Dũni wã sɩngrẽ Wẽnd naana yĩngr la tẽnga. Tẽnga da yaa vɩʋʋgo, bũmb da ka a pʋgẽ ye, lik n da yãmb zĩig zãnga. Wẽnd pãng la b maasem n da buiid kooma. Wẽnnaam yeelame tɩ vẽenem zĩndi. La vẽenem zĩndame. Wẽnnaam yãeeme tɩ vẽenem yaa sõmbo, tɩ b na n welg vẽenem la lika. B pʋda vẽenema tɩ wĩndga, n pʋd lika tɩ yʋngo. Zĩig sobgame n le yẽege: dẽ la pipi daare. Wẽnnaam yeelame tɩ gãong yɛdg kooma sʋka n welg kooma sags a yiibu. La yɩɩ boto. Wẽnnaam naana saaga n welg kooma sẽn be yĩngrã ne koom ninga sẽn bɛ-a tẽngre, Wẽnnaam pʋda yĩngra tɩ saaga. Zĩig sobgame n le yẽege: daar a yiib soaba. Wẽnnaam yeelame tɩ kooma sẽn be saaga tẽngr tigim zĩig a ye, tɩ zĩ-koɛɛng puki. La yɩɩ boto. Wẽnnaam pʋda Zĩ-koɛɛnga tɩ tẽnga, n bool kooma sẽn tigim zĩig ninga tɩ mogre. Wẽnnaam yãeeme tɩ rẽ yaa sõmbo. Wẽnnaam yeelame tɩ tẽnga sob ne vãado, ne mood buud toɛ-toɛ sẽn womd biisi, ne tɩɩs buud toɛ-toɛ sẽn womd b biisi. La yɩɩ boto. Tẽnga sɩd soba ne vãado; ne mood toɛ-toɛ yã ne b biisi, ne tɩɩs toɛ-toɛ ne b biisi, la Wẽnnaam yãeeme tɩ rẽ yaa sõmbo. Zĩig sobgame n le yẽege: daar a tãab soaba. Wẽnnaam yeelame tɩ bũmb sẽn kõt vẽenem zĩnd saaga zugu n welg yʋng ne beoogo, n yals kibs rãmba, n yals daare la yʋʋmde; b na n zĩnda yĩngri n yɩ vẽenem n vẽnegd tẽnga. La yɩɩ boto. Wẽnnaam naana bug-bɛd a yiibu, a yembr yaa bed-kẽenga, yẽ n so beoogo; a yembr sẽn ka ta pipi soabã, yẽ n so yʋngo. B naana ãds me. Wẽnnaam ning-b-la yĩngr tɩ b vẽneg dũniyã, tɩ b soog beoog la yʋngo, vẽenem la lika la Wẽnnaam yãeeme tɩ rẽ yaa sõmbo. Zĩig sobgame n le yẽege: daar a naas soaba. Wẽnnaam yeelame tɩ kooma pid ne bõn-vɩɩli sẽn dugd la sẽn nugd a pʋgẽ. Tẽnga me pid ne luiili sẽn yɩgd sa-gãonga tẽngre. La yɩɩ boto. Wẽnnaam naana mogr pʋgẽ dũm-bɛda ne bõn-vɩɩli sẽn dugd la sẽn nugd koomẽ, ned kam fãa ne-a buudu, n le paas bõn-yɩgdi, ned kam ne-a buudu. La Wẽnnaam yãeeme tɩ yaa sõmbo. B ning-b-la bark woto: Bɩ y rog la y wek n pid mogra koom zãnga, bɩ luiili wã me wek n pid tẽnga. Zĩig sobgame n le yẽege: daar a nu soaba. Wẽnnaam le yeelame tɩ tẽnga rog bõn-vɩɩli, ned kam fãa ne a buudu: dũm-bɛda, dũm-bõonego, weoog rũmsi, ned kam fãa ne a buudu. La yɩɩ boto. Wẽnnaam naana rũmsi, ned kam fãa ne a buudu: rũm-bɛda, rũm-bõonego, ned kam fãa ne a buudu, rũm-kɩdse sẽn be tomẽ, ned kam fãa ne-a buudu. La b yãeeme tɩ rẽ yaa sõmbo. Wẽnnaam yeelame: D naan ninsaala n mamsa wa tõndo, wa tõnd wẽnego, t'a soog mogra zĩma, yĩngr luiili, yir dũmsi, weoog rũmsi la bõn-vuudr fãa. Wẽnnaam naana ninsaala n mams b menga, b mams-a-la b meng wẽnego; yɩɩ pag la raoa la b naan yã. Wẽnnaam ning-b-la barka, n yeel-ba: Rog-y la y wek n pid dũniya la y soog-a. Soog-y mogr zĩma, yĩngr luiili la bõn-vuudr fãa. Wẽnnaam yeelame: M kõt-y-la mooda buud toɛ-toɛ sẽn yit tẽng zugu, n paas tɩɩs sẽn womd biisi la sẽn tar bula. Sã n ya we-rũmsã, luiili sẽn yɩgd yĩngri, bõn-vuudr fãa sẽn vɩ tẽng zugu, mo-maasa la m kõt bãmba t'a yɩ b rɩɩbo. La sɩd yɩɩ boto. Naaba-Wẽnd gesa b sẽn naana fãa: fãa ra yaa sõmbo. Zĩig sobgame n le yẽege: daar a yoob soaba. Yɩɩ woto la yĩngr la tẽnga ne b teed fãa naan yã. Daar a yopoe soaba, Wẽnd tʋʋmna yãenda a tɛka tɩ B na n vʋʋse tɩ b sɛ-la b tʋʋmde. B ninga daar a yopoe soaba barka n welg-a toore, tɩ yɩɩ baraare la b vʋʋs ne b naanega tʋʋmde. Ad-y Sɩngrẽ wã, yɩɩ woto la yĩngr la tẽng naan yã. Soaala-Wẽnd sẽn naan yĩngr la tẽng raarã, dẽ tɩ tɩɩg la moog ra nan pa yi pʋʋgẽ ye; b ra nan ka bas tɩ saag ni tẽng zug ye, ninsaal me rag n nan ka be sẽn na n yɩ tẽnga koaad ye. La ade, ko-nifu n da pusgi n zãgsd tẽnga zãnga. Soaala-Wẽnd wa n yaga ninsaala ne tẽng yagdo. Vɩɩm pemsem la b fʋʋs a yõe bogdẽ t'a tũ rẽ n paam vɩɩm. Soaala-Wẽnd sela zẽedo Eden, yaang sẽnẽ, be la b kẽes ninsaala, b sẽn naan-a n sɛ. B Kɩtame tɩ tɩɩs buud fãa yi zĩ kanga, tɩɩs sẽn be neere, n sakd gesgo tɩ b biis me rɩɩb noom noorẽ. B gesa zẽeda tẽnsʋka n sel vɩɩm tɩɩga. N paas neer la wẽng bãngr tɩɩga. Kʋɩlg n dag n yit Eden n zãgsd zẽedã. Kʋɩlga welga nao a naase. Pipi naoora boondame tɩ Pizõ, yẽ n gũbg Avila, sãnem tẽnga. Tẽn-kãng sãnema ka naag ne rẽok buug ye; beelẽ tɩɩsa yoosda sũm sẽn tar yũ-noogo; beelẽ kuga me saasa b toore, n pɩnda, n maneg n gʋl-gʋle, miid la kẽese. Kʋɩlga naoor a ye me boondame tɩ Giõ, yẽ n karg Kus tẽnga gilli. Kʋɩlga naoor a to boondame tɩ Tɩgr, a zoeta Asʋr yaanga. Naoor a naas soaba yaa Efrat. Soaala-Wẽnd tɩ zĩndga ninsaal Eden zẽeda tẽnsʋka t'a yɩ zẽeda koaad la a gũuda. B kõ-a-la no-kãnga: «Tɩɩsa fãa sẽn be zẽeda pʋga, fo tõe n dɩ-la b biisi. Sã n ya Neer la Wẽng bãngr tɩɩgã, da rɩ a biis ye tɩ fo sẽn na n dɩ a biig raare, sɩd ne sɩda, f na ki.» Soaala-Wẽnd yeelame: «Ka segd tɩ ninsaal zĩ a yembr ye, dẽnd m kõ-a sõangd sẽn wẽnd-a.» Soaala-Wẽnd le rɩka yagdo n yag we-rũmsã la luiili wã fãa, n tigim-b ninsaal taoore, n na n ges yaa yʋ-bʋg la a na n pʋd-ba. Ad-y yaa rũms vɩɩsa fãa la ninsaal bao yʋʋr n pʋde. Ninsaal pʋda rũmsa fãa b yʋʋre, n pʋd luiili wã fãa, n pʋd we-rũmsã; ninsaal yaool n pa yãend sẽn wẽnd yẽ sõangd ye. Soaala-Wẽnd kɩtame tɩ gõeem sẽn ya gõeem yõk ninsaala. B yãka a sĩif a ye n lebs nemdã n bɛ. B rɩka sĩifã b sẽn yãkã n naan paga n kõ raoã. Raoã sẽn yãend pagã, a yeelame: «Marsa sẽ, m paama kõbre sẽn yi m kõabẽ la m yĩng neongẽ. Raoã bool-a lame t'a bogre t'a lʋgrẽ la b bok n yii-sa.» Rẽ n so tɩ rao basda a ba ne a ma n zĩ ne a paga n lebgd yĩng a yembre. B yiib fãa ra yaa b zaala, paga ne raoã, la yãnd da ka tar-b ye. Rũmsa sẽn yi Soaala-Wẽnd nugẽ sʋka, Waaf n da yɩɩd ne sɩlem. Yẽ n yeel pagã: «Sɩd bɩ, Wẽnd n yeel yãmba tɩ tɩɩsa sẽn be zẽeda pʋga, bɩ y da saag-y n dɩ tɩɩg ba a ye biisi?» Tɩ paga leoke: «D tõe n dɩɩ zẽeda tɩɩs biisi. Yaa tɩɩg ninga sẽn bɛ-a zẽeda tẽnsʋk poorẽ la b yeel tɩ d da saag n dɩ tɩ-kãng biig ye, tɩ d da sak n sɩɩs-a ye, ka rẽ d na ki.» Waafa leoka pagã: «Pa sɩd ye, kũum kõn ki ye! Ad-y Wẽnnaam miime bala tɩ y sẽn na n dɩ-a raare, y nin na n pukame tɩ y lebg wa wẽn-bi, n mi neer la wẽnga.» Paga mikame tɩ tɩɩga biig wẽnda a na yɩ noogo, t'a bee neere, n sakd gesgo, t'a wata ne rɩ n paam bãngre. Dẽ la a fãsg n dɩ la a fãsg n kõ a sɩd sẽn da yɛs ne-a, tɩ yẽ me rɩ. La b yiiba fãa nin pukame tɩ b bãng tɩ b yaa b zaala n bao kankang vãad n zap-zap n sẽgne. A Adem ne a paga wʋma Soaala-Wẽnd kẽnda rãamde, zẽeda pʋga. B ra kokda zaabr pemsem. A Adem ne a paga zoe n soonda tɩɩsa sʋka tɩ Soaala-Wẽnd nif ra yãend-b ye. Soaala-Wẽnd boola a Adem: «F bɛɛ?» T'a yeel: «M wʋma y rãamd zẽeda pʋga, tɩ rabeem yõk-ma, tɩ m zoe n soond, tɩ m yaa m zaala.» Dẽ la b leok-a: «Ãnda n togs foom tɩ f yaa f zaala? Woto fo rɩɩ tɩɩg ning mam sẽn da rig foom a rɩɩbã!» Raoã yeelame: «Ad-y yaa pag ning y sẽn kõ maamã n fãsg tɩɩga biig tɩ m deeg n dɩ!» Tɩ Soaala-Wẽnd yeel pagã: «Bõe la f maan woto?» T'a yeele: «Yaa waaf n belg-m tɩ m dɩ.» Soaala-Wẽnd yeela waafã: «Ad-f sẽn maan woto wã, m yãkda f bark we-rũms la yir-dũms sʋka. Fo na n yẽra ne f pʋga la f mog tom n ta f yõor tɛka. M na n ninga beem, foo ne paga sʋka, f kamb la paga kamb sʋka. Fo na n dũma paga nao-kãsenkãare la a na bedsa f zugu.» B lɛɛg n yeela pagã: «Fo sã n wa tʋtẽ, f naong na n yɩɩ wʋsg-wʋsgo, yaa toog pʋgẽ la f na n dog f kamba, f na n tʋlga f sɩda ne tʋlsem kãsenga la yẽ n na n dɩ naam la a soog fo.» B yeela raoã: «Fo sẽn kelg f paga koɛɛg n dɩ tɩɩg ning mam sẽn da yet tɩ f ra rɩ wã, bɩ tẽnga da zĩnd bark f yĩng ye. F vɩɩma pʋgẽ, dɩll f yãe toogo n paam n dɩ. Tẽnga na n woma gõos la yõens-tabdo f yĩnga la pʋt-mood n na n yɩ f rɩɩbo. F na n kaaga f rĩir tʋʋlgo n paam n dɩ la na n yɩɩ woto n tãag daar ning f sẽn na n leb tẽng tomẽ tɩ f yii tomẽ. Fo yaa tãndo n na n leb tãndẽ.» A Adem boola a paga tɩ Awa, yẽ la ninsaal fãa sẽn na n vɩɩnd tẽng zug ma. Boaalẽ wã Awa ne nin-vɩɩg yekda taaba. Soaala-Wẽnd dɩka gãndo n maan futu n yeelg a Adem ne a pagã, n yaool n yeel: «Marsã ninsaal lebga wa tõnd nin-yend n mi neer la wẽnga; d da bas-a t'a tẽeg a nug n fãsg vɩɩm tɩɩga biiga n dɩ, n wa ka bãng kũum ye!» B riga a Adem n yiis Eden zẽedẽ la a sẽn yi tẽnga tomẽ, a lebga tẽnga koaada. B sẽn yiis a Adem, b yalsa gũudba zẽeda yaang noorẽ. Yaa malɛgs, la b zãada sʋʋs sẽn yãgd bugum, n gũud vɩɩm tɩɩga tɩ ned da ta-a ye. A Adem bãnga a paga, a Awa, t'a Awa rɩk pʋga, n dog biiga, t'a yet tɩ Naaba-Wẽnd maasem yĩnga, a paam n doga ninsaala, n pʋd a yʋʋr a Kayẽ. A roga a Kayẽ yẽer, a Abɛl. A Abɛl da kɩɩmda rũm-bõonese. A Kayẽ da koodame. Sẽn wa n beẽ, a Kayẽ yãka a kood n kõ Soaala-Wẽnd. La a Abɛl me baoo rũmsa kom-dẽems n kõ Soaalã. A naaga rũmsa kaam n kõ-ba. A Abɛl ne a kũuna n ta bãmb yam. A Kayẽ ne a kũuna pa ta b yam ye. A Kayẽ sũur puuga wʋsgo, t'a neng gãnem. Dẽ la Soaala-Wẽnd sok a Kayẽ: «Bõe tɩ f sũur puug tɩ f neng gãneme? Tuubg sã n kẽ f sũurẽ, f neng kõn doog sɩda? La tuubg sã n ka f sũurẽ, ka wẽng n yɛs f rignoorẽ wa bõn-ninda n gũud foo, tɩ na n lebg pakr ne foo tɩ f wɩsg f meng n tõog-a bɩ?» A Kayẽ baas n yeela a yao, a Abɛl: «Wa tɩ d yi kɛɛnga.» B sẽn paam n zãage, a Kayẽ wudg n kẽe a Abɛl n kʋ-a. Soaala-Wẽnd soka a Kayẽ: «F yao, a Abɛl, bɛɛ?» T'a na n leoke: «M mi-la, m ya-la m yao wã gũud la?» Tɩ Soaala-Wẽnd yeele: «Yaa bõe la f maan yã? M wʋmda f yao wã zɩɩma koɛɛga; koɛɛga kelemd-m-la tẽngẽ tɩ sãt yɩnga. Woto wã m yãkda f barka la m yiisd-f-la tẽng ning sẽn sakd koodã, t'a yaaga a noor n yũ f yao wã zɩɩma f meng nug sẽn daage. F ko tẽnga me, a kõn wom f yĩng ye; fo na n saadame n gõod n pɩkd moogo.» T'a Kayẽ na n leoke: «M sɩbgra zɩsame n yɩɩd m pãnga. Ade! Y sã n dig-m rũnna n zãag ne tẽn-kãnga, d neng kõn le tees taab ye. M na n lebga sãan n saad n pɩkd moogo la sẽn sega maam fãa na n kʋ-m lame!» Dẽ la Soaala-Wẽnd yeel-a: «Bãng tɩ sẽn na n kʋ a Kayẽ, na n deega sɩbgr naoor a yopoe.» La Soaala-Wẽnd maka a Kayẽ ne makre sẽn na yɩlẽ tɩ sẽn na n seg-a fãa da lebg a kʋʋd ye. A Kayẽ yii Soaala-Wẽnd taoore, n sɩng n gilgd yaare, Eden yaanga, Nod tẽnga. Sẽn waa n beẽ, a Kayẽ bãnga a paga t'a rɩk pʋg n dog a Enok. A Kayẽ lebga tẽn-meta la a sẽn me tẽng ningã, a pʋd-a-la Enok, wala a biigã. A Enok doga a Irad, t'a Irad dog a Mewuyaɛl, t'a Mewuyaɛl dog a Lemɛk. A Lemɛk pagb yɩ-la b yiibu: pipi paga la Ada, a yiib soab la Sila. A Ada biig la a Yabal, yẽ la sẽn be-b wetẽ n kɩɩmd dũmsa yaaba. A yao la a Yubal; yẽ la sẽn wẽed-b pɛndga la sẽn peebd-b mɛɛnem yaaba. A Sila me biig la a Tubal-Kayẽ; a Tubal-Kayẽ la sẽeb sẽn tʋmd-b kut bɩ yõgs sẽn tʋmd-b zũud yaaba. A Tubal-Kayẽ tão yɩ-la a Naama. A Lemɛk yeela a pagb a yiibã: «Kelg-y m koɛɛga, Ada la Sila, Lemɛk pagba, kelg-y m koɛɛga: m sẽn paam sãmpogr ned a ye nengẽ, m kʋ-a lame la bi-bilfr sẽn kãdg-ma, m yãka a yõore. Bãng-y t'a Kayẽ kʋʋd sã n sɩbgd naoor a yopoe, a Lemɛk kʋʋd yaa pisopoe la a yopoe.» A Adem sẽn bãng a paga, a doga biig a to n pʋd a yʋʋr a Sɛt t'a goma ne a meng woto: «Wẽnd kõ-m-la biiga n ledg a Abɛl.» A Abɛl la rao ning a Kayẽ sẽn dag n kʋ wã. A Sɛt me waa n doga biiga n pʋd-a t'a Enos. Wakat kãng la b sɩng n na n waoog Soaala-Wẽnde. A Adem dooga neb la woto: Wẽnd sẽn naan ninsaal daare, b kõ-a-la bãmb meng wẽnego. B naana raoa, n naan paga; b ning-b-la barka, n bool-ba, b naanega raare, tɩ ninsaalba. A Adem yʋʋm sẽn waa n pid koabg la pis-tã, a roga biig sẽn wẽnd a menga, sẽn tar a wẽnego la a pʋda a yʋʋr t'a Sɛt. A Sɛt dogem poore, a Adem le vɩɩnda yʋʋm kobs-nii la a roga kom-dibli la kom-pugli. A Adem pʋlemd zãng yɩɩ yʋʋm kobs-wɛ la pis-tã, t'a yaool n ki. A Sɛt yʋʋm sẽn waa n ta koabg la a nu, a roga a Enos. A Enos dogem poore, a Sɛt paama yʋʋm kobs-nii la a yopoe, n dog kom-dibli la kom-pugli. A Sɛt sẽn waa n na n ki t'a yʋʋm yaa kobs-wɛ la piig la a yiibu. A Enos yʋʋm sẽn waa n ta pis-wɛ, a doga a Kena. A Kena dogem poore, a Enos paama yʋʋm kobs-nii la piig la a nu la a roga kom-dibli la kom-pugli. A sẽn waa n na n ki t'a yʋʋm yaa kobs-wɛ la a nu. A Kena yʋʋm sẽn waa n ta pisopoe, a doga a Maalaleyɛl. A Maalaleyɛl dogem poore, a paama yʋʋm kobs-nii la pis-naase, t'a na n dog kom-dibli la kom-pugli. A sẽn waa n na n ki t'a yʋʋm yaa kobs-wɛ la piiga. A Maalaleyɛl yʋʋm sẽn waa n ta pisoob la a nu, a doga a Yerɛd. A Yerɛd dogem poore, a Maalaleyɛl paama yʋʋm kobs-nii la pis-tã la a doga kom-dibli la kom-pugli. A yʋʋma fãa zãng yɩɩ kobs-nii la pis-wɛ la a nu t'a yaool n ki. A Yerɛd yʋʋm sẽn waa n ta koabg la pisoob la a yiibu, a roga a Enok. A Enok dogem poore, a Yerɛd paama yʋʋm kobs-nii la a doga kom-dibli la kom-pugli. A yʋʋma zãng fãa yɩɩ kobs-wɛ la pisoob la a yiibu t'a yaool n ki. A Enok yʋʋm sẽn waa n ta pisoob la a nu, a doga a Metusela. A Enok yɩɩ wẽn-tũuda. A Metusela dogem poore, a paama yʋʋm kobs-tã la a doga kom-dibli la kom-pugli. A Enok yʋʋm fãa yɩɩ kobs-tã la pisoob la a nu. A tũu sor ning Wẽnd sẽn date la a waa menema dũniya la yɩɩ Wẽnd n loog ne-a. A Metusela yʋʋm sẽn waa n ta koabg la pis-nii la a yopoe, a doga a Lemɛk. A Lemɛk rogem poore, a Metusela paama yʋʋm kobs-yopoe la pis-nii la a yiibu la a roga kom-dibli la kom-pugli. A Metusela yʋʋma fãa zãng yɩɩ kobs-wɛ la pisoob la a wɛ t'a yaool n ki. A Lemɛk yʋʋm sẽn waa n ta koabg la pis-nii la a yiibu, a doga biiga. A pʋda a yʋʋr tɩ Nowe n yet a sũuri: «Bi-kãnga n na n yols-do, d naong la d tʋʋm tood pʋgẽ, tẽng sẽn ka le be bark pʋgẽ.» A Nowe dogem poore, a Lemɛk paama yʋʋm kobs-nu la pis-wɛ la a nu la a roga kom-dibli la kom-pugli. A Lemɛk yʋʋma zãng yɩɩ kobs-yopoe la pisopoe la a yopoe t'a yaool n ki. A Nowe yʋʋm sẽn waa n ta kobs-nu, a doga a Sɛm, a Kam la a Zafɛt. Ninsaalb buud waa n sɩnga paasg tẽng zugu; b waa n doga wʋsgo: kom-dibli wʋsgo, kom-pugli me wʋsgo. Na-komsã, pãn-dãmba, waa n yãeeme tɩ nin-zaalsa kom-pugli yaa neeba tɩ b na n bao b sẽn nong b rãmbã n maan b pagba. Soaala-Wẽnd waa n yeelame: «M pa tẽed tɩ yaa daar fãa la m na n bas ninsaal t'a kell n vɩɩnd moog ye. Ninsaal sẽn ya neong yĩnga, a yaa bõn-kiidga. Dũnna tɛka a pʋlemd kõn yɩɩg yʋʋm koabg la pisi ye.» Bãng-y tɩ sasa kãng tɩ nin-wobd n da be tẽngã. Bãmb n da pid tẽngã; pãn-dãmba sẽn waa n kẽed ne nin-zaalsa kom-pugli wã la b rog bãmba. Bãmb la tẽn-kʋdem-wẽnnẽ gãndaado; b yʋʋr da yii wʋsgo. Soaala-Wẽnd yãeeme tɩ tẽng zugu, ninsaalb wẽnema tara paasg tɩ b sũura pʋgd wẽng bala, wakat buud fãa. Dẽ me la Soaala-Wẽnd zab ne b menga, b sẽn naan ninsaal n ning-a tẽng zug yĩnga; b sũur sãama wʋsgo, tɩ b yeele: M na n menesa ninsaal m sẽn naana tẽng zugu ka, la m na n naaga yẽ ne rũm-bɛda, rũm-bõonesã la yĩngr luiili n menese; m sũur ka le noom m sẽn naan-ba ye. Sã n ya a Nowe, yẽ paamame tɩ b yals ne b nimbãan-zoeerã tɩ b ka na n maan-a bũmb ye. A Nowe buuda kibar la woto: A Nowe yɩɩ nin-sõngo la nin-tɩrga, a taaba fãa sʋka, a zamaana rãmb fãa sʋka, la a ra pʋgda Wẽnd, wala b sẽn date. A kamb yɩ-la a tãabo: a Sɛm, a Kam la a Zafɛt. A Nowe wakatẽ, Wẽnd mikame tɩ tẽnga sãamame, tɩ zamaana lebg pãn-tõog zamaana. Wẽnd gesame la b yãeeme tɩ tẽnga sãamame, ned ba a ye ra ka le tũud so-sõng tẽng zug ye. Woto la Wẽnd yeel a Nowe: «M yalsa dũni wãab m yamẽ tɩ ninsaal pids-a-la ne wẽnem la pãn-tõogo; m na n naaga ninsaal ne tẽngã n wã zãnga.» Naaba-Wẽnd yeela a Nowe: «Bao ra-pegd sẽn tõe n gõd n maan koglg. Kẽ a pʋgẽ n maan do-bõonego, n gãneg sũud b pʋgẽ la yɩnga. Ad koglga sẽn na n maan to-to: woglma na n yɩɩ kãntɩɩs kobs-tã, yalma kãntɩɩs pis-nu, zãndlma kãntɩɩs pis-tã. B le yeela a Nowe: Ka yĩngrã n mumdgi, la f ning kʋɩleng kɩreng a ye; rota rogenda taab naoor a tã. Ko-kẽeng la m na n sik tẽnga zugu, n sãam bõn-vɩɩl fãa; tẽng zug bõn-yooda fãa tog n kiime. M na n yõga zood ne foom. Kẽ koglga pʋga, foo ne f paga la f kamb ne b pagba. Bõn-vɩɩl la bũmb fãa sẽn ya neongo, rũmsa fãa sʋka tũus-ba, a yiib-yiibu, raoog la yãanga, n kẽes-b koglga pʋga, tɩ b naag foom n põse. Luiil buud fãa, rũng buud fãa, tẽnga rũm-kɩdsa buud fãa, raoog la yãang la f na n yãke tɩ b naag foom n paam n põse. Ning pãng n paam dɩɩb n bĩng foom ne bãmb yĩnga.» A Nowe sɩd maana Wẽnd sẽn yeel-a wã fãa. Soaala-Wẽnd yeela a Nowe: «Kẽ koglga pʋga, foo ne f zaka fãa tɩ m yãeeme tɩ foo bal la nin-tɩrga zamaana pʋga. Yãk rũms sõma buud fãa a yopoepoe, raad la yãanse. Sã n ya rũms niyns sẽn pa sõmb m nifẽ, yãk bãmb b yiib bal, buud fãa pʋgẽ, raoog la yãanga. Yĩngr luiili wã na n yɩɩ a yopoepoe, buud fãa pʋgẽ, raad la yãanse, tɩ b buud da wa menem moog ye. Keta rasem a yopoe tɩ m tak saag sẽn na n ni rasem pis-naase, wĩntoog la yʋngo, la woto m na menes moogo m sẽn naana fãa.» Soaala-Wẽnd sẽn yeel a Nowe t'a maan bũmb ninga fãa, a maan-a lame. Sa kẽengã la ko-kẽengã sẽn na n wa moog raare, dẽ t'a Nowe tara yʋʋm kobs-yoobe. A Nowe kẽe koglga pʋga ne a kamba, a paga ne a bi-pagba n paam n põs ko-kẽengã. Rũmsa fãa, sẽn ya-b sõmbo wala sẽn ka-b sõmbo, bõn-yɩgdi la bõn-vuudi, kẽe koglga pʋga, a yiib yiibu, raoog la yãang, wala b sẽn wilg a Nowe. Dasem a yopoe sẽn pidi, ko-kẽenga reega tẽngã. A Nowe dogem yʋʋm kobs-yoobe, kiuug a yiib soaba, kiuuga piig la a yopoe daare, yĩngr mogra ko-nina yoosa zãnga, tɩ sa-koom na n kiig tẽng dasem pis-naase, wĩntoog la yʋngo. Badaare, a Nowe kẽe koglga pʋga ne a Sɛm la a Kam la a Zafɛt; a kẽe ne a paga la a kamba pagb a tã, ne rũmsa buud fãa, bɛd la bõonego sẽn vɩ tẽng zugu, ne luiili wã fãa, bɛd la bõonego, sẽn tar b pɩgs buud fãa. Sẽn naag-ba a Nowe n kẽ koglgã yɩɩ bũmb fãa sẽn ya neongo, n vʋʋsd ne yõore la b kẽ-la b yiibu yiibu, raoog la yãang, wala Wẽnd sẽn da wilg b toore. A Nowe sẽn kẽ koglgã, Soaala-Wẽnd lɛɛg n pag-a-la pʋgẽ. Dasem pis-naas pʋgẽ, ko-kẽenga sɩnga tẽnga saagre; kooma wa n lebga wʋsgo la a zẽka koglgã n dʋʋs yĩngri. Kooma paasa wʋsgo, n wa reeg tẽnga zãnga tɩ koglga na n sɩng n kẽnd a zugu. Kooma tara rʋʋbo al n wa lim mooga tãms fãa. Kooma sẽn lim tãmsã n zʋʋg-ba, taa kãntɩɩs piig la a nu. Wakat kãnga bũmb ning fãa sẽn da vɩ tẽng zug kiime: luiili, yir-dũmsi, we-rũmsi, bõn-nagse la ninsaalb fãa. Sẽn vɩ-a ne yõor fãa, saaga tẽngr, tẽng zug, fãa kiime. Soaala-Wẽnd sãama sẽn da be tẽng zug zãng fãa, sẽn yɩ ninsaala n tat rũnga, bõn-vuudri, luiila, fãa kiime; sẽn põs bala yɩ-la a Nowe la sẽn da naag-b yẽnda koglga pʋga. Kooma paa tẽnga zugu dasem koabg la pis-nu. Wẽnd wa n tẽega a Nowe yelle, yẽ ne rũmsa sẽn da naag koglga pʋga, bɛd la bõonego. B kɩtame tɩ sob-raoog kaoog n fẽbg kooma tẽnga zugu. Yĩngr ko-nina pagame la sa-koom ka le rʋʋg ye. Woto, bilf-bilfu, kooma sɩnga fẽbgre; Dasem sẽn waa n ta koabg la pis-nu t'a yõbgame, la kiuug a yopoe soaba, kiuuga piig la a yopoe raare, koglga yalsa Ararat tãnga zugu. Kooma kell n talla sigbu n ta kiuug piig soaba la kiuug piiga sẽn ta, tãmsa zut sɩnga pukri. A Nowe basame tɩ dasem pis-naas le looge t'a lak koglga võore, n basd gãoobg t'a yit la a watẽ n tãag tẽnga sẽn waa n kʋɩ zãnga. Dẽ poore yaa wall la a Nowe yiis yã n na n bãng kooma sã n wooga tẽng zugu. Walla sẽn mik tɩ tẽnga ket n dɩga ne koom tɩ zĩ-koɛɛng ka n zaoondedẽ, a lɛɛg n waame. A Nowe tuda a nug n yõk-a n kẽes pʋgẽ. A Nowe basame tɩ rasem a yopoe loog t'a le yiis wallã. Zĩig sẽn maage, walla lɛɛg n waame la oliviye tɩɩg vã-maasr la a ra zãad a noorẽ la woto a Nowe bãngame tɩ kooma fẽbgame. A le gũu rasem a yopoe n yaool n le yiis wallã t'a yi n ka lɛɛg n wa lɛ-lɛ. Dɩlla a Nowe, yʋʋma sẽn pid kobs-yoobe la a ye raare la kooma fõog zãng tẽng zugu. A sẽn lak sugrã, a Nowe yãeeme tɩ tẽnga fãa kʋɩɩme. Yɩɩ kiuug a yiib soaba pisi la a yopoe raare la tẽnga kʋɩ zãnga. Wẽnd goma ne a Nowe woto: «Yi koglga pʋga, foo ne f paga, f kamb ne b pagba. Yiis rũmsa fãa sẽn be ne foo, sẽn ya neong buud fãa, luiili, we-rũmsi, bõn-vuudi. B reeg tẽng n yãmb, b piuugi, b wek n pid moogo.» A Nowe yii ne a kamba, a paga la a bi-pagba. Bãmb poore yɩɩ we-rũmsi, yir-dũmsi, luiili, bõn-vuudi, tẽnga bõn-vɩɩli wã fãa. B yii bal-balle. A Nowe maana maan-kugri la maan-kugra zugu a yõka rũng buud fãa sẽn ya sõngo, luiil buud fãa sẽn ya sõngo, n kʋ maoongo. Yɩɩ rũng a ye, buud fãa pʋgẽ. Soaala-Wẽnd koka maanda yũ-noogo n sigs b sũuri la b yeela b sũurẽ: «M kõn le saag n yãk tẽnga bark ninsaal yĩng ye tɩ ninsaal yam la a sũur togla wẽng t'a nan paooda. M kõn le saag n sɩbg bõn-vɩɩli wã wa m sẽn sɩbg-ba ye. Tẽnga sã n ket a zĩigẽ, bũmb ba a ye wakat kõn ta tɩ b pa yãend-a ye: bʋdbo bɩ tigsgu, waood bɩ tʋʋlgo, sẽoog bɩ sɩpalgo, wĩndg bɩ yʋngo.» Wẽnd ninga a Nowe ne a kamba barka n yeel-ba: «Dog-y la y wek n pid tẽnga. Bɩ rũmsa buud fãa rig rabeem y taoore: yĩngr luiili la tẽng bõn-yood fãa, mogr zĩm fãa. M dɩka b fãa n sagl y nugẽ. Bũmb ning fãa sẽn vɩ la a kẽnd tẽng zugu na n lebga yãmb dɩɩbo; m kõt-b-la yãmb wala m sẽn kõ-y vã-maasã. Y sẽn pa tõe n dɩ bala yaa nemd sẽn ket ne zɩɩm, ne vɩɩm. Ninsaal zɩɩm pa raagde tɩ m pa sok ye. M na sok rũnga, m na sok ninsaal fãa sẽn daag zɩɩm. Ninsaal yõor sã n yãke, m na soke. Ned ninga fãa sẽn daaga ninsaal zɩɩm bɩ b raag yẽ me zɩɩm. Ninsaal yaa naande sẽn tar Wẽnnaam wẽnego. Dog-y la y wek n pid tẽnga. Lebg-y wʋsgo n pid-a n saage.» Dẽ poore Wẽnnaam goma ne a Nowe la a kamba woto: «M yõgda zood ne yãmb la y yagens sẽn na n dog y poorẽ, ne bõn-vɩɩli wã fãa sẽn be-b ne yãmba: luiili, rũmsi, we-rũmsi, sẽn naag b yãmb n yi koglga pʋg fãa, tẽnga rũms fãa. M yõgda zood ne yãmba. Sa-kẽeng kõn le ni n kʋ bõn-vɩɩl ba a ye, sa-kẽeng kõn le ni n wã dũni zãng ye.» Wẽnnaam le paasame: «Ad makr sẽn ka na n tol n le viig, makr tɩ zood n be sʋka, maam ne yãmb la bõn-vɩɩli wã fãa sẽn be ne yãmba sʋka; m ningda saag-gomtɩʋʋg yĩngri t'a yɩ tõnd zooda makre, maam ne tẽnga zooda makre. M sã n wa tigim sawatã tɩ b na n ni, saag-gomtɩʋʋg na puki, la m na tẽeg zoodã m sẽn yõg ne yãmb la bõn-vɩɩl buud fãa, la kooma kõn le yɩ ko-kẽeng n yãk yõor abada. Saag-gomtɩʋʋga sã n puk yĩngri, m na yãend-a la m na tẽeg zood ning maam a Wẽnd sẽn yõg ne bõn-vɩɩl fãa sẽn be tẽng zugu.» Wẽnnaam le yeela a Nowe: «M zood ne sẽn vɩ-a tẽng zug fãa makr la saag-gomtɩʋʋgã.» A Nowe kamb sẽn naag b yẽnda n yi koglga pʋg yɩ-la a Sɛm, a Kam la Zafɛt. A Kam la a Kanaã ba. Bãmb b tãabã n yɩ a Nowe kamba la yaa bãmb n wek zulum wekre n pid moogo. A Nowe n yɩ pipi n sɩng tẽnga koobo. A waa n sela bugsuntungu. A waa n yũu bugsuntunga rãama n lʋɩ, n gãe a zaal a roogẽ. Kanaã rãmb yaab a Kam kẽe n mika a ba a zaala t'a yi n wilg a ba-biisã. A Sɛm ne a Zafɛt rɩka a Nowe fu-yorgã n palg b bãko n tar po-tula n wa lud b ba; b sẽn kẽn po-tulã b pa yãend b ba sẽn yaa a zaal ye. A Nowe sẽn neke, a bãnga a kamba yao zʋʋga sẽn maane. A yeelame: «Wẽnd na yãk a Kanaã barka, Wẽnd na kɩt t'a lebg sõgne a kẽema la a yao wã sõgen-kamba sõgne.» A le paasame: «Soaala, a Sɛm Wẽnda paam pẽgre! Wẽnd na kɩt t'a Kanaã yɩ a sõgne! Wẽnd na kɩt t'a Zafɛt ne a Sɛm zems taaba, Wẽnd na kɩt t'a Kanaã yɩ a Zafɛt yem-daogo!» Ko-kẽenga poore, a Nowe vɩɩnda yʋʋm kobs-tã la pis-nu. A Nowe yʋʋma zãng yɩɩ kobs-wɛ la pis-nu t'a yaool n ki. A Nowe kambã: a Sɛm, a Kam, a Zafɛt doga wʋsgo. B weka balbo, ko-kẽenga poore. A Zafɛt kamba: a Gomɛr, a Magog, a Mɛd, a Yavã, a Tubal, a Mosɛk, a Tiras. A Gomɛr kamba: a Askenaz, a Rifat, a Togarma. A Yavã kamba: a Elisa, a Tarsis, Kitim la Rodanim. Yaa bãmb zamaanẽ la neba sɩng n sẽeg taaba n kẽ mogra noorẽ tẽnse la tẽns sẽn puk mogr sʋka, ned kam fãa ne a weoogo, a goama, a sagse, a tẽn-peelem. A Kam kamba la woto: a Kus, a Misrayim, a Ypt, a Kanaã. A Kus kamba: a Seba, a Abila, a Sabta, a Rama, a Sabteka. A Rama kamba: a Seba, a Dedã. A Kus n dog a Nemrod, yẽ la tẽng zug pipi gãndaoogo. Da yaa tãoos sẽn yi ne pãng Wẽnnaam nugẽ, la b maana yelbũn a poorẽ: Tãoos ne pãng Wẽnnaam taoore, wala a Nemrod. A soolma na-tẽns yɩ-la a Babɛl, a Erɛk la Akad la Kalne; fãa yaa Sinear tẽn-peelmẽ. A Nemrod waa n yii be n dig Asʋr n tɩ me Niniv, tẽng ne so-raad sẽn kõog yalens-yalense, Reobot-Ir, n paas Kela tẽnga, tẽn-kãseng menga, n le paas Resen, la yẽnda bee Niniv la Kela sʋka. A Misrayim kamb yaa Lud tẽng rãmba, n paas Anam, Leab, Naftu, n paas Ezipt nug rɩtg rãmba wala Kaslu, be la Filisti rãmb yita, n pas Krɛt rãmba. A Kanaã n dog a Sidõ, a pipi biiga. A Ɛt n pʋgda. A buud yɛsa la Zebuzitse, Amoritse, Zirgazitse, Ivitse, Arkitse, Sinitse, Arvaditse, Sɛmaritse la Amatitse. A Kanaã buuda waa n sɩnga sẽegre. B tẽnga toaag sɩngda Sidõ n digd Gerar, n tat Gaza n teesd Sodom, Gomor, Adma, Seboyim n tat Leza. A Kam kamb la woto, ne b sagse la b buuda goama ne b tẽnse la b tẽn-peelem. A Zafɛt kẽem a Sɛm me n dog a Ebɛr yaaba. A Sɛm kamb yɩ-la a Elam, a Asʋr, a Arpaksad, a Lud, a Aram. A Aram kamb yɩ-la a Uk, a Ul, a Getɛr la a Mas. A Arpaksad n dog a Sela t'a Sela dog a Ebɛr. A Ebɛr kamb yɩ-la a yiibu: pipi soaba a Pelɛg tɩ yɩɩ yẽ wakatẽ la neba sɩng taab welgre; a yao wã yʋʋr la a Yoktã. A Yoktã kamb la a Almodad, a Selɛf, a Asar-mavɛt, a Yera, a Adoram, a Uzal, a Dikla, a Obal, a Abimayɛl, a Seba, a Ofir, a Avila, a Zobab, bãmb fãa yɩ-la a Yoktã kamba. B tẽnga ra sɩngda Mesa n digd Sefar, tãng ninga sẽn bɛ-a yaangã. A Sɛm kamba la woto, ne b sagse la buuda goama, ne b tẽnse la b tẽn-peelem Boto me la a Nowe kamb kibare, ned kam fãa ne a doogo la a buud goama, la a tẽn-peelem. Yaa wakat kãnga, ko-kẽenga poore, la ninsaalb sɩng sẽegr tẽng zugu. Neba fãa da yaa zelem yɛnga tɩ b goama ya goam yɛnga. La yaang sẽnegã neba gõome n wa yãe tẽn-nabre n tɩ n kẽ, yaa Sinear tẽn-nabre. B yeela taaba: «Wa-y tɩ d wẽ tãn-koɛɛm n wʋme.» La tãn-koɛɛm n yɩ b kug tɩ tãn-sũud yɩ tãn-fãoodem. B yeelame: «D me tẽng a ye la d yals gaosg a pʋgẽ. Yaa gaosg sẽn na n lug n tãag saaga. D tʋm n bao yʋʋre la d kell n pa zĩ yɛng la d da sẽeg moog ye.» Soaala-Wẽnd sigame n ges tẽngã la gaosgã b sẽn me wã. B yeelame: «Ade, b lagma taab n ya buud a ye tɩ b zelemd me yaa a ye; la nan yaa b tʋʋma sɩngre; d nee tagsg ning sẽn be b sũurẽ, bũmb ka le tõe n yɩ toog ne b ye. Wa-y tɩ d sig n kalem b goama tɩ b da le wʋm taab ye.» La Soaala-Wẽnd sẽega ninsaalb zĩis fãa, dũni pʋgẽ la tẽnga ka tõog n me n baas ye. Yaa rẽ yĩng la b boond tẽn-kãng tɩ Babɛl tɩ yaa zĩ-kãng la Soaala kalem zɛlma la b sẽeg ninsaalba zĩis fãa tẽng zugu. A Sɛm doog la woto: a Sɛm yʋʋm sẽn waa n ta koabga, a roga a Arpaksad, ko-kẽenga sẽn loog tɩ yʋʋm a yi. A Arpaksad rogem poore, a Sɛm vɩɩnda yʋʋm kobs-nu, n dog kom-dibli la kom-pugli. A Arpaksad yʋʋm sẽn waa n ta pis-tã la a nu, a roga a Sela. A Sela rogem poore, a Arpaksad vɩɩnda yʋʋm kobs-naase la a tãabo, n dog kom-dibli la kom-pugli. A Sela yʋʋm sẽn waa n ta pis-tã, a roga a Ebɛr. A Ebɛr rogem poore, a Sela vɩɩnda yʋʋm kobs-naase la a tãabo, n dog kom-dibli la kom-pugli. A Ebɛr yʋʋm sẽn waa n ta pis-tã la a naase, a roga a Pelɛg. A Pelɛg dogem poore, a Ebɛr vɩɩnda yʋʋm kobs-naase la pis-tã, n dog kom-dibli la kom-pugli. A Pelɛg yʋʋm sẽn ta pis-tã, a roga a Rewu. A Rewu dogem poore, a Pelɛg vɩɩnda yʋʋm kobs-yi la a wɛ, n dog kom-dibli la kom-pugli. A Rewu yʋʋm sẽn waa n ta pis-tã la a yiibu, a roga a Serug. A Serug rogem poore, a Rewu vɩɩnda yʋʋm kobs-yi la a yopoe, n dog kom-dibli la kom-pugli. A Serug yʋʋm sẽn waa n ta pis-tã, a roga a Nawor. A Nawor dogem poore, a Serug vɩɩnda yʋʋm kobs-yi, n dog kom-dibli la kom-pugli. A Nawor yʋʋm sẽn waa n ta pisi la a wɛ, a roga a Tera. A Tera rogem poore, a Nawor vɩɩnda yʋʋm koabg la piig la a wɛ, n dog kom-dibli la kom-pugli. A Tera yʋʋm sẽn waa n ta pisopoe, a roga a Abram, a Nawor la a Arã. A Tera roog la woto: a Tera n dog a Abram, a Nawor la a Arã; a Arã n dog a Lot. A Arã ki-la a ba, a Tera, nugẽ, Kalde rãmb tẽng sẽn boond tɩ Ur. A Abram ne a Nawor paama pagba. A Abram pag yʋʋr la a Sarayi t'a Nawor rẽnd boond tɩ Milka. A Milka ne a Yiska ba la a Arã. Bãng-y t'a Sarayi da yaa pʋg-kiiri n ka tar biig ye. A Tera peega a biiga Abram la a yao, a Arã, biig a Lot, n paas a Abram pag a Sarayi n tall-ba n yi Ur, Kalde rãmb tẽnga tɩ b na n dɩk Kanaã tẽng sor. B sẽn ta tẽng a ye b sẽn pʋd tɩ Arã, b ti-la b rot be. A Tera pʋlemd zãng yɩɩ yʋʋm kobs-yi la a nu t'a yaool n ki Arã tẽnga. Soaala-Wẽnd yeela a Abram: «Bas f tẽnga la f buudu la f zaka, n kẽng tẽng ning m sẽn na n wilg foom. M na n kɩtame tɩ f buud lebg kãsenga, m na n ning-f-la barka, m na n zẽka f yʋʋre, m na n kɩtame t'a lebg bark yʋʋre. Sẽn kãabda foom noogo, m na ning a soab barka, sẽn kãabda foom beedo, m na kãab a soab me beedo; dũni ninsaalba fãa na n tũu fo maasem n paam barka.» A Abram yiime wala Soaala-Wẽnd sẽn da kõ a noore. A Lot tũ-a lame. A Abram sẽn waa n na yi Arã tẽng t'a yʋʋm da zoe n taa pisopoe la a nu. A Abram peega a pag a Sarayi ne a yao biiga, a Lot; b wʋka b sẽn da tar laog ning fãa Arã tẽnga la b rɩka Kanaã sor ne b yemse la b rakõapa. B waa n taa Kanaã tẽnga. A Abram sãagame n ta zĩ-sõng ning sẽn boond tɩ Sikɛm; b siga More tɩɩg tẽngre, tɩ-bedr wa kʋka. Wakat kãng tɩ Kanaã rãmb n da kẽed tẽng-kãnga. Soaala-Wẽnd lika a Abram n yeel-a: «M na n dɩka tẽn-kãngã n kõ foo ne f buudu.» Dẽ la a Abram me maan-kugr zĩ-kãnga, tɩ Soaala lik-a-la be. A sẽn yi be, a dʋʋ tãng zugu, Betɛl tẽng yaanga; a tilga a roog be n get Betɛl nin-taoore, n get Ayi yaanga; a le mee maan-kugr a to Soaala waoogr yĩnga, b sɛɛg yõkr yĩnga. A Abram le sɩnga kẽnde. Yaa ta ka, n ka n vʋʋse, n le yik n tar kẽnde, n teesd Negɛb weoogo. Kom waa n lʋɩɩ tẽngã t'a Abram kong n ta Ezipt; koma sɩd yɩɩ kãsenga. B sẽn waa n kolg Ezipt tẽnga, a Abram yeela a paga, a Sarayi: «Gese, mam miime tɩ fo yaa pʋg-neere. Bãng tɩ Ezipt rãmba sã n wa yãe foom ne maam, b na n yeelame: ‹Paga yaa rao kãnga paga.› La b na n kʋʋ maam n paam n soog foom. Dɩlla m kot-f lame tɩ f yeele: ‹Ya m tão.› Woto b na maan m neere fo yĩnga la fo maasem yĩnga, b na bas-m ne yõore.» A Abram sẽn sɩd ta Ezipt tẽnga, Ezipt rãmb yãeeme t'a paga ra sɩd yaa neere al wʋsgo. Ezipt naaba neba pẽga a Sarayi neerem la b tall-a lame n kẽng na-yiri. Naaba talla a Abram neere, paga yĩnga la a kõ-a-la piisi, niisi, bõn-daado, bõn-yãanse, yʋgma, yem-daado la yem-pogse. La a Sarayi yĩnga, Soaala-Wẽnd sɩbga Ezipt dĩma la a zak rãmb ne sɩbgr sẽn yɩ toogo. Dẽ la dĩma bool a Abram n yeel-a: «Yaa bõe la fo sẽn maana? Bõe yĩng la fo pa togs tɩ paga yaa fo paga? Bõe yĩng tɩ fo yeel tɩ ya f tão tɩ mam deeg a n na n maan m paga. Deeg f pagã n yik n menem!» Dĩma bas-a-la a neba nusẽ la b tall-a lame n tɩ bas Ezipt tẽn-toaagẽ, yẽ ne a paga la a sẽn so fãa. A Abram yii Ezipt tẽng ne a paga, ne a Lot, ne a sẽn tar fãa la b teesa Negɛb. A ra yaa rakãagre n tar bãga la wuba la wanzurf la sãnem. A sẽn tar kẽnde, bilf-bilfu, a waa n yii Negɛb n ta Betɛl; n ta a sẽn deng n sig zĩig ninga, Betɛl ne Ayi tẽnsʋka, n ta a sẽn da me maan-kugrã zĩig ningã. Beene, a yõka Soaala-Wẽnd sɛɛga. A Lot da tũuda a Abram. Yẽ me ra tara rũmsi, bɛd la bõonego n paas pɛɛl la gãnd sẽn tar n tiid so-toak roto. Tẽnga ra pa tar tɩ sek a rɩlg bãmb b yiib ye tɩ b paoong ra yaa wʋsgo. Woto zabr n waa n yik a Abram ne a Lot rũm-kɩɩmba sʋka. Tẽnga ra yaa Kanaã rãmb la Perizitsa tẽnga. Dẽ la a Abram yeel a Lot: «Zabr bɩ beem da zĩnd maam ne foom tẽnsʋk ye, a ra zĩnd mam dũm-kɩɩmbã la fo rũm-kɩɩmba sʋk ye, tɩ d yaa saam-biisi. Tẽnga yɛdgame n dɩg d taoore. Wa tɩ d welg taab, fo sã n digd goabga bɩ mam kẽng dɩtgo, fo sã n digd dɩtgo bɩ mam tees goabga.» A Lot zẽka a neng n kaag Zʋrdẽ kʋɩlga foolle la a yãeeme t'a gãee ne yamdo. Wakat kãng tɩ Soaala-Wẽnd da nan pa sãam Sodom la Gomor ye. Al n ta Soar, zĩiga ra yaa waa Soaala zẽedo, wa Ezipt tẽnga. A Lot yãka Zʋrdẽ bãooga foolle, n tees yaanga. Yaa woto la b welg taaba. A Abram zĩnda Kanaã tẽnga, t'a Lot pa bãg-faasẽ, n tol n tilg a zak Sodom tẽnga. Sodom neba da yaool n yaa nin-wẽnse, b da beegda Soaala beegr kãsenga. A Lot sẽn welg ne a Abram bala la Soaala sẽn yeel-a: «Abram, bɩ f zẽk f neng marsã la f yaas f sẽn be zĩig ningã n ges goabg la rɩtgo, yaang la taoore. Tẽnga fo sẽn ne wã, m na n kõ-a-la foo ne f buudu, tɩ f soog-a wakat buud fãa. F buuda sõor na n paasa wʋsgo wala tẽng bĩisri. Ned ninga sẽn tõe n sõd tẽnga bĩisri, yẽ bal n wat n tõog n sõd f yagense. Aya, yik n saag tẽngã, a woglem la a yalem tɩ m dɩk-a lame n kõ foom!» A Abram yikame n dɩk a teedo n tɩ ti Mambre googo. Tɩ-bɛd wa kʋgs n da be be. Googa pẽe ne Ebrõ. Beene a vigla maan-kugri Soaala-Wẽnd waoogr yĩnga. Sinear dĩm, a Amrafɛl, zamaanẽ, Elasar dĩm, a Ariok, Elam dĩm, a Kedor-Laomɛr, n paas Goyim dĩm, a Tideal, waa n yika zabre ne Sodom dĩm, a Bera, ne Gomor dĩm, a Birsa ne Adma dĩm, a Sineab, ne Segoyim dĩm, a Semebɛr, n paas Bela tẽng dĩma. Tẽn-kãng boondame yɛs tɩ Soar. Dĩm bãmb ra tog n sega taaba Sidim, yamsem mogra bãg-faagẽ. A Kedor-Laomɛr dɩ naam b zug yʋʋm piig la a yiibu. Piig la a tãaba yʋʋmde, b zãensame n yi a soolmẽ. Dẽ me yĩnga, la piig la a naas yʋʋmde, a Kedor-Laomɛr wa ne dĩm niyns sẽn da ket n deegd a noorã. B naaga taab n tõog Refayitsã Astarot-Karnayim, n tõog Zuzitsa Am tẽnga, n tõog Emitsa Kiriyatayim tẽn-nabrẽ, n tõog Oritsa b tãmsa zut, al Seyir n ta Ɛl Parã sẽn pẽ ne we-raoogo. B yii be marsã n lɛɛg n wa Mispat bãka, n lɛɛg n wa Kadɛs. B tõoga Amalesitse la Amoritse sẽn da be Asasõ-Tamar. Dẽ me la Sodom, Gomor, Adma, Seboyim, la Bela dĩm dãmb yik n sũ tãpo n na tak zabre, Sidim bãg-faagẽ, ne Elam dĩm, a Kedor-Laomɛr, ne Goyim dĩm, a Tideal, ne Sinear dĩm, a Amrafɛl la Elasar dĩm, a Aryok. Dɩlla yɩɩ dĩm dãmb a naas n yik zabr ne dĩm dãmb a nu. Sidim noorẽ, b ra tuu tãn-sũud buls wʋsgo la Sodom ne Gomor dĩma sẽn da tard tula lʋɩ b pʋsẽ; sẽn paam-b n põsa zoe n dʋʋ tãnga. Tɩ b na n wʋk Sodom la Gomor dãmb paoong la b koodo n looge. B looga ne a Abram yao biiga, a Lot, ne a teeda fãa; a Lot ra tɩ kẽeda Sodom. Ned a ye n zoe n põse, n wa togs a Abram, Ebrayitgã; wakat kãng t'a Abram da ti a yir a Mambre kʋgsẽ; a Mambre da yaa Amoritga, t'a Eskol la a Anɛr yaa a yaop; bãmb ne a Abram da yaa zoodo. A Abram sẽn wʋm tɩ b looga ne a saam-biig, a Lot, a tigma a rakõap kobs-tã la piig la a nii sẽn dog yẽ zakẽ la sẽn tar sũ-keelem. B boba b zab-teedo n pʋg bɛɛbã n ta Dã tẽnga. B maana yam n na n ling-b ne yʋngo, n tõog-ba, n dig-ba n ta Oba, al Damas nug goabga. A Abram lɛɛg n waa ne a saam-biig a Lot, ne pagbã la rakõapã la laoga fãa. A Abram sẽn tõog a Kedor-Laomɛr ne dĩm dãmb a taabã n lɛɛg n watẽ, Sodom dĩma yii n seg-a-la Save bãoogẽ; b ra boonda zĩ-kãng me tɩ dĩm bãoogo. Salem dĩm, a Mɛlkisedɛk talla buri la rãam n wa; yẽnda n da ya Yĩngr Soaala maan-kʋʋda. A ninga a Abram bark woto: «Yĩngr Soaala-Wẽnde sẽn naana yĩngr la tẽngã, ning a Abram barka. Yĩngr Soaala paam barka, tɩ bãmb n sagl f nugẽ, f bɛɛba gilli!» A Abram weela a paoongã fãa piig-piiga n dok a ye piig fãa zug n kõ a Mɛlkisedɛk. Sodom dĩma yeela a Abram: «Kõ maam m nebã la f wʋk sẽn ketã n looge.» T'a Abram leok Sodom dĩma: «M zẽkda m nugu la m wẽenda ne Soaala-Wẽnde, sẽn naana yĩngr la tẽngã, m wẽendame tɩ f sẽn so bũmb ning fãa mam kõn yãk fɩ, a pʋgẽ ye, ba gaarga, ba neoodr gĩsga; woto f kõn tõog yeel bada tɩ foo n kɩt t'a Abram lebg arzɛk soab ye. Mam kõn deeg fɩ, sã n ka m rakõapa rɩɩbo. M zo-rãmba sẽn yãag-b maama na reeg b pʋɩɩre; a Anɛr, a Eskol, a Mambre, bãmb na yãk b keoore.» Dẽ loogr poore, a Abram paama Soaala-Wẽnd likri. B yeel-a lame: «Abram, da maan dabeem ye, mam ya f gũuda la f na n paama dolb wʋsg m nengẽ.» T'a Abram soke: «Bõe la y na n kõ-ma, Soaala-Wẽnnaam, tɩ m kʋʋndẽ n dabda n ket n nan ka rog biiga? Ade, yãmb ka kõ-m dogem ye la yaa m yir dakõore, Damas tẽng Eliezer, n na n wa soog m sẽn tara fãa.» Soaala-Wẽnd leok-a lame: «Ka yẽ n na n soog f roog ye, na n yɩɩ f meng bi-roaka.» Soaala-Wẽnd talla a Abram n yi yɩnga n yeel-a: «Ges yĩngri, la f sã n tõe bɩ f sõd ãdsã; ade, f buuda neb na n yɩɩ kõn bãng n sõde.» A Abram tẽe Soaala la bãmb me tõog n ges-a-la wa nin-sõngo. B lɛɛg n yeel-a lame: «Yaa maam, Naaba-Wẽnd, n yiis foo Ur, Kalde tẽnga, n wa kẽes f tẽn-kãnga tɩ f soog-a.» A Abram kʋʋga koɛɛga: «M Soaala, bõe n wilgd-ma tɩ tẽnga na n yɩɩ m soolem?» Dẽ la Soaala yeel-a: «Kẽng n tɩ wa ne yʋʋm a tã nag-sɛdga, n paas yʋʋm a tã bʋʋga, yʋʋm a tã pe-raoogo, pɩgdre la wall bila.» T'a Abram tɩ wa ne rẽ fãa, n bog-ba, a yiib yiibu, n dɩk boagã n yegl taaba. Pɩgdra la walla bal la a ka boke. Yɩbrend yãee nemdã n sigi t'a Abram laas-ba. Wĩndig sẽn waa n dabd lʋɩɩse, gõeem kãseng la rabeem yõka a Abram. Soaala-Wẽnd yeel-a lame: «Bãng neer tɩ f yagensã na n tɩ siga sãando tẽng a ye sẽn ka b tẽnga la b na n lebga yem-daado la b na n namsa yʋʋm kobs-naase. Buud ninga sẽn na n kẽesa bãmb yembdã, m na n wa kao-la a bʋʋdo la f yagensa na n yii be ne arzɛk kãsenga. Sã n ya foo, fo na n looga ne laafi n tɩ sak f saam-dãmba, f na n bãnga kʋʋlem noogo tɩ b yaool n maan f kʋʋre. Kaoosg sã wa beẽ, yagensa na n lɛɛg n waa kaanẽ; rũnna-rũnna, Amoritsa wẽnem ket n dabda taoore. M gũuda b wẽnema wa pid zãnga, tɩ m dig-ba.» Wĩndig sẽn waa n lʋɩ zãnga tɩ zĩig fãa lebg lika, bug-kãseng wa wʋng bugum, n tar zɛlma, looga nemda sʋka. Badaare Soaala-Wẽnd yõga zood ne a Abram woto: «M kõta f buuda tẽn-kãnga, sẽn sɩng Ezipt kʋɩlga n digd Efrat kʋɩl-kãsenga. Soog Kenitse, Kenizitse, Kadmonitse, Ititse, Perizitse, Refayitse, Amoritse, Kanaã rãmba, Zirgazitse la Zebuzitse.» A Abram paga, a Sarayi, da nan pa rog biig ye, a ra tara roog-biiga sẽn yit Ezipt tẽnga la sẽn boond tɩ Agar. Dẽ la a Sarayi yeel a Abram: «F ne-la, Soaala-Wẽnd ka kõ-m dogem ye; m kot-f-la bũmbu: kẽ ne mam doog-biigã tɩ daare m na paam kamba.» A Abram kelga a Sarayi koɛɛga. Woto a Abram sẽn waa n paam yʋʋm piig Kanaã tẽnga, a Sarayi rɩka a roog-biig, a Agar, Ezipt bi-pugla, n kõ a Abram t'a maan a paga. A Abram kẽesa a Agar; a Agar rɩka pʋga la a sẽn bãng t'a rɩka pʋga, a pa le ges a roog-ma wa ned ye. A Sarayi waa n kong n yeela a Abram: «Paoogr ning a Agar sẽn paoogd maama leb foo. Mam dɩka m doog-biig n kõ foo, la a sẽn bãng t'a rɩka pʋg tɛka, a pa le nand maam ye, bɩ Wẽnnaam bʋ d bʋʋdo.» Dẽ la a Abram leok a Sarayi: «Yaa foo ne f roog-biiga, maan ne-a wa f sẽn date.» A Sarayi namsa a roog-biigã al t'a wa kong n zoe. Ned la Soaala tʋm yã la a sega a Agar bãk a ye noor, Sur sorẽ bãkã, n yeel a Agar: «Sarayi doog-biiga, f yita yɛ la f dabda yɛ?» T'a leoke: «M yi-la a Sarayi nengẽ n zoetẽ.» Soaala sẽn tʋm a soaba yeelame: «Leb f zu-soaba nengẽ; tɩ sulg f meng a taoore. Soaala na n kõ-f-la kamb wʋsg-wʋsgo; b kõn waa n tõog n sõd n sɛ ye. Gese, fo tʋtame, f na n doga bi-ribla; f na n pʋda a yʋʋr a Ismayɛl, tɩ f pɛta pʋgẽ, Soaala wʋma f kɛlenga. F biiga na n yɩɩ wa burgumdi, a na yika zabr ne neb fãa, tɩ neb fãa me yik zabr ne-a, la a na n welga ne a saam-biisi n ti a zaka.» A Agar da sokda a meng woto: «M sɩd yãenda sẽn ne-a maama bɩ?» La yʋ-kãnga la a pʋd Soaala sẽn gom ne-a wã: Ɛl-Royi, Wẽnd sẽn ne-ma. Yaa rẽ yĩng me la a bool bãka sẽn da pẽ be wã t'a Layi-Royi, sẽn vɩ la sẽn ne-a Soaba bãka, la a bee Kadɛs la Berɛd sʋka. A Agar doga bi-ribla la a Abram boola biiga t'a Ismayɛl. A Agar sẽn waa n na n dog a Ismayɛl t'a Abram tara yʋʋm pis-nii la a yoobe. A Abram yʋʋm sẽn waa n dabd pis-wɛ la a wɛ, Soaala lik-a lame n yeel-a: «Yaa maam la Pãng-Soaba, Wẽnde, kẽn m taoore, yɩ sõng zãnga. M na n yõga zood ne foo, m na n kɩtame tɩ f buud lebg zembala.» A Abram lʋɩ-la a yãvabga Soaala taoore tɩ b gom ne-a woto: «Ade, m na n yõga zood ne foom, f na n yɩɩ buud ka tɛk yaaba. B kõn le bool-f tɩ Abram ye, yaa Abraam la b na n bool-fo, tɩ rũnna tɛka, m kɩtame tɩ f lebg buud ka tɛk ba. M na n kɩtame tɩ f buud wek al wʋsgo, m na n kɩtame tɩ f buuda yɩ sags ka tɛka, m na n yiisa dĩm dãmb a pʋgẽ. Maam ne foo na n yɩɩ zoodo, la fo loogr poore, m zooda na n paa ne f buudã n ka tol n yãe sɛɛb ye, tɩ m datame n yɩ fo Wẽnde la fo kamba Wẽnde, fo loogr poore. M na n kõo foo ne f kamba tẽnga tõre t'a yɩ f soolem daar fãa, la mam na n yɩɩ yãmb Wẽnde.» La Soaala yeela a Abraam: «Tall m zooda neere, foo ne f buudu, zamaan woo zamaan. Zood ninga sẽn ka tog n sɛ, maam ne foom la f kamba tẽnsʋkã, zood kãng kaset la woto: kẽes bi-ribl fãa bãongo. Bãonga kõom n na n yɩ maam ne yãmb zooda kaseto. Bi-ribl fãa sẽn dog tɩ dasem maan a nii, bɩ y kẽes-a bãongo; dɩlla, a yaa fo meng biiga, f yamb biiga, sãan biiga, kẽes-a bãongo. Mam zooda kaset na n zĩnda yãmb yĩngẽ wala bũmb sẽn ka tõe n menem ye. Woto wã, bi-ribl ning fãa sẽn ka kẽ bãongo, b na n yiis-a-la buudẽ t'a zãgsa zooda kaseto.» Soaala-Wẽnd yeela a Abraam: «Da le bool f pagã a Sarayi ye, a yʋʋr lebga Sara. M na n ning-a-la barka, a na doga biig n kõ fo tɩ m ning bi-kãng me barka; a na n doga bu-yalengo, mooga dĩm dãmb na n yi-la a pʋgẽ.» A Abraam lʋɩɩ-la a yãvabga, n pusg laado t'a yeela a sũurẽ: Yʋʋm koabg rao na rog biiga, yʋʋm pis-wɛ pag na le kũm dogem? Ad-a sẽn le yeele: «A Ismayɛl we n kell n zĩnd ne laafi.» Dẽ la Soaala-Wẽnd leok a Abraam: «F paga, a Sara, na n doga biiga tɩ f bool-a t'a Izaak la m na n yõga zood ne yẽndã la a kamba la yaa zood sẽn ka na n zĩnd sɛɛbo. Fo sẽn kos bũmb ning a Ismayɛl yĩnga, m deegame, ade, m ningd-a-la barka, yẽ me na n paasame, a na n weka zembala, a na n doga dĩm dãmb piig la a yiibu, a buuda na n yɩɩ bu-kãsenga. La m zooda yẽ, yaa ne a Izaak la m na n yõge, bi-kãng la f paga na n dog n kõ foo, vẽer wakat kãnga.» La Soaala-Wẽnd sẽn togs b koɛɛg n sɛ, b leba yĩngri n bas a Abraam, t'a Abraam bool a biig a Ismayɛl la kom-dibli fãa sẽn dog a zakẽ bɩ a sẽn da ra b rãmba, la badaar bala a kẽesa rapa fãa bãongo, wala Soaal sẽn da kõ noore. A Abraam sẽn waa n kẽ bãong t'a tara yʋʋm pis-wɛ la a wɛ. Dẽ t'a Ismayɛl yʋʋm yaa piig la a tãabo. A Abraam ne a biig a Ismayɛl kẽe bãong daar a ye. Sẽn naag-ba n kẽ bãongã yaa yẽ zak kom-dibli gilli, b ka bak sẽn dog-b zaka pʋga bɩ sãamba sẽn da ne ligd ye. Soaala-Wẽnd lika a Abraam a Mambre kʋgsẽ; a ra zĩ-la a doog noor n kokd pemsem. Zĩiga ra wɩngame. A waa n zẽka a nenga, la ade, rap a tãab n da yɛs a taoore. A sẽn yãend-ba, a wudg n kolgame n wõgemd tẽnga n yeel-ba: «M Zu-soaba, m kotame tɩ ning-taab sã n beẽ, bɩ y ra loog n pa yaas bilfr ye. Bas-y tɩ m tall koom bilf n wa tɩ y waas y nao la y zĩnd maasmẽ n vʋʋse. Yaas-y ka tɩ m wa ne dɩɩb bilfu, tɩ y na le paam pãng n kẽng taoore; m tẽedame tɩ y raab la boto la y sẽn tũ y yamba nengẽ wã!» Tɩ b leok-a: «Be neere, maan wala f sẽn yeelã.» A Abraam zoe tao-tao n tɩ yeel a Sara: «Yãk zom nug a tã n nage n dõos miisd var-vare.» A Abraam meng wudg n kẽnga a bãgrẽ n tɩ bao nag-bil poll sẽn ya sõmbo n kɩs a rakõore t'a reeg n dʋg tao. A rɩka bĩisim sẽn gũsi, n paas bĩs-naare la nag-bil a sẽn seglã n wa tẽgen sãamba taoore, tɩɩga maasmẽ, la yẽ meng yalsa be. B sẽn dɩ n sɛ, b sok-a lame: «F pag a Sara bɛɛ?» T'a leoke: «A be-la a roogẽ.» Sãan a ye yeelame: «M na n lɛɛg n waa vẽer zĩ-lik paalle la ade, f pag a Sara na n paama biiga.» Mik a Sara ra bee yẽ poorẽ bala, a roog noore. A Abraam ne a Sara ra kʋʋla wʋsgo; a Sara ra pa le tẽr kiuug pukda taoor bɩ yaang ye; Dẽ la a Sara laa a sũurẽ n yetẽ: «M sẽn kʋʋl woto wã m na le tõog n bãng dogem sũ-noogo? M sɩd yẽ sẽ n ka lebg nin-kẽem kʋdre.» Soaala-Wẽnd yeela a Abraam: «Bõe yĩng la a Sara laa a sũurẽ n yetẽ: ‹M sẽn kʋʋl woto wã m na n yɩɩ wãn n le rog biiga?› Bõe n be n ya toog ne Wẽnnaam? Vẽere, zĩ-lik paalle, m na le sig f yiri la a Sara na n doga biiga.» A Sara kɩɩsa woto: «Ad-y mam pa la ye.» Rabeem da yõk-a lame. Tɩ Soaala-Wẽnd yeele: «Da kɩɩs ye, f laame sẽ.» Rapa yikame tɩ b na n looge t'a Abraam yãag-b bilfu n tees Sodom sẽnẽ. Soaala yeelame: «M sẽn na n maan bũmb ningã, m tõe n solg-a-la a Abraam bɩ? A Abraam buuda tog n lebga bu-kãsenga, buud sẽn tar pãnga, tɩ tẽng zug buud a taaba tũ yẽ maasem n paam barka. Yẽnda la m yama kẽ yã tɩ m kos-a t'a wilg a kamba la a roogo, tɩ yẽ loogr poore, bɩ b tũ Soaala raabo n maan sẽn zems la sẽn toge tɩ Soaala me tõog n pids b sẽn kãab-a bũmb ningã fãa.» Soaala-Wẽnd waa n yeelame: «Ad koɛɛg ning sẽn ningd Sodom la Gomor taala sãta zĩig zãnga; b yel-wẽna labsa. Togame tɩ m ta n gese b sã n sɩd maana wala m sẽn wʋmd tɩ b gomdã. Sã n pa boto me, m na bãnge.» Neba dɩka Sodom sore. A Abraam da nan ka zãag ne Soaala ye. A pʋs n kolg-b lame n yeel-ba: «Yãmb na sak n naag nin-wẽng ne nin-sõng n kʋ? Daar bɩ nin-sõma pis-nu be tẽnga pʋga, yãmb na wã tẽngã? Y ka na n kõ-a sugri neb pis-nu wã sẽn ket a pʋgẽ wã yĩnga? Y yam zãr ne tʋʋmd a woto, y yam zãr ne kʋ nin-sõngo n naag ne nin-wẽnga. Bõe tɩ nin-sõng la nin-wẽng zãab ka na n welg taaba? Y yam zãr ne y fãoog-b taaba. Dũni wã fãa Bʋ-kaooda maanda wãn n bʋ kegre?» Soaala-Wẽnd leoka a Abraam: «M sã n yãe Sodom pʋga neb pis-nu sẽn ya nin-tɩrse, m na bas-a taal bãmb yɩnga.» A Abraam yeelame: «Ad-y m tɩtaam waooga, mam sẽn ya tãnd la tom bala, maam n dat n le gom ne yãmba. Sẽn yet tɩ pis-nu wã, daare neb a nu bal n wat n paooge, a nu wã bal yĩnga, yãmb na sak n wã tẽnga zãnga?» Tɩ Soaala-Wẽnd leoke: «Tẽnga kõn wã, m sã n yãe neb pis-naas la a nu a pʋgẽ ye.» A Abraam le paasame: «La sã n ya pis-naas bal n be, y na n maana wãna?» Tɩ Soaala-Wẽnd leoke: «Pis-naasa yĩnga, m kõn wã tẽnga ye.» A Abraam le kabsame: «Soaala, m kot-y lame tɩ m sã n le gome bɩ y ra puug y sũur ye; y na n maana bõe, sã n ya pis-tã bal n be?» Soaala leokame: «M sã n yãe neb pis-tã, m kõn maan fɩ.» M na n kosa m Soaala n le leok gomde: «La sã n ya pisi?» Tɩ Soaala yeele: «Pisi wã yĩnga, m kõn kʋ ye.» A Abraam le paasame: Bɩ Soaala ra puug a sũur ye, tɩ m na n le yiisa gomd a ye bala: «Sã n ya neb piig bala?» Tɩ b leoke: «Piiga yĩnga m kõn wã tẽnga ye.» Soaala sẽn gom n sɛ, b loog n basa a Abraam tɩ yẽ me leb a zakẽ. Malɛgs a yiibã kẽe Sodom ne zafare, dẽ t'a Lot zĩi tẽnga noore, la a sẽn yãend-ba a yik n tɩ seg-b lame, n wõgemd b taoore. A yeel-b lame: «M Zu-soaben-dãmba, sak-y n sig yãmb yamba yiri, n waas y nao la y gãand tɩ beoog yibeoogo, y na le rɩk y sore.» B yeelame: «Ayo! D na n gãanda yɩnga, tẽnga pʋga.» A Lot dɩdgr yĩnga b sak n siga a zakẽ. A Lot kõ-b-la rɩɩbo, bur sẽn pa ning bɩlle, la b rɩɩme. B sẽn yet tɩ b na n kẽe gãaga la tẽnga rãmb sẽn gũbg yirã: dapa, kom-bõonego, nin-kẽemse, tẽnga gill kaoog n waame. B boola a Lot n yeel-a: «Rapa sẽn kẽ ka yʋngã bɛɛ? Tall-ba n wa tɩ d sõs ne-ba.» A Lot yiime n lɛɛg n pag kʋɩlenga a poorẽ. A bʋʋga neba dignoorẽ, la a yeel-b lame: «Da saag-y yell a woto ye, m saam-biisi, m kota sugri! Mam tara m kom-pugli a yiibu sẽn nan ka kul sɩdb ye, bãmb la m na n tall n wa kõ yã tɩ y pids y raabo. Da maan-y nin-bãmba bũmb ye tɩ b siga sãand m yiri.» B leok-a lame: «Serg ka!» N le paase: «Fo yaa tẽnga sãan n yaool n dat n kao tõnd bʋʋdo la tõnd na tʋm foo wẽnga.» B ra veooda a Lot ne pãnga la bilf bal tɩ b kaoogẽ kʋɩlengã. Neb a yiiba tuda b nug n tak a Lot n kẽes a zakẽ, n lebs n pag kʋɩlenga. B fẽega sẽn da be-b yɩnga zondo, sẽn sɩng bi-bilfu n ta nin-kẽema al tɩ b babendẽ n baood kʋɩlengã n kongdẽ. Neb a yiibã yeela a Lot: «F sã n le tar ned ka wala rɛɛmba, bi-ribla, bi-pugla, sẽn yaa a soab fãa, t'a be tẽn-kãnga pʋgẽ, bɩ f tall-b tɩ y yi. Tõnd na n sãama tẽngã tɩ koɛ kãseng n sãt la a ningd-a-la taale, Soaala-Wẽnd taoore; yaa rẽnna la b tʋm tõnd tɩ d wa wã tẽngã.» A Lot bʋʋga a reem dãmba n yeel-ba: «Yik-y n loog-y ka tɩ Soaala-Wẽnd na n wãa tẽnga.» A reem dãmba yõkame t'a maanda dakɩɩr ne bãmba. Zĩig sẽn waa n yẽege, sẽn tʋm b rãmba pẽdga a Lot, b ra yet-a lame: «Yiki, peeg f paga la f kom-pugli tɩ y yi n looge tɩ tẽnga na n paama sɩbgre la ka tog tɩ y rɩ a beegra taal ye.» A Lot da maasame, tɩ b kong n gãd a nugu, n gãd a paga la a kamb a yiiba nusi, Soaala sẽn da rat b fãagr yĩnga. B tall-b lame n yiis kɛɛnga n yeel-ba: «Aya! Ned kam fãa zoe n fãag a yõore, ned da wẽneg n ges a poorẽ ye; da yals-y tẽn nabrẽ ye, zoe-y n kẽng-y tãng zug n paam n põse la y ra naag n ki ye.» A Lot leokame: «Yãmb sẽn makd bũmb ninga pa noom-m ye. Soaala, mam paama bark yãmb nengẽ, yãmb nimbãan-zoeer kãseng siga m zugu tɩ y rat tɩ m põse, la m pa tẽeda tɩ m na tõog n zoe n ta tãngã tɩ yella pa maan ye, tɩ m me baas n ki. Tẽn-bil a ye n pẽ ka, m tõe n zoe n kẽe be, a paooda la m we n tõog zoe n ta be n paam n põse.» B leoka a Lot: «Bas tɩ m zoe n deega f kosgo la fo sẽn gomd tẽn-bil ningã, m kõn maan-a fɩ. Aya! Nadg pãnga, zoe n tɩ kẽ be tɩ m pa na m maan fɩ tɩ f ket sor zug ye.» Ya rẽ yĩng la tẽnga yʋʋr lebg Soar, a pa zem bũmbu. Yaa sõor sẽn waa n pukdẽ la a Lot ta Soar. Soaala-Wẽnd kɩtame tɩ kidbri la yĩngr bugum sig Sodom la Gomor. B sãama tẽn-bãmba zãng fãa, b pʋto, b tɩɩs fãa, tẽnga ninsaalb fãa. Sã n yaa a Lot pagã, yẽ wẽneg n gesa a poorẽ, a paa zĩ-kãnga, n lebg yamsem nin-naande. A Abraam tõda beoogo n leb Soaala-Wẽnd sẽn da lik a zĩig ningã, a gesa Sodom la Gomor, la ade, a yãee bug-zõos sẽn nukdi, wa bug-kẽeng rẽnna. Soaala-Wẽnd sẽn waa n na n sãam tẽns a yiibã, b tẽega a Abraam yelle, dẽ la a Lot põs yã. A Lot yii Soar, yẽ ne a kom-pugli a yiibã tɩ rabeem ra tar-a-la wʋsgo. A tɩ yãee tãng boko n kẽ, yẽ ne a kamba. Kãsma yeela yao wã: «Ade, tõnd ba lebga nin-kẽema la rao a ye meng ka le ket tẽng zug sẽn na n kẽes tõnd kãadem wala b sẽn maand zĩis fãa ye. Wa tɩ d yũnug d ba rãam n paam n gãand ne-a n paam n dog biiga.» Badaar yʋngo, b kõ-la b ba rãam t'a yũ. Kãsma n deng n gãand ne a ba, a ba wã yaool n ka bãng a waoongo, a ka bãng a loogr ye. Vẽkẽmbeoogo, kãsma yeela a yao wã: «Zaame mam kẽe ne m ba, d le kõ-a rãam t'a yũ rũnna yɛsa tɩ fo kẽ ne-a tɩ d paam kamba, t'a buud da sɛ ye.» Yʋng kãnga yɛsa, b le kõ b ba rãam t'a yũ, tɩ yao wã kẽ n gãand ne a ba t'a pa tol n bãng a waoong la a loogr ye. B yiib fãa waa n dɩka pʋga. Kãsma sẽn dog a biiga, a pʋd-a-la Moab. Yẽ la rũnna Moabitsa yaaba. Yao wã sẽn dog a biiga, a pʋd-a-la a Amon, yẽnd la rũnna Amonitsa yaaba. A Abraam yii Mambre n tees Negɛb sẽnẽ; a ti-la a yir Sur la Kadɛs sʋka, n wa yi be n tɩ kẽ Gerar. A Abraam yeela a paga poorẽ: «A Sara yaa mam tão.» Wa n segame tɩ Gerar dĩma, a Abimelɛk, tʋmame tɩ b wa peeg a Sara. Woto wã Soaala-Wẽnd lika a Abimelɛk yʋngo, a gõeemẽ, n yeel-a: «Fo sẽn dɩk pʋg-kãnga wã, ad-f na n kiime, a tara sɩda.» A Abimelɛk da nan pa sɩɩs paga ye, dẽ la a yeel yã: «Soaala, m sok n gese yãmb na kʋ maam ne b m soolem dãmba tɩ d ka mi d beegr tiiri? Yaa a Abraam meng n yeele: ‹Yaa mam tão la a Sara.