Tin, kawng dik aṭanga ka pêna, Ka mitin suala min hruaia, Ka kutin thil sual a khawih chuan, Ka thawh rah chu mi dangin ei sela, Ka thlai chînte chu pawt vek rawh se. Ka ṭhenawmpa nupui ka îta. A kawngka bula ka chân rûk chuan, Ka nupui chuan mi dang chaw chhûm sela, Mi dangin mutpui rawh se. Chu chu bawhchhiatna sual lian tak, Rorêltuten an hrem ngei tûr chu a ni. Chutiang sual chu, kâng ral vek thei mei a ni a, Ka sum zawng zawng pawh a kâng ral ang. Ka chhiahhlawhnu leh chhiahlawhpate chu Ka laka an vuivaina thu Dik taka ka ngaihtuahsak duh loh chuan, Pathian a lo thawh hunah engtin nge ka tih tâk ang? A rawn zawh fiah hunah, engtin nge ka chhân tâk ang le? Pum chhûnga mi siamtu khân anni pawh a siam lo vem ni? Mi pakhat kutchhuak kan ni lo vem ni? Tlachhamte mamawh hrênsakin Hmeithaite ka tibeidawng ngai lo. Ka chaw keimah maia ei lovin Fahrahte ka eitîr ve ṭhîn. Anni chu an tleirâwl lai ata pa angin ka enkawl a, An sên têt ata ka kaihruai zâwk ṭhîn a ni. Tu pawh silhfên nei lova vâkvai emaw, Hâk tûr nei lo rethei ka hmuh chuan Ka berâm hmul ngeia siamin ka tuam lum ang a, Tichuan, anin min fak takzet ang. Rorêlnaah ṭantu ka neih dâwn avânga, Fahrahte chunga kut ka thlâk chuan, Ka koki hi ka dâr saiphêng nên phawk hlawk sela, Ka bân hi a bulah tliak hmawk rawh se. Pathian hrem ka hlauh êm avâng leh A ropui êm si avângin chûng thilte chu ka ti ngam lo va ni. Rangkachak chu rinchhan bera ka hmana, Rangkachak thianghlim hnênah, “Ka himna i ni,” ka tih chuan, Ka hausak êm avâng leh hna thawh tam avânga lâwm ka nih chuan Ni khi a ên êm avâng leh Thla pawh a ropui êm avânga ngaisânga, A rûka ka rilru an lo hîp beha, Anmahni zaha ka kut ka phar chuan, Chu pawh chu rorêltu hrem ngei chi, sual a ni, Chung Pathian phatsantu ka nih dâwn avângin. Mi hawtu chhiatnaa lâwm ka nih emaw, Thil ṭha lovin a tlâkbuak laia ka hlim viau emaw chuan. “Thi se,” tia ânchhe lawh nân Ka kâ ka phal lo. “I chaw ei lo tu nge awm le?” Ka awmpuiten an tih loh chuan. Mikhualte kawtthlêrah an riak ngai lo, Khualzinte tân ka kawng ka hawng reng ṭhîn. Mi anga sualna zêp chîng ka ni lo, Sualna ka pai ru ve ngai lo. Mipui zah avâng leh chipuite hau hlauh vânga Ngawi renga awma lêng chhuak ngam lovin ka awm ngai lo. Ka thu ngaithlatu tûr an awm na nge aw, Ka sawi apiang a dik asin. Engkimtitheian mi chhâng teh se, Ka chhiar atân min hêkna hi ziak chhuah ni se ka va ti êm! Chhuang takin ka kokiah ka târ ang a, Lallukhum angin ka khum ang. Ka tih apiang Pathian ka hrilh ang a, Ngampa takin amah ka pan ang. Ka lo neih lai hi ka rûk a niha, A neitu dik tak chhuhsak ka nih chuan. Man pe lova a rah chauh ei ka lo niha, A thlotute dangchâra ka siam chuan, Huit aiah hlîng ṭo zâwk sela, Barli aiah hlohar ṭo zâwk rawh se. Joba thu chu a tâwp ta. Tichuan, Joba chu ṭha a intih êm avângin a ṭhian pathumte chuan an chhâng mai ta lo va. Elihua, Barakela fapa, Buz mi, Rama thlahte zînga mi chu Joba chungah a thinur ta êm êm a, Pathian aia ṭhaah a inngaih avângin. Joba ṭhian pathumte chungah pawh a thinur bawk, Joba chu thiam lo ti chunga chhân ngaihna an hriat loh avângin. Anni chu aia upa an nih avângin Elihua chuan Joba hnêna thu sawi ve hun chu a lo nghâk reng a ni. Tichuan, hêng mi pathumte hian chhân ngaihna rêng an hre lo tih a hriatin Elihua chu a thinrim ta hle a. Barakela fapa, Elihua, Buz mi chuan heti hian a chhâng ve ta a: “Ka naupang a, nangni in upa a, chuvâng chuan ka zak a, Ka hriat pawh in kiangah ka sawi ve ngam lo va. Upate ṭawng sela, Rual ûten thu sawi teh se,” ka ti a. A ni, mihringa thlarau awm, Engkimtitheia thaw chu finna petu a lo ni. Kum tam apiang an fing chuang lo, Upa apiangin an hre fuh chuang hek lo. Chuvângin, mi ngaithla ula Ka ngaih dân ka han sawi ve ang e. Ngai teh u, in thu ka nghâk reng a, Sawi tûr in dap chhûng khân In ṭan dânah beng ka lo chhi reng asin. Ngun takin in thu ka ngaithla a, in zînga tu mahin Joba dik lohna in lailang thei lo va, Tu man a thu in letthla thei hek lo. “Mihring hneh theih loh, Pathian chauh hneh theih Mi fing kan tawng ta,” in ti reu reu ang e. Kan la intawng lo va, Nangni ang mai chuan ka chhâng ve dâwn lo. An dang reng a, chhân ngaihna an hre tawh lo va, Kam khat mah sawi tûr an nei ta lo. Tûnah an ngawi reng a, sawi tûr dang rêng an hre lo va, An din reng avângin ka nghâk reng mai dâwn em ni le? Keimah ngeiin ka han chhâng ve ang a, Ka ngaih dân ka han sawi ve teh ang. Sawi tûrin ka khat tlat a, Ka chhûngrilah mi tur ut ut a. Uain hu chhuahna nei lo ang ka ni, Uain thar peng angin ka puak keh ṭêp a ni. Ka sawi ve phawt loh chuan ka hah a dam lo vang, Ka kâ ka âng a, ka han chhâng ve teh ang. Ṭan bîk neih ka tum lo va, tu mah fak der ka tum hek lo. Fak der ka thiam lo va, chutiang chu ti ila, Mi siamtuin min la bo thuai mai ang. Tûnah, Joba, ka thu hi ngaithla la, Ka sawi zawng zawng hi ngun takin ngaithla rawh. Ngai teh, ka kâ ka âng a, Ka han sawi ve dâwn e. Rilru ngîl tak pua sawi ka ni, Ka thil hriat chu dik takin ka sawi dâwn. Pathian Thlarau chuan mi siam a, Engkimtitheia thaw chuan nunna min pe. I theih chuan mi han chhâng la, Ṭanfung siam la, mi hmachhawn teh. Pathian mit hmuhin nangmah ang bawk ka ni, Kei pawh hluma siam ve mai ka ni. Ngai teh, nanghi mi hlau tûr i ni lo ve, Ka nawr lutuk lo vang che. I sawi kha ka hria a, I thute pawh ka hre reng asin. “Sualna rêng nei lovin ka thianghlim a, Sawisêlbo ka ni a, khawlohna lakah ka fihlîm a ni. Ngai teh, ka lakah chhuanlam a zawng a, A hmêlmaah mi chhiar ta a, Ke kawl min buntîr a, Ka awm dân tinrêng mi enthla reng,” i ti a. Ngai teh, ka hrilh a che, he thilah hian i tidik lo, Pathian chu mihring aiin a ropui zâwk a ni. Kam khat maha a chhân loh che avângin Engah nge ani chu i hau le. Pathianin kawng hrang hrangin thu a sawi a, Mahse, mihringin an hrethiam lo. Tui taka mi an muthilha, Khumlaizâwla an mut laiin Mumangah te, inlârnaah te an hnênah thu a sawi ṭhîn. An beng chu a tihawng a, A zilhhauna avângin an thlaphâng a. Mihring chu a thiltih a ṭhulhtîr a, Chapona lakah a vêng him a. Ani chu thlâna liam lo tûr leh, A nunna pawh khandaiha thi lo tûrin a vêng. Ani chu natna khumah thunun a ni a, A ruh na pawh a reh thei lo. Chaw châkna rêng a nei lo va, Sa tuihnai takte pawh a châk hek lo. A chêr êm êm a, Ruh hlîr ruh hlîr a ni. Ani chuan mitthi khua a hnaih ta hle a, A nunna chu an lâksak ṭêp a ni. A lamṭang tûr Vântirhkoh sâng zînga pakhat tal, Mihring tih tûr dik tak hrilhtu awm teh sela! Amah duhsak takin, “Mitthi khuaah kaltîr teh suh, A tlanna man ka hmu ta e,” ti se. A tisa chu lo tuai thar leh sela, A vânglai nite chu lo inher kîr leh rawh se. Pathian hnênah a ṭawngṭai ang a, a lo duhsak ang a, Pathian hmêl chu hlim takin a hmu ang a, Chhan chhuah a nih thu chu mite hnênah a puang darh ang. “Thil dik ti lovin thil sual ka lo ti ta a, Mahse, ka phu angin ka tuar si lo,” Tiin vântlâng zîngah hla a sa ang. Tichuan, mitthi khuaa liam mai tûr a chhanhim a, A nunin khaw êng a hmu leh ta. Pathianin hêng thil zawng zawng hi Mihring tân vawi hnih vawi thum a ti ṭhîn. Thlân kotlâng aṭangin a nunnate a hruai kîr a, Nun hlimnate a neihtîr ṭhîn. E, Joba, ngun takin mi ngaithla teh, Ngawi la, ka han sawi zêl ang e. Sawi tûr i nei ve a nih leh mi chhâng la, Eng mah zêp suh, i dikzia hriat ka châk a ni. Sawi tûr i nei lo a nih leh mi ngaithla la, Lo ngawi la, finna ka zirtîr ang che. Tichuan, Elihua chuan a sawi zêl a, Nangni mi fingte u, ka thu ngaithla ula, Nangni mi thiamte u, in beng lo dawh rawh u. Kâin tui a hria a, Bengin thu ṭha leh ṭha lo a hria A dik chu thlang ila, Kan tâna ṭha ṭha chu i thlang. tlâng ang u. Joba chuan, “Mi ṭha ka ni a, Mahse, Pathianin ka dikna mi hnâwlsak a. Ka dik reng chu dawtheiah min puh a, Bawhchhe lo pui tihdam rual lohvin min hliam hi,” a ti a. Joba anga mi hmusit chîng Tu nge awm ang le? Thil sual titute nên inkâwma, Mi sualte nêna lêng ho ṭhîn chu tu nge? “Pathian tihlâwm tum hi mihring tân Hlâwkna eng mah a awm lo,” a ti vei a. Chuvângin, nangni mi fingte u, Pathian chuan thil sual tiin Engkimtitheia chuan thil dik lo a ti teuh lo vang. An thiltih ang zêlin mite a thungrûl a, An phu tâwk ang zêlin mi tin a rêlsak dâwn si a. Pathianin thil sual a ti hauh lo vang, Engkimtitheia chuan dik lo takin a rêl hek lo vang. Tu nge leilungah hian thu neihtîra, Khawvêl pum pui hi kawltîrtu chu? A thlarau chu a lâk kîra, A thaw chu a lâksak chuan, Mi zawng zawng hi an boral ang a, Mihring chu vaivutah a kîr leh ang. Hriatthiamna i neih chuan hei hi ngaithla la, Ka sawi hi ngaihtuah ngun ang che. Thu dik hawtu chuan ro a rêl ang maw? Mi dik leh thiltitheia chu i thiam lo dâwn em ni? Ani chuan lal chu, “Tlâktlailopa” a ti a, Mi ropui pawh, “Mi sualpa,” a ti ngam bawk asin. Hotute pawh a duhsak bîk lo va, Mi hausa pawh rethei aiin a ngaihsak chuang lo va, A kutchhuak vek an ni. Zânlaiah an thi thut a, Pathianin a sawisa a, An boral a, Mi chakte pawh mihring kut hmang lova lâk bo an ni. Mihringte awm dân a hmu vek a, An thiltihte a en reng ṭhîn. Thilsualtitute bihrûkna tûr Thim chhah tâwk a awm lo. Mihring chunga a rorêl hun tûr Pathianin tu mah a ruatsak lo. Mi ropuite a titlâwm a, an aiah mi dang a dah a, A tân an chanchin chhui lâwk a ṭûl lo. An thiltihte chu a hriat reng avângin Zânah anni chu a paihthla a, a nuai bo. An sual avângin Mite mit hmuhah anni chu a hrem a, An pên bosan avâng leh A dânte an pawisak loh avângin. Pathian hriat khawpin retheite an rûmtîr a, Hnehchhiahte au thâwm chu a lo hre ta. A ngawih reng pawhin tu nge dem thei ang? A hmêl a thup laiin tu nge hmu thei? Mi mal chungah pawh, hnam chungah pawh, Thuhmun rengin a che. Pathian hre lo mi chuan ro a rêl lohna tûr leh, Mipui an bum lohna tûrin. Miin Pathian hnênah hetiangin sawi sela, “Thununna ka tuar a, ka sual zui tawh lo vang, Ka hmuh theih loh chu mi zirtîr la, Ka lo tihsual chu ka ti leh tawh ngai lo vang,” ti sela, Pathian thiltih i do si a, I duh angin tihtîr i tum em ni? Ka hrilh ang che ni lovin, Nangmah ngeiin thu titlu rawh. I rin dân tak chu han sawi teh. Hriatna neite leh mi fingte chuan Ka thu sawi hi an hriatin mi pawmpui ang a, “Joba hi eng mah hre lovin a ṭawng mai mai a, A thu-ah hian finna a awm lo,” min tihpui ang. Joba thu sawi hi ngaihtuah ngun teh u, Mi sual angin thu a sawi mai mai a ni tih in hre thei ang. A sual belhchhahin a hel a, Kan hmuhah hmusit takin Pathian kut a ben khum a, A âng chiam a nih hi. Elihua chuan a sawi zêl a, “Pathian hmaah mi dik ka ni,” i ti hi A âwm i ti em? “Thil sual ka ti emaw, ti lo emaw I tân eng nge pawi ang a, Ka tân eng nge hlâwkna awm ang?” i ti elo? Ka han chhâng teh ang che, Nang leh i ṭhiante nên. Vân lam khi en teh, chhûmte khi thlîr la, Nang aia a sân zâwk khi. Thil i tihsual pawhin i tân eng nge pawi? I bawhchhiatna a tam pawhin eng nge a pawina? I dik pawhin eng nge i tân a ṭangkaina? I kut aṭangin eng nge a dawn? I sualna chuan mihring chauh a ni a khawih, I ṭhatna pawh mihring tân mai a ni. Tihduhdahna a nasat chuan mi an rûm a, Mi thiltitheite laka chhan chhuah an ngên. Mahse, tu man, “Min siamtu Pathian chu khawiah nge, Zâna hla min saktîrtu chu, Leia ramsate aia hriatna thûk zâwk min petu, Chunglêng savate aia finga min siamtu chu?” an ti ngai lo. Chuvâng alâwm, miten Pathian chu au mah se a chhân loh, Mi sualte chapona avâng chuan, “Pathianin dîlna a chhâng lo, Engkimtitheian a ngaihsak hek lo,” Tih hi a va ho tak êm! “Ani chu ka hmu thei lo,” i ti na a, Nghâk fan fan rawh, I chungthu chu ngaihtuah tûrin a hmaah a awm e. Tûnah, thinrimin a rawn hrem mai loh avâng leh, Sualna a rawn ngaimawh mai loh avângin Joba hian a kâ a âng mai mai a, Eng mah hre lovin a ṭawng mai mai a nih hi. Elihua chuan a sawi zêl a: Rei lo tê tal min ngaithla la, ka han hrilh ang che. Pathian hmingin sawi tûr ka la nei cheu a ni. Ka hriatna ka han fawmkhâwm vek teh ang, Mi siamtu dikzia chu ka târlang dâwn e. Ka thu sawi hi dâwt a ni lo tih hre rawh, Hriatna kawnga mi puitling i kiangah a awm reng hi. Pathian chu a chak a, tu mah a hmusit lo, Engkim a hre vek a ni. Mi suaksualte a zuah lo va, Hnehchhiahte dik takin ro a rêlsak ṭhîn. Lalṭhutthlêngah lal angin a ṭhuttîr a. Mahse, miten kawl an bun a, Hnehchhiahna hruia phuar an lo nih chuan An thil tih leh an bawhchhiatna a hriattîr a, An lo chapo ṭhinzia te nên. A zilhna ngaithla tûrin a hrilh a, An sual sim tûrin thu a pe. Thu awih taka a rawng an bâwl chuan, An damchhûng chu hmuingîl takin an awm ang a, Nuamsa takin an awm bawk ang. An ngaihthlâk loh erawh chuan khandaiha thah an ni ang. Tu ma hriat hlawh lovin an thi ang. Pathian zah lote chu an thinur ṭeuh reng a, A hrem lai pawhin ṭanpui dîlin an au duh lo. An vânglai takin an thi ang a, Mualpho takin an boral ang. Tuarna hmangin Pathianin mi a zirtîr a, Harsatnain an beng a tihvârsak ṭhîn. Ani chuan manganna hmun ata a hruai chhuak che a, Hmun thâwl takah thawveng takin a awmtîr che, Thil tui tinrêng a hlui ta che a ni. Mahse, nang chuan i sual man i tuar ta a, Dik taka rorêlsak i nih tâk hi. Hausak châknain hruai bo che suh se, Thamna tam tak avângin bumin awm suh. I hausakna leh i chakna zawng zawng chu I mangan loh phah dâwn em ni? Zân chu nghâkhlel suh, mite an awmna hmuna an boral hun a ni. Sual lam âwn lo tûrin fîmkhur rawh, Thil sual i tih loh nân a ni hrehawm i tuar hi. Ngai teh, Pathian chu thiltithei chungchuang a ni, Zirtîrtu ropui ber a ni. Tu nge a thil tih dân tûr ruahmansaka, “I ti dik lo a ni,” ti thei le? A thiltih ropui tak hi hre reng la, Miten fakna hlain an chawimawi ṭhîn a ni. Mi tinin chu chu an en a, Hla tak aṭang chauhvin an thlîr ta ṭhîn. Pathian ropuizia hi kan hre sêng lo a ni, Engtia upa nge a nih chhui chhuah rual a ni lo. Tui mal far tê tê chu a hîp chho va, Tui hu chu ruahtui thiangah a chantîr a. Vân aṭangin a sûrtîr a, Mihring tân a sûrtîr buan buan ṭhîn. Chhûm insemdarh dânte hi mihringin a hre thei em? A awmna hmun ata khawpui a rîktîr dur dur dânte hi? Ngai teh, chung lamah khian kâwl a phettîr zawr zawr a, Tuifinriat mawngte chu a thim tlat si. Hêng hi hnamte rem a ruatsak dân a ni. Tichuan, ei tûr tam tak a pe a ni. Ṭêk chu a hûm reng a, A tum tak fuh tûrin a tlâktîr ṭhîn. Khawpui ri hum hum chuan thlipui lo thleng tûr a entîr a, Ran rualte pawhin a lo hnaih tawhzia an hria. Hei vâng hian ka khûr a, Ka thin a phu hlawp hlawp a ni. Ngun takin ngaithla teh, a awrâwl ri hum hum te, A ka aṭanga thâwm nasa tak lo chhuakte chu, Vân hnuai hmun tinah kâwl a phêttîr a, Leilung hmun tin a fang chhuak a. A hnuah chuan a awrâwl a chhuah a, A aw ropui tak chu a ri hum hum a. Kâwl a phe zawr zawr reng bawk a. Pathian chuan mak takin khawpui a tiri a, Thil ropui tak, kan hriatthiam phâk loh a ti a ni. Vûr hnênah, “Leiah tla rawh,” a ti a, Chutiangin ruahpuivânâwn hnênah, “Sûr buan buan rawh,” a ti a. Mi tinrêng kut a chelhsak a, Ama tih a ni tih mi zawng zawngin an hriat nân. Tichuan, ramsaten bihrûkna an zawng a, An chênna pûkah te an tawm reng mai. Chhim lam aṭangin thlipui a lo thawk a, Hmâr lam aṭangin thli vâwt a lo tleh a. Pathian thaw chuan vûr tlang a siam a, Tuipui zau tak tak pawh a tikhang ṭhîn. Chhûm chhahpui chu tui a paitîr a, Chhûm zîngah chuan kâwl a phêttîr a, A thupêk angin an de zawr zawr a, Khawvêl pum puiah a thu angin thil an ti zêl a ni. Mihring hrem nân emaw, leilung tihṭhat nân emaw A duhsakna lantîr nân emaw chûng chu a hmang fo ṭhîn. Joba, hei hi lo ngaithla teh, Beng sikin Pathian thil tih makte chu ngaihtuah teh, Pathianin chhûm a thunun dân leh kâwl a phêttîr dân hi i hria em ni? Khua a dur dân te, Hriatna famkim neitu thil tih makte hi i hre pha em? Chhim thli lum a lo tleh a, I kawrte chu i thlanin a huh zo ṭhîn. Ani angin vân i kaipharh thei em ni? Ngên tlang anga khauh chu? A hmaa kan sawi tûr chu min hrilh rawh le, Thimin min tuam a, sawi tûr ahleih kan hriat loh hi. Kei chuan a hnêna thu sawi ka ngam lo vang, Min tihchhiat theihna kawng ka siam dâwn lo. Tûnah vâna êng khi a tle sur a, A ên êm avângin kan en ngam lo. Thliin vân chu a chhêm veng ta si a. Hmâr lamah mawi takin a lo êng a, Pathian chu ropui râpthlâk takin a lo kal. Engkimtitheia, hriat phâk lohva chu a ropui êm êm a, Dik takin ro a rêl a, hleih a nei lo. Tu mah a hnehchhiah lo. Chuvângin, miten amah an ṭih a, Intifingte erawh chu tu mah a pawisa lo. Tin, Lalpa chuan thlipui aṭangin Joba chu heti hian a chhâng a: Eng mah hre si lovin engtizia nge ka remruat i sawi nawi? Mipa takin i puan ven sawi chhîng la, Thu ka zâwt ang che a, mi chhâng ang che. Leilung nghahchhan ka phûm lai khân khawiah nge i awm? I hriat takmeuh chuan han sawi teh. A len dân tûrte tu nge ruahman i hre meuh maw? A nih leh, a zauzâwng tu nge ruat? Eng chungah nge a innghaha, Tu nge a kil lung phûmtu chu? Zîng lam arsite an kal dual dual a, Pathian fate hlim taka an au kha. Tuipui chu a awmna ata A lo len dûl dûl lai chuan tu nge lo dang chat? A silhfên atân chhûm ka siam a, Thim chhah takin ka tuam a. A chîm chin tûrte ka ruat a, A danna leh khârna tûrte nên. “Heti thleng chauh hi lo kal la, pêl hauh suh, Hetah hian i fâwn vêl tâwp rawh se,” ka ti a. I pian chinah khua vâr tûrin thu i pe ngai em? A vâr ṭanna hmun tûr i hrilh ngai em? Lei chungah khua vârtîrin An bihrûkna ata mi sualte chu i lailang ngai em? Khaw êngah chuan leia tlâng leh ruamte a lang fiah a, Puan angin a ze chân buai mai. Mi sualte tân khaw lo êng chu a êng lutuk a, Pawi rêng an khawih ngam lo. Tuipui lo irh chhuahna hnâr i tlawh tawh em? Li mawng thûk laite i dai tawh em? Mitthi khaw luhna leh thim mup luhna kawngka chu I hmu tawh ngai em ni? Lei zauziate hi i hre phâk em? I hriat chuan han sawi teh, Êng awmna in kawng chu khawiah nge? Khawiah nge thim chu a awm ṭhin? An kalna tûr thlenga hruaiin An in lamah i hruai hâwng leh thei em? I hria ang chu! Chûngah chuan i piang tawh a, I upat tawh êm hi! Vûr dahkhâwmna i tlawh tawh em? Rial kal khâwmna in pawh i hmu tawh em ni? Buai hun atânte leh indo leh inbeih nia hman atân Chûng chu ka khêk a ni lâwm ni? Êng hi engtizia nge a ṭaidarha, Khawchhak thli pawh lei chunga a insem darh le? Tu nge tuihâwk luanna kawrte sial a, ṭêk kalkawng siam le? Mihring chên lohna ram leh thlalêr, Mi awm lohna hmunah tu nge ruah sûrtîra, Ram ro leh pilril tihnâwnga, Hnimhringte tu nge ṭotîr? Ruahin pa a nei em ni? Daifîm hi tu hrin nge? Tu chhûl aṭangin nge vûr a lo chhuah? Vân aṭanga vûr lo tla ṭhîn hi tu hrin nge? Tui khalte chu lung ang maiin a sak a, Tuithûkpui chungte pawh a khal a. Siruk hi i phuar khâwm theiin Chhohreivûng khi i phelh darh thei em ni? Arsite khi a hun takah i chhuahtîr theiin Zângkhua leh a bâwmtute khi i hruai thei em? Chung lam vân awm dânte khi i hria em? Leiah hian an dânte chu i chhawr thei em? Nan tûr chein, ruahpuivânâwn, Chhûm aṭangin i ko thla thei em? Kâwlphete chu i hnêna lo kal tûra thu pein “Heta hi ka awm,” an rawn ti dâwn em ni? Tuivalawngin engtin nge lui lian tûr a hriat? Arpa pawhin khaw chêng tûr engtin nge a hriat? Tu nge chhûmte fawm khâwm thiama, Vân tuizêmte leihbaw thei? Vaivutte a inhlâwm khâwma, Lei tlangte a inbelhbawm hi? Sakeibakneipui chaw i zawnsakin A no hruaite kham khawp chaw i pe thei em ni? An pûkahte an bawk a, Seh tûr châng laite chu? Choak chaw zawng vâk vêl te, An noten chaw dîla Pathian hnêna an hrâmte hian Tu nge ei tûr pe? Sathâr no neih hun i hria em? Sazuk no nei lai i hmu em ni? An pai chhûng thla zât chhiarin an hrin hunte i hria em? An bawk a, nau an vei a, An hring mai ṭhîn. An note chu an pian a tlang a, Ramhnuaia ṭhang lianin an tla hrang a, An puite hnênah an kîr leh tawh lo. Ram sabengtung chu tu nge sezâwl chhuah? A duh duhin tu nge tlattîr? An awm nân thlalêr ka ruatsak a, Chên nân chi tamna ram. Khawpui hulûm engah mah a ngai lo va, Tu man an khawi ngamin an chhawr ngai lo. A tlatna chu tlângpui dung a ni a, Hnimhring peh tûr a zawng zêl ṭhîn. Sele-pa chu i chhawr thei dâwn em ni? I ran inah a riak duh meuh ang maw? Lei let tûrin hrui i bahtîr thei ang em? I hnungah a ruam lai a rawn hrût rual ang maw? A chak êm avângin a tha chu rinpuiah i hmangin I hna hahthlâk a kovah i nghat thei dâwn em ni? I buh i sengtîr thei dâwn em ni? I hruiha buh a khungsak ang che maw? Ostrich chuan nasa takin a thla a zâp thei a, Mahse, kânghlai angin a thlâwk thei lo. Leiah a tui a phûm a, Vaivut chuan a khuh lum a. Miin an rap keh thei a, Ramsaten an chîl keh thei tih a dâwn pha lo. A no ni lo ang hrimin a ngaihsak lo va, A hahpuina chu thlâwn mah se pawi a ti lo. Pathianin finna a pe lo va, Hriatthiamna a pêk hek loh avângin. Tlân tûra a han intihpuk meuh chuan, Sakawr leh a chungchuangte pawh a thamlo. Sakawr hi i tihchak em ni? A tuang hi i siamsak a ni a maw? Khau anga kat tûrin i siam em ni? A hnâr tum dur durte hi a hlauhawm a nia. Ruamah a ke phiatin a inhrosa a, Indona hmunah a tlân lût ṭhîn. Hlauh rêng a nei lo va, a zâm ngai lo, Khandaih lakah a tîm ngai bawk hek lo. A chungah thal bâwm a ri rawk rawk a, Fei leh thal a tle zawr zawr mai. Thatho takin a lîm puat puat a, Tawtawrâwt thâwmah a zauthau va, A awm hle hle thei lo. Tawtawrâwt a rîk phawt chuan a hnâr a tum a, Indo thâwm chu hla tak aṭangin a hre thei, Hotute au leh an haw haw chu. Vân sânga mu thlâwkte khi i zirtîr em ni? Chhim lam hawia an thla an zârte hi? I thupêkin em ni muvânlai a invânvawrha, Sâng taka bu a chheh? Khâmahte a chêng a, Lungpui kehkâr hmun himahte a riak ṭhîn. Chuta ṭang chuan ei tûr a mitmei a, hla tak tak a hmu phâk a ni. A notê pawhin thisen an dâwt a, Saruang awmnaah an awm khâwm ṭhîn. Lalpa chuan Joba hnênah, “Sawisêltu, Engkimtitheia chu i hnial ang maw? Pathian hnialtu, i chhâng zêl dâwn em ni?” a ti a. Tichuan, Joba chuan Lalpa chu a chhâng a: “Kei mi tlâktlailo tak hian Engtin nge ka chhân theih ang che? Ka kâ ka hup mai a ni. Vawi khat ka sawi tawh a, ka chhâng tawh lo vang che, A ni, ka sawi nawn dâwn tawh lo.” Lalpa chuan thlipui aṭangin Joba chu a chhâng a: Mipa takin i puanven sawi chhîng la, Thu ka zâwt ang che a, mi chhâng ang che. Ti dik lovah min puh dâwn em ni? Thiam i chan theih nân Thiam loh min chantîr dâwn em ni? Pathian angin i chak em ni? A aw anga ring aw i nei em ni? Chuti a nih chuan intiropuiin intizahawm la, Mawi tak leh ropui takin inthuam rawh. Mi chapote chu en la, An chungah i thinur nasa tak chu leih rawh. Mi chapote chu en bîkin titlâwm la, Mi sualte chu an awmhmunah rap hrep ang che. An vaiin leiah phûm khâwm la, Thlânah an hmaite tuam ang che. Tichuan, i kut ding lamin mahni i inchhan thei tih Kei pawh hian ka hria ang. En teh, Behemot hi, nangmah ang bawka Ka kutchhuak a nih hi. Bâwng angin hnimhnah a ei ṭhîn. A chakna chu a kâwngah a awm a, A thahrui chu a dul thuarah. A mei chu sidar thing angin a tikhauh va, A malpui thate pawh a phiar tlat mai. A ruhte chu ngên kawrawng anga khauh a ni a, A kête pawh thîr tlâwn ang mai a ni. Pathian thil siam zîngah a pui ber a, A siamtu chauhvin khandaihin a vau bet thei. Tlângah te a peh tûr hnim a ṭo va, Tah chuan, ram sakawlhte an tualchai ṭhîn. Lotus hlîngnei buk hnuaiah a bawk a, Phairuang dûm zîngahte a biru ṭhîn. Lotus buk chuan a hliah a, Lui kam tuipuisuthlah chuan a zâr hlim. Tui lian so bulh bulh chu a hlau lo va, A ka chîm khawpin Jordan lian mah se a pawisa lo. A mit tuamin tu nge man thei ang? A hnârah tu nge thil tlang thei ang? Nghakuaiin Leviathan i âwk thei em ni? Hruihrualin a lei i phuar thei em? A hnârah hrui i thil tlang thei em? Thîr kawmin a khabe-ah i thil thei em? Khawngaih a dîl dâwn che em ni? Hawihhâwm takin a bia ang che maw? Dam chhûnga i chhiahhlawha awm tûrin Thu a thlunpui ang che maw? Sava angin i khawi ngam thei ang em? I fanute chaih atân i hlîng thei ang em? Sangha mantuten indâwr nân an hmang em ni? Sumdâwngtuten lei atân an chan darh dâwn em ni? A vunah feikibâr te, a lu-ah nghafei te I riah thei em ni? A chungah kut han thlâk teh rêng, A hlauhawmzia i hria ang a, I ti leh tawh ngai lo vang. Ani tihtlâwm tum chu beidawnthlâk tak a ni, A hmêl mai pawh a râpthlâk êm a ni. Amah cho tho tûrin tu mah huai tâwk an awm lo, Chuti a nih si chuan tu nge min do ngam ang? Tu nge ka rulh leh tûra thil min pe hmasa? Vân hnuaia thil engkim hi ka ta asin. Leviathan fuke chu ka han sawi zêl teh ang, A chakzia leh a pian thiamzia te nên. Tu nge a vun pâwnlâng pawt hîk thei ang? Tu nge a vunpui tipawp thei ang? Tu nge a kâ keu ânga, A ha kual kulh hlauhawm tak chu keu lang ngam ang? A phuhlip inthuah tup chu a chhuan ber a ni, A insi phui tlat a, lung ang maia sak a ni. A insîk phui tlat avângin A kârah boruak pawh a lût thei lo. A inzawm a, a inchâr tlat a, Kaih ṭhen theih a ni lo. A hahchhiau chuan êng a phuh chhuak a, A mitte chu khawfîngchat ang rû a ni. A kâ aṭangin mei alh a chhuak a, Meisîte a ṭêk ur ur a. A hnâr aṭang chuan meikhu a lo chhuak a, Sa so bêl nghawr leh phairuang mût ang vut vut a ni. Meihawl a chhêm vâm a, A kâ aṭangin meialh a lo chhuak a. A nghâwng tha chu a chak êm a, A tawk apiang hlauvin an khûr. A vunah nêm lai rêng a awm lo va, Thîr anga sak a ni, vih pawh rual a ni lo. A thinlung chu thîr anga sak a ni, Râwtsawmna lung hnuai zâwk anga chang hi. A lo thawh meuh chuan mi chakte pawh an khûr a, An hlau va, an thla a bâr zo va. Khandaihin sât mah se, pem pawh a pem lo vang, fei te, thal te, feiṭam te chuan a chhun thei lo. Thîrte chu buhpâwl ang lekah a ngai a, Ngênte pawh thing mawih angah. Thal hlauvin a tlânchhe ngai lo va, Sairawkherha perh pawh favaia theh ang a ni. Talhtum chu buhpâwl ang lekin a ngai a, Thal ri rawk rawk pawh a thamlo. A dul phuhlip chu lampei anga hriam a ni a, Mawiin lei a hrût angin chirhdiak zîngah a tâl vêl a. Tui thûk tak chu bêl angin a tiso buah buah a, Tuipui chu bêlte angin a tiphûl. A kalna chu a vâr ruah a, Tuipui phuan vâr emaw an ti. Leiah hian amah ang rêng an awm lo va, Eng mah hlauh nei lova siam a ni. Ramsa ngêng tak takte chu a thamlo va, Inluling tak takte chungah a lêng a ni. Tichuan, Joba chuan Lalpa chu a chhâng a: “Engkim i tithei tih ka hria, I tum chu dâl rual a ni lo. Eng mah hre si lo hian engtizia nge I remruat hi ka lo sawisêl mai le! Ka hriatthiam lohte chu ka lo sawi a ni, Ka hriat phâk loh, ka tâna mak lutukte chu. I sawi ngaithla tûr leh I zawhna chhâng tûrin min ti a, Mi sawi aṭang chauhvin ka lo hria che a, Mahse, tûnah zawng ka mit ngeiin ka hmu ta che a ni. Chuvâng tak chuan ka inten a, Vut leh vaivuta ṭhuin ka sim ta e,” a ti a. Tin, Lalpa chuan Joba hnêna hêng thu hi a sawi zawhin, Elifaza, Teman mi hnênah, “I chungah leh i ṭhian pahnihte chungah ka thin a ur hle a ni. Ka chhiahhlawh Joba angin ka chungchâng thu dik takin in sawi si lo. Tichuan, bâwngpa pasarih leh berâmpa pasarih keng ula, ka chhiahhlawh Joba hnênah va kal ula, in tân hâlral thilhlan va hlân rawh u. Tin, ka chhiahhlawh Joba chuan a ṭawngṭaisak ang che u a, a dîl angin ka lo pawmsak ang a, in âtzia ang zêl chuan ka thungrûl lo vang che u, ka chhiahhlawh Joba angin ka chungchâng thu dik takin in sawi si lo va,” a ti a. Tichuan, Elifaza, Teman mi te, Bildada, Sua mi te, Zofara, Naama mi te chu an va kal a, Lalpa thupêk ang zêl chuan an ti a. Tin, Lalpa chuan Joba dîlna chu a ngaithla a. Joban a ṭhiante a ṭawngṭaisak hnuin Lalpa chuan Joba chu a tiṭha a, a hmaa a neih lêt hnih a pe leh ta a. Tin, a unaute leh a farnu zawng zawngte, tûn hmaa a hmêlhriat zawng zawngte chu a hnênah an lo kal a; a inah chawhlui an kîl ho va. Lalpa chuan a chunga thil ṭha lo a thlentîr avângte chuan pawi an tihzia an hrilh a, an thlamuan a. Mite chuan tangkaraw tlang te, rangkachak zungbunte an pe ṭheuh va. Lalpa chuan Joba hun hnuhnûng chu a hun hmasa aiin nasa takin mal a sâwm a. Berâm sîngkhat leh sângli, sanghâwngsei sângruk, bâwng tuak sângkhat, sabengtungpui sângkhat a nei a. Fapa pasarih leh fanu pathum a nei bawk a. A fanu upa ber hmingah Jemimai a sa a, a dawttu hmingah Keziaii, a pathumna hmingah Keren-hapuki a sa ta bawk a. Ram zawng zawngah pawh Joba fanute anga nula hmêlṭha an awm lo. An pa chuan anni chu an nuṭate nên ro chan tûr a siamsak ṭheuh va. Hemi hnu hian Joba chu a dam zêl a, kum za leh sawmli a dam a ni. A fapa te, a tupa te, chhuan li thlengin a hmu phâk a, Joba chu upa tak, tarkûna damin a thi ta a. Mi suaksual thurâwnna lam ngaithla duh lo va, Mi sualte tih dân pawh la duh lo va, Lalpa hmusittute zînga tel duh ngai lo mi chu a nihlawh e. A lâwmzâwng chu Lalpa dân zawm a ni a, A dân thu chu a chhûn a zânin a ngaihtuah ṭhîn. Ani chu lui kama thing phun, A hun taka rah ṭhîn, A hnah vuai ngai lo ang hi a ni a, A thiltih apiangah a hmuingîl zêl ang. Mi suaksualte erawh chu chutiang an ni lo va, Thliin a len bo buhsi ang hi an ni. Chuvângin, mi suaksualte chu rorêlnaah chuan an ding zo lo vang a, Mi dikte zîngah chuan mi sualte chu an tel thei hek lo vang. Lalpa chuan mi dikte chu a hum ṭhîn a. Mi suaksualte erawh chu an boral ang. Engati nge hnamte chu an pun khâwm chiama, Miten thil sâwt lo chu a rûka an ngaihtuah ṭhin? Lalpa leh a hriakthiha dovin Lei lalte chu an inhâwrkhâwma, Thuneitute pawh an inrâwn khâwm a? “Min phuarna hrui hi i tichat ang u khai, An hruihrual kan bah hi i paih daih ang u,” tiin. Vâna ṭhu-a chuan a nuihsan a, Lalpa chuan anni chu a nuihzatbûr a. Chutichuan, thinurin an hnênah thu a sawi a, A thinrimna chuan a tihlau va. “Keimah ngeiin ka tlâng thianghlim Zion-ah chuan, Ka lal thlan chu ka ṭhuttîr ta a ni,” a ti a. Lalpa thupêk chu ka puang teh ang, “Ka Fapa i ni e, Vawiinah hian Fa-ah ka nei ta che. I duh apiang dîl la, ka pe ang che, Hnamte pawh hi i rochan an ni ang a, Lei pum pui hi i ta tûr a ni bawk ang. Lei lalte chu thîrtiangin i vaw darh ang a, Hlumbêl angin i sawh keh sawm bawk ang,” a ti a. Lei lalte u, fîmkhur rawh u, Rorêltute u, zilhna pawisa rawh u. Ṭih chungin Lalpa rawng bâwl ula, Khûr chungin a hmaah kûn rawh u. Fapa hi lâwm ula, chutilo chuan a thinur ang a, A tiboral hlauh dah ang che u, Amaha himna zawngte chu an nihlawh e. Aw Lalpa, ka hmêlmate an pung chakin, Min eptute chu an va tam ta êm! “Pathianin a chhan hauh lo vang,” Min titu an va tam êm! Lalpa, nang chu kumkhuain ka phaw i ni a, Ka lu hi i chawisâng ṭhîn a, Min tiropuitu chu i ni. Awrâwl chhuaha Lalpa ka han auh chuan, A tlâng thianghlim aṭangin min lo chhâng ṭhîn. Ka han mu a, ka muhîl a, Ka han harh leh a, Lalpa chuan min lo chelh reng ṭhîn a ni. Min hmusittute tam hle mah se, Ka hlau hlek lo vang. Aw Lalpa, tho la, aw ka Pathian, mi chhanhim teh, Ka hmêlmate biang hi bensak langin, Mi suaksualte hâ chu tihbalsak ngei ang che. Aw Lalpa, i mite hi chhandamin malsâwm ang che. Aw ka felna Pathian, Ka koh che chuan mi chhâng ang che. Mangan hunin mi tithawveng la, Mi khawngaih la, ka dîlna hi lo ngaithla ang che. Aw mihringte u, eng chen nge, Thil lawilo leh dâwt ngainaa, ka ropuina hi in hmuhsit dâwn? Pathian ngaihsak mi chu Lalpan a tân a thlang tih hria ula, Lalpa chuan ka au aw hi a lo hria a. Thinrim mah ula, thil sual chu ti suh u, In khumlaizâwlah inngaihtuahin ngawi ṭhiap rawh u. Inthawina dik tak chu hlânin Lalpa chu ring rawh u. Mi tam takin, “Tu nge thil ṭha min pe ta ang le? Lalpa, i hmêl êng chu kan chungah rawn êntîr ta che,” an ti a. An buh leh bâl a hlâwk laia an hlim aia Nasa zâwkin min tilâwm a. Thlamuang taka muin ka muhîl ang a, Nangmah ngei hi i ni, Lalpa, him taka min awmtîr ṭhîntu chu. Aw Lalpa, ka thu hi lo ngaithla la, Ka rûm thâwm hi lo hria ang che. Ka Lal leh ka Pathian, Ka mangang authâwm hi min ngaihthlâksak ang che. I hnêna ṭawngṭai ka ni si a. Aw Lalpa, zîng takah ka aw i lo hria ang a, Min lo ngaithla ṭhîn ang che. Zîng aṭangin ka ṭawngṭai ṭhîn a, Nghâkhlel takin ka lo thlîr ṭhîn che. Sualnaa lâwm ṭhîn Pathian i ni lo va, I bulah chuan thil sual a leng hek lo. Inchhuangte chu i hmaah an ding thei lo vang a, Thil sual titute chu i huatzâwng an ni si. Dâwt sawi chîngte tiboral la, Tualthat leh bum chîngte chu, Lalpa tenzâwng tak an ni. Kei zawng i ngilneih êm vângin I inah hian ka lo lût a, Aw Lalpa, i tempul thianghlimah, Nangmah ṭih chungin ka lo kûn e. Aw Lalpa, min beitute avângin, I felnaah min hruai la, I kawngte chu ka tân titluang ang che. Thutak rêng an sawi ngai lo va, An thinlung chu mi tihchhiat duhnain a khat a; An hrawk chu thlân inhawng a ni a, An kâin mi an fak der ṭhîn. Aw Pathian, anniho hi hrem la, An remruat chu chhiat phah rawh se; An bawhchhiatna tam tak avângin paih daih ang che, I lakah hian an hel ta si a. Nangmah bêltute erawh chu an hlim ang a, Lâwmin an au kumkhua dâwn si; Anmahni chu i hum ang a, I hming ngainatute chuan an chhuang ang che. Aw Lalpa, mi dikte chu mal i sâwm ṭhîn a, Phaw ang maiin duhsakna chuan i hual vêl ṭhîn. Aw Lalpa, thinrimin min zilh suh la, Thinurin min thunun hek suh ang che. Lalpa, min khawngaih teh, ka chauh êm hi, Ka ruh lamin a na zo ta, min tidam ang che. Ka mang a va ang êm! Lalpa, eng chen nge mi ngawihsan dâwn? Lalpa, lo hawi kîr la, min rawn chhan la, I ngilneih êm vângin min hum ang che. Thi tawhte, tu mah hre reng che an awm lo va, Seol aṭang pawhin tu nge fak che? Rûmin ka chau zo ta, Zan tin ka mittuiin ka mutna chu a far ṭhîn a, Ka khum a huh vek ṭhîn. Lungngaih vângin ka mit a thim zo va, Ka hmêlmate avângin ka chau zo ta. Thil sual ti zawng zawngte u, min kalsan rawh u. Lalpa chuan ka ṭap thâwm chu a lo hre ta si a. Lalpa chuan khawngaih ka dîlna chu a ngaithla a, Lalpan ka ṭawngṭaina chu a lo pawm ta. Ka hmêlmate zawng zawng chu zak takin an chiai ang a, Mualpho takin an tlânchhe nghâl ang. Aw Lalpa, ka Pathian, ka rawn bêl a che, Mi ûmtute lakah hian min lo chhan la, min humhim ang che. Chutilo chuan, sakeibaknei angin min pawt thlêr ang a, Chhantu nei lovin, min pawt sawm dah ang e. Aw Lalpa, ka Pathian, Hêng thil hi ka tiha, Ka kut hian thil sual a khawiha, Ka ṭhiante chu phatsana, Ka hmêlmate chhan awm lova ka tihchhiat bawk chuan, Min dotuten min ûm sela, min man rawh se. Leiah min chîl thlu sela, Ka ruang pawh chu vaivutah zalh dêr rawh se. Lalpa, thinurin lo thawk la, Ka hmêlmate thinrim sosâng hi han hmachhawn teh, Aw ka Pathian, harh la, min pui rawh, Dikna hi i duhzâwng a ni si a. I vêlah hian mipui lo pung khâwm sela, Chung lam aṭangin ro han rêlsak ang che. Aw Lalpa, mi tin rorêlsaktu i ni, Aw Chungnungber, mi dik leh mi ngîl ka nih ang zêlin ro mi rêlsak ang che. Mi suaksualte sualna chu han titâwp la, Mi ṭhate erawh chu tinghet ang che. Nang chu rilru leh thinlung fiahtu, Pathian dik i ni si a. Pathian Chungnungbera chu ka phaw a ni, Mi nun tluangte chhandamtu chu. Pathian chu dik taka rorêltu a ni a, Mi sual chunga thinur reng ṭhîn Pathian a ni. An sim loh chuan khandaih a tât hriam ang a, A thalngul chu kuaiin a tin bawk ang. Thihna hriamhrei lain, A thal alh thei a hmang ngei ang. Sual ngaihtuah chhuah an thiamzia hi en teh, A chimawm zâwnga awm an thiam hle a, Thil khawlo tak an tichhuak ṭhîn. Khur an lai a, an zauh zêl a, An hum laihah ngei chuan an tla ta zâwk. Mahni chunga pawi khawih an ni a, an nunrâwnna ngei chuan a vaw lêt ang. Lalpa chu a dik avângin lâwmthu ka hrilh ang a, Lalpa, Chungnungbera hming chu fakin ka zai bawk ang. Aw Lalpa, kan Lalpa, Lei pum puiah hian i hming a va ṭha êm! I ropuina vân chung sânga awm chu, Naupangte leh nausênten an hril a. Phuba latute leh nangmah dotu, I hmêlmate tihdaihna tûr chu. I kutchhuak vânte khi ka han thlîr a, Thla leh arsi i dahte khi, Mihring hi eng nge maw a niha, i hriat renga, Mihring fapa pawh engtiziaa rawn kan ṭhîn nge i nih le? Pathian aia hnuai deuh chauhvin i siam a, Ropuina leh chawimawina chu i khumtîr a. I kutchhuak chungahte i laltîr a, An ke hnuaiah engkim i dah vek a. Berâm leh ran rual zawng zawng, Ramsate leh chunglêng savate, Sangha tinrêng leh tuifinriat chhûnga chêngte nên. Aw Lalpa, kan Lalpa, Lei pum puiah hian i hming a va ṭha êm! Lalpa, theihtâwpin ka fak ang chia; I thil mak tih zawng zawng ka hril vêl ang. Nangmah vângin hlimin ka lâwm ang a, Aw Chungnungber, i hming fakin ka zai bawk ang. I hmaah chuan ka hmêlmate an tlânchhia a, An tlu a, an boral zo ta e. Rorêltu dik, lalṭhutthlênga ṭhu-a chuan, Ka chungthu chu dik takin i rêl si a. Hnamte zilhin mi suaksualte chu i tiboral a, Kumkhua atân an hming thai bo vang che. Hmêlmate chu tihchhiat dêr an ni a, An khuate chu a ram zo va, Tu man an hre tawh lo. Lalpa erawh hi zawng chatuana lal a ni a, Rorêl tûrin a lalṭhutthlêng a hûng nghet ta. Dik takin khawvêlah ro a rêl ṭhîn a, Mi tin chungah rual takin a rêl ṭhîn. Hnehchhiahte tân Lalpa chu himna kulh a ni a, Mangan huna inhumhimna kulhbîng a ni. I hming ngainatute rinchhan i ni a, Lalpa, nangmah zawngtute chu I thlahthlam ngai si lo. Zion-a ṭhu Lalpa tân chuan fak hla sa ula, Mite hnênah a thiltihte chu puang rawh u. Thisen phuba lâksaktu chuan a ngaihven a, a hre reng ṭhîn a, Tuartute au thâwm a ngaihthah ngai hek lo. Aw Lalpa, min khawngaih la, Min hawtute laka ka tuar tamzia hi en teh: Thihna kawngka ata hi mi la chhuak ang che. Zion fate kulh kawngkaahte chuan ka fak chhan che ka sawi theiha, Min chhandamna ka chawimawi theih nân. Hnamte chu anmahni hum laihah chuan an tla a, An lên zâr rûkah chuan an kete chu a âwk ta a. Dik taka rorêlin Lalpa chu a inhriattîr a, Mi suaksualte chu anmahni thiltihah ngei an âwk ṭhîn. Mi suaksualte chu Seol-ah an chhuk ang a, Pathian ngaihthahtu hnamte nên. Mangangte chu thlahthlam an ni fo lo vang a, Retheite beisei pawh a bo hlen hek lo vang. Aw Lalpa, lo tho teh, mihringin ngam che suh se, Hnamte chungah ro han rêl ang che. Lalpa, anniho hi han tithlabâr la, Hnam tin hi mihring mai an nihzia hriattîr ang che. Aw Lalpa, engati nge hla taka i awma, Mangan nia i bihrûk daih ṭhin le? Mi suaksualte chuan chapo takin retheite an tiduhdah ṭhîn a, An thang kam rûkah chuan anmahni âwk rawh se. Mi suaksual chuan a duhzâwng chu a uanpui a, Mi duhâm chuan Lalpa hnâwlin a hmusit a. Mi suaksual chu a rilru a chapo va, Pathian a zawng lo va, A rilruin, “Pathian rêng a awm lo,” a ti ṭhîn. A thiltihte a hmuingîl zêl ṭhîn a, Pathian thil rêl dân a hre phâk lo va, A hmêlmate a nuihsawh ṭhîn. A rilruin, “Ka nghîng lo vang, Thil ṭha lo rêng ka tâwk hek lo vang,” a ti. Ânchhia te, dâwt te, vauna te a chhâk chhuak a, A ṭawng a chaltlai a, a hrâm tlahawlh hle. Khaw chhûng hmun kilkhâwrahte chuan mi a châng ṭhîn, Hmun fianrialah pawi khawih lote a that a, Chhantu nei lo a melh ru reng ṭhîn. Sakeibaknei angin bihrûkna remchângah a châng ru a, Retheite man tûrin a châng reng a, Retheite chu lêna manin a hnûk bo ṭhîn. A kûn a, a bawkvâk ṭhum ṭhum a, Vânduaite chu a hnehlâk ṭhîn. A rilruin, “Pathianin pawi a ti lo vang, A inhup a, mi hmu hek lo vang,” a ti ṭhîn. Lalpa, tho la, aw kan Pathian, i kut lek la, Retheite hi ngaihthah teh suh. Engtizia nge mi suaksualin Pathian a hmuhsita, “A rawn ngaihsak lo vang,” a tih rilrûk ṭhin le? Nang chuan i lo en reng si a, Tuar leh mangang i hmu vek a, Ṭanpui tûrin i inpeih reng si a. Rethei leh fahrah, i hnêna tlulûtte ṭanpui ṭhîntu i ni. Mi sualte bân chu tihtliahsak la, An sualna chu chhui chhuak vek la, Hmuh tûr awm tawh suh se. Lalpa hi zawng, kumkhaw Pathian a ni, A ram ata ring lote chu bo daih rawh se. Aw Lalpa, retheite duhthusâm chu hria la, Rawn tiharh la, ngaihven ang che. Fahrahte leh hnehchhiahte chu dik takin rêlsak la, Lei mihringte zînga tu mahin an tihthlabâr tawh loh nân. Lalpa chu him nân ka bêl ta a, Engtizia nge ka hnênah hetianga in tih ni: “Sava angin tlâng lamah khian thlâwk bo mai rawh. En teh, mi sualte chuan an thalngul an kuai a, A hruiah chuan thal an vuah a, Thim aṭangin mi ngîlte chu kah an tum hi; An innghahna lungphûmte pawh a chhiat tawh si chuan, Mi dikte chuan eng nge an tih theih tâk ang?” min tih ni? Lalpa chu a Tempul thianghlimah a awm a, Lalpa lalṭhutthlêng chu vânah a awm; A rawn thlîr a, Mihring fate hi a rawn en thlithlai ṭhîn. Lalpan mi felte chu a fiah ṭhîn a, Mi suaksualte leh nunrâwngte erawh chu a hua. Mi suaksualte chungah chuan mei leh kât a sûrtîr a, Thli lum takin a hrem a, Chûng chu an chanpuala ruat a ni. Lalpa chu a dik a, dikna a ngaina a, Mi ngîlte chu a bulah chuan an chêng reng ang. Lalpa, min ṭanpui rawh, Pathian ngaihsak mite chu an bo zo va, Mihring zîngah mi rinawmte an ral ta. Mahni ṭhiante dâwt inhrilh tawnin, Ṭawng thlum takin an inbum ṭhîn. Lalpan bum hmangte hmui chu hlep sela, Chapo taka ṭawngna leite nên chuan. “Ṭawnghmang thiamah kan hneh a, Kan duh apiang kan sawi ang a, Tu nge kan chungah hian lêng ang?” an ti. “Retheite hnehchhiahna avâng leh Pachhiate rûm thâwm avângin Ka tho vang a, an nghahhlelh ang ngeiin Tûnah ka chhan chhuak dâwn,” Lalpan a ti. Lalpa thu tiamte chu a thianghlim a, Tangkarua rawh thianghlimna khura meipuia rawh thianghlim, Vawi sarih rawh thianghlim tawh hnu ang hi a ni. Lalpa, nang chuan min vêng ṭhîn a, Tûnlai mite lakah hian min hum kumkhua ang che. Mi suaksualte chu kil tinah an vei a, Mihring zîngah pâwngnêk an uar tâk hi. Aw Lalpa, eng chen nge min thlahthlam anga, Ka lakah hian i hmêl i thup reng dâwn? Eng chen nge ka inngaihtuah buai anga, A chhûn a zâna mangang rêng rênga ka awm anga, Ka hmêlmate hi ka chungah hian an inlulin dâwn le? Aw Lalpa, ka Pathian, min han en la, min chhâng ang che, Ka mit han tivâr la; chutilo chuan, ka tlu hlum dah ang e. Ka hmêlma chuan, “Ka hneh ta,” min ti suh se, Ka chan chhiat avângin min dotute lâwm hek suh se. Kei zawng i ngilneihnaah hian ka innghat a, Min chhandam dâwn vângin ka lâwm a ni. Lalpa chu fakin ka zai ang, Ka chunga a ṭhat êm avângin. Mi â chuan “Pathian rêng a awm lo ve,” a ti rilru ṭhîn. Hlemhle takin an che ṭhîn a, thil tenawm tak an ti a, Thil ṭha ti rêng an awm lo. Pathian zawnga fing taka thil ti an awm nge awm lo tiin, Vân aṭangin Lalpan mihringte chu a zuk thlîr a; Pêng bo, rilru chhe pu an lo ni vek si a, Thil ṭha ti rêng an awm lo va, Pakhat tê mah an awm hauh lo. Mi hlemhle zawng zawngte hian, ka mite ei tûr chu An eisak ṭhîn a ni tih hi an hre na nge? Lalpa hming lah chu an ko si lo. Mi dikte chu Pathianin a awmpui avângin, Anni chuan an hlau êm êm ang. Retheite remruat chu an timualpho ṭhîn a, Mahse, anni lo humtu chu Lalpa a ni. Israel-te chhandamna chu Zion ata lo thleng sela, Lalpan a mite a tihhmuingîl hunah chuan Jakoba thlahte chu an va hlimin an va lâwm dâwn tak êm! Aw Lalpa, i puan inah tu nge lo thleng anga, I tlâng thianghlimah chuan tu nge lo chêng ang? Mi nun ngîl, dik taka thil ti ṭhîn, Thinlung taka thu dik sawi ṭhîntu chu. Ani chuan mi a sawichhe ngai lo va, A ṭhian chungah thil sual a ti ngai hek lo va, Ṭhenawmte a rêl ngai bawk hek lo. Mi sualte chu a hmusit a, Lalpa ṭihtute erawh chu a ngaisâng ṭhîn. A tâna pawi tûr pawh ni se, A thutiam a sût ngai hek lo. A pung ûmin tangka a pûktîr ngai lo va, Pawi khawih lote thiam loh chantîr tûrin tham theih a ni hek lo; Chutianga titu chu engtikah mah a chhe lo vang. Aw Pathian, i hnênah ka lo tlulût ta a, Min lo hum rawh. Lalpa hnênah, ‘Ka Lalpa chu i ni, Nang chauh hi ka tân i ṭha,’ ka ti a. Leia mi thianghlim awmte chu ropui ka ti a, ka duhzâwng tak an ni. Pathian dang thlangtute chuan An thil tuar tûr an tipung lek a ni. In tûr thil hlana, thisen an hlannaah ka tel lo vang a, An pathian hming ka lam ve hek lo vang. Lalpan ka chanpual tûr, ka no mi ruatsak a, Nang hi i ni ka awm dân tûr mi rêlsaktu chu. Ram ṭha min rochuntîr a, a ri min khamsak a, Ka chan tûr chu a duhawm hle a ni. Rem mi ruatsaktu Lalpa chu ka fak ang a, Zânahte pawh aman min zirtîr ṭhîn. Ka hmaah hian Lalpa a awm fo va, Ka ding lamah a awm ṭhîn a, ka nghîng lo vang. Chuvâng tak chuan, thinlung lâwmin ka hlim ta êm êm a, Ka taksa pawh thlamuang takin a awm hle hle tawh ang. Ka thlarau hi Seol-ah chuan i hnutchhiah lo vang a, I tâna inserh hi a ṭawih rala hmuh i phal hek lâwng. Nunna kawng chu mi kawhhmuh a, Hlimna kim chu i bula awm a ni, I ding lamah chatuan nawmna a awm bawk si a. Aw Lalpa, ka dikzia hi hria la, Ka au thâwm hi lo ngaithla teh. Dâwt sawi ngai lo dîlna hi ngaihven ang che. I hmaah chuan ka thiamna hi târlan ni se, I mit chuan thil dik chu hmu ngei rawh se. Ka thinlung hi fiah la, Zânah mi rawn tlawhin mi fiah ang che. I hnathawh an sawisêl angin ka sawisêl ve lo va, I thu ka zâwm zâwk a, inpâwngnêk ka chîng ngai lo. I kawng sialah zêl ka kal a, Ka tlu ngai lo. Aw Pathian, ka koh chein mi chhâng la, I beng dawhin ka thu hi ngaithla ang che. I ngilneihna mak chu han tilang la, Aw, nangmah bêltute lo hum ṭhîntu, I ding lamin an hmêlmate lakah chhan ang che. I mitnaute angin min vêng tlat la, I thla hnuaiah min thukru ang che. Mi suaksualten min hnehchhiah a, min thah tumtu hmêlmaten Min hual si a. Khawngaihna rêng an nei lo va, Chapo takin an ṭawng ṭhîn. Kan kalna lam apiangah min hual ṭhîn a, Kan tlûkna tûr remchâng an melh reng a. Min pawh sawm vek châkin hmun fianrialah Sakeibaknei angin min châng ru ṭhîn. Lalpa, tho la, anmahni hmachhawnin titlâwm la, Mi sual lakah i khandaih chuan min chhandam ang che. Khawvêl mite lakah min chhandam la, An duh tâwk tâwk nei ṭhînte lakah chuan. Hremna i khâwlsak chuan hrem la, An fate pawh hrem la, An tuchhuan thlengin hrem zêl ang che. Kei zawng mi dik ka nih vângin I hmêl ka hmu ang a, Nangmah anna neia ka ṭhanharh hunah chuan, Ka lungawi takzet ang. Aw Lalpa, mi tichaktu, Ka hmangaih che. Lalpa chu ka lungpui leh ka kulhpui, Min chhandamtu a ni. Ka Pathian, ka himna lungpui, Min chhandamtu ropui, ka phaw leh kulhbîng sâng a ni. Fak tlâk Lalpa chu ka ko va, Hmêlma lakah min hum ta a. Thihna hlauhawm tak chuan min hual vêl a, Chhiatna tuiliante chuan min chîm bawk a. Seol hruihrualte chuan min phuar vêl a, Thihna thangah ka âwk ṭêp tawh a. Ka mangang chuan Lalpa ka han au va, Pathian hnênah ṭanpuina ka dîl a, A tempul aṭang chuan ka aw a lo hria a, Ka au thâwm chuan a beng a thleng ta e. Tichuan, lei chu khûrin a insâwi hlawk hlawk a, Tlâng chu a nghahchhante lamin a nghîng ta dur dur a, A thinur nasa tak avâng chuan. A hnâr aṭangte chuan meikhu a lo chhuak a, A ka aṭang pawh chuan kan ral hmang mei a alh chhuak a, Meilingte pawh a lo chhuak bawk a. Vân khi a hai hawng a, Chhûm dum chunga dingin a lo chhuk a, Cherub chunga chuangin a thlâwk vêl a, Thlain a thlâwk ta thuak thuak a. Thimin a inkhuh a, Ruah pai chhûm chhah tak chuan a hual vêl bawk a. A hmaa êng awm chuan chhûm chu a chhun tlang a, Ṭêk te, rial te a tla ta dur dur a. Vânah Lalpan khawpui a tiri a, Chungnungberan a aw a chhuah a ni, Ṭêk te, rial te a tla ta dur dur a. A thal a han kâp a, an darh ta a, Kâwl a phêttîr zawr zawr a, an tlânchhe ta. Lalpa, i hnâra thaw chhuak meuhva i chhêma, I han hau zet chuan, Tuifinriat chu a mawng thlengin a kang zo va, Lei innghahnate pawh a lang zo ta. Vân aṭangin a han ban a, min rawn vuan a, Tui thûk ata min hnûk chhuak ta. Hmêlma chak tak kut ata chu min chhan chhuak a, Ka hneh rual loh min hawtute lak ata chu. Chhiatna ka tawh laiin mi rawn bei a, Mahse, ka nghenchhan chu Lalpa a ni. Hmun thâwl takah min hruai chhuak a, Ka chungah hian a lâwm avângin min chhandam ta. Lalpa chuan dik taka ka tih avângin lâwmman min pe a, Pawi ka khawih loh avângin mal min sâwm ṭhîn. Lalpa kawng chu ka zawh ṭhîn a, Pathian lakah thil sual ka ti hek lo. A rêl apiang ka zâwm zêl a, A thupêkte ka bawhchhe ngai lo. A tân mi ngîl tak nih ka tum fo ṭhîn a, Thil sual ti lo tûrin ka invêng reng bawk a. Dik taka ka tih ṭhin avângin Lalpan lâwmman min pe a, Pawi ka khawih lo tih a hria. I laka rinawmte tân i rinawm a, Mi ṭhate tân i ṭha êm êm. Mi thianghlimte tân chuan i thianghlim a, Mi suaksualte erawh chu i haw ṭhîn. Mi tlâwmte chu i chhan ṭhîn a, Chapote erawh chu i titlâwm ṭhîn. Ka khâwnvâr chu mi hâlsak a, Lalpa ka Pathian chuan ka thimna chu min tihênsak ta. Nangma zârah hmêlmate ka ûm a, Ka Pathian zârah chuan an kulh ka lâksak ta. Pathian hi zawng a kawngte a tluang a, Lalpa thu chuan fiah a dâwl ṭhîn a, Amah bêltu zawng zawngte tân phaw a ni. Lalpa lo hi tu nge Pathian dang awm? Kan Pathian chauh lo chu tu nge belh tûr dang awm? Chaknaa min thuama, Ka kawng titluangtu chu Pathian a ni. Ka ke te pawh sazuk ke ang maiin min siamsak a, Tlângah himin min dintîr a. Ka kutte chu indo a thiamtîr a, Dâr thalngulte ka kuai kûl thei hial a ni. Inhumhim nân phaw min pe a, I kut ding lam ngei chuan min kai ta a, Min puihna chuan min tiropui ta bawk. Ka pênte chu i tisau va, Ka kête lah a tleu si lo. Hmêlmate chu ka han ûm a, ka ûm phâk a, An thih vek hma loh chu ka kîrsan duh lo. Ka sât thlu a, an tho thei tawh lo, Ka ke hnuaiah an thal phung mai. Indo nikhua atân chaknain min thuam a, Min dotute min hnehtîr ṭhîn. Ka hmêlmate mi ûmtîr a, Min hawtute ka that zo ta. An au chûl a, chhantu an nei si lo, Lalpa chu an au va, a chhâng si lo. Ka râwt sawm a, thli len vaivut ang mai hi an ni, Kawtthlêr diak angin ka thian fai ta. Hel hmangte lakah chuan min chhan chhuak a, Hnamte hotu-ah min siam a, Ka hriat ngai loh hnamten ka rawng an bâwl ta. An hriat veleh ka thu an awih zêl a, Ka hmaah an kûn ta. Hnam dangte chu an zâm zo va, An kulh ata khûrin an lo chhuak ta. Lalpa hi zawng Pathian nung a ni, Ka lungpui chu fak rawh u, Min chhandamtu Pathian chu ropui rawh se. Pathianin phuba min lâksak a, Mite ka hnuaiah hian a dah. Hmêlma lakah min chhanhim a, hnuaichhiahtute chungah min awmtîr a, Mi nunrâwngte lakah min chhan chhuak ta. Lalpa, hnam tin zîngah ka fak ang che, I hming fakin ka zai bawk ang. A Lal thlan chu hnehna ropui tak a pe ṭhîn a, A hriakthiha chu a khawngaihin, Davida leh a thlahte chu a lainat kumkhua ang. Vânte khian Pathian ropuizia an tilang a, Vân dumah khian a themthiamzia a lang. Chhûn hian chhûn hnênah thu a hlân chhâwng a, Zân pawhin zân hnênah hriat tûr a puang chhâwng ṭhîn. Thu rêng an sawi lo va, an ṭawng ri bawk hek lo va, An aw te chu hriat tûr a awm hek lo. Mahse, an aw chuan lei a fang chhuak a. An thu chu kâwlkil thlengin a thang chhuak ta. Tah chuan ni chu puan in a zârsak a. Ni chu, moneitu a pindan ata hlim taka a chhuak ang leh, Mi chak phûr taka a tlân ang hi a ni. Kâwlkil chhak lamah a lo chhuak a, Kâwlkil thlang lam panin a kal kual a, A lum hre lova thuhrûk eng mah a awm lo. Lalpa Dân chu a famkim a, nun a tiharh ṭhîn, Lalpa thu hriattîr chu a rinawm a, mi mâwl a tifing ṭhîn. Lalpa thuruatte chu a dik vek a, thinlung a tilâwm ṭhîn. Lalpa thupêkte chu a thianghlim a, mit a tivâr ṭhîn. Lalpa ṭih chu a ṭha a, a daih kumkhua ṭhîn. Lalpa thurêl chu a dik a, a fel vêl vek a ni. Rangkachak aiin a duhawm a, Rangkachak thianghlim ber ai pawhin. Khawizu aiin a thlum zâwk a, A thlâra luang khawizu aiin. A ni, chûng chuan i chhiahhlawh hi min zirtîr ṭhîn, A zâwmtu tân lâwmman a tam êm êm. Mahni dik lohna tu nge hre thei? Sual inthup lakah te min tifihlîm ang che. I chhiahhlawh hi chapona lakah min vêng la, Ka chungah hian thu neihtîr suh, Tichuan, ka lo famkim ang a, Bawhchhiatna sual lakah ka fihlîm ang. Aw Lalpa, ka lungpui leh mi tlantu, Ka thu sawite leh ka ngaihtuahte hi I tân pawm tlâk lo ni rawh se. Mangan ni-ah Lalpan chhângin, Jakoba Pathian chuan hum che rawh se. Hmun Thianghlim aṭanga ṭanpui chein, Zion aṭang chuan pui che rawh se. I thil hlan apiangte lo pawmin, I hâlral inthawina lo lâwm rawh se. I duh apiang pe che sela, I thil ruahmante chu tipuitling ṭhîn rawh se. Hnehtu i nih hunah lâwmin kan au vang a, Kan Pathian hmingin hnehna puanzâr kan zâr ang. Lalpan i dîl apiang tihlawhtling ngei rawh se. Lalpan a hriakthiha a chhanhim ṭhîn tih ka hre ta. A hmun thianghlim vân aṭang chuan a rawn chhâng ta, A ding lam chuan ropui takin a hnehtîr ta. Ṭhenkhatin an tawlailîr an ring a, Mi dangin an sakawrte an ring bawk a, Keini zawngin Lalpa kan Pathian hming kan lam zâwk ang. Chûng mite chu tluin an thal dêr ang a, Keini chu kan tho vang a, kan ding nghet leh ang. Lalpa, lal hi han chhandam teh, Kan koh che chuan min chhâng ang che. Lalpa, i chaknaah lal chu a hlim êm êm a, I hnehtîr avângin a va lâwm êm! A duhzâwng chu i pe zêl a, A ngen apiang i hnial ngai lo. Thil ṭha tinrêngin i hmuak a, Rangkachak thianghlima siam lallukhum chu i khumtîr a. Nunna a dîl che a, i lo pe a, Kumkhuaa damna chu i pe ta a. I chhandam avângin a ropui ta êm êm a, Chawimawina leh zahawmna chu i khumtîr ta. Mal i sâwm kumkhua a, I hmêlin i tilâwm ṭhîn. Lal hian Lalpa chu a ring tlat a, Chungnungbera ngilneihna avângin a nghîng lo vang. I kut chuan i hmêlmate i dap chhuak a, I ding lam chuan nangmah hawtute chu i kawi chhuak ta. I lo lan hunah i thinurna meipuiah i paih ang a, Lalpa, i thinurnain a ei zo vang a, Mei chuan a kâng ral ang. An thlahte chu lei aṭangin an chimit ang a, An tuchhuante pawh mihring zîngah an ral vek ang. I lakah chuan thil sual tih an tum a, An thil phiarrûk chu a hlawhtling lo vang. I thal chuan an hmai i tin ang a, Tukkhum chhawnin an tlânchhiatsan ang che. Lalpa, i chakna avângin chawimawiin awm la, I thiltihtheihzia hi fakin kan zai ang. Ka Pathian, ka Pathian, engah nge mi kalsan? Engati nge ṭanpuina dîla ka rûm laia hla taka i awm le? Ka Pathian chu chhûnahte ka au va, mi chhâng lo va, Zân a lo ni, ka ngawi thei chuang si lo. Nang zawng i thianghlim a, lalṭhutthlênga ṭhu, Israel-ten an fak ṭhîna chu i ni. Kan pi puten an ring che a, An rin vângin i chhan chhuak a. An au che a, i hum ṭhîn a, Nangmahah chuan an innghat a, nangin i lo chhanhim ṭhîn. Kei zawng changpât ang lek, mihring tling lo ka ni a, Mî chhawnchhaih leh hmuhsit ka ni. Min hmu apiangte chuan min nuihzat a, An lu thingin min chhiatkhum a. “ Lalpa hnênah a tlulût alâwm, rawn chhan ang hmiang: A mi duhzâwng a ni a, rawn chhan chhuak rawh se!” an ti. Chhûl aṭanga mi la chhuaktu, Ka nu hnute ringa mi awmtleitu i ni a. Ka pian ata nangmah chauhva innghat ka ni a, Ka nu pum chhûng aṭang tawhin ka Pathian i ni. Hmêlma an lo hnai e, min hlat lul suh, Ṭanpuitu dang rêng rêng an awm si lo. Bâwng kawlhte chuan min hual tuau va, Basan bâwng huaite chuan min hual vêl e. Sakeibaknei koham rûm angin An kâ min ânkhum a. Tui leih buak ang ka ni, Ka ruhte pawh a pelh zo ta. Ka thinlung chu khawihnûn tui ang a ni. Ka tha lah chu hlumbêl keh them angin a ro zo va, Ka dangah hian ka lei a bet: Thi ang dêrin vaivutah chuan min mut a. Ui angin min hual vêl a, Mi sual rualin min zîm a, Ka kutah leh ka ke-ah an chhun a. Ka ruhte chu ka chhiar thei e. Anni lah chuan min en mai a, min thlîr reng mai. Ka silhfênte an insem a, Ka kawr atân ṭhum an vâwr bawk. Lalpa, nang chuan min hlat lul suh, Aw, min ṭanpuitu, lo hmanhmawh teh. Khandaih lakah min rawn chhan la, Hêng ui lakahte hian ka nunna chhanhim rawh. Sakeibaknei kâ ata hi min chhandam la, Ramsial ki kâr ata min la chhuak ang che. Tichuan, ka unaute hnênah i hming ka hril ang a, Pung khâwm zîngah chuan ka fak ang che. Lalpa ṭihtute u, amah chu fak rawh u, Jakoba thlahte u, chawimawi ula, Israela fate u, a hmaah kûn rawh u. Retheite chu a hmusit ngai lo va, a ten hek lo. Ṭanpui an dîlin a lo hria a, a hawisan ngai hek lo. Pung khâwm ropui tak zîngah ka fak ang chia, Nangmah ṭihtute hmaah chuan Ka thutiamte ka hlen bawk ang. Retheite chuan tlai takin ei sela, Lalpa zawngtute chuan amah chu fak rawh se. An thinlung chu tihharh ni kumkhua bawk rawh se. Lei pum puiin Lalpa an hria ang a, a hnênah chi tin an kîr ang a. A hmaah chuan hnam tin an ṭhingṭhi ang. Lalpa chu lalber a ni a, Hnam tin chungah ro a rêl ṭhîn. Inei thaute chu a hmaah an kûn ang a, Inchâwm nung zo lo, vaivuta chang tûrte pawh A hmaah chuan an ṭhingṭhi ang. Ṭhangtharten a rawng an bâwl ang a, An thlahte hnênah pawh Lalpa thu hi an hril zêl ang. “ Lalpan a mite a chhanhim,” tiin, La piang lote pawh an la hrilh ang. Lalpa chu min vêngtu a ni a, Ka tlachham lo vang. Ani chuan hlobet hring dup hmunahte min chawlhtîr a, Chawlhna tui kamahte chuan min hruai ṭhîn Ka nun a tiharh thar leh a, A hming avângin kawng dikah min kalpui ṭhîn. A ni, thihna hlim kawrruam zawh mah ila, Ka hlau lo vang, Nangin min awmpui si a, I talhtum leh i vêntiangin min thlamuan ṭhîn. Ka hmêlmate hmuhah ruai min siamsak a, Duhsakna hriak min thih a, Ka no in lai i chhûng khat reng. Matheilovin ngilneihna leh thil ṭhate chuan Ka dam chhûng zawng min zui zêl ang a, Tichuan, Lalpa inah ka awm kumkhua tawh ang. Leilung leh a chhûnga thil awmte hi Lalpa ta a ni a, Khawvêl leh a chhûnga chêngte nên hian. Tuifinriat chungah a nghat a, Tuipui chungah te a hûng ta a. Lalpa tlângah tu nge chho vanga, A hmun thianghlimah tu nge ding ang? Kut fai leh thinlung thianghlim pu mi, Milem be ngai lo leh, Dâwta chhechham ngai lo mi chu! Lalpa hnên aṭangin malsâwmnate an dawng ṭeuh ang a, Anmahni humhimtu Pathian ngei chuan Thiam a chantîr bawk ang. Lalpa pantute chu chutiang mi chu an ni, Aw, Jakoba Pathian, nangmah zawngtute chu. Aw, kulh kawngkhârte u, in hawng zau ula, Lal ropui chu a lo lût dâwn a ni. Tu nge Lal ropui chu? Lalpa, mi chak leh thiltithei, Indonaa huaisena hi. Aw, kulh kawngkhârte u, inhawng rawh u, Nangni kawngkhâr hlunte u, inhawng zau rawh u, Tichuan, Lal ropui chu a lo lût dâwn nia. Tu nge Lal ropui chu? Lalpa, Engkim Lalpa hi, Amah ngei hi Lal ropui chu a ni. Aw Lalpa, i lam ka lo hawi a, Aw ka Pathian, ka ring che a, ka mualpho hi phal suh, Ka hmêlmaten min uankhum hek suh se. A ni, nangmah nghâktute chu tu mah an mualpho lo vang a, Bum hmangte erawh chu an mualpho vang. Aw Lalpa, i kawngte chu min hriattîr la, I duhzâwng chu min zirtîr rawh. Rinawm taka ka awm theih nân min zirtîr la, Nang chu min chhandamtu Pathian i ni si a, Nilêngin ka nghâk ṭhîn che a ni. Aw Lalpa, hmasâng aṭang tawha i lainatna leh ngilneihna kha, hre reng ang che. Ka tleirâwl lai sual leh bawhchhiatnate kha, hre reng suh la, Aw Lalpa, i ṭhatna leh i ngilneihna avângin Min hre reng zâwk ang che. Lalpa chu a ṭhain a dik a, Mi sualte pawh kawng dik a zirtîr ṭhîn. Retheite chu dik takin ro a rêlsak a, Mi tlâwmte chu a kawng a zirtîr ṭhîn. A thuthlung leh a thu hriattîr zâwmtute tân chuan Lalpa kawngte chu a rinawm a, ngilneihnain a khat. Aw Lalpa, ka thiam lohna a nasa êm a, I hming avângin mi ngaidam rawh. Lalpa ṭihtute chu An kawng zawh tûr thlan dân a zirtîr ang. Thil ṭha tinrêng an nei ang a, An thlahte chuan ram hi an rochung ang. Amah ṭihtute chu Lalpa ṭhian an ni a, A thuthlung pawh a hrilh chiang ṭhîn. Lalpa lam chu ka thlîr reng a, lêna ka ke âwk chu mi phelhsak ang. Ka lam hi lo hawi la, min khawngaih ang che, Khawharin ka chau a ni. Ka thinlung hah tak hi min chhâwk la, Ka buaina zawng zawng ata hi min chhan chhuak ang che. Ka retheih leh ka manganzia hi en la, Ka sual zawng zawng hi la bo vang che. Ngai teh, ka hmêlmate an va tam ta êm! Huat tak têin mi hua a ni. Min humhim la, min chhan chhuak rawh, Ka rawn bêl che a, ka mualpho hi phal suh ang che. Ṭhatna leh dikna chuan min hum rawh se, Ka nghâk reng si che a. Aw Pathian, Israel-te hi an manganna zawng zawng ata, chhan chhuak ang che. Aw Lalpa, ka dikzia hi tilang chiang teh, Lalpa ka ring tlat a, ka nghîng lo vang. Mi en ngunin mi chhui chhuak la, Ka thinlung leh ka rilru hi fiah ang che. I ngilneihna chu min hruaitu a ni si a, I rinawmnain min kaihruai ṭhîn. Thil lawilo betute ka ṭhutpui ngai lo va, Mi vervêkte ka kâwm ngai bawk hek lo. Thil sual titu pung khâwmte chu ka huatzâwng tak an ni a, Mi sualte lah ka kâwm ngai bawk hek lo. Pawi ka khawih lo va, Lalpa maichâm ka bêl fo ṭhîn. Lâwmthu sawina hla ka sa a, I thil mak tihte chu ka hril bawk ṭhîn. Aw Lalpa, i chênna in chu ka ngaina a, I ropuina awmna hmun chu. Mi sual zîngah min tiboral suh la, Tualthat zîngah min telh hek suh. An vei lamin thil sual an ti a, An ding lamin thamna an la vak vak ṭhîn. Kei zawngin thil dik ka ti ṭhîn a, Min khawngaih la, min chhandam rawh. Hmun zâwla dingin Pung khâwm zîngah, Lalpa, ka fak ang che. Lalpa chu ka êng leh ka chhandamna a ni a, Tu nge ka hlauh vang? Lalpa chu ka nun humhimtu kulh a ni a, Hlauh rêng ka nei lo ve. Ka hmêlma leh mi dotu mi sualten Tihboral tuma min beih lai khân, An inchhuih a, an tluchhe ta. Mi sual rualin min hual mah se, Ka hlau lo vang. Min do rawn mah sela, Ka zâm chuang hek lo vang. Lalpa hnênah thil pakhat ka dîl a, Chu mawlh chu ka zawng ang; Lalpa mawizia hmu tûra zînga amah pâwlin, Ka dam chhûng zawng Lalpa ina ka chên theihna tûr chu. Mangan ni chuan a bûktê-ah min thukru ang a, A puan in chhûngrilah min bihrûktîr ang a, Lungpui chungah min hlâng daih ang. Min hualtu hmêlmate chungah ka lêng ang a, A inah chuan tawtawrâwt ri nên inthawina ka hlân ang a, Lalpa fakin ka zai bawk ang. Lalpa, ka auh che hi, lo ngaithla teh, Mi khawngaih la, mi chhâng ang che. Aw Lalpa, nangin, “Mi zawng rawh u,” i ti a, Kei chuan ka zawng ang che. Ka lakah hian inthup suh la, I thinrimin i chhiahhlawh hi hawisan suh ang che; Min puitu ber i ni, min thlahthlam suh la, Min chhandamtu Pathian, min kalsan suh ang che. Ka nu leh pate chuan min kalsan tawh a, Mahse, Lalpan min enkawl ang. Lalpa, i duhzâwng chu min zirtîr la, Min chângtute avângin I kawng tluangah min hruai ang che. Ka hmêlmate duh duha tihah min hlân suh la, Mi nunrâwng leh dâwta hêk chîngte chuan min bei a ni. Mi nung ramah hian Lalpa ṭhatna hmuh beisei lo ila chuan, Ka chau daih tawh ang. Lalpa chu nghâk reng la, insangmarin intichak la. Lalpa chu nghâk fan fan rawh. Aw Lalpa, ka lungpui, ka au va che, Min ngawihsan suh. I ngawih reng chuan Leilâwta tlate ang ka ni mai ang. Khawngaih dîla ka au hi ngaithla la, I hmun thianghlim lama pharin ka koh che hi. Mi sualte leh thil sual titute zîngah chuan Min la bo tel suh ang che. An ṭhiante chu remthu an sawipui a, Thil sual an ngaihtuah nghâl si ṭhîn. An thiltihte a sualzia ang zêlin hrem la, An kut thiltih phu tâwk zêlin thungrûl ang che. Lalpa thiltih leh a thilsiam chu An hriatthiam duh loh avângin Anniho chu a tichhe vek ang a, a tungding leh tawh lo vang. Lalpa hi zawng fak tlâk a ni, Khawngaih ka dîlna aw a lo ngaithla si ṭhîn a. Lalpa chu mi tichaktu ka phaw a ni, Amah ka rinchhan a, min ṭanpui ṭhîn; Ka lâwm êm êm a, amah fakin ka zai bawk ang. A mite tân Lalpa chu kulhpui a ni, A hriakthiha tân pawh chhandamna kulhbîng sâng a ni. I mite chhandam la, I rochante hi mal sâwm la, Vêngin, enkawl kumkhua ang che. Pathian fate u, Lalpa chu fak ula, Lalpa ropuina leh a chakna chu fak rawh u. Lalpa hming ropui tak chu fak ula, Thianghlimna silhfên inbelin Lalpa hmaah lo kûn rawh u. Tui chungahte chuan Lalpan aw a chhuah a, Pathian ropui chuan khawpui a tiri a, Tuifinriat chungahte chuan a ri dur dur a. Lalpa aw chu thiltithei tak a ni, Lalpa aw chu a ropui ngei mai. Lalpa aw chuan sidar thingte a titliak a, A ni, Lalpan Lebanon sidar thingte chu a titliak rem rum mai. Lebanon chu bâwng notê ang maiin a zuantîr a, Sirion tlâng chu ramsial notê angin. Lalpa aw chuan kâwl a tiphe zawr zawr a, Lalpa aw chuan thlalêr a tinghîng a, Lalpan Kades thlalêrte chu a tinghing a. Lalpa aw chuan zukpuite no a chhiattîr a, Ngawa thinghnahte a tiṭîl vek ṭhîn a, A tempul-ah chuan, “A va ropui em!” an ti. Lalpa chu Tuilêt chungah a ṭhu a, A ni, Lalpa chuan kumkhuain ro a rêl ang. Lalpan a mite chu a tichak ang a, Lalpan a mite chu muanna a pe bawk ang. Lalpa, min chhan chhuah avângin ka fak ang che, Ka chungah hian hmêlma an hlim i phal si lo. Aw Lalpa, ka Pathian, Ka au che a, min lo tidam ta a. Lalpa, Seol ata min la chhuak a, Thlâna chhuk tûr min tihdam leh tâk hi. A mi thianghlimte u, Lalpa chu fakin zai ula, A hming thianghlim chu fak rawh u. A thinur chu a dai thuai a, A duhsakna chuan dam chhûng a daih. Zânah mittui nên mu mah ila, Zîngah lâwmna a lo thleng ṭhîn. Kei chuan ngaihṭha taka awmin, Ka nghîng ngai lo vang, ka ti ṭhîn a. Lalpa, ka chunga i ṭhatna avângin tlâng angin mi tinghet a, Mahse, i hmêl i han thup chuan Ka mangan leh mai ṭhin kha. Lalpa, ka au va che, Lalpa hnênah khawngaih ka dîl a ni. Thi ta ila, leilâwtah tla ila, I tân eng nge hlâwk ang? Mitthite chuan an fak thei che em ni? I ṭhatzia pawh an puang ang maw? Lalpa, lo ngaithla la, min khawngaihin Lalpa, min ṭanpui ang che. Ka ṭah hi lâwmah chantîr la, Hlimna min sintîr zâwk ang che. Tichuan, ngawi mai lovin Nangmah fakin ka zai ang a, Lalpa ka Pathian i ni a, Ka fak kumkhua ang che. Lalpa, ka rawn bêl che a, Eng lai mahin ka mualpho hi phal suh ang che. I rinawm a, min hum ang che. I beng chhi la, min chhan thuai rawh. Ka tân phen tûr lungpui ni la, Ka himna kulh lo ni ang che. Nang chu ka lungpui leh ka kulhbîng sâng i ni, I hming avângin min kaihruai ṭhîn ang che. An lên zâr rûk ata min hnûk chhuak ang che. Nang zawng ka tân himna i ni si. I kutah ka thlarau ka kawltîr e, Aw Lalpa, Pathian rinawm, min tlan ang che. Eng mah ni lo milem betute chu ka huatzâwng tak an ni a, Kei zawngin Lalpa ka ring a ni. I ngilneihna avângin hlimin ka lâwm ang a, Ka tuarnate i rawn hmu a, Ka manganzia pawh i hre vek si a. Ka hmêlmaten min man i phal lo va, Zalên takin min awmtîr ta a ni. Ka mang a ang êm e, Lalpa, min khawngaih rawh, Lungngaihna avângin ka mit a vai zo va, Ka taksa leh ka thinlung pawh a chau zo ta. Lungngai rêng rêngin ka awm a, Ka hunte chu rûm nân ka hmang zo va, Ka bawhchhiatna avângin tha pawh ka nei ta lo, Ruh hlîr ruh hlîr ka ni ta e. Ka hmêlmaten min hmusit a, Ka ṭhenawmten min deu hle a, Ka hmêlhriatte lahin min hlau va, Khawlaia min hmututen min tlânsan bawk. Thi tawh angin min theihnghilh zo ta a, Hlumbêl keh paih ang mai ka ni. Mi tam tak phun ru ka hria a, Hlauhawmin min hual vêl a, An inrâwn a, ka nunna lâk an tum a ni. Kei zawngin, Lalpa, ka ring che a, “Pathian chu i ni,” ka ti a ni. Ka hunte chu i kutah a awm a, Mi tiduhdahtute leh min ûmtute lakah min chhanhim rawh. I chhiahhlawh chungah hian khawngaihna lantîr la, Khawngaihna tâwp lovin mi chhanhim ang che. Lalpa, ka au va che, min timualpho lul suh, Mi sualte chu mualphovin awm sela, Seol-ah chuan chhuk nghiai nghiai mai rawh se. Dâwt sawi chîngte hmui chu chîp hmiah rawh se, Chapo leh hmusit taka Mi dikte ṭawng khum thâr thârte chu. Nangmah ṭihtute tân thil ṭha i va khâwl khâwm tam êm! Mi dang hmuha nangmah bêltute tân i tihsak chu: Miten an phiar laiin i ângchhûngah i dah a, An sawichhiat dâwn pawhin i bûk chhûngah i thukru ṭhîn. Lalpa chu fak rawh u, Râlin min hual laia A khawngaihna mak tak avângin. Kei chuan “I hmuh lohvah min hnawt chhuak ta,” Ka lo ti hmanhmawh a; Mahse, khawngaih dîla ka auh che chuan I lo ngaithla var ṭhîn. Lalpa ngaihsaktute u, amah hmangaih rawh u, Lalpan mi rinawmte a vêng tlat ṭhîn a ni. Chapo taka khawsate erawh chu hneh takin a thungrûl ṭhîn. Lalpa nghâktu zawng zawngte u, insangmar ula, intihuai rawh u. An bawhchhiatna ngaihdama awma, An sualna thai bosakte chu an nihlawh e. Lalpan khawlohna nei lova a ngaih, Bum tumna reng nei lo mi chu an nihlawh e. Ka ngawih tlat lai khân, Nilênga ka rûmna lamah, Ka chau zo ta a ni. A chhûn a zânin i kut ka tuar ṭhîn a, Ṭhâl rum lai ram ro angin ka ro zo ta. Ka sualna chu i hmaah ka rawn puang a, Ka khawlohna ka zêp hek lo. “ Lalpa hnênah ka bawhchhiatna thupha ka chawi teh ang,” ka ti a. Tichuan, ka sualna zawng zawng chu i lo ngaidam ta a. Hei vâng tak hian, hmuh awla i awm lai hian Pathian ngaihsak mite chu, Tuite lo lian bulh bulh mah se, a chîm pha hauh lo vang. Ka tân bihrûkna i ni a, Hmêlma lakah min hum ang che. Min vên him avângin ka fak ang che. “Ka zirtîr dâwn che a, I kalna tûr ka kawhhmuh bawk ang che. Ka en reng che a, Ka kaihruai zêl ang che. Eng mah hre lo sabengtung leh sakawr ang hian awm suh u; Anni chu i thununa, i duhna lama duh duha i kaih theih nân lakam barh an ngai asin,” Lalpan a ti. Mi sualte tuarna chu a va tam êm! Amah ringtute erawh chu Lalpan a khawngaihnain a enkawl ṭhîn. Mi dikte u, Lalpa -ah chuan hlimin lâwm fo ula, Rilru ngîl tak pu zawng zawngte u, Hlimin au rawh u. Mi dikte u, Lalpa -ah lâwmin au ula, Mi ngîlte tân amah fak hi a âwm a ni. Ṭingṭang nên Lalpa chu fak ula, Perhkhuang hrui sâwm nei nên a fakna hla sa rawh u. A tân hla thar sa ula, Thiam taka remin, hlimin au rawh u. Lalpa thu chu a dik ṭhîn a, A thiltihte a rin ngam bawk a ni. Lalpan dikna leh rorêl ṭha a ngaina a, Lei hi a ngilneihnain a khat. Vân khi Lalpa thu-a siam a ni a, Engkim mai khi a thu-a awm a ni. Tuipui tuite chu bêlah a chhêk khâwm a, Tuifinriat tuite chu zêmah a khung khâwm bawk. Leia awmten Lalpa chu ṭih sela, Khawvêla chêng zawng zawngten ani chu hlau rawh se. Thu a han sawi a, khawvêl hi a lo awm ta mai a, Thu a han pe a, a awm hlen ta a ni. Lalpan hnamte remruat chu a hlawhchhamtîr a, Mite thiltum chu a dâl bawk ṭhîn. Lalpa remruatte chu chatuanin a ding a, A thiltum chu kumkhuaa awm atân a ni. Lalpa Pathiana neih hnam chu an nihlawh e, A rochana a thlan, a mite chu. Vân aṭangin Lalpan a zu thlîr a, Mihring zawng zawng a hmu vek a, A ṭhut hmun aṭangin Leia chêng zawng zawng hi a rawn en ṭhîn. An rilrute chu a siamsak a ni a, An thiltihte pawh chu a hre fai vek a ni. Sipai ngah avâng ngawtin lal chu an him lo vang a, Mi chak pawh an chak avâng ngawtin an him hek lo vang. Sakawr chu inchhanhim nân a rin tlâk loh va, Chak hle mah se, tu mah a chhan chhuak thei lo. Amah ṭihtute chungah Lalpa mit a fu, A khawngaihna nghâktute chungah chuan; Thihna laka chhan chhuak tûr leh, Ṭâmpui laka an nun humhim tûrin. Keinin Lalpa kan nghâk reng a, Min ṭanpuitu, kan phaw a ni. Amahah chuan kan thinlung a lâwm a, A hming thianghlim kan ring a ni. Lalpa, i ngilneihna kan chungah awm rawh se, Nang hi kan beisei chu i ni si a. Eng lai pawhin Lalpa chu ka fak ang a, Tâwp lo tawpin ka fak zêl ang. Lalpa chu ka chhuang êm êm a, Retheite chuan chu chu hria se, lâwm ve rawh se. Lalpa chu min chawimawipui ula, A hming i tiropui ang u. Lalpa chu ka zawng a, min lo chhâng a, Ka hlauh zawng zawng lakah min chhan chhuak ta. Amah an han en a, an hmêl a hlim ta a, An zak ngai tawh lo vang. He mi rethei tak hian Lalpa chu a au va, Anin a lo ngaithla a, A manganna zawng zawngah a rawn chhan chhuak ta a. Vântirhkohte chuan Lalpa ṭihtute chu An hual tlat a, an humhim ṭhîn. Lalpa ṭhatzia hi tem chhin ula, Han hre chiang teh rêng u. Lalpa hnêna tlulûtte chu an nihlawh e. A mi thianghlimte u, Lalpa chu hlau ula, Amah ṭihtute chuan tlâkchham rêng an nei lo. Sakeibaknei vânglaite chuan ei tûr an tlachham a, An ril a ṭâm bawk ṭhîn. Lalpa zawngtute erawh chuan thil ṭha eng mah an tlachham lo. Naute u, lo kal ula, Ka thu ngaithla rawh u, Lalpa ṭih dân ka zirtîr ang che u. Tu pawh nun thlahlela, Thil ṭha hmua dam rei duh chuan, Sual lakah chuan a lei vêng ṭha sela, Bumna thu sawi lo tûrin fîmkhur rawh se. Sual hawisan la, thil ṭha ti rawh, Remna zawng la, ûm zêl ang che. Mi dikte chu Lalpan a en reng a, Ṭanpui dîla an au a ngaithla ṭhîn. Thil sual titute chu Lalpan a lawm loh avângin Leiah pawh hriat reng an ni lo vang. Mi dikte chuan Lalpa an au va, anin a lo hria a, An manganna zawng zawngah a chhan chhuak a. Thinlung taka lungchhiate chu Lalpan a hnaih ṭhîn a, Rilru taka inchhîrte chu a chhandam ṭhîn. Mi dik chuan thil ṭha lo tam tak a tuar ṭhîn a, Mahse, chûng zawng zawng ata chu Lalpan a chhan chhuak ṭhîn. A ruh zawng zawng a vênsak a, Pakhat mah tihtliah a ni lo. Mi sualte chu thil ṭha lovin a tihlum ang a, Mi dik hawtute chuan thiam loh an chang bawk ang. Lalpan a chhiahhlawhte a tlan ta a, Amah pantu apiangte chuan thiam loh an chang lo vang. Lalpa, nangin min beitutebei la, Min dotute do ve ang che. I phaw kengin i âwmphaw pawh ha la, Min pui tûrin lo thawk ang che. I fei lekin i khandaih chu phawi la, Min ûmtute lo dang tlat la, “Ka chhan him dâwn a che,” min ti ang che. Min thah tumtute chu tihmualphova tihzahin awm sela, Min tihchhiat tumtute chu tlânchhiain, hrilhhai takin awm zâwk rawh se. Buhsi, thli lên angin, Lalpa vântirhkohvin anni chu ûm bo rawh se, Thim zînga kawng nâlah Lalpa vântirhkohvin ûm nek rawh se. A chhan awm lovin ka awh nân lên an zâr ru a, Ka tlâk nân khur an lai. An hriat loh hlânin chhiatna an chungah thleng se, An thang kam rûkah anni chu âwk sela, An khur laihah tla hlawm rawh se. Lalpa -ah chuan ka lâwm ang a, Min chhandam avângin ka hlim bawk ang. Ka thinlung zawng zawngin Lalpa hnênah, “Nang chuan an aia thiltithei lakah retheite i chhan ṭhîn, Pachhiate leh chanhaite pawh an neih lâksaktute lakah i hum bawk ṭhîn, Nang ang rêng hi tu nge awm le?” ka ti ngei ang. Hretu derte an lo thawk a, Ka hriat loh thilahte min chhâl. Ka thil ṭha tih sualin min thungrûl a, Ka bei a dawng a ni. Kei chuan an dam lohvin Saiip puan ka sin a, Chaw ngheiin ka tuarpui a, Lu kûn rengin ka ṭawngṭai ṭhîn. Ka ṭhian emaw, ka unaupa emaw tuarpui angin Ka vei ka vei ṭhîn a, Mahni nu sûn ni awm takin ka kun reng ṭhîn. Nimahsela, kei ka tlûk chuan hlimin an pung khâwm a, Min sawisa tûrin, ka hriat ngai lohte pawh An lo pung khâwm bawk a, Min sawisak an bâng duh lo. Piangsualte pawh hmusit duh ṭhîn mi sualte chuan An hâ min ṭhial khum hi. Lalpa, eng chen nge min en mai mai dâwn le? Min tichhe tûrte lakah min rawn chhan la, Hêng sakeibakneite lakah hian ka nunna hi chhanhim ang che. Pungkhâwm ropui tak hmaah lâwmthu ka hrilh ang che a, Mi tam tak zîngah chuan ka fak ang che. Dik lo taka min hmêlmâktute chu, Ka chungah lâwm suh se; Engmahlova min hawtute chu ka chungah hian meng sâng suh se Nêlawm takin an ṭawng ngai lo va, Khualehtui ṭhate bum dân tûr an ngaihtuah ṭhîn. Min bei tûrin an ka an âng a, “I hi! Kan mit ngeiin kan hmu ta alâwm,” an ti. Lalpa, i hmu reng a, ngawi mai teh suh; Lalpa, min hlat lul suh ang che. Tho la, min chhan tûrin lo thawk ta che, Lalpa ka Pathian, min chhanhim teh. Lalpa Pathian, i dikzia tilang tûrin ro min rêlsak la, Min diriam lul suh se. Anni chuan, “Kan duhthusâm a thleng ta le!” ti rilruin “Kan lem zo ta alâwm,” ti hek suh se. Ka chan chhiat laia lâwm ṭhînte chu Zakin mualpho rawh se; Ka chunga intilalte chu Zak ngawih ngawihin kun reng rawh se. Ka thiamchannaa lâwmte chu hlim takin awm sela; “ Lalpa chu a ropui e, A chhiahhlawh chan ṭha duhsaktu chu,” ti rawh se. Tichuan, i dikzia hi ka hril ang a, Nilêngin ka fak ang che. Mi sual thinlung chhûngah sualin thu a sawi. a, Pathian ṭih ṭûlna rêng a hmu lo. A ngaih dân chuan, A sualna chu Pathianin a hmuh a ring lo va, A huat a ring hek lo. Mi bumna thu sual a chhâk chhuak reng a, Thil ṭha leh fing a ti lo. A khumlaizâwlah chuan thil sual a suangtuah ṭhîn, Kawng sualah chuan a kal lui a, Thil ṭha lo tih a hnial ngai lo. Lalpa, i ngilneihna chuan vân a tawng a, I rinawmna pawhin vân dum a thleng. I dikna chu tlâng lian tak ang a ni a, I rorêl dikzia pawh tuithûkpui ang a ni. Aw Lalpa, mihring leh ramsate i humhim ṭhîn. Aw Pathian, i ngilneihna chu a va hlu êm! Mihringte hian i thla hnuai hlim an pan ṭhîn a. I inah chuan thil ṭha eiin an tlai puar a, I lâwmna lui tui chu i intîr ṭhîn. Nang chu nunna tuikhur i ni a, I êngah chuan êng kan hmu ang. Nangmah hretute chungah chuan i ngilneihna thla chu zâr la, I dikzia pawh mi ngîlte chungah chuan lantîr zêl rawh. Chapote ke chuan min chîl lo sela, Mi sualte kut chuan min vai lêng bawk suh se. Saw! Mi sualte an tlu e, An thal dêr mai, an tho thei lo. Mi sualte avângin intihrehawm suh la, An thil dik lo tihte awt bawk hek suh. Hlobet angin an vuai ang a, Hnimhring angin an ro mai dâwn si. Lalpa ring la, thil ṭha ti rawh, He ramah hian awm la, A hausakna tlân rawh. Lalpa chu nêl la, I dîl apiang a pe ang che. I awm dân tûr chu Lalpa chungah nghat la, Amah ring la, a tihsak vek ang che. I dikna chu ni angin a êntîr ang a, I rorêlna dik pawh chhûn êng ang a ni ang. Lalpa -ah chuan châwl la, Amah chu nghâk fan fan rawh. Hausa thutte awt suh ang che, Thil sual titute thîk hek suh. Thinrim bân la, thinur sim rawh, Intihrehawm duh suh, thil sual i tih phah dah ang e. Mi sualte chu hnawh chhuah an ni ang a, Lalpa nghâktute erawh chuan ram hi an chang ang. Rei lo têah mi sualte chu an bo ta phiar a, An awmna chu en en mah la, i hmu zo lo vang. Thuhnuairawlhte chuan ram hi an rochung ang a. Râlmuang takin an awm hle hle bawk ang. Mi sualte chuan mi dik an phiar ṭhîn a, Thinurin an hâ an ṭhial khum ṭhîn. Lalpan anni chu a nuihzat ang a, An thi mai dâwn tih a hre vek si. Retheite leh pachhiate tihchhiat nân, Mi suaksual chuan ngûnhnâm an phawi ṭhîn a, Mi ngîlte tihhlum nân, An thalngul chu an kai kûl ṭhîn. An ngûnhnâm chuan anmahni zâwk chu a chhun ang a, An thalngul pawh a tliak vek ang. Mi dik thil neih chu tlêm mah se, Mi sual thil neih ṭeuhte ai chuan a ṭha. Mi sualte chakna chu Lalpan a lâk bosak ang a, Mi dikte chu a hum tlat ang. Mi nun tluangte chu Lalpan a en zui a, An rochan chu an nei kumkhua tawh ang. Hun harsaah an mualpho lo vang a, Ṭâm kumah pawh an puar bawk ang. Mi sualte chu an boral thuai ang a, Lalpa hmêlmate pawh inthawina berâm thau angin meikhu-ah an zâm ral ang. Mi sualte chuan an pûkin an pe leh ngai lo va, Mi ṭhate erawh chuan a thlâwnin an pe ṭhîn. Mal a sâwmte chuan ram hi an luah ang a, Ânchhia a lawhte chu an boral ang. An kalna tûr Lalpan a ruatsak a, An nun dânah a lâwm bawk ṭhîn. Tlu ṭhîn mah se, an tlu hlen lo vang, Lalpan an kut a chelh zui ṭhîn a ni. Ka naupan lai ata ka lo tar hnu thleng hian, Lalpan mi dik a thlahthlam tâk ka hre ngai lo, An fate pawh chaw khawn ka hmu hek lo. Ni tin a thlâwnin an pe a, an pûktîr ṭhîn, An fate chuan malsâwmna pawh an dawng zêl bawk. Sual hawisanin thil ṭha ti la, He ramah hian i chêng kumkhua dâwn nia. Dik taka rorêl hi Lalpan a ngaina a, Amah ṭihtute chu a ensan ngai hek lo. A vêng kumkhua ang a, Mi suaksual thlahte erawh chu an boral ang. Mi dikte chuan ram hi an nei ang a, An awmchilh kumkhua ang. Mi dik chuan thufing a chhâk chhuak a, Dik takin ro a rêl bawk ṭhîn. Pathian dân chu a thinlungah a châm tlat a, A pênsan ngai hek lo. Mi suaksual chuan mi dik a châng ru a, Tihhlum dân kawng a zawng reng ṭhîn. Mahse, Lalpan mi sual kutah a hnutchhiah duh lo va, Rorêlnaah thiam loh an chan a phal hek lo. Lalpa chu thlîr reng la, a kawng zawh rawh. A chawimawi ang chia, ram chu a pe ang che a, Mi sualte boral lai i hmu bawk ang. Mi sual inchhek lai ka hmu a, Lei ṭhaa thing angin a duah hluah mai. Ka tlawh leh chuan a lo awm tawh lo va, Ka va zawng a, hmuh tûr a awm tawh lo. Mi ṭhate awm dân chu ngaihtuah ula, Mi ngîlte chu en teh mah u, Remna duh mite chuan tu leh fa an nei ṭhîn. Thil sual titute erawh chu an ral tlâng ang a, An zîk a bûl bawk ang. Mi dikte chu Lalpan a rawn chhandam ṭhîn a, Mangan ni chuan an himna kulh a ni. Lalpan a pui ṭhîn a, a chhan chhuak ṭhîn, Mi sual lakah a hum tlat a, A hnêna an tlûkluh avângin a chhandam ṭhîn. Lalpa, thinrim chungin min zilh suh la, Thinur chungin min hrem hek suh. I thal chuan min chhun a, I kut ka tuar tâk hi. I lungnih loh avângin ka taksaah dam lai rêng a awm lo va, Ka sual avângin ka na ṭhêm ṭhûm a ni. Ka khawlohnain mi chîm pil a, Phurh rual lohvin a rit a ni. Ka hliamte chu a pân pûn a, Ka lo â êm a ni. Na tuarin ka kun tlawk tlawk ṭhîn a, Nilêngin ka mangang chu ka vân ruai ṭhîn. Ka taiah hian a sa huai huai ṭhîn a, Ka taksaah dam lai rêng a awm lo. Ka â chuai a, ka sil ûrh a, Thinlung nâin ka rûm ka rûm ṭhîn a ni. Lalpa, ka duhzâwng chu ka rawn thlen e, Ka rûm thâwm pawh i hai hek lo. Ka phu dêp dêp ṭhîn a, tha rêng ka nei ta lo, Ka mitte pawh a thim zo ta. Ka pân avângin ka ṭhen leh rualte chuan min hnaih duh lo va; Ka laichînte pawh an hla zo ta. Min thah tumtute chuan ka tân thang an kam a, Ka chhiatna zawngtute chuan min vau reng a, Eng lai pawhin min phiar ru ṭhîn. Bengngawng angin eng mah ka hre ṭhîn lo va, Ṭawngtheilo ang maiin eng mah ka sawi ngai lo. Eng mah hre thei lote chuan Tu mah an chhâng ngai lo ang hian ka awm. A ni, Lalpa, nangmah ka nghâk che a, Lalpa, min chhâng ang che, aw ka Pathian. Ka tawlhthlûkin min diriam anga, An lâwm viau dah ang e, ka ti a ni. Ka chau lek lek a ni, Ka tuar reng si a. Ka bawhchhiatna ka zêp lo ve, Ka sual avângin ka mang a ang si a. Ka hmêlmate chu an thothâng a ṭhain an chak hle a, Dik lo taka min hawtute an pung tulh tulh, Thil ṭha suala thungrûltuten Thil ṭha ka tih ṭhin avângin min er, Lalpa, min kalsan suh, Aw ka Pathian, min hlat lul suh. Min pui tûrin lo hmanhmawh rawh, Lalpa, min chhandamtu. ‘Ka kalna tûr ka en ngun ang, Thu sual ka sawi loh nân, Mi sual bulah ka hmui Ka chîp tlat ang,’ ka ti a ni. Ka ngawi reng a, eng mah ka sawi lo va, A ṭha lam pawh ka sawi hek lo, Ka tuarna chu a zual tulh tulh bawk si. Ka thinlung a sahâl a, Ka inngaihtuah nasat poh leh ka buai a zual, Tichuan, ka ṭawng chhuak ta hial a: Lalpa, ka tâwpna tûr min hriattîr ang che, Ka dam chin tûr nên, ka nun tawizia ka hriat theih nân. Ngai teh, kan dam chhûng nite chu i va han titawi êm! Kan hunte hi i tân eng tham mah a ni lo, Mi tin an ṭhat lai ber pawhin eng an ni lo. Hlimthla ang chauh an ni; An buaipui ber pawh engmahlo mai a ni. Lalpa, beisei tûr eng dang nge ka neih? Nang hi i ni ka rinchhan ber chu. Ka sual zawng zawng ata min chhan chhuak la, Mi â-te nuihzatbûrah min siam lul suh. Nangin min tuartîr a nih avângin, Ka ngawi mai a, ka ṭawng hek lo. Min hrem tawh suh, I kut tuarin ka thi mai dâwn alâwm. An sualnaah mihringte chu i zilh a, i thunun ṭhîn, Thîm ei angin an mawinate i tichhe ṭhîn. Mihring hi zawng eng mah an lo ni lo. Lalpa, ka ṭawngṭai hi lo ngaithla la, Ṭanpui ka dîlna hi lo hria ang che. Ka mittui hi ngawihsan suh la, Kan pi leh pute ang khân, Rei lo tê châm, mikhual mai ka nih hi. Ka kal bova ka awm loh hlen hma hian. Ka hlimna tûr hun min siamsak ang che. Lalpa chu ka nghâk fan fan a, Min ngaihven a, ṭanpui ka dîlna chu a ngaithla ta. Khuarkhurum chirhdûp thûk ata min khai chhuak a, Lungpui chungah min dintîr a, Hmun nghetah chuan min awmtîr ta. Hla thar min saktîr a, kan Pathian fakna hla chu, Mi tam takin an hmu ang a, an hlau vang a, Lalpa chu an ring ang. Mi nihlawhte chu Lalpa ringtute hi an ni, Milem be duh lova, Pathian lem lam Hawi duh ngai lote chu. Aw Lalpa, kan Pathian, kan tân thil tam tak i ti a, Thil mak tak tak tiin min ngaihtuah êm êm ṭhîn a ni. Nangmah ang rêng tu mah an awm lo va, Chhiarin hril dâwn ila, Hril sên rual a ni lo. Inthawina leh hâlral thilhlan i ngaisâng lo va, Sual thawina leh pum hâl i phût hek lo, I thu ka hriat theih nân beng min pe ta zâwk a. Tichuan, “Hei le, ka rawn pan che; Dân bu-ah chuan i zirtîrna Ka tân ziak a ni e,” ka ti a. Aw ka Pathian, i duhzâwng tih ka va châk êm! I dânte chu ka thinlungah a châm reng ṭhîn a ni. Min chhan chhuah thu lâwmawm hi, Pungkhâwm ropui zîngah ka hril ṭhîn a, Lalpa, nangmah ngeiin i hria, Ka kâ hi ka ui ngai lo. Min chhan chhuah thu hi ka thup lo va, I rinawmna leh i chhandamna thu hi Ka hril fo ṭhîn. Pungkhâwm ropui zîngah, I ngilneihna leh i rin tlâkzia ka zêp ngai lo. Lalpa, i lainatna ka tân ui suh, I ngilneihna leh i rinawmna chuan min hualhim fo vang che. Thil ṭha lo chhiar sên lohte chuan min hual tlat a, Ka bawhchhiatnate chuan min chîm ta a, Ka chhiar sêng lo, Ka sam aiin a tam zâwk a, Ka bei a dawng ta a. Lalpa, khawngaih takin min chhan chhuak la, Lalpa, min rawn ṭanpui var rawh. Min thah tumtute chu Mualphovin, mangang hle hlawm rawh se. Ka chhiatna chunga lâwmte chu Zak takin tlânchhe rawh se. “Chei! Chei!” min tihkhumtute chu Zakin kun tlawk tlawk bawk rawh se. Nangmah zawngtu zawng zawngte chu, Hlimin au dur dur sela, I chhandamna ngaihlute chuan, “ Lalpa chawimawi rawh u,” ti fo rawh se. Kei pachhia leh rethei tak hi, Lalpan min ngaihtuah ṭhîn; Min puitu leh min chhandamtu i ni, Aw ka Pathian, muangchâng lul suh. Mi rethei ngaihtuahtutechu an nihlawh e, Mangan ni-ah Lalpan a chhanhim dâwn si a. Lalpan a vêng ang a, an dam reng ang, An ramah chuan engthâwl takin an awm ang a, An hmêlmate kutah a pe lo vang. Lalpan an dam lohvin a enkawl ang a, An natna a tidam ang. Kei chuan, “ Lalpa, i chungah thil ka tisual a, Min khawngaih la, min tidam rawh,” ka ti a. Ka hmêlmaten na tak takin min ṭawng khum a, “Engtikah tak thi-in boral ang maw,” an ti ṭhîn. Min tlawh lahin a chhe zâwngin an sawi chhâwng a, A chhe lam hlîr an la khâwm, An kal chhuak a, an sawi darh ṭhîn. Min hawtute an inbe ru ṭhîn a, Ka chhiatna tûr hlîr an ngaihtuah ṭhîn. “A na êm a, A thokâng leh tawh lo vang,” an ti a. Ka ṭhian bul ber, ka rin êm êm, Ka chaw kîlpui ngei chu Ka chungah a inlek ta. Lalpa, nang chuan min khawngaih la, min tidam leh ang che, Ka hmêlmate hi ka han thungrûl teh ang. Ka hmêlmaten min hneh loh chuan, Min duhsak hle tih ka hria ang. Ka dik avângin nangin min chelh tlat la, I hmaah chuan min awmtîr kumkhua ang che. Lalpa, Israel-te Pathian chu fak rawh u, Chatuan chatuanin amah chu fak rawh u. Amen, Amen. Sakhiin luite tui a châk êm êm ṭhîn ang hian, Aw Pathian, kei pawhin ka ngai êm êm ṭhîn che a ni. Ka nun hi Pathian châkin, Pathian nung châkin a tuihâl a ni. Pathian hmaa kalin engtikah nge ka inlan ang? Ka mittui avângin chaw rêng ka ei thei lo, Ka hmêlmate lah chuan, “Khawiah nge i Pathian chu?” min lo ti chhên a. Tûn hma ka ngaihtuahin ka lung a chhe hle ṭhîn, Pathian in pana mipui ka hruai ṭhin te, Hlim taka fak hla saa kan kût ṭhin laite kha: Engtizia nge ka ngui êma, Ka rilru a hah tâk êm le? Pathianah chuan ka innghat ang a, Min chhandamtu hmêl chu hmuin ka la fak ang. Aw Pathian, ka rilru a ngui hle mai, Hermon tlâng te, Mizar tlâng te, Jordan ram aṭangte hian ka hre reng ṭhîn a che. I tui luang ri hum hum angin, Tui thûk takte chu a phûl bulh bulh mai a, I tuifâwn inchhawkte chuan min tuam tâk hi. Lalpan a ngilneihna chu chhûnah a tilang a, Zânah a fak hlain min awi. Mi tinungtu Pathian hnênah ka ṭawngṭai ang. Pathian, ka lungpui hnênah, “Engati nge min thlahthlama, Ka hmêlmate kut tuara ka rûm le?” ka la ti ang. Ruh vuak sawmsak ang maia nain Ka hmêlmaten min diriam a, “Khawiah nge i Pathian chu?” Min lo ti chhên bawk si. Engtizia nge ka ngui êma, Ka rilru a hah tâk êm le? Pathianah chuan ka innghat ang a, Min chhandamtu hmêl chu hmuin ka la fak ang. Aw Pathian, ro min rêlsak rawh, Pathian pawisa lo hnam dang min khingtute khing ve la, Mi sual leh bum hmang lakah min chhanhim ang che. Min tichaktu Pathian i ni, Engati nge min thlauhthlâk tâka, Ka hmêlmate kut tuara ka rûm ka rûm le? I êng leh i thutak chu han tîr la, I tlâng thianghlim, i chênnaah chuan Min hruai thleng ngei rawh se. Aw Pathian, i maichâmah ka kal ang a, Nang hi min tihlimtu ber Pathian i ni, Aw Pathian, ka Pathian, ṭingṭang tumin ka fak ang che. Engtizia nge ka ngui êma, Ka rilru a hah tak êm le? Pathianah chuan ka innghat ang a, Min chhandamtu hmêl chu hmuin ka la fak ang. Aw Pathian, hmasânga anhun laia i thiltihte, Kan pi puten min hrilh a, Kan bengin kan hria. I kutin hnam dangte chu i hnawt chhuak a, An hmunah anni chu i phun a, Mi dangte chu i tidarh a, Anni chu i tipung ta a. Ram chu khandaiha an lâk a ni lo va, An chak avânga inhumhim an ni hek lo; I kut ding lam, i bân pharin i awmpui a, I duhsak êm avânga la an ni zâwk si. Aw Pathian, nang zawng ka Lal i ni, Jakob-ho, an dote hnehtîr ṭhîntu chu. Nangmah avângin min dotute kan nawr tawm a, I hming avângin min beitute kan chîl nek ṭhîn. Ka thal ka ring lo va, Ka khandaih hian mi chhan hek lo. Ka hmêlmate lakah nangin min chhanhim ṭhîn a, Min hawtute i timualpho bawk ṭhîn. Ni tin Pathian kan chawimawi a, I hming kan fak kumkhua bawk ang. Tûnah hi zawng min thlauthla ta, Min timualpho ta a, Kan sipai rual zîngah i tel ve tâk loh hi. Min dotute hmaah min tlânchhiattîr ta a, Min hawtuten min rawk tâk hi. Berâm anga talhah min dah a, Hnam tin zîngah min tihdarh hi. I mite chu tlâwm takin i hralh a, An man lah chu i phût sâng duh hek lo. Kan kianga awmte hmuhsitah min siam ta a, Kan vêla chêngte diriam leh nuihzat kan ni. Hnam dangte chuan fiamthu nuihzaah min hmang a, An lu min thin khum ṭhîn. Ni tin mualpho takin kan awm ṭhîn a, Zakin kan kûn reng mai; Min sâwta min diriamtute aw avâng leh Hmêlma leh phuba latute avângin. Hêng hi lo thleng mah se kan theihnghilh lo che a, I thuthlung pawh kan bawhchhe lo. Kan hawisan ngai lo che a, I kawng ata kan pêng hek lo. Sihal chênna hmunah min lum reng a, Thim chhah takin min khuh ta a. Kan Pathian hming kan theihnghilha, Kan kutte hi hnam dang pathian lama kan phar ṭhin chuan, Rilru ngaihtuah rûkte hre theitu, Chung Pathian chuan a hre lo vang maw? Nangmah avângin ni tin min that reng a, Berâm talh tûr dah khâwm ang lekin min ngai a ni. Lalpa, tho teh, engtizia nge i muthilh reng? Intiharh la, min ngaihsak lo reng suh. Engati nge min bihrûksana, Ka tuar nasatzia leh min tihduhdahzia hi i theihnghilh le? Lei siin kan kûn renga, Kan bawh phêk reng hi. Min pui tûrin lo thawk chhuak la, Ngil i neih êm avângin min tlan ang che. Thu mawi tak tak ka rilruah a lang uar uar a, Lal chungchâng thu ka hril dâwn e. Rang taka lehkha an ziak angin Ka sawi zung zung dâwn e. Mi azawngah i hmêl a ṭha ber e, I ṭawngkam lah a duhawm si, Chuvângin, Pathian pawhin mal a sâwm che hi. Aw mi huaisen, i khandaih chu pai la, Ropui leh mawi takin inthuam rawh le. Ropui taka inthuama, Thutak leh dikna ṭan tûrin Sakawr chunga chuangin tluang takin kal la, I chaknain hneh zêl ang che. I thalte chu a zum êm êm, I hmêlmate a chhun tlang a, I hmaah chuan mite an tlu phung mai. Pathian pêk che i lalna chu I nei reng ang a, I mite chungah diknain ro i rêl ang. Dikna i ngainata, sualna i huat avângin, Pathian, i Pathian chuan a thlang ta che a ni; Lal dangte aia nasa zâwkin hlimna hriak chu a thih ta che. I silhfênah Mura leh Aloe rim, Thakthîng rim nên a nam rum rum, Sainghova chei in ropui tak aṭangin Ṭingṭang tumtuten an awi che. I kianga ding ṭhîn tûra thlante chu lal fanute an ni, I ding lamah, Ofir rangkachak puan sinin lalnu a ding. Mami, ka thu hi ngaithla la, I beng chhiin ngaihven ang che: I laichînte leh i pa in chu theihnghilh daih rawh. Tichuan, lalin hmêlṭha tiin a duh ang che a, Ani chu i Lalpa a ni si a, a thu zâwm rawh. Tura khuaa mi hausaten an tlawn ang che a, Thilpêk an rawn hlân dâwn a che. A pindana lal nula ṭhu chu a va ṭha êm! Rangkachak zaia ṭial puan a sin saw. Mawi taka incheiin lal hnênah an hruai, Amah zuitu nula rualte nên, I hnênah an rawn hruai e. Hlim leh lâwmin an rawn hruai a, Lal inah chuan an lo lawi e. I pate hmun chu i faten an luah ang a, Ram tina rorêltuah i siam bawk ang. I hming hi chhuan zawng zawnga hriat reng tûrin ka siam ang a, Tichuan, miten an fak kumkhua ang che. Pathian chu kan inhumhimna leh kan chakna, Mangan laia ṭanpui var ṭhîntu hnai reng a ni. Chuvângin, leilung hi lo danglamin, Tlângte hi tuifinriat thûk laiah pil mah sela, Kan hlau lo vang. A tuite chu ri hum humin phûl bulh bulh mah sela, A fâwnte chuan tlângte tinghîng dur dur mah sela, Kan hlau chuang hek lo vang. Lui pakhat a awm a, Chumi pêngte chuan Pathian khawpui a tilâwm ṭhîn; Chungnungbera awmna Hmun Thianghlim chu. Pathian chu a chhûngah a chêng a, A nghîng lo vang a, Pathian chuan khawfîngchah hunah a ṭanpui ang. Hnamte an buai zo va, Ramte a nghîng bawk a, Ani chuan aw a chhuah a, lei chu a tui zo ta. Engkim Lalpan min awmpui a, Jakoba Pathian chu kan kulhbîng sâng a ni. Hawh u, Lalpa thiltihte hi han en teh u, Leia thilte a tihchhiat nasatzia hi. Indonate chu kâwlkil thlengin a tireh a, Thalte a titliak a, feite a tibung a, Phawte meiah a rawh ral ṭhîn. Ngawi ula, Pathian ka ni tih hi hre rawh u, Hnam tin chunga lal ka ni a, Lei chunga rorêltu ka nih hi. Engkim Lalpan min awmpui a, Jakoba Pathian chu kan kulhbîng sâng a ni. Mi zawng zawngte u, in kut bêng ula, Hlim takin Pathian fakin au rawh u. Lalpa, Chungnungbera chu a va hlauhawm em! Lei chungah lal ropui tak a ni. Kan hnuaiah mite a kûntîr a, Kan ke hnuaiah hnamte a awmtîr hi. Kan ro luah tûr min thlansak a, A hmangaih Jakoban a chhuan êm êm ram hi. Pathian chu au thâwm nên a chho va, Lalpa chu tawtawrâwt ri nên a chho ta. Fakin zai rawh u, Pathian fakin zai rawh u, Fakin zai rawh u, Kan Lalber hi fakin zai rawh u. Pathian hi khawvêl zawng zawng Lal a ni si a, Fakna hla mawiin amah chu fak rawh u. Hnam tin chungah Pathian chuan ro a rêl a, A lal ṭhutthlêng thianghlimah chuan a ṭhu. Mi tin zînga mi liante chu an pung khâwm a, Abrahama Pathian mite chu. Pathian chu lei chunga Lalber a ni, Ropui taka chawimawi tûr a ni e. Lalpa chu a ropui a, fak chiam tûr a ni e, Kan Pathian khawpuiah, a tlâng thianghlimah hian. Zion tlâng chu a mawi chungchuang mang e, Ram pum pui timawitu a ni. Zion tlâng hi Zafan tlâng ang a ni, Lal ropui tak khawpui chu. Kulh chhûngah chuan Pathian chu a chêng a, Humhimtu a nih a lang. Lalte an pung khâwm a, Rawn bei tûrin an lo kal khâwm. An han hmu a, mak an ti a, An hlau ta a, thlabârin an tlânchhia. Tah chuan an thauvah a man ta a, Nau vei na tuar ang mai an ni. Khawchhak thliin Tarsis lawng rual A tichhe vek bawk a. Engkim Lalpan awm reng tûra a din, Kan Pathian khawpuiah chuan, Kan hriat ṭhin kha kan hmuh tâk hi. Aw Pathian, i Tempul chhûngah chuan, I ngilneihzia kan chhui kan chhui ṭhîn, Aw kan Pathian, i hming an chawimawi a, Ram tinah a thang ta e, Dik takin ro i rêl ṭhîn. Zion tlâng chu lâwm hle sela, Judai ram mite chu hlim bawk rawh se, Dik taka ro i rêl avângin. Zion tlâng hi vêlin kal hual ula, In sângte chu chhiar vek rawh u. A kulh bangte chu en ngun ula, A thlêrte chu fang vek rawh u, Ṭhangthar zêl hnêna in hrilh atân. He Pathian hi, kumkhuaa kan Pathian a ni, Aman min hruai kumkhua dâwn si. Mi tinrêngin hei hi ngaithla ula, Khawvêla chêng zawng zawngten in beng lo chhi rawh u, Mitê leh milian, Hausa leh rethei, in zavaiin, Thufing ka chhâk chhuak dâwn e, Ka ngaihtuah ṭhinte chu ka tilang dâwn. Thu ril ka ngaihven ang a, Ṭingṭang tumin thu khirh ka sawi fiah ang. Hun ṭha lo chu engah nge ka hlauh vang? Min beitute sualna chuan min hual mah se. Chûng mite chuan an hausakna ringin An sum ngahzia an chhuang a ni. Tu mah mahni an intlan thei lo asin: Pathian hnênah intlanna man an pe thei hek lo. Mihring nunna man chu a tam êm a, Eng mahin a daih lo vang. Thlâna liam lova, An dam reng theih nân chuan. Mi fingte pawh an thi a hmu, Mi â te leh mi mâwlte ang bawkin, An sumte chu mi dang tân an hnutchhiah. An inte chu awm reng tûrin an ngai, An chênna chu kumkhaw daih tûr emaw an ti. An ram hmingah an hming an chawi. Mihring hi a hlu reng lo, Ramsa, boral mai tûr ang hi a ni. Mi â-te awm dân chu hetiang hi a ni e, An hnung zuia, an thu lâwmtute pawh: Berâm anga thi tûr an ni, Anmahni vêngtu chu Thihna a ni, Zîngah mi dikte chuan an chungah ro an rêl ang a, An taksa chu thlânah a ral ang, Seol-ah an awm dâwn tawh si a. Kei erawh chu, mitthi khua ata, Pathianin min tlan chhuak dâwn a ni. Mi an hlâwkin awt suh, An chhûngkaw sum a pun thûr thûrte hian, An thih hun chuan chhawm theih rêng an nei lo vang, An sum neih chuan a zui dâwn lo. An dam laiin nihlawh an inti hle ṭhîn a, An chêt fuhin miten an fak bawk ṭhîn. An pate kalnaah an chhuk ve tho vang, Êng awm lohna hmun thimah chuan. Mihring hlutna hi ramsa boral ṭhîn ang mai a nihzia An hrethiam thei lo. Lalpa, pathiante Pathian chuan thu a sawi a, Ni lo chhuahna aṭanga a tlâk lehna thlengin Leilung hi a ko va. Khaw mawi famkim Zion aṭang chuan Pathian a êng chhuak ta. Kan Pathian chu a lo kal ang a, a ngawi mai mai dâwn lo, Meialh hluah hluahin a hma a hruai ang a, A vêlah chuan thlipui a tleh hum hum ang. Chung lam vân khi a ko, lei nên, A mite tân ro a rêl dâwn a ni. “Pathian ngaihsakte chu ko khâwm ula, Inthawina hlâna thu min thlunpuitute chu,” a ti. Vân khian a dikzia chu a puang a, Pathian ngei hi rorêltu chu a ni. “Ka mite u, ngaithla ula, thu ka sawi dâwn, Israel mite u, ka khing dâwn che u a ni, Pathian, in Pathian chu ka nih hi. Inthawina avângin ka dem lo che u a, Hâlral thil hlan in rawn lâk fo avâng hian ka dem hek lo a che u, In ina mi bâwngpa ka phût lo va, In ran huanga mi kêlpa pawh ka ngên hek lo. Ramhnuaia sa tinrêng hi ka ta asin, Tlâng tina chêng ramsate pawh ka ta a ni. Tlânga sava tinrêngte pawh ka hria a, Thil nung zawng zawng pawh ka ta a ni. Rilṭâm mah ila, ka hrilh lo vang che u, Khawvêl leh a chhûnga awmte hi ka ta a ni si a. Bâwngpa sa ka eiin Kêlpa thisen ka in dâwn em ni? Pathian hnênah lâwmthu sawi inthawina hlân ula, Chungnungbera hnêna in thutiam chu hlen zâwk rawh u. Mangan ni-ah min ko ula, Ka chhanhim ngei ang che u, Tichuan, min chawimawi ang. Mi sual hnêna Pathian thu sawi chu hei hi a ni: “Ka dânte chu engah nge i lam chhêna, Ka thuthlung pawh engah nge i sawi fo? Ka thununna i duh lo va, Ka thupêkte i hnâwl bawk a. Rûkru i hmuhin i thurualpui a, Uire chîngte i kawp bawk ṭhîn. Thil sual sawi pawh i chîng hle a, Dâwt sawi i hreh hek lo. Mi zîngah i unau rêl i chîng a, I pianpui ngei i hêk bawk ṭhîn. Hêng thilte hi tih i chîng a, Ka ngawi mai dâwn em ni? Nangmah ang leka mi ngai hi ka dem che a, A chhan pawh i mit hmuhah ka tilang dâwn a ni. Pathian theihnghilhtute u, ngaithla rawh u, Chutilo chu, ka pawt sawm hlauh dah ang che u, Chhanhimtu rêng in nei lo vang. Lâwmthu sawi inthawina hlântu chuan min chawimawi a ni. A awm dân vawng diktu chu, Pathian chhandamna chu ka hmuhtîr ang,” a ti a ni. Aw Pathian, mi ngilnei tak i nih avângin min khawngaih la, Lainatna ngah tak i nih avângin, ka bawhchhiatnate hi thai bo vang che. Ka khawlohnate hi min sil faisak la, Ka sualna hi min tlen faisak ang che. Ka bawhchhia tih ka hre ta si a, Ka sualzia pawh ka hre reng mai. I chungah, i chungah ngei thil sual ka ti a, I mit hmuha sual chu ka ti a ni. Ka chungthu i sawi hi a dik e, Thiam loh min chantîr pawh a dik a ni. A ni, sualin ka lo piang a, Ka nu min pai tirh aṭang rêngin mi sual ka ni. Ngai teh, nang chuan chhûngril lamahte hian Takna i duh ṭhîn a. I finna chuan min tikhat ang che. Husop-in tui min theh la, ka thiang ang a, Min sil fai la, vûr aiin ka vâr ang. Hlim leh lâwm ri mi hriattîr ang che, Ka ruhte hi i titliak na a, Hlimna ka nei leh ang. Ka sualna hi haider la, Khawlohna zawng zawng thai bo vang che. Aw Pathian, keimahah hian thinlung thianghlim siam la, Rilru thar nghet tak min pe ang che. I hnên ata hi min hnawt bo suh la, I Thlarau thianghlim hi min lâksak hek suh ang che. I chhandam hlimna chu min pe leh la, Thlarauvin dawhthei takin min chelh reng ang che. Tichuan, i kawngte chu bawhchhetute ka kawhhmuh ang a, Mi sualte chuan i lam an lo hawi ang. Aw Pathian, min chhandamtu Pathian, Thisen chhuahna lakah min hum la, I felzia hi lâwm takin ka puang ang, Lalpa, ka hmuite hi hawng la, Tichuan, ka fak dâwn che nia.” Inthawina hi i lâwm lo va, Lâwm la chu ka rawn hlân tûr, Hâlral thilhlan pawh i duhzâwng ber a ni hek lo. Pathian hnêna inthawina dik tak chu thinlung keh hi a ni, Aw Pathian, lungchhiaa inchhîr ngawih ngawih hi I hmusit ngai lo ve. Aw Pathian, Zion khua chu duhsakin thil ṭha tihsak la, Jerusalem kulh bangte pawh din thar ang che. Tichuan, hâlral leh pumhlan inthawina dik takah chuan i lâwm ang a, I maichâmah bâwngpa an rawn hlân tawh ang. Aw, nang mi chak, engtizia nge thil sual i uanpui tâk? Pathian ngilneihna zawng a ngai reng ṭhîn asin. Mi dang sawichhiat i tum ṭhîn a, I lei lah chu chemte hriam tak ang hi a ni a, Dâwt phuah pawh i thiam ngei mai. A ṭha aiin a chhia i ngaina a, Thu dik aiin dâwt sawi i chîng bawk si. Nang, dâwt sawi hmang, Mi rilru hliam zâwnga thu sawi i hrât hle mai. Chuvângin, Pathian pawhin a tichhe hlen ang che, A man ang che a, i in ata a hnûk chhuak ang che a, Mi nung ram ata a pawt chhuak daih ang che. Mi dikte chuan chu chu an hmu ang a, an hlau vang a, An nuihzat bawk ang che. “En rú, Pathiana innghat duh lo pa hi, A hausakna a rinchhan a, Suahsual bâwla inhum a tum hi,” an ti ang che. Kei zawng Pathian ina oliv duah hluah hluah ang hi ka ni, Pathian ngilneihna hi ka rinchhan kumkhua chu a ni. Thil min tihsak avâng hian ka fak kumkhua ang che. Mi inserhte hmaah pawh i ṭhatzia hi ka puang fo vang. Mi â chuan “Pathian rênga awm lo ve,” an ti rilruṭhîn a, Hlemhle takin an che a, thil sual tenawm an ti ṭhîn. Thil ṭha ti rêng an awm lo ve. Pathian zawngtu mi fing an awm emaw tiin vân aṭangin Pathianin mihringte chu a zu thlîr a, An zavaiin hnungtawlh, rilru chhe pu an ni a, Thil ṭha ti rêng an awm lo va, Pakhat tê mah an awm hauh lo. Hlemhlete hian ka mite ei tûr chu an eisak ṭhîn a ni tih hi an hre na nge? Pathian lah chu an lam si lo. Ngai teh, hlauh lohna tûrah pawh an hlau êm êm ang a, Amah hre lo mite ruh chu Pathianin a theh darha, A thlauhthlâk tâk avângin i timualpho thei ta si a. Israel-te chhandamna chu Zion ata a lo thleng a, Pathian ngei chuan a mite chu a tihhmuingîl hunah, Jakoba thlahte chu an va hlimin an va lâwm dâwn tak êm! Aw Pathian, i thiltihtheihnain min chhandam la, I chaknain ka thu min rêlsak rawh. Aw Pathian, ka dîlna hi lo ngaithla la, Ka thute hi lo bengkhawn teh. Hnam dangte chu min bei tûrin an lo thawk a, Mi hlauhawm pui puiten min thah an tum, Pathian pawisa ngai lote chuan. Mahse, Pathian chu min ṭanpui ṭhîntu a ni a, Lalpa chu min tungding ṭhîntu a ni. Min tihchhiat tumtute sualna chu Pathianin thungrûl rawh se, Ani chu a rinawm a, anni chu a tiboral ang. Phal takin inthawina ka rawn hlân a che, Lalpa, i ṭha êm a, i hming ka chawimawi ang. Ka manganna tinrêng ata min chhan chhuak a, Ka hmêlmate tlâwm ta chu ka hmuh tâk hi. Aw Pathian, ka ṭawngṭaina ngaithla la, Khawngaih ka dîl a che, min bihrûksan lul suh. Mi ngaihven la, min chhâng ang che, Manganga vân ruaiin ka rûm ka rûm a ni: Ka hmêlmate thâwm avâng leh Mi suaksualte min nêkchêpna avângin. Min tibuai ta si a, An thinur a, min hua a ni. Ka thin a phu dêp dêp a, Thih ka hlau reng a ni. Ka thauvah min man a, ka khûr zawih zawih ta a, Ka chechâng thei ta lo. “Ṭhuro angin thla nei ila, Hahchawlhna tûr zawngin ka thlâwk daih ang. Ram hla takah ka thlâwk ang a, Thlalêr hmunah ka awm daih ang. Thlipui ruahpui laka himna panin ka kal sawk sawk tûr,” ka ti. Lalpa, an ṭawng tihbuaisak rawh, Khawpuiah hian khawlohna leh innghirnghona, Ka hmu ṭeuh si. Chhûn zân zawmin an vâk vêl a, Kulh vêngtute zîngah bawhchhiatna leh buaina a khat. Khawpui chhûngah suahsualna a tam a, Kawtthlêr zau laiah lah inpâwngnêkna leh Inbumnate a reh hek lo. Ka hmêlmaten min nuihzat chu ni se, Ka tuar thiam ang. Min hawtute ka chunga inlek chu ni se, Ka bihrûksan thei ang. Mahse, nangmah i lo ni reng si a, Keimah ang maia ka ngaih, ka ṭhian ka kawmngeih tak, Tui taka ka titipui ṭhin, Mipui ruala Pathian ina ka lawipui ṭhin kha. Hmêlmate chu a hun hmain thi se, A nung chungin Seol-ah chhuk rawh se. An inah leh an zîngah chuan sualna a châm tlat si. Kei erawh chuan Pathian ka au vang a, Lalpan min chhandam ang. Tûk tin, tlai tin, chhûn laiah pawh, Ka chau rûm thâwm a thleng chho va, Ka aw a hre ngei ang. Min beitute lakah min chhanhim a, An tam hle chungin. Hmasâng ata rorêltu Pathian chuan, A hria ang a, a titlâwm ang, An lamlêt duh lo va, Pathian an ṭih hek lo. Inrem taka a awmpui chungah chuan A kut a thawh ṭhîn a, An thuthlun chu a bawhchhe ṭhîn. Hnutetui ang maiin a kam chhuak chu a thlum a, Insual peih reng thinlung a pu si, A thuchhuak chu hriak ang maiin a tlawr a, Khandaih hriam tak ang a ni si. Lalpa chungah i phurrit chu nghat la, Anin a chhâwk ang che, Mi dikte chu an nghîn a phal lo vang. Aw Pathian, khuarkhurum thûkah chuan chhuktîr ang che, Thisen chhuah chîngte leh dâwt hehte chu, An dam tûr chanve pawh an dam lo vang, Kei erawh chu, nangmahah chuan ka innghat ang. Aw Pathian, min khawngaih rawh, Miten min veh min veh mai a, Min dotuten min zim reng hi! Min beituten min veh nilêng ṭhîn a, Aw Chungnungber, an va tam êm! Ka thla a phân laiin Kei chuan ka ring ṭhîn che. Pathian thu chu ka chhuang ang a, Pathian chu ka ring a, ka hlau lo vang, Mihringte chuan eng nge min tih theih ang? Ka chungthu-ah an inrawlh châmchi a, Ka chhiatna tûr an ngaihtuah ṭhîn. Hmun kilkhâwrah an inhâwr khâwm ṭhîn a, Ka hnu an chhui ru a, min thah an tum. An khawlohna avângin chhan chhuah an ni ang maw? Aw Pathian, chûng mite chu thinurin tudawl ang che. Ka vahvaih zinzia hi i hre vek a, Ka mittui luangte pawh i chhinchhiah a, I lehkhabu-ah chuan ziak vek a ni lâwm ni? Ka koh hun che chuan ka hmêlmate an tlânchhia ang, Pathian chu ka lama ṭang a nih ka hre si a. Pathian thu chu ka chhuang ang a, Lalpa thu chu ka chhuang bawk ang. Pathian chu ka ring a, ka hlau lo vang, Mihring maiin eng nge min tih theih ang? Aw Pathian, i hnêna ka thutiam chu ka hlen ang a, Lâwmthu sawi inthawina ka hlân ang che. Thihna lakah min chhan chhuak a, Ka kête lung chhuih bah palh lakah min vêng, Tichuan, Pathian hmaah ka lêng thei a, Mi nungte êngah chuan. Aw Pathian, min khawngaih rawh, min khawngaih rawh, I hnên ka rawn pan a, I thla hnuai hlimah chuan ka lo bi ang, Thil ṭha lo hi a kian hma chu. Pathian Chungnungbera chu ka au. Engkim min tihsak ṭhîntu Pathian chu. Vân aṭangin min chhâng ang a, min chhandam ang, Min vehtute hmuhsitna ata chu, Pathianin a rinawmna leh ngilneihna A rawn lantîr ngei ang. Sakei zînga awm ang ka ni, Ka chunga thinrimte zînga ka chên hi, An hâte chu fei leh thal anga hriam a ni, An leite lah khandaih hriam tak ang hi a ni. Vânahte khian i ropuizia han tilang la, Aw Pathian, lei pumah hian tilang ang che. Ka awh nân lên an zâr duai a, Ka mangang êm êm mai, Ka kalkhânah hum an lai a, Anmahni ngei an tla ta zâwk. Ka ring tlat che a ni, aw Pathian, ka ring tlat che, Hla ka sa ang, a ni, i fak hla ka sa ang. Ka nunna hi ṭhangharh sela, Ṭingṭang leh khuang te u, inpeih rawh u, Khua i han au vâr teh ang. Lalpa, i mite zîngah chuan ka fak ang che, Mipui zîngah i fak hla ka sa ang. I ngilneihna chuan vân a tawng a, I thutak chuan vân khi a thleng si a. Vânahte khian i ropuizia han tilang la, Aw Pathian, leiah pawh hian tilang ang che. Hotute u, thu dik in sawimeuh maw? Mite chungah dik takin ro in rêl em? Thil ṭha lo tih tûr ngawt in ngaihtuah thung si a, Ka ram hi pâwngnêknain in tikhat. Pum chhûng aṭang rêngin mi sualte chu an hel sa a, An pian tirh aṭangin dâwt lamah an thle daih tawh a ni. Rûl angin tûr an nei ṭeuh va, Chawngkawr bengngawng ang hi an ni, Rûl thlêm thiamte aw hre duh lo, Dawithiam dawi hla ngaithla duh lo ang hi. Aw Pathian, an hâte chu chhut balsak la, Lalpa, sakeibaknei kawlhho ngho hi tihtliahsak rawh. Tui anga pûtin luang ral sela, Thal fang nei lo ang hi ni hlawm rawh se. Chêngkawl thi angin râwp ral sela, Hlamzuih, êng hmu hman lo ang hi ni hlawm rawh se. An hriat loh hlânin hlobet anga ah chhum an ni, A thi leh dam, Pathian thinurnain a lên bo vang, Mi sual chunga phuba lo thleng chu an hmuhin, Mi dikte chu an hlim ang a, Mi sualte thisen chu an dai ang. “Mi dikte chuan lâwmman an la hmu ngei dâwn e, Pathian pawhin khawvêl a lo enkawl ngei hi,” Miten an la ti ang. Aw ka Pathian, hmêlma lakah min chhanhim la, Min beitute lakah min hum tlat rawh. Thil sual titute lakah chuan min chhan chhuak la, Thisen chhuah chîngte kut ata min chhandam rawh. Ngai teh, min thah tumin min châng reng a, Mi nunrâwng pui puite an pung khâwm e; Ka bawhchhiat leh ka sual vâng a ni lo, Lalpa. Thil ṭha lo ka tih vâng a ni hek lo, An tlân khâwm a, min hual tâk hi, Min pui tûrin lo tho harh la, en teh. Lalpa, Engkim Pathian, Israel-te Pathian i ni; Hnam dangte hi hrem tûrin lo thawk la, Vervêk taka che ṭhîn mi sualho hi khawngaih hauh suh ang che. Tlaiah an lo pung khâwm leh ṭhîn, Ui ang maiin min ngur min ngur, Khawpui chhûngah an vâk vêl ṭhîn. Min vau nasatzia hi ngai teh, An hmuite chu khandaih hriam tak ang hi a ni, “Tu nge hria ang?” an ti. Lalpa, nang chuan i nuihzat ang; Hnam tinrêng hi i nuihzatbûr bawk ang. Min tichaktu, ka thlîr reng che, Min hum ṭhîntu Pathian i ni si a. Ka chunga ngilnei ṭhîn Pathianin min lo hmuak ang a, Min dotute chau hmêl min entîr ang. Aw Pathian, hêngho hi thah zawng that suh la, Ka mite hian an theihnghilh dah ang e, Vahvaihtîr la, i chaknain titlâwm dêr rawh, Lalpa, kan phaw i ni. An ka chu sualin a khat a, An thu sawi pawh sual hlîr a ni. An chapona chhiat phah rawh se, ânchhe lawha dâwt sawi an chîng êm mai. Thinrimin tiboral la, ral vek rawh se, Jakoba chungah chuan Pathianin ro a rêl tih Kâwlkil thlengin hre vek rawh se. Tlaiah an lo pung khâwm leh ṭhîn, Ui ang maiin min ngur min ngur, Khawpui chhûngah an vâk vêl ṭhîn. Ei tûr zawngin an vâk ruai a, Kham tâwk an ei hma chu an vâk zankhua ta ṭhîn. Kei chuan i chakzia ka hril ang a, Zîng tak takah i ngilneihzia ka hril bawk ang, Ka tân mangan nia kulhpui i ni. Min tichaktu, zaiin ka fak ang che, Mi khawngaihtu chung Pathian hi Ka tân kulhbîng sâng chu a ni. Aw Pathian, min thlauthlâka, Min tihdarh zawh tâk hi; I thinur hle na a, kan lam lo hawi leh teh. Ram chu i sâwi nghîng a, a phel tâk hi, A chhe laite chu thawm la, A tlu mai dâwn alâwm. I mite hi thil khirh tak i tuartîr a, Pai pai khawpin uain min intîr hi. Nangmah ṭihtute chu an inhâwr khâwm theih nân, Thal kâptute lakah flag pe ang che. I chaknain min rawn chhan la, Kan dîlna hi lo ngaithla teh, I mi duh takte hi an him theih nân. A hmun thianghlim aṭangin Pathianin thu a sawi: “Sekem khua chu ka sem darh lêng ang a, Sukot ruam chu ka ṭhen darh vek bawk ang. Gilead leh Manase ram chu ka ta a ni, Efraim ram pawh ka inhumna lukhum a ni a, Judai ram lah ka laltiang a ni si. Moab ram chu ka insilna chawhtawlh a ni a, Ka ta a nih hriat nân, Edom ram chu ka ta a ni tih hriat nân, Ka pheikhawkin ka vawm ang, tiin. Ka chungah hian Filistia mite chu lâwmin an au ang maw?” Tu nge kulh nei khuaah mi hruai anga, Edom ramah min kalpui ang? Aw Pathian, min thlauthla ta em ni? Kan sipaite zîngah, aw Pathian, i tel ve tâk loh hi? Hmêlma lakah min ṭanpui teh, Mihring ṭanpuina zawng engmahlo mai a ni. Pathian zârah huai takin kan che ang, Kan hmêlmate a chîl hrep ang. Aw Pathian, ka au thâwmhi ngaithla la, Ka ṭawngṭaina ngaihven ang che. Hla tak aṭangin mangang takin ka auh che hi, Ka kai phâk loh lungpuiah chuan min hlâng ang che. Nang chu ka tân himna i ni, Hmêlma laka kulhbîng sâng nghet tak chu. I puan inah ka awm kumkhua ang a, I thlazâr hnuaiah chuan ka tlulût ang. Aw Pathian, ka thutiamte i ngaithla a, I hming ṭihtute chan tûr chu min pe. Lal dam chhûng hi tihseisak la, Tu mawng bêngin dam bawk rawh se. Aw Pathian, i hmaah chuan lal reng sela, I ngilneih leh i rinawmnain vêng ṭhîn ang che. Tichuan, i hming ka fak kumkhua ang a, Ka thutiamte ni tin ka hlen bawk ang. Pathian chu ka nghâk fanfan ṭhîn a, Amah chauh hi min chhandamtu a ni. Amah chauh hi ka tân himna lungpui a ni, Min hum ṭhîntu a nih avângin ka nghîng mai mai lo vang. Bang âwn leh pal tlu ṭêp ang lek hi, Nangni hian tihchim tumin eng chen nge min beih dâwn? A dinhmun sâng ata hnuh thlâk zai in rêl a, Dâwt sawi in lâwmzâwng tak a ni. In ṭawng chhuak chu a thlum hle a, In rilruin ânchhia in lawh si. Pathian chu ka nghâk fan fan ṭhîn a, Amah chauh hi ka innghahna a ni. Amah chauh hi ka tân himna lungpui a ni, Min hum ṭhîntu a nih avângin ka nghîng mai mai lo vang. Pathian chu min chhantu leh min tiropuitu a ni, Ka lungpui nghet tak, ka belh Pathian a ni. A mite u, eng lai pawhin ani chu ring ula, Engkim hrilh ṭhîn rawh u, Kan belh Pathian a ni si a. Mihringte hi thaw ang lek an ni a, Milian, mitê, engmahlo mai an ni; Han bûk mah la, an zâng heih a, Boruak ang leka zâng an ni. Chuhhelh taka thil neih innghah nân hmang suh la, Mi thil chhuhsaka hausak tum hek suh. Hausa thûr thûr mah la, Rilru innghah nân chuan hmang suh. Vawi hnih vawi thum Pathianin a sawi ka hre tawh, Thiltihtheihna hi zawng Pathian ta chauh a ni. Lalpa, ngilneihna hi nangma ta chauh a ni, An thiltih ang zêla mite rûltu i ni. Aw Pathian, ka Pathian i ni a, Ṭhahnemngai takin ka zawng ka zawng che a, Ram ro, tâmlak, tui vânna hmunah hian Nangmah châkin ka tuihâl a, Ka taksa hian a ngai êm êm a che. I hmun thianghlimah chuan hmu che ila, I chakzia leh i ropuizia han hmu teh ila aw! I ngilneihna hi zawng nunna aiin a hlu, Ka hmuite hian a fak ang che. Ka dam chhûng zawngin ka fak ang che a, I hming lamin ka bân ka rawn phar ang. A sa tui tui tlân ang maiin ka tlai ang a, Hlim takin i fak hla ka sa ang. Khumlaizâwlah ka dâwn ṭhîn che a, Zânkhua khuain ka lam ṭhîn che. “Min ṭanpuitu nang hi ni la, I thla hnuai hlimah chuan zaiin, Nangmahah chuan bei tlat ila, I kut ding lamin min chelh tlat la,” ka ti fo ṭhîn. Min thah tuma mi zawngtute, Leilâwtah an tla ang a, Khandaiha sah hlum an ni ang a, Sihalte chuan an sa an tlân bawk ang. Lal chu, Pathianah chuan a hlim ang a, A hming chhâltute chuan Ani chu an chawimawi ang, Dâwt sawi chîngte ka erawh chu huhsak a ni ang. Ka mangang au hi, aw Pathian lo ngaithla la, Hmêlma hlauhawm lakah ka nun hi hum ang che. Mi sual pung khâwm lakah min thukru la, Thil dik lo titute kal khâwmho lakah chuan. Khandaih angin an lei an tât hriam a, Thu huatthlala tak chuan thal angin min tin. Mi pawi sawi lo kah hlum tumin an châng ru a, An kâp thut ṭhîn, hlauh rêng an nei lo ve. Thil sual ti tûrin an intêl ruh a, Thang kam rûk zai an rêl. “Tu nge hmu ang?” an ti. Thil sual an rawt chhuak a, “Hmuh chhuah rual loh kan rawt tâk hi,” an ti. An ngaihtuahna chu a thûk a ni. Pathianin a kâp ve thung ang a, An tlu nghâl phung ang. An thu sawi ngei chu an chhiat phah ang a, A hmu apiangte chuan an lu an thin khum ang. Mi tinin an hlau vang a, “Pathian tih a ni,” an ti ang a, A hna thawhte an hrethiam ang. Mi dikte chu Lalpa -ah chuan an lâwm ang a, Amahah chuan an tlulût ang, Mi ngîlte chuan amah an chhuang bawk ang. Aw Pathian, Zion-ah chuan fak tûr i ni, Thutiamte pawh i tân hlen tûr a ni. Ṭawngṭai ngaithlatu i ni a, Mi tinrêng i hnênah an lo kal ang. Kan sualna chu sawi sên a ni lo va, Nang chuan kan bawhchhiatnate i ngaidam ṭhîn. I chênnaa awm ve tûra i thlan, I kianga awm tûra i tihte chu an nihlawh e. I ina thil ṭhate chênin kan tlai ang a, I tempul thianghlima i malsâwmnate chuan. Min chhandamtu Pathian, Dik tak leh mak taka thil tiin min chhâng a, Khawvêl pum puia mi leh tuifinriat râl hla taka Awmte pawh hian, an ring ta che. I chaknain tlângte i hûng mup a, I thiltihtheihzia i lantîr hi. Tuipui rûm hum hum te, Tuifâwn ri hlup hlup te, Mipui sa mur mur te i tidai a, Hmun hla taka awmte pawhin I thil tih makte chu mak an ti a, Zîng leh tlai lo thleng chuan lâwmna a rawn thlen ṭhîn. Lei hi i ngaihsak a, ruahtuiin i châwm a, Nasa takin i titui a, Luikawrte chu tuiin i tikhat a, Tichuan, buh hmun atân lei chu i buatsaih ṭhîn. Lei rih thlûr chu tui i leih a, A pâwng laite a tla muk a, Ruahtuiin a tinêm a, Thlai thar i chawrtîr ṭhîn. Kum a lo vei chuan a tawntawin thlai i thartîr a, I kalna apiangah chuan a awm rei rui ṭhîn. Thlalêr ram rovahte hnim a duah hluah hluah a, Mualte pawh chu a hring dup mai. Phûlahte chuan ran an tla noh noh va, Ruamahte chuan buh hlîr a tlim hmur mai, Hlima auvin hla an sa. Khawvêl pum puia chêng zawng zawngte u, Pathian chu fak chiam rawh u. A hming ropui tak hi fak ula, Ropui takin chawimawi rawh u. “I thiltihte a va mak êm! I chak êm avângin hmêlmate chu an kimki a, Mi zawng zawngin chibai an bûk a che. I fakna hla sa-in I hming an fak,” Pathian hnênah ti rawh u. Lo kal ula, Pathian thiltihte hi han en teh u, Mihring zînga a thil tih mak râpthlâk tak hi. Tuipui thûk chu leichâr a chantîr a, Lui chu kêin an kal kai ta. A thiltih avângin, tah chuan kan hlim êm êm a ni. A chaknain ro a rêl reng a, Hnamte a enthla reng a ni. Luhlulte chu lo induh mai suh se. Mi zawng zawngte u, kan Pathian hi fak rawh u, Hriat thamin in awte chhuah rawh u. Dam takin min awmtîr a, Kan tlûkchhiat lah a phal hek lo. Aw Pathian, nang chuan min enfiah a, Tangkarua meia an fiah angin Nang chuan min fiah a ni. Thangah min awhtîr a, Manganna chuan min delh ta a. Kan lu chungah mi an chuang a, Mei leh tui lian kan pal tlang bawk, Mahse, hmun chênghnâwngah min dah tâk hi. I inah chuan hâlral thilhlan ka rawn keng ang a, Ka thutiam pawh ka hlen ngei ang. Ka sawi tawh kha ka rawn ti ang, Mangan laia ka sawi ang khân. Ran châwm thau hâlral ka rawn hlân ang che a, Berâm hâl rimtui khute nên, Bâwngpa leh kêlchalte ka hlân bawk ang. Pathian ṭihtute u, lo kal ula, ngaithla teh u, A thil min tihsak chu ka hril dâwn e. Ani chu ka au va, Ka leiah hian fak hla a khat. Ka thinlunga sualna khawi ka nih chuan Lalpan ka thu a ngaithla lo vang. Pathian chuan ka thu a ngaithla ngei asin, Ka dîlna chu a lo ngaihven tak tak a ni. Pathian chu fakin awm rawh se, Ani chuan ka ṭawngṭaina a hlawhchhamtîr lo va, Ka tân a ngilneihna a dai hek lo. Pathian chu kan chungah ngilneiin Mal min sâwm sela, A hmêl pawh chu kan chungah lo êng rawh se. I duhzâwng chu khawvêlin a hriata, Hnam tinrêngin i chhandamna an hmuh theih nân. Aw Pathian, miten fak che sela, Mi tinrêngin fak che rawh se. Hnam tin hlima lâwmin au se, Hnam tinrêng chungthu chu dik taka rêlsakin, Mi tin i kaihruai si ṭhîn a. Aw Pathian, mi tinin fak che rawh se, Mi tinrêngin fak che rawh se. Leiah hian thlai lo tharin, Pathian, kan Pathian chuan mal min sâwm rawh se. Pathian chuan mal min sâwm sela, khawvêl pum puia mite hian, Pathian chu ṭih rawh se. Pathian lo thawk sela, hmêlmate darh rawh se, A hmaah chuan amah hawtute chu tlânchhe rawh se. Meikhu a zâm darh ang hian lên darh ang che, Mei lum bula khawihnûn a tui ang hian, Pathian hmaah mi sualte chu tui ral rawh se. Mi dikte erawh chu Pathian hmaah hlimin an lâwm ṭhîn a, Hlim takin an au chêl chûl ṭhîn. Pathian hnênah hla sa ula, A hming fakin zai ula, Chhûm chunga chuanga tân kawng buatsaih rawh u; A hming chu Lalpa a ni, Amah chu fak rawh u. Hmun thianghlima chêng kan Pathian chu, Fahrahte tân Pa a ni a, Hmeithaite ngaihtuahtu a ni. Mi tlahlangte chu chhûngkua a dinsak a, Tângte a hruai chhuak a, an hamṭha ta, Luhlulte erawh chu ram rovah a awmtîr ta. Aw Pathian, i mite hma hruaia, Thlalêr rama i kal lai khân, Sinai tlâng Pathian hmaah, Lei a nghîng a, vân aṭangin ruah a lo sûr a, Ruahte i sûrtîr tlâwrh tlâwrh a, I ro, ram châr tawh chu i tiduah leh ta a. I mite chuan awmhmun an khuar ta a, Aw Pathian, i ṭhat avângin retheite i buatsaihsak a ni. Lalpan thu a pe a, Hmeichhe tam takin chanchin ṭha chu an puang a, “Lalte leh an sipai rualte chu An tlânchhe zêl mai e,” tiin. In nghâk hmeichhiate chuan râllâk sum an insem a, Mei vil mai maite pawhin, Ṭhuro lim, a thla tangkaruaa siam, A thla hmâwr rangkachaka tuam chu an chang. Engkimtitheian lalte a tihdarh khân Zalmon tlângah vûr a tlâktîr. Basan tlâng hi tlâng ropui tak a ni a, Chhîp sâng pui a nei thluah mai. I tlângchhîp aṭangte chuan A chên nâna Pathian duhthlan tlâng hi, Engtizia nge i er mai le? Kumkhuaa Lalpa chênna tûr asin. Pathian tawlailîr sâng tam tak nên, Sinai tlâng aṭangin a hmun thianghlimah chuan Lalpa chu a lo kal e. A tlâng sângah a lâwn chho va, Sal man a hruai duah duah bawk a, Mihringte thilpêk a lo dawng a, Hel hmangte pawhin an rawn hlân ve; Tah chuan Lalpa Pathian a chêng tawh ang. Lalpa chu fak rawh u, Min chhandamtu kan Pathian hian, Ni tin kan phurritte min chhâwk ṭhin hi. Kan Pathian hi chhandam ṭhîntu Pathian a ni a, Kan Lalpa hi Lalpa, thihna ata min humtu a ni e. Pathian chuan hmêlmate lu a vaw keh ang, Suahsual chîng lu chhîp bukte chu. “Basan ram aṭangin in hmêlmate ka rawn hruai ang a, Tuifinriat mawng ata ka rawn khâwm ang. An thisen chu in dai ang a, In uite chuan an duh tâwk an liak ang,” Lalpan a ti. Aw Pathian, i lo kal kha mi tinin an hmu che, A hmun thianghlim pana ka lal, Ka Pathian kal chu. Hla sa pâwlten hma an hruai a, A hnung lamah ṭingṭang tum miten an zui a, A laiah chuan nula rualin benchhek an bêng. “Pungkhâwm zîngah Pathian chu fak ula, Jakoba thlahte u, Lalpa chu fak rawh u,” an ti. A hnam tlêm ber Benjamin chu hmahruaitu an ni a, Juda hnam puipaten an dawt a, Zebulun leh Naftali hruaituten an zui leh a. Aw Pathian, kan tân thil mak min tihsak ṭhinna, I thiltihtheihna kha han tilang teh. Jerusalem khuaa i tempul aṭangin, Lalten thilpêk an rawn pêkna hmun aṭang khân. Phairuang hmuna awm ṭhîn sa hrâng Aigupta khu zilh la, Khu hnam, bâwng kawlh leh an note awm khâwm khuan, Tangka duhin mi an chîl a. Indo châkho khu ûm darh rawh. Aigupta ram aṭangte chuan palai an lo kal ang, Kus mite pawh Pathian hmaah an kut an rawn phar ang. Khawvêla lalramte u, Pathian hnênah hla sa ula, Lalpa fakna hla sa rawh u. Hmasânga awm, Vân chunga chuanga chu, Ring takin a au ve, ngaithla rawh u. Pathian thiltihtheihzia puang chhuak ula, A ropuina, Israel-te chungah a awm ṭhîn a. A chakna chu vânah a awm a ni. A hmun thianghlima awm Israel-te Pathian chu ṭih tûr a ni, A mite chu chakna leh thiltihtheihna a pe a, Pathian chu fak rawh u. Aw Pathian, min chhan chhuak rawh, Tuite chuan min chîm pil lek lek a; Chirhdûpah chuan ka tâng ta a, Rah chhan tûr rêng a awm si lo. Tui thûkah chuan ka awm ta a, A fâwnah chuan ka pil dâwn hi. Ṭanpui dîla ka auna lamah chuan ka chau ta a, Ka dangte pawh a ro zo va, Pathian thlîrin ka mit a vai zo ta. Chhan awm lova min hawtute chu Ka sam aiin an tam tâk hi. Mi chak pui puite chuan mi nuai bo an tum a, Dâwta min bei ṭhîntute chuan Ka rûk loh pawh min pêk kîrtîr a ni. Aw ka Pathian, ka âtzia hi i hre vek a, Ka thiam lohnate i lakah thup a ni hek lo. Lalpa, Engkim Lalpa, Keimah avângin nangmah nghâktute chu zak suh sela, Israel-te Pathian, Keimah avângin nangmah zawngtute chu mualpho suh se. Nangmah avângin hau ka tuar a, Men ngaihna pawh ka hre ta lo. Ka unaute tân mikhual ang ka ni a, Ka pianpuite tân pawh ram dang mi ang ka ni. I in tâna ka ṭhahnemngaihna chuan Mi luah tlat a, An chêksawlhna che chu Ka phur zêl ṭhîn. Ṭapa chaw ka nghei leh miten min hmusit zui a, Saiip puan ka sin leh min nuihzat a. Kulh kawngkhâra ṭhuten min rêl zui a, Zu ruite chuan hlaah min chham. Kei zawng, Lalpa, i hnênah chuan ka ṭawngṭai ang, Ṭha i tih hunah mi chhâng ang che. Aw Pathian, i ngilneihna nasa tak leh I chhandamna rin tlâk tak chuan min chhâng ang che. Chirhdûp ata min chhan chhuak la, Ka pil mai chu phal suh ang che. Min hawtute leh tui thûk tak ata chu Min chhan chhuak bawk ang che. Tui lian chu min len botîr suh la, Tui thûkah ka tlâk phal lo la, Thlân kotlângah min liamtîr suh ang che. Lalpa, i ngilneihna a ṭha si a, min chhâng ang che, I lainatna nasa tak chu ka chungah lantîr ang che. I chhiahhlawh lakah hian i hmêl thup suh, Ka mangang êm a ni, min chhâng thuai rawh. Lo kal hnai la, min tlan ang che, Hmêlma lakah min chhan chhuak rawh. Min chêksawlh dânte hi nangin i hre reng a, Ka zahzia te, ka mualpho dânte pawh Ka hmêlmate i hmu vek bawk. Min hmuhsitna chuan ka lung a tichhia a, Na ka ti êm êm a ni. Khawngaih ka beisei a, tu man min khawngaih lo, Thlamuantu tûr tu mah ka hmu zo lo. Ka ei tûrah tûr an pawlh a, Ka tuihâl chu zu ṭâwng min pe. An ruai ṭheh chu chhiat phah sela, An inremna ruai pawh chu an tân fal chang rawh se. An mitte chu tihdelsak la, Eng mah hmu thei suh se, An kâwngte chu khûr zawih zawih bawk rawh se. I thinurna chu an chungah leih la, I thinrimna chuan nangchîng rawh se. An chênna chu ram sela, An puan inah tu mah chêng hek suh se. Nangin vuak i tuartîrte chu an sawisa a, Hliam i tuartîrte natzia chu sawi nuam an ti. I hremna tûr chu tihpunsak la, I chhandamna chu chang ve suh se. Nunna bu ata chu an hming thai chhia la, Mi dikte zîngah chuan an hming ziak suh. Kei zawng na tuarin ka rûm hi, Aw Pathian, min chhan la, Hmun râlmuangah min hlâng ang che. Pathian hming chu fakin ka zai ang a, Lâwmthu hrilin ka chawimawi ang. Lalpa tân chuan ran hlan aiin chu chu a ṭha, Bâwngchal, ki leh tin sei tak nei hlan ai pawhin. Tihretheihten an hmuh hun chuan an lâwm ang a, Pathian zawngtu thinlung chu a nung thar ang. Retheite thu Lalpan a ngaithla a, A ni, saltângte chu a zahpui lo. Lei leh vânten amah fak rawh u, Tuifinriat leh a chhûnga chêngte chuan fak rawh u. Pathian chuan Zion khua chu a hum ang a, Judai ram khuate chu a din leh ang. A mite chuan an luah ang a, Ram chu an nei tawh ang. A chhiahhlawh thlahte chuan an rochung ang a, A hming ngainatute chu tah chuan an chêng bawk ang. Aw Pathian, min chhan chhuak thuai la, Lalpa, min rawn ṭanpui ang che. Min thah tumtute chu mualphovin mangang sela, Ka chhiatna chunga lâwmte chu Zak takin tlânchhe rawh se. “Chei! Chei!” min tihkhumtute chu Zak tak maiin tlânchhe rawh se. Nangmah zawngtu zawng zawngte chu Hlimin au dur dur rawh se. I chhandamna ngaitute chuan “Pathian chawimawi rawh u,” ti fo rawh se. Kei pachhia leh rethei tak hi, Aw Pathian, min rawn pan thuai ang che. Min puitu leh chhandamtu i ni, Lalpa, muangchâng lul suh ang che. Lalpa, i hnênah chuan ka lo tlulût ta a, Engtikah mah mualpho takin min awmtîr suh ang che. Mi fel i ni a, min chhan chhuak la, min hum ang che, I beng chhi la, min chhandam rawh. Ka awm nân lungpui nghet ni la, I thu angin lo kal ngei rawh. Aw ka Pathian, mi sual kut ata min chhan chhuak la, Mi suaksual leh mi nunrâwng kut ata chu. Lalpa, nang chu ka thlîr ber i ni ṭhîn a, Lalpa, ka tleirâwl chhuah ata ka ring che a ni. Ka pian tirh aṭangin ka rinchhan ber i ni a, Ka nu pum chhûng ata min lachhuaktu i ni. Ka fak kumkhua ang che. Mi tam tak thlîr rawn ka ni a, Mahse, ka tân tlûkluhna nghet tak i ni. Eng lai pawhin ka fak fo ṭhîn che a, Ni tin ka chawimawi ṭhîn che a ni. Ka lo tar ta a, min hnâwl suh la, Ka lo chak lo ta a, min thlahthlam suh. Ka hmêlmaten ka chungthu an sawi a, Min vehtute an inrâwn khâwm. “Pathian pawhin a kalsan ta, I ûm ang u, kan man dâwn nia, Chhantu tûr rêng a nei lo ve,” an ti. Aw Pathian, min hlat lul suh, Aw ka Pathian, min rawn ṭanpui thuai rawh. Min beitute chu chauvin mualphovin mangang sela, Ka chhiatna tûr zawngtute chu Zakin mangang hle rawh se. Kei chuan nangmah chauh hi ka beisei i ni a, Ka fak deuh deuh vang che. I dikzia hi mi tin hnênah ka sawi ang a, Ka hril sêng lo nâng a, I chhandamna thu chu ka puang bawk ang. Lalpa, i ropuizia ka puang ang a, Lalpa, i dikzia chauh hi ka hril ang. Aw Pathian, ka tleirâwl chhuah ata min zirtîr a, Tûn thleng pawhin i thil mak tih ka hril zêl ṭhîn. Ka lo tarin ka lu a ṭuak ta a, Aw Pathian, min kalsan suh. I ropuizia leh i thiltihte hi, Ṭhangthar lo awm tûrte Ka hrilh hma chu min awmpui rawh. Aw Pathian, i dikna chuan vân khi a tawng, Thil ropui tak i tih ṭhin hi, Nangmah ang hi tu mah rêng an awm lo. Manganna leh thil ṭha lo tam tak min tuartîr a, Mahse, nangin min tiharh leh ṭhîn a, Khur thûk ata min la chhuak ta. Min chawisâng lehzual sauh ang a, Min thlamuan leh dâwn e. Perhkhuang tumin ka fak ang che a, I rinawmzia, aw ka Pathian, ka fak bawk ang. Israel Mi Thianghlima chu, ṭingṭang nên ka fak ang. Min chhandam avângin Ṭingṭang tuma lâwmin ka au chiam ang. I dikzia chu nilêngin ka sawi ang a, Mi tihchhiat tumtute an mualpho ta si a. Aw Pathian, i rorêl thiamna chu lal hi pe la, I dikna pawh pe bawk ang che. I mite chungthu hi fel taka a rêl theiha, Mi retheite ro pawh dik taka a rêl theih nân. Tlângten malsâwmna thlen sela, Mualten dikna thlen bawk rawh se. Mi retheite ro chu dik takin rêl sela, Pachhiate pawh chhan ṭhîn sela, Hnehchhiahtute erawh chu sawisa hrep rawh se. Ni leh thla khi a ên chhûng chu, Chhuan tam tak thlengin ṭih che rawh se. Hnim chunga ruahsûr ang ni se, Lei ro chunga ruahpuivânâwn a sûr ang hi. A dam chhûngin dikna hi lal sela, Thla khi a ên chhûng chu malsâwmna pung rawh se. A ram chuan tuifinriat râl kai sela, Khawchhak luipui aṭang khian kâwlkil khu thleng rawh se. Thlalêra chêngte chuan chibai rawn bûk sela, A hmêlmate a hmaah chuan bawkkhup rawh se. Tarsis lal leh thliarkâra lalte chuan, Lâwmman rawn hlân sela, Arab lal leh Seba lalte pawhin Thilpêk rawn keng rawh se. Lal zawng zawngte a hmaah kûn sela, Hnam tinrêngin a rawng rawn bâwl rawh se. Manganga aute chu a chhan ang a, Chhantu nei lo retheite pawh. Retheite leh pachhiate chu a khawngaih ang a, Mangangte nunna chu a humhim ang. Nêkchêpte leh râwng taka sawisakte a hum ang a, An nunna chu a tân a hlu a ni. Lal chu dam reng sela, Seba ram rangkachak rawn pe rawh se. Ṭawngṭaisak fo sela, Malsâwmna pawh dawng reng rawh se. Ram pum puiah a tawntawin buh hâwng sela, Lebanon tlânga thei a rah tup ṭhîn angin Tlâng chhîpahte rah tiar tuar bawk rawh se. Ram ṭhaa hnim a bit angin, Khuaahte chuan mi khat rawh se. Kumkhua pawhin a hming a dai lo vang, Ni khi a ên chhûng chu a hming thang zêl rawh se. Hnam tinrêngin a zâr zo se, Duhsak rawh se. Lalpa Pathian, Israel-te Pathian chu fak ula, Ani chauh hian a ni, hêng thil mak hi ti ṭhîn ni. A hming ropui tak chu chawimawi kumkhua ula, Lei pum pui hi a ropuina chuan khat rawh se. Amen, Amen. Jesaia fapa Davida ṭawngṭaina chu a tâwp ta. Israel-te chungah hian Pathian a lo ṭha ngei mai e, Thinlunga thianghlimte chungah chuan. Kei chuan ka ringhlel lek lek ṭhîn a, Ka tlu ṭhelh ṭhelh fo mai. Mi sualte vânneihzia ka han hmuh hian, Chapote chu ka awt hle ṭhîn. An thih pawhin na an tuar lo va, An thau mûm kûng bawk si. Mite angin an thawk rim ve lo va, Mi dang tuar ang hrehawm an tuar hek lo. An chapo êm êm a, An nun a râwng êm êm bawk. An thau avângin an mit a pâwng a, An duhsâm chuan chin lêm a nei hek lo. Mi dang an nuihzat a, thil sual an sawi ṭhîn a, Chapo takin mi dang an vau bet a. Vâna Pathian tlukin an insawi a, An thuin mihringte an hneh zêl a. Pathian mite meuh pawhin an lam an hawi a, An sawi apiang an awih zêl a. “Pathianin a hre lo vang, Chungnungberan a hmu hek lo vang,” an ti. Hei hi mi sualte awm dân chu a ni: An awm der der a, an hausa tulh tulh si. Ka lo invawng thianghlim thlâwn mai em ni? Thil sual eng mah ka khawih lo chung hian, Nilêngin ka tuar ṭhîn a, Tûk tina min zilh ṭhin hi? “An tih angin ka ti ve ang,” ti ila chuan, I fa, tûnlai mite hi ka bum a ni dâwn si. Hêng hi hriatthiam ka han tum ṭhîn a, Harsa ka ti ngei mai. Mahse, Pathian hmun thianghlima ka han luh chuan, An tâwp dân tûr ka hmu chiang ta. Hmun nâl takah i dah reng a lo ni a, Chhiatnaah chuan an tlulût ngei ngei dâwn. Mit khap kâr lek chhûngin an ral ang a, Râpthlâk takin an chhe vek ang. Zînga mumang ral ta ang hi an ni, Lalpa, nang meuh i lo thawh chuan, I tân hlimthla ang lek an ni. Ka lung a chhiat hlea, Ka thin a nat êm êm lai chuan, Ka rilru a buai a, ka hrethiam thei lo, I hmaah chuan ramsa ang mai ka ni. Mahse, i bulah chuan awm ka chuh tlat a, Ka kut ding lam hi min lo chelhsak ṭhîn. Nangin min fuihin, min kaihruai a, Nakinah chuan ropui takin min lo lâwm ang. Nang lo chu vânah khian tu nge ka neih? Leiah pawh hian nang lo chu tu mah duh ka nei lo ve. Ka taksa leh ka rilru hi a lo chau ṭhîn a, Mahse, Pathian chu ka tân lungpui nghet tak a ni, Ani chu eng lai pawhin ka awmna tûr a ni. Nangmah hlattute erawh chu an ral ang a, Nangmah tlânsantute chu i tiboral ang. Keia tân zawng Pathian hnaih hi a ṭha a ni, Lalpa Pathian chu tlûkluh nân ka hmang a, A thil mak tih zawng zawng hi ka hril zêl ang. Aw Pathian, engtizia nge min kalsan tâk daih a, I rama mite ngei chungah i thinur reng dâwn em ni? Hmasâng ata i mi tûra i neihho, I rochan, i tlan hnamte hi, I chênna ṭhîn Zion tlâng nên han hre reng ang che. A chhe rem rum tawh chu han tlawh la, Hmêlmate chuan i hmun thianghlim an tihchhiat zawh tâk hi. I mite punkhâwmnaah hmêlmate chu an haw haw dur dur a, An puanzârte chu an târ thluah mai. Ngawpui ṭhiat tûr ang maiin, An hreikawl chu an lek tâk hi. Thing suih mawi zawng zawngte, Hrei leh tubohvin an chhu chhe ta. I hmun thianghlim an hâl chim a, I chênna hmun chu an tibawrhbâng zo ta. Min tihdarh vek an rilrûk a, Kan ram chhûnga Pathian biakna hmun apiang chu, An hâl zêl mai. Kan hnam puanzâr târ hmuh tûr a awm lo va, Zâwlneite lah an awm tawh lo, Engtia rei nge hetia kan awm dâwn Hria pawh kan awm ta lo. Aw Pathian, hmêlmate hian eng chen nge an deu ang che? I hming an hmusit reng dâwn em ni? Engtizia nge i kut i lâk kîra, I kuangkuah tâk tlat le? Tiboral hlawm rawh. Aw Pathian, hmasâng ata kan Lal i ni, Leia i mite chhandam ṭhîntu i ni. Tuifinriat chu i chaknain i tiṭhen a, Tuipui chhûnga rûlpui lu chu i tikeh ta, Leviathan lu i chhu keh bawk. Thlalêra chêngte ei atân a sa i pe. Tuihna i chhun chhuak a, a luankawr i siam a, Luipui luang laite chu i tikang bawk. Chhûn leh zân hi i ta a ni a, Êntu leh ni te khi i dah a ni. Leilung ramri i kham chhuak a, Nipui leh thlasik hi i siam a ni. Lalpa, hmêlmate deuna hi hre reng ang che, Hnam â-te chuan i hming an sawichhiat hi. Sakawlhho kutah chuan i mite hi pe suh ang che, I mi, retheite hi theihnghilh reng suh. I thuthlung kha ngai pawimawh la, Ram chhûnga hmun thim laite chu Nunrâwnnain a khah tâk hi. Hnehchhiahte chu mualpho takin awmtîr suh la, Pachhiate leh retheite chuan i hming hi fak rawh se. Aw Pathian, lo thawk chhuak la, I thu han kengkawh teh, Mi â-te chuan ni tin an deu che hi hre reng ang che. I hmêlmate thâwm hi theihnghilh suh la, Nangmah beitute au thâwm chu a rîk hluah hluah reng hi. Aw Pathian, lâwmthu kanhrilh a che, I lo hnaih avângin lâwmthu kan hrilh a che. I thiltih ropui takte chu kan hril ṭhîn e. “A hun ka ruatah chuan Dik takin ro ka rawn rêl ang, Lei leh a chhûnga awmte sîksawi mah se, Kei hian a innghahna ka phûm a ni,” Lalpan a ti. “Chapote u, inchhuang suh u, Mi sualte u, inluling sú. Vâna awma lakah indahsâng lo ula, Dâk âwr chungin ṭawng thâwr thâwr hek suh u,” ka ti. Chhak leh thlang aṭangin emaw, Chhim leh hmâr aṭangin emaw, Rorêlna hi a lo thleng si lo va. Rorêltu chu Pathian a ni: Ṭhenkhat a titlâwm a, ṭhenkhat a chawimawi ṭhîn. Lalpan a thinurna no chu a keng reng a, Uain chi tinrêng chawhpawlha khat a ni, a phûl pâwng thûr mai, Chu chu a bun chhuak a, Mi sualte chuan an in ta a, A mawngnawi lam an lem zo vang. Kei chuan chatuanin ka chawimawi ang a, Jakoba Pathian chu fakin ka zai ang. Mi sual thiltihtheihna a tichhia ang a, Mi dik thiltihtheihna erawh chu a pung zêl ang. Judai ram chuan Pathian an hria a, Israel-te chuan a hming an chawimawi ṭhîn. Jerusalem-ah chuan a awm a, Zion-ah chuan a chêng a ni. Tah chuan hmêlma thalte leh, An phaw leh khandaihte, An râlthuamte a tihchhiatsak a. Aw Pathian, i ropui e, Hmêlma i hnehna tlâng ata i lo haw chu i ropui ngei mai e. An mi huaite râlthuam an hlihsak vek a, An thal ta rem rum mai! Mi chak tu mah kut lek thei an awm ta lo. Jakoba Pathian, nangin i han hau chuan, Sakawr leh a chungchuangte chu an thal dêr mai. Nang zawng, i lo hlauhawm ngei mai, I thinurin i hmaah chuan tu nge ding ngam awm ang? Vân aṭanga i thu rêl chu i rawn puan chuan, Lei chu hlauvin a ngawi reng a; Khawvêla mi retheite chhan tûra, Rorêla i lo thawh chhuah lai khân. Mi kawlhsente chuan an la fak ngei ang che a, I thinurna pumpelhte chuan an bêl ang che, Lalpa, in Pathian hnêna in thutiam chu hlen ula, A vêla awmte chuan Hlauhtûra hi An thilpêkte rawn hlân rawh se. Hruaitute chapona a tihtâwpsak a, Lei lalte tân hlauhawm tak a ni. Aw chhuah meuhvin, Pathian chu ka ngên ang a, Ka au vang a, ka aw a lo hria ang. Mangan laiin Lalpa chu ka zawng a, Bân phar chungin ka ṭawngṭai zânkhua ṭhîn, Mahse, ka thla a muang thei lo. Pathian ka ngaihtuahin ka rûm ṭhîn a, Ka suangtuahin ka chau hnêp ṭhîn. Mi timuhîl thei lo va, Ka vei ka vei ṭhîn a, sawi tûr rêng ka nei lo. Hmânlai ka ngaihtuah a, Hun liam ta zawng zawng ka hre chhuak ṭhîn. Zânah ka ngaihtuah neuh neuh va, Ka dâwn vêl a, ka inkhâpthlu dêr ṭhîn. Lalpan min thlauhthla reng dâwn em ni le? Ka chungah hian a lâwm dâwn tawh lo em ni aw! Mi khawngaih tawh lovin, A thutiam kha a titâwp hlen dâwn em ni? Pathianin min lainatna kha a theihnghilhin, Thinur vângin a ngilneihna a titâwp dâwn em ni? Chungnungbera kut chuan ngai a ang ta lo hi, Ka thin tinatu ber chu a ni. Lalpa thiltihte chu ka hre reng ang a, Hmasânga thil mak tak tak a tihte pawh ka hre reng ang. I thiltih ṭhinte chu ka ngaihtuah fo vang a, Thil ropui tak i tihte pawh ka chhui bawk ang. Aw Pathian, i kawng chu a thianghlim a, Nangmah ang rênga ropui hi pathian an awm lo. Nang zawng thil mak ti ṭhîn Pathian i ni a, I chakzia hi hnam tin i hriattîr ṭhîn. I bân chak chuan i mite chu i tlan a, Jakoba leh Josefa thlahte chu. Aw Pathian, tuite chuan an hmuh che chuan, An hlau va, tui thûkte pawh an khûr. Chhûmin ruah a sûrtîr ṭhîn a, Vân aṭangin khawpui a ri dur dur bawk a, Kâwlphete chu a de zawr zawr a ni. Ṭhâwngaleivirah chuan khawpui chu a ri a, Khawvêl hi kâwlphe chuan a ên chhuak a, Lei chu a nghîng dawt dawt a ni. Tuipuiah chuan i kal ṭhîn a, Tuifinriat pawh i fang chhuak a, Mahse, i hniak hmuh tûr a awm si lo. Mosia leh Arona kut hmangin I mite chu berâm angin i kaihruai ṭhîn. Ka mite u, ka zirtîrna hi ngaithla ula, Ka thute hi lo ngaihven rawh u. Tehkhin thu ka sawi ang a, Hmasâng thu rilte chu ka phuh chhuak dâwn. Kan ngaihthlâk ṭhin, kan thu hriat te, Kan pi puten min hrilh ṭhin kha, An fate hnênah chuan kan zêp lo vang, Lalpa ropuina leh a chakna te, Thil mak a tih ṭhin thute kha kan hril zêl ang. Jakob-ho chu hriat tûr a siamsak a, Israel-ho tân dân chu a pe; An thlahte hrilh chhâwng zêl tûrin, kan pute chu thu a pe bawk; Ṭhang lo thar zêlte chuan an zir theiha, La piang tûrte pawhin an fa leh te An zirtîr chhâwn tûrin. Pathian chu an rina, a thiltihte theihnghilh lova, A thupêkte an zawm theih nân. An pi pute anga awm tûr an ni lo va, Luhlul chhuaha hel chîng, Thinlung nghet lo, Pathian laka Rinawm lo an nih ve loh nân. Efraim-ho chu thal nên an inthuam a, Inbeih ni chuan an tlânchhiat kha. Pathian thuthlung an zâwm lo va, A Dân angin an awm duh lo. A thiltihte an theihnghilh a, Thil mak a hmuhtîrte an hre reng lo. Aigupta ram Zoan phaiah An pute hmuh atân thil mak tak tak a ti. Tuipui a tiṭhen a, a kal kaitîr ta a, Tui chu bang ang maiin a dintîr kha. Chhûnah chhûmin a hruai ṭhîn a, Meialh êngin a hruai zankhua bawk ṭhîn. Thlalêrah khân lungpui a vaw khi a, Luipui tui anga tam tui a pe a. Lungpui ata tui a luan chhuahtîr chu Luipui angin a luang ta dur dur a. Chuti pawhin a lakah chuan an sual lui a, Thlalêrah khân Chungnungbera lakah an hel. Pathian an fiah ta ngat mai a, An ei châkzâwng an dîl. Pathian an sawi hnâwm a, “Thlalêr rovah Pathianin ruai a ṭheh thei dâwn em ni? Lungpui vuain tui a luan chhuahtîr ngei a, Chaw meuh min pe thei dâwn em ni? A mite hi sa a pe thei ang emaw chu!” an ti. Lalpan a han hriat chuan a thinur a, Jakoba chungah chuan mei a thawh a, Israela chungah chuan a thinur chu a na ta hle a ni. Pathian an ring lo va, A chhan theiin an ring hek lo. Mahse, chung lam vân khi thu a pe a, Vân kawngkhârte a hawng a, An ei atân mana a sûrtîr a, Vân chaw a pe ta a. Mihring mai chuan vântirhkohte chaw an ei ta a, Hnianghnar taka ei tûr a pe a ni. Khawchhak ata vâna thli a tlehtîr a, A thiltihtheihnain chhim thli a hâwntîr bawk. Vaivut angin sa a sûrtîr a, Tuifinriat ṭiau anga tam sava a pe. An bûk tualah a lo tla a, An chênna bûk bul maiah chuan. Duh tâwkin an ei a, an tlai hle a, An châk ngei chu a pe a ni. Sa ṭhial ṭawn ṭawn chungin Phunnawi an bâng chuang lo. Pathian an chungah chuan a thinur a, An ṭhalaite a thahsak a, Israel tlangvâl chhuanvâwrte chu an thi zo ta. Chuti pawhin an sual lui zêl a, A thil mak tih an hmu na a, amah an ring duh chuang lo. An dam chhûng nite chu ho takin a tiral a, An dam chhûng kumte pawh râpthlâk takin a liam. A thah hnu chuan amah an zawng ṭan leh ta a, Sima ṭhahnemngaiin Pathian lam an hawi ta. An himna lungpui chu Pathian a nih an hre chhuak a, Anmahni tlantu chu Chungnungbera a ni. Mahse, an hmuiin an bum a, An leiin dâwt an hrilh bawk si. An thinlung chu a nghet lo va. A thuthlungah an rinawm bawk hek lo. Ani lah chuan a khawngaih a, An bawhchhiatna a ngaidam a, a tiboral lo, A thinur chu a insûm fo ṭhîn a, A thin thawk chu a che duh mai ngai lo. Mihring chak lo an nih a hre reng a, Thli tleh liam ang lek hi an ni si a. Thlalêrah khân an hel fo va, Ram rovah khân a thin an va tina zing em! Pathian an fiah an fiah mai a, Israel-te Mi Thianghlima chu an timangang. A thiltihtheihzia kha an hre reng duh lo va, An hmêlmate laka a chhan laite kha an hre duh bawk hek lo. Aigupta ram Zoan phaia A thil mak tih ropui tak kha an hre reng lo. An luite chu thisenah a chantîr a, Lui tui tu man an in thei lo. Thosi a puantîr a, a seh nek a, Chungu a tipung a, an ramah chuan a khat. An thlaite chu khau rual a eitîr a, An hnathawh rah a ngêt zo bawk. An grep hruite rialin a chhu chat a, An theipui kûngte chu vûrin a hmet hlum bawk. An rante chu rialin a chhu hlum a, An ran rualte ṭêkin a dêng hlum bawk. An chungah chuan a thinurna râpthlâk tak chu A leihbua a, a sawisa ta nek a, Chûng chu an chhiatna thlen tûra a tirh an ni. A thinur hrîkthlâk nân an nun a zuah lo va, Hripui a lêntîr kha. Aigupta mite fa tîr chu a that vek a, An in chhûnga sei lian an vânglai fate chu. A mite chu berâm angin a hruai chhuak a, Thlalêrah chuan a kalpui ta. A hualhim a, hlauh rêng an nei lo va, An hmêlmate erawh chu tuiin a chîm pil ta. A ram thianghlimah chuan a hruai thleng a, He tlângram, a kut ngeia a lâkah hian. An hmaah chuan hnam dangte chu a hnawt chhuak a, Israel-te neih atân an ram chu a sem a, An inte chu an luah ta a. Pathian, Chungnungbera an fiah leh a, an hel ta a, A thu hriattîr an zâwm duh lo. An hawi kîr a, an pute ang bawkin vervêk takin an khawsa a, Thalngul kawi ang an ni, rin tlâk an ni ta lo. Hmunsâng an siamte chuan an tithinur ta a, An milem chherte chuan a thin an titâwt. Chûng chu a han hmuhin Pathian a thinur a, Israel-te chu a ten ta êm êm a. Silo hmuna a chênna ṭhin chu a rauhsan ta a, Mihring zînga a chênna in ṭhîn chu. A chakna leh a ropuizia lanna Thuthlung Bâwm chu, Hmêlmate a mantîr a. A mite chu khandaihin a sâmtîr a, A rochante chungah a thinur a ni. Tlangvâlte chu an kâng hlum zo va, Nulate chuan pasal tûr an nei lo. Puithiamte pawh khandaihin an that a, An nupuiten an ṭah ngam lo. Mi chak, zu rui muhîl anga, Ngawi renga a awm chu a lo harh a. Hmêlmate chu a ûm lêt a, A timualpho ta vek a ni. Josefa thlahte chu a hnâwl ta a, Efraim hnamte chu a thlang ta lo, Juda hnam chu a thlang ta a, A ngaihnat tak Zion tlâng nên. Vâna a chênna ang hmun thianghlim chu a sa ta a, Nghet taka leia hûn angin Kumkhuaa awm tûrin a hûng nghet ta. A chhiahhlawh Davida chu a thlang ta a, Ran rual vêng lai a la chhuak a. Berâm no hruai a enkawl lai chu, A rochan Israel-te leh Jakob-ho châwmtu atân a ruat ta a. Theihtâwp chhuahin a enkawl a, Thiam takin a kaihruai ta a ni. Aw Pathian, hnam dangini ram ro an rûn a, I tempul thianghlim pawh an tihbawrhbân tâk hi. Jerusalem khua chu a chim rem rum ta mai! I chhiahhlawhte ruang chu Mulukawlhte eiah an hnutchhiah a, I tâna inserhte sa pawh ramsate tlan atân. I mite thisen chu tui ang maiin an luantîr a, Jerusalem khawlaiah chuan a luang zuih a, Phûmtu tu mah an awm lo ve. Kan bula awmte chuan min diriam hle a, Kan vêla awmte chuan min nuihzatin min hmusit a. Lalpa, eng chen nge maw i thinur anga, I thinrim chu mei anga sa a nih reng dâwn? I thinur chu nangmah hre lo hnamte chungah, I hming lam lohna ramahte chuan leih rawh. Jakoba chhûngte chu an that zo va, An khuate chu an tiram zo ta. Kan pute sual mawh min phurhtîr suh la, I ngilneihzia han lantîr thuai ang che. Kan chan a chauh tak êm hi le. Min chhandamtu Pathian, min rawn pui la, I hming ropui avângin min chhandam la, I hming avângin min ngaidam rawh. Hnam dangte chuan engtizia nge “I Pathian chu khawiah nge?” min tih chhên le? I chhiahhlawhte thisen chhuahtu hnam chungah chuan, Kan hmuh ngeiah phuba han la ang che. Lung in tângte rûm chu i hnên lo thleng sela, I chakna ropui chuan, thi tûra tihte chu chhan chhuak ang che. Lalpa, kan chhehvêla chêngten an chêksawlhna che chu, A lêt sarih ngawtin rûl rawh. Keini hi zawng i ta kan ni, i rama tla i berâm rualte chu, Lâwmthu kan hrilh kumkhua ang che, Eng lai pawhin kan fak ang che. Israel-te vêngtu, i beng lo chhi ang che, Berâm anga Josefa hruai ṭhîntu, lo ngaithla teh, Cherub-ho chunga ṭhu i hmêl êng chu: Efraim te, Benjamin te, Manase hnamte chungah chuan han tilang la, I chakzia chu han lantîr rawh. Aw Pathian, min din leh la, I hmêl êng chu min hmuhtîr rawh. Tichuan, kan him dâwn nia. Engkim Lalpa, Pathian, eng chen nge I mite ṭawngṭaina hi i thinursan dâwn le? Chaw atân mittui i rintîr a, No lian puiin i intîr hi. Kan vêla awmte chuan neih tumin min chuh a, Kan hmêlmaten min nuihzat hi. Engkim Pathian, min din leh la, I hmêl êng chu min hmuhtîr rawh, Tichuan, kan him dâwn nia. Aigupta rama mi grep hrui bul i pawt chhuak a, Hnam dangte ûm chhuakin i phun ta a; A vêlte chu i thian fai a, Nghet takin zung a thlâk ta a, Ram pum a awh ta e. Tlângte a tihlim duai a, Sidar lian pui puiah a zâm lûk a, Khawthlang tuipui a zâm kai a, Khawchhak luipui thlengin a zâm ta a. Engtizia nge a hungna pal i ṭhiah tâka, Veivâkte chuan a rah an lawh theih tâk hi le? Sanghalte chuan an nawr chhum a, Ramsate chuan an tlân. Engkim Pathian, kan lam lo hawi leh la, Vân aṭanga rawn thlîrin min han en la, I grep hrui hi han ngaihven teh. I kut ngeia i phun, I tân i chawrtîr hluah hluah kha a ni si a. Hmêlmaten min hâl a, min tan chhum a, I hmêl dur chuan tiboral rawh. I mi duhsaka chungah chuan i kut nghat la, Mihring fapa, nangin i tihchaka chungah ngei chuan. Tichuan, kan hawikîrsan lo vang che, Min tiharh la, i hming kan lam dâwn nia. Lalpa, Engkim Lalpa, min din leh la, I hmêl êng chu min hmuhtîr rawh. Tichuan, kan him dâwn nia. Min tichaktu Pathian fakin in aw chhuah rawh u, Jakoba Pathian chu fakin zai rawh u. Hla sa ula, benchhek kha khâwng rawh u, Perhkhuang leh ṭingṭang rimawite rem bawk rawh u. Thla tharah chuan tawtawrâwt hâm ula, Kût ni, thlahleinga zânah chuan. Hei hi Israel ramah chuan tih ṭhin tûr a ni, Jakoba Pathian thupêk a ni. Josefa thlahte tih tûra ruat a ni. Aigupta ram a fan lai khân, “Ka la hriat ngai lohte aw ka ngaithla a, An rit phurhte ka lâk kiansak a, An thil chawina kho pawh ka paihsak kha. Mangangin min au va, ka chhâng ta a, Khawpui rîkna, ka bihrûkna hmun aṭang ngei chuan. Meriba tui bula ka fiah che u kha, Ka mite u, ka zilhna hi ngaithla ula, Aw Israel, ka thu hi ngai ula ka va ti êm: Ram dang pathian be suh ula, Hnam dang pathian hmaah kûn hek suh u. Kei hi Lalpa, in Pathian chu ka ni, Aigupta ram ata hruai chhuaktu che u ka ni. In kâ kha âng rawh u, ka châwm dâwn a che u. Nimahsela, ka mite chuan ka aw an hre duh lo, Israel chuan engah mah min ngai ta lo. An luhlul êm êm a, An thu thuin ka awmtîr ta. Ka mite chuan ka thu hi ngaithlain Israel-te chuan ka kawng hi zawh teh sela aw! An dote chu ka han titlâwm ang a, An hmêlmate chungah ka kut ka thlâk thuai tûr. A hmaah chuan an dawl ang a, Lalpa hawtute chu An chan a chau hlen ang. Buh tui berin ka châwm ang a, Lungpuia khawizu-in ka titlai tûr che u a ni.” Pathian chu pathianho zîngah a ṭhu a, An zîngah chuan ro a han rêl a. ‘Dik lo takin eng chen nge ro in rêl anga, Mi sualte chu in duhsak zêl dâwn le? Retheite leh fahrahte chu chhan ṭhîn ula, Pachhiate leh baihvaite chungah pawh ṭhat chhuah rawh u. Pachhiate leh vâkvaite chu hum ṭhîn ula, Mi sualte kut ata chhan chhuak rawh u.’ Eng mah an hre lo va, eng mah an ngaihtuah bawk hek lo, Thimah an tei mai mai a, khawvêl innghahna ber dikna a bo zo ta e. Chungnungbera fate niin Pathian fate in ni emaw ka ti a, Mihring zînga milian, mitê ang lek Thi tûra ruat in ni si a.’ Aw Pathian, lo thawk chhuak la, Lei chungah hian ro han rêl rawh, Hnam zawng zawng hi i ta an ni. Aw Pathian, ngawi reng teh suh, Reh reng lo la; aw Pathian, awm hle hle suh. I hmêlmate an inhrosa a ni, Nangmah hawtute chu an dâk hrâw hrâw ta mai. I mite chu vervêk taka beih dân tûr te, I duhsakte chungchâng phiarin an inrâwn a, ‘Hawh u, he hnam hi i nuai bo vang, Israel hming hi bo hlen rawh se,’ an ti. An inthurual ta a, Nangmah bei tûr chein thu an thlung ta, Edom mi te, Ismael mi te, Moab leh Hagar mi te, Gebal leh Amon mi te, Amalek leh Filistia-ho, Tura khaw mi te nên an inthurual. Asuria pawh an zîngah chuan a tel ve, Lota thlahte ṭanpui tûrin. Midian chunga i tih ang khân, Kison luia Sisera leh Jabina ang khân ti la, Endor khuaa i tihhlumte ang khân, An ruang chu lei chungah ṭawih hlawm rawh se. An mi liante Oreba leh Zeeba angin siam la, An lalte chu Zeba leh Zalmuna angin. ‘Pathian ram duh lai chu I luahlân ang u,’ an ti vei a. Aw ka Pathian, ṭhâwngaleivir lâktîr ang che, Thliin buhpâwl a len ang hi ni hlawm rawh se. Ramhnuai a kâng ang leh Tlâng hnim a kâng hluah hluah ang hian, Thlipuiin nuai nek la, I thli hrâng chuan tichiai rawh. An hmêlte chu sen awp awp khawpin tizak ang che, Lalpa, i hming an lam theih nân. Mualpho leh beidawngin awm kumkhua sela, Zak takin boral rawh se. I hming chu Lalpa a ni a, Nang chauh hi khawvêl pum puia Chungnungbera i nih hre rawh se. Engkim Lalpa, i chênna chu a va duhawm em! Lalpa, i tualzâwl hi ka ngai ṭhîn a, A ni, ka lung a lêng hle ṭhîn. Ka nun pum hi Pathian nung Fakin hlim takin a au va ni. I maichâm bulahte chuan chawngzawng pawhin bu chhehna tûr a hmu a, Vamûrte chuan an note dahna tûr bu an chhep bawk. Engkim Lalpa, ka lal leh ka Pathian. I ina chêngte chu an nihlawh e, An fak fo thei ṭhîn che a ni. I hnên ata chakna dawng ṭhînte chu an nihlawh e, Zion lamlian zawh châk ṭhînte chu. Baka ruam ro an kalna chu kal tlang mah se, Tui hna awmnaah a chantîr a, Ruah hmasa chu a tling lung ṭhîn. An kal chu an tha a zâng tawlh tawlh a, Zion-a Pathian hnên an thleng ngei ang. Lalpa, Engkim Pathian, ka dilna hi lo ngaithla la, Aw Jakoba Pathian, i beng lo chhi ang che. Aw Pathian, kan phaw, en teh, I hriakthiha hi duhsak ang che. I biak in tuala ni khat awm chu Hmun danga ni sângkhat awm aiin a ṭha zâwk. Kan Pathian in kawngkhâr vêngtu nih chu, Mi sual puan ina awm ai chuan ka thlang zâwk. Ka tân Lalpa hi ni leh phaw a ni, Aw Pathian, min khawngaih la, min chawimawi rawh. Lalpan a ṭhatna chu a ui lo vang, Dik taka ti ṭhînte lakah chuan. Engkim Lalpa, nangmah ringtute chu an nihlawh e. Lalpa, i ram i duhsak a, Jakoba chu i tihmuingîlleh ta a, I mite bawhchhiatna i hlîp a, An sual zawng zawng i ngaidam bawk. I thinurna i hnûk kîr a, I thinrim nasa tak chu i la kîr ta. Min chhandamtu Pathian, kan lam lo hawi leh la, Kan chunga i lungnihlohna chu tidai ang che. Kan chungah hian i thin a ur rengin, Rei tak i thin a rim zêl dâwn em ni? I mite hi i chungah kan hlim theih nân, Min tiharh leh tawh dâwn lâwm ni? Lalpa, i ngilneihna chu lantîr leh la, Min rawn chhandam ang che. Lalpa, Pathian chuan eng nge a sawi ka ngaithla teh ang, A mi, amah ngaihsaktute tân remthu a sawi a, A mi rinawm, thinlung taka amah pantute hnênah chuan. Amah ṭihtute chu a chhandam duh ngei ang, kan ramah hian a ropuina a chêng bawk ang. Ngilneihna leh rinawmna chu an awm dûn ang a, Dikna leh remna pawh an inkuah ang. Lei aṭangin rinawmna chu a chawr ang a, Vân aṭangin dikna a lo zâm thla bawk ang. Lalpa pawhin thil ṭha a pe ang a, Kan ramah hian buh leh thlaite a thar ṭeuh vang. Diknain a hma a hruai ang a, A kalna tûr kawng chu a buatsaih ang. Lalpa, i beng chhi la, min chhâng ang che, Rethei leh pachhe tak ka ni si a. I tân ka inpe a, min vêng ang che, I chhiahhlawh hi chhanhim la, ka rin Pathian i ni. Lalpa, min khawngaih rawh, Nilêngin ka auh che hi. I chhiahhlawh hi min tihlim la, Lalpa, i lamah ngawt ka lo hawi hi. Lalpa, nang chu i ṭha a, ngaihdam i peih reng a, I hming lamtu chungah chuan ngil i nei êm êm a ni. Lalpa, ka ṭawngṭaina i lo ngaithla ṭhîn a, Khawngaih dîla ka au i bengkhawn ṭhîn. Mangan laiin ka au che a, Min lo chhâng ṭhîn. Lalpa, nang ang Pathian an awm lo va, I thil tih ang tu man an ti thei lo. I siam hnam tinrêngte an lo kal dâwn, i hmaah an kûn ang, Lalpa, i hming an chawimawi ang. Nang hi i ropui a, thil mak tam tak i ti, Nangmah chauh hi Pathian i ni. Lalpa, i duhzâwng min zirtîr la, Rinawm takin ka awm dâwn nia, I hming ṭih reng tûrin thinlung thianghlim min pe ang che. Lalpa, ka Pathian, Ka theihtâwpin ka fak ang che, I hming ka chawimawi kumkhua ang. Min lainatna a nasa a, Seol-a chhuk tûr min chhan chhuah hi. Aw Pathian, mi chapoten min rawn bei a, Mi râwng pui pui, nangmah pawisa lote chuan Min thah an tum. Lalpa, nang chu Pathian ngilnei tak leh zahngai thei tak i ni, Thinnel, khawngaihna leh rinawmna ngah i ni. Ka lam hi lo hawi la, min khawngaih rawh. I chhiahhlawh hi i chakna pe ve la, I chhiahhlawhnu fapa hi chhandam ang che. Ka chungah i ṭhatzia han tilang la, Min hawtuten hmu se, zak hle rawh se, Min ṭanpuia min thlamuan ṭhîntu chu Lalpa, nang hi i ni. A tlâng thianghlimah chuan Lalpan khua a din a, Lalpan Jerusalem khawpui hi, Jakoba thlahte khua zawng zawng aiin a ngaina zâwk. Aw Pathian khawpui, i chanchin An sawi ropui hle a ni. ‘Min pawmtute zîngah Aigupta leh Babulon chu, Ka chhiar tel ang. Filistia leh Tura, Kus mite nên, Jerusalem-a piang zîngah ka chhiar tel ang.’ Zion hnênah chuan, ‘He mi pawh hi, saw mi pawh saw - heta piang a ni e,’ an ti ang a, Chungnungberan chu chu a nemnghet ang. Lalpa hming ziakna bu-ah chuan, ‘Hei pawh heta piang hi a ni,’ tiin a ziak lût ang. ‘Zion aṭang vek hian a ni Malsâwmna kan dawn ṭhin,’ tiin An zai ang a, an lâm bawk ang. Aw Lalpa, min chhandamtu Pathian, Chhûnah ka au che a, zânah ka rawn pan che. Ka ṭawngṭaina i hnên lo thleng sela, Ka mangang au lo bengkhawn teh. Thil ṭha lo hi ka ning ta e, Ka thi ṭhelh ṭhelh a ni. Thlân khura liam tûrte anga ngaih ka ni a, Chhan tlâk ni tawh lo ang ka ni. Mitthi zînga chhiar tel, thlâna zalh tawh, Mitthi ang mai ka ni. Chûng mite chu i hre tawh lo va, Ṭanpui phâk pawh an ni tawh lo. Khur thûk tak mawngah chuan min dah ta a, Hmun thim thûk takah chuan. I thinurna chuan min delh tlat a, Min vaw na êm êm a ni. Ka ṭhiante min lâk sawnsak daih a, An tân tenawm ka ni ta a, Min khuahkhirh tlat a, ka vâk chhuak thei lo. Ka tuar a na êm a, ka mit a vai zo va, Lalpa, ni tinin ka au che a, I lamah ka kut ka phar fo ṭhîn. Mitthite tân thil mak i tihsak ngai em ni? An lo thovin an fak dâwn che em ni? Thlâna zalh tawhte chuan i ngilneihzia an hril theiin, Chhiatna tâwk tawhte chuan i rinawmzia an puang thei dâwn em ni? Hmun thimah chuan i thiltih mak hmuh theih em ni? Hriat reng tawh lohte ramah chuan I dikzia hi hriat phâk em ni? Aw Lalpa, kei chuan ka au che a, Tûk tin ka ṭawngṭai ṭhîn. Lalpa, engati nge min thlauhthlâka, Ka lakah hian i hmêl i thup tâk hi? Ka tleirâwl chhuah ata hrehawm ka tuar reng a, Ka thi lek lek ṭhîn a, I ṭihbaiawmna chuan ka thauvah hian min man a. I thinur chuan min nuai ṭhîn a, Nangmah hlauvin ka chau chhe ta. Tui lian angin ni tin min chîm reng a, Min hual vêl tlat ṭhîn a. Ka ṭhian bul leh ka lainate min lâk sawnsak daih a, Thim hi ka ṭhian ber a ni ta. Lalpa, i ngilneihzia zaiin ka chawi ang a, I rinawmzia ka hril kumkhua bawk ang. I ngilneihna a hlun dâwn tih ka hria, I rinawmzia lah vân anga nghet a ni. ‘Ka mi thlan hnênah thu ka thlung a, Ka chhiahhlawh Davida hnênah thu ka tiam kha. A thlahte chu lal an ni zêl ang a, An thlah zêlte pawh chuan i lalṭhutthlêng an luah zêl ang.’ Lalpa, vânten i thil mak tih an aupui a, Mi thianghlimte pung khâwm zîngah i rinawmzia an fak. Lalpa, vânah nangmah tluk hi tu mah an awm lo va, Lalpa ang hi vân mite zîngah tu nge awm? Mi thianghlimte awm khâwm zîngah Pathian hlauhawm tak i ni, I bula awmte tân Pathian ṭihbaiawm tak i ni. Lalpa, Engkim Pathian, nang anga thiltithei tu nge awma, Lalpa, rinawmnaa khat tu dang nge awm? Tuifinriat so bulh bulh chungah ro i rêl a, A fâwnte chu i hau reh ṭhîn. Rahab chu i vua a, a thi dêr mai, I bân chakin hmêlmate chu i vai darh ta. Vân khi i ta a ni a, lei pawh hi i ta a ni, Lei leh a chhûnga awm zawng zawng hi i siam a ni. Chhim leh hmâr i siam a, Tabor leh Hermon tlâng i hming fakin an au. I bân tha chu a va chak êm! I vei lam pawh chak tak a ni, I ding lam chu a chak lehzual. Dik taka tih leh rorêlna fel hi I lalṭhutthlêng nghahchhan a ni. Ngilneihna leh rinawmnain hma i la ṭhîn. Lalpa, nangmah faka zai nachâng hriate chu an nihlawh e, I hmêl ênga lêng ṭhînte chu. Nilêngin i hming vângin an lâwm ṭhîn a, I dik êm avângin an hlim takmeuh ṭhîn a ni. Ropui taka hnehtîrtu i ni a, I duhsakna avângin an chak zâwk ṭhîn a ni. Kan phaw hi Lalpa ta a ni, Kan lal pawh hi Israel Mi Thianghlima ta a ni. Nangmah ngaihsaktu hnênah zêlin thu i sawi a, “Pasalṭha tân ṭanpuitu ka siamsak a, Mipui zînga ka duha chu ka chawisâng ta. Ka chhiahhlawh Davida ka chhar ta a, Hriak thianghlim chu ka thih ta e. Ka chaknain ka thuam ang a, Ka thiltihtheihna chuan a tichak ang. Hmêlmate chu a chungah an inlek ngam lo vang, Mi sualte chuan an timangang hek lo vang. A hmêlmate chu ka vaw nek ang a, A hawtute ka vuak chauhsak bawk ang. Ka ngilneihna leh rinawmna a chungah ka tilang ang a, Ka hming avângin hnehtu ka nihtîr ang. Tuifinriatah khuan thu a nei ang a, Luipui thleng khian a lal bawk ang. Ani chuan, ‘Ka Pa, ka Pathian i ni a, min humtu lungpui, Min chhandamtu i ni,’ min la ti ang. Keiin fa tîrah ka neih ang a, Khawvêla lal ropui berah ka siam bawk ang. A chungah ngil ka nei kumkhua ang a, Ka thuthlung pawh ka vawng tlat ang. A thlahte chu ka laltîr zêl ang a, A ram chu vân awm chhûng chuan a kin lo vang. A fate chuan ka Dân hi an pawisak lohva, Ka duh anga ro an rêl duh lohva, Ka thutak an ngaihnêpa, Ka thupêkte an awih loh chuan, An sual avângin tiangin ka vua ang a, An bawhchhiatna avângin ka sawisa ang. Mahse, ka ngilneihna a dai hlen chuang lo vang a, Ka rinawmzia a nêp chuang hek lo vang. Ka thuthlung chu ka bawhchhe lo vang a, Ka sawi tawh chu ka tidanglam hek lo vang. Ka hming chhâla ka tiam tawh ang khân, Davida chu ka thlahthlam ngai lo vang. A thlahte chu eng lai mahin an mang lo vang a, Ni khi a awm chhûng chu a ram ka tungding ang. Vâna thla a awm chhûng chu A ram a kin lo vang,” tiin. I hriakthiha chungah nang chu i thinur a, I hawisan a, i thlauhthla a. I chhiahhlawh hnêna i thuthlung chu i palzût a, A lallukhum leiah i paihsak ta. A khaw kulh bangte chu i ṭhiahsak a, A kulhbîng chu a chim ta a. A fang apiangte chuan an duh duh an la a, Khaw ṭhenawmte nuihzat a ni ta e. Amah dotute chu i tichak a, A hmêlma zawng zawng i tihlim ta. A khandaih chu i tibil a, Inbeihnaah a chak i phal hek lo. A ropuina i lâksak a, A lalṭhutthlêng leiah i paih thla dêr. A tlangvâl chhûng i tihtawisak lehnghal a, Zakin a kun tlawk tlawk a ni. Lalpa, eng chen nge i bihrûk reng dâwna, I thinur chu mei anga a alh dâwn le? Ka dam chhûng tawizia hi hre reng ang che, Mihringte hi thi mai theiin i siam si a. Mihring piang tawh tu nge thi lo tûr awm? Tu nge Seol pumpelh thei ang? Lalpa, tûn hma lama i ngilneihnate leh Davida hnêna rinawm i tiamte kha khaw nge ni ta? Lalpa, i chhiahhlawh an thamlohzia hi hre reng ang che. Mi tam takin min sawichhiat hi theihnghilh lul suh. Lalpa, i hmêlmaten i hriakthih hi an hmusit a, A kalna apiangah an nuihzat zui. Lalpa chu fak kumkhua rawh u; Amen, Amen. Hmasâng ata, Lalpa, Nang chu kan chênna in i ni. Tlângte a din chhuah hma, Lei leh khawvêl a pian hma daih tawh khân, Nang chu chatuan chatuana awm Pathian i ni. ‘Hringfate u, kîr tawh rawh u,’ i han tih chuan, Leiah an kîr mai ṭhîn. I ngaihah chuan kum sâng pawh hi Nimin ral ta ang chauh kha a ni a, Zân vên khat ang lek hi a ni. Tui lian angin i hnâwl liam a, Ṭhangkhat mu ang lek hi a ni. Zînga hnim chawr ang hi a ni. Zîngah a lo chawr a, a lo pâr a, An han sâm a, tlaiah a vuai mai ṭhîn. I thinurna chuan min tichau dêr a, I thin a rim avângin kan mangang chhe ṭhîn. Kan bawhchhiatnate chu i hmu vek a, Kan sual tih rûkte pawh i hmu thei reng a ni. Kan dam lai nite chu i thinurna avângin a tla thuai a, Kan dam chhûng kumte chu a thâmral ṭhîn. Kan dam chhûng chu kum sawmsarih emaw a ni a, A chak deuh chu kum sawmriat pawh an dam. Mahse, kan dam rei leh a hahthlâk thlâwn mai a, A ral thuai a, kan bo ta vang vang ṭhîn. I thinur natzia hi tu nge hre phâk? Nangmah ṭih tûr anga hlau che tu nge awm? Kan dam chhûng ni tlêmzia min zirtîr la, Kan lo fin zâwk theih nân. Lalpa, engtikah nge i lo lamlêt ang? I chhiahhlawh hi rawn hnêm ta che: I ngilneihna nasa tak chuan zîngah min titlai la, Kan dam chhûngin hlim takin kan zai tawh ang. Hrehawm leh thil ṭha lo min tuartîr chenin Min tihlim leh ang che. I chhiahhlawhten i thiltihte hmu sela, An fate chuan i ropuizia hmu bawk rawh se. Lalpa, kan Pathian mawizia hi kan chungah lang sela, Kan kut hnathawhte hi tinghet la, Kan kut hnathawhte hi malsâwm ang che. Chungnungbera thla hnuaia chênga, Engkimtitheia hlima awm chuan, “ Lalpa, ka tlûkluhna, ka himna kulhpui, Ka Pathian, ka rin chhan ber i ni,” a ti ngei ang. Thang ata chu a chhan chhuak ang che a, Hripui hlauhawm lakah a hum ang che. I chungah chuan thla a zâr ang a, A thla hnuaiah i tlulût ang, Rinawm takin a vêng ang che a, a hum ang che. Zâna thil hlauhawmte, Chhûna thal lêng ṭhînte i hlau lo vang. Thima hri lêng ṭhîn leh Chhûna lêng ṭhîn chhiatna i hlau hek lo vang. Sâng têl i sîrah an tluin I vêlah chuan sîng têl thal phung mah se, A khawih ve hauh lo vang che. I mit zawngin i hmu ngei ang, Mi sual chunga phuba lâk chu a hmuhin i hmu chauh vang. I tlûkluhna chu Lalpa a ni a, Chungnungbera bula chêng i nih hi. Thil ṭha lo chuan a nang lo vang che a, I awmnaah hri chhia a lo hnai lo vang. I kalna apianga vêng tûr chein Vântirhkohte chu a tîr ang a; An kutin an dâwm ang che a, Lungah i ke i chhuih lo vang. Sakeibaknei leh rûl i rap ang a, Sakeibaknei vânglai leh rûlngân i chîl bawk ang. Min ngainat êm avângin ka chhan ang che, Ka hming a pawm tâk avângin ka chawisâng ang. Min au vang a, ka lo chhâng ang, A mangan leh ka awmpui ang a, Ka chhan chhuak ang a, ka chawimawi ang. A duh chen chen a dam ka phal ang a, Ka chhandamna ka hmuhtîr ang. Lalpa hnêna lâwmthu hrilhi a va ṭha em! Aw Chungnungber, i hming faka zai te, Tûk tin i ngilneihzia hril te, Zâna i rinawmzia puan te, Ṭingṭang hrui sâwm nei leh perhkhuangte leh, Bengbung rimawite nêna fak che hi a va nuam êm! Lalpa, i thiltihin min tihlim a, I kut hnathawh lâwmin ka au. I thiltih chu, Lalpa, a va ropui tak êm! I ngaihtuahte chu a va thûk êm! Hêng hi mi nazawngin an man pha lo, Mi â-te hriat rual lah a ni hek lo. Mi suaksualte chu hnim angin an chawr hluah hluah a, Thil sual titute pawh an vul hle si ṭhin hi; Mahse, boral vang vang tûr an ni si. Nang erawh chu, Lalpa, Kumkhuaa chungnung ber i ni. Ngai teh, Lalpa, i hmêlmate, Nangmah dotute chu an boral ang; Thil sual titute pawh an darh vek ang. Sele pachal angin mi tichak a, Hriak thar min thih bawk a; Min châng rutute lah ka hmu thei zêl a, Mi sual, min beitute thâwm pawh ka hre thuai ṭhîn. Mi dikte chu tûmthing angin an duah ang a, Lebanon tlâng sidar angin an ṭhangduang ang. Lalpa ina phun, kan Pathian in tuala awm tate chu an chawr hluah hluah ang a, Upa hle mah sela, an rah thliah thluah ang a, An tuaiin an hring hluah ang. Min humtu Lalpa chu mi ngîl a ni a, Sualna rêng rêng a nei lo tih an hril ṭhîn ang. Lalpa chu Lalber a ni a, Ropuina leh chaknain ainthuam a, Khawvêl hi nghîng lo tûrin a hûng tlat bawk a ni. Hmasâng ata i lalṭhutthlêng chu a ding nghet êm êm a, Nang chu chatuana awm i ni. Lalpa, tuifinriat chu a lo fâwn a, A fâwnte chu a ri hlup hlup mai a, A inchhawk ulh ulh mai. Tuifâwn ri hum hum te, Tuifinriat fâwn inchhawk ulh ulhte ai hi chuan, Vân sânga awm Lalpa chu a ropui zâwk daih e. I thu hriattîrte chu a rin tlâk êm êm a, Aw Lalpa, kumkhua atân, I chênna leh thianghlimna hi a inmawi hle a ni. Lalpa, phuba latu Pathiani ni, Phuba latu Pathian, lo lang tawh rawh. Lei chungah hian ro han rêl la, Chapote chu an phu tâwkin han thungrûl rawh. Lalpa, mi sualte hi Eng chen nge an inchhuan dâwn le? Chapo takin an ṭawng thâwr thâwr ṭhîn a, Thil sual titu zawng zawngte chu an uang hle ṭhîn. Lalpa, i mite hi an sawisa nek a, I rochante an tiduhdah. Hmeithaite leh kan zînga hnam dangte, Fahrahte pawh an that zêl mai. “ Lalpan a hmu lo vang, Jakoba Pathian chuan a ngaihsak lo vang,” an ti. Mi mâwlte u, ngaihtuah ngun hle ula, Mi â-te u, engtikah nge in fin ang aw? Beng siamtu chuan a hre thei dâwn lo vem ni le? Mit siamtu chuan a hmu thei lo vang maw? Hnam tin thununtu chuan a hrem thei lo vang maw? Mihring zirtîrtu chuan hriatna a nei lo vang maw? Lalpan an ngaihtuahte chu a hre vek a, Engmahlo mai a nih a hria. Lalpan mi a thununte leh A Dân a zirtîrte chu an nihlawh e. Hmêlma lakah rilru hahchawlhna a pe ṭhîn, mi sualte tlâkna tûr hum laih a nih laiin. Lalpan a mite chu a kalsan ngai lo va, A rochante chu a thlahthlam ngai hek lo. Mi felte tân rorêlna dik a awm leh ang a, Thinlung ngîlte pawhin an ṭâwmpui ang. Mi sual laka min chhan tûrin tu nge lo ding chhuak ang? Thil sual titu lakah tu nge min rawn ṭan ang? Min ṭanpuitu chu Lalpa ni suh sela chuan, Ngawih vang vangna ramah ka kal daih tawh âwm e. Ka tlu dâwn emaw ka tih laiin Lalpa ngilneihna chuan min chelh ṭhîn. Ka mangan êm êm laite chuan Min thlamuan a, min tihlim ṭhîn. Rorêlna dik lo chu i ngaithei lo, Dik lo taka rêl hi tih dân tûra neih ṭhîntu nên, Mi dikte nun lâk tuma beia, Pawi khawih lo a rûka thiam loh chantîrtu chu. Lalpa chu min humtu a ni, Ka Pathian chu ka tlûkluhna lungpui a ni. An suahsualna avângin a nuai bo vang; Lalpa, kan Pathian chuan a tiboral vek ang. Hawh u, Lalpa fakin hlimtakin i zai ang u, Min humhimtu Pathian fakin i au chiam ang. Lâwmthu sawiin a hmaah kal ila, Hlim takin a fak hla i sa ang u. Lalpa hi zawng Pathian ropui tak a ni a, Hnam dang pathiante chunga Lalber a ni. Lei chhûngril thûk takte a kuta awm a ni, Tlâng sângte pawh a ta a ni. Tuifinriat hi a ta a ni, a siam a ni si a, Khawmual pawh hi a kutchhuak a ni e. Lo kal ula, chibai bûkin a hmaah chuan i kûn ang u, Lalpa min siamtu hmaah chuan i ṭhingṭhi ang. Ani chu kan Pathian a ni a, Keini pawh hi a rama tla, a kuta awm berâmte chu kan ni. Vawiin ngei hian a thu hi ngaithla teh ula aw! “Meriba-a an tih ang khân in thinlung chu tikhauh suh u, Masa thalêra an tih ang khân. In pute khân tah chuan min chian a, Ka thiltihte an hmu chungin min fiah lui a. Anni chu kum sawmli chhûng khân ka kham hle a, Mi luhlul tak an ni. ‘Ka duhzâwng pawh an hre thei lo,’ ka ti ṭhîn a. Ka thinur a, thu ka tiam ta tlat a, ‘Ka pêk tûr, hahchawlhna ram chu, an thleng lo vang,’ ” tiin. Lalpa fakin hla sa ula, hlathar sa rawh u, Leia mi tinrêngin Lalpa fakin hla sa rawh se. Lalpa chawimawia hla sa-in, a hming fak ula; Min chhandamna thu lâwmawm hi ni tin puang rawh u. Hnam tin hnênah hril darh ula, Mi tin hnênah a thil mak tih chu puang rawh u. Lalpa chu a ropui a, fak chiam tûr a ni, Pathian dang zawng aiin ṭih tûr a ni. Hnam dang pathiante chu a lem mai an ni a, Lalpa hi zawng vân siamtu a ni e. Ropuina leh chawimawina chuan a hual vêl a, Thiltihtheihna leh mawina chu a Hmun Thianghlimah a awm. Khawvêl hnam tinrêngte u, Lalpa chawimawi ula, Lalpa ropuina leh chakna chu fak rawh u Lalpa hming ropui chu fak fo ula, Thilpêk kengin a inah lo haw rawh u. Thianghlim leh mawi taka inthuamin,. Lalpa hmaah lo kûn rawh u, Leia chêng zawng zawng pawh hlauvin khûr rawh se. Hnam tin hnênah, “ Lalpan ro a rêl e,” ti rawh u, Nghîng lo tûrin lei hi a hûng tlat a, Mi tin chungah dik takin ro a rêl dâwn. Vânte u, hlim ula, lei pawh hi lâwm rawh se, Tuifinriat leh a chhûnga awmte chu au dur dur rawh se. Lalpa hmaah chuan Lo leh a chhûnga awm zawng zawng hi Lâwm takin awm sela, Ngaw thing zawng zawngte chu Hlimin au hluah hluah bawk rawh se. Lalpa chu lei chungah rorêl tûrin a lo kal e, Khawvêl chungah dik takin ro a rêl ang a, Rinawm takin mi tinrêng thu a rêlsak dâwn si a. Lalpan ro a rêl e, lei hi lâwm se, Thliarkârte u, hlim bawk rawh u. Chhûm leh thim mup a vêlah chuan a awm a, Dik taka tih leh tluang taka rorêl hi A lalṭhutthlêng nghahchhan a ni. A hmaah mei a alh reng a, Amah hualtu hmêlmate chu a kâng ral ṭhîn. A kawlphe chuan khawvêl a ên zawr zawr a, Leiin a han hmuh chuan a khûr. Lalpa hmaah khawihnûn angin tlângte an tui a, Khawvêl pum pui hi Lalpa hmaah chuan. Vânte khian a dikzia an tlângaupui ṭhîn a, Mi zawng zawngin a ropuizia an hmu. Milem betute chu an zak ang a, Milem chhuangtu zawng zawngte leh Pathian dang zawng zawng pawh a hmaah an kûn ang. Zion tlâng chuan a lo hria a, a lâwm hle a, Judai ram mite chu hlim takin an au va, Lalpan a chhan chhuah tâk avângin. Lalpa, nang chu khawvêl pum puia chungnung ber i ni, Pathian dang zawng aiin i chungnung zâwk. Lalpan sual hawtute chu a hmangaih a, Inserhte chu a vêng reng a, Mi sual kut ata chu a chhan chhuak ṭhîn. Mi dik tân khua a lo êng a, Mi ngîlte tân hlimna a lo thleng bawk. Mi dikte u, Lalpa -ah lâwm ula, A hming thianghlim chu fak rawh u. A thil mak tih ropui tak avângin, Lalpa chu fakin hla thar sa rawh u, A kut ding lam leh a bân thianghlim ngei chuan Chhandamna a rawn thlen ta. Lalpan a hnehna chu a rawn lantîr a, Hnam tin hmaah thil a tihdikzia a tilang ta. Israel chhûngte chunga a ngilneihzia leh a rinawmzia a hre reng a, Pathian chhandamna chu khawvêl pum hian an hmu ta e. Khawvêla mi zawng zawng hian Lalpa chu fak ula, Hlima auvin hla sa rawh u. Ṭingṭangte nên Lalpa fakna hla sa ula, Perhkhuang ri mawi tum bawk rawh u. Tawtawrâwt leh seki tumin Kan Lalber, Lalpa hi fak chiam rawh u. Tuifinriat leh a chhûnga awmte chu au dur dur se, Lei leh a chhûnga chêngte pawh. Luipuite chuan a hmaah an kut bêng sela, Tlângte pawh hi hlimin au rual rawh se. Khawvêl rorêl tûrin Lalpa a lo kal e, Mi tin dik tak leh fel takin a rêlsak ang. Lalpan ro a rêl a, mi tin an khûr, Cherub chungah ṭhuin ro a rêl a, Leilung hi a nghîng dur dur mai. Zion-a Lalpa chu a ropui êm a, Mi zawng zawng aia chungnung daih a ni. A hming ropui leh hlauhawm tak chu mi tinin fak rawh se, Mithianghlima a ni. Aw, Lal chak ber, dikna i ngaina a, Thu dik i kengkawh ṭhîn, Jakoba chhûngte zîngah rorêlna ṭha leh dik I rawn awmtîr ta a. Lalpa, kan Pathian hi chawimawi ula, A ke bulah ṭhingṭhi rawh u. Mi Thianghlima a ni. Mosia leh Arona chu a puithiam an ni a, A hming lamtu Samuela a ni. Lalpa an au va, a lo chhâng ṭhîn. Chhûm ding aṭangin Pathianin a sawi a, A thu hrilh leh a thupêk chu an zâwm. Lalpa, kan Pathian, anni chu i chhâng a, An thil sual tih phuba latu i ni na a, Ngaidam ṭhîntu i nih pawh i hriattîr ṭhîn. Lalpa, kan Pathian hi chawimawi ula, A tlâng thianghlimah hian chibai rawn bûk rawh u. Lalpa, kan Pathian hi a thianghlim e. Ram zawng zawngte u, Lalpa chawimawiin au chiam rawh u; Hlim takin a rawng bâwl ula, Lâwma zaiin a hmaah lo kal rawh u. Lalpa hi Pathian chu a ni tih hria ula, Min siamtu chu amah ngei hi a ni. A rama tla ṭhîn a berâmte kan ni. Lâwmthu sawi chungin a kawngkhârah lo lût ula, A tualzâwlah fak hla rawn sa rawh u, Lâwmthu hrilh ula, a hming chu fak rawh u. Lalpa chu a ṭha si a, A ngilneihna a ngai reng a, A rinawmzia pawh kumkhuain a pangngai reng a ni. Ngilneihna leh rorêl dik thu, hlain ka sa dâwn e, Aw Lalpa, i hnênah ka hril dâwn a ni. Fîmkhur takin kawng dik chu ka zawh ṭhîn a, Engtikah nge i lo lên ang? Thinlung dik tak puin ka khawsa ṭhîn a ni. Ka inah chuan thil sual ka ngaithei lo va, Hnungtawlh chîngte chu ka huatzâwng tak an ni, Mi kawp thei bawk hek lo. Mi rilru kawite chuan min hlat ṭhîn a, Thil sual eng mah ka ti duh lo. A rûka ṭhiante rêl chîng chu ka ngawihsan a, Chapo leh inngaisângte ka ngaithei lo. Ram chhûnga mi rinawmte ka duhsak a, Ka bulah chuan ka awmtîr a, Rinawm taka thil ti ṭhînte chu ka rawngbâwltuah ka hmang. Bum chîngte ka in chhûnga an awm ka phal lo va, Dâwt sawi chîng pawh ka hmuh phâka an awm ka phal hek lo. Tûk tinin mi sualte chu kan ram ata ka ûm bo va, Lalpa khua ata hi thil sual tih chîngte pawh ka hnawt chhuak ṭhîn. Lalpa, ka ṭawngṭai ngaithla la, Ka au thâwm hian i hnên lo thleng rawh se; Mangan laiin ka lakah hian i hmêl thup suh, I beng chhi la, ka au veleh min lo chhâng var ang che. Ka dam chhûng nite chu meikhu angin a zâm ral a, Thuk sa angin ka sa huai huai a ni. Hnim ah chhum vuai angin ka awm ta a, Chaw pawh ka ei thei lo. Mangang taka ka rûm ka rûm avângin Ruh hlîr ruh hlîr ka ni ta e. Thlalêra tuivalawng ang ka ni ta a, Khaw ram chhimbuk ang mai ka ni. In chung chhîpa chawngzawng fu fâl angin Ka hawi ka hawi a ni. Ka hmêlmaten min deu ni tin mai a, Min hualtute chuan an kamchhe tleuh nân tak min hmang. Chawa ka rin ber chu vut a ni a, Ka thil in pawh chu ka mittuiin a pawlh. Ka chungah hian i thinur chu a so nasa ta êm êm a, Min la lawk a, min paih sawn ta a ni. Ka nunna chu tlaia hlim ral lam ang mai hi a ni, Hlobet angin ka vuai zo ta. Lalpa, nang chuan chatuanin ro i rêl ang a, Ṭhangthar zêlten an hre reng bawk ang che. Tho la, Zion hi khawngaih ang che, Khawngaih a hun ta e, Hun tiam a lo thleng ta si a. I chhiahhlawhten a lungbangte an ngaina a, A chim rem rumte hi an lainat bawk a ni. Hnam dangte chuan Lalpa hming hi an hlau vang a, Leia lal zawng zawngin i ropuina an ṭih bawk ang. Lalpan Zion chu a din ṭha leh ang a, Ropui takin a lo lang ang. Lalpan pachhiate ṭawngṭaina a ngaihsak ang a, An dîlna chu a hmusit lo vang. Hei hi ṭhang lo thar zêlte tân ziak la, La piang tûrten Lalpa an fak theih nân. A hmun thianghlim sâng tak aṭang khian Lalpan a han thlîr a, Vân aṭangin lei hi a en a, Lung in tângte rûm chu a han hria a, Thi tûra tihte chu a rawn chhan ta. Zion-ah Lalpa hming hi hril ula, Jerusalem-ah pawh a fakna hla sa bawk rawh u. Tichuan, mipui an lo pung khâwm ang a, Hnam tinrêngin Lalpa rawng an bâwl ang. Ka vânglai hun a titawi a, Ka nite chu a titlêm ta, ‘Aw ka Pathian, ka vânglaiin min la bo suh, Nang zawng kumkhuaa awm i ni si a,’ ka han ti a. Nangin lei hi hmâna i siam a ni, Vân pawh i kutchhuak a ni e. Mahse, an boral ang, nang erawh chu i awm kumkhua dâwn a, I hmaah chuan silhfên angin an chul ang a, Puan ang maiin i hluihlâwn ang a, An ral vek ang. Nang erawh chu a ngai reng i ni a, I kumte chuan kin ni a nei lo vang. Kan fate chu nangin i vêng ang a, An thlahte pawh him takin an awm ang. Aw ka thlarau, Lalpa chu fak la, Ka chhûnga awm zawng zawng hian a hming thianghlim chu fak rawh se. Aw ka thlarau, Lalpa chu fak rawh, A ṭhatna zozai hi theihnghilh suh ang che. I bawhchhiatna tinrêng a ngaidam a, I natna zawng zawng pawh a tidam a, I nunna chu khur thûk ata a tlan chhuak a, Ngilneihna leh lainatnain min hual vêl ṭhîn. Thil ṭha tinrêng ka duh tâwk min pe a, Mupui angin kei pawh ka tuai thar ṭhîn. Lalpan dik takin thil a ti a, Hnehchhiahte ro a rêlsak ta. Mosia hnênah a duhzâwng a hrilh a, A thiltihtheihzia Israel-te a entîr kha. Lalpa chu mi lainat ṭhîn, khawngaih thei tak a ni, Thinnel, ngilneihna ngah a ni. Mi sawisêl chîng tak a ni ngai lo va, A thinur lah a pai reng ngai hek lo. Kan sual angin kan chungah a ti lo va, Kan bawhchhiatna angin min thungrûl duh hek lo. Lei aiin vân a sâng ang hian, Amah ṭihtute chungah chuan a ngilneihna a sâng a ni. Khawchhak leh khawthlang a inhlat ang hian, Kan khawlohna min dah sawnsak ta daih a ni. Pain a fate a lainat ṭhîn ang hian, Lalpan amah ṭihtute chu a lainat ṭhîn. Kan derthâwnzia a hre chiang a, Vaivut mai kan nih a hre reng a ni. Mihring nun hi zawng hlobet ang chauh a ni, Ram hnim pâr a lo vul ve a, Thliin a han chhêm a, A bo ta daih mai a, Hmuh tûr a awm tawh lo ang hi a ni. Lalpa ṭihtute tân a ngilneihna a ngai reng a, A ṭhatna lah an tuchhuan thleng pawhin a ngai reng ṭhîn, A thuthlung vawng rengtute leh A thupêk zâwm ṭhînte tân. Lalpan vânah a lalṭhutthlêng a han rem a, Engkim chungah ro a rêl ta. A thupêkte zâwma, a thute ngaithla ṭhîn, Vântirhkoh chak takte u, Lalpa chu fak rawh u. A rawngbâwla, a duhzâwng ti ṭhîn Vâna mite u, Lalpa chu fak rawh u. A thuhnuaia awm zawng zawng leh A thilsiamten Lalpa chu fak rawh se, Aw ka thlarau, Lalpa chu fak rawh. Aw ka thlarau, Lalpa chu fak rawh, Aw Lalpa, ka Pathian, i va ropui tak em! Ropuina leh chawimawinain i inthuam hi. Puan angin êng i sin a, Vân khi puan in angin i kai pharh a, I in chu chung lam tuiah khian i sa a, chhûm chu tawlailîrah i hmang a, Thli chungahte chuan i chuang bawk ṭhîn. Thli hi i tirhkoh a ni a, Kâwlphe de zawr zawr hi i chhiahhlawh a ni bawk. Nghîng lo tawp tûrin Lei hi i nghat tlat a. Puana tuam angin tui thûk takin a tuam vêl a, Tlâng chhîpte chu tuiin a chîm vek bawk. I han hau va, tui chu a tlânchhia a, I râwl i han chhuah chuan a liam zo ta vek a. Tlângahte a luang liam a, Kawrahte chuan a luang thla a, A awmna tûr i ruatah chuan. A pelh loh tûr ramri i khamsak a, Lei hi a chîm pil leh loh nân. Tuihna leh lui i tichhuak a, Tlâng kârahte an luang ta a. Ramsa tinrêngte chuan an lo tlân a, Ram sabengtung tuihâlte chuan an dâwt. A kamah chuan chunglêng savaten bu an chhep a, Hnimbuk zîngahte chuan an hrâm bawk a. I chênna hmunsâng aṭangin Tlângah ruahpui i sûrtîr a, Lei chu malsâwmnain i tikhat ta. Ran peh atân hnim a lo chawr a, Mihring tân thlaite a lo ṭiak a, Leiah ei tûr buh a lo awm ta. A intihhlimna tûr uain a thar bawk a, Hriak pawh a sa timâm tûrin, A rin tûr chaw a nei ta a. Lalpan a phun Lebanon tlâng sidar thing chuan A duhtâwk tui a hmu. A zârah savaten bu an chhep a, Vachate chuan fâr lêrah bu an nei. Sathârte chu khâm sângah an chêng a, Khâm pûkah chuan sangawite an biru. Thla chu a hun bi-ah a de ṭhîn a, Ni pawh a hun takah a tla bawk ṭhîn. Khua a thim a, zân a lo ni a, Ramsa tinrêng an tla chhuak a. Sakeibaknei vânglai sa seh tûr chu a hâhum a, Pathian hnênah ei tûr a ngên. Ni a lo chhuak a, an ṭîn dial a, An awmna ṭheuhvah chuan an bawk leh ṭhîn. Hna thawk tûrin mihring a lo chhuak a, Tlai thlengin hna a thawk ṭhîn. Lalpa, i thil siam hi a va tamin I va siam thiam tak em! Lei hi i thilsiamin a khat a ni. Tuifinriat saw a ropuiin a va zau tak êm! Thil nung chhiar sên lohte an awm a, Lian tak tak te, tê tak takte an ni. Tah chuan lawngte an lêng noh noh bawk a, I siam Leviathan chu a lêng zuai zuai bawk a. An vaiin i mitmei an en a, A hun takah ei tûr i pe ziah ṭhîn. An chaw tûr i pe a, an ei a, Thil ṭha tinrêng i kut ata an duhtâwk an dawng ṭhîn. I hmêl i han thup chuan an mangang a, An thaw i tihtâwp chuan an thi mai a, Vaivutah bawk an kîr leh ṭhîn. Nangin i han thâwkkhum a, an nung ta mai a, Ram pawh hi i titui ṭhîn. Lalpa chu chatuanin ropui sela, Lalpa chu a thilsiamah hlim bawk rawh se. Lei hi a han melh chuan a khûr ṭhîn a, A han khawih chuan tlângte a tuiral ṭhîn. Ka dam chhûngin Lalpa fakin ka zai ang a, Pathian chu, ka nun chhûng zawng ka fak bawk ang. Ka ngaihtuahte hi a lâwmzâwng ni sela, Lalpa -ah chuan ka lâwm si a. Mi sualte chu lei aṭang hian boral sela, Mi suaksualte awm tawh suh se, Aw ka thlarau, Lalpa fak rawh. Lalpa chu fak rawh u. Lalpa chu lâwmthu hrilh ula, A hming lam rawh u, A thiltih hi hnam tinrêng hrilh rawh u. Amah fakin zai ula, Thil mak a tih zawng zawng hi hril rawh u. A hming thianghlim hi chhuang ula, Lalpa zawngtute chu hlim hle rawh se. Lalpa chu zawng ula, a chakna dîl rawh u, Ani chu pan fo rawh u. A thiltih ropui tak te, A thil mak tih leh a rorêl dân te, Aw, a chhiahhlawh Abrahama thlahte u, A thlan Jakoba fate u, hre reng rawh u. Ani chu Lalpa kan Pathian a ni a, Khawvêl pum puia rorêltu a ni. A thuthlung chu a hre reng a, Chhuan sâng thlengin a thupêk pawh a hre reng bawk. Abrahama hnêna a thuthlun leh Isaka hnêna a thutiam chu a hre reng a ni. Chûng chu Jakoba thlahte tân dânah a nemnghet a, Israel-te kumkhaw thuthlung atân. “Khai le, Kanan ram hi ka pe ang che u, Ro atân in nei thliah ang,” a ti a. Eng tham ni lo, mi tlêm tê Mikhual mai an la nih lai pawh khân. Hnam tinrêng zîngah vâkvaiin Ram tinah an pêm lâwr a, Mahse, tu ma nêkchêp a phal lo va, Anmahni avângin lalte a zilh zâwk a. ‘Ka hriakthiha khawih suh ula, Ka zâwlnei hi a pawi khawih hek suh u,’ a ti. Ram pum puiah ṭâmpui mitthi a thlentîr a, An buh zawng zawng a tihchhiatsak vek kha. An hmaa kal tûrin mi a tîr a, Bawiha an hralh Josefa kha. A ke-ah chuan kawl an buntîr a, A nghâwng thîr khaidiatin an hrêng. A sawi lâwk ang ngei khân a thleng ta a, Lalpa thu chu a dikzia a lang ta. Aigupta lalber chuan a chhuahtîr ta a, Chu hnam hotu ngei chuan a chhuahtîr ta. A ram hotu-ah a siam a, A neih zawng zawng chunga thuneituah a dah ta a. A mi liante a duh duha thunun tûr leh An upate finna zirtîr tûrin. Israela chu Aigupta ramah a chhuk ve a, Chumi ram chuan Jakoba chu a lo mikhual. Lalpa mite chu an pung chak ta hle a, Anmahni ertute ai chuan an chak ta a. Chûng mite rilru chu a inthlâk a, A mite chu an haw ta a, A chhiahhlawhte chu vervêk takin an chawk nawmnah ta a. A chhiahhlawh Mosia chu a tîr thla a, A mi thlan Arona nên. Pathian thil mak tih chu an entîr a, Aigupta ramah thil mak tak tak an ti. Khua a tithim a, ai mit thlawn ang mai a ni ta. An thiltihte an hmu thei ta lo va. An luite thisena chantîrin An sanghate a tihlum zo ta a. An ramah chuan chungu a puantîr a, Lal in chhûngahte pawh an awm noh noh. Thu a pe a, thosi a puang a, An ram chhûngah thophurh a khat ta a. Ruah aiah rial a tlâktîr a, An ram pumah ṭêk a tla bawk. An grep leh theipui chu a chhu chhia a, An ram chhûnga thingte a dêng tliak zo. Thu a pe a, khau a puang a, Chhiar sên loh khauphâr rual an kat noh noh. An ram chhûnga hnimhnah an ei zo va, An thlai chînte an ei kawlh vek. Ram pum puiah an fa tîrte a tihhlumsak vek a, An vânglai fate chu. Tangka leh rangkachak nên a hruai chhuak a, An zînga mi tu mah sil an awm lo. Aigupta mite chuan an hlau va, An chhuak ta chu an lâwm hle a. A hliap tûrin chhûm a zîntîr a, Zâna ên tûrin mei a chhi. An ngen angin vahmîm rual a lo ṭum a, An tlai tâwkin vân chaw a pe. Lungpui a tikhi a, Tui a lo luang chhuak ta a, Ram rovah chuan lui a luang ta. A chhiahhlawh Abrahama hnêna, A thutiam thianghlim chu a la hre reng a ni. Tichuan, a mite chu a hruai chhuak a, Hlim leh lâwmin an au va. Hnam dangte lo awmna ram chu a pe a, Chûng mite thawh rah chu an rochung ta: A thupêkte an zâwma, A Dânte chu an zawm theih nân. Lalpa chu fak rawh u. Lalpa chu fak rawh u, Lalpa chu a ṭhat êm avângin lâwmthu hrilh rawh u, Ngil a nei kumkhua si a. Tu nge Lalpa thiltih ropuizia hi sawi thei anga, A fakawmzia hril sêng ang le? Eng lai pawha dik taka awma, Thil ṭha ti ṭhînte chu an nihlawh e. Lalpa, i mite chunga ṭhat i chhuah hunah min hre reng la, I chhan chhuah hunah chuan min telh ve ngei ang che; I thlante nihlawhna hmua, I hnam thlante lâwma ka hlimpui theih nân leh, I rochanten an chhuan che anga Ka chhuan ve theih nân che. Kan pute ang bawkin thil kan tisual a, Kan khawlo va, kan sual a ni. Aigupta ramah khân kan pute chuan, I thil mak tih an hrethiam duh lo va, I ngilneih nasatzia pawh an hre duh lo, Tuipui Sen kamah khân an hel tâk kha. Mahse, i hming avângin i chawimawi a, I thiltihtheihziate i hriattîr tho a ni. Tuipui Sen chu thu a pe a, a chat ta a, A mite chu leichârah chuan a kal tlangtîr ta a. Anmahni hawtute kut ata chu a chhan chhuak a, An hmêlmate kut ata ngei chu. Tui chuan an hmêlmate a chîm pil a, Pakhat tê mah dam chhuak an awm loh kha. A mite chuan a thu an ring ta a, A fak nân hla an sa. Mahse, a thiltihte an theihnghilh leh ta thuai a, A remruat chu an ngaichâng duh leh ta lo. Thlalêrah an râwp ta êm êm a, Ram rovah chuan Pathian an fiah ta a. An dîl ngei chu a han pe a, An râwp a tihrehsak ta a. Mahse, Mosia leh mi thianghlim Arona chu, An riahna hmunah chuan an îtsîk ta a. Lei a khi chat phuk a. Dathana chu a tla ta a, Abirama pawh, a hote nên, an pil zo ta. An zîngah chuan mei a lo chhuak a, Mi sualte chu an kâng hlum ta vek a. Horeb tlângah pawh khân bâwngno lem an din a, An thil chhûn chu an be ta a. An ropuina Pathian chu Hnim pet, bâwng ang lekah an chan ta a. Aigupta rama thil ropui tak tak titu, An chhandamtu Pathian an theihnghilh ta. Aigupta ram chhûnga a thil mak tih te leh, Tuipui Sena thil râpthlâk tak a tihte pawh. A mi thlan Mosia chuan, A thinur tireh tûrin An kâra bân pharin ngensak lo se chu Tihboral vek a tum tâk kha. A thutiam chu an rin tâwk loh avângin, Ram duhawm tak chu an ngainêp a. An puan inah chuan an phunnawi a, Lalpa aw chu an ngaithla duh ta lo. Bân phar meuhvin thu a tiam a, “Thlalêrah in tlu hlum ang a, Ram dang daihah ka tidarh ang che u a, Hnam dang zîngah in thlahte an thi ang,” A ti ta hial a ni. Peor-ah khân Baal an bia a, Milem pathian hnêna inthawina sa an ei ve ta. An thil tih chuan ani chu a tithinur a, An zîngah chuan hripui a lêng ta a. Finehasa chu a tho va, ngaihdam a dîlsak a, Hri chu a reh thei ta. Chu chu a thil tih ṭhaa ngaih a ni ta a, Kumkhuaa ṭhangtharten an hriat zêl tûrin. Meriba tuiah Lalpa an tithinur leh a, Anmahni avângin Mosia meuh pawh a buai ta a. Ani chu an tithinur a, Thu hnu dâwn lovin a ṭawng ta a. Lalpan tihlum tûra thu a pêk angin Chûng rama awmte chu an tihlum duh lo. Chûngho nên chuan an inneih pawlh ta a. An tih dânte chu an zir ve ta zâwk a ni. An milemte an be ve ta a, Thangah an âwk ta a ni. An fanu te, an fapa te, Ramhuai hnêna inthawi nân an hmang ta a. Pawi khawih lo thisen chhuah an chîng a, Kanan mite milem hnênah thisen an hlân a, An fanu te, an fapa te thisen chuan Ram chu an tibawrhbâng zo ta. An thiltih avâng chuan an bawlhhlawh zo ta a, An thil chîn avâng chuan an uire zo ta a ni. A mite chungah Lalpa thin a thawk a, A rochante chu a ten ta êm êm a. Hnam dang hnênah a pe a, Anmahni hawtuten an chungah ro an rêl ta a, Hnam dangten an rap bet a, An thuhnuaiah an kûn ta a ni. Vawi tam tak chu a chhan chhuak a, Mahse, an hel lui zêl a, An sualnaah chuan an pil ta a ni. Mahse, an han mangan meuh chuan a ngaihsak a, An au thâwm chu a lo ngaithla ṭhîn. Anmahni avângin a thuthlung a hre reng a, Ngil a neih êm avângin pawi a ti ṭhîn. Sala mantu zawng zawngte chu Anmahni a khawngaihtîr fo ṭhîn. Aw Lalpa, kan Pathian, min chhan chhuak la, Hnam dang zîng ata hi min hruai khâwm leh ang che. I hming thianghlim kan fak ang a, Ropui takin kan chawimawi bawk ang che. Lalpa, Israel-te Pathian chu fak rawh u, Chatuan chatuanin fak ula, Mi zawng zawngin, ‘Amen,’ ti rawh se. Lalpa chu fak rawh u. “ Lalpa chu a ṭhat êm avângin lâwmthu hrilh rawh u, Ngil a nei kumkhua si a,” Lalpa tlanten ti fo rawh se. Hmêlma kut ata chu a tlan chhuak ta si a; Ram tina mi a hruai khâwm a, Chhak leh thlang, Chhim leh hmâr aṭangte chuan. Thlalêr ram rovah te an vâk an vâk a, An chênna tûr khua chu an hmu zo lo. Rilṭâm leh tuihâlin An beidawng êm êm ṭhîn. Harsatna an tawhin Lalpa an au ṭhîn a, An manganna ata a chhan chhuak ṭhîn. Kawng dik takah a hruai ta a, An chênna tûr khua chu an thleng thei ta. Lalpa chu a ngilneih êm avângin fak rawh u, Mihringte tân thil mak a tih ṭhin avângin. Tuihâlte chu an duh tâwkin a intîr a, Rilṭâmte pawh ei tûr tui tak takin a hrai puar ṭhîn. Ṭhenkhatte chu thim zîngah ngui takin an awm a, Hrehawm tuarin thîr kawl an bun. Pathian thu awih lova, Chungnungbera remruat an hmuhsit avângin. Rim takin a thawhtîr a, a tudawl ta a, An tlûk pawhin ṭanpuitu an nei lo. Harsatnate an tawhin Lalpa an au ṭhîn a, An manganna ata a chhan chhuak ṭhîn. Thim zînga ngui taka an awm chu a hruai chhuak a, An khaidiat bunte chu a tihchahsak bawk ṭhîn. Lalpa chu a ngilneih êm avângin fak rawh u, Mihringte tân thil mak a tih ṭhin avângin. Dâr kawngkhârte a chhu chhia a, A kalhna thîr tlâwnte a tibung bawk. Ṭhenkhatte chu an â hle a, An sual avâng leh an bawhchhiatna avânga tuar an ni. Ei tûr tinrêngin a ngei a, Thlân kotlângah an dâk. Harsatna an tawhin Lalpa an au ṭhîn a, An manganna ata a chhandam ṭhîn. Thu a pe a, a tidam a, Thlân ata chu a chhan chhuak ṭhîn. Lalpa chu a ngilneih êm avângin fak rawh u, Mihringte tân thil mak a tih vângin. A hnênah lâwmthu sawi inthawina hlân ula, A thiltihte hlain hril vêl rawh u. Ṭhenkhatte chu tuifinriatah lawnga chuangin, Tuipui zauvah ei an zawng a. Lalpa thiltihte chu an han thlîr a, Tui thûk taka a thil mak tihte chu. Thu a pe a, thlipui a tleh ta a, Tuifinriat chu nasa takin a tifâwn a. Lawng chu sâng tak takah a vawrh chho va, A chhuk leh vung vung ṭhîn, A hlauhawm êm avângin an thlabâr ṭhîn. Zu rui pai pai, thle thle ang hi an ni, A tihngaihna rêng an hre ṭhîn lo. Harsatna an tawhin Lalpa an au ṭhîn a, An manganna ata a chhan chhuak ṭhîn. Thlipui tleh chu a tibâng a, Tuifâwnte chu a reh ta a. A reh tâk avângin an hlim ta êm êm a, An thlen châk hmun nuamah chuan a hruai thleng ṭhîn. Lalpa chu a ngilneih êm avângin fak rawh u, Mihring tân thil mak a tih avângin. A mite pung khâwm zîngah chawimawi ula, Upa rual ṭhu khâwm zîngah amah chu fak rawh u. Lalpan luite chu thlalêrah a chantîr a, Tuihna awmna pawh ram rovah a chantîr bawk. Ram ṭha tak chu a mi chêngte sual avângin, Ram chhiaah a chantîr a. Thlalêr chu dîlah a chantîr a, Ram ro chu tuihna awmnaah a chantîr bawk. Tah chuan mi ṭâmte chu awmhmun a khuartîr a, An chênna tûr khawpui an din. Thlai an chîng a, grep an phun a, A rah ta tiar tuar mai a ni. Mal a sâwm a, an pung chak êm êm a, An rante pawh a riral ve ngai lo. Hnehchhiahna nasa tak leh tihduhdahna avângin An ral tial tial a, an kun ta tlawk tlawk a ni. Mahse, miliante hmusita, Kawng awm lova vahvaihtîrtu chuan, An tihretheih mangangte chu a chawi kâng a, An chhûngkuate a tipung leh ta a. Mi dikte chuan an han hmuhin an hlim ta êm êm a. Mi sualte erawh chu an ngawi hmak mai. Mi â lo chuan hêng hi chhût ngun sela, Lalpa ngilneihzia hi hre chiang teh se. Aw Pathian, ka ring tlat che a ni: Hla ka sa ang, a ni, i fak hla ka sa ang; Thinlung takin ka fak ang che. Ṭingṭang leh perhkhuangte u, inpeih ula, Khua i han au vâr teh ang. Lalpa, i mite zîngah chuan ka fak ang che, Mipui zîngah i fak hla ka sa ang. I ngilneihna chuan vân a khûm daih a, I thutak chuan vân khi a thleng si a. Vânahte khian i ropuizia han tilang la, Aw Pathian, leiah pawh hian tilang ang che. I chaknain min rawn chhan la, Ka dîlna hi lo ngaithla teh, I mi duh takte hi an him theih nân. A hmun thianghlim aṭangin Pathianin thu a sawi, ‘Sekem khua chu ka sem darh vek ang a, Sukot ruam chu ka ṭhen vek bawk ang. Gilead leh Manase ram chu ka ta a ni a, Efraim ram pawh ka inhumna lukhum a ni, Judai ram pawh ka laltiang a ni. Moab ram chu ka insilna chawhtawlh a ni, Ka ta a nih hriat nân Edom ramah ka pheikhawk ka vawm e, Filistia-ho chu ka aukhum. Tu nge kulh nei khuaah min hruai ang a, Edom ramah min kalpui ang? Aw Pathian, min thlauhthla ta em ni? Kan sipaite zîngah, aw Pathian, i tel ve tâk loh hi? Hmêlma lakah min ṭanpui teh, Mihring ṭanpuina zawng engmahlo mai a ni. Pathian zârah huai takin kan che ang, Kan hmêlmate a chîl hrep ang. Aw, ka fak Pathian, ngawi reng teh suh, Mi sual leh bum hmangten min bei luai luai a, Dâwtin min hêk min hêk si a. Thu huatthlala pui pui min sawi khum a, Chhan awm lovin min bei. Keiin ka hmangaih a, annin min do, An tân ka ṭawngṭai ṭhîn. Thil ṭha chu sualin min thungrûl a, Ka hmangaih a, annin min haw thung a. Ani chungah chuan rorêltu tûr mi sual ruat la, A ding lamah Setana ding rawh se. A chungthu rêl sela, thiam loh chang ngei rawh se, A ṭawngṭaina chenin suala ngaih ni rawh se. A dam chhûng nite chu tihtawi ni se, A hotu nihna chu mi dangin chang rawh se. A fate chu fahrahin awm sela, A nupui chu hmeithai rawh se. A fate chu vâkvaiin kutdawh sela, An in ram aṭangin hnawh chhuah ni rawh se. A neih zawng zawng a ba aiah pûktîrtuten la vek sela, A thawhrim rah pawh ram dang miten rawk bawk rawh se. Lainattu rêng tu mah nei lo sela, A fa, pa nei ta lote chu tu man khawngaih suh se. A thlahte pawh mang vek sela, Ṭhangthar lo awm tûr zîngah a hming dai hlen daih se. A pa bawhchhiatna chu Lalpan hre reng sela, A nu suahsualna pawh thai bo ni hek suh se. An sualna chu Lalpan chhinchhiah sela, Khawvêlah hian anmahni hriatrengna eng mah awm hauh suh se. Ngilneih nachâng rêng a hre lo va, Rethei, pachhia leh mangang te, An thih thlengin a ûm zui ṭhîn. Ânchhe lawh chîng tak a ni, ama chungah tla zâwk rawh se. Mi dang a duhsak ngai lo va, duhsakna dawng suh se. Ânchhia chu kawr angin a ha a, Tui ang maiin a taksa a fan chhuak a, Hriak ang maiin a ruhte pawh a fan chhuak a. Puana tuam ang maiin ani chu tuam sela, Kâwnghrên angin a taiah hrêng rawh se. Hêng hi min hêktute, Lalpan a thungrulhna chu ni sela, Min sawichhetute chan chu ni rawh se. Aw Lalpa, nang chu ka Lalpa i ni a, I hming avângin min ṭanpui la, Ngil i neiin i ṭha si a, min chhan chhuak ang che. Kei zawng rethei tak leh tlachham tak ka ni, Ka thinlung hi a na êm êm ṭhîn. Tlai lam hlim angin ka ral tial tial a, Khau anga len bovin ka awm a, Ka vânglai a liam a, ka lo tar ta. Chaw nghei vângin ka tha a khûr ta a, Thau viau ṭhîn kha ka chêr zo ta. Mi nuihzatbûr ka ni a, Min han hmuhin an lu min thin khum ṭhîn. Aw Lalpa, ka Pathian, min ṭanpuitu i ni, I ngilneih êm avângin min chhandam rawh. Chu chu i tih a nih hriattîr hlawm la, Lalpa, nangma tih ngei a ni. Annin ânchhia min lawh mah se, Nangin mal min sâwm a, Min bei mah se an mualpho vang a, I chhiahhlawh hi ka hlim thung ang. Mi khingtuten mualphona kawr ha se, Zahna puanin inkhuh rawh se. Lalpa chu lâwmthu ka hrilh mawlh mawlh ang a, Mipui zîngah ka fak bawk ang. Lalpan pachhia chu a ṭan a, Ani chu thiam loh chantîrtute lakah a chhan chhuak ṭhîn. Lalpa thuchhuak chuan ka Lalpa hnênah, ‘Ka ding lamah lo ṭhu rawh, I hmêlmate i ke nghahchhanah ka han siam ang e,’ a ti. I laltiang chu Lalpan Zion aṭangin a tîr chhuak a, I hmêlmate chungah ro rêl rawh le. Hmêlma i beih ni chuan I tlangvâlte an rawn inpe tup tup ang, I tlâng thianghlimah chuan Zîngah dai tla angin an lo kal khâwm bawk ang. Lalpan thu a tiam ta, a sût lo vang, ‘Chatuan Puithiam i ni, Melkisedeka ang chi kha.’ Lalpa chu i ding lamah a awm a, A thin a ur hunah lalte a titlâwm ang. Hnam tinrêng chungah ro a rêl ang a, An ruangte chu a vûm thûr ang. Kalkawng lui tui chu a in ang a, a lo harh thar leh ang. Lalpa, chu fak rawh u. Mi dikte pung khâwm zîngah chuan, Theihtâwp chhuahin Lalpa chu lâwmthu ka hrilh dâwn e. Lalpa thiltihte chu a ropui êm êm a, A lâwmtute chuan hriat nuam an ti. A thiltih chu a makin a zahawm a, A dikzia pawh a pangngai reng a ni. A thil mak tih kan theihnghilh mai a phal lo va, Lalpa chu khawngaihna leh lainatnaa khat a ni. Amah ṭihtute chu ei tûr a pe ṭhîn a, A thuthlung chu eng lai mahin a theihnghilh lo. A thiltihtheihzia chu a mite hnênah a lantîr a, Hnam dangte ram chu an hnênah a pe. A thiltih chu a rinawmin a dik a, A thupêk pawh a rin tlâk zêl a ni. Chûng chu kumkhua atâna ruat a ni a, Rinawm tak leh ṭha taka zawm tûr a ni. A mite chu a rawn chhandam ta a, A thuthlung chu kumkhuaa zawm tûrin thu a pe. A hming chu a thianghlimin a hlauhawm e. Lalpa ṭih hi finna bulpui a lo ni, A thu zâwmtute chu Hriatthiamna ṭha tak a pe. Amah chu kumkhuaa fak tûr a ni. Lalpa chu fak rawh u, Lalpa ṭihtute chu an nihlawh e, A thupêk ngaisâng êm êmtute chu. An fate chu leiah hian mi ropui an ni ang, Mi nun ngîl thlahte chu malsâwmin an awm ang. An chhûngkuain an hausa hle ang a, Mi dik tak chhûng an ni reng ang. Mi nun ngîlte tân thimah khua a vâr ang, Khawngaihna leh ngilneihna nei, mi dik takte tân chuan. Mi ṭha chu a ngilnei a, phal takin a pûktîr ṭhîn a, Engkim dik takin a ti ṭhîn. Mi ṭha chu eng lai mahin a nghîng lo vang a, Hriat reng a ni bawk ang. Chanchin ṭha lo hre mah sela, a hlau lo vang. Lalpa a ring a, a nghet tlat mai. A rilru a nghet a, a zâm lo va, A hmêlmate tlâwm chu a la hmu ang. A sem darh a, tlachhamte a pe a, A ngilneihna chu kumkhuain a pangngai reng a ni, Ropui taka chawimawi a ni bawk ang. Mi sualten an hmuh chuan an thinur ang, An ha an ṭhial ang a, an boral ang, Mi sualte tân beisei a bo hlauh vang. Lalpa chu fak rawh u, Aw Lalpa chhiahhlawhte u, fak ula, Lalpa hming chu chawimawi rawh u, Lalpa hming chu fakin awm rawh se, Tûn aṭanga chatuan thlengin. Ni chhuahna aṭanga a tlâkna thlengin, Lalpa hming chu chawimawi ni zêl rawh se. Lalpa chu hnam tinrêngte aia chungnung daih a ni, A ropuina chu vân chungah khian a awm. Hmunsâng taka awm, Lalpa kan Pathian ang hi tu nge awm? Lei leh vân en tûrin a intihniam a, Vaivut ata retheite chu a kai tho va, Vut zînga ṭhu pachhiate chu a tungding ṭhîn. Miliante zîngah chuan a ṭhuttîr a, A ni, miliante zîngah chuan, Nu chingte chu chhûngkua a dinsak a, Fate neihtîrin a tihlim ṭhîn. Lalpa chu fak rawh u. Israel-ten Aigupta ram an kalsana, Jakoba faten awze mite ram chu an chhuahsan khân, Judai ram chu a hmun thianghlim a ni ta a, Israel ram chu a lalna ram a ni. Tuipuiin a han hmuh chuan a tlânchhia a, Jordan lui pawh a luang kîr a. Berâm angin tlângte an zuang ṭum a, Berâm notê angin mualte an tualchai bawk. Engati nge, tuipui, i tlânchhiata, Nang Jordan lui, i luan lêt le? Engtizia nge tlângte berâm anga an zuana, Berâm notê angin mualte in tualchai tak? Nang, leilung, Lalpa hmaah khûr rawh, Jakoba Pathian hmaah chuan. Lungpui chu dîlah a chantîr a, Meilung chu tuihnaah a chantîr bawk. Lalpa, keini ni lovin, keimahni ni hek lovin, I hming chauh hi chawimawi ang che. I ngilneih leh i rinawm êm avâng hian. Engati nge hnam dangte chuan, ‘An Pathian chu khaw nge a awm?’ an tih vei ni. Kan Pathian chu vânah a awm, A duh apiang a ti mai ṭhîn a ni. Milemte chu tangka leh rangkachaka siam an ni a, Mihring kutchhuak mai an ni e. Kâ an nei a, an ṭawng thei si lo va, Mit an nei a, an hmu thei bawk hek lo. Beng an nei a, an hre thei miah lo va, Hnâr an nei a, thil rim an hre thei lo. Kut an nei a, an khawih thei si lo va, Ke an nei a, an kal thei bawk hek lo, Aw pawh an chhuah thei lo. Milem siamtute chu milem ang lek an ni a, Milem ringtute pawh milem ang chauh an ni. Aw Israel-te u, Lalpa hi ring rawh u, Ṭanpuitu leh phaw a ni e. Arona thlahte u, Lalpa hi ring rawh u, Nangmahni ṭanpuitu leh in phaw a ni. Lalpa ṭihtute u, Lalpa hi ring rawh u, ṭanpuitu leh phaw a ni e. Lalpan min hre reng a, mal min sâwm ang, Israela thlahte mal a sâwm ang a, Arona chhûngte pawh a sâwm bawk ang; Lalpan amah ṭihtute chu, a lian a têin, Mal a sâwm ang. Lalpan nasa takin tifing che u rawh se, Nangmahni leh in fate nên. Lei leh vân siamtu Lalpa chuan Malsâwm che u rawh se. Vân khi Lalpa vân a ni a, Lei hi mihringte tân a pêk a ni. Mitthite chuan Lalpa an fak thei lo, Ngawih rengna rama chhuk tâte chuan. Keini zawngin Lalpa kan fak ang a, Tûn aṭanga chatuan thlengin, Lalpa chu fak rawh u. Khawngaih ka dîlna aw a ngaihthlâk avângin Lalpa chu ka ngaina a ni. Ka koh apiangin a lo ngaithla ṭhîn. Thih hlauhna chuan min rawn chîm a, Seol hlauhawmna chuan mi rawn tuam a, Mangang leh lungngai takin ka awm. Tichuan, Lalpa hming chu ka han lam a, Aw ‘ Lalpa, min chhan chhuak teh,’ tiin. Lalpa chuan ngil a nei a, a ṭha a ni, Pathian hi zawng, mi lainat thei tak a ni. Lalpan ṭanpui ngaite a pui ṭhîn a, Ka chan a chauh laiin min rawn chhan chhuak. Aw ka nunna, thlamuang takin awm leh tawh rawh, Lalpa chu ka chungah a ṭha êm êm si a. Ka nunna hi thihna lakah, Ka mitte hi mittui lakah, Ka kete hi tlûkna lakah I chhan chhuak ta si a. Tichuan, Lalpa hmaah ka lêng thei ta, Mi nungte ramah chuan. ‘Ka va rethei tak êm!’ ka tih lai pawhin, Amah ka ring tlat a. ‘Tu mah rin tlâk an awm lo ve,’ Thlaphâng taka ka tih laite pawh khân. Ka tân a ṭhat êm avang hian Lalpa chu eng nge ka pêk ve ang? Chhandamna no ka keng ang a, Lalpa hming chu ka lam ang. Lalpa hnêna ka thutiam chu ka hlen ngei ang, A mite zawng zawng hmaah chuan. Amah ngaihsaktute thihna chu, Lalpa ngaihin hlu tak a ni. Aw Lalpa, kei zawng, i bawih, i chhiahhlawh ka ni a, I bawihnu fapa ka ni, Min phuarnate i rawn phelh ta. Lâwmthu sawi inthawina ka hlân ang che a, Lalpa, i hming ka lam bawk ang. Lalpa hnêna ka thutiam chu ka hlen ngei ang, A mite zawng zawng hmaah chuan. Lalpa biak in tualzâwl, Jerusalem laiah ka hlen ngei ang. Lalpa chu fak rawh u. Hnam zawng zawngte u, Lalpa chu fak ula, Mi tinrêngte u, amah chu fak rawh u. Kan chungah hian ngil a nei êm êm a, Lalpa rinawmna chu kumkhuain a pangngai reng a ni. Lalpa chu fak rawh u. Lalpa chu a ṭhat êm avângin fak rawh u, Ngil a nei kumkhua si a. Israel mite chuan, ‘Ngil a nei kumkhua si a,’ ti ngei rawh se. Arona thlahte chuan, ‘Ngil a nei kumkhua si a’ ti hlawm rawh se. Lalpa ṭihtute chuan, ‘Ngil a nei kumkhua si a,’ ti bawk rawh se. Ka mangang a, Lalpa chu ka han au va, Lalpa chuan min lo chhâng a, min tizalên ta a. Lalpa chu ka lamṭang a ni a, ka hlau lo vang, Mihringin eng nge min tih theih ang? Lalpa chu ka lama ṭang, min ṭanpuitu a ni, Min hawtute diriam takin ka la en ang. Mihring rinchhan ai chuan Lalpa hnêna tlûkluh a ṭha zâwk a, Milian rinchhan ai chuan Lalpa hnênah tlûkluh a ṭha zâwk. Hnam dangte chuan min rawn hual a, Mahse, Lalpa hmingin ka titlâwm ta. Min rawn hual tuau tuau va, Mahse, Lalpa hmingin ka titlâwm ta. Khuai rual angin min rawn bawh a, Mahse, Lalpa hmingin ka titlâwm ta. Min rawn nawr sawk sawk a, Ka tlu ṭhelh a; mahse, Lalpan min ṭanpui ta. Lalpa chu ka chakna leh ka hla, Min chhandamtu a ni. An bûka Pathian mite hnehna lâwma au thâwm chu ngai rawh u, ‘ Lalpa kut ding lam chuan a hneh ta a, Lalpa kut ding lam chawimawi a ni a, Lalpa kut ding lam chuan thil ropui tak a tih tâk hi,’ an ti. Ka thi lo vang, ka dam ang a, Lalpa thil tih ka hril ngei ang. Lalpan min thunun na hle a, Mahse, ka thih êm zawng a phal lo ve. Tempul kawngkhâr chu mi hawn rawh u, Ka lût ang a, Lalpa hnênah lâwmthu ka sawi dâwn a ni. Hei hi Lalpa kawngkhâr chu a ni, Mi dikte chu an lût thei ang. Min chhan avângin ka fak a che, Min chhanchhuaktu i ni. Insatute lung hnâwl tâk kha, A kil lung pawimawh ber a lo ni si. Chu chu Lalpa tih a ni e, kan hmuhin a mak kan ti. Vawiin hi Lalpa ni ruat chu a ni, Hlimin i lâwm ang u. Aw Lalpa, min chhandam teh, Aw Lalpa, min hlawhtlintîr ang che. Lalpa hminga lo kal chu an nihlawh e, Lalpa in aṭang hian mal kan sâwm a che u, Lalpa chu Pathian a ni a, kan chungah a lo êng ta! Chhâwl keng ila, maichâm thlengin kawng i zawh ang. Ka Pathian i ni a, lâwmthu ka hrilh ang che, Aw ka Pathian, ka chawimawi chiam ang che. Lalpa chu a ṭhat avângin fak rawh u, Ngil a nei kumkhua si a. Sawisêlbote chu an nihlawh e, Lalpa Dân zâwmtute chu. A thupêk zâwmtute chu an nihlawh e, Tihtakmeuhva zawngtute chu. Anni chuan thil sual an ti ngai lo va, A kawngah an kal ṭhîn. I thuruatte chu min pe a, Zâwm ngei tûrin min ti. I dânte chu Rinawm taka zâwmtu ni thei teh ila aw! I thupêk zawng zawng zâwm ila, Ka mualpho tawp lo vang. I rorêl dikzia ka hriat hunah Thinlung dik takin ka fak ang che. I dân chu ka zâwm ang a, Min kalsan suh ang che. Tleirâwlten engtin nge an awm dân an vawn thianghlim ang? I thute zâwmin. Theihtâwp chhuahin ka zawng che a, I thute ka pênsan phal lul suh. I chungah thil sual ka tih loh nân, I thu ka thinlungah ka vawng tlat a. Lalpa, fak tlâk i ni, I dânte min zirtîr rawh. I kâa thu chhuakte chu Ka sawi ka sawi dâwn e. I thu târlante zawm hi ka hlimna a ni a, Sum tam tak neiha ka hlim ang maiin. I thuruatte ka ngaihtuah a, I kawngte chu ka chhui bawk ṭhîn. I thutak chu ka lawmzâwng a ni a, I thute chu ka theihnghilh ngai lo vang. I chhiahhlawh chungah hian ṭha takin ti la, I thu zâwma ka nun theih nân. Ka mit mi tihvârsak ang che, I Dân makzia ka hmuh chian theih nân. Leiah hian khualzin mai ka ni a, I thupêk chu ka lakah hian zêp suh ang che. I rorêl hriat châkin Eng lai pawhin ka vân ruai ṭhîn. Mi chapo, ânchhe dawngte chu i zilhhau va, I thupêk pawisa lotute chu. Hmusit taka min sawichhiatna hi la bo vang che, I thu hriattîr ka zâwm si a. Miliante chuan ṭhu khâwmin min phiar a, Kei, i chhiahhlawh hi chuan i Dânte ka ngaihtuah ṭhîn. I thu hriattîr chu ka lâwmzâwng a ni a, Rem min ruatsak ṭhîntu a ni. Vaivutah ka tlu reng mai a, I tiam angin min tiharh rawh. Ka awm dânte i hnênah ka puang a, nangin min lo chhâng a, I dânte chu min zirtîr ang che. I thuruatte chu min hriatthiamtîr la, I thil mak tihte chu ka ngaihtuah ang. Lungngaiin ka chau dêr a, I tiam angin min tichak rawh. Kawng dik lo chu ka zawh phal suh ang che, Khawngaih takin i dân min zirtîr rawh. Kawng dik tak chu ka thlang ta a, I rorêlte ka zâwm bawk ṭhîn. I thu hriattîrte chu ka zâwm tlat a, Aw Lalpa, min timualpho lul suh. I thupêk chu châk takin ka zâwm a, Ka rilru hi a tizau ta. Lalpa, i dân thute min zirtîr rawh, A kip a kawiin ka zâwm dâwn nia. I Dân ka zawm theih nân hriatthiamna min pe la, Ka theih tâwkin ka zâwm ang e. I thupêkte min zawmtîr la, Chu chu ka lâwmzâwng tak a ni si a. I thu hriattîr lamah min hawitîr la, Awhna lamah ni lovin. Thil lawilo en lo tûrin ka mit min lâktîr ang che, I kawnga kal tûrin min tiharh rawh. I chhiahhlawh hnêna i thutiam chu hlen la, Nangmah ṭihtute hnêna i tiam chu. Ka hlauh êm êm, min sawichhiatna hi la bo vang che, I rorêl chu a va ṭha êm! I thuruatte chu ka ngaina takzet a ni. I ṭhatnain min tiharh rawh. Lalpa, i ngilneihzia ka chungah a lang, I tiam angin min chhandam rawh. Min sawichhetute ka chhân theih nân, I thu ka ring si a. Eng lai pawhin thu dik min sawitîr rawh, I rorêl chu ka innghahna a ni si a. I Dânte chu ka zâwm fo vang, Chatuan chatuanin. Engthâwl takin ka lêng teh ang, I thuruat chu ka zawn ber a ni si. Lalho hmaah i thu hriattîrte chu ka hril ang a, Ka zak lo vang. I thupêkte zawm nuam ka ti a, Ka châkzâwng tak a nih avângin. I thupêkte ka ngainain ka ngaisâng a, I dânte chu ka ngaihtuah ang. I chhiahhlawh hnêna i thutiam hre reng ang che, Chu chuan beiseina min neihtîr a ni. Chu chu ka tuar laia min thlamuantu a ni, I thu chuan min tiharh ṭhîn. Chapote chuan min hmusit êm êm a, Mahse, i Dân ka pên bosan ngai lo. Lalpa, hmasânga i rorêl chu ka hre reng a, Min tithlamuang a ni. Mi sualten i Dân an pawisa lo tih ka hmuhin, Ka thin a ur êm êm a ni. Ka dam chhûng rei lo tê-ah hian I dânte chu zaiin ka chawi ang. Lalpa, zânah i hming ka hre reng a, I Dânte chu ka ngaihtuah ṭhîn. I dân zawm hi, Ka lâwmna chu a ni. Lalpa, ka chanvo i ni a, I thu zawm ka tiam ta e. Theihtâwpin i duhsakna ka zawng a, I tiam angin min khawngaih rawh. Ka awm dânte ka ngaihtuah a, I thu hriattîrte zâwm tûrin ka ke ka pên ta e. I thupêkte chu muangchâng lovin Ka zâwm ta vat a ni. Mi sual rualin min hual vêl a, Mahse, i Dânte chu ka theihnghilh lo. Zânlaiah te fak tûr chein ka tho ṭhîn a, I rorêlte a dik avângin. Nangmah ṭihtute zawng zawng ṭhian ka ni, I dân zâwmtute chu. Lalpa, lei hi i ngilneihnain a khat a, I dânte chu min zirtîr rawh. I chhiahhlawh chungah hian, Lalpa, I thu angin thil ṭha i ti ṭhîn a. Finna leh hriatna ṭha min zirtîr rawh, I thupêk hi ka ring si a. Ka tuar hma khân ka vâk bo ṭhîn, Mahse, tûnah i thu ka zawm tâk hi. Nang zawng i ṭha a, thil ṭha titu i ni, I dânte chu min zirtîr rawh. Chapote chuan min hêk ṭhîn a, Kei chuan theihtâwp chhuahin i dân ka zâwm a ni. An thinlung a sak a, Kei zawng i Dân ka lâwmna a ni ṭhîn. Min tuartîr kha ka tân a lo ṭha e, I dânte chu ka zir phah ta. I Dân min pêkte hi, Tangka leh rangkachak sâng tam tak aiin a hlu zâwk a ni. I kutin min siam a, min din nghet a, Hriatthiamna min pe la, i thupêkte ka zir ang e. Nangmah ṭihtuten min hmu ang a, an lâwm ang, I thu ka rin tlat avângin. Lalpa, i rorêl chu a dik tih ka hria, Dik takin min zirtîr ṭhîn a lo ni e. I chhiahhlawh hnêna i tiam ang khân, Aw, i ngilneihna chuan min tithlamuang teh se: Min khawngaih la; tichuan, ka nung ang a, I Dân hi ka lâwm si a. Chapote chu mualpho rawh se, dâwta min hêk avângin, Kei chuan i thuruatte ka ngaihtuah ang. Nangmah ṭihtute chu ka lam lo hawi rawh se, I thu hriattîr hretute chu. I dânte chu zâwm vek ila, Ka mualpho ngai lo vang. Min chhanchhuahna nghâkin ka chau ta e, I thu ka ring si a. I thutiam thlîr nân ka mit a vai zo va, ‘Engtikah nge min thlamuan ang?’ tiin. Ip hluihlâwn ung tawh ang ka ni; Mahse, i dânte chu ka theihnghilh lo. I chhiahhlawh hi eng chen nge ka la dam ang? Engtikah nge min tiduhdahtute chungah ro i rêl dâwn? Mi chapo, i Dân zâwm duh lote chuan, Ka tlâk nân khur an lai a. I thupêkte a rin tlâk êm êm a, Dâwtin min bei a ni - min ṭanpui rawh. Lei ata hi min tiboral ṭhelh ṭhelh a ni; Mahse, i thuruatte chu ka thlahthlam chuang lo ve. Ngil i neih êm avângin min tiharh la, I thu hriattîr ka zâwm dâwn nia. Aw Lalpa, vânahte khian I thu chu a awm kumkhua ang. I rinawmna chu chhuan zawng zawng thlengin a pangngai reng a, Lei i din nghet a, a awm ta reng a ni. I rorêl angin tûn thleng hian engkim an awm a, An za vaiin i chhiahhlawh vek an ni. I Dân hi ka lâwmzâwng tak ni suh sela chuan, Hrehawm tuarin ka boral daih tawh ang. I thuruatte ka theihnghilh ngai lo va, Nangin chûng chuan min tiharh ṭhîn. I ta ka ni, min chhandam rawh, I thuruat zawngtu ka ni si a. Mi sualte chuan min thah tumin min châng mah se, I thu hriattîrte chu ka ngaihtuah ang. Engkim mai hian tâwp chin a nei tih ka hre ta a, I thupêk erawh chu zau tak a ni. Aw, I dân chu ka va ngaina êm, Ni tin ka ngaihtuah ṭhîn a ni. I thupêk chuan ka hmêlmate aiin mi tifing a, Kumkhuaa min chênchilh reng avângin. Min zirtîrtu zawng zawng aiin ka fing zâwk e, I thu hriattîr ka ngaihtuah fo avângin. Tarte aiin ka hre zau va, I thuruatte ka vawn ṭhin avângin. Kawng sual rêng rêng ka dai ngai lo, I thu ka zawm theih nân. I rorêl chu ka pênsan ngai lo va, Nangmah ngeiin min zirtîr avângin. I thute chu ka kâah hian a va tui êm! Khawizu aiin a thlum zâwk e. I thuruat chuan min tifing a, Awm dân dik lo tinrêng ka hua a ni. I thu hi ka ke atân khâwnvâr a ni a, Ka kawng atân êng a ni bawk. I rorêl dik tak chu Zawm ka tiam a, ka nemnghet e. Ka tuar nasa êm mai, Lalpa, I thu angin min tiharh rawh. Lalpa, khawngaih takin ka fakna hi lo lâwm la, I rorêl chu min zirtîr rawh. Ka nunna hi i kuta awm a ni a, I Dân ka theihnghilh ngai lo ve. Mi sualte chuan ka awh nân thang an kam a; Mahse, i thuruat chu ka pênsan lo. I thu hriattîrte chu ka kumkhaw rochan a ni a, Ka thinlung pawh a tihlim êm êm ṭhîn. Kumkhuaa i dân zâwm tûrin Ka rilru ka siam fel ta. Mumal nei lote chu ka hua a, I Dânte erawh chu ka ngaina e. Nang chu ka bihrûkna, ka phaw i ni, I thu ka ring tlat e. Thil sual titute u, min kalsan rawh u; Pathian thupêk ka zâwm dâwn a ni. I tiam angin min dawm ding la, ka nung dâwn nia, Ka beisei hi tithlâwn lul suh ang che. Mi chelh tlat la, ka him ngei ang, I dânte chu ka zâwm fo vang. I dân pênsantute chu i duh lo va, Mi bum an tumna chu engmahlo mai a ni. Leia mi sualte chu a êkchhia ang maiin i hnâwl zêl a, Chuvângin, i thu hriattîr ka ngaina ta a ni. Ka hlauh che avângin ka tisa a khûr a, I rorêlte hlauvin ka khat. Dik tak leh fel takin thil ka ti ṭhîn, Min tiduhdahtute kutah min pe lul suh. I chhiahhlawh hi ṭanpui tiam la, Mi chapoten min nêkchêp hi phal suh. I chhandamna thlîr nân ka mit a vai zo va, Chhandam i tiam kha hmuh tumin. I chhiahhlawh chungah hian ngilnei takin ti la, I dânte chu min zirtîr bawk ang che. I chhiahhlawh ka ni a, hriatthiam theihna min pe ang che, I thu hriattîrte chu ka hriat theih nân. Lalpa, i chêt a hun ta e, I Dân an bawhchhiat hi. Chuvângin, i thupêkte chu rangkachak aiin ka ngaina a, A ni, rangkachak thianghlim ber ai pawhin. Tichuan, i thuruat zawng zawngte chu a zavaiin ka zâwm a, Awm dân dik lo tinrêng ka hua a ni. I thu hriattîrte chu a va mak êm! Chuvâng chuan, ka zâwm ṭhîn. I thu hrilhfiahna chuan mite a tiêng a, Mi mâwlte pawh a tifing ṭhîn. I thupêkte hriat châk takin, Ka âng meuhvin ka thaw huam huam a ni. Ka lamah lo hawi la, min khawngaih rawh, I hming ngainatute chunga i tih fo ṭhin ang khân. I tiam angin ka ke pênte hi tinghet ang che, Sualin ka chunga thu a neih phal suh ang che. Min nêkchêptute kut ata hi min chhan chhuak la, I thuruatte ka zâwm dâwn nia. I chhiahhlawh chungah hian i hmêl lo êng sela, I dânte chu min zirtîr bawk ang che. I dânte chu an zawm duh loh avângin, Lui tui angin ka mittui hi a luang fo ṭhîn. Lalpa, nang chu mi dik i ni a, I rorêl pawh a dik a ni. I thu hriattîrte chu a dik a, A rin tlâk êm êm bawk. Ka ṭhahnemngaihna chuan mi ei zo va, Ka hmêlmaten i thu an theihnghilh tâk avângin. I thute chu finfiah vek tawh a ni, I chhiahhlawh hian a ngaina êm êm e. Eng mah tham lo, hmuhsitawm tak ka ni; Mahse, i thuruatte ka theihnghilh ngai si lo. I dikna hi a awm kumkhua ang a, I Dân pawh hi a ṭha reng ang. Manganna leh buainain min rawn nang a; Mahse, i thupêk hian min tilâwm ṭhîn. I thu hriattîrte chu a dik kumkhua dâwn a, Hriatthiamna min pe la, ka nung dâwn nia. Theihtâwp chhuahin ka au che a, Lalpa, min chhâng ang che, I dânte chu ka zâwm dâwn nia. Ka koh che hi, min chhandam rawh, I thu hriattîrte chu ka awih dâwn nia. Khawvâr hmain ṭanpui dîlin ka au ṭhîn che, I thu ka beisei ṭhîn a ni. Ka meng tlaivâr ṭhîn e, I thu ngaihtuahin. I ngilneihna avângin ka aw lo ngaithla la, Lalpa, i tih fo ṭhin ang khân min khawngaih rawh. Thil sual tih chîngte chuan min rawn hnaih hi, I thu zâwm duh ngai lote chuan. Lalpa, nang ka kiangah i awm a, I thupêk zawng zawngte a rin tlâk si. I thu hriattîrte chu kumkhua atân i tinghet tih Hmân aṭangin ka lo hre tawh a ni. Ka tuarna hi en la, min chhan chhuak teh, I Dân ka theihnghilh ngai si lo. Mi sawipui la, min tlan ang che, I tiam angin min tiharh rawh. Mi sualte tân chhandamna chu hla tak a ni, I dânte chu an zir duh si lo va. Lalpa, ngil i nei êm êm a, I tih fo ṭhin angin min tiharh rawh. Hmêlma, min ûmtute an tam hle a; Mahse, i thu hriattîr ka pênsan ngai lo ve. Phattute ka hmuhin ka ten êm êm, I thu an awih duh loh avângin. I thuruatte ka ngaihnatzia hi, min han en teh, Lalpa, i ngilneihna avângin min tiharh rawh. I thu laipui chu thutak hi a ni, I rorêl zawng zawng chu a dik kumkhua a ni. Hotute chuan chhan awm lovin min tiduhdah a, Mahse, i thu ka ngaisâng e. I thu vângin ka hlim êm êm ṭhîn a, Sum tam tak chhartu ang maiin. Dâwt ka hua a, ka ten a ni, I Dân erawh hi chu ka ngaina e. Ni khatah vawi sarih ka fak ṭhîn che, I rorêl chu a dik êm avângin. I Dân ngaihtuahtute an thlamuang êm êm ṭhîn, Eng mahin a titlu thei si lo. Lalpa, i chhandamna ka nghâk reng a, I Dânte chu ka zâwm zêl a. I thu hriattîrte chu ka zâwm ziah a, Ka ngaina êm êm ṭhîn. I thuruat leh i thu hriattîrte chu ka zâwm zêl ṭhîn, Ka awm dân zawng zawngte i hre vek bawk. Lalpa, ka au aw hi i hnên lo thleng sela, I tiam angin hriatthiamna min pe ang che. Khawngaih ka dîlna hi i hnên lo thleng sela, I tiam angin min chhandam rawh. Nangmah fakin ka zai ang a, I dânte chu min zirtîr ta si a. Ka lei hi i thu fakin zai rawh se, I thupêk zawng zawng chu a dik a ni. Min ṭanpui tûrin inpeih reng la, I thuruatte ka thlang ta si. Aw Lalpa, i chhandamna ka nghâkhlel a, I dânte chu ka lâwmzâwng tak a ni. Min tinung la, ka fak ang che, I rorêl chuan min pui rawh se. Berâm angin ka vâk bo va, i chhiahhlawh hi min rawn zawng teh, I thupêkte ka theihnghilh ngai si lo. Ka manganin Lalpa chu ka au va, Min lo chhâng ṭhîn. Dâwt sawi chîng leh bum hmangte lakah chuan, Lalpa, min hum ang che. Bum hmangte u, engtianga nasain nge A sawisak ang che u? In dopuite thal zum tak leh Thing chang lingin a hrem dâwn a che u. Mesek-ho zînga awm ang leh Kedar-ho zînga chêng ang ka ni, A va vânduaithlâk êm! Remna duh lote zîngah hian Ka chêng rei lutuk ta. Kei chuan inremna thu ka sawi ṭhîn a; Mahse, indo an thlang zâwk ṭhin. Tlâng lamahte khian ka mit ka lên chho vang, Khawi aṭangin nge ṭanpuina ka hmuh ang? Min ṭanpuina chu Lalpa, Lei leh vân Siamtu hnên aṭangin a lo thleng ang. Ani chuan i tlûk a phal lo vang a, Nangmah vêngtu chu a muhîl ngai lo ve. Ngai teh, Israel-ho vêngtu chu, A muhîl ngai lo va, a muthlu ngai hek lo. Lalpan a vêng che a, Lalpan a hliahkhuh zêl ang che. Chhûnah ni sa i tuar lo vang a, Zânah thlain a em â hek lo vang che. Thil ṭha lo tinrêng lakah Lalpan a vêng ang che a, A hum tlat dâwn a che. Lalpa chuan i chhuak leh lût a vêng ang che, Tûn aṭanga kumkhuain. ‘ Lalpa inah i kal ang u,’ Ti-a min sâwm lai khân ka lâwm hle a. Aw Jerusalem, i kulh chhûngah Kan kête chu a din tâk hi. Jerusalem, khawpui din thar, Fel taka remah chuan. Tah chuan a ni, hnamte an chhoh ṭhin ni, Lalpa hnamte chu, Israel-te thu a pêk anga a hming han fak tûrin. Tah chuan a ni, Davida thlahten, Rorêlna lalṭhutthlêng an hûn ṭhin ni. Jerusalem khaw tân thlamuanna dîl ula, Nang ngainatute chu hmuingîl rawh se. I kulh chhûngah râlmuanna awm sela, I lal inahte pawh thawvenna awm rawh se. Ka unaute leh ka ṭhiante avângin, ‘I chungah thlamuanna awm rawh se,’ ka ti a ni. Lalpa, kan Pathian in avângin, I ṭhatna tûr ka zawng zêl ang. Aw nang, vân aṭanga rorêl ṭhîntu, I lam ka rawn thlîr e. Chhiahhlawhten an pu an ngaichâng ang leh, Bawihnuten an pite an nghâk ang hian, Min khawngaih hma loh chu, Kan mit pawhin Lalpa kan Pathian chu a thlîr reng dâwn a ni. Min khawngaih rawh, Lalpa, min khawngaih rawh, Mi min hmuhsitna kan ning ta e. Mi nuamsaten min hmuhsitna leh Chapote min diriamna kan ning lutuk ta e. “ Lalpa chu kan lama ṭang ni suh sela chuan, Miten min beih lai khân Kan lama ṭang chu Lalpa ni suh sela, Kan chunga an thinur a sosân laite khân, A nung chungin min dawlh tawh ang. Tui lianin min lain Lui lian chuan min chîm pil tawh ang, Tui lian so bulh bulh chuan Min vûr pil tawh ngei ang,” Israel-te chuan ti ngei rawh se. Lalpa i fak ang u, Hmêlmaten min sehsawm a phal lo va, Thangkamtu thang ata sava angin min chhuah ta, Thang chu a tichhia a, keini kan chhuak ta a ni. Lei leh vân Siamtu Lalpa chuan, A hming avângin min rawn pui ta. Lalpa ringtute chu, Zion tlâng tihnghîn rual loh, Kumkhuaa awm rêng tûr ang hi an ni. Jerusalem khua chu tlângin a hual ang hian, A mite chu Lalpan a kal hual ṭhîn. Mi sualte chu mi dikte ramah chuan An lal reng dâwn si lo, Mi dikte chuan thil sual an tih ve loh nân. Aw Lalpa, mi ṭhate leh thinlung ngîlte chungah chuan, Thil ṭha ti ve ang che. Sual kawng zawhtute Lalpan a hruai bo hunah chuan, Thil sual titute chu a hruai tel ang. Israel-te hnênah rem lêng rawh se. Lalpan Zion-a min hruai kîr leh lai khân, mumang emaw kan ti. Kan nui hawm hawm a, Hlimin kan au chêl chûl bawk a. ‘ Lalpan an tân thil ropui tak a tihsak a nih hi,’ Hnam dangte chuan an ti. Lalpan thil ropui tak min tihsak a, Kan hlim êm êm a ni. Lalpan sala kan tâng min hruai kîr leh ta a, Thlalêra lui tui a luang leh ta ang hian. Mittui tla chunga tuhtute chuan Hlim takin an seng a, Ṭap chungin buh chi feh chhuahpui mah sela, An buhphalte kengin hlim takin an lo haw leh ang. Lalpan in a sak loh chuan, A satute an hah thlâwn mai a ni. Lalpan khawpui a vên loh chuan, A vêngtute an meng thlâwn mai a ni. Ei tûr zawnga zîng tak taka thawha, Tlai tak taka mut hi a hahthlâk thlâwn a ni. Lalpan a hmangaihte chu Malsâwmna a pe mai ṭhîn a ni. Fanaute hi Lalpa hnên ata kan rochan an ni a, Rîla rahte hi kan lâwmman dawn a ni. Kan vânglai fate chu indo mite thal ang hi an ni. Thal bâwm chutianga khat nei chu an nihlawh e, Kulh kawngkaa hmêlma an tawn hunah An mualpho hauh lo vang. Lalpa ṭihtu zawng zawngte chu an nihlawh e, A kawng zawh ṭhînte chu. Thawhrim rah i ei ang a, I hlimin i hmuingîl ang. I nupui chu i in chhûngrilah, Grep rah duh tak ang hi a ni ang a, I fate pawh oliv tuai ang, Chawhlui kîla ṭhu kual pup tham an ni bawk ang. Hetiang hian Lalpa ṭihtute chuan, Malsâwmna an dawng ngei ang. Zion aṭangin Lalpan mal a sâwm ang che a, I dam chhûng zawng Jerusalem hmuingîlna chu i chang ve ang. I tute hmêl hmuin i dam bawk ang. Israel-te hnênah rem lêng rawh se. ‘Ka naupan lai ata miten min va tiduhdah ṭhîn tak êm!’ Israel-hovin ti rawh se. ‘Ka naupan lai ata miten min va tiduhdah ṭhîn tak êm! Mahse, tu man min titlâwm thei si lo. Leilettuin lei a rîn thlûr angin, Ka hnungzâng hi an rîn thlûr seng sung mai. Lalpa chu a dik a, Mi sualte hruihrual chu mi zai chahsak ta e,’ Israel-ten ti ngei rawh se. Zion hawtu zawng zawngte chu Mualphovin, tlânchhe haw daih rawh se. A ṭhan sân hmaa vuai mai ṭhîn, In chung zâwla hlobet ang hi ni vek rawh se. Tu man chu chu an la khâwm ngai lo va, Seng tûr pawhin an têl hek lo. A bul hnaia kalte pawhin, ‘ Lalpan malsâwm che u rawh se, Lalpa hmingin mal kan sâwm a che u,’ An ti ngai bawk hek lo. Manganna khur thûk tak aṭangin, Lalpa, ka au va che, Lalpa, ka aw hi ngaithla teh. Khawngaih ka dîlna hi, Min ngaihthlâksak ang che. Lalpa, sualnate i chhinchhiah zêl chuan, Lalpa, tu nge thiam chang zo vang? Nang chuan sual i ngaidam ṭhîn a; Tichuan, miten an zah ṭhîn che a ni. Lalpa chu ka nghâk ṭhîn, A ni, ka nghâk reng ṭhîn a ni. A thu pawh ka ring a ni. Râlvêngtuten khawvâr an nghahhlelh aia nasain, A ni, râlvêngtuten khawvâr an nghahhlelh aia nasa mahin, Nghâkhlel takin Lalpa ka thlîr a ni. Israel-te u, Lalpa hi ring rawh u, Lalpa chu ngilnei tak a ni a, Chhandam a peih reng bawk. An bawhchhiatna zawng zawng ata, Israel-te a chhan chhuak ang. Lalpa, ka rilru a chapo ta lo va, Ka inngaihlu hek lo. Thil lian thamah ka intelh duh lo va, Ka phu loh thilahte chuan. Ka lung a awi ta a, Ka hah a dam ta e. Nausên hnute hne lai a nuin a pawm hle hle ang hian, Kei pawh thlamuang takin ka awm ta e. Israel-te u, Lalpa chu ring rawh u, Tûn aṭanga kumkhuain. Lalpa, Davida hi a hrehawm tuarna zawng zawng Hriatpui ang che. Lalpa hnênah thu a tiam a, Jakoba Mi Chaka hnêna a intiamkam kha Hriatpui ang che. ‘Ka in chhûngah ka lût lo vang a, Ka khumah pawh ka kai hek lo vang; Ka muhîl lo vang a, Ka maimitchhîng hek lo vang, Lalpa tân hmun ka hmuh hma leh, Jakoba Mi Chaka chênna tûr hmun ka neih hma chu,’ A tih kha. Ngai teh u, Efrata-ah a awm tih kan hria a, Jaar phûlah kan va hmu ta. A awmnaah kal ila, A ke bulah i kûn ang u. Lalpa, tho la, i chawlhna tûr hmunah kal rawh. I chakzia lanna Bâwm nên chuan. I puithiamte chu diknain inthuam se, Nangmah ngaihsaktute chu lâwmin au chiam rawh se. I chhiahhlawh Davida hnênah thu i tiam tawh si a, I hriakthiha hi tilunghnûr suh ang che. Lalpan Davida hnênah thu a tiam tlat tawh chu, A rinawm a, a sût lo vang. ‘I fate chuan ka thuthlung an pawma, Ka thu zirtîrte an zawm bawk chuan, An fate pawh i lalṭhutthlêngah chuan An ṭhu zêl ang,’ a tih kha. Lalpan Zion tlâng hi a thlang ta a, A chênna hmun atân a duh a ni. ‘Hei hi ka kumkhaw chawlhna tûr a ni, Ka awm reng nân ka duhzâwng tak a ni. Ei leh bâr kawngah mal ka sâwm ngei ang che a, A mi, retheite pawh ka hrai tlai ang. A puithiamte chhandamnain ka thuam ang a, A mi thianghlimte pawh hlim takin an au vang. Tah chuan, Davida thlah lal ropui tak ka ṭhuttîr ang, Ka hriakthiha tân chuan khâwnvâr ka chhi ta e. A hmêlmate ka timualpho vang a, A lallukhum ka tihtlêtsak bawk ang.’ Ngai teh, unau inngeihdial diala awm khâwm hi A va ṭhain, a va nuam êm! Hriak rimtui, lu-a thih, Khabehmula luang thla ang hi a ni. Arona khabehmula luang thla, A kawrfual nghâwng thlenga luang thla ang kha. Hermon dai fîm, Zion tlânga tla ṭhîn ang hi a ni. Chutah chuan a ni Lalpan malsâwmna a thlen ṭhin ni, Kumkhuaa nunna tûr chu. Hawh u, Lalpa chhiahhlawh zawng zawng, Zâna Lalpa ina rawngbâwl ṭhînte u, Lalpa chu fak rawh u. Hmun Thianghlimah in bânte phar ula, Lalpa chu fak rawh u. Lei leh vân siamtu Lalpa chuan, Zion aṭangin malsâwm che u rawh se. Lalpa chu fak rawh u; Lalpa hming chu fak ula, Lalpa chhiahhlawhte u, fak rawh u. Lalpa ina rawngbâwla, Kan Pathian in hung chhûnga che ṭhînte u, Lalpa chu fak rawh u. Lalpa chu fak rawh u, ani chu a ṭha si a. A hming fakin zai rawh u, a nuam si a. Lalpan Jakoba chu a thlang ta a, Israela chu a ta bîk atân a nei ta e. Lalpa ropuizia hi ka hre ta e, Kan Lalpa hi Pathian dang zawng zawng aia ropui zâwk a ni. Lei leh vânah te, tuipuiah leh tuifinriatah te, Lalpan a duh apiang a ti ṭhîn. Kâwlkil aṭangin chhûm a chhohtîr a, Ruah sûr nân kâwl a phêttîr a, A bâwm ata thli a rawn chhuah. Aigupta rama mihringte leh rante chu, An fa tîr a tihhlumsak a. Aigupta ramah, Farawa leh a chhiahhlawhte hrem nân, Chhinchhiahna leh thil mak tak tak a tih kha. Ani chuan hnam tam tak a tichhia a, Lal ropui tak takte a that bawk. Amor lal Sihona te, Basan lal Oga te, Kanan ram lal zawng zawngte nên. An ramte chu a mite a pe a, A ni, Israel-te rochan atân a pe. Lalpa, i hming chu kumkhuain a dai lo vang, Chhuan zawng zawngin, Lalpa, an hria ang che. Lalpa chuan a mite chu thiam a chantîr a, A chhiahhlawhte chungah khawngaihna a lantîr ta, Hnam dangte pathian chu mihring kutchhuak, Rangkachak leh tangkaruaa siam an ni e. Ka an nei a, an ṭawng thei si lo va, Mit an nei a, an hmu thei bawk si lo. Beng an nei a, eng mah an hre thei lo va. Thâwk pawh an thaw thei hek lo. Chûng ringtu leh siamtu zawng zawngte chu, Chûng milem ang lek chu ni hlawm rawh se. Aw, Israel chhûngte u, Lalpa chu fak rawh u, Aw, Arona chhûngte u, Lalpa chu fak rawh u, Aw, Levia chhûngte u, Lalpa chu fak rawh u, Lalpa ṭihtute u, Lalpa chu fak rawh u. Zion-ah chuan Lalpa chu fak ula, Jerusalem-a chêng Lalpa chu fak rawh u. A ṭhat avângin Lalpa chu lâwmthu hrilh rawh u, Ngil a nei kumkhua si a. Pathiante Pathian chu lâwmthu hrilh rawh u, Ngil a nei kumkhua si a. Lalte lal chu lâwmthu hrilh rawh u, Ngil a nei kumkhua si a. Mahni chauhva thil mak ropui tak titu chuan, Ngil a nei kumkhua si a. A finnaa vân siamtu chuan, Ngil a nei kumkhua si a. Tui chunga lei dah duaitu chuan, Ngil a nei kumkhua si a. Êng lian pui puite siamtu chuan, Ngil a nei kumkhua si a. Ni khi chhûna êng tûra siamtu chuan, Ngil a nei kumkhua si a. Thla leh arsite zâna êng tûra siamtu chuan, Ngil a nei kumkhua si a. Aigupta mite fa tîr thattu chuan, Ngil a nei kumkhua si a. Chuta ṭanga Israel fate hruai chhuaktu chuan, Ngil a nei kumkhua si a. Bân phar meuhva a kut lektu chuan, Ngil a nei kumkhua si a. Tuipui Sen pawh tiṭhentu chuan, Ngil a nei kumkhua si a. Israel-te hruaikaitu chuan, Ngil a nei kumkhua si a. Tuipui Sena Farawa leh a sipaite tihlumtu khân, Ngil a nei kumkhua si a. A mite thlalêra hruaitu khân, Ngil a nei kumkhua si a. Lal tam tak thattu khân, Ngil a nei kumkhua si a. Lal hmingthang tak takte thattu khân, Ngil a nei kumkhua si a. Amor lal Sihona thattu khân, Ngil a nei kumkhua si a. Basan lal Oga thattu khân, Ngil a nei kumkhua si a. An ram, a mite petu khân, Ngil a nei kumkhua si a. A chhiahhlawh Israel-te hnêna rochana petu khân, Ngil a nei kumkhua si a. Kan baihvai laia min hruaitu khân, Ngil a nei kumkhua si a. Kan hmêlmate laka min chhantu khân, Ngil a nei kumkhua si a. Thil nung tinrêng hnêna ei tûr pe ṭhîntu khân, Ngil a nei kumkhua si a. Vâna Pathian chu lâwmthu hrilh rawh u, Ngil a nei kumkhua si a. Babulon lui kamahte kan ṭhu a, Zion ngaiin kan ṭap ṭhîn. A kam tuipuisuthlahahte chuan Kan ṭingṭangte kan bâng ṭhîn a. Tah chuan sala min mantuten Hla sa tûrin min phût a, Min tiretheituten hlima hla sa tûrin min ti, ‘Zion hla min saksak ta che u,’ tiin. Engtin nge mi ramahte chuan Lalpa tân hla kan sak theih ang? Aw Jerusalem, ka theihnghilh che chuan, Ka kut ding lam hian a thil thiamte theihnghilh rawh se. Aw Jerusalem, ka hriat reng loh che-a, Ka hlimna ber aia ka thlan zâwk loh che chuan, Ka lei pawh hi ka dangah hian bet tlat rawh se. Jerusalem a chhiat nia, Edom miten, ‘Tichim rawh u, tichim rawh u, A lungphûm chenin tichhe rawh u,’ an tih kha, Aw Lalpa, a chhe lamin hre reng ang che. Aw nang Babulon, mi dang tichhe ṭhîntu, Ka chunga i tih ang taka thungrûltu che chu A va hlim dâwn êm! I fa sênte chhuhsaka, lungpui vuak nâna hmangtu chu A va hlim dâwn êm! Ka thinlung zawng zawngin Lalpa, lâwmthu ka hrilh a che, Hnam dang pathian hmaah nangmah fakin ka zai ang. I Tempul thianghlim lam hawiin chibai ka rawn bûk a che, I ngilneihna leh i rinawmna avângin I hming ka fak a ni. I thu leh i hming chu, I chawisâng ta ber a. Ka koh che khân min lo chhâng a, Min tihuaiin min tichak ta. Lalpa, lei lal zawng zawngte hian an fak a che, I thu an hriat tâk avângin. Lalpa thil tihte fakin hla sa rawh u, Lalpa ropuina hi a nasa êm si a. Lalpa chu ropui hle mah se, Mi tlâwmte chu a ngaihsak a, Chapote erawh chu hla tak aṭang pawhin a hmu a ni. Buainaten min chîm vêl mah sela, Ka nun i humhim ṭhîn. Ka hmêlmate thinur lo thawk chu i dang kîr a, I kut ding lamin min chhan ṭhîn. Lalpa, ngil i nei kumkhua a, Lalpa, i kut hnathawh bânsan lo la, Ka tân i thiltih tum hlen zâwk ang che. Lalpa, nangmah ngeiinngun takin mi en fiah a. Min hre chhuak vek a ni. Ka ṭhut leh ka din i hre vek a, Hla tak aṭang pawhin ka ngaihtuahte i hria. Ka kalna te, ka chawlhna te i hre chiang a, Ka awm dân zawng zawng hi i hre fai vek a ni. Ngai teh, Lalpa, ka sawi hma pawhin ka sawi tûr zawng zawng chu i hre vek si. Ka hma hruaiin ka hnu i dâl a, I kutphahin min hûm tlat ṭhîn. Min hriatzia hi a mak lutuk a, Ka tân hriat phâk rual a ni lo. I hnên ata khaw nge ka kal anga, I hmuh lohvah khaw nge ka tlân bo vang? Vânah han lâwn ila, i lo awm a, Seol-ah mutna zu siam ila, i lo awm reng bawk si. Chhaktiangah khian thlâwk chho ila, Tuifinriat râl daihah pawh zu awm ila, I kut chuan min lo vuan ang a, I kut ding lam chuan min lo chelh dâwn si. ‘Thimin min khuh tlat se, Ka vêl êng hi zânah chang se,’ ti mah ila, Thim hi i tân a thim ve si lo, Zân pawh chhûn angin a êng a, Thim leh êng hi i tân thuhmun reng a ni. A ni, ka taksa pêng tin hi i siam a ni, Ka nu pum chhûngah min rem khâwm a. Aw Chungnungber, ka fak a che, Hlauhawm tak i ni si a, Mak taka siam ka ni; I thiltih hi a mak êm êm a, Ka hre chiang hle a ni. Ka ruhrel hi i lakah thup a ni lo, A rûka siam ka nih lai leh Lei chhûngrila min rem khâwm lai pawh khân. Kutke ka neih hma pawhin mi hmu vek a, Ka dam chhûng ni tûrte a inṭan hma daihin, I lehkhabu-ah chuan ziak vek a ni. Aw Pathian, i mi ngaihtuahnate chu ka tân a va hlu êm! Chhiar sên rual a ni lo. Chhiar dâwn ila, ṭiauvaivut aia tam a ni a, Ka han harh chuan i kiangah ka lo awm reng si. Aw Pathian, mi sualte hi that mai teh, Thisen chhuah mite u, min kalsan daih rawh u. Chûng chuan an sawichhe ṭhîn che a, Nangmah dotute chuan an tinawmnah ṭhîn che. Aw Lalpa, nangmah hawtute chu ka va haw êm! I chunga helte chu ka va ten êm! Huat tak têin ka hua a, Ka hmêlmaah te ka chhiar hlawm a. Aw Pathian, mi en fiah la, Ka rilru hi hre tlang ang che. Mi en ngun la, ka ngaihtuahte hi hre vek ang che. Keimahah hian dik lohna rêng a awm emaw en la, Chatuan kawngah min hruai ang che. Lalpa, mi sual lakah mi chhan chhuak la, Mi nunrâwng lakah mi humhim ang che. Thil sual tih an rilrûk reng a, Ni tin buaina an chawk chhuak ṭhîn. An lei chu rûl tûr ang hian a hlauhawm a, An thu chu rûlrial tûr ang hi a ni. Lalpa, mi sual lakah min vêng la, Tihtlûk tuma min bei ṭhîntu Mi nunrâwngte lakah min hum ang che. Chapote chuan ka awh nân hruihrualin thang an kam a, Ka kalkhânah lên an zâr a, Kawng tluanin thang an kam a ni. Lalpa hnênah, ‘ka Pathian i ni e, Lalpa, khawngaih ka dîlna hi lo ngaithla teh,’ ka ti a. Aw Lalpa, ka Lalpa, chhandamtu chak, Indo nia min humhimtu i ni. Lalpa, mi sualte duhthusâm chu hlawhtlintîr suh la, An thiltum chu puitlin suh se. Min hualtute lu chungah chuan, Min vauna chu tla zâwk rawh se. An chungah meiling sûr se, Leilâwtah tla sela, Lo chhuak leh tawh suh se. Dâwta mi hêk chîngte chu hlawhtling suh se, Nunrâwngte chu thil ṭha lovin nangchîng sela, Nuai nek hlawm rawh se. Lalpa, retheite chu i ṭan ṭhîn tih ka hria, Pachhiate tân dik takin ro i rêl ṭhîn. Mi dikte chuan i hming an fak ang a, Mi nun ngîlte chu i bulah an chêng reng ang. Lalpa, ka koh che hi, lohmanhmawh la, Ka auh che hi, i beng lo chhi ang che. Ka ṭawngṭaina hi rimtui hâl angin lo chho sela, Ka kut phar hi tlai lam thilhlan angin lo pawm ang che. Lalpa, ka kâ vêngtu tûr ruat la, Ka hmui vêng tûr min pe ang che. Ṭhil ṭha lo tih châkna lakah min vêngin, Mi sualte zînga thil sual ka tih ve phal suh la, Thil sual tih chîngte ruai ṭheh ka kîl ve phal hek suh. Mi dik chuan min khawngaih avângin Min vua-in, min zilh rawh se, Chu chu hriak ṭha ber a ni, Ka lu hian hnar suh se. Mi sualte thiltih do erawh chuan ka ṭawngṭai reng a ni. An rorêltute chu khâma nam thlâk an nih hunah, Ka thu chu pawm nuam an ti ang. Leilettuin lei a tisawm nuai ang hian Ka ruhte pawh thlân kotlângah a darh tâk hi. Aw Lalpa, ka Lalpa, kei chuan ka thlîr rêng che a ni, Ka rawn bêl che a, saruakin min kalsan suh. Thil sual titute thang lakah te, Ka awh nâna lên an zâr lakah te chuan min hum ang che. Mi sualte chu anmahni thang kamah chuan âwk sela, Kei chu him thên ila ka va ti êm! Râwl chhuah meuhvin Lalpa chu ka au va, Lalpa hnênah khawngaih dîlin ka au va ni. Ka manganna a hnênah ka thlen a, Ka rilru buaina pawh ka hrilh vek bawk. Ka beidawn êm êm lai pawhin Nang chuan ka awm dân tûr i hria, Ka kalna tûrah chuan, Ka hmêlmaten thang an kam ru. Ka vêl hi han thlîr la, Tu mah mi ngaihsak rêng an awm lo ve, Belh tûr ka hmu lo va, Tu mah mi ngaihven an awm lo. Lalpa, ṭanpui dîlin ka au che a, ‘Nang chauh hi ka himna, Ka dam chhûnga ka duh ber chu i ni,’ tiin. Ka au thâwm chu ngaithla ang che, Ka chau êm êm a ni, Mi ûmtute lakah min chhanhim rawh, Kei aiin an chak zâwk si a. Tân in ata min hruai chhuak la, I hming ka chawimawi ang. Ka chunga i ṭhat êm avângin Mi dikte chuan min din hual ang. Lalpa, ka ṭawngṭaina hi lo ngaithla la, I rinawm êm avângin khawngaih ka dîlnaah I beng lo chhi ang che. I dik êm avângin min chhâng ang che. I chhiahhlawh chungah hian rorêl mai suh, I hmaah tu mah thiam chang thei an awm lo. Ka hmêlmaten min ûm ṭhîn a, Thi chhâwngin leiah min theh thlu a, Hmânlaia thi tawhte angin Hmun thimah chuan min awmtîr hi. Ka bei a dawng êm êm a, Ka mangang tâwp a ni. Hun kal tate ka thlîr kîr a, I thil tih zawng zawngte ka ngaihtuah a, I hna thawhte ka chhûtin I lam hawiin ka bân ka phar tâk hi, Lei ro, tui châk angin ka ngai a che. Lalpa, min chhâng thuai teh, Ka chau chhe mai dâwn e; Ka lakah hian i hmêl thukru suh la, Leilâwta tlate ang ka ni hlauh dah ang e. I ngilneihzia tûk tin min hmuhtîr ṭhîn la, Ka rinchhan ber nang i ni si a, I hnênah ka rawn ṭawngṭai hi, Ka kalna tûr min kawhhmuh rawh. Lalpa, ka hmêlmate kut ata hi min chhan chhuak la, Him nân ka rawn pan che. I duhzâwng tih min zirtîr rawh, Ka Pathian i ni si. Dawh thei takin kawng dikah chuan i Thlarauvin min hruai ang che, I hming avângin, Lalpa, min chhandam la, I ṭhatna avângin ka manganna ata min chhan chhuak ang che. Ka chunga i ngilneihna avângin ka hmêlmate tiboral la, Min beitu zawng zawngte tichhia ang che, I chhiahhlawh ka ni si a. Ka lungpui, Lalpa hi fak rawh u, Râl kah min zirtîr a, Indo dân tûr min thiamtîr bawk a. Ka tân kulhpui rinawm, Ka himna tûra kulhbîng sâng a ni. Ka phaw ka inhumhimna chu a ni, Ka mite ka hnuaia kûntîrtu a ni. Lalpa, mihringte hi eng nge maw an niha, i hriata, Hringfate hi eng nge maw an niha i ngaihtuah ṭhin? Thli thaw ang lek an ni a, An dam chhûng nite chu hlim ral mai ṭhîn ang hi a ni. Aw Lalpa, i vânte chu rawn tihniam la, Lo chhuk ta che. Tlângte khawih la, khu luih luih bawk rawh se. Kâwl phêttîr la, hmêlmate chu darh vek sela, Thalin kâp la, tlânchhe rawh se. Vân sâng aṭangin i kutin rawn ban la, Tui thûk tak ata min chhan chhuakin, Hnam dang kut ata hi min chhanhim teh. Chûng mite chuan dâwt an heh a, Dâwtin chhia an chham ṭhîn. Aw Pathian, i tân hla thar ka sa ang a, Perhkhuang hrui sâwm neiin ka fak ang che. Lalte hnênah hnehna i pe a, I chhiahhlawh Davida chu khandaih hriam lakah I chhanhim ta si a. Hnam dang kut ata hi min chhan chhuakin, Min humhim ang che. Chûng mite chuan dâwt an heh a, Dâwtin chhia an chham ṭhîn. Kan fate chu an vânglai hian, Thing ṭhang duang tak ang hi ni se, Kan fanute pawh chu Lal ina a kil bang cheimawi ang hi lo ni rawh se. Kan buhzêmte chu thlai tinrêngin khat thûr thûr se, Kan ram chhûnga kan berâm vulh te pawh, A sâng têl te, a sîng têl tein pung bawk rawh se. Kan ran rualte chuan no chhiat lovin hring sup sup sela, Riral bawk hek suh se. Kan kawtthlêrahte pawh mangang au thâwm awm hek suh se. Chutiang taka malsâwmna dawng hnam chu an nihlawh e. Pathian, Lalpa neitu hnam chu a nihlawh e. Aw Lalber, ka Pathian, ka chawimawi ang che a, I hming ka fak kumkhua dâwn e. Ni tin ka fak ang che a, I hming ka chawimawi kumkhua ang. Lalpa chu a ropui a, chawimawi chiam tûr a ni; A ropuizia chu chhui chhuah rual a ni lo. I thil tihte chu chhuan zawng zawngin an fak ang a, I hna thawhte an hril zêl ang. I ropui nasatzia an hril ang a, I thiltih makzia hi ka chhût bawk ang. Miten i thiltihtheihzia hi nasa takin an sawi ang a, I ropuizia ka hril bawk ang. I ṭhatzia hi an sawi bawrh bawrh ang a, I dikzia hi hlim takin an aupui ang. Lalpa chuan lainatna a ngah a, mi a khawngaih ṭhîn, Thinnel tak a ni a, ngil a nei êm êm ṭhîn. Lalpa chu mi tin chungah a ṭha a, A thil siam zawng zawng chu a lainat ṭhîn. Aw Lalpa, i thil siamten an chawimawi chia, Nangmah ngaihsaktute chuan an fak a che. I ram ropuizia chu an sawi ang a, I thiltihtheihzia pawh an hril bawk ang. I thiltih ropuizia mihringte hnêna hriattîr tûr leh I ram mawi ropuizia tilang tûrin. I ram chu ram hlun tûr a ni a, Kumkhuain thu i nei dawn si. Lalpa chu a thutiamah a rinawm a, A thiltih apiangah ngil a nei ṭhîn. Lalpa chuan tlute a tungding a, Lungngaia kûnte pawh a tiharh ṭhîn. Nangmah nghâktute mit chu i chungah a fu a, A hun takah ei tûr i pe ziah ṭhîn. I kut i han phar a, Thil nung tinrêng an chaw duhzâwngin i hrai ṭhîn. Lalpa chu a thil tih zawng zawngah a dik a, A thiltih apiangah ngil a nei ṭhîn. Amah kotute chu Lalpan a hnaih ṭhîn a, Tihtakzeta amah autu zawng zawngte chu. Amah ṭihtute duhzâwng chu a tihsak a, An au thâwm a hria a, a chhanhim ṭhîn. Lalpa chuan amah hmangaihtute a vêng ṭhîn a, Mi sualte erawh chu a tiboral ang. Ka kâ hian Lalpa fakna thu a hril ang a, Thilsiam zawng zawngin a hming thianghlim chu Kumkhuain fak rawh se. Lalpa chu fak rawh u, Aw ka nunna, Lalpa chu fak rawh. Ka dam chhûngin Lalpa ka fak ang a, Ka nun chhûng zawng Pathian fakin ka zai ang. Mihring zînga miliante chu ring duh suh u, Tu mah an chhandam thei si lo. An thi a, leiah an kîr ta a, Chumi ni chuan an thiltum zawng zawng pawh a ral nghâl ṭhîn. Jakoba Pathian, ṭanpuitua neihte chu an nihlawh e, Lalpa Pathiana beiseina nghattute chu. Ani chuan lei leh vân a siam a, Tuifinriat leh a chhûnga awmte nên; A thutiam pawh a hlen zêl ṭhîn. Hnehchhiahte chu dik takin ro a rêlsak a, Rilṭâmte chu chaw a pe a, Lalpa chuan mi tângte a chhuah bawk ṭhîn. Lalpan mitdelte mit a tivâr a, Lalpa chuan lungngaia kûnte pawh a tiharh ṭhîn. Lalpa chuan mi dikte a hmangaih a, Lalpa chuan mikhualte pawh a vêng bawk ṭhîn. Fahrahte leh hmeithaite chu a chhawmdâwl ṭhîn a, Mi sualte erawh chu a tiboral ang. Lalpa chu kumkhuain a lal ang a, Aw Zion, i Pathian chu a lal reng ang. Lalpa chu fak rawh u. Lalpa chu fak rawh u, Kan Pathian faka zai hi a ṭha si a; Amah fak hi a nuam a ni. Lalpa chuan Jerusalem a din leh a, Israel mi, an hnawh darhte chu a hruai khâwm leh ta. Lungchhiate chu a thlamuan a, An hliamte pawh a tuamsak bawk. Arsite khi a chhiar vek a, An hming pawh a sa ṭheuh a ni. Kan Lalpa hi a ropui a, chak tak a ni, A finna pawh sawi sên rual a ni lo. Lalpa chuan inngaitlâwmte a chawisâng a, Mi sualte erawh chu leiah a paih thlu ṭhîn. Lâwm hla sa-in Lalpa chu fak ula, Ṭingṭang nên kan Pathian fakin zai rawh u. Vân khi chhûm a hliahtîr a, Leiah ruah a sûrtîr ṭhîn a, Tlângahte chuan hnim a ṭotîr ṭhîn, Mihring ei tûr thlai hringte nên. Ramsate chu chaw a pe a, Choak no rilṭâmte a châwm bawk ṭhîn. Sakawr chakna a ngaihlu lo va, Mihring chakna pawh a ngaisâng hek lo. Amah ṭihtute hi a ni Lalpa lâwmzâwngte chu, A ngilneihnaa innghat tlatte chu. Aw Jerusalem, Lalpa -ah hian lâwm la, Aw Zion, i Pathian hi fak rawh. I kulh kawngkhâr kalhnate chu a tinghet a, I chhûnga awm i fate chu mal a sâwm ta. In ramrite chu a tirâlmuang a, Buh tui chi in duh tâwkin a pe che u. A thupêk chu lei chungah a puang a, A sawi ang chuan tih nghâl a ni. Puan vâr phah ang maiin vûr a tlâktîr a, Meivâp lêng angin a tlâktîr chem chem ṭhîn. Lung tê angin rial a tlâktîr a, A vawhzia chu tu nge tuar zo vang? Thu a pe a, vûr chu a tui ta a, Thli a tlehtîr a, tui chu a luang ta a. Jakoba hnênah thu a puang a, A Dân leh a thurêl chu Israela a hriattîr a; Chûng chu hnam dang tân a ti ngai rêng rêng lo va, A thurêlte pawh an hre ve ngai hek lo. Lalpa chu fak rawh u, Vân aṭangin Lalpa chu fak ula, Chung lamahte khian amah chu fak rawh u. Vântirhkohte u, amah chu fak ula, A ṭhuihruai zawng zawngte u, amah chu fak rawh u. Ni leh thlate u, amah chu fak ula, Arsi êng zawng zawngte u, amah chu fak rawh u. Vân sângte u, amah chu fak ula, Vân chunga tuite u, amah chu fak rawh u. Chûngho chuan Lalpa hming chu fak rawh se, Ani chuan thu a pe a, siam an lo ni ta si a. Thu a pêk ang ngeiin An awmna tûr ṭheuhvah an awm ta reng a, Kumkhua pawhin an insawn lo vang. Tuifinriat leh a chhûnga chêng sa lian hlauhawmte u, Lei aṭang hian Lalpa chu fak rawh u. Mei leh rial te, vûr leh chhûm te, Thlipui na tak, a thu awihtu te leh Tlâng leh mual te, Thei kûng leh sidar thing zawng zawng te, Ramsa te leh ran zawng zawng te, Rannung te leh chunglêng sava te, Lei lal te leh mi tinrêng te, Milian te leh leia rorêltu zawng zawng te, Nula leh tlangvâl te, Naupang leh tar te nên, Lalpa hming hi fak ṭheuh rawh se, Hming dang zawng aiin a hming chu a ropui zâwk a, A ropuina chu lei leh vân aiin a sâng zâwk daih a ni. A mite chu thiltihtheihnain a thuam a, A ni, amah ngaihsaktute chu chawimawina a khumtîr a, A duh tak Israel mite chu. Lalpa chu fak rawh u. Lalpa chu fak rawh u, Lalpa chawimawiin hla thar sa ula, A ni, amah ngaihsaktute pung khâwm zîngah fak hla sa rawh u. Anmahni Siamtu chungah Israel-te lâwm sela. Zion tlâng chu an Lalber chungah hlim rawh se. Lâmin a hming chu fak ula, Khuangtê leh ṭingṭang nên amah chu fak rawh u. A mite chu Lalpa lâwmzâwng tak an ni a, Mi tlâwmte chu a chhanhim a, a chawimawi ta. Amah ngaihsaktute chu an ropuinaah lâwm sela, An khumlaizâwlah chuan hlim takin zai rawh se. Khandaih hriam tawn keng sela, Pathian fakin ring takin au rawh se. Hnam dang chungah phuba a la a, Mite a hrem ta a. An lalte chu khaidiatin a hlîng a, An hotute chu thîr kawl a buntîr bawk. An chungchâng thu rêl tawh angin a thlentîr a, Chu chu a ni amah ngaihsaktute ropuina chu. Lalpa chu fak rawh u. Lalpa chu fak rawh u, Pathian chu a Hmun Thianghlimah fak ula, A thiltihtheihzia lanna vân sâng takah khian, Amah chu fak rawh u. A thiltih ropui takte avângin amah chu fak ula, A ropui êm avângin amah chu fak rawh u. Tawtawrâwt hâmin amah chu fak ula, Perhkhuang leh ṭingṭang nên amah chu fak rawh u. Khuangtê bênga lâmin amah chu fak ula, Phênglâwng leh phaiphulêngin amah chu fak rawh u. Darbenthek têin amah chu fak ula, Darbenthek lianin amah chu fak rawh u. Engkim, thaw thei tawh phawt chuan Lalpa chu fak rawh se. Lalpa chu fak rawh u. Israel lal Davida fapa Solomona thufing hi: Miten finna leh kaihhruaina dik an hriata, Thu rilte an hriat fuh theih nân a ni. Hmangchâng hriaa, thil dik tih leh rorêl thiamna neiin Tluang taka nung tûrin a kaihruai ang. Mi mâwlte chu a tifingvâr ang a, Tleirâwlte pawhin fîmkhur dân an hria ang. Mi fingten ngaithla se an fing sawt ang, Hre zaute chuan chinchâng an hriat belh ang. Thufing inthupte hrethiamin, Mi fing thu ril leh thu khirh an hre thei ang. Lalpa ṭih hi hriatna thûk ber a lo ni, Mi â-te chuan finna an hmusit a, Kaihhruai theih an ni lo. Ka fapa, i pa kaihhruaina ngaithla la, I nu thu zirtîr che pênsan hauh suh. Diar mawi tak khima, Ṭhi mawi tak awrh angin I nun a timawi ang. Ka fapa, mi sualten an thlêm hunah che An thu zâwm suh ang che. ‘Ti rawh, thah tûr i zawng ru ang, Pawi sawi lo pawh ni se a rûkin bei mai ila, A nung chunga phûm ang mai leh Seol-a chhuk tate angin i awmtîr ang, Thil hlu tak kan lâksak ṭeuh vang a, Kan thil lâk chu inah kan chhêk dâwn nia, Kan zîngah tel ve la Kan inṭawm vek dâwn nia,’ an tih che chuan, Ka fapa, an zîngah chuan tel ve hauh suh, An kawngah chuan pên lût hek suh. Thil sual ti tûr chuan an tlân chak hle a, Thisen chhuah pawh an nghâkhlel êm êm ṭhîn. Savaten an hmuh reng laia, An awhna tûr lên zâr a sâwt lo, Hêng mite erawh hi chu mahni awh nâna thang kam an ni, An awh hlum nâna kam ru an ni. Chutiang chu suamhmangte awm dân tûr chu a ni, An nun an chân ngei ang. Kawtthlêrahte leh tual zau laiahte, Finna chu a au va, Mipui lunna laiahte pawh a au bawk a, Kulh kawngkhâr bulahte thu a sawi ṭhîn. ‘Mi mâwlte u, mâwl reng in duh em ni, Eng chen nge finna hi in hmuhsit anga, Mi â pawhin hriatna hi a hmuhsit ang? Ka zilhna hi rawn ngaihven ṭha ula, Tihtakzetin thu ka hrilh ang che u. Ka thu ka hriatthiamtîr dâwn a che u. Ka ko che u a, in chhâng duh lo, Bân ka phar a, in pawisa lo. Ka remruat apiang in ngaihsak duh lo va, Ka zilhna chu in pawm duh bawk hek lo. In vânduaiin kei chu ka nui ang a, In râlkhêl hunah chuan ka nuihzat ang che u. Thlipui anga hlauhawm a lo thawhin, Ṭhâwngaleivir anga vânduainain a nuai che uin, Manganna leh hrehawmna in tuar hun chuan, Min au vang a, ka chhâng lo vang che u, Min zawng min zawng ang a, min hmu lo vang. Hriatna in hua a, Lalpa ṭih in tum si lo. Ka remruat chu in pawisa duh lo va, Ka zilhna apiang chu in hmusit a, In awm dân rah chu in seng ngei dâwn, In remruat chu in kham hlui ang. Mi mâwlte chu an lêlohna avângin an thi ang a, Mi â-te chu an ngaihsam avângin an chhe bawk ang. Ka thu ngaithlatute erawh chu him takin an awm ang a, Thil ṭha lo hlau lovin thlamuang takin an awm ang. Ka fapa, ka thu hi ngun takin ngaithla la, Ka thupêkte hi pawm tlat rawh. Thufing chu ngaihven la, Hriatthiam tum tlat ang che. A ni, hriatthiam ngên la, Hriat fuh châkin au rawh. Tangka angin zawng la, Ro phûm zawng ang maiin hai rawh. Tichuan, Lalpa ṭih dân i hria ang a, Pathian hriatna i chhar chhuak ang. Finna petu Lalpa a ni, Hriatna leh hmuh fuhna a hnên aṭanga chhuak a ni. Mi ngîlte tân hlawhtlinna a chhêk khâwm a, Dik taka awmte tân phaw a ni bawk. Dik taka rorêl ṭhînte chu a vêng tlat a, Amah ngaihsaktute chu an awm dân tûr a enzui ṭhîn. Tichuan, a fel leh dik i hria ang a, Ngîl taka chet dân kawng ṭha chu i hre thei ang. Finna chuan a rawn luhchilh ang che a, Hriatna neih chu i tân a nuam hle ang. Hmangchâng hriatna chuan a hualhim ang che a, Hriat fuhna chuan a vêng ang che. Sual kawng ata a chhan chhuak ang che a, Thu veivir chîng te, Kawng ṭha ata pênga, Thim zînga kal tate, Thil sual tih lâwm viauva, Mi bum châkte, Kawhmawh bâwl ṭhîn, Rin tlâk hauh lohte lakah a hum ang che. Kam thlum taka thlêm ṭhîntu che Hmeichhe sual lakah chuan a vêng ang che. A tleirâwl chhuah pasal tlânsana, Pathian hmaa thutiam theihnghilhtu a ni e. A in pan chu thihna a ni, A kawng chuan mitthi khua a chhun. A hnêna kal tawh chu an kîr leh ngai lo va, Nunna kawngah an lo kal tawh ngai lo. Mi ṭhate awm dân angin awm la, Mi dikte kawng chu zawh ang che. Mi ngîlte chu he ramah hian an awm ang a, Mi felte chu an chêng reng ang. Mi sualte erawh chu he ram ata hnawh chhuah an ni ang a, Bum hmangte chu hnuh chhuah vek an ni ang. Ka fapa, ka zirtîrna theihnghilh suh la, Ka thupêkte vawng tlat ang che. Tichuan, rei tak i dam ang a, I hmuingîl zêl bawk ang. Ngilneihna leh rinawmna hi thlah hlek suh la, I nghâwngah chuan zem tlat langin, I thinlung phêkah chuan ziak lût ang che. Pathian leh mihring hnên ata Khawngaihna te, duhsakna te i dawng dâwn nia. I thinlung zawng zawngin Lalpa ring la, Nangma hriatnaah innghat hauh suh, I thiltih apiangah Lalpa hre reng ṭhîn la, I kawng a tihtluansak ang che. Mahni fing inti hle suh la, Lalpa ṭih la, sual kalsan rawh. I taksa tân hrisêlna a ni ang a, I na atân damna a ni bawk ang. I sumin Lalpa chawimawi ṭhîn la, I neih pung hmasate nên chuan. Tichuan, i buh inte a khat ang a, I uain sâwrkhur a liam bawk ang. Ka fapa, Lalpa kaihhruaina hmusit suh la, A zilhna pawh ngainêp hek suh. Pain a fa duh tak a thunun angin, Lalpan a hmangaihte a thunun ṭhîn asin. Finna hmu chhuaka, Hriatna neitu chu a nihlawh e; Tangka neih aiin hlâwkna a tam zâwk a, Rangkachak hlu tak aiin a duhawm zâwk. Lunghlu aiin a hlu zâwk a, A tluka hlu duhthu sâm tûr a awm lo ve. Dam reinate a ding lamah a awm a, A vei lamah hausakna leh ropuinate a awm. A kawng chu a nuam a, A kalkawng chu hahdam tak a ni. Amah vuantute tân nunna thing a ni a, Amah zuitute chu an nihlawh e. Lalpan finna hmangin lei a siam a, Hriatna hmangin vân khi a din. A finna chuan tuithûkpuite a tiṭhen a, Chhûm chuan ruah a tlâktîr. Ka fapa, finna leh hriat fuh theihna hi kawl tlat ang che, I hmuh phâk lohvah kal sawn suh se. I tân nunna a ni ang a, I nghâwng atân mawina. Thlamuang takin i kal ang a, Eng mah i chhuih lo vang. I mut hunah hlauh rêng i nei lo vang, I mu ang a, tui takin i muhîl ang. Mi sualte chunga thleng ṭhîn chhiatna ang hi, Hlauhawm a thlen thut hlau suh la, Lalpan a vêng him tlat ang che, I ke thanga awh a phal lo vang. I theih phawt chuan mamawhte tân i thil ṭhate ui suh, Nei reng siin i ṭhenawm hnênah chuan, ‘Kal ta rih la, naktûk lamah lo kal leh rawh, Ka lo pe tawh ang che,’ ti suh. Ngaihngam taka i bula awm I ṭhian chungah thil sual phiar suh. I pawi khawih lo chu chhan awm lovin khing suh. Mi nunrâwng chu awt suh ang che, A awm dân pawh zui suh. Kawhmawhbâwlte chu Lalpan a ten a, Nun ngîlte erawh chu a rinzâwng tak an ni. Mi sual chhûngkua chu Lalpan ânchhia a lawh ṭhîn a, Mi dik chhûngkua erawh chu mal a sâwm ṭhîn. Chapote chu a hmusit a, Pachhiate erawh chu a duhsak ṭhîn. Mi fingte chuan chawimawi an hlawh ang a, Mi â-te chan tûr erawh chu mualphona mai a ni. Fate u, pa kaihhruaina ngaithla rawh u, Ngaihven ula, hriatthiam theihna in nei dâwn nia. Zir tûr ṭha chu ka hrilh che u a, Ka zirtîrna hi ngaihthah suh u. Ka pa fapa neihchhun ka ni a, Ka nu’n min duat hle ṭhîn. Ka pa chuan hetiang hian min zirtîr ṭhîn: ‘Ka thu hi vawng tlat la, Ka thupêkte zâwm la, i nung dâwn nia. Finna leh hriatthiamna neih tum la, Ka thu hrilh che hi theihnghilh suh la, Ngaihthah bawk hek suh. Tlânsan suh la, a vêng ang che, Pawm tlat la, a hum ang che. Finna neih hi thil pawimawh ber a ni, Thil dang zawng aiin hriatthiamna neih tum rawh. Ngaisâng la, a chawisâng ang che, Pawm tlat la, a chawimawi ngei ang che. I tân diar mawi tak a ni ang a, Lallukhum ropui tak a ni bawk ang,’ tiin. Ka fapa, ka thu hi ngaithla la, Ka thu sawi hi pawm rawh, Tichuan, i dam rei ang. Finna kawng ka zirtîr che a, Kawng ngîlah chuan ka hruai ṭhîn che. Tah chuan kal la, dîptu eng mah i tawng lo vang, Tlân vak mah la, i tlu lo vang. Kaihhruaina hi pawm tlat la, inthlahdah suh, Zawng reng rawh aw, i nunna tûr a ni. Mi sualte kawngah chuan kal ve suh la, Mi suaksualte awm dân zui suh. Hawisan daih la, inhnamhnawih suh, Pênsan daih la, kalsan vang vang ang che. Pawi an khawih phawt loh chuan an mu thei lo, Tu emaw tal an tihbuai zet loh chuan an mut a chhuak thei lo. Suahsual hi an chaw a ni a, Nunrâwn hi an uain a ni. Mi dikte awm dân erawh chu zîng êng ang hi a ni, A lo êng tial tial a, ni a lo chhuak ta ang hi. Mi sualte kawng chu zân thim ang hi a ni, An inchhuih tlûkna tûr pawh an hre thei lo. Ka fapa, ka thu hi ngaihven la, Ka thu sawi hi bengkhawn rawh. A bosan che phal suh la, I thinlungah vawng tlat ang che. A hmutute tân nunna a ni a, An taksa tân damna a ni. I thil ngaihtuah dânah fîmkhur hle la, I ngaihtuah chuan i nun a kaihruai ṭhîn a ni. Chaltlai taka ṭawng chîng suh la, Bum chîng hek suh. I hma lam thlîr ngun la, Dîng takin en tlat rawh. I kalna tûr en ngun la, I tih tawh chu a hlawhtling ang. Ding lamah emaw, vei lamah emaw pêng suh, Sual lakah i ke vêng ṭha rawh. Ka fapa, ka finna hi ngaihven ṭha la, Ka hriatna hi bengkhawn ṭha rawh. Tichuan, awm dân ṭha chu i hria ang a, I thu-ah chuan hriatna i neih a lang bawk ang. Hmeichhe sual chu a ṭawng a thlum êm êm a, Sahriak aiin a dang a nâl a ni. A hnuah chuan a ṭawng a bak ang a, Khandaih hriam tawn angin a hriam bawk ang. Thihna panin a ni a kal, A kalkawng chuan Seol a chhun. Nunna kawng rêng zawh a tum lo, Kawng dik lo a zawh a, Amah lah chuan a hre si lo. Chuvângin, ka fapate u, ngaithla ula, Ka thu sawi hi pênsan suh u. A lak aṭang chuan inthiarfihlîm ula, A kawngka pawh hnaih suh u. Mi dangin i zahawmna an chang ang a, Nunrâwng kutah i thi mai dah ang e. Mi dang daihin i hausakna an chên ang a, I thawhrim rah hnam dangin an nei ang. I thi tûr chu i rûm ang a, I chêrin i chak lo hle bawk ang. ‘Kaihhruai ka hreh ṭhînzia tak kha aw, Zilhna ka hmusit êm êm ṭhîn. Mi kaihruaitute aw ka hre duh lo vei a, Min zirtîrtute thu ka ngaihsak ngai hek lo. Pung khâwm zîngah ka mualpho ṭêp tawh a lo ni,’ i la ti ang. Nangma tuizêma tui ngei in la, I tuikhuah ata lo chhuak chu. I tuihna chu engah nge a chik darh anga, Kawtlaiahte a luan ral mai mai ang? Nangma tân chauh ni se, Mi dang tân ni suh se, I tuihna chuan malsâwmna dawng sela, I tawn tirh nupui chu hlim nân hmang rawh. Zukla nalh tak, saza tuai ang a ni, A ṭang nêmah tlei la, A hmangaihna chuan zial che rawh se. Ka fapa, mi dang nupui zûnah engah nge i uai ang, Hmeichhe dang ṭâng engah nge i vawn ang? Lalpan i thiltih zawng zawng a hmu vek a, I nun zawng zawng a enfiah ṭhîn. Mi sualte chu an sualna ngeiin a âwk a, An sualna chuan a phuar tlat ṭhîn. An insûm theih loh avângin an thi ang a, An ât em avângin an bo daih ang. I ṭhenawm aia tuar i intiama, Hmêlhriat loh leiba rûl tûra i insawi awh tawha, I thutiama i inhlin bawk si chuan; Ka fapa, i ṭhenawmpa kutah chuan i âwk ta a ni. Ti hian intihchhuah tum ang che, A hnênah kal thuai la, ngaihdam dîl rawh, I thu i sût a phal theih nân ngên chiam ang che, Mutsan hauh suh ang che, Chawlh hahdamsan hek suh. Sakhi âwk chhuak a tlân ang leh, Sava âwk chhuak a thlâwk daih ang mai hian, A thang ata chhuak vang vang rawh. Nang, thatchhepa, fanghmîr hnênah kal la, An awm dân hi en rawh, I fin phah mial mahna. Lal an nei lo, hotu leh hruaitu pawh an nei lo. Nipui lai chuan chaw an zawng a, Buhseng hunah ei tûr an khâwl khâwm ṭhîn. Thatchhepa, eng chen nge i mut dâwn? Engtikah nge i ṭhanharh ang? ‘Mu leh hlek ang, chhîng hlek ila, Kut kuangkuahin zâl hlek teh ang,’ i tih chhûngin Retheihna chu mikhual angin a lo thleng thut ang a, Tlâkchhamnain râl ang maiin a rawn nang thut ang che. Mi bengtlalo, mi chimawm chu, Thu veivirin a hmanhlel a, A mit siaiin a ke a phût a, A kut a lek vêl ṭhîn. A rilru kawi tak chuan thil sual a ruahman ṭhîn, Innghirnghona a tichhuak ṭhîn. Chuvângin, manganna chuan a nang thut ang a, Siam ṭhat rual loh chhiatna a tâwk ngei ang. Thil paruk-pasarih Lalpa huatzâwng, A ten êm êm a awm: Mit chapo te, dâwt sawi chîng te, Pawi khawih lo thattu te, Thil sual ngaihtuah chhuah chîng ṭhîn te, Sual ti tûra ngal chak hle te, Thuhretu der, dâwt phuh chhuak te, Unau innghirnghotîrtu te. Ka fapa, i pa thupêkte vawng tlat la, I nu zirtîrna pawh hawisan hek suh. I thinlungah châm rêng sela, I nghâwngah zem tlat rawh. I kalna apiangah a hruai ang che a, I mut hunah a vêng ang che, I thawh hunah kawng ṭha a hrilh ang che. An thupêkte chu khâwnvâr a ni a, An zirtîrna chu êng a ni, An hruaina chuan nun dân ṭha chu a kawhhmuh ang che. Hmeichhe sual lakah a vêng ang che, Mi dang nupui kam thlum tak lakah nên. A tîtuai ṭha ît suh ang che, A mitmei chuan man che suh se. Chhang tlang khatin nawhchizuar a lei theih a, Uirenu erawh chuan i nun hlu tak a veh a ni. Kawr kâng lovin mei hi a pawm theih em ni? Ke kâng lovin meiling a dai theih em ni? Ṭhenawmpate nupui chhaih chu chutiang bawk chu a ni; Khawihsak phei chuan an tuar ngei ang. Rilṭâm avânga thil rutu chu Miten an hmusit lem lo. An man hlauh erawh chuan A lêt sarih a chawi ang a, A neih zawng zawng a chân mai ang. Mi nu uiretu chu a â hle a ni, Ama nun a tichhia a ni. An hêm hrep ang a, a mualpho hle ang, A hming a chhe kumkhua bawk ang. Thîkthu avânga thinrim hi a tluka na a awm thei lo, Dîm lêk lovin phuba a la ngei ang. Thlêm lungawina eng mah a duh lo vang a, Thamna pe ṭeuh la, a lungawi chuang lo vang. Ka fapa, ka thu hi awih la, Ka thupêkte hi vawng tlat ang che. Ka thupêk hi zâwm la, i nung dâwn nia, Ka zirtîrna hi i mitnaute angin hum rawh. I zungṭangah bun la, I thinlung phêkah chuan ziak rawh. Finna chu, ‘Ka farnu,’ ti la, Hriatthiamna chu, ‘Ka laichînnu,’ ti rawh. Mi dang nupui, hmeichhe kam thlum tak lakah A vêng dâwn che nia. Kan tukverh âwng kârah ka han bih a. Tlangvâl mâwl tak tak mai ka hmu hlawm a, An zînga â fâl pakhat ka en zui a, Nu pakhat awmna vêng hnaiah a kal ta a, A in lam chu a pan. Tlai lam ni tlâk hnuah khua a thim ta maw tihah, Nawhchizuar anga inchei hlar, Mi lêm thiam takin a lo ko va. Zah bosal tawh, ti hawm hawm mai, Awm hle hle thei tawh lo. Kawtthlêrah te, tuallaiah te, Kil tin kil tanga tlangvâl châng ṭhîn chuan, A lo pawm a, a han fâwp a, Tlângnêl takin ti hian a han ti a: ‘Remna thilhlan hlân tûr ka ni a, Vawiin chiah hian ka thutiam chu ka hlen ta a, Nangmah zawng tûr chein ka lo chhuak a ni e, Ka melh ka melh che a, ka hmu ta che a ni. Aigupta ram puan ṭial mawi Ka khumah ka phah diam tawh a ni. Mura te, Aloe te, thakthing te chuan Khum chu ka tirimtui tawh a. Tirawh, khawvâr hma chu nui dûn ila, Hmangaihna chu i chên dûn ang. Ka pasal lah ina a awm loh lai tak a ni, Ram hla takah a zin daih a. Tangka ip a keng a, Thla vânglaiin a lo hâwng leh chauh vang,’ a ti a. A ṭawnghmang thiamin a lêm thlu a, A kam thlum tak chuan a zial â ta. Khai le, fate u, ka thu ngaithla ula, Ka thu sawi hi ngaihven rawh u. Nangni chuan chutiang hmeichhe lam chu hawi suh u, A kawngah chuan pêng hek suh u. Mi tam tak chu a tichhe tawh a, Mi tam tak chuan an thih phah tawh a ni. A in i pan vaih chuan Seol i thleng ang a, Mitthi khaw kawng pumpelh tawi ber a ni. Finna chu a au a ni lâwm ni? Hriatna pawh chuan aw achhuah e. Kawng sîr hmun sângahte leh Kawng pêng ṭhuam laiahte chuan a ding. Khawpui tawntirh kulh kawngkaa, Khaw luhnaahte chuan a au chiam ṭhîn. Nangni mihringte u, in hnênah thu ka sawi a ni, Hringfate u, in hriat atân ka au a ni. Mi mâwlte u, fîmkhur zir ula, Mi â-te u, fin zir rawh u. Thu tak tak ka sawi dâwn a, ngaithla ula, Ka thu hi zawng a dik a ni. Thu dik ka chhâk chhuak a, Suahsualna hi ka ten a ni. Ka sawi apiang thu dik tak zêl a ni, Thu veivir leh thu kawi a awm lo ve. Hriatthiamna nei tân chuan a tluangtlam a, Hre zau tân pawh a chiang hle ang. Tangka aiin ka kaihhruaina thlang rawh u, Rangkachak thlan chhuah ai pawhin hriatna hi duh rawh u. Lunghlu aiin finna a hlu zâwk a, Duhthusâm ber pawh hian a hen zo lo. Kei, finna hian fîmkhur ka thiam a, Hriatna neiin rem ka hre hle a ni. Lalpa ṭih dân chu sual huat hi a ni, Chapo leh intihvei, awm khawloh leh verther, Ka huatzâwng tak a ni. Rem ka ruat a, ka tihlawhtling bawk ṭhîn, Ka hrethiam a, thiltithei tak ka ni. Keimah avângin lalte an lal a, Rorêltuten dân ṭha an zam a. Rorêltuten ro an rêl a, Mi liante leh thuremtute pawhin. Min ngainate ka ngaina a, Ngun taka min zawngtuten min hmu. Hausakna leh zahawmna hi ka ta a ni, Hlawhtlinna leh hmuingîlna nên. Ka hnên aṭanga dawn tûr chu Rangkachak ṭha mi aiin a ṭha. Tangkaraw thianghlim ber ai pawhin a hlu. Kawng dik takah ka kal ṭhîn a, Dik takin ro ka rêl ṭhîn. Mi ngainate hnênah hausakna ka pe a, An ro bâwmte ka chhûn khahsak bawk ṭhîn. Lalpan min siam hmasa ber a, Thil siam a ṭan hmaa, A tîr bera a siam ka ni, Khawvêl siam hma daih khân. Tuithûkpui awm hma khân ka piang tawh a, Tuihna rêng rêng a awm hma khân. Tlângte a din ṭan hma daih khân; Mualte a pian hma khân ka piang tawh a. Lei leh khawmual siam hma Vaivut vei khat pawh a awm hma khân, Vân khi a dah hmain ka awm tawh a, Tuithûkpui hual tûra kâwlkil a rin kual hma te khân. Chung lam vân dum khi a dah ngheha, Tuithûkpui hna a siam hma khân, Tuiin a thupêkte a pelh loh nân Tuipui chîm chin tûrte a ruat hmaa, Lei nghahna tûr a ruahman hma khân ka awm tawh a ni. A bula awm, themthiam tak chu ka ni. Ni tin tilâwm ṭhîntu ka ni a, Kei pawh a hmaah ka hlim ṭhîn. A lei siam, a chênna tûrah Hlim takin ka lêng a, Mihringte chu ka hlimpui ṭhîn Khai le, fate u, ka thu hi ngaithla teh u, Ka thu zâwmtute chu an nihlawh e. Kaihhruaina zâwm ula, Fin phah rawh u, thlahthlam suh u. Ni tin, ka kawngkhâr bula min nghâktu, Kawngka sîra min châng ṭhîna, Ka thu ngaithlatu chu a nihlawh e. Min hmutu chu a nung ang a, Lalpa duhsakna a dawng ang. Mi hêltute chu mahni pawi khawih an ni. Min huate chuan thih an thlang tihna a ni. Finna chuan in a sa a, Lung chher ban pasarih a phun. A lawmna tûr ran a talh a, Uain pawh a bun chhuak a, Ruai chu a peih tawh e. Khaw chhûng hmunsâng berahte au tûr, A chhiahhlawh nulate a tîr a. ‘Mi mâwlte chu lo haw rawh se,’ tiin. ‘Ti teh u, ka chaw hi ei ula, Ka uain pawh hi in teh u, Mâwlna kalsan ula, nung rawh u, Hriatna kawngah kal tawh rawh u,’ a ti. Mi induhte i zilh chuan hau i tuar ang, Mi sual i zilhhau chuan kut i tuar ang. Induhte chu zilh suh, an hua ang che, Mi fing zilh la, a ngaina hle ang che. Mi fing hnêna i sawi chu a fin phah ang, Mi dik zirtîr la, a hriatna a pung ang. Lalpa ṭih hi finna ṭobul a ni a, Mi Thianghlima hriat hi finvârna chu a ni Chu chuan a tidamrei ang che a, I dam chhûng kum a tipung ang. Chu finna chu nei la, i tâna fing i ni ang a, I duh loh chuan nangman i tuar ngei ang. Hmeichhe â chu a intârlang a, Dâwn a nei lo, zah rêng a hre hek lo. A in kawngkaah chuan a ṭhu chhuak a, Khawpui hmun langsâr laiahte ṭhuthmun a rem a, Kawnga lo kal apiang a lo ko va, Veivâk apiang a lo au ṭhîn. ‘Mi mâwlte u, lo kal teh u,’ a ti. Mi â-te hnênah chuan, “A rûka tui in chu a tui bîk a, A rûka chhang ei pawh a tui bîk ṭhîn,” a ti a. Tah chuan thihna a awm tih an hre lo, A koh luh tâkte chu Seol khurah an awm a ni. Fapa fingin a pa a tilâwm a, Fapa â erawh chuan a nu a tirethei. Dik lo taka sum lâk luh chu a hlâwk chuang lo, Dik taka thil tih chuan nun a hum ṭhîn. Lalpa chuan mi dikte ṭâm a phal lo va, Mi sualte duhthusâm chu a tithlâwn ṭhîn. Mi thatchhia chu a rethei ang a, Mi taima chu a hausa ang. Fapa fing chuan a hun takah buh a seng ṭhîn a, Buh seng huna mut chîngte chu zahpuiawm tak an ni. Mi dik chuan malsâwmna a dawng ang a, Mi sual thu chuan inpâwngnêkna a keng ru ṭhîn. Mi dikte hriat reng hi anmahni chawimawina a ni a, Mi sualte hming erawh chu hriat reng a ni lo vang. Thinlung fing chuan thupêk a pawisa ang, Â taka ṭawng ṭhînte chu an tluchhia ang. Dik taka awmte chu an thlamuang ṭhîn. Mi rinawm lote chu man chhuah an la ni ang. Thu dik sawi tlang ngam lo chuan buaina a tichhuak a, Huai taka sawisêltu chuan remna a thlen ṭhîn. Mi dik tak thu chu nunna hnâr a ni, Mi sual thu chuan inpâwngnêkna a keng ru ṭhîn. Inhuatna hian innghirhona a thlentîr a, Hmangaihna erawh chuan bawhchhiatna a haider ṭhîn. Mi vengvâten thu fing an sawi ṭhîn a, Finna tlachhamte chuan vuak an tuar ang. Mi fingte chuan hriatna an khâwl khâwm a, Mi â an ṭawng ve chuan chhiatna a lo hnai ṭhîn. Hausate chu an hausaknain a hum ṭhîn a, Retheite chuan an pachhiat avângin an tuar ṭhîn. Thil ṭha tih rah chu nunna a ni a, Sual chuan sual a hrin belh ṭhîn. Kaihhruaina dik zâwmtu chu a nung ang a, Zilhna pawisa lotu erawh chu thil tisual a ni. Huatna zêptu chu mi dawthei a ni a, Mi rêl chîng chu mi â a ni. Ṭawng tam poh leh tihsual a tam a, Mi fing erawh chu a insûm ṭhîn. Mi dik ṭawng chu tangkaraw ṭha mi anga hlu a ni a, Mi sual rilru erawh chu nêp tak a ni. Mi dik thu chuan mi tam tak a titlai ṭhîn a, Mi â erawh chu finna tlachhamin a thi ang. Lalpa malsâwmna chuan mi a tihausa a, Lungngaihna a tel lo. Thil sual tih hlimpui hi mi â awm dân a ni a, Mi fingte erawh chuan finna an ngaisâng ṭhîn. Mi sualte chuan an hlauh ang ngei an tawng ang a, Mi dikte erawh chuan thil an duh chu an hmu ang. Thlipui a lo tleh a, mi sualte chu a nuai bo va, Mi dikte erawh chu an nghet tlat ṭhîn. Thatchhe tirh chu Thil thûrin hâ a tihṭima, Meikhuin mit a tithîp ang hi a ni. Lalpa ṭih hi dam reina a ni a, Mi sualte damchhûng erawh chu a tawi. Mi dikte thil nghah chu lâwmna a ni a, Mi sualte hmabâk erawh chu boralna a ni. Mi ngîlte chu Lalpan a hum ṭhîn a, Thil sual titute erawh chu a tiboral ṭhîn. Mi dikte chu an nghîng ngai lo vang a, Mi sualte erawh chu he ramah hian an awm ve reng lo vang. Mi dikte chuan thufing an sawi chhuak a, Thu sual sawina lei erawh chu hleh a ni ang. Mi dikte kam chhuak chu a duhawm ṭhîn a, Mi sualte thu sawi erawh chuan mi a khêng ṭhîn. Bûkna dik lo chu Lalpa tenzâwng tak a ni a, Bûklung dik erawh chu a lawmzâwng tak a ni. Chapote chu an mualpho thuai dâwn a, Inngaihtlâwm hi a fing zâwk e. Mi ngîlte chu rinawmnain a kaihruai a, Bum hmangte erawh chu an sualnain a tichhia ang. Hausak hi thinurna ni-ah chuan a ṭangkai lo va, Dikna erawh chuan thihna ata a chhan chhuak ang che. Mi ṭhate chu an dik avângin an kawng a tluang a, Mi sualte erawh chu an sualnain a tichhe ṭhîn. Mi ngîlte chu an diknain a chhan ṭhîn a, Bum hmangte erawh chu an châknain a man tlat ṭhîn. Mi sualte an thihin beisei tûr a awm tawh lo, Hausaknaa innghah hi sâwtna a awm lo ve. Mi dikte chu manganna ata chhan chhuah an ni a, Mi sualte chungah a thleng thung ang. Serh leh sâng nei lote thu sawi chuan an ṭhiante a tichhe ṭhîn a, Mi fingte chu an finnain a chhan chhuak ṭhîn. Mi dikte an tluan chuan khua an lâwm a, Mi sualte an tlâwm chuan lâwmin an au chiam ṭhîn. Mi ngîl zârah khua a mawi a, Mi sual ṭawngin a tihmingchhia. Mi dang hmuhsit hi a âtthlâk a, Mi fing erawh chu a ngawi mai ṭhîn. Mi kamtam chuan thurûk a zêp thei lo va, Rin tlâkte erawh chuan thu an zêp thei ṭhîn. Kaihruaitu ṭha an awm loh chuan mite an tlu ṭhîn a, Remruat thiam an tam chuan an him ṭhîn. Hriat chian loh tâna dahkhama ṭan chu inchhîrawm tak a ni, Ṭan loh law law a hahdamthlâk zâwk. Nu ngilnei chuan chawimawi a hlawh a, Hmeichhe sual chu zahpuiawm tak a ni. Mi thatchhia chu a hausa ngai lo vang a, Mi hrât tak erawh chu a hausa ang. Mi ngilnei chuan a ngilneihna a hlâwkpui a, Mi nunrâwng chu amah a intichhe ṭhîn. Mi sual thiltihah hlâwkna rêng a awm lo va, Mi dik thil tih erawh chu a hlâwk ngei ang. Thil dik tih tum tlatte chu an nung ang a, Thil sual ûmtute chu an tlu ngei ang. Lalpan rilru kawi a ten a, Rilru ngîlte erawh chu a ngaina. Mi sual chuan hrem a pumpelh hauh lo vang a, Mi dikte erawh chuan an pumpelh ngei ang. Nula hmêlṭha fîmkhur nachâng hre lo chu Vawk hnâra rangkachak khâng vuah ang hi a ni. Mi dikte duhthusâm chu thil ṭha hlîr a ni a, Mi sualte hmabâk chu Pathian thinurna tuar a ni. Sem darh chîn chu ngah lehzualna a ni, Mi kawm tak nih chu tlâkchham ngahna a ni. Thilphal hle la, i hausa ang, Mi ṭanpui la, an ṭanpui ve ang che. A to nghâka buh chheprelhtu chu ânchhia an lawh ang a, Phal taka hralh zêltu chu miin an fak ang. Thil ṭha i duh tlat chuan duhsakna i dawng ang. Thil sual i zawn chuan i tawng ngei ang. Hausakna rinchhante chu hnah angin an ṭîl ang a, Mi dikte erawh chu an duah hluah ang. Mahni chhûngkaw tibuaitu chuan eng mah a nei lo vang, Mi â-te chu mi fing chhiahhlawh an ni ang. Dikna rah chu nunna a ni a, Nunrâwn chu thihna a ni. Khawvêlah mah mi dikten lâwmman an dawn chuan Thil sual titute leh mi sualte chuan hrem an tuar ngei ang. Kaihhruaina ngaina chuan hriatna a ngaina a, Thununna hawtu chu a â hle a ni. Mi ṭhate chu Lalpan a duhsak a, Sual tih chîngte thiam loh a chantîr ang. Sual avângin tu mah an dingchang lo vang a, Mi dikte erawh chu an nghîng lo vang. Nu ṭha chu a pasal tân lallukhum a ni a, Pasal timualphotu chu ngalngêt ang hi a ni. Mi dikte chuan thil dik an ngaihtuah a, Mi sualte remruat chu bumna hlîr a ni. Mi sualte kam chhuak chu tual thah thu a ni a, Mi ngîlte thu chuan mi a chhanhim ṭhîn. Mi sualte chu an tluchhia a, an boral a, Mi dik chhûngkua chu an dingchang ang. Mi an fin leh fak an hlawh ṭhîn a, An ât leh an hmusit ṭhîn. Intihmilena ei tûr tlâkchham ai chuan, Mahni hna thawka mi narân nih a ṭha zâwk. Mi dikte chuan an rante lam an khawngaih a, Mi sualte erawh chu an nun a râwng a ni. Mahni lo enkawltu chuan ei tûr a ngah ṭhîn a, Eng mah ni hlei lo ûm ruak ruak hi a âtthlâk e. Mi sualte kulh chu a chhe ṭhîn a, Mi dikte erawh chuan nghet takin zung an kaih ṭhîn. Mi sual chu amah a inṭawngâwk ṭhîn a, Mi dik erawh chuan buaina a pumpelh ṭhîn. Ṭawnghmang thiam miin a thiam man a tlai phah ang a, A thil tih rah a seng bawk ang. Mi â chuan dik a inti hle ṭhîn a, Mi fingte erawh chuan thurâwn an ngaichâng ṭhîn. Mi â lungni lo chu a lang nghâl ṭhîn a, Mi fing chuan chêksawlhna a ngaihthah ṭhîn, Mi rinawm chuan thu dik a sawi ṭhîn a, Thuhretu der chuan dâwt a sawi ṭhîn. Ṭawng thlahdah hian ngûnhnâm angin mi a chhun na thei a, Mi fing thu erawh chuan mi a thawi dam ṭhîn. Thu fing chuan a daih rei a, Dâwt erawh chuan rei lo tê chauh a daih. Thil ṭha lo tih tumtuten mahni an inbum a, Remna zawngtuten hlimna an chang. Mi dikte chu thil ṭha lovin a tlâkbuak lo, Mi sualte erawh chuan manganna an tâwk ṭhîn. Lalpan dâwt hmang a ten a, Rinawm taka thil ti ṭhîn erawh chu a ngaina. Mi fîmkhur chuan a hriatzia a thup a, Mi chhawihte erawh chuan an âtzia an târlang. Taima apiangin thu an nei ang a, Thatchhiate erawh chu chhiahhlawh an ni mai ang. Lungkham neih avângin mi an ngui a, Thu ṭha erawh chuan mi a tihlim ṭhîn. Mi dik chu a ṭhiante kaihruaitu a ni a, Mi sualte kawng erawh chu bona a ni. Mi thatchhia chuan a duhzâwng a nei ngai lo vang a, Taima erawh chu a pung thûr thûr ang. Dikna hi nunna kawng a ni a, Chumi kawngah chuan thihna a awm lo. Fapa fing chuan a pa kaihhruaina a zâwm a, Pawisak nei lo chuan zilhna a ngaithla duh ṭhîn lo. Mi ṭha chuan a ṭhat man a chên ang a, Bum hmang chuan râwng taka chêt hi a nuam tihzâwng a ni. Ṭawng fîmkhur hi mahni invênna a ni a, Mi ṭawng tlahawlh chuan ama chhiatna a thlen ṭhîn. Mi thatchhiain eng mah a nei lo; Mahse, a vîr êm êm, Mi taima erawh chuan a nei le lu ṭhîn. Mi dik chuan dâwt thu a hua a, Mi sual thu erawh chu a tenawm a, a zahpuiawm. Dikna chuan pawi sawi lote a vêng tlat a, Suahsualna erawh chuan mi sualte chhiatna a thlen ṭhîn. Hausa hlea inngai eng mah nei lo an awm a, Pachhiaa inngai hausa hle an awm bawk. Hausa chuan intlanna tûr sum a nei a, Pachhia erawh chuan vau a tâwk ve lo. Mi dikte chu mei êng tak ang an ni a, Mi sualte chu khâwnvâr tihmih ang an ni. Chapona chuan inhauna a tichhuak ṭhîn a, Mi râwn ṭhin hi a finthlâk zâwk a ni. Awlsam taka sum neih chu a ral thuai a, Harsa taka thawh chhuah chu a pung zêl ṭhîn. Beisei a bo chuan thin a na a, Duh anga kan hlawhtlin chuan kan hlim ṭhîn. Thurâwn hmusittu chuan a chhiat phah ang a, Thupêk zâwmtu chu a him ang. Mi fing zirtîrna chu nunna hnâr a ni a, Thihna thang pumpelhna a ni. Finna ṭha chuan mi a timawi a, Rinawm lohna erawh chu boralna a ni. Mi fing chuan fîmkhur takin engkim a ti a, Mi mâwl erawh chuan a âtzia a târlang ṭhîn. Mi tirh rinawm loten buaina an tichhuak a, Palai rinawmten remna an thlen. Kaihhruai duh lotu chu a pachhiain a mualpho vang a. Zilhna zâwmtu chu chawimawi a ni ang. Duhthusâm hlawhtlin hi nuam tak a ni, Mi sualte chuan thil sual an hawisan duh tlat lo. Mi fing kâwm la, i fing ve ang; Mi mâwl i kawmngeih chuan i tuar ngei ang. Mi sualte chu mangannain a tlâkbuak ṭhîn a, Mi dikte erawh chuan thil ṭha an dawng ngei ang. Mi ṭha chuan a tute thlenga rochun tûr sum a hnutchhiah a, Mi sual sum khâwl erawh chu mi dikten an nei ang. Mi retheite tân buh thar ṭeuhna tûr ram a awm diai duai a, Mahse, mi dik loten an neih an phal si lo. Talhfiak hmang lo chuan a fa a hua a ni, A hmangaih chuan tuk tin zilh rawh se. Mi dikte chuan kham tâwk ei tûr an nei ang a, Mi sualte chu an ril a ṭâm fo vang. Hmeichhe fing chuan chhûngkua an din a, A â-te chuan an kut ngeiin an ṭhiat. Ngîl taka nung chuan Lalpa a ṭih a ni; Kawi taka awm chuan a hmusit a ni. Mi â chu chapo takin a ṭawng ṭhîn a, Mi fing chu a thuin a hum ṭhîn. Bâwng chhawr tûr a awm loh chuan buh in a ruak a, Bâwng tha chhawr avângin buh a hlâwk ṭhîn. Thuhretu rinawm chuan dâwt a sawi ngai lo va, A rinawm loh erawh chuan dâwt a phuahchawp ṭhîn. Mi inchhuangte chu an fing ngai lo vang a, Mi rilru nei rên râwnte chuan thil an hre thuai ṭhîn. Mi â chu kalsan vat rawh, Eng mah hrilh tûr che a nei lo. Mahni nihna hriat hi mi fing finna chu a ni a, Mi â âtna chu finga a inhriatna hi a ni. Pathianin mi â-te a hmusit a, Mi ngilneite erawh chu a duhsak ṭhîn. Kan lungngaihna chu mahni chauhvin kan hria, Kan lâwmna pawh mi dangin min ṭâwmpui thei lo. Mi sual chhûngkua an tlûkchhiat pawhin, Mi ṭha chhûngkua chu an dingchang ang. Kawng dik nia i hriat chu Thihna a la ni mai thei. Nuih lai pawhin thinlung a na ṭhîn a, Lâwmna chu lungngaihnain a zui fo ṭhîn. Mi sualte chuan an sual man an hmu ang a, Mi ṭhate chuan an thiltih lâwmman an dawng bawk ang. Mi sualte chuan eng pawh an ring mai a, Mi fîmkhur chuan a kalna tûr a thlîr ngun ṭhîn. Mi fingte chu an fîmkhur a, Thil ṭha lo an hawisan a, Mi sualte erawh chuan ngampa takin thil an ti buan buan ṭhîn. Thinchhiate chuan â takin thil an ti rum rum ṭhîn a, Mi fîmkhurte chu an hua. Mi mâwlte chuan an mâwl man an hmu a, Mi fingte chuan hriatna an dawn belh ṭhîn. Mi sualte chu mi ṭha hmaah an kûn ang a, Mi dikte hmaah chuan an ṭhingṭhi ang. Pachhiate chu an ṭhenawmte pawhin an hua a, Hausate erawh chuan ṭhian an ngah hle. Ṭhenawmte hmusittu chu mi sual a ni a, Retheite lainattu chu mi nihlawh a ni. Thil ṭha lo ngaihtuahtu chuan thil sual a ti a ni; Thil ṭha tih tumtute chu miin an ring ang a, an lainat ang. Thawhrim chuan rah a nei ṭhîn a, A sawia sawi ringawt chuan tlâkchhamna a thlen. Mi fingte chu hausakna vûr an ni a, Mi sualte âtzia chu chhah tak a ni. Thuhretu dik chuan mi nun a chhan ṭhîn a, Dâwt a sawi chuan mi a phat ṭhîn a ni. Lalpa ṭih hi him taka awmna a ni a, Fate tân pawh belh tlâk a ni. Lalpa ṭih hi nunna hnâr a ni a, Thihna thang pumpelhna a ni. Lalin khualehtui a ngah chuan a ropui a, Mi a neih loh chuan a chan a chau ta ṭhîn a ni. Mi thinnel chuan thil a hrethiam ṭhîn a, Mi thinram chuan a âtzia a tilang ṭhîn. Thlamuanna hian taksa a tihrisêl a, Îtsîkna hi ngalngêt ang a ni. Retheite nêkchêp hi siamtu hmuhsitna a ni; Pachhiate lainattu chuan a chawimawi a ni. Mi sualin a thil sual tih a chhiat phah a, Mi dik chu a diknain a hum zâwk ṭhîn. Mi rilru nei rên râwn chu an fing ṭhîn a, Mi sualte erawh chuan thufing an hre thei lo. Dikna chuan hnam a tiropui a, Sual hi hnam tin tân mualphona a ni. Chhiahhlawh fing chu lalin a duhsak ṭhîn a, A mit tlung lo chungah a thinur ṭhîn. Chhânna nêmin thinrim a tireh a, Aw vînin thinur a titho. Mi fing thu sawi chuan hriatna a tiduhawm a, Mi mâwlten thu â an phuh chhuak ṭhîn. Lalpan hmun tin a hmu a, Mi sual leh mi ṭha a thlîr kim vek a ni. Aw dam chuan mi a tiharh a, Thu veivir chuan mi a tingui. Mi â chuan a pa kaihhruaina a hmusit a, Mi fing chuan a pa zirtîrna a pawisa ṭhîn. Mi dik inah sum leh pai a tling khâwm a, Buaina a lo thlenin mi sualte an chhe mai ṭhîn. Hriatna hi mi fingten an tidarh a, Mi mâwlte erawh chuan an ti ve lo. Lalpan mi sualte inthawina chu a ten a, Mi ngîlte ṭawngṭaina chu a lawmzâwng tak a ni. Lalpan mi sualte awm dân chu a ten a, Dik taka thiltite chu a ngaina ṭhîn. Kawng dik pênsantu chu na taka hrem a ni ang a, Zirtîrna hawtu chu a thi ngei ang. Seol leh boralna hmun chu Lalpan a hmu tlang vek a, Mihring thinlung phei chu a va hmu chiang dâwn êm! Chapote chuan kaihhruai an duh lo va, Mi fing an pan duh bawk hek lo. Thinlung hlim chu hmêlah a lang a, Thinlung ngui chuan rilru a tichau. Mi fingte chuan hriat belh an duh a, Mi mâwlte chuan mâwl renga awm an duh tâwk. Rethei nun chu hahthlâk tak a ni, Mi hlim thei chuan nuam an ti ang. Buai phîlîa neih ṭeuh ai chuan, Tlêm tê chauh pawh neiha Lalpa ṭih hi a ṭha. Inhaw chunga sa tui tak tak ei ai chuan, Hmangaihte nên anhnah mai mai ei pawh a nuam. Mi thinramin buaina an chawk chhuak a, Mi thinnelin buaina an tidai ṭhîn. Thatchhe kawng chu hlîngin a khat a, Mi ngîlte kawng chu a fai hliau ṭhîn. Fapa fing chuan a pa a tilâwm a, A â erawh chuan a nu a hmusit ṭhîn. Mi mâwlte chuan an ât an hlimpui a, Mi fingte erawh chu kawng ngîlah an kal ṭhîn. Remruat lâwk a nih loh chuan thiltum a tlawlh ṭhîn a, Remhria an tam erawh chuan a hlawhtling ṭhîn. A hun taka chhânna dik hriat hi, A hlimawmin a va ṭha êm! Mi fingte chuan nunna kawng chu an zawh chho va, Seol chhukna kawngah an kal duh lo. Lalpan chapote in a ṭhiatsak a, Hmeithaite ramri chu a humsak ṭhîn. Lalpan mi sualte ngaihtuahna chu a ten a, Mi thianghlimte thu chu a lâwm. Dik lo taka hlêp ṭeuh tum chu chhûngkaw buaina a ni a, Thamna lâk duh loh hi nun hlimna a ni. Mi dikte chuan an chhân hmain an ngaihtuah ngun ṭhîn a, Mi sualte chuan thu ṭha lo an phuh chhuak pheng phung ṭhîn. Lalpa chuan mi sualte a hlat a, Mi dikte ṭawngṭai a ngaithla ṭhîn. Hlim hmêlin mi a tilâwm a, Thu lâwmawmin mi a tiharh. Zilhna pawisak hi mi fing zînga telvena a ni. Kaihhruaina pawisa lo chu mahni intichhia a ni a, Zilhna pawisak hi finna a ni. Lalpa ṭih hi fin zirna a ni a, Chawimawina hlawh hmain tlâwm a ṭûl ṭhîn. Mihringin rem a ruat a, A hlawhtlinna chu Lalpa thu thu a ni. Kan awm dân apiang ṭha hlein kan ngai ṭhîn a, Mahse, Lalpan kan thiltum a ni a thlîr ber. Lalpa -a innghatin thil ti la, I thiltum chu a tihlawhtling ngei ang. Tum bîk neiin Lalpan engkim a ti a, Mi sualte pawh chhiat tâwk tûra a siam an ni. Chapote chu Lalpa tenzâwng tak an ni a, Hrem an pumpelh hauh lo vang. Mi rinawmte chu khawngaihnain an bawhchhiatna ngaihdam a ni a, Lalpa ṭih hi thil ṭha lo hawisanna a ni. Lalpa lawmzâwnga mi a awm chuan, A hmêlmate nên pawh an inrem ṭhîn. Dik lo taka neih ṭeuh ai chuan Dik taka tlêm tê neih a ṭha. Mihringin a awm dân tûr a ruahman a, Mahse, amah kaihruaitu chu Lalpa a ni. Pathian kaihhruaiin lalin thu a sawi a, A thu rêl chu a sual ngai lo. Bûkna dik leh a lung dik chu Lalpa lâwmzâwng a ni, Bâwma bûklung zawng zawng hi a siam a ni. Suahsualna hi lalten an ngaithei lo va, Dikna avâng chauhvin an lalna hi a nghet a ni. Lalten thu dik sawi an lâwm a, Thu dik sawi ṭhînte chu an ngaina ṭhîn. Lal a thinur chuan mi a that mai thei a, Mahse, mi fing chuan a thlêm dai thei. Lal hmêl a hlim chuan nun a nuam a, A duhsakna chu ṭhâl chhûm ruah pai ang hi a ni. Finna hi rangkachak aiin a hlu a, Hriatna pawh hi tangkarua aiin a thlanawm zâwk. Mi ngîlte chuan sual pumpelhna lamlian an zawh a, Fîmkhur taka kal chuan a nun a humhim ang. Chapona chuan boralna a thlen a, Inchhuanna chuan chhiatna a thlen. Retheite nên tlâwm taka awm hi, Chapote nêna râllâk sum insem aiin a ṭha zâwk. Remhre taka thil titu chu a hlawhtling ṭhîn a, Mahse, Lalpa -a innghah chu a hlu zâwk. Mi fing chu thil hrethiam an ti ang a, Ṭawngkam thlum chu awih a nahawm ṭhîn. Finna neih hi nunna hnâr a ni a, Mi sual zirtîr tum chu a âtthlâk e. Ngun taka ngaihtuahin mi fing chuan thu a sawi a, A sawi chu a awihawm bîk ṭhîn. Ṭawngkam thlum chu a thlâra khawizu ang hi a ni, Mi a tilâwmin a tihahdam ṭhîn. Kawng dik nia i hriat chu, Thihna kawng a la ni mai thei. Mi an ṭâm chuan hna an thawk nasa a, An ril a ṭâm loh nâna thawk an ni. Mi sual chuan thil ṭha lo a ngaihtuah chhuak a, A thu chhâk chhuah pawh mei sa ang hi a ni. Mi kawi chuan innghirnghona a tichhuak a, Se sea thu lâk chîng chuan ṭhian ṭha a tiṭhen ṭhîn. Mi nunrâwngten an ṭhiante an bum a, Kawng dik lovah an hruai daih ṭhîn. Mit siaitu chuan thil ṭha lo a ngaihtuah a, Heh pettu chuan thil ṭha lo a ti dâwn a ni. Lu ṭuak hi lallukhum mawi tak ang a ni. Mi dikte chuan an nei ngei ang. Mi thinnel chu pasalṭha aiin a duhawm a, Khawpui hnehtu nih ai chuan mahni inhneh a ṭha zâwk. Chinchâng hriat nân ṭhum an vâwr ṭhîn a. Mahse, thu titâwptu chu Lalpa a ni. Buh leh sa neih rei ruia chhûngkaw inngeih si loh ai chuan, Inngeih taka chaw ṭhing ei a hlu zâwk. Chhiahhlawh fing chu fapa tlâktlailo ai chuan a lal zâwk ang, Unau zînga mi ang maiin pa ro a chang ve ang. Tangka leh rangkachak thukah an rawh thianghlim angin, Lalpan mihring thinlungte a fiah ṭhîn. Mi sualte chuan thil sual an ngaihven a, Dawtheite chuan dâwt thu an ngaithla ṭhîn. Rethei nuihzattu chuan Siamtu a hmusit a ni; Chhiat a tawha diriamtu chuan hrem a pumpelh lo vang. Tu leh fate hi pate tiropuitu an ni a, Fate timawitu chu pate hi an ni bawk. Mi chhawih tân mawi taka ṭawng a âwm lo va, Milian tân dâwt sawi a mawi hek lo. Thamna hi dawi anga thiltithei nia ngai an awm a, An lekna lam apiangah hlawhtlingin an hria. Sual ngaihdam hi ngainat hlawhna a ni, Kam tam erawh chu ṭhian ṭhenna a ni. Mi â vawi za ben ai chuan, Mi fing vawi khat zilh a sâwt zâwk. Mi sual chuan vuivaina ngawt a zawng a, Mi nunrâwng a hnênah an tîr ang. Mi â-in thil â tak a tih lai va tawn ai chuan, Savawm no ngai tawhchilh a ṭha zâwk. Thil ṭha suala thungrûltu chu, Thil ṭha lovin an chhûngkua a chhuahsan lo vang. Inhnial hi tuikhuah sah tûr khi ṭan ang hi a ni a, A zual hmain titâwp ang che. Mi sual thiam chantîra, Mi ṭha thiam loh chantîr chu Lalpan a haw ve ve. Mi â kuta tangka awm chu eng nge a ṭangkaina? Rilru nei si lo chuan finna a lei thei dâwn em ni? Ṭhian chuan eng lai pawhin min hmangaih a, Unaute hi mangan hun atâna lo piang an ni. Mi leiba mawhphurhsaka, Ṭhenawmte tân dahkhama ṭang chu A â hle a ni. Thil sual lâwmtu chuan buai a duh a ni; Mi uangthuang chuan chhiatna a tâwk ngei ang. Mi kawi chuan thil ṭha a tawng lo vang a, Mi ṭawngtlahawlh chuan chhiatna a tâwk ngei ang. Fa â tak neitute chu an lungngai ṭhîn, Chutiang pa chu an hlim ngai lo. Hlim hi hrisêlna a ni a, Ngui renga awm hi chauhna a ni. Mi sual chuan puan hnuaiah thamna a dawng a, Dik takin ro a rêl thei lo. Mi fing chuan thil fing a ti ṭhîn a, Mi â erawh chuan kil tin a hâwl dûm ṭhîn. Fa â chuan a pa a timangang a, A nu tân pawh inchhîrawm tak a ni. Mi dik lei chawitîr hi a dik lo va, Dik lohna nei si lo milian vuak lah a dik hek lo. Thil hre tam chu a ṭawng mai mai lo va, Thil hrethiam tawh rilru chu a nghet a ni. Mi â chu a ṭawng loh chuan finga ngaih a ni a, I hmui chîp la, fin i hlawh ang. Mal tlat chîng chuan amaduhzâwng chauh a ngaihtuah a, Mi dang a thurualpui thei lo. Mi â chuan hriatna a ngaina lo va, A ngaih dân chauh sawi a duh ṭhîn. Sual chu mualphonain a rawn zui a, Hmingchhiate chu hmuhsit zui an ni bawk. Kan thuchhuak chu lui luang ang hi a ni a, Finna tuikhur erawh chu thûk tak a ni. Mi dik chan tûr lâksaka, Mi sual duhsak a ṭha lo ve. Mi â ṭawng chuan inhnialna a tichhuak a, A thu chuan invuak a chawh a ni. Mi â chuan a thu a chhiat phah a, A inṭawngâwk tlat ṭhîn. Mi rêl ser ser hi thil tui tak ang a ni, Tui kan va ti ṭhîn êm! Mahni hnaa dâwngdah chîng chu Tichhetua unaupa a ni. Lalpa hming chu kulhpui ang a ni a, Mi dikte an tlân lût a, an him ṭhîn. Mi hausa tân a hausakna chu kulhpui ang a ni a, Lung bang sâng tak angin a ngai. Chapona chu chhiatnain a zui a, Ropui hmain tlâwm a ṭûl ṭhîn. Ngaihthlâk hmaa chhân chu, A âtthlâkin a zahthlâk ṭhîn. Dam loh pawhin dam duhna hian beisei min neihtîr a, Dam duhna a bo tawh chuan tu nge dam thei ang? Rilru nei rên râwnten hriatna an neih belh a, Mi fingte chuan hriatna an ngaihven ṭhîn. Thilpêkin kawng a tikaw thei a, Milian hmaah pawh awlsam taka luh theihna a ni. Thubuai sawi hmasatu chu thiam hlein a lang ṭhîn, A rawn chhâl lêt an awm hma chu. Milian an inkhin chuan ṭhum vâwr ila, Ṭhen theih an ni. I unau ṭanpui la, kulhpui angin a hum ang che, In inhau erawh chuan kawng a kalh hnan ang che. I thu sawi avângin i puar ang a, I thu azirin i tlai ang. Nunna emaw, thihna emaw a hring thei a, I thu sawi mawh chu i phur ngei ang. Nupui zawng hmu chuan thil ṭha tak a hmu a ni, Lalpa duhsakna a dawng ang. Mi rethei chuan khawngaih thla la takin thu a sawi ṭhîn a, Mi hausa erawh chu a ṭawng chaltlai hle ṭhîn. Ṭhian ṭha ni âwm taka lang an awm a, Unau aia ṭhian nghet an awm bawk ṭhîn. Mi â dawthei tak nih ai chuan, Mi rethei, ngîl taka nung nih a ṭha zâwk. Hriatna nei si lova phûr viau hi a ṭha lo ve, Hmanhmawh chuan a dai sual ṭhîn. Mi ṭhenkhatin an ât an chhiat phah a, Lalpa an dem leh si. Hausak hi ṭhian ngahna a ni a, Retheihna hian ṭhian a tiṭhen. Thuhretu der chu hrem a ni ang a, Dâwt sawi chuan hrem a pumpelh lo vang. Milian tlawntu an tam hle a, Mi thilphalten ṭhian an ngah ṭhîn. Mi rethei chu a unau zawng zawng pawhin an nin chuan, Ṭhian a nei zo lo pawh a mak lo ve. Neih tum chiam mah se, a hmu zo lo vang. Finna neih tum hi mahni induhsakna a ni a, Hriatna ngaihlu chuan a ṭhatpui ang. Thuhretu der chu hrem a ni ang a, Mi dawthei chu a boral ngei ngei ang. Sâng taka khawsak hi mi â tân a mawi lo va, Chhiahhlawh tân milian chunga thuneih a âwm hek lo. Mi fing chu a thinur duh lo va, Chêksawlhna a haider hi amah tiropuitu a ni. Lal thinrim chu sakeibaknei rûm ang hi a ni a, A duhsakna erawh chu hnim chunga dai tla ang hi a ni. Fapa â chu a pa tân chhiatna a ni a, Nupui âncheh chu in chung far reng ang hi a ni. In leh lote hi pate ta kan rochun a ni a, Nupui fing erawh chu Lalpa min pêk a ni. Mi thatchhia chuan mut an duh a, Mi dâwngdah chu a ṭâm ngei ang. Thupêk zawm hi mahni inhumhimna a ni a, Thu awih lo chu a thi ngei ang. Rethei khawngaih hi Lalpa hnêna thil pûktîr ang a ni, I thiltih ang chu a rûl leh ngei ang che. Beiseiawm a la nih laiin i fa chu thunun rawh, Chutilo chu, a chhiat i duh tihna a ni. Mi thinchhia chuan a thinchhiat rah a seng ang a, Chhan ṭhîn mah la, chhan leh ṭhin a ṭûl ang. Thurâwn ngaithla la, kaihhruaina zâwm rawh. Engtikah emaw chuan i la fing ang. Mihringin thil tam tak an ruahman a; Mahse, Lalpa remruat chauh a dingchang ang. Mihring hi rinawm taka awm tûr a ni, Dâwttheih ai chuan retheih a ṭha. Lalpa ṭih hi nunna a ni a, A lungawithlâk a, Thil ṭha lovin a tlâkbuak lo vang. Mi thatchhia chuan thlêng zen chu a peih a, Mahse, a bâr peih lo. Pawisak nei lo chu vua la, mi mâwlin a fin phah ang. Mi fing zilh la, hriatna a ngah sawt ang. Pate rawka nute hnawtchhuaktu chu, Fa zahpuiawm, mualphona tâwpkhâwk thlentu a ni. Ka fapa, thununna i zir zawm loh chuan, I hriat sa pawh i theihnghilh mai ang. Thuhretu sual chuan dik taka rorêl a ngainêp a, Mi sualte chuan dik lohna hi an duhzâwng tak a ni. Pawisak nei lote chu thiam loh chang sa an ni a, Mi â-te chu an hnungzânga vuak tûr an ni. Zuin mi a tiuang a, Rakzuin buaina a tichhuak. Zu rui mi fing an awm ngai lo. Lal thinur chu sakeibaknei rûm ang a ni a, Tithinurtu chuan a nun a chân ang. Intihbuainaa tel loh hi pa zahawm nihna a ni a, Mi â-te chu an inrawlh zen ṭhîn. Mi thatchhia chuan a hunah lei a rît peih lo va, Buh seng tûr zawng mah se a nei lo vang. Mihring ngaihtuahna hi li thûk tak ang a ni a, Mahse, mi fing chuan a dâwp chhuak thei. Rinawm tak nia insawi an tam hle a, Rinawm tak tak tu nge hre chhuak thei ang? Dik tak leh ngîl taka nung ṭhîn Fate chu an nihlawh e. Rorêl tûra lal a ṭhutin Thil dik lo chu a hmu nghâl ṭhîn. ‘Ka thinlung a thianghlim a, sual lakah ka fihlîm,’ Tu nge ti thei? Bûklung rit hlei te, Tehna no lian hlei te Lalpa tenzâwng a ni. Naupang pawh a thiltihah a zia a lang, Mi ṭha a ni emaw, mi dik a ni emaw a hriat theih ṭhîn. Beng thil hre thei, mit thil hmu theite hi Lalpa siam an ni e. Mut heh hle suh, i rethei dah ang e, I mit meng la, ei tûr i nei ṭeuh vang. ‘A to mang e,’ thil leitu chuan a ti ṭhîn a, Mual an liam a, an lei tlâwmzia an uanpui ṭhîn. Rangkachak leh lunghlu chu a tam hle a, Thu fing tak chu lungmawi vâng tak ang a ni. Hmêlhriat loh leiba rulhsak tiamtu kawr chu Dahkham atân lâksak mai rawh. Thil ei rûk chu a tui hle a, Mahse, kâa ṭiaulung khat ṭûn ang hi a la ni ang. Thil ruahman laiin ngun taka ngaihtuah tûr a ni, Remruat diam hnuah chuan indo ṭan tûr a ni. Mi ṭawng duh, lên heh chuan thurûk a puang ṭhîn a, Mi kamtam chu kâwm suh. Nu leh pa ânchhe lawhtu chu Thima khâwnvâr mit ang hi a la ni ang. Awlsam taka sum leh pai neih mai theihte hi A tâwpah chuan a hlâwk lem lo. ‘Thil sual ka thungrûl ang,’ ti mai teh suh, Lalpa chu ngaichâng la, a rawn chhan ang che. Bûklung inang lo hi Lalpan a ten a, Bûkna dik lo a ṭha hek lo. Kan ke pênte hi Lalpa ruat a ni, Tu nge kan kalna tûr hre thei ang? Ngaihtuah chiang lovin thilhlan Pathian hnêna pêk tiam suh, I tiam hnuah i la inchhîr leh dah ang e. Lal fing chuan mi sual a hmu thuai a, Tawlailîr a la chîltîr ang. Lalpan mihring chhûngah khâwnvâr a dah a, Thinlung chhûngril a chhun chhuak vek a ni. Ngilneihna leh zahawmna hi lal humhimtu a ni a, Dikna avângin a lalṭhutthlêng a nghet a ni. Tlangvâl ropuina chu an chakna hi a ni a, Upa mawina pawh an lu vâr hi a ni. Na taka vuakna hian sual simna a thlen a, Vuak nek hian chhûng lam a tithianghlim thei. Lal rilru hi Lalpa thu-a awm a ni a, Lui tui a duh duha a luantîr ang hian a tidanglam ṭhîn. Mahni awm dân hi ṭha hlein kan hria a, Mahse, Lalpa chhui chu thinlung hi a ni. Thil dik tih leh dik taka rorêl hi, Inthawina aiin Lalpan a duh zâwk. Induhna te, chaponate hi mi sual kaihruaitu a ni a, Chu chu thil sual a ni. Mi taima thiltum chu a hlawhtling ṭhîn a, Thil ti rum rum mi chu a hlawhchham ang. Dâwta intihhausak chu chhûm Ral mai ang hi a ni, thih a chawh bawk. Mi sual nunrâwnna chu an chungah a tla ang, Thil dik an tih duh loh avângin. Thiam loh changte rilru chu a kawi a, Mi ṭhate chuan thil dik an ti ṭhîn. Nupui âncheh tak nêna in khata chên ai chuan, In chung zâwl kila awm a ṭha zâwk. Mi sualte chuan thil sual an duh reng a. Lainatna an neih rêng an ṭhenawmte pawhin an hmu lo. Mi hmusittuten hrem an tuarin, mi mâwlten an fin phah a, Zirtîrna dawngtu mi fing chuan a hriat belh ṭhîn. Mi Dika chuan mi sual chhûngkua a hmu reng a, Mi sualte chungah chhiatna a thlentîr ang. Mi rethei thu ngaithla duh lotu chu, A mangang au an ngaithla bîk lo vang. Thilpêkin thinrim a thawi dam a, Thinur viau pawh a rûka thamnain a beng dai ṭhîn. Dik taka rorêl a nihin mi ṭha an lâwm a, Mi sualte tân chuan hnâra khawn ang a ni. Pianpui finna hmang duh lotu chu Mitthi zîngah a awm thuai ang. Nawmchen thlahlel chu a pachhia ang a, Zu leh sa ngaina chu a hausa lo vang. Mi sual chu mi dik tlan nân an hmang ang a, Mi bum hmang pawh mi nun ngîl tlan nân. Nupui âncheh leh thinchhe tak bula awm ai chuan, Thlalêra awm a ṭha zâwk. Mi fing inah chuan sum leh pai hlu tak tak a awm ṭeuh va, Mi â-te erawh chuan an ei zo zêl. Mi ngilnei, dik taka thil ti ṭhîn chu, A dam rei ang a, a hmuingîlin miin an zah ang. Hotu fing chuan mi huaisente kulh a la mai thei a, Inhumhim nâna an hman chu a chhu chhe ṭhîn. I hmui leh i lei vêng la, Buaina i pumpelh ang. Mi chapo leh mi inchhuang chu ‘Hmusittua,’ an ti, Chapo takin a inluling ṭhîn. Mi thatchhia chuan eng mah a thawk peih lo va, Rualawt rêng rêngin a thi ang. Nilêngin mi thil a awt ngawih ngawih reng a, Mi ṭha erawh chuan ui nei lovin thil a pe ṭhîn. Mi sual inthawina chu a tenawm a, A inthawi chhan a sual phei chuan a tenawm lehzual ṭhîn. Thuhretu der chu hnâwl a ni ang a, Chîk taka ngaihtuah mi thu chu pawm a ni fo vang. Mi sual chu a meng rum ṭhîn a, Mi dik erawh chu a nghet chat ṭhîn. Finna te, thiamna te, remruatna te, Lalpa kalh zawng chu eng mah a ni lo vang. Sakawr chu indona atân buatsaih a ni a, Mahse, hnehna chu Lalpa thu a ni. Hausak viau ai chuan hmingṭhat duh zâwk tûr a ni. Tangka leh rangkachak aiin mi ngaihsân nih a ṭha zâwk. Hausak leh retheih inanna chu, Pathian kutchhuak an ni ve ve. Mi fing chuan hlauhawm a hmuhin a biru a, Mi mâwl erawh chuan a tâwn mai a, a tuar phah ṭhîn. Inngaitlâwm la, Lalpa ṭih rawh, Hausakna te, ropuina te, nunna te i nei ang. Mi kawite kawng chu hlîng leh thangin a khat a, Invêng ngun la, hawisan daih rawh. Naupang chu awm dân ṭha zirtîr la, A upat hnuah pawh a thlah lo vang. Hausaten retheite chungah thu an nei a, Pûktu chu pûktîrtu chhiahhlawh a ni mai. Hleih neih chîng chuan buaina a tâwk ang a, Thinura mi chunga tiang lek ṭhîn chu a tliak ang. Mi ngilnei, retheite ei tûr pe ṭhîn chuan Malsâwmna a dawng a. Mi chimawm chu hnawt bo la, Inhnialna te, buaina te, inhauna te a reh mai ang. Lalpan thinlung thianghlim a ngaina a, Hawihhâwm taka ṭawng ṭhin hi lal ṭhian nihna a ni. Lalpan hriatna dik nei mi chu a hum tlat a, Dawtheite thu erawh chu a paihthla ṭhîn. Thatchhia chuan, ‘Pâwnah sakeibaknei a awm, Ka chhuah chuan min seh mai ang,’ a ti ṭhîn. Hmeichhe sual thu chu hum thûk tak ang a ni a, Lalpa huatzâwngte chu an tla lût ang. Naupangte hi â hle mah se, Tianga vuak reh hlauh theih a ni. Hausak duh vânga mi rethei tiduhdaha, Mi hausa tlawn chu tlâkranna a ni. Mi fingte thu sawi hi bengsikin ngaithla la, Ka zirtîr ang che. I hriat reng chuan i lâwm hle ang a, A ṭûl hunah i sawi chhâwng thei ang. Lalpa rin tlat theih nân, Vawiinah hêng hi ka hrilh che a ni. Hêng zilhna thu leh hriat tûr sawmthum hi Ka ziak chhuahsak che a, Hetah hian remruat dân ṭha a chuang a ni. Thu dik hi eng nge a nih tih a zirtîr ang che; Thu dik hmu chhuak tûra an tirh hunah che, A chhânna tûr dik tak i hre thei ang. Mi rethei chu an pachhiat avângin an thil chhuhsak suh, Rorêlnaa ṭanpuitu tûr nei lo chu rapbet suh. Lalpan a rawn ṭan ang a, Rapbettu chu a rawn rapbet ve ang. Mi thinchhia kâwm suh la, Mi thinram ṭhian hek suh. Chutilo chu, an awm dân i la ang a, I inâwk buai mai ang. Mi leiba rulhsak tiam suh la, Dahkhamah ṭang hek suh. Pêk tûr i neih loh hlauh chuan, I mutna khum chenin an lâksak ang che. Hmânlaia in puten ramri an kham chu sawn suh. Mi themthiam chu lalin a ruai ang a, Mi narânin an chhawr phâk ve lo vang. Milian nên chaw in kîl dâwnin, I hmaa ṭhu chu en ngun rawh, I ril a ṭâm hle pawhin insûm deuh la, Ei tûr tuihnai a hlui che chu, A bum tumna che a ni mai thei. Hausak tumin inhmang zo suh, Inkhêk deuh la, a fing zâwk ang. Hausakna chu i hmuh veleh a bo mai ang, Thla a nei ta emaw tih tûr a ni ang a, Mupui angin vân lamah khian a thlâwk bo vang. Khawhringneite chawhlui kîl suh la, Ei tûr tuihnai a neih chu ît hek suh. ‘Ei la, in teh,’ a ti ang che a, Duhsak tak tak si lo chein, Tum nei ru râna thil ti a ni. I thil ei chu i luak chhuak leh ang a, Amah i fakna chu a thlâwn mai a ni ang. Mi â zilh suh, i thu fing chu Engah mah a ngai lo vang. Ramri awm sa chu sawn suh la, Fahrahte ram chhuhsak hek suh. An tlantu chu ropui tak a ni a, Anni chu a ṭan ang a, a khing ang che. An zirtîrna che chu ngai ngun la, Thil hriat tûr chu ngaihven rawh. Naupang chu thunun lohvin zuah suh, I vuak avângin a thi lo vang. Tiang i lek ṭhin chuan, A nunna chu Seol aṭangin i chhan chhuak dâwn a ni. Ka fapa, i fin chuan kei hi mi lâwm ang. Thufing i phuh chhuah leh ka lâwm êm êm ang. Mi sualte chu awt rilru suh, Ni tin Lalpa ṭih i chîn chuan I tân a la ṭha ang a, I beisei chu a thlâwn lo vang. Ka fapa, ngaithla teh, fing la, I awm dân hi ngaihtuah ngun teh. Zu heh mi zîngah awm suh la, Sa heh mi kâwm hek suh. Zu heh leh sa heh mi chu an pachhia ang a, Ruih chîng chuan kawr ṭet a ha ang. A hringtu che i pa thu chu awih la, I nu a tar hnuin hmusit hek suh. Thu dik te, finna te, kaihhruaina te, hriatna te lei rawh, Hralh leh tawh suh. Mi dikte pa chu a hlim ang a, Fapa fing neitu chu a lâwm hle ang. I nu leh pain chhuang hle che sela, A paitu che tihlim ṭhin rawh. Ka fapa, ka thu hi awih la, Ka nun dân hi entawn ang che. Mi hur leh nawhchizuarte hi Thang hlauhawm tak an ni. Suamhmang angin mi an châng a, Mihring zîngah mi rinawm lo an pun phah ṭhîn. Tute nge ninawm tak, che pawr hle ṭhîn, Buaipuiawm tak, vui reng mai si, A ṭûl lova pem pheng phunga, Meng sen rêm rûm ṭhîn le? Zu in reng mai, Zu chi hrang hrang chawhpawlh hrâtte hi an ni. Zu sen lang mai, îtawm taka nova tling, Lem nuam âwm tak ni mah se, Melh duh hauh suh ang che. A tûkah chuan rûl tûr neiin A chu ta che emaw i ti ang a, Thil mak pui pui i hmu ang a, I rilru a buai ang a, i riat nuah nuah ang. Lawng ngul lêra awm, inthên inthên, Lawng rui angin i inhria ang. ‘Min tithal dêr mah se, pawi ka ti lo, Leiah let dêr mah ila a pawi hlei nêm, Ka ṭhanharh hunah chuan, Ka in leh bawk ṭhîn ang,’ i ti ang. Mi sualte awt suh la, An zînga tel châk bawk hek suh. Buaina tihchhuah dân an ngaihtuah ber a ni, Pawi khawih dân tûr tui takin an sep ṭhîn. Finna leh inhriatthiam tawnnaah Chhûngkua chu a indin nghet a, Hriatna avângin thil hlu leh mawi tak tak, Pindan chhûngah a khat vek ṭhîn. Fin hi chak ai chuan a ṭha, Hriatna hi âwmkhauh aiin a ṭha bawk. Indo hmain ngun taka râlrêl a ṭûl a, Remhria an tam chuan hmêlma an hneh nge nge ṭhîn. Mi chhawih tân thufing a ril lutuk a, Thupui vainaah sawi tûr a nei phâk lo. Thil ṭha lo hlîr suangtuahtute chu, ‘Pawi khawih hmang’ an ti ang. Mi â remruat apiang thil sual a ni zêl a, Mi dang hmusittu chu mi tenawm a ni. Mangan nia i chauh mai chuan, Chakna rêng i lo nei lo a ni. Dik lo taka tihhlum tûrte chu chhan la, Thah mai tûra an hruai hlawk hlawkte chu ensan mai suh. ‘Ka hriat ve chi a ni lo ve,’ ti suh, Thinlung entu chuan a hria a ni lâwm ni? Vêngtu che chuan a hre vek a, Mi tin an thil tihsual ang zêlin a thungrûl ang. Ka fapa, khawizu in rawh, a ṭha a ni, A thlâra luang a thlum bîk ang hian, I tân finna pawh a thlum ang, Finna nei la, i tân a la ṭha ang, I beisei pawh a thlâwn lo vang. Mi sualte angin mi dikte in suam tum suh la, An chênna in tihchhiatsak bawk hek suh. Mi dik zawng vawi sarih tlu mah se a tho leh ang, Mi sualte erawh chu thil ṭha lovin a titlu hlen vang vang ang. I hmêlmate an tlûkin lâwm suh la, An petekin hlim bawk hek suh, Lalpan a hmu hlauh dah ang che a, a lâwm lo vang e, An chunga a thinurna a hnûk kîr ang. Mi sualten i rilru tibuai suh se, An sualna chu awt hek suh. Mi sualte chuan ṭhat ni an nei lo vang a, An khâwnvâr chu tihmihsak a ni ang. Ka fapa, Lalpa ṭih la, lal zah thiam rawh, An laka hel duhte kawp suh, An chungah chhiatna a lo thleng thut mai ang, Chhiatna thlen theitu an ni ve ve si a. Hêng pawh hi mi fing thu sawi a ni, Rorêlnaa mi zahzâwng neih hi a ṭha lo ve, ‘I ti dik e,’ mi sual hnêna titu chu Ânchhia an lawh ang a, mi tinin an hua ang. Mi sual kamkhattu chu miin an lâwm ang a, Malsâwmna a dawng ang a, a hming a ṭha bawk ang. Thu dik taka min chhâng ṭhîntu chu Ṭhian ṭha a ni. Pâwn lama i hna tifelin i lo lam te tifel hmasa la, Tichuan, i in tûr chu sa rawh. I ṭhenawmte dâwtin hêk suh la, Ngaih kawih theihin an chungthu sawi hek suh. ‘Min tih angin a chungah ka ti ve ang, A sualna chu ka thungrûl dâwn,’ ti bawk hek suh. Mi thatchhe lovah ka va kal a, Mi tlawktlaw grep huan chu ka va fang a, Ngai teh, hlîng a lo khat vek a, Kângṭhaiin a khuh lûk a, A lung palte a lo chim rem rum mai. Chûng chu ka han en chuan ka ngaihtuah a, Zir tûr ka chhar ta a. I duh chuan han mu hlek ta che, Han châwl hahdam hlekin Kut hûmin zâl teh rêng: Retheihna chu rûkru angin a lo kal thuai ang a, Pachhiatna chuan sipai angin a rawn nang vat ang che. Hêng pawh hi Solomona thufing, Judai ram lal Hezekia hoten an ziak chhâwn a ni. Thil thup hi Pathian ropuina a ni a, Thil hmuh chhuah hi lal ropuina a ni. Vân sânzia te, tuifinriat thûkzia te angin, Lal rilru pawh hriat chhuah rual a ni lo. Tangkaraw êkchhia paih la, Thil chhertuin thil mawi tak a chher thei tawh ang. Lal kiang aṭangin mi sual hnawt bo la, A ramah dik taka rorêl a ni ang. Lal hmaah intivei suh la, Milian zîngah tel chîng hek suh. Aia milian ṭhutna kian tûra tih nih ai chuan, Ṭhutna ṭha zâwka ṭhu tûra sâwm nih a ṭha zâwk. I thil hmuh thubuaiah thlen mai suh, Thu hre chiang zâwkten an rawn sawi leh si chuan, Engtin nge i tih tâk ang? Ṭhenawmte nên inhnial inhnial mah ula, Mi dang thurûk chu puangzâr suh, Chutilo chu, a lo hriaten an dem ang che a, I hmingchhiat a reh lo vang. A hun taka thu sawi chu, Rangkachak mûm tangkaruaa phûm ang a ni. Mi fing zilhna chu ngaithla duhtu tân chuan, Rangkachak ṭha ber zungbun leh ṭhi aiin a ṭha. A tîrtu tân palai rinawm tak chu, Ni sen sat laia vûr tui ang hi a ni. A tîrtu chu a tiharh sawng sawng ṭhîn. Pêk tiam si-a pe si lotu chu, Ruah pai lo chhûm, thli chhêm lên ang hi a ni. Zai dawh taka thlêm heuh heuhvin lalte an tilungawi a, Khauh hle mah se, thu nêmin a hneh thei. Khawizu i tawn chuan a tâwk chauh in rawh, Chutilo chu, a ngei ang che a, i luak mai ang. Ṭhenawm inah lêng lutuk suh, A ning ang che a, a haw hlauh dah ang che. Mahni ṭhenawm dâwta hêktu chu Tuboh leh khandaih ang a ni, thal zum tak nên. Mangan nia mi bum chîng chunga innghah chu, Ha nghînga thil ṭhial leh ke na chunga kal ang a ni. Mi lungngai bula hla sak chu, Khaw vawh nia kawr hâk phelh leh chingala pem sil ang a ni. I hmêlma a rilṭâm chuan ei tûr pe la, A tuihâl chuan in tûr pe rawh. Tichuan, sen awp awp khawpin i tizak ang a, Lalpan a rûl ang che. Hmâr thliin ruah a rawn thlen ang hian, Inrêl rûk hian thinrim a tichhuak ṭhîn. Nupui phunchiar tak nêna in zau taka awm aiin, In chung zâwl kila awm a ṭha. Ram hla tak aṭanga thu lâwmawm hriat chu, Mi chau tân tuisik ang a ni. Mi sual hmaa mi dik tlâwm chu, Tuihna nu leh tuikhur bawlhhlawh ang hi a ni. Khawizu in tam lutuk a ṭha lo ve, Fak hlawh tum luattuk pawh a ṭha hek lo. Mahni inthunun thei lo chu, Khaw kulh bang chim ang hi a ni. Nipuia vûr tla leh buh seng laia ruah sûr a inhmeh lo angin, Mi âten chawimawi an inhmeh lo. Sava thlâwk leh vamûr lêng lai an fu lo ang hian, A chhan awm lovin ânchhia pawh i dawng lo vang. Sakawr chu vuak a ngai a, Sabengtung lakam barh a ngai a, Mi â hnungzâng pawh vuak a ṭûl a ni. Zawhna â tak tak i chhân zêl chuan, Nang pawh a zâwttu ang bawka â i ni ang. Mi â chu a ât dân ang lekin chhâng la, Chutilo chu, fing hlein a inngai ang. Mi â zualkova tîrtu chu, Mahni ke tan ang mai a ni, a tuar ngei ang. Mi â tân chuan thufing hi, Ke zeng, thên mai mai ang hi a ni. Mi â chawimawi chu a sâwt lo, Sairawkherha saihlum ṭâwn beh ang a ni. Mi â tân thufing phuh chhuah chu, Zu ruiin a kuta hlîng khei a tum ang hi a ni. Mi â veivâk nazawng leh zu rui ruaitu chu, A hmuh apiang thala kâp hliamtu ang hi a ni. Mi â-in thil â tak a tih nawn chuan, Ui-in a luak a ei leh ang hi a ni. Fing si lova fing hlea inhria ai chuan, Mi â tak chan a ṭha zâwk. Thatchhia chuan, ‘Kawngah sakei a awm, Tualah sakeibaknei a awm,’ tiin a pâwnchhuak ngam lo. Kawngkhâr kawpzaa a her ang hian, Thatchhia chu khumah a her vêl ṭhîn. Thatchhia chuan chawthlêng a zen a, A bâr leh peih si lo. Thil chhût thiam mi pasarih aiin thatchhia chuan fingin a inhre ṭhîn. Tel ve lohna tûra lo inrawlh chu, Ui tual lêng benga man tum ang a ni. Mi â-in meichher te, thal te, hriam te A khawih a khawih chuan thih theihna mai a ni. Mahni ṭhenawmte buma, ‘Ka fiamthu a nih kha,’ titu ang hi a ni. Thing a awm loh chuan mei a thi a, Se se-a thu lâk chîng an awm loh chuan buaina a reh. Meihawl a tam leh a ling a nasa a, Thing a tam leh a alh ṭha ṭhîn, Mi phunchiar tamnaah buaina a punlun ṭhîn. Mi rêl hi thil tuihnai tak ang hi a ni, Tui kan va ti ṭhîn em! Kam ṭha êm êm thinlung sual si chu, Hlumbêl an hnawih tlêt ang hi a ni. Mi vervêkin a huatzâwng chu, Ṭawng ṭhain a khuh ṭhîn. A ṭawngkam a tihthlum hle chuan ring suh, A thinlungah tenawm pasarih a awm a ni. A rilru chhia chu thup mawi mah se, A sualzia chu pung khâwm zîngah a la lang ang. A hum laihah chuan amah a tla ang a, A lung lum chuan amah a la delh ang. Mi dawthei chuan a bumte a lo haw hle ṭhîn a ni, Fak der chîng chuan chhiatna a thlen. Naktûka i awm dân tûr uanpui lâwk suh, Eng nge lo thleng dâwn i hre si lo. Mi dangin fak che rawh se, Nangmah zawng infak suh. Lung leh ṭiauvut hi a rit hle a, Mi â thinur chu a tawrhhlelhawm zâwk. Thinurna tuar hi a hrehawmin a rit a, Îtsîkna erawh hi chu tu nge tuar zo vang? A langa inzilhhau hi A rûka hmangaih ai chuan a ṭha zâwk. Hmangaihtu ben chu ṭhatna tûr a ni a, Hmêlmaten min lawm hûrh chuan fîmkhur a ṭha. Puar hle lai chuan khawizu pawhin min ngei a, Rilṭâm tân chuan thil kha tak pawh a thlum. Mahni bu awplum lo sava leh Mahni in leh lo ngaihsak lo chu an inang. Hriak leh têl rimtuiin mi a tilâwm a, Ṭhian ṭha thurâwn fing pawh a lâwmawm ṭhîn. I pa ṭhian leh nangma ṭhian chu thlauhthla suh, Buaina a lo thlenin unaute kher pan suh, Unau hla taka awm aiin ṭhenawm hnai an ṭangkai zâwk. Ka fapa, fing la, kei ka lâwm ang, Min deutute ka chhâng let ve thei dâwn nia. Mi fing chuan hlauhawm a hmu lâwk a, Mi â erawh chuan a tâwn mai a, a tuar phah ṭhîn. Hmêlhriat loh ba rulhsak tiamtu kawr chu, Dahkham atân lâksak mai rawh. Zîng taka mi kaithova, Ring taka chibai bûk chîng chu, Ânchhia anga ngaih a ni ang. Nupui âncheh tak chu, Khawchhiat ni-a in far reng ang hi a ni a, Tihreh tum chu thli tleh lo dan tum leh Sahriak hûm tum ang hi a ni. Thîrin thîr a tihriam a, Mihring pawhin mi dang hnên aṭangin a zir ṭhîn. Theipui kûng chu enkawl ṭha la, a rah i ei ang, Chhiahhlawh, a pu thu awih chu, chawimawi a ni ang. Tuiah thla kan hmu ṭhîn angin, Mihring thinlung pawh a nunah a lang. Seol leh Abadon chuan tâwk tih lêm an nei lo angin, Mihring mit pawhin tâwk tih a nei lo. Thukah tangka leh rangkachak an rawh thianghlim angin, Mihring hmingṭhatna pawh fiah a ngai ṭhîn. Mi â âtna chu sumah buh nên dêng nek mah la, A âtna chu a kiang chuang lo vang. I berâm rual chu fîmkhur takin enkawl la, I ran rual chu ngaihven ṭha rawh. Hausakna hian a daih kumkhua lo va, Lalna pawh hian chhuan tam a daih lo asin. Buhpâwl ât la, a chawr leh hma ang a, Tlâng hnimte zai bawk ang che. Tichuan, i berâm hmulte i sin ang a, I kêl man chuan ramte i lei thei ang. I kêl hnutete chu a tam ang a, i tlân ang a, I chhûngte leh i awmpui nulate ei khawp a tling bawk ang. Mi sual chu ûm lohvin a tlânchhia a, Mi dikte erawh chu sakeibaknei angin an ngam. Ramin thil a tihsual chuan hruaitu an inthlâk zut a, Hruaitu fing leh remhriate avângin hnam a ding chhuak ṭhîn. Lal sual, rethei tiduhdahtu chu, Ruahpuivânâwn, buh nan chhetu ang hi a ni. Dân pawisa lotu chuan mi sual a ṭan a, Pawisatu erawh chuan a kalh a ni. Mi sual chuan dik taka rêl dân a hre lo va, Lalpa zawngte erawh chuan engkim an thliar thiam ṭhîn. Rethei mah ila ngîl taka nun hi, Hausa hlea kawi taka nun ai chuan a ṭha. Fapa fing chuan Dân a zâwm a, Mi vîr kâwmtu chuan a pa a tizak ṭhîn. A pung ûma hlêp ṭeuh ṭeuhva intihausate chuan, Rethei khawngaih ṭhîntute tân an khâwlsak mai a ni. Dân thu ngaithla duh lotu chu, A ṭawngṭaina pawh tenawm a ni. Mi ngîl thil sual tihtîrtu chu, Ama hum laihah chuan a tla ang a, Mi ṭha erawh chuan thil ṭha a dawng ngei ang. Mi hausa chuan fing a inti hle a, Rethei fing chuan a hmu tlang ṭhîn. Mi dik an lal chuan mi an hlim êm êm ṭhîn a, Mi sual an lal chuan an bibo dial ṭhîn. A bawhchhiatna zêptu chu a hmuingîl lo vang a, Inpuanga sim erawh chuan zahngaihna a hmu ang. Lalpa ṭih fotu chu a nihlawh e, Mi luhlul erawh chu a vânduai ang. Rorêltu sual chu mi rethei tân, Sakeibaknei rûm leh savawm vâk ruai ang hi a ni. Hruaitu hriatna tlachham chu a râwng hle ṭhîn, Duhâmna hawtu chu a dam rei ang. Tualthattu chu a tualtlân vat ṭhîn, Tu man lo hum suh se. Mi rinawm chu a him ang a, Mi rinawm lo chu a tluchhe thuai ang. Mahni lo thlo taima chuan buh a ngah ang a, Awm mai mai chu an pachhe ngei ngei ang. Mi rinawmte chuan malsâwmna an dawng ṭeuh vang a, Hausak thut tumte erawh chuan an tuar ngei ang. Duhsak bîk neih hi a dik lo va, Mahse, thamna chhetê vânga thil dik lo tih duh an awm. Mi huamhap chuan hausak thuai an tum ṭhîn a, Tlâkchham hun tûr a awm thei tih an dâwn pha lo. Mi fak der ai chuan zilh la, A la lâwm zâwk ang. Nu leh pate thil rûksaka, pawiti si lo chu, Suamhmang ṭhian a ni. Mi duhâm chuan innghirnghona a tichhuak a, Lalpa ringtu chu a hmuingîl ṭhîn. Mahni inrin viau hi a âtthlâk hle, Mi fing thu zâwmtu erawh chu a him ang. Rethei ṭanpui la, tlâkchham i nei ngai lo vang, Pachhia maimitchhînsantu chu ânchhia an lawh huai huai ang. Mi sual an dinchan chuan mi an ṭi dêk a, An chhiat erawh chuan mi dik chan a ṭha ṭhîn. Zilh fo tawh pawha luhlullui zêl chu, Dan rual lohva tihchhiat rup a ni ang. Mi dik an lalin mi an hlim a, Mi sualin ro an rêlin mi an rûm ṭhîn. Finna ngaina chuan an pate an tilâwm a, Nawhchizuar kawptu chu an intlakral ṭhîn. Dik taka lalin ro a rêl chuan ram a ding chhuak a, Thamna ngawt a ngaihtuah chuan ram chu a tluchhe ṭhîn. Ṭhenawm fak der chîng chuan, Mahni awhna tûr thang a kam a ni. Mi sual chu a sualnain a âwk ṭhîn a, Mi dik erawh chu hlim takin a zai ṭhîn. Mi dik chuan rethei ngaihsak nachâng a hria a, Mi sual erawh chuan a hre ve lo. Pawisak nei lote chuan khua an chawk buai a, Mi fingte erawh chuan an vawng dai ṭhîn. Mi fingin mi â a khin chuan, Mi â chuan a ânkhum a, Bâng lêk lovin a nuihzat ṭhîn. Thisen chhuah chîng chuan mi dik a hua a, Mi ngîl erawh chuan mi dik nunna hum a tum ṭhîn. Mi â chuan a thinur a thup thei lo va, Mi fing chu a insûm a, a pal dai ṭhîn. Rorêltuin dâwt a bengkhawn zêl chuan. A ṭhuihruaite chuan dâwt an chîng mai ang. Mi rethei leh amah tiduhdahtu chuan inanna an nei, Lalpan hmuh theihna mit a neihtîr ve ve. Mi rethei chungthu dik taka rêl ṭhîn lal chuan, A lalna chu kumkhuain a tinghet ang. Talhfiak leh thununna hian mi a tifing a, Naupang, duh duha tla chuan a nu a tizak ṭhîn. Mi sual an lal chuan sual a pung a, Mi dikte chuan an tlûkchhiat hun an hmu ngei ang. I fa chu thunun ṭha la, i hahdam ang a, I thinlung tilâwmtu a la ni ang. Pathian hruai loh hnam chu an boral ṭhîn, Pathian Dân zâwm hnam erawh chu an nihlawh e. Chhiahhlawh chu thu maia siam ṭhat theih a ni lo, Hre kur mah se, a zâwm chuang lo vang. Pâwng ṭawng zung zung chîng mi ai chuan, Mi mâwl chan a la ṭha ang. A naupan têt ata chhiahhlawh chu i duat lutuk chuan, I chungah thu a la nei mai ang. Thinchhia chuan buaina a chawk chhuak a, Thinram chuan pawi a khawih rem rum ṭhîn. Chapona hian mi a titlâwm a, Inngaihtlâwmna hian mi a chawimawi. Rûkru kawptu chuan mahni hmêlmaah a insiam a, Chhia a chham a, thu dik a sawi leh si lo. Mihring hlauhna hian mi a phuar ṭhîn a, Lalpa rin erawh chu a muanawm a ni. Mi tam takin rorêltu duhsak nih an duh a, Lalpa erawh chuan mi ro dik takin a rêlsak ṭhîn. Mi dikte chuan mi sual an ten a, Mi sualte chuan mi dik an hua. Jakea fapa Agura thuchah: Chu mi thuchhuak chuan heti hian a ti: Pathianin min awmpui lo, Pathianin min awmpui lo va, eng mah ka ti thei lo, Mi azawngah ka mâwl a, An fin angin ka fing ve lo. Finna ka zir lo va, Mi Thianghlima ka hre hek lo. Tu nge thli hum khâwm theia, Puana tui fûn thei awm? Lei huam chin hi tu nge ri siam? A hming i hria em? A fapa hming pawh i hria em ni? Pathian thu tinrêng hi a rin tlâk a, Amah bêltute tân phaw a ni. A thute chu belhchhah hauh suh, Chutilo chu, a hau ang che a, Mi dawthei i ni dah ang e. Ka thih hma hian thil pahnih ka dîl a che, Mi hnial lul suh, Thu lawilo leh dâwt lakah min hum la, Min tihausa lo la, min tipachhe hek suh, Ka ei tûr tâwk min pe ang che. Ka tlai luat chuan ka phat ang che a, ‘ Lalpa in tih hi tu nge ni?’ ka ti vei dah ang e. Ka pachhiat luat lahin rûk ka ru ang a, ka Pathian hming ka tihliau dah ang e. Chhiahhlawh chu a pu hnênah rêl suh, Ânchhia a lawh ang che a, thiam loh i chang dah ang e. Mahni pate ânchhe lawh duh an awm a, Mahni nute duhsak nachâng hre lo an awm. Mahni ngaiha fel inti hle an awm a, Mahse, an inhrufai kim si lo. Ṭhenkhat chapo tak an awm a, An va meng sâng kher êm! Mi retheite ei nân an hâ chu khandaih ang a ni a, Pachhiate ṭhial nân an hapui chu chemte angin a hriam. ‘Khawi, khawi,’ ti châmchi ṭhîn, Fanu pahnih vangvatin a nei. Thil pathum pali-a lungawi thei lo, Tâwk tih nei ngai lo an awm: Thlân, chhûl ching, Tui khawpkham lo leichâr leh ‘A tâwk ta e,’ ti ngai lo mei. Mahni pa nuihzata, nu zilhna hmusittu mit chu, Luidung choakin kher sela, Mulukawlh novin ei rawh se. Thil pathum pali mak ka tih lutuk, Ka hriatthiam theih loha awm: Vânlaizâwla mupui lên dân, Lungpui chunga rûl tleng dân, Tuifinriat chunga lawng kal dân, Nula hmaa mipa chêt dân. Nupui rinawm lo tih dân chu hetiang hi a ni: A uire a, a inbual fai a, ‘Thil sual eng mah ka ti lo ve,’ a ti ṭhîn. Thil pathum pali, khawvêlin a ngaihtheih loh, Tawrhhlelhawm tak thil tih a awm: Lal ngai lo lal, mi â tlaipuar, Hmeichhe huatthlala pasal nei, Chhiahhlawh nula, a pi lântu. Khawvêlah thil tê tak tê si fing hle si an awm: Fanghmîr: chak lo hle mah se Nipui laiin chaw an chhêk ṭhîn. Sangawi, an viak a ṭha lo hle a, Lungpui hnuaiah bu an nei. Khau, lal nei lovin a rualin an awm ṭhîn. Daidêp: khawiah pawh man mai theih a ni, Mahse, lal inah pawh an chêng. Thil pathum pali kal vêl mit la tak tak a awm: Ramsa zawng zawng aia huai, Hlauh nei lo sakeibaknei, A rual zînga kêlchal: ârpa kal luah luah; A sipai zînga lal vei vêl. I ât êma, chapo taka thil sual i tih dâwn chuan, Invêng ang che. Hnutetui i chawh i chawh chuan a khal a lo chhuak ang a, Mi hnâr i chumsak chuan a lo thi ang, Chutiang bawkin thinur i chawh thawh chuan, Insualna a thleng ang. Hêng hi lal Lemuela thuchah, A nu’n a zirtîr chu a ni: Ka fapa, ka rîla rah, Ka ṭawngṭai chhânna ngaithla rawh, Lalte tichhe ṭhîn hmeichhe sual hnênah I chakna chu pe suh la, intlakral suh. Lemuel, lal tân zawng uain in tûr a ni lo ve, Rorêltuten zu hi lam chhên tûr a ni hek lo. Zu an in chuan Dân an theihnghilh a, Mi dik chan tûr an ngaihthah ṭhîn. Retheite chuan zu in ta se, Rilru mangangte chuan uain lo in ang hmiang; An retheihna theihnghilhin, An rilru hah a chhâwk mahna. Mahni tâna sawi thei lo chu sawisak la, Baihvaite pawh chhan rawh. Retheite leh pachhiate thu chu Dik takin rêlsak ṭhîn ang che. Nupui ṭha hmuh hi har tak a ni a, Lungmantam aiin a hlu zâwk asin. A pasal chu ngaihngam takin a awm thei a, Kawng engkimah a hlâwkpui êm êm. A dam chhûng zawngin thil ṭha a tihsak a, Thil ṭha lo a ti ngai lo. Berâm hmul leh la a zawng khâwm a, Hlim takin a dek ṭhîn. Ram hla tak aṭanga buh tawlh sumdâwng lawng angin, Ei tûr a la khâwm ṭhîn. Khawvâr hmaa thovin an chhûngkaw tân rawng a bâwl a, Chhiahhlawh nulate tih tûr a rêl fel ṭhîn. Ram ṭha en thlithlaiin a lei a, Ama kutkawih ngeiin grep huan a siam. Taima tak a ni a, thahrui nei tak a ni, A che reng mai. A sumdâwnnaa hlâwk tûr chu a hre êm êm a, Zân rei tak tak thlengin a men phah ṭhîn. Hmui thlûr a thlûr a, La a kai a. Rethei tân a thilphal a, Tlachhamte a chhawmdâwl ṭhîn. Vûr tla mah se a hlauthâwng lo, A chhûngte chuan puan lum an nei vek si. Puan chhuatphah mawi tak a tah a, Maimaw puan te, puan senduk te a sin. A pasal chu mi tinin an hria a, Kulh kawngkaa upa ṭhu khâwm zîngah a tel ve ṭhîn. Puan zai sîn a tah a, a hralh ṭhîn a, A kâwnghrên tah chu sumdâwngte hnênah a hlân ṭhîn. Thil ti thei tak, ngaihsânawm tak a ni a, Lungkham tûr eng mah a nei lo. Thu fing tak tak a chhâk chhuak a, A thu a dam êm êm. Chhûngkaw khawsak a rêl fel ṭhîn a, A awm mai mai ngai lo. A fate chuan lâwmthu an hrilh a, A pasal pawhin a fak bawk a. ‘Nutling tak tak an tam a, Nang zawng i lawr lak e,’ tiin. Ngaihnobeina hi engmahlo mai a ni; Hmêlṭhatna pawh a chuai mai ṭhîn. Lalpa ṭihtu hmeichhia erawh chu, Chawimawi tûr a ni e. A thil tih avângin fak ula, A taihmâk avângin mi tinin chawimawi rawh se. Jerusalem lal, Davida fapa, Thuhriltu thute chu: Thuhriltu chuan: A va ho tehlul êm, Ni sa hnuaiah hah takin hna kan thawk a, Eng nge a hlâwkna awm? Chhuan khat an liam a, chhuan dang an lo awm a, Lei erawh chu a awm ngaiin a awm reng si. Ni a chhuak a, a tla leh a, A chhuahna lam a pan leh thuai a. Chhim zâwngin thli a tleh a, Hmâr zâwngin a tleh kual a, A tleh kual vêl mai mai a, A kalna ngai bawkah a lêt leh ṭhîn. Lui zawng zawng tuifinriatah a luang lût a, Tuifinriat lah a liam chuang lo, Tui chu a kîr leh a, A luanna ngai bawkah a luang leh ṭhîn. A ninawm ngei mai, sawi sên a ni lo, Thil hmuh kan kham thei lo va, Kan beng pawh a tlai thei hek lo. Thil awm tawh chu a lo awm leh ang a, Tih tawh pawh chu an ti leh ang, Vân hnuaiah thil thar rêng a awm lo ve. ‘En teh, hei chu thil thar a ni,’ Tih tûr rêng a awm em? Hmânlai ata, kan awm hma daiha awm tawh a ni. Tûn hma thil chu tu man an hre reng lo, Tûnlai thil lah nakina mite chuan An hre reng bawk hek lâwng. Kei, Thuhriltu hi, Jerusalem-ah Israel-te lal ka ni a. Vân hnuaia thil thlengte hi ka finna hmanga chhuia, dap chhuah ka tum ta a. Pathianin mihring buaipui tûra a pêk hi hna hrehawm tak a lo ni. Vân hnuaia thil tih zawng zawng hi ka hmu vek a, engkim mai hi a va ho êm! Thli man tum ang a ni. A kawi chu tihngîl theih a ni lo, A awm lo chu chhiar theih a ni hek lo. Jerusalem-a lal tawh zawng zawng aiin ka fing zâwk daih a, finna leh hriatna ka ngah zâwk ka ti rilru a. Finna hi hriat ka tum a, thil ho leh thil âtthlâk pawh hriat ka tum a, chu pawh chu thli man tum ang mai a ni tih ka hre ta. Kan fin poh leh lungkham tûr kan ngah a, kan hriat poh leh manganna tûr a tam. ‘Nawmsip bâwlin nuam ka han tâwl teh ang,’ ka ti a. Chu pawh chu a ho khawp mai. Nuih hi a âtthlâk hle a, intihhlim pawh a sâwt lo hle tih ka hre ta. Uain nêna intihhlima nuam tâwl hi vân hnuaia mihring dam chhûng rei lo tê an hman dân tûr ṭha ber a ni law maw, a finthlâk nge thlâk loh chhin ka tum ta a. Nasa takin hna ka thawk a, in te ka sa a, grep huan te ka siam a. Huan nuam tak tak ka nei a, thei tinrêng ka phun bawk a. A châwm nân dîl ka khuap a, thing a ngaw khup mai. Bawih atân mipate leh hmeichhiate ka lei a, ka in chhûnga piang ngawt pawh an tam mai; ka hmaa Jerusalem lal zawng aiin ran leh berâm rual ka ngah a ni. Ka chhiah ram leh an lalte ro khâwl khâwm tangka leh rangkachak te chu ka lâksak a; zai thiam nula leh tlangvâl ka nei ṭeuh va, nula duhawm tak tak ka ngah bawk. Ka awm hmaa Jerusalem-a lo awmte chu ka khûm vek a ni, ka fin ka chhawr hle mai. Ka duh chu ka hlah ngai lo va, a nuam tûrah ka insûm ngai hek lo; ka tih apiangah ka lâwm a, ka hah man chu ka têl zêl a ni. Ka thiltihte leh ka hahziate ka han thlîr kîr a, a lo ho mang e, thli man tum ang mai a ni, vân hnuaiah eng mah rêng hlâwk a awm lo. Finna kan tih te, âtthlâk leh mâwl kan tihte hi ka chhui ngun a. Lal meuh pawhin lal dang lo tih ṭhin bâk chu a ti thei chuang lo. Fin chu ât ai chuan a ṭha, thim ai chuan êng a ṭha zâwk tih ka hria. Mi fing chuan a kalna a hria a, mi â erawh chu thimah a kal ṭhîn; mahse, an pahniha chungah khawrêl thuhmun a thleng ṭhîn. Mi â-te chan ang bawk ka chan tho dâwn si chuan fin eng nge a sâwtna? “A sâwt hauh lo,” ka ti rilru a. Hei pawh hi ho tak a ni. Tu man mi â an hre reng lo ang bawk hian mi fing an hre reng chuang lo; nikhua a lo rei a, an theihnghilh mai; mi fing pawh mi â pawh kan thi vek dâwn. Nun hi ka ning ta, vân hnuaia thiltih apiang hi ninawm mai a lo ni, ho tak vek a ni a, thli man tum ang mai a ni. Ni sa hnuaia ka thawhrimna leh ka hahna hi ka kham ngei mai, ka thawh chhuah chu mi dangin an nei dâwn si a. A neitu tûr chu mi fing nge mi â tu ma hriat a ni lo, ka thawh chhuah zawng zawng chu a la nei dâwn si a, ka fin avânga ka deh chhuah zawng zawng chu a khâwm vek dâwn a ni. A va ho êm! Ni sa hnuaia hah taka ka lo thawk ta kha ka inchhîr rum rum mai. Fing tak leh remhre taka mi themthiam hnathawh rah chu eng mah thawk hauh lovin a rochung hlauh si ṭhîn. Hei pawh hi ho tak, dik lo tak a ni. Ni sa hnuaiah miin hah takin thawk mah se a tân a sâwt em ni? A dam chhûng chu buaina leh manganna hlîrin a khat a, zânah pawh a muhîl thei lo. Hei pawh hi a va ho êm! Duh tâwka ei leh in lo liama ṭha mihring tân a awm lo, a hah man chên rawh se. Hei pawh hi Pathian ruat a ni tih ka hre ta. A thu lo chuan tu nge tui ti taka eia, nuam chên thei ang? Amah tilâwmtu chu Pathianin finna te, hriatna te a pe a; thil sual titute erawh chu, Pathian tilâwmtute rochun atân thil a zawn khâwmtîr a, a chhêk khâwmtîr ṭhîn. A va ho êm, thli man tum ang mai a ni. Vân hnuaia thil tinrêng tân hun bi ruat a ni a, Remchân hun bîk a nei ṭheuh: Pian hun a awm a, thih hun a awm a, Phun hun a awm a, kar leh hun a awm. Tihhlum hun a awm a, tihdam hun a awm, Ṭhiat hun a awm a, sak hun a awm. Ṭah hun a awm a, nuih hun a awm, Lusûn hun a awm a, lâm hun a awm. Lung paih hun a awm a, chhar khâwm hun a awm. Inpawm hun a awm a, inpawm loh hun a awm. Hmuh hun a awm a, hloh hun a awm, Khâwl khâwm hun a awm a, paih hun a awm. Pawh thlêr hun a awm a, ṭhui hun a awm. Ngawih hun a awm a, ṭawng hun a awm. Inhmangaih hun a awm a, inhuat hun a awm. Indo hun a awm a, inrem hun a awm. Rim taka thawh hi eng nge a sâwtna? Pathianin kan thawh tûr a ruat hi a hahthlâk hle tih ka hria. Thil engkim tân hun ṭha a ruat a ni. Tûn hma leh tûn hnu hriatchâkna min pe a; mahse, a bul leh a tâwp thlengin Pathian thiltumte kan hre vek thei si lo. Kan dam chhûng hian hlim taka kan thawh tûr thawh hi kan tih theih tâwk a ni tih ka hre ta. Kan thawh chhuah hi kan eiin kan in ang a, kan chên tûr a ni, Pathian thilpêk a ni si a. Pathian thiltih rêng rêng a awm hlen dâwn tih ka hria, eng mah kan belh thei lo va, kan paih thei hek lo. Amah kan ṭih theih nân hêng hi Pathianin a ti ṭhîn a ni. Thil awm rêng rêng awm tawh sa a ni a, lo thleng tûr pawh thleng tawh sa vek a ni. Pathianin a ngai bawk a thlen nawntîr leh ṭhîn a ni. Vân hnuaia thil ka hmuh bawk chu hei hi a ni: Hleih neih lohna leh dik taka rêlna tûr hmuna sualna awm hi. ‘Pathian chuan mi dik leh mi sual chungah ro a rêl dâwn; engkim tân hun remchâng a siam a, a tih hun pawh a ruat bawk,’ tih hi ka hmuh dân a ni. Ramsa ang chauh kan nih kan hriat theih nân Pathianin min fiah niin ka ngai ta bawk. Mihring leh ramsa chungah khawrêl thuhmun a thleng dâwn, an thi ve ve dâwn si a. An thaw thei ve ve a, mihring nih hlâwkna a awm chuang lo, engmahlo mai a ni. An lo chhuahnaah bawk an kîr leh dâwn. Mihring thlarau chu a chho vang a, ramsa thlarau chu leiah a chhuk dâwn tih tu nge hria? Kan thawh chhuah duh tâwka chen aia ṭha a awm chuang lo tih ka hre ta; chu chu kan chanpual tûr a ni: chu bâk chu thil eng nge lo thleng dâwn tu nge hre thei? Vân hnuaiah intihduhdahna a tamzia ka hmu bawk. Tihduhdahte chu an ṭap a, tu man an thlamuan lo; a tiduhdahtute chuan thil an ti thei êm êm a; chuvângin, puitu an nei lo a ni. Thi tawhte chu nungdama la awmte ai chuan nihlawh zâwk hlein ka ngai. Chûng ai maha chan ṭha chu la piang ve lo, vân hnuaia thil ṭha lo la hmu ve hman lote hi an ni. An theih tâwka miin rim taka hna an thawh chhan pawh ka hre ta; an ṭhenawmte an awh vang a ni; hei pawh hi ho tak a ni, thli man tum ang mai a ni. Thawh peih loh vânga rilṭâma thih chu âtthlâk tak a ni tih a ni a. Thli man tum anga, ṭhûm neih tuma phili sek ai chuan hahdam taka vei khat neih a ṭha zâwk. Vân hnuaiah thil ho dang ka hmu bawk. Fa pawh nei lo, unau pawh nei lo, mahni chauhva awm si, rim taka thawk reng mai, hausa inti ngai lo a awm, a duhzâwng pawh a ei ngam lo va, tu tân nge a thawh tih pawh a ngaihtuah lo. A va hovin a va retheihthlâk thlâwn êm! Mahni maia thawh ai chuan thawhpui neih a ṭha, hlawhtlin a awl zâwk. Pakhat a tlûk chuan pakhatin a kaitho thei a, mahni chauhva thawk chu tlu palh sela a vânduaithlâk hle ang, kaitho tûr tu mah an awm dâwn si lo. Pahnih chu mutnaah an innghêng lum thei, mahni chauh chuan tu nge mu lum thei ang? Pakhat hneh loh chu pahnih chuan an hneh ang. La zai thum kawp chu a chat mai lo. Naupang rethei fing tak si chu thurâwn ngaithla duh lo lal tar tawh ai chuan a ṭha. Chhûngkaw rethei tak aṭangin emaw, tân in aṭangin emaw a ramah chuan lalah a lo la ṭang mai thei tih a hre lo va ni. Vân hnuaia mihringte hi ka ngaihtuah a, an zînga naupang tuin emaw lal ai chu a la awh dâwn tih ka hria. Lal chu chhiar sên loh chungah lal mah sela a thih hnu chuan a chungah tu mah an lâwm chuang lo. A va ho êm! Thli man tum ang mai a ni. Pathian ina i kalin fîmkhur ang che; mite chuan thil ṭha an ti nge ti lo tih ngaihtuah lovin thil an hlân a, chutianga tih ai chuan ngaithla tûra kal a ṭha zâwk. Thu thlah mai mai suh, Pathian hnêna thutiam mai chîng hek suh; vânah daih Pathian chu a awm a, nang leiah i la awm si; chuvângin, a ṭûl lo chu sawi mai mai suh. Lungkham i ngah poh leh mangphan tur i ngah a, thu tuitam vak pawh thu â tak tak phuh chhuahna mai a ni. Pathian hmaa thu i tiam chuan hlen hreh suh, mi â chungah a lâwm si lo; i tiam chu hlen mai rawh. Tiam zeta hlen loh ai chuan tiam loh law law a ṭha. I thutiam avângin thiam loh chang suh, ‘Pathian tirhkoh hmaah ka ṭawng sual palh a ni,’ i tih a ngai dah ang e. Engah nge i thutiam avânga Pathian a thinur anga, i thiltih a tihchhiatsak vek ang che? Mumang i ngah pawhin engah mah a ni lo, i ṭawng ṭeuh pawhin a sâwt hek lo. Pathian ṭih rawh. Ram chhûnga thuneituin retheite a nêk chêp a, dik taka ro a rêl duh hauh loh chuan mak ti lêm suh, a aia sâng zâwkin a hum a, an aia sâng lehzual humtu an awm zêl a ni. ‘Mipui vântlâng tân a ni,’ an tih te, ‘Lal rawngbâwl nân a ni,’ an tihte i hria ang. Tangka ngaina chuan tâwk tih a nei lo; hausak châk chuan hlêp chin tâwk a nei hek lo. Hei pawh hi ho tak a ni. Mi an hausak leh a tlântu an pung a, a hausakzia mita a hmuh mai loh chu a tân eng nge a hlâwkna awm? Ei tûr an ngah emaw, ngah lo emaw hna thawk mi chu tui takin a mu thei a; an ngah êm avângin mi hausa erawh chu rilru hahin an mu thei lo. Vân hnuaia thil pawi tak ka hmuh chu hei hi a ni: miten mamawh hun atân tiin sum an khâwl a, Vânduaithlâk takin peipun an tumna lamah an chân ta vek mai hi. Fa nei siin hnutchhiah tûr eng mah an nei lo. An nu pum ata an lo chhuak angin saruak bawkin khawvêl an chhuahsan ang - an thawhrim rah eng mah an chhawm thei dâwn si lo. Hei pawh hi pawi tak a ni. Kan lo kal lam ang bawkin kan kîr leh ang; kan thawhrim hi eng nge a sâwtna? Kan dam chhûng ni zawng zawng hi thim hnuaia khawsain bawrhsâwm mangang leh thinrim ṭeuhvin kan hmang ral ṭhîn. Hei hi ka thil hmuh chhuah a ni: Pathianin dam chhûng hun tawi tê min pêkah hian kan thawhrim rah chêna ei leh in hi thil ṭha ber leh âwm ber a lo ni; chu chu kan tâna khawrêl chu a ni. Pathianin sum leh pai min pêk kan chen theihnate hi Pathian thilpêk a ni. Pathianin hlim theihna min pêk avâng hian kan dam chhûng tawizia kan lungkham lêm ṭhîn lo. Vân hnuaiah hian thil ṭha lo tak, mihring tâna âwm lo zet ka hmu. Pathianin mi ṭhenkhat chu sum leh pai a pe ṭeuh va, an neinungin miin an ngaisâng a, an duhzâwng eng mah tlâkchham an nei lo; mahse, Pathianin chûng chu an chen zu phal si lo va! Mi dang daihin an chên hlauh zâwk ṭhîn. A va hovin a va âwm lo êm! Miin fa za a nei a, a dam rei hle a, a kum tam hle mah se, a duhzâwng thil ṭha kham khawp a nei lo va, phûmtu mumal pawh a nei lo; chu mi ai chuan hlamzuih pawh nihlawh zâwkah ka ngai. Hlamzuih lo piang chu sâwt lo tak a ni, thim panin a kal leh nghâl a, hming lah a nei hman hek lo. Ni êng a hmu lo va, eng mah a hre hman lo; mahse, a châwl ta mai a. Kum sâng dam nawna thil ṭha chên si lo ai chuan a chan a ṭha zâwk, an kalna tûr a inthuhmun reng si a. Mihringin rim taka hna an thawh hi an hrawk tân chauh a ni; mahse, duhtâwk an nei chuang lo. Mi fing nih hi mi â nih aiin a hlâwk em ni? Nun dân tûr a hriat avângin mi rethei tân sâwtna eng nge awm? Duhthusâm neih si loh ai chuan neih saa lungawi a ṭha zâwk. Chu pawh chu ho tak a ni, thli man tum ang mai a ni. Lo awm tawh phawt chu an hming vuah sa a ni; mihring awm dân tûr chu hriat sa a ni; an aia ropui chu an sawisêl thei lo. Sawisêl chiam mah se an tân a sâwt chuang lo. Kan dam chhûng tawi tê, ho tak, hlim anga ral mai tûr tâna thil ṭha ber chu tu nge hria? Kan thih hnuah khawvêlah hian thil eng nge lo awm dâwn tih tu nge hria? Hming ṭha hi hriak rimtui tak aiin a ṭha, Pian ni aiin thih ni. Zu hmuna kal aiin lusun ina kal a ṭha, La damte hi thi mai tûr kan nih hriat fo tûr a ni. Nuih ai chuan lungngaih a ṭha, Hmêl tingui mah se thinlung a siam ṭha ṭhîn. Mi â chuan hlimna ngawt a ngaihtuah a, Mi fing erawh chuan thih thu a ngaihtuah ṭhîn. Mi â fak nih ai chuan Mi fing zilhna ngaihthlâk a ṭha. Mi â nui chu thuka hlîng kâng puak ang lek hi a ni, Ho tak bawk a ni. Mi fingin mi bum a chîn chuan thil âtthlâk tak a ti a ni, Thamna lâkin mi a tichhia. Thil tâwpna chu a inṭanna aiin a ṭha, Dawh theih hi chapo aiin a ṭha. Thinur insûm theih hi a ṭha e, Mi â chuan a pai reng ṭhîn, Engtizia nge tûnlai aiin hmânlai a ṭhat zâwk? ti suh, Zawhna âtthlâk tak a ni. Finna neih hi roluah anga ṭha a ni, Nungdamte tân hlâwk tak a ni. Tangka ang bawkin finna hian mi a hum thei a, Finna neitute a hum ṭhîn a, Chu chu hriatna hlâwkna a ni. Pathian thiltih hi ngaihtuah teh, A tihkawih tawh chu tu nge tingîl thei? Thil a kal tluan laiin lâwm la; buaina a lo thlenin hei hi ngaihtuah ngun rawh: hlimna leh buaina hi Pathian thlentîr a ni, thil lo thleng zêl tûr i hre thei si lo. Ka dam chhûng ho takah hian thil engkim ka hmu: Mi dik chu a dik avângin a thi a, mi sual chu a sual avângin a dam rei tlat bawk a. Fing lutukin dik lutuk suh, engah nge mahni i intihchhiat ang? Sual lutukin â lutuk bawk hek suh, a hun thlen hmain engah nge i thih ang? A eng zâwk zâwk mah hi uar lutuk suh, Pathian ṭih phawt mai la, i hlawhtling zêl ang. Khawpuia hotu sâwm awm ai chuan finna hi mi fing tân chuan a ṭangkai zâwk. Leiah hian mi dik, thil ṭha tia, thil sual ti ngai hlek lo tu mah an awm lo. Mi thu sawi nazawng bengkhawn suh, i chhiahhlawhin ânchhia a lawh che i hre dah ang e; nangmah ngei pawhin mi dang ânchhia i lawh ru fo ṭhîn tih i hre reng si a. Finna hmangin hêng hi ka finfiah a, ‘Ka la fing ve ang,’ ka ti a; mahse, a teuh lo mai. Thil a nih dân tak hi ka tân a thûk lutuk a, a khirh êm a, tu nge hmu chhuak phâk ang? Tichuan, zira thil hre tûrin ka inhmang ta a, finna hi eng nge a niha, thil awm chhan bul eng nge ni? Mâwlna âtthlâkzia leh ṭhat lohzia hriat ka tum ta a. Thil pakhat, thihna aia rapthlâk chu hmeichhe sual hi a ni tih ka chhar chhuak ta; mi a lêmna chu thang leh lên ang a ni a, mi a pawm chu khaidiata hlin ang a ni. Pathian tilâwmtu chu a lakah a him ang a, thil sual titu erawh chu a man tlat ang. Thuhriltu chuan, ‘Thil awmzia tlêm tlêmin ka hre ta tial tial a, ka duhthusam chu ka la hre lo na a, mi sâng zîngah mi ṭha mipa pakhat ka hmu hrâm a, hmeichhia erawh chu pakhat mah ka hmu lo. Hei chiah hi ka hmuh chhuah chu a ni: Pathian hian mihring hi mi tluangtlam tak ni tûrin a siam a; mahse, keini hian kan intikhirhkhân zo vek a ni,’ a ti a. Mi fing angin tu nge thil awmzia hria? Finna chuan hmêl a tihlim a, hmêl dur a tireh. Pathian hnêna i thutiam avângin lal thu awih rawh ka ti a che, bawhchhe mai mai suh; A thu thu-a thil a tih theih avângin thu dik lo a hmaah ṭan tlat suh. Lal thu chu a lal ber a, tu mah chhuahchhâl thei an awm lo. A thu i awih chuan i tuar lo vang; mi fing chuan a hun taka thil tih dân tûr dik a hre ṭhîn. Thil tinrêngin ningkhâwng an nei zêl a, mihring mawhphurhna hi a rit hle a ni. Thil lo thleng tûr hre lâwk tu mah an awm lo va, min hrilh tûr lah an awm hek lo. Tu mah mahni nunna chelh thei an awm lo, thih ni chunga thunei thei an awm hek lo. Indo laiin râlthuam dah theih a ni lo, mahni sualna laka intifihlîm thei kan awm hek lo. Hêng hi ka hmu vek a, vân hnuaia thil tih zawng zawng hi ka ngaihtuah a, ṭhenkhatin mi chungah thu an nei a, ṭhenkhatin an kut an tuar a. Mi sual, thlâna an phûm ka hmu a, thlân aṭanga hawte chuan thil sual a tihna khuaah chuan an fak a. A va ho êm! Hrem tûra tih tawh an hrem lawk loh avângin sualna a pung chak a, mihring thinlung chu thil sual tih duhnain a khat a ni. Mi sual chuan thil sual vawi za ti mah se a la dam zêl mai; mahse, Pathian ṭihtute tân chuan thil a kal tluang ang tih ka hria, Pathian an ṭih si a. Mi sualte tân eng mah a tluang lo vang, an nun chu hlim ang leka tawi a ni a, an dam rei lo vang: Pathian an ṭih si lo. Khawvêla thil awm, thil ho tak a awm bawk: mi dikte chuan mi sualte hremna tûr an tuar hlauh va, mi sualte lahin mi dikte lâwmman dawn tûr an dawng lawi si. Ho ka va ti êm! Tichuan, nawmchen hi vân hnuaia thil ṭha ber niin ka ring ta tlat a ni; mihring tân ei leh ina mahni intihhlim lo liam hi thil dang ṭha a awm lo; khawvêla a dam chhûng hun atân Pathianin a ruatah rim taka thawh paha a tih theih chhun a ni. Fin ka tum a, khawvêl thil kalhmang hriat ka tum apiangin a chhûn a zan mut ka hmu ṭhîn lo. Vân hnuaia Pathian thiltih dân tinrêng hi ka hrethiam phâk lo. Hriatthiam tum chiam mah ila, kan hre thei chuang lo vang. Mi fingte chuan hriain insawi mah se, an lo hre bîk lo. Hêng thil zawng zawng hi thliar fel tumin ka ngaihtuah chiam a, mi dikte leh mi fingte thiltih rêng rêng, mi dang an hmangaihna leh an huatna chenin, Pathian thu thu a lo ni, tu mah thil hre lâwk thei an awm lo. Mi tin chunga thil thleng a inang vek mai: mi dik leh mi sual, mi ṭha leh ṭha lo, mi thianghlim leh bawlhhlawh, inthawina hlân ṭhîn emaw, hlân duh lo emaw chungah khawrêl thuhmun a thleng vek a ni. Mi ṭha leh thil sual ti, chhechham ngam leh ngam lo an danglam chuang lo. An chunga khawrêl thuhmun thleng vek hi thil dik lo tak a ni. An dam chhûng chu mihring thinlung hi sualin a khat, an â hle a ni, rei lo têah an thi mai dâwn. Nungdama awmte zînga la awm chuan beisei tûr an la nei; sakeibaknei thi ai chuan ui nung takngial pawh a ṭha zâwk. La damte chuan thi tûr an nih an hria a, thi tawhte chuan eng mah an hre lo. Mi an hmangaihna te, an huatna te, an thîkthu te a ral vek tawh a, vân hnuaia thil tih rêng rêngah telna an nei ve tawh lo. Ti rawh, hlim takin chaw ei la, uain pawh hlim takin in rawh; i thiltihah Pathian a lâwm e. I silhfên chu fai reng sela, i lu chu hriak thih mawm rawh. He khawvêla i nun ho tak, i dam chhûng hian i nupui duh tak nên nun chên mai rawh, chu chu rim taka i thawh, khawvêla i dam chhûng ho taka i chanvo neih chhun a ni e. I kut thlâkna apiangah theihtâwp chhuah la, i kalna ngei tûr Seol-ah chuan thawh tûr te, ngaihtuah tûr te, hriatna te, finna te a awm dâwn tawh si lo. Ka han thlîr kîr a, vân hnuaia thil dang ka hmuh chu hei hi a ni: intlânsiaknaa tlân chak chu a chak ber lem lo, indonaa mi huai chu hnehtu a ni kher lo; mi fingin ei tûr an ngah chuang lo, thil hria an hausa lem lo va, themthiamin duhsak an hlawh zêl bawk hek lo; tu tân pawh a hun leh khawrêl angin thil a thleng ṭhîn. Mihringin thil lo thleng tûr kan hre lo, thanga sava âwk leh lêna sangha tâng ang maiin thil ṭha lo kan chungah a thleng thut ṭhîn. Vân hnuaiah hian miin finna an thlîr dân entîrna ṭha tak ka hmu bawk, ka ngai pawimawh hle. Khaw tê tak tê, mi tlêm tê awmna a awm a, lal ropui takin a rawn bei a, a hual a, dai a theu hnan tlat a. Chu khuaah chuan mi rethei tak, fing deuh mai a awm a, a finnain khua chu a chhan chhuak ta a; mahse, chu mi chu, a retheih êm avângin tu man an hre reng lo. ‘Finna hi tharum ai chuan a ṭha,’ ka ti a; mahse, mi rethei finna chu miin an hmusit a, tu man a thu an ngaithla duh lo. Mi fingin zawi tê pawha thu a sawi ngaihthlâk chu mi â zînga hotu au vak vak ngaihthlâk ai chuan a ṭha. Finna hi râlthuam aiin a ṭha; Mi sual pakhatin thil ṭha a tichhe tam thei hle. Tho thi chuan tel rimtui a bûr chawpin a tirimchhia. Âtna nêp tak pawhin Finna leh zahawmna a chhilh thei. Mi fingin thil tih âwm a hria a, Mi â chuan a hre ve lo. Mi â khawlai lêng chuan amah a inhre lo, A âtzia mi tin a hrilh lek a ni. Hotu i chunga a thinrimin tauhsan mai suh, Ngawih hian thil ṭha lo tam tak a tidai thei. Vân hnuaiah thil ṭha lo tak ka hmu: chu chu thuneitute tihfuh loh a ni: Mi â an dah sâng a, mi hausa an dah hniam hi. Chhiahhlawh sakawr chunga chuang ka hmu, chhiahhlawh anga mi lian kea a kal ka hmu bawk. Hum i laih chuan i tla ang a, A bâwm i tihpawh chuan rûlin a chu ang che. Lung khura hna i thawh chuan Lungin a chilh ang che. Thing i eh chuan i la intipalh ang. Hriamhrei bil i tah loh chuan A hman a hahthlâk ang. Thil ngaihtuah lâwk hi a hlâwk a ni. Dawi ât hmaa rûlin a chuk che chuan Dawi thiam nih sâwtna a awm lo. Mi fing chu ama thuin a chawimawi a, Mi â chu ama thuin a tichhe ṭhîn. A ṭawngkam chhuak hmasa chu a â hle a, A sawi zêl pawh a â tulh tulh a ni. Mi â chu a pâwt mai mai a, Thil lo thleng tûr hria tu mah an awm lo. Thih hnua thil thleng tûr hria pawh an awm lo. Mi â chu hâwn nachâng hre lovin A inthawk chau hnêp ṭhîn. Naupang chu lal a niha, Hotute zîng aṭanga zu an ruih chuan, Ram chu a va khawngaihthlâk êm! Lal chu mi pangngai fa a niha, Mi lianten a hun taka chaw an eia, Rui lova insûm thei an nih chuan Ram chu a va nihlawh êm! In chung pawp thawm peih lotu in chu A far ang a, a chim mai ang. Ruai hian mi a tilâwm a, Uain hian nun a tihlim, Mahse, hêng thil atân hian tangka a ṭûl zêl a ni. Lal chu i rilru pawhin ânchhia lawh suh, Pindan chhûngrilah pawh miliante ânchhia lawh hek suh, Chunglêng savaten i thu chu an thlawhpui ang a, An va hrilh mai dah ang e. I buh chu tuipuiah tawlh chhuak la, A hlâwkna i la têl ang. Thil ṭha lo khawvêla thleng tûr i hre lo va, Kawng sarih kawng riatah i neih chhep rawh. Chhûm a chhah chuan ruah a sûr ṭhîn, Hmâr zâwngin emaw, chhim zâwngin emaw Thing chu a tlûk dân ang angin a awm mai ang. Duhthusâm anga khaw awm i nghah chuan Buh tuh hun emaw, seng hun emaw i hmu lo vang. Thli tlehna tûr i hre lo ang leh Nu puma nau insiam dân i hre lo ang bawk hian, Pathianin thil engkim a siam dân i hre pha lo. Zîngah buh tuh la, tlaiah pawh tuh rawh, A ṭo ṭhat vek dâwn leh dâwn loh i hre si lo. Zînga tuh nge ṭha tlaia tuh i hre hek lo. Êng hi a hmuh a nuam a, Ni Êng hmuh theih hi a ṭha e, I dam rei leh lâwm zêl la, Thim lo thleng tûr chu a rei dâwn tih hre reng rawh, Eng mah beisei tûr dang a awm lo. Ṭhalaite u, in ṭhat lai hun hi chên ula, In la naupan lai hian hlim takin awm rawh u. In duhzâwng chu ti ula, Ṭha in tih angin awm rawh u. Amaherawhchu, in thiltih ang zêlin in chungah Pathianin ro a rêl dâwn tih hre reng rawh u. Engto eng mah nei suh ula, Intibuai duh hek suh u. In ṭhat lai ni a liam mai dâwn. I vânglai hian i siamtu chu hre reng ang che, Hun ṭha lo, tarchhiat hun, ‘Dam pawh nuam ka ti tawh lo,’ i tih hma hian. Chutih hunah chuan ni te, thla te, Arsi êng te i hmu ṭha thei lo vang a, Ruah sûr zawhah pawh i tân chhûm a la kiang chuang lo vang. I invênna, i bân chu a khûr ang a, I ke chak tak chu a la zawi ang. I hâ a bal tam avângin thil i ṭhial thei lo vang a, I mitin thil a hmu fiah hek lo vang. I beng a ngawng ang a, Kawtthlêra thâwm i hre lo vang. Buh her thâwm leh ṭingṭang ri I hre che che emaw a ni ang a, Sava hrâmah pawh i ṭhangharh ang. Hmun awih i hlau vang a, Kal pawh i zuam lo vang. I lu a ṭuak ang a, I che hrâm hrâm thei chauh vang a, Tisa châkna i nei tawh hek lo vang, I chatuan inah i kal dâwn tawh a, Khawlaiah an ṭah ang che. Tangkaraw zai chu a chat ang a, Rangkachak no chu a keh ang, Tuikhura tuibêl chu a keh ang a, Khai chhuahna hrui chu a chat ang. Vaivut chu leiah a kîr leh dâwn a, A petu Pathian hnênah thlarau pawh a kîr leh ang. Thuhriltu chuan, ‘A va ho êm! ho tak vek a lo ni,’ a ti a. Thuhriltu chu a fing hle a, a hriat chu mi a zirtîr ṭhîn a, thufing tam tak a zir a, a fiah a; thu khirhte pawh a hriat awl zâwngin a dah rem a. Thuhriltu chuan thu lem nuamte a zawng a, mahse a thu ziakte hi a dik a ni. Mi fingte thu sawi chu berâmpu tiang zum, berâm khalhna ang hi a ni; thufing an lâk khâwmte pawh chu thîrkilhna khen bûr tlat anga awm reng tûr a ni, min vêngtu Pathian pêk vek a ni. Ka fapa, thil dang pakhat thlîr ngun tûr a la awm! Lehkhabu-ah engkim ziak sên a ni lo, zir tam hian a tihah lutuk ang che. Hêng zawng zawng khaikhâwmna hi i han ngaithla teh ang: Pathian ṭih la, a thupêkte zâwm rawh, chu chu mihring siam chhan a ni. Pathian chuan kan thiltih apiang, a chhia emaw, a ṭha emaw, a rûka kan tih chen hian a rêl dâwn a ni. Solomona hla chhuanvâwr Min fâwp vawng vawng mai teh, Uain hnehin a thlum i hmangaihna, A tui veng veng mang e i rimte chu, I sakhming mawi chuan rimtui lêng vêl a iang e. Chuvâng alâwm nulate chuan an nêp zawh loh che. Min zai ta che, i tlân dûn ang, Ka lal ni la, i pindanah min hruai ang che, Hlimin nui hiau ila Hmangaihna uain i tlân dûn ang, Hmangaih âwm rêng i ni. Jerusalem nulate u, Ka hâng na a, ngaihno ka bei a nia, Kedar puan in angin hâng mah ila, Solomona puanzâr mawi ang ka ni. Ka han deuh avângin mi iai suh u, Ni sa ka tuar vâng mai a ni. Ka nuṭate an thinur a, Grep huan min vêntîr a, Ka intuaihnûm hman lo va ni. Min hrilh teh, aw duh tak, Khaw nge i berâmte i tlattîra, Chhûnah khaw nge i chawlhtîr ṭhin? Nangmah zawngin berâmpu dang zîngah Ka vâk ruai dâwn em ni le? Hmeichhia azawnga mawi ber, I hriat loh chuan ran rual sûlhnu chhui la, Berâmpute bûk bulah chuan I kêltête tlattîr ang che. Ka teh ber che, aw ka duh tak, Farawa tawlailîr hnûk sakawrla nên. I bianga bahsam uai chu a mawi mang e, I ṭhi awrhte nên chuan. Tangkaraw phûm rangkachak khim tûr Kan siam ang che. Ka lal chu laikhumah a zâl, Ka nard rim chuan in chhûng a khat, Mura rimtui fûn ang maiin Ka duh tak chu ka ṭânglaiah a bei. Ka duh tak chu hena pâr bâwr ang, Engedi huana pâr vul chu. Ngai teh, duh tak, I va han mawi tak êm! I mit meng lah ṭhuva ang lo ni e. Ngai teh, duh tak, i va mawi êm! En ka nuam ngei a che. Kan zâlna chhâwl a hring nghial e, Kan in chung chu sidar, A thuahtu pawh fâr thing. Kei zawng Saron phaia tûktinpâr leh Ruama lilipâr ang chauh hi ka ni e. Lanu rual zîngah, ka duh tak chu Hlîng zînga lilipâr ang hi asin. Ka duh tak chu vâl rual zîngah, Ngaw kâr apple kûng ang hi a ni. A hlima ṭhut nuam ka ti, A rahte pawh a thlum bîk e. Uain huanah min hruai lût a, Hmangaihnain min zial. Grep chhang min barh a, A zûna uai, apple theiin min tiharh ta. A kut vei lam ka lukham a, A ding lamin min pawm. Jerusalem nulate u, Ram zukchal leh ram zukpui chhâlin Ka ngên tlat a che u, Duh tâwk a ngah hma chu kan induh lai min tho suh u. Chu! Ka duh taka aw chu, Saw, a lo kal e. Tlângah a lo tlân a, Mualah a lo zuang ṭum e. Ka duh tak chu khâm saza ang. Sakhituai ang mai hi. Bang phênah sâwn a ding ta e, Tukverhah min rawn thlîr a, Bang âwng kârah min rawn bih e. Ka duh tak chuan mi han bia a: Duh tak tho la, lo kal teh khai. Thlasik a tâwp ta a, Ruahtui a hul tawh e, Phûlah pâr tin a vul ṭan a, A her chhuak e, sîrva hrâm hun, Mîmsîrikût a hrâm tâk chu Kan lo ramah. Theipui hel pawh a hmin dâwn ta, Grep pâr rim pawh a nam rem rem, Ti rawh, duh tak, tho teh, bawihte, I kal teh ang. I iang kher mai lungpui kâra ṭhuva biru, Khâmrâng kâra chêng chu; I sakhmêl mawi rawn inlan teh, Hriat ka nuam e, i ânka nêm. Sihal notê rual saw man rawh u, Sâwng tê tê sâwn kan grep pâr lai An tiṭil zo dah ang e. Ka duh tak chu ka ta a ni, Lilipâr zînga berâm tlattîrtu saw Zîng thlifîm a tleh a, Tlai khua a vâr hma hian, Rimtui tlânga saza tla leh sathâr angin, Duh tak, lo haw zên zên ta che. Laikhum zâlin zan tin ka dâwn ṭhîn a, Ka dap vêl a, ka duh tak chu A awm si lo. ‘Ka tho vang a, kan vâng khawpui fangin, Ka duh tak chu, thlêr tin, Daikâwm hrûtin ka zawng dâwn e.’ Ka zawng ruai a, ka tawng si lo. Khawpui vêngtu kal vêlte chuan min hmu, Ka duh tak chu an tawng emaw ka han zâwt a. Anni ka pelh hnu lawkah chuan Ka duh tak chu ka hmu a, Ka vuan tlat a, Ka nu pindan, min hrinnaah Ka hruai luh hma loh chu Ka thlah phal lo. Jerusalem nulate u, Khâm saza leh ram zukchal chhâlin Ka ngên tlat a che u, Duh tâwk a ngah hma chu, Kan induh lai min tho suh u. Tu a ni nge meikhu ding ang, thlalêra lo kal saw? Dâwra an zawrh mura rim leh beraw rimtui a nam veng veng. Lal Solomona, bâwmin an rawn zâwn a, Pheisen vâl rual kawp sawmthumin an vêng, Israel zînga chhuanvâwrte chuan. Ngûnhnâm vai thiam hlîr an ni a, Râlhrât tak vek an ni. An khandaihte an pai ṭheuh va, Zâna rawn beitu an ûm lêt nân. Lebanon tlâng thinga siam zâwnbâwm chhûngah Solomona a ṭhu, A zâwnfung tangkarua, A khuhna rangkachak zai tah khâwm, A ṭhutna, puan senduka tuam, Jerusalem nuten uluk taka an siam A chhûng chei nân an hmang. Zion nulate u, lo chhuak ula, Solomona hi lo hmuak rawh u. A nupui neih ni, a hlimna ni-ah hian, Lukhum cheimawi a nu’n a khumtîr hi. Ngai teh, duh tak, i mawi mang e, Ngai teh, i nalh ngei mai. I inkhuhna phêna i mit meng chuan a iang e ṭhuva, A iang rêng e i bahsam chuan Gilead tlânga lêngkêl tlân thla seng seng. I hâte chu a vâr siau va, Berâm hmul meh hlim bual fai angin, A kawpkim fer mai a, Bal rêng a awm lo ve. Zozâm iangin i heh a sen ser a, I hmuiphun chu a mawi ngei mai. I hmai khuhna phênah i biang a tai têk si. I nghâwngin a iang e Davida râlthuam in sâng, Râlhrât phaw sâng tam tak an bânna chu. I ṭângnêmin a iang e saza phîr Lili zînga tla dûnte chu. Zîng thlifîm a tleh a, tlaikhua a vâr hma hian Mura tlângah ka kal teh ang, Beraw hmunpuiah chuan. Duh tak, i hmêl a va mawi êm! Iaiawm lai rêng a awm lo, Lebanon tlâng ata, ti rawh, lungdi, Lebanon tlâng ata i chhuk dûn ang. Amana tlângchhîp ata chu lo chhuk la, Sakeibaknei leh keite chênna Senir leh Hermon tlâng ata i chhuk dûn ang. Bawihte, kei ka lungdi, Min zial â zo dâwn alâwm, Vawi khat mitsîr ka buai phah e, I ṭhi mal awrh vei nên. Bawihte, i hmangaihna a duhawm kher mang e, Kei ka lungdi, uain hnehin ka thlang i hmangaihna, Rim azawngah i rim a tui ber a. Aw ka lungdi, i hmui khawipui zuin a far, I ânka khawizu leh hnutetui ang, I silhfên pawh Lebanon rim a nam rem rem. Ka lungdi, ka bawihtei chu, Huan humhalh tlat ang hi a ni, Huan hung, tu ma khawih loh tui hna tamna ang chu. Tah chuan theibuhfai a tlim hmur a, A rah tiar tuar bawk ṭhîn. Hena leh Nard a tam êm êm. Nard leh safron te, ṭhal thing leh thakthîng te, Beraw leh Mura, Aloe te chînna rimtui tinrêng awmna hmun chu. Tah chuan tui a tam a, A luang dur dur, Lebanon tlânga hnâr nei chu. Hmâr thli, lo thawk teh, Chhim thli, lo tleh ta che, Ka huan hi han chhêm la, A rim chhêm darh vêl teh, Ka duh tak chu a huanah hian lo kal sela, A thei duh ber han ei rawh se. Ka thai bawihte, Ka huanah chuan ka lo kal a, Mura leh rimtui ka lâwr khâwm a, A thlâr chawpin khawizu ka ei ta a, Uain chu hnutetui nên ka in ta e. Lenrualte u, ei ula, in rawh u, Hmangaihna in ruih hnêp hma chu. Ka zâl na a, ka chhîng lêm lo, Chu! Ka duh tak chuan kawng a rawn kik. Duh tak, kawng min hawn rawh, Aw ka lungdi, ka ṭhûvate, ka enchim loh, Daiin ka lu a far huh a, Zân chhûmin min tihnawm zo ta. Ka inphelh vek tawh a, Ka inbel ṭha leh dâwn em ni? Ka ke ka sil tawh a, Ka tibawlhhlawh leh dâwn em ni? Ka duh tak chuan kawngkhâr âwngah a rawn zen a, A hnai êm a, ka zauthau zo. Kawng hawng tûrin ka han tho va, Ka kut Mura tuiah ka chiah a, Ka zungṭangah a far. A kalhna chu ka han hawng a; Ka han hawn chuan ka duh tak chu A aw hriat ka chak nên, a kal bo hman ta si. Ka zawng chiam a, ka tawng si lo, Ka au ruai a, min chhâng si lo. Khawpui vênga kal vêlte nên kan intawng a, Min vaw nek a, min hliam ta a, Vêngtute chuan ka inkhuhna min hlîmsak bawk. Jerusalem nulate u, ka ngên tlat a che u, Ka duh tak chu in hmuh hlauh chuan, A zûn ngaia ka uai thu hi, Han hrilh ngei ang che u. Hmeichhia azawnga mawi ber, I duh tak chu eng nge a duhawm bîk, Mi dang aia a ṭhat bîkna, Chuti êma min ngen tâk le? Ka duh tak chu a ṭha sensiar a, Sâng sâwm zîngah a ṭha chungnung e, A sakhmêlin rangka dârtui a iang a, A lu a kir chiat a. A bahsam dum ziar e lianâk ang. A chhîngmit chuan a iang ṭhûva, luite kama fu, Hnutetuia bual hlim chu. A biang chu hlo rimtui hmun, rimtui nam reng a ni, A hmuite chu lilipâr vul, mura rim kai ang hi a ni. A bân chu rangkachak mûm lungmantam phûmna ang hi a ni, A sakruang chu saingho Safir lung bel ang hi a ni. A châwn chu alabasta lung vâr, Rangkachaka inhûng ang hi a ni. A sakhmêlin Lebanon tlâng Sidar hmunpui a iang. A kam a thlum ngei mai, A pumin a duhawm, Aw Jerusalem nulate u, Chutiang chu a ni, ka duh tak chu, Chutiang chu a ni, ka hmangaih chu. Aw nang, hmeichhe zînga mawi ber, Khaw nge i duh tak chu a kal, Khawi lam ber nge i duh tak chuan a pan kan han zawnpui ang che? Ka duh tak chu a chhuk, huanah, Rimtui huan zâwlah chuan. Berâm a tlattîr a, Lilipârte a lâwr a ni. Ka duh tak chu ka ta a ni, Kei pawh a ta ka ni, Lili zînga berâm tlattîrtu chu. I mawi mang e, duh tak. Tirza khawpui iangin i duhawm e, Jerusalem iangin, Ka teh ber che pheisen dâr fêng puanzâr khai nên. Hnutiang min chhawn mai teh, Min bual â zo dâwn e, A iang ngei e i bahsam chuan Gilead tlânga lêngkêl tlân thla seng seng. I hâte chu berâmla rual bual fai hlim ang a ni, A kawpkim fer mai a, Bal rêng a awm lo ve. I hmai khuhna phênah I biangte chu a tai têk si, Lalnu sawmruk leh hmei sawmriat, Nula chhiar sên lohte awm mah sela, Ka ṭhûvatê, ka enchim loh chauh hi a ni ka duh, A nu fa neih chhun, a duat bîk chu. Nulaten an hmuhin nihlawh an ti a, Lalnute leh hmeite pawhin an fak. Tu a ni nge zîng êng anga lo chhuak pheu hi, Chhawrthlapui leh tûrni êng a iang e, Pheisen dâr fêng puanzâr keng nên ka teh ber che. Khawkherh hmunah ka zu chhuk a, Lui kama thil chawrno ka en dâwn e, Grepte a kuhmûm tawh emaw, theibuhfai a pâr emaw Ka zu en dâwn a ni. A kiangah chuan sâng sâwm zînga lalber Ka ni emaw ka inti a. Lâm teh, lâm teh, Sulam nula, I lâm kan thlîr dâwn a che. Engtizia nge thlîrtu zînga Sulam nula ka lâm min en duh le? Pheikhawk buna i pên a va mawi êm! Aw nang, milian fanu, I malte chuan a iang e lungmantam chei, Mi themthiam nawh mâm chu. I lai pawh hian uain tlinna no mawi a iang ngei e, I laibu lah buh chhûn vûm Lilipâra hual chu. I ṭângnêm chuan saza phîr, Tla dûn rial rial a iang e. I nghâwngin a iang e saingho in sâng, I mit mengin Hesbon dîl, Bath-rabbim kulh kawngkhâr kianga awm chu. I hnârin a iang e, Lebanon in sâng, Damaska khaw vênna chu. I lu chhîpin a iang e, Karmel tlângchhîp, I bahsam uai a dum ziar a, A kir chuan lal hi a zial tlat e. I va mawi êm! I duhawm ngei mai e! Ka duh tak, lung tiawi! I tlâwntlai ṭha, tûm thing angin, I ṭângnêm chuan a rah bâwr a iang e. Tûm thingah chuan han lâwn ila, A rahte chu ka lo teh ang; I ṭângnêm chu grep bâwr ang hi a ni, I thaw chuan apple rim a nam hiam e. I kam chhuak chu uain thlum ber, Lem a nuamin a tui ngei mai. Ka duh taka ta chu ka ni, Min ngai ve êm a ni. Ti rawh, duh tak, phûlah lêng dûn ila, Khuaahte sâwn i riak dûn ang. Grep huanah va zîng lên ila, A chawr emaw, a pâr emaw i en dûn ang. Theibuhfai pawh a pâr emaw i en dûn ang. Tah chuan ka hmangaihna ka hlân ang che. Zâwlaidi rim a nam rem rem, Thei tui tak, lawh hlim leh a hmin dûp te, Kan kawngka bulah kan dah e. Duh tak, a hmin ṭha ṭha i tân ka khêk a nia. Ka nu hnute hne ve, ka nuṭa chu ni la, Tuala kan intawh khân ka fâwp chawt ngei ang che, Tu man min dem lo vang. Ka kai ang che a, ka nu pindan rilah, Kan hruai ang che. Tah chuan hmangaih min zirtîr ang. Uain rimtui ka hlân ang che a, Theibuhfai sâwr ka intîr bawk ang che. A bân vei lam chu ka lukham a, A ding lam chuan min pawm. Jerusalem nulate u, ka ngên tlat a che u, Duh tâwk a ngah hma chu Kan induh lai min tho suh u. A duh tak nên innghêng riala, Thlalêr ata lo chho saw tu nge ni? Apple buk hnuaiah ka kai harh che, Tah chuan a ni i nu’n a vei che a, A hrin tâk che. Lunglai rilah min vuan tlat la, Keimah lo chu lêng dang chhai suh, Hmangaihna hi thihna angin a chak a, Thîkthu pawh hi Seol angin chin lêm a nei lo ve, Mei alh hluah hluah ang hi a ni. Tuia leih mih rual a ni lo, Lui lian pawhin a chîm hlum zo hek lo, Hmangaihna hi miin a sum neih zawng zawngin Lei tum sela, a tân a zahthlâk ang. Farnu te tak tê kan nei a, A hnute pawh sawi tham a la ni lo, Kan farnu tân eng nge kan tihsak ang, Inlêng a neih hunah? Kulh bang ni se, Tangkaraw bang pâwng kan siamsak ang, Kawngkhâr ni se, Sidar phêkin kan tuam thuah ang. Kulh bang ka ni alâwm, Ka hnute pawh kulh bang pâwng ang a ni, Min han enin a lung ka tiawi tâwk na e. Solomonan Baal-hamon hmunah Grep huan a nei. Thlawhhlawhtute a neihtîr a, Tangka sâng ṭheuh lei man an pe. Solomonan tangka sâng chu lo têl mai se, Thlawhhlawhtuten tangka zahnih pawh chu lo chang ang hmiang, Kei pawh grep huan ka nei ve bawk alâwm. Duh tak, huana awm, i aw ka lo ngaithla ang e, Ṭhiante pawhin hriat an châk e. Rimtui tlânga saza leh zuktuai an tla angin Duh tak, lo zuang ṭum rawh. Uzia te, Jothama te, Ahaza te leh Hezekia te Judai rama an lal laia Amoza fapa, Isaian Judai ram leh Jerusalem khaw chungchâng inlârna a hmuh chu: Lalpan thu a sawi e, “Vânte u, ngaithla ula, Leilung, beng lo chhi rawh: Fanaute ka châwm a, ka tiseilian a, Mahse, min helsan ta si a. Bâwngin a pu a hria, Sabengtungin a pu chaw pêkna thlêng a hre bawk a, Israel-te erawh hi chuan an hre lo va, Ka mite hian an hre thei lo. A! Hnam sual, khawlohnaa khat, Thlah sual, fa nikhualote tak hi aw! Lalpa in kalsan a, Israel-te Mi Thianghlima chu in hnâwl ta a, In hawisan tâk daih hi. Engati nge in hel luih zêl? Vuak in la duh cheu em ni? Kephah aṭanga chhîp thlengin dam lai rêng a awm lo, Pem te, hliam te, vuak duk chur tein a khah tawh hi; Chûng chu an ṭhui lo va, an tuam lo va, Damdawi an hnawih hek lo. In ramte chu tihram a ni ta a, In khuate chu a kâng ral ta, In hmuhah ngei hnam dangte chuan in ram chu an luah ta a, In hmêlmaten an tichhe rem rum mai. Jerusalem khua chauh a la him a, an hual tlat si, Kulh nei ve lo grep huana chhâwlbûk ang leh Fanghma huana thlâm ang hi a ni.” Engkim Lalpan a dam chhun tlêm min zuahsak suh sela, Sodom khua ang khân kan ral tawh ang a, Gomora khua ang kan ni ngei ang. Rorêltu, Sodom khaw mi ang maite u, Lalpa thu sawi hi ngaithla ula, Nangni Gomora khaw mi ang maite u, Kan Pathian Dân hi bengkhawn rawh u. Lalpa chuan heti hian a ti: “In inthawina zozai hi ka tân eng nge a nih? In berâm pum hâlte hi ka hnê tawh a, Ran chum thau in hlante hian mi ngei mang e, Bâwng te, berâm te, kêlpa thisen te hi Ka lâwm hek lo. Ka hmaa in rawn inlan hian Tu nge hêng thil in rawn tih hi phûta, Ka tual in rawn chîl hrep ṭhin le? Thilhlan rawn la sek tawh suh u, a sâwt lo ve, In rimtui hâlte hi ka ten a ni, Thla thar te, sabat te, khâwmpui in koh chhên te, Inkhâwmpui urhsûnte ka kham ta e, Sualin a khat si a. In thla thar kûtte leh in ruat belh kûtte chu Ninawm ka va ti êm! Ka tân a hnawksak a, ka tuar peih tawh lo ve. Min ngênin ban phar mah ula, Ka maimitchhînsan ang che u, Ṭawngṭai chiam mah ula, Ka beng ka chhi lo vang, Insil ula, intifai zâwk rawh u, Thil sual in tih ka hmuh ṭhin hi bânsan ula, Thil sual tih chîng leh tawh suh u. Thil ṭha tih zir ula, a dik chu ûm rawh u, Hnehchhiahte chhan ula, Fahrahte ro dik takin rêlsak ula, Hmeithaite ṭan rawh u.” “Hawh u, i han sawi fel teh ang,” Lalpan a ti. “Sualin sen hlur tawh mah ula, Vûr ang maia vârin ka sil fai ang che u, Senduk tluk mah ula, Sahmul vâr ang maiin in vâr leh ang. Ka thu in awih zêl chuan In rama thil tui berte in ei ang a, Mahse, in duh lohva luhlul in chhuah zêl chuan Khandaih hriama sah hlum in ni ngei ang,” tiin Lalpan thu a sawi e. Engtizia nge khawpui rinawm tak chu Nawhchizuar ang a lo nih tâk? Dik taka rorêlna, mi dikte chênna chu Tualthattute awmna a lo nih tâk hi le! Nang, tangkarua chu a êkchhiaah i chang ta a, Uain kha tui i lo ni ta. In hotute chu hel hmang an ni a, Rûkrûte ṭhian bul an ni; Hlêp tûr an zawng vek a, Thamna an ûm ruai ṭhîn, Fahrahte thu dik takin an rêlsak duh lo va, Hmeithaite thuin an hnên a thleng zo bawk hek lo. Tichuan, Lalpa, Engkim Lalpa, Israel-te Mi Chaka thuchhuak chuan heti hian a ti: “Khawi nge, ka hmêlmate chungah ka inhrithla ang a, Mi dotute chungah phuba ka la teh ang. I chungah ka kut ka lek ang a, Tangkarua angin ka rawh fai ang che a, A êkchhia chu ka thian fai vek ang. Hmâna in rorêltute ang kha ka dah leh ang, In remruattute ang kha ka pe leh ang che u; Tichuan, ‘Khawpui rinawm leh dik,’ an ti leh dâwn che u nia. Zion khua chu diknaa chhan chhuah a ni ang a, A chhûnga awm sual simte pawh felnaa chhandam an ni bawk ang. A laka hel leh mi sualte erawh chu a vaw sawm ang a, Lalpa hawisantute chu an ral vek ang. Sasaw thing biak in uar viau kha in la zak ang, Huan serh in siamte chu in la zahpui bawk ang. Sasaw thing thi tûr angin in vuai ang a, Tui hmu lo huan angin in ro reng ang. Mi thiltithei tak chu meibu ang hi a ni, A thiltih pawh meisi ang hi a ni, Chu chuan a timût ang a, tu man an timit lo vang.” Judai ram leh Jerusalem chungchânga Amoza fapa Isaian Lalpa thu a dawn chu: Ni hnuhnûngahte chuan Lalpa In awmna tlâng chu Tlâng ropui ber a ni ang a, Tlâng zawng zawng a khûm vek ang. Tah chuan hnam tinrêng an lo kal duah duah ang. Mi tam tak an lo kal ang a, heti hian an ti ang: “Hawh u, Lalpa tlângah i chho vang u, Jakoba Pathian in awmnaah chuan, A kawng min lo kawhhmuh ang a, A kawngah chuan kan kal ang,” Zion aṭangin Dân chu a lo chhuak ang a, Jerusalem aṭang hian Lalpan thu a sawi ṭhîn a ni. Hnam tin inkâr thu a rêl ang a, An thu a remsak ang. An khandaihte leileh nân an chher ang a, An feite chu thei ṭang tanna kawmah an siam bawk ang. Hnam dang chungah hnam dangin hriam an lek tawh lo vang a, Indo dân pawh an zir tawh hek lo vang. Jakoba thlahte u, hawh u, Lalpa êngah i lêng ang u. I mi, Jakoba fate hi i thlahthlam ta a ni, Khawchhak mite leh Filistia mite dawi an chîng ve a, Hnam dang mite an kawp tâk avâng hian. Chûng mite ram chu tangka leh rangkachakin a khat a, Sum an ngahzia hriat phâk a ni lo, An ram chu sakawrin a khat bawk a, An tawlailîr lah chhiar sên rual a ni lo. An ramah chuan milem a khat a, Anmahni siam, an kutchhuak chu chibai an bûk. Mi tin an kûn ang a, an tlâwm ang, Tungding hauh suh ang che. Lalpa zahawmna ropui leh hlauhawmna pumpelh tûrin Lung pûkahte lût ula, leivûngahte biru rawh u. Mihring chapona a tlâwm ang a, An inngaihhlutna pawh tihhniam a ni bawk ang. Chutih hunah chuan Lalpa chauh hi chawisân a ni dâwn si a. Chumi ni chuan Engkim Lalpan, Mi chapo te, inngaisâng te leh intivei zawng zawng te A tihniam ang. Lebanon tlâng sidar thing sâng zawng zawng te, Basan ram sasua te a râwt ang a, Tlâng tin leh mual tin, A sâng zawng zawng a râwt hniam ang. Râlvênbûk sâng leh kulh bangte A tichim vek bawk ang. Tarsis lawng rual, a lian leh mawi zawng zawng te, A vaiin a tipil ang. Mihring chapona a tlâwm ang a, An inngaihhlutna pawh tihhniam a ni ang. Chutih hunah chuan Lalpa chauh hi chawimawi a ni dâwn si a. Milemte chu a ral vek ang. Lei rawn sâwi nghîng tûra a lo kal hunah chuan, Lalpa zahawmna ropui leh hlauhawmna pumpelh tûrin Khâm pûkahte an lût ang a, Khuarkhurumahte an biru ang. Chumi ni chu a lo thlen chuan, An biak tangkaraw milem leh rangkachak milem An siamte chu buikelek leh bâk tân An paih chhuak ang. Lei rawn sâwi nghîng tûra a lo thawh hunah chuan, Lalpa zahawmna ropui leh hlauhawmna pumpelh tûrin Khâm kârah leh lung keh kârahte an biru ang. Thi thei mihring chungah innghat suh u, Eng mah an nih loh hi. Lalpa, Engkim Lalpan Jerusalem leh Judai ram aṭangin An innghahna tinrêng a la bo mêk a ni, An rinpui chaw leh tui te, An pasalṭhate leh râltu mi te, Rorêltu te leh zâwlnei te, aienthiam te leh sipai te, Sawmnga hotu te leh mi chhuanawm te, Mi râwn tlâk te leh dawi thiam te, Aikaih thiam te a la bo mêk a ni. An hotu-ah naupang ka dah ang a, An chungah naupangchhiain ro an rêl ang. Mite chu an inep ang a, Pa leh pa an insual ang a, Ṭhian leh ṭhian an inbei bawk ang. Tleirâwl chu upa lakah a inlek ang a, Michhe tê tê pawhin mi zahawmte an pawisa lo vang. Miin an unau an pa ina awm chu an chelh ang a, “Nang zawng silhfên pawh i neih hi, kan hotu-ah ṭang la, hêng niai nuai hi I kutah awm rawh se,” an la ti ang. Chumi hun chuan ani chuan a lo hnial ang a, “Hêngho hi ka tuamhlâwm thei lo vang, Chaw leh silhfên ka nei bîk lo, Mipui hotu-ah zawng mi siam suh u,” a lo ti ang. Jerusalem a chim a ni ta a, Judai ram pawh a chhia a ni ta e. Lalpa kalhin an ṭawng ṭhîn a, thil an ti ṭhîn, A ropuina an hmuhsit avângin. An hawiherah an thiam lohzia a lang a, Sodom mite angin an sual mualpho ta a, An inthup sêng ta lo. An chung a pik e, Mahni chhiatna an thlen a ni. Mi ṭhate hnênah chuan, “In ti ṭha e, In thil tih rah in sêng dâwn si,” ti ula; Mi sualte chung chu a pik e, an chhe dâwn si, An tih chu an chungah pawh tih a ni dâwn si a. Ka mite awpbettu chu naupang an ni a, Hmeichhiaten an chungah ro an rêl. Ka mite u, in hruaituten an hruai bo ta che a ni, Kalna tûr lam pawh hre lovin in buai tâk hi. A mite sual târlang tûrin Lalpa a inpeih a, An chungthu rêl tûrin a ding chhuak ta. Lalpa chuan an upate leh an hruaitute chungthu a han rêl a. “Nangni hi grep huan ram zotu chu in ni, Mi retheite thil in lâk chu in inah in chhêk khâwm a, Engtizia nge ka mite hi hetia in rah beha, Mi retheite neih chhun in lâk zawh zêl?” Lalpa, Engkim Lalpa thuchhuak chuan a ti. Lalpan heti hian a ti: “Jerusalem hmeichhiate chu an va chapo êm! An kal âwr âwr a, mi an melh hrâw hrâw a, Tengeng ri chhawng chhawngin an kal awh awh a. Lalpa chuan Zion hmeichheho lu a tipân ang a, Lalpa chuan saruakin a awmtîr ang. Chumi ni-ah chuan Lalpan An incheina ṭhate a lâksak ang: tengeng te, luhrên te, ṭhimkual te, bengbeh te, ngûn te, hmai khuhna te, samhrên te, bânhrên te, kâwnghrên te, rimtui bâwm te, belmawi te, zungbun te, hnârvuah te, kawrfual ropui te, puan te, kawrchung te, khai nel nel te, dârthlalang te, puan pan te, diar te, puan chei te a lâk bosak ang. Rimtui aiah rimchhia, Kâwnghrên aiah hruihrual, Sâm siam puk aiah chal kawlh, Awm bel mawi aiah saiip puan, Hmêlṭhat aiah hmêlchhiat, An chan tûr a ni ang. I mite chu khandaiha sah hlum an ni ang a, I mi huaisente pawh indonaah an thi bawk ang. Khaw hotute ṭapin an rûm ang a, Khuaa mite saruakin an ṭhu ang. Chumi hunah chuan hmeichhe pasarihin mipa pakhat an man ang a, “Ei tûr leh silhfên kan intum ang a, Kan hmingchhe tûr chhilh nân I nupuiah min nei hrâm rawh,” an la ti ang. Chumi ni-ah chuan Lalpa aṭanga zâr chawr chhuak chu a duah hluah ang a, Israel rama la awmte tân chuan ṭha tak leh tuihnai takin a rah ang. Zion-a thi bângte leh Jerusalem-a zuaha la awmte, Jerusalem-a nungdama awm tûra hming ziak zawng zawngte chu ‘mi thianghlim’ an ti ang. Lalpa thlarau chuan Zion mite chungchâng rêl felin an bawlhhlawhna chu a sil faisak ang a, mei kan angin a thlarau chuan Jerusalem-a thisen kai chu a tifai ang. Lalpa chuan Zion tlâng pum pui chungah leh chuta awm khâwmte chungah chuan chhûnah meikhu leh chhûm a dah ang a, zânah mei êng a dah bawk ang: Pathian ropuina chuan a khuh vek dâwn si a. Chu chu ni sensa laka zâr hlimtu, thlipui leh ruahpui laka humhimtu leh phen tûr a ni ang. Ka duh tak tân hla ka han sa teh ang, A duat êm êm grep huan hla chu: “Ka duh tak chuan grep huan a nei ta a, Mualchêng, lei ṭha tak hmunah chuan. Thlûr a siam a, lung a chhar fai a, Grep ṭha ber chi a phun a, A laiah chuan vênbûk a sa a, Grep sâwr khur tûr a ker bawk a. A rah hlân a nghâkhlel êm êm a, A han rah chuan a suak a lo ni vek si a. Jerusalem leh Judai ram mite u, Ka grep huan nêna kan inkâr thu hi Han ngaihtuah ve teh u. Ka tih bâk hi ka grep huanah Eng nge ka tih leh chuan tawh ang? Grep ṭha ngei lawh tumin ka thlîr rêng a, A suak hlîrin a rah si hi. Engtin nge ka tih dâwn, ka sawisak dân tûr chu, Ka han hrilh ang che u, A pal ka sâm ang a, ka tiram ang, A lung palte ka tichhe vek ang a, Ramsate chuan an chîl thlu ang. Ka ma ang a, a ṭang ka sât no lo vang a, A hmun ka thlo fai hek lo vang. Hnimhlîngnei leh hlo harin a khat ang a, Chhûmte thu ka pe ang a, Ruah rêng ka sûrtîr tawh lo vang.” Engkim Lalpa huan chu Israel chhûngte hi an ni a, Judai ram mite hi duat taka a phunte chu an ni. Dik takin ro an rêl a beisei a, Tual thah an chîng ta si, Thil dik an tih a beisei a, Mahse, manganga au a hmu ṭeuh si. Mi dang nêka, in zauh zêla, Huan zauh zêl chîngte u, in chung a pik e. Tu mah an leng ve lo vang a, Khawhar takin mahni chauhvin in la awm ang. Engkim Lalpa chuan ka beng hriatah, “Hêng in lian pui pui leh mawi tak tak hi A ram ang a, luah tûr an awm lo vang. Grep huan ṭîn sâwm hmunah Ṭîn hnih vêl chauh sâwr tûr a rah ang a, Phur sâwm chînnaah Phur khat lek chauh a haw bawk ang,” a ti. Zîng tak taka zu hrût ṭana, Zân rei tak tak thlenga rui hnêp ṭhînte chu An chung a pik e. Zu hmunah ṭingṭang leh perhkhuang nên, Dârbenchhek leh phênglâwng nên Zu nên an ri bûng bûng ṭhîn, Lalpa thiltih chu an en ṭha duh lo va, A kut hnathawh pawh chu an hmu duh lo. Ka mite chuan an hriat duh loh avângin Salah an tâng ngei dâwn a ni. An miliante rilṭâmin an thi ang a, Mipui vântlângte pawh tuihâlin an thi ang. Mitthi khua chuan lo dawlh a châk hle a, A kâ a âng huau mai. Jerusalem chhuangtu milian leh mitê Hlim taka awm ṭhînte chu a dawlh zo ta. Mitê leh milian tihhniam an ni ang a, Mi chapote an tlâwm bawk ang. Dik taka ro a rêl avângin Engkim Lalpa chu chawimawi a ni ang a, Thil dik taka tiin Pathian thianghlim chuan A thianghlimzia a lantîr ang. Tichuan, an tlatna phûlah berâm an tla angin, Hmun ramah chuan an tla ang a, Khaw rama hnimte chu kêlten an pet bawk ang. Sual laka inthiarfihlîm thei lo, Sual sim thei lote chu an chung a pik e, ‘Lo hmanhmawh se, kan hmuh atân, Han ti thuai thuai ang hmiang, Israel-ho Mi Thianghlima chuan a thiltum chu, Kan hriat theih nân han tithleng thuai rawh se,’ titute chu. Thil sual thil ṭha tia, thil ṭha thil sual tia, êng chu thima ngaia, Thim chu ênga ngai bawka, Thil thlum chu thil kha tia, Thil kha chu thil thlum titute chu, Mahni ngaiha fing intia, Fel inti hlete chu an chung a pik e. Zu ina pasalṭha, Zu chawhpawlha huaisente chu: An chung a pik e. Thamna lain mi sual thiam chantîr an chîng a, Mi ṭhate chu thiam loh an chantîr ṭhîn. Hemi avâng hian, meialhin buhpâwl a kâng ral ang leh Hnim ro a kâng ral ang mai hian An zungzâm a ṭawih ral ang a, An vânglaiin an boral ang; Engkim Lalpa Dân chu an hnâwl a, Israel-ho Mi Thianghlima chu an hmuhsit avângin. Chuvâng chuan a ni, Lalpa thinurna chu Mite chunga a lo thlen ni, A kut lekin a vuak tâk hi. Tichuan, tlângte chu a nghîng a, Mitthi ruang chu hnâwmhnawk angin Khawlaiahte a let rem rum, Chuti pawh chuan a thinur a la reh lo va, A kut a la thlâk ta cheu va. Lalpan ram hla taka awmte tân chhinchhiahna a târ chhuak ta, Kâwlkila mi hamrîkin a ko va, Hmanhmawh takin an lo kal saw. Hah rêng an hre lo va, an inchhuih bawk hek lo, Muthlu an awm lo va, an mut a chhuak hek lo, Kâwnghrên phelh dul tu mah an awm lo va, Pheikhawk hrui chat an awm hek lo. An thalte chu a zum êm êm a, An thalngul chu kawih sa-in an keng; An sakawr tinte chu meilung hriam ang a ni a, An tawlailîr kete chu ṭhâwngaleivir angin a vir vut vut. An au thâwm chu sakeibaknei hâhum ang hi a ni, Sakeibaknei vânglai angin an au hum hum a, An sa seh chu rûm ngul ngul chungin an pu bo va, Tu man an chhuh thei lo. Chumi ni chu a lo thlen chuan, Tuifinriat thâwm anga nasain Israel ram chhûngah an rawn ri hum hum ang. Ram han thlîr chuan thimna leh mangannain a khat a, Êng chu thimin a hliah zo ta. Lal Uzia thih kum khân Lalpa chu ka hmu a, a lalṭhutthlêng, sâng taka chawi kânah chuan a ṭhu a, a kawrfual hmâwr chuan Tempul chu a tikhat vek a. A kiang vêlah chuan Seraf-ho an awm a, chûng chuan thla paruk an nei ṭheuh va, an thla pahnihin an hmai an khuh a, an thla pahnihin an ke an tuam a, an thla pahnihin an thlâwk a: ‘Engkim Lalpa chu a thianghlim e, A thianghlim e, a thianghlim e, Lei pum puiah a ropuina a lo khat,’ tiin an inau tawn an inau tawn a. An thâwmah chuan Tempul nghahchhan lungphûmte chu a nghîng dur dur a, Tempul chu meikhuin a khat ta a. Kei chuan, “Che heu! Ka boral a nih tâk hi! Hmui bawlhhlawh pu, hmui bawlhhlawh pute zînga chêng hian, Lalber, Engkim Lalpa chu ka mitin ka hmu ta si a,” ka ti a. Seraf pakhat chu a lo thlâwk a, chaichehin maichâma meiling chu a rawn chep a, ka hmui a han dep a, “Hei hian i hmui a khawih ta a, I sualna lâk bo a ni ta a, I bawlhhlawh tihfai a ni ta e,” a ti a. “Tu nge ka tirh ang a, tu nge kan tân kal ang?” tiin Lalpa aw ka hria a. Kei chuan, “Kei ka kal ang chu! Min tîr ta che,” ka ti a. Ka hnênah chuan, “Kal ta la, he hnam hi va hrilh rawh: Ngaithla reng mah ula, a ngaihna in hre lo vang, En reng mah ula, in hmu si lo vang,” tiin. “He mite thinlung hi tichawlawl la, An beng tingawng la, An mit timalh bawk ang che. Chutilo zawng, an mitin an hmu ang a, An bengin an hria ang a, An thinlungin an hre bawk ang a, Hawi kîrin tihdam an ni dah ang e,” a ti a. Kei chuan, “ Lalpa, eng chen nge chutianga an awm ang?” ka ti a. Ani chuan, “Khawpuite chu luahtu awm lova a ram veka, inte pawh urtu awm lova ram pum a ṭiau vek hma loh chuan! Lalpan mite chu hla takah a thawn bo vang a, ram pum chu a tiṭiau vek phawt ang. “Sâwma pakhat pawh châmbang sela tihboral an ni ang. Sasua leh ṭhîl kih hnua a bul la awm ang hi a ni ang; chu chu chi thianghlim bul chu a ni,” a ti a. Uzia fa Jothama fapa Ahaza, Judai rama a lal laiin Suria lal Rezina leh Israel lal Remalia fapa Peka chu Jerusalem rûn tûrin an chho va, mahse, an la mai thei lo. Suria sipaiten Israel ram an lo thleng tawh tih Davida chhûngte an han hrilh chuan an hlau ta êm êm a, thliin ngaw thing a chhêm ang mai hian an khûr a. Lalpan Isaia hnênah, “I fapa Shear-jasuba hruai la, Ahaza va hmu rawh, dîl chhakta aṭanga tui lâkna kawng tâwp, puan su mite hmun panna kawngpuiah a awm e. A hnênah heti hian va ti rawh: Inring la, zâm mai suh, thlaphâng hauh suh. Suria lal Rezina leh Remalia fapa thinur hi thingthu bung khu ang lek an ni asin. Suria leh Israel lal Remalia fapa chuan in chungah thil ṭha lo an rawt a ni. ‘Judai ramah han chho ila, tichiai ila, kan tiṭhen ang a, an lalah Tabeela fapa hi kan siam dâwn nia,’ an ti vei a. Lalpa Pathian chuan heti hian a ti: ‘Chutiang chu a ni hauh lo vang a, An hlawhtling bawk hek lo vang. Suria lu chu Damaska a ni a, Damaska lu chu Rezina lek hi a ni si a. Kum sawmruk leh panga chhûngin, Efraim hnam chu an ral vek ang. Efraim lu chu Samaria a ni a, Samaria lu chu Remalia fapa lek hi a ni si a. Min rin loh chuan in ding chhuak lo vang,’ tiin,” a ti a. Lalpa chuan Ahaza hnênah thu a sawi leh a. “Leilâwt aṭangin emaw, vân aṭangin emaw chhinchhiahna entîr tûrin Lalpa, i Pathian dîl rawh,” a ti a. Ahaza chuan, “Ka dîl lo vang, Lalpa chu ka fiah duh hek lo,” a ti a. Isaia chuan, “Davida thlahte u, ngaithla teh u, mi dang tihhah tâwk ti lovin kan Pathian leh zêl tihhah in duh elo? Lalpa ngei chuan chhinchhiahna a hmuhtîr ang che: Ngai teh, nula chuan nau a pai ang a, fapa a hring ang a, a hmingah, ‘Imanuela’ a sa ang. A chhia a ṭha a thliar theih hma pawhin mite chuan hnutetui leh khawizu an ring ang. Chu nau chuan a chhia a hnâwl a, a ṭha a thlan theih hma pawhin i hlauh êm êmte ram chu a ṭiau vang. “ Lalpa chuan nang leh i mite leh i pa chhûngte chungah, Efraim-ho kha Judai ram aṭanga an intihhran china la thleng ngai lo hrehawm nasa tak a tithleng dâwn a ni: Asuria lal chu a rawn hruai ang. Chûng ni-ahte chuan Lalpan Aigupta rama lui, Nail hnâr aṭangte chuan faifûkin tho rual a ko vang, Asuria ram aṭang pawhin khuai rual a ko bawk ang. An lo thlâwk chiam ang a, luikawr kam khâmah te, Tlângram khâm kârah te, Hlîng buk leh ran tlatna hmunah te an lo fu sup sup ang. Chumi ni chuan Eufretis lui kama awm, Mi lu mehsak chîng Asuria lal chu, Lalpan a ruai ang a, In sam leh in hmul zawng zawng, In khabehmulte nên lam a ziat fai ang. Chumi ni chu a lo thlen chuan, Bâwngpui leh kêlpui pahnih an la vulh hrâm ang a, Hnutetui an ngah hle ang, Khawizu nên an ring ang. Rama la awm chhunte pawhin khawizu leh hnutetui an ring bawk ang. Chumi ni chu a lo thlen chuan, Tangka bûk sâng man, Grep kûng sâng awmna zawng zawng pawh chu hlo har leh hnimhlîngneiin a bawh ang. Tah chuan thalngul kengin thal nên an ramvâk ang. Ram pum puiah hnimhlîngnei leh hlohar a khat dâwn a ni. Tuthlawha an thlawh fai ṭhin mual zawng zawng chu, Hlohar leh hnimhlîngneia a khah avângin Tu mah an kal ngam lo vang, Bâwng rual an tla ang a, Berâm rual tlatna hmun a ni bawk ang.” Lalpa chuan ka hnênah, “Ziakna tûr phêk hlai tak la la, mi tin chhiar theih tûrin, ‘Maher-salal-khas-Baza’ tân, tih thîr zumin ziak kuau rawh,” a ti a. Thuhretu atân mi rinawm tak pahnih, puithiam Uria leh Jeberakia fapa Zakaria ka sâwm a. Tin, ka nupui bulah ka awm a, nau a pai a, fapa a hring a. Lalpa chuan, “A hmingah, ‘Maher-salal-khas-baza’ sa rawh. Nausên chuan, ‘Ka nu, ka pa,’ a tih theih hmain Damaska hausakna leh Samaria khua ata râllâk sum an lâk tûr chu Asuria lal hnênah an thlen ang,” a ti a. Lalpa chuan mi hrilh leh a, He mite hian Silo lui dam tui chu an duh lo va, Rezina leh Remalia fapa an lo lâwm a. Kei Lalpa hian Asuria lal leh a sipaite chu Tui lian angin ka lêntîr ang. A kuang a khat ang a, a kamah chuan a luang liam dûl dûl ang, Judai ram chu a rawn pan ang a, a rawn hrût zêl ang a, Nghâwng thleng zawkin ram pum a rawn chîm ang, I ram chungah a thla a zâr duai dâwn, Aw! Imanuel. Mite u, hre rawh u, in chau dâwn e, Ram hla taka awmte u, bengchhi rawh u, A ni, inpeih ula, hlau viau rawh u. Râl rêl ula, a hlawhtling chuang lo vang, In duh tâwkin sawi ula, a sâwt bawk hek lo vang, Kan Pathian kan hnênah a awm si a. He mite kawng zawh lai hi zawh ve lo tûrin Lalpan khauh takin min hrilh a. ‘Hêng mite hi thurualpui suh, an hlauh ang chu hlau ve hek suh la, ṭih bawk hek suh. Engkim Lalpa hi a ni in zah tûr chu. Ani chauh hi a ni in hlauhva in ṭih tûr chu. A thianghlim êm avângin Israel chhûng hnihte tân inchhuihna tûr lung, chhuiha tlûkna tûr chu a ni. Jerusalem-a chêngte tân tlâkna tûr hum leh awhna tûr thang a ni. Mi tam tak an inchhuih ang a, an âwk ang a, an tâng tlat ang,’ a ti a. Ka zirtîrte u, in thu zir, ka hrilh che u kha, vawng ṭha ula, kawl tlat rawh u. Kei chuan Lalpa hi ka nghâk reng ang a, Jakoba thlahte lakah a biru rih a nih hi; kei chuan ka beiseina chu amahah ka nghat tlat ang. En teh, kei leh Lalpa min pêk naupangte hi, Zion tlânga chêng Engkim Lalpan Jerusalem mite tân chhinchhiahna, thil mak tak ni tûrin min ti a ni. Mitthi thlûk thiam te, eng emaw zâwla chiap chiapa phun bul bul te chu râwn tûrin an ti ang che u. Anni chuan, ‘Thlaraute hi râwn tûr a ni a, thi tawhte pawh la damte tân râwn tûr an ni,’ an lo ti ang. Zirtîrna thu, ka hrilh che u mawlh kha, ngai ngun rawh u; anni thu sawi chuan awmzia a nei lo ve. Mangang tak leh rilṭâm takin ram chu an fang ang a. An rilṭâm thinur chuan vân lam enin an lal leh an Pathian chu ânchhia an lawh bawrh bawrh ang. Lei lam an hawi chuan manganna leh thim, thim râpthlâk tak, an tawn ngei tûr thim chu an hmu ang. Mangang taka awm ṭhînte tân thim a awm tawh lo vang, Tûn hma lam khân Zebulun leh Naftali ram chu Hmusitawm tak a ni a, Hun hnuhnûngahte erawh chuan a la tiropui hle ang, Tuipui kam aṭanga Jordan lui râl Galili ram, Jentail-te chênna ram chu. Thim hnuaia khawsa ṭhîn hnamte chuan êng ropui tak an hmu ta a, Ram thim taka chêngte tân chuan khua a lo vâr ta. Chûng hnamte chu i tipung a, An hlimna pawh i tihpunsak ta a, Buh seng leh râllâk sum insem laia an hlim ang hian, I hmaah chuan an hlim a ni. An rit phurhna nghâwngkawlte leh an thil kawh fungte chu, Chhawrtuin a vuakna tiangte nên chuan Midian-ho hneh ni ang khân, I tihtliahsak ta si a. Sipai lo kal ṭhup ṭhupna pheikhawk te, An thuam thisen kai hniang hnuang te, Hâl a ni a, a kâng zo ta. Kan tân nau a lo piang a, Fapa min pe ta a. Sawrkârna chu a kovah a innghat a, A hmingah chuan: Remruattua, Maka, Pathian Chaka, Chatuan Pa, Remna Lal an ti ang. A sawrkârna a nghet tulh tulh ang a, A ram chhûngah remnain tâwpintai a nei lo vang. Thu dik hmanga dik taka rorêlin Davida lalṭhutthlêngah a ṭhu ang a, a tinghet ang, Tûn aṭanga kumkhuain Lalpa ṭhahnemngaihna chuan Chûng chu a ti ngei ang. Lalpan Jakoba thlahte demin thu a sawi a, Israel mite pawh a huap a ni: ‘Efraim mi leh Samaria mi zawng zawng chuan Hêng hi a tih a nih an hria ang; An chapovin an inchhuang vei hle a, Leirawhchan bang chim mah se, Lungchher kan rem mai ang, Lungli khanchhuk min tansak a, Sidar thing ṭha kan hmang hlauh vang,’ an ti. Lalpan hmêlma a chawk tho ta, Anmahni hualtu tûrte chu. Khawchhak lamah Suria, khawthlang lamah Filistia, Israel chu dawlh tumin an kâ an âng huau mai. Chuti pawhin Lalpa thinur a reh lo va, A kut a la lek cheu a ni. Israel mite chu anmahni hremtu lamah an kîr lo va, Engkim Lalpa lam chu an hawi duh lo. Chuvâng alâwm Israel-te lu leh mei chu Ni khat thilah Lalpan a tansak ni, An tûmkau leh aidûte pawh a sâmsak bawk. An lu chu an upa chhuante an ni a, An mei chu zâwlnei dâwt hehte hi an ni. An hnam hruaitute hian an hruai bo va, An hruaite chu an bo zo ta a ni. Pathian pawisa lovin thil sual an ti vek a, An thu chhâkchhuahte lah a nikhua bawk hek lo; Chuvângin, Lalpan an tlangvâlte a zuah lo va, Fahrahte leh hmeithaite pawh a khawngaih lo, Chutiang a nih pawhin Lalpa thinur a reh lo va, A kut a la lek cheu a ni. Sual hi hlohar leh hnimhlîngnei kângtu mei ang a ni, Ngaw hnuaia hnimte pawh a tikâng a, A khu chho hluah hluah ṭhîn. Engkim Lalpa thinurna chuan ram chu a tikâng a, Mihringte chu hâl tûr chheh khâwm ang mai an ni. Tu man mahni unau ngei pawh an zuah si lo; An ding lama mi hlepin an ei a, An ril a la ṭâm tho, An vei lama mi pawh an ei a, An puar chuang lo, mahni fate ngei pawh an ei. Manase leh Efraim mi an inbei a, Juda thlahte an beihrawn a, Chutiang a nih pawhin Lalpa thinur a reh lo va, A kut a la lek cheu a ni. Dân chimawm tak siama, Thupêk khirh tak tak tichhuak ṭhînte u, In chung a pik e. Chutin rethei ṭhat vena tûr in dang tlat a, Dik taka ro rêlsak an ni ngai lo; Hmeithaite in suam a, fahrahte in rawk ṭhîn. Ram hla tak aṭanga chhiatna a lo thlen hun, Thungrulhna ni-ah chuan eng nge in tih tâk ang? Tu hnênah nge ṭanpui in dîl ang a, Khawiah nge in rote in thuhrûk ang? Sala an man zîngah in tel ang a, A nih loh leh an thah zîngah in tel ve ang. Chutiang a nih pawhin Lalpa thinur a reh lo va, A kut a la lek cheu a ni. A! Asuria lal chu ka thinur talhtum a ni, Ka thinrim hrîk thlâk nân ka tiang a ni. Pathian pawisa lo hnam bei tûrin ka tîr a, Min tithinurtute nuai nek tûrin thu ka pe a, Anni chu va suama, va rawk tûr leh Kawtthlêr chirhdiak anga chîl hrep tûrin. Chu mai chu a lo duh tâwk lo va, Hnam dangte chu tihmang a lo tum a, Chin lêm nei hlek lova râwt vek a lo rilrûk a ni. “Ka miliante hi lal tluk ṭhalh an ni a, Karkhemis khua angin Kalno khua pawh ka hneh a ni lâwm ni? Hamath khua angin Arpad khua pawh? Samari khua chu Damaska khua angin ka sawisak kha. Milem biakna ramah ka kut ka lek zêl a, Samari khua leh Jerusalem khua aia milem tamnaah chuan. Samari khua leh an milem biakte chu ka tichhe vek tawh a, Jerusalem khua leh an milem biakte pawh ka sawisa lo vang maw?” a ti vei a. Lalpa chuan heti hian a ti: “Zion tlâng leh Jerusalem khaw chunga thil tih ka tum chu ka tih zawh hun chuan Asuria chu a chapo leh a inchhuan êm avângin ka hrem dâwn a ni.” Asuria lal chuan: “Ka chak avâng leh ka fin thiam avângin Keimah ngeiin ka tih a ni. Hnam tin ramri ka sawn kual a, An ro khâwlte ka chhuhsak a, Bâwng kawlh angin lalte ka chîl nek a. Sava awm loh hlâna a tui an la ang hian, Ram tinrênga kalin an buzâwl chu Ka zensak a, an rote chu ka la zêl a, Thla min khawn khum an awm lo va, Min khak ngam rêng an awm lo ve,” a ti. Hrei hi a chêktu aiin a ropui zâwk em ni? Thingzaina pawh a hrûttute aiin a ṭangkai zâwk em ni? Talhtum pawh hian a lektu chu a lek thei em ni? Talhfiak pawhin a kengtu chu a lek thei lo. Lalpa, Engkim Lalpa ngei chuan, Mi thau tak takte chu chêr hri a veitîr ang a, Mei angin an kawchhûng chu a lum vut vut bawk ang. Israel-te êntu chu meiah a chang ang a, Mi Thianghlima chu meialhah a chang ang. Ni khat thilah engkim a kâng ral ang a, Hlohar leh hnimhlîngnei lam a kâng fai ang. A ngawpui leh ram ṭha hlutna chu A chhe vek dâwn a ni; Ngawrte an râwp ral ang mai hian. Ngaw thing la ding pheuh pheuhte chu Naupang chhiar tham lek a ni ang. Chumi hun chuan Israel la dam chhunte leh Jakoba thlah thi bâng la awmte chuan anmahni sawisatu an rin chhan tawh lo vang a, Lalpa, Israel Mi Thianghlima chu an ring takmeuh tawh ang. Jakoba thlah thi bâng la awm chhun chu an Pathian chak tak hnênah chuan an lo kîr leh ang. Israel mite chu tuifinriat kama ṭiau zâtin tam mah sela, tlêm tê chauh an lo kîr leh ang: boral tûra ruat an ni a, an phu rêng si a. Engkim Lalpa, Pathian chuan a ruat tawh angin ram pumah chhiatna a thlentîr dâwn a ni. Chuvângin, Engkim Lalpa, Pathian chuan heti hian a ti: “Zion-a chêng, ka mite u, Aigupta mite tih angin Asuria chuan tiang lekin vua che u mah sela, hlau suh u. Rei lo tê-ah, in chunga ka thinur chu a reh ang a, an chungah ka ṭuan thung ang. “Engkim Lalpa chuan Horeb lungpui hmuna Midian mite chunga a tih ang khân an chungah pawh a vuakfung chu a lek ang a, tuipuia Aigupta mite a tih ang khân Asuria chu a vaw hrep ang. “Chumi hun chuan Asuria thuhnuaia in kûn chu ka chhuah ang che u a, in nghâwng ata a nghâwngkawl chu ka titliak ang,” a ti. Aiath khua an lo thleng ta, Migron khua pawh an rawn pêl a, Mikmas khuaah an rawn inchhêk ta e. Kalkhân an pêl tawh a, Geba khuaah an riak ta e, Rama khaw mite chu hlauvin an khûr. Lal Saula khua Gibea mite an tlânchhia e. Galim khaw mite u, hlauvin au vak ula, Laisa khaw mite u, ngaithla ula, Anathoth mite u, lo chhâwn rawh u. Madmena mite chu an tlânchhia a, Gebim khuaa chêngte chu biru tûrin an tlân. Vawiin hian Nob khuaah chuan a ding ta a, Zion tlâng, Jerusalem khua chu kuttum a thin khum e. Ngai teh, Lalpa, Engkim Lalpa chuan Thingzâr thlâk ang maiin a thlâk duai duai ang a, A sâng sâng chu a râwt ang a, A titlâwm ang. Hreiin ngawpui an ṭhiat a, Lebanon tlânga thing lian pui pui an kit ang hian Asuria chu a kit ve ang. Thing kih bul chu a lo chawr leh ṭhîn ang hian, Jesaia thlah aṭangin lal thar a lo chhuak ang. Lalpan a thlarauvin a awmpui ang a, Finna leh hriatthiamna te, Remruat thiamna leh huaisenna te, Lalpa ṭihna leh hriat theihna thlarau te a neihtîr ang. Lalpa ṭih hi a lawmzâwng tak a ni ang a, A lan dân ang maiin ro a rêl lo vang a, Benga a hriat satliah aṭang maiin thu a pawtchat hek lo vang. Retheite chu dik takin ro a rêlsak ang a, Ram chhûnga mi tlâwmte pawh a chawikâng ang. A thu, a talhtum chuan lei hi a vua ang a, Mi sualte chu a chhêm hlum ang. Dikna a taihrênah a hmang ang a, Rinawmna chuan a kâwng a hrêng bawk ang. Chinghniate chu berâm zîngah an tla ang a, Keitê leh kêl pawh an bawk dûn ang. Bâwng no leh sakeibaknei no chu Ran châwm thau nên an awm ho vang a, Naupang têin a hruai duah duah ang. Bâwngpui leh savawm chu an tla dûn ang a, An note pawh an bawk za dial dial ang. Sakeibakneite chuan bâwng ang maiin buhpâwl an ei tawh ang. Hnute hne laite chu chawngkawr kaw bulah an tualchai ang. Hnute hnêk bâng hlimten rûlngân tawmkûkah kut an dah ang. Ka tlâng thianghlimah rêng rêng chuan Tu mah an intina tawh lo vang a, An intichhe hek lo vang; Tuifinriat hi tuia a khat angin, Lalpa an hriatna chuan ram hi a khat tawh dâwn si a. Chumi hun chuan Jesaia thlah aṭanga lal lo chhuak chu hnam tin tân chhinchhiahna a ni ang a, a chawlhhmun chu an rawn pan ang a, an chawimawi ang. Chumi ni chuan Lalpan a bân a phar leh ang a, ama mite thi bâng, Asuria leh Aigupta ram te, Pathros ram te, Sudan ram te, Elam ram te, Babulon ram te, Hamath ram te, tuifinriat kam leh thliarkâra la awmte chu a hruai kîr ang. Hnam tinrêng hmuhah puanzâr a zâr ang a, Israel hnam hnawh darhte leh Juda tlân darhte chu Kâwlkil li aṭangin a hruai khâwm ang. Efraim thîkthuchhiatna a reh ang a, Juda dotute chu an bo tawh ang. Efraim chuan Juda chu a thîk tawh lo vang a, Juda lahin Efraim chu a tibuai hek lo vang. Khawthlanga awm Filistia chu an beih rawn ang a, Khawchhak lam mite pawh an rawk ho vang. Lalpan Suez litengsâwl chu a tikang ang a, Eufretis luipui pawh thli lum hmangin a kangchahtîr ang a, Lui tê pasarihah a chantîr ang a, Kephah pawh huh lovin an kai thei ang. Aigupta ram ata Israel-te an lo chhuahna tûr Lamlian a awm ang khân, A mi la bângte tân Asuria ram aṭang pawhin Lamlian a awm ruah ang. Chumi ni chuan heti hiani ti ang: “Aw Lalpa, ka fak a che. Ka chungah hian i thinur a, Mahse, i thinur chu i la kiang a, Min tihthlamuan tâk hi. Ka Pathian chu min chhandamtu a ni; Amah ka ring ang a, ka hlau lo vang. Lalpa, ka Pathian chu mi tichaktu, ka hla a ni. Min chhandamtu a ni. Chhandamna tuikhur aṭangin hlim takin tui chawi rawh u.” Chumi ni chuan heti hian in ti ang: “ Lalpa chu fak ula, a hming chawimawi rawh u, A thiltih chu a mite hrilh ula, A hming ropuizia hi puang darh rawh u. A thiltih ropui tak avâng hian Lalpa chu fak ula, Khawvêl ram pum pui hi hriattîr rawh u. Zion tlânga awmhmun khuarte u, Hlim takin zai ula, au chiam rawh u; In zînga awm, Israel Mi Thianghlima chu A ropui êm asin.” Babulon chungthu Amoza fapa Isaian a dawn chu: Tlâng kawlh chhîpah puanzâr târ ula, Sipaite chu au khâwm ula, Khaw chapo tak kulh kawngkhâr chu Bei tûrin in kutin hawi rawh u. Keimah ngeiin ka mi ruatte thu ka pe a, Ka mi chhuanawm, huaisen tak takte chu, Ka thinur hrîkthlâk nân ka ko va ni. Tlânga ri mur mur chu ngaithla teh u, Ram tin ata hnam tinrêng lo kal khâwm, Thâwm ri a nih chu; Engkim Lalpan a sipaite râl bei tûrin a khâwm a ni. Kâwlkil ata an lo kal a, Vân tâwp ata an lo pung khâwm a ni, Lalpan a thinur hriamhreiin ram pum pui chu a tichhe dâwn a ni. Chiau vawng vawng rawh u, Lalpa ni chu a lo hnai ta, Engkimtitheia chuan chhiatna a thlentîr dâwn a ni. Chuvângin, mi zawng zawng bân a zâwi ang a, An zâm vek ang. Thlaphâng takin hrehawm leh na an tuar ang a, Nau vei angin an vial an vial bawk ang; An zâm hmêl chu an inhmuhin an zak hle ang. Lalpa ni chu a lo thleng dâwn, A thinur râpthlâk tak a lo lan hunah chuan, Ram chu tihṭiau a ni ang a, A chhûnga awm mi sualte chu an boral ang. Vân arsi leh chhohreivûngte khi An êng a reh tawh ang. Ni chhuak hlim pawh a thim ang a, Thla pawh a êng tawh lo vang. Lei hi a sual avângin ka sawisa ang a, Mi sualte pawh an sual avângin ka hrem bawk ang; Mi chapote inchhuanna chu ka titâwp ang a, Mi nunrâwng leh induhte chu ka titlâwm ang. Rangkachak hlu a vâng angin thi bâng an vâng ang a, Ofir rangkachak a tlêm angin mihring ka titlêm ang. A thinur ni a thlen hun chuan Engkim Lalpan vân khi a tikhûr ang. Lei pawh a sawi ang a, A awmna hmun ata a per chhuak ang. Sakhi tlânchhia leh berâm vên loh an darh angin, Mahni mite an pan ang a, Mahni ramah an tlân haw zut zut ang. An hmuh apiang an vit ang a, An man apiang khandaihin an that ang. An nausênte an mit hmuhah an vuak hlumsak ang a, An inte pawh an ramsak ang a, An nupuite an pâwngsualsak bawk ang. Babulon bei tûrin Media mite ka chawk tho va, Tangka an awt lo va, Rangkachaka tham theih an ni hek lo. An thalin tlangvâlte an kâp hlum ang a, Nausên an lainat lo vang a, Naupang pawh an khawngaih hek lo vang. Lal ram khuaa ropui ber, Babulon khaw mawi tak, Kaldai-ho chhuan êm êm chu Lalpan a titlâwm ang, Sodom leh Gomora khua ang khân. Tu mah an chêng tawh lo vang a, Ṭhang lo thar zêl mah se tu mah an pêm lût lo vang. Arab zin vêlte chuan puan in an zâr lo vang a, Berâmpu tu mahin an berâmte an chawlhpui hek lo vang. Thlalêr ramsa an chêng ang a, Chhimbukin bu a chhep bawk ang. Chingpirinute an awm ang a, In chim bângah sathâr an tualchai ang. Kulh bîngahte chuan sihal an û ang a, Lal in nuamahte chuan chinghnia an hrâm bawk ang. Babulon chhiat hun chu a lo thleng dâwn, A nite chu a ral ṭêp tawh a ni. Lalpa chuan Jakoba chungah ngil a nei ang a, a mi Israela chu a thlang leh ang. An ramah chuan a awmtîr leh ang a, hnam dang pawhin an rawn pan ang a, Jakoba chhûngte chu an rawn bêl ang. Lalpan a pêk rama haw tûrin hnam dangten an hruai ang a, Israel-te chuan Lalpa ramah chûng mite chu, a hmei a pa, bawihah an nei ang a, anmahni mantute chu an man ve thung ang a, awpbettute pawh chu an awp thung ang. Na in tuar te, in mangannate leh rim taka an chhawr luih che u lak ata Lalpan a hahchawlhtîr hunah che u chuan, He cheksawlhna hla hian Babulon chu in au khum dâwn nia: Tiduhdahtua chu a tlâwm ta elo? Hlauhawma kha a va reh ta êm! Lalpan mi sualte tiang a titliak a, Lal sualte vuakfung chu a tibung ta. A thinrim a, mite a hlap nek ṭhîn, A tihtlâwm tawhte pawh thinrim takin sawisak a bâng chuang lo. Ram tin thlamuang takin an awm ta hiai hiai a, Lâwm hla sa-in an au chûl mai. Nangmah vângin fâr thingte chu an lâwm ta e, Lebanon tlâng sidarte chuan, “I tlâwm tâk hnu hi chuan min kit tûr pawh lo kal an awm ta lo,” an ti. Hnuai lam mitthi khua chu hmuak tûr chein A lo buai êm êm a, I zuk thlen hlân a nghâkhlel hle a ni. Hnam tinrêng lalte leh hruaitute thlarau chu an lalṭhutthlêng Ata a kaitho chung mai a. An zavaiin an lo hmuak ang che a, “Keiniho ang maiin i chau ta a, Keini ang lek i nih tâk hi: I ropuina mitthi khuaah i rawn chhukpui ta a, I ṭingṭang thâwm rimawite nên, I âwngphah chu changpât a ni ta a, Thil lung puanah i sin tâk hi,” tiin. Aw nang, Babulon lal, “Zîng êng, Vârparh Arsi inti,” Vân aṭangin i va tlahniam ta êm! Hnam dang titlâwm ṭhîntu Tihtlâwm i nih ve tâk hi: “Vânah ka lâwn ang a, Pathian arsi chung lamah khian hmâr tâwpa Pathian tlângah lalṭhutthlêng ka hûng ang, Chhûm chung lamah ka han chho zêl ang a, Chungnungbera tlukah ka insiam ang,” i ti vei a. Mitthi khuaah an namthla ta a che, A khuar thûk laiah chuan. A hmu che chuan an en vawng vawng ang che a, ‘He mi hi maw lei pum tinghînga, Lalram sâwi nghîng ṭhîntu. Thlalêr anga ram tin tiṭiauva, Khawpui kulh neite la ṭhîntu chu? A sal mante chhuah ngai lova, Hâwntîr duh lotu chu?’ tiin I chanchin an chhui ang. Hnam dang lal zawng zawngte, Ropui takin mahni thlânah an zalh ṭhîn a, Nang erawh chuan phûm i hlawh lo vang a, I ruang chu nausên thisâwn angin tualah an paih ang a, Khuarkhurumah an paih ang a, an chîl nek ang, Mi dang ruangte chuan a delh bawk ang. I ram i tichhe hneh hle a, I mite pawh i thah avângin Lal dang anga phûm ve i ni lo vang, Mi sualte thlah hming chu bo hlen rawh se. An pate sual avângin an fate chu that zêl ula, An zînga mi tu mah lal tawh suh se, Leiah hian khawpuite an din leh dah ang e. Engkim Lalpa thuchhuak chuan heti hian a ti: “Babulon chu ka bei ang a, A hming ka tibo daih ang a, Eng mah ka zuah lo vang. A tu leh fa chenin ka tiboral vek ang,” Lalpa thuchhuak chuan a ti. “Ka phiat chhe vek ang a, Sakuh chênna hmun leh chirhdûmah ka siam ang,” Engkim Lalpa thuchhuak chuan a ti. Engkim Lalpan hming chhâl meuhvin heti hian a ti: “Tih ka tum chu ka ti ang a, Rem ka ruat chu a tlang bawk ang. Asuria chu ka ram chhûngah ka lo titlâwm ang a, Ka tlângahte chuan ka chîl nek ang. A nghâwngkawl chu ka mite nghâwng ata ka hlîp ang a, Thil rit tak tak a phurhtîr ṭhinte chu ka la bo vang. Khawvêl pum tân hei hi ka tih tum chu a ni, Hnam tinrêng chungah ka kut ka lek tâk hi.” Engkim Lalpan tih a tum ta, Tu nge sûtsak thei ang? Hrem tûrin kut a lek ta a, Tu nge lo dang thei ang? Lal Ahaza thih kumin he thu hi a lo thleng a: Filistia mite u, An vuakna che u tiang a tliak ta a, hlim mai suh u, Rûl chu thi mah sela chawngkawr a lo chhuak ang, A tui aṭangte chuan rûlpui thlâwk thei a lo keu vang. Lalpan a mi, rethei chanhaite chu a châwm ang a, Mangangte chu thlamuang takin an hahchâwl ang. Nangni erawh chu ṭâmin in fate ka tihlum ang a, Thi bângte chu ka sât hlum ang. Filistia rama khaw tin hotute u, Chiau vawng vawng ula, In vaiin hlau hle rawh u. Hmâr lam aṭangin vaivut a lo khu e, Chau fâl awm lo sipai rual pal khûk chu. Filistia ram palaite chu Engtin nge kan chhân ang? “Zion chu Lalpa din a ni a, Tah chuan tihduhdah tuar, a mite chu an tlu lût ang,” Tiin a ni ang chu. Moab chungthu: Zan khat thilah Ar khua sawisak nek a ni a, Moab a tlâwm ta e. Zan khat thilah Kir khua sawisak nek a ni a, Moab a tlâwm ta e. Dibon mite, an pathian biakna hmunsângah Ṭap tûrin an chho va, Moab miten an lu an mêt kawlh a, Khabehmul an ziat fai a, Nebo leh Medeba khua chu an ṭah vawng vawng a ni. Kawtthlêrahte saiip puan an veng a, In chung zâwlahte leh tual zau laiah te, Lungchhe takin an ṭap tlawk tlawk mai a. Hesbon leh Elealeh mite thlabârin an au va, Jahaz aṭang pawhin an hre phâk hial a ni. Moab sipaite pawh thlaphâng takin an au va, An zâm zo ta. Moab vângin ka thinlung a na a, Zoar leh Eglath-selisia thleng thlengin An râl hlau chu an tlânchhia a, Ṭhenkhatte chu Luhit chhovah ṭap chungin an chho va, Ṭhenkhat phei chu Honoraim-ah an tlân a, Mangang takin an ṭap zêl a, Nimrim lui a kang ta a, A kam hnimte a uai zo ta. Chawrno leh tûr a awm lo va, Hnimhring rêng rêng a awm ta lo. Tuipuisuthlah ruam pêlin An neih zawng zawng an tlânchhiatpui. Moab ram kil tinah an au chuah chuah mai a, An au thâwm chuan Eglaim a thleng hial a, Beer-elim aṭang pawhin an ṭap thâwm chu an hria. Dibon khaw tuite chu thisenin a sen khuih mai, Chûng aia râpthlâk chu a la awm dâwn, Moab ram aṭanga râltlânte leh Ram chhûnga thi bângte tân sakeibaknei ka tîr ang. Thlalêra awm Sela khua aṭangin Moab hotute chuan berâmno chum Zion tlânga rorêltu chu an han pe a. A bu lâksak sava thlâwk ruai angin Arnon kaiah mumal nei lovin Moab hotute chu an tei an tei mai e. “Engtin nge kan awm ang, min ngaihtuah teh u, Chhûn ni sâa thingbuk hlim angin, In hlimah chuan kan lo châwl ang e. Râltlânte hi min lo humhim ula, Hmêlma kutah min hlân suh ang che u. Moab vâkvaite hi in zîngah chêng ila, Min tihboral tumtute lakah min hum rawh u. Min tihduhdahna hi a reh mai ang, Min rapbettute hi kan ram ata an kîr hunah, Davida thlah lalah kan neih ang a, Rinawm takin khawngaihna nên ro a rêl ang, Thil dik tihah a ṭuan a ṭha ang a, Dik taka rêl a tum ngei ang,” an han ti a. “Moab chapo ṭhinzia kan hria, An va chapo ṭhîn êm! An induh a, an inchhuang a, an intivei êm êm; Mahse, an uang mai mai a ni,” an lo ti ang. Moab mite chu ṭap ṭap teh se, Mi tin chiau vawng vawng mai rawh se, Kir-hareset grep pho vuai hlâwm chu Châkin rûm rûm rawh se. Hesbon huan a chhe ta a, Sibna grep huante chu a chul zo ta. Hnam tin hotuten chuta uain chu an rui ṭhîn a, An grep hruite chu Jazer a zâm thleng a, Khawchhak lamah thlalêr a thleng bawk a, Khawthlang lamah Tuipui Thi pawh a zâm kai bawk. Chuvângin, Jazer tân ka ṭap ang a, Sibna grep tân ka ṭap vak dâwn, Hesbon leh Elealeh tân ka mittui a luang a, Inbeihna hmun a nih avângin thei lawh tûrte a ram zo ta. Huanahte chuan lâwma hlim thâwm a reh ta a, Grep huanahte hlimin an au ta lo, Grep rap sâwr tûr an awm hek lo, Lâwma au thâwm a reh duk mai. Ṭingṭang ri kuai ruai angin Moab avângin ka thinlung pawh a hnîm, Kir-hareset chu ka lainat êm a ni. Moab mite, an Pathian biakna hmunsângah ṭawngṭai tûrin an inhmang chau zo ta. An tân a sâwt si lo. Chu chu Moab chungchânga Lalpa thu sawi tawh chu a ni. Lalpan tûnah a sawi leh ta. “Kum thumah, kum thum chhûng inhlawhfa angin, Moab hausakna chu a tâwp ang. Mi an tam hle na a, tlêm tê chauh thi bâng an awm ang a, chûngte pawh chu an chau hle ang,” tiin. Damaska chungthu: “Damaska chu khua pawh a ni tawh lo vang, Thil chhe awm khâwm mai a ni ang. Aroer khuate chu an rauhsan vek ang a, Ran rual tlatna hmun a ni ang. Thlamuang takin an bawk ang a, Tu man an hnawt lo vang. Efraim ramah kulh rêng a awm lo vang a, Damaska ram pawh a ṭiau vek ang, Suria rama la dam chhunte chu Israel-te ropuina chuai ta ang an ni ang,” Engkim Lalpa thuchhuak chuan a ti. “Chumi ni chuan Jakoba ropuina a ral ang a, A hausa a, mahse, a pachhe hle tawh dâwn a ni. Buh sengtuin Refaim phai buh an seng zawha, Lâk hmaih la awm pheuh pheuh ang hi an la ni ang. Oliv rah sâwi ṭilh tawh, A lêr sânga pahnih khat rah veu veu, A zâr sei deuh hmâwra pali panga la awm ang hi an la ni ang,” Israel-te Pathian, Lalpa thuchhuak chuan a ti. Chutih hunah chuan miten anmahni siamtu lam an hawi ang a, Israel Mi Thianghlima chu an thlîr ang. Kuta an siam maichâmte chu an ngaihsak lo vang a, anmahni siam Aseri-te leh rimtui hâlna maichâmte chu an melh duh tawh lo vang. Israel-te hmaa Hiv mite leh Amor mite khawpui rauhsan ang mai khân an khawpui kulh ṭha tak takte chu an tlânsan ang a, a ram hun a lo thleng ang. In chhandamtu Pathian chu in theihnghilh a, In himna lungpui chu in hre duh ta si lo. Mawi tak takin huan serh in siam zâwk a, Hnam dang pathian biak chu in thlang ta a. In phun tûk lawkah chuan In thil phunte nungin pâr mah sela, A rah lawh tûr a awm hauh lo vang, Buai leh na reh thei lo a lo thlen ni-ah chuan. Chei! Tuifinriat fâwn angin Hnam liante chu an lo ri hum hum a, Tuifâwn buan buan angin An che buan buan a ni. Chûng mite chu lo fâwn buan buan mah se, Lalpan a hau vang a, an reh duak ang, Tlângah thliin buhsi a chhêm lên leh, Thlipui chhêm lên vaivut ang hian an bo duak ang. Tlai lamah chuan an hlauhawm êm êm a, Zîng lamah chuan hlauh tûr an awm ta lo, Chu chu min rawk tumtu, min ram tumte chanvo tûr chu a ni. Ethiopia lui râlah, thlâwk sup sup tamna ram a awm. Chûng mite chuan Nail luidung rawn hrûtin, Phairuang lawnglêng hmangin palai an rawn tîr chhuak, “In ramah kîr rawh u, palai viak ṭhate u, Hnam chak leh thiltithei tak, Mi dawlhkai ṭha, sa mâm thel thawl, Hmânlai ata mi tin hlauhte awmna, Lui tam tak luan tlangna ramah chuan.” Khawvêla awm zawng zawng, leilung luahtute u, Tlângchhîpa puanzâr an zâr lo thlîr ula, Tawtawrâwt ri lo ngaithla ang che u. Lalpa chuan heti hian ka hnênah a ti: Buh seng, khaw lum lai dai tla ang leh, Chhûn lai ni sa ang hian, Ngawi rengin ka awmna aṭang hian ka rawn thlîr ang. Grep pâr a han rêm a, a lo rah a, Mahse, a hmin lawh tûr a awm hmaa sâm ang maiin, Hmêlmaten Ethiopia mite chu an rawn sâm ang. An ruangte chu tlângrama mu leh ramsa eiah an hnutchhiah ang, Nipui laiin mu rualin an tlân ang a, Thlasik laiin ramsate chuan an tlân thung ang. Hnam chak leh thiltithei tak, Mi dawlhkai ṭha, sa mâm thel thawl, Hmânlai ata mi tin hlauhte awmna, Lui tam tak luan tlangna ram aṭangin Engkim Lalpa hming chawia sak, A chênna tlâng Zion-ah chuan Thilpêk kengin an lo kal ang. Aigupta ram chungthu: Chhûm chak tak chunga chuangin Lalpa chuan Aigupta ram a pan. A hmaah chuan Aigupta ram milemte chu an khûr ang a, Aigupta mite chu an zâm zo vang. “Aigupta mite chu, Aigupta mite vêk ka beihtîr ang a, Unau an inbitum ang a, ṭhenawm an inbei ang. Khua leh khua te, bial leh bialte an indo vang. Aigupta mite chu ka tizâm vek ang a, An remruat sate chu ka tichingpen vek ang. Milem te, dawithiam te, mitthi thlûk thiam te, Aien thiamte an râwn chung ang. Aigupta mite chu hotu râwng tak kutah ka pe ang a, Lal sual takin an chungah ro a rêl ang,” Lalpa, Engkim Lalpa thuchhuak chuan a ti. Nail luipui chu a kang ang a, Li mawngte pawh a ro vek ang. Lui pêngte leh an tui kawngte a kang ang a, A uih vut vut bawk ang, Phairuang leh pumphîrte chu a vuai zo vang. Luipui kam chu a kawlh rel rul ang a, Thil phunte pawh a thi ang a, Thliin a lên bo vang. Sanghamantute chu rûmin an ṭap ang a, Nail luia nghakuai chiahte leh lên dêng ṭhînte chu An hlawhchham ang. La zai sîn kaia khuihtute chu an buai ang a, Puan zai sîn tah thiamte pawh an mangang ang. Puantah thiamte chu an chau vang a, Inhlawhfate an lungngai ang. Zoan khaw hruaitute chu an va â êm! Farawa mi fingte remruat pawh â tak a ni; ‘Hmânlai mi fingte leh lalte thu dawng chhâwngtu kan ni,’ tiin. Engtin nge Farawa hnênah an sawi theih ang? Khawi lamah nge i mi fingte an awm? Aigupta tân Engkim Lalpa thil tih tum hi, Sawi fiah sela, hrilh che rawh se. Zoan khaw hruaitute chu mi â an ni, Nof khaw hotute pawh bum an ni. An hruaituten an hruai bo ta. Lalpan an rilru ngaihtuahna a tichiai ta a, Aigupta mite chuan eng mah tihdik theih an nei lo; An pai an pai ta a, Zu rui ama luaka a tlu ang hi an ni. Milian leh mitê, hausa leh rethei, Tu mah Aigupta ram tân tih theih nei an awm lo. Chumi hun chuan Aigupta mite chu hmeichhia ang maia dawih an la ni ang; Engkim Lalpan anmahni hrem tûra kut a han lek chuan hlauvin an khûr zawih zawih ang. Engkim Lalpan Aigupta a hrem dân tûr a puahchah chu sawi rîk hlek an hriat pawhin Judai ram chu an hlau êm êm ang. Chumi hun chuan Aigupta ram khaw ngaah Hebrai ṭawng an hmang ang a, Engkim Lalpa hming chhâlin thu an tiam ṭhîn ang. Chûng khaw zînga pakhat chu, ‘Haheres’ an vuah ang. Chumi hun chuan Aigupta ram chhûngah Lalpa tân maichâm an siam ang a, Aigupta ramriah a tân lungphun a ding bawk ang. Chûng chu Aigupta ramah Engkim Lalpa a awm tih hriat nân leh chhinchhiah nân a ni; tihduhdah an niha, Lalpa an auh veleh chhantu tûr tîrin a hum ang a, a chhan chhuak ang. Lalpa chu Aigupta mite hnênah a inlan ang a, hâlral thilhlante leh inthawinate hlânin chibai an bûk ang a, Lalpa hnênah thute an tiam ang a, an hlen bawk ang. Lalpa chuan Aigupta mite chu a hrem ang a; mahse, a tidam leh nghâl bawk ang. Lalpa lam an hawi ang a, an ṭawngṭainate a chhâng ang a, a tidam tawh ang. Chumi hun chuan Aigupta ram aṭangin Asuria ram thlengin lamlian a kal ruah ang a, Asuria leh Aigupta mite chu an intlawh tawn chhên tawh ang. Pathian chibai an bûk tlâng bawk ang. Chumi hun chuan Israel chu Asuria leh Aigupta tlukpui a ni ang a, chûng hnam thumte chu khawvêl tân malsâwmna an ni ang. Engkim Lalpa chuan mal a sâwm ang a, “Ka mi, Aigupta mite, ka kut chhuak, nangni Asuria mite, ka thlan, nangni Israel mite u, mal ka sâwm ang che u,” a la ti ang. Asuria lal Sargona thupêk angin an sipai hotu ber chuan Filistia mite khua Asdod chu a bei a, a la ta a. Hemi hma kum thum kal ta khân Amoza fapa Isaia chu a pheikhawk phelha, a saiip puan ven chu hlîp tûrin Lalpan thu a pe a, chutiang chuan a ti a; saruakin, pheikhawk pawh bun lovin a awm ta a. Asdod khua an lâk kum chuan Lalpan, “Ka chhiahhlawh Isaia chu kum thum chhûng pheikhawk bun lo leh saruakin a awm a, hei hi Aigupta leh Ethiopia chungchâng chhinchhiahna leh entîrna a ni ang. Hetiang hian Asuria lal chuan Aigupta mi an mante leh Ethiopia mi sala an hruaite chu, naupang pawh, upa pawh, saruak leh pheikhawk bun lovin mawngtam lang rengin an kawi duah duah ang. Aigupta ram an mualpho hle dâwn a ni. Ethiopia lo ring viau va, Aigupta lo chhuang ṭhînte chu beidawngin an mangang hle ang. Chumi hun a lo thlen chuan hêng tuipui kama chêngte hian, “Kan lo rin viau, Asuria lal laka min chhan tûr leh min hum tûra kan lo belhte heti mai hi an nih tâk hi! Keini tehlul hi mahni maiin engtin nge kan inhum theih ang?” an ti ang. Babulon chungthu: Ṭhâwngaleivirin thlalêra hrût angin, Ram hlauhawm tak aṭangin chhiatna a lo thleng dâwn. Zêl râpthlâk tak mi hmuhtîr a, Rawktuin a rawn rawk bawrh bawrh a, Suamtuin a rawn suam buan buan a. Elam sipaite u, bawh ta che u, Media sipaite u, kulhte chu bei rawh u, Mi dang tithlabârtu chu ka timang dâwn a ni. Chumi avâng chuan ka khûr a, Nauvei na ang maiin ka kâwngte a na a, Ka kûn reng a, eng mah ka hre thei lo, Min râp êm a, eng mah ka hmu thei bawk hek lo. Ka lu a hai zo ta, hlauvin ka buai ta e, Ka nghahhlelh ṭhin tlai ni nêm chu Ka tân khurh hun a ni ta zâwk. Ruai an lo buatsaih a, ṭhut nân pherte an lo phah a, Eiin an in ta a. “Tho thuai teh u, hruaitute u, In phâwte kha peih fel teh u,” Lalpa chuan ka hnênah heti hian a ti: “Kal la, râl vêng tûr mi dah rawh, A hmuh apiang sawi zêl rawh se. Sakawr chungchuang, a kawpa lo kal te, Sabengtunga chuang te, Ngun takin en rawh se.” Râlvêngtu chu a au va, “Ka pu, vênbûk sângah ka ding reng a, A chhûn a zân mu hauh lovin ka thlîr reng e,” tiin. Sakawr chungchuang, a kawpa lo kalte, An lo thleng thut mai le! “Babulon khua a chhe ta, a chhe ta, An milem pathiante a tlu bung rem rum mai,” Râlvêngtu chuan a ti. Ka mi, Israel, hruiha chîl nek tawh hnute u, Israel-te Pathian, Engkim Lalpan chanchin min hrilh tâk hi, In hnênah pawh ka rawn puang ve a ni. Duma chungthu: Edom ram aṭangin min rawn au va, “Râlvêngtu, zân a rei tawh em?” Râlvêngtu chuan, “Khua a vâr dâwn tawh a, Zân a lo thleng leh mai ang, Hriat i duh chuan lo kal leh la, Min rawn zâwt leh ang che,” a lo ti a. Arabia chungthu: Dedan mi ran rual nêna Arabia ram phûla riakte chu, Tema khaw mite u, Tuihâlte tân tuisik han la ula, Râltlânte hi chaw nên lo hmuak rawh u. Khandaih te, khandaih phawi sa te, Thalngul kawih sa te, Indona râpthlâk tak ata te tlânchhia an ni. Lalpa chuan ka hnênah heti hian a ti: “Inhlawhfa kum chhiara kum khat a tlin veleh Kedar ropuina chu a tawp ang. Kedar mi huaisen, thal kâp mite chu, tlêm tê chauh thi bâng an awm ang,” Lalpa, Israel-te Pathian chuan a ti. Inlârna ruam chungthu: Eng in ti nge in chung zâwla in lâwn tâk ṭheuh? Khawpui chhûng a ri ta mur mur mai, An au chûl a, an sâhâwk ta, In mitthite khandaiha thah an ni lo va, Inkahnaa thi lah an ni hek lo. In hotute an tlânchhia a, Thal khat mah thlah lovin an man, An hmuh apiang an man che u, Thui tak tlânchhe tawh mah ula. Min kalsan vek teh u, Ka mi thi tate hi ka ṭah tlawk tlawk dâwn e, Min hnem pawh tum suh u. Inlârna ruamah hian manganna ni, Inrahbeh leh chiaina ni, Lalpa, Engkim Lalpan a rawn thlentîr tâk hi. Khaw kulh bang chu an chhu chhia a, Mangang au thâwm chuan tlâng tin a nghawr ta e. Elam sipaite chu thal bâwm paiin Sakawr tawlailîrah an lo chuang a, Kir mite chuan an phaw an phawrh. In ram phaizâwl ṭha laiah chuan, An tawlailîr a awm khup a, Sakawr chungchuang mite pawh Kulh kawngkhâr bulah an ding hmur mai. Judai ram inhumhimna an ṭhiat zo ta. Chumi hun chuan thuam dahna ata râlthuam in la chhuak a, Davida khaw kulh bang chim laite chu in en vek a, Dîl thlangta zâwka tui chu in chawi khâwm a. Jerusalem khuaa inte pawh in en vek a, a ṭhente chu kulh bang chhe thawm nân in ṭhiat a. Khaw kulh chhûngah tuikhuah in siam a; Dîl hlui aṭanga tui lo luang chhêk khâwm nân in hmang a. Hmasâng ata hetiang thil lo ruat lâwka, Tithlengtu chu in ngaihsak si lo. Chumi ni chuan, Lalpa, Engkim Lalpan ṭapa chiau vawng vawng tûr lehlu mêt kawlha, saiip puan sin tûrin a ti che u; Mahse, nuiin in hlim viau va, Bâwng leh berâm talhin ruai in ṭheh a, Zu in chên a, “I eiin i in ang u, Naktûkah chuan kan thi mai ang,” in ti. Engkim Lalpan ka hnênah ngei a sawi, “An dam chhûng chu he an thil sual tih avâng hian, Ka ngaidam hauh lo vang, Kei, Lalpa, Engkim Lalpan ka sawi tawh hi.” Lalpa, Engkim Lalpa chuan heti hian ka hnênah a ti: “Hawh teh, lal sum enkawltu Sebna hnênah va kal la, heti hian va ti rawh: ‘Tu nge maw i niha, i thlân tûr i ker vei le? Tlângpang lungah an zalhna tûr che i ker vei a. Ngai teh, mi pawimawh tak ni mah la, Lalpa chuan a lên lawp ang che a, a vawrh daih ang che. Bâwl angin a la ang che a, ram zau takah a lum nek ang che; tah chuan, i chhuan êm êm, i tawlailîr bulah i thi ang; i pu chhûngte i tizak hle dâwn a ni. I hna ata ka bân ang che a, hotu i nihna ata i tla ang. Chumi hun chuan ka chhiahhlawh, Eliakima, Hilkia fapa chu, ka ko vang a, i kawrfual ropui chu ka hâktîr ang a, i kâwnghrên pawh ka hrêntîr ang. I thuneihna zawng zawng a hnênah ka hlân ang a, Jerusalem-a chêngte leh Judai rama mite tân pa a ni ang. Davida chhûngte chabi chu a kutah ka dah ang a, a hawn tawh chu tu man an khâr lo vang a, a khâr tawh chu tu man an hawng hek lo vang. Leichâra ban angin nghet takin ka phun ang a, a chhûngte tân a chhuanawm êm êm ang. A laichînte leh a tu leh fate chuan an bêl ang a, an chhûngkaw mamawh zawng zawng, bungbêl leh no chenin amahah a innghat vek ang.’ ” Engkim Lalpa thuchhuak chuan heti hian a ti: “Chutih hunah chuan leichâra nghet taka ban phun chu a nghîng ang a, a phawng ang. Amah bêltu zawng zawng tâwpna a ni ang,” tiin. Tura khaw chungthu: Tarsis lawngpute u, chiau vawng vawng rawh u, Inte chu lawngchawlhna chenin a chhe zo ta, Kupra thliarkâr in thlen hunah chauh chu chu in hria. Tuifinriat kama awmte u, ngawi ṭhiap rawh u, Sidon khuaa sumdâwngte u, Tuipui zau tak kânin in sumdâwng a; Sihor phai buh, Nail lui kama thar chu in zu lei a, ram dangahte in hralh leh a, Aw, Sidon khawpui, i mualpho ta e, Tuifinriat thûk tak chuan “Nau ka vei ngai lo va, ka hring ngai hek lo, Fanu fapa ka châwm lian bawk hek lo,” A tihsan tâk che hi. Tura chhiat tâk thu hi Aigupta miten an hriatin pawi an ti a, Tuifinriat kama mite u, chiau vawng vawngin Tarsis lamah kal kai rawh u. Hei hi maw hmânlai ata khaw hlun, Khaw inchhuang tak ṭhîn chu? Tuipui râla khaw thar din tûr, He khua aṭang hian maw chhuak ṭhîn? Lallukhum, mite an khumtîr a, An sumdâwng mite chu mi ropui tak tak an ni a, An dâwrkaite ram tin ngaihsân an ni bawk a. Tura chunga thil thleng ta chu tu tih nge ni? Engkim Lalpan a tih a ni, An chhuan êm êm an ropuina a titâwp a, An mi zahawmte chu a timualpho ta e. Nail lui kam angin in ram chu let ula, Tarsis mite u, lawng chawlhna tûr in nei ta lo. Lalpan tuifinriat chungah pawh kut a lek a, Lalram tam tak a sâwi chhe ta, Kanan mite hmunpui Nuai bo tûrin Lalpan thu a pe e. Sidon nula thianghlim, mi sawisak hnu, I uang tawh ngai lo vang. Kupra thliarkâr lamah tlân vei mah la, I him chuang hauh lo vang. Tura khua, ram sakawlh tlat nâna siamtu chu, Asuria ni lovin Babulon hi a ni; khaw hual nân in sâng an sa a, a kulhte chu an ṭhiat a, khua chu a chim chhe ta. Tarsis lawngpute u, chiau vawng vawng rawh u, In hmunpui chu a chhiat tâk hi. Chutih hunah chuan lal pakhat lal hun chhûng, kum sawmsarih chhûng chu, Tura khua hi tu man an hre lo vang. Kum sawmsarih a ral hnuah Tura chu he hlaa nawhchizuar ang hi a ni ang: Tu man an hriat tawh loh, nang nawhchizuar, Perhkhuang kengin khua fang leh la, Ṭingṭang perhin hla mawi tak tak sa rawh, An hriat leh theih nân che. Kum sawmsarih a ral hnu chuan Lalpan Tura khua chu a kan ang a, a tih ngai a tihtîr leh ang; khawvêl ram tinah a inzuar leh ang. A deh chhuah chu Lalpa tâna hlan a ni ang. A thukru lo vang a, a kawl ru hek lo vang. Lalpa hmaa chêngten hnianghnâra ei tûr leh silhfên ṭha ṭha lei nân an hmang ang. Lalpan lei hi a tiṭiau dâwn, a ram dêr ang, A khaikhup thawk ang a, A chhûnga chêngte chu a theh chhuak vek bawk ang. Mi narân leh puithiam, chhiahhlawh leh a pu, Chhiahhlawhnu leh a pi, thil leitu leh hralhtu, Pûktîrtu leh pûktu, battîrtu leh batu, An tuar a inang vek bawk ang. Lei chu bun ruah a ni ang a, A ruak vek ang. He thu hi Lalpa sawi a ni. Lei chuan a sûn ang a, a nguai ruai ang, Khawvêl chu lungngaiin a chau vang a, Lei leh vân pawh a dul ruih ang. A chhûnga chêngte chuan lei hi an tibawrhbâng ta a, Dân chu an bawhchhia a, thupêk an awih lo va, Kumkhaw thuthlung an pawisa lo. Chuvângin, leiin ânchhia a dawng ta a, A chhûnga chêngte chuan sual man an têl, Leia mite chu an kâng chiam a, Thi bâng an tlêm hle mai. Grep hrui a vuai zo va, Uain pawh a vâng tial tial, Hlim taka awm ṭhînte an ngui zo ta. Benchhek bênga an hlim leh lâm, Au thâwm a dai zo ta. Perhkhuang perh ri hriat tûr a awm ta lo. Zaiin uain an in tawh lo va, Zu thlum an in pawhin kha an ti zêl, Khawpui chu a chhiain a buai zo ta, In zawng zawng chu an kalh vek a, luh theih a ni lo ve. Mangang takin kawtthlêrahte an au, Uain in tûr a awm tâk loh avângin Hlimna tûr rêng a awm ta lo, Lei lâwmna pawh a bo zo ta. Khawpuite chu a chhe zo va, Kulh kawngkhârte pawh chhut chhiat a ni. A rah an sâwi tlâk hnu oliv kûng leh, An lawh nawn tawh grep hrui ang hi Khawvêla chêng hnam tin an la ni dâwn. La damte chu lâwmin an au vang a, Khawthlang aṭangin Lalpa ropuizia chu an aupui ang, Khawchhak lamah pawh Lalpa an chawimawi ang a, Israel-te Pathian, Lalpa hming chu, Tuipui kama chêngte pawhin an fak bawk ang. Kâwlkil aṭangin, “Mi Dika chu chawimawi rawh u,” Ti-a hla sa kan hre bawk ang. Ka chau ta, ka chau ta, ka chung a va pik êm! Min phattu chuan min phat zêl e, Min phat dân pawh a râpthlâk tial tial mai. Lei mite u, thil râpthlâk tak a lo thleng dâwn, Leilâwta tlâk leh fala delh in hmabâk e. Thil râpthlâk hlauva tlânchhia chu, Leilâwtah an tla ang, Leilâwt ata lo vâk chhuak chu falin a delh dâwn si. Vân tukverh inhawngah ruahpui a lo sûr chiam ang a, Lei nghahchhan pawh a nghîng bawk ang. Lei hi a khi ang a, a kak phawk ang, A phel ruah bawk ang a, a nghîng dur dur ang. Zu rui angin a thle a thle ang a, Thlâm sâwi del del ang hi a ni bawk ang. Suahsualna chu a nasa êm a, A tlûk phah ang a, a tho leh tawh lo vang. Chutih hunah chuan, Chung lam thiltihtheihnate leh Leia lalte Lalpan a hrem dâwn a ni. Tângho khuarkhuruma dah khâwm angin Lalhote chu a khung khâwm ang a, Nakin hnua hrem tûrin a tântîr ang. Thla a zak ang a, Ni a zak bawk ang, Zion tlângah, Jerusalem-ah chuan Engkim Lalpa chu lalah a ṭhu ang a, Upate chuan a ropuizia an hmu ṭhîn ang. Aw Lalpa, ka Pathian i ni, I hming chawimawiin ka fak ang che, Thil mak tam tak i ti ṭhîn a, Hmânlai aṭanga i remruatte Rinawm takin i tihlawhtling ṭhîn. Khawpuite chu i tichhia a, A kulhte chu i tichim a, Hnam dang khawpuite chu a ram ang a, Sak ṭhat a ni tawh lo vang. Tichuan, hnam chak tak takten an fak ang che a, Hnam râwng tak tak khuate pawhin an ṭih ang che. Rethei leh ṭanpui ngaite tân kulh i ni a, An mangang chu an lo tlân ṭhîn, Thlipui lakah i lo hum a, Chhûn ni sâah i daihlimah an biru ṭhîn. Thlipuiin bangte a nem sawk sawk ang hian Mi nunrâwngten an rawn bei ṭhîn. Ram ro taka mei sa ang hi an ni. Mahse, nang chuan hnam dangte thâwm i tidai a, Chhûm zîngin khaw lum a tidai ta ang hian. He tlângah hian Engkim Lalpan mi zawng zawng tân ruai tui tak a ṭheh dâwn, uain thlum ṭha ṭha, a tuitlingte nên, sa tui tui, a thlîngte nên ruai a buatsaih dâwn a ni. Ka tlângah hian mi zawng zawng tuamtu, hnam tin khuh ṭhîntu, lungngaihna chu, a hlîp daih ang. Lalpa Pathian chuan thihna chu a hneh ang a, a mite mittui chu a hru hul ang; miten khawvêl puma a mite an hnehchhiahna chu a tireh bawk ang; Lalpan chu chu a sawi tawh hi. Chumi hun chuan “En teh u, hei hi kan Pathian chu a ni. Amah kan ring a, min rawn chhan ta a nih hi. Ani hi Lalpa chu a ni a, amah kan ring a, min chhandam avângin i hlim ang u,” an la ti ang. Lalpan Zion tlâng hi a hum ang a, Moab erawh chu buhpâwl, êk khura an chîl pil ang hian a chîl pil ang. Tui hleuh tum angin an bân an phar ang a; mahse, Lalpan an chapona chu a tihhniamsak ang a, an kut themthiamnate pawh a tihbosak bawk ang. An kulh bang sâng tak takte chu a tichim ang a, lei vaivutah a let rum ang. Chumi ni chuan Judai ramah he hla hi an sa ang: “Khawpui rinawm takah kan chêng a, Kan inhum nân kulh bang min siamsak hi. Kulh kawngkhârte chu hawng ula, Hnam rinawmte lo lût rawh se, Thil dik ti ṭhîn hnam chu. Nghet taka nangmaha innghatte chu Thlamuang takin i awmtîr a. Lalpa chu kumkhuain ring tlat rawh u, Lalpa chu chatuan himna lungpui a ni. Sâng taka awmte chu a hnûk thla a, An chênna khaw rinawmte a tichhia a, An kulh bangte vaivutah a chantîr ṭhîn. Tah chuan baihvaite pawh duh duhin an kal a, An duh duhnaah chuan an vâk. Mi dikte kawng i siam nuam a, An kalna chu i titluang ṭhîn. A ni, Lalpa, i duhzâwng kawng zawngin ka nghâk a che, I hming hriat reng hi ka duhzâwng ber a ni. Zân a lo ni a, ka ngai êm êm che a, A ni, ka thlarau hian a zawng chiam ṭhîn a che, Lei chunga ro i rêl hun chuan A chhûnga awmte chuan rorêlna dik an hre tawh ang. Mi sualte chuan khawngaih hlawh mah sela, Thil dik tih zir an tum chuang lo, Dikna ramah pawh hian thil sual an ti zêl a, Lalpa ropuina chu an hmu duh lo. I kut i lek pawhin an hmu duh lo, I mite hi i duat ṭhinzia hmuhtîr ang che. Hmu se, mualpho rawh se, I hmêlmate tâna i buatsaih meiah chuan kâng ral rawh se. Lalpa, râlmuanna min pe a, Kan thil tih vete pawh nangma min tihsak vek a ni, Aw Lalpa, kan Pathian, lal dang kan chungah hian an lal ṭhîn a, Mahse, nang chauh hi kan lal chu i ni. An thi mai a, an nung leh dâwn tawh lo, An thlarau pawh a tho leh tawh lo vang. Anni chu i hrem a, hriat zui tûr an awm lo, Lalpa, kan hnam min tipung a, min tilian a, Kan ramrite min zauhsak a, Nangmah i inchawimawi ta zâwk a ni. Lalpa, an manganin an pan che a, Anni chu i hrem a; mahse, an au lawm lawm ṭhîn che. Hmeichhe nau vei na tuar rûm rûm angin, Lalpa, i hmaah kan awm hi. Nau pai angin kan vei na a, Eng mah kan hring si lo; Kan ram pawh kan chhan thei lo va, Tih theih eng mah kan nei lo. I mi, thi tate chu an nung leh ang a, An ruangte chu a tho leh ang. Vaivuta mu tawhte an lo ṭhangharh ang a, Hlim takin an zai ang. Hnah vuai, daifîmin a tiharh leh ang hian Thi tawhte pawh Lalpan a rawn tiharh leh ang.” Ka mite u, in pindan chhûngrila lûtin, Kawng inkhâr khum ula, Pathian thinur a kian hma chu lo biru rih teh u. A chênna vân ata Lalpa a lo kal ang a, An sual avângin lei mite chu a rawn hrem ang. Tual thah rûkte an puang ang a, An ruangte pawh leiin a khuh bo tawh lo vang. Chumi hun chuan Lalpan a khandaih lian pui, hriam tak chu tuipuia Leviathan, rûlpui tlânchhia, Dragon tleng nghuat nghuat hrem nân a lek ang a, a that ang. Chumi hun chuan Lalpan a grep huan duhawm tak thu chu heti hian a sawi ang: “Kei Lalpa hi a vêngtu ka ni a, Eng lai pawhin tui ka leih a, Tu man an khawih loh nân chhûn leh zân ka vêng a ni. A chungah chuan ka thinur tawh lo va, Thlawh fai tûr hlîng leh hlohar lo awm mah se, Ka hâl ral zêl bawk ang. An hmêlmaten ka vên an duh ve chuan, Min rawn rem sela, Kei hi min rawn rem mai rawh se. Engtik hunah emaw Jakoba thlahte chuan zung an thlâk leh ang a, Israel chu a chawrnovin a pâr leh ang. Leiah an rah a khat vek ang. Israel-te chu anmahni vawtu a vuak tlukin a vaw lo va, Anmahni thattute a that tam zâwk. Saltâng tûrin a tîr chhuak a, Khawchhak thli hrâng a lâktîr ta. Hnam dang maichâm lungte, Chinai lung ang maiin an râwt dip a, Aseri lim leh inthawina lung an paih fai vek hunah, Israel-te sual chu ngaihdam a ni ve ang. Khawpui kulh neite chu a chim zo ta, Khaw ram a ni ta a, thlalêr ang mai a ni. Tah chuan ran rualte an tla a, An riahna hmun, an tâl vêlna a lo ni ta. Thingzârte chu rovin a tliak ta a, Thingtuah atân hmeichhiaten an fawm ta, Eng mah hre hlei thei lo hnam an nih hi, An siamtu chuan a khawngaih lo vang a, Anmahni dintu chuan a lainat hek lo vang.” Chumi hunah chuan Lalpan Eufretis lui aṭanga Aigupta lui thlengin, buh seng angin a mi, Israel-te chu pakhat khatin a lâwr khâwm ang. Chumi hun chuan tawtawrâwt lian pui an hâm ang a, Asuria rama pil bote leh Aigupta-a hnawh thlâkte chu an lo kîr ang a, Jerusalem tlâng thianghlimah chuan Lalpa chibai an bûk ang. Ruam ram ṭha tak bula awm, Efraim rui thal dêr chung chu a pik e. Zu rui pârṭhi awrh a vuai angin, An chhuan khawpui, lallukhum mawi chu, A chuai mai dâwn. Anmahni bei tûrin mi chak leh huai Lalpan a hual tawh a, Thli hrâng lo thawk, rial tla chum chum, Ruahpuivânâwn lo sûr, tui lian bulh bulh angin, An ram a rawn nuai nek dâwn e. Efraim hotu rui bûr, chapo takte chu, A rawn raphrual zêk ang. Ruam ram ṭha tak bula awm ropui leh mawi tak chul ta chu, Nipui a thâwk hlima theipui lo hmin hmasa hmutuin, A lova a hmawm nghâl mai ang hi a la ni dâwn. Chumi hun chuan Engkim Lalpa ngei chu, Thi bâng la awm, a mite tân Lallukhum ropui leh diar mawi tak a ni ang. Rorêltu chu rorêl thiamna a pe ang a, Khaw vêngtu chu râl dang tûra huaina a pe bawk ang. Zâwlnei leh puithiamte meuh pawh, Uain ruiin an pai an pai tâk saw, Uain leh rakzu an in tam a, An rui buai a, an thle an thle a ni. Zâwlneite chu inlârna an hmuh Dawngsawng thei lo khawpin an rui a. Puithiamte pawh an hnêna thu an rawn thlen Rêl thei lovin an rui bawk. Dawhkânahte an luak niai nuai a, Bawlhhlawh hlîrin a khat. “Hriat tûr tu nge zirtîr a tum veia, A thu tu tân nge ngaihthlâk tham awm ang? Hnute nghei tîr naupangchhe tân em ni? Thupêkte chu a hawrawp mal malin, A tlar tê tê, eng emaw hlek hlek Min zirtîr a tum hi!” an ti. Hnam dang ṭawng, lam rîk har tak hmangin Ka mite hi Lalpan thu a hrilh ang. Hahdam taka châwl der der tûrin a sâwm ṭhîn a, Mahse, an ngaithla duh si lo. Chuvângin, Lalpa thu chu an tân, A hawrawp mal malin, a tlar tê têin, Eng emaw hlek hlek chauh a lo thleng ang. Tichuan, in kalkawngah in tlu ang a, Hliam in tuar ang a, man in ni ang, An hruai bo daih ang che u. Jerusalem-a chêng, Ka mite chunga rorêltu chapote u, Lalpa thu hi ngaithla rawh u: “Thihna nên thu kan thlung tawh a, Mitthi khua nên thu kan intiam tawh e, Hremna luipui lo lian mah se, Min chîm ve tawp lo vang. Inphen nân bumna kan hmang a, Inhumhim nân dâwt kan ruai ta,” in ti vei a. Chuvângin, Lalpa Pathian chuan heti hian a ti: Ngai teh, Zion-ah chuan lung ka phûm ta, Lung him rinawm tak chu, A kil lung ṭangkai leh hlu tak chu ka dah ta, A ring ngam chu an nghîng lo vang. A tihngîlna hrui atân rorêlna dik leh A sahâl khai atân dikna ka hmang a ni. Dâwta an inhumhimna chu rialin a chhu chhia ang, An inphenna pawh chu tuilianin a la ang. Thihna nêna in thuthlung chu sût a ni ang a, Mitthi khua nêna in thutiam pawh chu ṭhiat a ni ang. Hremna lui lo lian chuan, Nangni pawh a chîm pil ngei ang che u. A lo thlen chuan a la ngei dâwn si che u a, A tûk têlin a lo liam zêl ang a, Chhûn zân zawmin a lian reng dâwn si a, A thu awmzia hi hria ula, In va thlaphâng dâwn êm! ‘Thluanna tham loh khum tawi lutuk, Inkhuh dâwna puan tawngchham lutuk’ tih ang hi a ni. Perazim tlâng chungah leh Gibeon ram ruama a che ang khân, A thil tih tum mak tak tak leh A thawh tum ril tak tak chu Lalpan a rawn ti ang. Min nuihzat teh suh u, Chutilo zawng, in chan a chau sauh ang, Lalpa, Engkim Lalpan ram pum tihchhiat a tum a ni, Thu a peih fel tawh tih ka hria e. Ka aw hi hria ula, beng chhi rawh u, Ka thu sawi hi ngaithla ula, ngaihven rawh u, Lo neitu chuan thlai chin nân lei letin A rît phut kumkhua dâwn em ni? Lei chu a han chûl rual a, Par di a han theh a, Zîra a chîng ta mai a ni lom ni? A tlarin huit a chîng a, A hmun tûrah barli a theh; Vau hrûlah mîm a chîng bawk ṭhîn. Pathianin an tih tûr a hrilh a, A zirtîr ṭhîn a ni. Talhtum lianin zîra an vaw lo va, Tawlailîrin pardi an chîl ngai bawk hek lo. Talhfiak hmangin zîra an vaw ṭil a, Hmawlhte nên pardi an khâwng bawk ṭhîn. A fang keh sawm khawpin huit chu an chîl lo va, Keh lo tâwka sakawr-tawlailîr chiltîr dân an thiam. Hêng finna hi Engkim Lalpa pêk vek a ni, Pathian thil rêlte chu a fing êm êm a, A puitling ngei ngei ṭhîn. Aw, Jerusalem, Jerusalem, Pathian maichâm, Davida awmhmun khuarna khawpui! I va khawngaihthlâk êm! Kum hnih khat chu lo veiin, Kûtte lo hmang leh pawh ni ula. Tah chuan, Jerusalem chu ka rawn hual ang, Ṭapin an chiau vawng vawng ang, Khuaah thisen a luang ang a, ‘Pathian maichâm’ ang hian a sen hnuang ang. Bei tûr chein ka hual tlat dâwn a che, I vêlin lei ka chhûng pâwng ang a, Palin ka theu hnan ang che. I tlu zangthal dêr ang a, Vaivutin a khuh ang che a, Aikaih thiamte an phun ser ser angin Vaivut aṭangin i phun se se chauh vang. Ram beitu, hnam dang rualte chu, Vaivut dip ang maiin an darh ang a, Mi râwng pui puite pawh thli len buhsi angin, Len bo an ni bawk ang. Khawpui leh lîrnghîng nên, thâwm nasa tak, Thlipui leh ṭhâwngaleivir nên, Kan ral hmang mei alh hluah hluah nên chuan, Engkim Lalpa chu a lo thawk ang. Jerusalem beitu hnam dang sipai rualte, A kulh huala tihrehawmtute chu Zâna thil hmuh, mumang ang hian an ral duak ang. Rilṭâm takin mumang lamah chaw a lo ei a, A lo harh a, a puar si lo ang leh, Tuihâl takin mumang lamah tui a lo ina, A lo harh a, a tui a la hâl fo ang hi, Zion tlâng hualtu, hnam dang sipaite chu an la ni ang. A ngaihna hre lovin hawihai ula, In mitte pawh tidel law law rawh u, Uain in si lovin rui hnêp ula, Rakzu tem si lovin pai pai rawh u. Lalpan mutchhuahna thliin a chhêmtîr che u a, Zâwlneite mit a tuamsak a, Hmutute lu a khuhsak ta a ni. Nangni tân zawng hêng inlârna thute hi lehkhabu châr tlat chhûnga thu ang hi a ni. Lehkha chhiar thiam hnênah, ‘Han chhiar teh,’ tiin an pe a, anin, ‘Châr tlat a ni a, ka chhiar thei lo,’ a lo ti a. Lehkha chhiar thiam lo hnênah, ‘Han chhiar hrâm teh,’ an tih lahin, ‘Lehkha ka chhiar thiam hlei nêm,’ a lo ti bawk si a. Lalpa chuan heti hian a ti: “He mite hian an kâ chauhvin min hnaih ṭhîn a, An hmui chauhvin min chawimawi a, Thinlung tak erawh chuan min hlat si. Mihring thupêk bel taka vawn chauh hi, Min ṭih dân chu a ni. He mite chungah hian rin loh tak thil, Thil mak danglam tak chu ka ti ang a, An mi fingte finna a bo vang a, An mi thiamte thiamna a reh tawh ang. ” Lalpa laka an thil tih tum thuptute chu An va la chawh dâwn êm! A rûkin thil an ti emaw tiin “Tu nge hmu ang a, tu nge hria ang?” an ti. A letling zâwngin thu an la a ni, Bellei hian a vawtu a tluk thei dâwn em ni? Thil siam hian a siamtu hnênah, “I siam ka ni lo ve,” a ti thei dâwn em ni? Thil din pawh chuan a dintu chu, “I va â êm!” a ti thei dâwn em ni? Rei lo tê-ah Lebanon ngaw chu lo ṭha a ni ang a, Lo ṭha pawh chu ngawah a chang thuai ang. Chumi hun chuan bengngawngte chuan Lehkha Thu chhiar ri an hria ang a, Thim zînga awm mitdelte chu An mit a meng ang a, an hmu thei ang. Retheite chu Lalpa -ah chuan an lâwm ang a, Pachhiate pawh Israel Mi Thianghlima hmaah an hlim bawk ang. Mi nunrâwngte an ral ang a, Pathian hmusittute an boral ang. Thil sual tih tum zawng zawng pawh tihbo an ni bawk ang. Mi dang mi suala puh chînga, Rorêltute rêl sualtîra, Thu lawilova mi dik tuartîrtute chu An ral vek ang. Abrahama chhantu chuan Jakoba thlahte chungthu hetiang hian a sawi: Jakoba chu a mualpho tawh ngai lo vang a, A hmêl a dâng tawh ngai hek lo vang. Ka pêk, an fate chu, an zînga awm an hmuh hun chuan, Ka hming an chawimawi tawh ang a, Jakoba Mi Thianghlima chu an zah ang a, Israel-te Pathian chu an ṭih bawk ang. Thlarau lama bote chuan an hrethiam tawh ang a, Phunnawi chîngte pawhin an zir châk hle tawh ang. Lalpa thuchhuak chuan heti hian a ti: “Hel hmang fate tak hi aw! Ka remruat loh angin thil an ti a, Ka thu lovin an inbe rem a, An sual chungah sual an belh ta. Min râwn lovin Aigupta-ah an chhuk thla a, Farawa chu inhumhim nân phen an tum a, Aigupta hlim chu bêl tûrin an kal ta. Farawa hum nih chu an zahna tûr a la ni ang a, Aigupta hlim an bêl chu an mualphona a la ni ang. An hotute Zoan an thleng thla tawh, An palaiten Hannes an thleng ta e. An hnemhnânpui loh tûr hnam avâng chuan zah an la tuar ang. Ṭanpui thei lo, chhenfakawm lote avâng chuan Zakin an mualpho vang.” Chhim lam ramsa chungthu: Ram hrehawm leh hlauhawm Sakeibakneinu leh a pa chênna, Rûlngân leh rûl thlâwk thei tamna ramah An rote chu sabengtung an phurhtîr a, An sumte chu sanghâwngsei thlukvûmah an hlâng, Hnemhnânpui loh tûr hnam an pe dâwn a ni. Aigupta chu eng mah a ni lo va, Ṭanpui theih rêng a nei lo va, Chuvângin, “Rulpui awm hle hle-i,” ka ti mai. Kal la, an hmuh ngeiah chûng chu ziakna phêkah ziak rawh: Kumkhuaa hriat reng tûrin lehkhabu-ah ziak lût ang che. Hel chîng hnam an ni a, Fa dawthei tak an ni, Lalpa thupek ngaithla duh lo fa an nih hi. Hmutute hnênah, “Hmu vet teh suh u,” an ti a, Zâwlneite chu, “In hmuh ang thil dikte chu min hrilh suh u, Ngaihthlâk nuam min hrilh zâwk ula, Ngaihngam taka kan awm theihna tûrin bumna thu min hrilh zâwk rawh u; Min kiansan ula, insaseng daih rawh u, Israel Mi Thianghlima thu hi sawi tei vet suh u,” an ti. Chuvângin, Israel Mi Thianghlima chuan heti hian a ti: “Ka thu in hnâwl a. Tharum thawha vervêk taka tih hi in thlang ta a, Rin chhan berah in neih tâk hi. He thil sual hi in tih avângin Lungbang sâng tak, khi chat, chim ṭêp, Puar pup, chim phut tûr ang hi in ni ang. Dîm hlek lova hlumbêl vuak keh, Meiling chawina khawpa lampei hlai tâwk, Tui thâlna pawh awm lo khawpa, Vuak sawm ang hi in ni ngei ang. Lalpa, Engkim Lalpa, Israel Mi Thianghlima chuan heti hian a ti: “Lo kîr ula, awm hle hle mai rawh u; Tichuan, chhandam in ni ang a, Thlaphâng lovin ring mai ula, Chu chu in chakna tûr a ni.” Mahse, in duh si lo. ‘Kan duh lo ve, sakawrah kan chuang ang,’ in ti vei a; Chuang tak ula, tlânchhe rawh u, ‘Sakawr tlân chak chungah kan chuang mai ang’ in ti vei maw? Chak zâwk daihin an ûm dâwn a che u. Pakhat hrâwkah sâng rual in tlânchhia ang, Panga lakah phei chuan in vai tlân ang. Tlâng chhîp pâwng laia puanzâr in zâr te chu In tlânchhiatsan vek ang. Nimahsela, Lalpan a khawngaihin a la nghâk a che u, A ngilneihna a la târlang reng a ni. Lalpan dik takin ro a rêl ṭhîn, Amah nghâktute chu an nihlawh e. Nangni, Zion tlânga mi, Jerusalem khuaa chêngte u, in ṭap leh tawh lo vang; ṭanpui dîla in au thâwm a hriat chuan a lainat ngei ang che u a, a chhâng ngei ang che u. Lalpa chuan hrehawmna leh manganna tuartîr che u mah sela, in zirtîrtu chu a hla lo vang a, in hmuh phâk rengah a awm ang. Ding lamah emaw, vei lamah emaw in pên dâwn chuan, “Hei hi kawng dik chu a ni, tah hian kal rawh u,” in hnungah a rawn ti zêl ang. In tangkarua tuam leh rangkachaka luan milem chherte chu bawlhhlawh in ti ang a, ‘tenawm’ tiin i paih darh ang a, “Daih mai a!” in la ti ang. Lova in thlai chi thlâk chu ruah a nantîr ang a, ṭha tak tak hlirin a rah tiar tuar ang. Chumi hun chuan in ran rualte chu hnimhring awm duainaah an tla ang a, bâwngpa leh sabengtung, leileta in chhawrte chuan buhpâwl then fai, chi al an tlân ang. In hmêlmate sâm an niha, an kulhte a chim zawh hun chuan tlâng sângah leh mual pâwnga tui luannaahte chuan tui a luang dur dur ang. A mite vuakna hliam a tuamsak a, an pemte a tihdam hunah chuan thla chu ni tlukin a êng ang a, ni pawh a lêt sarihin, ni sarih chhûnga a êng tlukin a êng ang. Hla tak aṭang pawhin a hmuh theih, en rû, Lalpa thiltihtheihna a lo lan saw, A thinur mei a khu chho ngun ngun a, Lungawi lovin a hnûr nasa mai. A thuchhuak chu meialh kan ral hmang ang a ni. A thaw chhuak chu lui lian luang liam, Nghâwng thleng zawk ang mai hi a ni. Hnam tin thliarin a tichhia ang, An kâah chuan sakawr lakam a barh ang a, A hruai bo vang. Nangni zawng, kût thianghlim hman tirh zân angin lâwmin in zai ang a; Israel-te lungpui, Lalpa tlâng pan, baja awih, An kal theuh theuh ang hian hlim takin in awm ang. Lalpa chuan a aw ropui tak chu a chhuah ang a, a kutthlâk chu mi tinin an hmu ang. A thinur meialh chu kan ral hmang mei alh puat puat ang leh thlipui leh ruahpuivânâwn sûr leh rial tla dur dur angin a lo thleng ang. Asuri-hovin Lalpa aw an hriat chuan hlauvin an khûr ang a, a talhfiak chu an tuar ang. Châwl lêk lova Lalpan a talhfiak a vaia Asuria a hlap apiangin a mite chuan benchhek leh perkhuangin an lo rem ang. Asuria chungah kut a thlâk dâwn a ni. Asuria lal rawhna tûr meipui nasa tak chu chheh thûr a ni daih tawh a, thing tam tak an rawlh bawk; A tikâng tûrin Lalpa chuan lui anga luang kât alh a thaw chhuak ang. Ṭanpuina dîl tûra Aigupta ram pan thla, Sakawr chakna ringtute tak hi aw! Sakawr-tawlailîr an ngah a, An sakawr chungchuangte âwm a khauh avângin an ring a ni. Israel Mi Thianghlima lam an hawi duh lo va, Lalpa lah an râwn duh hek lo. Ani chuan rem a hria a, thil ṭha lo pawh thlentîr a thiam, A thu a sût dâwn lo. Thil sual titute chungah chuan a che ang a, Anmahni ṭanpuitute chungah a che bawk ang. Aigupta mite hi zawng mihring mai an ni, Pathian an ni lo ve. An sakawrte pawh sa mai an ni, Thlarau an ni lo ve. Lalpan a kut a lek hun chuan, Ṭanpuitu chu a pai ang a, A ṭanpuia pawh chu a tlu bawk ang, An pahnihin an ral dûn ang. Lalpan ka hnênah heti hian a ti: Sakeibaknei sa hauh ngur chu, Berâmpu rual pung khâwm au ri leh thâwm chuan A tizâm miah lo va, a pawisa hlek lo ang hian, Engkim Lalpa, Zion tlânga lo chhuk chuan A tlângte chu a rawn hauh vang. Savate chu an bu vênga an thlâwk ang hian, Engkim Lalpan Jerusalem khua chu a vêng ang a, A vêng himin a chhan tlat ang; a zuah ang a, a chhan him ang. Aw Israel mite u, a lakah in hel ruh hle na a, Hawi kîr leh rawh u. Chumi hun chuan tu pawhin an sual phah ṭhin, Tangkarua leh rangkachak milem, An kutchhuakte chu, an paih ang. Asuria chu mihring khandaih lovin sah thlûk a ni ang a, Mihring lek loh khandaihin a boral ang. Tlânchhe mah se, tlangvâlte chu salah an man tho vang. Thlaphâng takin an lal a thi ang a, Bak lêngin sipai hotute chuan an puanzâr an tlânsan ang. Lalpa thuchhuak chuan heti hian a ti: “Zion tlângah a mei a alh reng a, Jerusalem khuaah a thuk pawh a nung reng e.” Ngai teh, lal dik pakhat alo lal dâwn, A upate pawhin dik takin ro an rêl ang. Thlipui laka bihrûkna tûr, Ruahpui laka phen tûr an ni ang a, Ram rova lui luang leh thlalêra lungpui hlim ang hi an ni bawk ang. Ngun takin thil an thlîr ang a, Ngun takin an beng an dawh zêl ang. Hmanhmawha rêl lovin engkim an chîk ang a, Ṭawng ban lovin an thu a fiah bawk ang. Mi sual chuan tu ma zah an kai lo vang a, Mi duhâm chuan ngaihsân a hlawh lo vang. Mi sualte ṭawng a tlahawlh a, Thil sual tih tûr an suangtuah ṭhîn. Pathian elsên an chîng ṭhîn a, Lalpa thu pawh an la lek ṭhîn. Rilṭâmte tlaina tûr an ngaihthah a, Tuihâlte in tûr tui an leihbuaksak bawk ṭhîn. Duhâmte duhâmzia a va thûk êm! Thil sual tih hi an tum rân a, Dâwta retheite tihchhiata, Pachhiate pawh dik mah sela tihchhiat an tum. Mi ṭhate erawh chuan thil ṭha an suangtuah a, Chu chu an ṭan zui ngam zêl ṭhîn. Nuho, awm der der ṭhînte u, Tho ula, ka thu hi ngaithla rawh u. Nangni, nula, lungmuanga tâlte u, Ka sawi hi bengkhawn teh u: Kum khat emaw a ral hnu chuan Lungmuanga tâlte u in la khûr ang. Grep rah hleh tûr a awm dâwn lo, Theirah lawh tûr a awm hek lo vang. Awm der der ṭhînte u, hlau hle rawh u, Lungmuanga tâlte u, khûr bawk rawh u. Inhlîp ula, saruakin awm ula, In kâwngah khân saiip puan fêng rawh u. In huan duhawm, thlai ṭhat duhna, A chhiat tâk avângin âwm chûmin ṭap rawh u. Ka mite lo ram chu, hlohar leh hnimhlîngneiin a bawh zo ta. Khawpui nuam tak leh hlim taka an chênna inte A chhiat tâk avângin ṭap chiam rawh u. Lal in an rauhsan a, Khaw lûn tak ṭhîn chu a ram ta e. A mualte leh vênbûk in sângte chu Ram sabengtungte tualchaina a ni ang a, Ranrual an tla bawk ang. Chung lam ata Thlarau kan chunga a rawn leih hunah chuan, Thlalêr ram ro chu ram ṭhaah a chang ang a, Theikung a ngaw khup ang. Thlalêr ni ṭhînah chuan dik takin ro an rêl ang a, Ram ṭhaah chuan dik takin thil an ti bawk ang. Dik taka thil an tih ṭhin avângin Râlmuang takin an khawsa ang a, Lungmuang takin an awm kumkhua bawk ang. An in leh lovah ka mite chu Thlamuang takin chênna rinawm leh muanawmah chuan An awm der der tawh ang. Chutih hunah chuan ngaw chu a dai ruai ang a, Khawpui pawh chu hmun zâwl duaiah a innghat ang. Tui hnianghnârnaa thlai chîng ṭhîna, Bâwng leh sabengtungte thlah ṭhînte u, In nihlawh e. Rawk tâwk ngai lo, mi dang rawk ṭhînte tak hi aw! Bum tâwk ngai lo mi dang bum ṭhînte hian, In rawk zawhah rawk in tuar ang a, In bum hnuah bum in tâwk ang. Lalpa, kan chungah zahngai la, kan thlîr reng a che, Tûk tin kan bân thapui ni la, Mangan ni-ah min chhanhim bawk ang che. I thâwmah chuan mite an tlânchhia a, I lo chêt chuan hnam dangte an darh ta. Khau puang angin râl sumte chu an chuh a, Chhar khâwm tûrin an vâk sup sup mai e. Chung lamah khian Lalpa chu a awm a, A va ropui êm! Zion-ah dik tak leh fel takin ro a rêl e. In hun vawngtu a ni, A mite chu a hum tlat a, Finna leh hriatna pawh a pe. Lalpa ṭih hi an ro hlu ber a ni. En teh, an pasalṭhate chu pâwnah an au vêl ruai a, Remna zawnga palaite chu an ṭap zawih zawih mai e. Lamlian a reh ṭhuap a, Kawnga kal ngam rêng an awm lo. Thuthlung an bawhchhia a, Inremna thu an pawisa lo va, Tu mah an zah hek lo. Ram chu a chul ta a, a ram reng mai, Lebanon ngaw a ngui zo ta. Saron phai chu thlalêr ang mai a ni, Basan leh Karmel tlâng thinghnahte chu a ṭîl zo ta. Lalpa chuan heti hian a ti: “Ka han che tawh teh ang, ka inchawisâng ang a, Ka ropuizia ka târlang tawh dâwn e. Thil sâwt lo in suangtuah a, Eng mah in phuh chhuak si lo va, In thuchhuak chu mei ang a ni. A kâng ral vek dâwn a che u. Chinai lung rawh a darh ang leh Hlîngbuk sâm chu a kâng vâp mai ang hian in ral vek ang. Hla taka awmte u, ka thil tih hi hre vek ula, Hnai deuhva awmte u, ka ropuizia lo hre rawh u. Zion-a chêng, mi sualte chuan an hlau vang a, Sakhaw ngaihsak lote chu an khûr bawk ang. ‘Kan zînga tu hian nge a thinur mei tuar zo vang? Kumkhuaa alh reng hi tu nge tuar peih awm i?’ an ti ang. Dik taka thil tia, thu ṭha sawi ṭhîn, Hlêpna bawlhhlawh chu duh lova, Thamna hûm hlauva kut thing ṭhîn; Thisen chhuah rawt bengkhawn duh lo, Thil sual tih rawtnaa tel ve duh lo mi chu Hmunsâng takah a chêng ang a, Kulhbîng chhûnga awmte angin a him bawk ang, Ei tûr ngahin tui in tûr pawh a tlachham lo vang. In mit ngeiin lal ropui tak, Ram zau tak chunga ro a rêl in hmu ang. In râlṭit lai nite kha in hre chhuak ang a, ‘Hming lamtu kha khaw nge a awm tâk le, Chhiah lo dawnga, in zât chhiartu pawh kha?’ In la ti ang. Mi kawlhsen tak, thle lâwr lâwr, Ṭawng thûm hlêt hlût leh ṭawng berek chîl chêl, An sawi in hriat hleih theih si lohte kha In hmu leh tawh lo vang.” Kût kan hmanna tûr Zion khua hi thlîr ve teh u, Jerusalem khua hi en teh mah u, Puan in nuam tak, zâwn sawn ngai lo, A khennghehna phawng ngai lova, A kaihmarna chat ngai hauh lo ang hi a ni. Tah chuan, Lalpan a ropuina min entîr ang, Lui tamna ram, tui kawng zau tak bulah kan chêng ang a, Hmêlmaten lawng an rawn kar lût thei lo vang a, Lawng lian a lo lût thei hek lo vang. Lalpa chu ro min rêlsaktu a ni, Lalpa chu kan hotu a ni a, Lalpa chu kan lal a ni, Aman min hum tlat ang. An lawng puanzâr kaihna hruite a dûk ta a, A ngul an thlung nghet thei ta lo, Puanzârte pawh an kai pharh thei lo va, An sum zawng zawng kan man ang a, A tam êm a, kebaite hial pawhin an chuh hman ang. Khaw chhûnga awmte chuan, “Ka dam lo ve,” an ti ngai lo vang a, An sualte chu ngaihdam a ni bawk ang. Hnam tinrêngte lo hnai ula, Ngaithla tûrin lo kal rawh u. Lei leh a chhûnga awmte u, lo haw ula, In zavaiin ngaithla rawh u. Hnam tin chungah Lalpa a thinur a, An sipai rual chungah a thin a rim a ni. Thah vek atân a dah tawh e, Talh mai tûrin a hlân vek tawh. An ruangte chu paih tûr a ni, Phûm tûr a ni lo ve, A uih vut vut ang a, Tlângah an thisen chu a luang zeih zuih bawk ang. Vâna awmte pawh khi an ral ang a, Lehkha angin vân khi zial bo a ni ang a, Vâna awm zawng zawng khi an tla ang a, Grep leh theipui hnah ro a ṭîl ang hian. Vânah ka khandaih chu a inpeih ta, Thah atâna dah tawh Edom mite chungah a chhuk thla ang. An thisenin Lalpa khandaih chu a bual ang a, An thau a kai luai ang. Berâm leh kêl thisente, Kêlpa kal thautea inthawi angin Bozra khuaah Lalpa a inthawi dâwn, Edom mite a talh ṭeuh vang. Chumi rual chuan selête pawh a that ang a, Bâwngtuaite leh a chalte pawh a talh bawk ang. An ram chu thisenin a bual ang a, Vaivutte pawh thauvin a pawlh vek ang. Lalpan phuba a lâk a hun ta a, Zion tâna a thungrulh hun a lo ni ta. Edom ram luite chu alkatra-ah a chang ang a, Vaivutte pawh kâtah a chang bawk ang. A ram pum chu alkatra ang maiin a kâng ang a, Chhûn zân zawmin an timit lo vang a, A khu ngun ngun reng ang. Ṭhangthar zêl thlengin a ram ang a, Tu mah tlawh duh an awm lo vang. Tuivalawng leh sakuh an awm ang a, Chhimbuk leh choâkte an chêng ang. Leilung siam hma ang khân Lalpan a tichhe rem rum ang. Lala ṭang duh an awm lo vang a, Hotu tûr pawh an awm hek lo vang. Lal inte chu hlîng bawnin a khuh ang a, Kulh chhûngah pawh kângṭhai leh hlohar a tla khat ang. Sihal chênna a ni ang a, Chingpirinu bukhuarna hmun a ni bawk ang. Sanghar leh chinghnia an insûl reng ang a, Sathâr chuan a ṭhian a ko bawk ang. Tah chuan ṭaunu a lût ang a, Hahchawlhna tûr a hmu ve ang. Rûl thlâwk thei chuan bu a nei ang a, A tui ang a, a awp keu ang a, A note chu a awp lum ang. Mulukawlhte pawh an kawppuite nên Tah chuan an awm ho vang. Lalpa lehkhabu-ah zawng la, chhiar teh, Pakhat tê mah an bo lo vang, Kawppui an nei ṭheuh zêl a ni. Lalpa chuan thu a pe tawh a, A Thlarau chuan a hruai khâwm ang. An tân ṭhum a vâwr fel tawh a, Ram chin siamin an awmna tûr a pe vek tawh, Chu chu an hmun kumkhua tûr chu a ni, An thlahte pawhin an nei zêl ang. Thlalêr leh ramro chu a lâwm ang a, Ram kawlh vel vul chu hlimin a pâr vul ang. Phûl pangpârte angin a pâr chhuak ang a, Hlim takin a zai ang. Lebanon tlâng angin a ropui ve ang a, Karmel tlâng leh Saron phai ang maiin a duah hluah ang. Lalpa ropuina chu an hmu ngei ang, Kan Pathian mawina nên. Bân chau tawhte chu tichak ula, Khûp khûr tawhte pawh tichak rawh u. Rilru mangangte hnênah chuan, “Kan Pathian chuan phuba a rawn la dâwn, Intipachang ula, hlau hauh suh u, A rawn thungrûl ang a, A chhandam ngei ang che u,” ti ang che u. Mitdel mit chu a meng ang a, Bengngawng beng chu a vâr bawk ang. Kebaite pawh sakhi angin an zuang theuh theuh ang a, Ṭawngtheilo pawh hlimin an zai tawh ang. Thlalêrah tui a chik chhuak ang a, Ram rovah pawh lui a luang ang. Ram ṭau lum huam huamah dîl a awm ang a, Ram chârah chuan tuihna a irh chhuak ang. Sihal tamna, a tuallênna ramah Phairuang leh hnim a awm dul ang. Tah chuan lamlian a awm ruah ang a, “Kawng Thianghlim,” an ti ang a, Mi bawlhhlawhte an kal ve lo vang, Hei hi a ni an kalna tûr kawng chu. A kal apiang, mi â-te pawh, an bo lo vang. Tah chuan sakeibaknei a awm lo va, Ram sakawlh pawh a lo kal lo vang a, Hmuh tûr a awm hek lo vang, Tlan chhuahte kalna tûr kawng a ni si. Lalpa tlante an lo kîr leh ang a, Zaiin Zion an pan ang a, Chatuan lâwmna an khum bawk ang; Hlim leh lâwmin an khat ang a, Lungngaih leh ṭah a awm tawh lo vang. Hezekia kum sâwm leh pali a lal kumin, Asuria lal Senakeriban Judai rama khua, kulh nei zawng zawng a rûn a, a la ta a. Asuria lal chuan Lakis khua aṭangin Jerusalem lal Hezekia hnênah, sipai tam tak nên, Rabsakeha a tîr a; dîl chhakta zâwk aṭanga tuikawng bul, puansu mite hmuna lamlianah chuan a ding a. Lal chhûngkaw enkawltu, Hilkia fapa Eliakima te, ziaktu Sebna te, chanchin vawngtu Asapa fapa Joa te an va chhuak a. Rabsakeha chuan an hnênah, “Hezekia han hrilh teh u; lal ropui, Asuria lal chuan heti hian a ti. ‘Eng nge rinchhan i neiha i inchhutngên hle le! Ka ti a che, hmui themthiam ngawt hian râlthuam leh sipai chakna a lân thei hlei nêm. Tu nge i rinchhan veia, ka laka i hel tâk? He luang tiang sâwp, a hawltu kut chhun nghawt tûr, Aigupta hi i ring a ni maw? Aigupta lal Farawa chu a ringtute tân tiang sâwp ang lek hi a ni asin! Lalpa kan Pathian a ni kan rin, i ti em ni? A biakna hmunsâng leh maichâmte Hezekian a duh duhin a sawnsak mai mai a, Jerusalem leh Judai ram mite hnênah, ‘He maichâmah chauh hian Ani chu in be tûr a ni,’ a tih Pathian kha maw in la rin cheu? Ka pu, Asuria lal hnênah thu tiam mai teh, tûnah pawh hian keiin, a chuang tûr mi i hmuh zawh phawt chuan, sakawr sânghnih ka pe mai ang che. Aigupta sakawr-tawlailîr leh sakawra innghat i nih chuan engtin nge ka pu sipaite zînga nêp ber pawh i dan zawh ang? He ram tichhe tûrin Lalpa thu lova lo thawk ka nih i ring em ni? Lalpa chuan he ram hi han beia tichhe vek tûrin min ti asin,’ tiin hrilh rawh u,” a ti a. Eliakima te, Sebna te, Joa te chuan Rabsakeha hnênah, “Khawngaih takin Aramaik ṭawngin i chhiahhlawhte hnênah hian thu sawi teh, kan hre ve reng alâwm. Kulh bula awmte hriat phâkah Juda ṭawngin thu sawi suh, an ti a. Rabsakeha erawh chuan, “Ka pu hian hêng thu hi in lal leh nangni hnênah chauh sawi tûrin min tîr hlei nêm. Nangni ang bawka mahni êk eia, mahni zun in tûr kulh bang bula awmte hriat atân sawi tûrin min tîr asin,” a ti a. Rabsakeha chu a ding a, Judai ṭawngin ring takin a au va, “Lal ropui, Asuria lal thu hi, ngaithla teh u. Lal chuan heti hian a ti: Hezekia hian bum che u suh se, a hum thei dâwn tawp lo a che u. ‘ Lalpa chuan min rawn chhan ngei ngei dâwn, Asuria lalin khua hi a rawn la tawp lo vang,’ tiin Hezekia chuan in Lalpa hi ring tûrin a fuih che u pawhin ring suh ang che u. Hezekia thu hi ngaithla suh u. Asuria lal chuan heti hian a ti: ‘Lo chhuak ula, inrem ang u; mi tinin mahni grep in ei ṭheuh vang a, mahni theipui in tlân ang a, mahni tuizêma mi tui in in ṭheuh ang. Ka lo kal ang a, in ram ang chiaha ram ṭha, buh leh uain tamna ram, buh hmun leh grep hmun ṭha ramah ka hruai ang che u. Lalpan min chhan ngei ang, tiin Hezekia hian bum che u suh se. Hnam dangte hi thlîr teh u; an pathianten Asuria lakah an chhan thei em ni? Hamath leh Arpad pathiante chu khawiah nge an awm tâk? Sefarvaim pathian pawh khawiah nge a awm tâk? Samaria khua pawh ka lakah a hum thei em ni? Chûng pathiante chuan hêng ramte hi an hum theih si loh chuan Lalpa in tih pawh hian ka lakah Jerusalem khua hi a hum tehchai ang maw?’ a ti,” tiin. Lalin engtin mah chhâng suh u a tih avângin an ngawi reng a, eng mahin an chhâng lo. Tichuan, lal chhûngkaw enkawltu Eliakima, Hilkia fapa te, ziaktu Sebna te, chanchin vawngtu Asapa fapa Joa te chu puan thlêr sinin Hezekia hnênah an kal a, Rabsakeha thu chu an hrilh a. Lal Hezekian chûng thu chu a hriatin a puan a pawt thlêr a, saiip puan a sin a, Lalpa inah a lût ta a. Lal chhûngkaw enkawltu Eliakima te, Ziaktu Sebna te leh puithiam zînga upa te chu saiip puan sinin Amoza fapa zâwlnei Isaia hnênah a tîr a. “Lal Hezekian heti hian a ti: ‘Vawiin hian kan tân manganna ni a lo thleng ta, min hmuhsita, min diriam tak êm hi! Nau hrin hun tawh, a nu chau lutuk si ang mai kan nih hi. Pathian nung sâwt tûra Asuria lal mi tirh, Rabsakeha thu sawi kha Lalpa i Pathian chuan a lo hre châwk ang a. Lalpa, i Pathian chuan hriain hrem teh se. Kan mi, la dam chhunte tân nang ṭawngṭai rawh khai,’ a ti e,” an va ti a. Lal Hezekia mi tirhte chu Isaia hnên an va thleng a. Isaia chuan an hnênah, “ Lalpa chuan heti hian a ti: ‘Asuria lal chhiahhlawhten min diriam dân thu i hriatte kha hlau suh. Ngai teh, zâmna rilru ka pe ang a, thuthang ka hriattîr ang; a ramah a kîr ang a, a ram ngeiah khandaihin an sât hlum ang,’ tiin in pu hnênah va sawi rawh u,” a ti a. Rabsakeha chu a ṭin a, Lakis aṭangin Asuria lal chu a insawn a, Libna khua a bei tih a hriatin chu lam chu a pan a, a va hmu a. Ethiopia lal Tirhaka chanchin chu Asuria lal an hrilh a, amah bei tûrin a lo thawk tih a hriatin Hezekia hnênah palai a tîr a. “Judai ram lal Hezekia hnênah, ‘I rinchhan in Pathian chuan Asuria kutah Jerusalem chu a pe lo vang,’ tiin bum che u suh se. Asuria lalten an ram luah zawng zawnga an thil tih, an ram an tihchhiatsak vek thute i hria a. Nang tehlul hi i him bîk dâwn em ni? ‘Ka paten an tihchhiat hnam Gozan te, Haran te, Rezep te, Telesar-a awm Eden-ho te kha an pathianten an chhan thei em ni? Khawiah nge Hamath lal te, Arpad lal te, Sefarvaim-a khaw awm lal te, Hena lal te, Iva lal te kha an awm tâk?’ zu ti rawh u,” a ti a. Palai lehkha rawn ken chu Hezekia chuan a hmuhin a han chhiar a, Lalpa inah a chho va, Hezekia chuan lehkha chu Lalpa hmaah a pharh a, Hezekia chu Lalpa hnênah a ṭawngṭai ta a. “Engkim Lalpa, Israel-te Pathian, Cherub chunga ṭhu, nang chauh hi Pathian chu i ni, ram luah zawng zawng rorêltu i ni si a, lei leh vân pawh hi i siam a ni. Aw Lalpa, i beng lo chhi la, ngaithla teh: Lalpa, meng la, en teh; Pathian nung sâwt tûra Senakeriban thu a rawn sawi zawng zawng hi ngaithla teh. Aw Lalpa, Asuria lalte hian hnam tin an bei a, an ramte an tihchhiat tâk hi. An pathiante meiah an rawhsak a, chûng chu Pathian an ni lo rêng a, mihring kuta siam thing leh lung mai an ni a; chuvângin, chhe ngei tûr phei zawng an ni. Lalpa, tûnah a kut aṭang hian min chhan chhuak la; tichuan, khawvêl ram luah zawng zawnga miten nang chauh hi Lalpa chu i ni tih an hre dâwn nia,” a ti a. Amoza fapa Isaia chuan Hezekia hnênah mi a tîr a: “A hnêna i ṭawngṭaina chungchâng leh Asuria lal Senakeriba chungthu-ah Lalpa, Israel-te Pathian thu sawi chu hei hi a ni: Zion fanuin a hmusit che a, a nuihzat che, Jerusalem fanu chuan i tlânchhia chu lu a thin khum che. Tu nge i nuihzata, i sâwt vei le? Tu lakah nge i râwl i rin? Tu lakah nge i hawi chapo hle le? Israel Mi Thianghlima chungah a ni. I chhiahhlawhte hmangin Lalpa i sâwt vei a, ‘Tawlailîr tam tak nên tlâng sâng sângah ka lâwn a, Lebanon tlâng kil tin ka fang, Sidar thing sâng sâng ka kit a, Fâr thing ṭha ṭha ka kit asin; A tlâng sâng lai ngaw rilte pawh ka fang vek a, Tuite ka chhun chhuak a, ka in bawk a, Aigupta luite chu ka kephahin ka dai kang vek a ni,’ i ti vei a. Hmân aṭanga tih ka tum tawh a ni, I hre na nge? Tûna thil lo thleng hi, Hmâna ka rêl daih tawh a ni. Kulh nei khuate i tihchhiata, A chhûnga chêng an zâmte leh Thlabâr taka an mualpho te, Phûl leh muala hlobet, In chung zâwla hnim ṭiak tîr te, Thli lum chhêm vuai tâk te, Ka rêl lâwk vek a ni. Ka chunga i ânhla te, I ṭhut, i luh leh chhuahte ka hria asin. Ka chungah hian i âng vei a, I chapozia ka beng a lo thleng ta, I hnârah chuan hnâr kawl ka vuah ang a, Lakam ka barh ang che a, I lo kalna lamah ka hnûk kîr leh ang che.” Lal Hezekia hnênah, “Hei hi i tân chhinchhiahna tûr a ni ang: Kuminah hian buh hli in ring ang a, nakkumah pawh chumi hli chu in ring leh ang. A kum thumnaah chuan thlai chîng ula, a rah in seng dâwn nia. Huanah grep phun ula, a rah in ei bawk ang. Judai rama mi la damte chu thei kûng, thûk taka zung thlâk, rah tup ang hi an la ni ang. Jerusalem aṭangin dam chhuak tûr an awm a, Zion tlângah thi bâng an awm ngei dâwn a ni. Engkim Lalpa ṭhahnemngaihna chuan chûng chu a tipuitling ngei ang. Chuvângin, Asuria lal chungchâng Lalpan heti hian a ti: “He khawpuiah hian a lo lût lo vang a, thal khat pawh a thlah lo vang; phaw nên a rawn bei lo vang a, lei kulh a lai hek lo vang, Lalpa thuchhuak chuan a ti. He khua hi keimah avâng leh Davida vângin ka hum ang a, ka chhanhim dâwn a ni,” a ti a. Lalpa tirh Vântirhkoh chu Asuria-ho bûkah chuan a kal a, mi nuaikhat leh sîngriat leh sângnga a that a, zînga an han thawh chuan mitthi ruang hlîr a lo thal phung a. Asuria lal Senakeriba chu a ṭin a, a haw a, Ninevi khuaah a awm ta a. An pathian Nisroka ina pathian biaa a kûn lai chu a fa Adrammeleka leh Sarezera chuan khandaihin an sât hlum a, Ararat ramah an tlân ta a. A fapa Esarhadona chu a lo lal ta a. Chûng lai chuan lal Hezekia chu thih ngamin a na a, Amoza fapa Isaian a rawn tlawh a, a hnênah, “ Lalpa chuan heti hian a ti: I chhûngkaw thu rêl fel rawh, i thi dâwn si a, i dam chhuak dâwn lo ve,” a ti a. Hezekia chuan bang lam a hawi a, Lalpa hnênah a ṭawngṭai a, “Aw Lalpa, i hmaah dik takin ka awm ṭhîn a, thinlung thianghlim puin i mit hmuha thil ṭha ka tih ṭhin kha, khawngaih takin hre reng ang che,” a ti a, a ṭap ta zawih zawih a. Lalpa chuan Isaia a rawn bia a: “Tho la, Hezekia va hrilh rawh. Lalpa, i pu Davida Pathian chuan heti hian a ti: I ṭawngṭai ka lo hria a, i mittui pawh ka lo hmu e. Ngai teh, kum sâwm leh kum nga ka damtîr leh ang che. Asuria lal lakah nang leh he khua hi ka chhan ang a, khawpui hi ka hum tlat ang. “ Lalpan a thu sawi hi a ti ngei dâwn tih Lalpa hnên aṭanga i tân chhinchhiahna tûr chu hei hi a ni: “Lal Ahaza dâr chin tehna hlim saw rahka sâwmin ka kîrtîr ang,” a ti a. Chutichuan, ni hlim chu rahka sâwm a kîr leh ta a. Judai ram lal Hezekia damlo, dam leh ta chuan heti hian a ziak: Tarkûna dam lovin mitthi khuaah Ka vânglai hian ka liam dâwn ta emaw ka ti. Mi nung ramah Lalpa hmu tawh lovin Khawvêla chêngte hi hmuh leh ka beisei lo. Berâmpute puan in an ṭhiat ang hian Ka chênna in min ṭhiatsak a. Puan bu tah zawh an hlep ang hian, Ka nunna hi min hlehsak a, Tûk tin zân tin ka chau mai dâwn emaw ka ti. Kâwl ên thlengin ṭanpui dîlin ka au ṭhîn a, Ka ruhte chu sakeibaknei seh tliah ang hi a ni, Tûk tin zan tin ka chau mai dâwn emaw ka ti. Vamûr angin ka chiar ka chiar ṭhîn a, Ṭhuro angin ka rûm ka rûm bawk ṭhîn. Chung lam thlîr nân ka mit a vai zo ta. Lalpa, hnehchhiaha ka awm hi, a bul han tum rawh le. Eng nge ka sawi tâk ang? Min hrilh angin i rawn ti ta ngei a, Ka tuarna avâng hian ka dam chhûngin ka kal dêm dêm tawh ang. Lalpa, i tân ka nung ang a, Nangma tân chauh ka nung tawh ang. Min tichak la, min tidam leh ang che. Ka tuarna kha ka ṭhatna tûr a lo ni e, Min lainat a, chhiatna khur ata chu min la chhuak a, Ka sual zawng zawng i ngaidam ta. Mitthi khua aṭangin lâwmthu an sawi thei lo, Thi tawhte chuan an fak thei hek lo che, Leilâwta tlate chuan an ring pha tawh lo che. Nungdama awmte chauh hian a ni nangmah fak che, Keiin tûna ka fak ang bawk che hian, Pate chuan i thutak chu an fate an zirtîr ṭhîn. Lalpan min tidam ta, Ṭingṭang tumin fak hla ka sa ang a, Ka dam chhûng zawng Lalpa inah Amah fak hla ka sa tawh ang. (Isaian, “Theipui rah hmehhlâwm la ula, a khawihliah bel rawh u, a dam mai ang,” a tih kha. Hezekia pawhin, “ Lalpa inah ka chho thei dâwn tih chhinchhiahna eng nge ni ang?” a lo ti tawh a.) Chumi lai chuan Baladana fapa Merodak-baladana, Babulon lal chuan Hezekia damlo a dam leh tih a hriatin thilpêk leh lehkha a rawn thawn a. An chungah chuan Hezekia chu a lâwm hle a; tichuan, a sum dahna in a entîr a, tangkarua te, rangkachak te, mosola te, hriak man tam te, a râlthuam dahna ina râlthuam te, a sum dahna ina thil awm zawng zawng chu a entîr vek a. Hezekia chuan ama in leh a ram chhûnga a thil neih zawng zawng chu entîr loh a nei lo. Zâwlnei Isaia chu Hezekia hnênah a lo kal a, “Khâng mite khân eng nge an rawn tih dâwn? Khawi lam aṭanga lo kal nge an nih?” a ti a. Hezekia chuan, “Ram hla tak aṭanga lo kal an ni, Babulon khua aṭangin,” a ti a. “I in chhûnga mi engte nge an hmuh?” a ti a. Hezekia chuan, “Ka ina thil awm zawng zawng ka entîr vek a, ka sum dahna ina mi entîr loh eng mah ka nei lo,” a ti a. Isaia chuan Hezekia hnênah, “Engkim Lalpa thu hi ngaithla teh: Ngai teh, i ina thil awm zawng zawng, i paten vawiin thlenga an dah khâwm nên, Babulon-a an lâk vek hun a lo thleng dâwn, eng mah hnutchhiah an nei lo vang, Lalpan a ti. Nangma hrin ngei, i fapate zînga ṭhenkhat an man ang a, an til an rehsak ang a, Babulon lal inah an awm ang,” a ti a. Hezekia chuan a dam chhûngin râlmuang leh him takin an awm dâwn tihna niin a ngai a, Isaia hnênah, “ Lalpa thu i sawi chu a ṭha e,” a ti a. “Ka mite hi thlamuan rawh u, thlamuan rawh u,” In Pathianin a ti. Jerusalem hnênah thlamuanna thu hril thuai rawh u, An tuar tûr chu an tlâk ta a, Hrem an tuar hi a tâwk ta e, Lalpa kut pawh an sual lêt hnih an tuar tawh e. Aw chuan, “Thlalêrah Lalpa kawng buatsaih ula, Kan Pathian tân ram rova lamlian tirual rawh u. A ruam apiang chhûng khat ula, Tlâng leh mualte râwt hniam rawh u, A kawi laite tingîl ula, A bumbohte tirual rawh u. Lalpa ropuina chu a lang dâwn e, Mi zawng zawngin an hmu vek ang,” Lalpa ngei chuan a ti asin. Aw chuan, “Au rawh,” a ti a. Ani chuan, “Eng nge ka sawi tâk ang?” a ti a. “Mihringte hi hnimhring ang an ni a, An ropuina pawh phûl pangpâr ang a ni. Lalpa thli chu a lo tleh a, Hnim hring a chhêm vuai a, Pangpâr a tichuai ṭhîn, A ni, mihringte hi hnimhring ang chauh an ni, Hnimhring a ro ṭhîn a, Pangpâr a chuai bawk ṭhîn, Kan Pathian thu hi zawng a awm kumkhua dâwn si. Tlâng sângahte lâwn chho zêl la, Zion hnênah thu lâwmawm chu aw ring takin puang rawh, Jerusalem hnênah thu lâwmawm chu puang rawh, tîm suh, Judai ram khawpuite chu hrilh la, ‘In Pathian chu a lo kal ta,’ ti rawh. En teh, Lalpa Pathian chu mi chak angin a lo kal a, A bân tha chak hmangin ro a rêl dâwn, A chhan chhuahte a rawn hruai a, A tlan chhuahte a rawn chhawm e. Berâm vêngtu angin berâm rual chu a châwm ang a, A note chu la khâwma pawm chungin A puite chu a hruai dial dial dâwn e. Tu nge vei khat lekin tuifinriat teh sêng ang? Tu nge vân khi khâp chhuak thei le? Tu nge leia vaivut hi khova teh sêng awm ang? Tlâng leh mualte tu nge bûk thei? Lalpa Thlarau chu tu nge thu neihsak anga, Tu nge remruatsakin kaihruai thei ang? A bengvâr nân tu nge a râwn ṭhina, Tu nge kawng dik entîr thei le? Tu nge hriat tûr zirtîr theia, Thil tih dân tûr kawhhmuh thei ang? Lalpa tân chuan hnam zawng zawng hi, Bâlṭin mawnga tui far khat ang, Bûkthlênga vaivut kai ang lek hi an ni; Thliarkârte pawh lungtê anga, Vawrh derh derh tham lek chauh an ni. Lebanon tlâng ngâwa ramsate chu Lalpa hnêna inthawi nân chuan a tâwk lo va, Thing awmte lah tuah tham a ni hek lo. Hnam zawng zawng hi a tân eng tham an ni lo va, Engmahlo mai maiah a ngai. Pathian chu tu nên nge in khaikhin ang? Engte nên nge in tehkhin ang? Thil chher thiamin milem a han chher a, Thil chhûn thiamin rangkachakin a han luan a, Tangkaruain khaidiat awrh tûr a chhersak a, Chutiang nei zo lo chuan thingtum ngêt lo a thlang chhuak a, Tlu lo tûrin thing tuk thiam chu a tuktîr ṭhîn, Chutiang milem nên maw min tehkhin ang? In hre na nge? In ngaithla lo vem ni? A tîr ata an hrilh lo che u em ni? Leilung innghah dân hi in hre lo maw? Ani hi zawng kâwlkil hual chung daihah a awm a, A chhûnga awmte chu a tân khauphâr ang lek an ni. Puanzâr angin vân khi a zâr pharh a, Awmna tûr puanin an zâr ang hian. Lal ropuite a titlâwm a, Leia rorêltute engmahlovah a chantîr a, Thing phun lo chawr ṭan tîr, Thlai ṭiak zung thlâk ṭan chauh ang hi an ni. Thliin a rawn chhêm a, a vuai ta a, Thlipui a lo thawk a, Buhpâwl angin a la bo ṭhîn. Tichuan, tu nên hian nge min tehkhin ang a, Tu ang lek nge ka nih? Mi Thianghliman a ti. Vân lamah khian in mit lên chho ula, In hmuhte khi tu siam nge ni? Sipai rual ang maia hruai chhuak ṭhîntu, An hming chhiara ko ṭheuh theitu siam vek a ni; Thil a ti thei êm a, pakhat tê mah an bo ngai lo. Israel thlahte u, engtizia nge ‘ Lalpan kan awm dân hi a hmu lo va, Kan Pathian hian min ngaihthah ta,’ in tih? In hre na nge? Lalpa chauh hi chatuan Pathian chu a ni a, Kâwlkil hual chhûnga awm zawng zawng hi Ama siam vek a ni. A chau lo va, a hah ngai bawk hek lo. A finzia pawh tu mah hre phâk an awm loh hi, In hre ngai lo vem ni? Hahte a tichak a, Chaute a tichak thar leh ṭhîn. Tleirâwlte pawh dangchârin an chau va, Tlangvâlte pawh hahin an thal dêr ṭhîn. Lalpa nghâktute erawh chu An chak thar leh ang a, Mupui angin thlain an thlâwk chho vang, An tlân ang a, an chau lo vang, An kal ang a, an hah hek lo vang. Thliarkârte u, lo ngaithla rawh u. In mite chu inpeih rawh se; Lo kal ula, sawi ve rawh u, I lo rêl tlâng teh ang. A kalna lam apianga chak zêl, Khawchhak ata ko chhuaktu hi tu nge? Lalte, hnamte a hneh zêl a, Khandaihin vaivutah a chantîr a, Thliin buhsî a lên darh ṭhîn ang hian a thal hmangin a ûm darh zêl. A ûm zêl a, hliam tuar ve hauh lovin a tlang zêl a, Lei rap hman lo hialin a chak. Hêng hi tu nge a tîr ata rêla, Ṭhang lo thar zêl chunga thlentîrtu hi? Kei Lalpa hi, a bul tumtu ka ni, A tâwpna tûr pawh keimah bawk ka ni. Thliarkârte chuan ka thil tih an hmuhin an hlau vang, Kâwlkila awmte chu hlauvin an khûr bawk ang. An pung khâwm a, an lo kal e. Mahni ṭhian hnaite chu an fuih ṭheuh va, Mahni unaute pawh, ‘Hlau suh,’ an ti. Thil chher mi chuan rangkachak chhûng mi chu a tiphûr a, An milem siam dêng mâmtu chuan, ‘A bet ṭha e,’ tiin a dêngtu chu a fuih bawk a. A nghîn loh nân thîrkilhnain an kilh tlat mai. Aw Israel, nang zawng ka chhiahhlawh i ni a, Aw Jakob, ka thlan i ni, Ka ṭhian Abrahama hrin i ni. Kâwlkil ata ka lâk chhuah i ni a, A kil hla ber ata ka koh chhuah i ni e. ‘Ka chhiahhlawh i ni e,’ ka tih che kha, Ka thlang che a, ka hnâwl hauh lo vang che. Hlau suh, ka awmpui zêl a che, Thlaphâng hek suh, i Pathian chu ka ni, Chakna ka pe ang che a, ka pui ang che, Ka bân ding lam tha chak tak hian ka chelh ang che. I chunga thinurte zakin an mualpho vang. Nangmah khingtute pawh eng mah an ni lo vang. An boral vek dâwn a ni. Nangmah beitute chu zawng chiam mah la i hmu zo lo vang, Nangmah dotute chu an ral vek dâwn a ni. Lalpa i Pathian hian ka chelh tlat che, ‘Hlau suh, ka pui ang che,’ Keimah ngeiin ka tih tawh kha. Israel mi, aw Jakob, changpât ang lek i ni na a, ‘Hlau suh, ka pui ang che,’ Lalpa thuchhuak chuan a ti. Israel Mi Thianghlima, tlantu che chu ka ni. Ngai teh, buh chîl khâwl thar ha hriam tak nei ṭeuhvah Ka chantîr dâwn a che. Tlângte i chîl ang a, a sawm vek ang, Mualte pawh vaivutah a chang bawk ang; I zâp ang a, a lêng darh chum chum ang, Ṭhâwngaleivirin a lên bo vang. Lalpa -ah chuan nang chu i lâwm ang a, Israel Mi Thianghlima chu i chawimawi ang. Retheite leh pachhiaten tui in tûr an zawna, An hmuh loh pawhin an tuihâl dangro chu Kei Lalpa hian ka chhâng ang a, Israel-te Pathian hian ka thlahthlam lo vang. Mual kawlhahte lui ka luantîr ang a, Ruamah te chuan tuihna ka awmtîr ang. Thlalêr ram chu dîlah ka siam ang a, Ram ro pawh chu tui luannaah. Thlalêrah chuan sidar thing te, Thingri leh lenhmui, oliv thing nên ka phun ang a, Ram rovah chuan fâr te, phân te, tufâr te ka phun bawk ang. Chûng chu miten an hmu ang a, Kei Lalpa hian ka tih a ni tih an hria ang, Lalpa, Israel Mi Thianghlima kutchhuak A nih an hre vek ang. Nangni, hnam tinrêng pathiante u, Thiamthu sawi tûr in neih chu han sawi teh u, Lalpa, Israel-te lal chuan a ti. Han sawi ula, thil lo thleng tûr min hrilh rawh u, A lo thlen tûr kan lo hre lâwk dâwn nia. Thil kal tawh pawh engtihna nge sawi fiah ula, Kan lo ngaihtuah dâwn nia. Thil lo thleng tûr sawi lâwk ula, Pathian in ni emaw kan hre dâwn nia; Thil tih chhiat emaw, tih ṭhat emaw tal nei teh u. Kan hlau vang a, kan ṭih bawk ang che u. Eng mah in lo nih loh hi le, Eng mah tih theih in nei hek lo, Nangni chibai bûktute chu tenawm an ni. Khawchhak ata mi ka pun a, Ka hming a lam ang a, Hmâr lam ram aṭangin a lo kal dâwn. Bêl vawtuin a hlum a rap hrep ang mai hian Rorêltute chirhdiak angin a rap nek ang. Hêng thil lo thlengte hi “I tidik e,” kan tih tûrin Tu ber hian nge hrilh lâwk che u? Tu man in sawi lo va, tu mah in hrilh lo va, Tu man in thu an hre hek lo. Zion mite hrilh hmasa bertu chu ka ni, “En teh, in mite lo haw saw,” tiin Thu lâwmawm chu Jerusalem hrilhtu ka ni. Milemte chu ka han en vêl a, Thurâwn min pe thei rêng ka hmu zo lo, Ka zawhna pawh an chhâng thei lo. An zavaiin hman tlâk rêng an awm lo, Eng mah tih theih an nei lo va, An milem chhûnte hi engmahlo mai an lo ni e. En teh, ka chhiahhlawh, ka chelh tlat, Ka duhzâwng tak, ka thlan hi; a chungah ka thlarau ka leih ta a, Hnam tinrêng chungah dik takin ro a rêl ang. A au chhuak lo vang a, A râwl a rin hek lo vang a, Kawtthlêrahte a aw an hre hek lo vang. Luang sâwp a tichhum dâwn lo va, Khâwnvâr de sêt sêt pawh a timit mai lo vang, Dik takin ro a rêl ang. Khawvêlah hian rorêlna dik a awm hma chu A chau lo vang a, a beidawng hek lo vang. Thliarkârte chuan a thu an ngaichâng reng a ni. Pathian, vân siamtu leh kaipharh duaitu, Lei leh a chhûnga awm dintu, Nunna thaw leh thlarau petu, Lalpa chuan heti hian a ti: “Kei hi Lalpa chu ka ni, Dik taka rêl tûrin ka ko chhuak che, I bân tha tichakin ka hum che a, Nangmah hmangin mi tin tân thu ka thlung ta e, Hnam tin êng atân ka dah ta che. Mitdelte mit tivâr tûr te, Rip chhûnga khung tichhuak tûr leh Thim zînga tâng chhan chhuak tûrin. Kei hi Lalpa, i Pathian chu ka ni, Tu mân ka ropuina min ṭâwm thei lo, Min fakna pawh milem ṭâwmpui ka phal hek lo. Ngai teh, thu hrilh lâwkte chu a lo thleng tawh a, Thu thar ka puang dâwn e, A lo thlen hma ngeiin ka hrilh che hi. Lalpa fakin hla thar ngei sa ula, Khawvêl pum pui hian fak rawh se; Tuifinriata kalte leh a chhûnga awm te, Thliarkârte leh a chhûnga awmte chuan fak vek rawh se. Thlalêr ram leh a chhûnga khaw awmten fak sela, Kedar-ho chênna khuate chuan amah chu fak rawh se. Sela khuaa awmten fak selangin, Tlângchhîpa lâwn chhovin au vak rawh se. Thliarkâra chêngte chuan Lalpa chu fak sela, chawimawi rawh se. Indo tûra mi huaisen thinthawk angin Lalpa chu a lo thawk e, A han au va, a râwl a chhuah ta a, A hmêlmate lakah a chakzia chu a tilang ta. Rei tak chhûng chu chechâng lovin Ka mite hi ka ngawihsan veng veng a, Tûnah nau vei angin ka rûm ta a, Ka thin a tâwt a ni. Tlâng leh mualte ka tichhia ang a, Hnimte ka tiro vang. Luipuite chu ka tikang vek ang a, Dîlte pawh ka tiro vang. Mitdelte chu an hriat ngai loh kawngah ka hruai ang a, An kal ngai lohnaah ka kalpui ang. Thim chu ka tihênsak ang a, Kawng bumboh pawh ka tihrualsak bawk ang. Chûng chu ka thil tih tûrte chu a ni, Ka ṭhulh lo vang. Milem ringa, “Kan pathian chu i lo ni e,” titute chu An tlâwm ang a, an mualpho vang. Bengngawngte u, ngaithla teh u, Mitdelte u, lo hawi ula, en teh mah u, Ka chhiahhlawh anga mitdel hi tu nge awma, Ka mi tirh anga bengchhêt hi tu nge awm le? Lalpa chhiahhlawh leh a mi ruat anga Mitdel tu nge awm ang? Thil tam tak a hmu a; Mahse, a zâwm si lo. Beng a chhi a; mahse, a hre thei lo. Lalpan a dikzia tihlan nân A Dân chawimawia tihropui a duh a ni. Mahse, a mite chuan suam leh rawk an tâwk a, Huma tlain ripah an tâng zo ta. Man an ni a, chhantu an awm si lo. “Chhuah rawh u,” ti tûr an awm hek lo. In zînga tuin nge hei hi hre duh? Ngun taka ngaithla tawh tûr tu nge awm le? Jakoba chu tu nge suamhmang hnêna pea, Israela chu tu nge rawkhmang hnênah pe le? Lalpa a ni lâwm ni? A chungah chuan thil sual an ti a, A kawng an zawh lo va, A Dânte chu an pawisa duh hek lo. A thinur chu an chungah a leih bua a, Indona râpthlâk tak an tuar tâk hi. Israel chungah a thinur chu a alh ta a, An kâng na a, an hre lo va, An pawisa duh chuang lo. Tûnah hi zawng, Lalpan heti hian a ti: “Jakob, ka siam che a, Israel, ka din i ni, Hlau suh, i tlantu ka nih hi, I hming lamin ka ko che a, ka ta i ni. Tui thûk i dai laiin ka awmpui zêl ang che, Tui lian pawhin a chîm pil lo vang che, Meiah kal tlang mah la, i kâng lo vang, Meialhte chuan a hliau na lo vang che. Kei hi Lalpa, i Pathian, Israel Mi Thianghlima, Nangmah chhandamtu chu ka ni, Nangmah tlan nân Aigupta chu ka pe a, Nangmah thleng nân Ethiopia leh Seba ka pe. Ka ngaihlu êm êm che a, Ka ngaisângin ka hmangaih che. Nangmah avângin mi dang ka thlauhthla a, Mi tam tak chu ka hnâwl a ni. Hlau suh, ka awmpui che, Khawchhak ata i thlahte chu ka rawn hruai ang a, Khawthlang ata ka khâwm bawk ang. Chhuah vek tûrin hmâr lam ka hrilh ang a, Hrêng lo tûrin chhim lam ka hrilh bawk ang, Ka fapate ram hla tak aṭangin han hruai ula, Ka fanute kâwlkil ata han hâwn rawh u. An zavaiin ka hming putu an ni, Ka ropui lan theih nân ka siam an ni, Ka kut ngeia ka din an ni. Mit nei si-a mitdelte leh, Beng nei si-a bengngawngte chu han khâwm rawh u. Hnam tinrêng pung khâwm sela, Chi tinrêng lo kal rawh se. An zîngah hei hi tu nge sawia, Tûn hmaa lo sawi lâwk tawh? An sawi dik emaw thuhretu han hruai sela, Mite hriatah, ‘A dik,’ han ti rawh se. Ka thuhretu i ni, Lalpa thuchhuak chuan a ti. Ka chhiahhlawh, ka thlan i ni, Min hre tûr leh min ring tûrin, Kei hi Pathian awm chhun ka ni tih hretu atân. Ka awm hmaa awm Pathian an awm lo va, Ka hnuah lah an awm hek lo vang. Kei chauh hi Lalpa chu ka ni, Chhandamtu dang tu mah an awm lo. Thil lo awm tûr ka hrilh lâwk a, Chhandamtu chu kei hi ka ni, Kei chauh hian ka hrilh che u kha, Hêng hi hnam dang pathiante chuan an ti thei lo. Ka thuhretu i ni, Lalpa thuchhuak chuan a ti: Kei chauh hi Pathian chu ka ni. Leilung pian hma ata tawh Pathian ka ni, Ka kuta mi tu man min lâksak thei lo va, Ka tih tawh chu sût thei rêng an awm lo. Nangmah tlantu, Israel Mi Thianghlima, Lalpa chuan heti hian a ti: “Nangmahni avângin Babulon bei tûr ka tîr ang a, An kulh kalhnate chu ka chhu chhe vek ang a, Kaldai-ho chu an ṭap tlawk tlawk bawk ang. Kei hi, Mi Thianghlima, Lalpa ka ni, Israel-te siamtu, in lal ka ni. Tuipui kân nân kawng ka siam a, Tuifâwn bulh bulh laiah kalna ka siam. Sakawr leh tawlailîr ka hruai khâwm a, Sipai rual lian tak ka koh khâwm kha. An thal dêr a, tho leh tûr an awm lo, Khâwnvâr hmeh mih angin an chimit ta. Hmânlai thilah innghat suh u, Tûn hma thil kha ngaihtuah suh u; Thil thar ka tih tûr hi thlîr zâwk rawh u, A lo thleng ṭêp tawh e, in hmu lâwm ni? Thlalêrah kawng ka sial ang a, Ram rovah chuan luipui ka luantîr ang. Ramsate chuan min chawimawi ang a, Sihalte leh Ostrich-te chuan min fak bawk ang. Ka mi tlante in tûr thlalêrah tui ka tlintîr a, Ram rova lui ka luantîr hunah chuan. Ka ta tûra ka siam an ni, Min la fak dâwn a ni. Jakob, nang erawh chuan min au lo va, Aw Israel, min ning ta a. Hâl ral atân berâm min rawn lâk ngai lo va, Inthawinain min chawimawi duh hek lo. In hnên ata thilhlan ka phût lo va, Rimtui hâl tûr pawhin ka tihah lo che u. Ai rimtui te min leisak ngai lo va, Inthawina ran thauvin min titlai ngai hek lo. In sualnain min ngei zâwk a, In bawhchhiatna ka kham ngei mai. Kei hi ka ni in sual ngaidamtu chu, Keimah avângin a ni ka ngaihdam ṭhin che u-a, In sualte chu ka hriat reng ṭhin loh ni. Min khing tûrin lo kal ula, In thiamthute han sawi rawh u. In pa hmasa berin thil sual a ti a, In hruaitute ka lakah hian an hel. Tichuan, ka Hmun Thianghlima hotute tibawrhbângin Jakoba chu ka hluihlâwn ang a, Israela chu mi hmuhsitah ka siam bawk ang. Khai le, nang ka chhiahhlawh Jakob, Ka mi thlan Israel, ngaithla rawh le. Lalpa chuan heti hian a ti: Siamtu che ka ni a, Pum chhûnga dintu che ka ni, Ka chhiahhlawh Jakob, ka pui ṭhîn che, Ka mi thlan ngei, Jesurun, hlau suh. Ram rovah tui ka leih ang a, Ram chârah lui ka luantîr ang. I thlahte chungah chuan Thlarau ka leih ang a, I tu leh fate chu mal ka sâwm ang. Tui tamnaa hnimhring a duah ang leh, Tui luang kama tuipuisuthlah ang hian. ‘ Lalpa ta ngei ka ni,’ miten an rawn ti thliah thliah ang, Jakoba hming an rawn ṭâwm ang a, A ṭhente chuan an bânah, ‘ Lalpa ta,’ tih an ziak ang a, Ṭhenkhatte chuan Israela hming an pu bawk ang. Engkim Lalpa, Israel lal, anmahni tlantu, Lalpa chuan heti hian a ti: ‘Kei hi a bul leh a tâwp ka ni, Keimah lo hi Pathian dang an awm lo. Keimah ang hi tu nge awm le? Han sawi sela, rawn târlang chiang rawh se. Hmânlai mite ka din an ni asin, Thil lo thleng tûr te leh Thil lo awm tûrte chu han puang teh se. Hlau hauh suh la, thlabâr hek suh, Hmân aṭanga ka sawi lâwk kha in hre lâwm ni? Ka thuhretu in ni, Keimah lo hi Pathian dang an awm em? Ka hriat ve loh pathian ropui an awm em ni?” Milem siamtute hi eng mah an ni hlawm lo, an thil siam, an hlut êm êmte lah a ṭangkai hek lo. Hêng betute hian eng mah an hre fiah thei lo va, an hre thei hek lo, an la zak ang. Pathian lem siama, milem chhûng ṭhînte hian ṭangkaipui loh an inring ngai em ni? Chûng betu zawng zawng chu an la mualpho vek ang. Mi themthiamte hi mihring mai bawk an ni si a, lo kal khâwm sela, ka hmaah lo ding teh se, an khûr ang a, an mualpho hle ang. Thîrdêngin meilinga rawhin hriam a chher a, tubohvin a dêng a, theihtâwpin a ṭang a. A rilte a ṭâm a, a lo hah a, tuihâlin a chau hle ṭhîn. Mistiri-in thing chu a han teh a, a rîn kual a, hriamin a riruang chu a han duang a, mihring lemah a chhuah ta a. A in chhûnga dah atân mihring lem mawi tak a siam ta a. Ngâw aṭangin sidar thing emaw, fâr thing emaw, sasua emaw a va kit a; a nih loh leh ruah châwm len sidar thing phun chu a kit a. A ṭhen chu thingah a tuah a, a lum a ai a. A lingin chhang a ur a, a ṭhen erawh chu milem siam nân a hmang a, chibai a bûk ta a. A ṭhen chu thingah a hmang a, sa a rawh a, a ei puar a, mei lum chu a ai a, “A lum hle e, a alh duh hle mai,” a ti a. Thing bung dang chuan milem a siam a, a kûn a, chibai a bûk ta a. A hnênah a ṭawngṭai a, “Ka pathian i ni e, min chhandam rawh,” a ti a. Chutiang mi chu an mâwl lutuk e, eng mah an hre lo a ni. Hmuh hlauvin an maimitchhîng a, hriat hlauvin an rilru an hawng duh lo. “A ṭhen chu thingtuahah ka hmang a, chhang ka ur a, sa ka rawh a, ka ei a; a ṭhen chuan milem ka siam a, thingtum hmaa kûnin chibai ka lo bûk a nih hi,” tih nachâng hria rêng an awm lo va, hmu thiam an awm hek lo. Vaivut ei ang chauhva sâwt lo va ni. A ngaih dân â tak chuan a hruai bo va, chhan chhuah rual a ni tawh lo, “Ka milem ken hi eng mah a lo ni lo,” tih nachâng rêng a hre thei lo. Jakob, hêng hi hre reng ang che, Israel, nang hi zawng ka chhiahhlawh i nih hi, Ka chhiahhlawhah ka siam che a, Aw Israel, ka theihnghilh ngai lo vang che. Thli len bo chhûm angin i bawhchhiatna ka lên bo va, Ṭiauchhûm a ral angin i sualnate a ral ta e. Ka hnênah lo kîr rawh, i tlantu chu ka ni. Vânte u, lâwmin zai rawh u, Lalpan a hna a thawh tâk hi, Lei hnuaite u, au chhuak rawh u, Tlângte u, au hluah hluah ula, Ngaw leh a thing zawng zawngte u, au dur dur bawk rawh u. Jakoba chu Lalpan a tlan chhuak a, Israel-te zîngah a inchawimawi ta e. Pum chhûnga siamtu che, nangmah tlantu, Lalpa chuan heti hian a ti: “Engkim siamtu, kei hi Lalpa chu ka ni a, Mahni maia vân khi kai pharhtu chu ka ni, Lei hi ka siam lai khân tu nge tel ve? Zâwlnei derte thu ka tihlawhchham ṭhîn a, Aienthiamte ka timualpho bawk ṭhîn. Mi fingte chu ka let thla a, An hriatna âtthlâkzia ka târlang ṭhîn. Ka chhiahhlawhte thu ka nemnghet a, Ka tirhkohte remruat ka tipuitling zêl ṭhîn. ‘Jerusalem khua chu an luah leh ang a, Judai ram khuate pawh an din leh ang, a chhiate pawh ka siam ṭha ang,’ ka ti a ni. Tuifinriat chu kang chat tûrin thu ka pe a, A tuite chu a kang ta a. Kura hnênah chuan, ‘Ka berâmpu i ni, ka thiltum chu tihlawhtling rawh, Jerusalem sak ṭhattîr la, Tempul sak nân lung phûmtîr rawh,’ ka ti bawk a.” Kura chu Lalpan lal tûrinhriak a thih ta a, A chelh zui a, hnam dang hneh zêl tûr leh lalho chakna hlîpa, Khâr leh hauh loh tûra kulh kawngkhârte hawnsak tûrin a tîr a ni. A hnênah chuan heti hian a ti: “I hma ka hruai ang a, Tlângte ka lo tihniam ang a, Dâr kawngkhârte ka chhu chhia ang, Kulh kawngka kalhna thîr tlâwnte pawh ka titliak ang. Hmun thima ro an dah ṭhat te, Hmun rila sum an thuhrûkte ka pe ang che. I hming ngeia kotu che hi Lalpa, Israel-te Pathian ka nih i hre dâwn nia. Ka chhiahhlawh Jakoba, ka mi thlan Israel avângin I hming ngeiin ka ko ta che. Min hre lo na a, i hming ka sa ta e. Kei hi Lalpa chu ka ni, tu dang an awm lo va, Keimah lo chu Pathian dang an awm lo, Min hre lo na a, ka thuam che hi. Khawchhak ata khawthlang thlengin, Kei lo hi chu Pathian dang rêng an awm lo tih miten an hre dâwn nia, Keimah lo chu Pathian dang rêng an awm lo ve. Êng ka siam a, thim pawh ka awmtîr a, Mal ka sâwm a, vânduainate ka thlentîr bawk. Hêng zawng zawng hi kei Lalpa hian ka tih a ni. Vân sâng ata hnehna lo sûr sela, Lei hian lo dawng sela, rah chhuah rawh se, Chhandamna chu lo pâr chhuak bawk rawh se. Kei Lalpa hian chûng chu ka thlentîr ang. Hlum tlanga siam bêl chuan a vawtu chu a sawisêl thei em ni? Hlum chuan a vawtu chu, ‘Eng nge i siam dâwn le, i themthiam lo mang e,’ A ti thei dâwn em ni? Mahni nu leh pate hnênah, ‘Engati nge hetiang kher khera min hrin le?’ Tu nge ti vei awm ang? Israel-te siamtu, Mi Thianghlima, Lalpa chuan heti hian a ti: “Ka fate chungchânga min chachhuaha, Ka tih tûr chu nangni rêlsak rual em ka nih? Kei hi ka ni, lei siamtu chu A chhûnga awm mihringte pawh ka siam an ni. Keima kutin vân khi ka zâr pharh a, Thil awm zawng zawngte khi ka thu thu-a che vêl an ni. Râla lian tûrin Kura chu ka tur tho va, Kawng engkimah ka tihmuingîl bawk ang. Ka khawpui chu a din leh ang a, Lâwmman a phût lo vang a, tlanna man têl a duh hek lo vang, Ka mi, saltângte chu, a chhuah mai ang,” Engkim Lalpan a ti. Lalpa chuan heti hian a ti: “Aigupta mite thawh chhuah te, Ethiopia ram zawrh sumte chu in ta tûr a ni, An rawn ken ang che u. Seba rama mi sâng tak takte chu In bawiha ṭang tûrin an lo kal ang. Kawl bun chungin an zui ang che u a, In hmaa ṭhingṭhiin ‘Pathian awmpuite chu in lo nih ngei hi le, Ani chauh hi Pathian chak chu a lo nih hi,’ Tiin chibai an bûk bawk ang che u. Israel-te Pathian, anmahni chhandamtu chu Pathian inthup i lo nih ngei hi le. Milem siamtute chu an zak êm êm ang a, An zavaiin an mualpho vang, Lalpan Israel-te chu kumkhua atân a chhandam a, Engtikah mah an mualpho tawh lo vang.’ ” Vân siamtu chu Pathian a ni, Lei pawh a siam a, nghet takin a din hi. Chhe rem rumin a siam lo va, Chênna tlâkah a siam a ni. Chûng titu Lalpa chuan heti hian a ti: “Kei hi Lalpa chu ka ni, tu dang an awm lo ve, Lei chhûng hmun thim ata A rûkin thu ka sawi lo va, Hmun thengrenga min zawng tûrin Israela thlahte ka tîr hek lo. Kei hi, Lalpa, thu dik sawi ṭhîntu chu ka ni, Thil dik ka puang chhuak ṭhîn.” Lalpa chuan heti hian a ti: “Chhiatna pumpelh, hnam tinrêngte u, Lo kal ula, pung khâwm rawh u, Tu mah chhâng thei hlei lo thingtuma siam milem, pathiana biaa, zâwntute hian eng mah hriat an nei lo. Lo kal ula, in thu han sawi rawh u, Han inrâwn tlâng teh u, Hêng thilte hi hmânlai ata tu nge lo sawi? Kei Lalpa hi ka ni lâwm ni Mahni mite chhandamtu Pathian? Keimah chauh hi ka ni, tu mah dang an awm lo. Khawvêla mi zawng zawngte u, Ka lam lo hawi ula, ka lo hum ang che u, Keimah chauh hi Pathian ka ni, tu dang an awm lo ve. Mahni hming chhâl meuhvin thu ka tiam a, Ka thutiam chu a rinawm ṭhîn a ni. Ka thu sawi tawh ka sût ngai lo, Ka hmaah hian mi tin an lo ṭhingṭhi ang a, Ka hming an chhâl tawh ang. ‘ Lalpa, nangmahah chauh a ni, Dikna leh chakna chu a awm,’ min la ti ang a, Ka lam panin an lo kal ang. Min hawtu zawng zawngte erawh chu an mualpho vang. Kei Lalpa hian Jakoba thlahte chu ka chhandam ang a, Anni chuan mi chawimawi ang. “Babulon biak lal pathian Bela leh Neboa chu an chau va, An tlâwm ta dêr mai. Sabengtungte an phurhtîr a, Ran chau tawh tân an rit kher mai. Milem tlâwm tate chuan, A zâwntute an chhan thei lo, Mahni ngei pawh an inchhan thei lo va, Salah an hruai ta e. Jakoba leh Israel chhûng la dam zawng zawngte u, Ka thu hi ngaithla rawh u, In pian aṭang tawh khân ka puak tlei in ni a, Tarkûn lu ṭuak in nih thlengin Kei hi ka ni, khai ding ṭhîntu che u, Ka siam in ni, ka vêng zêl ang che u, Chawiliantu che u ka ni, Ka hum dâwn a che u. Tu nên nge min khaikhin ang a, Tu nên nge min tehkhin ang? An ip ata rangkachakte an bun chhuak hawk hawk a, Tangkaruate an bûk chhuak a, Themthiam rualin pathian lem an siam a, Kûnin chibai an bûk ta e. An kokiah an han chhuang a, an pu ta a, An awmna tûrah chuan an va dah a, A din ngaiin a ding rêng mai. A che sawn thei lo va, An auh pawhin a chhâng thei lo, Mangang mah se a chhan thei bawk hek lo. Chûng chu hre rengin, Chhût ngun ula, Mi sualte u, ngaihtuah rawh u. Hmânlai ata thil awm dân kha hre ta che u, Kei hi Pathian awm chhun ka ni, mi dang an awm lo ve, Keimah chauh hi ka ni Pathian awm chhun. A tîr ata a tâwp dân tûr ka sawi lâwk a, Thil lo thleng tûr hmâsâng ata ka sawi ṭhin kha, ‘Ka remruat chu a nghet tlat ang, Ka duhzâwng chu ka ti ngei ang,’ tiin. Khawchhak ata mupui ka han ko va, Ram hla tak aṭangin ka mi ruat chu ka pun a ni; A ni, ka sawi tawh a, a lo thleng ang, Ka tum tawh a, ka ti ngei ang. Thinlung luhlulte u, ka thu hi ngaithla rawh u, Hnehna ni chu a hla lo in ti. Ka hnehna ni a lo hnai ta, a hla lo ve. Rei lo tê-ah ka chhandam dâwn che u, Zion chu ka chhandam ang a, Israel chu ka tiropui bawk ang.” Aw nang nula, Babulon khaw fanu, lo chhuk thla la, Vaivutah hian ṭhu rawh. Lalṭhutthlêng ata kha, Kaldai fanu, leiah ṭhu rawh, ‘A no chik chek mang e,’ an ti leh tawh lo vang che. Buh herna khâwl vuan la, buh chu her rawh, I hmai khuhna hlîp la, I fênfual kha tichhîng deuh la, I mal hlîm la, lui kha dai kai rawh le. Saruakin i awm ang a, I zahmawh pawh a lang bawk ang. Phuba ka la dâwn a, tu mah ka zuah lo vang. Israel Mi Thianghlima chu min tlantu a ni a, A hming chu Engkim Lalpa a ni. Lalpa chuan Kaldai-ho hnênah, “Nang Kaldai fanu, Ngawi rengin thim zîngah chuan ṭhu tlawk tlawk rawh, Hnam tin lalnu an vuah dâwn tawh lo che. Ka mite chungah hian ka thinur a, Ka mi thlante ka sawisa a, I kutah ka rawn dah a, I lo khawngaih si lo. Putarte pawh dim hlek lovin i chhawr zêl mai. Lalnu ni kumkhua tûra inngaiin thil lo thleng tûr i thlîr lo va, A tâwp dân tûr i hre hek lo. Nawmchen lâwmnu: lo ngaithla teh, Lungmuang takin i awm der der ṭhîn a, ‘Kei chauh lo chu tu dang nge awm,’ i ti vei a. ‘Hmeithai ka ni dâwn lo, Lû ka sûn hauh lo vang,’ i ti bawk nên. Thâwklehkhatah, ni khat thil thu maiah, Hêng thilte hi i tuar ngei dâwn. Dawi thiam hlein thil ti thei viau mah la, Lu i sûn ang a, i hmeithai ngei dâwn e. Ngaihngam takin thil sual i ti ṭhîn a, ‘Tu man min hmu lo vang,’ tiin i finna leh i hriatna chuan a hruai bo che, ‘Kei chauh lo chu tu dang nge awm?’ I ti rilru vei ṭhîn. Dawia i dan zawh loh thil ṭha lovin a nang ang che, Thawi dam zawh loh vânduainate i chungah hian a lo thleng ang, I hriat lâwk loh chhiatna a lo thleng thut dâwn si. I dawi thiam te, i dawibûr te, I naupan lai ata i hman ṭhin kha bânsan duh suh, Tute emaw tihṭhaihin i hlâwkpui hlauh mahna. Thurâwntu che an tam vei nên, Eng mah i ti thei chuang si lo. Vân ṭhen thliaha, arsi thlîrtute leh thla tina thil sawi lâwktute chu Lo kal sela, chhan che rawh se. Meia kâng ral mai ṭhîn buhpâwl ang lek an ni, Meialh hluah hluah lakah an inchhan thei lo va, An tân a sa lutuk a ni, Meivâm ai tûr ang lek a ni si lo. I naupan lai ata i thawhpui leh i dâwr ṭhinte, Chutiang mai chu an lo ni si, An duh hunah an kalsan mai ang che, Tu man an chhan lo vang che,” a ti. Jakoba chhûngte u, ngaithla rawh u, Israela hming in pu a, Juda thlah in ni a, Israela Pathian hming chu in lam fo ṭhîn. In ti tak tak si lo va, in ti mai mai a ni. Khawpui thianghlim mi in inti a, Israel-te Pathian ringtu in inti bawk a, A hming chu Engkim Lalpa a ni. Lalpa chuan Israel-te hnenah, “A tîr ata hmâsâng thilte ka hril lâwk a, Ka sawi chhuak a, ka puang bawk a. Ka tih chu a ni ta nghâl mai a ni. In luhlul êm êm a, In nghâwng chu thîr anga khauh a ni, In chaldâr lah ngên anga chang a ni. In chungchâng thu ka sawi lâwk a, A lo thlen hma ngeiin ka hriattîr ṭhîn che u, Chutilo zawng, ‘Kan milem tih a ni, Kan chher leh chhûn milemte thu thu-a lo awm a ni,’ In ti vei dah ang e. Hêng hi in hmu a, in hre ta a, A dik in ti lâwm ni? Tûn aṭangin thil thar ka hrilh dâwn a che u, In hriat loh thil inthupte chu. Tûn maiah khân ka awmtîr a, Tûn hma kha chuan in hre ngai lo, Awm tawh ni se, ‘Kan hriat hnu alâwm,’ in ti ang. In la hre ngai lo va, in la hmu ngai hek lo, Tûn hma zawng khân beng pawhin in hre ngai lo, Mi bum hmang tak in nih ka hria asin, Pian tirh ata hel hmang in ni si a. Ka hming avângin ka thinur chu ka tilang duh rih lo va, Min fak theih nân ka insûm rih a ni, Ka tiral rih lo vang che u. Tangkarua chu thukah an rawh thianghlim ṭhîn a, Harsatnain nangni pawh hi ka fiah che u a ni. Keimah avâng liau liauva ti ka ni, Ka hming tihhliau ka phal lo va, Ka ropuina chu tu ma mi ṭâwm ka phal hek lo,” a ti a. Lalpa chuan heti hian a ti: “Aw ka koh Israel, Aw Jakob, ka thu hi ngaithla rawh, Kei hi a bul leh a tâwp chu ka ni. Lei innghahna, keima kuta ka siam a ni, Ka kut ding lamin vân khi ka zâr pharh a, Ka han ko va, an lo awm ta mai a ni. Lo kal khâwm vek ula, ngaithla rawh u, Tu ber hian nge hêng hi lo sawi lâwk le? Lalpa hmangaiha chuan Babulon-ah a duhzâwng chu a rawn ti ang a, Kaldai mite chungah kut a thlâk ang. Keimah ngeiin ka sawi tawh a, ka koh a ni, Ka rawn hruai a, a tih tûrah a hmuingîl ang. Lo hnai ula, hei hi hre rawh u, A tîr ata a rûkin thu ka sawi lo va, Thil lo thlengah ka awm ve zêl a ni.” (Tûnah Lalpa Pathian chuan min tîr a, A Thlarau pawh min pe a ni.) Nangmah thlangtu, Israel Mi Thianghlima, Lalpa chuan heti hian a ti: “Kei hi Lalpa, i Pathian chu ka ni, I tâna ṭha tûr chu ka zirtîr ṭhîn che a, I kalna tûr kawng chu ka kawhhmuh bawk ṭhîn che. Ka thupêkte ngaihven duh ṭhîn la aw: Luipui kang lo angin malsâwmnate a lo luang tûr. Tuifâwnte chuan vaukam a tuam hlup hlup angin, Hlawhtlinna pawh i tân a lo thleng tûr. I thlahte chu ṭiauvaivut anga tam an ni ang a, I tu leh fate chu chhiar sên an ni lo vang. Ka hmaah chuan an ral ngai hek lo vang. Babulon khua ata kal chhuak ula, Kaldai ram hi tlânsan rawh u. Hlim taka au vêlin ka thu hi puang ula, Hmun tinrêngah sawi zêl rawh u, ‘ Lalpan a chhiahhlawh Jakoba chu a tlan chhuak ta,’ tiin au rawh u. Thlalêr rama a hruai pawhin an tuihâl lo, Lungpui ata an tân tui a lo chhuak a, Lungpui khi aṭangin tuihna a lo chik chhuak bawk a. ‘Mi sualte tân râlmuanna rêng a awm lo ve,’ ” Lalpan a ti. Thliarkârte u, ka thu hi ngaithla rawh u, Hla taka awmte u, ngaihven rawh u. Chhûla ka awm lai khân Lalpan min ko va, Nu pum chhûnga ka awm lai khân ka hming a sa. Ka thu khandaih hriamah a chantîr a, A kut phênah min dah ṭha a, Thal zum takah min hmang ta a, A thal bâwmah min dah ṭha e. “Ka chhiahhlawh chu i ni, aw Israel, nangin min chawimawi ang,” min ti. Ka thawkrim thlâwn a ni, Thil lawilovah ka tha ka sêng zo va, Thawh chhuah eng mah ka nei si lo ka ti hial a; Mahse, ka chungthu hi Lalpa rêl tûr a ni. Ka thil tih ang zêla min petu chu Pathian a ni. Ka pian hma khân Lalpan a chhiahhlawhah min ruat tawh a, Jakoba chu hruai kîr tûr leh Israel-te hruai khâwm tûrin Lalpan min chawimawi a, Ka Pathian chu ka chakna hnâr a ni. Lalpa chuan heti hian a ti: “Jakoba thlahte tungdinga, Israel la damte hruai kîr tûra Ka chhiahhlawh nih hi nêp tak a ni. Chu aia hna ropui zâwk tih tûr i nei, Khawvêl pum pui hi chhandam a nih theih nân Hnam tin tân êng i ni ngei bawk tûr a ni.” Lalpa Israel-te tlantu, Mi Thianghlima chuan heti hian a ti: “Nang, mi hmuhsit, hnam tin endawng, Rorêltute chhiahhlawh, Lalten bawih ata i chhuak an hmu ang a, Nangmah zahin an tho vang a, Miliante pawh i hmaah an kûn ang.” Lalpan a thu a hlen avângin Israel Mi Thianghliman a thlang a che. Lalpan heti hian a ti: “A hun takah ka chhâng che a, A hun takah ka chhan chhuak che, Ka humhim che a, nangmah avângin Hnam dangte nên thu ka thlung a, In ram tungding leha, In ro chan ram ṭiau hnu in luah leh vek theih nân. Lung in tângte chu, ‘Chhuak rawh u’, ka ti ang a, Thim zînga awmte chu, ‘Engah lo chhuak rawh u,’ ka ti bawk ang. Berâm angin kalkawngahte an tla ang a, Mual kawlhahte hnimhring an hmu zêl ang. An ril ṭâmin an tui a hâl ngai lo vang a, Thli lum leh chhûn ni sa hrehawm an ti hek lo vang. An hruaitu chuan a lainat a, Tui tlan tûr awmnaah a hruai dâwn si. Tlângahte chuan lamlian ka sial ang a, An kalna tûr kalkawng ka buatsaih ang. En teh, ka mi, hla taka lo kalte saw, Hmâr lam ata an lo kal a, Thlang lam ata an lo haw e. Sinim ram hla aṭangtein an lo kal saw.” Vânte u, hlim takin au ula, Leilung pawh hi lâwmin au bawk rawh se. Tlângte lâwmin au chhuak sela, Lalpan a mite chu a thlamuan a, Tihduhdah tuarte chu a lainat hi. Zion chuan, ‘Kan Lal P athian -in min ngaihthah a, Lalpan min theihnghilh ta a ni,’ a ti hial a. Lalpan heti hian a ti: “Nuin a fa hnute hne lai a theihnghilh thei em ni? A rîla rah a lainat lo thei dâwn em ni? Nuten an fate chu an theihnghilh mai thei e, Kei chuan ka theihnghilh tawp lo vang che u. Ngai teh, ka kutphahah i hming ka ziak tawh a, I kulh bangte ka vêng reng ṭhîn a ni. Tichimtu che ai chuan sak ṭhat duhtu che chu an hmanhmawh zâwk a ni. A tichhetute chuan an chhuahsan thuai ang che. Dâk la, i mit han lên vêl teh, I mite chu an inhâwr khâwm mêk zêl a ni, An lo kal dâwn ṭêp e, Pathian nung ka nih a chiang ang leh, Movin a incheina a chhuang ang hian, I mite chu i chhuang hle ang. In ramte chu a chhe vek a, a ram dêr kha, A luah tûrte an lo thlen chuan A zîm lutuk ngei dâwn, Tiramtu che an bo vek dâwn si a. I tu i fa, saltâng lo hawte chuan, I beng hriatah, ‘Ram hi a zîm lua e, Chên nân ram zau zâwk kan mamawh ta e,’ an la ti ang. ‘Hêng mite hi tu nge min hrinsak le? Ka fa hrinte ka sûn zo va, Sala tângin ka vâkvai a, Hênghote hi tu nge min tihseilensak ni? Keimah chauhvin min hnutchhiah kha, Hêng mite hi khawi lam mi nge?’ i la ti ang.” Lalpa Pathian chuan heti hian a ti: “Hnam tin hmuhah ka bân ka phar ang a, Ka hui ang a, i fate chu an rawn pawmsak ang che, I fanute pawh chu an rawn pua ang. Lalte chu i pate an ni ang a, Lalnute chuan an awm ang che. Leia bawkkhupin chibai an bûk ang che a, I kea vaivut chu an liak bawk ang. Kei hi Lalpa ka nih i hriat theih nân, Min nghâktute tu mah an mualpho lo vang.” Mi huai râllâk i chhuhsak ngam em ni? Mi kawlhsenin a tântîr chu i chhuhsak ngam em ni? Lalpa chuan heti hian a ti: “Mi huai râllâk chu ka chhuhsak ang a, Mi kawlhsen tântîr pawh ka chhuah bawk ang. Khingtu che chu ka khing ang a, I fate chu kei hian ka chhandam ang. Tinawmnahtu che chu anmahni sa ka eitîr ang a, Uain rui ang maiin thisen an rui phung ang, Kei Lalpa hi nangmah Chhandamtu leh Tlantu, Jakoba Mi Chaka ka nih hi, Mi tinrêngin an hre vek ang.” Lalpa chuan heti hian a ti: “In nu Israel chu, ka tirh bo khân, Mâkna lehkha ka pe em ni? Leiba aia an fate hralh angin Tu hnênah nge ka hralh che u? In sual vângin a ni hralh in niha, In bawhchhiatna avângin a ni, in nu ka tirh bo ni. Ka lo kal khân tu man mi ûksak lo, Ka koh lai khân tu man mi chhâng hek lo; Chhan chhuak tûrin ka bân a tawi lutuk ta em ni? Chhan chhuak tûrin ka chak tâwk ta lo vem ni? Ka han hau hlek a, tuipui chu a kang mai a, Luipuite lah thlalêr rovah ka chantîr a, Tui awm loh avângin sanghate an thi a, An ṭawih zo ta. Vânte pawh khi ka tithim a, Lusûn puan dum sin ang mai a lo ni.” Lalpa, ka Pathian chuan Thu sawi thiamna min pe a ni, Mi chaute chu thu-a fuih harh dân tûr ka hriat theih nân tûk tin mi tiharh a, A tûk a têlin mi zirtîrna ka hrethiam telh telh a ni. Lalpa, ka Pathian chuan ka beng min hawnsak a, Kei ngei pawhin luhlul ka chhuah lohva, Ka hawi lêtsan loh nân. Vuak atân ka hnungzâng ka dawh a, Ka hmuihmulte an pawhin ka dawh reng a, chil te min chhâk a; Mahse, zakin ka hmai ka hup ngai lo. Lalpa, ka Pathian chuan min pui ṭhîn a, Chuvâng tak chuan ka mualpho lo va ni; Ka intipachang lui a, zahna tûr rêng ka nei lo vang. Mi ṭantu chu a lo hnai e, Tu nge mi khing ngam ang? Thiam thu sawiin i han ding tlâng teh ang, Min khingtu chu lo hnai teh se. Lalpa, ka Pathian hi min ṭantu chu a ni, Tu nge thiam loh min chantîr ang? Puan angin an hlui ang a, Thîmin a ei zo vang. Nangni zînga Lalpa ṭih ṭhîn, A chhiahhlawh, a thu pawisa ṭhîntute u, Êng nei lovin thimah kal mah ula, Lalpa hming chu ring mai ula, Pathianah chuan innghat rawh u. Mahse, mahni meichher chhi-a, Thal alh thei paite u, In thal alh êngah chuan kal teh rêng u, Lalpa kut in tuar tûr chu, Hrehawm râpthlâk tak a ni. Lalpa chuan heti hian a ti: “Chhan chhuah duha Lalpa zawngtute u, Ka thu hi ngaithla rawh u. In pian chhuahna lungpui hi en ula, In lo chhuahna lung khur hi en teh u. Abrahama, in thlahtu kha ngaihtuah ula, Sari, in hringtu kha hre reng rawh u. Ka koh lai khân fa rêng an nei lo va, Mal ka sâwm a, an pung ta chiam a nih kha.” Lalpan Zion khua chu a khawngaih a, A khaw chim chhûnga chêngte chu a thlamuan a; A ram, thlalêra chang te pawh, Eden angin a siam ang a, A ram ṭiau chu Lalpan huanah a siam dâwn e. Tah chuan hlimna leh lâwmna a awm ang a, Lâwmthu sawiin fak hla an sa bawk ang. “Ka mite u, ka thu hi ngaithla ula, Ka hnamte hian an beng lo chhi rawh se, Dân thu chu ka hnên ata a lo chhuak; Ka mite êng atân rorêlna dik ka siamsak bawk. Ka hneh hun chu a hnai ta a, Ka chhan chhuah hun a lo thleng dâwn, Keimah ngeiin ka mite chungah ro ka rêl ang a, Thliarkârte chuan min thlîr ang a, Ka kut an nghâk bawk ang. Vân lamah te in mit lên chho u la, Hnuai lama lei hi en rawh u, Vân khi meikhu angin a zâm ral ang, Puan ang maiin lei pawh hi a la hlui ang a, A chhûnga chêngte pawh tho ang maiin An thi pheng phung bawk ang. Ka chhandamna erawh hi zawng kumkhua atân a ni a, Ka hnehna pawh a tâwp ngai lo vang. Thu dik hretu, ka Dân thinlunga paite u, Ka thu hi ngaithla rawh u. Mihring deuna hlau suh ula, An diriamna pawh manganpui hek suh u. Thîmin puante a ei chhia a, Sûlrûl pawhin sahmul puante a ei ral ṭhîn ang hian, Chûngho pawh chu an la ral ang; Ka hnehna erawh chu kumkhua atân a ni a, Ka chhandamna pawh chu chhuan zawng zawng tân a ni.” Lalpa, harh la, harh la, tho teh, Hmânlai mite hnênah i chakzia chu i lantîr a, Han lantîr leh teh le. Nang hi i ni lâwm ni, Rahab sât sawma, tuipui Dragon chhun hlumtu kha? Tuipui tikanga, i mi thlante kal kaina tûr Tuifinriat mawnga kawng siamtu kha i ni lâwm ni? Lalpa, i tlante chu an lo hâwng ang, Zion tlâng chu zaiin an lo thleng ang, Chatuan lâwmna an khum ang a, Hlim leh lâwmin an khat ang a, Lungngaih thlaphân a awm tawh lo vang. Lalpa chuan heti hian a ti: “Kei hi ka ni thlamuanna rawn thlentu, Thi thei mihring, hlobet ang leh hring fate hi, Engtizia nge in hlauh mai le? Vân kai pharha, lei nghahchhan phûmtu, In siamtu Lalpa hi in theihnghilh ta em ni? Tiduhdaha tihchhiat tumtu che u thinur hlau rêng rênga in awm mai le? Thinur mah se in tuar lo vang. Kun tlawk tlawk tawhte chu an ding char leh thuai ang, Saltâng retheite chu an chhuak thuai ang a, An tânna khur chhûngah chuan an thi lo vang a, Ei tûr an tlachham hek lo vang. Kei hi Lalpa, in Pathian chu ka ni, Tuifinriatte ka chawk let a, Tuifâwnte chu a ri hum hum ṭhîn, Ka hming chu Engkim Lalpa a ni. Vân khi ka kai pharh a, lei innghahna ka phûm bawk a, Zion mite hnênah, ‘Ka mite in ni e, In hmuiah chuan ka thu ka dah ta a, Ka kut phênah ka dah ṭha ta che u,’ ka tih kha. Harh teh, harh teh, Jerusalem, tho teh, Lalpa thinurna uain chu i in ta a, Pai pai khawpa ruiin i in tâk hi, Hruai tûr chein i fa tu mah an awm lo va, Kai tûr chein i mite zînga mi tu mah an awm hek lo. Chhiatna thuah hnih i tuar tâk hi, Tu nge ṭah ta ang che? I ramte chu tihchhiat a ni, a ṭiau zo ta; I mite chuan ṭâm an tâwk a, khandaih an tuar tâk hi, Engtin nge, ka thlamuan tâk ang che? I fate chu kawtthlêr pêngṭhuam tinah chauvin an tlu phung mai. Lêna sathâr man ang maiin Lalpa thinur an tuar ta e, An pathianin a hau a ni. Nangni tihduhdah tuar, zu in si lo, ruia pai paite u, Hei hi lo ngaithla rawh u: Lalpa Pathian, a mite ṭan thîntu, in Pathian chuan Heti hian a ti: “Rui pai khawpa in tlâk ṭhak no, Lalpa thinurna uain no chu, Ka intîr leh ngai tawh lo vang che u. Ka la bo daih ang a, Nangmahni tiduhdaha, kawtthlêrah te, ‘Ka rahchhanah bawk rawh u,’ tia, I hnungzâng zawha, vei vêl ṭhînte hnênah ka pe thung ang.” Tho teh, tho teh, aw Jerusalem, Han insangmar rawh le, khawpui thianghlim Jerusalem, Ropui takin han inchei teh, Serh tan loh leh mi bawlhhlawhte An lo lût tawh dâwn lo. Aw Jerusalem, vaivut ata thovin inbêngfai la, Lalṭhutthlêngah ṭhu rawh. Zion khawpui fanau saltângte u, In nghâwng ata kawl kha hlîp rawh u. Lalpa chuan heti hian a ti: “Man têl lova bawiha hralh in ni a, tangka sum pe lova tlan in ni ang.” Lalpa Pathian chuan heti hian a ti: “Hmânah ka mite chu anmahni thuin Aigupta ramah an pêm a. Asuria-hovin engkhaw lawilovah an rawn rap bet leh a. Tûnah eng nge ka tih tâk ang?” Lalpa thuchhuak chuan a ti. “Ka mite chu Babulon-ah man pe lovin bawihah an hruai a, an chunga rorêltute chuan an vîn tuar tuar a,” tih hi LALPA thuchhuak a ni. “Nilêng lêngin ka hming an sawichhia a ni. Chuvângin, ka mite chuan ka hming an hria ang a, chutih hunah chuan keimah ngei hi a sawitu ka ni tih an hria ang. Ngai teh, keimah ngei hi ka ni.” Zion hnêna, “I Pathian chuan ro a rêl ta,” tia, Bawih chhuah thu lâwmawm tlâng tina rawn puanga, Remna chanchin ṭha rawn thlentute ke chu a va mawi em! Ngai teh, i râlvêngtute au thâwm chu! Zion-a Lalpa lo haw an mit ngeia an hmuh avângin Hlim takin an zai e. Jerusalem khaw ram tawha chêngte u, Hlim takin au dur dur rawh u; Lalpan a mite chu a thlamuanin Jerusalem khua chu a tlan ta e. Mi tin hmuhah Lalpan a bân thianghlim a hlîm ta a, Khawvêl pum pui pawh hian Pathian chhandamna chu an hmu bawk ang. Chhuak rawh u, chhuak rawh u, Babulon hi chhuahsan rawh u; Thil bawlhhlawh rêng rêng khawih suh u, Lalpa bungbêl phurtute u, inthian thianghlim ula, Chhuahsan rawh u. Tlânchhia anga kal tûr in ni lo va, Râltlân anga chhuak tûr in ni hek lo, Lalpan in hma a hruai ang a, Israel-te Pathian chu in hnu dâltu a ni dâwn si. Lalpa chuan heti hian a ti: “Ngai teh, ka chhiahhlawh chu a thil tihah a hmuingîl ang, Miten an chawimawiin an ngaisâng êm êm ang. Amah an hmuhin mi tam tak chuan Mak an ti êm êm dâwn a ni. A hmêl an tichhe nasa êm a, Mihring hmêl pawh a pu lo ve. Hnam tam tak chu a thisenin a theh fai ang, Lalte pawhin mak ti takin an hmui an chîp bawk ang; An la hrilh ngai loh chu an hmu ang a, An la hriat ngai loh chu an hre bawk dâwn si a. Kan thu sawi hi tu nge awih anga, Lalpa kut lo lang hi tu nge hrethiam ang le? A hmaah chuan ani chu thil ṭiak hlim, Lei ro aṭanga zung lo chawr chhuak ang maiin a lo piang chhuak a, Amah kan duhna tûrin ropuina leh mawina rêng a nei lo va, Kan ngainatna tûrin duhawmna rêng a nei hek lo. Ani chu mihringte duh loh leh hmuhsitin a awm a, Lungngai thei mi leh na thei mi a ni a; Mite hawisan leh hmuhsitin a awm a, Keini lah chuan engah mah kan ngai si lo. Ani chuan kan natnate min tuarsak a, Kan lungngaihnate a phur a lo ni zâwk; Keini lahin hrem tuarah leh, Pathian nghaisak leh vuakah kan ngai a. Mahse, ani chuan kan bawhchhiatna avângin hliam a tuar a, Kan sual avânga sawisak a ni; Muanna kan neih theih nân hrem a tuar a, A vuak tuar chu kan tân damna tûr a lo ni. Berâm angin kan vâk bo vek tawh a, Mahni duh lam lam kan pan ṭheuh va; Lalpan kan zaa khawlohna chu A chungah chuan a nghat ta a ni. Ani chu hnehchhiah leh tihduhdahin a awm a, Inngaitlâwm takin a tuar zêl a, A chhâng lêt ve hauh lo; Berâm talh tûr an kaih laia a ngawi tlat leh, Berâm a hmul meh laia a ngawi reng ṭhîn ang hian, Ani pawhin eng mah a sawi lo. An han man a, a chungthu an rêl a, A thlah kal zêl tûr tu man an dâwnpui lo; A nunna chu khawvêl ata an lâksak ta, Ka mite sual vânga tihhlum a ni. Râwng taka eng mah ti ngai lovin, Bumna thu rêng rêng sawi ngai lo mah se, Mi suaksualte thlânah phûm tûra ruat a ni a, Mahse, a thih chuan mi hausa thlânah an phûm ta zâwk. Lalpan vuak tuartîr chu ṭha a ti a, A tuar ta rêng a ni. A nunna chu sual thawi nâna i pawm hunah, A thlahte chu a hmu tawh ang. A dam chhûng chu a tisei ang a, A kutah chuan Lalpa duhzâwng a puitling ang. A thawh rah a hmuh hunah chuan A thlâwnin a tuar lo tih a hria ang; Ka chhiahhlawh fel tak chuan Mi tam tak a chhanhim ang a, An sualnate a phurhsak ang. Mi lian zîngah a chanpual tûr ka dah ta a, Mi chak zîngah râllâk sum chu a sem ve ang; Thi khawp hialin a inpe a, Mi sualte zîngah chhiar a ni si a. Ani zawngin mi tam tak bawhchhiatna phurin Mi sualte tân a ngensak ṭhîn. “Aw nang, fa nei ngai lo, hlim takin au rawh le, Nau vei ngai lo, lâwmin au chhuak ta che; Pasal neite ai chuan khawharnu chuan fanau a ngah zâwk dâwn,” Lalpan a ti. I puan in hmun chu zauh la, A khuhna pawh tihlai ang che, ren suh, A thlunna hruite chu tisei zêl la, A kaihmarna khente pawh tinghet sauh rawh. I ramri chu ding lam leh vei lamah i zauh ang a, Hnam dang luah ramte chu I fate chuan an nei ang a, Khawpui ram tawhte pawh An chûl hnûm leh dâwn e. Hlau suh, i zak dâwn tawh lo ve, I mualpho hek lo vang, i tlâwm tawh dâwn si lo, I tleirâwl lai mualphona chu i theihnghilh daih ang a, Hmeithai hmuhsitâwm tak i nih lai pawh i hre reng tawh lo vang. I siamtu chu i pasal a ni ang a, A hming Engkim Lalpa a ni. Israel-te tlantu, Mi Thianghlima a ni a, Lei pum pui Pathian tih a ni bawk. Tleirâwl chhuaha pasal nei, a pasalin a duh tâk loh, Thinlung na êm êm ang hi i ni; Mahse, Lalpan a ko leh dâwn a che. Rei lo tê chhûng ka ṭhen che a, Ka khawngaih êm che a, ka ko leh thuai ang che. Ka thinur êm vângin ka hawisan lawk che a, Ka hmangaihin ka khawngaih kumkhua ang che, Nangmah tlantu Lalpa chuan a ti e. “Nova dam lai khân Leiah tuilêt tawh lo tûrin thu ka tiam a, Thinur taka zilh tawh loh che tûnah ka tiam tâk hi,” Lainattu che, Lalpan a ti. “Tlângte chu bovin mualte pawh insawn mah se, Ka lainat che a reh lo vang, Remna thuthlung ka siam ka sût hek lo vang,” Lalpa, hmangaihtu che chuan a ti. Aw Jerusalem, sawisak nek tâwk, Tuifâwn vawrh lên vawrh lên, khawngaih hlawh lo, Lung ṭha chi hmangin ka din leh dâwn a che, I innghahna lungah safir ka phûm ang a, I vênbûkah rubi lung ka hmang ang a, I kulh kawngkhârah chuan lung chang tle mi ka hmang ang a, I kulh bangah lung hlu tak tak ka hmang bawk ang. I fa zawng zawng Lalpan a zirtîr ang a, Râlmuang takin an awm der der tawh ang. Dikna avângin i nghet ang a, Tiduhdahtu an kal bo vang a, hlauh tûr i nei lo vang, Hlauhawm lahin a hnaih hek lo vang che. Beitu che an awm chuan ka thu lova ti an ni a, A bei apiang che chu an tlâwm ngei ang. Ngai teh, meihawl chhêma, hriamhrei chhertu thîrdêngte hi ka siam an ni; Chûng hriamhrei thil tihchhiat nâna hmangtute pawh ka siam an ni. Nangmah beihna tûra an hriam chherte rêng rêng chu hmuingîl a awm lo vang. Nangmah hêktu zawng zawngte chuan Thiam loh an chang zâwk ang. Hei hi Lalpa chhiahhlawhte chan tûr chu a ni, Hnehna ka pe dâwn e, Lalpa thuchhuak chuan a ti. Hawh u, tuihâl apiangte u, Tui hi han pan rawh u. Tangka sum nei lote pawh lo kal ula, In ei atân buh hi tangka pawh pe chuang lovin han la ula, Uain leh hnutetui hi rawn chaw rawh u, A man a awm lo ve. Puar leh fânna ni lovah Engah nge in sum in khawhral le? Tlaina tûr ni lovah in tha in sêng thlâwn e. Ka thu hi ngai ula, Thil ṭha tuihnai tinrêng In châk apiang in ei dâwn nia. In beng dawhin ka hnênah lo kal rawh u, Ngaithla ula, in nung dâwn nia. Kumkhua atân thu i thlung ang, Lal Davida hnêna khawngaih ka tiam tlat tâk ang khân. Miten ka ropuizia an hriat theih nân, Ani chu hnam hotu leh hruaitu atân ka ruat a ni. I hriat ngai loh hnam chu i duh duhin i ko vang a, La hre ngai lo che chuan tlânin an rawn bêl dâwn che nia, Israel Mi Thianghliman chu chu a ti ang a, A chawimawi dâwn a che. Hmuh theiha a awm lai hian Lalpa chu zawng ula, A hnaih lai hian amah chu ko rawh u. Mi sualte chuan an awm dân chu kalsan sela, Mi tu pawhin an ngaihtuahna sualte bânsan sela, Lalpa lamah lo kîr rawh se. A lo khawngaih ngei ang; Kan Pathian hi ngaihdam peih tak a ni. ‘Ka rilru leh in rilru chu a inang lo, Ka awm dân leh in awm dân pawh a inmil bawk hek lo,’ Lalpa thuchhuak chuan a ti. Vân khi lei aia sâng a ni ang khian, Ka awm dân hi in awm dân aia sâng a ni. Ka rilru pawh in rilru aia thûk a ni. Ruah leh vûr chu vân aṭangin a lo tla a, Kîr leh lovin lei hi a tihnâwng ṭhîn, Thlai chi theh chu a tiṭiak a, A thehtu tân rah sêng tûr pawh a awmtîr ṭhîn. Ka kâa thuchhuak pawh Hlawhchhama kîr leh rual a ni lo ve, Ka duhzâwng chu a ti zêl ang, Ka tirhnaah a hlawhtling ngei bawk ang. Hlim takin Babulon chu in chhuahsan dâwn. Râlmuang takin an hruai chhuak ang che u, In hmaah chuan tlâng leh mual te, Lâwmin an au chhuak ang. Ngâwa thingte chuan hlimin kut an bêng dur dur ang. Hnimhlîngnei hmunah chuan fâr thing a ṭo vang a, Hlohar hmunah lenhmui a ṭo bawk ang. Lalpa thiltih hriat reng nâna kih loh tûr Kumkhua atân chhinchhiahna a ni ang. Lalpa chuan heti hian a ti: Dik takin ro rêl ula, diktakin thil ti rawh u, Ka chhan chhuak thuai dâwn a che u, Ka felzia chu a lo lang ang. Sabat bawhchhe lova serh ṭhîn, Thil ṭha lo rêng rêng khawih duh lo, hêng hi tia, Vawng tlattu mihring chu a nihlawh e. Lalpa mite rawn bêltu hnam dangte chuan, “ Lalpan a mite nên min enhrang e,” ti hauh suh se. Til reh pawhin, “Thing ro mai ka ni e,” ti hek suh se. Til reh hnênah Lalpan heti hian a ti e: Sabat serha, ka duhzâwng tia, Ka thuthlung pawh vuan tlattu chu, Ka Tempul-ah, ka in chhûng ngeiah hian, Amah hriatrengna tûr ka siamsak ang, Fanu fapa neite aia hming ṭha ka pe bawk ang. A hming a dai ngai lo vang. Hnam dang, Lalpa bêla a rawngbâwl ṭhîn Lalpa hming chu ngaina êma, a chhiahhlawha inpe, Sabat bawhchhe lova serh ṭhîn, Ka thuthlung vawng tlat ṭhînte chu Ka tlâng thianghlimah chuan ka hruai ang a, ṭawngṭaina hmun, ka inah chuan, Hlim êm êmin ka awmtîr ang. Hâlral thilhlan inthawinate Ka maichâma an rawn lâk chu ka lo lâwm ang. Ka Tempul hi mi tinrêng tân ṭawngṭaina hmun tih a ni ang. Tihdarh Israel-te hruai khâwm lehtu, Lalpa Pathian thuchhuak chuan heti hian a ti: A dangte pawh ka la hruai khâwm zêl ang. Ramhnuaia chêng, ngawpuia tla, Sakawlhte u, lo kal ula, han seh rawh u, Râlvêngtute mit chu a del vek a, eng mah an hre thei lo. Vêngtua dah ui bauh duh lo ang hi an ni, Mang nei hiala mut bawrh bawrh chauh an duh, Mut hi an va thlahlel kher êm! Ui koham ang maiin an tlai thei lo, Berâmpu chu an ni ngei a, A chhia a ṭha an thlei thei lo; Mahni duhzâwng angin an khawsa a, An tâna hlâwk tûr chauh an zawng vek mai. “Hawh u, zu i zawng ang; Rakzu thlum tui i in ṭeuh vang, Naktûk lamah phei chuan vawiin aiin A thlum sawt ang,” an ti a. Mi dik a thihin hrethiam rêng an awm lo va, Pathian ṭih mi lâk bo a han ni a, Chûng mite chuan hrehawm an kalsan ta tih rêng Ngaihtuah zui thiam an awm hauh lo. Thlamuang takin an awm ta a, Nun ngîl taka khawsa ṭhînte chu An khum laizâwl ngeiah an hahchâwl ta. Nangni, dawi chîngte u, lo kal thuai thuai teh u, Uire fa leh mihur thlahte in ni si a. Tu nge in nuihzata, Tu nge in chhiat khuma, in lei in chhuah khum le? Suahsualna leh inbumnaa hrin vek in ni lâwm ni? Sasaw hnuaiah nuam in tâwl a, thingbuk hlim nuam in pan zêl a, In fa sênte inthawi nân in hlân a, Lui kam khâm kârahte in hlân si ṭhîn. Lui kam lung mûm in thlang chhuak a, Chûngte ngei chu in pathianah in neih ta a, Uain leihin inthawina in hlân a, Ka lâwm dâwnin in ring em ni? Tlâng sâng sângah in mut dun nân khum in dawh a, Tah chuan in rawn inthawi ṭhîn a. In kawngka phênah chuan In milem chu in hûng ṭhîn a ni. Khumah in puan in phah duai a, In lâwn dûn ta ṭhîn a, In mutpui châkte chu thu in tiam a, Remchâng in hmu mai ṭhîn. Hriak rimtuite in thih mawm a, Moleka biak tumin in pan vang vang ṭhîn a, Biak tûr zawngin palaite ram tin in fantîr a, Mitthi khuaahte hial in kaltîr ṭhîn. Biak tûr zawngin in hah zo va, “A beidawnthlâk mang e,” in ti si lo. Beisei tûr thar in hmu zêl a, In chau chuang lo. Tu nge in hlauh, tu mitmei nge in vên? Dâwt min hrilh a, min theihnghilh tâk mai le? Rei tak ka ngawih avâng em ni Min zah lova min hlauh tâk loh? Dik nia i hriat chu i ti ṭhîn a; mahse, a sâwt lo vang, Ka mualpho dâwn a che. Mangang taka i au hunah I lâk khâwm ṭeuh milemte khân chhâng che rawh se, Thliin a lên ang a, a chhêm bo vang, Kei min bêltute erawh chuan ram hi an rochung ang, Ka tlâng thianghlim an chang bawk ang. Heti hian a ti: “Chhûng pâwng rawh u, Lamlian siamin lei chhûng ula, Ka mite hâwn kawng dîptu chu sât fai rawh u.” Hmunsânga chêng, chatuana nung, Mi Thianghliman heti hian a ti: “Hmun Thianghlim sâng takah awm mah ila, Thuhnuairawlh leh inchhîrte hnênah chuan Chawisâng tûr leh tiharh tûrin ka awm zêl ṭhîn. Ka mite chu ka dem fo lo vang a, Ka thin a ur reng hek lo vang. Ka hmaah chuan an chau chhe dah ang e, Keima siam ngei an ni si a. An sual vâng leh an duhâm avângin An chungah chuan ka thin a han ur a, Ka hrem a, thinurin ka hawisan ta a ni. Tichuan, an duhzâwng hlîr ti chung zêlin An khawsa lui ta tlat a ni. An awm dân chu ka hre reng a, Mahse, an natna chu ka tihdamsak ang a, Ka hruai ang a, ka pui ang a, Lusûnte chu ka thlamuan ang. Ram tin ram tanga awmte tân, Muanna, Muanna, ka mite chu ka tidam ngei dâwn e,” Lalpa kâ chuan a ti. Mi sualte zawng tuipui fâwn vêl, Châwl ngai lo ang hi an ni, Tuifâwnah chuan chirh leh bawlhhlawh a lo chhuak ṭhîn. Mi sualte tân muanna rêng a awm lo, Kan Pathian chuan a ti. Lalpa chuan heti hian a ti: “Au vak vak la, insûm hauh suh, Tawtawrâwt ri angin i aw chhuah la, Ka mite thil tihsual, Jakoba thlahte sualna chu hrilh rawh. Zawn zawng ni tin min zawng ṭhîn a, Ka duhzâwng chu hriat pawh an hre châk hle a, Dik taka thil ti ṭhîn hnam ni âwm takin Pathian thupêk hlamchhiah mai chu in tum lêm lo, Dik taka rorêl dân min zâwt chhên a, Pathian hnaih châk in inti hle. ‘Chaw kan nghei a, engtizia nge i hmuh si loh? I ngaihsak si loh chuan engah nge ril kan tihṭâm ang?’ in ti. In chaw nghei ni chu nawmsak bâwl nân in hmang hlauh va, In hna thawktute chu in vau bet ṭhîn. Chaw in ngheiin in thin a ram ṭhîn a, Intihbuaia insual duhin Kuttum in lek mai ṭhîn. Hetiang nia in ṭawngṭai chu Chung lama miin hria se inti em ni? Chutianga chaw nghei chu ka duhzâwng em ni le? Intihhrehawm ni-ah in siam hlauh va, Hnimhnah a uai angin in kun renga, Vaivut chunga saiip phahin in mut ṭhin hi? Chutiang chu maw chaw nghei in tih? Ka tân a lâwmawm dâwn em ni? Chaw nghei dân tûr ka lawmzâwng chu, Dik lo taka mi dang in phuarna phelhsaka, an nghâwngkawl hrui tihchahsak te, Mi tihduhdah chîn sim te, An phurrit zawng zawng hlihsak te hi a ni. Rilṭâmte chu in chaw sem ve ula, Vâkvaite chu in in chhûngah hruai lût rawh u; Saruak in hmuhte chu sin tûr pe ve ula, In laichînte hawisan suh u. Tichuan, zîng êng angin in êng ang a, In hliam tuar chu a dam thuai ang. Lalpa, Mi Dika chuan in hma a hruai ang a, A ropuina chuan in hnu a dâl bawk ang. Lalpa in au vang a, a lo chhâng ang che u, In ko vang a, a lo chhâng ang che u. In zîng ata innêkchêpna in tihreha, Ṭawng chhe hmanga inkawh sawk sawk in bânsana, Rilṭâmte tân in inphala, Retheite pawh in hrai tlai chuan, Thim zînga êng angin in êng ang a, In nguina pawh chhûn êng angin a veng tawh ang. Ka hruai zêl ang che u a, Ni sa hnuaia in dangro chu ka tireh ang a, In châk tinrêng ka pe bawk ang che u. In taksate ka tichak leh ang a, Tui tamna hmuna huan ang leh Tuikhur kang ngai lo ang in ni tawh ang. Rei tak chhe tawh in khuate chu In mite chuan lungphûm hlui chungah chuan an din leh ang, ‘Kulh bang leh a chhûnga in siam ṭha lehtu,’ An ti ang che.” Lalpa chuan heti hian a ti: “Ka ni thianghlim sabat in serh leha, Nuamsip bâwl in bânsana, Lalpa ni sabat hi in hluta, Hna thawk tûra in kal lohva, Mahni duhzâwng ûma titi mai mai nâna Hmang hauh lova in chawimawi chuan, Lalpa -ah chuan lâwmna in hmu ang a, Khawvêl puma chawimawi in ni bawk ang. In pu Jakoba ro ka pe bawk ang che u,” Lalpa kâ chuan a ti asin. Chhan pha lo tûrin Lalpa bân chu a tawi lo va, Hre pha lo khawpin a beng a ngawng hek lo. In bawhchhiatnate hian a ni, In Pathian nên tihrang che u. In sualte chuan a hmêl a hliah zo va, In aw a hre thei lo va ni. In kutahte thisen a kai hnuang a, In kutzungṭangahte khawlohna chu a khat, In hmuite chuan dâwt in sawi a, In leite chuan thu sual in sep. Tu man dikna an ṭanchhan lo, Thu dik hmanga inkhing an awm hek lo. Thil lawilovah an innghat a, Dâwt ngawt an sawi an sawi. Thu buai awm thei an dap vêl a, Thu chhiaah an chantîr. Rûl tui angin thil sual an awp ṭhîn a, Maimawm angin thu sual an zam. An tui awp eitu chu a thi ang a, Tikehtu tân rûlngân a lo chhuak ang. An thil zam chu sin tlâk a ni lo va, An thil phan chu intuamna tlâk a ni hek lo. An thil tih chu sual hlîr a ni. An kutte chuan pawi a khawih reng a ni. Sual ti tûrin an tlân chak hle, Mi dik thisen chhuah tûrin an hmanhmawh a, An thil ngaih dân zawng zawng a kawi zo va, An kalna hmun tinah thil a chhe rem rum a. Remna kawng chu an hre lo va, Dik taka rorêl dân an hre hek lo. An kawngte chu a kikawi a, A kal veten râlmuanna rêng an hre lo vang. Tichuan, rorêlna dik chuan min hlat a, Dik taka thil tih chuan min chîm pha lo. Êng kan duh a, thim hlîr a ni, Khaw êng zawngin thimah kan kal. Mitdel angin bang kan dap a, Mit nei lo ang maiin kan phar kan phar. Zân thim angin chhûn laiah pawh kan tlu ṭhîn a, Mi chak zînga mitthi ang mai kan ni. Savawm angin kan rûm kan rûm a, Mangang takin ṭhuro angin kan rûm bawk ṭhîn. Rorêlna dik kan beisei a, a awm si lo, Chhan chhuah kan nghâkhlel a, min chhan teuh si lo va. I hmaah chuan kan khawlohnate hi a va nasa tak êm! Kan sualte chuan min mualpho va, Kan bawhchhiatnate chu kan hre reng a, Kan suahsualnate pawh kan hai lo ve. Lalpa phatin kan nawrhsan a, Kan Pathian chu kan hawisan a, Thu veivirin hel zai kan rêl, Chhuanlam dapin dâwtte kan sawi. Dik taka rorêlna a awm ta lo, Dik taka thil ti rêng an awm hek lo. Rinawmna chu tuallaiah chuan a thal dêr a, Dikna pawh chu a lo lût thei ta lo va ni. Rinawmna rêng a awm ta lo, Sual hawisan chuan a tuar ta thung a, Lalpan a han hmuhin a lungawi lo hle a, Rorêlna dik rêng rêng a hmu zo lo. Tihduhdah tuar chhan tûr tu mah an awm lo va, Lalpan mak a ti êm êm a. Ama kut ngeiin a chhan dâwn e, Dikna chu a ṭanchhan a ni. Awmphâw atân dikna a ha ta a, Chhandam theihna lukhum a khum bawk a, Phuba lâkna puan chuan a intuam a, Thinurna puan a bât ta e. An thil tih ang zêlin a rûl dâwn a, Amah dotute chu thinurnain a rûl ang a, Hmêlmate chungah chuan phuba a la ang a, Thliarkâra awm daihte pawh chu a thungrûl ang. Lalpa hming ropui chu chhak leh thlanga miin an hlau vang a, Lalpa thawin a chhêm tuilian angin Manganna chu a lo thleng ang. “Jakoba thlah, sual hawisantute hnênah Zion-ah chuan Tlantua chu a lo kal ang,” Lalpan a ti. “Keiin in hnêna thu ka thlun chu hei hi a ni,” Lalpan a ti. “Ka Thlarau in hnêna awm leh, Ka thu in kâa ka dah chuan Tûn aṭanga kumkhuain a chhuahsan ngai lo vang che u; In fate leh in fate fa lehte pawh a chhuahsan ngai lo vang,” tih hi Lalpa thuchhuak a ni. Tho la, êng chhuak rawh le, I êng a lo thleng ta, Lalpa ropuina chuan a rawn ên ta a che. Thim chuan khawvêl a khuh tlat a, Hnam dang chung chu a thim mup mai, Nanga tân zawng Lalpa êng chu a chhuak ta a, A ropuina i chunga fu an hmu vek ang. I êngah chuan hnam tin an lêng ang a, Lalte pawhin i ênna chu an rawn chhim ang. I mit han lên chho la, thlîr teh, Inpun khâwmin an lo kal e, Ram hla tak aṭangin i fate chu an lo haw a, I fanute an rawn pua e. I hmuh hun chuan i hmêl a hlim ang a, Hlim lutukin awm ngaihna pawh i hre lo vang. Hnam tin sum leh pai chu tuipui chungah an rawn tawlh haw dâwn e. Sanghâwngsei rual an lo kal duah duah mai, Midian leh Efa sanghâwngsei rualte chu, Seba, ram hla tak aṭang chuan an lo kal a, Rangkachak leh beraw an rawn phur e. Lalpa fak hla an rawn sa dual dual mai. Kedar berâm rualte an rawn khalh duah duah a, Nebaiot berâm chalte an rawn hawn che. Ka maichâmah Lalpa tilâwm tûrin an rawn hlân ang, Ka Tempul chu ka chawimawi dâwn a ni. Chhûm vâk dûl dûl, pârva lawi sup sup ang maia Lawng rual lo tawlh dûl dûlte saw khawi lam mi nge? Thliarkâr hla tak aṭanga lo kal an ni a, Tarsis lawngten an hma an rawn hruai a, Ram hla tak aṭangin i fate an rangkachakte an rawn hawn a, Lalpa, i Pathian hming chawimawi tûr leh Israel Mi Thianghlima chawimawi tûrin, I mite chu hnam tin hmuhah Lalpan a chawimawi ta. Hnam dangte chuan i kulh bangte an rawn rem ṭha ang a, Lalte pawhin i rawng an rawn bâwl ang. Ka thinurin ka han vêl tak nâ che a, Duhsak chein ka khawngaih leh ta che. I kulh kawngkhârte chu a inhawng reng ang a, Chhûn leh zânah tu man an khâr lo vang. Hnam tin lalten an ro hlute An rawn keng zut zut ang. I rawngbâwl duh lo hnam leh ramte chu an chhia ang a, An ral vek ang. Lebanon tlâng tiropuitu thing ṭha ṭha chu, Fâr te, tufâr leh phân thing te, Ka Hmun Thianghlim chei nân an rawn la ang. Ka ke nghahna hmun chu ka chawimawi dâwn a ni. Tirethei ṭhîn che thlahte chu Kûnin i hmaah chuan an lo kal ang, Nangmah hmusit ṭhînte chu I ke bulah an bawkkhup ang. “ Lalpa khawpui, Israel Mi thianghlima Zion,” An ti ang che. An hua che a, an hawisan che, Tu man an tlawh duh loh che kha, Kei hian khaw mawi berah ka din ang che a. Kumkhaw hlimna hmunah ka siam ang che. Hnam dangte leh an lalte chuan An duat ang che a, an hnute te an hnêktîr dâwn a che, Chhandamtu che, kei Lalpa hi ka ni, Jakoba Mi Chaka, tlantu che chu ka nih i hre tawh ang. Dâr aiah rangkachak an rawn la ang, Thîr aiah tangkarua, thing aiah dâr, Lung aiah thîr ka rawn lâksak ang che. I chunga thuneitu atân ‘Remna’ ka dah ang a, Hna rêltu atân ‘Dikna’ ka dah bawk ang. I ramah chuan râwng taka che thâwm a reh ang a, I ram chu a chhiain a ram bawk hek lo vang. I bangte chu ‘Chhandamna’ i vuah ang a, I kawngkhâr chu ‘Fakna’ i vuah bawk ang. Chhûnah ni chu êng a ni tawh lo vang a, Zânah thla pawh i tân khâwnvâr a ni lo vang, Lalpa ngei chu i kumkhaw êng a ni ang a, Pathian ropuina chuan a ên ang che. I chungah chuan ni a tla ngai lo vang a, Thla pawh a mang ngai hek lo vang. Lalpa ngei chu i kumkhaw êng a ni ang a, I lusûn hun a ral tawh ang. I mite chu mi dik tak vek an ni ang a, Ram chu in luah kumkhua tawh ang. Ka phun chawr, ka kutchhuak an ni a, Ka ropuizia mi tin hmuha ka tihlanna an ni. An hnam zînga tê ber leh tlâwm ber chu Hnam ropui tak an la ni ang. Kei Lalpa hian a hun takah ka ti thuai ang. Lalpa Pathian thlarau chu ka chungah a awm, Hriak min thih a, Lalpan min tîr a ni. Riangvaite hnênah chanchin ṭha hrila, Nun beidawngte tuamhlâwm tûrin, Saltâng chhuah tûr thu te, Rip thim taka khungte hruai chhuah an nih tûr thu puang tûr te-a tih ka ni. Lalpa lungawi hun chu a thleng ta a, An Pathian phuba lâk hun lo thleng chu puanga, Lusûnte chu thlamuan tûrin mi tîr a ni. Zion khuaa khawharte hnêm tûr leh An lungngaihna lâwma chantîr tûrin, Pawr taka awm intuaihnûm leh tûr te, Ngui taka awm fak hla saktîr leh tûr tein min tîr a ni. Lalpan amah chawimawi tûra a phun, Thing duhawm tak an ni tih thu hrilh tûr ka ni. Hmasânga ṭiau tawh khuate chu an din leh ang a, Chim chhe tawh chu an tungding ang. Rei tak ram tawh khawpui chhia chu an siam leh ang. Hnam dangte chu in chhawr ang a, In ran rualte an enkawl ang. Ram dang miten in lei an let ang a, In grep huante an thlo bawk ang. Nangni hi zawng ‘ Lalpa puithiam’ tih in ni ang, ‘Pathian rawngbâwltute’ an ti bawk ang che u. Hnam tin hausakna chu in chên ang a, An ropuinate chuan in inthuam ang. In zahna leh in mualphona a reh ta a, Nangmahni ram ngeiah in chêng tawh ang; A lehhnihin in hausakna a pung ang a, Kumkhaw lâwmna in chang bawk ang. Kei Lalpa hi dik taka rorêl duhtu ka ni, Hâlrala hlan atâna ran rûk hi ka hua a ni, Dik tak zêlin an thiltih lâwmman chu ka pe ang a, Kumkhaw thuthlung ka siamsak ang. In thlahte chu hnam tin zîngah an lâr ang a, An zînga in fanau chêngte an hmuh chuan Lalpa duhsak hnam in ni tih an hria ang. Lalpa -ah chuan ka hlim êm êm ang a, Ka Pathian chungah hian ka lâwm hle ang. Moneitu, puithiam anga inchei leh a mo a inthuam mawi ang hian, Jerusalem khua chu chhandamna leh Hnehna puan chuan a rawn tuam ta a ni. Leiah thlai chi a ṭiak ṭhîn a, Huana thil phun a chawr ngei ṭhîn ang hian Lalpa, kan Pathian chuan hnehna a thlentîr ang, Hnam tinrêngin an fak bawk ang. Zion avângin ka ngawi hle hle thei lo, Jerusalem avângin ka awm mai mai thei lo, A dikzia chu a lan chiana, Chhandam a nih mei êng anga a lan fiah hma loh chuan. Hnam tinrêngin i dikzia chu an hmu ang, An lalte chuan i ropuizia an hmu bawk ang, Lalpa sak ngei hming thar i pu dâwn e. Lalpa tân chawimawina lukhum mawi i ni bawk ang. ‘Mâki,’ an ti tawh lo vang che a, I ram pawh chu, ‘Rami,’ an ti bawk hek lo vang. ‘Duhlaii,’ an ti tawh zâwk ang che a, I ram pawh chu, ‘Pawmlaii,’ an ti bawk ang. Lalpa i chungah a lâwm a, I ram tân chuan pasal ang a ni ang. Nula thianghlim tlangvâl chhuanin a nei ang hian, Siamtu che chuan a pawm ang che. Moneituin a mo a lâwm ang hian, I Pathian chuan a lâwm ang che. Jerusalem, i kulh bangahte chuan râlvêngtu ka dah ang a, A chhûn a zân an awm mai mai lo vang. A thutiam kha hre reng tûrin Lalpa an hrilh nawn fo ṭhîn ang. Jerusalem a rawn din ngheh leha, Ram tin fak tlâk tûra a rawn siam leh hma chu, Lalpa chu a awm hle hle an phal lo vang. Lalpan a kut ding lam meuh pharin thu a tiam a, A bân tha chak chuan a ti ngei ang. “In buhte chu hmêlma eiah ka pe tawh lo vang a, In thawh chhuah uainte pawh Hnam dangte chuan an in zawhsak tawh lo vang che u. A sengtute ngei chuan buh chu an ei ang a, Lalpa an fak bawk ang. Grep rah lotute chuan uain chu Ka in thianghlim tualah an in bawk ang.” Khua aṭang hian kal chhuak ula, Ka mite hâwn kawng sial tûrin Thawk chhuak rawh u. Chhûng pâwng ula, lamlian atân lei chhûng rawh u; Lungte thian fai ula, Mi tin hmuhah chhinchhiahna târ chhuak rawh u. Hnam tin hriatah Lalpan a puang ta e, Zion fanute chu hrilh rawh u, “ Lalpan a rawn chhan ta che u, A chhanchhuahte a rawn hruai a, A tlan chhuahte a rawn chhawm e,” tiin. Lalpa tlan chhuahte chu ‘Hnam thianghlim,’ an ti ang a, Nang pawh, ‘ Lalpa zawn chhuah, Rauhsan loh Khawpui,’ an ti ang che. Tu nge Edom khawpui, Bozra khua aṭanga Puan sen hnuang sina lo kal hi? Ropui takin a inchei a, a lo kal luah luah mai. “Kei ka ni e, Chhandamtu Ropuia, Ka hneh tâk thu ka rawn puang a ni e,” Engtizia nge i silhfênte a sen hnuang a, Grep rap sâwrtu thawmhnaw ang a nih? Keimah maiin hnam dangte chu Grep rah angin ka rap sâwr a, Tu man min pui lo ve. Ka thinrim a, ka rap nek a, Ka thinur a, ka chîl ta nek a ni. An thisen chuan ka silhfênte a chikkhum a, Ka thawmhnawte a bawlhhlawh ta a ni. Phuba lâk chu a hun ka ti ta a, Ka mite chu ka tlan hun tûr a lo thleng ta a ni. Min ṭanpui tûr tu mah ka hmu lo va, Min thlâwptu tûr an awm lo chu ka hrilhhai hle, Keimah maiin ka hneh ta a, Ka thinur chuan min tithatho a ni. Chûng mite chu ka thinrimin ka chîl nek a, Ka thinurin ka tirui a, an thisen chu leiah a luang ta zeih zuih a ni. Lalpa ngilneihzia hi ka hril dâwn e, Ka tâna thil a tih zawng zawng te, Israel chhûngte tân a ṭhatzia te, Khawngaihnaa min vûr fo ṭhîn avâng tein Amah fakin hla ka sa ang. “Ka mite an ni a, Min bum hauh lo vang,” Lalpan a ti. An tân chhandamtuah a ṭang ta a. An manganna tinrêng a tuarpui a, Vântirhkoh ni lo, amah ngei chuan a chhan ta a, A hmangaih a, a lainat êm avângin a tlan a ni. Mahse, a lakah chuan an hel ta a, A Thlarau Thianghlim rilru chu an tina a, An hmêlmaah a ṭang ta a, A bei lêt ta a ni. A mite chuan Mosia dam lai, Hmasâng nite an hre chhuak a, “An ran rualte vênga, Tuipui ata la chhuaktu kha khawiah nge a awm tâk? Mosia hnêna Thlarau petu kha khawiah nge? Mosia ding lama awm, thil ropui tak tia, An hmaa tuifinriat tiṭhena, Kumkhua atân a hming chawimawitu kha khaw nge? Hmun rem laia sakawr a tlân zar zar anga, Tawlhthlu lova tuipui mawnga kaltîrtu kha khaw nge?” an ti. Ram ṭha taka ran rual an tla dem dem angin, Lalpan a Thlarauvin a thlamuan a, A mite chu hruaiin hming ṭha a chher ta e. I chênna hmun thianghlim leh mawi, Vân sâng aṭangte khân, Han thlîr thla la, min han en teh, I ṭhahnemngaihna leh i chakna, I ngilneihna leh i lainatna kha a dai zo ta em ni? Nang zawng kan Pa i ni, Abrahaman min hre phâk lo, Israelan min hmu bawk hek lo; Nang zawng, Lalpa, kan Pa i ni. Eng lai pawha min hum ṭhîntu i ni. Lalpa, engtizia nge i kawng ata kan pên i phala, Nangmah kan ṭih loh nân min tihluhlul? I ro chan hnam, i chhiahhlawhte avâng hian Kan lam lo hawi leh rawh. I mi thianghlimte hian i Tempul chu Rei lo te chhûng an luah hman a, Kan hmêlmaten an chîl chhe ta. Kan lal ni ngai lo tawp angin nangin min en ta a, I mi ni ngai hauh lo ang mai kan nih tâk hi. Vân tithlêrin lo chhuk teh la, I hmaah chuan tlângte an khûr zawih zawih mai tûr. Meiin thingṭang a tialha, Tui chhuan a so bawrh bawrh ang hian, Hnam tinrêng hi i hmaah khûr sela, I hmêlmate i hming hriattîr ang che. Kan beisei loh thil hlauhawm tak tak tia, I lo chhuk laite khân tlâng lian pui pui i hmaah chuan an khûr a. Nangmah ngaitute tân Mita hmuh ngai loh leh benga hriat ngai loh, Thil ti ṭhîntu Pathian, nang chauh i ni. Thil dik tih châk, i duhzâwnga awm dân hriate I lo lâwm ṭhîn. Kan chungah zawng i thinur ta a ni, Kan sual lui zêl si a, Rei tak sual tawhte hi chhandam kan ni thei dâwn em ni? Kan zavaiin kan bawlhhlawh vek tawh a, Kan ṭhatna zawng zawng pawh silhfên bawlhhlawh ang mai a ni, Thinghnah uai ang vek kan ni e. Kan bawhchhiatnate chuan min lên min lên ta mai. I hming lam rêng kan awm lo va, Ṭanpui dîl tûr che-a tho peih kan awm hek lo, Kan lakah hian i hmêl i thup ta a, Kan sualna chuan min delh bet tlat a ni. Nang zawng, Lalpa kan Pa i ni, Keini hi bellei kan ni a, nang a vawtu i ni; Kan zavai hian i kutchhuak kan ni e, Lalpa, kan lakah hian thinur tawh lul lo la, Kan suahsualna hre reng hek suh ang che; Min en teh mah, i mite vek kan ni. I khaw thianghlim chu thlalêr a chang zo ta, Zion khua chu thlalêr ram ro a ni ta a, Jerusalem khua chu a ram ta e. Kan in thianghlim leh mawi, Kan pi puten an fak ṭhinna che Meiin a kâng zo va, Kan hmun nuam laite pawh A chim zo ta. Lalpa, hêng hi pawi i ti lo vem ni? I ngawi tlatin min tirethei reng dâwn em ni? Lalpa chuan heti hian a ti: “Ka inpeih reng a, min râwn duh si lo va, Hmuh mai theih ka ni a, min zawng duh bawk si lo. Ka mi, ka hming lam duh lote hnênah chuan ‘Heta hi ka awm reng alâwm,’ ka ti a. Nilêng lêngin an tân ka bân ka phar ṭhîn a, Hel hmangte hian an duhzâwng chauh an zawng, An awm dân hi a dik lo ve. Hêng mite hian ka huatzâwng tak an ti lui châmchi a, Huan serhahte an inthawi a, Hnam dang pathian maichâmahte rimtui an hâl a. Mitthi thlarau râwn tûrin Pûkah te, thlânahte an ṭhu zânkhua ṭhîn. Vawk sate an ei a, Sa bawlhhlawh tinrêng tuihâng te, An khuhhriangah an suak. ‘Min rawn hnaih suh, min khawih ang e, In khawih thiang kan ni lo,’ an ti ṭhîn a. Hêng mite hi meikhu, Nilêng lênga min ur rengtu an ni. Ka ngawihsan mai dâwn hlei nêm, Ka hrem dân tûr ziak fel a ni tawh a, An malchungah ka leihbua ang. An sualna chu, an thlahtute sual nên, Anmahni chungah ka thungrûl dâwn. Tlângahte chuan rimtui an hâl ṭhîn a, Mualahte chuan min hmuhsitzia an lantîr ṭhîn. An thil tih ṭhin avângte chuan Hremna, an chunga tla tûr chu, ka teh zo tawh.” Lalpa chuan heti hian a ti: “Grep la ṭha chu tu man an paih mai mai ngai lo, Uain-ah an siam zâwk ṭhîn. Ka chhiahhlawhte pawh hi an zavai chuan Ka tiboral bîk lo vang. Jakoba leh Juda thlah aṭangin Ka tlâng thianghlim luah tûr mi ka ruat ang, Ka tlângte chu an luah ang a, Tah chuan ka chhiahhlawhte an chêng reng dâwn a ni. Ka mi, mi zawngtute tân chuan Saron phai chu an ran tlatna a ni ang a, Akor ruamah an rante chu an tualchai ang. Lalpa chu kalsan a, ka tlâng thianghlim theihnghilhte u, ‘Gad’ chibai in bûkna tûr in buatsaih a, ‘Meni’, hnênah uain in hlân a; In tuar tûr khawrêl chu khandaiha thih a ni, Talhtu hmaah in la kûn vek ngei ang. Hêng mite hian ka koh laiin min chhâng lo va, Ka duh loh zâwng sual an ti a, Ka sawi laiin an ngaithla bawk hek lo, Ka lâwm loh zâwng tih an thlang ṭhîn.” Lalpa Pathian chuan heti hian a ti: “Ka chhiahhlawhten ei tûr an ngah ang a, Nangni in ril a ṭâm hle ang. Ka chhiahhlawhten in tûr an ngah ang a, Nangni in tui a hâl si ang. Ka chhiahhlawhte an hlim ang a, nangni in zak thung ang. Ka chhiahhlawhte thinlung a hlim ang a, Nangni thinlung nain in chiau in chiau vang a, Lungchhe takin in rûm in rûm bawk ang. Ka thlan, ka mite chuan in hmingte chu ânchhia atân an hmang ang a, Kei, Lalpa Pathian ngei hian ka tihlum ang che u. Ka chhiahhlawhte erawh chu an hming ka sa thar ang. Ram chhûnga mi, malsâwmna dîl apiangte chuan, Pathian, rinawma malsâwmna an dîl ang a, Ram chhûnga mi, chhechham duh apiangin Pathian rinawma hming chhâlin an chham ṭhîn ang. Tûn hmaa buainate a liam ta a, Ka hmuh phâk loh tûrah an awm zo ta. Lalpa chuan, “Ngai teh, vân thar leh lei thar ka siam ta a, Tûn hma thilte a liam ta a, Hriat reng a ni tawh lo vang. Ka thil siam tharah chuan lâwmin in hlim kumkhua tawh ang. Lâwm nân Jerusalem ka siam thar a, A mite pawh an hlim reng ang. Jerusalem chungah ka lâwm ang a, Ka mite chuan min tihlim ang. Ṭap thâwm hriat tûr a awm tawh lo vang a, Mangang au thâwm a awm bawk hek lo vang. Hlamzuiha thi an awm tawh lo vang a, Tarkûna khûp bihin an dam tawh ang; Kum za dam zo lo chu, ‘vâng laia thi,’ an ti ang a, Mi sual kum za dam zo lova thi chu ‘ânchhia a dawng a ni,’ an ti bawk ang. Inte an sa ang a, an luah ang a, Grepte an phun ang a, a rah an ei ngei ang. An in sak chu mi dang luah tûr a ni lo va, An grep phun chu mi dang ei tûr a ni hek lo, Ka mite chu hai tarin an dam ang a, Ka thlante chuan an thawh rah chu, Tarkûn thlengin an tlân ngei ang. An thawhrimna chu a thlâwn ngai lo vang a, An hrinte pawh vânduaina tâwk tûr an awm lo, An tu leh fa chenin Lalpan mal a sâwm ang. Min auh hmain ka chhâng ang a, An sawi zawh hma hmain ka lo hria ang. Chinghnia leh berâmno an tla dûn ang a, Sakeibaknei pawhin bâwng ang maiin buhpâwl a ei ang a, Rûlte pawhin chawah vaivut an ring bawk ang. Ka tlâng thianghlimah chuan Thil ṭha lo leh intihnat rêng a awm lo vang,” Lalpan a ti. Lalpa chuan heti hian a ti: “Vân ka lalṭhutthlêng ani a, Lei ka ke nghahchhan a ni; In eng ang nge min sak anga, Khawiah nge ka chên ang? Thil zawng zawng hi ka kut ngeia ka siam a ni; Tichuan, an lo awm ta a ni,” Lalpa thuchhuak chuan a ti. “Ka hmuh duhzâwng tute nge ni? Rilrua inngaitlâwm leh inchhîra ka thu awihtute hi an ni asin. Mahse, hêng mite tân hi chuan bâwng talha hlan emaw, Mihring thaha inthawi emaw a lêm chuang lo. Berâm hlan emaw, ui reh hlum hlan emaw, Chhangphut hlan emaw, vawk thisen hlan emaw, Rimtui an hâl emaw, milem an bia emaw, An tân a lêm chuang lo. An duh duhin thil an ti a. Thil tenawm biak an châkzâwng tak a ni. Keiin an tân thil râpthlâk tak ka tih dâwn hi, An thil hlauh ber ka thlentîr ang; Ka auh lai khân min chhâng lo va, Ka sawi lai khân an ngaithla duh si lo, Ka mit hmuhah ka duh loh zâwng thil an ti a, Ka lawm loh zâwng tih an thlang ta.” Lalpa ṭiha, a thu awihtute u, A thu sawi hi ngaithla rawh u, In u leh naute chuan an hua che u a, ‘ Lalpa ropuina chu lo lang ang hmiang, In lâwm emaw kan hria ang chu!’ An ti vei ṭhîn, an la mualpho ngei ang. Khawpui chhûnga ri ta chêl chûl, Tempul chhûnga thâwm chu eng nge ni ta? Lalpa phuba la thâwm a ni, A hmêlmate a thungrûl ta a ni. “Vei hman lova nau hring ta thut ang hian, Ka khawpui chuan vei lâwk awm hauh lovin fapa zu hring ta a! Chutiang thil chu tu nge hre ngai? Tu nge hmu tawh awm le? Ram hi ni khat maiah a lo awm thei em ni? Hnam pawh a lo piang thut thei dâwn em ni? Zion khua chuan a han vei ṭan chauh va, Fapa a hring ta mai. Pian hun thlentîr siin ka piantîr lo vang maw?” Lalpan a ti. “Hring ṭêp tawh chu ka kîrtîr dâwn em ni?” In Pathianin a ti. Jerusalem tuarpuitute u, lâwmpui ula, He khawpui duhsaktute u, lâwm ve rawh u. Nauvin hnutê duh tâwk a hne ang hian, A ropuina lo duah leh chu duh tâwkin chên rawh u. Lalpa chuan heti hian a ti: “Lui kang lo ang maiin remna ka pe ang a, Hnam dang hausakna tinrêngte, Lui lian angin ka rawn luan luhtîr ang. Nuin a nau hnutê pein a pawm ṭhîn a, A malchungah a sêp lep lep ṭhîn a, A nau a awm tlei ṭhîn ang hian, Keimah ngei hian ka awm tlei ang che u a; Thlamuang takin Jerusalem-ah chuan in awm tawh ang. Chu chu in hmuh hunah lâwmin in harh huai huai ang a, Hnim chawrno angin in duah leh ang. Kei Lalpa hian ka chhiahhlawhte ka pui ṭhîn a, Ka hmêlmate chungah ka thinur ṭhîn tih in hria ang. Ngai teh, mei nên Lalpa a lo thawk e, Ṭhâwngaleivir tawlailîra lo chuangin a thinur chu meiin a hrithla dâwn, Meialh hmangin a rawn hrem ang. Lalpa chuan mei hmangin ro a rêl dâwn, Mi tin chungah a khandaih chu a lek ang a, Lalpan a that rem rum dâwn e. Inthian thianghlim tûra inbual faia, Hnam dang pathian be tûra kal nguah nguah te, Vawk leh chaichîm sate eia, Bawlhhlawh tinrêng eitute chu an boral ṭêp a ni,” Lalpa thuchhuak chuan a ti. “An thiltihte leh an ngaihtuahte chu ka hria; hnam tinrêng leh ṭawng tinrêng hmangte chu ka hruai khâwm dâwn. An lo kal ang a, ka ropuina an rawn hmu ang. Anni chu chhinchhiahna ka entîr ang. An zînga ṭhenkhat chu ka zuah ang a, hnam dang zîngah Tarsis-ah te, Pul-ah te, Lud-ah te ka tîr ang a, thal kâp thiamte chu Tubal-ah te, Javan-ah te, thliarkâr hla takah te, ka hming la hre ngai hauh lo leh ka ropuizia la hmu ngai lo hnênahte ka tîr ang a, hnam tinrêng zîngah ka ropuizia an puang ang. Lalpa hnêna thil hlan tûr an rawn la ang hian hnam tinrêng zînga mi in unaute chu an rawn hruai ang. Sakawr chungahte an chuang ang a, tawlailîrahte an ṭhu ang a, zâwn bâwmahte an ṭhu ang a, sabengtung leh sanghâwngsei chungahte an lo chuang ang. Israel-ten thlêng thianghlima thil hlan tûr an rawn keng ang hian ka tlâng thianghlim Jerusalem-ah chuan an lo kal ang,” Lalpan a ti. “An zînga ṭhenkhat chu puithiamah te, Levia chi-ah te ka lo siam ang,” Lalpan a ti. “Vân thar leh lei thar ka siam tûr chu, Ka hmaah chuan a awm reng ang, Chutiang bawkin in thlahte leh In hmingte chu a awm reng ang. Thla thar leh sabat ni apiangin Chibai mi bûk tûrin mi tin an lo kal zut zut ang,” Lalpan a ti. “An chhuah pah chuan, ka laka hel ṭhînte ruang chu an hmu ang a, A ṭawih lung chu a thi sêng lo vang, A kângtu mei pawh chu a mit ngai lo vang, Mi zawng zawngin tenawm an ti hle ang.” Benjamin ram chhûnga Anathot khaw puithiam pakhat, Hilkia fapa Jeremia thute chu: Judai ram lal Amona fapa Josia lal kum sâwm leh pathumna kumin a hnênah Lalpa thu a lo thleng a. Josia fapa Jehoiakima lal lai pawhin a lo thleng ṭhîn, Josia fapa Zedekia lal kum sawm leh pakhat kum, a thla nganaa Jerusalem mite sala an hruai thleng khân Lalpa thu chu a hnênah a lo thleng a ni. Lalpa thu chu ka hnênah hetiang hian a lo thleng a: “Pum chhûnga ka siam hma chein ka hria che a, Chhûl ata i chhuah hma pawhin ka serh hrang tawh che, Hnamte hnêna zâwlnei atân ka ruat che a ni,” tiin. Kei chuan, “E khai, Lalpa P athian, naupang mai ka ni a, Thu sawi pawh ka thiam lo,” ka ti a. Lalpa chuan ka hnênah: “Naupang mai ka ni ti suh, Ka tirhna che apiang hnênah kal la, Thu ka pêk che apiang i sawi tûr a ni. Anni chu hlau suh, i hnênah ka awm ang a, Ka chhanhim zêl ang che,” Lalpa thuchhuak chuan a ti. Tin, Lalpa chuan a han ban a, a kutin ka kâ a khawih a, Lalpa chuan ka hnênah: “Ngai teh, i kâah ka thute ka dah ta. Vawiinah hian hnamte leh lalram chungah te Thu ka pe a che: Pawt chhuak tûr te, ṭhiat tûr te, tichhe tûr te, paih tûr te, siam ṭha tûr te, phun tûr tein,” a ti a. Lalpa thu chu ka hnênah a lo thleng a: “Jeremia, eng nge i hmuh?” a ti a. “Theite ṭang ka hmu,” ka ti a. Lalpa chuan ka hnênah, “I hmu fuh hle mai, ka thute hlen chhuah a nih theih nân ka mitmei reng asin,” a ti a. Lalpa thu chu ka hnênah a lo thleng leh a, “Eng nge i hmuh?” a ti a. “Hmâr lamah bêl so bawrh bawrh ka hmu, he lamah a lo liam ṭêp a ni,” ka ti a. Lalpa chuan ka hnênah, “Ram chhûng mi zawng zawng chungah hmâr lam aṭangin chhiatna ka thlentîr dâwn. Hmâr lam ram hnam zawng zawng ka khâwm ang,” tih hi Lalpa thuchhuak a ni. “An lalte an lo kal ang a, Jerusalem kulh bang hualin Kawngkaahte an lalṭhutthlêng an hûng ang a, Judai ram khawpui dangte pawh an hual ang. Ka miten pathian dang an bia a, Inthawina hlânin min phatsan a, An kutchhuakte an bia a, thil sual an tih tâk avângin Anni chu ka hrem dâwn tih thu ka puang ang. “Tûnah i kâwng hrêng la, inring rawh. Tho la, thu ka pêk apiang che chu hrilh rawh. An hmaah zâm suh; chutilo chu, an hmâah ka tizâm ang che. “Judai ram lal te, hotute, puithiam te, ram mipuite leh ram pum pui ep tûrin khawpui kulh nghet tak nei, thîr ban leh ngên bang nei angah ka siam ang che. An bei ang che a; mahse, an hneh lo vang che. I hnênah ka awm a, ka chhan zêl ang che,” tih hi Lalpa thuchhuak a ni. Lalpa thu chu ka hnênah heti hian a lo thleng a: “Kal la, Jerusalem mite hriat theih tûrin thu sawi rawh; Lalpa chuan heti hian a ti: ‘I tleirâwl laia mi ngainatzia te, I mo thar laia mi hmangaihzia te, Eng mah chîn lohna ram thlalêra min zui dânte kha ka hre reng a ni.’ Israel chu Lalpa tân a thianghlim a, A rah thar hmasa a ni. A rawn eichhetu apiang chuan thiam loh an chang ang a, An chungah chhiatna a lo thleng ang,” Lalpa thuchhuak chuan a ti. Aw Jakoba chhûngte leh Israel hnam zawng zawngte u, Lalpa thu hi ngaithla rawh u. Lalpa chuan heti hian a ti: “In thlahtuten ka lakah thil ṭha lo eng nge an hmuha, Hla taka min kalsan tâk daih le? Milem, eng mah ni lo an bia a, engmahlo an nih tâk hi. ‘Aigupta ram ata min hruai chhuak a, Thlalêr, ram ro, khuarkhurum hmun, Tui vânna leh ram thim tak, tu ma kal ngai lohna, Tu ma chên ngai lohna hmuna min hruai tlangtu, Lalpa chu, ‘Khawi lamah nge a awm?’ tih nachâng an hre hek lo. Ram ṭha takah, a rah eia, a ṭhatna tlân tûrin Ka hruai thleng che u a. Mahse, in han luh chuan ka ram chu in tibawlhhlawh a, ka ram pêk che u chu in tibawrhbâng zo ta. Puithiamten Lalpa chu lam nachâng an hre lo va, Dân vawngtuten min hre lo va, Rorêltute ka lakah an hel a. Zâwlneiten Baal hmingin thu an puang a, Milem, hlutna nei lo, an ûm ta zâwk a.” “Tichuan, ka khing ang che u a, In tute thlengin ka khing zêl ang,” Tih hi Lalpa thuchhuak a ni. “Kupra thliarkârahte va kal ula, en teh u, Kedar hmunahte mi tîr ula, ngun takin thlîr vêl rawh u, Hetiang thil hi a awm tawh ngai em? Ngun takin chhui teh u. Pathian tak ni lo mah se, Hnamten an pathian chu an thlâk ngai em ni? Ka mite erawh chuan anmahni tiropuitu chu, Milem, hlutna nei lovin an thlâk ta. Aw vânte u, he thil hi mak ti ula, Hlauvin mangang rawh u,” Lalpa thuchhuak chuan a ti. “Ka miten thil pahnih an tisual: Kei, nunna tuihnâr hi, min kalsan a, Tuikhur an inhiah chawp a, tuikhur khi, Tui tling thei lo tûr chu. “Israel chu chhiahhlawh a ni lo, Sal atân rênga piang pawh a ni hek lo, Engati nge mi kut a tuar tâk si le? Sakeibakneiten an rûm khum a, ring takin an hâhum a, A ram an tichhe zo vek a, A khawpuite pawh luahtu awm lovin a ram zo ta. Nof mite leh Tapanhes mite chuan I lu an tikawlh zo ta. Lalpa, i Pathianin kawnga a hruai lai che I nawrhsan avângin, He thil hi i chungah a thlentîr a ni lâwm ni? Nail tui in tûra Aigupta pan i hlâwkpui em? Eufretis tui in tûra Asuria i pan pawh a hlâwk em ni? I suahsualna avângin hrem i ni a, I hnungtawlh avângin thiam loh i chang ang a, Lalpa, i Pathian mi hawisan hi A sualzia leh ṭhat lohzia Ngaihtuah la, i hre chhuak ang. Mi ṭihna rêng i nei si lo,” Lalpa thuchhuak chuan a ti. “Hmânah khân i nghâwngkawl ka titliak a, An phuarna che ka tichat a, Mahse, ‘I rawng ka bâwl lo vang,’ i ti a, Tlâng sângah te, thingbuk hnuaiah te I mu vei a, nawhchizuar ang mai i ni. A chi dik tak, grep ṭha chi chu ka phun che a, Engtizia nge min inlehsana, Grep suak, eng maha tlâk lo i nih tâk le? Chingal leh sahbawnin insil chiam mah la, I sual hnuhma chu ka hmu reng tho a ni,” Tih hi Lalpa P athian thuchhuak a ni. “ ‘Ka bawlhhlawh lo va, Baal-te pawh ka ûm hek lo,’ Engtin nge i tih theih le? Ruama i chet dânte kha ngaihtuah la, I thil tih ṭhinte kha hre reng rawh, Sanghâwngsei hur, awm ngaihna hre lo anga i zat ruai kha. Thlalêra sabengtung hur, a hnâr lên ruai ṭhîn chu, A châkna tu nge dang zo vang? Pan hah a ngai lo va, Hmuh mai theihin a awm ṭhîn. Dang ro hial khawpa pathian dang panin I ke rap na suh; Nang chuan, ‘Bei a dawng ta, ram dang mite ka ngaina a, Anni chu ka zui dâwn,’ i ti si a. “Rûkru man angin Israel chhûngte an zak ang, An lal te, an hotu te, an puithiam te leh An zâwlnei te chuan: Thingbul hnênah, ‘Ka pa i ni,’ an ti a, Lung hnênah, ‘Mi hringtu i ni,’ an ti a; Ka lam hawi lovin an tukkhum chhah min chhawn a, An manganin, ‘Tho la, min chhan rawh,’ an ti leh si a. In siam chawp, in pathiante chu khawiah nge? Lo tho sela, in manganna ata An chhan thei mahna che u, Aw Juda, i khawpui zât zet pathian i neih hi. Engtizia nge ka chungah in vui fo le? In vaiin ka lakah in hel hi,” Lalpa thuchhuak chuan a ti. “In fate ka hrem a, a sâwt lo, An ṭhat phah chuang lo; Sakeibaknei nghal angin zâwlneite khandaihin in that ta. Nangni tûnlai mite u, Lalpa thu hi ngaithla teh u. Thlalêr leh ram thim tak ang, Israel-te tân ka lo ni em ni? Engtizia nge ka miten, ‘Kan zalên ta, i hnênah kan lo kal tawh lo vang,’ an tih hial le? Nulain a incheina a theihnghilhin Movin a inneih thawmhnaw a theihnghilh thei em ni? Ka miten min theihnghilh chhûng nite erawh chu Chhiar sên rual a ni lo. Ngaihzâwngte lêm dân i va thiam êm? Hmeichhe suaksualte pawhin i tih dân an zir tâk hi, I puanah pawisawilo, mi retheite thisen a kai e, Rawk tum che i lo that pawh a ni si lo, Nimahsela, hêng zawng zawng ti chung hian ‘Pawi ka khawih lo va, Ka lakah a thinur hek lo vang,’ i ti a. ‘Ka sual lo ve,’ i ti tlat a, Ngai teh, i chungthu ka rêl dâwn e. Engtizia nge i awm dân i thlâk zung zung mai le? Asuria i mualpho phah ang khân Aigupta pawh i mualpho phah ang. Kut khumin chuta ṭang pawh chuan i chhuak ang a, I innghahna ṭhinte chu Lalpa chuan a paihthla tawh a, Chûngho chuan an pui hauh lo vang che. “Miin a nupui ma sela, A nupui chuan pasal dang nei sela, Chu hmeichhia chu a pawm leh duh dâwn em ni? Ramin a bawlhhlawh phah vek dâwn lâwm ni? Nang chuan tlangvâl tam tak nei tawh mah la, ka hnênah i lo kîr leh duh lâwm ni?” Lalpa thuchhuak chuan a ti. Tlâng kawlh vel vul lam khi hawi la, en vêl teh, An mutpui lohna che hmun a awm em? Arab tleirâwlhovin mi an châng angin Tlangvâl nghâkin kawng sîrah i ṭhu reng ṭhîn; I nawhchi zawrh avâng leh i suahsualna avângin Ram i tibawlhhlawh zo ta. Hêng avâng hian ruah a sûr lo va, Ruah hnuhnûng a sûr hek lo; Nawhchizuar hmêl i pu a, i zak duh hauh si lo. ‘Ka pa, ka tleirâwl lai ata min kaihruaitu,’ Mi ti zo chauh a ni lâwm ni? ‘A thinur reng ang maw? A thinrim kumkhua dâwn em ni?’ ti reng chung siin Ngai teh, a sual thei ang berin thil i ti ta si a.” Josia lal laiin Lalpa chuan ka hnênah heti hian a ti: “Mi rinawm lo Israel-te thiltih hi i hmu em? Tlâng sâng tinah te chhovin, thingbuk tin hnuaiah te chuan thil sual an ti a. Hêng zawng zawng hi an tih hnuah ka hnênah an lo kîr ang chu ka ti a; mahse, an lo kîr chuang lo. An laizâwn Juda, mi bumhmangte pawhin an hmu a. Mi rinawm lo Israel-te chu an uirena sual ka hmuh vek avângin inmâkna lehkha ka pe a, ka hnawt chhuak a. A laizâwn, bumhmang Juda-te pawhin hlauh nachâng an hre lo va; an chhuak a, nawhchi an zuar ve ta a. Eng mah pawisa lova nawhchi an zawrh avângin ram chu an tibawlhhlawh zo ta a. Thingbulah te, lung bulah te chuan an uire ta a ni. Chuti chung pawhin an laizâwn, hel hmang Juda-te chu thinlung takin an lo kîr lo va, a der maiin a ni an lo kîr,” tih hi Lalpa thuchhuak a ni. Lalpa chuan ka hnênah heti hian a ti: “Mi rinawm lo Israel chu bumhmang Juda ai chuan fel zâwkah an inngai a. Kal la, hêng thu hi hmâr lamah va sawi rawh: ‘Rinawm lo Israel, lo kîr rawh, Tih hi Lalpa thuchhuak a ni; Thinrimin ka en reng lo vang che, Zahngai thei tak ka ni si a, Tih hi Lalpa thuchhuak a ni; ka thinur reng dâwn si lo. Lalpa, in Pathian laka in hel hi Thil sual in ti a ni tih hre rawh u. Thingbuk tin hnuaiah ram dang mite lakah in inphalrai a, ka thu in zâwm si lo, Lalpa thuchhuak chuan a ti. Aw, mi rinawm lote u, lo kîr leh rawh u, Lalpa thuchhuak chuan a ti; In pasal ka ni a, khawpui tin aṭangin mi pakhat, Hnam tin zîng ata mi pahnih, Ka thlang chhuak ang a, Zion-ah ka hruai ang che u.’ “Ka lungdum zâwng tak berâmpute ka pe ang che u a, annin hriatna te, hriatthiamna tein an châwm ang che u. Chûng ni-ahte chuan in lo pung ang a, ram chhûngah in tam hle ang,” tih hi Lalpa thuchhuak a ni. Mite chuan Lalpa Thuthlung Bâwm an lam tawh lo vang a, an ngaihtuah tawh lo vang a, an hre reng tawh hek lo vang; an mamawh tawh lo vang a, a dang an siam tawh hek lo vang. Chumi hunah chuan Jerusalem chu Lalpa lalṭhutthlêng an vuah ang a, Jerusalem-ah chuan hnam tinrêng Lalpa hming fak tûrin an kal khâwm ang a, rilru sual puin luhlul takin eng mah an ti tawh lo vang. Chûng ni-ahte chuan Juda chhûngte leh Israel chhûngte chu an inzawm ang a, in pute hnêna rochan atân ka pêk ramah chuan hmâr lam aṭangin an lo haw ho vang. Ti hian ka ngaihtuah a, “Ram nuam tak, hnam tin rochan zînga ram ṭha ber pe chein, Fa atân neih che ka duh a; ‘Ka pa,’ tia min kohva, Min hawisan loh ka lo beisei tehlul nên, Pasal laka rinawm lo hmeichhia ang hian Israel chhûngte u, Ka lakah in rinawm lo a ni,” Tih hi Lalpa thuchhuak a ni. Tlâng kawlh vul lamah au thâwm a awm e, Israel fate ṭap thâwm leh dîlna au thâwm chu, An Pathian, Lalpa chu an theihnghilh a, An pênsan tâk avâng a ni. Fa rinawm lote u, lamlêt ula, In rinawm lohna chu ka tireh ang a, “En teh, i hnênah kan lo kal hi, Nang, Lalpa chu kan Pathian i ni si a, A ni, tlânga milem biak te hi a sâwt lo va, Tlâng chunga rîk bûng bûng te hi bumna mai a ni; Lalpa, kan Pathian chauh hi a ni Israel-te chhandamtu chu. Mahse, kan tleirâwl lai ata kan pate thawhrim rah, an berâm rual te, ran rual te, an fanu leh fapate chenin, hêng thil zahpuiawm, milem biak nân te hian an hmang zo va. Zak takin i mu mai teh ang u, kan mualpho tâwpkhâwk ta a nih hi, kan Pathian lakah thil sual kan ti a. Keini leh min thlahtute nên, kan tleirâwl lai ata vawiin thlengin Lalpa kan Pathian aw kan pawisa duh si lo,” in ti a. Lalpa chuan heti hian a ti: “Israel-te u, lo kîr in duh chuan ka hnênah ngei in lo kîr tûr a ni. In milem tenawm takte kha ka hma ata in dah bo va, In vah bo tawh loh chuan, Rinawm taka in awma, dik tak leh fel faka ro in rêla, Mi nung Lalpa hming in chhâl chuan, Hnamte chu mal ka sâwm ang a, Annin mi chawimawi ang.” Juda mite leh Jerusalem mite hnênah Lalpa chuan heti hian a ti: “In lei khêkte let ula, Hlîng zîngahte chi theh suh u. Nangni Juda mite leh Jerusalem-a awmte u, Lalpa tân serh tan ula, In thinlung serh tan rawh u. Chutilo chu, in thil sual tih avângin Ka thinur ang a, mei angin a alh chhuak ang a, Tu ma ṭhelh rual lohvin a alh dah ang e.” Judai ramah hril ula, Jerusalem-ah puang rawh u, Ram pumah tawtawrâwt hâm ula, lo tlân khâwm rawh u; ‘Kulh nei khawpuiahte i tlân lût ang u,’ tiin Ring takin au rawh u. Zion kâwkin chhinchhiahna târ rawh u, Himna zawngin tlân ula, muang suh u, Hmâr lam aṭangin thil ṭha lo ka rawn thlen dâwn, Chhiatna râpthlâk tak chu. A tawmbûk aṭangin sakeibaknei a lo chhuak e, Hnamte tichhetu chu a lo lang ta. I ram tichhe tûrin a bûk a rawn chhuahsan, I khawpuite luah tlâk lohvin a tichhe dâwn. Chuvângin, saiip puan sin ula, Lungchhe takin ṭap vak vak rawh u, Lalpa thinur nasa tak chuan min kiansan si lo va. “Chumi ni-ah chuan heti hi a ni ang a, Lal leh hotute thinlung chu a zâm ang a, Puithiamte an buai hle ang a, Zâwlneite pawh an mangang hle ang,” Lalpa thuchhuak chuan a ti. Kei chuan, “E heu! Lalpa P athian, he mite leh Jerusalem mite hi i bum let dêr a lo nih hi, ‘Muanna a awm ang,’ i ti a, Khandaih an hmachhawn tâk hi,” ka ti a. Chumi hunah chuan he mite leh Jerusalem-a mite hi heti hian hrilh rawh: “Thlalêr tlâng kawlh vel vul aṭangin thli lum ka mite lamah a lo tleh ang a, a si chhêm lênga chhêm faitu mai ni lovin, thli na tak, ka thu pêkin a lo tleh dâwn; tûnah, kei pawhin an chungthu ka rêl dâwn,” tiin. En teh, chhûmpui angin hmêlmate an lo thawk e, An tawlailîrte chu thlipui ang, an sakawrte pawh mupui aiin an chak, Kan chung a va pik êm! Kan râlthûm a nih hi. Aw Jerusalem, i thinlung sual sil fai la, Chhan chhuah i ni dâwn nia, Eng chen nge thil sual i ngaihtuah dâwn le? Dan ram aṭangin thu a lo thang vêl, Chhiatna thleng tûr Efraim tlângram aṭangin an puang e, Hnamte hrilh ula, Jerusalem-ah puang rawh u, Ram hla tak ata hualtute an lo kal, Judai ram khawpuite beih tumin an au ve. Lo vêngtute ang maiin a vêlin an hual, “Ka laka an hel vâng a ni,” Lalpa thuchhuak chuan a ti. I awm dân leh i thil tihten hêng hi i chungah a tithleng ta, I sual vang a ni, a na ngei mai. I thinhnûn a chhun ta a nih hi. A va na êm, a va na êm, a va na tak êm! Aw ka rilru a va na êm, ka thin a phu zawih zawih, Ka awm hle hle thei lo. Tawtawrâwt ri te, indo thâwm te ka hre ta si a. Chhiatna a lo thleng zut zut a, Ram pum a chhe zo ta, Kan puan inte kârlovah a chhia a, Kan puanzârte a thlêr zo ta. Eng chen nge indo lai ka hmuh anga, Tawtawrâwt ri ka hriat ang? Ka mite zawng an â êm a, min hre lo a ni, Naupang â ang maiin Thil sual tih zawng an thiam hle, Thil ṭha tih an thiam si lo. Leilung ka han en vêl a, ngai teh, Eng mah a awm lo va, a ruak huai mai a ni, Vân lamah pawh êng rêng a awm lo. Tlângte ka han en chuan, ngai teh, a nghîng dur dur a, Mual tinrêng pawh a insâwi hlawk hlawk. Ka han hawi vêl chuan mihring rêng an awm lo va, Chunglêng sava zawng pawh an thlâwk bo zo ta. Ka han hawi vêl a, ram ṭha tak chu thlalêr a chang zo ta, Khawpui zawng zawng pawh a chhe zo ta, Lalpa thinurna nasa tak hmaah chuan. ( Lalpa chuan heti hian a ti: “Ram pum a chhe nasa hle ang a; Mahse, ka tichhe vek lo vang.”) Chumi avâng chuan lei hi a ngui ruai ang a, Chung lam vânte pawh a thim vek ang. Thu ka sawi tawh a, ka sût lo vang. Ka tiam tawh a, ka hlen ngei ang. Sakawr chungchuang mite leh thal kengtute thâwmah Khawpuia mi zawng zawng an tlânchhia a, Ṭhenkhat ngawah an tlân lût a, A ṭhen lung hmunahte an lâwn a, Khawpui zawng zawng a ram zo va, Luahtu rêng an awm ta lo. Nang, tihchhiata awm tawh hnu, Engtizia nge puan senlâr sina rangkachaka incheiin I mitte i hnawih dûr? I inchei thlâwn mai a ni, I ngaihzâwngten an hmusit che a, thah an tum che asin. Zion fanu thaw huam huam ri chu ka hria, Hmeichhe nau vei rûm thâwm, Fa tîr vei ṭê vawng vawng thâwm chu, A bân a phar a, “Ka chung a va pik êm! Tualthattuten min nang ta a nih hi,” a ti. Jerusalem kawtthlêrah tlân vêl ula, Hawi vêlin ngaihven rawh u; A tual zâwl zawng zawngte pawh zawng ula, Mi pakhat tal dik taka tia, Thu dik zawng rêng in hmuh chuan He khawpui hi ka ngaidam ang. Lalpa, mi nung hming chu chhâl mah se, Dâwt an sawi a. Aw Lalpa, thu dik chu i zawng a ni lâwm ni? Anni chu i vua a, an pawisa chuang si lo, Anni chu i chîl a, i thununna chu an zâwm duh chuang lo, An hmêl chu lung aiin a chang zâwk a, An sim duh hlawl lo. Tin, keiin, “Hêngho hi an â êm a, an rethei hle bawk a, Lalpa kawng pawh an hre lo va ni, An Pathian remruat an hre hek lo. Miliante hnênah ka kal ang a, ka va bia ang, Anni chuan Lalpa dân leh an Pathian remruat, An hriat ngei kha,” ka ti a. Nimahsela, anni pawh chu an inthurual a, An Pathian thu chu an hnâwl a, A phuarna hruite an tichat a. Chuvângin, ngawa sakeibakneiin anni chu a seh ang a, Thlalêr chinghniain a ei zo vang. Khawpuia mite chu keitein a châng ang a, A vâkchhuak apiang a lo pawt sawm ang. “An bawhchhe nasa a, an hnungtawlh thui êm avângin, Engtin nge ka ngaihdam theih ang che u? In faten min phatsan a, Pathian tak ni hlei lo hming an chhâl a. Puar taka ka hrai pawhin uire an chîng a, Nawhchizuar inahte an vir huai huai a. Sakawrpa châwm thau za chung angin Ṭhenawmte nupui îtin an za ruai mai. Hêng thil avâng hian ka hrem lo vang maw?” Tih hi Lalpa thuchhuak a ni. Hetiang hi keimah ngeiin ka hrem lo vang em ni? An huanahte chuan lût ula, tichhe rawh u, Amaherawhchu, tichhe vek suh u. A zârte la bo ula, chûngte chu Lalpa ta an ni si lo. “Israel chhûngte leh Jakoba chhûngte chu Ka lakah an rinawm lo hle a ni,” Tih hi Lalpa thuchhuak a ni. Lalpa thu chu dâwtah an ngai a, “Chutin a ti lo vang, Kan chungah chhiatna a thlentîr lo vang, Ṭâm te, khandaih te kan tuar lo vang,” an ti a. “Zâwlneite pawh thli mai an ni a, Anmahniah thutak rêng a awm lo, An sawi ang chu an chungah thleng rawh se,” an ti bawk. Chuvângin, Engkim Lalpa, Pathian chuan heti hian a ti: “Hetianga thu an sawi avângin ka thu i puante chu Meiah ka chantîr ang a, mite hi thingah ka chantîr bawk ang, Tichuan, an kâng ral vek ang. Aw Israel chhûngte u, nangmahni do tûrin ram hla taka hnam chu ka rawn hruai e,” Lalpa thuchhuak chuan a ti; “Hmasâng ata hnam hlun chak tak, an ṭawng pawh i hriat loh, An thu sawi pawh i hriatthiam lohte chu. An thal bâwmte chu thlân inhawng a ni a, An za-in mi chak, huaisen an ni. I thlai te, i chaw te an ei zo vang a, I fanu leh fapate chu an that ang. I ran rual te, i berâm rual te an ei ang a, I grep te, i theipui te an ei zo vek ang a, I rinchhan, khawpui kulh neite chu Hmêlmate chuan an chhu chhe vek ang.” Lalpa chuan heti hian a ti: “Chûng ni-ah te chuan, Ka tiboral vek lo vang che u; ‘Engtizia nge Lalpa kan Pathianin kan chungah hêng thil hi a tih le?’ i miten an tih chuan. Hetiangin chhâng ang che: ‘Min phatsan a, in ramah ram dang pathian in bia a, Chuvângin, in ram ni lovah ram dang mite rawng in bâwl ang, a ti,’ tiin.” “Jakoba thlahte chu hei hi hrilh ula, Judai ramah puangzâr rawh u. Nangni mi â, hriatthiamna nei lote u, Hei hi lo hre teh u: Mit in nei a, in hmu si lo, Beng in nei a, in hre thei si lo. Mi hlau lo vang maw?” Tih hi Lalpa thuchhuak a ni, “Ka hmaah in khûr lo vang maw? Tuipui chîm chin atân ṭiaupho ka dah a, A liam lohna tûra daidanna nghet chu, Tuifâwn chuan a chîmpil lo vang a, A fâwn chu ko bûr bûr mah se, A kuang a liam hek lo vang. Mahse, hêng mite hi mi luhlul, hel hmang an ni, An pêng a, an kal bo ta. “ Lalpa, kan Pathian chu i ṭih ang u, A hun takah ruah min pe a, Ruah hmasa leh ruah hnuhnûng a sûrtîr a, Buhseng hunbi min ruatsaktu a ni,” Thinlung takin an ti ngai lo. Hêng thil hi in thil sual tih avângin a bo zo va, In sualna avângin thil ṭha in chân ta e. Ka mite zîngah misual an awm, Thangkamtu angin mite an châng a, Thang an kam a, mite an âwk ṭhîn. Savaa khat bâwm angin An inte pawh bumnain a khat, An lo hausa a, thil an tithei ta hle a ni. An lo thau va, an lo mûm a, Tâwk chin nei lovin thil sual an ti. Fahrahte hmakhua an ngai lo va, Retheite chan ṭhatna tûr an ngaihtuah hek lo. Hêng thil avâng hian ka hrem lo vang maw?” Tih hi Lalpa thuchhuak a ni. “Hetiang hnam chungah hian phuba ka la lo vang em ni? He ramah hian thil râpthlâk tak leh hlauhawm tak a lo thleng ta. Zâwlneiten dâwtin thu an hril a, Puithiamten an thu thuin ro an rêl a, Chutiang chu ka mite lawmzâwng tak a ni, Ni kin ni-ah chuan engtin nge in awm tâk ang? Benjamin mite u, Jerusalem chhûng ata himna zawngin Tekoa khuaah tawtawrâwt hâm ula, Beth-hakarem aṭangin hriattîrna phêt rawh u, Hmâr lam ata thil ṭha lo a lo thleng ṭêp Chhiatna râpthlâk tak chu. Zion fanu, hmêlṭha leh no tak chu ka tichhe dâwn e. Lalte, an sipai rualte nên an lo thawk ang a, Khawpui hualin an puan in an rawn kaih ang a, Mahni duhna hmun ṭheuhvah an awm ang. “Bei tûrin inpuahchah rawh u, Tho ula, chhûnah i bei ang u, E khai, ni a hniam ta a, khua a tlai ta, A thim mai dâwn alâwm le, Tho ula, i bei ang, kulhte i tichhe vek ang.” Engkim Lalpa chuan heti hian a ti: “Thingte kit ula, Jerusalem-a luh nân lei chhûng pâwng rawh u, Hnehchhiahnaa khat khawpui hi tihchhiat vek tûr a ni. Tuikhurah tuihna a chhuak angin, Suahsualna a chhuak reng a ni. Tharum thawh leh inrawk a chhûngah a hluar a, Na tuar leh hliam tuar hmuh tûr an awm reng a ni. Aw Jerusalem, ka hawisan loh nân che leh I ram chu luahtu awm lova ka siam loh nân Zilhna hi pawisa teh.” Engkim Lalpa chuan heti hian a ti: “Israel awm chhunte chu grep angin lo fai ula, Grep lotuin a rahte a vai nawn angin vai nawn rawh u. An awih theih nân tu nge ka hrilh ang a, Tu nge zilhna ka pêk ang? Ngai teh, an beng an chhungawng tlat a, Eng mah an hre thei lo.” Lalpa thu chu an huatzâwng a ni a, an lâwm hek lo. Lalpa thinurnain ka thinur êm êm a, Ka insûm zo lo a ni. “Naupang tualchaite chungah hrithla la, Tlangvâl awm khâwmte chungah pawh; A pasal rualin a nupui man ni rawh se, Upa leh tarchhiate pawh. An inte chu mi dang pêk a ni ang a, An ram leh an nupuite pawh, Chu rama chêngte chungah ka kut ka lek dâwn,” tih hi Lalpa thuchhuak a ni. “A te ber aṭanga a lian ber thlengin duhâmnain an khat a, Zâwlneite leh puithiamte pawhin mi bum an chîng hle. Ka mite hliam chu duhdah takin an tuam a, “A ṭha e, a ṭha e,” an ti a, a ṭha hauh si lo. Thil tenawm an tih pawhin an zak lo va, Zah nachâng an hre rêng rêng lo. Chûng mite chu mi dang tlute zîngah an tlu ve ang a, Anni chu ka hrem hunah an thal dêr ang,” Lalpa chuan a ti. Lalpa chuan heti hian a ti: “Kawng pengṭhuamahte ding ula, en vêl rawh u, Kawng hlun leh ṭha chu zâwt ula, Tah chuan, kal rawh u. Tichuan, in thla a muang ang,” a ti a. Anni erawh chuan, “Kan kal lo vang,” an ti a. “In tân râlvêngtu ka ruat a, An tawtawrâwt ri chu ngaithla rawh u,” ka ti a, Anni erawh chuan, “Kan ngaithla lo vang,” an ti a. Aw hnamte u, ngaithla ula, nangni, pungkhâwmhote u, An chunga thil lo thleng tûr chu lo hre rawh u. Aw leilung, ngaithla teh, Hêng mite chungah hian chhiatna ka thlentîr dâwn, Ka thute an ngaihthlâk lohva, ka dânte an hnâwl avângin An suangtuahna rah chu an seng ang. Seba aṭanga beraw rimtui te, Ram hla tak aṭanga fu thlum tak mi rawn lâkte hi Eng atân nge ka tih ang? In hâlral thilhlante chu pawm tlâk a ni lo va, In inthawinate chuan min tilâwm hek lo. Chuvângin, Lalpa chuan heti hian a ti: “Hêng mite hmaah hian tlûkna tûr ka dah ang a, Tah chuan, pate leh an fate chu an tlu za ang a, An ṭhenawmte leh an ṭhiante pawh an boral ang.” Lalpa chuan heti hian a ti: “Ngai teh, hmâr lam aṭangin mi an lo kal e, Kâwlkila hnam ropui chu chawhthawh a ni ta e. Thal leh a ngul an keng a, Mi nunrâwng tak, lainatna nei lo an ni; an thâwm chu tuipui ri hum hum ang a ni, Sakawr chungahte an chuang a, Indo tûrin an intlar ṭhut mai, Aw Zion fanu, nangmah bei tûrin an lo thawk e. An chanchin kan hriat chuan kan bânte a zawi zo va, Hrehawm chuan min nangchîng ta, Hmeichhe nau vei ang maiin. Lo lamah kal suh ula, kawngah pawh kal hek suh u, Tah chuan hmêlma an awm a, kil tinah râl a ṭi. Aw, ka mite u, saiip puan sin ula, Vaivutah tâl rawh u. Fapa mal sûn ang maiin lungchhe takin ṭap rawh u, Tichhetu chuan min rawn nang thut dâwn si a. Kulh bangah leh râlvênbûkah ka siam a che, Ka mite hi fiah la, i thu an awih emaw chhin rawh. An vaiin mi luhlul, hel hmang an ni, Mi rêlin an vâk ruai a, Dâr leh thîr anga sak an ni a, An za-in dik lo takin thil an ti. Suan chu titui tûrin pûmin an zâp ṭhîn a, Mahse, a tithianghlim thei lo, Mi sualte chu lâk bo an nih loh avângin. Anni chu tangkaraw êkchhia an ti ang, Kei, Lalpa hian ka hnâwl tawh si a.” Jeremia hnêna Lalpa thu lo thleng chuan heti hian a ti: “ Lalpa in kawngkaah ding la, hetiang hian thu sawi rawh: ‘Nangni Lalpa be tûra hêng kawngkaa lo lût, Juda mi zawng zawngte u, Lalpa, thu hi ngaithla rawh u. Engkim Lalpa, Israel-te Pathian chuan heti hian a ti: in thiltih te, in awm dân te siam ṭha ula; tichuan, he hmunah hian ka awmtîr ang che u. Hei hi Lalpa in, Lalpa in, Lalpa in ngei a ni’ tih ringawt hi innghahna tlâk a ni lo ve. In awm dân te, in thil tihte in siam ṭha takmeuh a nih chuan dik takin mi dangte thu pawh rêlsak rawh u. Ram dang mi te, fahrah te, hmeithai te hnehchhiah suh u; thil sual ti lote thisen he hmunah hian chhuah suh ula, in chhiatna tûrin pathian dangte be hek suh u. Tichuan, he ram, hmasâng ata in thlahtute ka pêk ramah hian, kumkhuain ka awmtîr ang che u. Mahse, dâwt thu, eng mah ni lo chu in ring zâwk si a le! Rûk in ru a, tual in that a, in uire a, dâwtin chhia in chham a, Baal hnênah rimtui in hâl a, in hriat ngai loh pathiante in be ta si a. In lo kal a, he in, ka hming lam ṭhinna hmunah, ka hmaa dingin, ‘kan him ta,’ ti chungin hêng thil bawlhhlawh hi in ti zêl ang maw? He in, ka hming lamna hmun hi, suamhmangte pûk emaw in ti elo? Mahse, keimah ngeiin ka hmu reng che u asin,’ ” tih hi Lalpa thuchhuak a ni. “A tîra ka hming lamna hmun atâna ka thlan Silo khuaah kal ula; ka mi, Israel-te sualna avânga ka thiltihte en rawh u. Hêng thil sual hi in tih avângin zîng tak takah in hnênah thu ka sawi a, ka ko che u a, in chhâng si lo,” tih hi Lalpa thuchhuak a ni. “Chuvângin, Silo khua ka sawisak ang khân ka hming lamna in, in muanpui ṭhin, nangni leh in thlahtute ka pêk hmunte hi ka sawisa dâwn a ni. Efraim thlah, in unaute ka hnawt chhuak vek ang khân nangni pawh ka hnên ata ka hnawt chhuak dâwn che u a ni.” Lalpa chuan heti hian a ti: “Chuvângin, hêng mite hi ṭawngṭaisak suh, an tân dîl suh la, ngensak hek suh; i dîlsak pawhin ka ngaithla lo vang che. Judai ram khawpuia an thiltihte, Jerusalem kawtthlêra an thiltih te hi i hmu lo vem ni? Naupangin thing an fawm a, paten mei an chhêm a, nuten vân lalnu hnêna hlan tûr chhang an hmet a, pathian dangte tân in tûr thilhlan an thli chhuak a; chûng avâng chuan ka thinur takzet a ni. “Mi tithinur mai em ni an nih?” tih hi Lalpa thuchhuak a ni. An zahna tûr an insiam zâwk a ni lâwm ni? Chuvângin, Engkim Lalpa chuan heti hian a ti: “Ka thinurna nasa tak chu he hmunah hian ka leihbua ang a, mihring te, ramsa te, ramhnuai thing te, huana theirahte a kâng ang a, a mit tawh lo vang.” Engkim Lalpa, Israel-te Pathian chuan heti hian a ti: “Hâlral thilhlante chu inthawina pangngaiah belh ula, a sate pawh ei law law rawh u. In thlahtute Aigupta ram ata ka hruai chhuah lai khân hâlral thilhlan te, inthawina te eng mah ka phût lo va. Ka thupêk chu hei hi a ni zâwk, ‘Ka thu zâwm ula, in Pathian ka ni ang a, ka mite in ni ang. In hnêna ka thupêk zawng zawng hi in zawm chuan in hmuingîl zêl ang,’ tih hi. Mahse, an ngaithla lo va, an pawisa hek lo, luhlul chhuahin sual lam an âwn tlat a, hma lam pan lovin an hnungtawlh ta zâwk a. In thlahtuten Aigupta an chhuahsan ni aṭanga vawiin thlengin in hnênah ka chhiahhlawh te, zâwlnei te, ni tin zîng tak takah ka tîr ṭhîn a. Mahse, min ngaihsak lo va, min pawisa hek lo. Luhlul an chhuah a, an thlahtute aiin an sual ta zâwk a. “Hêng thu zawng zawng hi i hrilh ang a; mahse, an ngaithla duh lo vang. Anni chu i ko vang a, an chhâng lo vang che. An hmaah heti hian sawi rawh: ‘He hnam hian Lalpa, an Pathian aw an ngaithla lo va, a kaihhruaina an zâwm hek lo. Thu dik a bo va, sawi pawh an sawi ngai tawh lo,’ tiin. “I lu ziat kawlh la, i sam paih rawh, tlâng kawlh vulahte chuan lusûn angin awm rawh. He chhuan chungah hian kei Lalpa hi ka thinur a, ka paihthla ta a ni. Juda mite chuan ka mite hmuhah thil sual an ti ta,” tih hi Lalpa thuchhuak a ni. “Ka hming lam ṭhinna inah an milem tenawm tak chu an hûng a, an tibawlhhlawh ta. An fanute, an fapate hâl nân Ben-Hinom ruamah Tofet in sâng an sa a; chu chu ka thupêk a ni lo va, ka ngaihtuah ngai loh a ni. Chuvângin, fîmkhur la, nite a lo thleng dâwn e,” tih hi Lalpa thuchhuak a ni. “Miten chu hmun chu Tofet an vuah tawh lo vang a, Ben-Hinom ruam an ti tawh hek lo vang. ‘Inthahna ruam’ an ti tawh zâwk ang. Inphûmna tûr hmun dang a awm loh avângin mitthite chu Tofet-ah chuan an phûm tawh ang. He mite ruang hi chunglêng savate leh ramsate chaw a ni ang a, tu man an hnawt darh lo vang. Judai ram khawpuiah te, Jerusalem kawtthlêrah te chuan hlim thâwm te, lâm ri te, mo leh moneitu hlim ri te a reh ang a, ram chu a ṭiau vek dâwn a ni. “Chutih hunah chuan Judai ram lal ruh te, Jerusalem-a chêng ruh te chu an thlân aṭangin an phawrh chhuak ang,” tih hi Lalpa thuchhuak a ni. “Thlahlel taka a rawng an bâwl, an zawna an zuia chibai an bûk ṭhin ni te, thla te leh vâna arsi zawng zawngte hmaah chuan an pho chhuak ang. An senghawi lo vang a, an phûm hek lo vang; leia bawlhhlawh tling khâwm ang an ni ang. He hnam sual tak zînga la dam chhunte chuan ka hnawhdarhna hmunahte chuan dam aiin thih an thlang tawh zâwk ang,” tih hi Engkim Lalpa thuchhuak a ni. “ ‘ Lalpa chuan heti hian a ti’ tiin an hnênah sawi rawh: Mi an tlûkin an tho leh lo vang em ni? Kawng bo pawh an kîr leh lo vang maw? Engati nge Jerusalem mite hi an vah bova, An bo hlen dâwn? Kawng dik lo an zawh tlat a, kîr zai rêng an rêl lo. Ngun takin an thu ka ngaithla a, kîr zai rêng an rêl lo. ‘Eng nge ka tih tâk?’ tiin Tu man an sual an sim duh lo; Indona hmun pana sakawr lîm angin, Mahni kawng ṭheuh zawhin an tlân. Vân sânga vacha pawhin pêm hun bi a hria a, Ṭhuro te, vamûr te, kanghlai te pawh A hun takah an lo lang ṭhîn a, Ka mite erawh hi chuan Lalpa remruat an hre si lo. ‘Kan fing a, Lalpa Dân pawh kan hria,’ Engtin nge in tih theih le? In hriat chu lehkhaziaktuten phuahchawpa an ziak mai a ni. Mi fingte chu an zak ang a, Mangannain a nangchîng ang, Lalpa thu an hnâwl a, eng finna nge an neih tâk le? An nupuite mi dang ka pe ang a, An lote pawh mi dangin an nei ang. A tê ber aṭangin a lian ber thlengin duhâmnain an khat a, Zâwlneite leh puithiamte pawhin Mi bum an chîng hle. Ka mite hliam chu duhdah takin an tuam a, ‘A ṭha e, a ṭha e,’ an ti a; mahse, a ṭha hauh si lo. Thil tenawm in tih pawhin in zak lo va, Zah nachâng rêng rêng in hre hek lo. Chuvângin, tlute zîngah chuan in tlu ve ang a, Ka hrem hun che u chuan in tlu dêr ang,” Tih hi Lalpa thuchhuak a ni. Lalpa thuchhuak chuan, “Anni chu seng khâwm ka duh êm êm a ni, Mahse, grep rah lo leh theipui rah lo ang an ni, An hnahte pawh a vuai vek a, An hnêna ka pêk chu ka chhuhsak leh ang,” a ti a. Pathian mite chuan, ‘Engati nge kan ṭhut reng le? Kal khâwm ila, kulh nei khawpuiahte lût ila, Tah chuan i thi dial ang u. Lalpa laka kan sual avângin Lalpa, kan Pathian chuan, Thi tûrin min ti a, tûr in tûr min pe ta a ni. Muanna kan zawng a; mahse, thil ṭha eng mah a thleng lo, Tihdam hun kan thlîr a, ngai teh, thlaphânna mai a lo ni. Dan aṭangin an sakawr hnâr tum ri a hriat a, An sakawr hrâm ri chuan ram pum pui a tizâm ta, Ram leh a chhûnga awm tinrêng, Khawpui leh a chhûnga chêng zawng zawng tichhe tûra lo kal an ni,’ an ti a. Ngai teh u, in zîngah rûl tûr nei ka rawn tîr ang, Rûl khawi ngam theih loh chu, Chûng chuan a chuk ang che u,” Lalpa thuchhuak chuan a ti. Ka lungngaihzia hi hnem rual ka ni lo, Ka rilru a va na tak êm! Ram dung leh vânga ka mite ṭap thâwm chu ngaithla teh u, ‘Zion-ah Lalpa a awm lâwm ni, A chhûngah a lal a awm na nge?’ ‘Engati nge an milim chher, ram dang pathiante chuan nasa taka min tihthinur tâk le?’ Mipuite mangang chuan, ‘Buh an seng zo va, nipui pawh a tâwp ta a, Chhandam kan la ni si lo,’ an ti. Ka mite lungngaihna ka ṭâwmpui a, Ka ṭap a, mangang takin ka awm ta. Gilead-ah thinghnai damdawi a awm lâwm ni? Tah chuan tidamtu a awm na nge? Engati nge ka mite an dam theih loh? Ka lu hi tuiin khat se, ka mit hi mittui hnâr ni se, Ka mi, an thahte sûnin a chhûn a zânin ka ṭap tûr. Khualzinte tân thlalêrah thlenna khualbûk awm sela, Ka mite ka kalsan ang a, ka inthiarfihlîm daih tûr. An vaiin an uire a, bumhmang awm khâwm an ni. An lei chu dâwt sawi tûrin Thal ngul kawih kûl angin a inpeih reng a, “Ram chhûngah dikna aiin dâwt a lal ta. Thil sual an ti zui zêl a, kei mi hre si lo,” Tih hi Lalpa thuchhuak a ni. Ṭhiante lakah fîmkhur ṭheuh ula, In unaute tu mah ring suh u. Unaute chu bumhmang an ni, Ṭhian pawh chu hêkhmang a ni. “Ṭhian leh ṭhian an inbum a, thu dik sawi rêng an awm lo, Dâwt sawi an inzirtîr a, suahsual bâwlin an hmanhlel a. Inbum a hluar, bumna hlîr bumna hlîr, Kei mi hre duh si lo.” Tih hi Lalpa thuchhuak a ni. Chuvângin, Engkim Lalpa chuan heti hian a ti: “Ngai teh, anni chu rangkachak rawh thianghlim angin ka fiah ang, Ka mite chungah hian eng dang nge ka tih tâk ang le? An lei chu thihna thal ang hi a ni, Mi bumhlum an hnial lo. Ṭhenawmte thlum takin an bia a, Mahse, an chhiatna tûr an zawng ru rân si a. Hêng thil avâng hian ka hrem lo vang em ni? Hetiang hnam lakah hian phuba ka la lo vang maw?” Tih hi Lalpa thuchhuak a ni. Lusûn angin tlângte ka ṭah ang a, Hnimhring hmunte a ro zawh tâk avângin Ka ṭap vawng vawng ang. Tu mah an kal tawh lo vang a, Ranrual thâwmte pawh hriat a ni tawh lo vang. Chunglêng savate leh ramsate pawhin an rauhsan dâwn si a. “Jerusalem chu thil chhe vawm khâwm, Sihalte tualchaina hmun a ni ang, Judai ram khawpuite ka tichhe vek ang a, Tu man an luah tawh lo vang,” Tih hi Lalpa thuchhuak a ni. Hei hi hrethiam khawpa fing tu nge awm? Lalpa chuan tu nge puang tûra a hrilh le? Eng vângin nge ram chu a chhiata, Tu ma tlawh loh thlalêr ram ro ang mai a nih tâk? Lalpa chuan heti hian a ti: “An hnêna ka pêk, ka dân chu an hnâwl a, ka aw an ngaithla lo va, an zâwm duh hek lo; luhlul an chhuah a, an paten an lo zirtîr tawh angin Baal pathian an be ta zâwk a.” Engkim Lalpa, Israel-te Pathian chuan heti hian a ti: “Ngai teh, he mite hi hnim kha ka eitîr ang a, an in atân tui kha ka pe ang. Anmahni leh an thlahtute pawhin an hriat ngai loh hnam dang zîngah ka hnawt darh ang a, ka tihboral vek hma loh chu khandaihin ka ûm ang.” Engkim Lalpa chuan heti hian a ti: “Ngaihtuah teh u, mitthi sûn mi hmeichhiate ko ula, Ṭap thiamte pawh lo kal teh se.” Mipuite chuan, “Lo kal thuai sela, min rawn ṭahpui teh se, Kan mittui a tlâka, a sûr zung zung theih nân,” an ti a. Zion-a ṭap thâwm an hria: “Kan chhe zo va, kan mualpho ta dêr mai; Kan ram kan rauhsan dâwn ta, Kan inte a chhe zo ta si a.” Hmeichhiate u, Lalpa thu hi ngaithla ula, A sawi hi hre teh u. In fanute ṭah zirtîr ula, Anni chuan an ṭhiante khawhar zai zirtîr ṭheuh rawh se. Kan tukverhahte thihna a lo lâwn a, Kan lal inahte pawh a lût ta a, Kawtthlêra naupangte a la bo va, Tualzâwla tlangvâlte pawh a man ta. Lalpa thuchhuak chuan heti hian sawi rawh a ti: “Bawlhhlawh angin tualah mi ruang a thal pheng phung ang, Buh seng hmaih angin tu man an khâwm lo vang.” Lalpa chuan heti hian a ti: “Mi fingin a finna chhuang suh se, mi chakin a chakna chhuang hek suh se. Mi hausa pawhin a sum leh pai chhuang suh se. Kei Lalpa hi, leia mite khawngaiha, an chunga dik tak leh fel taka rorêl ṭhîntu ka ni tih hriat chianna chu a chhuang duh chuan chhuang zâwk rawh se chu chu ka lawmzâwng tak a ni si a,” tih hi Lalpa thuchhuak a ni. “Ngai teh u, nite a lo thleng e,” tih hi Lalpa thuchhuak a ni. “Tisa maia serh tanho zawng zawng ka hrem dâwn. Aigupta mi te, Juda mi te, Edom mi te, Amon mi te, Moab mi te leh thlalêra chêng bak ziat kâwnghote chu ka hrem dâwn; chûngho chu serh tan tak an ni lo va, Israel-te ngei pawh thinlung lama serh tan loh an ni.” Israel mite u, In hnêna Lalpa thu sawi hi lo ngaithla teh u: Lalpa chuan heti hian a ti: “Hnam dangte awm dân zir suh ula, Vâna chhinchhiahnate hlau hek suh u, Hnam dangten chûng thil chu hlau mah se, Hlau ve suh ang che u. Hêng mite sakhua hi eng mah a ni lo, Ngawa thing an lâk chu, themthiamin hreiin a tuk a, Tangkarua leh rangkachakin a cheimawi a, A tlâk loh nân thîrkilhnain a kilh nghet a. Thlai hmuna ṭihkhai an siam ang chauh hi a ni, An ṭawng thei lo va, an kal thei hek lo, Lâk sawn an ngai a ni. Chûng chu hlau suh u, Thil sual an ti thei lo va, thil ṭha an ti thei hek lo.” Aw Lalpa, nang ang tu mah rêng an awm lo; I chak a, i hming a ropui a, thil i tithei bawk, Aw hnamte Lalber, tu nge ṭih lo vang che? Ṭih chu i phu rêng a ni. Hnam dang mi fingte zîngah leh an lal zawng zawng zîngah Nang ang tu mah rêng an awm lo. An chhawih a, an â hle mai, Thing milim, engmahlo chu an zirtîrtu a ni. Tarsis aṭangin tangkaraw den phêk an rawn la a, Upaz aṭangin rangkachak, Kut themthiamte leh rangkachak chher thiamte siam chu, Puan dumpâwl leh senduk an sintîr a, Chûng zawng zawng chu mi themthiam kutchhuak mai a ni. Lalpa erawh chu Pathian dik, Pathian nung, chatuan lal a ni. A thin a ur chuan lei a nghîng a, Hnamten a thinur an tuar zo lo. (An hnênah heti hian sawi rawh u: Hêng pathian, lei leh vân siamtu ni lote hi lei ata an la bo vang a, vân hnuai ata an boral ang. ) A thiltihtheihnain lei a siam a, A finnain khawvêl a din, A hriatnain vân a kai pharh ta. Thu a pe a, vâna tuite chu a ri hum hum a, Kâwlkil aṭangin chhûm a chhohtîr a, Ruah leh kâwlphe a siam a, A dahna hmun ata thli a tlehtîr ṭhîn. An za-in an mâwl a, hriatna rêng an nei lo, Rangkachak chhertuten an milim an zahpui ang a; an milim chhûn chu a lem, nunna nei lo a ni si a. Hlutna nei lo, hmuhsitawm mai an ni, Hrem an nih hunah an boral vek ang. Jakoba Pathian chu hêngte ang hi a ni ve lo, Ani zawng engkim siamtu a ni, Israel pawh a rochan hnam an ni, A hming chu Engkim Lalpa a ni. In ram chhuahsan tûrin in thawmhnaw tel fel rawh u, An hual reng tawh che u a ni. Lalpa chuan heti hian a ti: “Chutih hunah chuan ram chhûnga awmte hi ka pawt chhuak ang a, Chek tlawk tlawk khawpin ka tihrehawm ang.” Jerusalem mite chu, “Kan nâ avângin kan va rethei êm! Kan hliam hi tihdam rual a ni lo. Kan tuar chhuak zo dâwn emaw kan lo ti ṭhîn. Kan puan in a chhia a, a kaihna a chat vek a, Kan faten min kal bosan a, tu mah an awm tawh lo. Kan puan in kaihtu tûr leh A puante kai pharhtu tûr an awm ta lo,” tiin an au va. Berâm vêngtute an ngawng a, Lalpa râwn nachâng an hre lo, Chuvângin, an hmuingîl lo va, an berâm rual zawng zawng an darh zo ta. Ngai teh u, thu a lo thleng a, Hmâr lam mite inpun khâwm thu chu, Judai ram khawpuite tirama, Sihal chênna hmuna siamtu tûrte chu. Aw Lalpa, tu mah mahni nun chunga thunei an awm lo tih ka hre ta. Tu man mahni awm dân tûr an rêl thei hek lo. Aw Lalpa, min thunun la; mahse, a tâwk têin, Thinur lovin; chutilo chu, kan bo hlauh dah ang e. Hnam dang, nangmah hre ngai lote leh I hming lam ngai lote chungah i thinurna leihbua ang che, Jakoba chu an ei a, an ei zo va, an ei fai ta vek a, A chênna pawh an tiram ta. Jeremia hnêna thu lo thleng chu hei hi a ni. He thuthlung thute hi ngaithla ula, Juda mite leh Jerusalem-a chêngte hrilh rawh u. An hnênah heti hian sawi rawh: “ Lalpa, Israel-te Pathian chuan heti hian a ti: ‘He thuthlung thu pawisa lote chu ânchhedawngin awm rawh se. Chu thuthlung chu in thlahtute, Aigupta ram, thîr rawhtuina thuk ata chu ka hruai chhuah nia ka pêk a ni. Ka thu chu zâwm ula, in hnêna ka thupêk apiang in tih chuan ka mite in ni ang a, kei pawh in Pathian ka ni ang,’ tia ka sawi kha. In thlahtute hnêna ka tiam, ‘khawizu leh hnutetuia luang ram, tûna in awmna hi ka pe ang che u,’ tiin ka lo tiam tawh chu ka hlen ang,” a ti a. Kei chuan, “Amen, aw Lalpa,” tiin ka chhâng a. Lalpa chuan ka hnênah heti hian a ti: “Hêng thu zawng zawng hi Judai ram khawpuiah te, Jerusalem kawtthlêrah te puang rawh. He thuthlung thute hi ngaithla ula, zâwm rawh u. In thlahtute Aigupta ram ata ka hruai chhuah ni aṭanga vawiin thlengin anni chu ṭhahnemngai takin ka zilh reng a, ‘Ka thu ngaithla ula, zâwm rawh u,’ tiin zîng tak taka thovin ka hrilh ṭhîn. Nimahsela, an ngaithla duh lo va, an zâwm hek lo. Luhlul takin ni tin an sual zui zêl a. Ka thupêk an zawm loh avângin ka thuthlunga ânchhia an chungah ka thlentîr ta a ni.” Lalpa chuan heti hian a ti: “Juda mite leh Jerusalem-a awmte chu an inthurual a. An thlahtu, ka thu ngaithla duh lote sualnaah chuan an kîr a, pathian dangte zuiin an rawngte an bâwl a, Israela chhûngte leh Juda chhûngte chuan an thlahtute hnêna thuthlung ka siam chu an bawhchhe ta,” tiin. Chuvâng chuan, Lalpa chuan heti hian a ti: “Hre rawh u, an pumpelh theih loh tûr chhiatna an chungah ka thlentîr dâwn, anni chuan min au mah sela, ka ngaithla lo vang. Judai ram khawpuia mite leh Jerusalem-a chêngte chuan, an pathian, rimtui an hlan ṭhinnate chu panin ṭanpuina an dîl ang a; mahse, an chunga chhiatna a lo thlen hun chuan an ṭanpui thei lo vang. Aw Juda, i khawpui zât zet pathian i nei a, zahthlâk taka Baal pathian hnêna rimtui hâlna tûr maichâm pawh Jerusalem kawtthlêr zât lai i din ta. Chuvângin, hêng mite hi ṭawngṭaisak suh, an tân dîl suh la, ngensak hek suh. An chunga chhiatna a lo thlen hunah min au mah se ka chhâng lo vang. Lalpa chuan heti hian a ti: “Ka duh tak chuan mi tam tak nêna thil sual ti chungin Ka Tempulah chanvo eng nge a neih tawh ang? Inthawina sa a hlante chuan hrem a pumpelhtîr thei ang em? Suahsual bâwl reng chungin a hlim thei dâwn em ni?” ‘Oliv thing mawi, rah duh tak,’ Lalpa chuan a ti che a, Mahse, thlipui ri hum hum anga nasa mei a kantîr ang che, I zârte pawh a kâng ral vek ang. Israel chhûngte leh Juda chhûngten thil ṭha lo tak tiin Baal hnênah rimtui an hâl a, min tihthinur avângin Engkim Lalpa chuan in chhiatna tûr a puang ta. Lalpa chuan mi min phiarna chu min hrilh a, ka hre ve ta, An thil sual tihte chu min hmuhtîr ta si a. Kei zawng berâmno ngam tak, talh tûra an hruai ang ka lo ni, ‘Thing chu a rah chawpin kit ila, Mi nung ram ata i sawn bo daih ang u; Tichuan, a hming pawh an hre tawh dâwn lo nia,’ Ti-a min phiarrûkna chu ka lo hre rêng rêng lo mai. Nang zawng, Engkim Lalpa, dik taka rorêltu, Rilru leh thinlung enfiahtu i ni. An chunga phuba i lâk chu mi hmuhtîr ang che. I hnênah ka inkawltîr tawh si a. Anathot mi, nangmah thah tuma, ‘ Lalpa hmingin thu sawi tawh suh, i sawi chuan kan that ang che,’ titute chungchâng chu Lalpa chuan heti hian a sawi: Engkim Lalpa chuan heti hian a ti: “Ngai teh, anni chu ka hrem dâwn, an tlangvâlte chu indonaah an thi ang a, an fanu leh fapate pawh ṭâm tuarin an thi ang. Hrem an tuar kumah Anathot mite chungah chuan chhiatna ka thlentîr ang a, thi bâng rêng an awm lo vang,” tiin. Aw Lalpa, i chungah phunnawi fo mah ila, Nang zawng i dik ṭhîn a ni. Mahse, i rorêl dân hi ka zâwt a che, “Engati nge mi suaksualte an hmuingîl viauva, Mi rinawm lote nuamsa taka an khawsak le?” Anni chu i phun a, zung an kai a, An ṭhang lian a, an lo rah ṭhîn. An awkain an fak che a, An thinlung erawh chuan a hlat si che. Aw Lalpa, nangin kei chu mi hria a, I chunga ka rilru put dânte i hre vek a, Anni erawh chu berâm talh tûr angin hnûkchhuak la, Talh hun tûr ruatsak ang che. Eng chen nge ram chuan a tuar anga, Hmun tina hnimte chu a vuai ang? A chhûnga chêngte sualna avângin Ramsate leh savate chu an boral a, Chûng mite chuan, “Kan awm dân hi a hmu hlei nem,” an ti ṭhîn. Mihring pawhin an ûm chauh hle che chuan, Engtin nge sakawrte chu i tluk tehlul ang? Hmun râlmuangah pawh i him loh chuan Jordan ngawah engtin nge i awm ang? I unau, in chhûngkaw zînga mi ngei chuan an bum che a, Ring takin an aukhum che, Ṭha taka an biak che pawhin anni chu ring suh. Ka in ka chhuahsan a, ka rochan chu ka hnâwl, Ka duh tak chu a hmêlmate kutah ka pe ta e. Ka rochante chu ka tân ngawa sakeibaknei ang an ni, Mi rûmkhum a; chuvângin, ka hua a ni. Ka rochante chu sava ang mai an ni, Muin a hêl a hêl mai; Ramsa kawlhte ko khâwm ula, an sa rawn ei zo rawh se. Berâmputen ka grep huan an tichhia a, An chîl hrep a, Ka lo ṭha tak chu ram rovah an chantîr ta. Ram hluihlâwnah an siam zo va, a ro vawng vawng mai, Ram pum pui chu an tiro zo va, tu man pawi an ti lo. Thlalêr tlâng kawlh vel vulahte chuan Tichhetu an lo pung khâwm a, Lalpa khandaih chuan ram dung leh vânga mite a that ang a, Tu mah him an awm lo vang. Buh an tuh ang a, hlîng an seng ang, Thawk tam hle mah se, hlâwkna eng mah an hmu lo; Lalpa thinurna nasa tak avâng chuan, Buh an seng chhunte chu an zahpui ang. Ka mi Israel-te hnêna rochan tûr ka pêk lâksaktu, ka ṭhenawma mi sualte chungthu chu Lalpa chuan heti hian a ti: “An ram aṭangin ka pawt chhuak ang a, Juda chhûngte chu an zîng ata ka la chhuak ang. Anni chu ka pawh chhuah hnuah chuan ka khawngaih leh ang a, mi tin an rochan ṭheuh ka pe leh ang a, anmahni ram ngeiah ka hruai kîr leh ang. Ka mite chu Baal hming chhâlin thutiam an lo zirtîr ṭhîn a, chutiang bawkin ‘ Lalpa, mi nung hming chhâla thutiam’ an zir ve hunah ka mite awm dân an la ang a, an zîngah an tel ve ang. Nimahsela, ngaithla duh lo hnam apiang chu ka pawt chhuak ang a, ka tiboral ang,” tih hi Lalpa thuchhuak a ni. Lalpa chuan heti hian min hrilh a, “Kal la, hrênpuan zai sîn lei la, i kâwngah vêt la, tuiah chiah suh ang che,” tiin. Tichuan, Lalpa thupêk angin puan zai sîn chu ka lei a, ka kâwngah ka vêt ta a. Lalpa thu chu ka hnênah a lo thleng leh a, “Tho la, i hrênpuan ven lai kha keng la, Eufretis luiah kalpui la, chuta lung keh kârah chuan thukru rawh,” tiin. Tichuan, Lalpa min hrilh ang chuan Eufretis luiah ka kal a, ka thukru ta a. Ni rei tak hnuah chuan Lalpa chuan ka hnênah, “Tho la, Eufretis luiah kal la, hrênpuan ka thuhrûktîr che kha la leh rawh,” a ti a. Tichuan, Eufretis luiah chuan ka kal a, ka han hai a, ka thuhrûkna hmun ata puan chu ka la chhuak a; mahse, a lo mawih vek a, eng atân mah hman tlâk a ni tawh lo. Lalpa thu chu ka hnênah a lo thleng leh a; Lalpa chuan heti hian a ti: “Hetiang tak hian Juda-te chapona leh Jerusalem inchhuanna chu ka tichhia ang. Hêng mi suaksual, ka thu ngaithla duh lova, luhlul taka khawsa ṭhîn, pathian dang rawngbâwla be ṭhînte hi he hrênpuan, eng maha tlâk lo ang hi an ni ang. Miin hrênpuan an kâwnga an vêt reng ṭhîn ang hian, Israel chhûngkua leh Juda chhûngkua zawng zawng chu ka hnêna awm tlat tûr leh min faka min chawimawia ka mi ni tûrin ka ruat a; mahse, an ngaithla duh lo,” tih hi Lalpa thuchhuak a ni. Hetiangin an hnênah thu sawi rawh: “ Lalpa, Israel-te Pathian chuan heti hian a ti: ‘Uain bûr zawng zawngah uain thun khat rawh u.’ Anni chuan i hnênah, ‘Bûr zawng zawng uaina thun khah tûr tih kan hre ve lo vem ni?’ an tih chuan, heti hian hrilh ang che, ‘Ngai teh u, he rama chêng, Davida ṭhutthlêng luahtu lal te, puithiam te, zâwlnei te leh Jerusalem-a chêng zawng zawng te chu ka hrai rui hnêp dâwn, Lalpa chuan a ti.’ Anni chu ka inchaltauhtîr ang a, pa leh fate pawh an intauh ang,” tih hi Lalpa thuchhuak a ni. “Khawngaihna te, lainatna te, hmangaihnate tel hauh lovin ka tiboral ang,” tiin. Lalpa thu sawi hi ngaithla ula, pawisa rawh u, Inchhuang suh u. Lalpa, in Pathian hi chawimawi ula, Khua a tihthima, tlâng hliah thimah in tlûk hma hian, êng in nghâkhlel a; Mahse, khawdur thim chhah mup a ni ang. Hei hi in ngaihthlâk duh loh chuan In chapo avângin a rûkin ka ṭap ang, Ka mittui a far zawih zawih ang, Lalpa berâmte sala an man dâwn avângin. Lalpa chuan heti hian a ti: “Lal leh lalnu heti hian hrilh rawh u. ‘In lalṭhutthlêng ata chhuk rawh u, In lallukhum ropui chu in lu ata hlih thlâk a ni dâwn e,’ tiin. Chhim lam ram khawpui zawng zawng an hual tlat ta, Chhuahna rêng rêng a awm tawh lo; Juda mi zawng zawng salah an man ang a, An hruai fai vek ang.” Dâk ula, hmâr lam ata hmêlma lo kalte saw, I ranrual vên lai, i berâm duhawm takte kha khaw nge an awm tâk? Ṭhian ṭhaa i ngaihin a rawn rûn thut che chuan Eng nge i sawi tâk ang? Hmeichhe nau vei angin na i ti hle ang. ‘Eng vângin nge hêng hi ka tuar?’ I ti rilru a nih chuan, i sual vâng a ni, I pawnfên an hlihsak che a, an sawisa che a nih kha. “Ethiopia mi hângin a vun a tidanglamin Keitein a zia a thup thei em? Nangni thil sual tiṭhangte hian thil ṭha in ti thei ang maw? Thlalêr thliin buhsi a lên darh angin Ka tidarh ang che u. Min theihnghilh a, dâwta in innghah avângin, Hei hi i chan ve, i tâna ka ruat chu a ni,” Tih hi Lalpa thuchhuak a ni. Keimah ngeiin i pawnfên chu i hmai khuh vek khawpin ka hlîm ang a, I lang fai vek ang. I uire hrâtzia te, i nuamtâwl ri te, Zah nachâng hre lova i inphalraizia te ka hria. Daipâwna tlângah te i chêt bawlhhlawhzia pawh ka hmu, Aw Jerusalem, i chung a pik e, Eng hunah tak thianghlim leh ang che maw? Khawkhêng chungchânga Jeremia hnêna Lalpa thu lo thleng chu hei hi a ni: Judai ram chuan a tuar a, A kulh kawngkhârte a chhe rem rum mai. Mite chu lungngaiin leiah an bawk a. Jerusalem-ah an ṭap chuah chuah e. An mi ṭhaten an chhiahhlawh tuichawi tûrin an tîr a, Tuikhuah an pan, tui an hmu lo, Tuibêl ruak an hâwnpui, zak tak leh beidawng takin An lu an khuh. Ramah ruahtui a tlâk loh avângin lei a khichat ta, Lo neitute an mangang a, an lu an khuh. Ramhnuaia zukpuiin no a nei a, Hnimhring awm loh vângin a tlânsan a, Tlâng chârah ramsabengtung a ding, Sihal angin a thaw hlawp hlawp; Hnimhring peh tûr a awm loh avângin An mit a vai. Kan sualnaten min timualpho mah se, I hming avângin, aw Lalpa min pui teh, Nasa takin kan hnungtawlh a, i chungah kan lo sual ta a ni. Aw nang, Israel-te nghahfâk, mangan laia chhantu, Engtizia nge he ramah hian khualzin, Zan khat riak ang leka i awm le? Engati nge phâwk hmêl i puta, Mi dang hum thei lo mi chak ang mai i nih tâk le? Mahse, aw Lalpa, kan hnênah i awm a, I hming putu kan ni a, min kalsan suh ang che. Lalpa chuan hêng mite chungchâng hetiang hian a sawi: ‘Vah bo an châk hle a, an insûm thei hauh lo.’ Chuvângin, Lalpa chuan anni chu a lâwm lo va, An thil sual tih a hre reng a, An sual avângin a hrem ang. Lalpa chuan ka hnênah, “Hêng mite ṭhatna tûr hi dîlsak suh. Chaw nghei mah sela an au ka ngaithla lo vang. An hâlral leh an thilhlante chu ka pawm lo vang a; anni chu khandaih te, ṭâm te leh hripui tein ka tiboral zâwk ang,” a ti a. Kei chuan, “E, Lalpa P athian, zâwlneiten ‘khandaih leh ṭâm in tuar lo vang, hemi hmunah hian muanna kumhlun in nei zâwk ang,’ tiin an sawi si a!” ka ti a. Lalpa chuan ka hnênah: “Chûng zâwlneite chuan ka hmingin dâwtin thu an hril ṭhîn a ni; anni chu ka tîr lo va, thu ka pe lo va, an hnênah thu ka sawi hek lo. Inlârna lem te, aien rin tlâk loh te, an rin thu phuahchawp te in hnênah an puang zâwk ṭhîn a ni. Chuvângin, Lalpa chuan heti hian a ti: Ka hminga thu sawia, ‘he ramah hian indona leh ṭâm a thleng dâwn lo’ titu zâwlneite chu ka tirh an ni lo. Chûng zâwlneite chu khandaih leh ṭâmin ka tiboral ang. An thu hril lo dawngsawngtute pawh chu Jerusalem kawtthlêrahte chuan khandaih leh ṭâm tuarin an tlu phung ang a, tu man an phûm lo vang. Chutiang thil chu an nupui te, an fapa te, an fanute chungah pawh a lo thleng ang. An sual avângin chhiatna nasa tak an chungah ka thlentîr dâwn a ni,” a ti a. He thu hi an hnênah hrilh rawh mi ti a: A chhûn a zân ka mittui luang se, hul lai rêng nei suh se; Ka mi, ka fanu, nula thianghlim chuan Hliam a tuar e, hliam na tak chu. Daipâwna ka kal leh khandaiha thah mi tam tak ka hmu a, Khaw chhûnga ka luhin ṭâmpui tuara thi ka hmu bawk si; Zâwlnei leh puithiamte meuh pawhin An hriat ngai loh ram an pan. Juda chu i paihthla ta dêr em ni? Zion pawh i ten ta em ni? Dam rual lovin engati nge min hliam le? Muanna kan beisei a, thil ṭha eng mah a thleng lo, Tihdam hun kan nghâk a; mahse, thlaphânna kan tawng si. Aw Lalpa, kan sual tih kan hria e, Min thlahtute bawhchhiatna pawh kan hria, I lakah kan lo sual takzet a ni. I hming a chhiat loh nân min hmusit lo la, I lalṭhutthlêng ropui chu timualpho suh, Kan hnêna i thuthlung hre reng la, bawhchhe suh ang che. Hnam dang pathiante zîngah Ruah tisûr thei an awm em ni? A nih, vânte pawh khian ruah an titla thei em ni? Aw Lalpa, kan Pathian, nang chauh hi kan innghahna i ni a, Hêng thil zawng zawng titu hi nang hi i ni. Lalpa chuan ka hnênah, “Mosia leh Samuela pawh ka hmaah hêng mite tân lo ding mah se, ka ngaihsak chuang lo vang. Ka hma ata hnawt chhuak ula, kal botîr rawh u. ‘Khawiah nge kan kal ang?’ an tih chuan hei hi an kalna tûra Lalpa sawi chu a ni tih hrilh rawh u: Ṭhenkhat hripuiin an thi ang a, Ṭhenkhat indonaah an thi ang a. Ṭhenkhat tâm tuarin an thi ang a, Ṭhenkhat salah an man ang. Tichhetu tûr thil pali ka ruat chu hêng hi a ni, tih hi Lalpa thuchhuak a ni: Thattu tûr khandaih te, an sa pu bo tûr ui te, chunglêng sava te leh ramsa, anmahni tihluma an sa ei zotu tûr te. Jerusalem-a Juda lal Hezekia fapa Manasea thiltih avângin khawvêl lalramten râpthlâk an tih atân anni chu ka siam ang,” a ti a. “Aw Jerusalem, tu nge khawngaih ang che? Tu nge ṭah ang che? ‘Eng nge i chanchin?’ tiin tu nge chiauau ang che? Nangin min duh lo va, min hawisan ta,” Tih hi Lalpa thuchhuak a ni. “Chuvângin, i chungah kut ka thlâk ta a ni, ka tiboral ang che. An ram chhûng khaw tin aṭangin ka zâp darh ang a, Ka mite chu ka tiboral ang, an fate pawh ka tihlum ang, An nun sual an sim loh avângin. Tuipui kama ṭiau aia tam hmeithai ka awmtîr ang a, An vânglaiin an tlangvâlte ka tihlum a, An nuten an tuar. Lungngaihna leh manganna an chungah ka thlentîr thut ang. Fa pasarih hringtu nu chu a chau va, A thidang a, chhûn laiin a ni a liam a, A mualpho va, a chan a chhe hle, A dam chhunte pawh an hmêlmaten khandaihin an that ang,” Tih hi Lalpa thuchhuak a ni. Ram puma mi tin hnialkalhtu leh dodâltu atân ka nuin mi lo hring hi ka va han vânduai tak êm! Ka pûktîr lo va, ka batsak hek lo; mahse, an za-in ânchhia min lawh si. Lalpa chuan, “Chhan ṭha tak avângin ka hum ngei ang che. Mangan ni leh chhiatna ni a lo thlen hunin i hmêlmate chu i hmaah ka kûntîr ang a ti. Thîr, hmâr lam thîr ngên pawlh chu a tihtliah theih em? Ram puma in suahsualna avângin in hausakna te, in ro hlu zawng zawngte chu râllâk sumah a thlâwnin ka pe vek dâwn. I hmêlmate sal atân ka siam ang che, i hriat ngai loh ramah chuan. Ka thinur chu mei angin a alh ang a, a kâng ang che,” a ti a. Aw Lalpa, nangin i hria a, Min hre reng la, min ngaihsak ang che, Min tiduhdahtute chungah phuba la la, I dawhtheih êm avângin min tiboral suh se. Nangmah avângin hau ka tuar tih hria ang che. I thu lo thleng chu ka zâwm a, I thute chu ka tân hlimna, ka thinlung tilâwmtu ber a ni, Aw Lalpa, Engkim P athian, i hming chu ka lam ṭhîn. Nuam tâwlho zîngah ka tel lo va, ka hlimpui hek lo, Mahni chauhvin ka awm hi nangin min chelh tlat si a, Min tithinur hle a ni. Engtizia nge ka na a dam theih loh? Ka hliamte pawh tihdam rual loh a nih tâk hi? Ka tân kawrte rin tlâk loh, ṭhâla kang leh mai ang hi i ni em ni? Chuvângin, Lalpa chuan heti hian a ti: “I lamlêt chuan ka tungding leh ang che a, Ka rawng i bâwl ang, Dâwt sawi lova thutak i sawi ṭhin chuan Ka thu puangtu i ni ang a, Miten an rawn pan ang che a, I pan a ngai lo vang. He mite hmaah hian ngên kulh bangah ka siam ang che, An bei ang che; mahse, an hneh lo vang che. Chhan tûr leh humhim tûr chein i hnênah ka awm,” Tih hi Lalpa thuchhuak a ni. “Mi sualte kut ata ka chhan ang che a, Mi nunrâwngte lakah ka humhim ang che.” Lalpa thu chu ka hnênah heti hian a lo thleng a: “Nupui i nei tûr a ni lo va, he hmunah hian fanu fapa i nei tûr a ni hek lo.” Hemi hmuna fanu fapa piangte leh anmahni hringtu nu leh pate chungthu chu heti hian Lalpa chuan a sawi: “Râpthlâk takin an thi ang a, tu man an ṭah lo vang a, phûm lohvin bawlhhlawh angin an awm phung ang. Khandaih leh ṭâm tuarin an thi ang a, an ruangte chu chunglêng savate leh ramsate chaw a ni ang,” tiin. Lalpa chuan heti hian a ti: “Khawhar inah lêng suh la, sûnpui tûr leh ṭanpui tûrin kal hek suh. Ka thlamuanna te, ka khawngaihna te, ka lainatna te hêng mite lak aṭang hian ka la kiang tawh si a,” tih hi Lalpa thuchhuak a ni. “He rama mi hausa leh retheite chu an thi ang a, tu man an phûm lo vang. Anmahni sûnin tu mah an inzai lo vang a, an inziat kawlh hek lo vang. Lusûn chhûngte chu thlamuan tûrin tu man ei tûr an hlui lo vang; an nu leh pate hnêm tûrin tu man in tûr an pe hek lo vang. Ruai ṭhehna inah lût suh la, an zîngah eiin in hek suh.” Engkim Lalpa, Israel-te Pathian chuan heti hian a ti: “Ngai teh, in dam chhûng ngei hian in mit hmuhah hlim leh lâwm thâwm te, mo leh a pasal hlim thâwm te he hmun ata hi ka titâwp vek ang. “Hêng thil zawng zawng hi hêng mite i hrilh hunah annin, ‘Engati nge hetiang chhiatna nasa tak hi Lalpa chuan kan chunga a thlentîr le? Thil dik lo eng nge kan tiha, kan Pathian chungah eng nge kan tihsual?’ an tih chuan heti hian hrilh ang che: ‘In pate chuan min hawisan a, pathian dang biain an rawng an bâwl a, min theihnghilh a, ka dânte an zâwm hek lo. Nangni phei chu in pate aiin in la sual sauh va, tu man ka thu in zâwm lo va, luhlul takin in thu thuin in awm tâk hi. Chuvângin, nangni leh in pate hriat loh ramah ka hnawt chhuak ang che u; tah chuan a chhûn a zân pathian dangte rawng in bâwl ang a, ka duhsak tawh dâwn lo che u a ni,’ tiin,” a ti a. Lalpa thuchhuak chuan heti hian a ti: “ ‘Aigupta ram ata Israel-te hruaichhuaktu Lalpa chu a nung alâwm,’ an ti tawh lo vang. ‘A tihdarhna hmun, hmâr lam ata hruaikhâwmtu Lalpa chu a nung alâwm,’ an ti tawh zâwk ang. An pate ka pêk ram ngeiah ka hruaikîr leh ang.” “Ngai teh, sangha man mi tam tak anmahni man tûrin ka tîr dâwn e,” tih hi Lalpa thuchhuak a ni. “Chumi hnuah chuan tlâng tin leh mual tin lung keh kâr chen khawrh chhuak tûr sapêl mi tam tak ka tîr ang. An awm dân zawng zawng ka hmu reng a, hmuh loh rêng rêng ka nei lo; an sualnate ka hmuh phâk loh a awm hek lo. Ka ram chu milem pathian, nunna nei lo leh pathian lemtein an tihbawlhhlawh avângin an khawlohna leh an sualnate chu a lehhnihin ka thungrûl ang.” Aw Lalpa, mi tichaktu leh mi hum ṭhîntu, Mangan nia ka phen tûr, Hnamte chu kâwlkil ata i hnênah an lo kal ang a, Kan pate chuan pathian lem, Hlutna leh ṭangkaina rêng nei lo milem An rochung a. Mihringin pathian a siam thei dâwn em ni? Chutiang pathian chu Pathian tak a ni lo vang. “Chuvângin, tûn ṭum na na na chu ka thiltihtheihzia leh chakzia anni chu ka han hriattîr leh teh ang; tichuan, ka hming chu Lalpa a ni tih an hria ang.” Lalpa chuan heti hian a ti: “Juda-te sualna chu thîr kawlawm leh lunghlu zumin an thinlungah fiah taka ziak a ni, an maichâm kiahte pawh ker a ni. Anni chuan an pathian Aseri, tlâng sâng thingbuk hnuaia awmte chu an bia a. Nang, daipâwn tlânga milem betu, i hausakna leh i ro hlu zawng zawng chu ram chhûng hmun tina i sualna avângin râllâk sum atân ka sem ral ta. I chanpual atâna ka pêk che kha i sual avângin i chân ang. I laka ka thinrim mei anga a alh reng avângin i hriat ngai loh ramah i hmêlmate rawng i bâwl ang.” Lalpa chuan heti hian a ti: “Mihring rinchhana, mihring bân tha chakna ringa, Lalpa hmusittu chuan ânchhia dawng rawh se. Ani chu thlalêr hnim ro rire ang a ni, Thil lo thleng tûr, thil ṭha a hmu lo vang, Thlalêr ram ro, lei al, tu ma luah lohvah chuan a chêng zâwk ang. Lalpa ringtu, innghah nâna Lalpa hmangtu chu, Chu mi chu tui kianga thing phun, lui kama zung kai, Khaw lum lo thleng pawh hlau lo, a hnah hring reng, khawkhên kum pawh pawisa lo, Rah ṭhulh chuang lo ang hi a ni. Thinlung hi thil dang zawng aia bumhmang, Siam ṭhat harsa khawpa chhia a ni a, Tu nge hrethiam thei ang? Kei Lalpa hi rilru entu, thinlung fiahtu ka ni; Mi tin an thiltih ang zêlin lâwmman ka pe ṭhîn.” Kut tling lova hausa chu varung, mahni tui ni lo awp keu ang a ni, A vânglai takin a hausakna chuan a kalsan ang a, A âtzia a la lang mai ang. Lalṭhutthlêng ropui tak, a tîr ata chawisân chu, Kan Hmun Thianghlim a ni. Aw Lalpa, Israel-te nghahfâk, Nangmah kalsantu zawng zawng chu an mualpho vang, Lalpa, nunna tuikhur chu an kalsan che avângin Vaivuta hming ziak angin an boral ang. Aw Lalpa, mi tidam la; Tichuan, ka dam viah ang; Mi hum la; tichuan, ka him ngei ang, Nang zawng ka chawimawi ṭhîn che a ni. Ngai teh, ka hnênah heti hian an ti ṭhîn: ‘Khawiah nge Lalpa thu chu? Tûnah lo thleng ang hmiang.’ Chhiatna thlentîr tûrin ka nawr lo che, Chhiatna thlentîr hi ka duhzâwng a ni lo tih i hria, Ka ṭawngka chhuakte chu nangin i hre vek si a. Ka tân ṭihbaiawm ni suh la, Mangan nia ka inhumhimna i ni si a. Min tiduhdahtute chu mualpho sela, Kei erawh chu mualpho lo ila, Anni chu zâm sela, kei erawh chu zâm lo ila, An chungah chhiatna thlentîr la, Tiboral hmiah ang che. Lalpa chuan ka hnênah heti hian a ti: “Kal la, kulh kawngka lûn ber, Juda lalte an luha an chhuahnaah va ding la, Jerusalem luhna kawngka dang zawng zawngah pawh ding zêl ang che. An hnênah heti hian sawi rawh: ‘Nangni Juda lal te, Judai rama chêng zawng zawng te, Jerusalem-a awm, hêng kawngkaa lût ṭhînte u, Lalpa thu hi ngaithla rawh u. Lalpa chuan heti hian a ti: Sabat nia thil phur lo tûrin in nun vawng ṭha rawh u, Jerusalem kawngkaahte chuan thil phur chungin lût rêng rêng suh u. Sabat niin in in ata eng mah phur chhuak hek suh u, hna pawh thawk suh u. In pute hnêna ka thupêk ang khân sabat ni hi serh thianghlim ang che u. Anni chuan ka thupêk chu an ngaithla lo va, an ngaihven hek lo. An beng an chhungawng a, zilhna an pawm duh lo va, an ngaithla duh hek lo. Lalpa thuchhuak chuan heti hian a ti: Tihtakzetin ka thu pawisa ula, Sabat niin he khawpui kawngkaahte hian thil phur lût suh ula, Sabat ni serh thianghlim ang che u; tichuan, Davida ṭhutthlênga ṭhu lalte leh hotute chu sakawr-tawlailîr leh sakawr chunga chuangin Juda mite leh Jerusalem-a chêngte nên he khawpui kawngkaah hian an lo lût ang a, he khawpui hi an luah hlen tawh ang. Judai ram khawpui aṭang te, Jerusalem chhehvêl khua aṭang te, Benjamin bial aṭang te, thlang lam phaikin aṭang te, tlângram aṭang te leh chhim lam aṭang te chuan hâlral thilhlan leh chhangphut thilhlan te kengin mite chu an rawn inthawi ang a; rimtui te, lâwmthu sawina inthawina te Lalpa inah an rawn hlân ang. Nimahsela, Sabat hman thianghlim thu-ah te, Sabat nia Jerusalem kawngkaa thil phurh luh khap thu-ah te ka thu in zawm loh chuan Jerusalem kawngkaahte mei mit thei lo ka dah ang a, lal inte nên a kâng ral vek ang,” tiin. Jeremia hnêna Lalpa thu lo thleng chuan: “Tho la, bêlvawtu inah zu kal la, tah chuan thu ka hrilh ang che,” a ti a. Tichuan, bêlvawtu inah ka zu kal a, ani chuan khâwl hmangin bêl a lo vua a, a bêl siam chu ṭha a tih loh chuan bêl dangah a siam leh mai ṭhîn a. Lalpa thu chu ka hnênah a lo thleng leh a: “Aw Israel fate u, he bêlvawtu tih ang hian in chungah ka ti thei lo vem ni? tih hi Lalpa thuchhuak a ni. Nangni Israel fate u, bêlvawtu kuta hlum ang mai hian ka kutah in awm a ni. Eng hunah pawh, hnam emaw, lalram emaw chungthuah, ‘ka pawt chhuak ang a, ka ṭhiat ang a, ka tichhe vek ang’ tiin lo sawi tawh mah ila, chu hnam chuan an thil tihsual an sim chuan an chunga thil ṭha lo tih ka tum chu ka ṭhulh ang. Eng hunah pawh hnam emaw, lalram emaw chungthuah ‘ka din ang a, ka siam ang’ lo ti mah ila, ka mit hmuha thil sual an tiha, ka thu an ngaihthlâk loh chuan thil ṭha tihsak ka tum chu ka sût leh ang.” Tûnah Juda mite leh Jerusalem-a chêngte hnênah Lalpa chuan heti hian a ti: “Ngai teh u, in chungah thil ṭha lo tih ka tum a, ka ruahman mêk a. Chuvângin, mi tinin in thil tihsualte sim ula, in awm dân leh in thiltih ṭha lote hawisan rawh u.” Anni chuan, “A ho êm mai, kan duh duhin kan awm ang; kan duh leh luhlul kan chhuah ang a, kan duh leh suahsual kan chhuah ang,” an ti a. Tichuan, Lalpa chuan heti hian a ti: “Hnam dangte zâwt teh rêng u, Tu nge hetiang thil hi hre tawh ngai le? Nula, Israel chuan thil râpthlâk tak a tih tâk hi. Lebanon tlâng lungpuite chu vûrin a kiansan ngai em? Tlâng aṭanga tui vâwt tak lo chhuak chu a kang ngai em? Ka mite erawh chuan min theihnghilh a, Milem tlâktlailo hnênah rimtui an hâl. Hmasânga an kal ṭhinna kawng chu an pênsan a, Kawngpui zawh lovin ṭumkawngah an kal. An ram an tirâlṭi zo va, kumkhuaa hmusitawmin a awm ta, Veivâk apiangin mak an ti a, an lu an thinkhum ta. Khawchhak thliin vaivut a lên darh angin, Anni chu hmêlma hmaah ka tidarh ang, An mangan ni-ah ka tukkhum chhah ka chhawn ang.” Mite chuan, “Hawh u, Jeremia hi i phiar ang u, dân min zirtîrtu tûr puithiam te, thurâwn min petu tûr mi fing te, thu min hrilhtu tûr zâwlneite an awm zêl tho vang. Hawh u, sawichhe bawrh bawrh ila, a thu i ngaithla duh lo vang u,” an ti a. Min ngaihsak teh, aw Lalpa, Min beitute hi hria ang che. Thil ṭha suala thungrûlh tûr em ni? Anni chuan ka tlâk nân khur an lai a, An laka i thinur la kiang tûra I hnêna ka ngensak kha hre reng ang che. An fate chuan ṭâmpui mitthi tuar sela, Khandaih hriam tawng rawh se, An pate chu hripuiin thi sela, An nute chuan an fa sûn sela, hmeithai rawh se, An tlangvâlte pawh indonaah sah hlum ni rawh se. Ka tlâk nân khur an lai a, Ka kalnaah thang an kam avângin Râlin bei thut sela, an inah ṭap chuah chuah rawh se. Aw Lalpa, mi thah tuma min phiar dân zawng zawng i hria a, An bawhchhiatnate ngaidam suh la, I mit hmuha an sualnate thai bo hek suh, I hmaah thehthal dêr la, Thinur ni-ah sawisa hrep ang che. Lalpa chuan heti hian a ti: “Kal la, bêlvawtu hlum bêl va lei la, mipui zînga puipa te, puithiam zînga puipate hruai ang che. Harsit kawngkhâra chhuakin Ben-Hinom ruamah chuan kal la; tah chuan, thu ka hrilh tûr che chu puang ang che.fate an hlanna hmun hi ngaisâng tawh lovin a nihna tak ‘inthahna ruam’ an ti dâwn a ni. Heti hian sawi ang che: ‘Juda lalte leh Jerusalem-a awmte u, Lalpa thu hi ngaithla rawh u. Israel-te Pathian, Engkim Lalpa chuan heti hian a ti: Ngai teh, he hmunah hian chhiatna râpthlâk tak ka thlentîr dâwn, a hria apiang an khûr ang. Mite chuan min kalsan a, hemi hmun hi ram dang pathian biak nân an hmang a, anmahni leh an thlahtu te, Juda lalte pawhin an hriat ngai loh pathian lem hnênahte rimtui an hâl a, pawi sawi lo thisenin he hmun hi an tikhat ta. Baal hnêna hâlral thilhlana an fate an hlanna tûr, Baal hmunsâng an siam a; chûng thil chu ti tûrin thu ka pe lo va, ka hrilh hek lo, ngaihtuah pawh ka ngaihtuah ngai hek lo. Chuvângin, ngai teh, ni te a lo thleng dâwn e, tih hi Lalpa thu chhuak a ni. He hmun hi Tofet ruam an ti tawh lo vang a, Ben-Hinom ruam an ti tawh hek lo vang, inthahna ruam an ti tawh zâwk ang.’ “Hemi hmunah hian Judai ram leh Jerusalem-a mite remruatte chu ka tichhia ang a, an hmêlma, anmahni thah tumtute chuan khandaihin an sât hlum ang. An ruang chu chunglêng savate leh ramsate ei atân ka pe ang. He khawpui hi mite hmuhsit atân ka tichhe vek ang a, a kal apiangin a chhiat nasatzia an hmuhin mak tiin an chek tlawk tlawk ang. Thah tumtu, an hmêlmate chuan an hualbet tlat ang a; tichuan, an fanu leh fapate sa an ei hial ang. Anmahni ngei pawh an sa an ineisak ang.” I kalpuite mit hmuhah hlumbêl chu tikeh la, an hnênah: “Engkim Lalpa chuan heti hian a ti: ‘He hmun leh he khawpui hi he bêl ang hian ka tichhia ang a, siam ṭhat theih rual a ni tawh lo vang. Phûmna tûr hmun dang a awm loh avângin mitthite chu Tofet-ah an phûm ang. He hmun leh a chhûnga chêngte chungah he thil hi ka ti dâwn,’ tih hi Lalpa thuchhuak a ni. He khawpui hi Tofet angin a siam ang. Jerusalem in te, Judai ram lal inte leh vân arsite hnêna rimtui hâla; pathian dangte hnêna thil an hlanna ṭhin hmun zawng zawng chu Tofet hmun anga tenawm an ni ang.” Jeremia chu Lalpan thu sawi tûra a tirhna hmun Tofet aṭang chuan a lo kîr a, Lalpa in hung chhûngah a ding a, chuta awm zawng zawng hnênah heti hian a ti a: “Israel-te Pathian, Engkim Lalpa chuan heti hian a ti: Chhiatna lo thleng tûr ka sawi zawng zawng kha he khawpui leh a chhehvêl khuaahte hian a thleng dâwn e, ka thu in ngaithla duh lo va, luhlul in chhuah luih tlat avângin,” a ti a. Puithiam Pasura, Imera fapa, Lalpa ina hotu ber chuan chûng thute chu Jeremian a sawi tih a lo hria a; tichuan, Pasura chuan zâwlnei Jeremia chu a vua a, kawl a buntîr a, Lalpa in, Benjamin kawngkhâr chhakta zâwk bulah chuan a tântîr a. A tûkah Jeremia kawl bun chu a phelhsak a, a chhuah ta a. Jeremia chuan a hnênah, “ Lalpa chuan i hmingah Pasura ti tawh lovin Magor Misabib a ti tawh zâwk a che, Lalpa chuan heti hian a ti: ‘Ngai teh, i tân leh i ṭhiante zawng zawng tân hlauhawmah ka siam ang che. I mit hmuhah anni chu i hmêlmaten khandaihin an that ang a, Juda mi zawng zawng Babulon lal kutah ka pe ang. Ani chuan Babulon-ah salah a hruai ang a, khandaihin a that ang. Tin, he khawpui hausakna zawng zawng te, a deh chhuah ro hlu zawng zawng te, Juda lal sum leh pai zawng zawngte pawh an hmêlmate kutah ka hlân ang. Anni chuan an rawk ang a, an lâksak ang a, Babulon-ah an phur hâwng ang.’ Nang pawh, Pasur, i ina awm zawng zawng nên salah an man ang che a, Babulon-ah i kal ve ang. Chutah chuan i thi ang a, an phûm ang che; nang leh i ṭhian dâwt thu i lo hrilhte nên khân,” a ti a. Aw Lalpa, nangin min bum a, bum ka nih tâk hi, Nang chu kei aiin i chak a, min titlâwm ta, Nilêngin min deusawh a, mi tin nuihzatbûr ka ni. Thu ka sawi apiangin Inpâwngnêkna leh intihchhiatna nasatzia ka aupui ṭhîn, Lalpa thu ka hnêna lo thleng avâng chuan Nilênga hmuhsit ka ni ta. ‘Ani chu ka hre reng lo vang a, A hmingin thu ka sawi tawh hek lo vang,’ ka tih pawhin Ruh chhûnga mei sa awm ang maiin Ka thinlungah mi tûr ut ut a. Ka pai hle hle thei ngang lo va ni. Mi tam tak phun ru ka hria, Kil tinah hlauhawmin min hual, ‘Hêk rawh u, keini pawhin kan hêk ang,’ an ti. Ka ṭhenrual zawng zawng, ka tlûk hun châng rengte chuan ‘Thlêm thlûk a nih hunah kan ngam ang a, A chungah phuba kan la ang,’ an ti. Mahse, Lalpa, mi chak, mi huaisen chu ka hnênah a awm a. Mi tiduhdahtute chu an tlu ang a, min hneh lo vang; An mualpho hle dâwn, an hlawhtling dâwn si lo, An hmingchhiatna chu kumkhuain theihnghilh a ni lo vang. Rilru leh thinlung hmu vektu, An chunga i phuba lâk lai mi hmuhtîr la, Kei erawh chu i kutah ka inkawltîr tawh si. Lalpa fak ula, Lalpa chu chawimawi rawh u, Mi sualte kut ata chanhaite a chhanhim si a. Ka pian ni chu ânchhedawngin awm se, Ka nuin min hrin ni chu chawimawi ni suh se. Ka pa hnêna, ‘Fapa i nei ta,’ tih thu hrilha, Tilâwmtu pawh chu ânchhedawngin awm rawh se. Lainat hauh lova Lalpan khawpui a tihchhiat angin Chu mi chu awm sela, Zîngah ṭap thâwm, chhûnah râlkhêl thâwm hre rawh se. Chhûlah khân min lo tihlum se, Ka nu chhûl chu ka thlan a ni mai tûr, A chhûlah chuan ka awm reng mai ang. Engah kher nge chhûl ata ka lo chhuah, Thawkrim leh lungngaia awm mai tûr leh Mualpho rêng rênga ka dam chhûng hmang ral tûr hian? Lal Zedekian Malkia fapa Pasura leh Maaseia fapa puithiam Zefania te chu Jeremia hnênah a kaltîr a, chutih laia Lalpa thu lo thleng chu: “ Lalpa chu thu min zawhsak teh, Babulon lal Nebukadnezara chuan min bei ta si a. Lalpa chuan kan tân thil mak tiin a hnawtkîr dâwn em?” an va ti a. Jeremia chuan an hnênah, “Zedekia chu heti hian va hrilh rawh u. Lalpa, Israel-te Pathian chuan heti hian a ti: ‘Ngai teh, Babulon lal leh in kulh hualtu Kaldai-ho i dona hriamhrei hman lai chu ka chelhbehsak ang che a. Khawpui chhûngah chuan hmêlmate ka hruai lût ang. Keimah ngeiin ka bân chak tak pharin thinrim tâwpkhâwk leh diriam tak chungin ka bei ang che u. He khawpuia chêng, mihring leh ran zawng zawng ka nghaisa ang a, hripuiin an thi ang. Chumi hnuah chuan, he khawpuia chêng Juda lal Zedekia leh a chhiahhlawhte hripui leh khandaihte leh ṭâm tuartea thi bâng zawng zawng chu Babulon lal Nabukadnezara kutah te, anmahni thah tumtu, an hmêlmate kutahte ka pe ang. Anni chuan khandaih hriamin an that ang a, an khawngaih lo vang a, an lainat hek lo vang,’ Lalpa thuchhuak chuan a ti. “Hêng mite hnênah heti hian va sawi rawh: Lalpa chuan heti hian a ti: ‘Ngai teh u, thihna kawng emaw, nunna kawng emaw, in duh zâwk thlan tûr ka siam a che u. He khawpuia awm reng duh chu ṭâm te, khandaih te, hripui te tuarin an thi ang. Amaherawhchu, kal chhuaka, nangmahni hualtu Kaldai-ho hnêna inpete chu râlin an man ang; mahse, an nun chu a him ang. He khawpui hi a ṭhat nân ni lovin a chhiat nân ka hawisan tawh,’ tih hi Lalpa thuchhuak a ni. Babulon lal kutah ka pe ang a, anin meiin a hâl chhe vek ang,” a ti a. “Juda lal chhûngte chuan hei hi hre rawh se; Davida chhûngte u, Lalpa chuan heti hian a ti: ‘Tûk tin dik takin ro rêl ula, Rawk tuar chu a tiduhdahtu kut ata chhan rawh u; Chutilo zawng, in thil sual tihte avângin Ka thinrim mei angin a alh dah ang e, Tu ma tihmih theih a ni lo vang. Nangni tlângchhîp zâwl, lungpui chunga chêngte u, ‘Tu nge min bei tûr lo kal anga, Kulh chhûngah lo lût ang?’ tite u, Ka ngei hle che u a ni,” tih hi Lalpa thuchhuak a ni. “In thil tih ang zêlin ka hrem ang che u,” Tih hi Lalpa thuchhuak a ni. “An ram ngaw chu ka hâl ang a, A chhehvêl ram zawng zawng a kâng chhia ang,” a ti a. Lalpa chuan heti hian a ti: “Juda lal inah zu kal la; tah chuan he thu hi sawi ang che. ‘Aw nang, Juda lal, Davida ṭhutthlêng luahtu, i ṭhuihruai, he kawngkhâra lût ṭhînte leh i mite nên Lalpa thu hi ngaithla rawh u. Lalpa chuan heti hian a ti: Dik tak leh fel takin ro rêl ula, rawk tuarte chu tiduhdahtu kut ata chhan rawh u. Mikhual te, fahrah te, hmeithai te chungah dik lo taka tiin tharum thawh suh u, he hmunah hian pawi sawi lo thisen in chhuah tûr a ni lo. Hêng thute hi ṭha taka in zawm chuan Davida lalṭhutthlênga ṭhu lalte chu an chhiahhlawhte leh an mite nên sakawr-tawlailîrah te, sakawr chungahte chuangin he in kawngkhârah hian an vei tlang ang. Amaherawhchu, hêng thute hi in zawm loh chuan he in hi a ram vek ang, tiin mahni hming chhâlin ka tiam a ni,’ ” tih hi Lalpa thuchhuak a ni. Lalpa chuan Juda lal chhûngkaw chungchâng heti hian a sawi: “Nang chu ka tân Gilead ang, Lebanon tlângchhîp ang i ni; Mahse, thlalêrah ka siam ang che a; Luahtu awm lo khawpui ram ang mai i ni ang. Nangmah tichhetu tûr hriamhrei keng ka rawn tîr ang, I sidar thing chhuante an kit ang a, Meiah an paih lût ang. “Hnam dang miten he khawpui hi an paltlang ang a, ‘Engati nge he khawpui ropui tak chungah he thil hi Lalpa chuan a tih le?’ an ti ang a. ‘ Lalpa, an Pathian thuthlung an hawisan a, pathian dangte biain an rawng an bâwl vang a ni,’ tiin an chhâng ang.” Thi ta chu ṭah suh ula, sûn hek suh u, Kal bo ta tân erawh chuan lungchhe takin ṭap ula, a lo kîr leh dâwn tawh lo. A pianna ram a hmu leh dâwn tawh si lo. Juda lal, Saluma, a pa Josia aiawha rorêltu, he hmun ata kal bo ta chungchâng thu chu Lalpa chuan heti hian a ti: “A lo kîr leh tawh lo vang. Sala an hruaina hmunah a thi ang a, he ram hi a hmu leh tawh lo vang,” tiin. Dik lo taka thil tia in satu, Thil ṭha lo tia in chhâwng siamtu, Mite chhawra, an thawhhlawh pe duh lotu chu A chung a pik e. ‘In ropui tak, chhâwng zau tak nei ka tân ka sa ang a, Tukverh zau tak tak ka hawng ang a, Sidar thingin ka thuah chhuak ang a, Rawng sen ka hnawih vek ang,’ a ti a. Sidar thinga in i sak theih avângin Lal ṭha zâwk i ni em ni? Sidar thing i ngah avâng khân Lal ta viauvah i inngai maw? I pa kha chuan dik tak leh fel takin thil a ti a, A duh tinrêng a eiin a in a, Tichuan, a lo hmuingîl ta hle a ni lâwm ni? Rethei leh chanhaite a ngaihsak a; Tichuan, a lo hmuingîl ta a ni. Chutiang chu nang pawhin min hriat dân tûr a ni lâwm ni? Tih hi Lalpa thuchhuak a ni. Mahse, dik lo taka hlêp tumin i mit i lên a, Pawi sawi lote thisen i chhuah a, Mi dang i hnehchhiah a, thil i phût ṭeuh ṭeuh va. Chuvângin, Juda lal, Josia fapa, Jehoiakima chungthua Lalpa thu chhuak chu hei hi a ni. ‘Aw ka pu, aw ka nuṭapa,’ tiin ani chu an ṭah lo vang. ‘Aw ka pu, chhuanawm ber,’ an ti hek lo vang. An hnûk ang a, Jerusalem kulh pâwnah an theh chhuak ang a, sabengtung ang lekin an phûm ang. Lebanon-ah chho la, Basan-ah hriat khawpin au chiam rawh, Abarim aṭangin ṭap chiam rawh, Lainattu che an chhe ta si a. I hmuingîl laiin i hnênah thu ka sawi a, Mahse, ‘Ka ngaithla lo vang,’ i ti a. Hei hi i tleirâwl lai ata i awm dân a ni, Ka thu i awih loh hi. In hotute thliin a lên bo vang a, lainattu che pawh salah an tâng ang a, I sualna avângin mualpho leh mangang takin i awm ang. Nang, Lebanon-a chêng, sidar ina khawsa, Nauvei nâ ang natna i chunga a lo thlen hun chuan I va rûm nasa dâwn êm! Lalpa thuchhuak chuan heti hian a ti: “Mi nung ka nih hi. Nang Juda lal Konia, Jehoiakima fapa, lal atân ka kut ding lamin lo chhinchhiah tawh che mah ila, chuta ta chu ka pawt chhuak ang che. Nangmah thah tumtu, i hlauh êm êm Babulon lal Nebukadnezara kutah leh Kaldai-ho kutah ka pe ang che. Hringtu che i nu nên i pianna ram ni lo, ram dangah ka theh chhuak ang che u; tah chuan in pahnihin in thi ang. Kîr leh an châkna ramah chuan an kîr leh tawh lo vang.” Kei chuan, “He Konia hi bêl keh, hmusitawm tak a ni lo vem ni? Tu man an ngaihsak loh hi. Engati nge amah leh a fate an paih chhuaha, An hriat loh rama theh chhuah an nih le?” ka ti a. Aw ram, aw ram, aw ram, Lalpa thu hi ngaithla rawh. Lalpa chuan heti hian a ti: “ ‘He mi hi fa nei lo tûr, dam chhûnga hlawhtling lo tûr a ni. A thlahte tu mah an hmuingîl lo vang a, Davida lalṭhutthlênga ṭhu tûr leh Judai rama rorêltu tûr an awm leh tawh lo vang,’ tiin ziak rawh,” min ti a. “Ka ran tlatna hmuna berâmte tidarha tiboraltu berâmpute chung chu a pik e,” tih hi Lalpa thuchhuak a ni. Chuvângin, Lalpa, Israel-te Pathian chuan ka mite enkawltu, berâmpute chungthu chu hetiangin a sawi: “Ka ran rual in ngaihsak lo va, in tidarh a, in ûm bo zo ta. Ngai teh u, in thil sual tih avâng hian ka hrem dâwn che u a ni!” tih hi Lalpa thuchhuak a ni. “Ka ran rual la dam chhunte chu ka hnawh darhna ram tin aṭangin keiin ka hruai khâwm ang a, an huangah ka khalh khâwm ang a, fa an ngah ang a, an chak hle ang. Anmahni enkawltu tûr berâmpu ka dah ang a, hlau leh mangangin an awm tawh lo vang a, pakhat mah an bo tawh lo vang,” tih hi Lalpa thuchhuak a ni. “Ngai teh, nite a lo thleng mêk e,” Tih hi Lalpa thuchhuak a ni. “Davida thlah aṭangin lal dik tak a lo chawr chhuak ang a, Chu lal chuan fing takin ro a rêl ang. Ram pumah dik tak leh fel takin thil a ti ang. A lal chhûng chuan Juda chu a him ang a, Israel pawh thlamuang takin a awm ang. A hmingah, ‘ Lalpa, kan dikna’ tih a ni ang. “Tichuan, ngai teh, nite a lo thleng mêk e,” tih hi Lalpa thuchhuak a ni. Mite chuan, ‘Aigupta ram ata Israel fate hruaichhuaktu Lalpa chu a nung alâwm,’ an ti tawh lo vang a, ‘Israela thlahte hmâr lam ram ata leh a ûm darhna ram tin aṭanga hruai chhuaka hruai hâwngtu Lalpa chu a nung alâwm,’ an ti tawh zâwk ang. Tin, anmahni ram ngeiah an chêng ang. Zâwlneiho chung thu chu: Ka rilru a va na êm; Tirilah ka khûr, Lalpa leh a thu thianghlim avâng hian Zu rui ang mai ka ni, rui hnêp ang mai hi. Ram chu uirenain a khat a, Ânchhia avângin a ngui zo ta. Kawng dik lo an zawh a, Dik lo takin an thiltihtheihna an hmang. “Zâwlneite leh puithiamte chuan serh leh sâng an nei lo va, Ka in chhûngah ngei pawh an sualna ka hmu,” Tih hi Lalpa thuchhuak a ni. “Chuvângin, an kawng chu zân thim kawng nâl ang a ni ang a, Tah chuan an tlânchhia ang a, an tlu ang a. Anmahni ka tlawh hunah An chhûngah thil ṭha lo ka thlentîr ang,” Tih hi Lalpa thuchhuak a ni. Samari khaw zâwlneite zîngah thil tenawm tak ka hmu, Baal hmingin thu an puang a, Ka mi Israel-te an hruai bo ta. Jerusalem-a zâwlneite zîngah pawh thil râpthlâk tak ka hmu, An uire a, dâwt an sawi a, thil sual titute an thlâwp a, Tu man an sual sim an tum loh phah a, A chhûnga chêngte chu ka tân Sodom khua leh Gomora khaw mite ang maia sual an ni. Chuvângin, zâwlneite chungchângah Engkim Lalpa chuan heti hian a ti: “Ngai teh, anni chu thil kha ka eitîr ang a, Tui kha ka intîr bawk ang. Jerusalem-a zâwlneite avângin ram pumah serh leh sâng pawisak lohna a punlun ta si a.” Lalpa Engkimtitheia chuan heti hian a ti: “In hnêna thupuangtu zâwlneite thu chu ngaithla suh u. Engmahlo mai mai an hrilh che u a, Lalpa thu sawi ni lo, an thu phuahchawp an sawi ṭhîn. Lalpa thu ngainêptute hnênah chuan, ‘In ti ṭha e,’ an ti châmchi a; mahni thuduhte hnênah pawh ‘In chungah thil ṭha lo a thleng chuang lo vang,’ an ti.” Lalpa remruatnaah tute nge tela, A thu hre tûra ngaithla le? Tu nge a thu hriatthiam tuma ngaichâng? Ngai teh, Lalpa thinur thli chu a tleh dâwn, Thli na tak chuan mi sualte lu chu a nuai ang. Lalpa thinur chu a reh dâwn lo, A thiltumte a hlena a tih zawh hma chu, Nakin hnuah hei hi in la hria ang. “Ka tirh ni lo zâwlneite chu an vâk vêl a, Eng mah ka hrilh lo va, ka hrilh ni âwm takin an puang si a. Ka remruatnaah tel ve ni sela, Ka mite hnênah ka thu an puang tûr; Tichuan, an awm dân sualte an bânsan ang a, An thil tihsualte an sim ngei ang. Hla taka awm Pathian ni lovin hnai têa awm Pathian ka ni lâwm ni?” Tih hi Lalpa thuchhuak a ni. “Ka hmuh loh tûra hmun rilah tu nge biru thei?” Tih hi Lalpa thuchhuak a ni. “Lei leh vân ka awh khat lo vem ni?” Tih hi Lalpa thuchhuak a ni. “Ka hming chhâla dâwt sawi zâwlneite chuan, ‘Mumangah kan mang a, mumangah min hrilh a ni,’ an tih chu ka hria. Hêng zâwlnei dawthei, mahni phuahchawpa mi bum ṭhînte hian eng chen nge an bum zêl dâwn? An paten Baal an bia a, ka hming an theihnghilh ta ang khân, ka hming an theihnghilh thei mahna tiin mite chu an mumangte an hrilh ṭhîn. Mang nei zâwlnei chuan a mumang a ni tih sawi sela, chutiang bawkin ka thuchah dawngtu pawhin dik takin sawi rawh se. Buhpâwl leh buhfang an inang em ni?” tih hi Lalpa thuchhuak a ni. “Ka thu chu mei ang a ni a, lung chhutkehna tuboh ang hi a ni lo vem ni?” tih hi Lalpa thuchhuak a ni. “Chuvângin, ngai teh, zâwlnei, ka thu anga an ṭhiante thu sawi chhâwngte chu ka hua a ni,” tih hi Lalpa thuchhuak a ni. “Ngai teh, zâwlnei, mahni phuahchawp sawia, ‘ Lalpa chuan heti hian a ti’ titute chu ka hua a ni,” tih hi Lalpa thuchhuak a ni. “Ngai teh, an mumang, dâwt thu puangtu chu ka hua a ni,” tih hi Lalpa thuchhuak a ni. “Eng mah pawisa lovin dâwt an sawi an sawi a, ka mite an hruai bo ta. Anni chu ka tirh an ni lo va, ka ruat an ni hek lo. Hêng mite tân hian ṭangkaina rêng rêng an nei lo,” tih hi Lalpa thuchhuak a ni. “Hêng mite hian emaw, zâwlneiin emaw, puithiamin emaw, ‘ Lalpa phurrit chu eng nge ni?’ tia an zawh che chuan, ‘Nangni hi phurrit chu in ni, ka paih bo dâwn che u,’ tih hi Lalpa thuchhuak a ni, tiin hrilh rawh, Zâwlnei emaw, puithiam emaw, tu pawhin, ‘Hei hi Lalpa phurrit a ni,’ an tih chuan chu mi leh a chhûngte chu ka hrem ang. Mi tinin mahni ṭhenawmte leh unaute hnênah, ‘ Lalpa chuan eng nge a hrilh che? Lalpa chuan eng nge a lo sawi?’ tiin an zâwt ang. ‘ Lalpa phurrit chu,’ in ti tûr a ni lo, in tih chuan ka thu chu in tân phurrit a ni takmeuh vang. Pathian nung, Engkim Lalpa, kan Pathian thu chu in kailek zo ta si a. Zâwlnei hnênah chuan, ‘Eng nge Lalpa chuan a hrilh che? Lalpa chuan eng nge a sawi?’ ti ang che. ‘Hei hi Lalpa phurrit chu a ni,’ in tih chuan hetiangin Lalpa chuan a ti, ‘Hei hi Lalpa phurrit chu a ni, ti lo tûra ka hrilh che u pawhin, hei hi Lalpa phurrit chu a ni,’ in la tih cheu avângin ngai teh u, ka pawt chhuak ang che u a, ka hnên ata ka paih chhuak dâwn che u a ni, he khawpui, in pate leh in tâna ka lo pêk tawh nên hian. Tichuan, kumkhuaa zahna leh mualphona, theihnghilh rual loh in chungah ka thlentîr ang.” Juda lal Jehoiakima fapa Jekonia leh Juda hotute, mi themthiamte, thîrdêngte Babulon lal Nebukadnezaran Jerusalem aṭanga Babulon-a sala a hruai hnu khân Lalpa chuan theipui bâwm pahnih, Lalpa in kawta inhûng chu mi entîr a. Bâwm pakhatah chuan theipui hmin ṭha tak tak, a rah hmasa chi ang hi a awm a, pakhat zâwkah chuan theipui rah chhe tak, ei tlâk loh khawpa chhia a awm bawk a. Lalpa chuan ka hnênah, “Jeremia, eng nge i hmuh?” a ti a. Kei chuan, “Theipui rah ka hmu, a ṭhate chu an ṭha hle a, a chhiate erawh chu chhe tak, ei tlâk loh khawpa chhia an ni,” ka ti a. Lalpa thu chu ka hnênah a lo thleng leh a. Lalpa, Israel-te Pathian chuan heti hian a ti: “Juda saltâng, Kaldai rama ka tirhte chu hêng theipui rah ṭha ang hi an ni. An tâna ṭha tûrin an chungah ka mit a fu ang a, he ramah hian ka hruai kîr leh ang. Anni chu ka tungding ang a, ka ṭhiat tawh lo vang. Ka phun ang a, ka pawt tawh hek lo vang. Lalpa ka ni tih an hriat theihna tûr thinlung ka pe ang. Ka mite an ni ang a, kei an Pathian ka ni ang, an thinlung zawng zawng nên ka hnênah an lo kîr dâwn si a.” Lalpa chuan heti hian a ti: “Juda lal Zedekia te, a upa te, Jerusalem-a awm te, he rama la chêngte leh Aigupta rama awmte chu theipui rah ei tlâk loh khawpa chhia ang hi an ni ang. Anni chu ram tina lalte tân ṭihkhaiah ka siam ang. Ka hnawhdarhna hmuna mite chuan hmusitin an nuihzat ang a, deusawh takin hmun tinah an hming chu ânchhe inlawh nân an hmang ang. An pate leh an hnêna ka pêk ramah chuan an boral vek hma chu an chungah khandaih te, ṭâm te, hri te ka lêntîr ang.” Juda lal Jehoiakima, Josia fapa a lal kum linaa Juda mi zawng zawng chungchâng thu-a Jeremia hnêna thu lo thleng chu: he hun hi Babulon lal Nebukadnezara lal kum khatna a ni. Zâwlnei Jeremia chuan Juda mi zawng zawng leh Jerusalem-a awm zawng zawng hnênah heti hian a ti: “Kum sawmhnih leh pathum chhûng, Amona fapa Josia, Judai rama a lal kum sâwm leh pathumna aṭanga vawiin thlengin Lalpa thu ka hnêna lo thleng ṭhîn chu zîng taka thovin ka hrilh ka hrilh che u a; mahse, in ngaithla duh si lo. Lalpa chuan a rawngbâwltu zâwlneite chu zîng tak takah a tîr fo va, in pawisa lo va, hriat tumin in beng in dawh hek lo. Mi tinin in awm dân sual te, in thil chin ṭha lote bânsan ula; tichuan, in pate leh in hnêna Lalpa pêk ramah hian kumkhuain in awm thei ang. Pathian dangte rawngbâwl tûr leh chibai bûk tûrin kal suh u. In kuta in thil siam chuan min tithinur lo ula; tichuan, ka hrem lo vang che u, tiin. Mahse, mi ngaithla lo va, in kuta in thil siamte chuan min tithinur a, nangmahni in intichhe ta zâwk a ni, tih hi Lalpa thuchhuak a ni. Tichuan, Engkim Lalpa chuan heti hian a ti: “Ka thu in ngaihthlâk duh loh avângin hmâr lama hnamte chu ka ko dâwn,” tih hi Lalpa thuchhuak a ni. “Babulon lal Nebukadnezara, ka chhiahhlawh chu, he rama chêngte leh a chhehvêl rama awm zawng zawng bei tûrin ka rawn hruai ang,” tih hi Lalpa thuchhuak a ni. “Anni chu ka tichhe vek ang a, miin mak an ti ang a, râpthlâk an ti hle ang, an chhe hlen hlauh dâwn a ni. An hlim thâwm te, an lâm ri te, moneitu aw leh mo aw te, buh dêng thâwm te, khâwnvâr êngte ka titâwp ang. He ram hi a pumin a ram ang a, a chhe vek ang a; hêng hnamte hian kum sawmsarih chhûng Babulon lal rawng an bâwl ang. “Kum sawmsarih hu a ral hnuah Babulon lal chu a mite nên an sual avângin ka hrem ang a, Kaldai ram chu ka tichhe hlen ang,” tih hi Lalpa thuchhuak a ni. “Anmahni dema thu ka sawi zawng zawng, he lehkhabua chuang zawng zawng, Jeremian hnam zawng zawng kalha thu a lo puan tawhte chu he ram chungah hian ka thlentîr ang. Hnam tam tak leh ram ropui tak takte chuan anni chu salah an siam ang a, an thil lo tih tawh leh an kut hnathawh ang zêlin ka thungrûl ang.” Lalpa, Israel-te Pathian chuan ka hnênah heti hian a ti: “He uain no, ka thinurnaa khat hi, ka kut ata la la, ka tirhna che hnam zawng zawng intîr ang che. An in ang a, an pai an pai ang a, an â zo vang; an hnênah khandaih ka lêntîr dâwn avângin,” tiin. Tichuan, Lalpa kuta no chu ka la a, Lalpa mi tirhna hnam zawng zawng chu ka intîr a. Tûna a awm ang hian Jerusalem leh Judai ram khawpuite chu a ram vek ang a, an lalte leh hruaitute chu hmuhsit leh nuihzat an ni ang a, ânchhia an dawng ang. Aigupta lal Farawa leh a chhiahhlawh te, a rorêltute leh a mi zawng zawngte leh hnam dang awmte; Uz rama lal zawng zawng te, Filistia rama lal, Askelon lal te, Gaza lal te, Ekron-a lal te leh Asdod-a hnutchhiaha awm lal te; Edom mi te, Moab mi te, Amon mi te; Tura leh Sidon lal te, tuifinriat kama awm zawng zawng lal te; Dedan te, Tema te, Buz-a chêngte leh lumêt zawng zawng te; Arabia lal zawng zawng te, thlalêra chêng hnam inpawlh lal te; Zimri lal zawng zawng te, Elam lal zawng zawng te; Media lal zawng zawng te; Hmâr lam lal, hmun hla leh hnaia awm zawng zawng te leh lei lalram tinrêng te pawh chuan a indawt zêlin an in ang. Chumi zawhah chuan Babulon lal pawhin a in bawk ang. Engkim Lalpa, Israel-te Pathian chuan in hnênah heti hian sawi rawh min ti: ‘In ula, luak ula, tho thei lo khawpin tlu rawh u. In zîngah khandaih ka lentîr dâwn si a,’ tiin. I kut ata no chu an lâk duh loh chuan heti hian hrilh ang che: Engkim Lalpa chuan, ‘In in ngei tûr a ni, a ti,’ tiin. “En teh u, ka hming chuanna khawpuiah chhiatna ka thlentîr ṭan ta a, nangni pawh hrem in tuar lo vang em ni? In pumpelh bîk hauh lo vang. Leia awm zawng zawng chungah khandaih ka lek dâwn si a,” tih hi Engkim Lalpa thuchhuak a ni. Tûnah, anni hi hetiang hian au khum rawh: “Vân sâng aṭangin Lalpa chuan aw a chhuah ang a, A chênna Hmun Thianghlim aṭangin awrâwl a chhuah ang. A ram demin aw a chhuah ang a, Grep sâwrtute angin a au vang, Leia mi zawng zawng an khûr ang. A thâwm chuan kâwlkil a thleng ang, Hnamte chungah Lalpa a thinur a ni. Mi zawng zawng ro a rêlsak ang, Mi suaksual chu khandaih a tuartîr ang,” Tih hi Lalpa thuchhuak a ni. Engkim Lalpa chuan heti hian a ti: “En teh u, hnam tin chungah chhiatna a thleng ta, “Kâwlkil ata thlipui na tak a lo thawk dâwn,” tiin. Chutih hunah chuan Lalpa mi thahte chu Kâwlkil aṭanga a lehlam thlengin Tu man an ṭah lo vang a, an ruang te pawh an hlâwm hek lo vang, An phûm lo vang a, leia bawlhhlawh tling khâwm ang lek an ni ang. Berâmpute u, ṭap ula, chiau vawng vawng rawh u, Nangni ran rual vêngtute u, Vaivutah let tawp tawp rawh u, An thah hun che u a thleng dâwn ta, In tlu ang a, hlumbêl ṭha tak keh ang maiin in keh darh vek ang. Berâmpute chuan tlânchhiatna tûr rêng an hre lo, Ranrual vêngtute tân pawh pumpelh theih a ni hek lo. Berâmpute ṭap thâwm leh ranrual vêngtute rûm thâwm chu, Ngaithla rawh u, Lalpa chuan an ran tlatna hmun a tichhe tawh si a. Lalpa thinurna nasa tak avâng chuan, Thlamuang taka an awm ṭhinna ram chu a ṭhing ta ṭhuap mai. Hnehchhiahtu ngûnhnâm avâng leh Pathian thinurna nasa tak avâng chuan An chênna ram chu an chhuahsan ta, Sakeibakneiin a pûk a rauhsan ang maiin. Juda lal Josia fapa, Jehoiakima a lal ṭan tirh kumin he thu hi Lalpa hnên aṭangin a lo thleng a. Hetiangin: “ Lalpa chuan a ti, ‘ Lalpa in kawtzâwlah ding la, Juda khawpui zawng zawng aṭanga Pathian be tûra Lalpa ina lo kalte hnênah thu sawi rawh. Thu ka pêk zawng zawng chu hmaih lovin puang ang che. Mite chuan an awm dân sual bânsanin an ngaithla mial mahna. Tichuan, an thil sual tihte avânga an chunga chhiatna thlentîr ka tum pawh ka sût leh ang. Lalpa chuan heti hian a ti a ni,’ tiin anni chu hrilh rawh: In hnêna ka pêk, ka thu in pawisa lo va, ka dân in zâwm hek lo. In hnêna ka tirh fo ṭhin ka chhiahhlawh zâwlneite thu in pawisak loh avângin he in hi Silo angin ka tichhia ang a, he khawpui hi leia hnam tinrêng ânchhe dawngtu atân ka siam ang,” tiin. Tichuan, puithiam te, zâwlnei te, mipui zawng zawngte chuan hêng thu, Lalpa ina Jeremia sawi chu an hria a. Mipui hrilh tûra Lalpa thupêk zawng zawng a sawi zawh veleh puithiam te, zâwlnei te, mipui te chuan Jeremia chu an man a, “I thi ngei tûr a ni. Engati nge Lalpa hming chhâla, ‘He in hi Silo ang a ni ang a, he khawpui pawh hi luahtu awm lovin a ram ang,’ tia i sawi?” an ti a. Lalpa inah chuan mipui zawng zawngin Jeremia chu an bâwr ta huai huai a. Hêng thu hi Juda rorêltuten an hriat chuan lal in aṭangin Lalpa inah an chho va, Lalpa in kawngka thar luhnaah chuan an ṭhu a. Puithiamte leh zâwlneite chuan rorêltute leh mipuite hnênah, “He mi hi thi tlâk a ni, in hriat angin ‘he khawpui hi a chhe dâwn’ tiin a sawi a ni,” an ti a. Jeremia chuan rorêltute leh mipui zawng zawng hnênah chuan heti hian a ti a: “In ngaihthlâk tâk ang khân he khawpui leh he in chhiat tûr thu hi sawi tûrin Lalpa chuan mi tîr a ni. In awm dân te, in chetzia te siam ṭha ula, in Pathian, Lalpa thu chu zâwm rawh u. Tichuan, in chunga chhiatna lo thleng tûr a lo puan tawh chu Lalpa chuan a sût dâwn nia. Kei chu, hei, in kutah ka awm a, dik leh ṭha nia in hriat angin ka chungah ti mai rawh u. Min thah chuan he khawpui leh a chhûnga chêngte hian pawi sawi lo thisen mawh in phur ang tih hi hria ang che u. Hêng thu hi in beng hriata sawi tûrin Lalpa chuan min tîr a ni e,” a ti a. Rorêltute leh mipuite chuan puithiamte leh zâwlneite hnênah chuan, “He mi hi tihhlum tûr a ni lo; Lalpa, kan Pathian hmingin kan hnênah thu a sawi si a,” an ti a. Chumi rama upa tute emaw an lo ding chhuak a, mipui pung khâwm hnênah chuan, “Moreset mi, Mika chuan Juda lal Hezekia hun lai khân thu a hril a, Juda mi zawng zawng hnênah: ‘Engkim Lalpa chuan heti hian a ti: Zion chu lo anga leh phut vek a ni ang a, Jerusalem pawh thil chhe vawm khâwm mai a ni ang, Lalpa in tlângte chu a ngaw khung ang,’ a ti a. “Ani chu Juda lal Hezekia emaw, Juda mi dangten emaw an that em? Hezekia chuan Lalpa a ṭih a, a tilâwm a. Tichuan, Lalpa chuan an chunga thil ṭha lo tih a tum chu a sût ta a ni lâwm ni kha? Keini zawng keimahni chungah thil ṭha lo tak kan thlentîr dâwn ta a nih hi le!” an ti a. (Mi dang, Semaia fapa Uria, Keriat-jearim mi chuan Lalpa hmingin thu a puang a. Lal Jehoiakima leh a milian te, rorêltute chuan a thu sawi an hria a, lal chuan thah a tum ta a. Uria chuan a hriatin a hlau va, Aigupta ramah a tlân ta a. Lal Jehoiakima chuan Akbora fapa Elnathana chu mi dangte nên Aigupta ramah a tîr a. Uria chu Aigupta ram aṭangin an rawn hruai a, lal Jehoiakima hnênah an rawn thlen a. Ani chuan khandaihin a sât hlum a, a ruang chu vântlâng thlânmualah an phûm ta a ni.) Amaherawhchu, Safana fapa Ahikama chuan Jeremia chu a ṭan tlat a, tihhlum tûrin mipui hnênah an pe ta lo va. Juda lal Josia fapa, Zedekia lal ṭan tirhin Lalpa thu Jeremia hnênah a lo thleng a. Lalpa chuan ka hnênah heti hian a ti: “Nghâwngkawl tuk la, a hrui vuahin i nghâwngah bât rawh. Edom lal te, Moab lal te, Amona thlah lal te, Tura lalte leh Sidon lal ten Juda lal Zedekia hmu tûra Jerusalem-a an mi rawn tirhte chu thu chah rawh: Hêng thu hi an pute hnênah sawi rawh se: ‘Engkim Lalpa, Israel-te Pathian chuan heti hian a ti: in pute chu heti hian hrilh rawh u: Ka thiltihtheihna ropui tak nên bân phar meuhvin leite, mihringte leh leia rannung zawng zawngte hi ka siam a; chûng chu pêk âwm ka tihte hnênah ka pe bawk a. Tûnah pawh hêng ram zawng zawng hi ka chhiahhlawh Nebukadnezara, Babulon lal kutah ka pe tawh a ni. Ramsate pawh ama rawngbâwl tûrin ka pe a ni. Ama ram a chhiat hun a thlen hma chuan hnam tinrêngin amah leh a fate leh a tute rawng an bâwl ang a; chumi hnuah erawh chuan hnam tam takte leh lal ropuite bawihah a awm ang. ‘Babulon lal Nebukadnezara rawngbâwl duh lo leh a thuhnuaia kûn duh lo tawh phawt hnam leh lalram chu khandaih te, ṭâm te, hripui tein ka hrem ang, ka kut chak tak hmangin anni chu ka tiboral vek dâwn a ni,’ tih hi Lalpa thuchhuak a ni. ‘Babulon lal rawng in bâwl lo vang,’ tia hrilhtu che u in zâwlnei te, in aienthiam te, mumang hrilhfiahtu te, hrilhlâwktu te, thil chhui thiamte thu chu ngaithla suh u. In ram ata hla taka hruai bo in nih theih nân leh ka hnawh darhna che u a in boral theih nân in hnênah dâwt thu an puang ṭhîn a ni. Amaherawhchu, Babulon thuhnuaia kûna, a rawngbâwltu hnam chu anmahni ram ngeiah ka awmtîr leh ang a, leite an let ang a, chutah chuan an chêng ang,” tih hi Lalpa thuchhuak a ni. Juda lal Zedekia hnênah pawh hetiang hian ka sawi bawk a: “Babulon lal thuhnuaiah kûn la, amah leh a mite rawng bâwl ang che; tichuan, i him ang. Babulon lal rawngbâwl duh lo hnam chungchâng Lalpa sawi tawh ang kha engah nge khandaih te, ṭâm te, hripui te tuarin nang leh i mite chu in thih ang le? ‘Babulon lal rawng bâwl suh u,’ in hnêna titu zâwlneite thu chu ngaithla suh u, in hnênah dâwt thu an sawi mai mai a ni si a. ‘Anni chu ka tirh an ni lo, ka hmingin dâwt thu an hril zâwk ṭhîn a ni,’ tih hi Lalpa thuchhuak a ni. Chuvângin, ka hnawt chhuak ang che u a, in hnêna thusawitu zâwlneite nên in boral ang.” “Puithiamte leh hêng mite hnênah hian hei hi ka sawi a ni: Lalpa chuan heti hian a ti: ‘ Lalpa ina bungbêl chu Babulon aṭangin lâk kîr a ni thuai dâwn,’ titu zâwlneite thu sawi chu ngaithla suh u. Dâwt thu an hrilh che u a ni. An thu chu awih suh u. Babulon lal rawngbâwl zâwk ula; tichuan, in him ang. Engah nge he khawpui hi a chhiat ang le? Zâwlnei an niha Lalpa thu an dawng tak meuh a nih chuan Lalpa ina bungbêl la awm, Juda lal ina awmte leh Jerusalem khuaa awmte hi Babulon-a lâk a nih loh nân Engkim Lalpa hnênah ngên ang hmiang.” A ni, Engkim Lalpa, Israel-te Pathian chuan - Lalpa ina bungbêl te, Judai ram lal ina thil hnutchhiah te leh Jerusalem khua a thil hnutchhiah te chungchâng hetiangin a sawi: “Babulon-ah lâk an ni ang; tin, ka hruai kîr leh ang a, he hmunah hian ka din thar leh ang,” tih hi Lalpa thuchhuak a ni. Chumi kum vêk, Judai ram lal Zedekia lal tirh lam, a kum lina, thla nganaah chuan zâwlnei Hanania, Azura fapa, Gibeon mi chuan puithiamte leh mipui zawng zawng hriatin Lalpa inah chuan ka hnênah hetiangin thu a sawi a. “Engkim Lalpa, Israel-te Pathian chuan heti hian a ti: ‘Babulon lal thuneihna chu ka tichhe ta. Babulon lal Nebukadnezaran hemi hmun aṭanga Lalpa ina bungbêl a lâk, Babulon-a a phurh hâwn zawng zawng kha kum hnih chhûng ngeiin he hmunah hian ka rawn thlen leh vek dâwn. Juda lal Jekonia, Jehoiakima fapa leh Juda saltâng, Babulon-a kal zawng zawngte pawh he hmunah hian ka hruai kîr leh vek ang, Babulon lal thuneihna chu ka tichhia ang,’ tih hi Lalpa thuchhuak a ni,” a ti a. Zâwlnei Jeremia chuan puithiamte leh Lalpa ina ding mipui zawng zawng hmaah chuan zâwlnei Hanania hnênah hetiangin a sawi a: “Amen, Lalpa chuan chutiang tak chuan ti rawh se, Lalpa chuan thu i puan ang chuan thlentîr sela, Babulon-a bungbêlte leh saltâng zawng zawng he mi hmunah hian rawn thlen leh ngei rawh se. Amaherawhchu, nang leh mipui zawng zawngin in hnêna ka thu sawi hi lo hre teh u; Hmâsâng ata, nang leh kei kan pian hma aṭangin zâwlneiten, ‘indona te, ṭâm te, hripui te ram tam tak leh lalram ropui tak tak chungah a thleng dâwn,’ an ti ṭhîn a. ‘Muanna a lo thleng dâwn,’ tih puangtu zâwlnei thu sawi chu a lo thlen hunah chu zâwlnei chu Lalpa tirh a nih leh nih loh a hriat mai ang chu,” a ti a. Tichuan, zâwlnei Hanania chuan zâwlnei Jeremia nghâwngkawl bah lai chu a la a, a titliak ta a. Hanania chuan mi zawng zawng hriatah heti hian a ti a: “ Lalpa chuan heti hian a ti: Hetiang tak hian Babulon lal Nebukadnezaran hnam zawng zawng a awpbehna thuneihna chu kum hnih chhûngin ka tichhe dâwn a ni,” tiin. Zâwlnei Jeremia chuan a kalsan ta a. Zâwlnei Hananian zâwlnei Jeremia nghâwngkawl bah a tihtliah hnuah Lalpa thu chu Jeremia hnênah a lo thleng a “Kal la, Lalpa chuan heti hian a ti, tiin Hanania chu va hrilh rawh: thing nghâwngkawl i titliak a, a aiah thîr nghâwngkawl i siamsak zâwk a nih hi, Engkim Lalpa, Israel-te Pathian chuan heti hian a ti: Babulon lal Nebukadnezara rawngbâwl tûrin hêng hnam zawng zawng hi thîr nghâwngkawl ka bahtîr ta a ni. Tichuan, a rawng an bâwl ang a. Ramsa hlauhawm pui puite pawh a hnênah ka pe bawk a ni,” tiin. Zâwlnei Jeremia chuan zâwlnei Hanania hnênah, “Hanani, hre rawh, Lalpa chuan a tîr lo che; hêng mite hi dâwt i rintîr mai mai a nih hi. Chuvângin, Lalpa chuan heti hian a ti: ‘Ngai teh, lei ata ka la bo daih dâwn che, Lalpa laka hel thu i puan avângin kuminah ngei i thi ang,’ a ti,” a ti a. Chumi kum, thla sarihnaah chuan zâwlnei Hanania chu a thi ta a. Nebukadnezaran Jerusalem aṭanga Babulon-a a hruai, saltâng zînga hruaitu te, puithiam te, zâwlnei te leh mi zawng zawng hnêna zâwlnei Jeremia thu thawn chu hei hi a ni: Chu chu lal Jekonia leh a nu te, mi tilreh te, Judai ram leh Jerusalem-a hotu te, themthiam te leh thîrdêng ten Jerusalem an chhuahsan hnu khân a ni. Juda lal Zedekian Babulon lal Nebukadnezara hnêna a mi tirh, Safana fapa Elasa leh Hilkia fapa Gemaria te kutah chu lehkha chu a thawn a ni. Heti hian a ti: “Israel-te Pathian, Engkim Lalpa chuan heti hian a ti: ‘Saltâng zawng zawng, Jerusalem aṭanga Babulon-a ka kaltîr tâkte u, in te sa ula; tah chuan chêng ang che u; huante siam ula, in thlai tharte chu ei ang che u. Nupui nei ula, fanu fapate nei ang che u. In fapate nupui neihsak ula, in fanute pawh pasal neihtîr ang che u. Tichuan, fanu fapa neiin in lo pung ang a, kiam lam pan suh u. Sala ka tirhna che u khawpui ṭhatna zawnsak ula, Lalpa hnênah dîlsak rawh u. Chu ram hmuingîlna zâr chu nangni pawhin in zo ve dâwn si a.’ Engkim Lalpa, Israel-te Pathian chuan heti hian a ti: ‘In zînga zâwlnei te, aienthiam te chuan bum che u suh se. An mumangte pawh ngaithla suh u. Ka hmingin dâwt an hrilh che u a, anni chu ka tirh an ni hauh si lo,’ tih hi Lalpa thuchhuak a ni. “ Lalpa chuan heti hian a ti: ‘Kum sawmsarih a tlin hunah Babulon ramah chuan ka rawn tlawh ang che u a, in hnêna ka thutiam nghet tak chu ka hlen ang a, he hmunah hian ka hruai kîr leh ang che u. In tâna ka remruat chu keimah chauhvin ka hria,’ tih hi Lalpa thu chhuak a ni. ‘Chhiatna ni lo, thil ṭha in beisei chu in chan theih nân ka ruahman a ni. Min lam ang a, ka hnênah in rawn ṭawngṭai ang a, ka lo ngaithla ang che u. Min zawng ang a, tihtakzeta min zawn hunah min hmu ang. In hmuh tûrin ka awm ang,’ tih hi Lalpa thuchhuak a ni. Sal ata ka chhuah ang che u a, ka hnawhdarhna ram hnam zawng zawng leh hmun tinrêng aṭangin ka hruai khâwm leh ang che u,’ tih hi Lalpa thuchhuak a ni. “ ‘ Lalpa chuan Babulon-ah pawh zâwlneite min siamsak a,’ in ti vei a. Lalpa chuan Davida lalṭhutthlênga ṭhu tûr lal chungchâng te, he khawpuia chêng mipui chungchâng te, in unau, in hnêna sala tâng ve lote chungchâng thu heti hian a sawi: ‘Ngai teh, an chungah khandaih te, ṭâm te, hripui te ka lêntîr dâwn e. Anni chu theipui ṭawih, ei tlâk loh khawpa chhia ang hian ka siam ang. Anni chu khandaih te, tâm te, hripui te nên ka ûmzui ang. Ka hnawhdarhna hnam tin zîngah leia lalram zawng zawngten thil râpthlâk leh ânchhia, mak an tiha an chek khum tlawk tlawkah leh an nuihzat huai huaiah ka siam ang. In hnêna zing tak taka ka tirh, ka chhiahhlawh zâwlneite thu in pawisa lo va, in ngaithla duh si lo,’ tih hi Lalpa thuchhuak a ni. Nangni, saltâng zawng zawng, Jerusalem aṭanga Babulon-a ka hruaite u, Lalpa thu hi ngaithla rawh u. Israel-te Pathian, Engkim Lalpa chuan Kolaia fapa Ahaba leh Maaseia fapa Zedekia, ka hminga dâwt thu puang ṭhînte chungchâng heti hian a sawi: ‘Ngai teh, anni chu Babulon lal Nebukadnezara ka mantîr ang a, in hmuh lai ngeiin a that ang. Judai ram aṭanga Babulon-a saltâng zawng zawngte chuan, ‘Babulon lalin Zedekia leh Ahaba meia a rawh ang khân, Lalpa chuan i chungah ti ve rawh se,’ tiin chûng mite hming chuan ânchhia an inlawh ang. Israel ramah â takin thil an ti a, an ṭhenawmte nupui an uiresak a, ka hmingin dawt an sawi a, an hnênah thu ka pe si lo. Kei hi hrechiangtu thuhretu ka ni,’ Lalpa thuchhuak chuan a ti,” tiin. Nehelam mi, Semaia hnênah heti hian thu sawi rawh: “Israel-te Pathian, Engkim Lalpa chuan heti hian a ti, Jerusalem mipui zawng zawng hnênah te, Maaseia fapa Zefania, puithiam hnênah te, puithiam dang zawng zawng hnênah te nangma hmingin lehkha i thawn a, hetiangin i ti a: ‘Nang Zefania, Lalpa chuan puithiam Jehoiada aiawhtu atân a ruat che a, Lalpa ina â taka thu puang ṭhînte chu kawl te, thîrkawl te buntîrtu atân ruat i ni a. Tûnah, Jeremia, Anathot khaw mi, in hnêna thu puangtu hi engtizia nge i zilh loh? Babulon-a awmte chu, ‘Saltân chhûng a rei dâwn a, in leh lote bêngbel ula, huante pawh siam ula, in thlaite ei rawh u,’ tiin thu a thawn hi,” tiin. Puithiam Zefania chuan he lehkha hi zâwlnei Jeremia hriatah a chhiar a. Lalpa thu chu Jeremia hnênah hetiangin a lo thleng a: “Hêng hi saltâng zawng zawng hrilh rawh: Lalpa chuan Nehelam mi Zefania chungchâng heti hian a sawi: Semaia hian in hnênah thu a hril a, ani chu ka tirh a ni lo, dâwt a rintîr che u a ni. Chuvângin, Lalpa chuan heti hian a ti: Nehelam mi Semaia leh a thlahte chu ka hrem dâwn. In zîngah thlah pakhat mah a nei lo vang a, ka mite tâna thil ṭha ka tih tûr pawh a chang ve hek lo vang, Lalpa laka hel thu a puan avângin, tih hi Lalpa thuchhuak a ni,” a ti a. Jeremia hnêna Lalpa thu lo thleng chu: “ Lalpa, Israel-te Pathian chuan heti hian a ti: I hnêna ka thu sawi zawng zawng kha lehkhabu-ah ziak rawh. Ngai teh, nite a lo thleng mêk e,” tih hi Lalpa thuchhuak a ni. “Ka mi Israel-te leh Juda-te chu an saltânna ata ka chhuah ang a, an pute hnêna ka pêk ramah chuan ka hruai hâwng leh ang a; tichuan, ram chu an luah ang,” tiin. Hêng hi Juda leh Israel chungchânga Lalpa thu sawi chu a ni. Lalpa chuan heti hian a ti: “Hlau leh mangang thâwm ka hria, Muanna rêng a awm lo. Hawiin zâwt vêl teh rêng u, Mipain nau an vei ngai em ni? Engtizia nge hmeichhe nau vei anga, Pachangin a pum a dawma, A hmêl a lo dân tâk? Chu ni chu a va han râpthlâk dâwn êm! A ang rêng a awm lo vang, Jakoba mangan hun tûr a ni, Mahse, chhan chhuah a ni ang. Chumi ni chuan a nghâwngkawl bah ka titliak ang a, An phuarna hrui ka phelhsak ang a, Ram dang mite chhiahhlawh an ni tawh lo vang, An Pathian, Lalpa leh an lal atâna ka tun din tûr, Davida thlah zînga mi rawng chu an bâwl tawh zâwk ang. Aw ka chhiahhlawh Jakob, hlau suh, Aw Israel, zâm hek suh,” Tih hi Lalpa thuchhuak a ni. “I thlah, ram hla taka saltângte chu ka chhan chhuak dâwn si a, Jakoba chu thlamuang tak leh him takin a awm ang, Tu man an tirâlṭi tawh lo vang. Chhan chhuak tûr chein i hnênah ka awm reng e,” Tih hi Lalpa thuchhuak a ni. “Ka hnawhdarhna che rama hnam zawng zawng chu, Ka tichimit vek ang a, Nang erawh chu ka tichimit lo vang che. A tâwk lekin ka thunun ang che a, Hrem loh zawngin i chhuak bîk lo vang.” Lalpa chuan heti hian a ti: “I hliam chu tihdam rual a ni lo, I tuar hi a na êm a ni. I pân tidama i na tidam tûrin Enkawltu rêng i nei lo. I lamṭang zawng zawngten an theihnghilh tawh che a, An ngaihsak tawh lo che. Hmêlma angin ka hliam ta che a, Dim lo takin ka hrem che a ni, I sualna leh i bawhchhiatna a nasat êm avângin. I hliam vângin engah nge i phunnawi? I na hi tihdam rual a ni lo; I khawlohna a nasa a, thil tam tak i tihsual avângin Hêng thil hi i chungah ka ti a nih hi. Eiraltu zawng zawng che chu eiral an ni ang a, I hmêlma zawng zawng salah an hruai ang. Rawktu zawng zawng che u an rawk ang a, Tiramtu zawng zawng che pawh ka tiram ve ang. Ka tidam leh ang che, I hliam tuar pawh ka tidam ang,” Tih hi Lalpa thuchhuak a ni. ‘Hnuchhawn, tu ma ngaihsak loh Zion,’ An tih che avângin. Lalpa chuan heti hian a ti: “Ngai teh, Jakob-ho ram chu ka din thar leh ang a, A chênna hmun chu ka lainat ang. Khawpui ram hnu chu ka siam ṭha ang a, Lal inte pawh a hmun ngaiah a ding leh ang. Chûng hmun aṭang chuan lâwmthu sawina leh Hlim thâwm a lo chhuak ang a, Anni chu ka tipung ang a, an kiam leh tawh lo vang, Ka tiropui ang a, an tenau hauh lo vang. An fate chu tûn hma ang khân an awm leh ang a, Ka hmaah ngêlnghet takin an awm ang. Anmahni hnehchhiahtute chu ka hrem zêl ang. Anmahni mi ngei hruaituah an nei ang a, An zîng aṭangin rorêltu an lo chhuak ang, Anni chu min rawn hnaih tûrin ka sâwm ang a; Tichuan, min rawn hnaih ang. Sâwm lohvin tu nge mi rawn hnaih ngam ang?” Tih hi Lalpa thuchhuak a ni. Ka mite in ni ang a, in Pathian ka ni ang. Ngai teh, Lalpa thinurna thlipui chu na takin a tleh ta, Mi suaksualte lu chu a nuai nek ang. A thiltumte a hlena a tih zawh hma loh chuan Lalpa thinurna nasa tak chu a reh lo vang, Ni hnuhnûngah hei hi in la hrethiam ang. “Chumi hnuah chuan kei hi Israel chhûngkua zawng zawng Pathian ka ni ang a, Anni pawh ka mite an ni ang,” Lalpa thuchhuak chuan a ti. Lalpa chuan heti hian a ti: “Khandaiha thah bângte chuan thlalêrah khawngaih an hlawh ang.” Israel-ten chawlhna ram an pan lai khân, Hmâna ka hnêna lo lang Lalpa chuan, “Hmangaih tâwp lovin ka hmangaih che a, Ngilnei takin ka hruai zêl ang che,” a ti. Aw nula Israel, ka din thar leh dâwn che, Din ngheh i lo ni ang. Benchhekte kengin hlim taka lâm tûrin i chhuak leh ang. Samaria tlâng tluanin grep huan i siam leh ang a, Phuntute chuan a rah chu an ei ang. Râlvêngtuten Efraim tlângah mi an auh ni a thleng dâwn, ‘Tho teh u, Lalpa kan Pathian hnênah, Zion-ah i chho vang u,’ tiin. Lalpa chuan heti hian a ti: “Jakoba tân hlim takin zai ula, Hnam azawnga ropui ber tân au chiam rawh u, Hril vêl ula, chawimawi rawh u, ‘Aw Lalpa, Israel la damte chu humhim ang che,’ tiin. Ngai teh, anni chu hmâr lam aṭangin ka hruai dâwn, Lei hmun kil tin aṭangin ka hruai khâwm ang a, Mitdelte leh kebaite pawh an tel ve ang, Nau paite leh vei laite nên, Hnam ropui tak chu he hmunah hian an lo kîr leh ang. Ṭap chungin lo kîr mah se, Ka thlamuan ang a, ka hruai hâwng ang. Lui kamah te, kawng tluang an tlûk lohna tûrah te chuan ka hruai ang. Israel-te tân pa ka ni ang, Efraim chu ka fa tîr a ni si a.” Aw hnamte u, Lalpa thu hi ngaithla ula, Tuifinriat kam ram hla takahte hril rawh u. ‘Israel tidarhtu chuan a hruai khâwm leh ang a, Berâmpu angin anni chu a enkawl dâwn,’ tiin. Lalpa chuan Jakoba chu a tlan chhuak ang a, A aia chakte kut ata a chhan chhuak ang. Hlim taka auvin Zion tlângchhîpah an lo lâwn ang a, Lalpa ṭhatna avâng chuan an hmêl a hlim êm êm ang. Buh te, uain te, hriak te, berâm leh ran rual note avâng chuan an lâwm ang, Anni chu hneh taka tuia châwm huan ang an ni ang a, An lungngai tawh lo vang. “Nulate chu hlim takin an lâm ang a, Tlangvâl leh tarte pawh an lâwm ang. An lungngaih lâwmah ka chantîr ang a, An lungchhia chu ka thlamuan ang. Puithiamte chu chaw tui takin ka hrai ang a, Ka mite chu ka ṭhatnain an tlai bawk ang,” Tih hi Lalpa thuchhuak a ni. Lalpa chuan heti hian a ti: Rama khuaah thâwm an hria, Lungchhe taka ṭap tlawk tlawk thâwm chu; Rakili chuan a fate a ṭah a, An awm tawh loh avângin hnem theih a ni lo. Lalpa chuan heti hian a ti: “Insûm la, ṭap tawh suh, i mittui pawh hul rawh se, I thawh rah i seng dâwn e,” Tih hi Lalpa thuchhuak a ni. “Râl ram aṭangin an lo hâwng dâwn. Nakinah chuan i chan a la ṭha hle ang, Mahni ram ngeiah i fate chu an lo kîr dâwn,” Tih hi Lalpa thuchhuak a ni. “Efraim rûm thâwm chu ka hre reng a, ‘Nangin bâwngtuai la sâwi loh angin mi sâwi a, Min thunun tâk hi. Min hawi kîrtîr la, ka lo kîr ang, Min hruai la, Ka Pathian, Lalpa chu i ni si a. Min hawi kîrtîr hnuin ka inchhîr a, Ka hriatthiam hnuin ka sim ta. Ka tleirâwl lai hmingchhiat phurin, Mualpho leh zak takin ka awm a ni.’ Efraim chu ka fapa duh tak, Ka duat êm êm chu a ni lâwm ni? Han khak ṭhîn mah ila ka thinlungah a châm reng a, Ani chu ka hre reng a, ka lainat takzet a ni,” Tih hi Lalpa thuchhuak a ni. Kawng chhinchhiahna siam la, Kawng chin hriatna tûr ban phun rawh, I kawngpui zawh chu chhinchhiah ngun rawh. Nula Israel, lo kîr la, I khawpuiah hian lo kîr leh rawh. Aw nang, fanu lepchiah, Eng chen nge i vah rawlai dâwn le? Lalpa chuan leiah thil a siam thar ta em ni? Hmeichhiain mipa a rîm tâk hi! Engkim Lalpa, Israel-te Pathian chuan heti hian a ti: “An saltânna ata ka hruai kîr leh hun chuan Judai ram leh a khawpuiahte chuan hetiang ṭawngkam hi an hmang leh ang: ‘Aw, mi dikte chênna hmun, Aw, tlâng thianghlim, Lalpa chuan malsâwm che rawh se,’ tiin. Judai ram leh a khawpuiahte chuan loneitute leh berâm vêngtute an chêng ho vang. Mi chaute chu ka tiharh ang a, ṭâmchhâwlte chu ka hrai tlai ang.” Ka mu chu ka han ṭhanharh chuan ka han hawi vêl a, ka lo mutui hle a lo ni a. “Ngai teh, nite a lo thleng dâwn e, Israel chhûngte zîngah leh Juda chhûngte zîngah mihring leh ran ka tipung ang,” tih hi Lalpa thuchhuak a ni. Anmahni pawtchhuaka tichhe tûr te, tithlua tiboral tûr te leh timangang tûr tein ka châng reng ṭhîn a; mahse, tungding leh tinghet tûrin ka ngaihven ta reng zâwk a ni, tih hi Lalpa thuchhuak a ni. Chûng ni-ahte chuan miten ‘Paten grep thûr an ei a, An fate hâ a ṭim e,’ An ti tawh ngai lo vang. Mi tinin mahni sualna an thihpui ang a, Tu pawh grep thûr ei apiang an hâ a ṭim ang. “Ngai teh, nite a lo thleng dâwn e,” tih hi Lalpa thuchhuak a ni. “Israel chhûngte leh Juda chhûngte nên thuthlung thar ka siam ang,” tih hi Lalpa thuchhuak a ni. “An thlahtute Aigupta ram aṭanga hruai chhuak tûra an kut ngeia ka chelh laia ka thuthlung ang kha a ni lo vang. An tân hotu ka ni chungin ka thuthlung chu an bawhchhe si a,” tih hi Lalpa thuchhuak a ni. “Chûng ni hnua Israel chhûngte nêna ka thu thlun tûr chu hei hi a ni: An rilruah ka Dân ka dah ang a, an thinlungah ka ziak bawk ang. Kei hi an Pathian ka ni ang a, anni chu ka mite an ni ang. ‘ Lalpa chu hre rawh u,’ tiin tu mahin an ṭhenawmte leh an unaute an zirtîr tawh lo vang. A tê ber aṭanga a lian ber thlengin min hre dâwn si a,” tih hi Lalpa thuchhuak a ni. “Tichuan, an bawhchhiatnate ka ngaidam ang a, an sualnate ka hre reng tawh lo vang.” Lalpa chuan heti hian a ti: “Chhûn tiêngtu atâna ni daha, zân tiêngtu atâna thla leh arsite ruattu, ri hum hum tûra tuifinriat tichetu chu a hming Engkim Lalpa a ni. Hêng thil awmphung ruatte hi ka tihtâwp hma loh chu Israel hnamte pawh an ral lo vang,” tih hi Lalpa thuchhuak a ni. Lalpa chuan heti hian a ti: “Chung lam vân khi in tehchhuah theiha, hnuai lama lei nghahchhante in zawn chhuah theih hunah, Israel thlahte chu an thil lo tih zawng zawng avângin ka paih ve ang,” tih hi Lalpa thuchhuak a ni. Ngai teh, nite a lo thleng mêk e, Hananela in sâng aṭanga kulh kil kawngka bul thlengin khawpui chu Lalpa tân din thar a ni ang,” tih hi Lalpa thuchhuak a ni. A ramri chu Gareb tlâng thlengin ngîl takin a kal ang a, Goa lamah a kawi ang. Mitthi phûmna leh bawlhhlawh paihna ruam pum pui leh a vêl ram zawng zawng, Kidron lui thlengin, chhak lam panga sakawr kawngka kil thleng chu Lalpa tân tihhran a ni. Chu chu engtikah mah tihdarh leh tihchhiat a ni tawh lo vang. Juda lal Zedekia lal kum sâwmnaah Lalpa thu chu Jeremia hnênah a lo thleng a; chu chu Nebukadnezara lal kum sâwm leh kum riatna a ni. Chutih lai chuan Babulon lal sipaite chuan Jerusalem an hual a, zâwlnei Jeremia pawh Juda lal in vêngtute chênna hmunah an tântîr a. Juda lal Zedekia chuan chutah chuan a tântîr a, a hnênah, “ Lalpa chuan, ‘Ngai teh, he khawpui hi Babulon lal kutah ka pe ang a, a la ang. Juda lal Zedekia pawh Kaldai mite kut ata a chhuak lo vang, Babulon lal ka pe ang. Inhmatawnin an inbia ang a, chiang takin an inen ang. Zedekia chu Babulon-ah a hruai ang a, amah ka tlawh hma chu chutah chuan a awm reng ang. Kaldai-ho chu do mahsela a hlawhtling chuang lo vang, Lalpa thuchhuak chuan a ti,’ tiin engati nge i sawi?” a ti a. Lalpa chuan heti hian a ti: Lalpa thu chu ka hnênah a lo thleng a: “Ngai teh, i pami, Saluma fapa Hananela chu i hnênah a lo kal dâwn a, ‘Nang chhûngkhat laina hnai i ni bawk a, Anathot-a ka lo hi lei rawh’ a rawn ti ang che,’ tiin. Tichuan, Lalpa thu ang chuan ka pami fapa Hananela chu vêngtu hung chhûngah ka hnênah a lo kal a, ‘Benjamin bial chhûnga Anathot khuaa ka lo chu lei ta che, rokhâwm thei i ni a, i chan tûr a ni, i tân lei mai rawh,’ mi rawn ti ta a. Hei hi Lalpa thu kha a ni tih ka hre ta a. Anathot khuaa ka pami fapa Hananela lo chu ka lei a, a man atân tangka ka han bûk a, tangkarua sekel sâwm leh pasarih lai a ni. Kan thiltih chu lehkhaah kan ziak fel a, kan châr a, hretute kan ko va, tangka chu kan bûk chhuak a. Ram leina, inlei dân ziakna chu châr leh châr loh ka siam a. Ka pami fapa Hananela mit hmuhah leh hretu, ram leina lehkhaa hming ziaktute leh hung chhûnga vêngtu, Juda ṭhuhote mit hmuhah Neria fapa Baruka, Maaseia tupa chu ka pe a. An beng hriatah Baruka chu hetiangin thu ka pe a: ‘Israel-te Pathian, Engkim Lalpa chuan heti hian a ti: Hêng lehkha, ram inlei dân chhinchhiahna châr leh châr lohte hi la la, a chhiat theih loh nân hlumbelah dah ṭha rawh. Israel-te Pathian, Engkim Lalpa chuan heti hian a ti: He ramah hian in te, lo te, grep huante an la lei dâwn,’ ” tiin. Neria fapa Baruka hnêna ram leina lehkha ka pêk hnu chuan heti hian ka ṭawngṭai a, “Aw Lalpa P athian, i thiltihtheihna nasa tak hmanga bân phar meuhva lei leh vân siamtu, i tân thil tih harsa lutuk eng mah a awm si lo. Nang zawng sâng tam tak chunga khawngaihna lantîra, pate sualna fate thlenga thungrûltu, aw Pathian ropui leh thiltithei, i hming chu Engkim Lalpa a ni. Nang, remruattu ropui leh thil tithei tak, mihringte khawsak dân tinrêng i hre reng ṭhîn. Mi tin an awm dân leh an thiltih ang zêla rûltu, Aigupta rama thil mak leh chhinchhiahnate tia, vawiin thlenga Israel ramah leh hnam dang zînga ti zêltu, tûn thlengin i hming i chher a ni. Thil makte leh chhinchhiahnate, kut chak tak leh bân phar meuhva thil râpthlâk takte tiin i mi Israel-te Aigupta ram ata i hruai chhuak a. He ram, khawizu leh hnutetuia luang ram hi an thlahtute hnêna pêk i lo tiam tawh angin i pe ta a. An lo kal a, an luah a; nimahsela, i thu an awih lo va, i Dân an zâwm hek lo. Tih tûra i thupêk rêng rêng eng mah an ti lo va. Chuvângin, hêng thil ṭha lo hi an chungah i thlentîr ta a ni. En teh, khawpui lâk nân lei an chhûn pâwn tâk hi. Khandaih te, ṭâm te, hripui te an tuar avângin khawpui pawh a rawn rûntu Kaldai-hovin an la ta a ni. I hmuh ang hian i lo hrilh lâwk kha a lo thleng ta a nih hi. Aw Lalpa P athian, nang lahin ka hnênah, ‘Lo chu tangkain lei la, thuhretute ko vang che; khawpui erawh zawng Kaldai-ho kutah pêk a ni ta,’ i ti si a,” tiin. Lalpa thu chu Jeremia hnênah heti hian a lo thleng a. ‘Ngai teh, kei Lalpa hi mi zawng zawng Pathian ka ni a, ka tâna tih harsa lutuk eng nge awm?’ tiin. Chuvângin, Lalpa chuan heti hian a ti: “Ngai teh, he khawpui hi Kaldai-ho leh Babulon lal kutah ka pe ang a, an la ang. He khawpui beitu Kaldai-ho chu an lo lût ang a, khua hi an hâl vek ang. Min tithinur tûra an in chunga Baal hnêna rimtui an hlanna te, pathian dang hnêna in tûr thilhlan an leih buakna zawng zawngte chu a kâng vek ang. An tleirâwl chhuah ata Israel fate leh Juda mite chuan ka mit hmuhah thil ṭha lo hlîr an ti si a. Israel fate chuan an thilsiamte chuan min tithinur a ni,” tih hi Lalpa thuchhuak a ni. He khawpui hi, an din tirh ni aṭanga tûn thlengin min tithinurtu leh min tihlim lotu a ni reng a, ka hmuh loh tûrin ka sawn bo dâwn a ni. Israel mite leh Juda mite chuan thil ṭha lo an tih avângin min tithinur a, an lal te, hruaitu te, puithiam te, zâwlnei te leh Jerusalem-a chêng zawng zawngte nên min tithinur a ni. Ka lam hawi lovin tukkhum chhah min chhawn a, ṭhahnemngai taka ka zirtîr chungin an ngaithla duh lo va, ka zilhna an pawm duh hek lo. An milem tenawm chu ka in thianghlimah an dintîr a, an tibawlhhlawh ta. Baal biak nân Ben-Hinom ruamah hmunsâng, an fanu te, an fapate, Moleka hnêna an hlanna tûr chu an siam a. Juda-ho hruai sual tûra he thil tenawm an tih hi ka thupêk a ni lo va, an tih duh pawh ka rin ngai loh a ni. Israel-te Pathian, Lalpa chuan heti hian a ti: “He khawpui hi Babulon lal kutah pêk a ni ang a; ‘ṭâm te, khandaih te, hripui te a tuar ang,’ tih a lo ni tawh a. Mahse, ngai teh, thinur takin lungnilo leh thinrim chungin anni chu ka hnawt darh a; mahse, ka hnawh chhuahna ram zawng zawng ata ka hruai khâwm leh ngei dâwn. He hmunah hian ka rawn thlen ang a, thlamuang takin ka awmtîr ang. Ka ta an ni ang a, kei hi an Pathian ka ni ang. Thinlung hmun khat puin ka awm hotîr ang a, kumkhuain min ṭih ang a, chu chu an tân leh an thlah zêlte tân a ṭha ang. Kumkhaw thuthlung ka siampui ang a, an tân thil ṭha tih ka bâng lo vang; min ṭih nachâng ka hriattîr ang a, min pên bosan tawh lo vang. An tâna thil ṭha tih chu ka lawmzâwng tak a ni ang a, he ramah hian ngêlnghet taka awmtîr ka tum tlat ang.” Lalpa chuan heti hian a ti: “Hêng mite chungah chhiatna nasa tak ka thlentîr ang khân an tâna thil ṭha pêk ka lo tiam tawh chu ka thlentîr ang, ‘ram ruak, mihring leh ran awm lohna, Kaldai-hovin an lâksak tawh hnu’ tia miten an sawi ṭhin he ramah hian lote in lei ang. Benjamin bialah te, Jerusalem chhehvêl khuaah te, Judai ram khuaah te, tlângram khuaah te, thlang lam tuipui kamah te, chhim lamah te, tangkain lote in lei ang; an ziak fel ang a, an chhinchhiah tlat ang. Anni chu ka tungding leh dâwn a ni,” tih hi Lalpa thuchhuak a ni. Jeremia chu vêngtu hung chhûnga a la tân laiin a hnênah Lalpa thu a lo thleng leh a: “Leilung siamtu Lalpa, dintu leh tinghettu Lalpa, a hming Lalpa chuan heti hian a ti: ‘Min ko la, ka chhâng ang che, i hriat ngai loh thil ropui leh ril tak ka hrilh ang che.’ ” Lalpa, Israel-te Pathian chuan he khaw chhûnga ṭanhmun siam nân in te, Juda lal inte an ṭhiat tâk chungchâng heti hian a sawi: “Ka thinur nasa tak avângin anni chu ka hrem a, Kaldai-hote an beihlêt avângin an ruangte chuan khawpui hi ka tikhat ang. An sualna nasa tak avângin he khawpui hi ka hawisan tawh si a. Nimahsela, damna leh hrisêlna ka pe leh thuai ang a, ka mite chu ka tidam ang a, thlamuang tak leh him takin ka awmtîr ang. Juda leh Israel chu an saltânna ata ka hruai kîr leh ang a, tûnhmaa an awm dân ang khân ka awmtîr leh ang. Ka laka an sualna leh khawlohna zawng zawng ka sil fai ang a, ka laka an helna te, an sualna leh khawlohna zawng zawngte ka ngaidam vek ang. He khawpui hi thil ṭha ka tihsak tih hretu khawvêl hnam tinrêng mit hmuhah mi tihlimtu, mi tilâwmtu leh mi chawimawitu a ni ang a, thil ṭha tam tak leh hausakna nasa taka ka vûr avângin chûngho chuan anni chu an hlau vang a, an khûr ang.” Lalpa chuan heti hian a ti: “He hmun ram tawh, mihring leh ran awm tawh lohna tia an sawi ṭhin leh Judai ram khawpui te, Jerusalem kawtthlêr ram tawh, mihring leh ran awm lohna an tihahte chuan, hlim leh lâwm ri te, mo leh moneitu thâwm te, Lalpa ina lâwmna inthawina rite hriat a ni ang, hetiangin: ‘Engkim Lalpa hnênah lâwmthu hril ula, Lalpa chu a ṭha a, Kumkhuain ngil a nei dâwn si a,’ tiin. “Tûnhma ang khân ram chu ka dinthar leh dâwn,” Lalpa chuan a ti. Engkim Lalpa chuan heti hian a ti: “He hmun leh khawpui ram tawh zawng zawng, mihring leh ran awm tawh lohnaah hian berâmpute chu an berâm rual nên an awm leh ang. Tlângram khawpuiah te, thlang lam tuipui kam khawpuiah te, chhim lam khawpuiah te, Benjamin bialah te, Jerusalem vêlah te, Judai ram khawpuiah te berâmputen an berâm an chhiar leh mawlh mawlh tawh ang,” Lalpa chuan a ti. “Ngai teh, nite a lo thleng mêk e,” tih hi Lalpa thuchhuak a ni. “Juda chhûngte leh Israel chhûngte hnêna thu ka tiam tawh chu ka hlen ang. Chûng hunahte chuan Davida thlah aṭangin lal ṭha tak ka chawr chhuahtîr ang a, ani chuan ram pumah dik tak leh fel takin ro a rêl ang. Chûng hunah chuan Juda chu a him ang a, Jerusalem pawh thlamuang takin a awm ang. Chu lal chu a hming atân, ‘ Lalpa chu kan dikna,’ tih a ni ang.” Lalpa chuan heti hian a ti: “Davida chuan Israel chhûngte zîngah a lalṭhutthlênga ṭhu tûr mi a tlachham lo vang. Levia chi, puithiamte pawhin ka hnêna hâlral thilhlan inthawina tûr an tlachham hek lo vang. Lalpa thu chu Jeremia hnênah hetiangin a lo thleng a: Lalpa chuan heti hian a ti: “Chhûn leh zân awm tûrin thu ka thlung a, An hun bi vawng tlat tûrin thu ka thlung a, Chu thuthlung chu in tihdanglam theih chuan, Ka chhiahhlawh Davida hnêna ka thuthlung, ‘A thlahte an lal zêl tûr thu’ leh ‘Levia chi puithiamten ka rawng an bâwl zêl ang,’ Ti-a thu ka thlun pawh a thlâwn a ni ang. Ka chhiahhlawh Davida thlahte leh ka rawng min bâwlsaktu Levia chite chu vâna arsi chhiar sên rual loh leh Tuipui kama ṭiau chhiar sên rual loh zâtin ka tipung ang.” Lalpa thu chu Jeremia hnênah hetiang hian a lo thleng a: ‘Chhûngkaw hnih, Lalpa thlante chu paihthlâk an ni ta’ tia hêng miten an sawi chu, Lalpa chuan heti hian a ti: “Chhûn leh zân awm tûra ka thu thlung hi a ngheh lohva, lei leh vân awm dân tûr ka ruat hi a nghet lo a nih chuan, Jakoba thlahte leh ka chhiahhlawh Davida chu ka paihthla ang a, an fate chu Abrahama thlahte, Isaka thlahte, Jakoba thlahte chunga rorêltu atân ka thlang lo vang. Anni chu ka tungding leh ang a, ka khawngaih dâwn si a,” tiin. Babulon lal Nebukadnezara leh a sipai rual zawng zawngte leh a ṭhuihruaia awm, lalram chhûnga hnam tin chi tinten Jerusalem leh a vêl khawpuite an beih laiin Lalpa thu Jeremia hnênah hetiang hian a lo thleng a: Lalpa, Israel-te Pathian chuan heti hian a ti, “Kal la, Juda lal Zedekia chu heti hian va hrilh rawh: Lalpa chuan heti hian a ti: Ngai teh, he khawpui hi Babulon lal hnênah ka pe ta, ani chuan meiin a hâl ang. An man ang che a, a hnênah an pe ang che, a kut ata chu i chhuak lo vang. Babulon lal nên hmaichhanah in inbia ang, Babulon-ah a hruai ang che. Aw Juda lal Zedekia, Lalpa thu hi ngaithla teh: I chungthuah chuan Lalpa chuan heti hian a ti: ‘Khandaihin i thi lo vang. Thih ṭhatin i thi ang a, in thlahtu, tûnhma lalte rimtui an hâlsak ṭhin angin nang pawh an hâlsak ang che. ‘A va pawi êm, ka pu!’ tiin an ṭah ang che.’ He ka thu sawi hi Lalpa thuchhuak a ni.” Hêng thu zawng zawng hi Jeremian Jerusalem-a Juda lal Zedekia a hrilh a. Babulon lal sipaiten Jerusalem leh Judai ram khawpui zawng zawng an beih lai chuan Judai rama khaw kulh nei awm chhun chu Lakis leh Azeka khua chauh hi an ni. Lal Zedekia leh Jerusalem mi zawng zawngin bawih chhuah thu an puan hnuin Lalpa thu chu Jeremia hnênah a lo thleng a. Mi tinin an Hebrai bawih, mipa pawh hmeichhia pawh an chhuah tûr a ni. Tu man a Juda-pui bawihah a nei tûr a ni lo. Tichuan, hotute leh mipui, thuthlung pawmtu zawng zawng chuan an bawihnu te, an bawihpate chu chhuaha hrên reng loh an remti tlâng a; an chhuah ta a. Mahse, a hnu lâwkah an lamlêt a, an bawihnu leh bawihpa an chhuah tawhte chu la kîrin bawihah an siam leh ta a. Lalpa thu chu Jeremia hnênah a lo thleng leh a. Lalpa, Israel-te Pathian chuan heti hian a ti: “In saltânna, Aigupta ram ata ka hruai chhuah lai che u khân in thlahtute nên thu kan thlung a. Tu pawhin, kum sarih dan zêlah, a Hebrai-pui bawiha a lei chu a chhuah tûr a ni. Kum ruk rawng a lo bâwl tawh chuan chhuah ngei ngei tûr a ni; in pate khân ka thu an ngaithla lo va, min pawisa hek lo. Tûn hnai mai khân in inchhîr a, ka mit hmuha thil dik in ti a, mi tinin mahni chipuite in chhuah tâk thu in puang a. Ka hming chuanna inah, ka hmaah thu in thlung a. Mahse, in lamlêt leh a, ka hming in tichhia a, mi tinin in bawihnu leh bawihpate in chhuah chauh va, in bawiha awm leh tûrin in la lui leh ta a ni.” Chuvângin, Lalpa chuan heti hian a ti: “Ka thu in zâwm lo va, in chipuite tân zalênna thu in puang lo va, kei erawh chuan in tân zalênna thu ka puang ta: khandaih te, hripui te, ṭâm tea in thihna tûr zalênna chu. Khawvêl ram tin tân ṭihkhaiah ka siam ang che u. Ka thuthlung bawhchhiaa ka hmaa thuthlung an siam bawhchhiaa, thuthlung zâwm lo chu bâwngno zai bun, a kâra an kal tlang ṭhinna angin ka siam ang. Juda hruaitute, Jerusalem-a hruaitute, rorêltute, puithiamte, ram chhûng mipui, bâwngno tan bun kâra kalte chu, an hmêlma, thah tumtute kutah ka pe ang. An ruang chu chunglêng savate leh ramsate chaw a ni ang. Juda lal Zedekia leh a upate chu an hmêlma, anmahni thah tumtute leh Babulon lal sipai, anmahni ṭinsantute kutah ka pe ang. He khawpuia lo lût leh tûrin thu ka pe ang. An rawn bei leh ang a, an la ang a, an hâl chhe vek ang. Juda khawpuite chu luahtu awm lovin ka tiram ang,” tih hi Lalpa thuchhuak a ni. Juda lal Josia fapa Jehoiakima lal laiin Lalpa thu chu Jeremia hnênah hetiangin a lo thleng a. “Rekaba chhûngte hnênah kal la, Lalpa in pindan chhûngah hruai la, anni chu uain in tûr pe rawh,” tiin. Tichuan, Habazinia fapa, Jeremia fa, Jaazania leh a unaute, a fa zawng zawngte leh Rekaba chhûngte zawng zawng chu ka hruai a. Lalpa inah chuan anni chu ka hruai a, Pathian mi Igdalia fapa Hanana fate pindanah ka luhpui a, chu chu hotute pindan kiang, kawngkhâr vêngtu Saluma fapa Maaseia pindan chunga awm a ni. Tin, Rekaba chhûngte hmaah chuan chawhtawlh khat uain leh no ka dah a. “Uain hi in rawh u,” ka ti a. Anni chuan, “Uain kan in ngai lo, kan pa Rekaba fapa Jonadaba chuan, ‘Nangni leh in fate hian kumkhuain uain in reng reng suh u,’ tiin thu min chah a ni,” an ti a. “ ‘In pawh in sa tûr a ni lo, thlai in chîng tûr a ni lo va, grep huan pawh in siam tûr a ni hek lo. He in mikhualna ramah hian in dam rei theihna tûrin in dam chhûng nite chu puan inahte hmang zâwk ang che u,’ tiin thu min pe a ni. Tichuan, kan thlahtupa Rekaba fapa Jonadaba thu min pêk zawng zawng chu kan zâwm a, keini leh kan nupuite, kan fapate leh fanute chenin tu man uain kan in ngai lo. Kan awmna tûr in kan sa lo va, grep huan kan siam lo va, lo leh thlai kan nei hek lo. Puan inahte kan chêng a, min thlahtu Jonadaba thu min pêk chu a kip a kawiin kan zâwm a, Babulon lal Nebukadnezaran he ram a rûn khân keini chuan, ‘Hawh u, Babulon sipai leh Suria sipai laka kan him nân Jerusalem-ah i chho vang u,’ kan ti a; tichuan, Jerusalem-ah hian kan awm ta a ni,” an ti a. Lalpa thu chu Jeremia hnênah a lo thleng a. Israel-te Pathian, Engkim Lalpa chuan heti hian a ti: “Juda mite leh Jerusalem-a chêngte hnênah kal la, hêng thu hi sawi rawh, ‘Ka thute ngaithla lovin ka zirtîrnate in pawm lo vang maw?’ Lalpa chuan a ti. Rekaba fapa Jonadaba fate chuan an thlahtuten uain in lo tûra thu an pêk chu zâwmin tûn thlengin an in ta lo va. Kei erawh chuan in hnêna thu ka sawi ka sawi pawhin in ngaithla duh lo va. Ka rawngbâwltu, zâwlnei zawng zawngte in hnêna zing tak taka ka tirhten, ‘Mi tinin in awm dân sual hawisanin in thiltihte siam ṭha ula, pathian dangte rawng bâwl suh u; tichuan, nangni leh in thlahtute ka pêk ram hi in luah dâwn nia,’ an ti a. Mahse, min ngaihsak lo va, ka thu in ngaithla duh si lo. Rekaba fa, Jonadaba thlahte chuan an thlahtu thupêk an zâwm a, nangni erawh chuan ka thu in zâwm lo. Chuvângin, Engkim Lalpa, Israel-te Pathian chuan heti hian a ti: “Ngai teh, Judai ram leh Jerusalem-a chêng zawng zawng chunga chhiatna lo thleng tûr ka sawite kha ka thlentîr dâwn e. An hnênah thu ka sawi a, an ngaithla si lo, ka ko va, min chhâng duh hek lo,” tiin. Jeremia chuan Rekaba chhûngte hnênah, “Engkim Lalpa, Israel-te Pathian chuan heti hian a ti: In thlahtu Jonadaba thupêk leh a thu zirtîr zawng zawng in pawm a, a thupêk zawng zawng chu in zâwm a; chuvângin, Engkim Lalpa, Israel-te Pathian chuan heti hian a ti: Rekaba fapa Jonadaba thlahte chu kumkhuain ka hmaa ding tûr an awm reng ang.” Juda lal Josia fapa, Jehoiakima lal kum linaah Lalpa thu Jeremia hnênah a lo thleng a. “Lehkhabu zial la la, Israel-te chungchâng te, Juda leh hnam dang chungchâng te i hnêna ka sawi zawng zawng chu ziak rawh. Josia lal laia i hnêna thu ka sawi ṭan ni aṭanga vawiin thlenga ka sawite kha ziak vek rawh. Juda mite chuan an chunga chhiatna thlentîr ka tumte chu hriain an awm dân sualte an sim mial mahna; an sim chuan an khawlohna leh an sualna chu ka lo ngaidam ang,” a ti a. Tichuan, Jeremia chuan Neria fapa Baruka chu a ko va, a hnêna Lalpa thu sawi zawng zawng chu Jeremia chuan a sawi chhuak a, chu chu lehkhabu-ah Baruka chuan a lo ziak zêl a. Jeremia chuan Baruka hnênah, “ Lalpa ina kal thei lovin min khuahkhirh tlat si a; chuvângin, nang, chaw nghei ni-ah Lalpa inah kal la, Lalpa thu, lehkhabu ziala ka ziaktîr che kha, Lalpa ina awmte hnênah chhiar chhuak rawh, Juda mi, an khua aṭanga lo kal zawng zawng hriatah pawh chhiar ang che. Mite chuan an awm dân sualte hawisanin Lalpa hnênah ngaihdam an dil mial mahna. Lalpa thupuan, a mite laka a thinur nasa tak hi a râpthlâk si a,” a ti a. Tichuan, Neria fapa Baruka chuan zâwlnei Jeremia hrilh ang zêl chuan Lalpa thu chu Lalpa inah chuan a chhiar chhuak ta a. Juda lal Josia fapa, Jehoiakima lal kum ngana, thla kuanaah chuan Jerusalem-a mi zawng zawng leh Judai ram khawpui aṭanga Jerusalem-a lo kal zawng zawngte chuan Lalpa hmaa chaw nghei thu an puang a. Baruka chuan lehkhabu ziala Jeremia thute chu ziaktu Safana fapa Gemaria pindan, Lalpa inah chuan mi zawng zawng hriatah a chhiar a. Chu hmun chu Lalpa in chuanchung luhna kawngka thar bula awm a ni. Safana fapa, Gemaria fapa Mikaia chuan lehkhabu ziala Lalpa thu zawng zawng chu a lo hriatin, lal inah a chhuk a, ziaktu pindanah chuan a lût a; tah chuan hotu zawng zawng an lo ṭhu a. Chûng mite chu Elisama te, Semaia fapa Delaia te, Akbora fapa Elnathana te, Safana fapa Gemaria te, Hanania fapa Zedekia te leh hotu dang zawng zawngte an ni. Barukan mipui hnêna lehkhabu zial a chhiar aṭanga a thil hriat zawng zawng chu Mikaia chuan anni chu a hrilh a. Hotute chuan Nethania fapa Jehudia, Selemia tupa, Kusia tupa chu Baruka hnênah an tîr a, a hnênah, “Mite hmaa i chhiar chhuah lehkhabu zial chu rawn keng la, lo kal rawh,” an ti a. Neria fapa Baruka chu lehkhabu zial kengin an hnênah a lo kal a. A hnênah, “Ṭhu la, kan hriatah chhiar ve teh le,” an ti a. Tin, Baruka chuan an hnênah a chhiar a, Chûng thu chu an hriatin an inen a, Baruka hnênah chuan, “Hêng thu hi lal hnênah kan hrilh ngei ang,” an ti a. Baruka hnênah chuan, “Hêng thute hi engtin nge i ziak, Jeremia thuchhuak ngei a ni maw?” an ti a. Baruka chuan, “Hêng thute hi ka hnênah a sawi a, keiin lehkhabu zialah ka lo ziak chhâwng mai a ni,” a ti a. Tichuan, hotute chuan Baruka hnênah, “Chhuak la, Jeremia nên biru rawh u, tu man in awmna hre suh se,” an ti a. Tin, lal in hung chhûngah an lût a, lehkhabu zial chu ziaktu Elisama pindanah an hnutchhiah a, lal hnênah an thu hriat zawng zawng chu an hrilh a. Lal chuan Jehudia chu lehkhabu zial la tûrin a tîr a, ziaktu Elisama pindan ata chu a va la chhuak a. Jehudia chuan lal leh a vêla hotu ding zawng zawng hriatah a chhiar a. Thla kuana a ni a, lal chu a thlasik ina awm a ni a, meihawl thuk vâm huam chu a ai a. Jehudia chuan lehkhabu zial thlûr thum emaw, thlûr li emaw a chhiar hnu chuan lal chuan chemtêin a zaibung a, thukah a paih lût a, lehkhabu zial chu a kâng ral ta a. Lal leh a ṭhuihruaiho, hêng thu zawng zawng hretute chuan hlau hmêl an pu lo va, an puante an pawtthlêr hek lo. Elnathana te, Delaia te, Gemaria ten lehkhabu zial hâl lo tûra lal chu an ngen chiam pawhin a sâwt chuang lo va ni. Lal chuan, ziaktu Baruka leh zâwlnei Jeremia chu man tûrin lal fapa Jerameela te, Azriela fapa Seraia te, Abdeela fapa Selamia te chu thu a pe ta a; mahse, Lalpa chuan anni chu a thukru a. Lehkhabu zial, Jeremia sawi chhuah Barukan a ziak zawng zawng chu lalin a hâl ral hnu chuan Lalpa thu chu Jeremia hnênah hetiang hian a lo thleng a. “Lehkhabu zial dang la la, lehkhabu zial hmasaa thu zawng zawng, Juda lal Jehoiakiman a hâl ral tâkte kha, ziak leh vek rawh. Juda lal Jehoiakima chungchâng thu-ah heti hian ti ang che: ‘Babulon lal a lo kal ang a, he ram hi a tichhia ang a, mihring leh rante a tiboral vek ang, tiin engati nge i ziak?’ tiin lehkhabu zial chu i hâl vei a. Chuvângin, Juda lal Jehoiakima chungthuah Lalpa chuan heti hian a ti: ‘Davida lalṭhutthlênga ṭhu tûr mi a nei lo vang, a ruang chu chhûn ni sa leh zân khaw vâwt tuar tûrin theh chhuah a ni ang. An sual avângin amah leh a thlahte leh a rawngbâwltute chu ka hrem ang. An chunga chhiatna lo thleng tûr ka sawi te, Jerusalem leh Judai ram mi tin chunga lo thleng tûr ka sawi te hi an pawisak loh avângin,” a ti a. Tichuan, Jeremian lehkhabu zial dang a la a, Neria fapa Baruka, ziaktu hnênah a pe a, ani chuan Jeremia ṭawngka chhuak, lehkhabua ziak tawh zawng zawng, Jehoiakiman a hâl ral tâk thute leh a anpui thu dangte nên a ziak a. Babulon lal Nebukadnezaran Judai ram lal atâna a dah Josia fapa Zedekia chu Jehoiakima fapa Konia aiah a lo lal ta a. Mahse, amah leh a ṭhuihruaite leh a rama mite chuan Lalpa thu zâwlnei Jeremia sawi chu an pawisa lo va. Lal Zedekia chuan Selemia fapa Jehukala leh Maaseia fapa puithiam Zefania chu zâwlnei Jeremia hnênah, ‘khawngaih takin Lalpa, kan Pathian hnênah min ṭawngṭaisak rawh,’ ti tûrin a tîr a. Jeremia chu vântlâng zîngah zalên takin a la vâk vêl thei a, tân inah an la khung lo va ni. Farawa sipaite chu Aigupta aṭangin an lo chhuak chho va. An thâwm chu Jerusalem hualtu, Kaldai-hoten an hriatin Jerusalem chu an ṭinsan a. Lalpa thu chu zâwlnei Jeremia hnênah a lo thleng a: Lalpa, Israel-te Pathian chuan heti hian a ti: “Juda lal, min râwn tûra rawn tîrtu che u hnênah chuan heti hian sawi rawh u: ‘Ngai teh, Farawa sipai, nangmah pui tûra lo chhuakte chu, an ram Aigupta-ah an kîr leh ta. Kaldai-ho chu an lo lêt leh ang a, he khawpui hi an bei ang a, an la ang a, an hâl chhe vek ang,’ tiin. Lalpa chuan heti hian a ti: Kaldai-ho chuan min kalsan ngei ang tiin mahni inbum suh u. An kal bo hlen dâwn si lo. Nangmahni rawn beitu Kaldai sipai rual hi hneh vek mah ula, an zînga hliam tuar, an puan ina mute pawh chu, an lo tho leh ang a, he khawpui hi an hâl chhe vek ang, tiin hrilh rawh,” a ti a. Farawa sipai rual an lo hnaih avânga Kaldai sipaite Jerusalem aṭanga an tawlh kîr lai khân, Jeremia chuan a chipuite zînga a ro chanpual la tûrin Jerusalem chhuahsanin Benjamin bialah a kal dâwn a, Benjamin kawngka chu a thlen chuan vêngtu zînga hotu, a hming Iriza, Selemia fapa, Hanania tupa ni bawk chuan zâwlnei Jeremia chu, “Kaldai-ho hnêna inpêk i tum a nih hi,” tiin a lo man a. Jeremia chuan “Tum lo ve, Kaldai-ho hnênah inpêk ka tum awzâwng lo,” a tih pawhin Iriza chuan a thu sawi chu a ngaithla duh lo va, Jeremia chu a man a, hotute hnênah a hruai ta a. Hotute chu Jeremia chungah chuan an thinur hle a, an vua a, ziaktu Jonathana inah an tântîr a, chu chu tân in atân an hmang a ni. Jeremia chu khur thim takah ni rei tak a awm a. Lal Zedekia chuan a ko chhuak a, ani chu an rawn hruai a. Lal chuan a rûk têin a inah chuan thu a zâwt a, “ Lalpa hnên ata thu eng emaw tal a awm em?” a ti a. Jeremia chuan, “Awm e, Babulon lal kutah i inpe tûr a ni,” a ti a. Jeremia chuan lal Zedekia hnênah chuan, “I lakah emaw, i ṭhuihruaite lakah emaw, mipui lakah emaw, eng nge ka tihsual, eng vângin nge tân ina min dah?” a ti a. “ ‘Babulon lal chu nangmah leh he ram do tûrin a lo kal lo vang’ tia thu puangtu i zâwlneite kha khawiah nge an awm tâk? Tûnah, ka pu Lalber, khawngaih takin ngaithla teh, ka dîl che hi min phalsak hrâm rawh. Ziaktu Jonathana inah chuan min kîrtîr lul suh ang che, chumi hmunah zawng ka thi mai ang,” a ti a. Lal Zedekia chuan thu a pe a, Jeremia chu vêngtu hung chhûngah chuan a tântîr a, chhang siamtute hnên aṭangin ni tin chhang tlang khat khawpuia chhang a awm chhûng chu a pe a. Chutiang chuan Jeremia chu vêngtu hung chhûngah chuan a awm ta reng a. Matana fapa Sefatia te, Pasura fapa Gedalia te, Selemia fapa Jukala te, Malakia fapa Pasura te chuan mi hnêna hetianga Jeremia thu sawi chu an hria a. Lalpa chuan heti hian a ti, ‘He khawpuia awmte chu khandaih te, ṭâm te, hripuite tuarin an thi ang a, Kaldai-ho hnêna inpete erawh chu an him ang; an man ang a, an nung ang.’ Lalpa chuan heti hian a ti, ‘He khawpui hi Babulon lal sipaite kutah pêk a ni ngei ang a; tichuan, an la ang’ tiin. Tin, hotute chuan lal hnênah, “He mi hi tihhlum tûr a ni, he khawpuia sipai la awmte leh mipuite hi hêng thu a sawi avângte hian an zâm zo ta si a. He mi hian mipui ṭhatna zawng lovin an chhiatna tûr a zawng zâwk a ni,” an ti a. Lal Zedekia chuan, “Ngai teh u, ani chu in kuta awm alâwm, lal hi in duh loh zâwng ti thei a ni hlei nêm,” a ti a. Tichuan, Jeremia chu an hruai a, vêngtu hung chhûnga lal fapa Malkia tuichhunchhuah chhûngah an thlâk a; Jeremia chu hruizênin an thlâk a ni, a chhûngah chuan chirhdiak chauh lo chu tui rêng a tling lo va, chirhdiakah chuan Jeremia chu a tla ta a. Ethiopia mi, mi tilreh, lal ina awm ṭhîn Ebedmeleka chuan Jeremia chu tuichhunchhuah mawngah an thlâk tih a lo hria a. Chutih lai chuan lal chu Benjamin kawngkaah ro a rêl a. Ebedmeleka chu lal in ata a chhuak a, lal hnênah chuan, “Ka pu, lalber, hêng mite hian zâwlnei Jeremia chungah thil sual nasa tak an ti a ni. Tuichhunchhuah chhûngah an thlâk a, rilṭâmin chutah chuan a thi mai ang, khawpuiah chaw a awm tawh si lo,” a ti a. Lal chuan Ethiopia mi Ebedmeleka chu thu a pe a, “Heta ṭangin mi sawmthum hruai la, zâwlnei Jeremia chu a thih hmain tuichhunchhuah ata chu la chhuak rawh u,” tiin. Ebedmeleka chuan mite chu a hruai a, lal tangka in hnuai, thawmhnaw hlui dahnaah chuan an lût a, chuta kawr leh puan chhiate chu an la a, tuichhunchhuah chhûnga Jeremia hnênah chuan hruizênin an thlâkthla a. Ethiopia mi, Ebedmeleka chuan Jeremia hnênah, “Hêng kawr hlui leh puan chhiate hi i zak damah hrên hnan rawh,” a ti a. Tichuan, Jeremia chu tuichhunchhuah ata chu hruizênin an khai chhuak a, vêngtu hung chhûngah chuan a awm ta a. Lal Zedekia chuan Jeremia chu a ko va, Lalpa in luhna kawngkhâr pathumnaah an rawn hruai a. Lal chuan Jeremia hnênah, “Thil ka zâwt ang che a, ka hnênah eng mah sawi hreh suh ang che,” a ti a. Jeremia chuan Zedekia hnênah, “Ka hrilh vek che chuan min tihlum mai lo vang maw? Thu râwn che mah ila min ngaithla awm si lo va,” a ti a. Lal Zedekia chuan Jeremia hnênah: “ Lalpa, ka nunna siamtu hmingin ka tihlum tawp lo vang che, hêng tihhlum tumtu che hnênah pawh hian ka pe tawp lo vang che,” tiin a rûk têin thu a tiam a. Jeremia chuan Zedekia hnênah, “Engkim Lalpa, Israel-te Pathian chuan heti hian a ti: ‘Babulon lal sipai kuta in inpêk chuan in him ang a, he khawpui hi hâl chhiat a ni lo vang a, nang leh i chhûngte pawh zuah in ni ang. Babulon lal sipai kuta in inpêk loh erawh chuan he khawpui hi Babulon mite kutah pêk a ni ang, an hâl chhe vek ang a, nang pawh an kut ata i chhuak lo vang,” a ti a. Lal Zedekia chuan Jeremia hnênah, “Babulon mite hnêna inpe Juda-hote hi ka hlau a ni. An kutah min pe ang a, min sawisa hrep mai ang,” a ti a. Jeremia chuan, “An pe hauh lo vang che, Lalpa thu ka hrilh che hi awih mai rawh; chu chu i tân a ṭha ang, i nun pawh zuah a ni ang. I inpêk duh loh erawh chuan hei hi Lalpa thu min hriattîr chu a ni. Juda lal ina hmeichhe la awm zawng zawng chu Babulon lal hotute hnênah an hruai ang a, chûng hmeichhiate chuan i hnênah heti hian an sawi ang: ‘I ṭhian ṭhaten an bum che a, an thuhnuaiah an dah ta che, chirhdiaka i ke a tân laiin an hawisan ta che,’ tiin. “I nupui leh i fate chu Babulon-ah an hruai vek ang. Nang pawh an kut ata i chhuak lo vang; Babulon lalin a man ang che a, he khawpui hi a kâng chhe vek ang,” a ti a. Zedekia chuan Jeremia hnênah: “Hêng thute hi tu man hre suh se; tichuan, i thi lo vang. Hotuten ka bia che tih an hriat chuan i hnênah an lo kal ang a, ‘Lal hnênah eng nge i sawia, lalin i hnênah eng nge a sawi, min hrilh rawh, eng mah zêp suh, kan tihlum lo vang che,’ an tih chuan nangin an hnênah, ‘Lal chu Jonathana ina min tîr kîr lo tûrin ka ngên a ni, i ti dâwn nia,’ a ti a. An vaiin hotute chu Jeremia hnênah an lo kal a, an zâwt ta ngei a, lalin sawi tûra a tih angin anni chu a lo hrilh a. Tichuan, a hnênah eng mah an sawi zêl ta lo va, lal nêna an inbiakna thu pawh tu man an hre hek lo. Jeremia chu Jerusalem an lâk ni thlengin vêngtu hung chhûngah chuan a awm ta reng a. Judai lal Zedekia lal kum kuana, a thla sâwmnaah Babulon lal Nebukadnezara leh a sipai rualte chuan Jerusalem an rûn a, an hual tlat a. Zedekia lal kum sâwm leh kum khatna, thla lina, ni kua ni chuan kulh chu tihchim a ni ta a. Babulon lal milianhote chu an lo lût a, kawngka laita bulah chuan awmhmun an rem a. Chûng mite chu: Nergal-serezera te, Samgarneboa te, Sarsekima te, Rab-saria te, Nergal-sarezera te, Rabmaga te leh Babulon lal milian leh hotu dang te an ni. Juda lal Zedekia leh a sipai zawng zawngte chuan anni chu an hmuhin an tlânchhe ta a. Zânah lal huan kawng, kulh bang pahnih inkâr kawngah an relhru a, Arabah lam panna kawngah an tlân ta a. Babulon sipaite chuan anni chu an ûm a, Jordan phaiah Zedekia chu an ûm pha a, an man a, Babulon lal Nebukadnezara hnênah, Hamat rama Ribla khuaah an hruai a; chutah chuan a chungthu an rêl a. Babulon lal chuan Ribla hmunah Juda mi ṭha zawng zawng leh a fate chu Zedekia hmuh lai ngeiin a that a. Zedekia mitmu a kher chhuak a, thîr kawl a buntîr a, Babulon-ah a hruai ta a. Kaldai-ho chuan lal in leh in dang zawng zawng chu an hâl a, Jerusalem kulh bangte an tichim a. Lal vêngtu hotu, Nebuzaradana chuan khawpuia mipui la awmte, a hnêna inpete nên, an za vaiin Babulon-ah salah a hruai a. Lal vêngtu hotu Nebuzaradana chuan mi rethei, eng mah nei lote chu Judai ramah chuan a hnutchhiah a, grep huan leh lote a pe nghâl a. Babulon lal Nebukadnezara chuan lal vêngtu hotu Nebuzaradana hnênah hetiangin thu a pe a: “Ani hi chu hruai la, ṭha takin enkawl rawh, tina rêng rêng suh, a ngen apiang tihsak zâwk ang che,” a ti a. Tichuan, lal vêngtu hotu Nebuzaradana te, sipai lal ber Nebusazbana te, aienthiam hotupa Nergel-Sarezara te leh Babulon hotu lian zawng zawngte chuan Jeremia chu vêngtu hung chhûng ata an hruai chhuak a, Safana fa, Ahikama fapa Gedalia hnênah, a ina hruai tûrin an hlân a; tichuan, mi dang zîngah a khawsa ve ta a. Vêngtu hung chhûnga Jeremia a awm lai chuan Lalpa thu chu Jeremia hnênah a lo thleng a. “Kal la Ebedmeleka hrilh rawh, ‘Engkim Lalpa, Israel-te Pathianin heti hian a ti: He khawpui ṭhatna tûr ni lovin a chhiatna tûr zâwkin ka thute ka hlen dâwn. Chutih hunah chuan, i mit hmuh ngeiah chung thil chu a lo thleng ang. Chumi hunah chuan, nang erawh chu ka hum ang che,’ tih hi Lalpa thuchhuak a ni. I hlauhte kutah chuan pêk i ni lo vang. Ka chhan ang che a, khandaihah i thi lo vang a, i him zâwk ang, mi rin tlat avângin,” tih hi Lalpa thuchhuak a ni. Lal vêngtu hotu Nebuzaradana chuan Rama khua aṭanga Jeremia a chhuahtîr hnuin a hnênah Lalpa thu a lo thleng a. Jeremia chu Judai ram leh Jerusalem aṭanga sal man, khaidiat bun chunga Babulon lama an hruai chhohte zîngah a tel ve a ni. Lal vêngtu hotu chuan Jeremia chu a hruai hrang a, a hnênah, “ Lalpa, i Pathian chuan he hmuna chhiatna lo thleng tûr hi a lo puang tawh a. Tûnah, a sawi ang ngeiin a thlentîr ta a nih hi. Lalpa chungah thil in tisual a, a thu in awih loh avângin hêng hi a lo thleng ta a nih hi. Mahse, nang zawng, vawiin aṭangin i khaidiat bun hi ka phelhsak a che. I duh chuan ka hnênah Babulon-ah kal la, ka enkawl ang che. I duh loh leh lo kal lo mai la, i duh duhnaah i kal thei e,” a ti a. Jeremian a chhân hmain “Babulon lalin Juda khuate awp tûra a ruat, Safana fa, Ahikama fapa Gedalia hnênah kîr leh la, a hnênah awm ang che, a nih leh i duh duhnaah i kal dâwn nia,” a ti leh a. Tichuan, lal vêngtu hotu chuan ei tûr leh thilpêk a pe a, a kaltîr ta a. Jeremia chu Ahikama fa Gedalia hnênah Mizpa khuaah a kal a, an rama la châmbângte zîngah a awm ve ta a. Sipai hotute leh mi dang, ramhnuaia awm zawng zawng chuan Babulon lalin Ahikama fapa Gedalia chu ram awptu, ram chhûnga mi retheite leh hmeichhia te, naupang te, Babulon-a sala hruai ve loh te enkawltu atân a ruat tih an lo hria a. Mizpa khuaah Gedalia hmu tûrin hêng mi, Nethania fapa Ismaela te, Korea fapa Johanana te, Tanhumeta fapa Seraia te, Netofa mi Efaia fapa, Makath mi Jezania leh mi dang te an lo kal a. Safana fa Ahikama fapa Gedalia chuan an hnênah leh a mite hnênah chuan, “Kaldai-ho rawngbâwl chu hlau reng reng suh u, ram hi luah ula, Babulon lal rawng hi bâwl ula, in tân a ṭha ang. Kei pawh in aiawha Babulon mite hmaa ding tûrin Mizpa khuaah ka awm ang a, nangnin uain te, nipui thei te, hriak te la khâwm ula, in bêlahte khung ṭha ang che u; in khaw luahahte chuan chêng reng ang che u,” tiin an hnênah thu a chah a. Chutiang bawkin, Moab rama Juda awm zawng zawng te, Edom rama awmte leh ram danga Juda awm zawng zawngte chuan Babulon lalin mi tlêm tê Judai rama a hnutchhiah thu leh Safana fa, Ahikama fapa Gedalia chu chûngho awptu atân a ruat tih an lo hria a. Tichuan, an darhna ram hrang hrang ata Juda-te chu Judai ramah an lo kîr a, Mizpa khuaa awm Gedalia hnênah an lo thleng a, uain leh nipui thei tam tak an kensak a. Korea fapa Johanana leh sipai hotu ramhnuaia la awmte pawh chu Mizpa khuaa Gedalia hnênah an lo kal a. A hnênah, “Amon mite lal Baalisa chuan Nethania fapa Ismaela chu nangmah that tûrin a tîr tih i hre na nge?” an ti a. Ahikama fapa Gedalia erawh chuan a ring lo va. Korea fapa Johanana chuan a rûk têin Mizpa khuaa awm Gedalia hnênah chuan “Nethania fapa Ismaela that tûr chuan min kaltîr mai teh, eng vângin nge i nunna a lâk ang? Nangmah bêla Juda mi awm zawng zawng leh Judai rama la châmbângte chu an darhin an boral vek dâwn asin,” a ti a. Ahikama fapa Gedalia erawh chuan Korea fapa Johanana hnênah chuan, “Chu thil chu ti suh, Ismaela chungchâng i sawi hi dâwt a ni,” a tihsan a. Thla sarihnaah chuan Elisama fa, Nethania fapa Ismaela, lal chi, lal khâwnbâwl zînga mi chu mi sâwm hruaiin Mizpa khuaah Ahikama fapa Gedalia hnênah a lo kal a, Mizpa khuaah chuan chaw an ei ho va. Nethania fapa Ismaela chu a mi hruai sâwmte nên chuan an tho thut a, Safana fapa Ahikama fa Gedalia, Babulon lalin ramawptua a dah chu, khandaihin an that a. Ismaela chuan Mizpa khuaa Gedalia hnêna Juda awm zawng zawng leh Babulon sipai, chumi hmuna awmte chu a that bawk a. Gedalia an thah tûkah, tu mahin an hriat hmain, Sekem aṭang te, Silo aṭang te, Samaria aṭang tein mi sawmriat an lo thleng a. An khabehmul an mêt a, an kawrte an tiṭet a, an inzai kak a, Lalpa ina chhang leh rimtui hlân tûra lo kal an ni. Nethania fapa Ismaela chu Mizpa aṭangin anmahni lo hmuak tûrin a chhuak a, kawng tluanin a ṭap a. Anni chu a han hmuh chuan an hnênah, “Ahikama fapa Gedalia hnênah lo kal rawh u,” a ti a. Khawpui chhûng an lo luh chuan Nethania fapa Ismaela leh a ṭhuihruaite chuan an lo that a, khuarkhurumah an paih a. Chûng zînga mi sâwmte erawh chuan Ismaela hnênah, “Min that suh, buh te, barli te, hriak te, khawizu te lovah kan thukru ṭeuh a nia,” an ti a. Tichuan, anni chu a zuah a, an ṭhiante zîngah chuan an that ve ta lo va. Ismaelan a mi thahte ruang a paihna khuarkhurum chu lal Asa-an Israel lal Baasa laka invên nâna a laih a ni. Nethania fapa Ismaela chuan Gedalia leh a hote a thah ruangin a tikhat tlat a. Ismaela chuan Mizpah-a mi la awm zawng zawng, lal fanu te, lal vêngtu hotu Nebuzaradanan Gedalia enkawl tûra Mizpa khuaa a dah zawng zawngte chu salah a man a, Nethania fapa Ismaela chuan Amon ramah a hruai ta a. Korea fapa Johanana leh sipai hotu, a hnêna awm zawng zawngte chuan Nethania fapa Ismaelan thil sual a tihte chu an hria a. Nethania fapa Ismaela bei tûrin an mite an khâwm a, an kal ta a. Gibeon khaw kianga dîl lian tak bulah chuan an va ûmphâk a. Ismaela hnêna mipui awm zawng zawngte chuan Korea fapa Johanana leh a hnêna sipai hotu awm zawng zawng chu an hmuhin an lâwm ta êm êm a. Ismaelan Mizpa aṭanga sala a hruai zawng zawng chu an lo kîr a, Korea fapa Johanana hnênah an pakai ta vek a. Nethania fapa Ismaela leh a hote pariat chu Johanana lak aṭangin an him hrâm a, Amon mite hnênah an tlânchhia a. Korea fapa Johanana leh a hnêna sipai hotu awmte chuan Nethania fapa Ismaelan Ahikama fapa Gedalia a thah hnua Mizpa aṭanga sala a man zawng zawng indo mi te, hmeichhia te, naupang te, mi tilreh te chu Gibeon aṭangin an hruai haw ta vek a. Tichuan, Aigupta rama kal tumin an kal zêl a, Bethlehem kiang Gerut chhim lam hmunah chuan an châwl a. Babulon lalin ram awptu atâna a dah Ahikama fapa Gedalia chu Nethania fapa Ismaelan a thah avângin Kaldai-ho chu an hlau hle a ni. Korea fapa Johanana te, Hosaia fapa Jezania te, sipai hotu zawng zawng leh mipui, a tê ber aṭanga a lian ber thlengin an lo kal a, Zâwlnei Jeremia hnênah chuan, “Kan dîl hi min ngaihthlâksak la, Lalpa kan Pathian hnênah mi la dam zawng zawng tân ṭawngṭai rawh. Min hmuh ang hian tam tak ni ṭhîn kha, tlêm tê chauh hnutchhiah kan ni ta si a. Lalpa, i Pathianin kan kawng zawh tûr te, kan tih tûr te min kawhhmuh rawh se,” an ti a. Zâwlnei Jeremia chuan anni chu a chhâng a, “In thu chu ka hria e, tûnah, Lalpa, in Pathian hnênah in ngen angin ka dîlsak ang che u, Lalpa chuan in hnêna a sawi apiang ka hrilh ang che u a, in lakah eng mah ka zêp lo vang,” a ti a. Anni chuan Jeremia hnênah, “ Lalpa i Pathianin kan tâna thu a hrilh che anga kan tih loh chuan Lalpa chu kan lakah hretu rinawm leh dik tak ni rawh se. Kan tirhna che Lalpa thu chu a chhia a ṭha kan zâwm ang. Lalpa, kan Pathian thu kan awih zêl chuan kan tân a ṭha dâwn si a,” an ti a. Ni sâwm hnuah Jeremia hnênah Lalpa thu a lo thleng a. Korea fapa Johanana leh a hnêna sipai hotu awm zawng zawng te, mipui, a tê ber aṭanga a lian ber thlengin a ko khâwm a. An hnênah, “ Lalpa, Israel-te Pathian, a hnêna ṭawngṭai tûra min tirhna khân heti hian a ti: ‘He rama in awm reng chuan ka tungding ang che u a, ka tidarh lo vang che u. Ka phun ang che u a, ka pawt chhuak lo vang che u. In chungah thil ṭha lo ka thlentîr avângin ka rilru a na a ni. In hlauh Babulon lal hi hlau tawh suh u, ani chu hlau suh u,’ tih hi Lalpa thuchhuak a ni. Chhan tûr che u leh a kut ata chhan chhuak tûr che uin kei in hnênah ka awm si a. Ka khawngaih ang che u a, ani pawhin a khawngaih ang che u; tichuan, in ramah hian in awm reng ang. “Amaherawhchu, Lalpa in Pathian thu zâwm lova, ‘He ramah hian kan awm lo vang a, Aigupta ramah kan kal zâwk ang; tah chuan, indo thâwm te, tawtawrâwt ri te, ṭâm te hre lovin kan awm ang,’ in tih chuan Juda mi la dam chhunte u, Lalpa thu hi hre rawh u; Engkim Lalpa, Israel-te Pathian chuan heti hian a ti: ‘Aigupta rama lûta awm in tum tlat chuan khandaih in hlauh ngei khân Aigupta ramah a nangchîng ang che u, in hlauh ṭhin ṭâmin Aigupta ramah a ûmzui ang che u a; tah chuan, in thi ang. A ni, Aigupta rama kala awm tum lui apiangte chu khandaih te, ṭâm te, hrite tuarin an thi ang. Thil ṭha lo an chunga ka thlentîr tûr lak ata tu mah himin an chhuak lo vang.’ “Engkim Lalpa, Israel-te Pathian chuan heti hian a ti: ‘Ka thinurna nasa tak Jerusalem-a ka leihbua ang khân Aigupta-a kalte chungah pawh ka leihbua ang. Ânchhia te, hmusit te, sawichhiat te leh hau te in tuar ang a, he ram hi in hmu leh tawh lo vang.’ Juda mi la dam chhunte u, Lalpa chuan a hrilh che u hi, Aigupta-ah chuan lût suh u. Vawiina ka thu hrilh che u hi ngai pawimawh teh u. Thihpui hial khawp thil sual lian tak in ti a ni. Lalpa, in Pathian hnênah min tîr a, ‘ Lalpa, kan Pathian hnênah min ṭawngṭaisak la, a sawi apiang kan ti ang,’ in ti a. Tûnah, in hnêna ka puan, Lalpa, in Pathianin min hrilh chu in zâwm leh si lo. Tûnah, hre rawh u, in awm duhna hmun ngeiah chuan khandaih te, ṭâm te, hri te tuarin in thi ang,” a ti a. Lalpa an Pathianin mi tin hnêna sawi tûra a tirh ang taka Lalpa, an Pathian thu chu, mi zawng zawng hnêna Jeremian a sawi hnu chuan Hosaia fapa Azaria leh Korea fapa Johanana leh mi chapohote chuan, “Dâwt i sawi a ni, Lalpa kan Pathianin, ‘Aigupta rama awm tûrin kal suh u,’ tia sawi tûrin a tîr lo che. Kaldai miten min mana min thah emaw, Babulon-a sala min hruai theihna tûrin emaw Neria fapa Baruka chuan a fuihpawrh che a nih zâwk hi,” an ti a. Tichuan, Korea fapa Johanana te, sipai hotute leh mipui zawng zawng chuan, ‘Judai rama awm tûr,’ tia Lalpa thupêk chu an zâwm ta lo va. Korea fapa Johanana leh sipai hotu zawng zawng chuan Juda mi la dam chhun, hnam tin zînga an hnawhdarhna ata Judai rama awm tûra lo kîrte chu an hruai a. Chûngte chu mipa te, hmeichhia te, naupang te, lal fanu te, lal vêngtu hotu Nebuzaradanan Safana fa, Ahikama fapa Gedalia hova awm tûra a hnutchhiah te, zâwlnei Jeremia te, Neria fapa Baruka te an ni. Tichuan, Lalpa thu zâwm lovin Aigupta ramah chuan an lût a, Tahfanes khua an thleng ta a. Tahfanes-ah chuan Lalpa thu Jeremia hnênah a lo thleng a, “Juda mite hmuh lai ngeiin lung lian pui pui la la, Tahfanes hmuna Farawa in panna kawng rem sirah hlum chawhdiakah phûm rawh. An hnênah heti hian ti ang che, ‘Engkim Lalpa, Israel-te Pathian chuan heti hian a ti: ka chhiahhlawh Babulon lal Nebukadnezara chu ka rawn tîr ang a, hêng lung; he laia ka phûmtîr che chungahte hian a lalṭhutthlêng a hûng ang a, a puan in a kaih bawk ang. Ani chu a lo kal ang a, Aigupta ram chu a rawn la dâwn a ni. Thi tûra an ruat chu an thi ang a, sala hruai tûra a tihte salah a hruai ang a, khandaiha thah tûr a tihte chu a that ang. Aigupta mite pathian inte chu a hâl chhe vek ang a, an pathian chu a la bo vek bawk ang. Berâmpuin a kawr ata hrik a enfai angin Aigupta ram chu a thian fai vek ang a, ngaihngam takin a hâwnsan ang. Aigupta rama ni pathian an biakna in ban lung an cheite chu a titliak ang a, Aigupta mite pathian biak inte chu a hâl chhe vek ang,” a ti a. Aigupta rama Juda awm zawng zawng, Migdol khuaa awm te, Tahfanes khuaa awm te, Nof khuaa awm te, Pathros rama awmte chungchânga Lalpa thu Jeremia hnêna lo thleng chu: Engkim Lalpa, Israel-te Pathian chuan heti hian a ti: “Jerusalem leh Judai ram khawpui zawng zawng ka tihchhiat in hmu a, tûnah hian a ram vek a, tu mah an awm ta lo. Thil sual tiin min tithinur a, anni leh in thlahtute pawhin in hriat ngai loh pathiante biaa rimtui in hâl avângin, Ka chhiahhlawh zâwlneite in hnênah ka rawn tîr fo va, hêng thil tenawm, ka huatzâwng hi ti lo tûrin an hrilh ṭhîn che u a. Mahse, in ngaithla lo va, in pawisa hek lo. Chuvângin, ka thinur nasa tak chu ka leihbua a, Juda khawpuite leh Jerusalem kawtthlêrte chu a kâng ta a ni. Vawiina a awm ang hian nasa takin a chhe ta a ni.” Lalpa, Engkim Lalpa, Israel-te Pathian chuan tûnah thu a sawi e: “Engati nge in zînga mipa leh hmeichhia, naupang leh nausên, Juda-te zînga tu mah zuah lova lâk bo vekna khawp hetiang thil ṭha lo in tih? In khawsakna Aigupta ram pathiante hnênah rimtui in hâl a, in siamchawp milemte ngei chuan min tithinur ta a nih hi. Khawvêl hnam tin sawichhiat leh ânchhe dawng atân in insiam a, in intichhe ta a ni. Judai ram leh Jerusalem kawtthlêra in thlahtute suahsualna te, Juda lalte leh an nupuite thil sual tihte leh in nupuite nêna in bawhchhiatnate chu in theihnghilh ta em ni? Vawiin thlengin in la sim lo va, min ṭih chuang hek lo. Nangni leh in thlahtute tâna ka dân leh ka thupêk in zâwm lo.” Chuvângin, Engkim Lalpa, Israel-te Pathian chuan heti hian a ti: “Ngai teh, in tâna thil ṭha lo, Juda zawng zawng boral vekna tûr ka thlentîr dâwn. Juda mi la dam chhun, Aigupta rama pêm tumte chu ka la bo vang. Aigupta ramah chuan khandaih an tuar ang a, ṭhenkhat rilṭâmin an thi ang a, an boral vek ang. A tê ber aṭanga a lian ber thlengin khandaih leh ṭâm tuarin an thi ang. Mi ânchhia an dawng ang a, hlauh te, sawichhiat te, hau te an tuar ang. Jerusalem-a awmte ka hrem ang bawkin Aigupta-a awmte chu khandaih te, ṭâm te, hri tein ka hrem ang. Aigupta rama Juda mi la dam chhunte chuan kîr an châk êm êm ang a; mahse, tu mah Judai ramah nungdamin an kîr lo vang; mi tlêm tê, tlânchhuakte chauh lo chu.” Aigupta rama Pathros hmuna Juda awm zawng zawng, an nupuiten pathian dang hnênahte rimtui an hlân ṭhîn tih hre reng pahote leh an zînga hmeichhe tel ve zawng zawng, mipui nasa tak pung khâwm chuan Jeremia chu an chhâng a, “ Lalpa hminga kan hnêna thu i sawite kha kan ngaithla lo vang. Thu kan lo tiam tawh angin kan awm zâwk ang a, vân lalnu hnênah rimtui kan hâl ang a, in tûr thilhlante a tân kan bun chhuak ang. Keini leh min thlahtute, kan lalte leh kan hotuten Judai ram khawpuiahte leh Jerusalem kawtthlêra an tih ṭhin ang khân kan ti ve ang. Chûng lai chuan ei tûr kan ngah a, kan hmuingîl a, chhiat pawh kan tâwk hek lo. Vân lalnu hnêna rimtui hâl leh a tâna in tûr thilhlan bun chhuah kan bânsan chinah erawh chuan eng mah kan nei ta lo va, khandaih leh ṭâm tuarin kan boral ta a nih hi,” an ti a. Hmeichhiate chuan, “Vân lalnu hnêna rimtui hâla, in tûr thilhlan kan bun chhuah te, a lim anga chhang kan ur te, a tâna in tûr thilhlan kan bun chhuah te kha kan pasalte hriatpuia ti kan ni lo vem ni?” an ti bawk a. Jeremia chuan hetianga amah chhângtu, a hmei a pa, mi zawng zawng hnênah chuan, “ Lalpa chuan Judai ram khawpuiah te, Jerusalem kawtthlêrah te nangni leh in lalte, in hotute, in thlahtute ram chhûng mi zawng zawngin rimtui in hâl ṭhîn tih a hre reng a, a theihnghilh lo tih in hre na nge? In thil sual tihte Lalpa chuan a tuar thei ta lo va, thil tenawm tak in tih avângin ram chu a chhe zo va, ânchhe dawng, tu ma luah lohvin tûnah a lo awm ta a nih hi. Tûna in chan chhiatna hi pathian dangte hnênah in inthawi a, Lalpa thupêk te, a dân te leh a thu hriattîr te zâwm lovin in sualsan vâng a ni,” a ti a. Jeremia chuan mipuite leh hmeichhiate hnênah chuan, “Nangni Juda mi, Aigupta rama awm zawng zawngte u, Lalpa thu hi ngaithla rawh u. Engkim Lalpa, Israel-te Pathian chuan heti hian a ti: ‘Vân lalnu hnêna rimtui hâl leh in tûr thilhlan bun chhuah, kan nupuite nên kan lo tiam tawh chu kan hlen ngei ang,’ tiin in ṭawng a, in thiltihin in tilang bawk a. In sawi ang chuan ti ula, in thutiam chu hlen mai rawh u. Amaherawhchu, nangni Aigupta rama Juda mi zawng zawngte u, Lalpa thu hi ngaithla teh u: ‘Ngai teh u, ka hming ropui tak chhâlin thu ka tiam ta,’ Lalpa chuan a ti. Aigupta rama Juda awmten, ‘Engkim Lalpa chu mi nung alâwm,’ tiin ka hming an chhâl tawh ngai lo vang. Ngai teh u, an ṭhatna tûr ni lovin an chhiatna tûr zâwkin anni chu ka châng reng a ni. An boral vek hma chu Aigupta rama Juda zawng zawng chuan khandaih te, ṭâm te an tuar ang. Khandaih pumpelha Aigupta ram aṭanga Judai rama kîr lehte chu tlêm tê chauh an ni ang. Aigupta rama awm tum, la dam chhunte chuan ka thu nge dik an thu an hria ang. He hmunah hian ka hrem dâwn che u a ni; tichuan, ka thute hi in chhiatna tûr a lo ni ngei tih in hria ang, tih hi Lalpa thuchhuak a ni. Lalpa chuan heti hian a ti: ‘Hre rawh u, Aigupta lal Hofra Farawa chu amah thah tumtu, a hmêlmate kutah ka pe ang, Judai lal Zedekia, amah thah tumtu, Babulon lal Nabukadnezara kuta ka pe ang khân,’ ” a ti a. Josia fapa Jehoiakima, Judai rama a lal kum linaah, Beria fapa Barukan zâwlnei Jeremia hnêna thu lo thleng chu lehkhabu-ah a ziak chhuak a, chutih lai chuan Jeremian a hnênah heti hian a ti a: “Nang Baruk, Israel-te Pathian chuan i chungchâng heti hian a sawi; nang chuan, ‘Mang a va ang êm! Lalpa chuan ka thil tuara chungah lungngaihna min rawn belhchhah ta si a; mangangin ka rûm a, hahchawlhna rêng ka hmu ta lo a nih hi,’ i ti a. Lalpa chuan, ‘Ngai teh, ram pumah ka lo sak tawh chu ka ṭhiat ang a, ka lo phun tawh pawh ka pawt leh ang. I tân chauhva thil ṭha i zawng em ni? Zawng tawh suh. Ngai teh, mi tin chungah thil ṭha lo ka thlentîr dâwn,’ tih hi Lalpa thuchhuak a ni. Mahse, khawiah pawh kal la, i nun zawng ka zuahsak ang che, tiin a hnênah sawi rawh min ti,” a ti a. Hnam dangte chungchânga zâwlnei Jeremia hnêna Lalpa thu lo thleng chu: Aigupta chungthu: Juda lal Josia fapa, Jehoiakima lal kum lina Babulon lal Nebukadnezaran Eufretis lui kam Karkhemis hmuna a hneh tâk, Aigupta lal Neko Farawa sipai rual chungchâng chu. “Phaw lian leh phaw tê peih diamin Indo tûrin kal chhuak rawh u. Sakawrte thuam ula, a chungah chuang rawh u, Thîr lukhum khumin intlar ula, Feite tât hriam ula, thîr kawr ha rawh u. Engtizia nge ni le, an zâma an tawlhkîr tâk? An mi huaisente an tlu a, Hmanhmawh takin an tlânchhe zo ta, Hnung lam hawi lêk lovin baklêngin an tlân a, Ram tinah râl a ṭi,” Lalpa thuchhuak chuan a ti. “Mi ṭuanṭha an tlânchhe hman lo va, Mi chak an him hek lo. Saw hmâr Eufretis lui kamah sâwn an pai a, an tlu zo ta. Nail lui anga lo lian ta hi tu nge ni? Luipui so bulh bulh ang hi? Aigupta chu Nail lui angin a lo lian a, Luipui tui so bulh bulh ang hian, Ka lian ang a, lei chung dâpin khawpuite chu a chhûnga chêngte nên ka tichhia ang,” a ti. Sakawrte u, tâwn ru, tawlailîrte u, tlân chiam rawh u, Nangni sipai huaisen, Ethiopia mite, Put mi, phaw kengtu te, Ludia mi, thal kâp thiamte u, tâwn zêl rawh u. Chu ni chu, Engkim Lalpa, Pathian ta a ni. Phuba lâk ni, a hmêlmate chunga phuba a lâk ni chu; Khandaih chuan duh tâwkin a ei ang a, An thisen pawh tlai khawpin a in ang. Saw hmâr Eufretis lui kamah sâwn, Engkim Lalpa, Pathian chuan Inthawi nân mi tam tak a hlân ta. Aw Aigupta fanu, nula thianghlim, Gilead-ah chho la, thinghnai damdawi han la rawh, Hnamten i mualphona an hria a, ‘Mi hrâng leh mi hrâng an insu a, an tlu dûn reng mai,’ Ti-a i ṭap thâwm chu lei pum puiah a thang. Babulon lal Nebukadnezara a lo kal a, Aigupta ram a rawn nghaisak tûr thu zâwlnei Jeremian Lalpa thu a sawi chu: Aigupta-ah puang ula, Migdol-ah hril rawh u, Nof-ah leh Tahfanes-ah puang ula, ‘Inring ula, invêng ṭha rawh u, Kan vêla mite chu khandaihin a eizo ta,’ tiin. Engati nge i mi chak chu a tlûk tâk? A ding thei ta lo, Lalpa nam thlûk a ni, An tlu khâwm a, an indelh a, tichuan, an inrâwn ta, ‘Hmêlma khandaiha kan thih loh nân kan ram, Kan chhûngte hnênah i tlân haw ang u,’ an ti. ‘Aigupta lal Farawa hi thâwm chang lian mai, A hun ṭha a hloh ta a nih hi’ ti ang che. ‘Kei hi mi nung ka nih hi, Lalber,’ a hming Engkim Lalpa thuchhuak chuan a ti; ‘Tlâng zînga Tabor a lawr ang leh Tuipui kama Karmel tlâng a awm luah angin A lo kal dâwn e. Nangni Aigupta mite u, saltâng tûrin in thawmhnaw têl rawh u, Nof khua chu a ṭiau vang a, a chhe vek ang. Luahtu rêng an awm lo vang. Aigupta chu bâwngla nalh tak ang a ni, Mahse, hmâr lam ata tlip lo thlâwkin a rawn bâwm ang. An sipai rawihte pawh bâwng châwm thau ang an ni, A ni, an hnungtawlh a, an tlânchhia; ding lovin. An chhiatna ni chuan a rawn nang ta, hrem an tuarna ni chu. An tlânchhe thâwm chu rûlpui tlânchhe ri ang a ni, An hmêlmate an lo hnai zêl, thingkittu angin Hreipui nên an lo thawk e. A ngawpui chu an rawn ṭhiat ang, Kal tlang theih loh khawpa pik chu,’ Lalpa thuchhuak chuan a ti. ‘Anni chu khau puang aiin an tam zâwk, Chhiar sên rual an ni lo. Aigupta mite chu an mualpho ta, Hmâr lam mite kutah pêk an ni tawh si a.’ Engkim Lalpa, Israel-te Pathian chuan heti hian a ti: “Ngai teh u, Thebes khaw pathian Amon te, Farawa te, Aigupta leh a pathian te, an lalte leh Farawa rinchhantu zawng zawngte chu ka hrem dâwn. Anmahni thah tumtu Babulon lal Nebukadnezara leh a ṭhuihruaite kutah ka pe ang. Chumi hunah chuan Aigupta ramah, hmânlai ang khân an awm leh ang,” Lalpa thuchhuak chuan a ti. “Ka chhiahhlawh Jakob, nang zawngin hlau suh, Aw Israel, zâm hek suh, Ram hla tak ata ka chhan chhuak ang che a, I thlahte pawh an saltânna ata ka hruai chhuak ang, Jakoba chu a lo hâwng ang a, Him tak leh thlamuang takin a awm ang; Tu man an tithlabâr tawh lo vang. Aw Jakob, ka chhiahhlawh, hlau suh, I hnênah ka awm hi,” Lalpa thuchhuak chuan a ti. Ka hnawhchhuahna che hnam zawng zawng ka tiboral ang a, Nangni zawng ka tiboral vek lo vang che u, Dik takin ka hrem ang che u, Hrem loh erawh chuan ka chhuah lo vang che u. Faraw-an Gaza a beih hmaa Filistia mite chungchânga zâwlnei Jeremia hnêna Lalpa thu lo thleng chu. Lalpa chuan heti hian a ti: Ngai teh, hmâr lam aṭangin tui a lo lian a, A kuang a khat ang a, a luang liam ang a, Ram pum a chîm vek ang. Mangangin mi an au vang a, ram chhûnga mi tin an rûm ang. A sakawr per ri ṭuk ṭukah te, a tawlailîr tlan ri dur durahte leh A ke inkhak bur bur thâwmahte chuan Pate kut a zawi zo vang a, an fate pawh an ngaihsak thei lo vang. Ni chu a lo thleng ta, Filistia mi zawng zawng chhiatna ni chu, Tura leh Sidon ata ṭanpuitu an awm ta lo; Tuipuia thliarkâr, Kapthora Filistia mi la dam chhunte chu, Lalpa chuan a tiboral dâwn si a. Gaza tân lu ziah kawlh a hun ta, Askelon a chhe zo va, Phaizâwla la dam chhunte u, eng chen nge in sûn dâwn le? Aw Lalpa khandaih, eng hunah nge i chawlh dâwn? I paiah inkhung la, châwl la, awm hle hle rawh. Lalpan tih tûr a tuk si chuan, Engtin nge a chawlh theih ang? Askelon leh tuipui kama chêngte bei tûrin thu a pe miau si a. Moab chungthu: Engkim Lalpa, Israel-te Pathian chuan heti hian a ti: Nebo chung a pik e, a chhe zo ta si a, Kiriathaim chu a mualpho va, an hneh ta si a, kulhte a chhe rem rum a, a luahtute an mualpho zo ta. Moab hmingthanna a nêp ta, Babulon-ah a chhiatna tûr an rêl. “Hawh u, hnama chhiar tlâk loh khawpin i siam ang u,” an ti. Nangni Madmen khaw mite u, in reh ṭhiap ang, Khandaihin a ûmzui ang che u. Horonaim aṭanga au thâwm, Chhiatna nasa tak thâwm chu ngaithla rawh u. Moab a chhia a, a fate an ṭap chuah chuah mai. Luhit-ah ṭap chungin an chho va, Horonaim chhukah mangang au thâwm an hria. In him theih nân tlânchhe rawh u, Thlalêra ram sabengtung ang maia chakin. In kutkawih, in sum leh pai in rinchhan avângin, Nangni pawh an man ang che u; Khemosa chu a puithiamte leh a hotute nên Sala hruai an ni ang. Khawpui tinah tichhetu a lo thleng ang a, Khaw khat mahin an pumpelh lo vang. Phaizâwl chu a chhia ang a, Hmun zâwl zaute pawh a chhe vek ang, Lalpa sawi tawh ang khân. A thlawh bo nân Moab chu thla pe ula, A khawpuite a chhe vek ang a, Tu mah an chêng tawh lo vang. Dâwngdah taka Lalpa hna thawk chu ânchhe dawngin awm rawh se; Thisen chhuah nâna khandaih hmang duh lo chu ânchhe dawngin awm rawh e. Moab chu a tleirâwl lai ata Nuamsa takin a awm ṭhîn a. Uain bun chhuah loh, a mawng nawi nêna inchiah, Bun chhuah ngai loh angin a awm a, Sala hruai a ni ngai lo. A thlum dân a pangngai reng a, A rim a chhe chuang lo. Chuvângin, ni chu a lo thleng ta, Tih hi Lalpa thuchhuak a ni. A hnênah bun chhuaktu ka tîr ang a, A bêl ata a bun chhuak ang. A bêl chu a bun ruak ang a, a tikeh sawm vek ang. Israel chhûngten an innghahna Bethel an zahpui angin, Moab pawhin Khemosa an zahpui ang. ‘Pasalṭha, râl laka huaisen kan nei,’ Engtin nge in tih theih le? Moab tichhetute chu, khawpuiah an chho va, An tlangvâl chhuanvâwrte thah tûrin an hruai chhuak ang. Tih hi, a hming Engkim Lalpa thuchhuak a ni. Moab chhiatna tûr chu a lo thleng ṭêp, A tuar tûr chuan a rawn hnaih ta. A chhehvêla awm zawng zawngten ani chu ṭah rawh se, A hming hretu zawng zawngten, ‘Engtizia nge, tiang khauh leh tiang mawi chu a tliah tâk mai le!’ ti rawh se. Aw nangni, Dibon mite u, in khaw ropui tak ata lo chhuak ula, Ram rovah hian ṭhu rawh u. Bei tûr chein Moab tichhetu a lo thleng ta. I kulhte pawh a tichhe vek ang. Aroer mite u, kawngahte ding ula, Paho tlânchhia leh nuho relhrute chu lo châng ula, ‘Engtizia nge ni ta?’ lo ti rawh u. Moab chu a mualpho va, a chhe zo ta, Lungchhe takin ṭap chiam rawh u. Arnon luiah, ‘Moab a chhe ta,’ tiin puang r’u. Tlâng chung zâwla khawpui, Holon te, Jahza te, Mefaat te, Dibon te, Nebo te, Beth-diblataim te, Kiriathaim te, Beth-gamul te, Beth-meon te, Keriot te, Bozra te, Moab rama khua zawng zawng, kilkhâwr taka awm chenin an chungthu rêl a ni ta. Moab ki chu râwtchhum a ni a, a bân pawh tihtliah a ni ta, tih hi Lalpa thuchhuak a ni. Moab chu hrai rui rawh, Lalpa aia lian zâwkah a inngai a, mahse, Moab chu ama luakah a tâl ang a, nuihzatbûr a ni ang. Israel chu i nuihzat ṭhîn a ni lâwm ni? Rûkru zînga tel em a niha, a chungchâng i sawi apianga i lu i thin ṭhin le? Moab-a chêngte u, khawpui chhuahsan ula, Lungpui kârah tawm rawh u. Pûk kawngka sîra bu chhep ṭhîn ṭhuro angin awm rawh u. Moab chapozia kan hria, chapo tak an ni, An induhzia te, mahni thu an duhzia te, An chaltlaizia te, an intihveizia te, An inlulinzia te ka hria, Lalpa thuchhuak chuan a ti. Mahse, eng mah a sâwt lo, A uang thlâwn mai a ni. Chuvângin, Moab ka tuarpui ang, Moab mi zawng zawng tân ka ṭap ang. Kir-heres mite pawh ka sûn bawk ang. Aw Sibmah grep kûng, Jazer mite ṭap aia nasain ka ṭah ang che, I zârte chuan tuipui a thleng a, Jezer a thlen hial ṭhin kha. Ei chhetuin i thei leh grep rahte a ei chhe ta. Moab ram ṭha tak aṭangin Hlimna leh lâwmna a reh zo ta, Uain sâwr tûr ka titâwp a, Tu man hlim takin an sâwr tawh lo vang. An au thâwm pawh hlim thâwm a ni tawh lo vang. Hesbon leh Elealeh-a an au thâwm chu Jahaz aṭangin a hriat a, Zoar mite pawhin an lo hria a, Horonaim leh Eglath-selisia thlengin an hre phâk. Nimrim tuikhurte pawh a kang zo ta. ‘Moab rama an hmunsâng te, an pathian hnêna rimtui an hâl ṭhinnate chu ka tichhe vek ang,’ tih hi Lalpa thuchhuak a ni. ‘Lusûnte tâna phênglâwng tum rîk angin Moab avângin ka lungngai a, Kir-heres mite tân pawh ka ngui zo ta. An sum leh pai chhêkkhâwl a ral zo ta si a. An lu an mêt kawlh vek a, an khabehmul pawh an ziat kawlh vek a ni. An kutte an zai a, saiip puan an veng ṭheuh. Moab-ho in chung zâwl zawng zawngah leh an khawlaiahte chuan an ṭap chuah chuah a, bêl chhe paih angin Moab chu a keh sawm ta,’ tih hi Lalpa thuchhuak a ni. A va han chhe hneh êm! An ṭap tlawk tlawk mai. Moab chu a mualpho va, Moab chu miten an nuihzat a, a vêla mi zawng zawngin râpthlâk an ti. Lalpa chuan heti hian a ti: “Ngai teh, mupui angin a lo thlâwk ang, Moab chungah a lo bir ang. Keriot chu lâk a ni a, a kulhte pawh lâk vek a ni, Chumi ni-ah chuan Moab Pasalṭhate an zâm ang a, Hmeichhe nau vei thlaphâng ang mai an ni ang. Moab a boral ta, hnama chhiar tlâk a ni ta lo, Lalpa lakah a inluling êm a ni. Hlauhawm te, khuarkhurum te, thang te chuan A châng reng che u a ni, Moab mite u,” Tih hi Lalpa thuchhuak a ni. “Hlauhawm tlânsantu chu khuarkhurumah a tla ang a, Khuarkhurum ata chhuak chu thangah a âwk ang. Moab ka hrem hun chu ka thlentîr dâwn,” Tih hi Lalpa thuchhuak a ni. “Hesbon phênah râltlânho chau takin an ding. Mahse, Hesbon aṭangin mei a lo chhuak a, Lal Sihona in aṭangin meipui a chhuak. Moab mite baksam a kâng a, Indo chak mite chhîpsam chu. Moab mite u, in va khawngaihthlâk tak êm, Khemosa mite an ral zo ta, I fapate salah an hruai a, I fanute an man zo ta. Ni hnuhnûngahte erawh chuan Moab dinhmun ka siam ṭha leh ang,” Tih hi Lalpa thuchhuak a ni. Hei zawng hi Moab hremna tûr thu chu a ni. Lalpa chuan Amon mite chungchâng heti hian a sawi: “Israelan fate a nei lo vem ni? Rokhâwmtu a nei na nge? Engati nge Gad-ho ram chu Milkoman a luaha, a mite pawh an khawpuiah an chên tâk le? Chuvângin, ngai teh, nite a lo thleng e,” Tih hi Lalpa thuchhuak a ni. “Indo thâwm ri ka hriattîr ang, Amon mite khua Raba an bei thâwm chu! Bawlhhlawh vawm khâwm mai an ni ang a, A chhehvêl khuate pawh meiin a kâng ang. Israel-te chuan anmahni hnawt chhuaktute chu an hnawt chhuak ve thung ang,” Tih hi Lalpa thuchhuak a ni. Aw Hesbon, chiau vak vak rawh, Ai khua chu a chhe zo ta si a. Raba mite u, ṭap chiam ula, saiip puan sin rawh u, Hung chhûngah chuan tlân kual rawh u, Milkoma chu a puithiamte leh a miliante nên Salah an hruai dâwn si a. Fa rinawm lote u, engtizia nge in phai ram ṭha in chhuan le? In sum leh paia innghatin, ‘Tu nge mi bei ang?’ i ti maw? Ngai teh, kil tin aṭangin I chungah hlauhawm ka rawn thlentîr dâwn, Tih hi Engkim Lalpa thuchhuak a ni. Mi tin an tlân darh chum chum ang a, Tu man tlândarhte chu an ko khâwm lo vang. Chûng hnuah chuan Amon mite chu ka tungding leh ang, Tih hi Lalpa thuchhuak a ni. Edom chungchâng: Engkim Lalpa thu chu hei hi a ni: Teman-ah finna a awm ta na nge? In zîngah remhria an awm ta lo vem ni? An finna a bo zo ta em ni? Dedan mite u, lêt ula, tlânchhe rawh u, Khuarkhurumahte biru rawh u. Esauva chungah chhiatna ka thlentîr dâwn, Anmahni ka hrem hun a thleng ta si a. Grep rah sengtu i rawihte chuan A rah tlêm tal an zuah ṭhîn a. Zâna rûkrute pawhin An duhzâwng chauh an la ṭhîn a ni lâwm ni? Esauva erawh chu a neih zawng zawng ka lâksak ang a, A thil thuhrûkna hmun chu ka haihawng vek ang, Tichuan, a thukru thei tawh lo vang a, A fa te, a laichîn te, a ṭhenawm te nên an boral ang a, Tu mah ka zuah lo vang. In zînga fahrah awmte chu ka hnênah hnutchhiah rawh u, Keiman ka enkawl ang. In hmeithaite pawhin mi ring rawh se. Lalpa chuan heti hian a ti: “In lo tûrte pawhin no chu an in si chuan, Nang hi hrem lohvin i chhuak ang maw? Hrem lohvin i chhuak hauh lo vang. I in ngei tûr a ni. Keimah ngeiin thu ka tiam ta,” Tih hi Lalpa thuchhuak a ni. Bozra chu mite hlauh, mak tih huai huai, Sawichhiat leh ânchhe dawng a ni ang, An khua zawng zawng pawh a ram hlen hlauh vang. Lalpa hnên ata thu ka dawng a, ‘Pung khâwm ula, anni chu bei tûrin lo kal ula, Indo tûrin lo thawk rawh u,’ tiin. Hnamte hnênah palai an tîr a. Ngai teh, mite hmuhsit atân, Hnamte zîngah ka titê ta che a ni. I vaupûm leh i chapona chuan a bum ta che a ni, Nang, lungpui keh kâra awm ṭhîn, Tlângchhîp sânga awmhmun khuar, Mupui angin sâng takah bu chhep mah la, Chuta ṭang chuan ka hnûk thla ang che, Tih hi Lalpa thuchhuak a ni. Edom chan chu miten râpthlâk an ti ang a, mi veivâk apiangin an hlau vang, a chhiat nasat êm avângin an chek tlawk tlawk ang. Sodom leh Gomora leh a kianga khaw tihchhiatte ang khân, ‘Tu mah an chêng tawh lo vang a, tu man an luah tawh hek lo vang,’ Lalpa chuan a ti. Ngai teh, Jordan ngawa sakeibakneiin phûla berâm tla a ṭhâwng thut angin vawilehkhatah anni chu an ram ata ka ûm chhuak ang a; tichuan, an chungah thu nei tûr ka duh duh ka dah ang. Kei ang hi tu nge awma, tu nge mi cho ngam le? Mi khing ngam berâmpu tu nge awm ang? Chutichuan, Lalpa thiltum, Edom chunga tih a tum leh Teman mite chunga hlen a tum hi ngaithla rawh u: ran notête chu a hnûk bo vang a, an tlatna hmunte chu a ṭiau vek ang. An tlu thâwmah lei a nghîng ang a, an ṭap thâwm pawh Tuipui Sen thlengin an hria ang. En teh u, Bozra chungah a thlâwk a, mupui angin a lo bir dâwn. Chumi ni chuan Edom mi huaisente thinlung chu hmeichhe nau vei angin a zâm ang. Damaska chungchâng: Hamat leh Arpat an mualpho ta, Chanchin lâwmawm lo an hria a, an zâm zo ta. Tuipui fâwn awm hle hle thei lo ang hian an buai zo ta si a. Damaska a chau va, tlânchhiat tumin a lehhawi, Buainain a nangchîng a, lungngaihnain a tlâkbuak ta, Hmeichhe nau vei na tuar ang mai a ni. Khawpui hmingthang, Mi tilâwmtu chu a chhe zo ta. Chuta tlangvâlte chu kawtthlêrah an tlu ang a, Chumi ni chuan sipaite pawh an boral vek ang, Tih hi Engkim Lalpa thuchhuak a ni. Damaska kulh bang ka hâl ang a, An lal Ben-hadada inte a kâng vek ang. Kedar leh Hazor ram, Babulon lal Nebukadnezaran a rûn thu: Lalpa chuan heti hian a ti: “Tho la, Kedar mite bei la, Khawchhak mite tiboral vek rawh. An puan in te, an ran rual te lâksak la, An puanzâr te, an bungrua te, An sanghâwngsei te nên la bo vek rawh. ‘Kil tinah râl a ṭi,’ tiin mite chu an au vang. Hazor mite u, tlân sawk sawk ula, pûkahte tawm rawh u,” Tih hi Lalpa thuchhuak a ni. “Babulon lal Nebukadnezaran a phiar che u a, Tihchhiat che u a tum a ni. Tho ula, râlmuang tak leh him taka awm ṭhîn, kulh kawngkhâr leh a kalhna pawh nei lo, Awm hle hle ṭhîn hnamte chu Bei rawh u,” Lalpa thuchhuak chuan a ti. “An sanghâwngseite râlin an man ang a, An ranrual pawh an kawisak ang a, Lumêthote chu kil tinah ka tidarh ang. Kil tin aṭangin an chhiatna tûr ka thlentîr dâwn,” Tih hi Lalpa thuchhuak a ni. Hazor chu sihalte tualchaina hmun a ni ang a, A ram kumkhua ang. Tah chuan tu mah an chêng tawh lo vang a, Tu mah an awm leh tawh lo vang. Judai rama Zedekia a lal ṭan tirha Elam chungchânga Lalpa thu, zâwlnei Jeremia hnêna lo thleng chu. Engkim Lalpa chuan heti hian a ti: “Ngai teh, Elam thalngul, an chakna thahrui ngei chu, ka titliak dâwn. Kâwlkil li ata thli pali, Elam bei tûrin ka rawn tîr ang. Kil tinah ka tidarh ang a, Elam mi darhte chu an kal lohna ram rêng a awm lo vang. An hmêlma, anmahni thah tumtute hmaah chuan Elam mite chu ka tizâm ang a, thinur takin an chungah thil ṭha lo ka thlentîr ang,” Lalpa thuchhuak chuan a ti. “Ka tihral vek hma chu khandaihin ka ûm zêl ang. An lalte leh hotute ka tiboral ang a, Elam-ah chuan ka lalṭhutthlêng ka hûng ang,” tih hi Lalpa thuchhuak a ni. “Mahse, ni hnuhnûngahte chuan Elam chu ka din thar leh ang a, ka siam ṭha leh ang,” tih hi Lalpa thuchhuak a ni. Babulon chungchâng leh Kaldai mite chungchâng, Zâwlnei Jeremia hmanga Lalpa sawi chu: Hnamte hnênah hril ula, puang rawh u, Puanzâr târ ula, puang rawh u, eng mah zêp suh u, ‘Babulon chu a tlâwm ta, An pathian Bela chu a mualpho va, Marduka chu a zâm a, An pathian limte a mualpho, An milemte a chhe zo ta,’ tiin. Ani chu hmâr lama hnam Pakhatin a rawn bei ang a, A ram chu a rawn tichhe vek ang. Tu mah an chêng tawh lo vang a, Mihring leh ramsa an tlân bo vek ang. A hun leh ni a lo thlen chuan Israel mite leh Juda mite chu an lo kal ho vang a, ṭap chungin Lalpa an Pathian an rawn zawng ang. Zion kawng an zâwt ang a, a lam an pan ang. ‘Hawh u, kumkhaw thuthlung, theihnghilh tawh loh tûr chu Lalpa nên i thlung ang u,’ an ti ang. Ka mite chu berâm bo ang an ni, an vêngtuten an hruai bo va, tlângahte an vâkvai a, tlâng leh mual dungte zawhin an huang pawh an hre tawh lo. A hmu apiangin an ei zêl a, an hmêlmate chuan, ‘Thil kan tisual hlei nêm, Lalpa, anmahni vêngtu dik tak, an thlahtute innghahna Lalpa lakah chuan thil an tisual a ni zâwk,’ an ti a. “Babulon khua tlânchhuahsan ula, Kaldai ram chu chhuahsan rawh u. A rual zînga kêlchal angin hma hruai rawh u. Ngai teh u, Babulon rawn bei tûrin hmâr lam ata hnam ropui tak pung khâwm chu ka chawktho vang a, amah chu do tûrin an insingsa ang. Chûng mite chuan an rawn hneh ang a, an thalte chu, râltuk thiam tak hlawhchham ngai lo ang a ni ang. Tichuan, Kaldai-ho chu an rawk ang a, a rawktute chu an hlawhtling hle ang,” tih hi Lalpa thuchhuak a ni. Nang ka hnam thlan rawktu, i hlimin i lâwm hle na a, Bâwngla, hnimno zînga tla melh melh ang leh, Sakawrpa hrâm nghur nghur ang hi ni mah la, I nu chu a zak hle ang a, Hringtu che chu a kun tlawk tlawk ang. Ngai teh, hnamte zîngah a tê ber ang a, Thlalêr ramro ang a ni ang. Lalpa thinurna avângin tu mah an awm lo vang a, A ram vek ang, Babulon-a kal tlang apiangin mak an ti ang a, A chhiat nasat avângin an chek tlawk tlawk ang. Thal kâp mi zawng zawngte u, Babulon hual rawh u, Kâp ula, in thalte ren suh u, Lalpa lakah an sual si a. Kil tin aṭangin au khum ula: a inpe ta! A kulhte a chim a, a bangte a sawp ta, Lalpa chuan phuba a la a ni. Nangni pawhin phuba la ula, A tih angin a chungah ti ve rawh u, Buh chi thehtu chu Babulon ata la bo ula, Buh seng laia favah kengtu nên chuan, Mi nunrâwng khandaih hlauvin Mi tinin mahni mite pan sela, Mahni ramah tlân ṭheuh rawh se. Israel chu berâm rual, sakeibaknei ûm darh ang hi a ni. Asuria lalin a han ei phawt a, Babulon lal Nebukadnezaran a ruh a ṭhei sawm a. Chuvângin, Engkim Lalpa, Israel-te Pathian chuan heti hian a ti: ‘Ngai teh, Asuria ram ka hrem angin Babulon lal leh a ram chu ka hrem dâwn. Israel chu a chênna ramah ka hruai kîr ang a, Karmel leh Basan-ah an tân ei tûr a tam ang a, Efraim tlâng leh Gilead thlaite chu duh tâwkin an tlân ang. A hun leh ni a lo thlen chuan Israel-te bawhchhiatna hmuh tumin an zawng ang a, an hmu lo vang; Juda-te sualna pawh hmuh tûr a awm tawh lo vang. Ka mi zuah, la dam chhunte chu, ka ngaidam dâwn si a,’ tih hi Lalpa thuchhuak a ni. “Merathaim ram leh Pekod mite chu bei rawh u, That ula, tiboral vek rawh u. Thu ka pêk che u ang zêlin ti ang che u,” Tih hi Lalpa thuchhuak a ni. Chu ramah chuan indo thâwm a awm, Chhiatna nasa tak thâwm chu. Khawvêl pum pui tidarhtu tuboh chu, a phel a, a kehdarh ta, Babulon chan chu hnamte chuan râpthlâk an ti. Aw Babulon, i awh nân thang ka kam a, i âwk ta a, Chu chu i hre si lo, Lalpa i dodâl hi an hre chhuak che a, An man ta che a nih hi. Lalpa chuan a râlthuam bâwm a hawng a, A thinurna hriamhrei a la chhuak ta. Lalpa, Engkim Lalpa chuan Kaldai ramah Thil tih tûr a nei a ni. Kil tin aṭanga bei tûrin lo kal rawh u, A thil dah khâwmna hawng ula, Buhpâwl angin tiang khâwm ula, tichhe vek rawh u, Eng mah rêng zuah suh u. A sipaite chu tihlum vek rawh u, An chung a va pik êm! An ni a thleng ta si, Hrem an tuar hun chu. Chu! Babulon ram aṭanga Tempul tichhetute chungah kan Pathian, Lalpa chuan phuba a lâk tâk thu Zion-ah an puan tâk chu! ‘Babulon bei tûrin thal kâp mi, thal kâp thiam zawng zawng ko khâwm ula, tu mah chhuak thei lo tûrin hual tlat rawh u. A thil lo tih tawh ang zêlin thungrûl ula, a tih ang chiahin a chungah ti ang che u, Lalpa, Israel Mi Thianghlima chu an pawisak loh avângin. Chuvângin, an tlangvâlte chu kawtthlêrah an tlu ang a, an sipaite pawh chumi ni chuan an boral vek ang,’ tih hi Lalpa thuchhuak a ni. ‘Ngai teh, chapopa, ka ngaithei lo che a ni,’ Tih hi Lalpa thuchhuak a ni. I ni a lo thleng ta, hrem i tuar hun chu, Mi chapo chu a pai ang a, a tlu ang, Tu man an kaitho lo vang, A khawpuite ka hâl ang a, A vêla awm zawng zawng a kâng vek ang. Engkim Lalpa chuan heti hian a ti: “Israel-te leh Juda-te chu hnehchhiahin an awm a, mantuten an chelh tlat a, an thlah duh lo. An tlantu erawh chu mi chak tak, a hming Engkim Lalpa a ni. Ani chuan a ṭan tlat ang a, leiah remna a lêntîr ang a, Babulon mite chungah erawh chuan buaina a thlentîr ang. ‘Kaldai mite chungah khandaih a lêng e, Babulon mite, an hruaitu te, an mi fing te chungah nên,’ Tih hi Lalpa thuchhuak a ni. Zâwlnei derte chungah khandaih a lêng e, An lo va â tak êm! A sipaite chungah khandaih a thleng a, An va han hlau tak êm! An sakawr leh tawlailîrte chungah pawh khandaih a lêng, Hnam dang sipai an rawihte chungah pawh Hmeichhia ang mai an ni ta, An sum leh pai chungah pawh khandaih a thleng, Rawk an tâwk dâwn a ni. Khua a khêng a, tuite a kang zo ta, Milim tamna ram, milem âtchilhtute an ni si a. Chuvângin, thlalêr sanghar leh chinghniate chutah chuan an chêng ang a, vanghâwngseite pawh an awm ang a, tu man an luah lo vang a, tu mah rêng an awm tawh lo vang. Pathianin Sodom te, Gomora te leh a chhehvêl khua te a tiram ang khân, chutah chuan tu mah an awm lo vang a, mi tu mah an chêng tawh hek lo vang. Ngai teh, hmâr lam aṭangin mi an lo kal, Hnam chak tak leh lal tam tak, kâwlkil ata lo thawkte chu! Thal leh fei an keng a, nunrâwng tak, lainatna nei lo an ni, An thâwm chu tuipui ri hum hum ang a ni, An sakawr chungahte an rawn chuang. Mite chu inrâlring sa vekin an lo kal, Aw Babulon mite u, an bei dâwn a che u. Babulon lalin an chanchin a lo hriatin A kut a zâwi a, hmeichhe nau vei angin Natna leh manganna chuan a man ta. Ngai teh, Jordan ngawa sakeibakneiin phûla berâm tla a ṭhâwng thut angin vawilehkhatah anni chu an ram ata ka ûm chhuak ang a; tichuan, an chunga thunei tûr ka duh duh ka dah ang. Kei ang hi tu nge awma, tu nge mi cho ngam le? Mi khing ngam berâmpu tu nge awm ang? Chutichuan, Lalpa thiltum, Babulon mite chunga a tih tum leh Kaldai mite chunga hlen a tum chu ngaithla rawh u; ran notête chu a hnûk bo vang a, anmahni angin an tlatna hmunte chu a ṭiau vek ang. Babulon an lâk thâwmah lei hi a nghîng ang a, an ṭap thâwm chu hnamte chuan an hria ang. Lalpa chuan heti hian a ti: “Babulon chungah leh Kaldai mite chungah thlichhia ka tlehtîr dâwn. Anmahni zâp bova, an ram tiruak vek tûr hnam dangte Babulon-ah chuan ka tîr ang. Chhiatniah chuan kil tin aṭangin an rawn bei ang, Thal kâptuin a thalngul kuai hman lovin A thir kawr pawh ha hman hek suh se. Tlangvâlte zuah sú, sipaite pawh tiboral vek rawh u. An ramah ngei Kaldai mite chu an that phung ang a, Kawtthlêrahte pawh râpthlâk takin an vit hlum ang. An ram chu Israel Mi Thianghlima hmaah lo sual hle ṭhîn mah se, An Pathian, Engkim Lalpa chuan Israel leh Juda-te chu a thlahthlam ngai lo. Babulon tlân chhuahsan rú, in him theih nân tlân rawh u, An suahsualna avângin boral ve suh u. Lalpa phuba lâk hun a thleng ta a, An phu tâwkin a thungrûl dâwn si a. Babulon chu Lalpa kuta rangkachak no a ni, Lei pum pui a tirui a, Hnamten a uain an in a, an â zo ta. Babulon chu a tlu thut ang a, a kehsawm vek ang, Ṭah vak vak rawh u, A hliamah thinghnai damdawi hnawih ula, A lo dam mial mahna. Babulon chu tihdam ka tum a, a dam thei si lo, Ani chu hnuchhawn ila, mahni ram ṭheuh i pan ang u, A thiam lohnain vân a tawng a, chhûm anga sâng a ni. Lalpa chuan kan dikzia a târlang ta a, ‘Lo kal ula, kan Pathian Lalpa thiltih hi, Zion-ah i hril ang u! Thalte tât hriam ula, phawte chuh rawh u, Lalpa chuan Media lalte a chawk tho va, Babulon tihchhiat a tum ta a ni. Lalpa chuan phuba a la dâwn, a Tempul phuba chu. Babulon kulh bang epah puanzâr zâr rawh u, Vêngtu pawh chah belh ula, enthlatu dah ula, Chân rûkna siam rawh u. Lalpa chuan a thiltum a hlen dâwn, Babulon mite chunga a lo sawi tawh chu. Nang, tui tam tak hmuna cheng, sum leh pai ngah êm êm, I tâwpna a lo thleng ta, i hun a liam ta e.” Engkim Lalpa chuan a hming chhâlin heti hian a ti: “Khau rual anga tam mipui ka rawn hruai lût ang a, Hnehna hla an sak khum ang che.” A thiltihtheihnain lei a siam a, A finnain khawvêl a din, A hriatnain vân a kai pharh ta. Thu a pe a, tuite chu a ri hum hum a, Kâwlkil aṭangin chhûm a chhohtîr a, Ruah leh kâwlphe a siam a, A hmun aṭangin thli a tlehtîr ṭhîn. Mi tin an mâwl a, hriatna reng an nei lo, Rangkachak chhertuten an milem an zahpui ang a, An milem chhûnte chu a lem, nunna nei lo an ni si a. Hlutna nei lo, hmuhsitawm mai an ni, Hrem an nih hun chuan an boral vek ang. Jakoba Pathian chu hêng ang hi a ni ve lo, Ani zawng engkim siamtu a ni, Israel pawh a rochan hnam an ni, a hming chu Engkim Lalpa a ni. “Nang hi ka hreipui, indona hriamhrei i ni, Nangmah hmangin hnamte ka tidarh ang a, Nangmah hmangin lalramte ka tichhia ang. Nangmah hmangin sakawr leh a chungchuang ka tidarh ang a, Nangmah hmangin tawlailîr leh a chungchuang ka tichhia ang. Nangmah hmangin mipa leh hmeichhia ka that ang a, Nangmah hmangin putarte leh ṭhalaite ka tihlum ang a, Nangmah hmangin nula leh tlangval ka that ang. Nangmah hmangin berâmte leh a pute ka that ang a, Nangmah hmangin loneitu leh an bâwng chhawrte ka tihlum ang a, Nangmah hmangin ramawptute leh hotute ka tiboral ang. Zion chunga an thil tihsual tâkte chu, in hmuh ngeiah Babulon leh a chhûnga Kaldai mite chungah Ka thungrûl dâwn,” Tih hi Lalpa thuchhuak a ni. “Nang, khawvêl tichhetu tlâng lian, ka ngaithei lo che a ni,” Tih hi Lalpa thuchhuak a ni. “Bei tûr chein i chungah ka kut ka lek ta, Khâmah ka nam lum ang chia, Tlâng kâng ût kawlh angin ka siam ang che. I hnên ata a kil lung tûr leh a lungphum tûr, Lâk a ni lo vang, Kumkhuain i ram hlen tawh ang,” Tih hi Lalpa thuchhuak a ni. Chu ramah chuan puanzâr zâr ula, Hnamte hriat tûrin tawtawrâwt hâm rawh u, Anni chu do tûrin hnamte chu inbuatsaihtîr ula, Bei tûrin Ararat te, Mini te, Askana ram te ko ula, An hotu tûr ruat bawk ula, Khau puang anga tam sakawr man khâwm rawh u. Babulon bei tûrin hnamte chu inbuatsaihtîr rawh u, Media lalte, ramawptute, an hruaitute, An ram awp zawng zawng te nên. Chu ram chu na tuarin a khûr hlawk hlawk a, Babulon ram tichhiaa, luahtu awm lova siam hi Babulon chunga Lalpa thiltum, a hlen mêk chu a ni. Babulon mi huaisente an râlbâng ta, kulh chhûngah an tawm tlat a, An dawih zo ta, hmeichhia ang mai an ni. An in te a kâng zo va, Kulh kawngkhâr kalhnate a bung zo ta, ‘Babulon khawpui chu kil tin aṭangin an la ta,’ Tih thu hrilh tûrin lal hnênah Zualko an tlân zut zut mai. Luikaite an la a, lui kam phairuangte an hâl fai, Sipaite chu an zâm zo ta. Engkim Lalpa, Israel-te Pathian chuan heti hian a ti: “Babulon mite chu hruihzâwla buh chîl ang hi an ni ang, Rei lo têah chîl hrep an ni dâwn. Babulon lal Nebukadnezaran mi ei zo ta, Bêl ruak ang mai ka ni. Rûlpui angin min dawlh a, ka sa tui tui eiin a intipuar a, Tichuan, mi chhâk chhuak leh ta a ni. Zion-a awmte chuan, ‘Min sawisak angin Babulon chu sawisak nek ni rawh se,’ ti sela, Jerusalem-a awmte pawhin, ‘Kan thisen mawh chu, Kaldai-hovin phur rawh se,’ ti teh se.” Lalpa chuan heti hian a ti: “Ngai rawh, i lamah ka ṭang ang a, phuba ka laksak ang che Luipui chu ka ti kang ang a, a tuikhurte chu ka tikang vek ang. Babulon chu thil chhe vawm khâwm, sihalte tualchaina, Mite hmuhsit leh endawng, Mi rêng rêng awm tawh lohnaah ka chantîr ang A mite chu sakeibaknei vânglai angin an rûm ang a, Sakeibaknei note angin an hrâm bawk ang. An râwp lai takin ruai ka buatsaihsak ang a, Ka hrai rui hnêp ang. An sa bual bual ang a, an muhîl hlen ang a, An harh leh tawh lo vang,” Tih hi Lalpa thuchhuak a ni. “Ran talhna hmuna berâmpa leh kêlpa talh tûr angin Anni chu ka hruai chhuak ang. Sesak chu man a ni ta, Lei pum pui chawimawi ṭhin chu a tlâwm ta. Hnam tinin Babulon chan chu rapthlâk an ti. Babulon chu tuipuiin a chîm ang a, A fâwn nasa tak chuan a khuh vek ang. A khawpuite chu a ram vek ang a, Thlalêr, mihring rêng awm lohna, Tu ma tlawh loh ram a ni ang. Babulon pathian Bela chu ka hrem dâwn, A dawlh tawh chu ka luak chhuahtîr ang a, Hnamte chuan an bêl tawh lo vang a, Babulon kulh bangte pawh a chim ang. Ka mite u, a chhûng ata lo chhuak rawh u, Lalpa thinur nasa tak laka in him nân tlân chhuak rawh u. Ram chhûnga thuthang in hriat hunah Zâm suh ula, hlau hek suh u, Kuminah thuthang pakhat a awm a, Kum lehah a dang. Ram chhûngah inpâwngnêkna thu a thang vêl, Rorêltu leh rorêltu insual thâwm chu. Ngai teh, nite a lo thleng ngei dâwn, Babulon milem ka hrem ni leh a ram pum pui mualpho ni chu, Mi ṭhate chu an tlu phung ang. Hmâr lam aṭangin tichhetuin Babulon chu a rawn tihchhiat hunah, Lei leh vân leh a chhûnga awm zawng zawng lâwmin an au vang,” Tih hi Lalpa thuchhuak a ni. Israel-te a thah chiam avângin Babulon chu a tlu ngei ang, Khawvel pum puia mi tam tak thihna thlentu a ni si a. Nangni khandaih pumpelhtute u, kal ula, ding suh u, Hla takah pawh Lalpa hre reng ula, Jerusalem theihnghilh suh u. Kan mualpho ta, min hmuhsitzia kan hriatin zahthlâk kan ti, Lalpa ina hmun thianghlimahte hnam dang an luh tâk hi. “Ngai teh, nite a lo thleng e,” Tih hi Lalpa thuchhuak a ni. “An milemte ka sawisa ang a, ram pum puiah Hliam tuar an rûm chuah chuah ang. Babulon chu vân tawngin sâng mah se, a kulhte pawh sâng hle mah sela, Tichhetu tûr a hnênah ka tîr ang,” Tih hi Lalpa thuchhuak a ni. Babulon aṭanga ṭap thâwm leh Kaldai ram aṭanga chhiatna nasa tak thâwm chu Ngaithla rawh u. Lalpa chuan Babulon a tiboral dâwn, An thâwm ri mur mur chu a tireh ang a. An thâwm chu tuifâwn ri hum hum ang hi a ni, An au chu a khâwk rum rum mai. Tichhetu chu Babulon-ah a lo kal ang a, An mi huaisente chu a man ang, An thalngulte chu a titliak vek ang a, Lalpa chu thungrûl ṭhîntu Pathian a ni. A thungrûl ngei ngei ang. “An hotute leh mi fing te, a ramawptu te chu, An hruaitute leh mi huaisente nên Ka hrai rui vek ang a, An muhîl hlen ang a, an harh leh tawh lo vang,” A hming Engkim Lalpa chuan a ti. Engkim Lalpa chuan heti hian a ti: “Babulon lal kulh bang chhah tak chu a chim vek ang a, A kawngka sâng takte pawh a kâng ral vek ang. Mipui thawhrimna chu a thlâwn a, Hnamte pawh kâng ral leh mai tûr atân an buai. Juda lal Zedekia lal kum linaa Babulon-a a kal laiin a hnêna kal ve, Seraia, Neria fapa, Maaseia tupa hnêna zâwlnei Jeremia thupêk chu: Seraia chu lal chhungkaw enkawltu a ni. Jeremia chuan Babulon chunga chhiatna lo thleng tûr zawng zawng leh Babulon chungchâng lehkhabu-ah a ziak a. Jeremia chuan Seraia hnenah, “Babulon i thlen hunah hêng thu zawng zawng hi chhiar chhuak ang che. Hetiangin sawi ang che, ‘Aw Lalpa, he hnam hi tihchhiat i tum thu i lo sawi tawh a; chuvângin, tu mah, mihring leh ramsa pawh, a chhûngah an chêng tawh lo vang a, kumkhuain a ram dêr tawh ang,’ ti ang che. He lehkhabu hi i chhiar chhuah zawhah, lungtum nên ṭâwn belhbawm la, Eufretis luiah paih ang che. ‘Babulon chu hetiang hian a pil ang a, a tho leh tawh lo vang. A chunga chhiatna ka thlentîr avângin a tlu dêr ang,’ tiin sawi rawh,” a ti a. Hei zawng hi Jeremia thute chu a ni. Kum sawmhnih leh pakhat a nihin Zedekia chu a lal ṭan a, Jerusalem-ah kum sâwm leh pakhat ro a rêl a. A nu hming chu Hamutali a ni, Libna khaw mi Jeremia fanu a ni. Jehoiakima angin Lalpa mit hmuhin thil sual a ti a. Lalpa a thinur avângin hêng thilte hi Jerusalem leh Judai ram chungah a lo thleng ta a, a hma ata anni chu a paih chhuak ta nge nge a ni. Tichuan, Zedekia chu Babulon lal chungah a hel ta a, Zedekia lal kum kuana, a thla sâwmna, ni sâwm ni chuan Babulon lal Nebukadnezara chu, a sipai zawng zawng nên Jerusalem bei tûrin a lo thawk a. Khawpui chu an hual a, a vêlah ṭanhmun an khuar a. Zedekia lal kum sâwm leh pakhatna thlengin khawpui chu an hual a. Ṭâm chu a na ta hle a; thla lina, ni kua ni chuan ei tûr an nei ta lo va. Khawpui hungna bang chu an tipawp a, sipai pâwlho chu an tlânchhe ta a. Kaldai miten khawpui chu an hual chungin lal huan kiang bang pahnih inkâr kawngah an kal a. Mahse, Kaldai sipaite chuan an ûm a, Zedekia chu Jeriko phaiah an ûm phâk a, a sipai zawng zawng chuan an tlânsan a. Tichuan, ani chu an man a, Hamath rama Ribla khuaah Babulon lal hnênah an hruai a, ani chuan a chungthu a lo rêl a. Ribla khuaah chuan Babulon lal chuan a fate chu Zedekia hmuh lai ngeiin a thahsak a. Zedekia pawh a mitmu a kher chhuahsak a, thîr kawl a buntîr a, Babulon-ah a hruai chho va, a thih ni thlengin lung inah a tântîr a. Babulon lal Nebukadnezara a lal kum sâwm leh pakuana, thla ngana, ni sâwm ni chuan lal vêngtu pâwl hotu Nebuzaradana, Babulon lal kianga ding ṭhîn chu Jerusalem-ah a lo lût a. Lalpa in leh lal in a hâl a, Jerusalem-a in zawng zawng, in pawimawh dang zawng zawng nên a hâl chhe vek a. Kaldai sipai rual, lal vêngtu pâwl hotu hnuaia mite chuan Jerusalem hungna kulhte chu an tichhe vek a. Lal vêngtu pâwl hotu, Nebuzaradana chuan mipui rethei tak tak, khawpuia hnutchhiah te, Babulon lal kuta inpeho te, kut themthiam la awm zawng zawngte nên salah a hruai a. Lal vêngtu pâwl hotu Nebuzaradana chuan ram chhûng mi retheiho ṭhenkhat chu grep huan leh lo lama hnathawk atân a hnutchhiah a. Kaldai mite chuan Lalpa ina dâr ban te, a nghahchhan te, Lalpa ina dâr tuizêm te an tikeh vek a. Dâr zawng zawng chu Babulon-ah an phur chho va. Bêl te, vutlawh te, khâwnvâr tihmihna te, maihûn te, rimtui hâlna berhbute leh dâr bungrua zawng zawng chu an la vek a. Lal in vêngtu hotu chuan maihûn te, berhbu te, thlêng te, bêl te, khâwnvâr dahna te, thîrfian te, in tûr thilhlan dahna te, rangkachak leh tangkaruaa siam te chu a la vek a. Lalpa in atâna Lal Solomona siam - dâr ban pahnih, tuizêm pakhat leh a hûnna dâra siam, bâwngpa sâwm leh pahnih leh bungbêl dang dâra siam zawng zawng chu bûk sên rual a ni lo. Bante chu tawng sâwm leh pariata sâng a ni, a len lam tawng sâwm leh pahnih bial a ni. A lai a kawrawng a, a chhah lam chu zungza bêng a ni. A ban hmawrah chuan lu bâwk tawng ngaa sâng a awm, a vêl chuan dâr leh theibuhfaia chei mawi vek a ni. Ban pahnihna pawh chu theibuhfaia chei bawk a ni. A pangah chuan theibuhfai sawmkua leh pahnih lai a awm a. A vêla chei mawina theibuhfai zawng zawng chu za zet a ni. Lal vêngtu pâwl hotu chuan puithiam lal ber Seraia te, a puitu puithiam Zefania te leh kawngkhâr vêngtu pathum chu a man a. Indo mite, hotute leh lal khâwnbâwl ṭhîn mi pasarih, khawpuia la awm a hmuhte chu a man a; ram chhûnga sipai latu hotu lal ber leh chumi rama mi sawmruk, khawpuia awmte chu a hruai bawk a. Vêngtu hotu Nebuzaradana chuan an vaiin a man a, Ribla khuaa Babulon lal hnênah a rawn hruai a. Babulon lal chuan Hamat ram Ribla khuaah chuan anni chu a sawisa a, a tihlum a. Tichuan, Juda mite chu an ram ata sala hruai an ni ta a. Nebukadnezaran sala a hruai mipui zât chu hei hi a ni: kum sarihnaah Juda mi sângthum leh sawmhnih leh pathum a hruai a. Nebukadnezara lal kum sâwm leh pariatnaah Jerusalem aṭangin mi zariat leh sawmthum leh pahnih a hruai leh a. Kum sawmhnih leh pathumnaah vêngtu pâwl hotu Nebuzaradana chuan Juda mi zasarih leh sawmli leh panga a hruai leh a, an vaiin sângli leh zaruk an ni. Juda lal Jehoiakina chu kum sâwm thum leh pasarih sala a tân hnuin Evil-merodaka chu Babulon-ah a lo lal a. Chumi kum thla sâwm leh pahnihna, ni sawmhnih leh panga ni chuan Juda lal Jehoiakina chu lung in ata a chhuah a, zalên takin a awmtîr ta a. Ani chu a tiṭha hle a, Babulon-a a hnêna awm ve lal dangte aia dinhmun ṭha zâwkin a siam a. Tichuan, tân in kawrte chu a hlîp a, a dam chhûng zawng lal hnênah a eiin a in ṭhîn. A ni tin mamawh chu Babulon lal chuan a pe a, chutiangin a dam chhûng zawng, a thih thlengin, ṭha takin a enkawl a. E khai! Khaw lûn tak ni ṭhîn chu A va chul ta teh ruai êm! Hnam tin ngaihsân ni ṭhîn chu Hmeithai ang a ni ta. Khaw ropui tak ni ṭhîn chu Chhiah khua a chang ta e. Zânahte pawh a ṭap tlawk tlawk a, A biangah mittui a luang nguah nguah, Amah ngaina ṭhîntu, thlamuantu rêng a nei lo ve, A ṭhiante chuan an bum, Hmêlma an chang zo ta. Judai ram mite chu hrehawm tuarin salah an tâng, Hnam dang zîngah an awm darh a, Hahchawlhna rêng an hmu zo lo. Ûmtute chuan an nangchîng a, an chêp ta hle a ni. Zion panna kawng chu a ṭhing ṭhuap a, Kût hmang tûr pawh an awm ta lo. Kawngkhârte chu a chhe zo va, A hlui ṭhuap mai a ni. Zai thiam nulate chu an chau zo va, Puithiamte pawh an rûm an rûm mai e. Hmêlmate chu hotu-ah an chang a, An thaw a veng kher mai. An sual êm vângin Lalpan a hrem a ni, Hmêlmate chuan an fanaute salah an kawisak ta. Zion ropuina chu a chuai zo ta, An hotute pawh chu sazuk ûm nek Ṭâmchhâwl chau hnêp ang mai an ni. Jerusalem chuan hrehawm mangan a tuar hnuin, A hmânlai ropuina a hre chhuak a, Hmêlmaten an rawn lâk lai khân, Puitu rêng a nei lo. A chan chhe ta êm chu hmêlmaten an diriam e. Jerusalem chuan thil sual a ti nasa êm a, A bawlhhlawh ta a ni. Ngaisâng ṭhîntute chuan an hmusit a, A saruak an hmuhsak avângin Zakin a rûm a, lehlam a hawi. A bawlhhlawhna, a pawnfêna kai chu Thup tumna pawh a nei thei lo. A chhiat dân chu a râpthlâk êm êm a, Thlamuantu rêng an awm lo ve. “En teh, Lalpa, kan chan chhiatzia hi, Hmêlmate an dinchan tâk hi,” A thil ṭha neih hmêlmaten an suam a, Hnam dang kal phal lohna Hmun Thianghlima an lût a thlîr reng mai. Ei tûr zawngin mite chu an rûm a, Intunnun nân an thil ṭha neihte chuan ei tûr an lei. “ Lalpa, kan nêpzia hi, en teh,” an ti. Veivâkte hnênah chuan, “En teh u, Ka tuar anga tuar nasa hi awm ve maw, Lalpa thinurna ni a thleng a, ka tuar a nih hi. Vânsâng aṭangin mei a rawn thlâk a, Min kâng ta a, min titlâwm ta a ni. Ka awh nân thang a kam a, A letlingin min khai, Awm ngaihna hre lovin ka chau nilêng. Ka sual a ṭâwn khâwm a, amah ngeiin min awrhtîr a, A nghâwngkawl chu min bahtîr a, a rit êm a, ka chau zo ta. Lalpan hmêlma kutah min hlân ta a ni, Ka tluk lohte kutah chuan. Kan zînga mi huaite Lalpan a thamlo hle, Min bei tûrin sipai tam tak a ko khâwm a, Kan tlangvâlte tihlum tûr leh Sâwrkhura grep rah sâwr anga, Kan nulate rap sâwr tûrin. Chuvâng alâwm ka ṭah chiama, Ka mittui pawh a luan zung zung, Min thlamuan tûr an darh zo va, Min tiharh tûr an awm hek lo. Hmêlmate chu an chak tâk avângin ka fate chu an hawihai ta. Zion chuan bân a phar vêl a, Thlamuantu rêng a hmu zo lo, Jakoba chu Lalpan a vêla mite a huattîr a, Jerusalem chu bawlhhlawh angin an ten a ni. Lalpa zawng a dik a, a thu ka awih lo zâwk a ni, Mi tinrêngin ka thu hi ngaithla teh u, Ka tuar nasatzia en teh mah u, Kan nula leh tlangvâlte chu salah an tân tâk hi. Min hmangaih ṭhîntute ka han au va, Min lo bum reng alâwm, Intihharh nân ei tûr an zawng lai chu, Puithiamte leh kan upate tualah an tlu hlum e. Lalpa, ka tuar dân hi en teh, Ka sa huai huai a, lung lêm ka nei thei lo. Ka sual vâng a ni e, pawi ka va han ti êm! Khandaih avângin tualah lusûn an pung. In chhûngah hripui a lêng. Ka rûm thâwm hi ngaithla teh u, Thlamuantu rêng ka nei lo ve, Min tuartîr a ni tih ka hmêlmaten An han hriat chuan an lâwm êm êm, I hun tiam chu han thlentîr la, Keimah ang hian tuar ve rawh se. An thil sual tihte chu hmu ve tawh la, Ka sual vânga min hrem ang hian hrem ve ang che, Hrehawm tuarin ka chauh hnêp hi.” E khai! Lalpa thinurin Zion khua chu thimin a khuh tâk hi. Israel ropuina chu vân aṭangin leiah a paih thla a, A thinur ni-ah chuan a ke nghahchhan A theihnghilh ta a ni. Lalpa chuan dîm lo tawpin Judai ram khuate chu a tichhia a, A thinur a, an kulhte chu a tichim bawk. An ram leh an hotute a titlâwm ta. A thinur so sâin Israel chakna chu a tichhia a, Hmêlma an lo kalin a pui duh lo, A vêl kâng fai vek ṭhîn meialh angin Jakoba chungah chuan a thinur chu a alh tâk hi. Hmêlma angin a thal chuan a kâp a, An enchim loh fanaute chu a thah zawhsak. Zion khuaa inahte chuan a thinur mei a leih tâk hi. Lalpa chu hmêlma ang mai a ni, Israel-te a lem zo va, An kulhte leh an in ropuite a tichhia a, Judai ram chhûngah lusûn rûnpui a thlentîr ta. Huana bûk ram angin inkhâwmna inte chu a tiram zo ta a, Zion-ah chuan inkhâwmpui te, sabat serh te, An titâwp ta vek a, A thinur avângin lal leh puithiamte chu a hnâwl. A maichâm chu Lalpan a rauhsan a, A Hmun Thianghlim a hawisan ta. A bangte chu hmêlma a ṭhiattîr a, Hlim taka kûtpui an hman ṭhinnaah khân, Hmêlma an haw haw dur dur mai. Lalpan Zion kulh chu tihchhiat a tum tlat a, A chhe tûr chin a rîn fel a, A kut thlâk chu a na ngei mai, In sângte leh kulh bangte chu a chim rem rum. A kawngkhârte thil chhe hnawkin a chhilh zo va, A kalhna thîr tlâwnte a bung rum mai. Lal leh miliante chu salah an tâng, Dân lah an inzirtîr tawh lo, Zâwlneite pawhin Lalpa inlârna rêng an dawng hek lo. Zion khaw upate chu leiah ngawi rengin an ṭhu a, An lu vaivut phulin saiip an sin a, Jerusalem nulate chu leiah an kûn. Ka mittui avângin ka meng phe ruai a ni, Ka mite chan chau chu ka lainat êm êm a, ka lung a chhia a ni. Naupangte leh nausênte chu Tual zau laiah an thidang e. Rilṭâm leh tuihâlin an nute hmaah an ṭap a, Khawlaiah chuan hliam tuar angin an tlu, An nute malchungah an thi. Aw Jerusalem, eng nge ka sawi tâk ang? Nang ang hi tu nge awm? Aw Zion nula, engtin nge ka thlamuan tâk ang che? A hliam tuar chu tuifinriat anga zau a ni a, Tu nge tidam thei ang? Zâwlneite chuan thil ho leh dâwt an hmuhsak che a, I sim theih nân i sualte an tilang ngai lo, Inlârna an hmuhte chu Thil lawilo leh inbumna mai a ni. Aw Jerusalem, i bula kalte chuan Kut bêngin an chek khum che; Lu an thing a, ‘Hei hi maw khaw mawi ber, Khawvêl chhuan chu!’ an ti. I hmêlmaten an nuihzat che a, An faifûk a, an ha an ṭhial khum che, ‘Kan lem zo ta, kan duhthusâm thlen ni Kan hmuh tâk hi,’ an ti. Lalpan a thiltum chu a ti ta a, Hmâna a sawi lâwk daih tawh chu a hlen ta a ni; Dîm hlek lovin a tichhia a, Hmêlmate chuan lâwmin in chungah bawp an khai. Aw Jerusalem, i bangte chuan Lalpa au se, A chhûn a zân i mittui chu luipui ang luang rawh se, Bâng lêk lovin ṭap ṭap mai rawh. Tho la, zankhuain Lalpa au rawh, Lalpa hmaah i thinlung chu tui angin leihbua la, Kawtthlêr tina rilṭâma chau i fate nun nân, Bân phar chungin dîl rawh. Lalpa, heti taka i sawisak tâkte hi, en teh, An fa pawmlaite sa an nuten an ei ang maw? Puithiam leh zâwlneite, Lalpa Hmun Thianghlimah an tualthi tûr em ni? Kawtthlêrahte naupang leh tar an thi phung mai, Nula leh tlangvâl rual khandaihin an thi, I sâm buan e, lainat lovin. Khâwmpui urhsûna kal khâwm angin, I thinur ni-ah chuan, Kil tin ata kan hmêlmate i ko khâwm a, Lalpa thinurna ni pumpelha him rêng kan awm lo, Kan fa pawm lai, kan chawi tleite, Hmêlmaten an that zo. A thinur tianga vuak tuartu ka ni, Ênga kal lovin thimah min hruai. Ni tin a kut ka tuar reng mai. Min tichêr a, ka vuai then mai, Ka ruhte pawh min tihtliahsak. Rilru na leh hrehawmin min tuam a, Thi tawhte angin thimah min awmtîr hi. Khaidiatin min phuar tlat a, Chhuak thei lovin min khung. Ṭanpui dîla ka au a hre duh lo. Ka kalkawngan lung bang a rem tlat a, a tiping zo ta e. Savawm angin min châng ru a, Sakeibaknei biru ang hian. Ka kawngte chu hlîngin a hnawh khat a, Min chhun pem pheng phung mai. A thalngul a kuai a, min tin reng hi. A bâwma thal ka thinhnûnah a bûr, Mi zawng zawngin mi nuihzat a, Ni tinin hla min sak el ṭhîn. Ning hlui khawpin thil khâ min intîr a, Thil hrehawm tak min tuartîr hi. Ṭiau lung min ṭhialtîr a, Vaivutah min tâltîr hrep a ni. Lungmuanga awm ka nei lo va, Nuam ka hre tawh hek lo. Ka tuar ta ngang lo ve, Lalpa lakah ka beisei a bo ta. Ka tuarna leh ka vahvaihna Hriat chhuah hi hrehawm tak a ni. Ka chhui ka chhuiin ka chau hnêp ṭhîn. Hei hi ka hriat chhuahin ka bei a sei leh ṭhîn: Lalpa ngilneihna leh a lainatna chu A chuai ngai lo. A thar zêl ṭhîn tûk tinin; A va rinawm tak êm! Lalpa hi ka neih chhun a ni a, Amahah chuan ka innghat ang. Amah nghâka zawngtute tân Lalpa hi zawng a ṭha a ni. Lalpan min chhandam hun tûr chu Nghah mai a ṭha. Naupan lai ngeia chhel zir a ṭha, Hrehawm hle mah se, ngawi renga Tuar ngat ngat tûr a ni. Kûna dawh mai tûr a ni a, Beidawn tûr a ni lo. Biangah min bêngin min diriam ṭhîn mah se, Dawh mai tûr a ni e. Lalpa chuan min hnâwl hlen dâwn si lo. Min tilungngai na a, ngil a nei êm mai a, Min lainat ṭhîn. Mihring tihlungngaih leh tihnat hi A duhzâwng a ni lo. Saltâng nghaisak chîngte, Chungnungbera hmuha hleih neih te leh Mi chan ai chhuhsak te hi Lalpa huatzâwng tak a ni e. Lalpan thu a pêk loh chuan tu thu nge hlawhtling ang? Chungnungbera kâ aṭang chuan Thu chhia thu ṭha a chhuak dâwn lâwm ni? Kan dam chhûng hian kan sual vânga kan tuarin Phunnawi tûr em kan nih? Kan awm dân hi chhûtin i fiah ang u khai, Lalpa lam i hawi ang u. Vâna Pathian lamah thinlung hawngin I ṭawngṭai zâwk ang u. “Thil sual tiin kan hawisan che a, Nangin min ngaidam lo va ni. Thinur takin min ûm zâwk a, Dîm hlek lovin min tihhlum hi. Chhûm chhah takin i inkhuh a, Kan ṭawngṭaina i hnên a thleng thei lo va ni. Hnam tin zîngah bawlhhlawh vawm khâwma min siam hi. Kan hmêlmaten diriam takin min au khum a, Thil râpthlâk leh hrehawm kan tuar, Chhiatpui kan tawh avângin Ka mittui hi a luang zawih zawih a ni. Bâng lovin ka ṭap ka ṭap mai dâwn, Vân aṭangin Lalpan min rawn bih, min hmuh hma chu, Khawpuia kan fanute tuar ka hmuh chuan Min tilungchhia a ni. Hmêlmate chuan a chhan awm hauh lovin Sava ang ziazângin min veh. A nung chungin khurah min thlâk a, lungin min dêng, Tuiin ka lu a rawn chîm chuan Ka thi dâwn ta emaw ka ti. Khur mawng aṭangin, Lalpa, ka rawn au che a, Ka au thâwm chu I ngaithla a, beng hup lovin ka rûm i lo hria a, Ka han auh tâk che chuan mi rawn hnaih a, ‘Hlau suh,’ mi ti. Lalpa, min rawn chhan a, ka nun i humhim ta. Lalpa, ka tuarna i hmu ta a, ka chungthu hi han rêl fel rawh. Phuba lâk tuma an inrâwn khâwm hi, I hmu reng ṭhîn a ni. Lalpa, min diriam dân hi i hre reng a, Min phiar dânte lamin. Min beitute chu nilêngin Ka chungchâng thu sawiin an phun sur sur, En teh, an ṭhut pawhin an din pawhin Hla min sak el. Lalpa, an thiltih ang zêlin thungrûl ang che. Ânchhia lawh la, beidawng rawh se, Thinrimin ûm nek teh, Lalpa, Vân hnuai ata tiboral rawh.” E Khai, rangkachak chu a thîm ta tlul mai a! Rangkachak ṭha chi chu a va danglam ta êm! Hmun Thianghlim sakna lungte chu Kawtthlêr pêng ṭhuamahte an paih darh ta. Zion tlangvâlte chu Rangkachak ṭha chi ang an ni ṭhîn a, Bêlvawtu hlumbêl ang lek an nih tâk hi! Chinghnia pawhin a no hnute a pe ṭhîn a, Ka mite erawh chu thlalêr vanghâwngsei Nun râwng tak ang hi an ni ta e. An pawm laite tuihâl dangchârin an awm a, An faten ei tûr an ngên a, an pe duh lo. Thil tui tui ei ṭhînte chu tualah an ṭâmchhâwl a, Puan senduk sin ṭhînten bawlhhlawh paih khâwm an hai. Tu ma khawih lohvin Sodom khua a chhe thut a, A mite tuar aiin ka mite tuar a nasa daih a ni. Kan hotute chu vûr aia vâr, Hnutetui anga pâwl phêt, An taksa chu Rubi anga sâr, Safir lung nawh mâm ang ni ṭhîn kha, An hmêlte chu meihawl aiin a dum ta a, Tuala an awm hriat hran rual an ni ta lo, An chêr ṭhiak a, an ro rem a, Thing ro ang mai an ni. Ei tûr hmu lo, châk ngawih ngawih si, Rilṭâma thi tate ai chuan khandaiha thahte chan a ṭha zâwk e. Ka miten chhiatpui an tawh meuh chuan, Nu ngilnei tak takte pawhin An fate hial an chhûm a, an ei ta mai! Lalpan a thinur chu a hrithla ta a ni, Zion-ah chuan a thinur mei a chhuah a, A lungphûm lamin a tichhe zo ta. Lei lalte leh khawvêla mi zawng zawngten Beitu hmêlma Jerusalem khuaah An luh theih rêng an ring ngai lo. Zâwlneite sual vâng leh puithiamte khawloh vâng a ni, Khaw chhûngah chuan mi dik thisen an chhuah si ṭhîn. Mitdel angin tualah an vâk dun dun a, An kawrahte thisen a kai hnuang a, Tu man an khawih thiang lo. Miten, ‘In bawlhhlawh e, kal daih rawh u, Kal bo daih rawh u, min khawih ang e,’ an ti. Hnam tin zîngah an vâkvai a, ‘Hetah an awm kan phal hlei nêm,’ an lo ti zêl. Lalpa a thinur a, a tidarh ta a ni, A ngaihsak tawh hauh lo, Puithiam a duhsak chuang lo va, Kan upate a khawngaih bawk hek lo. Min pui thei lo puih beiseiin Mit tla dâwnin kan thlîr. Min chhan thei lo hnam chu Kan nghâk thlâwn mai a ni. Hmêlmate chuan kan hnu an chhui zêl a, Kawtthlêrah pawh kan lêng ngam lo, Kan ral dâwn ta a ni, Kan ni a liam ta a, kan thi mai dâwn. Vânsâng ata mupui lo bir aiin min ûmtute an chak zâwk a, Tlângahte pawh min ûmzui a, Thlalêrahte min lo tlân khalh. Lalpa hriakthih, kan belh ber chu, An thangah chuan a âwk ta si. ‘Ama hovin hnam dang kârahte pawh, Kan awm ang chu,’ kan lo ti ṭhîn. Uz rama chêngte leh Edom mi leh sate u, In theih lai hian hlim ula, lâwm rawh u, In chungah pawh chhiatna no chu a lo thleng dâwn, In rui ang a, saruakin in awm ang. Zion fanaute chuan in tuar tûr chu in tlâk ta a, Salah in tâng tawh lo vang. Nangni Edom mite erawh chuan in tuar dâwn e, In sualzia hi a thai lang dâwn. Lalpa, kan chunga thil thleng hi hre reng ta che, Min rawn thlîr la, kan mualpho tâkzia hi en teh. Kan rochan ramte chu hnam dangin an nei a, Kan inte pawh ram dang miten an luah. Pa nei lovin kan fahrah a, Kan nute pawh an hmeithai ta. Kan tui ngei chu kan in dâwnin lei a ngai ta a, Kan thing ngei pawh a man kan pe. Bâwng nghâwngkawl min bahtîr a, min khalh nek a, Kan rim hle a, chawlh pawh kan châwl thei lo. Ei tûr kan neih hrâm nân Aigupta leh Asuria kan be tlawn ruai. Kan pate chuan thil sual an ti, an thi tawh a, An sual mawh chu keinin kan phur. Bawihten kan chungah ro an rêl a, An kut ata min chhan chhuak tûr tu mah rêng an awm lo. Thlalêra suamhmang rualin ram an dâp a, Thih huam hiala ei tûr kan dap a ngai. Thuk ang maiin kan pangte a sa a, Ṭâm chu a nat êm vâng a ni. Zion-ah chuan kan nupuite an pâwngsual a, Judai rama nulate pawh an tlâwm. Kan hotute banah an khai a, Upa hmêl lah an zah chuang lo. Tlangvâlte chu buhherkhâwlah an chhawr, Naupangte lah thing têl puin an pai chawn chawn. Upate chu kulhkawngkaah an ṭhu ta lo, Ṭhalaite chuan ṭingṭang an thlah. Kan hlimna kha a reh ta a, Kan lâm ṭhîn kha, lusûn ang kan ni ta. Kan pârṭhi khim a ṭîl zo ta, Kan sual a ni, kan va khawngaihthlâk êm! Hemi avâng hian kan lung a chhia a, Hêng avâng hian khua pawh kan hmu thei lo. Zion tlâng chu a ram ta a, Sihal rualte an tualchai e. Lalpa, nang zawng, kumkhuaa lal i ni, I lalna chuan tâwpintai a nei lo. Engtizia nge min theihnghilh tâk reng le? Min kalsan kumkhua dâwn em ni? Lalpa, i lamah min hruai la, Min hruai kîrin hmânlai ang khân min tithar leh ta che, Nge, min paih thla hlenin Kan chungah hian i thin a ur reng dâwn? Kum sawmthum kum thla lina, tahrik ni nga niin Kebar lui kama Juda-ho saltâng zînga ka awm ve laiin vân a inhawng a, Pathian inlârna ka hmu a. Chumi thla tahrik ni nga ni, Lal Jehoiakina an man kum nga kum chuan, kei, puithiam Ezekiela, Buzia fapa hnênah Babulon rama Kebar lui kamah chuan Lalpa thu chu a lo thleng ta a, Lalpa kut chu ka chungah a fu ta a. Ka han en a, hmâr lam aṭangin thlipui a lo thawk chûk chûk a; chhûm dum kuihah chuan kâwl a phe zawr zawr a, a vêl chu a êng uau va, a phêtnaah chuan dar tle ang êng a awm a. Chu êng lo chhuak aṭang chuan thilnung ang, mihring ang hi, pali an lo chhuak a. Hmai pali leh thla pali an nei ṭheuh va, an ke chu an thluang ngîl a, an ke bâwr chu bâwng ke ang hi a ni a, dâr nawh tlêt ang a ni. Hmai pali leh thla pali bâkah an panga thla pali hnuaiah chuan kut, mihring kut ang hi, an nei ṭheuh va. An thla chu inkhawih pha chiaha zârin kil li neiin an ding kual a, an kal pawhin inher ngai lovin mahni hma zâwnah an kal thei. An hmêl lan dân chu hetiang hi a ni: Hma lamah mihring hmêl an pu a, ding lamah sakeibaknei hmêl, vei lamah bâwngpa hmêl, hnung lamah mupui hmêl. An hmêl chu chutiang chu a ni: an thla pahnih chu inkhawih pha ṭheuhvin an zâr kual a, an thla pahnih chuan an taksa an khuh a. An duhna lam lamah inher lovin an kal thei a ni. Thilnungte chu meivâm, meialh êng tak ang hi an ni. Thilnung pali kârah chuan kâwl a phe zawr zawr a, mei angin a êng pup a. Mei aṭang chuan kâwlphe chu a lo de chhuak a ni. Thilnung palite chu kâwlphe anga chakin an tlân tawn zawk zawk a. Thilnung palite chu ka en reng lai chuan, an bul ṭheuhvah tawlailîr ke pali, leia innghat ka hmu a. Tawlailîr kete chu berul lung anga tle, inang ṭheuh a ni; a ke kual chhûnga ke kual dang awm ang hi a ni. An lirh sawn chuan inher lovin khawi lam zâwng pawhin an lîr thei. Tawlailîr ke bial tlâng chu a kual kung mai a, chhun kalhna a awm fur bawk a, a kual chu a de sût vek a ni. Thilnungte kal duhna apiangah, an bulah chuan an lîr ve zêl a. Thilnungte an thlawh chhoh leh an chho ve a, thilnungte thu thuin an awm a. An kalna lam apiangah an lîr ve zêl ṭhîn, an din leh an ding ve a, lei ata an chhoh leh tawlailîr kete pawh chu an chho ve a, thilnungte thu thu-a awm an ni. Thilnungte lu chungah chuan thil kûmkulh hi a awm a, vûr anga vâr sût a ni, an lu chungah chuan a inzâr a. Chu thil kûmkulh hnuaiah chuan an thla pahnih chu inkhawih phain an zâr duai a, an thla pahnih dang chuan an taksa an khuh a, An han thlawh chuan tuifinriat thâwm anga nasa, Engkimtitheia aw ang, bûka mipui ri mur mur ang hian a ri hum hum a, an din chuan an thla chu an khup a. An dina an thla an khup pawh chuan kumkulh aṭang chuan a la ri ta hum hum tho va. An lu chunga kûmkulhah chuan lalṭhutthlêng ang, safir lunga siam ni âwm hi a awm a, mihring ang hi a ṭhu a. A kâwng chung lam chu dâr rawh lin anga tle a ni a, a hnuai lam pawh chu mei anga êng a ni, a vêl chu a êng pum a. A vêlin êng chu ruah sûr nia chhimbâl zâm ang pup hi a ni. Hei hi a ni Lalpa ropuina êng lan dân chu. Chu chu ka han hmuh chuan ka tlu bawkkhup a, min betu aw chu ka hre ta a. Mi betu chuan, “Mihring fapa, ding teh, i hnênah thu ka sawi dâwn,” a ti a. A ṭawng veleh ka chhûngah Thlarau a lo lût a, min dintîr a, a thu sawi chu ka ngaithla ta a. “Mihring fapa, hel hmang Israel fate chu ka chungah an hel a, an hnênah ka tîr dâwn che a ni. An pate aṭangin vawiin thlengin ka chungah thil sual an ti a. An fate pawh tihmawh tak, luhlul tak an ni. An hnênah ka tîr a che: ‘Lalpa P athian chuan heti hian a ti,’ i ti dâwn nia. Tichuan, hnam hel hmang tak ni mah se, an ngaithla emaw, ngaithla lo emaw, an zîngah zâwlnei a awm tih an hre dâwn nia. “Mihring fapa, nang chuan anni chu hlau suh, an thu avângin zâm hek suh ang che. I thu an awih lo vang a, an kalh ang che, khawmualkaikuang zînga awm ang mai i ni ang. Hel hmang tak an ni a, vau dai che suh se, an hmêl chu hlau hek suh. Hel hmang tak ni mah se, an ngaithla emaw, ngaithla lo emaw, ka thu hi hrilh ang che. “Tin, mihring fapa, nang chu anmahni angin hel ve suh, ka sawi hi ngaithla la, i ka âng la, ka thil pêk che hi lem rawh,” mi ti a. Kut hian mi rawn ban a, lehkhabu zial a keng a. Kut chuan lehkhabu zial chu a phelh a, a chhûng lam leh pâwn lam chu ziakin a khat vek a. Thu chuang chu ṭahna thu te, rûmna thu te a ni. “Mihring fapa, lehkhabu zial i hmuh hi ei la; tichuan, kal la, Israel chhûngkaw hnênah thu va sawi ang che,” mi ti a. Ka kâ chu ka âng a, lehkhabu zial chu mi eitîr ta a, “Mihring fapa, lehkhabu zial ka pêk che hi lem la, puar takin ei rawh,” mi ti a. Tichuan, ka ei ta a, khawizu ang maiin a thlum a. “Mihring fapa, Israel chhûngkaw zîngah kal la, ka hrilh apiang che hi va hrilh ang che. Ṭawng harsa tak leh i hriat loh ṭawng hmang hnam hnênah ka tîr lo che, Israel-te hnênah a ni ka tirh che. Ṭawng harsa tak leh i hriat loh ṭawng hmang hnam hnênah tîr che ni ila, i thu an lo ngaithla mahna. Israel-te hi zawngin i thu an ngaithla lo vang, ka thu pawh an ngaithla duh ṭhîn lo va ni. Israel-te hi mi deh khirh tak leh luhlul tak an ni si a. Ngai teh, nang pawh anni ang bawka mi dehkhirh leh luhlul takah ka siam ang che. Meilung chang tak aia dehkhirhah ka siam dâwn a che. Hel hmang tak ni mah se, anni chu hlau suh la, an hmaah zâm hek suh ang che,” min ti a. Ka hnênah thu a sawi zêl a, “Mihring fapa, ka hrilh tûr che hi ngun takin ngaithla la, vawng tlat rawh. Tho la, i chipui, saltâng-ho hnênah kal la, an ngaithla duh emaw, duh lo emaw, an hnênah, Lalpa chuan heti hian a ti va ti ang che,” min ti a. Tichuan, Thlarauvin mi chawi kâng a, hnung lamah chuan, ‘ Lalpa, ropui taka chu, a chênna aṭangin fak rawh u,’ tia an au hluah hluah chu ka hria a. Thilnung pali thla hmâwr inkhawih phaa an thlâwk thâwm leh tawlailîr tlân thâwm ri hum hum chu ka hre bawk a. Chutichuan, Thlarau chuan min chawi kâng a, min hruai ta a. Ka hreh hle a, ka thin pawh a rim ṭeuh va. Mahse, Lalpa chuan min hruai lui tlat a ni. Kebar lui kam, Telabib hmuna awm saltângte hnênah chuan min hruai a. An ṭhutnaah chuan ka ṭhu ve a, ni sarih chhûng chu hrilhhai takin ka ṭhu a. Ni sarih a ral hnu chuan Lalpa thu chu ka hnênah a lo thleng a. “Mihring fapa, Israel chhûngkaw tân vêngtuah ka ruat a che. Ka thu i hriat hunah Israel-te chu min zilhsak ang che. Mi sual hnênah, ‘I thi ngei tûr a ni,’ ti ila, nangin i zilh lohva a nun theih nân a thil sual tih chu sim tûra i hrilh hmasak si loh chuan, chu mi chu a sual avâng chuan a thi ngei ang; mahse, a thihna mawh chu i chungah ka nghat ang. Chu mi chu i lo hrilh lâwka, a sualna a sim duh lohva a sual luih zêl chuan a sualna avângin a thi ang a; nang erawh chu a thihna mawh lakah i fihlîm ang. Mi dik pawh, hawi kîrin thil sual ti sela, a tlûkchhiatna tûra ka tih chin a dai chuan a thi ang; nangin i zilh lo va, a sual avâng chuan a thi dâwn a ni, a thil ṭha tih ṭhinte chuan sâwtna a nei lo vang a, a thihna mawh chu i phur ang. Nangin mi ṭha chu sual ti lo tûrin i zilha, thil sual a tih loh chuan i zilhna a pawm avângin a nung ngei ang, i zilhna a ngaithla a, nang pawhin i tuar lo vang.” Lalpa chuan mi rawn chelh ta tlat a, ka hnênah, “Tho la, lui phaizâwlah sâwn va kal teh; tah chuan thu ka hrilh ang che,” min ti a. Tichuan, ka tho va, lui phaizâwlah chuan ka kal ta a; Lalpa ropuina, Kebar lui kama ka hmuh ang kha a lo awm a, bawkkhupin ka tlu ta a. Thlarau chu ka chhûngah a lo lût a, min dintîr a, min bia a, “Kal la, inchhûngah inkhârhnan rawh. Nang, Mihring fapa, phuar kawm tlat i ni ang a, an zîngah i lêng chhuak thei lo vang. I lei chu i dangah ka tibet ang a, i ṭawng thei lo vang a, anni chu i zilh thei lo vang. I hnêna thu ka sawi hunah i kâ chu ka hawnsak che ang a, Lalpa P athian -in sawi tûra ka hrilh che chu an hnênah i sawi dâwn nia. A duh chuan an ngaithla ang a, a duh lo chuan an ngaithla lo vang, hel hmang an ni si a. “Nang, mihring fapa, leirawhchan phêk la la, i hmaah phah rawh; tah chuan Jerusalem khawpui lem ziak la, khaw hual angin cheibâwl la, phen tûr te siam la, lei te chhûng pâwng la, bûk sa la, bang chhut chhiatna te bun rawh. Thîr phêk la la, khaw lem nêna in inkârah chuan chhawng ang che; khaw lem chu hawi la, i hual dâwn nia, Israel-te tân entîrna i ni ang. “Tin, i vei lam delhin mu la, Israel-te sual mawh ka phurhtîr dâwn che a ni. I mut chhûngin Israel-te sual hremna i tuar ang. An kum khat sual aiah ni khat ka tuartîr ang che; ni zathum leh sawmkaw chhûng Israel-te sual chu i tuar dâwn a ni. Chumi zawhah chuan i ding lam delhin mu leh ang che, ni sawmli chhûng Juda-te sual i tuar leh ang, an kum khat sual aiah ni khat i tuar tûr a ni. Jerusalem chu hmachhawnin i hual ang a, i kuttum vilik la, a chhiat tûr thu hrilh mawlh mawlh ang che. Hual tûra ka tih chhûng che i tlingtlâk hma chu che sawn thei lovin ka phuar tlat dâwn che a ni. Huit leh barli te, be leh dailuah te, chhangphut te la la, bêlah dah khâwm ang che; ni zathum leh sawmkaw chhûng, i vei lam delha i mut chhûng zawng chuan chu chu chhangah siam la, i ring tûr a ni. I duh hun hunah ni khat chhûngin gram zahnih leh sawmthum bûk chiah i ei thei ang. Tui pawh, i duh hun hunah ni khat chhûngin no hnih chin chiah i in thei ang. Chhangpêr i siam ang a, mihring êk ro mûtin i hem hmin ang a, an zaa hmuhah i ei dâwn nia,” a ti a. Lalpa chuan, “Ka thawn darhna tûr rama mite zîngah Israel fate pawhin chutiang chuan chaw bawlhhlawh an ei ang,” a ti a. Kei chuan, “Khai a, Lalpa P athian, thil bawlhhlawh ka la ei ngai lo asin. Ka tleirâwl chhuah aṭangin a thisâwn leh a tlaw, sa rêng rêng ka la ei ngai lo, sa thianglo sa chu a tem pawh ka la tem ngai hlei nêm,” ka ti a. Tichuan, ka hnênah, “En teh, mihring êk aiah bâwng êk ka pe ang che, chu chuan chhang chu i hem hmin dâwn nia,” a ti a. Ka hnênah chuan a sawi zêl a, “Mihring fapa, ngai teh, Jerusalem khaw mite ei tûr, an chaw hmuhna hnâr chu ka chhu chat dâwn, an neih chhun chu bûk ker ker chauhvin thlaphâng takin an ei ang; tui pawh, hrilhhai takin a teh ker kerin an in ang. Ei tûr leh in tûr an tlachham ang a, hrilhhai takin an inen ang a, an sual avângin an râwp ral dâwn a ni,” a ti a. “Mihring fapa, lumêt mi bakmeh chem anga hriam khandaih la la, i lu leh i khabehmul ziat kâwng rawh. I ziah thlâk chu bûknaa bûkin sem rual rawh. Jerusalem khua i hual hun chhûng a ral hun chuan hmun thuma ṭhena hmun khat chu khuaah chuan meiah rawh ang che; hmun thuma ṭhena hmun khat chu khaw pâwnah khandaihin sât sawm la, thli len darhtîr la, keiin khandaihin ka ûmzui ang. A dang chu i puan hmâwrah fûn la, a ṭhen chu la la, meiah vawm lût ang che; a kâng ang a, chuta ṭang chuan Israel hnam pum puiah mei a chhuak ang,” a ti a. Lalpa P athian chuan heti hian a ti: “Aw nang, Jerusalem, khawvêla hmun laili takah ka dah che a, i vêlah hnam dangte chu ka awmtîr a. Ka thuruat i helsan a, ka Dânte i hnâwl a, i vêla hnam dang awmte aia nasa zâwkin ka thuruatte leh ka Dânte chu thil sual i tihsan a.” Chuvângin, Lalpa P athian chuan “Ka Dânte zâwm duh lovin i vêla hnam dang awmte aia nasa zâwkin thil sual i ti a; ka thununnate zâwm lovin i vêla awm hnam dangte dân i la zâwk a.” Chuvângin, Lalpa P athian chuan heti hian a ti: “Ngai teh, kei ngei pawh hian ka do dâwn che a ni. Hnam dangte hmuhah ka hrem ngei dâwn che a ni. I thil tih tenawm tak takte avângin ka la tih ngai loh, tih leh pawh ka tum ngai loh i chungah ka ti dâwn. In zînga pate chuan an fate sa an ei ang a, fate chuan an pate sa an ei bawk ang. Ka hrem dâwn che u a ni, a thi bâng pawh thli ka len darhtîr ang che u. Mi nunga ka nih hi,” Lalpa P athian thuchhuak chuan a ti. “In thil tih tenawm, ngeiawm tak tak avângin ka hmun thianghlim in tibawrhbâng a, kei ngei hian ka suat dâwn che u a ni; ka khawngaih lo vang che u a, ka dîm hek lo vang che u. In zînga mi, hmun thuma ṭhena hmun khat chuan hripui leh ṭâm in thihpui ang a, hmun thuma ṭhena hmun khat daipâwnah khandaiha sah hlum in ni ang. Hmun thuma ṭhena hmun khat chu thli ka len darhtîr ang che u a, khandaihin ka ûmzui ang. Chutiang chuan ka thinur ka hrithla ang a, a dai tawh ang. Chumi hnu chuan Lalpa P athian -in ka ṭhahnemngaihna avângin chûng chu ka tih a ni tih in hria ang. “In vêla awmte leh veivâkte hmuhsit leh mak tihah ka siam bawk ang che u. Thinur leh thinrim takin, lungawi lo zetin in chunga ro ka rêl zawh hnu chuan; mi hmuhsit, nuihzatbûr, mak tihah leh enthlâk in la ni ang; Kei Lalpa hian ka sawi tawh hi. In chhiat nân ṭâmpui mitthi ka tithleng ang a, in chaw hmuhna hnâr ka chhu chat ang a, rilṭâmin in thi ang. Ṭâm bâkah ram sakawlhte ka rawn tîr ang a, an seh ang che u a, lusûn in awm thliah thluah ang. Hripui leh thisen chhuahna, khandaih nên ka lêntîr bawk ang, in thi pheng phung ang: Kei Lalpa hian ka sawi hi.” Lalpa thu chu ka hnênah a lo thleng a: “Mihring fapa, Israel rama tlângte chu thlîr la, an chungthu sawi rawh. ‘Israel rama tlângte u, Lalpa P athian thu hi ngaithla teh u: Tlâng te, mual te, ruam te leh luikawr te chungchâng thu-ah Lalpa P athian chuan heti hian a sawi e: Ngai teh u, keimah ngei hian in chungah khandaih ka rawn lek dâwn; in hmunsângte chu ka tichhe vek ang a, in maichâmte ka tichim ang a, in milim dinte chu a keh sawm ang; in zînga thite ruang chu in milem hmaah ka vawm khâwm ang. Israel-ho fanaute ruang chu an biak milem bulah ka dah khâwm ang a, anmahni ruhte pawh an maichâm bulah ka theh darh ang. In chênna khua apiang chu ka tichim ang a, in hmunsângte chu a ṭhing reng ang; in maichâmte pawh a chim ang a, a ram dêr ang; in milemte chu a kehsawm zo vang a, in milim dinte chu ka chêk chhia ang a, in thiltihte chu nuai bo vek a ni ang. In zîngah mitthi ruang a let pheng phung ang a, a la damte chuan Lalpa ka nih an hria ang. ‘Ṭhenkhat chuan thih an pumpelh ang a, hnam dang zîngah, ram tinah ka tidarh ang. In zînga chutianga thih pumpelhte chu salah an man ang a, ram tinah an hruai darh ang. Hnam dang zînga an darh hnu chuan min hre chhuak ang a, uirea min hawisana, thil sual an tih pawi ka tih ṭhinzia te an hre chhuak ang a, milem lam an hawia, thil tenawm tak tak an lo tih ṭhin avâng chuan an inten ang. Kei hi Lalpa chu ka lo ni ngei tih an hria ang a, ‘hêng thil hi ka ti ang’ ka tih kha ka ti mai mai lo tih pawh an hria ang,’ ” a ti a. Lalpa P athian chuan heti hian a ti bawk: “I kutphah chûm la, i ke per rawh, Israel-ten thil sual tenawm an ti ṭhîn hi a va pawi êm! khandaiha sah hlum an ni ang a, hripui leh ṭâm tuarin an thi ang. Ram hla taka awmte chu hripuiin an thi ang a, hnaivaia awmte chu khandaihin thah an ni ang. Heta la awm chhun, hual chhûnga awmte hi, rilṭâmin an thi ang, chutiang chuan ka thinur ka hrithla dâwn a ni. Milem hnêna rimtui an hâl ṭhinna, an hmunsângah te, tlâng chhîpah te, thingbuk hnuaiah te, sasaw buk hlimah te, an maichâm milem bulah te mitthi ruang a awm pheng phung hunah Lalpa chu ka ni tih an hria ang. An chungah kut ka lek ang a, an chênna hmun tin mai chu Diblah thlalêr aia ram ro leh chhiaah ka siam ang a; tichuan; Lalpa chu ka ni tih an hria ang,” a ti a. Lalpa thu chu ka hnênah a lo thleng leh a. Lalpa P athian chuan Israel ram chungchâng thu a sawi a: “Nang, Mihring fapa, hun tâwp a lo thleng dâwn, ram chu a pumin a chhe vek ang. Tâwpna chuan a rawn nang ta che, ka thinur i chungah ka leihbua ang a, i thiltih ang zêlin i chungah ro ka rêl dâwn; thil tenawm tak tâk i tih avângin ka hrem dâwn a che. Ka khawngaih lo vang chia, ka dim hek lo vang che. I tih ṭhin ang khân i chungah ka ti ang a, thil tenawm i tihte avângin ka hrem ang che; tichuan, Lalpa chu ka ni tih i hria ang,” a ti a. Lalpa P athian chuan heti hian a ti: “Chhiatna hlîr, chhiatna hlîr a lo thleng dâwn. Hun tâwp, tâwpna ngei chu a lo hnai e, a lo kal a, a lo hnaih tâk saw. Ram luahtute u, in chungah zângkhua a bungbu dâwn, tlânga hlim taka in zai ṭhîn ang kha ni lovin in râlkhêl dâwn a ni. Ka thinurna chu in chungah ka sah dâwn a, ka thinrimna chu in tuar ang. In thil tih ang zêlin in chungah ro ka rêl ang a, in thil tenawm tih chu in chungah ka thungrûl ang. Ka khawngaih lo vang che u a, ka dim hek lo vang che u. In thil tih ang zêlin ka hrem ang che u a, thil tenawm in tihte chu in chungah ka thungrûl ang; tichuan, Lalpa chuan ka hrem che u a ni tih in hria ang. “Ngai teh, ni chu a lo thleng e, a lo thleng e, a lo inher chhuak ta, tuarna a punlun a, pawisak nei lo pawh an pung. Inpâwngnêkna chuan thil ṭha lo a tipung a, an neih eng mah bâng awm lo lêkin, an sum leh pai te, an thawhrim rah te, an nawmsakna te a ral vek ang. A hun chu a lo thleng ta, thinurna chu mi tin chungah a tla dâwn si a. Sumdâwngtu chu a hlâwkna hmu hmanin a dam lo vang; he inlârna thu hian tu mah a hmaih lo vang, a kîr hek lo vang; an sual avângin tu mah dam khawchhuak an awm lo vang. Tawtawrâwt an rawn hâm a, an inpeih ta vek a; mahse, lo do tûra thawk chhuak tûr tu mah an awm loh avangin an zaa chungah ka thinurna a tla ta a ni. Pâwnah khandaihin a lo châng a, kulh chhûngah ṭâm leh hripui a lêng a, lova awm chu khandaihin an sât hlum ang. Khawpui chhûnga awmte chu hripui leh ṭâmin an thi ang. Chûng pumpelh hrâmte chu tlângah, chul ram ṭhuro angin an rûm an rûm ang a, an sualna avângin an rûm chuah chuah ang. An bân tha a ṭhum vek ang a, an khûpte a zâwi vek ang. Saiip puan an veng ang a, hlauhnain an thâuvah a man ang; an zak êm êm ang a, an samte a tla kawlh vek ang. An tangkate chu khawlaiah an paih ang a, an rangkachakte pawh thil bawlhhlawh ang a ni ang. Lalpa thinurna ni an chunga a lo thlen chuan an tangka leh rangkachak chuan a chhan thei lo vang a, anmahni titlutu a nih avângin ei tûr lei nân pawh an hmang thei lo vang. An incheina mawi tak tak, an chhuan êm êm te chu an milem tenawm leh ngeiawm tak tak thuam nân an hmang a; chuvângin a ni thil bawlhhlawha ka chantîr tâk ni. Hnam dang ka mantîr ang a, khawvêla mi sualte tân râllâk sumah ka pe ang a, an tibawrhbâng ang. Ka hawisan ang a, ka hmun thianghlim chu ka tibawrhbâng ang. Rûkru an lût ang a, an suam ang. “Khaidiat buatsaih rawh u. Ram pumah thisen an chhuah a, khaw chhûngah pawh tharum an thawh e. Chuvângin, hnam azawnga hnam râwng ber ka rawn hruai ang a, in inte chu an rawn neihsak ang che u a, mi chapote chu ka titlâwm ang; in Hmun Thianghlimte chu an rawn tibawrhbâng ang. Thil râpthlâk lo thleng lakah chuan himna an zawng ang a, an hmu lo vang. Chhiatna tâwp ka thlen ang a, thu hlauhawm tinrêng ka tithang bawk ang; zâwlnei hnênah thil awmzia an zâwt ang a, puithiamte chuan zirtîr tûr an hre lo vang a, upate pawhin thurâwn tûr an nei lo vang. Lal chu a lungngai ang a, miliante chu an hrilhhai ang a, ram chhûng mite chu an chau vek ang. An thiltih ang zêlin ka thungrûl ang a, an phû tâwk ang zêlin ka hrem ang; tichuan, Lalpa chu ka ni tih an hria ang,” a ti a. Saltân kum ruk kum, thla rukna, tahrik ni nga ni chuan ka in chhûngah ka ṭhu a, Juda upaho ka hmaah an ṭhu a; tah chuan Lalpa P athian kut chu ka chungah a fu a. Ka han en chuan mi, mei ang hi ka hmu a, a kâwng hnuai lam chu mei anga êng a ni a, a kâwng chung lam chu dâr tle anga tle a ni. Kut ni awm tak hian ka chhîpsamah mi rawn ṭhâm a, lei leh vân inkârah Thlarau chuan min chawi chho va. Pathian inlârnaah chuan Jerusalem-ah min hruai a, tualzâwl chhûng zâwk hmâr lam kawngkhârah chuan min dah a; tah chuan Pathian tithinurtu milem chu a awm a. Israel-te Pathian ropuina, lui phaizâwla ka hmuh ang kha, a lo awm a. Ka hnênah chuan, “Mihring fapa, hmâr lam saw en teh,” mi ti a. Hmâr lam chu ka han en a, maichâm awmna hmâr lam kawngkhâr bulah chuan Pathian tithinurtu milem chu ka hmu a. Ka hnênah chuan, “Mihring fapa, an thil tih hi i hmu maw? Israel chhûngten thil tenawm pui pui heta an tih hi i hmu em? Ka Tempul aṭangin mi dah pâwn tial tial a ni. Hei aia tenawm zâwk hi i hmu zêl ang,” a ti a. Hmun chhûng zâwk luhna kawngka bulah chuan min hruai a, bang pawp ka hmu a. Ka hnênah chuan, “Mihring fapa, bang pawp hi tizau rawh,” mi ti a. Ka han tihzau chuan kawngkhâr hi a lo awm a. Ka hnênah, “Lût la, heta thil sual tenawm an tih hi va en rawh,” min ti a. Tichuan, ka va lût a, thil tenawm pui pui, rûl lem te, ran lem te, Israel-te biak milem tinrêng, bangah chuan a lo chuang buai mai a. Safana fapa, Jazania hovin Israel upa rual sawmsarih an lo awm a, rimtui hâlna an keng ṭheuh va, an thil hâl khu chu a lo khat mup a. “Mihring fapa, Israel chhûngkaw upaten a rûka thil an tih hi i hmu em? Mahni pual ṭheuh milem an biak hi. ‘ Lalpa chuan mi hmu hlei nem, Lalpa chuan ram hi a chhuahsan tawh alâwm,’ an ti,” tiin min hrilh a. A sawi zêl a, “Thil tenawm lehzual an tih i hmu zêl dâwn,” min ti a. Hmâr lama Lalpa in kawngkaah chuan min hruai leh a, tah chuan nuho an lo ṭap a, pathiannu Tamuz an lo ṭah a. Ka hnênah chuan, “Mihring fapa, hei hi i hmu maw? Hei aia tenawm zâwk an tih i la hmu ang” a ti a. Lalpa in hung chhûngnung zâwkah chuan mi hruai a, Lalpa Tempul kawngka bul, hulhliap leh maichâm inkârah chuan mi sawmhnih leh panga dâwn lai hi an lo awm a. Lalpa Tempul hnungchhawnin khawchhak lam an hawi a, khawchhak lama ni lo chhuak chu chibai lo zu bûk a! Ka hnênah chuan, “Mihring fapa, hei hi i hmu maw? Israel-te thiltih hi a tenau em ni? Ram chu pâwngnêknain an tikhat a, ka thin tiur zual tûrin hetah leh zêl hêng thil tenawmte hi an ti a ni. En teh, chhâwla an hnâr an huh vei saw! Chuvângin, kei pawh an chungah thinur takin ka ṭuan dâwn a ni, ka khawngaih lo vang a, ka dîm hek lo vang. Ring takin min au mah se ka hre duh bîk lo vang,” a ti a. Ring takin min ko va, “Khawpui enkawltute ko khâwm rawh, mi thahna tûr hriamhrei rawn keng teh se,” a ti a. Hmâr lama awm kawngkhâr chhakta zâwk aṭangin mi paruk, mi thahna tûr hriamhrei keng an lo kal a, an zînga pakhat chuan puan vâr a sin a, lehkhatui bûr a pai a, dâr maichâm bulah chuan an lo ding a. Cherub-ho chunga awm ṭhîn, Israel-te Pathian ropuina chu a tho va, sumhmunah a lo chhuak a; puan vâr sin, lehkhatui bûr paitu chu a han ko va. Lalpa chuan a hnênah, “Jerusalem khawpui hi fang chhuak la, khaw chhûnga thil tenawm an tih pawiti a mangang ṭhînte chu an chalah chhinchhiah rawh,” a ti a. Ka hriatah, mi dangte hnênah chuan, “Ama rual hian khua chu fang chhuak ve ula, kut thlâk rawh u; khawngaih suh ula, dîm hlek lovin putar te, tlangvâl te, nula te, naupang te leh hmeichhiate that fai vek rawh u, an chala chhinchhiahte chauh zuah rawh u. Ka Tempul aṭangin that ṭan rawh u,” a ti a. Tempul chhûnga upa awmho chu an that ṭan ta a. An hnênah chuan, “Tempul chu tibawrhbâng ula, a tualzâwlah te mitthi ruang vawm khat rawh u,” a ti a. An kal a, khuaah chuan an che ta a. Mi an that lai chu keimah chauhvin ka en a, ka bawkkhup a, ka au va, “Jerusalem chunga i thinur avângin Israel mi la awm chhunte hi i that vek dâwn em ni?” ka ti a. Ka hnênah chuan, “Israel-te leh Juda-te bawhchhiatna hi a nasa êm mai; ram chu tualthahnain an tikhat a, khawpui pawh hleih neihnain a khah tâk hi. ‘ Lalpan ram chu a kalsan a, eng mah a hmu tawh lo,’ an ti a. Kei pawhin ka khawngaih lo vang a, ka dîm hek lo vang; an thil tih ang ngeiin ka thungrûl ang,” a ti a. Puan vâr sin, lehkhatui bûr pai chuan, “Thu min pêk angin ka ti zo ta,” a ti a. Tin, ka han en a, cherub-ho chunga kûmkulhah chuan safir lunga siam ni âwm tak, lalṭhutthlêng ang hi ka hmu a. Puan vâr sin kha a bia a, “Cherub hnuaia tawlailîr ke kârah sâwn kal la, cherub zînga meiling saw va ṭhûm la, khaw chhûngah theh darh rawh,” a ti a. A kal ta chu ka enzui a. Chu mi chu a va kal chuan, cherub-ho chu Tempul chhûng chhim lamah an lo ding a, in chhûng chu meikhuin a khat a. Lalpa ropuina chu cherub chung aṭang chuan sumhmunah a chhuak a, in chhûng chu chhûmin a khat a, a tualah chuan Lalpa ropuina chu a êng phût a. Cherub-ho thla zâp thâwm chu tual hung pâwn aṭang pawhin hriat theih a ni a. El Sadaia thu sawi thâwm ang a ni. “Cherub hnuaia tawlailîr ke zînga mei saw va la rawh” a han tih chuan puan vâr sin chu a kal a, tawlailîr ke bulah chuan a va ding ta a. Cherub pakhat chuan cherub-ho hnuaia mei chu a la a, puan vâr sin chu a pe a; ani chuan a la a, a chhuahpui ta a. Cherub-ho chuan an thla hnuaiah mihring kut ang hi an nei ṭheuh va. Ka han en chuan cherub bul ṭheuhvah chuan tawlailîr ke pakhat a lo awm thliah a; tawlailîr kete chu berul lung ang hi a ni. Tawlailîr ke pali chu a inang ṭheuh va, a ke kual chhûnga ke kual dang awm ang mai hi a ni. An han lirh chuan inher lovin khawi lamah pawh an lîr thei, cherub hawina lam lamah, inher lovin an lîr thei a ni. An pumin, an taksaah te, an hnungzângah te, an kutah te, an thlaah te leh tawlailîr ke kualah te pawh mit a khat vek a. Tawlailîr kete chu ‘vir vut vut’ an tiin ka hria. An vaiin hmêl pali an nei ṭheuh va, cherub hmêl te, mihring hmêl te, sakeibaknei hmêl te leh mupui hmêl te a ni. Cherub-ho, Kebar lui kama ka hmuh, thilnung palite kha, an thlâwk chho a. Cherub-ho kalna apiangah tawlailîr kête pawh chu a lîr ve zêl a, cherub-ho an thlawh chhoh leh an rualin an chho ve zêl a ni. Cherub-ho an din chuan an ding ve a, an thlawh chhoh leh an chho ve a, cherub-ho thu thuin an awm a ni. Lalpa ropuina chu Tempul pindan hmasa aṭang chuan a chhuak a, cherub-ho thla zâp chu ka hmu a, an thlâwk chho va, tawlailîr kête pawh chu a tel zêl a; Lalpa in, khawchhak lam kawngkhâr chungah chuan an ding ta a, an chungah chuan Israel-te P athian ropuina chu a awm a. Chu chu Kebar lui kama Israel-te Pathian hnuaia thilnung ka hmuhte chiah kha an ni. Hmai pali leh thla pali an nei ṭheuh va, an thla hnuaiah mihring kut ang an nei bawk a. An hmêl pawh chu Kebar lui kama ka hmuh ang chiah kha a ni, an kalna lam apiang chu an hma zâwn a ni ṭheuh thei. Thlarau chuan mi chawi kâng a, khawchhak lam panga Lalpa in kawngkhârah chuan min hruai a, kawngkhâr bulah chuan mi sawmhnih leh panga an lo awm a, an zîngah chuan mipui hotu Azura fapa Jaazania te, Benaia fapa Pelatia te an awm bawk a. Ka hnênah chuan, “Mihring fapa, hêng mite hi an ni, thil sual ngaihtuah chhuaka, khuaa mite fuih khawlo zotute chu. In sak a la hun lo, ‘khawpui hi sa bêl ang a ni a, keini hi sa ang kan ni, kan him a nih hi,’ an ti a; chuvângin, aw nang, Mihring fapa, an chungchâng tûr thu hi sawi rawh,” a ti a. Lalpa Thlarau chu ka chungah a lo thleng a, ka hnênah chuan, “Sawi rawh, Lalpa chuan heti hian a ti: ‘In thu sawite chu ka hria a, in thil tih tumte pawh ka hria. Khaw chhûngah mi in thah belh zêl a, tual laite chu mitthi ruangin a khah tâk hi.’ Lalpa P athian chuan heti hian a ti: ‘Tuallaia in mi thah dah khâwmte chu sa bêl chhûnga sa awmte chu an ni; khua chu sa bêl a ni a; mahse, nangni chu ka la chhuak ang che u. In hlauh tak khandaih chu, in chungah ka rawn thlen dawn,’ Lalpa P athian thuchhuak chuan a ti. Khua ata ka la chhuak ang che u a, ram dang mite hnênah ka pe ang che u, ka hrem dâwn che u a ni, khandaiha sah hlum in ni ang. In ramri chhûng ngeiah in chungah ka ṭuan ang; tichuan, Lalpa ka ni tih in hria ang. Sa bêl chhûnga sa a him ang hian khua chuan a humhim lo vang che u. Ka thupêkte chu in awih duh lo va, ka dânte pawh in zâwm duh hek lo. In chhehvêla awm hnam dangte dân chu in la ta zâwk si a,” a ti a. Chûng thu ka sawi lai chuan Benaia fapa Pelatia chu a tlu a, a thi ta mai a. Ka bawkkhup a, ring takin, “Aw Lalpa P athian, Israel-ho la awm chhunte hi i tiboral vek dâwn em ni?” ka ti a. Lalpa thu chu ka hnênah a lo thleng a, “Mihring fapa, Jerusalem mite chuan, i unau, i laichîn, i chipui Israel saltângte chu, ‘ Lalpa in an pawh pha ta lo, ram chu kan chan atân min pe vek tawh,’ an ti vei a. Chuvângin, an hnênah sawi rawh: ‘Lalpa P athian chuan heti hian a ti: Hnam dang zîngah ka awmtîr daih a, ram tinah ka tidarh nâ a, an hnênah, an darhna ramah chuan, ka awm zêl a ni. Tichuan, hetiang hian hrilh rawh: Lalpa P athian chuan heti hian a ti: Mi zîng ata ka hruai chhuak che u ang a, in darhna ram ata ka khâwm ang che u, Israel ram chu ka pe leh ang che u.’ Tichuan, an lo haw ang a, thil ngeiawm leh tenawm zawng zawng hi an rawn tibo vek ang. Lungrual takin ka awmtîr ang a, thinlung thar ka pe ang. An thinlung, lung anga sak chu, ka lak bosak ang a, thinlung nêm tak ka siamsak ang. Ka thupêkte an awih ang a, ka Dânte chu an zâwm ang a, an ti zêl ang; ka mite an ni ang a, an Pathian ka ni bawk ang. Hêngho, thil ngeiawm leh tenawm tak tak tih ngainatuho hi an thiltih ang zêlin ka rûl ang,” Lalpa Pathian chuan a ti. Cherub-ho chu an thlâwk a, tawlailîrte pawh chuan an zui a, an chungah chuan Israel-te Pathian ropuina chu a awm a. Lalpa ropuina chu Jerusalem khua aṭang chuan a chhuak a, khawpui chhak lam tlângah chuan a ding ta a. Kei pawh inlârnaah chuan Thlarauvin min chawi a, Kaldai ram saltângte hnênah min hruai a, inlârna ka hmuh chu a kiang ta a. Lalpa thil min hmuhtîr zawng zawng chu saltângte ka hrilh ta a. Lalpa chuan ka hnênah, “Mihring fapa, hel hmang zînga awm i nih hi; mit an nei a, an hmu thei si lo; beng an neia an hre thei hek lo; an hel lui zêl a ni. Chuvângin, nang, Mihring fapa, saltâng thawmhnaw ang têl la, khaw ên laiin an hmuh ngeiah saltâng tûr angin thawk chhuak rawh, hmun dangah kal la, hel hmang tak ni mah se an hmu mahna che. An hmuh ngei tûrin chhûnah saltâng thawmhnaw têl la, tlaiah saltâng tûr anga i chhuak chu hmu ngei che rawh se. An hmuh ngei tûrah bang chu ṭhiat la; tah chuan la chhuak ang che. An hmuh ngeiah pu la, thimah chhuahpui rawh, kawng i hmuh theih loh nân i mit khuh ang che; Israel-te tân chhinchhiahnaah ka siam dâwn che a ni,” a ti a. Thu min pêk ang chuan ka ti a, chhûnah saltâng thawmhnaw ang ka têl a, tlaiah, thim dâwnah, bang ka ṭhiat a, ka la chhuak ta a. Min en huai huai a, thawmhnaw têl chu ka pu ta a. A tûk zîngah chuan Lalpa chuan ka hnênah, “Mihring fapa, hel hmang Israel chhûngte chuan, ‘Eng nge i tih?’ an tih che chuan, an hnênah heti hian ti ang che: ‘Lalpa P athian chuan heti hian a ti: He thu hi Jerusalem rorêltu leh khuaa awm zawng zawng tân a ni. In tân chhinchhiahna ka nih hi: ka tih ang tak hian in chungah an ti ang; sala tâng tûrin an man ang che u.’ “In hotu chu thawmhnaw têl puin thimah a tlân chhuak ang, an chhuahna tûr bang an rek pawp ang a; tah chuan a chhuak ang, kawng a hmuh theih loh nân a mit a khuh ang. A tân lên ka zâr ang a, a âwk ang a, Kaldai ramah, Babulon khuaah ka hruai ang; chu khua chu a mit chuan a hmu lo vang; mahse, tah chuan a thi ang. Amah puitu, a ṭhuihruai zawng zawng, a vêngtu sipaite nên thli ka lentîr ang a, khandaihin ka ûmzui ang. Hnam dang zînga ka thawn darha, ram tina ka tihdarh hnu chuan Lalpa chu ka lo ni ngei tih an hria ang. Khandaih te, hripui te, ṭâm avâng tea thi bâng mi tlêm tê ka zuah ang; an kalna hnam tin zîngah thil tenawm tak an tih ṭhinte chu an hre chhuak ang a, Lalpa chu ka ni tih an hria ang,” a ti a. Lalpa chuan ka hnênah, “Mihring fapa, khûr chungin chaw ei la, mangang taka sai dawt dawtin tui in rawh. He rama mite hi hrilh rawh: Israel rama Jerusalem khaw chungthu Lalpa P athian chuan heti hian a sawi: ‘Mangang takin chaw an ei ang a, thlabâr chungin tui an in ang, a mi chêngte nun a râwng êm a,’ ram chu a ṭiau vek dâwn. An chênna khawpuite chu a chim chhe vek ang a, ram pum chu a ram der ang. Tichuan, Lalpa ka ni tih an hria ang,” a ti leh a. Lalpa chuan ka hnênah, “Mihring fapa, Israel ramah, ‘Nikhua a lo rei a, hrilhlâwkna a thlâwn leh mai ṭhîn,’ in ti ṭhîn hi engtizia nge? He thu hi hrilh rawh: Lalpa P athian chuan heti hian a ti: ‘ṭawng tuallêng lâr tak in neih hi ka tibâng dâwn, Israel ramah an hmang tawh lo vang.’ Hrilh rawh, hun a lo thleng ṭêp a ni, inlârnaa thil hmuh chu a thleng thuai ang. Israel-te zîngah inlârna lem leh hrilhlâwkna dik lo a awm tawh lo vang; ‘ Lalpa chu ka ni a, ka sawi apiang chu hlen a ni ang; a muangchâng lo vang. Aw Israel helhmangte u, ka sawi hi in dam chhûng ngeiin hlen a ni ang, Lalpa P athian thuchhuak chuan a ti,’ ti rawh,” mi ti leh a. Lalpa chuan ka hnênah: “Mihring fapa, ngai teh, Israel chhûngte chuan, ‘Hun rei tak hnua mi tûr inlârna a hmu a, rei tak hnua thleng tûr chauh a hrilh lâwk ṭhîn,’ an ti a. Chuvângin, an hnênah sawi rawh: Lalpa P athian chuan heti hian a ti: “Ka thu sawi rêng rêng a muangchâng lo vang: ka sawi chu tih nghâl a ni ang, Lalpa P athian thuchhuak chuan a ti, ti rawh,” min ti a. Lalpa chuan ka hnênah, “Mihring fapa, Israel rama zâwlnei, mahni phuahchawp sawi ṭhînte hnênah, ‘ Lalpa thu ngaithla rawh u,’ ti rawh. Lalpa P athian chuan heti hian a ti: “Mahni duhzâwng chauh leh an hmuh si loh thu sawi ṭhîn zâwlneite chu an chung a pik e. Israel-te u, in zâwlneite chu khaw ram sihal ang chauh an ni. Israel-te kulh bang chhe lai an vêng lo va, Lalpan indona a rawn tihthlen tûr laka him nân thawm an tum hek lo. An thil hmuh chu dâwt mai mai a ni a, phuahchawp inlârna an hmu a. Lalpa sawi loh pui chu ‘ Lalpa thuchhuak a ni’ an ti a. An sawi chu a dikin an ring lehnghâl a: Ka sawi loh pui, ‘ Lalpa thuchhuak a ni,’ in tih hian inlârna lem in hmu a, phuah chawp in sawi mai mai tihna a ni lâwm ni?. “Chuvângin, Lalpa P athian chuan heti hian a ti: ‘Dâwtin thu in sawi a, inlârna lem in hmu a; chuvângin, ka hua che u a ni,’ Lalpa thuchhuak chuan a ti. ‘Zâwlnei, inlârna lem hmua, dâwt phuahchawp sawi chîngte chungah ka kut ka lek dâwn; ka mite ṭhu khâwm zîngah an tel ve lo vang a, Israel mite hming ziakna bu-ah an hming a chuang lo vang a, Israel ram an luah ve hek lo vang; tichuan, Lalpa P athian chu ka ni tih in hria ang.’ Ka mite chu, ‘A muanawm e,’ tiin in hruai sual a, a muanawm tawp si lo va, kulh bang chhetê an han rem a, rinawm âwm takin chinai nên an zût mâm a; chutianga zût mâmsaktute hnênah chuan, ‘A chim mai ang’ ti rawh. Ruah bawhawk a lo sûr ang a, rial lian pui puiin a rawn dêng ang a, thlipui a lo tleh ang a, a chim ngei ang. Bang chu a chim hnuah, ‘In zût mâmna kha khaw nge a nih tâk?’ an la ti dâwn lâwm che u ni? Chuvângin, Lalpa chuan heti hian a ti: ‘Ka thinur avângin thlipui ka tlehtîr ang a, ka thinrim avângin ruah bawhawk ka sûrtîr ang a, min run êm avângin rial ka chhuttîr ang. Tichuan, chinai nêna in zût mawi chu a chim ang a, a lungphûm lam a lang rel rul ang a, a chim vek ang; nangni pawh in thi ang; tichuan, Lalpa ka ni tih tu pawhin an la hria ang.’ “Tichuan, bang chungah leh chinaia zût mâmtute chungah ka thinur ka hrithla ang a, ‘A zût mâmtu, Jerusalem chungchâng, muanawm si lo muanawma hmutu Israel zâwlneite chu an thi a, bang pawh a awm tawh lo,’ tiin ka hrilh ang che u,” Lalpa P athian chuan a ti. “Nang, Mihring fapa, i mi, hmeichhehote hi hmachhawn rawh: an duhzâwng ang ang an sawi lâwk a, an chungthu heti hian sawi rawh: Lalpa P athian chuan heti hian a ti: ‘Nangni, hmeichheho, in chung a pik e. In bânah dawi hrui in bun a, mi hîp nân lu khuhna in siam a, in sa him nân ka mite hi in veh in veh dâwn em ni? Ka mite dâwta bumin barli vei khat lek leh chhang ah khat lek avângin thi lo tûr tûr in tithi a, thi âwm tak tak in zuah thung a, min tihmingchhe nasa a ni.’ Lalpa P athian chuan heti hian a ti: ‘in bânbun, sava tawktarh anga mi in hîpna chu ka huatzâwng tak a ni. In bân aṭangin ka pawt thla ang a, sava anga in awhte chu ka chhuah ang. In inkhuhnate pawh ka pawtthlêr ang a, in kuta awm, ka mite chu, ka chhuah ang, in duh duha tih theih an ni tawh lo vang. Tihmangan ka duh loh mi ṭhate chu dâwtin in tihṭhaih a, a nun theih nân mi sual chu a hawi kîr tûr kîr lo tûrin in fuihpawrh a. Chuvângin, inlârna lem in hmuhte leh in hrilhlâwkna dik lote chu ka tihtâwpsak ang che u a, ka mite chu in kut ata ka chhan chhuak ang,’ ” a ti. Israel upa ṭhenkhat an lo kal a, ka hmaah an ṭhu a, Lalpa chuan ka hnênah, “Mihring fapa, hêng mite hian milem an vuan tlat a, an bawhchhiatna chu an tân dâltu a ni a, min râwn tûr em an nih? Chuvângin, heti hian hrilh rawh: ‘Lalpa P athian chuan heti hian a ti: Israel mi tu pawh, milem vuan tlata, an bawhchhiatna chu anmahni dâltu ni ṭhîn mah se, zâwlnei râwn tûra an lo kal chuan, milem an ngah êm avângin kei Lalpa hian na takin ka lo chhâng ang. Israel chhûngte hian an milem avângin min hawisan nâ a, an thinlung ka hmin theih nân ka lo chhâng dâwn a ni.’ “Chuvângin, Israel chhûngte chu hrilh rawh: ‘Lalpa P athian chuan heti hian a ti: Lo kîr ula, in milemte hawisan ula, in thiltih tenawmte chu bânsan rawh u. Israel chhûng zînga mi emaw, an zînga chêng vête emaw, milem vuan tlata, an bawhchhiatna dâltua hmanga, ka laka intihrangte, an chungchâng thu-a zâwlnei hmanga mi râwn tûra lo kal chu; Kei Lalpa, kei ngei hian ka chhâng ang. Ka lo sawisa ang a, ka mite zîng ata ka theh chhuak ang. Miin an enbîk leh an sawi huai huai an ni ang a, Lalpa ka nih hi an hria ang.’ “Tin, zâwlnei chu buma awmin thu a sawi chuan, chu zâwlnei bumtu chu keimah ka ni a, ka kut a chungah ka lek ang a, ka mi Israel-te zîng ata ka tiboral ang. Zâwlnei sualna leh a râwntu sualna chu a inang reng a ni, an sual mawh chu anmahni ngeiin an phur ang. Tichuan, Israel chhûngte chu ka hnên ata an kal bo tawh lo vang a, milem avângin an bawrhbâng hek lo vang a, an bawh chhiatna avângin an bawlhhlawh hek lo vang a, ka mite an ni tawh zâwk ang a, an Pathian ka ni ang,” Lalpa P athian thuchhuak chuan a ti. Lalpa chuan a sawi zêl a: “Mihring fapa, ram chuan ka chungah nasa takin thil sual ti sela, ka kut ka lek ang a, an chaw hmuhna hnâr ka chhut chahsak ang a, rilṭâmin mihring leh sa an thi ang. “Hêng mi ṭha pathum, Nova te, Danela te, Joba te hi awm ve mah se, an ṭhat avângin an nunna chauh an hum thei ang,” Lalpa P athian thuchhuak chuan a ti. “Ram chhûngah ram sakawlh ka tirha, mi an seh hlum pheng phunga, rama mi an darh zawha, sa hlauh avânga kal ngam lohna hiala ka siamin, hêng mi pathumte hi awm ve mah se, an fanu fapate pawh an chhan thei lo vang; anmahni an inhum thei hrâm chauh ang a, ram chu a chhe zo vang. P athian ka nih hi,” Mi nung Lalpa P athian thuchhuak chuan a ti. “Ram chhûngah khandaih ka tirha, ‘Khandaihin ram hi fang chhuak sela, mi leh sa zawng zawng that rawh se,’ ka tih chuan, hêng mi pathumte hi awm ve mah se, an fanu fapate pawh an chhan thei lo vang, anmahni erawh chu an inhum thei hrâm ang. Pathian nung ka nih hi,” Lalpa P athian thuchhuak chuan a ti. “Mi leh sa tiboral tûra hripui ka lêntîra, ka thinurna ka leih buak chuan, Nova te, Danela te, Joba te awm ve mah se, an fanu fapate pawh an chhan thei lo vang. Kei Lalpa, Pathian nung ka nih hi,” Lalpa P athian thuchhuak chuan a ti: ‘An ṭhat avângin anmahni chu an inhum thei hrâm ang.’ Lalpa P athian chuan heti hian a ti: “Ka hremna na tak tak pali - khandaih te, ṭâm te, hripui te, sakawlh te, mihring leh sa tiboral tûra Jerusalem-a ka tirh hun chuan a va râpthlâk dâwn êm! An fanu fapate zînga thi bâng an awma, in hnêna an lo kal chuan, an khawsak dân leh an thil tihte chu in hmu ang a, Jerusalem chunga thil ṭha lo ka tih zawng zawng chu tih âwm rêng in ti ve ang. An khawsak dân leh an thil tihte in hmuh hunah chuan ka thil tihte chu chhan ṭha tak awm lo chuan ka ti lo tih in hria ang a, a âwm in ti ang,” Lalpa P athian thuchhuak chuan a ti. Lalpa chuan mi be leh a: “Mihring fapa, grep hrui leh a ṭangte hi ngaw thing leh a ṭangte aiin eng nge a lêm chuanna? “A kûng chu thil siam nân an hmangin A ṭang chu thil khai nân an siam ngai em ni? Ngai teh, meiah an tuah a, A hmâwr tuakah a alh a, A lai chu a kâng ût a, Ṭangkaina a nei tawh em ni? A kan hma pawh khân Eng siam nân mah a tlâktlai lo va, A kan uh hnu phei chuan Eng atân mah hman tlâk a ni lo. Lalpa P athian chuan heti hian a ti: ‘Ngaw thing zînga grep hrui chu Tuah tûrin thu ka pe a, Jerusalem khuaa chêngte pawh chutiang chuan ka ti ta.’ Kâng hmasa pumpelh mah se, Mei kângah ngei an ral ang. Ka sawisak hunah chuan Lalpa ka ni tih in hria ang. Min uiresan avângin Ram chu ka tiram vek dâwn a ni,” Lalpa P athian thuchhuak chuan a ti. Lalpa chuan ka hnênah, “Mihring fapa, Jerusalem chu a thil tenawm tihte hi hrilh rawh. Jerusalem hnênah heti hian a ti: ‘I pian leh mûrna chu Kanan mite ram a ni a; i pa chu Amor mi, i nu chu Hit mi a ni. I pian lai khân i laihrui âttu i nei lo va, bual fai i ni hek lo, chi an hnawih lo che a, puanin an tuam hek lo che. Tu mah en ṭha duh che an awm lo va, lainat chein tu man an bawihsâwm lo che. I pian hlim bawlhhlawh ang angin tâmlakah an hnutchhiah che a. Ka kal pahin thisen zînga i leng i leng chu ka hmu che a, chutia thisen zînga i awm chu i dam ka duh a, ‘I dam chhuak tûr a ni,’ ka ti che a. Hnim ang maiin ka tiṭhang che a, i ṭhangduang ta hle a, i lian tulh tulh a, i hmêl pawh a ṭha deuh deuh va. I hnute te a lo um a, i sam te pawh a ṭha ta hle a; mahse, saruak mai i la ni. Ka lo kal leh chuan ka han hmu che a, ngaihzâwng nei rual i lo ni ta a; tichuan, ka puan ka zâwn che a, i saruak chu ka khuhsak che a, ka ta i ni ta,” Lalpa P athian thuchhuak chuan a ti. “Tin, tuiin ka bual che a, i thisen kaite chu ka sil fai a, hriak ka hnawih che a. Puan cheimawi ka sintîr che a, savun ṭha mi pheikhawk ka buntîr bawk che a. Thawmhnaw ṭha ṭha ka bel che a, ngûn i bun a, khaidiat mawi ka awrhtîr bawk che kha. Hnâr vuah ka vuahsak che a, bengbeh ka behtîr bawk che a, lukhum mawi tak ka pêk bawk che kha. Tichuan, tangka leh rangkachakin i inthuam a, puan vâr pan chi leh maimaw puan i sin a, puan cheimawi i bih bawk a. Chhangphut ṭha chi i ei a, khawizu te, hriak te duhtâwkin i tlân a; i hmêl pawh a ṭha ta hle a ni, lalnu ni âwm tak i lo ni ta a. I hmêlṭhatzia chu a thang huai huai a, ka mawina ka bel che avângin i ṭha famkim a ni,” Lalpa P athian thuchhuak chuan a ti. “Mahse, i hmêlṭhat chu i chhuang a, i hmingthan chu i hur phah ta a, lo kal apiang hnênah i inphalrai a, an tlâwm ta che a. I inthuamnate chu i hlîp a, hmunsâng i siam a, puan rawng chi hrang hrang nên i inchei a, tah chuan i inzuar ta a. Chutiang chu a la thleng ngai lo va, a awm leh ngai hek lo vang. Tangka leh rangkachak ka pêk che khân mipa lem i siam a, mi hur angin i khawsakpui a. Thawmhnaw cheimawi ka pêk che chuan milem chu i thuam a, hriak leh rimtui ka pêk che chu an hmaah i hlân a. Chhangphut ṭha chi te, hriak te, khawizu tein ka châwm che a, chûng chu milem tlawn nân an hnênah i hlân a, chutiang chuan i ti ṭhîn,” Lalpa P athian thuchhuak chuan a ti. “Chulovah pawh, ka tâna i hrin, i fanu fapate hâlral atân an hnênah i hlân a. Hur theuleu tâwk ti lova, ka fate leh zêl milem hmaa hâl ral tûra i hlan hi thil namên em ni? Hêng thil tenawm hi tia i hur tak êm avângin, i naupan lai, saruak mai i nih lai, thisen zînga i leng i leng laite kha i hre ta lo a nih hi le!” Lalpa P athian chuan heti hian a ti: “I chung a pik e, i chung a pik e, hêng thil sual i tih bâkah kawng sîrah milem biakna leh inzawrhna tûr i siam thliah thluah a. Kawng langsâr laiah chûng hmunsâng chu i sa a, i hmêlṭhat chu i titenawm a; lo kal apiang i mal i hlîmsak zêl a, nawhchizuar satliah pawh i nih loh hi. I ṭhenawm, Aigupta, taksa lian pui pui hnênah i inhralh a, mi tithinur tûrin i hur a zual a. Ngai teh, i chungah kut ka lek ta. I chanpual ṭhîn chu ka hnûk kîr ta; nangmah hawtu, i khawloh zahpuitu Filistia mite hnênah ka pe ta che. Chu chu duh tâwk lovin Asuria-ho hnênah pawh i inzuar a, i inphalrai a; mahse, i kham chuang lo. Babulon mi, sumdâwngho hnênah pawh i inphalrai a, i kham chuang hek lo. Zah bosal tawh nawhchizuar ang maiin i chêt hi, i va hur teh hiam êm!” Lalpa P athian thuchhuak chuan a ti. Kawng aṭanga langsâr laiah milem biaknate i siam a, kawtthlêr tinah inzawrhna hmun i nei a; mahse, nawhchizuar pawisa mamawh ang hi i ni ve lo. Mahni pasal hmangaih lova uiresana, mi dang daih pawm ta ang hi i ni. Nawhchizuarte hi chuan hlawh an nei ṭhîn, nang erawh chuan mutpuitu che hlawh i pe thung a, ram hla tak taka mi i ṭhâm khâwm hlawm hi. Nawhchizuar danglam tak i ni, miin an sâwm lo che a, nangin i sâwm thung a; hlawh an pe lo che a, nangin i pêk thung hi.” Nang mi hurnu, Lalpa thu hi ngaithla teh, Lalpa P athian chuan heti hian a ti: “I bawlhhlawh êm mai, i ngaihzâwngte i hurpuina lamah i saruakna a lang zo ta: thil tenawm milemte i bia a, i fate thatin an hnênah i hlân a. Chuvângin, i ngaihzâwng rual, i tlawn hawm hawmte leh i huatzâwngte pawh ka ko khâwm ang a, kil tina din hual tûr chein ka hruai khâwm ang. An hmaah ka hlîm ang chia, an hmu fai leuh ang che. Pasal uiresantu leh tualthattu chungthu an rêl ang hian i chungthu ka rêl ang. Min run êm avângin thinur takin i chungthu ka rêl dâwn. An kutah ka pe ang chia, hmunsâng leh inzawrhna hmun i siamte chu an tichhe vek ang; i silhfênte an hlihsak ang chia, i thil mawite chu an la ang a, saruakin an dah ang che. Tlâng an pun ang a, lungin an dêng ang chia, ngûnhnâmin an chhun ang che. I inte chu an hâl ang a, hmeichhe dang hmuhah an hrem ang che; i hurna ka titâwp ang a, i ngaihzâwngte chu thilpêk i pe leh tawh hek lo vang. Tichuan, ka thinur chu a dai ang a, min run êmna chu a reh ang a, ka ngawi tawh ang, ka thinrim tawh lo vang. I têt lai kha i hriat reng tawh loh avâng leh hêng thil i tih ṭhinte hian min tihnat êm avângin ka thungrûl ang che,” Lalpa P athian thuchhuak chuan a ti. “Thil tenawm tinrêng tih belhchhahin i hur mualpho zêl a ni lâwm ni? Ngai teh, he ṭawng tuallêng tak hi hmangin, ‘nu siar, nu siar’ an ti lut lut dâwn che a ni. I nu, mahni pasal leh fate ngeitu fanu ngei zawng i lo nih tak hi; mahni pasal leh fate ngeitu laizâwn i lo ni a. I nu chu Hit mi a ni, i pa chu Amor mi. I u Samaria chu a fanute nên, i ram hmâr lamah a awm a. I nau Sodom chu a fanute nên, chhim lamah a awm. An awm dân anga awm ve lovin an thiltih tenawmte chu i ti ve ngai lo va; mahse, tûn maiah khân an aia hluar zâwkin i khawsa ta. Lalpa P athian thuchhuak chuan heti hian a ti: “P athian nung ka nih hi, i nau Sodom tih ngai loh, a fate pawhin an tih ngai loh, nang chuan i fate nên in tih tâk hi. Ngai teh, i nau Sodom sualna chu hei hi a ni: a chapo va, ei tûr a ngahin a fanute nên nuam an chên der der a, retheite leh mangangte an chhawmdâwl ngai lo. An inchhuang êm êm a, ka hmaa thil tenawm an tih avângin ka nuai bo va ni. Samaria pawhin i thil sual tih chanve pawh a ti lo, an aia nasa zâwkin thil tenawm i ti a; i thil tih a tenawm êm avângin i u thil tenawm tih chu a lan nêp tâk zâwk hi. I laizâwnte aia thil tenawm i tih nasat zâwk avângin an tuar âwma i ngaih aia nasa zahna i tuar ang; an aia i sualna a tenawm zâwk avângin anni chu ṭha viau âwmin an lang a ni; zakin sen awp awp rawh, i laizâwnte zawng mi ṭha tak ni âwm in an lan tâk hial hi.” “Sodom leh a fate chu ka din chhuahtîr leh ang; Samaria leh a fate pawh ka din chhuahtîr leh ang; an rual chuan nang pawh ka din chhuahtîr ang che. I la inzahpui ang a, i thiltihte avângin i la zak hle ang, anni pawh an ngaih a ṭha sawt ang. I nau Sodom leh i u Samaria chu an fate nên an ngai an awh leh ang; nang pawhin i fate nên ngai in awh leh ang. I ṭhat lai khân i nau Sodom chu kamchhe tleuhna takah i hmang ṭhîn a ni lâwm ni? I sualzia a lang ta a, anni ang bawk i ni, i vêla awm, Edom leh Filistia leh an faten, nangmah hawtute chuan, an hmuhsit ve tâk che hi. I thiltih tenawm leh i hurna hi a mawh chu i phur dâwn a ni,” Lalpa thuchhuak chuan a ti. Lalpa P athian chuan heti hian a ti: “I tih angin ka thungrûl ve ang che; i thutiam ngainêpin thuthlung chu i bawhchhia a. Mahse, kei chuan i naupan laia i hnêna ka thuthlung kha ka hre reng ang a, kumkhaw thuthlung ka siamsak ang che. I awm dân kha i hre chhuak ang a, i laizâwn, i u leh i naute chu i pawm leh hunah i la zak hle ang; ka thuthlungah tel lo mah se anni chu i fa atân ka pe dâwn che a ni. Nang nêna ka thuthlung chu ka tinghet ang a, Lalpa chu ka ni tih i hria ang. I thil sual tihte ka ngaihdam hunah chuan i sual ṭhinzia kha i hre chhuak ang a, i inzahpui êm êm avângin eng mah i sawi ngam lo vang,” Lalpa P athian thuchhuak chuan a ti. Lalpa chuan heti hian mi rawn hrilh a: “Mihring fapa, Israel-te hnênah thu khirh leh tehkhin thu sawi rawh, ‘Lalpa P athian chuan heti hian a ti: Mupui lian tak, thla hlai pui nei, Fêp buk mawi tak nei chu Lebanon tlângah a lo thlâwk a, Sidar lêrah a fu a. A lêr zîkno chu a thliak a, Sumdâwng mi ramah a thlawhpui a, Sumdâwnna khawpuiah a phun ta a. Israel rama grep ṭang a la bawk a, Lei ṭha hmunah a phun a, Tui tamna hmunah chuan a tlar a, Tuipuisuthlah ang hian. A lo ṭhang a, grep buk hniam ṭawi tak a lo ni a, A zârte chuan mupui lam chu a pan a, A zung chu lei thûk takah a zâm lût a. Tichuan, grep chu a lo chawr buk ta luai a. Mupui lian tak dang a awm a, Thla hlai tak leh fêp buk tak a nei bawk a, A ṭo hmun ata grep zung leh zâr chuan, Tui a hmuh tam zâwk theih nân a lamah a zâm ta a. Ram ṭha tak, tui tamnaah Grep kûng lian tak, duah hluah Rah tup tûra phun sawn a ni. Lalpa P athian chuan heti hian a ti: A puitling thei dâwn em ni? A phuntu chuan a zung chu pawt phawiin A rahte chu paihin A chawrnote chu a tivuai mai lâwng maw? Pawt phawi tûrin mi tam tak emaw, Mi chak tehchiam emaw a ngai si lo va? Ngun taka phun zawng a ni ngei mai a, Mahse, a nung thei dâwn em ni? Khawchhak thliin a rawn chhêm ang a, A uai-in a ṭona hmunah chuan A vuai mai dâwn lâwm ni?’ Ti rawh,” min ti a. Lalpa chuan heti hian mi hrilh a. “Hel hmang chhûngte chu hrilh rawh. He thil awmzia hi an hre lo vem ni? Ngai teh, Babulon lal chu Jerusalem-ah a lo kal a, lal leh miliante a man a, Babulon-ah a kawi ta a. Lal fa zînga pakhat chu thu a thlunpui a, chhia a chhamtîr a; milian dangte chu a hruai bo va. Ram chu a tlâwm a, an inlek leh loh nân leh thuthlung an bawhchhiat loh nân chûng miliante chu a hrêng a. Mahse, a hel ta a, Aigupta ramah sakawr leh sipai tam tak dîl tûrin palai a tîr a; a hlawhtling ang em? Chutiang titu chu a him dâwn em ni? Thuthlung bawhchhetu chu a inhum thei dâwn em ni? ‘Mi nung ka nih hi,’ ” Lalpa P athian thuchhuak chuan a ti. Lala dahtu Babulon lal hnêna a chhechham leh thuthlung a bawhchhiat avângin chu lal chu Babulon-ah a thi ngei ang. Mi tam tak tihlum tûra lei an chhûn pâwna, hual bang an siam hnan hnuah chuan Farawa sipai huaisente leh a ṭhuihruaite chuan an chhan thei lo vang. A chhechham chu a ngaihthah a, thuthlung chu a bawhchhia a, bân phar meuhva a nemngheh tawh si chu bawhchhiaa hêng thil hi a tih tak avângin a him lo vang. Chuvângin, Lalpa P athian chuan heti hian a ti: ‘Mi nung ka nih hi; ka thutiam a hmusit a, ka thuthlung a bawhchhe vei a, ama chungah ngei ka ṭuan dâwn a ni. Lênin ka khuh ang a, ka thangah ka awhtîr ang a, Babulon-ah ka hruai ang. Tichuan, mi phatsan avângin a chungthu ka rêl ang. A sipai tlân darhte chu khandaiha sah hlum an ni ang a, a thi bangte chu kil tin kil tangah an darh ang. Chûng sawitu chu kei, Lalpa hi ka ni tih in hria ang.” Lalpa P athian chuan heti hian a ti: “Kei hian sidar thing sâng ziding Zîkno chu ka thliak ang a, Keimah ngeiin tlâng sâng zo takah ka phun ang. Israel tlâng sângah chuan ka phun ang a, A duahin a rah tup ang. Sidar thing lian tak a ni ang a, a buk hlimah chuan Sava tinrêng an chêng ang a, bu an chhep ang. Rama thing zawng zawngin, kei Lalpa P athian hian thing sângte chu ka tihniam a, a hniamte chu ka tisâng a, Thing hring chu ka tiro va, a ro chu ka tihring a, Tih an hria ang. Kei Lalpa hian ka sawi tawh chu ka ti bawk ṭhîn.” Lalpa chuan heti hian min hrilh leh a: “ ‘Paten grep thûr an ei a, an fate hâ a ṭim,’ tih upate thu hi Israel ramah engtiziaa ti chhên nge an nih? ‘Mi nung ka nih hi,’ ” Lalpa P athian thuchhuak chuan a ti. “Israel-te zîngah he upate thu hi an sawi leh tawh lo vang. Mi zawng zawng nunna hi ka ta a ni a, Pa nunna leh a fapa nunna pawh ka ta a ni. Ngai teh, thil sual titu chu a thi ngei ang. Miin thil ṭha a tih a, dik taka ro a rel ṭhina, bâwlhmun ruai ṭhehnaa a tel ve lohva, Israel chhûngte milem a biak ve lohva, a ṭhenawmte nupui a tihbawrhbân lohva, hmeichhe fel loh lai a khawih lohva, tu mah tiduhdah lovin an thil pûk dahkhamte a pêk kîr zêla, tu mah a rûksak lohva, rilṭâmte chaw a pêk a, saruakte silhfên a sintîr ṭhina, a pung ûma a pûktîr lohva, thil ṭha lo laka a insûm tlat a, hleih nei lova mi chungthu a rêlsak ṭhin a, Ka thupêkte a zawma, ka Dânte a vawn chuan chu mi chu mi dik tak a ni a, a nung ngei ang,” Lalpa P athian thuchhuak chuan a ti. “Chutiang mi chuan rûkhmang leh tual thah chîng fapa nei sela, chu a fapa chuan a pa tih ang ti ve duh lovin bâwlhmun ruai ṭhehnaah te a tela, a ṭhenawmte nupui a tihbawrhbâna, rethei leh mangangte a tihduhdah a, mi rawk a chîna, thil pûk dahkham a pêk kîr duh lohva, milem biain thil tenawm a tih a, a pung ûma a pûktîra, hêng thil tenawm hi a tih ṭhin avângin a thi mawlh ang, a nung lo vang. “Chu mi chuan fapa hring ve se, chu a fapa chuan a pa thil sual tih zawng zawng chu hmuin a rilru a siam a, a ti ve duh lo va. Bâwlhmun ruai ṭhehnaah a tel duh lo va, Israel chhûngte milem chu a be ve duh lo va, a ṭhenawmte nupui a tibawrhbâng duh hek lo. Tu mah a tiduhdah lo va, pûk dahkham a la duh lo va, tu mah a rûksak lo va, rilṭâm hnênah chaw a pe a, saruak silhfên a sintîr a, retheite lakah a kawm lo va, a pung a ûm hek lo. Dik takin thil a ti a, ka thupêk a zâwm a, chu mi chu a pa bawhchhiatna avâng chuan a thi tawp lo vang. A pa chuan mi a tiduhdah ṭhîn a, mahni unau ngeite pawh a rawk a, a mite chungah thil ṭha lo a ti ṭhîn a; chu a pa chu a bawhchhiatna avâng chuan a thi ngei tûr a ni. ‘Engah nge fapa chuan a pa sual mawh chu a phurh loh vang?’ in ti ṭhîn a; nimahsela, fapa chuan dik taka thil a tih a, ka thupêkte a pawm vek a, a zawm chuan a nung ngei ang. Thil sual titu chu a thi ang; fate chuan an pa sual mawh an phur lo vang. Mi dik chuan a dik man a têl ang a, mi sual chuan a sual man a hmu ang. “Mi sual chu a bawhchhiatna ata a lamlêta, ka thupêk te vawnga thil dik leh ṭha a tih chuan a nung ang a, a thi lo vang. A thil sual tihte chu hriat reng a ni lo vang a, thil ṭha a tih avâng chuan a nung ang. Mi sual an thih hi ka lâwmzâwng em ni?” Lalpa P athian thuchhuak chuan a ti; “An lo lamlêt a, an nun hi ka lâwmzâwng a ni zâwk lâwm ni?” “Mi ṭha pawhin thil ṭha hawisanin thil sual a tih a, mi sualte tih anga thil tenawm tinrêng a tih ve chuan a nung dâwn em ni? A thil ṭha tihte chu hriat reng a ni tawh lo vang a, a thil sual tih leh a bawhchhiatnate avâng chuan a thi mawlh ang. “ ‘ Lalpa hian mumal neiin thil a ti lo ve a’ in ti ṭhîn.Israel chhûngte u, ngaithla teh u, mumal nei lovin thil ka ti lo va, in awm dân hi a mumal lo a ni zâwk. Mi ṭhain thil ṭha tih a bânsan a, thil sual a tih chuan a thi ang, thil sual a tih avâng ngei chuan a thi ang. Mi sual pawhin a thil sual tih ṭhin a sima, thil dik leh ṭha a tih chuan a nun a humhim ang. A rilru a siam a, a sualte a bânsan vek chuan a nung ang a, a thi hauh lo vang. Israel chhûngte chuan ‘ Lalpa hian mumal neiin thil a ti lo,’ an ti a. Israel chhûngte u, mumal nei lovin thil ka ti lo va, nangni awm dân hi a mumal lo a ni zâwk lâwm ni? Chuvângin, Israel chhûngte u, mi tin an awm dân zêlin an chungah ro ka rêl ang, Lalpa P athian thuchhuak chuan a ti. Lo hawi kîr ula, in thil sual tih zawng zawng ata lo lamlêt rawh u; tichuan, in tân dâltu sual a ni tawh dâwn lo nia. In bawhchhiatnate chu paih bo ula, thinlung thar leh rilru thar pu rawh u. Israel chhûngte u, engah nge in thih mai ang? Mi an thi hi ka lâwmzâwng a ni nêm,” Lalpa P athian thuchhuak chuan a ti. “Lam lêt ula, nung rawh u.” “Israel miliante sûnna hla phuah la, heti hian ti ang che: ‘I nu chu sakeibakneipui a ni a, Sakeibaknei vânglai zînga bawkin no a châwm a, Kawlh tak pakhat a châwm lian a, A puitlin chuan sa a seh thei hle a, Mihring pawh a seh ta a. Hnam dangte chuan an hriatin, Hum an lai a, a tla ta a; Thîr kawl an buntîr a, Aigupta ramah an hruai a. A nghahfâk, a beisei ber chu A bo ta tih a hriat chuan, No dang a châwm lian leh a, A puitlin chuan sakeibaknei zîngah a tla ve a, Sa a seh thei ta hle a, Mihring pawh a seh ta a. An kulhte a tichhia a, An khuate a tiram a, A rûm hlauvin chhuakvâk ngam rêng an awm lo. Hnam dangte chuan an rawn bei a, Kil tin aṭangin an lo kal, Lênin an han khuh a, An hum laihah a tla ta a. Thîr kawl an buntîr a, bâwmah an khung, Israel tlângramah te A rûm an hriat tawh loh nân Ripa khungin Babulon lal an pe. I nu chu grep hrui lui kam huana hi a ni. Tui a ṭhat avângin a duah hluah hluah a, A rah duh êm êm. Lal tianga hman tlâk, ṭang khauh pui pui a nei a, A kûng chu a sâng hle a, a buk luai a, An en huai huai mai a ni. Thinurna avângin pawh phawn a ni a, Leiah an paih ta a, Khawchhak thliin a chhêm ro va, A rah a ṭîl zo ta. A ṭang khauh pui puite a ro zo va, A kâng ta a. Tui vânna ramro thlalêrah chuan An phun sawn a. A zâr aṭang chuan mei a lo chhuak a, A rahte chu a kâng zo ta, Lal tiang tlâk ṭang lian a nei ta lo.’ Hei hi sûnna hla a ni a, sak fo tûr a ni.” Kum sarih kum, thla ngana, tahrik ni sâwm ni chuan Israel upate chu Lalpa râwn tûrin an lo kal a, ka hmaah an ṭhu a. Lalpa chuan heti hian mi rawn hrilh a: “Mihring fapa, Israel upate hnênah thu sawi la, heti hian ti ang che: Lalpa P athian chuan heti hian a ti: mi râwn tûrin in lo kal a ni maw? Mi nunga chu ka nih hi, nangni râwn tûr em ka nih?” Lalpa P athian thuchhuak chuan a ti. “Mihring fapa, anniho hi i chachhuah dâwn lâwm ni? An pate thil tenawm tih chu hrilh la, Lalpa P athian chuan heti hian a ti: Israel, ka mi thlan, Jakoba thlahte chungah ka bân ka phar a, kut phar meuhvin, ‘Kei hi in Pathian, Lalpa chu ka ni,’ tiin Aigupta ramah khân ka inhriattîr a. Chumi ni chuan Aigupta ram ata, ka ram zawn chhuah, hnutetui leh khawizu luanna ram, ram azawnga ram ṭha bera hruai lût tûr che uin thu ka tiam a. An hnênah, ‘In duhzâwng, thil tenawmte chu paih ula, Aigupta ram milemte chuan intibawrhbâng suh u, kei hi in Pathian, Lalpa chu ka nih hi,’ ka ti a. Mahse, ka chungah an hel a, ka thu tu man an ngaithla duh lo va, an duhzâwng thil tenawmte chu an paih duh lo va, Aigupta ram milemte lah an thlah duh hek lo; tichuan, Aigupta ramah ngei an chungah ka thinrim ka hrithla ang a, ka thinur ka leihbua ang ka ti hial a. Mahse, an awmna hnamte hmuhah ka hming a chhiat loh nân ka ti ta êm lo va, Aigupta ram aṭangin ka hruai chhuak dâwn tih ka lo puang tawh si a. Chutichuan, Aigupta ram aṭangin thlalêr ka hruai thleng a. Miin an zawma an nun theihna tûr, ka thupêkte chu, ka hrilh a, ka Dân chu ka zirtîr a. “Anni nêna kan inkâr chhinchhiahna atân sabat ni pawh ka ruatsak a, anmahni la hrangtu ka nih an hriat theih nân. Mahse, Israel chhûngte chuan thlalêrah khân min helsan a, miin an zawma an nun theih nâna ka thupêkte chu an zâwm duh lo va, ka Dânte an hawisan a, ka sabat nite lah an bawhchhe zêl a; tichuan, thlalêrah, anmahni timang tûrin ka thinur chu an chungah ka leih nâng emaw ka ti hial a. Mahse, ka hruai chhuah lai hmutu hnam dangte mit hmuhah ka hming a hliau loh nân ka ti ta lo va. Thlalêrah chuan ka pêk tûr ram, hnutetui leh khawizu-a luang, ram azawnga ram ṭha berah chuan ka hruai lût lo vang tiin ka tiam ta hial a. An milemte ngaina zâwkin ka Dânte an hnâwl a, ka thupêkte an zâwm duh lo va, ka sabat nite an bawhchhe ta a ni. Mahse, thlalêra tihhlum êm atân chuan ka khawngaih a, ka tiboral vek ta lo va ni. Thlalêrah khân an fate hnênah, ‘In pate thupêk zâwm suh u, an dânte pawisa hek suh ula, an milemte chuan intibawrhbâng hek suh u. kei hi in Pathian, Lalpa chu ka ni, ka thupêkte zâwm ula, ka Dânte pawisain zâwm rawh u. Ka sabat nite serh ula; tichuan, kei leh nangni inkâra chhinchhiahna a ni ang a, in Pathian, Lalpa chu ka ni tih in hre ṭhîn dâwn nia’ ka ti a. “Mahse, an fate pawh chuan, min helsan a, miin an zawma an nun theihna tûr, ka thupêkte chu, an awih duh lo va, ka dânte chu an zâwm hek lo; ka sabat nite chu an bawhchhia a, thlalêrah khân ka thinrim ka hrîkthlâk nân an chungah ka thinur ka leih nâng emaw ka ti hial a. Mahse, ka hruai chhuah lai hmutu hnam dangte hmuhah ka hming a chhiat loh nân ka insûm a. Thlalêrah ngei khân, ‘Hnam dang zîngah ka thawn darh ang a, ram tinah ka tidarh ang,’ tiin ka tiam ta a. Ka dânte an zâwm duh lo va, ka thupêkte an awih lo va, ka sabat nite bawhchhiain an pate milemte chuan an mit a la ta zâwk si a. Chuvângin, an ṭhatna tûr ni lo dân ka siam a, an nun theih lohna tûr thu ka pe bawk a; an thilhlante chuan anmahni ka intihbawrhbântîr a, an fa tîrte pawh inthawi nân an hmang ta a ni; thiam loh an chana, kei hi Lalpa chu ka ni tih an hriat theih nân. “Chuvângin, Mihring fapa, Israel chhûngte hnênah heti hian sawi rawh, Lalpa P athian chuan heti hian a ti: In paten min phatsan avângin min tihmingchhe hle a ni. Pêk ka tum ram ka hruai thlen khân tlâng sângte leh thing hringte an han hmu a; tah chuan an inthawinate an hlân ta mai a; min elsênin thilpêkte an hlân a, rimtuite an hâl a, an thil hlan uainte an bun chhuak a. ‘Hêng hmunsângahte hian engtizia nge in kal?’ ka ti a: chûng chu tûn thlengin ‘hmunsâng’ tih a la ni. Chuvângin, Israel chhûngte hrilh rawh, Lalpa P athian chuan heti hian a ti: In pate hnung zuiin in intibawlhhlawh a, an thil tenawm tih in ti zui zêl a. Milem hnêna thil hlan leh inthawi nân in fate hâl ralin vawiin thleng hian in intibawrhbâng si a, Israel chhûngte u, min râwn tûra lo kal tûr em in nih? Mi nung ka nih hi, Lalpa P athian thuchhuak chuan a ti. Nangni râwn tûr ka ni lo ve. Hnam dang, he rama chi hrang hrang awmte tih dân angin thing leh lung biak in tum ta tlat si a; mahse, in be hlek lo vang.” “Mi nung ka nih hi,” Lalpa P athian thuchhuak chuan a ti; “Ka hrilh lâwk a che u; in chungah dîm lo tawpin ka kut ka lek ang a, in chungah lal ka hrawt ang. Hnam dang zîng, in darhna ram aṭanga ka hruai kîr hunah che u ka thiltihtheihzia leh ka thinurzia ka entîr ang che u. Hnam dang ramah, thlalêrah chuan ka hruai ang che u a, inhmachhawnin in chungthu ka rêl ang. “Aigupta ram thlalêra in pate chungthu ka rêl ang khân in chungthu ka rêl ang,” Lalpa P athian thuchhuak chuan a ti. “Talhfiak nên ka vil ang che u a, ka thuthlungah ka luhtîr tlat ang che u. In zînga hel leh ka chunga thil sual titute chu ka thian ang a, an awmna ram ata ka hruai chhuak ang a; mahse, Israel ram an thleng ve lo vang; tichuan, kei hi Lalpa chu ka ni tih in hria ang. “Nangni Israel chhûngte u, Lalpa P athian chuan heti hian a ti: Mahni milem chu pan ṭheuh ula, chibai bûk mai teh u. Ka thu in ngaithla duh si lo! Ka hming thianghlim hi in thilhlan leh milemte chuan tibawrhbâng tawh suh u. “Israel ram, ka tlâng thianghlimah chuan, Israel chhûng tin, in zavaiin, chu ramah chuan ka rawng in bâwl ang a, tah chuan ka lo lâwm ang che u a, in thên thilhlan te, rah hmasa in hlan te, in thil thianghlim hlan te ka lo dawng ang. “Hnam dang zîng ata ka hruai chhuah che u a, in darhna ram ata ka hruai khâwm hunah che u chuan in thil rimtui hlan nên ka lo lâwm ang che u a, hnam dangte chuan ka thianghlimzia an hmu ang. “Kut phar meuhva in pate hnêna pêk ka tiam ram ka thlen hunah che u kei hi Lalpa chu ka ni tih in hria ang. In khawsak dân leh in thiltih a in intihbawrhbân ṭhin te kha in hre chhuak ang a, thil sual in tih avângin nangmahni in inngei hle ang. Aw Israel chhûngte u, ka hming avângin, in awm dân sual leh chimawm taka thil in ti ṭhin ang lova in chunga thil ka tih hunah chuan Lalpa chu ka ni tih in hria ang,” Lalpa, P athian thuchhuak chuan a ti. Lalpa chuan ka hnênah: “Mihring fapa, chhim lam hawi la, chhim lam ram demin thu sawi la, chhim lam ngaw chungthu puang rawh. Chhim lam ngaw chu ngaithla tûrin hrilh la: Lalpa P athian chuan heti hian a ti: Ngai teh, i chungah mei ka tichhuak ang a, thing hring leh ro, a vaiin a kâng vek ang. A alh chu tu man an ṭhelh thei lo vang a, chhim leh hmârah a darh ang a, mi tin hmêl a em ût vek ang. Kei Lalpa hian ka tihkan a ni tih tu pawhin an hria ang a, tu man an ṭhelh thei lo vang,” a ti a. Kei chuan, “Khai a! Lalpa P athian, ‘thu khirh hlîr a sawi ṭhîn,’ min ti dêr tawh asin,” ka ti a. Lalpa chuan heti hian a sawi a: “Mihring fapa, Jerusalem lam hawi la, hmun thianghlim demin thu sawi la, Israel ram chungchâng thu puang rawh; Israel ram hnênah heti hian ti rawh: Lalpa chuan heti hian a ti: Ngai teh, i chungah ka ṭuan dâwn, ka khandaih chu a pai ata ka phawi ang a, in zînga mi ṭha pawh, mi sual pawh ka râwt vek dâwn. Mi ṭha leh mi sual ka râwt dâwn avângin chhim leh hmâra mi zawng zawng chungah khandaih ka lek dâwn a ni. Tichuan, tu pawhin kei Lalpa hian khandaih chu ka phawi a, ka khung leh dâwn lo tih an hria ang. “Nang mihring fapa, rîl pawh thlâk ang chûlin chiau la, an hmuh ngeiah lungchhe takin ṭap rawh. ‘Engati nge i chiau tak chûl?’ an tih che chuan, ‘A sawi chu a lo thlen mai dâwn avângin ka chiau a ni. Mi zawng zawng an zâm ang a, an bân tha a zâwi ang a, an thlabâr ang, an khûpte pawh a sâwi hlawk hlawk ang,’ ti ang che. Ngai teh, a lo thleng ṭêp a ni,” Lalpa P athian thuchhuak chuan a ti. Lalpa chuan heti hian mi hrilh a: “Mihring fapa, hetiang hian puang rawh, Lalpa chuan heti hian a ti: Khandaih chu tah hriam a ni a, Khandaih chu nawh tlêt a ni ta. Insah nân tah hriam a ni a, Kâwlphe anga de zawr zawr tûra nawh tlêt a ni. Hlim rual a ni nêm! Ka mite hian zilhna an pawisak hauh loh hi. Hman theih maiin khandaih tah a ni tawh; A ni, thîr hriama nawh tlêt a ni, Thattu kenah peih a ni ta. Mihring fapa, ṭap la, chiau vawng vawng rawh, Ka mite tuar tûr a ni si, Ka mite chu Israel miliante nên khandaiha sah an ni dâwn. Mangangin i khêl bêng rawh. Ka mite hi fiah an ni a, An sim loh chuan an boral ang,” Lalpa P athian thuchhuak chuan a ti. “Nang mihring fapa, thu puang rawh, I kutphah chûm la, Khandaih chuan vawi hnih vawi thum sât sela, Sât sât rawh se; Khandaih hrâng a ni a, Khandaih lian pui, hlauhawm tak a ni, An vêla mite thahna tûr chu. Ka mite chu a tizâm a, an tlu zo ta, Inthahna khandaih, kâwlphe anga de zawr zawr tûr, Kulh kawngka tinah ka dah ta, Mi thah nân khêk tlat a ni. Khai le, ding lam leh vei lam I hawi lam apiang sâm zêl mai teh. Kei pawhin ka kut ka lo chûm ang a, Tichuan, ka thinur a dai tawh ang. Kei Lalpa hian ka sawi tawh hi.” Lalpa chuan heti hian mi hrilh a: “Nang mihring fapa, ram pakhat aṭanga kawng lo chhuak pêng ta, khandaih nêna Babulon-ho kal zêlna tûr kâwk chu chhinchhiah rawh. A pêng laiah chuan kutkâwk târ la, pakhat chuan Amon khua Raba kawng kâwk sela, pakhat chuan Jerusalem kulh kawng kâwk rawh se. Babulon lal chu pêngah chuan, a kalna tûr zâwk hriat nân aienin thal a thing a, milem a râwn a, an inthawina sa thin chu a en vung vung mai. Jerusalem hawi zâwnga tla, aienna thal chu a kut ding lamin a chhar a, kulh bang chhut chhiatna va bun tûr te, lei chhûng pâwnga hual bang siam tûrte niin a ngai ta a. “Jerusalem mite chuan Babulon nêna thu an lo thlun tawh avângin aienna dik lovah an ngai a; mahse, an sualzia hriat chhuahtîr tûr a ni a, man an ni ngei dâwn. Chuvângin, Lalpa P athian chuan heti hian a ti: In bawhchhiatna chu hriat reng a ni a, in sualte chu puanzâr a ni a, in thiltih apiangah in bawlhhlawhzia a lan hi: hrem in ni dâwn, hmêlmain an man dâwn a che u. “Nang, Israel-te hotu, mi sual, thah tûr i ni. I thih ni chu a lo thleng ta, bawhchhe tûr i awm tawh lo vang. Lalpa P athian chuan heti hian a ti: I lallukhum leh i diar chu phawng rawh, a ngaiin thil a awm dâwn lo; mi tlâwmte chu chawisân an ni ang a, mi liante chu tihtlâwm an ni ang. A chhe dâwn, a chhe dâwn, ka tichhe dâwn; mahse, a neitu dik tak tûr a lo kal hma chu ka ti lo vang, a hnênah ka pe dâwn a ni.” “Nang Mihring fapa, thu puang la, mi dem hrât Amon mite hnênah chuan heti hian ti rawh: Insah hlum nân khandaih chu an phawi ta, Khandaih hriam nawh tlêt, Kâwlphe anga de zawr zawr tûr chu. “Dâwt ni si inlârna an hmu a, aienna dik lovin ai an ensak che a ni, i nghâwngah khandaih a bûr dâwn, i sualna tenawm avângin i hun a thleng ta, hrem i nih hun chu. Khandaih chu a paiah khung mai rawh, i pian i mûrna ramah i chungthu ka rêl dâwn. Ka thinurna chu i chungah ka leih ang a, ka thinrimna mei chu i chungah ka chhêm alh ang. Mi that ṭhang pa nunrâwng pui pui kutah ka hlân ang che. Mei chuan a kâng ang chia, nangma ram ngeiah i thisen a chhuak ang; tu man an hre reng lo vang che, kei Lalpa P athian hian ka sawi tawh hi.” Lalpa chuan ka hnênah, “Nang, Mihring fapa, tualthahna khawpui chachhuah tûrin i inpeih em? An thil tenawm tih zawng zawng chu hrilh vek ta che. Lalpa P athian chuan heti hian a ti ti rawh: Tual thah chîng leh milema intibawlhhlawh khawpui tâwpna chu a lo thleng. Thisen in chhuahte avângin ka thiam lo che u a ni; in milem siamte chuan in intibawrhbâng a, in tâwpna hun chu in tihnai a, a lo thleng ṭêp a ni. Hnam tin hmuhsit leh ram tina nuihzatbûrah ka siam ta che u a ni. Innghirngho chîng, khaw hmingchhe tak i nih avângin i bul hnaia awmte leh ram hla taka awmte pawhin an nuihzat che a ni. “Ngai teh, khuaa Israel hotute chu an theih ang anga, tualthah inpeih rengin an khawsa a. Tu mahin nu leh pa an zah lo va, hnam dang mite an hnehchhiah a, fahrah leh hmeithaite dik lo takin an sawisa a. Ka Hmun Thianghlim an zah lo va, ka sabat ni an bawhchhia a, tihhlum tûrin mi dang an hêk a, bâwlhmuna inthawina ruai an kîl a, khuaah chuan an hur kual a. Ṭhenkhat chuan an pate nupui an mutpui a, hmeichhe fel lo lai an pâwl lui a. Ṭhenkhatin mahni ṭhenawm nupui an tibawrhbâng a, an mote pawh an khawih a, an pate fanu, an farnu ngeite pawh an tibawlhhlawh a. Tual that tûra thamna late an awm a, a pung an ûm a, ṭhenawm khawvêngte hrêkin an hlêp ṭeuh ṭeuh va, kei ngei pawh min theihnghilh ta,” Lalpa P athian thuchhuak chuan a ti. “Ngai teh, in zîngah mawi leh mawi lo thlu lêk lova hlêp leh tual thah in chîn avângin ka kut ka ben khum dâwn a che u. In chunga ka ṭuan hunah in tuar ngamin in lo ṭang zo dâwn em ni? Kei Lalpa hian ka sawi hi, ka ti ngei ang. Hnam dang zîngah ka tidarh ang che u a, chutiang chuan in bawlhhlawhna chu ka tibo vang. Hnam dangte chuan an lungten ang che u a; tichuan, kei hi Lalpa chu ka ni tih in hria ang.” Lalpa chuan heti hian mi hrilh a: “Mihring fapa, Israel chhûngte hi an zavaiin a êkchhia vek an ni, rawhtuina meia tangka rawh fai hnua a êkchhia, dâr te, ṭin te, suan te ang lek hi an ni. Chuvângin, Lalpa P athian chuan heti hian a ti: A êkchhia ang lek in nih tâk avângin Jerusalem khaw chhûngah ka khung khâwm ang che u; tangkarua te, dâr te, suan te rawhtuina bêla an dah khâwma an rawh tui ang hian ka thinura ka lungnih loh êm êm avângin ka dah khâwm ang che u a, ka rawhtui ang che u. A ni, ka dah khâwm ang che u a, ka thinurna mei chu ka chhêm hnan ang che u a, Jerusalem khaw chhûngah chuan ka rawh ang che u. Tangkarua, rawhtuina bêla an rawhtui ang hian in tui zo vang; tichuan, kei Lalpa hian ka thinur in chungah ka leih a ni tih in hria ang.” Lalpa chuan heti hian mi hrilh a: “Mihring fapa, Israel-te hi hrilh rawh. An ram chu ram then fai loh a ni a, thinurna ni avânga ruah dawng lo ram a ni. An hotute chu sakeibaknei sa hauh rûm ang an ni; mi an that a, mi sum leh thil hlute an lâksak a, mi tam tak an tihmeithai a ni. Puithiamte chuan ka dân an hmusit a, ka thil thianghlimte an tibawrhbâng a, thianghlim leh thianghlim lo an thliar thei lo va, a thiang leh thiang lo mi an zirtîr thei hek lo. Ka sabat ni an hai der a, an zînga tu mahin min zah lo. An hotute chu chinghne koham, a hmuh apiang seh zêl ang hi an ni: hlâwkna tûr a awm phawt chuan mi thah an tîm lo. Zâwlneite chuan inlârna an hmu der a, dâwt thu hril lâwkin chinai an hnawih mawi bang ang hian an thiltihte chu an sawi mawisak a; ka sawi loh pui, ‘Lalpa P athian chuan heti hian a ti,’ an ti a. Thingtlânga awmte pawhin mi dang an nêkchêp a, rawk an chîng a, retheite leh pachhiate an tiduhdah a, ram dang mite dik lo takin an hnehchhiah a. Thinura ram chu ka tihchhiat vek loh nân a bang chim rem ṭha tûr, a chhe laia lo ṭang tûr mi, an zîngah ka zawng a, ka hmu zo hauh lo. Chuvângin, ka thinurna an chungah ka leih ang a, ka thinrimna mei chuan a tihlum ang; an thiltih mawh chu an chungah ka nghat dâwn a ni,” Lalpa P athian thuchhuak chuan a ti. Lalpa chuan heti hian a sawi a: “Mihring fapa, nu pakhatin fanu pahnih a nei a. An tleirâwl chhuah aṭangin Aigupta ramah mi hurah an ṭang a, an hnute te an dehsak a, an nulâtna an hloh ta a. A upa zâwk hming chu Oholai a ni a, Samari entîrna a ni; a naupang zâwk chu Oholabai a ni a, Jerusalem entîrna a ni. Nupuiah ka nei a, fanu fapa min hrinsak a. Ka nupui ni chungin Oholai chuan min hursan a, a ngaihzâwng, râlhrâtho, Asuria chu a hak hiam a. Chûng chu kawr sena inthuam, milian leh hotu lal, tlangvâl hmêlṭha thlan, sakawr chungchuang mi an ni. Chûng Asuria mi chhuante nula chu a ni ta a; an milemte ngaisângin a be ve a, a intibawrhbâng ta a. Aigupta rama a hurna kha a la sim lo va ni, a tleirâwl chhuah aṭang rêngin mipain an mutpui ṭhîn a, an nula angin an chei ṭhîn. Chuvângin, a ngaihzâwng, a hak hiam ṭhin Asuria mite kutah ka pe ta a ni. Anni chuan a silhfên an hlihsak vek a, a fanu fapate chu an kawisak a, amah chu khandaihin an that a; a thil tuar chu hmeichheho sawiṭhaihna ber a ni ta a. “A nau Oholibai chuan chûng chu a hmuh pawhin a u ai chuan mi dang a hak hiam dân leh a hur dân chu a nasa zâwk ta daih a. Asuria milian leh hotu lal, râlhrât, kawr senlâr ha, sakawr chungchuang, tlangvâl rual hmêlṭha thlante chu a hak ve ta hiam a. Ani pawh chu a intibawrhbâng ta tih ka hmu a, a u siar a u siar a ni. A hurna chu a zual tulh tulh a; Kaldai hotu lian thlâ, banga an ziak, senlâr vûta rawng an hnawih, kâwnghrên mawi tak hrênga, diar fêm buk tak khim, han en pawha hotu ni âwm hliah hliah, Babulon mi, Kaldai rama piangte lem chu a han hmu a, a ngaizâwng ta a, Kaldai mite hnênah chuan puarak te a tîr ta a. Babulon mite chu an lo kal a, an rawn mutpui a, an tibawrhbâng ta a. Duh tâwka an chêt hnu chuan a ngei ta hle a. Chutia a lang a pauva a hur a, inhlîm a hreh loh avâng chuan a u ang bawkin ka ngei ve ta a. Aigupta rama a tleirâwl hurna kha a la reh lo, a hur tulh tulh a ni. Sabengtung leh sakawr anga lian mi hur pui pui mutpui tûr a melh riai mai. Aigupta rama i hnute an dehsak che a, i nulâtna i hloh tâk china i tleirâwl hurna chu i la chhunzawm zêl a nih hi. “Chuvângin, Oholiba, Lalpa P athian chuan heti hian a ti: Ngai teh, i ngaihzâwngte chu i chungah ka ṭuantîr dâwn. I ngaihzâwng, i ngei tâkte kha, kil tin aṭangin ka rawn hualtîr dâwn a che. Babulon mi te, Kaldai mi te, Pekod mi te, Shoa leh Koa mite leh Asuria-ho te chu ka rawn hruai ang. Babulon mi, Kaldai tlangvâl hmêlṭha thlan ṭhiau, milian leh hotu lal, râlhrât rual leh sakawr chungchuang hotute chu ka rawn khâwm dâwn. Hmâr lam aṭangin an lo kal ang a, sipai tam tak, sakawrtawlailîr hmang leh thil phur tawlailîr nên, phaw keng leh awmphaw ha-in, invenna lukhum nên an rawn hual ang che a, an duh duha an tih tûrin an kutah ka dah tawh che. I chungah ka thinur a, anni pawh thinur taka sawisa tûr chein ka ti a ni; i hnâr te, i beng te an hlep ang a, in zînga la dam chu khandaihin an that ang. I fanu fapate chu an man ang a, an man bâng chu an kâng hlum ang. I thawmhnawte an hlihsak vek ang chia, i ṭhi mawite chu an lâksak ang che. I hurna leh i nawhchi zawrh, Aigupta ram aṭanga i chhawm chu, ka titâwp ang. Aigupta chu thlîr kîrin i ngaihtuah tawh lo vang.” Lalpa P athian chuan heti hian a ti: “Ngai teh, i huatzâwng leh i mi ngeite kutah ka hlân dâwn che. An huat êm che avângin an sawisa nek ang che; i thawh chhuah zawng zawng an lâksak ang che a, saruakin, a lâwng maiin an lum reng ang che. I hur avâng leh nawhchi i zawrh avângin hêng hi i chungah i tithleng a ni, hnam dang dang ûmin i hur bo va, an milemte chuan i intibawrhbâng a, i u awm dâna i awm ve zêl avângin i tuar tûr no chu ka pe a che.” Lalpa P athian chuan heti hian a ti: “No lian pui, dawng hlâwk tak, i u no chu in rawh, Mi tinin an hmusit ang chia, An nuihzat ang che. A dawng hlâwk êm a nia. I rui ang a, i mangang hle ang, Hlauhna leh chhiatnaa khat no a ni. I u Samaria no chu, I in ang a, i tlâk vek tûr a ni, A keh them lam in tel la, I hnute te chu pawt fân rawh.” Lalpa P athian thuchhuak chuan, “Kei hi a siamtu che ka ni,” a ti. Chuvângin, Lalpa P athian chuan heti hian a ti: “Min theihnghilh a, min hawisan tâk avângin i hurna leh i nawhchi zawrh mawh chu i phur ang.” Lalpa chuan heti hian a sawi a: “Mihring fapa, Oholai leh Oholabai te hi chachhuah tûrin i inpeih em? An tenawmzia hrilh teh. An uire a, an kutah thisen a kai hnuang mai; milem biain an uire a, fapa min hrinsakte chu an that a, milem hnênah an hlân. Ka chungah hei chauh hi an ti nêm! Ka Hmun Thianghlim an tibawrhbâng a, ka sabat ni an bawhchhe bawk. An fate, milem hmaa an thah ni la lain, chumi ni ngei chuan, ka Hmun Thianghlimah an lo kal a, ka in chu an rawn tibawrhbâng ṭhîn. Ram hla taka mi sâwm tûrin puarakte an tîr chhên a, chûng mite chu an lo kal a. Anni chu an lo inbual fai a, an mit an hnawih dûr a, ṭhi man tamte an lo awrh a. Khum nuam takah an ṭhu a, ei tûr tui tui dah khâwmna dawhkân an chhawp a, ka pêk thil rimtui leh hriakte chu an dah bawk a. Engthâwl taka nuam chênin an ri bûng bûng a; thlalêr aṭanga sâwm khâwm ṭeuh te chuan ngûn an buntîr a, lukhim mawi tak an khimtîr a. Uire chau tawh chu nawhchizuar angin an chei a nih hi,’ ka ti a. Nawhchizuar, miin an pan ṭhin angin mi hur Oholai leh Oholabai chu an la pan ta chhên a. Uire leh tualthatah mi dikte chuan an puh ang a, thiam loh an chantîr ngei ang; uire an chîng a, an kutah thisen a kai hnuang si a.” Lalpa P athian chuan heti hian a ti: “Tihthlabâr tûr leh rawk tûrin mipui khâwm rawh u. Mipui chuan lungin dêng sela, khandaihin tan sela, an fanu fapate chu that rawh se, an inte pawh hâl rawh se. Ram pumah an hurna chu ka tibo dâwn, hmeichhe dangte pawhin anni anga hur an chîn ve loh nân. Nangni unau hian in hur man in tuar ang a, milema in in-tihbawrhbân mawh chu in phur ang. Tichuan, kei hi Lalpa P athian chu ka nih in hria ang.” Kum kuana thla sâwm, ni sâwm ni chuan Lalpan heti hian mi hrilh a. “Mihring fapa, ziakna la la, vawiin tahrik ni hi ziak teh, vawiin hi Babulon lalin Jerusalem a hual ṭan ni a ni. Hel hmang chhûng tân he tehkhin thu hi sawi rawh; ‘Lalpa P athian chuan heti hian a ti,’ ti rawh: Chhuang rú, bêl chu chhuang rú, Tui pawh leih khat rawh u. Sa ti ṭha ṭha, a bawp leh dâr, A irno ruhte nên la khâwm ula, Tikhat rawh u. Berâm tuihnai hnai talh ula, Thukah thing rawlh ṭeuh ṭeuh rawh u. So bawrh bawrh sela, A ruh filhin hmin teh se. “Lalpa P athian chuan heti hian a ti: Tualthahna khawpui chu a chung a pik e. Tihfai ngai loh khirkhâwng hlîr a ni. Sa hrang chu thlang chuang lovin thur vek rawh u. Khaw chhûngah mi an that a, an thisen chu lungpui châr chungah a luang, leiah luang se vaivutin a chhilh tûr. Chhilh a nih loh nân lungpui châr chungah ka luantîr a ni: mi tihthinrima phuba ka lâk theih nân. “Tichuan, Lalpa P athian chuan heti hian a ti: Tualthahna khawpui, i chung a pik e! Kei ngei hian thingfâk chu ka rawlh ṭeuh dâwn a ni. Thing fawm belh ula, chhêm hluah hluah rawh u; sa chu hmin kawi sela, chhuang kang rêt ula, a ruhte chu rawh ral rawh u. Dâr bêl ruak chu meiling chungah chhuang reng ula, ling vur rawh se. A khirkhâwng bawlhhlawh chu a kan ral hnuah bêl chu a thianghlim leh ang. A khirkhâwng chuti zozai chu hah hnêp khawpin tihfai tum mah la, i tifai thei lo vang, mei chauhvin a tifai thei a ni. In hurna chuan a tibawlhhlawh che u a, tihfai ka tum che u a, in fai thei si lo; ka thinur mei in tuar hma chu in fai dâwn lo va nih hi. Kei Lalpa hian ka sawi tawh a, ka hun a lo thleng ang a, ka ti ngei ang. Ka ngaizam mai lo vang, ka lainat lo vang a, pawi ka ti hek lo vang. In awm dân leh in thil tih dân ang chiahin in chungah ro ka rêl ang,” Lalpa P athian thuchhuak chuan a ti. Lalpa chuan heti hian mi hrilh a: “Mihring fapa, i duh lai tak ka tina thut ang a, ka lâksak dâwn a che. I ṭap ri tûr a ni lo va, i mittui a tla tûr a ni hek lo. Ngawi rengin inhnîp la, lusûn angin awm suh, diar khim la, pheikhawk bun rawh, i hmai tuam suh la, lusûn ei ang ei hek suh,” tiin. Chumi tûk chuan mipui hnênah thu ka sawi a, tlaiah chuan ka nupui chu a thi ta mai a. Thu min pêk ang khân a tûk zîngah chuan ka ti ta a. Mite chuan, “Engtizia nge hetia i tih, min hrilh teh,” an ti a. Anni chu ka bia a; Lalpa thu ka hnênah hetiang hian a lo thleng a ni: “Israel chhûngte hnênah sawi rawh. Lalpa P athian chuan heti hian a ti: Ngai teh u, ka Hmun Thianghlim, rinawm in tih êm êm, in chhuan, hmuh in kham theih loh, in lainat êm êm chu ka tibawrhbâng dâwn a ni. In fanu fapa Jerusalem-a la awmte chu khandaihin an sât hlum ang. Ka tih ang hian in ti ve dâwn a ni: in hmui in khuh lo vang a, lusûn ei ang in ei hek lo vang. Diar in khim tûr a ni, pheikhawk in bun ang a, in ṭap ri tûr a ni lo. In bawhchhiatna avângin in chau vang a, in inrûm chhâwk ang. Ezekiela hi in tân chhinchhiahna a ni ang, a tih ang zêl hian in ti dâwn a ni; chumi hnuah chuan kei hi Lalpa P athian chu ka ni tih in hria ang. “Nang, Mihring fapa, an hlimpui leh an chhuan, hmun rinawm tak, hmuh an kham theih loh, an lainat êm êm chu ka chhuhsak ang a, an fanu fapate chu ka la bo vang. A tlân chhuak awm chhun chu i hnênah a lo kal ang a, i beng ngeiin a thu i ngaithla ang. Chumi ni chuan i ṭawng thei leh tawh ang a, lo tlân chhuak chhun chu i be thei ang. Tichuan, an tân chhinchhiahna i ni ang a, Lalpa chu ka ni tih an hria ang,” a ti a. Lalpa chuan heti hian mi hrilh a: “Mihring fapa, Amon ram lam hawi la, thû puan khum rawh. Amon mite hnênah, ‘Lalpa P athian thu hi ngaithla rawh u,’ ti rawh. Lalpa P athian chuan heti hian a ti: Ka Hmun Thianghlim an tihbawrhbâna, Israel ram an tihchhiata, Judai ram mite sala an hruai khân i lâwm vei hle a. Chuvângin, ngai teh, khawchhak mite kutah ka pe ang che u. In ramah bûk an rawn tlar ang a, hmun an khuar ang. In thei rahte leh in ran hnutetuite chu an tlân ang. Raba khawpui chu sanghâwngsei tlatna hmunah ka siam ang a, Amon ram pum chu ran tlatna hmun a ni ang; tichuan, Lalpa chu ka ni tih in hria ang. Lalpa P athian chuan heti hian a ti: “Israel ram chu a chhiat avângin hmusit êm êmin hlim takin kut i bêng a, i ke i per vei a; chuvângin, ngai teh, i chungah ka kut ka lek dâwn a ni. Hnam dang kutah ka pe ang chia, an rallâk sum i ni ang. Hnama chhiar tlâk lohvah ka siam ang che a, ka tichhe vek ang chia, ram nei lovin ka siam ang che. Tichuan, kei hi Lalpa chu ka ni tih i hria ang.” Lalpa P athian chuan heti hian a ti: “Moab leh Seir chuan Judai ram pawh ram dang ang bawk a lo nih lek hi,’ an ti vei a. Chuvângin, ngai teh, Moab ramri humtu khawpuite chu ka tudarh dâwn, ram mawi taka khawpui Beth-jesimot te, Baal-meon te, Kiriathaim khua te chu. Khawchhak mite chu Amon chungah nên an che ang a, an neih atân an ram chu ka pe ang. Amon mite chu hnama chhiar an ni tawh lo vang. Moab chungthu chu ka rêl ang a; tichuan, Lalpa chu ka ni tih an hria ang.” Lalpa P athian chuan heti hian a ti: “Edom chuan Judai ram chungah phuba a la nghek a, hetia phuba an la mai hi an thiam lo tak zet a ni. Chuvângin, Lalpa P athian chuan heti hian a ti: Edom chungah ka kut ka lek dâwn; mihring pawh, ran pawh ka tihlum ang. Teman khua aṭanga Dedan khaw thlengin ka tichhia ang a, khandaihin mite chu ka sât hlum ang. Edom chunga ka phuba chu la tûrin ka mi Israel-te chu thu ka pe ta; ka lungnihlohzia leh ka thinurzia an tilang ang. Phuba ka la a ni tih an hria ang,” Lalpa P athian thuchhuak chuan a ti. Lalpa P athian chuan heti hian a ti: “Filistia-ho chuan an kumkhaw hmêlma chungah râwng takin phuba an la a, hmusit takin an tichhe vei a. Chuvângin, Lalpa P athian chuan heti hian a ti: Filistia chungah ka kut ka lek dâwn; Keret mite chu ka tihlum ang a, tuipui kama la awmte pawh chu ka tihlum ang. Thinur takin an chungah phuba ka la ang a; tichuan, kei Lalpa hian an chungah phuba ka la a ni tih an hria ang.” Kum sâwm leh pakhatna, thla ni hmasa berah chuan Lalpan heti hian a sawi a, “Mihring fapa, Tura mite chuan Jerusalem chungchângah hlim takin, ‘Chei! Hnam tin kawtchhuah, Jerusalem chu a chhe ta vek mai! A chhiat tâk avângin keini kan changtlung hlauh vang,’ an ti vei a. Chuvângin, Lalpa P athian chuan heti hian a ti: ‘Aw Tura, ngai teh, i chungah ka ṭuan dâwn, tuifinriat fâwn angin hnam tam tak rawn bei tûr chein ka rawn tîr dâwn. Tura kulh bang chu an tichhia ang a, an insângte an tichim ang, a chung lei chu ka phiat fai hliau vang a, lung pialtlêp ngawt a ni ang. Tuifinriata lên dêngho lên phona a ni ang. Kei hian ka sawi tawh hi,” Lalpa P athian thuchhuak chuan a ti: “Hnam dang tân râllâk sum an ni ang. An mi, lova awmte chu, khandaiha sah hlum an ni ang; tichuan, kei hi Lalpa chu ka ni tih an hria ang.” Lalpa P athian chuan heti hian a ti: “Ngai teh, Babulon lal, Nebukadnezara, lal ropui ber chu Tura bei tûrin hmâr lam aṭangin sakawr te, tawlailîr te, sakawr chungchuang mi te, sipai te, ṭhuihruai tam tak nên ka rawn hruai dâwn. I mi, lova awmte chu khandaihin a that ang a, khua chu hual bang a siam hnan ang a, lei a chhûng pâwng ang a, phaw nên a hual ang che. Bang chhut chhiatna a hmang ang a, i in sângte chu hreiin a chêk chhia ang. An sakawr pal khûk vaivutin a bawh tlat ang che. Sakawr te, tawlailîr te leh sakawr chungchuang mi te thâwmah chuan kulh bangte chu a nghîng dawt dawt ang a, bang chim laiah an lût tup tup ang hian i kulh kawngkaah an lût ang. I kawtthlêr chu sakawrin a chîl phut dup ang a, mite chu khandaihin an sât hlum ang; in lungphun nghet tak takte chu an titlu ang. I rote leh in dâwr sum te chu duh duhin an la ang a, in kulh bang chu an tichim vek ang. In nuam, in chhuan êm êmte chu an tichim bawk ang a, lung te, thing te, thil chim hnawk te chu tuifinriatah an paih ang, In zai dur dur ṭhîn chu ka titâwp ang a, in ṭingṭang ri pawh a dai dak ang. Lung pialtlêpah ka siam ang chia, lên phona mai i ni ang; an din leh tawh lo vang che. Kei Lalpa hian ka sawi tawh hi,” Lalpa P athian thuchhuak chuan a ti. Tura hnênah Lalpa P athian chuan heti hian a ti: “I chhiat hunah, mi an thah chiam, hliam tuarte thâwm avângin tuipui kama awmte chu hlauvin an khûr ve ang. Tuifinriat kama lalte chu an lalṭhutthlêng ata an chhuak ang a, an puante chu an dah ang a, an thawmhnaw mawi tak takte chu an hlîp ang a, an khûr zawih zawih ang. Leiah an ṭhu ang a, i chhiatna chuan a râp êm avângin an khûr tâwp thei lo vang. He hla hian an ṭah ang che: ‘Tuifinriata lêngte chênna khua Khaw hmingthang chu i va han chhe hneh êm! I chhûnga chêngte chu tuifinriata lal an ni a, Khawvêla mite hlauh i nih ṭhin vei nên. I chhiat ni chuan thliarkârte an khûr a, I bo ni chuan tuipuia thliarkârte an va hrilhhai em!’ Lalpa P athian chuan heti hian a ti: “Tu ma awm lohna, khaw ram angin ka tiram ang che, tuithûkpuiah ka tipil ang chia, tuifinriat chuan a chîm pil daih ang che. Hmânlai mite chhukna khurah ka thlâk ang chia, lei hnuai pûk, kumkhaw chhiatnaah, mitthite chhukna khuaah chuan ka awmtîr ve ang che. Tichuan, tu mah an lo awm thei tawh lo vang a, mi nung ramah i awm ve dâwn tawh si lo. I boral ang a, boral ve hi mi tinin an hlau vang. Zawng zawng che mah se, an hmu lo vang che,” Lalpa P athian thuchhuak chuan a ti. Lalpa chuan heti hian mi hrilh a: “Nang, Mihring fapa, Tura sûnna hla phuah rawh. Tuifinriat kawtchhuaha awm, tuipui kama awm zawng zawng nêna sumdâwng ṭhîn. Tura khaw hnênah chuan heti hian ti rawh. Lalpa P athian chuan heti hian a ti: ‘Aw Tura, ka mawi ber e, i inti a, Tuipui bula awm i ni a, A dintute chuan an rem mawi kher mai che. Hermon tlâng fâr thing an zai a, I lawng ngulah Lebanon sidar an hmang. Lawng kar nân Basan sasua, Chhuatah Kitim tufâr thingphel, Saingho phûm chu an hmang. Aigupta puan ṭial mawi chu Lawng thli puan zârah i hmang a, Puanzâr dang a ngai lo ve, Elim thliarkâr puan dum leh sen, Chung zârah i hmang. Sidon leh Arvad mite chu Lawng kartuah i chhawr a, Aw Tura, nangma mi thiamte ngei I lawng khalhtu an ni. Gebal themthiam mite chu Lawng pawp thawmtu an ni. Tuifinriata kal lawng zawng zawng chu I tân sumdâwngtu vek an ni.’ “Persia mi te, Lud mi te leh Put mite chu i sipaiah an ṭang a, phaw leh dâr lukhum an târ tuar a, an tiropui ngei che. Arvad leh Melek mite chuan i kulh an vên hual a, Gamad mite chuan i kulh bangah râl an vêng a, an phaw leh dâr lukhum chu bangah an târ tuar a, an tiropui ngei mai che. “Tarsis nên in indâwr a, tangkarua te, thîr te, ṭîn te, suan tein i bungrua an rawn lei a. Javan te, Tubal te leh Mesek te nên in indâwr a, sal leh dâr bêltein i dâwr sum an rawn lei. I bungrua chuan Beth-togarma aṭangin sakawr chhawr chi te, sakawr chungchuanna chi te leh sabengtung te i chaw a. Dedan nên in indâwr a, tuipui kama awm thliah thluahte chuan saingho hrawl pui pui leh thing ril dum mi an rawn lâk che a. Edom mite chuan i dâwr sum leh i thil siamte an rawn lei a, i dâwr sum lei nân lungmantam te, puan senduk te, puan cheimawi te, puan zai sîn te, tuikep te, rubi lung te an rawn keng a. Judai leh Israel ram aṭangin Minnit huit te, theipui te, khawizu te, oliv hriak te thinghnai damdawi tein an rawn dâwr che a. Damaska mite chuan i dâwr sum leh i thil siamte chu an rawn la zung zung a, Helbon uain leh Sahar sahmulin an rawn dâwr che. Uzal vêla Vedan leh Javan mite chuan an rawn dâwr che a, thîr hlûm te, mosola te, thakthîng te, thing rimtui te an rawn keng. Dedan mite chuan sakawr thawmhnawin i dâwr sum an rawn lei a. Arab mite leh Kedar lalte chuan berâmno te, a chal te, kêlpatein i dâwr sum an rawn lei. Seba leh Rama sumdâwngtute chuan mosola ṭha ber chi leh lungmawi tinrêng leh rangkachakin i dâwr sum an rawn lei a. Haran te, Kana te leh Eden khaw mite chu, Seba sumdâwngtute leh Asur leh Kilmad khaw mite nên dâwrtu che an ni. Puan ropui te, intuam puan te, puan senduk te, puan cheimawi te, chhuat phah ṭial buai te, la phiar mawi tak tak tein an rawn dâwr che. Tarsis lawng rualte chuan i dâwr bungrua an phur thûr thûr mai - Tuifinriat lawng ang i ni, bungraw tam tak phur khat thûr chu. “Lawng kartuten tuifinriat zau laiah, An kar chhuak che. Khawchhak thliin a lên chhe ta che a, Khawmual hlat takah chuan. I hausakna, dâwr sum leh bungrua te, I lawngpu zawng zawng te, Lawng khalhtu leh lawng pût thawm thiam te, Dâwr sum hralhtu leh vêngtu sipai te, Lawnga chuang zawng zawng te chu I chhiatpui a, tuiah an tla. Lawng khalhtute mangang au chuan Vaukam a khâwk. Lawng kartute an chhuak vek a, Lawngpute leh a khalhtu zawng zawng nên, Vaukamah chuan an ding ta a, Nangmah avângin an chiau vawng vawng. Vaivut an inphul a, leiah an tâl. An chhîp an ziat kawlh a, saiip an fêng, Lungchhe takin an ṭah che a, Lungngai takin an rûm. I tân ṭah hla an chham ang a, ‘Tura ang hi tu nge awm ang? Tui hnuaia pil ta vang vang hi!’ tiin. I sumdâwngte chuan tuifinriatah I sum, dâwr bungruate an tawlh chhuak ṭeuh ṭeuh va, Hnam tin an tilungawi hle ṭhîn. I sum avângin lalte an hausa bawk. Tuifinriatah i keh ta a, A thûk laiah i pil ta a, I bungrua leh i mi chhawr te, Tuifinriatah i pilpui ta. Tuipui kama chêng zawng zawng te, Nangmah vângin an hrilhhai hle, An lalte pawh an hmulthi a ding a, Zâm hmêl an pu. Ram tina sumdâwngte pawh an chek tlawk tlawk mai, Mi tin ṭihkhaiah i lo chang ta, I boral hlen dâwn si a.” Lalpa chuan a sawi leh a, “Mihring fapa, Tura lal hnênah heti hian ti rawh: Lalpa P athian chuan heti hian a ti: “I chapo va, ‘P athian ka ni, tuifinriatah P athian lalṭhutthlêngah ka ṭhut hi,’ i ti vei a, Pathianah inngai mah la, mihring mai i nih hi, Daniela aia fing zâwk, a lakah thuhrûk eng mah awm thei lo niin i inngai a. Sumdâwn i thiam hle a, i fin avângin i hausa a, rangkachak leh tangka i khâwl ṭeuh mai. I sumdâwnna a hmuingîl a, i hausak tâk êm avângin i rilru a lo chapo ta a ni. “Chuvângin, Lalpa P athian chuan heti hian a ti: Pathian anga fing i inti vei a; Ngai teh, i hmêlhriat loh, hnam azawnga hnam hlauhawm ber, nangmah bei tûr, ka rawn hruai dâwn: an khandaih chu an lek ang a, i fin avânga i mawina leh i ropuina chu an rawn tichhe vek ang. Lei vâwtah an chhuktîr ang chia, tuitla thihin i thi ang. Nangmah thattu tûr hnênah, ‘Pathian ka ni,’ i ti thei dâwn em ni? Thattu tûr che kutah chuan mihring mai i ni si a, Pathian awzâwng i ni lo ve. Serh tan loh thihin, Pathian hre loho kutah i thi ang. Ka ṭawng tawh hi,” Lalpa P athian thuchhuak chuan a ti. Lalpa chuan mi hrilh leh a, “Mihring fapa, Tura lal sûnna tûr hla phuah rawh: Lalpa P athian chuan heti hian a ti: ‘Finnaa khat leh mawi chungchuang, Khaw ṭha famkim chu i ni. Pathian huan Eden-ah i chêng a, Lungmantam chi tinrêng i inbel a, Lunghlu te, topaz te, berul te, karnelian te, jasper te, safir te, emeral te leh garnet te chuan. Themthiam kutchhuak, rangkachaka phûm I pian ni aṭang khân i ni. Vêng tûr chein cherub thlan ka dah a, P athian tlâng thianghlimah i awm, Lunghlu tle zîngah i lêng. Thil sual i tih hma kha chuan Sawisêlbo i ni ṭhîn. I sumdâwnna a lo zau va, Sum hrâwm i tina a, thil sual i ti ta a, Pathian tlâng lunghlu tle zînga i lênna aṭangin, Vêngtu cherub ka ûm chhuahtîr ta che. I ropuina chuan a tichapo che a, I mawina chapopuiin i finna i tichhe zo ta, Lalte ennawmah leiah ka paih thal ta dêr che a ni. I suahsualna zozai leh Dik lo taka sum hrâwm i chîn avângin I hmun thianghlim i tibawlhhlawh a, In zîngah mei ka chhuahtîr ang a, A kâng ral ang chia, Thlîrtu hmuhah lei vaivutah ka chantîr ang che. I hmêlhriat zawng zawngte chu Nangmah vângin an thlabâr ang, Mi tân ṭihkhai i lo chang ta, I bo hlen dâwn ta si a.” Lalpa chuan, “Mihring fapa, Sidon lam hawi la, thu sawi khum rawh. Lalpa P athian chuan heti hian a ti: ‘Aw Sidon, i chungah ka ṭuan dâwn. In zîngah chawimawi ka ni ang a, In chungthu ka rêl ang a, Ka thianghlimzia ka tilang ang. Tichuan, kei hi Lalpa chu ka ni tih in hria ang. Hripui ka rawn lêntîr ang a, Kawtthlêrah thisen a luang ang, Kil tinah khandaihin an bei ang chia, I mite chu an tihlum ang.’ Tichuan, kei hi Lalpa chu ka ni tih in hria ang,” a ti a. “Israel-te tân, an vêla awm, anmahni hmusittute chu, hnimhlîngnei leh hlîng anga chhun ṭhîntu an ni tawh lo vang a, kei hi Lalpa chu ka ni tih an hria ang.” Lalpa P athian chuan heti hian a ti: “Ka thawn darhna mite zîng ata Israel chhûngte chu ka hruai khâwm hunah ka thianghlimzia hnam tin zîngah a lang ang a, ka chhiahhlawh Jakoba hnêna ram ka pêkah chuan an awm tawh ang. Thlamuang takin an luah ang a, in te sa-in grep huan te an siam ang. An vêla awm, anmahni hmusittute chu ka hrem hunah him takin an awm ang. Tichuan, kei Lalpa hi an Pathian chu ka ni tih an hria ang.” Kum sâwmna, thla sâwm, tahrik ni sâwm leh pahnihah Lalpa chuan ka hnênah, “Mihring fapa, Aigupta lal Farawa lam hawi la, amah leh Aigupta ram pum chu thu sawi khum rawh. Lalpa P athian chuan heti hian a ti: Ngai teh, Aigupta lal, Awle lian, Nail luia chêng Faraw, i chungah ka ṭuan dâwn. ‘Nail lui hi ka ta a ni a, ka tân ka siam a ni,’ i ti vei maw? I khabe-ah nghakuai ka riah ang a, i phuhlipah lui sanghate chu ka behtîr ang; Nail lui aṭang chuan lui sangha, i phuhlipa bet zawng zawng nên ka hnûk chhuak ang che. Thlalêrah ka paih ang chia, nang leh Nail luia sanghate chu leichârah in thal reng ang. Tu man in ruang an hlâwm lo vang a, chunglêng sava leh ramsa tlanah ka pe ang che. Tichuan, Aigupta mi zawng zawngin kei hi Lalpa chu ka ni tih an hria ang. Israel chhûngte tân luang tiang ang lek an ni si a. An han hawl dâwn a, a tliak a; an dâr an herh phah a; an han rinchhan dâwn a, a bung ta a, an kâwng an herh ta a.” Chuvângin, Lalpa P athian chuan heti hian a ti: “Ngai teh, i chungah khandaih ka lek ang a, mihring leh ran ka that vek ang. Aigupta ram chu a chhiain a ram vek ang; ‘lui chu ka ta a ni a, ka tâna ka siam a ni,’ a tih avângin. Aigupta ram leh Nail lui chungah ka ṭuan dâwn a ni: Migdol aṭanga Suene, Ethiopia ram ri thlengin ka tichhe vek ang a, a ruak hlauh vang. Kum sawmli chhûng chu ramsa pawh, mihring pawh an kal lo vang a, awm an awm hauh lo vang. Kum sawmli chhûng chu ram azawnga ram chhe ber leh khua azawnga khaw chhe nasa berah ka siam ang a, Aigupta mite chu hnam dang zîngah ka hnawt darh ang a, ram tinah an darh ang.” Lalpa P athian chuan heti hian a ti: “Kum sawmli a ral hnu chuan an darhna ram mite zîng ata Aigupta mite chu ka hruai khâwm leh ang. Sala an tâng chu ka hruai kîr ang a, an pianna ram Pathros-ah an kîr ang a, hnam nêm tak an ni ang. Hnam dang zawng zawng aiin an nêp ang a, hnam dang chungah an inlek tawh lo vang a, hnam dang chungah thu an nei tawh lo vang. Israel chhûngte chuan rinchhanah an hmang tawh lo vang a, ṭanpui atân an sâwm kha an tihdik lohzia an hre chhuak ang a, kei hi Lalpa P athian chu ka ni tih an hria ang.” Kum sawmhnih leh pasarihna thla hmasa ber, tahrik ni khatah Lalpa chuan ka hnênah: “Mihring fapa, Babulon lal Nebukadnezara chuan Tura bei tûrin sipai a ruai chiam a, an phur a rih êm avângin an chhîp a kawlh râwt a, an koki a pilh phung mai; mahse, Tura aṭang chuan Lal leh sipaite chuan an hah man eng mah an hmu lo.” Chuvângin, Lalpa P athian chuan heti hian a ti: “Ngai teh, Babulon lal Nebukadnezara hnênah Aigupta ram ka pe dâwn. Aigupta ram thil neih tam êm êm chu a rawk ang a, a suam ang a, a sipaite hlawh atân a lâksak ang. Ka rawng an bâwl avângin Aigupta ram hi ka pe a ni,” Lalpa P athian thuchhuak chuan a ti. “Chutih hunah chuan Israel chhûngte chu ka tichak ang a, nang hi an zîngah thu ka sawitîr ang che; tichuan, Lalpa chu ka ni tih an hria ang.” Lalpa chuan ka hnênah, “Mihring fapa, thu puang la, heti hian ti rawh: Lalpa P athian chuan heti hian a ti: Ṭap ula, chiau vawng vawng rawh u, Ni chu a lo thleng dâwn. Ni a lo hnai ta, Lalpa ni a lo hnai e, Hnam tin tâna chhûm zîn ni chu. Aigupta ramah indona a chhuak ang a, Kus ramah lungngaih manganna, Aigupta mi tam tak an thi ang a, An hausakna lâk bo a ni ang a, An innghahna tihchhiat vek a ni ang. Kus mi te, Put mi te, Lud mi te, Arab-ho te, Kub te leh an thurualpuite chu indonaah an thi ang.” Lalpa chuan heti hian a ti: “Aigupta ram tungdingtute chu an thi ang a, An chhuan, kulh rinawmte pawh, a tlâwm ang. Migdol aṭanga Suene thlengin Indonaah mi an thi ang,” Lalpa P athian thuchhuak chuan a ti. “Aigupta chu ram chhe hneh ber a ni ang a, a khuate chu khaw ram zînga chhe nasa ber a ni ang. Aigupta rama mei ka tihchhuaha, ṭanpuitute ka tihboral hunah Lalpa chu ka ni tih an hria ang. Aigupta chhiat ni a lo thlen chuan Ethiopia, ngaihngam taka awm tizâm tûrin lawngin lamkal ka tîr ang a, Aigupta angin an thla a bâr ang. Chumi ni chu a lo thleng ṭêp a ni.” Lalpa P athian chuan heti hian a ti: “Lal Nebukadnezara kut hmangin Aigupta hausakna ka titâwp dâwn. Amah leh a hote, hnam râwng pui pui chu, ram tiṭiau tûrin an lo kal ang a, Aigupta mite chungah khandaih an phawi ang a, ram pumah ruang a thal pheng phung ang. Nail lui chu ka tikang ang a, mi sual pui pui kutah ka pe ang. Hnam dang mite chuan ram chu, a chhûnga awmte nên an tichhe vek ang. Kei Lalpa hian ka sawi tawh hi.” Lalpa P athian chuan heti hian a ti: “Nof khaw milemte chu ka tichhia ang a, thil tlâktlailo an biakte chu ka titâwp bawk ang. Aigupta ramah rorêl tûr tu mah an awm lo vang a, Aigupta mite chu an zâm ang. Pathros khua chu ka tiram ang a, Zoan khua pawh ka hâl ang a, No khua chu ka hrem ang. Sin khua, Aigupta kulh ropui chhûngah chuan ka thinurna ka leih ang a, No khaw mite ka râwt vek ang. Aigupta ramah mei ka chhuah ang a, Sin khua chu an chiai ang a, No khua chu an darh ang a, a kulhte chu a chim ang. Aven leh Pi-beset khaw tlangvâlte chu khandaihin an sât hlum ang a, mi dangte chu salah an hruai ang. Aigupta chakna ka tihchhiata, an kulh chhuan, rinawm chu, ka tihchim hunah chuan Tahfanes khuaah chuan ni a thim ang a, chhûm thimin a khuh ang a, a chhûnga mite chu salah an hruai ang. Aigupta ka hrem hun chuan Lalpa chu ka ni tih an hria ang.” Kum sâwm leh pakhatna, thla khat, tahrik ni sarih ni-ah Lalpan ka hnênah, “Mihring fapa, Aigupta lal Farawa bân chu ka tihtliahsak a, a dam theih nân an tuam lo va, khandaih a lek leh theih nân ṭhem an dawhsak hek lo. Chuvângin, Lalpa P athian chuan heti hian a ti: Aigupta lal Farawa bân ṭha lam, a tliak lo zâwk pawh chu ka tihtliahsak ang a, khandaih a chelh thei tawh lo vang. Aigupta mite chu hnam tin zîngah ka tidarh ang a, ram tinah ka thawn darh ang. Babulon lal kut chu ka tichak ang a, a kutah ka khandaih ka dah ang a, Farawa bân chu ka tihtliahsak ang; a hmaah chuan a hliam tuar avâng chuan a rûm dur dur ang. Babulon lal kut ka tihchaka, Farawa a tlâwm hunah chuan kei Lalpa hian Babulon lal kutah ka khandaih ka pe a, Aigupta ramah a lek ta a ni tih an hria ang. Aigupta mite chu hnam tin zîngah ka tidarh ang a, ram tinah ka thawn darh ang; tichuan, kei hi Lalpa chu ka ni tih an hria ang.” Kum sâwm leh pakhatna, thla thum, tahrik ni khatah Lalpa chuan ka hnênah a sawi a: “Mihring fapa, Aigupta lal Farawa leh ka mite hnênah heti hian ti rawh: I ropuizia eng nên nge ka teh ang le? Lebanon tlâng Sidar a ni, Ṭawi luai, hlim nuam tak mai, A zîk sângin chhûm han tawng chu. Tlan tûr tui a tam a, Lei hnuai tui chuan a châwm lian a, A ṭona chu a tihnâwng a, Ngawa thing tinrêng châwm nân a luang. Tui tlan a ṭhat êm avângin Thing dang aiin a ṭhang chak a, A buk a lianin a zârte pawh a sei. Chunglêng savate chuan a bukah bu an chhep a, Ramsate chuan a buk hnuaiah no an nei, A hlimah chuan hnam tam tak an chêng bawk. A buk chu a mawiin a zâr duai a, A zung chuan hnianghnârin tui a hmu. Pathian huana sidar zîngah a tluk rêng an awm lo, Fârthingte lah a tluka buk an awm lo va, Thingse zârte pawhin a tluk hek lo. Buk mawi takin ka siam a ni, Pathian huan, Eden-a thing zawng zawngin an awt.” Chuvângin, Lalpa P athian chuan heti hian a ti: “A ṭhang chakin a buk lian a, a zîkte chuan chhûmte a tawng tâk avângin a chapo ta a; Chuvângin, ka hnâwl ta a ni; hnam dang lal hnênah ka pe ang a, thil sual a tih ang chu a chungah a rawn ti ve ang. Hnam râwng tak tak chuan an rawn kit ang a, tlângah leh kawrahte a zâr leh a ṭang tliak chu a awm nêlh nûlh ang. A hlima chêng ṭhîn hnamte chu an darh ang a, an kal bo vang. A thingluang chungah chuan savate an ṭum ang a, a zârte chu ramsaten an chîl ang. Tichuan, tui ṭhatna hmuna thing rêng rêng, a tluka ṭhang chak leh sâng, chhûm tawnga ding luah, a awm leh tawh ngai lo vang. Mihringte anga thi mai tûr leh leilâwta chhuk vek tûrin ka ti tawh a ni.” Lalpa chuan heti hian a ti: “Seol-a a chhuk ni chuan lei hnuai tui chu amah sûn nân ka chawlhtîr ang a, lui luang chu ka titâwp ang a, tuihna luang chhuak a awm lo vang; Lebanon tlâng chu ka tingui ruai ang a, thingte chu an vuai zo vang. Seol-a ka nam thlâk ni chuan a tla thâwmah hnamte chu an khûr ang a, Eden huan thing zawng zawng leh Lebanon thing ṭha ṭha, tui tamnaa ṭo, leilâwta tla tawhte chu, leilâwta a tlâk ve tâk avângin an lâwm ang. Khandaiha an sah hlumte zînga awm tûrin mitthi khuaah an chhuk dial ang. A hlima awm ṭhînte chu hnam tin zîngah an darh ang. “Eden huanah, nang anga lian leh ropui a awm em ni? Eden huana thingte ang bawkin mitthi khuaah i chhuk ang a, khandaiha sah hlum, serh tan lohho zîngah chuan i awm ve ang. Chûng chu Farawa leh a hote an ni,” Lalpa P athian thuchhuak chuan a ti. Kum sâwm leh pahnihna, thla sâwm leh pahnih, ni khatah chuan Lalpan mi bia a: “Mihring fapa, Aigupta leh Farawa sûnna tûr hla heti hian phuah rawh: Hnam tin zîngah sakeibaknei vânglai ang i ni a, Tuipuia awle, luia chêng chu i ni, I chhek bûrh bûrh a, i tinu zo ta. Lalpa P athian chuan heti hian a ti: Hnam tam tak an lo pun khâwm hunah, Ka lên ka zâr ang a, Lêna i âwk chu an hnûk chhuak ang che. Khawmualah ka dah ang chia, Leichârah ka paih ang che. Chunglêng savate ka tlantîr ang chia, Ramsa zawng zawng ka titlai ang. I ruang ṭawih tawh chu Tlângah leh ruamah te ka tidarh ang. Tlângah te i thisen ka leihbua ang a, I chênna lui te chu thisenin a khat ang. Ka tihboral hun che chuan vân ka khuh ang a, Arsi ka tithim ang. Ni chu chhûmin a hliah ang a, Thla pawh a êng hek lâwng. Vâna êng awm zawng zawng ka tihthimsak ang chia, I ram chu a thim tlat ang, Lalpa P athian thuchhuak chuan a ti. I chhiat thu ka hriat hun chuan Hnam tam tak an thlabâr ang a, I hriat loh rama awmte pawh an chiai ang. A ni, mi tam tak an chiai ang a, An lalte pawh hlauvin an khûr ang. An hmaa khandaih ka vilik hunah i chhiat ni a lo thlen hun chuan Mi tin, thih ve hlauvin an khûr ang.” Lalpa P athian chuan heti hian a ti: “Babulon lal khandaih chu i tuar dâwn, I mite chu hnam râwng takte khandaihin ka thahtîr ang. Aigupta thil chhuanvâwrte chu An tichhia ang a, an tiboral vek ang. Tui tamna hmuna ran tlate chu ka tihlum vek ang. Tu mah an kal tawh lo vang a, Rante pawhin an dai nu tawh lo vang. A tuite chu ka tlin fîmtîr ang a, Luite chu ka luantîr dem dem ang, Lalpa P athian thuchhuak chuan a ti. Aigupta ram chu ka tiram ang a, A chhûnga awm zawng zawng pawh an thah hunah Kei hi Lalpa chu ka ni tih an hria ang. Hei hi amah an sûnna hla a la ni ang: Hnam tinrêng hmeichhiate chuan Aigupta leh a mite chu He hla hian an ṭah ang,” Lalpa P athian thuchhuak chuan a ti. Kum sâwm leh pahnihna, thla khatna, ni sâwm leh panga ni chuan Lalpan min bia a: “Mihring fapa, Aigupta mite tân ṭap rawh; hnam dang chak tak tak, mitthi khuaa chhuk tawhte hnênah chhuktîr la, heti hian ti ang che: Tu aiin nge i mawi zâwk le? Serh tan lohho nêna awm tûrin chhuk rawh. Aigupta mite chu indonaa thite zîngah an thi ve ang, That vek tûrin khandaih a inpeih ta. Seol-a kal tawh, an pasalṭhate chuan Farawa an lo lâwm a, ‘Amah ṭanpuitu, serh tan lohho, indonaa thite chu An lo chhuk ve ta a, an thal dêr mai,’ tiin. Tah chuan Asuria pawh, a mite nên an awm ve a, khandaiha thite thlân chuan A thlân an hual tuau mai. An thlânte chu lei hnuai thûkah chuan a awm a, A mite chu khandaiha thi an ni, A thlân vêlah an awm tuau mai, Mi nung ram tiralṭi ṭhîntute an ni. Tah chuan Elam pawh a awm a, A mite chuan a thlân an hual tuau mai. An za chuan khandaiha thi an ni. Lei hnuai khurah an chhuk thla ta, serh tan lohhote chu. Mi nung ram tirâlṭi ṭhîntute an ni. Khur thûkah chuan mualpho takin an chhuk. Elam chu khandaiha thahte zîngah a zâl ve a, A ni, serh tan loh, khandaiha thite chuan A thlân an hual. Mi nung ram tirâlṭi ṭhîntute an ni, Thi tawh zîngah an awm ve ta. Tah chuan Mesek leh Tubal thlân pawh An mite thlânin a hual tuau mai. Serh tan loh vek an ni, thah vek an ni, Mi nung ram tirâlṭi ṭhîntute an ni. Hmânlai pasalṭhate angin phûm an hlawh lo, Seol-ah râlthuam nên an chhuak, An khandaih an lukham a, An phaw inkhuh nân an hmang. Hêng mi huaite hi mi nung ram tirâlṭi ṭhîntute an ni. Aigupta pawh a chhiat hnu chuan Serh tan lohho zîngah khandaiha thahte zîngah a zâl ve ang. “Edom lal pawh, an miliante nên, ropui hle ṭhîn mah se, mitthi khuaah chuan an chhuk a; serh tan loh, khandaiha thahte nên an mu dul mai. Hmâr lama mi lian zawng zawng leh Sidon mi zawng zawng pawh tah chuan an awm. An chak avângin miin an hlau ṭhîn chu an inzahpui ang a, serh tan lohho, khandaiha thahte nên, mualpho takin mitthi khuaah an chhuk ve ang. “Chûng mite chu Farawa leh a sipai, khandaiha thite chuan an lo hmuhin an thin a dam tawh ang,” Lalpa P athian thuchhuak chuan a ti. “Farawa leh a mi, mi nung ram tirâlṭi ṭhîntute chu serh tan lohho, khandaiha thahte zîngah an mu ve ang,” Lalpa P athian thuchhuak chuan a ti. Lalpa chuan ka hnênah, “Mihring fapa, mite hnênah heti hian sawi rawh: Ram chhûnga indona ka thlentîr dâwnin an zînga mi pakhat râlvêngtuah ruat sela, chu mi chuan ral lo kal a hmuh chuan mi dang an inrâlrin nân tawtawrâwt a hâm tûr a ni. Tu-in emaw tawtawrâwt ri chu hriain ngaihsak lo sela; hriattîrna chu a pawisak loh avângin râl chuan rawn that mah se, ama thiam loh a ni. Tawtawrâwt ri chu a hria a, a inring duh lo va, a thihna chu ama mawh a ni ang; inring sela chuan thih a pumpelh thei ang. Râlvêngtu chuan râl lo kal hmuin tawtawrâwt hâm lo sela, mi an inrâlring lo vang a, râl chuan mi tu pawh rawn that sela, suala thi a ni a; mahse, a thisen phuba chu râlvêngtu chungah ka la ang. “Tichuan, nang mihring fapa, Israel chhûngte vêngtuah ka ruat a che. Ka thu i hriat ang ang chu an inrâlrinna tûrin hrilh rawh. Mi sual chu a thi ang ka tiha, a nun hum tûra a lamlêt theih nân i hrilh lâwk si loh chuan a sualna avângin a thi ngei ang; a thihna mawh erawh chu i chungah ka nghat ang. Mi sual chu i hrilh lâwka, a sual luih zêl erawh chuan a sualna avâng chuan a thi ang, nang erawh chu i fihlîm ang.” “Nang, Mihring fapa, Israel chhûngte hrilh rawh: ‘Kan bawhchhiatna leh kan sualnate chuan min delh a, chûng avâng chuan kan chau zo va, engtin nge kan nun theih ang?’ an ti ṭhîn. Heti hian hrilh rawh: ‘Mi nung ka ni, Lalpa P athian thuchhuak chuan a ti.’ Mi sualte thih hi ka lawmzâwng em ni? An lamlêta an nun asin ka duh. Mi sualte u, lamlêt ula, lo hawi kîr teh u, Israel chhûngte u, engah nge in thih mai ang? “Nang, mihring fapa, i mite hrilh rawh: Mi ṭhain thil sual a tih chuan a ṭhatna chuan a chhanhim thei lo vang. Mi sualin thil sual tih a sim chuan a sualna chu a chhiat phah lo vang. Mi ṭha pawhin thil sual a tih chuan a nung thei chuang lo vang. Mi ṭha chu a nung ngei ang ti mah ila, a ṭhatna chu tâwka a ngaiha, thil sual a tih chuan, a ṭhatna chu hriat reng a ni lo vang a, thil sual a tih avâng chuan a thi ang. “Mi sual chu a thi ngei ang ti mah ila, a sual chu a sima, dahkhamte a kîr ṭhina, a thil rûkte a pêk kîra, thil sual ti lova nun theihna tûr ka Dân a zawm chuan a thi lo vang, a nung ngei ang. Thil dik leh ṭha a tih avângin a thil sual tih ṭhin kha ka hre reng lo vang a, a nung ngei ang. “I mite chuan ‘ Lalpa awm dân hi a mumal lo,’ an ti a, an awm dân a mumal lo zâwk a ni. Mi ṭha chuan a ṭhatna a bansâna, thil sual a tih chuan a sual avâng chuan a thi ang. Mi sual chuan a sima, thil ṭha leh dik a tih chuan chumi avâng chuan a nung ang. Mahse, nangni chuan, ‘ Lalpa awm dân hi a mumal lo,’ in ti ṭhîn. Israel chhûngte u, in thil tih ang zêlin in chungah ro ka rêlsak dâwn che u,” a ti a. Kan saltân kum sâwm leh pahnihna, thla sâwm, ni nga ni chuan Jerusalem aṭanga tlân chhuak a lo thleng a, khawpui chu râlin an la ta tih min rawn hrilh a. Chu mi lo thlen dâwn zân chuan Lalpan mi rawn khawih a, a lo thleng zînga be thei tûrin min ṭawng theihtîr a, ṭawng thei lovin ka awm ta lo va. Lalpa chuan, “Mihring fapa, Israel ram khawpui chhiaa awmte chuan, ‘Abrahama, mi pakhat mai mah, ram hi a puma pêk a nih chuan, keini chu tam tak kan la ni a, ram pum hi kan ta tûr a ni ang chu,’ an ti. Tichuan, Lalpa P athian chuan heti hian a ti ti rawh: Sa chu a thisen nên in ei a, milem in bia a, thisen in chhuah bawk a, ram hi in chang ang maw? In khandaih in ring a, thil tenawm in ti a, mahni ṭhenawm nupui in tibawrhbâng a, ram hi in chang ang maw? Hrilh rawh, Lalpa P athian chuan heti hian a ti: ‘Mi nung ka nih hi,’ Lalpa P athian thuchhuak chuan a ti. Khaw rama awmte chu khandaiha sah hlum an ni ang a, tâmlaka awmte chu sa-in a seh ang a, ramhnuai leh pûka birute chu hripuiin an thi ang. Ram chu namên lovin ka tichhia ang a, an chakna an chhuan êm êm ṭhinte chu ka titâwp ang. Israel rama tlângte chu a ram vek ang a, tu mah an kal ngam lo vang. Thil tenawm an tih avânga ram chu ka tihchhiat vek hunah kei hi Lalpa ka ni tih an hria ang.” “Nang, Mihring fapa, i mite chuan kulh bang bulah te, kawngkhâr bulah te an intawhna apiangah i chungchâng an sawi noh noh mai. Heti hian an ti: ‘Ti rawh u, Lalpa thu a hril chu i va ngaithla teh ang,’ an ti. Ka mite ni âwm rêngin i thu ngaithla tûrin an lo kal khâwm a, an ṭhu a. Thu chu an ngaithla a, an zâwm duh si lo. An kam chauh a ṭha a, hma an sial êm êm si. Hla lênglâwng sak thiam tak leh ṭingṭang tum thiam tak ang lekah an ngai che a ni. I thu chu an hria a; mahse, an zâwm duh si lo; I thu lo thleng ngei tûr a lo thlen hunah an zîngah zâwlnei a lo awm takmeuh mai tih an hria ang.” Lalpa chuan ka hnênah, “Mihring fapa, Israel-te vêngtu, berâmpuho demin thu sawi la, thu puang rawh. Berâmpuho hnênah chuan heti hian ti ang che: Lalpa P athian chuan heti hian a ti: ‘Israel berâmpuho, mahni inhrai tlaite tak hi chu aw! Berâmpu chuan a berâmte a châwm tûr a ni lâwm ni? In ran thau in ei a, an hmul in sin a, a chum chum in talh a, berâm rual in châwm duh si lo. A sawngnawi in enkawl lo va, an nate intidam lo va, an hliam in tuam lo va, an tlânchhe darh in hruai khâwm lo va, a bo in zawng hek lo, an chungah râwng takin thil in ti zâwk si. Pu an neih loh avângin berâmte chu an darh a, ram sakawlh tinrêngin a darhte chu an seh a ni. Ka berâmte chu tlâng sângah te, mual lian takah te an bo va, tâmlakah te an darh a, tu man an zawng lo va, an lam lo. “Chuvângin, berâmpute u, Lalpa thu hi ngaithla teh u, ‘Mi nung ka nih hi,’ Lalpa P athian thuchhuak chuan a ti. Vêngtu an neih loh avângin ka berâmte chu seh mai theihin an awm a, ram sakawlh tinrêngin an ei a, berâmpute chuan an berâmte an zawng khâwm duh lo va, berâm châwm lovin anmahni chauh an inchâwm a ni.” Chuvângin, berâmpute u, Lalpa thu hi ngaithla teh u. Lalpa P athian chuan heti hian a ti: “Berâmpute u, ka va haw tak che u êm! Ka berâmte chu ka chhuhsak ang che u a, in enkawl leh tawh lo vang. In kut aṭangin ka berâmte chu ka chhan chhuak ang a, mahni chauh inchâwmin an sa in ei leh tawh lo vang.” Lalpa P athian chuan heti hian a ti: “Kei ngei hian ka berâmte chu ka zawng ang a, ka lam khâwm ang. Berâm darhte berâmpuin a lam khâwm ang hian kei pawhin ka berâmte chu, khaw dur ni leh thim tak an tawh laia an darhna ram tin ata ka lam khâwm ang. Hnam dang mite ram ata ka la khâwm ang a, ram tin ata ka khâwm ang a, an ramah ka hruai ang; Israel tlângramah te, lui kamah te, hmun nuamah te ka tlattîr ang. Hnim ṭhatna phûlah ka tlattîr ang a, Israel tlângram ṭhaah an awm ang, tah chuan huang an nei ang. Huangah chuan an bawk ang a, tlânga hnim ṭha ṭha chu an tlân ang. Ka berâmte chu keimah ngeiin ka châwm ang a, bawhna tûr ka siamsak ang,” Lalpa P athian thuchhuak chuan a ti. “A bo chu ka zawng ang a, a tlânchhe darh chu ka khalh khâwm ang a, an hliamte chu ka tuam ang a, a sawngnawite chu duat takin ka enkawl ang. A thau leh chakte chu ka vêng ang a, a tâwk têin chaw ka pe ang. “Nangni ka berâmte u, Lalpa P athian chuan heti hian a ti: “Berâm leh berâm inkâr thu te, berâm leh kêl inkâr thute ka rêl fel dâwn. Hnim ṭha ṭha in pet a, in peh sên loh in chîl chhia hi thil na mai em ni? Tui in in lahin a fîm in in a, in in sên loh in dai nu a. Ka berâm dangte chuan in chîl chhiat hnu an pet a, in dai nut hnu chauh in tûr an hmu.” Chuvângin, Lalpa P athian chuan an hnênah heti hian a ti: “Berâm chak leh chak lo inkâr thu ka rêl dâwn. A chak lo chu in nêk per a, in nawr kiang a, a rual zîng ata in phîn darh ṭhîn. Chuvângin, ka berâmte chu ka chhan dâwn a ni; seh mai theiha an awm ka phal lo vang. Ka berâmte chungthu, a mal malin, ka rêlsak ang a, a ṭha leh ṭha lo ka thliar ang. Vêngtu pakhat ka ruatsak ang a, ka chhiahhlawh Davida ang an lalah ka pe ang a, ani chu an vêngtu a ni ang. Kei Lalpa hi an Pathian ka ni ang a, ka chhiahhlawh Davida ang chu an hruaitu a ni ang; kei Lalpa hian ka sawi tawh hi. Thlamuang taka an awm theih nân remna thu ka thlunpui ang a, ram sakawlh zawng zawng ka hnawt bo vang a, ram rehah te thlamuang takin an awm ang a, ngaw hnuaiah pawh an mu chiah chiah thei ang. “Mal ka sâwm ang a, ka tlâng vêlah ka awmtîr ang. A hun takah an tân malsâwm ruah ka surtîr bawk ang. Thei kûngte chu ka tirah ang a, lovah thlai a ṭha ang a, mahni ram ṭheuhvah thlamuang takin an awm ang. An nghâwngkawl ka tihtliahsaka, chhiahhlawha neitute kut ata ka chhan chhuah hunah kei hi Lalpa chu ka ni tih an hria ang. Hnam dangte man mai mai tûr an ni tawh lo vang a, ramsate pawhin an seh tawh lo vang. Thlamuang takin an awm ang a, an thlaphâng tawh ngai lo vang. An buh leh thlai ka tihhlâwksak ang a, ṭâm an hre tawh lo vang a, hnam dangin an hmusit tawh hek lo vang. Israel chhûngte hi ka mite an ni a, kei Lalpa hi an Pathian ka ni tih tu pawhin an hria ang. “Nangni berâm rual, ka berâm châwmte u, ka mite in ni a, kei hi in P athian ka nih hi,” Lalpa P athian thuchhuak chuan a ti. Lalpa chuan a sawi a, “Mihring fapa, Seir tlâng lam hawi la, thu puan khum rawh: Lalpa P athian chuan heti hian a ti: Seir tlâng, ka hua a che, I chungah ka kut ka lek ang a, Ka tiram vek ang che. I khuate chu a chim chhe vek ang a, A ram hlauh vang. Tichuan, Lalpa chu ka ni tih i hria ang. “Israel fate kumkhaw hmêlma i ni a, an mangan lai tak, an sual tâwpa hrem an nih lai khân thah râl vek tûrin i hawisan vei a. ‘Mi nung ka nih hi,’ Lalpa P athian thuchhuak chuan a ti; chuvângin, i thisen a chhuak dâwn, i thisen zawmpuite i hua a, thisenin a ûm dâwn a che, i thi ngei ang. Seir tlângte chu ka tichim vek dâwn, a chunga veivâk apiang ka tihlum vek ang. Tlâng leh mualte chu ruangin ka tikhat ang a, ruamahte chuan khandaiha thi an lum phung ang. Chhe hlen hlauh tûr i ni, i khawpuite pawh tu man an luah lo vang; tichuan, Lalpa chu ka ni tih i hria ang. Kei Lalpa hi ka awm chhûngin, ‘Hêng hnam pahnih leh an ramte hi ka ta a ni, ka nei dâwn,’ i ti vei a, Mi nung ka nih hi,” Lalpa P athian thuchhuak chuan a ti. “Chuvângin, anmahni i huata, an chunga i thinura, i îtsîk ang hian i chungah ka che ve ang. An chunga i thiltih avângin ka hrem dâwn che a ni tih an hria ang. “ ‘Israel tlângte chu a chim ta a, kan duh duha sawisak theih a ni ta,’ tia i hmuhsit êm êmzia kha ka lo hria tih i hria ang. Ka chunga chapo taka i ṭawng thâwng thâwng kha ka hria asin.” Lalpa P athian chuan heti hian a ti: “Ka tiram hneh khawp ang chia, i chhiat avângin khawvêl an lâwm ang. Ka mi, Israel ṭiau i hmuh laia i lâwm ang khân i chungah ka che ve ang. Seir tlâng chu, Edom ram pum pui nên, a ram vek dâwn. Tichuan, kei hi Lalpa chu ka ni tih in hria ang.” “Nang, Mihring fapa, Israel tlâng chungthu puang la, heti hian ti rawh: Israel ram tlângte u, Lalpa thu hi ngaithla teh u. Lalpa P athian chuan heti hian a ti: Hmêlmate chuan, ‘Chei! Hmunsâng, hmun hlunte chu kan ta a ni ta,’ an ti vei a. Chuvângin, thu sawi khum rawh: Lalpa P athian chuan heti hian a ti: In vêla hnamte chuan in ram chu an neih theih nân an sawisa che u a, an tiram che u a, an chêksawlh che u a ni. Chuvângin, Israel tlângte u, Lalpa P athian thu hi ngaithla teh u: tlâng te, mual te, kawr te, hmun ṭiau leh ram te, rauhsan leh rawk tâwk khawpui te, an vêla hnam dangten an chêksawlhte hnênah Lalpa P athian chuan heti hian a ti: Lalpa P athian chuan, Ka ṭhahnemngai thinrimin an vêla awm hnam dangte demin thu ka sawi a ni. Edom phei chu ka dem zual a ni. Hlim takin ka ram chu an nuihzat a, neih tumin an insem a, ran tlatna chu an nei ta a. “Chuvângin, Israel ram chungthu puang la, tlâng te, mual te, lui te, kawr hnênah te heti hian sawi ang che: Lalpa P athian chuan heti hian a ti: Hnam dangin an tihmualpho che u avângin ka ṭhahnemngai thinrimin thu ka sawi a ni: Chuvângin, Lalpa P athian chuan heti hian a ti: In vêla awm hnam dangte chungah ka kut ka lek ta, an mualpho dâwn. Israel tlângah te erawh chuan thingte chu a duah hluah hluah ang a, ka mi Israel-te tân a rah tiar tuar ang; an lo kîr leh hun chu a hnai tawh a ni. Ngai teh, in lamṭang ka nih hi, in lam ka hawi ang a, in lote chu in let ang a, thlai in chîng ang. Israel chhûngte chu ka tipung ang a, khaw ram tawhte chu in luah leh ang a, in chei hnûm ang. In zîngah mihring leh ran an pung ang a, fa in ngahin in pung chak hle ang. Tûn hmaa in awm dân angin in awm leh ang a, ka tihmuingîl lehzual ang che u; tichuan, Lalpa ka ni tih in hria ang. Ka mi, Israel-te chu ka hruai kîr ang a, ram chu an luah ang a, an nei leh ang, a ram tawh ngai lo vang. Lalpa P athian chuan heti hian a ti: ‘He ram hi mihring heh ram a ni, an fate an sûn zêl mai,’ an ti ṭhîn. Mahse, ‘Mihring heh ram, fate sûnna ram,’ an ti tawh lo vang, Lalpa P athian thuchhuak chuan a ti. Hnam dang hmuhsitna ri an hre tawh lo vang a, an rawn timualpho hek lo vang,” Lalpa P athian thuchhuak chuan a ti. Lalpa chuan ka hnênah, “Mihring fapa, Israel chhûngte hian an rama an awm chhûngin an khawsak dân leh an thil tih dânin ram chu an tibawrhbâng a, hmeichhe fel loh lai angin ka hmaah an bawlhhlawh a ni. Ram chhûnga thisen an chhuah ṭhin avâng leh milema an intihbawrhbân ṭhin avângin an chungah ka thinur ka leih bua a ni. Hnam dang zîngah ka thawn darh a, ram tinah ka tidarh a, an awm dân leh thiltih dân angin ka hrem a ni. Mahse, an kalna ram apiangah ka hming thianghlim an tichhe zêl si a. ‘Hêng mite hi Lalpa mite an ni a; mahse, an awmna ram ata hnawh chhuah an ni,’ an lo ti zêl si a. Israel chhûngte kalna ram apianga ka hming a chhiat zui zêl avângin ka hming thianghlim chu ka lainat ta a. Tichuan, Israel chhûngte chu hrilh rawh: Lalpa P athian chuan heti hian a ti: Ka thil tih tum hi Israel chhûngte ka khawngaih vânga tih tum ka ni lo; ka hming thianghlim vânga tih tum ka ni, an kalna ram apiangah ka hming a chhe zui zêl si a. Ka hming thianghlim ropuizia hi hnam tin zîngah ka tilang dâwn; nangmahni avângin an zîngah ka hming a chhe ta si a; chûng mite chuan kei hi Lalpa chu ka ni tih an hre tûr a ni: Lalpa P athian thuchhuak chuan a ti; ka thianghlimzia an hmu ang. Hnam dang zîng ata ka la chhuak ang a, ram tin ata ka hruai khâwm ang a, an ram ka thlen ang. “Tui thianghlim an chungah ka leih ang a, an bawlhhlawhna ka tifai ang a, an milemte lakah ka tifihlîm ang. Thinlung thar leh rilru thar ka pe ang a, an thinlung, lung anga sak chu ka la bo vang a, thinlung nêm, tisa anga nêm chu ka pe ang. An kawchhûngah ka Thlarau ka dah ang a, ka dânte an zâwm ang a, ka thupêkte awihin an ti ang. An pate ka pêk ramah chuan an chêng ang a, ka mite an ni ang a, kei hi an P athian ka ni ang. An bawhchhiatna ata ka chhan chhuak ang a, an buh leh bâl ka tihhlâwksak ang a, ṭâm an tuar tawh lo vang. An thei kûngte ka tirah ang a, an lova thlaite ka ti ṭha ang, ṭâm avângin hnam dangten an hmusit tawh hek lo vang. An awm dân ṭhat lohzia an hre chhuak ang a, an sualna avâng leh thil tenawm an tih ṭhin avângin anmahni an inten ang. Nangmahni avânga hêng hi ti ka ni lo ve, Lalpa P athian thuchhuak chuan a ti. Aw Israel chhûngte u, in awm dân avânga zak leh mualpho in ni tih in hriat ka duh a ni.” Lalpa P athian chuan heti hian a ti: “In bawlhhlawhna ka tihfai hunah in khuaah te ka awmtîr leh ang che u a, a chim chhiate chu in din thar leh dâwn nia. A kal apiang hmuha hnim ber bur tawh, in lote chu in let leh ang. ‘He huan, ram daih tawh hi Eden huan ang zu ni leh ta a! Khaw chhe tawh, chim rem rum, an rauhsan tawh kha kulha inhungin an luah leh tâk hi!’ an ti ang. A vêla hnam la awmte chuan kei Lalpa hian khaw chhe chim tawhte leh ram tawhte chu ka din thar leh a ni tih an hria ang; kei Lalpa hian ka sawi angin ka ti a ni.” Lalpa P athian chuan heti hian a ti: “Israel chhûngte tân ka inhawng tawh ang a, berâm rual angin ka tipung ang. Kût nikhuaa an berâm hlan tûr Jerusalem khuaa a khat angin khaw chhe tawhahte mihring an khat ang; tichuan, kei hi Lalpa chu ka ni tih an hria ang.” Lalpa chuan a kutin min vuan a, Lalpa Thlarau chuan min hruai a, ruamah min dah a. Ruam chu ruhin a khat a. Ruamah chuan min hruai kual a, a ruam dâpin ruh chu a awm a, ruh ro tak tak hlîr a ni. “Mihring fapa, hêng ruhte hi an lo nung leh thei ang em?” min ti a. Kei chuan, “Lalpa P athian, nangin i hria alâwm,” ka ti a. Ani chuan, “Hêng ruh chungchâng thu hi puang la, ruh ro hnênah heti hian sawi rawh: ‘ Lalpa thu ngaithla teh u, hêng ruh rote hnênah hian Lalpa P athian chuan heti hian a ti: Ngai teh u, ka rawn chhêm ang che u a; tichuan, in nung leh ang. Thahrui ka pe ang che u a, vunin a khuh ang che u. Ka thâwk khum ang che u a; tichuan, in nung leh ang; kei hi Lalpa chu ka ni tih in hria ang,’ ” a ti a. Thu min pêk ang chuan ka ti a; thu ka puan lai chuan thâwm ri rawk rawk ka hria a, ruhte chu an zawmpuite nên chuan an inchuktuah ta a. Ka en reng a, thahrui a lo awm a, tisain a tuam a, vunin a khuh ta ṭheuh va, mahse an la thaw thei lo. Ka hnênah chuan, “Mihring fapa, thli hnênah thu puang la, heti hian thli chu hrilh rawh: kâwlkil li-a thlite u, lo kal ula, hêng mi thah ruangte hi han chhêm ula, lo nung rawh se,” a ti a. Thu min pêk ang chuan ka puang a, thli chuan a rawn chhêm a, an nung a, an ding ta a, sipai rual tam zet an ni. Heti hian mi ti a: “Mihring fapa, Israel chhûngte hi hêng ruh ro ang hi an ni, ‘Kan ruhte a ro zo ta, beisei a bo va, tihduhdah kan nih hi,’ an ti. Chuvângin, an hnênah heti hian puang rawh: Lalpa P athian chuan heti hian a ti: An thlânte chu ka hawng ang a, thlân aṭangin ka mite chu ka la chhuak ang a, Israel ramah ka hruai ang. An thlân ka hawna, ka lâk chhuah hunah chuan kei hi Lalpa chu ka ni tih an hria ang. Anmahniah ka Thlarau ka dah ang a, an nung ang a, an ramah ka hruai ang. Kei Lalpa hian ka sawi ang ngeiin ka ti tih an hria ang,” Lalpa thuchhuak chuan a ti. Lalpa chuan, “Nang, Mihring fapa, tiang pakhat la la, tah chuan, ‘Juda leh a thurualpui Israel fate,’ tih ziak rawh. Tiang dang pakhat la leh la, tah chuan, ‘Efraim tiang - Josefa leh a thurualpui Israel chhûngte tân,’ tih ziak bawk ang che. Tiang pakhat ni âwm takin a hmâwr pahnih chu hum zawm rawh. I mite chuan, ‘Hei hi eng tihna nge, min hrilh teh,’ an tih che chuan heti hian ti ang che: ‘Lalpa P athian chuan heti hian a ti: Ngai teh u, Josefa tiang, Efraim kuta awm, a thurualpui Israel chite chu Juda tiang nên ka hum kawp ang a, tiang pakhatah ka siam ang. An hmuh atân tiang i ziak pahnihte chu hum kawp ang che. An hnênah, Lalpa P athian chuan heti hian a ti, ti rawh: Ngai teh u, kei ngei hian Israel fate chu an kalna ram hnam dang zîng ata ka la khâwm dâwn; kil tin aṭangin ka hruai chhuak ang a, an ramah ka thlen ang. An ram, Israel tlângahte chuan hnam khatah ka siam ang a, rorêl tûr lal pakhat an nei ang a, hnam hnih leh ram hnih ni ṭhîn chu an inṭhen tawh lo vang. Milemte leh thil tenawm an tihte leh an bawhchhiatnate chuan an intibawrhbâng tawh lo vang a, an sual ṭhinna hmun ata chu ka chhan chhuak ang a, ka tifai ang; tichuan, ka mite an ni ang a, kei pawh an tân Pathian ka ni ang. Ka chhiahhlawh Davida ang lal an nei ang a, rorêltu pakhat hnuaiah an awm ang. Dik taka rorêlin ka Dân an awihin an zâwm ang a, an ti bawk ang.’ “Ka chhiahhlawh Jakoba hnêna ka pêk ram, an pate awmna ramah chuan an awm ang. Tah chuan an chêng reng ang, an fa te, an tu te, an tuchhuan te thlengin an awm kumkhua tawh ang. Thlamuang taka an awm theih nân kumkhaw remna thu ka thlunpui ang. Ka tinghet ang a, anni chu ka tipung ang a, ka hmun thianghlim chu an zîngah ka awmtîr kumkhua ang. An zîngah ka chêng ang a, an tân Pathian ka ni ang a, ka mite an ni ang. An zînga kumkhuaa awm tûr, ka hmun thianghlim, an zînga ka dah hunah chuan hnam dangte pawhin kei Lalpa hian Israel-te hi ka mi atân ka thlang tih an hria ang.” Lalpa chuan mi bia a: “Mihring fapa, Magog rama Mesek leh Tubal hruaitu lian ber, Goga lam hawi la, thu sawi khum rawh: Heti hian ti ang che: Lalpa P athian chuan Mesek leh Tubal hruaitu lian ber Goga hnênah heti hian a ti: Ka hua che a ni, ka tuai vir ang chia, i khabe-ah nghakuaiin ka kuai ang chia, i sipai rual te, sakawr leh sakawr chungchuang nalh tak taka inchei te, mi tam tak, awmphaw ha leh phaw keng, khandaih keng te nên ka hnûk chhuak ang che. I hote chu Persia mi te, Kus mi te leh Put mi te an ni; phaw leh dâr lukhum an za-in an nei. Gomer leh hmâr tâwpa awm Beth-togarma rama indo thiamte chuan an zui che, hnam dang zînga sipai rual tam tak pawh an tel. In peih la, i hote pawh inrâlring sela, vêng ngun rawh. “Ni eng emaw zât hnuah ka chhawr dâwn che a ni. Kum tam fe a ral hnuah hnam tam tak zînga darh ka hruai khâwmte thlamuang taka an awm tawhna, khandaih laka chhan ram, Israel tlângram chhe tawh leh ram tawh, thlamuang taka an awm leh tawhna ram chu, i rûn tûr a ni. Thlipui thawk buan buan angin sipai leh i ṭhuihruaite nên in bei ang a, ram chu chhûm ang maiin in tuam dâwn nia. “Lalpa P athian chuan heti hian a ti: Chumi hnuah chuan thil ṭha lo tak tih i rilrûk ang a, ‘Kulh pawh nei hlei lo ramah chuan ka kal teh ang, kulh nei lo, a khârna leh kalhna pawh awm lo khuaahte thlamuang takin an chêng der der a, ka rûn dâwn a ni. Khaw chhe tawha chêngte chu ka rawk ang a, ka suam ang,’ i ti vei a. Chûng mite chu hnam tin zînga darh tawh hruai khâwm leh an ni a, ran leh sum an nei leh ta a ni. Seba leh Dedan mite leh Tarsis sumdâwngtute chuan, ‘Rawk tûr leh suam tûrin i sipaite i khâwm em ni? An tangka leh rangkachak te, an ran te leh sum te chhuhsakin hawn ṭeuh i tum em ni?’ an ti ang. “Chuvângin, Mihring fapa, thu puang la, Goga chu hrilh rawh: Ka mi Israel-te chu thlamuang taka an awm laiin i bei ang a, hmâr tâwp, i awmna ram aṭang chuan mi tam tak, sakawr chungchuang rual leh sipai rual nên i thawk chhuak ang. Chhûmin ram a tuam angin ka mi Israel-te chu i tuam ang a, a hun ka tihah chuan. Aw Goga, ka ram chu ka rûntîr ang che, hnam tinin tu nge ka nih an hmuha ka thianghlimzia a lan theih nân. Lalpa P athian chuan heti hian a ti: Israel zâwlneite hmanga ka lo sawi daih tawh, ‘Israel-te bei tûrin mi tu emaw ka rawn hruai dâwn’ ka tih kha i ni. “Goga chu Israel ram bei tûra a lo kal hunah ka thinur hle ang, Lalpa P athian thuchhuak chuan a ti. Ka thinur chuan, ‘Israel ramah, chumi ni chuan, lîr nasa takin ka tinghîng ang,’ ka ti a. Tlângte a min ang a, khâmte a chim ang a, kulh bang te a chim ang; thih hlauvin tuipui sangha te, chunglêng sava te, ramsa te, bawkvâka kal te leh rama mihring awmte chu, ka hmaah chuan an khûr ang. Amah bei tûrin khandaih ka ruai ang,” Lalpa P athian thuchhuak chuan a ti. “A mite chu khandaihin an inbei tawn ang. Ruahpuivânâwn leh rial ka chhuttîr ang a, a kalpui sipaite leh a ṭhuihruai tam takte chungah kâta kâng mei ka sûrtîr ang. Tichuan, hnam tin hmuhah ka ropuizia leh thianghlimzia ka tilang ang a, kei hi Lalpa chu ka ni tih an hria ang.” “Nang, Mihring fapa, Goga chu thu sawi khum rawh. Lalpa P athian chuan heti hian a ti: Mesek leh Tubal hotu lian ber, Goga, ka hua che a ni. Ka tuai vir ang chia, ka hnûk ang che. Hmâr tâwp aṭangin ka la chhuak ang che a, Israel tlângah ka hruai ang che. I kut vei lama thalngul chu ka titliak ang a, i ding lama thal chu ka tibung ang. Goga leh a sipaite, a ṭhuihruaite nên chuan Israel tlângah an thi ang a, an ruang chu ramsa leh chunglêng sava ka tlantîr ang. A ram dâpin an tlu pheng phung ang,” Lalpa P athian thuchhuak chuan a ti. “Magog ramah leh tuipui kam, thlamuang taka an awmna ramah chuan, mei ka tichhuak ang a, mi tinin Lalpa chu ka ni tih an hria ang. Ka mi, Israel-te chu, ka hming thianghlim ka hriattîr ang a, ka hming thianghlim chu anmahni avângin a chhe tawh lo vang. Hnam dangte chuan Israel Mi Thianghlima ka ni tih an hria ang.” Lalpa P athian thuchhuak chuan heti hian a ti: “Ngai teh, ka hun sawi chu a lo hnai e, a thleng mai dâwn. Israel khuaa awmte chuan râlthuam tinrêng, phaw te, awmphaw te, thalngul te, thal te, talhtum te leh fei te chu thingah an fawm ang a, tuahah an hmang ang, kum sarih tla a ni ang. Thingtuah phur tûrin an ramah emaw, ngawa thing kit tûrin emaw an thawk chhuak ngai lo vang. Râlthuam tlâwmsan chu thingtuahah an hmang dâwn a ni. Anmahni rawktu chu an rawk ang a, suamtu chu an suam ve thung dâwn a ni,” Lalpa P athian thuchhuak chuan a ti. “Chumi hnuah chuan, Tuipui Thi chhak lama awm Abarim ruam an tih, Israel ramah chuan, Goga thlân hmun ka pe ang, chutah chuan Goga leh a ṭhuihruaite chu an phûm ang. Chu chuan khualzinte a dang ang a, ‘Hamon Gog ruam’ an vuah ang. Ram a thian theih nân thla sarih chhûngin Israel-te chuan an phûm zo hrâm ang. Phûmnaah chuan rama awm zawng zawng an thawk ang a, ka ropuina ni a thlen hunah chawimawi an ni ang,” Lalpa P athian thuchhuak chuan a ti. “Thla sarih a ral hnu chuan, ram pum fang chhuak tûr, ruang phûm loh a awm emaw tih zawnga hnaa neih tûr mi an ruat ang. Chutiang chuan ram chu an thian fai dâwn a ni. Chûng mite chuan an kal velnaah mihring ruh an hmuh phawt chuan a bulah chhinchhiahna an târ ang a, thlân laitute chuan an phûm tûr a ni. Chumi bulah chuan khaw pakhat, Hamona tih a awm. Tichuan, ram chu a lo thiang ang. “Nang, Mihring fapa, Lalpa P athian chuan heti hian a ti: chunglêng sava te leh ramsa te chu hrilh rawh: lo kal sela, kil tin aṭangin lo kal khâwmin inthawina ruai ropui ka buatsaihah hian sa han ei sela, thisen han in rawh se. Mi huaisen sa te in ei ang a, ram hruaitute thisen in in dâwn nia; berâm te, berâmno te, kêl te, bâwngchal te leh Basan ran chum te inthawi nân ka talh a ni. “Ka ruai buatsaiha sa thaute chu êleuhvin in ei ang a, thisente chu rui khawpin in in ang. Ka dawhkâna sakawr leh a chungchuang, mi huaite leh indo thiamte sa chu duh tâwkin in ei ang,” Lalpa P athian thuchhuak chuan a ti. “Hnam tin hnênah ka ropuizia ka tilang ang a, ka rorêl tâk dân chu an hmu ang. Chumi ni aṭang chuan Israel chhûngte chuan kei hi Lalpa, an Pathian chu ka ni tih an hre tawh ang. Ka chunga thil an tihsual avângin Israel-te chu salah ka tântîr a nih hnam dangte chuan an hria ang; ka chungah an rinawm lo va, ka hawisan ta a, khandaihah an thi a ni. An bawlhhlawhna leh an bawhchhiatna avângin ka hrem a, ka hawisan a ni.” Chuvangin, Lalpa P athian chuan heti hian a ti: “Jakoba saltâng chu ka hruai chhuak ang a, Israel chhûngte chu ka khawngaih ang; ka hming thianghlim chu ka humhalh ang. Tu man rawn tibuai lova anmahni ram ngeia thlamuang taka an awm hunah chuan min hawisan avânga an mualphona chu an theihnghilh thei tawh ang. Ka thianghlimzia tilang tûrin an hmêlmate awmna ram ata ka hruai khâwm ang a, hnam tin zîngah sala thawn darha, an ramah ngei hruai kîr leha, tu mah hruai hmaih nei lotu an Pathian Lalpa chu ka ni tih an hria ang. Ka hawisan tawh lo vang a, Israel chhûngte chungah ka Thlarau ka leih ang,” Lalpa P athian thuchhuak chuan a ti. Sala kan tân kum sawmhnih leh pangana, Jerusalem an lâk aṭanga kum sâwm leh pali, kum thar, ni sâwm ni chuan Lalpa chuan a kutin min chelh a, min hruai ta a. Inlârnaah chuan Pathianin Israel ramah min hruai a, tlâng sâng takah min dah a, ka hmaah chuan khawpui din thar ni âwm tak ka hmu a. Chutah chuan min hruai a, dâr tle anga lang mi pakhat ka hmu a, hrui leh tehna tiang a keng a, kawngka bulah a ding a. Chu mi chuan ka hnênah, “Mihring fapa, ngun takin en la, ngaithla rawh; ka entîr tûr zawng zawng che hi chhinchhiah tlat rawh: chumi atân chuan hetah hian ka hruai che a ni. I hmuh zawng zawng hi Israel chhûngte i hrilh tûr a ni,” a ti a. Ka hmuh chu Tempul a lo ni a; a vêlin bang a awm a. Tehna tiang a ken chu metar thuma sei a ni: bang chhah lam leh sân lam chu a han teh a, tiang tlûk khat ve ve a ni. Khawchhak lam aṭanga luhna rahkaah chuan a chho va, rahka tâwpah chuan zâwl, tehna tiang tlûk khata zau a lo awm a. Luh zêlna sîr tuakah chuan vênbûk pathum ve ve a awm a, vênbûk dung leh vâng chu a inchen a, tiang tlûk khat a ni. Vênbûk inkâr bang chu tawng ruka chhah a ni. Vênbûk chhûng ber aṭangin luh zêlna chu tiang tlûk khata thui a ni. Chumi dawtah chuan veranda, a chhûng thlâk tawng riat a awm a, ban tawng hnih biala lian a awm leh a. Khawchhak lam han thlîr lêt chuan luhna sîr tuaka vênbûk awm chu a intiat vek a, an inkâr bang chhah lam pawh a inang. Luhna zau lam chu a han teh a, tawng sâwm leh pathuma zau a ni a, ban awmna laiah erawh chuan tawng sâwma zau a ni. Vênbûk luhna bang bulṭhut chu, tawng khata chhah, tawng khata sângin an tipâwng a, bang bul chu luhna sîr tuakah tawng ruk zêl a awm a ni. Vênbûk in ep, châr bang ve ve inkâr chu tawng sawmhnih leh panga a ni. Luhna leh chhuahna ban chu tawng sawmruk vêla sângah a ngai a. Luhna tawntirh aṭanga hung chhûng lama chhuahna inkâr chu tawng sawmngaa thui a ni. Vênbûk chhûng châr lam bangah chuan tukverh tê a awm a, a sîr bangah pawh a awm ve ve a, kalna hrûl pindan bangah chuan tûm kûng lem an ziak a. Hung chhûng tualah chuan mi hruai a, pâwn lam pang bang ringin pindan sawmthum a awm a. Chûng pindan tual chhuat chu lung rem vek a ni, chuanhnuai tual zawng zawng nên. Chuanchunga luhna leh chuanhnuaia chhuahna inkâr chu a teh a, tawng za a ni. Hmâr lam aṭanga luhnaah chuan mi hruai leh a, luhna thui zâwng leh a zau lam chu a teh a. Luhna sîr tuaka vênbûk pathum awm ve ve te, an inkâr bang leh a bang ṭhut pâwng bîk te, a ban leh a ban inkâr te chu khawchhak lam aṭanga luhna ang chiah kha a ni; tawng sawmngaa thui, a zau lam tawng sawmhnih leh panga a ni. Tukverh tê te, luhna tawntirh ban te, tûm kûng lem te pawh khawchhak lam aṭanga luhnaa mi ang kha a ni. A luh tirhnaah ban a awm a, rahka pasarih a nei. Chuanhnuai tual luhna zâwnah chuanchung luhna a awm bawk a, an inkâr chu a teh a, tawng za a ni. Chhim lamah min hruai leh a, chutah pawh chuan luhna a awm a, a dang ang bawkin bante chu a the a. Tukverh tê te, bang bul pâwng bîk te a awm ve vek a; luhna thui zâwng pawh tawng sawmnga a ni a, a zau zâwng pawh tawng sawmhnih leh panga a ni. Luh chhohnaah rahka pasarih a awm a, ban te a awm a, banga tûm kûng lem ziak te, luhna sîr tuaka awmte pawh chu a inang a. Chuanhnuai luhna leh chuanchung luhna inkâr pawh a teh a, tawng za bawk a ni. Chhim lam aṭanga luhna kal tlangin chuanchung luhnaah chuan min hruai a, chuanhnuai luhna ang bawk kha a ni. Vênbûk te, bang te, luhna bul ban te, banga tukverh tê te a awm ve vek a, tawng sawmngaa thui, sawmhnih leh pangaa zau bawk a ni. Veranda dung chu tawng sawmhnih leh panga a ni a, a vâng lam chu tawng nga a ni. Banahte leh bangahte chuan tûm kûng lem ziak a ni a, a hnuai aṭanga chuanchung lâwn chhohna rahka chu pariat a ni. Khawchhak lam aṭanga luhna kal tlangin chuanchung luhnaah min hruai leh a, a han teh a, a dang ang bawk a ni. Vênbûk te, veranda te, chhûng lam pindan bang te pawh a dang tiat vek a ni. Tukverh tê te, ban te, hulhliap te a awm vek a, a thui lam pawh tawng sawmnga, a zau lam tawng sawmhnih leh panga bawk a ni. Chuanhnuai lamah ban a awm bawk a, tûm kûng pawh banah chuan ziak a ni, chhohna rahka chu pariat a ni. Hmâr lam aṭanga chuanchung luhnaah chuan min hruai leh a, a teh a, a dang ang bawk a ni. Vênbûk te, a ban te, hulhliap te, tukverh tête a awm ve vek a, a thui lam tawng sawmnga, a zau lam tawng sawmhnih leh panga bawk a ni. Chuanhnuai lamah ban a awm bawk a, banahte chuan tûm kûng lem ziak a ni a, a chhohna rahka chu pariat a ni. Hmâr lam aṭanga chuanchung luhna sîrah chuan in pakhat a awm a, luhna aṭanga kal luh nghâl mai theih a ni, hetah hian hâlral thil hlan tûr an sil ṭhîn. He inah hian dawhkân pali a awm a, bang bulah pahnih ve ve a awm a. Inthawinaa hlan tûr, hâl ral tûr emaw, sual thawina tûr emaw, thiam loh inthawina tûr emaw hêng dawhkânah hian an talh ṭhîn a ni. Pindan pâwn, hmâr lam aṭanga luhna sîrah chuan dawhkân pahnih a awm ve ve bawk a, ran talhna tûr dawhkân chu a vaiin pariat a ni, tualah pali, in chhûngah pali. Hâlral tûr an dahna dawhkân, lungchher kil li nei, tawng khat leh a chanvea inbial, tawng khat leh a chanvea sâng pali in chhûngah chuan a awm a. Ran talhna hmanrua zawng zawng chu hêng lung dawhkânah hian an dah ṭhîn. Lung dawhkân tlâng kawmna, kutphah bênga chhah, a tlângah chuan a awm chhuak a, hetah hian maichâma hlan tûr sa an dah ṭhîn a ni. Chuanchung zâwlah chuan mi hruai chhuak a, hmâr lam aṭanga luhna lamah leh chhim lam aṭanga luhna lamah in a awm ve ve a; pakhat chuan chhim lam a hawi a, pakhat chuan hmâr lam. Hmâr lama awm, chhim lam hawi chu, Tempula thawktute awmna a ni. Chhim lama awm, hmâr lam hawi chu maichâma rawngbâwltute awmna a ni, chûng mite chu Zadoka thlahte an ni, Levia thlahte zîngah anni chauh hi a ni Lalpa hmaa kala, rawngbâwl theite chu. Chuanchung zâwl chu a teh a, tawng zaa sei, tawng zaa zau a ni a, a inbial a ni; Tempul kawtah chuan maichâm a awm bawk. Tempul pindan hmasaah min hruai leh a, rahka tâwp, chhuah chhohnaah zâwl, tawng ngaa zau a lo awm a, chu chu lehlam lehlamah a kal zêl a. Pindan hmasa luhna bang chu tawng thuma chhah a ni a, bang leh bang inkâr chu tawng sâwm leh pali a ni. Pindan hmasa chhûng vâng lam chu tawng sâwm leh pahmin a ni a, a dung lam chu tawng sawmhnih a ni. Pindan hmasa tualzâwl chhohna chu rahka sâwm a ni, rahka chhuahah ban a awm ve ve bawk. Hmun Thianghlim luhna sîr bang chu tawng ruka chhah ve ve a ni, puan in zau lam tiat a nih chu. Luhna bang leh bang inkâr chu tawng sâwma zau a ni a, pindana luhin luhna sîr lam chu tawng nga ve ve a la ni a. Hmun Thianghlim chu a han teh a, tawng sawmli-a sei a ni a, a vâng lam chu tawng sawmhnih a ni. Pindan chhûngril luh zêlna kawng sîr bang chu tawng hniha chhah a ni a, bang leh bang inkâr chu tawng ruk a ni; luhna bang sîr tuaka pindan bang la awm chu tawng sarih ve ve a nih chu. Pindan chhûngril chu a han teh a, a dung leh vâng a inchen a, tawng sawmhnih ve ve a ni. ‘Hei hi Hmun Thianghlim Ber chu a ni,’ tiin min hrilh a. Tempul bang chhah lam chu a han teh a, tawng ruka chhah a ni. Bang ring chuan pâwn lamah pindan, tawng li-a zau a awm tluanchhuak a. Chûng pindan chu chhâwng thuma sânga sak a ni, chhâwng khatah pindan sawmthum zêl a awm a. Tempul bang chu chhâwng tinah a pan hret hret zêl a, in chhâwng chhuat chu Tempul banga va lût lovin a chhawrah chuan a innghat mai a, Pindan sâng apiang a zau hret hret zêl a ni. Pâwn lam aṭanga en chuan Tempul bang chu a lang zuih chuang lo. Chhâwng hnihnaa lâwn chhohna a awm a, chuta ṭang chuan chhâwng thumnaa lâwn chhohna a awm leh a. In chhuat chu a pâwng hret a, leia bang innghahna chu tawng ruk a ni. Hêng pindan hual hian kawng tawng ngaa zau a awm chhuak a, bang tawng ngaa chhahin a hual chhuak bawk a ni. He bang pâwn lamah hian hmun âwl, tawng sawmhniha zau Tempul hual chuan a awm bawk a. He hmun âwl aṭang hian chhûng lam luhna tûr kawngka, chhim lam leh hmâr lamah pakhat ve ve a awm. Khawthlang lam, Tempul châr lamah chuan, in a awm a, tawng sawmsariha zau, tawng sawmkuaa seia hung a ni, a hungna bang chu tawng ngaa chhah a ni tluanchhuak a. Tempul chu a han teh a, tawng zaa sei a ni a, a hnung hmun zâwl leh in awm chu tawng za bawk a ni. Tempul hma lam tual chu a teh a, tawng za a ni. Khawthlang lama hung bâk zâwla in awmte chu a teh a, tawng za bawk a ni. Tempul pindan hmasa te, Hmun Thianghlim te leh Hmun Thianghlim Berte chu a bang thingphela thuah vek a ni; bangah chuan tukverh lem a khât tâwkin a awm chhuak vek a, luh tirh aṭanga in chhûng chu chhuat aṭanga tukverh lem thleng chuan thingphela thuah chhuah vek a ni. Tukverh tête chu hawn tlang a ni lo. Kawngka chung lam pawh a chhûng lam leh pâwn lam thuah vek a ni. Pindan chhûng lam thuahna tluan chuan thil lem ker chhuah vek a ni. Cherub leh tûm kûng lem, inkârthlâk chiata ker chhuah vek a ni. Cherub-te chuan hmai pahnih an nei a, mihring hmêl ang chuan tûm kûng lam a hawi a, sakeibaknei hmêl ang chuan lehlama tûm kûng lam a hawi a. Chutiang chuan Tempul chhûng thuahna thingphel chu ker chhuah vek a ni. Chhuat aṭanga kawngka lu chung thlengin Cherub lem leh tûm kûng lem chu a awm a ni. Hmun Thianghlim Ber luhna kawngkhâr ban chu kil li nei a ni a, Luhna bulah chuan maichâm ang thing dawhkân, tawng thuma sâng, tawng hniha zau, tawng hniha sei a awm a; a bang te, a chung te leh a kil ban killi te chu thing vek a ni. Hmun Thianghlim Ber luhna leh hmun thianghlim luhna kawngkhâr chu khâr hnih nei ve ve a ni. Hmun thianghlim Ber kawngkhârah chuan, in chhûng banga ker ang bawk khân cherub lem leh tûm kûng lem a awm a, kawngka lu chung aṭang chuan thingphel zâr a awm a. Luhna bang sîrah chuan tukverh tê a awm bawk a, chumi sîrah chuan tûm kûng lem a awm bawk. Hmâr lam tualah min hruai chhuak a, Tempul huala hmun âwl dung zuia in awmah chuan min hruai a. A dung chu tawng za a ni a, a vâng chu tawng sawmnga a ni. Tempul hual hmun âwl tawng sawmhniha zau aṭanga teh ṭan a ni a, in chuan chuanhnuai zâwk tual thlengin a awh a ni. Chhâwng thum a ni a, a chhawr a awm zêl a. Hmâr lam hawi pindan kawngkhâr hmaah chuan kalna, tawng sâwma zau a awm a, a thui lam chu tawng za a ni. Pindan hnuai zâwk chu a chhawr a awm avângin a chung zâwk ai chuan a zîm, a chhawr chuan a la hêk a ni. Chhâwng thum ni mah se in dangte anga ban a neih loh avângin a bulṭhut pindan ai chuan a chhâwng bangte chu a pan hret hret a ni. Pindan hrûlah, bang tawng sawmngaa sei, tual zau lam depah chuan a awm a. Tual zau lam hawi pindante chu tawng sawmnga a ni a, Tempul lam hawi erawh chu tawng za a ni. Chuanhnuai tual aṭang chuan khawchhak lam aṭanga pindana luh chhohna kailâwn a awm. Chhim lamah pawh, Tempul huala hmun âwl dung zui bawkin in a awm a. Hmâr lam ina awm ang bawk kha kalnate a awm a, pindante pawh a intiat a, kawngkhâr te, a rem hmang te, luh chhohna te a inang vek a ni. Chhim lam hawi kawngka hmaa kal ṭannaah chuan khawchhak lam aṭanga lo luhna kawngka a awm. Mi chuan mi bia a, “Hmun zâwl dung zui, chhim leh hmâr lama pindan awmte hi pindan thianghlim an ni: Lalpa hmaa inlan ṭhîn puithiamte chuan inthawina sa thianghlim chu hetah hian an ei tûr a ni. Inthawina thil thianghlim, chhangphut hlan te, sual thawina te, thiam loh thawina te dah khâwmna tûr a ni, Hmun Thianghlim a nih hi. Puithiamte chu Hmun Thianghlima an luhin chuanhnuai tualah an chhuak tûr a ni lo, an thawmhnaw chu hlîpin hetah hian an dah zet tûr a ni, an thawmhnawte pawh chu thil thianghlim a ni si a. Mipui awmnaa an chhuah dâwn chuan thawmhnaw dang an inbel tûr a ni,” a ti a. Tempul leh a tual vêl a teh zawh chuan khawchhak aṭanga luhnaah chuan min hruai chhuak a, Tempul ram zauzâwng chu a teh kual ta a. Khawchhak lam bang chu a han teh a, tawng zangaa sei a ni. Hmâr lam bang a han teh leh a, tawng zangaa sei a ni. Khawthlang lam bang a teh a, tawng zangaa sei a ni. Chhim lam bang a han teh leh a, tawng zangaa sei bawk a ni. A bang kil li chu a teh chhuak a, a bang dung lam te, a vâng lam te tawng zanga ṭheuh a ni; bang chu thianghlim leh thianghlim lo daidangtu a ni. Khawchhak lam aṭanga luhnaah chuan mi hruai leh a. Khawchhak lam aṭangin Lalpa ropuina a lo kal a, a aw chu tuifinriat thâwm ang a ni; a ropuina avâng chuan lei chu a êng pum a. Inlârna ka hmuh lan dân chu Jerusalem tichhe tûra P athian inlârna ka hmuh ang leh Kebar lui kama ka hmuh ang kha a ni a, bawkkhupin ka tlu ta a. Lalpa ropuina chu khawchhak lam aṭanga luhna kal tlangin Tempul chhûngah chuan a lût ta a. Thlarau chuan min chawi a, chuanchung tualah chuan min hruai a. Ngai teh, Tempul chu Lalpa ropuinain a khat vek a. Ka bulah chuan mi pakhat a ding a, Tempul aṭanga lo chhuak aw ka hria a, heti hian mi rawn hrilh a: “Mihring fapa, hei hi ka lalṭhutthlêng ka hûnna leh ka ke nghahchhan awmna chu a ni; ka mi Israel-te zîngah hetah hian ka chêng kumkhua tawh dâwn a ni. Israel chhûngte leh an lalte chuan ka laka uirein ka hmun thianghlim an tibawrhbâng tawh ngai lo vang; pathian dangte hmunsâng angin an lalte ruang phûm nân an hmang a, ka tual ânin in an sa a, ka bang bul rêtah ban an phun ṭhîn, an thil tenawm tihte chuan ka hming thianghlim an tibawrhbâng a, ka thin a ur a, ka hrem ta a ni. Tûnah, an uirena chu bânsan sela, an lal ruangte chu la sawn rawh se; tichuan, an zîngah ka awm kumkhua ang. “Nang, Mihring fapa, Israel chhûngte hnênah ka Tempul sak dân tûr hi sawi la, a len lam leh a rem dân hmang hi hrilh rawh. An thil sual tihte avângin tizak rawh. An sualte avânga zah nachâng an hriat chuan Tempul din dân tûr hi an hnênah hrilh fiah la, a luhna leh a chhuahna te, a len lam te, a zau lam te hrilh rawh; a hman dân tûr te, a chhawr dân tûr te an hmuh atân ziak rawh; tichuan, a awm dân hi an zuia, a hman dân tûr angin an hman theih nân. “Hei hi Tempul hman dân tûr chu a ni, a tlâng hualin hmun serh a ni a, hman thianghlim a ni tûr a ni. “Tawng khat leh kutphah bêng, tawng khata ngaiin maichâm chu hetiang tûr hi a ni. A lei ṭhut chu tawng khata chhah lung rem tûr a ni; a kotlangah khuaptu a awm chhuak tûr a ni. Tawng khat chhawrin tawng hniha sâng lung rem chhoh tûr a ni a, heta ṭang hian tawng khat chhawra tawng li-a sâng lung rem chhoh leh tûr a ni a. Tawng khat chhawr lehin tap chu tawng li-a sâng rem chhoh leh tûr a ni; tap chu kil li neia rem tûr a ni, kil tinah ki, tawng khata sâng dah tûr a ni. Tap chu kil li nei tawng sâwm leh pahnih bial tûr a ni. A chhawr hnuai chu kil li nei, tawng sawm leh pali bial a ni ang a, a tlângah khuaptu, khâp khat a awm chhuak tûr a ni; tapa lâwn chhohna tûr khawchhak lamah kailâwn a awm tûr a ni. Heti hian min hrilh a: “Mihring fapa, Lalpa P athian -in heti hian a ti: Maichâm in siam hunah heti hian in tuih tûr a ni: Hâlral thilhlan in hlân ang a, thisen chu maichâmah in theh tûr a ni. Puithiam, Levia chi, Zadoka thlahte chauh ka hmaah an lo kal thei ang,” Lalpa P athian thuchhuak chuan a ti. “Sual thawi nâna hlan tûr bâwngtuai pe ang che. A thisen chu maichâm tap kil ki pali-ah chuan i tât ang a; a chhawr hual kil tinah leh a tlâng khuaptuah i tât bawk tûr a ni. Sual thawina tûr bâwngchal i la bawk ang a, pâwnah, Tempul tuala hmun ruatah chuan hâl tûr a ni. Ni hnih ni chuan sual thawina, kêlpa, hmêlhem lo i hlân tûr a ni. A ni lehah chuan kêlpa, hmêlhem lo i la ang a, sual thawi nân i hlân tûr a ni. Bâwng thisena i tih ang bawk khân kêl thisen chuan maichâm chu i tithianghlim tûr a ni. “Chutia maichâm i then zawh chuan bâwngtuai leh ranrual zînga berâmpa i hlân tûr a ni. Lalpa hmaah chûng chu i rawn la ang a, puithiamte chuan chi an al ang a, Lalpa tân an hâl ral ang. Ni sarih chhûng chu ni tin sual thawi nân kêl in hlân ang a, bâwngtuai leh ran rual zînga berâm hmêlhem lo in hlân bawk tûr a ni. Maichâm tuih nân chutiangin ni sarih tih tûr a ni a, chumi zawhah sil fai tûr a ni a; tichuan, maichâm chu a thiang tawh ang. Chûng hnuah chuan, a ni riat ni aṭangin, puithiamte chuan hâlral leh remna thilhlan te maichâmah chuan an hlân ṭhîn tawh ang; tichuan, kei ka lo lâwm ang,” Lalpa P athian thuchhuak chuan a ti. Khawchhak aṭanga Hmun Thianghlim chuanhnuai luhnaah min hruai leh a, a lo inkhâr a. Lalpa chuan min hrilh a, “Mihring fapa, kawng inkhâr hi a inkhâr reng tûr a ni, hawn tûr a ni lo; tu mah an lût tûr a ni hek lo. Israel-te Pathian, Lalpa chu, hetah hian a lût a, a inkhâr reng tûr a ni. Ram rorêltu erawh chu veranda-ah hian Lalpa hmaa ruai ei tûrin a kal thei ang a, a lo kalnaah bawk a kîr leh tûr a ni. Hmâr lam aṭanga luhna, Tempul hmaah chuan mi hruai leh a, Tempul chhûng chu Lalpa ropuinain a khat a, bawkkhupin ka tlu a. Lalpa chuan ka hnênah, “Mihring fapa, ngun takin en la, chhinchhiah tlat rawh; i hnêna ka sawi hi ngaithla ngun rawh. Hmun Thianghlim chhûng hman dân tûr te, tu nge lûta chhuak thei tûr te ka hrilh dâwn che hi. “Hel hmang Israel chhûngte hrilh rawh: Lalpa P athian chuan heti hian a ti: Israel chhûngte thil tenawm tih hi a tam lutuk ta. Hmun Thianghlimah, ka tân, sa thau leh thisen in rawn hlan pawhin hnam dang, thinlung leh tisaa serh tan lohte in hruai lût a, in tibawrhbâng a, thil tenawm in tih zozai avâng hian ka thuthlung in bawhchhia a ni. Ka hmun in vawng thianghlim lo va, a vawng tûrin hnam dang mi chu in dah a. Lalpa P athian chuan heti hian a ti: Hnam dang, thinlung leh tisaa serh tan loh rêng rêng ka Hmun Thianghlimah an lût tûr a ni lo; Israel-te zînga chêng ngeite pawh thinlung leh tisaa serh tan lohte chu an lût tûr a ni lo. “Milem biaa Israel-te an bo lai khân Levia thlahte pawh hian min hlat a, an bawhchhiatna avângin an tuar ang. Hmun Thianghlim thiantu an ni ang a, kawngka an vêng ang. Mipui hâlral thilhlan tûr leh inthawina an lo talhsak ang a, an lo ṭanpui tûr a ni. Mipuiin milem an biak lai khân an thilhlante hlansaktu an ni a, Israel chhûngte tân suala tlûkna bulpui an ni a; chuvângin, an chungah ka kut ka lek ta a ni,” Lalpa P athian thuchhuak chuan a ti. “An bawhchhiatna avângin an tuar tûr a ni. Puithiam angin ka bulah an lo kal hnai tûr a ni lo; thil tenawm an tih avângin zah an tuar ang. Ka in vêngtuah leh a chhûnga tih tûr apiang ti tûra tirhkahah ka ruat a ni. “Puithiam Levia chi, Zadoka thlahte erawh chuan, Israel-te an bo lai khân ka Hmun Thianghlim an vawng tlat a, anni hi chuan min rawn hnaih thei; ka rawng an bâwl ang a, ka hmaah an ding ang. Sa thau leh thisen ka hnênah an rawn hlan ang,” Lalpa P athian thuchhuak chuan a ti. “Anni chauh hi ka Hmun Thianghlimah an kal thei ang. Ka dawhkân an rawn hnaih ang a, Pathian biak an hruai ang. Tempul chuanchung zâwl an lo luhin la zai sîna siam thawmhnaw an inbel tûr a ni. Chuanchung zâwlah emaw, Tempul chhûngah emaw rawng an bâwlin sahmula siam thawmhnaw an ha tûr a ni lo. La zai sîna siam diar an khim ang a, la zai sîna siam kekawr an ha bawk tûr a ni, an thlan titla thei tûr kâwnghrên an hrêng tûr a ni lo. Mipui zînga chuanhnuai zâwla an kal dâwn chuan an rawngbâwlna thawmhnaw chu an hlîp ang a, pindan thianghlimah an dah ang a, thawmhnaw dang an inbel tûr a ni; chutilo chu, thawmhnaw thianghlim chu mipuiin an khawih palh ang a, an tuar dah ang e. Puithiam chuan an lu an ziat kawlh tûr a ni lo va, an sam an zuah sei lutuk tûr a ni hek lo, an mêt ṭhîn tûr a ni. Hung chhûnga an luh dâwnin puithiam tu mahin uain an in tûr a ni lo. La nula hle mah se, pasal sûn emaw, mâk emaw nupuiah an nei tûr a ni lo; Israel nula hnahkhat chu tu pawh an nei thei ang, puithiam dang thihsan pawh an nei thei ang. “Puithiamte chuan thil thianghlim leh thianghlim lo te, thiang leh thiang lo te mipui an zirtîr tûr a ni. Thu buai an rem bawk ṭhîn tûr a ni, ka Dân angin an rem tûr a ni. Ka Dân leh ka thupêkte angin kût nite an hmang tûr a ni a, ka sabat an serh tûr a ni. “Mitthi ruang khawihin an intibawlhhlawh tûr a ni lo. An pa te, nu te, unau te, fa te, farnu pasal nei lo te ruang erawh chu an khawih thei ang a; mahse, an bawlhhlawh ang. An inthen fai hnuah ni sarih chhûng an hna an chawlhsan tûr a ni. Chutah, hung chhûng chuanchungnungah an kal ang a, Tempula rawngbâwl an chhunzawm theih nân inthenna thil an hlân tûr a ni,” Lalpa P athian thuchhuak chuan a ti. “Puithiamho tân kei hi an chanvo ka ni. Israel zîngah chanvo dang eng mah pêk tûr an ni lo, ka hna hi an chanpual a ni ang. “Thlai thil hlan te, sual thawina te, thiam loh thawina te puithiam chan tûr a ni. Israel rama thil serh dah hran rêng rêng pawh an ta tûr a ni. Thlai chi tinrêng rah hmasa te leh ka hnêna thil pêk rêng rêng chu puithiam neih tûr a ni. Chhang siam apiangin tlang khat chu puithiam an pe tûr a ni; tichuan, chu mite chhûng chu mal ka sâwm ang. Sava te, ramsa te, a thisâwn leh sa seh chu puithiamte chuan an ei tûr a ni lo.” Ro atân ram in sem dâwnin Lalpa tân Hmun Thianghlim tûr, tawng sînghnih leh sângnga a sei, tawng sînghniha zau ram in serh hrang tûr a ni, chu ram chu ram serh a ni ang. He ram chhûngah hian hmun serh bîk, kil li nei, tawng zanga bial zuah tûr a ni. Hmun serh pum pui aṭang hian tawng sînghnih leh sângngaa sei, a vâng lam tawng sîngkhat teh chhuak ula, chu chu hmun thianghlim bîk, serh hran tûr chu a ni. Hmun thianghlim bîk a ni a, Hmun Thianghlima Lalpa rawngbâwltu puithiamte tân a ni, an insakna tûr leh biakbûk sakna tûr a ni. A la bâng, ram tawng sînghnih leh sângngaa sei, tawng sîngkhata zau chu Tempula thawktu Levia chite tân a ni, an nei ang a, hemi chhûngah hian khua an nei ang. Hmun serh bulah chuan khawpui tûr ram, tawng sînghnih leh sângngaa sei, a zau lam tawng sângngaa zau teh chhuak ula, chu chu Israel mi zawng zawng tân a ni ang. Lal tân pawh ram zuah tûr a ni. Hmun Thianghlim aṭangin khaw thlang lamah tuifinriat thleng a ni ang a, khawchhak lamah ram ripui thleng a ni ang a, Israel hnam pakhat tâna ram zuah tiat a ni tûr a ni. Israel ramah lal chanvo tûr chu he ram hi a ni ang, mi dang a nêk tûr a ni lo, hemi bâk hi chu Israel miten an nei tûr a ni. Lalpa P athian chuan heti hian a ti: “Israel hotute u, pâwngnêkna leh innêkchêpna hi bân ngang tawh teh u, dik takin rorêl ula, thil dik ti rawh u, ka mite hi an ram ata nêk chhuak tawh lul suh u,” Lalpa P athian thuchhuak chuan a ti. “In thil tehna chu a dik tûr a ni. Efa dik leh bath dik in hmang tûr a ni. Efa leh bath hi a intluk chiah tûr a ni, a lêt sâwm chu Homer khat a ni ang, Homer hi tehna chhûtna ber tûr a ni ang a. In bûklung pawh hetiang tûr hi a ni: Gera sawmhnih chu sekel a ni ang a, sekel sawmruk chu mina khat a ni ang. In thil hlan dân pawh hetiang tûr hi a ni: Huit chu in thar zât phur sawmruka phur khat, barli pawh phur sawmruka phur khat, hriak chu ṭin zaa ṭin khat in hlân tûr a ni. In hriak tehna tûr chu bath a ni a, bath sâwm chu Kor khat a ni ang. Kor leh Homer hi a intiat a ni. Israel rama berâm vulh zahnih zêlah berâm pakhat hlan bawk tûr a ni. Buh te, hâl ral tûr te, remna thilhlan te in hlân tûr a ni; tichuan, in sualte ngaihdam a ni ang,” Lalpa P athian thuchhuak chuan a ti. Ram chhûnga mi zawng zawngin Israel rama rorêltu hnênah hêng thil hi an rawn pe tûr a ni. “Thla thar kûtah te, sabat ni-ah te leh kût dangah te rorêltu chuan Israel hnam pum aiawhin hâlrala hman tûr ran te, buh hlan tûr te, uain hlan tûr te a tum ang. Israel mipui sual thawi nân, sual thawina te, buh hlan te, hâlral tûr te, inremna inthawinate a hlân tûr a ni.” Lalpa P athian chuan heti hian a ti: “Thla thar ni hmasa berah berâmpa hmêlhem lo talhin Tempul in thian tûr a ni. Puithiamin he sual thawina thisen hi a la ang a, Tempul kawngka biangah te, maichâm tap hnuai kil li-ah te, chuanchung veranda kawngka biangah te a tât tûr a ni. Thla thar ni sarih niin thil sual tih palh leh hriat loh vânga thil sual tih palh tân chutiang bawkin in ti leh tûr a ni; chutiang chuan Tempul chu in tithianghlim tûr a ni. Thla thar ni sâwm leh pali ni chuan kalhlên kût in hmang ṭan tûr a ni, ni sarih chhûng chhang dawidim telh loh in ei tûr a ni. Kût ṭan tirh niin lal chuan ama sual leh mipui sual thawi nân bâwngla a hlân tûr a ni. Ni sarih chhûng chu ni tin bâwngpa pasarih leh berâmchal pasarih, hmêlhem lo Lalpa hnênah hâl ral atân a hlân tûr a ni a, kêlpa pakhat pawh ni tin sual thawi nân a hlân tûr a ni. Bâwngpa pakhat leh berâm pakhat rual chuan chhangphut efa khat ve ve zêl hlan tel tûr a ni; chhangphut efa khatah hriak hin khat a tel zêl bawk tûr a ni. “Thla sarihna, ni sâwm leh pali ni kûtah pawh ni sarih chhûng chutiang bawk chuan a ti tûr a ni; sual thawina te, hâlral thilhlan te, chhangphut te a hlân tûr a ni. Lalpa P athian chuan heti hian a ti: “Hna thawh hun ni ruk chhûng chu khawchhak lam aṭanga chuanchunga luhna chu khâr tûr a ni; a ni sarih ni, sabat ni leh thla thar ni hmasa berah chuan hawn tûr a ni. Chuanchunga luh tlangnaah lal chu a lût ang a, veranda ban bulah a ding tûr a ni. Hâlral thilhlan leh remna thilhlan a rawn ken chu puithiamhovin an buatsaihsak ang a, veranda aṭang chuan Pathian chibai a bûk tûr a ni; tin, a hawn hnuah pawh tlai thlengin khâr tûr a ni lo. Ram mipuite pawh sabat leh thla thar ni chuan veranda bulah Lalpa hmaah an kûn tûr a ni. Sabat nia lalin hâlral thilhlan a rawn lâk chu berâmno hmêlhem lo paruk leh berâmchal hmêlhem lo pakhat a ni ang. Berâmchal hlan rualin chhangphut efa khat a hlân tel tûr a ni, berâmno hlan rual erawh chuan a phal zât zât chhangphut a hlân tûr a ni; chhangphut efa khatah hriak hin khat a telh zêl tûr a ni. Thla thar ni erawh chuan bâwngtuai pakhat hmêlhem lo, berâm paruk leh berâmchal pakhat, hmêlhem lo hlîr a hlân tûr a ni. Bâwngtuai hlan rual chuan chhangphut efa khat, berâmchal hlan rualin chhangphut efa khat, berâmno hlan rualin chhangphut a neih theih zât zât a hlân ang a, chhangphut efa khat zêlah hriak hin khat a telh tûr a ni. Veranda-a lal a kal chu a lo kalna vêkah a kîr leh tûr a ni. “Rama mipuiten, hun ruatah, Lalpa hmaa an lo kalin hmâr lam aṭanga luhnaa lo lût chu chhim lamah an chhuak ang a, chhim lam luhnaa lo lût chu hmâr lamah an chhuak tûr a ni, an luhnaah an chhuak leh tûr a ni lo, an kal ngîl mai tûr a ni. Lal erawh chu mipui rualin a lo lût ve ang a, a lo luhnaah a kîr leh tûr a ni. Kût ni leh puipun hunahte chuan bâwngtuai hlan rualin chhangphut efa khat, berâmchal hlan rualin chhangphut efa khat, berâmno hlan rualin chhangphut an duh zât zât, chhangphut efa khatah hriak hin khat zêl nên an rawn hlân tûr a ni. Lalin mahni duh thu-a hâlral thilhlan emaw, remna thilhlan emaw Lalpa hnêna a hlan duh chuan khawchhak lam aṭanga luhna chu an hawng ang a, sabat nia tih angin hâlral leh remna thilhlan chu an hlansak ang a; tin, a chhuak ang a, a chhuah hnuah kawng chu an khâr leh tûr a ni. “Zîngah, tûk tin, berâmno hmêlhem lo, kum khat tling, Lalpa hnêna hâl ral atân hlan ziah tûr a ni. Chhangphut efa hmun ruka ṭhena hmun khat leh a hmehna tûr hriak hin hmun thuma ṭhena hmun khat tûk tin hlan tel zêl bawk tûr a ni, thupêk angin hei hi tih reng tûr a ni. Berâmno te, chhangphut te leh hriak te hi tûk tin hâl ral atân hlan kumkhua tûr a ni.” Lalpa P athian chuan heti hian a ti: “Lalin ama ram ro aṭangin a fapa hnênah ram a pêk chuan a fa ta chu a ni ang a, a rochan a ni ang. A ṭhuihruai zînga mi pakhat hnênah a ram ro aṭangin ram a pêk chuan pêk kîr kumah lal ta a ni leh ang, lal leh a fate chauhvin an nei kumkhua thei ang. Lal hian mipui ram ro a lâksak tûr a ni lo, an ram ro aṭangin a hnawt chhuak tûr a ni hek lo. A fate hnêna ram a pêk pawhin ama ram ro aṭangin a pe tûr a ni; tichuan, ka mite hi an ram ro ata an darh tûr a ni lo.” Chhim lam aṭanga luhna bula puithiamho awmna pindan thianghlim, hmâr lam hawiah chuan min hruai leh a; chumi bul, khawthlang lama hmun awm chu min entîr a. He hmun hi puithiamhoten sual thawina leh thiam loh thawina sa thianghlim an chhumna tûr hmun a ni; chhangphut hlante pawh hetah hian an kang tûr a ni. Thil thianghlim rêng rêng chuanhnuai zâwla lâk chhuk tûr a ni lo, mipui a tipawi hlauh dah ang e. Chuanhnuai tualzâwlah min hruai kual a, kil tinah tual hung a awm zêl a. Tawng sawmli-a sei, tawng sawmthuma zau, kil tinah chuan hung a awm ṭheuh va, hungna bang bulah chuan lung an rem chhuak bawk a, thuk atâna rem a ni. “Tempul enkawltuten hei hi mipui inthawina sa an chhumsakna tûr hmun a ni,” a ti a. Tempul luhnaah min hruai kîr a; ngai teh, a pindan hmasa hnuai aṭang chuan, Tempul hawi zâwng, khawchhak hawi zâwngin tui a lo luang chhuak a. Tui chu Tempul luhna hnuaiah a luang zêl a; chhim lam, maichâm awmna ding lamah a luang zêl a. Hmâr lam aṭanga luhnaah mi hruai chhuak a, khawchhak lam aṭanga luhna bulah mi hruai zêl a; ding lam kovah chuan tui chu a lo far a. Khawchhak hawiin mi chu a kal a, a hrui ken chuan a han teh a. Tawng sâng a tlin chuan tui chu min daitîr a, kerêk thleng a ni. Tawng sâng a han teh leh a, mi daitîr a, khûp thleng a ni; tawng sâng a han teh leh a, kâwng thlengin mi daikaitîr a. Tawng sâng a han teh leh chuan lui lian tak, dai kai rual loh, hleuh kai ngai a lo ni ta a. Chu mi chuan, “Mihring fapa, hei hi i hmu em?” a ti a. Tichuan, min hruai a, lui kamah chuan min kîrtîr ta a. Vaukama ka chhuah chuan vaukam tawnah thing a lo awm khup mai a, ka hnênah, “He lui hi khawchhak lamah a luang a, Jordan phaiah a luang thla a, Tuipui Thi a zu fin a ni. Tuipui Thia a luan luh chuan a tui al chu a titui ta a. He lui hi a luanna a piangah rannung chi tinrêng a pung ang a, sangha te a tam êm êm ang. Tuipui Thi tui chu a tithianghlim ang a, thil nung tinrêng an pung ang. Engedi tui hmun aṭanga Eneglaim tui hmun thlengin tuipui kamah chuan sangha mantute an awm ang a, an lênte an pho vang. Mediteranean tuipuia sangha chi hrang anga tam sangha a awm ang. Vaukam chirhdûp hmunte leh dîlte erawh chu chia ten atân a la al tho vang. Lui kam tawna thing chi tinrêng chu ei atân a rah ṭhiah ṭhuah ang a, a hnahte chu a vuai ngai lo vang. Thla tin an rah ang a. Tempul aṭanga tui lo chhuak chuan a châwm a, a rahte chu ei atân a ni ang a, a hnahte pawh damna a ni ang. Lalpa P athian chuan heti hian a ti: “Israel hnam sâwm leh pahnihte ram insem dân chu hetiang hi a ni ang: Josefa thlahte chuan chan hnih an chang ang. In pate hnênah bân phar meuhvin he ram hi in ram rovah pêk ka tiam a, in ro atân insem rawh u le. “Hmâr lam ramripui chu Mediteranean Tuipui aṭanga khawchhak lamah Hethlon khaw panin Zedad khaw thlengin a kal ang a, Hamat leh Berotha-ah a kal zêl ang a, Hamat khân leh Damaska inrina Sibraim kal tlangin Hauran ramria Hazer-hatikon thlengin a kal ang a. Tichuan, hmâr lam ramri chu Mediteranean Tuipui aṭangin Hazar-enon thlengin a kal a ni; a hmâr lamah Damaska leh Hamat ram a awm a, hei hi hmâr lam ramripui chu a ni. Khawchhak lam ramri chu Damaska leh Hauran inrina aṭanga chhim lam panin a kal a, Jordan lui a zui a. Khawthlang lam chu Israel ram a ni a, khawchhak lam chu Gilead ram a ni; ri chu Tuipui Thiah Tamar thlengin a kal a. Chhim lam ramri chu Tamar aṭangin chhimthlang hawiin a kal a, Kades tui hmun thlengin. Chuta ṭangin hmârthlang lamah Aigupta ramri zuiin Mediteranean a thleng a. Khawthlang lam ri chu Mediteranean Tuipui a ni a, hmâr lamah Hamat khua a thleng a. “He ram hi a chi chiin insem rawh u. Ṭhum in vâwr ang a, in chan chu kumkhua a in ram tûr a ni. In zînga saphun awm, he rama fa neite pawhin in insem hunah chan an nei ve tûr a ni, mi dang ang bawkin ṭhum vâwrnaah pawh an pawt thei ang. Chutiang saphun awm vete chuan an awmna hnam ram chan an insem hunah an zîngah an tel ve ang,” Lalpa P athian thuchhuak chuan a ti. Hmâr lam ramri chu khawthlang Mediteranean Tuipui aṭangin khawchhak lamah Hethlon khaw panin Hamat khuaah a kal a, Enon khua a thleng a, Damaska leh Hamat inrina thlengin a kal a, hmâr lam ramripui aṭang hian a indawtin khawthlang lamah Tuipui aṭanga khawchhak ramripui thlengin an insem tûr a ni. A hmâr berah Dan a awm ang a, Aser-in a dawt ang a, Nafthali-in a dawt leh ang a. Chutah Manase-in a dawt leh ang a, Efraim-in a dawt leh ang. Reuben-in a dawt leh ang a, Juda a hnuhnûng ber ang. Juda dep chhim lamah, mi dang chan zât, ram serh, Tuipui aṭangin khawchhak ramripui thlengin, a zau lam tawng sînghnih leh sângnga zuah tûr a ni, hemi chhûngah hian Tempul a awm ang. Hemi chhûngah hian Lalpa tân bîk, ram tawng sînghnih leh sangngaa sei, tawng sînghniha zau in zuah tûr a ni. Hemi chhûngah hian Tempul a awm tûr a ni. Puithiamhovin he hmun serh aṭang hian khawchhak lam aṭanga khawthlang lamah tawng sînghnih leh sângngaa sei, chhim lam leh hmâr zâwnga tawng sîngkhata zau an chang ang. Hemi chhûngah hian Tempul a awm tûr a ni. He hmun thianghlim hi Zadoka thlahte awmna tûr a ni. Levia thlah dangte chuan Israel-te an sual bo lai khân an zui ve a, anni erawh hi chuan an zui ve lo va ni. Levia thlahte awmna depah, hmun thianghlim berah an awm tûr a ni. Puithiamho ram chhim lamah Levia thlahte pawhin ram bîk an nei tûr a ni, a dung tawng sînghnih leh sângnga, a vâng tawng sîngkhat. Hêng ram hi an hralh thei lo vang, ram dang nên an thleng thei lo vang a, mi dang an pe thei hek lo vang, Lalpa tâna serh hran a ni si a. He hmun bîk chhûnga ram la âwl, tawng sînghnih leh sângnga a sei, a zau lam tawng sângnga hi erawh chu serh hran a ni ve lo, a duh duh awmna tûr a ni, ram an nei ang a, an chhawm thei bawk ang. A laiah khawpui a awm ang a, kulh kil li nei a ni ang a, tawng sângli leh zanga a ni ang. Khawpui hual chhuak hian ram ruak, tawng zahnih leh sawmngaa zau zuah tûr a ni. Khawpui ram zuah hnua ram la chuang, khawchhak zâwnga tawng sîngkhat, khawthlang zâwnga tawng sîngkhat hi khawpui chhûnga awmten huanah an nei thei ang. Tu hnam pawh, khawpui chhûnga awm tawh phawt chuan huan hi an nei thei ang. Ram lai taka hmun zuah bîk chu kil li bial, tawng sînghnih leh sângnga a ni ang, hemi huam chhûngah hian khawpui chu a awm a ni. Tempul awmna te, puithiam awmna te, Levia chite awmna te leh khawpui awmna khawchhak leh khawthlanga ram la awm chu lal ta tûr a ni. Khawthlang lamah Tuipui, khawchhak lamah khawchhak ramripui thlengin a ta a ni a, hmâr lamah Judai ram a ri a, chhim lamah Benjamin ramri a thleng a ni. He ram ruat bîk chhim lam hi, Tuipui aṭanga khawchhak ramri thlengin hnam la awmten indawtin an insem ang. Ben jamin hnamin hmun serh chhim lam an chang ang a. Chumi chhim chu Simeon thlahten an chang ang a, Isakar-in a dawt ang a, Zebulun-in a dawt leh ang a, chhim berah Gad-ho an awm ang. Gada thlahte chan chhim lam ri hi ram pum chhim lam ripui a ni nghâl a, Tamar aṭanga chhimthlang hawiin Kades tui hmun thlengin a kal a, chuta ṭangin hmârthlang zâwngin Aigupta ramri a zui zêl a, Mediteranean Tuipui a thleng a ni. Israel hnam zînga an ram ro tûr sem dân tûr chu khitiang khi a ni, Lalpa P athian thuchhuak chuan a ti. Kulh bang pum pui sei lam chu tawng sîngkhat leh sângriat a ni. Tûn aṭang chuan he khawpui hmingah, ‘ Lalpa awmna’ tih a ni tawh ang. Judai rama Jehoiakima a lal kum thumnaah Babulon lal Nebukadnezara chu Jerusalemah a lo kal a, a hual a. Lalpa thuin Juda lal Jehoiakima chu a man a, Pathian ina bungbêl ṭhenkhat pawh a la a, an pathian in awmna Sinar ramah a kalpui a; a bungbêl lâkte chu an pathian ina thil dahkhâwmnaah chuan a dah a. Lal chuan hotu lian Aspenaza, mi tilreh chu, Israel lal thlah leh milian fa, tlangvâl pian fel, hmêlṭha leh engkima mi vengva, thil zir thei mi, hriatna ngah, lal ina chetla tlâk thlang chhuaka, Kaldai ṭawng leh lehkha zirtîr tûrin thu a pe a. Lal chuan, lal chawhmeh tui leh a in ṭhin ang uain, ni tin a pêktîr bawk a. Kum thum an zir hnuah lal hnênah an inlan tûr a ni. Chûng mi thlante chu Juda thlah zînga mi Daniela te, Hanania te, Misaela te, Azaria te an ni. Hotu lian, mi tilreh chuan an hming a sa thar a, Daniela chu Beltesazara a vuah a, Hanania chu Sadraka, Misaela chu Mesaka, Azaria chu Abednegoa. Daniela chuan chawhmeh tui leh uain lalin a in ṭhin chuan intihbawlhhlawh loh a tum tlat a, hotu lian, mi tilreh chu a intihbawlhhlawh loh nân ṭanpuiah a sâwm a. Hotu lian, mi tilreh chu, Lalpan Daniela duhsakin a khawngaihtîr a. Daniela hnênah, “Lal thuin ei leh in tûr kan pe che u a, ka pu lalber chuan in rualpui tlangvâl dangte aia in sa a chhiat hlauh chuan min that mai ang tih ka hlau a ni,” a ti a. Hotu lian, mi tilreh chuan Daniela te, Hanania te, Misaela te, Azaria te enkawltu tûr a ruat a; chu mi hnênah chuan Danielan, “Ni sâwm chhûng chu thlai hnephnawl leh tuisik chauh min pe la, lal chawhmeh eiho tlangvâlte nên kan hmêl en chhin la, ṭha i tih angin i chhiahhlawhte chungah thil i ti dâwn nia,” a ti a. Chu thil chungchânga an thu sawi chu a ngaithla a, ni sâwm chhûng chu a en chhin ta a. Ni sâwm a ral hnu chuan lal chawhmeh eiho tlangvâlte ai chuan an hmêl a mawi a, an sa pawh a ṭha a. Tichuan, anmahni enkawltupa chuan chawhmeh tui leh uain an in tûr chu pe lovin thlai hnephnawl chauh a pe ta a. Hêng tlangvâl palite hi Pathianin thil zir theihna a pe a, lehkha an thiam theiin an fing sâwt êm êm a; Daniela phei chu inlârnate leh mumangte hrilh fiah theihna a pe a. Lal hun tiam kum thum chu a ral a, hotu lian, mi tilreh chuan Nebukadnezara hnênah anni chu a hruai a. Lal chuan an za-in a lo be vêl a, Daniela te, Hanania te, Misaela te, Azaria te tluk tu mah an awm lo; chuvângin, lal upate zîngah an tel ve ta a. Thufing leh thil hriat âwm rêng rêng lalin a zawh apiang a ram chhûnga arsi chhui mi te, aienthiam te, aikaih thiam te hriat lêt sâwm an hria. Daniela chu lal Kuran Babulon a rawn rûn thleng khân lal bulah a khawsa a ni. A lal kum hnih kumin Nebukadnezara chuan mumang a nei a, a rilru a tibuai hle a, mut pawh a mu thei lo. A mumang chu sawi tûrin lal chuan arsi chhui mi te, bo hre thei te, aienthiam te leh Kaldai mi thiam te a ko va. An lo kal a, lal hmaah chuan an ding a. Lal chuan an hnênah, “Mumang ka nei a, min timangang hle a ni; engtihna nge tih hriat ka duh a ni,” a ti a. Kaldai-ho chuan Aramaik ṭawngin an chhâng a, “Lal chu dam reng rawh se, i mumang chu i chhiahhlawhte hi han hrilh la, kan hrilh fiah mai ang,” an ti a. Lal chuan, “Ka mumang hi a awmzia min hrilh ngei tûr a ni. Min hrilh theih loh chuan in kut leh ke ka pawhthlâksak ang che u a, in inte ka tiram vek ang. Ka mumang leh a awmzia min hrilh theih erawh chuan lâwmman tam tak ka pe ang che u a, ka chawimawi bawk ang che u. Ka mumang leh a awmzia mi han hrilh teh u le,” a ti a. “Lalpa chuan a mumang chu a chhiahhlawhte hi hrilh mai sela, keinin kan hrilh fiah ang,” tiin an chhâng leh a. Chutah lal chu a ṭêk ta a, “Ka thu ka hlen dâwn tih in hriat avângin tihkhawtlai dân in zawng tih ka hre chiang a ni. In hrilh fiah theih loh chuan thuhmun ṭheuhvin ka hrem ngei dâwn che u a ni. Nakin deuhvah thil a danglam mai ang tih beiseiin dâwt min hrilha, thil tihkhawtlai in tum a nih hi. Ka mumang chu min han hrilh mai ula; tichuan, in hrilh fiah theih leh theih loh pawh ka hre mai ang,” a ti a. Kaldai mi thiamte chuan lal chu an chhâng a, “Khawvêlah hian i hriat duh chu tu mah sawi thei an awm lo vang. Lal ropui ber te leh thiltithei ber te, tu mahin an arsi chhui mi te, bo hre thei te leh aien thiam te hnênah hetiang thil hi an zâwt ngai lo. Lalin i hriat duh hi a khirh êm a, pathiante chauh lo chuan tu man an hre lo vang, pathiante lah kan zîngah an awm si lo,” an ti a. Chuvâng chuan lal chu a thinur ta êm êm a, Babulon mi thiam rualte chu tihhlum tûrin thu a pe ta a. Mi thiamte thah thu pêk a nih tâk avângin Daniela leh a ṭhiante pawh chu thah tûr an ni ve ta a. Mi thiam rual that tûra tirh, lal vêngtute hotupa Arioka chu Daniela chuan fîmkhur tak leh hawihhâwm takin a bia a, “Engtizia nge heti taka khauhva lalin thu a pêk le?” a ti a. Arioka chuan thil awm dân chu Daniela a hrilh a. Daniela chu lal hnênah a kal a, mumang chu a hrilh fiah theih nân hun a dîl belh a. Tichuan, Daniela chu a hâwng a, a ṭhian Hanania te, Misaela te, Azaria te chu thil awm dân a hrilh a. Babulon mi thiam dangte ruala thah an nih loh nân vân Pathian khawngaihna ngêna, chu thu khirh chu hrilh fiah theihna dîl tûrin a hrilh a. Chumi zân la la chuan a mumangah chu thu khirh chu a hnêna hrilh fiah a ni ta a. Daniela chuan vân Pathian chu lâwmthu a hrilh a: “Pathian chu a fing a, thil a ti thei a, Amah chu fak kumkhua tûr a ni. Hun te, khua te, a thuin an awm a, Lal te a bân a, a siam bawk a, Finna leh hriatna petu a ni. Thu khirh leh thûk tak takte chu a puang a, Thim zînga thil thuhrûkte pawh a hmu a, Êngin a vêl a hual a ni. Min thlahtute Pathian, Ka fakin ka chawimawi a che, Finna leh chakna min pe a, Ka ṭawngṭai i lo ngaithla a, Lal hnêna sawi tûr min hrilh tâk hi,” a ti a. Lalin mi thiam rual that tûra a tirh Arioka hnênah Daniela chu a kal a, a hnênah, “Mi thiam rual hi that mai teh suh, lal hnênah min hruai la, a mumang chu ka hrilh fiahsak ang e,” a ti a. Arioka chuan Daniela chu lal hnênah chuan a hruai ta nghâl a, lal hnênah chuan, “Judai ram aṭanga sal zîngah lal mumang hrilh fiah thei tûr mi ka hmu ta,” a ti a. Lal chuan Daniela hnênah (a hming dang chu Beltesazara a ni), “Ka mumang leh a awmzia mi hrilh thei ang maw?” a ti a. Daniela chuan lal hnênah, “Bo hre thei emaw, aien thiam emaw, arsi chhui mi emaw, mi fing, chu thu khirh hrilh fiah thei tûr tu mah an awm lo vang. Amaherawhchu, vânah Pathian a awm a, ani chuan mite hnênah thu rilte a puang ṭhîn; lal Nebukadnezara hnênah pawh nakin lawka thil lo thleng tûr a rawn puang a nih hi. I mumanga i thil hmuh chu ka han hrilh ang che. “Khuma i mut laiin lal chuan thil lo thleng tûrte i ngaihtuah a. Thu ril tifiah tûrin Pathian chuan thil lo thleng tûr chu a entîr che a ni. Ka fin bîk vâng ni lovin lal hian i mumang awmzia i hriata, i rilrua thu lo lût chu i hriatthiam theih nân he thu ril awmzia hi ka hnênah tihlan a ni. Ani, ka pu, i mangah chuan milim lian pui mai, tle vur hi i lo hmu a, en ngam loh khawpa hlauhawm a ni. A lu chu rangkachak ṭha ber chia siam a ni, a âwm leh a bân chu tangkarua, a dul leh a kâwngbâwr chu dâr; a ke chu thîr, a ke bâwr chu thîr leh hlum inchawhpawlha siam a ni. I en reng a, chutih lai chuan khâm aṭangin tu ma tihbal ni lo lung lian tak a lo lum a, thîr leh hluma siam milim kephah chu a rawn delh a, a sawm ta vek a. Thîr te, hlum te, dâr te, tangkarua te leh rangkachak te pawh chu a keh sawm a, nipui laia hruiha buhsi ang mai an lo ni ta a; thliin a lên bo va, a hnuhma pakhat mah hmuh tûr a awm ta lo va. Lung erawh kha chu a lian tual tual a, tlâng tiat ngawt a ni a, leiah a khat ta mup a. “Chutiang chu a ni lal mumang chu, ka han hrilh fiah ang e: Lal azawngah lal ropui ber i ni a. Vân Pathian chuan ram te, thiltihtheihna te, chakna te leh ropuina te a pe che a. Leia mihring chêngte chungah rorêltuah a siam che a, sava leh rannung chungah pawh thu a neihtîr che hi. Rangkachaka siam lu ang chu i ni. I hnuah i ram aia nêp lalram dang a lo ding ang a, dâr ang lek lalram dang pawh a lo la ding leh zêl ang, chu chuan khawvêl ro a rêl ang. Nangmah anga chak lal dang, a palina tûr, thil tichhiaa tidarh thei, thîr ang an lo lal leh ang. Thîrin thil dang a tichhia ang hian lei lalram lo awm hmasate chu a rawn tichhiain a rawn tidarh vek ang. Milim ke leh kezungpui chu, thîr leh hlum inchawhpawlh a nih i hmu a; chu chuan, chu ram chu lungrual lo a nih tûr a entîr a; thîr leh hlum a ni a, thîr anga chakna lai a nei ang. A kezungpui chu thîr leh hlum inchawhpawlh bawk a ni a, ram chu a ṭhen lai a chak ang a, a ṭhen lai erawh chu a chak lo hle ang. Thîr leh hlum inchawhpawlh i hmu a, chutiangin chu ram rorêltute chuan chhûngkaw inzawm khâwm tumin an inneih pawlh ang a, mahse thîr leh hlum a inchawhpawlh thei lo ang bawk hian an inzawm khâwm tak tak thei lo vang. Chûng rorêltute hun lai chuan Vân Pathian chuan, ram hlun tûr, ramthar, a rawn din ang a, chu chu tu man an hneh thei lo vang; lal ram dangte chu a tichhe vek ang a, ani erawh chu a awm reng ang. Tu ma tihbal ni lo, khâm aṭanga lung lo tla kha i hmu bawk a; hlum te, thîr te, dâr te, tangkarua te leh rangkachak tea siam milim chu a delh tâk kha i hmu bawk a. Pathian ropui tak chuan lal hnênah thil lo thleng tûr a hrilh che a ni. I mumang chu ka hrilh ta che a, a awmzia pawh ka hrilh tâk che hi,” a ti a. Lal Nebukadnezara chu a bawkkhup a, Daniela chu chibai a bûk a, rimtui leh thilpêk Daniela hnêna hlan tûr thu a pe a. Lal chuan Daniela hnênah, “He thu ril hi i sawi fiah theih avângin i Pathian chu Pathian ropui ber a lo nih hi; lalte Lal a ni a, thu ril puangtu i nih ka hre ta,” a ti a. Daniela chu a siam lian a, thilpêk ṭha tak tak a pe a, Babulon bial a enkawltîr a, Babulon mi thiam rual hotu-ah a siam ta a. Daniela dîl angin Sadraka te, Mesaka te, Abednegoa te chu Babulon ram ṭhen hmun dangah hotu-ah a dah a, Daniela erawh chu lal bulah a awm ve ta zêl a. Lal Nebukadnezaran rangkachak milim a siam a, a sân lam chu tawng sawmruk a ni a, a vâng lam chu tawng ruk a ni. Babulon biala Dura phaizâwlah milim chu a din a. A hnuaia lal tenau te, ramawptute leh biala sawrkâr hna thawk zawng zawng chu lal Nebukadnezara din milim serh ni chhim tûrin a chah khâwm a. Milim serh hran ni chuan chûng lal tênau te, ramawptu te, thuneitu te, bial hotu te, tangka vawngtu te, rorêltu te, thuremtu te leh sawrkâr hna thawk zawng zawng te chu an lo kal khâwm a, milim hmaah chuan an ding ṭhup a. Tlângauvin ring takin heti hian thu a rawn puang a, “Hnam tin, chi tin, ṭawng tin hmangte u, tawtawrâwt an hâm ri in hria ang a, ṭingṭang te, perhkhuang te, bengbung te, phênglâwng te, rawchhêm te leh thil tum rîk theih chi dang te an rawn tum ang a; chûng thil chu an rawn tum veleh lal Nebukadnezara rangkachak milim hmaah in bawkkhup ang a, chibai in bûk tûr a ni. Tu pawh, bawkkhupa chibai bûk duh lo chu meipuia paih tûr an ni,” tiin. Tichuan, thil tum ri an hriat veleh hnam tin, chi tin leh ṭawng tin hmangte chu lal Nebukadnezara rangkachak milim hmaah chuan an kûn a, chibai an bûk ta a. Babulon mi ṭhenkhatten chu chu Juda-te hêkna remchângah an hmang a, lal Nebukadnezara hnênah, “Aw lalber, dam reng ang che. ‘Tawtawrâwt te, ṭingṭang te, perhkhuang te, phênglâwng te, rawchhem te leh thil tum rîk theih chi dangte an tum rîk in hriat veleh rangkachak milim hmaah in bawkkhup ang a, chibai in bûk tûr a ni, a bûk duh lo tawh phawt chu meipuia paih tûr,’ tiin thu i pe a. Juda mi, Babulon bial ṭhenkhat hotua i dah Sadraka te, Mesaka te, Abednegoa te hian i thu rêng an ngai lo va, i pathiante chibai an bûk duh lo, i rangkachak milim hmaah pawh an kûn duh ve hauh lo,” an ti a. Lal Nebukadnezara chu a thinur ta êm êm a, Sadraka te, Mesaka te, Abednegoa te chu a hmaa rawn hruai tûrin thu a pe a, anni chu lal hmaah chuan an rawn hruai a. Nebukadnezara chuan, “Sadrak, Mesak, Abednego, ka pathian chibai in bûk duh lo va, ka milim din hmaah in kûn duh hek lo tih hi a dik em? Tawtawrâwt te, ṭingṭang te, perhkhuang te, bengbung te, phênglâwng te, rawchhem te leh thil tum rîk theih chi dang an tum ri in hriatin ka milim siam hmaa bawkkhupa chibai in bûk duh chuan a ṭha a ni mai a, in bûk duh loh erawh chuan meipuia paih nghâl in ni ang. Pathian tuin nge ka kut ata chhan chhuak thei ang che u?” a ti a. Sadraka te, Mesaka te, Abednegoa te chuan lal chu an chhâng a, “Aw lal Nebukadnezar, he thilah hian kan chhân che a ṭûl lo ve. Ṭûl a nih chuan kan Pathian biak hian meipui ata min chhan chhuak thei asin, i kut ata pawh min chhan chhuak thei ang. Min chhan loh pawhin, aw lalber, i pathiante chu chibai kan bûk chuang lo vang, rangkachak milim i din hmaah pawh kan kûn hek lo vang,” an ti a. Lal Nebukadnezara chu a thinur ta êm êm a, Sadraka te, Mesaka te, Abednegoa te avâng chuan a hmai a sen ṭeuh mai a. Meipui chu a ngai aia lêt sariha saa tuah tûrin thu a pe a. A sipai zînga chak chak chu Sadraka te, Mesaka te, Abednegoa te phuara meipuia paih lût tûrin thu a pe a. An kawr te, diar te leh an silhfên dangte inbel vek chung chuan an phuar hlâwm a, meipuiah chuan an paih lût ta a. Lal thupêk chu a khauh êm avâng leh meipui chu a sat êm avângin, Sadraka te, Mesaka te, Abednegoa te meipuia paihtute chu meialh chuan a hliau hlum ta a. Anni pathum Sadraka, Mesaka, Abednegoa te chu phuar hlâwm reng chungin meipuiah chuan an tla lût ta a. Lal Nebukadnezara chu mak ti zetin a tho thut a, thurâwntute hnênah chuan, “Phuar chungin mi pathum meipuiah kan paih lût a ni lâwm ni?” a ti a. Anni chuan, “Paih lût e, aw lalpa,” an ti a. “Mi pali phuar loh, meialh zînga vei vei ka va hmu si ve, na rêng an ti lo va, a palina phei chu Vântirhkoh hmêl pu a ni,” a ti a. Lal Nebukadnezara chu meipui kawngkhâr bulah chuan a kal a, “Sadrak, Mesak, Abednego, lo chhuak ula hetah hian lo kal teh u,” a ti a. Sadraka te, Mesaka te, Abednegoa te chu meipui aṭang chuan an lo chhuak a. Lal tênau te, ramawptu te, ram rorêltu te leh lal thurâwntu te chu an lo kal khâwm a, hêng mite taksa hi chu meiin a khawih lo va, an sam a kâng lo va, an silhfênte pawh a ût lo va, mei rim lah an nam hek lo tih an rawn hmu a. Nebukadnezara chuan, “Sadraka te, Mesaka te, Abednegoa te Pathian chu fakin awm rawh se. Ani chuan vântirhkoh a rawn tîr a, amah ringa a rawngbâwltute chu a rawn chhan chhuak ta a; lal thupêk awih duh lovin an taksa boral huamin an Pathian chauh lo chu Pathian dang an be duh lo a ni. Chuvângin, hetiang hian thu ka pe e: Sadraka te, Mesaka te, Abednegoa te Pathian sawichhetu hnam emaw, chi emaw, ṭawng chi hrang hmang emaw rêng rêng chu an kut leh an ke pawhsawmsak an ni ang a, an inte pawh tihram a ni bawk ang. Hetianga mi chhan chhuak thei Pathian dang tu mah an awm lo,” a ti a. Lal chuan Sadraka te, Mesaka te, Abednegoa te chu Babulon ram bial hotu zîngah a kaisântîr ta a. Hnam tin, chi tin, ṭawng tin hmang, khawvêla awmte hnênah lal Nebukadnezaran hetiang hian thu a thawn a: “Remna in hnênah awm rawh se. Pathian Chungnungberan chhinchhiahna leh thil mak mi entîr hi lo hre ve teh u: A chhinchhiahnate chu a va ropui êm! A thil tih makte chu a va nasa êm! A ram chu chatuan ram a ni a, Kumkhuain ro a rêl ang. “Kei, Nebukadnezara hi, ka in ropui takah thlamuang takin ka awm a, engkimah ka hmuingîl a. Mumang hlauhawm tak ka nei a, mumanga ka thil hmuhte chuan ka rilru a timangang hle a. Ka mumang chu hrilh fiah tûrin Babulon mi thiamte ka hruai khâwmtîr a, bo hre thei te, aien thiam te, Kaldai mi thiam te leh arsi chhui mi te chu an lo kal a, ka mumang chu ka hrilh a; mahse, an hrilh fiah thei lo. A tâwpah Daniela, a hming dang chu Beltesazara, ka Pathian hming chawia sak chu a lo kal a, amahah chuan Pathian thianghlim thlarau a chêng a; tichuan, ka mang chu ka hrilh ve ta a. A hnênah chuan, ‘Nang Beltesazar, mi thiam rual hotu, Pathian thianghlim thlarau chu i hnênah a chêng tih ka hria; chuvângin, thu rilte pawh i hre vek a, ka mang chu hei hi a ni, hrilh fiah rawh le: ‘Khum laizâwla mua ka thil hmuh chu, khawvêl laili lai takah thing sâng deuh mai hi a lo awm a. Thing chu a ṭhang lian zêl a, a zîk chuan vân a tawng ta a; lei ram hmun tin aṭangin a lang thei a ni. A hnahte chu a mawi hle a, a rah tep tup a, tu tân pawh kham khawpa ei tham a rah a. Ramsate chuan a hlim an bêl a, chunglêng savate chu a zârah an chêng a, thil nung tinrêngin a rah chu an tlân a. ‘Mua ka thil hmuh chu ka ngaihtuah laiin vân aṭangin vântirhkoh, inring reng a lo chhuk a, hetiang hian ring takin a au va; ‘Thing kha kit ula, a ṭangte hlawi rawh u, a hnahte vaw ṭîl ula, a rahte paih vek rawh u, a hlim ata ramsate chu tlân darh sela, a zâr ata savate pawh thlâwk bo rawh se. A bul bâwr chu a awm ngaiin awm sela, thîr leh dâr khaidiatin thlung ula, hnimin bawh rawh se. Vân daiin tlâk huh sela, ramsate nên hnim zîngah awm za rawh se. A mihring rilru chu ramsa rilruah chang sela, a chungah kum sarih ral bawk rawh se. Hei hi Vântirhkoh inring rengho thurêl a ni; mihring ramte hi Chungnungbera thuhnuaia awm a ni a, mi nêp ber pawh a duh chuan a pe thei tih tu pawhin an hre dâwn nia,’ a ti a. “Kei lal Nebukadnezara hian chu chu ka manga ka thil hmuh chu a ni; Beltesazar, nangin han hrilh fiah teh, ka ram mi thiamten an hrilh fiah thiam lo va, nang erawh chuan Pathian thianghlim thlarau i hnênah a chêng a, i hrilh fiah thei ngei ang,” ka ti a. Daniela, Beltesazara an tih bawk chuan, a hlau êm êm a, eng emaw chen chu eng mah a sawi thei lo va. Lal chuan, “Beltesazar, mumang leh a awmzia avângin thlaphâng suh,” a ti a. Beltesazara chuan, “Ka pu, he mumang hi nangmah hawtu tân ni sela, a kawh pawh i hmêlma tân ni teh se. I thing hmuh, sâng zeta ṭhang, vân tawng ta, khawvêl hmun tin aṭanga hmuh theih, a hnah mawi tak, rah tep tup, mi tin ei tham, a hlim ramsaten an belh, a zâra savate chênna thing chu, aw lalber, nangmah hi i ni. I ṭhang lian a, i chak êm êm a, i ropuina chuan vân a tawng a, i ram chuan kâwlkil a thleng a. Vân aṭanga vântirhkoh inring reng, lo chhuk i hmu a, ‘Thing kha kit ula, tiboral rawh u, a bul bâwr erawh chu a awmna ngaiah awm sela, thîr leh dâr khaidiatin thlung ula, hnimin bawh rawh se; vân daiin tlâk huh sela, kum sarih a ral hma chu ramsate nên awm za rawh se,’ a rawn ti a. Aw lalber, hei hi a hrilhfiahna chu a ni: ka pu tâna Chungnungbera thupêk chu hei hi a ni. Mihring zîng ata hnawh chhuah i ni ang a, ramsate nên in awm za ang. Bâwngpa angin hnim i pet ang a, vân daiin a tlâk huh ang che. Kum sarih ral hunah, Chungnungbera chuan mihring ram chungah thu a nei a, a duh duh a pe mai ṭhîn tih i hria ang. Thing bul bâwr a awm ngaia a awm tûr a ni tih ang khân Chungnungberan thu a nei tih i hriat hunah i la lal leh ang. “Tichuan, aw lalber, ka thurâwn che hi pawm hrâm teh; i sual sim la, thil dik ti rawh. I bawhchhiatnate pawh sim la, tihduhdahte khawngaih la; tichuan, thlamuang taka i awm chhûng hi pawh sei a ni mahna,” a ti a. Chûng thil chu Nebukadnezara chungah a thleng ta thuai a. Kum khat a vei hnu chuan Babulon lal in chung zâwla a lên laiin heti hian a ti a: “Babulon khua hi a ropui teh e! Lal chên nân ka thiltihtheihzia leh ka ropuizia tilang tûrin ka sak a nih hi,” tiin. Lalin chutia thu a la sawi lai mêk chuan vân aṭangin aw a lo chhuak a, “Lal Nebukadnezar, ka sawi hi ngaithla rawh; i ram chu i chân ta, nang pawh mihring zîng ata hnawh chhuah i ni ang a, ramsa zîngah i awm ang; bâwng angin hnim i pet ang a, Chungnungbera chuan mihringte ramah thu a nei a, a duh duh a pe mai ṭhîn tih i la hria ang,” a ti a. Chûng thil chu Nebukadnezara chungah a thleng nghâl ta mai a. Khua ata an hnawt chhuak a, bâwng angin hnim a pet a, vân daiin amah chu a tihuh a, a samte chu mupui thla chen chenin a ṭhang sei a, a tinte pawh sava tin ang mai a ni ta a. “Chûng ni a tâwp hnu chuan kei, Nebukadnezara hian vân lam ka thlîr a, ka rilru ngai ka pu leh ta a. Chungnungbera, kumkhuaa awma chu ka fak a, ka chawimawi ta chiam a, ‘Kumkhuaa lal tûr a ni e, A ram chu a awm hlen dâwn a ni. Khawvêla chêngte chu eng tham mah an ni lo va, Vâna thil awmte pawh a thu thuin a dah a, Leia awm tu mahin an dang thei lo; Engtiziaa ti nge i nih? ti thei an awm hek lo.’ “Rilru pângngai ka put leh rual chuan ka ram ropuina pawh a lo vul leh a, kei pawh ka ropuiin ka lal leh ta hle a. Thu min râwntute leh ram hotute chuan mi rawn bêl a, ka ram chu a ding nghet leh ta a, a ropui zâwk mah a ni. Kei Nebukadnezara hian Vân Lalber chu ka fak a, ka chawimawi a, ka zah ta êm êm a ni; a thil tih apiang a dik a, a awm dânte pawh a âwm thlap a ni; chapote pawh a titlâwm ṭhîn.” Lal Belsazaran a milian sâng tân ruai ropui tak a ṭheh a, an hmaah chuan zu a in a, Belsazaran zu a han tem chuan a pa Nebukadnezaran Jerusalem Tempul aṭanga a lâk rangkachak leh tangkaraw note kha lâk chhuah thu a pe a, lal leh a miliante, a nupui leh a hmeite zu in nân a ti a ni. Jerusalem khuaa Pathian in, Tempul aṭanga an lâk note chu an la chhuak a, lal leh a miliante, a nupui leh a hmeite chuan zu in nân an hmang ta a. Zû chu an in a, rangkachak te, tangkarua te, dâr te, thîr te, thing te leh lung tea siam pathiante chu an fak ta chûl a. Chutih lai tak chuan khâwnvâr dahna ep lal in bang zût mâm, a êng lai takah chuan mihring kut a lo lang a, thu a rawn ziak ta a; lal chuan kut che vêl chu a en reng a. Lal chu a dâng sâwp sâwp a, a hlauh êm avângin a tha a zâwi a, a khûpte chu a sai hlawk hlawk a. “Aien thiam te, Kaldai mi thiam te, arsi chhui mi te han ko vat teh u,” tiin lal chu a au ta chûl a. Lal chuan Babulon mi fingte hnênah chuan, “Tu pawh, he thu ziak hi chhiara, a awmzia sawi thei chu puan senduk ka sintîr ang a, rangkachak khaidiat ka awrhtîr bawk ang a, ka rama lal ber pathumnaah ka siam bawk ang,” a ti a. Lal mi fingte chu an lo kal a, thu ziak chu an chhiar thiam lo va, lal hriat atân an hrilh fiah thei hek lo. Lal Belsazara chu a mangang hle a, a dâng sâwp sâwp a, a miliante lah chuan tihngaihna an hre bawk si lo. Lalnu chuan lal leh a miliante thâwm chu a hriatin rang takin ruai ṭhehna pindanah chuan a lo tlân lût a, “Lalber chu dam reng rawh se. I rilru mangang suh sela, i hmêl pawh danglam hek suh se. I ram chhûngah mi pakhat, Pathian thianghlim thlarau chênna a awm alâwm. I pa hun lai pawh khân hriatthiamna leh finna fiah tak, pathiante neih ang hi, a nei asin. I pa Nebukadnezara khân bo hrethei te, aien thiam te, Kaldai mi thiam te leh arsi chhui mi te hotu-ah a dah a ni. Mumang hrilh fiah te, thu khirh hriat theih te, thu ril sawi fiah te a thiam bîk a, mi fing tak a ni. A hming chu Daniela a ni, lalin a hmingah Beltesazara a sa a; ko la, hêng hi a rawn hrilh fiah mai ang,” a ti a. Lal hmaah Daniela chu an rawn hruai a. Lal chuan, “Juda mi, sal, ka pain Judai ram aṭanga a rawn hruai Daniela kha i ni em? Pathian thianghlim thlarau i hnênah a chêng a, finvârna te, hriatthiamna te leh finna te i ngah hle tih ka lo hria asin. “Mi fing te, aien thiam te he thu ziak hi chhiar a, a awmzia min hrilh tûrin an rawn hruai a; mahse, tu man an hrilh fiah thei lo. Nangin he thu ziak hi i chhiar theiha, a awmzia i sawi theih bawk chuan puan senduk ka sintîr ang che a, rangkachak khaidiat ka awrhtîr bawk ang che. He ram chhûngah lal ber pathumnaah ka siam bawk ang che,” a ti a. Daniela chuan a chhâng a, “I thil min pêk tumte chu nangman nei la, a nih loh leh mi dang pe zâwk ang che. He thu ziak hi ka chhiar tho vang a, a awmzia pawh ka hrilh ang che. Aw lalber, i pa Nebukadnezara chu Pathian Chungnungbera chuan a laltîr a, a tilianin a tiropui nasa êm êm a: a len êm avâng chuan mi tu pawh, hnam tin, chi tin leh ṭawng tin hmanghote chuan amah an hlau va, a hmaah an khûr ṭhîn; a duh a that a, a duh a zuah a, a duh a chawisâng a, a duh leh a tihniam a. A lo inngaihlu ta hle a, a rilru chu a sakin chapo takin thil a ti ṭhîn a. Chuvângin, paih a ni a, a ropuina chhuhsak a ni ta a. Mihring zîng ata hnawh chhuah a ni a, a rilru chu ramsa rilru ang chauh a ni ta a; ram sabengtungte nên an tla za a, bâwng angin hnim a pet a; mihringte ram hi Chungnungbera thu thuin a awm a, a duh apiang a laltîr mai a ni tih a hriat fiah hma chu vân daiin a taksa chu a tlâk huh ṭhîn. Nang, a fapa, Belsazar, chu thil chu i hre reng nâ a, i inngaitlâwm lo va, Vân Lalpa kalhin i inchawisâng a, a ina note chu i lâktîr a, nang leh i miliante, i nupuite leh i hmeite chuan zu in nân an hmang a. Rangkachak te, tangkarua te, dâr te, thîr te, thing te leh lung tea siam milim, eng mah hmu thei lo, ngaithla thei lo leh hre thei lote in chawimawi ta zâwk a. A kuta kawltu che, i khawsak dân tinrêng entu Pathian chu i zah lo vei a. “Hei vâng hian he kut hi he thu ziak tûrin a rawn tîr a ni. A thu ziak chu hei hi a ni: MENE, MENE, TEKEL tih leh PARSIN tih a ni. Mene tih chu i lal hun tûr chin a chhinchhiah a, a titâwp dâwn tihna a ni; Tekel tih chu bûk i ni a, i tling lo tihna a ni. Parsin tih chu i ram hi sem darh a ni a, Media leh Persia hnêna pêk a ni tihna a ni,” a ti a. Lal thupêk angin Daniela chu puan senduk an sintîr a, rangkachak khaidiat ṭhi an awrhtîr bawk a, rama lal ber pathumnaah dah a nih tâk thu an puang a. Chumi zân ngei chuan Kaldai lal Belsazara chu an that a, Media mi Daria chuan ram chu a chang ta a, kum sawmruk leh pahniha upa a ni. Daria chuan ram pum pui rorêl tûrin ramawptu za leh sawmhnih dah darh ṭha a ti a. Chûngte hna enzuia lal tâna ṭha tûr thlîr zui tûrin Daniela leh mi dang pahnih a ruat bawk a. Ram awptute leh chûng hotute zîngah chuan Daniela chu a fel lawr lak a; chutia a fel bîk êm avâng chuan lal chuan ram pum hotua dah a rilrûk a. Ramawptute leh hotu dangte chuan ram enkawl thu-ah, Daniela thil tihsual an châng ta rân a; mahse, hêkna tûr eng mah an hmu thei lo; Daniela chuan engkim dik tak leh rinawm takin a ti dim diam ṭhîn a, thil sual emaw, thil dik lo emaw a ti ngai si lo va. Chûng mite chuan, “A Pathian biak chungchâng thu-ah chauh lo chuan Daniela hi hêk chhiatna tûr kan hmu zo dâwn lo,” an ti a. Tichuan, lal hnênah an kal a, “Lal Daria, dam reng ang che. I ram enkawltu, hotute, ramawptute, upahote leh sawrkâr miliante chuan, ‘lal hian thupêk siam sela, chu a thupêk chu khauh taka lekkawh ni rawh se;’ kan ti tlâng a ni. ‘Ni sawmthum chhûng chu, nang, lal hnênah chauh lo chuan tu man, an pathian hnênah emaw, mi dang hnênah emaw eng mah an dîl tûr a ni lo,’ tih thu pe la, ‘a awih lo chu sakeibaknei pûkah paih tûr a ni,’ ti ang che. Tichuan, lalber, he thupêk hi chhuah la, i hming ziak hnan la, lekkawh tûr a ni; Media leh Persia dân, tihdanglam theih loh chu a lo ni dâwn nia,” an ti a. Lal Daria chuan thupêkah chuan hming a ziak ta a. Lal chuan thupêkah hming a ziak ta tih Danielan a hriat veleh a hâwng a. A in chhâwngah chuan Jerusalem lam hawia tukverh inhawng a awm hlawm a. Ni tin, ṭhingṭhiin, tukverh inhawng hawi chuan a ṭawngṭai ṭhîn a, chutiang bawk chuan a Pathian hnênah lâwmthu a sawi leh ta tho va. Daniela ertute chuan an enthla a, Pathian hnêna a ṭawngṭai chu an va hmu a. Daniela hêk tûrin an za chuan lal hnênah an kal ta a. “Aw lalber, ‘ni sawmthum chhûng chu tu pawh, lal hnênah tih loh, an Pathian hnênah emaw, mi dang hnênah emaw thil an dîl chuan sakeibaknei pûkah paih tûr a ni’ tiin thu i pêkah hming i ziak lâwm ni kha?” an ti a. Lal chuan a chhâng a, “Ziak e, chu thupêk chu thupêk ding lai alâwm, Media leh Persia dân sût theih loh tûr a nih kha,” a ti a. Lal chu an chhâng a, “Judai rama mi, sal pakhat, Daniela chuan, aw lalber, i thupêk chu a zah lo va, a pawisa hauh lo, ni tin vawi thum a la ṭawngṭai tho mai,” an ti a. Chu thu chu lalin a han hriat chuan pawi a ti hle a, Daniela chu chhan dân tûr a ngaihtuah a. Ni tlâk thlengin a ngaihtuah a. Chûng mite chu lal hnênah an lo kal leh a, “Nang, lalberin Media leh Persia dân ang thlapa thupêk, hming i ziak hnan tawh chu, sût leh theih a ni lo tih i hria e,” an ti a. Tichuan, Daniela chu lal chuan a mantîr a, sakeibaknei dahkhâwmna pûkah chuan a thlâktîr ta a. Daniela hnênah chuan, “Rinawm taka a rawng i bâwl ṭhîn i Pathian chuan chhan che rawh se,” a ti a. Pûk chu lungin an chhîn a, tu man Daniela chu an lâk chhuah theih loh nân lal leh hotute chhinchhiahna nem meuhvin lung chu an châr a. Lal chu a haw a, chumi zân chuan chaw a nghei a, intihhlimna eng mah a ngaithla duh lo va, a muhîl thei hek lo. Vârṭianah lal chu a tho va, hmanhmawh takin sakeibaknei pûkah chuan a va kal a. Daniela an thlâkna pûk chu a va thleng a, ṭah-awin Daniela chu a au va, “Daniel, Pathian nung rawngbâwltu, rinawm taka a rawng i bâwl ṭhin i Pathian chuan sakeibaknei kâ aṭangin a chhan ta che em?” a ti a. Daniela chuan, “Aw lalber, dam reng ang che, eng mah min tih lo tûrin Pathianin vântirhkoh a rawn tîr a, sakeibaknei kâ a rawn tichihsak a ni; eng mah tihsual ka nei lo va, lal chungah thil dik lo eng mah ka ti hek lo tih lan nân a rawn tîr a ni,” tiin a lo chhâng a. Lal chu a lâwm êm êm a. “Daniela chu pûk ata khai chhuah tûr,” a ti a. Daniela chu pûk ata an khai chhuak a, Pathian a rin tlat avângin hliam pakhat mah a tuar lo. Lal chuan Daniela hêktute chu man tûr a ti a, an nupui fanaute nên lam sakeibaknei awmna pûkah chuan an thlâk ta a. Pûk mawng an thlen hma hmain sakeibakneite chuan an lo seh a, an ruhte lamin an seh tliak vek a. Lal Daria chuan khawvêla hnam tin, chi tin, ṭawng tin hmangte hnênah lehkha a ziak a; “Remna in hnênah awm rawh se. Thu ka pe e, ka ram chhûnga mi zawng zawngin Daniela Pathian hi an ṭihin an zah tûr a ni. Pathian nung a ni a, Chatuanin ro a rêl ang. A ram chu a chhe ngai lo vang a, A lalna chu a tâwp ngai lo vang. A chhandam a, a chhan chhuak ta, Leiah leh vânah chhinchhiahna te, Thil mak tak takte a ti a, Sakeibaknei lakah Daniela pawh a chhan chhuak,” tiin. Daria lal lai leh Persia lal Kura lal laite chuan Daniela chu kawng engkimah a hmuingîl hle a. Babulon lal, Belsazara lal kum khat kum khân mang ka nei a, zâna ka mangah hmuh ka nei a, ka ziak chhuak a, hei hi chumi zâna ka thil hmuh ziakna chu a ni: Kil tin aṭangin thli a lo tleh a, tuifinriat chu a chhêm vak a. Tuifinriat aṭang chuan sakawlh lian pui pui pali, inang lo ṭheuh hi an lo chhuak a. Pakhatna chu sakeibaknei ang hi a ni a, mupui angin thla a nei a. Ka en reng lai chuan a thla chu an pawt kawlh a, lei ata an kaitho va, mihring angin ke pahnihin an dintîr a, mihring rilru ang an puttîr a. Sakawlh pahnihna chu savawm ang hi a ni a, a ke hnung lamin a ding a, nâkruh pathum hi a seh a, aw lo chhuak chuan, “Ei rawh, i duhtâwkin sa ei rawh,” a rawn ti a. Ka en reng lai chuan sakawlh dang a lo lang leh a, keite ṭial ang hi a ni nâ a, a hnungzângah chuan sava thla ang hi thla pali a awm a, lu pali a nei bawk a, thuneihna an pe a. Ka en reng lai chuan sakawlh palina pawh chu a lo lang a, hlauhawm tak leh râpthlâk tak, awmkhauh tak a ni. Thîr ha lian pui pui a nei ṭeuh mai a, a seh tawh chu a seh sawm a, a chîl nek ṭhîn. Sakawlh dang ang lovin ki sâwm a nei a. A kite chu ka en reng lai chuan ki tê tak tê pakhat, ki dang zîngah chuan a lo chawr chhuak a, ki pathum lo awm sa chu a tâwn phawng a. Chu ki chuan mihring angin mit a nei a, a uangthuang thei zat zat hle a. Ka en reng lai chuan: Lalṭhutthlêng an lo hûng a, Tah chuan Hmakhawsânga chu a ṭhu a; A silhfên chu vûr anga vâr a ni a, A sam pawh sahmul vâr ang a ni. A lalṭhutthlêng chu meialh a ni a, A ke tawlailîr pawh mei kâng a ni. Chuta ta chu mei a lo alh chhuak a, A rawngbâwl tûr mi sâng tam an awm a, A vêlah a sînga sîng têl an ding a, Rorêl chu an ṭan a, Lehkhabute chu an keu ta a. Ka en reng lai chuan ki tê tak tê kha inchhuang taka a uang ta pâng pâng thâwm chu ka hre zui a. Ka hmuh lai chuan sakawlh palina chu an that a, a ruang chu meiah chuan an vawm lût a, a kâng ral ta. Sakawlh dangte thuneihna pawh an lâksak a; amaherawhchu, hun eng emaw chên an nun zêl an phalsak a ni. Zâna ka thil hmuhah chuan hei hi ka hmu bawk: Vân chhûma inthuam hringfa ang tak A lo kal a, Hmakhawsânga lam a pan a, A hnênah chuan an hruai a. A hnênah chuan lalna te, Ropuina te, ramte an pe a. Tichuan, hnam tin, chi tin, ṭawng tin hmangte chuan Chibai an bûk a, kumkhuain thu a nei ang a, A lalna chu a tâwp ngai lo vang. Kei, Daniela hi zâna ka thil hmuh chuan min tithlaphâng a, ka buai rilru hle a. Chûng thil te chu engtihna nge tih min hrilh fiah tûrin chuta ding zînga pakhat chu ka pan a. Ani chuan, “Hêng sakawlh palite hi leia lalram lo awm tûr palite an ni; mahse, Chungnungbera mi thianghlimte chuan ram chu an nei ang a, kumkhuain an nei dâwn a ni,” a ti a. Sakawlh palina chungchâng hriat chian lehzual ka duh a, sakawlh dang a ang ve lo, thîr hâ leh dâr tin nei kha a hlauhawm êm êm a. A mante chu a seh sawm a, a chîl nek a, a tiboral ṭhîn. A lu-a ki sâwm awm chungchâng te, ki dang pakhat lo chawr, ki dang aia hlauhawm tak, mit nei, kâ pawh nei, chapo taka uang thâwng thâwng ṭhîn ki dang pathum rawn tâwn phawngtu chungchângte chu ka hre châk hle a ni. Ka en reng lai chuan ki chuan mi thianghlimte chu a bei a, a hneh ta mai a. Hmakhawsânga chu a lo kal a, Chungnungbera mi thianghlimte chu thiam a rawn chantîr a, mi thianghlimte lal hun chu a lo thleng ta a ni. Sakawlh palina chungchâng hetiang hian min hrilh: “Leiah lalram palina a lo awm ang, A dangte aia danglam a ni, Lei pum pui a hneh ang a, A tichhia ang a, a chîl nek ang. Ki sâwmte kha chu ram lal tûrte an ni, Lal dang a lo lal ang a, A hmasate ai chuan dang tak a ni ang, Lal pathum chu a hneh ang. Chungnungbera kalhin thu a sawi ang a, Chungnungbera mi thianghlimte chu a ching chau vang a, An dânte leh kût nite tihdanglamsak a tum ang a, Kum thum leh a chanve chu a thuhnuaiah an awm ang. Mahse, rorêlna chu ṭan a ni ang a, A lalna chu lâksak a ni ang a, Tihchhiat hlauh a ni ang. Ram te, lalna te, vân hnuaia a ram ropui takte chu, Chungnungbera mi thianghlimte an pe ang a, Kumkhuain an lal ang a, Leia rorêltu zawng zawngin an rawngbâwlin an thu an awih ang. Chu chanchin chu heti zawng hi a ni.” Kei Daniela hian ka hlau êm a, ka dâng ta sâwp sâwp a, rilruin ka pai ru ta reng a. Belsazara lal kum thum kum chuan kei Daniela hian inlârna, a ṭum hnihna chu ka hmu leh a. Inlârnaah chuan Elam biala awm Susan khawpui chhûngah ka lo awm a. Ulai lui kamah ka lo ding a. Ka han en chuan ki sei tak pahnih nei berâmchal ka hmu a, pakhat chu a sei zâwk a, a ṭo hnuhnûng zâwk a ni bawk. Chu berâm chuan khawthlang lam te, hmâr lam te, chhim lamte a phîn ruai a, sa pakhat mah lo cho ngam an awm lo va, a laka invêng him thei rêng an awm hek lo. A duh ang angin a che a, a inhrosa ta vak vak a. Engtihna nge ni ang tih ka ngaihtuah lai chuan khawthlang lam aṭangin kêlchal, lei pawh rap hman lo khawpa chakin a lo tlân a, a mit inkârah ki pakhat sei zet hi a awm a. Lui kama berâm ding ka hmuh kha a rawn pan a, a theihtâwpa chakin a rawn phîn a. Berâm chu a rawn hnaih a, a si ta vak a, a ki pahnih chu a sîk tliahsak a, eng mah a ti thei ta lo va. Berâm chu leiah a si thlu a, a chîl ta nek a. Berâm chu a lak aṭanga chhan chhuak thei tu mah an awm lo. Kêlchal chu a thâwm a na ta hle a; mahse, a ropui vânglai tak chuan a ki chu a tliak ta a; a aiah ki pali, kâwlkil li kâwk far, sei tak a lo ṭo ta a. ki pali zînga pakhat aṭang chuan ki tê tak tê hi a lo chawr chhuak a, chhim leh khawchhak lamah a ṭhang uak uak a, ram ropui lamah chuan a ṭhang a. Vâna mipuite tluk a tum a, chûng zînga mi leh arsi ṭhenkhat chu leiah a paih a, a chîl nek a. Vân mipuite hotupa tlukin a intiropui a, hâlral thilhlan, eng lai pawha an hlan ṭhin chu a tihtâwpsak a, Hmun Thianghlim pawh chu a tichhe bawk a. An bawhchhiatna avângin mite chuan thilhlan an hlan reng ṭhin chu an bânsan a, thutak chu leiah an paih thal dêr a, ki chuan a duh duhin thil a ti ta a. Vântirhkoh pakhat ṭawng ka hria a, vântirhkoh dangin a hnênah, “Inlârnaa thil hmuh hi eng chen daih tûr nge, thilhlan an hlan ziah ṭhin chu eng chen nge bawhchhiatna râpthlâk tak chuan a lan ang? Eng chen nge Hmun Thianghlim leh ram ropui ber chu duh duha an sawisak ang?” a ti a. Pakhat zâwk chuan a chhâng a, “Zîng leh tlai tina thilhlan an hlan ṭhin chu ṭum sânghnih leh zathum an hlân lo vang. Chumi hnuah Hmun Thianghlim chuan ngai a awh leh ang,” a ti a. Kei, Daniela hian chûng ka thil hmuh awmzia chu hriat ka duh a. Mihring ni âwm tak ka hmaah a lo ding a. Ulai lui kam lehlam aṭang chuan mi pakhat aw ka hria a, “Gabriel, a thil hmuh kha hrilh fiahsak rawh,” a ti a. Ka dinna bulah a lo kal a, ka hlau êm a, ka tlu bawkkhup ta a. “Mihring fapa, i thil hmuh kha khawvêl tâwp hun tûr entîrna a ni tih hre rawh,” mi ti a. Thu a sawi lai chuan eng mah hre lovin leiah ka tlu bawkkhup a; mahse, mi rawn chelh a, mi dintîr a. “Thinurna a lo thlen hun tûr ka hrilh dâwn che a ni, i thil hmuh hi khawvêl tâwp hun tûr thil a ni. Ki pahnih nei berâmchal i hmuh kha Media leh Persia lal entîrna a ni. Kêlchal hmul thum kha Grik lal entîrna a ni, a mit inkâra ki sei tak kha an lal hmasa ber entîrna a ni. Ki tliak ta aiawh tûra ki pali lo chawr khân Grik ram hmun li-a inṭhen tûr a entîr a; amaherawhchu, lal hmasa ber ang khân an chak lo vang. “Chûng ram lalte an tlâwm dâwn hunah, An sual vâwrtâwp thlen dâwnin Râl rêl thiam tak a lo kal ang. Thil a tithei hle dâwn a, Engkim a tichhe rem rum ang. A tih apiangah a hlawhtling ang a, Hnam tam tak a tichhia ang a, Hmun Thianghlim chungah pawh a che ang. A fin a kherek êm êm a, vervêk taka a thiltihte a hlawhtling zêl a, A inngairopui hle ang a, Inring hman lote a bei ang a, a tichhia ang, Hotute hotu meuh pawh a cho vang. “Zîng leh tlai tin thilhlan an hlan ṭhin chungchâng inlârna i hmuh kha a lo thleng ngei ang a; amaherawhchu, i thil hmuh hi i zêp tlat tûr a ni, rei tak hnua lo thleng chauh tûr a ni si a,” a ti a. Kei, Daniela hi ka chau dêr a, ni eng emaw zât chu ka dam lo va. Ka thawh peih hnu chuan lal hna chu ka thawk zui leh ta zêl a; mahse, ka thil hmuh avâng chuan ka bo map a, a ngaihna rêng ka hre lo. Media mi Daria, Ahasuera fapa chu, Babulon ram lal a ni a. A lal kum khatnaah chuan, kei Daniela hian, lehkhabu chu ngun takin ka chhiar a; kum sawmsarih chhûng Jerusalem khua a ram tûr thu Lalpa zâwlnei Jeremian a hrilh lâwk chungchâng kha ka ngaihtuah a. Chaw ngheia saiip puan sin chungin vaivutah ka ṭhu a, Lalpa Pathian hnênah ṭhahnemngai takin ka ṭawngṭai a. Lalpa, ka Pathian hnênah chuan ka ṭawngṭai a; ka mite thil sual tih avângin thupha ka chawi a. “ Lalpa Pathian, i ropui a, kan chawimawi a che. I thuthlungah i rinawm a, nangmah ngainaa i thupêk zâwmtute chu i lainat reng a. Kan sual a, kan ṭha lo va, thil dik lo kan ti a, i thupêk leh i dânte kan hawisan a. Kan lal te, kan hotu te, kan pa te leh hnam pum hnêna i chhiahhlawh i zâwlneiten i hminga thu an sawi chu kan ngaithla duh lo va. Lalpa, nang chuan dik takin thil i ti ṭhîn a, keini zawngin mahni kan intimualpho ta a nih hi; Judai rama la awm te, Jerusalema awm te, an sual vânga ram tin ram tanga i tihdarh Israel-te nên angkhat vek kan ni. Kan lalte, kan hotute leh kan pate chu zahpuiawm takin an khawsa a; Lalpa i chungah thil sual an ti a. Lalpa ka Pathian, nang chuan ngil i nei a, i lakah hel ṭhîn mah ila min ngaidam ṭhîn. Kan Pathian, Lalpa aw chu kan hre duh lo va, a chhiahhlawh, a zâwlneite hmanga kan tân Dân a siam chu kan zâwm duh hek lo. I aw hre duh lovin Israel mi zawng zawngin i Dân an bawhchhia a, an pênsan ta che. Kan sual avângin i chhiahhlawh Mosia Dân bu-a ziak ânchhiate, hming chhâl meuhva thil ṭha lo thlentîr i tiamte kha kan chungah i rawn thlentîr ta a ni. Keini leh kan rorêltute chungah, ‘thil ṭha lo ka ti ang,’ i tih chu i rawn ti ta a, Jerusalem phei chu a tluka nâa i sawisak vân hnuaiah a awm lo. Mosia Dân bu-a ziak thil ṭha lo zawng zawng kan chungah a tla nâ a, kan sualte simin kan Pathian, Lalpa lam kan hawi duh lo va, thu dik pawisain a khawngaihna kan dîl duh hek lo. “Chuvâng alâwm, hremna i lo buatsaih diam tawh chu kan chungah a lo thlen tâk ni. Kan Pathian, Lalpa chuan engkim dik takin a ti ṭhîn a, keini erawh chuan a thu kan awih ngai lo va ni. “Aw Lalpa ka Pathian, i thiltihtheihzia tihlan nân i mite chu Aigupta ram aṭangin i hruai chhuak a, tûn thlengin hming i chher a. Keinin thil sual kan ti a, kan tidik lo a ni e. Aw Lalpa dik taka thil i tih ṭhin avângin khawngaih takin Jerusalem chunga i thinurna leh i thinrimna chu la kiang tawh ta che; i khawpui, i tlâng thianghlim Jerusalem chu, kan sual leh kan pate bawhchhiatna avângin kan vêla awmte chuan kamchhe tleuh nân tak an hmang ta si a. Chuvângin, aw kan Pathian, i chhiahhlawh ṭawngṭaina leh dîlna hi lo ngaithla la, i hming ropui nân i hmun thianghlim chim chhe tawh chungah hian i duhsakna hmêl han tilang teh. Aw Pathian, i beng lo chhi la, ngaithla teh; kan chauh tâkzia leh i hming chawi khawpui chhiat hnehzia hi en teh mah; kan dik vânga chutia ngên che kan ni lo, ngil i neih êm avânga ngên che kan ni. Aw Lalpa, ngaithla teh, Aw Lalpa, min ngaidam rawh; Aw Lalpa, ngaihven la, lo che vat teh. I hming ropui nân, aw ka Pathian, i hming chawi khawpui leh i mite avângin muangchâng lul suh,” a ti a. Ka sual leh ka mi Israel-te sual thupha chawiin ka ṭawngṭai zêl a, ka Pathian, Lalpa hnênah a tlâng thianghlim din thar leh tûrin ka ngên a. Chutia ka ṭawngṭai lai mêk chuan inlârna hmasaa ka hmuh tawh, Gabriela kha, tlai lam thilhlan hun vêlah chak zetin a lo thlâwk a. A lo thlen chuan, “Daniel, i thinlung mit tivâr tûra lo kal ka ni. Pathian hnêna i ṭawngṭai tirh aṭang khân, ani chuan a hmangaih êm êm che a, a chhâng nghâl che a ni; a chhânna chu ka rawn hrilh dâwn che a ni. Chuvângin, a chhânna hi ngaithla ngun la, i thil hmuh chu ka han hrilh fiah ang e. “Sual leh bawhchhiatna ata i mite leh in khawpui thianghlim chhan chhuah nân hapta sawmsarih ruat a ni; sual ngaihdam a ni ang a, kumkhuain dik taka thil tih a ni tawh ang. Inlârna leh hrilhlâwkna chu a lo thleng kim tawh ang a, Hmun Thianghlim chu then fai a ni ang. Hei hi chhinchhiah la, hre chiang rawh: Jerusalem din leh tûra thupêk a nih aṭangin Pathian Hriakthiha a lo lan hma chu hapta sarih a ral ang a, Jerusalem chu din thar leh a ni ang a, kawtthlêrte leh kulh bang nghet takte an siam ang. Chu chu hapta sawmruk leh pahnih a ding ang; mahse, an buai hle ang. Chumi hnu chuan Pathian Hriakthiha chu eng khaw lawilovah an that ang. Tin, lal thunei tak sipaite lo lian chuan Jerusalem leh Hmun Thianghlim chu an rawn tichhia ang. Tâwpna chu tui lian ang a ni ang, Pathianin a buatsaih indona leh chhiatna chu a lo thleng dâwn a ni. Chu lal chuan mite nên hapta khat chhûng tân thu a thlung ang a, hapta chanve a ral hnu chuan inthawina leh thilhlan an hlan ṭhin chu a titâwp ang. Tenawm râpthlâk chu Tempul hmun sâng berah a dah ang; a dahtu chu Pathianin a chhiatna tûr a ruatsak ang a, a chhiat hma chu tah chuan a awm ang.” Persia rama Kura lal a nih kum thumnaah chuan Daniela, Beltesazara an tih bawk hnênah thu a lo thleng a. Thu chu a rinawm a; mahse, hriat fuh har tak a ni; amaherawhchu, inlârnaah hrilh fiahsak a ni. Chutih lai chuan kei Daniela hi, lusûn angin chawlhkâr thum chhûng ka awm a. Chaw tuihnai leh sa pawh ka ei lo va, uain pawh ka in hek lo. Kâr thum chhûng chu sahriak pawh ka thih lo. Thla hmasa ber, ni sawmhnih leh pali ni chuan Tigris luipui kamah chuan ka ding a. Ka han dâk a, ka han en chuan puan zai sîna inthuam mi pakhat ka hmu a, Upaz rangkachaka siam kâwnghrên a hrêng a. A taksa chu berûl lung tle ang a ni a, a hmêl chu kâwlphe ang a ni. A mit chu meichher êng tak ang hi a ni, a bân te leh a ke te chu dâr nawh tlêt ang a ni, a aw chu mipui nasa tak thâwm ang a ni. Kei, Daniela, keimah chauh hian a ni, chu inlârna hmu chu; ka bula awmte chuan eng mah an hmu ve lo; mahse, an hlau êm êm a, an khûr zawih zawih a, an biru bo ta a. Keimah chauhvin ka awm ta a, inlârna ropui tak chu ka han hmuh chuan ka chau ta hnêp a, ka hmêlte pawh tu ma hriat theih loh khawpin a danglam ta a. A aw ka han hriat chuan eng mah hre lovin leiah ka tlu a, ka bawkkhup reng a. Kutin min rawn chelh a, bawkvâk tûr angin min dah a, ka la khûr zawih zawih zêl a. Ka hnênah, “Daniel, Pathian mi ngainat i ni, ka thu hrilh che hi ngun takin ngaithla rawh; ding char la, i hnêna thu sawi tûra tirh ka nih hi,” a ti a. Mi biak hnu chuan ka ding thei ta a, ka la khûr ta fo va. Ka hnênah, “Daniel, hlau suh, thil hriatthiamna i neih theih nân inngaitlâwm taka i awm ṭan ni aṭang tawh khân i ṭawngṭaina chu Pathianin a ngaithla a. I ṭawngṭaina chhâng tûrin ka lo kal a ni. “Persia ram hotupa chuan ni sawmhnih leh pakhat chhûng chu min dodâl a; mahse, vântirhkoh hotu Mikaela chu mi pui tûrin a lo kal a, keimah chauhva Persia ram hotupa bei ka ni si a. Nakina i mite chunga thil lo thleng tûr ka rawn hrilh dâwn che a ni, i inlârna hmuh kha hun rei tak hnua thil lo awm tûr chauh a ni si a,” a ti a. Chutia a ṭawng hnu chuan ṭawng thei lovin lei chu ka bih ta reng a. Mihring ang hi a lo kal a, ka hmui a rawn dek a, chutah ka âng a, ka ṭawng thei ta a. Ka hmaa ding hnênah chuan, “Ka pu, inlârna avângin ka chau hnêp a, ka khûr reh thei lo va ni. Engtin nge i chhiahhlawh hi a pu hmaah hian ka ṭawng theih ang? Tha rêng ka nei ta lo va, thâwk pawh ka thaw hlei thei lo,” ka ti a. Mihring ang khân mi khawih leh a, tha thar min pe ta a, “Nang, Pathian ngainat mihring, hlau suh, thlamuang takin awm rawh, insangmar la, intihuai rawh,” a ti a. Chutia min biak hnu chuan ka lo chak leh ta a, “Mi tichak ta si a, ka pu, thu chu sawi ta che,” ka ti a. “I chunga thil ka tih kha i hrethiam em? Tûnah hian Persia ram hotupa bei tûrin ka kal rih dâwn a ni. Ka tihtlâwm hunah Grik ram lal a lo thawk ang. Thutak Lehkhabua ziak chu ka la hrilh fiahsak ang che. Hêng mite ka beihnaa ka lama ṭang chu in hotupa, Mikaela chauh kha a ni. “Media mi Daria a lal kum khat kum khân kei hi ka inrawlh ve a, ka tichak ta a ni,” a ti a. “Tûnah thu dik ka hrilh dâwn che hi. Persia ramah mi pathum indawtin an lo lal ang a, a palina chu a hausa fâl bîk ang; a hausak avânga a chak viau tâk hnu chuan Grik ram chu a cho vang. Chu ramah chuan lal huai tak a lo lal ang a, ram zau tak a nei ang, a duh duhin a che vêl ang. A lal vânglai tak chuan a ram chu a darh ang a, hmun li-a ṭhen a ni ang. Ama thlah ni lo, lal dang, a aiah an lal ang a; mahse, ani tluka chak tu mah an awm lo vang. “Chhim lam ram, Aigupta lal chu a chak hle ang a; mahse, lal pakhat dang kha a chak zâwk ang, a ram pawh a zau zâwk ang. Kum eng emaw zât hnu chuan Aigupta lal chuan hmâr lam ram, Suria lal chu ṭhianah a siam ang a, nupuiah a fanu a neihtîr ang. Mahse, an inṭhian rei lo vang, a fanu chu a pasal nên, a fa leh a chhiahhlawh chhawmte nên an that vek ang. Chûng hnu chuan chu nu unau pakhat chu a lo kal ang a, Suria lal sipaite chu a bei ang. An kulhah a luhkhung ang a, a titlâwm ang. An milim pathiante leh rangkachak leh tangkaruaa siam bungbêl, an pathian tâna an siamte chu a ram Aigupta ramah chuan a hâwnpui ang. Rei fe chhûng chu Suria ram chu a bei leh lo vang. Suria lal chuan Aigupta ram chu rûn a tum ang a; mahse, an lo hnawt kîr ang. “Suria lal fapa chuan Aigupta chu rûn tûrin sipai a la ṭeuh vang a; tui lian ang maiin an lian ang a, an kulh pakhat chu an hualsak ang. Aigupta lal thin chu a rim ang a, Suria ram lal chu a bei lêt ang a, a sipaite chu a mansak ṭeuh vang. A chak zâwk avâng leh sipai tam tak a thahsak avângin a inchhuang ta hle a; mahse, a chak zâwk reng dâwn lo. “Suria lal chuan a hma aia tam sipai a la leh ṭeuh vang a, hun remchângah sipai tam tak leh râlthuam tam deuh nên a thawk leh ang. Aigupta ram lal lakah mi tam tak an hel ang, inlârna an hmuh tihhlawhtlin tumin i mite zînga mi kawlhsen ṭhenkhat pawh an hel ang a; mahse, an tlâwm mai ang. Suria lal chu a lo lian ang a, an kulh chu a rawn hual ang a, a man ang; Aigupta sipaite chu an chechâng ngam lo vang, an zînga huai berte pawh chu an dawl vek dâwn a ni. Suria ram aṭanga rawn rûntu chuan a duh duhin a sawisa ang, khak ngam rêng an awm lo vang. Ram ropui berah pawh chuan a ding ang a, a thuhnuaiah a awmtîr ang. “Suria lal chuan a sipai rualte nên ram dang rûn a tum rilru leh a. A hmêlmapa ram a tihchhiatsak theih nân ṭhiana siam a tum ang a, nupui atân a fanu pêk a tum ang a; mahse, a hlawhtling lo vang. Chumi hnu chuan tuifinriat kama awmte chu a bei ang a, tam tak chu a hneh ang; mahse, lal pakhatin a lo hneh ang a, chapo hle mah se a titlâwm ang a, a chapona chu a chungah a lêt dâwn a ni. Ama ramah, a kulhah ngei hâwn leh a tum ang a; mahse, an that ang; chu chu a tâwpna tûr chu a ni. “Chu lal aiah chuan mi pakhat a lo lal ang a, chu mi chuan a ram a lo hausak theih nân chhiah chawi luihtîr tûrin hotute a tîr chhuak ang a. Rei lo têah chu lal chu indonaah ni lovin arte thihin a thi ang. “A aiah mi sual deuh pakhat a lo lal dâwn, dân anga lallukhum khumtîr pawh a ni lo vang; fin vervêk thawhin a lo lal thut mai dâwn a ni. Amah kalhtu tawh phawt chu, thuthlung hotupa meuh pawh ni se a hrût nek ang a, a lên bo vang. Inṭhianna thu thlunpuiin hnam dangte chu a bum ang a, ram zîm têa lal ni mah se a chak tial tial ang. Ram bung hausa lai laite chu an inrin loh laiin a rûn thut thut ang a, a pi leh pute tih duh ngai loh chu a ti ṭhîn ang. A râllâk te, a rawk sum te chu amah zuitute a sem bawk ṭhîn ang. Kulh nei khaw dangte pawh beih a tum zêl ang a; mahse, a hun a ral thuai ang. “Aigupta ram lal bei tûrin a insiam chak a, huai takin sipai tam tak a hruai a; mahse, ani chuan sipai tam zet chak tak nên a lo bei lêt ang; amaherawhchu, an phiarrûkna avângin Aigupta lal chuan a ngam lo vang. Ama mi, a chawhlui kîlpui ṭhinte ngei chu amah tichhetu an ni ang; a sipai tam tak chu an thi bawk ang a, an darh zo vang. Lal pahnihte chuan chawhlui an kîl dûn ang a; mahse, intihchhiat tum rilru pu rânin dâwt an inhrilh tawn ang. A tu a mah an hlawhtling lo vang, hun ruat chu a lo la thleng si lo va. Suria lal chu a râllâk sum zawng zawng nên a hâwng ang a, thuthlung thianghlim chu ṭhiatsak a tum ang a. A duh ang chuan a ti ang a, an ramah a kîr leh ang. “Chumi hnu deuhvah Aigupta ram a rûn leh ang a; mahse, tûn hma ang kha a ni tawh lo vang. Amah bei tûrin Kitim-ho lawng rual a lo kal ang a, a hlau hle ang. A kîr lam chuan thinur takin thuthlung thianghlim chu ṭhiat vek a tum ang a, chu thuthlung bawhchhetute thurâwn chu a pawm dâwn a ni. A sipaite chuan kulh leh hnam thianghlim chu an tibawrhbâng ang, hâlral thilhlan an hlan reng ṭhin chu an tihtâwpsak ang a, tenawm râpthlâk chu an dah ang. Thuthlung thianghlim bânsantute chu fak derin lamṭangah a siam ang a; mahse, Pathian thu zâwmtute chu an ṭang tlat ang a, an bei lêt ang. An zînga hruaitu fingte chuan mi dang pawh an hrilh fing ang a, hun eng emaw ti chhûng chu a ṭhen salah an man ang a, an rawk bawk ang. Anmahni ṭanpui tûra inpete chuan ti tak tak ṭhîn lo mah se, chûng mi thahte chuan ṭanpuina a tâwk a fang chu an dawng tho vang. An hruaitu fing ṭhenkhat chu an thahsak ang a, chumi avâng chuan mite chu then faia tihthianghlim an ni ang. Pathian hun ruat, tâwpna hun chu a lo thlen hun chuan chutiang chuan thil a awm ang. “Chu lal chu a duh duhin a che ang a, pathiante aia ropuiah a inngai ang a, pathiante Pathian meuh ai pawhin a indah sâng ang. Pathian thinurna, a tâna ruat chu a thlen hma chuan chutiang chuan a che ang. Chu lal chuan a pi leh pute pathian chu a ngaihthah ang a, hmeichhiaten an ngainat êm êm pathiante pawh a ngaihsak lo vang a, pathian dangte pawh pawisak rêng a nei lo vang, ropui zâwkah a inngai dâwn si a. Kulh humtu pathiante erawh chu a tlawn ang. A pi leh puten an biak ngai loh pathian hnênah rangkachak te, tangka te, lungmantam te leh thil hlu tak te a hlân ang. A kulh vêng tûrin ram dang pathian be mite a ruai ang a; amah lala pawmtute chu a chawimawi ang, hna ṭha tak tak a pe ang a, lâwmmanah ramte pawh a pe ang. “A hun tâwp dâwn hnaiah chuan Aigupta lal chuan a rawn bei ang a; mahse, Suria lal chuan tawlailîr te, sakawr chungchuang mi te leh lawng tam tak te nên theihtâwp chhuahin ṭhâwngaleivîr angin a lo bei lêt dâwn a ni. Ram ropui ber pawh a rawn bei tel dâwn a, mi a sînga sîng tam a that bawk ang. Edom te, Moab te leh Amon ram la bâng te erawh chu a zuah ang. Hêng ramte hi a rawn rûn chuan Aigupta pawh a zuah lo vang. Tuilian angin ram tam takah a lian zêl ang a, a hrût zêl ang. Rangkachak te, tangkarua te leh an ro hlu, Aiguptahovin an dah ṭhatte chu a la ang. Libua leh Sudan pawh a thuhnuaiah a dah ang. Khawchhak leh hmâr lam aṭanga thu thang lo thleng chuan a tithlaphâng ang a, chu thil chu beia titâwp ṭhak tûrin a thawk ang. Tuifinriat leh tlâng thianghlim mawi ber inkârah a lal bûk a khuar ang a; mahse, a thi dâwn, tu man an ṭanpui lo vang. “Chumi hunah chuan i mite enkawltu, hotu lian Mikaela chu, a lo thawk ang. Hnam lo din tirh aṭanga tûn thlengin chutiang hrehawm chu a awm tawh ngai lo vang; i mite erawh chu chhan chhuah an ni ang, lehkhabua an hming chuang apiangte chu. Lei vaivuta mu tawhte pawh an lo tho vang, ṭhenkhat chu chatuan nun chang tûrin an lo tho leh ang a, ṭhenkhat erawh chu an zak êm êm ang a, kumkhaw hmuhsit an ni ang. Hruaitu fingte chu vâna êng angin an êng ang a, thil dik ti tûra mi dang hruaitute pawh chu arsi angin an êng kumkhua ang. “Amaherawhchu, Daniel, tâwpna a lo thlen hma chu, thu chu thup la, lehkhabu chu châr tlat rawh, hriat duhin mi tam tak an phi ruai dâwn a ni,” a ti a. Kei, Daniela hian ka han en a, lui kam tuakah mi pahnih ding ka hmu a. Lui hnâr zâwka ding, puan zai sîna inthuam hnênah chuan, “Hêng thil mak tak tak hi engtikah nge a tâwp ang?” ka ti a. Lui hnâr zâwka ding, puan zai sîna inthuam chuan, a kut khing hnih a phar a, chatuan Pathian hming chhâl meuhvin a sawi a: “Hun khat, hun hnih, hun chanve chhûng tûr a ni. Pathian mite tihduhdah a tâwp hun chuan hêng thilte hi a thleng kim vek ang,” a ti a. A sawi chu ka hre nâ a, a ngaihna erawh chu ka hre lo, “Ka pu, hêng zawhah hian engtin nge ni ang?” ka ti a. “Daniel, kal mai rawh, tâwpna a lo thlen hma chu thu hi thupa châr hnan tlat a ni tawh. Mi tam tak an inthian fai ang a, an insu vâr ang a, tihthianghlim an ni ang; mi sualte erawh chuan an hrethiam lo vang a, an sual lui zêl ang, mi fingte chauhvin an hrethiam ang. “Ni tin thil hlan ṭhin an tihtâwp a, tenawm râpthlâk an dah ni aṭangin ni sângkhat leh zahnih leh sawmkua a ral ang. Ni sângkhat leh zathum leh sawmthum leh panga chhûng rinawm taka awm chhuak chu a nihlawh e. “Daniel, nang chu kal ta la, i hun tâwp a thlen hma chu rinawm takin awm rawh. I hahchâwl ang a, tâwpna a lo thlen hunah i awmna tûr hmun ruatah chuan i awm dâwn nia,” a ti a. Judai rama Uzia te, Jothama te, Ahaza te, Hezekia te lal lai leh Israel rama Joasa fapa Jeroboama a lal laiin, Beria fapa Hosea hnênah Lalpa thu a lo thleng a. Hosea hnêna Lalpan thu a sawi tirhin heti hian a rawn ti a: “Kal la, uire hmang thlah zînga mi nupuiah va nei rawh; ani chuan amah ang bawk fa a hrinsak ang che. Ram chuan uire a chîng a, Lalpa chu a uiresan ta a ni,” tiin. Tichuan, a kal a, Diblaima fanu, Gomeri chu nupuiah a va nei a. Ani chuan nau a pai a, fapa a hrinsak ta a. Lalpa chuan a hnênah, “A hmingah Jezreela sa rawh. Jezreel hmuna Jehuan thisen a chhuah chiam phuba chu rei lo teah a thlahte chungah ka la dâwn. Israel-ho lalna chu ka titâwp ang. Chumi ni chuan Israel thalngul chu Jezreel ruamah ka titliak ang,” a ti a. Gomeri chuan nau a pai leh a, fanu a hring a. Hosea hnênah, “A hmingah Lainatlohvi sa rawh. Israel chhûngte chu ka lainat tawh dâwn lo, ka ngaidam tawh ngai lo vang. Juda chhûngte erawh chu ka lainat ang a, kei Lalpa, an Pathian ngei hian ka chhan chhuak ang; thal te, khandaih te, indona te, sakawr chungchuang mi te chakna hmang lovin,” a ti a. Lainatlohvin hnute a nghei hnuah Gomeri chuan nau a pai leh a, fapa a hring a. Hosea hnênah, “A hmingah Kaminilova sa rawh, ka mi in ni tawh lo va, kei in Pathian ka ni tawh si lo,” a ti a. “Israel fate chu tuifinriat ṭiauvaivut anga tam, chhiar sên rual loh an la ni leh ang. Anni chu, ‘Ka mi in ni lo,’ lo ti tawh mah ila ‘Pathian nung fate in ni,’ ka la ti ang. Tichuan, Juda-te leh Israel-te chu an inzawm leh ang a, hruaitu pakhat an nei ang a, an ramah chuan an hmuingîl hle ang. Pathianin a dinthar ni chu ropui tak a ni dâwn si a.” In unaupate chu, ‘Pathian mi in ni,’ ti ula, in farnute pawh ‘Pathian lainat in ni,’ ti ang che u. “Ṭan suh u, in nu hi ṭan tawh suh u, Ka nupui a ni tawh lo va, A pasal ka ni tawh hek lo. A uire mit men hi bânsan sela, A inpho îtawm hi sim rawh se. A duh loh chuan a silhfên ka hlihsak vek ang a, A pian ni ang maia saruakin ka awmtîr ang. Thlalêr ram ro tak angin ka siam ang a, Tuihâl dang chârin a thi ang. A fate pawh ka lainat lo vang, Uire fa an ni si a. Anmahni paitu, an nu chu a zahpuiawm hle mai, Ngaihzâwng a nei a, ‘Chaw te, tui te, sahmul te, puan te, hriak te, In tûr te min petu, ka ngaihzâwng ka pan dâwn,’ a ti a. Chuvângin, a kawng hlîngin ka hnawh ang a, Amah dâl nân bang ka siam ang. Tichuan, a kawng a hloh tawh ang. A ngaihzâwngte a ûm ang a, a ûm pha chuang lo vang, Anni chu a zawng ang a, a hmu hek lo vang. ‘Ka pasal hnênah ka kîr leh teh ang. Tûn ai hian ka chan a ṭha zâwk si a,’ a ti a. Chaw te, uain te, oliv hriak te petu Ka nih a hre si lo. Baal hnêna a hlan rangkachak leh tangkarua pawh ka pêk a ni. A seng hunah ka buh leh uain ka lâksak ang a, A saruak khuhna tûra ka pêk sahmul leh la ka lâksak bawk ang. A ngaihzâwngte hmaah saruakin ka awmtîr ang a, Ka kut ata tu man an chhan chhuak lo vang. An hlimna hun, an kum tin kûtpui te, Thla thar kût te, sabat ni te, khâwmpui tinrêng te nên ka titâwp ang. Grep leh theipui kûng, a ngaihzâwng hnêna a hlawh, ‘Min pêk,’ a tih ṭhin chu ka tichhe vek ang, Ramhnuaiah ka chantîr ang a, ramsaten an tlân ang. Bengbeh leh ṭhite awrhin a inchei mawi a, A ngaihzâwngte a chhai ṭhîn. Baal hnênah inthawina a hlân fo, Kei mi theihnghilh avângin ka hrem a ni,” Lalpa thuchhuak chuan a ti. “Mahse, ani chu zaidam takin ka thlêm ang a, Thlalêrah ka hruai ang a, Tah chuan biahthu ka lo hlân ang. A grep huante ka pe kîr leh ang a, Akor ruam chu beiseina kawngkaah ka siamsak ang, Aigupta ram ata a lo chhuah lai, A tleirâwl lai nite ang khân, Lâwm takin min lo chhâwn ang.” Lalpa thuchhuak chuan heti hian a ti: “ ‘Baal’ min ti tawh lo vang a, ‘Kan pa’ min ti zâwk ang. Baal hming a lam ṭhin chu ka titâwp ang a, chu hming chu a lam leh tawh ngai lo vang. Chumi ni chuan ramsa te, chunglêng sava te, Leia bawkvâka kalte chu thu ka thlunpui ang a, Ram ata thal te, khandaih te, indona te ka tibo vang a, Thlamuang takin an awm tawh ang. Kumkhua atân nupuiah ka nei ang che a, Ka ta ni tûrin ka hual che a ni. Dik tak leh rinawm taka awmin, Hmangaihin ka lainat ang che. Ka pawm kumkhua ang che, Ka tân ka hual tlat tawh che hi, Tichuan, Lalpa ka nih i hre chiang ang.” Lalpa thuchhuak chuan heti hian a ti: “Chumi ni chuan vân ata ruah ka sûrtîr ang a, Leiin a ṭhatpui ang. Lei aṭangin buh te, grep te, Oliv te, A ṭo vang a, a duah hluah hluah ang. Jezreel ruam pawh a vul leh ang. He ramah hian ka pual atân ka din nghet ang a, Lainatlohvi chu ka lainat ang a, Kaminilova chu ‘ka mi i ni,’ ka ti ang a, Annin, ‘Ka Pathian i ni,’ min ti ang.” Lalpa chuan ka hnênah, “Kal leh ta la, i nupui duh lai, uirenu chu va rîm leh rawh, Israel-te chuan pathian dang hnêna grep ro chhang hlân uar hle mah se, Lalpa chuan a la hmangaih tho ang hian,” a ti a. Tichuan, a manah tangka tlang sâwm leh panga leh barli ṭîn sâwm ka pe a. “Rei fe chhûng chu ka inah awmin invawng thianghlim la, nawhchi zuar lo la, tlangvâl pawh nei suh; chutiang bawkin kei pawh ka invawng thianghlim ang,” ka ti a. Israel fate pawh hun rei fe chu lal leh hotu te, inthawina leh hmun serh te, aienna milimte nei lovin an awm dâwn a ni. Chumi hnu chuan Israel fate chu an lo hawi kîr ang a, an Pathian, Lalpa leh Davida chu an rawn pan ang; Lalpa chu an ṭih ang a, a zâr an zo kumkhua tawh ang. Israel fate u, Lalpa thu hi hre rawh u. He ramah hian rinawmna te, khawngaihna te, Pathian hriatna te a awm loh avângin Lalpa chuan a chhûnga chêngte a thiam lo a ni. Thu an tiam a, an zâwm lo va, Tual an that a, rûk an ru a, An uire a, serh leh sâng rêng an nei lo, Inzawm zatin tual an that. Ram chuan a tuar ang a, A chhûnga awm zawng zawng an chau vang, Tuipui sangha chenin an boral ang. Tu mah inhêkin tu mah lo indem suh u, Nangni puithiamte hi a ni ka demte chu. A chhûn a zânin in tlu in tlu a, Zâwlneite pawh nangmah ang chauh an ni, I nu, Israel chu, ka tiboral ang. Ka miten min hriat duh loh avângin an boral a, Nang pawhin min hriat duh loh avângin Ka puithiam ata ka bân che hi, I Pathian dânte i thlahthlam a, Kei pawhin i fate ka thlahthlam ve ang. An tam poh leh ka laka sual an tam a, An ropuina chu an mualphonaah ka chantîr ang. Ka mite sualna chu chênin an inei thau va, Sual zêl se an ti êm êm. An awm dân leh an thiltih avângin ka hrem ang, Mipui leh puithiamten angkhatin an tuar ang. Inthawina sa an ei ṭeuh ṭeuh va, An kham si lo, Chi ṭhatna pathian an pan a, fa an ngah chuang lo, Lalpa chu an hawisan avângin. Hurna te, uain te, zu te hian Thinlung a hruai bo ṭhîn. Ka miten an thing serh an râwn a, An tiangin inlârna an zawng a, Milem biak an châkna chuan a hruai bo va, An Pathian chu uiresanin an hawisan ta. Tlâng chhîpahte an inthawi a, Tlâng pangahte rimtui an hâl, Sasua te, beraw te, hriang thingbuk hnuaiah te, In fanute an inphalrai a, In mote pawh an uire ṭhîn. An sualna leh uirena avângin In fanute leh in mote chu ka hrem lo vang. Nangni ngei hi nawhchizuar tawmpuitu, Milem hnêna inthawina eitu in ni a, Chinchâng hre lote chu tluchhe âwm rêng an ni. Aw Israel, nang chu uire mah la, Juda zawng uire ve lul suh se, Gilgal-ah te, Beth-aven-ah te inthawi tûrin chho suh u, Tah chuan Lalpa hming chhâlin chhia chham hek suh u. Israel zawng, bâwngla anga luhlul a ni, Phûla berâm tla angin Engtin nge Lalpan a vên theih ang? Efraim chuan milem a be ta a, An duh ang ang chuan awm teh se. Zu hmunah nuam an chên a, suahsual an bâwl zui a, Ngaihsân nih aiin mualpho an thlang. Thlipuiin a la bo vang a, An inthawinate avângin an la zak ang. Puithiamte u, hei hi hre rawh u, Israel mite u, ngaihtuah teh u, Dik taka rorêl tûr in ni a, Mahse, Mizpa-ah thang in kam a, Tabor tlâng thlengin lên in zâr hi. Hel hmangho chu tualthahnaah an inrawlh thûk êm a, Ka hrem vek dâwn a ni. Efraim chu ka hre chiang a, Israel chu ka lakah thuhrûk a ni lo. Tûnah hian Efraim chu a uire tâk avângin Israel chu a bawlhhlawh zo ta a ni. An thiltihte chuan Pathian hnêna an kîr lehna a dâl tlat a. Uire rilru an put hlawm avângin Lalpa chu an hre thei lo va ni. A chapo avângin Israel chu a mualpho va, A sual avângin Efraim pawh a tlu ang a, An zîngah Juda pawh a tlu ve ang. An berâm leh bâwng rualte hlânin Lalpa zawngin inthawi mah se, An hmu lo vang, Anni chu a hawisan tawh si a. Lalpa lakah vervêk takin thil an ti a, An fate pawh falak an ni, An ram nên lam an chhe thuai ang. Gibe-ah berâmpa ki hâm ula, Rama khuaah tawtawrâwt hâm rawh u, Beth-aven-ah râlkhêl dâr vua ula, ‘Benjamin, an ûm pha dâwn che,’ ti rawh u. Efraim chu zilh a nih hunah a chhe vek ang, Israel-te chunga chhiatna thleng ngei tûr chu ka puang e. Juda hruaitute chu ramri lung sawntu ang an ni, Ka thinur chu tui angin an chungah ka leihbua ang. Efraim chu rahbehin a awm ta, Milem a be lui tlat si a. A chungthu chhe taka rêlsak a ni. Chuvângin, kei hi Efraim tingêttu ka ni a, Juda chhûngte tiṭawihtu pawh ka ni. Efraim chuan a natzia a inhria a, Juda pawhin a hliam natzia a hria, Ṭanpui dîlin Efraim a kal Asuria hnênah, An na leh hliam tidam thei lo lal ropui chu an bêl. Efraim tân sakeibaknei ang ka ni ang, Juda chhûngte tân pawh sakeibaknei vânglai ang ka ni. Keimah ngeiin ka pawt sawm ang a, ka pu bo vang, Ka hnûk chhuak ang a, tu man an chhan thei lo vang. An sual sima ka lam an hawi hma chu Ka awm bosan daih ang a, An hrehawm tuar avâng chuan Ṭhahnemngai takin min la zawng dâwn a ni. Hawh u, Lalpa hnênah i kîr ang u, Min vaw na hle nâ a, Min tuam dam leh dâwn si. Ni hnih hnuah min tiharh leh ang a, Ni thum ni chuan min tinung leh ang a, Tichuan, a hmaah kan awm ang. Hriat i tum ang u, Lalpa chu hriat i tum tlat ang u, Lei ro tihnâwng tûra ṭhâl ruah sûr ṭhîn ang hian, Zîng anga khêl lovin Lalpa chu Min tiharh tûrin a lo kal ngei dâwn e. Aw Efraim, engtin nge ka tih ang che, Aw Juda, engtin nge ka tih tâk ang che? Min hmangaihna chu zîng chhûm ang leh Dai tla ral ta mai ang hi a ni. Chuvângin, zâwlneite hmangin ka tidarh che a, Ka thu-a thah in ni, In chunga ka rorêl hi êng anga chiang a ni. Inthawina aiin khawngaihna a ni ka duh, Hâlral thilhlan aiin Pathian hriatna. Anni chuan Adama angin thuthlung an bawhchhia a, Tichuan, zahpuiawm takin an khawsa ta. Gilead chu mi sualte hmunpui a ni a, Thisen a luang zuih mai. Suamhmang rualin mi an lambun ang hian, Puithiamte chuan inthawi tuma Sekem pante an châng a, An lo that ṭhîn a, a va râpthlâk êm! Israel chhûngkaw zîngah thil râpthlâk tak ka hmu. Efraim chu a uire a, Israel chu a intibawrhbâng zo ta. Ka mite chanvo ka tundin leh hun chuan Nang pawh, Juda, rah seng tûr i nei ve ang. Israel-te tihdam ka tum apiangin Efraim bawhchhiatna ka hmu chiang a, Samaria sualnate nên, An inbum a, mi an rawk a, Kawtthlêrah mi an suam. An sualnate ka hre reng tih an ngaihtuah lo, An thil sual tihin an inhaivûr a, ka hmu reng si. Lal tihlâwm nân thil sual an ti a, Rorêltute tihlâwm nân dâwt an sawi. Chhang urtuin a chhang ur nân tuah belh ngai lo khawpa A thuk a tihsat ang hian, thil sual tih an châk ut ut a ni. Lal an chawimawi ni chuan miliante an rui buai a, Lal pawh a rui mualpho hle. Mi an phiar a, an thin chu thuk angin a sa a, Meivâpin meiling zâna a khuh, Zînga a lo alh ta hluah ang hi an ni. An thinur chu thuk ang an ni, An hruaitute pawh an that a, An lalte pawh an râwt a, Tu man mi lam duh lo. Efraim chu hnam dangte nên an inpawlh ta, Chhang lehlam chauh ur hmin ang hi an ni. Hnam dang an rinchhan a, an chak loh phah a, Chu chu an hrethiam si lo. An lu ṭuak tawh hle pawh chu an hre lo. Israel-te chu an chaponain a tihmêlhem a, An Pathian, Lalpa hnênah an kîr duh lo va, A lam hawi duh tu mah an awm hek lo. Efraim chu ngaihtuahna nei lo ṭhûro ang hi a ni, A chângin Aigupta a au va, a chângin Asuria a pan. A kalna apiangah lênin ka khuh ang a, Chunglêng sava angin ka man khâwm ang. An thiltih sual avângin ka hrem dâwn a ni. Min hawisantute chu an chung a pik e, Ka laka an hel avângin chhiatnain tlâkbuak rawh se. Anni chu chhandam ka duh a, a derin min be si. An thinlung chhûngril takin min au lo va. Milem biate angin khum laizâwlah an chiau an chiau va, Zu leh chaw dîlin an inzai thi zawih zawih a, Ka lakah an va hel nasa teh rêng êm! Keimah ngeiin anni chu ka zirtîr a, ka thuam a, Anni erawh chuan min phiar a, min do lêt ta. Chung lam an hawi duh lo, Thalngul rul tawh, hman tlâk loh ang an ni. An hruaitute an ṭawng chaltlai êm avângin khandaiha thah an ni. Aigupta miten an va nuihzat dâwn êm! Ka miten ka thuthlung an bawhchhia a, Ka dân an zawm loh avângin Mupui bir angin hmêlmate an lo thawk e, Râlkhêl tawtawrâwt hâm rawh u. ‘Aw Pathian, keini Israel chuan kan hria che asin,’ Tiin min au ṭhîn nâ a, Israel-te chuan thil ṭha an hnâwl a, Hmêlmate chuan an ûm dâwn a ni. Ka rem tih lohvin lalte an thlang a, Ka hriatpui lohvin hruaitute an ruat bawk a, An tangkarua leh rangkachaka siam milemte chu An chhiat phah dâwn a ni. Samari mite u, in bâwngno lim biak chuan Min va ngei tak êm! In chungah ka thinur êm êm a ni, Engtikah tak milem biak hi bânsan ang maw! Israel themthiamte siam milim chu Pathian a ni lo ve. A ni, Samari khuaa an biak bâwngno lem pawh Tihkehsawm vek a ni ang. Thlifîm a tleh a, thlipuiin a nuai dâwn a ni, An thlai chîn chu a vui lo vang a, a rah hek lo vang, Rah mah se, hnam dangte ei tûr mai a ni. Israel chu hnam dangin an chîm ral ta, Bungbêl hman tlâk loh ang mai an nih tâk hi. Ram sabengtung luhlul ang maiin, Asuria bêl tûrin a chhoh tâk saw. Efraim chu a ngaihzâwngte hnênah a inhralh ta. Hnam dang zîngah inhralh mah se, Anni chu ka vai khâwm ang a, An belh lal ropui tihduhdah tuarin An kun tlawk tlawk ang. Efraim chuan bawhchhiatna hmun atân Maichâm a din belh zêl a, Chûng maichâm chu suahsual an bâwlna hmun a ni si a. Ka dânte ziaksak ṭeuh mah ila, Mi dang tân leka ngaiin an hnâwl a. Inthawina hlan te, a sa eite an lâwm a, Mahse, Lalpa lâwmzâwng a ni si lo, An bawhchhiatnate a hre reng a, an sual avângin a hrem ang a, Aigupta ramah a kîrtîr ang. Israel chuan anmahni siamtu an theihnghilh a, Lal in ropui tak an sa a, Juda chuan khawpui kulh nei a din belh zêl a, Mahse, chûng khawpuite chu ka hâl ang a, An in ropuite chu a kâng fai vek ang. Aw Israel-te u, hnam dangte kût hmangin Hlim ve bûng bûng suh u, Chu chu in Pathian laka uirena a ni. Hruihzâwl tina i nawhchizawrh hlawh chu i thlahlel a, Hruihah leh grep khurah chuan Kham khawp i hmu lo vang, Uain thar tûr a awm hek lo vang. Lalpa ramah an chêng reng lo vang, Efraim chu Aigupta ramah a chhuktîr ang a, Ṭhenkhat chuan Asuria ramah ei thiang lo an ei ang. Lalpa hnênah uain an hlân lo vang a, An inthawinate chuan a tilâwm hek lo vang. Lusûnte ei ṭhin ang chaw an ei ang a, a ei apiang an bawlhhlawh ang. An chaw chu anmahni pumpuarna mai a ni ang a, Lalpa hnên a thleng lo vang. Lalpa puala khâwmpui urhsûn a lo thlen ni chuan, Eng nge in tih tâk ang le? Chhiatna lo thleng tlânsantute chu, Aigupta-ah an tlân khâwm ang a, Memfis hmunah phûm an ni ang. An tangka ro hlûte kangṭhaiin a bâwm ang a, An chênna inahte pawh hnimhlîngnei a khat ang. Hremna ni chu a lo thleng ta, Sual man hmuhna ni chu. Israel-te u, hre teh u, In sual êm avâng leh in luhlul êm avâng zâwkin Zâwlnei chu, ‘mi â’ in ti a, Thlarau mi chu, ‘Mi â bawraw,’ in ti ṭhîn. Zâwlnei chu, ka Pathian mi, Efraim-ho vêngtu a ni a, A kalna apiangah thang an lo kam a, A Pathian inah pawh an dodâl a ni. Gibea khuaa suahsualna ang khân an sualna chu a râpthlâk a, Pathianin an bawhchhiatnate a hre reng si a, An sualna avâng chuan a hrem ngei dâwn a ni. Israel chu thlalêrah khân grep angin ka hmu a, In pate pawh theipui hmin hmasa angin. Nimahsela, Peor tlânga Baal chu an pan a, An ngaihzâwng pathian tenawm tak ang chuan Zahpuiawm takin an awm ta a. Efraim ropuina chu sava angin a thlâwk bo ta, Nau hring te, nau pai te an awm tawh lo vang. An fate awmtlei mah se, An vaiin an sûn vek ang a. Anni chu ka kalsan hun chuan, An chan a va chau dâwn tak êm! Efraim chu Tura angin ram ṭha taka a awm ka hmu a, Mahse, Efraim chuan thah atân mai fa a ngah a ni. Aw Lalpa, an tân eng nge i tihsak ang? Nau chhiattîr la, an hnutetui tikang ang che. Gilgal-ah an sualna a hluar ṭan a, Tah chuan a ni ka huat tâk ni. An thil sual tihte avângin ka hmangaih tawh lo vang. An hruaitu zawng zawngin min helsan ta si a. Efraim chuan chhiat a tâwk ta, A zung chenin a ro zo va, Rah a chhuah thei ta lo. Nau pawh hring se, an duh lai, An rîla rah chu ka tihlum ang. A thu an awih loh avângin Ka Pathian chuan anni chu a hnawt darh ang a, Hnam dang zîngah an vâkvai ang. Israel chu grep duah tak Rah tiar tuar ang hi a ni ṭhîn a, A rah tam poh leh maichâm a siam tam a, A hausak poh leh an biak lungphun a cheimawi mai. An thinlung chu bumnain a khat a, An sual man chu an hmu ngei ang. An maichâm ka tichim ang a, An biak lungphunte pawh ka tichhe vek ang. ‘ Lalpa kan ṭih lo va, lal kan nei ta lo va ni, Nei pawh ni ila, Kan tân eng nge sâwt ang?’ an la ti ang. An ṭawng mai mai a, Dâwtin chhia an chham a, thute an thlung a, Lei rih thlûra hlo har a khat tlat ang hian Dikna an dîp raltîr. Samari khawpuia chêngte chu, Beth-aven bâwngno lim avâng chuan Hlauvin an khûr ang a, A ropuina tihchhiat a nih avângin Mite chu an ṭap ang a, A puithiamte chu an chiau vawng vawng ang. Asuria lal ropui tak pêk tûrin Berâmno lim chu an kalpui ang a, Efraim chu a mualpho let dêr ang; A remruat avângin Israel chu a zak hle ang. Tuiin hnâwl a lên ang hian, Samari lal pawh an hruai ang. Israel-te suahsual bâwlna Aven hmunsângte chu tihchim a ni ang. A maichâmah hlîng leh hnimhlîngnei a ṭo chûk ang a, Mite chuan tlâng hnênah, ‘Min khuh rawh,’ an ti ang a, Mual hnênah, ‘Min delh rawh,’ an ti ang. Aw Israel, Gibea khuaa thil sual in tih ang kha, In la ti zui ta zêl a, Gibea khuaah indonain a nangchîng ang che u. Hêng mi sualte hi ka bei ang a, Ka hrem ang. Anmahni bei tûrin hnam dang an ṭangrual ang a, An sualna avângin hrem an ni ang. Efraim chu buh chîl peih tak bâwngla hmin tawh angin, A nghâwng mawiah nghâwngkawl ka bât ang a, Efraim chuan lei a rît ang a, Juda chuan lei a let ang a, Jakoba chuan leitlang a tidip ang. In leiletah dikna theh ula, Khawngaihna in seng dâwn nia; In ram khêk chu let ula, Lalpa chu zawn hun a ni, A lo kal ang a, mal a sâwm ang che u. Sualna in theh a, in khawloh zawh tâk hi. Mahni inbum in ni. Mahni chaknaah in innghat a, In sipai ngah in chhuang vei si. Chuvângin, indopuiin in mite a nang ang a, In kulh zawng zawng a chhe vek ang. An inbeiha Beth-arbel khua Lal Salmanan a sawisa ang khân, Nunau lamin thah in ni ve ngei ang. Nangni Bethel-a awmte u, in sual êm avângin Chûng thilte chu in chungah a lo thleng dâwn, Zînga inbeihna an ṭan veleh Israel lal chu a thi nghâl ang. Israela chu a naupan lai aṭangin ka hmangaih a, Ka fa atân Aigupta ata ka ko chhuak a. Ka koh zin poh leh min hlat sauh zêl a, Baal hnênah an inthawi a, Milem hnênah rimtui an hlân hlauh ṭhîn. Efraim chu keimah ngeiin kal ka zirtîr a, A bânah ka kai ṭhîn. Nimahsela, ka awmtlei an ni tih an hre lo. Khawngaih leh lainat takin Anni chu ka hruai dial dial a, An phurritte ka chhâwk a, Duat takin ka châwm ṭhîn. Chuti chung pawhin mi bêl duh lo va, Aigupta-ah an kîr leh ang a, Asuria-in a awp bawk ang, Anmahni remruat chauh an zawm avângin. An khawpuiah khandaih a lêng ang a, An kulh kawngkhârte chu a chhe vek ang. Ka mite chuan min hawisan tlat a, An nghâwngkawl rih avângin. Chungnungbera an au vang a, Mahse, tu man an hlihsak lo vang. Efraim, engtin nge ka bânsan theih ang che? Adma angin engtin nge ka tihchhiat theih ang che? Zeboim angin engtin nge ka sawisak theih ang che, Ka lungrilah i châm tlat a, Ka hmangaih zual deuh deuh che a ni. Ka thinrim nasa tak chu ka hrithla lo vang a, Efraim chu ka tichhe leh tawh lo vang. Pathian ka nih hi, mihring ka ni lo ve, In zînga chêng, Mi Thianghlima chu thinrimin ka lo kal tawh lo vang. Lalpa chu sakeibaknei angin a rûm ang a, Tichuan, anni chuan an zui ang, Ring takin a au vang a, Khawthlang lam aṭangin a fate an lo haw hlawk hlawk ang. Aigupta ram aṭangin sava thlâwk anga chakin an lo chho vang a, Asuria ram ata ṭhuro angin an lo chhuk bawk ang. Tichuan, an ramah ngei ka chêntîr leh ang, Lalpa thuchhuak chuan a ti. Efraim chuan dâwt min hrilh kual min hrilh kual a, Israel-te chuan bum an hrât êm êm a, Juda pawhin Pathian, Mi Thianghlima leh Rinawma chu A dodâl reng a ni. Efraim chuan thil sâwt lo a ûm a, Nilêng lêngin khawchhak lam lalte tlawnin a buai; Dâwt sawi a hrât a, tharum thawh a uar, Asuria nên thu an thlung a, Aigupta-ah hriak a thawn. Lalpa chuan Juda-ho chungah vuina a nei. Jakoba chu a awm dân sual avângin a hrem ang a, A thil tih ang zêlin a thungrûl ang. Chhûla a awm laiin a unau keartuiah a man a, A vânglaiin Pathian a buan a, Vântirhkoh chu a bei a, a hneh ta a, Malsâwmna dîlin a ṭap a, Bethel-ah Pathian a hmu a, Ani chuan thu a lo hrilh a. A ni, Lalpa, Engkim Pathian chu a hming Lalpa a ni. Chuvângin, i Pathian hnênah kîr leh la, Khawngaihna leh dikna ngaina la, I Pathianah chuan innghat rawh. Sumdâwngten bûkna dik lo an hmang a, Bum an chîng êm êm. Efraim chuan chapo takin, ‘Ka hausa a, sum leh pai ka ngah a, Eng mah tihsual ka nei lo,’ a ti. Kei hi Lalpa, i Pathian, Aigupta ram aṭanga hruai chhuaktu che ka ni. Thlalêra in hnêna ka lo kal lai ang khân, Puan inahte ka chêntîr leh ang che u. Zâwlnei hmangin thu ka sawi a, Inlârna tam tak ka hmuhtîr a, Tehkhin thuin anni chu ka zirtîr ṭhîn. Gilead chu a bawhchhiatna avângin Eng mah a ni ta lo, Gilgal-ah pawh bâwng lem an bia a, An maichâmte chu leilet zâwla Lung paih khâwm ang mai a la ni ang. Jakoba chu Aram bialah a tlânchhia a, Israelan nupui man a tuak a, Berâm vênah nupui a hlawh. Lalpa chuan Aigupta aṭanga a mi Israel chu zâwlnei hmangin a hruai chhuak a, Anni chu zâwlnei hmangin a enkawl ṭhîn. Mahse, Efraim chuan a tithinur nasa êm êm a, Chuvângin, an thisen chhuah mawh chu an phur ang, Lalpa an timualpho va, an mualpho ve ngei ang. Efraim a han ṭawng chuan Israel hnam dangte an khûr a, An zîngah ngaihsân a ni ṭhîn. Baal biaa a sual tâk avângin a chhe ta a ni. Tûnah pawh hian an sual zual deuh deuh va, Tangkaraw milimte an chhûng a, Chûng milimte chu an duh dân ang taka Kut themthiamte siam a ni. Mihringa inthawite chuan Bâwngno limte lam pawh ‘Fawh tûr,’ an ti ṭhîn. Chuvângin, zîng ṭiauchhûm ang te, Dai tla ral leh thuai ṭhîn ang te, Hruihzâwla buhsi thli len bo ang te, Tukverha meikhu chhuak ang te an ni ang. Kei hi Lalpa in Pathian, Aigupta ram ata hruaichhuaktu che u ka ni, Keimah lo chu Pathian dang in hre lo va, Chhandamtu dang in neih hek loh kha. Thlalêr ram rovahte khân ka kaihruai che u a. Anni chu tlai takin ka hrai a, An puar hnu chuan an chapo va, Min theihnghilh ta a ni. An tân sakeibaknei ang ka ni ang a, Keite angin anni chu kawngah ka lo châng ru ang. A note lâksak savawm thinur angin An lung tuamtu ka haithlêr ang a, Sakeibaknei angin an sa ka ei ang a, Ram sakawlhte angin ka pawt sawm ang. Israel, nangmah ṭanpuitu mi do hi I chhiat phah dâwn a nih hi. Lal leh hotu in dîlte kha In khawpuite chhan tûrin khawnge an awm tâk? Thinur chungin lal ka pe che u a, Ka thin a rim vângin anni chu ka la bo leh ta. Efraim khawlohna chu ziak vek a ni a, An suahsualnate pawh chhinchhiah vek a ni. Nau vei angin a na thut ang a, Mahse, pian huna chhuah nachâng hre lo nau ang hi a ni. Seol thiltihtheihna ata chhanchhuakin, Thihna lak ata ka tlan dâwn em ni? Aw thihna, khawnge i hri chhia chu? Aw Seol, khawnge i tihchhiat theihna chu? Khawngaihna mitin ka en dâwn tawh lo. A unaute zîngah lo hmuingîl mahse, Lalpa thlî, khawchhak lam aṭangin a lo tleh ang a, Thlalêr aṭangin a rawn nuai ang. Luikawrte pawh a châr vek ang. A ro khâwl khâwm zawng zawng pawh an lâksak ang. Pathian laka a hel avângin Samaria chuan a sual man a têl ang, Khandaiha thah an ni ang a, Nausênte chu lei vuak nân an hmansak ang a, Nau pai laite pum chu an taithlêr ang. Aw Israel, i Pathian, Lalpa hnênah kîr leh rawh, I bawhchhiatna avângin i tlûk tâk hi. Lalpa hnênah kîr leh ula, Hetiang hian thupha chawi rawh u: “Kan bawhchhiatna zawng zawng la bo la, Kan tihṭhatte lo lâwm ang che. Tichuan, fakna inthawina kan hlân ang che. Asuria chuan min chhan thei lo va, Indona sakawr chuan min hum thei bawk hek lo. Kan kutchhuakte hnênah, ‘Kan Pathian in ni,’ Kan ti tawh ngai lo vang. I hnên aṭang hian a ni fahrahten khawngaihna an dawn ṭhîn ni,” tiin. An rinawm lohna chu ka tihdamsak ang a, Anni chu ka hmangaih hrim hrim dâwn a ni, An chunga ka thinurna pawh a reh tawh si a. Israel tân daifîm ang ka ni ang a, Lili angin a lo pâr vul ang. Lebanon tlâng thing angin nghet takin zung a kai ang. A zârte chu a ṭawi luai ang a, Oliv thing anga mawi a ni ang, Lebanon angin a rim a tui bawk ang. Ka hlimah an lo chêng leh ang a, Thlai angin an duah hluah hluah ang. Grep angin an rah tuar ang a, Lebanon uain angin an hming a thang ang. Efraim chuan milem nên inzawmna rêng a nei tawh lo vang a, Keiin ka lo ngaihsak ang a, Ka kaihruai ang. Kei hi fâr thing anga zâr hliahtu chu ka ni, Kei hi malsâwm tinrêng hnâr chu ka ni. Tu nge finga hêng hi hrethiam ang le? Tu nge hrethiama ngaihtuah chhuak thei le? Lalpa kawngte chu a ngîl a, Mi dikte chuan an zawh ṭhîn. Mi sualte erawh chuan an zawh lo va, An tlu thîn. Pethuela fapa Joela hnêna Lalpa thu lo thleng chu: Nangni upate u, hei hi ngaithla ula, Ram chhûnga mi zawng zawngte u, ngaihtuah rawh u: In hun lai leh in thlahtute hun lai khân Hetiang thil hi a lo thleng tawh rêng em? Hei hi in fate hrilh ula, annin an fate hrilh sela, An fa lehte pawhin chhuan dang hrilh zêl rawh se. Khau puangin thlai a rawn bawh a, Rual khatin an ei bâng chu rual dangin an rawn ei a, An ei bâng chu rual dangin an rawn ei fai. Zu hehho, harh ula, ṭap vak vak rawh u, Uain hehho, chiau vawng vawng rawh u. Uain in tûr in nei dâwn tawh lo. Khau rualin kan ram an tuam, chak tak an ni, Chhiar sên rual an ni lo; An ha chu sakeibaknei ha ang a ni a, An ngho pawh keipui ngho ang mai a ni. Ka grep hrui an tichhia a, Ka theipui kûng an ei kawlh, A pil an khel fai a, an ṭînsan a, A zârte chu a ro zo ta. Nulain a pasal hual thi a sûn angin Saiip puan sinin ṭap rawh u. Lalpa ina hlan tûr uain te, thlai te a awm ta lo, Lalpa rawngbâwltu puithiamte pawh an lungngai zo ta. Lo a chhe zo va, lei a ro vek a, Buh a kawlh zo ta. Uain a hâw ta lo va, hriak pawh a thar ta hek lo. Lo nei mite u, lungngai ula, grep enkawltute u, ṭap rawh u, In lovah huit leh barli seng tûr a awm ta lo. Grep hrui a vuai a, theipui kûng a ro zo va, Theibuhfai te, tûm te, apple te, Lova thing tinrêng a ro zo ta, A ni, mite lâwmna pawh a chuai zo ta. Kan Pathian rawngbâwltute u, ṭap vak vak rawh u, Lo kal ula, saiip puan sinin Zankhuain mu rawh u, In Pathian inah buh leh uain hlan tûr a awm ta lo. Chaw nghei nân awm ni kham ula, Khâwmpui lian buatsaih rawh u. Upate leh ram chhûnga awm zawng zawng chu In Pathian, Lalpa inah ko khâwm ula, Lalpa chu au chiam rawh u. A va pawi êm! Lalpa ni chu a lo hnai ta, Engkimtitheian chhiatna a rawn thlen dâwn. Kan mit hmuh ngeiah ei tûr a awm ta lo, Kan Pathian ina hlim leh lâwmna chu a reh zo ta. Lei rovah thlai chu a chhe zo ta, Buh a ro avângin buh ina dah tûr a awm lo va, Chhêk inte pawh a ram. Ramsate an mangang a, ranrual an chiai a, Hnim peh tûr rêng an nei ta lo, Berâm rual pawhin an tuar hle. Aw Lalpa, ka au va che. Meiin phûla hnimte a kâng zo va, Lova thingte pawh a kâng ral ta si a. Ramsate pawhin tuihâlin an au che, Luikawrte a châr vek a, Phûl hnimte meiin a kâng zo ta si a. Zion-ah tawtawrâwt hâm ula, Ka tlâng thianghlimah inrâlrin nân hâm rawh u. Ram chhûnga awm zawng zawng khûr sela, Lalpa ni a lo hnai ta, a thleng ṭêp a ni. Chumi ni chu a dul ruih ang a, Chhûm a zîng ang a, khua a dur khup ang. Zîng khawvâra tlâng a lang ṭhut ang hian, Sipai rual lian tak, thiltithei tak an lo thawk ang. Chutiang thil chu tûn hmain a thleng ngai lo va, Tûn hnuah pawh a thleng tawh ngai lo vang. Ram kâng angin an hma zâwn an ei zêl a, An kal pelh hnu chu mei kan fai ang a ni, An kal hma chuan ram chu Eden huan ang a ni a, An pelh hnu chuan thlalêr ram ro ang a ni ta, Eng mah zuah an nei lo. Sakawr rual ang mai an ni, Chak takin indo sakawr angin an tlân. Indo tawlailîr tlân ri sung sung angin Tlângchhîpahte an kat sup sup. Meiin buhpâwl a kâng hluah hluah ang leh Indo tûra sipai intlar pût ang hi an ni. An hmabâka awmte chu an mangang a, An hmêl a ngui ruai mai. Mi huaisen angin hma an rawn sâwn a, Sipai angin bangah an lâwn sup sup a. Mahni hma zâwnah dîng takin an kal a, Tu mah an pêng buai lo. Innêk buai lovin mahni zâwnah zêl an kal a, Eng mahin an kawng a dâl zo lo. Khawpui chhûngah an thlâwk lût a, Kulh bangah an vâk sup sup a, Inah an lâwn a, rûkru angin tukverhahte an lût. An kalna lam apiangah lei a nghîng a, vân pawh a khûr, Ni leh thla a thim a, arsi a êng tawh lo. Lalpa chuan a sipai rual thu a pe a, A hote chu chhiar sên rual an ni lo. A thu zâwmtute chu thiltithei tak an ni, Lalpa ni chu a ropui a, hlauhawm tak a ni, Tu nge dâwl zo vang? “Tûnah pawh,” tih hi Lalpa thuchhuak a ni, Simin ka lam lo hawi rawh u, Chaw ngheiin ṭap ula, chiau vawng vawng rawh u. In puan pawtthlêr lovin tihtakzetin inchhîr ula, Lalpa, in Pathian hnênah kîr leh rawh u; Ani chu khawngaihna ngah, lainatnaa khat, Thinnel tak leh hmangaihnaa khat a ni a; Thil ṭha lo thlentîr a hreh êm êm a ni. Lalpa, in Pathian chuan a khawngaih leh ang che u a, In lam a lo hawi ang a, A hnêna hlan tûr buh leh uain in neih theih nân mal a sâwm lo vang che u tih tu nge hria? Zion-ah tawtawrâwt hâm ula, Chaw nghei nân awmni kham rawh u, Khâwmpui lian buatsaih bawk ang che u. Mipui ko khâwm ula, pungkhâwmho chu thian thianghlim rawh u, Upate ko khâwm ula, Naupangte, hnute hne laite hruai khâwm rawh u. Moneitu chuan a pindan chhuahsan sela, Mo pawh a pindan ata lo chhuak rawh se. Lalpa chhiahhlawh puithiamte chu; Tempul hulhliap leh maichâm inkârah ṭap sela, “Aw Lalpa, i mite hi khawngaih la, I rochante hi hnam dang nuihzatbûr leh sawi nawmnaha an awm phal suh ang che; Engah nge chûng mite chuan, ‘Khawiah nge an Pathian chu?’ an tih ang le,” ti rawh se. Tichuan, Lalpa chuan a ram chu a rawn ngaihsak a, A mite pawh a khawngaih ta a. Lalpa chuan a mite chu heti hian a chhâng a: “Buh te, uain te, hriak te in kham khawpin ka pe ang che u, Hnam dangte ka hmuhsittîr tawh lo vang che u. Hmâr lam aṭanga rawn dotu che u chu Hla takah ka hnawh bosak ang che u a, Ram ruak, eng mah awm lohnaah ka kaltîr ang a, A hmasa pâwl chu khawchhak tuipuiah; A hnuhnûng pawl khawthlang tuifinriatah. An thi rim chu a nam vung vung ang. Nasa taka thil an tihchhiat avângin Anni pawh ka tichhe ve ang,” tiin. Aw leilung, hlau suh la, hlimin lâwm rawh, Lalpa chuan thil ropui tak a ti ta si a. Ramsate u, zâm suh u, ram rote chu hnimin a khat leh ta, Thingte pawh a rah tuar a, Theipui te, grep te a rah leh ta. Zion-a awmte u, hlim rawh u, Lalpa, in Pathianah chuan lâwm rawh u, Ruah hmasa chu a tâwk têin a pe che u a; Tûn hma ang khân in tân ruah hnuhnûng a sûrtîr kha. Hruihzâwlahte buh a khat ang a, Sâwrkhurte pawh uain leh hriakin a liam zawih zawih ang. Khau rualin a eichhiat vek kumte aiah Kum ṭhat kumte ka awmtîr leh ang. Khau puang, a rual ruala lo kal dûl dûlte kha Ka sipai rual, in hnêna ka rawn tirh an ni. Ei tûr in ngah ang a, in hnianghnâr ang, Tichuan, in zînga thil mak titu In Pathian, Lalpa hming chu in chawimawi ang. Ka mite chu an mualpho leh tawh ngai lo vang. “Israel-te zîngah ka chêng a, Lalpa, in Pathian chu ka ni, Pathian dang rêng an awm lo tih in hria ang, Ka mite chu an mualpho leh tawh ngai lo vang.” “Chumi hnuah chuan, Mi zawng zawng chungah ka thlarau ka leih ang a, In fanu in fapaten ka thu an hril ang. In upaten mumangah an mang ang a, In tlangvâlten inlârnate an hmu ang. Chûng ni-ah chuan ka chhiahhlawh a hmei a pa chungah Ka thlarau ka leih ang. Lei leh vânah chhinchhiahna mak tak tak ka lantîr ang a, Thisen te, mei te, meikhu ngun ngunte nên. Ni a thim ang a, thla pawh a sen khuih ang, Lalpa ni ropui leh râpthlâk tak a lo thlen hma chuan. Tu pawh Lalpa hming lam apiang chhandam an ni ang a, Zion tlâng leh Jerusalem-a mi ṭhenkhat chuan an pumpelh ang a, Ka mi thlante chu an him ang,” Lalpan a tih ang khân. “Ngai teh, a hun leh a ni ruatah chuan, Judai ram leh Jerusalem chan chu ka tiṭha leh ang a, Hnam zawng zawng ka ko khâwm ang a, Jehosafat ruamah ka hruai khâwm ang. Tah chuan an chungthu ka rêl ang a, Ka rochan, ka mi Israel-te chu Hnam dang zîngah an hnawt darh a, Ka ram chu an insem darh avângin. Ṭhum an vâwr a, ka mite an insem a, Mipa naupang nawhchizuar lei nân an hmang a, Hmeichhe naupang uain man atân an pe. An rui ta a. “Nangni, Tura leh Sidon khuaa awmte leh Filistia ram chhûnga awm zawng zawngte u, engtia mi tih nge in tum? Ka chungah phuba lâk in tum elo? In tum a nih zawngin na takin in chungah phuba ka la nghâl ang. Ka tangkarua leh rangkachak in la a, ka ro ṭha ṭha nên in tempulah in thiar lût a. An ram ata hla taka an awm theih nân Judai rama mite leh Jerusalem-a awmte chu Grik mite hnênah in hralh ta si a. Ngai teh u, anni chu in hralh chhuahna ram ata ka hruai chhuak ang a, an chunga in tih angin ka thungrûl ang che u. In fanu leh in fapate chu Judai rama mite hnênah ka hralh ang a, annin ram hla taka awm Seba mite hnênah an hralh ang,” Lalpan a ti. Hnamte zîngah hei hi puang rawh u, Indo tûrin inbuatsaih sela, Mi huaisente chu lo thawk rawh se, Indo mi zawng zawng lo hnai sela, rawn bei rawh se. In leilehna hmâwr zum chu khandaihah chher ula, In thei kûng hlawina chem kawm chu feiah siam rawh u, Mi chak lote pawhin, ‘Ka chak a ni,’ ti rawh se. Nangni ram chhehvêl hnam dang zawng zawngte u, Hmanhmawh takin lo kal ula, Pung khâwm rawh u. Tah chuan, aw Lalpa, i mi huaite rawn tîr ang che. Hnamte chu inrâlring sela, Jehosafat ruamah lo kal rawh se, Chutah chuan an vêla hnam dang zawng zawngte chu Ro ka rêlsak ang. An sual êm avângin favah ruai ula, Ât chhum vek rawh u, Sâwrkhur liam zawih zawiha uain an rap angin, Lo kal ula, rap hrep rawh u. Rorêlna ruamah mipui an tam mang e, Chutah chuan Lalpa ni a lo thleng thuai dâwn. Ni leh thla a thim ang a, Arsite pawh an êng tawh lo vang. Lalpa thâwm chu Zion aṭangin a lo ri hum hum ang a, Jerusalem aṭangin a aw a chhuah ang, Lei leh vân a nghîng ang a, Mahse, Lalpa chuan a mite a hum ang a, Israel-te tân kulhbîng a ni ang. Kei, Lalpa hi i Pathian ka ni a, Ka tlâng thianghlim Zion-ah ka chêng tih i hria ang, Jerusalem chu hmun thianghlim a ni tawh ang. Hnam dangten an hneh tawh ngai lo vang. Chutih hunah chuan tlângah grep a khat ang a, Mualahte pawh hnutetui a luang ang. Judai ram kawr zawng zawngah tui a luang ang a, Lalpa in aṭangin tuihna a lo chhuak ang a, Sitim ruam a châwm ang. Judai ram mite chungah râwng takin an che a, Pawi khawih lo thisente an chhuah avângin Aigupta ram chu a chhe vek ang a, Edom ram pawh thlalêr ram ro a ni ang. Judai ram erawh chu an luah kumkhua ang a, Jerusalem pawh an luah reng ang. An thisen phuba ka la ang a, Thil tisual chu ka zuah lo vang, Lalpa chu Zion-ah a awm si a. Juda lal Uzia te, Israel lal Joasa fapa Jeroboama te lal lai, lîrnghîn hma kum hnihah khân, Tekoa berâm vêngtu Amosa chuan Israel-te chungchâng inlârna hetiang hian a hmu: ‘Zion tlâng aṭangin Lalpa chu ring takin a au va, Jerusalem khua aṭangin a lo ri hum hum a, Berâm tlatna hmuna hnimhringte chu a ro zo va, Karmel tlângchhîpa hnimte pawh a ro zo ta,’ a ti a. Lalpa chuan heti hian a ti: “Damaska mite chu chin tâwk nei lovin an sual a, Ka hrem ngei ngei dâwn a ni. Gilead mite chu buhvuakna thîrkut zumin An hai hrep avângin. An lal Hazaela inah mei ka chhuah ang a, Ben-hadada in chu a kâng chhe vek ang. Damaska khaw kulh kawngkhâr chu ka tichhia ang a, Aven ruama chêngte chu ka tiboral ang a, Beth-edena lalte pawh an boral bawk ang, Suria mite chu Kir ramah salah an hruai ang,” Lalpa chuan a ti. Lalpa chuan heti hian a ti: “Gaza mite chu chin tâwk nei lovin an sual a, Ka hrem ngei ngei dâwn a ni. An mi mante Edom hnênah salah an hralh ṭhîn a. Tichuan, Gaza khaw kulh bang chungah mei ka chhuah ang a, An lal inte chu a kâng ral ang. Asdod mite chu ka tiboral ang, Askelon rorêltute nên, Ekron mite chungah kut ka thlâk ang a, Filistia mi la awm chhunte chu an boral ang,” Lalpa P athian chuan a ti. Lalpa chuan heti hian a ti: “Tura mite chu chin tâwk nei lovin an sual a, Ka hrem ngei ngei dâwn a ni. An mi mante Edom hnênah salah an hralh a, Unau thuthlung an bawhchhia a ni. Chuvângin, Tura khaw kulh bang chungah mei ka chhuah ang a, An lal inte a kâng ral vek ang.” Lalpa chuan heti hian a ti: “Edom mite chu chin tâwk nei lovin an sual a, Ka hrem ngei ngei dâwn a ni. A unaupa khandaih nên a ûm a, Lainatna rêng nei lovin a sawisa a. A thin a ur êm a, a thinrim rêng a reh thei lo. Chuvângin, Teman khuaah mei ka chhuah ang a, Bozra khuaa lal inte chu a kâng ral ang.” Lalpa chuan heti hian a ti: “Amon mite chu chin tâwk nei lovin an sual a, Ka hrem ngei ngei dâwn a ni. An ram zauh duhin Gilead hmeichhe nau pai pumte lam an taithlêrsak a, Chuvângin, Raba khaw kulh chu ka hâl ang a, An lal inte chu a kâng ral ang. A kâng ri chu indo nia au thâwm leh Thlipui tleh vut vut ang hi a ni ang. An lal chu, an miliante nên, salah an hruai ang,” Lalpa chuan a ti. Lalpa chuan heti hian a ti: “Moab mite chu chin tâwknei lovin an sual a, Ka hrem ngei ngei dâwn a ni, Edom lal ruh ro chu vâp vek khawpa an hâl avângin. Chuvângin, Moab ramah mei ka chhuah ang a, Keriot khuaa lal inte a kâng ral ang a, Indona tawtawrâwt ri leh sipai au tuar tuar zîngah Moab mite chu an thi ang. An rorêltu chu ka tiboral ang a, An milian zawng zawng pawh ka that vek ang,” Lalpa chuan a ti. Lalpa chuan heti hian a ti: “Juda-te chu chin tâwk nei lovin an sual a, Ka hrem ngei ngei dâwn a ni. Lalpa Dân an ngainêp a, A thupêkte an zâwm hek lo, An pate biak ṭhin milem pathian khân a hruai bo ta a. Chuvângin, Judai ramah mei ka chhuah ang a, Jerusalem-a lal inte chu a kâng ral ang.” Lalpa chuan heti hian a ti: “Israel-te chu chin tâwk nei lovin an sual a, Ka hrem ngei ngei dâwn a ni. Thamna lain mi dikte an tuartîr a, Pheikhawk bun khat lek avângin mi retheite an hralh a. Lei vaivutah retheite lu an rapbet a, An kawng ata pachhiate an nam kiang a, Pafain an chhiahhlawh nula an zen ṭâwm a, Ka hming thianghlim an tibawrhbâng a ni. Maichâm awmna apiangah, puan dahkham chungahte an mu a, An pathian ina lei an chawitîr chuan zu an lei a, an in a. Sidar thing anga sâng, sasua anga khauh, Amor-ho chu an hmaah chung lama an rah leh hnuai lama an zung lamin Tihchhiatsak a nih kha le! Amor-ho ram luah tûrin Aigupta ram aṭangin ka hruai chhuak che u a, Thlalêrah kum sawmli chhûng ka kaihruai che u a, Zâwlnei atân in fate zînga mi leh Nazarit mi atân in tlangvâlte zînga mi ka ruat a, Chutiang chuan ka enkawl che u a ni lâwm ni?” Lalpa thuchhuak chuan a ti. “Mahse, Nazarit mite chu zu in pe a, Zâwlneite pawh thu hril in khap a. Chuvângin, buhphal phur vûm thûr tawlailîr chîk ṭuah ṭuah angin Ka tihrehawm ang che u. Tlân chak pawh a him lo vang a, âwmkhauh pawhin a chakna a chhawr thei lo vang. Mi huaisen pawh a inhum thei lo vang. Thalkâp mi pawh an ṭang zo lo vang a, Mi ṭuanṭha pawh a tlân hman lo vang, Sakawr chuang mi pawh a inhum thei lo vang. Chumi ni chuan râlhrât zînga huai berte pawh Ruakin an tlânchhia ang,” Tih hi Lalpa thuchhuak a ni. “Nangni, Aigupta ram ata ka koh chhuah, Israel chhûngte u, Lalpa sawisêlna che u hi ngaithla teh u. Khawvêla chhûngkua zawng zawng zîngah Nangni chauh hi ka hriat in ni asin, Chuvângin, in suahsualna zawng zawngah Ka hrem ngei ngei ang che u,” a ti a. An thurual zet loh chuan Mi pahnih an zin dûn ngai em ni? Sa hauh nei lovin ngawah Sakeibaknei a rûm ngai em ni? Sa seh nei lovin pûkah Sakeibaknei vânglai a rûm dâwn em ni? Leia thang kam tawktarh awm lovah Sava a âwk ngai em ni? Eng mah âwk lovin lei ata Thang chu a per dâwn em ni? Râlkhêl tawtawrâwt khawpuia a rîk chuan Mi tinin an hlau dâwn lâwm ni? Lalpa thu lovin khawpuiah thil ṭha lo a thleng ngai em ni? A rawngbâwltu zâwlneite hnêna a thiltum hrilh lovin Lalpa P athian chuan eng mah a ti ngai lo. Sakeibaknei a rûm a, tu nge hlau lo vang? Lalpa P athian chuan thu a sawi a, Tu nge puang lo ngam ang? “Asdod khaw lal inahte puang ula, Aigupta lal inahte pawh hril rawh u, Samari tlângah pung khâwm ula, Chuta an buai nuai nuaizia leh An intihduhdah nasatzia chu en teh u! Thil tih âwm leh âwm lo dâwn nachâng an hre tawh lo,” Lalpa thuchhuak chuan a ti. Mi thil an chhuhsak leh an lâksakte chu, An in ṭha pui puiah an chhêk khâwm thêr thûr mai. Chuvângin, Lalpa P athian chuan heti hian a ti: “Ram chu hmêlmain an rawn hual ang a, Kulhte chu an rawn tichim ang a, In lal inte pawh an rawk ang.” Lalpa chuan heti hian a ti: “Berâmpuin sakeibaknei ei lai A beng them leh a keṭhiah pahnih tal A chhuhsak hrâm angin, Samari rama Israel-te chu An khum them leh a ke bung them chauh nên Chhan chhuah an ni ang. Ngaithla ula, Lalpa chhûngte hrilh rawh u,” Lalpa P athian, Engkim Pathian thuchhuak chuan a ti. “An bawhchhiatna avânga Israel-te ka hrem ni chuan Bethel-a maichâmte chu ka tichim ang a, Maichâm kite pawh ka titliak ang a, Leiah a tla rem rum ang. An thlasik in leh nipui inte ka tichhia ang a, Sainghova chei inte chu a chhe rem rum ang a, In lian pui puite pawh a chim vek ang,” Lalpa thuchhuak chuan a ti. Nangni Samari nuho Basan bâwng anga thau, Retheite nêkchêpa, pachhiate rapbeta, ‘In tûr han la rawh,’ pasalte hnêna ti ṭhînte u, He thu hi ngaithla teh u. Lalpa P athian Thianghlima chuan heti hian a ti: “Ngai teh u, nite a lo thleng mêk a ni, Thil kawmin an hnûk ang che u a, Nghakuaiin an kai ang che u. Kulh bang pawp hnai berah An hruai chhuak ang che u, Hermon-ah an khalh khâwm ang che u,” Lalpa thuchhuak chuan a ti. “Bethel-ah lo kal ula, bawhchhe leh ta che u le! Gilgal-ah phei chuan bawhchhe zual sauh ula, Tûk tin inthawi ziah ula, Ni thum danah sâwma pakhat pe ula, Lâwmthu sawi nân chhang hlân ula, Mahni tâna in thilpêkte pawh uanpui ta che u! Aw Israel-te u, chûng chu in tih châk zâwng tak a ni si a!” Tih hi Lalpa P athian thuchhuak a ni. “In khawpuiahte ei tûr in tlachham a, Hmun tinah ṭâm ka tlâktîr a, Mahse, ka lam in lo hawi duh chuang si lo,” Lalpa thuchhuak chuan a ti. “Buh seng hun thla thum vêlah ruahtui ka tikang a, Khaw khatah ruah ka sûrtîr a, Khaw dangah ka sûrtîr lo va, Hmun khata ruah a sûr laiin Hmun dang a ro va. Tui in tûr zawngin khaw hrang hrang an pan ṭâwk ṭâwk a, Mahse, duh tâwk an hmu si lo. Chutichung pawhin ka lam an lo hawi duh chuang lo,” Lalpa thuchhuak chuan a ti. “In thlaite thli lum ka chhêmtîr a, Ka tiṭâm zo va, in huan te, in grep te ka tiram a, In theipui te, in oliv-te khauvin a ei zo va, Chuti chung pawhin ka lam in lo hawi duh chuang si lo,” Tih hi Lalpa thuchhuak a ni. “Aigupta rama hripui ang kha in zîngah ka lêntîr a, In tlangvâlte khandaihin ka that a, In sakawrte ka mansak che u a, In bûkah, tuar har khawpa rimchhia Mi ruang ka awmtîr ṭeuh va. Chuti chung pawhin ka lam in lo hawi duh chuang si lo,” Tih hi Lalpa thuchhuak a ni. “Sodom leh Gomora khua ka hrem ang khân, In zînga mi ṭhenkhat ka hrem a, Meipui ata thingthu pawh chhuah ang in ni, Chuti chung pawhin ka lam in lo hawi duh chuang si lo,” Tih hi Lalpa thuchhuak a ni. “Chuvângin, aw Israel, i chungah thil ṭha lo ka ti dâwn, Ka tih ngei dâwn avângin Aw Israel, I Pathian tâwk tûrin inpeih rawh.” Pathian chuan tlângte a din a, Thlîte a siam a, A duhzâwng chu mihring a hriattîr a, Chhûn leh zân a siam a, Lei pum chungah ro a rêl a ni, A hming chu Lalpa, Engkim Pathian a ni. “Israel mite u, in tâna ka ṭah hla hi ngaithla teh u: Nula Israel chu a tlu a, A tho leh tawh rua lo, A ram ngeiah a tlu, tu khaw ngaihsak lohvin, Tu man an kaitho lo vang.” Lalpa P athian chuan heti hian a ti: “Indo tûra Israel khawpui aṭanga Mi sângkhat thawk chhuak zîngah za chauh an dam ang a, Mi za thawk chhuak thei zîngah sâwm chauh an dam ang.” Israel mite hnênah Lalpa chuan heti hian a ti: “Min zawng ula; tichuan, in nung ang. Bethel-ah mi zawng suh u, Gilgal-ah kal hek suh u, Beer-seba pawh pan suh u. Gilgal mite chu salah an tâng dâwn a, Bethel pawhin hlutna a nei tawh lo vang.” Lalpa zawng ula; tichuan, in nung ang, Chutilo zawng, Josefa chhûngte chungah Mei angin a lo thawk dah ang e, Bethel mite a kâng ral vek ang a, Tu man an ṭhelh thei lo vang. Nangni hleih nei taka rorêla, Thu dik hnâwl ṭhînte u, In châk lo vang! Siruk leh chhohreivûng siama, Thim chu zîng ênga chantîra, Chhûn êng chu zân thima chantîra, Tuifinriat tuite kova, Lei chunga sûrtîrtu hi A hming chu Lalpa a ni. Ani chuan mi chakte a titlâwm thut thut a, An kulhte a tichhe mai ṭhîn. Rorêlna hmuna dik taka rêltu chu an hua a, Thu dik sawi ṭhîn chu an ngei. Chuvângin, mi retheite in rapbet a, An buhte in lâksak a, Lungchherin in lian pui pui in sa a, Mahse, in luah lo vang. Grep huan ṭha tak tak in siam a, Mahse, a tui, uain chu in in lo vang. In bawhchhiat nasatzia te, In sualzia te ka hria, Mi dik in tiduhdah a, Thamna in la a, Pachhiate ro dik takin in rêlsak duh lo. Mi fing tân ngawih mai hun a ni e, Hun ṭha lo tak a nih hi! Thil sual ti lovin thilṭha tih tum ula, Tichuan, in nung ang, ‘ Lalpa, Engkim Pathian chu kan hnênah a awm,’ In tih ṭhin ang hian in hnênah a awm tak tak ang. Sual chu hua ula, thil ṭha chu ngaina rawh u, Dik takin ro rêl ṭhîn ula, Tichuan, Lalpa, Engkim Pathian chuan, Josefa thlah la damte chu a khawngaih mial mahna. Lalpa, Engkim Pathian, Lalpa chuan heti hian a ti: “Kawtthlêr tinah an ṭap chuah chuah ang a, Mualzâwlahte an chiau vak vak ang. Loneitute ṭap tûrin an pun ang a, Ṭah thiamte an ruai ang. Grep huan tinah an ṭap tlawk tlawk ang a, Anni chu ka hrem dâwn a ni,” Lalpa chuan a ti. “Nangni, Lalpa nî lo thlen nghâkhlelte u, In tân a va râpthlâk dâwn êm! Lalpa ni chu engah nge in nghahhlelh le? Êng ni lovin thim a ni dâwn asin! Sakeibaknei laka tlân chhuaka, Savawm tâwk ta emaw, Mahni ina hawa, bang han khawiha, Rûlin a lo chuk tâk ang hi a ni ang. Lalpa ni chu êng ni lovin thim a ni zâwk dâwn, Hlimna nî ni lovin lungngaihna nî a ni zâwk ang. In kûtte hian mi ngei a, ka ning ta e, In khâwmpui urhsûnte ka lâwm hek lo. Hâlral thilhlan leh thlai tharte rawn hlân mah ula, Ka pawm lo vang. Remna thil hlan atâna in ran châwm thau in hlante pawh Ka ngaisâng lo vang. In zai a bengchheng êm e, titâwp rawh u, In ṭingṭang ri pawh ka ngaithla peih lo. Rorêlna dik chu lui angin luang zâwk sela, Dikna pawh luipui kang lo angin luang rawh se. Israel chhûngte u, kum sawmli chhûng Thlalêrah khân inthawina leh thilhlan; Ka hnêna in rawn hlan a ngai em ni? In kutchhuak, in lal Sakut lim in bia a, In arsi pathian milem Kaiuan chu in biak tâk hi. Chuvângin, Damaska piah lamah Salah ka hruai ang che u,” Engkim Pathian, a hming Lalpa chuan a ti. Zion tlânga nuamti taka awm der dera, Samari tlânga thawveng taka awm veng vengte, Hnam azawnga hnam ropui Israel, An milian, mipuiin an pan ṭhinte chan tûr chu A va râpthlâk dâwn êm! Kalne khuaah kal ula, hawi vêl rawh u, Hamat khaw ropuiah kal leh ula, Filistia khua Gath-ah chhuk thla teh u, Judai leh Israel ram aiin an ram chu a ṭha zâwk em ni? Zauh pawh a zau zâwk em ni? Hun ṭha lo, lo thleng mai tûr lakah hian I inchhungêng vei a, I awm dân hian i chhiatna tûr a tihnai sauh a ni. Saingho khuma mua, Ṭhutna dûpa ṭhu zâla, Berâm rual zînga a no thlan chhuah sa leh Bâwngno chum sa ei ṭhînte u, Perhkhuang nêna hla lênglâwng saa, Davida anga phuah belh zêlte u, Zu no lian pui pui dawma, Hriak rimtui inchulha, Jakoba thlahte vânduaina pawi tihpui hauh si lote u, In chan tûr chu a va râpthlâk êm! Chuvângin, sala hruai hmasak ber in ni ang a, Nuam tâwla in ri bûng bûng chu a tâwp ang. Engkim Lalpa chuan a hming chhâlin heti hian a ti: “Jakob-ho chapona ka ten a, An in ṭha pui puite ka ngaimawh a ni. An khawpui chu a chhûnga awm nên ka mantîr vek ang,” Tih hi Lalpa, Engkim Pathian thuchhuak a ni. Thi bâng in pakhatah mi sâwm tawm khâwm mah se, An thi tho vang. Laina ruang hlâwmtuin ruang a rawn lâk dâwnin in chhûngrila awm hnênah, ‘Awm a la awm em?’ a ti ang a. Ani chuan, ‘Awm tawh lo,’ a lo ti ang. ‘Ngawi hlauh rawh, Lalpa hming kan lam palh ang e,’ a ti ang. Ngai teh, Lalpa chuan thu a pe a, “In ropuite chu a chhe rem rum ang a, In tête pawh a sawm vek ang. Lungpui hmunah sakawr a tlân ngai em ni? Chutah chuan bâwngin lei a let ngai em ni? Nangni zawng, in rorêl chu tûr ang a ni a, Dikna ṭhatna chu thil khaah in chantîr a, Lo-debar khaw tê tak tê chu in la a, in chhuang hle a, ‘Karnaim khua pawh la thei khawpin kan chak,’ in ti a; Ngai teh u, Israel chhûngte u, nangmahni bei tûrin, Hnam dang ka rawn tîr dâwn, Hmâr lam Hamat aṭanga Araba phai Thlengin an tiduhdah ang che u,” Lalpa, Engkim Pathian thuchhuak chuan a ti. Lalpa P athian chuan hei hi mi hmuhtîr a: Ngai teh, hnim ṭo hmasa, lal chanpual an ah zawha Hnim a chawr ṭan leh laiin khau rual a tihpun chu ka hmu a. Ram chhûnga hnim an ei zawh hnu chuan, “Aw Lalpa P athian, ngaidam teh, Jakoba chu engtin nge a din chhuah zawh ang, Amah lah a nêp hle si a?” tiin ka ngên a. Lalpa chuan a khawngaih ta êm êm a, “A nih leh chu thil chu thlenglo vang hmiang,” a ti a. Lalpa P athian chuan hei hi mi hmuhtîr leh a: Ngai teh, Lalpa P athian chuan a mite hrem nân mei a ko va; Tuithûkpui chu a kâng ral a, Ram pawh a kâng ṭan ta a. Kei chuan, “Lalpa P athian, titâwp teh, Jakoba chu engtin nge a din chhuah theih ang, Amah lah a nêp hle si a,” tiin ka ngên a. Lalpa P athian chuan a khawngaih ta êm êm a, “A nih leh chu thil pawh chu thleng lo vang hmiang,” a ti a. Lalpa chuan hei hi mi hmuhtîr leh a: Ngai teh, bang ngîl tak bulah a ding a, sahal a khai a. Lalpa chuan ka hnênah, ‘Amosa, eng nge i hmuh?” a ti a. Kei chuan, “Sahâl khai,” ka ti a. Lalpa chuan: “En teh, ka mi Israel-te en dik nân Sahal ka khai ta a ni, Ka ngaizam dâwn tawh lo. Isaka hmunsângte chu tihram a ni ang a, Israel Hmun Thianghlimte chu tihchhiat a ni ang. Jeroboama chhûngte lalna chu ka titâwp ang,” a ti a. Bethel puithiam Amazia chuan heti hian Israel lal Jeroboama chu a hrilh a: “Amosa hian Israel mite zîngah a sawichhe chiam che a, mipui a hmin zo dâwn. Amosa chuan heti hian a ti ṭhîn. ‘Jeroboama chu khandaiha thah a ni ang a, Israel-te chu an ram ata salah an hruai ang,’ tiin.” Tin, Amazia chuan Amosa hnênah, “Aw zâwlnei, kal la, Judai ramah tlân la, chutah chuan i ei hmuh nân thu va hril rawh. Bethel-ah hi chuan thu hril tawh suh. Lalin Pathian a biakna, hnam pum inthawina hmun a ni si a,” a ti a. Tichuan, Amosa chuan Amazia chu a chhâng a, “Ei zawn nâna zâwlnei ka ni ve lo, berâmvêngtu leh theipui enkawltu mai ka ni a. Mahse, Lalpa chuan ka berâm vêng lai min la a, ‘Kal la, ka mi Israel-te hnênah thu va hril rawh,’ ” min ti a ni. Tûnah Lalpa thu hi ngaithla teh, “Nangin, ‘Israel-te do zâwngin thu hril suh, Isaka thlahte demin thu puang hek suh,’ min ti a, Chuvângin, Lalpa chuan heti hian a ti: I nupui chu khawpuiah nawhchizuar a ni ang a, I fanu te, i fapate khandaihin an that ang. I hmunhma chu an insem darh vek ang a, Nang pawh hnam dang ramah i thi ang. Israel-te pawh an ram ata sala hruai bo an ni ngei ang,” a ti a. Lalpa P athian chuan hei hi mi hmuhtîr a: Ngai teh, nipui thei hmin ṭuah bâwma awm hi a lo ni. “Amosa, eng nge i hmuh?” a ti a. Kei chuan, “Nipui thei hmin ṭuah, bâwma awm,” ka ti a. Lalpa chuan ka hnênah, “Ka mi Israel-te tâwpna tûr chu a ṭuah ta, Ka pêl mai mai dâwn tawh lo,” a ti a. Lalpa P athian thuchhuak chuan heti hian a ti: “Chumi ni-ah chuan lal ina hlim taka zai ṭhînte chu Lungchhe takin an ṭap ang. Hmun tinah mitthi ruang a awm pheng phung ang a, Ngawi rengin an paih ang.” “Nangni, tlachhamte rapbeta, Ram chhûnga retheite ei zawh duh hialte u, Hei hi hre rawh u, ‘Thla thar kût ral thuai thuai se, Buh hralh a nghahhlelhawm mang e, Sabat ni ral thuai thuai sela, Chhangphut zawrh a châkawm mang e, Efa kan titê ang a, sekel kan tirit ang a, Bûkna dik lo kan hmang ang. Buh nawi ruh khâwm lam kan hralh ang a, Tangka chuan mi rethei kan lei ang a, Pheikhawk bun khatin pachhia kan lei ang,’ in ti thîn. Jakoba chhuan Lalpa chuan mahni inchhâlin thu a tiam a, A thil sual tih pakhat mah ka theihnghilh lo vang, Chuvângin, an ramah lîr ka nghîntîr ang a, A chhûnga awm zawng zawng pawh an mangang hle ang, Aigupta ram Nail luipui a liana a kâm leh ṭhîn angin, Ram pum chu a sângin a hniam ang. Ni ka tithim ang a, Chhûnah khua a thim vek ang. In kût nite chu invuina ni-ah ka chantîr ang a, In hlimna hlate chu khawhar hlaah, In za-in saiip puan ka ventîr ang che u a, In lu pawh ka tikawlh vek ang. Fapa mal sûn angin ka siam ang che u a, A tâwp thlengin a hrehawm tluanchhuak ang. Ngai teh, ni chu a lo thleng e, Chumi hun chuan ram chhûngah ṭâm ka tlâktîr dâwn, Tui leh chaw ṭâmin an ṭâm lo vang a, Lalpa thu ṭâmin an ṭâm ang. Lalpa thu hriat châkin chhak leh thlang, Chhim leh hmâr an fang ang a, An hmu zo chuang lo vang. Nula tlangvâl chak laite pawh Tuihâlin an chau vang. Samari khuaa milem betute, Dan khuaa pathian lem chibai bûktute leh Beer-seba milem pantute chu an tlu ang a, An tho leh tawh lo vang. Lalpa chu maichâm bula a ding ka hmu a, “Tempul ban chu a lêrah vaw vak la, A pumin nghîng sela, chim rawh se, A chhûnga awm zawng zawng delh sela, A thi bângte chu khandaihin ka tihlum ang a, Pakhat mah an tlân chhuak lo vang. Tu mahin an pumpelh hek lo vang. Seol thlengin kua hreuh chhuk mah sela, Chuta ta chu ka hnûk chhuak ang, Vânah khian lâwn chho mah sela, Chuta ta chu ka pawt thla ang. Karmel tlângchhîpah biru mah sela, Ka zawng chhuak ang a, ka man ang. Tuifinriat mawngah min bihrûksan pawhin, Chutah chuan rûlpui ka chuktîr ang. An hmêlmaten salah pawh hruai sela, Khandaihin ka sah hlumtîr ang a, An ṭhatna tûr ni lovin An chhiatna tûrin mit ka lên ang,” a ti a. Engkim Lalpa chuan, Lei hi a han khawih a, a lo tui ta a, A chhûnga awm zawng zawng chuan lu an sûn ta a, Aigupta ram Nail luipui a lian a, A kâm leh ṭhîn angin, Ram pawh chu a sângin a hniam a. Ani chuan vânah khian chênna tûr in a sa a, Vân kûmkulh chu leiah a nghat. Tuifinriat tuite a ko va, leiah a sûrtîr a, A hming chu Lalpa a ni. “Aigupta ram aṭanga Israel-te hruai chhuaktu ka ni lâwm ni?” Lalpa thuchhuak chuan a ti. “Kaftor ram aṭangin Filistia mite ka la chhuak a, Suria mite pawh Kir ram aṭanga ka hruai chhuah an ni. Ngai teh, Lalpa mit chu ram sual chungah a fu a, Lei ata ka tiboral ang. Jakoba chhûngte erawh chu ka tichhe vek lo vang,” Tih hi Lalpa thuchhuak a ni. “Ngai teh, thu ka pe ang a, Chhihri-a buh an hrîkin lungtê a tla tel ve lo angin, Ka mi Israel-te chu hnam tin zîngah ka hri ang a, Mi sual zawng zawng chu khandaihin ka that ang a, Chûng mite chuan, ‘Thil ṭha lo kan tawng lo vang a, Thil ṭha lovin min tibuai hek lo vang,’ an ti ṭhîn. “Chumi ni-ah chuan Davida ram tluchhe tawh chu Ka tungding leh ang. A chhe laite pawh ka thawm ang a, Tûn hmaa mi ang khân ka din thar leh ang. Edom ram la bângte an nei leh ang, Ka hming lam ṭhîn hnam zawng zawngte nên.” Hêng thil titu Lalpa thuchhuak chuan a ti. “Ngai teh, nîte a lo thleng e,” Tih hi Lalpa thuchhuak a ni: “Leileh hun thlengin buh an la seng ang a, A phun leh hun thlengin grep an la sâwr ang Tlâng aṭang te chuan uain thlum a luang chhuak ang a, Mualah te chuan a luang dûl dûl ang. Ka mi, Israel, sala tângte chu Ka hruai kîr leh ang a, An khaw ramte an din leh ang a, an luah leh ang. Grep-te an phun ang a, A uain an in ang a, Huante an siam ang a, Thlai tharte an ei bawk ang. Anmahni ram ngeiah ka awmtîr ang a, Anmahni ka pêk ram ata chu tu man an la chhuak tawh lo vang,” In Pathian, Lalpa chuan a ti. Obadia inlârna hmuh. Edom chungchângah Lalpa chuan heti hian a ti: Lalpan hnamte hnênah palai a tîr a, A thuchah chu kan lo hria, “Tho teh u, Edom do tûrin i thawk chhuak ang,” tiin. “Ngai teh, hnamte zîngah ka titlâwm ang che a, An hmusit ang che. Lungpui kulh chhûngah i awm a, Tlângchhîpah i chêng a, ‘Tu-in nge min tichhe thei ang?’ i ti rilru a. I chapopui hian a bum che a ni. Mu anga sâng taka thlâwkin, Arsi zîngah bu khuar mah la, Chuta ta chu ka la thla ang che,” Tih hi Lalpa thuchhuak a ni. Zâna rûkru leh suamhmang lo kalten Lâk chin tâwk an nei a, Grep lotute pawhin lawh hmaih tâwk an nei ṭhîn. Nang erawh chu an lâksak vek ang che. Esauva chu an va rawk nasa êm; A ro thuhrûkte pawh an dap chhuak e. I thuthlunpuite chuan an bum che a, I ram ata an ûm chhuak che, Râlmuang taka i awmpuite leh i ṭhian rinte chuan I awh nân thang an kam a, An ei chhia che, Chu chu i hre si lo. “Chûng ni-ah chuan Edom rama mi fing te, Esauva tlânga mi thiamte ka tiboral ang,” Lalpa thuchhuak chuan a ti. Aw, Teman, i mi huaite an zâm ang a, Tichuan, Esauva tlânga mite chu an that vek ang. I unaupa, Jakoba chu tharum thawhin i bei a, Mualpho takin i la awm ang a, I chhiat phah ang. Hnam dangten kulh bang hlun an chhut chhiat ni khân, I inthiarfihlîm a, Hmêlmaten Jerusalem sum an lâk an insem ni khân, Tel ve ang i ni. I unauten vânduaina an tawh lai khân diriam tûr i ni lo asin, Juda-ten chhiat an tawh khân lâwm tûr i ni bawk lo va. Manganna an tawh khân uankhum tûr i ni hek lo. Ka miten vânduaina an tawh lai denchhenin i luhkhung tûr a ni lo va, An mangan khân dichim tûr i ni lo, Chhiat an tawh khân an neih la ve tûr i ni hek lo. Râltlân danga pêngṭhuama ding tûr i ni lo va, An mangan ni khân la damte man tûr i ni hek lo. “Hnam tin chunga Lalpa rorêlna ni a hnai ta e, Edom, i tih angin i chungah tih a ni ang, I thiltih chu i lu chungah a la tla ang. Ka tlâng thianghlima chhiatna no, ka mite in ang kha, Hnam zawng zawngin an in ve ang. An in fai kêlh ang a, Piang lo ang hlauh an ni ang.” “Zion tlângah tlan chhuahte chu an awm ang a, Hmun Thianghlim a ni ang. Jakoba chhûngte chuan an ram ngai kha an nei leh ang. Jakoba chhûngte chu mei an ni a, Josefa chhûngte pawh meialh an ni. Esauva chhûngte erawh chu buhpâwl an ni a, Esauva chhûngte chu an kâng ang a, An ral vek ang, dam chhuak an awm lo vang,” Tiin Lalpan a sawi e. Judai ram tlâng thlang lam zâwla awmte chuan Filistia ram an nei ang a, Israel chuan Efraim leh Samaria ram a nei ngei ang, Benjamin-ho pawhin Gilead ram an nei ang. Israel mi, hmâr lama saltângte an lo kîr ang a, Foiniki aṭanga Zarefat thlengin an rawn la ang, Jerusalem mi, Sefarada saltângte chuan chhim lam ram khawpuite an rawn la ang. Hnehtute chu Zion tlângah an chho vang a, Edom ramah ro an rêl ang. Ram chu Lalpa ram a ni si a. Lalpa thu chu Amitaia fapa Jona hnênah a lo thleng a. “Tho la, khawpui ropui tak, Ninevi-ah chuan kal la, an sualna chuan ka hma a lo thleng ta tih hrilh rawh,” tiin. Jona chu a tho va, Lalpa tlân bosan tumin Tarsis lam a pan ta a. Joppa khuaah a chhuk a, Tarsis pan tûr lawng a hmu a, chuan man a pe a, Lalpa tlân bosan tumin Tarsis-a kal tûrte zîngah lawngah chuan a lût a. Lalpa chuan tuifinriatah thlipui na tak a tlehtîr a, thli a nat êm avângin lawng chu a keh dâwn ta a. Lawngpute chuan an hlau va, mahni pathian an au ta ṭheuh va. Lawng tizâng tûrin bungruate chu tuiah an paih a. Jona erawh chu lawng pindan chhûngrilah a lût thla a, tah chuan tui takin a muhîl a. Lawng hotupa chu a hnênah a lo kal a, “Engtiziaa lo muhîl reng nge i nih? Tho la, i Pathian au ve rawh, ani chuan kan boral loh nân min ngaihtuah mahna,” a ti a. An za chuan an inrâwn a, “Hawh u, he thil ṭha lo kan chunga lo thleng hi tu vâng nge tih hriat nân ṭhum i vâwr ang u,” an ti a. Tichuan, ṭhum an vâwr a, an ṭhumvâwr chu Jona chungah a tla ta a. Tichuan, Jona hnênah, “Kan chunga thil ṭha lo lo thleng hi tu vâng nge, khawngaih takin min hrilh teh; eng hna thawk mi nge i nih, khawi aṭanga lo kal nge i nih, khawii rama mi nge i nih, eng hnam nge i nih?” an ti a. Ani chuan an hnênah, “Hebrai mi ka ni a, tuifinriat leh khawmual siamtu, vân Pathian, Lalpa betu ka ni,” a ti a. Mite chuan an hlau lehzual a, a hnênah, “Eng pawi nge i khawih?” an ti a. Pathian tlân bosan tum a ni tih a sawi an lo hre tawh si a. Anni chuan a hnênah, “Tuifinriat fâwn a reh theih nân engtin nge kan tih ang che?” an ti a. Tuifinriat chu a fâwn nasa tawlh tawlh si a. Ani chuan, “Mi la kâng ula, tuifinriatah mi paih rawh u; tichuan, tui fâwn a reh mai ang. Keimah avângin he thlipui na tak hian a rawn nuai che u a ni tih ka hre reng a ni,” a ti a. Lawng mite chuan lawng chu vaukam thlenpui hrâm tuma theihtâwp an chhuah pawhin an thei lo, tuifinriat lah chu a hma aiin a fâwn nasa tawlh tawlh si a. Tichuan, Lalpa chu an au va, “Aw Lalpa, he mi nunna kan lâk avâng hian min tiboral lul suh ang che. Aw Lalpa, nangin ṭha i tih angin thil i ti ṭhîn a, pawi khawih lo thisen mawh hi kan chungah nghat suh ang che,” an ti a. Jona chu an la kâng a, tuifinriatah chuan an paih ta a; tuifinriat fâwn bulh bulh chu a reh ta a. Chûng mite chuan Lalpa chu an hlau ta êm êm a, a hnênah an inthawi a, thute an tiam ta a. Lalpa erawh chuan Jona dawlh tûr sangha lian pui a lo ruat diam a; tichuan, Jona chu sangha kawchhûngah chuan ni thum leh zân thum a awm a. Jona chu sangha kawchhûng aṭang chuan a Pathian, Lalpa hnênah heti hian a ṭawngṭai a: “Ka mangan tâwpah Lalpa ka ko va, Anin min chhâng a, Seol aṭangin ka au va, Nangin ka aw i lo hre ta. Tuifinriat mawng, a thûk laiah Nangin min paih lût a, Tuite chuan min khuh hlup hlup a, I tuifâwnte leh tui inchhawkte chuan min vûr ta. Kei chuan, ‘I hnên ata min hnawt chhuak a, I in thianghlim ka hmu dâwn tawh lo a nih hi,’ Ka lo ti a. Tuite chuan min chîm pil a, Ka vêlin tuithûkpui chuan min hual a, Tuifinriat hnimte chuan ka lu a phuar a. Tlâng innghahnaahte ka tla lût a, Lei hnuai khura tâng reng tûrin. Mahse, aw Lalpa, ka Pathian, Nangin khur thûk ata chu min la chhuak ta. Thi mai dâwna ka inhriat lai khân Lalpa chu ka hre reng a, Ka ṭawngṭaina chu i biak in thianghlimah I hnên a lo thleng ta. Eng mah ni lo milem betute chu I lakah an rinawm ta lo va ni. Kei erawh chuan fak hla sa-in Inthawina ka hlân ang che, Ka thutiam chu ka hlen ang, Chhandamtu chu Lalpa a ni si a,” tiin. Tichuan, Lalpa chuan sangha chu thu a pe a, khawmualah Jona chu a law chhuak ta a. Lalpa thu chu Jona hnênah a lo thleng leh a. “Tho la, khaw ropui tak Ninevi-ah chuan va kal la, i hnêna ka sawi ang khân va hril rawh,” tiin. Tichuan, Jona chu a tho va, Lalpa thu angin Ninevi khuaah chuan a kal ta a. Ninevi chu khaw ropui tak, a zau lam pawh ni thum kal laia zau a ni a. Jona chuan ni khat kal chin khawpui chu a fang ṭan a, heti hian a au va: “Tûn aṭanga ni sawmli-ah Ninevi khua hi tihchhiat vek a ni dâwn,” a ti a. Ninevi mite chuan Pathian an ring ta a, chaw nghei nân awmni an kham a, a tê ber aṭanga a lian ber thlengin saiip puan an sin ta a. Ninevi lalin chu chu a lo hriat chuan a lalṭhutthlêng a thawhsan a, a lal thuam a hlîp a, saiip a sin a, vaivutah a ṭhu ta a. Ninevi khaw lal leh miliante chuan hetiang hian thupêk an chhuah a: “Mihring te, ran te, bâwng rual te, berâm rual te chuan eng mah an tem tûr a ni lo, an eiin an in tûr a ni hek lo. Mihring leh rante chuan saiip puan sin sela, ṭhahnemngai takin Lalpa au rawh se. Mi zawng zawngin an sual hawisan sela, râwng takin che tawh suh se. Kan boral loh nân Pathianin a thinur nasa tak la kîrin mi khawngaih lo vang tih tu nge hria?” tiin. Pathianin an awm dân chu a hmu a, thil sual tih an sim tih a hria a. Pathian chuan a khawngaih a, an chunga chhiatna thlentîr a tum chu a ṭhulh a, a ti ta lo va. Jona erawh chu a lâwm lo hle a, a thin a rim ta a. Lalpa hnênah hetiang hian a ṭawngṭai a: “Aw Lalpa, hetiang hian i ti leh si ang tih ka rama ka awm lai pawh khân ka sawi lo vem ni? Chuvâng alâwm Tarsis lamah ka tlân vat ni. Nang hi zawng khawngaihna leh lainatnaa khat, Pathian thinnel leh hmangaiha khat, chhiatna thlentîr duh lo i ni miau tih ka hre si a. Aw Lalpa, tûnah ka nun hi la mai teh, ka tân thih hi dam aiin a ṭha zâwk si a,” tiin. Lalpa chuan, “I thinrim hi dik i ti maw?” a ti a. Jona chu khawpui aṭang chuan a chhuak a, khawpui chhak lamah a ṭhu a. Tah chuan bûk a sa a, a hlim aṭang chuan khawpuiah thil eng nge lo thleng dâwn tih hmuh a tum a. Pathian, Lalpa chuan ûm a ṭotîr a, Jona lu zâr hliaha amah tihahdam tûrin a zâmtîr a. Chu ûm hlim avâng chuan Jona chu a lâwm ta hle a. A tûk khua a lo vâr chuan Pathianin sûlrûl a tîr a, ûm chu a ei a, a vuai ta vek a. Ni a lo chhuak a, Pathianin khawchhak thli lum a tlehtîr a, ni chuan Jona chhîpah a em a, luhaiin a chau ta a. Thih a dîl leh ta a, “Ka tân dam aiin thih a ṭha zâwk e,” tiin. Nimahsela, Pathian chuan Jona hnênah, “Ûm chungchânga i thinur hi a dik em ni?” a ti a. Ani chuan, “Thih ngam meuhva ka thinur hi ka tidik a ni,” a ti a. LALPA chuan a hnênah, “He ûm, i tuh pawh ni lo, i ṭhantîr pawh ni lo, zânkhat thil thu-a lo ṭhang liana, a tûka thi leh ta mai mah hi i lainat a. Ninevi khaw ropui takah hian mihring nuaikhat leh sînghnih lai, an ding leh vei pawh hre lo, ran rual tam tak nên an awm a, chûng chu ka khawngaih lo vang em ni?” a ti a. Judai rama Jothama te, Ahaja te, Hezekia te an lal laia Moreset khaw mi, Mika hnêna Lalpa thu lo thleng, Samaria leh Jerusalem chungchâng a hmuh chu: Mi zawng zawngte u, ngaithla ula, Lei leh a chhûnga awm zawng zawngte u, ngaihven rawh u; Lalpa P athian chuan a chênna hmun thianghlim aṭangin A dem che u a ni. En teh u, Lalpa chu a chênna aṭangin a lo kal a, A lo chhuk ang a, lei hmun sângte a rawn rap ang. Mei bula khawihnûn a tui ṭhîn ang hian Tlângte chu a hmaah chuan an tui ang a, Awih panga tui a luang thlûr sung angin Kawrte pawh a siam seng sung ang. Hêng zawng zawng hi Jakoba bawhchhiatna avâng leh, Israel chhûngte sualna avâng a ni. Jakoba bawhchhiatna bul chu khawiah nge? Samaria khuaah a ni lâwm ni? Judai ram milem biakna te hi eng nge a bul? Jerusalem khua a ni lâwm ni? Chuvângin, Samaria chu khaw ram, bawlhhlawh chhêkkhâwmna hmunah ka siam ang a, Chutah chuan grepte an chîng ang. A lungte chu kawrruamah ka lum bo vang a, A lungphûmte pawh a chhe vek ang. An pathian lim zawng zawng ka tikeh sawm ang a, An thilpêk khâwmte pawh ka hâlral ang. An milem zawng zawng ka tichhe vek ang a, An nawhchizawrh hlawh khâwl khâwm chu, Mi dangin nawhchizuar lei nân an hmansak ang. Hei vâng hian lungngaiin ka ṭap ang a, Saruak ke lâwngin ka vâk ruai ang, Sihal angin ka û ang a, Vanghâwngsei angin ka râk tuar tuar ang. An hliam tuar chu tihdam rual a ni lo, Judai ram a lo thleng ve ta a, Ka mite chênna Jerusalem kawngka hial a lo thlen tâk hi. Gath khua chu eng mah hrilh suh u, An hriatah ṭap rêng rêng suh u. Beth-le-Afra mite u, vaivut zîngah tâl rawh u. Safir hmuna chêngte u, saruak leh zak chungin kal zêl rawh u, Zanan hmuna chêngte chu an lo chhuak ngam lo va, Beth-ezel mite chu mangangin an rûm a, Chu chu in hriat chuan him rual a ni bîk lo tih in hria ang. Lalpa hnên ata chhiatna nasa takin Jerusalem kulhkawngka a lo thlen tâk hial avângin Maroth hmuna mite chuan Chhan chhuah hun nghâkhlel takin an thlîr. Nangni, Lakis khaw mite u, Sakawr tawlailîr rual chu buatsaih peih diam rawh u, Nangni hi Zion fanu sualna bul in ni: Israel-te bawhchhiatna chu nangmahni aṭanga chhuak a ni. Tichuan, Moreset-gath chu thlahna thilpêk pe ula, Akzib chhûngkua chu Israel lalte bumtu an ni. Moresa mite u, nangmahni hnehtu ka rawn tîr dâwn, Israel mi huaisente chu Adulam-a pûkahte an biru ang. Mulukawlh lu ang maiin in fa duh takte sûnin in lu ziat fai rawh u, Salah an hruaisak dâwn si che u a. An khumlaizâwla thil ṭha lo suangtuaha, Thil sual tih tumte chu an chung a pik e! Zînga khaw ên aṭangin a rem veleh thil ṭha lo an ti nghâl ṭhîn. Mi ram an awt a, an lâksak a, Inte an awt a, an chhuhsak zêl mai. An chhûngkuain an tiduhdah a, An rote nên tu mah an him lo. Chuvângin, Lalpa chuan heti hian a ti: “He mite chhiatna tûr hi ka ruahman ta, An pumpelh lo vang, chapo takin an lêng tawh lo vang, An chhiatna hun a thleng dâwn si a.” Chumi ni chuan, “Kan ralthûm a ni ta dêr mai, Kan mite ram chanpual chu an sem darh a, Kan lote min chhuhsak a, Min pe kîr lovin sala min mantute a sem ta,” Tih hi nangmah deusawh nân ṭah hlaah an sa ang. Chuvângin, Lalpa chuan pungkhâwmho zînga ram a sem hunah Chanvo i nei ve lo vang. ‘Ṭawng suh,’ tiin min ṭawng khum a, “Chûng thu chu sawi teivet suh, Pathian chuan min timualpho lo vang, Israel chhûngte hi ânchhe dawng em an nih? Lalpa Thlarau chuan dawhtheihna a tlachham ta em ni? Chûng thilte chu a ti duh ang maw? Dik taka khawsa ṭhînte hnênah Thil ṭha a thlen dâwn lâwm ni?” an ti a. Nimahsela, tûn maiah khân ka mite chu hmêlma angin in en a, Indona hmun aṭanga ngaihngam taka ina lo hâwte chu an puan leh kawr in hlihsak a. Ka mi, hmeichhiate chu, an in nuam tak ata in hnawt chhuak a, An fate hnêna malsâwmna ka pêkte chu in lâksak a. Tho ula, chhuak thuai rawh u, Hei hi in tân hmun râlmuang a ni lo, In khawlohna avângin he hmun hi tihchhiat vek a ni dâwn. Mi dawthei leh bumhmang vâk vêlte chuan, ‘Uain leh zu kan pe ṭeuh vang che u,’ ti se, Chutiang mite chu he mite zâwlnei ni âwm lek an ni. Aw Jakob-ho, in vaiin ka hruai khâwm ngei ngei ang che u, Israel mi, la damte pawh ka la khâwm ngei ang. Phûla berâm tla dual dual leh Huanga an lawi dum dum angin ka hruai khâwm ang a, Tichuan, mipui an sa mur mur tawh ang. Kawng hawngtu chuan hma a hruai ang a, an lût hum hum ang. An lal leh hotu, Lalpa chuan an hma a hruai ang a, Ani chu an innghahna a ni ang. Nangni Jakoba chhûngte chunga hotute leh Israel-te zînga rorêltute u, ngaithla rawh u, Rorêl dân dik hre tûr in ni lâwm ni? Nangni thil ṭha huaa, thil sual ngainate u, Ka mite vun in lip a, an ruha tî in hlehsak a, Ka mite chu in ei a, an vun in lip a, An ruh te in titliak a, thlêngah in chan darh a, Bêla chhum tûrin an sa in chan sawm a. Chuvângin, Lalpa chu au mah se a chhâng lo vang, Chutih hunah chuan an lakah a hmêl a thup zâwk ang. Thil sual an tih reng avângin. Ka mite hruaikawitu zâwlneite chungthu-ah Lalpa chuan heti hian a ti: Ei tûr petu hnênah chuan, ‘A muanawm e,’ an ti a, Ei tûr pe duh lotu chu ensanah an vau a. Tichuan, inlârna awm lo, zân thim a thleng ang a, Hrilhlâwkna awm lo thimin a nang ang che u. Zâwlneite nî a liam ang a, an tân hun thim a lo thleng ang. Hmutheitute an zak ang a, hrilhlâwktute an mualpho vang, Pathianin a chhân loh avângin an vaiin zakin an kun reng ang. Kei erawh chu Jakoba bawhchhiatna leh Israel sual puang chhuak tûrin Lalpa Thlarau chuan thiltihtheihna te, Dikna te leh chakna tein min thuam a. Jakoba leh Israel chhûngte chunga hotu leh rorêltu, Dikna ngainêpa, thu dik dâwta chantîr ṭhînte u, Hei hi hre rawh u: Zion chu thisenin in sa a, Jerusalem pawh suahsualnain. Rorêltute chuan thamna beiseiin ro an rêl a, Puithiamte pawhin hlawh ûmin an zirtîr a, Zâwlneiten sum beiseiin thu an puang a; Chuti chung chuan ngaihngam taka Lalpa ṭawng chhanin, ‘ Lalpa chu kan hnênah a awm a, Kan chungah chhiatna eng mah a thleng lo vang,’ an ti ṭhîn. Tichuan, nangmahni avângin Zion chu lo anga leh phut a ni ang a, Jerusalem pawh a chhe rem rum ang a, Tempul awmna tlâng chu ramhnuai a chang zo vang. Ni hnuhnûnghahte chuan Lalpa awmna tlâng chu Tlâng ropui ber a la ni ang a, Tlâng zawng zawng a khûm vek ang. Tah chuan mi tinrêng an lo kal duah duah ang. Hnam tam tak an lo kal ang a, heti hian an ti ang: ‘Hawh u, Lalpa tlângah i chho vang u, Jakoba Pathian in awmnaah chuan, A kawng min lo kawhhmuh ang a, A kawngah chuan kan kal ang,’ Zion aṭangin dân chu a lo chhuak ang a, Jerusalem aṭang hian Lalpa chuan thu a sawi ṭhîn a ni. Mi tin inkâr thu a rêl ang a, Hla taka hnam chak takte thu pawh a remsak ang. An khandaihte lei leh nân an chher ang a, An feite chu thei ṭang tanna kawmah an siam bawk ang. Hnam dang chungah hnam dangin hriam an lek tawh lo vang a, Indo dân pawh an zir tawh hauh lo vang. Mi tin mahni grep leh theipui hlimah an ṭhu ang a, Tu mah an hlau lo vang, Engkim Lalpa chuan a ti. Hnam tinin mahni pathian ṭheuh an bia ang a, A thu an zâwm ang, Keini pawhin kan Pathian Lalpa chu kan bia ang a, A thu kan zâwm kumkhua tawh ang. “Chumi ni chuan kebaite ka khâwm ang a, Saltângte leh ka hrem tuarte chu ka hruai khâwm ang,” Tih hi Lalpa thuchhuak a ni. Kebaite chu hnam tundinna bul atân ka hmang ang a, Hnawh darhte chu hnam chak takah ka siam ang. Lalpa chuan Zion tlângah chatuanin ro a rêlsak tawh ang. Aw nang, ran rual vênna in sâng, Zion fanute chênna tlâng, Tûn hmaa in ram chu in nei leh dâwn a, Jerusalem mite chu an ram pêk an ni leh dâwn. Engtizia nge i ṭah vak vak le? Lal i nei na nge? Remruatsaktu che chu a awm ta na nge? Hmeichhe nau vei angin natnain a man tâk che hi. Aw Zion fanu, hmeichhe nau vei angin tâl la, rûm rawh, Ramhnuaia awm tûrin khawpui chhuahsan rawh, Babulon-ah kal la, tah chuan i him ang. Chuta ṭang chuan Lalpa chuan i hmêlmate kut ata a tlan chhuak ang che. Hnam tam tak an pung khâwm ang a, an do rawn ang a, ‘Zion chu tibawrhbâng ila, i thlîr zui teh ang u,’ an ti. Mahse, Lalpa rilru an hmu lo va, A remruat an hrethiam hek lo, Ani chuan hruiha chîl tûr buhphal angin Anni chu a seng khâwm ta si a. Aw Zion fanu, tho la, anni chu rap hrep rawh, Thîr ki ka pe ang chia, dâr tinkâwm ka pe bawk ang che, Chu chuan mi tam tak i tisawm vek dâwn nia. Mi thil an lâksakte chu Lalpa hnênah rawn hlân ula, An sum leh pai te pawh lei pum pui neitu Lalpa hnênah hlân ang che u. Khawpui kulh chhûnga mite u, in sipaite kha khâwm rawh u, Min hual tâk hi, Israel hruaitu pawh a bekah tiangin an vuak dâwn hi. Nang Bethlehem, Efrata, Judai khawpui zîngah tê hle mah la, I chhûng aṭangin Israel rorêltu ka tân a lo chhuak dâwn si a, Ani chu hmasâng ata thlahtu bul aṭanga lo chhuak a ni. Nau veiin a hrin hma chu Lalpan a mite chu a hawisan ang, Tichuan, a unau la dam zawngte chu an lo kîr ang a, Israel zîngah an tel ang. Pathian Lalpa hming ropui tak leh Lalpa chakna chuan a mite chu A vêng ang a, a châwm ang, Lei pum puiah a ropui dâwn êm a, A mite chu thlamuang takin an awm ang. Hetiang hian remna a awm dâwn a ni: ‘Asuria-in kan ram an rawn rûn a, Kan kulhah te an lo luh pawhin vêngtu leh hruaitu tam tâwk nên ka lo do lêt ang. Asuria ram chu khandaihin an hneh ang a, Nimroda ram chuan khandaih hriam an tuar ang. Asuria-in kan ram an rûn a, ramri an lo thlen chuan, Ani chuan min chhanhim ang. Jakoba thlah la awm chhunte chu hnam tam tak tân Lalpa hnên aṭanga daifîm tla, Thlai châwmtu ruah ang an ni ang. Mihringah an innghat tawh lo vang a, Tu mah an rinchhan tawh lo vang. Jakoba thlah la awm chhunte chu Hnamte leh mi tam tak tân Ramsa zînga sakeibaknei ang an ni ang a, Berâm rual zînga sakeibaknei vânglai A kalna apianga berâm seha pawtsawm ṭhîn, Tu ma ngam loh ang hi an ni ang. I hmêlmate chungah i kut i lek ang a, I hmêlma zawng zawng chu tihboral an ni ang. Chumi ni chuan in sakawrte ka lâk bosak ang che u a, In tawlailîrte ka tichhia ang,’ Tih hi Lalpa thuchhuak a ni. ‘In ram chhûnga khawpuite ka tichhia ang a, In kulh zawng zawng ka tichim ang. In dawithiam ka tichhia ang a, Aienthiam in nei tawh lo vang. In milim te, lung serh in phun te ka tihchhiatsak ang che u a, In kutchhuakte chu chibai in bûk tawh lo vang. In pathiannu, Aseri lim in phunte chu Ka nam tlûksak ang che u. In khawpuite ka tichhe vek ang. Ka thu awih lo hnamte chungah chuan Thinur takin phuba ka la ang.’ Khai le, Lalpa thu hi lo ngaithla teh u, Aw Lalpa, i chungthu hi tlângte hrilh la, Mualten i thu sawi hi lo hre teh se. Tlângte u, Lalpan a mite a demna hi lo hria ula, Nangni, leilung nghahchhan hlunte u, ngaithla teh u. Lalpa chuan a mite a dem a, Israel-te chu a khing ta. “Ka mite u, engtin nge maw ka lo tih che u le? Eng kawngin nge ka tihhah che u, Min chhâng teh u. Aigupta ram ata ka hruai chhuak che u a, In saltânna ram ata ka tlan chhuak che u a, In hruaitu atân Mosia te, Arona te, Miriami te ka rawn tîr a nih kha, Aw, ka mite u, Moab lal Balaka thil ruahman kha hre reng ta che u, Beora fapa Balaama chhânnate pawh kha, Sitim aṭanga Gilgal in thlen thlenga In thil tawnte kha hre reng ula, Lalpa thil tih dikzia kha in hria ang.” Lalpa hmaah eng nên nge ka kal anga, Pathian Chungnungbera chu engtin nge chibai ka bûk ang? Bâwngno kum khat tling hâlral thilhlanah Ka hlân dâwn em ni ang? Berâm sâng tam tak leh hriak luipui sâng sâwmah te Lalpa chu a lâwm dâwn em ni? Ka sual avângin ka fa tîr chu ka hlân ang a, Ka bawhchhiat manah ka rîla rah chu ka hlân ang maw? Aw mihring, thil ṭha chu a entîr tawh che a ni lâwm ni? Lalpan a phût che chu eng nge ni? Dik taka thil tih te, khawngaihna ngainat te, Thuhnuairawlh taka i Pathian nêna lên dun te hi a ni lâwm ni? I hming ṭih hi a finthlâk a ni, Lalpa chuan khawpui chu ring takin a au va, ‘Khawpuia pung khâwm hnamte u, ngaithla rawh u,’ tiin. “Mi sualin an ina thil bawlhhlawh an chhêk khâwm te, Tehna dik lo an hmang te hi ka hua a ni. Bûk ngul dik lo leh bûklung dik lo hmangtute chu Ka hrem ngei dâwn a ni. In mi hausate nun a râwng hle a, Mipui pawh dawthei, mi bum chîng in ni. In sualnate avângin na takin ka hrem ang che u a, Ka ti ṭiau vek ang che u. In ei ang a, in tlai lo vang, in ril a ṭâm reng ang. In chhêk khâwm ang a, in hum chuang lo vang, In khâwl sa pawh khandaihin ka tichhe vek ang. Thlai in chîng ang a, a rah in seng lo vang, Oliv in her ang a, a hriak in ei lo vang, Grep in sâwr ang a, a uain in in chuang lo vang. Omria awm dân angin in awm a, Ahaba chhûngkaw sualna zawng zawng in ti ve a, An awm dân in lâk avângin khawpuia awm zawng zawng, Ka tiboral vek ang a, Mite nuihzatbûr leh hmuhsit in ni ang.” Ka mang a va ang êm! Nipui thei leh grep ṭo Zawngtu ang mai ka ni. Ka châk êm êm grep leh theipui hmin hmasa A awm tawh si lo. Leiah hian mi rinawm an awm tawh lo, Mi nun ngîl tu mah an awm tawh hek lo; Thisen chhuah tumin an inchâng ṭheuh va, Mahni unau pawh man tumin an inveh a. Thil sual tih an thiam hle a, Hruaituten thilpêk an phût a, Rorêltuten thamna an ngiat a, Thiltitheite an duh duhin an pâwt a, Chutiang ti tûr chuan an inlungrual a ni. An zînga mi ṭha ber pawh buar ang chauh a ni, Mi dik ber pawh hnimhlîngnei ang mai a ni. Anmahni vêngtuin a sawi lâwk tawh angin Hrem an tuar ni a lo hnai ta. Tûnah pawh an chiai ta hle a ni. I ṭhenawmte ring suh la, i ṭhian bulte chungah innghat suh, I nupui pawm lai ngei pawh eng mah hrilh suh. Fapain a pa a hmusit a, Fanuin a nu a pawisa lo va, Movin a pasala nu a do vang. Mihring hmêlma chu ama chhûngkaw zînga mi ngei a ni ang. Kei erawh chuan Lalpa ka thlîr a, Min chhandamtu Pathian chu ka nghâk reng ang, Ka Pathian chuan ka aw a ngaithla dâwn si a. Ka hmêlmapa, min dichim suh, Tlu mah ila ka tho leh dâwn, Thimah awm mah ila Lalpa chu ka êng a ni. Lalpa chungah thil sual ka tih avângin A zilhna tuar tûr rêng ka ni, Ka chungthu a rêl fel a, Ka dikna a târlan hma chu, Tichuan, êngah min la chhuak ang a, A felzia chu ka hmu ang. “Khawiah nge Lalpa, i Pathian chu?” titu ka hmêlma chuan a hmu ang a, a zak hle ang; Ka mit ngeiin a tlu lai ka hmu ang a, Tuallaia chirhdiak angin an rap ang. I kulh bangte din thar ni a lo thleng dâwn, Chumi ni chuan in ram china ruat chu tihzau a ni ang. Chumi ni chuan Asuria aṭang te, Aigupta khawpui aṭang te, Aigupta leh Eufretis lui inkâr aṭang te, Tuifinriat leh tuifinriat inkâr aṭang te, Tlângram hla tak tak aṭang te chuan i hnênah, I mite chu an lo kal ang. Ram luahtute thil sual tih mawh chu ramin a phur ang a, Ram chu a ṭiau vek ang. I mi, i ro chante chu, i tiangin vêng la, Ngaw hnuaia khawhar taka awmte chu Hnimhring hmunah hruai chhuak rawh. Tûn hma ang khân tlattîr ang che. Aigupta ram aṭanga in lo chhuah lai nite ang khân, Anni chu ka thil tih mak ka hmuhtîr ang; Ropui hle mah se hnamte chuan an hmu ang a, An hrilh a hai hle ang. An kâ an hup ang a, An bengte pawh an tingawng ang. Rûl angin vaivut an liak ang a, Leia rannung bawkvâka kalte ang mai an ni ang. An kulh aṭangin thlabârin an lo chhuak ang a, Lalpa, kan Pathian chu, an rawn pan ang, An hlau êm êm ang che u. Nang anga sualte ngaidama, Rochan la awmte khawlohna la bo ṭhîn. Pathian dang an awm em? Nang zawng, i thinur reng lo va, Khawngaihna lantîr hi i lâwmzâwng tak a ni. Kan chungah ngilneihna i lantîr leh ang a, Kan sual zawng zawng min hnehsak ang a, Kan khawlohna zawng zawng Tuifinriat mawngah i thlâk dâwn si a. Hmasânga kan pute hnêna i tiam tawh ang khân, Jakoba lakah i rinawm a, Abrahama chungah khawngaihna i lantîr ta. Ninevi chungthu, Elkosa mi Nahuman inlârna a hmuh chu: Lalpa chu Pathian thîkthuchhia, phuba lâk hmang a ni, Lalpa chuan thinur takin phuba a la ṭhîn, Lalpa chuan amah dotute a thungrûl ṭhîn, A hmêlmate tân thinurna a khâwl khâwm. Lalpa chu a dawhthei a, thiltithei tak a ni, Thil sual tite chu hrem lohvin a chhuah lo vang; Ṭhâwngaleivîr leh thlipuite hi Lalpa kalkawng a ni a, chhûm hi vaivut a pal khûk a ni. Tuipui a hau va, a kang ta a, Luite pawh a kang zo ta, Basan ram leh Karmel tlâng a ro va, Lebanon tlâng mawitute chu a chuai zo ta. A hmaah tlângte an nghîng dur dur a, Mualte pawh an tui zo va, A hmaah chuan lei hi a khûr dur dur a, Khawvêl leh a chhûnga chêng zawng zawngte nên chuan. A thinrim chu tu nge tuar zo vang? A thinur nasa tak chu tu nge dâl thei? A thinrim chu mei angin a leihbua a, Lungpuite pawh a hmaah chuan an kehsawm ṭhîn. Lalpa chu a ṭha a ni, Mangan nia himna kulhpui, Amah ringtute ngaihsak ṭhîn a ni. Tuilian so bulh bulhin thil a tichhia ang hian, Ninevi khua chu a tichhe vek dâwn. A hmêlmate chu hmun thimah chuan a ûm lût vek ang a, Engati nge Lalpa do zâwnga thil in ngaihtuah? A tiboral vek dâwn che u asin, Dodâltu tûr rêng in awm tawh lo vang. Hlîng anga awmin, zu nên nuam tâwl ṭhîn mah se, Buhpâwl ro angin an kâng ral vek ang. In zîng aṭangin mi pakhat, Lalpa dodâl zâwnga Remruatna sual ngaihtuahtu a lo chhuak ta. Lalpa chuan heti hian a ti: “Asuria-ho chu inthurualin tam hle mah se, An tlâwm ang a, an chhe vek ang. Ka mite u, tirethei ṭhîn che u mah ila, Ka tihrehawm tawh lo vang che u. A nghâwngkawl i bah chu ka titliak ang a, A phuarna hrui chu ka tichat ang. I chungthu-a Lalpa thupêk chu hei hi a ni: I hming putu tûr thlah i nei lo vang a, I pathian biaknaa milem ker leh milim chhûnte chu ka tichhe vek ang a. I sual êm avângin i tân thlân ka buatsaih ta. En teh, tlângahte chanchin ṭha thlena, Remna thu puangtute ke chu! Aw Juda, i kûtte chu hmang la, I thutiamte chu hlen rawh, Mi sualpa chuan a pal tlang tawh lo vang che, Tihboral daih a ni ta e.” Hmêlmate chuan an rawn hnaihchilh ta, Kulh chu vêng ṭha ula, kawngte chu vêng ngun rawh u, Inthuam ula, ṭan lo khawh rawh u, Hmêlmaten tiṭiauvin an grepte tichhe vek tawh mah se, Lalpa chuan Jakoba ropuina chu Israel-te ropuina angin a din thar leh ngei ang. Aigupta phaw chu a sen a, Mi huaisente chu senlârin an inthuam a, Indo tûra an inbuatsaih ni chuan, Sakawr-tawlailîra thîrte a de noh noh va, An fei tle pawh a phe zawk zawk a ni. Kawtthlêrah sakawrtawlailîrte chu an tlân dur dur a, Mualzâwlahte an insu thuak thuak a, Meichher êng tak tlânpui ang an ni, Kâwlphe angin an phe zawk zawk mai. Sipai huaisente chu a ko khâwm a, Tlu nawk nawkin an lo tlân a, Kulh bei tûrin an bawh rawk rawk a, Phen tûrte an siam bawk. Luipui kama kawngkhârte chu an hawng a, Lal inte pawh a chhe zo ta. Lalnu chu a thuam an hlihsak a, salah an hruai a, A chhiahhlawh nulate ṭhuro angin An rûm a, an âwm an chûm. Ninevi mite chu tuikhuah sah huk angin An tlânchhe hum hum a, ‘Ding rawh u, ding rawh u,’ tiin au mah se, tu mah an lehhawi lo. Râllâk sum chu chuh rawh u, Tangkarua te, rangkachak te la rawh u, Ro hlu chhêk khâwm a vûm thûr a, Thil hlu tinrêng a awm rei rui. Ninevi chu an rawk a, a chhiain a ṭiau zo ta, Mi tin an zâm a, an khûp a zâwi a, an khûr, An hmêl a dâng zo ta. Sakeibaknei pûk, a notê a châwmna chu khawiah nge a awm tak? Khaw nge sakeibaknei nu leh pa, An notê nên muang taka an tualchaina hmun chu a awm tâk? A notê tân kham khawp sa seha, A pui tân ei tûr khâwl khâwma, A buzâwl pûka sa seh dah rei ruitu Sakeibaknei kha khaw nge a awm tâk? Engkim Lalpa thuchhuak chuan heti hian a ti: “Ka hmêlmâk che a ni, I sakawr-tawlailîrte chu ka hâl hluah hluah ang a, I notê pawh khandaihin ka that ang; Leiah hian sa seh tûr nei lovin ka awmtîr ang che, I mi tirhte thu pawh an bengkhawn tawh lo vang.” Thisen chhuahna khawpui, dâwta khat, Râllâk sum chhêk khâwmna, Bâng lova inrawkna hmun chu A chung a pik e. Chu! Tiang hlap ri te, tawlailîr thâwm te, Sakawr tlân ri khup khup te, Sakawr-tawlailîr ri bawp bawp te chu! Sakawr chungchuangten an rawn bawh a, Khandaih an lek zawr zawr a, An fei vilik chu a de zawk zawk bawk a, Thi leh hliam an let phung a, Ruang a intiang vûm thûr a, Ruangah chuan an inpal tlu nawk nawk mai. Chûng thilte chu nawhchizuarnu sual vânga lo awm a ni, Nu hmêlṭha tak, mi lêm thiam tak a ni. Hnam dangte dawi â-a, bawiha siamtu a ni. Engkim Lalpa thuchhuak chuan heti hian a ti: “Ka hmêlmâk che a ni, I hmai thlengin i pawnfên ka hlîm ang a, Hnam tinin i saruak chu an hmu ang a, Ram tinin i zahpui chu an hmu bawk ang, Bawlhhlawh tenawm ka theh ang che a, Tenawmah ka siam ang che, Hmuh tlâk lohvah ka siam dâwn che. A hmu che apiangin an tlânsan ang che a, ‘Ninevi chu a chhe zo ta, tu nge sûn ang le? Thlamuan tûr che khawi aṭangin nge kan hmuh tâk ang?’ An ti ang. Nail lui kama awm, tui hual vêl, Thebes khua aiin i chan a ṭha zâwk dâwn em ni? Ethiopia leh Aigupta chu a chakna hnâr a ni a, A duh duha a tih theih an ni; Put leh Libua pawh a lamṭang an ni. Chuti chung chuan sala man leh ram danga hruai bo an ni a, Kawtthlêr pêng ṭhuamah an nautête chu Lei vuak nân an hmansak a, Ṭhumvâwrin an miliante an insem a, An mi ropui zawng zawng khaidiatin an hlîng bawk. Nang pawh i rui ang a, i let dêr ang, I hmêlmate laka phen tûr i zawng ruai ang. I kulh zawng zawng pawh Theipui hmin hmasa sâwi ṭilh, A eitu kâa tla lût ang hi a ni ang. I sipaite pawh hmeichhia ang an ni, In ram luhnate chu hmêlma tân a inhawng huai a, A kawngkalhna thingtlâwnte pawh meiin a kâng ral ta, An hual dâwn che, tui chawi khâwl la, Kulhte tinghet rawh, Lei chîl diak la, leirawhchan tûr hlum tlang Siam peih diam rawh. Chutah chuan meiin a kâng ral ang che a, Khandaiha thah i ni ang. Khauvin thlai a ei ral ang maiin an ei ral ang che. Khau angin pung khâwm rawh u, Thlai eitu khaukhuap ang maia tamin. Vâna arsi aia tam sumdâwngten an bâwr che a, Mahse, khau angin thla an zâr ang a, An thlâwk bo vek ang. In hotute chu khau ang lek an ni; In vêngtute pawh khau rual; Khaw vawh nia banga fu khâwm, Ni a lo lana thlâwk bo leh ta ang mai hi an ni. Khawiah nge an awm tâk tu man an hre tawh lo. Aw Asuria lalpa, nangmah vêngtute an muhîl a, I miropuite an tlu zo ta. I mite pawh tlângah an tlân darh a, Hruai khâwm leh tûr tu mah an awm tawh si loh hi â. I nâ hi engtin mah tihdam theih a ni lo, Hliam i tuar hi na tak a ni. I chanchin hria apiangin lâwmin kut an ben khum che, Suahsual i bâwl ṭhin kha, tu nge tuar lo awm?” Inlârnaa zâwlnei Habakuka thil hmuh chu: Aw Lalpa, min pui tûrin ka auh che hi, Eng chen nge, min ngawihsan dâwn? ‘Mi sualten mi vaw hlum takngial dâwn,’ tia ka auh che pawhin, Engati nge min chhân loh? Engati nge dik lo taka thil an tih min hmuhtîra, Râwng taka an che i ngaihtheih zêl le? Inrawk leh invuak a hluar a, Inhau leh invelh a tam hle hi. Dam hian awmzia a nei tawh lo va, Dikna a lal tawh hek lo. Mi sualten mi dikte an dinchan khalh a, Chuvângin, dik taka thil tih a ni ta lo. In vêla hnamte hi thlîr kual ula, En ngun teh u, Mak in ti hle ang, In hriat pawha in awih loh tûr, In hmuh phâkah thil ka tih dâwn hi. Ngai teh, Kaldai mite chu ka chawk tho dâwn a, Hnam kawlhsen leh thinram tak, Mi ram neihsak tuma ram tina vâkvêl ṭhînte chu! An hlauhawmin an ṭihbaiawm hle mai, Chapo takin duh duhin an che. An sakawrte pawh keite aiin an chak a, Thimhlim chinghniate ai pawhin an hlauhawm. An sakawr chuang mite chu ram hla tak aṭangin Chak takin an lo tlân dur dur a, Mupui âr la tûr bir angin an chak. Mi rûn tûra lo kal an ni vek a, An thâwm hria apiang an thlabâr a, Ṭiauvaivut anga tam sal an man. Lalte an palzût a, miliante pawh an nuihzat a, Kulhte lah engah mah an ngai lo, Lei an chhûng pâwng a, an la zêl mai. Hmân ata tawh Pathian thianghlim, nung reng, Lalpa chu i ni lo vem ni? Aw Lalpa, anni chu min hrem tûra i ruat an ni a, Aw kan kulhpui, min thununtu atân i ruat an ni. I mitte chu a thianghlim êm êm a, Thil sual i en reng thei si lo va. Engati nge vervêk taka tite i ngaihtheih viau si? Mi sualten an aia ṭhate an tihduhdah laia Engtizia nge i ngawih reng mai le? Engtizia nge mihring hi tuipui sangha ang leh Rannung bawkvâka kal lal nei lote ang leka i siam ni le? Kaldai-ho chuan mite nghakuaiin an âwk a, Lênin an khuh a, lênkhangin an fûn a, An hlim êm êm lehnghâl a. Tichuan, an lênte chu chibai an bûk a, An lênkhang hnênah inthawina an hlân a, Ei tûr an hmuhna leh nuam an tâwl theihna a nih avângin. Tichuan, an lênte chu tiruak zêlin, Hnamte chu lainat hauh lovin an that zêl dâwn em ni? Ka vênbûkah ka lâwn ang a, Ka hnêna a sawi tûr nghâkin awmhmun ka rem teh ang. Lalpa chuan heti hian min chhâng a: “Inlârna thu chu lungphêkah ziak rawh, Tlân pah pawha chhiar theih khawpa chiangin ziak rawh. He inlârna hi hun bîk nei a ni a, A thlen hun thlîr reng la, a daw lo vang. A muan pawhin nghâk deuh la, A thleng ngei dâwn, a tlai dâwn lo. En teh, mi chapo chuan a sual avângin a tuar ang a, Mi dik erawh chu a rinawm avângin a him ang. Zu hian mi a bum ṭhîn, Mi chapo chu a awm hle hle thei lo va, A duhâmzia chu Seol anga zau a ni, Thihna angin chin lêm a nei lo va, Hnam tin hruai khâwma, Mi zawng zawng la khâwm ṭhîntu chu. Mite chuan tiel leh hmusit takin ‘Rûkrûka intihausa chu a chung a pik e, Mi neih chhuhsakin eng chen nge i intihhausak dâwn le?’ An lo ti ang. I leibatnate chuan an rawn ṭhîng thut ang che a, An rawn timangang hle ang che, An kut i tuar mai ang. Hnam tam tak i rawk a, Mi thisen i chhuah a, ram i suasam a, Khawpui leh a chhûnga chêngte i tiboral a. Chuvângin, a thi bângte chu i chungah an ṭuan ve ang. Dik lo taka sum leh pai hai lûta, Mi sual kut tuar hlauva in ṭha pui pui satu chu A chung a pik e. Hnam tam tak tihral i tum hi, In chhûngkaw mualphona tûr a ni, Nang ngei pawhin i tuar phah ang. Bang aṭangin lungten an au khum ang che a, Khanchhukte chuan an lo chhâwn ang. Khaw siam nâna thisen chhuaha, Khawpui din nâna sualna hmangtu chung chu a pik e. Kâng ral mai tûr in sa-in mite an thawkrim a, Hnamte pawh thil sâwt lovah an intihah a, Chûng chu Engkim Lalpa ruat a ni. Tuifinriat hi tuiin a khat vek angin, Lei pum puiah Lalpa ropuizia an hria ang. Tihmualpho tuma mahni ṭhiante An ruih hnêp thlenga in tûr petu chu A chung a pik e. Nang pawhin i in ve ang a, i mualpho vang, I rui ang a, i pai i pai ang. Mi zahawm chu nuihzatbûr i ni ang a, Lalpa hremna chu i tuar ngei ang. Ramsa i tihlum a, an ṭi zo va, Mihring thisen i chhuah a, Ramah te, khawpuiah te, a chhûnga chêng chungahte Tharum i thawh a. Chutiang bawkin i chungah an ti ve ang. Chher chawp milem hi eng nge a ṭangkaina? Themthiam kutchhuak mai a ni, Eng mah a ni lo, A siamtu chuan ama kutchhuak ngei Milim, ṭawng thei hlei lo chu innghah nân zu hmang ta a! Thingtum hnêna, ‘Tho teh,’ ti a, Lungtum, ṭawng thei lo hnêna, ‘Ding teh,’ titu chu A chung a pik e. Rangkachak leh tangkaruaa luan, Nunna nei lo milem chuan a zirtîr ang che maw? Lalpa chu a in thianghlimah a awm a, Lei pum pui hi a hmaah ngawi ṭhiap rawh se.” Fakna hla, Zâwlnei Habakuka ṭawngṭaina: Aw Lalpa, i thâwm ka lo hriatin hlauhawm ka va ti êm! Aw Lalpa, hmâna i thiltihte ang kha han ti leh teh, Kan hun lai ngei hian han ti leh ang che, Thinur hle mah la, min khawngaih ang che. Pathian chu Teman aṭangin a lo kal a, Mi Thianghlima chu Paran tlâng aṭangin. (Selah) A ropuina chu vânah a khat a, Lei hi amah faknain a khat ta. A ênzia chu ni ang a ni a, A kut aṭangin ni zung a lo chhuak a, Tah chuan a ni a thiltihtheihna a thuhrûk. Hripuiin a hma a hruai a, Thihnain a rawn zui. A han ding a, lei a tinghîng a, A hawi vêl a, hnamte an khûr, Tlâng hlunte chu a kehsawm a, A lênna ṭhin mualte pawh chu A pil zo ta. Kus mite puan in chhe rem rum chu ka hmu a, Midian-ho chênna pawh a chul zo ta. Aw Lalpa, luite chuan an tithinrim che em ni? Luipuite leh tuifinriatte chuan an tithinur che em ni? I sakawr, hnehna tawlailîr chunga i chuan tâk le? I thalngul chu i phawrh a, Thalte pawh a hruiah i vuah ta. Luikawr atân lei chu i kâp khi phawk a, Tlângte chuan an hmu che a, an hlau va, Tuite an luang darh chum chum a, Tuithûkpui chu a ri hum hum a, Sâng tak takin a invawrh. I thal lêng nuai nuai leh i fei de zawr zawr avângin, Ni leh thla chu an chesawn ngam lo. Thinurin lei i fang chhuak a, Thinrimin hnamte i chîl ta hrep a. I mite chhan tûrin i lo thawk a, I hriak thiha chhan tûrin, Mi suaksualte hotu chu i sawisa a, Ke lêr aṭangin chhîp thlengin a silhfên i hlihsak a. (Selah) A rûka mi retheite ei zawh nuam titu, Ṭhawngaleivir anga min tihchhiat tuma lo thawk Hotupa chu a feiin i chhun ta a. I sakawrte nêna tuipui in han dai chuan A phuan ta buah buah a. Ka han hriat chuan tirilah ka khûr a, Ka kha a inkhâwng a, ka thauvah a man a, Ka ke a phet ta a. Min rûntute a rawn hremna ni chu Ngawi rengin ka nghâk ta a. Theipui rah lovin grep rah dâwn lo mah se, Oliv pawh rah lovin lovah eng mah thar dâwn lo mah se, Huanga berâm bo zovin, ran in ruak vek mah se, Lalpa chungah chuan ka lâwm zêl ang a, Min chhandamtu Pathian chu ka fak zêl ang. Lalpa P athian chu mi tichaktu a ni, Sakhi ke angin ka ke a tichak a, Hmunsâng takah min lêntîr ang. Judai ramah Amona fapa Josia a lal laiin, Zefania hnênah Lalpa thu a lo thleng a. Ani chu Hezekia thlah, Amaria fapa Gedalia fapa, Kusa fapa a ni. “Lei chunga thil awm zawng zawng ka tiboral vek dâwn,” Tih hi Lalpa thuchhuak a ni. “Mihring leh ramsa ka tiboral vek ang a, Chunglêng sava leh tuifinriat sanghate pawh; Mi sualte ka inchhuihthlûktîr ang a, Lei ata mihring ka nuai bo vang,” Tih hi Lalpa thuchhuak a ni. “Juda-ho chungah kut ka thlâk ang a, Jerusalem-a chêng zawng zawng chungah pawh; Baal hnuhma zawng zawng he hmun ata hi Ka paih chhuak vek ang a, Milem puithiamte hming pawh Tu man an hre reng tawh lo vang. Ni te, thla te, arsi te in chung zâwla biaa, Lalpa chibai bûka, a hnêna thu tiam sia, Milkoma hnêna chhia chham leh site leh Lalpa hawisana zui duh lote, Lalpa zawng lova amah râwn duh lote, Ka tiboral ang.” Lalpa P athian hmaah chuan ngawi ṭhiap rawh u, Lalpa ni chu a hnai ta si a. Lalpa chuan inthawina a buatsaih zo va, A mi sâwmte pawh a tithianghlim ta. “ Lalpa inthawina ni-ah chuan Hotu te, lal fa te, hnam dang tih dân latute ka hrem ang. Chumi ni-ah chuan milem biate tih dân anga Kawngka bul zuan khûmtu te, Mi thil an chhuhsak leh rûka An pathian in tikhattute chu ka hrem ang. Chumi ni chuan Jerusalem-a Sangha Kawngkaah An ṭap chuah chuah ang a, Vêngtharah pawh mangangin an au vang a, Mualahte chuan an chiau vawng vawng ang,” Tih hi Lalpa thuchhuak a ni. “Dâwr hmuna awmte u, ṭap vak rawh u, Sumdâwngtute an awm tawh dâwn si lo, Tangkaruaa sumdâwngtute pawh an awm ta lo. Chutih hunah chuan Jerusalem chu khâwnvâr chhiin, Zu ṭawk tawh anga awm mai mai, Inchhuang taka titute chu ka vai khâwm ang a, ka hrem ang. ‘ Lalpa chuan thil chhia emaw, thil ṭha emaw a ti lo vang.’ An sum an rawksak vek ang a, An inte pawh a ram ang, Inte sa mah sela an luah lo vang, Grepte phun mah sela, a tui an in lo vang.” Lalpa ni ropui a lo thleng dâwn ta, A hnai hle tawh a, a lo thleng ṭêp a ni. Lalpa nia thâwm chu a râpthlâk êm a, Mi huaisente pawh an ṭê tuar tuar ang. Chumi ni chu thinurna ni, lungngaihna leh manganna ni, Buai ni leh chhiat ni, thimna leh nguina ni, Khaw dur leh thim chhah mup thlen ni a ni ang. Khawpui kulh leh in sângte bei tûra tawtawrâwt ri tuar tuar leh indo au thâwm awm ni a ni ang. Mite chu nasa takin ka timangang ang a, Mitdel angin an kal ang; Lalpa laka an sual avângin An thisen chu vaivut leihbuak angin a baw nuai ang a, An ruang pawh bawlhhlawh awm khâwm nûlh ang a ni ang. Lalpa thinur lo thlen ni-ah chuan, An tangkarua leh rangkachakte chuan a chhanhim thei lo vang a, A thinurna mei chuan lei pum pui a kâng ral vek ang. Lei chunga awm zawng zawng tân, Tâwp thutna a thleng ang. Zah nachâng hre lo hnamte u, In-au khâwm ula, pung khâwm rawh u; Buhsi anga len bo in nih tûr hun ruat thlen hma, Lalpa thinur na tak in chunga a lo thlen hma leh Lalpa thinrimnain a nan hma che u hian. Ram chhûnga mi tlâwm, a thupêk zâwmtute chuan Lalpa chu zawng rawh u, Dik takin ti ula, thuhnuairawlh takin awm rawh u, Lalpa thinur ni-ah chuan in him mial mahna. Gaza khua an rauhsan ang a, Askelon pawh a chhe vek ang. Asdod mite chu chhûn laiah an ûm chhuak ang a, Ekron khaw mite pawh an kawi chhuak vek ang. Tuipui kama chêng, Keriot mite u, In chung a pik e! Lalpan in chungthu a sawi hi: Filistia mite chênna Kanan ram chu, luahtu awm lo khawpin ka tichhe vek ang a, Tuipui kamte chu a hnim vek ang a, Berâm huang leh berâmpute bûk khuarna hmun a ni ang. Juda hnam thi bângten chûng ram chu an nei ang a, An berâmte chu an tlattîr ang. Zânah Askelon mite in ruakah an riak ang a, Lalpa an P athian -in a duhsak ang a, A tihmuingîl leh ang. Moab mite chapozia te, Amon mite an chhiatziate ka hria a, An ram chhuhsak tuma chapo taka ka mite an vau dânte pawh ka hre reng a ni. Engkim Lalpa, Israel-te Pathian chuan heti hian a ti: Moab chu Sodom angin a chhia ang a, Amon mite pawh Gomora mite ang an ni ang. An ram chu chi leilung, kângṭhaia khat, Eng atân maha tlâktlai tawh lo a ni ang. Ka mi, thi bângten an rûn ang a, Ka hnam zînga la dam chhunten an neihsak ang. An chapo man an hmu dâwn, Engkim Lalpa mite an hmuhsita an nuihzatbûr avângin. Lalpa chu an tân ṭihbaiawm tak a ni ang. A ni, lei chunga pathian zawng zawng chu a hrêk chau vang a, Tuipui kama chêng hnam tinrêng ten Amah chu mahni hmun ṭheuhvah chibai an bûk ang. Nangni, Ethiopia mite pawh Ka khandaiha thah in ni ang. Hmâr lam ram chungah a kut a lek ang a, Asuria chu a tichhia ang; Ninevi khua pawh a tiṭiau vek ang a, Thlalêr ramrovah a chantîr ang. Chutah chuan ranrual leh sa tinrêng, A rualin an bawk ang a, Thlalêr chhimbuk leh hrângkirte chu, Ban chhîp bâwkah an riak ang a, Tukverhahte an hrâm ang a, Kailâwnahte choak an fu ang a, Sidar thing inte pawh a chhe rem rum ang. Hei hi khawpui chapo, pawisak nei lo, ‘Kei aia chak tu nge awm?’ ti rilru ṭhîntu awm dân chu a ni. Mahse, heti khawp hian a chhe ta si a, Ramsate riahhmun mai a lo ni ta, A hmu apiangin diriam takin an chek khum tlawk tlawk ang. “Hel hmang leh bawlhhlawh, Hnehchhiah chîng khawpui chu, A chung a pik e! Zilhna a pawm lo va, a ngaithla duh lo, Lalpa a ring lo va, a Pathian chu a hnaih duh hek lo. Khaw hotute chu sakeibaknei rûm ang an ni a, Rorêltute pawh chinghne koham ang an ni, A tûk atân eng mah an khêk thei lo. Zâwlneite chu an ngaih a sam a, bum an chîng a, Puithiamte pawhin thil thianghlim an tibawlhhlawh a, An duh duhin Dân chu an bâwlzân a. A chhûnga awm Lalpa chu a dik a, thil sual a ti ngai lo, Tûk tin khêl lovin dik takin ro a rêl ṭhîn. Mi sualte erawh chuan zah nachâng rêng an hre lo. Hnamte chu ka nuai bo va, an kulh bang ka tichhia a, An kawtthlêrte ka tiram a, tu man an tlawh tawh lo vang. An khawpuite chu a chhe ta a, A ruak vek a, tu mah an chêng tawh lo vang. ‘Anni chuan min ṭih ang a, zilhna an pawm ang a, Khaw chhûnga chêngte chu ka tiboral lo vang, An chunga tih ka tum pawh ka ṭhulh ang,’ Ka lo ti a; mahse, suahsual bâwl zui zêl an duh ta zâwk a ni. Chuvângin, hnamte ka chachhuah ni chu lo nghâk rawh u,” Tih hi Lalpa thuchhuak a ni. “Ka tum chu hei hi a ni: Hnam te, lal ram te ka ko khâwm ang a, An chungah ka thinur, ka thinurna mei sa tak chu ka leih ang, Ka thîkna mei chuan khawvêl pum hi a kâng ral ang. Chutih hunah chuan mite hmui chu ka tidanglam ang a, An vaiin Lalpa hming chauh an lam ang a, Rilru hmun khatin a rawng an bâwl ang. Mi be ṭhîntu, Ethiopia lui râla darhhote chuan, Ka tân thilhlan an rawn keng ang. Chumi ni chuan ka chunga in bawhchhiatna thiltihte chu In zahpui tawh lo vang a, In zîng ata mi chapo, induh tak takte chu ka la bo dâwn si a, Ka tlâng thianghlimah chuan chapo takin in awm ngai tawh lo vang. In zînga mi tlâwmte leh mi hnuaihnungte chu ka hum ang a, Lalpa hming chu an tân himna a ni ang. Israel zînga la damte chuan thil sual an ti lo vang a, Dâwt an sawi lo vang a, Bum an chîng tawh hek lo vang. An eiin an in ang a, thlamuang takin an awm tawh ang.” Aw, Zion fanu, hlim takin zai la, Aw Israel, ring takin au rawh. Jerusalem fanute u, in thinlung zawng zawngin lâwm rawh u. Lalpa chuan a hremna tûr che u a la bo ta, I hmêlmate a hruai bo ta, Lalpa, Israel lal chu, in zîngah a awm a, Thil ṭha lo i hlau tawh lo vang. Chumi ni chuan Jerusalem hnênah, ‘Aw Zion, hlau suh, I kutte chu zawi suh se,’ an ti ang. LALPA, i Pathian, hnehtu huaisen chu i hnênah a awm a, I chungah a lâwm êm êm a, A hmangaihna chuan i nun a tithar ang, Zîng taka zaiin i chungah a lâwm ang. I mi, kût hmang pha ve lova mangangte chu ka hruai khâwm ang a, Tichuan, sawichhiat an ni tawh lo vang. “Chumi hunah chuan nangmah tiduhdahtu zawng zawng chu, An chungchâng ka ngaihtuah ang a, Kebaite pawh ka chhan chhuak ang a, Hnawh darhte ka khâwm ang a, Ram tina mualpho taka awm ṭhînte kha, Hming mawi an nei ang a, mi tinin an hria ang. Chumi hunah chuan ka hruai khâwm ang che u a, Ka hruai haw ang che u. Leia mi zawng zawngin an hmu ang che u a, An chawimawi ang che u. Ka chawimawi ang che u. Ka tihhmuingîl leh ni che u chu In mit ngeiin in hmu ang,” Lalpa chuan a ti. Lal Daria lal kum hnihna, thla rukna, ni khat ni chuan Lalpa thu zâwlnei Hagaia hmangin Sealtiela fapa Zerubabela, Judai ramawptu hnênah leh Jehozadaka fapa Josua, Puithiam lalber hnênah a lo thleng a. Engkim Lalpa chuan heti hian a ti: “Hêng mite hian, Lalpa In sak a la hun rih lo ve, an ti,” tiin. Tichuan, Lalpa thu chu zâwlnei Hagaia hnênah a lo thleng a. “Ka in a chhiat rem rum laia, nangni, in ṭha leh nuam tak taka in chêng hi a dik em ni?” tiin. Engkim Lalpa chuan heti hian a ti: “In awm dân hi ngun takin chhût teh u. Tam tak in chîng a, tlêm tê in thar a; in ei a, in tlai si lo; in sin a, in lum si lo, inhlawhfa hlawh chu ip pawpa thlâk ang mai a ni.” Engkim Lalpa chuan heti hian a ti, “In awm dân hi ngun takin chhût teh u. Tlângahte han kal ula, thing han la ula, Tempul chu sa rawh u. Chu chu ka lâwmzâwng tak a ni; tichuan, chawimawiin ka awm dâwn nia,” Lalpa chuan a ti. “Tam tak seng in beisei a, en teh u, a lo tlêm hle si. Ina in rawn hawn pawh ka lo chhêm darh a. Eng vângin nge?” tih hi Engkim Lalpa thuchhuak a ni. “Mahni in sa-in in buai ṭheuh va, ka in chu chhe rem rum a, in hlamchhiah vâng a ni. Tichuan, nangmahni avângin vân daifîm a tla lo vang a, leiin thlai rah a chhuahsak hek lo vang che u. Ram pumah khua ka tikhêng ang a, tlâng te, buh te, grep te, Oliv te a ro zo vang a, leia thil ṭo zawng zawng te, mihring te, ram te leh in thil chîn zawng zawng chuan an tuar ang.” Sealtiela fapa Zerubabela te, Jehozadaka fapa Josua, Puithiam lalberte leh mi la awm zawng zawngte chuan, Lalpa, an Pathian thu, zâwlnei Hagaia thute chu an zâwm a. Ani chu Lalpa, an Pathian tirh a ni a; tichuan, mipui chu Lalpa hmaah chuan an zâm ta a. Mipuite hnênah Lalpa chuan, “In hnênah ka awm zêl dâwn,” a ti. Tichuan, Lalpa chuan Sealtiela fapa Zerubabela, Judai ram awptu te, Jehozadaka fapa Josua, Puithiam lalber te leh mi la awm zawngte rilru chu a chawk tho ta a. Lal Daria lal kum hnihna, thla rukna, ni sawmhnih leh pali ni chuan Engkim Lalpa, an Pathian In sa ṭan tûr chuan an lo thawk ta a. Thla sarihna, ni sawmhnih leh pakhat ni chuan Lalpa thu zâwlnei Hagaia hnênah hetiang hian a lo thleng a: “Sealtiela fapa, Zerubabela, Judai ram awptu hnênah te, Jehozadaka fapa Josua, Puithiam lalber hnênahte leh mi la awm zawng zawng hnênah te heti hian thu sawi rawh: “Tûn hmaa he in ropui lai hmu phâk in zîngah tu nge awm? Tûna mi hi eng nge ang in tih? Nêp in ti hle e lo? Nimahsela, nang Zerubabel, ṭan la rawh,” tih hi Lalpa thuchhuak a ni. “Jehozadaka fapa Josua, Puithiam lalber, nang pawh ṭan la rawh. Nangni, ram chhûnga mi tinrêngte u, ṭan la rawh u,” tih hi Lalpa thu chhuak a ni. “Thawk zêl ula, in hnênah ka awm reng ang,” Engkim Lalpa chuan a ti. “Aigupta ram aṭanga in chhuah laia in hnêna thu ka thlun tawh ang khân ka Thlarau in hnênah a awm reng a, zâm rêng rêng suh u,” Engkim Lalpa chuan heti hian a ti: “Rei lo tê-ah lei leh vân te, tuipui leh khawmualte ka sâwinghîng dâwn. Hnamte chu ka sâwinghîng ang a, hnam tinrêngin an sum leh paite chu an rawn la khâwm ang a, he in hi ropuinain a khat ang,” Engkim Lalpa chuan a ti. “Tangkarua hi ka ta a ni, rangkachak pawh ka ta a ni,” Engkim Lalpa chuan a ti. “A hmasa ai khân tûna mi hi a ropui zâwk ang,” Engkim Lalpa chuan a ti. “He hmunah hian thlamuanna ka pe dâwn a ni,” Engkim Lalpa thuchhuak chuan a ti. Lal Daria lal kum hnihna, thla kuana, ni sawmhnih leh pali ni chuan Lalpa thu zâwlnei Hagaia hnênah a lo thleng a. Engkim Lalpa chuan heti hian a ti: “Hemi chungchângah hian Dânin eng nge a sawi puithiamte zâwt rawh u. Tuin emaw sa thianghlim a puan hmâwrah fûn sela, chu sa fûn chuan chhang emaw, satuihâng emaw, uain emaw, hriak emaw chaw eng pawh a deh a thianghlim ve ang em?” tiin. Puithiamte chuan, “Thianghlim ve lo vang,” tiin an chhâng a. Hagaia chuan, “Mitthi ruang khawih avângin mi bawlhhlawhin hêng thilte hi tawk sela, a bawlhhlawh ang em?” a ti a. Puithiamte chuan, “Aw, a bawlhhlawh ang,” an ti a. Tichuan, Hagaian, “Ka mit hmuhin hêng mite leh he hnam hi chutiang chu an ni,” tih hi Lalpa thuchhuak a ni; “An thawh rah zawng zawng te, an thilhlante pawh a bawlhhlawh a ni,” a ti a. “ Lalpa Tempul lungphûm in phûm hma leh tûn hnu hunte hi vawiin aṭangin ngun takin chhût rawh u. Phur sawmhnih thar beiseiin phur sâwm chauh a thar a; uain ûm sawmnga neih beiseiin ûm sawmhnih chauh a neih ṭhin kha. In thawh chhuah zawng zawng a hrikin ka tichhia a, a ngêt te, rialte hmanga ka hrem che u pawhin ka lam in lo hawi duh chuang lo,” tih hi Lalpa thuchhuak a ni. “Vawiin ni sawmhnih leh pali ni, thla kuana, Tempul lungphûm in rem zawh ni aṭang hian ngun takin chhût teh u. Buh inah a chî a la awm em? grep te, theipui te, theibuhfai te, oliv-te rah lo mah sela tûn aṭangin mal ka sâwm ang che u.” Lalpa thu chu chumi thla, ni sawmhnih leh pali ni vêk chuan a lo thleng leh a. “Judai ramawptu, Zerubabela chu, lei leh vân ka tinghîng dâwn tih hrilh rawh. Lalte ka titlâwm ang a, ram dang sawrkâr chaknate ka tichhe vek ang. An sakawr-tawlailîrte leh a khalhtute chu leiah ka theh thlu ang a, sakawr leh a chungchuangte an tlu phung ang a, ngûnhnâmin an inchhun hlum ang.” Engkim Lalpa chuan heti hian a ti, “Chumi ni chuan, ka chhiahhlawh, Zerubabel, Sealtiela fapa, ka chelh tlat ang che,” Lalpa chuan a ti. “Ka thlang tawh che a, ka hming nemna zungbun atân ka siam ang che,” Engkim Lalpa thuchhuak chuan a ti. Daria lal kum hnihna, thla riatnaah chuan Ido-a fa, Barakia fapa zâwlnei Zakaria hnênah Lalpa thu heti hian a lo thleng a: “In thlahtute chungah kei Lalpa hi ka lungni lo hle a ni. Chuvângin, an hnênah heti hian va sawi rawh: Engkim Lalpa chuan heti hian a ti: ‘Ka lam lo hawi rawh u,’ Engkim Lalpa thuchhuak chuan a ti. ‘Kei pawh in lam ka lo hawi ang,’ Engkim Lalpa chuan a ti. ‘In thlahtute ang khân awm suh u. Engkim Lalpa chuan zâwlnei hmasate hmangin an hnênah, ‘in sual sim ula, in thil sual tihte bânsan rawh u,’ a tih pawhin an ngaithla duh lo va, an zâwm duh hek lo,’ Lalpa thuchhuak chuan a ti. ‘Khawiah nge in thlahtute chu an awm tâk? Zâwlneite pawh an dam kumkhua em ni? Ka rawngbâwltu zâwlneite hmanga ka thu leh ka thuruat, in thlahtute ka hrilh chu, an zâwm lo va. Tichuan, an thil sual tihte inhrechhuakin, Engkim Lalpa chuan kan awm dân leh kan thil tih ang zêlin min hrem a nih hi,’ an ti,” a ti a. Daria lal kum hnihna, thla sâwm leh pakhat, Sebat thla, ni sawmhnih leh pali ni chuan Ido-a fa, Barakia fapa zâwlnei Zakaria hnênah Lalpa thu zânah a lo thleng a. Ngai teh, mi pakhat, sakawr sen chunga chuang ka hmu a, ruama hnimbuk zîngah a ding a, a hnung lamah chuan sakawr sen te, a sendâng te, a vâr te an awm a. “Ka pu, hêng hi eng tihna nge?” ka ti a. Vântirhkoh mi betu khân, “Eng tihna nge ka han entîr ang che,” tiin mi chhâng a. Tichuan, hnimbuk zînga ding chuan, “Hêng hi lei pum pui fang chhuak tûra Lalpa mi tirh an ni,” tiin a lo chhâng a. Tin, Lalpa tirhkoh, hnimbuk zînga dingte chuan, “Lei pum pui kan fang chhuak a, khawvêl pum pui hian ṭanpui an ngai hle a, an chau hle tih kan hmu,” an ti a. Lalpa tirhkoh chuan, “Engkim Lalpan kum sawmsarih chhûng i lo thinursan tawh Jerusalem leh Judai ram khawpuite hi eng chen nge lainat lova i awm dâwn?” a ti a. Lalpa chuan Vântirhkoh mi betu kha thlamuanawm takin a chhâng a. Tichuan, Vântirhkoh mi betu chuan ka hnênah, “He thu hi puang rawh, Engkim Lalpa chuan heti hian a ti: ‘Jerusalem leh Zion chu ka lainat takzet asin. Rei lo tê ka mite chunga ka thinur chhûngin hnam dangten an lo tuartîr nghek mai a, nuamtâwl mai mai chîng ṭhîn hnam chungah chuan ka lungni lo takzet a ni,’ a ti a. “Chuvângin, Lalpa chuan heti hian a ti: ‘Jerusalem chu ka lainat êm a, ka kîr leh ang a, ka in pawh ka tungding leh ang,’ ” Engkim Lalpa thuchhuak chuan a ti. “Jerusalem chu din thar leh a ni ang.” Engkim Lalpa chuan heti hian a ti: “Ka khawpuite chu a hmuingîlin an lo vul leh ang a, Lalpa chuan Zion tlâng chu thlamuang takin a awmtîr ang a, Jerusalem chu a thlang leh ta, tiin puang rawh,” mi ti a. Ka han dâk a, ka han hawi vêl a; ngai teh, ki pali ka hmu a, Vântirhkoh mi betu hnênah chuan, “Hêng hi eng tihna nge?” ka ti a. Ani chuan, “Hêng kite hi Juda te, Israel te, Jerusalem-te tiduhdahtu tûr an nih hi,” tiin min chhâng a. Lalpa chuan thîrdêng pali min hmuhtîr leh a, “Hêng hi eng ti tûra lo kal nge an nih?” ka ti a. Ani chuan, “Ding chhuak thei tawh lo tûr khawpa Judai ram tichhiaa, a mite phîn darhtu hnamte chu tizâm tûr leh tudawl tûrin hêng mite hi an lo kal a ni,” a ti a. Ka han dâk a, ka han hawi vêl a, mi pakhat, tehna hrui keng ka hmu a, “Khawiah nge i kal dâwn?” ka ti a. Ani chuan, “Jerusalem zau zawng ka teh dâwn a ni,” a ti a. Tin, vântirhkoh mi betu kha a kal sawn a, vântirhkoh dangin a rawn tâwk a, a hnênah, “Tlân la, tlangvâl hnênah chuan heti hian ti rawh: ‘A chhûngah mipui leh ranrual an tam êm êm dâwn a, Jerusalem khawpui chu hung rual a ni lo vang. Kei hi a tân mei bang ka ni ang a, kei ngei hi a tiropuitu tûr chu ka ni,” Lalpa thuchhuak chuan a ti. “Khaih, khaih, khaih! Hmâr lam ata kha lo chhuak teh u,” Lalpa thuchhuak chuan a ti. “Hmun tinah ka hnawt darh che u a,” tih hi Lalpa thuchhuak a ni. Nang pawh Zion, Babulon mite zîng ata lo tlân chhuak rawh. Engkim Lalpa chuan heti hian a ti: “Chuvângin, nangmahni tichhetu hnam chu ka do dâwn a ni,” A ti tih sawi tûrin Ropuia chuan mi tîr a ni. Ngai teh, anni chu ka kut ka thin khum ang a, An chhiahhlawh ni ṭhînte chuan an rawk ang. Chutih hunah chuan Engkim Lalpa chuan mi tîr tih in hria ang. Aw Zion, hlim takin au vak vak rawh, Ngai teh, in hnêna chêng tûrin ka lo kal e,” Tih hi Lalpa thuchhuak a ni. Chumi ni-ah chuan hnam tam takin Lalpa an bêl ang a, A mite an ni ang. In hnênah a chêng ang a, Tichuan, Engkim Lalpa chuan in hnênah min tîr tih in hria ang. Judai ram chu Lalpa pual, ram thianghlim a ni leh ang a, Jerusalem pawh ama tân a thlang leh ang. Lalpa hmaah chuan mi tin ngawi ṭhiap rawh u, Ani chu a hmun thianghlim aṭangin a lo chhuak dâwn si a. Lalpa tirhkoh hmaa ding, puithiam lalber Josua leh amah khingtu tûr Setana, a ding lama ding chu mi entîr a. Lalpa tirhkoh chuan Setana hnênah, “Nang, Setan, Lalpan hau che rawh se; a ni, Jerusalem thlangtu Lalpa chuan hau che rawh se. He mi hi mei ata thingthu lâk chhuah mai a nih hi,” a ti a. Josua chu Vântirhkoh hmaah a ding a, a silhfên chu a bâl hle a. Vântirhkoh chuan a hmaa dingte hnênah, “A silhfên bâl kha hlihsak rawh u,” a ti a. A hnênah chuan, “En teh, i khawlohna ka la bo va, silhfên faiin ka thuam dâwn che hi,” a ti a. An hnênah, “Diar vâr khimtîr rawh u,” a ti leh a. Tichuan, diar vâr an khimtîr a, silhfên tharin an thuam ta a; Lalpa tirhkoh pawh chu ka kiangah a ding reng a. Lalpa tirhkoh chuan Josua chu khûn takin thu a chah a. Ka kawngte i zawh zêl a, ka thupêkte i zawm chuan, Ka in leh a kawtzâwlte i kutah a awm ang a, Heta dingte zîngah hian i tel thei ang; Nang Puithiam lalber Josua, I thawhpui, i kianga awmte pawhin ngaithla rawh se, Ka chhiahhlawh Chawrnova chu ka rawn tîr dâwn e. Josua hmaa lung pakhat ka dah chu en teh, Tah chuan hmai pasarih a awm a, Engkim Lalpa thuchhuak hetianga ziak hi a chuang: ‘He ram sualna hi ni khat thil thuah ka la bo vang a.’ “Chumi ni chuan mi tinin an ṭhenawmte chu an grep leh theipui buk hnuaia ṭhu tûrin an sâwm ang,” Engkim Lalpa thuchhuak chuan a ti. Vântirhkoh mi betu kha a lo kal leh a, muhîl kaihthawh ang maiin mi rawn kai tho va. “Eng nge i hmuh le?” min ti a. Kei chuan, “Rangkachak hlîra siam khâwnvâr dahna ṭhuam sarih nei, a hmâwra hriak bâwm hmui nei ṭheuh ka hmu,” ka ti a. A kiangah Oliv thing pahnih a awm a, pakhat chu a ding lamah, pakhat a vei lamah. Vântirhkoh min betu hnênah chuan, “Ka pu, hêng hi eng tihna nge?” ka ti a. “Hêng hi eng tihna nge i hre lo maw?” mi ti a. “Hre lo, ka pu,” tiin ka chhâng a. Tichuan, ka hnênah heti hian a sawi: “Jerubabela hnêna Lalpa thu lo thleng chu hei hi a ni: I chakna ni lovin, i thiltihtheihna ni hek lovin Ka Thlarau zâwkin le,” Engkim Lalpa chuan a ti. Aw nang, dâltu tiang lian, eng nge i nih le? Jerubabela hmaah chuan râwt mâm vek i ni ang, Tempul sak zawhna lung hnuhnûng ber a rem hunah, Mipui chu, “A mawi mang e, a mawi mang e,” Tiin an au dur dur ang. Lalpa chuan heti hian min bia a: “Jerubabelan Tempul lung a phûma, a kuta a sak zawh hun chuan Engkim Lalpa chuan an hnênah ka tîr che tih an hria ang. Tempul sak hna a chak loh avânga zak ta chu Jerubabelan sahal khaia hna a chhunzawm an hmuh chuan an lâwm hle ang, hêng khâwnvâr dahna pasarih hi Lalpa mit, khawvêl pum pui thlîr ṭhîntu chu a ni,” a ti a. Tin, a hnênah, “Hêng Oliv thing pahnih, khâwnvâr dahna ding lam leh vei lama awmte hi engtihna nge? Rangkachak hriak bâwm hmui nei sîr tuaka oliv zâr pahnihte hi engtihna nge?” ka ti a. Ani chuan, “Hêng hi engtihna nge i hre lo maw?” min ti a. Kei chuan, ‘Hre lo, ka pu,” ka ti a. Ani chuan, “Hêng hi mi pahnih, lei pum puia Lalpa rawngbâwl tûra thlante chu an ni,” a ti a. Ka han dâk a, ka han hawi vêl a, lehkhabu zial thlâwk duai duai ka hmu a. Ani chuan, “Eng nge i hmuh?” a ti a. Kei chuan, “Lehkhabu zial thlâwk duai duai lai ka hmu, tawng sawmhniha sei, tawng sâwma hlai a ni,” ka ti a. Ani chuan, “Hei hi ram puma thleng tûr ânchhe ziakna a ni. A phêk lehlam hi rûkru zawng zawng tihboralna tûr thu ziakna a ni a, a lehlam hi chhechham apiang tihboralna tûr thu ziakna a ni bawk.” Engkim Lalpa chuan heti hian a ti: “Ka tîr chhuak ang a, rûkru inah te, ka hminga dâwta chhechham ṭhîn inahte ka thlawh luhtîr ang. Tah chuan, a awm reng ang a, chu in hmanrua, thing leh lungte chu a tichhe vek ang,” tiin. Vântirhkoh mi betu kha a lo kal leh a, “Dâk la, han en vêl teh, eng nge i hmuh le?” mi ti a. “Eng nge lo lang ta hi?” ka ti a. Ani chuan, “Hei hi bâwm, tehnaa hman tûr chu a ni; lei pum pui sualzia tihlanna tûr a ni,” a ti a. Bâwm chhîn chu suan phêk a ni a; a han hawng a, bâwm chhûngah chuan hmeichhia a lo ṭhu a. Ani chuan, “Hei hi Sualbûri a ni,” a ti a. Tichuan, bâwmah chuan a nem lût leh a, suan phêk chuan a chhîn leh ta a. Ka han dâk chhuak a, ngai teh, hmeichhe pahnih an lo lang a, thlain an lo thlâwk a, an thla chu vacha thla ang a ni. Bâwm chu lei leh vân inkârah an thlawhpui ta a. Vântirhkoh mi betu hnênah chuan, “Khawiah nge bâwm chu an thlawhpui dâwn?” ka ti a. Ani chuan, “Babulon ramah in an saksak dâwn a, an peih hunah ama awmna tûra an ruatah chuan an dah ang,” a ti a. Ka han dâk leh a, sakawr-tawlailîr pali, tlâng lian pui pui inkâr aṭanga lo chhuak ka hmu a, tlângte chu dâr a ni. Tawlailîr pakhat chu sakawr sen rualin an hnûk a, pakhat chu a dumin, pakhat chu a vârin, a dang leh chu a rângin. An chak êm êm vek a. Mi betu hnênah chuan, “Ka pu, hêng hi engtihna nge?” ka ti a. Vântirhkoh chuan, “Hêng hi vân thli pali, lei pum pui Lalpa hmaa inring renga awm ṭhîn, kal chhuak an ni,” a ti a. Sakawr sente chu khawchhak lama kal tûr an ni a, a dumte chu hmâr lamah, a vârte chu khawthlang lamah, a rângte chu chhim lamah. An lo per chhuak ṭek ṭek a, khawvêl fan chhuah an nghâkhlel hle a ni. An hnênah, “Kal ta ula, khawvêl fang chhuak rawh u,” a ti a. Tichuan, an fang ta a. Ani chuan mi han au va, “Ngai teh, hmâr lama kalte chuan hmâr lam ram chungchânga ka thinur an tidai ta,” a ti a. Lalpa thu chu ka hnênah hetiang hian a lo thleng a: “Saltângte thilpêk, Heldaia te, Tobija te, Jedaia te rawn ken chu la la, Babulon aṭanga lo thleng Zefania fapa Josia hnênah kalpui nghâl rawh. Tangkarua leh rangkachak chu la la, lallukhum siam la, Jehozadaka fapa Josua, puithiam lalber chu khumtîr rawh. A hnênah heti hian ti ang che: ‘Engkim Lalpa chuan heti hian a ti: Mi pakhat, Chawrnova an tih chu, a awmhmun lei aṭangin a chawr chhuak ang a, Lalpa Tempul a sa ang. Amah ngei hi a ni Lalpa Tempul satu tûr chu. Lal ropuinain a inthuam ang a, lalṭhutthlêngah a ṭhu ang. A ding lamah puithiam a ṭhu ang a, an lungrual hle ang. Lallukhum chu Lalpa Tempulah, Helema te, Tobija te, Jedaia te, Zefania fapa Josia te hriatrengna tûr a ni ang. Lalpa Tempul sa tûrin ram hla tak ata an lo kal ang a, Engkim Lalpa chuan in hnênah min tîr tih in hria ang. In Pathian, Lalpa thu in zawm phawt chuan hêng thil hi a lo thleng ngei ang,’ tiin,” a ti a. Daria lal kum lina thla kuana, Kislev thla ni li ni-ah Lalpan Zakaria chu a bia a. Bethel mite chuan Sarezara te, Regenmeleka te leh an hote chu Lalpa malsâwmna dîl tûrin an tîr a. Engkim Lalpa ina puithiam leh zâwlneite hnênah chuan, “Kum tam tak kan lo tih tawh ṭhin angin thla nganaah hian Tempul chhiat sûnin chaw kan nghei zêl ang em?” an rawn ti a. Engkim Lalpa thu chu ka hnênah a lo thleng a. “Ram chhûng mipuite leh puithiamte chu zâwt teh u. Hêng kum sawmsarih chhûng, thla ngana leh thla sarihnaa Tempul sûna chaw in ngheite khân, ka tâna chaw nghei in ni meuh maw? In ei a, in in pawhin in pumpuarna mai a ni lâwm ni? Jerusalem leh a chhehvêl khuaahte mi an bit êm êm lai, chhim lam ram leh tlâng bulṭhut phairuamah te mi an awm noh noh lai pawh khân Lalpa chuan hêng thu bawk hi a ni lâwm ni zâwlnei hmasate hmanga a sawi ṭhin kha?” Lalpa thu Zakaria hnênah chuan hetiang hian a lo thleng a: Engkim Lalpa chuan heti hian a ti: “Dik takin ro rêl ula, Inkhawngaihin inlainat tawn rawh u. Hmeithai te, fahrah te, hnam dang te, Pachhia te hnehchhiah suh u. Mi dang tâna pawi tûr eng mah Ngaihtuah chhuak suh u,” tiin. Nimahsela, an ngaithla duh lo va, An tukkhum chhah an chhawn a, An hriat theih loh nân beng an hup a. Engkim Lalpan zâwlnei hmasate hmanga a pêk, Dân leh thupêk ngaithla lo tûrin an thinlung chu lung angin an tisak a, Chuvângin, Engkim Lalpa chu a thinur takzet a ni. “Ka ko va, an hre duh lo va, Min koh pawhin ka hre duh bîk lo vang,” Engkim Lalpa chuan a ti. A hriat ngai loh hnam dang zîngah, Ṭhâwngaleivir ka lâktîr ang a, An chhuahsan ram chu a ṭiau ang a, Tu man an tlawh lo vang. Ram nuam tak chu thlalêr ram rovah an chantîr ta a ni. Engkim Lalpa thu chu ka hnênah hetiangin a lo thleng leh a. Engkim Lalpa chuan heti hian a ti: “Zion chu vei takzetin ka vei a ni. A chunga thinur khawpin asin ka thîk ni. Lalpa chuan heti hian a ti: Zion-ah ka lo kîr ang a, Jerusalem-ah ka chêng reng tawh ang. Engkim Lalpa tlâng pawh Tlâng Thianghlim an ti ang.” Engkim Lalpa chuan heti hian a ti: “Jerusalem kawtthlêrahte chuan pitar leh putar tiang hawl, Upa tak tak an ṭhu leh fer fur ang, Khawpui tual zau laiahte naupang an tualchai nuk nuk ang.” Engkim Lalpa chuan heti hian a ti: “Tûna la dam chhunte tân chu chu thil mak lutuk a nih pawhin, Ka tân a mak ve dâwn em ni?” Engkim Lalpa thuchhuak chuan a ti. Engkim Lalpa chuan heti hian a ti: “Ngai teh u, ka mite chu chhak leh thlang ata Ka hruai khâwm dâwn. Jerusalem luah tûrin ka hruai haw ang, Ka mite an ni ang a, kei pawh an Pathian, Rinawm tak leh dik taka rorêlsaktu ka ni ang.” Engkim Lalpa chuan heti hian a ti: “Engkim Lalpa Tempul lungphûm an phûm laia Zâwlnei thu sawi kha hre reng ula, In sa zo tûrin ṭan la rawh u. Tûn hma kha chuan mihring leh ran hlawh tûr a awm lo va, Hmêlmate avângin vâk chhuak ngam an awm hek lo. Mi tin ka inhmêlmâktîr vek a ni. A la awm chhunte tân tûn hma kha ka ang dâwn tawh lo,” Tih hi Engkim Lalpa thuchhuak a ni. “Ralmuang takin thlai an chîng ang a, An grepte pawh a rah tiar tuar ang a, An thlai chînte a lo hlâwk ang a, Vân daifîmin a châwm ang. A la awm chhunte chu hêng malsâwmna hian ka vûr ang. Hnam dangten ânchhia an lawh ṭhîn che u a, Nangni Juda leh Israel-te u, Hnam dangten in zâr an zo theih nân, Ka chhan chhuak dâwn a che u; Hlau suh u, ṭan la sauh sauh rawh u.” Engkim Lalpa chuan heti hian a ti: “In thlahtuten min tihthinur lai ang khân, Lainat lovin chhiatna in chungah thlentîr ka lo tum tawh a,” Engkim Lalpa chuan a ti. “Amaherawhchu, Jerusalem leh Juda chungah Thil ṭha thlentîr ka tum ta zâwk asin, Hlau suh u. Hêng hi in tihtûr chu a ni: Thu dik inhrilhtawn ula, In rorêlna hmunah dik takin rêl rawh u. Intihchhiat tawn tum suh u, Dâwta chhechham chîng hek suh u, Chûng chu ka huatzâwng tak a ni,” Tih hi Lalpa thuchhuak a ni. Engkim Lalpa thu chu ka hnênah hetiangin a lo thleng a: Engkim Lalpa chuan heti hian a ti: “Thla linaah te, thla nganaah te, thla sarihnaah te, Thla sâwmnaah te chaw in nghei ṭhîn a, Chu chu Juda chhûngte tân Kût hlimawm leh lâwmawm a ni tawh ang. Chuvângin, thu dik ngaina ula, remna zawng rawh u.” Engkim Lalpa chuan heti hian a ti: “Khawpui tam tak aṭangin mi an lo kal duah duah ang a, Khaw khata mite khaw danga kalin, ‘Hawh u, Lalpa be tûrin i kal ang u, Engkim Lalpa ka pan dâwn, Lo tel ve rawh u,’ an ti ang. Engkim Lalpa be tûr leh a malsâwmna dîl tûrin mi tam tak leh hnam thiltithei takte chu, Jerusalem-ah an lo kal dâwn a ni.” Engkim Lalpa chuan heti hian a ti: “Chutih hunah chuan hnam tin leh ṭawng tin zînga mi sâwm An lo kal ang a, Juda pakhat kawrfual vuan chungin ‘In zîngah kan tel ve dâwn, Lalpa chu in hnênah a awm tih kan hria a ni,’ an ti ang.” Hadrak leh Damaska chunga thleng tûr chungchânga Lalpa thu chu: Mite mit chuan Lalpa a thlîr a, Israel hnamte pawhin an thlîr. An ram ṭhenawm Hamat te, Tura te, Sidon khawpui te chu, an finnate chawpin a ta vek an ni. Tura chuan kulh a siam a, Vaivut ang maiin tangkarua a chhûng khâwm a, Rangkachak pawh kawtthlêr chirhdiak angin a chhêk khâwm. Mahse, Lalpan a thil neihte a chhuhsak ang a, A hausakna chu tuipuiah a paih ang a, khawpui chu a kâng ral ang. Askelon khuain an hmu ang a, an hlau vang, Gaza khua pawh hlauvin an khûr ang a, Ekron khua pawh an beidawng ang. Gaza khuaah lal chu a boral ang a, Askelon khua chu a ram ang. Asdod chu sâwnin a luah ang a, Hnam chapo Filistia chu ka titlâwm ang. A thisen nên sa an ei tawh lo vang a, Sa thiang lo an ei tawh hek lo vang. Thi bângte chu kan Pathian ta an ni ang a, Juda hnam ang an ni ang. Ekron mite pawh Jebus mite ang an ni ang. Sipai lo kal lakah ka in chu ka vêng tlat ang a, Hnehchhiahtuten an paltlang tawh ngai lo vang, Tûnah zawng ka vêng tlat tawh dâwn a ni. Aw Zion fanu, lâwm hle la, Aw Jerusalem fanu, hlim takin au rawh, En teh, i lal chu i hnênah a lo kal a, Mi dik tak a ni a, Chhandamtu a ni. Tlâwm takin sabengtung chungah a chuang a, A ni, sabengtung no chungah chuan Efraim indona tawlailîr leh Jerusalem sakawrte chu a tiral ang, Hnam tin a inremtîr ang a, A ram chu tuipui aṭanga tuifinriat thleng,. Luipui aṭanga kâwlkil thleng a ni ang. Nang erawh chu, kan inkâra thisen thuthlung avângin, Khuarkhurum rova i mi tângte chu ka chhuah vek a, Nangni, mi tâng, chhuah beiseite u, In kulh lamah kîr leh ang che u, Ka hrilh a che u, in tuar man chu A lêt hnihin ka rûl ang che u. Juda chu thalngul atân ka hmang a, Efraim chu thal atân, Grik mite dona tûrin Zion fate chu ka chawk tho vang a, Mi huaisen khandaih angin ka hmang ang. Lalpa chu an chung lamah a lo lang a, A thal chu kâwlphe angin a de zawr zawr ang. Lalpa P athian chuan tawtawrâwt a hâm ang a, Chhim thlipui na angin a lo thawk ang. Engkim Lalpa chuan anni chu a hum ang a, An hmêlmate chu an hneh ang a, Kulh denna lungte chu an chîl ang. An hmêlmate thisenin an rui ang a, An au chêlchûl ang. Maichâm kila thisen tah a luang zuih ang leh Chawhtawlha liam zawih zawih ang hi a ni ang. Chutih hunah chuan Lalpa, An Pathian chuan berâm angin A mite chu a chhanhim ang a, Lallukhuma lunghlute angin a ramah chuan an êng ang. An va ṭhain an va mawi êm! An buh chu tlangvâlten an ṭhat phah ang a, An uain chu nulaten an mawi phah ang. “Khua a khenin Lalpa churuah dîl ula, Lalpa chuan chhûm te, kâwlphe te a siam a, Thlai tinrêng ruah a châwmtîr a ni. Milemte chuan thil ho mai mai an sawi a, Aien thiamte thil hmuh pawh chu eng mah a ni lo. Mumang dik lo an mang a, Dâwtin mi an thlamuan thlâwn a, Chuvângin, mipuite chu berâm angin an darh a, Vêngtu nei lovin hrehawm an tuar. Berâmpute chungah chuan ka thinur takzet a ni, Hruaitute chu ka hrem ngei dâwn. Engkim Lalpa chuan a berâm Juda-te chu a ngaihsak a, Indo nâna a sakawr chhuan angin a tichak ang. A kil lung te, khen marna thîr te, indona thalngul te, Rorêltute an zîng aṭangin an lo chhuak ang. Anni chu indonaa mi chak tak an ni ang a, Kawtthlêr chirhdiak angin hmêlmate an chîl ang, Lalpa an hnêna a awm avângin an bei nasa mai ang, Sakawr chunga chuang mite pawh an hneh ang. Juda chhûngte chu ka tichak ang a, Josefa chhûngte chu ka chhanhim ang, Anni chu ka lainat êm a, ka hruai kîr leh ang a, Hnawh chhuah la ni ngai lo ang an ni ang. Kei Lalpa, an Pathian hi an dîlna chhâng ṭhîntu ka ni. Efraim mite chu mi huai rual angin an chak ang a, Uain in ṭhînte angin an hlim ang. An faten an chakzia an hre reng ang a, An thiltih avângin Lalpa chu an chhuang hle ang. Anni chu faifûkin ka ko khâwm ang, Ka tlan tawh sate an ni si a, Tûn hma ang khân an pung leh ang. Hnam dang zîngah hnawt darh mah ila, Ram hla tak aṭang pawhin min hre reng ang. Anni chu an fate nên dam takin An lo haw tlâng leh ang. Aigupta ram aṭangin ka hruai kîr leh ang a, Asuria ram aṭangin ka khâwm ang. Gilead ramah leh Lebanon-ah ka hruai lût ang a, Chûngah pawh chuan an leng chuang lo va. Tuifâwn pawh a reh ang a, Nail lui thûk laite pawh a kang chat ang a, Hnam chapo Asuria chu a tlâwm ang a, Aigupta ram lal pawh a tlâwm bawk ang. Lalpa hmingin ka mite chu ka tichak ang a, A hming chu an rinchhan ber a ni ang,” Lalpa thuchhuak chuan a ti. Lebanon, i kawngkhâr hawng rawh, I sidar thingte a kâng dâwn nia. Aw, nang fâr thinglian, ṭap la, chiau vawng vawng rawh, Sidar thingte a tlu vek tawh a, Thing lian pui puite pawh a tlu zo ta. Basan rama sasuate u, ṭap vawng vawng rawh u, Ngaw dur pui chu an ṭhiat zo ta. Berâmpute au thâwm tak chu aw! An ropuina a chuai ta si a. Sakeibaknei mangang rûm thâwm chu ngaithla teh u, An chênna Jordan ruamte pawh a chereu zo ta. Ka Pathian, Lalpa chuan heti hian a ti: “Ran talh tûrte chu châwm thau ula, A talhtuten khawngaih hauh lovin talh rawh se, A hralhtute chuan, ‘ Lalpa i fak ang u, Kan hausak tâk hi,’ an ti a, Berâmpute lahin an lainat hauh lo. “He ram mite hi ka khawngaih dâwn tawh lo,” tih hi Lalpa thuchhuak a ni. Mite chu a ṭhenawm ram leh chûnga lalte hnênah chuan ka hlân ang a, ram chu an tiṭiau vek ang, an kut ata anni chu ka chhan lo vang. Tichuan, berâm zuartute tân ranrual talh tûrte chu ka vulh a. Tiang pahnih ka la a, pakhat chu ‘Duhawm’ ka vuah a, a dang chu ‘Phuarkhâwmna’ ka vuah bawk a, ranrual chu ka enkawl ta a. Thla khat chhûngin berâmpu pathumte chu ka bân a, anni chu ka hua a, anni pawhin min hua a. Tichuan, an hnênah, ‘In vêngtu ka ni tawh hlei nêm; a thi chu thi ula, a boral pawh boral mai rawh u; a dam chhunte pawh intiboral tawn mai rawh u,’ ka ti a. Hnam tin tâna ka thuthlung chu ka ṭhiat ta tih entîr nân ka tiang ‘Duhawm’ chu ka la a, ka titliak a. Chumi ni-a tiang ka titliak chu ran zuartute chuan min thlîr reng a, ka thiltih chu Lalpa thu-a ti ka ni tih an hre ta a. An hnênah, ‘âwm in tih leh ka hlawh min pe ula, in tih loh leh min pe lo ula,’ ka ti a. Tichuan, chêng sawmthum min pe a. Lalpa chuan ka hnênah, “Ka man atâna tâwk hlea an hriat chu bêlvawtu pe rawh,” a ti a. Tichuan, chêng sawmthum chu ka la a, Lalpa tân bêlvawtu chu ka pe ta a. Ka tiang dang, ‘Phuarkhâwmna’ chu ka titliak leh a, Juda leh Israel inzawmna chu a chat ta a. Lalpa chuan ka hnênah, “Berâmpu tlâktlailo hmanrua chu la la, a ai va awh rawh,” a ti a. Ngai teh, ranrual enkawltuah, Ran chungah ani chu ka dah a, A bote a zawng lo va, a notête a ngaihsak lo; A hliamte a enkawl lo va, Tla thei lote a châwm hek lo, A thau thau a ei a, An tin lam a khâwng thlawn a. Berâmpu tlâktlailo, a berâm thlahthlamtu chu A chung a pik e. A bân ding lam leh a mit ding lam chu Khandaihin chhun sela, A bân chu zeng rawh se, A mitte pawh del rawh se,” a ti a. Israel chungchânga Lalpa thuchhuak chu: Vânte kaipharha, leilung nghahchhan phûmtu leh Mihring Thlarau dahtu Lalpa chuan heti hian a ti: “Ngai teh, Jerusalem chu a vêla mite tlûkchhiat nân Tawktarhah ka siam ang, Jerusalem an hual hunah Judai ram pawh an hual tel ang. Chumi ni chuan Jerusalem bei tûrin khawvêl hnam tin An pung khâwm ang a, Jerusalem chu khawvêla hnam tin tân Tihchêt rual loh lungpuiah ka siam ang. Tihchêt tum apiang an inhliam zâwk ang. Chumi ni chuan sakawr zawng zawng ka ṭhâwng darh phut ang a, A chungchuangte pawh an chiai ang,” Tih hi Lalpa thuchhuak a ni. Juda chhûngte chu ka vêng tlat ang, Hnam dang indona sakawr mitte ka tidel ang. Juda hruaitute chuan, “Engkim Pathian, Lalpa chuan Jerusalem-a a mite chu a tichak ṭhîn,” an ti rilru a. Chumi ni-ah chuan Juda hruaitute chu thingai chunga meivâm dah ang leh buhpâwl zînga meichher alh dah ang an ni ang a, an chhehvêla awm hnam dang, an ding lam leh vei lama mite chu an kâng ral ang a; Jerusalem erawh chu a hmun ngaiah nghet takin a ding reng ang. Lalpa chuan Judai rama chêngte chu a chhan hmasa ang; tichuan, Davida thlahte pawimawhna leh Jerusalem-a chêngte pawimawhna chuan Judai ram thingtlânga chêngte pawimawhna a khûm loh nân. Chumi ni-ah chuan Lalpa chuan Jerusalem-a chêngte chu a hum tlat ang a; tichuan, an zînga chak lo ber pawh Davida anga chak a lo ni ang a, Davida chhûngte pawh Pathian ang, an hmaa Lalpa Vântirhkoh awm ṭhînte ang an ni ang. Chumi ni-ah chuan Jerusalem rawn beitu hnamte chu tiboral tûrin ka lo thawk ang. Davida chhûngte leh Jerusalem-a chêngte chu lainatna leh mi duhsak theihna thinlungin ka tikhat ang a, an chhuna chu min en ang a, fa neihchhun sûn ang leh fa tîr fapa sûn ang maiin an lung a chhe hle ang. Chumi ni-ah chuan Jerusalem ṭap thâwm chu Megido phaia an pathian Hadad-rimona an ṭah thâwm ang maiin a nasa ang. Rama awmte chu a hnam hnamin an ṭap ang; Davida chhûngte leh an nupui te, Nathana thlahte leh an nupui te, Levia thlahte leh an nupui te, Simeia thlahte leh an nupui te, Israel hnam dang zawng zawng leh an nupuite chu a hrang ṭheuhvin an ṭap ang, mipa leh hmeichhia chu a hrangin. Chumi ni-ah chuan Davida chhûngte leh Jerusalem-a chêngte sualna leh bawlhhlawhna tlêng fai tûr tui a lo luang chhuak ang. Chumi ni chuan ram chhûnga an lam ṭhin milem zawng zawng chu ka tibo vek ang a, an hre reng tawh lo vang, tih hi Engkim Lalpa thuchhuak a ni. Zâwlneia inchhâlte leh thlarau bawlhhlawhte chu ram ata ka hnawt bo vek ang. Tu pawh, zâwlnei anga thu puang lui zêl chu amah hringtu, a nu leh paten a hnênah, “ Lalpa hminga dâwt i sawi avângin i thi ngei tûr a ni,” an ti ang a, amah hringtu a nu leh pa chuan a thu puang lai chu an vit hlum ang. Chutih hunah chuan, chûng zâwlneite chuan an inlârna hmuh chu an zahpui ang a, mi bum nân sahmul kawrfual an ha tawh lo vang. “Zâwlnei ka ni lo, ka naupan têt ata lo nei mi ka ni,” a ti zâwk ang. “A nih, hêng i taksaa pemte hi engtizia nge?” an tih chuan, anin, “Ka ṭhiante inah min tipalh a ni,” a ti ang. “Harh teh, khandaih, ka berâm vêngtu, Ka thawhpui chu bei rawh,” Engkim Lalpa thuchhuak chuan a ti. “Berâmpu chu vua la, berâmte chu darh rawh se, A note chungah pawh kut ka thlâk ang. Ram chhûngah hetiang thil hi a thleng dâwn a ni,” Lalpa thuchhuak chuan a ti. “Mi hmun thuma ṭhena hmun hnih an tlu ang a, an thi ang, Hmun thuma ṭhena hmun khat chu an zuah ang. Zuahte chu meiin ka fiah ang a, Tangkarua tihthianghlim angin ka tithianghlim ang a, Rangkachak fiah angin ka fiah ang. Min ko vang a, ka lo chhâng ang, ‘Ka mi in ni,’ ka ti ang a, Annin, ‘ Lalpa, kan Pathian chu i ni,’ min ti ang.” Ngai teh, Lalpa ni chu a lo thleng dâwn, râlin in thil an lâk chu in mit hmuhah an insem ang. Jerusalem bei tûrin hnam tinrêng ka ko khâwm ang a, khawpui chu an la ang a, inte an tichhe vek ang a, hmeichhiate pawh an pâwngsual ang. Khawpuia mihring zâtve chu salah an hruai ang a, a dang zawng chu khawpuiah an la awm ang. Tin, Lalpa chu a lo thawk ang a, indo nia a chêt ṭhin dân angin chûng hnamte chu a rawn bei ang. Chumi ni-ah chuan Jerusalem chhak lama Oliv tlângah a ding ang a, Oliv tlâng chu chhak leh thlang hawiin a khi phel phawk ang a, a inkâr ruam chu zau tak a ni ang. Tlâng phel khat chu hmâr lamah a tawlh ang a, a lehlam chu chhim lamah a tawlh ang. Tlâng kâr ruamah chuan in biru ang a, tlâng inkâr ruam chuan Azel hmun a thleng ang. Juda lal Uzia lal laia lîrnghîng avânga in tlân ang khân chutah chuan in tlân ang. Tin, Ka Pathian, Lalpa chu, a mi thianghlim zawng zawng nên a lo kal ang a. Chumi ni-ah chuan êng a awm lo vang a, khua a vâwtin vûr a tla tawh hek lo vang. Ni danglam tak, Lalpa ni an tih chu a lo thleng dâwn, chhûn a awm lo vang a, zân pawh a awm lo vang; tlai thlengin a êng reng ang. Chumi ni-ah chuan Jerusalem aṭangin tui nung a lo luang chhuak ang a, a zâtve chu Tuipui Thiah a luang lût ang a, a zâtve dang chu Mediteranean tuipuiah a luang lût ang. Fûrah pawh ṭhâlah pawh a kang lo vang. Lalpa chu lei pum pui tân lal a ni ang a, chumi hunah chuan Lalpa chauh an bia ang a, a hming chauh an lam ang. Hmâr lam Geba khua aṭangin Jerusalem chhim lama Rimon khaw thlengin ram pum pui chu Araba zâwl angin tihhniam a ni ang a. Jerusalem erawh chu a hmun ngaiah tihsân a ni ang. Khua chuan Benjamin kawngka aṭanga kawngka pakhatna, a kil kawngka an tih leh Hanania in sâng aṭanga lal uain sâwrna hmun an tih thlengin a awh ang. Chu chu an luah ang a, rawn tichhe tûr an awm tawh lo vang a, Jerusalem chu him takin a awm reng tawh ang. Jerusalem dotu hnam zawng zawng chu Lalpa chuan he hri chhia hian a hrem dâwn: Ding chungin an tisa a ṭawih ang a; an mitkhurah an mitmu a keh ang a, an lei chu an ka chhûngah a ṭawih ral ang. Chumi ni chuan namên lovin Lalpa chuan mite chu a tichiai ang a, mahni hnaih hnaih an man ang a, kut an inthlâk tawn ang. Juda pawhin Jerusalem tân ṭan a la ang a, an vêla hnam zawng zawng rangkachak te, tangkarua te, thawmhnaw tam tak te an la ang. Tichuan, hmêlmate riahhmuna an sakawr te, sabengtung te, sanghâwngsei te, sabengtung tê chi te leh an ranrual zawng zawng chungah hri chhia chu a lêng bawk ang. Hnam dang, Jerusalem rawn dotu, la dam zawng zawng chu, Engkim Lalpa chu be tûrin kum tin Bâwkte kût hmangin an lo chho vang. Leia mi zawng zawng, Engkim Lalpa chibai bûk tûra chho duh lote chungah chuan ruah a sûr lo vang. Aigupta mite pawh kût hmang tûra an lo chhoh duh loh chuan ruah an hmu lo vang. Bâwkte kûta lo kal duh lo hnam dang a hrem ang khân Lalpa chuan a hrem ang. Hei hi Aigupta ram hremna leh hnam tin Bâwkte kût hmang duh lote hremna tûr chu a ni. Chu mi ni chuan sakawr ṭhi-ah pawh ‘ Lalpa tâna serh hran’ tih a chuang ang a; Lalpa ina bungbêlte pawh maichâm hmaa maihûn angin a thianghlim tawh ang. Jerusalem leh Judai rama bungbêl awm zawng zawng chu a lo thianghlim tawh ang a, inthawi tûra kalte chuan bêl chu inthawina sa chhum nân an hmang thei tawh ang. Chumi hunah chuan Engkim Lalpa inah chuan sumdâwng tu mah an awm tawh lo vang. Israel-te chungchânga Lalpa thuchhuak Malakia ziak chu Lalpa chuan, “Ka hmangaih che u a ni,” a ti a. Nangni erawh chuan, “Engah khân nge min hmangaih?” in ti a. Esauva leh Jakoba chu unau an ni a, Tih hi Lalpa thuchhuak a ni. “Jakoba chu ka hmangaih a, Esauva chu ka ngaina lo, A tlângte pawh ram rovah ka siam a, A rochan ram pawh thlalêr sihalte ka pe ta.” Edom mite chuan, “Min lo tichhe tawh mah se, Kan khawpui hluite chu kan din thar leh mai ang,” an ti a. Mahse, Lalpa, Engkim Lalpa chuan heti hian a ti: “Din mah se, ka tichhe leh tho vang, ‘Suahsualna ram, kumkhaw Pathian ânchhe dawngho,’ an ti ang. In mit ngeiin in hmu ang a, Lalpa chu Israel ram pâwnah pawh, ‘A va lo ropui êm!’ in ti ang.” “Fapain a pa a chawimawi a, chhiahhlawhin a pu, Kei hi in pa ka ni a, engati nge min chawimawi loh? Kei hi in pu ka ni a, engati nge min ṭih loh?” Engkim Lalpa chuan a ti. “Puithiamte u, nangni hi in ni mi hmusittute chu.” ‘Engah khân nge kan hmuhsit che?’ in ti a, ‘Ka maichâma chaw bawlhhlawh in hlanah hian.’ ‘Engtin nge kan tihbawlhhlawh che?’ in ti a. ‘ Lalpa maichâm hi a lo nêp mang e,’ in tihah hian. Ran mitdel inthawinaa hlan hi a dik maw? Ran kebai leh a silawng hlan pawh a dik maw? In ram rorêltu pe dâwn teh u, in chungah a lâwm ang maw? A hlim hmêl in hmu ang maw?” Engkim Lalpa chuan a ti. “Tûnah, Pathian chu, min khawngaih tûrin ngên chiam teh u, Chutiang thil in hlan avângin A lo ngaihsak dâwn che u em ni?” Engkim Lalpa chuan a ti. “Ka maichâm mei in tihalh hi a sâwt lo, In zînga pakhat hian ka Tempul kawngka khâr law law se a ṭha zâwk tûr! In chungah ka lâwm lo, in thilhlan pawh ka pawm dâwn lo,” Engkim Lalpa chuan a ti. “Ni chhuahna lam aṭanga a tlâkna lam thlengin, Hnam tin zîngah ka hming a ropui ta a ni. Hnam tinin ka hmingin rimtui an hâl ang a, Inthawina pawh an hlân ang, Hnamte zîngah ka hming a ropui ta si a,” Engkim Lalpa chuan a ti. “ ‘ Lalpa maichâm chu a lo nêp mang e, Chuta ei tûr an hlante pawh chu a zahpuiawm.’ In tih hian ka maichâm in tibawlhhlawh a ni. ‘A va ninawm êm!’ tiin hnâr in tum khum ta si a,” Engkim Lalpa chuan a ti. “Inthawina atân mi thil in lâksak, Ran kebai te, a silawng te ka lo pawmsak ang che u maw?” Engkim Lalpa chuan a ti. “Ran hmêlhem lo Lalpa hnêna hlan in tiam a, A patuai ṭha tak nei reng bawk sia, A hmêlhem hlântu chuan ânchhia dawng rawh se, Lal ropui tak ka ni a, hnam tinin ka hming hi an ṭih a ni,” Engkim Lalpa chuan a ti. Khai le, puithiamte u, Ka thupêk hi in tân a ni asin. Engkim Lalpa chuan heti hian a ti: “Ka thu in ngaihthlâk lohva, Tihtakzeta ka hming in chawimawi loh chuan, In chungah ânchhia ka thlentîr ang a, In chanvote pawh ânchhia ka lawh ang, A ni, tihtakzeta min chawimawi loh avângin, Chûng chu ânchhia ka lawh dêr tawh a ni. Ngai teh u, nangmahni avângin in thlahte ka hrem dâwn, In hmaiah in inthawina ran êk ka tât ang a, Êk kai luai chung chuan an paih ang che u. Levia hnêna ka thuthlung a ngheh zêl theih nân, He thupêk hi ka pe che u a ni tih in hria ang,” Engkim Lalpa chuan a ti. An hnêna ka thuthlung chu nunna leh thlamuanna tûr a ni a, Min ṭih theih nân chu chu an hnênah ka pe a, Min ṭih ta ngei reng a, Ka hming pawh an pawisa ta a ni. Mite thu dik a zirtîr a, dâwt a sawi ngai lo, Ka hmaah ngaihngam tak leh dik takin a khawsa a, Thil sual ti lo tûrin mi tam tak a pui ṭhîn. Puithiamte chu thu dik kawltu an ni a, Miten an thu zirtîr an ngaichâng tûr a ni, Engkim Lalpa thuchah kengtute an ni si a. Nangni erawh chuan kawng dik in pênsan a, In zirtîrna chuan mi tam tak a titlu a, Levia hnêna thuthlung in bawhchhe ta,” Engkim Lalpa chuan a ti. “Tu man ka thu in zâwm lo va, Hleih nei taka ro in rêl avângin, Kei pawhin mi tin endawng leh Hmuhsitah ka siam che u a ni.” Kan vaiin pa pakhat thlah kan ni lo vem ni? Pathian pakhat siam vek kan ni lâwm ni? Kan pate thuthlung bawhchhiain Engah nge kan inphatsan ang? Juda chuan bum a chîng a, Israel ramah leh Jerusalem-ah thil tenawm a ti ta, Nupuiah pathian dang bia a neih avângin Ram thianghlim, Lalpa thlâkhlelh chu A tibawrhbâng ta si a. Engkim Lalpa hnêna thil hlan rawn keng mah se, Chûng thil titu tawh phawt chu Jakoba puan in ata Lalpa chuan a paih chhuak ang. In inthawina chu a lâwm lo va, a pawm hek loh avângin Hêng thil hi in ti bawk: In ṭap a, in chiau vawng vawng a, Lalpa maichâm chu in mittuiin a far huh a. Nangnin, ‘Eng vângin nge a pawm loh?’ in ti maw? Lalpa hriatah i tawn tirh nupui chu Rinawm taka neiin kawppui tlat i tiam a. I thutiam chu i bawhchhiat tâk avâng a ni. Pathianin i nupui nên chuan Tisa leh thlarau pumkhata Awm tûrin a siam che u a ni lâwm ni? ‘Eng atân maw?’ ‘Pathian mi, fa ṭha tak tak hring tûrin’ a ni. Chuvângin, i tawn tirh nupui nêna in thuthlung chu Bawhchhe lo tûrin fîmkhur rawh. Lalpa, Israel-te Pathian chuan heti hian a ti: “Inmâk hi ka haw takmeuh va, Nupuite râwng taka sawisak pawh ka hua a ni,” Engkim Lalpa chuan a ti. “Chuvângin, in nun vêng ṭha ula, rinawm takin awm rawh u.” In thu sawiin Lalpa a tihah ta, Nangnin, ‘Engtin nge kan tihhah?’ in ti a. ‘Thil sual titute chu Lalpa mit hmuhah mi ṭha an ni a, An chungah pawh a lâwm hle a ni,’ in ti a, ‘Khaw nge dik taka rorêl ṭhîn Pathian chu a awm,’ In tihahte hian.” “Ngai teh, ka tirhkoh ka rawn tîr dâwn, Ani chuan ka hmaah kawng min buatsaihsak ang. In zawn Lalpa chu a Tempul-ah a lo lang thut ang a, Hmuh in nghahhlelh êm êm Thuthlung tirhkoh pawh a lo kal ang,” Engkim Lalpa chuan a ti. Mahse, a lo kal ni chu tu nge dâwl zo vang? A lo lang chu tu nge tuar zo vang? Ani chu rawhtuina mei anga sa leh Puansutu sahbawn anga chak a ni si a. Tangkarua rawhtuia tithianghlimtu ang a ni ang a, Levia fate chu rangkachak leh tangkarua angin A tithianghlim ang a, Tichuan, Lalpa hnênah inthawina dik tak an hlân ang. Hun kal ta, hmasâng nite ang khân, Judai ram leh Jerusalem mite thil hlan chu Lalpa chuan a lo lâwm ang. Rorêl tûrin ka lo kal thuai dâwn, Dawithiam te, uire te, dâwta chhechham te, Hlawhfa hlawh pe ṭha duh lo te, Hmeithai te, fahrah te, hnam dang te hnehchhiaha, Min phatsantute chu thiam loh ka chantîr nghâl ang,” Engkim Lalpa chuan a ti. “Kei Lalpa hi ka danglam ngai lo va, Chuvângin, nangni Jakoba thlahte u, In la ral rih lo a nih hi. Nangni erawh chuan in pi leh pute aṭang tawh khân, Ka thuruat in hawisan a, in zâwm hek lo. Ka lam lo hawi ula, kei pawh in lam ka lo hawi ang,” Engkim Lalpa chuan a ti. “Nangni erawh chuan, ‘Engtin nge i lam kan hawi ang?’ in ti a. Miin Pathian chanpual a rûksak tûr em ni? Nangni erawh chuan min rûksak si a. ‘Engah hian nge kan rûksak che?’ in ti a. ‘Sâwma pakhat leh thilhlanahte hian!’ Ka chanpual min rûksak avângin in hnam pum pui chu ânchhia lawh a ni ta. Sâwma pakhat dik tak thawhlâwm bâwmah rawn dah ula, Tichuan, ka inah ei tûr a awm dâwn nia. He thilah hian mi han fiah teh rêng u, Vân tukverhte chu ka hawnsak ang che u a, Malsâwmna dawn sên loh ka vûr ang che u,” Engkim Lalpa chuan a ti. “Tichhetu ka vêng ang a, In lova thlaite chu a tichhe tawh lo vang. In huana grepte pawh a hlamtla tawh lo vang,” Engkim Lalpa chuan a ti. “Hnam tinrêngin nihlawh an ti ang che u a, Hlim takin in ramah ngei in awm tawh ang,” Engkim Lalpa chuan a ti. “Ṭawng chhe tak takin mi sawichhe ṭhîn,” Lalpa chuan a ti. “ ‘Engtin nge kan sawichhiat che?’ in ti a. ‘Pathian rawngbâwl hi thil sâwt lo tak a ni a, Engkim Lalpa duhzâwng tih leh A hmaa lungchhe taka inlante hi, Eng nge a hlâwkna?’ in tihah hian. ‘Mi chapote an nihlawh a, Thil sual titute an lian tual tual a, Pathian dawhtheihzia fiahtute hrem lohvin an chhuak a,’ In ti ṭhîn.” Tichuan, Lalpa ṭihtute chu an inbia a, Lalpa chuan a lo ngaithla a, a hre ta a, Lalpa ṭiha a hming ngaisângtute hming chu, Hriatrengna lehkhabu-ah, a hmuh ngeiah ziak a ni ang. “Ka hun ruat tharah chuan anni chu Ka chanpual an ni ang a,” Engkim Lalpa chuan a ti. “Miin a fa, amah châwmtu tûr a duat angin, Ani chu ka duat ve ang. Tichuan, mi dik leh mi sual danglamna te, Pathian rawngbâwltu leh rawngbâwl lotu te. An chan tûr a danglamna an thliar thei ang.” “Ngai teh, thuk alh hluah hluah ang ni chu a lo thleng dâwn, Mi chapote leh thil sualtitu zawng zawng chu Buhpâwl ang an ni ang a, Chumi ni-ah chuan an kâng ral vek ang a, A zung leh a zâr pawh a zuah lo vang,” Engkim Lalpa chuan a ti. “Nangni ka hming ṭihtute tân felna ni a lo chhuak ang, A zung chu damna a ni ang a, Bâwngnote chhuah angin hlim takin in zuang ang. Hêng thil hi ka tih ni chuan, Mi sualte chu in rapbet ang a, In kephah hnuaia vaivut ang mai an ni ang,” Engkim Lalpa chuan a ti. “Ka chhiahhlawh Mosia hnêna dân ka pêk te, Horeb tlânga Israel mi zawng zawng tâna Dân leh thuruat ka pêkte kha hre reng rawh u, Ngai teh u, Lalpa ni ropui râpthlâk thlen hmain In hnênah zâwlnei Elija ka rawn tîr ang. Ani chuan pate leh an fate a inremtîr ang, Chutilo zawng, ka lo kal ang a, Ram chu ka nghaisa ang a, Ka tichhe vek mai ang.” Isua Krista chu Davida thlah a ni a, Abrahama aṭanga an inthlah chhâwn dân chu hetiang hi a ni: Abrahaman fapa Isaka a nei a, Isakan Jakoba. Jakoban Juda leh a unaute. Judan Tamari lakah Faresa leh Zera, Faresan Esroma, Esroman Arama. Araman Aminadaba. Aminadaban Nasona, Nasonan Salmona. Salmonan Rahabi lakah Boaza, Boazan Ruthi lakah Obeda, Obedan Jesaia. Jesaian fapa, lal Davida a nei a. Davidan Uria nupui lakah fapa Solomona a nei a. Solomonan Rehoboama, Rehoboaman Abia, Abian Asafa. AsafanR Jehosafata, Jehosafatan Jehorama, Jehoraman Uzia. Uzian Jothama, Jothaman Ahaza. Ahazan Hezekia. Hezekian Manasea, Manasean Amosa, Amosan Josia. Babulon sala hruai lai vêl khân Josian Jekonia leh a unaute a nei a. Babulon-a sala an hruai hnuin Jekonian fapa Sealtiela a nei a. Sealtielan Zerubabela, Zerubabelan Abiuda, Abiudan Eliakima, Eliakiman Azora. Azoran Zadoka, Zadokan Akima, Akiman Eliuda. Eliudan Eleazara, Eleazaran Mathana. Mathanan Jakoba. Jakoban Josefa, Mari pasal chu a nei a; Mari lakah Isua, Krista an tih chu, a lo piang ta a. Tichuan, Abrahama leh Davida inkârah chhuan sâwm leh chhuan li an awm a, Davida leh Babulon sala hruai inkârah pawh chhuan sâwm leh chhuan li an awm a, Babulon sala hruai leh Krista inkârah chhuan sâwm leh chhuan li bawk an awm a ni. Isua Krista lo pian dân chu hetiang hi a ni: A nu Mari chu Josefa nupui hual a ni a, an inpâwl hmain Thlarau Thianghlimin nau a paitîr tih hriat a lo ni ta a. A pasal tûr Josefa chu mi fel tak a ni a, tihmualpho a duh lo va, a rûka ṭhen a tum a. Nimahsela, chûng thu chu a ngaihtuah lai chuan, ngai teh, a mangah Lalpa tirh vântirhkoh a hmu a. “Josef, Davida fapa, i nupui hual Mari hi neih tîm suh, a nau pai chu Thlarau Thianghlim laka mi a ni asin. Fapa a hring ang a, a hmingah ISUA sa ang che; ani chuan a mite chu an sualte lak ata a chhandam dâwn si a,” a ti a. Lalpan zâwlnei hmanga, “Ngai teh, nula thianghlim chuan nau a pai ang a, Fapa a hring ang a, A hmingah Imanuela an sa ang,” (chu chu ‘Kan hnêna Pathian awm’ tihna a ni) tia a sawi kha a lo thlen theih nân hêng zawng zawng hi a lo awm a ni. Josefa muhîl chu a lo harh a, Lalpa Vântirhkoh thupêk ang chuan a ti a. Mari chu nupuiah a nei ta a; nimahsela, fapa a hrin hma chu a pâwl lo, nau hmingah chuan Isua a sa ta a. Heroda a lal laia, Judai rama Bethlehem khuaa Isua a lo pianin, ngai teh, khawchhak lam aṭangin mi fingte Jerusalem-ah an lo kal a. “Khawiah nge Juda-te lal tûr nau lo piang chu? Khawchhak lamah a arsi kan hmu a, amah chibai bûk tûrin kan lo kal a ni,” an ti a. Chu chu lal Herodan a hriatin a buai ta hle a, Jerusalem-a mi zawng zawng pawh an buai a. Tichuan, puithiam lalte leh vântlâng Dân zirtîrtu zawng zawng chu a ko khâwm a, Krista pianna tûr hmun a zâwt a. Anni chuan, “Judai ram Bethlehem khuaa piang tûr a ni. Hetiangin zâwlneiin a ziak kha: ‘Nang, Bethlehem, Judai rama mi, Judai ram khawpui zîngah i tê ber tawp lo, I chhûng aṭangin awptu a lo chhuak dâwn si a, Ka mi Israel-te vêngtu tûr chu,’ ” an ti a. Chutichuan, Herodan mi fingte chu a rûkin a ko va, arsi lan hun lai chu ngun takin a zâwt a. Bethlehem-ah chuan a kaltîr a, “Kal ta ula, naute thu chu ngun takin zâwt chhuak ula; kei pawhin ani chu chibai ka rawn bûk ve theih nân in hmuh hunah mi rawn hrilh leh ang che u,” a ti a. Lal thu chu an hria a, an kal ta a; khawchhak lama arsi an hmuh khân naute awmna chung zâwn a thlena a din hma chu an hma a hruai zêl ta a. Arsi chu an hmuhin an hlim êm êm a; in chhûnga an va luh chuan a nu Mari bula nautê chu an hmu a, lei sia kûnin chibai an bûk a; an robâwmte an hawng a, thilpêk - rangkachak te, beraw te, mura te an pe a. Heroda hnêna kîr leh lo tûra an manga hrilh an nih avângin an ram panin kawng dangah an haw ta a. An hâwn hnuin, ngai teh, Lalpa Vântirhkoh Josefan a mangah a hmu a, “Tho la, nautê leh a nu hruai la, Aigupta ramah kal bo rawh; ka hrilh leh hma che zawng chutah chuan awm reng ang che, tihboral tumin Herodan nautê hi a zawng dâwn a ni,” a lo ti a. Tichuan, a tho va, nautê leh a nu chu a hruai a, a zân a zânin Aigupta ramah an kal ta a. Heroda thih hma chu chutah chuan an awm ta a. Lalpan zâwlnei hmanga, “Ka fapa chu Aigupta ram ata ka ko chhuak a,” tia a sawi kha a lo thlen theih nân. Tin, mi fingten an tihder a ni tih Herodan a hriatin a thin a ur ta êm êm a, a hun thu a zawha an hrilh ang khân Bethlehem leh a vêl zawng zawnga mipa naupang kum hnih chin hnuai lam chu a va thahtîr ta vek a. Zâwlnei Jeremian: “Rama khuaah thâwm an hria, Lusûn leh ṭap chuah chuah thâwm chu; Rakili chuan a fate a ṭah a, An awm tawh loh avângin a hnem theih loh,” tia a sawi kha a lo thleng ta a ni. Heroda chu a thih hnuin, Aigupta ramah chuan Josefan a mangah Lalpa vântirhkoh a hmu a, “Tho la, nautê leh a nu hruai la, Israel ramah haw tawh rawh; nautê thah tumtute kha an thi tawh e,” a ti a. Tichuan, a tho va, nautê leh a nu chu a hruai a, Israel ram chu an pan ta a. Nimahsela, Arkelausa chu a pa Heroda aiawhin Judai ramah a lal tih a hriatin chuta kal chu a hlau va, a mumanga hriattîrna a dawn angin Galili ram lamah a kal ta a. Khaw pakhat, Nazaret an tihah chuan a va awm a, “Ani chu, ‘Nazaret mi,’ an ti ang,” tia zâwlneite sawi kha a lo thleng ta a ni. Chûng lai chuan baptistu Johana chu Judai ram thlalêrah thu hrilin a lo kal a. “Sim rawh u, vânram chu a hnai tawh e,” a ti a. Ani hi a ni, zâwlnei Isaian, “Thlalêra mi au aw chuan, ‘Lalpa lamlian chei ṭha ula, A kal nân kawng tluang siam rawh u,’ a ti,” tia a sawi kha. Chu Johana chuan sanghâwngsei hmul kawr a ha a, savun kâwnghrên a hrêng a, a chaw chu khaukhuap leh ram khawizu a ni. Chutih lai chuan Jerusalem leh Judai ram hmun tina awmte leh Jordan luidung vêl ram zawng zawnga awmte chuan ani chu an pan huai huai a, an sualte an puang a, Jordan luiah chuan a lo baptis hlawm a. Tin, Farisai leh Sadukai tam tak baptisma chang tûra lo kal ve a hmuhin an hnênah, “Rûl thlahte u, thinur lo thleng tûr pumpelh nân tu nge baptisma chang tûra fuih che u? In sim ngei a ni tih tilang tûrin thil ti zêl zâwk rawh u. ‘Kan pa chu Abrahama asin’ in lo ti dah ang e; ka hrilh a che u, Pathian chuan hêng lung hi Abrahama thlahah a din thei a ni. Tûn apangin thing bul tinah hreipui an dah ta, thing eng pawh rah ṭhaa rah lo chu kiha meia tuah mai tûr a ni. Kei zawngin sim entîr nân tuiin ka baptis ṭhîn che u a; ka hnunga lo kal tûr erawh chu kei aiin a ropui zâwk a, a pheikhawk keng tlâk pawh ka ni lo ve. Ani zawngin Thlarau Thianghlim leh meiin a baptis ang che u; a hruiha buh chu zâp faia zêma khung mai tûrin a sisêp chu a keng tawh a, a site erawh chu tihmih rual loh meiah a hâl ral ang,” a ti a. Chutih lai chuan Galili ram aṭangin Johana hnênah, Jordan luia baptisma chang tûrin Isua chu a lo kal a. Johana erawh chuan, “Mi baptis tûr i ni zâwk si a, ka hnênah i lo kal a ni maw?” tiin a hnial a. Nimahsela, Isuan, “Tûnah remti hrâm rawh, hetiang felna zawng zawng hlen chhuah hi kan tân a mawi a ni,” a ti a. Tichuan, a remti ta a. Isuan baptisma a chan zawh chuan tui ata chu a chhuak nghâl a; a tân vân a lo inhawng a, Pathian Thlarau chu ṭhuro anga lo chhukin a chunga fu a hmu a. Ngai teh, vân aṭanga awin, “Hei hi ka Fapa, ka Duhtaka chu a ni, a chungah ka lâwm êm êm a ni,” a ti a. Chumi zawh chuan Isua chu Diabola thlêm tûrin thlalêrah Thlarauvin a hruai chho ta a. Ni sawmli leh zân sawmli chaw a nghei hnuin a ril a lo ṭâm a. Thlêmtu chu a lo kal a, a hnênah, “Pathian Fapa i nih tak tak chuan hêng lung hi chhanga chang tûrin thu pe rawh,” a ti a. Ani erawh chuan, “Mihring hi chhang ringawt ringin an nung tûr a ni lo. Pathian ka aṭanga thuchhuak tinrêng an ring bawk tûr a ni,” a ti a. Diabola chuan ani chu khaw thianghlimah a hruai lût a. Tempul chhîpah a dintîr a, a hnênah, “Pathian Fapa i nih meuh chuan zuang thla rawh. ‘I chungthu-ah zawng vântirhkohte thu a pe ang a, An kutin an dâwm ang chia, Tichuan, lungah i ke i sawh dâwn lo nia,’ tih ziak a ni si,” a ti a. Isua chuan a hnênah, “‘Lalpa i Pathian fiah suh’ tih ziak a ni bawk asin,” a ti a. Diabola chuan tlang sâng takah a hruai leh a, khawvêl ram zawng zawng leh a ropuina a entîr a; a hnênah, “Lei siin chibai mi bûk la, hêng zawng zawng hi ka pe ang che,” a ti a. Isuan a hnênah, “Setan, kal bo daih rawh, ‘Lalpa i Pathian chu chibai bûk la, ama rawng chauh bâwl rawh,’ tih ziak a ni,” a ti a. Tichuan, Diabola chuan a kalsan a, vântirhkohten rawng an bâwlsak ta a. Johana an man tih a hriatin Isua chu Galili ramah a kal ta daih a. Nazaret chhuahsanin Kapernaum khuaah a zu awm ta reng a, chu chu Zebulun leh Naftali biala dîl kama awm a ni; zâwlnei Isaia sawi kha a lo thleng ta a ni: “Zebulun leh Naftali ram Tuipui panna kawng, Jordan râl, Jentail-te chênna Galili. Thim hnuaia ṭhute chuan êng nasa tak an hmu a, Thihna ram thima chêngte chungah chuan êng a lo chhuak ta,” a tih kha. Chuta chinah chuan Isuan, “Sim rawh u, vânram chu a hnai tawh e,” tiin a hril ṭan ta a. Galili dîl kama a lên pahin unau pahnih, Simona, Petera an tih leh Andria chu dîla an lên dêng a va hmu a; sangha man mi an ni rêng a. An hnênah, “Mi zui rawh u; tichuan, mihring mantuah ka siam ang che u,” a ti a. An lênte chu an hnutchhiah a, ani chu an zui ta nghâl a. Chuta ṭang chuan a kal zêl a, unau dang pahnih, Zebedaia fa, Jakoba leh Johana chu a hmu a, an pa Zebedaia hovin lawngah an lên an lo ṭhui ṭha a, anni chu a ko va. Tichuan, lawng leh an pa chu an kalsan a, Isua chu an zui ta nghâl a. Isua chuan Galili ram a fang vêl a, an sunagog -ahte zirtîrin, Ram Chanchin ṭha chu a hril a, Israel-te zînga natna tinrêng leh chak lohna tinrênga nâte chu a tidam zêl a. Tichuan, Suria ram zawng zawngah a chanchin chu a thang ta a; damlo zawng zawng, damlohna leh natna tinrêng tuar te, ramhuai man te, thla-em-ât te leh zeng te, a hnênah an rawn hruai a, a lo tidam hlawm a. Galili ram aṭang te, Dekapoli khua aṭang te, Jerusalem aṭang te, Judai ram aṭang te leh Jordan râl aṭang te chuan mipui nasa takin amah an zui a. Mipui chu a hmuhin tlângah a chho va, a ṭhu a, a zirtîrte an lo kal khâwm a; thu a sawi a, anmahni a lo zirtîr a: “Thlarau lama an pachhiatzia inhriate chu an chan a ṭha e, vânram chu an ta a ni si a. “Lungngaite chu an chan a ṭha e, thlamuan an la ni dâwn si a. “Thuhnuairawlhte chu an chan a ṭha e, ram chu an la rochung dâwn si a. “Felna duha rilṭâma tuihâlte chu an chan a ṭha e, an la tlai dâwn si a. “Khawngaihna nei mite chu an chan a ṭha e, khawngaih an la hlawh dâwn si a. “Thinlunga thianghlimte chu an chan a ṭha e, Pathian an la hmu dâwn si a. “Remna siamtute chu an chan a ṭha e, Pathian fate tih an la ni dâwn si a. “Felna avânga tihduhdah tuartute chu an chan a ṭha e, vânram chu an ta a ni si a. “Keimah avânga miin an hau che ua, an tihduhdah che u a, dik lo taka sual tinrêng tia an puh hun che u chuan in chan a va ṭha dâwn êm! Lâwm ula, hlim takin awm rawh u, vânah in lâwmman a awm hnem si a; chutiang bawkin in hmaa zâwlneite pawh kha an tiduhdah ṭhîn asin. “Lei chi in ni e; nimahsela, chi hi da ta ang se, engtia tihal leh tûr nge ni ang? Paih chhuaha, mite rah mai mai chauhvah lo chuan eng atân mah a tlâktlai tawh lo vang. “Khawvêl êng in ni e. Tlângchhîpa khaw awm chu thuhrûk theih a ni lo. Miin an khâwnvâr chhit chu khovin an khuh ngai lo, a dahnaah an dah zâwk ṭhîn; tichuan, in chhûnga mi zawng zawng a ên ṭhîn. Chutiang bawkin in êng chu mi hmuhin êng rawh se; chutichuan, in thil ṭha tihte an hmu ang a, in Pa vâna mi an chawimawi thei ang. “Dân thu emaw, zâwlneite thu emaw ṭhiat tûra lo kal ka nih ring suh u, ṭhiat tûr ni lovin tifamkim tûra lo kal ka ni zâwk. Thu dik ka hrilh a che u, lei leh vân hi a awm chhûng chu Dân thu-a mi chhun han hlek emaw, thai han hlek emaw, a zaa a thlen kim zet hma chuan a pakhat mah hi a râl tawp lo vang. Chutichuan, hêng thupêk zînga pawimawh lo ber pakhat pawh hi ngainêpa, chutianga ti ve tûra mite zirtîr apiang chu vânramah chuan mi tê ber an ti ang; amaherawhchu, tu pawh zâwma, zirtîr ve chu vânramah chuan mi lian an ti ang. In felnain Dân zirtîrtute leh Farisai-te felna a khûm loh chuan vânramah in lût tawp lo vang tih ka hrilh che u a nih hi. “Hmânlai mite hnênah, ‘Tual i that tûr a ni lo, tual that rêng rêng chu an chungthu rêl tûr a ni,’ tih a nih thu in hria e. Kei erawh chuan ka hrilh a che u, mahni unau chunga thinur chu a chungthu rêl tûr a ni; a unau ‘mi chhawihpa,’ ti chu Sanhedrin-a rêl tûr a ni ang; a unau ‘mi â pa,’ ti phei chu hremhmun meia kal tlâk a ni tih ka hrilh che u hi. Tichuan, i thilpêk maichâma i hlan dâwn laiin i unauvin i chungah lungnih lohna a nei tih i hriat chhuah chuan, maichâm hmaah i thilpêk chu hnutchhiah la, kal langin, i unau chu rem zet la, chumi hnuah i thilpêk chu hlân rawh. I khingpui chu kalkawnga in kal dun laiin rem thuai rawh; chutilo chu, rorêltu a mantîr ang chia, rorêltu chuan pulis hnênah a hlân ang chia, tân inah an khung hlauh dah ang che. Thu dik ka hrilh a che, pawisa pakhat pawh i tlâk kim hma chu chuta ta chu i chhuak tawp lo vang. “ ‘I uire tûr a ni lo,’ tih a nih in hria e. Kei erawh chuan ka hrilh a che u, tu pawh, ngaih châka hmeichhe melhtu chu, a thinlungah a uire tawh reng a ni. I mit ding lamin a tihtlûk che chuan kher chhuak la, paih daih rawh; i taksa a puma hremhmuna paih a nih ai chuan, i taksa pêng pakhat boral chu i tân a ṭha zâwk e. Tin, i kut ding lamin a tihtlûk che chuan, tan la, paih daih rawh; i taksa a puma hremhmuna paih a nih ai chuan, i taksa pêng pakhat boral chu i tân a ṭha zâwk e. “ ‘Tu pawh nupui ma chuan mâkna lehkha pe rawh se,’ tih a ni bawk a. Kei erawh chuan ka hrilh a che u, uire vâng ni lova nupui ma apiang chuan an nupui chu an uiretîr a ni, mâk hnu nei pawh an uire a ni. “Hmânlai mite hnênah, ‘dâwtin chhia chham suh la, Lalpa hnênah i chhechham chu i hlen tûr a ni,’ tih a nih in hre bawk a. Kei erawh chuan ka hrilh a che u, chhia rêng rêng chham suh u; vân chhâlin chham suh u, chu chu Pathian lalṭhutthlêng a ni si a; lei chhâlin chham bawk hek suh u, chu chu a ke nghahchhan a ni si a; Jerusalem chhâl pawhin chham suh u, chu chu Lal ropui tak khawpui a ni si a. I lu chhâlin i chham tûr a ni hek lo, samzai pakhat pawh i tivârin i tidum thei si lo va. In thu sawi chu ‘ni,’ emaw, ‘ni lo,’ emaw ni ngawt rawh se, chûng aliam chu sual laka chhuak a ni. “ ‘Mit aiah mit, ha aiah ha,’ tih a nih in hria a. Kei erawh chuan ka hrilh a che u; mi sual dodâl suh u; i biang ding lam bêngtu hnênah chuan a lehlam pawh dawh rawh. Tu pawhin i lakah thu pawi siamin i kawr lâk an tum chuan, I puan pawh lâktîr mai rawh. Tin, km. khat hruai luitu che chu km. hnih zui rawh. An dîl che chuan pe la, i laka pûk duhtu chu hawisan suh. “ ‘I vêngte i hmangaih tûr a ni a, i hmêlma chu i haw tûr a ni,’ tih a nih in hria a. Kei erawh chuan ka hrilh a che u: i hmêlmate chu hmangaih la, a tiduhdahtu che chu ṭawngṭaisak rawh, in Pa vâna mi fate in nih theih nân ani chuan mi sualte leh mi ṭhate chungah ni a chhuahtîr a, mi dik leh dik lote chungah pawh ruah a surtîr ṭhîn. Nangmahni hmangaihtute chauh in hmangaih hian lâwmman eng nge in hmuh bîk ang? Chhiahkhawntute pawhin chutiangin an ti ve lo vem ni? Tin, in unaute chauh chibai in bûk hian eng nge in tih hnem chuan bîk? Jentail-te pawhin chutiangin an ti ve lo vem ni? Chutichuan, in Pa vâna mi a ṭha famkim angin in ṭha famkim tûr a ni. “In thil ṭha tihte mi hmuh atân, an hmaa ti lo tûrin fîmkhur rawh u; chutilo chu in Pa vâna mi hnêna lâwmman in hmu lo vang. Chutichuan, khawngaih thilpêk i hlanin, mi vervêkten mi fak an hlawh theih nân sunagog-ah te leh kawtthlêrah te an ti ṭhîn ang hian i hmaah tawtawrâwt hâm suh. Thu dik ka hrilh a che, an lâwmman chu an hmu tawh reng a ni. Nang erawh chuan khawngaih thilpêk i hlanin, i kut ding lam tih chu i kut vei lamin hre suh se, i thilpêk chu a rûka a awm theih nân; chutichuan, i Pa, a rûka hmu ṭhîntu chuan a rûl ang che. “In ṭawngṭai pawhin mi vervêkte angin awm suh u; miin an hmuh theih nân sunagog-ah te, kawtthlêr ṭhuam laiah te ding chunga ṭawngṭai an ngaina si ṭhîn. Thu dik ka hrilh a che u, an lâwmman chu an hmu tawh reng a ni. Nang erawh chu i ṭawngṭai hunin, i pindan chhûng rilah lût la, kawng khâr la, i Pa, a rûka awm hnênah chuan ṭawngṭai rawh; tichuan, i Pa, a rûka hmu ṭhîntu chuan a rûl ang che. “In ṭawngṭaiin Jentail-te angin sawi nawn mai mai suh u; an ṭawng tam avângin hriain an ring a ni. Anmahni angin awm suh u, in dîl hma pawhin in Pa chuan in mamawhte chu a hre si a. Tichuan, nangni chu hetiang hian ṭawngṭai rawh u: ‘Kan Pa, vâna mi, I hming zahin awm rawh se. I ram lo thleng rawh se. I duhzâwng vâna tih a nih angin leiah tih ni rawh se. Vawiinah hian kan ei khawp chaw min pe ang che. Kan laka bate kan ngaidam angin, kan batte hi min ngaihdamsak ang che. Thlêmnaah min hruai lût suh la, Mi sual lakah chuan min chhandam zâwk ang che.’ tiin. An bawhchhiatnaah mite in ngaihdam chuan, in Pa vâna mi pawhin a ngaidam ve ang che u. In ngaihdam loh erawh chuan in Pain in bawhchhiatnaahte a ngaidam bîk lo vang che u. “Chaw in nghei hun pawhin mi vervêkte angin ngui hmêl pu suh u; anni zawngin mi hmuha chaw ngheia an lan theih nân an hmêl an tipawr si ṭhîn a. Thu dik ka hrilh a che u, an lâwmman chu an hmu tawh reng a ni. Nang erawh chuan chaw i nghei hunin, sahriak thih la, i hmai phih rawh. I Pa, a rûka awm hnênah chauh lo chuan mi hmuhah chaw ngheiin i lang lo vang; tichuan, i Pa a rûka hmu ṭhîntu chuan a rûl ang che. “Leiah, thîm leh tuiêkin a ei chhiatnaah, rûkruten an reh pawha an rûknaah hian in tân ro khâwl khâwm suh u. Vânah, thîm leh tuiêkin a ei chhiat lohnaah, rûkruten an reh pawha an rûk hek lohnaah chuan in tân ro khâwl khâwm zâwk rawh u. In ro awmna apiangah in rilru pawh a awm ṭhin hi. “Mit hi taksa tân khâwnvâr ang a ni, I mit a dik chuan i taksa chu a pum ên ang; i mit a dik loh erawh chuan i pumin i thim vek ang. Tichuan, nangmaha êng awm chu a thim si chuan, chu thim chu a va nasa dâwn êm! “Tu man hotu pahnih rawng an bâwl kawp thei lo, pakhat huain pakhat an duh emaw a ni ang a; a nih loh leh pakhat chu an ngaina ang a, pakhat chu an hmusit ang. Pathian rawng leh sum rawng in bâwl kawp thei lo ve. “Chuvâng chuan, ka hrilh a che u, in nun nân eng nge in ei anga in in ang tih te, in taksa tân eng nge in sin ang tih te lungkham suh u. Ei tûr aiin nunna a pawimawh zâwk a, silhfên aiin taksa pawh a pawimawh zâwk lo vem ni? Chunglêng savate hi en ta che u, buh an tuh lo va, an seng lo va, buh inahte an khung khâwm hek lo; mahse, in Pa vâna mi chuan a châwm si a; anni ai chuan in hlu zâwk daih lo vem ni? Nangniho zîngah lungkham avângin tu nge mahni nun tisei hret thei? Silhfên thu engah nge in lungkham ni? Ram tûktinpâr ṭhan dânte hi ngaihtuah teh u, hna an thawk lo va, la an dek hek lo; nimahsela, ka hrilh a che u, Solomona meuh pawh a ropui thei ang bera a inthuam khân hêng tûktinpâr pakhat tluk pawh hian chei a ni lo. “Chutichuan, ram hnim, vawiina nung, a tûka meia tuah leh mai tûr mah Pathianin chuti kauva a chei si chuan, aw, nangni rin tlêmte u, chûngte ai chuan a thuam nasa zâwk dâwn lo che u em ni? Chuvângin, eng nge in eia in in anga, eng nge in silha in fên ang tih lungkham suh u. Jentail-ten chûng chu an buaipui ber a ni: hêng zawng zawng hi nangni pawhin in mamawh tih in Pain a hre reng a ni. A ram leh a felna chu zawng hmasa zâwk rawh u; tichuan, hêng zawng zawng hi a pêk belhchhah dâwn che u nia. Chuvângin, a tûk atân lungkham suh u, a tûk chuan ama tân a ngaihtuah chawp dâwn si a. Ni khat hrehawm hi ni khat atân a tâwk e. “Sawisêl suh u, sawisêla in awm loh nân. In sawisêlna ang bawkin sawisêl in ni ang a, in tehna ngeiin an tehsak ang che u. Engtizia nge mahni mita thingtum awm chu hre si lovin in unau mita thil tê tak tê awm chu in hmuh ni? A nih leh, engtin nge mahni mita thingtum awm reng siin i unau hnênah, ‘I mita thil tê tak tê awm kha mi lâk chhuahtîr rawh,’ i tih theih ang? Ngai teh, nangma mit ngeiah thingtum a awm ruau si a. Mi vervêk, i mita thingtum awm kha la chhuak hmasa zet rawh; tichuan, i unau mita thil tê tak tê lâk chhuah tûr chu fiah takin i hmu thei ang. “Uite chu thil thianghlim pe suh ula, vawk hmaah pawh in tuikeplung vawrh hek suh u; an chîl hrep ang a, an rawn tai thlêr dah ang che u. “Dîl ula, pêk in ni ang; zawng ula, in hmu ang; kik ula, hawnsak in ni ang. A dîl apiangin an dawng ṭhîn a, a zawng apiangin an hmu bawk ṭhîn; tu pawh a kik chu an hawnsak dâwn a ni. A nih leh, nangniho zînga tu pawh hi, a fapain chhang dîl sela, tu nge lung pe ang? Sangha dîl ta sela tu nge rûl pe ang? Chutichuan, nangni mi sual mahin in fate thil ṭha pêk nachâng in hriat chuan in Pa vâna mi chuan a dîltute chu thil ṭha a va pe dâwn êm! “Chutichuan, thil eng pawh miin in chunga an tih in duh tûr ang apiang chu, mi chungah pawh ti ve rawh u; chu chu Dân leh zâwlneite thu a ni rêng si a. “Kawngka zîmah chuan lût rawh u, boralna kawngka chu a zau va, a kawng pawh a nuam a, chumi lama kalte chu tam tak an ni. Nunna kawngka erawh chu a zîm a, a kawng pawh a chêp a, a hmutute pawh tlêm tê an ni. “Zâwlnei derte lakah fîmkhur rawh u, chûng chu berâm vun sinin in hnênah an lo kal ṭhîn; an chhûng lamah erawh chuan chinghne koham tak an ni si a. Anni chu an rahah in hre mai ang. Hlîngbukah grep an lo ngai em ni? Lênhlîngah theipui an lo ngai em ni? Thing ṭha chu a rah ṭha ṭhîn a, thing chhia chu a rah chhe ṭhîn. Thing ṭha a rah chhe thei lo va, thing chhia lah a rah ṭha thei hek lo. Thing tin rah ṭhaa rah lo apiang chu an kit a, meiah an tuah ṭhîn. Tichuan, anni chu an rahah in hre mai ang. “‘Lalpa, Lalpa,’ mi ti nazawng chu vânramah an lût lo vang a, ka Pa vâna mi duhzâwng titute erawh chu an lût ang. Chumi ni-ah chuan mi tam takin, ‘Lalpa, Lalpa, i hmingin thute kan hril a, i hmingin ramhuaite kan hnawt chhuak a, i hmingin thil makte kan ti ṭhîn lo vem ni?’ an la ti ang. Chumi hunah chuan, ‘Nangni thil sual titute u, ka hre ngai lo va che u, ka hnên ata kal bo daih rawh u,’ tiin anni chu ka la hrilh ang. “Chutichuan, hêng ka thu hi hriaa, zâwm apiang chu mi fing, lungpui chunga in satu nên tehkhin tûr a ni. Ruah a lo sûr a, tui te a lo lian a, thli te a lo tleh a, chu in chu a rawn nam sawk sawk a; mahse, lungpui chunga rem tlat a nih avângin a chim lo. Hêng ka thu hi hriaa zâwm si lote erawh chu mi â ṭiauvut chung maia in satu nên tehkhin tûr a ni. Ruah a lo sûr a, tui te a lo lian a, thli te a lo tleh a, chu in chu a rawn nam sawk sawk a, a chim ta a, a sawp rup mai a ni,” a ti a. Isuan chûng thu chu a sawi zawh chuan mipuiten a thu zirtîr chu mak an ti hle a, Dân zirtîrtute ang lova thu nei taka anmahni a zirtîr avâng chuan. Tlâng ata a lo chhuk hnuin mipui nasa takin Isua chu an zui a. A hnênah phâr a lo kal a, kûnin chibai a rawn bûk a, “Lalpa, i duh chuan mi tithianghlim thei e,” a ti a. Ani chuan a han ban a, a dek a, “Duh e, lo thianghlim tawh ang che,” a ti a, a phâr chu a lo thianghlim ta nghâl a. Isuan a hnênah, “Tu hnênah mah sawi suh; amaherawhchu, puithiam hnênah kal la, va inentîr rawh, i dam ngei tih miten an hriat nân; Mosian thil hlan tûr a ruat kha hlân rawh,” a ti a. Tin, Kapernaum khua a lo luhin a hnênah sipai za hotu a lo kal a, “Lalpa, ka naupang a zeng a, inah a mu reng a, a na hle mai,” tiin tidam tûrin ṭhahnemngai takin a ngên a. Ani chuan a hnênah, “Ka lo kal ang a, ka rawn tidam ang e,” a ti a. Sipai za hotu erawh chuan a chhâng a, “Lalpa, ka in chhûnga ko lût tlâk che ka ni lo, thu chauh sawi la, ka nau chu a dam mai ang. Kei pawh mi thuhnuaia awm ka ni a, ka hnuaiah sipaite an awm leh chhâwng a, ‘Kal rawh,’ ka tih chu a kal a, ‘lo kal rawh,’ ka tih chu a lo kal mai a; ka bawih pawhin ‘hei hi ti rawh’ ka tih chu a ti mai ṭhîn,” a ti a. Isuan chu chu a hriatin mak a ti hle a, a zuitute hnênah chuan, “Thu dik ka hrilh a che u, Israel zîngah pawh heti êma ring nasa hi tu mah ka hmu lo. Ka hrilh a che u, chhak leh thlang aṭangin mi tam tak an lo kal ang a, vânramah chuan Abrahama te, Isaka te, leh Jakoba te nên ruai an la kîl ho vang a; Ram fate erawh chu pâwn thimah hnawh chhuah an ni ang; chutah chuan an ṭap ang a, ha an ṭhial ang,” a ti a. Isuan, sipai za hotu hnênah chuan, “Kal tawh le, i rin angin i chungah lo thleng rawh se,” a ti a. Tin, chumi dâr ngeiah chuan naupang chu a dam ta a. Petera ina Isua a luhin a pizawn khawsika mu chu a hmu a, a kut a khawihsak a, a khawsik chu a reh ta a; a tho va, chaw ei a siamsak ta a. Khua a lo tlai lam chuan a hnênah ramhuai man tam tak an rawn hruai a, thuin ramhuaite chu a hnawt chhuak a, damlo lo kal zawng zawng pawh chu a tidam bawk a. Zâwlnei Isaian, “Ani chuan kan chak lohnate a la a, kan nâte a phur,” tia a sawi kha a lo thleng ta a ni. Mipui nasa tak a vêla awm Isuan a hmuhin Jordan râl lehlama kal tûrin a zirtîrte chu thu a pe a. Dân zirtîrtu pakhat a lo kal a, a hnênah, “Zirtîrtu, i kalna apiangah ka zui ang che,” a ti a. Isuan a hnênah, “Sihalten kua an nei a, chunglêng savate pawhin riahhmun an nei; Mihring Fapa erawh hi chuan lu nghahna tûr a nei lo,” a ti a. A zirtîrte zînga mi dangin a hnênah, “Lalpa, ka pa ka va vui zet ang e aw,” a ti a. Isua erawh chuan a hnênah, “Mi zui rawh, mitthiin anmahni mitthi chu lo vui mai rawh se,” a ti a. Tin, lawngah a chuang a, a zirtîrte chuan an zui a. Dîl chu nasa takin a lo fâwn ta a; tichuan, tuifâwnin lawng chu a rawn vûr hlup hlup mai a, ani erawh chu a muhîl a. An va kaitho va, “Lalpa, min chhanhim rawh, kan boral dâwn hi le,” an ti a. Ani chuan an hnênah, “Rin tlêmte u, engah nge in hlauh?” a ti a. Tichuan, a tho va, thli leh dîl chu a hau ta a, a lo reh ta ṭhuap mai a. Mite chuan mak an ti hle a, “He mi hi mi eng nge a nih? Thli leh dîl lam pawhin a thu an awih hi le!” an ti a. Râl lehlam, Gadarin mite ram chu a va thlenin ramhuai man pahnih, thlân aṭanga lo kalte chuan an rawn pan a; an kawlh êm êm mai a, chumi lam kawngah chuan tu mah an kal ngam lo. Tin, anni chuan, “Pathian Fapa, kan chungthu-ah rawn inrawlh i tum elo? Hun tiam thlen hmaa min nghaisa tûrin i lo kal em ni?” tiin an lo au va. Chuta ṭanga hla feah chuan vawk rual an tla sup sup a. Ramhuaite chuan, “Min hnawh chhuah chuan vawk kawchhûngah sâwn min luhtîr ang che,” tiin an ngên a. Ani chuan an hnênah, “Va lût ta che u,” a ti a. Tichuan, an lo chhuak a, vawk rual kawchhûngah chuan an lût ta a; tin, ngai teh, vawk rual chu an vaiin dîl kam khâm kovah chuan an tlân liam a, dîlah chuan an boral ta a. A enkawltute chu an tlânchhia a, khuaah an kal a, thil awmzia zawng zawng, ramhuai mante chunga thil lo thleng te chu an va sawi a. A khuain Isua hmu tûrin an lo chhuak ta a, amah an hmuh chuan an ram chhuahsan tûrin an ngên chiam a. Isua chu lawngah a chuang a, râl lehlam a kai a, a chênna khua chu a va thleng a. Ngai teh, zeng pakhat, a mutna chawpin a hnênah an rawn zâwn a. Isuan an rinzia a hmuhin zeng hnênah chuan, “Ka fa, thlamuang takin awm rawh, i sualte ngaihdam a ni ta e,” a ti a. Dân zirtîrtu ṭhenkhat chuan, anmahni zîngah, “He mi hian Pathian pawi a sawi a ni,” an ti hlawm a. Isua chuan an ngaihtuahte chu a lo hria a, “Engah nge in thinlunga sual in ngaihtuah ni? ‘I sualte ngaihdam a ni tawh e,’ tih nge sawi awla, ‘Tho la, kein kal tawh rawh,’ tih hi? “Khawvêlah hian Mihring Fapa hian sual a ngaidam thei tih ka han hriattîr ang che u,” a ti a; zeng hnênah chuan, “Tho la, i mutna kha la la, i inah haw rawh,” a ti a. Tichuan, a tho va, a haw ta a. Mipuiin chu chu an hmuhin an hlau va, chutiang thuneihna mihringte petu Pathian chu an fak a. Chuta ṭanga a kal pah chuan chhiah khawnna hmuna ṭhu mi pakhat, a hming Mathaia chu Isuan a hmu a, a hnênah, “Mi zui rawh,” a ti a. Ani chu a tho va, a zui ta a. Isua leh a zirtîrten ina chaw an kîl laiin chhiahkhawntute leh mi sual tam tak an lo kal a, an rawn kîlpui hlawm a. Farisai-ten chu chu an hmuhin a zirtîrte hnênah, “Engtizia nge in zirtîrtu hian chhiahkhawntute leh mi sualte zînga a ei ve le?” an ti a. Ani chuan a lo hria a, “Mi hrisêlten daktor an ngai lo va, mi bawrhsâwmten an ngai zâwk a ni. Chutichuan, ‘inthawina aiin khawngaihna ka duh e,’ tih hi eng tihna nge va zir rawh u. Mi dikte lam tûra lo kal ni lovin, mi sualte lam tûra lo kal ka ni zâwk,” a ti a. Johana zirtîrte chu a hnênah an lo kal a, “Engati nge keini leh Farisai-te hian chaw kan nghei zut a, i zirtîrte lêmin an nghei ve loh?” an ti a. Isuan an hnênah, “An zîngah moneitu a awm chhûng chuan mo hruaitute chu an lungngai dâwn em ni? Moneitu chu an hnên ata hruai bo hun a lo la awm ang a, chumi hunah erawh chuan chaw an la nghei ve ang. Tu man puan hlui, puan thar la sûk loh themin an bel ngai lo; a bel phuina tûr chuan a belna lai chu a kai thlêr zâwk ang a, a lo thlêr nasa lehzual ang. Uain thar pawh savun ip hluiahte an thun ngai hek lo; thun ta sela, savun chu a puakkeh ang a, uain chu a bua ang a, savun ip chu a chhia ang; uain thar chu savun ip tharahte an thun zâwk ṭhîn a ni; tichuan, him takin a awm ve ve ṭhîn,” a ti a. Chûng thu chu an hnêna a sawi laiin, ngai teh, hotu pakhat a lo kal a, kûnin chibai a bûk a, “Tûn maiah khân ka fanu a thi a; nimahsela, lo kal la, a chungah i kut nghat la, a lo nung leh ang,” a ti a. Tichuan, Isua chu a tho va, a zirtîrte nên ani chu an zui ta a. Hmeichhe pakhat thi pûta kum sâwm leh kum hnih dam lo a hnungah a lo kal a, a puan fêm a dek a; “A puan chauh pawh dek ila ka dam mai ang,” a ti rilru a ni. Isua chu a han lehhawi a, ani chu a hmu a, “Ka fanu, thlamuang takin awm rawh; i rinna hi i dam phah a ni e,” a ti a. Tichuan, hmeichhia chu chumi dâr a chinah chuan a lo dam ta a. Isuan hotu in chu a va thleng a, phênglâwng tumte leh mipui ri mur mur a va hmuh chuan, “Kiang rawh u naupang hi a thi lo ve, a muhîl a ni zâwk e,” a ti a. Anni chuan an nuihsan ta mai a. Mipuite chu hnawh chhuah an nih hnu chuan ani chu a lût a, naupang kut chu a chelh a, a lo tho ta a. Chumi ram zawng zawngah chuan chu thu chu a thang chhuak ta a. Chuta ṭanga Isua a kal zêl chu mitdel pahnihin an zui a, “Davida Fapa, min khawngaih rawh,” tiin an au zui zêl a. Ina a luh chuan mitdelte chu a hnênah an lo kal a, Isuan an hnênah, “Hei hi ka tih theih in ring em?” a ti a. Anni chuan, “Ring e, Lalpa,” an ti a. Ani chuan an mit chu a dek a, “In rin angin in chungah lo thleng rawh se,” a ti a. Tichuan, an mit chu a lo vâr ta a; Isuan an hnênah, “Tu mah hrilh hauh suh u,” a ti a. Nimahsela, anni chu an chhuak a, chumi ram zawng zawngah chuan a chanchin an tithang ta a. An chhuah laiin ramhuai man ṭawngtheilo pakhat a hnênah an rawn hruai a. Ramhuai chu a hnawh chhuah veleh ṭawng thei lo chu a lo ṭawng thei ta a. Mipui chuan mak an ti hle a, “Israel-te zîngah hetiang hi hmuh a la ni ngai lo,” an ti a. Farisai-te erawh chuan, “Ramhuai lal avângin a ni ramhuaite a hnawh chhuah ṭhin ni,” an ti a. Isua chuan Pathian ram Chanchin Ṭha chu hrilin, natna leh chak lohna tinrêng neite tidamin khaw lian leh khaw tête a fang chhuak vek a, an sunagog-ah te a zirtîr a. Mipuite chu a hmuhin, vêngtu nei lo berâmte anga mangang leh chavaia an awm avângin a khawngaih ta êm êm a. A zirtîrte hnênah chuan, “Buh seng tûr a tam tehlul nên, thawktu lah an tlêm si; chutichuan, a buh seng tûra mi tîr tûrin buh neitupa dîl rawh u,” a ti a. A zirtîr Sâwmpahnihte chu a ko va, thlarau bawlhhlawhte hnawt chhuak thei tûra thuneihna leh natna leh chak lohna tinrêng tidam thei tûrin thiltihtheihna a pe a. Tirhkoh Sâwmpahnihte hming chu hêng hi a ni: A hmasa berah Simona, Petera an tih leh a unau Andria te, Zebedaia fa Jakoba leh a unau Johana te, Filipa leh Bartholomaia te, Thoma leh chhiahkhawntu Mathaia te, Alfaia fa Jakoba leh Thadaia te, Kanan mi Simona leh a mantîrtu Juda Iskariota te an ni. Chûng Sâwmpahnihte chu Isuan a tîr chhuak a, thu a pe a, “Jentail-te chu tlawh suh ula, Samari mite khaw engah mah kal hek suh u; berâm bo, Israel hnam hnênah chuan kal zâwk rawh u. In zinnaah, “Vânram chu a lo hnai ta,” tiin hril zêl ang che u. Damlote tidamin mitthite kaitho ula, phârte tithianghlimin ramhuaite hnawt chhuak ang che u. A thlâwnin in hmu a, a thlâwnin pe ang che u. In kâwnghrênah rangkachak emaw, tangka emaw, dâr tangka emaw pai suh ula, zin kawng atân iptê emaw, kawr pahnih emaw, pheikhawk emaw, tiang emaw keng hek suh u; hnathawktu chu ei tûr hmu tlâk a ni si a. “Khaw lianah emaw, khaw tê-ah emaw, in luhna apiangah, thlenna âwm, mi zawng chhuak ula, in chhuah leh hma chu chutah chuan thleng reng ang che u. Ina in luhin chibai bûk ang che u. Chu ina mite chu chibai bûk tlâk an nih chuan in thlamuanna thu chu an chungah thleng rawh se; an tlâk loh erawh chuan in thlamuanna thu chu in chungah lo kîr leh rawh se. Mi tu pawhin an lo lawm loh che ua, in thu pawh an ngaihthlâk loh chuan, chu in ata emaw, chu khua ata emaw in chhuah hunin in kea vaivut chu thing thla ang che u. Thu dik ka hrilh a che u, rorêl ni-ah chuan chu khaw tuar tûr ai chuan Sodom leh Gomora ram tuar tûr chu a ziaawm zâwk ang. “Ngai teh u, chinghne zînga berâm lût angin ka tirh che u hi; chuvângin, rûl anga finga, ṭhuro anga pawi khawih lovin awm ang che u. Amaherawhchu, mite lakah fîmkhur rawh u; Sanhedrin-ah an thlen ang che u a, an Sunagog-ahte an vua ang che u. Keimah avângin hotute leh lalte hmaah, anni leh Jentail-ten ka thu an hriat theih nân an la thlen ang che u. Nimahsela, chutia an thlen hunah che u chuan in sawi tûr leh in sawi dân tûr engto suh ang che u; in sawi tûr chu a hun takah chuan hriattîr in ni dâwn si a. A sawitu chu nangni in ni dâwn si lo va, nangmahnia awm Pa thlarauvin a sawi zâwk dâwn a ni. “Tin, unaupa in a unaupa tihhlum tûrin a mantîr ang a, pa pawhin a fa a mantîr ang; fate pawhin an nu leh pate an do vang a, an tihlum ang. Ka hming avângin mi zawng zawngin an hua ang che u; a tâwp thlenga tuar peih apiang erawh chu chhandam an ni ang. “He khuaah hian an tihduhdah hunah che u chuan khaw dangah tlân ang che u; thu dik ka hrilh a che u, Mihring Fapa a lo kal hmain Israel khuate in fang chhuak hman lo vang. “Zirlai chu a zirtîrtu chungah a awm lo va, bawih pawh a pu chungah a awm hek lo. Zirlai chu a zirtîrtu anga a awm leh, bawih chu a pu anga a awm chuan an tân a tâwk a ni. In neitupa mah Belzebula an tih chuan, a chhûngte chu an va ti lehzual dâwn êm! “Chutichuan, anni chu hlau suh u; lang leh lo tûra thuhrûk eng mah a awm lo, hriat loh tûra zêp pawh eng mah a awm hek lo. Thima ka hrilh che u hi, êngah sawi ula, a rûka in hriat hi in chunga chuangin tlângaupui ang che u. Taksa tihluma thlarau tihlum thei lote chu hlau suh u; hremhmuna thlarau leh taksa tiboral theitu erawh chu hlau rawh u. Chawngzawng pahnih pawisa pakhatah an hralh ṭhîn lo vem ni? Nimahsela, an zînga pakhat mah in Pa hriat lohvin leiah an tla lo vang. In samzaite lam pawh hi chhiar vek a ni asin. Chuvângin, hlau suh u, chawngzawng tam tak aiin in hlu zâwk e. “Chutichuan, mite hmaa mi ṭan apiang kei pawhin ka Pa vâna mi hmaah ka ṭan ve ang. Tu pawh mite hmaa mi phat erawh chu, kei pawhin ka Pa vâna mi hmaah ka phat ve ang. “Leiah hian rem lêntîr tûra lo kal ka nih ring suh u, rem lêntîr tûra lo kal ka ni lo va, khandaih lêntîr tûra lo kal ka ni zâwk e. Fapa a pa dotîr tûr te, fanu a nu dotîr tûr te, mo a pasala nu dotîr tûr tea lo kal ka ni asin. Mahni hmêlma tûr chu mahni chhûngkaw zînga mi ngei an ni ang. Mahni nu emaw, pa emaw, fapa emaw keimah aia hmangaih zâwktu chu ka mi ni tlâk a ni lo. Mahni kraws pua mi zui lo chu tu mah ka mi ni tlâk an ni lo. Tu pawhin mahni nun humhim an tum chuan an chân ang a, keimah avânga an nun chân chuan an hmu ang. “Tu pawh lâwm che u chu kei mi lâwm an ni; tu pawh mi lâwm chu mi tîrtu lâwm an ni. Zâwlnei chu zâwlnei a nih avânga lâwm apiang chuan zâwlnei lâwmman an hmu ang; mi fel chu mi fel a nih avânga lâwm apiang chuan mi fel lâwmman an hmu ang. Thu dik ka hrilh a che u, hêng mi tê zînga pakhat pawh hi, zirtîr an nih avânga tui vâwt no khat pawh petu tu man an lâwmman tûr an chân tawp lo vang,” a ti a. Isuan zirtîr Sâwmpahnihte chu thu a pêk zawhin chuta ṭang chuan Galili ram khuaahte zirtîr tûr leh thu hril tûrin a kal ta a. Tin, tân ina awm Johana chuan, Krista thiltihte chu a lo hriatin, “Lo kal tûra chu i ni nge mi dang kan lo nghâk ang?” tia zâwt tûrin a zirtîrte Isua hnênah a tîr a. Isuan anni chu a chhâng a, “Kal leh ta ula, in thil hmuh leh in thil hriatte hi Johana va hrilh rawh u. Mitdelte an mit a vâr a, kebaite keiin an kal a, phârte tihthianghlimin an awm a, bengngawngten an lo hre thei ta a, mitthite kaihthawh an ni a, pachhiate hnênah pawh Chanchin Ṭha hrilh a ni ta bawk. Tu pawh ka laka beidawng lo chu an nihlawh e,” a ti a. Chu mite chu an kal tâk veleh, Isuan mipuite hnênah Johana thu a sawi ta a, “Eng ennawm en tûrin nge thlalêrah in kal? Thli chhêm nghîn luang maw? A nih loh leh, eng vânga kal nge in nih? Puan nêm sina inchei en tûrin em ni? Ngai teh u, puan nêm sinte chu lal inahte asin an awm. Eng vânga kal nge in nih? Zâwlnei en tûrin maw? A nih ngei kha, ka hrilh a che u, ani chu zâwlnei ai pawha ropui zâwk a ni: he mi hi alâwm, ‘Ngai teh, ka tirhkoh i hmaah ka tîr a, Ani chuan i hmaah i kawng a buatsaih ang,’ tia a chanchin an ziaka kha. Thu dik ka hrilh a che u, hmeichhe hrin zîngah Baptistu Johana aia ropui zâwk an la chhuak ngai lo; amaherawhchu, vânrama mi tê ber pawh ani ai chuan an ropui zâwk a ni. Baptistu Johana lo awm aṭanga tûn thlengin vânram chu an bawh huai huai a, a bei vakte chu an lût ṭhîn. Johana lo awm thlenga Dân thu leh zâwlnei zawng zawngten an sawi lâwk kha, in pawm duh a nih chuan ani hi Elija, lo kal tûra chu a ni. Ngaihthlâkna beng nei chuan ngaithla ngun rawh se. “Amaherawhchu, tûnlai mite hi eng nên nge ka tehkhin ang? Naupang, dâwrpui hmunahte ṭhu-a, an ṭhiante auva, ‘Phênglâwng kan tumsak che u a, in lâm lo va, Kan ṭap vak a, in ṭap chuang bawk si lo,’ tite ang hi an ni. “Johana chu a lo kal a, a eiin a in lo va, ‘Ramhuai a zâwl a nih hi,’ an ti a. Mihring Fapa hi a lo kal a, a eiin a in a, ‘En teh u, mi vir, uain heh mi, chhiahkhawntute leh mi sualte ṭhian saw,’ an ti leh si a. Pathian finzia chu a thiltihah a lang a ni,” a ti a. An sim loh avângin thil mak a tih tamna ber khuate chu a hau ta a. “Nang, Korazin, i chung a pik e; nang, Bethsaida, i chung a pik e; in zînga thil mak tihte kha Tura leh Sidona tih ni se, saiip sina vut inphulin an sim tih an tilang daih tawh ang. Nimahsela, ka hrilh a che u, rorêl ni-ah chuan in tuar tûr aiin Tura leh Sidon tuar tûr chu a ziaawm zâwk ang. Nang pawh, Kapernaum, vân thlenga chawi sân i ni dâwn em ni? Mitthi khaw thlenga nam thlâk asin i nih dâwn? Nangmaha thil mak tihte kha Sodom khuaa tih ni sela chu tûn thlengin a la awm reng tûr. Nimahsela, ka hrilh a che u; rorêl ni-ah chuan in tuar tûr ai chuan Sodom khaw tuar tûr chu a ziaawm zâwk ang,” a ti a. Chumi lai chuan Isuan heti hian a ti a: “Aw, ka Pa, lei leh vân Lalpa, nangin mi fing leh mi thiamte lakah hêng thu hi i thup a, mi mâwlte hnêna i puan avângin ka fak a che. A ni, ka Pa, chutiang chu ṭha i tih zâwng tak a ni. Ka pain engkim mi kawltîr tawh; Pa chauh lo chuan tu man Fapa hi an hre lo; Pa pawh chu Fapa leh an hnêna Fapain a puan duhnate chauh lo chuan tu man an hre lo. “Nangni thawk rim leh phurrit phur zawng zawngte u, ka hnênah lo kal ula, keiman ka lo chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh tak leh rilru inngaitlâwm tak ka ni si a; tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” tiin. Chûng lai chuan Isua chu sabat ni-in buhpui hmunahte a kal tlang a; zirtîrte chu an ril a ṭâm a, a vuite chu an thliak a, an ei ta a. Farisai-ten an hmuhin a hnênah, “En teh, i zirtîrten sabat nia tih thiang lo chu an tih hi,” an ti a. Ani erawh chuan an hnênah, “A ṭhiante nên an rilṭâm laia Davida thiltih kha in chhiar lo vem ni? Pathian inah a lût a, amah leh a ṭhianten ei thian loh, puithiamte chauh ei thian, ‘chhang dah’ an ei thu kha? A nih leh sabat ni pawh ni se Tempula puithiam awmte chuan sabat an tihbawrhbân pawhin an thiang tho tih Dân bu-ah in chhiar lo vem ni? Ka hrilh a che u, Tempul aia ropui zâwk hetah hian a awm. ‘Inthawina aiin khawngaihna ka duh e,’ tih hi engtihna nge lo hre tawh ula chuan, mi pawisawi lote chu thiam loh in chantîr lo tûr, Mihring Fapa hi sabat Lalpa a ni si a,” a ti a. Chuta ṭang chuan a kal a, sunagog-ah a va lût a. Ngai teh, kut zeng pakhat hi a lo awm a, Isua an hêk theih nân, “Sabat nia tihdam a thiang em?” tiin an zâwt a. Ani chuan an hnênah, “In zînga tu pawh hian, berâm pakhat nei ula, sabat niin khuarkhurumah tla ta sela, tu nge la chhuak lo vang che u? Berâm ai chuan mihring chu a va hlu zâwk êm! Chuvângin, sabat nia thil ṭha tih hi a thiang a ni,” a ti a. Tichuan, chu mi hnênah chuan, “I kut phar rawh,” a ti a. A han phar a, a kut lehlam angin a dam ta viah a. Chutichuan, Farisai-te chu an chhuak a, amah an tihboral theih dân tûr ngaihtuahin an inrâwn ta a. Isuan chu chu a hriatin chuta ṭang chuan a kal hrang ta a. Mi tam takin amah an zui a, an za-in a lo tidam hlawm a. Anni chu a chanchin puang lo tûrin a ti tlat a, zâwlnei Isaia hmanga a sawi kha a lo thlen theihna tûrin: “En teh, ka chhiahhlawh, ka thlan, ka duh tak, ka rilruin a lawm êm êma hi: A chungah ka thlarau ka dah ang; tichuan, Jentail-te hnênah rorêlna thu a puang ang. A hnial lo vang a, a au hek lo vang a, kawtthlêrah pawh tu man a aw an hre bawk lo vang. Hneh tûra rorêlna a tirh chhuah hma zawng Luang sâwp a titliak fithla lo vang a, Khâwnvâr de sêt sêt pawh a timit lo vang. Ama hmingah chuan Jentail-ten beiseina an nghat ang,” tih hi. Chumi lai chuan ramhuai man mitdel ṭawngtheilo pakhat a hnênah an rawn hruai a; a lo tidam a; chutichuan, ṭawngtheilo chu a lo ṭawng thei a, a lo hmu thei ta a. Mipui zawng zawng chuan mak an ti hle a, “He mi hi Davida Fapa chu a ni dâwn lâwm ni?” an ti a. Farisai-te erawh chuan chu chu an hriatin, “He mi hian ramhuai lal Belzebula vâng lo chuan ramhuai a hnawt chhuak lo vang,” an ti a. Isuan an ngaihtuahte chu a lo hria a, an hnênah, “Khawii ram pawh mahni indo chu an ṭiau ṭhîn; khawii khua pawh, chhûngkua pawh, mahni indo apiang an ding khawchhuak lo vang. Setana pawhin Setana vêk a hnawh chhuah chuan mahni indo a ni ang a, a ram chu engtin nge a din khawchhuah ang le? Keiin Belzebula vângin ramhuaite hnawt chhuak ni ila, in mite khân tu vângin nge ramhuai an lo hnawh chhuah ṭhin ni? Tichuan, anni khân asin thiam loh chantîr zâwk dâwn che u. Pathian Thlarau vânga ramhuai hnawt chhuak ka nih si chuan in hnênah Pathian ram chu a lo thleng ta tihna a ni. A nih loh leh, miin mi chak chu a phuar hmasak zet loh chuan engtin nge a ina lûtin a sum a lâksak theih ang? A phuar hnuah erawh chuan a in chu a ramsak ang. Ka lama ṭang lo tawh phawt chuan mi do va, mi lâk khâwmpui lo chuan a tidarh a ni. “Chuvâng chuan ka hrilh a che u, mite sualna zawng zawng leh Pathian pawi an sawi tinrêng te chu ngaihdam a ni ang. Thlarau pawi sawi erawh chu ngaihdam a ni ngai lo vang. Tu pawh, Mihring Fapa sawisêl chu ngaihdam an ni ang a, Thlarau Thianghlim sawichhia erawh chu, tûn dam chhûngah pawh, hun lo la thleng tûrah pawh ngaihdam a ni lo vang. “ ‘Thing ṭha chu a rah pawh a ṭha,’ in tih loh vêk leh, ‘thing chhia chu a rah pawh a chhia,’ ti ta law law che u, thing chu a rahah a hriat si a. Rûl thlahte u, nangnin sual nei reng chungin engtin nge thu ṭha in sawi theih ang? Thinlunga liam khawpa khat hi a ni kâin a sawi chhuah ṭhin. Mi ṭha chuan a ro bâwm ṭha ata thil ṭhate a phawrh chhuak ṭhîn. Ka hrilh a che u, miten thu lawilo an sawi apiang, chu thu chu rorêl ni-ah chuan an sawi fiah a la ṭûl ang. I thu chuan thiam a chantîr ang che a, i thu vêk chuan thiam loh a chantîr bawk dâwn che asin,” a ti a. Chumi lai chuan Dân zirtîrtute leh Farisai-te zînga mi ṭhenkhatten an chhâng a, “Zirtîrtu, i hnên ata chhinchhiahna thil mak hmuh kan duh e,” an ti a. Ani chuan a chhâng a, “Tûnlai mi, sual tak leh uire hmang takte hian, chhinchhiahna thil mak an zawng a; nimahsela, zâwlnei Jona chhinchhiahna chauh lo chu chhinchhiahna thil mak rêng entîr an ni lo vang. Jona chu ni thum leh zan thum nghapui kawchhûngah a awm ang khân Mihring Fapa hi ni thum leh zan thum lei chhûngah a awm bawk dâwn a ni. Ninevi mite chu rorêlna ni-ah chuan tûnlai mite nên hian an ding za ang a, thiam loh an chantîr ang; Jona thu hril avângin an sim si a; ngai teh u, Jona aia ropui zâwk hetah hian a awm asin. Chhim lam lalnu kha rorêl ni-ah chuan tûnlai mite rual hian a tho ve ang a, thiam loh a chantîr ang; Solomona finna ngaithla tûr mahin kâwlkil ata a lo kal si a; ngai teh u, Solomona aia ropui zâwk hetah hian a awm a ni. “Thlarau bawlhhlawh chu mi kawchhûng ata a chhuahin chawlhna zawngin tui awm lohna hmunahte a vâk a vâk a, a hmu zo lo va. Tichuan, ‘Ka in, ka chhuahsan takah khân ka kîr leh mai teh ang,’ a ti a; a va thlen chuan ruaka phiah faia tihfel diamin a va hmu a. Tichuan, a kal a, amah aia sual hlîr thlarau dang pasarih a rawn hruai a; an lût a, chutah chuan awmhmun an khuar ta a. Chu mihring awmze hnuhnûng zâwk chu a hmasa aiin a lo chhe daih ta a ni. Chutiang bawkin, tûnlai mi, mi sual takte chungah hian a la awm ang,” a ti a. Mipuite hnêna thu a sawi lai chuan, a nu leh a unaute chu amah biak tumin pâwnah an ding a. Mi pakhatin a hnênah, “I nu leh i unauten biak tum chein pâwnah sâwn an nghâk a che,” a ti a. Ani erawh chuan a hrilhtu chu a chhâng a, “Ka nu chu tu nge ni? Ka unaute pawh chu tute nge ni?” a ti a. A zirtîrte lamah a kut a phar a, “En teh u, ka nu leh ka unaute hi! Tu pawh ka Pa vâna mi duhzâwng titute chu ka unaute, ka farnu te, ka nu te an ni asin,” a ti a. Chumi ni chuan Isua chu in ata a chhuak a, dîl kamah a ṭhu a. A hnênah mipui nasa tak an lo pung khâwm a; tichuan, lawngah a chuang a, a ṭhu a; mipui zawng zawng chu ṭiauphovah an ding a. Thu tam tak an hnênah tehkhin thuin a sawi a: “Ngai teh u, buh chi thehtu buh chi theh tûrin a feh a. A han theh chuan a ṭhen kawngah a tla a, savaten an rawn tlân zo ta mai a. A ṭhen pialtlêp chung lei pan hmunah a tla a, lei a chhah lo va, a lo ṭo thuai a; nimahsela, ni a lo tlângsâng deuh va, a em vuai a, zung a kaih theih loh avângin a râwp ta mai a. A ṭhen hnimhlîngnei zîngah a tla a, hnim chu a lo ṭhang a, a dîp ral ta a. Ṭhenkhat chu lei ṭhaah a tla a, ṭhenkhat a lêt za te, ṭhenkhat a lêt sawmruk te, ṭhenkhat a lêt sawmthum tein a lo rah ta a. Ngaihthlâkna beng nei chuan ngaithla ngun rawh se,” a ti a. Zirtîrte chu an lo kal a, a hnênah, “Engati nge an hnênah tehkhin thuin i sawi?” an ti a. Ani chuan a chhâng a, “Vânram thu ril chu nangni hriat atân tih a ni a, an hriat atân tih a ni ve lo. Tu pawh a nei chu an pêk belhchhah ang a, a ngah lehzual ang; a nei lo chu a neih chhun pawh an lâksak ang. Chutih avâng chuan an hnênah tehkhin thuin ka sawi a ni; hmu reng chunga an hmuh ṭhin lohva, ngaithla reng chunga an hriat ṭhin lohva, an hriatthiam hek loh nân. Isaia hrilhlâwkna thu kha an chungah a lo thleng a nih hi: ‘In ngaithla in ngaithla ang a, a ngaihna in hre si lo vang. In hmu in hmu ang a, in hmu fuh si lo vang. He mite thinlung hi a lo chawlawl ta a. An bengte an chhu chhêt a, an maimitchhîng bawk a, Chuti ni lo se, an mitin an hmu ang a. An bengin an hria ang a, An thinlungin an hre bawk ang a, an hawi kîr leh ang a, Anmahni ka lo tidam tûr,’ a tih ang khân. “Nangni mit erawh chu a vânnei e, a hmuh ṭhin avângin; in beng pawh a vânnei e, a hriat ṭhin avângin, thu dik ka hrilh a che u zâwlneite leh mi fel tam tak pawhin in thil hmuhte hi hmuh an lo châk ṭhîn a, an hmu si lo; in thil hriatte pawh hi hriat an lo châk ṭhîn a, an hre si lo. “Chutichuan, buh chi theh tehkhin thu awmzia chu ngaithla rawh u; tu pawhin Pathian ram thu chu an ngaihthlâka, an hriatthiam si loh chuan mi sual chu a lo kal a, an thinlunga theh sa chu a chhuhsak ṭhîn. Chûng mi te chu kawnga tlate chu an ni. Tin, pialtlêp hmuna tla chu, thu chu ngaithlaa, lâwm taka pawm nghâltu hi a ni; mahse, zung a nei lo va, rei lo tê chauh a daih a; thu avânga hrehawmna emaw, tihduhdahna emaw a lo awm veleh a tlu nghâl ṭhîn. Hnimhlîngnei zînga tla chu thu chu a ngaithla a; nimahsela, khawvêl lungkhamna leh hausak nawmchenna chuan thu chu a dîp a, rah lovin a awm ṭhîn. Lei ṭhaa tla chu, thu chu ngaithlaa hrethiam hi a ni; chumi chu a rah ta ngei a, ṭhenkhat a lêt za te, ṭhenkhat a lêt sawmruk te, ṭhenkhat a lêt sawmthumtein a pung ṭhîn,” a ti a. Tehkhin thu dang an hnênah a sawi leh a; “Vânram chu, mi, a lova chi ṭha thehtu nên chuan tehkhin theih a ni. Zânah mi an muthilh vek hlânin, a hmêlma a lo kal a, buh zîngah chuan buh lem a theh a, a kal bo leh ta a. Buh chu a lo ṭo va, a vuih hun chuan buh lem chu a lo lang ta a. In neitu bawihte chu an lo kal a, ‘Ka pu, i lovah chi ṭha i theh lo vem ni? Buh lem saw khawi ata lo awm nge ni le?’ an ti a. Ani chuan, ‘Hmêlmain a lo theh a nih chu,’ a ti a. Bawihte chuan a hnênah, ‘A nih leh, chûng chu va lâwr khâwm mai ila rem i ti em?’ an ti a. Ani erawh chuan a chhâng a, ‘Ti lo ve, buh lem in lâwr khâwm zâwngin buh chu in pawt tel hlauh dah ang e. Buh seng thlengin ṭo za rawh se; buh seng hunah buh sengtute hnênah, ‘Buh lem chu lâwr khâwm hmasa zet ula, hâl tûrin têl rawh u; buh erawh chu ka buh inah seng lût rawh u,’ ka ti ang e,’” a ti a. Tehkhin thu dang a sawi leh a; “Vânram chu anṭam chi fang khat miin a lâka, a lova a theh ang hi a ni. Chi azawnga tê ber a ni a; mahse, a lo ṭhan sân chuan thlai dangte ai chuan a lo lian a, thing a lo ni a; chutichuan, chunglêng savate an lo kal a, a zârahte an riak ṭhîn,” a ti a. Tehkhin thu dang a sawi leh a: “Vânram chu hmeichhiain dawidim a lâka, chhangphut kho thum khat, zîngah a vaia a fan chhuah vek tûra a phul ang chu a ni,” a ti a. Chûng zawng zawng chu Isuan tehkhin thu hmangin mipuite hnênah a sawi a, tehkhin thu lovin an hnênah eng mah a sawi lo; zâwlnei hmanga sawi kha a lo thlen theihna tûrin: “Tehkhin thuin ka kâ ka âng ang a, Leilung pian tirh ata thil inthup chu ka sawi chhuak ang,” tih hi. Mipuite chu a kalsan a, inah chuan a lût a, a zirtîrte a hnênah an lo kal a, “Lova buh lem tehkhin thu kha min hrilh fiah teh,” an ti a. Ani chuan a chhâng a, “Chi ṭha thehtu chu Mihring Fapa hi a ni a, lo chu khawvêl hi a ni. Chi ṭha chu Ram fate an ni a, buh lem erawh chu mi sual fate an ni; hmêlma, buh lem thehtu chu Diabola a ni. Buh seng chu khawvêl tâwp hun tûr a ni a, a sengtute chu vântirhkohte an ni. Tichuan, buh lemte chu an la khâwm a, meia an hâl ang hian khawvêl tâwpah chuan a la awm ang. Mihring Fapa hian vântirhkohte a tîr chhuak ang a, a ram ata mi titlu thei zawng zawng leh thil sual titu zawng zawng an thiar chhuak ang a, rawhtuina meiah an paih ang; chutah chuan an ṭap ang a, ha an ṭhial ang. Chumi hunah chuan mi felte chu an Pa ramah chuan ni angin an êng tawh ang. Ngaihthlâkna beng nei chuan ngaithla ngun rawh se. “Vânram chu lova ro phûm rûk ang a ni; chu chu miin a hmu a, a chhilh leh a, lâwm êm êmin a kal a, a neih zawng zawng a va hralh a, lo chu a lei ta a. “Vânram chu sumdâwng mi, tuikeplung ṭha tak zawngtu ang chu a ni leh a; ani chuan tuikeplung hlu tak pakhat a hmu a, a neih zawng zawng a va hralh a, a lei ta a. “Vânram chu lênkhang, tuipuia zâr, sangha chi tinrêng fûn khâwmna ang chu a ni bawk. Chu chu a khah veleh vaukamah an hnûk chhuak a, an ṭhu a, a ṭha zawng bâwmah an dah khâwm a, a chhia erawh chu an paih a. Khawvêl tâwpah chutiang bawkin a la awm ang. Vântirhkohte an lo chhuk ang a, mi fel zîng ata mi sualte chu an hlîr ang a, rawhtuina meiah chuan an paih ang; chutah chuan an ṭap ang a, ha an ṭhial ang. “Chûng zawng zawng chu in hrethiam em?” a ti a. Anni chuan “Hrethiam e,” an ti a. Ani chuan an hnênah, “Chuvângin, Dân zirtîrtu, vânram thu zir tawh apiang chu, in neitu, a robâwm ata thil hlui leh thil thar phawrh chhuaktu ang hi a ni,” a ti a. Isuan chûng tehkhin thu chu a sawi zawhin chuta ṭang chuan a kal ta a. An khua chu a lo thleng a, an sunagog-ah chuan anmahni a zirtîr a; tichuan, mak an ti hle a, “He mi hian he finna leh hêng thil mak tihtheihna hi khawi ata nge a hmuh? He mi hi mistiri fapa kha a ni lo vem ni? A nu pawh Mari an tih kha a ni lo vem ni? A unaute pawh Jakoba te, Josefa te, Simona te, Juda te kha an ni lo vem ni? A farnute pawh kan zîngah an awm vek lo vem ni? Hêng zawng zawng hi khawi aṭanga a hriat nge?” an ti a. Amah chu an hmu thiam ta lo va. Isuan an hnênah, “Zâwlnei chu ama khaw lamah leh a chhûngte zîngah lo chuan an chawimawi ṭhîn,” a tihsan a. An rin loh avângin chutah chuan thil mak a ti tam lo. Chumi lai vêl chuan lal Heroda chuan Isua chanchin a lo hria a, a chhiahhlawhte hnênah, “Chu mi chu Baptistu Johana kha a nih chu; mitthi zîng ata a tho leh ta zuk nia; chuvângin, chûng thiltihtheihna chuan amahah a thawk a nih chu,” a ti a. Heroda chuan a unaupa Filipa nupui Herodi avângin Johana chu a man a, a phuar a, tân inah a lo khung reng tawh a; Johanan a hnênah “Ani i neih hi a thiang lo ve,” a tihsak avâng khân. Ani chu tihhlum a duh a, zâwlneia an ruat avângin mipui a hlau si a. Amaherawhchu, Heroda pian champhaphâk ni-ah Herodi fanu chu a laiah a lâm a, Heroda chu a tilâwm ta a. Chuvâng chuan a dîl apiang pêk a tiam ta a. Ani chuan, a nu fuih angin, “Thlêngah tûnah Baptistu Johana lu mi pe rawh,” a ti a. Lal chuan pawi a ti hle a; mahse, a thutiam avâng leh a chaw kîlpuite avâng chuan pêk tûr thu a pe ta a. Tichuan, mi a tîr a, tân ina awm Johana lu chu a tantîr a. A lu chu thlêngin an rawn la a, nula chu an pe a, ani chuan a nu hnênah a kalpui ta a. Tin, Johana zirtîrte chuan a ruang chu an va hlâwm a, an phûm a; Isua pawh an rawn hrilh a. Isuan a lo hriatin chuta ta chu lawngin hmun thlalêr lam panin a kal hrang ta a. Mipuiten an hriatin khua aṭangte chuan kea kalin an zui a. Lawng ata vaukama a chhuah chuan mipui nasa tak a hmu a, a khawngaih ta êm êm a, damlo an rawn hruaite chu a tihdamsak a. Tlai lam a lo nihin, zirtîrte chu a hnênah an lo kal a, “Hei hi hmun thlalêr a ni a, khua a tlai ta hle si a, khuaahte kalin an ei tûr an dap theih nân mipui hi kaltîr ta che,” an ti a. Isua erawh chuan, “An kal a ngai lo ve, nangmahnin ei tûr pe rawh u,” a ti a. Anni chuan, “Hetah hian chhang panga leh sangha pahnih chauh lo chu eng mah dang kan nei lo,” an ti a. Ani chuan, “Ka hnênah han la teh u,” a ti a. Hlobet chunga ṭhu tûrin mipui chu thu a pe a, chhang panga leh sangha pahnih chu a la a, vân lam enin mal a sâwm a, a phel a, chhang chu zirtîrte a pe a, zirtîrte chuan mipuite chu an pe a. An za chuan an ei a, an tlai ta a. An sem bâng chu an la khâwm a, bâwm sâwm leh pahnih khat a ni. A eitute chu hmeichhia leh naupang tiam lovin patling hlîr pawh sângnga lai an ni. Mipui chu a ṭîntîr vêl chhûngin râl lehlama lo va kai hmasa tûrin zirtîrte chu lawngah a chuan luihtîr a. Mipui a ṭîntîr hnu chuan ṭawngṭai tûrin tlângah a kal hrang a; tin, khua a lo thimin chutah chuan amah chauhvin a awm ta a. Lawng erawh chu dîlah, vaukam aṭanga hla takah a awm tawh a, thliin a ni lo zâwngin a nem a, tuifâwnin a vawrh a vawrh a. Khawfîng chah dâwn laiin dîl chungah an lam panin a lo kal a. Zirtîrten dîl chunga a kal an han hmuh chuan, “Hmuithla a nih saw,” tiin an thlaphâng a, hlauvin an au ta chûl a. Mahse, Isuan anni chu a be thuai a, “Thlamuang takin awm rawh u, keimah ka ni e, hlau suh u,” a ti a. Petera chuan a chhâng a, “Lalpa, nang i nih chuan tui chunga i hnêna kal thu mi pe rawh,” a ti a. Ani chuan, “Lo kal ta che,” a ti a. Petera chu lawng ata a chhuak a, Isua lam panin tui chungah chuan kein a kal a. Nimahsela, thli tleh chu a hmuhin a hlau va, a pil dâwn a, “Lalpa, mi chhanhim rawh,” tiin a au ta a. Isuan a ban ta nghâl a, amah chu a va chelh a, a hnênah, “Nang rin tlêm, engah nge i rinhlelh le?” a ti a. Lawnga an luh chuan thli chu a bâng ta mai a. Lawnga awmte chuan, “Pathian Fapa a lo nih takzet hi,” tiin, amah chu kûnin chibai an bûk a. Dîl an kân a, Genesaret ramah chuan an kai a. Chumi hmuna mite chuan ani chu an lo hria a, an kiang vêl ram zawng zawngah chuan mi an tîr a, damlo zawng zawng a hnênah an rawn hruai a; a puan fêm tal deh an ngên chiam a; tin, a dek apiang chu an dam ta zêl a. Chumi lai chuan Jerusalem aṭangin Farisai te leh Dan zirtîrtute chu Isua hnênah an lo kal a. “Engati nge i zirtîrten upate thu rochhiah an bawhchhiat ṭhin? Chaw an eiin an kut an sil ngai lo,” an ti a. Ani chuan a chhâng a, “Nangni pawhin engati nge in thu rochhiah avânga Pathian thupêk in bawhchhiat ni? Pathian chuan, ‘I nu leh i pa chawimawi rawh; mahni nu emaw, pa emaw sawichhia chu a thi ngei tûr a ni,’ a ti a. Nangni erawh chuan ‘Tu pawh, a nu emaw, a pa emaw hnêna i mi chhawrna tûr zawng zawng chu Pathian hnêna pêk a ni tawh, titu chuan a nu leh a pa a chawimawi a ngai tawh lo’ in ti ṭhîn. Tichuan, in thu rochhiah avâng hian Pathian thu chu in bawh bo a nih hi. Vervêkte u, Isaian hetia in chungchâng thu a lo sawi lâwk hi a tidik ngawt mai: ‘He mite hian an hmuiin mi chawimawi a, An thinlung erawh chuan mi hlat si. Thurin ang hrimin mihring thupêkte an zirtîr a, An mi biakna hi a thlâwn mai a ni,’ tih hi,” a ti a. Tin, mipui chu a ko va, an hnênah, “Ngaithla ula, hre fiah rawh u. Kâa lût chuan mihring a tibawlhhlawh lo va, kâa chhuak chuan, chu ngei chuan mihring a tibawlhhlawh zâwk ṭhîn a ni,” a ti a. Chumi lai chuan a zirtîrte an lo kal a, a hnênah, “Farisai-ten kha thu kha an hriatin an lungnih loh hle kha i hria em?” an ti a. Ani erawh chuan a chhâng a, “Kûng eng pawh, ka Pa vâna mi phun loh chu pawh chhuah a ni ang. Anni chu pawisa suh u, hruaitu mitdel an ni. Mitdelin mitdel vêk a hruai chuan khuarkhurumah an tla dûn ang,” a ti a. Peteran a chhâng a, “Tehkhin thu kha min hrilh fiah ta che,” a ti a. Ani chuan, “Nangni pawh chuti êma mâwl in la ni cheu elo? Kâa lût apiang chu pumah a tla thla a, dailênnaah paih chhuah a ni tih in hre lâwm ni? Kâa chhuakte erawh chu thinlung aṭanga lo chhuak a ni a, chûng ngei chuan mihring a tibawlhhlawh ṭhîn a ni. Thinlung aṭang hian ngaihtuahna sual te, tualthahna te, uirena te, inngaihna te, rûkrûkna te, dâwta hêk te, Pathian pawisawina te a lo chhuak si ṭhîn a. Chûng chu mihring tibawlhhlawhtu chu a ni; kut sil lova chaw ei erawh hi chuan mi a tibawlhhlawh lo ve,” a ti a. Chuta ṭang chuan Isua a chhuak a, Tura leh Sidon khaw bialah a kal ta a. Ngai teh, chûng lai rama mi, Kanan hmeichhe pakhat a lo kal a, “Lalpa, Davida Fapa, mi khawngaih rawh, ka fanu ramhuaiin a man tlat a ni,” tiin a au va. Ani erawh chuan kam khat mahin a chhâng lo. A zirtîrte chuan, “Kan hnungah a au a au si a, kaltîr mai rawh,” tiin an rawn ngên a. Ani erawh chuan, “Berâm bo, Israel hnam hnênah lo chuan tirh ka ni lo ve,” a ti a, a chhâng a. Nimahsela, hmeichhia chu a lo kal a, “Lalpa, mi pui rawh,” tia kûnin chibai a rawn bûk a. Ani chuan, “Fate chaw lâksaka uite hnêna pêk chu a âwm lo ve,” a ti a. Ani chuan, “A ni khawp mai, Lalpa; nimahsela, uite pawhin an pu dawhkân ata ei nawi tla chu an ei ṭhîn alâwm,” a ti a. Chu veleh Isuan a chhâng a, “Hmeichhia, i ring nasa êm mai a, i duh ang takin i chungah thleng rawh se,” a ti a. Tichuan, a fanu chu chumi a chinah chuan a lo dam ta a. Chuta ṭang chuan Isua a chhuak a, Galili dîl kam a hrût a; tlângah a chho va, chutah chuan a ṭhu ta a. Kebai te, piangsual te, mitdel te, ṭawngtheilo te leh mi dang tam tak rawn hruaiin mipui nasa tak an lo kal a, a ke bulah an dah a; ani chuan a lo tidam ta hlawm a. Mipui chuan ṭawngtheilote chu lo ṭawnga, piangsualte chu lo ṭhaa, kebaite chu kea kala, mitdelte mit lo vâr zo ta chu an hmuhin mak an ti hle a; tichuan, Israel-te Pathian chu an fak a. Isuan a zirtîrte chu a ko va, “Mipuiho hi ka khawngaih êm êm a ni, ka hnênah ni thum an awm tawh a, ei tûr lah an nei tawh si lo, rilṭâma hawtîr mai ka hreh a ni; chutilo chu, kawng lakah an ṭâmchhâwl dah ang e,” a ti a. Zirtîrte chuan a hnênah, “Thlalêrah mipui heti zozai hraina khawp chhang khawi ata nge kan hmuh ang?” an ti a. Isuan an hnênah, “Chhang eng zât nge in neih?” a ti a. Anni chuan, “Pasarih, sangha tlêm tê nên,” an ti a. Tichuan, mipui chu leia ṭhu tûrin thu a pe a. Chhang pasarih leh sanghate chu a la a, lâwmthu a sawi zawhin a phel a, zirtîrte a pe a, zirtîrte chuan mipui chu an pe a. An vaiin an ei a, an tlai ta hlawm a, an sem bâng chu bâwm sarihah an dah khat a. A eitute chu hmeichhia leh naupang tiam lovin patling ngawt pawh sângli an ni a. Mipui chu a ṭîntîr hnuin lawngah a chuang a, Magadan ramah a kal ta a. Farisai-te leh Sadukai-te a hnênah an lo kal a, amah fiah nân vân ata chhinchhiahna thil mak entîr tûrin an rawn ngên a. Ani erawh chuan a chhâng a, “Tlai lam a lo nihin, ‘khua a ṭha dâwn a ni ang, kâwl a sen êm mai,’ in ti ṭhîn. Zîngah pawh, ‘Vawiin chu khua a chhe dâwn a ni ang, kâwl a sen a, khua a dur êm mai,’ in ti ṭhîn a; khaw awmzia in hrethiam si a, hun chhinchhiahnate erawh chu in hrethiam thei si lo. Tûnlai mi, mi sual tak leh uire hmang takte hian chhinchhiahna thil mak an zawng ṭhîn a; nimahsela, Jona chhinchhiahna chauh lo chu chhinchhiahna thil mak rêng entîr an ni lo vang,” a ti a. Anni chu a kalsan a, a kal ta daih a. Zirtîrten râl lehlam an thlen chuan chhang an lo ken theihnghilh a. Isuan an hnênah, “Farisai-te leh Sadukai-te dawidim lakah chuan invêng ula, fîmkhur rawh u,” a ti a. “Chhang kan keng hauh lo mai le,” tiin anmahni zîngah chuan an sawi ta a. Isuan chu chu a hriatin, “Rin tlêmte u, engati nge chhang in neih loh thu ngawt in buaipui tâk? Tûnah pawh in la hrethiam lo cheu maw? Mi sângnga tâna chhang panga leh a bâng in dah zât kha in la hre reng lâwm ni? Mi sângli tâna chhang pasarih leh a bâng in dah zât pawh kha? Chhang thu in hnênah ka sawi lo tih engtizia nge in hriat loh? Farisai-te leh Sadukai-te dawidim lakah erawh chuan fîmkhur rawh u,” a ti a. Chu veleh, chhang dawidim lakah ni lovin, Farisai-te leh Sadukai-te zirtîrna laka fîmkhur tûrin anmahni a hrilh a ni tih an hre ta a. Isuan Filipa Kaisari bial a lo thlen chuan, “Miten Mihring Fapa hi tu nge a ni an tih?” tiin a zirtîrte chu a zâwt a. Anni chuan, “Ṭhenkhatin, ‘Baptistu Johana,’ an ti a, ṭhenkhatin, ‘Elija,’ an ti a, ṭhenkhatin ‘Jeremia emaw, zâwlnei tu-a emaw,’ an ti,” tiin an chhâng a. Ani chuan an hnênah, “A nih nangnin tu nge nia mi hriat?” a ti a. Simon Petera chuan a chhâng a, “Krista, Pathian nung Fapa chu i ni e,” a ti a. Isuan a hnênah, “Simon Barjona, i nihlawh e, mihringin an hrilh lo che a, ka Pa vâna miin a hriattîr che a ni zâwk e. Tin, nang, Petera i ni tih ka hrilh bawk a che; he lungpui chungah hian ka kohhran ka rem chho vang a, mitthi khaw kulh kawngkhârte chuan a ngam lo vang. Vânram chabite ka pe ang che a, lei chungah eng pawh i phuar apiang vânah phuar a ni ang a, lei chungah eng pawh i phelh apiang vânah phelh a ni ang,” a ti a. Chumi zawhah chuan Krista a ni tih tu mah hrilh lo tûrin a zirtîrte chu a ti tlat a. Chumi a chinah chuan Isuan Jerusalem-a a kal tûr thu te, upate, puithiam lalte leh Dân zirtîrtute lakah thil tam tak a tuar tûr thu te, tihhluma a awm tûr leh ni thum ni-a kaihthawha a awm tûr thu te zirtîrte chu a hriattîr ṭan ta a. Peteran ani chu a hruai hrang a, “Lalpa, ni lul lo ve; chûng chu i chungah thleng tawp suh se,” tiin a zilhhau ta a. Ani erawh chuan Petera hnênah, “Setan, kal bo daih rawh, ka tân tlûkna i ni, Pathian duh dâna ngaihtuah lovin, mihring duh dânin i ngaihtuah a nih hi,” a ti a. Isuan a zirtîrte hnênah chuan, “Tu pawh mi zui duh chuan, mahni inngaihtuah chang lovin, mahni kraws puin mi zui rawh se. Tu pawh mahni nun humhim tum chuan an chân ang a, tu pawh keimah avânga nun chân chuan an hmu ang. Miin khawvêl hi a pumin nei sela, a nun chân si se, a tân sâwtna eng nge awm ang? A nih leh, miin a nun aiah eng nge a pêk ang? Mihring Fapa hi vântirhkohte nên, a Pa ropuina nên a lo kal dâwn si a; chumi hunah chuan mi tin an thiltih ang zêlin a rûl ṭheuh vang. Thu dik ka hrilh a che u, heta dingho ṭhenkhat hi, Mihring Fapa a rama lo kal an hmuh hma chu thi lo tûr an awm,” a ti a. Tin, ni ruk hnuah chuan Isuan Petera te, Jakoba te, Johana te a hruai hrang a, tlâng sâng takah a chhohpui a. An hmaah chuan a hmêl lan dân chu a lo danglam ta a; a hmêl ni angin a lo êng a, a silhfênte chu a êngin a lo vâr ta sur a. Ngai teh, Mosia leh Elija chu an hnênah an inlâr a, Isua nên an inbia a. Petera chuan Isua hnênah, “Lalpa, heta kan awm hi a ṭha e; i duh chuan bawktê pathum ka khawh ang e; i tân pakhat, Mosia tân pakhat, Elija tân pakhat,” a ti a. A la sawi lai mêkin chhûm vâr tak a lo zîng a, anni chu a khuh a. Chhûm aṭang chuan awin, “Hei hi ka Fapa, ka Duhtaka, ka lawm êm êma chu a ni; ama thu hi ngai rawh u,” a ti a. Zirtîrte chuan chu chu an hriatin an bawkkhup a, an hlau êm êm a. Isuan anni chu a rawn dek a, “Tho ula, hlau suh u,” a ti a. An han dâk chhuak a, Isua chauh lo chu tu mah an hmu ta lo va. Tlâng aṭanga an chhuk laiin Isuan an hnênah, “Mihring Fapa hi mitthi zîng ata a thawh leh hma chu in thil hmuh kha tu mah hrilh suh u,” tiin thu a pe ta a. Zirtîrte chuan a hnênah, “Dân zirtîrtuten, ‘Elija a lo kal hmasa zet tûr a ni,’ engtiziaa ti si nge an nih le?” tiin an zâwt a. Ani chuan a chhâng a, “Elija chu lo kal tûr rêng a ni, engkim a siam ṭha ang. Nimahsela, ka hrilh a che u, Elija chu a lo kal tawh reng a; amah chu an hre lo va, a chungah an duh duhin an tih kha. Chutiang bawkin Mihring Fapa pawh hian an kut a tuar ve dâwn a ni,” a ti a. Tichuan, zirtîrte chuan Baptistu Johana thu an hnênah a sawi a ni tih an hre ta a. Tin, mipui hnên an zu thlen chuan mi pakhat a hnênah a lo kal a, a hmaah a ṭhingṭhi a. “Lalpa, ka fapa saw khawngaih ang che; thla-em-ât a ni a, a tuar nasa êm mai; vawi tam tak meiah a tlu tawh a, vawi tam tak tuiah a tlu bawk ṭhîn. I zirtîrte hnênah ka rawn hruai a, an tidam thei si lo,” a ti a. Isuan a chhâng a, “Tûnlai mi, rinna tlachham leh tihmawhte u, eng chen nge in zîngah ka awm ang a, eng chen nge ka dawhtheih dâwn che u? Ka hnênah han hruai teh u,” a ti a. Isuan ramhuai chu a hau va, a chhûng ata a chhuak ta a; chumi dârkâr aṭang chuan naupang chu a dam ta a. Zirtîrte chu a hnênah a fâlin an lo kal a, “Eng vângin nge keinin kan hnawh chhuah theih loh?” an ti a. Ani chuan an hnênah, “In rinna a tlêm vâng a ni. Thu dik ka hrilh a che u, anṭam chi fang khat ang rinna in neih chuan, he tlâng hnênah hian, ‘Heta ṭang hian sawtah sâwn insawn rawh,’ in ti ang a, a insawn mai ang. Tih theih loh rêng in nei lo vang,” a ti a. Galili ram an fan laiin Isuan an hnênah, “Mihring Fapa hi mihringte kutah mantîr a ni dâwn a, an tihlum ang a, ni thum ni-ah kaihthawhin a awm ang,” a ti a. Tichuan, an lungngai ta êm êm a. Kapernaum an lo thlen chuan Tempul chhiah khawntute chu Petera hnênah an lo kal a, “In zirtîrtu hian Tempul chhiah a chawi ve ṭhîn lâwm ni?” an ti a. Ani chuan, “Chawi ṭhîn e,” a ti a. Ina a va luh chuan Isuan a hnênah, “Simon, engtin nge i ngaih? Leia lalten bungraw chhiah emaw, lu chhiah emaw tu lakah nge an lâk ṭhin, an fate lakah nge mi hrang lakah?” tiin a lo sawi khalh a. Petera chuan, “Mi hrang lakah,” a tih veleh Isuan a hnênah, “Chu! An fate chuan chhiah an âwl alâwm. Nimahsela nang, dîlah va kal la, nghakuai chiah la, sangha âwk hmasa ber chu la rawh; a kâ keu la, chêng hnih i hmu ang; chu chu la la, kei leh nanga tân anni chu pe rawh; chutilo chuan, anni chu kan tilungni lo dah ang e,” a ti a. Chumi lai chuan zirtîrte chu Isua hnênah an lo kal a, “Vânramah tu nge ropui ber ang le?” an ti a. Ani chuan naupang tê hi a ko va, an hmaah a dintîr a, “Thu dik ka hrilh a che u, in inlamlêta naupang tê ang hi in nih loh chuan vânramah in lût tawp lo vang. Chutichuan, inngaitlâwma he naupang anga awm chu, vânrama ropui ber a ni ang. Tu pawh ka hming avânga hetiang naupang tê pakhat pawh lâwm chu keimah mi lâwm an ni. Amaherawhchu, tu pawh hêng mi ringtu zînga tê ber pakhat pawh titlu chu an nghâwngah chhangphut râwt lung lian pui awrhtîrin, tuifinriat thûk laia thlâk ni se an tân a hlâwk daih zâwk ang. “Tlûknate avângin khawvêl hi a va pik êm! Tlûknate hi awm tûr rêng zawng a ni; nimahsela, tlûkna awmtîrtu chung chu a pik e. I kutin emaw, i kein emaw a tihtlûk che chuan tan la, paih daih rawh; kut khing hnih emaw, ke pahnih emaw neia kumkhaw meia paih nih ai chuan, piangsualin emaw, ke baiin emaw nunnaa luh chu i tân a ṭha zâwk e. I mitin a tihtlûk che chuan kher chhuak la, paih daih rawh; mit khinghnih neia hremhmun meia paih nih ai chuan, mit khing khat chauh neia nunnaa luh i tân a ṭha zâwk e. “Hêng mi tête zînga pakhat pawh hi hmusit lo tûrin fîmkhur rawh u, vâna an vântirhkohten ka Pa vâna mi hmêl an hmu reng ṭhîn tih ka hrilh che u hi. “Engtin nge in ngaih? Miin berâm za nei se, an zînga pakhat chu vâk bo sela, sawmkua leh pakuate chu tlânga hnutchhiahin a bo zawng tûrin tu nge kal lo vang? Thu dik ka hrilh a che u, a hmuh leh hlauh chuan sawmkua leh pakua vâk bo lote chungah ai chuan a chungah a lâwm zâwk ang. Chutiang bawkin hêng mi tête zînga pakhat boral pawh hi in Pa vâna mi duhzâwng a ni lo ve. “I unauvin i chungah thil sual ti sela, kal la, in pahnih chauhva hriatah zilh ang che, a ngaihthlâk che chuan i unau chu i hmin a ni ang. A ngaihthlâk loh che erawh chuan mi dang pakhat emaw, pahnih emaw hruai ang che; chutichuan, in thu zawng zawng chu hretu pahnih emaw, pathum emaw kâa tihngheh a ni thei ang. Tin, anni chu a ngaihthlâk duh loh chuan kohhran hnênah thlen ang che; kohhran pawh chu a ngaihthlâk duh loh chuan ani chu i tân Jentail leh chhiahkhawntu ang ni rawh se. “Thu dik ka hrilh a che u, lei chungah eng pawh in phuar apiang vânah phuar a ni ang a, lei chunga eng pawh in phelh apiang vânah phelh a ni ang. Thu dik ka hrilh a che u, lei chungah hian in zînga mi pahnihin inrema eng thu-ah pawh an ṭawngṭai chuan, ka Pa vâna miin a tihsak ang. Mi pahnih emaw, pathum emaw ka hminga an ṭhut khâwm apiangin an zîngah ka awm si ṭhîn a,” a ti a. Chumi lai chuan Petera a lo kal a, “Lalpa, ka unauvin vawi eng zât nge ka chungah thil tisual sela ka ngaihdam ang? Vawi sarih thleng em ni ang?” a ti a. Isuan a hnênah, “Vawi sarih thlengin ka ti lo va che, vawi sarih hmun sawmsarih thlengin ka ti zâwk che a ni. “Chumi avâng chuan vânram chu, lalber tu emaw a bawihte hnêna sum chungchâng tihfel tum nên chuan tehkhin a ni. A han tihfel chuan mi pakhat, talent sîngkhat ba a hnênah an rawn hruai a; rulhna a neih loh avângin a pu chuan amah leh a nupui nên, a fate leh a neih zawng zawng chu hralha rulh tûr thu a pe a. Chutichuan, bawih chuan lei siin chibai a bûk a, ‘Ka chungah zahngai rih la, a za-in ka rûl vek ang che,’ a ti a. Tichuan, chu bawih chu a pu chuan a khawngaih ta êm êm a, a thlah a, a bat chu a ngaidam ta a. Nimahsela, chu bawih chu a kal chhuak a, a bawihpui zînga pakhat a duli za ba a va hmu a, a man a, a hrawkah a rêk a, ‘I bat kha mi pe rawh,’ a ti a. A bawihpui chuan, ‘Ka chungah zahngai rih la, ka la rûl ang che,’ tiin kûnin a ngên chiam a. Nimahsela, a duh lo va, a bat chu a tlâk hma zawng tân inah a khung ta a. A bawihpuite chuan a thil tih dân chu an hmuhin pawi an ti êm êm a; a thiltih zawng zawng chu an pu an va hrilh a. Chu veleh a pu chuan ani chu a ko va, a hnênah, ‘Bawih sual, i ngen chiam avângin i bat zawng zawng kha ka ngaidam a, ka khawngaih che ang khân i bawihpui chu i khawngaih ve tûr a ni lâwm ni?’ a ti a. A pu chu a thinur ta a, a bat zawng zawng a tlâk hma chuan nghaisatute a pe ta a. Mi tinin thinlung taka in unaute in ngaihdam loh chuan, ka Pa vâna mi pawhin chutiang bawkin in chungah a ti ve ang,” a ti a. Isuan chûng thu chu a sawi zawhin Galili ram ata a chhuak a, Jordan râla Judai ramah chuan a kal ta a. Mipui nasa takin an zui a, chumi hmunah chuan a lo tidam hlawm a. Farisai-te a hnênah an lo kal a, amah fiah nân, “Eng vâng pawhin miin a nupui a mâk a thiang em?” an ti a. Ani chuan a chhâng a, “A tîr ata Siamtu chuan hmeichhia leh mipaah a siam a, ‘chumi avâng chuan mipain a nu leh pa a thlah ang a, a nupui a vuan ang; tichuan, an pahnih chuan tisa pumkhat an lo ni tawh ang,’ a tih hi in chhiar lo vem ni? Chutichuan, pahnih an ni tawh lo va, tisa pumkhat an ni tawh zâwk a ni. Pathianin a zawm tawh avângin mihringin ṭhen suh se,” a ti a. Anni chuan a hnênah, “A nih leh, engati nge Mosian inmâkna lehkha pea mâk theih thu a pêk si?” an ti a. Ani chuan an hnênah, “Mosian in thinlung sak avângin in nupui mâk a phal a ni; nimahsela, a tîr ata chutiang a ni si lo. Kei chuan ka hrilh a che u, tu pawh uire vâng ni lova a nupui maa mi dang neitu chu a uire a ni. Mâk hnu nei pawh a uire a ni,” a ti a. Zirtîrte chuan a hnênah, “Chutiang chu nupa chungchânga mipa dinhmun a nih si chuan inneih hi a ṭha lo ve,” an ti a. Ani erawh chuan, “Chu thu chu mi zawng zawngin an pawm thei lo, a pêkate chauh lo chuan. Mi tilreh, nu pum chhûng aṭanga chutianga piang rêng an awm a; mihring kuta reh an awm bawk a; vânram avânga tilreha insiam chawp an awm bawk a. Tu pawh a zâwm thei chuan zâwm rawh se,” a ti a. Chumi lai chuan an chunga kut nghata a ṭawngṭaisak tûrin a hnênah naupang tê tê an rawn hruai a; zirtîrte chuan an lo hnar a. Isua erawh chuan, “Naupangte ka hnênah han kaltîr ula, hnar suh u; vânram chu hêng ang mite ta hi a ni si a,” a ti a. An chungah a kut a nghat a, chuta ta chu a kal ta a. Mi pakhat a hnênah a lo kal a, “Zirtîrtu chatuan nun ka neih theih nân eng thil ṭha nge ka tih ang?” a ti a. Ani chuan, “Thil ṭha engah nge mi zawh? Ṭha chu pakhat chauh a awm, Nunnaa luh i duh chuan thupêkte chu zâwm rawh,” a ti a. Ani chuan, “A engte hi maw?” a ti a. Isuan, “Tual i that tûr a ni lo; i uire tûr a ni lo; i ru tûr a ni lo; dâwtin i hêk tûr a ni lo; i nu leh i pa chawimawi rawh, tihte leh, nangmah i inhmangaih angin i vêngte i hmangaih tûr a ni, tihte hi,” a ti a. Tlangvâl chuan a hnênah, “Chûng zawng zawng chu ka zâwm ṭhîn, eng nge ka la bâk?” a ti a. Isuan, “Ṭhat famkim i duh chuan, kal la, i thil neihte hralh la, pachhiate pe rawh; chutichuan, vânah ro i nei dâwn nia; tin, lo kal la, mi zui ang che,” a ti a. Chu thu chu a hriatin tlangvâl chuan beidawng takin a kalsan ta a, sum ngah tak a ni si a. Isuan a zirtîrte hnênah chuan, “Thu dik ka hrilh a che u; mi hausa tân vânram chu luh harsa tak a ni. Ka hrilh leh a che u, Pathian rama mi hausa an luh aiin hriau benga sanghâwngsei luh tlang a awl zâwk,” a ti a. Zirtîrten an hriat chuan mak an ti êm êm a, “Chuti chu tu nge chhandam ni thei ang le?” an ti a. Isuan anni chu a en reng a, an hnênah, “Chu chu mihring tân tih rual a ni lo va, Pathian tân erawh chuan engkim tih theih a ni,” a ti a. Peteran a chhâng a, “Ngai teh, keini lahin engkim kalsanin kan zui ta che a, eng nge kan hmuh ang le?” a ti a. Isuan an hnênah, “Thu dik ka hrilh a che u, Hun Tharah chuan, mihring Fapa a lalṭhutthlêng ropui taka a ṭhut hunah, nangni mi zuitute pawh hi Israel hnam sâwm leh pahnih chunga rorêlin lalṭhutthlêng sâwm leh pahnihah in la ṭhu ve ang. Tu pawh ka hming avânga inte emaw, unaute emaw, farnute emaw, pa emaw, nu emaw, fate emaw, ramte emaw kalsan chuan a lêt za an hmu ang; chatuan nun an la chang bawk ang. “Mi tam tak hmasa bera awmte chu hnuhnûng ber an la ni ang a, hnuhnûng bera awmte pawh hmasa ber an la ni ang,” a ti a. “Vânram chu in neitupa grep huana hnathawktu ruai tûra zîng taka thawk chhuak ang chu a ni. Hnathawktute nên ni khata duli hlawha an inrem veleh a grep huanah a tîr ta a. Dâr kaw vêlah a chhuak leh a, dâwrpuia mi dang ding mai mai a hmu a; an hnênah, ‘Nangni pawh grep huanah va kal ve tawh u; a âwm tâwk apiang ka pe ang che u,’ a ti a. An kal ta a. Chhûn laiah leh tlai dâr thum vêlah pawh a chhuak a, chutiang bawkin a ti leh a. Tlai dâr nga vêlah a va chhuak leh a, mi dang dingte a hmu a, an hnênah, ‘Engati nge nilênga heta in din mai mai?’ a ti a. Anni chuan, ‘Tu man min ruai hek lo,’ an ti a. Ani chuan, ‘Nangni pawh grep huanah va kal ve rawh u,’ a ti a. “Tlaiah chuan a huan enkawltu hnênah, ‘Hnathawktute kha ko la, a hnuhnûng bera ṭanin a hmasa ber thlengin an hlawh pe rawh,’ a ti a. Tlai dâr nga vêla rawihte chu an lo kal a, duli an dawng ṭheuh va. A hmasa berte chu an lo kal a, dawn tam deuh an inring a; nimahsela, duli bawk an dawng ta a. An hlawh an han dawn chuan in neitupa chungah an phunnawi ta a. ‘Hêng hnuhnûng berte hian dârkâr khat chauh an thawk a, keini chhûn ni sa tuara thawk nilêngte tlukin i siam si,’ an ti a. “Ani erawh chuan a chhâng a, an zînga pakhat hnênah chuan, ‘ṭhiana, i chungah ka tidik lo hlei nêm; duli hlawhah kan inrem lo vem ni? I ta kha la la, kal mai rawh; ka pêk che ang bawk kha hêng thawk hnuhnûng berte pawh hi ka pe duh a ni. Ka ta na na na chu ka duh duha ka tih a thiang lo vem ni? A nih loh leh kei ka ṭhat avângin i vui a ni maw?’ a ti a. Chutiangin hnuhnûng berte chu hmasa ber an la ni ang a, hmasa berte pawh hnuhnûng ber an la ni ang,” a ti a. Jerusalem-a a chhoh dâwn laiin Isuan a zirtîr Sâwmpahnihte chu a hruai hrang a, kalkawngah chuan an hnênah, “Ngai teh u, Jerusalem-ah kan chhoh dâwn hi: Mihring Fapa hi puithiam lalte leh Dân zirtîrtute hnênah an mantîr dâwn a ni. Anni chuan thi tûrin a chungah thu an titlu ang a, nuihza siam nâna hman tûr leh vuak tûr leh khenbeh tûrin Jentail-te hnênah an hlân ang; tin, ni thum nia kaihthawh a ni ang,” a ti a. Chumi lai chuan Zebedaia nupui chu, a fate hruaiin Isua hnênah a lo kal a, ṭhingṭhiin chibai a bûk a, thil eng emaw a dîl a. Ani chuan, “Eng nge i duh?” a ti a. Ani chuan, “Ka fapa pahnihte hi i ramah, i ding lamah pakhat, i vei lamah pakhat an ṭhut theih nân thu pe ta che,” a ti a. Isuan a chhâng a, “In thil dîl hi in hre lo va ni. Ka no in tûr chu in in thei dâwn em ni?” a ti a. Anni chuan, “Thei ang,” an ti a. Ani chuan an hnênah, “Ka no chu in in ngei ang; nimahsela, ka ding lam emaw, ka vei lam emawa ṭhuttîr chu ka thu a ni lo va, ka Pa buatsaihsakte tân a ni zâwk ang,” a ti a. Zirtîr sâwmte chuan chu chu an lo hriatin unau pahnihte chungah chuan an lungni lo ta hle a. Isua erawh chuan anniho chu a ko va, “Jentail-te chunga rorêltute chu an intilal êm êm ṭhîn a, an miliante pawhin an chungah thu an nei êm êm ṭhîn tih in hria; nangni zîngah zawng chutiang tûr a ni lo ve. Tu pawh in zînga mi lian nih duh chu in rawngbâwltuah a awm zâwk tûr a ni. In zînga ropui ber nih duh pawh chu in chhiahhlawhah a awm tûr a ni. Mihring Fapa pawh hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûra a lo kal ang hian,” a ti a. Tin, Jeriko khua ata an chhuah laiin mipui nasa takin amah an zui a. Mitdel pahnih kawng sîra lo ṭhu chuan Isua a kal tih an hriat veleh, “Lalpa, Davida Fapa, min khawngaih rawh,” tiin an au va. Mipuite chuan an hau va, ngawi tûrin an ti a, mahse anni chuan, “Lalpa, Davida Fapa, min khawngaih rawh,” tiin an au zual sauh va. Isua chu a ding a, anni chu a ko va, “Eng nge tihsak che u ila in duh?” a ti a. Anni chuan a hnênah, “Lalpa, mit vâr kan duh,” an ti a. Isua chuan a khawngaih ta êm êm a, an mit a dek a; tichuan, an hmu thei ta nghâl a, amah chu an zui ta a. Jerusalem an lo hnaih ta a, Oliv tlânga Bethfage khua an han thlen chuan Isuan a zirtîr pahnih a tîr a, an hnênah, “In hma zâwn khuaah sâwn va kal ta ula, sabengtung thlun, a kianga a no nên in hmu mai ang; phelh ula, ka hnênah han kai rawh u. Mi tu pawhin in hnênah eng pawh sawi sela, ‘Lalpan a mamawh a ni,’ in ti ang a, a rawn kaltîr nghâl mai ang,” a ti a. Zâwlnei hmanga a sawi kha a lo thlen theihna tûrin chûng chu a lo awm a ni: “Zion fanu chu hrilh rawh u, en teh, i lal chu i hnênah a lo kal e, Thuhnuairawlh taka sabengtung chunga chuangin, Sabengtung no chung ngeiah,” tih thu hi. Tichuan, zirtîrte chu an va kal a, Isuan thu a pêk ang ngeiin an ti a. Sabengtung leh a no chu an rawn kai a, an chungah an puante an phah a, ani chu a chuang ta a. Mipui zînga a tam zâwk chuan kalkawngah an puante an phah a, a ṭhenin hnahchhâwl an sât a, kalkawngah chuan an phah zêl bawk a. A hma lama kalte leh a hnung lama zuitu mipui chu, “Davida Fapa hnênah, Hosana, Lalpa hminga lo kal chu fakin awm rawh se; Chungnung berah khian Hosana,” tiin an au va. Jerusalem a lo luh chuan, a khuain, “He mi hi tu nge ni?” tiin an phu ta mur mur a. Mipuiho chuan, “He mi hi zâwlnei Isua, Galili ram Nazaret khuaa mi a ni,” an ti a. Isua chu tempulah a va lût a, chuta englo zuartute leh leitute chu a hnawt chhuak vek a; tangka thlengtute dawhkânte leh ṭhuro zuartute ṭhutthlêngte chu a nam thlûksak a; an hnênah, “‘Ka in chu ṭawngṭaina in an ti ang,’ tih ziak a ni; nangni erawh chuan suamhmangte pûkah in siam zâwk a nih hi,” a ti a. Tempulah chuan mitdelte leh kebaite a hnênah an lo kal a, a lo tidam hlawm a. Puithiam lalte leh Dân zirtîrtuten thil mak a tihte leh Tempula, “Davida Fapa hnênah Hosana,” tia naupang aute chu an hmuhin an thinur ta hle a, “Hêngho thu sawi hi i hria em?” an ti a. Isuan an hnênah, “Hria e, ‘Nausênte leh hnute hne laite kâa chhuak chuan fakna i tifamkim ta,’ tih hi in chhiar ngai lo vem ni?” a ti a. Anni chu a kalsan a, khawpui ata a chhuak a, Bethani-ah a kal a, chutah chuan a riak ta a. Tin, zîngah khawpui lam a pan leh laiin a ril a lo ṭâm ta a. Kawng kamah chuan theipui a hmu a, a va pan a, a hnah chauh lo chu eng mah a hmu lo va, “Rah lo kumkhua tawh ang che,” a ti a; theipui chu a vuai ta nghâl mai a. Zirtîrte chuan chu chu an hmuhin mak an ti hle a, “Engtizia nge theipui hi a vuai nghâl tâk mai?” an ti a. Isuan a chhâng a, “Thu dik ka hrilh a che u; rinna in neiha in rinhlelh loh chuan, theipui chunga tih ang chang hi in ti lo vang a, he tlâng hnênah pawh hian, ‘Insawn la, tuifinriatah inpaih rawh,’ in tih chuan a inpaih mai ang. Engkim, ring chunga ṭawngṭaia in dîl apiang in hmu ang,” a ti a. Tempulah a lût a, a zirtîr lai chuan puithiam lalte leh vântlâng upate chu a hnênah an lo chho va, “Eng thuneihnain nge hêng thil hi i tih? Tu nge thu pe che?” an ti a. Isuan a chhâng a, “Kei pawhin thu ka han zâwt ve ang che u, chu chu mi hrilh chuan tu thuin nge hêng thil hi ka tih ka hrilh ang che u. Johana baptisma kha khawia ta nge, vâna mi thu nge mihring thu?” a ti a. An inrâwn khâwm a, “ ‘Vâna mi thu,’ kan tih chuan, ‘engah nge a thu in awih loh le?’ min ti dâwn si a; ‘mihring thu,’ kan tih chuan kan tân mipui an hlauhawm si, mi zawng zawngin Johana chu zâwlneiah an ngai si a,” an ti a. Tichuan, Isua chu an chhâng a, “Kan hre lo,” an ti a. Ani chuan an hnênah, “Kei pawhin tu thuin nge hêng thil hi ka tih ka hrilh bîk lo vang che u,” a ti a. Isuan, “A nih leh nangnin engtin nge in ngaih? Mi pakhatin fapa pahnih a nei a, pakhat hnênah chuan a va kal a, ‘Ka fapa, vawiin chu grep huanah va thawk rawh,’ a ti a. Ani chuan, ‘Ka duh lo,’ tiin a lo chhâng a. Nimahsela, nakinah a rilru a lamlêt a, a kal ta a. Pakhat hnênah pawh chuan a va kal a, chutiang bawk chuan a ti a. Ani chuan ‘Aw le, ka pa,’ a ti a; nimahsela, a kal ta chuang lo va. Chu mite pahnih chu a tu zâwk chuan nge an pa duhzâwng ti le?” a ti a. Anni chuan, “A hmasa zâwk chuan,” an ti a. Isuan an hnênah, “Thu dik ka hrilh a che u, chhiahkhawntute leh nawhchizuarte chuan Pathian ram an luh khalh ta che u a nih hi. Johana chuan kawng dik a rawn kawhhmuh che u a, amah chu in ring si lo va; chhiahkhawntute leh nawhchizuarte erawh chuan amah chu an ring a, nangnin chu chu in hmuh hnu pawhin amah chu ring tûrin in lamlêt si lo va. “Tehkhin thu dang ngaithla rawh u. In neitu pakhat a awm a, grep huan a siam a, palin a hung a, grep sâwr khur a lai a, vênbûk sâng tak a sa bawk a, thlawh hlawh tûrin huan enkawltute a pe a, ram dangah a kal ta daih a. A rah lawh a hun dâwn chuan a chanpual la tûrin huan enkawltute hnênah a bawihte a tîr a. Huan enkawltute chuan a bawihte chu an lo man a, pakhat an vaw nek a, pakhat an tihlum a, pakhat lungin an dêng a. Bawih dang, a hmasa aia tam zâwk a tîr leh a; anni pawh chu chutiang bawk chuan an lo ti a. Chumi hnu chuan, ‘Ka fapa hi zawng an zah ang chu maw,’ tiin a fapa chu an hnênah a tîr ta a. Nimahsela, huan enkawltute chuan a fapa chu an lo hmuhin, ‘He mi hi roluahtu tûr chu a nih hi; hawh u, that ila, a ro luah tûr hi i neihsak ang u,’ an ti hlawm a. Tichuan, ani chu an man a, grep huan ata chu an theh chhuak a, an tihlum ta a. Chutichuan, grep huan neitu chu a lo kal hunin, chûng huan enkawltute chu engtin nge a rawn tih tâk ang?” a ti a. Anni chuan, “Chûng mi sualte chu hrehawm takin a tiboral ang a, grep huan chu enkawltu dang, a lawh hun apianga a rahte chu amah pe zêltu tûrte hnênah thlawh hlawh tûrin a pe ang,” an ti a. Isuan an hnênah, “Lehkhathu-a, ‘In satute lung duh loh kha, chu ngei chu a kil lung ṭangkai ber a lo ni si, Chu chu Lalpa tih a ni a, Kan hmuhin mak kan ti,’ tih hi in chhiar ngai lo vem ni? “Chumi avâng chuan ka hrilh a che u, Pathian ram chu chhuhsak in ni ang a, a rah chhuah tûr hnam hnênah pêk a ni ang,” a ti a. Puithiam lalte leh Farisai-te chuan a tehkhin thu chu an hriatin anmahni chungthu a sawi tih an hre ta a. Man an tum a; mahse, mipui an hlau bawk si, zâwlneiah an ngaih tlat avângin. Mipui hnênah tehkhin thuin Isuan thu a sawi leh a, “Vânram chu lal tu emaw, a fapa tâna mo lawmna ruai ṭheh nên chuan tehkhin theih a ni. Ruai ṭheh tûra a sâwmte chu ko khâwm tûrin a bawihte a tîr a; mahse, an lo kal duh lo va. Ani chuan bawih dangte a tîr leh a, ‘Ka sâwmte hnênah khân, ngai teh u, ruai chu ka peih ta a, ka bâwngpate leh ran châwm thaute ka talh a, engkim peih a ni ta e; ruai ṭheh tûrin lo kal tawh rawh u, ti rawh u,’ a ti a. Nimahsela, an lo ngaihsak lo va, an kalsan ta mai a, a ṭhen an feh a, a ṭhen an sumdâwnnaah an kal a. Mi dangte chuan a bawihte chu an man a, zahthlâk takin an sawisa a, an tihlum ta mai a. Lal chu a thinrim ta a, a sipaite a tîr a, chûng tualthattute chu a tiboral a, an khua pawh a hâlsak ta a. “Tin, a bawihte hnênah chuan, ‘Ruai chu peih a ni ta, ka sâwmte erawh kha chu lo tel tlâk an ni lo. Chuvângin, kawng pêng ṭhuamahte kal ula, mi in hmuh apiang ruai ṭheh tûrin va sâwm rawh u,’ a ti a. Tichuan, bawihte chu an chhuak a, kawngahte chuan an kal a, an hmuh apiang, mi sual leh mi ṭhate pawh an hruai khâwm ta vek a; tichuan, mo lawmna in chu ruai kîltutein a lo khat ta a. “Lal chu ruai kîltute en tûra a lo luh chuan inneihna thuam inbel lo mi pakhat a rawn hmu a; a hnênah, ‘ṭhiana, engtizia nge inneihna thuam inbel lova heta i lo luh le?’ a ti a. Ani chu a ngawi ta reng a. Lal chuan a rawngbâwltute hnênah, ‘A kut leh ke phuar ula, pâwn thimah paih chhuak rawh u, chutah chuan an ṭap ang a, hâ an ṭhial ang. Sâwmte chu tam tak an ni a, thlante erawh chu tlêm tê an ni,” a ti a. Chumi lai chuan Farisai-ten a thu sawia an man theih dân tûr an sawi ho va. An zirtîrte chu Heroda pâwla mite nên a hnênah an tîr a; anni chuan, “Zirtîrtu, mi dik tak i ni a, tihtakzetin Pathian thu i zirtîr ṭhîn a, pawisak chuan tu mah i nei si lo va. Chuvângin, engtin nge i ngaih min hrilh teh khai, Kaisara hnêna chhiah chawi tûr kan ni nge ni lo?” an ti a. Isuan an sualzia chu a lo hria a, “Mi vervêkte u, engah nge mi ṭawng awhtîr in tum? Chhiah tangka chu mi han entîr teh u,” a ti a. A hnênah duli an rawn la a. Ani chuan an hnênah, “Hei, tu lem leh tu hming nge chuang hi?” a ti a. Anni chuan, “Kaisara,” an ti a. Ani chuan an hnênah, “Chuti a nih chuan, Kaisara thil chu Kaisara pe ula, Pathian thil chu Pathian pe ta che u,” a ti a. Chu chu an hriatin mak an ti hle a, amah chu an kalsan a, an kal ta daih a. Chumi ni vêk chuan Sadukai-ho, thawhlehna a awm lo tite chu a hnênah an lo kal a, “Zirtîrtu, Mosian, ‘Fa nei lovin mi thi sela, a unauvin a nupui chu rochungin a unau tân chi a thlahsak tûr a ni,’ a ti a. Aw le, kan zîngah unau mipa pasarih an awm a, a upa berin nupui a nei a, chi thlah lovin a thi a, a nupui chu a nau tân a hnutchhiah a; chutiang bawkin pahnihna pawh, pathumna pawh, pasarihna thlengin a ni a. Chu mite thih hnu chuan hmeichhia pawh chu a thi ta a. Tichuan, thawhlehnaah chûng mi pasarihte zînga tu nupui ber nge ni ang; an za-in an nei ṭheuh si a?” tiin an zâwt a. Isuan a chhâng a, “Lehkha Thu leh Pathian thiltihtheihna in hriat loh avângin in kal sual ṭhîn a ni. Thawhlehnaah chuan nupui pasal an innei dâwn tawh lo va, vâna vântirhkohte ang mai an ni zâwk dâwn a ni. Mitthi thawhlehna thu-ah chuan Pathianin, ‘Kei hi Abrahama Pathian, Isaka Pathian, Jakoba Pathian ka ni,’ tia in hnêna a sawi kha in chhiar ngai lo vem ni? Ani chu mitthi Pathian a ni lo va, mi nung Pathian a ni zâwk,” a ti a. Mipui chuan chu chu an hriatin a thu zirtîr chu mak an ti hle a. Sadukai-te chu a chhâng dang tih Farisai-te chuan an hriatin an inhmu khâwm a. An zînga Dânhremi pakhatin amah fiah nân, Zirtîrtu, Dânah hian eng thupêk hi nge ropui ber?” tiin a zâwt a. Ani chuan, “Lalpa i Pathian chu i thinlung zawng zawngin, i nunna zawng zawngin, i rilru zawng zawngin i hmangaih tûr a ni. Chu chu thupêk ropui leh pawimawh ber chu a ni. A dawttu, a anpui chu, ‘Nangmah i inhmangaih angin i vêngte hmangaih rawh,’ tih hi a ni. Chûng thupêk pahnihah chuan Dân leh zâwlneite thu zawng zawng a inkhaikhâwm vek a ni,” a ti a. Farisai-te kal khâwm chu Isuan thu a zâwt a, “Krista chu eng angin nge in ngaih? Tu fapa nge ni?” a ti a. Anni chuan, “Davida,” an ti a. Ani chuan an hnênah, “Davidan engtizia nge thlarauva sawiin ani chu, ‘Lalpa,’ a tih si? ‘Lalpa chuan ka Lalpa hnênah, Ka ding lamah lo ṭhu rawh, I hmêlmate i ke hnuaiah ka han dah ang e,’ a ti si a. Davidan ani chu, ‘Lalpa,’ a tih si chuan, engtin nge a fapa mai a nih theih?” a ti a. Tu man kam khat mahin an chhâng thei lo va, chumi a chin chu tu man thu dang rêng rêng an zâwt ngam tawh hek lo. Tichuan, mipuite leh zirtîrte hnênah Isuan thu a sawi a, “Dân zirtîrtute leh Farisai-te chu Mosia Dân zirtîrtua ruat an ni a. Chuvângin, an hrilh apiang che u chu ti ula, zâwm zêl ang che u, an thiltih ang erawh chu ti ve suh ang che u; sawi zawng an sawi ṭhîn a, an ti si ṭhîn lo. Phurrit hrehawm tak tak an siam a, mite an bel ṭhîn a, anni erawh chuan an kut zung hmâwr pawhin an khawih duh si lo. An thiltih zawng zawng chu mite hmuh atân a ni an tih ṭhin ni; an bân hrên leh chal hrêna bâwm chu an tihlai a, an puan fêm an tibuk ṭhîn a. Ruai ṭhehna hmuna ṭhutna ṭha ber te, Sunagog-a ṭhutna langsâr ber te, dâwrpui hmuna chibai bûk te, miten ‘Rabi,’ an tihte an ngaina si ṭhîn. “Nangni erawh chu, ‘Rabi,’ tihin awm suh u, in zirtîrtu chu pakhat a ni a, in za-in unau in ni si a. Tin, leiah hian tu mah, ‘ka pa’ ti suh u; in Pa chu pakhat a ni, vâna mi chu. ‘Hruaitute,’ tihin awm hek suh u, in Hruaitu chu pakhat a ni, Krista chu. In zînga ropui ber chu in rawngbâwltu a ni tûr a ni. Tu pawh inngaihlu chu an tlâwm ang a, inngaitlâwm apiang chawimawi an ni ang. “Nangni Dân zirtîrtu leh Farisai vervêkte u, in chung a pik e! Vânram kawng chu mite in khârsak si ṭhîn; nangni lah in lût si lo va, a lût tûrte pawh an luh in phal hek lo. Nangni Dân zirtîrtu leh Farisai-te u, in chung a pik e! Saphun pakhat siam tûrin tuifinriat leh khawmual in fang vêl ṭhîn a; in saphuna in siam hnuin nangmahni lêt hniha sualah in siam ṭhîn. “Nangni hruaitu mitdel, ‘Tempul chhâlin miin chhia chham sela, eng mah a ni lo; Tempul rangkachak chhâla chhia a chham erawh chuan a hlen tûr a ni,’ titute u, in chung a pik e! Nangni mi â, mitdelte u, a eng nge ropui zâwk, rangkachak nge rangkachak tithianghlimtu Tempul chu? ‘Miin maichâm chhâlin chhia chham sela, eng mah a ni lo; a chunga thilpêk chhâla chhia an chham erawh chuan an hlen tûr a ni,’ in ti bawk a. Nangni mitdelte u, a eng nge ropui zâwk, thilpêk nge thilpêk tithianghlimtu maichâm chu? Chuvângin, maichâm chhâla chhechham chu maichâm leh a chunga awm zawng zawng chhâla chhechham a ni. Tempul chhâla chhechham chu Tempul leh a luahtu chhâla chhechham a ni. Vân chhâla chhechham chu Pathian ṭhutthlêng leh a chunga ṭhu chhâla chhechham a ni. “Nangni Dân zirtîrtu leh Farisai vervêkte u, in chung a pik e! Pudina te, lêngmasêr te, pardi te sâwma pakhat in pe ṭhîn a; Dân thu pawimawh zâwk - dikna te, khawngaihna te, rinawmna te in ngaihthah si ṭhîn; nimahsela, chûng chu asin in tih tûr ni, a dangte chu ngaihthah chuang lovin. Hruaitu mitdel, thosi in tel palh hlauva thli faia, sanghâwngsei thli fai lova lem tel si ṭhînte u! “Nangni Dân zirtîrtu leh Farisai vervêkte u, in chung a pik e! No leh thlêng pâwn lam in sil fai ṭhîn a, a chhûng lam erawh chu duhâmna leh insûm lohnain a khat si a. Nang, Farisai mitdel, no leh a chhûng lam chu sil fai hmasa rawh, a pâwn lam pawh a lo fai dâwn nia. “Nangni Dân zirtîrtu leh Farisai vervêkte u, in chung a pik e! Thlân hnawih vâr, a pâwn lama mawi taka lang, a chhûng lam erawh chu mitthi ruh leh bawlhhlawh tinrênga khat ang chu in ni. Nangni pawh chutiang bawkin pâwn lamah chuan mi hmuhin fel âwm takin in lang a, chhûng lamah erawh chuan vervêkna leh khawlohnain in khat si. “Nangni Dân zirtîrtu leh Farisai vervêkte u, in chung a pik e! Zâwlnei thlân inte in sa a, mi fel thlânte pawh in cheimawi a. ‘Kan pi leh pute dam lai khân awm ve pawh ni ila, zâwlneite thisen chhuahnaah zawng kan tel ve lo vang,’ in ti ṭhîn. Chutiangin zâwlneiho thattute thlah in nihzia in tilang a ni. In pi leh puten an lo tih ṭan tawh chu hlen law law rawh u. Rûlte u, rûlrial thlahte u, hremhmun rorêlna chu engtin nge in pumpelh theih ang? “Ngai teh u, chumi avâng chuan in hnênah zâwlnei te, mi fing te, Dân zirtîrtute ka rawn tîr dâwn; ṭhenkhat in tihlum ang a, in khêngbet ang; ṭhenkhat sunagog-ah in vua ang a, khaw tinah in tiduhdah zui zêl ang. Chutichuan, Abela, mi fel tak thisen chhuah aṭangin, Hmun Thianghlim leh maichâm inkâra Barakia fapa Zakaria thisen in chhuah thleng khân, lei chunga mi fel thisen chhuak zawng zawng mawh chu nangniho chungah a tla ang. Thu dik ka hrilh a che u, chûng zawng zawng chu tûnlai mite chungah a thleng dâwn a ni. “Aw Jerusalem, Jerusalem, zâwlneite thattu, i hnêna tirhte lo dêng hlumtu! Arpuiin a notê a thla hnuaia a awp khâwm angin i fate vawi eng zât nge awp khâwm ka tuma, in duh si loh kha? Ngai teh u, in Tempul chu a rauhsan a, a ram ta a ni. Ka hrilh a che u, ‘Lalpa hminga lo kal chu fakin awm rawh se,’ in tih hma chuan tûn a chinah mi hmu leh dâwn tawh lo a nih hi,” a ti a. Isua chu Tempul ata a chhuak a, a kalsan dâwn laiin, Tempul sak dân te chu entîr tûrin zirtîrte an lo kal a. Ani erawh chuan a chhâng a, an hnênah, “Hêng zawng zawng hi in hmu maw? Thu dik ka hrilh a che u, lung intiang rêng rêng hi pakhat mah tihchim lohva hnutchhiah a awm lo vang,” a ti a. Tin, Oliv tlânga a ṭhut laiin zirtîrte chu anmahni chauhvin a hnênah an lo kal a, “Chûng chu engtikah nge a lo awm ang a, i lo kal lehna leh khawvêl tâwp chhinchhiahna thil mak eng eng nge awm ang, min hrilh teh,” an ti a. Isuan a chhâng a, “Tu man an hruai bo loh nân che u fîmkhur rawh u. Ka hming chhâlin ‘Krista chu ka ni,’ tiin mi tam tak an lo chhuak dâwn si a, mi an hruai bo ṭeuh ṭeuh vang. Indo ri te, indo chanchin te pawh in hria ang a, thlaphâng lo tûrin fîmkhur rawh u; chûng chu lo thleng tûr rêng a ni; hun tâwp erawh chu a la ni rih lo ve. Hnam hrang leh hnam hrang an indo vang a, sawrkâr hrang leh sawrkâr hrang an indo bawk ang, hmun hrang hrangah ṭâm a tla ang a, lîr a nghîng bawk ang. Chûng zawng zawng chu nau vei a inṭan ta tihna a ni. “Chumi hunah chuan hrehawm tuar tûrin an mantîr ang che u a, an tihlum ang che u; ka hming avângin hnam zawng zawngin an hua ang che u. Chumi hunah chuan mi tam tak an tlu ang a, an inmantîr tawn ang a, an inhaw tawn ang. Zâwlnei der tam tak an lo chhuak ang a, mi an hruai bo ṭeuh ṭeuh vang; Suahsualna a pun dâwn avângin mi tam zâwk hmangaihna chu a la dai ang. Nimahsela, a tâwp thlenga chhel taka tuar peih apiang, chûng mite ngei chu chhandam an ni ang. Ram Chanchin Ṭha hi hnam zawng zawng hriat tûrin khawvêl pum puia hril a ni ang a, chumi zawhah chuan tâwpna chu a lo thleng dâwn a ni. “Chutichuan, tiṭiautu tenawm zawlnei Daniela hmanga sawi kha, hmun thianghlima ding in hmuh hunah chuan (a chhiar chuan a awmzia hre rawh se) Judai rama awmte chu tlângramahte tlân rawh se; in chunga awm chu in chhûnga englo chuh tûrin chhuk suh se, Lova feh pawh a silhfên chuh tûrin haw hek suh se. Nau pai te leh nauno pawmte chu an va khawngaihthlâk dâwn êm! Thlasik lai emaw, Sabat ni emawa in tlân a ṭûl loh nân ṭawngṭai rawh u. Chumi hun chu a hrehawm êm êm dâwn a ni; chutianga hrehawm chu leilung pian tirh ata tûn thlengin a la awm ngai lo va, awm pawh a awm leh tawh hek lo vang. Chûng nite chu tihtawi ni suh sela, mihring tu mah dam khawchhuak an awm lo vang; nimahsela, thlante avângin chûng nite chu tihtawi a ni ang. “Chutih hunah chuan tu pawhin in hnênah, ‘En teh u, Krista chu heta hi,’ emaw, ‘Sawta saw,’ emaw an tih pawhin awih duh suh ang che u. Krista der leh zâwlnei derte an lo chhuak dâwn si a; thei ang se thlante meuh pawh an hruai bo theih nân chhinchhiahna leh thil mak ropui tak tak an ti ang. Ngai teh u, ka hrilh diam tawh che u hi. Chutichuan, in hnênah, ‘Thlalêrah a awm e,’ an tih chuan kal chhuak suh u, ‘En teh u, pindan chhûngrilah a awm,’ an tih pawhin awih duh hek suh ang che u. Chhak lamah kâwl a lo phe a, thlang lam thlengin a ên ṭhîn. Mihring Fapa lo kal lehna pawh chutiang chu a ni dâwn si a. “Khawiah pawh sa ruang awmna apiangah mulukawlhte an awm khâwm ang. “Tin, chûng hun hrehawm chu a liam veleh ni a thim ang a, thla a êng hek lo vang; vân aṭangin arsite a tla ang a, vân thiltihtheihnate chu tihnghîn a ni ang. Chutih hunah chuan Mihring Fapa chhinchhiahna chu vânah a lo lang ang a, chumi hunah chuan leia chi tinrêngin ṭapin an âwm an chûm ang a, Mihring Fapa hi thiltihtheihna leh ropuina nasa tak nên vân chhûm zînga a lo kal an hmu ang. Vântirhkohte chu tawtawrâwt ri ruai ruai nên a tîr chhuak ang a, anni chuan thlante chu kâwlkil li ata vân tâwp aṭanga a tâwp lehlam thlengin an lâwr khâwm ang. “Tichuan, theipui kûng awm dân aṭang hian zir tûr in nei; a zîk a lo no va, hnah a rawn chhuah chuan nipui a thaw dâwn tih in hre ṭhîn. Chutiang bawkin, nangni pawhin chûng zawng zawng in hmuh hun chuan ani chu a lo hnai tawh a, a lo thleng ṭêp tawh tih hria ang che u. Thu dik ka hrilh a che u, chûng zawng zawng chu a thlen hma loh chuan tûnlai mite hi an ral hman lo vang. Lei leh vân a ral ang a, ka thu erawh chu a ral lo vang. “Nimahsela, chûng lo thlen hun tûr ni leh dâr chu, Pa chauh lo chuan tu man an hre lo; vâna vântirhkohte pawhin, Fapa pawhin an hre lo. Tin, Nova dam lai ang khân Mihring Fapa lo kal lehna chu a ni ang. Tuilêt hma, Nova lawnga a luh ni thlengin an eiin an in a, nupui pasal an innei ṭhîn a; tui a lo lian a, an zaa a lâk bo vek hma loh chuan eng mah an hre lo, Mihring Fapa lo kal lehna chu chutiang bawk chu a ni ang. Chumi hunah chuan lovah mi pahnih an awm ang a, pakhat chu lâk a ni ang a, pakhat chu hnutchhiah a ni ang. Hmeichhe pahnihin buh an dêng ang a, pakhat chu lâk a ni ang a, pakhat chu hnutchhiah a ni ang. “Chutichuan, inring rengin awm rawh u, eng ni-ah nge in Lalpa a lo kal dâwn in hre si lo. Nimahsela, hei hi in hria e, rûkru lo kal tûr in neituin hria sela, a lo inring ang a, a in a reh pawhtîr lo vang. Chuvângin, nangni pawh inpeih rengin awm rawh u, in beisei loh hunah Mihring Fapa chu a lo kal hlauh dah ang e. “An puin an chhûngkaw hotu-ah leh an chaw sem huna semsak ṭhîntu atân sum enkawltu rinawm tak leh fing a ruat tûra chu tu nge ni ang? An pu hâwn huna bawih chutiang ti a rawn hmuh chu a nihlawh e. Thu dik ka hrilh a che u, a neih zawng zawng chunga hotu-ah a rawn siam ang. Amaherawhchu, bawih sual chuan, ‘Ka pu hi a lo haw lawk dâwn lo ve,’ ti rilruin a bawihpuite lo vêl ta sela, zu ruite nên eiin in sela, chu bawiha pu chu a rin loh ni-ah, a hriat loh dârah a lo kal ang a, bung hnihah a rawn chhuah ang a, mi vervêkte chan ang a chantîr ang; chutah chuan an ṭap ang a, hâ an ṭhial ang. “Chumi hnuah chuan vânram chu nula sâwm, an khâwnvâr kenga moneitu hmuak tûra chhuakte nên chuan tehkhin theih a ni ang. An zînga panga an â a, panga an fing a. A â-te chuan an khâwnvârte an keng nâ a, a tui an keng tel lo va. A fingte erawh chuan an khâwnvârte kengin ûmin a tui an keng tel bawk a. Moneitu chu a lo kal har avângin an za-in an muthlu a, an lo muhîl ta a. Zân laiah chuan au thâwm a lo awm a, ‘Ngai teh u, moneitu chu a lo kal e, a hmuak tûrin lo chhuak rú khai,’ tiin. Chu veleh nulaho chu an tho vek a, an khâwnvârte chu an buatsaih a. A â-te chuan a fingte hnênah, ‘In khâwnvârtui kha min pe ve rawh u, kan khâwnvârte a thi dâwn e,’ an ti a. Nimahsela, a fingte chuan, ‘Keini leh nangni tân a daih lo dah ang e, a zuartute hnênah kal ula, va lei zâwk rawh u,’ an ti a. Lei tûra an thang hlânin moneitu chu a lo thleng ta a; tichuan, a inpeihte chu ama rualin mo lawmna ruai ṭheh tûrin an lût a, kawng chu an khâr ta a. Chumi hnu chuan nula dangte pawh kha an lo thleng a, ‘Ka pu, ka pu, kawng min hawn rawh,’ an ti a. Ani erawh chuan a chhâng a, ‘Thu dik ka hrilh a che u, ka hre lo che u a ni,’ a ti a. Chutichuan, inring reng rawh u, a ni leh a dâr chu in hre si lo. “Chutih hunah chuan vânram chu, mi, ram danga kal dâwna, ama bawihte kova, a sumte an hnêna kawltîr ang chu a ni ang. Bawih pakhat chu talent nga a pe a, pakhat chu talent hnih, pakhat dang chu talent khat, an tlin tâwk tûr ang zêl ṭheuhvin a pe a; tichuan, a kal ta a. Talent nga dawngtu chu a va sumdâwng ta nghâl a, talent nga dang a dek chhuak a. Chutiang bawkin talent hnih dawngtu pawh chuan talent hnih dang a dek chhuak a. Talent khat dawngtu erawh chuan lei a va lai a, a pu tangka chu a phûm ru ta zâwk a. “Rei tak hnuah chuan chûng bawihho pu chu a lo hâwng a, an sum enkawl chungchâng a tihfelpui a. Talent nga dawngtu chu a lo kal a, talent nga dang a rawn keng a, ‘Ka pu, nangin talent nga mi kawltîr a, en teh, talent nga dang ka dek chhuak e,’ a ti a. A pu chuan a hnênah, ‘Bawih ṭha leh rinawm, i ti ṭha e, tlêm te chungah i rinawm a, tam tak chungah ka awmtîr ang che; i pu lâwmna chanpui ve rawh,’ a ti a. Talent hnih dawngtu pawh chu a lo kal a, ‘Ka pu, nangin talent hnih mi kawltîr a, en teh, talent hnih dang ka dek chhuak e,’ a ti a. A pu chuan a hnênah, ‘Bawih ṭha leh rinawm, i ti ṭha e, tlêm te chungah i rinawm a, tam tak chungah ka awmtîr ang che; i pu lâwmna chanpui ve rawh,’ a ti a. “Talent khat dawngtu pawh chu a lo kal a, ‘Ka pu, mi ti kher kher i ni tih ka hria a che, i tuh loh pawh i seng ṭhîn a, a chi i theh loh pawh a rah i seng ṭhîn a ni. Tichuan, ka hlau va, i talent kha leiah ka phûm ru a; en teh, i ta ngai kha i hmuh leh hi,’ a ti a. A pu chuan a chhâng a, a hnênah, ‘Nang bawih sual leh zawmthawpa, ka tuh loh pawh ka seng a, a chi ka theh loh pawh a rah ka seng ṭhîn tih i hria maw? Chuti a nih a hnu, ka tangka kha tangkaa sumdâwngtute hnêna lo dah tûr alâwm, ka lo hâwnin a pung nên keiin ka hmu leh tûr a ni. Chutichuan, a talent kha lâksak ula, talent sâwm neitu kha pe rawh u. A nei apiang an pêk belhchhah ang a, a ngah êm êm ang; a nei lo erawh chu a neih chhun pawh an lâksak ang. Tin, bawih ṭhahnem lo kha pâwn thimah paih chhuak rawh u, chutah chuan an ṭap ang a, hâ an ṭhial ang,” a ti a. “Tin, Mihring Fapa chu Vântirhkoh zawng zawng nên ropui taka a lo kal hunah chuan, a lalṭhutthlêng ropui takah a ṭhu ang a, a hmaah chuan hnam tin an inkhâwm ang a, berâm vêngtuin kêl zînga berâmte a hlîr angin anniho chu a hlîr ang a; berâmte chu a ding lamah a dah ang a, kêlte erawh chu a vei lamah. “Chumi hunah chuan Lalber chuan a ding lama mite hnênah, ‘Ka pa vohbîkte u, lo kal ula, khawvêl siam tirh ata in tâna ram buatsaih chu chang rawh u. Ka ril a ṭâmin nangnin ei tûr mi pe a; ka tui a hâlin in tûr mi pe a; mikhual ka nihin mi thleng a; saruaka ka awmin puan mi sintîr a; ka dam lohvin mi kan a; tân ina ka tânin mi tlawh a,’ a la ti ang. “Tichuan, mi felte chuan, ‘Lalpa, engtikah nge rilṭâma kan hmuh che-a chaw kan pêk che? Tuihâlin i awma tui kan pêk che? Engtikah nge mikhuala kan hmuh chia kan thlen che? Saruaka i awma puan kan sintîr che? Engtikah nge dam lovin emaw, tân inah emaw kan hmuh che-a kan tlawh che?’ tiin an la chhâng ang. Lalber chuan, ‘Thu dik ka hrilh a che u, hêng ka unau tê berte zînga pakhat chunga in tih chu, ka chunga ti in ni,’ tiin a la chhâng ang. “Chumi zawhah chuan, a vei lama mite hnênah pawh chuan, ‘ânchhe dawngte u, kumkhaw mei, Diabola leh a hote tâna buatsaihah chuan mi kalsan rawh u. Ka ril a ṭâmin nangnin ei tûr mi pe lo va, ka tui a hâlin in tûr mi pe lo va. Mikhual ka nihin mi thleng lo va; saruaka ka awmin puan mi sintîr lo va, ka dam loh lai leh tân ina ka tân laiin mi kan lo va,’ a la ti ang. Anni pawh chuan, ‘Lalpa, engtikah nge rilṭâmin emaw, tuihâlin emaw, mikhualin emaw, saruakin emaw, dam lovin emaw, tân inah emaw kan hmuh che-a rawng kan bâwlsak loh che?’ tiin an la chhâng ang. Ani chuan, ‘Thu dik ka hrilh a che u, hêng mi tê berte zînga pakhat chunga in ti lo chu ka chunga ti lo in ni,’ tiin a la chhâng ang. “Chûng mite chu chatuan hremnaah an kal ang a, mi felte erawh chu chatuan nunnaah an kal ang,” a ti a. Isuan chûng thu zawng zawng chu a sawi zawh chuan a zirtîrte hnênah, “Ni hnih hnuah kalhlên kût a lo awm dâwn tih in hria a, Mihring Fapa hi khenbeh tûrin an mantîr dâwn,” a ti a. Chumi lai chuan Puithiam lalber Kaiafa an tiha in hual chhûng kawtlaiah puithiam lalte leh vântlâng upate chu an kal khâwm a. Isua chu ngamthlêma mana, an tihhlum theih dân tûr ngaihtuahin an inrâwn a. “Kût chhûng chuan ni suh se, chutilo zawng vântlâng zîngah buaina a chhuak hlauh dah ang e,” an ti a. Bethani-a phâr Simona ina Isua a awm laiin, alabasta bûra hriak rimtui to tak keng hmeichhe pakhat a hnênah a lo kal a, a chaw kîl lai chu a lu-ah hriak chu a leih a. Zirtîrte chuan chu chu an hmuhin an thinrim a, “Engati nge hetia a tihriral mai mai ni? He hriak hi man tam taka hralha, mi retheite pêk theih a ni si a,” an ti a. Isua erawh chuan chu chu a hriatin an hnênah, “Hmeichhia hi engah nge in tihbuai ni? Ka chunga a thil tih hi thil ṭha ti a ni e. In zîngah mi retheite chu eng lai pawhin an awm a, kei erawh chu in zînga awm reng tûr ka ni lo. He hriak rimtui ka taksaa a leih hi, phûm tûra mi buatsaih nâna ti a nih hi. Thu dik ka hrilh a che u, khawvêl pum puia he Chanchin Ṭha hi an hrilhna apiangah he nu thil tih pawh hi, amah hriat reng nân an sawi ve zêl ang,” a ti a. Chumi hnu chuan Sâwmpahnihte zînga pakhat, Juda Iskariota an tih chu, puithiam lalte hnênah a kal a, “Amah chu ka mantîr ang che u a, eng nge min pêk ang?” a ti a. Tangka sawmthum an bûk chhuahsak ta a. Chumi hnuah chuan mantîr dân tûr remchâng a zawng ta reng a. Chhang dawidim telh loh Kût ni hmasa berah chuan zirtîrte chu Isua hnênah an lo kal a, “Khawii hmunah nge Kalhlên Kût chaw i ei tûr buatsaih ila i duh?” an ti a. Ani chuan, “Khawpuiah tu emaw hnênah va kal ula, a hnênah, ‘Zirtîrtu chuan, Ka hun a hnai ta a, ka zirtîrte nên Kalhlên Kût i inah kan hmang ang e, a ti,’ va ti ang che u,” a ti a. Tichuan, Isuan thu a pêk ang ngei chuan zirtîrte chuan an ti a; Kalhlên Kût chaw chu an buatsaih ta a. Tlaiah chuan zirtîr Sâwmpahnihte nên chaw an kîl ho va. An ei laiin ani chuan, “Thu dik ka hrilh a che u, in zînga mi pakhatin mi mantîr ang,” a ti a. An mangang ta êm êm a, a hnênah, “Lalpa, kei chu ka ni lo vang chu maw?” an ti ta ṭheuh a. Ani chuan a chhâng a, “Thlêng mi zenpuitu ngei chuan mi mantîr ang. Mihring Fapa hi a chanchin an ziak ang tak khân a kal dâwn a ni; nimahsela, Mihring Fapa mantîrtu tûr mihringa chung chu a pik e; chu mihring chu piang lo se a tân a ṭha zâwk tûr,” a ti a. A mantîrtu tûr Juda chuan a chhâng a, “Rabi, kei chu ka ni lâwng chu maw?” a ti a. Ani chuan, “I ti alâwm le!” a ti a. An ei laiin Isuan chhang a la a, malsâwmna a sawi a, a phel a, zirtîrte a pe a, “La ula, ei rawh u, hei hi ka taksa a ni,” a ti a. No pawh chu a la a, lâwmthu a sawi zawhin an hnênah a pe a, “In za-in in rawh u, hei hi ka thisen thuthlunna, sual ngaihdam nân mi tam tak tâna chhuak tûr chu a ni. Ka hrilh a che u: Ka Pa rama nangni nên a thar ka in hun a thlen hma chu grep rah tui hi ka in leh tawh lo vang,” a ti a. Hla an sak zawh chuan Oliv tlâng lam panin an chhuak ta a. Chutah chuan Isuan an hnênah, “Zâninah in za-in kei hi min hawisan vek ang; ‘Berâmpu chu ka vua ang a, berâmte chu an darh ang,’ tih ziak a nih kha. Nimahsela, kaihthawha ka awm hnuin Galili ramah ka lo kal hmasa ang,” a ti a, Petera erawh chuan. “An za-in nang an hawisan vek che pawhin kei chuan ka hawisan ve lo vang che,” tiin a chhâng a. Isuan a hnênah, “Thu dik ka hrilh a che, âr a khuan hmain zâninah vawi thum mi phat ang,” a ti a. Peteran a hnênah, “I hnênah thih ve a ṭûl pawhin ka phat tawp lo vang che,” a ti a. Chutiang bawkin zirtîr zawng zawng chuan an ti ta ṭheuh va. Chumi zawhah chuan Isua chu anniho nên hmun pakhat Gethsemani an tihah chuan an kal a, a zirtîrte hnênah chuan, “Saw laia ka va ṭawngṭai hlânin hetah hian lo ṭhu rawh u,” a ti a. Petera leh Zebedaia fapate pahnih chu a hruai a, thlaphângin a lo mangang ta hle a. An hnênah, “Ka thlaphâng hle mai a, thihpui tham hial a ni. Hetah hian lo awm ula, lo inrâlring ve rawh u,” a ti a. Hma lamah tlêm a va kal hlek a, lei sia kûnin a ṭawngṭai a, “Aw ka Pa, a theih chuan he no hian mi pêl hrâm teh se; nimahsela, ka thu ni lovin nangma thu thu ni zâwk rawh se,” a ti a. Zirtîrte hnênah chuan a lo kal a, an muthlu chu a rawn hmu a; tichuan, Petera hnênah, “E khai, dârkâr khat pawh in inrâlring thei lo a ni maw? Thlêmnaa in tlûk luh loh nân invêngin ṭawngṭai rawh u, thlarau zawngin a huam a, tisa erawh chu a chak lo va ni,” a ti a. A va kal vawi hnihnaah chuan a ṭawngṭai leh a, “Aw ka Pa, ka in lohva hei hian mi pelh theih lul loh chuan, nangma thu thu ni rawh se,” a ti a. A lo kîr leh a, an muthlu chu a rawn hmu leh a, an mut a chhuak hle si a. A kalsan leh a, a vawi thumnaah a thu sawi ngai bawk sawiin a ṭawngṭai leh a. Chumi zawhah chuan a zirtîrte hnênah a lo kal a, an hnênah, “Muhîlin in la châwl ta reng a ni maw? Ngai teh u, a hun chu a lo thleng ta. Mihring Fapa hi mi sualte kutah hlan a nih dâwn tâk hi! Tho teh u, i kal ang u. En teh u, mi mantîrtu tûr chu a lo hnaih tâk hi,” a ti a. A la ṭawng lai mêk chuan Juda, Sâwmpahnihte zînga pakhat chu a lo thleng a, a rual chuan puithiam lalte leh Dân zirtîrtute leh vântlâng upate tirh mi tam tak, khandaih leh talhtum kengin an lo thleng ta rup a. A mantîrtu khân chhinchhiahna tûr a lo hrilh diam tawh a, “Ka fawh chu amah chu a ni ang; man ang che u,” tiin. Tichuan, Isua chu a va pan nghâl a. “Chibai, Rabi,” tiin a fâwp ta ngawih ngawih a. Isuan a hnênah, “Ṭhiana, i tih tûr chu ti thuai rawh,” a ti a. Chu veleh Isua chu an rawn chelh a, an man ta a. Isua hote zînga pakhat chuan a kut a thawh a, khandaih a phawi a, Puithiam lalber bawih chu a sât a, a beng a hlawisak a. Chu veleh Isuan a hnênah, “I khandaih kha a paiah khung leh rawh; khandaih ruaitu zawng zawng chu khandaih vêkin an thi dâwn si a. Vântirhkoh sîngsarih leh sânghnih aia tam zâwk min rawn tirhsak nghâl tûrin Pa ka ngên thei lovin mi ring em ni? Mahse, ngên ta ila, hetiang thil lo awm tûr sawina Lehkha Thu kha engtin nge a lo thlen theih ang?” a ti a. Chumi lai chuan Isuan mipuite hnênah, “Suamhmang man tûr ang ziazângin khandaih leh talhtum kengin min man tûrin in lo thawk a ni maw? Tempulah ni tin ṭhuin mi ka zirtîr ṭhîn a, mi man si lo. Nimahsela, zâwlnei Lehkha Thute chu a lo thlen theih nân hêng zawng zawng hi a lo awm ta a nih hi,” a ti a. Tichuan, a zirtîr zawng zawngin ani chu an hawisan a, an tlânchhe ta a. A mantute chuan Isua chu Puithiam lalber Kaiafa ina Dân zirtîrtute leh vântlâng upate lo awm khâwmnaah chuan an hruai a. Petera chuan hnung feah Puithiam lalber in hual chhûng kawtlai thlengin a zui a; tin, a va lût a, a tâwpna hmuh tumin chhiahhlawhte zîngah a ṭhu ve a. Puithiam lalte leh Dân zirtîrtute leh Sanhedrin mi zawng zawngte chuan Isua an tihhlum theih nân dâwta hêkna an zawng an zawng a. Hretu der tam tak lo kal mah se thu tling an hmu si lo. Nakinah erawh chuan mi pahnih an lo kal a, “He pa hian, ‘Tempul hi ṭhiata ni thuma sa leh thei ka ni,’ a ti e,” an ti a. Tichuan, Puithiam lalber chu a ding chhuak a, a hnênah, “Hêngho hêkna che hi i chhâng thei na nge? An hêkna che hi eng tizia nge?” a ti a. Isua erawh chu a ngawi reng a. Puithiam lalber chuan, “Pathian nung chhâlin thu ka pe a che: Krista, Pathian Fapa chu i ni nge ni lo min hrilh rawh,” a ti a. Isuan a hnênah, “Chu, i sawi chu, ka hrilh a che u, nakinah, Mihring Fapa hi Thiltitheia ding lama ṭhuin vân chhûm zînga lo kal in la hmu dâwn a ni,” a ti a. Chu veleh Puithiam lalber chuan a silhfênte chu a pawtthlêr a, “Pathian pawi a sawi e, thuhretu dang a ṭûl em ni? Ngai teh u, Pathian pawi a sawi chu tûnah in hre ta a, engtin nge in ngaih?” a ti a. “Thi tlâk a ni,” tiin an chhâng a. A hmaiah chil an chhâk a, an hnek a, ṭhenkhatte chuan an bêng a, “Nang, Krista, tuin nge bêng che sawi rawh,” an ti a. Petera chu in hual chhûng kawtlaiah chuan a ṭhu a, nula pakhat a lo kal a, “Nang pawh hi Galili mi, Isua hnêna awm kha i nih hi,” a rawn ti a. Ani erawh chuan, “I thu sawi chu a awmzia ka hre hauh lo mai,” tiin an zaa hmaah a phat a. In hungna kawngkhâra a va chhuah chuan, nula dangin ani chu a lo hmu a, chuta awmte hnênah chuan, “He mi hi Nazaret Isua hnêna awm ve kha a nih hi,” a ti a. “Chu mihring chu ka hre lo,” tiin chhechhamin a phat leh a. Rei lo te chinah chuta dingte chuan Petera chu, “Nang pawh hi an zînga mi i ni ngei ang, i awphawiah a hriat alâwm,” an rawn ti a. Ani erawh chuan ânchhe dawn huamin chhia a chham a, “Chu mihring chu ka hre lo ve,” a ti a. Ar a khuang ta nghâl a, “âr khuan hmain nangin vawi thum mi phat ang,” Isuan a tih kha Petera chuan a hre chhuak a. Tichuan, a chhuak a, a ṭap ta zawih zawih a. Zîng a lo nih chuan puithiam lalte leh vântlâng upa zawng zawng chuan Isua tihhlum dân tûr an rêl a: An phuar a, an kai a, Ramawptu Pilata hnênah an hruai a. A mantîrtu Juda chuan Isua chu thiam loh an chantîr tih a hriat veleh a inchhîr a, tangka sawmthum kha puithiam lalte leh upate a pe kîr leh a. “Mi pawisawi lo thi tûra ka mantîr kha ka lo tisual a ni,” a ti a. Anni erawh chuan, “Chu chu kan tân eng nge pawi ang? Nangin i tih tihin ti rawh,” an lo tihsan a. Tichuan, tangka chu Hmun Thianghlimah a paih lût a, a kal a, a va inâwk hlum ta a. Puithiam lalte chuan tangka chu an la a, “Hei hi Tempul tangka bâwma dah a thiang lo ve, thisen man a ni si a,” an ti a. Tichuan, an inrâwn a, mikhual phûm nân bêlvawtu hmun an lei ta a. Chuvângin a ni, chu hmun chu, tûn thlengin ‘Thisen hmun’ an tih tâk ni. Chutichuan, zâwlnei Jeremia hmanga sawi kha a lo thleng ta a ni: “Israel fa tuten emaw Tangka sawmthum an chhiara Man chu an la a, Lalpan thu a pêk ang khân Bêlvawtu hmun manah an pe a,” a tih hi. Isua chu Ramawptu hmaah chuan a ding a, Ramawptu chuan, “Juda-te lal i ni maw?” tiin a zâwt a. Isuan a hnênah, “I sawi chu,” a ti a. Puithiam lalte leh upate hêkna chu a enga mah a chhâng lo. Tichuan, Pilatan a hnênah, “An hêkna zozai che hi i hre lo vem ni?” a ti a. Nimahsela, a chhâng hlek lo va, an hêkna pakhat mah a chhân loh avâng chuan mak a ti êm êm a. Ramawptu chuan kût niin mi tâng pakhat an dîl apiang a chhuahsak ṭhîn a. Chumi lai chuan mi hmingthang tak Baraba an tih chu lung inah a tâng a. Tichuan, an lo pung khâwm chu Pilatan, “Tu nge chhuahsak che u ila in duh, Baraba nge Isua, Krista an tiha hi?” a ti a. Îtsîkna avângin ani chu a hnênah an rawn hlân tih a hre si a. Rorêlnaa a ṭhut laiin Pilata nupuiin, “Kha mi fel tak chungah khân eng mah ti suh; vawiin hian amah avângin mumangah thil tam tak ka tuar a ni,” tiin a rawn chah bawk a. Puithiam lalte leh upate chuan Baraba chu chhuaha, Isua chu tiboral tûra ngên tûrin mipuite chu an thlêm thlu ta a. Ramawptu chuan an hnênah, “Anni pahnih hi a tu zâwk hi nge chhuahsak che u ila in duh?” a ti leh a. Anni chuan, “Baraba,” an ti a. Pilatan an hnênah, “Isua, Krista an tih hi, engtin nge ka tih tâk ang le?” a ti a. An za-in, “Krawsah khêngbet rawh,” an ti a. Ramawptu chuan, “Engah maw, eng nge a tihsual ni?” a ti a. Nimahsela, mipui chu, “Krawsah khêngbet rawh,” tiin an au ta tuar tuar a. Tichuan, Pilatan engtia tih mah a sâwt lo va, buaina a chhuak mai dâwna a hriatin, tui a la a, mipui hmaah chuan a kut a sil a, “He mi fel thisenah hian ka hul e, nangnin in tih tihin ti rawh u,” a ti a. Mipui chuan an za-in, “A thisen mawh chu keimahni chungah leh kan fate chungah awm rawh se,” tiin an chhâng a. Tichuan, Baraba chu a chhuahsak a; Isua erawh chu sipaite a vuaktîr a, krawsa khenbeh tûrin an kutah a pe ta a. Tichuan, Ramawptu sipaite chuan Isua chu praitorian-ah an hruai lût a, an pâwla mi zawng zawng a bulah an au khâwm a. A kawr an hlihsak a, kawrfual senduk an hâktîr a. Chawimawina atân hlîng an kual a, an khumtîr a, a kut ding lamin tiang an kentîr a, a hmaah an ṭhingṭhi a, “Chibai, Juda-te lal,” tiin nuihza siam nân an hmang ta a. Ani chu chil an chhâk a, tiang chu an lâksak a, a luah an vua a. Nuihza siam nân an hman zawhin kawrfual chu an hlihsak a, ama kawr chu an hâktîr leh a, krawsa khenbeh tûrin an hruai ta a. Kalkawnga an kal laiin Kurini khuaa mi, a hming Simona an hmu a, Isua kraws putsak tûrin an man a. Golgotha, ‘Luruh hmun’ an tih chu an va thleng a; Chutah chuan uain, thil kha nêna pawlh a in tûrin an pe a; a han tem a, a in duh ta lo va. An khenbeh zawhin a silhfênte chu ṭhumvâwrin an insem a. Chutah chuan an ṭhu a, amah chu an vêng a. Amah hêkna, ‘He mi hi Isua, Juda-te lal a ni,’ tih ziak a lu chungah chuan an bel a. A rual chuan suamhmang pahnih krawsah an khêngbet ve a, a ding lamah pakhat, a vei lamah pakhat. Mi veivâk nuk nukte chuan an lu an thing a, an tiel a. “Nang, Tempul hi ṭhiata ni thuma din leh theitu, intidam rawh. Pathian Fapa i nih meuh chuan kraws ata kha lo chhuk ta che,” an ti a. Chutiang bawkin puithiam lalte chuan Dân zirtîrtute leh upate nên nuihzatin, “Mi dang mah tidam ṭhîn, mahni lah intidam thei si lo! Israel lal alâwm, tûnah hian kraws ata lo chhuk sela kan ring ang chu! Pathian a ring alâwm, amah hi a duh chuan tûnah chhan chhuak ang hmiang, ‘Pathian Fapa ka ni,’ a ti si a,” an ti a. Suamhmang khenbehte pawh chuan chutiang bawkin an tiel ve a. Dâr sâwm leh pahnih aṭanga tlai dâr thum thlengin khawvêl pum pui a thim ta vek a. Tlai dâr thum vêlah chuan Isua chu ring takin a au chhuak a, “Eli, Eli, lema sabakthani” a ti a; chu chu, ‘Ka Pathian, ka Pathian, engah nge mi kalsan?” tihna a ni. A kianga ding ṭhenkhat chuan chu chu an hriatin, “He mi hian Elija a ko va ni,” an ti a. An zînga pakhat chu a tlân nghâl a, sponj a la a, uain thûrah a chiah a, tiangah a târ a, Isua chu intîr a tum a. Mi dangte chuan, “Ngawi rú, amah chhan tûrin Elija a lo kal emaw i en ang u,” an ti a. Isua chu ring takin a au leh a, a thlarau a thlah ta a. Ngai teh, Tempul chhûng puanzâr chu a chung lam aṭangin a hnuai lam thlengin a thlêr thla a; lîr a lo nghîng a, lungpuite a khi chat a. Thlânte a lo inhawng a, mi thianghlim muhîl tawhte taksa tam tak pawh kaihthawh a ni ta a. A thawhleh hnuah chuan chûngte chu thlân ata lo chhuakin khaw thianghlimah chuan an lût a, mi tam tak hnênah an inlâr a. Sipai za hotu leh a bula Isua vênga awm vete chuan, lîrnghîng leh thil lo thlengte chu an hmuhin an hlau ta êm êm a, “He mi hi Pathian Fapa a ni ngei mai,” an ti a. Chutah chuan hmeichhe tam tak, a rawngbâwla Galili aṭanga Isua rawn zuitute chu an awm bawk a, hla tak aṭangin an thlîr a. Chûng zîngah chuan Magdala mi Mari te, Jakoba leh Josia nu Mari te an tel a, Zebedaia nupui pawh a tel a. Tlaiah chuan Arimathai khuaa mi hausa pakhat, a hming Josefa a lo kal a, ani pawh chu Isua zirtîr a ni bawk a. Chu mi chu Pilata hnênah a va kal a, Isua ruang chu a dîl a. Pilata chuan a lo phal a. Tichuan, Isua ruang chu Josefa chuan a hlâwm a, puan zai sîn fai takin a tuam a, ama thlân thar, lung a ker kuakah chuan a zalh a; thlân kawngka chu lung lian takin a khâr a, a kalsan ta a. Chutah chuan Magdala mi Mari leh Mari dang chu an awm ve a, thlân hma zâwnah chuan an ṭhu a. A tûk, Sabat ni chuan puithiam lalte leh Farisai-te chu a huhovin Pilata hnênah an kal a “Ka pu, Tihdertua khân a dam laiin, ‘ni thum chinah ka tho leh ang,’ a tih kan hre reng a ni. Chuvângin, thlân chu ni thum ni thlenga vêng ṭha tûrin thu pe rawh; chuti lo chu a zirtîrten amah chu an va ru hlauh ang a, vântlâng hnênah, ‘Mitthi zîng ata a tholeh ta a ni,’ an ti dah ang e; tichuan, tihderna hnuhnûng zâwk chu a hmasa ai khân a ṭha lo lehzual ang,” an ti a. Pilatan an hnênah, “Vêngtute in nei alâwm, kal ula, ṭha in tih ang apiangin vêntîr rawh u,” a ti a. Chutichuan, an kal a, thlân khârna lung chu an chhinchhiah a, vêngtute chu an vêntîr ta tlat a. Sabat ni a lo ral a, Pathianni zînga khua a vâr dâwnin Magdala mi Mari leh Mari dang chu thlân en tûrin an kal a. Ngai teh, lîr nasa takin a lo nghîng a; Lalpa Vântirhkoh vân aṭangin a lo chhuk a, lung chu a rawn lum sawn a, a chungah a ṭhu ta a. A lan dân chu kâwlphe ang a ni a, a silhfênte chu vûr angin a vâr a. Amah an hlauh êm avângin vêngtute chu an khûr a, mitthi ang maiin an lo awm ta a. Vântirhkoh chuan hmeichhiate chu a bia a, “Nangni chuan hlau suh u, Isua an khenbeh kha in zawng tih ka hria e. Hetah a awm tawh lo ve, a sawi ang ngeiin kaihthawh a ni tawh a, a mutna hmun hi rawn en teh mah u. Tin, kal thuai ula, a zirtîrte hnênah, ‘Mitthi zîng ata kaihthawh a ni ta, Galili ramah a lo kal hmasa dâwn a, chutah chuan amah in hmu ang,’ ti ang che u. Ngai teh u, ka hrilh tawh che u hi,” a ti a. Hlau leh lâwm êm êm chungin thlân aṭang chuan hmanhmawh takin an kal a, zirtîrte hrilh tûr chuan an tlân ta a. Ngai teh, Isuan anni chu a tâwk a, “Chibai u,” a ti a. Tichuan, a kephahte chu an vuan a, kûnin chibai an bûk a. Isuan an hnênah, “Hlau suh u, kal ta ula, Galili rama kal tûrin ka unaute va hrilh rawh u; chutah chuan mi hmu ang,” a ti a. An kal lai chuan vêngtu ṭhenkhat chu khawpuiah an va lût a, thil lo thleng zawng zawng chu puithiam lalte an hrilh a. Upate nên an kal khâwm a, an inrâwn zawhin vêngtute chu tangka tam tak an pe a. “Zânah kan muthilh hlânin a zirtîrte an lo kal a, amah an ru ta a ni,” ti ang che u. Ramawptuin chu chu a lo hre ta a nih leh amah chu kan thlêm ang a, hlauhthâwn tûr nei lovin kan siam ang che u,” an ti a. Chutichuan, tangka chu an la a, an hrilh ang zêl chuan an ti ta a; tichuan, tûn thlengin chu thu chu Juda-te zîngah an la sawi darh ta zêl a ni. Zirtîr Sâwmpakhatte chu Galili ramah, Isuan tlâng a ruatsakah chuan an kal a. Amah an hmuh chuan kûnin chibai an bûk a; ṭhenkhat erawh chuan an ringhlel a. Isuan a rawn pan a, anni chu a bia a, “Lei leh vâna thuneihna zawng zawng pêk ka ni ta. Tichuan, kal ula, hnam zawng zawng zirtîrah siam rawh u; Pa leh Fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u. Tin, ngai teh u, kei, kumkhuain, khawvêl tâwp thleng pawhin, in hnênah ka awm zêl ang,” a ti a. Pathian Fapa, Isua Krista Chanchin Ṭha inṭanna chu: Zâwlnei Isaia lehkhabua: ‘Ngai teh, ka tirhkoh i hmaan ka tîr a, Ani chuan i kawng a buatsaih ang.’ Thlalêra mi au aw chuan ‘Lalpa lamlian chei ṭha ula, A kal nân kawng tluang siam rawh u,’ tia ziak ang khân. Baptistu Johana chuan sual ngaihdam nân sima baptisma chan tûr thu thlalêrah a rawn hril a. Judai ram kil tina mi leh Jerusalem khuaa mi zawng zawng chuan amah an pan a, an sualte an puang a, Jordan luiah chuan a lo baptis hlawm a. Johana chu sanghâwngsei hmul puanin a inthuam a, savun kâwnghrên a hrêng a, khaukhuap leh ram khawizu chawah a ring a. “Kei aia ropui zâwk ka hnungah a lo kal a, kei hi chu kûna a pheikhawk hrui phelh tlâk pawh ka ni lo. Keiin tuiin ka baptis che u a, ani erawh chuan Thlarau Thianghlimin a baptis ang che u,” tiin thu a hril a. Chûng hun lai chuan Isua chu Galili rama Nazaret khua aṭangin a lo kal a, Jordan luiah chuan Johanan a lo baptis a. Tui ata a lo chhuah veleh, vân inhawnga Thlarau, ṭhuro anga lo chhuk a hmu a, vân aṭang chuan aw a lo chhuak a. “Nang, ka Fapa, ka Duhtaka chu i ni; i chungah ka lâwm êm êm e,” a rawn ti a. Thlarau chuan ani chu thlalêrah a tîr chhuak nghâl a. Chutah chuan ni sawmli Setana thlêmin a awm a; ramsate zîngah a awm ve a, vântirhkohten a rawng an bâwlsak a. Tin, Johana chu an man hnuin Isua chu Pathian Chanchin Ṭha hrilin Galili ramah a kal ta a. “Hun chu a lo thleng ta; Pathian ram pawh a hnai e; sim ula, Chanchin Ṭha hi ring rawh u,” a ti zêl a. Galili dîl kama a kal lai chuan Simona leh a unaupa Andria chu dîla an lên dêng a va hmu a, sangha man mi an ni rêng a. Isuan an hnênah, “Mi zui rawh u; tichuan, mihring man mi-ah ka lo siam ang che u,” a ti a. An lênte chu an hnutchhiah a, ani chu an zui ta nghâl a. A va kal leh hlek a, Zebedaia fa, Jakoba leh Johana te unau chu a hmu a, lawngah lên an lo ṭhui ṭha a. Anni pawh chu a ko ve nghâl a, an pa Zebedaia leh inhlawhfate chu lawngah an kalsan a, Isua chu an zui ta a. Tin, Kapernaum khuaah an lût a, Sabat ni chuan Sunagog-ah a zirtîr ta nghâl a. Dân zirtîrtute ang lova thunei taka anmahni a zirtîr avâng chuan a zirtîrna chu mak an ti êm êm a. An sunagog-ah chuan thlarau bawlhhlawh pai mi pakhat a lo awm ve a, a au chhuak ta phut a, “Nazaret Isu, kan chungthu-ah rawn inrawlh i tum elo? Min tiboral tûrin i lo kal em ni? Tu nge i nih ka hria Pathian mi thianghlim chu i ni,” a ti a. Isua chuan a hau va, “Ngawi la, a chhûng ata lo chhuak rawh,” a ti a. Thlarau bawlhhlawh chuan a sawisa nek a, ring taka auvin a chhûng ata chu a lo chhuak ta a. An za chuan mak an ti êm êm a. “Hei eng nge ni ta ngai? Zirtîrna thar a nih hi; thlarau bawlhhlawhte pawh thu nei takin thu a pe a, an awih mai hi,” an inti hlawm a. Galili ram kil tinah a chanchin chu a thang ta thuai a. Sunagog ata chu a chhuak a, Jakoba leh Johana te nên Simona leh Andria in lam chu an pan nghâl a. Simona pizawn chu khawsikin a lo mu reng a, a chanchin an hrilh vat a. Ani chuan a va pan a, a kut a chelh a, a kai tho ta a. A khawsik chu a reh ta mai a, chawei a siamsak ta a. Chumi tlai, ni tlâk hun chuan, damlo zawng zawng leh ramhuai mante a hnênah an rawn hruai a, a khuain kawngka bulah chuan an lo awm khâwm ta hmur a. Mi tam tak, nat tinrênga nate chu a tidam a, ramhuai tam tak a hnawt chhuak bawk a, amah an hriat avângin ramhuaite chu an ṭawng a phal lo. Tin, zîng takah, khua a la ên hmain a tho va, a chhuak a, hmun fianrialah a kal a, chutah chuan a va ṭawngṭai a. Simona leh a ṭhiante chuan an zawng a; an va hmuh chuan, “Miin an rawn zawng huai huai che asin,” an ti a. Ani chuan, “Hmun dangah, khaw ṭhenawmahte i kal ang u, chûngahte pawh chuan thu ka hril zêl tûr a ni; chu chu ka lo chhuah chhan a ni si a,” a ti a. Tichuan, Galili ram zawng zawnga an sunagog-ah lûtin thu a hril zêl a, ramhuaite pawh a hnawt chhuak a. A hnênah phâr a lo kal a, a hmaa ṭhingṭhiin tihdam a ngên chiam a, “I duh chuan mi tithianghlim thei e,” a ti a. Ani chuan a lo khawngaih êm êm a, a han ban a, a dek a, “Ka duh e, lo thianghlim tawh ang che,” a ti a. A phâr chu a lo dam ta nghâl a, a lo thianghlim ta a. Khauh takin thu a pe a, a kaltîr ta nghâl a. “Tu hnênah mah sawi hauh suh; amaherawhchu, puithiam hnênah va inentîr la, i dam ngei tih an hriatna tûrin inthen nâna Mosia thupêk ang khân thil hlân rawh,” a ti a. Ani chu a kal ta a, chu thu chu a sawi a sawi ta mai a, a puang darh ta zâwk a; tichuan, Isua chu khuaah pawh a langin a lût thei ta lo va, hmun fianrialah a awm ta zâwk a; hmun tin aṭangin miin an rawn pan tho va. Ni eng emawti hnuah chuan Kapernaum-ah a lo lût leh a, ina a awm thu a darh ta a. Tichuan, pâwnah pawh kawngka bul thleng khat tlatin mi tam tak an lo pung khâwm a, an hnênah chuan thu a hril ta a. Mi paliin zeng pakhat an rawn zâwn a, a hnên an rawn panpui a. Mipui avâng chuan an hnaih hlei thei lo va, a awmna zâwn in chung chu an ṭhiat a; tin, an ṭhiat zawhin zeng chu a zâwnna chawpin an zu thlâk a. Isuan an rinzia a hmuhin zeng hnênah chuan, “Ka fapa, i sualte ngaihdam a ni ta e,” a ti a. Chutah chuan Dân zirtîrtu ṭhenkhat ṭhu ve an awm a, “He mi hian engah nge hetianga a tih le? Pathian pawi a sawi a ni; mi pakhat, Pathian chauh lo chuan, tu nge sualte ngaidam thei?” an ti rilru hlawm a. Chutiang chuan an ngaihtuah tih Isuan a hre nghâl mai a, an hnênah, “Engah nge rilrua chutiang in ngaihtuah ni? Zeng hnênah hian, ‘I sualte ngaihdam a ni ta,’ tih nge awl a, ‘Tho la, i mutna kha la la, kein kal tawh rawh,’ tih? Khawvêlah hian Mihring Fapa hian sual a ngaidam thei tih ka han hriattîr ang che u,” a ti a; zeng hnênah chuan, “Tho la, i mutna kha la la, i inah haw rawh, ka ti a che,” a ti a. Tichuan, a tho va, a mutna chu a la a, an vaia hmuhin a chhuak ta nghâl a; an za chuan mak an ti êm êm a, “Hetiang hi kan la hmu ngai rêng rêng lo,” tiin Pathian an fak a. Tin, dîl lamah chuan a kal leh a, mipuiin an rawn pan dûl dûl a, ani chuan a lo zirtîr a. A kal pahin, Alfaia fapa Levia chu chhiah khawnna hmuna ṭhu a hmu a, “Mi zui rawh,” a ti a. Ani chu a tho va, a zui ta a. Tin, a inah ruai a ṭheh a, Isua leh a zirtîrte chu chhiahkhawntute leh mi sual tam takin chawhlui an rawn kîlpui hlawm a, tam takin amah an zui ve tawh a ni. Farisai-te zînga Dân zirtîrtute chuan chhiahkhawntute leh mi sualte a kîlpui an hmuh chuan a zirtîrte hnênah, “Engtizia nge chhiahkhawntute leh mi sualte zînga a ei ve le?” an ti a. Isuan chu chu a hriatin an hnênah, “Mi hrisêlten daktor an ngai lo va, mi bawrhsâwmten an ngai zâwk a ni. Mi felte lam tûr ni lovin mi sualte lam tûra lo kal ka ni zâwk,” a ti a. Johana zirtîrte leh Farisai-te chaw nghei ni chuan tute emaw an lo kal a, a hnênah, “Engati nge Johana zirtîrte leh Farisai zirtîrten chaw an nghei a, i zirtîrte lêmin an nghei ve loh?” an rawn ti a. Isuan, “An zîngah moneitu a awm chhûng chuan mo hruaitute chuan chaw an nghei ngai em ni? Moneitu chu an awmpui chhûng chu chaw an nghei ngai lo. Moneitu chu an hnên ata hruai bo hun a la awm ang a, chumi hunah erawh chuan an la nghei ve ang. “Tu man puan hlui, puan thar la sûk lohvin an bel ngai lo, bel ta sela, a thar chuan puan hlui chu a kai ṭet ang a, a thlêr chu a nasa lehzual ang. Uain thar pawh tu man savun ip hluiah an thun ngai lo, thun ang sela, uain chuan savun ip chu a tâwn keh ang a, uain chu a bua ang a, savun ip pawh chu a chhia ang; uain thar chu savun ip tharahte an thun zâwk ṭhîn,” a ti a. Sabat ni vawi khat chu buhpui hmunahte an kal tlang a, a zirtîrte chuan kal pahin a vuite chu an thliak a. Farisai-te chuan a hnênah, “En teh, engtizia nge sabat nia tih thiang lo an tih ni?” an ti a. Ani chuan, “Rilṭâma ei tûr an neih loh laia Davida leh a ṭhiante thil tih kha in chhiar ngai na nge? Abiathara Puithiam lalber a nih laia Pathian ina a luha, puithiamte chauh ei thian chhangdah chu a ei a, a ṭhiante pawh a pêk ve thu kha?” a ti a. Amah vêkin, “Sabat hi mihring tâna siam a ni a, mihring hi sabat tâna siam a ni lo. Tichuan, Mihring Fapa hi sabat chungah lam pawh hian Lal a ni,” a ti a. Tin, sunagog-ah a lût a, chutah chuan mi pakhat kut zeng a lo awm a. Amah an hêk theih nân sabat nia a tihdam dâwn leh dâwn loh an châng a. Ani chuan kut zeng hnênah chuan, “A laiah hian lo chhuak teh,” a ti a. “Sabat ni-ah tihṭhat nge thiang tihchhiat? Mi nun chhan nge thiang tihhlum?” tiin anni chu a zâwt a; mahse anni chu an ngawi reng a. An thinlung sakzia a hriatin pawi a ti êm êm a, thinur taka anmahni a en vêl hnuin chu mi hnênah chuan, “I kut phar rawh,” a ti a. A han phar chhuak a, a kut chu a lo dam ta a. Farisai-te erawh chu an chhuak a, amah an tihboral theih dân tûr ngaihtuahin Heroda pâwla mite nên chuan an inrâwn ta nghâl a. Isua chu a zirtîrte nên dîl kam lamah an kal kiang a; Galili ram aṭangin mipui nasa takin an zui a. Judai ram aṭang te, Jerusalem aṭang te, Idumea ram aṭang te, Jordan râl aṭang te leh Tura leh Sidon bial aṭang te chuan mipui nasa takin a thiltihte an hria a, amah an rawn pan bawk a. Mipuiin an rawn nêk chêp luat loh nân lawnglêng lo buatsaih tûrin a zirtîrte chu a hrilh a; mi tam tak a tihdam tawh avângin na nei apiangin amah deh tumin an bawh huai huai si a. Thlarau bawlhhlawhte pawh chuan amah an hriatin an bawkkhup a, “Nang Pathian Fapa chu i ni,” tiin an au ṭhîn a. Tu nge a nih erawh chu an sawi a khap tlat a. Tin, tlângram lamah a chho va, a mi duhzâwngte chu a ko va, anni chu a hnênah an lo kal a. A hnêna awma, thu hrila, a tirh tûr, ramhuaite pawh hnawt chhuak thei tûr mi sâwm leh pahnih a ruat a. Chûngte chu: Simona, Petera a vuah tâk te, Zebedaia fa Jakoba leh Jakoba unau Johana ‘Boanergia’ tia a vuah tâk te (chu chu ‘Khawpui ri fate’ tihna a ni), Andria te, Filipa te, Bartholomaia te, Mathaia te, Thoma te, Alfaia fa Jakoba te, Thadaia te, Kanan mi Simona te, a mantîrtu Juda Iskariota te chu an ni. Tin, inah a haw a, mipui an lo pung khâwm leh ta chiam a, chaw pawh an ei hlei thei lo va. A chhûngte chuan an hriatin, “A â ta a nih chu,” an ti a, amah hruai tûrin an lo thawk a. Jerusalem aṭanga Dân zirtîrtu lo chhuk thlate pawh chuan, “Belzebula a zâwl a nih hi,” te an ti a, “Ramhuai lal avângin alâwm ramhuaite a hnawh chhuah ṭhin,” te an ti bawk a. Anni chu a ko va, tehkhin thuin an hnênah, “Setanan Setana vek engtin nge a hnawh chhuah theih ang? Ram pawh inṭhena mahni an indo chuan chu ram chu a ding thei lo. Chhûngkua pawh inṭhena mahni an indo chuan chu mite chhûng chu an ding khawchhuak thei lo vang. Setana pawh mahni inbeiin inkhing ta sela, a ding chhuak thei lo vang, a ral mai zâwk ang. Mi chak chu an phuar hmasak zet loh chuan a ina lûtin a sum an lâksak mai thei hek lo, an phuar hnuah erawh chuan a in chu an ramsak thei tawh ang. Thu dik ka hrilh a che u; miin sualna zawng zawng leh thil pawi tinrêng an sawite chu ngaihdam theih a ni ang. Thlarau Thianghlim pawi sawi meuh erawh chu, tu mah, engtikah mah ngaihdam an ni lo vang, chatuan sual chu an ti a ni,” a ti a. “Thlarau bawlhhlawh a zâwl a ni,” an tih avâng khân chu chu a sawi a ni. A nu leh a unaute chu an lo thleng a, pâwnah an ding a, amah an kohtîr a. A vêla mipui ṭhute chuan a hnênah, “En teh, pâwna saw, i nu leh i unaute leh i farnuten an ko va che,” an ti a. Ani erawh chuan a chhâng a, “Ka nu leh ka unaute chu tute nge ni?” a ti a; a kianga ṭhute chu a han en vêl a, “En teh u, ka nu leh ka unaute hi. Tu pawh Pathian duhzâwng ti chu, chu mite ngei chu, ka unau te, ka farnute, ka nu te an ni e,” a ti a. Dîl kamah chuan a zirtîr leh ta a; mipui nasa tak an lo pung khâwm a, dîla lawngah chuan a chuang a, a ṭhu a; mipui zawng zawng chu dîl kam khawmualah chuan an awm a. Tehkhin thuin thu tam tak a zirtîr a, a zirtîr lai chuan an hnênah, “Ngai thla teh u. Buh chi thehtu buh chi thehin a feh a; a han theh chuan a ṭhen kalkawngah a tla a, savaten an rawn tlân zo ta mai a. A ṭhen pialtlêp chung lei pan hmunah a tla a, lei a chhah lo va, a lo ṭo thuai a; tin, ni a lo tlângsâng deuh va, a em vuai a, zung a kaih loh avângin a râwp ta mai a. A ṭhen hnimhlîngnei zîngah a tla a, hnim chu a lo ṭhang a, a dîp ral a, a rah thei ta lo va. Ṭhenkhat chu lei ṭhaah a tla a, a ṭo va, a ṭhang lian a, a rah ta a; a let sawmthum te, a let sawmruk te, a let za te a lo haw ta a,” a ti a. “Ngaihthlâkna beng nei chuan ngaithla ngun rawh se,” a ti bawk a. A fâla a awm hnu chuan Sâwmpahnihte leh a ṭhuihruai dangte chuan tehkhin thute chu an zâwt fiah a. Ani chuan an hnênah, “Pathian ram thu ril chu in hnêna pêk a ni a; pâwna mite tân erawh chuan tehkhin thu veka sawi a ni: ‘En fo siin an hmu fuh lo vang a, Ngaithla ngaithla siin a ngaihna an hre hek lo vang; Chuti ni lo sela chu an lo hawi kîr ang a, Ngaihdam an ni tûr,’ tih ang kha a nih theih nân,” a ti a. Amah vêk chuan, “He tehkhin thu hi in hrethiam lo maw? Engtin nge tehkhin thu dang rêng rêng in hriatthiam theih ang? Buh chi thehtu chuan thu chu a theh a. Kalkawnga tlate chu hetiang hi an ni: thu chu an hriatin Setana a lo kal thuai a; anmahnia thu theh chu a lâk zawhsak nghâl mai ṭhîn. Chutiang bawkin pialtlêp hmuna thehte chu hetiang hi an ni: thu chu an hriat veleh lâwm takin an pawm nghâl a; nimahsela, anmahniah chuan zung a kai lo va, rei lo tê chauh an daih a, chumi hnuah chuan thu avânga hrehawm emaw, tihduhdahna emaw a lo awm veleh an tlu nghâl mai ṭhîn. Hnimhlîngnei zînga thehte pawh chu hêng mite ang hi an ni: thu chu an hria a. Mahse, khawvêl lungkhamna te, hausak nawmchenna te, thil dang châkna te a lo lût a, thu chu a rawn dîp ral a, a rah ta ṭhîn lo. Lei ṭha a thehte erawh chu: thu chu hriaa, pawma, a lêt sawmthum te, a lêt sawmruk te leh a lêt za tea rah tate hi an ni,” a ti a. Amah vêkin an hnênah, “Khâwnvâr hi khova khuh tûrin emaw, khum hnuaia dah tûrin emaw an rawn chhi ngai em ni? A dahnaa dah tûr a ni dâwn lâwm ni? Eng mah puan loh tûra thuhrûk a ni hek lo. Ngaihthlâkna beng nei chuan ngaithla ngun rawh se,” a ti a. Tin, amah vêkin an hnênah, “In thil ngaihthlâk chu ngai ngun rawh u, in tehna ngaiin an tehsak ang che u, an pe tam zâwk mah ang che u. A nei an pêk belhchhah ang a, a nei lo chu a neih chhun pawh an lâksak ang,” a ti a. Amah vekin an hnênah, “Pathian ram chu miin a lovah chi a theh a, zânah a mutsan a, chhûnah a tho va, chi chu engtia lo ṭiaka, lo ṭhang nge tih a hre lo ang hi a ni. Lei chuan amahin rah a rawn chhuahtîr mai ṭhîn, a tîr berah a kûng, a dawtah a vui, chumi zawhah a vuia a fang pum chu. A rah chu a lo hmin a, seng a lo hun tâk avângin a favahin a ât nghâl ṭhîn,” a ti bawk a. Tin, amah vêkin, “Pathian ram chu eng nên nge kan teh anga, eng tehkhin thu hmangin nge kan sawi fiah ang? Anṭam chi fang ang hi a ni, an theh lai chuan leia chi zawng zawnga tê ber a ni a, an han theh hnu chuan thlai dang zawng zawng aia lianin a lo ṭhang a, zâr lian tak takte a rawn chhuah a, chunglêng savate pawh a bukah chuan an riak thei ṭhîn,” a ti a. Chutiang tehkhin thu tam tak hmang chuan an hriatthiam tâwk tûrin thu chu an hnênah a sawi ṭhin a; tehkhin thu lo chuan an hnênah thu a sawi ngai lo; ama zirtîrte hnênah erawh chuan fianrialah engkim a hrilh fiah ṭhîn. Chumi nia khua a lo tlai lam chuan an hnênah, “Râl lehlamah sâwn i kai ang u,” a ti a. Mipuite chu an kalsan a, a chuanna lawng chuan ani chu an kalpui a, lawng dangte pawh an tel ve a. Tin, thlipui na tak a lo tleh ta a, tuifâwnte chu lawngah a rawn invawrh lût a, a khat dâwn ta mai a. Ani chu lawng mei lamah lukham khamin a lo muhîl a. An han kai tho va, “Zirtîrtu, kan boral dâwn hi, pawi i ti lo vem ni?” an ti a. Ani chu a lo tho va, thli chu a hau va, dîl hnênah pawh chuan, “Ngawi la, awm hle hle rawh,” a ti a. Thli chu a bâng a, a lo reh ta ṭhup mai a. Ani chuan an hnênah, “Engah nge in hlauh? Rinna rêng in la nei na nge?” a ti a. An hlau ta êm êm a, “He mi hi tu nge ni le! Thli leh dîl lam pawhin a thu an awih hi?” an inti a. Dîl râl Gerasin mite ram chu an va thleng a. Lawng ata a chhuak chu thlarau bawlhhlawh pai mi pakhat, thlân hmun aṭanga lo kal chuan, a rawn pan vat a. Chu mi chu thlânahte a chêng ṭhîn a, tu mahin khaidiat pawhin an phuar thei lo va, khaidiata phuarin kawlte buntîr ṭhîn mah se, khaidiatte chu a pawt chat a, kawlte chu a tisawm ṭhîn; tu mah tudawl thei an awm lo. A chhûn a zân mai hian thlânahte leh tlângahte chuan a au a au ṭhîn a, lungte pawhin a inzai ṭhîn a. Hla tak aṭangin Isua chu a hmu a, a lam panin a tlân a, kûnin chibai a bûk a. Aw ring takin a au va, “Isu, Chungnungbera Pathian Fapa, kan chungthu-ah rawn inrawlh i tum elo? Mi nghaisa lul lo tûrin Pathian hmingin ka ngên a che,” a ti a. Ani lah chuan, “Thlarau bawlhhlawhpa, a chhûng ata kha lo chhuak rawh,” a lo ti si a. “I hming eng nge ni?” tiin a zâwt a. Ani chuan, “Ka hming chu Sângruka a ni, kan tam êm êm a ni,” a ti a. Chumi ram ata tichhuak lo tûrin a ngên chiam a. Chumi tlâng pangah chuan vawk rual tam deuh mai an tla a. A hnênah chuan, “Vawk hnênah sâwn min kaltîr la, an kawchhûngah kan va lût ang e,” tiin an ngên a. Isuan a phalsak ta a. Tichuan, thlarau bawlhhlawh chu an lo chhuak a, vawk kawchhûngah chuan an lût a. Vawk rual chu sânghnih lai an ni, khâm kovah chuan an tlân liam a, dîlah chuan an tla hlum ta a. A vêngtute chu an tlânchhia a, khua leh a chhehvêla mite chu an va hrilh a. Tichuan, eng thil nge lo thleng ta tih en tûrin an lo kal hlawm a. Isua hnên an lo thlen chuan ramhuai man, Sângruka kha, puan sina rilru pangngai pua lo ṭhu an va hmu a; hlauhawm an ti êm êm a. Chûng hmutute chuan ramhuai man chunga thil thlengte leh vawk chanchinte chu an lo hrilh bawk a. Chûng mite chuan Isua chu an bial ata chhuak tûrin an ngên a. Isua chu lawnga a chuan dâwn laiin ramhuai mana khân a hnêna awm reng a ngên a; mahse, a phal lo va, “I inah, i chhûngte hnênah haw la, Lalpan i tân thil a tihsak che leh a khawngaihzia che hi va hrilh zâwk tawh,” a ti a. Ani chu a kal a, Dekapoli khuaahte chuan Isuan thil a tihsakte chu a tlângaupui ta a, mi zawng zawngin mak an ti hle a. Tin, Isua chu lawnga râl lehlama a kai leh chuan mipui nasa tak a hnênah an lo pung khâwm a; dîl kamah chuan a awm a. Sunagog hotu zînga pakhat, a hming Jaira chu a lo kal a, amah a han hmuh chuan a ke bulah a bawkkhup a, “Ka fanu naupang tê a thi lek lek a, a lo harh a, a lo dam leh theih nân a chungah i kut va nghat teh,” tiin a ngên chiam a. Isua chuan a zui ta a, mipui nasa takin amah chu an zui ve a, an nêk huai huai bawk a. Hmeichhe pakhat, kum sâwm leh pahnih thi pût tawh hi a awm a. Daktor tam takin nasa takin an enkawl tawh a, a neih zawng zawng a hman ral hnu pawhin ṭhat lam pan ahnêkin a zual zâwk mah si a. Isua chanchin a lo hriat veleh chuan hnung lamah mipui kârah chuan a lo kal a, a puan chu a va dek a. “A puan chauh pawh dek ila ka dam ngei ang,” a ti a ni. Tichuan, chawplehchilhin a thi pût chu a lo hul ta a, a na chu a dam ta tih a taksaah chuan a inhre ta a. Isua pawh chuan amah aṭangin thiltihtheihna a chhuak tih a inhre nghâl a, mipui zîngah chuan a hawi vêl a, “Tu nge ka puan dek kha?” a ti a. A zirtîrte chuan “Mipuiin an nêk huai huai che i hmu si a, engtizia nge ‘tu nge mi dek?’ i tih le?” an ti a. Ani erawh chuan a dektu hmuh tumin a en vêl a. Tichuan, a chunga thil lo thleng ta chu hriain hmeichhia chu hlau leh khûr chungin a lo kal a, a hmaah a bawkkhup a, engkim dik takin a hrilh ta a. Ani chuan, “Ka fanu, i rinna hi i dam phah a ni e, thlamuang takin kal ta la, i natna ata chu lo dam hlen tawh ang che,” a ti a. A la ṭawng lai mêk chuan Jaira in aṭanga lo kalte chuan, “I fanu a thi ta. Engah nge zirtîrtu hi i la tihhah cheu dâwn?” an rawn ti a. Isua erawh chuan an thu sawi chu a lo hre ve a, sunagog hotupa hnênah chuan, “Hlau suh, ring mai rawh,” a ti a. Petera te, Jakoba te, Jakoba unau Johana te chauh lo chu mi dang tu mahin an zui ve a phal ta lo va. Sunagog hotupa in chu an va thleng a, ri mur mur leh ṭap tuar tuara chiau vawng vawngte chu a va hmu a. A luh pah chuan an hnênah, “Engati nge in buaia in ṭah vak vak le? Naupang chu a thi lo ve, a muhîl a ni zâwk,” a ti a. Anni chuan an nuihsan mai a. Tichuan, an za-in a hnawt chhuak a, naupang nu leh pa leh amah zuitute chu a hruai a, naupang mutna hmunah chuan an lût a. Tin, naupang kut chu a chelh a, a hnênah, “Talitha, kum,” a ti a, chu chu, “Mami, tho rawh,” tihna a ni. Hmeichhe naupang chu a lo tho va, a kal thei ta mai a, amah chu kum sâwm leh pahnih mi a ni. Mak an ti nasa êm êm a. Ani erawh chuan an hnênah, “Hei hi tu man hre suh se,” a ti tlat a. “Ei tûr pe rawh u,” a ti bawk a. Chu hmun chu a chhuahsan a, an khaw lamah a kal ta a, a zirtîrte pawh chuan an zui zêl a. Sabat ni a lo ni a, sunagog-ah chuan a han zirtîr ṭan ta a; mi tam tak an awm a, a thu an hriat chuan mak an ti êm êm a, “Hêng hi khawi aṭanga a hriat nge? A dawn hi eng finna nge ni-a, chuti kauva thiltihtheihna a neih le? Mari fa, Jakoba te, Josea te, Juda te, Simona te unaupa mistiri kha a ni lo vem ni? A farnute pawh kan zîngah an awm lo vem ni?” te an ti a; amah chu an hmu thiam ta lo va. Isua chuan an hnênah, “Zâwlnei chu ama khaw lamah te, a laichîn te leh a chhûngte zîngah lo chuan an chawimawi ṭhîn.” a tihsan a. Tin, damlo tlêm te chunga kut nghata a tihdam chauh lo chu chutah chuan thil mak rêng a ti thei lo. An rin loh avâng chuan mak a ti hle a. Tin, zirtîr chung zêlin khuate a fang vêl a. Sâwmpahnihte chu a ko va, pahnih zêla inkawpin a tîr chhuak a, thlarau bawlhhlawhte chunga thuneihna pawh a pe bawk a; kalkawng atân tiang chauh lo chu chhang pawh, iptê pawh, an kâwnghrênah pawisa pawh pai lo tûrin a ti tlat a, pheikhawk an bun a phal a, kawr pahnih an hâk erawh chu a phal lo. An hnênah chuan, “In chhuahsan leh hma chu in va thlen in ngaiah chuan chêng reng ang che u. Khawii khua pawhin an lawm loh che ua, in thu an ngaihthlâk loh chuan, chu khua in chhuahsan dâwnah, an tihdik lohzia hriattîr nân in kephaha vaivut chu thing thla ang che u,” a ti bawk a. Tichuan, an kal chhuak a, “Sim rawh u,” tiin thu an hril a. Ramhuai tam tak an hnawt chhuak a, damlo tam tak hriak an hnawih a, an tidam bawk a. Isua hming chu a than tâk êm avângin Lal Heroda chuan a lo hre ve ta a. Mi ṭhenkhat, “Baptistu Johana kha mitthi zîng ata a lo tho leh ta a, hêng thiltihtheihnate hian amahah a thawk a nih chu,” tite an awm a, mi dangin, “Elija a nih chu” an ti a; a ṭhenin, “Zâwlnei, hmânlai zâwlnei zînga pakhat ang kha a nih chu,” te an ti a. Heroda erawh chuan a lo hriatin, “Johana, a lu ka tansak kha a ni ang, a lo tho leh ta a nih chu,” a ti a. He Heroda hi a ni, a unau Filipa nupui, Herodi, nupuia neihsaktu, chumi avâng chuan Johana chu a mantîr a, tân inah a khung a ni. Johana chuan Heroda hnênah, “I unau nupui i chhuhsak hi a thiang lo ve,” a ti a. Chuvâng chuan, Herodi chuan a hal ta riau a, tihhlum pawh a duh a; mahse, a thei si lo; Herodan Johana chu mi fel leh mi thianghlim a nih a hria a, a ṭih êm êm a, a hum tlat a ni; a thu a ngaihthlâk chuan a inngaihtuah buai hle ṭhîn a; mahse, châk takin a ngaithla ṭhîn. Heroda chuan a mi ropui te, sipai hotu lian te, Galili rama mi liante a sâwm a, a pian champhaphâk ruai a ṭheh lai chuan hun remchâng a lo awm ta a. Herodi fanu chu a lo lût a, a lâm a, Heroda leh a ruai kîlpuite chu a tilâwm ta hle a; lal chuan nula hnênah chuan, “I duh apiang mi dîl rawh, ka pe ang che,” a ti a. “Eng pawh mi dîl apiang, ka ram chanve hial pawh ka pe ang che,” tiin a tiam bawk a. Ani chu a chhuak a, a nu hnênah chuan, “Eng nge ka dîl ang?” a va ti a. A nu chuan, “Baptistu Johana lu le,” a lo ti a. Hmanhmawh takin lal hnênah chuan a kîr leh a, “Thlêngah Baptistu Johana lu mi pe nghâl rawh,” a ti a. Lal chuan pawi a ti êm êm a; mahse, a thutiam leh a ruai kîlpuite avâng chuan a hnial hreh a. Lal chuan vêngtu sipai pakhat a tîr ta nghâl a; tân inah chuan Johana lu chu a tan a, thlêngin a rawn la a, nula chu a pe a, ani chuan a nu a pe leh a. Chu chu a zirtîrten an hriatin an va kal a, a ruang chu an hlâwm a, thlânah an zalh ta a. Tirhkohte kha Isua hnênah an lo kal khâwm a, an thil tih apiangte leh an thu, zirtîr zawng zawng chu an hrilh vek a. Ani chuan an hnênah, “Keimahniho chauhvin fianrialah kal hrang ila, in châwl rih dâwn nia,” a ti a. Mi tam tak an insûl zut zut a, chaw takngial pawh an ei hman si lo va. Tichuan, fianrial pan chuan lawngin an kal ta a. An chhuak chu mi tam takin an hmu a, anni an ni tih an hriat chuan khawmual lamah, khaw tin aṭangin, an tlân khâwm a, an lo lehkhalh a. Lawng ata a lo chhuah chuan mipui nasa tak a hmu a, vêngtu nei lo berâm ang an nih avângin a khawngaih ta êm êm a, ṭhahnemngai takin a zirtîr ta a. Khua pawh a lo tlai ta hle a, a zirtîrte chu a hnênah an lo kal a, “Hei hi hmun thlalêr a ni a, khua pawh a lo tlai ta a, kan kiang vêl lovahte leh khuaahte mahni ei tûr eng emaw tal an zawn theih nân anniho hi kaltîr ta che,” an rawn ti a. Ani erawh chuan, “Nangmahnin ei tûr pe zâwk rawh u,” tiin a lo chhâng a. Anni chuan, “Chhang duli zahnih man leiin ei tûr kan pe em ni ang?” an ti a. Ani chuan, chhang eng zât nge in neih, han en teh u,” a ti a. An neih zât an han hriat chuan, “Tlang nga, sangha pahnih nên,” an ti a. Ani chuan an vaiin hlobet hring hmunah chuan a pâwl pâwla ṭhuttîr tûrin zirtîrte chu thu a pe ta a; za te, sawmnga tein an ṭhu ta hlawm a. Ani chuan chhang panga leh sangha pahnih chu a la a, vân lam enin malsâwmna a sawi a, chhang chu a phel a, mipui hnêna sem tûrin zirtîrte chu a pe a; sangha pawh chu a sem ṭheuh va. An zavai chuan an ei a, an tlai ta ṭheuh va; chhang leh sangha sem bâng chu bâwm sâwm leh pahnihah an dah khat a. Chhang eitute chu patling hlîr pawh sângnga an ni. Mipuite chu a ṭintîr vêl chhûngin râl lehlam Bethsaida-a lo va kal hmasa tûrin a zirtîrte chu lawngah a chuan luihtîr ta nghâl a. Mipui chu a thlah fel hnu chuan ṭawngṭai tûrin tlângah a kal ta a. Khua a lo thim a, lawng chu dîl laiah a awm tawh a, ani erawh chu amah chauhvin khawmualah a la awm a. Thliin a ni lo lama a nem avâng chuan mangang taka lawng an kar chu a hmu a; khawfîng chah dâwn vêlin dîl chungah chuan an lam panin a kal a, kal pelh a tum a. Dîl chunga a kal an hmuh chuan hmuithla emaw an ti a, hlauvin an au ta chûl a. “Thlaphâng suh u, keimah ka ni e, hlau mah ta che u,” a ti a. Lawngah chuan a chuang lût ve ta a, thli pawh chu a bâng ta mai a. Tichuan, mak an ti êm êm a, chhang thu kha a awmzia an hre si lo va, an rilruin a man pha lo va ni. Dîl an kân a, Genesaret ramah chuan an va kai a, lawng chu an thlung a. Lawng ata chu an chhuak a, miten ani chu an lo hre nghâl a. Chumi bial pumah chuan an tlân ta sung sung a, a awma an hriatna apiangah damlote chu an mutna chawpin an zâwn khâwm a. Khaw tê-ah te, khaw lianah te, lovah te, khawiah pawh a kalna apiangah damlote chu an bazâr hmunahte an muttîr a, a puanfêm pawh deh theih an ngên hlawm a; tin, a dek apiang chu an dam ta zêl a. Farisai-te chu, Dân zirtîrtu ṭhenkhat Jerusalem aṭanga lo kalte nên a hnênah an lo kal ho va; a zirtîr ṭhenkhatten kut bawlhhlawha chaw an ei chu an hmu a, chu chu ‘kut sil loh’ tihna a ni. Farisai-te bâkah Juda-ho zawng zawng pawhin upate thu rochhiah zâwmin kut an sil zet loh chuan eng mah an ei ngai lo. An bazâr kai haw pawh an insil zet loh chuan eng mah an ei ngai lo. Thil dang tam tak pawh zawm tûr dawn chhâwn an nei - no sil te, bêl sil te, khum sil ang te hi. Chutichuan, Farisai-te leh Dân zirtîrtute chuan, “Engati nge i zirtîrte hian upa thu rochhiah zâwm lovin kut bawlhhlawha chaw an ei ni?” an ti a. Ani chuan a chhâng a, “Nangni mi vervêkho thu Isaian hetia a lo hril lâwk hi a tidik zet mai: ‘He mite hian an ṭawngkam chauhvin mi chawimawi a. An thinlung erawh chuan mi hlat si. Thurin ang hrimin mihring thupêkte an zirtîr a, An mi biakna hi a thlâwn mai a ni,’ a tih kha. Pathian thupêkte in hlamchhiah a, mihring thu rochhiah te chu in vuan tlat a nih hi,” a ti a. Amah vêkin, “Nangmahni thu rochhiah in kenkawh theih nân Pathian thupêk hêl dân in thiam teh e. Mosia chuan, ‘I nu leh i pa chawimawi rawh, mahni nu emaw, pa emaw sawichhia chu a thi ngei tûr a ni,’ a ti a; nangni erawh chuan, miin a nu emaw, a pa emaw hnênah, ‘Mi chhawrna tûr zawng zawng Korban (chu chu ‘Pathian hnêna pêk’ tihna a ni) a ni tawh,’ a tih chuan a nu tân emaw, a pa tân emaw eng mah a tihsak in phal tawh ṭhîn lo. Tichuan, in thu rochhiah avâng hian Pathian thu chu in bawh bo a nih hi, chutiang chu tam tak in ti ṭhîn,” a ti a. Mipuite chu a ko khâwm leh a, an hnênah, “In za-in ka thu hi ngaithla ula, hei hi hre fiah rawh u; pâwn lam aṭanga mihring chhûnga lût eng mahin amah a tibawlhhlawh thei lo, mihring chhûng lam aṭanga lo chhuak zâwk chu a ni amah tibawlhhlawh ṭhîntu chu,” a ti a. Mipui chu ina a luhsan hnuin a zirtîrte chuan tehkhin thu chu an zâwt fiah ta a. Ani chuan, “Nangni pawh chuti êma mâwl in ni maw? Eng pawh pâwn lam ata mihring chhûnga lût apiang, a thinlung chhûnga lût lovin a pum chhûngah a lût zâwk a, dailênnaah a chhuah leh mai avângin amah chu a tibawlhhlawh thei lo tih in hre lâwm ni?” a ti a. (Chutiang chuan ei tûr tinrêng hi a sawi thiang ta vek a ni.) Mihring chhûng lam aṭanga lo chhuak chuan chumi ngei chuan, mihring hi a tibawlhhlawh ṭhîn a ni. Mihring thinlung chhûng lam aṭang chuan ngaihtuahna sual - inngaihna te, rûkrûkna te, tualthahna te, uirena te, awhna te, suahsualna te leh bumna te, hurna te, îtsîkna te, Pathian pawi sawina te, chapona te, ho taka chêtna te a lo chhuak si ṭhîn a. Hêng thil sual zawng zawng hi chhûng lam aṭanga lo chhuak a ni a, mihring a tibawlhhlawh ṭhîn a ni,” a ti a. A tho va, chuta ṭang chuan Tura bialah a kal ta a; in pakhatah a va awm a, tu ma hriat a duh lo na a, a inthup hlei thei si lo. Thlarau bawlhhlawh pai fanu nei nu pakhat pawh chuan a chanchin a lo hriat veleh a rawn pan a, a ke bulah chuan a bawkkhup a. Chu nu chu Grik a ni a, Suria rama Foiniki biala piang a ni. A fanu kawchhûng ata ramhuai chu hnawt chhuak tûrin a ngên a. Isua erawh chuan a hnênah, “Fate chu tlai phawt rawh se, fate chaw lâksaka, ui hnêna pêk chu a dik lo ve,” a lo tihsan a. Ani chuan a chhâng a, “A ni khawp mai, Lalpa; nimah sela, dawhkân hnuaia uite pawhin fate ei nawi tlate chu an ei ṭhîn alâwm,” a ti a. “I thu sawi avâng chuan haw ta la, ramhuai chu i fanu kawchhûng ata a chhuak tawh e,” a ti a. Ani chu a hâwng a, a fa chu khuma a mu a va hmu a, ramhuai chuan a lo chhuahsan tawh a ni. Tura bial aṭang chuan a chhuak leh a, Sidon tlawhin Dekapoli bial chu kal tlangin Galili dîl a lo thleng leh a. Bengngawng pakhat, ṭawng pawh ṭawng fiah thei lo hi a hnênah an rawn hruai a, a chunga kut nghat tûrin an ngên a. Isua chuan mipui zîng ata chu a hruai hrang a, a kut zung chuan a beng kuate chu a khawihsak a, a leiah chil a hnawmsak a, vân lam enin a thaw huai a, a hnênah, “Effata,” a ti a, (chu chu ‘lo inhawng rawh,’ tihna a ni.) Tichuan, a beng chu a lo vâr a, a lei phuarna te pawh chu a lo inphelh a, fiah takin a ṭawng thei ta a. Tu mah hrilh lo tûrin anniho chu a ti tlat a; nimahsela, a khap nasat veleh an tlângaupui zual sauh zêl a. Mak an ti nasa êm êm a, “Thil a va han ti ṭha ṭhîn tak êm! Bengngawng beng a tivâr a, ṭawngtheilote pawh a ṭawngtîr hi,” an ti a. Chutih lai vêl chuan mipui nasa tak an lo pung khâwm leh a, ei tûr eng mah an nei lo va. A zirtîrte chu a ko va, “Mipuiho hi ka khawngaih êm êm a ni, ka hnênah ni thum an awm tawh a, ei tûr lah an nei ta si lo; rilṭâma ka hawtîr mai chuan kawng lakah an ṭâmchhâwl mai ang, ṭhenkhatte phei chu an lo kalna a hla hle si a,” a ti a. A zirtîrte chuan, “Tu nge hetiang hmun thlalêrah hêngho puarna khawp chhang hmu thei ang?” tiin an chhâng a. Ani chuan, “Chhang eng zât nge in neih?” a ti a. Anni chuan, “Pasarih,” an ti a. Tichuan, mipui chu leia ṭhu tûrin thu a pe a, chhang pasarih chu a la a, lâwmthu a sawi zawhin a phel a, an hnêna sem tûrin a zirtîrte a pe a; mipui chu an sem ta a. Nghatê tlêm an nei bawk a, chûng pawh chu malsâwmna a sawi zawhin a semtîr a. Tichuan, an ei a, an tlai ta hlawm a. An sem bâng chu bâwm sarihah an dah khat a. Mipuite chu sângli lai an ni; anniho chu a ṭîntîr a, ani pawh chu a zirtîrte nên lawngah an chuang ve nghâl a, Dalmanutha ram an va thleng a. Farisai-te an lo kal a, an rawn hnial a. Amah fiah nân vân ata chhinchhiahna thil mak an phût a. Thaw ipikthlâk a ti hle a, “Engati nge tûnlai mite hian chhinchhiahna thil mak an zawn? Thu dik ka hrilh a che u, tûnlai mite hi chhinchhiahna thil mak rêng rêng entîr an ni lo vang,” a ti a. Anni chu a kalsan a, lawngah chuan a chuang leh a, râl lehlam panin a kal ta a. A zirtîrte chuan chhang an lo ken theihnghilh a, lawngah chuan chhang tlang khat chauh lo chu a dang rêng an nei lo. Ani chuan, “Farisai-te dawidim leh Heroda dawidim lakah chuan invêng ula, fîmkhur rawh u,” tiin anni chu a han zilh a. “Chhang kan nei hauh lo mai le,” tiin an inbia a. Isuan a lo hriatin, “Engati nge chhang in neih loh thu ngawt in buaipui tâk? In la man lovin in la hrethiam lo ta cheu a ni maw? In va ngawng ve maw le! Mit nei siin in hmu lo maw? Beng nei siin in hre lo maw? In theihnghilh ta em ni? Chhang pangaa mi sângnga ka hrai ṭum khân eng zât nge bâng kha?” a ti a. “Bâwm sâwm leh pahnih,” an ti a. “A nih leh, mi sângli chhang pasariha ka hrai khân eng zât nge bâng kha?” a ti a. “Bâwm sarih,” an ti a. Tichuan, an hnênah, “In la hrethiam lo ta cheu maw?” a ti a. Bethsaida chu an lo thleng a, a hnênah mitdel an rawn hruai a, amah dek tûrin an ngên a. Ani chuan mitdel kut chu a chelh a, khua ata chu a kai chhuak a. A mitah chil a chhâk a, a khawih a, “Khua i hmu thei em?” tiin a zâwt a. Ani chu a han dâk a, “Mi ka hmu, thing angin an kal zut zut mai,” a ti a. A mit chu a khawihsak leh a, a han meng vak a, a lo dam felin engkim fiah takin a hmu thei ta a. “Khuaah pawh lût lovin haw nghâl rawh,” a ti a. Isua leh a zirtîrte chu Filipa Kaisari chhehvêl khuaahte chuan an kal ta a. Kawngah chuan a zirtîrte hnênah, “Miten tu nge nia mi sawi?” tiin a zâwt a. Anni chuan, “ ‘Baptistu Johana,’ ti che an awm a, a ṭhenin ‘Elija,’ an ti che a, ṭhenkhat erawh chuan, ‘Zâwlnei tu-a emaw’ te an ti che,” tiin an chhâng a. Ani chuan, “A nih, nangnin tu nge nia mi hriat?” tiin a zâwt a. Petera chuan, “Krista chu i ni,” a ti a. Tichuan, a chanchin chu tu mah hrilh tawp lo tûrin a ti a. Tin, Mihring Fapa chuan thil tam tak tuar ngei tûr a nih thu te, upate, puithiam lalte leh Dân zirtîrtuten an duh loh tûr thu te, an thah ngei tûr thu te, ni thum china a thawhleh ngei tûr thu te chu a zirtîr ṭan ta a. Chûng thu chu chiang takin a sawi a. Petera erawh chuan ani chu a hruai hrang a, a zilhhau ta a. Ani chuan a hawisan a, a zirtîrte lam chu a hawi a, “Setan, kal bo daih rawh, Pathian duh dâna ngaihtuah lovin mihring duh dânin i ngaihtuah a nih hi,” tiin Petera chu a hau ve ta thung a. Mipui chu a zirtîrte nên chuan a ko va, an hnênah, “Tu pawh mi zui duh chuan mahni inngaihtuah chang lovin mahni kraws puin mi zui rawh se. Tu pawh mahni nun humhim tum chuan an chân ang a, tu pawh keimah avâng leh Chanchin Ṭha avânga nun chân chuan an humhim ang. Miin khawvêl hi a pumin nei vek sela a nun chân si se, a tân eng nge sâwt ang? Miin a nun aiah eng nge a pêk theih ang? Tûnlai mi, uire hmang leh sual tak zînga ka thu leh kei mi zahpui apiang chu Mihring Fapa pawh hian Vântirhkoh thianghlimte nêna a Pa ropuina nên a lo kal hunah chuan anni chu a zahpui ve ang,” a ti a. “Thu dik ka hrilh a che u, heta dingho ṭhenkhatte hi, Pathian ram thiltihtheihna nêna lo thleng an hmuh hma loh chu thi lo tûr an awm,” a ti bawk a. Tin, ni ruk hnu chuan Isuan Petera te, Johana te leh Jakoba te chu tlâng sâng takah hruaiin anmahni chauh a chhohpui a; an hmaah chuan a hmêl lan dân a lo danglam ta a. A silhfênte pawh chu, leia puan su tu rêng rêngin an sûk vâr theih loh khawpin a lo vâr ta sur mai a. Elija leh Mosia chu an hnênah an rawn inlâr a, Isua nên an inbia a. Petera chuan Isua hnênah, “Rabi, heta kan awm hi a ṭha e; bâwktê pathum kan khawh ang e, i tân pakhat, Mosia tân pakhat, Elija tân pakhat,” a ti a. An hlauh êm avângin sawi tûr ahleih pawh an hre lo va ni. Tin, chhûm a lo zîng a, anniho chu a rawn khuh a, chhûm aṭang chuan aw a lo chhuak a, “Hei hi ka Fapa, ka Duhtaka chu a ni, ama thu hi ngai rawh u,” tiin. Tichuan, an han en vêl thuai a, an zîngah chuan Isua chauh lo chu tu mah dang an hmu ta lo va. Tlâng ata chu an chhuk laiin Mihring Fapa chu mitthi zîng ata a thawhleh hma chuan an thil hmuhte chu tu mah hrilh hauh lo tûrin a ti a. Tichuan, chu thu chu an vawng reng a, ‘Mitthi zîng ata thawhleh,’ tih chu eng tihna ni ang maw tiin an sawi ho ṭhîn a. Anni chuan, “Engtizia nge Dân zirtîrtuten, ‘Elija a lo kal hmasa zet tûr a ni’ an tih le?” tiin Isua chu an zâwt a. Ani chuan, “Elija chu engkim siam ṭha tûra lo kal hmasa rêng tûr alâwm. Engtizia nge Mihring Fapa hi thil tam tak tuara hmuhsitin a awm dâwn a ni tih ziak a nih si le? Nimahsela, ka hrilh a che u, Elija chu a lo kal tawh a, a chanchin ziak ang ngei khân a chungah an duh duhin an tih kha,” a ti a. Tin, zirtîrte hnên an zu thleng a, an vêla mipui nasa tak chu an hmu a, Dân zirtîrtute nên an lo inhnial a. Amah an hmuh veleh mipui zawng zawng chuan mak an ti hle a; a hnên lamah an tlân a, chibai an bûk a. Ani chuan an hnênah, “Hêngho nên hian eng thu-ah nge in lo inhnial?” a ti a. Mipui zînga pakhat chuan a chhâng a, “Zirtîrtu, ka fapa, ramhuai ṭawngtheilo pai chu, i hnênah ka rawn hruai a; a man apiangin a paih tlu ṭhîn a; a chil phuante a tla a, a hâte a ṭhial a, a khawng tlat mai ṭhîn. I zirtîrte hi hnawt chhuak tûrin ka ti a, an thei si lo,” a ti a. Ani chuan a chhâng a, “Ṭhangthar, rinna tlachhamte u, eng chen nge in hnêna ka awm anga, eng chen nge ka dawh theih dâwn che u? Ka hnênah han hruai teh u,” a ti a. A hnênah chuan an hruai a, ramhuai bawlhhlawh chuan Isua a hmuh veleh naupang chu a sawisa ta nghâl a; tichuan, leiah a tlu a, chilphuan tla zawih zawihin a tâl ta awrh awrh mai a. A pa chu, “Eng chen nge hetianga a awm tawh?” tiin a zâwt a. Ani chuan, “A naupan têt ata a ni. Meiah te, tuiah te amah tiboral tûrin a nam thlu fo ṭhîn; nimahsela, nangin engtin emaw tal i tih theih chuan khawngaih takin mi pui ang che,” a ti a. Isua chuan a hnênah, “I theih chuan â maw! Ringtu tân chuan engkim hi tih theih asin,” a ti a. Naupang pa chuan, “Ka ring e. Rinna ka tlâkchham avâng hian min pui ang che,” tiin a au chhuak ta nghâl a. Mipui an lo tlân khâwm tup tup chu a hmuhin Isua chuan ramhuai bawlhhlawh chu a hau va, “Nang, ramhuai ṭawngtheilo leh bengngawng, thu ka pe a che, a chhûng ata kha lo chhuak la, lût leh tawh suh,” a ti a. Ramhuai chu a au chhuak a, a nghaisak nek hnuin a lo chhuak ta a. Naupang chu thi ang maiin a awm a, mi tam tak phei chuan, “A thi ta a ni,” an ti hial a. Isua erawh chuan a kut a chelh a, a kai tho va, a lo ding chhuak ta mai a. Isua chu inah a lût a, a zirtîrten, “Engati nge keinin kan hnawh chhuah theih loh le?” tiin a fâlin an zâwt a. Ani chuan, “Hetiang hi zawng ṭawngṭaina chauh lo chuan engti dang mahin a hnawh chhuah theih loh,” a ti a. Tin, chuta ta chu an chhuak a, Galili ram chu an kal tlang a; chu chu tu ma hriat a duh lo, a zirtîrte chu thil zirtîr a nei a ni; an hnênah chuan, “Mihring Fapa hi mihringte kutah mantîr a ni dâwn a, an tihlum ang; mahse, an tihhlum hnu ni thum chinah a tho leh ang,” a ti a. Anni chuan a thu sawi chu a ngaihna an hre lo va, amah lah chu an zâwt ngam bawk si lo. Kapernaum chu an lo thleng a, in chhûnga a luh hnu chuan an hnênah, “Kalkawngah khân eng thu-ah nge in inhnial le?” tiin a zâwt a. Kawngah chuan, ‘kan zîngah tu nge ropui ber ang?’ tia an lo inhnial avâng khân an ngawi ta reng hlawm a. Ani chu a ṭhu tê tê a, Sâwmpahnihte chu a ko va, an hnênah, “Tu pawh hmasa ber nih duh chu hnuhnûng berah an awm tûr a ni, mi zawng zawng rawngbâwltuah an awm bawk tûr a ni,” a ti a. Naupang tê a kai a, an zîngah chuan a dintîr, a kuangkuah a, an hnênah, “Tu pawh ka hming avânga hetiang naupang tê pakhat pawh lâwm chu kei mi lâwm an ni; tu pawh kei mi lâwm chu kei mi lâwm ni lovin mi tîrtu lâwm an ni zâwk,” a ti a. Johana chuan, “Zirtîrtu, tu emaw i hminga ramhuaite hnawt chhuak kan hmu a, kan zînga a zui ve loh che avângin khap kan lo tum asin,” tiin a han hrilh a. Isua erawh chuan, “Khap suh u, tu mah ka hminga thil mak ti si-a mi rêl zui nghâl thei an awm lo. Min dodâl lo chu kan lamṭang an ni ngai e. Thu dik ka hrilh a che u, Krista mi in nih avânga tui in tûr no khat pe apiang che u chuan an lâwm man tûr an chân tawp lo vang. “Tu pawh hêng ringtu zînga tê ber pakhat pawh titlu chu, an nghâwngah chhangphut râwtna lung lian pui awrhtîrin tuifinriatah thlâk ni se an tân a ṭha zâwk ang. I kutin a tihtlûk che chuan tân mai rawh, kut pahnih neia Gehena mei mit thei lova kal ai chuan piangsuala nunnaa luh i tân a ṭha zâwk. I ke pawhin a tihtlûk che chuan tân mai rawh, ke pahnih neia Gehena-a paih nih ai chuan ke bûla nunnaa luh i tân a ṭha zâwk e. I mit pawhin a tihtlûk che chuan kher chhuak mai rawh, mit khing hnih neia, thil lungin a kher rengna hmun leh meiin a kan rengna hmun Gehena-a paih nih ai chuan, mit khing dela Pathian rama luh chu i tân a ṭha zâwk e. Mi tin meia tih thianghlim an ni dâwn si a. Chi hi a ṭha e; nimahsela, chi pawh hi da ta se, engin nge in tihal leh ang? Nangmahni ngeiah chi nei ula; tichuan, inngeih dial dial rawh u,” a ti a. Tin, a tho va, chuta ṭang chuan Judai ramah leh Jordan râlah te a kal a, mipuiin an lo bawh ruih ruih a; tichuan, a tih dân pângngaiin a lo zirtîr ṭhîn a. Farisai-te a hnênah an lo kal a, amah fiah nan, “Miin a nupui a mâk a thiang em?” tiin an zâwt a. Ani chuan, “Mosian engtin nge thu a pêk che u?” a ti a. Anni chuan, “Mosian inmâkna lehkha ziakin inmâk a phal,” an ti a. Isua erawh chuan, “In thinlung khauh avângin asin chu thupêk chu in tân a ziak ni. Nimahsela, thilsiam ṭân tirh aṭang rêngin mipa leh hmeichhia a siam a. Chumi avâng chuan mipain a nu leh pa a thlah ang a, a nupui a vuan ang; tichuan, an pahnih chuan tisa pumkhat an lo ni tawh ang, pahnih an ni tawh lo va, pumkhat an lo ni tawh zâwk a ni. Pathianin a zawm tawh avângin mipain ṭhen suh se,” a ti a. Inah a zirtîrten chûng thu chu an zâwt leh a. Ani chuan, “Tu pawhin a nupui a ṭhena, mi dang a neih chuan a nupui chu a uiresan a ni: hmeichhia pawhin a pasal a ṭhena, mi dang a neih chuan a pasal a uiresan a ni,” a ti a. Tin, a deh atân a hnênah naupangte an rawn hruai a, zirtîrte erawh chuan an lo hnar a. Nimahsela, Isuan a hmuhin a lungni lo êm êm a, an hnênah, “Naupangte ka hnênah han kaltîr ula, hnar suh u, Pathian ram chu hêng ang mite ta a ni si a. Thu dik ka hrilh a che u, Pathian ram chu naupang anga lâwm lo apiang; tu mah a chhûngah an lût tawp lo vang,” a ti a. Anni chu a lo kuah a, an chungah kut nghatin mal a sâwm ta a. Isua chu zin tûra a chhuah laiin mi pakhat a lo tlân a, a hmaah a ṭhingṭhi a, “Zirtîrtu Ṭha, chatuan nun ka chan theih nân eng nge ka tih tûr?” tiin a rawn zâwt a. Isuan a hnênah, “Engati nge Ṭha mi tih? Tu mah ṭha an awm lo, Pathian chauh lo chu. Thupêkte chu i hria alâwm, ‘Tual that suh, uire suh, ru suh, dâwtin hêk suh, bum suh, i nu leh i pa chawimawi rawh,’ tihte hi,” a ti a. Ani chuan, “Zirtîrtu, chûng zawng zawng chu ka tleirâwl tirh ata ka zâwm ṭhîn,” a ti a. Isuan ani chu a han en chiang a, a ngaina ta hle a, a hnênah, “Kawng khat i la bâk e; kal la, i neih apiang va hralh la, pachhiate pe rawh; chutichuan, vânah ro i nei dâwn nia; tin, lo kal la, mi zui ang che,” a ti a. Chûng thu avâng chuan a ngui ta hle a, lungngai takin a kal ta a, sum ngah tak a ni si a. Isua chu a han hawi vêl a, a zirtîrte hnênah chuan, “Sum ngahte tân Pathian rama luh a va harsa dâwn êm!” a ti a. Zirtîrte chuan a thu sawi chu mak an ti êm êm a; Isua chuan anni chu a chhâng leh a, “Naute u, Pathian rama luh hi a harsa teh asin: Pathian rama mi hausa an luh aiin hriau benga sanghâwngsei kal tlang a awl zâwk,” a ti a. Mak an ti lutuk a, “Chuti chu tu nge chhandam ni thei ang le?” an inti a. Isuan anni chu a en a, “Pathian tân tih loh, mihring tân chuan tih rual a ni lo rêng a; Pathian tân erawh chuan engkim tih theih a ni asin,” a ti a. Peteran a hnênah, “Ngai teh, keini lahin engkim kalsanin kan zui ta si che a,” a ti hman chauh va; Isuan a lo chhâng a, “Thu dik ka hrilh a che u, tu pawh keimah avâng leh Chanchin Ṭha avânga in emaw, unaute emaw, farnute emaw, nu emaw, pa emaw, fate emaw, ramte emaw kalsan chuan, tûn dam chhûng la la hian in te, unau te, farnu te, nu leh pa te, fa te a lêt za an hmu ngei ang, tihduhdahna te leh hun lo thleng tûra chatuan nun nên. Nimahsela, mi tam tak hmasa bera awmte chu hnuhnûng ber an la ni ang a, hnuhnûng bera awmte pawh hmasa ber an la ni ang,” a ti a. Tin, Jerusalem-a chho tûrin kawngah chuan an kal a, Isuan hma a hruai a, anni chuan mak an ti hle a, a zuitute pawh chu an zâm hle a. Isuan Sâwmpahnihte chu a hruai hrang leh a, a chunga thil lo thleng tûr zawng zawng chu a hrilh a; “Ngai teh u, Jerusalem-ah kan chhoh dâwn hi. Mihring Fapa hi puithiam lalte leh Dân zirtîrtute hnênah mantîr a ni dâwn; anni chuan thi tûrin a chungah thu an titlu ang a, Jentail-te hnênah an hlân ang. Anni chuan an lo nuihzat ang a, chil an chhâk ang a, an vua ang a, an tihlum ang; mahse, ni thum chinah a tho leh ang,” a ti a. Zebedaia fapa Jakoba leh Johana chuan ani chu an rawn hnaih a, “Zirtîrtu, kan dîl tûr apiang che min tihsak kan duh e,” an ti a. Ani chuan, “Eng nge tihsak che u ila in duh?” a ti a. Anni chuan, “I ropuinaah chuan i ding lamah pakhat, i vei lamah pakhat min ṭhuttîr ang che,” an ti a. Isua erawh chuan, “In thil dîl hi in hre lo va ni. Ka no in tûr chu in in thei dâwn em ni? Baptisma ka chan tûr pawh in chang thei dâwn em ni?” a ti a. Anni pawh chuan, “Thei ang,” an ti a. Isuan, “Ka no in tûr chu in in ang a, baptisma ka chan tûr pawh chu in chang ve ang; nimahsela, ka ding lam emaw, vei lam emawa ṭhuttîr chu ka thu a ni lo va, an buatsaihsakte tân a ni zâwk,” a ti a. Zirtîr dang sâwmte chuan chu chu an lo hriatin Jakoba leh Johana chungah chuan an lungni lo ta êm êm a. Isua erawh chuan anniho chu a ko va, an hnênah, “Jentail-te chunga rorêltua ruatte chu an chungah an intilal êm êm ṭhîn a, an mi liante pawhin an chungah thu an nei êm êm ṭhîn tih in hria. Nimahsela, nangni zîngah zawng chutiang tûr a ni lo ve, tu pawh in zînga ropui ber nih duh chu in rawngbâwltuah a awm tûr a ni. Tu pawh in zînga hmasa ber nih duh pawh chu, mi zawng zawng chhiahhlawhah a awm bawk tûr a ni. Mihring Fapa meuh pawh rawngbâwlsaka awm tûrin a lo kal lo va, rawngbâwl tûr leh mi tam tak tlan nân a nun pe tûrin a lo kal zâwk a ni,” a ti a. Jeriko khua an lo thleng a, a zirtîrte leh mipui nasa tak nên Jeriko aṭang chuan an chhuak a; Timaia fapa, kutdawh, mitdel, Bartimaia chu, kawng sîrah a lo ṭhu a. Nazaret Isua a ni tih a hriat chuan, “Isu, Davida Fapa, mi khawngaih rawh,” tiin a au ta vak a. Mi tam takin an hau va, ngawi tûra an tih pawhin, a hma aia ringin, “Davida Fapa, mi khawngaih rawh,” tiin a au zual sauh va. Isua chu a ding a, “Han ko teh u,” a ti a. Mitdel chu an ko va, “Ngaihṭha takin awm la, tho rawh, a ko va che,” an ti a. Ani chuan a puan a paih lawk a, a zuang tho va, Isua hnên lam chu a pan ta a, Isuan a lo bia a, “Eng nge tihsak che ila i duh?” a ti a. Mitdel chuan, “Raboni, hmuh theih ka duh,” a ti a. Tichuan, Isuan, “Kal rawh le, i rinna i dam phah a ni e,” a ti a. Khua a lo hmu thei ta nghâl mai a, kalkawngah chuan a zui ve ta a. Tin, Jerusalem an lo hnaih ta a, Oliv tlânga Bethfage khua leh Bethani khua an thlen dâwn chuan a zirtîrte zînga pahnih a tîr a, “In hma zâwn khuaah sâwn va kal ta ula, khua in luh veleh, tu ma la chuanna ngai loh, sabengtung no thlun in va hmu mai ang; phelh ula han kai rawh u. Mi tu pawhin, ‘Engati nge khatia in tih mai?’ an tih che u chuan, ‘Lalpan a mamawh a ni, a rawn dahtîr leh thuai ang,’ ti ang che u,” a ti a. An kal ta a, sabengtung no, kawngka bula thlun, pâwn lam kawtthlêra ding chu an va hmu a, an phelh ta a. Chuta ding tute emaw chuan an lo hmu a, “Engtizia nge sabengtung kha in phelh tâk mai?” an ti a. Anni erawh chuan Isua hrilh ang tak khân an sawi a; tichuan, an kal an phal ta a. Sabengtung no chu Isua hnênah an rawn kai a, a chungah an puante an phah a, Isua chu a chuang ta a. Mi tam takin kalkawngah an puante an phah a, a ṭhenin rama mi chhâwl sâtin an phah bawk a. A hmaa kalte leh a hnunga zuitute chu “Hosana! Lalpa hminga lo kal chu fakin awm rawh se, Ram lo thleng tûr, kan pa Davida ram chu Chawimawiin awm rawh se, Chungnung berah khian Hosana,” tiin an au va. Tin, Jerusalem-a Tempulah chuan a va lût a, engkim a en vêl zawh chuan khua pawh a tlai lam ta a, Sâwmpahnihte nên Bethani lamah an kal leh ta a. A tûkah chuan Bethani aṭanga an chhuak chu a ril a lo ṭâm ta a. Hla takah, theipui hnah nei hluah hi a hmu a, a rah a awm mial law maw tiin a va pan a, a va thlen chuan a hnah chauh lo chu eng mah a hmu lo va, theipui rah hun a ni lo rêng a. Tichuan, Isuan thing hnênah chuan, “Tûn a chinah chuan, kumkhuain i rah tu man ei tawh suh se,” a ti a. A zirtîrte pawh chuan chu chu an hria a. Jerusalem chu an lo thleng a, Tempulah chuan a lût a, chuta englo zuartute leh leitute chu a hnawt chhuak ta a, tangka thlengtute dawhkânte leh ṭhuro zuartute ṭhutthlêngte chu a nam thlûksak a. Tempulah chuan tu man bungrua an kal tlangpui pawh a phal lo bawk a. An hnênah chuan, “ ‘Ka in chu hnam tin tân ṭawngṭaina in an ti ang,’ tih ziak a ni lâwm ni? Nangni erawh chuan suamhmangte pûkah in siam ta zâwk a nih hi,” tiin a zirtîr ta a. Puithiam lalte leh Dân zirtîrtute chuan an lo hria a, amah tihhlum dân tûr an zawng ta a, a zirtîrna chu mipui zawng zawngin an ngaihsân êm avângin ani chu an hlau hle a ni. Tlaiah chuan khawpui ata chu a kal chhuak ṭhîn a. Tin, zîngah an kal pahin theipui kûng kha a zung nên lam a thi ta tih an hmu a. Petera chuan a hre chhuak a, a hnênah, “Rabi, en teh, theipui ânchhia i lawh kha a lo thi dêr mai!” a ti a. Isuan a chhâng a, “Pathian ring rawh u. Thu dik ka hrilh a che u, tu pawhin he tlâng hnênah hian, ‘Insawn la, tuifinriatah inpaih rawh,’ ti ang sela, a thinlunga ringhlel hauh lova, a sawi ang chuan a lo thleng ngei ang tih a rin tlat chuan tihsak a ni ang. Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang. Ṭawngṭai tûra in din hun pawhin mi chunga thu pawi eng emaw in neih chuan ngaidam rawh u; in Pa vâna mi pawhin in bawhchhiatnate a ngaihdam ve theih nân,” a ti a. Jerusalem chu an thleng leh a; Tempul a fan vêl laiin puithiam lalte, Dân zirtîrtute leh upahote a hnênah an lo kal a. “Eng thuneihnain nge hêng thil hi i tih? Tu nge thu pe che?” tiin an zâwt a. Isuan, “Thu kam khat ka han zâwt ang che u; mi chhâng ula, kei pawhin tu thuin nge hêng thil hi ka tih ka hrilh ang che u. Johana baptisma kha, vâna mi thu nge mihring thu? Mi chhang rawh u,” a ti a. An inrâwn tlâng a, “Vâna mi thu kan tih chuan, ‘Engah nge a thu in awih loh?’ min ti dâwn si a; ‘mihring thu’ kan ti mai emaw chu ni ang?” an inti a. Mahse, mi zawng zawngin Johana chu zâwlnei ni ngeiah an pawm tlat avângin mipui chu an hlau bawk si a. Tichuan, Isua chu an chhâng a, “Kan hre lo,” an ti a. Isua pawh chuan, “Kei pawhin tu thuin nge hêng thil hi ka tih ka hrilh bîk lo vang che u,” a ti a. Tehkhin thuin an hnênah thu a sawi ta a. “Tu-in emaw grep huan a siam a, palin a hung a, grep sâwr khur a siam a, vênbûk sâng tak a sa bawk a, thlawh hlawh tûrin huan enkawltute a pe a, ram dangah a kal ta daih a. A lawh hun chuan a chan ai la tûrin huan enkawltute hnênah chuan bawih pakhat a tîr a. Anni chuan an lo man a, an vêl a, kut ruakin an hawtîr ta a. Bawih dang an hnênah a tîr leh a, ani pawh chu a lu an vuak pawhsak a, zahthlâk takin an sawisa a. Bawih dang a tîr leh a, chu phei chu an lo that a. Bawih dangte pawh a tîr zêl a, a ṭhen an lo vêl a, a ṭhen an lo that a. Mi dang tirh âwm pakhat, a fapa duh tak chauh a nei tawh a, ‘Ka fapa hi chu an lo zah ang chu maw,’ tiin a hnuhnûng berah a tîr ta a. Nimahsela, huan enkawltute chuan, ‘He mi hi ro luahtu tûr chu a ni, hawh u, i that ang u, a ro luah tûr hi kan ta a ni mai ang,’ an inti a. Tichuan, ani chu an man a, an that a, grep huan ata chu an paih chhuak ta a. Huan neitupa chuan engtin nge a rawn tih ang? A lo kal ang a, huan enkawltute chu a rawn tiboral ang a, huan chu mi dang a pe ang. He Lehkha Thu hi in chhiar lâwm ni? ‘In satute lung duh loh kha Chu ngei chu a kil lung ṭangkai ber a lo ni si, Chu chu Lalpa tih a ni a, Kan hmuhin mak kan ti,’ tih kha?” a ti a. Chu tehkhin thu chu anmahni demin a sawi tih an hriatin man an tum a; amaherawhchu, mipui an hlau bawk si a, ani chu an kalsan a, an kal bo ta a. A thu sawiah a inṭawngâwk thei dah law maw tiin a hnênah Farisai-te leh Heroda pâwla mi ṭhenkhat an tîr a. A hnên an lo thlen chuan, “Zirtîrtu, mi dik tak i ni a, pawisak chuan tu mah i nei lo tih kan hria e, tu mah zah bîk pawh nei chuang lovin Pathian thu dik tak i zirtîr ṭhîn; Kaisara hnêna chhiah chawi tûr kan ni nge ni lo? Kan pe ang nge pe lo vang?” an ti a. Ani erawh chuan an vervêkzia chu a lo hmuhin “Engah nge ṭawngawhtîr min tum? Duli mi han lâk ula, ka lo en teh ang,” a ti a. Anni chuan an rawn la a, an hnênah, “Hei, tu lem leh tu hming nge chuang hi?” a ti a. Anni chuan, “Kaisara,” an ti a. Isua chuan, “Kaisara ta chu Kaisara pe ula, Pathian ta chu Pathian pe ta che u,” tiin a chhâng a. Mak an ti nasa êm êm a. Sadukai-ho, thawhlehna a awm lo titute pawh chu a hnênah an lo kal ve a; “Zirtîrtu, Mosian, ‘Tu pawhin fa nei lovin nupui thihsan se, a nupui chu a unaupain rochungin a unaupa tân chuan chi a thlahsak tûr a ni,’ tiin min ziaksak a. Aw le, unau mipa pasarih an awm a, a upa ber chuan nupui a nei a; mahse, fa nei lovin a thi a. A dawttu chuan a nupui chu a rochung a, chi thlah lovin a thi ve leh ta a; a pathumna pawh chutiang chu a ni a. Unau pasarihte chuan nupuiah an nei ṭheuh va; mahse, tu man chi rêng an thlah lo. A tâwpah hmeichhia pawh chu a thi ve ta a. Thawhlehnaah chuan tu nupui ber nge ni ang, an pasarihin nupuiah an nei ṭheuh si a?” tiin an zâwt a. Isuan anni chu a chhâng a, “Lehkha Thu leh Pathian thiltihtheihna in hriat loh avâng hian a ni rêng lâwm ni in kal sual ṭhin? An lo thawhleh hun chuan nupui pasal an innei tawh dâwn hlei nêm, vâna vântirhkohte ang mai an ni zâwk dâwn asin. Mitthite kaihthawha an awm tûr thu-ah chuan - Mosia lehkhabua hnimbuka meialh thu kha in chhiar ngai lo vem ni? Pathianin a hnênah, ‘Kei hi Abrahama Pathian, Isaka Pathian, Jakoba Pathian ka ni,’ a tih kha, Ani chu mitthi Pathian a ni lo va, mi nung Pathian a ni zâwk; in bo nasa tawh a nih hi,” a ti a. Dân zirtîrtu zînga pakhat a lo kal a, an thu sawite chu a ngaithla a, a chhâng ṭha hle tih a hriat chuan a hnênah, “Thupêk zawng zawngah a eng hi nge pawimawh ber?” tiin a han zâwt ve a. Ani chuan a chhang a, “Aw Israel, ngai teh, Lalpa kan Pathian chauh hi Lalpa chu a ni. Lalpa i Pathian chu i thinlung zawng zawngin, i nunna zawng zawngin, i rilru zawng zawngin, i chakna zawng zawngin i hmangaih tûr a ni,’ tih hi a pawimawh ber a, a dawttu chu, ‘Nangmah i inhmangaih angin i vêngte pawh hmangaih ve rawh,’ tih hi a ni. Hêng aia thupêk pawimawh zâwk rêng hi a awm lo,” a ti a. Dân zirtîrtu pawh chuan, “A ni tak e, Zirtîrtu, Lalpa chauh hi Pathian chu a ni a, amah chauh lo chu tu mah dang an awm lo, amah chauh chu ngaihtuahna zawng zawng leh hriatna zawng zawng leh chakna zawng zawnga hmangaih leh mahni inhmangaih anga vêngte hmangaih hi pumhâl thilhlan leh inthawina zawng zawng aiin a ṭha zâwk êm êm tih hi, i sawi dik ngei mai,” a ti a. Ngun taka ngaihtuahin a chhâng a ni tih Isuan a hriatin, “Pathian ram chu i hlat lo ve,” a ti a. Chuta chin chu tu man eng mah an zâwt ngam ta lo va. Isuan Tempula a zirtîr pah chuan a sawi zêl a, “Dân zirtîrtute hian engtizia nge Krista chu Davida fapa nia an sawi? Amah Davida ngei khân Thlarau Thianghlima sawiin, ‘Lalpa chuan ka Lalpa hnênah, Ka ding lamah lo ṭhu rawh, I hmêlmate i ke hnuaiah ka han dah ang e,’ a ti si a. Amah Davida ngeiin ani chu ‘Lalpa,’ a tih si chuan engtin nge a fapa a nih theih ang?” a ti a. Mipui pung khâwm nasa tak chuan a thu chu an ngaithla tui hle a. A zirtîr pah chuan an hnênah, “Dân zirtîrtu, kawrfual haa lên vêl chînga, dâwr hmuna chibai bûk ngainaa, sunagog-a ṭhutna langsâr ber leh ruai ṭhehna hmuna ṭhutna pawimawh ber ngiat ṭhînte lakah hian fîmkhur rawh u. Hêngho, hmeithai sum ei zawhsaka, mi hmuh atân maia rei tak tak ṭawngṭai chîng site hian hrem an tuar nasa ber ang,” a ti a. Tin, thawhlâwm bâwm zâwnah chuan a ṭhu a, miten bâwma tangka an thlâk lai chu a lo thlîr reng a. Mi hausa tak takte chuan an rawn thlâk ṭeuh ṭeuh va. Hmeithai rethei tak pakhat hi a lo kal ve a, dar pawisa pahnih a rawn thlâk a (chu chu pawisa pakhat hu a ni.) Isuan a zirtîrte chu a ko va, an hnênah, “Thu dik ka hrilh a che u, mi dang zawng zawng aiin he hmeithai rethei tak hian thawhlâwm bâwmah a thlâk tam zâwk. Mi dangte hi chuan an neih liam an rawn thlâk a; ani hi chuan tlachham chung chungin, a neih zawng zawng, intunnunna tûra a neih chhun chu, a rawn thlâk a nih hi,” a ti a. Tempul ata chu an kal chhuah laiin a zirtîrte zînga pakhat chuan, “Zirtîrtu, en teh, a lungte hi a lianin, a in sakte hi a mawi teh a nia!” a ti a. Isuan a chhâng a, “Hêng in lian pui pui hi i hmu maw? Lung intiang rêng rêng pakhat mah tihchim lohva hnutchhiah a awm lo vang,” a ti a. Tempul zâwn, Oliv Tlânga a ṭhut laiin Petera te, Jakoba te, Johana te, Andria te chuan a fâlin thu an zâwt a; “Chûng chu engtikah nge a lo awm ang a, chûng zawng zawng lo thlen dâwn chuan chhinchhiahna thil mak eng eng nge lo awm ang? Min hrilh teh,” an ti a. Tichuan, Isuan a hrilh ta a; “Tu man an hruai bo loh nân che u fîmkhur rawh u. Ka hming chhâlin, ‘Keimah hi ka ni,’ tiin mi tam tak an lo chhuak ang a, mi an hruai bo ṭeuh vang. Indo ri te, indo chanchinte in hriat hunah pawh thlaphâng suh ang che u, chûng chu lo thleng tûr rêng a ni; hun tawp erawh zawng a ni rih lo ve. Hnam hrang leh hnam hrang an indo vang a, sawrkâr leh sawrkâr an indo vang, hmun hrang hrangah lîr a nghîng ang a, ṭâm a la tla ang. Chûng chu nau vei a inṭan ta tihna a ni. “Nangni zawng inring rawh u; Sunagog-ahte leh a rorêltute hnênah an hlân ang che ua, an vua ang che u, keimah avângin hotute leh lalte hmaah, ka thu an hriat theih nân, an dintîr ang che u. Chanchin Ṭha hi hnam zawng zawng hnênah hril hmasak ngei tûr a ni si a. An man che u a, in chungthu rêl tûra an hlan hun che u chuan in sawi tûr enghelh lâwk suh ang che u, chumi huna lo lang apiang chu in sawi mai dâwn nia, a sawitu chu nangni in ni dâwn si lo, Thlarau Thianghlim a ni zâwk dâwn si a. Tihhlum tûrin unau leh unau an inmantîr ang a, pa pawhin a fa; fate pawhin an nu leh pate an do vang a, an tihhlumtîr bawk ang. Keima hming avângin mi tam takin an hua ang che u a; nimahsela, a tâwp thlenga chhel taka tuar peih apiang, chûng mite ngei chu chhandam an ni ang. “Tiṭiautu tenawm chu a din lohna tûra ding in hmuh hunah erawh chuan (a chhiar chuan a awmzia hre rawh se), Judai rama awmte chu tlângramahte tlân rawh se. In chunga awm chu ina lûtin a chhûnga englo chuh tûrin chhuk suh se; lova feh pawh a silhfên chuh tûrin haw hek suh se. Chûng huna naupaite leh nauno pawmte chu an va khawngaihthlâk dâwn em! Thlasik khaw chên laia a lo thlen loh nân ṭawngṭai rawh u. Chumi huna hrehawm lo thleng chu, Pathianin leilung a siam tirh ata la awm ngai lo, engtik maha awm leh tawh hek lo tûr chu a ni. Lalpan chûng nite chu titawi lo se mihring tu mah an dam khawchhuak lo vang; a mi thlante avângin a titawi a ni. “Chutih hunah chuan, tu pawhin in hnênah, ‘En teh u, Krista chu heta hi,’ emaw, ‘En teh u, sawta saw,’ emaw an tih pawhin awih suh ang che u. Krista der leh zâwlnei derte an lo chhuak dâwn si a, thei ang sela thlante meuh pawh hruai bo tûrin chhinchhiahna leh thil makte an ti ang. Nangni zawng fîmkhur rawh u, engkim ka hrilh diam tawh che u hi. “Chûng hun hrehawm chu a liam hun chuan ni a thim ang a, thla a êng hek lo vang a, vân aṭangin arsite a tla ang a, vâna thiltihtheihnate chu tihnghîn a ni ang. Chutih hunah chuan Mihring Fapa hi thiltihtheihna nasa tak nên ropui takin chhûm zînga lo kal an hmu ang. Chutichuan, vântirhkohte chu a tîr chhuak ang a, a mi thlante chu kâwlkil li ata leilung tâwp aṭanga vân tâwp thlengin a lâwr khâwmtîr ang. “Tichuan, theipui kûng awm dân aṭang hian zir tûr in nei; a zîk a lo nova, hnah a rawn chhuah chuan nipui a thaw dâwn tih in hre ṭhîn. Chutiang bawkin, nangni pawhin chûng zawng zawng lo thleng in hmuh hun chuan ani chu a lo hnai tawh a, a lo thleng ṭêp tawh tih hria ang che u. Thu dik ka hrilh a che u, chûng zawng zawng chu a lo thlen hma chuan tûnlai mite hi an ral hman lo vang. Lei leh vân a ral ang a, ka thu erawh chu a ral tawp lo vang. “Nimahsela, chûng thil lo thlen hun tûr, ni leh dâr chu; Pa chauh lo chuan tu man an hre lo, vâna vântirhkohte pawhin, Fapa pawhin an hre lo. Fîmkhur ula, inring reng rawh u, chumi hun chu in hre si lo. Mi ram danga zin dâwna, a bawihte hnêna an hna pual ṭheuhva mawhphurhtîra, kawngkhâr vêngtu pawh inring renga awm tûra hrilh diama kal ta daih ang hi a ni. Chuvângin, inring reng rawh u. In neitupa hâwn hun tûr chu tlai lamah nge, zânlaiah nge, âr khuanah nge, kâwl ênah nge tih in hre si lo; a lo haw thut mai zawngin muhîlin a rawn hmu hlauh dah ang che u. Tichuan, in hnêna sawi hi mi zawng zawng tâna sawi ka ni, inring reng rawh u,” a ti a. Tin, ni hnih hnuah Kalhlên Kût leh Chhang Dawidim telh loh Kût a awm dâwn a; puithiam lalte leh Dân zirtîrtute chuan amah chu ngamthlêma mana tihhlum theihna kawng an zawng a, “Kût lai chuan ni suh se, mipui zîngah buaina a chhuak dah ang e,” an ti a ni. Bethani-ah, phâr Simona ina chaw a kîl laiin alabasta bûra nard hriak rimtui hlîr hlak, to tak kengin hmeichhe pakhat a lo kal a, alabasta bur chu a tikeh a, a lu-ah a leih ta a. Chuta mi ṭhenkhat chu an lungni lo hle a, anmahni zîngah, “Engati nge hriak rimtui hi a tihriral tâk mai chu le? Duli zathum aia tam man a ni si a; hralha, mi retheite pêk zâwk âwm,” tiin chu nu chu an sawisêl a. Isua erawh chuan, “Eng mah tih suh u, engah nge in tihbuai? Ka chunga a tih hi thil ṭha ti a ni e. In zîngah mi retheite eng lai pawhin an awm a, in duh hun hunah thil ṭha in tihsak thei a; kei erawh chu in zînga awm reng tûr ka ni lo. A tih theih ang chu a ti ta a, ka taksa hi phûm tûrin hriak a lo hnawih lâwk a nih hi. Thu dik ka hrilh a che u, khawvêl pum puia chanchin Ṭha hi an hrilhna apiangah, he nu thil tih pawh hi amah hriat reng nân an sawi ve zêl ang,” a ti a. Tin, Sâwmpahnihte zînga mi pakhat, Juda Iskariota kha Isua mantîr tumin puithiam lalte hnênah a va kal a. Chu chu an lo hriatin an lâwm hle a, pawisa pêk an tiam ta a. Tichuan, mantîr dân tûr remchâng a zawng ta a. Chhang Dawidim telh loh Kût ni hmasa ber, Kalhlên Kût berâmno an talh ṭhinna ni-ah chuan, a zirtîrten, “Khawi hmunah nge Kalhlên kût chaw i ei tûr va buatsaih i la i duh?” an ti a. Tichuan, zirtîrte zînga mi pahnih a tîr a, “Khawpuiah va kal ta ula, pa pakhat hlumbêla tui chawiin a lo tâwk ang che u; ani chu zui ula, a luhna in neitu hnênah chuan, ‘Zirtîrtu chuan, Ka zirtîrte nêna Kalhlên Kût chaw kan eina tûr pindan chu khawiah nge? a ti e,’ va ti ang che u. Amah ngei chuan pindan chungnung zau tak, engkim awm, peih diam a entîr ang che u, chutah chuan kan tân va buatsaih tawh u,” a ti a. Tichuan, zirtîrte chu an chhuak a, khawpuiah chuan an va kal a, an hnêna a sawi ang ngei khân an va hmu a, Kalhlên Kût chaw chu an buatsaih ta a. Khua a lo tlai lam chuan Sâwmpahnihte nên an va kal ta a. Chaw an kîl a, an ei lai chuan Isuan, “Thu dik ka hrilh a che u, in zînga pakhat, mi kîlpuitu ngei hian, mi mantîr dâwn a ni,” a ti a. An mangang ta hle a, a mal malin a hnênah, “Kei chu ka ni lâwng chu maw?” an ti ta ṭheuh va. Ani chuan, “Sâwmpahnihte zînga mi, thlêng mi zenpuitu ngei hi a ni. Mihring Fapa mantîrtu tûr mihring chung chu a pik e. Chu mihring chu piang lo se a tân a ṭha zâwk ang,” a ti a. Chutia an ei lai chuan Isuan chhang a la a, malsâwmna a sawi a, a phel a, an hnênah a pe a, “La rawh u, hei hi ka taksa a ni,” a ti a. No pawh chu a la a, lâwmthu a sawi zawhin an hnênah a pe a, nova mi chu an za chuan an in ta ṭheuh va. Ani chuan, “Hei hi ka thisen, thuthlunna, mi tam tak tâna chhuak tûr chu a ni. Thu dik ka hrilh a che u, Pathian rama a thar ka in hun a thlen hma zawng, grep rah tui hi ka in leh tawh lo vang,” a ti a. Hla an sak zawh chuan Oliv tlâng panin an chhuak ta a. Isuan an hnênah, “In za-in mi hawisan vek ang. ‘Berâmpu chu ka vua ang a, berâmte chu an darh ang,’ tih ziak a nih kha. Nimahsela, kaihthawha ka awm hnuin Galili ramah ka lo kal hmasa ang,” a ti. Petera erawh chuan, “An vaiin hawisan vek che mah se kei zawngin ka hawisan hauh lo vang che,” a ti a. Isuan a hnênah, “Thu dik ka hrilh a che, zâninah, zânin la la hian, âr vawi hnih a khuan hmain nangin vawi thum mi phat ngei ang,” a ti a. Ani erawh chuan khauh takin, “I thihnaah chuan thi ve dâwn pawh ni ila, ka phat tawp lo vang che,” a ti a. Chutiang bawkin an za chuan an ti ta ṭheuh va. Huan pakhat, Gethsemani an tih chu, an thleng a, a zirtîrte hnênah, “Ka ṭawngṭai hlânin hetah hian lo ṭhu rawh u,” a ti a. Petera te, Jakoba te, Johana te chu a hruai a. Nasa takin a thlaphâng a, a mangang ta êm êm a. An hnênah, “Ka thla a phâng hle mai a! Thihpui tham hial a ni; hetah hian awm ula, lo inrâlring rawh u” a ti a. Hma lamah tlêm a va kal hlek a, leiah a bawkkhup a, chumi hun chuan amah a pelh mial theih nân a ṭawngṭai a. “Abba, ka pa, engkim i ti thei a, he no hi mi lâk sawnsak rawh; nimahsela, keima thu ni lovin nangma thu thu ni zâwk rawh se,” a ti a. A lo kîr a, anniho muthlu chu a rawn hmu a; Petera hnênah “Simon, i muthlu a ni maw? Dârkâr khat chauh pawh i inrâlring thei na nge? Thlêmnaa in tlûk luh loh nân invêngin ṭawngṭai rawh u; thlarau zawngin a huam a, tisa erawh chu a chak lo va ni,” a ti a. A kal leh a, a thu sawi ngai sawiin a va ṭawngṭai leh a. A lo kîr leh chuan an muthlu chu a rawn hmu leh a, an mut a chhuah êm avângin chhân ngaihna pawh an hre lo. A lo kîr vawi thumnaah chuan, “In la muthluin in la inthlahdul ta cheu a ni maw? A tâwk ta e, a hun chu a lo thleng ta; ngai teh u, Mihring Fapa hi mi sualte kûtah hlan a nih dâwn tâk hi. Tho teh u, i kal ang u. En teh u, mi mantîrtu tûr pawh a lo hnaih tâk hi,” a ti a. Chutia a la ṭawng lai mêk chuan Juda, Sâwmpahnihte zînga pakhat kha a lo thleng ta nghâl a, ama rual chuan puithiam lalte, Dân zirtîrtute leh upate tirh mi tam tak, khandaih leh talhtum kengin an lo thleng ta rup a. A mantîrtu tûr khân chhinchhiahna tûr a lo hrilh lâwk tawh diam a, “Ka fawha chu amah chu a ni ang, man ula, ngun taka vêngin hruai ang che u,” tiin. A lo thlen veleh Isua chu a rawn pan nghâl, a, “Rabi,” tiin a fâwp ta ngawih ngawih a. Isua chu an chelh a, an man ta a. A kianga dingte zînga pakhat chuan khandaih a phawi a, puithiam lalber bawih chu a sât a, a beng a hlawisak a. Chûngho chu Isuan a bia a, an hnênah, “Suamhmang man tûr ang ziazângin khandaih leh talhtum kengin min man tûrin in lo thawk a ni maw? In zîngah tempulah ni tin mi ka zirtîr ṭhîn a, mi man si lo. Lehkha Thu chu lo thlêng tûr rêng a ni e,” a ti a. Zirtîrte chuan amah chu an hawisan a, an tlânchhiatsan ta a. Tlangvâl pakhat, puan zai sîn chauh sin hian a lo zui ve a, ani pawh chu an man a; mahse, a tâl pût a, saruakin a tlân bo ta a. Isua chu Puithiam lalber hnênah an hruai a, puithiam lal te, upaho te leh Dân zirtîrtu te an lo kal khâwm a. Petera pawh chuan hnung fêah Puithiam lalber in hual chhûng kawtlai thlengin a rawn zui a; chhiahhlawhte zîngah chuan meilum aiin a ṭhu ve ta a. Puithiam lalber leh Sanhedrin-a tel zawng zawng chuan Isua tihhlum theihna tûr thu an zawng ta a; mahse, an hmu hlei thei lo. Mi tam takin dâwtin an rawn hêk a; nimahsela, an hêkna thu chu a inhmu thei si lo. Mi ṭhenkhat an lo ding chhuak a, dâwtin an hêk a, “‘He Tempul, kuta sak hi ka ṭhiat ang a, a dang, kuta sak ni lo, ni thum chhûngin ka din leh ang,’ a tih keimahni ngei hian kan hria,” an rawn ti a. Chu thilah pawh chuan an hêkna thu chu a inhmu thei chuang lo. Puithiam lalber chu a laiah a va ding chhuak a, Isua chu a zâwt a, “Hêngho hêkna che hi i chhâng thei na nge?” a ti a. Ani erawh chu a ngawi reng a, a enga mah a chhâng lo. Puithiam lalber chuan a hnênah, “Faktlâka Fapa, Krista chu i ni em?” tiin a zâwt leh a. Tichuan, Isuan a chhâng ta a, “Ka ni asin, Mihring Fapa hi Thiltitheia ding lama ṭhu-a, vân chhûmte nên a lo kal in la hmu dâwn a ni,” a ti a. Chu veleh Puithiam lalber chuan a silhfênte chu a pawtthlêr a, “Thuhretu dang engah nge kan ngaih tawh ang? Pathian pawi a sawi dân chu in hre ta, engtin nge in ngaih?” a ti a. Tichuan, an za-in Isua chu tihhlum tlâkah an ngai a. A ṭhen phei chuan amah chu chil an chhak ta pang a, a hmai te an tuam a, an hnek a, ‘Tu nge ti che sawi teh, an ti a. Vêngtute chuan an kai a, an bêng sawk sawk a. Petera chu in chhâwng hnuai lam in hung chhûng kawt laiah chuan a awm reng a. Puithiam lalber chhiahhlawh zînga nula pakhat a lo kal a; Petera meilum ai chu a rawn hmu a, a han en chiang a, “Nang pawh hi he Nazaret mi Isua hnêna awm kha i nih hi,” a ti a. Ani erawh chuan, “I thu sawi awmzia chu ka hre hauh lo mai, a ngaihna pawh ka hre lo ve,” tiin a phat a. Pâwn lam a pan a (ar a khuang a). Nula khân a enzui a, a bula dingte hnênah chuan, “An zînga mi a ni maw le,” a ti leh a. Ani chuan a phat leh a. Chumi hnu lawkah Petera kianga dingte chuan, “An zînga mi i nih ngei hi, Galili mi i ni alâwm,” an ti a. Ani erawh chuan ânchhe dawn huamin chhia a chham a, “Chu mihring in sawia chu ka hre hauh lo,” a ti a, âr chu a khuang leh ta nghâl a. Isuan a hnêna, “âr vawi hnih a khuan hmain nangin vawi thum mi phat ang,” a tih thu kha Petera chuan a hre chhuak a; lungchhe takin a ṭap chhuak ta a. Zîng a lo nih veleh puithiam lalte chu upate, Dân zirtîrtute leh Sanhedrin pum pui chuan ro an rêl a; Isua chu an hlîng a, an kai a, Pilata kutah an hlân ta a. Pilata chuan ani chu a lo zâwt a, “Juda-te lal i ni maw?” a ti a. Ani chuan a chhâng a, “Chu, i sawi chu,” a ti a. Puithiam lalte chuan an hêk mawlh mawlh a. Tichuan, Pilatan a zâwt leh a, “An hêkna zozai che hi i hre na nge, a enga mah i chhân loh?” a ti a. Isua erawh chuan a enga mah chu a chhâng ta chuang lo va, Pilata chuan mak a ti hle a. Kût niin mi tâng pakhat an ngen apiang Pilatan a chhuahsak ṭhîn a. Helho tâng zînga pakhat, Baraba an tih chu, hel laia tual an thahnaa a tel ve avângin tân inah a tâng reng a. Mipuite chu an han chho va, a tih ṭhin ang kha tihsak leh tûrin Pilata chu an ngên a. Ani chuan, “Juda-te lal hi chhuahsak che u ila in duh em?” a lo ti a. Puithiam lalte chuan îtsîkna avângin a kutah an rawn hlân a ni tih a hre si a. Puithiam lalte chuan mipui chu Baraba chhuahsak dîl tûrin an fuih a. Tichuan, Pilatan anniho chu, “Chuti chu Juda-te lal in tiha hi engtia ka tih nge in duh?” tiin a zâwt leh a. Anniho chu an au leh a, “Krawsah khêngbet rawh,” an ti a. Pilata chuan, “Engah maw? Eng nge a tihsual?” a ti a. Nimahsela, anniho chu ring lehzualin, “Krawsah khêngbet rawh,” tiin an au ta tuar tuar a. Tichuan, Pilatan mipui tihlungawi a duh a, Baraba chu a chhuahsak ta a; Isua erawh chu sipaite a vuaktîr a, krawsa khenbeh tûrin an hnênah a pe ta a. Sipaite chuan in hual chhûngah, praitorian an tihah chuan an hruai lût a, an pâwla mi zawng zawng an au khâwm a. Ani chu kawrfual senduk an hâktîr a, chawimawina atân hlîng an kual a, an khumtîr a. “Chibai, Juda-te lal!” tiin chibai an bûk ṭan ta a. Tiangin a lu-ah an vua a, chil an chhâk a, ṭhingṭhiin chibai an bûk el huai huai a. Chutia nuihza siam nâna an hman zawh chuan kawrfual senduk chu an hlihsak a, ama kawr an hâktîr leh a, krawsa khenbeh tûrin an hruai chhuak ta a. Thingtlâng lam aṭanga lo kal mi pakhat, Simona, Kurini khaw mi, Aleksandara leh Rufa pa, lo ding chu Isua kraws putsak tûrin an man a. Golgotha, ‘Luruh hmun’ an tih thleng chuan an hruai a, Mura pawlh uain an pe a; mahse, a duh lo va. Tichuan, krawsah an khêngbet ta a. An chan ṭheuh tûr hriat theih nân ṭhumvâwrin a silhfênte chu an insem a. An khenbeh hun chu zîng dâr kua vêl a ni. Amah an hêkna thu ziak an târ a, ‘Juda-te lal,’ tiin. Ama rual chuan suamhmang pahnih an khêngbet bawk a, a ding lamah pakhat, a vei lamah pakhat. Mi vei nuk nukte chuan an lu thingin, “Uai! Nang, Tempul ṭhiata ni thuma din leh theitu, intidam la, kraws ata kha lo chhuk ta che,” tiin an tiel a. Chutiang bawkin puithiam lalte leh Dân zirtîrtute chuan, “Mi dang mah tidam ṭhîn, mahni lah intidam thei si lo. Amah kan rin theih nân kan hmuhah, Krista, Israel lal chu, tûnah hian kraws ata lo chhuk ang hmiang!” tiin hmusit takin an tiel bawk a. Ama ruala khenbehte pawh chuan chutiang bawkin an ti a. Chhûn dâr sâwm leh pahnih a lo ni a, tlai dar thum thlengin khawvêl pum pui a thim ta vek a. Tlai dâr thumah chuan Isua chu ring takin a au va, “Eloi, Eloi, Lema Sabakthani,” tiin (chu chu, “Ka Pathian, Ka Pathian, engah nge mi kalsan?” tihna a ni). A kianga ding ṭhenkhatte chuan chu chu an hriatin, “Ngai teh u, Elija a ko va ni,” an ti a. Mi pakhat a tlân a, uain thûrah sponj a chiah a, tiangah a târ a, Isua chu intîr a tum a, “Ngawi rú, amah la thla tûrin Elija a lo kal emaw i en ang u,” a ti a. Isua chu aw ring takin a au va, a hnuk a chat ta a. Tin, Tempul chhûng puanzâr chu a chung lam aṭangin a hnuai lam thlengin a thlêr thla ta a. A hma zâwna sipai za hotu ding pawh chuan chutia a hnuk chat ta chu a hmuh chuan, “He mi hi Pathian Fapa a lo nih ngei hi le!” a ti a. Hmeichheho pawhin hla tak aṭangin an thlîr ve reng a, chûng zîngah chuan Magdala khaw mi Mari te, Jakob naupang zâwka nu Mari te, Josea nu te, Salomi te an tel a. Hêng mite hi Galili rama a awm laia amah zuia a rawngbâwlsak ṭhîntute an ni; tin, a ruala Jerusalem-a chho ve hmeichhe dang pawh tam tak an awm. Juda-te Inrinni a ni a, (chu chu Sabat ni atâna an inbuatsaih ni a ni.) Josefa, Arimathai khuaa mi, rorêltu zînga tel, mi zahawm tak, Pathian ram beisei mi ve bawk kha, tlai lam a lo nih chuan a lo kal ve a, huai takin Pilata a va luh chilh a, Isua ruang chu a dîl a. Pilata chuan a thi ta mai tih a hriat chuan mak a ti hle a, sipai za hotu chu a ko va, a thihna chin a zâwt a. Sipai za hotu ka aṭanga a hriat hnu chuan a ruang chu Josefa a pe ta a. Tichuan, puan zai sîn a lei a, amah chu a la thla a, puan zai sîn chuan a tuam a, lung ker thlânah a zalh a, thlân kawngka chu lungin a khâr ta a. Tin, Magdala mi Mari leh Josea nu Mari pawh chuan an zalhna chu an en reng a. Sabat ni a lo ral a, Magdala mi Mari te, Jakoba nu Mari te, Salomi te chuan a ruang va hnawih atân hriak rimtui an lei a. Pathianni zîngah thlânah an va kal a, ni pawh a chhuak tawh a. “Thlân kawngka ata lung chu tuin nge min lum sawnsak ang,” an intih lai mêkin, (lung lian tak a ni rêng a) an han dâk a, lung chu lum sawn sa-in an hmu ta a. Thlânah chuan an lût a, tlangvâl pakhat puan vâr sin, ding lam panga ṭhu an hmu a, an bîng ta chûk chûk a. Tichuan, ani chuan an hnênah, “Hlau suh u, Nazaret Isua, an khenbeh kha, in zawng a ni âwm a, kaihthawh a ni tawh a, hetah a awm tawh lo; en teh u, an zalhna chu hei hi a ni. Nimahsela, kal ula, a zirtîrte leh Petera hnênah chuan, ‘A hrilh che u ang ngei khân Galili-ah a lo kal hmasa dâwn a, chutah chuan in hmu ang,’ tiin va hrilh rawh u,” a ti a. An khûr a, an thauvah a man tâk avâng chuan thlân ata chu an chhuak a, an tlânchhe ta a; tu ma hnênah eng mah an sawi lo, an hlau êm a ni. (Tin, Pathianni zînga a thawhleh khân Magdala mi Mari, a kawchhûng ata ramhuai pasarih a hnawh chhuahsak hnênah khân a inlâr hmasa ber a. (Tichuan, an hnêna a thu hrilh zawng zawng chu hmeichhiate chuan Petera leh a ṭhiante hnênah an va sawi vat a. Ani chu Isua ṭhiante hnênah a kal a, mitthi ngaia an ṭap lai chu a va hrilh a. Chumi hnu chuan, Isua ngeiin, anmahni hmangin, chatuan chhandamna thu ril thianghlim leh chhe thei lo chu, chhak leh thlang, ram tinah a theh darh ta a. Amen) Nimahsela, a nung leh a, hmuh pawh a hmu tih an han hriat pawhin an awih chuang lo. Chumi hnu chuan an zînga mi pahnih, thingtlâng khaw lam pan laite hnênah pawh, hmêl danglam puin a inlâr a. Anni pawh chuan mi dangte chu an rawn hrilh a; mahse, an lo awih chuang lo. Chumi hnu chuan Sâwmpakhatte hnênah, chaw an kîl laiin a inlâr a, a tholeh hmutute thu an awih loh avângin an rin loh leh an thinlung sak kawngah chuan a zilhhau ta a. An hnênah, “Khawvêl ram zawng zawngah kal ula, thil siam tinrêng hnênah Chanchin Ṭha hi hril rawh u. Tu pawh a ringa, baptisma chang chu chhandam an ni ang a, tu pawh a ring lo chuan thiam loh an chang ang. Hêng chhinchhiahna thil makte hi ringtute zîngah a awm zêl ang: Ka hmingin ramhuaite an hnawt chhuak ang a, ṭawng thartein an ṭawng ang a, kutin rûlte an man ang a, thihna tûr eng pawh in mah se, eng mah an ti lo vang; damlote chungah kut an nghat ang a, an dam zêl ang,” a ti a. Chutichuan, an hnêna thu a sawi zawhin Lalpa Isua chu vâna hruai chhohvin a awm a, Pathian ding lamah a han ṭhu ta a. Anni pawh chu an chhuak a, ram tinah thu an hril ta a, Lalpan anmahni a thawhpui a, an thu chu chhinchhiahna thil maktein a tinghet zui zêl a. Amen.) Kan zînga thil lo thleng chanchin, a tîr aṭanga mita hmutute leh thu rawngbâwltuten min hrilh chhâwn ang kha, mi tam takin ziak chhuah an tum ta a; chuvângin, Theofil zahawm ber, a bul aṭangin engkim ngun takin keimah ngeiin ka chhui a, mumal nei deuhvin ziaksak che ila a ṭha ang ka ti a ni, an thu zirtîr che kha a dikzia i hriat theih nân. Judai rama Heroda a lal lai khân Abija pâwla mi puithiam pakhat, a hming Zakaria a awm a; a nupui chu Arona thlah zînga mi a ni a, a hming chu Elizabeti a ni. An pahnih chuan Pathian mit hmuha mi fel an ni a, sawisêlbova Lalpa thupêkte leh a Dân zawng zawng zâwm mi an ni a. Nimahsela, Elizabeti chu a chin avangin fa an nei thei lo va, anmahni pawh an upa tawh hle a. An pâwl rawngbâwl huna Pathian hmaa puithiam hna a thawh ve lai chuan, puithiamte tih dân pângngai angin, Tempul chhûnga lûta, rimtui hâltu tûr ṭhumvâwra an en chu a chungah a tla a. Rimtui a hâl lai chuan mipui zawng zawng chu pâwnah an ṭawngṭai a. Rimtui hâlna maichâm ding lama dingin Lalpa tirh vântirhkoh pakhat a hnênah a rawn inlâr a. Zakarian a hmuh chuan a phu zawk a, a hlau ta hle a. Nimahsela vântirhkoh chuan, “Zakari, hlau suh, i ṭawngṭaina chu hriat a ni e. I nupui Elizabeti chuan fapa a hrinsak ang che, a hmingah Johana i sa dâwn nia. Nang lâwmin i hlim ang a, mi tam tak pawh a lo pian avângin an lâwm bawk ang. Lalpa ngaihin mi lian a ni ang a, uain leh zu a in tûr a ni lo va; a nu pum chhûng aṭang rêngin Thlarau Thianghlimin a khat ang a. Israel thlahte zînga mi tam tak chu Lalpa an Pathian lamah a hawi kîrtîr leh ang. Pate chu an fate ngaihsaktîr tûr te, mi tihmawhte chu mi felte rilru put ang pu tûr te, Lalpa tâna mite inpeih tûra lo buatsaih tûrtein Elija thlarau dawn leh a thiltihtheihna neiin Lalpa hmaah chuan a lo kal hmasa dâwn a ni,” a ti a. Vântirhkoh hnênah Zakaria chuan, “Chu chu engtin nge ka hriat chian theih ang? Kei putar ka ni a, ka nupui pawh a upa hle tawh si a,” a ti a. Vântirhkoh chuan, “Kei hi Pathian hmaa ding ṭhîn Gabriela ka nih hi, nangmah be tûr leh chûng thu lâwmawm chu hrilh tûr che-a tirh ka ni. Ngai rawh, a hun taka lo thleng ngei tûr thil ka sawite hi i awih lo vei a, a lo thlen tak tak hma chu i ngawi reng ang a, ṭawng pawh i ṭawng thei lo vang,” a ti a. Mipui chuan Zakaria chu an lo nghâk ṭhuap a. Tempul chhûnga chuti chen chen a awm ta chu mak an ti hle a. A lo chhuah chuan an hnênah eng mah a sawi thei lo va, Tempul chhûngah inlârna a hmu a ni tih an hre ta a; an hnênah zaizirin thu a sawi a, a ṭawng thei ta hauh lo va. A rawngbâwl hun bi a lo kim tâk hnu chuan in lamah a haw ta a. Chûng hnu chuan a nupui Elizabeti chuan nau a pai ta a. “Mi zînga ka hming chhia chhilh nân Lalpan mi khawngaih a, heti hian mi tihsak ta,” a ti a. Thla nga a inkhûrkhung a. A thla ruknaah chuan Galili rama khaw pakhat Nazaret an tiha awm, nula thianghlim pakhat, Davida thlaha mi, Josefa nupui hual hnênah chuan. Pathianin vântirhkoh Gabriela chu a tîr a; chu nula hming chu Mari a ni. Inah chuan a va lût a, a hnênah, “Chibai, vohbîk, Lalpa i hnênah a awm,” a ti a. A thu sawi chuan a timangang ta êm êm a, a chibai bûkna chu eng tihna tak ni ang maw tiin a inngaihtuah a. Vântirhkoh chuan, “Mari, hlau suh, Pathian duhsakna i dawng e. Ngai teh, nau i pai ang a, fapa i hring ang; a hmingah Isua sa ang che. Ani chu mi ropui tak a la ni ang a, Chungnungbera Fapa an ti ang; Lalpa Pathianin a thlahtu Davida lalṭhutthlêngah a ṭhuttîr ang a; Jakoba thlahte chungah chatuanin a lal ang, a ramin kin ni a nei lo vang,” a ti a. Mari chuan Vântirhkoh hnênah, “Pasal ka la nei si lo va, engtin nge ni ang?” a ti a. Vântirhkoh chuan a chhâng a, “Thlarau Thianghlim chu i chungah a lo awm ang a, Chungnungbera thiltihtheihna chuan a hliahkhuh ang che; chuvângin, nau lo piang tûr chu mi thianghlim, Pathian Fapa an ti ang. Tin, ngai teh, i laichînnu, a ching an tih ṭhin, Elizabeti pawhin a tar hnuin mipa a pai ta, tûn thla hi a thla rukna a ni tawh. Pathian thuchhuak rêng rêngin tih theih loh a nei lo vang,” a ti a. Mari chuan, “Ngai teh, Lalpa bawihnu ka ni, i thu ang chuan ka chungah lo thleng rawh se,” a ti a, vântirhkoh chuan a kalsan ta a. Chûng lai chuan Mari chu a tho va, tlângrama Juda-ho khaw pakhat panin a chho ta vang vang a; Zakaria in a han thlenga, Elizabeti chu chibai a bûk a. Mari chibai bûkna aw chu a hriatin a pum chhûnga nautê chu a lo chê a. Elizabeti chu Thlarau Thianghlimin a khat a, ring takin a au va, “Nang hi hmeichhia azawngah i vânnei ber e; i rîla rah pawh a vânnei e; Engtizia kher nge ka Lalpa nu ka hnênah i lo kal le? Ngai teh, i chibai bûkna aw ka hriat veleh a lâwm avângin nautê pawh ka pum chhûngah a che asin. I hnêna Lalpain thu a sawi kha a thleng ngei dâwn tih i rin avângin i nihlawh e,” a ti a. Tin, Marin, “Thinlung takin Lalpa ka chawimawi a. Min chhandamtu Pathian chungah ka lâwm êm êm a ni, A bawihnu tlâwm tak hi a rawn ngaihsak a. Ngai rawh, tûn chinah chuan ṭhangthar zêl pawhin nihlawh min ti ang. Thiltitheia khân thil ropui tak min tihsak ta. A hming pawh a thianghlim e. A khawngaihna chu ṭhang lo thar zêl thlengin Amah ṭihtute tân a dai ngai lâwng. A bânin a chakzia a lantîr a, thinlunga chapote chu a vai darh a, An ṭhutthlênga lal ṭhute chu a hnûk thla a, Rethei daikilkâra mite a chawi kâng a. Rilṭâmte chu thil tui tinrêngin a hrai tlai a, hausate erawh chu kut ruakin a kaltîr a. Min thlahtute hnêna a tiam ang khân a chhiahhlawh Israel-te pui tûrin a lo thawk ta. Abrahama leh a thlahte a khawngaihna kha kumkhuain a hre reng a nih hi,” a ti a. Mari chu thla thum lai a châm a, a haw leh ta a. Elizabeti nau hrin chu a lo hun ta a, fapa a hring a. A ṭhenawmte leh a laichînte chuan Lalpan a khawngaihzia an hriat chuan an lâwmpui hle a. A ni riat ni chuan nausên serh tan tûrin an lo kal khâwm a, nau hmingah a pa hming vêk, Zakaria, sak an tum a; mahse, a nu chuan, “Ni lo ve, Johana sak tûr a ni,” a ti a. Anni chuan, “I laichînte zîngah he hming pu hi tu mah an awm hlei nêm,” an ti a. A pa chu a hmingah eng nge sak a duh tih zaizirin an zâwt ve a. Ani chuan ziakna phêk a han dîl a, “A hming chu Johana a ni,” tiin a ziak a. An za chuan mak an ti hle a. Chu veleh a ka leh a lei chu phelh a lo ni ta nghâl a. Pathian fakin a lo ṭawng chhuak thei leh ta a. An ṭhenawm zawng zawng chuan an hlau va, chûng thu chu Judai tlângramah chuan an sawi ta huai huai a. A hria apiang chuan an ngaihven a. “Chu nau chu engtin tak la awm ang maw!” an ti a. Lalpa pawhin amah a awmpui zêl a. A pa Zakaria chu Thlarau Thianghlimin a lo khat a, heti hian a ti a: “Lalpa, Israel-te Pathian chu fakin awm rawh se, A mite tlawhin a rawn tlan ta si a. A chhiahhlawh Davida chhûngte zîngah Kan tân chhandamtu ropui tak a din ta. Hmânlai zâwlnei thianghlimte kâa A sawi tawh ang khân. Kan hmêlmate leh min hawtute laka Min humtu tûr chu. Min thlahtute a khawngaihzia a tilang a, a thuthlung thianghlim a hre reng a ni. Kan pu Abrahama hnênah thu a tiam tlat a, kan hmêlmate laka min chhan a, Thlaphâng lova a rawng kan bâwla, Kan dam chhûng zawng, A hmaa thianghlim leh fel taka kan awm a tiam kha. Mama, nang zawng chungnungbera zâwlnei i ni ang a, Lalpa kawng buatsaihin i kal hmasa dâwn a ni, An sualte ngaidamin a mite a chhandam tih hriattîr tûrin. Kan Pathian khawngaihna nasa tak avâng hian chung lam ni chhuak chuan mi rawn tlawh dâwn, Thih hlau rêng rênga awmte leh thim zînga ṭhute chhun ênga, Thlamuanna kawnga kan kête pêntîr tûrin,” a ti a. Nausên chu a lo ṭhang lian a, thlarau lamah a lo puitling deuh deuh va, Israel mipui hmuha a rawn lan hma kha chuan thlalêrah a awm reng a ni. Chûng lai chuan Kaisara, Augasta chuan khawvêl zawng zawnga mite hming ziak vek tûrin thu a pe a. Chu chu Suria ram awptu Kurinia a nih laia chhiarpui hmasa ber a ni. Tichuan, mi zawng zawng mahni khua ṭheuhvah hming ziak tûrin an kal ta a. Chuta an awm lai chuan a hrin a lo hun ta a; fa tîrah mipa a hring a. Puanin a tuam a, khualbûka an len ve tâk loh avângin ran chaw pêkna thlêngah a muttîr a. Chu lai ramah chuan berâmputen berâm an vêng a, zânah an riah chilh a. Lalpa tirh vântirhkoh an hmaah a lo ding a, Lalpa ropuina chuan an vêl chu a chhun êng ta pup a; an hlau êm êm a. Vântirhkoh erawh chuan an hnênah, “Hlau suh ula, ngai rawh u, mi tin tân Chanchin Ṭha lâwmawm êm êm ka rawn thlen che u a ni. Vawiin hian in tân Davida khuaah Chhandamtu a piang ta, Lalpa Krista chu. Nausên, puana tuam, ran chaw pêkna thlênga mu in va hmuh chuan ani chu a ni tih hria ang che u,” a ti a. Thâwklehkhatan vântirhkoh kiangah chuan vân mipuiho an lo awm ta chiam a, Pathian an fak a: “Chungnung berah khian Pathian chu ropui takin awm sela, Leiah hian a lawm êm êm mihringte zîngah rem lêng rawh se,” an ti a. Vântirhkohten vâna an kalsan tâk veleh berâmpute chuan, “Hawh u, Bethlehem-ah kal ila, Lalpa thu min hrilh lo thleng chu i va en ang u,” an ti a. Tichuan, hmanhmawh takin an kal a, Mari te, Josefa te, ran chaw pêkna thlenga nausên mu te chu an va hmu a. An va hmuh chuan nausên chanchin vântirhkoh sawi kha an hrilh a. A hria apiang chuan berâmpute thu sawi chu mak an ti hle a; Mari chuan chûng chu a vawng reng a, a ngaihtuah neuh neuh ṭhîn a. Vântirhkoh hrilh ang ngeia engkim an hmuha an hriat avâng chuan berâmpute chu Pathian chawimawi leh fak chung zêlin an kîr leh ta a. Tin, ni riat a lo tlina a serh an tan ni chuan, a hmingah, chhûla a awm hma rênga vântirhkoh sak tawh sa Isua an sa a. Mosia Dân anga an inthenna ni a lo thlen chuan nausên chu Lalpa hnêna hlân tûrin Jerusalem-ah an chhohpui a. Lalpa Dân thu-ah, “Fa tîr mipa tawh phawt chu Lalpa chanvo tûr a ni,” tih a ni a. Tin, Lalpa Dân angin ṭhuro pahnih emaw, pârva no pahnih emaw inthawi nân an hlân tûr a ni. Jerusalem-ah chuan mi pakhat, a hming Sumeona a awm. Ani chu mi fel leh sakhaw mi tak a ni a, Israel thlamuantu tûr chu a thlîr reng a; a chungah Thlarau Thianghlim a awm a. Thlarau hruaiin tempulah chuan a lo kal a, nausên Isua chu a nu leh pain Dânin a phût tihsak tûra an rawn hruai luh lai chuan a lo pawm a, Pathian a fak a: “Aw Lalber, tûnah i thu ang ngeiin I bawih hi thlamuang takin i chhuahtîr dâwn ta a, I chhandamna mi tin hmuha i siam kha, ka mit hian a hmu ta e. Jentail-te hnêna i êng tilang tûr leh I mi Israel-te ropuina tûr chu,” a ti a. A nu leh pa chuan nausên chungchâng a sawi chu mak an ti hle a. Sumeona chuan anni chu mal a sâwm a, a nu Mari hnênah: “Ngai rawh, Israel zînga mi tam tak Tlûkchhiat nân leh din chhuah nân He nautê hi ruat a ni, Chhinchhiahna, an hnial luai luai tûra chu. Nang pawh, ngûnhnâma chhun angin i thin a la nâ ang, Mi tam tak rilru chhûngril tihlan a ni dâwn si a,” a ti a. Zâwlnei pakhat, Annii, Fanuela fanu, Asera hnam, tar tawh tak a awm bawk a. A pasal nên kum sarih an inneih hnuin, kum sawmriat leh pali a hmeithai tawh a. Ani chuan Tempul kalsan lovin chaw te a nghei ṭhîn a, a chhûn a zân ṭawngṭaiin Pathian a be ṭhîn a. Chutih lai chuan ani chu a lo kal a, Pathian hnênah lâwmthu a sawi a, Jerusalem chhanchhuahna beiseitu apiang hnênah nausên chanchin chu a sawi ta a. Lalpa Dân ang zêla thil an tih zawh vek hnu chuan Galili ramah, an khua Nazaret-ah chuan an haw leh ta a. Nausên pawh chu a ṭhang lian zêl a, a fing deuh deuh va, Pathian khawngaihna a chungah a awm reng a. A nu leh pate chu kum tin Jerusalem-ah Kalhlên Kût hmang tûrin an kal ṭhîn a. Ani chu kum sâwm leh pahnih a nihin dân pangngai anga Kût hmang tûrin an chhohpui a. Kût an ṭiak a, an hâw ta a, naupang Isua erawh chu a nu leh pa te hriat lohvin Jerusalem-ah a châm a. An pâwlte zîngah a awm a ni ang chu tiin ni khat an kal hman tawh a, an laichînte leh an hmêlhriatte zîngah an han zawn chuan an hmu ta lo va. Zawng zêl chungin Jerusalem-ah an kîr leh ta a. Ni thum ni chuan tempulah, zirtîrtuho bula a lo ṭhu ve chu an han hmu ta a; an thu a lo ngaithla a, thute a lo zâwt bawk a. Anni chuan a finzia leh a chhân thiamzia an hriatin mak an ti hle hlawm a. A nu leh a pa chuan an han hmuh chuan mak an ti êm êm a, a nu chuan, “Mama, engati nge hetia min tih? I pa nên thlaphâng takin kan zawng kan zawng che asin le,” a ti a. Ani erawh chuan, “Engah nge mi zawn? Ka Pa ina awm ngei tûr ka ni tih in hre lâwm ni?” a ti a. An hnêna a thu sawi chu a ngaihna an hre lo va. An rual chuan a haw ve ta a, Nazaret an thleng a, an thu a awih êm êm zêl a; tin, a nu chuan chûng thu zawng zawng chu a rilruah a vawng reng a. Tin, Isua chu a lo ṭhang lian telh telh a, a fing deuh deuh va, Pathian khawngaihna leh mite duhsakna a dawng zêl a. Tiberia Kaisara a lal kum sâwm leh panga kum chuan, Pontia Pilata chu Judai ram awptu a ni a, Heroda chu Galili ram lal a ni. A unau Filipa chu Ituria leh Trakonitis ram lal a ni a, Lusania chu Abilene ram lal a ni; Anna leh Kaiafa chu Puithiam lalber an ni a; thlalêrah, Zakaria fapa Johana hnênah, Pathian thu a lo thleng a. Jordan lui ruam ram a fang vêl a, sual ngaihdam nân sima baptisma chan tûr thu a hril zêl a; zâwlnei Isaia lehkhabua, “Thlalêra mi au aw chuan Lalpa lamlian chei ula, A kal nân kawng tluang siam rawh u. Kawr tin chhûn khah vek a ni ang a, Tlâng tin mual tin râwt hniam a ni ang. A kawite chu a lo ngîl ang a, A bumbohte chu a lo rual bawk ang. Pathian chhandamna chu mi tinin an hmu ang,” tih ziak ang khân. Tichuan, mipui lo kalte hnênah chuan, “Rûl thlahte u, thinur lo thleng tûr pumpelh nân tu nge baptisma chang tûra fuih che u? In sim ngei a ni tih tilang tûrin thil ti zâwk rawh u. ‘Kan pa chu Abrahama asin,’ in lo ti rilru mai dah ang e; ka hrilh a che u, Pathian chuan hêng lung hi Abrahama thlahah a din thei asin. Tûn apangin hreipui chu thing bul tinah an dah ta; thing eng pawh rah ṭhaa rah lo chu kiha meia tuah mai tûr a ni,” a lo ti a. Mipui chuan, “Chuti chu eng nge kan tih tûr le?” tiin an zâwt a. Ani chuan, “Tu pawh, kawr pahnih nei chuan a nei ve lo pe rawh se; chutiang bawkin ei nei chuan a nei ve lo pe rawh se,” a ti a. Chhiahkhawntute pawh baptisma chang tûrin an lo kal a, “Zirtîrtu, eng nge kan tih tûr?” an ti a. Ani chuan “Chhiah bi tûr aia tam phût suh u,” a ti a. Sipaite pawh chuan, “Anih, keini hi, eng nge kan tih ve tûr?” an ti a. Ani chuan “Tihluihnain emaw, dâwtin emaw tu ma thil lâksak suh ula, in hlawhah lungawi rawh u,” a ti a. Mite beisei chu a sâng hle a, Johana chu ‘Krista a ni mai âwm e,’ tia an ngaihtuah rilrûk lai chuan, Johana chuan an za-in a hrilh a, “Kei zawngin tuiin ka baptis che u a; nimahsela, kei aia ropui zâwk a lo kal dâwn a, kei hi chu a pheikhawk hrui phelh tlâk pawh ka ni lo. Ani zawngin Thlarau Thianghlim leh meiin a baptis ang che u. A hruiha buh zâp faia zêma khung mai tûrin a sisêp chu a keng tawh a, a site erawh chu tihmih rual loh meiah a hâl ral ang,” a ti a. Chutiang chuan fuihna thu dang tam tak nên mite hnênah Chanchin Ṭha chu a hril ṭhîn a. Lal Heroda pawh kha, a nau nupui Herodi nêna an chungchâng thu-ah leh thil sual dang a tih zawng zawng chungthu-ah a zilhhau va. Heroda chuan ama thil sual tih tâk zawng zawng belhchhahin Johana chu tân inah a khung a. Tin, mi zawng zawngin baptisma an chang a. Isua pawhin a chang ve a, a ṭawngṭai laiin vân a lo inhawng a, Thlarau Thianghlim chu taksa neiin ṭhuro angin a chungah a lo chhuk a, “Nang, ka Fapa, ka Duhtaka chu i ni, i chungah ka lâwm êm êm e,” a rawn ti a. Rawng a bâwl ṭan chuan Isua chu kum sawmthum laia upa a ni tawh a, mi ngaih chuan Josefa fapa a ni. Chu mi chu Helia fa a ni a, ani chu Matthata fa a ni; ani chu Levia fa a ni; ani chu Melkia fa a ni; ani chu Jannaia fa a ni; ani chu Josefa fa a ni; ani chu Mattathia fa a ni; ani chu Amosa fa a ni; ani chu Nahuma fa a ni; ani chu Eslia fa a ni; ani chu Naggaia fa a ni; ani chu Maatha fa a ni; ani chu Mattathia fa a ni; ani chu Semeia fa a ni; ani chu Joseka fa a ni; ani chu Joda fa a ni; ani chu Joana fa a ni; ani chu Resa fa a ni; ani chu Zerubabela fa a ni; ani chu Salathiela fa a ni; ani chu Neria fa a ni; ani chu Melkia fa a ni; ani chu Addia fa a ni; ani chu Kosama fa a ni; ani chu Elmadama fa a ni; ani chu Era fa a ni; ani chu Isua fa a ni; ani chu Eliezara fa a ni; ani chu Jorima fa a ni; ani chu Matthata fa a ni; ani chu Levia fa a ni; ani chu Simeona fa a ni; ani chu Juda fa a ni; ani chu Josefa fa a ni; ani chu Jonama fa a ni; ani chu Eliakima fa a ni; ani chu Melea fa a ni; ani chu Menna fa a ni; ani chu Mattatha fa a ni; ani chu Nathana fa a ni; ani chu Davida fa a ni; ani chu Jesaia fa a ni; ani chu Obeda fa a ni; ani chu Boaza fa a ni; ani chu Sala fa a ni; ani chu Nasona fa a ni; ani chu Aminadaba fa a ni; ani chu Admina fa a ni; ani chu Arnia fa a ni; ani chu Esroma fa a ni; ani chu Faresa fa a ni; ani chu Juda fa a ni; ani chu Jakoba fa a ni; ani chu Isaka fa a ni; ani chu Abrahama fa a ni; ani chu Tera fa a ni; ani chu Nahora fa a ni; ani chu Seruga fa a ni; ani chu Hragaia fa a ni; ani chu Falega fa a ni; ani chu Ebera fa a ni; ani chu Sala fa a ni; ani chu Kainana fa a ni; ani chu Arfaksada fa a ni; ani chu Sema fa a ni; ani chu Nova fa a ni; ani chu Lameka fa a ni; ani chu Methusela fa a ni; ani chu Enoka fa a ni; ani chu Jareda fa a ni; ani chu Mahalaleela fa a ni; ani chu Kainana fa a ni; ani chu Enosa fa a ni; ani chu Setha fa a ni; ani chu Adama fa a ni; ani chu Pathian fa a ni. Isua chu Thlarau Thianghlimin a khat a, Jordan lui aṭanga a lo haw chu, Diabola thlêm chungin thlalêrah ni sawmli Thlarau hruaiin a thang bo va. Chûng chhûng chuan eng mah a ei lo va, a tâwpah chuan a ril a ṭâm ta hle a. Tichuan, Diabolan a hnênah, “Pathian Fapa i nih tak tak chuan he lung hi chhanga chang tûrin thu pe rawh,” a ti a. Isua erawh chuan, “ ‘Chhang ringawt ringin mihring hi an nung tûr a ni lo, tih ziak a ni,” a ti a. Hmun sâng takah a hruai chho va, mitkhapkâr lovah khawvêl ram zawng zawng a entîr a. Diabola chuan, “Hêng zawng zawng chunga thuneihna leh a ropuina hi ka pe ang che; ka hnêna pêk a ni tawh a, ka duh duh pe thei pawh ka ni. Nang hi chuan chibai mi bûk la, a za-in i ta a ni vek mai tûr,” a ti a. Isuan, “ ‘Lalpa i Pathian chu chibai bûk la, ama rawng chauh bâwl rawh,’ tih ziak a ni,” a tihsan a. Jerusalem-ah a hruai leh a, Tempul chhîpah a dah a, “Pathian Fapa i nih meuh chuan heta ṭang hian zuang thla rawh: ‘Nangmah vêng tûr chein Vântirhkohte chu thu a pe ang,’ tih leh, ‘An kutin an dâwm ang chia, Tichuan, lungah i ke i sawh dâwn lo nia,’ tih ziak ang khân,” a ti a. Isua erawh chuan, “ ‘Lalpa i Pathian fiah suh,’ tih ziak a ni,” a tihsan leh ta a. Tichuan, Diabolan a thlêmna tûr tinrênga a thlêm zawh chuan a remchân leh hun atân a kalsan ta a. Tin, Isua chu Thlarau thiltihtheihna nên Galili ramah a haw ta a; chu mi bial pumah chuan a chanchin a thang vêl ta a. An sunagog-ahte mi a zirtîr ṭhîn a, miten an hlut hle a. A seilenna khua Nazaret chu a lo thleng a, a tih dân pângngaiin Sabat ni chuan sunagog-ah a lût a, chhiar tûrin a ding a. Zâwlnei Isaia lehkhabu zial chu an pe a, he thu chuanna thleng hian a han phelh a: Lalpa Thlarau chu ka chungah a awm a, Pachhiate hnêna Chanchin Ṭha hril tûrin Hriak mi thih a ni. Saltâng chhuah tûr thu te, Mitdel mit vâr tûr thu te, Rahbeh chhan chhuah tûr thu te, Lalpa duhsakna lan hun thleng ta te hi Puang tûrin mi tîr a ni. Lehkhabu chu a zial a, rawngbâwltu a pe leh a, a ṭhu ta a, sunagog-a mi zawng zawng chuan an en ṭhuap mai a. An hnênah, “He lehkha Thu hi vawiin hian in hriatah a lo thleng ta,” tiin a han sawi ta a. An za chuan sawi ṭha an ti hle a, a thu sawi duhawm tak chu mak an ti a, “He mi hi Josefa fapa kha a ni lâwm ni?” an ti a. Ani chuan an hnênah, “‘Daktor, nangmah intidam rawh,’ an tih ṭhin ang hian nangni pawhin, ‘Kapernaum khuaa i thil tih kan hriat angte kha i khaw lamah pawh hian ti ve ta che,’ min la tih dâwn ngei hi,” a ti a. A sawi zêl a, “Thu dik ka hrilh a che u, zâwlnei tu mah ama khaw lama miten an lâwm ngai lo. Dik tak chuan, Elija pawh kha, a dam laia kum thum leh thla ruk khua a khena, khawvêla ṭâm nasa tak tlâk lai khân, Israel ramah hmeithai tam tak an awm na a, an zînga tu hnênah mah tirh a ni lo va. Sidon rama Zarefat khaw hmeithai pakhat hnênah chauh tirh a nih kha. Zâwlnei Elisa dam lai pawh khân Israel ramah phâr tam tak an awm na a, an zîngah, Suria mi Naamana chauh lo chu tu mah dang tihthianghlim an nih loh kha,” a ti a. Chûng thu chu an hriatin sunagog-a awm zawng zawng chu an thinur ta êm êm a; an thawk lawk a, khua ata chu an nam chhuak a, an khaw kiang khâma nam thlâk tûrin an hruai ta a; nimahsela, ani chuan mipui a tâwn tlang a, a kal ta daih a. Galili rama khaw pakhat Kapernaum-ah a zuk kal a. Sabat ni chuan mite chu a zirtîr a. Thunei taka a zirtîr avâng chuan a zirtîrna chu mak an ti hle a. Sunagog-ah chuan ramhuai bawlhhlawh thlarau pai a awm a, ring takin a au ta chiam a, “E! Nazaret Isu, kan chungthu-ah rawn inrawlh i tum elo? Min tiboral tûrin i lo kal em ni? Tu nge i nih ka hria, Pathian Mi Thianghlim chu i ni,” tiin. Isua chuan a hau va, “Ngawi la, a chhûng ata lo chhuak rawh,” a ti a. Ramhuai chuan leiah a tithlu a, amah tina lovin a chhuahsan ta a. An za chuan mak an ti a, “Hei hi eng thu nge ni ta ngai? Thuneihna leh thiltihtheihna hmangin thlarau bawlhhlawhte thu a pe a, an chhuah tâk mai hi,” an ti a. Tichuan, chumi bial hmun tinah a chanchin chu a thang ta a. Tin, a tho va, sunagog aṭang chuan Simona inah a lût a. Simona pizawn chu a khua a lo sik hluah mai a, a tân an lo ngensak a. A kiangah a va ding a, khawsik chu a hau va, a reh ta a; tichuan, a tho thei ta nghâl a, chaw ei a siamsak ta a. Ni tlâk lai vêl chuan natna hrang hranga na, damlo nei apiang chuan an rawn hruai a; an zaa chungah kut a lo nghat ṭheuh va, a tidam zêl a. Ramhuaite pawh, “Pathian Fapa i ni,” tia auvin mi tam tak kawchhûng ata an lo chhuak bawk a; anni chu Isuan a hau va. Krista a ni tih an hriat avângin an ṭawng a phal lo. A tûk zîngah chuan hmun fianrialah a kal a, mipuite chuan an zawng a, a hnênah an lo kal a, anmahni a kalsan loh nân chelh an tum a. Nimahsela, ani chuan, “Khaw dangahte pawh Pathian ram Chanchin Ṭha hi hril tûr ka ni asin; chumi avânga tirh ka ni si a,” a ti a. Tichuan, Judai rama sunagog-ahte chuan a lût a, thu a hril vêl ta a. Ni khat chu Pathian thu ngaithla tûra mipuiin an bâwr huai huai lai chuan Genesaret dîl kamah a ding a; dîl kama lawng pahnih awm chu a hmu a, sangha mantute chu an chhuak a, an lênte an sûksan a ni. Lawng pakhat, Simona ta zâwkah chuan a chuang a; a hnênah vaukam ata dîla tlêma tawlh luh deuh a dîl a. Lawnga ṭhu chung chuan mipui chu a zirtîr ta a. A thu sawi zawhah chuan, Simona hnênah, “Li thûk lam pan la sangha man tûrin in lênte dêng rawh u,” a ti a. Simona chuan, “Hotupa, tlaivâr zakin kan dêng tawh a, eng mah kan man lo asin; nimahsela, i thuin lênte chu ka han dêng ang e,” tiin a chhâng a. A han den chuan sangha an khuh ta ṭeuh mai a, an lênte pawh chu a ṭet dâwn ta mai a. Tichuan, lawng danga an pâwlpui awmte chu anmahni pui tûrin an hui a. Anni chu an lo kal a, lawng pahnih chu pil lek lek khawpin an chhûng khat ve ve a. Chu chu Simon Petera chuan a hmuhin Isua ke bulah chuan a kûn a, “Lalpa, min kalsan rawh, mi sual ka nih hi,” a ti a; an sangha man chu ani leh a ṭhiante chuan mak an ti êm a ni. Simona pâwla mi, Zebedaia fapa Jakoba leh Johana te pawh chuan mak an ti êm êm a. Isuan Simona hnênah, “Hlau suh, tûna chinah zawng mihring i man tawh ang,” a ti a. An lawngte chu vaukamah an kar kai a, engkim kalsanin amah chu an zui ta a. Vawi khat chu khaw pakhata a awm laiin pa pakhat, a taksa puma phâr hian Isua chu a hmu a, bawkkhupin tihdam a dîl a, “Lalpa, i duh chuan mi tithianghlim thei e,” a ti a. Ani chuan a han ban a, a dek a, “Ka duh e, lo thianghlim tawh ang che,” a ti a. A phâr chu a lo dam ta nghâl a. A hnênah chuan, “Tu mah hrilh suh; amaherawhchu, puithiam va inentîr la, i dam ngei tih miten an hriat theih nân Mosia thupêk angin i inthen nân thil hlân rawh,” a ti a. Nimahsela, a chanchin chu a thang zual ta sauh va; mipui tam tak a thu hriat duh leh an nâte tihdamsak duhin an lo kal khâwm tup tup a. Ani erawh chu fianrialah a ṭawngṭai ṭhîn. Chûng lai chuan ni khat chu mite a zirtîr a. An zîngah chuan Galili leh Judai ram khaw tin aṭang leh Jerusalem aṭangtea lo kal khâwm Farisai-te leh Dân zirtîrtute chu an awm ve a; tin, mi tihdam nân Lalpa thiltihtheihnain amahah chuan a thawk a. Chutih lai chuan tlangvâlhovin zeng pakhat, a mutna chawpin an rawn zâwn a; zâwn luha a hmaa dah an tum a ni; nimahsela, mipui avâng chuan zâwn luh ngaihna a awm lo va; in chungah an lâwn a, in chung chu an phawk a, chuta ṭang chuan a mutna nên a laia Isua hma takah chuan hruiin an thlâk thla a. An rinzia chu a hmuhin a hnênah, “Ṭhiana, i sualte ngaihdam a ni ta e,” a ti a. Dân zirtîrtute leh Farisai-te chuan, “Pathian pawisawi hi tu nge maw a nih le? Pathian chauh lo chuan tu nge sual ngaidam thei?” an inti hlawm a. Tichuan, Isuan an thu sawi chu a hriatin an hnênah, “Engati nge rilrua chutianga in ngaihtuah? ‘I sualte ngaihdam a ni ta,’ tih nge awl a, ‘Tho la, kêin kal tawh rawh,’ tih hi? Khawvêlah hian Mihring Fapa hian sual a ngaidam thei tih ka han hriattîr ang che u,” a ti a; zeng hnênah chuan, “Tho la, i mutna kha la la, i inah haw rawh ka ti a che,” a ti a. An mit hmuhah chuan a tho ta mai a, a mutna chu a la a, Pathian fak chung zêlin a in lamah a haw ta a. An za chuan mak an ti êm êm a, Pathian an fak a, “Vawiin chu thil mak dang lam tak kan hmu alâwm,” an ti a, an hlau hle a. Chumi zawh chuan a chhuak a, chhiah khawnna hmuna ṭhu, chhiahkhawntu pakhat, a hming Levia chu Isuan a hmu a, “Mi zui rawh,” a ti a. Ani chu a tho va, engkim kalsanin a zui ta a. Tin, Levia chuan a inah ruai ropui tak a ṭhehsak a; tichuan, chhiahkhawntute leh mi dang tam takin chawhlui chu an rawn kîlpui hlawm a. Farisai-te chu Dân zirtîrtute nên chuan a zirtîrte chungah an lo phunnawi a, “Engah nge chhiahkhawntute leh mi sualte nêna in eia in inho le?” an ti a. Isua chuan a chhang a, “Mi hrisêlten daktor an ngai lo va, mi bawrhsâwmten an ngai zâwk a ni. Mi felte lam tûr ni lovin, an sim theih nân mi sualte lam tûra lo kal ka ni zâwk,” a ti a. Anni chuan a hnênah, “Johana zirtîrten chaw nghei an chîng hle a, an ṭawngṭai chhên bawk a; chutiang bawkin Farisai zirtîrte pawhin an chîng a, i hote lah hian an eiin an in zêl mai si,” an ti a. Isuan an hnênah, “An zînga moneitu a awm chhûng chuan mo hruaitute chu chaw in ngheitîr ngai em ni? Moneitu chu an hnên ata hruai bo hun a lo la awm ang; chûng hunah erawh chuan an la nghei ve ang chu,” a ti a. An hnênah chuan tehkhin thu pawh a sawi a, “Tu man puan thar pawt thlain puan hluiah an bel ngai lo, bel teh rêng pawh ni se, a thar chu an tithlêr chhe mai mai a, a thar them lahin a hlui chu a rem bawk hek lo vang. Uain thar pawh tu man savun ip hluiah an thun ngai hek lo, thun se, uain thar chuan savun ip chu a tâwn keh ang a, a baw ral ang a, savun ip pawh chu a chhia ang. Uain thar chu savun ip tharahte thun zâwk tûr a ni. Tin, an in ṭhan uain an in hnuin a thar an duh ngai lo, ‘a hlui nge nge a ni tui,’ an ti ṭhîn,” a ti a. Sabat vawi khat pawh buhpui hmunahte a kal tlang a; a zirtîrte chuan a vui an thliak a, an kutin an nuai fai a, an bâr a. Farisai tute emaw chuan, “Engati nge Sabat nia tih thiang lo chu in tih ni?” an ti a. Isuan anni chu a chhâng a, “A ṭhiante nên an rilṭâm laia Davida thil tih kha in chhiar lâwm ni? Pathian inah a lût a, puithiamte chauh ei thian chhangdah chu a la a, a ei a, a ṭhiante pawh a pêk ve thu kha?” a ti a. An hnênah, “Mihring Fapa hi Sabat ni Lalpa a ni,” a ti bawk a. Sabat ni dang lehah chuan sunagog-ah a lût a, a zirtîr a. Chutah chuan mi pakhat kut ding lam zeng a awm ve a. Dân zirtîrtute leh Farisai-te chuan a hêkna tûr an hmuh theih nân Sabat nia a tihdam dâwn leh dâwn loh an lo châng a. An rilru chu a hriatin kut zeng hnênah chuan, “Tho la, a laiah hian ding chhuak teh,” a ti a. Ani chu a tho va, a laiah chuan a ding chhuak a. Isuan an hnênah, “Sabat niah tihṭhat nge thiang tihchhiat, mi chhandam nge thiang tihhlum - ka zâwt a che u,” a ti a. Tin, an za chuan a han en vêl a, zeng hnênah chuan, “I kut phar rawh,” a ti a. A han phar a, a kut chu a lo dam ta a. Anniho chu thin tâwtin an puakkeh lek lek a, Isua chu engtia tih tûr nge tih an inrâwn ta a. Chutih lai vêl chuan zan khat chu tlângah ṭawngṭai tûrin a kal a. Pathian hnênah a ṭawngṭai zânkhua a. Khua a lo vâr chuan a zirtîrte chu a ko va, an zîng ata sâwm leh pahnih a thlang a, an hmingah tirhkoh a vuah a; Simona, Petera a vuah te, a unau Andria te, Jakoba leh Johana te, Filipa leh Bartholomaia te, Mathaia leh Thoma te, Alfaia fapa Jakoba te, Simona, Zealota an vuah te, Jakoba fapa Juda te, a mantîrtu ni ta Juda Iskariota teho chu an ni. An rual chuan a chhuk a, phaizâwlah a ding a. Chutah chuan a zirtîrte tam tak leh Judai ram zawng zawng ata te, Jerusalem ata te, Tura leh Sidon vêl tuifinriat kam ata te mipui nasa tak, a thu ngaihthlâk duh leh an nâte tihdam beiseia lo kalte chu an awm a; thlarau bawlhhlawh sawisakte pawh an lo dam ta a. Mipui zawng zawng chuan amah deh an tum a, a hnên ata thiltihtheihna a chhuak a, mi tin a tidam zêl si a. Tin, a hawi vêl a, a zirtîrte chu a en a: Pachhiate u, in chan a ṭha e, Pathian ram in ta a ni si a. Tûna rilṭâmte u, in chan a ṭha e, in la tlai dâwn si a, Tûna ṭapte u, in chan a ṭha e, in la nui dâwn si a. “Mihring Fapa avânga miten an huat che u a, an ensan che u a, an hau che ua, hmingchhe taka an hnâwl hunah che u chuan in chan a va ṭha dâwn êm. Chumi hunah chuan lâwm ula, hlimin zuang ang che u, ngai teh u, vânah in lâwmman a awm hnêm si a; in chunga an tih ang bawkin an thlahtute pawhin zâwlneite chungah an tih ṭhin kha. “Nangni hausate u, in chung a pik e, nuam in chên zo dêr tawh si a; “Tûna tlai puarte u, in chung a pik e, in ril a la ṭâm dâwn si a; Tûna nuite u, in chung a pik e, lusûna lungngaiin in la ṭap dâwn si a. “Mi zawng zawngin an fak hle che u chuan in va khawngaihthlâk dâwn êm; chutiang bawkin an thlahtuten zâwlnei derte an fak ṭhîn. “Ka thu ngaithlatute u, nangni zawng ka ti a che u, in hmêlmate chu hmangaih ula, a hawtu che u chungah chuan ṭhat chhuah ula, ânchhe lawhtu che u chu malsâwmna dîlsak ula, a tiduhdahtu che u chu ṭawngṭaisak rawh u. “I biang lehlam bêngtu hnênah a lehlam pawh dawh rawh. I puan lâksaktu che chuan i kawr a lâk pawh hnial suh. A dîltu apiang che chu pe la, i sum lâksaktu che chu dîl leh tawh suh. In chungah miin ti se in tih ang ngeiin mi chungah pawh ti ve rawh u. “Nangmahni hmangaihtu chauh in hmangaihin eng nge mi sualte aia in danglam bîkna? Anni pawhin anmahni hmangaihtute chu an hmangaih ṭhîn asin. In chunga ṭhate lakah chauh ṭhat in chhuah hian eng nge mi sualte aia in danglam bîkna? Anni pawhin chutiang bawkin an ti ṭhîn asin. Hmuh kîr leh beisei theihna hnên chauhva thil in pûktîr hian eng nge mi sualte aia in danglam bîkna? Anni pawhin a ngai hmu kîr leh tûr chuan mi sualte hnênah an pûktîr ṭhîn asin. In hmêlmate chu hmangaih zâwk rawh u, an chungah thil ṭha ti ula, hmuh kîr leh beisei kher lovin pûktîr rawh u; tichuan, lâwmman tam tak in hmu ang a, Chungnungbera fate in ni dâwn nia; Ani zawngin lâwm nachâng hre lote leh mi sualte pawh a khawngaih vek a ni. In Pain mi a khawngaih ṭhîn ang bawkin nangni pawhin mi khawngaih ṭhîn rawh u. “Mi sawisêl suh u; tichuan, sawisêl in ni lo vang; tu mah thiamlovah ruat mai hek suh u; tichuan, thiam loh in ni lo vang; ngaidam rawh u; tichuan, ngaihdam in ni ang. Pe rawh u; tichuan, pêk in ni ang; ṭhahnemngai taka teh chhuaka, beng mukin, sâwi liam zawih zawih khawpin in ângchhûngah pêk in ni ang. Tehna in hman ngei khân tehsak in ni ang,” a ti a. Tin, an hnênah tehkhin thu a sawi a, “Mitdelin mitdel vêk a hruai thei dâwn êm ni? Khuarkhurumah an tla dûn mai lâwng maw? Zirlai chu an zirtîrtu chungah an awm lo, an zir zawhah erawh chuan an zirtîrtu an tluk tawh ang. “Engtizia nge mahni mita thingtum awm chu hre si lovin i unau mita thil tê tak tê awm chu i hmuh ni? Mahni mita thingtum awm chu ngaimawh si lovin, i unau hnênah, ‘Unau, i mita thil tê tak tê kha mi lâk chhuahtîr rawh,’ engtin nge i tih theih le? Mi vervêk, i mita thingtum awm kha la chhuak hmasa zet rawh; chutichuan, i unau mit ata thil tê tak tê lâk chhuah tûr awm chu fiah takin i hmu thei ang. “Thing ṭha a rah chhe ngai lo, thing chhia lah a rah ṭha ngai hek lo. Thing chu a rah aṭangin eng ang nge a nih a hriat a ni. Tu man hlîng bukah theipui an lo ngai lo, hnimhlîngnei kûngah pawh grep rah an lo ngai bawk hek lo. Mi ṭha chuan a thinlung robâwm ṭha ata thil ṭhate a phawrh chhuak ṭhîn, mi sual erawh chuan a thinlung robâwm ṭha lo ata thil ṭha lote a phawrh chhuak ṭhîn; thinlunga liam khawpa khat hi a ni kâin in sawi chhuah ṭhin. “‘Lalpa, Lalpa’ mi ti siin engati nge ka thu in zawm loh? Tu pawh ka hnêna lo kala, ka thu hriaa, zâwmtu chu tu ang nge a nih ka hrilh ang che u. In satu, thûk taka lei laia, lungpui chunga lungphûm remtu ang chu a ni: in chu tuilianin rawn hrût mah se, a tinghîng thei lo, a sak ngun êm avângin. Amaherawhchu, ka thu hriaa zâwm lo chu lungphûm nei lova lei chung maia in satu ang chu a ni; in chu tuilianin a rawn hrût a, a chhe ta nghâl a, a tlu sawp rem rum mai a ni,” a ti a. Mite hriat atâna a duh ang a sawi zawh chuan Kapernaumah a lût ta a. Sipai za hotu pakhat bawih duh tak a dam lo va, a thi lek lek a. Isua chanchin a lo hriat chuan a bawih tidam tûra ngên tûrin Juda upate a tîr a. Anni chuan Isua hnên an va thleng a, ṭhahnemngai takin an ngên a, “Hei hi i tihsak tlâk a ni e, kan hnam hi a hmangaih a, sunagog pawh min saksak a ni,” an ti a. Tichuan, Isua chu an rualin a kal ve ta a. In a thlen dâwn chuan sipai za hotu chuan a ṭhiante a tîr a, “Lalpa, lo kal harsa duh suh, ka in chhûng i luhna tlâk a ni lo va, i hnêna lo kal tlâkah pawh ka inngai lo va ni; thu pe la, ka nau chu a dam mai ang. Kei pawh mi thuhnuaia awm ka ni a, ka hnuaiah sipaite an awm leh chhâwng a, ‘Kal rawh,’ ka tiha chu a kal a, ‘lo haw rawh,’ ka tiha chu a lo haw mai a, ka bawih pawhin ‘hei hi ti rawh,’ ka tih chu a ti mai ṭhîn,” a ti a. Tin, Isuan chu chu a hriatin chu mi chu mak a ti hle a, a lehhawi a, a zuitu mipui hnênah, “Ka hrilh a che u, heti êma ring nasa hi Israel-te zîngah tu mah ka hmu lo,” a ti a. Mi tirhte kha inah an va haw leh chuan bawih chu damin an va hmu a. A hnu lawkah khaw pakhat Nain an tihah chuan a kal a, a zirtîrte leh mipui nasa tak an kal ve a. Khaw kulh kawngka a thlen dâwn chuan, ngai teh, mitthi an rawn zâwn chhuak a; a nu chu hmeithai a ni a, a fapa mal a ni. Khuaa mi tam tak pawh an lo kal ve a. Lalpa chuan a han hmuhin chu nu chu a khawngaih ta êm êm a, “Ṭap tawh suh,” a ti a. A va hnaih a, hlâng chu a chelh a, a zâwntute pawh chu an ding ta a; “Tlangvâl, tho rawh, ka ti a che,” a ti a. Mitthi chu a ṭhuchhuak a, a lo ṭawng ta a, a nu hnênah chuan a pe a. Mi zawng zawngin an hlau ta a, Pathian an fak a, “Kan zîngah zâwlnei ropui tak a lo awm ta a nih hi,” an ti a; “Pathianin a mite a rawn tlawh ta a nih hi,” an ti bawk a. Chûng thu chu Judai ram zawng zawngah leh a kiang vêl ram tinah a thang chhuak ta a. Chûng thu zawng zawng chu Johana zirtîrte chuan an pu chu an hrilh a. Johana chuan a zirtîr pahnih a ko va, Lalpa hnênah chuan a tîr a, “Lo kal tûra chu i ni nge, mi dang kan la nghâk ang?” tiin. Chu mite chu Isua hnên an va thleng a, “Baptistu Johanan, ‘Lo kal tûra i ni nge mi dang kan la nghâk ang?’ tiin i hnênah min tîr a ni,” an ti a. Chutih lai tak chuan Isuan mi tam tak, natna tuar te, hripui vei te, thlarau bawlhhlawh paite a tidam a, mitdel tam tak pawh an mit a lo tihvârsak a. Tichuan, anni chu a chhâng a, “Kal leh ta ula, in thil hmuh leh in hriatte hi Johana chu va hrilh tawh u; mitdelte chu an mit a vâr a, kebaite kein an kal a, phârte an thianghlim a, bengngawngte pawh an beng a vâr a, mitthite kaihthawh an ni ta a, pachhiate hnênah Chanchin Ṭha hrilh a ni ta. Tu pawh ka laka beidawng lo chu an nihlawh e,” a ti a. Johana mi tirhte an haw hnu chuan mipui hnênah Johana chungchâng a sawi ta a. “Eng ennawm en tûrin nge thlalêrah in kal? Thli chhêm nghîn luang maw? A nih leh tu en tûrin nge in kal? Puan nêm sina inchei maw? Puan nêm sin leh mi neinungte chu lal inah asin an awm. Eng ber en tûrin nge in kal? Zâwlnei en tûrin maw? A nih ngei kha; ka hrilh a che u, ani chu zâwlnei ai pawha ropui zâwk a ni. He mi hi alâwm: ‘Ngai teh, ka tirhkoh i hmaah ka tîr a, Ani chuan i hmaah i kawng a buatsaih ang,’ tia a chanchin an ziak kha. Ka hrilh a che u, hmeichhe hrin zîngah Johana aia ropui zâwk an awm lo; amaherawhchu, Pathian rama mi tê ber pawh ani ai chuan a ropui zâwk,” a ti a. Vântlângho leh chhiahkhawntute chuan Johana thu an hriatin Pathian thiltih dik tak chu pawmin a baptisma an chang hlawm a; Farisai-te leh Dân hremite erawh chuan baptisma chu an chang ve duh lo, anmahni tâna Pathian remruat chu an duh lo a ni. Isuan, “Tûnlai mite hi eng nên nge ka tehkhin ang? Eng ang nge an nih? Naupang dâwrpui hmuna ṭhu-a, inau tawna, ‘Phênglâwng kan tumsak che u a, in lâm lo va, kan ṭap vak a, in ṭap chuang bawk si lo,’ intite ang hi an ni. Baptistu Johana chu a lo kal a, chhang a ei lo va, uain a in hek lo va, nangnin ‘ramhuai a zâwl a nih hi,’ in ti a. Mihring Fapa a lo kal a, a eiin a in a, nangnin, ‘En teh u, mi vir, uain heh mi, chhiahkhawntute leh mi sualte ṭhian saw,’ in ti leh si a. Nimahsela, Pathian finna dikzia chu a pawmtuteah a lang chhuak a ni,” a ti a. Farisai zînga pakhatin chaw eiah a sâwm a, Farisai inah chuan a lût a, chaw a kîl a. Ngai teh, chumi khuaa hmeichhe sual pakhatin Farisai inah chaw a ei tih a hriat chuan alabasta bûrin hriak rimtui a rawn keng a. A hnungah, a ke bulah chuan ṭap chungin a ding a; a mittui chuan a ke chu a far huh a, a sam chuan a zu hru a, a ke chu a fâwp ta ngawih ngawih a, hriak rimtui chu a leih a. A sâwmtu Farisai chuan a hmuhin, “He mi hi zâwlnei ni tak tak se chu a dektu hmeichhia hi tu nge a niha, eng ang mi sual nge a nih hi a hre tûr,” a ti rilru a. Isuan a hnênah, “Simon, i hnênah thu kam khat sawi tûr ka nei,” a ti a. Ani chuan, “Sawi ta che, Zirtîrtu,” a ti a. Isuan, “Mi pahnihin tangka pûktîrtu hnênah lei an ba a, pakhat chuan duli zanga, pakhat chuan duli sawmnga. Rulhna an neih loh avângin a ngaidam ve ve ta a. Chutichuan, tu zâwk chuan nge ani chu hmangaih zâwk ang?” a ti a. Simona chuan, “A ngaihdam tam zâwk chuan a ni ang chu,” a ti a. Ani chuan, “I ti dik e,” a ti a. Hmeichhe lam chu a hawi a, Simona hnênah, “He hmeichhia hi i hmu êm? I inah ka lo lût a, nangin ka ke silna tûr tui mi pe lo va, ani hi chuan a mittuiin ka ke a tihuh a, a samin a hru a. Nangin mi lo fâwp lo va, ani hi chuan a lo luh tirh ata ka ke fawh a bâng lo. Nangin ka luah hriak mi thih lo va, ani erawh hi chuan hriak rimtui a leih a ni. Chuvângin, ka hrilh a che, a sual zawng zawng chu ngaihdam a ni ta, ani pawhin heti tak hian a hmangaih a ni. Ngaihdamsak nêp chuan a hmangaih nêp ṭhîn,” a ti a. Hmeichhe hnênah chuan, “I sualte ngaihdam a ni ta,” a ti a. A chaw kîlpuite chuan, “Sualte pawh ngaidam ta mai chu tu nge maw a nih le?” an inti a. Tin, anin hmeichhe hnênah chuan, “I rinna hian a chhandam che a ni, thlamuang takin kal rawh,” a ti a. Chûng hnu lawkah chuan khaw lian leh khaw tête fangin Pathian ram Chanchin Ṭha chu hrilin a puang zêl a; Sâwmpahnihte pawh an tel ṭhîn. Nu ṭhenkhat, thlarau bawlhhlawh pai tihdamte leh na dam lehte pawh an tel bawk; Magdala khaw mi, a kawchhûng ata ramhuai pasarih chhuak ta Mari an tih te, Heroda sum enkawltu Chuza nupui Joani te, Susani te leh mi dang tam takte chu; chûngte chuan anmahni neihin Isua leh a hote rawng an bâwlsak ṭhîn. Tin, mipui nasa tak an lo pung khâwm a, khaw tin ata miin an rawn pan huai huai a; tehkhin thu hmangin thu a lo hrilh a. “Buh chi thehtu chu buh chi thehin a feh a; chutia a han theh chuan a ṭhen kawngah a tla a, miten an rap mai mai a, chunglêng savaten an tlân zo ta thuai a. A ṭhen pialtlêp chungah a tla a, ṭo chu a han ṭo thuai a; mahse, a hnâwn loh avângin a râwp ta mai a. A ṭhen hnimhlîngnei zîngah a tla a, hnim chuan a ṭhan khalh a, a dîp ral ta a. A ṭhen lei ṭhaah a tla a, a lo ṭhang lian a, a lêt za-in a rah ta a,” a ti a. Chûng thu chu a sawi a, “Ngaihthlâkna beng nei chuan ngaithla ngun rawh se,” tiin a au va. A zirtîrte chuan chu tehkhin thu chu eng tihna nge tih an zâwt a. Ani chuan, “Pathian ram thu ril chu nangni hriat atâna tih a ni a, mi dangte tân erawh chuan thu harsa a ni; hmu reng mah se an hmuh fiah theih lohva, hre mah se an hriatthiam loh nân. “Tehkhin thu awmzia chu hei hi a ni: Buh chi chu Pathian thu hi a ni. Kawnga mi chu thu ngaithlatute an ni, an awih lohva chhandam an nih loh nân Diabola a lo kal a, an thinlunga thu chu a lâk zawhsak ṭhîn. Pialtlêp chunga mi chu, an hriat veleh thu chu lâwm taka pawm tate hi an ni; nimahsela, zung rêng an kai lo va, rei lo tê zawng an awih mai a, thlêmna an han tâwk hlek a, an tlûksan leh mai ṭhîn. Hnimhlîngnei zînga tlate chu thu chu an hria a, a han ṭhang ve a; mahse, dam chhûng khawsak engtona leh nawmsak duhna chuan a rawn dîp a, rah puitling a chhuah ve ta lo va ni. Lei ṭhaa mi chu hêngte hi an ni, thu chu hriaa, rilru dik leh ṭha pua, vawng tlata, bei hrâm hrâma rah chhuah tate hi an ni. “Tu man an khâwnvâr hâl chu bêlin an khuh ngai lo, khum hnuaiah pawh an dah ngai hek lo, a lût apiangin a êng an hmuh theih nân a dahnaah an dah zâwk ṭhîn. Eng mah puan leh loh tûra zêp a awm lo, hriat loh tûr leh tihlan loh tûrin eng mah thuhrûk a awm hek lo. Chutichuan, in thu dawnsawn dânah fîmkhur rawh u, a nei apiang chu an pêk belhchhah ang a, a nei lo chu neia a inhriat chhun pawh an lâksak ang,” a ti a. A nu leh a unaute pawh a hnênah an lo kal a; nimahsela, mipui avângin an pawh thei lo va. “I nu leh i unauten hmuh tum chein pâwnah sâwn an nghâk a che,” tiin an hrilh a. Ani chuan a chhâng a, “Pathian thu hriaa zâwmte hi ka nu leh ka unaute an ni e,” a ti a. Ni khat chu a zirtîrte nên lawngah an chuang a, an hnênah, “Dîl râl lehlamah sâwn i kai ang u,” a ti a, an chhuak ta a. Chutia an kal lai chuan a lo muhîl a, dîlah chuan thlipui a lo tleh chhuk phut a, an lawng chu tuiin a khat dâwn ta mai a, an ngaihtuahawm ta hle a. A hnênah an kal a, an kai tho va, “Hotupa, hotupa, kan boral dâwn e,” an ti a. Ani chu a lo tho va, thli leh tuifâwn chu a hau va; a bâng a, a reh ta ṭhuap a. An hnênah chuan, “Khawiah nge in rinna?” a ti a. An hlau va, mak an ti êm êm a, “He mi hi tu nge ni le? Thli leh tui lam pawh thu a pe a, an awih mai hi!” an inti hlawm a. Galili ram zâwn Gerasin mite ramah chuan an va kai a. Khawmuala a chhuah chuan khuaa mi, ramhuai man pakhat hian a rawn pan a. Chu mi chu rei tawh tak puan sin lovin inah pawh awm lovin thlânahte a chêng ṭhîn a. Isua a han hmuh chuan a au va, a hmaah a bawkkhup a, ring takin “Isu, Pathian chungnungbera Fapa, ka chungthu-ah rawn inrawlh i tum elo? Mi nghaisa lul lo tûrin ka ngên a che,” tiin a au va. Chu mi kawchhûnga thlarau bawlhhlawh chu chhuak tûrin thu a lo pe tawh si a. Ramhuai chuan vawi tam tak a buan tawh ṭhîn a, khaidiat te, kawlte an buntîr a, an vêng ṭhîn a; nimahsela, an hlinnate chu a tichat a, ramhuai chuan thlalêrahte a hruai ṭhîn. Tin, Isuan, “Tu nge i hming?” a ti a. Ani chuan “Sângruka” a ti a, a chhûnga ramhuai lût chu an tam êm vâng a ni. Leilâwta paih thla lo tûrin amah an ngên chûl a. Chumi tlângah chuan vawk rual, tam tak an tla a, an kawchhûnga luh phal tûrin a hnênah an ngên a; ani chuan a phalsak ta a. Ramhuaite chuan chu mi chu an chhuahsan a, vawk kawchhûngah chuan an lût a, vawk rual chu khâm kovah chuan an tlân liam a, tuiah an tla hlum ta a. A enkawltute chuan thil lo thleng chu an hmuhin an tlânchhia a, khuaa mite leh a chhehvêla mite chu an hrilh a. Tichuan, eng thil nge lo thleng ta tih en tûrin mite chu an thawk chhuak a, Isua hnên an lo thlen chuan ramhuai chhuahsan tâka kha puan sina, rilru ngai puin Isua ke bula a ṭhu chu an rawn hmu a, hlauhawm an ti êm êm a. Chûng thil hmutute chuan ramhuai man lo dam tâk dân chu an lo hrilh bawk a. Gerasin rama mi zawng zawng chuan hlauhawm an tih êm avâng chuan an hnên ata chhuak tûrin an ngên a; tichuan, ani chu lawngah a chuang a, kîr leh a tum a. Ramhuai chhuahsana khân a hnêna tel ve zêl a ngên a. Nimahsela, Isuan, “I in lamah haw la, Pathianin thil a tihsak che hi va hril zâwk tawh,” tiin a kirtîr ta a. Tichuan, a kal a, khawpui chhûng zawng zawngah chuan Isuan thil a tihsak chu a va tlângaupui ta a. Tin, Isua lo kîr leh chu mipuite chuan an lo nghâk ṭuai a, an lo lâwm a. Ngai teh, mi pakhat, a hming Jaira, sunagog hotu chu a lo kal a, Isua ke bulah a bawkkhup a, a fanu mal kum sâwm leh pahnih vêl mi chu thi chhâwnga a lum reng avângin a ina kalah a ngên a. A kal ta a, innêk tûlh tûlh khawpa mipui nasain an zui a. Tin, hmeichhe pakhat kum sâwm leh pahnih thi pût tawh, a sum neih zawng zawng pawh daktor laka sêng zo tawh, tu man an tihdam theih loh chu a hnungah a lo kal a, a puan fêm chu a rawn dek a, chawplehchilhin a thi pût chu a reh ta nghâl a. Isuan, “Mi dek kha tu nge ni?” a ti a. ‘Kei chu ka ni lo’ an ti ṭheuh va, Peteran “Hotupa, mipuiin an zîm huai huai che a, an nêk nuk nuk che alâwm,” a ti a. Nimahsela Isuan, “Tu emaw zawngin mi dek a ni, thiltihtheihna ka chhûng ata a chhuak tih ka hria a ni,” a ti a. Tin, hmeichhia chuan inthup rual a ni ta lo tih a hriatin, khûr chungin a lo kal a, a hmaah a bawkkhup a, a deh chhan leh chawplehchilha a dam tâk mai thu mi zawng zawng hmaah a hrilh ta a. Ani chuan, “Ka fanu, i rinna hi i dam phah a ni e, thlamuang takin kal rawh,” a ti a. A la ṭawng lai mêkin Jaira in ata mi pakhat a lo kal a. “I fanu a thi ta, zirtîrtu hi tihah duh suh,” a rawn ti a. Isuan a lo hria a. Jaira hnênah, “Hlau suh, ring mai la, a dam leh ang,” a ti a. In chu a va thlen chuan Petera te, Johana te, Jakoba te leh naupang nu leh pa chauh lo chu tu ma luh ve a phal lo va. An za chuan an âwm chûm vak vakin an lo ṭah tuar tuar a. Nimahsela, ani chuan, “Ṭap suh u, a thi lo ve, a muhîl a ni zâwk,” a ti a. A thi tawh ngei tih an hriat avângin an nuihsan mai a. Isua chuan a kut a chelh a, “Mami, tho rawh,” a ti a, a ko va. A thlarau chu a lo kîr leh a, a tho ta nghâl a, “Ei tûr eng emaw pe rawh u,” a ti a. A nu leh pa chuan mak an ti êm êm a; nimahsela, thil awm dân chu mi dang hrilh a khap tlat a. Sâwmpahnihte chu a ko khâwm a, ramhuai tin rêng chunga thiltihtheihna leh thuneihna a pe a, nâte tihdam theihna pawh a pe bawk a; Pathian ram thu hril tûr leh damlote tidam tûrin a tîr chhuak ta a. An hnênah chuan, “Zin kawng atân tiang te, iptê te, chhang te, tangka te eng mah keng suh u; kawr pahnih pawh keng suh u. In kalna apiangah in thlen in ngaiah thleng reng ula, chuta ṭang ngei chuan chhuak leh ang che u. Nangni lo ngaihsak lo che u khua chu, in chhuahsan hunah an tihdik lohzia hriattîr nân in kephaha vaivut chu thing thla ang che u,” a ti a. Tichuan, an chhuak ta a, khaw tin an fang a, hmun tinah Chanchin Ṭha hrilin mite an tidam zêl a. Lal Heroda chuan chûng thil chu a lo hre ve a. Ṭhenkhatin, “Johana kha mitthi zîng ata a tho leh ta a ni,” te an ti a; a ṭhenin, “Elija a lo inlâr ta a ni,” te an ti a; a ṭhenin, “Hmânlai zâwlnei tu emaw kha a lo tho leh ta a ni,” te an tih avâng chuan a ngaihna a hre lo va. Heroda chuan, “Johana chu a lu ka tansak tawh kha! A chanchin heti kauva nasa ka hriat hi tu nge ni ta?” a ti a, amah chu hmuh a tum ta a. Tirhkohte kha an lo haw a, a hnênah an thiltihte an rawn sawi a. Anni chu a hruai a, Bethsaida an tih khuaah chuan a kal hranpui ta a. Nimahsela, mipuiho chuan an hriatin an zui ve ta a. Anni chu a lo lâwm a, Pathian ram thu a lo hrilh a, tihdam ngai apiang a tidam a. Ni a tlâk dâwn lai chuan Sâwmpahnihte chu an lo kal a, “Mipuiho hi kan kiang vêl khuaahte leh lovahte thlen in leh ei tûr zawngin kaltîr ta che, hmun thlalêra awm kan nih hi,” an ti a. Ani erawh chuan, “Nangmahnin ei tûr pe rawh u,” a ti a. Anni chuan, “Chhang panga leh sangha pahnih bak kan nei hlei nêm - hêng mi zawng zawng ei tûr kan va lei ngawt loh chuan,” an ti a. Patling ngawt pawh sângnga lai an ni si a. Ani chuan zirtîrte hnênah, “A pâwl pâwlin ṭhuttîr rawh u, sawmnga vêl zêlin,” a ti a. Chutiang chuan an ti a, an ṭhuttîr ta vek a. Chhang panga leh sangha pahnih chu a la a, vân lam enin malsâwmna a sawi a, a phel a, mipui hnêna sem tûrin zirtîrte chu a pe a. An zavai chuan an ei a, an tlai ta ṭheuh va; an sem bâng chu an la khâwm a, bâwm sâwm leh pahnih khat a la ni. Vawi khat chu fianriala a ṭawngṭai laiin a zirtîrte pawh an awm ve a, an hnênah, “Mipuiten tu nge nia min sawi?” tiin a zâwt a. Anni chuan, “ ‘Baptistu Johana,’ ti che an awm a, a ṭhenin ‘Elija,’ an ti che a, ṭhenkhat erawh chuan ‘hmânlai zâwlneite zînga tu emaw tholeh ta,’ ni âwmin an sawi che,” tiin an chhâng a. Ani chuan, “A nih, nangnin tu nge nia mi hriat?” a ti a. Petera chuan, “Pathian Krista chu,” tiin a chhâng a. Tichuan, chu chu tu mah hrilh lo tûrin thu a pe tlat a. “Mihring Fapa hian thil tam tak a tuar tûr a ni; upate, puithiam lalte, Dân zirtîrtuten an hnâwl ang a, an tihlum dâwn a; amaherawhchu, ni thum chinah kaihthawh a ni ngei dâwn,” a ti a. Tin, mi zawng zawng hnênah, “Tu pawh mi zui duh chuan mahni inngaihtuah chang lovin, ni tin mahni kraws puin mi zui rawh se. Tu pawh mahni nun humhim tum chuan an chân ang a, tu pawh keimah avânga nun chân chuan an humhim ang. Miin khawvêl hi a pumin nei sela, amah chuan chhiat phahin, boral phah si sela, a tân eng nge sâwt ang? Ka thu leh kei mi zahpui apiang chu, Mihring Fapa pawhin a ropuina nên, Pa leh vântîrhkoh thianghlimte ropuina nêna a lo kal hunah anni chu a la rawn zahpui ve ang. Dik takin ka hrilh a che u, heta dingho ṭhenkhat hi, Pathian ram an hmuh hma chu thi lo tûr an awm,” a ti a. Chûng thu a sawi aṭanga ni riat lai hnuah chuan, Petera te, Johana te, Jakoba te hruaiin, ṭawngṭai tûrin tlângah a chho va. Chutia a ṭawngṭai lai chuan a hmêl lan dân chu a lo danglam ta a, a puante chu a vâr ta sur mai a. Ngai teh, mi pahnihin an rawn kâwm a, chûng mite chu Mosia leh Elija an ni; ropui takin an rawn inlâr a, Jerusalem-a a thih tleitlâkna tûr chungchâng an sawi a ni. Petera leh a ṭhiante chu an mut a chhuak hle a, an han harh chian chuan a ropuina leh a bula mi pahnih dingte chu an hmu a. Tin, Isua an ṭhen dâwn lai chuan Peteran, “Hotupa, heta kan awm hi a ṭha e, bâwkte pathum kan khawh ang e, i tân pakhat, Mosia tân pakhat, Elija tân pakhat,” a ti a, eng nge a sawi pawh a hre mumal lo va ni. Chûng thu chu a sawi lai mêkin chhûm a lo zîng a, anniho chu a rawn khuh a, chhûmin a rawn chîm chuan an hlau hle a. Chhûm aṭang chuan aw a lo chhuak a, “Hei hi ka mi thlan, ka Fapa chu a ni; ama thu hi ngai rawh u,” tiin. Aw a reh hnu chuan Isua chauh chu an hmu a. Chûng lai chuan an thil hmuh chu an ngawihpui tlat a, tu mah eng mah an hrilh lo. A tûka tlâng ata an chhuk chu mipui nasa takin an lo hmuak a. Mipui zînga pa pakhat chu a au chhuak a, “Zirtîrtu, ka fapa, ka fa neih chhun chu, en tûrin ka ngên a che; thlarauvin a man fo mai a, a khawih ṭê tuar tuar ṭhîn a, chilphuan tla bawrh bawrhin a sawisa a, thi ang dêrin a kalsan ṭhîn. I zirtîrte hi hnawt chhuak tûra ka ngên lahin an thei si lo,” a ti a. Isuan a chhâng a, “Tûnlai mi, rinna tlachham leh tihmawhte u, eng chen nge in hnênah ka awm anga, ka dawh theih dâwn che u? I fapa chu han hruai teh,” a ti a. A rawn hruai laiin ramhuai chuan a ṭhuai thlu a, a sawisa nek a. Nimahsela, Isuan thlarau bawlhhlawh chu a hau va, naupang chu a tidam a, a pa hnênah chuan a pe ta a. Mi zawng zawng chuan Pathian ropuizia chu mak an ti êm êm a. Mi zawng zawngin a thil tihte mak tia an ngaihsân êm êm lai chuan a zirtîrte hnênah, “Hêng thu hi nangni bengah chuan châm reng rawh se. Mihring Fapa hi mihringte kuta mantîr a ni dâwn si a,” a ti a. Nimahsela, a thu sawi chu a ngaihna an hre lo. An hriatthiam theih loh nân an lakah thup a ni; chu thu chu amah lah an zâwt fiah ngam bawk si lo. An zîngah tu nge ropui ber ang tih thu-ah an lo inhnial a. Isuan an thil ngaihtuah chu a hria a, naupang tê hi a kai a, a bulah a dintîr a, an hnênah, “Tu pawh he naupang hi ka hming avânga lâwm chu kei mi lâwm a ni; kei mi lâwm chu mi tîrtu lâwm a ni; in zînga tê ber hi a ni ropui ber,” a ti a. Tin, Johana chuan ani chu a bia a, “Hotupa, mi pakhat i hminga ramhuaite hnawt chhuak kan hmu a, keini anga a zui ve loh che avângin khap kan lo tum asin,” a ti a. Isuan a hnênah, “Khap suh u. Tu pawh dodâl lo che u chu in lamṭang an ni ngai e,” a ti a. Amah hruai chhoh hun a lo hnaih chuan Jerusalem-a kal a tum lui tlat a. A hmaah lamkal a tlântîr a. Anni chu an kal a, a tân engkim lo buatsaih fel tûrin Samari mite khaw pakhatah an lût a; mahse, Jerusalem pana kal zêl a tum tlat avângin an lo ngaihsak lo va. Tichuan, a zirtîr Jakoba leh Johana chuan chu chu an han hmuh ve chuan, “Lalpa, hêngho kan hlum vek nân hian vân ata mei ko thla ila i duh em?” an ti a. Ani erawh chu a han lehhawi a, a kamkhat a; khaw dangah an kal ta a. Kalkawnga an kal laiin mi pakhatin a hnênah, “I kalna apiangah ka zui ang che,” a rawn ti a. Isuan, “Sihalten kua an nei a, chunglêng savate pawhin riahhmun an nei; Mihring Fapa erawh hi chuan lu nghahna hmun tûr a nei lo,” a ti a. Mi dang hnênah, “Mi zui rawh,” a ti ve thung a. Ani chuan, “Lalpa, ka pa ka va vui ta zet ang e aw?” a ti a. Isua erawh chuan, “Mitthiin anmahni mitthi chu lo vui mai rawh se; nang erawh chuan Pathian ram thu hi va hril darh zâwk rawh,” a ti a. Mi dangin, “Lalpa, ka zui ang che, amaherawhchu, in lama mite ka va chibai zet ang e,” a ti a. Chu mi hnênah chuan Isuan, “Leilehnaa kut nghat reng chunga hnung lam hawi bawk si chu tu mah Pathian ram mi ni tlâk an awm lo ve,” a ti a. Chumi zawhah chuan Lalpan mi dang sawmsarih a ruat a, an kalna tûr khaw tinah leh hmun tinah lo kal hmasa tûrin pahnih zêlin a tîr a. An hnênah, “Buh seng tûr a tam tehlul nên, thawktu lah an tlêm si. Chutichuan, a buh seng tûra mi tîr tûrin buh Neitupa dîl rawh u. “Kal ta ula, chinghne zînga berâmno lût angin ka tirh che u hi. Tangka ip te, iptê te, pheikhawk te keng suh u; kalkawngah tu mah chibai bûk hek suh ang che u. In thlen in apiangah, ‘He inah hian thlamuanna thleng rawh se,’ ti hmasa zêl ang che u. Chu inah chuan thlamuanna ngaina mi an lo awm chuan, in thlamuanna thu chu an chungah awm sela, an awm loh erawh chuan in hnênah lo kîr leh rawh se. Chumi in hlîrah chuan chêng ula, an pêk apiang che u eiin in ang che u, hnathawktu chu hlawh hmu tlâk a ni. In hrang hrangah thleng lâwr suh u. “Tin, khua in luhna apiangah an lo lawm che u chuan, an hlui che u apiang ei ula, damlo awmte pawh tidam ula, an hnênah, ‘Pathian ram chu in hnênah a lo thleng ta,’ ti ang che u. In luhna khuaten an lo ngaihsak loh che u chuan, in chhuahsan pahin an kawtlaiah, ‘In khaw vaivut takngial pawh hi kan kai duh lo ve, kan kephah ata kan vuak fai hi; Pathian ram in hnênah a lo thleng ta tih erawh chu lo hre rawh u,’ in ti dâwn nia. Ka hrilh a che u. Rorêl ni-ah chuan chu khaw tuar tûr ai chuan Sodom khaw tuar tûr chu a ziaawm zâwk ang. “Nang Korazin, i chung a pik e. Nang Bethsaida, i chung a pik e; in zînga thil mak tihte kha Tura leh Sidona tih ni sela, saiip puan sina vaivut zîngah ṭhuin an simzia an tilang daih tawh tûr. Rorêlnaah chuan in tuar tûr aiin Tura leh Sidon tuar tûr chu a ziaawm zâwk ang. Nang pawh, Kapernaum, vân thlenga chawisân i ni dâwn êm ni? Mitthi khaw thlenga nam thlâk asin i nih dâwn! “In thu awih chuan ka thu pawh an awih ang, a hnâwl che u chuan kei pawh mi hnâwl a ni; tin, kei mi hnâwltu chuan mi tîrtu pawh a hnâwl a ni e,” a ti a. Sawmsarihte chu hlim takin an lo haw leh a, “Lalpa, ramhuaite pawh i hming avângin kan thu thuin an awm,” an rawn ti a. Ani chuan an hnênah, “Vân ata ṭêk anga Setana tla ṭhuai kha ka lo hmu reng asin. Ngai teh u, rûl te, khawmualkaikuang te, hmêlmapa chakna zawng zawngte rah beh theihna thu ka pêk che u hi, eng mahin a tina hauh lo vang che u. Amaherawhchu, thlaraute in thu thu-a an awm avâng hian lâwm suh u, vâna in hming ziak a nih avângin lâwm zâwk rawh u,” a ti a. Chumi lai tak chuan Thlarau Thianghlimah a lâwm ta êm êm a. “Aw ka Pa, lei leh vân Lalpa, nangin mi fingte leh mi thiamte lakah hêng thu hi i thup tlat a, mi mâwlte hnêna i puan avângin ka fak a che; a ni, ka Pa, chutiang chu ṭha i tih zâwng tak a ni. Ka pain engkim mi kawltîr tawh; Fapa hi tu nge a nih Pa chauh lo chuan tu man an hre lo; Pa pawh chu tu nge a nih, Fapa leh an hnêna Fapain a puan duhnate chauh lo chuan tu man an hre lo,” a ti a. Tin, a zirtîrte lam a hawi a, Ka hrilh a che u, zâwlneite leh lal tam takte pawhin in thil hmuhte hi hmuh an lo duh ṭhîn a, an hmu si lo; in ngaihthlâkte hi ngaihthlâk an duh a; mahse, an ngaithla si lo,” a ti a. Ṭum khat chu Dânhremi pakhat hi a ding a, amah fiah nân, “Zirtîrtu, chatuan nun nei tûrin eng nge ka tih tûr?” a ti a. Ani chuan, “Dân bu-ah eng nge chuang? A eng lai nge in chhiar ziah ṭhin kha?” a ti a. Ani chuan, “ ‘Lalpa i Pathian chu i thinlung zawng zawngin, i nunna zawng zawngin, i chakna zawng zawngin, i rilru zawng zawngin i hmangaih tûr a ni; nangmah i inhmangaih angin i vêngte pawh i hmangaih tûr a ni,’ tih hi,” a ti a. Isua chuan, “I chhâng dik e, chutiang chuan ti la, i nung ang,” a ti a. Ani erawh chuan thiam inchantîr a duh a, Isua hnênah, “A nih leh ka vêngte chu tute nge?” a ti a. Isuan a chhâng a, “Mi pakhat, Jerusalem aṭanga Jeriko khuaa kal tûr chu, kawng lakah suamhmanghovin an lo bei a, a silhfênte chu an hlihsak a, an vaw nek a, thi chhâwngin an kalsan ta a. Chumi kawngah chuan puithiam pakhat a zu kal hlauh va, ani chu a han hmuh chuan a hêl ta mai a. Chutiang bawkin Levia chi mi pakhat pawhin chumi hmun chu a lo thleng a, ani chu a han hmuh chuan a hêl ve ta mai a. Samari mi pakhat zin kal chuan a awmna chu a lo thleng ve a, ani chu a han hmuh chuan a khawngaih ta êm êm a; a va pan a, a pemte chu hriak leh uain hnawihin a tuamsak ta a; ama sabengtung chungah a chuantîr a, khualbûkah a kalpui a, a enkawl ta a. A tûkah chuan duli pahnih a phawrh a, khualbûk enkawltu chu a pe a, ‘Lo enkawl la, hemi bâka i sên zawng chu ka lo kîr leh hunah ka rawn rûl ang che,’ a ti a. “Aw le, chûng mi pathum zînga tu ber chu nge suamhmang tâwktu vêngte nia i rin?” a ti a. Ani chuan, “A khawngaihtu chu,” a ti a. Isuan, “Nang pawh chutiang bawk chuan va ti ve rawh,” a ti a. An kal pah chuan khaw pakhatah an lût a, hmeichhe pakhat Marthii an tih chuan a lo thleng a. Laizâwn pakhat, Mari an tih chu a nei a. Mari chuan Lalpa ke bula ṭhuin a thu a ngaithla a. Marthii erawh chu ei tûr buatsaihin a indaih lo hle a, a hnênah a lo kal a, “Lalpa, ka laizâwnnuin keimah chauh che tûra mi ring mai hi ṭha i ti em ni? Mi rawn pui se a ṭha lâwm ni?” a ti a. Lalpa chuan a chhâng a, “Marthi, Marthi, ngaihtuah i ngah a, i buai hle tak e; mahse, thil ṭûl tak pakhat a awm. Mari chuan chan ṭha a thlang a, chhuhsak tûr a ni lo ve,” a ti a. Vawi khat chu hmun pakhatah a ṭawngṭai a. A han bân chuan a zirtîrte zînga pakhatin a hnênah, “Lalpa, Johanan a zirtîrte ṭawngṭai dân a zirtîr ang khân min zirtîr ve ta che,” a ti a. An hnênah chuan, “In ṭawngṭaiin heti hian ti ang che u: ‘Kan Pa, I hming zahin awm rawh se, I ram lo thleng rawh se, Ni tin ei tûr chaw min pe ang che, Kan sualte min ngaidam la, Keini pawhin kan chunga tisual apiang kan ngaidam ṭhîn. Thlêmnaah min hruai lût suh ang che,’ tiin,” a ti a. An hnênah, “In zînga mi pakhatin ṭhian nei sela, zânlaiah a hnêna va kalin, ‘ṭhiana, chhang tlang thum min pûktîr teh, ka ṭhian zinin mi rawn tlawh thut a, a hmaa hlui tûr eng mah ka nei lo,’ va ti sela, in chhûnga mi chuan, ‘Mi rawn tibuai suh, tûnah zawng kawng pawh kan kalh diam tawh a, ka fate nên khumah kan mu tawh, thovin ka rawn pe thei lo che,’ tihsan sela; ka hrilh a che u, a ṭhian a nih avângin thovin va pe lo mah se, a dîl ngut ngut avângin thovin a duh zât zât a pe ang. “Chutichuan, ka hrilh a che u, dîl ula, pêk in ni ang; zawng ula, in hmu ang; kik ula, hawnsak in ni ang. A dîl apiangin an dawng ṭhîn, a zawng apiangin an hmu bawk ṭhîn. Tu pawh a kik chu an hawnsak dâwn a ni. In zînga pa, a fapain sangha dîl sela, tu nge sangha aiah rûl pe ang? Artui aiah pawh tuin nge khawmualkaikuang pe ang? Chutichuan, nangni mi sual mahin in fate thil ṭha pêk nachâng in hriat si chuan, in Pa vâna mi chuan a dîltute chu Thlarau Thianghlim a va pe dâwn êm!” a ti a. Ramhuai ṭawngtheilo pakhat hi a hnawt chhuak a, ramhuai chu a lo chhuah hnu chuan ṭawng thei lo chu a lo ṭawng thei ta a, mipui chuan mak an ti hle a. An zînga ṭhenkhat chuan, “Ramhuai lal Belzebula vâng alâwm ramhuaite a hnawh chhuah le,” an ti a. A ṭhen erawh chuan amah fiah nân vân ata chhinchhiahna thil mak entîr an phût a. Ani chuan an tih chhan a lo hria a, “Khawii ram pawh mahni indo chu an ṭiau ṭhîn: chhûngkua pawh mahni indo chu a kehchhe ṭhîn. Setana pawh mahni a indo chuan engtin nge a ram chu a din theih ang? Belzebula vângin ramhuaite hnawt chhuakah min puh si a. Keiin Belzebula vângin hnawt chhuak ni ila, in mite khân tu vângin nge ramhuai an lo hnawh chhuah ṭhin? Tichuan, anni khân asin thiam loh chantîr zâwk dâwn che u. Pathian kut avânga ramhuai hnawt chhuak ka nih si chuan in hnênah Pathian ram chu a lo thleng ta tihna a ni. “Mi chak chuan hriam famkim nên a in a vên chuan, a sum chu a him ṭhîn; amaherawhchu, a aia chak zâwkin a rawn beiha, a rawn hneh chuan, a rin chhan râlthuam chu a chhuhsak ang a, a sum pawh a lâksak ang a, a duh duhin a sem darh mai ang. Ka lama ṭang lo tawh phawt chuan mi do a ni, mi lâk khâwmpui lo chuan a tidarh a ni. “Thlarau bawlhhlawh chu mi kawchhûng ata a chhuahin chawlhhmun zawngin tui awm lohna hmunahte a vâk a vâk a; mahse, a hmuh loh avâng chuan, ‘Ka in, ka chhuahsan tâkah khân ka kîr leh mai teh ang,’ a ti a. Tin, a va thlen chuan phiah faia tihfel diamin a va hmu a. Tichuan, a kal a, a aia sual hlîr thlarau dang pasarih a hruai a, an lo lût a, tah chuan awmhmun an khuar ta a; chu mihring awmze hnuhnûng zâwk chu a hmasa aiin a lo chhe daih ṭhîn a ni,” a ti a. Chûng thu chu a sawi laiin mipui zînga nu pakhat a lo au chhuak a, “I paina pum chu a nihlawh e, i hnute hnêk pawh,” a ti a. Ani erawh chuan, “A ni, mahse, Pathian thu hriaa zâwmte hi mi nihlawh an ni zâwk e,” a ti a. Tin, mipui an lo pung khâwm chiam a, Isuan, “Tûnlai mite hi sual tak an ni; chhinchhiahna thil mak an phût a, Jona chhinchhiahna chauh lo chu chhinchhiahna thil mak rêng entîr an ni lo vang; Jona chu Ninevi mite tân chhinchhiahna a ni ang khân, Mihring Fapa hi tûnlai mite tân chhinchhiahna a ni ang. “Chhim lam lalnu kha Rorêl ni-ah chuan tûnlai mite rual hian a tho ve ang a, thiam loh a chantîr ang: Solomona finna ngaithla tûr mahin kâwlkil ata a lo kal si a; ngai teh u, Solomona aia ropui zâwk hetah hian a awm asin. Ninevi mite chu Rorêl ni-ah tûnlai mite nên hian an ding za ang a, thiam loh an chantîr ang. Jona thu hril avângin an sim si a; ngai teh u, Jona aia ropui zâwk hetah hian a awm a ni. “Tu man an khâwnvâr hâl chu hmun biru takah an dah ngai lo va, khovin an khuh ngai hek lo, a lo lûtten khua an hmuh theih nân a dahnaah an dah zâwk ṭhîn. “I mit hi i taksa tân khâwnvâr ang a ni; i mit a dik chuan i taksa pum chu a êng vek ang, a dik loh erawh chuan i pumin a thim vek ang. Fîmkhur rawh, nangmaha êng awm chu thim a lo ni hlauh dah ang e. Thim lai awm lova, i taksa pum a ên vek erawh chuan khâwnvâr êngin a chhun êng che ang hian i pumin i êng ang,” a ti a. Chûng thu a sawi lai chuan Farisai pakhatin chaw eiah a sâwm a; tichuan, a zui lût a, chaw chu a kîl ta a. Farisai chuan chaw ei dâwna kut a sil lo chu mak a ti hle a. Lalpa chuan a hnênah, “Nangni Farisai-te hian no leh thlêng pâwn lam in sil fai ṭhîn tak a, in chhûng lam erawh chu duhâmna leh suahsualnain a khat si a. In va â êm! Pâwn lam siamtuin chhûng lam pawh a siam a ni lâwm ni? No leh thlêng chhûnga thil awm chu mi rethei pe ula chuan, in tân engkim a thianghlim mai tûr. “A ni, nangni Farisai te u, in chung a pik e; lêngmasêr te, pudina te leh thlai tinrêng sâwma pakhat in pe ṭhîn, dik taka tih leh Pathian hmangaih erawh chu in ngaihthah si ṭhîn; chu chu asin in tih ngei ngei tûr chu, a dangte pawh khi tih ṭhulh chuang lovin. Nangni Farisai-te u, in chung a pik e, sunagog-a ṭhutna hmasa berte leh dâwr hmuna chibai bûk te in ngaina si ṭhîn a. In chung a pik e, thlân tih hriat loh, a chunga hre lova mi an kal ṭhinna ang hi in ni e,” a ti a. Dânhremi pakhat chuan, “Zirtîrtu, hêng thu i sawi hian keini pawh min dem tel a nih hi,” tiin a lo chhâng a. Ani chuan, “Dânhremite u, nangni pawh in chung a pik e; phur hrehawm tak tak mite in bel ṭhîn a, nangniho lah chuan in kutzungṭang tê pawhin in khawih duh si lo. In chung a pik e, in pate thah zâwlneiho thlân inte in sa a; in thlahtute thil tih chu in hriatpui a, in remtihpui tihna a ni; annin a thah an tum a, nangnin an thlân in sak in tum a. Chuvângin alâwm, Pathian Finna bu-ah pawh, ‘An hnênah zâwlneite leh tirhkohte ka tîr ang, a ṭhen an that ang a, a ṭhen an tiduhdah ang,’ tih ziak a nih kha. Chutichuan, Abela thah aṭanga maichâm leh Hmun Thianghlim inkâra Zakaria thah thleng khân, leilung pian tirh aṭanga zâwlnei zawng zawng thah thisen phuba chu tûnlai mite chungah hian lâk tûr a ni. A ni, ka hrilh a che u, tûnlai mite chungah hian phuba chu lâk a ni dâwn. Nangni Dânhremite u, in chung a pik e, Finna chabi chu in kawl bo daih a, nangni lah lût duh si lovin, a lût tûrte in khap bawk si,” a ti a. Chuta ṭang chuan a chhuak a, Dân zirtîrtute leh Farisai-te chuan an tai ṭan ta a; thu tam tak an zâwt sek a, a ṭawng sual palh man tumin an châng ta reng a ni. Chutih chhûng chuan mipui sâng tam tak inrap nûlh nûlh khawp an lo pung khâwm a, ani chuan thu a sawi a, a zirtîrte hnênah phei chuan, “Farisai-te dawidim vervêkna lakah chuan fîmkhur rawh u. Eng mah thup hlen theih a ni lo, a lang leh mai ṭhîn; eng mah zêp hlen theih a ni hek lo, hriat chhuah a ni leh mai ṭhîn. Zân thima sawi chu a tûk êngah miin an hria ang, pindan chhûngrila in sawi rûk chu in chunga chuangin an tlângaupui ang. “Ka ṭhiante u, ka hrilh a che u, taksa tihluma, chumi hnua eng mah tih thei tawh lo che u chu hlau suh u. Tu nge hlauh tûr ka hrilh ang che u; taksa tihluma, chumi hnu pawha hremhmuna paih theitu che u chu hlau rawh u; a ni, ka hrilh a che u, amah mawlh chu hlau rawh u. Chawngzawng panga pawisa pahnihin an hralh ṭhîn lo vem ni? Pathian erawh chuan an zînga pakhat tê mah a hmaih ngai lo. In samzaite lam pawh a chhiar vek asin. Hlau suh u, chawngzawng tam tak aiin in hlu zâwk e. “Ka hrilh a che u, mite hmaa mi ṭan apiang chu Pathian vântirhkohte hmaah Mihring Fapa hian a ṭan ve ang. Nimahsela, mite hmaa mi phat chu Pathian vântirhkohte hmaah a phat ve ang. Tin, Mihring Fapa chu an sawisêl pawhin an sawisêlna chu ngaihdam a ni ang; amaherawhchu, Thlarau Thianghlim meuh pawi sawi chu ngaihdam a ni lo vang. “Tin, sunagog hotute leh thuneitute hmaa an hruai hunah che u chuan, chhân dân tûr emaw, in sawi tûr emaw engto suh ang che u, a hun takah Thlarau Thianghlim chuan in sawi tûr a hrilh dâwn che u a ni,” a ti a. Mipui zînga pakhat chuan, “Zirtîrtu, ka unaupa hnênah ka pa ro mi sem ve tûrin mi hrilhsak rawh,” a ti a. Ani chuan, “Mihring, nangni tân rorêltuah leh ro semtuah tu nge mi siam?” a ti a. Tin, an hnênah, “Fîmkhur ula, awhna rêng rêng lakah invêng rawh u; mihring nunna hi a hausaknaah a innghat lo ve,” a ti a. An hnênah tehkhin thu a sawi a: “Mi hausa tak pakhat hi a lo a hlâwk êm êm a. Tichuan, a inngaihtuah a, ‘Engtin nge ka tih tâk ang? Ka buh leh bâl dah khâwmna ka nei sêng ta si lo,’ a ti a. ‘Heti hian ka ti teh ang; ka buh inte ka ṭhiat ang a, a aia lianin ka sa ang a; chutah chuan ka buh leh bâl leh ka sum zawng zawng ka chhêk khâwm ang. Tin, ‘Pa vânnei! Kum rei tak daih sum tam tak i khâwl tâk hi; châwl la, eiin bâr la, nuam takin awm rawh, ka ti ang,’ a ti a. Nimahsela, Pathianin a hnênah, ‘Mi â, zânin hian i nun an lâksak dâwn che a ni. I thil deh chhuahte kha tuten nge nei ta ang?’ a ti a. Mahni tâna sum khâwla, Pathian lama ngah si lo chu, chuti mai chu a ni,” a ti a. A zirtîrte hnênah chuan, “Chuvângin, ka hrilh a che u, nun nân eng nge in ei anga, in taksa tân eng nge in sin ang tih lungkham suh u. Ei tûr aiin nunna a pawimawh zâwk a, silhfên aiin taksa a pawimawh zâwk bawk. Choakte hi ngaihtuah teh mah u, buh an tuh lo va, an seng hek lo, zêm an nei lo va, buh in pawh an nei hek lo; nimahsela, Pathianin a châwm ṭhîn; nangni hi savate ai chuan in hlu zâwk daih a ni. Nangni zîngah lungkham avângin tu nge mahni nun tisei hret thei Hemi tê pawh ti thei si lo, engati nge thil dang in lungkham? “Tûktinpâr ṭhan dânte hi ngaihtuah teh u, hna an thawk lo va, la an dek hek lo; nimahsela, ka hrilh a che u, Solomona meuh pawh a ropui thei ang bera a inthuam khân, hêng tûktinpâr pakhat tluk pawh hian chei a ni lo. Chutichuan, ram hnim, vawiina nung, a tûka meia tuah leh mai tûr mah Pathianin chuti kauva a chei si chuan, aw nangni, rin tlêmte u, chûngte ai chuan a va thuam nasa zâwk dâwn che u êm! Nangni zawng, ei leh in tûr ngaihtuahin buai phili suh ula, mangang hek suh u. Hêng hi khawvêl mi zawng zawng buaipui ber a ni; in Pain hêngte hi nangni pawhin in mamawh ve tho tih a hria e. Ama ram chu zawng zâwk ula, tichuan, hêngte pawh hi a pêk belhchhah dâwn che u nia. Pâwl tlêmte u, hlau suh u, ram pêk che u hi in Pa lâwmzâwng tak a ni e. “In neih apiang hralh ula, pachhiate pe rawh u, vânah, rûkru kal lohnaah, thîm ei theih lohnaah chuan, tangka ip phai thei lo te, sum ral thei lo te insiam rawh u. In ro awmna apiangah in rilru pawh a awm ṭhin hi. “Insiam sa diamin, khâwnvâr chhit sa nên inpeih reng rawh u. An pu lawichaw ei hawin kawngkhâr a rawn kik lo hawn vat thei tûra nghâk rengte ang hian awm rawh u. An pu lo hâwngin amah lo nghâk rengtu bawih a rawn hmuh chu an nihlawh e. Thu dik ka hrilh a che u, ani chu a insiam ang a, anni chu chaw a kîltîr ang a, an chaw ei a vil ang. Zânlaiah emaw, khawvâr lamah emaw a lo hâwna, chutianga bawih a rawn hmuhte chu an nihlawh e. Hei hi in hria e, rûkru lo kal hun tûr in neituin hria sela, a vêng ang a, a in a reh pawhtîr lo vang. Nangni pawh inpeih rengin awm rawh u, Mihring Fapa chu in beisei loh hunah a lo kal hlauh dah ang e,” a ti a. Petera chuan, “Lalpa, he tehkhin thu hi keimahni chauh nge min hrilh mi zawng zawng?” a ti a. Lalpa chuan, “An puin a chhiahhlawhte hotu-ah leh an chaw sem huna semsak ṭhîntu atân sum enkawltu rinawm tak leh fing tak a ruat tûra chu tu nge ni ang? An pu lo kal huna bawih chutianga ti a rawn hmuh chu a nihlawh e. Dik takin ka hrilh a che u, a neih zawng zawng chunga hotu-ah a rawn siam ang. Amaherawhchu, bawih chuan, ‘Ka pu hi a lo haw lawk dâwn lo ve,’ ti rilruin bawih dangte chu a hmei a pain lo vêl sela, eiin lo rui buai hle mai sela, chu bawiha pu chu a rin loh ni-ah, a hriat loh dârah a lo kal ang a, bung hnihah a rawn chhuah ang a, mi rinawm lote chan a rawn chantîr ang. Bawih, an pu duhzâwng hre reng chunga ti lo leh inpeih lo chu na taka vuak an ni ang. Amaherawhchu, hriat loh avânga hremna khawp thil ti chu nêp deuhva vuak an ni ang. Tam tak an pêk apiangte lakah chuan tam tak an phût ang, tam tak an kawltîr apiangte lakah tam tak an beisei ang. “Khawvêlah mei chhuah tûra lo kal ka ni, tûnah pawh hian kâng tawh pang se ka va ti êm! Baptisma chan tûr pawh ka nei, chumi ka tlingtlâk hma chu ka thaw a va pik êm! Leiah hian rem lêntîr tûra lo kal emaw mi ti elo? Hnai lo ve, ka hrilh a che u, do lêntîr tûra lo kal ka ni asin. Tûn hnuah chuan chhûng khata mi panga an indo vang a, pathumte chuan pahnihte chu an do vang a, pahnihten pathumte chu an do vang. Pain a fapa a do vang a, fapain a pa: nuin a fanu a do vang a, fanuin a nu; nuin a mo a do vang a, movin a nu,” a ti a. Tin, mipui hnênah pawh chuan, “Khawthlang lama chhûm lo chhuak in hmuhin, ‘ruah a sûr dâwn e,’ in ti nghâl ṭhîn a, a sûr ngei ṭhîn. Chhim thli a lo tleh lahin, ‘khua a lum dâwn,’ in ti a, a lum ngei ṭhîn. Nangni mi vervêkte u, lei leh vân enin khaw chin in hrethiam thei si a, engtizia nge tûnlai hun awm dân hi in hriatthiam theih loh? “A dik leh dik lo chu engati nge nangni pawhin in thliar mai loh? Thuneitu hmaa i khingpui nên in lan dâwnin, kal pahin a laka fihlîmna kawng zawng hrâm rawh, chuti lo chu rorêltu hmaah a hnûk lût hlauh dah ang che. Rorêltu chuan pulis hnênah a hlân ang chia, pulis chuan tân inah a khung ang che. Ka hrilh a che u, pawisa pakhat tê pawh in tlâk kim hma chu chuta ta chu in chhuak tawp lo vang,” a ti a. Chutih lai tak chuan tute emaw an lo kal a, Galili rama mi, Pathian be lai, an inthawina ran thisen leh an thisen inpawlh nuaia Pilatan a thah thu an rawn hrilh a. Isuan a chhâng a, “Chûng Galili mite chu, chutiang thil an tuar avângin Galili mi dang zawngte aia sual bîk niin in ring êm ni? Sual bîk suh e, ka hrilh a che u, nangni pawh in sim loh chuan chutiang bawkin in boral ve ang. A nih leh, Siloam in sângin a delh hlum mi sâwm leh pariatte pawh kha, Jerusalem-a chêng zawngte aia sual bîk niin in ring êm ni? Sual bîk suh e, ka hrilh a che u, nangni pawh in sim loh chuan chutiang bawkin in boral ve ang,” a ti a. He tehkhin thu hi a sawi bawk a: “Mi pakhatin grep huanah theipui kûng khat a phun a, a rah a zawng ṭhîn a, pakhat mah a hmu ngai lo va. Grep huanpu hnênah chuan, ‘En teh, kum thum zet he theipui rah hi ka zawng tawh a, ka hmu ngai lo. Hmun a awh mai mai a ni lâwm ni? Kit mai rawh,’ a ti a. Ani chuan, ‘Ka pu, kumin tal hi chu awm leh teh se, a vêlin ka lai ang a, êk dûrin ka vûr rih ang e; a rah tâk leh a ṭha ang a, a rah loh leh kit mai ang che,’ a ti a,” tiin. Sabat vawi khat chu sunagog pakhatah mi a zirtîr a. Hmeichhe pakhat, kum sâwm leh pariat thlarau sualin a tihnat tawh a lo awm a, a kun reng a, a ding char thei tawh hauh lo va. Isuan ani chu a han hmuhin a ko va, “Hmeichhia, i natna chuan a thlah ta a che,” a ti a. A chungah chuan a kut a nghat a, a ding char thei ta nghâl a. Pathian a fak ta a. Isuan sabat nia mi a tihdam avâng chuan sunagog hotu chu a thinur hle a, mite hnênah chuan, “Hna thawhna tûr ni ruk a awm a, chumi chhûngin lo kal ula, intidam ta che u, sabat ni ber kher ni lovin,” a ti a. Lalpa erawh chuan an hnênah, “Nangni vervêkte u, sabat ni pawha mahni sebâwng emaw, sabengtung emaw phelha, a thlunna hmun ata tui in tûra hruai chhuak lo tu nge awm che u? He nu pawh hi Abrahama fanu a ni si a. Setanan kum sâwm leh pariat zet a lo phuar tawh a, chu phuarna chu sabat ni pawhin phelhsak tûr a ni dâwn lâwm ni?” a ti a. Chûng thu chu a han sawi chuan a hmêlmate chu an zak hle a, mipui erawh chu a thiltih ropui takte avâng chuan an lâwm a. Chutichuan, ani chuan, “Pathian ram chu eng ang nge ni? Anṭam chi fang khat miin a lâka, huana a theh ang hi a ni; a lo ṭiak a, thing a lo ni a, chunglêng savate a zârah an riak ṭhîn,” a ti a. “Pathian ram chu eng nên nge ka han tehkhin leh ang? Dawidim hmeichhiain a lâka, chhangphut fawng thum zînga a zavaia fan chhuak vek tûra a phul ang chu a ni,” a ti a. Ani chuan zirtîr chung zêlin Jerusalem a pan a, khaw lian leh khaw tête a tlawh zêl a. Tu-in emaw, “Lalpa, chhandamte chu an tlêm hle elo?” a ti a. Ani chuan an hnênah, “Kawngka zîmah chuan luh tum hrâm rawh u; ka hrilh a che u, mi tam takin luh an tum ang a, an thei lo vang. In neitupa a thawha, kawng a kalh tawh hnu chuan, nangnin pâwna dingin, ‘ka pu, kawng min hawn rawh,’ tiin va kik mah ula, ani chuan, ‘Khawi lama mi nge in nih ka hre lo va che u,’ tiin a lo chhâng dah ang che u. Nangnin, ‘I hovin kan eia kan in ṭhin kha, kan kawtthlêrahte pawh i zirtîr ṭhin kha,’ in la ti ang a; ani erawh chuan, ‘Ka hrilh a che u, khawi lama mi nge in nih ka hre lo a che u; nangni thil sual ti zawng zawngte u, ka hnên ata kal bo vek rawh u,’ a la ti ang che u. Nangni pâwna paih chhuah in ni ang a, Abrahama te, Isaka te, Jakoba te leh zâwlnei zawng zawngte Pathian ram chhûnga awm in hmu si ang a, chutih hunah chuan in ṭap ang a, ha in ṭhial ang. Tin, chhak leh thlang, chhim leh hmâr aṭangin mi an lo kal ang a, Pathian ram ruai chu an rawn kîl ang. Ngai teh u, hnuhnûng berte pawh la hmasa ber tûr an awm a, hmasa berte pawh la hnuhnûng ber tûr an awm,” a ti a. Chutih lai tak chuan Farisai ṭhenkhat an lo kal a, a hnênah, “Chhuak la, heta ta hi kal bo teh, Herodan tihhlum che a tum a ni,” an rawn ti a. Ani chuan an hnênah, “Chu sihal chu heti hian va hrilh rawh u, ‘Ngai rawh, vawiin leh naktûkah hian ramhuaite ka hnawt chhuakin nâte pawh ka tidam ang a, ni thum ni-ah ka zo vang, a ti,’ tiin. Eng pawh ni se, vawiinah nên, naktûkah nên, a tûk leh thlengin ka ti zêl tûr a ni; Jerusalem pâwn lamah zâwlnei thih theih a ni lo ve. Aw, Jerusalem, Jerusalem, zâwlneite thattu, i hnêna tirhte lunga lo dêng hlumtu! Arpuiin a note a thla hnuaia a awp khâwm angin i fate vawi eng zât nge awp khâwm ka tuma, in duh loh kha? Ngai teh u, in in chu rauhsan a ni ta. Ka hrilh a che u, ‘Lalpa hminga lo kal chu fakin awm rawh se,’ in tih hma chuan mi hmu leh tawh lo vang,” a ti a. Sabat vawi khat chu Farisai-te zînga hotu lian pakhat inah chaw ei tûrin a kal a, an lo enthla reng a. Tin, ngai teh, a hmaah chuan damlo pakhat, vûng hi a awm a. Dân hremite leh Farisai-te chu a bia a, “Sabat ni hian tihdam a thiang nge thiang lo?” a ti a. Anni erawh chu an ngawi reng a. Ani chuan dam lo chu a chelh a, a tidam a, a kaltîr ta a. Anni chu a bia a, “Nangni zîngah in fapa emaw, sebâwng emaw tuichhunchhuahah tla sela, sabat ni pawhin tu nge la chhuak var lo vang che u?” a ti a. Chu pawh chu an chhâng thei lo bawk a. Chaw eia sâwm vete chuan ṭhutna ṭha ṭha an chuh zêl tih a hmuh chuan an hnênah tehkhin thu a sawi ta a. “Tu-in emaw lawichaw eiah a sâwm che u chuan, ṭhutna ṭha berah ṭhu suh ang che u; in aia mi lian a lo sâwm ve hlauh ang a, a sâwmtu chuan, ‘He mi ṭhutna tûr hi kian rawh,’ a rawn tih mai che u chuan zak takin ṭhutna ṭha lo berah in ṭhu mai tûr a nia. An sâwm che chuan ṭhutna ṭha lo berah ṭhu ang che; chutichuan, a sâwmtu che chu a lo kal ang a, i hnênah, ‘ṭhiana, lo ṭhu chho rawh khai,’ a ti ang a, chaw kîlpuite mit hmuhah chawimawiin i awm ang. Inngaihlu apiang an tlâwm ang a, inngaitlâwm apiang chawimawiin an awm ang,” a ti a. Amah sâwmtu hnênah pawh chuan, “Chhûnah emaw, zânah emaw ruai i ṭhehin i ṭhian te, i unau te, i laichîn te leh i vêng hausa te chu sâwm suh ang che; chuti lo zawng an sâwm ve leh ang chia, an rûl leh kher dah ang che. Ruai i ṭheh hun chuan pachhia te, piangsual te, kebai te, mitdel te sâwm zâwk ang che; tichuan, malsâwmna i dawng ang, rulh vena tûr che an nei dâwn si lo va; mi felte thawhlehnaah chuan rulh leh i ni dâwn nia,” a ti bawk a. A chaw kîlpui pakhat chuan chu chu a hriatin a hnênah, “Pathian rama ruai ṭheh tûra chu a va nihlawh êm!” a ti a. Ani erawh chuan a chhâng a, “Mi tuin emaw zanriah ropui tak a buatsaih a, mi tam tak a sâwm a. A ei hun chuan a mi sâwmte hnênah, ‘Lo kal rawh u le, tûnah engkim peih a ni ta,’ ti tûrin a bawih a tîr a. An za chuan inthurual ang maiin an lo pha ṭheuh va. A hmasa ber chuan, ‘Lo ka lei a, a enin ka kal a ṭûl a ni; khawngaih takin mi han phatsak ang che,’ a ti a. Mi dangin, ‘Sebâwng tuak nga ka lei a, enfiah tûrin kal ka lo tum a; khawngaih takin mi han phatsak ang che,’ a ti a. Mi dangin, ‘Nupui nei hlim ka ni a; chuvângin, lo kal thei ka ni lo ve,’ a ti a. Tin, bawih chu a hâwng a, chûng thu chu a pu a hrilh a. In neitupa chu a thinur ta a, bawih hnênah chuan, ‘Chhuak thuai la, kawtthlêrah te, kâwmkârah te kal la, pachhia te, piangsual te, mitdel te, kebai te hetah han hruai lût rawh,’ a ti a. Tin, bawih chuan, ‘Ka pu, i thupêk ang khân tih a ni tawh a; mahse, hmun ruak a la awm ta fo mai,’ a ti a. A pu chuan a hnênah ‘Chhuak leh la, lamlianah te, daiah te kal la, ka in khah nân mi han hruai lût hrâm rawh. Ka hrilh a che, mi ka sâwmte pakhat mah khân ka ruai an ei lo vang,’ a ti a,” a ti a. Tin, a rual chuan mipui nasa tak an kal ve a, a han lehhawi a, an hnênah, “Ka hnêna lo kal apiang chuan an pa te, an nu te, an nupui te, an fa te, an unau te, an farnu te, leh, anmahni nun lam pawh an hawisan si loh chuan ka zirtîr an ni thei lo vang. Mi zui duha mahni kraws pu si lo chu ka zirtîr an ni thei hek lo vang. “In zînga mi hian in sâng sak tum sela, sak zawhna tûr sum a neih dâwn leh dâwn loh tu nge chhût hmasa tê tê lo vang? Lungphûm dah zet si-a, a sak zawh theih si loh chuan, a en apiangin, ‘He pa hian a rel uaih a, a sa zo leh thei si lo,’ tiin an nuihzat ang asin. “Tin, lal pawh, lal dang do tûrin chhuak dâwn se, ṭhu-a, sipai sîng hnih nêna rawn bei tûr chu sipai sîngkhat nên a lo beih ngam dâwn leh dâwn loh tu nge ngaihtuah hmasa tê tê lo vang? A beih ngam dâwn loh chuan hla fea an la awm laiin inremna sawi tûrin palai a tîr ngei ang. Chutiang bawkin nangni zînga mi pawh neih zawng zawng kalsan vek lo apiang chu ka zirtîr an ni thei lo vang. “Chi hi a ṭha e; nimahsela, chi chu da ta ang se, engin nge an tihal leh ang? Lei tih ṭhat nân a tlâk loh vang a, êk dûra pawlh tlâk a ni hek lo vang a; paih ringawt tûr a ni mai. Ngaihthlâkna beng nei chuan ngaithla ngun rawh se,” a ti a. Vawi khat chu chhiahkhawntute leh mi sual tam takin a thu ngaihthlâk tumin an rawn pan a. Farisai-te leh Dân zirtîrtute chuan, “He pa hian mi sualte a kâwm a, chaw te pawh a eipui ṭhîn,” tiin an phunnawi a. Ani chuan an hnênah he tehkhin thu hi a sawi a, “Nangni zîngah tuin emaw berâm za neiin, an zînga pakhat bo ta sela, phûlah sawmkua leh pakua te chu hnutchhiahin, a bo chu a hmuh leh hma chu tu nge zawng lo vang? A hmuh leh chuan lâwm takin a kokiah a pu ang a, in a va thlen chuan a ṭhiante leh a ṭhenawmte a ko khâwm ang a; ‘Ka berâm bo kha ka hmu leh ta, hawh u, i lâwm ang u,’ a ti ang. Ka hrilh a che u, chutiang bawkin mi fel sawmkua leh pakua sim chuan tûr nei lote chungah ai chuan mi sual pakhat sim chungah vâna mite lâwmna a nasa zâwk a ni. “Tin, hmeichhia tu pawh duli sâwm neiin pakhat chu hloh ta se, khâwnvâr hâla hmun phiatin, a hmuh leh hma chu tu nge ngun taka zawng lo vang? A hmuh leh chuan a ṭhiante leh a ṭhenawmte chu a ko khâwm ang a, ‘Ka duli hloh ka hmu leh ta e, hawh u, i lâwm ang u,’ a ti ang. Ka hrilh a che u, chutiang bawkin Pathian vântirhkohte zîngah chuan mi sual pakhat sim chungah lâwmna a nasa ṭhîn,” a ti a. A sawi zêl a, “Mi pakhat hian fapa pahnih a nei a; a naupang zâwk chuan a pa hnênah, ‘Ka pa, ka ro chan ai chu mi pe rawh,’ a ti a. Tichuan, a sum chu an hnênah a sem ta a. Tin, ni rei lo tê-ah a fapa naupang zâwk chuan a chan ai zawng zawng chu a la khâwm vek a, ram dang hla takah a kal ta a; chutah chuan nuam tâwlin a intlakral ta mai mai a. A sum neih a deh ral vek hnuin chu ramah chuan ṭâm nasa tak a lo tla a, ei tûr a tlachham ta a. Tichuan, chumi rama chêng mi pakhat a bêl ta a, ani chuan a lo lamah vawk rual enkawl tûrin a tîr a. Tin, vawk chawte chu ei tak a nâp a, tu man ei tûr an pe si lo. “Tin, a han inhriat chhuah veleh, ‘Ka pa hlawhfate ei sên loh nei an tam tehlul vei nên, kei lah hetah rilṭâmin ka thi mai dâwn si a. Ka tho vang a, ka pa hnênah ka kal ang a, a hnênah, ‘Ka pa, vâna mi chungah leh i chungah ka lo tisual ta a ni e. I fapaa vuah tlâk ka ni ta lo, i hnêna inhlawhfa pakhat angin mi chhawr ve rawh, ka ti ang,’ a ti a. “Tichuan, a tho va, a pa hnênah a kal ta a. Hla taka a la awm laiin a pa chuan a lo hmu a, a khawngaih ta êm êm a, a tlân a, a va pawm a, a fâwp ta ngawih ngawih a. A fapa chuan, ‘Ka pa, vâna mi chungah leh i chungah thil ka tisual a ni e, i fapaa vuah tlâk ka ni ta lo,’ a ti a. A pa erawh chuan a bawihte hnênah, ‘Kawr ṭha ber kha han la thuai ula, hâktîr rawh u, zungbun buntîr ula, pheikhawk pawh buntîr rawh u; bâwngno châwmthau kha han kai ula, talh rawh u; hlim takin ruai i ṭheh ang u. He ka fapa hi a thi a, a lo nung leh ta a; a bo va, kan hmu leh ta a nih hi,’ a ti a. Tichuan, hlim takin an awm ṭan ta a. “A fapa upa zâwk chu lovah a feh a, a lo haw a, in a thlen dâwn chuan thil tum ri leh lâm thâwm chu a hre ta a. Chhiahhlawh pakhat a ko va, ‘Chu, eng nge ni ta?’ tiin a zâwt a. Ani chuan, ‘I nau a lo hâwng a, dam taka a hmuh leh avângin i pain bâwngno châwmthau a talh a ni,’ a ti a. Tichuan, a thinur a, inah chuan a lût duh ta lo va. A pa chu a va chhuak a, a rawn thlêm a. A pa chu a chhâng a, ‘Ngai rawh, kumkhaw hei leh chen sal chhawrin mi chhawr a, i thupêk lah ka awih lo ngai hek lo; chuti chung pawhin ka ṭhiante nêna intihhlimna tûr kêltê takngial pawh mi pe ngai si lo. Nimahsela, he i fapa, nawhchizuarte hnêna i sum khawhral vektu hi a lo hâwng a, bâwngno châwm thau i lo talhsak si,’ a ti a. “Tin, ani chuan a chhâng a, ‘Ka fapa, ka hnêna awm reng i ni a, ka neih zawng zawng hi i ta alâwm. He i nau, thi tawh kha a lo nung leh ta a ni, a bo tawh kha kan hmu leh ta a nih hi; hlim tak leh lâwm taka awm tûr rêng alâwm,’ a ti a,” a ti a. Tin, a zirtîrte hnênah chuan, “Mi hausa pakhatin sum enkawltu a nei a, chu mi chuan a sum a khawhralsak mai mai a ni tiin, a hnênah an hêk a. Tichuan, ani chu a ko va, ‘I chungchâng thu ka hriat hi engtizia nge? I sum enkawl ziakna bu chu han la rawh; sum enkawltuah i ṭang thei tawh lo vang,’ a ti a. Chu sum enkawltu chuan a rilruin, ‘Ka puin sum enkawltu ka nihna mi bân dâwn hi, engtin nge ka tih ang? Lei laih ka peih si lo, kut dawh lah ka zak si. Sum enkawltua mi bân huna miten an ina mi awmtîr theih dân tûr ka hre ta,’ a ti a. Tichuan, a pu leibatute chu pakhat khatin a ko va, a hmasa ber hnênah chuan, ‘Ka pu hnênah eng zât nge i bat?’ a ti a. Ani chuan, ‘Hriak ṭîn za,’ a ti a. Ani chuan, ‘I ziakna lehkha hi la la, ṭhu la, sawmnga tih ziak rawh,’ a ti a. Mi dang hnênah, ‘Nang eng zât nge i bat kha?’ a ti a. Ani chuan ‘Buh ṭîn sânghnih leh zahnih leh sawmnga’ a ti a. Ani chuan, ‘I ziakna leh kha hi la la, ṭîn sâng khat leh zariat tih ziak rawh,’ a ti a. A pu chuan sum enkawltu sual fin thiamzia chu a fak ta a, êng fate aiin tûnlai mite hi khawvêl thilah chuan an fing zâwk a ni. “Ka hrilh a che u, khawvêl sum lem hian in tân ṭhian siam rawh u; sum a ral hnuah chatuan rama lawm luh in ni thei ang. Tlêm te chunga rinawm chu tam tak chungah pawh a rinawm ṭhîn; tlêm tê chunga rinawm lo chu tam tak chungah pawh a rinawm ṭhîn lo. Khawvêl sum chungah mah in rinawm loh chuan, tu nge sum tak chu kawltîr ngam ang che u? Mi dang ta chungah mah rinawm lo chu, in ta tûr ngei pawh tu nge pe ang che u? Chhiahhlawh tu mahin hotu pahnih rawng an bâwl kawp thei lo; pakhat huain pakhat an duh emaw a ni ang a; a nih loh leh pakhat chu an ngaina ang a, pakhat an hmusit ang. Pathian rawng leh sum rawng in bâwl kawp thei lo ve,” a ti a. Farisai, tangka ngaihlututen chûng thu chu an hriatin Isua chu an nuihzat a. An hnênah, “Mi mit hmuha mi fel anga lang mai in ni e; mahse, Pathianin in rilru chhûng a hre si a. Mihringte ngaihsân hi Pathian hmuha tenawm a ni. Johana a lo kal hma zawng kha chuan Dân leh zâwlneite thu kha hman tûr a ni a; chuta chinah erawh chuan Pathian ram Chanchin Ṭha hril a ni a, mi tinin luh tumin an bawh ta huai huai a ni. Nimahsela, Dân thu pakhat tê pawh a bo ai chuan lei leh vân boral hi a awl zâwk ang. “Nupui maa, mi dang nei tawh phawt chu an uire a ni, mi nupui mâk hnu nei apiang pawh an uire a ni. “Mi hausa deuh pakhat hi a awm a, puan senduk leh puan zai sîn a inbel a, ni tin nuamsa takin a awm ṭhîn a. A kawngkapui bulah chuan mi rethei tak pakhat, a hming Lazara, pân bawm khah lûk chu an muttîr ṭhîn a; mi hausa dawhkân ata ei nawi tlate chu ei a châk a, uite lah chuan a pân an rawn liahsak ṭhîn a. Mi rethei chu a thi a, Abrahama ângchhûngah vântirhkohten an kalpui ta a. Mi hausa pawh chu a thi a, an phûm a. Mitthi khuaah hrehawm tak a tuar a; a han vânvadâk a; hla takah, Abrahama chu, a ângchhûnga Lazara awm nên, a han hmu a. Tin, a au va, ‘Ka pa Abraham, mi khawngaih la, Lazara kha, a kut zung hmâwr tuiah chiah se, ka lei tidai tûrin han tîr teh, he meialhah hian ka na êm êm a ni,’ a ti a. “Abraham erawh chuan, ‘Ka fapa, nangin, i dam laiin thil ṭha hlîr i chang a, chutiang bawkin Lazaran thil ṭha lo hlîr a chan kha hre reng ta che; tûnah zawng ani chu thlamuang takin hetah a awm ta a, nang zawng i na a nih kha. Chu lo rêngah, heta ṭanga nangni hnêna kal tumte emaw, kha lam aṭanga kan hnên lama lo kal tumte emaw, an kal kai theih loh nân leikak nasa tak kan inkârah a awm a ni,’ a ti a. Ani chuan, ‘A nih leh, ka Pa, ani chu ka pa inah kaltîr tûr talin ka ngên a che. Pianpui mipa panga ka nei a, he na tuarna hmunah hian an lo kal ve dah ang e, ṭhahnemngai takin hrilh teh se,’ a ti a. Abrahama chuan, ‘Mosia leh zâwlneite an nei alâwm, an thu ngaithla ang hmiang,’ a ti a. Ani chuan, ‘Ka Pa Abraham, ni lo ve, mitthi zînga mi meuh an hnênah kal sela an sim ang,’ a ti a. Ani chuan, ‘Mosia leh zâwlneite thu an awih loh chuan, mitthi zînga mi meuh tho leh thu pawh an awih chuang lo vang,’ a tihsan a,” a ti a. Tin, a zirtîrte hnênah, “Tlûknate hi awm lo thei a ni lo; nimahsela, a awmtîrtu chung chu a pik e. Hêng mi tête zînga pakhat pawh hi a tihtlûk ai chuan chhangphut râwtna lung lian pui a nghâwngah awrhtîra, tuifinriata thlâk ni se a tân a ṭha zâwk ang. “Fîmkhur rawh u, i unauvin i chunga thil a tihsual chuan zilh rawh, a sim chuan ngaidam rawh. Ni khatah i chunga vawi sarih thil a tihsualin vawi sarih, ‘ka sim e,’ tia i lam a lo hawi chuan i ngaidam tûr a ni,” a ti a. Tirhkohten Lalpa hnênah chuan, “Kan rinna min tihpunsak rawh,” an ti a. Lalpa chuan, “Anṭam chi fang khat tluk rinna nei ula chuan, he thingtheihmu kûng hnênah hian, ‘Inphawi la, tuifinriatah insawn rawh,’ in ti ang a, in thu a awih mai tûr. “Nangni zîngah tu hian nge bawih neia, lei leta feh emaw, berâm vênga kal emaw, a lo hâwn veleh, ‘Lo kal la, chaw rawn kîl nghâl rawh,’ lo ti ang? ‘Ka ei tûr siam rawh, inthuam la, ka ei kham hma chu mi lo vil rawh; chumi hnuah nangin i la ei ve ang chu,’ a ti zâwk dâwn lâwm ni? In thu anga a tih avângin in bawih chu lâwmthu in hrilh ngai êm ni? Chutiang bawkin nangni pawh thupêk zawng zawng in tih zawh vek hnuin, ‘Bawih ṭangkai lo kan ni e, kan tih tûr rêng chauh kan ti a nih hi,’ ti ang che u,” a ti a. Jerusalem a pan pah chuan Samari leh Galili inrinaah a kal a. Khaw pakhata a luh dâwnin phâr sâwm a lamah an lo kal a; hla feah an ding a; an au va, “Isu, Hotupa, min khawngaih rawh,” an ti a. Anni chu a han hmuh chuan, “Kal ta ula, puithiamte va inentîr rawh u,” a ti a. Chutia an kal lai chuan an lo thianghlim ta hlâwm a. An zînga pakhat chuan a dam ta tih a inhriat veleh aw ring taka Pathian fak chungin a kîr leh a; Isua ke bulah chuan a va bawkkhup a, lâwmthu a hrilh ta a. Chu mi chu Samari mi a ni. Isua chuan a lo bia a, “Mi sâwm kha in lo thianghlim ta vek a ni lâwm ni? Pakuate kha khawiah nge? He awze mi chauh lo hi Pathian fak tûra lo kîr leh pakhat mah an awm na nge?” a ti a. Tichuan, a hnênah, “Tho la, kal rawh, i rinna hi i dam phah ta a nih hi,” a ti a. Farisai-ten Pathian ram lo thlen hun tûr an zawh chu a chhâng a, an hnênah, “Pathian ram lo thleng chu mita hmuh chi a ni lo ve. ‘En teh u, heta hi,’ emaw, ‘sawta saw,’ emaw an ti hek lo vang. Ngai teh u, Pathian ram chu in zîngah hian a awm zâwk a ni,” a ti a. A zirtîrte hnênah chuan, “Mihring Fapa dam lai hunte hi ni khat tal hmuh in duh ni a lo la thleng dâwn; nimahsela, in hmu si lo vang. In hnênah, ‘En teh u, sawta saw le,’ emaw, ‘en teh u, heta hi le,’ emaw an la ti ang; kal chhuak suh ula, zui duh hek suh u. Mihring Fapa lo kal ni chuan, kâwlphein kâwlkil a dêt tawn zawr zawr ang hi a la ni dâwn. Amaherawhchu, tûnlai mite hian an hnâwl ang a, thil tam tak a tuar hmasa zet tûr a ni. “Nova hun laia thil awm dân ang khân Mihring Fapa lo kal ni-ah pawh a la awm ve ang. Nova lawnga a luh ni thleng khân mite chuan an eiin an bâr a, nupui pasal an innei a; tui a lo lian a, an zaa a rawn tihboral tâk kha. “Chutiang bawkin Lota dam laiin thil a awm kha; an eiin an in a, an leiin an hralh a, thil an phun a, in an sa a; nimahsela, Sodom khua ata Lota a chhuah ni chuan vân aṭangin mei leh kât a sûr a, an za-in a tihhlum vek kha. Mihring Fapa lo kal hun chuan chutiang bawk chu a la ni ang. Chumi hunah chuan in chungah mi an awm chuan, in chhûnga sum chuh tûrin chhuk suh se. Lova awm chu hâwng hek suh se. Lota nupui hre reng rawh u. “Mahni nun chhan tum apiang chuan an chân ang a, mahni nun chân apiang chuan an hum ang. “Ka hrilh a che u, chumi zânah chuan mi pahnih khum khatah an mu ang a, pakhat chu kal bopui a ni ang a, pakhat chu hnutchhiah a ni ang. Hmeichhe pahnihin buh an dêng ang a, pakhat chu lâk a ni ang a, pakhat chu hnutchhiah a ni ang,” a ti a. Anni chuan an lo chhâng a, “Lalpa, khawiah maw?” an ti a. Ani chuan, “Sa ruang awmna apiangah mulukawlhte pawh an awm khâwm ang,” a ti a. Tin, beidawng lova ṭawngṭai fan fan tûr a nihzia tehkhin thuin a hrilh a: “Khaw engah emaw rorêltu pakhat a awm a; Pathian a ṭih lo va, mihring lah a pawisa hek lo. Chumi khuaah chuan hmeithai pakhat a awm a, ‘Ka khingpui nêna kan thubuai min chinfelsak rawh,’ tiin a hnênah a lo kal chhên a. Ani chuan eng emaw chhûng chu a lo duh lo va, nakinah erawh chuan a rilruin, Pathian ṭih lovin mihring pawisa lo mah ila, he hmeithai hian mi tibuai êm a, ka tihfelsak mai teh ang; chuti lo chu a lo kal fo âwm si a, a ninawm lutuk dâwn,’ a ti a,” a ti a. Lalpa chuan a sawi zêl a, “Rorêltu fel lo thu sawi chu hre rawh u, A mi thlan, a chhûn a zâna amah autute thu chu Pathian chuan a chinfelsak thuai dâwn lâwm ni? A muangchâng dâwn em ni? Ka hrilh a che u, a rawn chinfelsak thuai ang. Amaherawhchu, Mihring Fapa hian a lo kal hunah khawvêlah rinna a rawn hmu ang em ni?” a ti a. Fel inti hlea, mi dangte hmusit ṭhînte hnênah he tehkhin thu hi a sawi a. “Mi pahnih tempulah ṭawngṭai tûrin an chho va; pakhat chu Farisai a ni a, pakhat chu chhiahkhawntu a ni. Farisai chu a ding a, hetiang hian a ṭawngṭai a, ‘Aw Pathian, mi dang anga mi bum hmang, Dân bawhchhia, uire leh he chhiahkhawntu ang pawh hi ka nih loh avângin lâwmthu ka hrilh a che. Chawlhkâr tin vawi hnih chaw ka nghei ziah a, ka neih apiangah sâwma pakhat ka pe ṭhîn,’ tiin. Chhiahkhawntu erawh chu hnung feah a ding a, vân lam pawh a en ngam lo va, ‘Aw Pathian, kei mi sual hi mi khawngaih rawh,’ tiin a âwm a inchûm a inchûm ta zâwk a. “Ka hrilh a che u, a hmasa aiin chu mi zâwk chu thiam changin a in lamah a haw thla ta a. Inngaihlu apiang an tlâwm ang a, inngaitlâwm apiang chawimawi an ni ang,” a ti a. A deh atân nausênte lam pawh an rawn hruai a, zirtîrte erawh chuan an lo hnar a. Nimahsela, Isuan anni chu a ko va, “Naupangte ka hnênah han kaltîr ula, hnar tawh suh u; Pathian ram chu hetiang mite ta a ni si a. Thu dik ka hrilh a che u, Pathian ram chu naupang anga lâwm lo apiang tu mah a chhûngah an lût tawp lo vang,” a ti a. Tin, hotu pakhatin a hnênah, “Zirtîrtu Ṭha, chatuan nun ka chan theih nân eng nge ka tih ang?” tiin a zâwt a. Isuan, “Engati nge Ṭha mi tih? Tu mah ṭha an awm lo, Pathian chauh lo chu. Thupêkte chu i hria alâwm uire suh, tual that suh, ru suh, dâwtin hêk suh, i nu leh i pa chawimawi rawh, tihte hi,” a ti a. Ani chuan, “Chûng zawng zawng chu ka tleirâwl chhuah tirh ata ka zâwm ṭhîn,” a ti a. Chu chu a hriatin Isuan a hnênah, “Kawng khat i la bâk e; i neih zawng zawng hralh la, pachhiate sem rawh; chutichuan, vânah ro i nei dâwn nia; tin, lo kal la, mi zui ang che,” a ti a. Chûng thu a han hriat chuan a lungngai ta hle a, mi hausa tak a ni si a. Isuan ani chu a hmuhin, “Sum ngahte tân Pathian rama luh a va harsa êm! Pathian rama mi hausa an luh aiin, hriau benga sanghâwngsei luh tlang a âwl zâwk si a,” a ti a. A lo ngaithlatute chuan, “Chuti chu tu nge chhandam ni thei ang le?” an ti a. Ani erawh chuan, “Mihring tih theih loh hi Pathian chuan a ti thei asin,” a ti a. Petera chuan, “Ngai teh, kan in leh lo kalsanin kan zui ta che a,” a han ti a. Isuan, “Thu dik ka hrilh a che u, Pathian ram avânga in emaw, nupui emaw, unaute emaw, nu leh pa emaw, fate emaw kalsan tawh phawt chuan tûnah ngei pawh hian, a aia tam daih an hmu ngei ang, hun lo la thleng tûra chatuan nunna nên,” a ti a. Sâwmpahnihte chu a hruai hrang a, an hnênah, “Ngai teh u, Jerusalem-ah kan chhoh dâwn hi; Mihring Fapa chungchâng thu zâwlneite hmanga ziak zawng zawng kha a thleng kim dâwn. Jentail-te hnênah an hlân ang a; anni chuan an lo nuihzat ang a, zahthlâk takin an sawisa ang; chil an chhâk ang a; an vua ang a, an tihlum ang; ni thum ni-ah a tho leh ang,” a ti a. Chûng thu chu a ngaihna an hre lo, an laka thup a ni a, a thu sawi chu an man lo va ni. Jeriko khua a lo thlen dâwn chuan mitdel pakhat hi kawng sîrah kut dawhin a lo ṭhu a. Mipui kal thâwm a hriat chuan eng nge ni ta tih a zâwt a. “Nazaret Isua a lo kal a ni,” an ti a. Tichuan, “Isu, Davida Fapa, mi khawngaih rawh,” tiin a au ta a. Kal hmasate chuan an hau va, ngawi tûra an tih pawhin a hma aia ringin, “Davida Fapa, mi khawngaih rawh,” tiin a au zual sauh va. Isua chu a ding a, a hnêna han hruai tûrin a hrilh a. A kiang hnai a lo thlen chuan, “Eng nge tihsak che ila i duh?” a ti a. Ani chuan, “Lalpa, hmuh theih ka duh,” a ti a. Tichuan Isuan, “Hmu thei tawh ang che, i rinna hi i dam phah a ni e,” a ti a. Thâwklehkhatan khua a hmu thei ta a. Pathian fak chung zêlin amah chu a zui ve ta a. Mi zawng zawngin chu chu an hmuhin Pathian an fak a. Jeriko-ah chuan a lût a, a chhûnpelh dâwn a. Chutah chuan pa pakhat, a hming Zakaia a awm a; chhiahkhawn hotu a ni a, mi hausa tak a ni. Isua chu tu nge ni tih hmuh a tum a, mipui avâng chuan a hmu thei lo va, pa tawi tak a ni si a. Tichuan, a kalna tûr kawngah a tlân khalh a, a en tûrin theipui kûngah a lâwn a. Chumi hmun Isuan a va thlen chuan a dâk a, a hnênah, “Zakai, lo chhuk thuai rawh, vawiin hian i inah ka thleng dâwn a ni,” a ti a. A lo chhuk ta sawk sawk a, hlim takin amah chu a thleng ta a. Chu chu an hmuhin an za chuan, “Mi sual hnêna thleng tûrin a luh tâk saw,” tiin an phunnawi a. Zakaia chu a ding a, Lalpa hnênah chuan, “Ngai teh, Lalpa, ka sum zâtve pachhiate ka pe ang a; tu thil pawh dik lo taka lâksak ka lo neih chuan a lêt liin ka rûl leh ang,” a ti a. Isuan a hnênah, “Vawiinah he inah hian chhandamna a lo thleng ta, ani pawh Abrahama fapa a ni si a. Mi bote zawnga chhandam tûrin Mihring Fapa hi a lo kal a ni rêng a ni,” a ti a. Chûng thu chu an ngaihthlâk lai chuan Jerusalem pawh an hnaih tâk avâng leh, Pathian ram chu lo thleng mai dâwna an rin avângin tehkhin thu a sawi ta a: Heti hian a sawi a, “Mi lian pakhat, a lal theihna tûr thu laa lo kîr leh tûrin khaw lam hla takah kal a tum a. A bawihte sâwm a ko va, rangkachak tangka pakhat a pe ṭheuh va, an hnênah, ‘Ka thang chhûngin lo peipung rawh u,’ a ti a. Tin, chu khuaa mite chuan an hua a, ‘He pa hi lal atân kan duh lo ve,’ ti tûrin palai an tîr zui ve nghâl a. “Lalna thu chu laa a lo kîr leh chuan, tangka a pêk a bawihte kha, an peipun zât hriat nân a kohtîr a. A lo kal hmasa ber chuan, ‘Ka pu, i rangkachak tangka kha sâwmin a pung e,’ a ti a. Ani chuan, Bawih ṭha, i ti ṭha e, tlêm tê chungah i rinawm a, khaw sâwm chunga hotu-ah ṭhu ang che,’ a ti a. A dawta lo kal pawh chuan, ‘Ka pu, i rangkachak tangka kha pangain a pung e,’ a ti a. Ani chuan, ‘Nang pawh, khaw nga chunga hotu-ah ṭhu rawh,’ a ti a. “A dang pawh a lo kal a, ‘Ka pu, en teh, i rangkachak tangka kha, thlanhrûkna puanin ka lo fûn ṭha khiau asin. Mi khirh tak i nih avângin ka hlau che a ni; i dah loh pawh i la ṭhîn a, i tuh loh pawh i seng ṭhîn si a,’ a ti a. “Ani chuan, ‘Bawih sual, i ṭawngka chhuak aṭang ngeiin ka thiam lo va che. Mi khirh tak ka niha, ka dah loh pawh ka lâk ṭhina, ka tuh loh pawh ka seng ṭhin i hria maw? Chuti a nih ahnu, ka tangka chu engah nge tangkaa sumdâwngtute hnênah i dah mai loh? Ka lo hâwnin a pung nên keiin ka rawn ṭhîng tûr alâwm,’ a ti a. Tin, a kianga dingte hnênah, ‘A rangkachak tangka kha lâksak ula, rangkachak tangka sâwm neitu kha pe rawh u,’ a ti a. Anni chuan, “Ka pu, ani zawngin sâwm a nei alâwm,’ an ti a. Ka hrilh a che u, a nei apiang an pêk belhchhah ang a, a nei lo chu a neih chhun pawh lâksak a ni ang. Tin, hêng, ka hmêlma, an lal atâna mi duh lotute hi, rawn hruai ula, ka hmaah that rawh u,’ a ti a,” a ti a. Chûng thu chu a sawi zawh chuan Jerusalem panin hma a hruai chho ta a. Oliv tlâng an tiha awm Bethfage leh Bethani khua a thlen dâwnin zirtîrte zînga pahnih a tîr a. “Kan hma zâwn khuaah sâwn va kal ta ula, in va luhin sabengtung no thlun, tu ma la chuan ngai lohna in va hmu ang; phelh ula, han kai rawh u. Miten, ‘Engah nge in phelh tâk mai?’ an tih che u chuan, ‘Lalpan a mamawh a ni,’ tiin chhâng ang che u,” a ti a. Tichuan, a tirhte chu an kal ta a, an hnêna a sawi ang ngeiin an va hmu a. Sabengtung chu an phelh lai chuan a neitute chuan, “Sabengtung kha engah nge in phelh tâk mai?” an ti a. Anni chuan, “Lalpan a mamawh a ni,” an ti a. Isua hnênah an rawn kai a, sabengtung chungah chuan an puante an phah a, a chungah Isua chu an chuantîr ta a. A kalkawngah chuan an puante an phah zêl a. Jerusalem thlen dâwn hnaih, Oliv tlâng liam thlâk dâwnah chuan zirtîrho zawng zawng chu thil mak an hmuh zawng zawngte avângin an lâwm a, aw ring takin an au va, Pathian an fak ta a. “Lalpa hminga lal lo kal chu Fakin awm rawh se, Vânah rem lêng sela, Chungnungbera hnênah ropuina awm rawh se,” an ti a. Mipui zînga Farisai ṭhenkhat erawh chuan a hnênah, “Zirtîrtu, i zirtîrte hi khap rawh,” an ti a. Ani chuan a chhâng a, “Ka hrilh a che u, hêngho hi an ngawih chuan hêng lung tal hi an au chhuak ang,” a tihsan a. Tin, a lo hnaih deuhva, khawpui a han hmuh chuan a ṭah ta a, “Aw, nang lul hian vawiinah tal hian muanna kawng hi hre hman hrâm la ṭha tûr! I râlten leikulh an siam hnan hun che a lo thleng dâwn, an hual ang chia, kil tin aṭangin an bei dâwn a che; i chhûnga fanaute nên lam an paih thal dêr ang che u; i chhûngah lung intiang rêng rêng an zuah lo vang, Pathianin a rawn kan lai che i hriat loh avângin chûng chu i chungah a lo thleng dâwn,” tiin. Tempulah chuan a va lût a, englo zuartute chu a hnawt chhuak a, an hnênah, “ ‘Ka in chu ṭawngṭaina in a ni ang,’ tih ziak a ni a, nangni erawh chuan suamhmangte pûkah insiam tâk zâwk hi,” a ti a. Ni tin Tempulah chuan a zirtîr ṭhîn a, puithiam lalte leh Dân zirtîrtute chuan, vântlâng hotute nên, amah tihboral an tum a; nimahsela, mipuiten a thu ngaihthlâk an kham theih loh avângin a tih dân tûr an hre thei lo a ni. Ni khat chu Tempula Chanchin Ṭha hrila a zirtîr lai chuan puithiam lalte leh Dân zirtîrtute chu, upate nên a hnênah an lo chho va. “Eng thuneihnain nge hêng thil hi i tih? Tu-in nge thu pe che min hrilh rawh,” an rawn ti a. Ani chuan a chhâng a, “Kei pawhin thu ka zâwt ve ang che u: Johana baptisma kha, vâna mi thu nge mihring thu, min hrilh rawh u,” a ti a. An inberâwn a, ‘Vâna mi thu kan tih chuan, ‘engah nge a thu in awih loh,’ min ti si ang a, ‘leia mi thu,’ kan tih lahin mipui hian an za-in lungin min dêng mai awm si a, Johana chu zâwlnei ni ngeiah an pawm tlat hlawm si,” an ti a. Tichuan, “Khawi lam zâwk thu nge kan hre lo,” an ti a. Isua chuan, “Kei pawhin tu thuin nge hêng thil hi ka tih ka hrilh bîk lo vang che u,” a ti a. Vântlâng hnênah he tehkhin thu hi a hrilh ta a: “Mi pakhatin grep huan a siam a, huan enkawltute a thlawh hlawhtîr a; ram dangah rei tak a thang bo va. A lawh hun chuan a chan ai la tûrin bawih pakhat huan enkawltute hnênah chuan a tîr a; nimahsela, huan enkawltute chuan an lo vêl a, kut ruakin an hâwtîr a. Bawih dang a tîr leh a, chu pawh chu an lo vêl a, zahthlâk takin an sawisa a, kut ruak bawkin an hawtîr leh ta a. A ṭum thumnaa a tirh lek phei chu, thisen an lo chhuahsak a; huan ata an theh chhuak a. “Grep huan neitupa chuan, ‘Engtin nge ka tih ang aw? Ka fapa duh tak hi ka tîr mai teh ang; ani hi zawng an lo zah êm ang chu maw,’ a ti a. Huan enkawltute chuan an lo hmuhin, ‘He mi hi ro luahtu tûr chu a ni, i that ang u khai, keinin a ro chu kan nei hlauh dâwn nia,’ an ti hlawm a. Grep huan ata chu an theh chhuak a, an tihlum ta a. Tichuan, grep huan neitupa chuan engtin nge anni chu a rawn tih ang? A lo kal ang a, huan enkawltute chu a rawn tiboral ang a, huan chu mi dangte a pe ang,” a ti a. Thu ngaithlatute chuan, “Chu êm chu ni lo ve!” an ti a. Nimahsela, anniho chu a en a, “In satute lung duh loh kha, Chu ngei chu a kil lung ṭangkai ber a lo ni si,’ tih ziak hi eng tihna nge ni? Chu lung chunga tlu apiang an keh sawm ang a, a delh lek phei chu a râwt dip ang,” a ti a. Chutih lai chuan Dân zirtîrtute leh puithiam lalte chuan, chu tehkhin thu chu anmahni demin a sawi tih an hriat avângin man nghâl mai an duh a; amaherawhchu, vântlâng an hlau si. Tichuan, remchâng an melh ta rân a: Ramawptu rorêlna leh a thuneihnaah an thlen theih nân a ṭawng sual palh man tûrin enthlatu, mi dik anga lang tûrin an tîr a. Chûng mite chuan, “Zirtîrtu, i thu sawi leh i thu zirtîr hi a dik tih kan hria; tu mah zah bîk nei chuang lovin Pathian thu dik tak i zirtîr ṭhîn. Kaisara hnênah chhiah chawi tûr kan ni nge ni lo?” tiin an zâwt a. An ngamthlêm a ni tih a hmu tlang a, an hnênah, “Duli mi han entîr teh u. Tu lem leh tu hming nge chuang?” a ti a. Anni chuan, “Kaisara,” an ti a. Ani chuan, “A nih ahnu, Kaisara ta chu Kaisara pe ula, Pathian ta chu Pathian pe ta che u,” a ti a. Tichuan vântlâng hmaa a thu sawia man an tum chu an hlawhchham ta a; a chhânna chu mak an ti hle a, an ngawi ta daih a. Sadukai-ho, ‘thawhlehna a awm lo,’ tite zînga ṭhenkhat Isua hnênah an lo kal a. “Zirtîrtu, Mosian, ‘Tu pawh nupui nei si, fa nei lovin thi sela, a unaupa chuan a nupui chu rochungin a unaupa tân chi a thlahsak tûr a ni,’ tiin min ziaksak a. Aw le, unau mipa pasarih an awm a, a upa ber chuan nupui a nei a, fa nei lovin a thi a; a pahnihna chuan a rochung a, pathumna pawhin; chutiangin pasarihte chuan an rochung ṭheuh va, fa nei lovin an thi zêl a. Chumi hnu chuan hmeichhia pawh chu a thi ve ta a; tichuan, thawhlehnaah chuan chu nu chu tu nupui ber nge ni ang? An pasarih khân nupuiah an nei ṭheuh si a?” tiin an zâwt a. Lalpan an hnênah, “He khawvêl mite hi nupui pasal an innei ṭhîn a; khawvêl lo la awm tûra thawhlehnaa tel tlâka ruatte erawh chu nupui pasal an innei dâwn tawh hlei nêm; thih pawh an thi leh thei dâwn tawh lo, vântirhkohte ang an ni; thawhlehna changtute an ni a, Pathian fate an ni. Mitthi kaihthawh thu chu Mosia pawhin a tilang alâwm. Hnimbuk meialh thu-ah khân Lalpa chu, ‘Abrahama Pathian, Isaka Pathian, Jakoba Pathian,’ tia a sawi kha. Ani chu mitthite Pathian a ni lo va, mi nungte Pathian a ni zâwk e. Ani tân chuan an nung vek a ni,” a ti a. Dân zirtîrtu ṭhenkhat chuan, “Zirtîrtu, i sawi dik hle e,” an lo ti bawk a, thu dang chu an zâwt ngam tawh lo. An hnênah, “Krista chu Davida fapa engtiziaa ti nge an nih? Fakna Hla bu-ah Davida ngeiin: ‘Lalpa chuan ka Lalpa hnênah, ka ding lamah lo ṭhu rawh, I hmêlmate i ke nghahchhanah ka han siam ang e,’ a ti a. Davidan ani chu, ‘Lalpa,’ a tih si chuan, engtin nge a fapa a nih theih ang?” a ti a. Vântlâng hriatin a zirtîrte hnênah chuan, “Dân zirtîrtute lakah fîmkhur rawh u. Anni chuan kawrfual haa lên vêl an chîng a, dâwr hmuna chibai bûk an ngaina a, sunagog-a ṭhutna langsâr ber leh ruai ṭhehna hmuna ṭhutna ṭha ber an ngiat ṭhîn. Hêngho, hmeithai sum ei zawhsaka, mi hmuh atân maia rei tak tak ṭawngṭai chîng site hian hremna an tuar nasa ber ang,” a ti a. Thawhlâwm bâwma mi hausate thawhlâwm thlâk chu a thlîr reng a. Hmeithai rethei tak pakhatin dâr pawisa pahnih a rawn thlâk ve chu a hmu a. Tichuan, “Thu dik ka hrilh a che u, he hmeithai rethei tak hian mi dang zawng ai khân a thlâk tam a ni. Mi dangte hi chuan an neih liama mi an rawn thlâk a, ani erawh hi chuan tlachham chungin, intunnunna tûra a neih chhun chu a rawn thlâk a nih hi,” a ti a. Lung mawi tak tak leh thilpêk khâwma Tempul an chei mawizia thu mi ṭhenkhatin an sawi laiin Isuan, “Hêng in thil hmuhte hi, lung intiang rêng rêng hi pakhat mah tihchim lohva hnutchhiah a awm loh hun a lo thleng dâwn,” a ti a. Anni chuan a hnênah, “Zirtîrtu, chûng chu engtikah nge a lo awm ang? Chûng lo thlen dâwn hun chhinchhiahna thil mak eng eng nge awm ang?” tiin an zâwt a. Ani chuan, “Hruai bo in nih loh nân fîmkhur rawh u. Ka hming chhâlin, ‘Keimah hi ka ni,’ ‘a hun a thleng dâwn ta,’ tiin mi tam tak an lo chhuak ang; an hnung zui suh ang che u. Indo ri te leh hel vânga buai thâwmte in hriat hunin, hlauvin mangang suh ang che u; chûng chu thleng hmasa tûr rêng a ni, hun tâwp erawh chu a ni nghâl mai lo vang,” a ti a. Tin, an hnênah, “Hnam hrang hrang an indo vang a, sawrkâr hrang leh sawrkâr hrang an indo bawk ang. Lîr a nghîng vak vak ang a, hmun hrang hrangah ṭâm a tla ang a, hrite a lêng bawk ang; vân ata hlauhawmte leh chhinchhiahna mak tak tak a lo awm ang. Nimahsela, chûng thilte chu a lo thlen hmain an man ang che u a, sunagog-ah te hruaiin tân inah te an khung ang che u a, an tiduhdah dâwn che u a ni. Ka hming avângin lalte leh Ramawptute hmaah an hruai ang che u. Ka thuhretute in nih târlanna remchâng a ni hlauh dâwn. Chhânna tûr ngaihtuah lâwk a ngai lo tih hre sa rawh u; in khingpuite tluk loh tûr leh hnial theih loh tûr finna leh mi chhân thiamna keiin ka pe dâwn si che u a. In nu leh pate, in unaute, in laichînte leh in ṭhiante hial pawhin an mantîr ang che u a; a ṭhen phei chu an tihlum ang che u. Ka hming avângin mi tinin an hua ang che u. Nimahsela, in samzai pakhat pawh a boral lo vang. Chhel takin ding tlat ula; tichuan, in him ang. “Sipaihoten Jerusalem an hual in hmuh hun chuan, a chhiat a hnai ta tih hria ang che u. Chutih hunah chuan Judai rama awmte chu tlângramahte tlân se; khawpui chhûnga awmte chuan chhuahsan sela, thingtlânga awmte chu a chhûngah lût suh se. Chûng nite chu hremna ni chu a ni e, thu ziak zawng zawng a thlen kim nân. Chûng huna nau paite leh nauno pawmte chu an va khawngaihthlâk dâwn êm! He ramah hian hrehawm nasa tak a thleng dâwn si a, he chite chungah hian thinurna a lo thleng dâwn a ni. Khandaiha sâm an ni ang a, Jentail ram tinah sala hruai darhin an awm ang; tin, Jentail-te hun a tâwp hma zawng Jerusalem hi Jentail-te rah beh a ni ang. “Tin, ni-ah te, thlaah te, arsi-ah te khian chhinchhiahna mak tak tak a lo awm ang a; leiah pawh tuifinriat fâwn leh rûm hum hum an hriatin hnam tin tihngaihna hre lovin an mangang ang a; Vân thiltihtheihnate chu tihnghîn a ni ang a, khawvêla thil hlauhawm lo thleng tûr an suangtuahin, hlauva thlabârin mite an thidang ang. Chutih hunah chuan Mihring Fapa hi thiltihtheihna leh ropuina nasa tak nên chhûm zînga lo kal an hmu ang. Chûng thil chu a lo thlen chuan en chho ula, dâk chhuak ang che u; in tlanna chu a lo hnai ta a ni,” a ti a. An hnênah tehkhin thu a sawi bawk a, “Theipui kûng leh thing dangte pawh hi en teh u. A lo chawr no in hmuhin nipui a lo thaw ṭan ta tih in hre mai ṭhîn. Chutiang bawkin nangni pawhin chûng zawng zawng lo thleng in hmuh hun chuan, Pathian ram chu a lo hnai ta tih hre mai ang che u. Thu dik ka hrilh a che u, chûng thil zawng zawng chu a lo thlen hma loh chuan tûnlai mite hi an ral hman lo vang. Lei leh vân a ral ang a, ka thu erawh chu a ral tawp lo vang. “Tichuan, nawmsak bâwl te, zu ruih te, ni tin khawsak engtona te in rilrua a khah lutuk loh nân fîmkhur rawh u. Thanga âwk phut ang maiin a rawn nang dah ang che u. Lei pum pui chunga chêngte chungah chutiangin a lo thleng dâwn si a. Chûng thil lo thleng tûrte tuar chhuaka, Mihring Fapa hmaa in din theih nân eng lai pawhin ngaihvenin ṭawngṭai rawh u,” a ti a. Chhûnah chuan Tempulah a zirtîr a, zânah erawh chuan a chhuak a, Oliv tlâng an tihah chuan a riak ṭhîn. Mi zawng zawng pawh a thu ngaithla tûrin zîngah Tempulah an lo kal ṭhîn. Tin, chhang dawidim telh loh kût, Kalhlên Kût an tih chu a lo hnai ta a. Puithiam lalte leh Dân zirtîrtute chuan amah tihhlum dân tûr kawng an dap ta a; vântlâng an hlau si a. Sâwmpahnihte zînga chhiar tel, Juda, Iskariota an tiha chhûngah Setana a lût a; tichuan, a va kal a, puithiam lalte leh vêngtu sipai hotuten an man dân tûr a va sawipui ta a. Anni chu an lo lâwm hle a, pawisa pêk an tiam a. Ani pawh chuan a remti a, mipui awm loh laia mantîrna hun remchâng a zawng ta a. Chhang dawidim telh loh kût ni, Kalhlên Kût berâmno an talh ni chu a lo thleng a. Tichuan, Petera leh Johana chu a tîr a, “Kalhlên Kût chaw kan ei tûr va buatsaih rawh u,” a ti a. Anni chuan “Khawiah nge va buatsaih ila i duh?” an ti a. Ani chuan, “Ngai teh u, khawpuia in va luhin pa pakhat, hlumbêla tui chawiin a rawn tâwk ang che u, a luhna inah zui lût ang che u. Tin, in neitupa hnênah, ‘Zirtîrtuin, ka zirtîrte nêna Kalhlên Kût chaw kan eina tûr pindan chu khawiah nge, a ti a che,’ ti ang che u. Ani chuan pindan chungnung zau tak, engkim awm a kawhhmuh ang che u; chutah chuan buatsaih rawh u,” a ti a. Tichuan an kal a, an hnêna a sawi ang ngei khân an va hmu a, Kalhlên Kût chaw chu an buatsaih ta a. Tin, a ei a lo hun chuan ani leh a zirtîrte chuan chaw chu an kîl ta a. An hnênah, “Ka tuar hmain he Kalhlên Kût chaw hi eipui che u ka duh tak meuh a ni. Ka hrilh a che u, Pathian rama a tak tak a thlen hma loh chu kût chaw hi ka ei leh tawh dâwn lo,” a ti a. Tin, no a la a, lâwmthu a sawi zawhin, “Hei hi la ula, in rawh u. Ka hrilh a che u, tûn a chinah Pathian ram a lo thlen hma loh chu grep rah tui hi ka in leh dâwn tawh lo,” a ti a. Tin, chhang a la a, lâwmthu a sawi zawhin a phel a, an hnênah a pe a, “Hei hi ka taksa a ni, in tâna pêk chu; min hriat reng nân hetiang hian ti ṭhîn rawh u,” a ti a. Zanriah ei zawh chuan chutiang bawkin no chu a la a, “He no hi ka thisena thuthlung thar, in tâna chhuak chu a ni. “Nimahsela, ngai teh u, mi mantîrtu tûr chuan he dawhkân hi a kîl ve reng a ni. Mihring Fapa hi Pathian ruat angin a kal dâwn; amaherawhchu, a mantîrtu tûr mihring chung chu a pik e,” a ti a. Anni chuan an zîngah chutiang ti tûr chu tu tak ni ang maw, tiin an inzâwt a. An zîngah tu nge ropui bera ngaih tûr ni ang tih inhnialna a lo chhuak bawk a. Ani chuan an hnênah, “Jentail-ho lalte chu an intilal êm êm a, an chunga thuneitute lah chuan ‘Hotuṭhaa’ tih hming te an invuah a. Nimahsela, nangni zîngah zawng chutiang tûr a ni lo ve. In zînga ropui ber chu tê ber angin awm sela, hotu ber chu rawngbâwltu angin awm zâwk rawh se. Tu nge ropui zâwk, chaw kîltu nge a rawngbâwltu? Chaw kîltu chu a ni lo vem ni? Nimahsela, kei zawng in zîngah rawngbâwltu angin ka awm hi. “Harsatna ka tawh chhûng zawng nangnin mi awmpui a. Ka Pain ram mi ruatsak ang bawkin kei pawhin ram ka ruatsak a che u; tichuan, ka ramah chuan ka dawhkânah in eiin in bâr ang a, lalṭhutthlênga ṭhuin Israel hnam sâwm leh pahnih ro in rêlsak ang. “Simon, Simon, ngai teh, Setanan buh thlei angin thlei a tum che u a ni; nimahsela, i rin a bo loh nân ka ṭawngṭaisak a che. Tin, i lo hawi kîr leh hunah i unaute tinghet ang che,” a ti a. Ani chuan, “Lalpa, i hnênah chuan tâng tûr leh thi tûr pawhin kal ve zêl ka inhuam asin,” a ti a. Ani chuan, “Peter, ka hrilh a che, ‘Ani chu ka hre lo ve,’ tia vawi thum mi phat hma chu zâninah âr a khuang lo vang,” a ti a. An hnênah, “Tangka ip te, iptê te, pheikhawk te keng lova ka tirh che u khân tlâkchham in nei rêng em?” a ti a. Anni chuan, “Nei hauh lo,” an ti a. Ani chuan, “Tûnah zawng tangka ip nei chuan keng sela, iptê pawh keng rawh se; khandaih nei lo chuan a puan hralh sela, lei rawh se. Ka hrilh a che u, ‘Ani chu mi sual zîngah an chhiar tel ta,’ tih Lehkha Thu kha ka chunga thleng ngei tûr a ni. Ka chungthu an ziak kha a thleng kim dâwn ta,” a ti a. Anni chuan, “Lalpa, en teh, hei khandaih pahnih chu a awm e,” an ti a. Ani chuan, “A tâwk e,” a ti a. Tin, ani chu a chhuak a, a dân pângngaiin Oliv tlângah chuan a kal ta a; a zirtîrte pawh chuan an zui ve a. A hmun a va thlen chuan an hnênah, “Thlêmnaa in luh loh nân ṭawngṭai rawh u,” a ti a. Lung den phâk chin vêlah a va kal hrang a, a ṭhingṭhi a, a ṭawngṭai a. “Ka Pa, rem i tih zâwng a nih chuan he no hi mi lâk sawnsak rawh; nimahsela, keima thu ni lovin, nangma thu ni zâwk rawh se,” a ti a. Vân ata vântîrhkoh pakhat, a tiharh tûrin a hnênah a lo lang a. A thlaphâng êm êm a, ṭhahnemngai lehzualin a ṭawngṭai a; a thlan chu thisen far lian tak angin a far a. A ṭawngṭai zo chu zirtîrte hnênah a lo kal a, an lungngai tawngkhawng muthlu chu a rawn hmu a, an hnênah, “Engati nge in mutthlûk le? Tho ula, thlêmnaa in luh loh nân ṭawngṭai rawh u,” a ti a. Tin, a la sawi lai mêkin mipui an lo thleng a, Sâwmpahnihte zînga tel Juda an tih khân hma a rawn hruai a, fawh tumin Isua a rawn pan a. Nimahsela, Isuan a hnênah, “Juda, Mihring Fapa hi fâwpin em ni i mantîr dâwn?” a ti a. A vêla mite chuan thil lo thleng tûr chu an hmuhin, “Lalpa, khandaih kan lek mai dâwn aw?” an ti a. An zînga pakhat chuan Puithiam lalber bawih chu a sât a, a beng ding lam a hlawisak a. Isua chuan a chhâng a, “Khaih khaih, a tâwk e,” a ti a. A beng chu a khawihsak a, a tidam ta a. Puithiam lalte, Tempul pulis hotute leh upa lo kalte hnênah chuan Isuan, “Suamhmang man tûr ang ziazângin khandaih leh talhtum kengin in lo thawk a ni maw? Ni tin Tempulah in zînga ka awm ṭhin lai khân mi man si lo; nimahsela, tûn hi in chêt hun a ni, thim lal chêt hun chu,” a ti a. An man ta a, Puithiam lalber inah an hruai lût a. Petera chuan hnung feah a zui a. Tin, in hual chhûng kawtlaiah mei an chhêm a, an ṭhu khâwm a, Petera pawh chu an zîngah chuan a ṭhu ve a. Mei ênga a ṭhu chu chhiahhlawh nula pakhat hian a han hmu a, a en vang vang a, “He pa hi a hnêna awm ve kha a nih hi,” a ti a. Ani erawh chuan, “Hmeichhia, ani chu ka hre lo ve,” a ti a, a phat ta a. A hnu lawkah mi dangin a rawn hmu ve a, “Nang pawh an zînga mi i nih hi,” a ti a. Petera chuan, “Mihring, ka ni awzâwng lo mai,” a ti a. Darkâr khat vêl hnuah chuan mi dangin, “He pa hi a hnêna tel kha a nih ngei hi maw, Galili mi a ni alâwm,” a ti tlat a. Petera chuan, “Mihring, i thu sawi chu ka hre hauh lo,” a ti a. A ṭawng lai mêk chuan âr a lo khuang nghâl a. Lalpa chu a lo hawi a, Petera chu a en a. Petera chuan “Zâninah âr a khuan hmain vawi thum mi phat ang,” Lalpan a hnêna a tih kha a hre chhuak a. Pâwnah a chhuak a, a ṭap ta zawih zawih a. Isua chelhtute chuan nuihza siam nân an hmang a, an bêng sawk sawk a. A mit an tuam a, “Tu nge bêng che, sawi teh,” te an ti a. Ṭawng chhe pui puiin an hau va. Tin, ni a lo chhuah chuan vântlâng upaho, puithiam lalte leh Dân zirtîrtute chu an ṭhu khâwm a; an Sanhedrin-ah chuan Isua chu an rawn hruai a. “Krista chu i nih leh nih loh min hrilh rawh,” an ti a. Ani chuan, “Hrilh che u mah ila, in awih chuang lo vang; zâwt che u mah ila mi chhâng chuang lo vang. Nimahsela, tûn aṭang chuan Mihring Fapa hi Pathian thiltihtheihna ding lamah a ṭhu tawh ang,” a ti a. An zavai chuan, “Chu, nang hi Pathian Fapa i ni maw?” an ti a. Ani chuan, “Nangman, ‘i ni’ min ti alâwm le!” a ti a. Anni chuan, “Hretu dang tu nge kan ngaih tawh ang? Keimahni ngeiin ama kamchhuak kan hre ta alâwm,” an ti a. An za chuan an tho va, Pilata hnênah an hruai ta a. “He mi hian kan chite hel tûrin a fuih a, Kaisara hnêna chhiah chawi a khap a, amah hi Lal, Krista chu niin a insawi tih kan hre chhuak a ni,” tiin an hêk a. Pilata chuan a hnênah, “Juda-te lal i ni maw?” a ti a. Ani chuan a chhâng a, “Chu, i tih chu,” a ti a. Pilata chuan puithiam lalte leh mipuite hnênah chuan, “He mi chungah hian thu pawi eng mah ka hmu lo ve,” a ti a. Nimahsela, anni chuan, “Hel tûra mite fuihpawrhin Judai ram khaw tinah mi a zirtîr ṭhîn tih kan hria, Galili ramah a ṭan a, hetah pawh a lo thlen tâk hi,” tiin an bei lehzual sauh va. Pilatan chu chu a han hriat chuan Galili mi a nih leh nih loh a zâwt a: Heroda biala mi a ni tih a hriat chuan Heroda hnênah a tîr ta a; ani pawh chu Jerusalemah a lo awm lai tak a ni. Herodan Isua a lo hmuhin a lâwm hle a, a chanchin a hriat fo avângin hmuh a châkna a rei hle tawh rêng a; a thil mak tih eng emaw tal hmuh pawh a beisei a. Thu tam tak a zâwt a; nimahsela, a eng mah a chhâng lo. Puithiam lalte leh Dân zirtîrtute pawh chu an ding ve a, an hêk chiam a. Tin, Heroda pawh chuan, a sipaite nên, Isua chu an hmusit hle a, nuihza siam nân an hmang a, puan ropui tak an sintîr a, Pilata hnênah a tîr kîr leh ta a. Pilata leh Heroda chu tûn hma chuan an intai hle ṭhîn a, chumi ni aṭang chuan an inngeih leh ta a. Pilata chuan puithiam lalte leh Dân zirtîrtute leh vântlângho chu a ko khâwm a, an hnênah, “He mi hi mite hel tûra fuihah in rawn puh a, in hma ngeiah ka chhuahchhâl a, in hêkna thu-ah thil pawi eng mah a khawih ka hmu lo. Heroda pawhin a hmu hek lo, kan hnênah a rawn tîr kîr leh ta mai a nih hi. Ngai rawh u, thihna khawp meuh eng mah tih a nei lo va; tichuan, ka han zilh hlek ang a, ka chhuah mai dâwn a ni,” a ti a. Nimahsela, an za chuan an au rual a, “He mi hi chu tiboral la, Baraba kha min chhuahsak rawh,” an ti a. Chu mi chu khawpuia helna avâng leh tual thah avânga tân ina tâng a ni. Pilata chuan Isua chu chhuah a duh a, an hnênah thu a sawi leh a; mahse, “Khêngbet rawh, krawsah khêngbet rawh,” tiin anniho chu an au ta tuar tuar a. Tin, ani chuan a vawi thumnaah, “Engah maw? Eng nge a tihsual? Thihna khawp meuh eng mah pawi a khawih ka hmu lo; ka zilh ang a, ka chhuah mai dâwn,” a ti a. Anni chu ring takin an au va, krawsa khêngbet tûrin an ngên lui tlat a, an aw chuan a vau dai ta a. Pilata chuan an ngên ang chuan thu a titlu ta a. Helna leh tual thah avânga tân ina mi tâng an dîl kha a chhuah a, Isua erawh chu an duh duha tih tûrin a pe ta a. Tichuan, an hruai ta a; Simona, Kurini khaw mi, thingtlâng lam aṭanga lo kal chu an man a, Isua hnungah kraws chu an puttîr a. Tin, vântlâng mipui nasa tak leh lungchhiaa ṭap ṭap hmeichhiaten an zui dûl dûl a. Isua chuan an lam a hawi a, “Jerusalem nute u, mi ṭah suh u, nangmahni leh in fate tân ṭap zâwk rawh u. ‘Hmeichhe ching te, nau pai ngai lo pum te, nau hnêk loh hnute te chu a nihlawh e,’ an tih hun a lo thleng dâwn. Chûng hunah chuan tlâng hnênah, ‘min delh rawh,’ an ti ang a, mual hnênah pawh, ‘min khuh rawh,’ an la ti ang. Thinghring mah hetiang hian an ti a, a ro chu engtin tak la ti ang maw,” a ti a. Tihhlum tûr mi dang, mi sual pahnih a rual chuan an hruai ve a. Luruh an tih hmun chu an va thleng a; mi sualte pawh chu a ding lamah pakhat, a vei lamah pakhat an khêngbet bawk a. Isuan, “Ka Pa, anniho hi ngaidam rawh, an thiltih hi an hre lo a ni e,” a ti a. A silhfênte chu ṭhumvâwrin an insem a. Vântlângho chuan dingin an thlîr a. Hotute pawh chuan, “Mi dang mah a tidam ṭhîn a, Pathian mi ruata, Krista chu a nih meuh chuan amah pawh intidam ang hmiang,” tiin an ṭawng el a. Sipaihote pawh chuan an nuihzat a, a hnênah an kal a, uain thûr an pe a, “Juda-te lal i nih zet chuan intidam ta che,” an ti a. A chungah chuan, “He mi hi Juda-te lal a ni,” tih ziak an târ a. An khenbeh ve mi sual pakhat zâwk pawh chuan a ân khum a, “Krista chu i ni lo vem ni? Intidam la, keini pawh min tidam ve ta che,” a ti a. Nimahsela, pakhat chuan a lo khak a, a zilhhau va, “Pathian meuh pawh i hlau na nge, thuhmun renga an hrem che hi? Keini pahnih hi zawng hrem âwm rêng kan ni, kan thiltih man kan hmu a nih hi; he mi hi zawngin eng mah a tisual si lo,” a ti a. Tichuan, “Isu, i ram i thlen hunah mi hre reng ang che,” a ti a. Ani chuan a hnênah, “Thu dik ka hrilh a che, ka hnênah vawiinah hian paradis-ah i awm ve ang,” a ti a. Chhûn dâr sâwm leh pahnih vêl aṭanga tlai dâr thum thlengin khawvêl a lo thim ta vek a; ni a êng ta lo va, Tempul chhûng puanzâr chu a laiah a thlêr thla a. Isua chu ring takin a au va, “Ka pa, ka thlarau i kutah ka kawltîr a che,” a ti a. Chu chu a sawi zawh chuan a hnuk a chat ta a. Sipai za hotu chuan thil lo thleng chu a hmuhin Pathian a fak a, “He mi hi mitakzet a ni phawt mai,” a ti a. Chûng thil en tûra mipui lo kal khâwmte chuan thil lo thleng chu an hmuhin an lungngai a, an âwmte chûm chûmin an haw leh ta a. A hmêlhriathote erawh chu hla feah an ding reng a, Galili ram aṭanga amah zuitu hmeichhiate nên khân chûng thil chu an thlîr ho va. Tin, mi pakhat, a hming Josefa, rorêltu zînga tel, mi dik leh ṭha tak a awm a. Ani chuan an rorêl leh an thil tih chu a remtihpui ve lo rêng a. Juda-te khua Arimathai-a awm a ni, Pathian ram beisei ve ṭhîntu a ni bawk a. Chu mi chu Pilata hnênah a kal a, Isua ruang a va dîl a. Tin, a la thla a, puan zai sînin a tuam a, tu mah la zalh ngai lohna lung ker thlânah a zalh ta a. Chumi ni chu Juda-te Inrinni a ni a; mahse, Juda-te sabat ni a inṭan lek lek tawh a. Galili ram aṭanga rawn zuitu hmeichheho pawh chuan an zui ve zêl a, thlân leh a ruang an zalh dân chu an en a. Tin, an haw a, rimtuite leh hriak rimtuite an siam a. Thupêk angin sabat ni chuan an châwl a, Pathianni chuan vârṭianah rimtui an siamte chu kengin thlânah chuan an va kal a. Thlân kawngka ata lung chu lum sawnin an hmu a, an han luh chuan Lalpa Isua ruang rêng an hmu ta lo va. Chutia hrilhhai taka an awm lai chuan, mi pahnih puan vâr taka inthuam an kiangah an lo ding a. An hlau va, lei bihin an kun tlat a. Chu mite chuan an hnênah, “Engati nge mitthi zîngah mi nung in zawn? Hetah a awm tawh lo, kaihthawh a ni ta. Galili rama a awm laia in hnêna a sawi kha hre reng rawh u; ‘Mihring Fapa hi mi sualte kuta mantîr a ni ang a, krawsah an khêngbet ang a, ni thum ni-ah a tho leh tûr a ni,’ a tih ṭhin kha?” an ti a. A thu sawi kha an hre chhuak leh ta a. Thlân ata chu an hâwng a, Sâwmpakhatte leh mi dangte chu chûng thu chu an hrilh a. Chûng thu tirhkohte rawn hrilhtute chu Magdala mi Mari te, Joani te, Jakoba nu Mari te leh an zînga kal ve hmeichhe ṭhenkhatte an ni. Nimahsela, chûng thu chu thu tak takah an lo ngaihsak lo va, an awihsak hek lo. Petera erawh chu a tho va, thlânah chuan a va tlân a, kûna a han bih chuan puan zai sîn awmte chauh chu a hmu a; tichuan, thil awm dân chu mak ti tak chungin in lamah a haw leh ta a. Ngai teh, chumi ni tak chuan an zînga pahnih chu khaw pakhat Emmau an tihah chuan kal tûrin an chhuak a. Chu khua chu Jerusalem aṭanga km. sâwm leh pakhat vêla hla a ni. Thil lo thleng zawng zawng chu an sawi dûn a. Chutia an titia thu an sawi dun lai chuan amah Isua ngei chuan a rawn hnaih a, an kal tlâng ta a; nimahsela, a hmêl an hriat theih loh nân an mit chu tihvaih a ni a. An hnênah chuan, “Kal paha in sawi kha eng thu nge?” a ti a. Ngui takin an ding ta a. A hming Kleopa zâwk chuan a chhâng a, “Nangmah chauh hi i ni âwm e, Jerusalem tlawh si tûnlai chanchin hre lo chu!” a ti a. Ani chuan, “Eng chanchin maw?” a ti a. Anni chuan, “E le, Nazaret Isua chanchin hi; Pathian leh mi zawng zawng mit hmuha thu-ah leh thil tiha zâwlnei thiltithei tak chanchin kha. Ani chu kan puithiam lalte leh kan rorêltuten tihhlum tûrin an pêka, krawsah an khenbeh tâk thu kha. Keini lahin Israel-te tlantu tûra kha a nih kan lo beisei vei nên. Chu mai pawh a ni lo, vawiin hi a ni thumna a ni a; kan pâwla hmeichhe ṭhenkhat pawh tûkin zîngah khân thlânah an va kal a, a ruang an va hmu si lo; ‘Vântîrhkoh inlâr kan hmu a, chu mite chuan, ‘a nung leh ta an ti,’ te an rawn ti a, min timangang nasa mai a. Kan awmpui zînga ṭhenkhat pawh thlânah an va kal ve a, hmeichheho sawi ang chiah khân thil an va hmu a; mahse, amah chu an hmu bîk si lo,” an ti a. Ani chuan an hnênah, “Mi â te u, zâwlneite thu sawi tinrêng awih kawnga ngawngte u! Kristan chûng thil chu tuarin a ropuinaah a lût tûr a ni rêng lâwm ni?” a ti a. Tichuan, Mosia aṭanga ṭanin zâwlnei zawng zawng thu chhuiin, Lehkha Thua a chanchin ziakna apiang anmahni a hrilh fiah a. An kalna tûr khua chu an thleng dâwn ta a; ani erawh chu kal zêl tûr ni âwm takin a lang a. Kâin an chelh a, “Kan hnênah riak ve mai rawh, khua a tlai ta a, ni pawh a tlâk dâwn tawh hi,” an ti a. Tichuan, an hnêna riak tûrin a lût ta a. Zanriah an han kîl ho va, chhang a la a, malsâwmna a sawi a, a phel a, an hnênah a pe a. An mit chu a lo vâr a, a hmêl an hre ta a; ani erawh chu a ral ta mai a. Anni chuan, “Kalkawnga min biak laia Lehkha Thute min hrilh fiah lai khân kan thinlung a harh huai rêng lâwm ni kha?” an inti a. Tichuan, an tho va, Jerusalem-ah an kîr leh ta nghâl a. Sâwmpakhatte leh an ṭhiante awm khâwm chu an han hmu a. “Lalpa chu a lo tho leh ngei alâwm, Simona hnênah pawh a inlâr asin,” an lo ti a. Anni pawh chuan kalkawnga thil lo thleng leh chhang a phela, amah an lo hriat tâk dânte chu an sawi a. Chûng thu chu an sawi laiin Isua ngei chu an zîngah a lo ding a, an hnênah, “In chungah thlamuanna awm rawh se,” a ti a. Râpthlâk an ti a, an hlau ta êm êm a, thlarau hmuah an inruat a. Ani chuan, “Engati nge chuti êm êma in hlauh? Engtizia nge in inngaihtuah buai tâk? Ka kut te, ka kephah te hi en ta che u, keimah ngei kha ka ni alâwm. Mi dek ula, en rawh u; kei mi hmuh ang hian thlarauvin tisa leh ruh a nei hlei nêm,” a ti a. A sawi zawhin a kut te, a kephah te a entîr a, an lâwm lutuk chuan an la awih ta lo cheu va; mak an tih êm avângin an hnênah, “hetah englo ei tûr in nei êm?” a ti a. Sangha hem hmin hrang khat an pe a. A la a, an hmaah chuan a ei ta a. An hnênah chuan, “In zînga ka awm lai khân hêng thu hi ka hrilh ṭhin che u kha, Mosia Dânah te, zâwlnei Lehkhabu-ah te, Fakna Hla bu-ah te ka chanchin an ziak apiang chu a thleng tûr a ni, tiin,” a ti a. Tichuan, Lehkha Thu hrethiam thei tûrin an rilru a hawnsak ta a. An hnênah, “Krista chuan a tuar ngei tûr a ni, ni thum ni-ah mitthi zîng ata a tho leh bawk tûr a ni; ‘simna leh sual ngaihdamna thu chu Jerusalem-a ṭanin hnam tin hnênah ama hminga hril tûr a ni tih ziak a nih kha. Hêng thil hi a hretute in ni e. Ngai teh u, Pa thil tiam chu in chungah ka rawn tîr dâwn e. Chung lam aṭanga thiltihtheihnaa thuam in nih hma loh chuan khawpuiah hian awm reng ang che u,” a ti a. Tin, Bethani dai kiang thlengin a hruai chhuak a, a bân a phar a, anni chu mal a sâwm a. Chutia mal a sâwm lai chuan anni chu a ṭhen a, vâna hruai chhoh a ni ta a. Chibai an bûk a, hlim takin Jerusalem-ah an kîr leh ta a; tin, Tempulah chuan Pathian fakin an kal fo ṭhîn a. A tîrin Thu a awm, Thu chu Pathian hnênah a awm a, Thu chu Pathian a ni. Ani chu a tîr aṭangin Pathian hnênah a awm. Engkim amah hmanga siam a ni a; thil siam rêng rêng amah tel lo chuan eng mah siam a awm lo. Amahah chuan nunna a awm a, chu nunna chu mihringte tâna êng a ni. êng chu thim zîngah a lo êng a, thimin chu chu a ngam lo. Pathianin mi pakhat a rawn tîr a, a hming chu Johana a ni. Ani chu êng thu chu hriattîr tûra lo kal a ni, mi zawng zawngin a thuchah chu an hriata an rinna tûrin. Ani chu êng chu a ni lo, êng thu chu hriattîr tûra lo kal a ni. Chu êng chu êng tak tak, khawvêla lo kala, mi tin rawn êntu chu a ni. Khawvêlah a awm a, amah hmanga khawvêl chu siam a ni a, khawvêlin amah chu a hre si lo. Ama ram ngeiah a lo kal a, ama miten an lo lâwm si lo. Mi ṭhenkhat erawh chuan an lo lâwm a, amah an ring a, an hnênah Pathian fate nih theihna a pe a. Chûng mite chu thisen hrin an ni lo va, tisa duhzâwnga hrin pawh an ni lo va, mipa duhzâwnga hrin an ni hek lo, Pathian hrin an ni zâwk e. Tin, thu chu tisaah a lo chang a, kan zîngah a lo awm ta a. A ropuizia kan hmu, Pa Fa mal neih chhun ropuina chu, khawngaih leh thutakin a khat. Johanan a chanchin a hril a, “ ‘Ka hnunga lo kal tûr chu keimah aiin a ropui zâwk,’ ka tih kha he mi hi a ni, ka awm hmaa awm tawh a ni si a,” tiin a au va. A khawngaihna famkim aṭangin khawngaihna kan dawng ṭheuh, khawngaihna hlîr khawngaihna hlîr. Dân chu Mosia hmanga pêk a ni a, khawngaihna leh thutak erawh chu Isua Krista zâra lo thleng a ni. Tu man Pathian an hmu ngai lo va, Pa Fa neih chhun, a ângchhûnga awm chuan a chanchin a hriattîr ta a ni. Jerusalem khuaa Juda-ten, “Tu nge i nih?” tia zâwt tûra Puithiamte leh Levia chite an tirh laia Johana thu lo sawi chu hei hi a ni. Zêp lovin, “Kei zawng Krista chu ka ni lo,” tiin chiang takin a inpuang a. “A nih leh tu nge i nih le? Elija i ni em?” tiin an zâwt leh a. Ani chuan, “Ka ni lo,” a ti a. “Zâwlnei kha i ni em?” an ti a; “Ni lo,” tiin a chhâng leh a. Anni chuan, “Min tîrtute kan chhân theih nân tu nge i nih min hrilh teh, i chanchin eng nge sawi tûr i neih?” an ti a. Ani chuan, “ ‘Lalpa kawng tingîl rawh u,’ tia, Thlalêra au aw, zâwlnei Isaian a sawi kha ka ni e,” a ti a. Chûng mite chu Farisai-te tirh an ni. Anni chuan, “Krista tal, Elija tal, Zâwlnei tal chu i nih si loh chuan, engati nge i baptis si le?” tiin an zâwt leh a. Johana chuan, “Kei chuan tuiin ka baptis a, in zîngah mi pakhat, in hriat loh a ding a ni. Ani chu ka hnungah a lo kal a; mahse, a pheikhawk hrui phelh tlâk pawh ka ni lo ve,” a ti a. Chûng thil chu Johanan a baptis-na hmun Jordan lui râla Bethani khuaah an ti a ni. A tûkah chuan Johanan Isua amah a rawn panin a hmu a, “En teh u, Pathian Berâmno, khawvêl sual la botu saw. Saw mi saw a ni, ‘Ka hnunga lo kal tûr, keimah aia ropui zâwk, ka awm hmaa awm tawh,’ ka tiha kha. Amah chu ka lo hre si lo; nimahsela, Israel-ten amah an hriat theih nân kei hi tuia baptisma chantîrin ka lo kal a ni,” a ti a. Hei hi Johanan thu a hriattîr dân chu a ni, “Thlarau chu ṭhuro angin vân aṭanga lo chhuka, a chunga fu rengin ka hmu a. Amah chu ka la hre lo va; nimahsela, tuia baptis tûra mi tîrtu khân ka hnênah, ‘Mi, a chunga Thlarau lo chhuka, fu ta reng i hmuh chu Thlarau Thianghlima baptistu tûr chu a ni ang,’ a ti a. Chu chu ka hmu ta a, he mi hi Pathian Fapa a ni tih ka hriattîr a che u,” tiin. A tûk lehah chuan Johana chu a zirtîrte pahnih nên an ding a. Isua a vei a vei chu an thlîr a, “En teh u, Pathian Berâmno saw!” a ti a. A zirtîr pahnihten a sawi chu an hriat chuan, Isua chu an zui ta a. Isua chu a han lehhawi a, amah an rawn zui chu a hmu a, an hnênah, “Eng nge in zawn?” a ti a. Anni chuan, “Rabi, (chu chu zirtîrtu tihna a ni) khaw nge i awm?” an ti a. “Rawn en ta che u,” a ti a. Tichuan, a hnênah an kal a, a awmna chu an va hmu a, chumi ni chuan a hnênah an awm ta a. Tlai dâr li vêl a ni. Johana thu sawi hriaa Isua zuitu pahnihte chu, pakhat chu Andria, Simon Petera unau a ni a. Ani chuan a hmasa berin a unau Simona a va zawng hmu a, “Mesia, (chu chu Krista tihna a ni) kan hmu ta,” a va ti a. Tin, Isua hnênah a rawn hruai a. Isuan ani chu a lo en a, “Johana fapa, Simona i ni, Kifa tih i ni ang,” a ti a. Kifa chu Petera tih nên thuhmun a ni a, lungpui tihna a ni. A tûkah chuan Isuan Galili rama kal a tum a, Filipa a hmu a, a hnênah, “Mi zui rawh,” a ti a. Filipa chu Andria leh Petera awmna khua, Bethsaida khuaa mi a ni. Filipa chuan Nathanaela a hmu a, a hnênah, “A chanchin Dân lehkhabua Mosian a ziak, zâwlneite pawhin an ziak kha, amah chu kan hmu ta, Nazaret Isua, Josefa fapa chu,” a ti a. Nathanaela chuan, “Nazaret khua aṭangin thil ṭha a chhuak thei em ni?” a ti a.Filipa chuan, “Rawn en ta che,” a ti a. Isuan Nathanaela lo kal a hmuh chuan a chanchin a lo sawi a, “En teh u, Israel mi tak, mi bum tumna rêng nei lo saw,” a ti a. Nathanaela chuan, “Engtin nge mi hriat le?” a ti a. Isuan, “Filipan a koh hma che-a, theipui bula i awm lai khân ka hmu che asin,” a ti a. Nathanaela chuan, “Rabi, Pathian Fapa i ni. Israel-te lalber i nih hi,” tiin a chhâng a. Isuan, “Theipui bulah ka hmu che asin,’ i hnêna ka tih avângin i ring a ni maw? Hêng aia thil ropui zâwk hi i la hmu ang,” a ti a. Tin, an hnênah, ‘Thu dik tak ka hrilh a che u, vân inhawnga, Pathian vântirhkohte Mihring Fapa chunga chhuk leh chho in la hmu ang,” a ti a. Ni thum ni chuan Galili rama Kana khuaah inneihna a awm a, chutah chuan Isua nu a awm ve a. Isua leh a zirtîrte pawh inneihnaah chuan an sâwm a. Uainin a daih ta lo va, Isua nu chuan a hnênah, “Uain an tlachham ta e,” a ti a. Isuan a chhâng a, “Ka nu, engah nge i lo inrawlh ve duh? Ka hun a la thleng lo a ni e” a ti a. Isua nu chuan rawngbâwltute hnênah, “In hnêna a sawi apiang chu ti zêl rawh u,” a ti a. Juda-ten an sakhaw dân, sil fai dân an tih chu an nei a, chumi dân ang chuan lung tuibêl paruk, ṭîn nga emaw, ṭîn sarih dawng vêl emaw ṭheuh chutah chuan an hûng a. Isuan an hnênah, “Tuibêlahte hian tui chhûng rawh u,” a ti a. A vaiin khat takin an chhûng ta a. Tichuan, an hnênah, “Thâl ula, fatu hotu hnênah kalpui rawh u,” a ti a. An kalpui ta a. Fatu hotu chuan tui uaina chang ta chu a lo tem a, khawia mi nge tih a hre lo va; tui thâl chhuaktute erawh chuan an hria a. Fatu hotu chuan moneitu chu a ko va, a hnênah, “Mi tinin uain ṭha an sem hmasa phawt a, tam deuh an in hnuin a narân deuh an sem ṭhîn a ni a; nang zawngin tûn thlengin uain ṭha i la vawn hi!” a ti a. Isuan he chhinchhiahna thil mak a tih hi Galili rama Kana khuaah a ti a, a ropuizia a lantîr a, zirtîrte chuan amah an ring ta a. Chumi hnu chuan, Isua chu a nu nên, a unaute leh a zirtîrte nên Kapernaum khuaah an chhuk a, chutah chuan ni tlêm tê chauh an châm a. Juda-te Kalhlên Kût hun a thleng lek lek tawh a, Isua chu Jerusalem-ah a chho ta a. Tempulah chuan bâwng te, berâm te, pârva te an lo zuar chu a hmu a, tangka thlengtute an dawhkân bula ṭhu a hmu bawk a. Vuakna hruihrual ang a siam a, an berâm nên, bâwng nên, ran dang zawng zawng nên chuan a hnawt chhuak ta vek a; tangka thlengtute dawhkânte chu a nam thlûksak a, an pawisate chu a tihdarhsak a. Ṭhuro zuartute hnênah chuan, “Hêng hi la chhuak rawh u, ka Pa in sumdâwnna hmunah siam suh u,” a ti a. A zirtîrte chuan, ‘I in tâna ka ṭhahnemngaihna chuan mi ei zo vang,’ tih ziak a nih thu an hre chhuak leh ta a. Juda-te chuan an rawn chhuahchhâl a, “Hêng thil hi tihtheihna i nei tih entîr nân eng chhinchhiahna thil mak nge min entîr dâwn?” an ti a. Isuan, “He Tempul hi ṭhiat ula, ni thum chhûngin ka tungding leh ang,” a ti a. Juda-te chuan, “Ni thum chhûngin i tungding leh ang maw? He in sak nân hian kum sawmli leh kum ruk a duh asin,” an ti a. Nimahsela, Isuan Tempul a sawi hi ama taksa thu a sawi a ni. Mitthi zîng ata kaihthawha a awm khân chu thu chu a sawi tih zirtîrten an hre chhuak leh a; Lehkha Thu leh Isua thu sawi chu an ring ta a. Jerusalem-a Kalhlên Kût Isuan a hman laia chhinchhiahna thil mak a tihte hmutu tam tak chuan amah an ring ta a. Nimahsela, Isuan anni chu a ring ve lo, mi zawng zawng a hriat chian êm avângin. Mi chanchin tu man an hrilh a ngai lo, an thinlung chhûnga awm chu a hre si a. Mi pakhat, a hming Nikodema a awm a, Juda-te hotu, Farisai pâwla mi a ni. Zân khat chu Isua hnênah a lo kal a, a hnênah, “Rabi, Pathian tirh zirtîrtu i ni tih kan hria, Pathian an hnêna a awm loh chuan tu man chhinchhiahna thil mak i tih ang hi an ti thei lo vang,” a ti a. Isuan a chhâng a, “Thu dik tak ka hrilh ang che, mi tu mah, piangthar lo chuan Pathian ram an hmu thei lo vang,” a ti a. Nikodema chuan, “Putar pui tawh engtin nge a pianthar theih ang? A nu pumah lûtin a piang nawn leh thei awm si lo va?” a ti a. Isuan, “Thu dik tak ka hrilh ang che, tuiah leh thlarauva piang lo chu tu mah Pathian ramah an lût thei lo vang. Tisa chuan tisa a hring a, thlarau chuan thlarau a hring a ni. ‘I piangthar tûr a ni,’ ka tih hi mak ti suh. Thli khawiah pawh a duh duhin a tleh ṭhîn, a ri i hria e; nimahsela, khawi aṭanga lo kal nge tih leh, khawiah nge a kal dâwn tih i hre si lo. Tu pawh Thlarauva piang chu chutiang chu an ni,” a ti a. Nikodeman, “Chu chu engtin nge a nih theih?” a ti a. Isuan, “Nang, Israel-te zirtîrtu i ni a, chu chu i hre lo maw? Thu dik tak ka hrilh ang che; kan hriat chu kan sawi a, kan hmuh chu kan hriattîr ṭhîn, tu man kan thu hriattîr in pawm duh chuang si lo. Khawvêl thil ka hrilh che u mah in awih si lo va, vân thil lek phei chu hrilh che u ila engtin nge in awih ang? Tu mah vânah an lâwn ngai lo, Mihring Fapa, vân aṭanga lo chhuka chauh lo hi chu,” a ti a. Mosian thlalêra rûl a khai kân ang khân Mihring Fapa hi khai kânin a awm bawk tûr a ni, amah ring apiangin chatuan nun an neih nân. Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân. Pathian chuan khawvêl thiam loh chantîr tûrin a Fapa khawvêlah a tîr si lo, amah azâra khawvêl chhandama an awm theih nân a tîr a ni zâwk. Tu pawh Pathian Fapa ring chu thiam lohvin an awm lo va, tu pawh ring lo chu thiam lohvin an awm tawh reng a ni; Pathian Fapa mal chu an rin loh avângin. Thiam loh an chan dân chu hetiang hi a ni: êng chu khawvêlah a lo kal a; nimahsela, miten êng ai chuan thim an duh zâwk, thil sual an tih avângin. Thil sual ti apiangin êng an haw ṭhîn a, êngah pawh an lo kal lo, an thiltihte a lan loh nân. Thil dik ti apiang êngah an lo kal ṭhîn, an thiltihte chu Pathian thu zâwma ti an nih a lan nân. Chumi hnu chuan Isua leh a zirtîrte chu Judai ramah an kal a. Chutah chuan eng emaw chen a châm a, baptisma a chantîr a. Johana pawhin Salim bula Ainon hmunah a baptis a, chutah chuan tui a tam avângin. Mi an lo kal ṭhîn a, a lo baptis zêl a. Johana chu tân ina khung a la ni si lo va. Johana zirtîr ṭhenkhatte leh Juda pakhat sil fai thu-ah an lo inhnial ta a. Johana hnênah an kal a, “Zirtîrtu, Jordan râla i hnêna awm, a chanchin i sawi khân tûnah hian a baptis ve a, mipuiin an pan ruih ruih mai,” an ti a. Johanan a chhâng a, “Pathianin a pêk loh chuan tu man eng mah an dawng thei lo. ‘Kei chu Krista ka ni lo va, a hmaa kal tûra tirh ka ni,’ ka tih kha nangmahni ngei ka thuhretute in ni alâwm. Mo pasal chu moneitu chu a ni, mo neitu ṭhian, a thu lo ngaichâng rengtu chuan moneitu aw a hriatin a hlim ṭhîn. Chutiang chuan kei pawh ka lâwm a kim ta a ni. Ani chu ropui tial tial tûr a ni a, kei erawh chu tê tial tial tûr ka ni,” a ti a. Chung lam aṭanga lo chhuka chu mi zawng zawng aia ropui a ni. Lei aṭanga lo chhuaka chu lei mi a ni a, lei thil a sawi ṭhîn; vân aṭanga lo chhuk chu engkim chunga mi a ni. Vân aṭanga lo chhuk chuan, thil a hmuh leh a hriatte chu a sawi a; nimahsela, tu man a thuhriattîr chu an pawm si lo. Tu pawh a thu hriattîr pawm chuan Pathian chu a dik tih an tilang chiang ṭhîn a ni. Pathian tirha chuan Pathian thu a sawi ṭhîn a, Pathianin Thlarau chu teh kherin a pe si lo va. Pain Fapa a hmangaih a, a kutah engkim a dah tawh. Tu pawh Fapa ring chuan chatuan nun an nei tawh; Fapa thu awih lo chuan nun an nei lo vang a, an chungah Pathian thinur chu a awm reng zâwk a ni. Farisai-ten Johana aiin Isuan zirtîr tam zâwk a siam a, a baptis tih an hria tih Isuan a hriat chuan, Isua tak chuan a baptis lo va, a zirtîrten an baptis zâwk a ni. Judai ram a chhuahsan a, Galili ramah a kîr leh ta a. Samari ram a kal tlang a ngai a. Samari rama khaw pakhat, Sukar an tih chu a va thleng a, chu chu Jakoban a fapa Josefa ram a pêk kianga awm a ni. Jakoba tuichhunchhuah pawh chutah chuan a awm a. Isua chu a kal hah êm avângin tuichhunchhuah sîrah chuan a ṭhu chawt a. Chhûn lai tak a ni. Samari hmeichhia tui chawi tûrin a lo kal a. Isua chuan, “In tûr mi pe rawh,” a lo ti a. A zirtîrte chu ei tûr leiin khuaah an kal tawh a ni. Hmeichhia chuan, “Nang Juda mi i ni a, kei Samari hmeichhia ka ni a, engtiziaa in tûr mi dîl nge maw i nih le?” a ti a (Juda-te leh Samari miten eng mah an inhman ṭâwm ngai lo va). Isuan a chhâng a, “Pathian thilpêk leh i hnêna, ‘In tûr mi pe rawh,’ titu hi hria ni la chuan, a hnênah i dîl zâwk ang a, ani chuan tui nung a pe tûr che a ni,” a ti a. Hmeichhia chuan, “Ka pu, khai chhuahna tûr eng mah i nei si lo va, tuichhunchhuah a thûk vei nên, khawi ata nge tui nung chu i neih? Kan pu Jakoba aiin i ropui zâwk em ni? Ani chuan he tuichhunchhuah hi min pe a, amah leh a fate leh a ran rualte pawhin heta mi hi an in ṭhîn,” a ti a. Isuan, “Tu pawh he tui in apiang an tuihâl leh ang; tu pawh an hnêna ka pêk tûr tui in erawh chu an tuihâl leh tawh lo vang. An hnêna ka pêk tûr chu, an kawchhûngah tuihnaah a lo chang ang a, chatuan thlengin a kang lo vang,” a ti a. Hmeichhia chuan, “Ka pu, chu tui chu mi pe rawh, ka tuihâl tawh loh nân leh hêng thleng thlenga tui chawi tûra ka lo kal tawh loh nân,” a ti a. Isuan, “I pasal va ko la, hetah lo kîr leh ang che,” a ti a. Hmeichhia chuan, “Pasal ka nei hlei nêm,” a ti a. Isuan, “ ‘Pasal ka nei hlei nêm,’ i tih hi i ti dik e; Pasal panga i nei tawh a, tûna i neih lai hi i pasal a ni lo rêng a ni. I sawi chu a dik e,” a ti a. Hmeichhia chuan, “Ka pu, zâwlnei i ni tih ka hre ta. Min thlahtute chuan he tlângah hian Pathian chibai an bûk ṭhîn a, nangni erawh chuan, ‘Miten Jerusalem-ah ngei Pathian chibai an bûk tûr a ni,’ in ti a,” a ti a. Isuan, “Hmeichhia, ka thu awih rawh, he tlângah kher lo pawh, Jerusalem-ah kher lo pawh Pa chibai in bûk hun a thleng dâwn. Nangnin in hriat loh chibai in bûk ṭhîn, keinin kan hriat chu chibai kan bûk ṭhîn; chhandamna chu Juda-te hnên ata lo chhuak a ni si a. Nimahsela, a hun a thleng dâwn, tûnah pawh a thleng tawh mêk, Pathian chibai bûktu tak takten thlarau leh thutakin Pa chibai an bûk tawh ang. Chutiang mi chu Pain amah chibai bûk tûrin a zawng a ni. Pathian chu thlarau a ni a, amah chibai bûktuten thlarau leh thutakin chibai an bûk tûr a ni,” a ti a. Hmeichhia chuan, “Mesia, Krista an tih chu, a lo kal dâwn tih ka hria. A lo kal hun chuan engkim min la hrilh ang,” a ti a. Isuan a chhâng a, “Kei, a betu che hi amah chu ka ni,” a ti a. Chumi lai chuan zirtîrte chu an lo thleng tawh a, hmeichhia a bia an rawn hmuh chuan mak an ti hle a. Nimahsela, tu mahin, “Eng nge i duh?” emaw, “Engah nge hmeichhia i biak?” emaw an ti lo. Hmeichhia chuan a tuibêl a kalsan a, khuaah a kîr a, khuaa mite hnênah chuan, “Mi pakhat, ka thiltih apiang mi hrilh thei vektu a awm a, lo kal ula, va en teh u, Krista a ni thei âwm emaw,” a ti a. Tichuan, khua ata chu an chhuak a, Isua hnênah an kal ta a. Chumi hlân chuan zirtîrte chuan, “Zirtîrtu, ei rawh,” tiin an ngên a. Ani lah chuan, “In hriat loh chaw ei tûr ka nei e,” a ti mai si a. Zirtîrte chuan, “Tuten emaw chaw an rawn pe em ni chu le?” tiin an inzâwt ta hlawm a. Isuan an hnênah, “Mi tîrtu duhzâwng tih leh a hna thawh zawh chu ka chaw a ni. ‘Thla li-ah buh seng a hun ang,’ in ti ṭhîn a ni lâwm ni? Dâk chhuak ula, lote en vêl rawh u, buhte chu seng mai theihin a êng tawh tih ka hrilh che u hi. Buh sengtu chuan hlawh a hmu nghâl tawh a, chatuan nun atân a seng khâwm mêk a ni, a phuntu leh a sengtu chu an hlim dun theih nân. ‘Mi pakhatin a tuh a, mi dangin a seng a,’ tih thu hi a dik a ni. In thawhrim rah ni lo seng tûrin ka tirh che u hi, mi dangin an thawk a, an thawhrim rah in seng a ni,” a ti a. Hmeichhiain, “Ka thiltih apiang mi hrilh thei vek,” a tih avâng khân chumi khuaa Samari mi tam takin Isua an ring ta a. Samari mite Isua hnên an lo thlen chuan an hnênah châm tûrin an ngên a, chu khuaah chuan ni hnih a châm ta a. A thu an hriat chuan mi dang tam tak pawhin an ring ta a. Tin, hmeichhe hnênah chuan, “Tûnah zawng i thu sawi avânga ring kan ni ta lo, keimahni ngeiin a thu sawi kan hria a, he mi hi khawvêl chhandamtu a ni ngei tih kan hre ta,” an ti a. Ni hnih hnu chuan chuta ṭangin Galili ramah a kal ta a. Amah Isua ngeiin, “Zâwlnei chu ama ram lamah chawimawiin a awm lo,” a lo ti tawh si a. Galili ram a va thlen erawh chuan, Galili mite chuan an lo lâwm hle a; Jerusalem-a Kalhlên Kût chhimin an han kal a, kût laia a thiltih engkim an han hmuh avângin. Isua chuan Galili rama Kana, tui uaina a chantîrna khua kha a va thleng leh a. Kapernaum-ah sawrkâr milian tak pakhat fapa damlo a awm a. Chu mi chuan Isua, Judai ram aṭangin Galili ramah a lo kal tih a hriatin a hnênah a han kal a, a fapa thi lek lek tidam tûrin Kapernaum-a chhukah a sâwm a. Isuan a hnênah, “Chhinchhiahna leh thil mak tih in hmuh loh chuan in ring tawp lo vang,” a ti a. Chu mi chuan, “Ka pu, ka fapa chu a thih hmain lo kal hrâm rawh,” a ti a. Isuan, “Kal mai rawh; i fapa chu a dam ta,” a ti a. Ani chuan Isua thu sawi chu a ring a, a kal ta a. A zu haw chu kawngah a chhiahhlawhten an lo hmuak a, “I fapa chu a dam ta e,” an lo ti a. A fapa lo dam leh ṭan hun chu a zâwt hlawm a. Anni chuan, “Nimin chhûn dâr khatah khân a khawsikin a thlah ta a ni,” an ti a. Naupang pa chuan chumi lai tak chu Isuan, “I fapa chu a dam ta,” a hnêna a tih hun kha a ni tih a hre ta a. Tichuan, an chhûngin an ring ta a. Chu chu Isua Judai ram aṭanga Galili rama a kal hnua chhinchhiahna thil mak a tih vawi hnihna a ni. Chumi hnu chuan Juda-te kût pakhat a awm a, Isua pawh Jerusalem-ah a han kal ve a. Jerusalem-ah chuan berâm kawngkhâr bulah dîl pakhat, Hebrai ṭawnga Beth-zatha an tih chu a awm a; hulhliap panga a nei a. Chutah chuan dam lo tam tak, mitdel te, kebai te, zeng te an awm hlawm a. Mi pakhat, kum sawmthum leh kum riat damlo tawh pawh a lo awm a. Isuan chuta a mu chu a hmu a, rei tak dam lovin a awm tawh tih a hria a, a hnênah, “Dam i duh em?” a ti a. Damlo chuan, “Ka pu, tui a phûl huna dîla mi dah thlatu tu mah ka nei ve si lo va, luh ka tum chhûngin mi dangin mi luh khalh zêl a ni,” a ti a. Isuan, “Tho la, i mutphah la la, kein kal rawh,” a ti a. Chu mi chu thâwklehkhatah a lo dam ta mai a; a mutphah chu a la a, kein a kal ta a. Chumi ni chu sabat a ni a. Juda-te chuan lo dam ta-a hnênah, “Sabat ni a nih hi; kan dânah i mutphah i ken a thiang lo ve,” an ti a. Ani chuan a chhâng a, “Mi tidamtu ngeiin, ‘I mutphah la la, kein kal rawh,’ mi ti alâwm,” a ti a. Anni chuan, “ ‘I mutphah la la, kein kal rawh,’ titu chu tu nge ni?” an ti a. Damlo tihdama chuan tu nge a nih a hre si lo; chutah chuan mipui tam tak an awm a, Isua lah chu a kal bo ta mai si a. Chumi hnu chuan Isuan Tempulah a hmu a, a hnênah, “Hei, i lo dam tâk hi; sual leh tawh suh, chutilo zawng, i chungah thil ṭha lo lehzual a lo thleng dah ang e,” a ti a. Chu mi chuan amah tidamtu chu Isua a ni tih Juda-te chu a va hrilh ta a. Chumi avâng chuan Juda-te chuan Isua an tinawmnah ṭan ta a, sabat nia mi a tihdam avângin. Isuan anniho chu a chhâng a, “Tûn thlengin ka Pa chuan hna a thawk reng a, kei pawhin amah angin ka thawk zêl a ni,” a ti a. Chuvâng chuan, Juda-te chuan amah tihhlum an tum lehzual sauh va, sabat a bawhchhia chauh pawh ni lovin, Pathian chu, ‘Ka Pa a ni,’ tia Pathian tluka a insiam avângin. Isuan anni chu a chhâng a, “Thu dik tak ka hrilh che u hi, Fapain ama thuin eng mah a ti thei lo; Pa tih a hmuh chauh loh chu; Pa tih ang chu Fapa pawhin a ti ve a ni. Pain Fapa a hmangaih a, a thiltih engkim a entîr si a. Hêng aia thil ropui zâwk hi a la entîr ang, mak in tih atân. Pain mitthite a kai tho va, a tinung ang bawkin, Fapa pawhin a duh apiang a tinung ṭhîn. Pain tu chungthu mah a rêlsak lo, Fapa hnênah rorêlna chu a hlân vek a ni; mi zawng zawngin Pa an zah angin Fapa an zahna tûrin. Tu pawh Fapa zah lo chuan amah tîrtu Pa pawh a zah lo va ni. “Thu dik tak ka hrilh a che u, tu pawh ka thu hriaa, mi tîrtu ring chuan chatuan nun a nei tawh, thiam loh changin a awm lo vang a, thihna ata nunnaah a lût tawh zâwk a ni. Thu dik tak ka hrilh a che u, a hun a thleng dâwn, tûnah pawh a thleng tawh mêk; mitthiten Pathian Fapa aw an hriat hun chuan, a hriate chu an nung ang. Pa chu nunna hnâr a ni ang bawkin, Fapa pawh chu nunna hnâr nihna a pe a. Mihring Fapa a nih avângin rorêl theihna a pe bawk a. “Chu chu mak ti suh u, thlâna mitthi zawng zawngin a aw an hriat hun a lo thleng dâwn si a; tin, thlân aṭangin an lo chhuak ang, thil ṭha titute chu nun nei tûrin an tho leh ang a, thil ṭha lo titute erawh chu thiam loh chang tûrin an tho leh ang. “Keimah maiin eng mah ka ti thei lo; Pathianin mi hrilh ang zêlin ro ka rêl a, ka rorêl pawh a dik a ni, keima duhzâwng tih tum lova, mi tîrtu duhzâwng chauh tih ka tum zâwk avângin. Mahni chanchin hriattîr ni ila, ka thu hriattîr chu a dik lo vang. Nimahsela, mi dang, ka thu hriattîrtu a awm, ka thu a hriattîr chu a dik tih pawh ka hria. Johana hnênah mi in tîr a, ani chuan thutak a lo hriattîr a. Mihring hriatpui ka ngai lo ve; amaherawhchu, chhandama in awm theih nân chûng chu ka sawi a ni. Johana chu khâwnvâr alh êng tak ang a ni a, a ênga hlim taka han awm rih pawh in duh a. Nimahsela, Johana thu hriatpuina aia hriatpuitu pawimawh zâwk ka nei, Pain hna thawh zawh tûra mi pêk te, tûna ka thiltih laite hian Pain kei mi tîr ngei tih a hriattîr a ni. Pa mi tîrtu ngei pawh chuan ka thu a hriattîr bawk a ni, a aw in hre ngai lo, a hmêl in hmu ngai hek lo. A thu pawh in thinlungah in vawng reng lo, a mi tirha hi in rin loh avângin. Lehkha Thu ngun takin in zir ṭhîn, a chhûngah chatuan nun awma in rin avângin. Chu chu ka thu hriattîrtu a ni si a. Chuti chung pawhin nun nei tûrin ka hnênah in lo kal duh si lo. “Mihring chawimawina ka zawng lo, nangni erawh chu ka hria a che u, in thinlungah Pathian hmangaihna rêng in nei lo tih ka hria e. Ka pa thuin ka lo kal a; nimahsela, mi lo lâwm si lo; mahni thuin tu emaw lo kal sela in lo lâwm si ang. Pathian tak awm chhun fak hlawh tum si lovin, infak tawn in lâwm a, engtin nge in rin theih ang? Ka Pa hnêna ka hêk che u ring suh u. A hêktu tûr che u chu Mosia a ni, in innghahna bera kha. Mosia chu ring ni ula kei pawh mi ring tûr, ka chanchin asin a ziak ni. A thu ziak chu in rin miau si loh chuan, ka thu sawi engtin nge in rin theih ang?” a ti a. Chumi hnu chuan Galili dîl, Tiberia dîl an tih râlah a kal ta a, dam lote chunga chhinchhiahna thil mak a tihte an hmuh avângin mipui nasa takin an zui a. Isua chu tlângah a chho va, a zirtîrte nên an ṭhu a. Juda-te Kalhlên Kût chu a hnai tawh a. Isua chu a han hawi vêl a, mipui nasa takin amah an rawn pan chu a hmu a, Filipa hnênah, “Hêngho hraina daih tûr chhang khawiah nge kan lei ang?” a ti a. Chu chu Filipa fiah nân a sawi a ni; a tih tûr chu amahin a hre vek si a. Filipan a chhâng a, “Mi tinin tlêm têa an chan ṭheuh tûr pawh duli zahnih man chhangin a daih lo vang,” a ti a. A zirtîrte zînga pakhat, Andria, Simon Petera unaupa chuan, “Hetah hian mipa naupang pakhat barli chhang tlang nga leh sangha pahnih nei a awm; nimahsela, hêng zozai tân hian chu chu eng tham nge ni ang?” a ti a. Isuan, “Mipuite hi ṭhuttîr rawh u,” a ti a. Chu laiah chuan hlobet hmun a awm duai a. Patlingte chu an ṭhu a, sângnga lai an ni a. Isuan chhang chu a la a, lâwmthu a sawi a, chuta ṭhuhote chu a sem ta a; an duh tâwk an chang ṭheuh va. An kham hnu chuan a zirtîrte hnênah, “Eng mah rîral awm lo tûrin sem bâng kha dah ṭha rawh u,” a ti a. Tichuan, an la khâwm a, barli chhang tlang nga eitute hnêna sem bâng chu bâwm sâwm leh pahnih a la khat a. Mipuiten chhinchhiahna thil mak a tih chu an hmuh chuan, “He mi hi zâwlnei, khawvêla lo kal tûra chu a nih ngei hi!” an ti a. Isuan amah mana lala siam luih tumin an lo kal dâwn tih a hria a; chuvângin, tlângah amah chauhvin a kal hrang leh ta a. Tlai a lo nih chuan a zirtîrte chu dîlah an chhuk a; lawngah an chuang a, Kapernaum lam panin dîl chu an kân dâwn a. Khua a lo thim ta a, Isua lah chu an hnênah a lo la thleng si lo. Thli na tak a tleh avângin tui a lo fâwn nasa ta hle a. Km. li vêl lawng an kar hnu chuan, Isuan tui chunga kala lawng a rawn pan chu an hmu a; tichuan, an hlau ta a. Isuan an hnênah, “Keimah ka ni alâwm, hlau suh u,” a ti a. Lawnga chuan luhtîr an duh a, nimahsela, lawng chuan an pan khawmual chu a thleng ta nghâl mai a. A tûkah chuan, dîl râla mipui la awmte chuan lawng pakhat chauh lo chu lawng dang a awm lo tih an hmu a, Isua chu a zirtîrte hnênah lawngah a chuang ve lo va, a zirtîrte chu anmahni chauhvin an kal tih an hria a. Lalpan lâwmthu a sawi zawha chhang an eina hmun kiangah khân, Tiberi khua aṭanga lo kal lawng dangte chu a lo thleng hlawm a. Mipuiten Isua leh a zirtîrte chutah chuan an awm tawh lo tih an hmuh chuan, lawngahte chuan an chuang a, Isua zawngin Kapernaum-ah an kal ta a. Mipuiten Isua chu râl lehlama an va hmuh chuan, “Zirtîrtu, eng laiin nge heta i lo thlen?” an ti a. Isuan a chhâng a, “Thu dik tak ka hrilh a che u, chhinchhiahna thil makte in hmuh avânga mi zawng in ni lo va, chhang in ei puar avâng zâwk khân a nih hi. Chaw dangral mai ûmin phe phe suh u, chatuan nun daih tûr chaw chu ûmin phe zâwk rawh u. Chu chaw chu Mihring Fapain a pe ang che u, Pa Pathianin amah a chhinchhiah tawh si a,” a ti a. Tichuan annin, “Pathian hna kan thawh theih nân eng nge kan tih tûr?” an ti a. Isuan, “Pathian hna in thawh tûr chu hei hi a ni, a mi tirh hi ring rawh u,” a ti a. Anni chuan, “Kan hmuha kan rin theih nân eng chhinchhiahna thil mak nge i tih ang? Eng nge i tih dâwn le? Min thlahtuten thlalêrah manna kha an ei a, Lehkha Thu-in, ‘Vân aṭangin anni chu ei tûr a pe,’ a tih ang khân,” an ti a. Isuan, “Thu dik tak ka hrilh a che u, vân aṭanga chhang Mosian a pe lo che u; ka Pa zâwkin chhang tak, vân ata chu, a pe che u a ni. Pathian chhang pêk chu vân aṭanga lo chhuka, khawvêl hnêna nun petu hi a ni,” a ti a. Anni chuan, “Lalpa, chu chhang chu min pe fo rawh,” an ti a. Isuan, “Kei hi nunna chhang chu ka ni; ka hnêna lo kal tawh phawt chu an rilṭâm lo vang, kei mi ring chu an tuihâl ngai lo vang. Nangnin mi hmuh hnu pawhin mi la ring si lo tih ka hrilh che u hi. Pain mi pêk apiang ka hnênah an lo kal ang a, ka hnêna lo kal tawh phawt chu ka hnawt chhuak lo vang. Mahni duh zâwng ti tûr ni lovin, mi tîrtu duhzâwng ti tûr zâwkin vân aṭanga lo chhuk ka ni si a. Mi tîrtu duhzâwng chu hei hi a ni: anin mi pêk zawng zawng tu mah hloh lovin ni kin ni-ah kaitho zâwk ila. Ka pa duhzâwng chu hei hi a ni: Fapa hmua amah chu ring apiangin chatuan nun nei sela, anni chu ni kin ni-ah ka kaitho vang,” a ti a. “Vân aṭanga chhang lo chhuk chu ka ni,” a tih avângin Juda-te chu a chungah an phunnawi ta a. “He mi hi Josefa fapa Isua a ni lo vem ni? A nu leh pa pawh kan hria alâwm. Engtizia nge ‘Vân aṭanga lo chhuk ka ni,’ a tih tâk ni?” an ti a. Isuan a chhâng a, “Phunnawi tawh suh u. Pa, mi tîrtuin a hîp loh chuan tu mah ka hnênah an lo kal thei lo; keiin ni kin ni-ah a lo kala chu ka kaitho vang. Zâwlneiten, ‘Mi zawng zawng Pathianin a zirtîr ang,’ tiin an ziak a. Mi tin, Pa thu hriaa, a hnên aṭanga zir chu ka hnênah an lo kal ṭhîn. Pa hmu tawh an awm tihna a ni lo; Pathian hnên aṭanga lo kal hi Pa hmutu awm chhun chu a ni. Thu dik tak ka hrilh a che u, a ringtu chuan chatuan nun a nei tawh. Kei hi nunna chhang chu ka ni. In thlahtuten thlalêrah mana an ei a; mahse, an thi a. Vân aṭanga chhang lo chhuk erawh hi chu a ei apiang an thi lo vang. Kei hi vân aṭanga chhang nung lo chhuk chu ka ni. He chhang hi tu pawhin an ei chuan kumkhuain an nung reng ang. Chhang ka pêk tûr chu ka taksa hi a ni, khawvêl nun nâna ka pêk chu,” a ti a. Chutichuan, Juda-te chu nasa takin an inhnial ta a. “Engtin nge he pa hian a tisa ei tûrin min pêk theih ang?” an ti a. Isuan, “Thu dik tak ka hrilh a che u; Mihring Fapa tisa in eia, a thisen in in loh chuan nangmahniin nun in nei lo ve. Tu pawh ka tisa eia, ka thisen in chuan chatuan nun a nei tawh, keiin ni kin ni-ah amah chu ka kaitho bawk ang. Ka tisa hi chaw tak a ni a, ka thisen hi in tûr tak a ni. Tu pawh ka tisa eia, ka thisen in chu keimahah a awm reng a, kei pawh amahah ka awm reng a ni. Pa, nung chuan mi tîr a, Pa avâng chuan kei pawh ka nung a, chutiang bawkin tu pawh mi ei chu keimah avângin an nung ve ang. Hei hi vân aṭanga chhang lo chhuk chu a ni; in thlahtuten chhang an ei ang kha a ni lo, an thih tho kha. He chhang eitu hi chu chatuanin a nung reng ang,” a ti a. Kapernaum-a sunagog-ah a zirtîr laiin Isuan he thu hi a sawi a ni. A zirtîrte zînga tam takin chu chu an hria a, “Hei hi thu khirh tak a ni, tu nge hrethiam ang?” an ti a. Chu mi thu-ah a zirtîrte an phunnawi tih Isuan a rilruin a hria a, an hnênah, “Hei hian a tilungni lo che u elo? Mihring Fapa hi tûn hmaa a awmnaa a kîr chho hmu ta ula, engtin nge ni ang? Nunna petu chu thlarau a ni; tisa chu a ṭangkai lo. In hnêna thu ka sawite hi thlarau leh nunna a ni. Chuti pawhin ṭhenkhatin in la ring duh si lo,” a ti a. Isuan a tîr aṭangin tute nge ring duh lo tûr leh tu nge amah mantîrtu tûr a hre reng si a. “Chuvâng tak chuan a ni, in hnênah, ‘Pain kal theihna a pêk loh chuan tu mah ka hnênah an lo kal thei lo,’ ka tih kha,” a ti a. Chuta chinah chuan a zuitute zînga tam takin an bânsan a, an zui ve ta lo va. Tichuan, Isuan Sâwmpahnihte hnênah chuan, “Nangni pawh kal bo ve in duh em?” a ti a. Simon Peteran a chhâng a, “Lalpa, tu hnênah nge kan kal ang? Chatuan nunna thu i nei alâwm, Pathian mi thianghlim chu i ni tih kan ring a, hriat pawh kan hria asin,” a ti a. Isuan anni chu a chhâng a, “Nangni Sâwmpahnihte hi keima thlan in ni lâwm ni? In zînga pakhat Diabola a ni lehnghâl vei nên!” a ti a. Simon Iskariota fapa Juda thu kha a sawi a ni, Sâwmpahnihte zînga pakhat a ni nain amah mantîrtu tûr a ni si a. Chumi zawhah chuan Isuan Galili ram a fang a; Juda-ten amah thah an tum avângin Judai ram chu a fang duh lo va ni. Juda-te Bâwkte Kût chu a hnai tawh a. Isua unaute chuan a hnênah, “He hmun hi chhuahsan la, Judai ramah kal rawh, i zirtîrten i thiltih hi an hmuh theih nân. Tu man hmingthan duh siin a rûkin thil an ti ngai lo. Hêng thil hi i tih rau rau chuan khawvêl hmuhah intârlang rawh,” an ti a. A unaute pawh chuan amah an ring si lo. Isuan an hnênah, “Ka hun a la thleng lo, nangni hun erawh chu eng lai pawhin a thleng reng a ni. Khawvêlin a haw thei lo che u, kei erawh chu mi hua a ni, an thiltihte a ṭha lo tih ka hriattîr ṭhîn avângin. Kûtah chuan han kal rawh u. Kei chu tûnah chuan, Kûtah hian ka han kal rih lo vang; ka hun a la thlen loh avângin,” a ti a. Chutiang chuan a sawi a, Galili ramah chuan a awm ta zêl a. A unaute Kût hmang tûra an chhoh tâk hnu chuan ani pawh chu langsâr lovin, a rûkin a han chho ve a. Juda-ten Kût lai chuan amah an zawng a, “Khawiah nge a awm?” an ti a. Mipui chuan a chungchâng thu an sawi sup sup a. Ṭhenkhatin, “Mi ṭha a ni,” an ti a, a ṭhenin, “Ni lo ve, mipui a hruai sual zâwk a ni,” an ti a. Juda-te an hlauh avângin a lang erawh chuan tu man a chungchâng an sawi lo. Kût vânglai tak chuan Isua tempulah a chho va, a zirtîr ta a. Juda-te chuan, “He mi hian zir si lovin engtin nge lehkha a thiam?” an ti a, mak an ti hle a. Isuan anni chu a chhâng a, “Ka thu zirtîr hi keima zirtîrna a ni lo va, mi tîrtu zirtîrna a ni zâwk. Tu pawh Pathian duhzâwng tih duh chuan, ka thu zirtîr hi Pathian hnên ata nge keima phuahchawp tih an hre mai ang. Mahni phuahchawp thu sawitu chuan mahni ropuina a zawng a ni. Mahni tîrtu ropuina zawngtu erawh chu a rinawm a, amahah dik lohna rêng rêng a awm lo. Mosian, Dân chu a pe lo che u em ni? Nimahsela, in zînga tu mahin Dân chu in zâwm si lo. Engati nge mi thah in tum?” a ti a. Mipui chuan an chhâng a, “Ramhuai i zâwl a nih hi; tuin nge thah tum che?” an ti a. Isuan anni chu a chhâng a, “Thil pakhat ka ti a, in za-in mak in ti a. Mosian serh tan thu a pêk che u avângin (Mosia tihchhuah a ni lo va, in thlahtute tihchhuah a nih zâwk kha,) sabat ni pawhin serh in tan ṭhîn. Mosia Dân bawhchhiat loh nân sabat ni pawha serh tan a nih chuan, engah nge sabat nia mi ka tihdam tâk avânga ka chunga in thinur bîk? Pâwn lam lan dân ngawt enin thu peih mai suh u; a nih dân dik tak enin rêl zâwk rawh u,” a ti a. Jerusalem-a mi ṭhenkhatte chuan, “He mi hi thah an tum chu a ni lâwm ni? En teh u, vântlâng hriatin thu a sawi a, tu mahin an kalh si lo. Hotute hian amah hi Krista chu ni ngeiin an hre ta tihna em ni ang? He mi hi khawia mi nge a nih kan hre si a; Krista chu a lo kal hun chuan khawia mi nge a nih tu man an hre dâwn si lo,” an ti a. Isuan chutia Tempula a zirtîr lai chuan aw ring takin, “Kei mi hria a, khawia mi nge ka nih pawh in hria e. Nimahsela, mahni thu-a lo kal ka ni lo. Mi tîrtu erawh chu mi dik tak a ni, ani chu in hre lo. Kei chuan ka hria, mi tîr a, a hnên aṭanga lo kal ka nih avângin,” a ti a. Tichuan, man an tum a, nimahsela, a hun a la thlen loh avângin tu man an khawih lo. Mipui zînga mi tam takin amah an ring a, “Krista a lo kal hunah he mi tih aia tam zâwk chhinchhiahna thil mak a rawn ti dâwn chuang em ni?” an ti a. Farisai-te chuan a chungchâng mipuiin an sawi rûk sup sup chu an hria a, puithiam lalte leh Farisai-te chuan Isua man tûrin vêngtute an tîr ta a. Tichuan, Isuan, “Rei lo tê in hnênah ka la awm rih ang a, chumi hnu chuan mi tîrtu hnênah ka kal ang. Nangnin mi zawng ang a, mi hmu lo vang, ka awmna tûrah chuan in kal thei dâwn si lo va,” a ti a. Juda-te chuan, “Khawiah nge maw kal a tuma, kan hmuh theih dâwn loh chu le? Grik-ho zînga Juda awm darhte hnêna kala, Grik-hote zirtîr a tum em ni ang le? ‘Mi zawng ang a, mi hmu lo vang, ka awmna tûrah chuan in kal thei dâwn si lo va,’ a tih te hi eng tihna nge ni ang?” an inti hlawm a. Kût ni hnuhnûng ber, ni ropui berah chuan Isua a ding a, aw ring takin a au va, “Tuihâl apiang chu ka hnênah lo kal sela, in rawh se. Lehkha Thu-in a sawi angin, tu pawh kei mi ring chu a kawchhûng aṭangin tui nung luite a lo chhuak ang,” a ti a. Chu chu amah ringtuten Thlarau an la chan tûr thu a sawina a ni; Isua chawimawia a la awm rih loh avângin Thlarau chu pêk a la ni rih lo va ni. Mipui zînga ṭhenkhatin chûng thute chu an hriat chuan, “He mi hi zâwlnei chu a ni ngei mai,” an ti a. Mi dangin, “Krista chu a ni,” an ti a. Ṭhenkhat erawh chuan, “Krista chu Galili ram aṭangin a lo kal ang maw? ‘Krista chu Davida thlah, Davida awmna khua Bethlehem-a lo piang tûr a ni,’ Lehkha Thu-in a ti a ni lâwm ni?” an ti a. Tichuan, amah avângin mipui zîngah inṭhenna a lo awm ta a. An zînga ṭhenkhatin amah man an duh a; nimahsela, tu man an khawih lo. Vêngtu sipaite chu puithiam lalte leh Farisai-te hnênah chuan an kîr leh a, anni chuan, “Engati nge in rawn hruai loh?” an lo ti a. Vêngtu sipaite chuan an chhâng a, “He mi sawi ang hian tu man thu an la sawi ngai lo,” an ti a. Farisai-te chuan an chhâng a, “Nangni pawh a lo bum ve che u elo? Hotute leh Farisai-te zînga pakhat mahin amah an ring lo tih in hre na nge? Hêng mipui Dân hre loho hi ânchhe dawng an ni e,” an ti a. An zînga pakhat, Nikodema, Isua hnêna kal tawh khân, an hnênah, “Kan Dân ang chuan mi a thiamthu sawitîra, eng nge a tih hriat chian hma chuan thiam loh chantîr mai loh tûr a ni lâwm ni?” a ti a. Ani chu an chhâng a, “Nang pawh Galili mi i ni ve elo maw? Lehkha Thu ngun takin chhiar la, Galili ram aṭangin zâwlnei an chhuak ngai lo tih i hre mai ang,” an ti a. Tichuan, mi tin mahni inah an haw ta ṭheuh va. Isua erawh chu Oliv tlângah a kal a. A tûk zîng takah chuan Tempulah a lût leh a. Mipui zawng zawng a hnênah an lo kal a; tin, a ṭhu a, anmahni a zirtîr ta a. Dân zirtîrtute leh Farisai-te chuan hmeichhia, a uire lai man an rawn hruai a, a laiah an dintîr a. Isua hnênah, “Zirtîrtu, he hmeichhia hi a uire lai taka man a ni a. Kan Dân, Mosia min pêkah chuan hetiang hmeichhia hi lunga den hlum tûr tih a ni a. Nangin engtin nge i ngaih le?” an ti a. Chu chu amah fiah nân an ti a ni. Isua chu a kûn a, a kut zungṭangin leiah a ziak a. Chutia an zawh sek sek tâkah chuan a han dâk a, an hnênah, “In zînga sual nei lovin lungin dêng hmasa rawh se,” a ti a. A kûn a, leiah a ziak leh ta a. Chu chu an hriat chuan pakhat khatin a upa bera ṭanin an chhuak fai ta vek a, hmeichhia a awmna ngaia awm nên chauh chuan an awm ta a. Isua chu a han dâk a, a hnênah, “Hmeichhia, khawiah nge an awm tâk? Tu man thiam loh an chantîr na che nge?” a ti a. Ani chuan “Chantîr lo, Lalpa,” a ti a. Isuan a hnênah, “Kei pawhin thiam loh ka chantîr lo va che; kal la, tûn chinah chuan sual leh tawh suh,” a ti a. Isuan an hnênah thu a sawi leh a, “Kei khawvêl êng ka ni. Tu pawh mi zui chu thimah an lêng tawp lo vang a, nunna êng an nei zâwk ang,” a ti a. Farisai-ten, “Mahni thu i hriattîr a ni; i thu hriattîr hi a dik lo ve,” an ti a. Isuan, “Mahni thu hriattîr ka nih pawhin ka thu hriattîr chu a dik a ni, ka lo chhuahna leh ka kalna tûr ka hre si a; nangni zawngin ka lo chhuahna leh ka kalna tûr in hre si lo. Nangnin tisa dânin in rêl a, kei zawngin tu ma thu ka rêl ve lo. Rêl pawh ni ila, ka thu rêl chu a dik ang a, a rêltu chu keimah mai ni lovin, kei leh Pa, mi tîrtu kan ni dâwn si a. In Dânah pawh mi pahnih thu hriattîr chu a dik a ni, tih ziak a nih kha. Kei hi mahni thu hriattîrtu ka ni a, Pa mi tîrtu chuan ka thu mi hriatpui bawk a ni,” a ti a. Anni chuan, “Khawiah nge i pa chu?” an ti a. Isuan, “Nangnin mi hre lo, ka Pa in hre hek lo. Kei mi hria ni ula, ka Pa pawh in hre tawh tûr,” a ti a. Chûng thu chu Tempul thawhlâwm bâwm dahna hmuna a zirtîr laiin a sawi a ni. Tu man amah an man si lo, a hun a la thlen loh avângin. Isuan an hnênah, “Ka kal bo dâwn a, nangnin mi zawng ang, nimahsela, in sualnaah chuan in thi ang; ka kalna tûrah in lo kal thei lo vang,” a ti leh a. Juda-te chuan, “Amah a intihlum dâwn em ni ang? ‘Ka kalna tûrah in lo kal thei lo vang,’ a tih hi?” an ti a. Isuan an hnênah, “Nangni hnuai lam aṭanga lo chhuak in ni, kei zawng chung lam aṭanga lo chhuak ka ni; nangni chu he khawvêl ata lo chhuak in ni a; kei zawng he khawvêl ata lo chhuak ka ni lo. Chuvâng chuan a ni, ‘in sualnaah chuan in thi ang,’ ka tih che u ni. ‘Ka ni’ ka tih hi in awih loh chuan, chu in sualnaah chuan in thi ang,” a ti a. Anni chuan, “Tu nge i nih?” an ti a. Isuan, “A tîrin in hnênah ka sawi tawh a ni lâwm ni? In chungchângah hian sawi tûr leh rêl tûr tam tak ka nei; eng pawh ni se, mi tîrtu chu mi dik tak a ni, a hnên aṭanga ka hriat chauh khawvêl hnênah ka sawi ṭhîn,” a ti a. An hnênah Pa thu a sawi tih an hre lo. Isuan an hnênah, “Mihring Fapa hi in khai kân hunah keimah ka ni tih leh, keima thuin eng mah ka ti lo va, Pain mi hrilh ang zêl chauh ka sawi zâwk tih in la hria ang. Mi tîrtu chu ka hnênah a awm a, keimah chauhva awm tûrin mi kalsan ngai lo; a lâwmzâwng hlîr ka tih ṭhin avângin,” a ti a. Chu thu chu a sawi laiin mi tam takin amah an ring ta a. Isuan amah ringtu Juda-te hnênah chuan, “Ka thu-a in awm reng chuan ka zirtîrte in ni tak tak ang; thutak in hria ang a, thutak chuan a zalêntîr ang che u,” a ti a. Anni chuan an chhâng a, “Abrahama thlahte kan ni a, tu bawihah mah kan awm ngai lo; ‘a zalêntîr ang che u,’ engtiziaa ti nge i nih?’ an ti a. Isuan a chhâng a, “Thu dik tak ka hrilh a che u, thil sual ti apiang chu sual bawih an ni. Bawih chu chhûngkuaah a tel kumkhua lo, fapa erawh chu kumkhuain a awm reng. Chutichuan, Fapain a zalêntîr che u chuan in zalên tak tak tawh ang. Abrahama thlahte in ni tih ka hria e; nimahsela, min thah in tum si, ka thuin nangmahniah hmun a neih loh avângin. Keiin Pa hnêna ka hmuh ka sawi a, nangni erawh chuan in pa hnên aṭanga in hriat chu in ti ṭhîn,” a ti a. Anni chuan, “Kan pa Abrahama a ni,” tiin an chhâng a. Isuan, “Abrahama fate in nih chuan Abrahama tih ang in ti ang chu. Pa hnêna ka hriat thutak hrilhtu che u hi tûnah mi thah in tum si a. Abrahaman hetiang a ti ngai lo. In pa tih ang in ti ve a nih hi,” a ti a. Anni chuan, “Sâwn kan ni lo ve, pa pakhat kan nei, Pathian chu,” an ti a. Isuan an hnênah, “Pathian in pa a nih chuan mi hmangaih ang, Pathian hnên ata lo kal ka ni si a. Keima thu-a lo kal ka ni si lo, amahin mi tîr zâwk a ni. Engati nge ka thu sawi in hriatthiam loh? Ka thu in dawn fuh theih loh vâng a ni. Nangni zawng in pa Diabola laka chhuak in ni a, in pa duhzâwng tih in duh a ni. Ani chu a tîr ata tualthattu a ni a, thutakah a ding ngai lo, amahah thutak a awm loh avângin. Dâwt a sawiin amaha chhuak chu a sawi a ni; dawthei a ni a, dâwt pa a nih avângin. Keiin thutak ka sawi avângin mi ring lo a ni. In zîngah ka sualna tu nge sawi thei awm? Thutak ka sawi a, engati nge mi rin si loh? Pathian aṭanga chhuak chuan Pathian thu a ngaithla ṭhîn; nangni erawh zawngin ka thu in ngaithla lo, Pathian laka chhuak in nih loh avângin,” a ti a. Juda-te chuan an chhâng a, “Samari mi i ni a, ramhuai i zâwl a ni kan tih kha kan tidik a ni lâwm ni?” an ti a. Isuan, “Ramhuai zâwl ka ni lo va, ka Pa ka chawimawi a ni zâwk e, nangni lahin mi tihmingchhe si. Keima ropuina tûr ka zawng lo, a zawngtu leh a ngaihtuahtu chu a awm. Thu dik tak ka hrilh a che u, tu pawh ka thu zâwm chuan thih ni hmêl a hmu lo kumkhua ang,” a ti a. Juda-ten a hnênah, “Tûnah chuan ramhuai i zâwl a ni tih kan hre chiang ta; Abrahama a thi tawh a, zâwlneite pawh an thi tawh a, nang lahin, ‘Tu pawh ka thu zâwm chuan thihna a tem lo kumkhua ang,’ i ti si a. Min thlahtu Abrahama aiin i ropui zâwk em ni? Ani pawh a thi tawh, zâwlneite pawh an thi tawh, tu-ah nge i insiam le?” an ti a. Isuan, “Mahni inchawimawi ila ka mawina chu eng mah a ni lo. Ka Pa, ‘Kan Pathian a ni,’ in tiha chu mi chawimawitu a ni. Ani chu in hre si lo, kei erawh chuan ka hria; ‘Ani chu ka hre lo,’ ka tih chuan, nangmahni ang bawka mi dawthei ka lo ni ang; nimahsela, amah ka hria a, a thu pawh ka zâwm a ni. In thlahtu Abrahama kha ka ni hmu tûr a nih avângin a hlim êm êm a, a hmu ta ngei a, a lâwm rêng a ni,” a ti a. Juda-te chuan a hnênah, “Kum sawmnga pawh la tling lo pui che, Abrahama i hmu maw?” an ti a. Isuan, “Thu dik tak ka hrilh a che u, Abrahama pian hma pawhin Ka Awm tawh,” a ti a. Amah den nân lung an chhar ta a; mahse, Isua a biru a, Tempul ata a chhuak ta a. Isua chuan a kal pahin mitdel saa piang a hmu a. A zirtîrte chuan, “Rabi, mitdel saa a piang hi tuin nge thil sual ti, he mi hian nge a nu leh pain?” an ti a. Isuan a chhâng a, “He mi hian a tisual lo, a nu leh pain an tisual hek lo, amahah Pathian hnathawh a lan theihna tûr a ni. Chhûn a nih lai hian mi tîrtu hna kan thawk tûr a ni. Tu man hna an thawh theih loh hun zân a lo thleng dâwn e. Khawvêla ka awm chhûng hian khawvêl êng ka ni,” a ti a. Chu chu a sawi zawhin leiah chil a chhâk a, chu chuan hlum a siam a, a mitah hlum chu a bel a, “Siloam dîlah va sil rawh,” a ti a. Siloam chu, ‘tîrh,’ tihna a ni. Tichuan, a va kal a, a sil a, mit vârin a lo kîr leh ta a. A ṭhenawmte leh tûn hmaa a kutdawh hmu ṭhînte chuan, “He mi hi kutdawha ṭhu reng ṭhîn kha a ni lo vem ni?” an ti a. Ṭhenkhatin, “Kha kha a ni,” an ti a. Mi dangin, “Ni lo, a anpui a ni zâwk,” an ti a. Ani chuan, “Kha mi kha ka ni e,” a ti a. Anni chuan, “Engtin nge i mit a lo vâr tâk?” an ti a. Ani chuan, “Mi pakhat, Isua an tih khân hlum a siam a, ka mitah a tât a, ‘Siloam dîlah va sil rawh,’ mi ti a. Tichuan, ka va sil a, ka lo hmu thei ta mai a ni,” a ti a. Anni chuan, “Khawiah nge a awm?” an ti a. “Ka hre lo,” a ti a. Chutichuan, mitdel ni ṭhîna chu Farisai-te hnênah an hruai a, Isuan hlum a siam a, a mit a tihvâr ni chu sabat a ni a. Farisai-te chuan a lo hmuh theih tâk dân chu an lo zâwt leh a. Ani chuan, “Ka mitah hlum a dah a, ka sil a, ka hmu ta mai a ni,” a ti a. Farisai-te zînga mi ṭhenkhatin, “He mi hi Pathian hnên aṭanga lo chhuak a ni lo, sabat a serh loh avângin,” an ti a. Ṭhenkhat chuan, “Mi sualin engtin nge hetiang chhinchhiahna thil mak a tih theih ang?” an ti a. An zîngah inṭhenna a lo awm ta a. Mitdel hnênah chuan, “Ani chu mi engah nge i ngaih, i mit a tihvârsak si che a?” an ti a. Ani chuan, “Zâwlnei a ni,” a ti a. Juda-te chuan khaw hmu thei ta-a nu leh pa chu an koh hma chuan, ‘mitdel a ni ṭhîn a, khua a lo hmu leh thei ta a ni’ tih an awih lo va. Tichuan, “He mi hi in fapa, mitdel saa piang in tih kha a ni maw? Engtin nge tûnah hian a lo hmuh theih tâk?” tiin an zâwt a. A nu leh a pa chuan an chhâng a, “Hei hi kan fapa a ni tih leh, mitdel saa piang a ni tih kan hria; engtin nge tûnah hian a lo hmuh theih tâk erawh chu kan hre lo, a mit tihvârsaktu pawh kan hre hek lo; amah zâwt rawh u. Puitling a ni ve tawh alâwm; aman ama thu chu sawi rawh se,” an ti a. A nu leh pa chuan Juda-te an hlauh avângin chutiang chuan an ti a ni; Juda-te chuan, “Ani chu Krista a ni,” tia pawm apiang chu sunagog-a hnawntîr an lo remti tlâng diam si a. Chuvâng chuan a ni, a nu leh pa chuan, “Puitling a ni ve tawh alâwm, amah zâwt rawh u,” an tih ni. Mitdel ni ṭhîna chu an ko nawn leh a, a hnênah, “Pathian chawimawi rawh. He mi hi mi sual a ni tih kan hria,” an ti a. Ani chuan a chhâng a, “Mi sual a nih leh nih loh ka hre lo, thil pakhat ka hria, mitdel ka ni ṭhîn a, tûnah ka hmu thei ta,” a ti a. Anni chuan, “Engtin nge a tih che? I mit engtin nge a tihvâr?” an ti a. Ani chuan, “Ka hrilh tawh reng che u a, in hre duh si lo; engtizia nge in hriat duh leh tâk ni? Nangni pawh a zirtîrte nih ve in duh elo?” a ti a. Anni chuan an hau ta a, “Nang hi chu pa zirtîr chu i ni a, keini zawng Mosia zirtîrte kan ni asin. Pathianin Mosia a bia tih kan hria, he mi ve hi chu khawia mi nge a nih kan hre hrep lo ve,” an ti a. Chu mi chuan a chhâng a, “Chu tak chu a ni, a makna chu, khawia mi nge a nih in hre lo va, ka mit a tihvâr miau si hi! Pathianin mi sual thu a ngaithla lo tih kan hria; Pathian ngaihsaka, a duhzâwng titute thu erawh chu a ngaithla ṭhîn. Khawvêl awm tirh ata mitdel saa piang mit tivâr ta tu man an hre ngai lo. He mi hi Pathian aṭanga lo chhuak a nih loh chuan eng mah a ti thei lo vang,” a ti a. Anni chuan an chhâng lêt a, “Sual muhlûma piang i nih hi, mi i zirtîr tehlul ang maw?” an ti a. Tichuan, an hnawt chhuak ta a. An hnawt chhuak tih Isuan a lo hria a, a va zawng chhuak a, “Mihring Fapa i ring em?” a ti a. Chu mi chuan a chhang a, “Ka pu, ani chu tu nge ni le, amah ka rin theih nân?” a ti a. Isuan, “Ani chu i hmu tawh a, be mêktu che hi a ni alâwm,” a ti a. “Lalpa, ka ring e,” tiin chibai a bûk ta a. Isuan, “Rorêl tûrin he khawvêlah lo kal ka ni, hmu thei loten an hmuh theiha, hmu theite chu mitdel an lo nihna tûrin,” a ti a. A hnêna Farisai awmte chuan chu chu an hria a, a hnênah, “Keini pawh mitdel kan ni ve elo?” an ti a. Isuan an hnênah, “Mitdel in nih chuan sual in nei lo vang; tûnah, ‘Kan hmu thei e,’ in ti miau si a, in sual chu a awm reng a ni,” a ti a. “Thu dik tak ka hrilh a che u, tu pawh berâm huang kawngkaa lût lova, hmun danga lâwn lût chu rûkhmang leh suamhmang an ni. Kawngkaa lût erawh chu berâm vêngtu chu a ni. Kawngkhâr vêngtuin ani chu kawng a lo hawnsak ṭhîn a, berâmte pawhin a aw an hria; ama berâmte chu an hming ṭheuhvin a ko va, a hruai chhuak ṭhîn. Ama ta zawng zawng a chhuahtîr zawh chuan an hma a hruai a, berâmte chuan amah an zui ṭhîn, a aw an hriat avângin. Mi dang zawng an zui lo vang a, an tlân bosan zâwk ang, mi dang aw chu an hriat loh avângin,” a ti a. Chu tehkhin thu chu Isuan an hnênah a sawi a; nimahsela, a thu sawi awmzia chu an hre si lo. Chutichuan, Isuan an hnênah thu a sawi leh a, “Thu dik tak ka hrilh a che u, kei hi berâmte tân kawngka ka ni. Ka hmaa lo kal zawng zawng kha rûkhmang leh suamhmang an ni; mahse, berâmten an aw an ngaithla lo. Kei kawngka chu ka ni; tu pawh keimaha lût chu a him ang a, a lûtin a chhuak ang a, tlatna ṭha a hmu bawk ang. Rûkru chu ru tûr leh tihlum tûr leh tichhe tûr lo chuan a lo kal lo; kei zawng nun an neih nân, tam taka an neih nân lo kal ka ni. Kei berâm vêngtu ṭha ka ni; berâm vêngtu ṭhain berâmte tân a nun a pe. Inhlawhfa, berâmpu tak ni lova, berâm neitu ni hek lo chuan chinghne lo kal a hmuhin berâmte a tlânsan ṭhîn a, chinghnia chuan berâmte chu a seh a, a tidarh ṭhîn. Inhlawhfa mai a ni a, berâmte a ngaihsak loh avângin a tlânsan ṭhîn a ni. Kei zawng berâm vêngtu ṭha ka ni; ka ta chu ka hria a, ka ta pawhin mi hria, Pain mi hriat leh keiin Pa ka hriat ang hian; berâmte tân chuan ka nun ka pe bawk. He berâm huanga mi lo hi berâm dang ka nei; anni pawh ka la rawn hruai ngei dâwn. Ka aw pawh an ngaithla ang a, vêngtu pakhat neiin berâm rual khat an ni tawh ang. Lâk leh tûra ka nun ka pêk dâwn avâng hian Pain mi hmangaih a ni. Tu man mi lâksak lo vang, keima duh thuin ka pe dâwn a ni zâwk. Pe thei ka ni a, la leh thei pawh ka ni; chu thupêk chu ka Pa hnên aṭangin ka hmu a ni,” a ti a. Chûng thu avâng chuan Juda-te zîngah inṭhenna a lo awm leh a. An zîngah mi tam takin, “Ramhuai a zâwl a, a â a ni; engah nge a thu in ngaihthlâk?” an ti a. Ṭhenkhatin, “Hêng thu hi ramhuai zâwl thu a ni lo ve, ramhuaiin mitdel mit a tivâr thei em ni?” an ti a. Jerusalem-ah Tempul Hlan Thar lehna Kût hman lai a ni a, thlasik lai a ni. Isua chu tempula Solomona hulhliapah a vei a vei a. Juda-te a vêlah an lo pung khâwm a, a hnênah, “Eng chen nge tuilairapin min awmtîr dâwn? Krista i nih chuan chiang takin min hrilh rawh,” an ti a. Isuan a chhâng a, “Ka hrilh tawh che u kha, in awih si lo; ka Pa hminga hna ka thawhte hian ka chanchin a hriattîr a ni. Nimahsela, in awih si lo, ka berâm zînga mi in nih loh avângin. Ka berâmten ka aw an hria a, kei pawhin anni chu ka hria a, mi zui ṭhîn; an hnênah chatuan nun ka pe a, kumkhuain an thi lo vang; tu man ka kut ata mi chhuhsak hek lo vang. Anni mi petu ka Pa chu engkim aia ropui zâwk a ni; ka Pa kuta awm chu tu man an chhuhsak thei hek lo. Kei leh Pa chu pumkhat kan ni,” a ti a. Juda-te chuan amah denna tûrin lung an chhar leh a. Isuan an hnênah, “Paa chhuak hna ṭha tam tak in mit hmuhah ka thawk a, ka hnathawhte zînga a eng vâng ber hian nge lunga mi den dâwn hi?” a ti a. Juda-te chuan an chhâng a, “Hna ṭha thawh avângin lungin kan dêng dâwn lo che. Pathian pawi i sawi a, nang mihring mai si, Pathiana i insiam avâng zâwkin a ni,” an ti a. Isuan a chhâng a, “In Dân Lehkhabuah, ‘Pathiante in ni ka ti,” tih ziak a ni lo vem ni? Pathian thu thlennate mah pathiante tih an nih chuan, Lehkha Thu chu hnâwl theih a ni si lo va. Pathianin a serh hran, khawvêla a tirha hian, ‘Pathian Fapa ka ni,’ ka intih avângin, ‘Pathian pawi i sawi,’ min ti maw? Ka Pa hna thawk ka nih loh chuan mi ring suh u; thawk ka nih erawh chuan kei mi ring lo mah ula, ka hnathawhte tal hi ring rawh u; Pa chu keimahah a awm a, kei Paah ka awm tih in hriata in chian theih nân,” a ti a. Ani chu man an tum leh a; mahse, an kut ata a chhuak ta a. Jordan râlah, Johanan tûn hmaa baptisma a chantîrna hmunah khân a va kal leh a, chutah chuan a awm ta reng a. Mi tam tak a hnênah an lo kal a, “Johanan chhinchhiahna thil mak eng mah a ti lo; amaherawhchu, Johanan he mi chungchâng a sawi apiang kha a lo dik a nih hi,” an ti a. Chutah chuan mi tam takin amah an ring ta a. Bethani khuaa mi pakhat Lazara a damlo va, chu khua chu Mari leh a laizâwn Marthi awmna a ni. Damlo chu Mari nuṭa Lazara a ni. Mari chu Lalpa hriak rimtui chulha, a sama a ke hrûksaktu kha a ni. Tichuan, a farnute chuan, “Lalpa, i hmangaih kha a dam lo ve,” tiin mi an hrilhtîr a. Isuan a lo hriat chuan, “He natna hi thihna tûr a ni lo ve, Pathian ropuina tûr a ni zâwk. Hemi avâng hian Pathian Fapa hi chawimawiin a awm dâwn a ni,” a ti a. Isuan Marthi leh a laizâwnnu leh Lazara chu a hmangaih a; mahse, a damlo tih a hriatin a awmna ngaiah ni hnih a la awm ta cheu va. Chumi hnu chuan a zirtîrte hnênah, “Judai ramah i kal leh ang u,” a ti a. A zirtîrte chuan, “Zirtîrtu, tûn lawkah Juda-ten lunga den che an tum a, chutah chuan i kal leh ang maw?” an ti a. Isuan a chhâng a, “Chhûnah dârkâr sâwm leh pahnih a awm lo vem ni? Mi chhûna a lên chuan a petek ngai lo, he khawvêl êng hi a hmuh avângin. Zâna a lên erawh chuan a petek ṭhîn, amahah êng a awm loh avângin,” a ti a. Chu chu a sawi zawhin an hnênah, “Kan ṭhian Lazara kha a muhîl a; mahse, amah kaitho tûrin ka kal dâwn a ni,” a ti a. A zirtîrte chuan a hnênah, “Lalpa, a muthilh chuan a ṭha leh mai ang chu,” an ti a. Isuan a thih thu a sawina chu mut pangngaia a muthilh thu a sawina emaw an ti a. Chutichuan, Isuan fiah takin a sawi a, “Lazara a thi a ni; nangmahni avângin chuta ka awm lo chu ka lâwm a ni, in rin theih nân; eng pawh ni se, a hnênah i kal ang u,” a ti a. Thoma, Phîra an tih chuan a zirtîrpuite hnênah, “Thih leh thih, a hnênah i kal ve ang u,” a ti a. Isua a va thlen chuan ni li thlânah a awm tawh tih a hria a. Bethani chu Jerusalem kiang lawka awm a ni, km. thum vêla hla a ni. Juda-te zînga tam tak, an nuṭa thih chungchânga Marthi leh Mari khawhar lênpui tûrin an lo kal a. Marthi chuan Isua a lo thleng dâwn tih a hriat chuan a va hmuak a; Mari erawh chuan in a nghâk a. Marthi chuan Isua hnênah, “Lalpa, hetah awm ni la chu, ka nuṭa a thi lo tûr. Tûnah pawh Pathian hnêna i dîl apiang Pathianin a pe ang che tih ka hria e,” a ti a. Isuan, “I nuṭa a tholeh ang,” a ti a. Marthiin, “Ni kin nia thawhlehnaah chuan a tholeh ang tih chu ka hria e,” a ti a. Isuan, “Kei hi thawhlehna leh nunna chu ka ni, tu pawh mi ring chu thi mah sela, a nung reng ang; tu pawh mi nung la dam kei mi ring chu, kumkhuain a thi lo vang; chu chu i ring em?” a ti a. Ani chuan, “Ring e, Lalpa, Krista, Pathian Fapa khawvêla lo kal tûra chu i ni tih ka ring e,” a ti a. Chu chu a sawi zawhin a kal a, a laizâwn Mari chu a rûk têin a va ko va, “Zirtîrtu hetah a awm a, a ko va che,” a ti a. Ani chuan chu chu a hriat veleh a tho thuai a, a hnênah a kal ta a. Isua chu khuaah a lût rih lo va, Marthiin a va hmuhna hmunah khân a la awm a. Juda-te, in chhûnga khawhar ṭhutpuia awmte chuan, Mari a tho thuai a, a chhuak ta chu an hmuhin, thlânah ṭap tûrin a kal dâwn emaw an ti a, an zui a. Marin Isua awmna a va thlena, amah a hmuh chuan a ke bulah a bawkkhup a, “Lalpa, heta awm ni la chu, ka nuṭa a thi lo tûr,” a ti a. Isuan Mari ṭap leh amah rawn zuitu Juda-te ṭap chu a hmu a, a rilru a khawih a, a hnuk a ulh a. “Khawiah nge in phûm?” a ti a. Anni chuan, “Lalpa, lo kal la, en teh,” an ti a. Isua a ṭap ta a. Juda-te chuan, “En teh u, Lazara hi a va lo hmangaih êm!” an ti a. An zînga ṭhenkhat chuan, “Mitdel mit tivârtu hian he mi pawh hi a thih lohtîr thei dâwn lâwm ni?” an lo ti a. Isua chu hnuk ulh ṭeuh chungin thlân chu a thleng ta a. Pûk a ni a, lunga khâr a ni. Isuan, “Lung hi dah sawn rawh u,” a ti a. A thia farnu Marthi chuan a hnênah, “Lalpa, tûnah zawng a rimchhe tawh ang, a thihna ni li a ni tawh si a,” a ti a. Isuan a hnênah, “I rin chuan Pathian ropuizia i hmu ang ka ti lo che em ni?” a ti a. Tichuan, lung chu an dah sawn ta a. Isua chu a vânvadâk a, “Ka Pa, ka thu i ngaihthlâk avângin lâwmthu ka hrilh a che. Ka thu i ngaithla ṭhîn tih pawh ka hria; nimahsela, heta pung khâwmte avâng hian chu chu ka sawi a ni, nangin kei mi tîr tih an rin theih nân,” a ti a. Chu chu a sawi zawh chuan aw ring takin a au va, “Lazar, lo chhuak rawh,” a ti a. Mitthi chu a kut a ke thlân puana inzem chungin a lo chhuak a, a hmai pawh inhrûkna puana tuam a ni a. Isuan an hnênah, “Phelh ula, kaltîr rawh u,” a ti a. Mari lênpuitu, Isua thiltih hmutu Juda-te zînga tam tak chuan amah chu an ring ta a. Ṭhenkhat erawh chu Farisai-te hnênah an kal a, Isua thiltihte chu an va hrilh a. Chutichuan, Puithiam lalte leh Farisai-te chuan Sanhedrin an ko va, “He mi hian chhinchhiahna thil mak tam tak a ti ta si a, engtin nge kan tih tâk ang? Hetianga kan thlahzal chuan mi zawng zawngin amah an ring dâwn a, Rom mite an lo kal ang a, kan hmun thianghlim leh kan hnam hi min rawn tihchhiatsak mai ang,” an ti a. An zînga pakhat, Kaiafa, chumi kuma Puithiam lalber chuan an hnênah, “In va han hre lo êm! Mipui aia mi pakhat a thiha, hnam pum pui a chimih loh chu in tân a ṭha zâwk tih in hrethiam lo va ni,” a ti a. Chu chu ama rilru puak chhuaka sawi a ni lo; chumi kum chuan Puithiam lalber a ni a, an hnam aia Isua thih tûr a sawi lâwk a ni zâwk. An hnam ai mai pawh ni lovin, Pathian fa khawvêla darhte pâwl khata a hruai khâwm lehna tûr pawh a sawi a ni. Chumi aṭang chuan amah tihhlum an tum ta a. Chuvângin, Isua chu a langin Juda-te zîngah a lêng ta lo va, chuta ṭang chuan thlalêr dep rama khaw pakhat Efraim an tihah chuan a kal a, chutah chuan a zirtîrte nên an awm ta reng a. Juda-te Kalhlên Kût a lo hnai ta a, thingtlâng aṭangin mi tam tak chu Kalhlên Kût hmaa inthian tûrin Jerusalem-ah an chho va. Isua chu an zawng a, Tempula an din ho laite chuan, “Eng nge in rin dân? Kûtah hian a lo kal lo vang maw?” an inti hlawm a. Puithiam lalte leh Farisai-ten amah an man theih nân, tu pawhin a awmna an hriat chuan, thuneitute an hriattîr tûr a ni tih thu an pe si a. Kalhlên Kût hma ni rukah, Isua chuan a mitthi kaihthawh Lazara awmna Bethani a lût a. Chutah chuan a tân zanriah an buatsaih a, Marthiin chaw kîl ho chu a vil a, Lazara pawh a kîlpuitute zîngah a tel a. Marin nard hriak rimtui hlîr hlak, man tam tak, no khat a rawn keng a, Isua keah a chulh a, a ke chu a samin a hru a. Hriak rim chu inah chuan a khat ta rum rum a. A zirtîrte zînga pakhat, Juda Iskariota, amah mantîrtu tûr chuan, “Engati nge he hriak rimtui hi duli zathuma hralhin mi retheite an pêk zâwk loh?” a ti a. Mi retheite a ngaihsak avânga chu chu sawi a ni lo, rûkru a ni a, tangka ip a kawl a, a chhûnga awm chu a lâk ṭhin avâng zâwk a ni. Isuan, “Eng mah tih suh u, mi phûm ni atân ring rawh se. In zîngah mi retheite chu an awm reng alâwm, kei erawh chu in zîngah ka awm reng dâwn lo,” a ti a. Juda mi tam takin chutah chuan a awm tih an lo hre ta a, Isua chauh hmuh duha lo kal an ni lo va, mitthi zîng ata a kaihthawh Lazara hmuh an duh bawk a ni. Puithiam lalte chuan Lazara pawh chu tihhlum an tum ta a, amah avânga Juda-te tam takin an pakaisana, Isua an rin tâk avângin. A tûkah chuan kûta lo kal mipui nasa takin Isua Jerusalemah a lo lût dâwn tih an hria a, tûmkaute an keng a, a hmuak tûrin an chhuak a, “Hosana, Lalpa hminga lo kal chu fakin awm rawh se, Israel lal chu fakin awm rawh se,” tiin an au dual dual a. Isuan sabengtung a hmu a, a chungah a chuang a, “Hlau suh, Zion fanu, En teh, i lal chu a lo kal e, Sabengtung no chunga chuangin,” tih ziak ang khân. Chûng chu a zirtîrten a tîrin an hrethiam lo va; nimahsela, Isua chawimawia a awm hnu chuan a chungchâng chutianga ziak a ni a, a chungah chûng thil chu an lo ti a ni tih an hre ta a. Lazara thlân ata a koh chhuaha, mitthi zîng ata a kaihthawh laia a hnêna mipui awmte khân chu thu chu an hriattîr zêl bawk a. Chu chhinchhiahna thil mak chu a ti tih an hriat avângin a ni, mipuite chuan amah an va hmuah ni. Farisai-te chuan, “Eng mah in tih thei lo a nih hi; en rawh u, khawvêlin amah an zui tâk hi,” an in ti a. Kût laia Pathian chibai bûk tûra han kalte zîngah Grik tute emaw an tel a. Chûngte chu Galili rama Bethsaida khaw mi Filipa hnênah an kal a, “Ka pu, Isua hmuh kan duh e,” tiin an ngên a. Filipa chuan Andria a rawn hrilh a, Andria leh Filipa chuan Isua an va hrilh a. Isuan a lo chhâng a, “Mihring Fapa chawimawia a awm hun a lo thleng ta. Thu dik tak ka hrilh a che u; buh fang leia a tlâka a thih loh chuan, a malin a awm reng mai a, a thih erawh chuan rah tam tak a chhuah ṭhîn. Mahni nun thlahleltu chuan a hloh ṭhîn, he khawvêla mahni nun hawtu chuan a vawng reng ang a, chatuan nun a nei bawk ang. Tu pawhin ka rawngbâwl an tum chuan mi zui rawh se, ka awmnaah ka rawngbâwltu pawh an awm ve ang. Tu pawhin ka râwng an bâwl chuan Pain a chawimawi ang. “Tûnah ka rilru a mangang hle, eng nge ka sawi tâk ang le? ‘Ka Pa, hemi hun lakah hian mi chhandam rawh,’ ka ti dâwn em ni? Dâwn lo ve, he thil tuar tûr hian he hun hi ka lo thleng a ni. Ka Pa, i hming chawimawi rawh,” a ti a. Chutichuan, vân aṭangin aw a lo chhuak a, “Ka chawimawi tawh, ka chawimawi leh ang,” a ti a. Chuta mipui ding vete chuan aw chu an hriatin, “Khawpui a ri a ni,” an ti a; a ṭhenin, “Vântîrhkohvin a bia a ni,” an ti a. Isuan a chhâng a, “Chu aw chu ka tâna lo chhuak a ni lo, in tân a ni zâwk e. Tûn hi khawvêl chungchâng ngaihtuah lai a ni, tûnah he khawvêl rorêltu hi paih chhuah a ni ang. Kei lei ata khai kâna ka awm chuan, mi zawng zawng ka lamah ka hîp ang,” a ti a. Chu chu eng tiangin nge a thih dâwn entîr nân a sawi a ni. Mipui chuan an chhâng a, “Krista chu kumkhuain a awm reng dâwn tih Dân lehkhabu aṭangin kan hria a ni, engtiziaa nangin, ‘Mihring Fapa chu khai kânin a awm ang,’ ti nge i nih? Chu Mihring Fapa chu tu nge ni?” an ti a. Isuan an hnênah, “Êng hi rei lo tê in zîngah a la awm rih ang; êng in la neih chhûng hian lêng rawh u, thimin a nang dâwn lo che u nia; thima lêng chuan a kalna chin a hre si lo; êng in la neih chhûng hian êng hi ring rawh u, êng fate in nih theih nân,” a ti a. Chûng thu chu Isuan a sawi a, a kal ta daih a, an hmuh loh tûrin a biru ta a. Chutiang chhinchhiahna thil mak tam tak chu an mit hmuhah ti mah se amah an ring si lo, Zâwlnei Isaian: “Lalpa, kan thu sawi tuin nge ring? Lalpa kut pawh tu hnênah nge a lan?” a tih kha a lo thlen nân. Hemi avâng hian an ring thei lo va ni, Isaian, “An mit a tidel a, an thinlung a tingawng a, An mitin a hmuh loh nân leh, an thinlungin a hriatthiam loh nân. Chuti ni lo se, an hawi kîr leh ang a, Anni chu ka tidam tûr,” a tih leh ang khân. Isaian chûng thu a sawi chu a ropuizia a hmuh avângin a chanchin a sawi a ni. Chuti chung pawhin hotute zînga mi tam takin Isua chu an ring ta a; amaherawhchu, Farisai-te avângin an insawi lang ngam lo, sunagog-a an hnawn loh nân. Pathian chawimawina aiin mihring chawimawina an duh zâwk si a. Isua a au chhuak a, “Tu pawh mi ring chu kei mi ring a ni lo va, mi tîrtu ring a ni zâwk e. Tu pawh mi hmu chu mi tîrtu hmu a ni. êntu atân khawvêla lo kal ka ni, mi ring apiang chu tu mah thima an awm loh nân. Tu pawhin ka thu hriain zâwm lo sela, ani chu keiin thiam loh chantîr tûra lo kal ka ni lo va, khawvêl chhandam tûra lo kal ka ni zâwk si a. Tu pawh mi hnara, ka thu pawm lo chuan a chungthu rêlsaktu tûr pakhat a nei. Ka thu sawi ngei kha ni kin ni-ah chuan a chungthu rêlsaktu a ni ang. Keima phuahchawpin ka sawi lo va, mi tîrtu, Pa ngei chuan, ka sawi tûr leh ka ṭawng tûr thu mi pe zâwk a ni. A thupêk chu chatuan nunna a ni tih kan hria. Chuvângin, Pain sawi tûra mi hrilh ang chu ka sawi a ni,” a ti a. Kalhlên Kût dâwn a ni a, Isuan he khawvêl chhuahsana, Pa hnêna a kal hun a thleng ta tih a hria a; ama mi khawvêla awmte chu a hmangaih a, a tâwp thlengin a hmangaih a ni. Tin, zanriah an kîl a, Diabola chuan Simon Iskariota fapa Juda chu Isua mantîr a lo tum rilrûktîr tawh a. Isuan, Pain engkim a kutah a dah tih leh Pathian aṭanga lo chhuak a ni a, Pathian hnênah a kal dâwn tih a hria a, a zanriah kîl lai chu a tho va, a kawrfual a hlîp a, inhrûkna puan a la a, a veng a. Tin, maihûnah tui a bun a, zirtîrte ke a sîl ta a, inhrûkna puan chuan a hru zêl a. Simon Petera hnên a lo thleng a, Petera chuan, “Lalpa, nang meuhvin ka ke i sil ang maw?” a ti a. Isuan a chhâng a, “Ka thiltih hi tûnah i hre lo; nimahsela, nakinah i la hria ang,” a ti a. Peteran a hnênah, “Ka ke zawng i sil tawp lo vang,” a ti a. Isuan a chhâng a, “I ke ka sil loh chuan eng mah mi ṭâwmpui thei lo vang,” a ti a. Simon Petera chuan a hnênah, “Lalpa, chuti chu, ka ke chauh ni lovin, ka kut leh ka lu pawh hi le,” a ti a. Isuan a hnênah, “Inbual tawh chu a ke chauh lo chu sil a ngai tawh lo, a pumin a fai alâwm. Nangni in fai e, in za erawh chuan a ni lo,” a ti a. Amah mantîrtu tûr chu a hre si a; chuvângin, ‘In za chuan in fai lo,’ a ti a ni. An ke a sil zawh chuan, a kawr dah kha a ha a, a ṭhu leh ta a, an hnênah, “In chunga ka thiltih hi a awmzia in hria em? Nangnin, zirtîrtu leh Lalpa mi ti ṭhîn, in ti dik e, ka ni rêng a. Kei Lalpa leh zirtîrtu mahin in ke ka sil chuan, nangni pawh in ke in insilsak tûr a ni. In chunga ka tih anga in tih vena tûrin entawn tûr ka siamsak che u a ni e. Thu dik tak ka hrilh a che u, bawih a pu aiin a ropui lo, tîrhkoh pawh a tîrtu aiin a ropui hek lo. Chûng chu in hre ta a, in zawm chuan in lâwm ang. In zaa thu ka sawi lo; ka thlante chu ka hria; amaherawhchu: “Ka chhang eitu chu ka hmêlma a lo chang ta,” tih lehkha thu kha a lo thleng tûr a ni. Tûnah a lo thlen hma hian ka hrilh che u hi, a lo thlen hunah ani chu ka ni ngei tih in rin theih nân. Thu dik tak ka hrilh a che u, ka mi tirh lo lâwmtu chuan keimah mi lâwm a ni a, kei mi lâwmtu chuan mi tîrtu a lâwm a ni,” a ti a. Isuan chûng thu chu a sawi zawhin a rilru a mangang a, “Thu dik tak ka hrilh a che u, in zînga mi pakhatin mi mantîr ang,” a ti a. Tu ber nge a tih hre lovin zirtîrte chu an inen ta hlawm a. A zirtîrte zînga pakhat, Isuan a hmangaih chu, Isua hnaih berah chaw kîlin a ṭhu a. A tu ber nge a tih hriat nân zaizîrin Simon Peteran ani chu a zawhtîr a. Tichuan, chu mi chu Isua âwm nghêngin a va thle phei a, “Lalpa, tu hian maw?” a ti a. Isuan a chhâng a, “Chhang them ka chiaha ka pêka chu a ni ang,” a ti a. Chutichuan, chhang them chu a chiah a, Simon Iskariota fapa Juda chu a pe a. Judan chhang them a lâk hnu chuan a chhûngah Setana a lût ta a. Isuan a hnênah, “I tih tûr chu ti thuai rawh,” a ti a. Chuta ṭhuho zînga tu mahin chu chu eng vânga a hnêna sawi nge a nih an hre lo. Ṭhenkhatin, Juda chuan tangka ip a kawl avângin Isuan, “Kût atân thil kan mamawhte lei rawh,” a ti emaw, “Mi retheite hnênah englo pêk tûr,” a ti emaw an ti a. Juda chuan chhang them chu a la a, a chhuak ta nghâl a; zân a ni tawh a. A chhuah tâk hnu chuan Isuan, “Tûnah chuan Mihring Fapa chawimawiin a awm ta, amahah Pathian pawh chawimawiin a awm ta. “Amahah Pathian chawimawia a awm chuan, Pathianin ani pawh a hmaah a la chawimawi ang a, a chawimawi nghâl bawk ang. Naute u, rei lo tê in hnênah ka la awm rih a, nangnin mi zawng ang a, ‘Ka kalna tûrah in lo kal thei lo vang,’ Juda-te hnêna ka tih ang khân tûnah nangni hnênah pawh ka tih hi. “Thupêk thar ka pe a che u; inhmangaih tawn rawh u; keiin ka hmangaih che u angin nangni pawh inhmangaih tawn rawh u. In inhmangaih tawn chuan mi zawng zawngin ka zirtîrte in ni tih chumiah chuan an hria ang,” a ti a. Simon Peteran a hnênah, “Lalpa, khawiah nge i kal dâwn?” a ti a. Isuan a chhâng a, “Tûnah chuan ka kalna tûrah mi zui thei lo vang a, nakinah mi la zui ang,” a ti a. Peteran, “Lalpa, eng vângin nge tûnah pawh ka zui theih lo vang che? I tân chuan thih ka huam asin,” a ti a. Isuan a chhâng a, “Ka tân thih i huam maw? Thu dik tak ka hrilh a che, nangin vawi thum mi phat hma loh chuan âr a khuang lo vang,” a ti a. “In thinlung mangang suh se, Pathian ring ula, kei pawh hi mi ring rawh u. Ka Pa inah awmna tam tak a awm a; chuti ni suh sela, in tân hmun siama ka kal tûr thu ka hrilh dâwn che u em ni? In tân hmun siama ka kal hnuah ka lo kîr leh ang a, ka hnênah ka hruai ang che u, ka awmnaah in awm ve theih nân. Ka kalna tûr kawng pawh in hria e,” a ti a. Thoman a hnênah, “Lalpa, i kalna tûr kan hre lo asin, engtin nge a kawng kan hriat theih ang?” a ti a. Isuan a chhâng a, “Keimah hi kawng leh thutak leh nunna chu ka ni; keimaha kal lo chu tu mah Pa hnên an thleng ngai lo. Kei mi hria ni ula, ka Pa pawh in hre tûr; tûnah zawng amah in hria e, in hmu tawh bawk,” a ti a. Filipan a hnênah, “Lalpa, Pa chu min hmuhtîr la, kan tân a tâwk ang,” a ti a. Isuan, “Filip, hei leh chen hi in hnênah ka awm a, mi la hre lo cheu maw? Kei mi hmu chu Pa hmu a ni. Engtiziaa Pa chu min hmuhtîr rawh ti nge i nih le? Kei Paah ka awm a, Pa keimahah a awm tih in ring lo vem ni? In hnêna thu ka sawite hi keima phuahchawpin ka sawi lo. Pa, keimaha awm reng chuan ama hna a thawk a ni zâwk. Kei Paah ka awm a, Pa keimahah a awm ka tih hi ring rawh u; a nih loh leh thiltih avâng tal hian mi ring rawh u. Thu dik tak ka hrilh a che u, tu pawh mi ring chuan thil ka tih ang hi a ti ve ang; hei aia ropui zâwk pawh hi a la ti ang, Pa hnêna ka kal dâwn avângin. Ka hminga eng pawh in dîl chuan ka ti zêl ang; Pa chu Fapa avânga chawimawi a nih theih nân. Ka hmingin eng pawh mi dîl chuan ka ti zêl ang. “Nangnin mi hmangaih chuan, ka thupêkte in zâwm ang. Tin, keiin Pa ka dîl ang a, Awmpuitu dang a pe ang che u, in hnêna awm kumkhua tûrin, Thlarau dik tak, khawvêlin a hmuh lohva a hriat hek loh avânga a chan theih loh chu. Nangmahniah a nun avângin nangni chuan amah in hria e, in hnênah a awm reng si a. Fahrahin ka kalsan lo vang che u, in hnênah ka lo kal leh ang. Rei lo tê a chinah khawvêlin mi hmu tawh lo vang, nangni erawh chuan mi hmu ang, kei ka nun avângin nangni pawh in nung ve ang. Chutih hunah chuan kei Paa ka awm te, nangni keimaha in awm te, kei nangmahnia ka awm te in la hria ang. Tu pawh ka thupêkte pawma zâwmtu chu mi hmangaihtu a ni; mi hmangaihtu chu ka Pain a hmangaih ang a, kei pawhin ka hmangaih ang a, a hnênah ka inlâr bawk ang,” a ti a. Juda, Iskariot ni lo zâwk chuan a hnênah, “Lalpa, kan hnênah i inlâr ang a, khawvêl hnênah i inlâr si lo tûr chu engtizia nge?” a ti a. Isuan a chhâng a, “Miin mi hmangaih chuan ka thu a zâwm ang, ka Pain ani chu a hmangaih ang a, a hnênah kan lo kal ang a, a hnênah kan awm reng ang. Mi hmangaih lotu chuan ka thu a zâwm lo, thu in hriat hi keima thu a ni lo va, Pa mi tîrtu thu a ni zâwk e. In hnêna ka la awm chhûng hian hêng thu hi ka hrilh che u a ni; Awmpuitu, Thlarau Thianghlim, ka hminga Pain a rawn tirh tûr chuan engkim a zirtîr ang che u, in hnêna ka sawi zawng zawng pawh a hriat chhuahtîr leh ang che u. Thlamuanna ka hnutchhiah a che u, keima thlamuanna ka pe a che u; khawvêlin a pêk ang ni lovin ka pêk che u hi. In thinlung mangang suh se, hlauh pawh hlau suh se. “‘Ka kal bo dâwn a, in hnênah ka lo kîr leh ang,’ ka tih kha in hria e. Mi hmangaih chuan Pa hnêna ka kal tûr hi in lâwm ang: Pa chu kei aiin a ropui zâwk si a. Chu chu a lo thlen huna in rin theih nân, tûnah a lo thlen hmain ka hrilh che u a ni. In hnênah thu ka sawi tam tawh lo vang, he khawvêl lal hi a lo kal dâwn avângin. Ka chungah thu eng mah zawng a nei lo; amaherawhchu, keiin Pa ka hmangaih a, Pain thu mi pêk ang zêlin ka ti ṭhîn tih khawvêlin a hriatna tûr a ni. Tho rawh u, heta ta hi i chhuak ang u. “Kei hi grêp tak chu ka ni a, ka Pa a huan enkawltu a ni. Ka zawmpui pêng rah lo apiang a paih ṭhîn a, a rah apiang a thian fai ṭhîn, a rah tam lehzual nân. In hnêna ka thu sawi zawng zawng avâng chuan in thianghlim tawh pang a ni. Keimahah awm reng ula, kei pawh nangmahniah ka awm reng ang. Pêng chu grêp hruia a awm reng loh chuan a rah thei lo ang bawkin, nangni pawh keimaha in awm reng loh chuan in rah thei lo vang. Kei grêp chu ka ni, nangni a pêngte chu in ni. Tu pawh keimaha awm renga, kei pawh amaha ka awm rengna chu tam takin a rah ṭhîn; keimah lovin eng mah in ti thei si lo. Tu pawh keimaha awm reng lo chu, pêng anga paih chhuahin an awm ṭhîn, pêng paih chu a vuai a, an fawm a, meiah an paih a, a kâng ṭhîn. Keimaha in awm renga, ka thu nangmahnia a awm reng bawk chuan, in duh apiang dîl ula, in hmu zêl ang. Tam taka in raha, ka zirtîrte in nih tak meuh hian ka Pa chawimawiin a awm ṭhîn. Pain mi hmangaih angin kei pawhin ka hmangaih che u hi; ka hmangaihin awm reng rawh u. Ka thupêkte in zawm chuan, ka hmangaihin in awm reng ang, keiin ka Pa thupêkte ka zâwm a, a hmangaiha ka awm reng ang hian. “Ka lâwmna hi nangmahnia a awm reng nân leh, in lâwmna chu a famkim nân hêng thu hi in hnênah ka sawi a ni. Hei hi ka thupêk chu a ni; ka hmangaih che u ang hian nangni pawh inhmangaih tawn rawh u. Miin a ṭhian tân a nun a pêk aliama hmangaihna nasa zâwk tu man an nei lo. Thu ka pêk che u hi in tih chuan ka ṭhiante in ni ang. Bawih ka ti leh tawh lo vang che u; bawih chuan a pu thiltih a hre si lo va; ṭhiante ka ti zâwk a che u; ka Pa hnên aṭanga thil ka hriat zawng zawng ka hrilh tawh si che u a. Nangnin mi thlang lo, keiman ka thlang zâwk che u a, va rah tûr leh in rah awm reng tûrin ka ruat bawk a che u; tichuan, ka hminga Pa hnêna in dîl apiang a pe dâwn che u nia. He thu hi ka pe a che u, inhmangaih rawh u. “Khawvêlin a huat che u chuan, a huat hma che uin kei mi haw tawh tih hria ang che u. Khawvêl mi ni ula chuan, khawvêlin ama ta chu a hmangaih ang che u; nimahsela, khawvêl mi in ni lo va, khawvêla mi ka thlan chhuah in nih avângin khawvêlin a hua che u a ni. Bawih a pu aiin a ropui lo tih thu in hnêna ka sawi kha hre reng rawh u. Annin kei mi tihduhdah ang khân nangni pawh an tiduhdah ang che u; ka thu an zawm chuan in thu pawh an zâwm ang. Nimahsela, hêng thil zawng zawng hi ka hming avângin in chungah an ti ang, mi tîrtu an hriat loh avângin. Kei lo kalin an hnênah thu sawi lo ila chuan, sual an nei lo tûr; tûnah zawng an sual chhuanlam tûr an nei tawh lo. Tu pawh mi hua chuan ka Pa pawh a hua a ni. Mi dang tu ma la tih ngai loh thilte an zîngah ti lo ila chuan, sual an nei lo tûr; tûnah zawng ka thiltihte an hmu a, kei leh ka Pa chu min haw ta bawk a ni. Engpawh ni se an Dân Lehkhabuah, ‘Annin a chhan awm lovin min hua,’ tih ziak kha a lo thlenna tûr a ni. “Awmpuitu, Pa hnên ata in hnêna ka rawn tirh tûr, Paa chhuak Thlarau dik tak chu a lo thlen hunah, ani chuan ka chanchin a hriattîr ang. Nangni pawh ka thu hretute in ni e, a tîr ata ka hnêna in awm avângin. “In tlûkchhiat loh nân hêng thu hi ka sawi a ni. Sunagog-ahte an hnawntîr ang che u a; a tihhlum che u apiangin Pathian duhzâwng tia an inngaih hun a lo la thleng ang. Pa leh kei mi hriat loh avângin chutiang thil chu an ti ang. A hun a lo thlen tikah ka hrilh tawh che u tih in hriat reng nân hêng thu hi in hnênah ka sawi a ni e. “In hnêna ka la awm avângin a tîr ata hêng thu hi ka la hrilh lo rêng che u a ni. Tûnah chuan mi tîrtu hnênah ka kal dâwn tawh a, in zînga tu mahin, ‘Khawiah nge i kal dâwn?’ tiin mi zâwt si lo. Mahse, hêng thu hi in hnênah ka han sawi ta a, in thinlung chu lungngaihnain a khat leh si a. “Nimahsela, thu dik tak ka hrilh a che u, ka kal hi in tân a ṭha zâwk e, ka kal loh chuan Awmpuitu chu in hnênah a lo kal dâwn si lo; ka kal erawh chuan in hnênah ka rawn tîr ang. Ani chu a lo thlen chuan, sual thu te, thiam chantîrna thu te, rorêlna thu te an lo ngai sual tih khawvêl a hriattîr ang. Sual thu-a an dik lohna chu kei mi rin lohna hi a ni a; Thiam chantîrna thu-a an dik lohna chu, Pa hnênah ka kal dâwn a, mi hmu leh dâwn tawh lo hi a ni: rorêlna thu-a an dik lohna chu, he khawvêl rorêltu hi rorêlsakin a awm tawh a ni. “In hnênah thu tam tak sawi tûr ka la nei cheu va; amaherawhchu, tûnah chuan in la tlin rih lo vang. Thlarau dik tak chu a lo thlen hunah erawh chuan thutak zawng zawngah a hruai lût ang che u. Ama phuahchawpin thu a sawi dâwn si lo; thu a dawn chu a sawi zâwk ang a, thil lo la thleng tûr pawh a hrilh ang che u. Ani chuan kei mi chawimawi ang; ka ta-a mi a la ang a, a hrilh dâwn che u a ni. Pain thil a neih zawng zawng ka ta a ni; chuvâng chuan a ni, ‘Ka ta-a mi lain a hrilh ang che u,’ ka tih ni. “Rei lo têah nangnin mi hmu tawh lo vang a, rei lo têah bawk mi hmu leh ang,” a ti a. A zirtîrte ṭhenkhatin, “Kan hnêna a thu sawi hi eng nge ni? ‘Rei lo têah mi hmu tawh lo vang a, rei lo têah bawk mi la hmu leh ang,’ a tih leh, ‘Pa hnêna ka kal dâwn avângin,’ a tih hi?” an inti a. Chutichuan, “ ‘Rei lo tê,’ a tih hi eng tihna nge ni? Eng nge sawi a tum kan hre lo ve,” an ti a. Isuan thu an zâwt duh tih a hria a, an hnênah, “ ‘Rei lo têah mi hmu tawh lo vang a, rei lo têah bawk mi la hmu leh ang,’ ka tih kha in zâwt a ni maw? Thu dik tak ka hrilh a che u, nangni in mittui a tlain in ṭap ang a, khawvêl erawh chu an hlim ang; nangni in lungngai ang a; mahse, in lungngaih chu lâwmah a chang ang. Hmeichhiain nau a neih dâwn chuan nasa takin a tuar a, a hun a thlen avângin; nimahsela, nau a lo pian chuan a tuarna chu a hre reng tawh ṭhîn lo, khawvêla mihring lo piang chu a lâwm avângin. Chutiang chuan nangni pawh tûnah in lungngai a; nimahsela, ka hmu leh ang che u a, in thinlung a hlim ang a, in hlimna chu tu man an lâksak lo vang che u. Chumi ni-ah chuan nangnin eng mah mi zâwt tawh lo vang. Thu dik tak ka hrilh a che u, Pa hnênah eng pawh in dîl chuan ka hmingin a pe ang che u. Tûn thleng hian ka hmingin eng mah in la dîl lo; dîl rawh u; tichuan, in hmu ang, in lâwm a kimna tûrin. “Chûng chu a thawiin in hnênah ka sawi ṭhîn a; in hnênah pehhêla sawi tawh lovin, chiang taka Pa thu ka hrilh hun che u a lo thleng dâwn. Chumi ni-ah chuan nangnin ka hmingin in dîl ang; keiin in tân Pa hnênah ka dîl ang ka ti lo ve. Pa ngei chuan a hmangaih si che u a, Pa hnên aṭanga lo kal ka ni tih in rin avângin mi hmangaih si a. Pa hnên aṭangin ka lo chhuak a, khawvêlah ka lo lût a, khawvêl ka chhuahsan leh dâwn a, Pa hnênah ka kal dâwn a ni,” a ti a. A zirtîrte chuan, “Tûnah zawng chiang takin thu i sawi ta a, a thawiin i sawi ta lo ve. Engkim i hria a, tu man an zawh che pawh i ngai lo tih tûnah chuan kan hre ta; hemi avâng hian Pathian hnên aṭanga lo kal i nih kan ring ta e,” an ti a. Isuan a chhâng a, “Tûnah in ring ta maw? Ngai rawh u, nangni hi mahni in ṭheuhvah kal darhin, keimah chauhva mi thlah fâl hun a lo thleng dâwn, a thleng tawh mêk a ni; nimahsela, keimah chauhvin ka awm lo ve, Pa chu ka hnênah a awm si a. Keimahah thlamuanna in hmuh nân hêng hi in hnênah ka sawi a ni; khawvêlah hian hrehawmin in awm ṭhîn; nimahsela, thlamuang takin awm rawh u, keiin khawvêl ka ngam ta,” a ti a. Chûng thu chu Isuan a sawi a, a vânvadâk a, “Ka Pa, a hun a thleng ta; i Fapa chawimawi rawh, Fapain a chawimawi theih nân che. Mi zawng zawng chunga thuneihna i pe ang khân ani pawhin a hnêna i pêk apiangte chu chatuan nun a pêk theih nân. Hei hi chatuan nunna chu a ni, nang Pathian tak chauh leh i tirh Isua Krista hriat hi. Thil tih tûr mi pêk kha ka ti zo va, leiah hian ka chawimawi tawh a che. Ka Pa, khawvêl awm hmaa i hnêna ropuina ka neih khân, tûnah nangma hnên ngeiah mi chawimawi rawh. “Khawvêl ata kei mi pêkhote hnênah i hming ka tilang ta; i ta an ni a, anni chu mi pe a; i thu pawh an zâwm ta. Tûnah chuan thil mi pêk zawng zawng nangmaha chhuak a ni tih an hre ta. Nangin thu mi pêkte kha an hnênah ka pe a, an lo pawm a; i hnên aṭanga lo kal ka ni ngei tih an hre ta bawk a, nangin kei mi tîr tih pawh an ring ta e. “Keiin an tân ka ngensak hi, khawvêl tâna ngensak ka ni lo, nangin mi pêkte tân zâwk a ni, i ta an ni si a. Ka ta zawng zawng chu i ta a ni a, i ta pawh chu ka ta a ni bawk e, anmahniah chawimawiin ka awm ta. Kei khawvêlah ka awm tawh lo vang, anni erawh hi chu khawvêlah an la awm ang; kei zawng i hnênah ka lo haw dâwn ta. Ka Pa thianghlim, nangin mi pêkte hi i hmingin hum rawh, keimahni ang hian pumkhat an nih theih nân. “An hnêna ka awm chhûng chuan nangin kei mi pêkte hi i hmingin ka hum ṭhîn; anni chu ka vêng a, an zînga pakhat mah an boral lo, boral tûra lo kha chu, Lehkha Thu a lo thlen kimna tûrin. Tûnah i hnênah ka lo haw dâwn ta, hêng thil hi khawvêlah ka sawi a ni, ka lâwmna anmahniah an neih famkimna tûrin. I thu an hnênah ka pe tawh a, kei khawvêla mi ka ni lo ang bawk hian khawvêla mi an ni si lo va; chuvângin, khawvêlin an hua a ni. “Anni chu khawvêl ata la chhuak tûrin ka ngên lo va che. Mi sual laka hum tûrin ka ngên zâwk a che. Khawvêl mi an ni lo, kei khawvêl mi ka ni lo ang hian. Anni chu thutakin tithianghlim rawh, i thu chu thutak a ni. Khawvêla mi tîr angin anni pawh khawvêlah ka tirh hi. Anmahni avângin ka intithianghlim a ni, anni pawh thutaka an thianghlimna tûrin. “Hêngho tân chauh hian ngensak ka ni lo, an thu avânga kei mi la ring tûrte tân pawh ngensak ka ni bawk, an za-in inpumkhat sela; ‘Ka Pa, nang keimahah i awma, kei nangmaha ka awm ang hian, anni pawh keimahniah awm sela, nangin kei mi tîr tih khawvêlin an rin theihna tûrin. Nangin ropuina mi pêk kha kei pawhin anni ka pe ta, pumkhat an nih theih nân, keini pumkhat kan ni ang bawk hian; kei anmahniah, nang keimahah, an inpumkhatna a famkim nân leh, nangin kei mi tîr a, mi hmangaih ang bawkin anni chu i hmangaih tih khawvêlin an hriat nân. Ka Pa, nangin mi pêkte hi ka awmnaa ka hnêna awmah ka duh, nangin mi hmangaih avânga leilung pian hma tawha mi pêk ka ropuina kha an hmuhna tûrin; ka Pa fel tak, khawvêl zawngin an hre lo che a, kei erawh chuan ka hria a che; hêngho pawh hian nangin kei mi tîr tih an hria e. An hnênah i hming ka hriattîr a, ka hriattîr zêl ang; hmangaihna, keimah min hmangaihna ngei kha anmahnia a awma, kei anmahnia ka awm theih nân,” a ti a. Isuan chûng thu chu a sawi zawhin, a zirtîrte nên an chhuak a, Kidron luikawr an kân a, chutah chuan huan a awm a, a chhûngah chuan a zirtîrte nên an lût a. A mantîrtu Juda pawh chuan chu hmun chu a hria, chutah chuan Isua leh a zirtîrte an inhmuh fo ṭhin avângin. Chutichuan, Juda chuan sipai pâwl khat leh puithiam lalte leh Farisai-te tirh Tempul vêngtute chutah chuan a rawn hruai a; khâwnvâr te, meichher te, hriamhrei te an keng a. Isuan a chunga thil lo thleng tûr zawng zawng chu a hre vek a; a va pên chhuak a, an hnênah, “Tu nge in zawn?” a ti a. “Nazaret Isua,” tiin an lo chhâng a. Isuan, “Keimah hi ka ni,” a ti a. A mantîrtu Juda pawh chu an zîngah a ding a. Tichuan, “Keimah hi ka ni,” an hnêna a tih veleh, an hnungtawlh a, leiah an tlu hlawm a. “Tu nge in zawn?” tiin anni chu a zâwt leh a, “Nazaret Isua,” an ti a. Isuan a chhâng a, “Keimah hi ka ni tih ka hrilh tawh che u alâwm, kei mi zawng in nih chuan hêngho hi thlah ṭha rawh u,” a ti a. A thu sawi, “Nangin kei mi pêkte kha pakhat mah ka hloh lo,” a tih kha a lo thlen theihna tûrin. Simon Petera chuan a khandaih a phawi a, Puithiam lalber bawih a sât a, a beng ding lam a hlawisak a. Chu bawih hming chu Malka a ni. Isuan Petera hnênah chuan, “Khandaih kha a paiah khung rawh; Pain mi pêk no hi ka in lo vang em ni?” a ti a. Tichuan, sipai pâwl leh an hotu leh Juda-te Tempul vêngtuho infin khâwm chuan Isua chu an man a, an phuar a, Anna hmaah an hruai hmasa a. Anna chu, chumi kuma Puithiam lalber Kaiafa puzawn a ni. Kaiafa chu a ni, ‘Mipui thih aiin mi pakhat thih a ṭha zâwk,’ tia Juda-te thu râwntu kha. Simon Petera leh zirtîr dang pakhatin Isua chu an zui a. Chu zirtîr chu Puithiam lalber hmêlhriat a ni a. Puithiam lalber kawtlaiah chuan Isua a luhpui ve a. Petera erawh chu kawngka pâwn lamah a ding a. Zirtîr dang, Puithiam lalber hmêlhriat chu, a va chhuak a, kawngka vêngtu nula chu a bia a, Petera chu a hruai lût a. Kawngka vêngtu nula chuan Petera hnênah, “Nang pawh he mi zirtîrte zînga mi i ni lâwm ni?” a ti a. Ani chuan, “Ni lo ve,” a ti a. Chutah chuan chhiahhlawhte leh vêngtu sipaite an ding a, a vawh avângin meihawlin mei an chhêm a, an ai hlawm a; Petera pawh chuan an zîngah mei lum chu a ai ve a. Puithiam lalber chuan Isua chu a zirtîrte chanchin leh a thu zirtîr chungchâng a zâwt a. Isuan ani chu a chhâng a, “A langin mi tin hnênah thu ka sawi ṭhîn; Juda zawng zawng kal khâwmna sunagog-ah te, Tempulah te ka zirtîr fo ṭhîn a; a rûkin eng mah ka sawi ngai lo. Engah nge kei mi zawh? Ka thu sawi ngaithlatute hnênah eng nge ka sawi ṭhin zâwt ta che u, eng nge ka sawi an hria alâwm,” a ti a. Chu chu a sawi zawh chuan vêngtu sipai dingho zînga pakhat chuan Isua hmaiah a bêng a, “Chutianga Puithiam lalber chhân tûr em ni?” a ti a. Isuan ani chu a chhâng a, “Thu dik lo ka sawi a nih chuan mi hrilh mai la, thu dik ka sawi si chuan engah nge mi ben?” a ti a. Anna chuan phuar chungin Puithiam lalber hnênah a tîr ta a. Simon Petera chuan dingin mei lum a la ai a, “Nang pawh hi a zirtîrte zînga mi i ni lo maw?” an ti a. Ani chuan a phat a, “Ni lo ve,” a ti a. Puithiam lalber chhiahhlawhte zînga pakhat, Peteran a beng a hlawisaka laichîn chuan, “Huanah khân a hnênah ka hmu lo che maw?” a ti a. Petera chuan a phat leh a; tin âr a khuang ta nghâl a. Isua chu Kaiafa in aṭangin Ramawptu inah an hruai a. Zîng tak a la ni a. Juda-te chu bawlhhlawh lova Kalhlên Kût chaw an ei theih nân a inah chuan an lût duh lo va. Tichuan, Pilata chu an hnênah a va chhuak a, “He mi hi eng tisualah nge in puh?” a ti a. Anni chuan, “He mi hian thil sual a tih loh chuan i hnênah kan rawn hruai lo vang,” an ti a. Pilatan, “Nangmahniin hruai ula, in dân angin a thu rêlsak ta che u,” a ti a. Juda-te chuan, “Keini chuan mi tihhlum theihna kan nei hlei nêm,” an ti a. Chu chu Isuan engtianga thi tûr nge a nih a sawina thu a lo thlenna tûrin a ni. Tichuan, Pilata chu a inah a lût leh a, Isua a ko va, a hnênah, “Juda-te lal i ni maw?” a ti a. Isuan a chhâng a, “Chu chu nangma rilru puak chhuaka sawi nge i nih, mi dangin ka chungchâng thu hi an hrilh che?” a ti a. Pilatan a chhâng a, “Kei hi Juda ka ni em ni? I chipuite leh puithiam lalten ka hnênah an rawn hlân che a nih hi; eng nge i tih le?” a ti a. Isuan a chhâng a, “Ka ram chu he khawvêla mi hi a ni lo; ka ram chu he khawvêla mi ni sela, Juda-te kuta mantîra ka awm loh nân ka ṭhuihruaiten an bei ang; ka ram zawng heta mi a ni lo ve,” a ti a. Pilatan, “Chu, lal i ni maw?” a ti a. Isuan a chhâng a, “Nangman lal mi ti a; kei chu thutak hriattîr hi ka pian chhan leh khawvêla ka lo kal chhan chu a ni. Tu pawh thutaka awm chuan ka aw an ngaithla ṭhîn,” a ti a. Pilatan a hnênah, “Thutak eng nge ni?” a ti a. Chu chu a sawi zawhin Juda-te hnênah a va chhuak leh a, an hnênah, “A chungah thu pawi eng mah ka hmu lo. Amaherawhchu, in tih ṭhin dânin Kalhlên Kût laiin mi tâng pakhat ka chhuahsak dâwn che u a, Juda-te lal hi chhuahsak che u ila in duh em?” a ti a. Nimahsela, ring takin an au va, “He mi hi chu ni lo ve, Barabba zâwk le,” an ti a. Barabba chu suamhmang a ni. Tichuan, Pilatan Isua a hruai a, a vuaktîr a. Sipaite chuan chawimawi nân hlîng an kual a, lukhumah an khumtîr a, kawrfual senduk an hâktîr bawk a, “Chibai, Juda-te lal!” an ti a; a hmaiah an bêng bawk a. Pilata chu pâwnah a va chhuak leh a, an hnênah, “En teh u, a chungah eng mah thu pawi ka hmu lo tih in hriat nân in hnênah ka rawn hruai chhuah hi,” a ti a. Tichuan, chawimawina lukhum chu khuma kawrfual senduk ha chuan Isua chu pâwnah a lo chhuak a. Tin, an hnênah, “En teh u, Mihringa hi,” a ti a. Puithiam lalte leh an ṭhuihruaiten an hmuh chuan, “Krawsah khêngbet rawh, krawsah khêngbet rawh,” tiin an au va. Pilatan an hnênah, “Nangmahnin hruai ula, krawsah khêngbet ta che u, kei zawngin a chungah thu pawi ka hmu lo ve,” a ti a. Juda-te chuan an chhâng a, “Dân kan nei a, chumi dân ang chuan, Pathian Fapaa a inchhâl avângin a thi tûr a ni,” an ti a. Pilatan chu thu chu a hriatin a hlau lehzual a. Inah a va lût leh a, Isua hnênah, “Khawi lam mi nge i nih?” a ti a. Nimahsela, Isuan a chhâng lo. Pilatan a hnênah, “Nangin kei mi be duh lo vei maw? Chhuah thei che ka ni a, krawsa khêngbet thei che ka ni tih i hre lo vem ni?” a ti a. Isuan a chhâng a, “Chung lam aṭanga pêk i nih loh chuan ka chungah thuneihna rêng rêng i nei lo vang; chuvângin, i hnêna mi petu khân sual a phur nasa zâwk a ni,” a ti a. Chuvâng chuan, Pilatan amah chhuah dân kawng a zawng ta a; nimahsela, Juda-te an au va, “He mi hi i chhuah chuan Kaisara ṭhian i ni lo vang; tu pawh lala insiam chu Kaisara do an ni,” an ti a. Pilatan chûng thu chu a hriat chuan Isua chu a hruai chhuak a, ‘Lungrem,’ Hebrai ṭawng chuan, ‘Gabatha,’ an tih, rorêlna ṭhutthlêngah chuan a ṭhu a. Kalhlên Kût Inrinni a ni a, chhûn lai vêl a ni. Juda-te hnênah chuan, “En teh u, in lal hi,” a ti a. Anni chu an au va, “Tiboral rawh, tiboral rawh; krawsah khêngbet rawh,” an ti a. Pilatan, “In lal hi krawsah ka khêngbet ang maw?” a ti a. Puithiam lalten an chhâng a, “Kaisara lo chu lal dang kan nei lo,” an ti a. Tichuan, ani chu krawsa khenbeh tûrin a pe ta a. Chutichuan, Isua chu an hruai ta a. Mahni kraws puin, ‘Luruh hmun,’ Hebrai ṭawnga, ‘Golgotha,’ an tih hmun chu, panin a chhuak ta a. Chutah chuan krawsah an khêngbet a, mi dang pahnih nên, a sîr tuakah pakhat ve vein, a laiah Isua. Pilata chuan hriattîrna a ziak a, kraws lêrah a târ a, “Nazaret Isua, Juda-te lal,” tia ziak a ni. Hriattîrna chu Juda tam takin an chhiar a, Isua an khenbehna hmun chu khawpui kiang a nih avângin Hebrai ṭawng te, Rom ṭawng te, Grik ṭawng tein ziak a ni. Juda puithiam lalte chuan Pilata hnênah, “ ‘Juda-te lal,’ tiin ziak suh, ‘Juda-te lal ka ni a ti,’ tiin ziak zâwk rawh,” an ti a. Pilatan a chhâng a, “Ka ziak kha ka ziak zo tawh,” a ti a. Sipaiten Isua krawsa an khenbeh zawh chuan a silhfênte an lâksak a, sipai pakhat tân chan khat zêl tûrin chan li-ah an sem a. A kawrfual an la bawk a, chu chu ṭhui loh kawr a ni a, a nghâwng aṭanga a tlâng thlengin a pumin tah vek a ni. Anni chuan, “Hei hi chu i pawt thlêr suh ang u, tu ta ber tûr nge hriat nân ṭhum i vâwr zâwk ang u,” an ti a, “Ka silhfênte an insem a, Ka kawr atân ṭhum an vâwr a,” tih Lehkha Thu kha a lo thlenna tûrin. Sipaihote chuan chûng chu an ti ta ngei a. Isua kraws kiangah chuan a nu te, a nu laizâwn Mari, Klopa nupui te, Mari Magdala mi te an ding a. Isuan a nu leh a kianga ding zirtîr a hmangaih chu a hmuhin a nu hnênah chuan, “Ka nu, en teh, i fapa kha,” a ti a. Zirtîr hnênah pawh chuan, “En teh, i nu kha,” a ti a. Chuta ṭang chuan chu zirtîr chuan ama inah ani chu a hruai ta a. Chumi hnuah chuan Isuan thil zawng zawng a thleng kim ta tih a hria a; Lehkha Thu a thlen nân, “Ka tui a hal e,” a ti a. Chutah chuan bêl, uain thûra khat a awm a; tichuan, sponj, uain thûra an chiah chu, husop tiangah an târ a, a hmui an han thlen a. Isuan uain thûr chu a lo in zawh chuan, “A kim ta!” a ti a; tin, a lu a kûn a, a hnuk a chat ta a. Juda-te Inrinni a ni a, ruangte chu sabat nia krawsa a awm reng loh nân, chu sabat chu ni ropui a ni si a, Juda-te chuan Pilata hnênah mi khenbehho kête tihtliaha, an ruang lâk sawn an dîl a. Chutichuan, sipaite an lo kal a, Isua ruala khenbehte, a tawn tirha mi leh pakhat zâwk kête chu an titliak ta a. Isua an va pan a, a thi tawh tih an hria a, a kête chu an tihtliahsak ve lo va. Amaherawhchu, sipai zînga pakhat chuan a nâkah feiin a chhun a, thisen leh tui a lo luang chhuak ta nghâl a. Mit ngeia hmutu sawi a ni, nangni pawhin in rinna tûrin. A thu hriattîr hi a dik a, thu dik a sawi tih hretu pakhat a awm. Lehkha Thu, “A ruh pakhat mah tihtliah a ni lo vang,” tih thlenna tûra chûng thil chu lo thleng a ni. Lehkha Thu dangin, “An chhuna chu an la en ang,” a ti bawk a. Chumi hnu chuan Arimathai khaw mi Josefa, Isua zirtîr, Juda-te a hlauh avânga inthup chuan, Pilata chu Isua ruang lâk a dîl a. Pilatan a lo phalsak a. Tichuan, a ruang chu a va la ta a. Nikodema, tûn hmaa zâna a hnêna lo kal kha, mura leh aloe inpawlh sa Kg. sawmthum leh pali lai kengin a lo kal ve a. An pahnih chuan Isua ruang chu an la a, Juda-te inphûm dân angin englo rimtuite nên chuan puan zai sînin an zem a. Amah an khenbehna hmunah chuan huan a awm a; huanah chuan thlân thar, tu mah an la zalh ngai lohna a awm. Juda-te Inrinni a nih avângin, thlân chu an kiang lawka awm a ni bawk a, Isua chu an zalh ta a. Pathianni zîng takah, khua a la thim laiin, Magdala mi Mari chu thlânah chuan a va kal a, lung chu thlân ata lâk sawnin a hmu a. Chutichuan, Simon Petera leh zirtîr dang Isuan a hmangaih hnênah chuan a va tlân a, an hnênah, “Thlân ata Lalpa chu an la chhuak a, khawiah nge an dah kan hre si lo,” a ti a. Tichuan, Petera leh zirtîr dang chu thlân lam panin an chhuak ta a. An pahnih chuan an tlân dûn a; zirtîr dang chu Petera aiin a tlân chak zâwk a, thlân chu a thleng hmasa a. Kûnin a han bih a, puan zai sîn awmte chu a hmu a, a chhûngah erawh chuan a lût lo. Simon Petera pawh a hnungah a lo thleng ve a, thlân chhûngah chuan a lût ta a; puan zai sîn awmte chu a hmu a, a lu tuamna puan pawh chu puan zai sîn zînga awm lovin, inziala a hranga awmin a hmu a. Zirtîr dang, thlân thleng hmasa pawh chu a lût ve ta a, a hmu a, a ring a. Mitthi zîng ata a tholeh tûr a ni tih Lehkha Thu kha an la hrethiam rih si lo va. Tichuan, zirtîrte chu an haw leh ta a. Mari chu thlân pâwnah ṭap chungin a ding a. Ṭap chung chuan a kûn a, thlân chhûng chu a han bih a. Isua ruang awmna a lu leh a ke bulah vântîrhkoh pahnih, a vâra inthuam, ṭhu a hmu a. Anni chuan a hnênah, “Hmeichhia, engati nge i ṭah?” an ti a. Ani chuan, “Ka Lalpa an la bo va, an dahna ka hre lo atin a ni,” a ti a. Chu chu a sawi zawh chuan a han lehhawi a, Isua ding a hmu a, Isua a ni tih erawh chu a hre lo. Isuan a hnênah, “Hmeichhia, engati nge i ṭah? Tu nge i zawn?” a ti a. Ani chuan huan enkawltu emaw a ti a, a hnênah, “Ka pu, amah i la bo a nih chuan i dahna mi hrilh ta che; tichuan, ka la dâwn nia,” a ti a. Isuan a hnênah, “Mari!” a ti a. Ani chuan a lam a han hawi a, Hebrai ṭawngin, “Rabboni,” a ti a (chu chu, ‘Zirtîrtu,’ tihna a ni). Isuan a hnênah, “Mi vuan tawh suh, Pa hnênah pawh ka la chhoh rih loh hi; amaherawhchu, ka unaute hnênah va kal la, an hnênah, ‘Ka Pa, in Pa, ka Pathian, in Pathian hnênah ka chho dâwn,’ a ti e, ti ang che,” a ti a. Mari, Magdala mi chu, a kal ta a, zirtîrte hnênah, “Lalpa chu ka hmu ta,” a va ti a, chûng thu chu a hnênah a sawi tih a hrilh bawk a. Chumi ni, Pathianni tlaiah chuan, Juda-te hlauh avângin zirtîrte awmna kawngkhârte chu an khâr tawh a, Isua a lo kal a, an zîngah a lo ding a, an hnênah, “In chungah thlamuanna awm rawh se,” a ti a. Chumi a sawi zawh chuan a kut leh a nâk a entîr a, Lalpa chu an hmuh chuan zirtîrte chu an lâwm êm êm a. An hnênah, “In chungah thlamuanna awm rawh se,” a ti leh a. “Pain kei mi tîr ang bawkin kei pawhin ka tirh che u hi,” a ti a. Chu chu a sawi zawhin an chungah a thaw a, an hnênah, “Thlarau Thianghlim nei rawh u. Tu sual pawh in ngaihdam chu ngaihdam a ni ang a, in ngaihdam loh chu ngaihdam loh a ni ang,” a ti a. Sâwmpahnihte zînga pakhat, Thoma, Phîra an tih chu, Isua lo kal laiin an zîngah a awm ve lo va. Zirtîr dangte chuan a hnênah, “Lalpa chu kan hmu ta asin,” an ti a. Ani chuan, “A kuta thîr khenna hmuamhma ka hmuha, thîr khenna hmuamhmaahte ka kut zunga ka khawiha, a nâk ka zen ngei loh chuan ka awih lo vang,” a ti a. Ni riat hnuah a zirtîrte chu in chhûngah an awm khâwm leh a, Thoma pawh an zîngah a awm ve a. Kawngkhârte chu kalh a ni a; mahse, Isua a lo kal a, an zîngah a lo ding a, “In chungah thlamuanna awm rawh se,” a ti a. Tin, Thoma hnênah chuan, “I kut zungṭang chuan han khawih la, ka kutte en rawh, han ban la, ka nâk zen rawh; ring lovin awm suh la, ring mai rawh,” a ti a. Thoman a chhâng a, “Ka Lalpa leh ka Pathian,” a ti a. Isuan a hnênah, “Mi hmuh avângin mi ring a ni maw? Hmu lova ringte chu an nihlawh e,” a ti a. Isuan zirtîrte hmaah chuan chhinchhiahna thil mak dang tam tak a ti a, chûng chu he lehkhabuah hian ziak a ni lo. Isua chu Krista, Pathian Fapa a ni tih in rinna tûr leh, in rin avâng chuan ama hminga nun in neih nân hêng hi ziak a ni. Chumi hnu chuan Isua chu Tiberia dîlah a zirtîrte hnênah a inlâr leh a; hetiang hian a inlâr. Simon Petera te, Thoma - Phîra an tih te, Galili rama Kana khuaa mi Nathanaela te, Zebedaia fapa pahnih te, a zirtîr zînga pahnih dang te an awm khâwm a. Simon Petera chuan an hnênah, “Sangha man tûrin ka kal dâwn e,” a ti a. Anni chuan “Keini pawh i hnênah kan kal ve ang,” an ti a. An thawk chhuak a, lawngah an chuang ta a; mahse, chumi zân chuan eng mah an man lo. Khua a lo vâr chuan Isua chu ṭiauphovah a lo ding a; nimahsela, zirtîrte chuan Isua a ni tih an hre lo. Isuan an hnênah, “Naute u, in man em?” a ti a. Anni chuan “Man hauh lo mai,” tiin an chhâng a. Ani chuan “Lawng sîr ding lamah khân lên dêng ula, in man ang,” a ti a. Tichuan, an han dêng a, sangha a tam avângin an hnûk chhuak zo ta lo va. Zirtîr, Isuan a hmangaiha khân Petera hnênah, “Lalpa a nih saw!” a ti a. Simon Peteran Lalpa a ni tih a hriat chuan kawr a inbel a, saruakin a lo awm si a, dîlah chuan a zuang thla ta a. Zirtîr dangte erawh chuan lawng têin, lên, sanghaa khat hnûk chung chuan an rawn pan a, khawmual aṭanga hla lo tê, tawng zahnih emaw lekah an awm a ni si a. Khawmuala an chhuah chuan, meihawla mei chhêm, a chunga sangha awm leh chhang chu an hmu a. Tin, Isuan, “Tûna in sangha man kha a ṭhen han la teh u,” a ti a. Simon Petera chu lawngah a va chuang a, lên chu sangha lian pui puia khatin khawmualah a hnûk chhuak a, za leh sawmnga leh pathum a ni; chuti zo zai chu awm mah sela lên chu a ṭet si lo. Isuan an hnênah, “Tûkṭhuan lo ei rawh u,” a ti a. Zirtîrte zînga tu mahin, “Tu nge i nih?” tiin an zâwt ngam lo. Lalpa a ni tih an hre si a. Isua chu a kal a, chhang a la a, an hnênah a pe a, sangha pawh chutiang bawkin a ti a. Chu chu Isua mitthi zîng ata a thawhleh hnua a inlâr vawi thumna a ni. Tûkṭhuan an ei kham chuan, Isuan Simon Petera hnênah, “Simon, Johana fapa, hêngte ai hian nangin mi hmangaih zâwk em?” a ti a. Ani chuan, “Aw, Lalpa, ka ngaina che tih i hria e,” a ti a. Isuan a hnênah, “Ka berâm note châwm rawh,” a ti a. A vawi hnihnaah chuan Isuan a hnênah, “Simon, Johana fapa, nangin mi hmangaih em?” a ti leh a. Ani chuan, “Aw, Lalpa, ka ngaina che tih i hria e,” a ti a. Isuan, “Ka berâmte enkawl rawh,” a ti a. A vawi thumnaah chuan a hnênah, “Simon, Johana fapa, nangin mi ngaina em?” a ti a. A vawi thumnaah, “Mi ngaina em?” a hnêna a tih avâng chuan Petera a lungngai a, “Lalpa, engkim i hria a, ka ngaina che tih i hria e,” a ti a. Isuan a hnênah, “Ka berâmte châwm rawh. “Thu dik tak ka hrilh a che, i naupan laiin incheiin i kâwng i hrêng a, i duhna apiangah i lêng ṭhîn a, i lo upat hnuah erawh chuan i kutte i phar ang a, mi dangin i kâwng an hrênsak ang chia, i duh lohna lamah an hruai ang che,” a ti a. Engtianga thiin nge Pathian a la chawimawi ang tih hriat nân chûng thu chu a sawi a ni; chu chu a sawi zawhin a hnênah, “Mi zui rawh,” a ti a. Petera chu a han lehhawi a, zirtîr, Isuan a hmangaih, zanriah ei laia a âwm nghênga thle pheia, “Lalpa, a mantîrtu tûr che chu tu nge ni?” titu khân rawn zuiin a hmu a. Ani chu Peteran a han hmuh chuan, Isua hnênah, “Lalpa, ani saw engtin nge ni dâwn?” a ti a. Isuan a hnênah, “Ka lo kal leh thlenga awm reng tûrin duh pawh ni ila, eng atân nge i tih? Mi zui mai rawh,” a ti a. Chu zirtîr chu thi lo tûr angin unaute zîngah chuan thu a thang vêl ta a. Nimahsela, Isuan a thi lo vang tih a hnênah a sawi si lo, ‘Ka lo kal leh thlenga awm reng tûrin duh pawh ni ila, eng atân nge i tih?’ a ti mai zâwk a ni. Chu zirtîr chu hêng thu hretu leh ziaktu hi a ni a, a thu hriattîr hi a dik a ni tih kan hria. Thil dang tam tak Isuan a tihte a la awm a, chûng chu ziak chhuah vek ni dâwn sela, lehkhabu ziak tûr chu khawvêlah pawh hian lengin ka ring lo. Theofil, ka lehkha hmasaah khân Isua rawngbâwl ṭan aṭanga vâna lâk chhoh a nih thlenga a thil tih leh a thu zirtîr zawng zawng chanchin ka ziak tawh a; a tirhkoh thlante chu Thlarau Thianghlim hmangin thu a chah a. A thih hnuin a nung leh tih hriat nân hai rual lohvin vawi tam tak an hnênah a inentîr a, ni sawmli chhûng Pathian ram thu sawiin a inlâr ṭhîn. An zînga a awm laiin, “Jerusalem khua chhuahsan suh u, Pa thutiam ka hrilh che u kha lo nghâk rawh u. Johana chuan tuiin a baptis a, nangni erawh chu ni rei lo tê-ah Thlarau Thianghlima baptis in ni ang,” tiin a hrilh a. An lo kal khâwm chuan, “Lalpa, tûnah em ni Israel-te ram i tundinsak leh dâwn?” tiin an zâwt a. Ani chuan, “Pain a hun leh ni, ama thu thu-a awm tûra a dah chu nangni lo hriat chi a ni lo ve. Nimahsela, Thlarau Thianghlim in chunga a lo thlen hunah thiltihtheihna in la nei ang a; tichuan, Jerusalem-ah te, Judai leh Samari ram pumah te, kâwlkil thlengin ka thuhretute in ni tûr a ni,” a ti a. Chûng thu chu a sawi zawh chuan, an en reng laiin vâna hruai chhoh a ni a, chhûmin an hmuh phâk lohvah a la bo ta a. Chutia vâna a chho an thlîr reng lai chuan mi pahnih puan vâr sin an kiangah an lo ding a. “Galili mite u, engati nge vân lam ena in din reng le? He Isua in hnên ata vâna lâk chhoh hi, vâna a chho in hmuh ang tak hian a lo kal leh dâwn a ni,” an ti a. Tichuan, Oliv tlâng an tih aṭang chuan Jerusalem-ah an kîr leh ta a; chu tlâng chu Jerusalem aṭanga sabat ni kal tâwk vêl a ni. Khua an luh chuan an thlenna pindan chungnungah an chho va; chûngte chu Petera te, Johana te, Jakoba te, Andria te, Filipa te, Thoma te, Bartholomaia te, Mathaia te, Alfaia fapa Jakoba te, zealot pâwla mi Simona te leh Jakoba fapa Juda te an ni. An za chuan hmeichhiate leh Isua nu Mari leh Isua unaute nên lungrual takin an ṭawngṭai ho ṭhîn a. Ni khat chu, unaute awm khâwmnaah chuan Petera a ding a, an vai chuan za leh sawmhnih vêl an ni. “Unaute u, Thlarau Thianghlimin Isua mantute hruaitu Juda thu Davida kâa a lo sawi lâwk, Lehkha Thu kha a lo thleng tûr rêng a ni. Ani chu kan zîngah a tel ve ṭhîn a, kan rawngbâwlpui a ni ṭhîn. Ani chuan thil sual tiha a pawisa hlawhin hmun pakhat a lei a, a tla hlum a, a rîl chhuak vek khawpin a pum a ṭet a. Chu thu chu Jerusalem-a awm zawng zawngin an hria a, chu hmun chu anmahni ṭawngin, ‘Akeldama,’ an ti a, chu chu ‘Thisen hmun,’ tihna a ni. Fakna hla bu-ah hetiang hian ziak a ni: ‘A in leh lo chu ram sela, A chhûngah tu mah chêng suh se,’ tih leh, ‘A hotu nihna chu mi dangin chang rawh se,’ tih hi. Chutichuan, kan Lalpa Isua hova kan chêttlat laia kan zînga tel ve ṭhîn, Baptistu Johana hun aṭanga vâna min chhohsan ni thlenga tel ṭhîn mi pakhat, a thawhlehna min hriatpuitu atân kan thlang chhuak tûr a ni,” a ti a. Tichuan, mi pahnih, Josefa, Barsaba an vuah, Justa an tih bawk leh Mathia an ruat a. An pahniha chungah chuan ai an en a, an ai en chu Mathia chungah a tla a, Mathia chu tirhkoh Sâwmpakhatte zîngah chuan chhiar tel a ni ta a. Pentikos ni a lo thlen chuan an za-in an awm khâwmna inah chuan an inkhâwm a. Thâwklehkhatah vân ata thlipui thâwm ang ri a lo thleng ta phut a, an ṭhutna inah chuan a ri ta hum hum a. Meialh, lei ang tak insem darh an hmu a, an chungah a fu ta ṭheuh va. An za-in Thlarau Thianghlimin an khat ta vek a, Thlarauvin a ṭawngtîr angin ṭawng dangtein an ṭawng ta hlawm a. Vân hnuaia hnam hrang hrang zînga chêng, Pathian ngaihsak Juda-te chu Jerusalemah an châm a. Chu thâwm chu hriain mi tam tak an lo kal khâwm a, an thu sawi chu mi tinin mahni ṭawng ang ṭheuhvin an hre thei a. Mak an ti êm êm a, “En teh u, hêng thu sawitu zawng zawng hi Galili mi an ni lâwm ni? Engtin nge kan zaa mahni ṭawng ang maia an thu sawi kan hriat theih? Ṭhenkhat Parthai mi te, Medai mi te, Elamitai mite kan ni a; ṭhenkhat Mesapotamia rama awm te, Judai rama awm te, Kapadokia ram te, Ponto leh Asia ram te, Frugia leh Pamfulia ram te, Aigupta leh Libua rama Kurini khaw chhehvêla awm te kan ni a; ṭhenkhat Rom khua aṭanga lo kal, Juda-te leh Juda saphun te kan ni a; ṭhenkhat Kret thliarkâra mi leh Arab rama mi kan ni si a; nimahsela, Pathian thiltih ropuite an sawi mahni ṭawng ang ṭheuhva kan hriat hi!” an ti a. An vaiin a ngaihna hre lovin mak an ti a, “Hei hi eng nge ni ta ngai!” an ti a. Ṭhenkhat erawh chuan an nuihsan a, “Eng uain emaw an rui a nih hi,” an ti a. Petera chu Sâwmpakhatte nên an ding za a, mipui hnênah chuan ring takin thu a sawi a, “Nangni Juda unaute leh Jerusalem-a awm zawng zawngte u, ka thu hi ngun takin ngaithla teh u. Hêngho hi in ngaih angin an rui lo ve, zîng dâr kua chauh a la nih hi. He thil hi zâwlnei Joela sawi kha a ni zâwk: Pathianin, ‘Ni hnuhnûngahte chuan hei hi ka ti dâwn a ni: Mi zawng zawng chungah ka Thlarau ka leih ang a, In fanu in fapaten ka thu an hril ang In tlangvâlten inlârnate an hmu ang a, In upaten mumangahte an mang ang. Chûng ni-ah te chuan ka rawngbâwltute a hmei a pain, an