› A Sara me yeelame: ‹Yaa mam kẽema.› M sẽn maan bũmb ninga ne-a, m maan-a-la ne sũur sẽn ka rat wẽnga, ne pʋ-peelem zãnga.» Dẽ la Soaala-Wẽnd yeel-a, a zãmsdẽ: «Ya m sẽn mi tɩ f yaa pʋ-peen-neda la m pa sak tɩ f tʋm wẽng ne-a, tɩ f pa sɩɩs-a ye. Marsã, lebs pagã a sɩda; ad yaa mam neda, a na n pʋʋs n kõ-f lame la f na n vɩɩndame. F sã n zãgs a lebsgo, mars-marsã bala f na n kiime la f sẽn so fãa na n wãame.» Tao-tao bala, a Abimelɛk yika ne yʋngo n bool a rakõapa fãa n togs a sẽn wʋma, tɩ rabeem kãseng yõk-ba. A kɩtame tɩ b bool a Abraam la a yeel-a lame: «Bõe la f maan tõndo, ãnna n beeg foo tõnd sʋka, tɩ f rat n wã-d zãng-zãnga? Ad yaa sẽn ka tog la f sẽn maan tõndã. Yaa bõe yĩng la fo maan woto?» T'a Abraam yeele: «M tagsa m sũurẽ, daare ned ka be ka n zoet Wẽnd ye, la b na n kʋ maam n soog m paga. Baad-y tɩ m sẽn yeela ka zirẽ zãng ye, a yaa m tão, a yaa m ba-biiga, la ka m ma-biig ye, pagẽ wã yẽ, a yaa mam paga. Wẽnd sẽn waa n yiis maam m ba zakẽ, m kos-a-la m toore t'a zoe m nimbãanega la a yeele, d sẽn ta zĩig ning fãa, t'a yaa m tão.» A Abimelɛk bao piisi, niisi, yem-daad la yem-pogse n kõ a Abraam; a lebs-a-la a paga Sara. A yeel-a lame: «Ad tẽnga sẽn yɛdg n dɩg f taoore, ti f zak f sẽn dat zĩig ninga.» A Abimelɛk yaool n yeela a Sara: «Deeg wakɩ koeems tusri n kɩs f kẽema, dẽ na n yɩɩ kaseto tɩ f tara sɩda la f zãag d fãa ne pĩnd tudgrã.» A Abraam sẽn pʋʋse, Soaala-Wẽnd kõ-la a Abimelɛk laafi; a paga la a yem-pogsã fãa paama laafi n tõog n le rogd kamba. Bãng-y t'a Abimelɛk sẽn bao a Abraam paga Sara tɛka, Soaala da gɩdga a pagba rogem. Soaala-Wẽnd tẽega b sẽn da pʋlem a Sara bũmb ninga, la b pidsa b pʋlemde. Pʋg-yãanga, a Sara, rɩka pʋga la a roga biig Wẽnd sẽn yals wakat niingã, n kõ nin-kẽem a Abraam. A Abraam pʋda biig ning a Sara sẽn dogã t'a Izaak, a Laadwɛɛnda. Dasem a nii daare, a Abraam kẽesa a biiga bãongo wa Soaala-Wẽnd sẽn da kõ-a noore. A Izaak dogma wakato t'a Abraam tara yʋʋm koabga. A Sara goma woto: «Wẽnd waa ne laado, ned ninga fãa sẽn na n wʋma kibarã na n pusga laado.» A le yeelame yɛsa: «Ãnda n na n saagẽ n yeel t'a Sara na le yẽsem biiga, mik m kʋʋlem pʋgẽ m doga biiga.» Biiga bɩɩme n tol n sigi. Biiga sẽn bas a ma bĩisr daare, a ba maana kibs kãsenga. Daar a ye, a Sara yãenda a biig, a Izaak, t'a reemd ne a Ismayɛl, Ezipt poaka, a Agar, biigã. A tɩ yeela a Abraam: «Dig yem-poaka ne a biigã tɩ pa segd tɩ yem-poak biig wa naag m biig, a Izaak, n welg a ba raboog ye.» Paga leokre, a Ismayɛl poorẽ, pa yɩ a Abraam noog ye. Soaala-Wẽnd yeela a Abraam: «Da sãam f sũuri, yem-poaka ne a biiga poorẽ ye, ade, a Sara sẽn na n kos-f bũmb ning fãa, bɩ f maan boto, tɩ m na n tũ-la a Izaak maasem n kõ-f buudu tɩ f yʋʋra ra menem ye. La yem-poaka biig sẽn ya fo buudã, m na kɩt tɩ yẽnda me yɩ bu-kãsenga.» A Abraam tõda beoogo n bao buri la ko-waooga n kõ a Agar. A Agar zombga biiga gʋbla, t'a Abraam na n yiis-ba. A Agar sẽn yi, a tɩ sɩnga saab Beerseba zĩ-pɛɛlẽ. Kooma waa n sɛɛme t'a bao tɩɩg a ye maasem n bas a biiga be. A loogame n tɩ bao zĩig n gãande. Biiga ne a ma da zãra ne taaba wala pĩim sẽn tõe n tão n ta zĩig ninga. A da yeta a sũurẽ: Woto m kõn yãend m biiga kũum ye; a yaool n da wẽnega a neng n tees be la a tar yãbre la wiisgu. Soaala-Wẽnd me wʋma biiga kɛlenga; dẽ la b tʋm ned yĩngri t'a sig n bool a Agar: «Agar, bõe la f maanda, bas rabeem, Soaala wʋma f biiga koɛɛga. Yik n tɩ rɩk-a n sagl f naoẽ, m na n kɩtame t'a buud yɩ bu-kãsenga.» Soaala-Wẽnd puka a nina la a yãee bãk ne koom t'a kẽng n tɩ toog n pids a waooga n kõ a biiga t'a yũ. Soaala-Wẽnd zĩnda ne biigã, a paa weoogẽ n lebg tãoosa. A paa Parã weoogo. A ma tɩ bao Ezipt tẽng biig n kõ-a t'a maan a paga. Wakat kãnga, a Abimelɛk ne a tãnsoaba Pikol waa n yeela a Abraam: «Ade, Soaala bee fo poorẽ wakat fãa. Dɩlla wẽen ne f Wẽnde tɩ f kõ maan-m bũmb ye, maam ne m kambã la m yagensã, wẽen tɩ f na n zoe m nimbãanega, wala mam sẽn zoe f nimbãanega, n deeg-f sãand ka. D zooda ra sãam ye.» T'a Abraam yeele: «M wẽendame.» Zabr n waa n baas n yik a Abraam ne a Abimelɛk sʋka, t'a Abimelɛk neb n wa n dig a Abraam rakõapa n deeg b bulg a ye. Woto la a Abimelɛk leok yã: «Mam ka mi ned ninga sẽn tʋm tʋʋmda ye; fo zɩ n gom ne m ye, sã n ka rũnna, koɛɛg nan ka lʋɩ m tʋbrẽ ye.» A Abraam bao piisi la niis n kõ a Abimelɛk la b lebga zoodo. A Abraam sʋka pe-yãans a yopoe n loe kɛɛnga. T'a Abimelɛk na n sok-a: «Fo sʋka pe-yãans a yopoe wã n n na n maan bõe?» T'a Abraam yeele: «M kotame tɩ f reeg piisã tɩ rẽ yɩ kaseto tɩ yaa maam n sɩd tuk bulgã.» Ad-y yaa rẽ yĩng la b bool zĩ-kãnga tɩ Beerseba, wẽeneg bulga, b yiiba fãa sẽn wẽena yĩnga. Zooda sẽn yõg Beerseba n sɛ, a Abimelɛk ne a tãnsoab a Pikol yii n leba Filisti rãmba soolmẽ. A Abraam sela tɩɩg Beerseba la tɩ-kãng tẽngr la a waoog Soaala, ka-sɩng-ka-sɛɛb Wẽnde. A Abraam kaoosa wʋsg Filisti rãmba soolmẽ. Dẽ loogr poore, Wẽnnaam fɛɛsa a Abraam n na n bãng a pʋga. B bool-a lame: «Abraam!» T'a sake: «Naaba!» Tɩ b yeel-a: «Dɩk f bi-yendã, a Izaak, fo sẽn nong a soab wʋsgã, n kẽng Moriya tẽnga, tãnga a ye zugu, m sẽn na n wilg-fu n tɩ kʋ-a maoong n yõog bugum.» A Abraam yika tõd-beoogo n loe a bõang gaare, n nek a rakõap a yiibu ne a biiga Izaak. A wɩɩsa raada sẽn na n tall n yõog maoongã la a rɩka sor ning Wẽnnaam sẽn wilg-a. Da-tãten-daarã, a Abraam zẽka a neng n yãe zĩigã al yɩɩg-yɩɩga. A yeela a rakõapã: «Yas-y ka ne bõangã tɩ maam ne m biiga ta taoor n pʋʋs la d lɛɛg n wa paam-y ka.» A Abraam rɩka maoonga raado n tʋk a Izaak, yẽ meng ra zãada bugum la sʋʋga tɩ b tũud taab n dabda. A Izaak waa n yeela a ba: «M ba!» T'a leoke: «Yaa wãna, m biiga?» Tɩ biiga yeele: «M nee bugum ne raado la maoonga pe-bila bɛɛ?» T'a Abraam na n yeel-a: «Sã n ya maoonga pe-bilã, Wẽnd n na n ges rẽnna.» La b kell n talla kẽnde. B sẽn ta Wẽnd sẽn wilg zĩig ningã, a Abraam sama kuga, a mee maan-kugri, a sigla raadã a zugu la a sẽba a biig a Izaak n gãnege. A Abraam tẽega a nug n na n dɩk sʋʋgã n kodg a biiga. Soaala malɛka bool-a lame: «Abraam, Abraam!» T'a sak: «Naaba!» La koɛɛg n yeel-a: «Sõng tɩ f nug ra sɩɩs biiga ye la ra maan-a bũmb ye. Marsã m miime tɩ fo zoeta Wẽnde, fo ka mong-ma f bi-yenda ye.» A Abraam zẽka a nenga, a yãee pe-raoogo; kãgr n da gãd a yɩɩlã la a Abraam yõk-a lame n kʋ a biiga zĩigẽ: A Abraam pʋda zĩ-kãng tɩ Wẽnd-na-ges ne b maoonga rũnga: tãn-kãng ket n boondame tɩ Wẽnd-na-ges tãnga. Koɛɛg n le bool a Abraam la a yeel-a lame: «M wẽend ne m menga, fo sẽn maan woto wã yĩnga, fo sẽn pa mong maam f bi-yendã, m na sudg f barka, m na kɩt tɩ f buud lebg wʋsgo, b sõor na ta ãds sẽn be yĩngri la bĩisr sẽn dɩg mogr noore, fo yagensã n na n soog b bɛɛba na-tẽnga. La buud a taaba na n tũ fo maasem n paam barka, fo sẽn deeg m noora yĩnga.» A Abraam sigame n babs a rakõapã tɩ b leb Beerseba n tɩ zĩnd be. A Abraam zĩnda be n wʋm t'a yao a Nawor pag, a Milka, me roga kamba, bãmb la woto: a pipi biiga, a Uk; sẽn pʋgde, a Buz, a Kemuwɛl, a Aram ba, sẽn pʋgd yɛsa, a Kesɛd, a Azo, a Pildas, a Yildaf, a Betuwɛl. A Betuwɛl n dog a Rebeka; yɩɩ kamb a nii la a Milka kõ a Nawor, a Abraam yao. A Nawor pag a to me sẽn boond tɩ Rewuma n dog kom-bãmbã: a Teba, a Gaam, a Taas la a Maaka. A Sara pʋlemd zãng yɩɩ yʋʋm koabg la pisi la a yopoe. A maana kaalem Kiriyat-Arba, yaa Ebrõ, Kanaã tẽn-peelmẽ. A Abraam waa be, n yãb a Sara kʋʋre. A Abraam yalsa kũuma zug n yeel a Ɛt kamba: «Mam siga yãmb wala bu-zẽnd neda la sãana, m kota yaad zĩiga n mum m kũuma.» A Ɛt kamba leok-a lame: «Kelg-y neere, d zu-soaba, ad yãmb yaa wala dĩma Wẽnd sẽn kõ tõndo, dɩlla yãmb tõe n muma y kũuma tõnd yaadẽ, ned ka be n tõe n gɩdg-y tɩ y ra mum y kũuma tõnd yaadẽ ye.» A Abraam yikame n sulg a zug a Ɛt kamba taoore, n yeel-ba: «Yãmb sã n dat tɩ m mum m kũuma, kelg-y-m neere la y yõk a Soar biig, a Efrõ, sɛɛg n kõ-ma. Kos-y t'a kõ-m Makpela tãn-bokã sẽn yaa a soolem la sẽn be a pʋʋga satmẽ. A kõ-a maam tɩ m na yao a sẽn saag-a tɛka, la m paam n soog-a zãnga n maan yaad zĩiga.» A Efrõ da bee a Ɛt kamba sʋka la a meng leoka a Abraam, t'a Ɛt kamba ne tẽnga rãmb zĩi n kelgdẽ: «M zu-soaba, kõn yɩ boto ye, la kelg-y m gomda neere, m na n kõ-y-la pʋʋgã ne tãn-bokã, m buuda kamb taoore; yik-y n tɩ mum y kũuma.» A Abraam me yikame n sulg a neng tẽnga, bãmb taoore. Ad-a sẽn yeel a Efrõ la sẽn da gũbg-b yẽnda wã: «M kotame tɩ yãmb me kelg ma: yaa ligd la m na n kɩse, m kotame tɩ f reege tɩ m tõog n mum m kũuma.» A Efrõ leokame: «M zu-soaba kelge, zĩigã y sẽn datã, sõta wakɩ koeems kobs-naase n deege, la rẽ me zema bõe maam ne yãmb tẽnsʋka? Sẽn ya woto wã, tɩ mum y kũuma bala.» Ne rẽ fãa a Abraam baas n sõda ligdã wala a Efrõ sẽn wilgã n kõ-a, a Ɛt kamba taoore, la yɩɩ wakɩ koeems kobs-naase wala lɛɛbdba sẽn tar n leebdẽ. Yɩɩ woto la Abraam paam n sooge a Efrõ pʋʋgã sẽn be Makpela n tot Mambre, pʋʋga la tãn-bokã, pʋʋga la tɩɩsã sẽn be a pʋgẽ. B lebga a Abraam soolem, t'a Ɛt kamba la sẽn kẽed b tẽnga fãa mi tiiri. Woto me la a Abraam tõog n mum a Sara Makpela tãng bokẽ, Makpela tota ne Mambre, tɩ kẽer boond tɩ Ebrõ la yaa Kanaã rãmb tẽn-peelmẽ. Yɩɩ woto yɛsa, la pʋʋga ne tãn-bokã yi a Ɛt kamb nugẽ n lebg a Abraam soolem la yaad zĩiga. A Abraam da kʋʋlame, a yʋʋma da lebga wʋsgo la a da paama Soaala-Wẽnd barka a tʋʋma fãa pʋgẽ. Dẽ la a waa n yeel a sõgen-kãsenga: «Dɩk f nug n sɩɩs m gerã, la f wẽen ne Wẽnnaam, yĩngr la tẽng Soaala, tɩ f kõn bao pag kaalẽ, Kanaã rãmb sʋka, n kõ a Izaak ye. Yaa m ba-yir la m buudẽ la f na n kẽng n tɩ bao pag n wa kõ m biig a Izaak.» Sõgna leokame: «Daare paga wat n yeelame t'a kõn tũ maam n wa ka ye, yãmb biiga sã n tũ maam n leb y ba-yira ka sãoo?» A Abraam leokame: «Da saag bada n tall m biigã n leb be ye. Wẽnd la dũni fãa Soaala yiisa maam m ba zakẽ la m yaab rãmb tẽngẽ, la b kãab-m lame tɩ b na kõ-m kamb la yagens kaanẽ. Dẽ yĩnga b na lʋɩɩs b ned f taoore tɩ f tɩ bao pag beenẽ n wa kõ m biigã. Paga sã n zãgs t'a kõn tũ n wa, taal yi-la f zugu, la bada ne bada-bila, da tall m biigã n kẽng be ye.» Sõgna sɩɩsa a Abraam gere la a wẽename. Sõgna kẽe a zu-soaba bãgrẽ n yiis yʋgma piiga n paas a zu-soaba arzɛka la a looga Mezopotami, a Nawor tẽnga. A sẽn ta a Nawor tẽnga, a yalsa yʋgma wã tẽnga noore, zafare, pagba sẽn wat n yõngd kooma wakato. A yeelame: «Soaala, m zu-soaba Abraam Wẽnnaam, zĩnd-y ne maam dũnna n wilg-m tɩ y sɩd nonga m zu-soab a Abraam. Ade, mam yɛsa bulga sɛɛga, la tẽnga kom-pugli na n wa yõnga koom. Dɩlla m sẽn na n yeel bi-pugl ninga: ‹Pʋdg f yʋʋra koom n kõ ma,› t'a yeele: ‹Yũ la f bas tɩ m yũnug y yʋgma,› bɩ bi-kãng yɩ yãmb sẽn segl a soab a Izaak yĩnga, la woto m na bãng yãmb nonglem ne m zu-soaba.» A pa yãe n gom n sɛ, la a Rebeka sẽn wa ne a yʋʋre. A ra yaa a Betuwɛl biiga la a Betuwɛl ma la a Milka, a Milka sɩd la a Nawor, a Nawor ne a Abraam yaa ba-biisi. Bi-pugla neng da yaa neere al wʋsgo; a ra nan yaa pʋg-sɛda. A taa bulgã n pids a yʋʋre n na n looge. Sõgna zoe n taame n yeel-a: «Bas tɩ m yũ f yʋʋra koom.» T'a yeele: «M zu-soaba, yũ-y!» La tao-tao bala a kɩlla a yʋʋrã n kõ-a t'a yũ. A sẽn yũ n sɛ la bi-pugla sẽn yeele: «M na n tooga kooma n kõ y yʋgma tɩ b fãa yũ n tɩge.» A budga a yʋʋrã gaolga pʋga n leb bulgẽ wã n tɩ toog la a maana woto tɩ koom wa sek yʋgma wã fãa. Rakõora ra sĩnda a noor n yɛs n getẽ la a sokd a menga: Soaala-Wẽnd na n manega m sorã bɩ b ka na n manege? Yʋgma wã sẽn yũ n tɩge, dao wã yiisa sãnem kalem-bãng sẽn zɩse n sog bi-pugla yõore la a rɩka kags a yiibu zɩslem me sẽn pa paoode n pid a kamse, la a yeel-a: «M kotame tɩ fo togs maam fo sẽn ya ned ning biiga la f wilg-ma m sã n tõe n yõga gãag-sobendo f ba wã zakẽ?» Tɩ biiga leok: «M yaa a Betuwɛl biiga; a Betuwɛl yaa a Milka biiga la a Milka sɩd la a Nawor.» A le paasame: «Mood la yamd bee wʋsgo la zĩig sẽn na n yõg gãag-sobend ka tõe n kong ye.» Rakõora sulga a neng n pʋʋs Soaala-Wẽnde, n yetẽ: «M zu-soaba, a Abraam Wẽnnaam, paam barka; b pa solg b zood la b nonglem ne m zu-soaba ye. B talla maam tɩrga n tɩ kẽes m zu-soaba ba-biig zakẽ.» Bi-pugla wudg n leba yiri, a sẽn ta zakẽ a togsa a ma fãa. A ra tara kẽema sẽn boond tɩ Labã la a Labã zoe tao-tao n tees bulga sẽnẽ n na n tɩ seg a Abraam dakõorã. A sẽn yãe kalem-bãngã la kagsã, a sẽn tẽeg a tão wã sẽn togs tɩ rao wã goma woto la woto, a tɩ seg-a-la ne a yʋgma, bulga sɛɛga. A yeel-a lame: «Waa-y yã, Soaala-Wẽnd sẽn ning a soab barka. Bõe tɩ yãmb yɛs yɩnga? M pɩɩga m zaka la m segla zĩig yʋgma wã yĩnga.» Rao wã ta-la a Labã zakẽ, a looda yʋgma n bao yamd la rɩɩb n kõ-ba, n bao koom n kõ dakõorã ne a tũud-n-taas tɩ b waas b nao. B waa n tẽgna rɩɩb a taoore t'a yet t'a kõn dɩ t'a ka reng n togs a sẽn tar n na n togsa ye. Dẽ la a Labã yeel-a: «Gome!» T'a na n yeele «Mam yaa a Abraam dakõore. Soaala-Wẽnd ninga m zu-soaba barka la a lebga arzɛk kãseng soaba, a tara rũms wʋsgo, bɛd la bõonego, a tara wanzurf la sãnem, yem-daado la yem-pogse, yʋgma la bõeense. M zu-soaba sẽn waa n kʋʋle, a pag a Sara doga biiga la a ratame tɩ bi-kãng soog a paoong fãa. M zu-soaba kɩtame tɩ m wẽene tɩ m kõn bao pag Kanaã kom-pugli wã sʋk n kõ a biiga ye; a tol n paasame: ‹Yell na pak-fo, f sã n ka leb m buudẽ, m saam-dãmba tẽngẽ, n bao pag n kõ m biigã!› Wakat kãnga, m yeelame: ‹Daare paga ka na n sak n tũu n wa ye,› t'a leok ma: ‹Wẽnd ninga m sẽn kẽn a soab taoor n ta rũnna wã na lʋɩɩs a ned f taoore, a na tall foom n taas f sorã, la ya m ba zakẽ biiga la f na n tall n wa kõ a Izaak. Taal sẽn na n yi f zug daare, yaa f sẽn na n ta mam buudẽ. Le yaa f sẽn na n ta buudẽ wã tɩ buuda zãgse.› M sẽn ta bulga sɛɛg dũnna, m pʋʋsa m sũurẽ: ‹M Soaala, m zu-soaba Abraam Wẽnnaam, m kotame tɩ y wilg ma, m sora sã n zemsame, m na n yalsa bulga sɛɛga, la sõng-y tɩ biig ning sẽn na n wa yõng koom tɩ m yeel-a: Kõ maam f yʋʋra koom bilf tɩ m yũ, t'a leoke: Yũ-y la y bas tɩ m bao koom n kõ y yʋgma wã, sõng-y tɩ bi-kãng yɩ pag ning yamb sẽn tũusi n na n kõ m zu-soaba biiga.› M pa yãe n pʋʋs n sɛ la a Rebeka sẽn yi ne yʋʋre, a waa bulgẽ wã n toog koom tɩ m yeel-a: ‹Sã n ta f yam, m kot-f-la koom n yũ.› Tao-tao bala, a sika a yʋʋrã n yeel-ma: ‹Yũ-y la y bas tɩ m toog koom n kõ y yʋgma.› Mam yũume la m rũmsa me paamame n yũ. Tɩ m na n sok bi-puglã: ‹Fo ya ãnda biiga?› T'a yet t'a yaa a Betuwɛl biiga la a Betuwɛl yaa a Nawor pag a Milka biiga. M yiisa sãnem kalem-bãnga n sog a yõore la m n ninga kagse a kamsẽ. M sẽn yĩgimdi, m waooga Soaala, m zu-soaba Abraam Wẽnnaam tɩ b kɩtame tɩ m sor yɩ sõngo, tɩ m paam pag sẽn ya m zu-soaba yagenga. La marsã yãmb sã n dat n maan m zu-soaba neere bɩ y togs-ma. Y sã n ka rat me bɩ y togs-ma tɩ m bãng m sẽn lebdẽ, goabg bɩ rɩtgo.» A Labã ne a Betuwɛl yeelame: «Woto bee ne Soaala-Wẽnde, tõnd yẽ ka tar sẽn na leok tɩ n-yẽe bɩ ayoo! Ad-a Rebeka sẽn yẽs f taoore, peeg-a tɩ y kuli t'a tɩ lebg f zu-soaba bi-paga, wala Soaala sẽn date.» A Abraam dakõorã sẽn wʋm b leokrã a wõgemda Soaal Wẽnd taoore. A yiisa sãnem la wanzurf teedo n paas futu n kõ a Rebeka, a bao kũun sõma n kõ a ma la a kẽema. Zaka rãmb me kõo sõgna ne a tũud-n-taasa rɩɩb tɩ b rɩ n yaool n kẽ gãaga. B sẽn vẽeg beoogo, dakõora yeelame: «M kotame n leb m zu-soaba nengẽ.» T'a Rebeka ma la a tão yeele: «Bas-y bi-pugla t'a kell n yaas dasem a yiibu bɩ dasem piig t'a na yaool n kuli.» Dẽ la dakõora leok yã: «Da tadg-y-m ka ye, Soaala togl-m-la so-sõngo, bas-y tɩ m leb m zu-soaba nengẽ.» Tɩ b leok-a: «Sã n ya woto d na n boola bi-puglã n bãng a raabo.» B boola a Rebeka n sok-a: «Fo rat n tũ n loogame?» T'a leoke: «N-yẽe!» La b basa a Rebeka ne a ma-wubdga, tɩ b loog ne a Abraam dakõorã la a tũud-n-taasã. B kãaba a Rebeka kãab noodo: «D tão sõngo, Wẽnd na kɩt tɩ f wek n lebg bu-yalengo, Wẽnd na kõ f yagensã b bɛɛba na-tẽng tɩ b sooge.» A Rebeka ne a yem-pogsã zomba yʋgma n pʋg a Abraam dakõorã; a Rebeka tũ-a lame n looge. A Izaak da yii Layi-Royi bãka sẽn beẽ wã n wa Negɛb zĩ-peen-daagẽ. Zĩig sẽn maage, a Izaak yiime n na n pemse la a sẽn zẽk a nenga, a yãee yʋgma sẽn wate. A Rebeka me sẽn doog a nenga, a yãee a Izaak la a yɩk n tiimda tẽnga. A soka dakõorã: «M ba bõe n segd tõnd weoogẽ ka?» Tɩ rakõora yeele: «Yaa mam zu-soabã.» A sẽn wʋm woto a bao peende n lud a nenga. Rakõora togsa a Izaak bũmb ning fãa sẽn maane. A Izaak talla a Rebeka n kẽes a roogẽ; a reeg-a lame n maan a paga la b ra nonga taaba; yaa woto la a Izaak sũur maag bilfu t'a ra ket n yãbda a ma kaalem. A Abraam le rɩka pag a to sẽn boond tɩ Ketura. Yẽ kamba la woto: a Zĩmrã, a Yoksã, a Medã, a Madiã, a Yisbak la a Suwa. A Yoksã n dog a Seba la a Dedã; A Dedã kamb la Asuritse, Letuzitse la Lewumimitse. A Madiã kamba: a Eyifa, a Efɛr, a Anok, a Abida, a Elda; b zãng fãa yaa a Ketura kamba. A Abraam rɩka a paoongã n kõ a Izaak. Sã n ya pagb a taaba kamba, a Abraam yãee kũuni n kõ-ba. A ka bas-b tɩ b lagem ne a Izaak ye, a zãag-b lame, b teesa yaanga. A Abraam yʋʋma yɩɩ koabg la pisopoe la a nu t'a yaool n maan kaalem. A tɩga raar la yʋʋma, a kʋʋlem yɩ-a-la noogo. A waa n tɩ saka a saam-dãmba. A kamba, a Izaak ne a Ismayɛl tɩ mum-a-la Makpela tãnga bokẽ, Ititga a Soar biig, a Efrõ, pʋʋgẽ, Mambre taoore. Pʋʋga yaa pʋʋg ning a Abraam sẽn da a Ɛt kamba nengẽ; yaa be la b mum a Abraam ne a Sara. A Abraam kũuma poore, a Izaak kell n paama Soaala-Wẽnd barka; a ti-la a zak Layi-Royi bulga sɛɛga. A Ismayɛl doog la woto: a ba yaa a Abraam, t'a ma yaa a Agar, Ezipt tẽng paga, a Sara doog-biiga. A Ismayɛl kamba ne a buuda sagsa yʋy la woto: pipi soaba la a Nebayot, a yiib soaba, a Kedar; dẽ poore, a Adbeyɛl, a Mibsam, a Misma, a Duma, a Masa, a Adad, a Tema, a Yetur, a Nafis la a Kedma. Woto la a Ismayɛl kamba. Ned kam fãa ne a yʋʋre. Ned kam fãa ra tara a weoog la a sik n kẽedẽ. Buuda kãsem-dãmb da yaa piig la a yiibu. A Ismayɛl yʋʋm yɩɩ koabg la pis-tã la a yopoe t'a yaool n ki. A sẽn ki, b mum-a-la ne a saam-dãmba. Yẽnda buud n da kẽed Avila weoogo n tãag Sur sẽn be Ezipt yaanga, f sã n dabd Asiri. A soolma da tota a yaopa soolem. B ra ya yagse la b moora ra ka zemsd taab ye. A Izaak kibar la woto: a Abraam n dog a Izaak. A Izaak yʋʋm da ta pis-naase a sẽn waa n na n peeg a Rebeka. A Rebeka ba la a Betuwɛl, ya Padã-Aram neda; a Rebeka kẽem la a Labã, Aram tẽnga. A Izaak pʋʋsa Soaala-Wẽnd n kos sõngre, a paga yĩnga, t'a da ka rogd ye. Soaala-Wẽnd deega a kosgo la a Rebeka rɩka pʋga. A Rebeka waa n mikame tɩ kamb n maood a pʋgẽ, t'a kelem: «Sã n ya woto, m sẽn dɩk pʋga yõod la bʋgo?» A yikame n tɩ gom ne Soaala-Wẽnde. Tɩ b yeel-a: «Ad yaa buud sags a yiib n be f pʋgẽ, kamb a yiib la f na n doge la b na n welga taaba, biig a ye n na n tõog a to, kãsma n na n lebg yao wã sõgne.» A Rogma sẽn waa n ta, a Rebeka bãngame tɩ na n yɩɩ kinkirsi. Sẽn yi-a pipi soaba da yaa moɛɛga la yĩn-kõabneng soaba; b pʋda yẽ tɩ Ezayu. A to wã n pʋgl dogem la a nuga ra gãda a Ezayu nao-kãsenkãare; b boola yẽ t'a Zakoob. B rogma wakat t'a Izaak yʋʋm yaa pisoobe. Kamba waa n bɩɩme t'a Ezayu lebg tãoosa la we-gõaada; a Zakoob yẽ da zĩ-la a zĩ-yɛnga n pa zãagd ne yir ye. A Izaak ra nong a Ezayu tɩ we-nemda ra tata a yam; a Rebeka yẽ ra nonga a Zakoob. Daar a ye, a Zakoob rʋga a rɩɩbo; a Ezayu yii weoogẽ n wa ne yaamse la a yeela a Zakoob: «Kom n tar maam, yãk f rɩɩba sẽn moog ne rʋkã n kõ-ma.» Dẽ me la b pʋd a yʋʋr tɩ Edom. A Zakoob yeelame: «Bɩ f reng n koos f kãsenga ne maam.» T'a Ezayu yeele: «M kiidame tɩ m kãsengã paas m bõe?» A Zakoob yeelame: «Bɩ f reng n wẽen!» La a wẽename n koos a kãsengo. A Zakoob yaoola marsã n kõ-a buri la bɛnga; a rɩɩme la a yũ, la a yik n looge. A Ezayu pa pẽg a kãsengo wala a zema bũmb ye. Kom n waa n lʋɩ tẽngã, la rẽ n tõkd a yiib soaba, t'a ye me n zoe n zĩnd pĩnda, a Abraam wakato. A Izaak yi n kẽnga Gerar, Filisti dĩm, a Abimelɛk, nengẽ. Soaala lika a Izaak n yeel-a: «Da ta Ezipt tẽng ye, tek n pa tẽng ning m sẽn na n wilg-fo. Pa tẽn-kãng pʋgẽ tɩ m na n zĩnda ne foo la f na n paama m barka, m na n dɩka tẽngã n kõ foo ne f buudu. M na n pidsa m pʋlengo, pʋleng ning sẽn pʋlem a Abraam, fo ba-roakã. M na kɩt tɩ f yagensã sõor yɩ wala yĩngr ãdse, m na n kõ-b-la tẽns zembala la dũni wã zãng na n tũu bãmb maasem n paam barka. M na n maan-f-la woto t'a Abraam yɩɩ sakda, a reega m goam la m sẽn yals fãa, a maana m sẽn yeel-a t'a maan.» Yɩɩ gomd kãng yĩnga la a Izaak pa Gerar. Tẽnga rãmb waa n leok-a-la a paga poorẽ tɩ yẽ yeele: «Yaa m tão.» A zoe rabeem t'a sã n yeele: «Yaa m paga,» b na n kʋ-a lame. A Rebeka ra yaa neer wʋsgo. A Izaak sẽn kẽ Gerar n maan dasem a wãna la a Abimelɛk sẽn ges a roog võorẽ n yãend a Izaak ne a Rebeka tɩ b sõsd ne taaba. A Abimelɛk kɩtame tɩ b bool a Izaak la a yeel-a lame: «M tara kaseto tɩ paga yaa fo paga! Fo yɩɩ wãn n leoke: ‹Yaa m tão?› » A Izaak yeelame: «Ade, mam da tagsame tɩ b tõe n kʋ-m lame, paga poorẽ.» A Abimelɛk le sok-a lame: «Yaa bõe la f maan woto? Kellẽ la bilfu tɩ tẽnga nin-yend yõgẽ f pagã n tak yell kãseng d fãa zugu.» A Abimelɛk kõ-la a soolma rãmb no-kãnga: «Ned ninga fãa sẽn sɩɩsa nin-kãnga ne a paga, bɩ b kʋ-a!» A Izaak bʋda a pʋʋgo la a sẽn paam kood yʋʋm kãng yɩɩga a sẽn paam yʋʋm a taaba naoor koabga. Wẽnnaam bark sɩd sig-a lame. A arzɛka paasame n paase, t'a wa lebg rakãagre. A waa n lʋɩ-la a taaba fãa taoore. A yʋʋr waa n yiime. A waa n paama rũms ka tɛka, bɛd la bõonego la sõgen-kamb wʋsgo. Dẽ la Filisti rãmb waa n yik n maand sũ-kiir ne-a. Buls niyns a Abraam dakõap sẽn tu a Abraam wakatẽ, Filisti rãmb da lɛɛg n yẽd-b-la ne tãndo. A Abimelɛk yeela a Izaak: «Yi d tẽngẽ tɩ marsã fo pãng yɩɩda tõndo!» A Izaak sak n yiime n tɩ ti a zak Gerar bãoogẽ. A Izaak kɩtame tɩ b yẽeg buls niyns sẽn da tu a ba wakatẽ tɩ Filisti rãmba lɛɛg n yẽdã. Bulg fãa le reega yʋʋr ninga a Abraam sẽn da kõ-a. A Izaak rakõapa waa n tɩ tuka zĩig a ye n paam koom sẽn bun n pa sɛtẽ ye. La Gerar dũm-kɩɩmba yika zabr ne a Izaak rakõapa n yet tɩ bulga yaa bãmb bulga. A Izaak pʋda bul-kãng yʋʋr tɩ Esɛk, tɩ zabr n zĩnd a poorẽ. B le tuka bulg a to tɩ rẽ me le yɩ zabre t'a pʋd-a tɩ Sitna. B zãaga zĩig n tuk bulg a to la zabr pa zĩnd a poorẽ ye t'a pʋd-a tɩ Reobot, n yetẽ: «Marsã Wẽnd kõ-d-la ween-vɩʋʋgo tɩ d paoong tõog n paase.» A waa n yii be n dig Beerseba. Ba raar yʋngo, Soaala-Wẽnd lik-a lame n yeel-a: «Maam la f ba, a Abraam, Wẽnnaam. Da maan dabeem baa bilfu tɩ m bee ne foom. M na n ninga foo barka, m na n kɩtame tɩ f buud lebg wʋsgo, a Abraam maasem yĩnga.» Zĩ-kãnga, a Izaak mee maan-kugri n waoog Soaala-Wẽnd, a tii roog be t'a rakõapa tuk bulga. A Abimelɛk yii Gerar n wa ges a Izaak; a zoa Awuzat n paas a tãnsoaba Pikol tũ-a lame n wa. A Izaak yeel-b lame: «Y wata m nengẽ bõe yĩnga, yãmb ka kisg maam n dig maam n yiis y tẽngẽ bɩ?» Tɩ b leoke: «Tõnd bãnga neer marsã tɩ Soaala-Wẽnd bee ne foom tɩ d yet tɩ f wa tɩ d yõg zoodo. Wẽen tɩ f kõn maan-d bũmb ye, tɩ tõnd ka zab ne foom ye, d maan-f-la neere, d bas-f lame tɩ f yi ne laafi la ade, rũnna, fo lebga ned sẽn tar Soaala-Wẽnd barka.» A Izaak segla rɩɩbo la sɩda, b rɩ yã, b yũ yã. B vẽega beoog n yõg zood ne taaba t'a Izaak bas-b tɩ b kuli, la b sɩd looga ne laafi. Yaool n yɩɩ baraare la a Izaak rakõapa waa n togs b sẽn da tuud bulg a ye kibare: b pooga koom. Dẽ la b pʋd bulgã tɩ Sibea, wẽenego, la yaa rẽ la b ket n boond tẽnga rũnna tɩ Beerseba, wẽeneg bulga. A Ezayu yʋʋm sẽn waa n ta pis-naase, a kẽe kãadem ne pagb a yiibu: a ye la a Yewudit, Ititga Beeri biiga, a to: a Baasmat, Ititga Elon biiga. A Izaak ne a Rebeka yãee naong wʋsgo pʋg-kãens poorẽ. A Izaak waa n kʋʋlame, a nina waa n pa le ne bũmb ye; a boola a bi-kẽeng a Ezayu: «M biiga!» T'a leok: «Naaba!» A Izaak paasame: «Fo ne-la, m kʋʋlame, m ka mi m loogr daar ye. Rẽ yĩnga, rɩk f teedo, f lok ne f tãpo, kẽ weoogã n wa ne rũnga; segl-a wala mam sẽn datã n tall n wa tɩ m dɩ la m paam n ning f bark tɩ m nan ket ne yõore.» Mik a Izaak sẽn waa n gomdã t'a Rebeka zĩi n kelgdame. A Ezayu yik n kẽe weoogo n na n bao rũng n wa kõ a ba. A Rebeka soos n yeela a biiga Zakoob: «Mars-marsa bala, m wʋma f ba sẽn yeel a Ezayu: ‹Wa ne weoog rũnga, segl dɩ-noog n kõ-ma, tɩ m dɩ la m ning-f barka, Soaala-Wẽnd maasmẽ, n yaool n ki.› Sẽn ya woto wã, m biiga, kelg la f maan m sẽn na n yeel-f fãa. Babs rũmsã, tɩ wa ne bʋ-poal a yiibu tɩ m na segl dɩɩbo wala f ba sẽn datã. Fo na yaool marsã n tɩ kɩs f ba t'a rɩ la a ning f barka la a looge.» Dẽ la a Zakoob yeel a ma: «Gese, a Ezayu yaa yĩn-kõabneng soaba la mam yĩnga yaa saalle. M zoeta m ba na n wa babl n bãng tɩ m tudg-a lame t'a bas kãab noogo n kãab-m wẽnga.» T'a Rebeka leoke: «Bas tɩ kãab wẽnga lʋɩta mam zugu, fo wee n kelg-m bala la f tɩ wa ne bʋʋsã.» A Zakoob tɩ waa ne bʋ-poal a yiibu t'a ma reeg n segl dɩɩbo wala a Izaak sẽn da rata. A Rebeka tũusa a bi-kẽenga, a Ezayu, fu neeba sẽn dag n be a roogẽ, n yeelg a Zakoob. A rɩka bʋʋsa gãnd n lud a kamse la a yubla sẽn da ya saalgã. A rɩka rɩɩbã sẽn seglã n kɩs-a. A Zakoob sẽn ta a ba taoore, a yeelame: «M ba!» T'a leoke: «M sakame! La foo la m biig a bõe?» Tao-tao t'a Zakoob yeelame: «Mam yaa yãmb bi-kẽenga, a Ezayu, m maana wala y sẽn yeelã, yik-y n zĩnd-y n dɩ tãoosga rɩɩbo, la y sik y bark m zugu.» T'a Izaak na n yeel a Zakoob: «Ad-f maana tao-tao wɛ, m biiga!» T'a leoke: «Yaa Soaala-Wẽnd n sõng-ma.» A Izaak kos-a lame: «Kolg tɩ babl-fo. Fo sɩd yaa m biig a Ezayu bɩ ned a to?» A Zakoob kolgame la a ba, a Izayi, sẽn babl-a a yeelame: «Koɛɛga yaa a Zakoob koɛɛga la kamsa yaa a Ezayu kamse!» Woto wã a pa tõog n bãng vẽenega, t'a Zakoob kamsa da yaa kõbdo wala a biig a Ezayu dẽnna, la a ning-a-la barka. A baas n le sok-a lame: «Fo sɩd ya m biiga Ezayu?» Tɩ yẽ yeele: «N-yẽe!» A Izaak yeelame: «Bɩ f wa ne f tãoosga rɩɩbo, m bi-sõngo, tɩ m dɩ la m kãab-f noogo.» A kõ-la a ba wã rɩɩbã t'a rɩ n le paas rãam t'a yũ. A Izaak yeel-a lame: «Kolg wɛ, m biiga, n mobg ma.» T'a sɩd kolg n mobg a ba. A ba wã wʋma a futa yũugu; a ninga a biiga bark woto: «M biiga yũugu yaa wa pʋʋg yũugu, pʋʋg sẽn womd wʋsgo, sẽn paam Soaal barka. Wẽnd na kõ foo yĩngr meenem n kõ-f pʋt sẽn sakd koodo, n kõ-f kood la rãam. Wẽnd na kɩt tɩ buud ka tɛka wa wõgemd f taoore. Lebg f ba-biisa zu-soaba, la f ma kamb wõgemd f taoore. Sẽn na n kãab-a foom wẽnga, bɩ wẽnga pa ne yẽ soaba; sẽn na n kãab foom kãab noogo, bɩ nooga pa ne yẽ soaba.» A Izaak sẽn ning a Zakoob bark n sɛ, t'a me nan yit a ba roogẽ, la a kẽema Ezayu sẽn yi weoogẽ n wa. Yẽ me segla rɩɩbo n tɩ kɩs a ba n yeel a ba: «M gõo weoogo n wa ne rɩɩbo, yik n dɩ m tãoosga rɩɩbo la f ning m barka.» T'a Izaak na n soke: «Foom la ãnna?» T'a yeele: «M yaa m ba bi-kẽenga, a Ezayu.» A Izaak yɛɛsa wʋsgo la a yeelame: «Dɩlla m ba bõe n wa ne weoog rɩɩb ka tɩ m dɩ wã? Mam dɩɩme tɩ fo nan pa wa ye la m zoe n ninga barka la barka na n kell n paa yẽ soaba zugu.» A Ezayu sẽn wʋm a ba leokre, a kelma ne sũ-sãanga la a kot a ba: «M ba, ning-y maam me barka!» T'a leoke: «Ad-f yao wã soos n waame n deeg f barka.» A Ezayu yeelame: «B ka be bʋʋm n boond-a t'a Yõk-n-dɛɛs sɩda? Pĩnda yɩ m kãsengo la a reeg yã la rũnna ya m barka; la m ba sõngo, yãmb pa kees bark bilf mam yĩng laa?» T'a Izaak leoke: «M yeel-a lame t'a yɩ f zu-soaba, t'a saam-biisa fãa lebg a sõgen-kamba; mam kãab-a-la kood la rãam, bõe la m tõe n le maan f yĩng marsã, m biiga?» A Ezayu yeela a ba: «Woto la fo kãabga tɛka, m ba? Bao kãab nood a taab n kãab maam me!» A Izaak ka tõog n leok tɩ bũmb ye, t'a Ezayu na n sɩng yãbre. A ba wã kong n yeel-a lame: «F yira na zãag ne pʋt sẽn sakd koodo, n zãag ne yĩngr sa-koom. Fo na n dɩ-la f pãngẽ, f na n yɩɩ f yao wã sõgne n tãag wakat ninga f sẽn na n zãens n yi a soolmẽ.» A Zakoob sẽn deeg a Ezayu barka tẽka, b lebga beem ne taaba; a Ezayu yeela a sũurẽ: «Kõn leb n zãag tɩ m maan m ba kʋʋr ye, la yaa wakat kãng la m na n kʋ a Zakoob.» B rɩka a Ezayu goama n taas a Rebeka, dẽ la a bool a Zakoob n yeel-a: «F kẽema Ezayu dat n kʋ-f lame n dok a sũuri. Dɩlla, m biiga, reeg m noore, yik n zoe n bʋʋg m kẽema, a Labã, Aram tẽnga. Be la f na n tɩ zĩnd bilfu t'a Ezayu sũur maage, t'a yĩm fo sẽn maan-a bũmb ning la a bas taale; wakat kãnga m na tʋm tɩ b tɩ bool fo; ka rẽnna yaa yãmb y yiib kʋʋre la b na n naag n yãb daar a yembre.» A Rebeka le yeela a Izaak: «A Ɛt kom-pugli wã kɩtame tɩ m yam yi ne vɩɩm. M biiga Zakoob sã n bao tẽn-kãnga biig n maan a paga, pag sẽn yit a Ɛt buudẽ, ad-y m vɩɩma ka le be yamleoog ye. M kõn le tõog n vɩɩnd tẽng zug ye.» A Izaak boola a Zakoob n le ning a barka la a yeel-a: «Da saag n bao pag Kanaã tẽng ye. Yik n kẽng Padã-Aram, f yaab a Betuwɛl nengẽ n tɩ bao biig be n maan f paga, Bao biig f ma-kẽema a Labã kamb sʋka. Bɩ Wẽnd pãng soab ning f barka, tɩ f rog la f wek n lebg bu-yalengo. Bɩ Wẽnd Pãng soab kõ foom ne f yagensã bark ning a Abraam sẽn paam a soabã, n soog tẽng ning f sẽn na n zĩnd a soab pʋgẽ.» A Izaak basa a Zakoob t'a loog Padã-Aram tẽnga, a Labã nengẽ. A Labã da yaa Aram tẽng a Betuwɛl biiga la a Rebeka kẽema; a Rebeka yaa Ezayu la a Zakoob ma. A Izaak sẽn ning a Zakoob barka la a tʋm-a Padã-Aram t'a tɩ bao pag beelẽ, a Ezayu tẽegame t'a Izaak ra kõ-a-la noor kãnga: «Da saag n yi kãadem ne Kanaã bi-pugl ye.» A Zakoob deega a ba ne a ma noore n kẽng Padã-Aram. Woto la a Ezayu bãng t'a ba wã ka nong Kanaã rãmb ye. Yẽ me kẽnga a Ismayɛl buudẽ n tɩ rɩk pag n paase. A yʋʋr la a Maalat; yaa a Ismayɛl bi-pugla la a Ismayɛl ba la a Abraam; a Maalat le yaa a Nebayot tão. A Zakoob yii Beerseba n dɩk Aram tẽng sore. Zĩ-sobdo, a waa n yãenda zĩig n gãand be. A yãee kugr n dɩk-a n kʋgl a zugu n gũsi. A zãmsame, la ade, raodg n da sel tẽnga n yaool n lug n kul yĩngri, tɩ Wẽnd malɛk rãmb tũud-a n dʋʋd la b sigda. A yãee Soaala-Wẽnd tɩ b yɛs a taoore la b goma woto: «Maam la Soaala, f yaab, a Abraam, Wẽnnaam la f ba, a Izaak, Wẽnnaam, fo sẽn gãe tẽng ningã, m dɩkd-a lame n kõt foo ne f yagense. F yagensa sõor na n yɩɩ wʋsgo, wa tẽng bĩisri; yaang la taoore, goabg la rɩtgo, mooga tõr fãa na n tũu foo ne f kamba maasem, n paam barka. M bee ne foom, f sẽn dabd zĩig ning fãa m na yɩ f gũuda la f na le lɛɛg n wa. M na n pidsa m kãabg fãa la m kõn yi f poorẽ abada!» A Zakoob sẽn neke, a goma ne a meng la a yeelame: «Sɩd sɩda Soaala-Wẽnd bee zĩ-kãnga la m da ka mi ye!» Rabeem yõk-a lame t'a yeele: «Zĩ-kãnga kẽesd-m-la rabeem wʋsgo; a ka bũmb a to, a yaa Soaala-Wẽnd zaka la b Arzãna dignoore.» A Zakoob sãda beoog n dɩk a sẽn kʋgl kugr ningã n yals wa tãn-kugri, n dɩk kaam n daag a zugu. A pʋda zĩ-kãng tɩ Betɛl, Soaala-Wẽnd zaka. Tẽnga yʋʋr yaool n da yaa Luz. A Zakoob pʋlmame: «Soaala-Wẽnnaam sã n bee ne maam, n gũud m sorã, n kõt-m dɩɩb m sẽn na n dɩ la b kõt-m fuug sẽn na n yeelge, m sã n lɛɛg n wa m ba wã zakẽ ne laafi, b na lebg mam Wẽnnaam. La kugrã m sẽn yalsã na lebg Wẽnnaam doogo la m sẽn na n paam bũmb ning fãa yãmb nengẽ, m na kẽ be n yãk yãmb pʋɩɩre: pʋɩɩr a ye piig zugu.» A Zakoob le sɩnga kẽnd n tees yaang sẽnẽ. A waa n yãee bulga, la bulga sɛɛga a yãee dũms bõones bãg a tã; rũmsa ra paamda koom be n yũuda; kugr ninga sẽn tar n pagd bulga noorã yaool n da yaa kug bedre. Yaa rũmsa sẽn wat n tigim taaba la b lakd kugrã n yũnug-ba n le lebs-a n page. A Zakoob soka rũm-kɩɩmbã: «Yãmb yita yɛ?» Tɩ b yeele: «Tõnd yita Aram.» T'a sok-ba «Yãmb mi-la a Nawor biig a Labã bɩ?» Tɩ b yet tɩ: «N-yẽe!» T'a sok-ba: «A bee laafi?» Tɩ b yeele: «Laafi be! La ad-a biig a Rasɛl sẽn wat ne rũmsi.» T'a Zakoob yeele: «Wĩndig ketame la rũmsa kõom nan pa ta ye. Yũnug-y-ba la y leb n wãben-ba.» Dẽ la b leok-a: «B ka tõe n yũ nand ye, rẽnd b fãa tigim taaba tɩ b yaool n lak kugrã n paam n kõ-b tɩ b yũ.» A Zakoob ra ket n sõsda ne rũm-kɩɩmbã, la a Rasɛl taa bulgã ne a ba wã rũmsi; yẽ n da gũud rũmsã. A Zakoob sẽn yãee a Rasɛl, a yɛsb a Labã biiga, a sẽn yãe rũmsã, a kolgame n lak kugrã n kõ-b koom. A Zakoob mobga a Rasɛl, n lɛɛg n sɩng yãbre. A wilga a Rasɛl t'a ba wã ne yẽ yaa rogem, t'a yaa a Rebeka biiga la a Rasɛl wudg n tɩ togsa a ba. A Labã me sẽn wʋm t'a Zakoob yaa a tão biiga, a zoe n tɩ seg-a lame, tɩ b pʋʋs taab wa neb sẽn nong taaba la b rɩk yir sore. A da kelgda a Zakoob sẽn da kõt-a kibɛ niynsã. A Labã yeelame: «F yĩng yi-la m yĩngẽ la f kõbr yi-la m kõabẽ.» A Zakoob paa ne-a kiuug tõre. A Labã yeela a Zakoob: «Tõnd yaa buudu, la ka rẽ yĩng la f na n tʋm m zaka tʋʋma n ka reeg yaood ye; wilg maam f yaood sẽn tog n yɩ a soaba.» A Labã kom-pugli wã ra ya-la b yiibu: a Lea, kãsma, a Rasɛl, yao wã. A Lea nina ra yaa nin-bʋgsg soab nini; a Rasɛl yagd da pida zãnga t'a neng ya neere. A Zakoob sẽn da nong a soaba yaa a Rasɛl; dẽ la a yeel a Labã: «M na n tʋma f zakẽ yʋʋm a yopoe, tɩ f kõ maam yao wã, a Rasɛl.» T'a Labã na n yeele: «M menga neeme tɩ m sã n dɩk-a n kõ foo n são m sã n dɩk-a n kõ sãana, woto wã pa ne maam.» A Zakoob tʋma yʋʋm a yopoe, a Rasɛl daab yĩnga. La a sẽn da nong-a wʋsga yĩnga, yʋʋm a yopoe wã yɩ wa rasem a yopoe. A Zakoob waa n yeela a Labã: «M tẽed tɩ wakata taame la m datame t'a Rasɛl lebg m paga.» A Labã tigsa tẽnga neba fãa n segl dɩɩb n kõ-ba. Zĩig sẽn sobge, a rɩka a Lea n kõ a Zakoob t'a kẽ ne-a. A Labã rɩka a Zilpa n kõ a Lea t'a maan a roog-biiga. Zĩig sẽn yẽege, a Zakoob yãeeme tɩ yaa a Lea la a paam yã, t'a yeel a Labã: «Kato! Yaa bõe la f maan-ma, ka a Rasɛl yĩng la m da tʋmd la? Bõe yĩng tɩ f maan-m zãmbo?» T'a Labã na n leoke: «Ad tõnd zamaanẽ wã yẽer pa rengd a kẽem n kul sɩd ye. Vʋʋs ne tʋʋma rasem a yopoe, f kãadma ne a Lea yĩnga. Dẽ poore, m na rɩk a Rasɛl n paas-fo la fo na le tʋm m yĩnga, yʋʋm a yopoe yɛsa.» A Zakoob maana boto, a rɩ-la a yikãadma kibs rasem a yopoe, dẽ poore a Labã rɩka a Rasɛl n paas-a. A Labã rɩka a Bila n kõ a Rasɛl t'a maan a roog biiga. A Zakoob kẽe ne a Rasɛl. A ra nonga yẽ n yɩɩd a Lea. A Zakoob paasa yʋʋm a yopoe, a yɛsba yiri. Soaala yãeeme t'a Zakoob pa get a Lea yell neer ye, tɩ b yeel tɩ yẽnda la b na n kõ kamba n yaool n mong a Rasɛl. A Lea rɩka pʋga n dog a biiga n pʋda yʋʋr a Rubẽ; la rẽ yaa a sẽn da yeel a sũurẽ: «Soaala-Wẽnd yãenda m nimbãanega la rũnda tɛka m sɩda na nong-m n yɩɩd pĩnda.» A Lea sẽn le rɩk pʋga a dogame n pʋd bi-kãng t'a Simeõ: tɩ biig la a le paam yɛsa n kõ a sɩda la raare nonglma na paase. A Lea le rɩka pʋga n dog biiga la a yeelame tɩ marsã wã yẽ, nonglem na zĩndi tɩ yaa kamb a tãab la a kõ a sɩda. Biiga pʋdame tɩ Levi. A Lea le rɩka pʋg n le rog biiga n yetẽ: «Marsã m na pẽg Soaala-Wẽnd.» Rẽ la a pʋd a biiga Zɩɩda, la a pa le paam dogem ye. A Rasɛl yãeeme t'a meng ka rogd ye t'a na n zab pʋg-taare ne a Lea, n yeel a Zakoob: «Kõ-m kamba, ka rẽ m na n kiime!» Dẽ la a Zakoob sũur puug ne a Rasɛl t'a leok-a: «M yaa Wẽnd-Pãng-Soab la, ka bãmb n mong foom dogma bɩ?» T'a yeele: «Ad-m doog-biiga, a Bila, kẽ ne-a t'a rog biig n kõ ma.» A rɩka a roog-biig n kõ a Zakoob t'a kẽes-a. A Bila rɩka pʋg n dog biig n kõ a Rasɛl. T'a Rasɛl yeele: «Soaala-Wẽnd bʋ-la m bʋʋdo, b reega m kosgo n kõ maam biiga.» Yaa rẽ yĩng la a pʋd biiga t'a Dã. A Bila, a Rasɛl doog-biiga, waa n le rɩka pʋga n dog a Zakoob biig a to. A Rasɛl yeelame: «M zaba Wẽnd zabr ne m kẽema Lea la maam n tõoge.» La a pʋda biiga t'a Neftali. A Lea me sẽn yãende t'a pa le paamd dogem, a rɩka a doog biig a Zilpa n kõ a Zakoob. A Zilpa roga a Zakoob biiga, t'a Lea yeele: «Wã la Zu-noogo!» La a pʋda biiga tɩ Gad. A Zilpa, a Lea roog-biiga, le roga biig a to n kõ a Zakoob. T'a Lea yeele: «Wã la Sũ-noogo tɩ kom-pugli wã fãa na n pẽg-m lame.» Dẽ la a pʋd biiga tɩ Asɛr. Ka-kɛɛr wẽnde, a Rubẽ kẽnga pʋʋgẽ n tɩ tʋ a yẽgen-tɩto. A tɩ paamame n tuk n wa kõ a Lea. A Rasɛl yãeeme n yeel a Lea: «Yãk f biiga yẽgen-tɩɩma n kõ ma!» T'a Lea na n leok: «Fo sẽn deeg m sɩdã n bas-ma pa sek-fo tɩ f baood n na n deeg m biig tɩ-yẽgend n paase?» Dẽ la a Rasɛl yeel-a: «Sã n ya woto, bɩ f kõ-m f biiga tɩ-yẽgna la f tɩ pɩɩg a Zakoob roog yʋngã.» A Zakoob yii pʋʋgẽ n wat ne zĩ-sobdo t'a Lea yi n seg-a n n yeele: «Ad-a Rasɛl deega m biig tɩ-yẽgende la a saka rooga me pɩɩgd tekre.» Yʋng kãnga, b kẽe ne taaba. Wẽnd deega a Lea kosgo t'a rɩk pʋg n dog biiga la rẽ n tõkd a rogem a nu. Dẽ me la a yeel yã: «M dɩka m doog-biig n kõ m sɩda la Wẽnd dola m tekre.» La a pʋda biiga tɩ Isakar. A Lea waa n le rɩka pʋga n dog a biig a yoob soaba. A yeelame: «Soaala-Wẽnd kõ-m-la kũun-kãsenga, marsa yẽ m na paam waoogr m sɩda nengẽ tɩ m kõ-a-la kamb a yoobe.» La a pʋda biiga tɩ Zabulõ. A waa n doga bi-pugla n bool a t'a Dina. Wẽnnaam me tẽega a Rasɛl yelle n kõ a rogem. A sẽn dɩk pʋg n dog a biiga, a yeelame: «Wẽnd yiis-m-la yãnd pʋgẽ.» A pʋda biiga yʋʋr tɩ Zozɛf n yetẽ: «Wẽnd na kõ-m a to n paase!» A Zozɛf dogem poore, a Zakoob yeela a Labã: «Bas-m tɩ m leb m ba-yiri. Kõ-m m pagba tɩ yaa bãmb yĩng la m tʋm f tʋʋma. Kõ-m kamba tɩ m looge, fo sẽ n ka ne m sẽn maan fãa f yɩnga?» A Labã leok-a lame: «Tõnd sẽn lebg zooda bɩ f kelg-ma. M bagra wilg-m lame tɩ yaa fo yĩng la m paam Soaala-Wẽnd barka. Dẽ yĩnga wilg maam m sẽn tog n yao-f to-to bala tɩ m na yao.» A Zakoob yeelame: «Fo mi m tʋʋmna sẽn yɩ a soaba la f paoongã sẽn paas seem ninga. F paoonga da paooda, la ad-a sẽn paas wʋsg-wʋsgo, la Soaala-Wẽnd tũu mam maasem n ning f barka. Marsã ka segd tɩ ma me tʋm m meng yĩng sɩda?» A Labã yeelame: «Bõe la f rat tɩ m yao-fo?» T'a Zakoob leok: «Ka bũmb la f na n yao ye, fo sã n maan wala m sẽn datã, m na le sak n gũ la m legl f piisã. Rũnna, m na n kẽ-la f rũms bõonega sʋka la m na n yiisa pe-bil fãa kõbg sẽn ya sablga bɩ sẽn lob sabl la pɛɛla. M na n yiisa piisa sʋka pe-yãang fãa sẽn ya sablga, bʋ-yãang fãa kõbg sẽn ya sablga bɩ sẽn lob sabl la pɛɛla, la rẽ n na n yɩ m soolem. F sã n wa beoogo n na n ges m sẽn so wã, n yãend bʋʋg kõbg sẽn ka sablga bɩ sẽn ka lob sabl la pɛɛla, n yãend pe-yãang sẽn ka sablga, dẽ na puk m zãmbo, la ges rẽ wala wagdem.» T'a Labã yeele: «M saka boto, maan wa fo sẽn togsã.» Badaare, a Labã welga toore boɛɛg fãa kõbg sẽn ya sablga, bɩ sẽn lob sabl la pɛɛla, bʋ-yãang fãa sẽn ya sablga bɩ sẽn lob sabl la pɛɛla, a welga a sẽn tõog n yõke, n paas pe-yãang fãa sẽn ya sablga, la a rɩk-b lame n gũnug a kamba. B yaool n looga taoore la b zãaga ne a Zakoob sẽn ta da-yɩten-daar kẽnde. A Zakoob yii ne a Labã rũmsã sẽn kellã n na tɩ gũ-ba. A Zakoob gesame n kɛɛg wa yɩlga, noabga, la gãak ribli, n bẽeg paoka bilfu n gilgi, tɩ b raada tõndẽ, sabla, sabl la pɛɛla. A Zakoob rɩk-b lame n gãneg gaolga pʋga, rũmsa sẽn wat n yũud zĩig ningã. Kooma yũub wakato la rũms yãamsa da baood boeesa zĩiga. Yaa kooma yũub wakato la rũmsa da rʋʋda, la ribli wã sẽn dɩg b taoor tɩ b getẽ la b rʋʋd taabã, rũms yãansa me da rogda kamb ne kõbg sẽn sobe, sẽn lob sabl la pɛɛla. Sã n ya ne pe-raadã, a Zakoob welg-b-la toore la a rig-b lame n tees a Labã rũms niyns sẽn sobe, bɩ sẽn lob sabl la pɛɛla, n tees rũms niyns sẽn sakd dogem a Labã bãgrẽ wã, la woto a paama a toorẽ dũms sẽn welg ne a Labã dẽnna. Dabaar a to me: sã n ya rũm-sõma n dʋʋde, a sagenda dasaba gaolgẽ wã tɩ rũmsa ne-ba. Sã n ya rũm budumse n dʋʋde, a pa sagend daada ye; woto me rũm sõma wã ra yaa yẽ soolem tɩ rũms budumsã yaa a Labã rẽnna. A Zakoob waa n lebga dakãagre n tar rũms zembala, n tar yem-daado la yem-pogse, yʋgma la bõeense. A Zakoob wʋma a Labã kom-dibli wã tɩ b gomda: «A Zakoob wʋka d ba sẽn da so fãa, a paoonga fãa yita tõnd ba wã nengẽ.» A Zakoob sẽn ges a Labã nenga, a mikame tɩ nenga ka zaamẽ neng ye. La Soaala-Wẽnd yeela a Zakoob: «Leb f buudẽ, f ba yiri, la m na n zĩnda ne foo.» A kɩtame tɩ b bool a Lea ne a Rasɛl sẽn da be bãoogẽ la a yeel-b lame: «M gesa y ba nenga la a ka le ya wa pĩnd ye; m ba rãmba Wẽnnaam yaool n ket n dat-m-la ne neere. Yãmb miime tɩ yaa ne m sũur fãa la m tʋm y ba tʋʋmde. Yãmb ba zãmba maam, a sẽn da sede t'a na n yaoo maam bũmb ningã, a teem-a-la naoor piiga. Yaa Soaala-Wẽnd bala n pa sak kegre. A sã n da yeel fãa: ‹Sẽn lob sabl la pɛɛl na n yɩɩ fo yaoodo,› la rũmsa fãa sẽn dogd kamb sẽn lobd sabl la pɛɛla; a sã n da yeele: ‹Sẽn bẽes fãa n na n yɩ fo rẽnna, la rũmsa fãa sẽn dogd kamb sẽn bẽese.› Yaa woto la Wẽnd deeg a paoongo n kõ maam. Ade, pe-yãansa sẽn mi n sakd pe-raada wakato, mam zẽka m nenga yĩngri, m zãmsdẽ, la b yãeeme tɩ pe-raada kõbg da loba sabl la pɛɛla bɩ b gʋlgʋlame. La Soaala yeela maam: ‹Zakoob!› Tɩ m leoke: ‹Ad-ma!› Tɩ b paase: ‹Zẽk f neng n gese, pe-raada fãa sẽn dʋʋdã, b kõbga loba sabl la pɛɛla la b gʋlgʋlame, la bãng tɩ yaa m sẽn mi a Labã wẽnema sẽn yɩ a soaba ne fooma. Mam la Wẽnd ninga sẽn lika foo Betɛl. Yaa mam yĩng la fo sẽn dɩk kaam n daag kugra zugã la f kãab maam f kãabgo. Marsã yik n yi tẽn-kãnga, n leb f ba-yiri.› » A Rasɛl ne a Lea leoka woto: «Bũmb ka le ket d ba zakẽ sẽn na n yɩ tõnd pʋɩɩr ye. D ba wã geta tõnd wala sãamba la sɩda a koosa tõndo; d ligd meng tol n pala a nengẽ. Dɩlla arzɛk ning fãa Wẽnd sẽn yiis d ba nengẽ lebga tõnd ne d kamb soolem; maan Naaba-Wẽnd sẽn yet tɩ f maan bũmb ninga fãa.» A Zakoob yik n baoo yʋgma n zombg a pagb la a kamba. A yiisa a sẽn da so rũms niynsã la a sẽn paam b rãmb Padã-Aram tẽnga; a rɩka a sẽn tar fãa n leb a ba, a Izaak, nengẽ, Kanaã tẽnga. A Labã ra yii n na n tɩ wõrsa a piisa kõbdo, t'a Rasɛl paam dẽ n kẽ n wʋk wẽn-naands niyns a ba sẽn tar n gũud a menga. A Zakoob manesma pa wẽneg ned sẽn zoet manesem ye, a maana woto t'a Labã ka bãng tɩ zoees n zoet ye. A zoe ne a sẽn da tar fãa; a sẽn dʋʋg Efrat, a teesa Galaad tãnga. Sẽn waa n maan da-yɩten-daare, a Labã wʋmame t'a Zakoob zoeeme. Dẽ la a yi ne a yaopa tɩ b na n pʋg a Zakoob la dasem a yopoe poore, b paam-a-la Galaad tãnga. Yʋng a ye, Soaala-Wẽnd lika Aram dao, a Labã, a zãmsdẽ la b yeel-a lame: «Da saag n yeel a Zakoob tɩ bũmb ye.» A Labã paama a Zakoob Galaad tãnga zugu, be la a ra wẽe a sika. A Labã me wẽ-la a sik be. A Labã yeela a Zakoob: «Bõe yĩng la f tudg-ma, n zoe ne m kamba, wala f wẽ tãpo n paam-ba? Bõe yĩng la fo tudg maam n soos n zoe; m sã n da bãngẽ m na yãagẽ foo ne sũ-noogo, ne yɩɩla, ne gãngão-gilsi la pɛndga. Fo ka bas tɩ m mobg m kom-dibli la m kom-pugli wã ye. Sɩda, fo maana wala gãeenga. M da tõe n tʋm-f-la wẽnga, la yʋngẽ, f ba wã Wẽnnaama yeel-m lame: ‹Gũus n da yeel a Zakoob tɩ bũmb ye.› La ade, f ba wã nonglem yĩnga fo zoet n lebda f ba-yiri, bõe yĩng marsã tɩ f zuud m sẽn tar n gũud m menga?» A Zakoob leoka a Labã: «Ad yaa rabeem n yõk-ma, m tagsame tɩ f na n deega f kamba. Sã n kella teed niyns fo sẽn tar n gũud f menga, ad fo sẽn yãend-b a soab nengẽ kõn pa ne yõor ye. M yet-f-la d saam-biisa taoore, kẽe n bao sẽn ya f rẽnna la f rɩk-a n looge.» A Zakoob dag n ka bãng tɩ yaa a Rasɛl n da zu-b ye. A Labã kẽe a Zakoob sẽokẽ n paas a Lea la a roog-kamba rẽnnẽ, n bao sõma la a pa yãend fɩ. A yii be n tɩ vɛɛs a Rasɛl dẽnna. Mik a Rasɛl da rɩk-b lame n solg yʋgemda gaar tẽngre n yaool n dʋ n zaoẽ; a Labã vɛɛsa a dooga zãnga la a pa yãend fɩ. A Rasɛl yeela a ba: «Bɩ m ba da puug a sũuri a sẽn wa m taoor tɩ m ket n zĩi wã ye, ad-y yaa m yĩinsã n pa noom dũnna.» A Labã bao a sẽn tar n gũud a mengã la a pa yãend-b ye. A Zakoob puuga a sũuri tɩ yẽ ne a Labã lebg zabre: «M kongr la bʋgo, m beegre la bʋgo tɩ f yik n pʋgd-m woto? Fo sẽn zũndg mam teedã, bõe la f yãend sẽn wẽnd f yir bũmbu. F sẽn yãe bũmb ninga fãa yiis-a ka, m yaopa la fo yaopa taoore, tɩ b kao tõnd d yiiba bʋʋdo! Yaa yʋʋm pisi rõanna la m be f zakẽ, f piis la f bʋʋs paama rogem, m ka wãb f bãgr pe-raoog ba a ye. Gigma sẽn yõg b rãmbã tɩ m ka tall-ba n wa wilg fooma ka maam n kong n bao n lebs-f wɛ? Yaa yʋngo, yaa wĩntoog la wagdba waa n yõg f rũmsã, fo kɩtame tɩ m yao fãa. M namsa tʋʋlg wĩntoogo, n nams waood yʋngo, m zɩ n tɩg gõeem ye. Yaa yʋʋm pisi la m be f zakẽ. M tʋma yʋʋm piig la a naase n paam f kamba yiibã; m kɩɩma f rũms yʋʋm a yoobe la f teema m yaood naoor piiga. Wẽnd-Pãng-Soaba, m ba Izaak la m yaaba Abraam Wẽnnaamã sã n da da ka zĩnnẽ ne maam m kõn yiẽ f zakẽ wã ne bũmb ye. La Wẽnnaam gesa m yaamse, m yãooga tʋʋma, n kao bʋʋd yʋngẽ nand bala.» A Labã leoka a Zakoob woto: «Kom-pugli wã yaa mam kom-pugli, f kamba yaa mam kamba, rũmsa yaa mam rũmsi, fo sẽn ne wã fãa yaa maam n so la m na deega kom-pugli wã ne b kambã n maan bõe? Dɩlla wa tɩ d yõg zoodo, wa tɩ d yals zooda kaseto.» A Zakoob dɩka kugr n sele, n yeel a nebã: «Wa-y ne kuga!» B wʋka kug n sam zĩ-yɛnga la b rʋʋ kuga zug n dɩ. A Labã pʋdã zĩ-kãng: Yegar-Saaduta, kaset kug saongo, t'a Zakoob pʋd-a Galeed, gũus-to zĩiga. A Labã yeelame: «Bɩ rũnna tɛka kug-saongã yɩ kaseto maam ne foo tẽnsʋka.» Yaa rẽ yĩng la zĩiga pʋd tɩ Galeed la Mispa: t'a le paas: «D sã n wa ka le ne taaba, bi Wẽnd nif kell teeg-do. Fo sã n ka zã m kamba ne waoogre, fo sã n dɩk pagb a taab n paas bãmba, ba tõnd sã n zãr ne taab me, Wẽnd neeme.» A Labã le paasame: «Ges kuga saongã sẽn lob tõnd d yiiba tẽnsʋka la kugra sẽn selã. Ad kugra sẽn selã, ad kugra saong yaa toaaga. M wẽendame tɩ m kõn yõsg-ba n dig fo sẽneg ye la fo me wẽendame tɩ f kõn yõsg-ba n dig mam sẽneg tɩ yel-beed ka maan ye. La Wẽnd na kɩt tɩ d yaab rãmba Wẽnnaam, a Abraam la a Nawor Wẽnnaam yɩ d bʋʋda.» La a Zakoob wẽena ne a ba, a Izaak Wẽnde, Wẽnd ning sẽn kẽesda rabeema. A Zakoob kʋʋ maoong tãnga zugu la a boola a neba tɩ b wa rɩ. B rɩɩme la b gãanda tãnga zugu. Sã n yaa a Labã, a sãda beoog n mobg a kom-dibli la a kom-pugli, n ning-b barka la a leba a tẽngẽ. A Zakoob ra kẽndame la Soaala-Wẽnd tʋma neb tɩ b wa seg-a. A Zakoob yãend-b lame n yeele: «Wẽnd ti-la b yir ka.» Dẽ la a pʋd zĩiga tɩ Maanayim. A Zakoob tʋma neba a kẽem, a Ezayu, nengẽ, Seyir tẽnga. Pẽe ne Edom tẽn-peelem. A kõ-b-la no-kãnga: «Gom-y woto ne m kẽem a Ezayu: ‹F yao a Zakoob koɛɛg la woto: m kẽnga a Labã nengẽ n tɩ pa be n ta rũnna. M tɩ paama niisi, bõeense, piisi, bʋʋse, yem-daad la yem-pogse tɩ m yet tɩ nin-bãmba reng taoore n wilg kibarã m zu-soaba, a Ezayu, la b kos tɩ y maan-d yardo.› » Sẽn tʋm b rãmba lɛɛg n waa a Zakoob nengẽ n yeele: «Tõnd tɩ yãee f kẽem a Ezayu la yẽ meng wata f segbo ne neb kobs-naase.» Dabeem la sũ-sãang kãseng yõka a Zakoob t'a welg sags a yiibu a neba, a rũmsã, bɛd la bõonese, la a yʋgma. A ra yeta a sũurẽ: «Woto a Ezayu sã n seg bogr a ye n maan zabre, bogr a to wã na zoe n põse.» A Zakoob goma ne Wẽnde: «M yaab a Abraam Wẽnnaam, m ba a Izaak Wẽnnaam, Naaba-Wẽnde, yãmb n yeel maam: ‹Leb f tẽngẽ, leb f ba wã zakẽ tɩ m ningd-f-la barka.› Yãmb sẽn maan bũmb ning fãa mam yĩnga, yãmb sẽn pʋg maam ne nonglem ningã, m da ka tog ne rẽ fãa ye. M sẽn waa n dabda, m dʋʋga Zʋrdẽ kʋɩlga ne m dasaar bala la ad-m sẽn wa ne neb la rũmsi sẽn sek sags a yiib welgre. Bɩ y sõng-ma tɩ m põs a Ezayu nugu. Rabeem tar-m lame, m zoeta a na n wa kʋ maam, n kʋ m pagb la m kamba. M ket n tẽra yãmb sẽn yeele: ‹M na n zam-f-la kũuni, m na n kɩtame tɩ f buuda yɩ wa mogr bĩisri sẽn ka tõe n sõd ye t'a ka be tẽk ye!› » A Zakoob gãanda zĩ-kãnga. A yãka a sẽn da tar fãa n na n segl kũun n bĩng a Ezayu. Yɩɩ bʋ-yãans kobs-yi la boees pisi, pe-yãans kobs-yi, pe-raad pisi. Yʋgem yãans pis-tã, sẽn tar kamb la bĩisim, nag-yãans pis-naase, lols piiga, bõn-yãans pisi, bõan-daad piiga. A welga rũmsa sak-saka; sak fãa ne a rũm-kɩɩma la ad-a sẽn yeele: «Lʋɩ-y mam taoore la vɩʋʋg zĩnd rũmsa ne taab sʋka.» A Zakoob yeela sõgen ning sẽn na n lʋɩ a taoorã: «M kẽem a Ezayu sã n seg foo n sok fo: ‹F zu-soab la ãnda, a rabda yɛ, ãnna n so rũmsã sẽn kẽnd f taoorã?› Bɩ f leoke: ‹Yaa a Zakoob n tʋm maam ne a kũuni tɩ m wa kõ m zu-soab a Ezayu la a meng bee poorẽ.› » Sak a yiib soaba, wala a tãab soaba, la neb niyns fãa sẽn da pʋgd rũmsã, a kõ-b-la noor kãnga: «Ad-y sẽn na n gom to-to ne a Ezayu, y sã n wa seg-a. Y na yeel-a: ‹F yao a Zakoob bee poorẽ watẽ.› » A Zakoob da tagsa a sũurẽ: Kũun sã n deng taoore n tak zood tɩ mam meng yaool n pʋgda, daare a na maan sugri. Kũuna lʋɩɩ taoore; a meng kell n paa sikẽ wã n gãand. A Zakoob yika ne yʋngo n yi ne a pagb a yiibã la roog-kamb a yiibã, a kamb piig la a ye wã, n dʋʋg Yabok kʋɩlgã, a ko-kɩdgẽ. Yẽ meng n gãd-ba n dʋʋg kʋɩlgã, ned kam fãa ne a teedo. B fãa loogame n bas a Zakoob a yembre. La ned n waa n sog a maoore la b maoome tɩ beoog vẽeg. Neda sẽn mik t'a pa na n lub a Zakoobã, a sɩɩsa a kɩʋʋlgo t'a gĩina maage. Maod-n-taaga waa n yeelame: «Bas-m marsã tɩ zĩig yẽegame.» T'a Zakoob yeel-a: «M kõn bas-f tɩ f ka reng n ning m bark ye.» T'a soke: «F yʋʋr la a bõe?» T'a Zakoob leoke: «A Zakoob.» T'a yeele: «Ade, b ka na n le bool foo tɩ Zakoob ye, b na n bool-f lame tɩ Israyɛl tɩ f maoo ne Wẽnd la ninsaalba la fo n tõoge.» A Zakoob paasame: «M kot-y lame tɩ y togs y yʋʋre.» T'a soke: «Yaa bõe tɩ f baood m yʋʋre?» La a wẽneg n ninga a Zakoob barka. A Zakoob pʋda zĩ-kãng tɩ Penuwɛl, n yetẽ: «M yãee Wẽnnaam nenga n yaool n pa ki ye.» Sõor sẽn waa n pukdẽ, a yii Penuwɛl la ra kẽnda kɩʋʋlgo. Yaa rẽ yĩng la ba ne rũnna, Israyɛl kamb pa wãbd kɩʋʋlg gĩindi, a Zakoob kɩʋʋlga sẽn da pogla tẽegr yĩnga. A Zakoob dooga a neng la a yãe-la a Ezayu, t'a wat ne neb kobs-naase. A weela a kambã n kõ a Lea, a Rasɛl la a roog-kamba. A lʋɩɩsa a Bila la a Zilpa ne b kamba taoore, t'a Lea pʋgd ne a kamba, t'a Rasɛl ne a Zozɛf pa poorẽ. Yẽ meng waa n lʋɩɩ taoore, n wõgemd tẽng naoor a yopoe n yaool n ta a kẽema. A Ezayu wudgame n seg-a n mobg-a, n mok-a-la b sɩnga yãbre. A Ezayu sẽn yãe pagbã la kambã a sokame: «Yaa yɛ rãmb n be ne foo ka?» T'a leoke: «Yaa kamb niyns Wẽnd sẽn kõ maama.» Doog-kamba me kolga ne b rẽnna la b me wõgemda tẽnga. A Lea kolga ne a kamba n wõgemd tẽnga, t'a Rasɛl ne a Zozɛf me ta, b me wõgend tẽnga. A Ezayu sokame: «Yaa bõe la f rat n maan ne rũmsa m sẽn segã?» T'a leoke: «Yaa sẽn na yɩlẽ n paam yãmb nimbãan-zoeere.» T'a Ezayu yeele: «Mam sẽn tara zoe n labsa, m yao sõngo, tall f rẽnna.» Dẽ la a Zakoob yeel yã: «Ka na n yɩ boto ye, y sã n kõ-m-la sugri, bɩ y nug reeg m kũuna. Sɩda mam sẽn saag n seg yãmbã, yaa wa ninsaal sẽn seg Naaba-Wẽnde, la yãmb reeg-m-la neere. Bɩ y reeg m kũuna tɩ Wẽnd maan-m-la neere tɩ bũmb fãa be m nugẽ.» A Zakoob dɩdgra yĩnga, a Ezayu sakame n deege. A Ezayu yeelame: «D sɩng kẽnde la maam n na n lʋɩ taoore!» T'a Zakoob yeele: «M zu-soaba miime tɩ kamba ka tar pãnga, la m tog n maana gũusgu ne pe-yãansã sẽn tar kom-peendo. Kẽna sã n yɩ wʋsgo, b fãa na n kiime. Sẽn ya woto wã bɩ yãmb deng taoore. Mam na n kẽna bãanem-bãanem, n tũ rũmsã la m tũ kambã n ta Seyir, m zu-soaba zakẽ.» A Ezayu yeelame: «Sã n ya woto, m na n yãka m neba kẽer n bas ne foom.» T'a Zakoob leok: «Rẽ võor la bõe, m sẽn dat bũmb ningã, yaa yãmb maan yard ne m bala.» A Ezayu rɩka Seyir sore badaare, t'a Zakoob wẽnemd n tees Sukot; a mee zak a meng yĩnga la a tii sõg-zags a rũmsa yĩnga; yaa rẽ yĩng la a pʋd zĩ-kãnga tɩ Sukot, sõg-zakẽ. A Zakoob taa ne laafi Sikɛm, Kanaã tẽnga, a sẽn yi Padã-Aram n leeg n watẽ, a siga tẽnga noore. A kosa a Amor, a Sikɛm ba, t'a kõ a zĩig ning a sẽn sigã la a reeg wanzurf koeems koabga. A mee maan-kugr zĩ-kãnga, n pʋd a yʋʋra ƐL, a Israyɛl Wẽnnaam. A Lea bi-pugl a Dina yiime n na n tɩ sõs ne tẽnga kom-pugli. Ivitga Amor biig, a Sikɛm, tẽnga na-bi-kẽenga, yãenda a Dina n yõg-a ne pãnga. A yam da kẽe a Zakoob bi-puglã, a Dina; a da nonga bi-pugla wʋsgo, bi-pugla ra taa a yam zãnga. A Sikɛm yeela a ba, a Amor: «Kos biigã n kõ-ma tɩ m maan m paga!» A Zakoob yaool n da bãngame t'a bi-pugl a Dina ra sãamame la a rũm-kɩɩmba sẽn da ket weoogã, a sĩnda a noor n tãag b waoongo. A Sikɛm ba, a Amor, waa a Zakoob nengẽ ne a koɛɛga. A Zakoob kamba wẽneg n yii bãoogẽ n wa la b wʋma yellã tɩ b sũur puug wʋsgo; b wʋmame t'a Sikɛm tʋma wẽnga n sãam a Zakoob bi-pugla la b fãa yeelame tɩ rẽ ka segd ye. A Amor leoka woto: «Mam biig a Sikɛm yãee yãmb bi-pugla t'a yam kẽe-a wʋsgo. Bɩ y rɩk-a n kõ-a t'a maan a paga. D yõg zoodo ne taaba tɩ yãmb kõ tõnd y kamba tɩ tõnd me kõ yãmb d rẽnna. Y na n paa ne tõndo, d tẽnga na n lebga y soolem, y na tõog n kẽ a weta fãa, y na tõog n ti y roto.» A Sikɛm yeela biiga ba la a kẽem dãmba: «Maan-y yardo tɩ m na kõ-y y sẽn na n kos bũmb ning fãa. Saag-y maam yaoodo sẽn ya kãsenga tɩ m na yao fãa gilli la y kõ maam y bi-pugla tɩ m maan m paga.» A Amor biig a Sikɛm sẽn da sãam a Dina yĩngã, a Zakoob kamba leok-a-la ne zãmbo: «Tõnd sẽn ka tõe n maan la woto: n dɩk d tão n kõ dao sẽn ka kẽ bãongo; tõnd nengẽ a yaa yãnd wʋsgo. Yãmb sã n dat tɩ d sake bɩ yãmb me lebg wa tõndo, bɩ yãmb me sak n kẽes y rapa bãongo. Rẽ poor marsã tõnd na rɩk d kom-pugli wã n kõ yãmba tɩ yãmb me rɩk y rẽnd n kõ tõndo, woto d na pa ne yãmba n lebg buud a ye. La yãmb sã n pa kelg d sẽn leokd-y bũmb ning bãonga poorẽ, tõnd na n looga ne d biiga.» B goama ta-la a Amor la a Sikɛm yam. Bi-ribla pa kaoos n maan b sẽn kos a bũmb ninga ye t'a yama da kẽe a Zakoob bi-pugla zãnga. La bãng-y tɩ buuda fãa da ne-la a Sikɛm wala b nin-kãsenga. A Amor ne a biiga Sikɛm tigma buuda, tẽnga noore, la b yeel-b lame: «Ad-y nin-bãmba raab yaa sõngo; bɩ d tẽng lebg b tẽnga, tɩ b tõe n gõ d wetẽ wala b sẽn date, tɩ b rɩk b kamb n kõ tõndo, tɩ tõnd me rɩk d kamb n kõ bãmba. Ad-y b yaool n pa na n sak n zĩnd ne tõndo tɩ d lebg buud a yembre, tõnd rapa fãa sã n ka kẽ bãongo wala bãmb ye. N paas me, tõnd sã n sake, b rũmsã, b paoongã fãa na n lebga tõnd dẽnna la b na n paa ne tõndo.» Tẽnga kẽedba fãa kelga a Amor la a Sikɛm neere, la rapa fãa gill sak n kẽe bãongo. Sẽn maan dasem a tã tɩ Sikɛm dãmb ket n zĩ ne toogo la a Zakoob kamb a yiibu, a Dina kẽem dãmba, a Simeõ ne a Levi, sẽn yi ne b sʋʋse n tɩ kẽ tẽngã; dabeem buug da ka tar-b ye; b kʋʋ tẽnga rapa fãa gilli. B kʋ-la a Amor ne a Sikɛm la b yiisa a Dina a Sikɛm zakẽ n tall-a n looge. B baasa sẽn da pogl-bã la b zɛɛ tẽngã, b tão wã sẽn sãama yĩnga. B zɛ-la b rũmsi, bɛd la bõonego, b bõeense, b rũmsa fãa, sẽn pa-b yir wala sẽn da be-b bãoogẽ. B looga ne b arzɛka fãa, ne b kom-bõonego, ne b pagba, ne sẽn da be rota pʋs fãa. A Zakoob yeela a Simeõ ne a Levi: «Yãmb kẽes-m-la yellẽ, y maaname tɩ Kanaã rãmb la Perizitse na n kisg tõndo. Mam neba paooda, b na n sũu tãpo n zab ne maam, n tõog-ma, n wã maam ne m roog zãnga.» Tɩ b leoke: «Da segdame tɩ b rɩk tõnd tão wã n maan b pʋg-yoodr bi?» Wẽnnaam yeela a Zakoob «Yik n dʋ Betɛl n tɩ zĩnd be; beenẽ f na n mee maan-kugr n kõ Wẽnnaam ning sẽn lika foo f sẽn waa n zoet n na n põs f kẽem a Ezayu.» A Zakoob yeela a zak rãmba: «Menes-y tẽn-kug la tɩta fãa sẽn be y nengẽ, pek-y y mense la y teed y futu. Yik-y tɩ d dʋ Betɛl. M na n tɩ mee maan-kugri n kõ Naaba-Wẽnd tɩ b reega m kosgo, m pɛta wakato, la b sõnga maam tɩ m sor loke.» B rɩka bũmb ning fãa b sẽn dõoge n tar n tẽegd b wẽn-naandsa yelle la b tʋb-londa fãa n kɩs a Zakoob t'a tuk bok tɩɩg tẽngr, Sikɛm, n bus-b be. B yikame n looge. Naaba-Wẽnd kẽesa tẽns niyns fãa sẽn pẽ-b be wã rabeem. Woto b pa pʋg a Zakoob ne a neba ye. A Zakoob taa Luz, Kanaã tẽnga, be yẽnẽ la Betɛl, a taa ne a neba fãa. A mee maan-kugri n pʋd zĩ-kãng tɩ Betɛl, tɩ Wẽnnaam da zoe n lik-a-la be, a sẽn waa n zoet n na n põs a kẽema. A Rebeka ma-wubdga, a Debora, kii be tɩ b mum-a Betɛl tɩ-bedr wa kʋk tẽngre, la b pʋda tɩ-kãng tɩ nintãm kʋka. Wẽnnaam lika a Zakoob Padã-Aram sor zugu, la b ning-a-la barka. Wẽnnaam yeel-a lame: «Fo yʋʋr la a Zakoob la b kõn le bool-f boto ye, na n yɩɩ Israyɛl, la Israyɛl n sɩd lebg a yʋʋre.» Wẽnnaam le paasame: «Maam la Wẽnd-Pãng-Soaba. Rog la f weke. Ad bu-kẽengo, dĩm dãmb buudu, na n yi-la f pennẽ. Tẽng ning m sẽn kõ a Abraam la a Izaak, m kõt-a-la foom me, la fo loogr poore, m kõt-a-la f kamba.» B sẽn gom woto b leba yĩngri n zãag ne segba zĩigã. La Wẽnd sẽn gom ne-a zĩig ningã, a Zakoob lugla kugri, n dɩk kaam n daag a zugu. La a Zakoob pʋda Wẽnd sẽn lik a zĩig ningã tɩ Betɛl. B yika Betɛl; da keta bilf bal tɩ b ta Efrata la a Rasɛl sɩng n na n kũma rogem la rogma ka yɩ naana ye. Rogma sẽn da ya toogã, pʋg-roagsa yeel-a lame: «Da maan dabeem tɩ yaa bi-ribl la f paam yã.» A Rasɛl mikame t'a pãng sɛɛme t'a na n ki t'a pʋd biigã tɩ Ben-Oni, Kʋrɩta, la biiga ba zãgsame n pʋd-a a Bẽnzame, tom-pag biiga. A Rasɛl kiime la b mum-a-la Efrata sor zugu, yaa Bɛtelyɛɛm la be. A Zakoob sela kugri yaoga zugu la kug kãng keta ne rũnna. A Israyɛl yii be n tɩ yals Migdal-Edɛr poore. Yaa beenẽ la a Rubẽ yõg a Bila, a ba paga, la a ba wã bãngame la a sũur pa yɩ noog ye. A Zakoob kamba yɩɩ piig la a yiibu. Ad-a Lea kamba: a Rubẽ, yẽ la a Zakoob bi-kẽenga; a Simeõ, a Levi, a Zɩɩda, a Isakar, a Zabulõ. Ad-a Rasɛl kamba: a Zozɛf ne a Bẽnzame. Ad-a Rasɛl doog-biig a Bila kamba: a Dã, a Neftali. Ad-a Lea doog-biig a Zilpa kamba: a Gad, a Asɛr. Woto la a Zakoob kamba sẽn dog Padã-Aram tẽnga. A Zakoob taa a ba a Izaak zakẽ, yaa Mambre, Kiriyat-Arba, b boond-a lame yɛs tɩ Ebrõ, yaa be la Abraam la a Izaak kaoos yã. A Izaak pʋlemd zãng yɩɩ yʋʋm koabg la pis-nii, a paam n kʋʋla wʋsgo n yaool n ki, n yaool n sak a saam-dãmba, t'a kamb a Ezayu la a Zakoob na n solg-a. A Ezayu boondame tɩ Edom la ad yẽ me roogo. Yaa Kanaã kom-pugli la a Ezayu kẽes yã, yaa Ada, Ititga Elon biiga; yaa Oolibama: yẽ ba la a Ana, la Ana ba la a Sibeõ, a Sibeõ yaa Ivitsa buud neda. Sẽn leb n paas yaa Basmat: yẽ yaa a Ismayɛl bi-pugla la a Nebayot tão; a Ada biig la a Elifaz; a Baasmat biig la a Reowɛl; a Oolibama kamb la a Yewus, a Yalam la a Kora. Woto la kamb niyns a Ezayu sẽn dog Kanaã tẽnga. A Ezayu waa n yika ne a pagba, a kom-dibli, a kom-pugli, a yir dãmb fãa, a rũmsa fãa la a sẽn da paam bũmb ning fãa Kanaã tẽnga, n kẽng Seyir, n zãag ne a yao, a Zakoob. Sɩda, b rũmsa da yaa wʋsgo ne b tõog n naag taab zĩ-yɛnga; tẽnga ra ka tõe n sek-b ye. Yaa rẽ yĩng la a Edom dʋ Seyir tãnga zugu. Edom ne Ezayu yaa nin-yende. Woto la Edomitsa ba, a Ezayu, kibare, a sẽn waa n ta Seyir tãngẽ. Ad-a Ezayu kamba yʋya: a Elifaz, yẽ ma la a Ada, a Ezayu paga, a Reowɛl, yẽ ma la a Basmat, a Ezayu paga. Ad-a Elifaz kamba: a Teman, a Omar, a Sefõ, a Gatam, a Kenaz. A Ezayu biig a Elifaz rɩka a Timna n paas a pipi paga la a Timna doga a Amalɛk. Bãmb la a Ezayu ne a Ada bãmba. Sã n yaa a Reowɛl, yẽ kamb la a Naat, a Zera, a Sama, a Miza. A Ezayu ne a paga Basmat kamb la bãmba. A Ezayu paga, a Oolibama, sẽn yaa a Ana biiga, a Sibeõ yagenga, doga a Yewus, a Yalam, a Kora. Ad sẽn yɩ-b b ba a Ezayu rooga nanamse, Edom tẽn-peelmẽ: a Tema, a Omar, a Sefõ, a Kenaz, a Gatam, a Amalɛk. A Ezayu bi-kẽeng a Elifaz kamb la bãmba. B ma la a Ezayu pag a Ada. Roog nanams a Naat, a Zera, a Sama, a Miza; Bãmb yaa a Ezayu biig a Reowɛl kamba; b yaab poak la a Basmat, a Ezayu paga. B vɩɩnda Edom tẽn-peelmẽ. Roog nanams a Yewus, a Yalam, a Kora. Bãmb yɩ-la a Ezayu ne a paga a Oolibama kamb; a Ana la a Oolibama ma. Edom nanamsa la bãmba, fãa ya-la a Ezayu kamba. Sẽn zĩnd-b Edom tẽn-peelmẽ pipi yɩɩ Oritga a Seyir yagense. La Oritsa nanams yi-la a Lotã, a Sobal, a Sibeõ, a Ana, a Disõ, a Esɛr, a Disã, a Seyir kamba. A Lotã kamb yɩ-la a Ori la a Emam; a Lotã da yaa a Timna tão. A Sobal kamb yɩ-la a Alwã, a Manaat, a Ebal, a Sefõ, a Onam. A Sibeõ kamb yɩ-la a Aya, a Ana, yaa Ana kãng n da kẽng we-raoogẽ n na n tɩ wãbneg a ba a Sibeõ bõeense n tɩ yãend koom sẽn ya tʋʋlga. A Ana kamb yɩ-la a Disõ, a bi-ribla la a Oolibama, a bi-pugla. A Disõ kamb yɩ-la a Emdã, a Esbã, a Yitrã a Kerã. A Esɛr kamba yɩ-la a Bilã, a Zaawã, a Akã. A Disã kamb yɩ-la a Us, a Arã. Oritsa nanamse la woto: a Lotã, a Sobal, a Sibeõ, a Ana, a Disõ, a Esɛr a Disã. Bãmb n yɩɩ b roog nanams Seyir tẽn-peelmẽ. Ad neb niyns sẽn dɩ-b naam Edom tẽnga, tɩ Israyɛl dĩm dãmba yaool n na n wa soog-a. Pipi dĩma yɩ-la a Bela, a ba yʋʋr a Beor la a na-tẽnga ra boondame tɩ Dinaba A Bela sẽn ki, a Zobab n ledg a zĩiga, yẽ ba la a Zera, t'a na-tẽnga ya Bosra. A Zobab sẽn ki, a Usam n dɩ naam a zĩigẽ, Temanitsa tẽngẽ. A Usam sẽn ki, a Bedad biig a Adad n deeg a zĩiga. Yaa yẽ n zab ne Madianitse, n tõog-ba, Moab weoogẽ. A na-tẽng yɩɩ Awit. A Adad sẽn ki, a Samla n led a zĩiga. Masreka la a na-tẽnga. A Samla poore, Reobot-An-Naar rao, a Sol, n dɩ naam. Sẽn pʋg a Sol yɩ-la a Akbor biig, a Baal-Anã. A Akbor biig, a Baal-Anã, kiime t'a Adar ledg a zĩiga, a na-tẽnga ra boondame tɩ Pawu; a pag ra boondame tɩ Metabeyɛl, a Matrɛd bi-pugla, a Me-Zaad yagenga. Ad neb niyns sẽn yɩɩ dĩm dãmb a Ezayu roogẽ, ned kam fãa ne a saka, a tẽnga: a Timna, a Alvã, a Yetɛt, a Oolibama, a Ela, a Pinõ, a Kenaz, a Tema, a Mibsar, a Magdiyɛl, a Iram. Bãmb n yɩ Edom dĩm dãmba, tẽns niyns b sẽn da ya b soolem. A Ezayu la Edomitsa yaaba. A Zakoob ba wã sẽn zĩnd tẽng ning Kanaã, beenẽ la yẽ me ti a yiri. Wã marsã yaa a Zakoob doog kibare. A Zozɛf yʋʋm sẽn waa n ta piig la a yopoe, a da naagda a kẽem-dãmb n kɩɩmd rũmsi. A ra ket n yaa yãaga; a Bila la a Zilpa kamba la a rogd-n-taase; a Bila ne a Zilpa yaa a ba pagba. A sã n mii n wʋm tɩ b gomd wẽng a kẽem dãmba poorẽ, a wat n togsa a ba. A Israyɛl da nonga a Zozɛf n yɩɩd a kamb a taabã, a da yaa a kʋʋlem biiga; a kɩtame tɩ b sẽ na-biig fuug n kõ-a. A kẽem dãmba sẽn yãe t'a ba wã nong-a-la wʋsgo n yɩɩd bãmbã, b tuga beem ne-a, tɩ ya mo-beed bala n dag n be b noorẽ. A Zozɛf zãmsame n yi n togs a kẽem dãmbã, tɩ b na n maneg n kisg-a. A yeelame: «Kelg-y m sẽn zãmse: Tõnd dag n bee pʋʋgẽ n kalsd koodo; mam kalga yikame n yaas yĩngri tɩ yãmb dẽnna na n gũbg-a n wõgemd a taoore.» Dẽ la a kẽem dãmba leok-a: «Sãnd f ka rat n wa yɩ tõnd dĩma bɩ d soaala!» Zãmsdã la goama kɩtame tɩ b sũ-kiira la b beema yãng n paas. A Zozɛf le paama zãmsd a to, t'a le wilg a kẽem dãmba: «M le zãmsame la m yãee wĩntoog la kiuug la ãds piig la a ye tɩ b wõg mam taoore.» A togsa a ba la a kẽem dãmbã la ba wã zab-a lame: «Ad fo zãmsdã kɛɛma, maam ne f ma la f kẽem-dãmbã na n wa wõgemda fo taoor la?» Rẽ paasa a kẽem dãmba sũ-kiiri. A ba wã yẽ da sĩnda a noore n bilgd yɛlã a sũurẽ. A Zozɛf kẽem dãmba kẽnga Sikɛm n na n tɩ gũ b ba rũms bõonese. A Israyɛl yeela a Zozɛf: «Fo kẽem dãmba bee Sikɛm bãoogo, wa tɩ m tʋm-f b nengẽ.» T'a yeele: «M na kẽng!» T'a ba wã yeel-a: «Bʋʋg-f kẽem dãmbã n ges b keta laafi la f ges rũmsa me keta laafi n wa togs-ma.» La a Zozɛf yii Ebrõ n ta Sikɛm. Ned n seg-a bãoogẽ t'a kẽnd la a sok-a lame: «Biiga, bõe la f baooda?» T'a leoke: «M baooda m kẽem dãmba la wilg maam b sẽn be zĩig ninga n kɩɩmd rũmsã!» Tɩ raoã yeele: «B yikame la m da wʋmdame tɩ b goamda: d kẽng Dotã.» A Zozɛf gẽesa a kẽem dãmba la a tɩ yãend-b-la Dotã. A Zozɛf kẽem dãmba yãend-a lame t'a nan ket yɩɩg n watẽ tɩ b sed ne taab n na n kʋ-a. B ra yeta taaba: «Ad zãmsda naab sẽn wate! Wa-y tɩ d kʋ-a n lob bul kɩdgẽ la d yeel tɩ rũng n yõk-a n wãbe la woto d na bãng a zãmsdã sẽn na kẽ zĩig ninga!» A Rubẽ wʋmame la a fãag-a-la b nusẽ n yeel-b tɩ b wa tɩ b ra kʋ-a ye. A Rubẽ yeelame: «Wa-y tɩ d da kʋ-a ye, d da sɩɩs-a ne d nug ye, d bas a bul-kɩdgẽ bala, weoogẽ ka.» A da ratame n soos n yiis-a n tɩ lebs a ba. Woto a Zozɛf sẽn ta b sʋka, tao-tao bal tɩ b yeega a fu-yorgo t'a ra yera na-biig fuugu. B gãd-a lame n lob bul-kɩdgẽ; bulga da yaa vɩʋʋgo, koom da ka be a pʋgẽ ye, n yaool n leb b zĩigẽ n na n tɩ rɩ. B sẽn doog b nenga, b yãee Ismayɛl toandba sẽn yi Galaad n kuiisẽ. B yʋgma wã ra zɩta tɩdare, tɩ-kaam sẽn na n ning kũum tɩ ra sãam ye, la sẽn tar yũ-noogo. B ra teesda Ezipt tẽnga. A Zɩɩda yeela a ba-biisi: «Yõod bʋg la d na n paam, d sã n kʋ d yao wã la d bus a zɩɩma? Wa-y tɩ d koos-a ne Ismayɛlitsã la d da kʋ-a ye tɩ ya d yao, d fãa yaa zɩɩm a ye.» A sẽn gom woto, b kelg-a lame. Madiã toandba taame tɩ b yiis a Zozɛf bulgẽ wã n soos n koos a wakɩ koeems pisi ne bãmba tɩ b tall-a n loog Ezipt tẽnga. A Rubẽ leba bulgẽ wã n mik t'a Zozɛf ka le ket be ye t'a na n kẽes a fut, la a lɛɛg n wa yeel a ba-biisi: «Ad-y biiga ka le ket ye, la m na n kẽe yɛ?» Dẽ la b rɩk a Zozɛf fuugã n kodg boɛɛg a ye, n bilim fuuga zɩɩmẽ. B toolame tɩ b tɩ kɩs fu-yorgã b ba la b yeel-a: «Wã bala la tõnd sẽn yãende, ges-y sãnd ka y biiga fuugã?» A Zakoob gesame n yeele: «Yaa m biiga fu-yorgo, bõn-nind n wãb a Zozɛf n zerem-a wa rũnga.» A Zakoob kẽega a fuug n bao sũ-pa-noang fuugu n yeelge la a yãba a Zozɛf n kaoose. A kom-dibli la a kom-pugli waame n na n bels-a-la a zãgsa belsgo n yetẽ: «Bas-y-ma tɩ m sig bʋg-tẽng ne nintãm n paam m biiga.» La a kell n yõka yãbre. Madianitsa koosa a Zozɛf. B koos-a-la ne Ezipt tẽng rao a ye, a Potifar. Da yaa nin-kãsenga Ezipt naaba zakẽ la zaka rãmb dɩlgr ra paka yẽnda. Ade, a Zɩɩda waa n basa a ba-biisã n kẽng Adulam nin-yend nengẽ la nin-kãng yʋʋr la a Ira. A waa n yãenda Kanaã bi-pugl sẽn boond tɩ Suwa la a rɩk-a lame n maan a paga. Paga waa n dɩka pʋga n dog a biiga n bool tɩ Er. A sẽn le rog biig a to, a pʋd-a lame tɩ Ona. A le roga biig a to, n pʋd yẽ soab t'a Sela. Yɩɩ Kezib tẽng la a kũm yẽ rogem. A Zɩɩda bao pag n kõ a bi-kẽeng a Er, paga da boondame tɩ Tamar. La a Zɩɩda bi-kẽeng a Ɛr maana sẽn ka ta Soaala-Wẽnd yam tɩ b yãk a yõore. Dẽ la a Zɩɩda yeel a Ona: «Maan sẽn tog ne f kẽema paga n dog biig n kõ-a.» A Ona da mime tɩ biiga na n yɩ-la a kẽema biig n yaool ka yẽ biig ye. A sã n da kẽ ne pagã a da raagda zɩɩma tẽnga n mi tɩ woto a kõn dog biig n kõ a kẽem ye. Dẽ me pa ta Soaala-Wẽnd yam ye tɩ b sɩbg-a ne kũum. A Zɩɩda kong n yeela a bi-pag a Tamar: «Leb f ba-yiri wa pʋg-kõore t'a Sela paam n bɩ.» A sẽn gom woto wã yaa a sẽn da rat tɩ bi-kãng põse, n da ki wala a kẽem dãmba; a Tamar sakame n leb a ba-yiri. Sẽn waa n kaoos bilfu, a Zɩɩda pag a Suwa kiime. A Zɩɩda sẽn yãb a pag n sɛ, a kẽnga Timna n na n tɩ wõrs a piisi, yẽ ne a zoa, a Ira, Adulam neda. B yeela a Tamar: «Ad-a Ɛr ba wã wata Timna n na n wõrs a piisi.» A Tamar yeesa fut niyns sẽn da wilgd t'a yaa pʋg-kõorã n bao peend n murs-mursi, n zĩ Enayim tẽnga kʋɩleng sɛɛga; Enayim da bee Timna sor zugu. A Tamar neeme t'a Sela lebga raoa tɩ b pa rɩk-a n kõ-a ye. A Zɩɩda yãenda a Tamar la a mams-a-la ne pʋg-yoodre; a nenga ra ludame. A bʋʋg-a lame n yeel-a: «Bas tɩ m kẽ ne fo!» A ra ka mi tɩ yaa a bi-pag ye. Dẽ la a Tamar sok-a: «Bõe la f na n kõ-m tɩ m sak-fo?» T'a leoke: «M na tool-f bulla, m sã n ta yiri.» La paga yeelame: «M na sake, f sã n dɩk f bũmb n bas m nugẽ, tɩ bulla sã n wa bɩ f le reege.» Dẽ la a Zɩɩda sok yã: «F ratame tɩ m bas bõe?» T'a yeele: «Fo sẽn tar bũmb ning n kõt kaset tɩ sẽn gʋlsa yaa foom n gʋlse, bõn-kãng ne a boabdga, n paas f rasaarã.» A sak n kɩs-a-la rẽ fãa; b bãnga taaba. A Tamar tol n wa mikame t'a tedgame. Paga sẽn kul a yiri, a yãka peenna n lebs a pʋg-kõt fut n yeelge. A Zɩɩda tʋma a zoa, Adulam daoa, t'a tɩ kɩs bullã la a reeg a teed n wa. A sẽn kẽnge, a pa yãend paga ye. A soka tẽnga rãmba: «Pʋg-yoodrã sẽn da be Enayim sora noorã bee ye?» Tɩ b leok-a: «Pʋg-yoodr zɩ n zĩnd ka ye.» A lɛɛg n waa a Zɩɩda nengẽ n yeel t'a pa yãend-a ye, tɩ la tẽnga rãmb me kõo kaseto tɩ b zɩ n yãe pʋg-yoodr be ye. A Zɩɩda leokame: «A tall gilli; pa tog tɩ b wa laad tõnd ye; m tʋma foo ne bullã la f pa tɩ yãend-a ye.» Sẽn maan kiis a tã, b togsa a Zɩɩda: «Ad-f bi-paga Tamar maana yoob n tol n dɩk pʋga.» A Zɩɩda kõo noor tɩ b yiis-a tẽnga pʋga n yõog-a bugum. B sẽn waa n tar-a n yita, a tʋmame tɩ b tɩ yeel a Zɩɩda: «Yaa sẽn so a woto wã fãa soab biig la m tʋta. Ges-y neere n bãng ãnnã n so gʋlsg kaset kãngã, ne a boabdgã la dasaarã?» A Zɩɩda gesa neere la a yeelame: «Paga bʋʋm yɩɩda maam sɩda, tɩ m da pa sak n dɩk-a n kõ m biig a Sela ye.» Dẽ tɛka b ka le bãng taab ye. A Tamar sẽn waa n kũmd dogem, a mikame tɩ yaa kinkirsi. Dogma wakato biig a yembr tuda a nug yɩnga tɩ pʋg-roagsa gãd-a n loe gĩs-miuugu n yeele: «Yãoo la pipi.» Yẽ soaba le kẽesa a nug la yaa yao wã n yi, tɩ pʋg-roagsa yeele: «Yaa bõe n na n maan-f tɩ f fãod n yita?» Tɩ b bool-a t'a Perɛk, a Fãooda. A ye wã yaool n yiime tɩ gĩs miuuga loe a nugu, tɩ b bool-a tɩ Zera, a Yõadi. Yaa Ezipt tẽng la b taas a Zozɛf. A Potifar da raa-a-la Ismayɛl yagensa nengẽ. Ezipt dĩma yam da kẽ-la a Potifar la yẽ la dĩma gũudba tãnsoaba. Soaala-Wẽnd zĩnda ne a Zozɛf, bũmb fãa sak-a lame, a pa-la a Potifar zakẽ. Nin-kãnga yãendame t'a Zozɛf yĩnga, Soaala-Wẽnd da bee ne-a tɩ bũmba fãa sakd-a, a ra nong-a lame, a rɩka a zak naam la a sẽn tar fãa n bas ne-a. Ezipt raoã sẽn dɩk a zak naam la a sẽn tar fãa n bas ne a Zozɛf tɛka, Soaala-Wẽnd ninga a zak barka. Barka siga a sẽn da tar fãa, a zak wala a pʋto. A sẽn dɩk fãa n bas ne a Zozɛf, a ka le bʋ bũmb ba a ye poorẽ ye, tʋʋmd ning a sẽn da kell a meng yĩnga, da yaa a menga rɩlgre bala. A Zozɛf ra yaa rao sẽn pidi la a neng ra sakda gesgo. Sẽn waa n beẽ, a Zozɛf zu-soaba pag yam waa n sog-a lame. Paga yeelame: «Zefo, kẽ ne maam!» A Zozɛf zãgsame la a yeel-a lame: «M zu-soaba maana yard ne maam, n pa le bʋʋd bũmb ba a ye, n dɩk fãa n gũnug-ma. A zaka pʋga a ka tar waoor n yɩɩd maam ye, a ka yet tɩ m maan a ni ne bũmb ba a ye sã n ka ne foo, a paga. Sẽn ya woto wã, m na n yɩɩ wãn n tũ fo raab wẽnga la m beeg Wẽnde?» Beoog sẽn vẽeg fãa, paga ra ket n gomda ne a Zozɛf la a kell n zãgsame, a pa sak n gãand ne-a ye. Daar a ye, a Zozɛf kẽe a Potifar zakẽ n tʋmd a tʋʋma. Dakõor ba a ye da ka pa zaka pʋg ye. Paga gãda a fuug n yeel-a: «Gãand ne maam!» La a Zozɛf basa fuugã a nugẽ n zoe n yi. A sẽn mik t'a Zozɛf basa a fuug a nugẽ n zoe n yi, a boola a sõgen-kamba n yeel-ba: «Ges-y, m sɩda waa ne Ebre kãnga, t'a rat n yog ne maam; a tol n kolgame t'a na n yõg-ma la mam kelmame tɩ sãde. A sẽn mik tɩ m zẽka m koɛɛg n boondẽ, a bas a fuug m nugẽ la a zoeeme n yi.» Paga rɩka fuugã n dɩgl a sɛɛgẽ n gũud a zu-soaba waoongo. La a sɩda sẽn wa, a goma woto: «Fo sẽn tall Ebre ning n wa ka wã kolgame n na yog ne maam. M zẽka m koɛɛg n boole t'a bas a fuug m nugẽ n zoe n yi.» A Potifar sẽn wʋm pagã sẽn yeelã: «Ges f yem-daoogã sẽn tʋlg bũmb ning ne maam,» a sũur yikame. A kɩtame tɩ b yõk a Zozɛf n kẽes roogo. Soaala-Wẽnd sõnga a Zozɛf, b nonglma paa ne-a, ro-gũuda ka yɩ toaag ne-a ye. Gũudba naab tol n yeela a Zozɛf t'a ges bi-bees a taaba yelle la bũmb sɩd da ka maand t'a ka bãng tiir ye. Tʋʋmd buud da ka le ket gũdba naab sẽn na n tʋm ye, tɩ Wẽnd da sõngda a Zozɛf t'a sẽn maand fãa baasd neere. Sẽn yɩ bilfu, neb a yiib n beeg dĩma beegr kãsenga; yaa sẽn geta rãama yelle la sẽn geta rɩɩba yelle. Dĩma sũur puuga ne bãmb b yiibã al wʋsgo. A sui-b-la roogo; ro-kãng pʋg me la b ra kẽes a Zozɛf. Gũudba kãsem n da so ro-kãng gesgo. Gũudba naab kosa a Zozɛf t'a ges neb a yiiba me yelle. B kaoosa roogẽ wã bilfu, Yʋng a ye, sẽn wata ne dĩma rãama la sẽn wata ne dĩma rɩɩbã b sẽn yõk n sui roogã paama zãmsdo. Zãmsda da wilgda ned kam yell sẽn na n yɩ a soaba. A Zozɛf taa b nengẽ yibeoogo la a mik-b-la ne sũ-sãanga. T'a sok-ba: «Yaa bõe tɩ y nens gãnem dũnna?» Tɩ b yeele: «Tõnd zãmsame la d ka tar ned sẽn na n togs tõnd d zãmsda võor ye.» A Zozɛf yeel-b lame: «Bãng-y tɩ sɩda, yaa Wẽnd n tar bũmb fãa võore, la yãmb ye n togs maam y zãmsdã.» Rãama kɩtã n sɩnge, a yeelame: «Mam zãmsame tɩ tɩɩg sẽn womd biisi tɩ b tõsd n maand dãam n yɛs mam taoore. Will a tã n tão tɩɩga sɛɛga, n tob vãado, n ning puudu, n ning sib gĩin la gĩna wẽneg n moogame. M da zãada Ezipt dĩma rãam wamd m nugẽ, m fãsga tɩɩga biis n wẽk wamdẽ wã n dɩk wamna n sagl dĩma nugẽ.» A Zozɛf yeel-a lame: «Ad-f zãmsda võore: will a tã makda dasem a tã. Keta rasem a tã tɩ dĩma yiis foom roogo tɩ f le rɩk f pĩnd tʋʋmde; foom n na n dɩk rãama wamd n le sagl dĩma nugẽ wala f sẽn da maande. La f zug sã n yɩ noogo, bɩ f ra yĩm m yell ye, tẽeg n gom m yelle ne f zu-soabã t'a yiis m doogo. Mam yita Ebre rãmb tẽnga la m sẽn wa ka wã, m ka maan bũmb sẽn sek roog ye.» Rɩɩba kɩta sẽn mik t'a Zozɛf leokra wẽnda gom noogo, yẽ me waa ne a sẽn zãmse. A yeelame: «Mam me zãmsa woto: M da tʋka rɩɩb pet a tã. Peoog ninga sẽn da roga zugẽ wã da pida ne dĩma rɩɩb buud fãa la luiili waa n dɩt-b-la m zugẽ.» A Zozɛf yeel-a lame: «Fo zãmsda võor la woto: pet a tãaba makda dasem a tã. Dɩlla keta rasem a tã tɩ dĩma zẽk foo n zʋʋg f sẽn date. A na n yiisa foo n tɩ luul tɩ luiili tõs f nemdo.» Sɩda, dasem sẽn maan a tã, dĩma moona kibsa a rogem tẽegr yĩnga, a segla rɩɩbo n bool nin-bɛda fãa, n bool rãama kɩta la rɩɩba me kɩta. A lebsa rãama naab a pĩnd zĩigẽ la yɩɩ yẽnda n pʋdg rãama n kõ-a. A kɩtame tɩ b yõk rɩɩba kɩta n luuli, wala a Zozɛf sẽn da togsã. Bãng-y tɩ rãama kɩta ka maan tẽegr ye, a yĩma a Zozɛf yell fasi. Sẽn maam yʋʋm a yi, dĩma me zãmsame: a ra yɛsa Nil kʋɩlga noore. A yãee nag-yãans a yopoe sẽn yi kʋɩlgẽ wã n wãbd yamdo, b ra nobame n ya yɩlma. Nag-yãans a yopoe le yii kʋɩlgẽ wã; b waglmame n ka le tar neerem ye la b wa n yegla pipi rãmbã. La sẽn wagl-bã, n ka tar neerma wãba a yopoe wã sẽn nob n ya yɩlma. La dĩma wẽneg n nekame. A waa n le gũsame, n le zãmse: kaf a ye n da ning zut a yopoe; a ye fãa yaa bedre, n pɛ neere. La bãmb poore, zut a yopoe a taaba, war sẽn wãke la sẽn ya bõonese, n tão n yi. Ka-zut niyns sẽn ya b bõonesã dɩɩ sẽn sĩd bã, n ya bɛdã. Dĩma sẽn neke, a bãngame tɩ yɩɩ zãmsdo. Beoog sẽn vẽege, Ezipt dĩma yama da gõodame. Dẽ la a kɩt tɩ b bool Ezipt sɛb mitbã la yam zulung rãmba fãa, n togs a zãmsgã la ned ba a ye ka tõog n wilg a võor ye. Dẽ la sẽn kɩta dĩma rãama yik n yeele: «M data rũnna n wilg m kongre. Wakat n waa n zĩndi tɩ dĩma sũur puug ne maam la rɩɩba kɩta la a kɩtame tɩ b pag tõnd d yiiba roogo. Yʋng a ye, tõnd naaga taab n zãms zãmsdo; zãmsda da wẽnda taaba tɩ b võor yaool n ya toore. Ro-gũuda naab da tara yem-daoogo sẽn naag tõnd doogẽ la sẽn ya Ebrayitga; tõnd wilg-a-la d zãmsdo la a tõog n bilga b võore, a wilga ned kam fãa yell sẽn na n yɩ-la. Sɩd yɩɩ wala a sẽn da togsã, mam leba m pĩnd zĩigẽ la b luula m tũud-n-taagã.» Ezipt dĩma kɩtame tɩ b bool a Zozɛf; tao-tao bal tɩ b yiis-a-la roogo. A põnga a zug, n teem futu, n wa yals dĩma taoore. Tɩ dĩma na n yeel a Zozɛf: «M zãmsa m zãmsdo la ned ba a ye ka tõog n wilg a võor ye. M yaool n wʋmame tɩ zãmsd sẽn lʋɩ f tʋbrẽ bal la f sẽn wa ne a võore.» A Zozɛf yeela dĩma: «Da teeg-y maam ye, teeg-y Naaba-Wẽnd tɩ bãmb n tõe n leok tɩ yõod zĩndi.» Dĩma yeela a Zozɛf: «M zãmsda pʋgẽ, m da yɛsa Nil kʋɩlg noore, la nag-yãans a yopoe sẽn nobe, n ya yɩlma n yi kʋɩlgã n wãbd yamdo. La nag-yãans a yopoe sẽn waglme n ka le tar neerem ba bilfu, n yi n yegl pipi rãmbã, la Ezipt tẽng zɩ n yãe niis sẽn waglme n pa sakd gesgo wala nag-kãens ye. Sẽn wagl-bã, n ka tar neerma, wãba a yopoe wã sẽn da nobe n ya yɩlma. B sẽn vel-b n sɛ, ka yɩɩ wa b vela bũmb ye, b pa tedg ba bilfu; mam wẽneg n nekame. M waa n le zãmsame, n yãe kaaf a ye sẽn ning zut a yopoe t'a ye fãa ya bedre, n pɛ neere, la zut a yopoe a taab, war sẽn wãke la sẽn pa bõonese, tão n yii bãmb sɛɛgẽ, la sẽn ya-b bõonesã rɩɩ sẽn ya-b bẽdã la neebã. M togsa m zãmsdã mitbã la yam zulung rãmbã, la ned ba a ye pa tõog n wilg maam b võor nand ye.» A Zozɛf yeela Ezipt dĩma: «Yãmb zãmsdã yaa zãms yɛnga, Wẽnd wilga dĩma bũmb ning sẽn na n yɩ beoogo. Nag-yãans a yopoe sẽn ya yɩlma makda yʋʋm a yopoe; la ka-zut a yopoe sẽn pɛ neerã me makda yʋʋm a yopoe; zãmsga yaa zãms yɛnga. Nag-yãans a yopoe sẽn waglme n ka sakd gesgã sẽn pʋgã makda yʋʋm a yopoe, tɩ ka-zut a yopoe wara sẽn wãkã la sẽn pa bõonesã, bãmb me yaa yʋʋm a yopoe. Dɩlla yʋʋm a yopoe kom n na n zĩndi. Yaa wala m sẽn yeelã, Wẽnd wilga dĩma bũmb ning sẽn na n yɩ beoogo. Yʋʋm a yopoe n wate tɩ Ezipt tẽng na n gal ne bũmb fãa. Yʋʋm a yopoe n na n pʋge la na n yɩɩ kom, bũmb ka na n le zĩndi, koma na n zaba tẽnga gilli. Koma sẽn na n pʋgã, la a na n zab wʋsgã na n kɩtame tɩ b yĩm tɩ Ezipt yɩɩ tɩgr tẽnga. Zãmsda sẽn yɩ a yiibã wilgdame tɩ Wẽnd nengẽ bũmba fãa yals n sɛɛme la wakat yaoome. Sẽn ket marsã, yaa dĩma bao ned sẽn tar yam la sɩlem t'a ges Ezipt yelle. Bɩ dĩma bao neb n zĩndig tẽng fãa pʋgẽ tɩ yʋʋm a yopoe wã pʋgẽ, bɩ ned kam fãa rok a kood yõod a nu soaba n tall n wa bãmb nengẽ. Yʋʋm a yopoe tɩgra pʋgẽ, b sõng n me bao tẽng fãa la b pids-b ne kood n bĩngi. Woto, koma yʋʋm a yopoe wã pʋgẽ, b na paam n dɩ n põse.» Goama ta-la dĩma ne a poorẽ dãmba yam. Dĩma pʋs n yeel-b lame: «Yɛɛnẽ la d na n yãe Naaba-Wẽnd sẽn pids ninsaal ne yam wala nin-kãnga?» Dẽ la a yeel a Zozɛf: «Wẽnd sẽn sõng foo tɩ f mi woto wã fãa, tõnd ka le ne ned a to sẽn tar yam la sɩlem wa foo ye. Dɩlla foom la m na n lʋɩɩs taoore, na n yɩɩ tɩlɛ ne tẽnga rãmb tɩ b tũ fo sẽn yeela fãa. Bũmb ninga sẽn na n welg maam ne foom na n yɩɩ naama zaoor bala.» Dĩma le paasame: «Yɩ Ezipt tẽng soaala.» A pidga a nug-bĩng n pid a Zozɛf, n bao fu neeba n yelg-a, n bao sãnem yãndo n pid a yubla. A zombg-a-la a meng bilim-bilm a yiib soaba tɩ ned be a taoore n moonẽ: «Yĩgimd-y yã!» Yaa woto la a Zozɛf lebg Ezipt tẽng fãa soaala, ne Ezipt dĩma raabo. Dĩma yeela a Zozɛf: «Maam la dĩma menga, la sã n ka foom n kõ noore ned ka tõe n le zẽk a nug-bil meng Ezipt tẽng ye.» A teema a Zozɛf yʋʋr la ne Ezipt rãmb goama a lebga Safnat-Panea, tɩ Wẽnd n so vɩɩm. A kõ-a-la paga sẽn boond tɩ Asmat; a Asmat yaa On maan-kʋʋd, a Potifera biiga. A Zozɛf yiime n kaag Ezipt tẽnga. B sẽn waa n tall a Zozɛf n wa Ezipt dĩma taoore t'a yʋʋm yaa pis-tã. A Zozɛf basa dĩma zaka n sɩng Ezipt tẽng gilgri. Tẽnga sɩd woma ne a sũur fãa yʋʋm a yopoe wã pʋgẽ. La yʋʋm a yopoe wã sẽn yɩ tɩgr yʋʋma, a kɩtame tɩ b tigs koodo; wetẽ dãmba koodã da watame n tigsd tẽn-bɛdẽ. A Zozɛf tigsa kood zembala, wa bĩisr sẽn be mogr noore, tɩ gɛɛndb bas taale ne b geelse, la sɩda, kooda da ka tõe n mag ye. Koma sẽn waa n nan ka lʋɩ tẽngã, a Zozɛf paama kamb a yiibu ne a Asmat, On maan-kʋʋd, a Potifera, bi-puglã. A Zozɛf pʋda a bi-kẽengã tɩ Manase, tɩ Wẽnd kɩtame t'a yĩm a naong la a buudu. A boola a to wã, a Efrayim, tɩ Wẽnd kɩtame t'a rog kamb a yembd tẽngẽ. Yʋʋm a yopoe tɩgrã wala Ezipt dãmb sẽn zɩ n yãend a taarã waa n loogame, tɩ yʋʋm a yopoe kom wala a Zozɛf sẽn da wilgã, ledg a zĩiga. Tẽnga zãgsa wombo, ne rẽ fãa, rɩɩb ka tol n kong Ezipt tẽng ye. Wara lʋɩɩme tɩ Ezipt rãmb bʋʋg dĩma n yãbd n kot rɩɩbo la a da yet-b lame: «Kẽng-y fãa a Zozɛf nengẽ, la a sẽn yet tɩ y maan bũmb ninga bɩ y maan.» Yaool n da yaa dũni wã zãnga la koma lʋɩ yã; a Zozɛf kɩtame tɩ b pags bao wã tɩ Ezipt rãmb paam kood n da. Koma waa n lebga toog Ezipt tẽnga. Dũni wã tõr da wata Ezipt tẽng n daad kood a Zozɛf nengẽ. Bãng-y tɩ koma da saaga dũni wã zãnga. A Zakoob wʋmame tɩ kood bee Ezipt tẽng n koosdẽ t'a yeel a kamba: «Y sẽn zĩi n get taaba yõod la bʋgo? M wʋmame tɩ kood bee Ezipt tẽng n koosdẽ, kẽng-y be n tɩ ra tɩ d rɩ n paam n põse.» A Zozɛf kẽem dãmb piiga kẽnga Ezipt tẽnga n na n da koodo. A Zakoob pa sak t'a Bẽnzame tũ a kẽem dãmba ye. A Zozɛf ne a Bẽnzame yaa ma-biisi. A Zakoob ra yetame tɩ ka tog tɩ yell wa pak a me ye. A Israyɛl kamba tũu neb a taab n na n tɩ ra koodã tɩ koma ra bee Kanaã tẽnga. A Zozɛf da yaa na-kãsenga, da yaa yẽ nengẽ la raadba fãa da wat n daadẽ. Woto a Zozɛf kẽem dãmba sẽn taa a taoore b wõgemdame n waoog-a. A Zozɛf sẽn yãe a kẽem dãmbã, a bãng-b lame la a maana waa a ka mi-b ye, n tol gomd ne b yãas-yãasa. A sok-b lame: «Yãmb yita yɛ?» B leokame: «Tõnd yii Kanaã tẽng n wa n na n da koodo!» A Zozɛf bãnga a kẽem dãmbã la bãmb yaool n ka bãng a Zozɛf ye. A Zozɛf tẽega a sẽn da zãms b poorẽ, a yeel-b lame: «Yãmb yaa lɩɩsdba, yãmb dat n bãnga zĩig ning tõnd pãnga sẽn paoodẽ, yaa rẽ la y wa ka.» B naaga taab n yeele: «Ayo! Naaba, y yemsa waame bal n na n da koodo. D gill fãa yaa ned a ye kamba, la d togsda sɩda, y yemsa ka lɩɩsdb ye.» T'a yeel-ba: «Ka sɩd ye, yaa tõnd pãng sẽn paood zĩig ning la yãmb baood n na n bãnge.» B leoka a Zozɛf: «Yãmb yemsã da yaa piig la a yiibu, ba a ye kamba, d tẽng la Kanaã. Yao-zʋʋga paa ne d ba, tõnd nin-yend bal n ka le kete.» A Zozɛf yeel-b lame: «Yaa wala m sẽn zoe n togsã, yãmb yaa lɩɩsdba. Ad sɩbgr ning m sẽn na n sɩbg yã: m wẽen ne Ezipt dĩma, yãmb kõn yi ka tɩ y ka reng n wa ne y yao-zʋʋga ye. Tʋm-y yãmb nin-yende t'a tɩ boaal-a t'a wa la yãmb meng pa roogẽ ka; d na ges y toagsga sã n yaa sɩda bɩ y sã n yagda zirẽ. D sẽn nan ka tar y pʋgã, m ket n wẽenda ne Ezipt dĩma tɩ yãmb yaa lɩɩsdba.» A kẽes-b-la roogo dasem a tãab yĩnga. Da-tãten-daarã, a Zozɛf yeel-b lame: «M zoeta Wẽnde la ad-y sẽn na n maan bũmb ning n pam n põse: sã n ya sɩd la yãmb sẽn togsã bɩ nin-yend pa ka, bi-beesa roogẽ, sẽn kell-ba na leb ne koodã n tɩ fãag y zak rãmba. Y yao-zʋʋga na tũ yãmb n wa, woto m na bãng tɩ y togsa sɩda la y kõn ki ye.» Yɩɩ woto la a nams-ba. B ra yeta taaba: Sɩda, yaa tõnd sẽn maan d yao wã bũmb ninga n leb tõndo, tõnd yãee sũ-sãang ning sẽn da be a sũurẽ a sẽn waa n yet tɩ d maan-a sugri tɩ tõnd pa kelgã, yaa rẽ la tõnd me zĩ rũnna ne yɩɩre. T'a Rubẽ yeel-ba: «M da ka yeel-y tɩ d da saag n maan d yao wã bũmb tɩ y zãgse, ad-b sẽn sokd tõnd a zɩɩm dũnna!» B da ka mi t'a Zozɛf wʋmda b moora ye, woto no-rɛɛs n da be sʋk n deesd b goama n taasdẽ. A Zozɛf zãaga ne a kẽem dãmbã n tɩ yãbe la a lɛɛg n wa b sʋka n le gom ne-ba. A yõka a Simeõ n loe wĩir bãmb fãa nifẽ. A Zozɛf kõo noor tɩ b pids a kẽem dãmba yondo ne koodo n yaool n lebs ned kam fãa ligd n sui la b kõ-b sor zug dɩɩbo la b maana waa a sẽn wilgi. B rɩka b koodã n zɩlg b bõeense la b loogame. B sẽn ta b sikẽ, yʋngo, tɩ bãmb nin-yend lok a yolgo n na n yãk kood n kõ a bõanga, a yãee ligd a yolga pʋga. T'a na n yeel a ba-biisã: «B lebsa maam m ligdi, b sui-a-la m yolgẽ wã.» B pɛleng yɩka wʋsgo tɩ b get taaba la b rigda la b yetẽ: «Yaa bõe la Wẽnd maan tõnd woto?» B ta-la b ba-yiri, Kanaã tẽnga la b togsa b ba bũmb ning fãa sẽn maane. B yeelame: «Tẽnga dĩma maana mo-beed ne tõndo, a mamsa tõnd ne lɩɩsdba. Tɩ tõnd yeel: ‹Tõnd yaa neb sẽn togsd sɩda, tõnd ka lɩɩsdb ye. Tõnd yaa piig la a yiibu, ba a ye kamba; a ye n ka be la yao-zʋʋga paa yiri, Kanaã tẽnga, ne d ba.› Sẽn dɩta naam tẽnga pʋgẽ da ratame n bãng tõnd sã n togsda sɩda la a yeelame: ‹Bas-y yãmb nin-yend ka n kul ne kood n tɩ kõ y yir dãmba tɩ b tara a tʋʋmde; la lɛɛg n wa-y ne yãmb yao-zʋʋgã tɩ m na bãng tɩ y ka lɩɩsdb ye la y togsa sɩda; dẽ poor marsã m na lebs y nedã la y na tõog n da y sẽn dat bũmb ninga fãa tẽnga pʋgẽ.› » B zuka b yondo la b yãeeme tɩ ned kam fãa ligd da bee pʋgẽ, tɩ rabeem na n yõk-ba, bãmb ne b ba, a Zakoob B ba a Zakoob yeel-b lame: «M kamb a yiib n ka ye, a Zozɛf ka ye, a Simeõ me ka ye, tɩ yãmb le rat a Bẽnzame n paase, yaa mam zug la yɛla fãa lʋɩta, dẽ fãa yaa mam zu-beedo!» Dẽ la a Rubẽ leok a ba: «F na kʋ m kamb a yiibã, m sã n ka lɛɛg n wa ne a Bẽnzame, gũnug maam a Bẽnzame tɩ m na tall-a n wa lebs-fo.» A Zakoob baas n yeelame: «Mam biiga kõn tũ yãmb ye. A kẽema kiime n bas yẽnda a ye, y sã n dɩk y sorã tɩ yell tek n pak-a, ad-y m kʋʋlma la sũ-sãang kãsenga na n kʋ-m lame.» Koma da ket n zabda ne tẽnga rãmba. B sẽn yi Ezipt n wa ne kood ninga sɛɛme la b ba yeel-b lame: «Leb-y n tɩ ra kood n wa!» A Zɩɩda leokame: «Dao wã wilga tõnd neere t'a kõn le sak tɩ d wa a taoore, d yao-zʋʋga sã n ka be ne tõnd ye. Fo sã n sak t'a tũ, bãng tɩ tõnd na leb Ezipt tẽng n tɩ ra koodo. F sã n ka na n sak t'a tũ, tõnd me kõn leb ye; raoã togsame: ‹M ka rat n le yãend-y m taoore tɩ y yao wã ka be ne y ye.› » A Zakoob yeelame: «La ãnda n yeel tɩ y wɩbg-ma n tãag n togs raoã tɩ y yao-zʋʋg a ye n kete?» Tɩ b leoke: «Yaa a sẽn sok tõnd d buuda poorẽ: ‹Y ba ket n vɩɩme, y tara yao a to?› Yaa rẽ yĩng la tõnd me togs yã; ãnna n da tõe n bãng t'a na yeele: ‹Wa-y ne y yao wa?› » A Zɩɩda yeela a Israyɛl: «Bas tɩ m loog ne biigã, d yik n dɩk sor n paam n põse, tõnd ne d sẽn get b rãmb yelle. A Bẽnzame yell doga m zugu, m sã n ka lɛɛg n wa ne-a, bɩ f sok-ma, m sã n ka lɛɛg n wa ne-a tɩ f yãend-a ne f nifu, bɩ m dɩ rẽ taal m vɩɩma fãa pʋgẽ. Tõnd sã n da ka ka kaoosẽ yiibu, marsa sekẽ la d ta la d lɛɛg n waẽ.» La kamba ba, a Israyɛl, yeelame: «Kẽnda sẽn ya tɩlɛ wã, bɩ y maan woto: bao-y tẽnga bõn-sõma buud fãa n zɩ n tɩ kõ raoã; kaam sẽn tar n sõod nenga, seem buud toor-toore la sɩɩdo. Zɩ-y ligd y kordẽ la y rɩk pĩnd ligdã n paase tɩ daare yɩɩ tudgri. Deeg-y y yao wã la yik-y n leb raoã nengẽ. La Wẽnd-Pãng-Soaba na kɩt t'a maan y yardo la a bas-y tɩ y lɛɛg n wa ne y yao, a Bẽnzame; m sã n na n dɩ m kamba bõne bɩ m dɩ.» B sɩd yii ne b kũuna, ne b bõeensã, ne b ligdã, n tɩ sig Ezipt tẽnga la b ta-la a Zozɛf taoore. A Zozɛf sẽn yãe a kẽem dãmba ne a Bẽnzame, a yeela a sõgen kãsenga: «Tall-y-ba n kẽ zakẽ; kʋ-y rũng n segl, tɩ wĩntoogã b na n dɩɩ ne maam.» Sõgna maana wala a Zozɛf sẽn yeele n tall-ba n kẽes zakẽ. B sẽn waa n tar-b n dabdã, dabeem yõk-b lame; la b ra yeta taaba: Ad-y yaa ligdã sẽn pa tõnd yonnẽ wã yĩnga la b tar tõnd n dabd a Zozɛf yiri, b na n kãaga tõnd n kẽes yembdo la b reeg d bõeense. B sẽn kolg zaka noore b yeela a Zozɛf sõgen kãsengã: «Y kabre, d zu-soaba! Tõnd zoe n waa ka vugri n da koodo. Tõnd sẽn lɛɛg n kuisẽ, d sẽn ta d sik zĩigẽ, n pak d yondo, ned kam fãa yãeeme tɩ ligda keta a zĩigẽ tɩ tõnd le tar-a n watẽ. D waa ne ligd me n na n le ra koodo tɩ sɩda tõnd ka bãng sẽn ya ned ning n lebs ligda yonnẽ wã ye.» Sõgen-kãsenga leok-b lame: «Gãneg-y y yam, da maan-y rabeem ye tɩ yãmb Wẽnd la y ba Wẽnd n ning arzɛk y yonnẽ, sã n ya maam, m da reega m ligdi.» A kẽe n waa ne a Simeõ. Sõgna tɩ kẽes-b-la a Zozɛf zakẽ n tall koom n wa tɩ b waas b nao, n tall yamd n wa tɩ b kõ b bõeense. B yiisa b kũuna n dɩgl n gũud a Zozɛf waoongo, wĩnto-sʋka, tɩ b waa n bãngame tɩ b na n dɩɩ ne yẽnda. A Zozɛf waa yiri tɩ b yiis b kũuna n kõ-a la b wõgemda tẽng n waoog-a. A reega b pʋʋsem neere la a sok-b lame: «La nin-kẽema, yãmb sẽn gom mam a soab yellã, a ket n vɩɩme?» Tɩ b leoke: «Tõnd ba, yãmb yamba, bee ne laafi, a ket n vɩɩme.» La b le yĩgimdame, b le wõgemdame. A Zozɛf zẽka a nin n yãe a yao, a Bẽnzame, a ma biiga, la a sokame: «Woto la yãmb yao-zʋʋga bɩ, yaa yẽ yell la y sẽn da leok maama bɩ?» Dẽ poore a yeela a Bẽnzame: «Wẽnd na sõng fo, m biiga!» A Zozɛf zoe n yiime, a sẽn yãee a Bẽnzame t'a sũur rigimd t'a nin kalsd nintãm, a kẽ-la a roogẽ, la be, a yãbame. A peka a neng n lɛɛg n yi la a tõoga a meng n yeele: «Wa-y ne rɩɩba.» B waa ne a Zozɛf rẽnd toore la Ezipt rãmba rẽnd me toore tɩ Ezipt rãmb ka sakd n dɩ ne Ebre rãmb ye, dẽ yaa b kisgu. A Zakoob kamba ra zĩ-la a Zozɛf taoore la a Zozɛf ra zĩndig-b-la kãseng-kãsengo, n sɩng kẽema n ta yao-zʋʋgã la rẽ yɛɛs-b lame. A Zozɛf kɩtame tɩ b yãk rɩɩb yẽ meng laagẽ n kõ-ba la a Bẽnzame pʋɩɩrã yɩɩga a taab naoor a nu. B naaga a Zozɛf n yũ la lebga laa-n-kaase. A Zozɛf kõ a sõgen-kãsenga noore: «Pids-b yonda ne koodo wala b sẽn tõe n zɩ tɛka, la lebs ned kam fãa ligd n sui pʋgẽ.» A rɩka wanzurf wũmbla n naag ne a Bẽnzame ligdã n sui yolgẽ. Sõgna maana wala a Zozɛf sẽn yeelã. Beoog sẽn vẽege, b bas-b lame tɩ b looge ne b bõeense. B ka paam n zãag ye, t'a Zozɛf yeela a sõgna: «Yik n zoe n pʋg-ba la f gom ne b woto: bõe tɩ b maan yãmb neere tɩ yãmb lebsd wẽnga? Bõe tɩ yãmb dɩk m zu-soaba sẽn tar wũmbl ning n yũud a rãama la a lɩkd be n bʋgd a bagrã? Y sẽn maana sɩd yaa wẽnga.» Sõgna wudg n paam-b lame la a taas-b-la a zu-soaba koɛɛga. Dẽ la b leok yã: «Yaa bõe la d zu-soaba gomd woto? F yemsã yɩta a wãn n maan yell a woto fãa? Ade, ligda meng tõnd sẽn tees n yãend d yonnẽ, tõnd tall-a lame n wa, d na n yɩɩ wãn n wa zuud f soaala sãnem bɩ a wanzurfu? B sẽn na n yãend b bũmba ned ninga yolgẽ bɩ b kʋ yẽ soaba la b kẽes tõnd fãa yembdo.» Sõgna leok-b lame: «Bɩ y maan wala yãmb sẽn yeelã, d sẽn na n yãend bũmbã ned ninga yolgẽ, yẽ soab na lebg mam yamba la sẽn ket-ba na loog ne laafi.» Tao-tao bal tɩ ned kam fãa sika a yolgo n lok-a. Sõgna sɩnga kẽem dãmba vɛɛsgo n wat yao-zʋʋgã la a yãenda bũmbã a Bẽnzame yolgẽ. B kẽesa b futu la b zɩlga b bõeense n le rɩk na-tẽnga sore. A Zɩɩda ne a ba-biisã kẽe a Zozɛf zakẽ; a Zozɛf da ket n bee be la b wõgemda a taoore. T'a Zozɛf sok-ba: «Yaa bõe la y sẽn maana? Yãmb ka mi tɩ ned wa maama bagr neeme la?» A Zɩɩda leokame: «Tõnd na n yeela d zu-soaba tɩ bõe? Gomd bʋg la d na n togs n paam bʋʋm, ad-y yaa Wẽnd meng b toor n luk y yemsã bãongo; woto wã d fãa na n lebga yãmb yem-daado, tõnd ne sẽn maana yellã.» A Zozɛf leok-b lame: «M ka tõe n maan boto ye, sẽn ket-ba na n leba b ba nengẽ ne laafi.» Dẽ la a Zɩɩda yik n kolg a Zozɛf n yeel-a: «M naaba, y kabre! Kelg-y mam koɛɛg, kelg-y ne sũ-maasem, yãmb sẽn tar Ezipt dĩma meng naama. Yaa woto la m naaba ra sok tõndo: ‹Yãmb ba ketame? Yãmb tara yao?› Tɩ tõnd yeel d zu-soaba: ‹D tara ba sẽn kʋʋle la yao-zʋʋga, a kʋʋlem biiga; a kẽem n ka be, t'a lebg a ma-bi-yende la a ba wã nong-a-la wʋsgo!› Yãmb yeela y yemsã: ‹Tall-y yẽnda n wa tɩ m yãee ne m nifu.› Wakat kãnga tõnd leok-y lame: ‹Yao wã ka tõe n loog n bas nin-kẽema ye, a sã n zãag ne-a, ba wã na n kiime.› La yãmb leoka tõndo: ‹Y yao-zʋʋga sã n ka tũ n wa, m ka rat n le yãend-y m taoor ye.› Yaa woto la tõnd kul n tɩ togs d ba, yãmb yamba. Yaa woto me la a waa n baas n yeel tõndo: ‹Tɩ ra-y kood n wa,› tõnd leokame: ‹Tõnd ka tõe n leb be ye, d sã n lebe, dẽnd d yao-zʋʋga tũ, tɩ tõnd kõn tõog n ta neda taoore, yao-zʋʋga sã n ka tũ ye.› Tõnd ba wã, yãmb yamba, paasame: ‹Yãmb miime tɩ b yɩ-la b yiib bala b ma pʋgẽ, a ye menemame la m tẽedame tɩ bõn-nind n sɩɩg-a wa rũnga, la sẽn ta marsã, m nif ka le teeg-a ye. Yãmb sã n loog ne ada tɩ yell pak-a, y na kɩt tɩ kʋʋlem la sũ-sãang kãseng kʋ-ma, la rẽ me yɩta y yelle.› Dɩlla mam sã n leb m ba wã nengẽ tɩ biig ninga a sẽn nong wʋsgã yaool n pa ka, ad-a sã n bao-a n konge, yaa yãmb yemsã b toore n na n kɩt tɩ d ba wã zug sẽn pelgã sig bʋg-tẽnga ne sũ-sãang kãsenga. Yaa rẽ la m yeel yã: ‹Yao wã yell doga m zugu, m sã n ka lɛɛg n wa ne-a, bɩ m dɩ rẽ taale, m vɩɩma fãa pʋgẽ.› Sẽn ket marsã, yaa mam pa ka bala, n lebg yamba tɩ yao wã loog ne a kẽem dãmba. M yɩta a wãn n leb m ba nengẽ, biiga sã n ka tũ? M pa rat tɩ m nif yãend yell ning sẽn na n pak m ba wã ye.» A Zozɛf ka tõog n le yõk a meng a neba taoor ye, a yeelame: «Y fãa yi yɩnga!» Sɩda, a Zozɛf sẽn waa n na n vẽneg a meng a ba-biisã, sãan ba a ye ka zĩnd sʋk ye. A Zozɛf da yãbdame tɩ yita, tɩ Ezipt rãmb tol n wʋme, t'a yãbra kibar tol n ta Ezipt dĩma menga. A Zozɛf yeela a kẽem dãmba: «Maam la a Zozɛf. M ba wã ket n vɩɩme?» La a ba-biisã ka tõog n leok ye tɩ b pɛleng yɩkame. T'a Zozɛf yeel-ba: «Kolg-y!» La b kolgame, t'a paase: «Maam la a Zozɛf, y yao ninga y sẽn koos ne Ezipt rãmbã. Marsã, da sãam-y y sũur ye, da ges-y yãmb sẽn koos maama wa wẽng tɩ loog ye, tɩ yaa yãmb fãagr yĩnga la Wẽnd kɩt tɩ m deng yãmb taoor ka. Yaa yʋʋm a yi rõanna la kom lʋɩ tẽngã la yʋʋm na n kell m maana a nu tɩ koob pa na n ko ye, tɩ tigsgu pa na n tigs ye. Wẽnnaam tʋm-m-la yãmb taoore, sẽn na n yɩlẽ tɩ d buuda kɩ yẽgende la wʋsg paam n põse. Dɩlla ka yãmb n tʋm maam ka ye, yaa Wẽnnaam, la b kɩtame tɩ m lebg nin-kãsenga, dĩma zakẽ, la m get Ezipt tẽng fãa yelle. Leb-y y ba nengẽ tao-tao la y yeel-a: ‹F biiga Zozɛf koɛɛg la woto: Wẽnd kõo maam naam Ezipt tẽnga, wa m nengẽ tao-tao. M na n kẽes-f-la Gosen tẽnga la f na n zĩnda be foo ne f kamba, la f yagense, la f rũmsi, la f sẽn so fãa. Beene m na sõng-y ne rɩɩbo, m na sõng tɩ foo ne f zaka la f sẽn so fãa da wʋm far ye. Koma na n kell n kaoosa yʋʋm a nu.› » A Zozɛf paasame: «Yãmb meng nin neeme la m yao a Bẽnzame nee ne a nin tɩ yaa mam meng m toore n gomd ne-yã. Tɩ togs-y m ba t'a bãng naam ning m sẽn dɩt Ezipt tẽnga, la y sẽn yãe bũmb ning fãa. Sõng-y tɩ m ba wã wa tao.» A wudg n mobga a Bẽnzame la a tar yãbre; a Bẽnzame me mobg-a lame la a yãbame. A mobga a kẽem dãmba fãa ne nintãm la b waa n zĩndame n sõse. Dĩma me wʋmame t'a Zozɛf kẽem-dãmbã n wa, la rẽ yɩ-la a sũ-noogo, yẽ ne a poorẽ dãmba. A goma ne a Zozɛf woto: «Yeel f kẽem-dãmbã: ‹Zɩlg-y bõeensã n leb Kanaã n peeg y ba la buuda zãng n wa ka, m na bao zĩ-sõng Ezipt tẽng n kõ yã tɩ tẽnga sɩɩlma n na n yɩ y rɩɩbo.› La foom, Zozɛf, kõ b no-kãnga: ‹Zɩ-y bilim-bilm ka, n tɩ sagl y pagba, y kamba la y ba, n wa.