chungah Ka thlarau ka leih ang a, ka thu an hril ang. Chung lam vânah thil mak te, Hnuai lam leiah chhinchhiahna te ka hmuhtîr ang, Thisen te, mei te, meikhu ngun ngun te nên; Ni tihthim a ni ang a, thla thisen angin a sen khuih bawk ang, Lalpa ni ropui leh pawimawh tak a lo thlen hmain. Tichuan, Lalpa hming lam apiang chu chhandam an ni ang,’ a ti, a tih kha. “Nangni Israel mite u, ngaithla teh u; in hriat ṭheuh angin Pathianin Nazaret Isua hmangin thil ropui tak tak te, thil mak te leh chhinchhiahna te in zîngah ngei tiin a mi ruat a nihzia chiang takin a tihlan kha. Ani chu Pathian tum lâwk leh rêl lâwk angin in hnênah pêk a ni a. Nangnin hnam dang mite hmangin krawsah in khêngbet a, in tihlum a. “Nimahsela, ani chu thihna chelh hlen rual a nih loh avângin Pathian chuan thihna phuarnate chu a phelh a, a kaitho ta a. Davida pawhin a chungchâng hetianga a lo sawi kha: ‘Ka hmaah Lalpa ka hmu fo va, ka bulah a awm a, eng mahin mi tinghîng thei lo. Chuvângin, ka thinlung a hlim a, ka lei pawh a lâwm a, ka tisa pawh hian a beisei tlat a ni. Ka thlarau mitthi khuaah i hnutchhiah lo va, I mi thianghlim ruang a ṭawih i phal hek lo. Nangin nunna kawng mi kawhhmuh a, I hmêl hmuin lâwmin ka khat ang,’ tiin. “Unaute u, thlahtu Davida thu chu huai takin ka hrilh a che u, ani chu a thi tawh a, an phûm a, a thlân pawh kan bul lawkah a la awm reng alâwm. Ani chu zâwlnei a ni a, a thlahte zînga tu emaw a lalṭhutthlêng luah tûrin Pathianin a hnênah a tiam tlat tih a hria a; ‘mitthi khuaa hnutchhiah ni lovin, a ruang pawh a ṭawih loh tûr thu’ a sawi hi, Krista thawhleh tûr thu a sawi a lo ni. A ni, chu Isua chu Pathianin a kaitho leh ta a, chu thu hretute chu kan za hian kan ni. Pathian ding lamah chawimawi a ni ta a, Pa hnên ata Thlarau Thianghlim tiam chu a dawng a, in hmuh leh in hriat hi a thilpêk a rawn leih chu a nih hi. Davida chu vânah a lâwn chho lo ve; amah ngeiin, ‘Lalpa chuan ka Lalpa hnênah, ka ding lamah lo ṭhu rawh, I hmêlmate i ke nghahchhanah Ka han dah ang e,’ a ti e, a ti zâwk a nih kha. “Chutichuan, Isua in khenbeh kha, Pathianin Lalpaah leh Kristaah a siam ta ngei tih Israel mi tinin hre ngei rawh se,” a ti a. An thu hriat chuan an thinlung a khawih a, Petera leh tirhkoh dangte hnênah chuan, “Unaute u, eng nge kan tih tâk ang?” an ti a. Petera chuan, “Sim ula, in sualte ngaihdam nân Isua Krista hmingin baptisma chang ṭheuh rawh u; tichuan, he thil pêk, thlarau Thianghlim hi in dawng ang. A tiam hi in tân a ni a, in fate tân pawh a ni a, ram hla taka mi zawng zawng tân leh, Lalpa kan Pathianin a koh apiangte tân a ni e,” a ti a. Thu dang tam tak sawiin a sâwm a, “Tûnlai mi sual takte lakah hian intihim rawh u,” tiin a fuih nghâl bawk a. A thu zâwm apiangin baptisma an chang a; chumi ni chuan mi sângthum laiin an belh ta a. Tirhkohte thu zirtîr ngaithlaa inpâwl khâwmin, chhang phel leh ṭawngṭaiin an awm ho ṭhîn a. Mi tinin an zah ta hle a, tirhkohte chuan thil mak leh chhinchhiahna tam tak an ti a. Ringtu zawng zawngte chu an awm khâwmna inah an awm ho ṭhîn a, engkim an inṭâwm vek a. A neite chuan an in leh lo te leh an thil neih te an hralh a, an châkkhai daih tâwk ṭheuhvin an zaa hnênah chuan an sem ṭhîn. Ni tin Tempulah lungrual takin an inkhâwm ṭhîn a, in hrang hrangahte chhang an phel a, hlim tak leh inphal takin chaw an ei ho ṭhîn. Pathian an fak a, mi zawng zawng duhsak an hlawh a, Lalpa chuan a chhandam apiangte chu ni tin an zîngah a tel belhtîr zêl a. Chawhnu dâr thum, ṭawngṭai hun pangngaiah chuan Petera leh Johana chu Tempulah an chho va. Pa pakhat, a pian tirh ata kebai hi an rawn zâwn a. Tempula kalte hnêna kut lo dawh tûrin kawngkhâr, ‘Mawi,’ an tih bulah ni tin an dah ṭhîn a. Chu mi chuan Petera leh Johana Tempula lût tûr chu a hmu a, kut a lo dawh a. Anni chuan an en reng a, Petera chuan a hnênah, “Min han en teh,” a ti a. Ani chuan eng emaw dawn beiseiin a han en a. Petera chuan, “Tangka leh rangkachak eng mah ka nei lo; nimahsela, ka neih chhun ka pe ang che, Nazaret Isua Krista hmingin kein kal tawh rawh,” a ti a. A kut ding lam a vuan a, a kai tho va, a ke leh a kheimit te chu a lo chak ta nghâl a. Tichuan, ani chu a zuang tho va, a ding a, kein a kal ta a. Kea kala zuangin Pathian fak chung zêlin Tempulah chuan an rualin a lût ve ta a. Mipui zawng zawngin kea a kal leh Pathian a fak an hmuh chuan, Tempul kawngkhâr, Mawi bula kutdawh ṭhu ṭhîn kha a ni tih an hria a, a chunga thil thleng chu mak an ti êm êm a, a ngaihna an hre lo va. Tin, ani chuan Petera leh Johana a la vawn reng laiin mipui chu Solomona hulhliap an tihah chuan an lo tlân khâwm a, mak an ti êm êm a. Peteran chu chu a hmuhin mipui hnênah chuan, “Nangni Israel mite u, engati nge hei hi mak in tih? He mi hi keimahni theihna emaw, kan ṭhat bîk vâng emawa kan kaltîr ang êm chuan engati nge min en reng? Abrahama Pathian, Isaka Pathian, Jakoba Pathian, min thlahtute Pathian chuan a chhiahhlawh Isua a chawimawi ta a nih hi. Ani chu in mantîr a, rorêltu Pilatan chhuah a tum pawhin in hnial tlat a nih kha. Mi thianghlim leh fel tak kha in duh lo va, tual that kha chhuahsak che u in ngên ta zâwk a. Nunna petu chu in thahtîr a; nimahsela, Pathianin ani chu mitthi zîng ata a kaitho leh ta a, chumi thuhretute chu kan ni. “Isua hminga thiltihtheihna leh chu hming rinna chuan in hmuh leh in hriat ṭhina hi a tidam ta a; amah rinna avâng chuan he mi hi in zaa in hmuh ang hian a dam ta viah a. Tûnah hian unaute u, nangni leh in hotute pawhin in thiltih kha in hre tak tak lo a ni tih ka hria e. Krista chuan a tuar tûr a ni tih Pathianin a zâwlnei zawng zawng hmanga a lo sawi lâwk kha hetiang hi a thlentîr dân a lo ni. Chuvângin, in sualte sim ula, hawi kîr leh rawh u. Chutichuan, Lalpa hnên ata harhtharna hun a lo thleng ang a, in tâna a ruat Mesia, Isua chu, a rawn tîr ang. Amaherawhchu, engkim siam thar hun a thlen hma chuan vânah ani chu a awm rih tûr a ni; siamtharna thu chu Pathianin a zâwlnei thianghlimte kâa hmasâng ata a sawi daih tawh kha. “Mosia pawh khân, ‘Lalpa in Pathianin keimah ang hi in unaute zînga mi, zâwlnei pakhat a dinsak ang che u; eng pawh in hnêna a sawi apiang in zâwm tûr a ni. Chu zâwlnei thu ngaithla lo apiang chu Pathian mite zîng ata tihboral zêl tûr a ni,’ a tih kha. Samuela leh a hnua zâwlnei zawng zawngte khân tûnlai chanchin hi a ni an lo hrilh lâwk ni. “Zâwlneite thu leh in thlahtute hnêna thuthlung rochungtute in ni asin. Abrahama hnênah chuan, ‘I thlahah chuan khawvêla hnam tinin malsâwmna an dawng ang,’ a tih kha. Pathianin a chhiahhlawh chu a thlang a, in sualte hawisantîr ṭheuh tûr che u leh malsâwm tûr che uin in hnênah a rawn tîr hmasa a nih hi,” a ti a. Petera leh Johanan mipuite hnêna thu an sawi lai chuan, puithiam chu Tempul pulis hotupa nên, Sadukai-hote nên an hnênah an lo kal a. Isua thawhlehna thu sawiin mitthi thawhlehna thu mipui an zirtîr avâng chuan an lungni lo êm êm a. Tichuan, an man a, tlai lam a nih avângin a tûk thlengin tân inah an khung ta a. Nimahsela, an thu ngaithlatute zînga tam tak chuan an ring ve ta a, an za chuan sângnga lai an tling a. A tûkah chuan Juda hotu te, upa te, Dân zirtîrtu te Jerusalemah an inkhâwm a; chûng chu Puithiam lalber Ana te, Kaiafa te, Johana te, Aleksandara te, puithiam lal thlahho te nên an ni. Petera leh Johana chu a laiah an dintîr a; “Engtia tidam thei nge in niha, tu hmingin nge he thil hi in tih?” tiin an chhâl a. Tichuan, Petera chu Thlarau Thianghlimin a khat a, an hnênah, “Mipui hotute leh upate u, vawiinah hian kebai tihdam thu-ah engtia dam nge a nih min zâwt a ni bawk a, nangni zawng zawng leh Israel mi zawng zawngin hre teh u; Nazaret Isua Krista, in khenbeh, Pathianin mitthi zîng ata a kaihthawh leh tâka hming khân he mi hi tihdam a ni a; tûnah hetah in hmaah dam varin a ding ta a nih hi. Ani hi alâwm, nangni in satuten in duh loh lung kha, a kil lung pawimawh ber a lo ni ta si a. Tu dang hnênah mah chhandamna a awm lo, vân hnuaia mihring hming sak zîngah min chhandam thei hming dang rêng rêng a awm lo,” a ti a. Petera leh Johana huaizia chu an hmuhin, lehkha thiam lo leh mi mâwl mai an nih an hriatin, mak an ti hle a; Isua hnêna awm ṭhîn an ni tih an hre ta a. Tin, an mi tihdam, an kianga ding chu an enin eng mah sawisêl tûr a awm si lo. Tichuan, Sanhedrin ata an chhuahtîr hnu chuan an inrâwn a, “Hêng mite hi engtin nge kan tih tâk ang? An thil mak tih hi Jerusalem-a awm zawng zawngin an hriat tâk hi; keini pawhin kan hnial thei si lo. Amaherawhchu, miin an hriat darh lehzual loh nân tu hnênah mah he hminga thu sawi leh tawh lo tûrin i vau ang u,” an ti a. Tichuan, anni chu an ko leh a, Isua hminga thu sawi lo tûr leh zirtîr tawh tawp lo tûrin thu an pe a. Nimahsela, Petera leh Johana chuan an hnênah, “Pathian mit hmuhah Pathian thu zawm aiin mihring thu zawm chu a dik zâwk dâwn emaw chu, ngaihtuah teh u. Keini zawng thil kan hmuh leh kan hriat hi sawi lovin kan awm thei lo,” an ti a. Tin, anni chuan nasa takin an vau va, an chhuah ta a. An thiltih avânga mi zawng zawngin Pathian an chawimawi ṭheuh si avângin hremna remchâng an hmu lo va ni. Mak taka an tihdam chu kum sawmli aia upa zâwk mah a ni. Petera te chu an chhuak a, an ṭhiante hnênah an va kal a, puithiam lalte leh upaten an hnêna an sawi chu an hrilh vek a. An thu ngaithlatute chuan a rualin ring takin Pathian an au va, “Aw Lalber, nang, vân te, lei te, tuifinriat te leh a chhûnga thil awm zawng zawng siamtu, Thlarau Thianghlimin min thlahtu i chhiahhlawh Davida kâin hêng thu hi i sawi a: ‘Jentail-te engati nge an thinur? Mipuiin engati nge thil sâwt lo an rêl? Lei lalten an er a, hotute pawh a chungah an inrâwn khâwm a, Lalpa leh a hriak thiha chungah chuan,’ tiin. “Chutiang tak chuan he khuaah hian i chhiahhlawh thianghlim Isua, i hriak thiha chungah chuan, Heroda leh Pontia Pilata te chu Jentail-te leh Juda-te nên an inthurual ta ngei a. Nangin i ruat lâwk ang thlentîr i tum chu tihlawhtling tûrin an pung khâwm a lo ni. Lalpa, ngai teh, tûna an mi vau dân hi, i thu hril ngam tûrin i bawihte hi huaisenna pe ang che. Mite tidam tûrin i kut phar la, i chhiahhlawh thianghlim Isua hmingin chhinchhiahna te leh thil makte tihtîr bawk ang che,” an ti a. Chutia an ṭawngṭai zawh chuan an awmkhâwmna hmun chu a lo nghîng a, an za-in Thlarau Thianghlimin an khat a, huai takin Pathian thu an hril ta a. Ringtuho chu thinlung hmun khat leh rilru hmun khat puin an awm a, an zînga tu mahin an thil neihte chu, ‘ka ta bîk a ni,’ an ti lo, engkim an inṭâwm zâwk a. Tirhkohte chuan thiltihtheihna nasa tak neiin Lalpa Isua thawhlehna thu an hril ṭhîn a, an za-in Pathian duhsak an hlawh a. An zînga tu mah tlachham an awm lo. In emaw, ram emaw nei apiangin an hralh a, a man chu an rawn keng a. Tirhkohte hnênah an hlân a, an châkkhai daih ṭheuhvin an insem ṭhîn. Tin, Josefa, tirhkohten Barnaba an tih (chu chu ‘Thlamuanna fa,’ tihna a ni), Levia chi, Kupra thliarkâra mi pawh chuan, ram a nei a, a hralh a, a man chu rawn kengin tirhkohte hnênah a hlân a. Mi dang pakhat, a hming Anania a awm a, a nupui chu Sapfiri a ni. Ram a hralh a, a man chu a nupui hriatpuiin anmahni tân an dah hrang a, a ṭhen chauh rawn kengin tirhkohte hnênah a rawn hlân a. Nimahsela, Peteran, “Anani, Thlarau Thianghlim bum tûr leh ram man a ṭhen zêp tûrin engati nge Setanan i thinlung a luah le? I hralh hma zawng khân i ta a ni a, i hralh hnu pawhin a man chu i thu thu-a i tih tûr a ni lâwm ni? Engati nge hetiang thil ti tûra rilru i put le? Mihring i bum a ni lo va, Pathian i bum a ni zâwk e,” a ti a. Ananian chûng thu chu a hriat chuan a tlu a, a thi ta a. A hria apiangin an hlau ta êm êm a. Tlangvâlho an lo thawk a, an tuam a, an zâwn chhuak a, an phûm ta a. Dârkâr thum lai hnuah chuan a nupui chu thil awmzia hre lovin a lo lût ve a. Petera chuan a hnênah, “Mi hrilh teh, ram chu heti zât chiah hian maw in hralh?” a ti a. Ani chuan, “Ni e, heti zât chiah hian,” a ti a. Petera chuan, “Engati nge Lalpa Thlarau fiah tuma in inthurual ni? Ngai rawh, i pasal phûmtute pawh kawngka bul an lo thlen leh tawh saw; nang pawh an zâwn chhuak ang che,” a ti a. Tichuan, thâwklehkhatah a ke bulah chuan a tlu a, a thi ve ta mai a. Tlangvâlte chu an lo lût a, ani chu thi-in an rawn hmu a, an zâwn chhuak a, a pasal kiangah an phûm ve ta a. Kohhran mi zawng zawngte leh chûng thu hria apiangte chuan an hlau ta êm êm a. Tirhkohte chuan mipui zîngah chhinchhiahna leh thil mak tam tak an ti zêl a. Anniho chu an za-in lungrual takin Solomona hulhliapah an inkhâwm ṭhîn a. An zîngah chuan tu mah mi dang an tel ve ngam lo nâ a, mite chuan an ngaisâng êm êm a. Lalpa ringtute erawh chu, a hmei a pa, an zînga tel an pung tial tial a. Chutichuan, dam lote pawh kawtthlêrahte an zâwn chhuak a, khumah te, mutphahah te an muttîr a. Petera hlim chuan a kal vêl pahin an zînga ṭhenkhat tal a hliah theih nân an ti a ni. Jerusalem kiang vêl aṭang pawhin mi an lo kal a, damlo te, ramhuai bawlhhlawh man te an rawn hruai a, chûngho zawng zawng pawh chu an lo dam ta zêl a. Tin, Puithiam lalber leh a hote zawng zawng, Sadukai pâwla mite chu an lo thawk a; tirhkohte chu an îtsîk êm êm a, an man a, vântlâng tân inah an khung a. Nimahsela, zânah Lalpa tirh Vântirhkoh pakhatin tân in kawngkhâr chu a rawn hawng a, a hruai chhuak a; an hnênah, “Kal ta ula, Tempulah va ding ula, mipuite hnênah hêng nunna thu leh a awmzia zawng zawng hi va sawi tawh u,” a ti a. Chu thu chu an hriatin an kal a, zîngah chuan Tempulah an lût a, mi an zirtîr ta a. Puithiam lalber leh a hote chuan Israel upate, Sanhedrin mi zawng zawng an khâwm a, tirhkohte chu va hruai tûrin tân inah mi an tîr a. An tirhte chu an va kal a; mahse, tân inah chuan anni chu an hmu si lo. An lo kîr leh a, “Tân in chu him taka inkhârin, a vêngtute pawh kawngkhâr bula dingin kan hmu a; nimahsela, kan han hawng a, a chhûngah tu mah kan hmu si lo,” tiin an rawn sawi a. Tempul pulis hotu leh puithiam lalten an hriat chuan, “Engtizia nge ni ta le?” tiin an buai hle a. Chutih lai chuan mi pakhat a lo kal a, an hnênah, “Ngai teh u, tân ina mi in khungte khân Tempulah sâwn mi an zirtîr ka ti,” a rawn ti a. Tichuan, Tempul pulis hotu chu a hote nên an va kal a, tirhkohte chu tilui lovin an rawn hruai a, an man luih mai chuan mipuiin lungin an dêng ang tih an hlau a ni. An rawn hruai thlen chuan Sanhedrin hmaah chuan an dintîr a. Puithiam lalber chuan an hnênah, “He hming hian zirtîr tawh hauh lo tûrin thu kan pe che u a; ngai teh u, in thu zirtîrin Jerusalem in tihkhah vek tawh hi; chu pa thisen mawh chu kan chunga bel in tum a nih hi le!” tiin a chhâl a. Petera leh tirhkohte erawh chuan, “Mihring thu aiin Pathian thu kan zâwm zâwk tûr a ni. Min thlahtute Pathian chuan, thinga khai kânga in tihhlum tâk Isua kha a kaitho leh ta a. Israel-te sual simtîra ngaihdam an nih theih nân Amah ngei kha Pathianin Lal leh Chhandamtu atân a ding lamah a chawimawi ta a. A thu zâwmtute hnêna Pathian pêk Thlarau Thianghlim leh keini hi chûng thuhretutechu kan ni,” tiin an chhâng a. Chûng an thu hriat chuan an thin a khei ta riau va, tirhkohte chu tihhlum an tum ta a. Nimahsela, Farisai pakhat, a hming Gamaliela, Dân zirtîrtu, mi zawng zawng ngaihsân tak chu Sanhedrin-ah chuan a ding a, tirhkohte chu chhuahtîr rih tûrin vêngtute chu a hrilh a. Rorêltute hnênah chuan, “Israel mite u, he mite chunga in thil tih tumah hian fîmkhur rawh u. Hmân deuh tawhah khân Theuda chu mi ropui tak nia inchhâlin a lo kal a, mi zali vêl laiin an zui a. Ani chu an that a, amah zuitute zawng zawng chu an darh vek a, eng mah an ni ta lo va. Chumi hnu chuan, chhiarpui lai khân, Galili rama mi Juda kha a lo kal leh a, ani pawhin mipui a hîp leh hle a. Nimahsela, ani pawh an that a, amah zuitu zawng zawng pawh an darh leh ta vek bawk a. Chuvângin, tûnah hian ka ti a che u, he mite hi khawih suh ula, awmtîr mai mai rawh u. Hêng an thiltih tum leh an thiltihte hi mihring tihchhuah mai a nih chuan a tâwp leh mai ang. Pathian tihchhuah a nih erawh chuan in tiboral thei lo vang; Pathian dodâl in lo ni hlauh dah ang e,” a ti a. Tichuan, a thu chu an zâwm a, tirhkohte chu an ko va, an vua a, Isua hminga thu sawi tawh hauh lo tûrin thu an pe a, an chhuah ta a. Chutichuan, chu Hming avânga mualpho tuar tlâka ruat an nih avângin, lâwm êm êm chungin Sanhedrin ata chu an chhuak a. Ni tin, Tempulah leh in lamah Isua kha Mesia chu a nih thu hril leh zirtîr an bâng chuang lo. Chûng laia zirtîrte an pun zêl lai chuan an ni tin thil semah an hmeithaite an ngaihthah bîk tiin Grik ṭawng hmang Juda-te chu Hebrai-hote chungah an phunnawi a. Sâwmpahnihte chuan zirtîrhote chu an ko khâwm vek a, “Pathian thu hril thlahthlama ni tin khawsakna lam kan buaipui hi a dik lo vang. Chutichuan, unaute u, in zînga mi hming ṭha, Thlarau Thianghlima khat, mi pasarih thlang ula, an hnênah hêng hna hi kan hlân ang e; keini erawh chu ṭawngṭai leh thu rawngbâwlah kan inpumpêk tlat ang e,” an ti a. Chu thu chuan mipui zawng zawng chu a tilâwm a; tichuan, Stefana, ringtu nghet tak leh Thlarau Thianghlima khat leh Filipa te, Prokora te, Nikanora te, Timona te, Parmena te, Nikola, Juda saphun, Antiokei khuaa mite an thlang a. Chûng mite chu tirhkohte hmaah an dintîr a, tirhkohte chuan an lu chunga kut nghatin an ṭawngṭai a. Tichuan, Pathian thu chu a darh zêl a, Jerusalem-ah chuan zirtîr an pung nasa êm êm a, puithiamte zînga mi tam tak pawhin Rinna chu an pawm ve ta a. Stefana chu Pathian khawngaihna leh thiltihtheihnain a khat a, mi zîngah thil mak leh chhinchhiahna ropui tak tak a ti ṭhîn a. Nimahsela, Kurini khua leh Aleksandria khua ata Juda ṭhenkhat ‘Sal chhuak pâwl’ Sunagog an tiha tel ve ṭhînte leh Kilikia ram leh Asia rama Juda-te an lo thawk a, Stefana chu an rawn hnial a. A finna leh a sawipuitu Thlarau chu an hnial hneh si lo va. Tichuan, “Mosia leh Pathian pawi a sawi kan hria,” ti tûrin mite an tham a. Mipuite leh upate leh Dân zirtîrtute chu an fuihpawrh a, Stefana chu an bei a, an man a, Sanhedrin hmaah an hruai ta nghâl a. Hretu der an rawn thawhpui a, chûng chuan, “He mi hian kan Tempul thianghlim leh kan Dân hi a sawichhiat a bâng duh lo. ‘Nazaret Isuan kan Tempul hi a ṭhiat ang a, Mosia Dân min pêkte hi a tidanglam vek dâwn,’ a tih kan hria a ni,” an ti a. Rorêltute zawng zawng chuan Stefana chu an en ṭhuap a, a hmêl chu vântirhkoh hmêl angin an hmu a. Puithiam lalber chuan, “Hêng thu hi a dik em?” a ti a. Ani chuan, “Ka unaute leh ka pute u, ngaithla rawh u. Kan pu Abrahama chu Haran khuaa a awm hma, Mesapotamia rama a awm lai khân, ropuina Pathian chu a hnênah a inlâr a. I ram leh i laichînte hi chhuahsan la, ram ka la kawhhmuh tûr che lamah kal rawh,’ a rawn ti a. Tichuan, Kaldai ram ata a chhuak a, Haran-ah awmhmun a khuar a. Chuta ṭang chuan a pa thih hnuah tûna in awmna ramah hian Pathianin a pêm luhtîr a. Pathian chuan ram luah tûr hniak khat pawh a pe lo va; mahse, Abrahama chu fa nei lo a ni chungin, amah leh a thlahte hnênah he ram hi pêk a tiam a. Pathianin hetiang hian a hrilh a ni, ‘I thlahte chu mi ramah an la mikhual ang a, kum zali lai mi bawihah awmin tihduhdah an ni bawk ang. Bawiha siamtu tûr hnam chu keimah ngeiin ka la ngaihtuah ang a, chumi hnuah an chhuak ang a, he hmunah hian ka rawng an la bâwl ang,’ a ti a. Pathianin a hnênah serh tan thu kha a thlung a. Chutiang tak chuan fapa Isaka a neih khân, a ni riat ni-ah a serh a tansak a. Isaka chuan fapa Jakoba a nei a, Jakoban fapa sâwm leh pahnih, thlahtute kha, a nei a. “Tin, thlahtute khân Josefa chu an îtsîk a, Aigupta ram lamah an hralh a; nimahsela, Pathian a hnênah a awm a, hrehawm a tuar zawng zawng ata chu a chhan chhuak zêl a. Aigupta rama lal Farawa mit hmuha mi fing tak leh duhawm tak a nihtîr a; Farawa chuan Aigupta ram chungah leh a chhûngkaw chunga hotu-ah a siam ta a. Tin, Aigupta leh Kanan ram pumah ṭâm a lo tla a, an tuar na hle a; kan pute chuan ei tûr an nei ta lo va. Jakoban Aigupta ramah buh a awm tih a hriat chuan, kan pute chu a tîr chhuak a, chu chu an kal hmasak ber a ni. An kal vawi hnihnaah Josefa chu a unaute hnênah a inhriattîr a, Farawa pawhin Josefa chhûngte chu a hre ve ta a. Tichuan, Josefa chuan a pa Jakoba leh a unaute zawng zawng a kohtîr a, an vaiin sawmsarih leh panga lai an ni a. Jakoba te chu Aigupta ramah an chhuk a, ani leh kan pute chu an thi a. An ruang chu Sekem khaw thlengin an rawn zâwn a, Abrahaman Sekem khuaa Hamora fate laka tangka suma a lei thlânah an phûm ta a. Abrahama hnêna Pathian thutiam kha a thlen dâwn lai chuan kan mite chu Aigupta-ah chuan an pung chak hle a, an tam ta êm êm mai a. Aigupta ramah chuan lal dang, Josefa hre lo a lo lal ta a. Chu mi chuan kan chite chu vervêk takin a bei a, kan pute chu a tiduhdah a, an fa sênte thi tûrin a paihtîr zêl a. Chumi lai chuan Mosia a lo piang a, nausên duhawm bîk tak mai a ni a, anmahni inah thla thum an awmpui a; an in ata an dah chhuah hnu chuan Farawa fanuin a chhar a, ama fa atân a nei ta a. Mosia chu Aigupta ram finna zawng zawng a zirtîr a; tichuan, thu sawi thei tak leh thil ti thei tak a lo ni ta a. Mosia chuan kum sawmli a nih kum khân, a unau Israel fate chu tlawh ṭûlin a hre ta a. A va tlawh chuan an zînga pakhat chu Aigupta miin a lo tiduhdah lai a hmu a, a chhan a, a phuba a lâksak a, a tiduhdahtu chu a that ta a. Mosia chuan ama kutin Pathianin anmahni a chhanhim dâwn tih a unauten an hria emaw a ti a; nimahsela, an lo hre si lo. “A tûkah chuan mi pahnih insual lai a rawn hmu a, ṭhelh tumin, ‘Pute u, unau in ni alâwm, engati nge in insual tâk mai?’ a ti a. A ṭhenawm bei hmasatu zâwk chuan Mosia chu a nam kiang a, ‘Kan chunga hotu-ah leh rorêltuah tuin nge siam che? Nimina Aigupta mi i thah ang khân mi thah ve i tum a ni maw?’ a ti a. Chu thu avâng chuan Mosia chu a tlân bo va. Midian ramah a va châm ta reng a, chutah chuan fapa pahnih a nei a. “Tin, kum sawmli a vei hnuin Sinai thlalêrah hnimbuka meialh zîngah Vântirhkoh a hnênah a inlâr a. Mosian a thil hmuh chu mak a ti êm êm a; fiah tumin a va hnaih a, Lalpa awin, ‘Kei hi i pute Pathian, Abrahama te, Isaka te, Jakoba te Pathian chu ka nih hi,’ a rawn ti a. Tichuan, Mosia chu a khûr a, a fiah ngam ta lo va. Lalpa chuan a hnênah, ‘I pheikhawk kha phelh rawh, i dinna kha hmun thianghlim a ni. Aigupta rama ka mite an tihretheihzia ka hmu reng a, an rûm pawh ka hre reng a, anmahni hruai chhuak tûrin ka lo chhuk ta a ni. Hawh teh, Aigupta ramah ka tîr ang che,’ a ti a. “Chu Mosia, ‘hotu-ah leh rorêltuah tuin nge siam che,’ tia an hnara ngei chu, Pathianin hotu leh chhanchhuaktu atân hnimbuka a hnêna inlâr vântirhkoh hmangin a rawn tîr ta a ni. Ani chuan anni chu a hruai chhuak a, Aigupta ramah te, Tuipui Senah te, thlalêrah te kum sawmli chhûng lai thil mak leh chhinchhiahnate tiin a hruai a. Chu Mosia chu Israel fate hnêna, ‘Pathianin keimah ang in unaute zînga mi zâwlnei a la siamsak ang che u,’ titu kha a ni. Amah chuan thlalêra pung khâwm zîngah Sinai tlânga amah betu vântirhkoh chu a lo chhâwn a, kan pute hnêna thu sawi ṭhîna, min pêk chhâwn tûr thu nungte pawh dawngtu a nih kha. Kan pute chuan a thu an zâwm duh lo va, an hnâwl a, Aigupta lama kîr leh an duh a. Arona hnênah, ‘Kan hma hruaitu atân pathiante min siamsak teh khai; he Mosia, Aigupta ram ata min hruai chhuaktu lah hi engtin nge a awm tâk pawh kan hre si lo,’ an ti a. Chutichuan, bâwngno lim an siam a, chu milim hnênah chuan inthawina an hlân a, anmahni kutchhuak chu an hlimpui ta a. “Tichuan, Pathianin anmahni a hawisan a, vâna arsite an biak theihna tûrin a kalsan a, zâwlnei Lehkhabua: ‘Israel chhûngte u, kum sawmli chhûngin thlalêrah khân inthawina ran mi hlân em ni? Moleka puan in in zâwn a, In Pathian Refana arsi lemte in siam a. Chûng lemte chu chibai in bûk a, chuvângin, Babulon piah lamah ka tântîr ang che u,’ tih ziak ang khân. “Kan pute chuan thlalêrah khân Pathian chênna puan in an nei a, Mosia hnêna Pathianin siam dân tûr a hrilh laia a lem a entîr ang taka siam a ni. Chu ngei chu kan puten an chhawm zêl a, Pathianin kan pute hmaa Jentail-te a hnawh chhuaha, Josua hova Kanan ram an luh khân an luhpui a, Davida hun thleng khân a awm ta reng a. “Davida chuan Pathian duhsakna a dawng a, Jakoba Pathian tân in sak phalna a dîl a. Nimahsela, Solomona zâwkin in chu a saksak ta a. Amaherawhchu, Chungnungbera zawng kuta sak inahte a awm ngai lo, zâwlneiin: Lalpan, ‘Vân ka ṭhutthlêng a ni a, lei ka ke nghahchhan a ni. In eng ang nge mi saksak anga, ka chawlhhmun pawh khawiah nge? Hêng thil zawng zawng hi ka kuta ka siam a ni lo vem ni?’ tia a sawi ang khân. “Mi tihmawh, serh tan lohho ang mai, thinlung sak leh beng tululte u; Thlarau Thianghlim in dodâl fo va, in pute ang bawkin nangni pawhin in ti ṭhîn. In puten zâwlneite zîngah tu nge an tihduhdah loh? Mi fel tak, lo kal tûra thu hrilhlâwktute kha an that a, tûnah nangniho hi, chu mi fel tak mantîrtu leh thattute chu in ni. Vântirhkohte pêk Dân dawngtu, zâwm duh si lote u,” a ti a. Chûng thu chu an hriatin an thin a khei ta hle a, a chungah thinurin an ha an ṭhial a. Nimahsela, Stefana chu Thlarau Thianghlimin a khat a, vân lam a thlîr reng a, Pathian ropuina leh Pathian ding lama Isua ding a hmu a. “Ngai teh u, vân inhawng ka hmu a, Pathian ding lama Mihring Fapa ding pawh ka hmu,” a ti a. Chutichuan, ring takin an au va, an beng an hup a, Stefana chu an beih rawn a, khua ata chu an nam chhuak a, lungin an dêng ta a. Thuhretute chuan an puante chu tlangvâl pakhat, Saula an tih, ke bulah chuan an dah a. Stefanan, “Lalpa Isu, ka thlarau la ang che,” tia Lalpa a koh lai chuan lungin an dêng ruih ruih a. A ṭhingṭhi a, ring takin, “Lalpa, he an thiltih sual mawh hi anmahni phurhtîr suh ang che,” a ti a. Chu thu chu a sawi zawh chuan a muhîl ta a. Saula pawh chuan Stefana thah chu a remti ve rêng a. Chumi ni aṭang chuan Jerusalem-a kohhran chu nasa takin an tiduhdah ta a. Tichuan, tirhkohte chauh lo chu Judai leh Samari ram khaw tinah an darh ta vek a. Pathian ngaihsak ṭhenkhatten Stefana chu an phûm a, nasa takin an ṭah a. Saula erawh chu kohhranho nuai bo tumin inahte a lût a, a hmei a pain a hnûk chhuak a, tân inahte a khung a. Tin, a darhte chu hmun tinah an kal a, Chanchin Ṭha an hril zêl a. Filipa chu Samari khawpuiah a chhuk a, an hnênah Krista thu a hril a. Mipuiten Filipa thu sawi an hriata, a thil mak tihte an hmuh chuan a thusawite chu an bengkhawn tlâng hle a. Ramhuai bawlhhlawhte chu ring taka auvin mi tam tak kawchhûng ata an lo chhuak a, zeng leh kebai tam tak pawh tihdam an ni a. Chu khua chu an lâwm ta êm êm a. Chu khuaah chuan mi pakhat, Simona an tih, dawithiam a awm a. Mi ropui tak niin a insawi a, Samari mite chuan a dawi chu mak an ti êm êm a. Mi zawng zawngin, a lian a têin a thu chu an bengkhawn hle ṭhîn, “He mi hi Pathian thiltihtheihna, ‘Ropui,’ an tih kha a nih hi,” an ti a. A mitdawivaih thiam chu hun rei tak mak ti taka a lo siam tawh avângin a thu chu an ngaichâng ṭhîn a ni. Pathian ram Chanchin Ṭha leh Isua Krista hming Filipan a hril chu an rin tâkah chuan, a hmei a pain baptisma an chang ta hlawm a. Simona meuh pawhin a ring ve ta a, baptisma a chang a, Filipa chu a kawp ta tlat a, chhinchhiahna leh thil mak ropui tak a tihte chu a hmu a, mak a ti êm êm ṭhîn a. Jerusalem-a tirhkoh awmte chuan Samari khaw miten Pathian thu an awih ta tih an hriat chuan an hnênah Petera leh Johana an tîr a. Anni chu an zu kal a, Thlarau Thianghlim an dâwn theih nân an ṭawngṭaisak a. An zînga tu mahin Thlarau Thianghlim chu an la dawng rih lo; Lalpa Isua hmingin baptisma an chang chauh a la ni si a. Tichuan, tirhkohten an lu chungah kut an nghat a, Thlarau Thianghlim an dawng ta a. Tirhkohten an chunga kut an nghahin Thlarau Thianghlim pêk an ni tih Simona chuan a hmuhin pawisa pêk a tum a, “Hetiang thiltihtheihna hi mi pe ve rawh u, an chunga kut ka nghahna apiangin Thlarau Thianghlim an dawn ve theih nân,” a ti a. Nimahsela, Peteran a hnênah, “I tangka nên hian boral rawh u: Pathian thilthlâwn pêk tangka suma lei i tum avângin. I rilru put dân Pathian mit hmuhah a dik lo va, hêng thilah hian tel vena leh chanvo i nei ve lo. Amaherawhchu, i sual hi sim la, Lalpa hnênah ṭawngṭai la, i ngaihtuahna sual hi a ngaidam mial mahna che. Awhna rilru chhe tak i pu a, sualin a phuar tlat che tih ka hmu a ni,” a ti a. Simona chuan, “I thil sawite chu eng mah ka chunga a lo thlen loh nân nangnin Lalpa hnênah mi dîlsak rawh u,” a ti a. Chutichuan, Lalpa thu chu an hriattîra an sawi hnu chuan, Petera leh Johana chu Jerusalem lamah an haw leh ta a. An haw pah chuan Samari rama khaw tam takah Chanchin Ṭha an hril a. Lalpa tirh vântirhkohvin Filipa chu a bia a, “Tho la, Jerusalem aṭanga Gaza khaw zuk chhun, chhim lam thlalêr kal tlang kawngah khuan kal rawh,” a ti a. Tichuan, a tho va, a kal ta a. Tin, Ethiopia rama mi pakhat an lalnu Kandaki hnuaia mi tilreh lal tak, a sum zawng zawng enkawltu chu Jerusalemah Pathian be tûrin a han kal a; a haw lamah chuan tawlailîra ṭhu chungin zâwlnei Isaia lehkhabu a chhiar a. Thlarauvin Filipa hnênah, “Tawlailîr saw pan la, va pawh rawh,” a ti a. Tichuan, Filipa chu a va tlân a, mi tilrehin zâwlnei Isaia lehkhabu a chhiar chu a ngaithla a, “I chhiar chu a awmzia i hria em?” a ti a. Ani chuan, “Tu ma mi hrilh fiah lohvin engtin nge ka hriat ang?” a ti a. Filipa chu a bula ṭhu-a chuang ve tûrin a sâwm a. Lehkha Thu a chhiar lai chu hei hi a ni: “Berâm talh tûr angin ani chu an hruai a, Berâmno a hmul mêttu hmaa a ngawi reng angin, Ani pawhin a ka a âng lo, Tihmualpho a ni a, dik lo taka rêlsak a ni, A thlahte chanchin tuin nge la sawi ang? Khawvêl aṭangin a nun an lâksak ta si a,” tih hi. Mi tilreh chuan Filipa hnênah, “Zâwlnei hian tu thu nge a sawi, ama thu nge mi dang thu? Mi hrilh teh,” a ti a. Filipa chuan Lehkha Thu aṭang chuan sawi ṭanin, Isua chanchin a hrilh ta a. Chutia kalkawnga an kal lai chuan tui awmna an thleng a, mi tilreh chuan, “En teh, heta hi tui a awm a, baptisma ka chan engin nge dâl?” a ti a. Tichuan, tawlailîr chu a tiding a, Filipa leh mi tilreh chu an pahnihin tuiah chuan an chhuk a; Filipa chuan a baptis ta a. Tui ata an lo chhuah chhoh chuan Lalpa Thlarauvin Filipa chu a la bo ta a. Mi tilreh chuan a hmu ta lo va; nimahsela, hlim takin a kal ta zêl a. Filipa chu Azota khuaah miin an lo hmu a, Kaisari khua a thlen hma chu khaw tinah a kal a, Chanchin Ṭha a hril zêl a. Saula erawh chuan Lalpa zirtîrte chu thah atân a la vau ta zêl a. Kawnga mite, a hmei a pa, a hmuh apiang mana, Jerusalem-a a rawn hruai theihna tûrin Damaska khaw sunagog hotute pêk tûr lehkha Puithiam lalber a va dîl a. Damaska pana a kal laiin, a thlen dâwn ruaiah, thâwklehkhatan vân aṭangin êng a vêlin a lo êng ta phut a. Leiah a tlu a; aw a hria a, “Saula, Saula, engati nge mi tihduhdah?” a rawn ti a. Ani chuan, “Lalpa, tu nge i nih?” a ti a. Aw chuan, “Isua, i tihduhdah hi ka ni e; tho la, khuaah lût la, i tih tûr an lo hrilh ang che,” a ti a. A kalpuite chu hrilhhai takin an ding a, aw chu an hre na a, tu mah an hmu si lo. Saula chu a lo tho va, a han meng a, eng mah a hmu thei ta lo va; tichuan, an kai a, Damaska-ah chuan an hruai lût a. Ni thum khaw hmu lovin a awm a, eng mah a eiin a in lo. Damaska-ah chuan zirtîr pakhat, Anania a awm a. Lalpa chu a hnênah a inlâr a, “Anani,” a ti a. Ani chuan, “Lalpa, heta hi ka awm,” a ti a. Lalpa chuan, “Tho la, kawtthlêr, ‘ngîl,’ an tihah chuan kal la, Juda inah Tarsa khuaa mi Saula zawng chhuak rawh. Ani chu a ṭawngṭai mêk a, mi pakhat, Anania lo lûta, a mit tivâr tûra a chunga kut a nghat a hmu a ni,” a ti a. Anania erawh chuan, “Lalpa, chu mi chuan Jerusalem-a i mi thianghlimte nasa takin a tiduhdah tih mi tam takin mi hrilh a. Hetah pawh i hming lamtu zawng zawng man theihna thu puithiam lalte hnên aṭanga hmua lo kal a ni asin,” a ti a. Lalpa chuan, “Kal mai rawh, he mi hi Jentail-te, lalte leh Israel-te hnêna ka hming pu lûttu atâna ka mi ruat a ni asin. Ka hming avângin hrehawm engtia nasa nge a la tuar dâwn amah ka la hriattîr ang,” a ti a. Tichuan, Anania chu a chhuak a, inah chuan a va lût a, a chunga kut nghatin, “Unau Saul, i mit a vâr leh theih nân leh Thlarau Thianghlima i khah theih nân, i lo kalna kawnga i hnêna inlâr Lalpa Isua khân i hnênah mi rawn tîr a ni,” a ti a. Thâwklehkhatah a mit a vâr leh ta a. Tichuan, a tho va, baptisma a chang ta a. Chaw a ei a, a lo harh leh ta a. Damaska-ah chuan zirtîrte hnênah ni eng emaw zât a châm a. Sunagog-ahte chuan Isua chu Pathian Fapa a ni tih a hril ṭan ta nghâl a. A thu sawi hria zawng zawngin mak an ti hle a, “He mi hi Jerusalem-a he Hming lamtute tiduhdahtu kha a ni lâwm ni? Puithiam lalte hnêna hruai atân he Hming lamtute man tumin hetah pawh a lo kal a ni lâwm ni?” an ti a. Saula thu sawi chuan mi a hneh deuh deuh va, Isua chu Mesia a ni tih chiang takin a hrilh fiah ṭhin avângin Damaska-a Juda-te chu a tidang a, a tibuai zo ta a. Ni rei tak chhûng chu Saula thah tumin Juda-te an inrâwn khâwm ṭhîn a. Amah an phiar tih Saulan a lo hria a. Thah tumin chhûn leh zân kulh kawngkaahte an châng reng a. Nimahsela, a zirtîrten ani chu an hruai a, zânah kulh bang pâwnah bâwmin an thlâk thla ta a. Tin, Saulan Jerusalem a lo thlen chuan zirtîrte zînga tel a tum a, anni erawh chuan zirtîr a nih ve an ring thei lo va, an za-in an hlau hle a. Nimahsela, Barnaba chuan tirhkohte hnênah a kalpui a, kalkawnga Lalpa a hmuha, Lalpan amah a biak thu te, Damaska-a Isua hminga huai taka thu a hril chanchin te a hrilh hlawm a. Tichuan, Saula chu Jerusalem-ah chuan an zîngah a chêng ve ta a. Lalpa hmingin huai takin thu a hril ṭhîn a. Grik ṭawng hmang Juda-te hnênah pawh thu a sawi a, a hnial a, anni chuan thah an lo tum ta mai a. Unauten chu chu an hriatin Kaisari khuaah an hruai chhuk a, Tarsa khuaah an kaltîr ta daih a. Judai ramah te, Galili ramah te, Samari ramah te, ram pumah kohhran mite chu muang takin an awm a, an intinghet deuh deuh va, Lalpa ṭih takin an khawsa a. Thlarau Thianghlimin a thlamuan a, an lo pung ta telh telh a. Petera khaw fang chuan Luda khuaa mi thianghlimte a zu tlawh a. Chutah chuan mi pakhat Ainia, a zen avânga kum riat lai khuma mu tawh a hmu a. Petera chuan a hnênah, “Aini, Isua Krista chuan a tidam a che, tho la, i khum kha siam fel rawh,” a ti a. Tichuan, a tho ta nghâl a. Luda leh Saron phaia awm zawng zawngten Ainia chu an hmu a, Lalpa lam an hawi ta hlawm a. Tin, Joppa khuaah zirtîr pakhat, Tabiti a awm a, a Grik hming chu Dorki a ni, chu chu sazukla tihna a ni. Thil ṭha ti leh retheite thil pe-a inhmang zo mi a ni. Chûng lai chuan a dam lo va, a thi ta mai a. An bual fai a, pindan chungnungah an zalh a. Luda chu Joppa khaw kiang lawka awm a ni a. Luda khuaah Petera a awm tih zirtîrten an hriat chuan, “Khawngaih takin lo kal thuai teh,” tia ngên tûrin a hnênah mi pahnih an tîr a. Tichuan, Petera chu a tho va, an rual chuan a kal ve ta nghâl a. A va thlen chuan pindan chungnungah an hruai chho va, hmeithai zawng zawng chu a kiangah an ding a, an ṭap a. Dorkiin a dam laia kawr leh thawmhnaw dang a siamsakte chu an entîr a. Petera chuan an vaiin a chhuahtîr vek a, ṭhingṭhiin a ṭawngṭai a, ruang lam chu a hawi a, “Tabit, tho rawh,” a ti a. Tichuan, Tabiti chu a lo meng a, Petera chu a hmu a, a ṭhuchhuak ta a. Petera chuan a ban a, a kai tho va, mi thianghlimte leh hmeithaite chu a ko va, damin an hnênah a hruai ta a. Chu chu Joppa khaw pum puiin an hria a, mi tam takin Lalpa an ring ta a. Petera chu Joppa-ah chuan ni rei tak a châm a, savun siamtu Simona inah a thleng a. Tin, Kaisari khuaah mi pakhat, Kornelia a awm a, Itali Sipai pâwl an tiha sipai za hotu a ni. Ani chu Pathian ngaihsak mi a ni a, a chhûngte zawng zawng nên Pathian ṭih mi an ni. Juda mi retheite hnêna phal taka thilpêk pe ṭhîn mi a ni a. Pathian hnênah a ṭawngṭai fo ṭhîn. Ni khat chu tlai dâr thum vêlah fiah takin inlârna a hmu a. Pathian tirh Vântirhkoh pakhat a hnênah a lo lût a, “Korneli,” a rawn ti a. Kornelia chuan ani chu a en reng a, a hlau va, “Lalpa, eng nge ni?” a ti a. Vântirhkoh chuan, ‘I ṭawngṭaina leh i thil pêkte kha Pathianin a hre reng a. Tûnah hian Joppa-ah mi tîr la, mi pakhat, Simona, Petera an tih chu kohtîr rawh. Tuipui kamah, savun siamtu Simona inah a thleng a ni,” a ti a. A betu Vântirhkoh chu a kal veleh, Kornelia chuan a chhiahhlawhte zînga mi pahnih leh sipai pakhat, Pathian ngaihsak tak, a tirhkah bîk ṭhinte zînga mi chu a ko va. Thil awmzia zawng zawng chu a hrilh a, Joppa-ah chuan a tîr ta a. Tin, a tûk chhûn laiah chûng miten khua an thlen dâwn chuan, Petera chu ṭawngṭai tûrin in chung zâwlah a lâwn chho va. A ril a ṭâm hle a, chaw ei a duh a; mahse, ei tûr an siam lai chuan zêlin a awm ta a. Vân inhawng a hmu a, bâwm, puan hlai tak ang, a kil li-a hlin hi leia lo uai thla a hmu a. Bâwm chhûngah chuan ran ke pali nei te, bawkvâka kal leh tleng chi te, chunglêng sava tinrêngte a awm a. Aw hian, “Peter, tho rawh, talh la, ei rawh,” a rawn ti a. Petera erawh chuan, “Ni lo ve, Lalpa, thiang lo leh bawlhhlawh eng mah ka ei ngai hlei nêm,” a ti a. Aw chuan, “Pathianin a tihthianghlim tawh chu nangin bawlhhlawh ti suh,” a rawn ti leh a. Chutiangin vawi thum a rawn ti a. Bâwm chu vâna khai chhoh a ni leh ta a. Peteran a thil hmuh chu a ngaihna hre lova a awm lai chuan, Kornelia mi tirhte kha Simona in zâwt chhuakin, a kawt kawngkhâr bulah an lo ding a, “Hetah hian Simon Petera a thleng em?” tiin an lo zâwt a. Peteran a inlârna hmuh chu a ngaihtuah laiin, Thlarauvin a hnênah, “Mi pathumin an zawng a che. Tho la, chhuk rawh, eng mah ringhlel lovin anmahni zui ang che; anni chu ka tirh an ni e,” a ti a. Chutichuan, Petera chu a chhuk a, mite hnênah chuan, “In zawn chu ka ni e. Eng nge in lo kal chhan?” a ti a. Anni chuan, “Pathian ṭih mi, Juda hnam zawng zawngin an fak, sipai za hotu fel tak Kornelia chu vântirhkoh thianghlimin a bia a, i thu sawi a ngaihthlâk theih nân, a ina kala sâwm tûr chein a hrilh a, keini hi min rawn tîr a ni,” an ti a. Chu mite chu a ko lût a, a riahtîr ta a. A tûkah chuan Petera chu a tho va, chu mite chu a zui ta a, Joppa-a unau ṭhenkhatte pawhin Petera chu an zui ve a. A tûk lehah chuan Kaisari chu an thleng ta a. Kornelia chuan a laichîn unaute leh a ṭhian ṭhate a lo sâwm khâwm a, Petera te chu an lo nghâk reng a. Peteran in a luh dâwn chuan Kornelia chuan a lo hmuak a, a ke bulah a bawkkhup a, chibai a bûk a. Petera chuan ani chu a kai tho va, “Tho rawh, kei pawh mihring mai ka nih hi,” a ti a. Inbe zêl chungin an lût a, mi tam tak awm khâwm chu a va hmu a. An hnênah chuan, “Juda-te tân hnam dang zînga chêttlat leh anmahni tlawh a thian lohzia nangni ngeiin in hria e. Nimahsela, tu mah thiang lo leh bawlhhlawh ka ti tûr a ni lo tih Pathianin chiang takin mi hriattîr a ni. Chuvângin, mi rawn sâwm veleh hnial lovin ka lo kal a nih hi. Eng nge mi rawn sâwm chhan le?” a ti a. Kornelia chuan, “Vawiin hi a ni lina a ni ta, tûn ang hun tlai dâr thumah ka ṭawngṭai laiin, ngai teh, mi pakhat puan vâr sin ka bulah a lo ding a, ‘Korneli, i ṭawngṭaina leh i thil pêkte Pathianin a hre reng e. Chutichuan, Joppa-ah mi tîr la, Simon Petera kohtîr rawh. Tuipui kamah savun siamtu Simona inah a thleng a ni,’ a ti a. Chuvângin, i hnênah mi ka rawn tîr ta nghâl a ni; i lo kal thei hi a ṭha e. Tûnah hian Lalpan thu a pêk apiang che ngaithla tûrin Pathian hmaah kan za hian kan lo awm khâwm a nih hi,” a ti a. Petera chuan, “Pathianin mi duhsak bîk a neih lohzia ka hre chiang ta. Hnam tin zîngah tu pawh amah ṭiha, thil dik taka ti apiang a lâwm zâwng mi an ni. Israel fate hnênah Pathian chuan thu a rawn thlen a, remna Chanchin Ṭha chu Isua Krista hmangin a rawn puang ngei a; mahse, Isua chu mi zawng zawng Lalpa a ni. Johanan baptisma thu a hril hnua Galili rama inṭan, Judai ram puma thil lo thleng thu kha in lo hre tawh phawt ang a. Nazaret Isua chu Pathianin Thlarau Thianghlim leh thiltihtheihnain a thuam a, Pathian chuan a awmpui reng a, thil ṭha tia zin vêlin Diabola sawisak zawng zawng a tidam zêl a. Judai ram leh Jerusalem-a a thil tih zawng zawng hretute kan ni; ani chu krawsa khêngbetin an tihlum a nih kha. Mahse, Pathianin ni thum ni-ah a kaitho leh a, a inlârtîr a. Mi tin hmuhah erawh chuan a inlâr lo, Pathianin hretu atâna a lo ruat lâwk keiniho chauh hian kan hmu; a thawhleh hnu khân kan eiin kan in ho va. Chu chu tlângaupui tûr leh, Ani chu mi nung leh mitthi chunga rorêltua Pathian ruat chu a ni tih mite hriattîr tûrin thu min pe a ni. Zâwlnei zawng zawng pawhin, amah ring apiang a hming avângin an sual ngaihdam a ni ang tih an lo hril ṭhîn a nih kha,” a ti a. Peteran chûng thu chu a sawi laiin, a ngaithlatu zawng zawng chungah chuan Thlarau Thianghlim a lo thleng a. Serh tanho zînga ringtu, Petera rawn zuitute chuan, Thlarau Thianghlim thilpêk, Jentail-te hnênah pawh pêk a ni ve chu mak an ti êm êm a: ṭawng hriat lohtea thu an sawi leh Pathian an fak chu an hre si a. Peteran, “Hêng mite hian kan dâwn ang bawk khân Thlarau Thianghlim an dawng si a, tui hmanga baptisma an chan tuin nge khap thei ang?” a ti a. Tichuan, Isua Krista hminga baptisma chan tûr thu a pe a. Chûng zawhah chuan châm rih tûrin an ngên a. Judai ram tina tirhkohte leh unau awmte chuan Jentail-te pawhin Pathian thu an awih ve tih an hre ta a. Peteran Jerusalem a thlen chhoh leh chuan, ‘serh tan a ṭûl,’ tituten an lo sawisêl a, “Serh tan lohte i tlawh a, an zîngah chaw te i ei mai a,” an ti a. Nimahsela, Petera chuan a bul aṭanga indawt zêlin an hnênah a hrilh fiah a. “Joppa-ah ka awm a, ka ṭawngṭai laiin zêlin ka awm a, bâwm, puan hlai tak ang kil li-a hlin, vân ata ka bula lo uai thla ka hmu a. Ka en reng a, ka ngaihtuah a, leia mi ran ke pali nei te, ramsa te, bawkvâk leh tleng chi te, chunglêng sava te a chhûngah chuan ka hmu a. “Tin, awin, ‘Peter, tho la, talh la, ei rawh,’ mi han tiin ka hre bawk a. Kei chuan, ‘Ni lo ve, Lalpa, thiang lo leh bawlhhlawh eng mah rêng ka kaah a lût ngai lo,’ ka ti a. Vân ata aw chuan, ‘Pathianin a tihthianghlim tawh chu nangin bawlhhlawh ti suh,’ mi han ti leh a. Chutiang hlîr chuan vawi thum a lo awm a, a vaiin vânah khai chhoh a ni leh ta a. Chutih lai chuan mi pathum, Kaisari aṭanga ka hnêna an rawn tirhte chu ka thlen in kawtah an lo ding reng tawh a. Thlarauvin hreh lova anmahni zui tûrin mi hrilh a. Hêng unau paruk pawh hian mi zui ve a, Kornelia inah chuan kan va lût a. Ani chuan a ina Vântirhkoh a hmuh thu leh a hnêna, ‘Joppa-ah mi tîr la, Simon Petera kohtîr rawh, ani chuan thu a hrilh ang chia, a thu sawi avâng chuan nang leh i chhûngte zawng zawng chhandam in ni ang,’ a tih thute mi lo hrilh a. Thu chu ka han sawi ṭan a, Thlarau Thianghlim chu, a tîra kan chunga a lo thleng ang bawk khân an chungah a lo thleng ta a. Lalpan, ‘Johanan tuiin a baptis ṭhîn a, nangni erawh chu Thlarau Thianghlima baptis in ni ang,’ a tihte kha ka hre chhuak leh ta a. Keini, Lalpa Isua Krista ringtute min pêk ang thilpêk thuhmun reng Pathianin an hnênah pawh a pêk ve miau si chuan, kei tehlul hian Pathian ka hnial thei dâwn em ni?” a ti a. Chûng thu an hriat chuan an ngawi ta a, “Chuti a nih chuan Pathianin Jentail-te pawh sima nung tûrin kawng a hawnsak ve ta a nih chu,” tiin Pathian an fak ta a. Stefana avânga tihduhdahte kha Foiniki ramah te, Kupra thliarkârah te, Antiokei khaw thleng tein an kal darh a. Juda-te hnênah chauh lo chuan tu hnênah mah thu an hril lo. An zînga ṭhenkhat chu Kupra thliarkâra mi leh Kurini khaw mite an ni a. Chûng mite chuan Antiokei an thlen chuan Grik mite hnênah pawh thu an sawi a. Lalpa Isua Chanchin Ṭha an hrilh ve ta a. Lalpan anni chu a pui a, mi tam takin an ring a, Lalpa lam an hawi ta a. An chanchin chu Jerusalem-a Kohhran beng a lo thleng a, anni chuan Barnaba chu Antiokei-ah an tîr ta a. A zu thlen chuan Pathian khawngaihna hnathawh chu a hmu a, a lâwm hle a. Rinawm taka Lalpa vuan tlat tûrin an za-in a fuih a. Barnaba chu mi ṭha tak, Thlarau Thianghlim leh rinnaa khat a ni. Tichuan, mi tam tak Lalpa hnênah hruai an ni ta a. Tin, Barnaba chu Saula zawng tûrin Tarsa lamah a kal leh ta a. A han hmuh chuan Antiokei-ah a rawn hruai a, kum khat zet kohhran mite zîngah an tel ve a, mi tam tak an zirtîr ṭhîn a. Antiokei khuaah hian a ni, zirtîrte chu, ‘Kristian,’ an tih hmasak ber ni. Chûng lai chuan Jerusalem aṭangin zâwlnei ṭhenkhat Antiokei-ah an lo kal a. An zînga mi pakhat Agaba chu a ding a, Thlarau hriattîrin ram tina ṭâmpui mitthi a tlâk tûr thu a hrilh lâwk a. Klaudia lal laiin ṭâm chu a tla ta a. Zirtîrte chuan an theih ang tâwk ṭheuhva thawhin Judai rama unau awmte ṭanpuina thawn an tum a. An tum ang chuan an ti a, upate hnênah Barnaba leh Saula kutah an thawn ta a. Tin, chutih lai chuan lal Herodan kohhranho zînga mi ṭhenkhat a tiduhdah ṭan ta a. Jakoba, Johana unaupa chu, khandaihin a sât hlum a. Chu chuan Juda-te a tilâwm tih a hriatin Petera pawh chu man a tum leh ta zêl a (Chu chu Chhang dawidim telh loh Kût lai a ni). Petera chu a man a, tân inah a khung a, sipai pâwl li, pali zêla inchhâwkin a vêntîr a. Kalhlên kût zawha mipui hmaa hruai chhuah a tum a ni. Nimahsela, ani chu Kohhran miten ṭhahnemngai takin Pathian hnênah an ṭawngṭaisak a. Herodan hruai chhuah a tum dâwn zân chuan Petera chu a bân khing hniha hlinin sipai pahnih kârah a muhîl a. A dangte chuan kawngkhâr bula dingin an vêng tlat bawk a. Ngai teh, Lalpa tirh Vântirhkoh pakhat a lo ding a, rip chhûng chu a lo êng ta a; Petera chu a nâkah a bêng harh a, “Tho thuai rawh,” a ti a. Khaidiat pawh chu a bân ata a tla ta a. Vântirhkoh chuan “Insiam la, i pheikhawk bun rawh,” a ti a. Chutiang chuan a ti a. Vântirhkoh chuan “I kawr ha la, mi zui rawh,” a ti leh a. Petera chuan a zui chhuak ta a. Vântirhkoh thiltih chu a tak a ni tih a hre lo va, zêla awm emaw a inti a ni. Vêngtu hmasa ber leh a dawttu chu an kal pêl a, khawpui lama kal chhuahna tûr thîr kawngkhâr chu an va thleng a, chu kawngkhâr chu amahin a inhawng ta a, an kal chhuak a, kawtthlêr pakhata an kal laiin vântirhkoh chuan a kalsan ta a. Petera chu a lo harh chiang a, “Lalpan a vântirhkoh a rawn tîr a, Heroda kut ata leh Juda-ten ka chunga thleng ngei tûra an ngaih lak ata mi chhan chhuak a ni tih tûnah ka hre chiang ta,” a ti a. Thil awmzia a hriat fiah hnu chuan, Johan Marka nu Mari inah chuan a va kal a, chutah chuan mi tam tak an awm khâwm a, an lo ṭawngṭai a. Petera chuan kawngkhâr chu a kik a, nula pakhat, Rodi chu kawng hawng tûrin a va kal a. Petera aw a hriat chuan a lâwm lutuk a, kawng hawng lovin a tlân lût leh a, kawngkhâr bulah Petera a ding tih a va hrilh a. Anni chuan, “I â ta a nih hi,” an lo ti a. Ani chu a ṭang tlat a; mahse anni chuan, “Amah vêngtu Vântirhkoh a nih chu,” an ti leh zêl a. Petera chuan kawngkhâr chu a kik leh ṭhîn a. Kawng an han hawn chuan amah chu an hmu ta a, mak an ti êm êm a. Ani chuan anniho chu ngawi tûrin a kutin a zâp a, Pathianin tân in ata a hruai chhuah dânte chu a hrilh ta a. “Hêng thu hi Jakoba leh unaute va hrilh rawh u,” a ti a. A chhuak a, hmun dangah a kal ta a. Khua a lo vâr chuan vêngtu sipaite chu, “Khawiah nge Petera a awm tâk?” tiin an buai chhe ta mai a. Heroda pawhin a zawng chiam a; mahse, a hmu si lo va; vêngtute chu a chhuahchhâl a, anni chu tihhlum tûrin thu a pe a. Heroda chu Judai ram ata Kaisari-ah a kal chhuk a, chutah chuan a châm ta reng a. Heroda chu Tura leh Sidon mite chungah a thinur hle a. Anni chu thu khat vuain amah be tûrin an lo kal a, lal upa Blasta chu lamṭangah an siam a. An ramin Heroda rama pûr chaw ṭhîn an nih avângin inrem an ngên a. Inbiakna tûr ni-ah chuan Heroda chu lal kawr ha-in lalṭhutthlêngah a ṭhu a, an hnênah thu a sawi a. “Pathian aw a ni, mihring aw a ni lo,” tiin mipuite chu an lo au ṭhîn a. Ani chuan chawimawina chu Pathian hnêna a pêk loh avângin Lalpa tirh vântirhkohvin chawplehchilhin a man a, rûlhûtin a ei a, a thi ta a. Pathian thu erawh chu a darh a, ringtu an pung ta zêl a. Barnaba leh Saulan an rawngbâwl hna an zawh chuan Johan Marka hruaiin Jerusalem aṭangin an kîr leh ta a. Tin, Antiokei kohhran mite zîngah chuan zâwlneite leh zirtîrtute an awm a. Chûngte chu: Barnaba te, Sumeona, Nigera an tih te, Kurini mi Lukia te, lal Herodan unauva a neih Manaina te, Saula te an ni a. Chaw ngheia Lalpa an biak ho laiin Thlarau Thianghlimin, “Barnaba leh Saula hi anmahni ka ruat chhan ti tûrin mi tihhransak rawh u,” a ti a. Chutichuan, chaw an nghei a, an ṭawngṭai a, an chungah kut an nghat a, an tîr chhuak ta a. Chutichuan, Thlarau Thianghlim tirh chhuahin Selukai khuaah an chhuk a, chuta ṭang chuan Kupra thliarkârah lawngin an kal a. Salamis khua an thlen chuan Juda-ho sunagog-ahte Pathian thu an hril a. Johana pawh anmahni ṭanpuitu atân an hruai ve a. Thliarkâr chu a pumin, Pafos khaw thlengin an fang chhuak a. Dawithiam, zâwlnei der, Juda mi pakhat, Bar-Isua an hmu a. Chu mi chu Ramawptu fing tak Sergia Paula hnêna awm a ni. Chu Ramawptu chuan Barnaba leh Saula chu lêngah a sâwm a, Pathian thu hriat a duh a. Eluma, dawithiam (chu chu a hming awmzia a ni) chuan Ramawptu chu rinna thu chu awih lohtîr a tum a, anni chu a lo dodâl a. Saula, Paula an tih bawk chu, Thlarau Thianghlimin a khat a, ani chu a en reng a, “Nang bumna tinrêng leh suahsualna tinrênga khatpa, nang Diabola fapa, nang thil ṭha zawng zawng dodâltu, Lalpa kawng tluang tihbuai i bâng lo vang maw? Hre rawh, tûnah Lalpa kut i tuar dâwn a ni, i mit a del ang a, khaw êng i hmu rih lo vang,” a ti a. Chu veleh chhûm leh thimin amah chu a bawh a, kaitu tûr zawngin a phar ta ruai a. Ramawptu chuan chu chu a hmuhin a ring ta a, Lalpa thu an zirtîrna chuan a hneh hle a ni. Paula leh a ṭhiante chu Pafos aṭang chuan lawngin an chhuak a, Pamfulia rama Perga khua an thleng a. Johana khân anni chu a hawsan a, Jerusalem-ah a kîr leh ta a. Perga aṭang chuan Pisidia rama Antiokei khuaah an kal zêl a, sabat niin sunagog-ah inkhâwmin an ṭhu ve a. Dân bu leh Zâwlnei Lehkhabu chhiar hnu chuan sunagog hotute chuan mi an tîr a, “Unaute u, min fuihna tûr thu eng emaw in neih chuan sawi rawh u,” an va ti a. Tichuan, Paula chu a ding a, kutin a zâp a, a sawi ta a: “Nangni Israel mite leh Pathian ṭihtute u, ngaithla rawh u. Hêng Israel mite Pathian hian kan pute kha a thlang a, an mikhualna Aigupta rama an awm chhûng khân hnam ropui takah a din a, chuta ṭang chuan a thiltihtheihna ropui tak hmangin a hruai chhuak a. Kum sawmli chhûng lai thlalêrah dawhthei takin a hruai a. Tin, Kanan rama hnam sarih a tihtlâwm hnu khân an ram chu a luahtîr a. Chûng chuan kum zali leh sawmnga chhûng lai a awh a. Chûng hnuah chuan rorêltute a pe ṭhîn a, zâwlnei Samuela thleng khân. Chumi hnu chuan lal an dîl a, Pathianin Benjamina chi a mi, Kisa fapa Saula, kum sawmli chhûng atân a pe leh a. A lalna a tihtâwp hnuah Pathianin Davida a laltîr a, ‘Ka mi duhzâwng tak, Jesaia fapa Davida ka chhar ta, ani chuan ka duhzâwng apiang a ti ang,’ a ti a. Chu mi thlahte zîng aṭang chuan, Pathianin a thutiam ang zêlin, Israel-ho hnênah Chhandamtu Isua a rawn pe ta a. Isuan rawng a bâwl ṭan hmain Johanan, sima baptisma chan tûr a nih thu Israel mi zawng zawng hnênah a lo hril hmasa a. Johana chuan, a rawngbâwlna a hlen chhuah dâwn lai khân, ‘Nangnin tu-ah nge mi ruat? Ani chu ka ni lo ve. Ngai teh u, ka hnungah a lo kal mêk a ni, a pheikhawk phelhsak tlâk pawh ka ni lo ve,’ a ti a. “Ka unau, Abrahama thlahte leh nangni Pathian ṭih zawng zawngte u, chu Chhandamtu chanchin chu kan zaa hnênah a lo thleng ta a ni. Jerusalem-a awmte leh an rorêltuten ani chu an hre lo va, sabat ni apianga an chhiar ṭhin zâwlneite thu an hriatthiam loh avângin ani chu thiam loh an chantîr a, zâwlneite thu chu an thlen kimtîr ta a ni. Thihna khawp meuh a chungah eng mah an hmuh loh pawhin tihlum tûrin Pilata an ngên a. A chanchin ziak zawng zawng kha a thlen zawhin kraws ata an la thla a, thlânah an phûm a. Nimahsela, Pathianin ani chu mitthi zîng ata a kaitho leh ta a. Galili ram aṭanga Jerusalem-a ama ruala chho vete hnênah ni rei tak chhûng a inlâr ṭhîn a; chûng mite chu tûnah hian Israel mite hnêna a thuhretute an ni. Keini pawh hi Pathianin min thlahtute hnêna a lo tiam Chanchin Ṭha chu hriattîr tûr che u-in kan lo kal a ni, keini an thlahte hnêna Isua kaithova a rawn hlen tâk thu hi. pahnihnaah: ‘Nang zawng ka fapa i ni e, Vawiin hian fa-ah ka neih ta a che,’ tih ang khân. Tin, a ruang pawh ṭawih lova a kaihthawh tûr thu: ‘Davida hnêna ka thutiam thianghlim, Thlâwn lo tûr chu ka pe ang che,’ tia a sawi ang khân. Chuvângin, hmun dangah pawh, ‘I mi thianghlim hi a ṭawih i phal lo vang,’ a ti bawk a. Davida zawng a dam chhûngin Pathian duhzâwnga rawng a bâwl hnuah a muhîl a, a thlahtute bulah an phûm a, a ṭawih ral tawh alâwm. Pathianin a kaihthawha erawh kha chu a ṭawih ve lo. Chutichuan, unaute u, hre rawh u; amah avânga sual ngaihdamna thu hi kan rawn hrilh che u a ni. Mosia Dâna thiam in chan theih lohna zawng zawngah khân, Isua ringtu apiang thiam chantîr an ni ta. Chuvângin, fîmkhur rawh u, chutilo chuan, zâwlneite lehkhabua sawi kha in chungah a thleng dah ang e: ‘Pathian hmusittute u, en rawh u, mak ti ula, boral rawh u. In dam chhûngin thil kawng khat ka tih hi; chu thil chu miin hrilh che u mah sela, in awih chuang tawp lo vang,’ tih hi,” a ti a. An inkhâwm bâng lo chhuak chuan sabat leha chûng thu chu sawi leh tûrin an ngên a. Inkhâwm an ṭîn fel hnu chuan, Juda tam tak leh Juda saphun Pathian ngaihsak tam takin Paula leh Barnaba chu an zui a, anni chuan Pathian khawngaihnaa awm reng tûrin an lo fuih a. Sabat lehah chuan Lalpa thu ngaithla tûrin a khua thawin an rawn inkhâwm a. Nimahsela, Juda-ten mipui an hmuh chuan an îtsîk ta êm êm a; Paula thu sawi chu an hnial kalh a, nasa takin an sawichhia a. Paula leh Barnaba chuan huai takin, “Pathian thu hi nangni hnêna hril hmasak tûr rêng a ni; nimahsela, in hnar a, chatuan nun nei tlâk lova in inngaih ahnu chuan, hre rawh u, Jentail-te lam kan hawi ang. Chutianga ti tûrin Lalpan thu min pe a ni: ‘Jentail-te êng atân ka ruat a che, kâwlkil thlenga mite chhandamna atân,’ tih ziak ang khân,” an ti a. Jentail-ten chu thu chu an hriat chuan an lâwm a, Lalpa chu an fak a, chatuan nun nei tûra ruat apiang chuan an ring ta a. Lalpa thu chu chumi ram pumah chuan a darh ta a. Nimahsela, Juda-te chuan miliannuho Pathian ngaihsakte leh khuaa mi pawimawhte chu an fuihpawrh a, Paula leh Barnaba chu an bei a, an ram ata an hnawt chhuak ta a. Anmahni an demzia tihlan nân tirhkohte chuan an kephah ata vaivut an thing thla a, Ikonion khuaah an kal ta a. Zirtîrhote chu Thlarau Thianghlimin an khat a, an lâwm ta êm êm a. Chutiang bawk chuan Ikonion-ah pawh Juda-te sunagog-ah tirhkohte chu an inkhâwm a, an thu sawi avângin Juda leh Grik tam takin an ring a. Ring duh lo Juda-te chuan Jentail-te an fuihpawrh a, unaute chu an huattîr a. Mahse, tirhkohte chu rei fe an châm a, Lalpa thu chu huai takin an hril ṭhîn a. A khawngaihna thu an hril ṭhin chu nemngheh nân Lalpan anmahni hmangin chhinchhiahna leh thil mak tam tak a ti a. Khuaa mipuite chu an inṭhen a, a ṭhenin Juda-te an ṭan a, a ṭhenin tirhkohte an ṭan a. Jentail-te leh Juda-te leh an rorêltute chuan, sawisak hrepa lunga den an tum tih tirhkohten an hriatin, Lukaoni rama Lustra khuaah te, Derbe khuaah te leh a vêl ramah te an tlânsan ta a. Chûngahte pawh chuan Chanchin Ṭha an hril zêl a. Tin, Lustra-ah chuan piangsual pakhat, ṭhu reng hi a awm a, a pian tirh ata kein a la kal ngai lo va. Chu mi chuan Paula thu sawi chu a ngaithla a, Paulan ani chu a en reng a, damna tûra rinna a nei tih a hriatin, ring takin, “I kein ding chhuak rawh,” a ti a. Ani chu a zuang tho va, kein a kal thei ta a. Mipuiten Paula thiltih chu an hmuhin, Lukaoni ṭawngin ring takin, “Pathiante chu mihring angin kan zîngah an lo chhuk ta a nih hi!” an ti a. Barnaba chu Zeusa an ti a, Paula chu thusawitu ber a nih avângin Hermea an ti a. An Pathian Zeusa Tempul chu kawtchhuahah a awm a, chuta puithiam chuan bâwngpa leh pangpâr ṭhite khaw kulh kawngkaah chuan a rawn la a; mipuite nên chuan tirhkohte hnêna inthawina hlan an tum ta a. Tirhkoh Barnaba leh Paulan chu chu an hriat chuan, an puan an pawtthlêr a, mipui zîngah chuan an zuang lût a, an au va, “Pute u, hêng thil hi engah nge in tih? Keini pawh nangmahni ang mihring bawk kan nih hi. Hêng thil lawilo hi in hawisana, vân te, lei te, tuifinriat te leh a chhûnga thil awm zawng zawng siamtu Pathian Nung lam in hawi theihna tûrin Isua Chanchin Ṭha kan rawn hrilh che u a ni. Pathian chuan tûn hmain hnam tin anmahni dân anga an awm a phal a. Chuti chung pawhin chhui chhuah theih loh tûrin amah a inthup ngai lo; a thil ṭha tihin a inhriattîr a, vân aṭangin ruah a pe che u a, a hun tê-ah in thlaite a rahtîr a, ei tûr a pe che u a, in rilru a tihlim êm êm ṭhîn a ni,” an ti a. Chûng thu chu sawiin mipuite chu an hnêna inthawina hlân lo tûrin an khap thei ta hrâm a. Nimahsela, Antiokei leh Ikonion aṭangin Juda ṭhenkhat an lo kal a, mipuite chu an rawn hmin a, Paula chu lungin an dêng a, a thi emaw tiin khua ata an hnûk chhuak a. Mahse, zirtîrten an din hual laiin ani chu a lo tho va, khuaah chuan a lût leh ta a. Tin, a tûkah chuan Barnaba nên Derbe-ah an kal ta a. Chu khuaah chuan Chanchin Ṭha an hril a, mi tam tak zirtîrah an siam hnuin Lustra-ah an kîr leh a, Ikonion-ah te, Antiokei-ah te an kal zêl a. “Hrehawm tam tak tuarin Pathian ramah kan lût tûr a ni rêng a ni,” tiin zirtîrte rilru an tinghet a, rinna chu vuan tlat tûrin an fuih a. Kohhran tinah upate an ruat zêl a, chaw ngheiin an ṭawngṭai a, an rin Lalpa hnênah an kawltîr zêl a. Pisidia ram chu an fang chhuak a, Pamfulia an lo thleng leh a. Perga-ah thu an hril a, Atalia khuaah an chhuk a; lawngin an kal a, Antiokei an thleng leh ta a. He khua hi an hna thawh tâk thawk tûra unauten Pathian khawngaihnaa an kawltîra, an zin chhuah ṭanna kha a ni. An thlen chuan kohhran mite chu an ko khâwm a, Pathianin anmahni hmanga thil a tih zawng zawng leh Jentail-te tân pawh Isua rinna kawng a inhawn thu te an hrilh a. Zirtîrte hnênah chuan rei fe an châm ta a. Judai ram aṭangin mi ṭhenkhat an lo chhuk a, “Mosia Dân anga serh in tan kher loh chuan chhandam in ni thei lo vang,” tiin unaute chu an rawn zirtîr a. Chutichuan, Paula leh Barnaba te nên nasa takin an inhnial a, an inkalh tlat avângin Paula leh Barnaba leh an zînga mi ṭhenkhat, Jerusalem-a tirhkohte leh upate hnêna kal chhova, chu thu chu sawi tûrin an ti ta a. Tichuan, kohhran mite chuan an thlah a, Foiniki ram leh Samari ram an fang chhuak a, chûnga unau awmte hnênah chuan Jentail-ten Pathian thu an awih tâk thu chu an sawi zêl a; chu chuan a tilâwm hle hlawm a. Jerusalem an han thlen chuan kohhran mite, tirhkohte leh upate chuan an lo lâwm a; Pathianin anmahni hmanga thil a tih zawng zawng an hnênah an hrilh a. Nimahsela, Farisai pâwla mi, ringtu ṭhenkhat an ding chhuak a, “Jentail-te chu an serh tan tûr a ni a, Mosia Dân pawh zâwm tûrin phût tlat tûr a ni,” an ti a. Chu thu ngaihtuah tûr chuan tirhkohte leh upate chu an inkhâwm a; Rei tak an ngaihtuah hnuin Petera a ding a, an hnênah, “Unaute u, Jentailten keima ka aṭanga Chanchin Ṭha an hriata an rinna tûrin Pathianin hmâna in zîng ata mi thlan kha in hria e. Rilru hretu Pathian chuan keini min pêk ang bawka an hnêna Thlarau Thianghlim pein, Jentail-te pawh a duh a ni tih a tihlan kha. Keini leh anni a thlei hrang lo va, an rin avângin an rilru a tithianghlim a. Chutichuan, min thlahtute leh keini zawh tawh loh nghâwngkawl kha, tûnah zirtîrte kova bah luihtîr tumin engati nge Pathian in hnial le? Anmahni ang bawkin keini pawh Lalpa Isua khawngaihna avânga chhandam tûr niin kan inring si a,” a ti a. Tichuan, mipui zawng zawng chu an ngawi ta a, Barnaba leh Paula chuan anmahni hmanga Jentail-te zînga chhinchhiahna leh thil mak Pathianin a tihte an sawi chu an ngaithla ṭhuap a. An ngawih tâk hnu chuan Jakoban a sawi ve a, “Unaute u, ka thu hi ngaithla rawh u. Sumeona khân Pathianin Jentail-te ngaihsakin ama hming pu tûra an zînga mi a lâk chhuah ṭan thu a sawi a. Chu thu leh zâwlnei thu ziak hi a inrem a ni: ‘Chûng hnu chuan ka kîr leh ang a, Davida bâwkte chim kha ka tungding leh ang; A chhe laite ka siam ṭha ang a, ka din thar leh ang. Tichuan, mi dangte pawhin Lalpa an zawng ang a, Jentail ka hming pu zawng zawngte nên. Hmasâng aṭanga hêng thu hriattîrtu Lalpa chuan a ti a ni,’ tih hi. “Chuvângin, hetiang hian ti ila ka ti a ni: Jentail-te zînga Pathian thu awihte chu tibuai lo ila; milem biakna thil bawlhhlawh laka inthiarfihlîm tûr te, inngaih bânsana, sa rehhlum sa leh sa thisen ei lo tûrin lehkha i thawn zâwk ang u. Mosia Dân chu hmasâng aṭangin khaw tinah an puang a, sunagog-ah te sabat ni apiangin an chhiar ṭhîn,” a ti a. Tichuan, tirhkohte leh upate chuan, kohhran mi zawng zawng nên, an zîng ata mi thlan chhuaha, Paula leh Barnaba ruala Antiokeia tirh nghâl ṭhain an hria a. Juda, Barsaba an tih leh Sila an thlang a, anni chu unaute zînga hruaitu deuhte an ni. Hetiang hian lehkha an ziak a, an kentîr a: “Tirhkohte leh upate leh in unaute hian, Antiokeia mi te, Suria rama mi te, leh Kilikia rama Jentail unau awmte chu chibai kan bûk e. Kan zînga mi ṭhenkhat in hnêna lo kalin, kan thu hmu si lovin an tibuai che u a, in rilru an timangang tih kan lo hria a. Kan duh tak Barnaba leh Paula, kan Lalpa Isua Krista hming avânga thih huamte rual hian, thukhat vuain, kan aiawh kan thlante in hnêna rawn tirh ṭhain kan hria a. Tichuan, Juda leh Sila hi kan rawn tîr a ni; anni pawhin hêng thu bawk hi ṭawngkain an hrilh ang che u. Thlarau Thianghlim leh keinin hêng thil pawimawh zual lo hi chu in chungah phurrit dang nghat lo ila ṭhain kan hria. Milem biakna thil ei lo ula, sa thisen leh sa reh hlum sa ei lo ula, inngaih bânsan bawk ula kan ti: hêng thil lakah hian in inthiar fihlîm chuan in tân a ṭha ang, Dam takin,” tiin an ziak a. Tichuan, an kaltîr ta a, Antiokei an thleng thla a, mipui an ko khâwm a, lehkha chu an pe a. An han chhiar a, fuihna thu avâng chuan an lâwm ta hle a. Juda leh Sila chu zâwlnei an ni bawk a, unaute chu thu tam takin an fuih a, an tinghet a. Rei fe an châm hnuin, anmahni tîrtute hnêna thlamuang taka kîr leh tûrin unaute chuan an hâwntîr ta a. Paula leh Barnaba erawh chu Antiokei-ah chuan mi dang tam takte nên an awm ta reng a, Lalpa thu an hril a, an zirtîr ṭhîn a. Ni eng emaw zât hnuah chuan Paulan Barnaba hnênah, “Kal leh ila, Lalpa thu kan hrilhna khaw tina unau awmte kha tlawh ila, engtin nge an awm tâk i kan teh ang,” a ti a. Barnaba chuan Johan Marka kha hruai leh a duh a. Paula erawh chuan, Pamfulia ram aṭanga anmahni a kîrsana, an hnathawhnaa a kal ve zêl tâk loh avâng khân ani chu hruai leh mi niin a ngai lo va. Tichuan, hmaisen khawpa an inhnial tâk avângin anni pawh chu an lo inṭhen ta a. Barnaba chuan Marka chu a hruai a, Kupra thliarkâr lamah lawngin an kal ta a. Paula erawh chuan Sila a thlang a, unauten Lalpa khawngaihnaa an kawltîr hnuin an zin chhuak ve ta a. Suria ram leh Kilikia ram chu an fang chhuak a, kohhran mite chu an tinghet zêl a. Derbe khua tlawhin Lustra an thleng a, chutah chuan zirtîr pakhat Timothea a awm a, a nu chu ringtu Juda a ni a, a pa erawh chu Grik mi a ni. Lustra leh Ikonion-a unaute chuan ani chu an fak hle a. Paulan zinpui atân a duh a, a pa chu Grik mi a ni tih an hre vek a, chûng lai vêla Juda-te avâng chuan a serh a tansak a. Khaw tinah an kal pahin Jerusalem-a tirhkohte leh upate thu rêl kha zâwm tûrin an hrilh zêl a. Tichuan, kohhran mite chu rinnaah an tinghet a, ni tin an pung deuh deuh a. Asia rama thu hril lo tûrin Thlarau Thianghlimin a tih avângin Frugia leh Galatia inrina lai vêl chu an fang chhuak a. Musia ramri an thleng a, Bithunia rama luh an tum a, chu pawh chu Isua Thlarauvin a phal lo va. Tichuan, Musia ram chu an kal tlang a, Troas khua an thleng thla a. Paulan zânah inlârna a hmu a, Makedonia rama mi pakhat dingin, “Makedonia ramah lo kai la, min pui rawh,” tiin a lo ngên a. Chu inlârna chu a hmuh zawh chuan Makedonia rama kal kan tum ta nghâl a, an hnêna Chanchin Ṭha hril tûrin Pathianin min ko niin kan hre ta a. Troas aṭang chuan lawngin kan chhuak a, tluang takin Samothraki khua kan thleng a, a tûkah Neapolis khua kan thleng leh a. Chuta ṭang chuan Filipi khuaah kan kal a. Chu khua chu Makedonia ram bial khaw pawimawh tak, Rom sawrkâr khua a ni. Chutah chuan ni eng emaw zât kan châm a. Sabat ni chuan kulh kawngkhâr pâwn lui kamah ṭawngṭaina hmun nia kan rinah chuan kan kal a; hmeichhe lo kal khâwmho hnênah chuan ṭhuin thu kan sawi a. Thuatira khuaa mi nu pakhat, Ludi, Pathian ṭih, puan senduk zuartu chuan kan thu sawi a ngaithla ve a. Paula thusawite zâwm tûrin Pathianin a rilru a hawnsak a. A chhûngte nên baptisma an chang a, “Lalpa ring takzeta mi ruat chuan, ka inah lo thleng rawh u,” tiin min ngên a, min chelh ta a. Ni khat chu ṭawngṭaina hmuna kan kal lai chuan bawih nula pakhat, ramhuai pai, aien thiam hian min tâwk a. A aien thiam chu a pute chuan an hlâwkpui hle a. Chu mi chuan Paula leh keini chu min zui a, “Hêng mite hi Pathian Chungnungbera bawihte an ni a, chhandamna kawng an rawn hrilh che u a nih hi,” tiin a au a au va. Chutiang chuan ni tam tak a ti a, Paula chuan a ngaithei ta lo va, a hawi a, ramhuai hnênah chuan, “Isua Krista hmingin thu ka pe a che; a kawchhûng ata lo chhuak rawh,” a ti a. Chutih lai tak chuan a lo chhuak ta nghâl a. A pute chuan an sum hnâr a chat ta tih an hriatin Paula leh Sila chu an man a; hotute hmaah, vântlâng pun khâwmnaah chuan an hnûk lût a. Tichuan, rorêltute hnênah an hruai a, “Hêng mite hi Juda an ni a, kan khua an rawn tibuai a ni. Keini Rom mite zawm ve leh tih ve thiang lo dân dang an hril a ni,” an ti a. Tichuan, mipuite pawh chu tirhkohte bei tûrin an lo thawk ve a; rorêltute chuan an kawrte an hlihsak a, tianga vuak thu an pe a. An vuak nek hnuah tân inah an khung a, vêngtu hnênah chuan anni chu him taka vêng tûrin thu an pe a. Chuti taka thu an pêk khauh avâng chuan anni chu tân in chhûngrilah a khung a, an keahte thing kawl a buntîr a. Zânlai vêlah chuan Paula leh Sila chu Pathian hnênah an ṭawngṭai a, hla an sa a, mi tângten an ngaithla a. Thâwklehkhatah lîr nasa takin a lo nghîng a, tân in lungphûmte lamin a nghîng a, kawngkhâr zawng zawngte a inhawng a, tângho kawl bunte pawh chu a inphelh nghâl ta vek a. Tân in vêngtu chu a lo harh a, mi tângte chu an tlân chhuak ta vek emaw a ti a, a ngûnhnâm a phawi a, intihhlum a tum a. Paula chu ring takin a au va, “Eng mah intih suh, kan za-in hetah kan la awm vek alâwm,” a ti a. Chu veleh êng a lam a, a zuang lût a, hlauva khûr chungin Paula leh Sila hmaah chuan a bawkkhup a. Anni chu pâwnah a hruai chhuak a, “Pute u, chhandam ka nih theih nân eng nge ka tih tûr?” a ti a. Anni chuan, “Lalpa Isua ring la; tichuan, chhandam i ni ang, nang leh i chhûngte nên,” an ti a. Amah leh a ina awm zawng zawng chu Lalpa thu an hrilh a. Chumi zân, chumi dârkâr la la chuan Paula te chu a hruai a, an vuakna hliamte chu a silsak a, an chhûngin baptisma an chang ta nghâl a. Tin, a inah a hruai a, ei tûr a hlui a, Pathian an rin tâk avângin an chhûngin an hlim ta êm êm a. A tûk zîngah rorêltuten, “Kha mite kha chhuah rawh,” tia hrilh tûrin tân in vêngtu hnênah pulis an tîr a. Tân in vêngtu chuan an thu chu Paula a hrilh a, “Rorêltute chuan chhuah tûr che uin mi an rawn tîr a, tûnah lo chhuak ula, thlamuang takin kal rawh u,” a ti a. Nimahsela, Paula chuan an hnênah, “Rom mi kan ni a, thiam loh chang pawh kan ni si lo va, vântlâng hmuhin min vua a, tân inah min khung a. Tûnah a rûkin min chhuah an tum vei em ni? A ni tawp lo vang, anmahni ngei lo kal sela, min va hruai chhuak rawh se,” a ti a. Pulis-te chuan chûng thu chu rorêltute an va hrilh a. Rom mi an ni tih an hriat chuan an hlau ta a. An va kal a, thupha an chawi a, an hruai chhuak a, an khua ata kal chhuak tûrin an ngên a. Tichuan, tân in ata chu an chhuak a, Ludi inah an kal a, unaute chu an hmuh chuan an thlamuan a, an chhuak ta a. Tin, Amfipoli leh Apolonia khua an kal tlang a, Thesalonika khua an thleng a, chutah chuan Juda-te sunagog a awm a. Paula chu a tih dân pângngaiin a inkhâwm ve a; sabat vawi thum Lehkha Thu aṭangtea chhuipuiin, Krista chu thihna tuar tûr a nihzia leh mitthi zîng ata tho leh tûr rêng a nihzia hrilh fiahin a kawhhmuh ṭhîn a. “He Isua, a chanchin kan hrilh che u hi, Krista chu a ni e,” a ti a. Tichuan, an zînga mi ṭhenkhatin an ring a, Paula leh Sila chu an pâwl ve ta a. Pathian ngaihsak Grik mi tam tak leh miliannu ṭhahnem takin an zui bawk a. Juda-te chuan an îtsîk êm êm a, khawlaia mi sual tei mai maite chu an khâwm a, a khuain an chawk buai a, tirhkohte chu vântlâng hmaa hruai chhuah tumin Jasona in an rawn ṭhâwng a. Anni chu an hmu lo va, Jasona leh unau ṭhenkhatte chu khaw hotute hnênah an hnûk lût a, “Khawvêl chawk buaitute kha hetah pawh an lo kal a, Jasona hian a lo thleng vei a. Hêngho hian an za-in, ‘Isua, lal dang a awm,’ tiin Kaisara thu kalhin thil an ti ṭhîn a ni,” tiin an au va. Chûng thu chuan khaw hotute leh mipui chu a tibuai hle a. Jasona leh mi dangte hnên aṭangin an aia hrên tûr thil an la a, an chhuah ta a. Unaute chuan a zân a zânin Paula leh Sila chu Beroia khuaah an kaltîr ta vat a. An va thlen chuan Juda-te sunagog-ah an inkhâwm a. Anni chu Thesalonika mite ai chuan an lo inhawng zâwk a. Châk takin thu an dawng a, an thu sawi chu a dik leh dik loh fiah nân ni tin Lehkha Thute an chhiar ṭhîn. An zînga tam takin an ring ta a, Grik miliannu te leh mipa tam tak pawhin an ring ta bawk a. Nimahsela, Thesalonika khuaa Juda-ten Paulan Beroia khuaah pawh Pathian thu a hril tih an hriat chuan, an lo kal a, mipui an fuihpawrh a, an tibuai leh ta a. Chutichuan, Paula chu tuipui thlengin lawnga kal tûrin unaute chuan an hruai ta nghâl a. Sila leh Timothea erawh chu an la châm zêl a. Paula hruaitute chuan Atheni khua an hruai thleng a, Sila leh Timothea chu Paula chuan a rang thei ang bera a hnêna lo kal tûrin a chah a, an haw leh ta a. Paulan Atheni-ah a lo nghâk a, chu khua chu pathian limin a khat tih a hmuh chuan a vei ta êm êm a. Tichuan, sunagog-ah Juda-te leh Pathian ngaihsakte chu Pathian thu a chhuipui ṭhîn a, vântlâng punkhâwmnaa lo kalte pawh a hmuh apiang ni tin thu a sawipui bawk ṭhîn. Tin, Epikuria mi ṭhenkhat leh Stoik mi fing ṭhenkhatte pawhin an rawn hnial a, “He bengchhengpa hian eng nge a sawi?” an ti a. Isua thu leh thawhleh thu a sawi avângin a ṭhen chuan, “Hnam dang pathiante thuhriltu a ni âwm e,” an ti a. Tichuan, an hruai a, Areopagi-ah chuan an kalpui a. “He zirtîrna thar i sawi hi eng nge a nih kan ngaithla thei ang em? Kan beng hriatah thil danglam tak i rawn sawi a, chûng thil awmzia chu hriat kan duh e,” an ti a. Atheni mi zawng zawng leh mikhualte pawh thil dang ti lo lêkin thil thar sawi leh ngaihthlâk an chîng ṭhîn rêng a. Paula chu Areopagi-a mite hmaah chuan a ding a, a sawi a: “Nangni Atheni khaw mite u, engkimah sakhaw mi tak in ni tih ka hria. Ka lên paha chibai in bûkate ka en laiin maichâm pakhat, a chunga, ‘Hriat loh Pathian tân, tia ziak ka hmu a. Hre lova chibai in bûk ṭhina thu chu keiin ka rawn hrilh che u a ni. Pathian, khawvêl leh a chhûnga thil awm zawng zawng siamtu chu, lei leh vân lal a nih avângin, kuta sak tempulahte a awm lo va. Thil tlachhama mihringte kuta rawngbâwlsak ngai lah a ni hek lo; amah ngei chu engkim hnêna nunna te, thâwkna te leh thil zawng zawng petu a ni zâwk si a. Lei chung hmun tina awm tûrin thlahtu pakhat aṭangin hnam tin a din a, an tân hun bi te a thliahsak a, an awmna tûr rite pawh a khamsak a. Pathian an zawna, an dap an dapa, an hmuh fuh hlauh theih nân a ti a ni; ani chuan min hlat lo ṭheuh si a. ‘Amah avângin kan nung, kan che, kan awm a ni si a,’ tia an sawi ang khân. Nangni zînga hla phuahtu ṭhenkhat pawhin, ‘Keini pawh a thlahte kan ni,’ tia an sawi ang kha a ni. Tichuan, Pathian thlahte kan nih si chuan, Pathian chu rangkachak emaw, tangkarua emaw, lung emaw, mihring themthiam leh remruata chherte ang emaw hi ni-ah kan ngai tûr a ni lo. Chutianga Pathian kan hriat loh laite kha ani chuan a haider a; mahse, tûnah hian hmun tina mi sim tawh tûrin a ti a ni. Khawvêl pum pui hi dik taka ro a rêlsak hun tûr nî a ruat fel tawh a; a rêltu tûr pawh a ruat tawh: mi tin hriat atân chu mi chu mitthi zîng ata a kai tho a ni,” a ti a. Mitthi zîng ata thawhlehna thu an hriat chuan, a ṭhenin an nuihzat a, a ṭhenin, “He thu hi ngaihthlâk leh kan duh e,” an ti a. Tichuan, Paula chu an zîng ata a chhuak ta a. Paula chu an zui zêl a, an ring ta a. Chûng zîngah chuan Areopagi rorêltu zînga mi Dionusia te, hmeichhe pakhat Damari te leh mi dang tam tak pawh an tel a. Chûng hnu chuan Paulan Atheni a chhuahsan a, Korinth khuaah a kal ta a. Juda mi pakhat Akuila a hmu a, ani chu Ponto rama piang a ni. Rom lal Klaudian Juda zawng zawng Rom khua ata a hnawh chhuah avângin a nupui Priskili nên Itali ram aṭanga lo thleng hlim an ni. An hnênah a lêng a, a hna thawh ang thawk ve an nih avângin a thlen chilh a, a thawhpui ve ṭhîn a; puan in an siam ṭhîn a ni. Sabat ni apiangin sunagog-ah thu a sawi a; Juda-te leh Grik-te chu rintîr tumin a bei ṭhîn a. Sila leh Timothea chu Makedonia ram aṭanga an lo thlen thlâk chinah chuan Paula chu thuhril hnaah a inpumpêk ta a; Isua kha Krista chu a ni tih Juda-te hnênah a hrilh fiah ṭhîn a. Nimahsela, Juda-ten an dodâl a, an sawichhiat tâkah chuan Paulan a puan a thing a, “In boral pawhin nangmahni mawh a ni ta e, kei zawng ka thiang ta. Tûn achinah chuan Jentail-te lam ka hawi tawh ang,” a ti a. Chuta ṭang chuan a kal chhuak a, mi pakhat, Tita Justa inah a lût a, ani chu Pathian ngaihsak tak a ni a; a in pawh sunagog bula awm a ni. Sunagog hotu Krispa leh a chhûngte zawng zawngin Lalpa an ring a. Korinth khuaa mi tam tak pawhin an hria a, an ring a, baptisma an chang ta a. Zan khat chu Paulan inlârna a hmu a, Lalpa chuan a hnênah, “Hlau suh, ngawi lovin thu sawi zêl rawh. Kei i hnêna ka awm avângin tina tûr chein tu man i chungah kut an lek lo vang, he khuaah hian mi tam tak ka nei si a,” a ti a. Paula chu an zîngah Pathian thu zirtîrin kum khat leh thla ruk a awm ta a. Galiova chu Akaia ram awptu a nih laiin Juda-ten inthurualin Paula an beih rawn a, rorêlnaah an hruai a. “He mi hian kan Dân kalh zâwnga Pathian be tûrin mi a thlêm ṭhîn a ni,” an ti a. Paula chuan chhân a han tum a; mahse, Galiova chuan Juda-te hnênah, “Aw Juda-te u, he thil hi thu chhia emaw, thil sual tih thu emaw ni se, in thu ka lo ngaithla tûr. Nimahsela, thu leh hmingte leh in Dân chungchânga in buaina thu mai a nih chuan, nangnin ngaihtuah rawh u. Kei zawngin chutiang thil chu ka ngaihtuah duh lo ve,” a lo ti a. Rorêlna in aṭang chuan a chhuahtîr ta a. Mahse, mi dang zawng zawng chuan sunagog in hotu Sosthena chu an man ta a, rorêlnaah chuan an vua a. Chu pawh chu Galiova chuan engah mah a ngai lo va. Paula chu ni rei tak a la châm a, chumi hnu chuan unaute chu ṭha takin a ṭhen a. Suria ram lam panin lawngin a chhuak ta a, a rual chuan Priskili leh Akuila te pawh an kal ve a. Paulan thutiam a neih avângin Kenkriai khuaah a lu a mêt a. Efesi khua an thleng a, chutah chuan anni chu a hnutchhiah a. Sunagog-a kalin Juda-te chu Pathian thu a chhuipui a. Anni chuan châm deuh rih tûrin an ngên a; mahse, a remti lo va. “Pathianin rem a tih chuan in hnênah ka lo kal leh dâwn nia,” tiin ṭha takin a ṭhen a, Efesi ata chu lawngin a chhuak leh ta a. Kaisari a thleng a, Jerusalem-ah a chho ta a, kohhran mite chibai a bûk a, chumi zawh chuan Antiokei-ah a haw ta a. Rei fe a chawlh hnuin a kal leh a, Galatia ram leh Frugia ram a fang chhuak a, zirtîrho zawng zawngte chu a tinghet zêl a. Tin, Juda pakhat, Apolova, Aleksandria khuaa piang chu Efesi khuaah a lo kal a, thu sawi thiam, Pathian thu hre tak a ni. Lalpa kawng an lo hrilh tawh a, ṭhahnemngai takin Isua chanchin chiang taka sawiin mi a zirtîr ṭhîn a; mahse, Johana baptisma chauh a la hria. Sunagog-ahte pawh huai takin thu a sawi a, a thu sawi an hriat chuan Priskili leh Akuila chuan an hruai hrang a, Pathian kawng uluk takin an hrilh fiah a. Akaia rama kal a tum tih an hriat chuan unauten an lo puiha, amah an lo lawm theih nân zirtîrte hnênah lehkha an ziaksak a. A zuk thlen chuan ringtute chu Pathian khawngaihna azârah nasa takin a ṭanpui a. Vântlâng hriatin Juda-te chu a hnial dang ṭhîn a: Lehkha Thu hmangin Isua chu Krista a nihzia a kawhhmuh ṭhîn. Apolova Korinth-a a awm hlânin Paulan tlângram bial kal tlangin Efesi a lo thleng a, zirtîr ṭhenkhatte a rawn hmu a. An hnênah, “Ringtu in nih tirh khân Thlarau Thianghlim in chang em?” a ti a. Anni chuan, “Chang lo, Thlarau Thianghlim a awm tih pawh kan hre hlei nêm!” an ti a. Ani chuan, “A nih leh eng baptisma nge in chan le?” a ti a. Anni chuan, “Johana baptisma kha,” an ti a. Paula chuan, “Johana khân sim entîr nân baptisma a chantîr ṭhîn a, a hnunga lo kal tûr Isua chu lo ring tûrin Israel mite a hrilh ṭhîn a nih kha,” a ti a. Chu chu an hriatin Lalpa Isua hmingin baptisma an chang ta a. Chutia Paulan an chunga kut a nghah lai chuan Thlarau Thianghlim an chungah a lo thleng a, ṭawnghriatlohvin an ṭawng a, Pathian thu te an sawi ta a. An vaiin patling sâwm leh pahnih lai an ni. Paula chu sunagog-ah a inkhâwm ṭhîn a, thla thum lai huai takin thu a sawi a; Pathian ram thu a chhuipui a, hmin a tum hlawm a. Ṭhenkhat erawh chu an khauh hle a, an ring duh lo va. Mipui hmaa kawng thu an sawichhiat tâkah chuan a kalsan a, zirtîrhote chu a hruai hrang a, ni tin, Turana sikulah Pathian thu a chhuipui ṭhîn a. Chutiang chuan kum hnih lai a ti a; chuvâng chuan, Asia rama mi zawng zawng, Juda-te leh Grik-te chuan Lalpa thu an hre ta a. Pathianin Paula kut hmangin thil mak tam tak a ti ṭhîn a. Chutichuan, a inhrûkna leh a puan sin lai te chu damlote hnênah an keng a, an lo dam ta a, an kawchhûng ata ramhuai bawlhhlawhte pawh an chhuak a. Tin, thiam zuara vâk vâk Juda ṭhenkhatten, “Paula hril ṭhin Isua hmingin chhuak tûrin thu kan pe a che,” tiin ramhuai paite chungah Lalpa Isua hming an lam vei ṭhîn a. Juda puithiam lal pakhat Skeva chuan chutiang ti ve ṭhîn fapa pasarih a nei a. Ramhuai bawlhhlawh chuan an hnênah, “Isua ka hria, Paula pawh ka hria e; nangni hi tute nge maw in nih le?” a ti a. Ramhuai bawlhhlawh pai chuan anni chu a zuan a, an za chuan a hneh ta a; a sawisa a, chu in aṭang chuan saruak leh hliam phungin an tlân chhuak ta a. Chu thu chu Efesi mi zawng zawng, Juda-te leh Grik-ten an lo hriat chuan an za-in an hlau va, Lalpa Isua hming chu an chawimawi ta a. Ringtute zînga tam tak chuan an sual rawn inpuangin an thil lo tih ṭhinte an sawi chhuak a. Dawithiam tam tak pawhin an lehkhabute an rawn la khâwm a, mi zawng zawng hmaah an hâl a, a man an chhût a, chêng sîng nga niin an hria. Chuti kauva nasa chuan Lalpa thu chu a darh a, a hneh ta zêl a. Chûng hnuah chuan Paulan Makedonia ram leh Akaia ram fan chhuah zeta, Jerusalem-a kal a rilrûk a. “Chuta ka kal zawhah Rom khua pawh ka tlawh bawk tûr a ni,” a ti a. Makedonia lamah chuan amah puitu pahnih, Timothea leh Erasta chu a kaltîr a, ani erawh chu Asia ramah chuan a la awm ta rih a. Chûng lai chuan Kawng avângin an buai ta êm êm a. Demetria, tangkaraw chher mi, tangkaruaa pathiannu Artemi Tempul lem siamtu chuan mi themthiam tam tak a ruai ṭhîn a, an hlâwk êm êm a. Anni chu an thawh ang thawk ve mi dangte nên a ko khâwm a, an hnênah, “Pute u, he hna hi kan sum hnâr a ni tih in hria a. Efesi-ah chauh hian ni lovin, Asia ram zawng zawng deuhthawah he Paula hian, ‘Kuta siam pathiante chu Pathian an ni lo ve,’ tiin mipui tam tak a hneh a, a hruai kawi zo ta tih nangni ngeiin in hmuin in hre bawk a. Tichuan, kan hna thawh hi a lân ang tih a hlauhawm chauh a ni lo va, pathian ropui tak Artemi Tempul hi miten an rawn ngainêp ang a, Asia ram pum leh khawvêlin an biak ṭhin hi, a ropui tehlul nên, a tlâwm ang tih a hlauhawm bawk a ni,” a ti a. Chûng thu chu an hriat chuan an thin a rim ta êm êm a, “Efesi-a Artemi hi ropui tak a ni,” tiin an au va. Tichuan, a khuain an buai ta a, Gaia leh Aristarka, Makedonia ram mi, Paula zinpuite chu an man a, inthurualin ennawm siamna hmunah an tlânpui a. Paulan mipui zînga zuan luh ve a tum a; mahse, zirtîrhoten an phal lo va. Asia ram hotu liante zînga ṭhenkhat chu Paula ṭhiante an ni a, anni pawh chuan mi an rawn tîr a, ennawm siamna hmuna kal ve lo tûrin an rawn ngên bawk a. Mipuite lah chu a ṭhen thu khatin an au va, a ṭhen thu dangin an au va, an kal khâwm chu an buai zo ta a, mi tam tak phei chuan an inkhâwm chhan pawh an hre lo va. Juda-te chuan Aleksandara chu hma lamah an nawr phei avângin mipui zînga ṭhenkhat chuan amah avâng emaw an ti a. Aleksandara chuan ngawi tûrin kutin a han zâp a, mipui hnênah chuan an thiam thu sawi a tum a. Nimahsela, ani chu Juda a ni tih an hriat veleh, dârkâr hnih dâwn lai, “Efesi-a Artemi hi ropui tak a ni,” ti hlîrin an au ta dual dual a. Khawpui ziaktu chuan mipuite a ngawihtîr hnu chuan, “Efesi mite u, Artemi ropui tak leh a lim thianghlim vân aṭanga lo tla Tempul enkawltu chu Efesi khaw mite hi in nih tu nge hai awm? Hêng thil hi hnial rual a nih loh ahnu, ngawi ula, thu hnu dâwn lovin eng mah ti suh u. Hêng in mi rawn hruaite hi Tempul rawk hmang an ni lo va, kan pathiannu sawichhetu lah an ni hek lo. Demetria leh a ṭhianten tu lakah pawh thu pawi an neih chuan thubuai sawina a inhawng reng a, Ramawptute pawh an awm a, an thubuai chu rawn thlen ang hmiang. Chu bâk sawi tûr in neih chuan inkhâwm pângngaiah sawi fel tûr a ni. Vawiin thil hi hel tuma buaina siamah min puh pawh a hlauhthâwnawm alâwm, kan pun khâwm chhan sawi tûr mumal pawh kan hre si lo,” a ti a. Chûng thu a sawi zawh chuan pungkhâwmte chu a ṭîntîr ta a. Buai chu a reh hnuin Paulan zirtîrte a ko khâwm a, a fuih a, chibai a bûk a, Makedonia rama kal tûrin a chhuak ta a. Chu ram chu a fang chhuak a, zirtîrhote chu nasa taka a fuih zawhin Grik ram a thleng ta a. Thla thum a thang hnu chuan Suria ram lama lawnga haw an tum a; nimahsela, Juda-ten thah an tum avângin Makedonia ram tlawh kual zâwnga haw a tum leh ta zâwk a. Pura fapa Sopatera, Beroia khaw mi te, Thesalonika khaw mi Aristarka leh Sekunda te, Derbe khaw mi Gaia te, Timothea te, Asia rama mi Tukika te leh Trofima ten an zui a. Chûngho chu an kal hmasa a, Troas khuaah min lo nghâk a. Keini pawh Chhang dawidim telh loh Kût zawhah chuan Filipi khua aṭangin lawngin kan chhuak a, ni nga hnuah Troas kan thleng ve a, chutah chuan ni sarih kan châm a. Pathiannia chhang phel tûra kan inkhâwmin, Paula chuan a tûka kal a tum avângin an hnênah thu a sawi a, zanlai thlengin a sawi a. In chhâwnga pindan kan inkhâwmnaah chuan khâwnvâr tam tak a awm a. Tlangvâl pakhat, Eutuka an tih chu, tukverhah a ṭhu a, Paulan thu a sawi rei tâk êm avângin a mut a chhuak ta hle a, a muthlu a muthlu a; in chhâwng thumna aṭang chuan a tla ta a, thi-in an chhar a. Paula chu a tlân thla a, a bawh a, a pawm a, “Thlaphâng teh suh u, a la nung e,” a ti a. An kal chho leh a, chhang an phel a, a ei a, rei tak, khawvâr thleng zakin thukhawchâng a sawipui a; tichuan, a kal chhuak ta a. Tlangvâl chu damin in lamah an hruai hâwng a, an thlamuang ta êm êm a. Keini chu Asso khaw panin lawngin kan lo kal hmasa a, Paula chuan kea lo kal a tum avângin Asso khuaah lawnga lo chuantîr kan tum a, chu chu ama remruat dân a ni. Asso khuaa min rawn fin chuan lawngah a lo chuang ve a, Mitulene khua kan thleng a. Chuta ṭang chuan lawngin kan kal leh a, a tûkah Kio thliarkâr zâwn kan thleng a, a tûk lehah Samo thliarkâr kan lût a, a tûk lehah chuan Mileto khua kan thleng ta a. Paulan Asia rama a awm rei loh nân Efesi chu lawnga kal pelh a tum a, a theih chuan Jerusalem-ah Pentikos Kût hman a tum a, a kal hmanhmawh deuh a ni. Mileto aṭang chuan Efesi-ah mi a tîr a, kohhran upate a kohtîr a. An lo thlen chuan an hnênah, “Asia ram ka luh tirh ni aṭangin in hnêna ka awm chhûng zawnga ka awm dân kha in hria e. Juda-ten mi phiar avânga hrehawm mi delhtu phur chungin, thuhnuairawlh tak leh mittui nên Lalpa rawng ka bâwl ṭhin kha. In tâna sâwt tûr chu eng mah zêp lovin, vântlâng zîngah leh inahte ka hrilh ṭhîn che u a, ka zirtîr bawk ṭhin che u kha. Juda-te leh Grik-te hnênah pawh, sima Pathian lam hawi tûr leh kan Lalpa Isua ring tûrin urhsûn takin thu ka hril ṭhîn. Tûnah hian hre rawh u; Thlarauvin mi tirh tlat avângin Jerusalem-ah ka kal dâwn a, chutah chuan ka chunga thil lo thleng tûr chin ka hre lo ve. Amaherawhchu, Thlarau Thianghlimin lung in tân leh hrehawm tuar ka hmabâk tih chauh khaw tinah mi hrilh ṭhîn. Lalpa Isua hnên ata ka hmuh rawngbâwl hna thawh tûr ka hmabâk, Pathian khawngaihna Chanchin Ṭha puan darh tûr hi ka hlen theih phawt chuan, ka nun pawh hi thlâkhlelh tûrah ka ngai lo. Tûnah hian hre rawh u, nangni zawng zawng, Pathian ram thu hrila ka vah ka vah ṭhinnate hian ka hmêl in hmu leh tawh lo vang tih ka hria e. Chuvângin, mi zawng zawng thisenah ka fihlîm tih vawiin hian ka hriattîr a che u. Pathian remruat dân zawng zawng eng mah zêp lovin ka hrilh vek tawh che u kha. Pathian kohhran, ama tâna thisena a lei chu châwm tûrin nangmahni leh in berâmte tân fîmkhur rawh u; Thlarau Thianghlimin an chunga hotu-ah a dah che u hi. Ka kal hnuin chinghne kawlhte in zîngah an lo lût ang a, berâmte chu an zuah lo vang tih ka hria. Nangni zînga mi ngei pawh hi zirtîrhote mahni lama ṭantîr tumin thu hran sawi in la awm ang. Chuvângin, invêng ngun rawh u, kum thum meuh a chhûn a zâna mittui nên mi tin ka zilh ṭhin che u kha hre reng rawh u. Tûnah hian Pathian hnênah leh a khawngaihna thu-ah ka hlân a che u; chu chuan a tipuitling thei che u a, mi thianghlimte zîngah rochan a neihtîr thei bawk ang che u. Tu ma tangka emaw, rangkachak emaw, silhfên emaw ka awh ngai loh kha. Hêng kutte hian keimah leh ka ṭhiante mamawh a thawh chhuah ṭhin kha nangmahni ngeiin in hria e. Chutianga thawkrimin mi chak lote in ṭanpui tûr a ni tih kawng engkimah ka tihhmuh ṭhin che u kha; kan Lalpa ngeiin, ‘Lâk aiin pêk a hlâwk zâwk,’ a tih kha hre reng rawh u,” a ti a. Chûng thu a sawi zawh chuan an za-in a ṭhingṭhitpui a, an ṭawngṭai a. An vaiin an ṭap ta a, Paula nghâwngah an kuah a, an fâwp ngawih ngawih a. An lung tichhetu ber chu a hmêl an hmuh leh tawh loh tûr thu a sawi chu a ni. Tichuan, lawng thlengin amah chu an thlah ta a. Kan inthlah fel hnu chuan lawngin kan chhuak a, ngîl takin Kaw thliarkâr kan thleng a, a tûkah Rodo thliarkâr kan thleng a, chuta ṭang chuan Patara khua kan thleng a. Foiniki rama kal tûr lawng pakhat kan hmu a, kan chuang a, kan kal leh ta a. Kupra thliarkâr kan hmu a, vei lamah kan pêl a. Suria ram panin Tura khua kan thleng a, chutah chuan lawng bungrua thiar chhuah tûr a ni. Zirtîrhote kan zawng chhuak a, an hnênah ni sarih kan châm a, anni chuan Thlarauvin a hrilh anga Paula chu Jerusalem-a kal lo tûrin an ti a. Nimahsela, chûng zawhah chuan kan chhuak a, kan kal chu zirtîrte chuan an vaiin, an nupui fanaute nên kawtchhuah thlengin min thlah a, tuipui kamah chuan kan ṭhingṭhi a, kan ṭawngṭai a. Chibai kan inbûk a, lawngah kan chuang a, anni chu in lamah an haw leh ta a. Tura aṭang chuan lawngin Tolemai khua kan thleng a, unaute chibai kan bûk a, an hnênah ni khat kan châm a. A tûkah kan chhuak leh a, Kaisari khua kan thleng a, Chanchin Ṭha hriltu Filipa inah kan lût a; ani chu upa pasarihte zînga mi kha a ni. A inah kan thleng ta a. Fanu, nula thianghlim pali a nei a, Pathian thu an hril ṭhîn a. Ni rei tak kan châm a, kan châm chhûng chuan Judai ram aṭangin zâwlnei pakhat Agaba a lo chhuk a. Kan hnênah a lo kal a, Paula kâwnghrên chu a la a, a ke leh a kut a inphuar a, “Jerusalem-a Juda-ten hetiang hian he kâwnghrên neitu hi an phuar ang a, Jentail-te kutah an pe ang, Thlarau Thianghlimin a ti a ni,” a ti a. Chûng thu chu kan hriatin keini leh chu khuaa mite chuan Paula chu Jerusalem-a kal lo tûrin kan ngên chiam a. Paula chuan, “Engtizia nge in ṭah in ṭaha, mi tihlungchhiata mi tihzâm in tum? Lalpa Isua hming avâng chuan Jerusalem-a phuar chang ka huam hlei nêm, thih pawh ka huam asin,” tiin min chhâng a. Thlêm thlûk rual a nih loh ahnu chuan, ‘Lalpa thu thu ni rawh se,’ kan ti a, kan bâng ta a. Chûng hnuah chuan kan insiam a, Jerusalem-ah kan chho ta a. Kaisari khuaa zirtîr ṭhenkhatten min zui a, kan thlenna tûr Nasona inah min hruai a; ani chu Kupra thliarkâra zirtîr hmasate zînga mi a ni. Jerusalem kan thlen chuan unauten hlim takin min lo lâwm a. A tûkah chuan Paula hovin Jakoba hnênah kan lêng a. Kohhran upa zawng zawng pawh an lo awm a. Paulan anni chu chibai a bûk zawhin a rawngbâwlna hmanga Pathianin Jentail-te zînga thil a tih apiang chu kimchang takin a hrilh a. Unaute chuan chûng thu chu an hriatin Pathian an fak a. Paula hnênah chuan, “Unaupa, Juda-te zîngah ringtu an tam tâkzia i hmu a, kan Dân ngaina tak vek an ni si a. Nangin Jentail-te zînga Juda awm zawng zawng chu Mosia Dân bânsana, an fate serh tan lo tûr leh Juda-te dân zâwm lo tûrin i zirtîr ṭhîn tih mi sawi an hria a ni. Engtin nge ni ta ang le? I lo thleng tih an hre ngei dâwn si a. Tichuan, i hnênah kan sawi ang hian ti ta che: Thutiam nei lai kan zîngah mipa pali an awm a. Chûng mite chu hruai la, an zîngah inthian ve la, lu an meh man tumsak rawh; tichuan, mi zawng zawngin i chanchin an hriat hi dâwt a ni a, nangmah ngei pawh Dân zâwmin Dân ang takin i la awm zêl zâwk a ni tih an hre dâwn nia. Jentail-te zînga ringtute chungchâng thu zawng, milem biakna thil ei lo tûr te, sa thisen ei lo tûr te, sa reh hlum sa ei lo tûr te leh, inngaih bânsan tûra kan thu rêlte kan thawn kha,” an ti a. Tichuan, a tûkah Paulan chu mite chu a hruai a, an rual chuan a inthian ve ta a. Tin, Tempulah a lût a, an inthen zawh hun tûr ni leh an hming kima inthawina a hlansak hun tûr ni puithiam a hriattîr a. Ni sarih a tlin dâwn ruaiin Asia rama Juda-ten Paula chu Tempulah an hmu a. Mipui zawng zawng an fuihpawrh a, Paula chu an man ta a. “Israel mite u, min pui rawh u. He mi hi kan chi te, kan Dân te leh he hmun kalh zâwnga ram tina mi zawng zawng zirtîr ṭhîna kha a nih hi, tûnah pawh Tempulah hian Grik mite a luhpui a, he Hmun Thianghlim hi a tibawlhhlawh a ni,” an ti a. Efesi khaw mi Trofima chu khawpuiah amah nên an hmuh hmasak tawh avângin, Paulan ani chu Tempulah a hruai lût emaw an ti a ni. A khuain an buai zo ta a, mipui an lo tlân khâwm tup tup a; Paula chu an man a, Tempul ata an hnûk chhuak a, kawngte an khâr ta nghâl a. Ani chu thah an tum lai chuan Jerusalem khaw pum a buai tih sipai hotu lalberin a lo hria a. Ani chu sipaite leh sipai za hotute hruaiin an zîngah a tlân thla a. Mipui chuan sipai hotu lalber leh sipaite chu an hmuh veleh Paula vuak an bâng ta a. Sipai hotu lalber chuan a rawn hnaih a, Paula chu a man a, khaidiat pahnihin a hlintîr a, tu nge a niha, eng nge a tih a zâwt a. Mipui zînga a ṭhen thu khatin an au va, a ṭhen thu dangin an au bawk si a, buai avâng chuan a eng mah chu a hre chiang thei ta lo va; kulhbîng chhûngah a hruaitîr ta a. Kailâwn an thlen chuan mipuiin an bawh nasat êm avângin Paula chu sipaiten an chawi kâng a. Mipui tam takin, “Tiboral rawh u,” tia auvin an zui hum hum si a. Kulhbînga an hruai luh dâwn lai chuan Paulan sipai hotu lalber hnênah, “I hnênah thu kam khat ka sawi thei ang em?” a ti a. Ani chuan, “Grik ṭawng i thiam a ni maw? Chuti chu, Aigupta mi pakhat hmân deuhva helna chawk chhuaka mi thah chîng sângli rual thlalêra hruai chhuaktu kha i ni lo maw?” a ti a. Paula chuan, “Kei zawng, Juda mi, Kilikia rama Tarsa khaw mi ka ni, khaw narâna mi ka ni lo; khawngaih takin mipui hnênah hian thu mi sawitîr rawh,” a ti a. A remtih veleh Paula chu kailâwnah chuan a ding a, mipui chu ngawi tûrin a kutin a zâp a, an ngawi ta ṭhuap a, Hebrai ṭawngin thu a sawi ta a. “Unaute leh pute u, tûna in hnêna ka thiam thu sawi hi ngaithla teh u,” a han ti a. Hebrai ṭawngin thu a sawi tih an hriat chuan an ngawi lehzual a. Ani chuan, “Juda mi, Kilikia rama Tarsa khuaa piang ka ni; nimahsela, he khawpuia sei lian hi ka ni. Gamaliela hnênah min thlahtute Dân khermei taka zawm ka zir a, vawiina nangniho ang bawk hian Pathian tân ṭhahnem ka ngai ṭhîn a. He kawnga mite hi tihlum hial khawpin ka tiduhdah ṭhîn a, a hmei a pain ka man a, tân inah ka khung ṭhîn. Puithiam lalber leh upate rorêl ṭhu khâwm pawhin mi hriatpui alâwm. An hnên aṭangin Damaska khuaa unaute pêk tûr lehkha ka la a, chuta awmte chu hrem atân phuar chunga Jerusalem-a rawn hruai tûrin ka kal a. “Tichuan, ka kal a, Damaska ka thlen dâwn ruai chuan, chhûn lai tak a ni a, vân aṭangin êng nasa tak mai ka vêlah a lo êng ta phut a. Leiah ka tlu a, aw ka hria a, aw chuan, ‘Saula, Saula, engah nge mi tihduhdah?’ mi ti a. Keiin, ‘Lalpa, tu nge i nih?’ ka ti a. Ani chuan ‘Isua, i tihduhdah hi ka ni,’ a ti a. Ka ṭhiante chuan êng chu an hmu na a, mi betu aw erawh chu an hre lo. Tin, keiin, ‘Lalpa, eng nge ka tih ang?’ ka ti a. Lalpa chuan, ‘Tho la, Damaska-ah lût rawh, tah chuan thil engkim i tih tûra ruatte chu an lo hrilh ang che,’ a ti a. Chu êng ropui avâng chuan khua rêng ka hmu thei ta lo va, ka ṭhianten mi kai a, Damaska-ah kan lût ta a. Mi pakhat, Anania, Dân ang thlapa Pathian be mi, chu khuaa Juda zawng zawngten an fak chu ka hnênah a lo kal a, ka kiangah a ding a, ka hnênah, ‘Unau Saul, i mit lo vâr rawh se,’ mi ti a. Chu veleh ka hmu leh thei ta a, amah ka han en a. “Ani chuan, ‘Min thlahtute Pathianin a duhzâwng hriaa, Mi Feltak chu hmua, a aw ngei hre tûrin a thlang ta a che. I thil hmuh leh hriat thu-ah khân mi zawng zawng hnênah thuhretu i ni dâwn si a. Muangchâng lovin tho la, a hming lamin baptisma chang la, i sualte tlêng fai rawh,’ mi ti a. “Tin, Jerusalem-a ka haw leha, Tempula ka ṭawngṭai laiin, zêlin ka awm a. Lalpa ka hmu a, ani chuan, ‘Hmanhmawh la, Jerusalem hi chhuahsan rawh; ka chanchin i hril an pawm dâwn lo ve,’ mi ti a. Keiin, ‘Lalpa, sunagog tina lûta, nangmah ringtute ka vuaka, tân ina ka khung ṭhin kha anmahni ngeiin an hre si a. I thuhretu Stefana thisen an chhuah lai khân, kei pawh an zîngah ka ding a, ka remtihpui a, a thattute puan ka lo vênsak bawk a,’ ka ti a. Ani chuan ‘Kal rawh, hla takah Jentail-te hnênah ka tîr dâwn che a ni,’ mi ti ta a,” a ti a. Chumi a sawi thleng chuan an ngaithla a, ring takin, “Mi hetiang hrep hi khawvêl ata tiboral rawh u, nung tlâk a ni lo ve,” an ti a. An au va, an puante an hlîp a, vaivut an vawrh a. Sipai hotu lalber chuan Paula chu kulhbîngah a hruai luhtîr a, a chunga chuti taka an au chhan chu a hmuh chhuah theih nân hruihruala vuaka, dâwp tûrin thu a pe a. Vuak tûra savun hruia an phuar zawhin, Paulan a kianga ding sipai za hotu hnênah, “Rom mi, thiam loh chantîr pawh la ni si lo hi vuak a thiang em ni?” a ti a. Sipai za hotu chuan chu thu chu a hriat veleh, sipai hotu lalber hnênah a kal a, “Engtin nge i tih dâwn? He mi hi Rom mi a lo ni reng mai,” a ti a. Sipai hotu lalber chu a lo kal a, a hnênah, “Rom mi i ni maw? Mi hrilh rawh,” a ti a. Ani chuan, “Ni e,” a ti a. Sipai hotu lalber chuan, “Kei chuan Rom mi nihna nei tûrin sum tam tak ka sêng asin,” a ti a. Paula erawh chuan, “Kei zawng Rom mi rênga piang ka ni,” a ti a. Tichuan, sawisa chunga dâwp tumte chuan Paula chu an ṭînsan ta nghâl a, sipai hotu lalber pawh chuan Rom mi a lo phuar mai tih a han hriatin a hlauthâwng hle a. A tûkah chuan Juda-ten Paula chungah thu eng nge an neih hriat chian tumin, sipai hotu lalber chuan puithiam lalte leh Sanhedrin mite inkhâwm tûrin thu a pe a. Paula chu a phelh a, a hruai chhuk a, an hmaah a dintîr a. Paula chuan rorêltute chu a han en chiang a, “Unaute u, vawiin thleng hian Pathian hmaa ka awm dânah, ka chhia leh ṭha hriatnaah mahni inthiam lohna eng mah ka nei lo,” a ti a. Puithiam lalber Anania chuan Paula kianga dingte hnênah, “A ka kha bensak rawh u,” a ti a. Paula chuan, “Nang, bang hnawih vârpa. Pathianin a bêng zâwk ang che. Dân anga mi ngaihtuah tûrin i ṭhu a, dân lo anga mi ben tûr i ti maw?” a ti a. A kianga dingte chuan, “Puithiam lalber i hau vei maw?” an ti a. Paula chuan, “Puithiam lalber a ni tih ka hre lo va ni, ‘In hnam rorêltu chungah thu ṭha lo sawi suh,’ tih ziak a ni si a,” a ti a. Paulan a ṭhen Sadukai te, a ṭhen Farisai te an ni tih a hria a, Sanhedrin-ah chuan a au va, “Unaute u, kei pawh Farisai ka ni a, Farisai fapa pawh ka ni. Mitthi thawhleh beiseina thu-ah rorêlna hmaah ka ding a nih hi,” a ti a. Chu chu a sawi zawh chuan Farisai-te leh Sadukai-te chu an inhnial a, Sanhedrin mite chu an inṭhen ta a. Sadukai-te chuan, “Thawhlehna rêng a awm lo, vântirhkoh te, thlarau te pawh a awm hek lo,” an ti a. Farisai-te erawh chuan chûng chu an ring si a. Tichuan, an râwl a ring ta hle a, Farisai lama mi Dân zirtîrtu ṭhenkhat an ding a, an ṭang ta tlat a, “He mi chungah hian thil dik lo eng mah kan hmu lo ve, Thlarauvin emaw, vântirhkohvin emaw an bia a ni mahna,” an ti a. An inhnial nasat deuh deuh avângin, sipai hotu lalber chuan Paula chu an pawh sawm a hlau va, zuk kala, an zîng ata Paula la chhuaka, kulhbînga hruai tûrin sipaite chu thu a pe a. Chumi zân chuan Lalpa chu Paula kiangah a lo ding a, “Huai takin awm rawh; Jerusalem-a ka thu i hril ang bawk hian, Rom khuaah pawh i hril tûr a ni,” a ti a. A tûk zîngah chuan Juda-te chu Paula phiarin an inkhâwm a, an thah hma chu eng mah eia in lo tûrin chhia an chham a. Chutianga phiartute chu sawmli aia tam mah an ni. Puithiam lalte leh upate hnênah an kal a, “Paula kan thah hma chuan eng mah ei lo tûrin chhia kan chham ta vek a ni. Chuvângin, tûnah nangni leh rorêltuten a thu chiang lehzuala ngaihtuah tum angin, Paula chu in hnêna hruai thla tûrin sipai hotu lalber hnênah han sawi rawh u; a lo thlen thlâk hmaa that tûrin kan inpeih reng a ni,” an ti a. Nimahsela, Paula farnua fapain thah tuma an lo chân rûk tûr thu chu a lo hria a, a han kal a, kulhbîng chhûngah a lût a, Paula a hrilh a. Paula chuan sipai zahotu zînga pakhat a ko va, “He tlangvâl hian sipai hotu lalber hnênah thu eng emaw sawi tûr a nei e,” a ti a. Tichuan, sipai hotu lalber hnênah chuan a va hruai a, “Mi tâng, Paula khân mi ko va, he tlangvâl hi i hnêna rawn hruai tûrin mi ngên a, i hnênah thu eng emaw sawi tûr a nei a ni âwm e,” a ti a. Sipai hotu lalber chuan a kutah a vuan a, a kai hrang a, a rûkin, “Eng nge mi hrilh tûr i neih chu?” a ti a. Ani chuan, “Paula thu hi chiang lehzuala ngaihtuah tûr angin naktûkah Sanhedrin hmaa hruai chhuk tûrin Juda-ten dîl che an remti tlâng a. Nimahsela, an thu lo awih suh ang che. An zînga mi sawmli aia tamin an châng reng a, chu mite chuan an thah hma chu eng mah eia in lo tûrin chhia an chham a. Tûnah hian i thu nghâkin inpeih sa-in an awm reng a ni,” a ti a. Sipai hotu lalber chuan tlangvâl chu a kaltîr a, “Hêng thu hi mi hrilh tih tu hnênah mah sawi suh ang che,” a ti tlat a. Sipai za hotu pahnih a ko va, “Kaisari-ah zânin dâr kuaa kal tûrin sipai zahnih leh sakawr chungchuang mi sawmsarih leh fei keng mi zahnih buatsaih rawh u. Tin, Paula chuanna tûr sakawrte buatsaih bawk ula, him takin Ramawptu Felika hnên in thlen tûr a ni,” a ti a. Hetiang hian lehkha a ziak a. “Klaudia Lusian ramawptu zahawm ber Felika chibai a bûk e. He mi hi Juda-ten an man a, an thah dâwn laiin sipaite hruaiin ka zuk kal a, Rom mi a ni tih ka hriatin ka chhan chhuak a. Tin, tihhlum an duh chhan hriat ka duh a, an Sanhedrin hmaah ka hruai a. An Dân engahte emaw hêk a ni tih ka hmu a; nimahsela, thihna khawp meuh emaw, tânna khawp meuh emaw eng mah a tih ka hre thei si lo. Juda-ten thah tumin an phiar ru tih miin mi hrilh veleh i hnênah ka rawn tîr ta nghâl a ni: a hêktute pawh a chunga thu pawi an neih apiang i hnêna sawi tûrin ka hriattîr tawh e,” tiin. Chutichuan, sipaite chuan thupêk angin a zân a zânin Paula chu an hruai a, Antipatri khua an thleng a. A tûkah chuan sakawr chunga chuang mite chu Paula hruai zêl tûrin an kal a, sipai dangte chuan an kîrsan a, kulhbîng lamah an haw leh ta a. Anni chuan Kaisari chu an thleng a, Ramawptu hnênah lehkha chu an pe a, Paula pawh a hmaah an dintîr a. Ramawptu chuan a chhiar zawhin, khawi lama mi nge a nih a zâwt a, Kilikia rama mi a ni tih a hre ta a. “Nangmah hêktute an lo thlen hunah i thu ka ngaihtuah ang,” a ti a; Heroda ina daha vên tûr thu a pe a. Ni nga hnuah chuan puithiam lalber Anania leh upa ṭhenkhatte chu ukil pakhat Tertula hruaiin an lo thleng a, Paula chu Ramawptu hmaah an khing ta a. Paula an koh chhuah hnu chuan Tertula chuan an khinna thu a han sawi ta a: “Felik zahawm ber, nangma zârah thlamuang takin rei tak kan lo awm ta a, i finna avângin he rama mite tân hian thil ṭha lo tak tak te chu, kawng tinrêngin hmun tinah siam ṭhat a lo ni ta hi ṭha kan ti a, kan lâwm takmeuh a ni. I tân ninawm ka nih loh nân tawi têin ka han sawi ang e, khawngaih taka min ngaihthlâksak tûrin ka ngên a che. He pa hi mi hnawksak tak, ram tina Juda zawng zawng zînga buaina tichhuaktu, Nazaret pâwl hotu ber a ni tih kan hria a. Tempul pawh tihbawlhhlawh a tum a, kan man ta a ni. Nangmah ngeiin chhâl la, kan hêkna zawng zawng hi a hnên aṭangin i hre chiang thei ang,” a ti a. Juda-te pawhin a hêkna chu an lo thlâwp a, ‘chutiang chu a ni’ an lo ti a. Ramawptu chuan thu sawi tûra a han mitmei veleh Paula chuan, “He chite rorêltuah hian kum tam tak i ṭan tawh avângin ngaihṭha takin ka thiam thu ka sawi dâwn a ni. Jerusalem-a Pathian be tûra ka han kal chu ni sâwm leh ni hnih lo liam a la ni lo tih i hre thei ang. Tempulah emaw, sunagog-ah emaw, khawpui khawi laiah mah mi ka hnial leh buaina siam tûra mi ka fuihpawrh tu man an hre lo. Tûna an mi hêkna pawh hi a bulbâl i hnêna sawi tûr eng mah an hre hek lo vang. Thil pakhat ka hrilh ang che. ‘Pâwl hrang,’ an tih Kawng thu angin min thlahtute Pathian ka be ṭhîn a, Dân leh zâwlneite Lehkhabu ziak zawng zawng ka ring tho va. Pathian ka ring a, mi fel leh fel lote thawhlehna a awm ka ring bawk a; chu chu anmahni ngei pawhin an ring ve si a. Chuvângin, eng lai pawha Pathian leh mihring hmaa sawisêl kai lo, chhia leh ṭha hriatna thiang neih ka tum hrâm hrâm ṭhîn a ni. “Kum tam tak ka thang bo hnuah, ka chipuite chhawmdâwlna pe tûr leh inthawina hlân tûrin Jerusalem-ah ka han kal a. Chutianga ka ti lai chu Tempulah mi hmu a; mahse, mipui punkhâwmna a awm lo va, buaina a awm hek lo. Asia rama mi Juda ṭhenkhat an awm ve a, chûngte chuan ka chunga thu pawi an neih chuan hetah lo kalin i hmaah mi hêk rawh se. A nih loh leh heta lo kalte hian Sanhedrin hmaa ka din lai khân eng nge ka tihsual an sawi tûr a ni; an hmaa ka din laia he thu kam khat, ‘Mitthi thawhlehna thu-ah vawiin hian in hmaah chhâlin ka awm a nih hi,’ ka tih kha a nih nghâl loh chuan,” a ti a. Felika chuan Kawng thu chu a lo hre hle tawh a, “Sipai hotu lalber Lusia a lo thlen thlâk hunah i thu ka la ngaihtuah ang e,” a ti a, an thu chu a dah ta rih a. Paula chu zalên deuhva awmtîra, a ṭhianten a rawng an bâwlsak pawh khap lova vêng tûrin sipai za hotu chu thu a pe a. Tin, ni eng emaw zât hnuah Felika chu a nupui Drusili, Juda mi hruaiin a lo kal a, Paula chu a kohtîr a, Krista Isua rinna thu a sawi chu a ngaithla a. Thiam chantîrna thu te, insûm theihna thu te, rorêlna lo awm tûr thu te Paulan a sawi lai chuan Felika chuan hlauhawm a ti hle a, “Kal leh ta rih la, hun remchâng ka neih hunah ka la rawn ko vang che,” a ti a. Paulan tangka a pêk a beisei tel bawk a; chuvângin, a ko fo va, a be ṭhîn a ni. Kum hnih a vei hnu chuan Felika chu Porkia Festan a thlâk a. Felika chuan Juda-te tihlâwm a duh a, Paula chu lung inah a hnutchhiah ta a. Festa chuan ram a awp aṭanga ni thum hnuah chuan Kaisari aṭangin Jerusalem-ah a han kal a. Puithiam lalte leh Juda-te chuan Paula nêna an thubuai chu an lo hrilh a. “Khawngaih takin Jerusalemah han hruaitîr rawh,” tiin an lo ngên a, kawng laka lo chân rûka thah an tum a ni. Festa chuan, “Paula chu Kaisari lung inah a awm reng a, kei pawh ka haw thla thuai dâwn a, sualna a neih chuan in hotuten mi zui thla sela, hêk rawh se,” a ti a. An zîngah chuan ni riat emaw, ni sâwm emaw vêl a châm a. Kaisari-ah a haw thla leh ta a. A tûkah chuan rorêlna ṭhutthlêngah a ṭhu a, Paula chu a hruaitîr a. A lo thlen chuan Jerusalem aṭanga Juda lo chhukte chu a vêlah an ding a, thu lian fe fe tam takin an hêk a; mahse, an hêknate chu a dik a ni tih an finfiah thei si lo. Paula chuan a thiam thu a sawi ve a, “Juda-te Dân ka bawhchhe lo va, Tempul ka tibawlhhlawh lo va, Kaisara pawi eng mah ka sawi hek lo,” a ti a. Festa chuan Juda-te lakah tlâktlum a duh a, Paula hnênah chuan, “Jerusalem-a chhohva ka hmaa in thu hi rem i duh em?” a ti a. Paula erawh chuan, “Kaisara rorêlna ṭhutthlêng hmaah ka ding a, hetah ngei hian rêlsak tûr ka ni. Juda-te chungah thil eng mah ka tisual lo tih nangmah ngeiin chiang takin i hria a. Thil sual ka tiha, thihna khawp meuh thil ti ka nih chuan thih ka hnial lo ve. Nimahsela, hêngho mi hêkna hi engmahlo mai a nih si chuan, anni lâwm nân an hnênah tu man mi pe tûr a ni lo. Kan thu hi Kaisara hnêna thlen ka ngên e,” a ti a. Festa chuan a rorêlpuite a biakrâwn hnu chuan, “Kaisara hnêna thlen i duh chuan Kaisara hnênah kal ang che,” a ti a. Ni eng emaw zât a ral hnu chuan Lal Agripa leh Berniki chu Kaisari-ah Festa lâwm tûrin an lo kal a. Ni tam tak an châm a, Festa chuan Paula chungchâng thu chu lal a hrilh a, “Felika khân mi tâng pakhat a hnutchhiah a, Jerusalem-a ka han kalin Juda Puithiam lalte leh an upaten a thu chu mi lo hrilh a, thiam loh chantîr tûrin mi lo ngên a. Kei chuan an hnênah, ‘Mi tu mah, amah hêktute nên inhmatawna an inchhâl hmaa thiam loh chantîr mai chu Rom sawrkâr dân a ni lo ve,’ ka ti a. Hetah an lo chhuk a, muang lovin a tûkah rorêlna ṭhutthlêngah ka ṭhu a, chu mi chu ka kohtîr a. A hêktute chu a kiangah an ding a, ka rin ang he huin eng mah thu pawi an sawi ta mang si lo va. Anmahni sakhaw thu leh mi pakhat thi tawh, Paulan a nung leha a sawi, Isua chungthu-ah an buai a lo ni lek a. Keiin chûng thu chu ka ngaihtuah thiam zâwng pawh niin ka hre lo va, Jerusalem-a han kala, an thu chu han rêlsak a duh leh duh loh ka zâwt a. Nimahsela, Paulan amah ṭha taka vên leh an thu Lalber hnêna thlen a ngên ta zâwk a. Chuvângin, Kaisara hnêna ka tirh theih hma chu vêng ṭha tûrin thu ka pe a ni,” a ti a. Agripa chuan Festa hnênah, “Kei pawh chu mi thu sawi chu ngaihthlâk ka duh asin,” a ti a. Ani chuan, “Naktûkah i ngaithla dâwn nia,” a ti a. A tûkah chuan Agripa leh Berniki chu ropui takin an lo kal a, thusawina inah an lût a, sipai hotu liante leh khuaa mi pawimawh deuh deuhte pawh an tel ve a. Festa thupêkin Paula chu an rawn hruai lût a. Festa chuan, “Lal Agripa leh heta kan zînga awm zawng zawngte u, Juda mipui zawng zawngten ‘Nung tlâk a ni lo ve,’ tia an au va, Jerusalem-ah leh heta a chungchâng thu ka hnêna an sawi chu he mi in hmuha hi a ni. Nimahsela, kei chuan thihna khawp meuh eng mah a tih ka hmu lo va, amahin Lalber hnêna thlen a duh avângin tirh ka tum ta a ni. Amaherawhchu, Lalber hnêna thlen tûr thu mumal tak eng mah ziak tûr ka hre si lo va; chuvângin, in hmaah ka rawn hruai chhuak a ni; Lal Agrip, i hnêna han hruai bîk deuh ka ni a, chhâl a nih hnua eng emaw ziak tûr ka hriat theih nân. Amah an hêkna chiang taka ziak lova lalber hnêna mi tâng tirh chu âwmin ka hre si lo va,” a ti a. Agripa chuan Paula hnênah, “I thiam thu i sawi thei e,” a ti a. Chu veleh Paula chuan a kut a phar a, a thiam thu a sawi ta a. “Lal Agrip, vawiinah hian i hmaah Juda-te mi hêkna zawng zawnga ka thiam thu ka sawi dâwn avângin vânnei ka inti hle mai. Juda-te khawsak dân leh an inkhin ṭhin dânte i hriat êm avângin vânnei ka inti lehzual a ni. Chuvângin, dawhthei taka ka thu mi ngaihthlâksak tûrin ka ngên a che. Ka tleirâwl tirh aṭang tawhin ka chipuite zîngah leh Jerusalem-a ka awm dân chu a tîr ata Juda-te zawng zawngin an hria e. An sawi duh chuan hmân aṭanga kan sakhaw pâwl khermei ber Farisai zînga mi ka nih te pawh an hria ang. Min thlahtute hnêna a thutiam kha Pathianin a hlen ka beisei thu-ah tûnah hian rorêlna hmaah ka ding a nih hi. Chu thutiam chu hmuh beiseiin kan hnam sâwm leh pahnihte chuan a chhûn a zânin ṭhahnemngai takin rawng an bâwl ṭhîn a ni. Aw, Lal Agrip, chutiang beiseina avâng chuan Juda-te hian mi hêk a ni. “Nangni hian engtizia nge Pathianin mitthite a kaihthawh in rin loh? Kei ngei pawhin Nazaret Isua hming kalh zâwnga theihtâwp chhuah tûr niin ka lo inngai a. Chutiang chuan Jerusalem-ah ka ti ṭhîn a, puithiam lalte hnên aṭanga thu lain mi thianghlimte zînga mi tam tak tân inahte ka khung a, tihhlum an tum pawhin ka remtihpui bawk ṭhîn. Sunagog tinah Isua sawichhiattîr tumin ka hrem fo va, an lakah ka kawlh êm êm a, ram dang khaw thleng thlengin ka tiduhdah ṭhîn. “Chutiang ti tûr chuan puithiam lalte hnên aṭanga thu hmu leh an thupêk kengin Damaska ka pan a. Tichuan, Lal Agrip, kawnga kan kal lai chuan chhûn laiah vân aṭanga êng, ni aia êng ka hmu a, chu chuan kei leh ka kalpuite chu min rawn chhun a. Leiah kan tlu ta vek a, awin Hebrai ṭawngin, ‘Saula, Saula, engati nge mi tihduhdah? Chhunna tiang khen hi i tân a na thlâwn mai mai a ni,’ mi rawn tiin ka hria a. “Kei chuan, ‘Lalpa, tu nge i nih?’ ka ti a. Lalpa chuan, ‘Isua, i tihduhdah hi ka ni. Tho la, i kein ding rawh; ka rawngbâwltu atâna ruat tûr chein i hnênah ka rawn inlâr a ni. Mi hmuh thu leh thil ka la entîr tûr che hi mite i hrilh tûr a ni. Juda-te leh Jentail-te hnênah ka tîr ang che a, an lak ata ka chhan chhuak ang che. Kei mi rin avânga an sualte ngaihdam an nih theih nân leh, mi thianghlimte zînga rochan an neih ve theihna tûrin. An mit tivârtu tûr te, thim ata eng lama hawi kîrtîr tûr leh Setana thuhnuai ata Pathian lama hawi kîrtîr tûra ruat i ni e,’ mi ti a. “Chuta ṭang chuan, Lal Agrip, vân inlârna chu ka zâwm ta a. Tichuan, Damaska mite hnêna sawi ṭanin, Jerusalem-a mite hnênah te, Judai rama mi zawng zawng leh Jentail-te hnênah sima Pathian lam an hawia, an sim takzet a ni tih a lan nâna thil an tihna tûrin thu ka hril ṭhîn a ni. Chumi avâng chuan Tempula ka awm laiin Juda-ten mi man a, mi thah an tum a. Nimahsela, Pathianin mi ṭanpui avângin vawiin thleng pawh hian mi lian leh mi tête hnêna thu hril tûrin ka la ding thei a ni. Zâwlneite leh Mosian thil lo thleng tûr an sawi bâk eng mah ka sawi lo. ‘Krista chuan a tuar ang a, mitthi zîng ata thawh hmahruaitu a ni ang a, Juda-te leh Jentail-te hnênah êng thu a hriattîr ang,’ tia an sawi loh hi chu eng mah dang ka sawi lo,” a ti a. Chutianga thiam thu a sawi lai chuan Festa chu ring takin a au va, “Paula, i â ta a ni e, i zir tam hi i ât phah a ni,” a ti a. Nimahsela, Paula chuan, “Festa zahawm ber, ka â lo asin; thu dik tak leh thu fing tak ka sawi zâwk a ni. Hêng thil hi lal pawhin a hria e, a hnênah pawh huai takin ka sawi hi; a hriat loh pakhat mah a awm lo tih ka hria; hêng thil hi a rûka tih a ni si lo va. Lal Agrip, zâwlneite thu i ring em? I ring tih ka hria e,” a ti a. Agripa chuan Paula hnênah, “Rei lo te chhûnga Kristiana mi siam i tum a ni maw?” a ti a. Paulan, “Rei se, rei suh se, nang chauh ni lovin, vawiina ka thu ngaithlatute zawng zawng pawh hi keimah anga awm tûrin Pathian hnênah ka dîl a ni, kawl erawh hi chu bun ve lovin,” a ti a. Tichuan, lal te, Ramawptu te, Berniki te leh an ṭhutpuite chu an tho va. An kal hrang a, an inbia a, “He mi hian thihna khawp emaw, tânna khawp emaw eng mah zawng a tih loh hi,” an ti a. Agripa chuan Festa hnênah, “He mi hian Kaisara hnêna thlen dîl lo sela chuan chhuah mai theih a nih hi,” a ti a. Tin, Itali rama lawnga kal tûra min tih veleh, Paula leh mi tâng dang ṭhenkhatte chu Augasta Sipai pâwl an tiha mi sipai za hotu Julia kutah an hlân a. Adramuteno khaw lawng, tuifinriat kama Asia ram khuate tlawh tûrah chuan kan chuang a, kan kal ta a; Makedonia rama Thesalonika khaw mi Aristarka pawh a tel ve a. A tûkah chuan Sidon khua kan thleng a, Julia chuan Paula chu a tiṭha hle a, a ṭhiante hnêna lênga a châkkhai lam te a phalsak a. Chuta ṭangin lawng chuan kan kal zêl a, thliin a ni lo zâwnga min nem avângin Kupra thliarkâr phên thli ûp lamah kan kal a. Kilikia ram leh Pamfulia ram dep tuipui kan pelh hnuin, Lukia rama Mura khua kan thleng a. Chutah chuan sipai za hotu chuan Aleksandria khaw lawng, Itali rama kal tûr a hmu a, chu lawngah chuan min chuantîr a. Ni rei tak zawi zawiin kan kal a, harsa takin Nido khaw zâwn kan thleng hrâm a. A lêt zâwnga thliin min nem avângin Kret thliarkâr phên thli ûp lamah kan kal kual a. Kret thliarkâr hmâwr zum Salmoni an tih chu kan pêl a. Harsa takin vaukam kan hrût a, hmun pakhat, lawng chawlh hmun Mawi, an tih chu kan thleng a, chu chu Lasai khaw kianga awm a ni. Ni rei fe kan châm hnu chuan Chawnghei hun a pêl ta bawk a, lawnga kal zêl a hlauhawm hle tawh avângin anni chu Paulan thu a râwn a, an hnênah, “Pute u, tûna kan kal zêl chuan chhiatna nasa tak kan tâwk dâwn tih ka hria; lawng leh a bungraw phurh chauh ni lovin, keini lawnga chuangte tân pawh boral a hlauhawm a ni,” a ti a. Nimahsela, sipai za hotu chuan Paula thu sawi ai chuan lawngpu leh lawng neitu thu chu a awih ta zâwk a. Thlasik tuar nân chu lawng chawlhna chu a remchân loh avângin mi tam zâwkin kal chhuaha, Foiniki khua thlen hrâm a, chuta thlasik tuar chu an duh a. Foiniki khua chu Kret thliarkâra lawng chawlhna pakhat a ni, chhimthlang leh hmârthlang hawi zâwnga awm a ni. Chhim thli a lo tleh hiau hiau va, an duh ang tak an hmu ta emaw an ti a, thîrchakai chu an khai chhuak a, Kret thliarkâr chu a kam hnaih thei ang berin kan hrût a. Nimahsela, rei lo tê-ah khawmual lam aṭangin thlipui na tak a lo tleh chhuk ta phut a, chu thli chu Eurakulo an vuah a. Lawng chu a rawn chhêm vir nawk a, thli lam hawia kar her rual ni ta hek lo, a duh duha len tûrin kan awm ta a, min lên min lên ta mai a. Thliakâr tê tak tê, Kauda an tih phên thli ûp lamah min lên a, harsa tak chungin lawnglêng chu kan hum thei hrâm a. Lawngah an khai chhuak a, lawng chu hruiin an phuar ta tlat a. Libua kam ṭiaudûpa min len luh an hlauh avângin lawng puanzâr chu an tihniam a; tichuan, min lên min lên leh ta a. Thli leh tuifâwn chuan min vawrh reng avângin, a tûkah chuan lawng bungraw phurh chu an paih ṭan ta a. Ni thum ni chuan anmahni kut meuhvin lawng thawmhnaw pawh an paih chhuak leh ta a. Ni rei tak, ni pawh, arsi pawh a lang lo va, thli lah chuan nasa takin min nuai reng a, dam rêng kan inbeisei tawh lo. Chaw ei lova ni tam tak an awm hnuin Paula chu an zîngah a ding a, “Pute u, ka thu kha awihin Kret thliarkâr aṭang khân chhuak lo ila chuan hetiang hrehawmna leh hlohnate hi kan tâwk lo tûr. Nimahsela, tûnah hian thlamuang taka awm tûrin ka ngên a che u. In zîngah tu mah in thi lo vang, lawng erawh hi chu a chhe dâwn a ni. A ta ka ni a, a rawng ka bâwl ṭhin, Pathian chuan vântirhkoh pakhat nizân khân a rawn tîr a, ka kiangah a lo ding a, ‘Paula, hlau suh, Kaisara hmaah i ding tûr a ni. Ngai teh, lawnga i zinpuite zawng zawng kha nangmah avângin Pathianin a hum dâwn a ni,’ mi rawn ti a. Chuvângin pute u, thlamuang takin awm rawh u. Pathian ka ring a, mi hrilh ang chu a thleng ngei ang. Thliarkâr khawiah emaw min lên chhuak tûr a ni,” a ti a. A zan sâwm leh zan li zânah chuan thliin Mediteranean tuipuiah chuan min lên zêl a, zanlai vêlah chuan lawng miten khawmual eng emaw thleng dâwnin an inhria a. Tichuan, tui thûk lam an teh a, hlam sawmhniha thûk a lo ni a, rei lo te hnuah an teh leh a, hlam sâwm leh pangaa thûk a ni ta a. Lung chhe hmuna min len chhuah an hlauh avângin lawng mei lamah chuan thîrchakai pali an thlâk a, khawvâr hlân an nghâkhlel hle a. Lawng mite chuan lawng hnâr lama thîrchakai thlâk tûr ni âwm takin lawnglêng chu tuifinriatah an thlâk a, lawng chu tlânsan an tum a ni. Chu veleh, Paula chuan sipai za hotu leh sipaite hnênah chuan, “Hêngho hi lawnga an awm reng loh chuan in him thei lo vang,” a ti a. Tichuan, sipaite chuan lawnglêng hruite chu an zai chat a, an len botîr ta a. Khawvâr dâwn ṭêpah Paula chuan lawnga mi zawng zawng chu chaw ei tûrin a ngên a, “Vawiin hi eng mah ei lova in awm ni sâwm leh ni lina a lo ni ta a. Chuvângin, chaw ei tûrin ka ngên a che u, in nunna tûr a ni e; in zînga tu ma samzai pakhat tê mah a boral lo vang,” a ti a. Chûng thu a sawi zawh chuan chhang a la a, an zaa hmaah chuan Pathian hnênah lâwmthu a sawi zawhin a phel a, a ei ṭan ta a. Tichuan, an za-in thlamuang takin an ei ta a. Lawnga mi chu kan vaiin zahnih leh sawmsarih leh paruk kan ni a. An ei kham vek hnu chuan lawng tizâng tûrin an buh phurhte chu tuipuiah an paih chhuak leh ta a. Khua a lo vâr chuan khawi lai vaukam nge an thlen an hre lo va, litengsâwla ṭiaupho an hmuhin lawng chu a theih chuan ṭiauphova khalh chhuah an tum a. Thîrchakai hruite chu an zai chat a, tuipuiah an hnutchhiah ta a; chumi rual chuan a kar herna phuarnate chu an phelh a, hma lam puanzâr chu thli chhêm tûr zâwngin an tisâng a, ṭiaupho chu an pan ta a. Nimahsela, tuizangkhauh pahnih intawhnaah kan lût a, lawng hnâr lam chu a insu bûr ta tlat a, tihchêt rual lohvin a tâng ta a; tuifâwn a nasat êm avângin lawng mei lam pawh chu a keh ṭan ta a. Sipaite chuan tânghote chu thah vek an rawt a, tui hleuh kaite an awm ang a, an tlân bo vang tih an hlau va ni. Nimahsela, sipai za hotu chuan Paula chhanhim a duh a, an thil rawt chu a khap a; tui hleuh thiam apiang chu tuipuia zuang thlaa khawmuala lo kai hmasa tûr leh, mi dang zawng chu thingphel chungah emaw, lawng keh them chungah emaw kai tûrin thu a pe ta a. Chutiang chuan kan za-in khawmualah him takin kan kai ta vek a. Kan kai zawh chuan thliarkâr chu Meliti a ni tih kan hre ta a. Chu thliarkâra mite chuan min lo khawngaih êm êm a. Ruah a sûr avâng leh a vawh êm avângin meipui an chhêm a, kan za-in min lo lâwm a. Paulan thing têl khat a fawm a, meiah a tuah a, a sat avângin rûl a lo chhuak a, a kutah a zem ta tlat a. Chuta mite chuan a kuta rûl bet reng an hmuh chuan, “He mi hi tualthat a ni phawt mai, tuifinriat aṭangin tlân chhuak mah sela, dik taka Rorêltua chuan a nun a awih tawh lo a nih hi,” an ti a. Nimahsela, ani chuan rûl chu meiah a thing thla a, engtin mah a awm ta chuang lo va. Anni chuan a vûn emaw, thâwklehkhata a tlûka a thih nghâl emaw an ring a. Rei fe an nghâk a, eng mah a ti lo tih an hmuh chuan an rilru an lamlêt a, “Pathian a nih hi,” an ti leh ta zâwk a. Chumi kiang lawkah chuan chumi thliarkâr lal Poplia huan a awm a. Ani chuan min lo lâwm a, ni thum lai lâwm takin min thleng a. Poplia pa chu khawsik leh santên veiin a lo mu reng a. Paula chuan a en a, a luah kut nghatin a ṭawngṭai a, a tidam ta a. Chumi hnu chuan, chu thliarkâra mi dang na nei apiang chu an lo kal a, an dam ta a. Anni chuan nasa takin min chawimawi a, kan kal leh dâwn pawh chuan kan mamawh apiang lawngah an lo dah a. Thla thum hnuah chuan lawng pakhat, thlasik laia chu thliarkâra lo châm tawh chuan kan kal leh ta a. Chu lawng chu Diaskuro an vuah a, Aleksandria khaw lawng a ni. Surakus khua kan thleng a, ni thum kan châm a. Chuta ṭang chuan lawngin kan kal kual a, Regium khua kan thleng a. Ni khat hnuah chhim thli a lo tleh a, a tûk lehah Puteoli khua kan thleng a. Chutah chuan unaute kan hmu a, an hnêna kâr khat châm tûrin min ngên a, chutiang chuan Rom khua kan thleng ta a ni. Rom khuaa unaute chuan kan chanchin an hriat veleh, ‘Appia Dâwr’ leh ‘Khualbûk Pathum’ thlengin min hmuak tûrin an lo kal a. Paulan chu mite chu a hmuhin Pathian hnênah lâwmthu a sawi a, a thlamuan phah ta hle a. Rom kan thlen chuan Paula chu sipai vên chunga amaha a awm an phalsak a. Ni thum hnuah chuan Paulan chuta Juda hotute chu a ko khâwm a, an lo kal chuan an hnênah, “Unaute u, kan mite chungah emaw, min thlahtute Dân lakah emaw eng mah ka tisual lo chung pawhin, Jerusalem-ah mi man a, Rom sawrkâr kutah mi hlân a. Anni chuan mi chhâl a, thihna khawp meuh eng mah ka tihsual an hmuh loh avângin mi chhuah an tum a. Nimahsela, Juda-ten an hnial tlat avângin Kaisara hnêna thlen lo thei ka ni ta lo va ni; Mahse, ka chipuite hêk tûra ti ka ni awzâwng lo ve. Chuvâng chuan, hmuh leh biak che u duhin ka ko khâwm che u a ni; Israel-ten an beisei ṭhin, kha mi avâng khân he khaidiat hi ka bun a nih hi,” a ti a. Anni chuan, “Judai ram aṭangin i chanchin sawina lehkha eng mah kan hmu lo va, unaute zînga mi tu mahin i chanchin a chhe lam emaw, a ṭha lam emaw sawi tûr an lo kal hek lo. He pâwl hi hmun tinah sawichhiat niin kan lo hria a, i ngaih dân pawh hriat kan duh e,” an ti a. Tichuan, ni an tiam a, chumi ni chuan a awmna inah mi tam takin an rawn pan a, zîng aṭangin zân thlengin Pathian ram thu a sawi a, a hrilh fiah a; Mosia dân bu leh zâwlneite lehkhabu aṭangin Isua chungchâng anmahni awihtîr tumin a hrilh a. A ṭhenin a thu sawi chu an ring a, a ṭhenin an ring lo va. An thu a inhmu ta lo va, Paulan thu a sawi zawh chuan an chhuak ta a. A thu sawi chu hei hi a ni: “Thlarau Thianghlimin zâwlnei Isaia kâa in thlahtute hnêna a sawi kha a dik ngawt mai, ‘He chite hnênah hian kal la, va sawi rawh. In ngaithla in ngaithla ang a, a ngaihna in hre si lo vang. In en in en ang a, in hmu fuh si lo vang. He mite thinlung hi a lo chawlawl ta a, An bengte an chhu ngawng a, An maimitchhîng bawk a, Chuti ni lo se an mitin an hmu ang a, an bengin an hria ang a, An thinlungin an hre bawk ang a, An hawi kîr leh anga, Anmahni ka lo tidam tûr!’ a tih kha. “Pathian chhandamna chu Jentail-te hnênah pêk a ni tih hre rawh u; anni zawngin ngaih pawh an ngaithla ang,” a ti a. Kum hnih pumhlûm Paula chu ama in luahah chuan a awm a, a hnêna lo lêng apiang a lo lâwm a. Pathian ram thu a hrilh a, Lalpa Isua Krista thu huai takin mi a zirtîr a, tu man an khap lo. Paula, Isua Krista bawih, tirhkoh atâna koh, Pathian Chanchin Ṭha hril tûra tihhrana chuan: chu Chanchin Ṭha chu Pathianin a zâwlneite hmangin a lehkha thianghlimah a lo tiam tawh a. A Fapa, kan Lalpa Isua Krista thu chu tisa lam chhui chuan Davida thlaha piang a ni a, thianghlimna thlarau lamah erawh chuan; mitthi zîng ata ropui taka kaihthawh a nihna chuan Pathian Fapa a nihzia a tilang chiang a; amah avâng chuan Pathianin hnam tin zînga mite ringa awihtîr tûrin tirhkoh nihna chanvo min hlân a ni. Nangni pawh chutianga Krista mite ni tûra koh in ni si a. Pathianin a duh tak, a mi thianghlim ni tûra a koh Rom khuaa mite chibai ka bûk a che u. Pathian kan Pa leh Lalpa Isua Krista hnên ata khawngaihna leh remna in hnênah awm rawh se. Ringtu in nih thu ram tina a than tâk huai huai avângin Isua Krista zârah nangmahni avângin Pathian hnênah lâwmthu ka sawi hmasa a ni. Ka ṭawngṭainaahte chuan ka hre reng ṭhîn che u a, tih tak meuhva a Fapa Chanchin Ṭha rawng ka bâwl Pathian chu mi hriatpuitu a ni. A remtih zâwng a nih chuan tûn ṭumah tal ka rawn tlawh theihna tûr che uin Pathian ka dîl ṭhîn a ni. In ngheh lehzual nân thlarau lam thilpêk dawntîr tûr che uin hmuh che u ka chak êm êm a ni, kei leh nangni hi rinnaa kan inchâwm tawna, kan inṭanpui tawn theihna tûrin. Unaute u, rawn tlawh che u ka tum fo va; mahse, rem lohna a awm leh ṭhîn a ni tih in hriat ka duh a ni. Jentail dang zînga ka hmuh ṭhin angin in zîngah pawh rah hmuh ve ka beisei. Grik mite leh Awze mite, mi fing leh mi mâwlte hnênah bat ka nei a; chuvângin, a ni, nangni Rom khuaa awmte hnênah pawh Chanchin Ṭha hi hril ka châk êm êm ni. Chanchin Ṭha hi ka zahpui si lo va, tu pawh a ring apiangte chhandam nâna Pathian thiltihtheihna a ni si a; Juda-te tân a ni phawt a, Jentail-te tân pawh a ni leh a. Hetah hian rinna avâng chauhva Pathianin mi thiam a chantîr dân a lo lang ta a ni, “Rinna avânga thiam chang chu a nung ang,” tih ziak ang khân. Vân ata Pathian thinurna chu mihring, an sakhaw ngaihsak lohna leh suahsualna avânga thutak dodâl tlattute chungah chuan a lo lang a ni. Pathian chanchin hriat theih tûr chi chu mihringte hnênah a lang reng a, chu chu Pathian ngeiin a tihlan a ni. A nihna, mita hmuh theih loh, a chatuan thiltihtheihna leh a Pathianzia chu khawvêl siam tirh ata a thil siamahte chuan chiang taka hmuh theihin a lang a. Phatna tûr rêng an nei lo. Pathian zawng an hria a ni; Pathian ang erawh chuan an chawimawi lo va, lâwmthu pawh an hrilh hek lo; an ngaihtuahna a khawlo zo va, an rilru lawilo tak chu a thim zo ta a ni. Fing an inti nâ a, an â hle si a ni. Thi thei lo Pathian ropuina chu thi thei mihring te, sava te, ke pali nei te leh rannung lim ang lekah an chantîr a. Chuvângin, an thinlung châkzâwng thil bawlhhlawhte ti tûrin Pathianin a hawisan a, zahpuiawm takin an awm ta a ni. Pathian thutak aiin dâwt an thlang a, a siamtu chu biak aiin a siama chu biain a rawng an bâwl ta zâwk a. A siamtu chu chatuana fakin awm rawh se. Amen. Chûng avâng chuan a ni Pathianin zahthlâk taka an hur phalin a hawisan tâk ni; an hmeichhiate chu an awm dân phung pêlin an khawsa a; an mipate lah hmeichhe hman dân pangngai bânsanin, hurin an inît tawn a, mipa leh mipa mawi lo takin an khawsa a. Anmahni taksa ngeiah an sual rah chu an hmu a ni. Tichuan, Pathian hriatna dik chu an thlah tâk avângin an ngaihtuahna khawlo tak anga awm tûrin Pathianin a hawisan a, an tih loh tawp tûr pawh an ti ta a ni. Dik lohna chi tinrêngin an lo khat ta a, sualna te, duhâmna te leh suahsualna te, îtsîkna te, tual thah te, in erna te, inbumna te leh inhuatna tein an khat a. An inrêl a, an insawichhia a, Pathian an hua a, an intivei a, an chapo va, an uang a, thil ṭha lo thar an chîng chhuak zêl a; an nu leh pate an zah lo va, pawisak an nei lo va, lainatna lah an nei hek lo. Chutiang thil titute chu Pathianin a ruat ang ngeia thi tlâk an ni tih hre reng chungin, an ti lui zêl a, a ti vete pawh an ngaisâng lehnghâl a ni. Aw mihring, tu pawh ni la, mi dang thiam loh chantîr thei i ni bîk hlei nêm, mi i thiam lohna ngei chu nang pawhin i ti ve tho si a, mahni leh mahni thiam loh inchantîr mai i ni. Chutiang ti mite chu Pathianin thiam loh a chantîr chuan a tidik a ni tih kan hria; nangin i tih ṭhin ang tite i thiam loh si chuan, Pathianin a demna che chu pumpelh i inring em ni? A nih loh leh, simtîr che a duh avângin Pathian chuan ngilnei takin a nghâk ṭhîn che tih hre lovin, ṭhatna a ngahzia leh a dawhtheihzia leh a entheihzia chu i ngainêp em ni? I luhlul leh i thinlung khauh avângin thinurna ni, dik taka Pathianin ro a rêlna ni atân chuan mahni tân hremna chhêk khâwl lek i ni asin. Pathian chuan mi tin an thiltih ang zêlin a rêlsak dâwn si a. Ropuina te, chawimawina te leh boral theih lohna te zawnga thil ṭha ti fan fante chu chatuan nunna a pe ang; nimahsela, mahni hma chauh siala, thutak hnara, thil dik lo zâwm zâwkte chungah chuan Pathian thinurna leh thinrimna a lo thleng ang. Thil sual ti apiangte tân hrehawmna te, lungngaihna te a awm dâwn - Juda-te tân a awm phawt ang a, Grik mite tân pawh a awm ang; thil ṭha ti apiangte erawh chuan Pathian hnên aṭangin ropuina te, chawimawina te leh thlamuanna te an dawng ang. Juda-ten an dawng phawt ang a, Grik mite pawhin an dawng ang. Pathianin mi duhsak bîk a nei si lo va. Dân hnuaia awm loten thil sual an tih chuan Dân lovin an thi ang: Dân hnuaia awmten thil sual an tih chuan Dân angin an chungthu rêl a ni ang. Dân hriat vâng ni lovin, zawma zawm vâng zâwkin Pathian hmaah chuan thiam chan theih a ni. Jentail-te chuan Dân chu an hre ve lo na a, Dân thu tum chu an pianpui ze phung remzâwng a nih avângin an ti a, Dân chu an hnêna pêk ni ve lo mah se, Dân nei ang an ni. An chhia leh ṭha hriatnaah thiam inchantîr leh inchantîr loh nachâng an inhriat dân aṭang hian Dân thupêk chu an thinlungah a inziak a ni tih a lang. Pathianin Isua Krista hmanga mihringte thurûk a ngaihtuah ni-ah chuan Chanchin Ṭha ka hril ang hian a rêl dâwn a ni. A nih, nang, Juda mi i inti a; Dân chu i rinchhan a, Pathian chu i chhuang hle a: Pathian duhzâwng pawh i hria a. Dân i hriat avângin a chhia leh a ṭha pawh i hria a; mitdelte hruaitu, thima awmte tâna êng, mi mâwlte hruai fing theitu, naupangte zirtîrtu ber ni-ah i inngai ṭhîn; hriat tûr leh thutak zawng zawng chu Dân thu-ah hian a awm vek tih i ring a. Mi dang ka zirtîr e i ti a, engati nge mahni i inzirtîr si loh? Ru lo tûrin mi i zirtîr a, nangin i ru si maw? Uire i khap a, nang i uire si em ni? Milem haw hle siin milem biakna Tempul i rawk duh si maw? Dân chu chhuang hle siin, Dân chu bawhchhiain Pathian i tihmingchhe ṭhîn maw? “Nangmahni avângin Pathian hming chu Jentail-te zîngah sawichhiat a ni,” tih ziak ang khân. Dân zâwm la chu i serh tan pawh kha a sâwt hle tûr; Dân i bawhchhiat si chuan serh tan loh ang chiah i ni a. Serh tan lohvin Dân a zawm si chuan serh tan anga ngaih a ni dâwn lâwm ni? Nangnin serh in tan a, Dân thu ziak pawh in nei a; mahse, Dân thu chu in bawhchhe si, Jentail, tisa serh tan lohte chuan Dân thu chu an zâwm tlat zâwk si a, thiam loh an chantîr dâwn che u a ni. A lang maia Juda mi ni chu Juda mi tak tak a ni lo va, tisa maia serh tan chu serh tan tak tak a ni bawk hek lo; amaherawhchu, chhûng rila Juda mi ni chu Juda tak tak chu a ni a, serh tan tak tak pawh chu thinlung lamah a ni, lehkhaa ziak maiah ni lovin, thlarau lamah a ni zâwk. Chutiang mi chu mihringin chawimawi lo mah se, Pathianin a chawimawi ang. Chuti chu Juda mi nih a sâwtna a awm chuang em ni? Serh tan pawh eng nge a hlâwkna? Kawng tinah hlâwk tak a ni. A hlâwkna ber chu Pathian thute kawltîr an nihna hi a ni. Mi ṭhenkhatte rinawm lo ta sela, engtin nge ni ta ang? Anni rinawm lohna chuan Pathian rinawmna chu a tibo dâwn em ni? Tibo suh e; mi zawng zawng dawthei ni vek mah se, Pathian zawng a dik ngei tûr a ni: “Nangin thu i sawi huna thiam i chana, Rorêlsaka i awm huna i hneh theih nân,” tih ziak ang khân. Kan dik lohna chuan Pathian dikzia a tihlan chian lehzual si chuan, engtin nge kan ngaih ang? Mihring takin sawi ila - Pathianin thinurna a rawn lantîr hian a tidik lo kan ti dâwn em ni? Ti teh suh e, chuti ni se Pathian chuan engtin nge khawvêl ro a rêl theih ang? A nih loh leh, dawthei ka nihna hian Pathian a ropui nâna Pathian dikzia a tihlan chian lehzual si chuan, engati nge mi suala mi la chhiar cheu vang? Mi ṭhenkhatin, “ ‘Thil ṭha a lo chhuah theih nân thil sual i ti ang u,’ a ti e,” ti-a min sawichhiat ang khân, thil sual kan ti mai dâwn em ni? Chûng mite chu thiam loh chang awm rêng an ni. A nih leh keini Juda-te hi kan ṭha bîk em ni? Ṭha bîk teh suh e. Juda-te leh Grik-te chu sual bawiha awm vek kan ni tih kan sawi fiah tawh kha: ‘Tu mah mi fel rêng an awm lo, Pakhat mah an awm lo; Tu mah hrethiam rêng an awm lo, Pathian zawng rêng an awm hek lo. An pêng bo ta vek a, an khawlo zo ta a; Tu mah thil ṭha ti rêng an awm lo, pakhat mah an awm lo. An hrawk chu thlân inhawng a ni a, an leiin bumna thu an sawi a, an hmui aṭangin rûl tûr a chhuak a, An kâ chu ânchhia leh thu khain a khat a. Thisen chhuah tûrin an pên chak a, An kalna apiangah chhiatna leh lungngaihna an thlen a. Thlamuanna kawng an hre hauh lo va, Pathian ṭih nachâng rêng an hre hek lo,’ tia ziak ang khân. Dân thute chu Dân hnuaia awmte chunga hman tûr a ni tih kan hria, tu man eng mah an sawi theih lohna tûr leh khawvêl hi Pathian rorêla a awmna tûrin. Dân zawm ṭhat avângin tu mah Pathian hmaah thiam chang pha an awm lo; Dân avângin miin thil sual an tih an inhre fiah ṭhîn a ni. Tûnah zawng Dân hman ngai lova mi thiam a chantîr dân Pathian chuan a rawn tilang ta: Dân leh zâwlneite thu pawhin chu chu a sawi kha a ni. Isua Krista an rin avângin tu pawh a ring apiangte chu Pathianin thiam a chantîr a ni, danglamna rêng a awm lo, mi zawng zawngin thil sual an ti vek a, Pathian ropuina chu an chang thei ta lo va ni. Nimahsela, Isua Krista tlanna zârah Pathian chuan a khawngaihna avâng chauhvin chûng mite chu a thlâwnin thiam a chantîr ta, Pathianin ani chu a thisen rin avânga sual thupha chawina ni tûrin a ruat a, mi thiam a chantîr dân tilang tûra ti a ni. A dawhtheihna avângin tûn hma lam sualte chu Pathianin a haider a; amah chu a dik a, Isua ringtute chu thiam a chantîr tih tifiah tûrin tûnlai hunah hian mi thiam a chantîr dân chu a rawn tilang ta a nih hi. Chuti chu chhuan tûr rêng kan nei em ni? Nei suh e! Eng vângin maw? Thiltih vângin maw? Ni lo ve, rinna avâng a ni zâwk. Dân zawm vâng ni lovin rinna avângin miin thiam an chang kan ti a ni. Pathian chu Juda-te ta bîk em ni? Jentail-te ta pawh a ni lo vem ni? Ni e, Jentail-te ta pawh a ni asin. Pathian chu pakhat a ni a, serh tanho chu an rinna avângin thiam a chantîr ang a, serh tan lohho pawh an rinna avâng bawkin thiam a chantîr ang. Chuti ni se, rinna kan sawi pawimawh avângin Dân chu eng mah lovah kan dah ta tihna em ni? Ni suh e; Dân chu kan ṭan zâwk a ni. Chuti ni se, tisa lama min thlahtu Abrahama thu kha engtin nge kan sawi tâk ang le? Thiltih avânga thiam chantîr ni se, Abrahama khân chhuan tûr a nei mahna, amaherawhchu, Pathian hmaah chhuan tûr a nei hauh lo. Lehkha Thu-in eng nge a sawi kha? “Abrahama chuan Pathian a ring a, chu a rinna avâng chuan thiam chantîr a ni,” a ti a. Hna thawktu hlawh chu khawngaih thilpêk a ni lo va, bat anga ngaih a ni zâwk. Mi sual thiam chantîrtu chu miin a rina, thil tih vâng ni lova thiam chantîra a awm hian, a rinna avângin thiam a chang kan ti a ni. Thiltih vâng ni lova Pathianin thiam a chantîrte nihlawhzia Davida pawhin hetiang hian a sawi: ‘An bawhchhiatnate ngaihdamsaka awma, an sualte thai bova awmte chu an va nihlawh êm! Lalpan sual neia a ruat loh chu an nihlawh e,’ tiin. Chu malsâwmna chu serh tan tân chauh nge serh tan lohte tân pawh? “Abrahaman a rinna avângin thiam a chang,” tih a ni kan ti a. A serh tan hma thu nge a serh tan hnu thu? Engtia ngaih tûr nge? A serh tan hnu ni lovin, a serh tan hma thu a ni zâwk. A serh tan hmaa a rinna avâng ngeiin Pathianin thiam a chantîr tih entîr tûrin serh a tan chauh zâwk a ni. Tichuan, serh tan lo mah se rinna avânga Pathianin thiam a chantîrte tân chuan Abrahama chu an thlarau lam pa a ni. Serh tante pa pawh a ni, serh tan an nih mai vâng ni lovin, kan pa Abrahaman serh a tan hmaa a rin ang bawka rinna an neih avângin a ni. Dân zawm vâng ni lovin, rinnaa thiam chantîr a nih avâng zâwkin Pathian chuan Abrahama hnênah amah leh a thlahte chuan khawvêl hi an rochung dâwn a ni tih thu a tiam a ni. Dân zawm hi roluahtu nihna ni se, rinna hi thil lothlâwn mai a ni ang a, thutiam pawh chu eng mah a ni lo tihna a ni ang. Dân chuan thinurna chu a hring a, Dân awm lo sela bawhchhiatna pawh a awm dâwn si lo. Abrahama thlah zawng zawng tân, Dân zâwmtute chauh ni lovin, ama rin anga ringtute tân Pathian thilthlâwnpêk a nihzia tilang tûrin rinna avângin a ni, Abrahama hnênah thu a tiam ni, ‘chi tam tak paah ka siam ta che,’ tih ziak ang khân, a rin Pathian, mitthite tinung lehtu, thil awm lote awmtîrtu hmuhah chuan; ani chu kan zavaia pa a ni. Beisei tûr a awm loh pawhin beiseiin a ring tlat a; tichuan, chi tam tak pa a lo ni ta, ‘I thlahte chu khiti zât khi an la ni ang,’ tih ziak ang khân. Kum za dâwn lai a ni tawh a, a taksa ngaihtuah chuan mitthi ang mai a ni tawh a, Sari pawh chu fa nei rual a ni tawh lo tih a hre reng chungin, a rinna a chuai chuang lo va, rinna tlachhamin Pathian thutiam chu a ringhlel lo va, a rinna a chak tial tial a; tichuan, Pathianin a chawimawi ta zâwk a ni. Thutiamtu chuan a tiam tawh chu a hlen thei ngei ang tih a ring tlat a. Chuvâng chuan alâwm, a rinna avânga thiam chantîr a ni an tih ni. Hei hi ama chungthu sawina atân maia ziak a ni lo. Keiniho, kan Lalpa Isua mitthi zîng ata kaithotu ringtute, rin vânga thiam chang tate tân pawh hian ziak a ni. Isua chu kan bawhchhiatnate avângin tihhlum a ni a, thiam kan channa tûra kaihthawh a ni bawk. Tichuan, rin vânga thiam kan chan tâk avângin, kan Lal Isua Krista zârah Pathian nên inremin kan awm ta. Amah avâng vêk chuan tûna kan awmna, khawngaihna hnuaiah hian, rinnain kan lût ta a, Pathian ropuina kan la ṭâwm tûr beiseina avângin kan lâwm bawk a ni. Chu bâkah kan hrehawmnaah pawh kan lâwm zêl a ni; hrehawmna chuan chhelna a hring ṭhîn a, chhelna pawh chuan nghehna a hring a, nghehna chuan beiseina a hring tih kan hre si a. Chu beiseina chuan min tibeidawng lo va. Thlarau Thianghlim min pêk hmangin kan thinlungah hian Pathian chuan a hmangaihna chu a rawn leih ta si a. Eng mah ti thei lo kan nih lai khân a hun takah Krista chu mi sualte tân a lo thi ta si a. Mi fel tâna thih chu tu tân pawh a har hle ang, mi ṭha tân erawh chuan thih ngam an awm mial mahna. Amaherawhchu, Pathianin min hmangaihzia a lanna chu - mi sual kan nih reng laiin Krista kan tân zu thi a! A thisen avâng chuan Pathianin thiam min rawn chantîr ta a; thinurna lak ata chu ama zârah min va chhan chhuak dâwn êm! Hmêlma kan nih lai maha a Fapa thihna azâra Pathian nên kan inrem tawh si chuan, Pathian nêna inrema kan awm hnu phei chuan, Krista nunna avângin chhandam kan va ni dâwn tehlul êm! Chu chauh chu a ni lo, tûna inremna min petu kan Lalpa Isua Krista zârah chuan Pathianah kan lâwm bawk a ni. Khawvêlah hian mi pakhat avângin sual a lo lût a, sual avâng chuan thihna a lo awm ta a. Tichuan, khawvêl mihring zawng zawng hi thihna chuan a fan chhuak ta a ni, mi zawng zawngin thil sual an tih avângin. Dân a awm hma pawhin khawvêlah sual a awm tawh; mahse, Dân a awm loh avângin sual chu suala ngaih a ni lo. Nimahsela, Adama hun aṭanga Mosia hun thlengin, mi zawng zawng chungah Adaman Pathian thupêk awih lova thil sual a tih tâk anga sual ti ve lote chungah pawh thihna chuan thu a nei a. Adama chu lo kal tûra nên tehkhin a ni. Nimahsela, Pathian thilthlâwnpêk chu Adama sual nên chuan inang lo tak a ni - kha mi pakhat sual avâng khân mi tam tak an thi a: Pathian khawngaihna leh mi pakhat, Isua Krista avânga a thilthlâwnpêk chu tam takin an dawng thung a ni. Pathian thilpêk leh mi pakhat sual chu inang lo tak a ni sual pakhat avângin thiam loh channa a lo awm a; amaherawhchu, sual tam tak avângin khawngaiha thiam channa a lo awm ta. Mi pakhat, mi mal sualna avânga khawvêlah hian thihnain ro a rêl ta a nih si chuan, mi pakhat bawk, Isua Krista avângin, Pathian khawngaihna nasa tak leh a thilthlâwnpêk thiam channa dawngtute chuan, nun changin ropui takin ro an rêl ngei ang. Tichuan, mi pakhat sual avângin mi zawng zawng thiam loh chantîr an ni a, chutiang bawkin mi pakhat dik avângin mi zawng zawng thiam changin an nung thei ta a ni. Mi pakhat thu awih lohna avâng khân mi tam tak mi sual an ni ta a, chutiang bawkin mi pakhat thuawihna avângin mi tam tak mi dik an ni ang. Sual a lan chian lehzual theih nân Dân a lo awm a; nimahsela, sual a nasat poh leh khawngaihna a nasa lehzual ṭhîn a. Tichuan, sual chuan thihnain ro a rêl a; kan Lalpa Isua Krista zâra chatuan nun kan neih theih nân Pathian khawngaihna chuan thiam chantîrnain ro a rêl ta a ni. Eng nge kan sawi tâk ang le? Khawngaihna chu a pun nasat theih nân kan sual lui zêl dâwn em ni? Dâwn suh e, keini sual thihsan tawhte chu sualah engtin nge kan la chên reng theih ang? Krista Isuaa baptisma chang apiangte chu a thihnaah baptis-in kan awm zêl tih in hre lâwm ni? Baptisma kan chanin a hnênah phûmin kan awm ve a, a thihna chu kan ṭâwmpui a ni; chutiang bawkin, Pain mitthi zîng ata ropui taka Krista chu a kaihthawh ang khân, keini pawh nun tharin kan lêng tawh ang. Keini pawh amah nên inzawma, a thih anga kan thih ve chuan, amah a tho leh ang bawkin amah nêna inzawmin keini pawh kaihthawhin kan awm ve ang. Sual bawiha kan awm tawh loh nân sual pu taksa hi tihlum tûrin, kan mihring hlui chu a hnênah khenbehin a awm tawh tih kan hre si a. Thi tawh chu sual lakah a fihlîm a ni. Tin, Krista hnêna kan thih ve tawh chuan, a hnênah kan nung ve bawk ang tih kan ring a ni. Krista chu mitthi zîng ata kaihthawhin a awm a, a thi leh dâwn tawh lo tih kan hria, thihna chuan a chungah thu a nei tawh lo. A thihna chu sual lama thih hlen vang vangna a ni a, a nunna chu Pathian hnêna nun hlenna a ni. Chutiang bawkin nangni pawh sual lama thi tawhah inngai ula, Krista Isuaah Pathian lama nungah inngai rawh u. Tichuan, in tisa châkna zawmtîr tûr che uin in taksa thi theiah chuan sual hi lal suh se. In taksa pêng a enga mah thil ṭha lo tih nân sual hmantîr tawh suh u; mitthi zîng ata nung leh angin Pathian hnênah inhlân ula, in taksa pêngte pawh chu ama hnênah felna hriamhrei atân pe zâwk rawh u. Sual chuan in chungah thu a nei dâwn tawh si lo; Dân thuhnuaia awm lova, khawngaihna thuhnuaia in awm tawh zâwk avângin. Engtin nge ni ta ang le? Dân thuhnuaia awm lova, khawngaihna thuhnuaia kan awm tâk zâwk avângin kan sual zêl dâwn em ni? Sual zêl lul lo ve. Tu hnênah pawh a thu awih tûra in intukluh tawh chuan, a thu in awiha bawih chu in ni - sual bawihah a nih chuan thihna, thuawihna bawihah a nih chuan thiam channa a ni ang tih in hre lo vem ni? Sual bawih in ni tawh a; mahse, an hlan chhâwn che u Chanchin Ṭha zirtîrna thu in dawn chu thinlung takzeta in zawm avângin, sual bawih ata chu tihchhuah in ni a, dikna bawih in lo ni ta. Chuvângin, Pathian hnênah lâwmthu awm rawh se. In taksa chak lohzia hriain, mihring takin thu ka sawi a ni - in taksa pêngte chu tûn hmaa bawlhhlawh leh bawhchhiatna bawihah, bawhchhe tûrin in pe ṭhîn ang khân, tûnah zawng dikna bawihah thianghlima nung tûrin pe thung tawh rawh u. Sual bawih in nih lai khân dikna lakah in fihlîm a. Tûna in zahpui tâk, thil in lo tih ṭhinte kha, in hlâwkpui em? Chûng chuan a tâwpah thihna a thlen si a. Tûnah zawng sual lakah tihfihlîm in ni a. Pathian bawihah in luh tâk avângin chatuan nun chang tûra tihthianghlim in ni ta e. Sual man chu thihna a ni si a; Pathian thilthlâwnpêk erawh chu kan Lalpa Krista Isuaah chuan chatuan nunna a ni. Unaute u, Dân in hre hlawm bawk a, ka sawi hi in hai lo vang chu, Dân chuan mi an dam chhûng chauh an chungah thu a nei a ni lâwm ni? Nupui chu a pasal dam chhûng zawng a pasalah Dân chuan a phuar bet a; mahse, a pasal a thih chuan a pasal lama Dânin a phuarna chu phelhin a awm ṭhîn. A pasal dam laiin mi dang a neih chuan a uire a ni a; a pasal thih hnuah erawh chuan Dân phuarna lak ata chu a fihlîm a, mi dang nei mah se uire a ni tawh lo. Chutiang bawk chu a ni, ka unaute u: Krista taksa pêngte in nih tâk avângin Dân chu in thihsan tawh a. Pathian tân rah kan chhuah theihna tûrin tûnah zawng mi dang ta, mitthi zîng ata kaihthawha ta chu kan ni e. Kan mihring hlui nuna kan khawsak lai kha chuan kan châkna sual, Dânin a chawh thawh khân, kan taksaah a thawk a, thihna a thlen ṭhîn. Tûnah zawng, min phuar ṭhîntu kha kan thihsan tawh a, Dân lakah kan fihlîm tawh: Dân thu ziak hlui ang mai ni lovin, Thlarau dân tharin rawng kan bâwl zâwk a ni. Eng nge kan sawi tâk ang le? Dân chu sual em ni? Ni suh e. Amaherawhchu, Dânin mi hriattîr lo se sual hi ka hre lo vang. Dân chuan “Awt suh,” ti lo se, awh hi ka hre lo vang. He thupêk hi remchânga hmangin sual chuan keimahah hian awhna chi tinrêng a chawk tho va. Dân awm lo sela chu sual hi thil thi mai a ni. Hmânah chuan Dân tel lovin ka nung ṭhîn a; mahse, thupêk chu a lo awm a, sual chu a lo harh a, kei chu ka thi ta a. Nunna tûra thupêk chu ka tân thihna a lo ni ta. Sual chuan thupêk chu remchânga hmangin mi bum a, mi tihlum ta a ni. Dân zawng a thianghlim a ni, thupêk pawh a thianghlim a, a dik a, a ṭha a ni. A nih loh leh, thil ṭha chuan kan tân thihna a rawn thlen a ni maw? Thlen suh e. Sual zâwk hian a ni; sual a nihzia tilang tûrin thil ṭha hmangin ka tân thihna a rawn thlen a, thupêk avângin sual râpthlâkzia chu a lo lang fiah ta a ni. Dân chu thlarau lam thil a ni tih kan hria; kei erawh chu mihring mai, sual bawiha hralh tawh ka ni. Ka chêt dân hi ka hrethiam lo ve; tih ka duh chu ti lovin, ka huatzâwng chu ka ti zâwk tlat ṭhîn. Ka tih duh loh zâwng ka tih hian Dân chu a ṭha ka tihpui ve tihna a ni. Tichuan, keimah hi zawng a titu tak ka ni lo, keimaha sual chêng hi a ni zâwk. Keimah mihringah hi zawng thil ṭha eng mah a awm lo tih ka hria, thil ṭha tih duhna nei ṭhîn mah ila ka ti thei si lo. Ka tih duh thil ṭha chu ti lovin, ka duh loh thil sual chu ka ti zâwk ṭhîn. Ka tih duh loh zâwng chu ka tih ṭhin si chuan, a titu chu keimah tak hi ka ni tawh lo tihna a ni a, keimaha sual awm hi a ni zâwk. Hetiang hi thil awm dân a ni tih ka hre chhuak ta; Thil ṭha tih ka duh na a, thil sual ka ti leh mai ṭhîn. Ka mihring chhûngril chuan Pathian Dân chu a lâwm a; nimahsela, ka taksaah hian thawktu, dân danglam tak a awm tih ka hria; chu chuan ka chhûngril ṭha tihzâwng dân chu a do va, sual dân ka taksaa thawk ṭhîn bawihah mi siam ṭhîn a ni. Mi khawngaihthlâk ka va han ni tak êm! He thihna taksa lak ata hi tuin nge mi chhan chhuak ang? Pathianin le! Kan Lalpa Isua Krista zârah ani chu fakin awm rawh se. Tichuan, ka thinlung chhûngril tak chuan Pathian Dân a zâwm a, ka taksa hi chuan sual dân a zâwm thung a ni. Chutichuan, tûnah zawng Krista Isuaa awmte tân chuan, thiam loh chantîrna rêng a awm tawh lo. Krista Isuaa nunna Thlarau dân chuan sual leh thihna dân ata chu min tichhuak tawh si a. Tisa a chak loh avânga Dânin a tih theih hauh loh chu Pathianin a rawn ti ta; mihring tisa sual ang puin, a Fapa ngei chu sual thawi nân Pathianin a rawn tîr a, tisaa sual awm chu thiam loh a chantîr ta; tisa dâna awm tawh lo, thlarau dâna awm tawh keimahniah hian Dânin a phût chu hlena a awm theih nân. Tisa dâna awmte chuan tisa lam thilte an duh a, thlarau dâna awmte erawh chuan Thlarau lam thilte an duh ṭhîn. Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni. Tisa duhzâwng chuan Pathian a do va, Pathian Dân a zâwm si lo va, zawm pawh a zâwm thei hek lo: chuvângin, tisa duhzâwng anga awmte chuan Pathian an tilâwm thei lo. Pathian Thlarau chu in hnêna a chên chuan tisa mi in ni tawh lo va, Thlarau mi in ni tawh zâwk a ni. Tu pawh Krista Thlarau nei lo chu ama mi an ni lo. Tin, Krista chu nangmahnia a awm chuan in taksa chu sual vânga thi ni mah se, thiam chantîr in nih tawh avângin in thlarau erawh chu a nung a ni. Mitthi zîng ata Isua kaithotu Thlarau chu nangmahnia a awm chuan, mitthi zîng ata Krista kaithotu chuan nangmahniah a thlarau chêntîrin, in taksa thi thei chu a tinung ang. Chuvâng chuan, unaute u, bat kan nei, tisa dâna tisa taka nung tûr chuan a ni lo. Tisa dâna in awm chuan in thi ngei ang: amaherawhchu, in taksa châk zâwng thil sual tihte Thlarauva in tihhlum chuan in nung ang. Pathian Thlarau hruaia awm apiangte chu Pathian fate an ni e. In Thlarau dawn chu bawih anga hlauva awmtîr leh tûr che u ni lovin, fa-a siam tûr che u Thlarau a ni zâwk e; chuvâng chuan, “Abba, Ka Pa” tiin kan au chhuak ṭhîn a ni. Chu Thlarau ngei chuan keimahni thlarau nên inkawpin, Pathian fate kan nih min hriattîr a. Pathian fate kan nih chuan a roluahtute kan ni, Krista tuarna kan ṭâwmpui si chuan a ropuina pawh kan ṭâwmpui ngei dâwn a ni. Tûna tuarnate hi nakîna kan tân ropuina tihlan tûr nên chuan tehkhin thamah ka ruat si lo. Thil siam zawng zawngte chuan Pathianin a fate a tihlan hun an nghâkhlel êm êm a ni. Thil siamte chu anmahni duh vâng ni lovin, a siamtu thu avângin chhiatna tâwk tûra tih an ni; amaherawhchu, beisei tûr a la awm; thil siamte chuan chhiatna bawih ata tihchhuaha awmin Pathian fate zalênna ropui chu an ṭâwm ve dâwn a ni. Thil siam zawng zawng chu tûn thlengin nau vei rûm angin an rûm tih kan hria. Chu chang a ni lo, keini Thlarau rah hmasa dawngtute ngei pawh hi, a fa-a min siam hun, kan taksa tlanna tûr chu, nghâkhlelin kan rûm a ni. Chu beiseina avâng chuan chhandam kan ni si a; amaherawhchu, hmuh tawh reng beiseina chu beiseina a ni lo ve. A hmuh tawh reng chu tu nge la beisei fo? Kan hmuh loh chu kan beisei erawh chuan kan nghâk fan fan ṭhîn a ni. Chuvângin, Thlarau pawh chuan kan chak lohnaah min pui ṭhîn. Engtia ṭawngṭai tûr nge tih pawh kan hre si lo va. Thlarau chuan rûm sawi hleih theih lohvin min ṭawngṭaisak ṭhîn a ni. Mi thinlung enfiahtu Pathian chuan, Thlarau sawi tum chu eng nge ni tih a hria; Thlarau chuan Pathian duhzâwng ang zêlin min ṭawngṭaisak si a. Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria; a hriat lâwkate chu ama Fapa ang taka awm tûrin a ruat lâwk si a; tichuan, Fapa chu unau tam tak zînga fa u ber a lo ni tawh ang. Tin, a ruat lâwkate chu a ko va, a kohvate chu thiam a chantîr a, thiam a chantîrte chu a ropuina a chantîr bawk a. Chûng thu-ah chuan eng nge kan sawi tâk ang? Pathian kan lama a ṭan chuan tuin nge min do thei ang? Ama Fapa ngei pawh zuah lova, kan zaa tâna petu chuan engkim a thlâwnin min pe tel lo vang em ni? Pathian mi thlante chu tu nge hêk ngam ang? Pathian chu thiam chantîrtu a ni si a. Tu-in nge thiam loh chantîr ang? Krista Isuan maw? Ani chu kan tân a thi chauh pawh ni lovin, a tholeh a, Pa Pathian ding lama awmin min sawisaktu a ni a. Krista hmangaihna ata chu engin nge min ṭhen thei ang? Hrehawmnain emaw, mangannain emaw, tihduhdahnain emaw, ṭâmin emaw, saruaknain emaw, khandaihin emaw min ṭhen thei dâwn em ni? “Nangmah avângin nilêngin thah mai hmabâkin kan awm a, berâm talh tûr anga dah kan ni,” tih ziak ang khân. Thei suh e! Chûng zawng zawngah chuan min hmangaihtu avângin ropui taka ngamtu kan ni. Eng mahin - thihna te, nunna te, vântirhkoh te, lalna te, thil awm sa te, thil lo la awm tûr te, thiltihtheihna te, sânna te, thûkna te, thil siam dang rêng rêng te pawhin, kan Lalpa Krista Isuaa awm Pathian hmangaihna ata chu min ṭhen thei lo vang tih ka hre chiang a ni. Kristaah chuan thu dik tak ka sawi a ni; ka daw lo ve: Thlarau Thianghlim zârah ka chhia leh ṭha hriatna pawhin a hre chiang. Ka rilru nasa takin a hrehawm a, ka lungngaihna pawh a reh thei lo. Ka unaute, tisa lama ka chipuite aiah hian ânchhia dawngin Krista hnên ata tihhran ni ila ka ti hial ṭhîn. Israel mi an ni a, fa nihna te, ropuina te, thuthlung te, Dân te, rawngbâwl hna te, Pathian thutiam te an chang a. Thlahtute chu an pute an ni a, tisa lam chhui chuan Krista ngei pawh chu an chipui a ni; engkim chunga awm Pathian chu chatuana fakin awm rawh se. Amen. Pathian thu chu a thlâwn ta tihna zawng a ni hauh lo; Israela thlah zawng zawng Israel mi an ni vek lo ve. Abrahama thlah zawng zawng pawh a fate an ni vek hek lo. “Isaka-ah hian i thlahte chhui an ni ang,” Pathianin a tih zâwk kha. Tichuan, tisa lama a fate chu Pathian fate an ni chuang kher lo, Pathian thutiam avânga a fate erawh chu Abrahama thlah dik taka ngaih an ni. “Tûn ang hunah hian ka lo kal ang a, Sari chuan fapa a nei ang,” ti-a tiam a nih kha. Chu chang chu a ni hlei nêm: mi pakhat, min thlahtu Isaka lakah Rebeki chuan phîr a pai a, naute pian hma, a chhia emaw, a ṭha emaw an tih theih hma khân Pathianin a duhzâwng angin pakhat zâwk a thlang a ni tih a lang: thiltih avâng ni lovin, a kotu duhzâwng avâng zâwkin Rebeki hnênah, “A upa zâwkin a naupang zâwk rawng a bâwl ang,” a tih kha. “Jakoba ka hmangaih a, Esauva erawh chu ka hua,” tih ziak a ni bawk. Chuti a nih si chuan eng nge kan sawi tâk ang? Pathianah dik lohna a awm em ni? Awm lo ve. Ani chuan, “Ka khawngaih apiang chu ka khawngaih ang a, zah ka ngaihna chung apiangah zah ka ngai ang,” tia Mosia hnêna a sawi kha. Chuvângin, mihring duh thu emaw, thiltih emaw ni lovin, Pathian khawngaihnaah a innghat zâwk a ni. Lehkha Thu-in Farawa hnênah, “He mi avâng ngawt hian ka tungding che a ni, nangmaha ka thiltihtheihna ka entîr theihna tûr leh, khawvêl zawng zawnga ka hming a than theih nân,” a ti si a. Tichuan, Pathian chuan a duh apiang a khawngaih ṭhîn a, a duh apiang pawh a tiluhlul ṭhîn a ni. “Chuti chu Pathianin engati nge mi a la dem cheu vang? A duhzâwng chu tu nge dodâl thei awm?” in ti a ni thei e. Aw mihring, Pathian hnial veitu chu tu nge maw i nih le? Thilsiam chuan a siamtu hnênah, “Engati nge hetianga mi siam?” a ti ang em ni. Bellei tlang khat aṭangin bêl hlu deuh te, hlu lo deuh te siam tûrin bêlvawtu chuan bellei chungah thu a nei lo vem ni? Chutiang chuan Pathianin a ti ṭhîn; a thinur leh a thiltihtheihna chu lantîr duh mah se, a thinurna dawngtu bêl, tihboral mai tûrte chu a dawh hrâm hrâm a; tin, a khawngaihna bêl, a ropuina chang tûra a buatsaih keiniho hnênah hian ropuina nasa tak a rawn tilang thung a ni. Juda-te zîng ata chauh ni lovin, Jentail-te zîng ata a koh chhuahte hi chutiang bêlte chu kan ni. Hosea lehkhabuah hetianga a sawi kha: “Ka mi ni ngai lote chu ‘Ka mite,’ ka ti ang a, Hmangaihngailohvi chu ‘Hmangaihi,’ ka ti ang. ‘Ka mite in ni lo ve,’ an tihna hmunah ngei chuan Pathian nung fate vuah in ni ang,” tiin. Isaia pawh khân Israel mite thu aupuiin, “Israel mite chu tuifinriat ṭiau zâtin tam mah sela, a bâng tlêm tê chauh chhandam an ni ang. Lalpa chuan lei chunga a rorêlna tûr chu a hlen thuai dawn si,” a tih kha. Isaia vêkin, “Engkim Lalpa chuan a chi thlah min lo zuahsak suh sela chuan, Sodom khua ang kan ni tawh ang a, Gomora khua ang mai kan ni tawh ang,” tia a lo sawi lâwk ang khân. Eng nge kan sawi tâk ang le? Jentail thiam chan tum lêm lote chu thiam chantîr an lo ni ta, rinna avânga thiam chantîrna chu. Dân zâwma thiam chan tum Israel-te zâwk chuan Dân ang chuan thiam an chang zo ta lo. Eng vâng nge ni? Rinna lova thiltiha hmuh an tum vâng a ni a, Tlûkna lungah chuan an tlu ta a ni. “Ngai teh, Zion-ah chuan inchhuiha tlûkna lung, Insuta tlûkna lungpui ka dah a, Tu pawh amah ring apiang chu An mualpho lo vang,” tih ziak ang khân. Unaute u, ka chipuite chu chhandam ni se tih hi ka duhthusâm leh Pathian hnêna ka dîl ber ṭhin a ni. Pathian tân ṭhahnem an ngaih nasatzia ka hria, hre chiang lovin ṭhahnem an ngai a ni. Pathianin mi thiam a chantîr dân chu an hrethiam lo va, anmahni kawng an zawh tlat a, Pathianin thiam a chantîr dân hnuaiah an intulût duh lo. A ring apiangte thiam chantîra an awm theihna tûrin, Krista chu Dân tibângtu a ni si. Mosia chuan Dân zawm avânga thiam chan chungchâng thu heti hian a ziak: “Dân zâwmtu chu a nung ang,” tiin. Rinna avânga thiam chan chungchâng thu erawh chu, “ ‘Tu nge vânah lâwn ang?’ (Chu chu chung lam ata tu nge Krista hruai chhuk ang, tihna a ni) emaw, ‘Tu nge leilâwtah chhuk ang?’ (chu chu, mitthi khua ata tu nge Krista hruai chhuak ang, tihna a ni) emaw, in rilruin ti suh u,” a ti a. “Thu chuan a hnaih a che, i kâah leh i thinlungah a awm,” a ti zâwk a ni. ‘Thu’ tih chu rinna thu kan hril hi a ni. I kâin Isua chu Lalpa a ni tih i ṭana, mitthi zîng ata Pathianin a kaitho tih i thinlunga i rin chuan, chhandam i ni ang. Thinlunga ring chu thiam chantîr an ni a, kâa ṭan chu chhandam an ni bawk a. Lehkha Thu-in, “A ring chu tu mah an mualpho lo vang,” a ti a ni. Juda nih emaw, Grik nih emaw danglamna a awm chuang lo; Lalpa pakhat chu an zaa Lalpa a ni a; amah lamtu apiangte tân chuan engkim a ngah a ni. “Tu pawh Lalpa hming lam apiang chhandam an ni ang,” tih a ni si a. An rin lohva chu engtin nge an lam theih ang? An hriat lohva chu engtin nge an rin theih ang? Hrilhtu an awm si loh chuan engtin nge an hriat ang? Tirh an nih si loh chuan tu nge hril ang? “Thil ṭha chanchin rawn hriltute ke chu a va mawi êm!” tih ziak ang khân. Nimahsela, Chanchin Ṭha chu an za-in an awih vek lo. Isaia ngei pawhin, “Lalpa, kan thu sawi tuin nge ring?” a ti si a. Tichuan, rinna chu thu hril an hriat avângin a lo awm a, thu hril chu Isua Krista thu hi a ni. A nih leh, an bengin an hre ngai lo vem ni? Hria e a! “An thâwm chu ram tinah a thang a, an thu chu kâwlkil thlengin a thang chhuak ta,” tih a ni. A nih leh Israel miten an hre ve lo vem ni? “Chi-a sawi tham lohte chu ka thîktîr ang che u a, Chi fing lote avângin ka tithinur dâwn che u a ni,” tiin Mosia chuan a sawi hmasa a. Isaia chuan a sawi huai lehzual a: “Mi zawng lote chuan mi hmu a, Mi lam lote hnênah ka inhriattîr a,” a ti a. Israel-ho chungchâng thu-ah erawh chuan, “Mi tihmawh leh hel hmangho tân Nilêngin ka bân ka phar ṭhîn,” a tih kha. A nih leh, Pathian chuan a mite chu a paih thla kan ti dâwn em ni? Paih thla suh e. Kei ngei pawh Israel mi, Abrahama thlah, Benjamin hnam ka ni si a. Pathianin a mi hriat lâwkate chu a paih thla lo ve. Elija chanchin Lehkha Thua chuang kha in hre lo vem ni? Ani chuan Israel mite chungthu Pathian hnênah a thlen a: “Lalpa, i zâwlneite an tihlum a, I maichâmte an tichim a, Keimah chauh hi ka la awm a, Kei pawh mi tihhlum an tum a ni,” tiin. Pathianin engtin nge a chhân kha? “Baala hmaa ṭhingṭhi ngai lo mi sângsarih keima tân ka la zuah reng a ni,” tiin a chhâng a nih kha. Tûnah pawh chutiang bawk chuan Pathianin a khawngaihna avânga a thlan chhuahte chu tlêm tê chauh an ni. A khawngaihna avânga thlan chhuah an nih chuan, an thiltih vâng a ni thei lo; chuti ni se khawngaihna chu khawngaihna a ni thei lo vang. Engtin nge ni ta ang le? Israel-te chuan an zawn chu an hmu lo va, Pathian thlan tlêm tê chauhvin an hmu, mi dang zawng zawng chu an chawlawl zo vek ta a ni. “Pathianin vawiin thlengin rilru muthlu a pe a, hmu thei lo mit leh hre thei lo beng nên,” tih ziak ang khân. Tin, Davida chuan, “An ruai siam chu an tân thang leh fal ni sela, Tlûkna leh thungrulhna ni rawh se! An hmuh theih loh nân an mit chu thim sela, Rit phurin kûl reng rawh se,” a ti bawk a. A nih leh an tlûk avângin an chhe hlen dâwn em ni? Chhe hlen suh e, an tlûk avângin Jentail-te hnênah chhandamna a lo thleng a, Israel-te awh tûra lo thleng a ni. Tichuan, an tlûkna mah khawvêl tihhausakna a niha, an tlâkhniamna mah Jentail-te hausakna a nih bawk si chuan, an lo tel kim hun chuan eng ang tak ni ang maw! Nangni Jentail-te hnênah thu ka sawi a nih hi. Kei hi Jentail tâna tirhkoh ka nih avângin ka rawngbâwl hna hi ka ngai ropui a ni; ka chipuite ka thîktîr che u a, a ṭhen tal ka chhandam theihna tûrin. Anmahni paihthlâkna mah khawvêl hi Pathian ṭhiana siam lehna a nih si chuan, anmahni lawm luh lehna chu thihna ata nun lehna a ni dâwn lâwm ni? Chhang hmeh lai hlâwm ata sawh thlâk hmasak ber chu serh thianghlim a nih chuan, a hlâwm pum pawh serh thianghlim a ni; tin, thing pawh a zung a thianghlim chuan a zârte pawh a thianghlim a ni. Oliv thingzâr ṭhenkhat chu sât thlain, nangni oliv suakte chu oliv kûngah chuan zawm in ni a; zung ṭha chu in ṭâwm ve ta a. Zâr dangte lakah chuan inchhuang mah ula, a zung châwmtu in ni lo, a zungin a châwm zâwk che u a ni. Tin, nangin, “Zawma ka awmna tûr zârte chu sah thlâk a ni alâwm,” i ti ang e. I ti dik e; an rin loh avângin sah thlâk an ni a, nang chu i rin avângin zawm i ni. Chapo mai teh suh, hlau zâwk rawh. Pathianin zâr takte chu a zuah si loh chuan nang pawh a zuah bîk lo vang che. Pathian ṭhatzia leh a ṭihbaiawmzia hi ngaihtuah teh; tlute tân a ṭihbaiawm a, a ṭhatnaa i awm reng chuan, nanga tân zawng a ṭha a ni; i awm reng loh chuan nang pawh sah thlâk i ni ve mai ang. Tin, anni pawh ring lova an awm reng loh chuan zawmin an awm leh ang, Pathianin anni chu a zawm leh thei si a. Nang oliv suak ata sah chhûm mah, pianphung pângngai ang lova oliv thing ṭhaa zawm i nih si chuan, oliv zâr dik tak chu oliv thing dikah chuan zawm a va awlsam zâwk dâwn êm! Unaute u, he thurûk hi in hriat loh ka duh si lo; chutilo chu, fing tâwk in lo inti dah ang e; Jentail-te an tel kim hma chu Israel mi ṭhenkhatte chungah chawlawlna a lo thleng rih a ni, tih hi. Chumi hunah chuan a ni, Israel mi zawng zawng chhandam an nih dâwn ni. “Zion aṭangin Chhandamtu chu a lo chhuak ang a, Jakoba hnên ata suahsualna a ti bo vang.” ‘Chu chu an hnêna ka thuthlun tûr chu a ni, An sualte ka lâk bo hunah chuan,’ tih ziak ang khân. Chanchin Ṭha an hnâwl avângin Juda-te chu Pathian hmêlma an ni a; nangni chan a ṭhat phah a; mahse, Pathianin a thlan avângin thlahtute azârah a ṭhian duh takte an ni tho. Pathianin mal a sâwm tawh leh a thlan tawh chu sût leh theih a ni lo. Hmânah chuan Pathian thu in awih lo va, tûnah zawng annin an awih loh avângin a khawngaihna in dawng ta a; chutiang bawkin, tûnah nangnin khawngaihna in dawn avângin, anni pawhin khawngaihna an dawn ve theih nân tûnah hian an awih rih lo a nih hi. An zavaia chungah a khawngaihna a lantîr duh avângin Pathian chuan mi zawng zawng awih lohnaah a khung khâwm a ni. Pathian hausakzia, a finna leh a hriatna chu a va thûk êm! A rorêl dân chu hriat phâk rual loh, a kawngte chu chhui theih rual loh a ni! “Lalpa rilru chu tu nge hriaa, tu nge a remruatsaktuah ṭang tawh? A rulh leh tûra a hnêna thil pe tu nge awm ngai le?” Thil zawng zawng hi amah aṭanga lo awm, amah avâng leh ama tâna awm a ni. A hnênah chatuanin ropuina chu awm rawh se; Amen. Chuvângin, unaute u, Pathian khawngaihna avâng hian, inthawina nung leh thianghlim, Pathian lawm tlâk ni tûrin, in taksa chu a hnêna hlân tûrin ka ngên a che u, chutiang chu in rawngbâwl dân tûr tak a ni e. Tûnlai khawvêl awm dân ang hi ṭâwm suh u; in nun phung chu, in rilru tihthara awmin, tihdanglam ni vek rawh se; tichuan, Pathian duhzâwng, ṭha leh lawm tlâk leh ṭhat famkim chu in hrethiam thei ang. Pathian mi pêk khawngaihna avâng hian in zînga tu mah inngaihlu lutuk lo tûrin ka ngên a che u. Pathianin mi tin hnêna rinna a pêk ang zêlin mahni phu tâwk rilru pu rawh u. Taksa pum khatah pêng hrang tam tak kan nei a, pêng zawng zawngin thawh hrang an nei ṭheuh; chutiang bawkin keini pawh tam tak ni mah ila, Kristaah chuan taksa pumkhat kan ni a, kan za hian taksa pêng anga inzawm tawn ṭheuh kan ni. Khawngaihna min pêk ang zêlin thilthlâwnpêk hrang hrang kan dawng ṭheuh a ni; thu hril lam a nih chuan, kan rinna ang zêlin hril ila, rawngbâwl lam a nih chuan, ṭhahnemngai takin bâwl ila, zirtîr lam a nih chuan zirtîr ila; mi thlamuan tûr a nih chuan theihtâwp chhuah ila; petu chuan phal takin pe sela, rorêltu chuan taima takin rêl sela, puih ngai puitu chuan hlim takin pui rawh se. Hmangaihna chu vervêkna tel lovin ni rawh se. Sual chu hua ula, a ṭha chu pawm tlat rawh u. Unau inlainat angin inlainat tawn ula, inchawimawi tawn uar rawh u. Inthlahdul hauh lovin rilru phûr takin Lalpa rawng chu bâwl rawh u. Beiseina chuan tilâwm che u sela, tihduhdah in tuar pawhin chhel takin tuar ula, eng lai pawhin ṭawngṭai rawh u. Unau tlachhamte chu chhawmdâwl ula, mikhual lawm chîng rawh u. A tiduhdahtu che u chu malsâwm ula, ânchhia lawh suh u. Lâwmte chu lâwmpui ula, ṭapte chu ṭahpui rawh u. Angkhat vekin inen ula, intivei suh u, mi tête pâwl zâwk rawh u. Sual chu sual vêkin thungrûl lo ula, mi zawng zawng ngaiha mawi ngaihtuah zâwk rawh u. Nangni chuan in theihtâwpin mi zawng zawng nên inrem tum rawh u. Duh takte u, phuba la suh ula, Pathian thinurna kian zâwk rawh u. “ ‘Phuba rêng rêng keima lâk tûr a ni, keiman ka thungrûl ang,’ Lalpan a ti,” tih ziak a ni si a. Chuvângin, i hmêlma a rilṭâm chuan ei tûr pe rawh, a tuihâl chuan in tûr pe rawh; chutianga i tih chuan a zak êm êm dâwn a ni. Sual ngam chein awm suh la, ṭhatnain sual chu ngam zâwk rawh. Mi tinin an chunga rorêltute thu an awih tûr a ni. Pathian ruat lohvin rorêltu an awm thei lo; tûna rorêltute pawh hi Pathian ruat an ni asin. Tichuan, rorêltu dodâl chuan Pathian ruat a dodâl a ni; dodâltu chuan ama chungah hremna a thlentîr ang. Rorêltu chu thil ṭha titu tân a hlauhawm lo, thil sual titu tân erawh chuan a hlauhawm a ni. Rorêltu hlau lova awm i duh em? Thil ṭha ti la, a fak i hlawh ang. I ṭhatna tûra Pathian rawngbâwltu a ni si a. Thil sual i tih erawh chuan hlau rawh, khandaih chu a keng mai mai lo a nia. Pathian rawngbâwltu a ni a, thil sual titute chunga Pathian hremna kengkawhtu a ni. Chuvângin, hrem hlauh vâng mai ni lovin, i chhia leh ṭha hriatna avâng pawhin a thu i zâwm tûr a ni. Chutiang a nih avâng chuan chhiah pawh in chawi ṭhîn; thuneitute chuan an hna ṭha taka an thawh chuan Pathian rawng an bâwl a ni si a. Pêk tûra ruat apiangte hnênah pe ula, lei man pêk tûr a nih leh pe ula, chhiah chawi tûr a nih leh chawi ula, ṭih tûr chu ṭih ula, pawisak tûr chu pawisa rawh u. Inhmangaih tawnna ngawt lo chu tu ma eng mah ba suh u; mahni mihringpui hmangaihtu chuan Dân a zawh famkim tawh a ni. Hêng, “Uire suh, tual that suh, ru suh; awt suh” tih leh thupêk dang rêng rêngte hi, “Nangmah i inhmangaih angin i vêngte i hmangaih tûr a ni,” tih hian a khai khâwm vek si a. Hmangaihnain vêngte a tikhawlo ngai lo va; chuvângin, hmangaihna hi Dân zawh famkimna a ni. Tûnlai thil awmzia hi in hria e; muhîl thawhharh a hun takzet tawh a, tûnah chuan kan rin tirh lai ai khân chhandam kan nihna tûr ni chu a hnai zâwk tawh a ni. Zân hi a ral lek lek tawh a, khua a vâr dâwn ta; chhûn ênga awmte angin mawi takin khawsa ila, thim thiltih chu paihin, êng thuamin i inthuam ang u. Zu in buai leh ruia awm lovin, hur leh inngaih hmanga awm lovin, insual leh inîtsîka awm hek lovin. Lalpa Isua Krista chuan inthuam zâwk ula, in tisa châkna puitlin tum rêng rêng suh u. Rinnaa mi chak lo chu, a ngaih dân hnial tum kher lovin lâwm rawh. Mi pakhatin engkim ei hi thiangin a ring a, mi chak lo erawh chuan thlai chauh a ei a. Engkim ei mi chuan a ei lo chu hmusit suh se; a ei lo pawhin a ei mi chu sawisêl suh se, Pathianin ani chu a lâwm tho a ni. Mi dang chhiahhlawh lo sawisêltu chu tu nge maw i nih le? A din ngheh emaw, a tlûk emaw chu ama pu thu thu a ni. A ding nghet ngei ang; Lalpa chuan a din chhuahtîr thei si a. Tin, mi dangin ni khat hi ni dang aiin a ngaihlu bîk a, mi dangin ni zawng zawng hi inang ṭheuhvin a ngai thung a. Mi tinin mahni ngaih dân bulfûk mumal neih tûr a ni. Ni pakhat serh bîktu chuan Lalpa chawimawi nân a serh a ni; engkim eitu chuan, Pathian hnêna lâwmthu sawi zeta ei a nih avângin Lalpa chu a chawimawi a ni. Ei lama insûm mi pawh chuan Pathian hnêna lâwmthu a sawi tho avângin Lalpa chawimawi nân a ti a ni. Tu mah mahni tâna nung kan ni lo va, tu mah mahni tâna thi kan ni hek lo; kan nun chuan Lalpa tân kan nung a ni a, kan thih pawhin Lalpa tân kan thi a ni; chuvângin, kan nun pawhin, kan thih pawhin Lalpa ta kan ni. Tichuan, mi nung leh mitthi Lal a nih theih nân Krista chu a thi a, a nung leh ta a ni. Engtizia nge nangin i unaupa i sawisêl mai? Engati nge nang pawh i unaupa chu i hmuhsit mai? Pathian rorêlna ṭhutthlêng hmaah chuan kan la ding ṭheuh dâwn asin: “Minunga chu ka ni, Mi tinrêng ka hmaah an ṭhingṭhi ang a. Lei tinrêngin Pathian ka nih an puang ang,’ Lalpan a ti,” tih ziak a ni. Tichuan, kan za-in Pathian hmaah mahni chanchin kan sawi ṭheuh dâwn a ni. Tichuan, insawisêl chîng tawh suh u, tu pawhin mahni unau tlûkna tûr emaw, lungnihlohna tûr emaw siam loh tum zâwk rawh u. Lalpa Isuaah chuan thil rêng rêng amah ngawtah chuan thiang lo eng mah a awm lo tih ka hre chiang a ni; amaherawhchu, thil ṭhenkhat chu, thiang lova ngaitu tân chuan a thiang lo a ni mai. I englo ei avânga i unau rilru a nat chuan, hmangaihna kawng i zawh tawh lo va ni. A thih ai Kristan a thihsaka chhiatna chu i thil eiin thlen suh. Ṭha in tih zâwng chu mi sawichhiat lam chi ni suh se. Pathian ram chu ei leh in lam thu a ni si lo va, Thlarau Thianghlim zâra thiam channa te, remna te, lâwmna te a ni zâwk e. Chutianga Krista rawngbâwltu tawh phawt chu Pathian lâwmzâwng mi a ni a, mihring fak pawh a hlawh ṭhîn. Tichuan, inremna tûr leh intihsâwt tawnna tûr thilte chu i ûm ang u. I thil ei avângin Pathian hnathawh tichhe suh. Thil engkim ei hi thian zawng a thiang a ni; mahse, mi dang tlûk theihna thil ei erawh chu a ṭha lo. Sa ei te, zu in te, unau tlûk theihna tûr thil rêng rêng tih hi chîn loh a ṭha a ni. I rin dân chuan ring mai la, Pathian nêna in inkâr thu a ni. Mahni rin ang zâwng tia, inthiam lohna nei lo chu a nihlawh e. Inthiam lo chunga ei chuan thiam loh a chang reng tawh a ni; a rin dân anga ti a nih loh avângin. Eng pawh rinna lova tih chu sual a ni. Keini mi chak zâwkte hian mahni lâwmna zawng lovin, chak lo zâwkte chu an chak lohnaah kan ṭanpui tûr a ni. Intihsâwt tawn nân mahni vêngte tilâwmin an tâna ṭha tih i tum ṭheuh vang u. Krista pawhin mahni lâwmna a zawng si lo, “Nangmah chêksawlhtute chêksawlhna chu ka chungah a tla ta,” tih ziak ang khân a tuar zâwk a ni. Lehkha Thua lo ziak tawh rêng rêng chu min zirtîr tûra ziak a ni, thu ziak aṭanga chhelna leh thlamuanna kan dawn azâra beiseina kan neih theih nân. Tin, chhelna leh thlamuanna petu Pathian chuan, Krista Isua thu angin rilru hmunkhat puttîr che u sela, thinlung hmun khat pua thukhat vuain, kan Lalpa Isua Krista Pa leh Pathian chu in fak za thei dâwn nia. Pathian ropuina tûrin Krista chuan a lâwm che u ang khân inlâwm tawn rawh u. Ka hrilh a che u, Pathian rinawmzia tihchian nân thlahtute hnêna a thutiam hlenin, Krista chu serh tanho rawngbâwltuah a lo awm a. Jentail-te pawhin a khawngaihna avânga Pathian an chawimawi theihna tûrin: “Tichuan, Jentail-te zîngah ka fak ang chia, I hming fakin ka zai ang,” tih ziak ang khân. Hetiang hian a ti bawk, “Jentail-te u, a mite nên lâwm rawh u.” Hetiang pawh hian a ti: “Jentail zawng zawngte u, Lalpa chu fak rawh u, Ama mite zawng zawng pawhin fak rawh se.” Isaia pawhin heti hian a ti: “Jesaia zung zâm chu a awm ang a, Jentail-te lal tûrin a lo chhuak ang. Amahah Jentail-te chuan an beiseina an nghat ang.” Thlarau Thianghlim thiltihtheihna azârah beiseinaa in khah theihna tûrin, beiseina hnâr Pathian chuan in rin avângin lâwmna leh thlamuanna tinrêngin vûr che u rawh se. Ka unaute u, nangniho hi ṭhatnaa khat, finna tinrêng ngaha, inzirtîr tawn thei tûr in nih ka ring tlat a; amaherawhchu, thil ṭhenkhat hriat nawntîr tûr che uin ka rawn ziak tho va. Jentail-te tâna thawk tûra Pathianin Krista rawngbâwl hna mi rawn hlan hi chhuangin ka ziak huai hle nghe nghe a. Jentail-te chu Thlarau Thianghlima Pathian hnêna lawm tlâka inthawina atân hlan tûrin Chanchin Ṭha hril hi ka puithiam hna a ni si a. Krista Isuaah chuan Pathian rawng ka bâwl hi ka chhuang hle a ni. Mi dang lungphûm chunga rem chho ka nih loh nân, Krista la hriat lohna hmun apiangah Chanchin Ṭha puan hi ka duh dân a ni si a: “A chanchin la hril ngai lohnaa mite chuan An hmu ang a, La hre ngai lote chuan an hria ang,” tih ziak ang khân hril ka tum zâwk ṭhîn a ni. Chuvâng chuan a ni, in hnêna lo kal ka ṭhulh leh ṭhin ni. Tûnah erawh chuan hêng lai ramah hian kalna tûr ka nei ta lo va; kum tam tak chhûng rawn tlawh che u ka châk tawh bawk nên; Spain ram kal pahin lo kal ka inbeisei a, nangni nên inpâwl kham tê tê ila, kal ka tumna lama mi thlah ka beisei bawk a ni. Tûnah tak hi chuan mi thianghlimho rawngbâwl tûrin Jerusalem khuaah ka kal rih dâwn. Makedonia leh Akaia rama mite chuan phal takin Jerusalem khuaa mi thianghlimho zînga retheite tân thawhlâwm an thawh a. Phal taka ti an ni; amaherawhchu, an lakah bat an nei ve rêng a ni; Jentail-ten an thlarau lam thilte an ṭâwmpui chuan, khawvêl lam thilah anmahni chhawmdâwl ve thung âwm rêng an ni. Chu chu ka tiha, thawhlâwm chu an hnêna ka hlan fel hnuah, nangmahni tlawhin Spain ramah ka kal zêl ang. Tin, in hnêna ka lo kal hun chuan Krista malsâwmna famkim nên ka lo kal ang tih ka hria. Unaute u, kan Lalpa Isua Krista leh Thlarau Thianghlim zâra in hmangaihnain Pathian hnêna mi ṭawngṭaipui ngat ngat tûrin ka ngên a che u. Judai rama ring lote laka ka him theih nân te, ka rawngbâwlna hi Jerusalem-a mi thianghlimte tân thil lâwmawm tak a nih theih nân te, rilru hlim taka ka lo kal theiha, Pathianin rem a tih chuan kan intihharh tawn theih nân te mi ṭawngṭaisak rawh u. Remna Pathian chu in zaa hnênah awm rawh se. Amen. Kan farnu, Foibi, Kenkriai kohhrana rawngbâwltu hi, Lalpa hminga mi thianghlimte tih âwm rênga lo lâwm tûr leh, puih a ngaihna apianga lo pui tûrin ka duh che u a ni. Amah pawh hi mi tam tak puitu a lo ni ṭhîn a, kei ngei pawh hi mi pui a ni. Priski leh Akuila, Krista Isuaa ka hnathawhpuite kha, chibai ka bûk e. Anni chuan ka nun chhanhim nân thih pawh an huam kha; kei chang ni lovin, Jentail kohhran zawng zawng pawh an chungah an lâwm a ni. An ina kohhran inkhâwmho kha chibai ka bûk e. Ka duh tak Epainata, Asia rama Krista ring hmasa bera kha, chibai ka bûk e. Mari, in tân rim taka thawktu kha, chibai ka bûk e. Andronika leh Junia, ka chipui leh ka tânpuite kha, chibai ka bûk e; anni chu tirhkohte zînga hmingthang tak an ni a, kei aia Krista ring hmasa an ni. Ampliata, Lalpaa ka duh tak kha, chibai ka bûk e. Kristaa ka thawhpui Urbana leh ka duh tak Stakua kha chibai ka bûk e. Kristaa mi tak, Apelia kha chibai ka bûk e. Aristobula chhûngte chibai ka bûk e. Ka chipui Herodiana kha chibai ka bûk e. Narkisa te chhûng zînga mi Lalpaa awmte kha chibai ka bûk e. Trufaini leh Trufosi, Lalpaa thawk rim ṭhînte kha, chibai ka bûk e. Duh tak Persi, Lalpa tâna rim taka thawk ṭhîn kha, chibai ka bûk e. Lalpa hnaa mi langsâr tak Rufa leh a nu, ka nu ve bawk kha, chibai ka bûk e. Asunkrita te, Flegona te, Hermea te, Patroba te, Herma te, an hnêna unau awmte nên, chibai ka bûk e. Filologoa leh Juli nên, Nirea leh a farnu nên, Olumpa nên, an hnêna mi thianghlim awm zawng zawng nên chibai ka bûk e. Fawh thianghlimin inchibai tawn ula, Krista kohhran hian chibai kan bûk bawk a che u. Unaute u, zirtîrna thu in dawn kalh zâwnga in zînga inṭhenna leh tlûkna chawk chhuaktute lakah fîmkhur ula, anni chu hawisan tûrin ka ngên a che u. Chutiang mite chuan kan Lalpa Krista rawng an bâwl lo va, mahni pumpui rawngbâwl mai an ni. An ṭawng hmang thiam leh kam ṭhatin mi mâwlte chu an bum ṭhîn. Chanchin Ṭhaa in nghehzia hi mi tin hriat a ni; chuvângin, kei pawh in chungah ka lâwm a ni. Thil ṭha lama finga, sual lama in fihlîm ka duh a ni. Remna Pathian chuan Setana chu in ke hnuaiah a rahbehtîr thuai dâwn che u a ni. Kan Lalpa Isua Krista khawngaihna chu in hnênah awm rawh se. Ka hnathawhpui Timothea leh ka chipui Lukia te, Jasona te, Sosipatera te hian chibai an bûk a che u. Kei, Tertia, he lehkha ziaktu hian, Lalpa hmingin chibai ka bûk a che u. Ka thlen in-pa, kohhran inkhâwm thlengtu Gaia hian, chibai a bûk a che u. Khaw sum enkawltu Erasta leh a unaupa Kuarta pawhin chibai an bûk a che u. Kan Lalpa Isua Krista khawngaihna chu in zaa hnênah awm rawh se. Amen. Pathian chu i chawimawi ang u; Ani chuan Isua Krista thu, Chanchin Ṭha kan hrilh leh tûn hnua thu ril inthup lo inpuang ta ang hian, in rinnaah nghet takin a dintîr thei che u a ni. Tûnah zawng chu thu inthup ṭhîn chu Zâwlneite Lehkhaah a lo lang a, tu pawhin an rina an awih theihna tûrin, chatuan Pathian thupêk anga hnam tin zînga hriattîr a ni ta. Pathian awm chhun, finga chu, Isua Krista avângin chatuanin ropui rawh se. Amen. Paula, Krista Isua tirhkoh ni tûra Pathian duhzâwng anga koh leh, kan unaupa Sosthena chuan, Korinth khuaa Pathian kohhran awm, mi thianghlim ni tûra koh, Krista Isuaa tihthianghlim leh hmun tina kan Lalpa Isua Krista, (anni leh keini Lalpa) hming lam zawng zawng chibai kan bûk e. Pathian kan Pa leh Lalpa Isua Krista hnên ata khawngaihna leh remna in hnênah awm rawh se. Pathianin Krista Isuaa khawngaihna a pêk che u avâng hian in chungthu-ah ka Pathian hnênah eng lai pawhin lâwmthu ka sawi ṭhîn. Amahah chuan kawng tinrêngin tihhausak in ni a, thu-ah leh hriatna tinrêngah in ṭhang zêl a, Krista thu kan hril khân nangmahniah zung a kai nghet ta a; tichuan, kan Lalpa Isua Krista lo lan in nghah chhûng hian thlarau lam thilpêk eng mah in tlachham lo va. Kan Lalpa Isua Krista nia sawisêlbova awm tûrin a tâwp thlengin a tinghet ang che u. A Fapa, kan Lalpa Isua Krista pâwlnaa ko lûttu che u Pathian chu a rinawm a ni. Unaute u, kan Lalpa Isua Krista hmingin ka ngên a che u, in zîngah inṭhenna awm lovin thukhat vua ula, rilru thuhmun leh ngaih dân hmun khat neiin awm khâwm rawh u. Ka unaute u, in zîngah inngeih lohna a awm tih Kloii chhûngten mi rawn hrilh a. Chu chu ka han sawi ang e: “Kei Paula pâwl ka ni, kei Apolova pâwl ka ni, kei Kifa pâwl ka ni, kei Krista pâwl ka ni,” mi tinin in tih hi. Krista chu ṭhenin a awm em ni? In tân Paula chu khenbeh a ni em ni? A nih loh leh Paula hmingin baptisma in chang em ni? Krispa leh Gaia lo chu in zîngah tu mah ka baptis loh avângin ka lâwm a ni. Tuten emaw ka hminga baptisma chang angin an sawi dah ang che u. Stefana chhûngte pawh ka baptis tak e. Chûng mite tih loh chu mi dang ka baptis emaw ka hre lo. Krista chuan baptis tûrin mi tîr lo va, Chanchin Ṭha hril tûrin mi tîr zâwk a ni si a. Thufing hmanga hril tûrin mi tîr lo, chutilo chu Krista kraws hi engmah lovah an ngai dah ang e. Kraws thu chu boral mêkte tân chuan thu âtthlâk a ni, keini chhandam mêkte tân erawh chuan Pathian thiltihtheihna a ni. ‘Mi fing finna ka tiboral ang a, Mi thiam thiamna chu ka hnâwl bâwk ang,’ tia ziak a ni. Mi fing chu khawiah nge? Dân hremi chu khawiah nge? Tûnlai thila hnial thiam chu khawiah nge? Pathianin khawvêl finna hi thil âtthlâkah a siam ta a ni lâwm ni? Pathian finna chu hei hi a ni, khawvêlin finna hmanga Pathian an hriat theih loh hnuin, kan thu hril âtthlâk hmanga ringtute chhandam hi: chu chu Pathian lâwmzâwng tak a ni si a. Juda-te chuan chhinchhiahna thil mak an phût kher a. Grik-te lahin finna ngawt an zawng a; Keini erawh chuan Krista khenbeh thu kan hril a ni, chu chu Juda-te tân chuan dâltu a ni a, Jentail-te tân thil âtthlâk a ni. Nimahsela, Juda pawh ni se, Grik pawh ni se, kohte tân chuan Krista chu Pathian finna leh thiltihtheihna a ni. Pathian âtna chu mihring finna aiin a fing zâwk a, a chak lohna pawh mihring chakna aiin a chak zâwk si a. Unaute u, a koh dân che u hi ngaihtuah teh u, in zînga tam tak hi tisa lama mi fing in ni lo va, mi thiltithei tak pawh in ni lo va, mi ropui chhûng zînga mi pawh in ni hek lo. Nimahsela, Pathian chuan khawvêl mite ngaiha thil âte chu mi fingte tihmualpho nân a thlang a, khawvêla thil chak lote chu thil chakte tihmualpho nân a thlang bawk a; tin, thil awm sate paihthlâk nân khawvêl thil mâwl leh hmusitawmte, thil awm lote nên lam Pathianin a thlang a. Chuvângin, Pathian hmaah chuan tu mah inchhuang thei an awm lo vang. Nangni zawng, Pathian zârah, Krista Isuaah chuan in awm ta a; ani chu Pathian hnên ata kan tân finna te, thiam chantîrna te, tihthianghlimna te leh tlanna te a lo ni ta a; tichuan, an ziak angin, “Chhuan tûr duh chuan Lalpa chu chhuang rawh se.” Kei zawng unaute u, Pathian thu ril puang tûra in hnêna ka lo kal khân, thu thiam bîk leh fing bîk angin ka lo kal loh kha. In zînga ka awm chhûngin Isua Krista leh Krawsa khenbeh a nih thu chauh lo chu eng dang mah hria nih ka tum loh kha. In zîngah chak lo takin, hlau leh khûr chungin ka awm a, ka thu sawiah leh thu hrilah thu sawi tlawr leh thu fing hmang lovin, Thlarau leh a thiltihtheihna tilang zâwngin ka sawi zâwk ṭhîn a ni; mihring finnaa innghat lova, Pathian thiltihtheihnaa in innghah zâwk nân. Puitling zîngah zawng thu fing kan sawi ṭhîn, tûnlai mite finna hi a ni lo va, an hotu, tlâwm mai tûrte finna lah a ni bawk hek lo. Thu fing inthup kan sawi hi Pathian thu ril, kan ropuina tûra leilung pian hmaa Pathianin a lo ruat lâwk tawh chu a ni. Chu chu he khawvêl rorêltu tu mahin an hre lo, hria sela ropuina Lalpa chu an khêngbet lo tûr. Lehkha Thu-in: “Mita la hmuh ngai loh, benga la hriat ngai loh, Mihring rilrua lût ngai lo, amah hmangaihtute tâna Pathianin a buatsaihsak chu,” a tih kha kan hril zâwk a ni. Chûng chu kan hnênah Pathianin Thlarauvin a rawn puang ta a; a ni, Thlarau chuan engkim, Pathian rilru thûk pawh a hre vek a. Mihring rilru chhûngril chu amaha awm thlarau chauh lo chuan tuin nge hria? Chutiang bawkin Pathian rilru chhûngril pawh Pathian Thlarau ngawt lo chuan tu man an hre lo. Khawvêl thlarau kan dawng lo va, Pathian Thlarau, Pathian hnêna mi kan dawng zâwk a ni, Pathian thilthlâwnpêkte kan hriat theih nân. Mihring finna an inzirtîr ṭhin chu hmang lovin, Thlarau zirtîrna hmangin thu kan sawi zâwk a, thlarau mite hnênah thlarau lam thil kan sawi fiah ṭhîn. Tisa mi chuan Pathian Thlarau lam thil eng mah a lâwm lo, a tân chuan âtthlâk mai a ni, thlarau chauhva hriat theih a nih avângin a hre thei lo. Thlarau mi erawh chuan thil engkim a thliar thiam a; ani lah chu tu man an hrethiam pha si lo. Lalpa rilru chu tu nge hriaa, amah chu zirtîr thei? Keini zawngin Krista rilru kan pu a ni. Unaute u, thlarau mite hnêna sawi angin in hnênah thu ka sawi thei lo va; tisa mi, Krista rinnaa nausênte hnêna sawi angin ka sawi zâwk ṭhin kha. In la ei theih loh avângin chaw rum ni lovin, hnute tuiin ka châwm ṭhîn che u a; tûn thleng pawhin in la ei theih loh hi. In la tisa mi hle a ni. In zîngah inîtsîkna leh inerna a awm chhûng chuan tisa mi, mihring taka la khawsa in ni tihna a ni lo vem ni? In zîngah, “Kei Paula pâwl ka ni, kei chu Apolova pâwl ka ni,” tite in la awm chhûng chuan in tisa mi hle tihna a ni lo vem ni? A nih leh Apolova chu tu nge a nih? Paula pawh chu tu nge a nih? In rin theihna tûra rawngbâwltu mai an ni asin; chu pawh chu Lalpan a pêk ang zêlin an thawk a ni. Keiin ka phun a, Apolovan tuiin a châwm a; nimahsela, Pathianin a ṭhantîr a ni. A ṭhantîrtu Pathian chauh lo chu, a phuntu leh tuia châwmtu chu eng mah an ni lo. A phuntu leh tuia châwmtu chu hna thuhmun thawk an ni. An thawhrim dân athuin lâwmman an hmu ve ve ang. Pathian tâna thawk dûn kan ni si a, nangni hi Pathian thlawhhma chu in ni e. Pathian in sak chu in ni bawk. Pathianin khawngaihna min pêk hmangin, in satu themthiam remhre tak angin a lungphûm ka phûm a, chumi chungah chuan mi dangin an rawn sa a; amaherawhchu, an sak dân hmangah fîmkhur ṭheuh rawh se. Lung rem tawh sa lo chu tu man lungphûm dang an phûm thei ta lo, chu lungphûm chu Isua Krista hi a ni. Chumi chungah chuan miin rangkachakin emaw, tangkaruain emaw, lungmantamin emaw, thingin emaw, hnimin emaw, buhpâwlin emaw in sa sela, mi tin hna thawh ṭhat leh ṭhat loh dân a la lang fiah ang; Krista ni chuan a la tilang dâwn si a, meia a inlâr dâwn avângin. Mei chuan mi tin hnathawh chu a fiah ṭheuh vang. Tu in sak pawh a kan loh chuan, chu mi chuan lâwmman a hmu ang a; tu in sak pawh a kan chuan, chu mi chuan a chân ang, amah tak erawh chu chhanhim a ni hrâm ang, mei kan hnu ang maiin. Pathian chênna in chu in ni tih leh Pathian Thlarau nangmahniah a chêng reng tih in hre lo vem ni? Mi tu pawhin chu in chu an tihkhawloh chuan, Pathianin anni chu a tikhawlo ve ang; Pathian chênna in chu a thianghlim si a, chu in chu in ni e. Tu man mahni inbum suh se. In zînga tu pawh he khawvêl ngaiha fing nia a inhriat chuan, a lo fin tak tak theih nân â phawt rawh se; he khawvêl finna hi Pathian ngaihin âtthlâk a ni si a. “Ani chuan mi fingte chu anmahni fin vervêknain a âwk a,” tih ziak a ni si a. “Lalpa chuan mi fingte ngaihtuahna chu engmah lo mai a ni tih a hria,” tih a ni bawk. Chuvângin, tu man mihringte hi chhuang suh se, engkim hi in ta vek a ni si a; Paula emaw, Apolova emaw, Kifa emaw, khawvêl emaw, nunna emaw, thihna emaw, tûn hun emaw, nakin hun emaw, azain in ta a ni. Nangni pawh Krista ta in ni a, Krista pawh chu Pathian ta a ni. Keini hi Krista rawngbâwltu, Pathian thu ril enkawltua ngaih tûr kan ni a. Enkawltu atâna ruatte chu an rinawm phawt tûr a ni. Nangnin emaw, mi dangin emaw min fiahna hi engah mah ka ngai lo va, keimah lah ka infiah ngai hek lo; eng mah indemna tûr ka hre si lo, sawisêlbo ka ni tihna zawng a ni lêm lo, mi fiahtu chu Lalpa a ni zâwk. Chutichuan, Lalpa lo kal leh hma loh chu, a hun lovah tu mah sawisêl suh u, chutih hunah chuan thima thuhrûkte chu a rawn tilang ang a, mi tinin mahni phu tâwkah Pathian fak an hlawh ṭheuh vang. Unaute u, hêng thu, “Thu ziak chu khûm suh u,” tih hi in zir theih nân kei leh Apolova hi in entawn atân ka han intârlang a ni, tu mahin pakhat chhuanga pakhat in thlauhthlâk loh nân. Tu-in nge mi dang aia danglam bîkah siam che? A thlâwna in dawn tih loh eng nge in neih? Chuti a nih si chuan i dawn ni lo ang maia engtizia nge i uanpui le? In hnianghnâr ta a ni maw? In hausa ta hle mai maw? Kan tel lovin in lal ta hle em ni? Lal tak tak ula kan va ti êm, in zârah kan han lal ve tûr! Pathian hian keini tirhkohte hi thi tûra ruatte ang maiin lei leh vâna vântirhkohte leh mi zawng zawngin ennawma an en huai huai atân, a hnuhnûng berah min dah niin ka hre ṭhîn. Keini zawng Krista avângin mi â kan ni a, nangni erawh chu Krista zârah mi fing in ni. Keini kan chak lo va, nangni in chak thung a, keini chu miten min hmusit a, nangni zawng an ngaisâng che u a ni. Tûn thleng pawh hian rilṭâm leh tuihâlin kan awm a, silhfên kan tlachham a, mi kut kan tuar a, kan vâkvai a. Kuta rim taka thawkin ei kan zawng a, miin ânchhia min lawhin mal kan sâwm thung a, min tihduhdah leh chhel takin kan tuar a. Min chêksawlh leh ṭha takin kan chhâng a. Tûn thleng pawh hian khawvêl bawlhhlawh chhêk khâwm hnâwmhnawk ang leka ngaih kan ni. Hêng hi in zah nâna ziak ka ni lo, ka fa duh takte anga zilh nân che u ka ziak a ni. Krista lama kaihruaitu che u a sîng têl nei mah ula, pa zawng pakhat chauh in nei, kei hi Kristaa in pa, Isua chanchin Ṭhaa rawn hringtu che u ka ni. Chuvângin, mi entawn tûrin ka ngên a che u. Hei vâng hian ka fa duh tak, Lalpaa mi rinawm Timothea chu in hnênah ka rawn tîr a ni; ani chuan hmun tina Kohhran kan zirtîr ṭhin anga Isua Kristaa ka khawsak dân a rawn hriat nawntîr ang che u. Kei in hnêna lo kal leh lo tûr ang hrimin ṭhenkhat chu in uang hle a ni. Lalpan rem a tih chuan ka rawn tlawh thuai dâwn a che u; chutih hunah chuan hêng mi uangte hian eng nge an sawi, tih mai ni lovin, eng thiltihtheihna nge an neih tehrêng ka rawn hria ang. Pathian ram chu thu maiah a innghat lo va, thiltihtheihnaah a innghat zâwk a ni. A eng nge in duh? Talhfiak nêna ka lo kal nge in duh, thuhnuairawlh tak leh hmangaihna rilru nên? Jentail-te pawhin an duh loh inngaihna bawlhhlawh in zîngah a awm tih thu a thang nasa hle a ni, mi pakhatin a pa nupui a neih kha! Pawi ti hle tûr in ni a, engati nge in la uan theih cheu? In zîng ata chutiang titu chu hnawh chhuah tûr a ni lâwm ni? Tisain in zîngah awm lo mah ila, thlarauvin ka awm a, chutiang titu chungchâng chu in zînga awm angin kan Lalpa Isua hmingin ka ngaihtuah fel tawh. In inkhâwmnaah kei thlarauva in zînga tel ve angin, Lalpa Isua thuneihna hmangin, Lalpa Ni-a a thlarau chhandama a awm theih nân, a tisa tiboral tûrin Setana pe rawh u. In uanna hi a ṭha lo ve. Dawidim tlêm têin chhang hlâwm a pumin a fan chhuak thei tih in hre lâwm ni? Dawidim tel lo chhang in lo niha, chhang hlâwm thar hlak in lo nih theih nân dawidim hlui chu thian fai rawh u. Kan Kalhlên kûtna tûr Krista ngei chu hlanin a awm tawh si a. Chutichuan, i kût ang u, dawidim hlui, nun chhia leh sual dawidim telh chhang nên ni lovin, thianghlimna leh dikna telh chhang nên i kût zâwk ang u. Ka lehkhaah khân inngaih hmangte pâwl lo tûrin ka ti che u a. Khawvêl mi, inngaih hmang te, duhâm te, rûkru te leh milem biate kawmserh tûr ka tihna a ni lo; chuti ni se, khawvêl in chhuahsan a ngai dâwn si a. Ringtu, unau zînga tel si, inngaih hmang emaw, duhâm emaw, milem bia emaw, mi hau hmang emaw, zu heh emaw, rûk hmang emaw pâwl lo tûrin, an zîngah ei pawh ei lo tûrin ka ti zâwk che u a nih kha. In zînga miin ringtu dang laka thubuai a neihin, ringtute hnêna thlen lovin, engtizia nge ring lote hnêna a thlen ngam? Ringtute chuan khawvêl ro an rêl dâwn tih in hre lâwm ni? Khawvêl rorêlsaktu tûrte in nih si chuan, thil tê tham pawh ngaihtuah tlâk lo in ni em ni? Tûn dam chhûng thil chu sawi loh, vântirhkohte chungthu pawh kan la rêl dâwn tih in hre lo vem ni? Dam chhûng khawsak thu rêl tûr in neihin, kohhrana enga maha ngaih lohte in rêltîr dâwn em ni? A va zahthlâk âwm ve! Unau kâra thu rem thei mi fing pakhat tal in zîngah an awm lo vem ni? Chutia ring lo mite rem atân ringtuin a unau a khin tâk? Thubuai nangmahni zînga in nei ṭhîn hi, Kristian nunah in tling lo let dêr tihna a ni. Engah nge a tlâwm zâwk nih in hreh? A tuar zâwk nih pawh engah nge in hreh? Chutih ahnêkin mahni unaute pawi khawihtu leh chhuhsaktu in la ni ta zâwk mah a. Mi dik lote chuan Pathian ram an chang thei dâwn lo tih in hre na nge? Bumin awm suh u, inngaih hmang te, milem bia te, uire te, mi hur te, mawngkawhur te, rûk hmang te, duhâm te, zu ruih chîng te, mi deu chîng te, hlêprûk chîng te chuan Pathian ram an luah lo vang. In zînga ṭhenkhat chutiang mi chu in ni ṭhîn a; nimahsela, Lalpa Isua Krista hmingah leh kan Pathian thlarauvah chuan tlen fai in ni a, tihthianghlim in ni a, thiam chantîr in ni tawh. Ka tân engkim a thiang a; mahse, a ṭangkai vek lêm lo, ka tân engkim thiang mah se eng bawihah mah ka inphal lo. Chaw hi pum tân a ni a, pum pawh chu chaw tân a ni; nimahsela, Pathianin a la tiboral ve ve dâwn. Taksa hi inngaih nân a ni lo va, Lalpa tân a ni zâwk, Lalpa pawh chu taksa tân a ni. Pathianin Lalpa chu a kaitho va, keini pawh chu a thiltihtheihna chuan min kaitho ve ang. In taksa chu Krista taksa pêng a ni tih in hre lo vem ni? Krista taksa pêng lain nawhchizuar pêngah ka siam dâwn em ni? Siam lul lo ve! Miin nawhchizuar a zawm chuan taksa pumkhat an ni ta tih in hre na nge? “An pahnih chuan tisa pumkhat an ni tawh ang,” tih ziak a ni asin. Lalpa zawmtu erawh chu amah nên thlarau pumkhat an ni. Inngaihna sual hi bânsan rawh u. Thil sual dang eng pawh miin an tih chuan, an taksa pâwn lam thil a ni a; inngaihna erawh hi chu mahni taksa chunga thil tihsualna a ni. In taksa hi, ‘in chhûnga awm Pathian hnên aṭanga in hmuh Thlarau Thianghlim chênna in a ni tih in hre na nge? Mahni ta pawh in ni tawh hlei nêm, mana lei in ni tawh asin; chuvângin, in taksa hian Pathian chawimawi rawh u. In thu han ziak chungchângah chuan: Mipain hmeichhia khawih loh a ṭha. Amaherawhchu, inngaihna a awm ṭhin avângin mipain nupui bîk nei ṭheuh sela, hmeichhia pawhin pasal bîk nei ṭheuh rawh se. Pasalin a nupui hnêna a tih tûr chu ti sela, chutiang bawkin nupui pawhin a pasal hnêna a tih tûr chu ti ve rawh se. Nupui chuan ama taksa chungah thu a nei lo va, a pasalin a nei zâwk a ni; chutiang bawkin pasal pawhin ama taksa chungah thu a nei lo va, a nupuiin a nei zâwk a ni. Ṭawngṭai tûra in inpêk theih nân rei lo tê atân rem in tih dun chauh loh chuan, a tua mah intidâwng suh u; chumi hnuah chuan in awm dân pangngaiin awm leh thuai ula, chuti lo zawng insûm zawh loh avângin Setanan a thlêm dah ang che u. Amaherawhchu, a thu pe zâwnga sawi ka ni lo va, a phal zâwnga sawi ka ni zâwk e. Mi zawng zawng keimah ang hian awm vek se ka duh a; mahse, mi tinin Pathian hnên ata thilpêk bîk kan dawng ṭheuh va, pakhatin kawng khatin, a dangin kawng dangin. La innei lote leh hmeithaite chu keimah angin awm sela a ṭha. An insûm theih loh erawh chuan nupui pasal nei mai rawh se, hur aiin inneih a ṭha zâwk si a. Innei tawhte chu ka thu ni lovin, Lalpa thupêk ka hrilh a che u - nupui chuan a pasal ṭhen suh se. A ṭhen vêk chuan mi dang nei tawh suh se, a nih loh leh a pasal nên an inrem leh tûr a ni; pasal pawhin a nupui ma suh se. Mi dang hnênah chuan Lalpa thu ni lovin, keimahin sawi tûr ka nei. Ringtuin ring lo mi nupuiah nei sela, a nupui chuan a hnêna awm zêl a duh chuan ṭhen suh se. Ringtu hmeichhia pawhin ring lo mi nei sela, a pasal chuan a hnêna awm zêl a duh chuan a ṭhen kher tûr a ni lo. Ring lo pa chu a nupui zârah tihthianghlim a ni a, ringlo nu pawh a pasal zârah tihthianghlim a ni bawk. Chuti ni suh se, in fate chu an thianghlim lo vang; nimahsela, an thianghlim a ni. Amaherawhchu, ring lo zâwkin ṭhen a duh chuan ṭhen mai rawh se; chutiang thilah tawh chuan ringtu chu, a hmei a pain phuar in ni lo ve; Pathian erawh chuan inrem tûrin a ko che u a ni. Nute u, in pasalte in chhandam dawn lo tih engtin nge in hriat? Pate u, in nupuite in chhandam dâwn lo tih engtin nge in hriat? Mi tin hi Lalpan an hnêna a sem ang ṭheuh leh, Pathianin a koh laia an awm dân ang ṭheuhvin awm zêl rawh se; chutianga awm tûrin kohhran zawng zawng ka hrilh ṭhîn a ni. Serh tan tawh koh an awm chuan tihbo tum suh se, serh tan loh koh an awm chuan tan suh se. Serh tan hi eng mah a ni lo va, tan loh pawh eng mah a ni hek lo, a pawimawh chu Pathian thupêk zawm hi a ni. Mi tin koh an nih laia an dinhmun ngaiah awm rawh se. Bawih i nih laiin koh i ni em? Engto tehchiam suh; chhuak thei i nih erawh chuan chhuak mai rawh. Bawih, Lalpa koh chu, Lalpa bawih chhuah a ni; bawih ni lo Lalpa koh chu, Krista bawih a ni. Mana lei in ni tawh e, mihring bawihah awm tawh suh u. Unaute u, mi tin kohva in awm laia in dinhmun ngaiah ṭheuh Pathianah awm rawh u. Nula leh tlangvâl chungchâng thu-ah chuan Lalpa thupêk eng mah ka nei lo va; amaherawhchu, a ngilneihna azâra Lalpa ngaiha rinawm ka nih hi chhuangin ka ngaih dân ka sawi a ni. Hun harsain min nan tâk avângin mahni awm pangngai anga awm mai ṭha ka ti. Nupui nei i nih chuan ṭhen tum suh, nei lo i nih chuan nupui zawng suh. Nupui i neih pawhin thil i tisual lo ve; nula pawhin pasal a neih chuan thil a tisual lo. Amaherawhchu, nupui pasal neiten harsatna tam tak an tâwk ang, keiin chûng chu pumpelhtîr che u ka duh a ni. Unaute u, hun a tawi tâk êm avângin hei hi ka ti a ni; tûn chinah chuan nupui neite chu nei lo angin, lusûnte chu sûn lo angin, lâwmte chu lâwm lo angin, leitu chu nei lo angin, khawvêl thila inhmangte chu inhmang lo angin awm sela ka duh a ni. He khawvêl awm dân hi a boral mêk a ni. Lungkham nei lova in awm ka duh a ni. Nupui nei lo chuan Lalpa tilâwm tûrin Lalpa hna a engto va. Nupui nei erawh chuan a nupui tihlâwm nân khawvêl thil a engto va, a rilru a phîr ṭhîn. Pasal nei lo hmeichhia leh nula thianghlim chuan an taksa leh an thlarau vawng thianghlim tûrin Lalpa hna chauh an engto va; pasal nei erawh chuan a pasal tihlâwm nân khawvêl thil a engto ṭhîn. Hei hi in tâna sâwt tûr a nih avângin ka sawi a ni; khuahkhirh ka tum che u a ni lo ve, mawi taka in awm theih nân leh Lalpa rawngbâwl tûra in inpumpêk theihna tûrin ka sawi zâwk a ni. Mi tu pawhin a nupui hual lakah tidik lova a inhriata, lêngṭûl mai tûr a niha, inneih ṭûla a hriat bawk si chuan, a duh ang chuan ti sela, nei mai rawh se, thil a tisual lo ve. Amaherawhchu, nupui nei lo tûra nawr luih ni lova, ama duh thu ang ngeia neih loh tum tlat thei a nih chuan, a duh anga a tih chu a ṭha a, a nupui hual a nei lo chu a ti ṭha e. Chutichuan, a nula hual nupuia neitu chuan a ti ṭha e, nei lotu chuan a ti ṭha lehzual a ni. Nupui chu a pasal dam chhûng chuan phuar a ni a; a pasal a thih erawh chuan a duh apiang a nei thei ang; amaherawhchu, Lalpaa awm mi a ni tûr a ni. Nei lova a awm ngaia a awm zêl chu a nihlawh zâwk ka ring. Kei pawh Pathian thlarau neiah ka inngai a ni. Milem biakna thil ei thu chu: Kan za-in ‘hriatna’ kan nei ṭheuh tih kan hria a, chutiang ‘hriatna’ chuan mi a tichapo ṭhîn a, hmangaihna erawh chuan mi a siam ṭha ṭhîn. Tu pawhin thil hria nia a inngaih chuan a hriat tûr ang a la hre lo va ni. Miin Pathian a hmangaih erawh chuan Pathian mi hriat a ni. Chutichuan, milem biakna thil hlan ei thu-ah chuan - khawvêlah hian milemte hi eng mah an nih lohzia leh, Pathian pakhat chauh lo chu a dang rêng rêng an awm lohzia kan hria. Vânah emaw, leiah emaw pathian anga ngaih tam tak an awm thei a, chutiangin pathian tam tak leh lalpa tam tak an awm rêng a ni. Nimahsela, keini tân zawng Pathian pakhat chauh, Pa, engkim siamtu chu a awm a; keini pawh ama tâna awm kan ni; tin, Lalpa pakhat chauh, Krista chu a awm bawk a; thil engkim hi ama zâra siam a ni a, keini pawh ama zâra awm kan ni. Amaherawhchu, chu hriatna chu mi zawng zawngin an nei vek lêm lo, tûn thlengin mi ṭhenkhat milem be ṭhang an nih avângin an thil ei chu milem hnêna inthawina anga ngaiin an ei ṭhîn a; an chhia leh ṭha hriatna a chak si lo va, bawlhhlawhin an inhre ṭhîn. Eng pawh ni se, kan thil ei hian Pathian mit min tluntîr chuang lo; ei lo mah ila kan chhe chuang lo va, ei mah ila kan ṭha chuang hek lo. Amaherawhchu, fîmkhur rawh u, in zalênna hi engti kawngin emaw rinnaa chak lote tân tlûkna a lo ni hlauh dah ang e. Nang, chutiang hriatna nei, milem biakna ina i chaw ei lai, mi, a chhia leh ṭha hriatna chak lovin hmu ta che sela, milem hnêna thil hlante ei a ngam phah ve dâwn lâwm ni? Chuti a nih chuan i hriatna chu ringtu chak lo tân chhiatna a ni ang asin; ani tân pawh Krista chu a thi si a. Chutianga unaute chunga in tihsuala, an chhia leh ṭha hriatna chu a chak loh nâk alaia, in hliam lehnghâl chuan Krista chunga thil tisual in ni. Chuvângin, ei leh inin ka unau a tihtlûk si chuan, ka unau chu ka tihtlûk loh nân kumkhuain sa rêng ka ei tawh lo vang. Zalên ka ni lo vem ni? Tirhkoh ka ni lo vem ni? Kan Lalpa Isua ka hmu tawh a ni lâwm ni? Nangni pawh hi Lalpaa ka hnathawh rahte chu in ni lâwm ni? Mi dangte tân tirhkoh ni kher lo mah ila, nangni tân zawng ka ni. Lalpa mi in ni hi tirhkoh ka nih chhinchhiahna chu a ni. Mi sawisêltute chu hetiang hian ka chhâng ṭhîn: Ei leh in tûr kan phût thei lo bîk em ni? Tirhkoh dangte leh Lalpa unaute leh Kifa te angin zinnaah Kristian hmeichhia kan hruai thei lo bîk em ni? Kei leh Barnaba hi kut hna thawka inchâwm chawp tûr kan ni bîk em ni? Mahni inchâwma sipaia ṭang tu nge awm? A rah ei si lovin tu nge grep huan siam ngai? A hnute ei si lovin tu nge ran vulh ngai? Hêng hi mihring thlîr dân aṭanga sawi ka ni lo ve. Dân thu pawhin hêng hi a sawi lo vem ni? Mosia Dânah chuan, “Bâwngpain buh a chîl laiin a hmui phuar suh,” tih ziak a ni. Pathianin bâwng tân chauh em ni a sawi? Kan tâna sawi a ni zâwk lâwm ni? Ni e, kan tâna ziak a ni. Lei lettu chuan beisei neiin let sela, buh chîltu pawhin chan neih ve beiseiin chîl rawh se. Keinin in zîngah thlarau lam thil tuhin, in hnên ata tisa lam thil seng tel ta pawh ni ila, hlâwk ta lua kan ni bîk dâwn em ni? Mi dangten in laka chutiang an phût theih chuan keini chuan thei lehzual tûr kan ni lâwm ni? Phût thei mah ila kan phût ngai lo. Krista Chanchin Ṭha chu kan dâl loh nân, engkim chhel takin kan tuar hrâm hrâm zâwk ṭhîn. Tempula rawngbâwltuten tempula thil hlante an ei a, maichâma inthawina hlântute pawhin an thil hlan aṭangin chan an nei ve tih in hre lâwm ni? Chutiang bawkin Chanchin Ṭha hi Chanchin Ṭha hriltute ei hmuh nân Lalpan a ruat a ni. Mahse, kei chuan a enga mah hi ka chhawr lo, ka chunga chutiang in tih nân hei hi ziak ka ni lo; ka chhuan hi eng mah lova mi siamsak ai chuan ka tân thih a ṭha zâwk. Chanchin Ṭha hril mah ila, chhuang thei ka ni lo, tihmâkmawh ka chungah a innghat a ni. Chanchin ṭha hi hril lo ila ka chung a va pik dâwn êm! Mahni duh thu-a hril ni ila, hlawh pawh ka nei ang chu, mahni duh thu-a hril ka nih si loh chuan Chanchin Ṭha enkawl hna mi pe a ni mai ang. Eng nge ka hlawh tâk ang le? Chanchin Ṭha hriltu ka nih avânga ka phût theih phût lova a thlâwna Chanchin Ṭha ka hril theihna hi a ni. Tu ma bawih ni lo mah ila, a tam thei ang ber ka lâk theih nân mi tin bawihah ka insiam ṭhîn. Tichuan, Juda-te ka lâk theih nân Juda-te zîngah Juda mi angin ka awm a; Dân hnuaia awm ni lo mah ila, Dân hnuaia mite ka lâk theih nân Dân hnuaia awm angin ka khawsa ṭhîn. Dân nei lote ka lâk theih nân an zîngah Dân nei lo angin ka awm ṭhîn, Pathian dân zâwm lo ni si lovin, Krista dân zâwm tlat siin. Mi chak lote ka lâk theih nân an zîngah chak lo angin ka awm ṭhîn. Chutiang chuan, eng emaw ti tala mi ṭhenkhat ka chhandam theih nân mi tin zîngah kawng hrang hrangin ka awm ṭhîn. Chanvo ka neih ve theih nân Chanchin Ṭha avângin engkim ka ti ṭhîn. Intlânsiakho chu theihtâwp chhuahin an tlân ṭhîn a; mahse, pakhat chauhvin lâwmman a hmu ṭhîn tih in hre lâwm ni? Chutiang chuan lâwmman hmu ngei tûrin tlân rawh u. Intlânsiaknaa tel tûrte chu kawng engkimah an insûm ṭhîn, chawimawina lukhum chhe mai thei hmu tûrin an bei a, keini erawh chuan chawimawina lukhum chhe thei lo hmu tûrin kan bei a ni. Chutiang tak chuan kei pawh pan nei rânin ka tlân a, boruak mai hnek lovin keimah ka inhnek ṭhîn, ka taksa hi ka sawi zawi a, ka thunun a; chutilo chuan, mite hnêna Chanchin Ṭha hriltu ni siin kei hi hnâwlin ka awm hlauh dah ang e. Unaute u, min thlahtute chunga thil thlengte kha hre reng rawh u; an za-in chhûm hnuaiah an awm a, tuifinriat Sen pawh an kai vek a, an vaiin chhûmah leh tuifinriatah Mosia zui tûra baptis an nih kha. An za-in thlarau lam chaw thuhmun an ei a, an za-in thlarau lam in tûr thuhmun an in bawk a, anmahni châwmtu thlarau lam lungpuia mi tui an in ṭheuh kha; chu lungpui chu Krista hi a ni. Chuti chung pawhin an zînga tam zâwk chungah Pathian a lungni lo va, thlalêrah khân an tlûk hlum kha. Thil sual tih an châk anga kan châk ve loh nân chûng chu min zirtîrtu tûr a lo ni. An zînga ṭhenkhatin milem an bia ang khân milem be suh u, “Mipui chu ei leh in tûrin an ṭhu a, lâm tûrin an tho leh a,” tia ziak ang khân. An zînga ṭhenkhat an inngai ang khân i inngai ve suh ang u, ni khatah mi sînghnih leh sângthumin an thih phah kha. An zînga ṭhenkhatin Lalpa an fiah ang khân i fiah ve suh ang u, rûlin a chuk hlum ṭeuh kha. An zînga ṭhenkhat Pathian laka an phunnawi ang khân phunnawi suh u, tiboraltuin a tihboral hlawm kha. Chûng an thil tawhte chu mi dang zilh nân a ni a; keini, hun tâwpa chêngte min zirtîrtu atân ziak a ni bawk. Tichuan, tu pawh ding nghet nia inhria chu a tlûk loh nân fîmkhur rawh se. Fiahna in tawh ṭhin hi mi tawh bâk a awm chuang lo. Pathian chu a rinawm a, in tawrh theih aia nasa fiahna in chungah a thlentîr lo vang, in do zawh theih nân fiahna lo thlen rualin pumpelhna kawng a siamsak zâwk ang che u. Chuvângin, ka duh takte u, milem biak hi hawisan rawh u. Thil chinchâng hre rual in ni bawk a, ka thu hi ngun takin ngaihtuah teh u. Malsâwmna no laa, malsâwmna kan sawi ṭhin hi Krista thisen kan ṭâwmpuina a ni lo vem ni? Chhang kan phel hi Krista taksa kan ṭâwmpuina a ni lo vem ni? Chhang chu tlang khat a ni angin, keini hi tam tak ni mah ila, taksa pumkhat kan ni, chhang tlang khata mi kan chang ṭheuh si a. Pianna lama Israel-te hi ngaihtuah teh u, inthawina sa eitute chuan maichâm nên inkûngkaihna an nei lo vem ni? He thu-ah hian eng nge sawi ka tum le? Milem hnêna thil hlan chuan hlutna a nei tih leh, milem pawh chuan takna a nei ka tihna em ni? Ni suh e, Jentail-te inthawina chu Pathian hnênah ni lovin, ramhuai hnênah a ni tih thu ka sawi a ni. Nangni zawng ramhuai nêna inkûngkaihna in neih ka duh lo va ni. Lalpa no leh ramhuai no in in kawp thei lo vang; Lalpa chawhlui leh ramhuai chawhlui in kîl kawp thei hek lo vang. Lalpa chu kan tithinur dâwn zâwk em ni? Ani aiin kan chak zâwk em ni? “Eng pawh tih a thiang,” in ti maw? Tih vek chu a ṭha lêm si lo. “Engkim tih a thiang,” in ti maw? Engkim tihin mi a siam ṭha hek lo. Tu pawhin mahni ṭhatna tûr mai zawng lovin mi dang ṭhatna tûr zawng zâwk rawh se. Sa dâwra an zawrh tawh phawt chu dilchhût taka eng mah zâwt lovin ei mai rawh u. Lei leh a chhûnga thil awm zawng zawng hi Lalpa ta a ni e. Ring lo miin chaw eia an sâwm che ua, kal in duh si chuan, dîlchhût taka zâwt lovin an hlui apiang che u chu ei mai rawh u. Amaherawhchu, tuin emaw, “Hei hi chu inthawina thil a ni,” tia a hrilh che u chuan, a hrilhtu che u avâng leh chhia leh ṭha hriatna avângin ei suh ang che u; in chhia leh ṭha hriatna thu ka sawi lo va, mi dang chhia leh ṭha hriatna thu ka sawi zâwk a ni. A nih leh, ka zalênna chu mi dang ngaih dânin a dîpdâl tûr em ni? Lâwm taka ka eia, a chunga lâwmthu ka sawina thilah hian engah nge sawichhiat ka nih ang? Chutichuan in ei emaw, in in emaw, thil in ti emaw, in tih apiangah Pathian ropuina tûr hlîrin ti rawh u. Juda te, Grik te leh Pathian kohhran te ngaihmawh zâwngin awm suh u; kei pawhin mahni hlâwkna zawng lovin, chhandam an nih theih nân mi tam tak ṭhatna zawng zâwkin, kawng tinrênga mi dang ka tilâwm ṭhîn ang hian. Keiin Krista ka entawn ang hian nangni pawhin mi entawn ve rawh u. Engkimah mi hriat reng ṭhin avâng leh pawm zêl tûr thu ka hrilh che u ang taka in awm avângin ka fak a che u. Hei hi in hriat ka duh: Mipa tawh phawt lu chu Krista a ni a, hmeichhe lu chu mipa a ni a, Krista lu chu Pathian a ni. Mipa, lukhum khum chunga ṭawngṭai emaw, thu hril emaw apiang chuan an lu an timualpho a ni; hmeichhia, lukhum khum lova ṭawngṭai emaw, thu hril emaw apiang pawhin an lu an timualpho a ni, chutiang chu meh kâwn nên thuhmun reng a ni. Hmeichhiain lukhum a khum duh loh chuan mêt law law rawh se. Amaherawhchu, hmeichhe tân lu meh leh ziah kâwn a zahthlâk si chuan lukhum khum rawh se. Mipa erawh chu Pathian anpui leh ropuina tilangtu a nih avângin lukhum khum tûr a ni lo; hmeichhia erawh chu mipa ropuina tilangtu a ni. Mipa hi hmeichhia aṭanga siam a ni lo va, hmeichhia erawh chu mipa aṭanga siam a ni. Mipa hi hmeichhe tâna siam a ni lo va, hmeichhia erawh chu mipa tâna siam a ni. Tichuan, vântirhkohte avângin hmeichhiain an lu-ah mipa thuneih chhinchhiahna an khum tûr a ni. Nimahsela, Lalpaah chuan hmeichhia hi mipa tel lo chuan an awm thei lo va, mipa pawh hmeichhe tel lovin an awm thei hek lo. Hmeichhia hi mipa aṭanga siam a ni ang bawkin, mipa hi hmeichhe laka piang a ni si a; nimahsela, engkim hi Pathian aṭanga chhuak vek a ni. Ngaihtuah teh mah u, hmeichhia lukhum khum lova Pathian hnêna ṭawngṭai chu a âwm rêng rêng em ni? Mipain sam sei a neih chuan a tân thil zahthlâk a ni tih in rilru pianpui pawhin in hre lâwm ni? Hmeichhiain sam sei a neih erawh chuan amah chawimawitu a ni, a sam chu amah khuh nân pêk a ni si a. Eng pawh ni sela, hei hi in hnial a nih pawhin, keinin emaw, Pathian kohhranten emaw chutiang kawngah dân kan nei lo ve. He zirtîrna zawm thu-ah erawh hi chuan ka fak thei lo va che u, in inkhâwm hi ṭhatpui ahnêkin in chhiat phah zâwk si a. A hmasa berin, Kohhranho in inkhâwmnaah inṭhenna a awm ṭhîn tih ka lo hria a, rin pawh ka ring deuh bawk a ni. In zînga mi dik takte an lan chian theih nân, ngaih dân hrang nei an awm chu a âwm rêng a ni. Hei vâng hian in inkhâwmna chu Lalpa Zanriah kîlna chi a ni lo; mi tinin mahni zanriah tûr in rawn keng a, mahniin in ei a, ṭhenkhat an ril a ṭâm a, ṭhenkhat an rui a. Chutianga ei leh inna tûr mahni in in nei ṭheuh a ni lâwm ni? A nih leh, Pathian Kohhran hmusitin nei lote chu tihzah in tum em ni? Eng nge ka sawi tâk ang? Ka fak dâwn che u em ni? He thu-ah hi zawng ka fak thei lo va che u. Ka thu hrilh chhâwn che u hi, Lalpa hnên ata ka dawn asin; khatia, mantîra a awm zâna, Lalpa Isuan chhang a lâka, lâwmthu a sawi zawha, a phela, “Hei hi ka taksa a ni, in tân a ni e, mi hriat reng nân heti hian ti ṭhîn rawh u,” a tih kha. Chutiang bawkin, an ei zawhah, no pawh chu a la a, “He no hi ka thisena thuthlung thar chu a ni, in in apiangin mi hriat reng nân ti ṭhîn rawh u,” a tih kha. Chu chhang chu in eia, no chu in in apiangin, a lo kal leh hma loh zawng, Lalpa thihna chu in puang ṭhîn a ni. Chuvângin, tu pawh tlâk lo chunga Lalpa chhang hi eia, a no hi in apiang chuan Lalpa taksa leh thisenah thiam loh an chang ang. Tichuan, mi tin mahni infiah ṭheuh sela, chutiangin chhang chu eiin no chu in rawh se. A ei leh intu chuan Lalpa taksa awmzia a hriat loh chuan mahni chunga rorêlna thlen tûrin a eiin a in a ni. Hemi avâng hian in zînga tam tak in chak lovin in bawrhsâwm a, in muhîl a ni. Mahni inenfiah hmasa ṭhîn ila chuan rorêlsakin kan awm lo tûr. Rorêlsaka kan awm pawhin, khawvêl mite nên thiam loh kan chan ve loh nân Lalpan min thunun ṭhîn a ni. Chutichuan, ka unaute u, Lalpa Zanriah kîl tûra in inkhâwmin innghâk ṭhîn rawh u. Rilṭâm an awm chuan inah ei zet rawh se; tichuan, in inkhâwm chu thiam loh in chan phah dâwn lo nia. Thil dang erawh chu ka lo kal hunah ka rawn tifel ang. Unaute u, Thlarau lam thilpêk thu hi in hriat loh ka duh lo ve. Jentail mi in nih lai khân milem ṭawng thei hlei lo lamah an hruai bo ṭhîn che u tih in hria e. Chuvângin, hei hi ka hriattîr a che u: Pathian Thlarauvah chuan tu mahin, “Isua chu ânchhe dawngin awm rawh se,” an ti thei lo va, Thlarau Thianghlimah lo chuan, “Isua chu Lalpa,” an ti thei bawk hek lo. Tin, thilpêk chi hrang hrang a awm a, chûng chu Thlarau pakhata mi a ni. Rawngbâwlna chi hrang hrang pawh a awm a, Lalpa pakhat tân a ni; thiltihtheihna pawh chi hrang hrang a awm a, Pathian pakhat hnêna mi a ni, mi tin hnêna thiltihtheihna pe ṭhîntu chu. Sâwt tlânna tûrin mi tin hnênah Thlarau inhriattîrna chu a lo thleng ṭheuh va. Thlarau zârah mi ṭhenkhat hnênah thu fing sawi theihna pêk a ni a, mi dang hnênah chu Thlarau vêkah chuan thu hriat theihna pêk a ni a; mi dang hnênah chu Thlarauvah bawk chuan rinna pêk a ni a, chu Thlarau vêkah chuan mi dang hnênah tihdam theihna pêk a ni a, mi dang hnênah thil mak tih theihna pêk a ni a, mi dang hnênah thu hril theihna pêk a ni a, mi dang hnênah Thlarau dik leh dik lo hriat theihna pêk a ni a, mi dang hnênah ṭawnghriatloh chi hrang hrang pêk a ni a, mi dang hnênah ṭawnghriatloh hrilh fiah theihna pêk a ni. Hêng zawng zawng hi Thlarau pakhat hnathawh vek a ni a, a duh ang takin mi tin hnênah thilpêk chi hrang hrang a pe a ni. Taksa hi pakhat a ni a, pêng tam tak a nei a; taksa pêng zawng zawng chu tam hle mah se, taksa pakhat a ni ang hian, Krista pawh chutiang chu a ni. Kan za-in Juda kan ni emaw, Grik kan ni emaw, bawih kan ni emaw, ni lo emaw, pumkhata awm tûrin Thlarau pakhata baptis kan ni a, Thlarau pakhat min intîr ṭheuh bawk a ni. Taksa hi pêng khat chauh ni lovin, pêng tam tak a ni zâwk a. Ke hian, “Kut ka nih loh avângin taksaa tel ka ni lo ve,” ti ta sela, chumi avâng chuan taksaa tel lo a ni chuang lo. Beng hian, “Mit ka nih loh avângin taksaa tel ka ni lo ve,” ti ta sela, chumi avâng chuan taksaa tel lo a ni chuang lo. Taksa pum pui hi mit ni ta vek sela, engtin nge ri kan hriat ang? Beng ni ta vek sela, engtin nge rim kan hriat ang? Pathianin pêng hrang hrang hi taksaah hian ṭûl a tihna apiangah a dah a ni. An vaiin pêng khat chauh ni ta sela, taksa a awm thei dâwn em ni? Pêng hrang hrang tam tak awm mah se, taksa chu pumkhat a ni. Tichuan, mit hian kut hnênah, “Ka mamawh lo va che,” a ti thei lo; lu pawhin ke hnênah, “Ka mamawh lo va che,” a ti thei hek lo. Taksa pêng chak lo zâwka langte hi an pawimawh zâwk a ni. Kan taksa pêng hmuhsitawm deuhva kan ngaihte hi, chûng ngei chu kan ngai pawimawh a, nasa takin kan chei ṭhîn a, a lang mawi lote chu kan cheimawi zâwk ṭhîn a ni. Kan pêng mawi zâwkte chu chei pawh a ngai hlei nêm. Pathianin taksa hi a rem khâwm a, sitawm deuhte chu a chawimawi zâwk a, taksaah inhranna a awm lohva, a pêng hrang hrangte an inngaihtuah tawn theih nân a rem khâwm a ni. Pêng pakhatin a tuar chuan pêng zawng zawngin an tuar ve vek a, pêng pakhat chawimawi a nih chuan pêng zawng zawng pawh an lâwm ve vek a ni. Nangniho hi Krista taksa chu in ni a, a pêngte in ni ṭheuh bawk a ni. Pathianin a kohhranah hêng mite hi a dah a: a pakhatnaah Tirhkohte, a pahnihnaah Zâwlneite, pathumnaah Zirtîrtute, a dawtah thil mak ti theite, a dawt lehah tihdamna thilpêk neite, mi ṭanpui peihte, rorêl thiamte, ṭawnghriatloh chi hrang hrang neite. An za-in tirhkoh an ni vek em ni? An za-in zâwlnei an ni vek em ni? An za-in zirtîrtu an ni vek em ni? An za-in thil mak an ti thei vek em ni? Tihdam theihna thilpêk an dawng vek lo va, ṭawnghriatlohvin an ṭawng vek lo va, a hrilh fiah theihna an dawng vek hek lo. Thlarau thilpêk pawimawh zâwkte chu dawn châk hle rawh u. Kawng ṭha ber ka han entîr ang che u. Mihring ṭawngte leh vântirhkoh ṭawngtein thu sawi thei mah ila, hmangaihna ka neih si loh chuan, dâr ri ang emaw, dârbenthek ri ang emaw chauh ka ni ang. Thu hril theihna neiin, thu ril zawng zawng leh hriat tûr zawng zawng hre vek mah ila, tlâng sawn theihna khawpa rinna nasa nei mah ila, hmangaihna ka neih si loh chuan eng mah ka ni lo vang. Ka neih zawng zawng mi retheite tân pe vek mah ila, hâl tûrin ka taksa pawh inpe mah ila, hmangaihna ka neih si loh chuan ka tân eng mah a ni lo vang. Hmangaihnain a dawhthei a, ngil a nei bawk ṭhîn; hmangaihnain a îtsîk lo va, a infak lo va, a uang lo va, mawi lo takin a che lo va, mahni hma a sial ngai hek lo; a thinur duh lo va, thil sual a hre reng ngai hek lo: hmangaihna chu thil dik lovah a lâwm lo va, thutak erawh chu a hlimpui ṭhîn. Engkim a tuar hrâm hrâm a, rinnain a khat a, a beisei tlat a, engkim a tuar chhuak ṭhîn. Hmangaihna hi eng tikah mah a dai lo vang; thuhrilnate erawh hi chu tihbân a la ni ang a; ṭawnghriatlohte pawh a la bo vang a, hriatnate pawh hi a la tâwp dâwn a ni. A ṭhen chauh kan hria a, a ṭhen chauh kan hril rih a ni. A famkim a lo thlen hunah erawh chuan a ṭhen chauhva kan hriat hi a famkim tawh ang. Ka naupan lai khân naupang ṭawngin ka ṭawng a, naupang rilru ka pu a, naupang ngaihtuah dân angin thil ka ngaihtuah ṭhîn; ka lo puitlin hnu erawh hi chuan naupang tih dân chu ka bân tawh. Tûnah zawng dârthlalanga lang riai ruai ang chauhvin kan hmu rih a, nakinah erawh chuan inhmatawnin ka hmu tawh ang. Tûnah zawng a ṭhen chauh kan hre rih a, nakinah chuan Pathianin min hre chiang ang hian kan la hre chiang ve ang. Tichuan, hêng thil pathum - rinna te, beiseina te leh hmangaihna te hi a awm reng dâwn, hêngahte hian a ropui ber chu hmangaihna hi a ni. Hmangaihna hi ûm zêl rawh u; thlarau lam thilpêkte chu dawn châk zêl bawk ula, thu hril theihna neih phei chu châk lehzual rawh u. Ṭawnghriatlohva thu sawitu chuan mi dang hnêna sawi lovin Pathian hnêna sawi a ni a, tu man a thu sawi awmzia an hre thei lo, Thlarauvah thurûk a sawi a ni. Thuhriltu erawh chuan mite hnênah thu a sawi a, a tisâwt a, a fuih a, a thlamuan ṭhîn. Ṭawnghriatlohva thu sawitu chuan ama tâna sâwt tûr a sawi ṭhîn a, thuhriltu erawh chuan kohhran tâna sâwt tûr a sawi ṭhîn. Ṭawnghriatloh nei vek ula ka ti hle, thu hril theihna phei chu nei vek ula ka ti lehzual a ni. Kohhran hlâwkpui tûra hrilh fiahsaktu an awm si loh chuan ṭawnghriatloh neite ai chuan thuhrilna neite chu an ṭangkai zâwk a ni. Unaute u, tûnah in hnênah lo kal ila, ṭawnghriatlohvin thu rawn sawi ta ila, thu ka puang emaw, ka hriattîr che u emaw, ka hril emaw, ka zirtîr che u emaw a nih si loh chuan in tân a hlâwk dâwn em ni? Ri thei, nunna nei lo, hêng phênglâwng leh ṭingṭangte pawh hi awmze nei lova an tum chuan eng hla nge an sak tu nge hre thei ang? Tawtawrâwt pawh mumal neia an ham loh chuan tu nge râl do tûrin insiam ang? Chutiang bawkin ṭawnghriatlohva in thu sawi chu hriat mai theih a nih si loh chuan tu nge hrethiam ang? Ṭawng mai mai in ni ang asin. Khawvêlah hian ṭawng chi hrang hrang a tam hle a ni thei e, awmze nei lo pakhat mah a awm lo. A thu sawi awmzia ka hriat si loh chuan ani chu ka tân ram dang mi ang a ni dâwn a, kei pawh a tân ram dang mi ka ni bawk ang. Tichuan, thlarau thilpêk dawn châk zêl ula, Kohhran tihphuisuina tûr thlarau thilpek in ngah theih nân zawng rawh u. Chuvangin, ṭawnghriatloh neite chuan a hrilh fiah theihna dîl rawh se. Ṭawnghriatlohva ka ṭawngṭai chuan ka thlarau chu a ṭawngṭai ngei na a, ka ngaihtuahna erawh chu ka hmang lo. Engtin nge ni ta ang le? Thlarauvin ka ṭawngṭai ang a, ngaihtuahna hmangin ka ṭawngṭai bawk ang. Fakna hla pawh thlarauvin ka sa ang a, ngaihtuahna hmangin ka sa bawk ang. Thlarauvin lâwmthu sawi ta ila, ringlote ṭhutnaa ṭhute chuan i thu sawi awmzia an hre dâwn si lo va, engtin nge i lâwmthu sawiah ‘Amen,’ an tih theih ang? I lâwmthu sawi ṭawngṭaina chu a ṭha hle a ni thei e; mahse, mi dang a tisâwt si lo. Nangni aia ṭawnghriatloh ka hman tam zâwk avângin Pathian chungah ka lâwm hle a ni; mahse, Kohhran inkhâwmnaah chuan mi dang zirtîr nân ṭawnghriatlohva thu sîngkhat sawi aiin ngaihtuahna hmanga thu panga lek sawi ka duh zâwk. Unaute u, naupang takin thil ngaihtuah suh u; sual lamah chuan nausên ang ni ula, ngaihtuahnaah erawh chuan puitling takin awm rawh u: “ ‘Ṭawnghriatloh hmang mite hmuiin He mite hnênah hian thu ka sawi ang a, Chuti pawhin an ngaithla lo vang,’ Lalpan a ti,” tiin Lehkha Thu-ah te ziak a ni. Chutichuan, ṭawnghriatloh hi ringlo mite tân chhinchhiahna a ni a, ringtute tân zawng a ni ve lo; chutiang bawkin thu hril hi ringtute tân chhinchhiahna a ni a, ringlote tân zawng a ni ve lo. Kohhran pum pui inkhâwmnaah in vaiin ṭawnghriatlohvin thu lo sawi ta ula, la hre lote emaw, ringlo emaw lo lut ta sela, in â ta emaw an ti dâwn lâwm ni? In za-in thu lo hril ta ula chu, ringlo emaw, hre lo emaw lo lût ve te chu in thu chuan a khawih ang a, an sualzia a hriattîr ang. An thinlunga thurûkte chu tihlan a ni ang a, Pathian chibai bûkin an bawkkhup ang a, “In zîngah Pathian a lo awm takzet a ni,” tiin an puang zâwk ang. Unaute u, inkhâwmnaah hla nei te, zirtîrna nei te, thu puan tûr nei te, ṭawnghriatlohva ṭawng ṭûl te, hrilhfiahna nei te in awm si chuan engtia tih tûr nge ni ang? Kohhran siam ṭha zâwnga tih tûr a ni. Ṭawnghriatlohva thu in sawiin mi pahnih pathum bâkin thu sawi suh se, a indawtin sawi sela, pakhatin hrilh fiah rawh u, hrilhfiahtu an awm loh chuan inkhâwmnaah chuan ngawi mai sela, a fâlin Pathian hnênah sawi rawh se. Thu hril pawh pahnih pathum chauhvin hril sela, mi dangin chîk takin lo ngaithla rawh se. A ngaithlatute zîngah thu puan tûr nei an awm chuan a sawi hmasatu chu ngawi rawh se. A indawtin thu hril ṭhîn ula; tichuan, mi tinin zir tûr in nei thei ang a, mi tin in thlamuan thei ang. Thuhriltute thuhril theihna thlarau chu an thuhnuaiah a awm a ni; Pathian chu buaina Pathian a ni lo va, remna Pathian a ni zâwk. Kohhran tina Pathian mi thianghlimte tih dân angin, Kohhran inkhâwmnaah hmeichhiate chu ngawi reng rawh se, thu an sawi ve phal a ni lo ve. Dân buin a sawi angin thu an zâwm zâwk tûr a ni. Thil hriat duh an neih chuan in lamah an pasalte zâwt rawh se. Hmeichhe tân Pathian kohhran inkhâwmnaa thu sawi hi a zahthlâk si a. Pathian thu hi nangmahni aṭanga chhuak em ni? A nih leh, in hnênah chauh em ni a lo thlen? Tu pawhin zâwlnei emaw, thlarau mi emaw nia an inngaih chuan in hnêna ka lehkha hi Lalpa thupêk a ni tih lo hre rawh se. Tu pawhin an pawisak loh chuan ngaihsak suh u. Chutichuan, ka unaute u, thu hril hi châk hle ula, ṭawnghriatlohva thu sawi pawh khap suh u. Amaherawhchu, engkim fel tak leh awmze nei taka tih tûr a ni. Unaute u, in hnêna Chanchin Ṭha ka rawn hril in lo pawm a, in innghah tâkna kha ka hriattîr leh che u a ni. Chanchin Ṭha ka hrilh che u ngei kha in pawm reng chuan chhandam in ni ang a, in pawm reng loh chuan in rinna chu a thlâwn a ni ang. Hêng hi ka thu dawn pawimawh ber ka hrilh chhâwn che u kha a ni; Krista chu Lehkha Thu ang zêlin kan sualte avângin a thi a, phûmin a awm a, Lehkha Thu angin ni thum ni-ah kaihthawh a ni a; Petera hnênah a inlâr a, Sâwmpahnihte hnênah pawh a inlâr a; chumi hnuah, ṭum khatah, unau zanga aia tam hnênah a inlâr leh a, chûng zînga a tam zâwk chu an la dam a, ṭhenkhat erawh chu an muhîl ta. Jakoba hnênah a inlâr leh a, chumi hnuah chuan tirhkoh zawng zawng hnênah a inlâr leh bawk a. A tâwp berah chuan, kei, a hun lova piang ang mai hnênah pawh a rawn inlâr a. Kei zawng, tirhkoh zînga tê ber ka ni, Pathian kohhran ka tihduhdah avângin tirhkohva vuah tlâk pawh ka ni lo. Nimahsela, Pathian khawngaihna avângin ka nih nih ka ni ta. A khawngaihna mi pêk hi a thlâwnin a awm lo ve, tirhkoh dangte aiin ka thawk nasa zâwk asin; nimahsela, keia thawh a ni lo va, ka hnêna awm Pathian khawngaihna thawh a ni zâwk. Tichuan, kei pawhin, anni pawhin khati khân kan hril ṭhîn a, nangni pawhin chu ngei chu in ring ta a. Krista chu mitthi zîng ata kaih thawh a nih thu kan hril a, in zînga ṭhenkhatin engati nge mitthi thawhlehna a awm lo in tih theih? Mitthi thawhlehna a awm si loh chuan Krista pawh kha kaihthawh a ni lo vang. Krista kha kaihthawh a nih si loh chuan kan thu hril hi dâwt a ni ang a, dâwt ring lek in ni bawk ang. Pathianin Krista chu mitthi zîng ata a kaitho tih kan hril a, mitthi thawhlehna a awm si loh chuan Krista pawh kaihthawh a ni lo vang a, Pathian chungchâng thu-ah dâwt kan sawi a ni bawk ang. Mitthite kaihthawh an nih loh chuan, Krista pawh kha kaihthawh a ni bîk lo vang. Krista chu kaihthawh a nih si loh chuan in rinna hi eng mah a ni lo va, in sualnaah in la awm reng a ni ang. Chuti a nih chuan Kristaa muhîl tate pawh kha an boral ta a ni ang. Kristaa beisei kan neih hi tûn dam chhûng atân chauh ni ta se, mi zawng zawnga khawngaihthlâk ber kan ni ang. Mahse, Krista chu mitthi zîng ata kaihthawh a ni takzet a ni, mitthite thawh hmahruaitu a ni. Mihring avângin thihna a lo awm a, mihring avâng vêkin thawhlehna pawh a lo awm a ni. Adama-ah mi zawng zawng an thi ang khân, Kristaah mi zawng zawng tihnun leh an ni dâwn. Amaherawhchu, mahni hun ṭheuhvah a ni ang. Thawh hmahruaitu Krista chu a tho hmasa a, a dawtah, a lo kal leh hunah, ama mite. Chumi zawhah tâwpna chu a lo thleng ang. Rorêlna te, thuneihna te, thiltihtheihna zawng zawng te a tihbo hunah Pa, Pathian hnên ngeiah Ram chu a hlân ang. Pathianin hmêlma zawng zawng a hneha, a ke hnuaia a dah vek hma chu Krista chuan ro a rêl dâwn si a. Hmêlma hnuhnûng ber tihbova awm tûr chu thihna hi a ni. Pathianin, “Engkim a ke hnuaiah a dah,” tih a ni. Heta, ‘engkim’ tihah hian, Krista ke hnuaia engkim dahtu Pathian chu a tel ve lo tih a lang chiang a. A hnuaia engkim dah a nih hnuah, amah, Fapa ngei chu, a hnuaia engkim dahtu Pathian hnuaiah dah a ni ang a; Pathian chu engkima chungnung ber a ni tawh ang. A nih leh, thawhlehna hi awm lo ni se, engah nge mitthi puala baptisma an chan ang? Mitthite kaihthawh an nih dâwn si loh chuan engati nge an puala baptisma an chan ṭhin? Eng vângin nge keini pawh hi dârkâr tin thih hlauhthâwnawma kan awm? Unaute u, kan Lalpa Krista Isuaa ka chhuan êm che u avângin, ni tin thihna ka hmachhawn tih ka hrilh che u a nih hi. Mihring tih dân angin Efesi khuaa sakawlhte kha sual ka nih chuan ka tân eng nge sâwt ang? Mitthite kaihthawh an nih dâwn loh chuan, “I eiin i in ang, natûkah kan thi mai dâwn si a,” an tih ang hian i awm ve mai ang u hmiang. Hruai bovin awm suh u, “Ṭhian sualin nungchang ṭha an tikhawlo ṭhîn,” tih a ni. Harh fîm ula, thil sual ti tawh suh u. Ṭhenkhat chuan Pathian hriatna rêng in neih loh hi, hei hi in zahna tûrin ka sawi a ni. ‘Engtin nge mitthite chu kaihthawh an nih ang? Eng ang taksa nge an put ang?’ tiin in zâwt a ni thei e. Chu chu zawhna âtthlâk tak a ni. Leia chi in tuh pawh hi a thih zet loh chuan a ṭo ngai hlei nêm. Buh chi emaw, thil dang chi emaw in tuh a ni thei e, in chi tuh chu a kûng lo la awm tûr chu a ni lo va, a fang mai a la ni. Pathianin a duh angin kûng a siamsak a, thlai chi hrang hrangin kûng chi hrang hrang an nei a ni. Tisa zawng zawng hi tisa chi khat a ni hek lo, mihring tisa a dang a, ran tisa a dang a, sava tisa a dang a, sangha tisa pawh a dang a ni. Vân taksa a awm a, lei taksa pawh a awm bawk a; vân taksa ropui dân leh lei taksa ropui dân pawh a inang lo. Ni hian ama ropuina a nei a, thlain ropuina hran a nei a, arsi pawhin ropuina hrang a nei, arsi hrang hrang ropui dân pawh a inang lo. Mitthi thawhlehna pawh chutiang bawk chu a ni ang. Ṭawih thei kha phûm a ni a, ṭawih thei lova kaihthawh a ni ang a, hmuhsitawm tak kha phûm a ni a, ropui taka kaihthawh a ni ang; chak lo tak kha phûm a ni a, thiltithei taka kaihthawh a ni ang. Kan phûm kha mihring lam taksa a ni a, kaihthawha awm tûr chu thlarau lam taksa a ni. Mihring lam taksa a awm chuan thlarau lam taksa pawh a awm ang. Lehkha Thu chuan, “Mihring hmasa ber Adama chu mi nung a lo ni ta a,” a ti a; Adama hnuhnûng ber chu nunna petu Thlarau a ni. Thlarau lam a hmasa lo va, mihring lam a awm hmasa a, chumi hnuah thlarau lam a lo awm chauh a ni. Mihring hmasa chu leia siam, leia mi a ni a, mihring pahnihna chu vâna mi a ni. Leia siamte chu leia siama ang kha an ni a, vâna mite erawh chu vâna mi ang kha an ni. Leia siama ang kha kan nih angin vâna mi ang kha kan la ni ang. Unaute u, tisa leh thisen hian Pathian ram chu a luah thei lo va, ṭawih thei hian ṭawih thei lo chu a luah dâwn lo tih ka sawi a ni. Ṭawih thei hi ṭawih thei lovah a chang ang a, thi thei hi thi thei lovah a chang tûr a ni. Chutianga ṭawih thei hi ṭawih thei lova a chana, thi thei hi thi thei lova a chan hunah chuan he Lehkha Thu: “Thihna chu hnehnain a lem zo ta. Aw thihna, khaw nge i hnehna chu? Aw thihna, khawiah nge i tûr chu?” tih hi a lo thleng tawh ang. Thihna tûr chu sual hi a ni a, sual thiltihtheihna chu Dân hi a ni. Mahse, kan Lalpa Isua Krista zâra hnehna min petu Pathian hnênah lâwmthu awm rawh se. Chutichuan, unau duh takte u, tihchêt rual lohvin ding nghet ula, in thawhrimna chu a thlâwn dâwn lo tih hriain Lalpa hna ṭhahnemngai takin thawk rawh u. Mi thianghlimte tâna thawhlâwm thu-ah chuan Galatia rama kohhrante ka hrilh angin ti ve ang che u. Pathianni apiangin in zînga tu pawhin malsâwmna in dawn ang zêlin dah khâwl ṭheuh ula, ka lo kal hunah thawhlâwm khawn a ngaih loh nân. Ka lo kal hunah in thil pêkte chu Jerusalem-a kalpui tûrin in mi rinzâwngte chu lehkha keng chuan ka kaltîr ang. Ka kal ve a ṭûl chuan kan kal ho dâwn nia. Makedonia ram ka fan hnuin ka rawn tlawh ang che u; Makedonia ram fan a ṭûl tho si a. In hnênah rei tak ka châm mai thei, thlasik chhûng zawng pawh a ni mai thei e; tin, nangnin ka kal leh zêlna tûrah pawh min pui dâwn nia. Tûna kal paha hmuh zawk che u mai chu ka duh tâwk lo va, Lalpan rem a tih chuan rei tak in hnêna châm theih ka inbeisei a ni. Efesi khuaah hian Pentikos ni thlengin ka châm rih ang. Dodâltu tam tak awm mah se, hetah hian hlâwk taka rawngbâwl theihna remchâng a inhawng reng a ni. Tin, Timothea hi in hnên a lo thlen hunah, in zîngah inthlahrung lovin awmtîr ang che u, keimah ang bawka Lalpa hna ṭhahnemngai taka thawktu a nih hi. Chuvângin, tu man lo ngainêp suh u. Ka hnênah hlim taka a lo kîr leh theih nân lo ṭanpui ang che u; unau dang ruala a lo thlen ka beisei a ni. Unaupa Apolova erawh chu unau dangte ruala in hnêna lo kal tûrin ka ngên chiam a; mahse, tûnah chuan a duh rih lo tlat a, hun remchâng dangah a lo la kal ngei ang. Inring rengin awm ula, rinnaah ding nghet ula, huai tak leh chak takin awm rawh u. In tih apiang chu hmangaihnaa tih ni zêl rawh se. Stefana te chhûng kha Akaia rama ring hmasa an ni a, mi thianghlimte rawngbâwl hnaah an inpe zo tih in hria e; chutiang mite leh an thawhpuite leh an rawngbâwlpuite thu chu zâwm zêl rawh u. Tin, Stefana te, Fortunata te, Akaika te lo kal hian mi tilâwm hle a ni; anni hian in awm loh pawh lang lovin mi siam a, in rilru an tiharh ang khân kei pawh mi tiharh a, hetiang mite hi ngaihlu rawh u. Asia ram kohhrante hian chibai an bûk a che u. Akuila leh Priskili leh an ina kohhran inkhâwmte hian Lalpa hmingin chibai an bûk mawlh mawlh a che u. Unau zawng zawngte pawh hian chibai an bûk a che u; fawh thianghlimin inchibai tawn rawh u. Hei hi, kei Paulan, keima kut ngeia chibai ka bûkna che u a nih hi. Tu pawh, Lalpa hmangaih lo chu ânchhe dawngin awm rawh se. Lalpa chu a lo kal e. Kan Lalpa Isua Krista khawngaihna chu in hnênah awm rawh se. Krista Isuaah chuan ka hmangaihna in zaa hnênah awm rawh se. Pathian duhzâwnga Krista tirhkoh Paula leh kan unaupa Timothea chuan, Korinth khuaa Pathian kohhran leh Akaia ram pum puia mi thianghlim awm zawng zawng chibai kan bûk e. Pathian, kan Pa leh Lalpa Isua Krista hnên ata khawngaihna leh remna in hnênah awm rawh se. Kan Lalpa Isua Krista Pa leh Pathian, khawngaihnaa khat, thlamuanna petu Pa Pathian hnênah chuan lâwmthu i sawi ang u. Pathianin min thlamuannain hrehawm tinrêng tuarte kan thlamuan ve theih nân, ani chuan kan hrehawm tuar zawng zawngah min thlamuan ṭhîn. Krista tuar anga kan tuar tam poh leh Krista zâra kan thlamuanna chu a pung ṭhîn a, Kan tuarna hi in thlamuanna tûr leh in chhandamna tûr a ni. Kan thlamuanna hi nangni pawhin hrehawm kan lo tuar tawh ang chu chhel tak leh thlamuang taka in tuar ve theihna tûr a ni. Hrehawm min tuarpuitu in ni angin thlamuanna min chanpuitu tûr pawh in ni tih kan hria e; chuvângin, in chungah beiseina nghet tak kan nei a ni. Unaute u, Asia rama hrehawm kan tuar kha in hriat loh kan duh lo ve; khatia tuar zawh rual loh phurritin min delh a, dam rêng kan inbeisei tawh lohzia kha. Thi ngei tûra tih niin kan inhria a; mahse, mahni inring lova, mitthi kaithotu Pathian chu kan rin zâwkna tûr a lo ni a. Chutia thih hlauhawm taka kan awm chu min chhan chhuak a, min chhan chhuak leh bawk ang a; min la chhan chhuak zêl ang tih kan ring tlat a ni. Ṭawngṭaiin min ṭanpui ula, mi tam tak ṭawngṭaina avângin khawngaihna kan dawng ang a, keimahni avângin mi tam takin Pathian hnênah lâwmthu an la sawi ang. Hei hi ka chhuang a ni: Mihring finna vâng ni lovin, Pathian finna vâng zâwkin Pathian hmuhah nun tlang leh rilru ngîl tak puin mi zîngah kan awm ṭhîn a, nangni zîngah phei chuan chutiangin kan awm lehzual ṭhîn tih ka chhia leh ṭha hriatna pawhin mi hriatpui a ni. Kan lehkhaah khân, in chhiara in hriatthiam loh tûr eng mah kan ziak lo va, in la hriatthiam vek ka ring. Tûnah in la hrethiam vek lo na a, Lalpa Isua Nî-a kan chhuan tûr in ni ang bawkin in chhuan tûr kan ni asin. Chu chu ka rin tlat avângin hlâwkna thuah hnih in chan theih nân tlawh hmasak phawt che u ka tum a, chuta ṭangin Makedonia ram ka fang zêl ang a, chumi zawhah Makedonia aṭanga Judai ram pana ka kal pahin rawn tlawh leh che u ka tum a, ka kalna tûra min puih ka beisei a ni. Hei hi ka tum dân chu a ni a, tum mumal nei lo ka ni em ni? A nih loh leh mihring taka a chânga, “Ni e, ni e,” tia a châng leh, “Ni lo ve, ni lo ve,” ti mai mai ka ni em ni? Pathian chu a rinawm avângin in hnêna kan thu pawh a chânga, “Ni e,” a chânga, “Ni lo ve,” tih ang hi a ni lo. Kei leh Silvana leh Timothean in hnêna a chanchin kan hril, Isua Krista, Pathian Fapa chu, “A ni,” leh “A ni lo,” a ni kawp ve si lo. Chutih ahnêkin amahah chuan “A ni,” tih chauh a awm. Pathian thutiam zawng zawng chu amahah chuan, “A ni,” tih vek a ni; chuvângin, keimahni avânga Pathian a ropuina tûrin Isua Krista zârah, “Amen,” kan ti ṭhîn a ni. Kristaa keini leh nangni min tichaktu leh min serh hrangtu chu Pathian a ni. A ta-a min chhinchhiahtu leh kan thinlunga zakhamna Thlarau min petu pawh Pathian bawk a ni. Ka nunna chhâlin thuhretu atân Pathian ka lam a ni, nangmahni zuah tûr che uin a ni Korinth khuaa ka lo kal tâk loh ni. In rinna chungah intihlal kan tum lo ve, in lâwmna atân nangni nên kan thawk tlâng a ni zâwk, rinnaa ding in ni si a. Chuvângin, in thin tina tûr chuan in hnênah lo kal leh tawh lo ila ka ti ta a ni. Keiin in thin ka tihnat si chuan, nangni ka tihnatte vêk lo chuan tu nge mi tilâwm ang? Ka lo kal huna mi tilâwmtu tûrten ka thin in tihnat loh nân kha lehkha kha ka rawn thawn che u a ni, ka lâwmna chu in za-in mi lâwmpui ve ka ring tlat a ni. Mittui tam tak tla chungin, rilru mangang leh hrehawm ti chungin, in thin tina tûr ni lovin, ka hmangaihzia che u in hriat theihna tûrin ka rawn thawn a nih kha. Lungngaihna thlentu hian kei chang mi tilungngai a ni lo, eng emaw chenah in za-in a tilungngai che u a ni ti ila, ka uar lutuk lâwng chu maw. Mi tam zâwkin hetianga in hrem hi a tâwk e. Tichuan, khawngaih ula, thlamuan tawh zâwk rawh u; chuti lo zawng, lungngaih lutuk vângin a beidawng dah ang e. Amah chu in hmangaih a ni tih lantîr tûrin ka ngên a che u, Kawng tinrêngah thu in awihin fiah in dâwl tih ka hriat theih nân lehkha kha ka rawn thawn che u a ni. Tu pawh in ngaihdam apiang kei pawhin ka ngaidam ve a; tu pawh ka lo ngaihdam a, eng pawh ka lo ngaihdam tawh chu nangmahni avângin Krista hmaa ngaidam ka ni; chutilo zawng, Setanan min dinchan khalh dah ang e, a tum chu kan hai si lo va. Krista Chanchin Ṭha hril tûra Troas khua ka thlen khân, Lalpa chuan rawngbâwlna kawng mi hawnsak na a, ka unaupa Tita ka hmuh loh avângin ka mangang êm êm a; tichuan, anni chu chibai ka bûk a, Makedonia ramah ka kalsan leh ta zâwk a ni. Nimahsela, Pathian hnênah lâwmthu awm rawh se. Ani chuan Krista zâra hnehtu kawng zawhnaah min hruai zêl a; Krista hriatna rimtui hmun tina lên chhuahtîrtuah min hmang a ni. Chhandam mêkte leh boral mêkte tân Pathian hnêna Krista rimtui hlan chu kan ni. Boral mêkte tân chuan thihna tûra thih theihna rimchhia kan ni a, chhandam mêkte tân erawh chuan nunna tûra nun theihna rimtui kan ni. Chûng atân chuan tu nge tling ang? Mi tam takin Pathian thu hi sumdâwn nân an hmang angin keini zawngin kan hmang ve lo ve; Pathian tirhin, Pathian hmuhah, Kristaah chuan tihtakzetin thu kan sawi zâwk ṭhîn. Mahni insawimawi kan ṭan leh ta em ni? A nih loh leh, mi dangte ang bawkin sawimawina lehkha kan rawn ken emaw, in hnên ata kan lâk emaw a ṭûl ta em ni? Nangni hi kan lehkha, kan thinlung chhûnga ziak, mi tin hriat leh chhiar chu in ni asin. Nangni hi Krista lehkha, keimahni min ziaktîr, lehkhatuia ziak ni lo, Pathian nung Thlarauva ziak, lung phêka ziak ni lo, tisa thinlung phêka ziak chu in ni tih a lang chiang a ni. Krista zârah chutiang tak chuan Pathian kan ring a ni. Keimahni ngawt chuan kan tlin lo va, keimahni tih anga sawi tûr eng mah a awm hek lo, kan tlin theihna chu Pathian min pek a ni zâwk. Ani chuan Thuthlung Thar rawngbâwl tlâkah min siam a, chu chu Dân, hawrawpa ziak ang kha a ni lo ve; Thuthlung Thar, Thlarauva ziak chu a ni zâwk. Dân, hawrawpa ziak khân thihna a thlen a, Thlarauva ziak erawh chuan nunna a thlen a ni. Mosia hmêl êng, reh leh mai tûr pawh Israel faten an en reng ngam loh khawpin a ropui a; lunga hawrawpa ziak, thihna thlentu rawngbâwlna mah khati taka ropui a nih chuan, Thlarau rawngbâwlna chu a ropui lehzual dâwn lâwm ni? Thiam loh chantîrna rawngbâwlna mah a ropui chuan, thiam chantîrna rawngbâwlna chu a va ropui dâwn êm! Chumi kawngah chuan, ropui taka kha, a aia ropui zâwk daih a lo awm tâk avângin a ropui reng tawh lo ve. Reh leh ta mai mah kha chuti taka ropui a nih chuan, awm hlen tûr chu engti takin ropui ang maw! Chutiang beiseina chu kan neih avângin keini zawng kan huai êm êm a ni. Mosia tih ang khân kan ti lo ve. Ani chuan a hmêl êng a reh thlenga Israel faten an en reng loh nân, hmaikhuhnain a hmai a khuh a. An rilru pawh a chawlawl a ni, vawiin thleng hian Thuthlung Hlui bu an chhiar apiangin chu khuhna chuan a la khuh reng a ni: Kristaah chauh chu khuhna chu lâk bo a ni. Tûn thlengin Mosia lehkhabu an chhiar apiangin chu khuhna chuan an thinlung chu a la khuh reng a ni. Nimahsela, Lalpa Isua lam an hawi hun apiangah chu khuhna chu lâk bo a ni tawh ang. Lalpa chu Thlarau a ni a, Lalpa Thlarau awmna apiangah zalênna a awm ṭhîn. Chutichuan, keini, hmai khuh lohva awm zawng zawng hian Lalpa ropuina chu kan lantîr a, ropuina aṭanga ropui deuh deuh atân ama anpuia awm tûrin tihdanglam kan ni - chu chu Lalpa tih a ni a, ani chu Thlarau a ni. Chutichuan, khawngaihna zâra he rawngbâwl hna hi kan hmuh avângin kan zâm lo ve. Thil zahpuiawm, a rûka an tih ṭhinte chu kan hnâwl a. Fin vervêk thawhin Pathian thu a dik lo zâwnga sawi kan chîng ve hek lo. Thutak kan târlang a, Pathian hmaah mi tin chhia leh ṭha hriatna mittlunga awm kan tum zâwk ṭhîn a ni. Kan Chanchin Ṭha hril hi khuh a nih pawhin, boral mêkte tân chauh khuh a ni ang. Krista chu Pathian anpui ngei a ni a; mahse, Krista ropuina Chanchin Ṭha êng chu hmu lo tûrin tûnlai khawvêl pathian hian ring lote rilru mit chu a tihdelsak a ni. Keimahni chanchin kan hril lo va, Isua Krista chu Lalpa a nih thu kan hril zâwk ṭhîn, keini pawh Isua avânga in bawih kan nih thu kan hril bawk ṭhîn. Pathian ropuina Isua Krista hmêla lo lang chu kan hriat chian theih nân, “Thimah êng lo awm rawh se,” titu Pathian chuan kan thinlungte hi a chhun êng ta a ni. Nimahsela, he thiltihtheihna ropui tak hi keimahnia chhuak ni lovin, Pathiana chhuak a ni zâwk tih a lan chian theih nân, chu ro chu hlumbêlah kan vawng a ni. Kawng tinrêngah nêk chêpin kan awm a, nêk beh zawng kan ni si lo; tihmanganin kan awm a, kan bei a dawng hek lo; tihduhdahin kan awm a; mahse, kalsan kan ni si lo; vuak thlûkin kan awm a; mahse, tihhlum zawng kan ni lo. Isuaa nunna chu kan taksaah hian a lan theih nân, a thihna pawh kan taksaah hian kan pu reng a ni. Isua nunna chu kan taksa thi theiah hian a lan theih nân, keini nungdama awmte pawh hi Isua avânga thi tûra tih kan ni fo a ni. Chutichuan, keimahniah hian thihnain a thawk ṭhîn a, nangmahniah erawh chuan nunnain a thawk ṭhîn a ni. Lehkha Thu-in, “Ka ring a, chuvângin ka sawi a ni,” a ti a; chutiang rinna thinlung chu puin keini pawhin kan ring a, thu kan sawi ṭhîn a ni. Lalpa Isua kaithotu chuan keini pawh Isua nên min kaitho ve ang a, nangniho nên a hmaah min dintîr dâwn tih kan hria. Hêng zawng zawng hi in ṭhatna tûr a ni a; tichuan, mi tam tak zîngah Pathian khawngaihna a pung ang a, Pathian ropuina tûrin lâwmthu sawina pawh nasa takin a pung ang. Chumi avâng chuan kan zâm lo ve, kan pâwn lam mihring hi awngrawp telh telh mah sela, kan chhûng lam mihring chu ni tin siam tharin a awm zâwk a ni. Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni. Thil hmuh theihte chu kan thlîr lo va, thil hmuh theih lohte chu kan thlîr zâwk si a. Thil hmuh theihte chu a ral mai dâwn a, thil hmuh theih lohte erawh chu chatuanin a awm ang. Leia kan taksa hi tihchhiat ni mah sela, taksa hlun, kuta siam ni lo, chatuana awm tûr, Pathian buatsaih chu kan nei dâwn tih kan hre si a. Tûnah hi zawng vâna kan awm huna taksa ropui kan neih tûr chu neih thuah châkin he taksaah hian kan rûm ṭhîn a nih hi. Chutiang taksa kan neih hunah chuan saruakin kan awm lo vang. He lei taksaa kan awm chhûng hian thawpikin kan rûm ṭhîn, he taksa hi chân kan duh vâng a ni lo va, vân taksa neih thuah kan châk vâng a ni; tichuan, thi thei hi nunnain a lem zo tawh ang. Pathian ngei chuan chumi atân chuan min buatsaih a, a zakham nân Thlarau min pe a ni. Chutichuan, taksaa kan awm chhûng hian Lalpa hnênah kan la awm rih lo mai a ni tih hriain, huai takin kan awm fo ṭhîn. Hmuh theih hian min hruai lo va, rinnain min hruai zâwk a ni. Huai takin kan awm a, amaherawhchu, taksaa awm lova Lalpa hnêna awm kan thlang zâwk. Chuvângin, taksain kan awm emaw, awm lo emaw, ama lâwmzâwng mi nih kan tum tlat ṭhîn a ni. Kan vaiin Krista rorêlna hmaah kan lang vek dâwn si a, he dam chhûnga kan thil tih man, a chhia emaw, a ṭha emaw, kan hmuh ṭheuh theih nân. Tichuan, Lalpa hlauhawmzia hriain, ring tûrin mite kan thlêm ṭhîn a ni; Pathian chuan min hre fai vek a, nangni pawhin in thinlung tak chuan min hriat chian ka ring. In hnênah kan insawimawi leh ta a ni lo; thinlung lam ni lo, pâwn lam thil mai chhuangtute chu in chhân theih nân, keimahnia chhuan tûr ṭha kan hrilh che u a ni. Kan lo â a nih pawhin Pathian tân a ni a, kan lo fing a nih erawh chuan in tân a ni. Krista hmangaihna chuan min hneh khawp a, heti hian kan ngaihtuah: mi zawng zawng tân mi pakhat a thi a; chuvângin; mi zawng zawng thi an lo ni; tichuan, a nungte chu anmahni tâna nung tawh lovin, an tâna thi-a tholeha tân an nun tawh zâwk nân, mi zawng zawng tân a thi a ni. Chuvângin, tûn chinah chuan tisa takin tu mah kan en tawh lo. Hmânah tisa takin Krista chu lo hre ṭhîn mah ila, tûnah zawng chutiangin kan ngai tawh lo ve. Mi tu pawh Kristaa an awm chuan thilsiam thar an lo ni a, thil hluite chu an ral a, ngai teh, an lo thar ta. Hêng zawng zawng hi Pathian tih vek a ni: ani chuan Krista zârah amah nên inremin min awmtîr a, inremna rawngbâwl hna chu min pe a. Chutichuan, Pathianin Kristaah khawvêl hi amah nên a inremtîr a, an bawhchhiatnate chu bawhchhiatnaah a chhiar tawh lo va, chu inremna thu puan hna chu kan kovah a nghat ta a ni. Chuvângin, Krista aiawha palai kan ni a: Pathianin keimahni min hmangin a ngên a che u, “Pathian nên lo inrem rawh u,” tiin, Krista aiawhin kan ngên a che u. Ama zârah Pathian ṭhatna kan lo chan ve theih nân, sual rêng rêng hre lo chu, keimahni avângin Pathianin sualah a siam a ni. Pathian khawngaihna in dawn chu ṭangkaipui ngei tûrin, keini amah thawhpuitute hian kan ngên a che u: “A hun takah ka ngaithla che a, Chhandamna ni-ah ka ṭanpui che,” a ti si a. Ngai teh u, tûn hi a hun tak chu a ni a, tûn hi chhandamna ni chu a ni. Kan rawngbâwl hna hi miten an dem loh nân an ngaimawh zâwng eng mah kan ti lo. Kan tih apiangah Pathian rawngbâwltute ni âwm rêngin mi mittlungin kan awm zâwk ṭhîn. Tihduhdahna te, hrehawm te, nêkchêp te chhel takin kan tuar a. Vuak kan tuar a, lung inah kan tâng a, tlâng chîl kan tâwk a, mutmu pawh tuah thei lovin kan thawk rim a, chaw kan tlachham a; thianghlimnaah te, hriatnaah te, ṭhatnaah te, ngilneihnaah te, Thlarau Thianghlimah te, hmangaihna tak takah te, thu dik sawiah te, Pathian thiltihtheihna kan hman dânah te, Pathian rawngbâwltute ni âwm rêngin kan awm a: felna râlthuam chu ding lam leh vei lama kengin kan ṭang ṭhîn. Ngaih ropui kan hlawh a, ngaih nêp kan hlawh bawk a; min fak a, min dem bawk a; thu dik kan sawi a, bumtu-ah min ngai bawk si; tu khaw hriat tham kan ni lo va; mahse, mi tinin min hre bawk si. Thi ang kan ni a; mahse, kan nung si; thunun kan tâwk a, tihhlum kan ni si lo; lungngaihna kan tawhin lâwmna tûr kan nei zêl si; pachhe hle mah ila mi dang kan tihausa si; eng mah kan nei lo va, engkim kan ta a ni bawk si. Aw Korinth mite u, thinlung inhawng takin in hnênah thu kan sawi hi. Eng mah zêp kan nei lo va, nangmahni in inhawng lo a ni zâwk e. Fate hnêna thu sawi angin sawi ta ila, nangni pawh keimahni angin inhawng ve rawh u. Ring lo mite thurualpui suh u. Dikna leh sualnain inṭâwm theih eng mah an nei lo, êng leh thim pawh a inkawp thei em ni? Krista leh Beliara pawhin inlaichînna eng nge an neih? Ringtu leh ring lovin eng nge chan dun an neih? Pathian Tempul leh milemte pawhin eng nge inzawmna an neih? Keini zawng Pathian nung Tempul kan ni si a. Pathianin, “Anmahniah ka awm ang a, ka chên chilh ang; An Pathian ka ni ang a, anni pawh ka mite an ni ang,” a tih ang khân. Chuvângin, “ ‘An zîng ata lo chhuak ula, a hrangin awm rawh u, Thil bawlhhlawh pawh khawih suh u,’ Lalpan a ti.” Chutichuan, “ ‘Ka lâwm ang che u a, In tân Pa ka ni ang a, Nangni pawh ka tân fanu fapa in ni ang,’ Lalpa Engkimtitheia chuan a ti.” Chutichuan, duh takte u, chu thutiam chu kan neih avângin, taksa leh thlarau lam bawlhhlawhna zawng zawng ata intifai ila, Pathian ṭihin thianghlimnaah chuan i puitling ang u. In thinlungah hmun mi kian rawh u, tu pawi mah kan khawih ngai lo va, tu mah kan tichhe ngai lo va, tu mah kan bum ngai hek lo. Thiam loh chantîr tûr che uin chu chu ka sawi lo va; ka hrilh tawh che u angin kan thinlungah in awm tlat a, nangni nên chuan thih tlân emaw, dam tlân emaw kan huam asin. In zîngah ka tlângnêl êm êm a, ka chhuang hle bawk che u a, ka thlamuang êm êm a ni; hrehawm tinrêng kan tuarnaah pawh lâwmin ka khat bawk a ni. Makedonia ram kan lo thlen pawh khân kan hah a dam chuang lo; hrehawm tinrêng kan tâwk zâwk a, pâwn lamah min bei an awm a, chhûng lamah hlauhthâwnnaten min chîm bawk a. Nimahsela, mi chanhaite thlamuantu Pathian chuan Tita lo thleng hmangin min thlamuan ta a. A lo thlen vâng chauh ni lovin, nangmahni avânga a thlamuanna pawh chuan min thlamuan bawk a ni; min ngaihzia te, min tuarpuizia te, kan tâna ṭhahnem in ngaihzia te min hrilh a, chu chuan mi tithlamuang lehzual a ni. Ka lehkha khân in thin a tina tih ka lo hriatin ka inchhîr hman deuh va; mahse, kha lehkha khân rei lo te chauh a tina che u tih ka lo hriat leh thuai avângin ka inchhîr leh ta lo ve. Tûnah chuan ka lâwm ta, in thin ka tihnat vâng ni lovin, pawi in tih avânga in sim ta hi ka lâwmna chu a ni zâwk; chutianga in tuar chu Pathian duhzâwng a ni si a; keimahni avângin eng mah in chân hek lo. Pathian duhzâwng anga lungngaihna hian chhandamna tûra simna a thlen a, inchhîrawm lo tak a ni. Mihring taka lungngaihna erawh chuan thihna a thlen ṭhîn a ni. Ngai teh u, Pathian duhzâwng anga in lungngaihna hian ṭhahnem a va ngaih nasattîr che u êm! In dikzia tihlan duhna te, sual huatna leh sual tih hlauhna te in nei ta a; min ngaihna te, ṭhahnemngaihna te, mi sual hrem duhna te in neih thar tâk hi! Tûnah chuan he thilah hian in inhnamhnawih ve lo tih nangmahni ngeiin in tilang chiang ta. In hnêna ka lehkhathawn kha thil sual titu avâng emaw, a tihsual tuartu avâng emawa ziak ka ni lo va, Pathian mit hmuha kan tân ṭhahnem in ngaihzia nangmahni ngeiin in hmuhchhuah theih nân ka ziak a ni zâwk. Chuvângin, kan thlamuang ta a ni; Tita lâwmna avângin kan hlim lehzual a, in za-in a rilru in tihahdam êm êm a ni. Tita hnênah hian ka chhuang hle ṭhîn che u a, ka tisual lo ve; thu dik tak in hnênah ka sawi ṭhîn a, Tita hnêna kan chhuang che u pawh hi kan lo tidik e. Tin, in zaa a thu in awihzia te, hlau leh khûr chunga amah in lo lawm dân te hre rengin a lainat lehzual che u a ni. Kawng tinrêngah ka rin ngam tâk che u avângin ka lâwm a ni. Unaute u, Pathianin Makedonia rama Kohhrante khawngaihna a pêk thu hi kan hrilh duh che u a ni. Hrehawm nasa taka fiah an ni chungin an lâwm ta êm êm a, an pachhe hle chung pawhin an thilphal êm êm a ni. An neih tlin tâwk an pe mai ni lovin, an tlin tâwk aia tam daih an pe tih ka hriatpui a ni. Chu chu anmahni duh thu ngeia ti an ni a. Mi thianghlimte chhawmdâwlna tûr rawngbâwl hnaah hian tel ve mi dîl chiam a, chu chu kan lo beisei phâk loh a ni; Lalpa hnênah anmahni an inhlân phawt a, chumi hnuah Pathian duhzâwng angin kan hnênah an intulût a. Tichuan, hmâna a lo tih ṭan tawh, in zînga chhawmdâwlna thawhlâwm khawn chu, rawn ti zo nghâl tûrin Tita hi ka ngên a. Rinnaah te, thu-ah te, hriatnaah te, ṭhahnemngaih ṭûlna tinrêngah te, min hmangaihnaah te, kawng engkimah hma in hruai ṭhîn ang khân, he hmangaihna rawngbâwl hnaah pawh hian ṭhahnemngaih chhuah rawh u. Thu pe zâwnga ti ka ni lo va, thil pêk lama mi dang thathozia enin in hmangaihna tak leh tak loh a lan fiah nân ka sawi a ni. Kan Lalpa Isua Krista khawngaihna ngahzia chu in hria e; a retheihna avânga in lo hausak theih nân, hausa hle mah se, nangmahni avâng ngeiin a lo retheih tâk kha. Ka ngaih dân ka han sawi ang e, nikuma in tih ṭan kha tûnah ti zo ula in tân a ṭha ang. A tih tum hmasa ber chauh in ni lo va, a ṭan hmasa ber pawh in nih kha. A tîra in inhuam ang khân, in neih dân ang zêla pein ṭhahnemngai takin tûnah hlen chhuak rawh u le. Miin a neih loh pui ni lovin, a neih aṭanga phal taka pêk a nih chuan a lâwmawm a ni. Mi dang chhâwk zân nân nangni hah ula ka ti a ni lo, inchhâwk tawn a ṭûl thu ka sawi a ni. Tûnah nangnin in ngah lai hian an tlâkchhamna in phuhrûksak a, anni pawhin an ngah ve hunah in tlâkchhamna an la phuhrûksak ve ang che u; tichuan, in inchhâwk tawn dâwn a ni. “A chhar tam chuan a nei tam chuang lo va, a chhar tlêm lahin a tlachham hek lo,” tih ziak ang khân. In tâna ka ṭhahnemngaihna ang, Tita thinlunga dahtu Pathian hnênah lâwmthu awm rawh se. Ani chuan kan ngen avâng mai ni lovin, a ṭhahnemngaihna avâng zâwkin, ama thu ngeiin in hnênah lo kal a tum ta a. A rual hian unau pakhat kan rawn tîr ve a, ani hi Chanchin Ṭha hril thu-ah Kohhranho zawng zawngin an fak hle a ni. Chu chauh pawh a ni lo va, Lalpa ropui nâna ṭhahnemngai taka he chhawmdâwl rawngbâwl hna thawka kan zinpui atân Kohhranten an thlan chhuah a ni. Chutiang chuan miten phal taka an pêk, tam tham tak hi kan buaipuinaah dem kai loh hrâm hrâm kan tum a ni. Lalpa hmuha mawi chauh ni lovin, mihring hmuha mawi pawh kan ngaihtuah bawk tûr a ni. Tin, kan unaupa pawh hi an rualin kan rawn tîr bawk a ni; ani pawh hian ṭhahnem a ngaihzia kawng tam takah a tilang fo tawh a; tûnah phei chuan a rin êm che u avângin lo kal a châk lehzual a ni. Tita hi chu ka ṭhian leh in rawng mi bâwlpuitu a ni a, kan unaute pawh hi kohhran palai an ni a, Krista ropuina an nih hi. Kohhranten hmangaihna in neihzia hi an hmuha, kan fakna che u hi a dikzia an hriat theih nân an chungah in hmangaihna lo lantîr ang che u. Mi thianghlimte rawngbâwlsak thu hi in hnêna ziak tam a ngai lo ve, ṭanpui in peihzia ka hre si a. “Nikum khân Akaia ram chu an inpuahchah tawh,” tiin, nangmahni chhuang takin Makedonia rama mite ka hrilh ṭhîn a, in ṭhahnemngaihna chuan mi tam tak a tiharh ta a. He thilah hian ka fak sual loh nân che u leh ka sawi ang ngeia in lo inpeih theih nân unaute hi ka rawn tîr a ni. Makedonia rama mite kan rualin lo kal ve ta sela, in la inpeih lo tih an rawn hmuh chuan, kan rin tehlul che u vei nên, in tân chauh ni lovin, kan tân pawh a zahthlâk hle dâwn asin. Thawhlâwm in tiam tawh sate kha lo ching fel diam tûrin unaute hi rawn tirh hmasak ṭûlin ka hria a; in lo inpeih chuan in thil pêkte chu lâk luihsak che u ang ni lovin, nangmahni thu ngeia pêk a ni tih a lang chiang dâwn a ni. Hre rawh u, hetiang kawngah hian tuh tlêm chuan a seng tlêm ang a, tuh tam erawh chuan a seng tam ang. Mi tinin an rilrua an tum sa ang chu ui lovin, tih luih ang ni hek lovin pe ṭheuh rawh se; Pathian chuan lâwm taka petu a ni a hmangaih ni. Pathian chuan in mamawh thil ṭha tinrêng a pe ṭeuh thei che u a, in mamawh aia tam pawh thil ṭha in tih theih nân a pêk belhchhah thei che u a ni: “A sem darh a, tlachhamte a pe a, a ngilneihna chu kumkhuain a pângngai reng a ni,” tih ziak ang khân. Tuh atâna chi petu leh ei atâna chaw petu chuan chi a pe ṭeuh vang che u, a ṭhantîr ang a, in thilphalna rah chu a tipung bawk ang. Kawng tinrênga thilphal hle tûrin a tihausa ang che u; tin, keimahni hmanga in thil pêk vâng hian Pathian hnênah lâwmthu an la sawi ang. In chhawmdâwl rawngbâwl hna hian mi thianghlimte mamawh a phuhrûksak chauh ni lovin, Pathian hnêna lâwmthu sawina pawh nasa takin a tipung bawk ang. He in rawngbâwl hna hian Krista Chanchin Ṭha in pawma in zawmzia te, an tân leh mi dang zawng zawng tân in thilphalzia te a tilang a, chu chuan Pathian a chawimawitîr ngei ang. Anni pawhin Pathian khawngaihna in dawn nasat êm avâng hian duhsak takin in tân an ṭawngṭai ngei ang. A thilpêk sawi hleih theih loh avâng hian Pathian hnênah lâwmthu awm rawh se. “Hmaichhana nêm tak, râlkhata paukhauh tak si,” in tih kei Paula ngei hian, Krista thuhnuairawlhna leh nunnêmna chhâlin ka ngên a che u. Tisa taka khawsaa mi puhtute chungah khauh takin ka awm ngam dâwn tih ka inhre si a, ka lo kal hunah chutianga ka awm a ṭûl loh nân ka ngên a che u. Khawvêla awm zawng kan ni ngei e; mahse, khawvêl rilru pua bei kan ni lo. Indona hriamhrei kan hman hi khawvêl thil a ni lo va, kulhpui ṭhiat theihna Pathian hriamhrei thiltithei tak a ni zâwk. An ṭanhmun kan ṭhiatsak zêl a, Pathian hriatna kawng chapo taka dodâltu apiang kan tudawl a, ngaihtuahna tinrêng Krista bawihah kan siam bawk a ni. Tin, thu in awih zân hnuah a la awih lote chu hrem tûrin kan inpeih reng a ni. A lan dân aṭang maiin thil in thlîr a. Tu-in emaw Krista ta ni bîkah a inruat chuan inngaihtuah nawn teh se; Krista ta a ni ang bawkin keini pawh kan ni ve asin. In chhiatna tûr ni lo, nangmahni tundin nâna Lalpan thuneihna mi pêk hi ka lo chhuang lutuk deuh pawh a ni ang e; mahse, ka inzahpui lo ve. Lehkhathawna nangmahni tihṭhaih tumah mi ngai suh u. “A lehkha thute chu a ritin a khauh va, amah kan hmuh meuh chuan pa awmnêm tê, a thu sawi lah sitawm tak a ni si,” tite in awm a. Chutianga ngaitute chuan hei hi hre rawh se; in hnêna kan lo kal hmaa lehkhathawna ka rawn sawi ang tak khân, kan lo kal hunah pawh kan rawn ti ang. Mahni insawimawi ṭhenkhatte zîngah chuan kan inchhiar tel ve ngam lo, anni nên kan inteh ngam hek lo. Mahni inteh nân bi an inthliah chawp a, chu chuan mahni leh mahni an inteh a, a va âtthlâk êm! Keini zawng kan thawhna hmuna mite bâk kan chhuang dâwn lo, Pathianin ri min khamsak chhûnga mi chauh kan chhuang zâwk ang, nangni pawh a huam tel si che u a. Kan bial chin in nih avângin Krista Chanchin Ṭha in hnênah kan rawn thlen a, a piah lamah kan kal loh kha. Kan bial piah lama mi dang thawh kan uanpui lo ve. In rinna a lo ṭhang ang a, thil ropui zâwk in zîngah tih a la ni ang, kan bial pawh a zau zêl ang tih kan beisei. Tichuan, in ram piah lamah pawh Chanchin Ṭha chu kan la hril zêl ang; amaherawhchu, mi thawh sa chu kan uanpui lo vang. A chhuang apiangin Lalpa chu chhuang rawh se. Mahni insawimawite chu ngaihsân tûr an ni lo va; Lalpan a chawimawite chu ngaihsân tûr an ni. Ka â deuh a nih pawhin mi dawhtheih ka duh hle, dawh pawh mi dawhthei hle e. Pasal pakhat, Krista chu ka hualsak tawh che u a, a hnêna nula thianghlim anga ka hlan theihna tûr che uin, Pathian thîkthu a chhiat avângin asin in lakah kei pawh ka thîkthu a chhiat. Rûlin Evi ngamthlêma a bum ang khân, Krista lama in rilru thianghlim leh mawi tak kha eng emaw ti mai maiin an tikhawlo vang tih ka hlau a ni. Kan hril ṭhin ni lo Isua dang hrila lo kal kha in lo lâwm thei a. Thlarau dang in chan ngai loh chu in pawm thei a, in pawm tawh ang ni lo Chanchin Ṭha dang pawh in ngaithei zêl mai maw! Chûng ‘tirhkoh lian’ in tihte pawh chu eng kawngah mah tluk loh ka inring lo asin. Thu sawi thiam ve lo mah ila hriatna lamah chuan ka duai bîk lo tih in hnênah kawng tinrêngin, eng hunah pawh ka tihlan ṭhin kha. A nih loh leh, chawisân in nih theih nân mahni indah hniama Pathian mi pêk Chanchin Ṭha a thlâwna ka hrilh che u khân, thil sual ka ti a lo ni maw? In zînga rawng ka bâwl theih nân Kohhran dang ka pûr a ṭûl a. In hnêna ka awm lai khân ka tlâkchham thu-ah tu mah ka tihautak lo che u, ka mamawh chu Makedonia ram aṭanga unau lo kalten mi rawn pe zêl a ni; tihhautak loh che u ka tum tlat ṭhîn a, ka tum zêl bawk ang. Keimaha Krista thutak awm chu ṭanchhanin ka sawi a ni; Akaia ram chhûnga he ka thil chhuan hi tu man mi tihtâwpsak thei lo vang. Eng vângin maw? Ka hmangaih loh che u vâng em ni? Pathianin ka hmangaihzia che u chu a hria alâwm. Kan thawh ang chiaha thawk nia insawi duhten chhuan tûr eng mah an neih loh nân ka tih ṭhin ang hi ka ti zêl dâwn. Chûng mite chu tirhkoh tak ni lo, mi bum tuma thawk, Krista tirhkohva insiam chawpte an ni. Chu chu a mak lo ve. Setana meuh pawh êng tirhkohvah a insiam chawp ṭhîn asin. Chuvângin, Setana rawngbâwltute chu felna rawngbâwltu anga insiam chawp a har lo ve, an tâwpna tûr erawh chu an thiltihin a la tilang ang. Han sawi zêl ila, mi â angah mi lo ngai lo ula, mi ngai a nih pawhin mi â angin mi lo en mai ula, ka han uang ve hlek teh ang. Ka sawi hi Lalpa mi sawitîr zawng a ni lo ve, mi â angin ka thil chhuan hi ka sawi dâwn a ni. Mi tam takin khawvêl thil an uanpui ṭhîn a, kei pawhin ka han uanpui ve teh ang. Nangni zawng in fing a, mi â-te pawh lâwm takin in dawh thiam a. Miin bawihah siam che u sela, ei zo che u sela, bum che u sela, hmusit che uin in hmaiah bêng che u mah se in dawh zêl thei a. Chutianga kan lo ti ve ngam lo chu a zahthlâk hle mai. Â takin han sawi ta ila: Tu pawhin eng pawh an ngam apiang kei pawhin ka ngam asin. Hebrai mi an ni maw? Kei pawh ka ni. Israel mi an ni maw? Kei pawh ka ni; Abrahama thlahte an ni maw? Kei pawh ka ni. Krista rawngbâwltute an ni maw? Â takin han sawi ta ila, ka ni lehzual - a thawk rim hlei hlei ka ni a, tân inah te ka tâng zing zâwk a, vuak lah ka tuar tam zâwk daih a, thih mai theihna pawh ka tâwk tam zâwk. Juda-te tih dân angin vawi khata vawi sawmli tling lo vuak ṭum nga ka tuar a, ṭum thum tiangin mi vua a, ṭum khat lungin mi dêng a, ṭum thum lawng chhiat ka tâwk a, ni khat leh zan khat tuifinriatah ka hmang a. Ka zinna lamah luia hlauhawm te, suamhmang laka hlauhawm te, ka chipuite laka hlauhawm te, Jentail-te laka hlauhawm te, khawpuia hlauhawm te, thlalêra hlauhawm te, tuipuia hlauhawm te, unau derte laka hlauhawm te ka tâwk fo va; thawk rimin ka buai a, mut pawh hmu lovin vawi tam tak ka awm a, rilṭâm leh tuihâl ka tuar a, sin tûr nei lovin khaw vâwt ka tuar a. Hêng bâkah hian, Kohhranho zawng zawng ka ngaihtuahna, ni tin mi delh rengtu a awm bawk. Mi chak lote ka tuarpui lo ngai em ni? Mi an tlûkin ka vei lo ngai em ni? Chhuang tûr ka nih vêk chuan ka chak lohzia tilangtute hi a ni ka chhuan zâwk dâwn. Pathian, Lalpa Isua Pa chuan dâwt ka sawi lohzia a hria. Amah chu chatuana fakin awm rawh se. Damaska khuaah erawh kha chuan lal Areta hnuaia rorêltu chuan mi man tumin Damaska khua chu a vêntîr a; mahse, kulh bang tukverh aṭang chuan bâwmin mi thlâk thla a; tichuan, a kut ata ka chhuak ta a ni. Sâwt chuang lo mah se, ka han uang ve teh ang. Ka hnêna Lalpa inlârna leh a thu puan ka han sawi zêl teh ang. Kum sâwm leh pali a ni ta, Kristaa awm mi pakhat ka hria - chu mi chu vân thumna meuhva hruai chhohvin a awm a, a hringhrânin a ni nge ni lo tih erawh chu ka hre lo, Pathianin a hria. Chutiang mi chu ka chhuang dâwn; nimahsela, ka chak lohnate lo chu mahni ka inchhuang dâwn lo. Inchhuang duh pawh ni ila âtthlâk a ni lo vang, thu tak tak ka sawi si a; mahse, ka insûm ang, chutilo chuan, mi hmuh ang leh ka laka thu an hriat ang aiin mi ngai ropui zâwk dah ang e. Thil mi hriattîr chu a ropui êm vânga ka inngaihhlut luattuk loh nân ka tisaah hian hlîng mi pe a, chu chu Setana tirhkoh, ka inngaihhlut loh nâna mi kap reng tûr chu a ni. Chu chu mi lâk kiansak tûrin vawi thum Lalpa ka dîl a. Ani chuan, “ka khawngaihna i tân a tâwk e, ka thiltihtheihna hi chak lohnaah asin tihpuitlina a awm ṭhin,” mi ti a. Chuvângin, Krista thiltihtheihna chu keimaha a chên theih nân ka chak lohnate hi lâwm takin ka chhuang tawh zâwk ang. Krista avâng chuan chak lohnaah te, tihduhdahnaah te, harsatnaah te ka lâwm ṭhîn a ni; ka chak loh veleh ka lo chak leh ṭhîn a ni. Mi â ang mai ka nih tâk hi, nangnin â lo thei lovin mi siam a ni; dik tak chuan nangni hi asin mi sawimawitu tûrte chu. Eng mah ni lo mah ila, eng kawngah mah ‘tirhkoh lian’ in tihte chu ka tluk lo bîk lo ve. Tirhkoh ka nih chhinchhiahna chu chhinchhiahna te, thil mak te, thil ropui tak tak te kawng tinrênga dawhthei taka in zînga ka tih ṭhin kha a ni. Eng kawngah nge kohhran dangte aia ka ngaihnêp zâwk che u? Ka tihhautak loh vâng che u kha em ni? Ka lo tidik lo a nih chuan mi ngaidam rawh u. Ngai teh u, tûn hi in hnêna lo kal ka inpeih vawi thumna a ni. Ka tihautak lo vang che u, in thil neih ka ngiat lo, nangmahni hi a ni ka duh ber chu. Faten nu leh pa tân an khâwlsak ngai lo va, nu leh paten fate tân an khâwlsak zâwk ṭhîn a ni. Kei zawng, in thlarau tân lâwm takin ka inhmangral ang a, ka inpe zo vek ang. Ka hmangaih nasat êm che u avângin mi hmangaih nêp dâwn em ni? Ka tihhautak lohzia che u kha in hria a; mahse, depde taka bumtu che u ka lo ni maw? In zînga ka rawn tirh tu emaw tal hmangin in lak aṭanga hlâwkna ka nei em ni? Tita chu in hnêna lo kal tûrin ka ngên a, ama rualin unau pakhat ka rawn tîr bawk a. Tita chuan hlâwk phah nân a hmang che u em ni? Rilru hmun khat pua thawk dûn, hniakhnung inzui chiah kan ni lâwm ni? Mahni insawi thiamah mi lo ngai ṭhîn a ni maw? Pathian hmuhin Kristaah thu kan sawi ṭhîn a ni a. Duh takte u, engkim hi nangmahni siam ṭhat nân ka ti ṭhîn a ni. Ka lo kal hunah ka tum angin ka rawn hmu lo vang che u a, kei pawh in tum angin min hmu lo vang tih ka hlau va ni; inhauna te, inîtsîkna te, thinurna te, inerna te, insawichhiatna te, inrêlna te, chapona te, buaina te in zîngah ka la rawn hmu fo vang a, ka lo kal leh hunin in hmaah ka Pathianin mi timualpho vang a, tûn hma lama thil sual tite, an thil bawlhhlawh tih - inngaih te, hur te sim si lo mi tam tak avângin ka ṭap dah ang tih ka hlau bawk a ni. Tûn hi in hnêna ka lo kal vawi thumna tûr a ni. “Thuhretu pahnih emaw, pathum emaw kâ aṭang chauhvin thubuai rêng rêng tihfel tûr a ni,” tih a ni a. In hnêna ka lo kal vawi hnihnaah khân thil sual titute leh mi dang zawng zawng hnênah ka sawi lâwk tawh a, in zîngah awm rih lo mah ila, ka hrilh lâwk a che u; ka lo kal hun chuan thil sual titute chu ka zuah lo vang. Keimah mi hmangin Krista chuan thu a sawi a ni tih fiahna in zawn chu in la hmu ang. Krista chu in zînga a hna thawhah a duai lo va, thil nasa taka titheitu a nih zâwk kha. Nimahsela, ani chu chak lohna avângin khenbeh a ni a, Pathian thiltihtheihna avângin a nung leh ta a ni. Keini pawh amahah chuan kan chak lo va; nimahsela, in tâna kan rawngbâwlnaah Pathian thiltihtheihna avângin amah nên thil kan ti ve thei ang. Rinnaah chuan in awm emaw, mahni infiah ula, mahni inchhin ṭhîn rawh u. Krista Isua chu nangmahniah a awm tih hriatna in nei lâwm ni? Inhriatna in nei lo a nih chuan a lem mai in la ni. Keini erawh chu a lem mai kan ni ve lo tih in hriat ka beisei. Thil sual eng mah in tih loh nân Pathian hnênah kan ṭawngṭaisak ṭhîn che u a ni; hlawhtling bîk nia kan lan theihna tûr a ni lo, hlawhchham angin lang mah ila thil ṭha in tih theihna tûrin kan dîl zâwk ṭhîn a ni. Thutak ṭan tûr lo chuan a do zâwngin eng mah kan ti thei si lo va. Keini kan chak loh pawhin nangni in chak chuan kan lâwm ṭhîn asin. Hei hi kan dîl bawk ṭhîn - in ṭhat zâwk zêlna tûr hi. Tichhe tûr che u ni lovin, siam ṭha tûr zâwkin Lalpan thuneihna min pe a, in hnêna ka lo kal huna chu thuneihna chu ka lek vak a ṭûl loh nân ka lo kal hmain hêng thu hi ka ziak a ni. Unaute u, dam takin u le; insiam ṭha ula, ka ngenna che u hi pawisa ula, rilru hmun khat pu ula, inrem takin awm rawh u; tichuan, hmangaihna leh remna Pathian chuan a awmpui ang che u. Fawh thianghlimin chibai inbûk rawh u. Mi thianghlim zawng zawngte hian chibai an bûk a che u. Lalpa Isua Krista khawngaihna te, Pathian hmangaihna te, Thlarau Thianghlim pâwlna te chu in zaa hnênah awm rawh se. Kei Paula, tirhkoh, mihring tirh ni lo, mihring ruat pawh ni lo, Isua Krista leh mitthi zîng ata amah kaithotu Pa Pathian ruata hian, kan hnêna unau awm zawng zawngte nên hian, Galatia rama kohhrante chibai kan bûk a che u. Pathian, kan Pa leh Lalpa Isua Krista hnên ata khawngaihna leh remna in hnênah awm rawh se. Pathian, kan Pa duhzâwng zâwmin, tûn hun ṭha lo laka min chhan chhuak tûr leh kan sualte min tlen faisak tûrin, Krista chu amah a inpe ta si a. Pathian hnênah chuan ropuina chatuan chatuanin awm rawh se. Amen. Krista khawngaihnaa kotu che u chu kalsanin, ‘Chanchin Ṭha’ chi dang in pawm leh ta thut mai hi mak ka va ti êm! Chanchin Ṭha chi dang a awm lo asin, nangmahni tibuaitute khân Krista Chanchin Ṭha tihdanglam an tum mai a ni zâwk. Keini pawh ni ila, vân ata lo chhuk vântirhkoh pawh ni sela, kan hrilh tawh che u ni lo, ‘Chanchin Ṭha’ an rawn hrilh che u chuan ânchhe dawngin awm rawh se. Ka hrilh tawh che u a, tûnah pawh ka hrilh nawn leh a che u: in pawm tawh ni lo, ‘Chanchin Ṭha’ dang rawn hrilhtu apiang che u chu ânchhe dawngin awm rawh se. Tûnah hian mihring nge tihlâwm ka tum Pathian? Mihring lâwmzâwng sawi tum angin ka lo lang ṭhîn em ni? Mihring tihlâwm tum ni ila Krista bawih ka ni lo vang. Unaute u, ka hrilh a che u, Chanchin Ṭha ka hril hi mihring laka chhuak a ni lo. Tu hnên aṭang maha dawng ka ni lo va, tu man mi zirtîr hek lo; Isua Krista ngei chuan ka hnêna a puan a ni. Juda fîr ka nih laia ka awm dân in hria e, Pathian Kohhran nasa takin ka tiduhdah a, nuai bo ka tum ṭhîn a nih kha. Kan sakhaw biakna lama thlahtute thu hlan chhâwn vawn chungchângah pawh ka rualpui Juda-te zîngah a firfiak ber ka ni ṭhîn. Nimahsela, Pathian chuan ka nu pum chhûng aṭangin mi serh hrang a, a khawngaihnain mi ko ta a. Jentail-te zînga a Chanchin Ṭha ka hril theih nân a Fapa chu ka hnêna rawn puan ṭha a tih thu mi hriattîr lai khân mi dang tu mah ka râwn lo; ka nih ve hmaa tirhkoh lo ni tawh Jerusalem-a mite hnênah ka kal hek lo. Arabia ramah ka kal ta daih zâwk a; tin, Damaska khuaah ka lo kîr leh ta chauh a ni. Kum thum hnuah erawh chuan Jerusalem-ah Kifa hmêlhriat tûrin ka han kal a, a hnênah ni sâwm leh panga ka châm a. Nimahsela, Lalpa unau Jakoba tih loh chu tirhkoh dangte tu mah ka hmu lo. Ka thu ziak hi a dik a ni, Pathian hmaah pawh ka daw lo ve. Chumi hnu chuan Suria leh Kilikia ramah te ka kal leh ta a. Judai rama Kristian Kohhrante phei chuan mi la hmêlhriat lo va, “Hmâna min tiduhdahtu khân rinna thu nuai bo a tum ṭhin kha a hril ve ta thung,” tih thâwm chauh an hria a; ka chunga thil thleng avângin Pathian an fak a. Kum sâwm leh pali a vei hnuin Barnaba nên Jerusalem-ah kan han kal leh a, Tita pawh kan hruai bawk a. Pathianin mi tirh avânga kal ka ni. Hruaitu lian deuh deuhte chauh a fâlin ka hmu a, Jentail-te hnêna Chanchin Ṭha ka tlângaupui ṭhin hi ka hrilh hlawm a, tûn hma leh tûna ka rawngbâwl zêlna hi hahthlâk thlâwn mai a nih lohna tûrin. Nimahsela, ka mi hruai Tita pawh chu Grik mi a ni na a, serh an tan luihtîr chuang lo. Ringtu der, Isua Kristaa zalênna kan neih enthla tûra an zînga lût ru vete erawh chuan bawiha luhtîr leh min tum a. Amaherawhchu, Chanchin Ṭha thu dik chu in tân an tihdanglam loh nân an thu chhe tê pawh zawm kan duh lo. Hruaitu pawimawh nia langte chu an nih tak tak leh tak tak loh ka tân a dang chuang lo, Pathianin pâwn lam lan dân mai a ngaisâng lo ve, hêng mite ngei pawh hian sawi tûr eng mah an nei chuang lo. Neih ahnêkin Petera chu serh tante zînga Chanchin Ṭha hrilh hna kawltîr a ni ang bawkin, serh tan lohte hnêna Chanchin Ṭha hrilh hna ka hnênah kawltîr a ni tih an hmu a. Serhtante tâna tirhkoh ni tûra Petera thuamtu chuan, Jentail-te tâna tirhkoh ni tûrin kei pawh mi thuam a ni. Tichuan, kohhran bana an ngaih ber Jakoba te, Kifa te leh Johana te pawh chuan he chanvo ka dawn hi an hmuhin, thawk ho kan nih entîr nân Barnaba nên inpâwlna kut ding lam min pe ta zâwk a; keinin Jentail-te zîngah rawng kan bâwl ang a, anniin serh tante zîngah. An zînga retheite erawh chu hre reng tûrin mi phût a, chu lah chu ka lo tum sa rêng a ni si a. Tin, Kifa chu Antiokei khuaa a lo kal lai khân demawm takin a awm a, a langin hmai chhanah ka khak a. Jentail-te zîngah chaw a ei ve ṭhîn a; mahse, Jakoba tirh mi ṭhenkhat Jentail serhtantîr tumtute chu a hlau va, an lo thlen hnu chuan a tîm a, a inthiarfihlîm ta a. Juda dangte pawh chuan a tih dân chu an zui ve a, Barnaba meuh pawh an tih dân chuan a hruai kawi ta a. An thiltih dân chu Chanchin Ṭha thu nên a inhmeh lo tih ka hmuhin, an zaa hmaah Kifa hnênah chuan, “Nang Juda i ni a, Juda anga awm lovin Jentail-te angin i han khawsa a, chuti chung chuan engtizia nge Jentail-te chu Juda mi anga awmtîr i tum?” ka ti a. Keini zawng Juda mi rênga piang kan ni a, ‘Jentail mi sual,’ an tih ṭhinte kan ni lo. Amaherawhchu, Dân zawm vâng ni lovin, Isua Krista rin avâng chauhvin miin Pathian hmaah thiam an chang thei a ni tih kan hria; Dân zawm vâng ni lova, Krista rin avânga Pathian hmaa thiam kan chan theih nân, keini ngei pawh hian Kristaah chuan rinna kan nghat a ni. Tu man Dân zawm avângin Pathian hmaah thiam an chang zo lo vang. Krista rin avânga Pathian hmaa thiam chan tum keiniho hi, ‘Jentail mi sualte ang chiaha ngaih kan nih si chuan, Krista chuan sual rawng a lo bâwl tihna em ni?’ Ni awkawng lo ve. Ka lo ṭhiat tawh Dân vêk chu din thar leh ka tum si chuan, a bawhchhetu ka ni tih a chiang a ni. Kei chuan Dân avângin Dân chu ka thihsan tawh a ni; Pathian lama ka nun theih nân Krista hnênah krawsa khenbeh ka ni tawh. Keima nun pangngaia nung ka ni tawh lo va; keimahah hian Krista chu a nung tawh zâwk a ni. Tûna tisaa ka nung hi, mi hmangaiha ka tâna nun petu, Pathian Fapa ringa nung ka ni. Pathian khawngaihna hi ka hnâwl dâwn lo. Dân zawm avânga Pathian hmaa thiam chan theih a nih chuan, Krista thihna hi a thlâwn mai a ni ang. Aw Galatia rama mi â-te u, tu nge dawi che u? In mit ngeia hmu ve ang maia chiangin Krista khenbeh thu hrilh in nih kha. Min hrilh teh u, Thlarau in dawn kha Dân in zawm vâng nge, Chanchin Ṭha in hriata in rin tâk vâng? Chuti êma â in lo ni maw? Thlarauva ṭan tawh siin tisa thilah in tâwp dâwn em ni? In chunga thil thleng zozai kha engmah lo mai mai em ni? Ni âwm lo tak le! Phal taka thlarau pe che ua, in zînga thil mak ti ṭhîntu Pathian khân, Dân in zawm avânga ti nge a nih, Chanchin Ṭha in hriat in awih tâk avângin? “Abrahama chuan Pathian a ring a, thiam changah pawm a ni ta,” tih ang khân a ni zâwk asin. Abrahama fa dik takte chu ringtute hi an ni tih hre ta che u. Tin, Lehkha Thu chuan Jentail-te pawh rinna avângin Pathian chuan thiam a chantîr dâwn tih a lo hmu lâwk a; tichuan, Abrahama hnênah, “Nangmahah chuan hnam tin malsâwmin an awm ang,” tiin Chanchin Ṭha chu a lo hril diam tawh a ni. Tichuan, Abrahaman a rin anga ring ve apiangin malsâwmna chu an dawng ta a ni. Dân zawm innghah nâna hmangte chu ânchhe dawng mai an ni; “Dân lehkha thu-a chuang zawng zawng zâwma ti vek lo chu ânchhe dawng an ni,” tih ziak a ni si a. Dân zawm avângin Pathian hmaah tu mah thiam chang zo an awm lo tih a chiang a ni, “Rinna avânga thiam chang chu a nung ang,” tih a ni si a. Dân chuan, “Thupêk zâwm vektu chu a nung ang,” a ti mai a, rinna a sawi tel lo. “Thinga khai chu ânchhe dawng a ni,” tia ziak ang khân, Krista chuan kan tân ânchhia chu phurin, Dân ânchhe lak ata min chhan chhuak ta a. Tichuan, Pathianin Abrahama mal a sâwmna chu Jentail-te hnênah Kristaah chuan a lo thleng ta a, keini hian Thlarau pêk tiam chu rinna avângin kan lo dawng ta a ni. Unaute u, entîr nân mihring tih dân han sawi ta ila - Miten thu an lo thlun fel tawh chuan, mihring thuthlung mai a ni nain tu man an phelh leh ngai lo, belh pawh an belh ngai lo. Abrahama leh a chi thlah hnênah chauh Pathianin thu a tiam a nih kha; mi tam tak chungchâng a sawi lo, chi thlahte ti lovin, mi mal thu sawiin, “I chi thlah,” a ti zâwk a ni, chu mi chu Krista hi a ni. Ka sawi tum chu hei hi a ni - Kum zali leh sawmthum hnua dân lo awm ta khân Pathian thuthlun chu a ṭhiat chuang lo, a thutiam pawh chu a tidanglam chuang hek lo. Dân zawm avângin roluahtu nih theih se, Pathian thutiam vâng a ni lo vang; Pathian erawh chuan a thutiam avângin a ni Abrahama hnênah roluahtu tûr a pêk tâk ni. Chuti ni se, Dân hi engati nge pêk a nih? Bawhchhiatna hi eng ang tak nge tih tilang tûrin vântirhkohte palaia hmangin pêk a ni; Abrahama hnêna Fa a tiam kha a lo lan hma atân chauh a ni. Mi pakhat tân palai awm a ṭûl lo ve, Pathian chu pakhat chauh a ni si. Chuti ni se, Pathian thutiam hi Dân hian a kalh em ni? Kalh teh suh e! Mi tinung thei Dân pêk ni sela, chu Dân zawm avâng chuan Pathian hmaah tu pawh thiam chan theih a ni ang chu. Nimahsela, Lehkha Thu chuan, “Engkim hi sual thuhnuaiah a awm tawh,” a ti a; tichuan, Isua Krista rin avânga dawn tûr thiltiam chu a ring apiangte hnêna pêk a ni. Rinna thu a lo thlen hma kha chuan Dânin mi a khuahkhirh a; rinna thu tihlan fiah a nih hma chuan min kaihruai a. Tin, rinna avânga thiam kan chan theihna tûrin Dân chu Krista lama min kaihruaitu a ni a; mahse, rinna thu chu a lo thlen tâk avângin kaihruaitu hnuaiah kan awm tawh lo ve. Tichuan, Krista Isua in rinna avângin in za-in Pathian fate in ni ta; Kristaa baptisma chang apiangte chu Krista chuan in inthuam ta a ni. Juda leh Jentail, bawih leh bawih lo, mipa leh hmeichhia a awm chuang tawh lo, Isua Kristaah chuan in za-in pumkhat in ni. Krista mi in nih tawh chuan Abrahama thlahte in ni, thutiam anga roluahtu tûrte chu. Ka sawi tum chu han sawi zêl ila: Fapa chu ro zawng zawng khâwmtu tûr ni mah se, naupang a la nih chhûng chu a neitu tak a ni chungin bawih ang leka cheibâwl a ni; a pa hun tiam a thlen hma chu enkawltute hnuaiah a awm ṭhîn. Keini pawh chutiang chuan kan awm - naupang kan nih lai khân khawvêl zirtîrna dik lo hnuaiah bawih kan ni a. A hun tak a lo thlen meuh chuan Pathianin a Fapa chu a rawn tîr a. Ani chu Dân hnuaia awmte min tlan tûr leh fapa dinhmuna min dintîr tûrin, hmeichhe laka piangin Dân hnuaiah a rawn seilentîr a. Fa in ni tih a chian nân Pathian chuan a Fapa Thlarau chu kan thinlung chhûngah a rawn tîr a, “Abba, ka Pa,” tiin a au chhuak ṭhîn. Tichuan, bawih in ni tawh lo va, fa in ni ta zâwk a, fa in nih chuan Pathian zâra roluahtu tûrte in ni. Tûn hma khân Pathian in la hre ngai lo va; chuvângin, an pianphung rêng pawha Pathian ni hlei lote bawihah in awm ṭhin kha. Tûnah zawng Pathian in lo zawm ta a - Pathianin a zawm ta che u tih tûr a ni zâwk mah ang chu; engtizia nge khawvêl zirtîrna dik lo mai mai, eng mah ni hlei lote lam in hawia, an bawih nih leh in duh tâk mai? Ni te, thla te, hun te, kum te serh bîk in neih leh tâk hi! In tân tha ka sêng thlâwn ang tih ka hlau a ni. Unaute u, keimah anga awm tûrin ka ngên a che u, nangmahni ang maiin kei pawh ka awm a, tu man mi tihchhiat ngai loh kha. In hnêna Chanchin Ṭha ka rawn hril hmasak ṭum kha ka bawrhsâwm vâng a ni tih in hria e; ka taksa chu in tân buaipuiawm tak ni mah se, mi hmusit lo va, mi ten hek lo; Pathian vântirhkoh ang maiin, Isua Krista ni hial âwmin mi lo lâwm a. Theih ni phei se in mitte kher chhuakin mi pêk in huam tih ka hria; nihlawh in intih tehlul nên, engtizia nge ni ta? In hnêna thu dik tak ka sawi avângin in hmêlma ka ni ta em ni? Mi dodâltute hian a ṭha lam zâwnga rawn ngaihsak che u an ni lo va, lâk hran che ua, anmahni in hlutsak an duh vâng mai a ni. In zînga ka awm loh pawhin a ṭha lam zâwnga rawn ngaihsak che u mi dang an awm phawt chuan a lâwmawm zêl e. Naute u, Krista anna in neih hma chu nau veiin ka vei leh che u hi. Tûnah in zînga chêng ni ila ka va ti êm, ka aw ki pawh a dang tûr! A tihngaihna tak ka hre lo va che u. Dân hnuaia awm duhte u, mi hrilh rawh u, Dân thu chu in hre lo vem ni? “Abrahama chuan fapa pahnih a nei a, pakhat chu bawihnu fa, pakhat chu chhûngpuinu fa,” tih ziak a nih kha. Bawihnu fa chu mihring dân pangngai anga hrin a ni a, chhûngpuinu fa erawh chu Pathian thutiam vânga hrin a ni. Hêng hi tehkhinna a ni; chûng nu pahnihte chu thuthlung pahnih entîrna an ni - pakhat chu Sinai tlâng aṭanga lo chhuak kha a ni a, chu chu Hagari a ni a, a fa hrinte chu bawih an ni. Hagari chu Arabia rama Sinai tlâng entîrna a ni a; tûnlai Jerusalem khua nên angkhat a ni, a chhûnga chêngte nên bawih an ni hlawm si a. Chung lam Jerusalem erawh chu bawih a ni lo, chu chu keini nu hi a ni: “Nang ching, fa hrin nei lo, lâwm la, Nang nau vei ngai lo, hlim takin au rawh, Pasal nei ai chuan hrin nei lo nu chuan Fa a ngah zâwk si a,” tih ziak ang khân. Tichuan, unaute u, Isaka ang bawka Pathian thutiam fate in ni. Mihring dân pangngai anga hrin khân Thlarau thiltihtheihnaa hrin chu a tiduhdah ang khân tûnah pawh a nih zêl hi. Lehkha Thu-ah engtia ziak nge ni kha? “Bawihnu chu a fapa nên hnawt chhuak rawh, bawihnu fapa chuan chhûngpuinu fapa chu ro a luahpui tûr a ni lo,” tih a nih kha. Tichuan, unaute u, bawih fa kan ni lo va, chhûngpuinu fate kan ni. Krista chuan min zalêntîr ta a, in zalênnaah hian ding tlat ula, bawih nghâwngkawl bât leh tawh suh u. Ngai teh u, kei Paula ngei hian ka hrilh a che u - serh in tan chuan Krista chu in hlâwkpui lo tawp ang. Serh tan apiang hnênah hei hi ka sawi duh a ni - Dânin a phût zawng zawng chu an ti law law tûr a ni. Dân zawm avânga thiam chan tumte u, Krista hnên ata in intan fithla a, khawngaihna chu in chhuahsan ta a ni. Keini zawng Thlarau zârah rinna avânga thiam channa chu beiseiin kan nghâkhlel takmeuh a ni. Isua Kristaa kan awm phawt zawngin serh tan emaw, tan loh emaw a danglam chuang lo; hmangaihnaa thuam rinna hi a pawimawh ber mai. Hma in sâwn ṭhat ṭhin vei nên, tu ber kherin nge thutak tlûksan tûra hruai bo ta che u! He hruai kawina hi a kotu che u laka chhuak a ni lo ve. Dawidim tlêm têin chhang hlâwm lian pui pawh a fan chhuak thei tih a ni. Lalpa pakhata awm za kan nih avângin rilru hrang in la put loh kei chuan ka ring tlat a ni; nangmahni chawk buaitu chu tu pawh ni se, hrem a la tuar ang. Unaute u, kei hian serh tan a ṭûl tiin lo hril ṭhîn ila, engah nge mi tihduhdah ang? Chuti ni se, kraws thu kan hril hian buaina a siam lo tûr. Nangmahni tibuaitute hi in zîng ata intan fithla law law ang hmiang. Unaute u, nangni zawng zalênna nei tûra koh in ni a, in zalênna hi tisa tâna remchângah hmang lul suh u; inhmangaih tawnin rawng inbâwlsak zâwk rawh u. “Nangmah i inhmangaih angin i vêngte pawh hmangaih rawh,” tih thu kam khat hi in zawm chuan Dân zawng zawng in zâwm a ni mai. Ran ang maia inbeih leh intihnat in chîn chuan fîmkhur rawh u, in intiboral tawn mai dah ang e. Ka sawi tum chu hei hi a ni: Thlarauvah awm ula, tisa châkna chu in zâwm tawp lo vang. Tisa duhzâwng chuan thlarau lam thil a kalh tlat a, Thlarau lahin tisa lam thil chu a kalh tlat bawk a, an inkalh tawn tlat avângin in tih duh eng mah in ti thei ṭhîn lo va ni. Thlarau hruaia in awm zawngin Dân hnuaiah in awm lo ve. Tisa mite thiltih chu a lang chiang a ni - inngaihna te, bawlhhlawhna te, hurna te, milem biakna te, dawi te, inhuat te, innghirngho te, thîkna te, thinchhiat te, mahni hmasial te, intihdarh te, inṭhen te, inîtsîk te, zu ruih chîn te, zu hmuna nuam tâwl te leh chutiang chi chu. Chutiang ti mite chuan Pathian ram an luah tawp lo vang tih ka hrilh tawh che u angin ka hrilh nawn leh a che u. Thlarau rah zawng hmangaihna te, lâwmna te, remna te, dawhtheihna te, ngilneihna te, ṭhatna te, rinawmna te, nunnêmna te, insûm theihna te a ni. Chutiang kalh zâwng Dân a awm lo ve. Isua Kristaa awmte chuan an tisa châkna te leh duhna te chu an khêngbet tawh a ni. Thlarauva nung kan nih tawh chuan Thlarau hruai ang zêlin i awm ang u. Incho tawna, inîtsîk tawnin mahni i inngaihlu suh ang u. Unaute u, miin sual a ti lai phâwk ula, nangni thlarau mite chuan chu mi chu dimdawi takin tundin leh tum ṭhîn rawh u; nangni pawh mahni invêng ṭha ṭheuh ula, thlêmna in tâwk ve dah ang e. Phur inchhâwk tawn ṭhîn ula; tichuan, Krista dân chu in zâwm a ni ang. Eng mah ni si lo, mi lian tak nia inngai chu mahni a inbum mai a ni. Mi tinin mahni thiltih enfiah ṭheuh zâwk rawh se, mi dang nêna inteh lovin, mahni thawh tâwk tê têah lâwmna tûr in nei thei ang; mi tinin mahni pual phur kan nei ṭheuh si a. Zirtîrna thu dawngtu chuan a zirtîrtu chu thil ṭha a neih ang ang pe ve rawh se. Bumin awm suh u, Pathian chu ngaihnêp rual a ni lo ve. Miin a tuh chu a seng leh ngei dâwn a ni. Mahni tisa lam tâna tuhtu chuan tisaa mi chhiatna a seng ang a, Thlarau lam tâna tuhtu erawh chuan Thlarauva mi chatuan nunna a seng dâwn si a. Thil ṭha tih i ning suh ang u, kan inthlahdah loh zawngin a hun takah kan la seng ngei dâwn e. Chutichuan, remchâng kan hmuh apiangin mi tin hnênah thil ṭha ti ila, rinnaa kan chhûngte chungah phei chuan i uar zual ang u. En teh u, hawrawp hraw pui puia ziak hi keima ziak ngei a nih hi. Tisa lama intih hmêl mawi tumte chuan serh tan luihtîr che u an tum a, Krista kraws avânga tihduhdah an tuar loh nân an ti a ni. Serh tante pawh hian Dân chu an zâwm kim bîk hlei nêm. In taksaa chhinchhiahna awm chu an uanpui theih nân serh tantîr che u an tum a ni. Kei zawng, kan Lalpa Isua Krista kraws chauh lo chu chhuan tûr rêng ka nei lo, chu krawsah chuan khawvêl hi ka tân khenbeh a ni a, kei pawh khawvêl tân khenbeh ka ni. Miin serh an tan nge tan lo a pawimawh lo, siamtharna hi a pawimawh ber chu a ni. He thu zâwmtu zawng zawng chungah remna leh zahngaihna awm rawh se, Pathian Israel-te chungah pawh. Tûn chinah tu mahin mi tibuai tawh suh se, ka taksaa ser awmte hi Krista bawih ka nih chhinchhiahna a nih hi. Unaute u, kan Lalpa Isua Krista khawngaihna chu in hnênah awm rawh se. Amen. Pathian duhzâwnga Krista Isua Tirhkoh Paula chuan, mi thianghlim Efesi khuaa awm, Krista Isua mi rinawmte chibai ka bûk e. Pathian kan Pa leh Lalpa Isua Krista hnên ata khawngaihna leh remna in hnênah awm rawh se. Kan Lalpa Isua Krista Pa leh Pathian chu i fak ang u. Ani chuan Krista zârah vân hmunahte khian thlarau lam malsâwmna tinrêngin mal min sâwm a. Thianghlim leh sawisêlbova a hmaa kan awm theih nân leilung pian hma khân hmangaihnain Kristaah min thlang tawh a. Ama duhzâwng leh a tum dân ang taka Isua Krista zâra a fa ni tûrin min lo ruat lâwk tawh bawk a. Duh taka zâra a khawngaihna thil thlâwnpêk ropui tak min pêk avângin i fak ang u. Krista thisena tlan kan ni, kan bawhchhiatnate ngaihdamna chu. A khawngaihna chu a va thûk êm! Chu khawngaihna chu fing tak leh remhre takin min vûr ta ṭeuh a ni. Kristaa a ruat lâwk tawh ang taka tih a tum thurûk chu min hriattîr ta. A hun taka Kristaa tihhlawhtlin tûra Pathian thil rêl lâwk chu engkim, vâna thil awm te, leia thil awm te Kristaa fâwk khâwm hi a ni. Ama remruat ang taka thil engkim tihlawhtlingtu duh dân ang ngeiin Krista zârah a mite ni tûrin keini hi min ruat lâwk a, min thlang chhuak tawh a ni. Keini Kristaa beiseina nghat hmasate hi a ropuina tilangtu tûr kan ni. Amahah chuan thutak, in chhandamna Chanchin Ṭha chu, in lo hria a, Krista chu in ring ve ta a; tichuan, Thlarau Thianghlim tiam chuan nangni pawh a chhinchhiah ta che u a ni. In Thlarau dawn kha a ta ni tûra min tlanna avânga kan rochan tûr zakhamna a ni. A ropuina chu fakin awm rawh se. Chuvângin, kei pawhin Lalpa Isua in rinna leh mi thianghlim zawng zawng in hmangaihna ka lo hriatin, ka ṭawngṭainaahte ka hre reng ṭhîn che u a, nangmahni avângin bâng lovin lâwmthu ka sawi ṭhîn. Kan Lalpa Krista Isua Pathian, ropuina Pa chuan, finna leh hriatthiamna thlarau pe che u rawh se. Tichuan, in thinlung mitte tihvârin awm sela, eng beisei tûrin nge a koh che u tih te, mi thianghlimte nêna in rochan tûr a khâwl tamzia te, keini ringtua a chakna thahrui thiltihtheihna tâwp chin nei lova a thawh nasatzia te in hre thei ang. Chu chakna chuan Krista chu mitthi zîng ata a kaitho va, vân hmunahte a ding lamah a ṭhuttîr a; lalna te, thuneihna te, thiltihtheihna te, rorêlna zawng zawng te chungah, he khawvêl leh khawvêl lo la awm tûra hming sak zawng zawng chung daihah a dah ta a ni. ‘A ke hnuaiah chuan engkim a dah ta a, ani chu lu ber atân kohhran hnênah a pe ta a ni. Kohhran chu Krista taksa a ni, engkim engkima tifamkimtu famkimna chu. Hmânah chuan in bawhchhiatnate leh in sualte avângin thi in ni a. Chutih lai chuan he khawvêl dân ang hian in khawsa a, boruaka thuneitute lal, awih lote chunga tûna thawk mêk thlarau thu thu-a in awm kha. An zîngah chuan keini pawh kan tel vek a, kan tisa châkzâwng ûmin kan tisa duhzâwng leh ngaihtuahzâwng kan ti ṭhîn a, mi dangte ang bawkin Pathian thinurna tuar tûr rênga piang kan nih kha. Nimahsela, Pathian khawngaihna chu a nasain, a mi hmangaihna chu a thûk êm a, kan bawhchhiatnate avânga thi kan nih lai khân Krista nên min tinung ta hlawm a. A khawngaihna avânga chhandam in ni. Krista Isuaah chuan min kaithovin, vân hmunahte min ṭhuthotîr ta a. Krista Isuaa kan chunga a ngilneihna hian hun lo thleng leh zêl tûr atân pawh khawngaihna a ngah nasatzia a rawn tilang ta a ni. Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni. Thil ṭha tih avângin a ni lo, chuti ni se miin an chhuang dah ang e. Krista Isuaah chuan thil ṭha ti tûrin min siam a, a kut chhuak ngei kan nih tâk hi, thil ṭha tih chu kan awm dân tûra Pathian buatsaih lâwk a ni. Nangni hi piannaa Jentail, tisa kuta serhtanten ‘serh tan loh’ an tih ṭhin che u kha; khatih lai khân Krista in la nei lo va, Israel chhûngkaw lakah mi hrang in ni a, Pathian thutiamah thuthlung pâwna mi in ni bawk a, khawvêlah hian beiseina rêng nei lo leh Pathian tak hre lova in awm kha hre reng rawh u. Tûnah erawh chuan Krista Isuaah, nangni hmâna hla taka awmte kha, Krista thisen chuan tihhnaih in ni ta. Krista chu kan inremna a ni. Ani chuan Jentail-te leh keini Juda-te hi pumkhatah min siam a, min daidang ṭhîn intaina bang chu a tisa khân a tibo ta. Dân thupêkte leh tih tûr awmte chu a titâwp a, keini leh nangni hi amahah chuan mihring thar, pumkhatah min siam a, inremna a rawn thlen ta a. Krawsah chuan intaina chu a tibo va, Jentail-te leh Juda-te chu pumkhata lo awmin, Pathian nên kan inrem ta a. A lo kal khân hla taka awm nangni hnênah remna Chanchin Ṭha a hril a, hnai zâwka awm keini hnênah pawh remna Chanchin Ṭha bawk chu a hril a. Ama zârah Thlarau hmun khatin Pa hnênah kan lût thei ve ve ta a ni. Tichuan, tûnah hian ram dang mi leh mikhual châm mai in ni tawh lo va, mi thianghlimte nên chuan tualkhat leh Pathian chhûngkua in ni ta zâwk a. Tirhkohte leh zâwlneite lungphûm chunga rem in ni, chu lungphûma a kil lung pawimawh ber chu Krista Isua hi a ni. Chu in chu a pumin amahah chuan rem khâwm a ni a, Lalpa tân Tempul thianghlim a lo ni ta a ni. Nangni pawh amahah chuan mi dangte nên, Thlarauva Pathian chênna in atân rem khâwm in ni. Hemi avâng hian nangni Jentail-te tâna Krista Isuaa mi tâng, kei Paula hian ka ṭawngṭaisak che u a ni. A khawngaihna avângin Pathianin in tân he hna hi thawk tûrin mi ruat tih in hre tawh châwk ang a. Ka sawi hlek tawh ang khân Krista thurûk chu inlârnaa hriattîr ka ni a. Ka thu ziak in chhiar ngun chuan chu Krista thu ril chu ka hriat chianzia pawh in hre thei ang. A tirhkoh thianghlimte leh zâwlneite hnênah Thlarauvin tûna a hriattîr ang hian, tûn hma chuan he thu ril hi mihringte a la hriattîr ngai lo; Chanchin Ṭha avângin Krista Isuaah chuan Jentail-te pawh, Israel-te nên ro luah tlâng tûr leh pumkhata awm tûr leh chhûng khat, thutiam dawng ho tûr an nih thu hi. Pathian khawngaihna thilpêk mi dawntîr avâng hian, a thiltihtheihna hmangin chu Chanchin Ṭha rawngbâwltua siam chu ka ni. Kristaah chuan, amah kan rin avângin nêl tak leh ngam takin Pathian kan pawh thei ta a ni. Chutichuan, in tâna ka tuarnate avânga zâm lo tûrin ka ngên a che u, in ropuina tûr a ni e. Hemi avâng hian Pa, lei leh vâna chhûngkaw tinrêng hming chawi chhana hmaah chuan ṭhingṭhiin ka kûn ṭhîn a ni. A thlarau zârah in chhûng lam nun tihchak nân a ropuina nasa tak ata thiltihtheihna pe che u sela, rinna avângin Krista chu in thinlungah chêng sela, hmangaihnaah zung kaiin phun ngheh in ni dâwn nia. Tichuan, mi thianghlim zawng zawng nên a hmangaihna zauzia te, seizia te, sânzia te, thûkzia te chiang takin in hre tlâng thei ang. Krista hmangaihna hriat sên rual loh chu in hria ang a, Pathian famkimna tinrênga tihkhah in lo ni ang. Chutichuan, keimahnia thawk ṭhîn thiltihtheihna hmanga, kan dîl leh kan ngaihtuah phâk aia nasa zâwka ti theitu hnênah ngei chuan, eng lai pawhin Kohhranah leh Krista hnênah ropuina chatuanin awm rawh se. Amen. A kohna che u phua awm tûrin kei, Lalpa avânga tâng hian ka ngên a che u. Kawng tinrêngah inngaitlâwm leh thuhnuairawlh takin awm ula, inphahhniam takin hmangaihna nên indawh tawn rawh u. Inrem taka awm hovin Thlarauva inpumkhatna hi vawng tlat rawh u. Beisei hmun khat nei tûra koh in ni ang bawkin, taksa pakhat leh Thlarau pakhat chauh a awm a. Lalpa pakhat, rinna hmun khat, baptisma hmun khat, mi zawng zawng Pa, Pathian pakhat chauh a awm a ni. Ani chu engkim chungah a awm a, engkim a fang chhuak a, engkimah a awm bawk a ni. Tichuan, Krista khawngaihna thilthlâwnpêk chu tâwk a tih ang zêlin min pe ṭheuh a ni. Lehkha Thu-ah pawh: “Chung lama a chhoh khân Râl a man tâkte tam tak chu salah a hruai a, Mihringte hnênah pawh thilpêk a sem,” tih a nih kha. (Chung lama chho tih hi eng tihna nge? Lei hmun hnuai berah a lo chhuk hmasa tihna a ni. Engkim a tihfamkim theih nân, lo chhuka ngei kha vân chung daiha han chho leh ta-a chu a ni.) Tichuan, mi ṭhenkhat chu tirhkoh atân, ṭhenkhat zâwlnei atân, ṭhenkhat Chanchin Ṭha hriltu atân, ṭhenkhat kohhran enkawltu leh zirtîrtu atân a ruat a. Chutiang chuan mi thianghlimte tihpuitlin nân rawngbâwl hna thawk tûr leh Krista taksa tiṭhanglian tûrin a ruat a ni. Chu chu kan zaa rinna hmun khat kan vawna, Pathian Fapa hriatna kan neiha, mi puitling, Krista famkimna tluka mi famkim kan lo nih theihna tûr a ni. Fing vervêka thiam taka mi hruai bo an tumna, zirtîrna chi tinrênga lehlam lehlama hruai kawi theih naupangchhia ang kan ni tawh lo vang a, hmangaihnaa thu dik sawiin, engkimah Krista lamah kan ṭhang lian thei ang; Krista chu Lu a ni si a. Taksa pum chu amahah a innghat a, tha leh zungin a phuar khâwm a, taksa pêng tin chu an tih tûr ang ti ṭheuhvin an ṭhang tlâng a, hmangaihnain an inchâwm lian ṭhîn a ni. Chutichuan, hei hi ka sawi duh a, Lalpa hmingin ka hrilh a che u; rilru mumal nei lo Jentail-te awm dân angin awm ve tawh suh u. An rilru a thim zo va, hriatna an nei lo va, an thinlung an tihchawlawl tawh avângin Pathian nunna lak ata ṭhenin an awm ta. Zah nachâng pawh an hre tawh lo va, suahsualnaah an inpumpêk a, duhâm takin thil bawlhhlawh tinrêng an ti a. Nangni zawng Krista zirtu in ni a, chutianga awm ve tûr in ni lo. A thu in zawma, thutak, Kristaa awm kha zirtîr in nih takzet chuan, tisa châknain a tihkhawloh tawh in awm dân hmasa, mihring hlui kha hlîp rawh u. In rilru leh thinlung chu tihthar ni sela, thutaka chhuak, dikna leh thianghlimnaa Pathian anga siam mihring thar chuan inthuam rawh u. Chutichuan, dâwt sawi bânsan ula, Krista taksa pêng kan nih ṭheuh avângin mahni ṭhenawmte chu thu dik chauh hrilh rawh u. Thinrim mah ula, thil sual ti suh u, ni tlâk thleng thlengin thinrim suh u. Diabola chu hun remchâng pe suh u. Rûkhmang chuan ru tawh suh se, tlachham hnêna pêk tûr a neih theih nân mahni kut ngeia hna thawkin rim zâwk rawh se. Ṭawng mawi lo rêng rêng hmang suh u, mi siam ṭha thei tûr chauh in ka aṭangin chhuak rawh se; chutichuan, a ngaithlatute tân a lâwmawm bawk ang. Pathian Thlarau Thianghlim chu tilungngai suh u, tlanna ni atân ama ta ngei in nihzia Pathianin a chhinchhiahna che u a ni e. Huatna te, thinurna te, tauhna te, ânna te, sawichhiatna zawng zawng te nangmahni aṭangin paih bo rawh u, sualna zawng zawng nên. Inkhawngaih tawnin inlainat tawn ula, Pathianin Kristaa a ngaidam che u ang hian inngaidam tawn rawh u. Chutichuan, Pathian fa duh takte in nih avângin a awm dân latute ni rawh u. Kristan min hmangaiha, Pathian lâwmzâwng thilpêk leh thilhlan rimtui ni tûrin kan tân a inpe ang khân hmangaihna nei ve rawh u. Mi thianghlimte tih dân tûr ni âwm rêngin inngaihna te, bawlhhlawhna te, duhâmna te in zîngah lam pawh lam ri suh u. Zahmawh te, ṭawng mawi lo leh fiamthu tenawm sawi te hi in tân a mawi lo va ni, lâwmthu sawi chîng zâwk rawh u. Inngaih chîng te, mi bawlhhlawh te, mi duhâm te (chu chu milem bia tihna a ni) - chûng mite chuan Krista leh Pathian ramah chuan chan tûr rêng an nei lo tih hre rawh u. Chûng thil a nêp zâwnga sawitute chuan bum che u suh se, chûng thil avâng chuan Pathian thinurna chu awih lo mite chungah a thleng dâwn a ni. Chuvângin, anmahni chu kâwm hlek suh u. Hmânah khân thim in ni a, tûnah erawh chuan Lalpaah êng in lo nih tâk hi, ênga awmte ni âwm rêngin awm rawh u. Êng chu ṭhatna te, felna te leh thutak tinrêngin a rah chhuak ṭhîn. Lalpa lâwmzâwng chu eng nge ni tih hriat fiah tum zâwk rawh u. Tin, thima awmte thiltih ṭangkai lovah chuan tel ve hauh suh u, a dik lohzia tilang ṭhîn zâwk rawh u. A rûka an thil tih ṭhinte chu a sawi pawh a zahthlâk si a. Eng pawh êngin a chhun chuan a nihna a lang chiang ṭhîn, tihêna awm tawh chu a lo êng ve ṭhîn a ni. Chuvângin, Lehkha Thu-ah pawh: “Nang muhîl, harh la, Mitthi zîng ata tho rawh, Krista chuan a chhun êng ang che,” tih a nih kha. Chutichuan, in khawsak dânah fîmkhur hle rawh u, mi â-te anga awm lovin, mi fingte angin awm zâwk rawh u. Hun ṭha lo taka awm kan nih avângin in hun chu hmang ṭha rawh u. Chuvângin, â takin awm suh ula, Lalpa duhzâwng eng nge ni tih hriatthiam tum zâwk rawh u. Uain ruih chîng tawh suh u, chhiatna bul a ni e, Thlarauvin khat zâwk rawh u. Fakna hla te, Pathian hla te leh thlarau lam hla te chuan inbe ṭhîn ula, in thinlung takin Lalpa fakna hla sa-in zai rawh u. Kan Lalpa Isua Krista hmingin eng lai pawhin engkimah Pa Pathian hnênah lâwmthu hril rawh u. Krista ṭihtute in nih avângin intulût tawn rawh u. Nute pawhin Lalpa thu an awih angin mahni pasalte thu an awih tûr a ni. Krista chu ama taksa, Kohhran chhandamtu a ni a, Kohhran lû a ni ang hian pasal chu nupui lû a ni. Krista hnênah Kohhran a intulût angin, nupuite pawh engkimah an pasalte hnênah intulût rawh se. Pate u, Kristan kohhran a hmangaih ang hian in nupuite hmangaih ve rawh u. Kohhran chu thu leh tuia sil faia tithianghlim tûrin Krista chu amah a inpe a, Kohhran ropui tak, zûr lo, kaidum awm lo leh chutiang thil bawlhhlawh kai lo, thianghlim leh hmêlhem lo ama tân din tûrin a inpe a ni. Pasalte chuan mahni taksa an hmangaih angin mahni nupuite an hmangaih tûr a ni. Mahni nupui hmangaihtu chuan amah a inhmangaih a ni. Tu mân mahni taksa an lungten ngai lo, Kristan kohhran a châwma a duat ang hian an duat zâwk ṭhîn; keini pawh a taksa pêngte kan ni si a. Lehkha Thu-ah chuan, “Chumi avâng chuan mipain a nu leh pa a thlah ang a, a nupui a vuan ang; tichuan, an pahnihin tisa pum khat an lo ni tawh ang,” tih a ni. Hei hi thu ril thûk tak a ni, kei chuan Krista leh a kohhran thu a sawina niin ka hria. Eng pawh ni se, in zînga tu pawhin mahni a inhmangaih ang bawkin mahni nupui hmangaih ṭheuh rawh se, nupui pawhin a pasal a zah thiam tûr a ni. Naupangte u, Lalpaah chuan in nu leh in pate thu zâwm rawh u, chu chu thil dik tak a ni. “I nu leh i pa chawimawi rawh,” tih hi thupêk zînga tiam tel nei hmasa ber a ni. “I tân a ṭha ang a, leiah hian i dam rei bawk ang,” tih a nih kha. Tin, nangni pate u, in fate tithinur suh ula, Lalpa zirtîrnaah leh thununnaah enkawl zâwk rawh u. Bawihte u, Krista thu in zâwm angin rilrua tihtakzetin, hlau leh khûr chungin tisaa in pute thu zâwm rawh u. Mihring tihlâwm tumtute ang maia an hmuh lai chauhva thawk lovin, Krista bawih ni âwm rêngin rilru takin Pathian duhzâwng ti ula, mihring rawngbâwl mai ni lovin Lalpa rawngbâwl in nih zâwk avângin hlim takin thawk ṭhîn rawh u. Bawih pawh, bawih lo pawh, mi tinin an thil ṭha tih lâwmman Lalpa hnên ata an hmu ṭheuh dâwn tih in hre si a. Tin, nangni hotute u, chutiang bawkin an chungah ti ve rawh u. In bawihte nêna in hotu, thlei bîk nei lo chu, vânah a awm tih hre rengin invau chîng suh u. A tâwp berah chuan Lalpa leh a chakna aṭang chuan thiltihtheihna la ṭhîn rawh u. Diabola thlêmna in dan theih nân Pathian râlthuam kimin inthuam rawh u. Mihring râl do kan ni lo ve, lalna te leh thuneihna te, he khawvêl thim chunga rorêltute leh vân hmuna thlarau sual awmte kan do a nih zâwk hi. Chuvângin, Pathian râlthuam kim chuan inthuam ula, ni ṭha lo a thlen hunah hmêlma in dang tlat thei ang a, in dan zawhah pawh in ding reng thei ang. Tichuan, nghet takin ding ula, thutaka in kâwng hrêngin, dikna chu âwmphawah ha rawh u. Remna Chanchin Ṭha puang tûra inpeih rengna chu pheikhawkah bun ula, mi sualpa thal alh theite chu in tihmih zêl theih nân rinna hi phawah hmang rawh u. Chhandamna chu lukhumah hmang ula; Thlarau khandaih, Pathian thu chu pai rawh u. Ṭawngṭai fo ula, Pathian chu in mamawh apiang dîl ula, Thlarau hruai ang zêlin eng hunah pawh ṭawngṭai rawh u. In ṭawngṭainaah chuan mi thianghlim zawng zawng tân bâng lovin dîl rawh u. Chanchin Ṭha thu ril huai taka puang tûra thu ka dawn theih nân kei pawh mi dîlsak ula. Chanchin Ṭha palai lung in tâng ka ni a, ka sawi tûr huai taka ka sawi theih nân min dîlsak ang che u. Lalpaa unau duh tak leh rawngbâwltu rinawm tak Tukika hian, ka chanchin in hriat theih nân engkim a hrilh ang che u. Ka chanchin hrilh tûr che u leh thlamuan tûr che uin ani hi ka rawn tîr a ni. Pa Pathian leh Lalpa Isua Krista hnên ata remna te, hmangaihna te leh rinna te chu unaute hnênah awm rawh se. Kan Lalpa Isua Krista chuai lova hmangaihtu zawng zawng hnênah khawngaihna awm rawh se. Paula leh Timothea, Krista Isua bawihte chuan, Krista Isuaa mi thianghlim Filipi khuaa awm zawng zawng leh, Kohhran hotute leh rawngbâwltute chibai kan bûk e. Pathian kan Pa leh Lalpa Isua Krista hnên ata khawngaihna leh remna in hnênah awm rawh se. In chanchin ka ngaihtuah apiangin ka Pathian hnênah lâwmthu ka sawi ṭhîn a, eng hunah pawh in zavaia tân ka ṭawngṭai apiangin hlim takin ka ṭawngṭai ṭhîn a ni, in hriat tirh ni aṭangin tûn thlenga Chanchin Ṭha hril hna mi thawhpui ṭhin avângin. Nangmahnia he thil ṭha tichhuaktu chuan Krista Ni-a a puitlin thlengin a thawh zêl ka ring tlat a ni. Ka ngai êm êm ṭhîn che u a, Pathianin he chanvo mi pêk Chanchin Ṭha tâna ka beihnaah te, tihngheh hna ka thawhnaah te leh ka kawl bunah te min ṭanpuitu in nih avângin ka thinlungah in awm reng a, in zaa chungah chutiang rilru pu âwm rêng pawh ka ni. Krista Isua rilru ka ṭâwmpui avângin in zain ka ngai êm êm che u a ni tih Pathianin a hria. In hmangaihna chu hriatnaah te, thil hmuh fiah thiamna tinrêngah te ṭhang liana a pun deuh deuh theih nân ka ṭawngṭai a ni. Tichuan, thil ṭha bîkte chu in thlang thiam ang a, Krista Nî-ah chuan thianghlim leh sawisêlbo in lo ni ang a, Pathian ropui nân leh fak nân Krista zâra felna rah chuan in lo khat dâwn nia. Unaute u, ka thil tuarte kha chanchin Ṭha tihdarhna tûr a lo ni ta hlauh zâwk tih in hriat ka duh a ni. Ka kawl bunte hi Krista vâng a ni tih lal in vêngtuho leh mi dang zawng zawng pawhin an hre ta. Unau tam zâwkte pawhin ka kawl bun avângin Lalpa an ring nghet sauh va, hlau lovin Pathian thu pawh an hril ngam ta. Mi ṭhenkhat chuan îtsîkna leh elrelna avângin Krista thu an hril ve ṭhîn a, ṭhenkhat erawh chuan rilru ṭha takin an hril ṭhîn. Chanchin Ṭha ṭan tûra ruat ka nih hriain hmangaih avânga hril an ni; ṭhenkhat zawngin ti tak tak lovin, inerna avâng leh ka chungthu hi rip zual se an tih avânga hril an ni. A pawi lo ve, a derin emaw, a takin emaw, engti kawng emaw tala Krista thu hrilh a ni hi a lâwmawm e, ka lâwm zêl ang. Min ṭawngṭaisakna avâng leh Isua Krista Thlarau ṭanpuina avângin chhan chhuah ka ni dâwn tih ka hre si a. Ka duhthusâm ber leh ka beisei tlat chu, engah mah ka mualpho lohva, huai taka eng hunah pawh, tûn ṭumah ngei pawh hian, damin emaw, thîin emaw ka taksaa Krista chawimawi hi a ni. Kei zawng Krista tâna nung ka ni a, thi mah ila ka tân chuan a hlâwk zâwk ang. Dam zêl ila ṭangkaina ka la nei dâwn bawk si a; a eng nge thlan zâwk tûr ka hre lo. A ngaihna tak pawh ka hre lo ve, kal chhuaha Krista hnêna awm châkna ka nei a, chu chu a ṭha zâwk tih ka hria. Amaherawhchu, nangmahni avângin la dam reng a ṭûl bawk si. In zaa rinna tiṭhang tûr leh in lâwmna tipung tûrin ka dam zêl dâwn tih ka hria. Ka lo kal leh hunah chuan keimah avângin Krista in la fak lehzual dâwn a ni. Krista ring tûr chauh ni lovin, a tâna tuar tûr pawhin rawngbâwl hna hi in chang a ni si. Indona ka tawh in hmuh ṭhin, tûnah pawh ka tâwk zêl tih in hriat ang kha in tâwk ve ta a nih hi. Krista zârah thlamuanna in nei ta a, a hmangaihna chuan a tilâwm che u a, Thlarau pâwlna in chang a, inlainatna leh inkhawngaihna in nei ta a. Chuvângin, lungrual taka inhmangaih tawnin, inthuruala rilru hmun khat puin, ka lâwmna tikim rawh u. Mahni hmasial tak leh inngaihlu taka eng mah ti lovin, tu pawhin inngaitlâwm takin mi dangte ṭha zâwkah dah rawh u. Mahni ṭhatna tûr chauh zawng lovin, mi dang ṭhatna tûr pawh zawng rawh u. Krista Isua rilru ang hi nangni pawhin pu zêl rawh u. Ani chu Pathian anpui ni mah sela, Pathian tluka awm chu tum tlat tûrah a ngai lo va, mahni intitlâwmin bawihah a insiam a, mihringa lo piangin mihring a lo ni ngei na a, a inngaitlâwm a, thi khawp hialin thu a zâwm a, krawsah a thi ta a. Chuvâng chuan, Pathianin ani chu a chawimawi nasa ta ber a, hming zawng zawnga hming chungnung ber a pe ta a. Tichuan, Isua chawimawiin mi tin, vâna mi te, leia mi te, lei hnuaia mi te a hmaah an ṭhingṭhi ang a, Pa Pathian ropui nân mi tinrêngin, “Isua Krista chu Lalpa a ni,” tiin an puang ang. Tichuan, ka duh takte u, ka awm laia ka thu in awih ang khân, tûna ka awm loh hlân pawh hian in awih lehzual a ṭûl a ni. Pathian hlau leh ṭih tak chungin in chhandamna tifamkim tûrin thawk zêl rawh u. Ama duhzâwng tih tum tûr leh ti thei tûra nangmahnia thawktu chu Pathian a ni si a. Phunnawi lo leh hnial lovin engkim ti rawh u. Tûnlai mi bengtla lo leh tihmawhte zîngah hian Pathian fa, sual nei lo, nun tlang, sawisêlbo in nih theihna tûr leh, khawvêl tiêngtute in nih theihna tûrin, nunna thu chu vuan zêl rawh u; tichuan, Krista Nî-ah chuan ka chhuan tûr in ni ang a, ka tlân thlâwn lova, ka thawkrim thlâwn lo tih a lang dâwn nia. In rinna rawngbâwlna leh inthawinaah chuan kei hi hlanin awm dâwn pawh ni ila ka lâwm ang, nangni pawh ka lâwmpui bawk ang che u. Chutiang bawkin nangni pawh lâwm ula, mi lâwmpui bawk rawh u. In chanchin hriaa ngaihṭha taka ka awm theih nân, Lalpa Isuan rem a tih chuan in hnênah Timothea rawn tirh thuai theih ka inbeisei. Tihtakzeta kei anga ngaihtuah ve che u chu ani chauh hi a ni. Mi dang zawngin Isua Krista tân ngaihtuah lovin, mahni tân an zawng si ṭhîn a. Ani erawh hi chu a ṭangkaizia in hre tawh a, pa leh fa thawk dûn angin Chanchin Ṭha rawng kan bâwl dun ṭhin kha. Chutichuan, ka chanchin tûr ka hriat veleh ani hi ka rawn tirh nghâl theih ka beisei. Lalpan rem a tih chuan keimah ngei pawh hi lo kal thuai theih ka inring. Tin, ka unaupa, ka sipaipui, ka rawngbâwlpui, ka mamawh phuhrûk tûra in rawn tirh Epafrodita hi in hnêna rawn tirh ṭûlin ka hria. In za-in a ngai êm êm che u a, a na tih in lo hria chu pawi a ti hle a ni. Thih ngama nâ zawng a ni ngei a; mahse, Pathianin a khawngaih a, ani chang ni lovin, kei mi khawngaih pawh a ni bawk ang chu, lungngaih lehzualna tâwk lovin mi siam ta a. Chutichuan, amah in lo hmuha in lâwm nân leh, ka mangan a reh theih nân ani hi ka rawn tîr vat a ni e. Ani hi Lalpa hmingin hlim takin lo lâwm ula, hetiang mi hi ngaihlu rawh u. Nangmahni ngeiin kuta min ṭanpui phâk si loh avângin thih dâwn lovin Krista hna a thawk a, a thih phah ṭhelh nghe nghe a ni. A tâwp berah chuan ka unaute u, Lalpaah lâwm rawh u. Thu pângngai bawk ziak leh ṭhin hi keia tân ninawm a ni lo va, in tân a sâwt bawk si a. Ui lakah te, thil ṭha lo titu lakah te, serh tan uarho lakah te fîmkhur rawh u. Keini Pathian Thlarau zâra Pathian bia leh Krista Isua chhuanga, pâwn lam thila innghat lote hi serh tan dik tak kan ni zâwk si a. Duh ila chuan kei pawhin pâwn lam thil chhuan tûr chu ka nei asin. Miin pâwn lam thil chhuang theia an inhriat chuan kei ka inhre lehzual a ni. Ni riat nia serh tan, Israel thlaha mi, Benjamina chia mi, Hebrai nu leh pa kâra piang ka ni. Dân zawm lamah chuan Farisai ka ni a, ṭhahnemngaih lamah lah kohhran tiduhdahtu ka ni a. Dânin a phût ang hlen thu-ah pawh sawisêlbo ka ni. Nimahsela, chûng thil, ka tâna hlâwk tûr apiangte chu, Krista avângin hlohna zâwkah ka ngai a ni. Chu chang a ni lo, ka Lalpa Isua Krista hriatna hlu tak avângin thil engkim hi hlohnaah ka ngai a; Krista chu ka neih theih nân leh amah nên pumkhat kan nih theih nân, amah avângin engkim ka chân ta vek a, chûng chu bawlhhlawh ang lekah ka ngai a ni. Thiam chang ka nihna chu Dân zawm vâng ni lovin, Krista rin vâng zâwk a ni a, rin vânga Pathian hmaa thiam channa chu. Ka thil duh chu Krista hriat te, a thawhlehna thiltihtheihna chan te, a tuar anga tuar te, a thihna ṭâwmpui te hi a ni. Tichuan, mitthi thawhlehna chu ka chang ve dâwn si a. Hêng hi ka chang tawh ka ti lo ve, famkim tawh pawh ka inti hek lo; Krista mi man chhan chu tihlawhtling ngei tûrin ka la bei zêl zâwk a ni. Unaute u, hlawhtling tawhah ka inngai lo ve, thil pakhat erawh chu ka ti ṭhîn, thil kal tawhte chu theihnghilha, hma lam thilte chu thlîr zâwkin, Krista Isuaa Pathian chung lam kohna lâwmman chu hmu tûrin, tiam chin lam chu ka pan ngat ngat a ni. Tichuan, keini puitling tawhte hian chutiang rilru chu i pu ang u. Ngaih dân dang nei in awm a nih pawhin Pathianin a la tihfiahsak ang che u. Eng pawh ni se, kan thlen chin aṭang khân hma i sâwn zêl ang u. Unaute u, ka awm dân hi zir zêl rawh u. Entawn tûr keini min nei a, kan awm dân anga awmte chu en berah neih rawh u. An khawsak dâna Krista kraws hmêlma tam tak an awm tih ka hrilh fo che u kha, tûnah pawh ṭap chungin ka hrilh nawn leh a che u. Chûngho tâwpna chu chhiatna a ni. Ei tûr hi pathianah an neih a, zahpui tûr thilte chu an la chhuang ta zâwk a, khawvêl thil chauh an ngaihtuah a ni. Keini zawng vân khua-leh-tui kan ni si a, min chhandamtu Lalpa Isua Krista vân aṭanga lo kal tûr chu nghâkhlel takin kan thlîr a ni. Engkim a thuhnuaia dah theitu chuan kan taksa tlâwm tak hi ama taksa ropui anga awm tûrin a thiltihtheihna chuan a tidanglam dâwn a ni. Chuvângin, ka unau duh tak leh ngaih êm êm, ka lâwmna leh mi chawimawitu duh takte u, chutiang chuan Lalpaah ding nghet rawh u: Lalpaa rilru hmun khat pu tûrin Euodii leh Suntuki kha ka ngên e. A ni, nang, ka nghâwngkawl bahpui rinawm tak, khâng hmeichhiate kha ṭanpui tûrin ka sâwm a che; anni chuan, Klemena leh Nunna Bû-a hming chuang dangte nên Chanchin Ṭha hrilh hnaah mi thawhpui nasa si a. Lalpaah chuan lâwm fo rawh u, ka sawi nawn leh ṭhîn ang, lâwm rawh u. In dawhtheihzia mi zawng zawng hriat ni rawh se. Lalpa chu a hnai e. Engah mah mangang suh u, eng thilah pawh ṭawngṭaiin, in mamawh chu Pathian hnênah thlen ula, lâwmthu hril zêl chungin dîl rawh u. Tichuan, mihring hriat sên rual loh Pathian thlamuanna chuan, in thinlung leh in rilrute chu Krista Isuaah chuan a vênhimsak ang che u. A tâwp berah chuan unaute u, a dik leh zahawm apiang, a fel leh thianghlim apiang, a duhawm leh thangmawi apiang, a ṭhata, fak tlâk a nih phawt chuan, chûng chu ngaihtuah rawh u. Ka hnên aṭanga in thil zir leh dawn te, in thil hriat leh hmuhte kha ti zêl rawh u. Tichuan, thlamuanna Pathian chuan a awmpui ang che u. In mi ngaihtuahzia tûn hnaia in rawn tihlan leh theih tâk avângin Lalpaah chuan ka lâwm takmeuh a ni. Chutiang tih chu in tum reng a, remchâng in la hmu rih lo mai a ni. Ka tlâkchham thu sawi zawng ka ni lo ve; eng ang pawhin awm ila lungawi ka zir tawh si a. Rethei taka awm dân ka thiam a, hausa taka awm dân pawh ka thiam bawk a; engkimah tlai leh rilṭâma awm dân, hausa leh retheia awm dân thurûk ka zir tawh. Mi tichaktu avângin eng pawh tâwk tûrin chakna ka nei ta a ni. Eng pawh ni sela, ka mangannate mi lo hriatpui ṭhîn hi in ti ṭha e. Tin, Chanchin Ṭha ka hrilh ṭan laia Makedonia ka chhuahsan hnu khân nangni Filipi-ho chauh lo chuan kohhran dang pakhat mahin sum hman tûr mi ngaihtuahpui an awm lo tih in hria e, Thesalonika khuaa ka awm lai pawhin ka tlâkchham phuhrûk tûrin vawi khat chang ni lovin, vawi hnih lai thilpêk mi rawn thawn kha. Thil pêk ka zawng lo ve, in tâna thlarau lam rah tûr chu ka zawng zâwk a ni. In thilpêk zawng zawng ka lo dawng a, ka ngah ta e. Epafrodita kuta in thil rawn thawnte pawh ka lo hmu a, ka phuisui ta e. Chu chu thilhlan rimtui pawm tlâk, Pathian lâwm zawng a ni. Ka Pathian chuan Krista Isuaa a hausakna ropui tak aṭangin in mamawh tinrêng a pe ang che u. Kan Pathian leh kan Pa chu chatuanin ropui rawh se. Amen. Mi thianghlim zawng zawng Krista Isua hmingin chibai ka bûk e. Ka hnêna unau awmte hian chibai an bûk a che u. Mi thianghlim zawng zawngin chibai an bûk a che u, Kaisara ina awmte hian an bûk deuh bîk a che u. Lalpa Isua Krista khawngaihna chu in hnênah awm rawh se. Paula, Pathian duhzâwng anga Krista Isua Tirhkoh leh kan unaupa Timothea chuan, Kolosa khuaa mi thianghlim awm Kristaa unau rinawmte chibai kan bûk e. Pathian kan Pa hnên ata khawngaihna leh remna in hnênah awm rawh se. In tân kan ṭawngṭai apiangin Pathian, kan Lalpa Isua Krista Pa chu lâwmthu kan hrilh ṭhîn. Krista Isua in rin tâk thu te, mi thianghlim zawng zawng in hmangaih tâk thu te kan lo hria a; Chanchin Ṭha thutak in hriat aṭanga beiseina in lo neih tâk vâng a ni a, chu beiseina chu in tân vânah dah ṭhat a ni. In hnêna Chanchin Ṭha a lo thlena, Pathian khawngaihna chu in hriat chian ni aṭanga thil awm dân ang khân khawvêl ram tinah Chanchin Ṭha chuan rah chhuahin a darh ta. Kan tâna Krista rawngbâwltu rinawm Epafra, kan bawihpui duh tak, Chanchin Ṭha hrilhtu che u hian, Thlarau zâra hmangaihna in neih thu hi min hrilh a ni. Chumi avâng chuan thlarau lam finna leh hriatthiamna tinrênga a duhzâwng in hriat famkim theih nân, in chanchin kan hriat ni aṭangin ṭawngṭai leh dîlsak che u kan bâng lo. Lalpa mi ni tlâka a lâwmzâwng in niha, hnathawh ṭha tinrênga rah chhuahin, engkima Pathian hriatnaa in ṭhan len theih nân kan dîl ṭhîn a ni. A thiltihtheihna ropui tak aṭanga chhuak chakna chuan kawng tinrênga chhelna leh dawhtheihna nei tûrin a tichak ang che u. Tichuan, mi thianghlimte nên a ram ênga rochan nei ve tlâka siamtu che u Pathian chu hlim takin lâwmthu in hrilh thei ang. Ani chuan thim thuneihna laka min chhan chhuakin, a Fapa hmangaih taka ramah chuan min hruai lût ta a. Fapaah chuan tlan chhuah kan ni a, kan sualte ngaihdam a ni ta. Krista chu hmuh theih loh Pathian anpui, thil siam zawng zawng hmahruaitu a ni. Amahah chuan engkim, vâna awm te, leia awm te, hmuh theih te, hmuh theih loh te siam a ni a; lalṭhutthlêng te, rorêlna te, lalna te, thuneihna te, engkim hi amah avânga siam a ni a, ama ta tûra siam a ni bawk. Ani chu engkim awm hmain a awm a, amahah chuan engkim a innghat bawk a ni. Ani chu kohhran lu a ni a, kohhran hi a taksa a ni bawk; ani chu engkim bul a ni a, engkima chungnung ber a nih theih nân mitthi zîng ata thawhlehna hmahruaitu a ni. Amahah Pathian nihna famkim a awm hi Pa duhzâwng a ni. Krista avângin engkim Amah nên a inremtîr leh a, krawsa a Fapa thisen chuan remna a siam a, Krista avâng chuan leia awmte leh vâna awmte chu Amah nêna inremna a siam ta. Nangni pawh hmânah chuan Pathian lakah mikhual in ni a, thil sual in ngaihtuaha in tih ṭhin avângin hmêlma in ni a. Tûnah zawng a Fapa, tisaa lo chang thihna avângin a hmaah thianghlim, hmêlhem lo leh sawisêlbova in awm theih nân Pathianin Amah nên a inremtîr ta che u a ni. Tichuan, rinnaah awm reng ula, nghet taka dingin Chanchin Ṭha in hriat avânga beiseina in neih tâk kha tawlh bosan suh u. Chanchin Ṭha chu vân hnuaia thil siam tinrêng hnênah hrilh a ni ta, kei Paula hi chumi rawngbâwltu chu ka ni. Nangmahni avânga ka tuarnaah tûnah hian ka lâwm a ni. A taksa, kohhran tâna Krista tuar bâkte chu ka tisain ka chhunzawm zêl a ni si a. Pathian thu leh a remruat in hnêna kim taka puang tûrin Pathianin hna mi pe a, kohhran rawngbâwltuah kei hi mi siam a ni. Mi zawng zawng laka a lo thup kumkhua ṭhin thurûk kha, tûnah hian a mi thianghlimte hnênah a tilang ta. Chûng mite hnênah chuan hnam tin tâna a thurûk ropui leh hlu tak chu Pathianin hriattîr a duh rêng a ni; chu thurûk chu Krista, nangmahnia awm, ropuina beisei chhan chu a ni. Krista thu chu mi zawng zawng hnênah kan hril a, Kristaa kan puitlin ṭheuh theih nân finna tinrêngin mi tin kan zirtîrin kan kaihruai ṭhîn a ni. Chumi ti tûr chuan Krista chakna, keimahnia thawk ṭhîn chu hmangin kan bei a, rim takin kan thawk a ni. Nangni leh Laodikei khuaa mi leh tisaa ka hmêl hmu lote pawhin, engti kauva rimin nge in tân ka thawh ṭhin in hriat ka duh a ni. An thinlung a thlamuan theih nân hmangaihnaa an insuih khâwma, kawng tinrênga thinlungah hriat chianna an ngaha, Pathian thurûk, Krista chu, an hriat theih ka duh a ni. Kristaah chuan finna leh hriatthiamna ro hlu zawng zawng chu a inphûm si a. Tu man, thu dik ni âwm taka lang, dik si lova an bum mai loh nân che u hei hi ka sawi a ni. Tisain in hnênah awm lo mah ila, thlarau zawngin in zîngah ka awm a, in invawn felzia leh Krista rinnaa in nghehzia ka hmuhin ka lâwm a ni. Chutichuan, Krista Isua chu Lalpaa in pawm tâk avângin amahah awm rawh u. Amahah chuan zung kaiin inrem chho ula, zirtîrna in dawn ang khân rinnaah chuan ding nghet ula, lâwmthu sawi uar rawh u. Fîmkhur rawh u, Krista aṭanga chhuak ni lo, khawvêl zirtîrna ramhuai aṭanga chhuak, khawvêl finna an tih, mihring inzirtîr chhâwn mai mai hmangin tuten emaw an bum dah ang che u. Kristaah chuan Pathian famkimna tinrêng chu taksain a awm si a. Ani chu lalna leh thuneihna zawng zawng lu a ni a, amahah chuan nangni pawh tihfamkim in ni. Amahah serh tan in ni ta, kuta tisa vun tan ni lovin, Kristaah chuan serh tan in ni. Baptisma-ah chuan a hnênah phûm ve in ni a, mitthi zînga ata amah kaithotu Pathian thiltihtheihna rin avângin amahah chuan kaihthawh in ni. In bawhchhiatnate leh tisaa serh tan loh in nih avângin thi in ni a; nimahsela, Krista nên a tinung ta che u a; kan bawhchhiatna zawng zawng min ngaidam ta a, thupêk, kuta ziak, min dâl ṭhîntu, zawm kan bat si chu a thai chhia a, krawsah chuan khêngbetin a tibo ta. Krawsah chuan boruaka rorêltute leh thuneitute chu hnehin, chûngte chu mipui hmuhah chiang takin a tilang ta. Chutichuan, ei leh in thu-ah emaw, kût hman thu-ah emaw, thla thar kût hman thu-ah emaw, sabat serh thu-ah emaw tu man thu neihsak che u suh se. Chûng chu thil lo la awm tûr hlimthla mai a ni, a tak chu Krista hi a ni. Taksa ngaihnêp tûr, vântirhkohte pawh biak tûr tia, inlârna danglam bîk hmua insawi, tisa tak rilru pua, engmahlova inhâmpuarho hi in chungah thu neihtîr suh u. Lû, Krista chu, an vuan tawh lo. Amahah chuan taksa pum hi tha leh ruangâma phuar khâwmin châwm a ni a, Pathian duhzâwng angin taksa pum chu a ṭhang ṭhîn a ni. Khawvêl zirtîrna dik lote chu Kristaah in thihsan tawh si chuan, engtizia nge khawvêl mi la ni fo anga, ‘tawk suh, tem suh, dek suh,’ tia mihring thil an intuk chawp leh phuah chawp hnuaia in kûn leh tâk mai? Chûngte chu hman zawha ral mai thil a ni. Hêng vântirhkoh biak tih te, taksa ngaih nêp tihte hi ṭha âwm takin a lang a; mahse, tisa châkna hneh tûrin a ṭangkai si lo. Krista hnênah kaihthawh in ni ta a; chuvângin, Pathian ding lama Krista ṭhutnaa awm, chung lam thilte chu zawng rawh u. Chung lam thilah in rilru nghat tlat ula, lei lam thilah chuan nghat suh u. In thi tawh a, in nunna chu Krista hnênah Pathianin a vawng ṭha a ni. In nunna bul, Krista chu, a lo lan hunah nangni pawh a hnênah ropui takin in lang ve ang. In khawvêl nun sual - inngaihna te, bawlhhlawhna te, hurna te, châkna sual te, duhâmna te (chu chu milem biakna a ni) hêngte hi tihlum rawh u. Chûng thil avâng chuan ring lote chungah Pathian thinur a lo thleng dâwn a ni. Hmânah chuan nangni pawh chutiang chuan in awm a, in duhzâwng ber a ni ṭhîn a. Tûnah zawng thinrim te, thinchhiat te, inhuat te bânsan ula, insawichhiat te leh zahmawh sawi te in ka aṭangin chhuak suh se. Dâwt inhrilh tawn chîng suh u, mihring hlui chu a thiltihte nên in hlîp tawh a; mihring thar chuan in inthuam tawh si a; Pathian hre chiang tûrin chu mihring thar chu a siamtu anga awm tûra siam tharin a awm mêk a ni. Chu nun tharah chuan Grik leh Juda, serh tan leh tan loh, awzia leh hnam dang mi, bawih leh bawih lo a awm theih loh, Krista chauh hi engkim a ni a, engkimah a awm a ni. Chutichuan, Pathian mi thlan, mi thianghlim leh duh takte ni âwm rêngin, thinlung taka inlainatna te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u. Indawh tawn ula, mi dang laka thu pawi in neih pawhin inngaidam tawn rawh u, Lalpan a ngaidam che u ang bawk hian ngaidam ve rawh u. Chûng zawng zawng chungah chuan hmangaihna inbel ula, chu chu engkim rem taka phuar khâwm theitu a ni. Kristaa chhuak remna chuan in thinlungah ro rêl rawh se, taksa pumkhata awm tûra koh in ni si a. Lâwm nachâng hre bawk rawh u. Krista thu chu, a hausakna zawng zawng nên nangmahniah chêng rawh se. Fakna hla te, Pathian hla te, Thlarau lam hla te nên finna tinrêngin inzirtîr ula, infuih tawn rawh u. In thinlung taka Pathian chawimawiin hlim takin zai rawh u. Krista zâra Pathian hnêna lâwmthu hril chungin in tih apiang, thu sawiah emaw, thiltihah emaw, Lalpa Isua hmingin ti vek rawh u. Nute u, in pasalte thu awih rawh u, chu chu Lalpa mite tih âwm rêng a ni si a. Pate u, in nupuite khawngaih ula, an lakah sual suh u. Naupangte u, engkimah in nu leh pate thu zâwm rawh u, chu chu Lalpa lâwmzâwng a ni si a. Pate u, in fate tithinur suh u, an beidawng dah ang e. Bawihte u, engkimah in pute thu zâwm ula, mihring tihlâwm tumtute anga an hmuh lai chauhva thawk lovin, thinlung taka Lalpa ṭih chungin an hmuh lohvah pawh thawk rawh u. In tih apiangah mihring rawngbâwl ang ni lovin, Lalpa rawngbâwl ang zâwkin tih tak zetin ti ang che u. Lâwmman atân ro luah tûr Lalpa hnên aṭangin in hmu dâwn tih hre reng rawh u. Lalpa Krista rawng in bâwl a ni e. Thil dik lo titute chuan thil dik lo an tih man an hmu ang, Pathian chuan tu mah a thlei bîk si lo. Hotute u, nangni pawhin vânah Hotu in nei tih hriain, in bawihte chungah dik tak leh ṭha takin engkim ti rawh u. Ṭawngṭai fan fan ula, in ṭawngṭainaah lâwmthu hril chungin ngaihven rawh u. Keini pawh min ṭawngṭaisak rawh u, Pathianin a thu hrilna kawng min hawnsak nân te, ka lung in tân chhan, Krista thu ril puan hi ka chhunzawm theih nân te, ka sawi tûr ang taka ka sawi theih nân te mi ṭawngṭaisak bawk rawh u. Ring lote lakah fing takin awm ula, in hun chu hmang ṭha rawh u. Eng lai pawhin ṭha tak leh hawihhâwm takin ṭawng ṭhîn ula; tichuan, mi tin engtia chhân tûr nge in hre thei dâwn nia. Lalpaa ka bawihpui, rawngbâwltu rinawm tak, kan unau duh tak Tukika hian ka chanchin zawng zawng a rawn hrilh ang che u. Kan chanchin in hriata, rilru hlim taka in awm theih nân ka rawn tîr a ni. Ama rual hian nangmahni mi, unau duh tak Onesima, ringtu nghet tak hi ka rawn tîr ve a. Hêng lam chanchin hi an rawn hrilh vek ang che u. Kan tânpui Aristarka hian chibai a bûk a che u. Marka, Barnaba tupa pawh hian chibai a bûk a che u (Ani hi in hnêna a lo kal hun chuan lo lâwm tûrin ka hrilh tawh che u kha). Isua, Justa an tih hian chibai a bûk a che u. Juda Kristiante zîngah chuan anni pathum chauh hi Pathian ram tâna min thawhpuitu an ni a, min tithlamuang hle a ni. Epafra, nangmahni mi, Krista Isua bawih hian chibai a bûk a che u. A ṭawngṭai apiangin nghet taka in dina, in lo puitlina, Pathian duhzâwng anga ringtu tak in nih theih nân ṭhahnemngai takin a dîlsak ṭhîn che u a ni. Nangniho tân te, Laodikei khuaa mite leh Hierapolis khuaa mite tân ani hian a thawk nasa êm êm tih kei pawhin ka hria a ni. Luka, daktor duh tak leh Dema hian chibai an bûk a che u. Laodikei khuaa unau awmte leh Numfii leh a ina kohhran inkhâwm kha chibai min bûksak ang che u. Ka lehkha hi in zînga in chhiar zawhah Laodikei kohhran chhiartîr ve ula, chutiang bawkin Laodikei kohhran lehkha pawh kha lo chhiar ve ang che u. Tin, Arkipa hnênah khân, “Rawngbâwl hna Lalpa hnên ata i dawn kha hlen tûrin fîmkhur rawh,” ti ang che u. Kei Paulan hei hi keima kut ngeia chibai ka bûkna che u a nih hi, ka kawl bunte hi hre reng rawh u. Khawngaihna in hnênah awm rawh se. Paula, Silvana leh Timothea chuan, Thesalonika khuaa Pa Pathian leh Lalpa Isua Krista kohhran chibai kan bûk e. Khawngaihna leh remna in hnênah awm rawh se. Nangniho avâng hian Pathian hnênah lâwmthu kan hril ṭhîn; kan ṭawngṭainaah te chuan bâng lovin in hming kan lam a. Rinna avânga ṭan in lâk dân te, hmangaihna avânga in thawhrimzia te, kan Lalpa Isuaa beiseina in nghah nghehzia te hi kan Pa Pathian hmaah kan hre reng ṭhîn a ni. Unaute u, Pathianin a hmangaih che u a, ama tân a thlang chhuak che u tih kan hria. Chanchin Ṭha in hnêna kan rawn thlen lai khân thu mai mai ni lovin, thiltihtheihna nên, Thlarau Thianghlim nên ring tlat chungin kan rawn sawi a nih kha; in zîngah eng angin nge in tân kan awm tih pawh in hria. Kan awm dân leh Lalpa awm dân latute in lo ni ta a, hrehawm tam tak tuar chungin, Thlarau Thianghlima lâwmna nên thu chu in pawm ta a. Chutichuan, Makedonia leh Akaia rama ringtu zawng zawng tân entawn in ni a, Makedonia leh Akaia ramah Lalpa thu tûnah nangmahni aṭangin a darh mai ni lovin, hmun tinah Pathian in rin thu a thang ta a; chuvângin, keinin eng mah kan sawi a ṭûl ta lo. Kan rawn tlawh che u ṭuma min lo lawm dân te, milem kalsana Pathian nung leh dik tak rawngbâwl tûra Pathian lam in lo hawi tâk thu te, A Fapa Isua, mitthi zîng ata a kaihthawh, thinur lo thleng tûr laka min chhan chhuaktu chu, vân aṭanga a lo kal nghâka in awm thu te an sawi huai huai a ni. Unaute u, in hnêna kan lo kal kha a thlâwn lo tih nangmahni ngeiin in hria e. In hriat angin Filipi khuaah khân zahthlâk taka sawisak tuar mah ila, dodâlna tam tak kârah in hnêna Chanchin Ṭha hril tûrin kan Pathianin min tihuai ta hlauh zâwk a nih kha. Kan thu hrilh che u hi thu dik lo emaw, thu bawlhhlawh emaw, bumna thu emaw a ni lo va. Chanchin Ṭha kawltîr tlâka Pathianin min ruat ang ngeiin, mihring tilâwm tûr ni lovin, kan thinlung fiahtu Pathian tilâwm tûr zâwkin thu kan hril thîn a ni. Eng lai mahin mi kan fak der ngai lo va, duhâm khuh nân thu kan sawi ngai hek lo tih in hria, Pathian pawhin a hria. Mi min fak kan phût lo va, nangnin emaw, mi dangin emaw min fak kan ngiat hek lo. Krista tirhkoh kan nih avângin in tân hautak zet ni thei mah ila, nuin a fate a duat angin kan duat zâwk che u kha. Chuti taka kan ngainat che ua, kan hmangaih êm êm che u avângin, Pathian Chanchin Ṭha chauh ni lovin, keimahni nun lam pawh pêk hial che u kan peih kha. Unaute u, kan thawh hahzia leh rimzia kha in hria e, in zîngah tu mah kan tihhautak lohna tûrin a chhûn a zâna hna rim taka thawk chungin Chanchin Ṭha kan hrilh ṭhin che u kha. Thianghlim leh fel leh demawm lo takin ringtute lakah kan awm ṭhîn tih hretute nangni in ni a, Pathian pawhin min hriatpui a ni. Pain a fate chunga a tih angin in zaa chungah kan ti ṭhîn tih in hria. A ram leh a ropuina chang ve tûra kotu che u Pathian mi ni tlâka awm tûrin kan ngênin kan fuihin kan hriattîr ṭhîn che u a nih kha. Hemi avâng hian bâng lovin Pathian hnênah lâwmthu kan sawi bawk ṭhîn, kan thu rawn hril in pawm lai khân, mihring thu anga pawm lovin, Pathian thutak pawma in pawm zâwk avâng khân. Pathian thu ngei a ni rêng a, nangni ringtuteah pawh a thawk bawk a ni. Unaute u, nangni pawh Judai rama Pathian kohhranho Krista Isuaa awmte ang in ni, annin Juda-te laka an tuar angin nangni pawhin in mite lakah in tuar kha. Chûng Juda-te chuan Lalpa Isua leh zâwlneite an that a, keini pawh min tiduhdah a, Pathian an tilâwm lo va, mi dang pawh dodâl loh an nei lo. Jentail-te chhandam an nih vena tûra Chanchin Ṭha an hnêna kan hrilh min khap a, an sual vâwrtâwp an thleng a, Pathian thinurna an chungah a lo thleng ta nge nge a ni. Unaute u, thinlung lamah ni lovin, taksa lamah hun eng emaw chhûng kan inṭhen rih a; chuvângin, in hmêl hmuh leh kan châk takmeuh a, hmuh tum che uin kan bei nasa a ni. Rawn tlawh che u kan tum ṭhîn a, kei Paula ngei pawh hian vawi hnih vawi thum ka tum tawh a; mahse, Setanan min dâl ṭhîn a ni. Kan Lalpa Isua lo kal leh hunah, a hmaa hmuh kan beisei tûr, kan hlimna tûr, chawimawina chhuanawm kan khum tûr chu nangni lo tu dang nge ni ang? Nangni hi kan ropuina tûr leh kan hlimna tûr chu in ni asin. In chanchin hre lova awm kan theih tâk loh avângin keini chauh hi Atheni khuaah awm hnufual ila ṭha kan ti a; tichuan, kan unaupa Timothea, Krista Chanchin Ṭha hrila Pathian rawng kan bâwlpui hi in rinna tinghet tûr leh, hêng tihduhdahnate avânga in zînga mi tu mah in nghîn loh nân fuih tûr che u-in kan rawn tîr a ni. Nangni pawhin hêng hi kan tuar ngei tûr a ni tih in hriat kha. In hnêna kan awm lai khân tihduhdahna kan tuar dâwn tih kan hrilh lâwk che u kha, chutiang ngei chuan a lo thleng ta tih in hria e. Rinnaa in ngheh zêl leh zêl loh hre lova awm reng kan theih loh avângin Timothea kha kan rawn tîr a ni; thlêmtuin thlêm thlu che u-in, kan hna thawh a thlâwn mai dah ang e tih hlauva rawn tîr kan ni. Timothea chu in hnên ata a lo thleng leh ta a, chanchin lâwmawm tak, in rin nghehzia te, hmangaihna in ngahzia te, keinin hmuh che u kan châk êm êm ang bawka min hmuh in châk ve thu te, eng lai pawhin min hre reng a ni tih te min rawn hrilh a. Chuvâng chuan, unaute u, in rinna a ngheh avângin kan manganna leh kan hrehawmna zawng zawngah thlamuang takin kan awm thei ta a ni. Lalpaa in ngheh zêl avâng hian tûnah chuan kan tân dam man a awm ta e. Nangmahni zâra Pathian hmaa kan hlimna zawng zawng avâng hian a hnênah lâwmthu hrilh kan va ba nasa êm! In hmêl kan hmuh theihna tûr leh rinna lama in tlâkchham kan phuhrûksak theihna tûr che uin Pathian hnênah chhûn leh zân ṭhahnemngai takin kan dîl ṭhîn a ni. Kan Pa Pathian ngei leh kan Lalpa Isua chuan in hnêna kan lo kalna tûr kawng min siamsak rawh se. Kan hmangaih che u ang taka nasaa in inhmangaih theih nân leh mi zawng zawng in hmangaih theih nân, in hmangaihna chu Lalpan tiṭhangin tihpunsak che u rawh se. Tichuan, kan Lalpa Isua chuan, a mi thianghlim zawng zawng nên a lo kal hunah, Pathian kan Pa hmaah chuan thianghlim leh sawisêlbova awm thei tûrin in thinlung tinghet rawh se. A tâwp berah chuan unaute u, Pathian tilâwm zâwnga nun dân kan hnên aṭanga in dawn ang khân in awm a, chutianga awm zêl tûrin Lalpa Isua hmingin kan ngên che u a, kan fuih bawk a che u. Lalpa Isua thuneihna hmangin eng thu nge kan pêk che u in hria e. Hei hi Pathian duhzâwng chu a ni - in thianghlim hi; inngaih bânsan rawh u. In zînga mi tu pawhin mahni taksa vawng thiamin, thianghlim leh chawimawi tlâkin vawng ṭheuh ula. Pathian hre lo Jentail-te angin tisa châknaah tlu lût suh u. He thilah hian tu man a unau bumin a lakah thil ṭha lo ti suh se; chutiang titute chungah chuan Lalpan phuba a la ang tih kan hrilhin kan hriattîr tawh che u kha. Pathian chuan bawlhhlawh taka nung tûr ni lovin, thianghlim taka nung tûrin min ko zâwk a ni. Chuvângin, he thu pawisa lo chuan mihring a pawisa lo a ni lo va, Thlarau Thianghlim petu che u Pathian chu a pawisa lo a ni zâwk e. Unaute inhmangaihna thu chu in tân ziak a ngai lo ve, Pathianin nangmahni ngei inhmangaih tawn a zirtîr si che u a. Chutiangin, Makedonia rama unau zawng zawng chungah pawh in tih ṭhin kha. Unaute u, chu hmangaihna chu ngah lehzual tûrin kan ngên a che u. Kan hrilh tawh che u ang khân, ngawi renga in kuta mahni hna thawh uar rawh u. Chutichuan, pâwn lam mite hmuhah mawi takin in khawsa thei ang a, eng mah tlâkchham in nei lo vang. Unaute u, beiseina rêng nei lo mi dangte anga in lungngaih loh nân muhîlte chanchin in hriat loh kan duh lo ve. Isua a thi a, a tho leh tih kan ring si a, chutiang bawk chuan Isuaa muhîl tawhte pawh Pathianin ama rualin a rawn hruai ve ang. Lalpa thuin hei hi kan hrilh a che u: Keini Lalpa lo kal thlenga nungdama lo la awm rengte hian muhîl tawhte chu kan lehkhalh tawp lo vang. Lalpa ngei chu thu pe au âw nên, vântirhkoh ropui ber aw nên, Pathian tawtawrâwt ri nên vân aṭangin a lo chhuk ang a, Kristaa thi tawhte chu an tho hmasa ang. Chumi hnuah chuan keini nungdama la awm rengte hi, boruakah Lalpa hmuak tûrin, anmahni rualin chhûm zîngahte khian lâk chhohvin kan awm ang a, Lalpa hnênah kan awm kumkhua tawh ang. Tichuan, hêng thute hian lo inthlamuan tawn ṭhîn rawh u. Amaherawhchu, unaute u, a hun leh a ni thute ziaksak in ngai lo ve. Lalpa Nî chu zâna rûkru lo kal angin a lo thleng dâwn tih nangmahni ngeiin chiang takin in hre si a. “A him e, a muanawm e,” an tih laiin hmeichhe nau vei angin chhiatna an chungah a lo thleng thut ang a, an pumpelh tawp lo vang. Unaute u, nangni erawh chu thimah in awm loh avângin chumi ni chuan rûkru angin a nang lo vang che u. In vaiin êng fate leh ni fate in ni vek si a. Zâna mi kan ni lo va, thima mi kan ni hek lo. Chuvângin, mi dangte angin i muhîl suh ang u khai, mengin i ngaihven zâwk ang u. Muhîlte chu zânah an muhîl ṭhîn a, zu ruite pawh zânah a ni an ruih ṭhin. Keini zawng chhûna mi kan nih avâng hian, rinna leh hmangaihna âwmphaw chu ha-in, chhandam beiseina chu lukhuma hmangin, harhfîm takin i awm zâwk ang u. Pathianin thinurna tuar tûr ni lovin, kan Lalpa Isua Krista zâra chhandam ni tûrin min ruat zâwk a ni. Kan dam emaw, kan thi emaw, amah nên kan nun tlân theih nân ani chu kan tân a thi si a. Chuvângin, inthlamuan tawnin, intichak tawn rawh u, in tih fo ṭhin ang hian. Unaute u, in tân rim taka thawktu, Lalpaa nangmahni enkawltute leh zilhtute chu hre reng tûrin kan ngên a che u. Anni chu an hna thawh avânga ngaisâng êm êmin hmangaih ula, inngeih dial dial rawh u. Tin, unaute u, ka ngên a che u, mi dâwngdahte zilh ula, mi beidawngte chu thlamuan ula, mi chak lote ṭanpui ula, mi zawng zawng dawhthei rawh u. Tu sual mah suala thungrûl lo tûrin fîmkhur ula, eng lai pawha thil ṭha intihsak tawn zâwkin mi zawng zawng chungah thil ṭha ti zêl rawh u. Lâwm fo ula, bâng lovin ṭawngṭai ula, engkimah lâwmthu hril fo rawh u. Hei hi Krista Isuaah chuan Pathianin in tih a duh chu a ni. Thlarau chu timit suh u. Thuhrilte pawh hmusit suh u. A enga pawh chu fiah hmasa ula, a ṭha chu pawm tlat ula, a ṭha lo apiang tlânsan rawh u. Remna Pathian ngei chuan in pumin tithianghlim che u sela, kan Lalpa Isua Krista lo kal hunah chuan in thlarau leh in rilru leh in taksa a puma sawisêlbovin awmtîr rawh se. A kotu che u chu a rinawm a, tih pawh a ti ngei ang. Unaute u, min ṭawngṭaisak rawh u. Unau zawng zawng kha kut vuanin chibai mi bûksak ṭheuh rawh u. He lehkha hi unau zawng zawng hriata chhiar tûrin Lalpa hmingin ka ngên a che u. Kan Lalpa Isua Krista khawngaihna chu in hnênah awm rawh se. Paula, Silvana leh Timothea chuan Thesalonika khuaa Pathian kan Pa leh kan Lalpa Isua Krista kohhran chibai kan bûk e. Pa Pathian leh Lalpa Isua Krista hnên ata khawngaihna leh remna in hnênah awm rawh se. Unaute u, nangmahni avângin Pathian hnênah lâwmthu hril fo tûr kan ni a, chu chu kan tih âwm rêng a ni. Rinnaah in ṭhang chak êm êm a, in zaa in inhmangaih tawnna pawh a thûk tial tial bawk a. Tihduhdahna leh hrehawm tinrêng chhel taka in tuara, rinnaa in nghehzia leh in chhelzia te hi kohhranhote zîngah kan chhuang ṭhîn a ni. Pathian ram avânga tuar in ni a, chuta lût tlâk in nih theih nân Pathian rorêl dikzia tihlanna in nih hi. Pathian chuan dik takin thil a ti ṭhîn a, tihrehawmtu che u chu hrehawmnain a thungrûl ve ang. Lalpa Isua chu vân aṭanga ama vântirhkoh thiltithei takte nên meialh zînga a lo lan hunah, nangni hrehawm tuarte hi a rawn chawlhtîr ang che u, keini pawh min chawlhtîr ang. Pathian hre lote leh kan Lalpa Isua Krista Chanchin Ṭha ring duh lote chungah phuba a la ang. Chûngte chu Lalpa hma ata leh a thiltihtheihna ropui tak lak ata kumkhaw chhiatnaah chuan paih an ni ang a. A mi thianghlim, amah ringtute hnên aṭanga ropuina leh chawimawina dawng tûra a lo kal nî chuan hrem an ni ang. In hnêna kan thu hril in lo rin avângin nangni erawh chu chûng ringtute zîngah chuan in tel ve ang. Hemi avâng hian Pathianin a kohna che u phua in awm theihna tûr leh, ṭhat in duhna zawng zawng leh rinna avânga in thiltihte chu, a chaknaa a tihfamkimsak theihna tûr che uin, bâng lovin kan ṭawngṭaisak ṭhîn che u a ni. Tichuan, kan Pathian leh Lalpa Isua Krista khawngaihna zârah, kan Lalpa Isua hming chu in zîngah chawimawi a ni ang a, nangni pawh ama zârah chawimawi in ni ang. Unaute u, kan Lalpa Isua Krista lo kal lehna leh a hnêna kan inkhâwmna tûr thu-ah chuan: Thlarauva sawi emaw, thu hril emaw, kan lehkha ni âwm emaw ṭanchhana “Lalpa Nî chu a thleng reng tawh,” tih thu thang avânga in rilru tinghîng leh tibuai lo tûrin ka ngên a che u. Tu man eng kawng mahin hruai bo che u suh se. Pathian laka helna chu a lo thlena, Dânbawhchhepa, Boraltûra chu a lo lan zet hma chuan chu Nî chu a lo thleng dâwn si lo va. Ani chuan miten pathiana an neih, an biak apiangte chu dovin an aia ropuiah a indah ang a, Pathian Tempul meuhva ṭhuin Pathianah a inchhâl ang. In hnêna kan awm lai khân chûng thu chu kan hrilh ṭhin che u kha in hre reng lâwm ni? A hun taka a lo lan theihna tûrin tûnah engin nge dâl rih in hria e. Dân bawhchhiatna chuan tûnah pawh a rûkin a thawk mêk a ni; nimahsela, a dâltu chu lâk bo a nih hma chuan a lo lang mai lo vang. Chutih hunah chuan Dânbawhchhepa chu a lo lang ang a; mahse, ani chu Lalpa Isuan a rawn tihlum ang a, a lo kal lehna ropui takah chuan a rawn tiboral ang. Dânbawhchhepa chu Setana chakna nên a lo kal ang a, thiltihtheihna tinrêngin thil mak leh chhinchhiahna lem a ti ang. Chûng boral tûrte chu dik lo takin kawng tinrênga bum an ni ang a, anmahni chhandam thei tûr Chanchin Ṭha thutak chu an lawm loh avângin. Chuvângin, dâwt an rin theihna tûrin Pathianin an zîngah bumna hri a lêntîr a. Thutak ring lova dik lohna lâwm zâwkte zawng zawngin thiam loh an chang vek dâwn a ni. Unau, Lalpa duh takte u, nangmahni avângin Pathian hnênah lâwmthu hril fo tûr rêng kan ni; Thlarauva tihthianghlimin, thutak ring tûr leh rah hmasa atân chhandam tûrin Pathianin a thlang che u a ni. Chumi atân chuan kan Lalpa Isua Krista ropuina chang ve tûrin kan Chanchin Ṭha hril hmangin a ko che u a ni. Tichuan, unaute u, ding nghet ula, kan thuhrilah leh lehkhathawna kan zirtîr ṭhin kan thu hlan chhâwn che u kha pawm tlat rawh u. Tichuan, kan Lalpa Isua Krista ngei leh Pathian kan Pa, min hmangaihtu, a khawngaihna avânga kumkhaw thlamuanna leh beiseina ṭha min petu chuan, in rilru thlamuan sela, thil ṭha tinrêng in tih leh in sawiah tichak zêl che u rawh se. A tâwp berah chuan, unaute u, min ṭawngṭaisak rawh u. Lalpa thu chu in zîngah ropui tak leh chak taka a darh ang khân a darh zêl theihna tûr leh, mi dik lo leh mi sualte laka kan him theihna tûrin. Mi zawng zawngin an la ring si lo. Lalpa erawh chu a rinawm a, ani chuan a tichak che uin mi sual lakah chuan a vêng him ang che u. Thu kan pêk che u angin in ti a, in tih zêl pawh Lalpaah chuan kan ring tlat a ni. Lalpa chuan in thinlungte chu Pathian hmangaihna hre lehzual tûr leh Krista anga dawhtheihna nei tûrin kaihruai rawh se. Unaute u, kan hnên aṭanga zirtîrna an dawn anga awm lo unau, dâwngdah taka awm zawng zawng laka inthiarfihlîm tûrin kan Lalpa Isua Krista hmingin thu kan pe a che u. Nangmahni ngeiin kan tih dân zir tûr in nih in hria a, in zîngah dâwngdah takin kan awm ngai loh kha. Tu chaw mah a thlâwnin kan ei ngai lo va, in zînga mi tu mah kan tihhautak lohna tûr che uin chhûn leh zân hah tak leh rim takin hna kan thawk ṭhîn a nih kha. In mi châwm kan phût theih loh vâng a ni lo va, in mi entawn atân tiin kan thawk zâwk ṭhîn a ni. In hnêna kan awm lai khân, “Hna thawk peih lo tawh phawt chuan ei pawh ei suh se,” tiin kan hrilh ṭhin che u kha. In zînga ṭhenkhat an dâwngdah a, mahni hna thawk si lovin mi hnaa inrawlh an chîng tih kan lo hria a ni. Chutiang mite chu thawk mawlh mawlha mahni thawh chhuah ring tûrin Lalpa Isua Krista hminga thu pein kan fuih a ni. Unaute u, nangni zawngin thil ṭha tih ning suh u. Tu pawhin he lehkhathawna kan thu sawi hi an zawm duh loh chuan chhinchhiah bîk ula, kawm serh rawh u, an zah theihna tûrin. Amaherawhchu, hmêlma ang chuan ngai lo ula, unau angin zilh zâwk rawh u. Remna Lalpa ngei chuan kumkhuain kawng tinrêngah remna pe che u sela, Lalpa chu in zaa hnênah awm rawh se. Kei Paulan keima kut ngeia chibai ka bûkna che u a nih hi. Hetianga ka ziak hi ka lehkhathawn apiang chhinchhiahna a ni. Kan Lalpa Isua Krista khawngaihna in zaa hnênah awm rawh se. Kei Paula, min chhandamtu Pathian leh kan beisei innghahna Krista Isua thupêk anga Krista Isua tirhkoh hian, rinnaa ka fa tak tak Timothe, chibai ka bûk a che. Pa Pathian leh Krista Isua kan Lalpa hnên ata khawngaihna te, zahngaihna te, remna te i hnênah awm rawh se. Makedonia rama ka kal dâwn laia ka ngen ang che khân Efesi khuaa awm zêl tûrin ka ngên leh a che. Mi ṭhenkhat thurin dik lo zirtîr ṭhînte kha khap la, khâng thawnthu leh thlahtute chhui vak vak kha bântîr rawh, inhnialna a titam mai mai a, rinna vânga hriat ṭhin, Pathian thiltum chu mi a hriat fiahtîr chuang si lo. Thinlung thianghlim, chhia leh ṭha hriatna thiang leh rinna dik tak aṭanga chhuak hmangaihna chu a lo pun zâwk theih nân he thu hi ka pe che a ni. Ṭhenkhat chuan chu chu an pênsan a, inhnialna sâwt lo lamah an lût ta a. Dân zirtîrtu berah an inngai a, an thu sawi awmzia leh ngam taka an thil sawi ṭhinte chu an hre tak tak si lo. Dân hi a hmanna tûr taka hman a nih chuan a ṭha tih kan hria, mi ṭhate chunga lek tûr a ni lo tih hriat tûr a ni: Dân pawisa lo te leh luhlul te, sakhaw ngaihsak lo leh mi sual te, serh leh sâng nei lo leh bawlhhlawh te, nu leh pa thattu te leh tual that te, inngaih chîng te leh mawngkawhur te, mihring rûk chîng te leh dawthei te, dâwta chhechham chîng te leh, fak tlâk Pathianin puan tûra mi kawltîr Chanchin Ṭha ropui kalha zirtîr chîng te chunga lek tûr a ni. Mi tichaktu, rin tlâka mi ngaia he hna atâna mi ruattu Krista Isua, kan Lalpa chu lâwmthu ka hrilh a ni; tûn hma khân a sawichhetu, tiduhdahtu leh hmusittu lo ni mah ila, ringtu ka la ni lo va; hre lova ti ṭhîn ka nih avângin ka chungah zah a ngai êm êm ṭhîn a, kan Lalpa khawngaihna chuan Krista Isuaa rinna leh hmangaihnain mi vûr khat ta zâwk a. Krista Isua chu mi sualte chhandam tûrin khawvêlah a lo kal tih hi a dikin a va pawm tlâk êm! Kei hi an zînga sual ber ka ni. Mahse, hemi avâng hian khawngaihna ka dawng, Krista Isua chuan ka chunga a dawhtheihzia a tilang hmasa hi, tûn hnu pawha amah ringtu apiangin, chatuan nun an nei thei dâwn tih entîrna a lo ni. Lalber, chatuan mi, thi thei lo, mita hmuh theih loh, Pathian tak chauh hnênah chuan chawimawina leh ropuina chatuanin awm rawh se. Amen. Ka fapa Timothe, hêng thupêk hi ka kawltîr a che; zâwlneiten i chungchâng an sawi lâwk kha hre reng la, chûng thu chu hmangin indona ṭha chu bei rawh; rinna leh chhia leh ṭha hriatna thiang vawng tlat ang che; mi ṭhenkhatten an chhia leh ṭha hriatna an hnâwl a, an rinna chu a keh chhe zo ta. Chûng mite zîngah chuan Humenaia leh Aleksandara pawh an tel a, Pathian pawi sawi an sim nân thunun an ngai a, Setana ka pe ta a ni. Ka chah duh hmasak ber che chu thil dîlna te, ṭawngṭaina te, dîlsakna te, lâwmthu hrilhna te mi zawng zawng tân hlân ula, Pathian ngaihsak leh zahawma awmin thlamuang taka kan khawsak ho dial dial theih nân lalber leh thuneitu zawng zawng pawh dîlsak rawh u; chu chu min chhandamtu Pathian hmuhin a ṭha a, a lâwmzâwng a ni. Ani chuan mi zawng zawng chhandama awmah leh thutak hria atân a duh si a. Pathian pakhat chauh a awm a, Pathian leh mihring inkârah palai pakhat chauh a awm bawk, mihring Krista Isua chu. Mi zawng zawng tlan nân ani chu a inpe a, chhandamna thu chu hun a tih takah a rawn puang ta. Kei hi, Jentail-te hnêna chu rinna thu chu puang tûr leh thutak zirtîrtu leh tirhkoh atân ruat ka ni; he ka thu sawi hi thutak a ni a, dâwt a ni lo ve. Tichuan, in inkhâwmna apiangah mipaho chuan tihtakzetin, thinur chung leh ringhlel chunga ti lovin kut thianghlim pharin ṭawngṭai rawh se. Hmeichhia pawh a mawi tâwk leh inchawih tâwkin inchei sela, sam chei lêrh te, rangkachaka inchei te, tuikeplung ṭhi awrh te, puan man tam inbel te chîng suh se. Pathian ngaihsak hmeichhiate tih âwm rêng, thil tih ṭhatein inthuam zâwk rawh se. Hmeichhiate chuan ngawi rengin, thu awih takin thil an zir tûr a ni. Hmeichhiain an zirtîr te, mipa chunga thu an neih te ka phal lo, ngawih an chuh tûr a ni. Adama chu Evi ai chuan siam hmasak a ni a, buma awm kha Adama a ni lo va, hmeichhia kha a ni buma awm leh bawhchhetu chu. Amaherawhchu, rinnaah te, hmangaihnaah te, thianghlimnaah te, mawi taka an awm reng phawt chuan fa hrin avângin chhandam an ni ang. Tu pawh kohhran hotu hnathawh duh chuan hna ṭha thawh a duh a ni tih hi a dik a ni. Tichuan, kohhran hotu ni tûr chu sawisêlbo, nupui pakhat nei, insûm thei, rilru fîm, mi zahawm, mi inphal leh zirtîr thiam a ni tûr a ni. Zu in chîng lo, kut thlâk mai chîng lo, mi nunnêm, inrem duh mi leh tangka sum ngaina lo mi a ni tûr a ni; zahawm taka chhûngkaw khawsak rêla, fate kîlkawi thiam mi a ni bawk tûr a ni; mahni chhûngkaw rêl fel thiam si lo chuan engtin nge Pathian kohhran a enkawl theih ang? Ring thar mi ni suh se, chuti lo chu a chapo vang a, Diabola angin thiam loh a chang ve dah ang e. Pâwn lam mite ngaihsân a ni bawk tûr a ni; tichuan, hmingchhiat hlawhin Diabola thangah a âwk dâwn lo nia. Chutiang bawkin kohhran rawngbâwltute pawh mi zahawm, mi rilru nghet an ni tûr a ni, zu heh leh bawlhhlawh taka hlêp duh mi an ni tûr a ni lo; chhia leh ṭha hriatna thianga rinna thu ril chelh tlat mi an ni tûr a ni. En fiah hmasak phawt tûr an ni a, mi tling tâwk an nih chuan rawng an bâwl chauh tûr a ni. Hmeichhiate pawh chutiang bawkin mi zahawm, mi rêl chîng lo, insûm thei, kawng engkima mi rinawm an ni tûr a ni. Rawngbâwltute chu nupui pakhat nei, fate leh chhûngkaw enkawl thiam mi an ni tûr a ni. Rawng bâwl ṭhate chu an chan a ṭha tial tial ang a, Krista Isua rinnaah pawh an huai telh telh ang. He lehkha ka ziak lai hian lo kala hmuh thuai che ka inbeisei reng a; mahse, ka lo tlai palh tâkin Pathian chhûngkua, Pathian nung kohhran, thutak kengkawhtute chu eng anga awm tûr nge an nih i hriat theih nân ka han ziak a nih hi. Kan sakhaw thurûk rilzia hi hnial rual a ni lo ve: Ani chu tisa puin a lo lang a, Thlarauvin a dikzia a tilang a, Vântirhkohte pawhin an hmu a, hnam tin zîngah puan darh a ni a, khawvêl puma miin an ring a, Ropui taka lâk chhoh a ni ta. Hun hnuhnûngah chuan miten rinna thu hi an la hawisan ang a, thlarau dik lo hruai bovin, ramhuai laka chhuak zirtîrna dik lo chu an la awih zâwk dâwn tih thlarauvin chiang takin a sawi. Chûng thu theh darhtute chu chhia leh ṭha hriatna del, thîr linga deh châr ang, mi dawthei an ni. Inneih te leh thil ṭhenkhat ei te an khap a. Thutak hre tawh ringtute erawh chuan lâwmthu sawi chunga ei atân Pathian siam a ni tih an hria. Pathian thil siam tinrêngte hi a ṭha a, eng mah duh loh tûr a ni lo; lâwmthu sawi chunga dawn mai tûr a ni, Pathian thu leh ṭawngṭainaa hlan thianghlim vek a ni tawh si a. Hêng kaihhruainate hi unaute hrilh la, Krista Isua rawngbâwltu ṭha in ni dâwn nia; rinna thu leh zirtîrna ṭha i zawm ṭhin khân thlarau lamah a ṭhan lentîr zêl bawk ang che. Thawnthu dukdak lo mai mai chu hawisan la, thlarau lam thilah insawizawi rawh. Taksaa insawizawi hi a sâwt ngawt mai, thlarau lama insawizawina erawh chu kawng engkimah a ṭangkai a, tûn dam chhûng leh nakin hun atân a sâwt êm êm a ni. He thu hi a dik a, pawm tlâk a ni. Pathian nung chu kan beisei innghahna a nih tâk avângin kan thawk rim a, kan bei nasa a ni. Ani chu mi zawng zawng tân chhandamtu a ni a, ringtute tân a ni ber nghe nghe. Hêng thu hi pe la, zirtîr zui zêl rawh. I naupan avâng maiin tu man ngainêp che suh se, thu sawiah te, chêtziaah te, hmangaihnaah te, rinnaah te, thianghlimnaah te ringtute entawn tlâkin awm ang che. Ka lo kal hma chu vântlâng zînga Pathian thu chhiar te, thu hril te, zirtîr te lo uar rawh. Upahovin i chunga kut an nghah laia zâwlneite sawi anga thlarau lam thilpêk i dawnte kha thlahthlam suh. Hmang zui zêl la, tuina berah neih la; tichuan, mi tinin i ṭhan zêlzia an hmu dâwn nia. I thil tih leh i zirtîrah fîmkhur hle la, hêng hi ti zêl la, nangmah leh i thu ngaithlatute i chhandam dâwn nia. Upa zâwkte chu hau suh la, mahni pa anga enin a ngenin ngên zâwk ang che; naupang zâwkte chu nau angin en la, Pitarte chu nu angin en la, nulate chu thianghlim takin farnu angin en ang che. Mahni chauhva awm hmeithaite chu zah la; tu leh fa nei hmeithaite chu, an tu leh fate chuan Pathianin chhûngkaw mawhphurhna a pêk chu hlen chhuah zir phawt sela, anmahni châwm liantu chu châwm ve thung rawh se, chu chu Pathian lâwm zâwng a ni. Châwmtu nei lo, mahni chauhva hmeithai chuan, Pathian chauh rinchhan tûr a nei a, ṭanpuina dîlin a chhûn a zân a ṭawngṭai ṭhîn. Hmeithai leplêrh tak erawh chu, a dam lai pawhin mitthi mai a ni. Hêng kaihhruainate hi hrilh la, sawisêlbovin awm rawh se. Mahni chhûngte, in khata awmpui ngei châwm duh lo an awm chuan, rinna hi an phatsan ta tihna a ni, ringlo mi aiin an sual zâwk. Hmeithai la nula deuhte chu telh suh, an châkna avângin Krista hawisana pasal neih an duh leh si ṭhîn a, an thu lo tiam tawh an bawhchhiat avângin sawisêl an kai ṭhîn. Chu lovah pawh, mi ina an lên kualna lamah dâwngdah an zir a, dâwngdah mai pawh ni lovin mi rêl an chîng a, thu veivir an hrât a, an sawi loh tûr tûr an sawi ṭhîn. Chuvângin, hmeithai la nula deuhte chuan pasal nei leh se ka ti a ni, fate neiin chhûngkua enkawl sela, hmêlmaten min sawichhiatna tûr rêng an nei dâwn lo nia. Ṭhenkhat chu Setana zuiin an pêng sual tawh a ni. Ringtu hmeichhiain, an chhûngkaw zîngah hmeithai nei se a châwm tûr a ni; mahnia hmeithaite chauh kohhranin an enkawl theih nân kohhran chu phurrit siamsak suh se. Kohhran upa, mi hruai thiam, thu hril leh zirtîr lama taima bîkte chu a leh hniha chawimawi tlâk an ni. Lehkha Thu-in, “Bâwngpain buh a chîl laiin a hmui phuar suh; hna thawktu chu hlawh hmu tlâk a ni,” a ti a. Upa an hêkna chu thuhretu pahnih emaw, pathum emaw tal an awm loh chuan pawm suh. Thil tisual ngeite chu vântlâng hmaah zilh rawh, mi dang pawhin an hlauh theih nân. Pathian leh Krista Isua leh a vântirhkoh thlante hmaah thu ka pe a che: ngaih dân nei sa lovin, hleih nei lovin hêng thu hi kengkawh ang che. Rawngbâwltu tûr nemngheh hmanhmawh lutuk suh la, mahni invawng thianghlim rawh. Tui chauh in tawh lo la, na i nei fo si a, i pum nawm nân uain tlêm in ṭhîn ang che. Mi ṭhenkhat sualna chu a langsâr a, thiam loh chantîr nghâl theih a ni; ṭhenkhat sualna erawh chu rei fe hnuah lo chuan a lang nghâl mai lo. Chutiang bawkin thiltih ṭha chu a langsâr a, langsâr lo mah se, thup reng theih a ni chuang lo. Chhiahhlawh, bawih nghâwngkawl bâtte chuan an pute chu kawng engkimah an zah tûr a ni, chuti lo chu Pathian hming leh kan zirtîrna hi sawichhiat a ni dah ang e. Bawih, Kristian pu neite chuan rinnaa unau an nih denchhenin an pute chu an ngainêp tûr a ni lo, ṭha lehzualin rawng an bâwlsak zâwk tûr a ni; an rawngbâwlsakte nên rinna leh hmangaihnaa chhûngkhat an ni si a. Hêng hi i zirtîra, i fuihna tûr chu a ni. Tu pawh kan Lalpa Isua Krista thutak leh sakhaw zirtîrna thu dik chu kalha zirtîrna danglam zirtîr chu, mi â, intivei tak, eng mah hre si lo an ni; sawihnâwm tûr zawn thiam tak, inhnial châk hliah hliah, inîtsîkna te, innghirnghona te, Pathian pawi sawi te leh thu inchuh tâwpintai nei lo chawk chhuaktu an ni; rilru chhe tawh, thu dik man pha tawh lo, sakhua hi hausak nâna hman tumte an ni. Mahni ta-a lungawite tân chuan sakhaw mi nih hi a hlâwk êm êm rêng a ni. Khawvêlah hian eng mah kan luhpui lo va, eng mah kan chhuahpui thei dâwn bawk hek lo. Ei tûr leh silh tûr kan neih chuan kan tân a tâwk a ni. Hausak duh mite chu thlêmnaah an lût a, duhâmna âtthlâk, thang hlauhawm takah chuan an âwk a, an chhiat phah a, an boral ṭhîn a ni. Tangka sum ngainat hi sual tinrêng bul a ni, sum ngah an tumna lamah ṭhenkhat chuan rinna hi an pênsan a, lungngaih sawi sên lohvin mahni an intina ta a ni. Nang, Pathian mi, chûng chu tlânsan la, dikna te, sakhaw ngaihsakna te, rinna te, hmangaihna te, dawhtheihna te, nunnêmna te neih tum tlat zâwk rawh. Rinna hlu tak hi ṭanin theihtâwp chhuah ang che; chatuan nun chu vuan tlat la, chumi chang tûr chuan koh i ni a, hretu tam tak hmaah rinna hi i pawm thu i puan kha. Engkim nunna hnâr, Pathian leh Krista Isua, Pontia Pilata hmaa hlau hlek lova thu dik ṭan tlattu hmaah chuan, i tih tûra ruat chu rinawm taka ti tûrin thu ka pe a che. Kan Lalpa Isua Krista lo lan leh hma chu bawlhhlawh kai lo leh sawisêlbovin awm rawh. Fak tlâk Pathian, engkim chunga thu neitu awm chhun, lalberte Lalber, lalte Lal chuan a hun takah Krista chu a rawn lantîr dâwn si a. Amah chauh hi thi thei lo, hnaih theih rual loh ênga chêng, tu ma la hmuh loh leh hmuh theih loh ni bawk chu a ni, a hnênah chuan chawimawina leh thiltihtheihna chatuanin awm rawh se. Amen. Khawvêl mi hausate chu inchhuang lo tûrin hrilh la, sum rin tlâk loh rin chhan tum lova engkim kan hman atâna min petu Pathianah innghat zâwk tûrin fuih rawh. Thil ṭha ti tûr te, thil ṭha tiha hausa tûr te, phal taka mi dangte sem ve chîng tûr tein fuih bawk rawh. Tichuan, nakin atân ro hlu tak an insiamsak a ni ang a, nunna tak tak chu an chang dâwn nia. Aw Timothe, i kova innghat hi vawng fimkhur hle ang che, ‘hriatna dik’ tia an chhâl, dik si lo, thu inkalh si, khawvêl mi tam takin an khûkpui ṭhin lakah khân inthiarfihlîm rawh; ṭhenkhat chuan an zâwm ve a, rinna kawng aṭangin an bo ta a ni. Pathian khawngaihna in hnênah awm rawh se. Kei Paula, Kristaa nunna tiam puang tûra Pathian duh zâwnga Krista Isua tirhkoh hian, ka fapa duh tak Timothe, chibai ka bûk a che. Pa Pathian leh kan Lalpa Krista Isua hnên ata khawngaihna te, zahngaihna te, remna te i hnênah awm rawh se. Min thlahtute tih anga chhia leh ṭha hriatna thiang taka a rawng ka bâwl Pathian hnênah lâwmthu ka sawi a ni. A chhûn a zânin ka ṭawngṭainaah te ka hre reng ṭhîn che a, i mittuite pawh ka hre reng a, hlim êm êma inhmuh leh ka châk ngei mai. I rinna takzia pawh ka hre reng ṭhîn, i pi Loisii neih, i nu Euniki pawhin a neih bawk kha nang pawhin i nei ta zêl a ni tih ka hria. Chumi avâng chuan i chunga kut ka nghah laia Pathian thilpêk i dawn kha chhêm alh reng tûrin hrilh nawn che ka duh a ni. Pathian Thlarau kan chan hian min tidawih lo va, chakna te, hmangaihna te, mahni inthunun theihna te min pe zâwk a ni. Kan Lalpa thu hi puan zak suh, amah avânga lung in tâng pawh hi min zahpui hek suh; Pathian chakna ringin Chanchin Ṭha avânga hrehawm tuar ve huam zêl zâwk rawh. Kan thiltih avâng ni lovin, ama tum dân a nih zâwk avângin khawngaihnain min chhandam a, thianghlim taka nung tûrin min ko va ni. Krista Isuaah chuan leilung pian hma daih khân a khawngaihna chu min lo pe tawh a; mahse, tûnah hian, min chhandamtu Krista Isua a lo kal khân, chu chu tihlan a ni ta chauh a ni. Ani chuan thihna chu a hneh ta a, Chanchin Ṭhaah hian nunna leh thih theih lohna a rawn tilang ta a ni. Kei hi chumi thu puang tûra tirhkoh leh zirtîrtu atân ruat ka ni. Chuvâng chuan alâwm tûnah pawh hetianga ka tuar ni; mahse, ka zak lo ve; ka rina chu ka hria, a hnêna ka kawltîr chu, chumi Nî atân chuan a vawng him thei tih ka hre chiang a ni. Ka hnên aṭanga i hriat ṭhin zirtîrna dik kha zawm berah neih la, Krista Isuaa rinnaah leh hmangaihnaah chuan chêng tlat rawh. I kova innghat, thilpêk ropui tak kha, keimahnia chêng ṭhîn Thlarau Ṭhianghlim hmangin vawng ṭha tlat bawk rawh. Asia rama mite khân, Fugela leh Hermogena te chenin mi hawisan ta tih i hria e. Lalpa chuan Onesifora te chhûng chu khawngaihna pe rawh se; ani chuan mi tihlim êm êm a ni, lung in tâng ka nih hi mi zahpui lo va, Rom khua a lo thlen veleh mi rawn zawng chhuak vang vang a ni. Efesi khuaah pawh min puih nasatzia i hre chiang a, Lalpa chuan chumi Nî-ah chuan a khawngaihna chu dawntîr rawh se. Ka fapa, Krista khawngaihna hian tichak che rawh se. Mi tam tak hriata ka zirtîrna i ngaihthlâkte kha zirtîr chhâwng zêl thei tûr nia i mi rin tâwkte hnênah hrilh chhâwng zêl ang che. Krista sipai rinawm angin hrehawm mi tuarpui ve rawh. Sipai chu a hotu tilâwm tûrin khawvêl thil dangah a inhnamhnawih ngai lo. Intlânsiak mi pawh dân ang taka a tlân loh chuan lâwmman a hmu thei lo vang. Lo lamah pawh a thawk hahtu chuan rah hmasa a chang tûr a ni. Ka sawi hi ngaihtuah ngun la, Lalpan kawng engkimah hriatthiamna a pe ang che. Chanchin Ṭha ka hril ṭhin, Isua Krista, Davida thlaha mi, mitthi zîng ata tholeh ta-a thu kha hre reng rawh. Chu Chanchin Ṭha avâng chuan hrehawm ka tuar a, mi sual ang maia khaidiata phuar ka ni, Pathian thu erawh chu phuar rual a ni lo. Krista Isuaa awm, chhandamna chu, chatuan ropuina nên an chan theih nân thlante avângin hêng zawng zawng hi ka tuar a ni. He thu hi a dik a ni: A thihna kan ṭâwm ve chuan, A nunna pawh kan ṭâwm ve ang. Kan tuar ve chuan ro kan rêlpui ve ang. Kan phat erawh chuan min phat ve ang. Rinawm lo mah ila, Ani zawng a rinawm reng a, a thu a sût ve ngai lo. Hêng thu hi hriattîr rawh, Pathian hmingin hrilh la, thu inchuha inhnial ṭhin hi bânsan rawh se, sâwtna a awm lo va, ngaithlatute a tikhawlo mai mai a ni. Nang chuan Pathian lâwmzâwng mi, hna thawktu, mahni hna zahpui lo, thutak chu dik taka hmang thiamtu nih tum tlat ang che. Khawvêl mite thu dukdak lo chu hawisan rawh, chu chuan Pathian ngaihsak lohna lamah mi a hruai si ṭhîn. Pânchhia angin an thu zirtîr chu a darh ṭhîn; an zîngah Humenaia leh Fileta kha a bulpui an ni. Thutak chu an pênsan a, ‘thawhlehna chu a awm daih tawh,’ an ti a, mi ṭhenkhat rinna pawh an pheh chhiatsak tawh a ni. Pathian thutak lungphûm erawh chu a nghîng chuang lo, “Lalpan a mite a hria,” tih leh “Lalpa hming lamtute chuan sual an kalsan tûr a ni,” tih ziak a chuang. In ropui taka bungbêlte pawh chu rangkachak leh tangkaruaa siam a ni vek lo va, thinga siam te, hluma siam te pawh a ni a, a ṭhen a hlu deuh va, a ṭhen a hlu lo deuh va. Hêng thil ṭha lo ka sawite laka inthiarfihlîm mi chu hmanraw hlu, in Neitupa tân hman tlâk, sil fai diam, hna ṭha tinrêng thawh nâna hman mai theih tûra inpeih reng ang hi a lo ni ang. Tleirâwl châkna te hawisan la, thinlung thianghlim taka Lalpa lamtute nên dikna te, rinna te, hmangaihna te, remna te ûm rawh. Hêng inhnialna sâwt lo leh âtthlâk hi hawisan rawh, innghirnghona a tichhuak mai mai a ni. Lalpa chhiahhlawh chuan inhau a chîng tûr a ni lo, mi lainat thei, zirtîr thiam, mi dawhthei a ni zâwk tûr a ni; amah kalhtute pawh dawhthei takin a kilkawi tûr a ni, thutak hre tûrin Pathianin an rilru a lamlêttîr mai thei a, Diabola thanga âwk, a duh zâwng a tihtîr ṭhinte chu lo chhuakin an lo harh leh mahna. Ni hnuhnûngah chuan hun khirh tak a lo thleng dâwn tih hre rawh. Mi, mahni hmasial te, tangka ngaina te, inchhuang te; intivei te, Pathian pawi sawi hrât te, nu leh pa thu awih lo te, lâwm nachâng hre lo te, thianghlim lo te, pianpui hmangaihna nei lo te, huaikawm bâwl te, rêlchhiat chîng te, insûm thei lo te, nunrâwng te, ṭha hua te, dâwta hêk chîng te, pawisak nei lo te, chapo te, Pathian aia mahni nuam tih zâwng ngaihtuahtu te, a langa intisakhaw mi viau, chhûng lama takna nei si lo te an lo awm ang - chûng mite chu hawisan rawh. An zînga ṭhenkhat phei chu mi inahte an lêng an lêng ang a; hmeichhe chak lo anmahni rit phur, châk zâwng apiang ûm ruai, eng pawh zir peih viau, thutak hre thei bawk si lote chu an hîp ang. Jannia leh Jambrian Mosia an dodâl ang khân thutak an dodâl ang; an rilru a khawlo zo tawh a, rinnaah lah tihtlâk an ni tawh lo. Chûng bâk chu eng dang han ti thei tûr an ni lo, Jannia leh Jambria te ang bawk khân miten an âtzia an hai lo vang. Nang zawngin ka zirtîrna te, ka awm dân te, ka thiltum te, ka rinna te, ka dawhtheihna te, ka hmangaihna te leh ka chhelzia te i hria a. Antiokei-ah te, Ikonion-ah te leh Lustra khuaah te tihduhdahna leh harsatna tam tak ka chunga lo thleng te, tihduhdahna ka tuar nasatzia leh chûng ata chu Lalpan mi chhan chhuah thu te kha i hria e. Tu pawhin Krista Isua nun mawi tak anga nun an tum phawt chuan tihduhdah an ni ngei ang. Mi sualte leh tihdertute erawh chu an chan a chhe tial tial ang a, mi dang bum ṭhîn mah se anmahni ngei pawh bum an ni ang. Pathian thâwkkhum Lehkha Thu zawng zawng hi intihdik nân te, insiamṭhat nân te, nun dân dik inzirtîr nân te a ṭangkai êm êm a ni. Chutianga hmang chuan a ni Pathian mi chu hman tlâk a lo niha, thil ṭha tinrêng ti thei tûra thuam a lo nih ṭhin ni. Pathian leh Krista Isua, mitthi leh mi nung rorêltu tûra hmaah, a lo kal lehna leh a ram chhâlin thu ka pe a che. Thu chu hril rawh, hun ṭhaah emaw, ṭha lovah emaw bei zêl rawh; dawhthei taka zirtîr chungin an dik lohna kawhhmuh la, zilh la, fuih rawh. Zirtîrna dik ngaithla ṭha duh lovin an duh zâwng chauh ngaithlain, an bengverh zâwng zirtîrtute chauh an sâwm khâwm hun a la thleng dâwn. Thu dik an bengkhawn lo vang a, thawnthu mai mai an tuipui ang. Nang zawng engkimah inthunun la, tuar fan fan rawh; Chanchin Ṭha hril hna hi thawk zêl la, i rawngbâwl hna kha hlen rawh. Kei zawng hlan tûra tih ka ni tawh, khawvêl ata ka kal chhuah hun a thleng ta. Intihsiakna ṭha chu ka zo tawh a, ka tlânna tûrah ka tlân chhuak a, rinna chu ka vawng reng a ni; tûnah chuan thiam channa, chawimawina lukhum chu dawn chauh ka hmabâk tawh a ni; chu chu rorêltu dik Lalpa chuan, chumi ni-ah chuan min pe ang, keimah mai ni lovin, a lo lan hun nghâkhleltu zawng zawngte pawh a pe ang. Ka hnêna lo kal thuai han tum hrâm teh. Dema chuan tûnlai khawvêl a ngainat avângin Thesalonika khaw lamah mi kalsan ta. Kreska pawh Galatia ramah a kal a, Tita chu Dalmatia ramah a kal bawk a. Luka chauhvin mi awmpui a ni. Marka kha rawngbâwl kawnga mi puitu ṭha tak a ni a, rawn hruai ang che. Tukika kha Efesi khuaah ka tîr ta. I lo kal hun chuan Troas khuaa Karpa hnêna ka kawrfual hnutchhiah kha han la la, ka lehkhabu nên, savun lehkhate phei kha chu han keng ngei ang che. Dâr chhûng mi Aleksandara khân ka pawi a khawih nasa hle a, Lalpan a thiltih ang zêlin a la thungrûl ang chu. A lakah khân nang pawh fîmkhur hle ang che, kan thu a dodâl nasa êm êm a ni. Thiamthu ka sawi hmasak ṭum chuan tu mah mi ṭantu an awm lo, min tlânsan vek a, (a mawh chu phur hlawm suh se). Lalpa erawh chuan mi awmpui a, mi tichak a, Jentail zawng zawng hriat tûrin Chanchin Ṭha chu ka puang kim ta; sakeibaknei ka ata chhan chhuah ka ni ta a. Lalpa chuan thil ṭha lo tinrêng lak ata mi chhan chhuak zêl ang a, him takin a vânram chu min thlen ang. Chatuan chatuanin ropuina chu a hnênah awm rawh se. Amen. Priskili leh Akuila te leh Onesifora chhûngte kha chibai ka bûk e. Erasta chu Korinth khuaah a awm ta reng a. Trofima chu a dam loh avângin Mileto khuaah ka kalsan ta. Thlasik hmain lo kal tum hrâm ang che. Eubula te, Pudea te, Lina te, Klaudii te leh unau zawng zawngten chibai an bûk a che. Lalpa chu i hnênah awm rawh se. Khawngaihna in zaa hnênah awm rawh se. Kei Paula hi, Pathian chhiahhlawh leh Isua Krista tirhkoh, Pathian mi thlante rinnaa kaihruai tûr leh sakhaw lam thu dik, chatuan nun beiseina chu hriattîr tûra ruat ka ni. Daw ngai lo Pathian chuan chu chu leilung pian hmain a lo tiam tawh a, ama thu ang ngeiin ṭha a tih hun takah a rawn tilang ta a, min Chhandamtu Pathian thupêk anga chu Chanchin Ṭha puan hna chu kawltîr ka ni. Kan pawm tlân rinna avânga ka fa tak tak Tita, chibai ka bûk a che. Pa Pathian leh min chhandamtu Krista Isua hnên ata khawngaihna leh remna i hnênah awm rawh se. Thil tihfel bâk tifel tûrin Kret thliarkârah ka hnutchhiah che a, thu ka pêk che ang khân khaw tinah upate ruatsak rawh. Upate chu sawisêl kai lo, nupui pakhat nei an ni tûr a ni; an fate pawh ringtu, nawmsakbâwl lama sawisêl kai lo leh luhlul lo ni rawh se. Kohhran hotu chu Pathian chhûngkaw enkawltu a ni a, sawisêl kai lo mi ni rawh se; mahni thu duh, thinram, zu rui mi, kut thlâk hmang, bawlhhlawh taka hlêp duh mi ni suh se. Mi inphal, thil ṭha duh, insûm thei, mi ngîl, mi thianghlim, mahni inthunun thei ni rawh se. Kan inzirtîrna thu rinawm tak hi man fuhtu a ni bawk tûr a ni; tichuan, zirtîrna dik a zirtîr thei ang a, hnialtute a timualpho thei bawk dâwn nia. Mi tam tak thunun ngai, pâwt mai mai, mi bum chîng an awm ṭeuh kha, chûngte chu serh tanho zînga mi an ni deuh ber; an kâ huhsak tûr a ni; a chhûng chhûngin mite an chawk buai a, sum hmuh beiseiin zirtîr loh tûr tûr an zirtîr a. Kret mi, anmahni zâwlnei pakhat ngei pawhin, “Kret thliarkâr mite hi mi dawthei, ram sakawlh ang, thatchhe si, vir tak si an ni,” a tih hi thu dik tak a ni. Chuvângin, rinna dik an neih theih nân na takin zilh rawh. Juda-te thawnthu mai mai leh thutak hawisan tawhte thu zâwm tawh suh se. Mi thianghlimte tân zawng engkim hi a thianghlim a, mi bawlhhlawhte leh rinna nei lote tân erawh chuan eng mah hi thianghlim aram a awm lo; an thinlung leh an chhia leh ṭha hriatna chenin a bawlhhlawh a ni. Pathian hriaah an inngai a; mahse, an thiltihin a zir si lo; mi luhlul leh ngeiawm tak an ni a, thil ṭha eng atân mah an tlâktlai tawh lo. Nang erawh chuan zirtîrna dik i zirtîr zêl tûr a ni. Putarte chu insûm thei, zahawm, inthunun thei, rin dân dik, hmangaihna nei mi leh mi dawhthei ni tûrin fuih rawh. Chutiang bawkin pitarte pawh an chêt dâna Pathian ṭih mi ni tûrin fuih la, mi rêl hmang, uain heh mi ni suh se; thil ṭha zirtîr chîng sela, la nula deuhte chu an pasalte leh an fate hmangaih te, insûm theih te, thianghlim te, in chhûnga khawsak ṭhat te, ngilneih te leh pasal thu awih te zirtîr rawh; tichuan, Pathian thu hi sawichhiat a ni dâwn lo nia. Chutiang bawkin tlangvâlte pawh mahni inthunun tûrin fuih rawh. Nang phei chu thil ṭha tinrêng tih kawngah entawn tlâk takin awm la, zahawm tak leh tihtakzetin mite zirtîr ṭhîn la, ṭawngkam mawi, sawisêl tûr awm lo chu hmang ṭhîn ang che; tichuan, hnialtuten min sawichhiatna tûr rêng rêng an nei lo vang a, an zak zâwk dâwn nia. Bawihte chu kawng engkimah an pute hnênah intulût rawh se; an lâwm zâwngin awm sela, an chhâng lêt ve tûr a ni lo, an ei rûksak tûr a ni bawk lo; kawng engkimah rin tlâk takin an awm zâwk tûr a ni; tichuan, kan Pathian min chhandamtu zirtîrna thu hi engkimah a hlutzia an tilang dâwn a ni. Mi zawng zawng chhandam an nih theih nân Pathian khawngaihna chu tihlan a lo ni ta a. Tûnlai hunah hian Pathian ngaihsak lohna leh khawvêl lam thil bânsan te, mahni invawng fela, dik taka awma sakhaw ngaihsak nun te min zirtîr a. Kan Pathian ropui leh min chhandamtu Isua Krista ropui taka a lo lanna ni lâwmawm kan beisei hi tihhlawhtlin a nih hun kan nghâk a ni. Amah ngei chu kan tân a inpe a, bawhchhiatna tinrêng lak ata min tlan chhuak a, ama mi atân min tithianghlim a, thil ṭha tih châkna min pe a ni. Hêng thu hi i hrilh tûr a ni; fuih la, thunei takin zilh rawh. Tu man ngainêp che suh se. I mite chu rorêltute leh thuneitute thu awih tûr leh, thil ṭha tinrêng tih inpeih reng tûrin hrilh rawh. Tu pawi mah sawi suh se; zâwldawhin mi zawng zawng lakah nunnêm tak leh hawihhâwm takin awm rawh se. Hmânah chuan keini pawh mâwl tak, luhlul tak, hruai bova awm, châkna leh nawmsakna chi tinrêng bawiha awm kan ni a, mi îtsîka elrelin kan khawsa a; huatthlala tak, inhuat tawn chîng mi kan ni ṭhîn. Amaherawhchu, min chhandamtu Pathian ngilneihzia leh mi a hmangaihzia a lo lan khân, keinin thil kan tih ṭhat vâng ni lovin, a khawngaihna avângin min chhandam ta a, siamtharnaa sil fai leh Thlarau Thianghlima siam thar kan ni ta a. Min chhandamtu Isua Krista zârah kan chungah hian a thlarau chu a rawn leih ta chiam a; tichuan, khawngaihna avânga thiam min chantîrin, chatuan nun beiseina roluahtute kan ni thei ta a ni. He thu hi a dik a ni. Pathian ringtute chuan thil ṭha tih duhna rilru an put zêl theih nân hêng thu hi uar tûrin ka duh che a ni; chu chu a ṭha a, tu tân pawh a ṭangkai a ni. Inhnialna âtthlâk te, thlahtu chhui vak vak te, Dân thu-a inhnial luai luai te kalsan rawh; ṭangkaina a nei lo va, sâwtna a awm hek lo. Inṭhendarhna tichhuaktu chu vawi hnih khat zilh la, ngaihven zui duh suh; chutiang mi zawng rilru kawi chhe pu tawh an ni tih i hria a, an tisual a ni tih pawh an inhre reng a ni. Artema emaw Tukika emaw i hnêna ka rawn tirh veleh nang chuan Nikopoli khuaah mi rawn pan thuai ang che, chutah chuan thlasik chhûng zawng awm ka tum a ni. Zena, dânhremi leh Apolova chuan, an zin kawnga eng mah an tlâkchham loh nân i theihtâwpin ṭanpui ang che. Kan mite chu thil ṭha tiin inhmang ṭhîn rawh se, inthlahdah mai mai lovin hetiang thil ṭûl mamawh lo awm ṭhîn hi an phuhrûk thei tûr a ni. Ka hnêna awm zawng zawng hian chibai an bûk a che u. Rinnaa kan ṭhiante kha chibai ka bûk e. In zaa hnênah khawngaihna awm rawh se. Paula, Krista Isua avânga tâng leh kan unaupa Timothean kan thawhpui duh tak Filemona te, kan farnu Afii te, kan sipaipui Arkipa te leh i ina inkhâwm ṭhîn kohhran mîte chibai kan bûk e. Kan Pa Pathian leh Lalpa Isua Krista hnên ata khawngaihna te, remna te in hnênah awm rawh se. Ka ṭawngṭainaah te ka hre reng ṭhîn che u. I rinna thu leh Lalpa Isua leh mi thianghlimte i hmangaihzia ka hriatin Pathian hnênah lâwmthu ka sawi a ni. Rinna avânga inpâwlhona kan neih tâkna hian Kristaah chuan malsâwmna tinrêng kan dawnte hriatthiamna a tihthûk zual zêl ka beisei e. Unaupa, i hmangaihna thu ka hriatin ka lâwm êm êm a, mi thianghlimte thinlung pawh i chawh phûr thar tâk avângin ka thla a muang ta huai mai. Hei vâng tak hian Kristaa unau kan nihnaah i tih âwm ti tûrin thu pe ngam che mah ila, i hmangaihna hriain, kei putar Paula, tûna Krista Isua vânga mi tâng hian, a ngenin ka ngên zâwk dâwn che a ni. Ka fapa Onesima, tân ina ka hrin tân hian ka ngên che a ni. Tûn hma khân i tân hman tlâk loh ni ṭhîn mah se, tûnah zawng ka tân a ṭangkai a, i tân pawh a ṭangkai tawh ang. Ka duhsakna thinlung zawng zawng nên i hnênah hei ka han tîr kîr e. Chanchin Ṭha avânga ka tân chhûng hian i aia min pui tûrin awmpui zêl ka duh hle a; mahse, rem i tih loh zâwng eng mah tih ka duh lo; min hmangaihna chu nangmah aṭanga puak chhuak ngei ni se ka duh avângin ani hi hrên luihsak che ka duh lo va ni. Eng emaw chhûng a tlân bosan che hi kumkhuaa i hnêna a ngam hlen tawhna ai a ni ngei ang. Tûnah zawng, bawih ang ni tawh lovin, bawih aia hlu tak, unau duh tak a ni tawh e; ka tân a duhawm êm êm a, i tân pawh tisa lamah leh Lalpaah a duhawm lehzual ngei ang. Chuvâng chuan, i thawhpui nia mi ngaih takmeuh chuan keimah ang maiin ani hi lo lâwm ang che. I lakah tihdik loh emaw, bat emaw a neih chuan ka rulh atân lo dah la. Kei, Paula hian keima kut ngeia ziakin ka rûl ang ka tih hi, nangmah ngei ka hnênah i inbat ve thu sawi tum phei zawng ka ni lo ve. Tichuan, unaupa, Lalpa avângin he thil hi min tihsak la, Kristaah chuan ka thinlung tilâwm rawh. Ka ngenna che hi a hlawhtlin ngei beisei tlatin ka ziak a nih hi, ka beisei aia nasa mahin i tih ka ring nghe nghe. In ṭawngṭainate chu chhân a niha, in hnêna lo chhuah ka inbeisei a, thlenna tûr in mi lo ngaihtuahsak ang che. Epafra, Krista Isuaa ka tânpui hian chibai a bûk a che. Ka thawhpui Marka te, Aristarka te, Dema te leh Luka te hian chibai an bûk a che. Kan Lalpa Isua Krista khawngaihna chu in zaa hnênah awm rawh se. Tûn hma hun zawng khân kawng tinrêngin Pathian chuan kan pi pute hnênah zâwlneite hmangin thu a sawi ṭhîn a; tûn hun hnuhnûngah hian kan hnênah Fapain thu a rawn sawi ta thung a ni; Ani chu a ro zawng zawng luahtuah a ruat a, amah hmangin lei leh vân hi a siam a, Ani chu a ropuina êng leh a zepui putu a ni bawk; engkim hi a thiltihtheihnain a khai ding a, sual faina kawng a siam hnuin Chungnungbera ding lamah khian a han ṭhu ta a. Vântirhkohte hming aia hming ropui a nei ta a; tichuan, anni ai chuan a ropui zâwk a ni. Vântirhkoh zînga tu hnênah nge, “Nang zawng ka Fapa i ni e, vawiin hian Fapaah ka nei ta che,” emaw, “A tân Pa ka ni ang a, Ka tân fapa a ni ang,” a tih ngai le? Fa tîra erawh chu khawvêla a rawn tirh khân, “Pathian vântirhkoh zawng zawngin ani chu chibai bûk rawh se,” a tih kha. Vântirhkoh chungchâng a sawi chuan, “Vântirhkoh chu thli-ah a chantîr a, A rawngbâwltute chu meialhah a chantîr,” a ti a. Fapa thu a sawi erawh chuan heti hian a ti: “Aw Pathian, i lalṭhutthlêng chu a awm kumkhua ang. I ram rorêlna chu rorêlna dik a ni. Felna i ngaina a, dik lo i hua a, Chuvângin, Pathian, i Pathian chuan I ṭhiante aiin duhsakna hriak a thih ta bîk che a ni.” Heti pawh hian a ti bawk: “Aw Lalpa, a tîrah nangin lei hi i siam a, Vânte pawh khi i kutchhuak a ni. Chûngte chu an la boral ang a, Nang erawh chu i awm reng ang. Chûng zawng zawngte chu silhfên angin an la hlui ang a, Puan angin i zial ang a, Silhfên angin i la thlâk ang. Nang zawng i ngai reng a, Kin ni i nei lo vang.” Vântirhkoh zînga tu hnênah nge, “Ka ding lamah lo ṭhu rawh, I hmêlmate I ke nghahchhanah ka han siam ang e,” a tih ngai? Vântirhkoh zawng, thlarau chhandamna changtute rawngbâwlsak tûra tirh an ni lâwm ni? Chuvângin, kan thu dawnte kha kan pawisa lehzual tûr a ni, chuti lo zawng kan tawlh bo hlauh dah ang e. Vântirhkoh hmanga thu sawi mah a ngheh êm êma, a bawhchhetu leh pawisa lotu rêng rêng an phu tâwka hrem an nih zêl si chuan, heti kauva chhandamna pawimawh hi kan thlahthlam vaih chuan, engtin nge hrem kan pumpelh theih tehlul ang? Chu chhandamna chu Lalpa ngeiin a rawn puang hmasa a, a thu dawngtute khân min nemnghehsak a. Pathian meuh pawhin chhinchhiahna te, thil mak te leh thiltih ropui tak te tiin, Thlarau Thianghlim thilpêk chu ṭûl a tih ang zêla semin a rawn nemnghet bawk a ni. Khawvêl lo la awm tûr chu vântirhkohte thuhnuaiah a dah lo tih kan sawi a nih hi. Tu emaw chuan hetiang hian khawiah emaw a sawi: “Mihring hi eng nge maw a niha, i hriat reng ṭhin ni? Mihring Fapa pawh hi eng nge maw a niha, i ngaihtuah ṭhin ni? Ani chu vântirhkohte aia hnuaiin i siam rih a, Ropuina leh chawimawina i khumtîr a, a ke hnuaiah engkim i dah a,” tiin. “A ke hnuaiah engkim i dah,” tih hian engkim takmeuh a huam a ni; amaherawhchu, tûnah engkim a hnuaia awmin kan la hre rih lo. Nimahsela, Isua, “Vântirhkohte aia hnuaia siam rih” chu thihna tuar avânga ropuina leh chawimawina khumtîr a ni ta tih kan hmu, Pathian khawngaihna azârah mi tin tân thihna a temsak ta a ni. A ropuina chang ve tûra fa tam tak hruai lûttu, an chhandamna siamtu, a zâra engkim awma, a tâna engkim awm bawka tân chuan, tuarnate avânga tihfamkima a awm chu a âwm rêng a ni. Tithianghlimtu leh tihthianghlimte chu Pa thuhmun aṭanga chhuak an ni; chuvângin, anniho chu ‘unaute,’ tih a zak lo ve: “Ka unaute hnênah i hming ka lam ang a. Kohhran zîngah i fak hla ka sa ang,” a ti a. “Amahah ka rinna ka nghat ang,” pawh a ti a. “En teh, kei leh Pathian mi pêk naupangte hi,” a ti bawk. Naupang a tihte hi tisa leh thisen nei an ni a, ani pawh chutiang chu a lo ni ve ta a ni. Tichuan, thihna chunga thuneitu Diabola chu, a thihna avângin a titlâwm a, dam chhûnga thih hlau rêng rênga awm ṭhîn, hlauhna bawiha tângte chu a chhuah ta a ni. A rawn ngaihsakte hi vântirhkoh an ni lo, Abrahama thlahte an ni a rawn ngaihsakte chu. Chuvâng chuan, min lainattu, Pathian tâna Puithiam lalber rinawm tak, mi zawng zawng sual thuphachawina hlântu ni tûr chu, kawng engkima a unaute anga a lo awm a ṭûl rêng a ni. Amah ngei chu thlêmna tuar chhuak tawh a nih avângin thlêmna tuarte pawh a ṭanpui thei a ni. Chuvâng chuan, unau thianghlim, vân kohna chang vete u, kan thurina Tirhkoh leh Puithiam lalber, Isua chu ngaihtuah rawh u. Pathian chhûngkaw pum pui tân Mosia a rinawm ang bawkin ani pawh a ruattu tân a rinawm a. Chhûngkaw dintu chu a chhûngte aiin an chawimawi zâwk ang hian, Isua pawh Mosia aia ropuina nasa zâwk hmu tlâk a ni. Chhûngkaw tin hi tu din emaw an ni vek a; engkim dintu chu Pathian a ni. Mosia chu chhiahhlawh niin Pathian chhûngkaw pum pui tân a rinawm a, Pathian thu sawi puang chhâwngtu a ni a. Krista erawh chu Fapa niin Pathian chhûngkaw tân a rinawm a ni; keini hi a chhûngte chu kan ni, kan beiseina ngaihṭhatthlâk tak leh chhuanawm tak hi kan chelh tlat phawt chuan. Chutichuan, Thlarau Thianghlimin heti hian a ti: “Vawiin hian a aw in hriat chuan Thlalêra mi fiah lai, Hel lai nî ang khân In thinlung tikhauh suh u. Kum sawmli chhûng in pi puten Ka thiltihte hmu chungin mi chhin a, mi fiah bawk a. Chuvângin, chu chhuanho chungah chuan ka thinur ta a, An rilruin a hruai pêng a, Ka kawng pawh an hre ta lo; ka ti a. Thinur taka ka tiam tâk ang khân Ka chawlhnaah an luh ka phal lo vang,” tiin. Unaute u, fîmkhur rawh u, chuti lo chuan Pathian nung tlûksan tûrin tu thinlungah emaw rin lohna sual a lo lût dah ang e. ‘Vawiin,’ tih a nih chhûng hian in zînga tu mah suala an tlûka, an thinlung an tihkhauh loh nân nî tin infuih tawn zâwk rawh u. A tîra kan rinna kha a tâwp thlenga kan vawn tlat phawt chuan Krista ṭâwmpuitute kan ni asin. ‘Vawiin hian a aw in hriat chuan, hel lai ni ang khân In thinlung tikhauh suh u,’ tih a ni a. A nih leh tute nge hre reng chunga hel kha? Aigupta ram aṭanga Mosia hruai chhuahte kha an ni lo vem ni? Kum sawmli chhûng khân tute chungah nge a lungnih loh kha? Thil sual titute, thlalêra tlu hlum tate chungah khân a ni lo vem ni? Thu awih lote chungah chauh lo chuan tu hnênah nge a chawlhnaa lût lo tûra thu a tiam le? Chutichuan, an rin loh avângin an lût ve thei ta lo tih kan hria. A chawlhnaa luh theihna thutiam a la din reng chhûng hian in zîngah tlai lutuk ta nia inngai in awm hlauh vang tih a hlauhawm a nia. Annihovin Chanchin Ṭha an hriat ang bawkin keini pawhin kan hre ve ta a. Anni chuan rinnaa ngaithlatute an rem loh avângin an thu dawn chu an sâwtpui lo va ni. Keini ringtute hi a chawlhnaa lût tate chu kan ni; Pathianin lei leh vân a siam zawh khân a hna a chawlhsan nâ a, ‘Thinur taka ka tiam tâk ang khân, Ka chawlhnaah chuan an lût lo vang,’ a la ti reng a ni. Ni sarih ni thu-ah chuan, ‘Pathianin a hna thawh zawng zawng ni sarih niin a chawlhsan ta a,’ tiin khawiah emaw ziak a nih kha. ‘Ka chawlhnaah chuan an lût lo vang,’ tih thu-ah hian a ṭhen lût tûr an awm tihna a ni. Chanchin Ṭha hre hmasate khân an rin loh avângin an lût thei ta lo va. Kan sawi tâk, ‘Vawiin hian a aw in hriat chuan in thinlung tikhauh suh u,’ tih hi Davida sawitîrin kum tam tak hnuah Pathian chuan ni dang, ‘vawiin’ a tih chu a rawn ruat leh ta a ni. Josua khân ‘chawlhnaah’ chuan hruai lût ni se, Pathianin hun dang a ruat leh lo vang. Chuvângin, Pathian mite tân chawlhna hun dang a la awm dâwn a ni. Pathianin a hnathawh a chawlhsan ang bawkin Pathian tiam chawlhna changte chu an thawhrimna ata an la châwl dâwn. Rin loh avânga an tlu ang khân tu mah kan tlûk ve loh nân, chu chawlhnaa lût tûr chuan theihtâwp i chhuah ṭheuh vang u. Pathian thu chu a nung a, thil a ti thei a, khandaih hriam tawn eng anga hriam ai pawhin a hriam zâwk a, ruhtuah leh thlîng te, nunna leh thlarau inzawmnate a phel hrang thei a, rilrua ngaihtuah leh tumte pawh a hre nghâl thei a ni. A mit hmuha lang lo thil siam rêng rêng a awm lo. Kan chanchin kan sawina tûra mit hmuhah chuan engkim hi saruak leh inhawng sa a ni vek zâwk a ni. Tichuan, vânahte kal tlang tawh Puithiam lalber ropui tak, Isua, Pathian Fapa chu, kan neih avângin kan thurin hi i vuan tlat ang u. Kan Puithiam lalber neih hi kan chak lohnate min hriatpui pha lo a ni lo va, keimahni ang bawka kawng tinrênga thlêmna tâwk tawh, sual si lo chu a ni. Chutichuan, puih kan ngaih hun taka zahngaihna leh khawngaihna kan hmuh theihna tûrin, khawngaihna lalṭhutthlêng chu huai takin i hnaih ang u. Puithiam lalberte chu mihring zîng ata thlan chhuah an ni ziah ṭhîn, mihring tân Pathian lama rawngbâwl tûra ruat an ni a, thilpêkte leh sual tâna inthawinate hlân tûra tih an ni. Anni pawh chu chak lohna hual vêla awm ve bawk an nih avângin, hre lote leh bawhchhiate an dîm thiam ṭhîn. Chuvângin, mi dangte tân sual thawina an hlansak ang bawkin, anmahni tân pawh an hlân ngei tûr a ni. Tu man hetiang inchawimawina hi mahni an inkhumtîr ngai lo va, Arona anga Pathian kohte chauhvin an khum zâwk ṭhîn a ni. Chutiang bawkin, Krista pawh chu mahni inchawimawiin Puithiam lalberah a insiam lo. “Nang zawng ka Fapa i ni e. Vawiin hian fapaah ka neih ta che,” titu khân a ruat zâwk a ni. Hmun dangah pawh, “Nang zawng Melkisedeka puithiamna ang chi-a chatuan puithiam i ni e,” a ti bawk. Ani chuan a tisa put lai nite khân thihna laka amah chhan theitu hnênah nasa taka au leh mittui tla chunga dîlin a ṭawngṭai a. Pathian a ṭih ṭhin avângin a dîlna chu ngaihthlâk a ni ta a. Fapa meuh pawh ni mah sela, a thil tuarahte chuan thu awih a zir ta a. Tihfamkima lo awmin, a thu awih zawng zawngte tân chatuan chhandamna bulpui a lo ni ta. Tichuan, Melkisedeka puithiamna ang chî-a Puithiam lalberah Pathianin a ruat ta a ni. Chu mi chungchângah chuan sawi tûr tam tak kan nei a, in la mâwl êm avângin hrilh fiah pawh a harsa a ni. A hun ngaihtuah chuan zirtîrtu ni tawh hial âwm in ni na a. Pathian thu chu a bul rêt aṭanga zirtîr in ngai leh ta a ni. Chaw tak ni lovin hnutetui in la mamawh a nih hi. Hnute hne laite chu nausên an la nih avângin chaw tak, felna thu chu an la ei thei lo. Chaw tak erawh chu puitling tân a ni. Chûngte chuan a chhia leh a ṭha thliar thiam tûrin an rilru an sawizawi tawh a ni. Chutichuan, Krista chungchânga zirtîrna thu mâwl tê tê chu sawi tawh lovin puitlin lam i pan ang u; thiltih sâwt lo bânsan thu te, Pathian rin thu te, baptisma thu te, kut nghah thu te, mitthi thawhlehna thu te leh chatuan rorêl inzirtîrna thu te sawi nawn sawi nawn tawh lovin. Pathianin rem a tih chuan chu chu tih kan tum a ni. Tihêna awm tawh, vân thilpêk tema, Thlarau Thianghlim pawh chang ve tawh, Pathian thu tuina leh khawvêl lo la awm tûr thiltihtheihna tem tawh zeta, tlûksan leh tate chu sim tûra hruai kîr leh rual an ni tawh lo; anmahni ngeiin Pathian Fapa chu khêngbet nawn lehin an timualpho va ni. Lo, a chunga ruahtui tla ṭhîn lo dawnga, a neitu tâna thlai ei tlâk chhuah ta chu Pathianin mal a sâwm ṭhîn. Amaherawhchu, hnim leh hlîngte chauh chhuah chu mâkin a lo awm a, ânchhe dawn hmabâk a lo ni a, a tâwpah hâl a tâwk ṭhîn. Duh takte u, chutiang thu chu sawi mah ila nangni zawng in dinhmun a ṭhat zâwka, chhandam in nih ngei ka ring tlat a ni. In thil tih ṭhin, tûnah pawh in la tih zêl ṭhin, a hming vânga hmangaihna in lantîr te leh, mi thianghlimte rawng in bâwlsak ṭhin te hi theihnghilh mai tûrin Pathian chu mi fel lo a ni lo ve. Tu pawhin in beiseina hi a thlen famkim hma chuan taihmâk in chhuah zêl ka duh êm êm a ni. Dâwngdah lova ring tlat leh dawhthei taka nghâk fan fan ṭhîn, Pathian thutiam changtute anga in awm kan duh a ni. Pathianin Abrahama hnêna thu a tiam lai khân, a aia ropui zâwk chhâl tûr an awm loh avângin amah leh amah inchhâlin thu a tiam a. “Matheilovin mal ka sâwm ang chia, ka tipung ngei ngei ang che,” tiin. Tichuan, Abrahama chuan a nghâk fan fan a, Pathian thiltiam chu a dawng ta a. Mihringte chuan anmahni aia ropui zâwk chhâlin chhia an chham ṭhîn, chutiang chhechham chuan thu inchuh a titâwp a, a tinghet ṭhîn a ni. Pathian pawhin a thutiam a sût loh tûrzia entîr nân thutiam dawng tûrte hnênah mahni inchhâl meuhvin a nemnghet a. Sût leh mai mai loh chi hêng thil pahnih - thutiam leh mahni inchhâlna avâng hian, Pathian chu daw rual a ni lo ve. Chuvângin, keini, a hnêna tlânte hian him nân kan hmaa beiseina chu thlamuang takin kan chelh thei a ni. Chu beiseina chu kan nun thîrchakaiah kan nei a, rinawm leh nghet tak a ni; Hmun Thianghlim Berah a inthlung lût a. Chutah chuan kan tân, kan hmahruaitu Isua a lût tawh a, Melkisedeka puithiamna ang chi-a chatuan Puithiam lalber a ni ta. Chu Melkisedeka chu Salem khaw lal a ni a, Pathian Chungnungbera puithiam a ni bawk. Ani chuan Abrahama, lalho that lo haw kha a lo hmuak a, mal a sâwm a. Abrahama chuan ani chu a râllâk sum zawng zawng aṭang chuan sâwma pakhat a pe a. A hming awmzia hi ‘Felna lal’ tihna a ni phawt a. Salem lal a nih bawk avângin ‘Remna lal’ tihna a ni bawk. Ani chu pa nei lo, nu nei lo, thlahtu chhui tûr awm lo, a awm ṭan ni leh a nun tâwp ni sawi tûr awm lo a ni a; Pathian Fapa ang mai a ni a, puithiam a ni reng a ni. Thlahtu Abrahaman a rallâk sum zawng zawng aṭanga sâwma pakhat a pêka chu a ropuizia hi ngaihtuah teh u. Puithiam hna chelhtu Levia thlahte chuan Dân thu angin an unau Israel mite, Abrahama thlah ve thote lakah sâwma pakhat lâk tûr thu an hmu a. Levia thlahte zînga tel ve si lo Melkisedeka chuan, Abrahama hnên aṭangin sâwma pakhat a la a, thutiam dawngtu Abrahama chu mal a sâwm a. Hnial rual lohvin a tê zâwk chu a ropui zâwkin mal an sâwm ṭhîn a ni. Puithiamte thu-ah chuan, thi thei mihringten sâwma pakhat an dawng a, Melkisedeka thu-ah erawh chuan nung renga an sawi chuan sâwma pakhat chu a dawng a ni. Tin, Levia, sâwma pakhat dawngtu ngei pawh khân Abrahama kutin Melkisedeka hnênah sâwma pakhat a pe tih theih a ni, Melkisedekan a lo hmuah lai khân Levia chu a pu Abrahama ṭhalbea awm a ni si a. Chutichuan, Levia thlahte puithiam hna nêna inthlunga Dân hi pêk a ni a; chûng avânga famkim theih ni ta sela, Arona puithiamna ang chî ni lo, Melkisedeka puithiamna ang chi-a puithiam dang awm a ngai dâwn em ni? Puithiam hna kalhmang thlâk a nih tâk si chuan Dân pawh chu thlâk a ngai rêng a ni. A chanchin kan sawia hi maichâm rawngbâwlna khawih ve ngai lo hnam zînga mi a ni. Kan Lalpa chu Mosian puithiam thu a sawi laia sawi tel ve ngai loh Juda hnama mi a nih chiang takin kan hria. Puithiam chi dang, Melkisedeka ang chi, mihring Dân anga puithiam ni ve satliah lo, tihchhiat rual loh nunna thu-a ruat a lo awm ta hian kan thu chu a tifiah lehzual a ni. Lehkha Thu chuan: “Melkisedeka puithiamna ang chî-a chatuan puithiam i ni e,” a ti a. Thupêk hmasa chu a chak lo va, a hman tlâk loh avângin hnâwl a ni ta a. Dân chuan eng mah a tipuitling thei si lo. Beiseina ṭha zâwk, Pathian min hnaihtîrtu chuan a rawn thlâk ta a ni. Hming chhâl meuhva a rawn thlâk a ni, puithiam dangte chu chutianga ruat an ni ve si lo. Ani erawh hi chu hming chhâl meuhva ruat a ni, a ruattu chuan a hnênah: “Lalpan hming a chhâl, A lamlêt tawh lo vang, Nang zawng chatuan atân puithiam i ni e,” a tih kha. Tichuan, chu thuthlung, Isua ngeiin a nemngheh chu a va ropui êm! Danglamna a la awm: Thihna avângin an puithiamna hna an chhunzawm kumkhua thei lo va; chuvângin, mi tam tak puithiamah siam an ni. Ani erawh hi chu a nun reng avângin a puithiamna chu thlâk theih lohvin a nghet ta a ni. Tichuan, Amaha Pathian hnêna kalte chu eng ang pawh a chhandam thei reng a, an tân Pathian hnêna ngensak tûrin a nung reng si a. Chutiang chî Puithiam lalber chuan kan mamawh a phuhrûk zo êm êm a ni; a thianghlim a, pawi a sawi lo va, a hmêlhem lo va, mi sualte lakah a fihlîm a, vân aia sângah tûnah chawimawi a ni ta. Puithiam lalberte chuan nî tin mahni sual tân inthawina an hlân ṭhîn a, chumi zawhah mipuite sual tân an hlân ve leh ṭhîn a; ani erawh hi chuan chutianga ti ve lovin mahni a inhlân a, mi zawng zawng tân inthawina chu ṭum khatah, kumkhua atân a hlân tlingtla ta a ni. Dân chuan Puithiam lalber ni tûrin mihring chak lo tê tê a ruat ṭhîn a. Dân awm hnu daiha hming chhâla thutiam chuan Fapa, chatuan atân tihfamkim tawha chu, Puithiam lalberah a rawn ruat ta a ni. Tichuan, kan thu sawi tum ber chu: chutiang Puithiam lalber chu kan nei ta tih hi a ni. Vânahte khian Ropuibera lalṭhutthlêng ding lamah a han ṭhu a. Hmun Thianghlim leh biakbûk tak tak, mihring sak ni lo, Lalpa sak zâwkah chuan rawng a han bâwl ta a ni. Puithiam lalber te chu thilpêkte leh inthawinate hlân tûra ruat an ni a. Chuvângin, ani pawh hian eng emaw tal hlan tûr a neih a ngai a ni. Leiah hian la awm reng sela, puithiam hna rêng a thawk lo vang, Dân anga thilpêk hlântu tûrte an awm reng si a. Mosian biakbûk a sak dâwn laiin Pathianin a sak dân tûr a hrilh a, “Tlânga a lem ka entîr ang chiah che khân engkim i siam tûr a ni tih hre reng rawh,” a tih ang khân hêngho rawngbâwlna hi vân thil lem leh hlimthla mai a ni. Tûna ani rawngbâwlna neih tâk hi zawng, thutiam ropui zâwkah a innghat a, thuthlung ṭha lehzual a rawn thlen ang bawk hian, an rawngbâwlna ai chuan a ropui zâwk êm êm a ni. Thuthlung hmasa kha sawisêlbo ni ta sela, thlun nawn a ngai lo tûr. Anmahni demin hetiang hian a sawi a nih zâwk kha: “Ngai teh u, nite a lo thleng dâwn,” Lalpan a ti. “Israel chhûngte leh Juda chhûngte chu Thuthlung thar ka siampui ang. An pi pute Aigupta ram ata ka hruai chhuah laia, An kutte ka chelh nia, An hnêna ka thlun ang kha ni lovin, Ka thuthlungah chuan an awm reng loh avângin Anmahni ka ngaihsak ta lo va ni,” Lalpan a ti. “Chûng nîa Israel chhûngte hnêna thu ka thlun tûr chu hei hi a ni: An rilruah ka Dânte ka dah ang a. An thinlungah ka ziak bawk ang, An Pathian ka ni ang a, ka mite an ni bawk ang,” Lalpan a ti. “Tu mahin ‘Lalpa chu hre rawh u,’ tiin, Mahni khuate leh unaute an inzirtîr tawh lo vang. A tê ber aṭangin a lian ber thlengin An za-in mi hre vek tawh dâwn a ni. An bawhchhiatnaahte zah ka ngai ang a, An sualte pawh ka hre reng tawh lo vang,” tiin. Thuthlung thar a sawi tâk avângin thuthlung hmasa chu a tihlui ta a, lo upaa hlui ta chu a bo thuai dâwn a ni. Thuthlung hmasaah pawh khân rawngbâwl dân tûr leh rawngbâwlna tûr Hmun Thianghlim, leia mi chu ruat a ni a. Biakbûk an sa a, a tawntirhah chuan khâwnvâr dahna te, dawhkân, chhangdah awmna te a awm a, chu chu Hmun Thianghlim an ti a. Puanzâr pahnihna chhûngah chuan biakbûk Hmun Thianghlim Ber an tih chu a awm a. Chutah chuan rimtui hâlna rangkachak maichâm te, Thuthlung Bâwm rangkachak tia luan te a awm a. Thuthlung Bâwm chhûngah chuan mana dahna rangkachak bêl te, Arona tiang chawr te, thuthlung ziakna lung phêk te a awm a. A chungah chuan ropuina cherub-te an awm a, sual thuphachawina hmun chungah chuan an thla an zâr a. Chûng thute zawng tûnah a kip a kawiin kan sawi hman lo vang. Chutianga rem chu a ni a, puithiamte chu biak bûk tawntirhah chuan an puithiam rawngbâwl hna thawkin nî tin an lût ṭhîn a. A dawttuah erawh chuan Puithiam lalber chauh, kum khatah vawi khat, thisen keng ngeiin a lût ṭhîn, chu chu ama tân leh mipuiten hre lova an tihsual thawi nân a hlân ṭhîn a ni. Hêng thil rem dân aṭang hian biakbûk tawntirh hi a la awm chhûng chu, Hmun Thianghlim Bera luhna kawng chu a la inhawng rih lo va ni tih Thlarau Thianghlim chuan min kawhhmuh a ni. Hêngte hi tûn hun entîrna a ni: hêng dân anga thil hlante leh inthawina hlante hian a hlântu mipuite thinlung chu a tifamkim thei lo; chûng chu ei leh in, insil dân hrang hrang, tisa lam thil mai mai a ni a, Siamṭhatna hun thlen hmaa hman tûra tih chauh a ni. Krista erawh chu thil ṭha tûna lo thleng taahte Puithiam lalber a ni ta a, a rawngbâwlna biakbûk pawh chu, mihring sak a ni lo va, he khawvêla thilsiam ang pawh hi a nih loh avângin a ropuiin a famkim zâwk a ni. A thisen hlan pawh chu kêlpa leh bâwngtuaite thisen ni lovin, ama thisen ngei a ni a, Hmun Thianghlimah chuan vawi khat lûtin chatuan atâna tlanna a siam ta. Kêlpate leh bâwngpate thisen leh bâwngla vâp, mi bawlhhlawhte chunga theh mahin, an tisa thiang khawpa anmahni a tihthianghlim theih si chuan, Krista thisen chuan a va tithianghlim zo dâwn êm! Ani chu chatuan thlarau zârah thilhlan hmêlhem lo atân Pathian hnênah amah a inhlân a, a thisen chuan Pathian rawng bâwl tûrin thiltih sâwt lo lakah kan chhia leh ṭha hriatna a tithianghlim ta. Hemi avâng hian Krista chu thuthlung thar palai a ni; thuthlung hmasa bawhchhiatnate laka mite a tlan chhuah theihna tûra a lo thih tâk avângin, kohte chuan chatuan roluah tûr tiam chu an chang ta a ni. Thurochhiah pawh hi a chhiahtu a thi tawh nge la thi lo fiah hmasak a ṭûl ṭhîn; a chhiahtu a la dam chhûng chuan hman theih a la ni rih lo va, a thih hnu chauhva hman tûr a ni. Chuvângin, thuthlung hmasa pawh kha thisena tihngheh a nih kha. Dân thu-a thupêk tinrêng Mosian mipuite a hrilh lai khân, bâwngpatuai thisen chu tui nên, sâpsen nên, husop nên a la a, lehkhabu zial leh mipui zawng zawng chu a theh a. “Hei hi in zawm tûr Pathianin in hnêna a pêk thuthlung tihnghehna thisen a nih hi,” a ti a. Tin, biakbûk leh rawngbâwlna hmanrua zawng zawng pawh chutiang bawkin thisen chuan a theh a. Dân thu ang chuan engkim deuhthaw mai hi thisena tihthianghlim tûr a ni a, thisen chhuah lovin ngaihdamna a awm thei si lo. Chutichuan, vân thil anpuite mah chutianga tihthianghlim chu a ṭûl a, vân thil tak takte phei chu chûng aia inthawina ṭha zâwka tihthianghlim a ṭûl ngei tûr a ni. Kuta sak hmun tihthianghlim, a tak anpuiah chuan Krista chu a lût a ni lo ve, vânah khian a han lût zâwk a, tûnah kan aiawhin Pathian hmaah a han ding ta a ni. Puithiam lalber chu mahni thisen ni lo, ran thisen kenga kum tin Hmun Thianghlima a lût ṭhîn ang hian ani chu mahni inhlân nawn fo tûrin a lût ve hek lo. Chuti ni suh sela leilung pian tirh aṭang khân vawi tam tak a tuar tûr a ni. Nimahsela, tûn hun tâwpah hian sual tihreh nân amah inhlân tûrin vawi khat a lo lang ta a ni. Mihring tân vawi khat thih ruat a ni, chumi hnuah rorêlna a awm ang. Chutiang bawkin Krista pawh chu mi tam tak sualte la bo tûrin ṭum khat hlan a ni tawh a. Sualte la bo tûr ni tawh lovin, amah lo nghâktute chhandamnaa hruai lût tûrin a lo kal leh dâwn a ni. Dân chuan thil ṭha lo awm tûrte hlimthla, a tak ni lo, a lem chauh a ken avângin, kum tina inthawina pângngai an hlan fote chuan a hlântute chu engtin mah a tifamkim thei lo va ni. Tifamkim thei sela, inthawina hlântute hi tihthianghlim an nih tawha, suala inhriatna an neih tawh si loh chuan inthawina hlan an bânsan daih tawh dâwn lâwm ni? Chutih ahnêkin he inthawina hian an sual tih kum tin a hriat nawntîr ṭhîn a ni. Kêlpa leh bâwngpate thisen chuan sualte tibo thei rual a ni lo. Chuvângin, khawvêla a lo luh lai khân heti hian a ti: Inthawina leh thilhlan i duh lo va, Ka tân taksa mi buatsaihsak zâwk a. Pum hâl inthawina leh sual tâna inthawina I lâwm hek lo. Chu veleh, keiin, “Aw Pathian, ngai teh, lehkhabu ziala ka chanchin an ziak ang khân I duhzâwng ti tûrin ka lo kal e,” ka ti a. A hmasaa, ‘Inthawina te, thilhlan te, pum hâl inthawina leh sual tâna inthawinate i duh lo va, i lâwm hek lo,’ tih hi Dân thupêk ang taka inthawina hlan ṭhin kha a ni. “Chu veleh, ngai teh, i duhzâwng ti tûrin ka lo kal e,” a tih leh tâk hi, inthawinain a rawn thlâk ta tihna a ni. Isua Krista chuan Pathian duhzâwng anga, kumkhua atân ṭum khat a taksa a hlan avângin tihthianghlim kan ni ta a ni. Puithiamte chuan dingin kâwla ni chhuak chhiara rawngbâwlin inthawina pângngai an hlân fo va; mahse, chûng inthawina chuan engtin mah sual a tibo thei si lo. Ani erawh hi chu, chatuan atân sual thawina vawi khat a hlan hnuin, Pathian ding lamah a han ṭhu ta a. A hmêlmate a ke nghahchhana siam an nih hun chu a nghâk ta a ni. Vawi khat a inhlanna khân a tihthianghlimte chu chatuan atân a tifamkim ta a ni. Thlarau Thianghlim pawhin heti hian min hriattîr: “Chûng nia an hnêna ka thuthlun tûr chu hei hi a ni,” Lalpan a ti: “An thinlungah ka Dânte ka dah ang a, An rilruah ka ziak bawk ang,” tia a sawi hnu khân, “An sualte leh an bawhchhiatnate ka hre reng tawh lo vang,” a ti a. Tichuan, sualte ngaihdam a nih tawh si chuan sual tâna thil hlan a ngai tawh lo. Tichuan, unaute u, Isua thisen zârah Hmun Thianghlim Bera luhna kawng thar leh nung, daidanna puanzâr kal tlangna kawng chu min hawnsak ta a, chu puanzâr chu a taksa kha a ni. Tichuan, Pathian chhûngte tân Puithiam Ropui tak kan neih avângin sual inthiam lohna rilru sil faisaka awma, kan taksa pawh tuifîma bual faiin, thinlung tak leh rinna nghet tak nên Pathian chu i hnaih ang u. Beiseina thurin kan pawm hi nghîng lovin i chelh tlat ang u. A tiamtu chu a rinawm si a. Hmangaihna ngah tûr leh thil ṭha ti tûra inchawhthawh dân i ngaihtuah ang u. Ṭhenkhatin inkhâwm thlahthlam an chîng angin chîng ve lo ila, i infuih zâwk ang u; ni chu a lo hnai ta tih in hriat avângin i uar lehzual ang u. Thutak hriatna kan neih tawh hnu pawha kan sual luih zêl si chuan, sualte la bo thei inthawina a awm tawh dâwn lo va; rorêlna leh amah dodâltute tiboral tûr Pathian thinurna mei, thlaphâng taka nghah ngawt loh chu hmabâk dang kan nei lo. Mosia Dân pawisa lotute chu thuhretu pahnih pathum thuin khawngaihna tel miah lova tihhlum an ni ṭhîn. Pathian Fapa rap beta, thuthlung thisen, amah tihthianghlimna chu thil narâna ruata, khawngaihna Thlarau sawichhetu chu nasa lehzuala hrem tûrah in ngai lo vem ni? “Phuba rêng rêng keima lâk tûr a ni, keimân ka thungrûl ang,” tih leh “Lalpan a mite a ngaihtuah ang,” titu hi kan hre si a. Pathian nung kut tuar chu râpthlâk tak a ni. Hmâna tihêna in awm hnua hrehawm nasa tak in tuar lai nite kha hre reng rawh u. A chângin vântlâng ennawm atân hmuhsit leh tihduhdah in tuar a, a châng phei chuan chutiang tuarte tuarna chu in ṭâwmpui ve a. Kawlbunte chu in lainat a, in thil neih an lâksak che u pawhin lâwm takin in tuar a; thil ṭha zâwk, awm hlen tûr chu in nei tih in hriat avângin. Chutichuan, in huaina kha hloh suh u, lâwmman ropui tak a nei dâwn a ni. Pathian duhzâwng ti tûr leh a thiltiam dawng tûr chuan in chhel a ngai a ni. Rei lo tê-ah lo kal tûra chu a lo kal dâwn, a muang lo vang. Rin vânga thiam ka chantîr chu a nung ang, a hnungtawlh erawh chuan ka rilruin amahah lâwmna rêng a nei lo vang. Keini zawng boral tûra tawlh kîr thei kan ni tawh lo va, nunna hum tûra rinna chelh tlattute kan ni zâwk e. Rinna hi kan beiseite hriat chianna, thil kan hmuh lohte hriatfiahna a ni. Rinna thu-ah hian upate kha an fakawm a ni. Khawvêl hi Pathian thu-a siam a nih leh, lang lo aṭangin hmuh theihte hi a lo awm ta tih rinnain kan hmu a ni. Abela chuan rinnain Kaina inthawina hlan aia hlu Pathian hnênah a hlân a, a thilhlan chu a lo pawm a, Pathian hmuha mi dik nih a hlawh ta a. Thi tawh mah se rinna avângin thu a la sawi ta zêl a ni. Enoka chu rinna avângin thihna tem lova lâk bo a ni a. Pathianin a lâk bo avângin hmuh tûr a awm ta lo. Lâk bo a nih hma khân Pathian a tilâwm tih Lehkha Thu-in a sawi. Rinna lo chuan Pathian tihlâwm rual a ni lo. Tu pawh Pathian hnêna lo kal chuan Pathian chu a awm ngei a, amah zawngtute tihlawhtlingtu a ni tih an ring tûr a ni. Nova chuan thil lo thleng tûr chungchânga hrilhlâwkna a dawn chu a ngai pawimawh êm êm a, rinnain an chhûngkaw him nân lawng a tu a. Chu chuan khawvêl thiam loh a chantîr a, rinna avânga thiam chantîr a lo ni ta. Abrahama chuan a rochun tûr rama kal tûra Pathian kohna chu rinnain a zâwm a, a kalna lam tûr pawh hre lovin a thawk chhuak a. Ram tiamah chuan, mi rama châm ang maiin, rinnain a châm ta reng a, thutiam thuhmun a dawnpui tûr, Isaka leh Jakoba nên, puan inah an khawsa a. Pathian ruahman leh din, lungphûm nghet tak nei khawpui chu Abrahama hian a nghâk ta reng a. Sari ngei pawh a ching a, upa lutuk tawh mah se Abrahama chuan rinnain chi thlah theihna a dawng a, thutiam chu a ring tlat a. Tichuan, thi ang mai ni tawh mah se he mi pakhat aṭang hian chi thlah, vâna arsi anga tam, tuifinriat kama ṭiau chhiar sên loh zât an lo chhuak ta a ni. Hêngho hi rinna neiin an thi a, thil tiam chu an chang rih lo na a, hla tak aṭangin an lo hmu phâk a, an hlut êm êm a. Leiah hian mikhual leh zin châm mai an ni tih an inhria. Chutiang mai an nih hriate chuan mahni ram hlun tûr chu an zawng zâwk tih an tilang. An chhuahsan ram kha lungkham ni se kîr lehna hun remchâng an hmu thei ngei ang. Ram ṭha lehzual, vâna awm chu an ngai zâwk a ni. Tichuan, Pathian pawhin an Pathian nih a zak lo va, an tân khua lam a lo buatsaih tawh a ni. Abrahama chuan, fiaha a awm lai khân a fapa neih chhun Isaka chu rinnain inthawi nân a hlân a. Thutiam dawngtu a ni a, “Isaka-ah hian i thlahte chhui an ni ang,” tih ni mah se, Pathian chuan mitthi pawh a kai tho thei ang tih ringin a hlân ta a, thi hnu dam leh ang maiin a hmu kîr leh ta ngei rêng a. Rinnain Isaka chuan thil lo la awm tûrahte Jakoba leh Esauva mal a sâwm a. Jakoba chuan a thih hma khân Josefa fapate chu rinnain mal a sâwm ve ve a, a tiang rinchhana kûnin Pathian chibai a bûk a. Josefa chuan a thih a lo hnaih khân Aigupta ram ata Israel thlahte an lo chhuah tûr thu sawiin, rinnain a ruang phûm dân tûr a hrilh a. Mosia a pian khân nau hmêlṭha tak a ni tih an hmuhin, a nu leh pain thla thum chhûng rinnain an thukru a, lal thupêk pawh an hlau lo. Mosia chuan, a lo puitlin hnu khân, Farawa fanua fapaa vuah a duh lo va, rei lo te atâna sual nawmna chen ai chuan, Pathian mite nêna tihduhdahna tuar rinnain a thlang ta zâwk a. Aigupta ram hausakna zawng zawng ai chuan Krista an hmusitna chu ro hlu zâwkah a ngai a, lâwmman a dawn tûr chu a thlîr tlat a: Lal thinur pawh hlau lovin Aigupta ram chu rinnain a chhuahsan a, Hmuhtheihlohva chu a hmuh avângin chhel takin a tuar a. Rinnain Kalhlên Kût a din a, Tiboraltua khân an fa tîrte a khawih loh nân kawngka biangah thisen a thehtîr a. Rinnain Tuipui Senah khân leichâra kal ang maiin an kal kai a. Aigupta miten kai ve an tum khân an tla hlum ta vek si a. Rinnain Jeriko kulh chu ni sarih an hual a, a chim ta a. Nawhchizuar Rahabi chuan rinnain enthlatute kha lâwm takin a lo thleng a, ring lotute zîngah a boral ve ta lo. Ka la sawi zêl dâwn em ni? Gideona te, Baraka te, Samsona te, Jeftha te, Davida te, Samuela te leh zâwlneite chanchin sawi dâwn ila hunin mi daih dâwn si lo. Chûngte chuan rinnain ram te an la a, thil dik an ti a, thiltiam te an dawng. Sakeibaknei khâ te an tihchihsak a, meialh hluah hluahte an timit a, khandaiha thah an pumpelh a, chak lo tê ni mah se tihchak an ni a, indonaah chak tak an ni a, hmêlma kulh an tichim a. Hmeichhiaten an chhûngte thi lo nung leh an lo lâwm a, a ṭhenin tihduhdah an tuar a, thawhlehna nun hlun an neih theih nân chhan chhuah pawh an duh lo. Ṭhenkhatin tihnawmnah leh vuak an tuar a, a ṭhen khaidiata hlina tân ina khung an ni a. Ṭhenkhat lunga den an ni a, ṭhenkhat thingzainaa zai bun an ni a, a ṭhen berâm leh kêl vun sinin an vâkvai a, tihduhdahin rethei takin hrehawm an tuar a. Chûng mite tân chuan khawvêl hi awmna tlâk a ni lo, thlalêrah te, tlângah te, pûkah te, khuarkhurumah te an vâk an vâk ṭhîn. Chûng zawng zawng chuan an rinna avângin fak lo hlawh tawh mah se, thil tiam chu an chang lo va. Pathian chuan kan tân thil ṭha lehzual a lo buatsaih tawh a, keini leh anni a ruala tihfamkima kan awm theihna tûrin a lo rêl a ni. Chutichuan, chhûmpui nasa tak ang thlîrtuten min hual vêl avângin, min tihnawk thei apiang leh sual min tibuai ṭhînte chu hlîpin, kan hmaa intlânsiaknaah hian chhel takin i tlân zêl ang u. Isua, kan rinna innghahna bul leh tifamkimtu chu i en tlat ang u. Ani pawhin a hmaa lâwmman awm avâng chuan, mualphona chu ngainêpin krawsah chhel takin a tuar a, Pathian lalṭhutthlêng ding lamah chuan a han ṭhu ta a ni. Chutianga mi sualten an dodâlna zawng zawng a tuar chhuah dânte kha ngaihtuah ula; tichuan, in beidawng lo vang a, in chau dâwn lo nia. Sual dovin thisen chhuak khawpin in la ṭang lo ve. Fate anga zilhna che u thu kha in theihnghilh ta em ni? “Ka fa, Lalpa thununna chu ngainêp suh la, A zilhhauva i awmin hnual hek suh. Lalpa chuan a hmangaih chu a thunun ṭhîn a, Fa a lawm apiang chu a vaw ṭhîn,” tih a nih kha. Thununna chu tuar hrâm hrâm rawh u, fate chunga tih angin Pathianin in chungah a ti a nih hi. Pa thunun loh fa tu nge awm ngai le? Faten an hlawh ṭhin Pa thununna chu in hlawh ve loh chuan, fa tak ni lovin sâwn in ni ang asin. Min thununtu pa kan nei ṭheuh va, kan zah êm êm si a. Kan nunna tûrin thlarau lama Pa thununna hnuaiah kan kûn lehzual tûr a ni dâwn lâwm ni? Kan paten ṭha an tih angin rei lo tê chu min thunun ṭhîn ngei tak a, ani erawh chuan a thianghlimna kan chan ve theih nân, kan ṭhatna tûrin min thunun zâwk ṭhîn a ni. Thununna rêng rêng hi tuar lai chuan thil lâwmawmah a ngaih theih loh va, hrehawm tak a ni; mahse, insawizawi hnuah chuan rah thlamuanawm tak a chhuah a, mi a siam ṭha ṭhîn. Chutichuan, in kut awm mai maite hna thawhtîr ula, in khûp zâwi tawhte chu tichak leh ula, kebai sa chu pelhsawlh lova a dam zâwk theih nân in kawngte timâm rawh u. Mi zawng zawng nêna inremna leh thianghlimna ûm rawh u; chumi tel lo chuan tû man Lalpa an hmu thei lo vang. Pathian khawngaihna tû man an tlûksan loh nân te, in zîngah mi tibuai leh tibawlhhlawh thei rilru chhia a lo chhuah loh nân te fîmkhur ula; inngaih chîng te, Esauva anga mi puithu lote tu mah in awm loh nân fîmkhur bawk rawh u. Esauva chuan a fa tîr nihna chu chaw vawi khat eiah a hralh kha. Chumi hnu chuan a malsâwmna dawn tûr chu a duh leh pawhin hnâwlin a awm ta a, mittui nên ngên mah se tihdanglamna hun a awm tawh lo tih in hriat kha. In tlâng thlen hi Sinai tlâng ang a ni lo ve; Sinai tlâng zawng khawih theih a ni a, chu tlâng chu meialh chhuahna, thim chhah mupin a khuh, thlipui tlehna, tawtawrâwt rîk ruai ruaina, au thâwm nasa tak awmna a ni. Chu aw hriate chuan thu dang sawi zêl lo tûrin an ngên a. “Sa pawhin tlâng chu a khawih chuan lunga den hlum tûr a ni,” tih thupêk chu an zo lo va. A hlauhawm êm avângin Mosia pawhin “Hlauvin ka khûr,” a tih hial kha. Tûnah zawng Zion tlâng Pathian nung khawpui, vân Jerusalem-ah, vântirhkoh sâng tam tak te, fa tîr kohhran, vâna hming chuang te, mi tin rorêlsaktu Pathian leh tihfamkim tawh mi fel thlarau te inkhâwmpuina hmaah in ding ta a, Abela thisen aia ṭha zâwka thu sawi thei thisen thehtu Isua, thuthlung thar palai hnên in lo thleng ta a nih hi. Thu rawn sawitu hi in lo hnar hlauh dah ang e, fîmkhur rawh u. Leia an hnêna thu sawitu lo hnarte mah khân hrem an pumpelh si loh chuan, vân aṭanga thu rawn sawitu kan lo hawisan hlauh chuan hrem kan pumpelh lo lehzual ang. Chutih lai chuan a aw khân lei a nghawr nghîng a, tûnah zawng, “Vawi khat chu lei mai ni lovin, vân pawh ka tinghîng leh dâwn,” tiin a tiam a ni. “Vawi khat chu” tih hi thilsiamte chu tihnghîna sawn bo an ni ang a, tihnghîn theih lohte chauh an awm reng dâwn tihna a ni. Tichuan, ram tihnghîn theih rual loh kan chan avângin i lâwm ang u, zah tak leh ṭih tak chungin a lâwm zâwngin Pathian rawng i bâwl ang u. Kan Pathian hi mi kâng ral thei mei a ni si a. Unau inhmangaihna hi uar zêl rawh u. Mikhual chungah ṭhat chuh ula, chutiang tiin ṭhenkhatten hre lovin vântirhkohte an thleng asin. Lung in tângte chu tâng ve angin hre reng ula, hrehawm tuarte pawh tisaa awm ve bawk in nih avângin hre reng rawh u. Inneih hi mi zawng zawngin chawimawi tûr a ni a, nupa chu rinawm tawn rawh se. Inngaite leh uirete chu Pathianin a ngaihtuah dâwn si a. Sum ngaina mi ni lo ula, in thil neih tâwkah lungawi rawh u. Amah ngeiin, “Engtikah mah ka thlahthlam lo vang che a, kal pawh ka kalsan tawp lo vang che,” a ti si a. Chuvângin, “Lalpa chu mi ṭanpuitu a ni a, ka hlau lo vang, Mihringin eng nge min tih theih ang?” kan ti ngam a ni. In hotute, Pathian thu lo hrilhtu che u chu hre reng ula, an lo khawsak dân ngun taka ngaihtuahin an rin dân zir rawh u. Isua Krista chu niminah nên, vawiinah nên, kumkhua pawhin a pângngai reng a ni. Zirtîrna chi dang dang leh mak tak tak hruai bovin awm suh ula, Pathian khawngaihna, chhûng lam nun min tichak theitu dawn hi, ei leh in dân kawnga khermei ai chuan a ṭha zâwk a, chutianga khermeite chuan an sâwtpui chuang si lo. Tempula rawngbâwltuten keini maichâmah chuan an ei ve a thiang lo. Puithiam lalberin ran thisen chu sual thawi nâna hlan tûrin Hmun Thianghlim Berah a luhpui a; mahse, ran ruangte chu kulh pâwnah an hâl ṭhîn. Chuvângin, Isua pawhin, ama thisen ngeia mite a tihthianghlim theih nân khawpui pâwnah a lo tuar ta a ni. Chutichuan, amah an hmuhsitna chu phurin, a hnênah kulh pâwnah i kal chhuak ang u. Leiah hian kan tân khaw hlun a awm lo va, khaw lo la awm tûr kan zawng zâwk a ni. Chutichuan, ama zâra fakna inthawina chu Pathian hnênah i hlân fo vang u, a hming kan ṭan apiangin fakna inthawina chu kan hlân ṭhîn a ni si a. Nimahsela, thil ṭha tih leh inṭanpui tawn hi theihnghilh suh u, chu chu Pathian lâwmzâwng inthawina chu a ni. In hotute thu awih ula, an thu thuin awm rawh u. Mutmu pawh tuah thei lovin in thlarau nun an vênsak che u a, Pathian hnêna in chungchâng sawitu tûr an ni. An thu in awih chuan hlim takin an thawk ang a, in awih loh chuan hrehawm ti takin an thawk ang, chu chu in tân a sâwt hek lo vang, Mi ṭawngṭaisak fo rawh u; eng lai pawhin thil ṭha tih kan duh avângin chhia leh ṭha hriatna thiang tak kan nei tih kan inhria. In hnênah Pathianin mi tirh kîr leh thuai theih nân min ṭawngṭaisak tûrin ka ngên chiam a che u. Berâmpu ropui, kan Lalpa Isua chu mitthi zîng ata hruai chhuaktu remna Pathian chuan, chatuan thuthlunna thisen avâng chuan a duhzâwng ti thei tûrin thil ṭha tinrêngin thuam famkim che u sela, Isua Krista zârah a lâwmzâwng ang taka awm tûrin min siam sela, Krista hnênah chuan chatuanin ropuina awm rawh se. Amen. Unaute u, he fuihna thu hi ngai thei hrâm hrâm tûrin ka ngên a che u, ka lehkhathawn che u hi tawi tê chauh a nih hi. Kan unaupa Timothea kha lung in ata an chhuah ta tih lo hre rawh u, a lo thlen hman chuan ka rualin ka rawn hruai ang. In hotu zawng zawng leh mi thianghlim zawng zawng kha chibai mi bûksak ang che u. Itali rama mite hian chibai an bûk a che u. In zaa hnênah khawngaihna awm rawh se. Pathian leh Lalpa Isua Krista bawih Jakoba hian, hnam sâwm leh hnam hnih khawvêla pêm darhte chu chibai ka bûk e. Ka unaute u, fiahna tinrêng in tawh hunin thil lâwmawmah ngai vek rawh u. In rinna fiaha a awm hian tuarchhel in zir a ni tih in hre si a. Chhel taka tuarna hian, tlin lohna laite siam ṭhain mi a tipuitling a, a tifamkim ṭhîn. In zîngah tu pawhin finna a tlâkchham chuan, mi zawng zawng hnêna hau lova phal taka pe ṭhîntu Pathian chu dîl rawh se, pêk a ni ang. Amaherawhchu, rinna neiin, ringhlel hauh lovin dîl rawh se; ringhleltu chu thliin tuifinriat a chhêma a tihfâwn ang hi a ni si a. Unau rethei tak chu chawisâna a awmin lâwm sela, hausa pawh tihtlâwma a awmin lâwm bawk rawh se, hnim pâr angin a hausakna chu a ral mai dâwn si a. Ni a lo chhuak a, thli lum a lo tlehin hnim chu a tivuai a, a pâr chu a tla a, a mawina a lo chuai ṭhîn. Chutiangin mi hausa pawh a sum buaipui chungin a boral dâwn a ni. Fiahna tâwka ding nghet tlat chu a nihlawh e, fiaha a awm hnuin Lalpan amah hmangaihtute pêk a tiam, chawimawina lukhum, nunna chu, a chang dâwn si a. Tu man thlêmna an tawhin, “Pathianin min thlêm alâwm maw le,” ti suh se. Pathian chu sual tûra thlêm rual a ni lo, amah lahin mi a thlêm ngai bawk hek lo. Mi tin hi mahni châkna suala thlêm an ni ṭheuh zâwk a, chu chuan a hîpin a hruai bo ṭhîn a ni. Chu châkna chuan no a pai a, sual a hring a, a lo puitlin chuan thihna a hring ṭhîn. Ka unau duh takte u, bumin awm suh u. Thilpêk ṭha tinrêng leh thilpêk famkim tawh phawt chu chung lam aṭanga lo kal, êng siamtu Pa hnên ata lo chhuak a ni. Amah chu a danglam ngai lo va, inher danglamin vânglai leh mang lai a nei lo va, thimah min awmtîr ngai lo. A thilsiamte zînga rah hmasa atân ama duh ang takin thutakah min hring a ni. Ka unau duh takte u, hêng hi hre rawh u. Mi tinin ngaihthlâk lam uar sela, sawi lam chuh lovin dawh thei rawh se; mihring thinurna hi Pathian felna tihlanna kawng a ni si lo. Chuvângin, thil tenawm chi tin leh sual tinrêng paih bo ula, in thinlunga Pathian thu tuh, chhandam thei che u chu, thuhnuairawlh takin pawm rawh u. Thil tih awm si lova thu ngaihthlâk ngawt tâwka ngaiin mahni inbum hek suh u. Tu pawh thu ngaithlatu ni-a zâwm si lo chu, darthlalanga mahni hmêl entu ang a ni. Ngun takin a inen a, a kal sawn hnu chuan eng ang hmêl pu nge a nih a theihnghilh leh mai si a. Amaherawhchu, tu pawh dân famkim, min tizalêntu chu bih nguna, chutianga awm renga, ngaithlaa, theihnghilh leh mai lova, a zawma zâwmtu ngei chu a thiltih apiangah a hmuingîl ang. Tu pawh sakhaw mi tak nia inngaia, a lei vêng hneh si lo chu mahni inbum a ni a, a sakhua chu engmahlo mai a ni. Kan Pa Pathian mit hmuha sakhaw biak dân thianghlim leh sual tel lo chu hei hi a ni: fahrah leh hmeithaite an hrehawm laia kana, khawvêl bawlhhlawh kai lova invawn ṭhat hi. Ka unaute u, kan Lalpa ropui tak Isua Krista ringtute chuan hleih nei suh u. In sunagog-ah mi rangkachak zungbun buna kawr ṭha tak ha lo lût sela, mi rethei kawr chhe tak ha lo lût bawk sela; kawr ṭha ha chu in lo ngaihsaka, “Nang chu ṭhutna ṭhaah hian ṭhu rawh,” in tiha, mi rethei hnênah chuan, “Nang chu saw tah sâwn ding rawh,” emaw, “Ka ke bul chhuatah hian ṭhu rawh,” emaw in tih si chuan, hleih in nei a, in thlîr dân rilru a sual hle a ni lâwm ni? Ka unau duh takte u, ngaithla teh u, khawvêl ngaiha mi retheite hi rinnaa hausa tûr leh, amah hmangaihtute hnêna a ram tiam chang atân Pathianin a thlang lo vem ni? Nangni zawngin mi retheite chu in zah lo va. Mi hausate hi nangmahni hnehchhiahtute leh rorêlna ina hnûk lût ṭhîntu che u an ni lâwm ni? Hming duhawm tak in put chu sawichhetute an ni lâwm ni? “Nangmah i inhmangaih angin i vêngte i hmangaih tûr a ni,” tih Lehkha Thua chuang Dân ropui ber hi in zawm chuan in ti ṭha e; Hleih in neih erawh chuan thil sual in ti a ni e, Dân bawhchhetute in ni. Tu pawhin Dân zâwm vek mah se, pakhat pawh a bawhchhiat si chuan a zavaia bawhchhia a ni. “Uire suh,” titu chuan, “Tual that suh,” a ti bawk si a; uire lo mah la, tual i thah si chuan Dân bawhchhia i ni tho mai. Tichuan, Dân, min zalêntîrtu hmanga rêlsak tûr kan ni tih inhriain thu sawi ula, thil ti bawk rawh u. Khawngaihna tel lova thil titu chu khawngaihna tel lova rêlsak a ni ang, mi khawngaih thei erawh chuan rorêlna hlauh tûr a nei lo. Ka unaute u, miin, “Rinna ka nei,” ti sela, a thiltihah tilang si lo sela, eng nge a sâwtna? Chutiang rinna chuan a chhandam thei ang em? Unaupa emaw, farnu emaw saruak leh rilṭâmin awm sela, in zînga tuin emaw, “Thlamuang takin kal ta la lum tak leh puar takin awm ang che,” ti sela, a taksa tâna mamawh chu a pêk si loh chuan eng nge a sâwtna? Chutiang bawkin thil tih tel lova rinna chauh hi chuan awmzia a nei lo va ni. “A ṭhenin an ring a, a ṭhenin thil an ti a ni mai alâwm,” tia ṭang an awm thei e. A nih leh, thil tiha tilang si lova rinna i neih theih dân min entîr ta che, keiin rinna ka nei tih ka thiltihin ka entîr ang che. Pathian pakhat chauh a awm tih i ring maw? I ti ṭha e, ramhuaite pawhin chu chu an ring a, an khûr ṭhîn asin. Mi â pa, rinna hi thiltih tel lo chuan eng mah a ni lo tih i hre duh maw? Min thlahtu Abrahama kha a fapa Isaka, maichâma a hlan lai khân, a thiltih avânga thiam chantîr a ni lâwm ni? A rinna leh a thiltih chu a ṭang kawp a, a thiltih chuan a rinna chu a tifamkim ta tih i hria e. Lehkha Thu, “Abrahaman Pathian a ring a, a rin avâng chuan thiam changah pawm a ni ta,” tih chu a thleng a, Pathian ṭhiana vuah a ni ta a. Miin thiltih avângin thiam an chang a, rinna avâng chauh chuan a ni lo tih in hre ta. Chutiang chuan Rahabi, nawhchizuar pawh khân, mi tirhte chu a lo lâwm a, kawng dangah a hâwntîr a, a thiltih avâng khân thiam a chang a ni lâwm ni? Taksa hi thlarau tel lo chuan thi a ni angin, thil tih tel lo chuan rinna pawh hi thi a ni. Ka unaute u, zirtîrtu nih tum vek kher suh u, zirtîrtute hi mi dangte aia khirh zâwka rorêlsak kan la ni dâwn tih in hre si a. Kan za-in thil tam tak kan tisual fo ṭhîn. Tu pawh a thu sawia tisual ngai lo mi chu mi puitling a ni a, chutiang mi chuan an taksa pum pawh an thunun thei ṭhîn. Kan thu awihtîr tûrin sakawr kâah thîrbarh kan barh a, an taksa pum pawh kan duhnaah kan hertîr ṭhîn. Lawngte pawh lian hle mah se, thli na takin a chhêm kal lai pawhin a khalhtuin a duhna lam lamah a tihherna tê tak têin a kaltîr thei a ni. Chutiang bawkin lei pawh hi taksa pêng tê tak tê a ni na a, uang thei tak a ni. Mei si tê tak têin ramngaw zau pui a tikâng te hi ngaihtuah teh u. Lei pawh hi mei ang a ni a, khawlohna tinrênga khat, kan taksaa tel, kan taksa nun tibawlhhlawhtu a ni a, kan khawsak dân zawng zawng hremhmun meia tihrehawmtu a ni. Ramsa leh sava tinrêng te, rannung leh sangha tinrêng te hi khawi ngam theih an ni a, mihringin an khawi ngam bawk ṭhîn. Lei erawh hi chu tu man an khawi ngam thei lo, khuahkhirh theih loh sual, thihna tûra khat a ni. Chu chuan kan Pa, Lalpa chu kan fak a, kan mihringpui, Pathian anpuia siamte ânchhia kan lawh bawk a. Kâ pakhat aṭangin fakna leh ânchhia a chhuak ṭhîn. Ka unaute u, chutiang tûr a ni lo ve. Tui hna pakhat aṭangin tui tui leh tui lo a chhuak ngai em ni? Ka unaute u, theipui kûngah oliv a rah ngai em ni? Grep hruiah pawh theipui a rah thei em ni? Chi khur aṭangin zo tui thiang a lo chhuak thei hek lo. In zîngah finna leh hriatthiamna nei an awm em? Chêt dân mawi leh thil ṭha tihin thiam tak leh thuhnuairawlh takin lantîr rawh se. In thinlungah îtsîkna thûk tak leh mahni hmasialna in neih rûk si chuan, thu dik kalha in finna uanpuiin dâwt sawi suh u. Chutiang finna chu chung lam aṭanga chhuak a ni lo va, ramhuai laka chhuak a ni zâwk, a khawvêl a, a thlarau lo va ni. Îtsîkna leh mahni hmasialna awmnaah chuan buaina leh sualna chi tinrêng a awm ṭhîn. Chung lam aṭanga finna lo chhuak chu a hmasa berah a thianghlim a, a dawtah a nêlawm a, a nunnêm a, a tihnuam bawk a; khawngaihnain a khat a, rah ṭha a chhuah ṭhîn; hleih a nei lo va, a vervêk hek lo. Remna siamtuten remna zawnga chi an tuh chu thil ṭhain a rah ṭhîn. In zînga indona leh insualna te hi khawi aṭanga lo chhuak nge ni? Nawmchen in duhna, in thinlung chhûnga indona thlen ṭhîntu aṭangin a ni lo vem ni? In awt a, in nei si lo; tual in thah phah a; in ît a, in nei thei bawk si lo, in inhauvin in insual phah a; Pathian hnênah in thlen loh avângin in duhzâwng chu in nei lo va; in dîl pawhin in dîl dân a dik loh avângin in hmu lo, nuamtâwl nân hman in tum si a. Uirete u, khawvêl ṭhian nih hi Pathian hmêlma nihna a ni tih in hre lo vem ni? Khawvêl ṭhian nih duh apiang chu Pathian hmêlmaah a insiam a ni. Lehkha Thu-in, “Keimahnia a thlarau a dah hian min duh hliah hliah zia a entîr a ni,” a tih hi a sawi satliah mai niin in ring em ni? Khawngaihna min vûr tam zâwk mah lehnghâl asin. Chuvângin, “Pathianin chapote a dodâl a, Inngaitlâwmte erawh chu a khawngaih ṭhîn,” tih a ni. Chuvângin, Pathian hnênah intulût ula, Diabola erawh chu dodâl rawh u; tichuan, a tlânsan ang che u. Pathian hnaih rawh u, ani pawhin a hnaih ang che u. Mi sualte u, in kutte sil fai ula, mi vervêkte u, in thinlung tithianghlim rawh u. Mangang ula, lungngai ula, ṭap rawh u; in nuih lungngaihah chang sela, in hlim nguiah chang rawh se. Lalpa hmaah chuan inngaitlâwm ula; tichuan, a chawisâng ang che u. Unaute u, insawichhe tawn suh u. Tu pawh a unau sawichhia emaw, dem emaw chuan Dân a sawichhia a, Dân a dem a ni; Dân i dem chuan, Dân zâwmtu i ni lo va, rorêltu i ni zâwk e. Dân petu leh rorêltu pakhat chauh a awm - chhandam theia tiboral theitu chu; nang, ṭhenawmte dem veitu chu tu nge maw i nih le? Ngaithla teh u, nangni, “Vawiinah nge, naktûkah nge ni ang, khawii khuaah emaw kan kal ang a, chutah chuan kum khat kan va sumdâwng ang a, kan hlêp ṭeuh mai ang,” titute u; naktûkah in nunna chu eng angin nge a awm dâwn tih pawh in hre si lo. Chhûm, rei lo tê lo langa, ral leh ta mai ang lek hi in ni si a. “Lalpan rem a tih chuan kan dam ang a, chumi khami chu kan ti ang,” in ti zâwk tûr a ni. Tûnah zawng chapo takin in uang a. Chutianga chapo taka awm chu sual a ni. Chutichuan, thil ṭha tih tûr hriaa ti si lo chu a sual a ni. Nangni mi hausate u, ngaithla teh u, in chunga hrehawm lo thleng tûr avâng hian ṭap ula, chiau vawng vawng rawh u. In hausaknate a chhe zo ta a, in puante pawh thîmin a ei zo ta. In rangkachak leh tangka pawh a lo tuiêk zo va, a tuiêk chu in thiam lohzia lantîrtu a ni ang a, meiin thil a kâng ral angin in tisa chu a ei zo vang. Ni hnuhnûngah hian ro in khâwlkhâwm a nih hi. Ngai teh u, in lova thawktute hlawh in hrênsakte chu an au va, buh sengtute au thâwm chu Engkim Lalpa beng a thleng ta. Leiah hian nuamsa tak leh nuamtâwlin in awm a, inthah rûnpui ni atâna inchâwm thau mai in nih hi. Mi Diktaka chu thiam loh in chantîr a, in that a, ani chuan a dodâl loh che u kha. Chutichuan, unaute u, Lalpa lo kal hma zawng chhel takin awm rawh u. Lo neituin a lo aṭanga rah seng tûr a nghah dân hi en rawh u; ruah hmasa leh ruah hnuhnûng a nghâk fan fan ṭhîn. Nangni pawh chhel takin awm ula, rilru nghet tak pu rawh u; Lalpa lo kal lehna a hnai tawh si a. Unaute u, thiam loh changa in awm loh nân innghirngho suh u. Ngai teh u, rorêltu chu kawngka bulah a awm reng tawh a ni. Unaute u, Lalpa hminga thu sawitu zâwlneiten tihduhdahna chhel taka an tuar dân kha entawn atân hmang rawh u. Chhel taka tuartu chu nihlawh kan ti a ni. Joba tuarchhelzia in hria a, Lalpan a tâwpa a tih dân kha in hria e. Lalpa chu zahngaihna leh khawngaihnain a khat si a. Ka unaute u, eng pawh ni se, chhia zawng chham suh u, vân emaw, lei emaw, thil dang chhâlin emaw chhia chham suh u, ‘ni’ in tih chu ‘ni’ ti mai ula, ‘ni lo’ in tih chu ‘ni lo’ ni mai rawh se; chutichuan, thiam lohvin in awm dâwn lo nia. In zîngah vânduaina tâwk an awm em? Ṭawngṭai rawh se. Hlim an awm em? Fak hla sa rawh se. In zîngah damlo an awm em? Kohhran upa kohtîr sela, annin Lalpa hminga hriak hnawihin a tân ṭawngṭai rawh se; ring tlata ṭawngṭaina chuan damlo chu a tidam ang a, Lalpan a kaitho vang; thil a lo tihsual tawh pawh ngaihdam a ni ang. Chutichuan, in sualte thupha chawi tawn ula, inṭawngṭaisak rawh u; tichuan, tihdamin in awm dâwn nia. Ṭhahnemngai taka mi dik ṭawngṭaina chuan thil ropui tak a thawk thei a ni. Elija chu keimahni anga mihring ve mai bawk a ni a, ruah sûr loh nân ṭhahnemngai takin a ṭawngṭai a, kum thum leh thla ruk chhûng lei chungah ruah a sûr ta lo va. A ṭawngṭai leh a, vân ata ruah a lo sûr a, lei aṭangin thlaite a lo thar leh ta a. Ka unaute u, in zînga tu emaw thutak aṭangin pêng bo sela, mi sual, a kawng bona ata hruai kîr lehtu chuan thihna ata a thlarau a chhandam ang a, sual tam tak a khuh bosak bawk ang tih hre rawh u. Petera, Isua Krista tirhkoh chuan, Pathian mi thlan, Ponto ram te, Galatia ram te, Kapadokia ram te, Asia ram te leh Bithunia rama awm darh tate chibai ka bûk e. Pa Pathian hriat lâwk anga thlan, Isua Krista thu awih tûr leh a thisena tlen fai tûra Thlarau Tihthianghlim in in ni a, in chungah khawngaihna leh remna tihpunin awm rawh se. Kan Lalpa Isua Krista Pathian leh Pa chu fakin awm rawh se. Isua Krista chu mitthi zîng ata kai thovin, beiseina nung nei tûrin a zahngaihna ropui tak chuan min tinung leh ta a. Ro chhe thei lo, hmêlhem lo leh chuai thei lo luah tûr kan ni ta, chu ro chu in tân vânah dah ṭhat diam a ni. Amah in rin avângin chhandamna buatsaih sa, hun hnuhnûnga tihlan a nih thlengin Pathian thiltihtheihna chuan a vawng ang che u. Fiahna tinrêng in tawha, in mangan pawhin hlim takin awm rawh u. In rinna fiahna tûr a ni, rangkachak chhe thei mah meia fiah a ni a, a aia hlu zâwk, in rinna chu, fiah tûr a ni asin; tichuan, Isua Krista a lo inlâr hunah fakna te, ropuina te, chawimawina te in hlawh ang. Amah hmu lo pawhin in hmangaih a, tûnah hian ani chu hmu rih lo mah ula in ring a, hlimna nasa tak, sawi hleih theih lohvin in khah hi; in rinna rah, in thlarau chhandamna chu, in hmuh mêk avângin. He chhandamna chungchâng hi zâwlneiten ngun taka zawngin an chhui a, in chunga Pathian thilpêk, khawngaihna lo thleng tûr chu an lo sawi lâwk a ni. Anmahnia Krista thlarau awm chuan, Krista tuarna leh a hnua chawimawia a awm tûr thu a hriat lâwktîr a, eng hunah nge a lo thlen anga, engtia lo thleng tûr nge tih hriat an tum ṭhin a ni. Anmahni tân ni lo, nangmahni tân rawng an bâwl a ni tih hriattîr an ni a. Vân aṭanga tirh, Thlarau Thianghlim ṭanpuia in hnêna Chanchin Ṭha hriltute khân chu chu an hrilh tâk che u kha. Chûng thil chu vântirhkohte pawhin bih an châk a ni. Chuvângin, rilru inpeih diamin inring reng ula, Isua Krista a lo lan huna khawngaihna a rawn kensak tûr che u chu beisei tlat rawh u. Fa thuawihte angin awm ula, tûn hma, in hriat loh laia in châknate ang khân awm suh u. A kotu che u a thianghlim angin nangni pawh in chêt dân zawng zawngah lo thianghlim zâwk rawh u. “Kei ka thianghlim si a, nangni pawh in thianghlim tûr a ni,” Lehkha Thu-in a ti si a. Hleih nei lova mi tin an thiltih ang zêla ngaihtuahsaktu chu Pa-ah in neih chuan, he leia in châm chhûng hian amah ṭih takin khawsa rawh u. In thlahtute aṭanga in dawn chhâwn, nun dân âtthlâk tak ata chu, thil chhe thei tangka leh rangkachaka tlan in ni lo va, Berâmno hmêlhem lo leh bawlhhlawh kai lo, Krista thisen hlua tlan in ni zâwk tih in hre si a. Ani chu leilung pian hmaa ruat lâwk a ni a, tûn hun hnuhnûngah hian in tân a lo lang ta a ni. Mitthi zîng ata kaithotu leh ropuina petu Pathian chu amah avângin in ring ta a; tichuan, Pathian chu in rinna leh beiseina innghahna ber a lo ni ta. Thutak in zawm avângin in rilru in tithianghlim a, unaute tihtakzetin in hmangaih ta a, thinlung takin inhmangaih tawn rawh u. Chi chhe thei lakah ni lovin, chi chhe thei lo Pathian chatuan thu nung laka piangthar in nih kha. ‘Mi zawng zawng hnim hring ang an ni, an ropuinate pawh hnim pâr ang a ni; Hnim chu a vuai a, a pâr chu a tla a, Lalpa thu erawh chu chatuanin a awm reng,” tih a ni. Chu ngei chu a ni Chanchin Ṭha an hrilh che u kha. Chutichuan, sual chi tinrêng bânsan rawh u, inbum te, vervêk te, îtsîk te, insawichhiat zawng zawng te bânsan ula; nausên piang hlim angin thlarau lam hnutetui eng mah pawlh loh chu châk rawh u, chutiang ring chuan in ṭhang lian thei ang a, chhandam in ni dâwn nia. “Lalpa ṭhatna chu tem teh rêng u,” tih ziak ang khân. Amah chu pan rawh u. Ani chu lung nung, mihringte hnâwl, Pathian thlan, hlu tak chu a ni. Tichuan, nangni pawh lung nung ang ni vein thlarau lam in atân rem khâwm ni ve rawh u. Chutah chuan Isua Krista zâra Pathian pawm tlâk, thlarau lam inthawina hlântu, puithiam thianghlim in lo ni ang. Lehkha Thu-in, “En teh, lung hlu tak ka thlan, A kil lungphûm chu Zion-ah ka dah ta, Amah ring chu tu mah an mualpho lo vang,” a ti si a. Nangni ringtute tân chuan lung hlu tak a ni, ring lote tân erawh chuan, “In satute lung duh loh, a kil lung pawimawh ber. Mite inchhuih tlûkna lung, Insut tlûkna lungpui chu,” a ni ve thung. Thu chu an awih loh avângin an tlu a, chutianga awm tûr rênga ruat an ni. Nangni zawng hnam thlan, Lalpa puithiam, hnam thianghlim, Pathian ta bîk, ama êng mak taka lût tûra thim ata ko chhuaktu che u thiltih ropui puang tûr in ni. Pathian mi in la ni ngai lo va, Tûnah zawng in nih tâk hi: Khawngaih in la hlawh ngai lo va, Tûnah zawng in hlawh tâk hi. Duh takte u, khual zin, mi rama awm in nih avângin, thlarau do ṭhîn tisa châknate lakah chuan inthiarfihlîm tûrin ka ngên a che u. Jentail-te zîngah mawi takin khawsa ula, thil sual tia an puh che u pawhin in thil tih ṭhatte anmahni ngeiin an hmu ang a, Pathianin a tlawh hunah che u amah an chawimawi thei ang. Lalpa avângin mihring dâna thuneitute hnênah intulût rawh u; thuneitu sâng ber, lalber thu chu awih ula, thil sual titute hrema, thil ṭha titute chawimawi tûra a ruat ramawptute thu pawh awih rawh u. Eng mah hre lote thu sawi âtthlâk chu thil ṭha tiha tidang tûrin Pathianin a duh a che u. Zalêna awm tûrin, in zalênna chu sual thup nâna hmang lova, Pathian bawihte anga awm zâwk tûrin a duh che u a ni. Mi zawng zawng zah ula, unaute hmangaih ula, Pathian ṭih ula, lalber chu chawimawi rawh u. Nangni chhiahhlawhte u, in pute thu awih ula, a ṭha leh a ngilneite chauh ni lovin, a ṭha lote pawh zah rawh u: Miin Pathian duh zâwng nia a hriat tlat avânga a tuar kher loh tûr hrehawm a tuar chuan Pathian lâwmzâwng a ni. In sual avânga in tuarin, chhel takin tuar mah ula in tân hmingṭhatna eng nge awm? Thil ṭha in tih pawha kut in tuar erawh chuan Pathian lâwmzâwng a ni. Hetianga awm tûr hian koh in ni, Krista pawh khân in tân a tuar a, a hniakhnung in zui theih nân entawn tûr a hnutchhiah che u kha. Ani chuan thil sual eng mah a ti lo va, a kâah bumna thu a chhuak hek lo. Hau a nih pawhin a hau lêt lo va, a tuar laiin a vau lêt hek lo, dik taka rorêl ṭhîntu hnênah chuan a inkawltîr zâwk a ni. Sual thihsana felna neia kan nun theih nân, amah ngeiin thingah khân a taksain kan sualte a phur a; a hliamte chuan tihdam in ni ta. Berâm angin kawng in bo tawh a, tûnah zawng in thlarau Vêngtu leh Hotu hnênah chuan in lo kîr leh tâk hi. Chutiang bawkin nangni nute u, in pasalte thu awih rawh u; chutichuan, an zîngah Pathian thu awih lo an awm pawhin, thu hrilh kher ngai lovin in chêt dân chuan a hneh mai ang, anmahni ngeiin ṭih tak chunga in chêt dân thianghlim chu an hmu dâwn si a. Pâwn lam incheina - sam chei lêrh te, rangkachak ṭhi awrh te, silhfên ṭha inbeltea inchei mawi tum lovin, thinlung aṭanga mize dik, rilru thuhnuairawlh leh nunnêm, inthuamna chhe thei lo chuan inchei zâwk rawh u, chu chu Pathian mit hmuhin a hlu êm êm a ni. Chutiang chuan hmasâng hmeichhe thianghlim, Pathiana beiseina nghatte kha, an pasalte thu awihnain an inchei ṭhîn a ni. Sari chuan Abrahama thu a awih a, “Ka Lalpa,” tia a ko ang khân; thil ṭha in tih chuan Sari fate in ni ang; hlauh tûr rêng in nei lo ve. Nangni pate u, chutiang bawkin nupa in nihnaah in nupuite dimdawi rawh u, chak lo zâwk an nih avâng leh Pathian khawngaihna thilpêk, nunna chu, chanpuitu che u an nih hriain zah thiam rawh u. Tichuan, in ṭawngṭaina dâltu eng mah a awm dâwn lo nia. A tâwp berah chuan, in za-in rilru hmun khat pu ula, inlainatin unau angin inhmangaih tawn ula, inkhawngaih tawnin thuhnuairawlh takin awm rawh u; sual sualin thungrûl suh ula, ânchhia pawh ânchhiaa thungrûl lovin, malsâwm hlauh zâwk rawh u; malsâwmna dawng tûrin asin Pathianin a koh che u. Lehkha Thu-in, “Dam thlahlela, hlim ni hmêl hmuh duh chuan Sual lakah a lei vêng ṭha sela, A hmui pawh bumna thu sawi lo tûrin vêng rawh se. Sual hawisanin thil ṭha ti rawh se, Remna zawngin ûm zêl rawh se. Lalpa mit chu mi felte chungah a fu a, An ṭawngṭaiin a beng a lo dawh ṭhîn. Thil ṭha lo titute chungah erawh chuan Lalpa hmêl chu a dur ṭhîn,” a ti a. Thil ṭha tih lama ṭhahnem in ngaih chuan tu nge in chungah thil ṭha lo ti ang? Thil dik in tih avânga in tuar chuan vânneihthlâkah ngai rawh u. Tu mah hlau suh ula, mangang hek suh u. Krista chu zah ula, in thinlungah lalah neih rawh u. In beisei zâwt apiang che u chhâng tûrin inpeih sa reng rawh u. Nimahsela, thuhnuairawlh leh hawihhâwm takin, chhia leh ṭha hriatna thiang tak neiin ti ang che u; tichuan, Kristaa in awm dân ṭha sawi hnâwmtute chu tihzahin an awm dâwn nia. Pathian remtiha tuar in nih rau rau chuan, thil sual tih avânga tuar ai chuan thil ṭha tih avânga tuar chu a ṭha zâwk. Krista pawh kan sualte avângin vawi khat a thi a, Pathian hnêna hruai theihna tûr che uin, mi dik chu mi dik lote tân a thi a ni. Tisaah tihhlum a ni a, thlarauvah erawh chuan tihnunin a awm. Ani chuan tân ina awm thlaraute hnênah thu a zuk hril a. Chûngte chu Nova lawng tuk chhûnga Pathianin dawhthei taka a nghah laia, awih duh lote thlarau kha an ni. Lawngah chuan, mi tlêm tê, pariat lek, tuia chhandam an ni. Chumi anpui baptisma hian, Isua Krista thawhlehna avângin tûnah a chhandam ta che u a ni; baptisma chu taksaa bawlhhlawh silfaina mai a ni lo, chhia leh ṭha hriatna thiang taka Pathian hnêna thu tiamna hi a ni zâwk. Isua Krista chu vânah kalin Pathian ding lamah a awm a, vântirhkohte thuneihna te, thiltihtheihna te a thuhnuaiah an awm ta. Kristan taksaa a tuar avângin nangni pawh chutiang rilru chu pu ve rawh u; tisaa tuar tawh chuan sual a bânsan ṭhîn; tisaa a dam chhûng chu mihring châknate ûm tawh lova Pathian duhzâwnga a awm tawh zâwk theih nân. Jentail-te duhzâwng tih nân, tûn hma hun in hman zozai kha a tâwk ta e; hurnaah te, taksa châknaah te, uain hehnaah te, zu hmun hlimnaah te, zu in honaah te, milem biakna tenawm takah te in inhman ṭhin kha. Tûnah an nawmsak bâwl anga in bâwl ve tâk loh avâng hian mak an ti a, an sawichhe ta che u a ni. Mi nung leh mitthite ngaihtuah tûra inpeih sa hnênah chuan an chanchin anmahniin an la sawi ang. Hemi avâng hian mitthite hnênah pawh Chanchin Ṭha hril a ni, mi dangte ang bawka an chungthu rêl a niha, Pathian hmaa thlarauva an nun theih nân. Thil zawng zawng tâwp hun chu a hnai ta a, in ṭawngṭai theih nân rilru fîm tak puin invawng fel rawh u. Thil dang zawng aiin thinlung taka inhmangaih tawn uar rawh u, hmangaihnain sual tam tak a khuh si a. Phunnawi lovin inmikhual tawn rawh u. Pathian khawngaihna thilpêk tam tak enkawltu ṭhate angin Thlarau lam thilpêk in dawn apiang chu rawng inbâwlsak tawn nân hmang rawh u. Tu pawhin thu an sawi chuan Pathian thu ngei sawi rawh se, rawngbâwltu pawhin Pathianin chakna a pêk angin bâwl rawh se; chutichuan, Isua Krista avângin Pathian chu engkimah chawimawiin a awm thei ang, ropuina leh thiltihtheihna chatuanin a ta a ni si a. Amen. Duh takte u, fiahna na tak in zînga lo thleng hi thil mak tak lo thleng taah ngai suh u. Krista tuarna ṭâwmpuitute in nih avângin lâwm zâwk ula, ropui taka a lo lan hun chuan hlim leh lâwmin in la khat dâwn a ni. Krista hminga hau in nih chuan in nihlawh e, thlarau ropui tak, Pathian thlarau chu, nangmahniah a chêng tihna a ni. In zîngah tu mahin tual thah avâng emaw, rûkrûk avâng emaw, thil sual tih avâng emaw, mi tibuaitu nih avângin emaw tuar suh se. Kristian in nih avânga tuar in nih chuan in zak tûr a ni lo, Krista hming in put avângin Pathian chawimawi zâwk rawh u. Rorêlna chu ṭan a hun ta a, Pathian chhûngte aṭangin ṭan a ni ang. Keimahniah ṭan a nih si chuan, Pathian Chanchin Ṭha thu awih lote chu engtin tak awm ang maw! Lehkha Thu-in, “Mi dikte mah chhandam hrâm an nih chuan, sakhaw ngaihsak lo mi sualte chu, engtin tak awm ang maw,” a tih ang khân. Chutichuan, Pathian remtih anga tuarte chuan thil ṭha ti zêlin an thlarau chu Siamtu rinawm tak hnênah kawltîr rawh se. In zînga kohhran upate chu, kei upa ve bawk, Krista tuarnate hmutu leh ropuina lo lang tûr chan ve beiseitu hian ka fuih e. In zînga Pathian berâmte chu enkawl ṭha rawh u, tihluih ngai lovin Pathian duh anga châk taka tiin, hlêp beisei vâng ni lovin, rawngbâwl duhna rilru puin enkawl rawh u. In hote chungah intilal suh ula, pâwlhote entawn tlâk ni zâwk rawh u. Tichuan, Berâm vêngtu Lalber a lo lan hunah chawimawina lukhum ropui chul thei lo chu in dawng ang. Chutiang bawkin nangni ṭhalaite u, upate thu awih rawh u. In za-in thuhnuairawlhnaa inthuamin rawng inbâwlsak rawh u. “Pathianin chapote a dodâl a, inngaitlâwmte erawh chu a khawngaih ṭhîn,” tih a ni si a. Chuvângin, a hun takah chawimawia in awm theih nân Pathian kut chak tak hnuaiah inphahhniam ula, in manganna zawng zawng ama chungah nghat vek rawh u; a ngaihtuah êm êm che u a ni. Ngaihven ula, fîmkhur rawh u; in hmêlma Diabola chu, sakeibaknei rûm ṭhîn angin ei tûr zawngin a phî ruai ṭhîn. Rinnaah hian ding nghet tlat ula, amah chu do rawh u. Khawvêl hmun danga in unaute pawhin chutiang bawk chu an tuar tih in hre si a. Rei lo tê in tuar hnuin, Kristaa a chatuan ropuina chang tûra kotu che u, khawngaihnaa khat Pathian chuan a rawn tungding ang che u a, siam ṭhaa tichakin a tinghet ang che u. Ama hnênah chuan thiltihtheihna kumkhuain awm rawh se. Amen. Unaupa, mi rinawm a ni tih ka hriat Silvana kutah hian he lehkha tawi tê hi ka rawn thawn che u a ni. Hei hi Pathian khawngaihna chu a ni tih hriattîr tûr che u leh chutah chuan ding nghet tlat tûra ka fuihna che u a ni. Babulon kohhran, nangmahni ang bawka thlan hian chibai an bûk a che u; ka fapa Marka pawhin a bûk a che u. Krista hmangaihnaa kut invuanin chibai inbûk rawh u. Nangni Kristaa awm zawng zawngte hnênah remna awm rawh se. Isua Krista bawih leh tirhkoh Simon Petera chuan, min chhandamtu Isua Krista zârah leh kan Pathian felna zârah rinna kan neih ang nei vete chibai ka bûk e. Pathian leh kan Lalpa Isua in hriatnaah khawngaihna leh remna in chungah tihpunin awm rawh se. A ropuina leh ṭhatna chang ve tûra min kotu kan hriat tâk avânga Pathian ṭiha kan nun theih nân, Pathian thiltihtheihna chuan kan mamawh engkim min pe ta. Tichuan, thilpêk a tiam, ropui tak leh hlu tak chu min pe ta a; chuvâng chuan, khawvêl sual châkna, min tichhe thei lak ata in chhuak a, Pathian zia in ṭâwmpui thei ta a ni. Hei vâng hian theihtâwp chhuahin, in rinnaah chuan ṭhatna telh ula, in ṭhatnaah chuan hriatna, in hriatnaah chuan mahni inthununna, mahni inthununnaah chuan chhelna, in chhelnaah chuan inserh thianghlimna, inserh thianghlimnaah chuan unaute lainatna, unaute in lainatnaah chuan hmangaihna belh rawh u. Chûng chu in neiha, a pun zêl chuan kan Lalpa Isua Krista in hriatnaah taima tak leh ṭangkai takah a siam ang che u. Chûng thil nei lote chu mitdel, khaw hawi tawi, an tûn hma sual sil faisak an ni tih theihnghilh tâte an ni. Tichuan, unaute u, a kohna leh a thlanna che u hi tilang tûrin theihtâwp chhuahin nghet takin ding rawh u; chutianga dingte chu eng lai mahin an tluchhe lo vang. Tichuan, kan Lalpa leh Chhandamtu Isua Krista chatuan ramah lâwm takin an luhtîr ang che u. Chuvângin, thutak in hriatah khân nghet takin awm tawh mah ula, hêng thu hi hriat nawntîr fo che u ka duh a ni. He taksa ka put chhûng hi chuan hriat nawntîr ṭhin che u hi ka tih tûrah ka ngai. Kan Lalpa Isua Kristan mi hrilh angin he ka taksa hi ka chhuahsan thuai tawh dâwn tih ka hria. Ka chhuahsan hnuah pawh, eng lai pawha hêng hi in hriat reng theihna kawng siamsak tûr che uin theihtâwp ka chhuah dâwn a ni. Kan Lalpa Isua Krista chu thiltihtheihna nên a lo kal leh tûr thu kan hrilh lai che u khân, thawnthu phuahchawp mai mai hrilh che u kan ni lo ve, a ropuina chu mit ngeia hmutute kan ni. Pa Pathian hnên ata chawimawina leh ropuina a dawn lai khân, Ropuibera hnên aṭangin âw a lo chhuak a, “Hei hi ka Fapa, ka Duhtaka chu a ni, a chungah ka lâwm êm êm a ni,” a rawn ti a. Chu âw, vân aṭanga lo chhuak chu, keini pawhin tlâng thianghlima a hnêna kan awm lai khân kan hre ve a ni. Zâwlneite thu lo puan tawh kha a dik ngei tih keini pawhin kan pawm nghet sauh va, nangni pawhin, Vârparh Arsi a lo lan hma chuan, khawvâr hma, zân thima khâwnvâr êng angin, chu thu chu in thinlungah êntuah hmang ula a ṭha ang. Lehkha Thu-a hrilhlâwkna thute hi mahni ngaih dân maia hrilh fiah tûr a ni lo tih hre hmasa phawt ula, hrilhlâwkna rêng rêng hi mihring thu-a chhuak a ni si lo va, Thlarau Thianghlim hruaiin Pathian hnên ata an sawi zâwk ṭhîn a ni. Kan mite zîngah zâwlnei der an awm ṭhîn ang khân nangni zîngah pawh zirtîrtu dik lo an lo awm dâwn; mi tichhe thei zirtîrna dik lo an rawn pu lût ru ang a; an Lalber, anmahni tlantu chu phatsanin mahni chhiatna rang takin an thlentîr ang. An awm dân tenawm tak chu miten an chîng ve ang a, anmahni avâng chuan thutak kawng hi sawichhiat a ni ang. Sum an hmuh theih nân duhâm takin an thu phuah chawp chuan sumdâwnna atân an hmang ang che u; nimahsela, an chunga rorêl tawh sa chu a awm mai mai lo vang, chhiatna chuan muhîl lovin a châng reng a ni. Vântirhkohten thil sual an tih lai khân Pathianin a zuah lo, hremhmunah a paih a, Rorêl Ni nghâk tûrin khuarkhurum thimah chuan an awm ta a ni. Hmânlai khawvêl pawh a zuah lo, khawvêl sual tak chunga tui a lêttîr pawh khân, Nova - felna thupuangtu leh mi dang serh leh sâng nei pasarih chauh a nih kha a chhan chhuah ni. Sodom leh Gomora khua pawh vaivutah a chantîr a, serh leh sâng nei lote a hrem dân tûr entîr nân a tichhe vek a nih kha. Lota, mi sualte awm dân pawiti êm êm ṭhîntu erawh chu a chhan chhuak a, chu mi ṭha tak chu an zînga khawsa ve ṭhîn a ni a, an thil sual tih a hmuh leh a hriatte chuan a thin a tina êm êm ṭhîn. Lalpa chuan amah ṭihtute chu tuarna laka chhan chhuah dân leh rorêl Ni a lo thlen hma pawha mi sual hrem dân a hria. An taksa châkna bawlhhlawh anga awmte leh Pathian thuneihna hmusittute lek phei chu hrem dân a hre lehzual. Hêng zirtîrtu dik lote hi an ât huai a, an chapo va, vân mi ropuite pawh khi sawichhiat an hlau lo. Anni aia chak leh thiltithei zâwk vântirhkohte pawhin, Lalpa hmaa hêng mi ropuite chungchâng hi an sawiin ṭawng chhia an hmang ngai lo. Mahse, hêngho hi ngaihtuahna nei lo, ramsa, mana tihhlum mai tûra lo piangte ang hi an ni, an hriatthiam loh apiang an sawichhia a, ramsa te anga tihhlum an ni dâwn. An sual man chu an tuar ang. Nilêng lênga nuamtâwl chîng mi an ni a, mi tenawm leh mi bawlhhlawh, in zînga inzep an ni a, in ruai ṭhehnaa an lo tel hian an bum che u a ni. An mitin uire tûr an melh reng a, sual tih an kham thei lo. Mi rilru nghet lote an bum a, duhâm dân an thiam hle, ânchhe dawng an ni. Kawng dik chu an pênsan a, an bo ta. Bosora fapa Balaama kawng an zawh ta. Ani chuan thil sual tih hlâwk berin a ring a; mahse, a bawhchhiatnaah chuan zilhhauvin a awm ta a, sabengtung ṭawng thei lo chu mihring angin a lo ṭawng a, zâwlneipa âtna chu tihtâwpsak a ni ta. Hêng mite hi tuikhur hna kang chat leh chhûm, thlipui len vêl mai mai ang chauh hi an ni, thim chhah mup chu an awm nân ruat a ni. Thu âtthlâk pâwr tak takin an sawi a, an khawvêl nun dân dik lo bânsan hlimte chu tisa châkna hmangin an bum a. Zalênna pêk an tiam a; mahse, anmahni pawh chu an thil chîn ṭha lo bawih an ni reng si a; tu pawh mai hi anmahni hnehtu bawih an ni ṭhîn. Kan Lalpa leh min chhandamtu Isua Krista hriatna avânga khawvêl sual kalsantute chu suala an inhnamhnawiha an tlûk leh chuan, a tîra an awm dân ai khân an awm dân hnuhnûng chu a chhe zâwk ṭhîn. An hnêna thupêk thianghlim hre tawh zeta hawisan leh site chuan felna kawng hi lo hre lo law law se an tân a ṭha zâwk tûr. An awm dân aṭang hian hêng thufing dikzia hi a lang chiang hle: “Ui chuan a luak a ei leh a,” tih leh “Vawkpui bual fai chu chirhdiakah a inbual leh a,” tihte hi. Duh takte u, vawi hnih lehkha ka rawn thawnna che u a ni ta. In hriat tawh sa hriat nawntîr che uin nangmahniah rilru thianghlim chawk harh tûrin vawi hnih ka han thawn che u a ni. Zâwlnei thianghlimte thu leh Lalpa leh Chhandamtu thupêk, in tirhkohten hmâna an hrilh che u kha, hre reng rawh u. Ni hnuhnûngah chuan hmusittute, mahni châkna ang zêla awmte an lo chhuak ang tih hre hmasa rawh u. Hmusit êm êmin, “Lo kal leh a tiam kha engtin nge ni ta? Min thlahtute an thi zo ta a, thilsiam ṭan tirh ata engkim a ngai rengin a la awm a ni lâwm ni?” an la ti ang. Hmânlaiin Pathian thu-a vânte khi siam a nih te, lei chu tui ata siam chhuah a nih te, tui leh tui inkâra dah a nih te, tuilêt lai khân khawvêl hlui chu, chu tui chuan a chîma a tihchhiatte kha an haider lui a. Sakhaw pawisa loho chungchâng rêl hun leh tihboral huna meia kâng ral tûrin tûna lei leh vân pawh hi Pathian thuin a khêk a ni. Duh takte u, hei hi theihnghilh suh u, Lalpa tân chuan ni khat hi kum sângkhat ang a ni a, kum sângkhat pawh hi ni khat ang a ni. Ṭhenkhat rin dân angin Lalpa hi a thutiam hlen kawngah a muang lo ve; in tân a dawhthei a nî zâwk; tû ma boral a duh lo va, mi zawng zawngin an sual an sima, a hnêna an kîr a duh vâng zâwk a ni. Lalpa Nî chu rûkru angin a lo thleng ngei dâwn. Chumi nî-ah chuan thâwm ring tak nên vân khi a boral ang a, vâna arsite khi a kâng ral vek ang; lei pawh a chhûnga thil awm zawng zawng nên a boral vek ang. Hêngte hi chutianga chhe vek tûr a nih si chuan nangniho kha mi eng ang tûr nge in nih? Pathian ni tiam nghâkhlel taka in thlîr reng lai hian mi thianghlim, Pathian tâna inpe mi in ni tûr a ni. Chumi ni-ah chuan vân khi a kâng ral ang a, arsite pawh an tuiral ang. Nimahsela, Pathian tiam, lei thar leh vân thar, a chhûnga dikna awmna chu kan nghâk a ni. Tichuan, duh takte u, hêng thil in nghah lai hian Pathian hmaa thianghlim leh sawisêlbova awm tûrin theihtâwp chhuah ula, amah nên inrem rawh u. Lalpa dawhtheihna hi chhandam in nih theihna hun remchângah ngai ula. Pathianin finna a pêk angin kan unaupa duh tak Paula pawhin hêng thu hi a ziak ṭhîn a ni. A thu ziak ṭhenkhat chu hriatthiam a har hle, eng mah zir lo leh mi nghet loten Lehkha Thu dang an ngai kawi ang bawkin an ngai kawi a, mahni chhiatna an thlen ṭhîn a. Duh takte u, nangni zawngin in hre tawh a, fîmkhur rawh u; chuti lo zawng pawisak nei loten an hruai bo vang che u a, in nghet ṭha lai in tlu hlauh dah ang e. Kan Lalpa leh chhandamtu Isua Krista hriatnaah te, khawngaihnaah te ṭhang lian zêl rawh u. A hnênah chuan tûn aṭanga chatuan thlengin ropuina awm rawh se. Amen. A tîr aṭanga awm, kan benga kan hriat, kan mita kan hmuh, ngun taka kan en, kuta kan khawih, nunna thu chu kan ziak a ni. Chu nunna chu a lo lang a, kan hmu ta a, kan puang a, Pa hnêna awm chatuan nunna kan hnêna lo lang ta chu kan hrilh che u a ni. Nangnin min pâwl ve theih nân kan hmuh leh kan hriat chu kan hrilh che u a, chu kan inpâwlna chu Pa leh Fapa Isua Krista nêna kan inpâwlna a ni si a. Kan lâwm a famkim theih nân hêng thu hi kan ziak a ni. Thuchah a hnên ata kan hriat kan hrilh chhâwn che u chu hei hi a ni: Pathian chu êng a ni a, amahah chuan thim rêng a awm lo tih hi. “Amah nên kan inpâwl,” kan tiha, thima kan awm si chuan dâwt kan sawi a, thutak kan zâwm lo va ni. Amah ênga a awm angin ênga kan awm ve erawh chuan, kan inpâwl ho va, A Fapa Isua thisenin kan sual zawng zawng min tlen faisak ṭhîn a ni. “Sual ka nei lo,” kan tih chuan mahni kan inbum a, thutak chu keimahniah a awm lo va ni. Kan sualte kan puan erawh chuan, ani chu a rinawmin a dik si a, kan sualte min ngaidamin kan dik lohna zawng zawng min tlen faisak dâwn a ni. “Thil sual ka ti lo,” kan tih chuan ani chu dawtheiah kan chantîr a, a thu pawh keimahniah a awm lo a ni. Fate u, thil sual in tih loh nân hêng thu hi in hnênah ka ziak a nih hi. Amaherawhchu, tu pawh lo sual ta sela, Pa hnêna min sawipuitu mi fel, Isua Krista chu kan nei. Ani chu kan sual ngaihdamna a ni, keimahni sual chauh ni lovin, khawvêla mi zawng zawng sual ngaihdamna pawh a ni. A thupêkte kan zawm chuan amah kan hria a ni tih kan chiang a, “Amah chu ka hria,” tia a thupêkte zâwm si lo chu mi dawthei a ni a, amahah thutak a awm lo. Tu pawhin a thu a zawm chuan Pathian chu a hmangaih takzet a ni. Amahah kan awm ngei tih hriat chianna tûr chu hei hi a ni: “Amahah ka awm reng, titu chu Krista nun angin a nung ve tûr a ni,” tih hi. Duh takte u, in hnênah thupêk thar ka han ziak a ni lo ve, thupêk hlui, a tîr ata in neih kha ka ziak a ni zâwk e. Thupêk hlui chu thu, in hriat tawh sa kha a ni. In hnêna thupêk ka ziak hi a thar a nihna a awm bawk, amahah leh nangmahniah a dikzia a lang; thim chu a kiang mêk a, êng tak tak a lo ên tâk avâng hian. Ênga awm intia, a unau haw si chu tûn thlengin thimah a la awm reng a ni. Mahni unau hmangaihtu chu êngah a awm reng a, a tân tlûk a hlauhawm lo. Mahni unau hawtu erawh chu thimah a awm a, thimah a vâk vêl a, thimin a mit a tihdel tawh avângin a kalna pawh a hre ṭhîn lo va ni. Fate u, ama hming avânga in sualte ngaihdam a nih tâk avângin in hnênah ka ziak a nih hi. Pate u, a tîr ata awm renga chu in hriat tâk avângin in hnênah ka ziak a nih hi. Tlangvâlte u, mi sual chu in ngam tâk avângin in hnênah ka ziak a nih hi. Naute u, Pa chu in hriat tâk avângin in hnênah ka ziak a ni. Pate u, a tîr ata awm renga chu in hriat tâk avângin in hnênah ka ziak a ni. Tlangvâlte u, in chak a, Pathian thu nangmahniah a awm avânga mi sual in ngam tâk avângin in hnênah ka ziak a ni. Khawvêl hi hmangaih suh ula, khawvêla thil awmte pawh hmangaih hek suh u. Tu pawhin khawvêl hi a hmangaih chuan, Pa chu a hmangaih lo va ni; khawvêla thil awm zawng zawng - tisa châkna te, mit châkna te, mahni sum uanpuina te hi Pa hnên aṭanga chhuak a ni lo va, khawvêl aṭanga chhuak a ni zâwk e. Khawvêl hi a châknate chawpin a boral mêk a ni. Pathian duh zâwng titu erawh chu kum khuain a awm reng ang. Naute u, hun hnuhnûng a lo ni ta a, Krista dodâltu a lo kal dâwn tih in hriat ang khân, tûnah hian Krista dodâltu tam tak an lo chhuak ta; chuvâng chuan, hun hnuhnûng chu a ni tih kan hria. Anni chu kan zîng ata an chhuak a, kan mi leh sa tak tak an ni lo rêng a, ni se kan zîngah an awm reng tûr. Mahse, an za-in kan mi leh sa an ni vek lo tih a lan chian nân an chhuak ta a ni. Nangni zawng, Mi Thianghlima chuan hriak a thih che u a, engkim in hria a ni. Thutak chu in hriat loh avânga in hnêna ziak ka ni lo; in hriat avâng leh thutak aṭanga dâwt a chhuah ngai loh avânga ziak ka ni zâwk. Isua chu Krista a ni tih pawm lotu aliama dawthei tu nge awm? Pa leh Fapa pawm lotu chu Krista dodâltu chu a ni. Tu pawh Fapa pawm lo chuan Pa pawh a pawm lo va ni: Fapa pawmtu erawh chuan Pa pawh a pawm a ni. Nangni zawngin a tîr ata in hriat kha nangmahniah awmtîr reng rawh u. A tîr ata in hriat kha nangmahniah a awm reng chuan, nangni pawh Paah leh Fapaah chuan in awm reng dâwn a ni. Hei hi a ni, a thutiam, amah ngeiin kan hnêna a tiam chu - chutuan nunna hi. Nangmahni hruai bo tumtute chungchâng thu hi in hnênah ka ziak a ni. Nangni thu-ah zawng, a hriak thih che u kha nangmahniah a awm reng a, tu ma zirtîr in ngai lo ve, a hriak thihna che u chuan thil tinrêng a zirtîr zâwk che u a, chu chu a dik a, dâwt a ni lo. Tichuan, a zirtîr che u ang khân amahah awm reng rawh u. Tûnah hian, fate u, a rawn inlâr huna huai taka kan awma, a lo kal hunah zak lova kan awm theih nân amahah awm reng rawh u. Amah chu mi dik tak a ni tih in hriat chuan, dik taka titu apiang chu a fate an ni tih hre rawh u. Ngai teh u, Pain min lo va hmangaih nasa êm; Pathian fa-ahte min vuah tâk hi! Chutiang chu kan ni rêng e. Hemi avâng hian khawvêlin min hre lo va ni, amah chu an hriat loh avângin. Duh takte u, tûnah hian Pathian fate kan ni tawh reng a, engtin nge kan la awm dâwn tih erawh chu a lang rih lo va. Amah a lo lan hun chuan amah ang kan la ni ang tih zawng kan hria, a nih ang takin amah chu kan la hmu dâwn si a. Kristaa chutiang beiseina nei apiang chuan amah a thianghlim angin a intithianghlim ṭhîn. Tu pawh thil sual ti chuan dân a bawhchhia a ni, sual chu dân bawhchhiatna a ni si a. Ani chu sualte la bo tûrin a lo lang a, amahah chuan sual a awm lo tih in hria e. Tu pawh amaha awm reng chuan thil sual a ti lo; tu pawh thil sual ti chuan amah a hmu lo va, hriat pawh a hre hek lo. Fate u, tu man bum che u suh se; ani chu mi dik tak a ni ang khân thil dik titu chu mi dik a ni. Thil sual titu chu Diabola aṭanga chhuak a ni; a tîr aṭang rêngin Diabola chuan thil sual a ti si a. Pathian Fapa lo lan chhan chu, Diabola hnathawhte tiboral tûr hian a ni. Tu pawh Pathian hrin chuan, Pathian chi chu amahah a awm reng avângin thil sual a ti lo; Pathian hrin a nih avângin sual pawh a sual thei lo. Pathian fate leh Diabola fate lan chianna chu hei hi a ni: Tu pawh thil dik ti lo leh a unau hmangaih lo chu Pathiana chhuak a ni lo. A tîr ata thuchah in hriat kha hei hi a ni, kan inhmangaih tawn ṭheuh tûr a ni, tih hi. Mi sual laka chhuak, Kaina, a unau thattu ang kha kan ni tûr a ni lo. Eng vângin nge a thah le? Ama thiltihte a sual a, a nau thiltihte a dik avângin. Unaute u, khawvêlin a huat che u pawhin mak ti suh u. Keini chuan unaute kan hmangaih avângin thihna ata kan chhuak a, nunnaah kan lût tawh tih kan hria: hmangaihna nei lo chu thihnaah a la awm reng a ni. Tu pawh a unau hua chu tual that a ni, tu pawh tual that chuan chatuan nun a nei dâwn lo tih in hria e. Anin kan tân a nun a pêkah hian hmangaihna chu kan hre ta. Keini pawhin unaute tân kan nun kan pe ve tûr a ni. Tu-in emaw khawvêl hausakna neiin a unau tlachham hmu sela, amah chu lainat si lo sela. Pathian hmangaihna chu engtin nge amahah a awm theih ang? Fate u, ṭawngka leh thu chauhvin i hmangaih suh ang u, thiltih leh tihtakzetin ni zâwk rawh se. Tichuan, thutakah kan awm tih kan inhria ang a, a hmaah pawh tlângnêl takin kan awm thei ang. Kan thinlung mahin thiam loh min chantîr chuan, Pathian chu kan thinlung aiin a ropui zâwk a, engkim a hre vek a ni tih kan hre si a. Duh takte u, kan rilruin thiam loh min chantîr loh chuan Pathian kan nêl ngam ṭhîn, a thupêk kan zawma a lâwmzâwng kan tih avângin, a hnêna kan dîl apiang kan hmu zêl ṭhîn si a. A thupêk chu hei hi a ni: A Fapa Isua Krista hming kan rina, thu min pêk anga kan inhmangaih tawn hi. Pathian thupêk zâwmtu chu Pathianah a awm reng a, Pathian pawh amahah a awm reng a ni. Tin, hei hi Pathian keimahniah a awm reng tih kan hriatna a ni: Thlarau min pêk hi. Duh takte u, thlarau nazawng ring zêl suh u, thlarau chu Pathian aṭanga lo chhuak a ni nge ni lo fiah ṭhîn zâwk rawh u; zâwlnei der tam tak khawvêlah an lo chhuah tâk avângin. Hei hi Pathian Thlarau in hriat theihna tûr chu a ni: Isua Krista chu tisain a lo kal tih ṭantu apiangin Thlarau a dawn chu Pathiana chhuak a ni. Isua ṭan lote thlarau dawn chu Pathian aṭanga chhuak a ni lo thung: chu chu Krista dodâltu, a lo kal dâwn tih in hriat lâwk kha a ni, tûnah pawh khawvêlah a awm tawh reng a ni. Fate u, nangni chu Pathian aṭanga chhuak in ni a, nangmahnia awma chu khawvêla awma ai chuan a ropui zâwk avângin zâwlnei derte chu in ngam tawh e. Anni chu khawvêla mi an ni a; chuvângin, khawvêla mi angin thu an sawi a, khawvêlin an thu an ngaithla ṭhîn a ni. Keini zawng Pathian aṭanga chhuak kan ni a; Pathian hretute chuan kan thu pawh an ngaithla ṭhîn; Pathian aṭanga chhuak lo chuan kan thu pawh an ngaithla lo; chûng aṭang chuan thlarau dik tak leh thlarau dik lo kan hre thei a ni. Duh takte u, i inhmangaih tawn teh ang u; hmangaihna chu Pathian aṭanga lo chhuak a ni si a; tu pawh hmangaihna nei chu Pathian hrin an ni a, Pathian an hre bawk a ni. Hmangaihna nei lo erawh chuan Pathian an hre lo, Pathian chu hmangaihna a ni si a. Pathian hmangaihna chu hetiang hian kan zîngah a lo lang, a zâra nun kan neih theihna tûrin Pathianin a Fapa neih chhun khawvêla a rawn tirhah hian. Hei ngei hi a ni hmangaihna chu: Keinin Pathian kan hmangaih ni lovin, Aman min hmangaih a, kan sual thupha chawi nân a Fapa a rawn tîr ta zâwk hi. Duh takte u, Pathianin chuti taka min hmangaih si chuan, keini pawh kan inhmangaih tawn ṭheuh tûr a ni. Tu man Pathian an hmu ngai lo na a, kan inhmangaih tawn chuan Pathian keimahniah a awm reng a, a hmangaihna pawh keimahniah tihfamkimin a awm a ni. A Thlarau min pêk hi, Amahah kan awma, Ani pawh keimahniah a awm tih kan hriatna chu a ni. Pain Fapa chu khawvêl Chhandamtu atân a rawn tîr tih kan hmu tawh a, mi dang pawh kan hriattîr a ni. Tu pawh Isua chu Pathian Fapa a ni tih ṭantu chu amahah Pathian a awm reng a, ani pawh chu Pathianah a awm reng a ni. Pathianin min hmangaihna chu keimahni ngeiin kan hria a, kan ring ta a ni. Pathian chu hmangaihna a ni a, chu hmangaihnaa awm reng chu Pathianah a awm reng a, Pathian pawh amahah a awm reng a ni. Rorêl ni-a hlau hlek lova kan awm theih nân keimahniah hmangaihna chu tihfamkim a ni ta; he khawvêlah pawh hian amah ang takin kan awm tâk hi. Hmangaihnaah hian hlauhna rêng a awm lo va, hmangaihna famkim chuan hlauhna zawng zawng a hnawt bo zâwk ṭhîn. Hlauhnaah hian hremna a tel a, hlauva awm chu hmangaihnaah a la famkim lo va ni. Aman min hmangaih hmasak avângin keini pawhin kan hmangaih a ni. Miin “Pathian ka hmangaih,” tiin a unau haw si se, mi dawthei a ni; a unau a hmuh renga mah a hmangaih si loh chuan, Pathian a hmuh ngai loh chu a hmangaih thei lo vang. He thupêk hi a hnên aṭangin kan hmu a ni: Pathian hmangaihtu chuan a unau pawh a hmangaih tûr a ni, tih hi. Isua hi Krista chu a ni tih ring apiang chu Pathian hrin a ni, a hringtu hmangaihtu chuan a hrina pawh a hmangaih ṭhîn a ni. Pathian fate kan hmangaih a ni tih kan hriatna chu, Pathian kan hmangaih a, a thupêkte kan zawm hi a ni. Pathian kan hmangaih vena chu hei hi a ni: a thupêkte kan zawm hi; a thupêkte chu a khirh si lo va. Pathian hrin tawh phawt chuan khawvêl hi a ngam ṭhîn: hei hi a ni, khawvêl hneha ngamna chu, kan rinna hi. Isua hi Pathian Fapa a ni tih ringtu chauh lo chuan tu nge khawvêl ngam ṭhîn le? Isua Krista hi a ni, tui leh thisena lo kala chu, tuiah chauh ni lovin, tuiah leh thlarauvah a ni zâwk e; thlarau chu hriatpuitu a ni. Thlarau chu thutak a ni si a. Hriatpuitu pathum an awm, Thlarau leh tui leh thisen chu, chûng pathumte chu an inthurual a ni. Mihring hriatpuina mah kan pawm chuan Pathian hriatpuina chu a ropui zâwk si a; Pathian hriatpuina chu, A Fapa chanchin a hriattîr tâkna hi a ni. Pathian Fapa ringtu chuan amahah he hriatna hi a nei a ni: Pathian ring lotu erawh chuan Pathian chu dawtheiah a chantîr a ni, Pathianin Fapa chanchin a hriattîr chu a rin loh avângin. Hei hi a thu hriattîr chu a ni - Pathian chuan chatuan nun min pe a, chu nun chu Fapaah hian a awm a ni. Fapa nei apiang chuan nunna chu an nei, Fapa nei lo erawh chuan nunna chu an nei lo. Chatuan nun in nei tih in hriat theih nân nangni Pathian Fapa hming ringtute hnênah hêng thu hi ka ziak a ni. A duh zâwng anga eng pawh kan dîl chuan min ngaihthlâksak ṭhîn, chu chu amah kan nêl chhan chu a ni. Kan dîl apiangin min ngaithla ṭhîn tih kan hriat avângin, kan dîl ang chu min pe ṭhîn tih pawh kan hria. Tu pawhin a unau, thihna khawp ni lo sual tiin hmu sela, a dîlsak ang a, Pathianin nunna a pe ang. Hei hi thihna khawp sual ti lote tân a ni. Thihna khawp sual a awm a, chutiang tân dîlsak tûr ka ti lo. Thil dik lo tih zawng zawng hi sual a ni vek a; amaherawhchu, sual apiang hi thihna khawp sual a ni vek lo. Tu pawh Pathian hrin chuan thil a tisual lo tih kan hria; Pathian Hrina khân a vawng him a, mi sual chuan a khawih thei lo va ni. Khawvêl pum hi Misualpa thuhnuaiah awm mah se, Pathian aṭanga chhuak kan ni tih kan hria. Pathian Fapa chu a lo kal a, Pathian tak chu hre thei tûrin hriat theihna min rawn pe tih kan hre bawk; tichuan, Pathian takah chuan kan awm a ni - a Fapa Isua Kristaah chuan. Hei hi a ni Pathian dik tak chu, hei hi a ni chatuan nunna chu. Fate u, milem lakah invêng ṭha rawh u. Upa chuan Hmeichhe Ṭha Pathian thlan leh a fate, thutaka ka hmangaihte chibai ka bûk e. Keimah chauh pawh ni lovin, thutak hretu dang zawng zawng pawhin an hmangaih a che u; thutak, keimahnia chêng chu, kumkhuain kan hnênah a awm dâwn avângin. Thutak leh hmangaihnaah chuan Pa Pathian leh Pa Fapa Isua Krista hnên ata khawngaihna te, zahngaihna te, remna te chu kan hnênah a awm ang. Pain thu min pêk anga i fa tute emaw thutaka an awm ka hmuh avângin ka lâwm êm êm a ni. Hmeichhe ṭha, thupêk thar ni lovin, a tîr ata kan dawn kha hrilh tûr chein ka ziak a ni: ‘i inhmangaih tawn ang u,’ tiin ka ngên a che. A thupêk ang zêla kan awm hi hmangaihna chu a ni; hei hi a thupêk, a tîr ata in hriat kha a ni, ‘hmangaihnaah in awm reng tûr a ni,’ tih hi. Bumtu tam tak, Isua Krista chu tisa puin a lo kal tih pawm lote khawvêlah an lo chhuak ta a. Chutiang mite chu bumtu leh Krista dodâltute an ni. In thawh chhuah sate chân lova in thawh hlawh a kima in hmuh theih zâwk nân, mahni invêng ṭha rawh u. Tu pawh Krista zirtîrna thu-a khawsa lova kal khûm chuan Pathian a nei lo. A zirtîrna thu-a khawsa reng chuan Pa leh Fapa a nei kawp a ni. Chu zirtîrna chu keng lova in hnêna lo kal chu tu mahin inah thlentîr suh ula, ṭawngkam ṭha pawhin lo be suh u: Ṭawngkam ṭhaa betu chu a thil sual tihah chuan a tel ve a ni. In hnênah thu tam tak sawi tûr nei mah ila, lehkha leh lehkhatuia ziak ka tum lo; kan lâwm a kim theih nân in hnêna lo kala, inhmatawna inbiak ka beisei zâwk a ni. I laizâwnnu, thlan ni ve bawki faten chibai an bûk a che. Upa chuan duh tak, Gaia, thutaka ka hmangaih chibai ka bûk e. Ṭhian duh tak, engkimah i hmuingîla, thlarau lam leh taksa lamah i dam leh i hrisêl theih nân ka ṭawngṭaisak ṭhîn che a ni. Unaute an lo kal a, thutaka i rinawmzia leh thutaka i awm tlatzia min rawn hrilh a, ka lâwm êm êm a ni. Ka fate thutakah an awm tih ka hriat aliama lâwmna nasa zâwk rêng ka nei lo ve. Ṭhian duh tak, hêng unaute hi, mikhual pawh ni se an chungah i lo ṭha êm êm a. Kohhran hmaah pawh i ṭhatzia an sawi an sawi mai. An zin kawngah anni hi Pathian lâwm zâwnga i lo ṭanpui zêl theih chuan a ṭha hle ang. A hming avânga thawk chhuak an ni a, Jentail-te hnên aṭangin eng mah an dawng duh lo. Chutichuan, thutak ṭana thawk ho kan nih kan hriat theih nân keini hian hêng mite hi kan ṭanpui tûr a ni. Kohhran hnênah khân lehkha ka ziak tawh a; nimahsela, Diotrefa, an zînga hotu ber nih thlahlel khân ka thu a pawisa lo va ni. Chuvângin, ka lo kal hun chuan a chêt dân, thil râpthlâk pui pui tia mi puh thute ka hrilh vek ang che u. Chu chu tâwk ti lovin amah ngeiin unaute a lâwm duh lo va, a lâwm duhte pawh a khap a, kohhran aṭangin a hnawt chhuak lehnghâl a ni. Ṭhian duh tak, a ṭha lo chu zir suh la, a ṭha chu zir zâwk rawh. Thil ṭha titu chu Pathiana chhuak a ni, thil ṭha lo titu chuan Pathian a la hmu ngai lo va ni. Demetria hi mi tinin an fak a, thutaka fak pawh a hlawh a ni; keini pawhin kan fak ve a, kan fakna chu a dik a ni tih i hria e. I hnênah thu tam tak sawi tûr ka nei a; mahse, lehkha leh lehkhatuia ziak ka duh lo. Hmuh thuai che ka beisei a, inhmatawnin kan la inbe dâwn nia. Thlamuanna i hnênah awm rawh se. Kan ṭhiante hian chibai an bûk a che. Kan ṭhiante kha an hming lam ṭheuhvin chibai mi bûksak ang che. Isua Krista bawih leh Jakoba unau Juda chuan, Pa Pathian khawngaihna leh Isua Krista vênhimnaa awm, kohte chu chibai ka bûk e. Khawngaihna te, remna te, hmangaihna te in chungah tihpunin awm rawh se. Zirtîrna dik lo chungchâng (2 Pet. 2:1-17) Duh takte u, chhandamna kan dawn tlân chungchâng hi in hnêna ziak ka châk êm êm ṭhîn a; Pathianin a mi thianghlimte hnêna rinna thu vawi khat a kawl nghehtîr tawh hi ṭan tlat tûra fuih tûr che uin in hnênah ziak lo thei ka ni ta lo. In zîngah sakhaw pawisa lo mi tute emaw an inzep lût ru a, Pathian khawngaihna thu hi an hurna sawi mawi nân an hmang a, kan hotu leh Lalpa neih chhun Isua Krista an pawm duh hek lo, chûng mite chu thiam loh chang tûra ruat daih tawh an ni. In hriat tawh sa vek ni mah se, hêng hi han hriat nawntîr che u ka duh a ni. Lalpan Aigupta ram aṭangin Israel mite a chhan chhuak a; mahse, an zînga ring lotute chu a tihboral leh tâk dân te, Vântirhkohte pawh an awmna chhuahsana, an hna tlânsante chu, an chungthu Rorêlna Ni ropuia ngaihtuah atân, chatuan khaidiata phuarin thim hnuaia dah an nih thu te, chutiang bawka Sodom leh Gomora khuate pawh, an kiang vêl khuate nên, hurna bawlhhlawhah an inpumpêk avânga mi dangte zilh lâwk nân kumkhaw meia hrem an nih thu te kha. Hêng mite pawh hi chutiang bawkin an che ṭhîn a ni. Zêl an hmu chawp a, an taksa an tibawlhhlawh a, thuneitu an pawisa lo va, vân mi ropuite an sawichhe ṭhîn. Mikaela, vântirhkoh chungnung ber meuh pawhin, Diabola nên Mosia ruang chungchânga an inhnial lai khân, ṭawng chhiain a hau duh lo va, “Lalpan hau che rawh se,” a ti mai zâwk a ni. Hêng mite erawh hi chuan an hriatthiam loh apiang an sawi chhe ṭhîn a; ngaihtuahna nei lo ramsaten an pianpui hriatna an zui ang maia anni pawh hian an zui avângin anmahni a tichhia a ni. An va khawngaihthlâk tak êm! Kaina kawng chu an zawh a, tangka ûmin Balaama sualna kawngah an tlân a, Kora angin an hel a, an boral ve ta! Chûngho chu hmangaihna ruai in ṭheh tihmêlhemtu an ni, zak lovin an kîl ve a. Mahni chauh an inngaihtuah a, chhûm ruahtui pai lo, favâng thing rah lo, a zung chawpa tlu kar vek tawh ang; tuifinriat invawrh phuan, mahni inmualpho, arsi vâkvai, chatuan thim chhah mup khêksakte ang chu an ni. Adama thlah kal zêl pasarihna, Enoka chuan hêng mite chungchâng hi a lo hril lâwk a, “En teh u, Lalpa chu a mi thianghlim sâng tam tak nên a lo kal e. Sakhaw pawisa lo zawng zawngten Pathian ṭih lova an thil tih zawng zawng leh, amah dodâla thu khauh tak tak an sawi zawng zawng chungchângah, sakhaw pawisa lo mi sualte thiam loh chantîr tûr leh mi zawng zawng chunga rorêl tûrin a lo kal dâwn a ni.” Chûng mite chuan phunnawi leh mi sawisêl chauh an hrât a, anmahni châkna sual chauh an ûm a, pâwr tak takin an uang a, hlâwkna ûmin mi tlawn an peih êm êm a. Duh takte, u, nangni zawngin kan Lalpa Isua Krista tirhkohten thu an hril lâwk kha hre reng rawh u. “Hun hnuhnûngah chuan, nuihsantute, sakhaw ngaihsak lova mahni châkna ang zêla khawsate an lo la awm ang,” tia an hrilh che u kha. Chûngho chu inṭhenna tichhuaktu, tisa mi, Thlarau nei lote an ni. Duh takte u, nangni zawng in rinna thianghlim takah chuan mahni inrem chho tlat ula; Thlarau Thianghlima ṭawngṭaiin, Pathian hmangaihnaah chuan invawng ṭha ula, chatuan nun nân kan Lalpa Isua Krista khawngaihna chu nghâk rawh u. Ringhlelte chu khawngaih ula, ṭhenkhat mei ata chhan chhuah ngaite chu hnûk chhuak thuai rawh u; ṭhenkhat chu hlau chungin khawngaih ula, an tisa bawlhhlawh kai silhfênte chu ten rawh u. Tlu lo tûra vêng thei che u, a ropuina hmaa sawisêlbo leh hlim êm êma dintîr thei che u, Pathian awm chhun, min chhandamtu hnênah chuan, kan Lalpa Isua Krista zârah, ropuina te, lalna te, thiltihtheihna te, thuneihna te, hun kal tawh zawng zawng ata tûnah leh chatuan thlengin awm zêl rawh se. Amen. Isua Krista thupuan hi thil lo thleng thuai tûr, a bawihte hriat atân Pathian pêk a ni; chu chu Isuan Vântirhkoh tîrin, a bawih Johana hnênah a hrilh lâwk a; ani chuan Pathian thu leh Isua thu a dawn ang ang chu a puang ta a ni. He lehkhabu chhiartu leh a chhûnga hrilh lâwkna thute lo bengkhawna zâwmtute chu an nihlawh e, hun a thleng ṭêp si a. Johana chuan Asia rama kohhran pasarihte chibai a bûk e. Awm mêka leh awm tawha leh lo kal tûra leh a lalṭhutthlêng hmaa thlarau pasarih leh, Isua Krista, thuhretu rinawm, mitthi zînga tho hmasa ber, leia lalte chunga hotu hnên aṭangin khawngaihna leh remna in hnênah awm rawh se. Min hmangaiha, a thisena kan sualte min sil faisaktu, lala min siama, a pa Pathian tân puithiama min siamtu hnênah, ama hnên ngeiah chuan ropuina leh thuneihna chatuanin awm rawh se. Amen. Ngai teh, chhûm zîngah a lo kal e, mit tinrêngin an hmu ang, amah chhuntute ngei pawhin an hmu ang. Khawvêla hnam tinrêngin amah an ṭah bawk ang: Ni e. Amen. “Kei Alfa leh Omega chu ka ni,” Lalpa Pathian, Engkimtitheia, awm mêka leh awm tawha leh lo kal tûra chuan a ti. Kei Johana, in unau, Isua avânga tihduhdahna chhel taka tuarpuitu che u leh, a lalna ṭâwmpuitu che u hi, Pathian thu avâng leh Isua thu ka hril avângin Patmos an tih thliarkârah ka awm a. Lalpa ni-ah chuan thlarauvin ka lo awm a. Tawtawrâwt ri ang maia ring ka hnung lamah aw ka hria a. “I thil hmuh hi lehkhabuah ziak la, kohhran pasarih - Efesi kohhran te, Smurna kohhran te, Pergamos kohhran te, Thuatira kohhran te, Sardis kohhran te, Filadelfia kohhran te leh Laodikei kohhran te thawn rawh,” a ti a. Mi betu hmuh tuma ka han lehhawi chuan, rangkachak khâwnvâr zâr sarih ka hmu a, chûng zîngah chuan mihring ang, kelêr thlenga kawrfual ha rangkachak kâwnghrên hrêng ka hmu a; a sam chu sahmul vâr tak ang, vûr ang maia vâr a ni a, a mit chu meialh ang a ni. A ke chu dâr tle mi, meia rawh thianghlim ang a ni a, a aw chu tuifinriat ri hum hum ang hi a ni. A kut ding lamin arsi pasarih a keng a, a ka aṭangin khandaih hriam tawn hriam tak a lo chhuak a, a hmêl chu ni sat vânglai tak anga êng a ni. Ani chu ka hmuh veleh thi ang maiin a ke bulah ka tlu ta a. A kut ding lam ka chungah a rawn nghat a, “Hlau suh, Hmasabera leh Hnuhnûngbera, Minunga chu ka ni, ka thi a; nimahsela, ngai teh, tûnah zawng chatuana nung tûrin ka lo tho leh ta a; thihna leh mitthi khaw chabite ka nei a ni. I thil hmuh tâkte, thil awm mêk leh thil lo thleng tûrte chu ziak rawh. Ka kut ding lama arsi pasarih leh, rangkachak khâwnvâr zâr sarih i hmuhte awmze ril chu hei hi a ni: Arsi pasarih hi kohhran pasarih tirhkohte an ni a, khâwnvâr zâr sarih hi kohhran pasarihte an ni,” a ti a. “Efesi khaw kohhran tirhkoh hnênah heti hian ziak rawh: ‘A kut ding lama arsi pasarih kenga, rangkachak khâwnvâr dahna pasarih zînga vei veia khân heti hian a ti: I thiltihte ka hria, i thawhrimzia te, i chhelzia te, mi sual i ngaihtheih lohzia te, tirhkoh ni si lo tirhkoh invuahte chu i fiah a, a der an nih i hriat tâk thu te ka hria. I chhel êm êm a, ka hming avângin i tuar a, i beidawng lo va. Nimahsela, demna che ka nei: a tîra mi hmangaih ang khân mi hmangaih ta lo. I tlûksan tâk kha ngaihtuah teh; sim la, a tîra i tih ang kha ti leh rawh. Chutilo zawng, i hnênah ka lo kal ang a, i sim loh chuan a awmna ata i khâwnvâr chu ka sawn daih ang. Nikola-ho thil tih, ka huatzâwng i haw ve hi erawh chu i ti ṭha e. Thlarauvin kohhranho hnêna thu a sawi hi hriat theihna beng nei chuan ngaithla ngun rawh se. A hnehtu apiang chu Pathian paradis-a awm nunna thing rahin ka châwm ang.’ “Smurna khaw kohhran tirhkoh hnênah pawh heti hian ziak rawh: ‘Hmasabera leh Hnuhnûngbera, thi-a nung leh ta-a khân heti hian a ti: I tuarnate ka hria, i pachhe na a, i hausak si hi. Juda ni lo Juda inti, Setana sunagog-a miten an sawichhiat dân che pawh ka hria. I thil tuarte chu hlau suh. Ngai teh, in zînga mi ṭhenkhat chu tân ina khungin, Diabola chuan a fiah dâwn a che u, ni sâwm chhûng in tuar ang. Thih thlengin rinawm takin awm zêl la, chawimawina lukhum, nunna chu ka pe ang che. Thlarauvin kohhrante hnêna a sawi hi hriat theihna beng nei chuan ngaithla ngun rawh se. A hnehtu apiang thih hnihna chuan eng mah a tih lo vang.’ “Pergamos khaw kohhran tirhkoh hnênah pawh heti hian ziak rawh: ‘Khandaih hriam tawn neia chuan heti hian a ti: Setana lalṭhuthlêng hûnna hmunah i awm tih ka hria; mahse, ka hming i ṭan tlata, ka thuhretu rinawm Antipa, Setana awmna hmuna an thah lai pawh khân, mi rinna i thlah chuang lo va. Amaherawhchu, tlêmin demna che ka nei: In zîngah mi ṭhenkhat Balaama zirtîrna vuan tlat in awm. Ani chuan Balaka chu Israel fate hruai sual dân a zirtîr a, Israel fate chu milem biakna sa ei tûr leh inngaihna suala tlu tûrin a hruai a. Chutiang bawkin, in zîngah Nikola zirtîrna vuan tlat in awm a. Sim ula, chutilo chuan in hnênah ka lo kal thuai dâwn, chûng thil titute chu ka kâa khandaih hian ka rawn bei ang. Thlarauvin kohhrante hnêna thu a sawi hi hriat theihna beng nei chuan ngaithla ngun rawh se. A hnehtu apiang mana thuhrûk ka pe ang a, lungvâr ka pe bawk ang; chu lungah chuan mi dang tu ma hriat loh, a dawngtu chauh hriat tûr hming thar a chuang a ni.’ “Thuatira khaw kohhran tirhkoh hnênah pawh heti hian ziak rawh: ‘Pathian Fapa, meialh ang mit nei, dâr tle mi ang ke neia chuan heti hian a ti: I thil tihte ka hria, mi hmangaihzia te, i rinawmzia te, i rawngbâwl dân te, i dawhtheihzia te, a tîr aia tûna thil i tihṭhat zâwk tâkzia te ka hria. Amaherawhchu, demna che ka nei; kha hmeichhia, Jezebeli, zâwlneia inchhâl kha i ngaihtheih avângin. Ani chuan ka bawihte milem biakna sa eia inngaih chîng tûrin a zirtîr a, a hruai bo va. A sim nân hun ka pe a, inngaih a chîn a thlah chuang lo. Ngai rawh, khumbetin ka nattîr dâwn, an thil chîn an sim loh chuan a uirepuite pawh nasa takin ka timangang ang. Amah zuitute pawh ka tihlum ngei dâwn; tichuan, kohhranten mite thinlung leh rilru hre vektu ka ni tih an hria ang. In thil tih ang zêl ṭheuhvin ka rûl ang che u. ‘Thuatira khaw mi dangte erawh zawngin he zirtîrna hi in zâwm ve lo va, ‘Setana thu ril’ an tihte pawh in pawm ve loh avângin phurrit ka belhchhah lo vang che u, ka ti a ni. Ka lo kal leh hma chu in thil neih sa kha vawng tlat rawh u. A tâwp thlenga ka duh zâwng ti tlattu, hnehtu chu Jentail-te chunga thuneihna ka pe ang. An chungah thîrtiang hmangin ro a rêl ang a, hlumbêl angin a vaw sawm ang. Pa hnên ata ka dawn vârparh arsi chu ka pe bawk ang. Thlarauvin kohhrante hnêna thu a sawi hi hriat theihna beng nei chuan ngaithla ngun rawh se.’ “Sardis khaw kohhran tirhkoh hnênah pawh heti hian ziak rawh: ‘Pathian Thlarau pasarih leh arsi pasarih neia chuan heti hian a ti. I thil tihte ka hria; thi reng siin nunga i than hi; intiharh la, i thil neih thi lek lekte chu tinung leh rawh. I thiltihte chu ka Pathian mit tlung zo a awm lo va ni. Tichuan, an zirtîr che leh i thu dawnte kha hre rengin zâwm la, i sual kha sim rawh. I harh loh erawh chuan rûkru angin ka lo kal ang a, i hnên ka lo thlen hun i hre lo dah ang e. Sardis khuaa mi ṭhenkhat erawh chu an thawmhnaw tibawlhhlawh lo an awm, chûng chu kawrfual vâr ha-in ka hnênah an lêng ve ang, chutianga awm tlâk chu an ni si a. Hnehtute chuan chutiang chuan kawrfual vâr an ha ang a, nunna bua an hming chuang chu ka thai bo lo vang. Ka Pa leh vântirhkohte hmaah anni chu ka ṭan ang. Thlarauvin kohhrante hnêna thu a sawi hi hriat theihna beng nei chuan ngaithla ngun rawh se.’ “Filadelfia khaw kohhran tirhkoh hnênah pawh heti hian ziak rawh: ‘Thianghlima leh Dika, Davida chabi neia, tu ma khâr theih loh tûra kawngkhâr hawnga, tu ma hawn theih loh tûra khâra chuan heti hian a ti: I thiltihte ka hria, chakna tlêm tê chauh i nei na a, ka thu i vawng tlat a, tu ma khâr theih loh tûr i hmaah kawngka ka hawng a. Tin, Setana sunagog-a mi, mi dawthei, Juda ni si lova Juda intite chu hruaiin i hmaah ka rawn kûntîr dâwn; nang hi ka hmangaih chu i ni tih an hre tawh ang. Chhel taka awm tûra thu ka pêk che i vawn avângin leia chêng zawng zawng fiah nân khawvêl puma hremna lo thlen hunah kei pawhin ka humhim ang che. Ka lo kal thuai dâwn e, i thil neih sa kha vawng tlat la; tichuan, tu man chawimawina lukhum i chan tûr chu an chhuhsak lo vang che. A hnehtu apiang chu ka Pathian Tempul banah ka phun ang a, chuta ta chu sawn an ni tawh lo vang. Pa Pathian hming anmahniah chuan a chuang ang a, Pathian khawpui Jerusalem thar, ka Pathian hnên ata lo chhuk hming leh ka hming thar chu anmahniah ka ziak bawk ang. Thlarauvin kohhrante hnêna thu a sawi hi hriat theihna beng nei chuan ngaithla ngun rawh se.’ “Laodikei khaw kohhran tirhkoh hnênah pawh heti hian ziak rawh: ‘Amena, Thuhretu rinawma leh Dika, Pathian thil siam zawng zawng bula chuan heti hian a ti: I thiltihte ka hria, i vâwt lo va, i lum hek lo; i vawh emaw, i lum emaw ka duh a ni. Vawt si lo, lum pep pup chauh i nih avângin ka kâ ata ka chhâk chhuak ang che. ‘Ka hausa a, engkim ka ngah a, tlâkchham ka nei lo,’ i ti vei a; rethei khawngaihthlâk, pachhia, mitdel leh saruak mai i ni tih i inhre si lo. Tichuan, i hausak theih nân rangkachak meia rawh thianghlim ka hnên aṭanga lei tûrin ka râwn a che. I saruak zahpuiawm tak khuh tûrin i hâk atân kawr vâr lei la, i hmuh theih nân mit na damdawi lei bawk rawh. Ka hmangaihte chu ka zilhin ka thunun ṭhîn; chuvângin, ka thu awih la, sim rawh. Ngai teh, kawngkhâr bula dingin ka kik hi, tu pawh ka aw hriaa kawng mi hawnsaktu hnênah chuan ka lût ang a, zanriah ka ei ang a, ani pawhin ka hnênah a ei bawk ang. A hnehtute apiang ka lalṭhutthlêngah ka ṭhuttîr ang a; kei pawhin ka hneha, ka Pa bulah a lalṭhutthlênga ka ṭhu ang hian. Thlarauvin kohhrante hnêna thu a sawi hi hriat theihna beng nei chuan ngaithla ngun rawh se.’ ” Chûng hnu chuan ka han en a, vâna kawngka inhawng ka hmu a, tawtawrâwt ri ang aw, mi bia ka hriat tawh khân, “Hetah hian lo chho la, tûn hnua thil lo awm ngei tûr ka entîr ang che,” mi ti a. Thlarauvin ka awm ta nghâl a. Vânah chuan lalṭhutthlêng a lo awm a, tah chuan mi pakhat a ṭhu a. A hmêl chu Jaspi leh Sardion lung ang a ni a, lalṭhutthlêng vêlah chuan Samaragdin lung rawng ang chhimbâl a zâm kual a. Lalṭhutthlêng hual chuan lalṭhutthlêng dang sawmhnih leh pali a inhûng a, tah chuan upa sawmhnih leh pali an ṭhu a, a vârin an inthuam a, rangkachaka siam chawimawina lukhum an khum bawk a. Lalṭhutthlêng aṭang chuan kâwl a phe a, aw te, khawpui te a lo ri chhuak dur dur a. Lalṭhutthlêng hmaah chuan meichher pasarih a alh hluah hluah a, chûng chu Pathian thlarau pasarihte an ni. Lalṭhutthlêng hma lamah chuan tuifinriat ang dârthlalang, krustal lung anga fîm a awm bawk a. A laia lalṭhutthlêng vêlah chuan hnung lam leh hma lam mita khat, thilnung pali an ding kual a. Thilnung pakhatna chu Sakeibaknei ang a ni a, thilnung pahnihna chu bâwngpa ang a ni a, thilnung pathumna chu mihring hmêl ang pu a ni a, thilnung palina chu mupui thlâwk lai ang a ni. Thilnung palite chuan thla paruk an nei ṭheuh va, an pâwn lam leh an chhûng lam chu mitin a khat bawk a: “Lalpa Pathian, Engkimtitheia, awm tawha leh awm mêka leh lo kal tûra chu a thianghlim e, a thianghlim e, a thianghlim e,” tia auvin chhun leh zân an châwl lo. Thilnung palite chuan lalṭhutthlênga ṭhu, chatuana nung renga chu an chawimawia, an faka, lâwmthu an hrilh apiangin, lalṭhutthlênga ṭhu-a hmaah chuan upa sawmhnih leh palite chu an bawkkhup a, chatuana nung renga chu chibai an bûk ṭhîn a. Lalṭhutthlêng hmaah chuan an lu-a chawimawina lukhum chu an dah a, “Nang, kan Lalpa leh kan Pathian, Ropuina te, chawimawina te, Thiltihtheihna te nei tlâk i ni e, Thil engkim i siam a, I thuin an lo awm a, din chhuah an lo ni,” an ti a. Lalṭhutthlênga ṭhu-a ding lamah chuan, pâwn lam leh chhûng lama ziak lehkhabu zial, chhinchhiahna pasariha châr tlat ka hmu a. Vântirhkoh thiltithei tak ka hmu bawk a, “Tu nge lehkhabu zial hi hawnga, a chhinchhiahnate hi phelh tlâk awm?” tiin ring takin a tlângau va. Lehkhabu zial chu phelha, a chhûng en thei vânah tu mah an awm lo va, leiah leh lei hnuaiah pawh tu mah an awm hek lo. Lehkhabu zial chu phelha en tlâk tu mah an awm loh avâng chuan ka ṭap ta zawih zawih a. Upa zînga pakhat chuan, “Ṭap teh suh, ngai teh, Juda hnama sakeibaknei, Davida thlaha mi khân chhinchhiahna chu phelh tûr leh, lehkhabu zial chu pharh tûrin a hneh ta,” a ti a. Tin, thilnung pali leh upaho ṭhut hual, a laia lalṭhutthlêngah chuan, Berâmno talh tawh ni âwm tak ding ka hmu a. Berâmno chuan mit pasarih leh ki pasarih, lei hmun tina tirh chhuah ṭhin, Pathian thlarau pasarih chu a nei a. Lalṭhutthlênga ṭhu-a ding lama lehkhabu zial chu la tûrin a lo kal a. A han lâk chuan thilnung palite leh upa sawmhnih leh palite chu Berâmno hmaah chuan an bawkkhup a, perhkhuang leh rangkachak berhbu, rimtui mi thianghlimte ṭawngṭainaa khat chu an keng ṭheuh va, hla thar an sa a: “Nang, lehkhabu zial chu laa, a chhinchhiahna phelh tlâk i ni e. I thi a, i thisenin hnam tin, ṭawng tin, mi tin leh Jentail-te, Pathian tân i lei a; Lalah te, kan Pathian tân puithiamah te i siam a. Lei chungah an lal ang,” tiin. Ka en reng a, lalṭhutthlêng leh thilnung leh upaho din huala vântirhkoh rual, a sînga sîng, a sânga sâng rual tam tak aw ka hria a, ring takin an au va, “Berâmno talh tawha chu, Thiltihtheihna te, hausakna te, finna te, chakna te, chawimawina te, Ropuina te, fakna te dawng tlâk a ni e,” an ti a. Thil nung tinrêng, vâna mi te, leia mi te, lei hnuaia mi te, tuifinriat leh a chhûnga awm zawng zawng te au thâwm ka hre bawk a, “Lalṭhutthlênga ṭhu-a leh Berâmno chuan fakna te, chawimawina te, ropuina te, Thiltihtheihna te chatuanin nei rawh se,” an ti a. Thilnung palite chuan, ‘Amen,’ an lo ti a, upate pawh chuan bawkkhupin chibai an bûk a. Berâmno chuan chhinchhiahna pasarih zînga pakhat a phelh lai chu ka hmu a, thilnung pali zînga pakhat chuan khawpui ri ang maia auvin, “Lo chhuak rawh,” a tih ka hria a. Ka han en a, sakawr vâr ka hmu a, a chunga chuang chuan thalngul a keng a, chawimawina lukhum an khumtîr a, hneh zêl tûrin hnehtu chu a chhuak ta a. Chhinchhiahna pahnihna a han phelh a, thilnung pahnihna chuan, “Lo chhuak rawh,” a tih ka hria a. Ka han en a, sakawr dang, a sen a lo chhuak a. A chunga chuang chu insâmpui a thlen theih nân lei ata remna lâk bo theihna an pe a, khandaih lian pui mai an pe bawk a. Chhinchhiahna pathumna a han phelh leh a, thilnung pathumna chuan, “Lo chhuak rawh,” a tih ka hria a. Ngai teh, kan han en chuan sakawr dum ka hmu a. A chunga chuang chuan a kutin bûkna a keng a. Thilnung palite zîng aṭanga chhuak ni âwm tak aw ka hria a, “Ni khat hlawhin buhpui kg. khat, ni khat hlawhin barli kg. Thum; uain leh hriak chu khawih tel suh,” tiin. Chhinchhiahna palina a han phelh a, thilnung palina chuan, “Lo chhuak rawh,” a tih ka hria a. Ka han en a, ngai teh, sakawr dâng ka hmu a, a chunga chuang hming chu Thihnaa a ni a, Mitthikhuaan a rawn zui a. Ngûnhnâm te, ṭâm te, hri te, ram sakawlh te hmanga tihlum tûrin lei hmun li-a ṭhena hmun khat chunga thuneihna an pe a. Chhinchhiahna pangana a han phelh a, Pathian thu avâng leh an thu hrilh avânga thah, mi thianghlimte thlarau chu maichâm hnuaiah ka hmu a. Anni chu aw ring takin an au va, “Aw Lalpa ropui, mi thianghlim leh mi dik tak, engtikah nge lei mite chunga ro i rêl anga, kan thisen phuba chu min lâksak dâwn?” an ti a. Kawrfual vâr an pe ṭheuh va, an bawihpuite leh an unaute, anmahni ang bawka thah an nih hma chu lo nghâk rih tûrin an hrilh ta bawk a. Chhinchhiahna parukna a han phelh chuan lîr a nghîng ta chiam a, sahmul puan dum ang maiin ni a lo thim a, thla chu thisen angin a sen bawk a. Thlipuiin theipui hel a nuai ṭîl ang maiin arsite chu leiah a tla chum chum a. Vân chu lehkhabu anga zial bo a ni a, tlângte leh thliarkâr zawng zawng chu sawn an ni ta vek a. Tichuan, leia lalte, hotute, sipai hotute, mi hausa leh mi thiltitheite leh mi dang, bawih leh bawih lote pawh chu pûkah te, tlânga lungpui phênah te an biru a. Tlâng leh lungpui te hnênah chuan, “Lalṭhutthlênga ṭhu-a mit hmuh ata leh Berâmno thinurna lak ata min delh ula, min khuh rawh u. An thinurna râpthlâk tak chu a lo thleng ta si a, tu nge tuar zo vang?” an ti a. Chûng hnuah chuan lei kil li-ah vântirhkoh pali ding ka hmu a, lei chungah te, tuifinriat chungah te, thing chungah te thli a tleh loh nân thli palite chu an chelh tlat a. Vântirhkoh dang, Pathian nung chhinchhiahna keng, khawchhak lama lo chhuak ka hmu bawk a; lei leh tuifinriat tihchhiat theihna an pêk vântirhkoh palite chu ring takin a han au va, “Kan Pathian bawihte chala kan chhinchhiah zawh hma chu lei te, tuifinriat te, thing te eng mah tih suh u,” tiin. Israela fa, hnam sâwm leh pahnih zînga mi an chhinchhiah zât chu, mi nuaikhat leh sîngli leh sângli an ni tih an sawi ka hria; hetiangin: Juda hnama mi sîngkhat leh sânghnih, Reubena hnama mi sîngkhat leh sânghnih, Gada hnama mi sîngkhat leh sânghnih, Asera hnama mi sîngkhat leh sânghnih, Naftalia hnama mi sîngkhat leh sânghnih, Manasea hnama mi sîngkhat leh sânghnih, Sumeona hnama mi sîngkhat leh sânghnih, Levia hnama mi sîngkhat leh sânghnih, Isakara hnama mi sîngkhat leh sânghnih, Zebuluna hnama mi sîngkhat leh sânghnih, Josefa hnama mi sîngkhat leh sânghnih, Benjamina hnama mi sîngkhat leh sânghnih. Chûng hnuah chuan mipui nasa tak tu ma chhiar sên loh, Jentail-te leh hnam tin, mi tin, ṭawng tina mi ka hmu a, tûmkaute kenga kawrfual vâr ha-in lalṭhutthlêng leh Berâmno hmaah chuan an ding a. Ring takin an au va: “Chhandamna chu kan Pathian Lalṭhutthlênga ṭhu leh Berâmno hnêna mi a ni,” an ti a. Vântirhkoh zawng zawng chu lalṭhutthlêng leh upate leh thilnung palite hualin an ding a, lalṭhutthlêng hmaah chuan an bawkkhup a, Pathian chibai an bûk a: Amen, Fakna te, ropuina te, finna te, Lâwmthu sawina te, chawimawina te, thiltihtheihna te leh Chakna te kumkhuain kan Pathian ta a ni, Amen,” an ti a. Upa zînga pakhat chuan, “Hêng kawrfual vâr hate hi tute nge ni-a, khawi lam aṭanga lo kal nge an nih?” tiin mi zâwt a. Kei chuan ka chhâng a, “Ka pu, nangin i hre zâwk ang,” ka ti a. Ani chuan, “Hêng mite hi hrehawm nasa tak ata chhuak hote kha an ni a, an puante su faia, an silhfênte Berâmno thisena tivâr tate an nih hi. Chuvâng chuan, Pathian lalṭhutthlêng hmaah an awm a, a tempulah chuan a chhûn a zânin a rawng an bâwl ta a ni: Lalṭhutthlênga ṭhu-a chuan an chungah a puan in a zârsak dâwn si a. An rilṭâm leh tawh ngai lo vang a, an tuihâl tawh hek lo vang, ni sa an tuar ngai tawh lo vang a, khaw lumin a tihrehawm tawh hek lo vang. Lalṭhutthlêng laia awm Berâmno chu anmahni vêngtu a ni ang a, nunna tuikhurah te chuan a hruai ang. Pathian chuan an mit ata mittui zawng zawng a hru fai ang,” a ti a. Tin, chhinchhiahna pasarihna a han phelh chuan dâr chanve lai vân chu a reh ta ṭhup a. Pathian hmaa vântirhkoh pasarih ding ka hmu a, tawtawrâwt pasarih an pe a. Vântirhkoh dang, rangkachak berhbu keng, lalṭhutthlêng hmaa rangkachak maichâmah chuan a lo kal a, mi thianghlimte ṭawngṭaina belhchhah nân rimtui hâl tûr an pe ṭeuh va. Vântirhkoh kuta rimtui hâl khu chu mi thianghlim ṭawngṭainate nên chuan Pathian hmaah a khu chho ta a. Vântirhkoh chuan berhbu chu a la a, maichâma meiling chu a khatin a rût a, leiah a paih thla a. Tichuan, khawpui a ri a, aw a lo chhuak a, kâwl a lo phe a, lîr te a lo nghîng ta dur dur a. Tin, vântirhkoh pasarihte chuan tawtawrâwt an kente chu hâm tûrin an insiam a. A hmasa ber chuan a han hâm a, rial leh mei, thisen nêna inpawlh leiah a tla ta chiam mai a. Lei hmun thuma ṭhena hmun khat leh thing hmun thuma ṭhena hmun khat chu a kâng ral a, hnimhring zawng zawng pawh a kâng ral vek bawk a. Vântirhkoh pahnihna chuan a han hâm ve a, thil eng emaw, tlâng lian pui kâng hluah hluah ang hi tuifinriatah an paih thla a. Tuifinriat hmun thuma ṭhena hmun khat chu thisenah a chang ta a, tuifinriata nungcha awm zawng zawng hmun thuma ṭhena hmun khat chu an thi a, lawngte pawh hmun thuma ṭhena hmun khat chu a chhe ta a. Vântirhkoh pathumna chuan a han hâm ve a; arsi lian tak, meichher anga alh hluah hluah hi vân aṭangin a tla a, lui zawng zawng hmun thuma ṭhena hmun khatah leh tuikhurahte chuan a tla a. Chu arsi hming chu ‘Khâ’ a ni. Chu chuan tui hmun thuma ṭhena hmun khat chu a tikhâ a, a khâk tâk êm avângin a in tam tak chuan an thih phah ta a. Vântirhkoh palina chuan a han hâm ve leh a; ni hmun thuma ṭhena hmun khat, thla hmun thuma ṭhena hmun khat, arsi pawh hmun thuma ṭhena hmun khat chu a chhia a, hmun thuma ṭhena hmun khat chu a thim ta a; ni pawhin a ênna hmun thuma ṭhena hmun khat a hloh va, zân pawhin chutiang bawkin. Ka han en a, vânlaizâwlah mupui a lo thlâwk duai duai a, ring takin a hrâm tuar tuar a, “Vântirhkoh pathumten an tawtawrâwt an ham hun chuan leia chêngte tân a va râpthlâk dâwn êm! A va râpthlâk dâwn êm! A va râpthlâk dâwn êm!” a ti a. Tin, Vântirhkoh pangana chuan a han ham ve a, vân aṭanga leia tla arsi ka hmu a. A hnênah chuan leilâwt chabi an pe a. Leilâwt chu a han hawng a, a kua aṭang chuan meikhu ang mai a lo khu chhuak ngut ngut a, meikhu lo chhuak avâng chuan ni leh boruak a thim zo ta a. Meikhu aṭang chuan khau rual leiah an lo chhuak a, leia khawmualkaikuang thiltihtheihna ang thiltihtheihna an pe a. An chala Pathian chhinchhiahna pu lo mihringte sawisak an phal a; leia hnim rêng rêng, thlai te, thing te erawh chu tichhe lo tûrin an hrilh a. Chhinchhiahna pu lote chu an tihhlum mai an phalsak lo, thla nga chhûng tihnat chauh an phalsak a; khawmualkaikuang angin an seh a na a ni. Chûng ni-ah chuan miten thihna an zawng ang a, an hmu si lo vang; thih an châk ang a; mahse, thihna chuan a tlân bosan ang. Khau lan dân chu indona atân sakawr an thuam ang hi a ni; an lu-ah chuan rangkachaka siam chawimawina lukhum ang hi a awm a, mihring hmêl ang an pu a; hmeichhe sam anga sei sam an nei a, an hâ chu sakeibaknei hâ ang a ni; phuhlip, thîr-phaw ang an nei a, an thla zâp thâwm chu sakawr-tawlailîr tam tak indonaa tlân ri dur dur ang hi a ni. Mei an nei bawk a, khawmualkaikuang angin mi an seh thei a, an seh chu thla nga chhûng a na a ni. An lal chu leilâwt huai a ni a, Hebrai ṭawnga a hming chu ‘Abadona’ a ni, Grik ṭawng chuan ‘Apoluona,’ a ni, chu chu ‘Tiboraltua,’ tihna a ni. Thil râpthlâk pakhat chu a liam ta a, hêng zawhah hian thil râpthlâk dang pahnih a lo la awm dâwn. Vântirhkoh parukna chuan a han hâm ve leh a; Pathian hmaa rangkachak maichâm ki pali aṭang chuan aw ka hria a; tawtawrâwt keng vântirhkoh parukna hnênah chuan, “Eufretis luipuia vântirhkoh pali phuarte khu chhuah rawh,” a ti a. Tichuan, he kum, he thla, he ni leh dârkâra mihring hmun thuma ṭhena hmun khat that tûra buatsaih vântirhkoh palite chu an chhuah ta a. An sipai sakawr chungchuang mite chu vaibêlchhetak hnih an ni tih mi sawi ka hria. Tin, inlârnaah chuan sakawr leh a chungchuangte chu hetiang hian ka hmu: mei anga sen, huakintho lung anga dumpâwl, kât anga êng âwmphaw an nei a; chûng sakawr lu chu sakeibaknei lu ang a ni a, an kâ aṭang chuan mei te, meikhu te, kât te a chhuak sung sung a. An kâ aṭanga hremna lo chhuak mei te, meikhu te, kât te avâng chuan mihring hmun thuma ṭhena hmun khat chu an thi a. Chûng sakawr thiltihtheihna chu an kâah leh an meiah a awm; an mei chu rûl ang a ni a, lu an nei a, chu chuan mi an tina ṭhîn a ni. Hêng hremna tihhlum bâk mihringte hian anmahni thilsiam biak an sim chuang lo; rangkachak te, tangkarua te, dâr te, lung te leh thinga an milim siam - eng mah hmu thei lo, eng mah hre thei lo, kal pawh kal thei hlei lote biak leh ramhuai biak an bâng chuang lo. Tual thah an chîn te, an dawi hman te, an hurna te, an rûkrûk te an sim hek lo. Tin, Vântirhkoh dang, thiltithei tak, vân aṭanga lo chhuk ka hmu a, chhûmin a inthuam a, a lu-ah chhimbâl a zâm a, a hmêl chu ni ang a ni a, a kete pawh chu mei ban ang a ni. Lehkhabu zial te tak tê inphelh sa hi a keng a. A ke ding lamin tuifinriat a rap a, a vei lam chuan khawmual a rap a. Sakeibaknei hâhum anga ringin a au va, a han au chuan khawpui ri pasarihte chuan aw an chhuah a. Khawpui ri pasarihte thu sawi chu ka han ziak dâwn a, vân aṭangin aw ka hre ta a, “Khawpui ri pasarihte thu sawi kha zêp tlat la, ziak suh,” mi rawn ti a. Tuifinriat leh khawmual kârin Vântirhkoh chu a ding a, a kut ding lam chu vân lamah a phar a, chatuana nunga, vân leh a chhûnga awm te, lei leh a chhûnga awm te leh tuifinriat leh a chhûnga awm te siamtu hming chhâlin a chham a, “A rei tawh lâwng, vântirhkoh pasarihnain a tawtawrâwt a ham hun chuan Pathian thurûk, a bawih zâwlneite hnêna a puan chu, a lo thleng tawh ang,” a ti a. Vân aṭanga aw ka hriat khân mi rawn be leh a, “Tuifinriat leh khawmual kâra ding vântirhkoh kuta lehkhabu zial inphelh sa saw va la rawh,” a ti a. Vântirhkoh hnênah chuan ka kal a, lehkhabu zial tê chu ka va dîl a. Ani chuan, “La la, ei rawh, i pumah chuan a kha ang a, i kâah erawh chuan khawizu angin a thlum ang,” a ti a. Vântirhkoh kuta lehkhabu zial chu ka la a, ka ei a; ka kâah chuan khawizu angin a thlum a, ka han lem a, ka pumah chuan a kha ta êm êm a. Ka hnênah, “Mi te, Jentail te, ṭawng hrang hrang te leh lal tam takte hnênah Pathian thu i puang leh tûr a ni,” mi ti a. Tin, luang tlâwn, tehna tiang ang hi mi pe a, “Tho la, Pathian tempul leh maichâm chu teh la, a chhûnga betute pawh chhiar rawh; Tempul hung chhûng kawtlai erawh chu kân la, teh tel suh; Jentail-te hnêna pêk a ni tawh si a, Jentail-ten khawpui thianghlim chu thla sawmli leh pahnih chhûng an rapbet ang. Nimahsela, chûng ni sângkhat leh zahnih leh sawmruk chhûng chuan ka thuhretu pahnihte chu saiip sinin thu ka sawitîr ang. Hêng mite hi, oliv thing pahnih leh khâwnvâr pahnih, lei Lalpa hmaa ding ṭhînte chu an ni. Anni chu tihnat tuma an hmêlmaten an beih phawt chuan an kâ aṭanga mei lo chhuak chuan a kâng ral ṭhîn. Thu an hril chhûng chuan ruah sûr loh nân vân an khâr thei a, tuite pawh thisenah an chantîr thei a, an duh hun hunah leiah hri tinrêng an lêntîr thei bawk a ni. Thu an hril zawhah leilâwt aṭanga lo chhuak sakawlh chuan anni chu a do vang a, a hneh ang a, a tihlum ang. An ruang chu khaw ropui kawtlaiah chuan a lum reng ang a. Chu khawpui chu thlarau lama thlîr chuan Sodom leh Aigupta vuah a ni, an Lalpa an khenbehna khua chu. An ruang chu mi tinrêng, hnam tinrêng leh ṭawng tinrêng hmangte leh Jentail-te chuan ni thum leh a chanve chhûng an en huai huai ang a, phûm an awih lo vang. Hêng zâwlnei pahnihte hi an hnawksak êm ṭhin avângin an thi chu leia chêngte chuan an lâwm ang a, intihhlimna an siam ang a, thilpêkte an inpe tawn ang. Ni thum leh a chanve hnu chuan Pathian hnên ata nunna thaw an chhûngah a lût a, an ding chhuak ta mai a; a entute chuan an hlau ta êm êm a. Vân aṭanga aw ring tak an hria a, “Hetah hian lo chho rawh u,” a rawn ti a; tichuan, chhûm zîngah vânah an chho ta a, an hmêlmate chuan an thlîr reng a. Chutih lai tak chuan lîr nasa takin a nghîng a, khawpui hmun sâwma ṭhen hmun khat chu a chim chhe ta a, lîrnghîng avâng chuan mi sângsarih an thi a; a la damte chuan an hlauh avângin, vân Pathian chu an chawimawi a. Thil râpthlâk pahnihna chu a liam ta a, thil râpthlâk pathumna chu a lo thleng thuai dâwn. Vântirhkoh pasarihna chuan a han hâm a, vâna ring taka aute chuan, “Lei leh vân hi kan Lalpa leh a Mesia ram a lo ni ta. Ani chu chatuanin a lal tawh ang,” an ti a. Tin, Pathian lalṭhutthlêng hmaa ṭhu, upa sawmhnih leh palite chuan bawkkhupin Pathian chibai an bûk a, “Lalpa Pathian Engkimtithei, awm mêk leh awm tawh, I thiltihtheihna ropui tak chu hmangin ro i rêl tâk avângin Kan fak a che. Jentail-te chu an thinur ta a, Mahse, i thinurna ni a lo thleng ve ta a, Mitthite chunga i rorêl ni chu. I bawih, i zâwlneite, mi thianghlimte, Milian mitê, i hming ṭihtute, Lâwmman i pêk hun leh Lei tichhetute i tihchhiat ve hun chu A thleng ta a nih hi,” an ti a. Vâna Pathian tempul chu an hawng a, tempul chhûnga thuthlung bâwm chu a lo lang a; kâwl a lo phe a, aw a lo chhuak a, khawpui a lo ri a, lîr a lo nghîng a, rial te a lo tla ta dur dur a. Vânah chhinchhiahna thil mak tak, hmeichhia - nî-a inthuam, a ke hnuaia thla awm, arsi sâwm leh pahnih chuang chawimawina lukhum khum a lo lang a. Nau a pai a, a vei a, a rûm a rûm a. Vânah chhinchhiahna mak tak, Dragon sen lian pui, lu sarih leh ki sâwm nei, a lu-ah chawimawina lukhum pasarih khum a lo lang leh a. A mei chuan vâna arsi hmun thuma ṭhena hmun khat a hâwl a, leiah a hêm thla vek a. Nau a hrin veleha lo dawlh mai tûrin hmeichhe nau vei hmaah chuan a awm ta rûn a. Jentail-te chunga thîrtianga rorêl tûr fapa a hring a, a fa chu Pathian leh a lalṭhutthlêng hmaah chuan lâk chhoh a ni ta a. Tin, hmeichhia chu Pathianin a buatsaihsak, thlalêrah chuan a tlân bo ta a, chutah chuan ni sângkhat leh zahnih leh sawmruk chhûng an châwm dâwn a ni. Tin, vânah chuan indona a lo awm a, Mikaela leh a ho vântirhkohte chuan Dragon chu an bei a, Dragon leh a hote chuan an bei lêt ve a; mahse, Dragon chuan a hneh ta lo va, vânah chuan an leng ve ta lo va. Dragon lian pui, rûlpui tar, Diabola leh Setana an tih, khawvêl pum bum ṭhîntu chu an paih chhuak a, a hote nên chuan leiah an paih thla ta a. Tichuan, vânah ring taka au ka hria a, “Tûnah zet chuan kan Pathianin min chhan chhuak ta, a thiltihtheihzia te, a lalzia te, a Mesia thuneihzia te a lo lang ta. Kan Pathian hmaa dinga, a chhûn a zâna kan unaute hêk ṭhîntu chu vân ata paih thlâk a nih tâk hi. Berâmno thisen ṭana thu dik an pawm tlat avângin hnehtu an ni a, nun châna thih huam rêng an ni. Vân te leh a chhûnga chêngte u, lâwm rawh u. Lei leh tuifinriatte u, Diabola chu in hnênah a lo chhuk tâk avângin in chung a pik e, hun tlêm tê chauh a nei tih a hriat avângin a thinur êm êm a ni,” tiin. Dragon chuan leia paih thlâk a nih a han hriat chuan fapa hringtu hmeichhia kha a ûm ta a. Hmeichhia chu rûlpui hmuh phâk loh thlalêrah, a awmna tûra a thlawh luh theih nân mupui lian tak thla khing hnih an pe a; chutah chuan kum thum leh a chanve an châwm ang. Rûlpui chuan a kâ aṭangin hmeichhe lên bo tûr lui tui anga tam tui a pik chhuak ta puat puat a. Mahse, hmeichhia chu leiin a lo chhan a, a kâ a âng a, Dragon kâ aṭanga lui lo luang chhuak chu a lem zo ta vek a. Hmeichhe chungah chuan Dragon chu a thinur ta êm êm a, a thlah la awmte, Pathian thupêk zâwma, Isua thu rinawm taka puang ṭhîntute chu do tûrin a thawk chhuak a. Dragon chu tuifinriat kamah chuan a ding ta a. Tuifinriat aṭang chuan sakawlh lo chhuak ka hmu a, ki sâwm leh lu sarih a nei a, a ki-ahte chuan lallukhum sâwm an târ bawk a, a lu-ahte chuan Pathian sawichhiatna hming a chuang ṭheuh va. Ka sakawlh hmuh chu keite ang a ni a, a ke chu savawm ke ang a ni a, a kâ chu sakeibaknei kâ ang a ni. Dragon chuan sakawlh chu a thiltihtheihna te, a lalṭhutthlêng te, a thuneihna nasa tak te chu a pe a. Sakawlh lu pakhat chu thihpui khawp hialin a hliam a; thihpui khawp hiala hliam chu a dam leh ta mai a. Khawvêl mi zawng zawngin mak an ti a, an zui huai huai a. Sakawlh hnêna thuneihna a pêk avâng chuan mi tinin Dragon chu chibai an bûk a. Sakawlh pawh chu chibai an bûk bawk a, “Sakawlh ang hi tu nge awm? Tu nge do thei ang?” an ti a. Pathian huatthu chaltlai taka sawia, thla sawmli leh pahnih chhûng duh tâwka a chêt an phalsak a. Tichuan, Pathian a sawichhe ta a, a hming te, a tempul te, vâna chêng zawng zawng te a sawichhe ta buan buan a. Mi thianghlimte a do leh a hneh phal a ni a, hnam tin, mi tin, ṭawng tin leh Jentail-te chunga thuneihna pêk a ni bawk a. Lei leh vân siam hmaa talh tawh Berâmno Nunna Lehkhabua hming chuangte chauh lo chuan khawvêla mi zawng zawngin amah chu an be dâwn a ni. Tu pawh hriat theihna beng nei chuan ngaithla ngun rawh se. Sala tâng tûr chu salah an tâng ang a, khandaiha thi tûr chu khandaihin an thi ang; hetah hian mi thianghlimte chu chhel tak leh rinawm taka an awm a ṭûlzia a lang. Tin, sakawlh dang, berâm ki ang ki pahnih nei, Dragon anga thâwm na, lei aṭanga lo chhuak ka hmu a, sakawlh hmasa thuneihna nasa tak chu a hmaah a lek ta a; sakawlh, thihpui khawp hial hliam dam leh kha, lei leh a chhûnga mi zawng zawng a biak luihtîr ta a. Sakawlh pahnihna chuan thil mak a ti ṭeuh va, mi tin hmuhah vân ata mei te leiah a ko thla a, sakawlh hmasa hminga thil mak tam tak a tih phalsak a nih avângin leia mi zawng zawng a bum a; sakawlh, khandaih hliam tuar dam leh ta-a lim chu a dintîr a. Sakawlh lim chu a lo ṭawng theihna tûr leh, sakawlh lim be duh lo apiang a tihhlum theihna tûrin sakawlh lim tihnun theihna thu pêk a ni a. Sakawlh chuan mi zawng zawng, milian leh mitê, hausa leh rethei, bawih leh bawih lo te pawh an kut ding lamah emaw, an chalah emaw chhinchhiahna a nemsak a; chuvângin, sakawlh hming emaw, a hming tlukpui nambar emaw chhinchhiahna pu lo chuan tu mahin thil an leiin an hralh thei lo vang. Hetah hian fin a ṭûl hle. Chhût thiam chuan sakawlh nambar chu chhût rawh se, mihring nambar a ni si a, a zât chu zaruk leh sawmruk leh paruk a ni. Tin, Zion tlângah chuan Berâmno ding ka hmu a, a hming leh a Pa hming an chala ziak mi nuaikhat leh sîngli leh sângli a bulah an ding a. Vân aṭang chuan tuifinriat ri ang leh khawpui ri dur dur ang thâwm ka hria a, ka thâwm hriat chu ṭingṭang tum miten an ṭingṭang an tum ri ang a ni. Lalṭhutthlêng hmaah, thilnung palite leh upate hmaah chuan hla thar an sa a, lei ata tlan chhuahte mi nuaikhat leh sîngli leh sângli chauh lo chuan chu hla chu an hre ve thei lo. Chûng mite chu hmeichhe laka intibawlhhlawh lo, invawng thianghlim, Berâmno kalna apianga zuitute an ni, mihring zîng ata thlan chhuah, Pathian leh Berâmno tân rah hmasate an ni. Dâwt an sawi ngai lo va, hmêlhemna an nei hek lo. Vânlaizâwlan vântirhkoh dang pakhat thlâwk ka hmu a, leia chêng zawng zawng, Jentail te, hnam tinrêng te, ṭawng tinrêng te leh mi tinrêng te hnêna chatuan Chanchin Ṭha puang tûra thlâwk a ni. Ring takin a au va, “Pathian ṭih ula, chawimawi rawh u, a rorêl hun chu a lo thleng ta si a; vân te, lei te, tuifinriat te leh tuihna te siamtu chu chibai bûk rawh u,” a ti a. Vântirhkoh dang, a pahnihna chuan a rawn zui a, “A tlâwm ta, Babulon khaw ropui, a hurna uain, hnam zawng zawng Pathian thinurna intîr ṭhîntu chu a tlâwm ta,” a ti a. Vântirhkoh dang, a pathumna chuan anni chu a rawn zui a, ring takin, “Tu pawh sakawlh leh a lim chu biaa, an chalah emaw, an kutah emaw a chhinchhiahna chuang tawh phawt chuan, Pathian thinrimna uain fîr, a thinurnaa khat no chu an in ang a, vântirhkoh thianghlimte leh Berâmno hmaah chûng mite chu mei leh kâtin a kâng ang. Anmahni hremna mei chu chatuanin a khu chho vang; sakawlh leh a lim betute leh a hming putute hremna chuan tâwpintai a nei lo vang,” a ti a. Hetah hian mi thianghlim, Pathian thupêk avânga Isua ring tlattute tân chhel a ṭûlzia a lang. Vân aṭanga aw ka hria a: “Ziak rawh, tûn aṭangin mitthi, Lalpaa thite chu an nihlawh e,” a rawn ti a. Thlarau chuan, “Ni e, an thawhrimnate chu an chawlhsan tawh ang, an thiltihte chuan a zui dâwn si a,” a lo ti a. Tichuan, ka han en a, chhûm vâr ka hmu a, a chungah chuan mihring ang hi a ṭhu a, chu chuan rangkachaka siam chawimawina lukhum a khum a, a kutin favah hriam tak a keng bawk a. Tempul aṭang chuan vântirhkoh dang a lo chhuak a, chhûm chunga ṭhu hnênah chuan ring takin, “I favah kha phawrh la, ât rawh; buh seng a hun ta, leia buh khu a ngui ta e,” a ti a. Tichuan, chhûm chunga ṭhu chuan a favah chu leiah a thlâk a, leia buh chu a seng ta a. Vâna tempul aṭangin vântirhkoh dang a lo chhuak a, ani pawh chuan favah hriam tak a pai a. Vântirhkoh dang, mei chunga thuneitu, maichâm aṭangin a lo chhuak bawk a, ring takin a au va, “I favah hriam tak kha phawrh la, leia grep khu a hmin tawh a, zu seng rawh,” a ti a. Tichuan, vântirhkoh chuan favah chu leiah a thlâk a; leia grep rah bâwrte chu a hlep khâwm a, grep sâwrkhur thûk tak, Pathian thinurna khurah chuan a vawm lût a. Khawpui pâwna uain sâwrkhurah chuan grep chu a rap sâwr ta a; khur aṭang chuan thisen, sakawr thîrbarh chîm phaa thûk, km. zathum leh pasariha thui a luang ta ngûk ngûk a. Tin, vânah chhinchhiahna dang mak tak leh ropui tak ka hmu a: Vântirhkoh pasarihin hremna hnuhnûng pasarih an rawn keng a, chûng hremnaah chuan Pathian thinrimna a thleng kim ta a ni. Mei nêna inpawlh ni âwm tak tuifinriat, dârthlalang ang ka hmu a. Sakawlh leh a lim leh a hming nambar hnehtute chu ka hmu bawk a. Pathian ṭingṭang kengin dârthlalang tuifinriat kamah chuan an ding a. Pathian bawih Mosia leh Berâmno hla an sa: “Lalpa Pathian, Engkimtithei, I thiltihte chu a ropuiin a va mak êm! Hnam tin Lalber, i kawngte chu a felin a dik a ni. Lalpa, tu nge ṭih lo vang che-a, I hming chawimawi lo vang? Nang chauh hi mi thianghlim chu i ni, Hnam zawng zawng i hmaah lo kalin chibai an bûk ang che. I thiltih dikzia tihlan a ni ta si a,” tiin. Chumi hnu chuan ka han en a, vânah, tempul hmun thianghlim ber chu a lo inhawng a, hremna pasarih keng vântirhkoh pasarihte chu tempul aṭang chuan an lo chhuak a; puan zai sîn vâr tle sût an sin a, rangkachak hruiin an âwm an hrêng a. Chatuana nung reng Pathian thinrimnaa khat rangkachak berhbu pasarih chu, thilnung palite zînga pakhat chuan vântirhkoh pasarihte chu a pe a. Tempul chu Pathian ropuina leh a thiltihtheihna khu chuan a khat ta mup a, vântirhkoh pasarihte ken hremna pasarih chu a zawh hma chuan tu mah tempulah chuan an lût thei lo. Tempul aṭanga lo chhuak aw ring tak chuan vântirhkoh pasarihte hnênah, “Kal ula, Pathian thinrimna berhbu pasarihte chu leiah leihbaw rawh u,” a tih ka hria a. A hmasa ber chu a kal a, a berhbu chu leiah a leihbua a; tichuan, sakawlh leh a chhinchhiahna pute leh a lim betu mihringte tân pânchhia na takah a chang ta a. A pahnihna chuan a berhbu chu tuifinriatah a leihbua a; tichuan, thisen, mitthi thisen ang maiah a chang ta a; tuifinriata nungcha awm zawng zawng chu an thi zo ta a. A pathumna chuan a berhbu chu luiahte leh tuikhurahte a leihbua a, thisenah a lo chang ta a. Tui vântirhkoh chuan, “Awm mêk leh Awm tawh, Nang, mi thianghlim, ro i rêl dik ngei mai; mi thianghlimte leh zâwlneite thisen chhuahtute chu thisen i intîr ve tâk thung hi; in âwm rêng an ni,” a tih ka hria a. Maichâm aṭang chuan, “Ni e, Lalpa, Pathian Engkimtithei, i rorêlna chu a dikin a fel a ni,” tih aw ka hre bawk a. A palina chuan a berhbu chu ni-ah a leihbua a; ni chu mei saa mihringte em uh an phalsak a. Tichuan, mei sa-in mite chu a em ût ta a; mahse, chûng hremna chunga thuneitu Pathian hming chu an sawichhia a, an sim lo va, amah an fak duh hek lo. A pangana chuan a berhbu chu sakawlh lalṭhutthlêngah a leihbua a, a ram chu a lo thim ta vek a; an na tuar chu an ṭhen tlawk tlawk a. An pân vei leh an na tuar avâng chuan vân Pathian chu an sawichhia a, an thiltihte chu an sim chuang lo. A parukna chuan a berhbu chu Eufretis luipuiah chuan a leihbua a, a tui chu a kang ta a; khawchhak lam aṭanga lal lo kal tûrte tân kawng a inhawng ta a ni. Tin, Dragon kâ aṭang te, sakawlh kâ aṭang te, zâwlnei der kâ aṭangtea lo chhuak thlarau bawlhhlawh pathum, chungu ang ka hmu bawk a. Chûng chu ramhuai thlarau an ni a, thil mak pawh an ti ṭhîn. Pathian Engkimtitheia ni ropuia indonaa hruai khâwm tûrin khawvêl lal zawng zawng hnênah an kal a. Ngai teh u, rûkru angin ka lo kal e, inringa inchei peih diama awm chu a nihlawh e, saruaka a awm miten an hmuha a zah loh nân. Hebrai ṭawnga Harmegadon an tih hmunah an rawn hruai khâwm a. A pasarihna chuan a berhbu chu boruakah a leihbua a, tempula lalṭhutthlêng aṭang chuan aw ring tak a lo chhuak a, “A zo ta,” tiin. Kâwl a phe a, aw a lo chhuak a, khawpui a ri dur dur a, lîr na takin a nghîng a, mihring awm china lîrnghîng azawngah a la na ber. Khaw ropui chu hmun thumah a lo phel a, Jentail khawpuite a chim a, Babulon khaw ropui chu Pathianin a hre reng a, a thinurna no chu a intîr ta a ni. Thliarkâr zawng zawng a bo va, tlângte pawh hmuh tûr a awm tawh lo. Vân aṭangin rial lian pui pui, kg. sawmnga dâwn laia rit, mihring chungah a tla a. Riala hremna avâng chuan Pathian chu miten an sawichhia a, hremna chu a na êm êm mai si a. Berhbu pasarih keng Vântirhkoh pasarihte zînga pakhat chu a lo kal a, mi rawn bia a, “Hawh teh, tui tam tak chunga ṭhu, nawhchizuar hmingthang tak chunga rorêlna chu ka hmuhtîr ang che. Leia lalte chuan an tawmpui ṭhîn a, leia chêngte pawh a hurna zu chuan a hrai rui ṭhîn,” a ti a. Tichuan, Thlarauvin thlalêrah mi hruai a, sakawlh senlâr chunga chuang hmeichhia ka hmu a. Sakawlh taksa pumah chuan Pathian huatzâwng hming a chuang buai a, lu sarih leh ki sâwm a nei. Hmeichhia chu puan senduk leh senlârin a inthuam a, rangkachak ṭhi te, lungmantam te, tuikeplung tein a inchei a. A kutin thil tenawm leh a hur bawlhhlawhnaa khat rangkachak no a keng a. A chalah chuan awmze rûk nei, ‘Babulon khaw ropui, khawvêl nawhchizuarte nu, mi tenawmte nu,’ tih a chuang a. Chu nu chu mi thianghlimte thisen leh Isua avânga martarte thisena a rui ka hmu a. Amah ka han hmuh chuan mak ka ti êm êm a. Vântirhkoh chuan, “Engati nge mak i tih? He nu leh a phurtu sakawlh lu sarih leh ki sâwm nei thurûk chu ka hrilh ang che. Sakawlh i hmuh hi a awm tawh zet a, a awm leh ta lo va; leilâwt aṭangin a lo chhuak leh ang a, boralnaah a lût leh mai dâwn. Lei leh vân siam hmaa Nunna bu-a hming ziak loh leia chêngte chuan, sakawlh chu a awm tawh zet a, a awm leh ta lo va, a lo awm leh tûr chu mak an ti ang. Hei hi hriatthiam a ṭûl hle. Lu sarih chu hmeichhe ṭhutna tlâng sarih a ni a, lal pasarih an ni bawk. Panga chu an thi tawh a, pakhat chu a la awm a, a dang erawh chu a la awm rih lo; a lo awm hunah pawh rei lo tê chauh a awm ang. Sakawlh, awm tawh zeta awm leh ta lova chu a pariatna a ni, pasarihte zînga mi kha a ni bawk; mahse, tihboral a ni ang. ki sâwm i hmuh kha lal sâwm, la lal ve lote an ni, anni chuan dârkâr khat chhûng chauh sakawlh nên lal anga thuneihna an nei ang. Inthurualin an thuneihna leh an thiltihtheihna chu sakawlh hnênah an pe ang. Anni chuan Berâmno chu an do vang a; mahse, Berâmno chuan a hneh ang: a hnung zuitu, a kohva a thlan, mi rinawmte nên chuan anni chu an hneh ang, ani chu lalte Lal, lalberte Lalber a ni si a,” a ti a. Ka hnênah a sawi zêl a, “Nawhchizuar ṭhutna tui tam tak i hmuh kha mi te, mipui te, Jentail-te leh ṭawng hrang hrang te an ni. I sakawlh hmuh leh a ki sâwmte chuan nawhchizuarnu chu an hua ang a, a silhfên an hlîp vek ang a, saruakin an hnutchhiah ang. A sa chu an ei ang a, meiah an rawh ral ang. Pathianin a thiltih tum ti tûrin an rilru a hneh a, Pathian thu a thlen kim hma chu sakawlh hnênah an lalna pêk an remti tlâng a ni. I hmeichhe hmuh kha, khawpui ropui, leia lalte chunga lal chu a ni,” a ti a. Chûng hnuah chuan vântirhkoh dang vân aṭanga lo chhuak ka hmu leh a. Thuneihna nasa tak a nei a, a ropuina chuan lei pum pui a ên a. Ring takin, “A tlâwm ta, Babulon khaw ropui chu a tlâwm ta. Ramhuaite chênna, thlarau bawlhhlawhte inkulhna leh sava bawlhhlawh tenawm tinrêng tawm khâwmna hmun a lo ni ta. A uirena, thinurna uain chu Jentail-ten an in a, leia lalte chuan ani chu an tawmpui a, a nawmsak bâwlna chu leia sumdâwngtuten an hausak phah ṭhîn,” tiin a au va. Vân aṭanga aw dang ka hre leh a: “Ka mite u, chhuahsan rawh u, A sualnaahte tel ve suh u, hremna hi in tuar ve dah ang e. A sualna chuan vân a tawng a, Pathianin a thil sual tih chu a hre reng a ni. In chunga a tih ang chiahin a chungah ti ve ula, a thiltih zawng zawng a lêtin thungrûl rawh u. In tûra a buatsaih leh hniha tak a novah chuan chhûnsak rawh u. A intihropui leh a nawmsak bâwl ang hu tuarna leh lungngaihnain thungrûl rawh u. ‘Lalnuah ka ṭhu a, hmeithai ka ni lo ve, lu ka sûn ngai lo ve,’ a ti rilru vei a. Chuvâng chuan, ni khat chhûng maiin hremna a tuar dâwn, thih te, lusûn te, ṭâm te, meia hâl ral te a tuar bawk ang. Thiam loh chantîrtu chu Lalpa Pathian Chaka a ni,” tiin. Leia lal, amah uirepuitu, nawmsak bâwlpui ṭhîntute chuan a kâng khu an hmuh chuan an ṭap ang a, khawpui chu an ṭah ang. A hremna chu tuar ve an hlauh avângin hla takah an thlîr ang a, “E heu! A va râpthlâk êm! Babulon khaw ropui leh chak tak chu, Dârkâr khat chhûng lekin a chhiat tâk hi!” an ti ang. Leia sumdâwngtute pawhin an ṭah ang a, amah an sûn ang; tu man an zawrh sumte an leisak ta si lo. Rangkachak te, tangkarua te, lungmantam te leh tuikeplung te, puan zai sîn te, puan senlâr leh duk te, maimaw puan te, thing rimtui chi hrang hrang te, saingho te, dâr te, thîr te leh sailungvâra siam thil chi hrang tinrêng te, thakthîng te, mawsawla te, beraw te, mura te, rimtui hâl chi te, uain leh oliv hriak te, chhangphut leh a hûm te; sebâwng leh berâm te, sakawr leh tawlailîr te, bawih te leh mihring nunna an zawrh ṭhin te chu tu man an leisak tawh lo. Sumdâwngtute chuan, “I thei duhzâwng, i châk ṭhinte kha a awm ta lo; i ropuina leh i mawina zawng zawng a bo ta, i nei leh ngai tawh hauh lo vang,” an ti a. Chutianga sumdâwng mi, khawpuia sumdâwnga intihausate chuan a hremna tuar chu tuar ve an hlauh avângin hla takah an ding a: “E heu! A va râpthlâk êm! Khawpui ropui, puan zai sîn, senduk leh senlâra inthuama, Rangkachak ṭhi te, lungmantam te leh tuikeplung tea Inchei ṭhîn chu! Dârkâr khat chhûng lekin a hausakna a ral tâk vek hi!” an ti a. Lawng hotu te leh a chhûnga khualzin te, lawng khalhtu te leh tuifinriata hna thawktu te pawh hla takah an ding a. A kâng khu an hmuh chuan an au va, “He khua ang khawpui ropui dang a awm dâwn em ni?” an ti a. An lu-ah vaivut an phul a, an ṭah a, “E heu! A va râpthlâk êm! Tuifinriat lawng zawng zawng chu, He khawpui hausak zâra hausa an ni a, dârkâr khat chhûng lekin A ram tâk hi!” an ti a. Aw vân te, mi thianghlim te, tirhkoh te, zâwlnei te u, a chhiat tâk avângin lâwm rawh u; in chunga a thil tihte avângin Pathianin a hrem ta a nih hi. Vântirhkoh chak tak hian chhangphut râwtna lung tiat zeta lian lung a la a, tuifinriatah a paih a, “Babulon khaw ropui chu hetiang hian vawm pil a ni ang a, tu man an hmu leh tawh hauh lo vang. Ṭingṭang te, phênglâwng te, tawtawrâwt te I chhûngah an tum ri dâwn tawh lo. Thil tinrêng siam thiam hmuh tûr tu mah an awm lo vang a, Buh her thâwm hriat tûr a awm hek lo vang. Khâwnvâr êng hmuh tûr a awm lo vang a, Mo leh a pasal hlim thâwm hriat tûr a awm hek lo vang. I sumdâwngtute khawvêl milian an ni a, I dawiin Jentail-te i bum si ṭhîn,” a ti a. Mi thianghlim te, zâwlnei te leh leia an thah zawng zawng thisen a chhûngah chuan chhuah a ni ṭhîn. Chûng hnuah chuan vânah mipui nasa tak aw ang ka hria a: “Haleluia, chhandamna te, ropuina te, thiltihtheihna te kan Pathian ta a ni. A rorêl chu a dik a, a ṭha a ni, Nawhchizuar hmingthang, a hurnaa khawvêl tibawlhhlawhtu chu, Thiam loh a chantîr ta. A bawihte thisen a chhuahsak ṭhin avângin phuba a la ta a nih hi,” an ti a. “Haleluia, a kâng khu chu chatuanin a chho vang,” an ti leh a. Upa sawmhnih leh pali leh thilnung palite chu an bawkkhup a, lalṭhutthlênga ṭhu Pathian chu chibai an bûk a, “Amen, Haleluia,” an ti a. Tin, lalṭhutthlêng ata aw lo chhuak chuan, “Nangni a chhiahhlawh, milian leh mitê, amah ṭihtute u, kan Pathian hi fak rawh u,” a rawn ti a. Mipui nasa tak aw ang, tuifinriat ri hum hum ang, khawpui ri hluah hluah ang thâwm ka hria a: “Haleluia, Lalpa kan Pathian Engkimtitheia chuan ro a rêl e. Hlimin lâwm ila, i chawimawi ang u, Berâmno nupui neih a hun tâk hi; A nupui tûr pawh a inpeih tawh a, Puan zai sîn vâr tle takin an thuam ta. Puan zai sîn chu mi thianghlimte thil ṭha tihte hi a ni,” tiin. Tin, ka hnênah, “Ziak rawh, Berâmno nupui neihna ruai ṭheh tûra sâwmte chu an nihlawh e,” a ti a. “Hêng thute hi Pathian thu dik a ni,” a ti bawk a. A ke bula bawkkhupin chibai ka bûk ta a. Ka hnênah, “Khatin ti suh, nang leh Isua thu pawmtu, i unaute nêna in bawihpui mai ka nih hi. Pathian chibai bûk zâwk rawh, Isua thu rawn hril hi thuhriltîrtu thlarau a ni,” a ti a. Tin, vân a lo inhawng a, sakawr vâr ka hmu a, a chunga chuang hming chu “Rinawma leh Dika” a ni, dik taka rorêlin râl a bei ṭhîn a ni. A mit chu meialh ang a ni a, a lu-ah chuan lallukhum tam tak a khum a, tu ma hriat ve loh amah chauhvin a hriat hming ziak a pu a. Kawr, thisena hnim a ha a, a hming chu ‘Pathian Thu-a’ a ni. Vân sipai rual puan zai sîn vâr tle taka inthuamte chuan sakawr chunga chuangin a hnung an zui a. A kâ aṭang chuan khandaih hriam tawn hriam tak a lo chhuak a, chu chuan Jentail-te a hneh ang a, thîrtiangin an chungah ro a rêl ang. Amah hi a ni Pathian Engkimtitheia thinurna nasa tak uain sâwrna khura rap sâwrtu tûr chu. A kawrah leh a malpuiah chuan hming “Lalte Lal, Hotute Hotu,” tih a chuang. Tin, vântirhkoh pakhat ni-a ding ka hmu a, vânlaizâwla sava thlâwk ṭhîn zawng zawng hnênah ring takin, “Pathian ruai ropui ṭheh tûrin lo kal rawh u; lal sa te, sipai hotu sa te, mi huai sa te, sakawr leh a chungchuang sa te, bawih leh bawih lo, milian leh mitê, an zavaia sa in ei dâwn nia,” a ti a. Sakawlh leh lei lalte chu an sipaite nên chuan sakawr vâr chunga chuang leh a sipaite bei tûrin an kal khâwm ka hmu a. Sakawlh chu an man a, a mit hmuha thil mak ti ṭhîn zâwlnei der pawh chu an man a. Chu Zâwlnei chuan a thil tih makin sakawlh nambar pute leh a lim betute chu a bum ṭhîn a ni. An pahnih chuan a nung chungin kâta kâng meidîlah chuan an paih ta a. Sakawr chunga chuang kâ aṭanga khandaih lo chhuak chuan mi dangte pawh chu thah an ni a; savate chuan an sa chu puar takin an ei ta a. Tin, vân aṭanga Vântirhkoh pakhat lo chhuk ka hmu a, leilâwt chabi leh khaidiat lian tak a keng a. Dragon, Rûlpui Tar, Diabola leh Setana chu a man a, kum sâng tâng tûrin a phuar a; kum sâng a ral hma chu hnamte a bum tawh loh nân leilâwtah chuan a thlâk a, a kalh khum a, a châr hnan ta a. Chumi hnuah erawh chuan rei lo tê an chhuahtîr leh ang. Tin, Lalṭhutthlêng ka hmu a, a chunga ṭhute chu ro an rêltîr a. Isua thu an hril avâng leh Pathian thu avânga lu tante thlarau ka hmu a, sakawlh leh a lim be ve lo, an chalah emaw, an kutah emaw a chhinchhiahna awm ve lote thlarau ka hmu bawk a. Chûng chu an lo nung leh a, Krista hovin kum sâng ro an rêl ta a. Mitthi dangte erawh chu kum sâng a ral hma chuan an nung leh ve rih lo. Hei hi thawhlehna hmasa chu a ni. Thawhlehna hmasaa telte chu an thianghlimin an nihlawh e. Thih hnihna chuan an chungah thuneihna a nei tawh lo. Pathian leh a Krista tân puithiam an ni ang a, a hovin kum sâng an lal ang. Kum sâng a ral hnu chuan a tânna ata Setana chu an chhuah ang a, lei kil li-a Jentail-te, Gog leh Magog chu a rawn bum ang a, indonaah a hruai khâwm ang; an tam lam chu tuifinriat kama ṭiauvaivut anga tam an ni. Lei pum dâpin an lo chho va, mi thianghlimte kulh leh a khawpui duh tak chu an hual a; mahse, vân ata mei a lo sûr a, anni chu a kâng ral ta a. Anmahni bumtu Diabola chu, Sakawlh leh zâwlnei der awmnaah, kâta kâng meidîlah chuan an paih a, chutah chuan a chhûn a zânin hrem an tuar kumkhua tawh ang. Lalṭhutthlêng vâr ropui tak leh a chunga ṭhu ka hmu a, a hma ata lei leh vân an tlân bo va, hmuh tûr a awm tawh lo. Mitthite, milian leh mitê, lalṭhutthlêng hmaa ding ka hmu, lehkhabu zialte an pharh a; tin, lehkhabu zial dang, nunna bu an pharh ka hmu bawk a; mitthite chu chûng lehkhabua an thiltih ziak ang zêl chuan an chungthu rêl a ni a. Tuifinriat chuan a chhûnga mitthite chu a chhuah a, thihna leh mitthi khua pawh chuan mitthi an kawlte chu an chhuah bawk a; mi tin an thiltih ang zêlin an chungthu rêl a ni ta a. Thihna leh mitthi khua chu meidîlah an paih a. He meidîl hi thih hnihna chu a ni. Tu pawh Nunna bu-a an hming an hmuh loh chu meidîlah chuan an paih a. Tin, vân thar leh lei thar ka hmu a, vân hmasa leh lei hmasa chu a awm tawh lo va, tuifinriat pawh a awm tawh hek lo Khaw thianghlim, Jerusalem thar chu, mo pasal nei tûra inchei diam anga inpeih, Pathian hnên ata vân aṭanga lo chhuk ka hmu a. Lalṭhutthlêng ata aw ring tak ka hria a, “Ngai teh, Pathian chênna chu mihring zîngah a lo awm ta: An zîngah a chêng ang a, a mite an ni ang. Pathian ngei chu an hnênah a awm ang a, an Pathian a ni bawk ang. An mit ata mittui zawng zawng a hru hul ang a, Thih a awm leh tawh lo vang. Lu sûn te, ṭah te, nat te pawh a awm tawh hek lo vang. Thil hluite chu a liam ta a,” a ti a. Lalṭhutthlênga ṭhu chuan, “Ngai teh, thil engkim ka siam thar e,” a ti a. “Ziak rawh, hêng ka thute hi a rinawmin a dik a ni,” a ti leh a. Ka hnênah, “A lo thleng ta, kei Alfa leh Omega, a bul leh a tâwp ka ni. Tuihâl apiang hnênah nunna tuikhura mi a thlâwna in tûr ka pe ang. A hnehtute chuan hêng hi an chang dâwn: An Pathian ka ni ang a, ka tân fapa an ni bawk ang. Mi dawihzep te, ring lo te, tenawm te, tual that te, inngaih chîng te, dawithiam te, milem bia te leh dawthei zawng zawng te chan tûr erawh chu kâta kâng meidîl a ni, chu chu thih hnihna chu a ni,” a ti a. Tin berhbu pasarih, hremna hnuhnûng pasariha khat keng vântirhkoh pasarih zînga pakhat chu ka hnênah a lo kal a, “Lo kal teh, Berâmno nupui, a mo chu ka lo entîr ang che,” mi ti a. Thlarauvin tlâng lian pui sâng takah mi hruai a, Jerusalem, khawpui thianghlim chu Pathian hnên ata vân aṭanga lo chhuk mi entîr a. Pathian ropuina a khum a, a ên dân chu lungmantam jaspi lung, krustal anga fîm a ni. Kulh bang chhah tak, sâng tak a nei a, kawngkhâr sâwm leh pahnih a awm a, kawngkhârte chu vântirhkoh sâwm leh pahnihin an vêng a; chûng kawngkhârahte chuan hming ziak a awm - Israel fa hnam sâwm leh pahnihte hming chu. Chhak lamah kawngkhâr pathum, hmâr lamah kawngkhâr pathum, chhim lamah kawngkhâr pathum, thlang lamah kawngkhâr pathum a awm ṭheuh va. Khawpui kulh bang chuan innghahna lungphûm sâwm leh pahnih a nei a, chutah chuan Berâmno tirhkoh sâwm leh pahnihte hming a chuang bawk a. Mi betu chuan khawpui leh a kawngkhârte leh kulh bang teh nân rangkachaka siam tehna tiang a keng a. Khawpui chu kil li nei, a dung lam leh a vâng lam inbial a ni a, tiang chuan a han teh a. Km. sânghnih leh zali a sei a ni. A dung leh a vâng leh a sân lam chu a inchen vek a. A kulh bang chu mihring tehna hmangin vântirhkoh chuan a han teh a, metar sawmruka chhah a ni. A kulh bang atân jaspi lung an hmang a, khawpui chu dârthlalang anga fîm rangkachak thianghlima din a ni. Khawpui kulh bang lungphûm chu lungmantam chi hrang hrang a ni a, lungphûm pakhatna chu jaspi lung a ni a, a pahnihna chu safir lung a ni a, a pathumna chu kalkedon lung a ni a, a palina chu smaragdin lung a ni a, a pangana chu sardonuk lung a ni a, a parukna chu sardoni lung a ni a, a pasarihna chu kruso lung a ni a; a pariatna chu berul lung a ni a, a pakuana chu topaz lung a ni a, a sâwmna chu krusopras lung a ni a, a sâwm leh pakhatna chu huakintho lung a ni a, a sâwm leh pahnihna chu amethus lung a ni. Kawngkhâr sâwm leh pahnihte chu tuikeplung sâwm leh pahnih, tlang khat ṭheuhva siam a ni. Khawpui kawtlai chu rangkachak thianghlim dârthlalang anga fîm a ni. Khawpui chhûngah chuan tempul ka hmu lo. Lalpa Pathian Engkimtitheia leh Berâmno chu an tempul a ni. Khawpui ên tûrin ni leh thla a ngai lo, Lalpa ropuina chuan a ên a, an khâwnvâr chu Berâmno a ni. Jentail-te chu a êngah chuan an lêng ang a, leia lalte pawhin an ropuina an rawn luhpui ang. A kawngte chu chhûnah an khâr ngai lo vang a, zân a awm tawh hek lo vang. Jentail-te chuan an ropuina leh chawimawina an rawn luhpui ang. Thil bawlhhlawh eng mah a lo lût thei hek lo vang a, thil tenawm tite leh dâwt chîngte an lo lût thei hek lo vang; Berâmno nunna bu-a hming chuangte chauh an lût thei ang. Tin, nunna lui mi entîr a; krustal anga fîm a ni, Pathian leh Berâmno lalṭhutthlêng aṭangin a lo luang chhuak a, khawpui lai taka kawtthlêrah chuan a luang tlang a, a kam tuakah chuan nunna thing, rah chi hrang sâwm leh pahnih nei a awm, thla tin a rah a, a hnahte chu hnam tin tihdamna a ni. Ânchhe dawng thil eng mah a awm tawh lo vang; tah chuan Pathian leh Berâmno lalṭhutthlêng a inhûng ang a, a bawihte chuan a rawng an bâwl ang a, a hmêl an hmu reng ang; an chalah chuan a hming a chuang bawk ang. Zân a awm tawh lo vang a, khâwnvâr leh ni êng an ngai tawh hek lo vang, Lalpa Pathian chuan a ên dâwn si a, chatuan chatuanin an lal tawh ang. Ka hnênah, “Hêng thute hi a rinawmin a dik a ni, Lalpa Pathian, zâwlneitea thu sawitu chuan thil lo thleng thuai tûr a bawihte entîr tûrin vântirhkoh a rawn tîr a ni. Ngai teh, ka lo kal thuai dâwn e; he lehkhabua hrilhlâwkna thu zâwmtute chu an nihlawh e,” a ti a. Hêng hretu leh hmutu hi kei Johana hi ka ni. Ka hriata ka han hmuh chuan hêng thil mi entîrtu vântirhkoh ke bulah chuan chibai bûk tûrin ka bawkkhup a. Ani chuan “Khatin ti suh, kei chu i bawihpui, zâwlneite leh he lehkhabu thu zâwmtute bawihpui ve mai ka nih hi, Pathian chibai bûk zâwk rawh,” mi ti a. Ani chuan ka hnênah, “He lehkhabua hrilhlâwknate hi zêp suh, a hun a lo thleng ṭêp a ni. Mi sualte chu sual zêl sela, mi bawlhhlawhte chu bawlhhlawh zêl sela, mi ṭha chu ṭha zêl sela, mi thianghlim pawh thianghlim zêl mai rawh se,” a ti a. Ngai teh, ka lo kal thuai dâwn e; mi tin an thiltih ang zêla pêk tûrin lâwmman ka hnênah a awm. Kei hi Alfa leh Omega, hmasa ber leh hnuhnûng ber, a bul leh a tâwp chu ka ni. An puan su faite chu an nihlawh e, khawpui chhûnga lûtin nunna thinga mi an ei thei dâwn si a. Ui te, dawithiam te, inngaih chîng te, tual that te, milem bia te, dâwt sawi chîng leh ngaina zawng zawngte erawh chu a pâwnah an awm ang. “Kei Isua hian, kohhrante hêng thu hrilh tûrin ka vântirhkoh ka rawn tîr a nih hi; Davida zungzâm, a thlah, vârparh arsi êng chu ka ni,” a ti a. Thlarau leh mo chuan, “Lo kal rawh,” an ti a. A hria apiang pawhin, “Lo kal rawh,” ti ve rawh se. Tuihâl apiang lo kal sela, nunna tui duh apiangin a thlâwnin han in rawh se. He lehkhabua hrilhlâwkna thu hria apiang ka hriattîr e: miin hêng thute hi an belhchhah chuan, Pathianin he lehkhabua hremna sawite hi a belhchhah ve ang. Tu pawhin he lehkhabua hrilhlâwkna thute hi an lâk bo chuan, he lehkhabua ziak nunna thinga mi leh khaw thianghlima an chan tûr chu Pathianin a lâksak ve ang. Hêng thu puangtu hian, “A ni, ka lo kal thuai dâwn e,” a ti a. Amen, Lalpa Isu, lo kal ta che. Lalpa Isua khawngaihna chu mi tin hnênah awm rawh se.