› Yãmb sẽn na n bas bũmb ning fãa Kanaã da ges-y rẽ wa bõne koe; sẽn ya neer la sõng fãa Ezipt tẽnga, na n yɩɩ yãmb soolem.» Ad-a Zakoob kamba sẽn maane: a Zozɛf bao bilim-bilm n kõ-ba wala dĩma meng sẽn wilgã. A kõ-b-la sor dɩɩb me. A kõo ned kam fãa kibs fuugu. Sã n yaa a Bẽnzame, yẽ reega wakɩ koeems kobs-tã la kibs fut a nu. A kɩtame tɩ b bao Ezipt te-sõma n zɩlg bõeens piiga la bõn-yãans piig sẽn na n tʋk koodo la buri la bãmb ne b ba wã sor zug rɩɩbo. A basa a kẽem dãmbã tɩ b looge la a yeel-b-la woto: «Sor zugu, da wẽ-y no-koɛɛm ye!» B yii Ezipt tẽnga n lɛɛg n wa Kanaã, b ba, a Zakoob, nengẽ. B yeel-a lame: «A Zozɛf ket n vɩɩme, pʋs n yaa yẽ n so Ezipt tẽnga.» A sũur pa kiuus ye, t'a pa tẽ b goama ye. B sẽn wa n togs a Zozɛf sẽn yeel bũmb ninga fãa, a sẽn waa n yãe bilim-bilm a Zozɛf sẽn toole, yẽnda rɩkr yĩngã, raood le waame. T'a yeele: «A Zozɛf sã n ket vɩ, rẽ seka maam, m na kẽng n tɩ yãend-a ne m nifu la m yaool n ki!» A Israyɛl yii ne a sẽn tar fãa. A taa Beerseba n kʋ maand n waoog a ba, a Izaak, Wẽnnaam. Wẽnnaam lik-a-la yʋngo n yeel-a: «Zakoob, Zakoob!» T'a leoke: «M bee ka!» Tɩ Wẽnd yeele: «Maam la Wẽnnaam, mam la f ba, a Izaak Wẽnnaam da maan dabeem ne Ezipt kẽnd ye, yaa be la m na n kɩt tɩ f buud lebg bu-kãsenga. Maam n na n yãag foom Ezipt tẽnga, maam n na n leb n tɩ yiis-f be la a Zozɛf n na n mum f nini.» A Zakoob yii Beerseba; a kamba kɩtame tɩ b ba, b kom-bõonego la b pagb kẽ bilim-bilm dĩma sẽn da tool so-toaka yĩnga. B zɩ-la b rũmsi la b sẽn da tar fãa Kanaã tẽnga n tɩ kẽ Ezipt. A Zakoob ne a kamba, a yagense, a kom-pugli, a kom-dibli, b buuda fãa tɩ kẽe Ezipt tẽnga. Ad-a Israyɛl (a Zakoob) kamb sẽn tũ-a n wa Ezipt tẽnga: a Rubẽ, yẽ la kãsma; Ad-a Rubẽ kamba: a Enok, a Palu, a Ekrõ, a Karmi. A Simeõ kamba: a Yemuwɛl, a Yamin, a Oad, a Yakẽ, a Sowar la a Sol (yẽ ma yɩɩ Kanaã biiga) A Levi kamba: a Zersõ, a Keyat, a Merari. A Zɩɩda kamba: a Ɛr, a Ona, a Sela, a Perɛk, a Zera. A Ɛr ne a Ona da maana yõor Kanaã tẽnga la a Perɛk kamba yɩ-la a Esrõ la a Amul. A Isakar kamba: a Tola, a Ypva, a Yasub la a Simrõ. A Zabulõ kamba: a Serɛd, a Elon, a Yaleyɛl. A Zakoob doga bãmb fãa Padã-Aram, b ma yɩ-la a Lea. Sẽn paase, yaa a Dina; b zãng fãa, yaa pis-tã la a tã. A Gad kamba: a Sefõ, a Agi, a Suni, a Esbõ, a Eri, a Arodi, a Areli. A Asɛr kamba: a Yimnã, a Yiswa, a Yiswi, a Beria ne b tão a Sera. A Beria kamba: a Ebɛr la a Malkiyɛl. Bãmb fãa ma yɩ-la a Zilpa, pag ninga a Labã sẽn kõ a Lea t'a Lea rɩk n kõ a Zakoob. B fãa sõor yaa piig la a yoobe. A Zakoob pag, a Rasɛl kamba: a Zozɛf ne a Bẽnzame. Ezipt tẽnga, a Zozɛf roga a Manase la a Efrayim; bãmb ma la a Asnat, On maan-kʋʋd, a Potifera, biiga. A Bẽnzame kamba: a Bela, a Bekɛr, a Azbɛl, a Gera, a Naama, a Eyi, a Ros, a Mupin, a Upim la Ard. Bãmb ba la a Zakoob la a Rasɛl yagense. B yaa piig la a naase. A Dã biiga: a Usim. A Neftali kamba: a Yasiyɛl, a Guni, a Yesɛr, a Silem. Bãmb fãa ma la a Bila, pag ning a Labã sẽn dɩk n kõ a Rasɛl, t'a Rasɛl dɩk n kõ a Zakoob. B sõor yaa a yopoe. Neb niyns fãa sẽn yaa a Zakoob kamb bɩ a yagense n tũ n wa Ezipt tẽng yaa pisoob la a yoobe; la a kamba pagb ka naag n sõd ye. Yaa kamb a yiib bala la a Zozɛf dog Ezipt tẽnga. A Zakoob kamb fãa sẽn wa Ezipt tẽng yaa pisopoe. A Israyɛl tʋma a Zɩɩda taoore t'a tɩ yeel a Zozɛf tɩ b seg taab Gosen; sɩda yaa Gosen la b ta yã. A Zozɛf kɩtame tɩ b sog a bilim-bilma wiidi t'a zomb n tɩ seg a ba Gosen; b sẽn yãe taaba, b mogba taaba, n tar yãbre. T'a Israyɛl wa yeel a Zozɛf: «Marsã m tõe n loogame tɩ f keta ne yõore la m le paam n yãenda f nenga.» A Zozɛf yeela a buuda zãnga: «M na n lʋɩɩ taoore n tɩ togs dĩma woto: ‹Ade, m kẽem-dãmb la m buudã sẽn da be Kanaã tẽng n wa m nengẽ. M na wilg-a tɩ b yaa rũm-kɩɩmba, b talla fãa n wa ka, b rũmsi, bɛd la bõonego, la b sẽn so fãa.› Dĩma sã n wa bool yãmb n sok yãmba: ‹Yãmb tʋʋmd la bʋgo?› Bɩ y yeele: ‹Y yemsa gũu rũmsi b yãadmẽ n tãag dũnna. B ba rãmb me kɩɩma rũmsi.› Bãng-y tɩ sã n ya woto, y na tõog n pa Gosen.» Bãng-y tɩ Ezipt tẽng rãmb pa nong rũm-kɩɩm ba sẽn paoode. A Zozɛf tɩ yeela Ezipt dĩma woto: «M ba la m kẽem dãmb yii Kanaã tẽng n wa. B waa ne b rũmsi, bɛd la bõonego, b waa ne b sẽn tar fãa la b siga Gosen.» A kẽem dãmb a nu n yãag-a dĩma nengẽ. Dĩma soka a kẽem dãmbã: «Bõe n ya yãmb tʋʋmde?» Tɩ b leoke: «Yãmb yemsã gũuda rũmsi. D tʋmda d ba rãmb tʋʋmde.» B yeela dĩma yɛsa: «Tõnd waa n kẽe tẽngã tɩ yamd ka le ket Kanaã tẽnga y yemsa sẽn na n paam n kõ b piis ye; koma zabda wʋsg ne Kanaã rãmba; d kotame tɩ y kẽes-d Gosen.» Dĩma yeela a Zozɛf: «F ba ne f kẽem dãmba wa-la f nengẽ. Ad Ezipt tẽn-peelem sẽn dɩg f taoore. Kẽes f ba la f kẽem dãmba zĩig ning sẽn tar bʋgsem n yɩɩda. B tɩ kẽ Gosen. Fo sã n mi tɩ neb bee bãmb sʋka n tar yam n yɩɩda, yãk bãmb dãmb tɩ b gũ mam meng rũmsi.» A Zozɛf talla a ba, a Zakoob, n wa dĩma taoore. A Zakoob ninga dĩma barka, tɩ dĩma yeel-a: «Y yʋʋm taa wãna?» A Zakoob leokame: «M yʋʋm tẽng zug ka, yaa koabg la pis-tã, m ka paam vɩɩm noog la yõ-wok waa m saam-dãmb sẽn paam a soabã ye.» A Zakoob pʋʋsa dĩma la a paama sor n looge. A Zozɛf bao tẽng n kẽes a ba la a kẽem dãmba; a kẽes-b la zĩig ning sẽn da ya sõng n yɩɩda, wala dĩma sẽn da wilgã: yɩɩ Ramsɛs. A Zozɛf baoo rɩɩb n kõ a ba la a kẽem dãmba, a buuda gilli; a kõo sẽn sek zak fãa ne a neba. Rɩɩb waa n sɛɛ zãng Ezipt tẽnga; koma da bee wʋsgo n namsd Ezipt ne Kanaã rãmba. Ezipt la Kanaã rãmb sẽn tar pʋlb n tar pʋlbo, b ligda fãa waa n yii bãmb nugẽ n tɩ tigs a Zozɛf nengẽ. A Zozɛf rɩka ligd kãng n kɩs dĩma t'a bĩng a zakẽ. Ligd sẽn waa n yi Ezipt la Kanaã zãnga, b bʋʋga a Zozɛf n yeel-a: «D data rɩɩbo, yãmb na sake n bas tɩ kom kʋʋd tõnd tɩ y getẽ? Tõnd ka le tar ligd ye.» T'a Zozɛf yeele: «Ligd sã n ka be bɩ y wa ne y rũmsi tɩ m na kõ y koodo.» Tɩ b tall b rũms n wa, b wiidi, b bʋʋse, b piisi, b bõeense. T'a Zozɛf kõ-b koodo. Dɩlla yʋʋmd kãnga, yaa b rũmsa la a reeg yã la a kõ-b koodo. Yʋʋmda sẽn vẽke, b le lɛɛg n waa a Zozɛf nengẽ, n yeel-a: «D ka na n solg-y ye, ligda da zoe n sɛɛme la rũmsa me sɛɛme, sẽn ket marsã, yaa d mens la d pʋto. La d yɩta a wãn n sak n bas d mens la pʋto tɩ kom kʋ tõnd yãmb nifẽ? Deeg-y d mense la d pʋto la y kõ-d dɩɩbo, woto tõnd na lebg y dĩma yem-daado. Kõ-d bõn-buud tɩ d bʋde n tõog n vɩɩnde la d da ki ye, tɩ tẽnga ra le sãam n paas ye.» Yaa woto la Ezipt tẽng pʋtã lʋɩ dĩma soolmẽ: ned kam fãa da rɩka a pʋʋg n koos n na n põs kom la yaa woto la dĩma waa n soog-b zãnga. Ezipt tẽng tõr neba lebga yem-daado. Yaa maan-kʋʋdba pʋt bala n ka kẽ dĩma soolmẽ; dĩma da kõt-b-la ligdi tɩ b tar n dɩlgd b mense; bãmb sẽn tar n dɩtẽ wã yĩnga, b pa koos b pʋt ye. A Zozɛf yeela neba marsã: «Yãmb ne y pʋtã lebga dĩma soolem, woto wã deeg-y ka-buud n tɩ bʋd y pʋtã. Y sã n wa tigs y koodã, y na welg-a pʋɩɩr a nu n yãk a ye n kõ dĩma, n tall a naase; ka-buud na n yii be, yãmb dɩɩb na n yii be, yãmb sẽn get b rãmb fãa yell dɩɩb na n yii be.» B leokame: «Yãmb fãaga tõndo la Wẽnd na kɩt tɩ y kell n pʋg-d ne y sõngre tɩ d yɩ dĩma tʋʋm-tʋmdba.» A Zozɛf yalsa noor b sẽn ket n deegd Ezipt tẽng rũnna: pʋɩɩr a nu soaba yaa a dĩma n so. Maan-kʋʋdba pʋt bal la dĩma ka sooge. A Israyɛl kamba paa Ezipt, Gosen tẽnga, beenẽ b paama pʋto, b roga kamb wʋsgo tɩ b buuda piuugi. A Zakoob paama yʋʋm piig la a yopoe Ezipt tẽnga, a yʋʋma sõor yɩɩ koabg la pis-naase la a yopoe. A Israyɛl sẽn waa mik t'a pãnga sɛɛ zãnga, a boola a Zozɛf n yeel-a: «Fo sã n ket n nong maam bɩ f kell n wilg-m tɩ f rat-m-la ne neere la f rɩk f nug n sɩɩs m gerã la f wẽen tɩ f kõn mum maam Ezipt tẽng ye. M sã n kaẽ bɩ y tall m yĩngã n tɩ mum m ba rãmb yaoogẽ.» Dẽ la a Zozɛf leok a ba: «M na maan wala y sẽn date.» A ba wã paasame: «Wẽene!» La a wẽename, la dẽ t'a Israyɛl sulga a neng a gãag zugu n na n pʋʋs a Zozɛf barka. B waa n yeela a Zozɛf: «Y ba wã ka keem ye.» A Zozɛf kẽnga ne a kamb a yiibã: a Manase la a Efrayim. B sẽn waa n yeel a Zakoob woto: «Ad-f biig a Zozɛf n wa n na n ges fo», a yeela a Zozɛf: «Wẽnd-Pãng-Soaba lik-m-la Luz, Kanaã tẽnga la b ning-m-la barka. B yeela maam: ‹M na kɩt tɩ f rog kamba, n lebg wʋsgo n kẽ tẽns ka tɛka la m kõt-f-la tẽn-kãnga; foom ne f kamba n na n soog-a daar fãa.› » A Zakoob paasame: «Fo kamb a yiib sẽn dog Ezipt tẽnga dẽ tɩ m nan ka babs foom, bãmb na m yii mam soolem. A Efrayim ne a Manase na n yɩɩ mam kamb wala a Rubẽ la a Simeõ sẽn ya mam kamba. Kamb niyns sẽn pʋg b bãmbã, bãmb na n yɩɩ fo soolem. B sã n bool-b tɩ b wa reeg b pʋɩɩr buuda sʋka, yɩta b kẽem dãmba maasem yĩnga. F ma a Rasɛl tees n ki sor zugu, m sẽn yi Padã, Kanaã tẽnga, sẽn waa n ket bilf bala tɩ d ta Efrata, la b mum-a-la Efrata sor zugu: Efrata yaa Bɛtelyɛɛm.» A Israyɛl yãee a Zozɛf kamb a yiibã n soke: «Woto yaa ãnd dãmba?» T'a Zozɛf leok-a: «Yaa Wẽnd sẽn kõ-m kamb nins Ezipt tẽng ka.» T'a Zakoob na n yeele: «Kolg ne-ba tɩ m ning-b barka.» A sẽn da kʋʋl wʋsg yĩngã, a Israyɛl nina da ka le ne neer ye. A Zozɛf kɩtame tɩ kamba kolg b yaaba t'a na n mobg-ba la a mok-ba. A Israyɛl yeela a Zozɛf: «M da pa tẽed tɩ m na le yãend foom, mik Wẽnd maaname tɩ m na n tol n yãend f kamba.» A Zozɛf veooga kambã n leb poorẽ, n paam n wõgemd n kɩ a neng tẽnga. A Zozɛf le gãda kambã, a gãda a Efrayim ne a dɩtgo n yals a Zakoob goabga, n gãd a Manase ne a goabga n yals a Zakoob dɩtgo la a kɩtame tɩ b kolge. A Zakoob tẽega a dɩtgo n tik a Efrayim zugu; a Efrayim la yao, n yaool n tẽeg a goabg a Manase zugu, la yẽnda la kãsma. Yɩɩ modgr t'a Israyɛl nus kalemd taaba. A ninga a Zozɛf roog bark woto: «M ba a Abraam la a Izaak sẽn tũ Wẽnd ningã, Wẽnd ninga sẽn yɩ a mam gũuda, m dogem tɛka n paas malɛk ninga sẽn fãaga maam yel-pakr buud fãa pʋgẽ, ning kom-kãensa barka! B yɩ maam la a Abraam la a Izaak yʋʋr tẽegre, b wek balbo n pid tẽnga!» A Zozɛf yãeeme t'a ba rɩka a rɩtgo n tik a Efrayim zugu t'a sũur ka yɩ noog ye. Dẽ la a gãd a ba nug, t'a ra tik a Efrayim la a tik a Manase. A Zozɛf yeelame: «Ka woto ye, m ba, yaa a Manase la kãsma, dɩlla tik a zug ne f rɩtgo.» A ba wã zãgsame n yeele: «M miime, m biiga, m miime. Yẽ me buud na n yɩɩ yalengo, a me na a yɩɩ nin-kãsenga, baasgo a yao wã na n yɩɩg-a lame, a yao wã buuda na n yɩɩ zãma ka tɛka.» Badaare a ning-b-la bark woto: Israyɛl kamb sã n dat n kãab ned noogo, yãmb yʋʋra la a na n pʋd n yeel woto: «Wẽnd puk b nonglma ne foo wala b sẽn puk-a ne a Efrayim la a Manase!» A Efrayim yʋʋrã n deng taoore. A Zakoob yeela a Zozɛf: «Mam na n kiime la Wẽnd bee ne yãmba la b na n wa lebs-y-la y ba rãmb tẽngẽ. M paasda f pʋɩɩre, woto f na yɩɩg f kẽem-dãmbã. M sẽn paas f pʋɩɩr ningã, yaa m sẽn zab ne sʋʋga la tãpo n deeg Amoritsa nusẽ.» A Zakoob boola a kamba fãa n yeel-ba: «Tigim-y taab tɩ m wilg-y yɛl niyns sẽn wate. Zakoob kamba, kolg-y n kelge, n kelg y ba koɛɛga! Rubẽ, foom la m bi-kẽenga, m doga foom m sẽn waa n ya bi-bɩɩga, n wɩɩd ne pãnga. Foom n pid ne gãndalsem, foo n pid ne gãbe. F zoeta ne pãnga wa kʋɩl-kẽeng koom, la fo kõn soog kãseng ye, tɩ fo beega f ba n dʋʋ a gãaga n dẽgem-a. A Simeõ ne a Levi, sɩd yaa ma-biisi; bãmb nengẽ, yell fãa welgda ne pãng la sʋʋga, m yam kõn yals ne b sẽn sed bũmb ning ye, b yẽsgo zĩigẽ m kõn zĩnd sʋk ye; tɩ b yika b sũuri n kood ninsaalba, n yik ne pʋ-toogo n pãs lols gĩini. Wẽnd loog ne b sũ-puurã t'a yõsga nugu la b sũ-kãbrã t'a ka be taar ye. M na n pʋɩ-b-la a Zakoob buud sak woo saka, mam na n sẽeg-b-la a Israyɛl vẽenemẽ. Zɩɩda, foo la f ba-biis na n pẽge f nug na wẽoog f bɛɛba yubla, f ba-biis na wõgemd f taoore. Zɩɩda fo yaa Gɩgemd bila. M biiga kẽnga zabre n lɛɛg n watẽ, A põda a rũmdi, n gãand wa bõnyẽega, wala bõnyẽ-yãanga, ãnda n na n pĩng-a t'a yiki? Naam dasaar kõn serg a Zɩɩda sɛɛgẽ ye. Naam dasaar kõn yi a toaagẽ ye, al n tol n ta a zu-soaba waoongo; n ta tẽnsa sẽn tog n deeg a soab noora waoongo. Bugsuntung la a loet a bõn-bila, tɩ-womdg will la a loet a bõn-yaanga biiga. A pekda a fuug sib rãamẽ, a sogemda a fu-bila sib zɩɩmẽ. A nin mooga ne sib rãam, a yẽna pelga ne bĩisim. A Zabulõ zĩi mogr noore n so koom-kogendã sẽn tedgã, n yɛdga a toaag n tat Sidõ. A Isakar yaa bõn-daoog sẽn be gãbe; lals a yiib n me n gũbg a roogo. A mikame t'a gãag noom-a. A mikame tɩ tẽng bʋgsa, a zõondame t'a po-raoog reeg zɩɩbo, t'a na n tʋm yem-daad tʋʋma. A Dã na n dɩɩ naam a buudẽ a na n ges-a-la wa sẽn tog ne a Israyɛl saka. A na n yɩɩ wa waaf sẽn dɩg sor zugu, wa põeer sẽn dɩg so-bukẽ, yẽ n na kɛ weefa karga, tɩ wed-dʋʋda na n bidg n lʋɩɩ zãmbɛɛla. Yãmb sõngr la m teeg yã, Soaala-Wẽnde! Sã n yaa a Gad, fãadb n waa n fã-a tɩ yẽ me yik n digdẽ n na n deeg a teedo. A Asɛr sũur noom ne a rɩ-kaam t'a rõosd a miisd dĩm dãmb yĩnga. A Neftali yaa yĩsr sẽn gõod weoog a yam, n dogd a kom neeba. A Zozɛf yaa lʋlle, Lʋll sẽn be koom noore; b sã n kẽesa yãgrẽ la a sẽn gãndgde n yi. B bao-la a noore, n maan zabr ne-a. Tãb-biis n yik n tak zabr ne-a, la a tãpa pa fãag a nugẽ a sẽn waa n ligind a bɛɛba ye, A Zakoob Wẽnnaam nug n tʋm dẽnna, a Israyɛl Gũuda, a Pĩiga, a Israyɛl Lillã n tõog rẽnna. Bɩ f saam-dãmba Wẽnnaam, bɩ f Soaala, wa sõng fo! Bɩ bark tũ Wẽnnaam-Pãng-Soaba nug n sigi! B ning yĩngr saaga barka, n ning vɩʋʋga sẽn yɛdg tẽnga barka, n ning roagseng barka, n ning bĩisr barka. F kood paam bark b puudẽ la b biisẽ; biisa pelg ne tãms sẽn kʋʋl b gãagẽ, sẽn kõn sirg abada! Barka sig a Zozɛf zugu, tɩ Wẽnd welga yẽ toore! A Bẽnzame yaa digd-n-yĩidga, yibeoogo a wãbda a sẽn bri, zaabre a pʋɩta a te zɛɛdem.» Israyɛl buud sags piig la a yi wã sɩngr la woto. Yaa woto me la b ba gom yã, a sẽn waa n ningd barka. Ned kam fãa reega bark ninga a sẽn tog ne a soaba. A Zakoob yaool n kõ a kamba noor kãnga: «Mam na n tɩ saka m saam-dãmba; y na n mum-m-la tãng bokẽ la boka bee Ititga a Efrõ pʋ-wɛɛgẽ; yaa Mambre sɛɛgẽ, Kanaã tẽngẽ. A Abraam da raa pʋʋgã ne a ligdi, Ititga a Efrõ nengẽ. Yaa be la b mum a Abraam ne a Sara, be la b mum a Izaak ne a paga, a Rebeka, la yaa be la m mum a Lea. Yaa pʋʋga ne tãn-bokã la a Ɛt kamba da koos yã.» A Zakoob sẽn togs a koeesa fãa n sɛ, a kolemda a nao a gãagẽ la a kiime la a saka a saam-dãmba. A Zozɛf dĩ-la a ba, n tar-a mogsgo la yãbre. A Zozɛf kõo sẽn tɩpdba noore tɩ b segl a Zakoob yĩnga la b waa ne b kaam. Seglga kaoosa dasem pis-naase, yaa boto la b ra maanda. Ezipt rãmb yãba a Zakoob kʋʋr dasem pisopoe. La kʋʋra sẽn waa n yãb n sɛ, a Zozɛf goma woto ne na-yira dãmba: «Yãmb sã n dat n maan-m neere, m kotame tɩ y taas dĩma m kõe-kãnga: ‹A sẽn waa n na n ki, m ba kɩtame tɩ m wẽene tɩ yaa Kanaã tẽnga, yaoog ning a sẽn da segla pʋga, la m na n mum-a.› Sẽn ya woto wã, m kota sor n tɩ mum m ba beenẽ la m lɛɛg n wa.» Dĩma leokame: «Kẽng-y n tɩ mum-a be wala a sẽn kɩt tɩ y kãabe.» A Zozɛf looga a ba wã mumbu la na-yir dãmba ne b poorẽ dãmba, Ezipt kombɛɛmba fãa tũume. A Zozɛf yira rãmb fãa, a kẽem dãmba, a ba wã zaka fãa, yãag-a lame. Kom-bõoneg la rũmsa bal n pa Gosen. A Zozɛf kẽe bilim-bilm pʋga. Sẽn maan-b wa yẽnda me yɩɩ wʋsgo. Sɩd yɩɩ nedgo. B sẽn ta zɛɛg sẽn boond tɩ Gõaag zɛɛgẽ, Zʋrdẽ kʋɩlg rʋʋnde, b le kelma kʋʋre la b yãba dasem a yopoe. Kanaã tẽng rãmb wʋma kʋʋra rãamd Atad sɛɛgẽ, la b yeelame: «Woto yaa Ezipt rãmb kʋʋr meng-menga!» La b pʋda zĩ-kãng Abɛl-Misrayim, Ezipt rãmb kʋʋre; yaa Zʋrdẽ rʋʋnd la be. A Zakoob kamba maana a kʋʋr wala a sẽn da kõ-b noore. B tall-a lame n kẽng Kanaã tẽnga n tɩ mum-a Makpela tãnga bokẽ, a be Ititga a Efrõ pʋ-wɛɛgẽ la yaa pʋ-kãng la a Abraam da ra yaad yĩnga, Mambre sɛɛgẽ. A Zozɛf sẽn mum a ba, a lɛɛg n waa Ezipt tẽnga ne a ba-biisa fãa la sẽn yãag-b yẽnda wã fãa. A Zakoob kũuma poore, a Zozɛf kẽem dãmba yeela taaba: «Sãnd marsã a Zozɛf ka na n tug beem n dol wẽng ning d sẽn maan-a wã?» B tʋmame tɩ b yeel a Zozɛf: «Yãmb ba sẽn waa n na ki a yeel-d-la woto: ‹Tɩ yeel-y yã a Zozɛf: Maan yardo, kõ f kẽem dãmbã b yel-wẽndã la b beegra sugri.› Yĩm b sẽn maan-f bũmb ning fãa, tɩ b tũuda Wẽnd ning sẽn yɩ f yaab rãmb Wẽnde.» A Zozɛf sẽn wʋm b goama, a yãbame. A kẽem dãmba kolgame n wõgemd a taoore n yeel-a: «Tõnd yaa fo yem-daado!» T'a Zozɛf na n yeel-ba: «Bas-y rabeem tɩ Wẽnd la Bʋ-kaooda la m kõn deeg b zĩiga n kao y bʋʋd ye. Yãmb sẽn da tʋlg maam ne wẽng ningã, Wẽnd kɩtame tɩ neer yi a pʋgẽ wala d fãa sẽn ne rũnna; yaa bu-yaleng n tũ rẽnna n paam fãagre. Dɩlla bas-y rabeem, m na ges yãmb ne y zak rãmb yelle.» A Zozɛf maasa b sũur ne gom-nood kãensa. Yɩɩ woto la a Zozɛf ne buuda zãng pa Ezipt tẽnga. A Zozɛf kaoosa yʋʋm koabg la piig tẽng zugu. A Efrayim yagensa doga a nifẽ, a paam n deega a naoẽ, a Makir kambã, a Manase yagense. A Zozɛf yeelame: «M na n loogame, la daar a ye, Wẽnnaam na n wa ges-y lame, la b na n yiis-y-la tẽn-kãnga n lebs y tẽng ning b sẽn kãab y yaab rãmba, a Abraam, a Izaak la a Zakoob.» A Zozɛf kɩtame t'a ba-biisa wẽene: «Ezipt yiib wakato y kõn loog n bas m kõaba ka ye.» A Zozɛf ki-la a yʋʋm koabg la piiga. B segla a mumbu ne kaam sẽn tar yũ-noogo, n sagl-a a kug koglgẽ, n mum-a. Ad-a Israyɛl kamb ne b zak rãmb sẽn tũ a Zakoob n wa Ezipt tẽnga: A Rubẽ, a Simeõ, a Levi, a Zɩɩda, a Isakar, a Zabulõ, a Bẽnzame, a Dã, a Neftali, a Gad la a Asɛr. Sã n naag ne b zak rãmba, b fãa gill sõor yaa pisopoe. Sã n yaa a Zozɛf, yẽ ra reng n bee Ezipt tẽnga. A Zozɛf ne a saam-biisa fãa waa n maana kaalem. B ra roga kamb wʋsgo, n wa lebg ka tɛka; b waa n pida tẽngã, b waa n kẽe pãafo. Dĩm a ye n wa n deeg Ezipt tẽng naam. Yẽ ka bãng a Zozɛf ye. Yẽe n wa n yeel a soolem dãmba: «Dẽnd d gũus ne a Israyɛl kamba, b lebga wʋsgo, b tara pãnga; tõe n wa yɩɩ yelle. D bao yam n kõ d menga, n sõng tɩ b sõora ra le paas ye; ka rẽ zabr tõe n yikame tɩ b bas tõnd sõngre n sõng d bɛɛba, n yaool marsã n paam n looge.» Woto wã b yãka neb sẽn na n ges Israyɛl kamba tʋʋma, neb sẽn na n mao tɩ b yãend far ne tʋʋm-toodo. Ezipt dĩma kɩtame tɩ b me tẽn-bɛd a yi: Pitom la Ramsɛs. Be la b ra bĩngd b te-koosem buud fãa. Israyɛl kamba far da paasdame, la b sõora ra ka woogd ye, b tol n paasa wʋsgo, tɩ Ezipt tẽng-rãmb wa maand dabeem. Israyɛl kamb deega tʋʋm toodo. Yɩɩ tʋʋm sẽn sɩd nams-b wʋsgo: Tãnd tagbo, tãn-koɛɛm wẽebo, koobo; yɩɩ ne tʋʋm buud fãa la b modg-ba. Ezipt dĩma boola pʋg-roagsdb a yiibu sẽn da rogsd Ebre pogsã, a Sifara ne a Ypwa, n yeel-ba: «Y sã n dogsd Israyɛl pagbã bɩ y maan gũusgu. Ges-y biiga yaa pag bɩ raoa. Kʋ-y kom-dibli la bas-y kom-pugli wã.» Pʋg-roagsdba da zoeta Wẽnde, woto b pa sak n deeg dĩma noor ye. B pa sak n kʋ kom-dibli wã ye. Dẽ la dĩma bool-ba n yeel-ba: «Yaa bõe yĩng la yãmb bas kom-dibli wã n pa kʋʋda?» Tɩ b na n leoke: «Ad-y Israyɛl pagba ne Ezipt pagba ka wẽnd taab ye; b tara pãnga, woto, pʋg-roagsa ne a na n ta tɩ b rog n sɛɛme.» Wẽnd ninga pʋg-roagsdba barka. A Israyɛl kamba tõog n lebga wʋsgo, b tõog n kɩɩ yẽgna. Pʋg-roagsdba sẽn zoe Wẽnnaam nifa yĩnga, Wẽnd yalga b buudu. Dĩma waa n yeela a nebã: «Lob-y koomẽ a Israyɛl sẽn na n dog kom-dibli niyns fãa; bas-y kom-pugli wã bala.» A Levi sakẽ, ned n da tɩ bao a pag a buuda kamb sʋka. Paga waa n dɩka pʋg n dog bi-ribla. Biiga da yaa neere la a ma tõog n solg-a-la kiis a tãabo. Biiga solgr waa n lebga toogo. A bao mo-kãdre n wʋg peoogo, n maneg n bol a pʋga ne tãn-sũudu n yaool n dɩk biigã n sagl-a pʋgẽ, n tʋk n tɩ bas kʋɩlg noor, rudum sʋka. Biiga tão soosame n lamdeg yɩɩga n na n ges yella sẽn na n baas to-to. La ade, dĩma bi-pugl waa kʋɩlgẽ n na n so koom. Kom-pugli n yãag-a, la bãmb paa kʋɩlga noore. Dĩma bi-pugla yãee peoogã, rudma sʋka, n kɩt tɩ b rɩk-a n yiis. A laka peoogã n yãe biig sẽn yãbda. Biiga weoog kẽ-a lame la a yeelame: «Wã yaa Ebre bila.» Biiga tão kolgame n yeel dĩma biiga: «Sãnd y ka rat pag Ebre pogsa sʋk sẽn na n kõt-a bĩisim?» Tɩ dĩma bi-pugla leok-a: «N-ye! M datame!» La yaa biiga ma menga la a tɩ tall n wa. Dĩma bi-pugla yeelame: «Tall-y biigã, n tɩ wub-a, n kõ-ma. M meng m toor na yao-fo.» Paga talla biigã n tɩ wubi. Biiga sẽn bɩ, b tall-a lame n wa kɩs rĩma bi-puglã la a ges-a-la wa a meng biiga n pʋd a yʋʋr a Moyiiz, t'a ra yetame: «M yiis-a-la koomẽ.» Sẽn waa n beẽ, n beẽ, a Moyiiz yiime na n kaaga a saam-biisã. A yãee tʋʋm tood niyns b sẽn da tʋmna; a yãee Ezipt dao a ye sẽn pãbd a saam-biiga. A Moyiiz sẽn ges goabg la rɩtgo, a pa yãe tɩ ned pẽ be ye, t'a kʋ Ezipt nedã n bus bĩisrẽ. Vẽkẽmbeoogo a le yiime; a yãee a saam-biis a yiib sẽn tar taaba t'a sok nin-yend: «Bõe tɩ f pãbd f tũud-n-taaga?» Saam-biiga leokame: «Ãnda n yeel foo tɩ f yɩ d naaba la d bʋ-kaooda? Fo rat n kʋʋ maam wala Eziptga laa?» Dabeem yõka a Moyiiz la a yeela a sũurẽ: «Daare yella vẽnegame.» Yella sɩd da taa dĩma t'a baood a Moyiiz n na n kʋ, dẽ la a zoe n zãag al Madiã tẽnga. A waa n yãee bulga la a zaonda a noore. Madiã maan-kʋʋda yaool da tara kom-pugli a yopoe. Bãmb n wa bulgẽ wã, n na n yõng koom, n pids gaolg, n yũnug b ba piisi. Rũm-kɩɩm n waa n tuk-b be n sɩng b rigbu, t'a Moyiiz na n sõng-ba tɩ b paam n yũnug b rũmsã. B sẽn leb yiri, b ba Reowɛl nengẽ, b ba wã yeel-b lame: «Ade, dũnna y lɛɛg n waa tao-tao wɛ, m kamba!» Tɩ b yeele: «Ad-y yaa Ezipt ned n fãag tõnd pe-kɩɩmba nugẽ, a reega tõnd zĩig n toog koom n kõ rũmsã.» Dẽ la b ba sok yã: «La nin-kãng bɛɛ? Bõe yĩng la a pa beelẽ? Bool-y daoã t'a wa rɩ.» A Moyiiz wa n noka a Reowɛl tɩ yẽ rɩk a bi-pugl a ye n kõ-a; bi-pugla yʋʋr la Sefora. A Sefora roga a Moyiiz biiga la biiga pʋdame t'a Gersõ, a Sãana. A Moyiiz ra yetame: «M waa n noka tẽn-zẽnga.» Sẽn waa n beẽ, Ezipt dĩma kiime. A Israyɛl kamb waa n yɛɛ ne b yembdã la b kelmame, la b koɛɛg taa Naaba-Wẽnd. Wẽnd kelga b waasgo la b tẽega b zood ne a Abraam, a Izaak la a Zakoob. B gesa Israyɛl kamba ne nimbãan-zoeere la b weoog yõk-b lame, b bãnga b yɩɩre. A Moyiiz da kɩɩmda a rɛɛm piisi, a rɛɛmba boondame tɩ Zetro, n ya Madiã maan-kʋʋd. A Moyiiz waa n talla piisã n zãage, a waa n taa Oreb, Wẽnd tãnga zugu. Wẽnnaam malɛka waa lik-a-la be bugum sʋka. Yɩɩ tuug sẽn dɩt bugum pʋgẽ. A Moyiiz gesame la ade: tuuga da wita bugum la bugma yaool n da pa rɩt tuuga meng ye. Dẽ la a yeel yã: «M na n gilgame n ges bõn-bãnde, n bãng sẽn ya bũmb ninga la tuuga wit bugum n yaool n pa rɩtẽ ye.» Wẽnnaam yãeeme t'a sɩd kolgda n na n paam n ges neere la b zĩnda tuugẽ wa n bool-a: «Moyiiz, Moyiiz!» T'a yeele: «Ad ma!» Tɩ b yeel-a: «Da kolg ye la piid f neooda wã tɩ fo sẽn tabd zĩig ninga yaa zĩ-sõngo.» Wẽnnaam le paasame: «Ad yaa maam la f ba rãmb Wẽnnaam, a Abraam Wẽnnaam, a Izaak Wẽnnaam la a Zakoob Wẽnnaam.» A Moyiiz sẽn wʋm dẽ, a pĩ-la a nenga n zoet t'a nif na n wa teeg Wẽnde. Wẽnnaam yeelame: «M yãee neer-neere, m neba sẽn be Ezipt tẽnga nimbãanega. Sẽn get-b tʋʋma kɩtame tɩ b waasdẽ la m tʋbr wʋma b kɛlenga. M mi-la b yɩɩre la m datame n fãag b Ezipt rãmb nugẽ, n yaool n tall-ba n kẽes tẽn-yalengẽ la tẽn-sõngẽ; tẽn-kãng kʋɩlse: bĩisim la sɩɩdo. Yaa Kanaã rãmb tẽnga, n paas Ititse, Amoritse, Perizitse, Ivitse, la Zebuzits tẽnga. M wʋma Israyɛl kamba waasgo la m yãee namsg ning Ezipt rãmba sẽn namsd-b. Dẽ yĩnga m tʋmd-f-la dĩma nengẽ tɩ f tɩ yiis a Israyɛl kamba, mam nebã.» A Moyiiz yeelame: «Maam la a bõe n na n ta dĩma nengẽ n kɩt t'a yiis Israyɛl kamb Ezipt tẽnga?» Tɩ Wẽnnaam yeele: «M na n zĩnda ne foo la ad kaset ning m sẽn kõt-f tɩ f bãng tɩ yaa maam n tʋmd foo: f sã n wa yiis m neba Ezipt tẽnga, y na rʋ tãn-kãnga zug n waoog-ma.» A Moyiiz yeela Wẽnnaam: «Ade, m na n tɩ yeela Israyɛl kamba woto: ‹Yãmb yaab rãmb Wẽnnaam n tʋm maam y nengẽ.› B sã n sok maam tɩ y yʋʋr la a bõe, m leokda wãna?» Wẽnnaam yeela a Moyiiz: «Maam la a Beẽ-n-Beẽ! La f na n goma ne Israyɛl kamba woto: ‹A Beẽ-n-Beẽ n tʋm maam yãmb nengẽ.› La f na n paasame: ‹Yaa Soaala n tʋm maam yãmb nengẽ, yaa yãmb yaab rãmb Wẽnnaam, a Abraam Wẽnnaam, a Izaak Wẽnnaam, a Zakoob Wẽnnaam.› Yaa yʋ-kãnga n na n yɩ m yʋʋre zamaan sẽn wate, yaa yʋ-kãnga la y na n ning y pʋ-tẽerẽ, zamaan woo zamaana. Marsã kẽng n tigim Israyɛl nin-kẽemba la f yeel-ba: ‹Soaala, yãmb yaab rãmb Wẽnnaam, a Abraam Wẽnnaam, a Izaak Wẽnnaam, a Zakoob Wẽnnaam, n lik maam la b yeel-m lame: M wa y sʋka n na n fãag yãmba, tɩ m yãee Ezipt rãmba sẽn zãad yãmb zãab ninga. Yaa rẽ yĩng la m dat tɩ y yi n kẽ Kanaã rãmb tẽngẽ n paas Ititse, Amoritse, Perizitse, Ivitse la Zebuzitse, m datame n tɩ kẽes-y tẽng a ye, la tẽng kãng kʋɩls koom yaa bĩisim la sɩɩdo.› B na n kelga f koɛɛga, la foo ne nin-kẽemba, yãmb na n tɩ yãee Ezipt dĩma la y na n yeel-a-la woto: ‹Naaba-Wẽnde, Ebre rãmba Wẽnnaam, n sig d sʋka. D Kotame tɩ y bas-d tɩ d kẽn dasem a tãab kẽnde, we-raoogẽ, n tɩ kʋ maoong bãmb yĩnga.› M miime tɩ sã n ka tũ ne pãnga, Ezipt rĩma kõn bas-y tɩ y yi ye. Yaa rẽ yĩng la m na n tẽeg m nugu, dẽ la m na n moadg-a ne bõn-bãn ka tɛka, m sẽn na n maan. Dẽ poor marsã a na yaool n bas-y tɩ y looge. M na kɩt tɩ m kamba ne Ezipt neba moor zems taaba. Woto y sẽn wat n na n yi n looge, y kõn loog zaalem ye. Pag na n kosa a yaka, n kos a zĩnd-n-taase, sãnem teedo, wanzurf teedo, futu. Dẽ n na n lebg yãmb kom-dibli bɩ yãmb kom-pugli faongo, tɩ Ezipt rãmb na n yaool n dɩ bõne.» A Moyiiz yeelame: «M maanda a wãna? B sã n zãgs m tẽebo, n zãgs m kelegre, b sã n yeele: Bada, Soaala-Wẽnd pa lik foo ye!» Dẽ la Soaala sok-a: «Yaa bõe la f zãada?» T'a yeele: «Yaa dasaare!» Tɩ Soaala kõ-a noor t'a lob dasaara tẽnga. A sẽn lobe, lebga waafo, t'a tare. Tɩ Soaala yeel-a: «Tẽeg f nugu n gãd a zʋʋrã!» T'a Moyiiz tud a nugu n gãde, la waafa sẽn ta a nugẽ, a lebga dasaare. Wẽnd yeelame: «Woto b na reeg tɩ sɩd yaa Wẽnnaam n lik b menga, b yaab rãmb Wẽnnaama, a Abraam Wẽnnaama, a Izaak Wẽnnaama, a Zakoob Wẽnnaama.» Soaala le yeela a Moyiiz: «Kẽes f nugã f fuugẽ n sɩɩs f yãoogo.» T'a kẽes a nugu, n sɩɩs a yãoogo n lɛɛg n yiis n mik t'a yĩn-gãong bẽedame n pelg wa laongo. Tɩ Soaala ko-a noore: «Lebs n sɩɩs f yãoogo.» A sẽn kẽes a nug n lɛɛg n yiisi, a mikame t'a leba a pĩnd zĩigẽ. Soaala yeel-a lame: «Woto, pipi bõn-bãnda sã n ka tõog tɩ b reege, a yiib soaba na tõoge. La b sã n ket n ka tẽeda, b sã n ket n ka rat n kelge, bõn-bãn a yiiba poore, bɩ f toog kʋɩlga koom n daag tẽnga; kooma fo sẽn toog kʋɩlgẽ wã na lebg zɩɩm, f sã n daag-a tẽnga.» A Moyiiz yeela Soaala-Wẽnde: «Y kabre, m Soaala! Sẽn ta marsã, mam zɩ n yɩ goam-goamd ye. Ne yãmb sẽn lik maam n gom ne maama, bũmb ka teem ye. Goama ka sakd m noorẽ ye la m zelemd yaa pabrgo.» Soaala-Wẽnd leokame: «Ãn n kɩbg ninsaal noore? Ãnna n naan muka, n naan wʋnga, sẽn ne-a la sẽn ka ne-a? Ka maam laa! Dɩlla, kẽng tao, m na yaag f noore, m na wilg f sẽn na n togse.» A Moyiiz le yeelame: «Y kabre, m Soaala, bao-y y sẽn dat a soaba n tʋm!» Tɩ Soaala-Wẽnd sũur puug tɩ b yeele: «Fo saam-biig a Aarõ, Levitga, ka be la? Mam miime t'a gomda neere. Ad-a sẽn pʋs n wat f nengẽ. A sã n ta f taoore, a sũur na yɩ noogo. Foo n na gome la yẽ noor n na deeg goama n taase. Mam meng na sõng yãmb y yiibu, n wilg y sẽn na n togse. A Aarõ n na n gom ne neba fo zĩigẽ. A noora na n yɩɩ fo noore, fo yaa wa a wẽnde, n vẽnegd-a. Sã n ya f dasaarã, dɩk-a n zã. F na n maana bõn-bãn wʋsgo ne-a.» A Moyiiz yi-la a sẽn da be zĩig ningã n lɛɛg n wa a rɛɛmba, a Zetro, nengẽ la a yeel-a lame: «M kota sor n leb Ezipt tẽnga, m saam-biisa sẽn be zĩig ningã, n ges b sã n ketame.» T'a Zetro na n yeel-a: «Kẽng ne laafi!» Yaa woto la Soaala-Wẽnd gom ne a Moyiiz Madiã tẽnga: «Yik n leb Ezipt tẽnga tɩ sẽn baood-b foom n na n kʋ wã, kii zãnga.» A Moyiiz yii ne a paga la a biiga, a zombg-b-la bõanga n le rɩk Ezipt sore. A Moyiiz da zãada Wẽnd sẽn kõ-a dasaar ningã, a nugẽ. La Soaala le yeel-a lame: «Fo sẽn lebd Ezipt tẽngã bɩ f sak n maan bõn-bãna dĩma taoore. M kõ-f-la tõog rẽ yĩnga. M na n gesame n kidb a sũuri, la a ka na n bas m neba tɩ b loog ye. Dẽ marsã la f na n yeel dĩma: Soaala-Wẽnd koɛɛg la woto: mam bi-kẽeng la a Israyɛl. M yet-f lame; bas m biiga t'a kẽng n tɩ waoog-ma; la f sẽn zãgs t'a kõn yi wã, ma me na n kʋʋ fo bi-kẽenga.» A Moyiiz waa n yalsa b sikẽ yʋngo tɩ Soaala-Wẽnd kolg-a, la yaa waa b ra baood n na n yiisa a yõore. A Sefora rɩka kugr sẽn dɩt wa barga n kẽes a biiga bãongo. A rɩka zɩɩma n taag a sɩda kur-wĩir n yetẽ: Fo yaa m sɩd m sẽn fãag ne zɩɩm. Soaala-Wẽnd loog n bas-a a Moyiiz t'a Sefora sẽn gom tɩ zɩɩm n fãag a sɩdã, yaa bãonga kẽesg yell la a tẽeg-a. Soaala-Wẽnd yeela a Aarõ: «Yi we-raooga sẽnẽ n seg a Moyiiz.» A Yikame la a seg-a-la Wẽnd tãnga zugu la b mobga taaba. A Moyiiz wilga a Aarõ Soaala-Wẽnd sẽn kõ-a tʋʋmd ningã la bõn-bãn niyns b sẽn kõ-a noor t'a maana. A Moyiiz ne a Aarõ dɩka sore la b sẽn ta, b tigma tẽnga nin-kẽemba sẽn ya Israyɛl kamba. A Aarõ togs-b-la bũmb ning fãa Soaala-Wẽnd sẽn taas a Moyiiz la buuda taoore, a wẽneg n maana bõn-bãna. B deegame tɩ Wẽnd bee ne-ba, tɩ b yãenda b nimbãanega la b watame n na n fãag-ba. Woto b wõgemda tẽnga n waoog Soaalã. A Moyiiz ne a Aarõ waa n tɩ yãenda Ezipt tẽng dĩma n yeel-a: «Soaala-Wẽnde, a Israyɛl Wẽnnaam, n yet woto: Bas m neba tɩ b yi n tɩ maan kibs mam yĩng we-raoogẽ.» Tɩ dĩma yeele: «Fo Wẽnda la ãnna tɩ m tog n deeg a noor n bas a Israyɛl t'a looge? M ka mi, ba sẽn paoode, fo Wẽnda sẽn ya a soab ye, m kõn sak t'a Israyɛl loog ye.» A Moyiiz ne a Aarõ yeel-a lame: «Yaa Ebre rãmb Wẽnnaam n lik tõndo. Woto wã, kõ-y tõnd sor tɩ d kẽn da-yɩten-daar kẽnde, n ta we-raoogẽ wã n kʋ maoong n waoog bãmba. Sã n ka rẽ b na n kʋ-d-la ne sʋʋga bɩ ne nod-tãoodre.» Dẽ la Ezipt dĩma leok yã: «Yaa bõe la yãmb baooda, Moyiiz ne a Aarõ, n na n sãam neba tʋʋma? Leb-y y tʋʋmnẽ!» Dĩma le paasame: «Neba sẽn lebg wʋsga la yãmb na n kẽ sʋk n sãam tʋʋma?» Badaare bala, dĩma kõo sẽn get-b tʋʋma la sẽn gʋlsd-b sɛba noor kãngã: «Da le bao-y moodo n kõ nin-bãmba tɩ b wẽed tãn-koɛɛma wala y sẽn da maand pĩnda ye. B kẽng b toore n tɩ bao moodo. La modg-y-ba tɩ b paam tãn-koɛɛm wala zaamẽ la rabɩtẽ. Tãn-koɛɛma sõor pa tog n woog ye. Israyɛl kamba yaa kʋɩɩm dãmba, yaa rẽ la b sẽn yetã: d kẽng n tɩ kʋ maand Soaala-Wẽnd yĩnga. Paas-y b tʋʋmna tɩ b da le paam n vʋʋs ye la b ra le paam vɩʋʋg n gomd zirẽ-be-goam ye.» Sẽn da get-b tʋʋma la sẽn gʋlsd-b sɛba tɩ yeela zãma wã: «Dĩma noor la woto: M ka na n le kõ-y mood ye. Kẽng-y y toore n tɩ bao moodã y sẽn tõe n paam zĩig ning fãa. La tʋʋmd ka be y sẽn da tʋmd pĩnda, y sẽn ka na n kell n tʋm ye.» Zãma wã sẽega zãnga n na n bao moodo n wa wẽ tãn-koɛɛma. Sẽn get-b tʋʋma da tãsd-b lame: Y tog n paama y sẽn paamd daar fãa wala b sẽn waa n baood moodã n kõt yãmbã. B kɩtame tɩ b pãb sɛb gʋlsdba, dĩma sẽn da tũus Israyɛl kamba sʋka; b ra pãbd-b lame la b sokdẽ: Bõe tɩ zaame la rũnna y tãn-koɛɛma sõor pa ta y sẽn da paamd dasem kam? Israyɛl kamb sẽn gʋlsd-b sɛba waa n guglma ne dĩma: «Bõe tɩ y tar y yemsa woto? Tõnd ka le paamd mood sẽn kʋʋs ye la b pʋgda tõnd wakat buud fãa, tɩ yaa: wɩng-y ne tãn-koɛɛma, wɩng-y ne tãn-koɛɛma! Tõnd meng n le paamd pãbre. Dẽ ka segd ye!» Dĩma leok-b lame: «Yãmb yaa kʋɩɩm dãmba, kʋɩɩm dãmb menga, yaa rẽ la y sẽn yete: tõnd dat n tɩ kʋʋ maoong n kõ Soaala-Wẽnde. Yik-y tao n leb y tʋʋmnẽ! Moodã, y kõn paam-a, la sõng-y tɩ tãn-koɛɛma sõor taase.» Seb gʋlsdba yika ne yɩɩre b sẽn wʋm tɩ b yet-ba: Tãn-koɛɛma y sẽn tog n paam daar fãa wã, da sak-y tɩ b sõora paoog ye. B yi-la dĩma nengẽ n zoe n ta a Moyiiz la a Aarõ nengẽ. Bãmb me ra gũud-b lame. La b yeel-b lame: «Bɩ Soaala ges y sẽn maana la b ning-y taale. Yãmb kɩtame tɩ dĩma ne a poorẽ dãmb maand beem ne tõndo; yaa wa y rɩka sʋʋg n ning b nugẽ tɩ b kʋ tõndo.» A Moyiiz lɛɛg n waa Soaala-Wẽnd taoor n yeele: «Soaala, bõe tɩ yãmb namsd y nebã, bõe tɩ y kõ maam tʋʋm kãnga? Mam sẽn wa Ezipt dĩma nengẽ tɛka, m sẽn wilg yãmb daabã, a namsda y nebã la yãmb ka maand fɩ n na n fãag-b ye.» Wẽnnaam yeela a Moyiiz: «Yɩ bilfu, f na yãend m sẽn na n maan Ezipt dĩma bũmb ninga! M na modg-a t'a bas Israyɛl kamb tɩ b looge. M meng m toore n na n kɩt tɩ b yi ne rugdu.» Wẽnnaam goma ne a Moyiiz n yeel-a: «Maam la Soaala. Mam lika m meng a Abraam, a Izaak, a Zakoob wala Wẽnd ning sẽn yɛs a zĩigẽ daar fãa; m wilg-b-la neere tɩ maam la Soaala sẽn bɛ-a bãmb poorẽ dũnna la beoogã. Mam yõga zood ne bãmba la m maana kaseto tɩ m na n kõ-b-la Kanaã tẽnga, tẽng ning b sẽn yi b ba-yir n wa kẽ sãandã. Ezipt sẽn tar b rãmb wa yem-daadã kɛleng lʋɩ m tʋbrẽ, dẽ la m tẽeg m kãabgã. Dɩlla f na tɩ yeel Israyɛl kamba: Maam la Naaba-Wẽnde, m na kɩt tɩ y tɩlg ne Ezipt tʋʋm toodã. M na yiis-y yembd pʋgẽ, m na wilg Ezipt tɩ, pipi, yaa mam soolmẽ la a Israyɛl deng n lʋɩ la m na le reeg-a-la ne pãng la rugdu. Y na lebg mam buud neba la ma me na lebg yãmb Wẽnde la y na bãng tɩ yaa maam, yãmb Wẽnnaam, n kɩt tɩ y tɩlg ne Ezipt tʋʋm toodo. Dẽ poore, m na n kẽes-y-la tẽng ning m sẽn kãab a Abraam, a Izaak, a Zakoob, la tẽnga na waa n lebg y soolem, tɩ maam, y Wẽndã, n kãab-y rẽnna.» A Moyiiz taasa Israyɛl kambã Soaala-Wẽnd gomdã la Israyɛl kamb pa sak n kelg ye; b da yɛɛ fas ne b yembdã. Soaala-Wẽnd yeela a Moyiiz: «Kẽng Ezipt dĩma nengẽ n tɩ yeel-a t'a bas Israyɛl kamba tɩ b yi a tẽngẽ wã n looge.» A Moyiiz guglma Wẽnd taoore n yeele: «M sẽn ka tõog tɩ Israyɛl kamba kelg m koɛɛga, m yɩta a wãn marsã n tõog tɩ dĩma reeg m koɛɛga? Maam la sẽn ka mi goam la.» Soaala-Wẽnd zaba ne a Moyiiz la a Aarõ, n kõ-b noor tɩ b bʋʋg Ezipt dĩma n kɩt t'a bas Israyɛl kamb tɩ b yi Ezipt tẽnga. Ad Israyɛl buuda kãsem-dãmba: Pipi, a Rubẽ, a Israyɛl bi-kẽenga, yẽ kamb la woto: a Anok, a Palu, a Esrõ, la a Karmi. Bãmb la a Rubẽ rooga kãsem-dãmba. A Simeõ kamba: a Yemuwɛl, a Yamin, a Oad, a Yakim, a Soar la a Sol, yẽ ma yɩɩ Kanaã bi-pugla. B zãng kẽeda a Simeõ. Ad-a Levi kamb la a yagense: a Gersõ, a Keyat, a Merari. A Levi yʋʋma yɩɩ koabg la pis-tã la a yopoe. A Gersõ kamba: a Libni, a Simeyi; bãmb me yɩɩ roog kãsem dãmba. A Keyat kamba: a Amram, a Isar, a Ebrõ la a Uziyɛl. A Keyat yʋʋm yɩɩ koabg la pis-tã la a tã. A Merari kamba: a Mali, a Musi, b zãng yaa a Levi kamba la a yagense. A Amram dɩka a pʋgdba a Zokbɛd n maan a paga, n dog kamb a yiibu, a Aarõ la a Moyiiz. A Amram yʋʋm yɩɩ koabg la pis-tã la a yopoe. A Isar kamba: a Kore, a Nefɛg la a Zikri. A Uziyɛl kamba: a Mikayɛl, a Elisafã la a Sitri. A Aarõ pag yɩ-la a Eliseba. Yẽnd ba la a Aminadab, a tão la a Nasõ; yẽ n dog a Nadab, a Abiyu, a Elazar la a Itamar. A Kore kamb la a Asir, a Elkana la a Abiasaf. Bãmb la a Kore doogo. A Aarõ biig a Elazar yii kãadem ne a Yptiyɛl bi-pugl a ye n dog a Pinas. A Levi buudu, a kamb la a yagens la bãmba. Yaa a Aarõ la a Moyiiz la Soaala-Wẽnd da kõ noore: Kɩt-y tɩ Israyɛl kamba bob tãpo n yi Ezipt tẽnga. Yaa bãmb n tɩ gom ne Ezipt dĩma, n yeel-a t'a bas Israyɛl kamba tɩ b looge. N-ye! Yɩ-la a Moyiiz ne a Aarõ. Wẽnnaam goma ne a Moyiiz Ezipt tẽnga, n yeel-a: «Maam la Soaala. M sẽn na n yeel-f bũmb ning fãa bɩ f sõng n taas-a Ezipt dĩma.» T'a Moyiiz leok woto: «M pa tõe n gom naana ye; dĩma na sak n kelg sɩda?» Soaala-Wẽnd leoka a Moyiiz: «Ade, m na n kõ-f-la Wẽnd tõog, Ezipt dĩma taoore la f kẽem, a Aarõ, n na n yɩ f no-rɛɛsa. Mam sẽn yet tɩ f togs bũmb ninga la f na n togse la f kẽem, a Aarõ, na reeg-a n taas dĩma la a na bas Israyɛl kamba tɩ b yi a tẽngẽ. M na n kɩtame tɩ dĩma yɩ zãgsda tɩ m maan bõn-bãna la yɛl-soalma ka tɛk, Ezipt tẽnga. M miime tɩ Ezipt naaba ka na n sak n kelg-y ye la m na maan Ezipt pãnga n yiis m buudã ne a tãb-biisã la na n yɩɩ pakre tɩ m sɩbg Ezipt rãmb wʋsgo. Na n yɩɩ tɩlɛ ne Ezipt rãmba fãa tɩ b reeg tɩ maam la Soaala-Wẽnde, tɩ m na n zẽka m nug n sɩbg-ba n paam n yiis Israyɛl kamb b tẽngẽ.» A Moyiiz la a Aarõ sakame n tũ Soaala-Wẽnd noora zãnga. A Moyiiz yʋʋm da yaa pis-nii t'a Aarõ dẽnd ya pis-nii la a tãabo, b sẽn waa n tɩ yãend Ezipt dĩma. Wẽnnaam yeela a Moyiiz: «Dĩma sã n yeel-y tɩ y maan bõn-bãnde, bɩ f yeel a Aarõ t'a rɩk a dasaarã n lob a taoore t'a na lebg wag-bãnde.» A Moyiiz ne a Aarõ kẽnga dĩma taoore la b maana wala b sẽn da yeel-bã. A Aarõ loba a dasaarã dĩma taoore, a neba taoore, la dasaara lebga wag-bãnde. Naaba me boola neb sẽn tar yam zulunga, a bagba la a tɩt rãmba. Bãmb me tõogame n maan bõn-bãnd kãnga. Ned kam fãa loba a dasaare tɩ dasaar fãa tedg n legb wag-bãnde la a Aarõ dasaara vel-b-la zãnga. Ne rẽ fãa dĩma kidba a sũuri, a ka kelg a Moyiiz ne a Aarõ ye. Soaala-Wẽnd yeela a Moyiiz: «Dĩma yaa zug koɛɛng soaba, a zãgsame tɩ m neba kõn loog ye. Kẽng, beoog yibeoogo, n tɩ yãend-a, a sẽn wat n dabd kʋɩlgẽ; gũ-a kʋɩlga noore, zã dasaar ning sẽn tedg n legb waafã, f nugẽ. Gom ne dĩma woto: Soaala-Wẽnde, a Israyɛl Wẽndã tʋma maam f nengẽ tɩ m wa yeel-fo: bas m neba tɩ b yi n tɩ waoog-m we-raoogẽ. Sẽn ta marsã, fo yẽda f tʋba. Ad-m sẽn yet-fo: ges bũmb ning sẽn na n wilg tɩ maam la Soaala-Wẽnde: m na n dɩka dasaarã m sẽn zãadã n wẽ kʋɩlga koom la a na n lebga zɩɩm. Kʋɩlga zĩma fãa na n kiime, b na n põogame, kooma na n lebga yũugu la Ezipt rãmb na n maka a yũub n konge.» Soaala-Wẽnd yeela a Moyiiz: «Gom ne a Aarõ: dɩk f dasaarã, tẽeg f nug Ezipt kʋɩlga zugu: A ko-soy wã, a ko-ralma, a ko-bao wã, a bãtã, a bulsã, koom sẽn tõe n tẽgnẽ fãa, tɩ fãa na lebg zɩɩm; laoka peesa ne kugri, bɩ a peesa ne raoogo, koom sẽn tẽgen a pʋgẽ fãa na lebg zɩɩm.» A Moyiiz ne a Aarõ maana wala Soaala sẽn togs-bã. A Aarõ zẽka a dasaare, dĩma ne a poorẽ dãmb nifẽ, n wẽ kʋɩlga koom la a lebga zɩɩm zãnga. Kʋɩlga zĩma kiime, kʋɩlga lebga yũugu, a kooma ra ka le tõe n yũ ye. Ezipt tõr lebga zɩɩm. Ezipt bagba la b tɩt-rãmb me tõog n maana boto tɩ dĩma na n kidb a sũur n paase; wala Soaala-Wẽnd sẽn da yeelã, a zãgsa a Moyiiz ne a Aarõ kelgre. Dĩma gesa rẽ fãa wa zaalem la a leba a zakẽ. Tẽnga rãmb kong n tuu buls kʋɩlga noore, tɩ kʋɩlga meng koom da ka le tõe n yũ ye. Sẽn maan dasem a yopoe, bõn-bãnd a to n le maane. Soaala-Wẽnd yeela a Moyiiz: «Ta dĩma nengẽ la f yeel-a: Soaala-Wẽnd koɛɛg la woto: bas m neba tɩ b loog n tɩ kʋ maoong n waoog-ma. F sã n ka sake m na kɩt tɩ loms deeg tẽnga fãa n yãmbe. Kʋɩlga na n pida ne lomse. B na n yiime n kẽ f zakẽ, n kẽ f do gãagẽ, n dʋ f gãag zugu. Na n yɩɩ boto me ne f poorẽ dãmba, ne f neba fãa. Bur wʋnga, bura sẽn bĩngd zĩig ninga, fãa na pida ne lomse. Lomsa na n lolma foo, f poorẽ dãmba, f sõgen-kambã.» Wẽnnaam yeela a Moyiiz: «Kõ a Aarõ no kanga: tẽeg f nug la f dasaarã, kʋɩlga zugu, ko-soy wã la tãnagda zugu, n kɩt tɩ loms kẽ Ezipt tẽnga.» A Aarõ tẽega a nug Ezipt kʋɩlga zugu la loms yiime n deeg Ezipt tẽng n yãmbe. La ne b rabaar la b tɩto, Ezipt rãmb me tõogame tɩ lomsa yi n pid tẽngã. Dẽ la dĩma bool a Moyiiz ne a Aarõ n yeel-ba: «Pʋʋs-y Soaala-Wẽnd t'a zãag lomsã ne maam la m poorẽ dãmba tɩ woto m na bas-y tɩ y tɩ kʋ y maoongã n waoog y Wẽnnaam.» T'a Moyiiz leoke: «Wilg maam sẽn ya wakat ning la m na n pʋʋs f yĩnga, f zak rãmb yĩnga, f neba fãa yĩnga, tɩ lomsa zãage ne foom ne f zaka, ne f poorẽ dãmba, ne f neba fãa, n pa kʋɩlga pʋgẽ bala.» Tɩ dĩma leoke: «Beoog bala.» A Moyiiz yeelame: «M na maan wala f sẽn datã la woto f na bãng tɩ tõnd Wẽnnaam ka be taar ye. Lomsa na n zãaga ne foom, ne f yirã, ne f poorẽ dãmba, ne f soolma fãa; kʋɩlga pʋgẽ bal la b na n kelle.» A Moyiiz ne a Aarõ loogame n bas dĩma la b pʋʋsa Wẽnde tɩ lomsa zãage. Wẽnnaam deega a Moyiiz kosgo, lomsa kii rotẽ, zagsẽ, pʋtẽ. B wʋk-b lame n sam la tẽnga fãa lebga yũugu. Dĩma sẽn paam laafi, a le kidba a sũuri, wala Soaala-Wẽnd sẽn da wilgi, n zãgs a Moyiiz ne a Aarõ kelgre. Soaala-Wẽnd yeela a Moyiiz: «Kõ a Aarõ no-kãnga: tẽeg f nug n wẽ tẽnga tom ne f dasaarã tɩ lebg rũm-pigli, n pid Ezipt tẽnga.» A Aarõ zẽka a nug n wẽ tẽnga ne a dasaare. Rũms yiime n na n wãb bũmb fãa. Tẽnga tom gill tedgame n legb rũm-pigli. Bagbã la tɩt rãmb makame n na n bool dũm-pigli la b pa tõog ye. Rũmsa wãba ninsaalba la bõn-vɩɩli wã fãa. Dẽ la tɩta rãmb leok dĩma: «Woto yaa Wẽnd tõogo.» La wala Soaala-Wẽnd sẽn da togsã, Ezipt dĩma le kidba a sũur n paase, a zãgsa a Moyiiz ne a Aarõ kelgre. Soaala-Wẽnd yeela a Moyiiz: «Sãd beoog pĩnd n tɩ yaas dĩma sora zugu, a sã n wa rabd kʋɩlgẽ. F na yeel-a: Soaala-Wẽnd koɛɛg la woto: bas m neba tɩ b loog n tɩ waoog-ma. F sã n zãgse, yaa keooda la m na n tʋm tɩ b wa kẽ f zakẽ, f rotẽ, f neba zagsẽ la b rotẽ. B na n pida Ezipt rota fãa la tẽnga fãa. Yaa Gosen tẽng bal la m na n welg toore tɩ be yaa m neba tẽnga la keoodr kõn ta be ye. Woto f na bãng tɩ maam a Naaba-Wẽnde n be f soolma tẽnsʋka. M na n welga m buud ne fo rẽnna la yaa beoog bala la keooda wã wata.» Soaala-Wẽnd maana wala b sẽn yeele la keooda ka tɛk kẽe dĩma zakẽ, n kẽ a meng rotẽ, n kẽe a neba rotẽ n kẽ Ezipt tẽnsa fãa n yaal-b zãnga. Dĩma boola a Moyiiz la a Aarõ n yeel-ba: «Bao-y zĩig tẽnga pʋgẽ n kʋ y maoongã n waoog y Wẽnde.» T'a Moyiiz leoke: «Tõnd pa tõe rẽ ye. Tõnd sẽn koot dũms niynsã, Ezipt rãmb get-b-la wa wɩɩbdo; tõnd sã n kʋʋd b nifẽ bũmb b sẽn kisi, b kõn lab tõnd ne kug sɩda? Dẽn tõnd kẽn da-yɩten-daar kẽnde n ta we-raoogẽ, n kʋ d maoong n waoog Naaba-Wẽnde, n kʋ maand niyns b sẽn na n wilg-du.» Dẽ la dĩma yeel yã: «M na bas-y tɩ y yi n ta we-raoogẽ n kʋ maoong n waoog y Soaala-Wẽnde, la rẽnd yamb me kãabe tɩ y kõn zãag zĩig ye, tɩ y na tẽeg m yelle.» A Moyiiz yeelame: «M sã n yi ka bala m na n sɩnga Soaala pʋʋsgo la beoog yibeoog tɩ keooda wã basa dĩma laafi yẽ ne a poorẽ dãmb la a soolem dãmba. La naaba me maan sugri n da le belg-d ye la a bas d buudã t'a tɩ maan a maoongã.» A Moyiiz yii dĩma zakẽ la a yõka Soaala sɛɛga, la b deega a kosgo la keooda wã zãaga ne dĩma, ne a poorẽ dãmba, ne a soolma rãmba, a ye meng ka kell ye. La Dĩma baas n le kidba a sũur, n zãgs tɩ b kõn loog ye. Soaala-Wẽnd yeela a Moyiiz: «Kẽng dĩma nengẽ n tɩ yeel-a woto: Ad Soaala-Wẽnd, Ebre rãmb Wẽndã, sẽn yete: bas m neba tɩ b loog n tɩ waoog-ma. F sã n zãgse, tɩ b le kaoos ka, n pa looge, Soaala nug na n sɩɩsa f rũmsã sẽn be bãoogẽ: wiidi, bõeense, yʋgma, niisi, rũm-bõonese; bã-toaag n na n loog ne b fãa gilli. Soaala-Wẽnd na n welga a Israyɛl rũmsa toore la b rũng ba a ye kõn ki ye.» Soaala-Wẽnd yãka raare, b yeelame tɩ yaa beoog la b na n yãe yel-bãnda Ezipt tẽnga. Beoog sẽn vẽege, Soaala-Wẽnd sɩd pidsa b kãabgo, Ezipt rãmb rũmsa fãa kii gill kasi. A Israyɛl rũng ba a ye ka ki ye. Dĩma kɩtame tɩ b saag n ges la yɩɩ sɩda, a Israyɛl rũng ba a ye ka ki ye. Ne rẽ fãa dĩma pa sak tɩ b loog ye. Soaala-Wẽnd yeela a Moyiiz ne a Aarõ: «Kõdg-y rʋk vũundu n pids y nugu la y sã n ta dĩma taoore bɩ a Moyiiz lob a rẽnd yĩngri. Bug-vũunda na n yɛdga wala wubs-bãanega, n kẽ Ezipt tõre tɩ rũmsa ne neba yĩns pus yũya.» B taa rĩma nengẽ ne rʋk vũundu t'a Moyiiz lob vũunda yĩngri tɩ rũmsa la neba yĩns pus yũya. Tɩta rãmb ka tõog n wa a Moyiiz taoore ye, tɩ yũya ra pusa bãmb me wala Ezipt rãmb fãa. Soaala-Wẽnd kidba dĩma sũuri la wala b sẽn da pĩnd n togsã, a zãgsa a Moyiiz la a Aarõ kelgre. Soaala-Wẽnd kõ-la a Moyiiz no-kãnga: «Sãd beoog pĩnd n kẽng dĩma nengẽ. Yeel-a tɩ Ebre rãmb Wẽnnaama goma woto: bas m neba tɩ b yi n tɩ waoog-ma. Yeel dĩma tɩ marsã wã yẽ, m datame tɩ yel-beed buud fãa lʋɩ a zugu, n lʋɩ a poorẽ dãmba zugu t'a yaa n bãng tɩ m ka tar m to moog ye. M sã n da kɩtẽ tɩ bãag ninga sẽn kʋ a rũmsa yõkẽ yẽnda me ne a poorẽ dãmba, marsã tɩ d zĩig zãrẽ. M bas-a lame n ka kʋ ye t'a bãng m pãnga la a pẽg m yʋʋr tɩ ta tẽnga satmẽ. A ket n maanda tɩtaam ne m kambã n pa rat n bas-b tɩ b loog ye. La ade, beoog yibeoog pĩnd-pĩnda, sapɩlem n na n wa ne pãnga, wala b sẽn zɩ n yãend a taar Ezipt tẽng ye. Yeel-a t'a bao zĩig n solg a rũmsi la bũmb ning fãa a sẽn so, tɩ kẽnd yɩnga. Bũmb ning fãa sẽn be yɩnga, ninsaal bɩ rũnga, tɩ b pa tall-a n wa yiri, sapɩlem n na n kʋ.» Dĩma poorẽ dãmba wʋma Wẽnd sẽn dat bũmb ningã la b yɛɛsame la b bao zĩig b zakẽ n ning b yem-daad la b rũmsi. Kẽer n yaool n tẽ tɩ Soaala-Wẽnd gomd yaa belgre la b basa b yem-daado la b rũms tɩ pa yɩnga. Soaala-Wẽnd yeela a Moyiiz: «Zẽk f nug n tees yĩngri tɩ sapɩlem dʋʋg Ezipt tẽng tõre, n pãb neba, n pãb rũmsi la sẽn be pʋtẽ, Ezipt tẽn-peelmẽ.» A Moyiiz zẽka a dasaar n tees yĩngri la saag tãsame, tɩ sapɩlem dʋʋg zĩig zãnga. Saaga yãgdame tɩ sapɩlma dʋʋgdẽ la sapɩlma da fõta ne pãnga wa b sẽn zɩ n yãend a taar Ezipt tẽnga, a sẽn sɩng n yet t'a yaa tẽnga. Ezipt tẽn-peelma zãnga, sapɩlma sãama sẽn da be yɩng fãa. A kʋʋ neb la rũmsi, a kʋʋsa tẽnga mood fãa la tɩɩse. Yaa Gosen tẽng bal n põse, yaa be la Israyɛl kamb da kẽeda. Dĩma tʋmame tɩ b tɩ bool a Moyiiz ne a Aarõ la a yeel-b lame: «Marsã m deega m kongre. Wẽnd n so bʋʋm la maam ne m nebã n konge. Pʋʋs-y tɩ sa-tãsa la sapɩlma yaas tɩ m na bas-y tɩ y looge la kõn kaoos ye.» T'a Moyiiz yeel-a: «M sã n yɩ tẽngã, m na pʋʋs Soaala tɩ sa-tãsa la sapɩlma yalse tɩ f bãng tɩ Soaala-Wẽnd n so tẽngã. La ka foo bɩ f poorẽ dãmba n na n zoe Wẽnd nif ye, dẽ yaa vẽenega.» Beren-dɩga la alkam pugsgu sãama zãnga; alkam pugsga da zoe n wekame, la beren-dɩga da zoe n yaa puudu. Alkam pɛɛlga la alkam gilsã n põse tɩ bãmb yaa yaoose. A Moyiiz yii Ezipt dĩma nengẽ, n yi tẽnga zãnga, n tẽeg a nus n tees Naaba-Wẽnde tɩ sa-tãsa la sapɩlma yaase. Saaga sɩd ka le ni ye. A sẽn mik tɩ saaga pa le niida, tɩ sapɩlem pa le rʋʋgdẽ, tɩ sa-tãsa ka le tãsdẽ, dĩma le rɩka a pĩnd zʋgo. A kidba a sũuri, yẽnda ne a poorẽ dãmba, n pa sak tɩ Israyɛl kamb loog ye, wala Wẽnd sẽn da zoe n wilgi. Soaala-Wẽnd le yeela a Moyiiz: «Kẽng dĩma nengẽ tɩ yaa maam n kɩt t'a gir a zugu, yẽnda ne a poorẽ dãmba, sẽn na n yɩlẽ n paam n maan bõn-bãna a nifẽ. Sẽn na n yɩlẽ me tɩ fo tõog n togs f kamb la f yagense m sẽn yaal Ezipt rãmb ne bõn-bãn niynsi, la woto y na bãng tɩ maam la Naaba-Wẽnde.» A Moyiiz ne a Aarõ kẽng n tɩ yãee Ezipt dĩma n yeel-a woto: «Ad Ebre rãmba Wẽnnaam sẽn togsd-f bũmb ninga: F na n kell n yɩɩ tõata, f na n zãgsa f sulg f meng mam taoor n ta da-bʋre? Bas m neba tɩ b loog n tɩ waoog-ma. F sã n zãgse, yaa sʋy la m na n kẽes f tẽngẽ la na n yɩɩ beoog yibeoog bala. B na n dʋʋgame n lud tẽnga zãnga, tẽn-gãong kõn le yãend ye, la sapɩlma sẽn kees bũmb ningã, b na loog ne rẽ fãa, b na rɩ pʋta tɩɩs fãa gilli. F zaka, f poorẽ dãmb zagse, Ezipt dãmb fãa gill zagse na n pida ne sʋya. Fo yaab rãmb, fo yaab rãmb-yaab rãmb zɩ n yãe woto buud Ezipt tẽnga, a sẽn yet t'a yaa tẽng ye.» A Moyiiz lɛɛgame n yi. Dẽ la dĩma poorẽ dãmba yeel b zu-soaba: «Nin kãnga na n kell n yɩ bẽdg tõnd yĩng n ta da-bʋre? Bas-y tɩ b loog n tɩ waoog b Naaba-Wẽnde. Fo ka ne tɩ Ezipt rabda a wãab zĩigẽ?» Woto b kɩtame t'a Moyiiz ne a Aarõ lɛɛg n wa tɩ dĩma yeel-ba: «Y tõe n kẽng n tɩ waooga y Wẽndã, la ãnd-dãmb n na n looge?» A Moyiiz yeelame: «D na n looga ne d kom-bɩɩba, d nin-kẽemba, d kom-dibli la d kom-pugli, d rũmsi, bẽd la bõonego, tɩ yaa kibs la d na n maan Soaala-Wẽnd yĩnga.» Tɩ dĩma leok-a: «Woo! M bas-y tɩ y looge, yãmb ne y kamba, m nong-y la kɛɛma! Yãmb sẽ n pa ne tɩ y raabã yaa goalenga? Ad-y rẽ ka tõe ye, bɩ rapa bal kẽnge n tɩ waoog Soaala-Wẽnde tɩ yaa rẽ la y sẽn baoodã.» La a sẽn gom woto, a rig-b-la a taoore. Dẽ la Soaala-Wẽnd yeel a Moyiiz: «Zẽk f nug Ezipt zug n bool sʋya tɩ b sig Ezipt tẽng n dɩ a koodã la a tɩɩsa zãnga. B loog ne sapɩlma sẽn keesã.» A Moyiiz zẽka a dasaare la yaang sobg fugame, wĩndig la yʋngo. Beoog sẽn vẽege, b mikame tɩ sobga waa ne sʋya. Sʋya dʋʋga Ezipt ween-vɩʋʋga tõre. Sʋya sõore: ad-y b zɩ n yãe la b kõn le yãend a taar ye. B luda tẽnga gãong t'a moog zãnga. B rɩɩ tẽnga moodo la tɩɩsa biis sẽn põs sapɩlma. Vãoog buug ka kell tɩɩg zug ye, ka kell pʋʋgẽ ye, la yɩɩ Ezipt tẽnga la b sãam woto. Dĩma kɩtame tɩ b bool a Moyiiz ne a Aarõ tɩ b wa tao-tao t'a yeel-ba: «Ad-y m beega Soaala la m beega yãmb me. M kotame tɩ y kõ-m sugri tɩ rũnna la tɛk-tɛka la pʋʋs-y Soaala, yãmb Wẽnnaama, t'a zãag-m ne yel-beedã.» A Moyiiz yiime n tɩ yõk Soaala-Wẽnd sɛɛga. Soaala waa ne sob-lebende, nin-taoor sobgo, la sobga looga ne sʋya n tees Rudum Mogre. Ezipt tẽn-peelma tõre, sʋʋr ba a ye ka pa ye. Soaala-Wẽnd kidba naaba sũuri t'a ka sak Israyɛl kamba loogre ye. Soaala-Wẽnd yeela a Moyiiz: «Tees f nuga yĩngri; ad lik sẽn ya taoko n tõe n sɩɩs ne nug na n dɩɩ Ezipt tẽng zãnga.» A Moyiiz teesa a nug yĩngri la lik sẽn ya lik meng n lud Ezipt tẽnga, dasem a tãab tõre. Dasem a tãab pʋgẽ, Ezipt ned ba a ye ka le tõog n yãend a to ye, ned ba a ye ka le tõog n luk a zĩigẽ ye; Israyɛl kamba sẽn da kẽed tẽng ninga bal n da tar vẽenem. Dĩma kɩtame tɩ b bool a Moyiiz n yeel-a: «Kẽng-y n tɩ waoog y Wẽnnaama; y rũmsa bala, bɛd la bõonego, n na n pa ka. Y pagba ne y kamba tõe n tũume n looge.» Dẽ la a Moyiiz yeel yã: «Fo meng tog n baoo rũms n kõ-d tɩ d tɩ maan laafi kosg maoong la yũ-nood maando, tõnd Soaala-Wẽnd taoore. Sã n ya d rũmsã, bãmb me na n tũume, ba a ye ka na n pa ye; yaa tõnd dũms la d na n yãk n kʋ maoongo n waoog Soaala-Wẽnde. D pʋs n ka mi d sẽn na n waoog d Wẽnnaama seem ninga, sã n ka d taa d maoonga zĩigẽ.» Wẽnnaam kidba dĩma sũuri t'a zãgs tɩ b kõn loog ye. A leoka a Moyiiz woto: «Menem ka! Gũus tɩ m da le yãend-f m taoor ye tɩ baraare yaa f kũum daare.» T'a Moyiiz na n yeele: «Na yɩ wala f sẽn datã, m kõn le wa f taoor bada!» Soaala-Wẽnd yeela a Moyiiz: «Yel-beed a ye n kete, a ye tãa, m sẽn na n tool Ezipt dĩma ne a soolem dãmba. Dẽ poore, a na bas-y tɩ y looge, a pʋs n na n dig-y lame menga. Wilg m neba tɩ ned kam fãa kos a yaka, rao bɩ paga, wanzurf la sãnem teedo.» Soaala-Wẽnd kɩtame tɩ b nebã ne Ezipt rãmba moor zems taaba. A Moyiiz meng da yaa nin-kãseng Ezipt tẽnga, dĩma sõsd-n-taasã la a soolma rãmb fãa nifẽ. A Moyiiz yeela dĩma: «Ad Soaala-Wẽnnaam koɛɛga: Yʋn-sʋka, m na n pɩʋʋga Ezipt tẽnga. Sẽn ya-a a ma pipi bi-ribl fãa, Ezipt tẽnga tõre, na n kiime: biig ning sẽn tog n ledg dĩma, a zaoorẽ, na n kiime, wala yem-pogsa sẽn werd neerẽ wã kom-dẽemse, la rũmsa me pipi kamba sẽn ya raado. La kɛleng n na n kelem Ezipt tẽng tõre, wala b sẽn zɩɩ n wʋm la b kõn le wʋm a taar ye. Sã n ya ne mam kambã, kɛleng kõn kelem ye, baag meng kõn wes ninsaal bɩ rũng ye. La woto f na bãng tɩ maam, Naaba-Wẽnd baka a Israyɛl toore, m welg-a-la ne Ezipt rãmba. Wakat kãng marsã, f poorẽ dãmb na wa n wõgemd m taoore n yeel-ma: ‹Looge, foom ne f nebã.› La m sɩd na n looga wakat kãnga.» A Moyiiz yii Ezipt dĩma zakẽ n loog ne sũ-puuri. Soaala-Wẽnd yeela a Moyiiz: «Dĩma ka na n sak y kelgr ye; rẽ fãa yaa sẽn na yɩlẽ tɩ m pids Ezipt tẽng ne m bõn-bãna.» Yel-beeda fãa sẽn sõdgã, a Aarõ ne a Moyiiz kɩtame tɩ b pids dĩma taoore. La Wẽnnaam kidba a sũuri t'a zãgs tɩ Israyɛl kamb kõn yi a tẽngẽ ye. Soaala-Wẽnd yeela a Moyiiz ne a Aarõ Ezipt tẽnga: «Kiuug kãnga n na n lʋɩ kiis a taaba taoore: yẽnda n na n yɩ yʋʋmda pipi kiuugu. Yeel-y Israyɛl zãma wã woto: kiuug kãnga dasem piig daare, bɩ ned kam fãa bao rũm-bila. Zak fãa ya rũng a ye, roog fãa yaa rũng a ye. Zak sã n paood n ka tõe n sɛ rũng tõre bɩ a tɩ fãoog a yaka, a tɩ fãoog ne sẽn pẽ-a yẽnda n yɩɩda t'a neba me zemse. Ges-y ned kam fãa sẽn tõe n dɩ tɛka n bãng n yãk rũngã tɩ wa zemse. Rũnga kõbg ka na n lɩʋʋs ye, rũnga na n yɩɩ raoogo, na n yɩɩ yʋʋmd a ye rũnga; tõe n yɩɩ pesg bɩ bʋʋga. Rũnga na n basame n tãag kiuuga piig la a naas raare; baraar zĩ-sobdo, b na kodg-a, neba fãa taoore. B na yãk a zɩɩm n taag roog ning rɩɩba sẽn na dɩẽ wã. Rũnga zɩɩm yãkdame n taag kʋɩlenga ne a ra-lugs a yiibã la a rignoorã rĩiri. Yʋn-kãnga yaa nem-sẽedgo la y na n wãbe la b na n wãb-a-la ne bur sẽn ka ning bɩlle la ne vã-tɩɩsense. Da saag-y n dɩ sẽn ya kãad bɩ sẽn dʋg ye, sẽn sẽ bugmẽ bal la y na n wãbe; naag-y zugã ne karsã la yãadã. Da kell-y bũmb beoog yĩng ye. Zĩig sã n yẽege, rɩk-y sẽn ketã n yõog bugum. Yaa woto la y na n wãb rũngã: y sẽbgda y sɛɛga, n pid neooda, n zãad dasaare. Y na n dɩɩ ne yãgbo. Soaala pɩʋʋga y sʋk baraare. Yʋn-kãnga m na n pɩʋʋga Ezipt tẽnga, m na n kʋʋ bõn-dẽemsa fãa sẽn be Ezipt tẽnga: ninsaalba wala rũmsi. Woto m na rok m sũuri ne Ezipt wẽn-naandsa fãa. Yaa maam, Naaba-Wẽnd, n gome. Zɩɩma n na wilg yãmb sẽn kẽed dot niynsi. M sẽn yãe zɩɩma zĩig ning fãa, m na n londga yi-kãnga, woto tẽn-kũuma daare, m sẽn na n sɩbg Ezipt raare, y na põse. Daara na n yɩɩ y Wẽnda sẽn tẽeg y yella raara. Y na n yiime n tong taaba n maan kibs Soaala yĩnga, zamaan woo zamaana. Dasem a yopoe tõre, ket n yaa Soaala n gomde, y na n dɩɩ bur sẽn ka ning bɩlle. Y na n sɩnga pipi daarã n menes bɩll y zagsẽ, tɩ ned ninga fãa sẽn na n dɩ bur sẽn wẽ ne bɩlle pipi raarã n tãag a yopoe raarã, a soab na n kiime. Y na n maana tigẽng kãsenga pipi raarã. A yopoe raarã me yɩ boto. Badaare tʋʋmd buug pa tʋmd ye, sã n ka rɩɩb seglgo bala. Y na n deega bur pa lobd bɩlla noore. Y na n maana kibs n tẽeg tɩ badaare m yiisa y buuda Ezipt tẽnga. Yals-y kibs kãnga zamaan woo zamaana. Yaa Soaala-Wẽnd meng noore y sẽn tog n deege. Dɩlla pipi kiuugã, a piig la a naas daar zĩ-sobdo, n tãag a pisi la a ye daare, zĩ-sobdo, y na n dɩɩ bur sẽn ka ning bɩlle. Dasem a yopoe wã pʋgẽ bɩ m da yãe bɩll y zagsẽ ye, tɩ ned ninga sẽn na n wãba bur sẽn ning bɩlle, m na n yiis a soab Israyɛl buudẽ. A yaa tẽnga ned bɩ sãana, b na n yiis-a-la buudẽ. Da rɩɩ-y bur sẽn ning bɩlle ye; y sẽn be zĩig ning fãa, dɩɩ-y bur sẽn ka ning bɩlle.» A Moyiiz tigma a Israyɛl nin-kẽemba fãa n yeel-ba: «Tɩ bao-y rũm-bõonego, pe-bil bɩ bulla, zak woo zaka, n kʋ paka, tẽegra, yĩnga. Y na kao vãado n tʋm zɩɩma sĩngẽ, n yãk zɩɩma n bol dignora rĩiri la ra-lugs a yiibã. Sã n ka beoog n vẽege, bɩ ned ba a ye da saag n yi yɩng ye. Wotone Soaala-Wẽnd sã n wa saagd Ezipt tẽng n na n kʋ, b sã n yãe zaka t'a rignoora la ra-lugsã bola ne zɩɩm, b na looge n ka kẽ yi-kãng pʋg ye, la kũum kõn ki y zagsẽ ye. Woto me na n yɩɩ noor y sẽn na n deeg, yãmb ne y kamba, zamaan woo zamaana. Y sã n wa kẽ tẽng ning Soaala sẽn na n kõ yãmbã, y na kell n maan boto. Y kamb sã n wa sok yãmba: ‹Yaa bõe la y maand woto.› Y na leok-ba: ‹Yaa pak maoong la d kʋʋda, Wẽnnaam waoogr yĩnga, tɩ Ezipt tẽnga b londga Israyɛl kamb zagse n tɩ kʋ Ezipt rãmba n yaool n bas tõndo.› » A Moyiiz yaool n kɩtame tɩ neba yĩgimd n waoog Soaala-Wẽnde. Israyɛl kamb sẽegame. B reega noora zãnga. B maana bũmb ning fãa Wẽnnaam sẽn wilg a Moyiiz ne a Aarõ. Yʋn-sʋka, Soaala-Wẽnd kʋʋ sẽn yaa bi-rẽeng fãa Ezipt tẽnga: dĩma bi-rẽeng sẽn da na n led a ba a zaoorẽ, wala yem-daada kom-dẽems. Yɩɩ woto me ne rũmsã. Ezipt dĩma ne a poorẽ dãmba la Ezipt buuda neb fãa nekame. Kɛleng kãseng n kelme, tɩ b zak ba a ye pa zĩnd tɩ kũum pa ki a pʋgẽ ye. Dĩma boola a Moyiiz ne a Aarõ tɩ zĩig nan pa yẽeg ye. A yeel-b lame: «Kẽng-y n tɩ waoog y Soaala-Wẽndã wala y sẽn kosã. La wala y sẽn kosã, loog-y ne y rũmsi, bɛd la bõonego la y tak y Wẽnda bark m zugu.» Ezipt nebã, b toore, n da tusd Israyɛl kamba tɩ b ning pãng n yi b tẽngẽ tɩ b ra ki ye. Neba yiime; b baoo lagd niyns sẽn tar n wẽed burã n wʋk b zoma sẽn nan ka paam n mikã n sẽb ne futu n tʋk n looge. Israyɛl kamb maana wala a Moyiiz sẽn da yeele, n kos Ezipt rãmba fan teedo, sẽn dõog ne sãnem bɩ ne wanzurf la b kos-b-la fut n paase. Wẽnnaam kõ Ezipt rãmb yam sõngo la b sak n penga b teedã. Woto me la Israyɛl paam n loog ne Ezipt rãmb paoongo. Israyɛl kamba yii Ramsɛs n tees Sukot. B da taa neb tus kobs-yoobe. Sõda rapa bala, ka paas b zak rãmb ye. Yɩɩ zãma kãseng n pʋg-ba, n paas rũmsi, bɛd la bõonego, ka tɛka. B yãka zoma sẽn wer Ezipt tẽngã n dõos miisdu. Zoma ka paam n wuk ye. B sẽn dig-b tɩ b yi ne yãgbo b ka paam n bao sor dɩɩb ye. Israyɛl kamb zĩnda Ezipt tẽng yʋʋm kobs-naas la pis-tã, n na n yaool n wa looge. Yɩɩ kobs-naas la pis-tã wã baasg raare, ra-kãseng raare, la Soaala yiis b neba bal-bal Ezipt tẽnga. La Wẽnnaam nif sẽn pa mum yʋn-kãng tɩ Israyɛl kamba paam n loogã, togame tɩ Israyɛl kamba me bas gõeem yʋn-kãng tẽegr yĩnga, n waoog Soaala-Wẽnd la na n yɩɩ woto zamaan sẽn wate. Soaala-Wẽnd yeela a Moyiiz ne a Aarõ: «Noy-niyns sẽn get tẽegra raare la woto: Sãan ba a ye ka tog n naag-y ye. Sã n ya ned f sẽn da ne ligdi, yẽ soab tõe n naagame, a yee n kẽe bãongo. Ned sã n nok foom bɩ a sã n tʋmdame n deegd ligdi, yẽ soab ka tõe n naag n dɩ kibsa ye. Zak fãa pʋgẽ, yaa roog a ye tãa pʋgẽ la b na n dɩ tẽegra rɩɩbo. Nem-võr meng ka tõe n yi ro-kãng pʋg ye. Kõbr ba a ye me ka wekd ye. Yaa Israyɛl zãma wã fãa n tog n maan tẽegra raare. Sãan sã n be y tẽngẽ t'a me rat n tẽeg raarã, n waoog Wẽnnaam, bɩ rao fãa sẽn be a zakẽ, deng n kẽ bãongo. Wakat kãnga a tõeeme t'a lebga wa tẽnga biiga. La sẽn ka kẽ-a bãong ka tõe n naag ye. Noora yaa no-yɛnga, sãamba la tẽnga dãmba yĩnga.» Israyɛl kamb sak n maana wa Wẽnnaam sẽn togs a Moyiiz ne a Aarõ. Yaa baraar meng la Soaala-Wẽnd yiis Israyɛl kamba, b tãb-biis la b rũms Ezipt tẽnga. Wẽnnaam yeela a Moyiiz woto: «Kõ maam pag pipi biig fãa sẽn ya raoa, n dog Israyɛl tẽn-peelmẽ, tɩ m sooge. Kom-dibli wã, maam n na n sooge; na n yɩɩ boto me ne rũmsã kom-dẽemse.» A Moyiiz yeela nebã: «Tẽeg-y daar ninga yãmb sẽn yi Ezipt, y yembd tẽnga. Wẽnd pãng n sõng-y tɩ y paam n yi; daara tẽegr daare, bɩ y da rɩ bur sẽn ning bɩll ye. Y yita Ezipt tẽng rũnna, Abib kiuugu, bõn-bɩʋng kiuugu. Soaala-Wẽnd sã n wa kẽes yãmb Kanaã rãmba, Ititse, Amoritse, Ivitse la Zebuzitsa tẽngẽ, tẽng ning b sẽn kãab y ba rãmba, tẽng sẽn zoet bĩisim la sɩɩdo, y na vẽ ne bur sẽn ning bɩll rɩɩbo, kiuug kãnga pʋgẽ. Dasem a yopoe tõre, y kõn sɩɩs bur sẽn ning bɩll ye la a yopoe daarã, y na maan kibs n waoog Naaba-Wẽnde. Dɩlla yaa dasem a yopoe tõre la y ka na n dɩ bur sẽn ning bɩlle. Dasem a yopoe pʋgẽ, b kõn yãend-a f zakẽ, b kõn yãend-a tẽnga pʋgẽ ye. Badaare y na togs y kamba woto: ‹Wẽnd sẽn maan tõnd neere n yiis-d Ezipt tẽnga la d tẽegda.› Yeel-y-b tɩ bura sẽn ka ning bɩllã yaa tẽegre wa wiifu sẽn kɩ kanga bɩ rĩiri. A na tẽeg-y tɩ y kils Soaala-Wẽnd tɩ yaa bãmb n yiis-y ne pãng Ezipt tẽnga. F na reeg no-kãnga yʋʋmd-yʋʋmd fãa, a wakato. Wẽnnaam sã n wa kẽes foo Kanaã tẽnga wala b sẽn kãab foo ne f yaab rãmba, b sã n wa pids b kãabgã, f na kõ Soaala-Wẽnd, pag fãa pipi bi-ribla la rũng fãa pipi bi-raoogo; Sẽn ya raoogo la pipi biig fãa, yaa Wẽnd n so. Sã n ya bõn-dibla, f na bao pe-bil n teke. F sã n ka rat n teke bɩ f wẽ a kãarã n wãag. F tog n bao bũmb n ledg bi-ribl fãa zĩigẽ. F ka teke, Wẽnd n so. La beoog raarã, f biiga sã n wa sok fo: ‹Rog-n-mik kãnga võor yaa bõe?› F na yeel-a: ‹Yaa Wẽnnaam pãnga sẽn tõe bũmb fãa wã n yiis tõnd Ezipt tẽnga yembdẽ. Dĩma sẽn da ka rat tɩ tõnd loogã, Soaala-Wẽnd kʋʋ Ezipt kom-dẽemsa fãa: yɩɩ ninsaalba la rũmsa kom-dẽemse. Yaa rẽ yĩng la sã m ya rũnga, m kʋʋda a pipi biig sẽn ya raoogo; sã n ya ninsaala, rũng la m baood n ledg a zĩigẽ n kʋ.› Soaala n tʋm b pãng tʋʋma n yiis tõnd Ezipt tẽnga, la rẽ na n yɩɩ tẽegr wa wiifu sẽn kɩ f kang bɩ f rĩirẽ.» Ezipt dĩma basa Israyɛl kamb tɩ b looge. Wẽnd yaool n ka sak tɩ b rɩk Kanaã tẽnga sor ye; yẽnda n yaool n da ya tɩrga. Wẽnnaam da yeela b menga: B sã n yãg n sɩng zaba ne b bɛɛbã sẽn ka tɛkã, b wat n basa raood n leb Ezipt tẽnga. Yaa rẽ yĩng la b kɩt tɩ b rɩk soe gõdem-gõdem n tees we-raoogã la Rudum Mogre. Israyɛl kamba sẽn yi Ezipt da pa kẽnd yaar ye, b tonga wa tãb-biis sẽn dabd zabre. A Moyiiz tẽeg n wʋka a Zozɛf kõaba; a Zozɛf sɩd da yeela a saam-biisã: «Wẽnnaam na n wa ges-y lame la wẽen-y tɩ y na zɩ m kõabã.» Israyɛl kamba yika Sukot n wa yals Etam, we-raooga noore. Naaba-Wẽnd ra lʋɩta b taoore. Wĩntoogo, da yaa sawadgo, n wilgd-b sore, la yʋngo yaa vẽenem n tilgdi, n vẽnegd b sore la woto, wĩntoog bɩ yʋngo, yaa kẽnd bala. Sawadga ka viigd wĩntoog bada, la yʋngo vẽenema n deegd a zĩiga. Wĩntoog wala yʋngo, sora ra vẽnega b taoore n dɩga. Soaala-Wẽnd goma ne a Moyiiz woto: «Yeel Israyɛl kamba tɩ b lɛɛg n wa wẽ b sika Pi-Ayirot, Migdol la mogra sʋka, n get Baal-Sefõ b taoore. Yaa be, mogra noorẽ, la y na n yaas. Ezipt dĩma na n yeela a sũurẽ: ‹Israyɛl kamba taa we-raoogẽ n ka le mi b goabg la b rɩtg ye, tɩ we-raooga na n dɩ-ba.› M na n kidba dĩma sũuri t'a yik n pʋg yãmba la m na tʋm tʋʋmd sẽn na n wa ne m yʋʋra kilsgu. Dĩma ne a tãb-biisa na bãng tɩ maam la y Wẽnde.» Israyɛl deega Soaala-Wẽnd noore. B sẽn wa n wilg Ezipt dĩma tɩ Israyɛl kamba loogame, yẽ ne a poorẽ dãmba sũur ka yɩ noog ye. B yeelame: «Tõnd maana a wãna n ka na n zã Israyɛl kamba wa yem-daado n bas-b tɩ b looge?» Dĩma kɩtame tɩ b sog a bilim-bilma wiidi, t'a yi ne a tãb-biisi. A yii ne bilim-bilm kobs-yoob sẽn da ya sõma n yɩɩd b taaba, a yii ne Ezipt tẽng bilim-bilm fãa la yaa neb sẽn mi weoofo n da zãad-ba. Wẽnnaam kidba dĩma sũuri t'a yik n na n babs a Israyɛl sẽn da loog ne yẽesem. Ezipt rãmbã, dĩma wiidi, bilim-bilm, wed-dʋʋdba, tãb-biisi, fãa pʋg-b lame n ta b sikã, mogra noorẽ, be la Pi-Ayirot ne Baal-Sefõ tot taaba. Israyɛl kamba gesame la b yãee Ezipt rãmba sẽn zoet n pʋgd-ba tɩ rabeem kãseng yõk-ba, tɩ b sɩng n kaasd ne Soaala. B yeela a Moyiiz: «Yaad n sɛ Ezipt tẽng bɩ bõe tɩ f tall-d tɩ d wa ki we-raoogẽ? Ezipt tẽng yiiba yõoda la bʋgo? Tõnd da ka pĩnd n yeel foom Ezipt tẽng bɩ: Bas-d tɩ d tʋm Ezipt rãmba yĩnga tɩ rẽ n são d sẽn na n ki we-raoogẽ!» Dẽ la a Moyiiz yeel-ba: «Yiis-y rabeem buud fãa y sũurẽ, da bas-y raood ye, y na n yãee Naaba-Wẽnd sẽn na n maan bũmb ninga n fãag yãmb dũnna raarã. Bãng-y tɩ y sẽn ne Ezipt rãmba dũnna, y kõn le yãend-b bada. Soaala-Wẽnd na n zaba yãmb zĩigẽ, yãmb tek yaa gesg bala, y kõn maan bũmb n paas ye.» Soaala-Wẽnd yeela a Moyiiz: «Bõe yĩng tɩ f kelemd-m woto? Yeel Israyɛl kamba tɩ b le dɩk sore. Fo yee n zẽk f dasaarã, zẽk f nug mogra zug, wẽ-a ne rasaarã t'a welg a yiibu, tɩ Israyɛl kamba loog sʋka tɩ b naoor meng ka madg ye. M na n kidba Ezipt neba sũuri la b na n kẽeme n pʋg yãmba la m na n tʋma raood ne dĩma, ne a tãb-biisã, ne a bilim-bilm, ne a wed-dʋʋdbã. Woto Ezipt rãmb na bãng tɩ maam la y Wẽnnaam, m sã n maan daood n tõog dĩma ne a tãb-biisã, ne a bilim-bilma, ne a wed-dʋʋdbã.» Wẽnd malɛka sẽn da kẽnd Israyɛl kamba taoor teema zĩig n wa poorẽ. Sawadga me leba poorẽ n yaase. A tɩ yalsa Ezipt la Israyɛl tãb-biisa sʋka n maan lik sẽn ya lik menga. Zĩig sẽn waa n yẽege, b yãendame tɩ b pa tol n kolg taab yʋnga tõr ye. A Moyiiz tẽega a nug mogra zugu. Yʋnga tõre Soaala-Wẽnd kɩtame tɩ yaang sob-raoog fʋʋs mogrã n kʋɩɩs a kooma; kooma yalsa goabg la rɩtgo, n bas sʋka koɛɛnga. Israyɛl kamba dʋʋga mogra nao-koɛɛnga, b kẽna sʋka, tɩ koom yɛs wa lalga, b rɩtgo la b goabga. Ezipt sɩnga pʋgbo; dĩma, a bilim-bilma, a wed-dʋʋdba, fãa kẽeme n pʋgda, n wa ta sʋka. Beoog sẽn waa n kolg vẽegre Soaala-Wẽnd zĩnda sawatẽ wã n ges Ezipt tãb-biisã n kɩt tɩ bũmb fãa lebg zũngu. B gɩmba b bilim-bilma karse tɩ kẽnd lebg nimbãanega; Ezipt rãmb kelmame: «D zoe la d bas Israyɛl kamba tɩ Soaala sõngd-b lame n bas Ezipt rãmba.» Soaala-Wẽnd yeela a Moyiiz: «Tẽeg f nug mogra zugu tɩ kooma lɛɛg n wa seg Ezipt rãmba ne b bilim-bilma la b wed-dʋʋdbã.» A Moyiiz tẽega a nugu, la zĩig sẽn waa n yẽegdẽ, kooma leba a zĩigẽ. A sega Ezipt kamba sẽn da lɛɛg n zoetẽ n menes-b zãnga. Kooma waa n dɩɩ bilim-bilma, wed-dʋʋdbã. Dĩma tãb-biisa sẽn da pʋgdã, ba a ye ka tõog n põs ye. Sa n ya a Israyɛl kambã, bãmb paamame n dʋʋg nao-koɛɛnga, tɩ koom yɛs wa lalg b goabg la rɩtgo. Badaare Wẽnd fãag-b-la Ezipt rãmb nusẽ. A Israyɛl yãee Ezipt rãmba sẽn ki n dʋr mogra noore. A Israyɛl yãee ne a nifu, bõn-bãnd ning Soaala-Wẽnd sẽn maane n wã Ezipt rãmb zãnga. A Israyɛl zoe Soaala-Wẽnde, a tẽe Naaba-Wẽnd la b tʋʋm-tʋmd a Moyiiz. A Moyiiz ne Israyɛl kamba naaga taab n yɩɩl yɩɩn kãnga n na n pẽg Soaala-Wẽnd. Ad-b sẽn yeele: M kilsda Naaba-Wẽnde tɩ b tʋma tʋʋm bãnde. B sẽn tus wed-dʋʋd ne a weefo yɩɩ koomẽ, faoo! M pãnga la m ziirã, yaa yãmba, m Soaala. Yãmb n yɩ m Fãagda, yãmb la Wẽnd tɩ m na n pẽg yã, yãmb la m yaab rãmb Wẽnde tɩ m na kils yã. Soaala yaa Tãnsoaba, Naaba-Wẽnd la b yʋʋre. Dĩma bilim-bilm ne a tãb-biisi, fãa loba koomẽ, faoo! Wed-kɩɩm mitba gilli Rudum Mogr pa kees ba zoobgo. Kooma lim-b-la zãnga, B lisa bõra, wala kug-sĩdma. Soaala, y nug rɩtgã ka solg a pãng ye, y nug rɩtgã, Soaala n fẽd bɛɛba zutu wa noaba. Y sẽn yik n yals y naoor zugu y fabsa bɛɛba tẽnga, y sẽn puug y sũuri, a bugma rɩ-b-la wa moogo. Wẽnd sẽn tĩs b tĩsga, koom sũu taaba, koom yalsa a meng wa lalga, Kooma taa ko-sʋka, n ka wa baafo. Bɛ wã ra yetame: M sẽn digi, m pa yõke, la m sẽn yõk na lebg m pʋɩɩre! Ka rɩɩb la m na n dɩ m yam? Ya m ta n wõog m sʋʋga ya m nug tʋk n looge! Mik sobg la Soaala na n fʋʋse tɩ mogra lɛɛg n pil-b wa rebre, Mik b na n lisa wa namdo la ko-vɛlga ka na n kees bũmb ye. Yãmb ka be taar ye, Soaala! Ãnda n zem yãmb ne sõmblem? Ãnda n tõe tʋʋm-bãn wa yãmba? Ãnda n tõe n pẽg wa sẽn segde, sẽn ka vʋʋsda ne tʋm tɩ ninsaal yãend n pĩ a noorã? Yãmb sẽn tees bɛɛba ne y nugu, la tẽnga sẽn sɩng b velbo. Y pidsa y kãoobgo y sẽn da kãab y buudu; y tall-a-la ne pãnga n tɩ kẽes y zag sõngẽ. Dũni rãmb wʋmame n lɛɛg n zĩ ne yɩɩre. Ad-y Filisti rãmb digimda waoodo, tɩ Edom dĩm dãmb saood kalwaare. Moab na-komse la Kanaã zãng fãa gilli lebga rigbu la yɩɩre. B yɛɛsa b rabeem yɛɛsgo n tiig n lebg mugsi n tiig n lebg wa kugri, tɩ yãmb neba lood b loogre, Soaala, tɩ zooda kamb kẽnd ka mi tadgre. Y soolma rãmba, Soaala, ya y tãnga zug la y rʋʋs-ba, be la b rʋ n na n zĩnd n kaoose Yaa zĩ-kãng la y segl y meng yĩnga, Be la y yãk y waoogr zĩiga tɩ b na n ti b rot be. Ro-sõng la y nuga ti n kõ-b be Ro-kãng pʋgẽ la b na n waoog yã. Soaala soog naam zamaan ne zamaana! Ezipt dĩma weef kẽe mogrã ne a bilim-bilm, ne a wed-dʋʋdba, tɩ Naaba-Wẽnd kɩt tɩ kooma seg-ba. Sã n yaa Israyɛl kambã, bãmb yaool n taba tẽn-koɛɛng n looge. Bãngd poaka, a Miriyam, a Aarõ tão, yika ne a gãngão-gilga. Pagb a taaba me yika ne b rẽnda n sigl saooga, t'a Miriyam na n pʋd yɩɩn kãnga: D yɩɩl n kils Wẽnnaam tɩ b tʋma raoodo, weefã ne a wed-dʋʋdã, b tusa fãa n lub koomẽ! A Moyiiz kɩtame t'a neba yik mogra noor n dig Sur zĩ-peen-daagẽ; b kẽna dasem a tã n pa tol n tuk koom ye. B sẽn ta zĩig a ye, b pa tõog n yũ be kooma ye t'a da yaa toog lig-ligi: pʋs n yaa rẽ yĩng la b boond tẽnga tɩ Mara. Neba guglma ne a Moyiiz la b yeelame: «Bõe la d na n yũ?» A Moyiiz yõka Soaala-Wẽnd sɛɛga la b wilg-a-la tɩɩg buud a ye t'a na n kʋʋg a raoogo. A sẽn dɩk-a n los koomẽ, kooma lebga noogo. Be la Soaala-Wẽnd wilg a Israyɛl sẽn kis la sẽn gɩdge, be la b kõ-a noore, beene me la b fɛɛs a sũuri. B yeela woto: «Fo sã n kelg Wẽnd gomde, fo sã n maan sẽn ya neer b nifẽ, fo sã n deeg b noya, fo sã n maan b raabo, m kõn sak tɩ yel-beed niyns sẽn nams Ezipt rãmba ta foo ye, tɩ maam, Naaba-Wẽnd, la bãag fãa tɩɩm.» B taa Elim. Buls piig la a yi, n paas koms pisopoe, n da be be, tɩ b sig n gãand be, kooma noore. A Israyɛl kamba yii Elim n ta Sin zĩ-peen-daagẽ. Sin bee Elim ne Sinayi tẽnsʋka. B taa be b sẽn yi Ezipt tẽng tɩ kiuug la rasem piig la a nu. Israyɛl kamb yika we-raoogẽ wã n guglem ne a Moyiiz la a Aarõ. B yeel-b lame: «Bõe tɩ y ka bas tɩ Soaala-Wẽnd kʋ tõnd Ezipt tẽnga, nemda rʋgd sẽn da waa n dɩg d taoore tɩ d kaood burã d yam? Bõe tɩ yamb tall zãma a woto fãa n wa zĩ-peen-daagẽ tɩ kom na n kʋ-ba?» Dẽ la Wẽnnaam yeel a Moyiiz: «M na n kɩtame tɩ rɩɩb yi yĩngr n dʋʋg wa saaga tɩ y rɩ. Beoog sẽn vẽeg fãa neba na yi n wʋk sẽn sekd-b daar a ye dɩɩbo. M na n maana woto n ges b sã n na n sakame bɩ b sã n pa na n sak n deeg m noore. Daar a yoob soabã b na n le wʋkame n segl b dɩɩbo la badaare a na n yɩɩga dasem kam dẽnna naoor a yiibu.» A Moyiiz ne a Aarõ goma ne zãma wã woto: «Zaabrã y na bãng tɩ yaa Soaala-Wẽnd n yiis yãmb Ezipt tẽnga. Beoog yibeoogo Soaala-Wẽnd na n puk-y-la b ziiri. B wʋma y sẽn tar gugleng ne bãmba. Sã n ya tõndo, d neeme tɩ y sẽn tar gugleng ne tõnda ka be zĩig ye.» A Moyiiz da rat n yeelame: «Y na yãend Soaala ziiri, b sã n wa kõ yãmb nemd zaabre, n kõ-y rɩɩb yibeoog tɩ y rɩ n tɩge, tɩ y guglma ne Soaala la b wʋmame. Tõnd yaa bõe tɩ y na n guglem ne tõndo, yaa ne bãmb la y guglemda.» A Moyiiz yeela a Aarõ: «Kõ Israyɛl zãma wã no-kãnga: Wa-y Wẽnnaam taoore tɩ b wʋma y guglengã.» A Aarõ sẽn waa n gomd ne-bã, b wẽnemda b nens n tees zĩ-peen-daagã la b yãee Wẽnd ziirã sẽn puk yĩngri, sawadgẽ. Wẽnnaam goma ne a Moyiiz la ad-b sẽn yeel-a: «M wʋma Israyɛl kamba guglengu. Dẽ yĩnga yeel-ba: Zĩig sã n wa sobge y na wãb nemdo la yibeoogo y na tɩg rɩɩbo la woto y na bãng tɩ maam a Naaba-Wẽnd la yãmb Wẽnnaam.» Zĩig sẽn sɩd sobge pitr-lʋɩɩs dʋʋgame n pid a Israyɛl sẽn da wẽ a sika zĩig ningã la vẽkẽmbeoogo meenem n dʋʋg n gilgi. Meenema sẽn waa n mesge, b yãee bõn-bõonego sẽn ya bɛɛl-bɛɛla, sẽn pelg weooga wa zom, wa fʋl-fʋl-bi. Israyɛl kamb yãee-a lame la b sogsa taaba: Woto yaa bõe? B da ka mi sẽn ya bũmb ning ye. T'a Moyiiz leok-ba: «Wã la rɩɩb ning Wẽnd sẽn kõt yãmbã. La ad noor ning b sẽn kõt-y rɩ-kãnga poorẽ: Ned kam fãa wʋk sẽn tog n sek-a. Ned fãa wamde. F roog ned ba a ye ra kong a rẽnd ye. Bɩ ned kam fãa wʋk sẽn na n sek a roog rãmb fãa.» A Israyɛl vẽega beoogo n maan wa Wẽnd sẽn yeelã. Kẽer dẽnd da yaa wʋsgo, tɩ kẽer dẽn ya bilfu. B sã n yaool n dɩk magba wamde n na n mage, fãa zengda taaba. Sẽn wʋk-b wʋsga dẽnd boogdame, sẽn wʋk-b bilfa dẽnd fɩɩgdame. Ned kam fãa ra paamda sẽn sekd a rɩɩbo. A Moyiiz yeel-b lame: «Ned ba a ye da saag n bĩng beoog yĩng ye.» Kẽer ka kelg ye la b yãkame n bĩng beoog yĩnga. Bãng-y tɩ sẽn keesã, zũnzũy kẽe-a lame la a põogame n lebg yũug zãng t'a Moyiiz sũur puug. Dɩlla beoog-beoog fãa ned kam da wʋkda wala a sẽn tõe n dɩ tɛka; wĩndg sã n zẽke a boogdame. Daar a yoob soabã b wʋka dasem kam fãa dẽnna naoor a yi: ned kam fãa wam a yi. Sagsa kãsem-dãmb waa n togsa a Moyiiz. T'a na n yeel-ba: «Soaala-Wẽnd n sɩd yeel woto: Beoog yaa vʋʋsg daare. Yaa Soaala-Wẽnd daare. Ning-y wʋngẽ y sẽn dat n ning be, la rʋg-y y sẽn dat n dʋge. Bas-y sẽn kella fãa beoog yĩnga.» B bĩnga sẽn keesã beoog yĩnga, wala a Moyiiz sẽn yeelã la bũmb ka põog n lebg yũug ye, bũmb ka kẽ zũnzũy ye. A Moyiiz yeel-b-la baraare: «Yãmb dɩɩb la woto rũnna, yaa vʋʋsg daare, yaa Wẽnnaam daare. Rũnna bũmb ka na dʋʋg pʋʋgẽ ye. Dasem a yoobã, y tõe n wʋk-a lame la raar a yopoe soaba, vʋʋsga raarã, a kõn dʋʋg ye.» Daar a yopoe soaba, neb kẽer baas n yiime n na n tɩ wʋke, la b pa yãend bũmb ye. Soaala-Wẽnd yeela a Moyiiz: «Yãmb na n zãgsa m noora reegr n ta da-bʋre? Ade, m kõo yãmb vʋʋsg noore. M kɩtame tɩ daar a yoob soaba bɩ y paamd sẽn sekd dasem a yiib dɩɩbo. Dẽ yĩng bɩ ned kam fãa pa a zĩigẽ; a yopoe daarã bɩ ned da yi ye.» Dẽ tɛka b pa le saag n tʋm vʋʋsga daar ye. Rɩɩba sẽn da yit yĩngr n dʋʋgd tẽngã, Israyɛl kamba ra sokda taaba: «Bõe la wã, bõe la woto?» B ra ka mi a sẽn ya-la. A ra wẽnda siili, n ya pɛɛlga, n noom wa miisd sẽn dõos ne sɩɩdo. A Moyiiz yeelame: «Ad Soaala-Wẽnd sẽn yals bũmb ninga: Bao-y wamde n wʋk rɩɩbã n pids-a, n bao zĩig n bĩng-a y kamb yĩnga, woto b na yãe rɩɩb ning m sẽn tall n dɩlg yãmb we-raoogẽ wã, m sẽn waa n yiis-y Ezipt tẽnga.» A Moyiiz yeela a Aarõ: «Bao rubla n pids-a ne rɩɩbã n tɩ rɩgl-a Soaala-Wẽnd taoore, y yagensa yĩnga.» A Aarõ baoo rubla, n pids ne rɩɩbã, wala Soaala-Wẽnd sẽn yeelã la b bĩng-a-la ne kuga walsã. Yɩɩ yʋʋm pis-naas pʋgẽ la Israyɛl kamba paam dɩ-kãnga n tãag b sẽn na n yi we-raoogẽ n kẽ tẽngẽ. B da rɩtame la b sokd b mens tɩ bõe la wã, n tãag Kanaã rãmb toaagẽ. Wamda sẽn da magd ned kam fãa pʋɩɩrã, yaa bãmb piig n da pit peoogo. Israyɛl kamba deega Soaala-Wẽnd noore, b yii Sin weoogã n dig taoore. B taa Refidim n yaas be, la b pa yãend koom n na n yũ ye. Dẽ la b yik zabr ne a Moyiiz: «Kõ-d koom tɩ d yũ!» T'a Moyiiz leok-ba: «Bõe yĩng la y zabd ne maam? Bõe yĩng tɩ y baood Soaala-Wẽnd noore?» Ko-yũuda sẽn da zabd-b yĩnga, b kell n guglma ne a Moyiiz n yetẽ: «Bõe tɩ f yiis-d Ezipt tẽnga? F ratame tɩ ko-yũud kʋ tõnd ne d kamb la d rũms laa?» A Moyiiz yõka Soaala-Wẽnd sɛɛg woto: «Bõe la m na n maan nin-bãmba yĩnga? Kellẽ la bilf bal tɩ b labẽ maam ne kuga.» Tɩ Soaala-Wẽnd yeel a Moyiiz: «Yi ne f nebã, lʋɩ b taoore, foo ne zagsa kãsem-dãmb kẽere; rɩk rasaar ning fo sẽn tall n wẽ kʋɩlgã, rɩk-a n zã f nugẽ la kẽnge. M na n yalsa f taoore, pĩiga zugu, Oreb tãnga. F na n wẽe pĩiga t'a pusg koom tɩ neba paam n yũ.» La yaa boto la a Moyiiz maan kãsem-dãmba taoore. B boola zĩ-kãng tɩ Masa la Meriba, fɛɛsgo la no-baoore, la rẽ yaa b sẽn bao Wẽnd noor zĩ-kãnga la b sẽn fɛɛs Soaala-Wẽnd n na n bãng b sã n beeme bɩ b sã n ka be ne bãmba. Amalɛk waa Refidim n tak zabr ne a Israyɛl. A Moyiiz yeela a Zozuwe: «Bao neb tɩ y yik beoog n tɩ zab ne a Amalɛk. M na dʋʋ n yalsa tãnga zugu la Wẽnd dasaara la m na n zã m nugẽ.» A Zozuwe maana wala a Moyiiz sẽn togs-a; a yi n sega a Amalɛk la rẽ t'a Moyiiz ne a Aarõ la a Ur dʋʋ tãnga zugu. A Moyiiz nusa sã n da zẽk yĩngr fãa, a Israyɛl n da tõe. Nusa sã n sigi yaa a Amalɛk n da tõe. A Moyiiz nusa waa n kiime t'a Aarõ ne a Ur bilim kugr n kõ-a t'a zaond tɩ bãmb yaool n zẽkd a nusã, la woto wĩndig kẽeme tɩ b ket n zãnd yĩngri. A Zozuwe sʋʋga varga a Amalɛk. Wẽnnaam yeela a Moyiiz: «Bao sebr n gʋls yel-kãnga tɩ b ra wa yĩm-a ye la f togs a Zozuwe woto: m na n yẽesa Amalɛk rãmb buud saaga tẽngre.» A Moyiiz mee maan-kugr n pʋd a yʋʋra woto: Soaala-Wẽnd la m tãb-kaoore. La rẽ yaa a sẽn tʋlg n wilgi: «A Amalɛk bao zabre ne Naaba-Wẽnde, bɩ Naaba-Wẽnd kao zabr ne a Amalɛk, zamaan woo zamaana.» Madiã maan-kʋʋd la a Moyiiz rɛɛmba, a Zetro, wʋma Soaala-Wẽnd sẽn maan bũmb ning ne a Moyiiz la b buudu, a Israyɛl. A wʋmame tɩ Wẽnd yiis-b-la Ezipt tẽnga. Dẽ la a babs-a la a waa ne a paga Sefora sẽn da pa Madiã, n paas a kamb a yiibu. Biig a ye yʋʋr la Gersõ, a Sãana, t'a ra yeelame: Yaa tẽn-zẽngẽ la m zoe n tɩ kẽ. Biig a to wã pʋdame tɩ Eliezer, Wẽnd la m sõangda, t'a ra yeelame: M ba rãmb Wẽnd yɩ-la m sõangda la b fãag-m-la ne Ezipt dĩma sʋʋga. Dɩlla a Moyiiz rɛɛmba Zetro ne a kamba la a pag waa n paam-a-la we-raoogẽ wã, b sikẽ, Wẽnd tãnga zugu. A kɩtame tɩ b yeel a Moyiiz: «Ad yaa maam, f rɛɛmba Zetro, n wa n na n ges-fo la m waa ne f pagã la f kamb a yiibã.» A Moyiiz yi n sega a rɛɛmba, n wõgemd a taoore, n mobg-a, n sok taab keelem tɩ b yaool n tũ taab n kẽ roogẽ. A Moyiiz wilga a rɛɛmba Wẽnd sẽn maan ne Ezipt dĩma la a nebã. B sẽn sõng a Israyɛl to-to. A wilga yel-pakr toɛ-toɛ b sẽn seg sor zugu tɩ Wẽnd fãag-ba. A Zetro nooga a sũuri ne Soaala-Wẽnd sẽn maan bũmb ning fãa a Israyɛl yĩnga tɩ b põs Ezipt rãmba. A zẽka a koɛɛga n yeele: «Wẽnnaam paam pẽgre, bãmb sẽn yiis yãmb Ezipt naaba la Ezipt dãmb nugẽ, bãmb sẽn yiis yãmb Ezipt yembdẽ. Marsã m miime tɩ Israyɛl Wẽnnaam n yɩɩd Ezipt wẽn-naandsã ne pãnga, ba wẽn-naandsa sũra sẽn waa n puug zãng ne a Israyɛl.» A Zetro, a Moyiiz rɛɛmba, kʋ yũ-noog maoongo la maand a taaba. A Aarõ la a Israyɛl nin-kẽemba waa n naaga ne a Zetro tɩ b rɩ, Soaala-Wẽnd taoore. Beoog sẽn vẽege, a Moyiiz zĩndame n na n kao Israyɛl kamba bʋʋdo. Neba yaasa yĩngr, yibeoogo n ta zaabre, tɩ pa sɛ ye. A Moyiiz rɛɛmba yãee namsg ninga a Moyiiz sẽn namsd ne a nebã la a sok-a lame: «Fo welgda f neba koees wãn-wãna? Bõe tɩ fo ya f ye? Neba ka labsa? Yaa bõe tɩ bʋʋda bʋʋd yibeoog n tat zaabre?» T'a Moyiiz leoke: «Nebã n wat m nengẽ n dat Soaala-Wẽnd leokre. B sã n yik no-koeemd ne taaba, yaa mam nengẽ la b wata tɩ m na n wilg ned kam fãa a bʋʋm bɩ a kongre la m wilg-b Soaala-Wẽnd sẽn date, Soaala-Wẽnd sẽn yalse.» A Moyiiz rɛɛmba leok-a lame: «Fo sẽn maand woto wã ka tog ye! Fo sɛɛsda f pãnga la f lakda neba yam. Tʋʋmda yɩɩda f pãnga, f ka tõe n tʋm f yembre tɩ yɩ sõmb ye. Kelg saglg ning m sẽn na n sagend-fã, tɩ woto Soaala-Wẽnd na sõng-fo. Fo meng f toore n na n ges sẽn lam neba ne Wẽnde, n taas-b Soaala koɛɛga. Zãms-b Soaala-Wẽnd noya, wilg-b sor ning b sẽn na n dɩke, wilg-b b sẽn na n maan to-to. Ges zãma wã sʋka n bao neba, neb sẽn tar dabaare, neb sẽn zoet Wẽnde, neb sẽn ya pʋ-peen-dãmb n kõ b naam. Kẽer na n dɩɩ naam neb tusr zugu, kẽer neb koabga, kẽer neb pis-nu, kẽer piiga. Bãmb na n zĩnda neba sʋka wakat fãa, n kao bʋʋdo; b na n taasa foom koe-bɛdã; sã n ya koe-bõonesã, bãmb na welg rẽnd b toore. B na naag foom n zɩ zɩɩbã t'a tiig n lebg faasga. F sã n maan woto, la sã n sega ne Soaala-Wẽnd daabo, f na tõog n tʋm f tʋʋma la neba me na leb b zagsẽ ne sũ-noogo la laafi.» A Moyiiz tũ-la a rɛɛmba saglse n maan wala a sẽn togsã. A tũusa Israyɛl kamb sʋka neb sẽn tar dabaare la a kõ-b-la naam, naam sẽn dɩt neb tusri zugu, bɩ neb koabga, bɩ neb pis-nu, bɩ neb piig zugu. Wakat buud fãa b ra bee neba sʋk n kaood bʋʋdo. Koe-bɛda bal la b ra wat ne a Moyiiz taoore; bãmb mens n da welgd koe-bõonesã. A Moyiiz basa a rɛɛmba t'a lebe; a sɩd le rɩka a tẽng sore. Israyɛl kamba sẽn waa n ta Sinayi zĩ-peen-daagẽ dẽ tɩ yaa kiis a tã la b yi Ezipt tẽnga. B yii Refidim n dɩk b sore la b sẽn ta Sinayi zĩ-peen-daagẽ, b yalsa be. A Israyɛl sika da tii tãngã pennẽ. A Moyiiz dʋʋ tãnga zug n bʋʋg Soaala-Wẽnde. Tãnga zugu, Soaala boola a Moyiiz n yeel-a: «Ad-f sẽn na n gom to-to ne a Zakoob kamba, ad-f sẽn na togs bũmb ning a Zakoob roogo. Y meng y toor yãenda m sẽn maan Ezipt rãmba bũmb ninga. Y yãeeme tɩ m dɩka yãmb wala sɩlg, n kolg m menga. Marsã, yãmb sã n deeg m noore, y sa n sak m zoodã, m na ges-y wala m kamba, dũni wã pʋgẽ, la dũni wã, maam n so-a zãnga. M na ges-y wa maan-kʋʋdb buudu, wala buud sẽn welg toor mam yĩnga. Yaa woto la f na n togs Israyɛl kamba.» A Moyiiz lɛɛg n sigame; a tigsa nin-kẽembã n taas Wẽnd koɛɛga. Zãma wã naaga taab n yɩ sũur a ye, n yeele: «Soaala sẽn togs bũmb ninga fãa, tõnd deegame.» A Moyiiz taasa Naaba-Wẽnd b leokrã. Soaala-Wẽnd yeela a Moyiiz: «M na n zomba sawadg sẽn tagme n wa f nengẽ tɩ m sã n gomd ne foo, bɩ neba wʋmd m koɛɛga, tɩ b yama kẽ fo me zãnga.» A Moyiiz n da reesd zãma wã koɛɛg n taas Soaala-Wẽnde. Soaala-Wẽnd le yeela a Moyiiz: «Kos neba tɩ b yɩlg b mense rũnna la beoog yĩnga, yeel-b tɩ b pek b futu. Yeel-b tɩ b gũ-m da-yɩta tɩ da-yɩta m na n siga tãnga zugu la b fãa nif na n yãend-m lame. Bao bũmb n pɩk n gũbg tãngã la f yeele: ned ba a ye da saag n dʋ tãnga ye, ned ba a ye da saag n sɩɩs tãnga sɛɛg ye. Ned ninga sẽn sɩɩsa tãnga bɩ b kʋ-a. Bãng tɩ pa nug n na n sɩɩs a soab ye, na n yɩɩ kug bɩ pɛɛma. Yaa rũnga, yaa ninsaala, a pa tog n le vɩɩnd ye. Baorga sã n peebe, neb kẽer bala n na n dʋ tãngã.» A Moyiiz sigame n tɩ yeel neba tɩ b segl b mense. A yeela nebã tɩ b gũ da-yɩten-daare la b ra kolg b pagb ye. Da-yɩten-daar yibeoogo, b yãee sawad sableg tãnga zugu. B yãee saag sẽn yãge la b wʋma a sẽn tãse. B wʋma bʋʋr sẽn sãt wʋsgo, tõntõog peebgo, tɩ ned kam fãa sɩng rigbu. A Moyiiz yiisa nebã tɩ b seg Soaala-Wẽnde la b kolga tãnga sɛɛga. Sinayi tãnga ra nukda bug-zõose tɩ yaa bugum pʋga la Soaala da sig yã. Bug-zõosa da nukda wala wʋng dẽnna la tãnga da rimda wʋsgo. Tõntõoga bʋʋra ra yãngdame n paasdẽ; a Moyiiz ra gomdame tɩ Soaala-Wẽnd leokd-a ne sa-tãse. Sinayi tãnga zug-tẽnsʋka la b sig yã. B yeela a Moyiiz t'a me rʋ tãnga zug-tẽnsʋka, la a rʋʋme. Soaala Wẽnd yeela a Moyiiz: «Lɛɛg n sig n yeel nebã tɩ b ra gãndg toaagã n wa ges Soaala-Wẽnde, tɩ b sã n gãndge, wʋsg na kiime. Ba maan-kʋʋdba sẽn minim Soaala-Wẽnd pẽnegrã, b modg n yɩlg b mense n da wa tak Soaala-Wẽnd beem b zug ye.» Dẽ la a Moyiiz leok Soaala: «Neba kõn saag n dʋ Sinayi tãnga ye. Yãmb da reng n wilg-b lame tɩ b da pẽneg tãnga ye la yãmb kɩtame tɩ b ning toaag n welg-a toore.» La Soaala-Wẽnd yeelame: «Lɛɛg n sigi n tɩ wa ne a Aarõ la yeel nebã la maan-kʋʋdbã tɩ b gũus n da long toaaga n wa paam n pẽneg Soaala-Wẽnd, tɩ b wa yik zabr ne b ye.» A Moyiiz sigame la a kosa nebã tɩ b maan gũusgu. Wẽnnaam yeela a Israyɛl woto: «Yaa maam, f Soaala, n yiis foo Ezipt tẽnga, f yembd tẽnga. Da lʋɩɩs wẽnd ba a ye m taoor ye, da waoog wẽnd a to. Da mams bũmb ba a ye wẽneg n waoog-a ye: a ra yɩ yĩngri, saag zug bũmb ye, a ra yɩ tẽng zug ka bũmb ye, a ra yɩ koomẽ, mogra pʋgẽ bũmb ye. Ra wõgemd bũmb sẽn dõog bɩ sẽn pees taoor ye, da waoog-a ye, tɩ maam, Naaba-Wẽnd la f Soaala. F Wẽnda yaa sũ-ki-neda, b pa rat tɩ b nong bũmb n yɩɩg bãmb ye. B sɩbgda kamb b ba rãmb beegr yĩnga, n sɩbgd yageng a yaab rãmb beegr yĩnga, n sɩbgd yagen-tʋbra-kẽega a yaab rãmb sẽn tugd beem ne maam yĩnga. M nonglma yaool n pʋgda neb ka tɛka sẽn nong-m la sẽn deegd m noya. Da pʋd Soaala, f Wẽnnaama, yʋʋr yaar ye, tɩ b yʋʋra sã n pʋd yaare, b ka tõe n ka sɩbg ye. Tẽeg vʋʋsg daar noor n deeg-a wa noor sẽn ka tõe n kɩɩs ye. Dasem a yoob pʋgẽ, tʋm f tʋʋmde. La daar a yopoe daarã na n yɩɩ vʋʋsg daare, Wẽnnaam yĩnga. Badaare ned ba a ye ka tʋmd ye, f menga wala f f bi-ribla, f bi-pugla, f dakõore, f zak bi-pugla, f rũmsi, sãan sẽn waa n nok-fo. Yɩɩ dasem a yoob pʋgẽ la Wẽnnaam naan yĩngr la tẽnga, la mogre la bũmb niyns fãa sẽn be b pʋgẽ. B vʋʋsa daar a yopoe soaba, yaa rẽ yĩng la Wẽnnaam ning ra-kãng barka, n welg-a toore t'a ya vʋʋsg daare. Waoog f ba la f ma, tɩ Soaala, f Wẽnnaam, paas raarã b sẽn kõ-f, tẽng zugu ka. Da kʋ ned ye. Da yo ye. Da zuk ye. Da rõd f to ye. Da tʋlg f to yir ye, da tʋlg f to pag ye, da tʋlg a dakõor ye, a zak bi-pugl ye, a naafo, a bõanga, da tʋlg bũmb ba a ye a sẽn so ye.» Sa-tãsã, sa-yãgbã, baorga bʋʋrã la tãngã sẽn nukd bug-zõosã kẽesa neba rabeem tɩ b na n leb poorẽ. La b yeela a Moyiiz: «Fo gom ne do tɩ d na wʋme la Wẽnd da gom ne d ye, tɩ ka rẽ d na n kiime.» A Moyiiz leok-b lame: «Bas-y rabeem buud fãa, Wẽnnaam waame n na n bãng bũmb ning sẽn be y sũurẽ; b waa n kẽes-y la rabeem tɩ rabeema zãag-y ne wẽnga.» Neba paa yɩɩga. A Moyiiz bal n da kolg sawadg taokã, Wẽnnaam sẽn da beẽ wã. Soaala-Wẽnd yeela a Moyiiz: «Togs Israyɛl kamba woto: Y mens yãeeme tɩ m zĩnda yĩngr n gom ne yãmba. Ad-y m pa rat tɩ y ges-m wa wẽnd sẽn dõog ne wanzurf bɩ ne sãnem ye. M da yãend b buud y nengẽ ye. F na n dɩka tãndo n me maan-kugri, la yaa yẽ zug la f na n yãk rũms kẽere, bɛd bɩ bõonese, n kʋ yũ-noog maando n yãk kẽere, bɛd bɩ bõonese, n kʋʋ n dɩ, f zak rãmba laafi yĩnga. Zĩig ning fãa m sẽn na n yãk tɩ yɩ m waoogr zĩiga, m na sig be la m na ning-f barka. Sã n ya kug la f rɩkd n na n me maan-kugrã, da pees-b ye tɩ fo sã n pees b ne kutu, peesga yãkda b barka. Da ning maan-kugra teeds ye tɩ f sã n zẽkd f nao n na n dʋ, bɩ f fuuga me ra wa zẽk tɩ loog ye.» Soaala-Wẽnd paasame: «Ad noya a taaba f sẽn na n kõ Israyɛl kambã: Fo sã n da yamba, sẽn ya Ebre buudu, a na n tʋma f yĩng yʋʋm a yoob bala. Yʋʋmd a yopoe soabã, a tõe n loogame, a so-la a menga tɩ ka tũ ne ligd yaoob ye. A sã n wa-la a ye, a kuiisa a ye. A sã n waa ne paga, paga me naagd-a lame n looge. Sã n yaa a zu-soab n kõ a pagã, tɩ paga rog kamba, kom-dibli bɩ kom-pugli, paga ne kamba ya a zu-soaba soolem, a sã n yita, a yita a ye. Yem-daooga sã n yeele: ‹M nonga m zu-soabã ne m pagã la m kambã, m pa na n loog ye,› a zu-soaba leokdame t'a basa yella ne Wẽnde, a na n yalsa yambã n pẽneg a roog kʋɩlenga bɩ a lugri. A na n dɩka pĩim n vʋdg yem-daoogã tʋbre la a na n pa-la a zu-soaba soolmẽ wakat buud fãa. Ned sã n koos a bi-pugla t'a lebg yem-poaka, bi-kãng ka fãagd a meng wa yems a taab ye. A sã n ka ta a zu-soaba yam, t'a zu-soaba yeel t'a pa le rat-a, bɩ b yao n deeg-a. La b ka tõe n zãmb-a n dɩk n koos ne bu-zẽn ye. A sã n da raa bi-puglã a biig yĩnga, a na tũ noora sẽn wilg zak kom-pugli poorẽ. Yem-poaka zu-soaba sã n dɩk pag a to n paase, bũmb ka tog n woog pipi paga nengẽ, wala dɩɩbo, futu la roog pɩɩgr ye. B sã m mong-a bũmb a tãabã, a tõe n loogame tɩ ka tũ ne ligd yaood ye. Ned ning fãa sẽn wẽe a to n kʋ, yẽ soab me tog n kiime. A sã n pa gẽes a bɛ wã n wa paam-a n kʋ, b sã n da ka mi taab tiiri n seg taaba tɩ yõor yãke, b na wilg yẽ soaba zĩig a ye t'a zoe n tɩ solg be. Ned sã n gẽeg a tũud-n-taag bɩ a sã n bẽd-a n paam n kʋ, ba yẽ soab waa n gãd maan-kugrã, bɩ b yõk-a n kʋ. Ned ninga fãa sẽn wẽe a ba bɩ a ma toga ne kũum. Ned sã n yõk a to, n na n soog tɩ b wa bãnge, a koos-a lame bɩ a nan ka paam n koos-a, yẽ soab toga ne kũum. Ned sã n tʋʋs a ba bɩ a ma, bɩ b kʋ yẽ me soaba. Neb sã n yik zabr ne taaba tɩ nin-yend wẽ a to ne kugri bɩ ne nugu, n ka kʋ-a ye, la a pogl-a lame t'a ka tõe n le yi yɩnga, bɩ a tõe n tika rasaar n paam yɩnga, b pa na n kʋ sẽn waa ne sãmpogra ye. La yaa pakre t'a yao bãada bũmbu, a sẽn ka le tõe n bao n kõ a noora yĩnga la a tɩbs-a t'a wa sãoog zãnga. Ned sã n wẽ a yem-daogo bɩ a yem-poaka, ne guugu, tɩ yõor yãke, b tog n kʋʋ yẽ soab me. Sẽn deega wẽeda sã n põse, ba ya daar a ye bɩ dasem a yi, b kõn kʋ a zu-soaba ye, t'a sõda ligd n da-a. Rap a yiib sã n zab taaba, n wa tus tʋtre-pʋg n lub la pʋga ka sãam ye, b na n yaoo paga sɩd sẽn yet tɩ b yao bũmb ninga, kaset dãmba taoore. Kũum sã n ki, yõor n don yõore, tɩ nif don nifu, tɩ yẽnd don yẽnde, tɩ nug don nugu, tɩ naoor don naoore. Sã n yõog bugum, yõogdame n lebse. Yũur n don yũuri, tɩ toog don toogo. Ned sã n wẽ a yem-daoog bɩ a yem-poak n feoog a nifu bɩ a bas-a t'a yembda sɛɛme, a nifa sẽn feooga yĩnga. Yem-daooga bɩ yem-poaka yẽnd sã fɩrge, yembda sɛɛme, zu-soaba sẽn fɩrg a yẽnda yĩnga. Loalg sã n tãag rao bɩ pag n kʋ, b labda loalga ne kuga. B kõn wãb a nemd ye la b ka maand a zu-soaba bũmb ye. Naafa sã n da tãadame t'a soaala mi tiiri n yaool n ka maand gũusgu, a sã n tã n kʋ pag bɩ raoa, b labd-a-la ne kug la b kʋʋda a soaala me. B sã n bas naafa soaalã n ka kʋ, n yeel-a t'a yao, a tog n yao b sẽn saag-a bũmb ning fãa n paam n põse. Sã n ya bi-ribla bɩ bi-pugla la naafa kʋ yã, bɩ b maan wala sẽn zoe n togsã. Sã n yaa yem-daoogo bɩ yem-poaka la naafa kʋ yã, a soaala tog n yaoo zu-soaba kiuug a ye tõr yaoodo. Naafa na n laba ne kuga. Ned sã n tuk bok bɩ bulga n bas-a n ka page, tɩ naf bɩ bõang lʋɩ a pʋgẽ, sẽn tuka bokã bɩ bulgã na n yaoome; a na bao ligd n kɩs rũnga soaala la a soog rũnga sẽn ki wã. Niis sã n zab taab t'a ye ki, b na n koosa nag-vɩɩgã n pʋɩ taab a ligdi. B pʋɩta taab nag-kɩɩnga me. Nag-vɩɩgã soaal sã n da mi t'a naafa yõgdame la a ka gũ-a neere, yaa nag-vɩɩg la a na n dole la a soog rũm-kɩɩngã. Ned sã n zuk loalg bɩ pesgo n tɩ kʋ bɩ n tɩ koose, yaa niis a nu la a na n yao n dol loalgã, la yaa piis a naas la a na n yao n dol pesgã. Ned sã n poog roogo n na n zu, tɩ b paam-a n kʋ, b ka raagd zɩɩm n dol ye. Sã n yaa zĩig sẽn yẽege la b wẽ-a n kʋ, b kʋʋdame n dole. Wagdr buud fãa tog n yao a sẽn zuki, a sã n ka tõe n yao, yẽ meng la b koosd n yao. A sã n ket n tar a sẽn zukã, naafo bɩ bõanga, bɩ rũm-bila, yaa niis a yi bɩ bõeens a yi, bɩ rũm-bõones a yi la a na n yao. Ned sã n tar wãbneg zĩiga n yaool n bas a rũms tɩ b tɩ kẽ ned a to pʋʋgẽ, a na yao wa pʋʋga soab sẽn da saagd yõod ningã ne a pʋʋga bɩ ne a tɩɩsã, yʋʋmd kãnga. Ned sã n yõog moogo tɩ bugma rɩ tuudã n wa long n dɩ kood sẽn wʋr n same, kood sẽn nan ka kẽebe, kood sẽn nan ka bɩ, mo-yõaada tog n yao bugma sẽn sãama. B sã n bobl ned bũmbu, ligd bɩ bũmb a to, tɩ b wa zuki, b sã n yõk wagdrã, b kɩtdame t'a yao a sẽn zukã naoor a yi. B sã n ka paam wagdrã n yõke, sẽn deega bobellã na n taa Wẽnd taoore n wẽen tɩ ka yẽ n dɩk ye. Zãmb sã n maan naaf poorẽ, bɩ bõanga, bɩ rũm-bila, bɩ fuugu, bɩ bũmb a to sẽn meneme poorẽ, tɩ b wa yeele: foo la zãmba soaba, ad bʋʋda kaooda Wẽnd taoore. Sẽn konga bʋʋm Wẽnd taoora yaooda naoor a yi. Ned sã n dɩk a rũng n gũnug ned a to, wala bõanga, naafo, rũm-bila, rũng buud fãa, tɩ rũnga wa ki, bɩ a poglame, bɩ b soos n zuk-a lame, neb a yiibã tata Wẽnd taoore n wẽen ne Wẽnde. Woto b bãngda rũnga gũudã sã n dɩkame, bɩ a sã n ka rɩk a to bũmbu. Rũnga soab sã n deeg t'a yeela sɩda, gũuda ka na n yao bũmb ye. Rũnga sã n zukame t'a pa zãr ne zakã, b tog n yaoo rũnga soaba. Sã n ya we-rũng n yõk-a n zerme, a wat n wilga a sẽn paam n deege la samd ka le ket a zug ye. Ned sã n peng a to rũnga, tɩ rũnga naoor bɩ a karg kaoog, bɩ a kiime, la ka yɩ a soaala nifẽ ye, sẽn penga rũnga tog n yaoome. Rũmga sã n ki a zu-soaba nifẽ, samd ka le ket sẽn peng a soaba zug ye. Rũnga soab sã n da yeele: deeg rũng n tʋmnẽ la f yaood-ma, yaa yaood ning sẽn da sedã la a na kell n deege. Ned sã n belg pa-kuli n yo ne-a, a yaooda ligd la a reegda bi-puglã n maan a paga. Bi-pugla ba sã n zãgs t'a ka na n kõ a bi-pugla, rao wã yaooda ligd ning b sẽn geend pʋg-sɛdba kulsg yĩnga. Da bas-y t'a vɩɩnd yãmb sʋka, pag sẽn dɩ tɩt n maand bõn-bãn ye. Ned sã n wɩɩb ne rũnga, bɩ b kʋ a soaba. Ned sã n kʋ maoong n waoog wẽn-naands bɩ b kʋ-a. Naaba-Wẽnd bal la b waoogd ne maoongo. Da yaal sãana la f ra yɩ nin-toaag ne-a ye tɩ fo me yɩɩ sãan Ezipt tẽnga. Da nams pʋg-kõor la kɩɩb ye. Fo sã n nams-ba tɩ b wa yãb m taoore, m na n kelga b koɛɛg. M sũura na n puugame tɩ m bas tɩ sʋʋg kood yã, tɩ y pagb lebg pʋg-kõapa, tɩ y kamb lebg kɩɩ-bi. Fo sã n peng tẽnga biig ligdi, fo sã n peng naong soab sẽn be f zakẽ, da bao n na n dok yõod ye, da kɩt t'a yao n yɩɩg a sẽn deeg ye. Ned sã n ka tar bũmb n na n yao tɩ fo reeg a fu-yorgo, tɩ lebs-a a fu-yorgã, zĩig sã n sobge. Rẽ bal la a tar n lut a menga, yaa rẽ la a tar n yerẽ la yaa rẽ la a tar n pinnẽ. A sã n yãb m taoore, m na n kelg-a lame tɩ m yaa nimbãan-zoeta. F kõn tʋʋs Wẽnd ye, f kõn kãab buud kãsem wẽng ye. Da kaoos n kõ Wẽnnaam f kood paalga sẽn yɛs ne bao tɩ f rã paalga pid ne rʋgd ye. Rɩk f bi-kẽeng fãa n kõ maam. Maan boto me ne f rũmsi, bɛd la bõonego. Rũnga bi-rẽeng paada ne a ma dasem a yopoe, la dasem a nii daarã fo wat n kõ-a-la maam, Naaba-Wẽnde. M datame tɩ y yɩ nin-sõma. Y kõn wãb nemd, we-rũng sẽn yõk ye, rɩk-y nemd kãnga n kõ baase. Da wɩd f to ye; da sõng yel-maand ne f kaset zirẽ ye. Da kẽ sẽn baood-b wẽnga, b sõor yaa wʋsg yĩng ye. Da tũ sõor yaa wʋsg rãmba n togs sẽn pa sɩd n paalg ned bʋʋdo, a sẽn yaa a ye wã yĩng ye. Da lʋɩɩs taoore t'a zagl yaa nin-bila n wa gãndg sɩda n sõng-a tɩ loog, bʋʋd zĩigẽ ye. F sã n yãend f bɛ bõang bɩ a naaf sẽn meneme, bɩ f yõk-a n wa lebs a soaala. F bɛ bõang sã n ka tõe a zɩɩbo n pãsd n lʋɩtẽ bɩ f ra yɛs kɛɛng n getẽ ye. Kolg tɩ y naag taab n yik-a. B sã n bool naong soab bʋʋdo bɩ f ra sõng n kedb a bʋʋda ye. Zirẽ-beed sã n be sʋka, bɩ f ra lʋɩɩs f toog ye. Da sõng tɩ b b kʋ nin-tɩrga la ned sẽn ka beeg ye. Ad-y m ka tõe n kõ yel-maand bʋʋm ye. Da reeg kũun ye, tɩ kũun pagda nini n kedbd nin-tɩrs bʋʋdo. Da tall sãan toog ye, y mii sãan yɛl sẽn yaa a soaba, tɩ y me yɩɩ sãamb Ezipt tẽnga. F na n bʋda f pʋta yʋʋm a yoob n tong taaba la f na n tigsa f koodã f baoorẽ. Yʋʋmd a yopoe soaba, fo basda f pʋtã n ka ko ye la f ka rɩkd bũmb ba a ye f pʋʋgẽ ye. Yaa naong rãmb n na n dɩ b yõodo, tɩ rũmsa me soog naong rãmba sẽn na n keesã. Na n yɩɩ boto me ne tɩ-sendsã, bugsuntund la kakamse. Dasem a yoob pʋgẽ, f na n tʋmame la a yopoe raarã f na n vʋʋsame, f naaf la f bõang na n vʋʋsame. F yem-poak biiga, f noak na n vʋʋsame. Maan-y gũusgu ne m sẽn togs-y bũmb niynsa fãa; da pʋd-y wẽn-naandsa yʋʋr ye. Da sak-y tɩ b yʋʋra yi y noorẽ ye. Yʋʋmd pʋgẽ yaa naoor a tã la y na n maan kibs m yĩnga. Pipi kibsa yaa bur sẽn pa ning bɩll kibsa. Dasem a yopoe tõre y na n dɩɩ bur sẽn ka ning bɩlle la rẽ na n yɩɩ bõn-bɩʋng kiuug, wa sẽn zoe n wilgã, tɩ yaa bõn-bɩʋng kiuug la yãmb yi Ezipt tẽnga. Ra wa-y mam taoore ne nus-vɩɩd ye. Ad kibs a to: f kood rɩkre, f tʋʋmda pipi biis f pʋʋg sẽn wom n kõ-f rɩkre. Ad kibs a to: zĩig sẽn wat n kolg likri tɩ f kẽesd f sẽn tʋm n paam fãa. Dɩlla yʋʋmd pʋgẽ yaa naoor a tã la Wẽnnaam na n paam waoogr rapa fãa nengẽ. Baraare m pa rat tɩ b kõ-m maand n naag ne bur sẽn lob bɩll ye. Nem-kaama y sẽn na n kõ maam kibsa raarã, da bĩng-y tɩ beoog vẽeg ye. Yaa tẽnga sẽn wom bũmb ninga pipi tɩ ya sõmbo la f na n wa kõ Wẽnnaam, f Soaala. Da saag n dʋg bull ne a ma bĩisim ye. M na n tʋma m malɛk t'a lʋɩ f taoore n gũ f sora zugu la a tall-fo n taas m sẽn kãab-f tẽng ningã. Waoog-a la f kelg a koɛɛga, da yɩ tõat ye. F sã n yɩ tõata, f kõn paam f beegra sugr ye, t'a gomda m zĩigẽ. Fo sã n sak-a neere, la f sã n maam bũmb ning fãa m sẽn yet tɩ f maana, m na yɩ f bɛɛba bɛyã, la sẽn zabda ne fooma pat-n-taaga. M malɛka m sẽn lʋɩɩs f taoora sã n wa tall-f n taas Amoritse, Ititse, Perizitse, Ivitse, Zebuzitse la Kanaã rãmb tẽnga tɩ f paam n kʋ-b zãnga, da saag n wõgemd b wẽn-naandsa taoor ye, da saag n waoog-b, wala tẽnga rãmb sẽn da maand ye, da tũ b sora ye, pãb-ba n wã, n wã b tẽn-kugã. Yaa f Soaala la f Wẽndã la f na n waoog wa sẽn segde. Sã n yɩ woto, f sẽn dɩt la f sẽn yũud na paam barka la m na zãag-f ne bãaga. F tẽngẽ, f pag ba a ye pʋg kõn sãam ye, pag ba a ye kõn pa n ka rog ye. F na kʋʋl tẽng zug n tãag f pʋlemd daare. Yɛɛsgo la m na n lʋɩɩs f taoore; f sẽn na n ta zĩig ning fãa, m na n zũndga tẽn-kãnga la m na n kɩtame tɩ f bɛɛba ning tĩiga, b zãkudg bal la f na n yãende. M na n lʋɩɩsa kãnenkãas f taoore tɩ b rig Ivitse, Kanaã rãmba la Ititse. Ka na n yɩ yʋʋm-yɛng pʋgẽ bal la m na n dɩg bãmb f taoor ye, tɩ tẽnga ka tog n tiig n lebg we-raoogo, bõn-nindi tẽnga, tɩ yɩ naana ne foom ye. M na n dig-b-la f taoor bilf-bilfu, n tãag wakat ning m sẽn wat n ges tɩ f kamba lebga wʋsgo n tõe n soog tẽng ning m sẽn na n kõ-b t'a yɩ b soolem. Toaag ning m sẽn na n toog f tẽnga la woto: Rudum Mogrã n tãag Filisti rãmb mogre, Efrat kʋɩlga n ta zĩ-peen-daaga. M na n basa tẽnga rãmb fãa f nugẽ tɩ f sẽeg-b zãnga. Da maan zood ne b ye, da maan zood ne b wẽn-naandsa ye. Da bas-b fo tẽngẽ ye, ka rẽ b wat n kɩtame tɩ f beeg maam, f wat n tʋlgame n waoog b wẽn-faadã la rẽ yaa b bẽdgo, b sẽn na n bẽd n yõk foo.» Soaala-Wẽnd da yeela a Moyiiz: «Dʋ tãngã n kolg maam, kɩt t'a Aarõ, a Nadab, a Abiyu la a Israyɛl nin-kẽems pisopoe yãag foom. Y na n wõgemda tẽng tɩ y nan ket yɩɩga. Foom a Moyiiz bala n na n kolge; sẽn yãag b fooma ra kolg ye la zãma wã kell n paa a zĩigẽ.» A Moyiiz waa n lɛɛg n sigame, n wilg neba Soaala-Wẽnd koeesã la bũmb ning fãa sẽn na n lebg modgre tɩ b tũ; neba naaga taab n leoke: «Soaala-Wẽnd sẽn yiis noy niyns fãa tõnd na reege.» A Moyiiz gʋlsa Soaala-Wẽnd sẽn wilg-a bũmb ning fãa la vẽkẽmbeoogo, sõor sẽn waa n pukdẽ, a mee maan-kugri tẽn-nabrẽ la a sela kug piig la a yiibu, a Israyɛl sags piig la a yiiba yĩnga. A tʋma Israyɛl kom-bɩɩba tɩ b kʋ yũ-noog maand Soaala yĩnga la b kood lol-bõonese tɩ b lagem taab n dɩ Soaala taoore. A Moyiiz yãka zɩɩma pʋɩ-sʋka n ning laasẽ la a rɩka sẽn kellã n daal maan-kugrã. A rɩka zooda sebr n karem tɩ neba fãa naag taab n yeele: «Soaala-Wẽnd sẽn yals bũmb ning fãa tõnd na tũ; tõnd na reege.» Dẽ la a Moyiiz yãk zɩɩma n mes nebã n yetẽ: «Zɩɩm kãnga yaa zood kaseto, zood ning Soaala sẽn yõg ne yãmba n kõ yãmb b noya.» A Moyiiz kɩtame t'a Aarõ la a Nadab la a Abiyu la nin-kẽems pisopoe yãag-a tɩ b leb tãnga zugu. B yãee Israyɛl Wẽnnaam, b yãee b naoẽ wã, kug sẽn ya kẽeg lima sẽn gãneg la sẽn pɩn wa saag menga. Soaala-Wẽnd pa sɩɩs neb niyns sẽn paam-ba n kolg bãmba ye. Nin-bãmb yãend-b-la ne b nifu. B yaoolame marsã n dɩ la b yũ. Naaba-Wẽnd yeela a Moyiiz: «Dʋ n babs maam tãnga zugu la yals be tɩ m kõ-f kug-paklse: bãmb zug la m gʋls m sẽn na n zãms-y noy niynsã.» A Moyiiz yika ne a sõgen a Zozuwe tɩ b rʋ Wẽnd tãngã. A reng n yeela nin-kẽembã: «Yaas-y n gũu-y-du, tɩ d dʋ la d lɛɛg n wa. A Aarõ ne a Ur na n paa ne yãmba. Ned sã n tar koɛɛga bɩ a ta bãmb taoore.» A Moyiiz rʋʋ tãngã la sawadg luda tãngã. Soaala-Wẽnd ziira paa Sinayi tãnga zug la rasem a yoob pʋgẽ sawadga lud-a lame. Daar a yopoe soabã, Soaala-Wẽnd zĩnda sawadgẽ n bool a Moyiiz. Israyɛl kamba ra bee tẽng n ne Soaala-Wẽnd ziira sẽn yãng tãnga zug wa bug-witem. A Moyiiz kẽe sawadgẽ wa, a rʋʋ tãngã la a paa be dasem pis-naase, wĩndig la yʋngo. Soaala-Wẽnd yeela a Moyiiz: «Wilg a Israyɛl kamba tɩ b sa neba nengẽ n dees bũmb m yĩnga. B reeg-a neb niyns sẽn ka mi beeda nengẽ, kõt yaara rãmb nengẽ. Ad-y y sẽn na n deege: sãnem, wanzurfu, zũudu, peen-mismiuugu, peen-moomde, peen-miuug yʋs, peend sẽn wʋg ne gĩs peelse la gĩs bãanese, peend sẽn wʋg ne bʋ-kõbdo, pe-gãnd sẽn los monem, gãn sẽn ka yũnd koom, ra-neeba, kaam sẽn na n ning fitila, kaam sẽn tar n zɛɛdẽ, tɩdar sẽn tar yũ-noogo, kug sẽn moog wa rulg lɛlma, kug neeb sẽn na n tall n zap sãnem-pɛ-m-poore la sãnem-pɛ-m-yãoogo. Dẽ fãa la b na n tall n ti gãnd ro-sõngo n kõ-ma tɩ m tõog n pa y sʋka. M na n wilg-f-la rooga sẽn na n ti to-to la bũmb ning fãa sẽn na n kẽ a pʋgẽ. Maan-y fãa wa m sẽn na n wilgã. B na n peesa gõ-miiga n maan koglgo. Koglga woglem na n yɩɩ kãntɩɩs a yi la pʋɩ-sʋka, a yalma kãntɩɩg la pʋɩ-sʋka, a zãndlem kãntɩɩg la pʋɩ-sʋka. B gãneg sãnem, koglga pʋg la a yɩnga. B kʋk a noorã ne sãnem maabre. B maan sãnem kags a naase n sog-a, a yiib goabga, a yiib rɩtgo. B pees ra-gils a yi, n bolg-b ne sãnem. Bãmb na n tuii kagsã, koglga lʋgrẽ, koglga zẽkr yĩnga. La b na n paa be daar fãa. Yaa koglga pʋg la f na n bĩng kuga walsã m sẽn na n gʋls f yĩnga. B na n maana ling koglga yĩnga. A na n yɩɩ sãnem zãnga; a woglem yaa kãntɩɩs a yi la pʋɩ-sʋka; a yalma yaa kãntɩɩg la pʋɩ-sʋka. F na n dɩka sãnem n toos n maan malɛgs a yi, n zaoolg lingã, a ye taoore, a ye poorẽ. Naag malɛgs a yiibã n tableg ne lingã tɩ b lebg bũmb a ye ne-a. Malɛgs a yiiba neng na n togla taaba, n tees lingã, tɩ b pɩgsa na n zẽk n yɛdg a zugu n lilld-a. B na n dɩka lingã n fõgneg koglgã. Koglga pʋga f na n bĩnga noya walsã m sẽn na n gʋls n kõ-fã. Yaa linga zug la m na n likd m meng foom a Moyiiz, malɛgs a yiiba sʋka, yẽ zug la m na n yiis koees niyns f sẽn na n deeg n taas a Israyɛl kamba. B na n baoo gõ-miig raado n maan bũmb sẽn tar n dogend teedo. A woglma yaa kãntɩɩs a yi, a yalma kãntɩɩga, a zãndlema kãntɩɩg la pʋɩ-sʋka. B gãneg sãnem a zugu. B bao sãnem maabre n kʋk-a n gilgi. B kok-a, a kɩrems a naasã, ne raad yalem sẽn ta nus-bi a naase. B bao sãnem n gãneg ra bãmb me zugu. B kud sãnem kags a naase n ning kɩrems a naasã. Kagsa ningdame n pẽneg te-roagendga noore. Raad la b na n tuii kagsã, te-roagendga zẽkr yĩnga. Raada na n yɩɩ ra-sõma la f na bolg-b-la ne sãnem. Ra-bãmb tuiida te-roagendga tʋkr yĩnga. B rɩgl a zugu yõg-laase, ko-teese, la-bõonese, bãmb pʋg la b ningd rãama. Teeda fãa na n yɩɩ sãnem zãnga. Yaa te-roagendga zugu, la b na n dɩgl burã b sẽn kõt maam wala m pʋɩɩrã. Bur ka tõe n vaal a zug abada. B na n dɩka sãnem zãnga n dõog-dõog fitilsa roagendg kãsengã. Fãa na n naagame n dõog rõog yɛnga: sɛɛgã, wilã, maabrã, pu-yoaalã la puuda menga. Fitilsa sẽn na n wa rogl bũmb ning zugã tara sɛɛga, n tar sʋk willi, la wil a yoobe sẽn keg taab tẽnsʋk willã, n dʋʋd a yiib-yiibu, zĩis a tã. Wila sẽn keg taab a yiib-yiibã tara puud a tã la puug fãa rõoga wa lɩɩn puugu ne a pu-yoolle la a puuga menga. Wil a yooba fãa wẽnda taaba. Tẽnsʋk willã tara puud a naase sẽn dõog wa lɩɩn puugu ne a pu-yoolle la a puuga menga. Will a yooba fãa sẽn tão sɛɛgã la sẽn keg taab n dʋʋd a yiib-yiib, zĩis a tã wã, dõoga maabre, n gilgi. Maabrã ne willã na naagame n dõog rõog yɛnga. Fãa na n yɩɩ sãnem yɩlemde sẽn toos ne zãare. Roagendga puuda pʋsẽ la f na n sagl fitils a yopoe. Fitilsa sã n widgi b vẽenema tʋʋsda b taoore. Bug-rɩɩna sẽn dʋʋgd laok ninga pʋgã la laonga wõrsdgã, bãmb me tog n yɩɩ sãnem zãnga. Yaa sãnem gilgu sẽn ta nin-tɩɩg zɩɩbo la f na n dɩk n dõog fitilsa ne b roagendgã la teed a taabã. Ges neere, Moyiiz, tɩ fãa tũ wa m sẽn wilgd foom tãnga zugã.» Soaala yeela a Moyiiz: «Sã n ya sɛka roogo, wʋg a yĩnga, pɛɛl piiga. Pɛɛla wʋgda ne beren-dɩgr gĩsi sẽn maneg n dĩngi. Pɛɛl kẽer yaa mismiuugu, kẽer yaa moam wa saag paga Nina-nina. F sã n wa wʋgd pɛɛlã bɩ f ges n buk ne minim la bãngre, rũms sẽn naag n tar nao a naase, pɩgsa la ninsaal nenga. Peend a ye fãa tara kãntɩɩs pisi la a nii, a yalem yaa kãntɩɩs a naase la pɛɛl piiga fãa zema taaba. Pɛɛl a nu la f rɩkd n bogl taaba, n le rɩk a nu sẽn kellã n bogl taaba. Rĩng wĩ ne pe-kõbdo, wĩ sẽn ya mismiidu, n tall n loe pipi satem peen-boagla noore. Maan boto ne bogl a to wã me. Wĩ wã na n yɩɩ pis-nu, pipi bogla yĩnga la pis-nu me bogl a yiib soaba yĩnga. Wĩ wã loeesa zĩig na n togla taaba. Yaa sãnem sogdse pis-nu la f na n kud tɩ b wa tõog n loe peen-bɛd a yiiba ne taaba. Woto yaa wa peen-yɛng la b rɩk n ti roogã. Maan pɛɛl a taab sẽn ya tagd-tagdo ne bʋ-kõbdo sẽn na n palg pipi pɛɛla zugu. Peen-kãens na n yɩɩ piig la a ye. Peend a ye fãa woglem yaa kãntɩɩs pis-tã, a yalem yaa kãntɩɩs a naase. Bãmb piig la a ye wã fãa zema taaba. Dɩk a nu n bogl taaba la rɩk a yoobã sẽn ketã n bogl taaba. Peend a yoob soaba na n lɛɛg n lʋɩɩ dooga kɩrenga. Kud zũud sogds pis-nu n ning pɛɛl a nu wã sẽn bogl taaba kɩreng a ye, la ning sogds pis-nu pɛɛl a yooba sẽn bogl taaba me kɩreng a to wã. Ning wĩ pis-nu pɛɛl a nu wã sẽn bogl taaba kɩreng a ye wã. Ning wĩ pis-nu me pɛɛl a yoobã sẽn bogl taaba kɩreng a to wã. Kud zũud sogds pis-nu, wĩ wã sẽn na n wa tui zĩig ninga n gãd pɛɛla tɩ rooga lebg wa peen-yɛng roogo. Pɛɛla sõor sẽn ka zem taabã, peend ning sẽn luga wã pʋɩ-sʋk na n lɛɛg n siga rooga kudga. Pɛɛla sẽn tʋʋg kãntɩɩgã, kãntɩ-kãng na n lɛɛg n lʋɩɩ rooga kɩrenga n lud-a. Rooga yĩng yɛsa, zap pe-raad gãnd sẽn ning monem la gãn sẽn ka yũnd koom n wa yɛdg rooga zugu. Rooga yĩnga bao gõ-miig n pees ra-pegdo sẽn na n ka taab a naas-naase, n bas võ-yaleng tẽnsʋka, n yik-ba n yals yĩngri. Yaa ra-lug-yalemse. B zãndlma yaa kãntɩɩs piiga tɩ yalma ya kãntɩɩg la pʋɩ-sʋka. Basda ra-pegdã tɩ tʋʋg zĩis a yiibu tɩ bũmb wa tõog n sel zĩ-kãnga. B zãnga fãa kaab na n wẽnega taaba. Kaadame n bas vɩʋʋg sʋka. Raada sẽn ka woto wã na n tonga bãmb pisi, dooga rɩtg kɩrenga. F na n dɩka wanzurf n dõog te-sendse, bãmb pis-naase. Ra-pegda sẽn tʋʋg zĩig ninga na n wa sela bãmb zutu. Ra-lug-yaleng fãa yaa te-sends a yiibu. Rooga kɩreng a to wã, goabg soaba, me tara ra-lug-yalens pisi. Bãmb me senda wanzurf te-sends pis-naas zutu: Ra-lug-yaleng fãa yaa te-sends a yiibu. Sã n ya rooga nin-taoore, ra-lug-yalensa sõta bãmb b yoobe. Rooga satmẽ pẽgsã reegda ra-lug-yalens a yiibu, a ye goabga, a ye rɩtgo. Bãmb teegda roogã n na n paas a pãnga. Rɩgend-b lame tɩ tẽngrã bɩ ra-pegda zãr ne taaba n yaool n na n tɩ sɩɩs taab yĩngri. B sẽn ya woto wã, rooga teega bãmb n yɛsẽ. Dɩlla, rooga nin-taoore, ra-lug-yalensa sõta bãmb b nii. Ra-lug-yaleng fãa sela wanzurf te-sends zutu, bãmb piig la a yoobe: ra-lug-yaleng fãa yaa te-sends a yi. Bao gõ-miig n pees ra-paadse, bãmb b nu rɩtg kɩrenga yĩnga. Bãmb b nu me goabg kɩrenga yĩnga, a nu poorẽ kɩrenga sẽn tees nin-taoora yĩnga. Ra-lugsa zãndlma tẽnsʋka, la raad na n pɩʋʋge n sog ra-lugsa fãa ne taaba, b sɩngrẽ n tãag b baasgo. Bolg ra-lugsa sãnem, kud sãnem kags sẽn na n wa tui ra-paadsã la bolg ra-paadsa me sãnem. Yaa wala m sẽn wilg-f tãnga zugã la f na n tũ n ti roogã. Wʋg peen-lilli ne gĩs mismiidu, gĩs moama, gĩs moam yʋs, gĩs peelse sẽn maneg n dĩng kẽnkẽ. Wʋgba wakato, bɩ f ges n buk ne minim la bãngre, rũms sẽn naag n tar nao a naase la pɩgsa la ninsaal nenga. F na n yagla peenda gõ-miuug ra-lugs a naas sẽn bolg sãnem, sẽn tar sãnem kaad-gõdse, la sẽn sel wanzurf te-sends a naas zutu. Peen-lilla loeta kaad-gõdsã. Yaa peen-lilla poore la f na n dɩgl kuga walsa sẽn be koglg ning pʋgã la peen-lillã a na welga sõmblem sẽn pid ne sõmblem zĩiga ne zĩis a taaba. Kuga walse sẽn be koglg ninga pʋgã, dɩk a lingã n fõgneg-a a zĩigẽ: sõmblem sẽn pid ne sõmblema zĩigẽ. Dɩgl bur sõma piig la a yiiba te-roagendgã, peen-lilla taoore, rooga nug goabga, dɩgl sãnem fitil kãsenga rooga nug rɩtgo t'a tot te-roagendgã. Sã n yaa rooga noor bɩ f ning peend sẽn wʋg ne gĩs miidu, gĩs mismiidu, gĩs moam yʋs, gĩs peelse. Sʋlg sẽn mi a tʋʋmde n na n wʋg-a. Peen kãng yĩng bɩ f pees raad a nu n bolg-b sãnem, ning-b sãnem kaad-gõdse. Ra-bãmb na n wa sela zũud te-sends a nu zutu.» Soaala yeela a Moyiiz: «Maan-kugra na n kaa ne gõ-miig raado. A woglem yaa kãntɩɩs a nu, a yalem yaa kãntɩɩs a nu, dɩlla a kɩrems a naasa fãa zema taaba. A zãndlma yaa kãntɩɩs a tã. Ning yɩdb a naas, kɩrems a naasã. Maan-kugrã ne a yɩdba naagdame n ka wakat yɛnga. Gãneg zũud a zugu. F na n yõga laas n tar n kokd tompɛglma, n paas kardo, sĩmbi sẽn na n kokd zɩɩm, kõse la tɩdar laase. Te-bãmb fãa na n kuda ne zũudu. Ka bũmb n mobg maan-kugrã. Ka wa zũud gãmbre n gilg-a la ning zũud kags a naas, gãmbra kɩrems a naasã. Gãmbra ningda tẽngre la a zẽkdame n ta maan-kugra pʋɩ-sʋka. Maan-kugra tʋkr yĩnga, pees raad a naas n mobg ne zũudu. Raada tuiida kagsã tɩ b sãd n be maan-kugra taoor la poorẽ. Maan-kugra kaada ne ra-pegdo, a pʋga na n yɩɩ vɩʋʋgo la fãa na n tũu wala m sẽn togs bũmb ning tãnga zugã. Rooga na n paama a zaka n gilg-a. Yaa pɛɛl sẽn wʋg ne gĩs sẽn maneg n dĩngi la b na n yagle. Rooga nug rɩtgo, yaa pɛɛl woglem sẽn ta kãntɩɩs koabga. B ra-lugs pisi wã na n yalsa zũud te-sends pisi zutu la b tara kaad-gõdse la wanzurf ribli, fãa yaa sẽn na n yɩlẽ n wa tõog n sog taaba. Goabg kɩrengã me yaa kãntɩɩs koabga, la a na n luda ne pɛɛla. Ra-lugsa yaa pisi la b na n yalsa zũud te-sends pisi zutu la b tara kaad-gõdse la wanzurfu ribli. Sã n ya nin-taoore, yaa sẽn ta kãntɩɩs pis-nu la zaka yalem la a luta ne pɛɛl sẽn loe ra-lugs piig sẽn sel zũud te-sends piig zutu. Sã n ya yaanga a yalma yaa kãntɩɩs pis-nu yɛsa. Kɩreng a ye yaa kãntɩɩs piig la a nu la f magd pɛɛlã. B ra-lugsa ya b tã, la b te-sendsa me ya b tã. Kɩreng a to wã le yaa kãntɩɩs piig la a nu la f magd pɛɛlã. B ra-lugs ya b tã la b te-sendsa me yaa b tã. Dɩlla dignoora meng yalem yaa kãntɩɩs pisi. Pɛɛla wʋga ne gĩs mismiidu, gĩs miidu, gĩs moam yʋs, gĩs bãanese, sʋlg-mit tʋʋmde. Ra-lugsa yaa b naase, n sel te-sends a naas zutu. Yaa ne wanzurf ribli la zaka ra-lugs fãa na n loe n gãd taaba. Ka na n loe kaad-gõdsa ne kut ribli ye, na n yɩɩ ne wanzurf; b te-sendsã n ya zũudu. Zaka woglem: kãntɩɩs koabga. A yalem: kãntɩɩs pis-nu. A zãndlem: kãntɩɩs a nu; te-sendsa yaa zũudu. Teeda fãa sẽn be rooga tʋʋm yĩnga, a biili wã, ne kaadsã, fãa na n yɩɩ zũudu. Kos Israyɛl kamba tɩ b kõ-f oliviye kaam sẽn ya yɩlenga, roga bugum yĩnga, tɩ zaabr bɩ sãnem fitil kãsenga tõog n widi. A Aarõ ne a kamba na n ninga sãnem fitil kãsenga sɛka roog pʋga, roog ninga sẽn ti ne gãndã. Dɩgend-a-la peenda taoore, peend ning sẽn lilla kuga walsa koglgã. Sãnem Fitila na n wida zaabr n ta yibeoogo, maam, Naaba-Wẽnd taoore. Dẽ yaa noor sẽn ka tõe n teem zamaan sẽn wate, a Israyɛl kamba yĩnga.» Soaala-Wẽnd yeela a Moyiiz: «Bool f kẽem a Aarõ ne a kamba, a Nadab, a Abiyu, a Elazar la a Itamar. Fo na n welg-b-la ne Israyɛl kamb a taaba la maan-kʋʋr tʋʋmd la b na n tʋm m zakẽ. F kẽem, a Aarõ, yĩnga, sẽ wẽnd doog fu sõma sẽn na n pids-a ne faong la ziiri. Bʋʋg sʋls niyns sẽn tʋmd b sõma n yɩɩdã, m sẽn kõ b rãmb yam sɩlengã, tɩ b wʋg a Aarõ yĩnga, fut a sẽn na n yeelg a maan-kʋʋra tõoga reegr daare la a sẽn na n yeelg n tʋm maan-kʋʋra tʋʋmde. Ad b sẽn na n wʋge: sãnem-pɛ-m-yãoogo, bag korgo. N paas sãnem-pɛ-m-poore. N paas fu-yorg kãsenga. N paas fu-yorg-bil sẽn maneg n buki ne gĩs neeba. N paas zu-vindga la sẽbdga. F kẽema, a Aarõ, n na n yeelg fu-bãmba. Maan-kʋʋra yĩng me, bɩ b sẽ fut a Aarõ kamba yĩnga. B sẽn na n dɩk bũmb ning n wʋg-ba: yaa sãnem, yaa peen-mismiidu, gĩs miidu, gĩs moam yʋs, gĩs bãanese. Yaa sʋls sẽn mi b tʋʋmde n na n wʋg sãnem-pɛ-m-poorã. Wʋgd-a-la ne sãnem, ne gĩs mismiidu, gĩs miidu, gĩs moam yʋs, ne beren-dɩgr gĩs peels sẽn dĩng tɩ kẽ. Yɩta tʋʋmd mit n na n tʋm-a. Peenda noya a yiibã na n ninga peen-dis a yiibu sẽn naag n sẽ ne fuugã t'a wa tõog n loe maan-kʋʋda sɛɛga. Peen-disa sẽn tar n loet sãnem-pɛ-m-poorã wʋgda ne gĩs miidu, gĩs mismiidu, gĩs moam yʋs, gĩs peels sẽn dĩng tɩ kẽ, la sẽn naag n sẽ ne-a. B na n dɩka kug sĩdma a yi sẽn yãgd wa nin-gɛtga la sẽn ya kẽeg-kẽega la b na n gʋlsa a Israyɛl kamba yʋy b zugu. Pipi kugra zugu yaa Israyɛl kamba yʋy a yoob la b na n gʋlse. Kugra a yiib soaba zug la b na n gʋls a yooba sẽn kellã, la yaa yʋʋr fãa ne a pʋgdga, wala kamba sẽn pʋg taab rogmẽ. Yaa ned sẽn minim n gʋlsd kugr zugu ne kɩtga n na n gʋls Israyɛl kamba yʋy. Ka bũmb sẽn na n wẽneg n yẽes ye. Sãnem paklg pʋg la b na n lɛɛg n gãneg kuga ne yʋy wã sẽn gʋls b zugã. Kug a yiibã na n wa tablga ne sãnem-pɛ-m-poorã. Kug bãmb yaa Israyɛl kamba tẽegr bũmbu la a Aarõ zɩt-b la a bãgd zugu, Soaala taoore. Dõog sãnem nug-bĩnsi. Maan sãnem yãndo, bãmb b yiibu; maan-b wa pãnenga. Pãneng fãa na n wa soga ne sãnem nug-bĩnga. Sãnem-pɛ-m-yãooga na n wʋga ne sãnem, ne gĩs mismiidu, gĩs miidu, gĩs moam yʋs, gĩs peels sẽn maneg n dĩng tɩ kẽ, wala sãnem-pɛ-m-poorã. Yaa gɩf yalem la woglem sẽn zems kãntɩɩg pʋɩ-sʋka. F na n bao kug neeba n zap n tong rũns a naase. Pipi rũnuga na n yɩɩ kug zẽego, kõodr pespele la toenɛɛga. Rũnug a yiib soaba: moomde, kẽega la kõodre. Rũnug a tãab soaba: kugr sẽn bẽes miuug la sabla, kõodr sẽn lɩʋʋs miidu la mismiuugu. Rũnug a naas soaba: yirg gelle, rulg lɛlma la bɩrba. Kug bãmb fãa na n zapa ne sãnem. Kugr a ye fãa tara a Israyɛl biig yʋʋre la b sõora yaa piig la a yiibu: Yʋʋra na n gʋlsame tɩ kẽ kugrã wala bũmb sẽn ka tõe n yẽese. Buuda sak fãa tara a kugri. F na n dɩka sãnem gĩs n pãnem wa wĩiri n loe sãnem-pɛ-m-yãoogã. F na n kuda sãnem kags a yi. Yaa sãnem-pɛ-m-yãooga yĩngr kɩrems a yiibã la b na n soge. Sãnem pãneng fãa loeta ne sãnem-pɛ-m-yãooga kagsã. Sãnem pãnenga noor fãa wat n soga ne sãnem-pɛ-m-yãooga gaagdse la woto a luunda neer maan-kʋʋda taoore. F na n le rõoga sãnem kalem-bãense n ning sãnem-pɛ-m-yãooga tẽngr kɩrems a yiibã, la be la a na n wa loe ne sãnem-pɛ-m-poorã. F na n le rõoga sãnem kalem-bãens a yiibu n loe-b ne sãnem-pɛ-m-poora peen-disgã. B wat n soga ne sãnem pãnenga la kagsã. Yaa peen mismiuugu n loet sãnem-pɛ-m-poor ne sãnem-pɛ-m-yãoogã, la bũmb fãa yɛsa a zĩigẽ. Woto a Aarõ sã n kẽ wẽnd doogẽ Israyɛl kamba yʋy gʋlsa a yãoogẽ la woto, maam, Naaba-Wẽnd, kõn yĩm y yell abada. Foom, Moyiiz, fo na n suii sãnem-pɛ-m-yãooga sẽn yaa korga pʋga bũmb a yiibã sẽn tar n sokdẽ la b tar n bãngd Wẽnd leokra yaa n-yẽe, bɩ ayoo wã. A Aarõ tar-b-la a yãoogẽ, a sã n wat Soaala-Wẽnd taoore; la woto me a tara Wẽnd leokrã a sẽn na n taasd Israyɛl kamba wakat buud fãa. Maan fuug a to sãnem-pɛ-m-poora sẽn na n buug a soabã. Yẽ yaa mismiuugu zãnga. Ning loor a tẽnsʋkã tɩ yaa fu-yorgo. Loora na n yɩɩ tʋʋmd mit tʋʋmde. A na n yɩɩ gilga, la a na n kãda wala gãmbre sẽn na n yɩlẽ t'a ra tõog n kẽeg lɛ-lɛ. Fuuga tẽngre, n gilgi, gʋle ne gĩs mismiidu, ne gĩs moam yʋs, ne gĩs peelse tɩ-biis wa pooloomse. F na n soga loamba sẽn dõog ne sãnem. Tɩ-biis wa pooloomsa ne sãnem loamba wã na n lɩʋʋs-lɩʋʋsa taaba n gilgi. Fu-kãng la a Aarõ na n yeelg a tʋʋmda yĩnga. A sã n wa kẽedẽ bɩ a sã n wa yit wẽnd doogẽ, b wʋmda loamba wã bʋʋre la woto a kõn ki ye. F na n dõoga ne sãnem yɩlenga bũmb sẽn tar neerem la sẽn wẽnd puugu. Gʋls a zugu ne kut tɩ kẽ, wala kaset gʋlsem la gʋls woto: Welga toor Wẽnd yĩnga. F na n sog-a-la ne peen mismiuugu n loe zu-vindgã tɩ gʋlsma be taoore. A Aarõ sẽbgda bõn-neerã a rĩirẽ a sẽn wat wakat ning fãa maam, Naaba-Wẽnd, taoore la woto m na reeg kũun niyns fãa a Israyɛl kamba sẽn na n kõ-ma, ba b sã n ket n be tudgr la zɩɩlem pʋgẽ. F na n wʋga fu-wok pɛɛlgã. F na n sẽe zu-vindga sẽn ya pɛɛlga, n paas sẽbdga — la rẽ fãa na n yɩɩ tʋʋm mit tʋʋmde. A Aarõ kamba yĩnga, maan fu-yordo la sẽbdse. Paas pugli tɩ pugl n wat ne naam la ziiri. Kɩt tɩ f kẽema, a Aarõ ne a kamba ning-ba. Taag kaam b dĩiri tɩ b paam n sɩng b tʋʋmde. Welg-b toore n kõ maam tɩ b yɩ m maan-kʋʋdba. Sẽ kur koees n kõ-b tɩ b sẽgne. Bãmb me na n wʋga ne gĩ bãanese la b na n sigame n ta gɛ wã. A Aarõ ne a kamb na n yeelga boto b tʋʋmda wakato, woto me b kõn kolg b zaal maan-kugra ye; ka rẽ b na maan bũmb sẽn ya wẽnga n sek b kũum. Woto yaa noor sẽn kõn teem abada, a Aarõ ne a yagensa yĩnga.» Soaala yeela a Moyiiz: «Ad-f sẽn na n maan bũmb ninga, n kõ a Aarõ ne a kamba b maan-kʋʋr tõogo. Bao lʋll a ye la pe-raad a yi sẽn ka tar bãnde. Dɩk bur sẽn ka ning bɩlle, samsa, miisd me sẽn ka lob bɩlle, sẽn dʋg ne kaam la sẽn wẽ ne alkam zom sẽn ka kalem bũmb a to. F na n ning-b-la peoog a ye pʋgẽ la f na n naaga peoogã ne lʋllã la piis a yiibã n kõ Wẽnde. Kɩt t'a Aarõ ne a kamba wa rooga noor n so koom. Yeelg a Aarõ fu-bilã, fu-kãsengã ne sãnem-pɛ-m-poore la sãnem-pɛ-m-yãoogo. Maneg-ba n sog taaba. Fõgneg-a a pugla la loe gʋlsma a rĩirẽ. Dɩk kaama marsã n daag a zugu n maneg n sõoge. Kɩt t'a Aarõ kamba me kolg tɩ f yeelg-b b fu-yordã. Ning sẽbdsã b sɛɛsẽ, a Aarõ wala a kamba, fõgneg b pugli wã b rĩirẽ la woto b na reeg maan-kʋʋr tõog zamaan sẽn kõn sɛ yĩnga. Yaa woto la f na n kõ a Aarõ ne a kamb maan-kʋʋr naam. Kɩt tɩ b wa ne lʋllã, sɛka roog noore. A Aarõ ne a kamba nus na n sɩɩsa naafa zugu. Kʋ naafã m taoore, sɛka roog noor. Tẽk a zɩɩma ne nug-bila n taag maan-kugra yɩdb a naasã, dɩk zɩɩma n daag maan-kugra sɛɛga. Wobg yãooda kaam, tõsg sãoora vã-minima, yɩɩm a yiibã ne b kaama, n yõog maan-kugra bugmẽ. Yaa sugr-kosg maoongo, maan-kʋʋdba yĩnga. Zãag ne rotã n yõog naafa nemdo, a gãongo, a bĩndã. Kɩt tɩ b kolg ne pesg a ye t'a Aarõ ne a kamba le sɩɩs a zugu ne b nusi. Kʋ pesgã, dɩk a zɩɩma n mes maan-kugrã n gilgi. Pas pesgã, pek a yãadã ne a karsã, dɩk nemda ne zugã n dogl taaba. Yõog-b zãng maan-kugra zugu tɩ yaa yũ-noog maoongo sẽn na n sigs Soaala-Wẽnd sũuri. Yaa maoong sẽn yõog bãmb waoogr yĩnga. Kɩt tɩ b wa ne pe-raoog a to wã t'a Aarõ ne a kamba le tẽeg b nus n sɩɩs a zugu. Kodg-a, rɩk a zɩɩma n taag a Aarõ rɩtg tʋbre, a kamba me boto, b rɩtg nug-raado, b rɩtg nao-raado. Dɩk zɩɩma sẽn kellã n daal maan-kugrã n gilgi. Yãk zɩɩma maan-kugra zugu, yãk kaam sõnga me n paas n mes a Aarõ ne a futu, a Aarõ kamba ne b futu. Yẽ ne a futã na n lebga bõn-sõma, a kamba me ne b futã na n lebga bõn-sõma sẽn welg toore. Maan-kʋʋra tõoga reegre tʋɩsda ne pe-raoog a yiib soaba maoongã. Dɩk pe-raooga kaam, a zʋ-kɛɛgã, kaam sẽn mobg yãadã, tõsg sãoora vã-leg-legã, yɩɩm a yiibã ne b kaama la rɩtg gerã. Dɩk bur sẽn ya gilga, samsa, miisgu sẽn be peooga pʋga peoog ning sẽn dɩg m taoorã. Dɩk rẽ fãa n sagl a Aarõ ne a kamba nugẽ, la f yeel-b tɩ b dɩkd-ba n tees maam. Lebs n deeg-ba n yõog m taoore, wala pipi rũngã. Na n yɩɩ maoong sẽn yõog tɩ rɩ zãnga, tɩ m na n kok a yũ-noogã. Pesg kãng sẽn kʋ, a Aarõ tõoga deegr yĩnga, dɩk a yãoogã n mak kũun makre, m taoore, la foom n na n soog rẽnna. F na yeele tɩ pesga yãooga ne a gerã sẽn dɩk n tees maama lebga bũmb sẽn ya sõngo, sẽn welg toore. Yaa rẽ me yĩnga la Israyɛl kamba na n yãk wakat buud fãa, yãoog la gere, b sã n kʋ rũng maoongo tɩ rẽ n lebg a Aarõ ne a kamb pʋɩɩre. A Aarõ sã n wa kaẽ, yaa a kambã n na n yeelg a futã n deeg maan-kʋʋr tõogo la b lebg neb sẽn welg toore. A biig ning sẽn na n deeg a zĩig n kẽ sɛka roogẽ n tʋm maan-kʋʋd tʋʋmd na n yeelga futã rasem a yopoe. Rɩk pesgã sẽn kʋ tõoga reegr yĩngã n bao zĩ-sõng n dʋg a nemdã. A Aarõ ne a kamba na n wãba pesgã ne burã sẽn be peooga pʋga, sɛka roog noore. B na n wãba b sẽn tall bũmb ning fãa n kos Wẽnd sugri, b naama deegre daare, b sẽn lebg neb sẽn welg toora raare, la ned a to ka tõe n wãb-b ye, tɩ yaa rɩɩb sẽn welg toore. Beoog sã n vẽege, sẽn kellã, bura la nemdã, ningda bugmẽ. Ned a to ka tõe n dɩ ye, tɩ yaa rɩɩb sẽn welg toore. Maan ne a Aarõ la a kambã wala m sẽn togsã. B maan-kʋʋra tõog reegr na n kaoosa rasem a yopoe. Beoog sẽn vẽeg fãa, lʋll maoong la b na n kʋ n kos yel-wẽna sugri. B na n yɩlga maan-kugra woto, b na n taag-a-la kaam n welg a toor Soaala yĩnga. Yaa dasem a yopoe pʋgẽ la f tog n kʋ beoog sẽn vẽeg fãa yel-wẽnd sugr kosg maoong, maan-kugra zugu, n le rɩk a n kõ Wẽnde t'a wa lebg sõng zãnga. Dẽ poore nin zaalg bɩ rũng sã n sɩɩs-a, yaa yell la a na n bao n kõ a menga. Beoog sẽn vẽeg fãa n tãag dũni wã yikri, ad-b sẽn na n kʋ bũmb ning maan-kugra zugu: pe-bi a yi, sẽn zems yʋʋmd a ye rũmsi. A ye kʋʋda yibeoogo, t'a ye kʋ zaabre. Tũnug pipi rũnga maoong ne alkam zom wamd pogbre sẽn nag ne kaam sẽn ya yɩlgemde, la sẽn pit lengre, n paas yubl rãam. Pesg a ye n na n kʋ zĩ-sobdo, n tũnug zom, kaam la rãam, wa yibeoogẽ wã. Na n yɩɩ yũ-noog maoong sẽn na n maag Wẽnd sũuri, yaa maoong sẽn yõogd zãng Wẽnd taoore. Dẽ yaa bũmb sẽn tog n maan beoog sẽn vẽeg fãa Wẽnd taoore, sɛka roog noore, zĩig ning b sẽn na n seg foom n kõ b koeese. Be la m na n seg Israyɛl kamba la m na n welga zĩ-kãng t'a lebg m ziir zĩiga. M na n welga rooga la maan-kugra toore, m na n welga a Aarõ ne a kamba toore, maan-kʋʋr yĩnga. M na n zĩnda Israyɛl kamba sʋk n yɩ b Wẽnnaam. B na bãng marsã tɩ yaa maam la bãmb Wẽnde, sẽn yiis-b Ezipt tẽnga, n na n pa ne bãmba. Maam la Soaala, bãmb Wẽnnaam.» Soaala yeela a Moyiiz: «F na n maana maan-kugri la yaa yẽ zug la f na n yõog tɩdarã. F na n maan-a-la ne gõ-miig ra-pegdo. A woglma yaa kãntɩɩga, a yalma me boto; dɩlla a kɩremsa fãa zema taaba. A zãndlma yaa kãntɩɩs a yi: Ning-a yɩdb a naase sẽn naag n ya bũmb a ye ne-a. Bao sãnem meng n bolg a zugã, a kɩremsã la a yɩdbã. Bao sãnem n mobg-a zãnga. Ning a kɩrems a yiibã sãnem kags a naase. Yaa raad a yi la b na n wa tui kagsã n tõog n zẽkd maan-kugrã. F na n peesa gõ-miig raado n maan dasaba f sẽn na n bolg ne sãnem. Maan-kugra na n dɩgla peend ning sẽn luta kuga walsa koglga taoore, tɩ koglg kãng zug la m na n kõ-y sɛka. Yibeoog fãa a Aarõ na n yõoga tɩdar zom sẽn tar yũ-noogo, a sã n wa manegd dooga bugma. Zaabre me a sã n wa ne kaam n na n ning fitilsã, a na n le yõoga tɩdarã. Tɩdara sẽn yõogd Wẽnnaam taoorã yaa bũmb sẽn na n maan zamaan woo zamaana. Maan-kugr kãnga zugu y kõn yõog tɩdar zaalg ye, y kõn yõog yũ-noog maoong ye, y kõn dɩgl kũun a zug ye, y kõn kɩrg rãam bɩ kaam ye. Yʋʋmd-yʋʋmd fãa, a Aarõ na n kosame tɩ Wẽnd zãag-a ne rẽgdo. A na n taaga yɩdba ne zɩɩm. Yʋʋmd-yʋʋmd fãa, na n yɩɩ sugr kosg kibs kãsenga raare la a Aarõ na n dɩk rũnga zɩɩm n taag maan-kugra yɩdba, a pekr yĩnga. Na n yɩɩ woto zamaan sẽn wate tɩ maan-kugra pa a sõmblema zĩigẽ zãnga.» Wẽnnaam goma ne a Moyiiz: «F sã n wa sõd Israyɛl kamba sẽn ta sõadga, n bãng b sẽn zem to-to, kɩt tɩ ned kam fãa kɩs Wẽnd a yaoodo. Woto sõadga wakato tẽn-kũum kõn zĩnd ye. Sẽn sõd a soab fãa kɩta ligdi. Neb a yi yaa wakɩ koɛɛnga, wala b sẽn dɩt a soab Wẽnd waoogra zĩigẽ. Yaa ned ninga yʋʋm sẽn ta pisi bal la b sõta la yaa sẽn be-a sõadgẽ n kɩt yaoodã. Arzɛk rãmba, naong rãmba, b fãa kɩta bũmb a ye: wakɩr koɛɛng pʋɩ-sʋka. Yaooda reegda Soaala-Wẽnd yĩnga n na n fãag f yõore. Ligd kãnga me n yãkd sɛka roog tʋʋma yĩnga. Woto maam, Naaba-Wẽnd, na tẽeg Israyɛl dãmba yelle, n fãag b yõore.» Wẽnnaam goma ne a Moyiiz: «Maan sĩnga, koom waasg yĩnga. A menga yaa zũudu, a sẽn na n dogl bũmb ninga zuga me yaa zũudu. Ning-a zaka pʋga, maan-kugrã ne sɛka roog tẽnsʋka. Pids-a ne koom. Be la a Aarõ na n toog n waas a nus la a nao. B sã n na n kẽ rooga pʋg bɩ b reng n waas n da wa ki ye. B maan boto me b sã n kolgd maan-kugrã n na tʋme, n na n yõog yũ-noog maoong, Soaala-Wẽnd yĩnga. B na n peka b nus la b nao n da wa ki ye. A Aarõ ne a kamba yĩnga, dẽ yaa noor sẽn ka tõe n teem abada.» Wẽnnaam yeela a Moyiiz: «Bao bõn-yood sẽn tar yũ-noog wʋsgo wala: gondre-yẽoog sũm koaaga: wakɩ-koeems kobs-nu; wala yulun-yuuga: wakɩ-koeems kobs-yi la pis-nu; wala wal tʋko: wakɩ koeems kobs-yi la pis-nu; wala barkudga: wakɩ koeems kobs-nu, wakɩr wala b sẽn dɩt a soab Wẽnd waoogra zĩigẽ, n paas la-pogbr ne oliviye kaam; lens a nu n pit laagã. Dɩk-ba n kalem taaba n maan ka-sõngo; sõng t'a yũuga yɩɩ noog wa mitba rẽnna. Yẽ n na n yɩ ka-sõngo. F na n yãk-a-la me n taag roogã la kuga walsa koglgã, te-roagendga ne a teedã, sãnema fitil kãsenga la tɩdara maan-kugrã; yũ-nood maanda Maan-kugra ne a teedã, sĩnga ne a sẽn dogl bũmb ning zugã. Welg-b toore, Wẽnd yĩnga, la bũmb ning fãa sẽn na n sɩɩs-b na n lebga bõn-sõngo. F na n yãka ka-sõngã n taag a Aarõ ne a kamba, n welg-b toore maan-kʋʋra yĩnga. F na n yeela Israyɛl kamba woto: Bãng-y tɩ ka-kãnga yaa ka-sõng zamaan woo zamaana, mam yĩnga. Ka-kãnga ka taagd ned yaare ye; da maan kaam sẽn wẽnd-a ye, yaa bũmb sẽn ya bõn-sõngo n na n kell n yɩ sõngo. Ned ninga fãa sẽn na n mams a buudu n dɩk n taag nin-zaalga, b na kʋ a soaba.» Wẽnnaam yeela a Moyiiz: «Ning pãng n paam bõn-yood sẽn tar yũ-noodo wala naglɛng, wala soompiiga, wala wisao, la tɩdar menga. Bao tɩ b zeng taaba. Kalem b taaba n wa yãkd n lobd bugmẽ. Kalem b wala mitba sẽn maandã, tɩ yɩ sõmbo la tog ne pẽgre. To-b tɩ b lebg zom tɩ f yõgen-b rooga pʋga, sɛka roogẽ. Y na n ges-b-la wala bũmb sẽn ya sõngo. Da maan-y bũmb sẽn wẽnd-a y meng yĩng ye, ges-y tɩdarã wa bõn-sõngo, bũmb sẽn welg toor Wẽnd yĩnga. Ned ninga fãa sẽn na n togs n maan a buudu n tar a yũugã n kokdẽ, b na n kʋ-a lame.» Wẽnnaam yeela a Moyiiz: «Ade, m yãka a Besalɛl, a Uri biiga, a Ur yagenga, a Zɩɩda sak neda. M kõ-a-la sɩlem, bãngre, minim la tʋm-tɩ-b-pẽg tõogo, bũmb wʋsg yĩnga. A tõe n yãenda a yamẽ la a maan ne a nugu sãnem teedo, wanzurf teedo, zũud teedo. A tõe n peesa kug sẽn yãgd b toore n maan fan teedo, n maneg n ning ned kam a zĩigẽ tɩ sakd gesgo; a tõe n peesa raado; d yeel vugr bala t'a tõe n maana fãa. M na n kõ-a-la ned sẽn na n sõng-a: yaa a Ayisamak biig a Ooliab, a Dã sakẽ neda. M kõo neb a taab me yam la sɩlem sẽn tõe maan m sẽn dat tɩ b maane. Bãmb n na n maan roogã, koglg ning sẽn na n pag kuga walsã, koglga ne a lingã, sɛka roog teedo; te-roagendga ne a teedã, fitila sẽn ya bõn-neer mengã, tɩdar maan-kugrã, maan-kugrã ne a teeda fãa, ko-sĩnga ne a sẽn dogl bũmb ning zugã, fu-sõma wã, maan-kʋʋra futu, a Aarõ ne a kamba sẽn yeelgdã, ka-sõngã, tɩdar bãanegã. B sã n sɩng b tʋʋmna, bɩ b tũ m sẽn wilgã.» Soaala-Wẽnd kosa a Moyiiz t'a yeel Israyɛl kamba: «Deeg-y vʋʋsga noor neere tɩ vʋʋsga daar m sẽn yalsã yaa kaset sẽn ya sõmbo, kaset tɩ yãmb ne y kamba miime tɩ maam y Wẽndã n welg y toore. Reeg-y vʋʋsga noore tɩ yaa daar sẽn tog ne waoogre, sẽn tõdga noor kãnga n tʋm tʋʋmd baraare toga ne kũum. Tʋʋmda tʋmda dasem a yoobe, la a yopoe daarã zãnga b vʋʋsdame, sẽn tʋma badaare, b kʋʋd-a lame. Israyɛl kamba na n deega vʋʋsga noore zamaan woo zamaana. Yaa zood sẽn ka tog n sãam kaseto. Maam ne a Israyɛl kamba yĩnga, a yaa tẽegre, wakat buud fãa tẽegre tɩ m tʋma dasem a yoobe, n naan yĩngr la tẽnga, la daar a yopoe soaba b vʋʋsame n ka tʋm ye.» Wẽnd sẽn gom ne a Moyiiz n sɛ, b kɩs-a-la kug wals a yi, yaa kug walse la Wẽnd meng b toore n gʋls-b ne b nugu. Neba sẽn mik t'a Moyiiz kaoosda tãnga zugu, n pa sigd tao-tao, b gũbga a Aarõ n yeel-a: «Ade, yiki! Maan wẽnd-dãmb n kõ-do, tɩ b lʋɩ d taoore. Tõnd ka mi bũmb ning sẽn maan a Moyiiz, rao ning sẽn yiisa tõnd Ezipt tẽnga ye.» A Aarõ yeel-b lame: «Wa-y ne sãnem tʋb-londã y pagbã, y kom-dibli la y kom-pugli sẽn sog b tʋba. Tall-y-ba n wa kõ-ma.» La b fãa yãgsa b sãnem tʋb-lond n wa kõ a Aarõ. T'a Aarõ deeg-ba n bao boaaga n yẽneg-ba, n maan nag-bila; tɩ b naag taab n moone: «Woto la tõnd wẽnda sẽn yiis tõnd Ezipt tẽnga.» A Aarõ yãend-a lame la a mee maan-kugr n yals nag-bila taoore n yeel Israyɛl kamba: «Beoog yaa tig-raaga, Soaala yĩnga.» Vẽkẽmbeoog pĩnda b kʋʋ maando, yũ-noog maand, maan-dɩtga la b zĩndame n yũ, b zĩndame n dɩ n yik n deem. Wẽnnaam yeela a Moyiiz: «Ges n sigi tɩ f sẽn yiis neb niyns Ezipt tẽnga maana wɩɩbdo. Ka yãee n kaoos tɩ b zoe n zãag ne sor ning m sẽn wilg-ba ye. B yẽnega bũmb n maan nag-bila n yĩgimd a taoore. B kʋʋ maand n kõ-a la b yeelame: ‹Ad-d wẽnde, ad sẽn yiisa tõnd Ezipt tẽnga.› » Wẽnnaam yeela a Moyiiz: «M nee nebã, m neeme tɩ nin-bãmba yaa tõatba! Bas-m tɩ m yik ne-ba; bas tɩ m yik m sũur ne-ba, m na n menes-b lame la yaa fo roogo n na n lebg bu-kãsenga.» A Moyiiz makame n na n sigs Soaala-Wẽnd sũuri, ad-a sẽn yeele: «Yaa bõe, Naaba-Wẽnde, tɩ y na n bas y sũur t'a fõd ne kamb niyns yãmb meng sẽn yiis Ezipt tẽnga ne y kang la y nug pãnga? Bõe tɩ Ezipt dãmb na n wa tõog n yeele: ‹A yiis-b-la pʋ-toog tõnd tẽnga, n na n tɩ kʋ-b tãms zutu tɩ b buuda yẽes tẽng zugu.› Sigs-y y sũuri, da bao-y y neba wãab ye. Tẽeg-y yã a Abraam, a Izaak la a Zakoob yelle. B yɩɩ yãmb tʋʋm-tʋmdba la yãmb wẽename n kãab-ba n yeele: ‹M na n kɩtame tɩ f buuda kamb zeng ãdsa ne sõore, m na n kõ-b-la tẽns ka tɛka tɩ yɩ b kamb la b yagens pʋɩɩre zamaana fãa sẽn wate.› » La bãng-y tɩ Soaala-Wẽnd yeelame tɩ b kõn le sɩbg b kamba ne yel-beed ning b sẽn da rat n sɩbg-ba ye. A Moyiiz dɩka sika sore, n sigd tãngã la a zãad kuga walsã a nugẽ. Yaa kug bãmb zug la zooda sẽn dat tɩ b tũ bũmb ninga fãa gʋls yã. Walsa kɩrems a yiiba fãa gʋlsame. Walsa yaa Wẽnd tʋʋmde, gʋlsga yaa Wẽnd gʋlsgo. A Zozuwe sẽn wʋm dãamd sẽn yit sikã a yeela a Moyiiz: «Kelg-y zabr bʋʋre, sika pʋga!» T'a Moyiiz leok-a: «Ka neb sẽn tõog b bɛɛb n lɛɛg n watẽ bʋʋr ye, ka neb sẽn lʋɩ bɛɛb nugẽ yãbr me ye, yaa kibs yɩɩl sẽn yɩɩn n deesd taab la m wʋmda.» A Moyiiz sẽn kolge, a yãee sãnem nag-bila, la a yãee neb sẽn saoode, t'a sũur puug wʋsgo t'a lob kuga walsã a sẽn da zãadã, a lob-b-la tãnga sɛɛg tɩ b wã. A sẽn ta, a losa b sẽn dõog nag-bil ninga bugmẽ n yẽneg-a, n to-a t'a lebg zom bãanega t'a rɩk-a n lob koomẽ n kõ a Israyɛl kamba tɩ b yũ. A Moyiiz yaool n yeela a Aarõ: «Neba maan-f-la bõe tɩ f tʋk b zugu yel-beed sẽn ta woto fãa?» T'a Aarõ yeele: «Bɩ f ra puug f sũur ye, fo meng mi tɩ nin-bãmba tʋʋla ne wẽng maanego. Ad-y yaa bãmb meng n waa n yeel-ma: ‹Maan wẽnd dãmb n kõ-do tɩ b lʋɩ d taoore, tɩ Moyiiz ning sẽn yiisa tõnd Ezipt tẽnga, d ka mi bũmb ning sẽn maan-a ye.› Ya rẽnda la m sok-ba: ‹Ãnda n tar sãnem?› La b fãa rɩka b sẽn tar n kõ-ma la m sẽn los rẽ fãa bugmẽ, nag-bil kãnga la m dõog-ya.» A Moyiiz yãeeme tɩ neba da ka le tar lɛkd ye. A Aarõ ra bas-b lame tɩ b pʋʋs belgr wẽnde la b lebga bɛɛb laado. A yalsa sika noor n yeele: «Sẽn ket n bɛ-a Naaba-Wẽnd poorẽ bɩ a wa ne maam!» Tao-tao t'a Levi kamba gũbg-a lame. T'a yeel-ba: «Ad-y Soaala, a Israyɛl Wẽnnaam, daab la woto: ‹Ned kam fãa rɩk a sʋʋga, n kẽ sika pʋga, n yi zaka n kẽ zaka, la a kʋ, nina a ba-biiga, nina a zoa, nina a roagda!› » A Levi kamba reega a Moyiiz noore, la badaare neb sẽn ta tus a tã n ki. A Moyiiz yeel-b lame: «Reeg-y dũnna y maan-kʋʋr tõogo tɩ Wẽnd n kõt-a yãmba la ka zaalem ye. Yaa b kamb zɩɩm la kẽer daag yã, kẽer yaa b yaop rẽnna, la rũnna yaa y maan-kʋʋr tõog reegr daare la bɩ Soaala-Wẽnd ning-y barka.» Beoog sẽn vẽege, a Moyiiz yeela zãma wã: «Yãmb maana sẽn ka neer ba bilfu, dẽ la m na n le rʋ tãngã, Soaala taoore, tɩ daare y samda na tõog n yao.» La sɩda a Moyiiz leba Wẽnd nengẽ n yeel-ba: «Kato! Neba maana yell kãsenga, b maana sãnem wẽnde. M kot-y lame tɩ y kõ-b sugri, ka rẽ bɩ y yẽes m yʋʋra sẽn gʋls vɩɩm sebra pʋga.» La Soaala-Wẽnd yeelame: «Yaa sẽn maana wẽng la m na n yẽes m sebrẽ. Leb n tɩ tall nebã n kẽng m sẽn wilg zĩig ningã. M malɛk na n lʋɩ-la f taoore la m sẽn na n wa ges-b raare, m na sɩbg b beegrã.» Wẽnd sɩbga neba b sẽn maan nag-bila yĩnga, b sẽn kos a Aarõ t'a maan nag-bilã n kõ-ba yĩnga. Soaala-Wẽnd yeela a Moyiiz: «Loog ne f neba f sẽn yiis Ezipt tẽngã, dɩk sore, yaa tẽnga sore, tẽng ning m sẽn kãab a Abraam, a Izaak la a Zakoob tɩ m na reeg-a n kõ m kamba. M na n tʋma malɛk f taoore t'a pĩng Kanaã rãmba, Amoritsã, Ititsã, Perizitsã la Zebuzitsã f taoore. Tɩ kẽe-y tẽng sẽn bund bĩisim la sɩɩdo. Mam ka na n yãag-y ye tɩ yãmb ka reegd noor ye la m sã n belg m meng n yãag yã, m na n kʋ-y-la zãng sor zugu.» Neba sẽn bãng tɩ Soaala-Wẽnd zabdame, b maana wa kʋ-biisi, fuug sẽn wẽnd kibs fuug ka yeelg baraar ye. Wẽnnaam wilga a Moyiiz t'a yeel a Israyɛl kambã: «Yãmb tara tõatb zʋgo. M sã n yãag yã n kẽn bilfr bala, m na n kʋ-y-la zãnga. Yãgs-y y fan-teedã tɩ m bãng m sẽn na zã-y zãab ninga.» Yaa rẽ la Oreb tɛka, Israyɛl kamba ka le ning fan-teed ye. A Moyiiz zãaga wʋsgo n ti roogã. A bool-a lame tɩ sɛk roogo. Ned ninga fãa sẽn da tara koɛɛg n dat n sok Wẽnde, a ra yit n taa sɛka roog sẽn da ti n zãag ne sikã. A Moyiiz sã n da yi n digd dooga sẽnẽ, ned kam fãa da yikdame n yaas a roog noore n get a Moyiiz t'a wa ta sɛk roogã. A Moyiiz sã n wa kẽed doogã, sawadg me n sigd n yaas dooga noore la koɛɛg n da yit be t'a Moyiiz kelgdẽ. Sawadga sã n wa yaas rooga noore, ned kam fãa zĩndida a doog noor n wõgemd tẽnga. Soaala-Wẽnd ne a Moyiiz ra sõsda ne taaba wa ned ne a zoa. A Moyiiz mi n lɛɛgd n wa neba sʋka, a rakõorã, a Zozuwe, a Nun biiga bal n da paad do-sõnga pʋga. A Moyiiz yeela Soaala-Wẽnde: «Yãmb meng n yeel maam tɩ m kɩt tɩ neba rɩk sore la y ka wilg ned ning sẽn na n paas maam ye. Yãmb da yeelame tɩ y mi-la m tiiri la y sɩd zoe-la m nimbãanega. Sã n ya sɩd tɩ y ka yi m poorẽ, bɩ y wilg maam y raabo tɩ m bãng la m deeg tɩ y ket n be-la m poorẽ. Bãng-y tɩ nin-bãmba yaa yãmb neba.» Soaala-Wẽnd leokame: «M na n lʋɩ-la f taoore tɩ f paam n kẽ vʋʋsga tẽngẽ?» T'a Moyiiz paas: «Y meng y toor sã n ka na n tũ bɩ y ra sak tɩ d yi ka ye. Kaset bʋg la m tar n na n bãng tɩ zood n be tõnd sʋka, maam ne yãmb la yãmb ne y neba sʋka? Kaset n le bee n yɩɩd d sã n tũud taab bɩ? Y sã n tũud tõndo, neba kõn bãng tɩ yãmb n welg maam ne y neba toore, dũni wã pʋgẽ sɩda?» Soaala-Wẽnd yeela a Moyiiz: «M na n maan wala fo sẽn kos maama tɩ m nong-f lame la m maam n welg-f toore.» A Moyiiz kos-b lame: «Wilg-y maam y ziirã!» Tɩ Soaala-Wẽnd yeele: «M na n looda f taoore, n wilgd-f m nonglma sẽn ta zĩig ninga la m togsd m yʋʋre: Naaba-Wẽnde. M zoeta m sẽn dat a soab nimbãanega la m kõta m sẽn dat a soab sugri. La ade, fo ka tõe n yãe mam neng ye, tɩ ned ka yãet mam neng n le vɩɩnd ye. Soaala le yeelame: Ad vɩʋʋg m sɛɛgẽ, ad pĩigã. M sã n wa lood ne m ziira, m na kẽes f pĩiga bokẽ, m na solg f ne m nug, m loogra wakato. M na yaool n yãk m nugã tɩ f yãend m zãkudga; sã n ya m nengã, ad nenga ka tõe n yãend ye.» Soaala-Wẽnd yeela a Moyiiz: «Pees kug a yi sẽn wẽnd pipi rãmbã, dʋ tãnga zug tɩ m gʋls goam niyns sẽn da be pipi kuga walsa zutu, kug niyns fo sẽn lob n wãagã. Beoog yibeoog tɩ segl n sɛɛme, rʋ tãnga zugu, sõor pukri n gũ-ma. Ned ba a ye ra tũ n dʋ ye, ned ba a ye pʋs n da lɩk tãnga sẽnẽ meng ye. Dũmsã, bɛd la bõonego, da kolg tãngã n wãb yamd ye.» A Moyiiz peesa kug a yi sẽn wẽnd pipi rãmbã la yibeoog pĩnda a rʋ-la a ye Sinayi tãnga. Wala Wẽnd sẽn da wilg-a wã. A ra zãada wals a yiibã a nugẽ. Naaba-Wẽnd tũu sawadg n sigi n yals, la a Moyiiz pʋʋsa Soaala-Wẽnde. Soaala-Wẽnd looga a Moyiiz taoor n tãsdẽ: «Maam la Naaba-Wẽnde, maam la Naaba-Wẽnde! M yaa nin-bʋgsgo la nimbãan-zoeta, m sũur ka yikd tao-tao ye, m kũun ka belgr ye, m ka yõgd zood sẽn ya daar a ye zood ye. M maanda neb ka tɛk sugri, m sĩndame wa m ka ne beegr ye, wa m ka ne tõdgr la yel-wẽnd ye, m yaool n bakda sẽn ka beega ne sẽn beega tɩ bũmb ka beẽ n ka na n deeg a dolb ye. Kamb paamda b ba rãmb beegr sɩbgre, tɩ yagenga, yagen-tʋbra-kẽeg meng deegd a yaab rãmb beegr sɩbgre.» A Moyiiz sẽn wʋme, a lʋɩɩ yãvabg Soaala-Wẽnd taoore. A yeelame: «Sã n ya sɩda, tɩ y yam ket n bee ne maam, bɩ y yãag-do. D zug sã n ka gird n le gõms me bɩ y maan sugr tɩ d lebga yãmb pʋɩɩr kamba.» Wẽnnaam yeela a Moyiiz: «M na n yõga zood ne foom, n maan bõn-bãn neba taoore wala tẽng ba a ye la buud ba a ye sẽn zɩɩ n yãend ye. Neba sẽn gũbga fãa na n yãee tʋʋmd ning m sẽn na n tʋm ne foo, la na n yɩɩ tʋʋmd bãnde. Kelg m sẽn yet tɩ f maan dũnna wã. Ade, m na n digame n zãag f taoore, Amoritse, Kanaã rãmba, Ititse, Perizitse, Ivitse la Zebuzitse. Da maan no-noom ne neb niyns f sẽn na n kẽ b rãmb tẽngẽ wã ye. Ka rẽ b na n lebga bẽdg f yĩnga. Wã b maan-kugã, wã b sẽn sel kug niynsã, kao b sẽn pees raad niynsã. Dẽnd yĩnga: Da yĩgimd wẽn-sãang taoore ye, tɩ m yaa Wẽnd sẽn nong m buuda ne m sũur fãa la m pa sak tɩ buuda nong bũmb a to n yɩɩg-m ye. Da maan no-noom ne tẽnga rãmb ye, woto b sã n wa wɩɩb n kõ b wẽnd dãmba maando, b kõn bool foo tɩ f wa wãb b maanda nemd ye. Da maan no-noom ne-ba, n saag n bao f kamb pagb bãmb kom-pugli wã sʋk ye, ka rẽ kom-pugli wã wat n dabda b wẽnd dãmba waoogre tɩ fo kamba yik n pʋgda. Da yẽneg kut buud n maan wẽnd ye. Deeg noor ning sẽn yet tɩ b ra rɩ bur sẽn ning bɩlle. Yaa bõn-bɩʋng kiuug pʋgẽ, tɩ yaa sasa kãng la m yiis-f Ezipt tẽnga. Maan n so bũmb ning fãa sẽn yaa a ma pipi biiga: bõn-daoog fãa sẽn dog pipi a ma pʋgẽ, rũm-bedr wala rũm-bila. Bao rũm-bil n tek ne bõang pipi biiga; f sã ka na n bao rũng n tek-a, bɩ f wãa a kãarã. Bao bũmb n kɩs n deeg f meng bi-kẽenga n sooge. Naaba-Wẽnd taoor ka wat ne nug vɩʋʋg ye. F na n tʋma dasem a yoobe la a yopoe daarã, f na n vʋʋsame, ba sã n ya koob bɩ tigsg wakato. Yʋʋmd sã n vẽeg fãa, maan dasem pis-nu kibsa, y sẽn wat n dɩkd y kood-rẽemsã. La kooda fãa sã n wa bɩ, maan-y tigsgu kibsa. Yʋʋmd pʋgẽ yaa naoor a tã la neba tog n wa Soaala, a Israyɛl Wẽnda, taoore. Maam n na n wa reeg nanams a taaba tẽns n kõ-fo, Israyɛl, n yalg f toaaga, ned ba a ye kõn mak n deeg f tẽngã yʋʋmda kiis niyns y sẽn na n wa m waoogra zĩigẽ, naoor a tã yʋʋmda pʋgẽ wã ye. Da saag n tũnug miisd sẽn lob bɩlle ne maoong ye. Rũng ninga sẽn kʋ pak yĩnga nemd ka tog n vẽeg beoog ye. Yãk f kood rẽemsã n kõ Wẽnnaam, f Soaala. Da saag n dʋg bull ne a ma bĩisim ye.» Soaala-Wẽnd yeela a Moyiiz: «Gʋls noy-kãensã tɩ yaa bãmb deegre n na n yals zoodã mam sẽn yõgd ne foom, a Israyɛl.» A Moyiiz paa ne Soaala-Wẽnd, Sinayi tãnga zugu, dasem pis-naase, wĩntoog la yʋngo, n ka rɩ la a ka yũ ye. A gʋlsa zooda noya kuga wals a yiib zutu. Noya yaa bãmb piiga. A Moyiiz siga tãngã, a ra zãada wals a yiibu. A ra ka mi t'a sẽn sõs ne Naaba-Wẽndã poore, a nenga da tʋʋsda vẽenem ye. A Aarõ ne a Israyɛl kamba fãa yãenda a Moyiiz, b mikame t'a nenga yãgda la b pa saag n kolg-a ye. Dẽ la a Moyiiz bool-b, la a Aarõ ne kãsem-dãmba lɛɛg n waame la a Moyiiz goma ne-ba. Dẽ poore yaa a Israyɛl kamba fãa n kolge la a taas-b-la noy-niyns fãa Wẽnd sẽn kõ-b Sinayi tãng zugu. A Moyiiz sẽn gom n sɛ, a baoo peende n lud a nenga. A Moyiiz sã n da rabd n na n tɩ sõs ne Soaala-Wẽnde a ra yãkda peennã. A sã n wa yita, a lɛɛgd n ning-a lame. A sã n lɛɛg n wa, a wilgda a Israyɛl kamb Soaala-Wẽnd koeese. Israyɛl kamba ne-la a Moyiiz nenga sẽn tar yãgbo. A Moyiiz lebd n luda a nengã ne peennã n gũud wakat ning a sẽn na n leb n tɩ sõs ne Naab Wẽnde. A Moyiiz tigma Israyɛl kamba, n yeel-ba: «Ad Soaala-Wẽnd sẽn yeel tɩ y maan bũmb ninga. Dasem a yoob pʋgẽ b tʋmdame la daar a yopoe soaba yaa ra-sõngo, vʋʋsg daare, Soaala-Wẽnd waoogr yĩnga. Ned ninga fãa sẽn na n tʋm-a baraare, b na n kʋ-a lame. Da widg-y bugum vʋʋsga daare, zĩig ba a ye, y zakẽ ye.» A Moyiiz taasa Israyɛl kambã Soaala-Wẽnd noor kãnga: «Yãk-y y sẽn tare n kõ Soaala-Wẽnde. Sẽn nonga n bao n kõ Wẽnde, bɩ a wa ne woto: sãnem, wanzurfu, zũudu, gĩs mismiidu, gĩs miidu, gĩs moam yʋs, gĩs sẽn maneg n dĩngi, bʋ-kõbdo, pe-raad gãndo sẽn los monem, gãnd sẽn ka yũnd koom, raado, kaam sẽn na n ning fitila, kaam sẽn tar n zɛɛdẽ, tɩdar sẽn tar yũ-noogo; kug sẽn moog wa rulg lɛlma, kug neeb sẽn na n tall n zap sãnem-pɛ-m-poore la sãnem-pɛ-m-yãoogo. Neb niyns fãa sẽn be yãmb sʋk n tõe n maan bõn-neer fãa, bɩ b wa sõng tɩ Soaala-Wẽnd sẽn data tõog n pidsi. Yaa sɛka roog ne a pɛɛla, a kɩremsã la zug tẽnsʋk peen-tagdã, loetsã, ra-lugsã, ra-lug gilsã, ra-paadsã, b sẽn send bũmb niyns zutã. Yaa koglgã ne a ra-tuiidsã, la a lingã, yaa peen-lillã; te-roagendgã ne a ra-tuiidsã la a te-neebã, bura sẽn ya Wẽnd pʋɩɩrã. N paas fitilsa ne b kaama. N paas tɩdara maan-kugrã ne a ra-tuiidsã, kaam sõngã, tɩdar bãanegã, rooga noor peen-kãsengã. N paas yũ-noog maan-kugrã ne a kut gãmbrã, ko-sĩngã, ne a sẽn dog bũmb ning zugã. N paas zaka pɛɛla, a ra-lugsã ne raada sẽn send zĩig ningã, zaka noor peendã. N paas rooga ne zaka raado la wĩya. N paas fu-bɛdã, maan-kʋʋr futã, a Aarõ ne a kamba rẽnna.» Israyɛl kamba fãa basa a Moyiiz n leb b zagsẽ. Yamleoog tʋʋm-tʋmdba fãa waame. Neer baoodba fãa talla b kũuni n wa kõ Soaala-Wẽnde, sɛka roog tiib yĩnga, fu-sõma wã wʋgb yĩnga. Rap ne pagb waame, ne yamleoogo, b waa ne b fan-teedo: zũya, nug-bĩnsi, fan-teed buud fãa sẽn dõog ne sãnem, la b rɩk-b-la fãa n tees la b kõ Soaala-Wẽnde wa b sẽn maan ne sãnema. Ned ning fãa sẽn da tara gĩs mismiidu, gĩs miidu, gĩs moam yʋs, gĩs bãanese, bʋ-kõbdo, pe-raad gãndo sẽn los monem, gãnd sẽn ka madgd koom, a tall-b lame n wa. B waa ne b wanzurf bɩ zũudu n kõ Soaala-Wẽnde. B waa ne ra-sõma tʋʋmda yĩnga. Pagb niyns sẽn da mi-b lamd wĩib sõmb-sõmbo, wĩi gĩ-bãanese, gĩs moam yʋs gĩs miidu, gĩs mismiidu. Sẽn da rat-ba la sẽn da mi-b bʋ-kõbd gĩs wĩib waame. Kãsem-dãmba waa ne kug moama, ne kug neeb a taab sẽn na n zap sãnem-pɛ-m-poore la sãnem-pɛ-m-yãoogo, b waa ne bõn-yood sẽn tar yũ-noodo, fitila kaama la ka-sõnga yĩnga, b waa ne tɩdar bãanegã. Rapã la pagbã sẽn da rat ne sũuri n maan tʋʋma wala Soaala-Wẽnd sẽn wilgã, fãa tẽegame tɩ b yaa Israyɛl kamba la b waa ne b kũuni n kõ Soaalã. A Moyiiz yeela Israyɛl kambã: «Ade, yaa a Besalɛl, a Uri biiga, a Ur yagenga, a Zɩɩda sakẽ neda, la Soaala-Wẽnd yãk yã. B kõ-a-la sɩlem gongo, dabar la bãngr kãsenga t'a tõe tʋʋm buud ka tɛka. A tõe n yãenda a yamẽ la a maan ne a nugu sãnem teedo wanzurfu, zũud teedo; a tõe n peesa kug-bõonego tɩ b yãgd b toore; a tõe n peesa raado, a tõe bũmb fãa. Soaala-Wẽnd kõ-a lame wala b sẽn kõ a Ooliab, a Dã sakẽ nedã, yam sẽn na n zãms b taab tʋʋma. B kõ-b-la yam la sɩlem tɩ b tõe tʋʋm buud fãa wala kug neeb peesgo, peen-neeb bukri, ne gĩs bãanese, sʋlg meng tʋʋmde; b tõe n yãenda b yamẽ tʋʋm buud toɛ-toɛ yã la b maan-b ne b nugu.» Yɩɩ wala Soaala-Wẽnd sẽn da wilg-bã la a Besalɛl, a Ooliab la neb a taaba sẽn da paam sɩlem la bãngr n na tʋm dooga tʋʋmna, wẽneg n sɩng b tʋʋmde. A Moyiiz boola a Besalɛl, a Ooliab la neb a taabã sẽn da paam sɩlem la bãngre n paas sẽn da tar-b tʋʋmda sũuri n yet tɩ b na n tʋm-a lame wã. B waa n deega a Moyiiz nengẽ bũmb ning fãa a Israyɛl kamba sẽn wa ne, Soaala-Wẽnd waoogr ro-sõnga yĩnga. La beoog sã n vẽege a Israyɛl kamba da ket n tara waoongo ne b kũuni. Woto tʋʋm mitbã sẽn da sɩng-b tʋʋmna n na n ti roogã, kong n yalsame. B waa n yeela a Moyiiz: «Neba sẽn ket n wat ne kũuna yaa n yɩɩda Wẽnd daabo.» Dẽ la a Moyiiz kɩt tɩ b moon tẽnga pʋga: «Marsã tɛka bɩ ned ba a ye, pag bɩ rao, da le wa ne bũmb Wẽnd waoogr ro-sõnga yĩng ye.» B gɩdga neba tɩ b ra le wa ne kũun ye. Teeda sẽn wa wã da sekda roogã n mabge. Yaa tʋʋm-mitb gill la b yãk rooga tiib yĩnga. B wʋga pɛɛl piig ne gĩs bãanese, gĩs mismiidu, gĩs miidu, gĩs moam yʋs, b buka peenda zugu, rũmsi sẽn naag n tar nao a naase la pɩgsa la ninsaal nenga. Peend a ye fãa woglem yaa kãntɩɩs pisi la a nii t'a yalma ya kãntɩɩs a naase. Pɛɛla fãa ra zema taaba. B deng n dɩka pɛɛl a nu n bogl taaba, n le rɩk a nu n bogl taaba. B rɩka pe-kõbd gĩs mismiidu n wʋg wĩ n loe peen-satga noore; b le maana boto me ne a to wã. Peend satg a ye fãa noore yaa wĩ pis-nu la b loe yã; peend satsa a yiiba fãa wĩ loeme tɩ b tot taaba. B kuda sãnem sogds pis-nu, peela loees yĩnga, la b sã n sɩd loe, lebga wa peend yɛnga. B wʋga peen-tagdo me ne bʋ-kõbdo, bãmb piig la a ye sẽn na n wa gãneg rooga zugu. Peend fãa woglem yɩɩ kãntɩɩs pis-tã, t'a yalem tat kãntɩɩs a naase. Pɛɛla fãa ra zema taaba. B rɩka pɛɛl a nu n bogl taaba la b rɩk a yoobã sẽn kellã n bogl taaba. Peen satga noorẽ, b ninga wĩ pis-nu, a to wã me wĩ pis-nu. B kuda sãnem sogds pis-nu n na n wa loe pɛɛla tɩ yɩ wa peen-yɛng. Rooga yĩnga b le sẽe pɛɛla, n sẽ pe-raad gãn sẽn los monem la b sẽ gãnd sẽn ka yũnd koom, dooga sugr pilb yĩnga. Rooga yĩnga b rɩka gõ-miig ra-pegdo n ka-b taab a naas-naase, n bas võ yaleng tẽnsʋka, n yik-b n yals yĩngri. Bãmb boondame tɩ ra-lug-yalemse. B zãndlem yɩɩ kãntɩɩs piiga, tɩ b yalem yaa kãntɩɩg la pʋɩ-sʋka. B kaa ra-pegda tɩ tʋʋgd zĩis a yi, b selb yĩnga, la b sel-b lame n pẽneg taaba. B tonga bãmb pisi, nug rɩtgo. B maana wanzurf te sends pis-naase la yaa bãmb zut la b sel ra-lug-yalensã, ra-lug-yaleng fãa yaa te-sends a yiibu, la yɩɩ woto n tonge. Nug goabg ra-lug-yalensa me na n tonga pisi. B wanzurf te-sendsa yaa pis-naase, a yiib ra-lug-yaleng fãa tẽngre. La yɩɩ woto n tonge. Rooga nin-taoor yɩɩ ra-lug-yalens a yoobe. Rooga nin-taoor pẽgsa reega ra-lug-yalens a yiibu sẽn na n paas tiiba pãnga. Tẽngrã b ra yaagame, la yĩngrã b tɩ naag n sogda ne pipi kakã. Ra-lug-yalensa sẽn na n paas pãnga sogame n wẽneg taaba. Dɩlla nin-taoorã yɩɩ ra-lug-yalens a nii la wanzurf te-sends piig la a yoobe, ra-lug-yaleng fãa te-sends a yi. B peesa ra-paadse ne gõ-miiga, bãmb b nu kɩreng a ye fãa yĩnga. Rooga kɩreng a to wã me yɩɩ bãmb b nu. Sẽn lebd mogra sẽnẽ kɩrenga le yaa bãmb b nu. Tʋʋm-mitba gesame n bog raado n pɩk ra-lug-yalemsã b zãndlem pʋɩ-sʋka, rooga sɩngre, n ta a sɛɛbo. B bolga raada sãnem. B kuda sãnem kagse n tui ra-paadsã la bãmb me bolga sãnem. B wʋga peen-lilli ne gĩs mismiidu, gĩs miidu, gĩs moam yʋs, gĩs bãanese la b buka peenda zugu rũms sẽn naag n tar nao a naase la pɩgsa la ninsaal nenga. Sɩd yɩɩ tʋʋm-mit tʋʋmde. B yagl-a-la ra gils a naas sẽn bolg sãnem la sẽn ka sãnem kaadse. B maana wanzurf te-sendse a naas b yĩnga. B sẽn na n dogl bũmb niyns zutã yaa wanzurf, bãmb b naase. Rooga noore b ninga peend sẽn wʋg ne gĩs miidu, gĩs mismiidu, gĩs moam yʋs, gĩs peelse wa mitba sẽn wʋgdã. Peen-kãng yagla raad a nu sẽn bolg sãnem la sẽn tar sãnem kaadse. B bolga ra-lugsã ne b bãn-sogdsã ne sãnem la b dõoga zũud te-sends a nu b yĩnga. A Besalɛl dɩka gõ-miig n pees raad n maan koglgã. A woglem yaa kãntɩɩs a yi la pʋɩ-sʋka, a yalem kãntɩɩg la pʋɩ-sʋka, a zãndlem kãntɩɩg la pʋɩ-sʋka. A gãnega sãnem yulli koglga pʋg la a yɩnga. A kʋgla a noorã ne sãnem maabre. A maana sãnem kags a naas n sog koglga tẽngre, a yiib kɩreng a ye, a yiib kɩreng a to. A peesa gõ-miig raad gils-gilsi n bolg sãnem. A rɩk-b lame n tui kagsã la yaa ne ra bãmb la b ra tar n zɩt koglgã. A maana koglga linga ne sãnem yɩlemde; a woglma yaa kãntɩɩs a yi la pʋɩ-sʋka, a yalma kãntɩɩg la pʋɩ-sʋka. A rɩka zãar n kud rũms a yi sẽn naag n tar nao a naase la pɩgsa la ninsaal nenga. A yals-b-la koglga linga sɛtmẽ. A ye ninga rɩtgo, t'a ye ning goabga la b naag-b lame n ka ne lingã. Rũmsa sẽn da yɛsa pɩgs ra zẽkame n yɛdg linga zugu. B nensa ra teesa taaba la b ra geta koglga lingã. B peesa gõ-miig raad n maan te-roagendga. A woglem yaa kãntɩɩs a yi, a yalem kãntɩɩga, a zãndlem kãntɩɩg la pʋɩ-sʋka. B gãnega sãnem yɩlemde a zugã la b mobga a noora ne sãnem maabre. Raad yalem sẽn ta nus-bi a naase n ka n pɩke n maan kogsre la b bolga bãmb me sãnem. B maana sãnem kags a naas n ning te-roagendga kɩrems a naasã. Kagsa ra pẽnega te-roagendga noore la b ra tuiid-b-la raado n na n tõog n zẽk-a n teem zĩiga. Ra-kãens peesame n bolg sãnem, b pees-b-la te-roagendga tʋkr yĩnga. B kuda ne sãnem, teeda sẽn na n dogl a zugã: laase, ko-teese, la gilsi, wũmbli, bãmb pʋg la b na n ningd rãam bɩ kaama sẽn na n bas ne maandã. Yaa sãnem yɩlemde la b rɩk n maan-ba. B rɩka sãnem meng menga n kud fitil kãsenga. Zãar n toos sɛɛgã wala willã, maabrã, pu-yoaalã la puuga menga. Fãa naagame n kud kud-yɛnga. Fitila welga a sɛɛgẽ wã wil a yoobe: wil a yoob sẽn keg taab tẽnsʋk willã n dʋʋd a yiib-yiibu, zĩis a tã. Wil a yooba fãa sẽn keg taab tẽnsʋk willã n dʋʋd a yiib-yiib, zĩis a tã wã tara puud a tã sẽn dõog wa lɩɩn-puugu, ne a pu-yoolle la a puug menga. Sʋk wila tara puud a naase, sẽn dõog wa lɩɩn-puugu, ne a pu-yoolle la a puug menga. Maabre n da tʋʋg n gilg zĩis a tãabã wil a yooba sẽn keg taab tẽnsʋk willã n duudã. Maabra ne wila naagame n kud kud yɛnga. Fãa yaa sãnem meng sẽn toos ne zãare. Fitilsa a yopoe wã n paas teed a taaba, wa wõrsdgã la bug-rɩɩnda sẽn dʋʋgd zĩig ningã, dẽ me yõga ne sãnem yulli. B rɩka sãnem gilgu sẽn sek nin-tɩɩg tʋkre n kud rẽ fãa. B peesa gõ-miig raad n ka tɩdar maan-kugrã. A woglma yaa kãntɩɩga, a yalma yaa kãntɩɩga. A yalma la a woglma ra zema taaba. A zãndlma n da ya kãntɩɩs a yi, la a yɩdba naagame n ya bũmb a ye ne-a. B baoo sãnem meng n bolg a zugã la a kɩremsã la a yɩdbã, n bao sãnem maabre n mobg-a zãnga. B ninga a kɩrems a yiibã, poorẽ la taoore, sãnem kagse, bãmb b naase. Raad a yi n tuiid kagsã, maan-kugra tʋkr yĩnga. Daada maneg n peesa ne gõ-miiga, n bolg sãnem. B segla ka-sõngã la tɩdarã sẽn na n yõogã, wala mitba sẽn maandã. B Kaa yũ-noog maan-kugrã ne gõ-miig ra-pegdo. A woglem yaa kãntɩɩs a nu, a yalem kãntɩɩs a nu, dɩlla a kɩrems a naasa fãa zema taaba; a zãndlma yaa kãntɩɩs a tã. B ninga yɩdba a kɩrems a naasa fãa n bolg zũud a zugu. B yõga maan-kugra teed fãa: bug-rɩɩnda laase, kardo, zɩɩm sĩmbi, kõsã la wisda laase. Te-bãmb fãa yõga ne zũudu. B maana kut gãmbre n gilg maan-kugrã, b ning-a-la tẽngre la a zẽkame n ta a pʋɩ-sʋka. B ninga zũud kags a naase, kɩremsã, ra tuiidsa yĩnga. B peesa ra tuiidsã n maneg n bolg ne zũudu. B tuii b kagsã maan-kugra zẽkr yĩnga. Maan-kugra pʋg ra yaa vɩʋʋgo. B maana zũud ko-sĩngã. A sẽn dog bũmb ning zuga me yaa zũudu. Pagba sẽn da gãe sɛka rooga noora zũuda nin-gɛtsã la b reeg n kud dẽnd fãa. B maana zaka. Yaa pɛɛl sẽn wʋg ne gĩs kegemse la b tak n gilgi. Nug rɩtgo b woglma yaa kãntɩɩs koabga. Pɛɛla ra sogda wanzurf ribli sẽn ning gaagdse la sẽn tɩ gaagd zũud ra-lug gils sẽn tong taab pisi la sẽn sel te-sends pisi zutu. Nug goabga, le yaa kãntɩɩs koabga la peenda tak yã. Ra-lugsa sẽn ya gilsa me yaa pisi, b te-sendsa me boto. Sẽn lebd nin-taoore, yaa kãntɩɩs pis-nu la zaka yalem, la pɛɛla ra loe ra-lugs gils piiga sẽn sel zũud te-sends piig zutu. Sã n ya yaangã yalma yaa kãntɩɩs pis-nu. Yaa kãntɩɩs piig la a nu la pɛɛla reng n loe ra-lugs gils a tã sẽn sel te-sends a tãab zutu. Yaa kãntɩɩs piig la a nu la pɛɛla leb n tɩ loe ra-lugs gils a tã sẽn sel te-sends a tãab zutu. Woto b basa noor sʋka sẽn ta kãntɩɩs pisi. Rooga pɛɛla wʋga ne gĩs peelse sẽn maneg n dĩngi tɩ ya kẽnkẽ. Ra-lug gilsa sẽn sel bũmb niyns zuta rõoga ne zũudu, tɩ ribli wã ne b gaagdsa ya wanzurfu. Ra-lug gilsa zuta ra bolga ne wanzurfu; ra-lug gilsa ra soga taab ne wanzurf ribli la gaagdse. Dooga noor peendã da maneg n bukame la b wʋg-a-la ne gĩs mismiidu, gĩs moam yʋs, gĩ bãanese. A woglem yaa kãntɩɩs pisi, t'a zãndlma yaa kãntɩɩs a nu, wala pɛɛl a taabã. A ra-lug gils a naasã ne b te-sendsã da yaa zũudu. Yaa wanzurf ribli la gaagdse n da sog-b ne taaba. Ra-lug gilsa zuta bolga ne wanzurfu. Sɛka roog biili ne zaka rẽnna, fãa ra yaa zũudu. Ad kutã, sãnema, wanzurfã sẽn tall n maan doogã, la kuga walsa koglgã geelse. A Moyiiz sẽn yeel b rãmb tɩ b maan geelsã yɩɩ Levitse; maan-kʋʋd a Aarõ biiga, a Itamar, n deeg kãsengo. A Uri biig a Besalɛl, a Ur yagengã, Zɩɩda sak nedã, n tʋm tʋʋma wala Soaala-Wẽnd sẽn da wilgã. Sẽn yɩ-a a sõangda, yɩɩ Dã sak ned, a Ayisamak biiga Ooliab: yẽ ra mii kug peesgo, raad peesgo, peend bukri, peen yũnugri, n yũnug tɩ lebg mismiigu, miigu, moomd yʋs. Sãnema zãng sẽn tall n wa kõ Naaba-Wẽnd rooga tʋʋm yĩng zɩslem taa neb pis-naas la a tã zɩɩbo. Sãnem gila maga wa b sẽn minim n magd-a Wẽnd waoogra zĩigẽ. Israyɛl kamba sõadga wakato, b da reega wanzurf gil sẽn ta neb koabg la pis-nu zɩɩbo. (Magba tũu Wẽnd waoogr do-sõngẽ dẽnna.) Dẽ wilgdame tɩ ned kam fãa kɩsa wakɩ koɛɛng pʋɩ-sʋka. Yaool n yɩɩ rap bal la b sõd yã. Yaa neb niyns yʋʋm sẽn da ta pisi bala. Yɩɩ neb tus kobs-yoobe la a tã la kobs-nu la pis-nu. B rɩka wanzurf zɩslem sẽn ta neb koabg la pis-nu zɩɩbo n yẽneg n maan teeda sẽn na n sel zĩig ningã, Soaala-Wẽnd waoogr ro-sõnga ra-lugsi la peen-lilla raad yĩnga. Te-sendsã yɩɩ koabga, la wanzurf sẽn ta nin-tɩɩg zɩɩbo la b rɩk n dõog te-sendg a ye. B rɩka wanzurf sẽn ta nin-yend zɩɩbo n dõog ra-lugsa bãn-sogse la b kell n bolga zũuda ra-lugsa zutu la b kud bãn-tuiidsã sẽn tuiid ra-lugsã. B sẽn wa ne zũuda taa neb koabg la a yoob zɩɩbo. Dẽ la b rɩk n kud sɛka rooga noor ra-lugsa te-sendse, yũ-nood maanda maan-kugri ne a gãmbrã la a teed a taabã. Zaka ra-lugsa te-sendse, dooga noorẽ dẽnna, sɛk rooga rẽnna, bãn-kaadsã, fãa yɩɩ zũudu. Wẽnd dooga maanda kʋʋb yĩnga, b maana futu ne gĩs peelse, gĩs mismiidu, gĩs miidu, gĩs moam yʋs; b wʋga fut sẽn ya sõmbo a Aarõ yĩnga, wala Soaala-Wẽnd sẽn da wilgã. B maana sãnem-pɛ-m-poore ne gĩs mismiidu, gĩs miidu, gĩs moam yʋs, gĩs bãanese, n kõog-a ne sãnem gĩsi. B kuda sãnem t'a lebg paklga tɩ b bẽes a bõonego n kalem ne gĩs mismiidã, gĩs miidã, gĩs moam yʋs, gĩs peelse wala bukd mitba sẽn maandã. Sãnem-pɛ-m-poora yĩnga b wʋga peen-dis a yi: Peen-disa ninga sãnem-pɛ-m-poora kɩrems a yi. Sãnem-pɛ-m-poora peen-disa wʋga wala a mengã la ra yaa bõn-yɛng ne-a, wala Soaala sẽn da wilg a Moyiiz. B peesa kug miid a yiibã tɩ b yãgd b toore, n maneg n mobg-b ne sãnem. Kug miida zug ra gʋlsa a Zakoob kamba yʋy; gʋlsame tɩ kẽ sõma. B ra loeta Israyɛl kamba yʋy fu-bãg-vɩɩda poore n na wilg tɩ Soaala tẽra b yelle, wa b sẽn da wilg a Moyiiz. B mana sãnem-pɛ-m-yãoogã. B maneg n buk-a-la wa sãnem-pɛ-m-poorã ne gĩs mismiidu, gĩs miidu, gĩs moam yʋs, gĩs peelse, n kõog-a ne sãnem wa sãnem-pɛ-m-poorã. Da yaa gɩfo; a yalma me a woglma ra zema taaba, da yaa nug-yakemde. Gɩfa manegame n zape n tong a zugu kug neeb rũnus a naase: Pipi rũnuga yɩɩ kug zẽoogo, kõodr-pespele, toenɛɛga. Rũnug a yiib soaba: moomde, kẽega la kõodre. Rũnug a tãab soaba: miuug la sabla, kõodr sẽn lɩʋʋs miuugu, la mismiuugu. Rũnug a naas soaba: yirg gelle, rulg-lɛlma la bɩrba. Kug bãmb fãa zapame n kok ne sãnem. Kugr a ye fãa tara a Israyɛl biig yʋʋre la b sõora yaa piig la a yiibu. Yʋʋra gʋlsame tɩ kẽ kugrã wala kaset gʋlsem. Buuda sak fãa tara a kugri. B dɩka sãnem gĩs n pãnem wa wĩir, sãnem-pɛ-m-yãooga sẽbgr yĩnga. B rõoga sãnem nug-bĩns a yi, n gãneg sãnem paklga n bʋʋg-ba tɩ b luund sãnem-pɛ-m-yãooga yĩngr kɩrems a yiibã. Sãnem pãnems a yiibã dɩka b noor a ye n loe sãnem-pɛ-m-yãooga nug-bĩns a yiibã. Sãnem pãnemsa noor a to dɩk n loe ne sãnem-pɛ-m-poora peen-disã la woto gɩfa ka lebd goabg la rɩtg ye. B kuda sãnem kags a yi n loe-b sãnem-pɛ-m-yãooga tẽngr kɩrems a yiibã. B le kuda sãnem kags a yi n loe-b sãnem-pɛ-m-poor peen-dis a yiibã tẽngre, b sẽnesma zĩigẽ. Kagsa ra be yĩngr tɩ peen-disa be bãmb tẽngre. B rɩka peend mismiigu n gaag sãnem-pɛ-m-yãoogã la sãnem-pɛ-m-poorã kagse la woto b naaga taab n sog n ka le tõe n n lak ne fu-bãg-vɩɩda ye, wala Soaala-Wẽnd sẽn da wilg a Moyiiz. B wʋga fu-kãseng ning sãnem-pɛ-m-poorã la sãnem-pɛ-m-yãooga sẽn na n wa yeelg n bʋʋgã. B wʋg-a-la zãng ne pe-kõbd gĩs mismiidu. Yɩɩ mit tʋʋmde. B ninga loor fu-yorga tẽnsʋka la loora ra kãda wala gãmbre, n ka tõe n kẽeg ye. Fuuga tẽngre b gʋla tɩ-biis wa pooloomse ne gĩs mismiigu, gĩs miuugu, gĩs moomd yʋs, gĩs-pɛɛlga. B kuda sãnem loamba n lɩʋʋs-b fuuga tẽngr ne tɩ-biisã. Sɩda loamba wã ne tɩ-biisa ra lɩʋʋsa taab fuuga tẽngre: tɩɩg biiga, lombre; tɩɩg biiga lombre. La fuuga ra yeelgda maanda kʋʋb yĩnga, wala Soaala-Wẽnd sẽn da wilg a Moyiiz. A Aarõ ne a kamba yĩnga b sẽe fu-peelse. Dẽ me yɩɩ sʋlg mit tʋʋmde. Sẽn-le paase, b wʋga zu-viindse, pugli la kur koeese ne gĩs peelse. Sã n ya sẽbdsã, bãmb wʋga ne gĩs mismiidu, gĩs miidu, gĩs moam yʋs; b maneg n buk-b-la sõmb sõmbo, wala Wẽnd sẽn da togs a Moyiiz. B kuda sãnem paklgã sẽn na n mobg rĩirã. B kuda-a-la ne sãnem yɩlenga la b gʋlsame tɩ kẽ neere, wa kaset gʋlsem: Welga toor Wẽnd yĩnga. B sog-a-la ne peen mismiigu sẽn na n yɩlẽ n loe-a ne puglã, wala Wẽnd sẽn da wilg a Moyiiz. Woto la b baas rooga tʋʋma, sɛka roog tʋʋma. Israyɛl kamba modga ne tʋʋmna la b tʋmame tɩ tũ, wala a Moyiiz sẽn yeela zãnga. B waa n kɩsa a Moyiiz sɛka roog ne a zaka teedo; b waa ne sogdsã, ra-kaadsã, ra-paadsã, ra-lug gilimsã ne b te-sendsã, B waa ne pe-raada gãn-moama, sugra gãn sẽn ka tõe n yũn kooma, tẽnsʋk peen-lutgã. B waa ne kuga walsa koglgo la a ra-tuiidsã n paas a lingã. B waa ne te-roagendgã ne a teedã la Soaala-Wẽnd burã. B waa ne sãnem fitil kãsengã, teed nins sẽn naag wa wõrsdgã, bug-rɩɩnda laaga n paas bugma kaam. B waa ne sãnem maan-kugrã, ka-sõngã, tɩdar bãanegã, rooga noor peen-lillã. B waa ne zũud maan-kugrã ne a kut gãmbrã, a ra-tuiidsã la a teed a taaba n paas ko-sĩnga ne a sẽn dɩg bũmb ninga zugã. B waa ne zaka pɛɛla, ra-lugsã, te-sendsã, zaka noor peenna, wĩya, bãn-kaadsã la bũmb ning fãa sẽn tar a tʋʋmd dooga pʋga, sɛka roogã. B waa ne futã, maan-kʋʋra futã, a Aarõ ne a kamba sẽn da tog n yeelg b rãmbã, b tʋʋmda wakatã. Teeda fãa ra maaname n tũ Soaala-Wẽnd sẽn da wilg a Moyiiz. A Moyiiz ges-b-la a yembr-yembre, a yãeeme tɩ yaa Soaala-Wẽnd sẽn datã la a ning-b-la barka. Soaala-Wẽnd yeela a Moyiiz: «Ti ro-sõnga pipi kiuuga pipi raare. Ning kuga walsa koglg a pʋgẽ, peen-lilla poore. Wa ne te-roagendgã ne a teedã, n ning bũmb fãa a zĩigẽ. Wa ne fitil kãsenga la f widg a bugma. Dɩgl yũ-noog maan-kugra kuga walsa koglgo taoore, yagl peen-lillã. Dɩgl tɩdara maan-kugrã dooga noore, sɛka rooga noore. Dɩgl ko-sĩnga sɛka roog ne maan-kugra tẽnsʋka la pids-a ne koom. Ka zaka pɛɛla la yagl zaka noor peennã. Dɩk kaama n taag roogã la bũmb ning fãa sẽn be a pʋgẽ. Dɩk-ba n kõ Soaala-Wẽnd tɩ b lebg bũmb sẽn ya sõng zãng-zãnga. Taag yũ-noog maanda maan-kugr, ne a teeda fãa, ne ka-sõngo n dɩk-ba n kõ Soaala-Wẽnde tɩ b lebg bũmb sẽn ya sõng zãnga. Taag ko-sĩnga ne a sãngrã tɩ b lebg bõn-sõma. Kɩt t'a Aarõ ne a kamba kolg roogã n so koom. Dẽ poore yeelg a Aarõ a tʋʋmna futu la f taag-a kaam n dɩk-a n kõ Wẽnde t'a tʋm maan-kʋʋr tʋʋmde. Kɩt t'a kamba me kolg tɩ f yeelg-b futu. Taag-b kaam tɩ b tʋm maan-kʋʋr tʋʋmde. Kaama na n kõ-b-la maan-kʋʋr naam yʋʋm sẽn tong taab n ka be sɛɛbo.» A Moyiiz deega Wẽnd noor n maan fãa wa b sẽn da wilgã. Yʋʋmd a yiib soaba, pipi kiuugã pipi daare, b tii roogã. A Moyiiz kɩtame tɩ b reng n dɩgl te-sendsã n yaool n ning ra-lug-yalemsã, ra-paadsã, ra-lug-gilsã. B yɛdga sugra pɛɛl, wa Soaala-Wẽnd sẽn da wilgã. B rɩka kuga wals koglgo n kẽes rooga pʋga; b ninga a ra tuiidsã la b rɩka a lingã n dogl a zugu. B kẽesa kuga walsa koglga rooga pʋga la b yagla peen-lillã n na n solg-a wala Soaala sẽn da wilg a Moyiiz. B kẽesa te-roagendgã sɛka roogẽ, nug goabga, peen-lilla taoore. B tẽgna burã Soaala-Wẽnd taoore, wala b sẽn da wilg a Moyiiz. B ninga sãnem fitil kãsenga sɛka roogẽ, dooga rɩtgo, t'a tot te-roagendgã. B yõgna bugma, wa Soaala-Wẽnd sẽn da wilg a Moyiiz. B rɩgla sãnem maan-kugrã sɛka roog pʋga, peen lilla taoore. B yõoga a zugu tɩdar bãaneg sẽn tar yũ-noogo, wala b sẽn da togs a Moyiiz. B yagla peenna sɛka roog noore. B yalsa yũ-nood maan-kugrã sɛka roog noore n kʋ maand a zugu, yũ-noog maoongo la b kõo bõn-koodi kũuni, wala Soaala-Wẽnd sẽn da togs a Moyiiz. B rɩgla ko-sĩngã maan-kugrã ne sɛka roog tẽnsʋka la b pids-a-la koom, waasg yĩnga. Yaa ko-kãng la a Aarõ ne a kamba da tar n pegd b nusi la b nao. B sã n da kẽed sɛka roogẽ bɩ b sã n da kolgda maan-kugrã, b da rengd n peka b mense, wala Soaala-Wẽnd sẽn da togs a Moyiiz. A Moyiiz yagla zaka pɛɛla n gilgi sɛka roogã la maan-kugrã. A yagla zaka noor peenda me. Yaa woto la a Moyiiz baas rooga tʋʋma. Sawadga luda sɛka roogo la Soaala-Wẽnd pids-a-la ne b ziiri. A Moyiiz ka tõog n kẽ rooga pʋg ye tɩ sawadga ra lud-a lame la Wẽnnaam da pids-a-la ne b ziiri. B sẽn da ta zĩig ning fãa n yalse b paada zĩ-kãnga tɩ sawadga wa zẽk n loog n bas sɛka roogo tɩ bãmb me yaool n sɩng kẽnde. Sawadga sã n ka yiki, bãmb me yɛs n gũud-a lame. Wĩntoogo, sawadga ra yɛsa sɛka roog zugu la yʋngo a widigda bugum tɩ Israyɛl kamba fãa be b zagsẽ n ne-a. La b sẽn yals zĩig ning fãa yɩɩ boto. Wẽnnaam zĩnda sɛka roogẽ n bool a Moyiiz n yeel-a t'a wilg Israyɛl kamba woto: Yãmb nin-yend sã n wat ne bũmb n na kõ Soaala-Wẽnde, a tõe n waa ne rũm-bil bɩ rũm-bedre. Sã yaa yũ-noog maoong la yãmb nin-yend dat n kʋ ne rũng sẽn ya kãsenga, bɩ rũnga yɩ raoogo la a bũmb ba a ye da kedb ye. B talld-a lame n wa sɛka roog noor n kõ Soaala-Wẽnde. Kõata tikda a nug rũnga zug la Soaala-Wẽnd deegd-a lame wala kũun a sẽn kɩs n na n paam a yel-wẽna sugri. B yaond n kʋʋ rũngã Soaala-Wẽnd taoore la maan-kʋʋdba, a Aarõ kamba, kõta Soaala-Wẽnd zɩɩma. B mesda zɩɩma n gilg maan-kugrã sẽn be sɛka rooga noore. B sɩɩgda rũngã n bees-a. Tɩ maan-kʋʋdba, a Aarõ kamba, tugl bugum maan-kugra zugu n ning raado. La maan-kʋʋdba, a Aarõ kamba, rɩkda nemdã, zugã la kaama n dogl daada sẽn dɩt bugma, maan-kugra zugu. B pekda yãada la karsã ne koom, tɩ maan-kʋʋdba reeg n los bugmẽ. Bugum n na n dɩ maoong kãnga zãnga, t'a ruk yũ-noogo sẽn tat Soaala yam. Sã n yaa yũ-noog maoongo, la yaa rũm-bil la b rat n kʋ, pe-bila, bulla, rũnga na n yɩɩ raoogo, n ka tar bãnd ye. B kʋʋd-a-la maan-kugra goabga, Soaala-Wẽnd taoore, la maan-kʋʋdba, a Aarõ kamba, mesda zɩɩma n gilg maan-kugrã. B sɩɩgda rũngã n bees-a la maan-kʋʋdba dɩkda nemdã n paas zugã ne kaama n dogl bugma sẽn be maan-kugra zugu. B pekda yãada la karsã ne koom, tɩ maan-kʋʋda yõog-b maan-kugra zugu. Bugum n na n dɩ maoong kãnga zãnga t'a yũuga noog Soaala-Wẽnd sũuri. Sã n ya yũ-noog maoong la yaa bõn-yɩgdr buudu, la b rat n kõ Soaala-Wẽnde, wall bɩ malwall, la b na n kʋ. Maan-kʋʋda rɩkd-a lame n kõ Soaala-Wẽnde, maan-kugra zugu la a tõsgda a zugã, n dɩk-a n los bugmẽ t'a rɩ; la a basdame tɩ zɩɩma sĩin maan-kugrã. Dẽ poore a yãkda yoosengã ne bũmb ninga sẽn be a pʋgẽ n lob maan-kugra sɛɛga, zĩig ning tompɛglma sẽn dʋʋgdã, yaang sẽnẽ. B na n wesg-a lame n dɩk-a zãnga n los bugmẽ, t'a yũuga noog Soaala-Wẽnd sũuri. Ned sã n dat n kõ Soaala-Wẽnd kũuni, kũun sẽn ka rũnga, wala zom, zoma na n kalma ne kaam la tɩdare. B talld-a lame n kẽng maan-kʋʋdba, a Aarõ kamba, taoore. Yõngda zoma nug koore, n paas kaama la tɩdara zãnga. Maan-kʋʋda ningda rẽ fãa bugmẽ, maan-kugra zug, wala Soaala-Wẽnd pʋ-tẽer nekr bũmbu, la bugma rɩt-a lame t'a yũuga noog Soaala-Wẽnd sũuri. Sẽn kellã, yaa a Aarõ ne a kamba soolem. Yaa pʋɩɩr sẽn ya sõng wʋsg la b reegda t'a yãka Soaala-Wẽnd meng rẽnnẽ. Kũuna sã n yaa bũmb sẽn ningd wʋngẽ, a tog n yɩɩ zom sẽn nag ne kaam n yaool n ka ning bɩlle, n dõos wala miis-zũuri bɩ miis-paklga sẽn sõ kaam n lebg bugmẽ, n ka ning bɩll ye. Sã n ya bõn-kɩʋʋngo la f kõt Soaala-Wẽnde, dẽ me yɩta zom sẽn nag ne kaam, n ka ning bɩlle. Kũuna wesdame n dɩk kaam n pʋdg-a. Yaa kũuni sẽn ka rũnga la f kõ Soaala-Wẽnde. Sã n ya bũmb sẽn dõosd laag pʋga, zoma naagda ne kaam. F sẽn segl bũmb ning Soaala-Wẽnd yĩngã, f talld-a lame n wa kɩs maan-kʋʋdã t'a reeg-a n kolg maan-kugrã. Maan-kʋʋda na n yãka pʋ-tẽer nekr pʋɩɩrã n yõog-a maan-kugra zugu t'a yɩ yũ-noog n noog Soaala-Wẽnd sũuri. Sẽn kellã, yaa Aarõ ne a kamba soolem: yaa pʋɩɩr sẽn ya sõmb wʋsgo t'a yãka Soaala-Wẽnd meng rẽnnẽ. Zom sẽn tũnug kũun ning fãa tɩ y rat n dɩk-a n kõ Soaala-Wẽnde, bɩ b ra saag n lob-a bɩll ye. Y kõn saag bada n yõog bugmẽ, Soaala-Wẽnd yĩnga, rɩɩb sẽn ning bɩll bɩ sɩɩd ye. Y tõe n dɩk-a lame n kõ Soaala-Wẽnd wala kood dẽeng kũuni la ka tõe n yõog bugum, maan-kugr zugu, b yũ-noog yĩng ye. F sã n tall bõn-koodr kũun n wa, tẽeg n wa ne yamsem; da yĩm n ning Soaala-Wẽnd kũuna yamsem ye, t'a yaa zood bũmbu. Yaa rẽ yĩnga la bõn-koodr kũun fãa naagda ne yamsem. Sã n ya kood dẽeng la f wat n na n kõ Soaala-Wẽnde, kũuna na n yɩɩ ka-zut sẽn sẽ bugmẽ, bɩ kood paal zom pãrga. Paas kaam la tɩdare, tɩ yaa kũuni. La maan-kʋʋda na n yãka pʋ-tẽer nekr pʋɩɩre, zoma bilfu, kaama bilfu, tɩdara zãnga, n yõog bugum Soaala-Wẽnd yĩnga. Ned sã n dat n kʋ Lagem-n-dɩ maoongo, la rũnga yaa bedre, raoog bɩ yãanga, a bãng tɩ yaa rũng sẽn ka tar bãnde la a na n tall n wa Soaala taoore. B tikda nug rũnga zug la b kodgd-a-la sɛka roog noore. Maan-kʋʋdba, a Aarõ kamba, yãkda a zɩɩma n mes maan-kugrã n gilgi. B yãkda maoonga bũmb n yõog bugum tɩ rɩ zãng Soaala-Wẽnd yĩnga. B sẽn na n yãkã, yaa kaama sẽn mobg yãada zãnga, bɩ sẽn be zĩig a to; n paas yɩɩma a yiibã ne b kaama. Sã n ya sãoorã, b naagdame n yãk-a ne yɩɩma yiibã. A Aarõ kamba yõogda rẽ fãa maan-kugra zugu, wa yibeoog fãa maoongã. Bugum n na n dɩ-b zãnga tɩ b yũ-nooga noog Soaala-Wẽnd sũuri. Lagem-n-dɩ maoonga sã yaa rũm-bil la b kʋʋda, rũnga tõe n yii raoog bɩ yãanga, a ye n ka tar bãnde. Sã n ya pe-bila b talld-a lame n wa maanda kʋʋb zĩigẽ. B tikda nug rũnga zugu la b kʋʋd-a-la sɛka roog noore; t'a Aarõ kamba mes a zɩɩma n gilg maan-kugrã. Bũmb la b na n yãk n yõog tɩ rɩ zãnga t'a yũ-nooga kẽ Soaala-Wẽnde: yaa zʋʋra tõre, ne zʋ-kɛɛgã, kaama sẽn mobg yãada zãnga, yɩɩm a yiibã ne b kaama. Sã n ya sãoorã, naagd n yãk-a la ne yɩɩma. Maan-kʋʋda, na n basame tɩ bugma rɩ-b zãng maan-kugra zugu, Soaala-Wẽnd yĩnga. Sã n ya bʋʋg la b na n kʋ n kõ Soaala-Wẽnde, b rɩkda nug n tik a zugu, n kodg-a sɛka roog noore t'a Aarõ kamba mes a zɩɩma n gilg maan-kugrã. Ad-b sẽn na n yãk bũmb ning n yõog bugum Soaala-Wẽnd yĩnga: kaama sẽn mobg yãada zãnga, zĩis a taaba kaama, yɩɩm a yiiba ne b kaama, zʋ-kɛɛgã kaam. Sã n ya sãoorã, naagd-a lame n yãk ne yɩɩm a yiibã. Maan-kʋʋda yõogd-b-la bugum tɩ b rɩ maan-kugra zugu wala yũ-noog sẽn noogd Soaala-Wẽnd sũuri. Soaala-Wẽnd n so kaama fãa. La rẽ yaa noore mam sẽn kõt yãmb yagense la b sẽn na n deege, b sẽn be zĩig ning fãa; noora la woto: da rɩ-y kaam la zɩɩm ye. Soaala-Wẽnd goma ne a Moyiiz n yeel-a t'a wilg Israyɛl kamba woto: Ned sã n yĩd n maan wẽnga, n tõdg noor ning fãa Soaala-Wẽnd sẽn kõ, n maan bũmb sẽn kisi, bɩ a wa ne bũmbu tɩ b kʋ maoongo. Sã n ya maan-kʋʋd kãsenga, b sẽn taag a soab ka-sõngã, sã n yaa yẽ n maan wẽnga, n kɩt tɩ buuda fãa naag n dẽgme, yaa lʋlle sẽn ya sõng zãnga la a na n kʋ, a yel-wẽna sugr paoong yĩnga. A tallda lʋllã n wa Soaala-Wẽnd taoore, sɛka roog noore, n tik a zuga ne a nugu la a kodg-a Soaala-Wẽnd taoore. Maan-kʋʋdã, b sẽn taag a soab ka-sõngã, yãkda naafa zɩɩm bilfu n tall n kẽ sɛka roogẽ. A tẽkda zɩɩma ne a nug-bila n mes Soaala-Wẽnd waoogr rooga peen-lillã, Soaala-Wẽnd taoore, naoor a yopoe. A yaond n yãka zɩɩma bilfu n taag tɩdara maan-kugra yɩdbã, Soaala-Wẽnd taoore, sɛka roogẽ. Dẽ poore a raagda zɩɩma fãa n gilg maan-kugrã sẽn dɩg sɛka rooga noorã. La naafa sẽn kʋ yel-wẽnd sugr kosg yĩnga, a yãkda a kaama fãa. Yaa kaam ning sẽn mobg yãadã, sẽn gãneg yãada zugã, yɩɩm a yiibã ne b kaama, zʋ-kɛɛga kaam. Sã n ya sãoorã, a naagdame n yãk-a ne yɩɩma. Yãkda wala b sẽn yãkd lagem-n-dɩ maoongã la maan-kʋʋda yõogd-b-la bugum, yũ-noog maanda maan-kugr zugu, sɛka roog noore. Naafa gãongo, a nemdã, a zugã, a karsã, a yãadã, a bĩndã, naafa tõre, b na n talla rẽ fãa n zãag ne sikã, zĩig sẽn welg toore tɩ b lobd tompɛglma. B Na tugla bugum n yõog-b be. Yaa tãmpʋʋra zug la b na n dɩ bugum zãnga. Sã n ya Israyɛl kamba zãng n yĩdi n maan wẽnga, n maan Soaala-Wẽnd noor sẽn digdi, b rogenda yell b zugu, ba b sã n ka mi. Yell a woto buud sã n maane, b na bao lʋlle n tall n wa sɛka roog noore. Soaala-Wẽnd taoore kãsem-dãmba tikda naafa zugu ne b nusi la Soaala-Wẽnd taoore, b kʋʋd-a lame. Maan-kʋʋdã, b sẽn taag a soab ne ka-sõngã, tallda naafa zɩɩm n kẽ sɛka roogẽ. A na n tẽka zɩɩma ne a nug-bil n mes peen-lillã, Soaala-Wẽnd taoore, naoor a yopoe. A na n taaga maan-kugra yɩdba, maan-kugr ning sẽn vigl Soaala-Wẽnd taoorã, la a raagda zɩɩma yũ-noog maan-kugra sɛɛgẽ, sɛka rooga noorẽ. A na n yãka loalga kaam zãng n yõog bugum maan-kugra zugu. B na n maana ne nag kãng wala b sẽn maand ne naaf ning b sẽn kʋ yel-wẽn sugr kosg yĩngã. Maan-kʋʋda sã n maan b sẽn yet t'a maan bũmb ning n paam Soaala-Wẽnd sugrã, zãma wã sɩd paamda sugri. A na n kɩtame tɩ b tall nemda zãng n zãag ne sikã n tɩ yõoge. Yaa woto la b maanda, a Israyɛl kamba yel-wẽna dolb yĩnga. Sã n ya buud kãsma n yĩdi n maan wẽnga, n maan bũmb ning Soaala-Wẽnd noor sẽn gɩdge, tɩ samd be a zugu, a wata ne boɛɛg sẽn ya sõmbo. A rɩkda a nug n tik boɛɛga zugu la b kʋʋd-a-la Soaala-Wẽnd taoore, zĩig ning b sẽn kʋʋd yũ-noog maoongã, tɩ yaa yel-wẽnd dolb maoongo. Maan-kʋʋda tẽkda zɩɩma ne a nug-bila n taag maan-kugra yɩdbã, n yaool n dɩk zɩɩma sẽn kellã n daag maan-kugra sɛɛga. B yõogda kaama fãa wala lagem-n-dɩ maoongo. Maan-kʋʋda sã n maan a sẽn tog n maana fãa, buuda kãsem paamda sugri. Sã n ya nin-zaalg n yĩdi n kɩɩs Soaalã, n tʋk yell a zugu, b sã n wa wilg-a a sẽn tudg zĩig ninga, a tallda bʋ-yãanga sẽn ya sõmb n wa, a yel-wẽnda sugr kosg yĩnga. A rɩkda a nug n tik rũnga zugu tɩ b kʋ-a b sẽn kʋʋd yũ-noog maanda zĩigẽ. Maan-kʋʋda tẽkda zɩɩma ne a nug-bila n taag yũ-noog maan-kugrã yɩdbã. A rɩkda zɩɩma sẽn kellã n daag maan-kugra sɛɛga. A yãkda kaama zãng wala b sẽn maand ne lagem-n-dɩ maoongo. Maan-kʋʋda yõogda rẽ fãa bugum, Soaala-Wẽnd sũur maagr yĩnga. La a sã n maan a sẽn tog n maana fãa tɩ sẽn beega soaba paam sugri, a sɩd rokda a beegr taale. Neda sã n wat ne rũnga n na n kʋ maoongo, yell a woto yĩnga, bɩ a wa ne pe-yãanga sẽn ya sõmb zãnga. A rɩkda a nug n tik rũnga zugu tɩ b kʋ-a, a yel-wẽna sugr kosg yĩnga, zĩig ning b sẽn kʋʋd yũ-noog maandã. Maan-kʋʋda tẽkda zɩɩma ne a nug-bila n taag yũ-noog maan-kugra yɩdbã. A rɩkda zɩɩma sẽn kellã n daag maan-kugra tẽngre. A yãkda a kaama zãng wala b sẽn yãkd pesg sẽn kʋ laafi kosg yĩnga. Maan-kʋʋda yõogd-a-la bugum maan-kugra zugu Soaala-Wẽnd yĩnga. Maan-kʋʋda sã n maan a sẽn tog n maan bũmb ninga fãa, beegda paamda sugri. Fo yãenda bũmb ne f nifu bɩ bũmb n lʋɩ f tʋbrẽ la b kosa foo Soaala-Wẽnd yʋʋr yĩnga la b naag n kãab-f kãab wẽnga tɩ f wa togs sɩda, bãng tɩ f maana yel-wẽnde la f tʋka taale f zugu, fo sã n pa sak n togs sɩdã. Ned sã n ka bãnge n sɩɩs bũmb ning fãa sɩɩsg sẽn kisi, wala we-rũnga, wala yir-dũnga, wala rũm-kɩdse sẽn ki, la yaa rũms sɩɩsg sẽn kisi, nin kãng rat t'a pa rata, a rẽgmame n dogl yell a zugu. Ned sã n ka bãnge n sɩɩs ninsaal rẽgdo, sẽn ya rẽok ninga sɩɩsg sẽn kis fãa, a sã n wa bãng t'a sɩɩs-a lame, wakat kãng tɛka a lebgda rẽgdo la yell doga a zugu. Ned sã n ka maan gũusgu n yaag a noor n wẽen yaare, wẽeneg sẽn na n lɛɛg n wã-a, bɩ sẽn na n wã a taaba, bɩ ned sẽn minim n wẽen yaar bũmb fãa poorẽ, yẽ soab sẽn bãng t'a wẽena yaar wakat ning fãa, a lebga rẽgdo tɩ yell be a zugu. Ned ninga sẽn dogl yell a woto a zug tog n wilga neba fãa a kongre. A yel-wẽnda dolb yĩnga, a na n kõo Soaala-Wẽnd rũng sɛdga, bʋ-sɛdg bɩ pe-sɛdga. Maan-kʋʋda na n maana a sẽn tog n maan bũmb ninga tɩ beegda paam sugri. Ned sã n ka tõe n paam pe-yãanga bɩ bʋ-yãanga, yaa wal a yiibu bɩ malwal a yiibu la a na n tall n wa kõ Soaala-Wẽnde n dol a yel-wẽna. Wall a ye bɩ malwall a ye kʋʋda yel-wẽna sugr kosg yĩnga, a to wã kʋʋda yũ-noog maoongo. A rengd n kɩsa maan-kʋʋdã a sẽn na n kʋ a soab yel-wẽna dolb yĩnga. Maan-kʋʋda gãta walla yublã n take la a pa tõsgd-a ye. La a yãkda zɩɩma n mes maan-kugra zugu la a tãoos walla zɩɩm maan-kugra sɛɛga: yaa yel-wẽnd sugr kosg maoongo. Wallã bɩ malwallã a to wã, maan-kʋʋda regd-a lame n maan yũ-noog maoongo wala sẽn zoe n wilgã. Maan-kʋʋda sã n maan a sẽn tog n maan bũmb ning fãa n kos sugrã la sugra paamda. Ned sã n ka tõe n paam wal a yi bɩ malwal a yi, a sẽn na n wa ne bũmb ninga, Soaala-Wẽnd taoore, a yel-wẽnda sugr kosg yĩnga: yaa zom wũmbla. B basda kaama ne tɩdara taale, tɩ yaa yel-wẽnd dolb maoongo. A na n talla zoma n wa maan-kʋʋda nengẽ tɩ yẽ yãk pʋ-tẽer nekr pʋɩɩr ne nug koore la a na n ning-a-la bugmẽ tɩ bugma naag-a ne kũuna taabã n dɩ Soaala-Wẽnd yĩnga. Yaa sugr kosg maoongo. Maan-kʋʋda maanda a sẽn tog n maan bũmb ning fãa n kos sugri tɩ beegda sɩd paam sugri. Maan-kʋʋda meng sẽn deegd bũmb ning wala a pʋɩɩre, wẽnda a sẽn deegde, sã n ya kood la b wa ne. Soaala-Wẽnd yeela a Moyiiz t'a wilg woto: Ba ned sã n yĩd n maan wẽnga, n kʋ rũnga, Soaala-Wẽnd noor sẽn gɩd rũms niyns maanda kʋʋbo, yẽ soab rẽgma a menga. Ad-a sẽn na n maane: a wa maneg a yellã Soaala-Wẽnd taoore ne pesgo sẽn ya sõmb zãnga, t'a ligda me zem bũmbu, sã n na n da-a ne ligd ning sẽn sõt wẽnd doogẽ wã. Maoonga na n yɩɩ sugr kosg maoong la b na n kʋ. A sã n wa ne rũng sẽn ka zem bũmbu, yaa bõne la wẽnd dooga rɩ yã. A na n yaoo woto: ligd ning maan-kʋʋdba sẽn saagd pesgã, pʋɩta a nu la pʋɩɩr a nu soaba la a lebd n bao n paas n kɩse. Maan-kʋʋda kʋʋda rũnga maoongo la a maanda a sẽn tog n maan n kos sugri neda yĩnga, tɩ sugra yaool n paam, Soaala-Wẽnd nengẽ. Neda sã n maama yel-wẽnde t'a maana bũmb Wẽnnaam noora sẽn gɩdge, yell be-la a zugu, ba sã n tũu ne yĩdgu. A na n baoo a wubrẽ, pe-raoog sẽn ya sõmb zãnga la sẽn sek yel-wẽnd sugr kosg maoongo. Maan-kʋʋda sã n maan a sẽn tog n maan fãa n kos sugri, beegda paamda a beegra sugri, beegra sã n sɩd tũu ne yĩdgu la bãngr kaoolgo. Dẽ yaa yell manegr maoongo t'a sɩd da tʋka Soaala-Wẽnd beegr a zugu. Soaala-Wẽnnaam yeela a Moyiiz t'a taas woto: Ad Soaala-Wẽnd beegra sẽn tõe n beeg to-to yɛsa: f maana bũmb sẽn wa ne f tũud-n-taaga bõne. Yaa waa f sã n ka togs f tũud-n-taaga sɩda bobell poorẽ, bɩ a sẽn peng foo bũmb poorẽ, bɩ f sẽn zuk bũmb poorẽ, bɩ f sẽn zãmb f to poorẽ. Leb n yaa f sã n yagd zirẽ, bũmb sẽn menem tɩ f lɛɛg n yãende n ket n wẽenẽ tɩ f pa yãend ye. Yaa paas zirẽ wã yagb wẽnem ne wẽenego. Sẽn maana woto maana wẽng n tʋkd yell a zugu la a tog n lebsa a sẽn zukã, a sẽn deeg tɩ yɩɩd a sẽn da tog n deegã, bobellã bɩ bõn-menemdgã a sẽn lɛɛg n yãendã. Ad-b sẽn na maan kast zirẽ soabã: bũmba na n saaga ligdi la b na n yaoolg-a-la ligda pʋɩɩr a nu soaba n paase t'a kɩse n ka kees bũmbu, b sẽn na n wilg-a a kongra raare. A na n wa kõo Soaala-Wẽnde, a yel-wẽnda dolb yĩnga, pe-raoogo sẽn ka tar bãnde, a sẽn yiis a wubrẽ, la sẽn ta yel-wẽnd dolb maoong rũnga. Maan-kʋʋda na n kosa sugr beegda yĩnga, la a yella sẽn yɩ a soab fãa na paama sugri. Wẽnnaam yeela a Moyiiz t'a togs a Aarõ ne a kamba woto: Ad yũ-noog maoong sẽn sẽed to-to. B sẽn boond maoong ning tɩ yũ-noog maoongã, yaa maoong sẽn ningd bugmẽ yʋngo, maan-kugra zugu la b modgdame tɩ raada ra tẽes ye. Maan-kʋʋda tãooda kur-koɛɛga la a yeelgda fu pɛɛlga. A vaagda bug-rɩɩna sẽn be maan-kugra zugu n ning maan-kugra sɛɛgẽ. Dẽ poor marsã a yeesda a futã n le ning a taaba la a tʋkda tompɛglma n yi we-kɛɛnga, zĩig ning b sẽn yãk toore. Bugum ninga sẽn wit maan-kugra zugã ka tog n ki ye. Yibeoog fãa maan-kʋʋda wata ne raado. Raada zugu a rogenda nemdã bɩ kaama sẽn na n dɩ bugma, Bugum sẽn ka kiid abada n wit maan-kugra zugu. Ad kũuna sẽn kõt to-to: a Aarõ kamb n talld-a n wa maan-kugra zugu, Soaala-Wẽnd taoore. B yãkda zoma ne nugu n paas kaama bilfu, la tɩdara zãnga, n yõog bugum t'a yũuga noog Soaala-Wẽnd sũuri la a yɩ tẽegre. A Aarõ ne a kamba yaondame marsã n dɩ sẽn ketã la b gũusdame tɩ ra-bɩll da pẽneg be ye. B baooda zĩig sẽn ya zĩ-sõng, zaka pʋga, sɛka doog noor, n zĩnd n dɩ b rɩɩbã. Ka lobd ra-bɩll n wẽ zoma n yaool n kɩɩm ye. B sẽn kõ Soaala-Wẽnd kũun ninga la m yãkd n kõ a Aarõ kamba. Yaa rɩ-sõngo, wala b sẽn keesd yãmb rɩɩb ningã, y sã n kʋʋd yũ-noog bɩ yell manegr maoongo. Sẽn ya-a rao fãa, a Aarõ kamba sʋka, n tõe n dɩɩ rɩ-kãngã. Yaa bãmb pʋɩɩr sẽn ka na tedg zamaan woo zamaana, pʋɩɩr sẽn yãk Soaala rẽnnẽ. Woto wã fo sã n ka kĩ ne a Aarõ n kɩɩs n dɩ, f na bool yel-beed n kõ-f menga. Wẽnnaam yeela a Moyiiz t'a gom woto: Ad kũun ninga a Aarõ ne a kamba sẽn na n kõ Soaala-Wẽnde, b kaama taagr daare: zom wamde, wamda pʋɩ-sʋk yibeoogo, a pʋɩ-sʋk zaabre, zamaan woo zamaana. Zoma nagda ne kaam n dõos kud-pakleg zugu la b kõt-a-la Soaala-Wẽnd wala yũ-noog sẽn noogd sũuri. A Aarõ biig ning sẽn na n deeg a ba wã maan-kʋʋra naam, yẽ me na n maana boto tɩ yaa noor sẽn ka tõe n teem ye. Kũuna na n dɩɩ bugmẽ zãnga, Soaala-Wẽnd yĩnga. Kũun ninga fãa sẽn ya maan-kʋʋd n wa ne, na n yɩɩ bũmb sẽn yõogd zãnga, b ka na n dɩ-a ye. Wẽnnaam yeela a Moyiiz t'a taas a Aarõ ne a kambã woto: Ad yel-wẽnd sugr kosg maoongo sẽn kʋʋd to-to. Rũnga kʋʋda Soaala-Wẽnd taoore, zĩig ning b sẽn kʋʋd yũ-noog maoongã. Yaa bũmb sẽn ya sõng zãnga. Maan-kʋʋd ninga sẽn kʋ-a maoongã n tõe n wãb-a la yaa zĩ-sõngẽ la a na n wãb-a: sɛka zakẽ. Bũmb ning fãa sẽn sɩɩs nemdã na n lebga bõn-sõngo. Rũnga zɩɩm sã n madg fuugu, b baooda zĩ-sõng n pek zɩɩma sẽn madg zĩig ningã. Rʋk ninga sẽn dʋga nemdã na n wãame, a sã n ya tãnd rʋko. Sã n ya kut rʋko, b ruud-a lame la b pekd-a lame n yɩlem. Sẽn ya-a rao fãa, n be maan-kʋʋdba sʋka, tõe n dɩ maoongã. Yaa bũmb sẽn ya bõn-sõng zãnga. B ra saag n wãb rũng sẽn kõ Wẽnnaam yel-wẽnd dolb yĩnga, tɩ b rɩk a zɩɩma n kẽ sɛka roogẽ n mes-a la yaa sugra kosg n wa ne rẽnna ye, yõogd-a-la bugum. Yaa woto la yell manegr maoonga kʋʋda: yaa bũmb sẽn ya bõn-sõngo. B kʋʋda rũnga zĩig ning b sẽn kʋʋd yũ-noog maoongã tɩ maan-kʋʋda raag zɩɩma n gilg maan-kugrã. A na n dɩka kaama fãa n kõ Soaala-Wẽnde: zʋʋrã, kaama sẽn mobg yãadã, yɩɩm a yiibã ne b kaama, zʋ-kɛɛga kaam, kaam ninga sẽn pɛ lʋgã. Naagda sãoora vã-minim la yɩɩma. Maan-kʋʋda na n yõog-b lame tɩ b rɩ bugum zãnga Soaala-Wẽnd yĩnga, yaa yell manegr maoongo. Sẽn ya-a rao fãa, n ya maan-kʋʋda tõe n dɩ-a lame. B rɩt-a-la zĩ-sõngẽ tɩ yaa bũmb sẽn ya sõmb wʋsgo. Yel-wẽnd dolb maoongo ne yell manegr maoong tũuda sor a ye, b manesma yaa bõn-yɛnga. Kũun ning maan-kʋʋda sẽn dɩk n kos sugrã lebgda maan-kʋʋda pʋɩɩre. Maan-kʋʋda sẽn deeg rũng ning fãa n kõ Soaala-Wẽnde, yẽ n so a gãongã, maoonga sã n ya yũ-noog maoongo. Kũun ninga fãa sẽn kɩɩme, sẽn wʋme, sẽn dõos laagẽ bɩ sẽn dɩgl kud paklga zug, yaa maan-kʋʋd ninga sẽn dɩk-a n kõ Soaala-Wẽnda soolem. Kũun fãa sẽn nag ne kaam bɩ sẽn ka ning kaam, n yaool n ka rʋge yaa a Aarõ kamba n so la pʋɩta taab tɩ zemse. Ad lagem-n-dɩ maoong sẽn na n maan to-to: B sã n naag-a ne maoong a to, wala pẽgr maoongo, maoonga paasda ne zom sẽn nag ne kaam n yaool n pa ning bɩll ye, bɩ bur sẽn sõog kaam n yaool n pa ning bɩll ye, bɩ miisdu. B Naagdame n wa ne bur sõngo pẽgr maoonga yĩnga. B yãkda dɩɩba buud toɛ-toɛ wã n tees Soaala-Wẽnde, wala bãmb pʋɩɩre. Sẽn maan-a maoongã la a rɩk zɩɩma n mesã n so rẽ. Nemda dɩta maoonga raar bala, ka keesd bũmb beoog yĩng ye. Sã n ya pʋleng pidsgu maoong bɩ yamleoog maoong la b kʋ yã, nemda dɩta maoonga raare la sã n keese, a rɩɩb pa tõt vẽkẽmbeoog ye. Nemda sã n maan da-yɩten-daare, b yõogd-a-la bugum zãnga. Maoonga sã n kʋ tɩ ra-bitẽ, tɩ fo ket n wãbd a nemd dũnna, fo rẽgemda f menga, fo sãamda f maoonga yel-sõmde, la fo sẽn wãb nemd sẽn sãama, fo tʋka yell f zugu. Neong fãa sẽn sɩɩs-a bõn-dẽgdo ka tõe n le wãb ye, b lobd-a-la bugmẽ. Yell sẽn ka be ned ninga zug bal n tõe n wãb maoong nemdo. Yell sã n be ned zug t'a wãb maoong neongo, lagem-n-dɩ maoongo, b yiisda a soab buudẽ. Ned sã n sɩɩs bõn-dẽgdo, rẽgda yaa ninsaal rẽgd bɩ rũnga, bɩ bũmb a to, n yaool n wãb lagem-n-dɩ maoong nemdo, b yiisda yẽ soab me buudẽ. Soaala-Wẽnd yeela a Moyiiz t'a wilg Israyɛl kamba woto: Da rɩ-y naafo, pesgo bɩ bʋʋg kaam ye. Rũng sã n ki a toore bɩ yaa we-rũng n yõk-a, rũng kãng kaam tõeeme n dɩk n tʋm tʋʋmde la ka tõe n dɩ-a ye. Rũng ka kʋʋd yũ-noog maoongo tɩ b le tõog n dɩ a kaama ye. B yiisda sẽn kɩɩs-a n dɩ fãa buudẽ. Y sẽn be zĩig ning fãa, y ka tõe n dɩ zɩɩm ye. Yaa rũng rẽnna, yaa luiil rẽnna, y ka tõe n dɩ zɩɩm ye. Ned ninga fãa sẽn dɩ-a zɩɩm, b yiisd-a-la Israyɛl buudẽ. Soaala-Wẽnd yeela a Moyiiz t'a wilg Israyɛl kamba woto: Ned ninga fãa sẽn na n kʋ-a lagem-n-dɩ maoong bɩ a wa ne Soaala-Wẽnd pʋɩɩre. Yaa yẽ meng a toore n na n wa ne kũun niyns sẽn na n kõ Soaala-Wẽnde: nem-kaama. A naagda ne yãoogã, tɩ yãooga la b reegd n tees Soaala-Wẽnde, maan-kugra zug, Soaala-Wẽnd taoore. Maan-kʋʋda yãkda kaama n yõog maan-kugra zugu la yãooga menga, a Aarõ ne a kamba n so rẽ. Y na n paasa maan-kʋʋda rũnga rɩtg gere, wa pʋɩɩr sẽn yãk Soaala-Wẽnd dẽnnẽ. Sẽn ya-a rɩtg ger kãng soaala, yaa maan-kʋʋd ning sẽn dɩka zɩɩma la kaama n kõ Soaala-Wẽndã. Israyɛl kamba sã n kʋ rũng lagem-n-dɩ yĩnga, mam a Naaba-Wẽnd n so yãoogã ne gerã la mam dɩkd-b lame n kõt a Aarõ ne a kamba, la rẽ yaa noor a Israyɛl sẽn na n deeg zamaan woo zamaana. Woto n yɩt pʋɩɩr ning a Aarõ ne a kamba sẽn na n deeg Soaala-Wẽnd pʋɩɩrẽ, b sã n paam maan-kʋʋra tõog fãa. Yaa woto la Soaala-Wẽnd modgd Israyɛl kamba tɩ b kõ b maan-kʋʋdba b sẽn taag-b kaam daare tɩ b reeg maan-kʋʋr naam la rẽ yaa noor a Israyɛl kamb sẽn na n gãd zamaan woo zamaana. Yaa woto me la b kõt kũuni la b kʋʋd yũ-noog maoongo, yel-wẽnd dolb maoongo, yell manegr maoongo, naam deegr maoongo la laafi kosgo bɩ lagem-n-dɩ maoongo. Yaa woto la Soaala-Wẽnd wilg a Moyiiz Sinayi tãnga zugu b sẽn waa n yeel Israyɛl kamba we-raoogẽ tɩ b wa ne kũuni n kõ bãmba. Soaala-Wẽnd yeela a Moyiiz: «Bool a Aarõ ne a kamba sɛka roog noore. Kɩt tɩ b wa ne fu-sõma wã, ne kaam-sõngã, ne loalg ning sẽn na n kʋ yel-wẽnd sugr paoong yɩngã, ne pe-raad a yi la bura sẽn ka ning bɩlle n tẽg ne peoogã. Tigim a Israyɛl kamba fãa sɛka roog noore.» A Moyiiz deega Soaala-Wẽnd noore, la neba tigma taab sɛka roog noor. A Moyiiz yeel-b lame t'a na n maana Soaala-Wẽnd sẽn yet t'a maan bũmb ninga. A kɩtame t'a Aarõ ne a kamba kolg t'a so-b koom. A Moyiiz yeelga a Aarõ fu-wokã, n sẽbg a sɛɛga, n yeelg-a fu-mismiuugã ne fu-bãg-vɩɩdã la a loe-la a poorẽ wã sãnem-pɛ-m-poorã. A rɩka sãnem-pɛ-m-yãooga me n sog-a la a suii b sẽn tar n bʋgd b mens Soaala-Wẽnd taoorã, n mi Soaala leokr yaa n-yẽe bɩ ayoo. A vila a zuga peende n mobg-a ne sãnem paklgã. Yẽ la pugl sõng buud Soaala-Wẽnd sẽn da wilg a Moyiiz. A Moyiiz rɩka ka-sõng n taag roogã la bũmb ninga fãa sẽn da be a pʋgẽ. A mesa maan-kugra naoor a yopoe n yaool n taag-a kaam ne a teeda fãa tɩ b na n lebg bõn-sõma, n paas ko-sĩnga ne a roaglga. A kɩrga kaam a Aarõ zugu n dɩk-a n kõ Soaala-Wẽnde. A Moyiiz yaool n kɩtame t'a Aarõ kamba kolge t'a yeelg-b futu, n sẽbg-b seese, n ning-b pugli, wala Soaala-Wẽnd sẽn da wilg-a. A kɩtame tɩ b wa ne lʋllã, yel-wẽn sugr kosg maoonga rũngã. A Aarõ ne a kamba tika a zug ne b nusi, t'a Moyiiz kodg-a. A tẽka a nug-bil zɩɩmẽ wã n taag maan-kugra yɩdba, sẽn na n yɩlẽ n pek a rẽgd buud fãa la a raaga zɩɩma maan-kugra sɛɛga. Yɩɩ woto la maan-kugra welg toore n lebg bõn-sõngo tɩ b na n wat n kʋʋd a zugu sugr kosg maandã. A Moyiiz yãka kaama fãa sẽn gãneg yãada zugẽ, n yãk sãoora, yɩɩm a yiibã ne b kaama la a yõog-b-la bugum maan-kugra zugu. Lʋlla menga, a gãongo, a nemdã, a bĩndã, b zãaga sikã n yõog-ba, wala Soaala-Wẽnd sẽn da wilg a Moyiiz. A Moyiiz kɩtame tɩ b kolg ne yũ-noog maoonga pe-raoogo. A Aarõ ne a kamba tika pesga zug ne b nusi t'a Moyiiz kodg-a. A raaga a zɩɩma n gilg maan-kugrã. A sɩɩga rũngã n bees-a n kɩt tɩ b yõog zugã, wilsã la kaama. A peka koomẽ yãadã, karsã, la a yõoga pesgã tõre maan-kugra zugu. Bugum n na n dɩ maoong kãnga zãnga t'a yũuga noog Soaala-Wẽnd sũuri. A kɩtame tɩ b wa ne pesg a to wã, naam deegr maoonga pesgo. A Aarõ ne a kamba rɩka b nus n tik a zugu, a Moyiiz kʋ-a lame n yãk a zɩɩma bilfu n taag a Aarõ rɩtg tʋbre, n taag a rɩtg nug-raoogo, a rɩtg nao-raoogo. A kɩtame marsã t'a Aarõ kamba kolge t'a yãk zɩɩma n taag b rɩtg tʋba, b rɩtg nug-raado, b rɩtg nao-raado. Dẽ poore a Moyiiz daaga zɩɩma n gilg maan-kugrã. A rɩka kaama, zʋʋrã, kaama sẽn gãneg yãada zugã, sãoorã, yɩɩm a yiibã ne b kaama la rɩtg gerã. Peoog ning sẽn dɩg Soaala-Wẽnd taoora pʋga a yãka bur sẽn ka ning bɩlle, n paas samsa, miisdu, la a rogl-b-la kaama la rɩtg gera zugu. N dɩk rẽ fãa n ning a Aarõ ne a kamba nusẽ tɩ b naag taaba n tees Soaala-Wẽnde. A Moyiiz le reeg-b lame n yõog bugum. Dẽ yɩɩ naam deegr maoong, yũ-noog maoongo, Soaala-Wẽnd yĩnga. A Moyiiz dɩka yãoogã n tees Soaala-Wẽnde la rẽ yɩɩ yẽ pʋɩɩre, wala Soaala-Wẽnd sẽn da wilg-a. A Moyiiz yaool n dɩka kaama la zɩɩma sẽn da be maan-kugra zugu n mes a Aarõ ne a kambã, a fut la a kamba futu. Woto a rɩka a Aarõ ne a futã n kõ Soaala-Wẽnde. N dɩk a kamba ne b futã n kõ Soaala-Wẽnde. A Moyiiz yeela a Aarõ ne a kamba: «Rʋgl-y nemdã sɛka roog noore. Yaa beenẽ la y na n wãb nemdã n naag ne burã sẽn be peooga pʋga, tɩ yaa woto la m da yeel yã: ‹A Aarõ ne a kamba n na n dɩ ba.› Sẽn kellã, nemdã la burã, los-y-b bugmẽ. Dasem a yopoe tõre y ka na n zãag ne sɛka dignoor ye tɩ y naam deegr kibsa wa baase, la a kaoosda dasem a yopoe. Soaala-Wẽnd n yeele tɩ m maan wa m sẽn maan dũnna wã n kos sugr y yĩnga, la dasem a yopoe pʋgẽ, wĩndig la yʋngo, y na n paa sɛka rignoorẽ. Dẽ poor marsã la y na tõog n sɩng y maan-kʋʋra tʋʋmde la y kõn ki ye. Yaa woto la b wilg-ma.» A Aarõ ne a kamba maana Wẽnnaam sẽn togs-b bũmb ning fãa ne a Moyiiz noore. A nii daarã, a Moyiiz boola a Aarõ, a kambã la kãsem-dãmbã. A yeela a Aarõ: «Yõk nag-bil n kʋ maoong yel-wẽnd sugr kosg yĩnga la f yõk pe-raoogo n kʋ yũ-noog maoongo. Nag-bilã wala pesgã tog n yɩɩ sõmb zãnga, tɩ f tall-ba n wa Soaala-Wẽnd taoore. Dẽ poore yeel Israyɛl kamba: ‹Wa-y ne boɛɛg n kʋ yel-wẽnd sugr kosg maoongo; wa-y ne nag-bila la pe-bila sẽn zems yʋʋmd a ye la sẽn ya sõng zãnga n kʋ yũ-noog maoongo; wa-y ne loalga la pe-raoogo n kʋ Soaala-Wẽnd taoore, tɩ y wa lagem-n-dɩ. Wa-y ne kũuni, zom sẽn nag ne kaam. Rũnna, Soaala-Wẽnd na n lika b menga.› » B talla a Moyiiz sẽn yeela fãa n wa sɛka roog noor tɩ Israyɛl kamba fãa kolg Soaala-Wẽnd taoore. T'a Moyiiz yeel-ba: «Ad Soaala-Wẽnd sẽn yet tɩ y maan bũmb ninga n paam n yãend b ziirã.» A yeela a Aarõ: «Kolg maan-kugrã, kʋ maandã f sẽn tog n kʋ f meng yĩngã, sugr kosgo la yũ-noog maoongã. Maan Soaala taoore sugr kosga sẽn dat bũmb ning fãa. Yaool marsã n kʋ buuda maoong la f kos sugr a yĩnga la maan fãa tɩ tũ wala m sẽn wilg fooma.» A Aarõ kolga maan-kugrã n kʋ nag-bila a meng yel-wẽna sugr kosg yĩnga. A kamba kolga ne zɩɩma t'a tẽk a nug-bil n taag maan-kugra yɩdba n yaool n daag sẽn ketã maan-kugra sɛɛgẽ. Rũng ninga sẽn kʋ yel-wẽnd dolb yĩnga, yẽ kaama, a yɩɩma ne b kaama la sãoorã, a Aarõ yõog-b-la bugum maan-kugra zugu, wala Soaala-Wẽnd sẽn da wilg a Moyiiz. Nemda la gãongã, a yõog-b-la we-kɛɛnga. A kʋʋ yũ-noog maoongã t'a Aarõ kamba wa ne zɩɩma t'a raag-a n gilg maan-kugrã. B kɩs-a-la rũnga nemd b sẽn beesã n paas zugã t'a yõog-b maan-kugra zugu. B peka yãada la karsã n yõog bãmb me maan-kugra zugu. B waa ne zãma wã kũuni. A reega boɛɛga n kʋ-a yel-wẽnd sugr kosg yĩnga wala a sẽn zoe n maane. A kɩtame tɩ b kolg ne yũ-noog maoongã la a maana wa sẽn segde. B waa ne zoma t'a yõng ne a nug n lob bugmẽ, maan-kugra zugu, t'a rɩ bugum wala yibeoog maoongo. A kʋʋ loalga la pe-raoogã, yɩɩ maan-dɩtga zãma wã yĩnga. A Aarõ kamba kɩs-a-la zɩɩma t'a raag-a n gilg maan-kugrã. Loalga la pe-raooga kaama, a zʋʋrã ne a kaama, yɩɩma, sãoorã, b yõog-b-la maan-kugra zugu. A Aarõ rɩka rɩtg gerã la rũms a yiiba yãoog n tees Soaala-Wẽnde, wala sugr kosga sẽn dat t'a maan la wala b sẽn da wilg a Moyiiz. A Aarõ yaool n zẽka a nug marsa n ning neba barka. A sẽn kʋ maandã n sɛ, yel-wẽnd sugr kosg maoongo, yũ-noog maoongo, laafi kosg maoongo, a sigame. A Moyiiz ne a Aarõ kẽe sɛka roogẽ n lɛɛg n yi n ning zãma wã barka. Soaala-Wẽnd puka b ziir neba fãa gill nifẽ. Bugum n yi Soaala-Wẽnd taoore n dɩ maoongã la kaama sẽn dɩgl maan-kugra zugã. Zãma wã kelma sũ-noogo la a wõgemda tẽnga. A Aarõ kamba, a Nadab la a Abiyu, rɩka b tɩdar laase. Bugum la tɩdar zom la b ning b pʋsẽ. B taa Soaala-Wẽnd taoore n na n n wis-ba, la Soaala-Wẽnd yaool n da ka kos b rẽ ye. Dẽ la bugum me yi Naaba-Wẽnd taoore n zomb-ba la b kiime. A Moyiiz yeela a Aarõ: «Soaala-Wẽnd da ka pĩnd n yeele: M datame tɩ sẽn kolgd-b maama bãng m waoogre, m datame tɩ m yʋʋra paam pẽgre buuda fãa taoore.» A Aarõ pa tõog n leok tɩ bũmb ye. A Moyiiz boola a Mikayɛl ne a Elisafã, a Uziyɛl kamba, a Aarõ ba bil kamba, la a yeel-b lame: «Wa-y n dɩk-y y saam-biisã n zãag ne Soaala-Wẽnd waoogr do-sõngã, tall-y-ba n dig we-kɛɛnga.» B kolgame n pil-b futu n tall-b n yi we-kɛɛnga, wala a Moyiiz sẽn da yeele. A Moyiiz yeela a Aarõ ne a kambã, a Elazar la Itamar: «Da yidg-y y zoobdo la ra kẽes-y y fut n wilg tɩ y rɩta kʋʋr ye tɩ pa rẽ y na ki la y na tak Soaala-Wẽnd sũ-puur zãma wã zugu. Ad-y Soaala-Wẽnd bugma sẽn dɩ b rãmba kʋʋre, yaa neba taabã n na n kelem-a, ka yãmb ye. Da zãag-y ne sɛka roog ye, ka rẽ y na ki, b zɛ yãmb ne naam kaam, ne Soaala-Wẽnd kaam.» La b maana wala a Moyiiz sẽn yeelã. Soaala-Wẽnd yeela a Aarõ: «Yãmb sã n wat sɛka roogẽ, foom ne f kambã, da yũ-y rãam buud ye tɩ woto y kõn ki ye. Yaa noor f kambã sẽn na n deeg wakat buud fãa. Da yũ-y rãam y sã n tog n wilg sẽn ya sõmbo n bak ne sẽn ka sõmbo, n wilg n bak Wẽnd bũmbu la bõn-zaalle, n wilg bũmb sẽn dẽgemd ninsaala la sẽn ka rẽgemd-a. Da yũ-y rãam y sã n tog n zãms Israyɛl kamba m sẽn taas-y noy niynsã ne a Moyiiz noor ye.» A Moyiiz yeela a Aarõ ne a kamba sẽn keesã, a Elazar la a Itamar: «Rɩk-y zoma b sẽn tall n wa kõ Soaala-Wẽnde n keesã n maan bur sẽn ka ning bɩll ye la y rɩ-ba, maan-kugra sɛɛga tɩ yaa rɩɩb sẽn ya sõmbo, la rɩɩba zĩig ka tog n yɩ yaar ye, ya zĩ sõngẽ bala, tɩ yaa Soaala-Wẽnd n yãk b meng pʋɩɩrẽ n kõt foo ne f kamba la rẽ yaa bãmb meng noore b sẽn kõ maam. Rũng fãa a Israyɛl kamba sẽn kõ laafi kosg yĩnga tɩ b reeg a yãoogã la a ger n tees Soaala-Wẽnde, bãng-y tɩ y tõe n wãba nemd kãnga. Bao-y zĩig sẽn ya sõngo n wãb-a, foo ne f kom-dibli la f kom-pugli. Yaa pʋɩɩr sẽn yãk Soaala-Wẽnd dẽnnẽ yãmb yĩnga. Gera b sẽn yãkã la yãoogã b sẽn naag ne kaama n tees Soaala-Wẽndã, bãmb me yaa foo ne f kamba soolem, b sã n dɩk ba n kõ Soaala-Wẽnd n sɛ. La rẽ yaa noor sẽn ka tõe n viigi, m sẽn paam Soaala-Wẽnd nengẽ.» A Moyiiz waa n sokame n na n bãng b sẽn maan bũmb ning ne boɛɛgã b sẽn kʋ zãma wã yel-wẽnd sugr kosg yĩngã. A waa n bãngame tɩ b yõog-a-la bugum. Woto a sũur puuga ne a Elazar la a Itamar, a Aarõ kamba sẽn kellã. A sok-b lame tɩ yaa bõe yĩng la b pa rɩ-a Soaala-Wẽnd waoogra zĩ-sõngẽ? Yaa bõn-sõng la b kõ yãmb n na n pek zãma wã rẽgdo, la b kos Soaala-Wẽnd sugri zãma wã yĩnga. Bʋ-kãnga zɩɩma sẽn pa tall n kẽ rooga pʋga, yãmb da tog n dɩ-a-la Soaala-Wẽnd waoogra ro-sõngẽ, wala m sẽn da yeelã. Ad-a Aarõ sẽn leoke: «Yaa yũ-noog la sugr kosg maoong la tõnd kõ Soaala-Wẽnd dũnna, la fo nee yell ning sẽn baas n pak-ma. M sũ-sãanga pʋgẽ, m na le tõog n noog m sũur Soaala-Wẽnd taoor ne maanda dɩɩb sɩda?» A Moyiiz wʋmame la a gesame tɩ leokra wẽnda sõmbo, la a reegame. Wẽnnaam goma ne a Moyiiz la a Aarõ tɩ b yeel a Israyɛl kamba woto: Ad tẽng zug rũmsa sʋka, yãmb sẽn tõe n wãb b rãmba. Rũng ninga fãa sẽn tara nao-beong sẽn welg a yi, la sẽn wãbd yamdo n bʋgsdẽ, yãmb tõe n wãba rũng kãnga. Y pa tõe n wãb rũng nao-beong sẽn welg a yi bala bɩ sẽn bʋgsda yamd bal ye. Bũmb a yiiba yaa tɩlɛ. Woto wã y na gesa wa rũng sẽn ya rẽgdo: yʋgemde, a bʋgsda yamdo la a nao-beong ka welg a yiib ye. Marawa me ya boto, a bʋgsda yamdo la a ka tar nao-beong ye. Ges-y soaamba wala rũng y sẽn pa tõe n wãb ye. A bʋgsda yamdo la a nao-beong ka welg a yi ye. Ges-y kurkuri wala rẽgdo; a nao-beong welga a yi, yaa sɩda, la a ka bʋgsd yamd ye. Ges-y-ba wa rũms y sẽn ka tõe n sɩɩs ye; da wãb-y b nemd ye n tʋk yelle y zug ye; b sã n ki bɩ y ra sɩɩs-b ye. Ad koomẽ bõn-vɩɩli y sẽn tõe n wãbe: yaa sẽn be-b koomẽ, mogrẽ bɩ kʋɩlsẽ, n tar legbre la pagdo. Bũmb ning fãa sẽn ka tar legbre, bɩ pagdo, n yaool n vɩ koomẽ, mogrẽ bɩ kʋɩlsẽ, ges-y b fãa gill wa rẽgdo. Ges-y-b wa bõn-dẽgdo la y ra wãb-b ye la y ra pẽneg b kũum ye. Bũmb ninga fãa sẽn vɩ-a koomẽ n ka tar pagdo bɩ legbre, ges-y bãmb fãa wala rẽgdo. Ad luiili wã sʋka y sẽn na n ges b rãmb wala rẽgdo, n ka na n wãb-ba, b sẽn ya rẽgda yĩnga: pa-nand-tugri, wɩbga, sɩl-faoogo, bõn-poag-wɩbga, kosenkonde, gãoobg buud fãa, na-neoongo, viuugu, ka-ra-la-m-zomda, sɩls buud toor toore, viuug-luiila, koom-daoogo, kos-ki, faoogo, salsanga, yɩbrgo nok-naaba, raong buud toor-toore, bulwãoogo la zanga. Rũm-bõonesa sẽn tar pɩgs la sẽn kẽnd ne nao a naase: ges-y-b wala bõn-dẽgdo. Bãmb sʋka, yãmb sẽn tõe n wãb b rãmba yaa: sẽn tar b gɛ, n tõe n tão n yɩke. Y sẽn tõe n wãb b rãmba yaa sʋʋr buudu, sʋ-warõngo, kalwaare, mogdr-zẽenga. Bõn-yɩgdi a taaba sẽn kẽnd ne nao a naase, ges-y-b wa bõn-dẽgdo. Y sã n sɩɩs rũms kẽere, y tʋkda yell y zugu, y rẽgemda y mens n ta zaabre. B sã n ki, tɩ fo tʋk-ba, yaa modgr tɩ f pek f futã la f na n paa ne rẽgd n ta zaabre. Ges-y rũms niyns sẽn tar-b nao-beong sẽn ka welg a yi la sẽn ka bʋgsd yamdo wala rũng sẽn ya rẽgdo; fo sã n sɩɩs-ba, fo tʋkda yell f zugu. Rũng ninga fãa sẽn tara nao a naase n yaool n ka tar nao-beongo, ges-y rũng kãng wala rũng sẽn ya rẽgdo; a ki tɩ f sɩɩs-a, f lebgda rẽgd n ta zaabre. B sã n ki tɩ f tʋk-ba, f tog n peka f futã la f na n kell n paa ne rẽgdo n ta zaabre. B yaa rũms yãmb sẽn ka tõe n sɩɩse. Ad tẽng zug rũms a taab sɩɩsg sẽn kisi: sãbtõaasga, dũm-tula, wʋʋga, wiuugu la sẽn wẽnd b bãmba, kõskõogo, bãngenlegsre, sẽnemde, gomtɩʋʋgo, weoogẽ-dao-a-kõbre. Yaa rũms bãmba buud fãa la y tog n ges wala rẽgdo. B sã n ki n sɛ, tɩ fo sɩɩs-ba fo rẽgemda f meng n tãag zaabre. B sã n ki bũmb pʋgẽ, bõn-kãng me lebga rẽgdo: raoog laoko, fuugu, gãongo, yolgo, sẽn ya teoog ning fãa. Bõn-kãng losda koomẽ la a na n kell n paa ne rẽgd n ta zaabre; zaabr sã n ta, a lebga te-sõngo. Sã n yaa tãnd laok pʋga la a lʋɩ yã, laok kãng wãadame la bũmb ning fãa sẽn da be a pʋgẽ lebga rẽgdo. Sã n dɩk koom sẽn da be laok kãng pʋga n kiig rɩɩb sẽn ka kis rɩɩbo, rɩɩba lebgda kisgu. Sã n kiig-a bõn-yũudr sẽn da ka kis yũubu, bõn-kãng yũub lebga kisgu, ba a be sãnem laokẽ. Bõn-kɩɩnga sẽn sɩɩs bũmb ning fãa lebgda rẽgdo; wʋnga, bug-rʋko, tog n wãame tɩ b lebga rẽgdo la b na n dẽgma yãmba. Sã n ya bãkẽ, bulgẽ bɩ kʋɩlg pʋg la bõn-kɩɩng lʋɩ yã, a ka rẽgemd-b ye. Sã n ya ned n sɩɩs-ba, a soab rẽgemdame. Bõn-kɩɩng sã n sɩɩs ka-buudu, a ka rẽgemd-a ye, kood sã n madg koom n na n dɩ bɩ n na n dʋge tɩ bõn-kɩɩng lʋɩ a zugu, ges-y kooda wa bõn-dẽgdo. La yãmb sẽn dɩt rũms niynsa sã n wa ki tɩ yãmb sɩɩs-ba, y paada ne rẽgd n ta zaabre. Fo sã n wãb a nemdo, fo na n peka f futã la fo na n kell n paa ne rẽgd n ta zaabre. Sẽn tʋka bõn-kɩɩnga tog n peka a futu la a me paada ne rẽgd n ta zaabre. Rũms kɩdsa fãa sẽn kẽnd tẽng zugu, yaa bõn-dẽgdo, da wãb-y-b ye. Bõn-kɩdsa la bõn-yooda fãa sẽn kẽnd tẽng zugu, yaa ne nao a naas bɩ yɩɩd rẽnna, da wãb-y-b ye tɩ b yaa bõn-dẽgdo. Da rẽgem-y y mens ne-b ye, da bas-y tɩ b sɩɩs-y ye. Yaa maam la yãmb Soaala-Wẽnde rũnda la beoogo; yãmb na n yɩlga y mense n legb sõma tɩ mam yaa sõngo, da leb-y n dẽgem y mense ne bõn-yaals sẽn vuud tẽng ye. Yaa maam n yiis yãmb Ezipt tẽnga n lebg yãmb Soaala. Dɩlla yɩɩ-y sõma tɩ mam yaa sõngo. Woto la noorã m sẽn kõt yãmb rũmsa poorẽ, luiili wã poorẽ, koomẽ dũmsi la tẽng zug rũms poorẽ. Yaa sẽn na yɩlẽ tɩ y bãng n welg bõn-dẽgd la bõn-sõngo. Yaa sẽn na yɩlẽ n welg sẽn tõe n wãb la sẽn ka tõe n wãbe. Wẽnnaam yeela a Moyiiz t'a wilg Israyɛl kamba woto: Pag sã n dɩk pʋg n dog bi-ribla, a ges a meng wa rẽgdo dasem a yopoe pʋgẽ, wala a kiuug yãeeb wakato. Dasem a nii daare, b kẽesda bi-pɛɛlga bãongo. La paga na n gũu dasem pis-tã la a tã n paam n peke. A ra sɩɩs bũmb sẽn ya sõng ye, a ra kẽ Soaala-Wẽnd waoogra ro-sõngẽ, n taa a pekra daare. A sã n dog bi-pugla, a yaa rẽgd wala a kiuug yãeebo la rasma na n tonga piig la a naase; paga na n gũu dasem pisoob la a yoobe n paam n peke. A pekra raar sã n pidi, a biiga yaa rao bɩ paga, a talld-a lame n wa maan-kʋʋd taoore, sɛka roog noore, ne yʋʋm yɛng pesgo, yũ-noog maoong yĩnga, la malwall a ye bɩ wall a ye, yel-wẽnd sugr kosg maoong yĩnga. Maan-kʋʋda deegda kũuna n kõ Soaala-Wẽnde la a kos sugri t'a tɩlg ne a rẽgdo. Woto yaa noore, pag sẽn tog n deeg, a biig rogem poore, a biiga ya bi-ribl bɩ bi-pugla. A sã n ka tõe n paam ligd n da pesgo, bɩ a wa ne wal a yiibu bɩ malwal a yiibu tɩ b kʋ a ye, yũ-noog maoongo, n kʋ a to wã yel-wẽnd sugr kosg maoongo. Maan-kʋʋda na n kosa sugri t'a tɩlg ne a rẽgdo. Wẽnnaam yeela a Moyiiz ne a Aarõ: «Ned sã n wa mik t'a yĩng lobg yũuri, bɩ dasempʋɩɩga, bɩ a yãka zĩig n pɩnda, a soab yĩnga tara bãaga. Woto b talld-a lame n kẽng maan-kʋʋda Aarõ nengẽ bɩ a biig a ye nengẽ. Maan-kʋʋda geta a yĩnga gãongo. A sã n mik tɩ kõbgã pelgame, la zĩ-kãng võtame, a bãngdame tɩ bãag n pukdi. Maan-kʋʋda sã n ges-a n sɛ, a wilgd-a lame t'a lebga rẽgdo. Gãonga sã n yãk zĩig n pɩnda, n ya pɛɛlga, la zĩiga yaool n ka võd tɩ b neẽ, la kõbga me ka peel boto ye, maan-kʋʋda baooda zĩiga n kẽes nedã t'a pa be dasem a yopoe. Daar a yopoe soabã, a lebd n ges-a lame. A sã n yãenda ne a meng nini tɩ bũmb ka paase, a kelld n bas-a-la be dasem a yopoe yɛsa. Sã n maan dasem a yopoe, a lebd n ges-a lame. A sã n mik tɩ bãaga leba poorẽ, tɩ gãonga ka le pɩnda, maan-kʋʋda yet-a lame t'a ka le ya rẽgd ye: yaa rasempʋɩɩg bala. Bãada pekda a fut n lebg yɩlemde. A sã n wa mik tɩ maan-kʋʋda gesg poore bãaga baas n dabda taoore, a lebda a nengẽ yɛsa. Maan-kʋʋda get-a lame la a sã n sɩd yãe tɩ bãaga paasame, a wilgda bãada t'a bẽeda yĩnga la a yaa rẽgdo. Ned sã n yãe tɩ bũmb pukd a yĩnga, bɩ a kẽng maan-kʋʋda nengẽ. Maan-kʋʋda get-a lame la a sã n ne tɩ gãonga wukame, n ya pɛɛlga, tɩ kõbga me ya pɛɛlga, la yĩnga yãka zĩig n maan nodre, a bãng t'a bãaga kẽe pãafo. A ka baood zĩig n ning-a ye, tɩ sãmbg ka ye, a yaa rẽgdo. Bãaga sã n gãneg yũya, yĩnga tõre, n yi zug n sig nao, f sẽn ges zĩig ning fãa, yaa kud-kuda, maan-kʋʋda geta bãadã la a sẽn ne tɩ bãaga sãaga a yĩnga tõrã, a wilgd-a lame t'a ka rẽgd ye, a yĩnga fãa sẽn pelga yĩnga. Yaa gãonga sẽn mɛdg raare tɩ nemsa tonnẽ la a lebgd rẽgdo. Maan-kʋʋda sã n yãe nodrã, a wilgda bãada t'a yaa rẽgdo, tɩ nodr yaa rẽgdo: yaa yĩng bãaga. A yĩnga sã n le lɛɛg n pelg bɩ bãada ta maan-kʋʋda nengẽ. Maan-kʋʋda lebd n ges-a lame la a sã n mik tɩ gãonga tabendame n lebg pɛɛlga bɩ a wilg bãada t'a ka le ya rẽgd ye. Ned yĩng sã n lob yũuri, la yũura waa n maagame, la a soaba gesame n mik tɩ yũura zĩigẽ gãonga wukame n ya pɛɛl-pɛɛl bɩ miid-miidu, a soaba babs maan-kʋʋda. La yẽ na n ges-a lame la a sã n mik tɩ gãonga võdame, tɩ kõbda pelge, a wilgd-a lame t'a yaa rẽgdo. Bãaga kẽe pãaf n lobg yũuri pipi soaba zĩigẽ. Maan-kʋʋda sã n ka yãe kõb-peendo, a sã n ka yãe tɩ gãonga võtame, a yãeeme bal t'a sobdame, a baooda zĩig n ning bãadã t'a pa be dasem a yopoe. A sã n mik tɩ bãaga kẽnga taoore, a wilgda bãadã t'a yaa rẽgdo, t'a tara yĩng bãaga. Yũura sẽn da pɩnna sã n ka paase, a yaa nod dãoongo bala. Maan-kʋʋda wilgda a soab t'a pa le ya rẽgd ye. Bugum sã n yõog ned tɩ lebg nodre, tɩ zĩig yãk n pɩnda, n ya pɛɛlg bɩ pɛɛlg la moomde, a soab kẽng tɩ maan-kʋʋda gese. A sã n mik tɩ kõbda pelgame, a sã n ne vẽenega tɩ yĩnga võtame, a bãng tɩ yaa bãaga n tũ bugma n yẽege, maan-kʋʋda na n wilg-a lame t'a yaa rẽgdo tɩ yaa yĩng bãag la a bẽeda. Maan-kʋʋda sã n ges la a pa yãe kõbd sẽn ya pɛɛl ye, a ka yãe tɩ yĩnga võtame ye, a neeme bal t'a soba bilfu, a baooda zĩig n paalg bãada be, a ye, dasem a yopoe. A yopoe raarã, a lebd n ges-a lame la a sã n mik tɩ bãaga kẽnga taoore, a wilgd-a lame t'a yaa rẽgdo, yaa yĩn-gãong bãaga la a bẽeda. A sã n mik tɩ bãaga ka kẽng taoore, gãonga sã n lɛɛg n sobda, nodra yaa bugma n wa ne yĩnga wukri. Maan-kʋʋda wilgd-a bãada t'a ka rẽgem ye, yaa bugum n dɩ tɩ maan nod-dãong bala. Rao bɩ pag sã n tar nodre a zugẽ bɩ a lemdẽ, maan-kʋʋda geta bãadã la a sã n mik tɩ gãonga võdame, tɩ kõbda lebg kar-kare la kõodr-kõodre, a wilgda nedã t'a yaa rẽgdo. Yaa rasempʋɩɩga, yaa zug bɩ lemd rasempʋɩɩga. Maan-kʋʋda sã n ges n ka yãe tɩ gãonga võdame, n pa yãe kõbd sẽn ya sabl me ye, a baooda zĩig n ning bãadã dasem a yopoe. A yopoe daarã, a geta bãadã la a sã n mik tɩ rasempʋɩɩga ka yɛdg n paase la kõbda ka kõodr-kõodre la gãonga me ka võde, a kɩtdame t'a põng a zugu; a põngdame n gilg rasempʋɩɩgã la a le basd-a-la rasem a yopoe. A yopoe daarã a wat n gesame la a sã n mik tɩ dasempʋɩɩga ka paase, tɩ yĩnga gãong ka võde, maan-kʋʋda wilgd-a lame t'a ka rẽgem ye. A sã n pek a futã, a lebgda yɩlemde. Tõeeme tɩ rẽ poore bɩ rasempʋɩɩga le yãnge. Maan-kʋʋda get-a lame la a sã n mik tɩ dasempʋɩɩga yãngame, a yeta bãada t'a yaa rẽgdo la a ka le yɛs n get kõbga sã n ya kõodr ye. Dasempʋɩɩga sã n ka yɛdge, tɩ kõbda lebg n yit sabla, rẽ wilgdame tɩ bãaga sãoogame, bãada ka tar rẽgd ye la maan-kʋʋda na n wilg-a lame t'a yaa yɩlemde. Pag bɩ rao yĩng sã n yãk zĩig n lobd pɛɛl-pɛɛla, bɩ maan-kʋʋda ges-a. A sã n mik tɩ gãonga peelma ka looge, a bãng tɩ yaa yĩn-firsendu. Bãada pa rẽgem ye. Ned zug zoobd sã n dʋʋgdẽ, yaa zu-kõogo, a soaba ka rẽgem ye. Sã n ya dĩira zoobd n dʋʋge, yaa dĩir zoob-kõogo, a ka rẽgem ye. La zugã bɩ dĩirã sã n lobd pɛɛlg la moomde, a bãng tɩ yaa bãag n dɩt a zugã bɩ a dĩirã. Maan-kʋʋda get-a lame, la a sã n mik tɩ zuga loba kõbd pɛɛla la mooma, a bãng tɩ neda yaa bãada la a yaa rẽgdo, a tara zug noad bãaga. Sẽn bẽeda yĩng bãaga yeelgda fu-kʋɩdse la a ka ningd pugl ye. A na n luda a noore n kẽnd la a kelemdẽ: M yaa rẽgdo, m yaa rẽgdo! A sẽn ket n bẽed a bãaga wakat ning fãa, a yaa rẽgdo la rẽ yĩnga a welgda toore. A tiida a yir we-kɛɛnga. Ad-y yaa bugd bãaga la fuug me bẽeda, fuuga sã n wa lobd kẽega, n lobd miuugu. Tõe n yɩɩ pe-kõbd bɩ beren-dɩgr fuugu, peend sẽn wʋg niirẽ bɩ ne bãn-gõdse, gãong fuug bɩ fuug sẽn zap ne gãongo. Peenda bɩ gãongã sã n wa lebgd kẽeg bɩ moomde, yaa peend sẽn wʋg niirẽ bɩ ne bãn-gõdse, ad-y yaa bugd bãaga la a bẽeda. Maan-kʋʋd la b na n bool t'a wa gese. Maan-kʋʋda na n gesa põogrã la a bao zĩig n bĩng fuugã tɩ maan dasem a yopoe. A yopoe daarã, a sã n mik tɩ fuuga põogra paasame, yaa peen sẽn wʋg niirẽ bɩ ne bãn-gõdse, fuug sẽn zap ne gãongo, sẽn ya fuug buud fãa, a bãng tɩ yaa bãag sẽn tõe n longe; fuuga lebga rẽgdo. B na n loba fuuga bugmẽ, a yaa peend sẽn wʋg niirẽ bɩ ne bãn-gõdse bɩ yaa gãongo, tɩ b bẽeda bã-longdem la b tog n yõoga bugum. Maan-kʋʋda sã n ges n mik tɩ bãaga pa kẽng taoore, a kɩtdame tɩ b pek fuugã, a sẽn ya-a a soab fãa, la b bao zĩig n bĩng tɩ ta dasem a yopoe. Fuuga sã n pek tɩ b ges n mik tɩ bũmb ka teem ye, wẽng ka paas ye, fuuga baas n yaa rẽgdo. F na lob-a bugmẽ, tɩ bãaga rɩ-la a nen-sõngã la a nen-wẽngã. Maan-kʋʋda sã n ges n mik tɩ pekra poore põogra zĩig lobda sabla, peenda bɩ gãongã, a wolgd-a lame. Bũmb sã n le lɛɛg n puk fuuga zugu, fuuga peend yaa peend sẽn wʋg niirẽ bɩ ne bãn-gõdse, bɩ yaa gãongo, a sẽn wʋg ne bũmb ning fãa, yaa bugdã n dɩt-a n dabda. Dẽnd b yõog fuugã. Sã n pek fuugã, peena, gãongã, n mik tɩ bugda sɛɛme, b lebd n pek-a lame n paase, t'a lebg sõng zãnga.» Woto la Soaala-Wẽnd noore sẽn get fuugu, peende sẽn wʋg ne pe-kõbdo bɩ lamdo, n paas bũmb sẽn zap ne gãongo, a sẽn ya-a a soab fãa, f sã n dat n bãng tɩ b yaa rẽgdo bɩ b pa rẽgdo. Soaala-Wẽnd yeela a Moyiiz: «Ad noor ning yĩng soab sẽn tog n tũ a pekr daare. B talld-a lame n kẽng maan-kʋʋd nengẽ. Maan-kʋʋda na n seg-a lame t'a nan ket we-kɛɛnga. A sã n ges n mik tɩ bãaga sãoogame, a kɩtdame tɩ b bao, a yĩnga, luiili a yiibu sẽn ket n vɩ la sɩɩsg sẽn pa kisi. B na n paasa kʋk raoogo, monem, la tɩɩg a ye sẽn tar yũ-noog vão-killi. A kɩtdame tɩ b kʋ luiil a ye tãnd rʋkẽ, rʋk sẽn pid ne koom sẽn yõng kʋɩlgẽ. A na n yaool n dɩka luiil a to wã ne kʋka raoogo, la monema, la vão-killã, n los b sẽn kodg luiil ninga zɩɩmẽ. A mesda bãada naoor a yopoe n yaool n wilg-a t'a pekame la a basda luiila t'a yɩk n looge. Sẽn yɩlgd a meng ne a bãaga, pekda a futa fãa, n bao barg n põng a meng zãnga, n bao koom n so n lebg sõmbo. Dẽ poor marsã a kẽeda tẽnga pʋga la a pa tõe n yãg n kẽ a meng zakẽ ye, rẽnd dasem maan a yopoe. A yopoe daarã, a kõogda a zoobdo, a toɛɛnga, a nin-kʋɩgdga, a tog n põnga a kõbd fãa. A sã n pek a futã la a pek a menga, a lebga yɩlemde. A nii daare, a wata ne pe-bi raad a yiibu sẽn ka tar bãnde, n paas yʋʋmd yɛng pe-sɛdg sẽn ka tar bãnde, la zom wamde sẽn nag ne kaam n paas kaam lengre. Maan-kʋʋd ning sẽn na n pek bãada kɩtdame t'a yals sɛka roog noore, Soaala-Wẽnd taoore, yẽ ne a kũuna. A yãkda pe-bil a ye n kʋ yell manegr maoongo la a paasda kaama ne lengrã. A rɩkd-b lame n tees Soaala-Wẽnde. A kʋʋda pesgã zĩ-sõng ning b sẽn kʋʋd rũmsã, yel-wẽnd sugr kosg yĩngã, la yũ-noog maoongo. La yell manegr ne sugr kosg maoong sẽn wẽnd taabã, ad-y rũnga sẽn kʋ yell manegr yĩngã na n yɩɩ maan-kʋʋda soolem. Yaa bũmb sẽn ya sõng wʋsgo. Maan-kʋʋda tẽkda maoonga zɩɩm n taag bãada rɩtg tʋbre, a rɩtg nug-raoogo, a rɩtg nao-raoogo; maan-kʋʋda reegda kaama lengre n pʋdg a goabg nugu. Maan-kʋʋda tẽkda a rɩtg nug-bila kaama sẽn be a goabg nugã. A tẽkda kaama ne a rɩtg nug-bila n mes yĩnga soab naoor a yopoe Soaala-Wẽnd taoore. A yãkda kaama sẽn ket a nugẽ n taag bãada rɩtg tʋbre, a rɩtg nug-raoogo, a rɩtg nao-raoogo, zɩɩma taagr poore. Kaama sẽn ket a nugẽ wã, a rɩkd-a lame n tẽg bãada zugu. La Soaala-Wẽnd taoore a le maanda sugr kosga sẽn dat bũmb ninga fãa. Dẽ poore maan-kʋʋda maanda yel-wẽnd sugr kosg maoongo bãada yĩnga t'a paam n peke. A baasda ne yũ-noog maoongo. Maan-kugra zugu, a rʋʋsda yũ-noog maoongã la kũuna, n maan sugr kosgo. Rẽ fãa sã n sɛ, bãada me peka zãnga. Bãada sã n ya naong soaba n ka tar ligd tɩ seke, a wata ne pe-bil a ye bala, yell manegr pesgo. B rɩkd-a lame n tees Soaala-Wẽnde tɩ b maan sugr kosg sẽn dat tɩ b maana. A wata ne zom sẽn nag ne kaam n paas kaam lengre. A le paasda wal a yiibu bɩ malwal a yiibu, a sẽn tõe n paam. Wall a ye bɩ malwall a ye yɩta yel-wẽnd sugr kosg yĩnga, a to wã yũ-noog maoong yĩnga. Yaa a nii daarã, a pekra raare, la a wat ne rẽ fãa, Soaala-Wẽnd taoore, sɛka roog noore. Maan-kʋʋda reegda pesgã sẽn na n kʋ yell manegr yĩngã, n paas kaama, a rɩkd-b lame n tees Soaala-Wẽnde. La a kʋʋda pesgã, a yãkda pe-bila sẽn kʋ yell manegr yĩnga zɩɩma n taag bãada rɩtg tʋbre, a rɩtg nug-raoogo, a rɩtg nao-raoogo. A pʋdgda kaama a nug goabga, la ne ka-kãnga a mesda ne a rɩtg nug-bila naoor a yopoe, Soaala-Wẽnd taoore. A tẽkda kaama n taag bãada rɩtg tʋbre, a rɩtg nug-raoogo la a rɩtg nao-raoogo, a sẽn zoe n taag zɩɩma zĩig ninga. A rɩkda kaama sẽn ket a nugẽ wã n bil bãada zugu la a kota Soaala-Wẽnd sugr a yĩnga. A na n yãka wall a ye bɩ malwall a ye, dẽ tũuda ne bãada sẽn tõog n wa ne a soaba, n maan maoong yel-wẽnd dolb yĩnga, n dɩk a ye wã n maan yũ-noog maoongo, n naag ne kũun ning a sẽn tog n wa ne. Maan-kʋʋda kota sugr a yĩnga, Soaala-Wẽnd taoore.» Woto la ned ning sẽn bẽed yĩng bãag tog n maane, a sã n ka tar fɩ n na n kɩse n paam pekre. Soaala-Wẽnd goma ne a Moyiiz la Aarõ: «Y sã n wa ta Kanaã, tẽng ning m sẽn na n kõ-y tɩ y soogã, y sã n yãe beelẽ tɩ roog a ye lebga yĩid-yĩidu, bɩ rooga soab wa wilg maan-kʋʋda la a yeele: M yãeeme tɩ yaa wa m dooga tara bãaga. Maan-kʋʋda kɩtdame tɩ b yiis rooga teed fãa t'a yaool n wa sɩng rooga gesgo. Woto a kõn tõog n yeele tɩ sẽn ket a pʋgẽ wã yaa rẽgd ye. Dẽ poor marsã la maan-kʋʋda kẽed n gese. A rengd n gesa rooga sẽn tu bogdã, la a bãng b sã n yaa kẽeg-kẽega bɩ miuug-miuugu, n bãng b sã n tu n zulgame. Maan-kʋʋda lɛɛgd n yiime la kʋɩlenga noore, a wilgdame tɩ b ra le kẽ rooga pʋg ye. A lɛɛgd n waa a yopoe daarã n le gese la a sã n mik tɩ yaa wa lalsa wẽnema paasame, a kɩtdame tɩ b yãgs kug niyns piisma sẽn yĩ wã n tɩ lob we-kɛɛnga, rẽgda sẽn lobd zĩig ningã. A kɩtdame tɩ b kõrs rooga pʋg lalsã n wʋk toma n tɩ lob tãmpʋʋrẽ we-kɛɛnga. B baooda kug paala n lebs kʋda zĩigẽ la b maneg roogã n bolg zãnga. B sã n ning kug paalã n lebs n bolge, tɩ yaa wa bãaga ket n dabda taoore, maan-kʋʋda lebd n wa gesame la a sã n mik tɩ wẽnema sɩd paasame, a wilgdame tɩ yaa yĩid sẽn tõe n longe, la rooga lebga rẽgdo. Sẽn kete, ya b lub roogã, n wʋk a kugã, a toma, a raadã n tɩ lob tãmpʋʋrẽ, we-kɛɛnga. Rooga pʋgẽ kõoma sẽn waa n kisã, ned ninga fãa sẽn saag n kẽ, rẽgma a menga n ta zaabre. Sẽn kẽ-a be n gãande, tog n peka a futu. Sẽn kẽ-a be n dɩ, yẽ me tog n peka a futu. Rooga bolgr poore, maan-kʋʋda sã n lɛɛg n wa la a yãeeme tɩ bũmb ka paase, a wilgdame tɩ rooga ka le ya rẽgd ye t'a yĩida sɛɛme. Rooga pekr yĩnga, maan-kʋʋda na bao luiili a yi, kʋk raoogo, monem, tɩɩg a ye sẽn tar yũ-noog vão-killi. A kodgda luiil a ye tãnd laagẽ, sẽn pid ne kʋɩlg koom. A rɩkda kʋka raoogo, tɩɩg a ye vão-killi, monema la luiil ning sẽn keta wã, n los pipi luiila zɩɩmẽ la koomẽ. A Mesda rooga naoor a yopoe. Yaa woto la rooga na n yɩlg ne a yĩidu; yɩlgd-a-la ne luiila zɩɩm, ne kooma, ne luin-vɩɩgã, ne kʋka raoogo, ne tɩɩg a ye vão-killã, ne monema. Dẽ poore a basda luin-vɩɩga t'a yɩk n leb weoogẽ. A maanda sugr kosgo. La rẽ sẽn maan n sɛ, rooga ka le ya rẽgd ye.» Soaala-Wẽnd noora la woto, yĩng bãag poorẽ, rasempʋɩɩg poorẽ, fut bugd poorẽ la rot yĩid poorẽ, yũya, noada la yĩn-firseng poorẽ. Yaa noy-bãmba n wilgd sẽn tog n maan n pa yɩlemde, n ka rẽgem ye. Woto la noya sẽn get yĩng bãaga la a pekre. Naaba-Wẽnd yeela a Moyiiz ne a Aarõ tɩ b wilg Israyɛl kamba woto: Rao sã n bẽed a taoorẽ, a bãng t'a menga zãng n ya rẽgdo. Bũmb yit bɩ pa yit be, a lebga rẽgdo. Raoã sẽn gãand bũmb ning zugu, a sẽn zĩnd bũmb ning zugu, lebgda rẽgdo. Ned sã n sɩɩs a gãagã, a tog n peka a futu, n so koom, la ne rẽ fãa, a na n kell n yɩɩ rẽgd n ta zaabre. Ned sã n zaoonda a goeelã, a tog n peka a futu, n so koom, la ne rẽ fãa a na n kell n yɩɩ rẽgdo n ta zaabre. Ned ninga sẽn sɩɩsa nin kãng tog n peka a futu, n so koom, la ne rẽ fãa a na n kell n yɩɩ rẽgdo n ta zaabre. A sã n sẽnes ned kolkoodo, ned sẽn ya yɩlemde, nin-kãng tog n peka a futu, n so koom, la ne rẽ fãa a na n lebga rẽgdo n ta zaabre. A sẽn zaond gaar ning n tog sore, gaar kãng lebga rẽgdo. F sã n sɩɩs a sẽn zaoond n bʋʋg bũmb ning fãa, f me lebga rẽgdo n ta zaabre la f sã n dɩk bũmb a sẽn zaond n bʋʋge, f tog n peka f futã, n so koom, la ne rẽ fãa, f paada ne rẽgdo n ta zaabre. A sẽn na n sɩɩs ned ninga fãa n ka reng n pek a nusã ne koom, a soab tog n peka a futã, la a so koom la ne rẽ fãa, a kelld n paa ne rẽgd n ta zaabre. B wãada tãnd laok fãa a sẽn sɩɩse, laoka sã n ya raoog laoko, b pekd-a lame. Neda sã n dat t'a rẽgda peke, a sõta rasem a yopoe. Rasem a yopoe wã poore a pekda a futu. Dẽ poore a sooda koom kʋɩlgẽ n yaool n yɩlge. Dasem a nii soaba, a wat n kɩsa maan-kʋʋda wal a yiibu bɩ malwal a yiibu, sɛka roog noore. Maan-kʋʋda reegda a ye n maan yel-wẽnd sugr kosg maoongo la a reeg a ye n maan yũ-noog maoongo, la woto, maan-kʋʋda kota sugr a yĩnga la a pekdame. Rao zɩɩm sã n mad-a, bɩ a pek a yĩnga tõr ne koom la ne rẽ fãa a paada ne rẽgd n ta zaabre. Zɩɩma sẽn sɩɩs bũmb ninga, fuug bɩ gãongo, tog n peka ne koom la a na n kell n yɩɩ rẽgd n ta zaabre. Pag ne rao sã n zĩnd ne taaba, b tog n soo koom la b na n kell n yɩɩ rẽgd n ta zaabre. Pag me sã n kiuudẽ, yaa dasem a yopoe tõre la a paad a rẽgdẽ; ned sã n sɩɩs-a, a soab me rẽgemdame n ta zaabre. Gãag ning a sẽn gãe a soab zugã, goeel ning a sẽn zao a soab zugã, lebga rẽgdo. Ned ninga sẽn sɩɩs a gãaga tog n peka a futu, n so koom la a na n kell n yɩɩ rẽgd n ta zaabre. Ned ninga fãa sẽn sɩɩs a sẽn zaonde, tog n peka a futu la a so koom la ne rẽ fãa a na n kell n yɩɩ rẽgd n ta zaabre. Bũmb sã n be a gãagã bɩ a goeela zugu, tɩ fo wa sɩɩs bõn-kãnga, fo lebgda rẽgdo n ta zaabre. Ned sã n gãand ne-a, a me lebgda rẽgdo, a na n yɩɩ rẽgd dasem a yopoe la a sẽn na n gãand zĩig ning fãa, zĩ-kãng me lebgda rẽgdo. Pag sã n ne a kiuug t'a pukr yaool n nan pa ta, bɩ kiuuga sã n loogame t'a ket ne-a, a bãng t'a yaa rẽgd wakat kãnga. Daara sẽn paasã le paasa a rẽgdo. Daara sẽn paasã, a gãagã, a goeela kelld n paa ne rẽgdo. Ned ninga sẽn na n sɩɩs-ba, a soab tog n peka a futu, n so koom la a na n paa ne rẽgd n ta zaabre. A kiuuga sã n kẽ, paga sõta rasem a yopoe n paam n yɩlge. Daar a nii soaba, a wata ne wal a yi bɩ malwal a yi, sɛka roog noore n wa kɩs maan-kʋʋda. Maan-kʋʋda yãkda a ye n maan yel-wẽnd sugr kosg maoongo, n yãk a ye n maan yũ-noog maoongo; maan-kʋʋda kota sugr a yĩnga, Soaala-Wẽnd taoore, t'a tɩlg ne a rẽgdo. Wilg-y Israyɛl kamba tɩ b bãng tɩ b sẽn ya rẽgd wakat ning fãa, bɩ b leb kɛɛnga la woto b kõn ki, b sẽn dẽgma yĩng ye, b sẽn kɩt tɩ m dooga lebg rẽgda yĩng ye. Yaa woto la Soaala-Wẽnd wilg, rao poorẽ, bũmb ning sẽn wat ne a rẽgdo, wakat ning a sẽn paad ne rẽgdo. Woto me la b wilgd, pag poorẽ, bũmb ning sẽn wat ne a rẽgdo la bũmb ning sẽn kis ne-a, a kiuug sã n puki. Ad Soaala-Wẽnnaam sẽn yeel a Moyiiz, wakat ning a Aarõ kamb a yiiba sẽn beeg Wẽnd n yõog b yamleoog wisdu, bãmb taoorã, tɩ b kʋ-bã: «Yeel f kẽem a Aarõ t'a ra saag n kẽ sɛka roogẽ a sẽn dat wakat ning ye. A ra lɩk peen lilla poore, a ra kẽ Sõmblem pid sõmblema roogẽ, kuga walsa koglga ne a linga sẽn dɩg zĩig ninga ye. A sã n kẽed yaare, a tõe n wa kiime, m sã n tũ sawadgã n wa lik m meng ne m ziir, koglga linga zugu. Ad-a Aarõ sẽn na n kẽ sɛka roog to-to: a wata ne loalga, yel-wẽnd sugr kosg maoong yĩnga la pe-raoogo, yũ-noog maoong yĩnga. A yeelgda a Maan-kʋʋr fu-pɛɛlga, n ning kur-pɛɛlga, n sẽbg a sɛɛga, n bao peen-pɛɛlga n vil a zugu. Yaa bũmb sẽn ya sõng zãnga. A sooda koom n yaool n yeelg fu-bãmba. A na n deega a Israyɛl kamba nengẽ boees a yiibu, yel-wẽnd dolb yĩnga, la pe-raoog a ye yũ-noog maoong yĩnga. Maan-kʋʋd a Aarõ kɩta loalgã a meng yel-wẽna yĩnga, a zak yel-wẽnd dolb yĩnga, n yõk Wẽnd sɛɛga. A Aarõ yalsda boees a yiibã Soaala-Wẽnd taoore, sɛka roog noore. A na n bʋgame n bãng boees a yiiba sʋka boɛɛg ning sẽn na n yɩ Wẽnd dẽnna la a Azazɛl dẽnna. A Aarõ kʋʋda boɛɛg ning sẽn ya-a Wẽnd dẽnna yel-wẽna dolb yĩnga. Boɛɛg ning sẽn ya-a a Azazɛl dẽnna, b wata ne a vɩɩga, Soaala-Wẽnd taoore, la b dogenda yel-wẽna fãa a zugu n yaool n diga n kẽes weoogo. A Aarõ kʋʋda naafã, a meng yel-wẽna dolb yĩnga n kos sugri, a meng ne a zak yĩnga. A rɩkda laag n pids ne bug-saala sẽn yãk maan-kugra zugu, Soaala-Wẽnd taoore, a yãkda tɩdar zom, nug koor a yi, n tall rẽ fãa n kẽ peen lilla poore. A na n ninga tɩdarã bugmẽ wã, Soaala-Wẽnd taoore, tɩ bug-zõosa lud kuga walsa koglga linga. Woto a kõn ki ye. A na n yaool n yãka naafa zɩɩm ne a nug-bila m mes koglga lingã. A na n mes-a-la naoor a yopoe. Dẽ poore a kʋʋda boɛɛga zãma wã yel-wẽn dolb yĩnga la a tallda zɩɩma n leb peen lilla poore n maan ne boɛɛga zɩɩm wala a sẽn maan ne loalga rẽnna, n yi n yaas, n mes zɩɩma koglga lingã, la koglga taoore. A maanda woto n yõk Wẽnd sɛɛga Israyɛl tõdgre la a yel-wẽna zãng fãa yĩnga. A na maan woto me ne sɛka roogo tɩ Wẽnd paalga b meng yel-wẽn-maandb sʋka. Dɩlla maan-kʋʋda sã n wa kẽed sẽka roogẽ n na n kos sugrã ned ba a ye da zĩnd be n tãag a yiib ye. A na n kosa a meng yel-wẽna sugri, n kos a zaka rãmb yel-wẽn sugri, n kos a Israyɛl kamba fãa yel-wẽna sugri. A yitame n kolg maan-kugrã sẽn be Soaala-Wẽnd taoorã n kos a yɩlgre. A rɩkda loalga la boɛɛga zɩɩm n taag maan-kugra yɩdbã. A tẽkda a nug-bil zɩɩmẽ n mes maan-kugrã naoor a yopoe, n pek-a ne Israyɛl kamba rẽgdo, t'a yɩlge, n lebg sõngo. Maan-kʋʋda sã n sɛ ne ro-sõngã, ne sɛka roogo, ne maan-kugrã, a kɩtdame tɩ b kolg ne boɛɛga a to wã. A Aarõ dɩkda a nus a yiibã n tik a zugu n togs Israyɛl kamba fãa yel-wẽna, b tõdgra fãa, b beegra fãa. A sã n zɩlg boɛɛga ne neba yel-wẽna n sɛ, a baooda ned t'a pʋgd n digd-a n tees we-raoogo. Yaa we-raoogẽ wã la boɛɛga na n tɩ menem ne a zɩɩbã. Boɛɛga sã n dɩg we-raoogẽ wã n sɛ, a Aarõ lɛɛgd n kẽe sɛka roogẽ, n yees futã a sẽn da yer sɛka roogẽ wã la a rɩgend-b-la be. Yaa ro-sõng pʋg la a na n so koom. Dẽ poore a lebd n yeelga a futã la a yitame n kʋ maoongo, yũ-noog maoong a meng yĩnga la neba yĩnga. A kota sugr a meng la buuda yĩnga. Maan-kugra zugu, a yõogda yel-wẽnd sugr kosga maoonga kaam. Sẽn dig a Azazɛl boɛɛg n kẽes weoogã sã n lɛɛg n wa, a rengd n peka a futu la a so koom n yaool n paam n kẽ a zakẽ. B sẽn kʋ boɛɛga la naafã yel-wẽn sugr kosg yĩnga n tall b zɩɩma n kẽ n mes ro-sõngẽ wã, b tald-b lame n yi we-kɛɛnga la b naagda b gãongã, b nemdã la b bĩndã n yõog bugum. Sẽn yõoga rũnga soab tog n peka a futu la a so koom n yaool n tõog n kẽ a zakẽ. Woto yaa noor sẽn ka tõe n teeme, yãmb yĩnga. Kiuug a yopoe soaba, raar piig soaba, y na n loe noore la y ka na n tʋm tʋʋmd ye, tẽnga biig wala sãana. Yaa baraar la b na n kos sugri tɩ y paam n yɩlge; Soaala-Wẽnd taoore, y ka le tar yel-wẽnd ba a ye. Badaar na n yɩɩ vʋʋsg daare la no-loeere. Yaa noor sẽn kõn teem abada. Maan-kʋʋd ning b sẽn taag a soab kaam la b kõ-a maan-kʋʋr naama t'a na n wa reeg a ba zĩiga, yaa yẽ n maand sugr kosg maoongã. A na n yeelga fu-peelse, fu-sõma. A na n yɩlga Soaala-Wẽnd waoogra ro-sõngã, sɛka roogo la maan-kugrã. Dẽ poore a yɩlgda maan-kʋʋdba la zãma wã.» Dẽ me yaa noor sẽn kõn teem abada. Yʋʋmd pʋgẽ, b yãkda daar a ye tɩ yaa a Israyɛl kamba fãa yel-wẽna sugr kosg daare. La a Aarõ maana wala Soaala-Wẽnd sẽn togs a Moyiiz. Soaala-Wẽnd yeela a Moyiiz t'a taas a Aarõ ne a kamba, la Israyɛl kamba gilli koe-bãmba: A Israyɛl buud ned ning sẽn na n saag n kʋ naafo, pesgo bɩ bʋʋga, sika pʋg bɩ we-kɛɛnga, n ka wa sɛka roog noore n dɩk-a n kõ Soaala-Wẽnde, b na sok a soab zɩɩma a sẽn daagã: b yiisd-a-la buudẽ. Dẽ yĩnga, a Israyɛl kamb wata ne rũms niyns b sẽn na n kõ Soaala-Wẽnde, sɛka roog noore: Yaa laafi kosg maoong la b na n kʋ, Soaala-Wẽnd taoore. Maan-kʋʋda tẽkda zɩɩma n mes maan-kugra, sɛka roog noore la a yõogda kaama t'a yũuga noog Soaala-Wẽnd sũuri. Woto b kõn le kʋ wẽn-yaalsa maoong n dẽgem b mens ye. La rẽ me la noor m sẽn kõt-b yʋʋm sẽn kõn sɛ yĩnga. Yeel-b yɛsa: A Israyɛl buud ned bɩ sãan ninga fãa sẽn be ne yãmba n dat n kʋ yũ-noog maoongo, bɩ maoong a to, n yaool n ka reng n tall rũnga n wa kõ Soaala-Wẽnd sɛka roog noore, yeel-y-b tɩ b yiis-a buudẽ. A Israyɛl buud ned la ned ninga fãa sẽn bɛ-a ne yãmba n dɩt zɩɩm, sẽn ya zɩɩm ning fãa, mam na yik zabr ne-a la m na yiis-a-la buudẽ. Bõn-vɩɩg vɩɩm be-la a zɩɩmẽ. Y paama m nengẽ tɩ maan-kugra zug zɩɩm wat ne y sugri, la rẽ yaa zɩɩma sẽn ya vɩɩma. Yaa rẽ yĩng la m yeel a Israyɛl kamba: Ned da saag n dɩ zɩɩm ye; sãan sẽn vɩ-a ne yãmba kõn dɩ zɩɩm ye. Ned ning fãa sẽn ya-a a Israyɛl biiga, bɩ sãan sẽn vɩ ne Israyɛl kamba, a sã n kẽng soom-saar n paam rũnga, bɩ luiila, b sẽn tõe n wãbe, bɩ a kodga n kedg n bao tom n bus zɩɩma. Nin vɩɩg fãa vɩɩm be-la a zɩɩmẽ. Dẽ me la m yeel a Israyɛl kamba: Da rɩ-y bũmb ba a ye ne a zɩɩm ye tɩ zɩɩm yaa vɩɩm la sẽn kɩɩsa n dɩ bɩ b yiis-a buudẽ. Ned ning fãa, tẽngen-ned bɩ sãana, sẽn wãb rũng sẽn ki, rũng a to sẽn yõke, tog n peka a futu la a so koom ne rẽ fãa a na n kell n paa ne rẽgdo n ta zaabre. Zaabr sã n ta a lebgda yɩlemde. A sã n ka pek a futã, a sã n ka pek a yĩnga, a tʋka yell a zugu. Wẽnd goma ne a Moyiiz n yeel-a t'a wilg a Israyɛl kamba woto: «Maam la Soaala, yãmb Wẽnnaam. Da maan-y wala y sẽn zĩnd ne b rãmb Ezipt tẽnga sẽn da maanda ye. Da maan-y wala b sẽn maand Kanaã tẽnga, tẽng ning m sẽn tar-y n dabdẽ wã ye. Y ka na n tũ b manesma ye. Yaa mam daab la y na n tũ. Yaa maam noya la y na n deege, y vɩɩma na n tũu noya m sẽn wilgi. Maam la Naaba-Wẽnde! Deeg-y m noya, maan-y m daabo. Sẽn tũud-a na paam vɩɩm. Maam la yãmb Wẽnnaam rũnda la beoogo. Ned ba a ye da kolg a roagda n yo ne-a ye. Maam la y Naaba-Wẽnde. Da lodg f ba kur-wĩir ye. Da sẽk f ma fuugu ye, ya f ma, da sẽk a fuug ye. Da sẽk f ba pag fuug ye tɩ yaa f ba meng la f ningd yãnde. Da sẽk f tão fuug ye, a yaa f ba biiga bɩ f ma biiga, sẽn dog f ba zakẽ bɩ tẽng a to, da sẽk a fuug ye. Da sẽk f yageng fuug ye, a yaa f bi-ribl biiga, a yaa f bi-pugl biiga, bɩ f da saag ye. F ning-b yãnde, f ninga f meng yãnde. Da sẽk f ba pag biig fuug ye. Y ma wã sã n ka a ye me, y ba wã yaa a ye, dɩlla yaa f tão, da sẽk a fuug ye. Da sẽk f pʋgdb fuug ye t'a zɩɩma yaa f ba zɩɩm. Da sẽk f ma yao bɩ f ma kẽem fuug ye t'a yĩnga yaa f ma yĩnga. Da ning f ba kẽema bɩ a yao yãnde, n kolg a pag ye, tɩ yaa f ba yao bɩ f ba kẽem paga. Da sẽk f bi-pag fuug ye, tɩ yaa f biig paga, da sẽk a fuug ye. Da sẽk f kẽem bɩ f yao pag fuug ye tɩ yaa f kẽem bɩ f yao la f ningd yãnde. Da sẽk pag fuug n le lɛɛg n sẽk a biig fuug ye, da sẽk a yageng fuug ye: tɩ b yĩnga yaa yĩng a ye la yaa bũmb sẽn ka toge. F pag yao da kul-f ye, pʋg-taar yĩnga. Da kẽes-a, f paga sã n ket n vɩ ye. Da kẽ ne f paga a sã n ne a kiuug ye, tɩ wakat kãnga a yaa rẽgdo. Da kẽ ne tẽngen-paga n dẽgem f meng ye. Da rɩk f biig n kɩs tɩ b kʋ a Molɛk maoong ye. Y sã n maan dẽ y paoogda maam, yãmb Wẽnnaam. Da kẽ ne rao wala f kẽe ne pag ye: yaa wɩɩbdo. Da lagem ne rũng ye tɩ f na n dẽgma f menga, pag me ra lagem ne rũng ye, dẽ me yaa wɩɩbdo. Da rẽgem-y y meng ne manesem a woto buud ye. Yaa rẽ n dẽgem buud niyns m sẽn menes yãmb taoorã. Tẽnga lebga rẽgdo tɩ m yẽeg-a, a beegra yĩnga, t'a kong n wʋb a nebã wa bõn-beedo. Sã n ya yãmba, tũ-y m daabo, da sak-y wɩɩbd ye, f yaa a Israyɛl buud ned, bɩ f nok-a lame. Yaa wɩɩbd a woto buud n dẽgem neb niyns sẽn da kẽed-b tẽn-kãensã. Yãmb sã n lebg rẽgdo, tẽnga ko wʋb yãmb wala a sẽn wʋb pipi rãmba sɩda? Sɩda, ned ninga sẽn sak n wɩɩb woto a yaa ninsaal bɩ rũnga, bãmb fãa na n yiisa buudẽ. Vɩɩnd-y wala m sẽn wilg yã, da tũ-y pĩnd dãmba soy yooda ye, woto b manes yooda kõn dẽgem-y ye. Maam la yãmb Wẽnnaam.» Soaala-Wẽnd yeela a Moyiiz t'a yeel a Israyɛl kamba fãa woto: «Yɩ-y sõma tɩ maam, y Wẽnda, yaa sõngo. Bɩ ned kam fãa zoe a ba la a ma nifu la a reeg vʋʋsga noore. Maam la yãmb Wẽnnaam rũnda la beoogo. Da teeg-y wẽn-yaalsa ye, da bʋʋg-y yõak bɩ sẽyã t'a kud bɩ a zug wẽn-naand n kõ-y ye. Maam la yãmb Wẽnnaam. Yãmb sã n dat n kʋ laafi kosg maoongo bɩ y tũ m sẽn wilgã tɩ m na reeg y maoong. Maoonga dɩɩb rɩta a raare, bɩ a vẽkẽmbeoogo. Sẽn ket da-yɩten-daarã fãa tog n yõoga bugmẽ. Y sã n dɩ-a da-yɩten-daarã, bãng-y tɩ yaa rɩɩb sẽn sãame, a rẽgemda a rɩta bala. Sẽn kɩɩsa n dɩ, tʋka yell a zugu, a paooga Soaala-Wẽnd ne b sõmblem. Nin kãng tog n yiisa buudẽ. Y sã n wa ta y tẽngẽ wã, y sã n wa na n tigs y koodo, bɩ y ra saag pʋʋga zãng ye, da wʋk-y sẽn lʋɩ tẽnga ye. Da pʋg-y n tõs y bugsuntundu biisi sẽn kees b willẽ bɩ sẽn dʋʋg tẽng ye. Bas-y-b tɩ b yɩ naong-rãmb la sãamb dɩɩbo. Maam la yãmb Wẽnnaam! Ned da saag n zuk a to bũmb ye, n yag zirẽ ye, n wẽd a to ye. Da wẽen mam yʋʋr n togs sẽn ka sɩd ye, ka rẽ f sãamda Wẽnnaam yʋʋre. Maam la Naaba-Wẽnde! Da rɩ f to paoong zaalem ye, da zu-a ye. Tʋʋm-tʋmd yaood da pa f nengẽ n vẽeg beoog ye. Da kãab wʋng beed ye, da gãneg bẽdg zoang taoor ye; zoe Naaba-Wẽnd nifu. Yaa maam la Soaala, y Wẽnnaam! Da bʋ-y kegre, da yɩ-y bʋgsg tɩ loog ne nin-bõones ye la ra zoe-y nin-bɛda nif ye. Bʋ f saam-biig ne zemsgo. Da rõd f saam-biig ye, da rogl f to zug bũmb sẽn sek a kʋʋb ye. Maam la yãmb Wẽnnaam! Da kisg f to, f sũurẽ ye. Wilg f saam-biig a kongre n da wa rɩ a yel-wẽnd taal ye. Da rok f sũur ye, da tug beem ne f buuda kamb ye. Nong f to wala f menga. Maam la yãmb Wẽnnaam! Deeg-y m noya. Rũms a yi sã n ka buud a ye, bɩ f ra bas b tɩ b rʋ ye. Pʋʋg a ye pʋgẽ, bɩ f ra bʋd kood buud toɛ-toɛ ye. Da yeelg fuug sẽn sẽ ne pɛɛl buud sẽn ya toor ye. F sã n yo ne paga sẽn ya roog biiga a zu-soaba sẽn nan ka yao bɩ a nan ka yiis-a a soolmẽ, sɩbgr tog n sɩbgame. B ka na n yiis yõor ye, tɩ paga yaa roog biiga. Raoa na n waa ne yell manegre maoong, sɛka roog noore. Rũnga na n yɩɩ pe-raoogo. Maan-kʋʋda sã n deeg rũngã n kos sugri, Soaala-Wẽnd taoore, wakat kãng la a soab na n tɩlg ne a rẽgdo. Yãmb sã n wa kẽ m sẽn kãab y tẽng ninga n sel y tɩ-rɩts buud fãa, ges-y-b wa rẽgdo. Yʋʋm a tãab pʋgẽ, b sẽn ya rẽgda yĩnga, yãmb ka na n dɩ-b ye. Yʋʋmd a naas soaba marsã, b maanda Wẽnd pẽgr pʋʋsg kibsa n dɩk-b n kõ Soaala-Wẽnde. Yʋʋmd a nu soaba tɛka y tõe n dɩ-b lame, y tõe n tigsa b biisi tɩ y paoong fɩɩge. Maam la yãmb Wẽnnaam! Da rɩ-y bũmb ne a zɩɩm ye, da bʋg-y bagr ye, da sok-y kɩɩms ye. Da kok-y y zug ye, da kok-y y toɛɛng ye. Ned sã n ki bɩ y ra bog y meng n wilg y sũ-sãang ye. Da kɩɩs-y y yĩng ye. Yaa maam la yãmb Wẽnnaam! Da paoog f bi-pugl n bas-a ne yoaadb ye; woto tẽnga tõr kõn zãag ne Naaba-Wẽnd ye. Reeg-y m vʋʋsga noore, waoog-y m waoogra do-sõngã. Maam la Naaba-Wẽnde! Da sogs-y kɩɩms ye, da pʋg-y yam dãmb ye. Da pʋg-y bagb ye, tɩ b na n dẽgem-y lame. Maam la y Wẽnnaam! Ned zug sã n pelge, bɩ f waoog-a; ned sã n kʋʋle, ning-a sʋka. Yɩ ned sẽn zoet Wẽnd nifu. Yaa maam la Wẽnnaam! Sãan sã n nok yãmba, bɩ y ra tall-a toog ye. Sãan sa n nok yãmba, bɩ ges-a wa tẽnga biiga n nong-a wala y menga, tɩ yãmb me yɩɩ sãamb Ezipt tẽnga. Yaa maan la yãmb Wẽnnaam! Da bʋ-y bʋ-kɛg ye, da mag-y mag yoodo n woog bũmb zɩslem, a woglem, a zulum ye. Mag-y ne bõn-magdi sẽn ya sõma n paam tɩ zɩslem zemse, tɩ peoog yɩ peoogo, la yʋʋr yɩ yʋʋre. Yaa maam la yãmb Wẽnnaam sẽn yiis yãmb Ezipt tẽnga! Reeg-y m noya la m dog-n-mikã; tũ-y-b neere. Maam la a yãmb Wẽnnaam!» Wẽnnaam yeela a Moyiiz t'a wilg Israyɛl kamba woto: «B na n kʋʋ Israyɛl biiga bɩ Israyɛl noak fãa sẽn na n dɩk a biig n kõ a Molɛk. Tẽnga rãmb na n lab-a-la ne kuga. Mam meng na n yika ne yẽ soaba la m na n yiis-a-la Israyɛl buudẽ, t'a rɩka a biig n kõ a Molɛk, n yaool n na n lɛɛg n wa m waoogr do-sõnga pʋg ne rẽgdo n paoog a Soaala yʋʋre. Tẽnga rãmb sã n ka rat kʋ ned ninga sẽn dɩk a biig n kõ a Molɛk n maand wa b ka yãend bũmbu, yaa maam n na n yik ne nin kãnga, ne a zak rãmba, n yiis-a Israyɛl buudẽ, yẽ la neb nins fãa sẽn naag-a n waoogd wẽn-naand a Molɛk. Ned ninga sẽn na n pʋg kɩɩmse, la yam dãmba n bas maam, m na yik zabr ne yẽ soaba n yiis-a m buudẽ. Dɩk-y sõmblem sore n yɩlg zãnga tɩ y rũnda la y beoog Wẽnda la maam bala. Reeg-y m noya, vɩɩnd-y wala m sẽn wilg-y tɩ y sõmblema yita maam y Wẽnda nengẽ. Dɩlla ned ning fãa sẽn na n kãab a ba bɩ a ma beedo, tog n kiime. A sẽn kãab a ba bɩ a ma wã, yaa a meng n bao a kũum. Rao ninga sẽn maana yoob ne tẽngen-pag sẽn tar sɩda, bãmb b yiiba fãa tog n kiime. Rao fãa sẽn maana yoob ne a ba paga, ninga a ba yãnde. B yiiba fãa, raoa ne paga, tog n kiime; bãmb n bao b zɩɩm daagre. Ned sã n yo ne a bi-paga, yaa bãmb b yiiba fãa la b tog n kʋ. B maana wɩɩbdo n bao b kʋʋbo. Rap a yiib sã n maan wɩɩbd ne taaba b yiiba fãa tog n kiime, b wɩɩbda yĩnga, la yaa bãmb n bao b zɩɩm daagre. Ned sã n kẽes pag ne a ma, a maana yel-beedo. Yẽ ne pagb a yiiba fãa yõogda bugum la woto, ned sẽn sãamd y tẽnga yʋʋr kõn vɩɩnd yãmb sʋk ye. Ned sã n wɩɩb ne rũnga, b kʋʋda bãmb b yiib fãa. Pag me sã n wɩɩb ne rũnga, b kʋʋda bãmb b yiiba me, la bãmb n bao b kũum. Ned sã n dɩk a tão n maan a paga, la b yaa ba a ye bɩ ma a ye, b maana wɩɩbdo la neb a yiiba fãa tog n yiisa buudẽ, buuda fãa taoore, tɩ b sẽn maan woto wã b tʋka yell b zugu. Rao sã n kẽ pag roogẽ a kiuug wakato, la b yiiba fãa tara kiuuga pukr kaseto, b tog n yiisa b fãa buudẽ. Sẽn kẽe-a ne a ma-bila bɩ ne a ma-kãsenga, sẽn kẽe-a ne a pʋgdba, yaa neb a yiibã n tʋk yell b zugu, b sẽn ya buud a ye wã yĩnga. Rao ning sẽn kẽeda ne paga, a ba kẽem bɩ a ba yao paga, luka a ba bãongo, a tʋka yell a zugu la b yiiba na ki n ka rog biig ye. Ned ninga sẽn dɩka a kẽem paga bɩ a yao paga, maana sẽn kisi, a luka a kẽem bɩ a yao bãongo la b na n kiime n ka rog biig ye. Reeg-y m noya, m dog-n-mikã, tũ-y-ba. Woto tẽng ning m sẽn na n kõ yãmba kõn maan waa a ka mi yãmba, n wʋk-y n lob ye. Da tũ-y neb niyns m sẽn digd yãmb taoora dog-n-mik ye. Yaa b sẽn maan wɩɩbd ka tɛka la m sũura sẽn yaal ne-bã. Yaa rẽ la m sẽn kãabe tɩ yãmb n na n soog b tẽnga; mam meng m toor n na n kẽes yãmb bĩisim la sɩɩd sẽn zoet zĩig ninga. Yaa maam, n welg yãmb toore la maam la y rũnda la y beoog Wẽnde. Bãng-y n welg rũms niyns bɩ luiili niyns maoong sẽn tat m yam, n welg-b ne rũms niyns bɩ luiili niyns maoong sẽn pa tat m yam. Woto mam me yam kõn lak ne yãmb wala a sẽn lak ne rũms kãensa ye. Bas-y tɩ m soog y zãnga la yɩ-y sõma wala mam sẽn ya sõngã tɩ maam la y rũnda la y beoog Soaala la m welg-y-la toore tɩ y yɩ m neba. Rao bɩ pag sã n be yãmb sʋka n sõsd ne kɩɩmse la zĩn dãmba, bɩ b kʋ-a. B lob-b ne kuga, bãmb n bao b zɩɩm daagre.» Soaala-Wẽnd yeela a Moyiiz t'a taas maan-kʋʋdba, a Aarõ kamba, woto: «Kisa ne maan-kʋʋda t'a sɩɩs a buuda ned sẽn ki, sã ka b pẽe taab ne rogem. Rogma me sẽn pẽneg maan-kʋʋd ne ned ning yaa a ba, a ma, a bi-ribla, a bi-pugla, a kẽem bɩ a yao. Sã n yaa a tão sẽn nan ka kul sɩda, a tõe n sɩɩs-a lame, a sẽn ka lʋɩ ned a to soolmẽ yĩnga. A pa tõe n sɩɩs-a, a sã n kul sɩd ye, yaa kisgu. A ra yeel t'a yaa buud kãsma n saag n sɩɩs yaar ye: kisame. Maan-kʋʋd ra põng a zug tẽnsʋk ye, a ra kok a toɛɛng ye, a ra bog a meng ye. Maan-kʋʋd welga toore n ya Wẽnd pʋɩɩre, a ra sãam Soaala-Wẽnd yʋʋr ye. Yaa bãmb n wat ne kũuni, n wat ne rɩɩbo n kõt Soaala-Wẽnde la b tog n yɩɩ sõma. A ra kẽ ne pʋg-yoodr ye, a ra kẽ ne pag yʋʋr sẽn sãam ye, a ra kẽ ne pag a sɩd sẽn yiis ye, tɩ maan-kʋʋd dɩka a meng n kõ Soaala-Wẽnde. Ges maan-kʋʋd wa nin-sõngo tɩ yẽ n wat ne Naaba-Wẽnd dɩɩbo. Ges-a wa ned sẽn welg toore la yaa maam n welg-a toore la maam la a Wẽnde, rũnna la beoogo. Maan-kʋʋd bi-pugl sã n sãam a yʋʋr ne yoobo, yaa maan-kʋʋda yʋʋr la a sãam yã; b tog n yõog-a-la bugum. Sã n ya maan-kʋʋd kãseng b sẽn daag kaam sõng a soab zugu, sẽn yeelga fu-sõma n deeg maan-kʋʋr naama, bɩ a ra yidg a zoobd ye, a ra kẽes a fut ye. A ra pẽneg kũum, yaa a ba bɩ a ma n ki, n sãam a sõmblem ye. A ra yi Wẽnd waoogra ro-sõngẽ wã n lɛɛg n wa ne rẽgdo n paoog Wẽnnaam doogo, tɩ b sẽn taag-a ne kaam sõngã, b welg-a-la toore. Yaa maam la a Soaala-Wẽnde, rũnda la beoogo! A sã n na n kẽ kãadem bɩ a yi ne pa-kuli. A ra saag n dɩk pʋg-kõore, a da rɩk pag a sɩd sẽn dig bɩ sẽn rẽgem a meng ne yoob ye. Yaa a buudẽ bi-pugla n kuiis-a. Woto a buuda kõn waa n kalem ne bu-zẽnd ye la yaa maam b Wẽnnaam n welg-b toore.» Wẽnnaam yeela a Moyiiz t'a wilg a Aarõ woto: «Ad noor f sẽn nan deeg zamaan woo zamaana: f kamba la f yagensa sʋka, ned da saag n kolg ne Wẽnd kũuni, a yĩnga sã n tar bãnd ye. Ad neb niyns yĩng sẽn tar bãnde tɩ b pa tõe n pids maan-kʋʋr tʋʋmde: m nin pa ne ye, m yaa woabga, m yõe-rot wãame, m tʋb fiusame, m kams bɩ m nao yaa lɛbla, m nus bɩ m nao kiime, m yaa kũnd soaba, m yaa ned sẽn butme; m nif bẽeda yẽbga; m tara dasempʋɩɩga, m tara nod kʋdre la m yaa zu-soaba. Maan-kʋʋd, a Aarõ, yagenga yĩng sã n tar bãnde, a kõn tõog abada n tall kũuni n wa kõ Wẽnd ye. A sẽn ya koamsa yĩnga, a ra kolg ne Wẽnd dɩɩb ye. A tõe n dɩɩ Soaala-Wẽnd dɩɩbo, wala sugr la laafi kosg maando. A ka tõe n kolg peen-lilla ne maan-kugra ye; a wat n paooga m dooga ne a te-sõma wã la maam n welg-a toore.» A Moyiiz taasa Wẽnd koeesa fãa a Aarõ ne a kambã la a Israyɛl zãma. Wẽnnaam yeela a Moyiiz t'a wilg a Aarõ ne a kamba tɩ b sã n pa rat n paoog-ma, bɩ b lak b mens wakat kẽere ne maanda rɩɩbo, maand niyns Israyɛl kamba sẽn wat n kõt-ma, maam b Soaala-Wẽnde. Yeel-b woto: Zamaan woo zamaana, yãmb buuda ned da saag n dɩ kũun niynsi a Israyɛl kamba sẽn kõt Wẽnnaama, a sã n ne tɩ b rɩɩb wata ne m paoogre. Sẽn saaga n dɩ, bɩ b kʋ a soaba. Yaa maam n gome, maam, yãmb Wẽnnaam! A Aarõ yageng sẽn bẽed yĩng bãaga bɩ sẽn kɩrsd a yĩng rẽgdo, da saag n dɩ rɩɩb ning Israyɛl kamba sẽn wat n kõt Wẽndã t'a ka reng n pek a meng ye. Boto me ne ned ning fãa sẽn lebg rẽgdo, a sẽn sɩɩs kũum yĩnga, bɩ yell a to sẽn be a zug yĩnga t'a mi tiiri. Le yaa a sẽn sɩɩs-a rũng ning Wẽnd sẽn ka reegd a soab maoongo; le yaa a sẽn sɩɩs nin dẽgdo, a rẽgda sẽn ya-a a soab fãa. Ned ning sẽn rẽgem a meng woto paada ne a rẽgd n ta zaabre la sã ka wĩndg n lʋɩ la a soo koom, a ka tõe n dɩ rɩ-sõma wã ye. Zĩig sã n sobge t'a paam n peke, a tõe n dɩɩme tɩ yaa a rɩɩb la rẽ. A ra wãb rũng sẽn ki bɩ rũng a to sẽn yõke, n wa rẽgem a meng ye. Maam la yãmb Wẽnde, rũnda la beoogo. B reeg rɩɩba noy kãensã n da wa tʋk yel-wẽnd b zug ye tɩ ka rẽ b na kɩ, tɩ yaa maam b Wẽndã n welg b toore. Sẽn ka-a maan-kʋʋd ka tõe n sɩɩs rɩ-sõng ye; sãan sã n sig maan-kʋʋda, a pa tõe n sɩɩs rɩ-sõng ye. Sẽn be-a maan-kʋʋd zakẽ n tʋmd n deegd yaood, yẽ me ka tõe n dɩ ye. Maan-kʋʋda sẽn da a soab ne ligdi, yẽ soab toe n dɩɩme; wala rakõor sẽn dog a zakẽ: yaa b zu-soab rɩɩbo. Maan-kʋʋd bi-pugl sã n yi kãadem ne ned sẽn ka maan-kʋʋda, a ka tõe n le rɩ wẽnd doog rɩɩb maan-kʋʋdba bal sẽn tõe n dɩ wã ye. A sã n lebg pʋg-kõore, bɩ b sã dig-a lame, la a sẽn ka tar kamb yĩnga, a lɛɛg n wa be-la a ba zakẽ, wala a yãadmẽ, a tõe n dɩ-la a ba rɩɩbo, ne a sẽn ka maan-kʋʋdã. Ned sã yĩd n dɩ maan-kʋʋd dɩɩbo, b saagd-a-la yaoodo, la a lebd n paasa yaooda pʋɩɩr a nu soaba. B da saag n dɩ yaare dɩ-sõma niyns a Israyɛl sẽn yãk n kõ Soaala-Wẽnd ye. B sã n dɩ yaare, yaa yelle la b rogend b zugu, la yaa bũmb sẽn tog ne rolbo tɩ yaa maam a Wẽnde n welg dɩ-kãens toore. B yaa rɩ sõma. Wẽnnaam yeela a Moyiiz t'a wilg a Aarõ ne a kamba la a Israyɛl dooga zãng woto: «A Israyɛl biig bɩ sãan sẽn nok-a, sã n dat n kʋ yũ-noog maoongo, yaa pʋleng bɩ yamleoog maoongo, a sõng tɩ rũnga yɩ raoogo, n ya sõmbo, loalga, pesgo, bɩ bʋʋga. Da wa-y ne rũng sẽn tar bãnd ye tɩ maoonga ka na n deeg ye. Ned sã n wat ne rũnga, bedr bɩ bilfu, n na n kʋ yamleoog lagem-n-dɩ maoongo, bɩ tũu ne pʋlengo, Wẽnd ka tõe n deeg maoongã, rũnga sã n tar bãnd ye. Da kõ Soaala-Wẽnd rũng sẽn ya zoang ye, kar-keok ye, kar-fiung ye, sẽn tar ãbr ye, sẽn tar dasempʋɩɩg ye, sẽn tar nodr sẽn kaood mɛt ye. B ra saag n dɩgl rũng a woto buud neong maan-kugra zug ye tɩ ka tõe n yɩ Soaala-Wẽnd dɩɩb ye. Sã n ya rũng sẽn ya rɩgre bɩ sẽn ka sõma zãnga, f tõe n yõk-a lame n kʋ yamleoogo maoongo, a ya bedr bɩ bilfu; sã n ya pʋleng pidsgu yĩnga, ka tõe ye. Da kõ-y Soaala-Wẽnd rũng sẽn toose bɩ sẽn kɩsge, ba sã n ka tũ ne ninsaal daab ye. Y meng da wa ne kũun a woto buud y tẽngẽ ye. Da sak-y tɩ sãan wa ne kũun a woto buud n kõ Soaala-Wẽnd ye. Rũng sẽn kɩsg tara bãnde la Soaala-Wẽnd ka reegd b maoong ye. Wẽnnaam yeela a Moyiiz: Naafo bɩ pesgo, bɩ bʋʋg sã n doge, b kamba paada ne b ma dasem a yopoe. Daar a nii daarã, Soaala-Wẽnd tõe n deega b maoongo. Da naag-y n kʋ nag-yãanga, pe-yãanga, bɩ bʋ-yãang ne b biig, raar a ye ye. Y sã n kʋʋd pẽgr maoong maam, Naaba-Wẽnd yĩnga, bɩ y modg tɩ maoonga yɩ Soaala-Wẽnd sẽn tõe n deege. B wãbda rũnga zãnga, maoonga raare, beoog ka vẽegd-a ye. Maam la yãmb Wẽnde, rũnna la beoogo! Deeg-y m noya la y tũ ba tɩ maam la y Wẽnnaam! Da sãam-y m yʋʋr ye, modg-y tɩ m paam pẽgr Israyɛl kamba sʋka. Maam n welg yãmb sõmblem welegre. Yaa maam n yiis yãmb Ezipt tẽnga n na n yɩ yãmb Wẽnnaam, rũnna la beoogo.» Soaala-Wẽnd yeela a Moyiiz t'a taas Israyɛl kamba noy kãensa: «Naaba-Wẽnd tara b kibs bɛda la b ra-sõma. Ad-m ra-moonesã, d sẽn na n seg taaba raare. Yãmb na n tʋma rasem a yoobe, a yopoe raarã, y na n vʋʋsa zãnga. Ra-kãng yaa m segb ra-sõngo, y ka tõe n tʋm fɩ. Y sẽn be zĩig ning fãa, na n yɩɩ vʋʋsg daare, Soaala-Wẽnd yĩnga. Ad dasem niyns a Israyɛl kamb sẽn na n tigim taab yʋʋmd pʋgẽ tɩ yɩ kibsa la Soaala-Wẽnd daare. Pipi kiuugã piig la a naas daare, zĩ-sobdo, yaa Pak sɩngre, m waoogr yĩnga. Kiu-kãng piig la a nu daarã na n yɩɩ kibs Soaala-Wẽnd yĩnga, bur sẽn ka ning bɩll kibsa. Dasem a yopoe pʋgẽ, y na n wãba bur sẽn ka ning bɩlle. Pipi raarã yaa ra-sõngo, y kõn tʋm tʋʋmd ye. Dasem a yopoe wã pʋgẽ, beoog sẽn vẽege, y na n kõo Soaala-Wẽnd b rɩɩbo. Daar a yopoe soaba yaa kibsa, y kõn tʋm tʋʋmd ye.» Soaala-Wẽnd yeela a Moyiiz t'a togs Israyɛl kamba woto: «Y sã n wa kẽ tẽng ning m sẽn kõt yã, tigsgu sã n ta, bɩ y tall y pipi ka-gĩndã n wa kõ maan-kʋʋda. Maan-kʋʋda reegd-a lame n kõ Soaala-Wẽnde, n kos tɩ b me reeg-a. Ka-gĩnda kũun daare, y na n paasa pe-bil sẽn ta yʋʋmde la sẽn ka tar bãnde, n kʋ yũ-noog maoongo, Soaala-Wẽnd yĩnga. Sẽn ket yɛsa, yaa zom moena a yi sẽn nag ne kaam tɩ b na n yãk n yõog bugum n noog Soaala-Wẽnd sũuri; wa-y ne rãam me bilfu. Da rɩ-y buri, da wãb-y ka-sẽedem; da rɩ-y kood rẽenga, y sã n ka reng n kõ Soaala-Wẽnd ye. La rẽ yaa noor y kamb sẽn na n deeg, b sẽn be zĩig ning fãa, zamaan woo zamaana. Kibsa poore, yãmb sẽn tall y ka-gĩnda n wa kõ Soaala-Wẽndã poore, a yɩ tɩ zaame, sõd-y dasem pis-naas la a wɛ. Dɩlla dasem pis-nu daare, yẽ me le yaa kibs tɩ y na n tall kũun a taaba n wa kõ Soaala-Wẽnde. Y sẽn kẽed tẽng ning fãa, ad-y sẽn na n wa ne kũun ning n kõ Soaala-Wẽnde, na n yɩɩ bur a yiibu sẽn wẽ ne zom moen a yiibu, bur sẽn ning bɩlle. Dẽ la y kood rẽeng bũmbu y sẽn na n tall n wa kõ Wẽnnaam. Y sẽn na n paas bũmb ninga, yaa pe-bi a yopoe sẽn ta yʋʋmde la sẽn ka tar bãnde. Sẽn pʋgde yaa loalga la pe-raad a yɩ, yũ-noog maoong yĩnga. Rãam la kũun a taab me naagdame. Y yõogd-b lame tɩ b yũ-noogã dʋ n ta Soaala-Wẽnde n noog b sũuri. Y na n kʋʋ boɛɛg yel-wẽnd sugr kosg yĩnga; pe-bi wã sẽn ta yʋʋmdã kʋʋda lagem-n-dɩ maoongo. Maan-kʋʋda tata Soaala-Wẽnd taoore n tees b kũuna: pe-bi a yiibã la kood rẽemsa burã. Yaa rɩ-sõma sẽn kõ Soaala-Wẽnde, la maan-kʋʋdbã n na n dɩ-ba. Badaar na n yɩɩ tigsga, tigsg sẽn na n yɩ sõngo; y kõn tʋm tʋʋmd badaar ye, woto me yaa noor y kamba yĩnga, b sẽn be zĩig ning fãa. Y sã n wa ta y tẽngẽ wã, y sã n wa na n tigs y koodo bɩ y ra saag y pʋʋga zãng ye; da wʋk-y sẽn lʋɩ wã ye, bas-y rẽ tɩ naong rãmb la sãamb wa tõog n yiisi. Yaa maam la yãmb Wẽnnaam rũnda la beoogo!» Soaala-Wẽnd yeela a Moyiiz t'a togs Israyɛl kamba woto: «Kiuug a yopoe soaba, a pipi daarã na n yɩɩ vʋʋsg daare, y yĩnga. Na n yɩɩ tẽeg n kils Soaala-Wẽnd daare, n kils-b ne noor la tõntõodo. Y na n boola taaba, n tigim taaba. Badaare y ka na n tʋm tʋʋmd ye la y na n waa ne yũ-noog maand n kõ Soaala-Wẽnde.» Wẽnnaam yeela a Moyiiz t'a taas woto: «Kiuug a yopoe soaba, daar piig soaba, na n yɩɩ sugr kosg da-kãsenga. Y na n tigma taab badaare, y na n loe y noore la y na kʋʋ yũ-noog maoong n kõ Naaba-Wẽnde. Badaare y ka na n tʋm ye, badaar yaa sugr kosg da-kãsenga, tɩ y na n ta n kudg kãntɩɩga n paam pekre, y Wẽnnaama taoore. Sɩda, ned ning fãa sẽn zãgsa a noor loees badaare, b yiisd-a-la buudẽ. Ned ning sẽn tʋma tʋʋmd badaare, mam meng m toore n yiisd-a a buud sʋka. Da tʋm-y tʋʋmd ye; dẽ yaa noor sẽn kõn teem abada, y kamb yĩnga, b sẽn be zĩig ning fãa. Na n yɩɩ vʋʋsg daare wala raar a yopoe raarã. Loe-y noore, la kiuuga daar a wɛ soaba zaabre, n ta a vẽkẽmbeoogo zaabre, da tʋm-y ba fɩ.» Soaala-Wẽnd yeela a Moyiiz t'a wilg Israyɛl kamba woto: «Kiuug a yopoe soaba, a piig la a nu daare, bɩ y sɩng Sẽgd kibsa. Y na n maana kibs Soaala-Wẽnd yĩnga la a na n kaoosa dasem a yopoe. Pipi daarã, kibsa mooneg daarã, yaa ra-sõngo, y ka tõe n tʋm tʋʋmd ye. Dasem a yopoe pʋgẽ, y kõta Soaala-Wẽnd b yũ-noog maoongo, la a nii daarã, yẽ me le yaa tig-raaga tɩ y na n wa ne y kũun Soaala-Wẽnd yĩnga. La sẽn ya tigsg daarã, y ka tõe n tʋm ye. Kibsa na n baasa baraare, yaa vʋʋsg daare. Woto la Soaala-Wẽnd kibs bɛda, b ra-moonesã. Badaare y wat n kõo Soaala-Wẽnd y yũ-nood maando, y yamleoog kũuni, y laafi kosg maando, y maand sẽn tũnug ne zom la rãam la wala sẽn wilgã, raar fãa ne a rẽnna. La ra yĩm-y a yopoe raarã, vʋʋsga raarã kũuni, y yamleoog kũuni bɩ y pʋleng pidsgu kũuni y sẽn tog n wa kõ Soaala ye. Kiuug a yopoe soaba, a piig la a nu daare, y sã n wa tigs y koodo, bɩ y sɩng kibs Soaala-Wẽnd yĩnga dasem a yopoe pʋgẽ. Pipi daarã la daar a nii soaba yaa vʋʋsg daare. Pipi daarã, y na n baoo tɩ-sõma biisi, koms vãado, tɩɩs sẽn tar vãad wʋsgo, kʋɩlg noor yɩlse, n naag taab n yɩɩnd y sũ-noog yɩɩla la y kilsd Soaala-Wẽnde. Na n yɩɩ woto dasem a yopoe tõre. Yʋʋmd pʋgẽ yaa rasem a yopoe la y na n kɩdem woto Soaala-Wẽnd yĩnga. Dẽ yaa noor sẽn kõn tedg abada. Ya kiuug a yopoe soaba pʋgẽ la y na n kɩdem y sũ-noogo. Dasem a yopoe pʋgẽ, y na n gãanda sẽgdẽ. Woto y yagensa na bãnge tɩ m sẽn wa n yiis Israyɛl kamb Ezipt tẽnga, sẽgd n yɩ b roto. Woto la yãmb Wẽnda raabo.» La a Moyiiz wilga Israyɛl kamba b sẽn tog n maan bũmb ninga Soaala-Wẽnd kibs bɛda raare. Soaala-Wẽnd yeela a Moyiiz t'a wilg Israyɛl kamba tɩ b wa ne oliviye kaam sẽn ya yɩlemd menga. Yẽ la b na n tall n yõgend zaabr fãa sãnem fitila Soaala-Wẽnd doogẽ. A Aarõ na n ninga sãnem fitil kãsenga sɛka roogẽ, peenda sẽn lill kuga walsa koglga taoore. Fitila na n wida m taoor zaabr n ta yibeoogo. La rẽ yaa noor sẽn kõn teem abada f yagensa yĩnga. A Aarõ na n yõgna sãnem fitila t'a wit yʋng fãa Soaala-Wẽnd taoore. Dɩk alkam zom n wẽ bur gils piig la a yiibu. Bur fãa yaa zom wamde. Fo na dogl-b-la a yoob-yoobe, zĩis a yiibu, sãnem roagendga zugu, Soaala-Wẽnd taoore. Rɩgl tɩdare meng menga bura zugu n paase. Tɩdar kãng la b na n wa yõog m yĩnga, bura zĩigẽ wala tẽegr bũmbu. Yaa vʋʋsga raar fãa la bur kãens na n wa rɩgl m taoore. Israyɛl kamba na n waa ne ba wala zood sẽn kõn sãam kaseto. B na n yɩ-la Aarõ ne a kamba soolem la yaa zĩ-sõngẽ la b na n dɩ-ba, wala kũun sõngo b sẽn paam Soaala-Wẽnd pʋɩɩrẽ. Yaa noor sẽn kõn teem abada. Daar a ye zabr n zĩnd sika pʋga. Yaa Israyɛl biig menga n zab ne Ezipt tẽng rao biiga. Ezipt tẽng neda rog-a-la ne Israyɛl bi-pugla sẽn boond tɩ Selomit. A Selomit ba la a Dibri, Dã sakẽ neda. A Selomit biiga waa n wẽename n pʋd Soaala yʋʋr ne paoogre. B tall-a lame n wa a Moyiiz taoore. B bao zĩig n paalg-a n gũud Soaala-Wẽnd koɛɛga. Dẽ la Soaala-Wẽnd yeel a Moyiiz: «Kɩt tɩ b yiis sẽn sãama Soaala-Wẽnd yʋʋrã we-kɛɛnga. Yeel neb niyns fãa sẽn wʋm a gomdã tɩ b rɩk b nus n tik a zugu la rẽ poor bɩ Israyɛl kamba fãa laba ne kuga. La gom ne Israyɛl kamba n kõ-b noor kãnga: Ned ninga fãa sẽn tʋʋsa Soaala-Wẽnde, a tʋka yell a zugu. Ned ninga sẽn sãama Wẽnnaam yʋʋre, toga ne kũum la yaa Israyɛl zãma wã n na n laba ne kuga. Sẽn tʋʋs-a Soaala-Wẽnde, a yaa tẽnga biig bɩ sãana, b kʋʋd-a lame. Ned sã n kʋ a to, sẽn ya ned ninga fãa la a kʋ yã, yẽ me tog n kiime. Ned sã n wẽ rũng n kʋ, a tog n yaoo rũng sẽn vɩ. Yaooda sẽn ki wã ne rũng sẽn vɩ. Ned sã n pogl a saam-biiga, bɩ b pogl-a n lebse. Kaoogdame n dol sẽn kaooge. Nif ronda nifu tɩ yẽnd dond yẽnde. Wẽng ninga fo sẽn maan f to wã, wẽng kãng me la b lebsd foo. Ned sã n wẽ rũng n kʋ, a yaoodame n dole; sã n ya ninsaal la a kʋ yã, b tog n kʋʋ yẽ me. Yaa sãana, yaa tẽngen-neda, yõor zema yõore la maam la yãmb Wẽnnaam, rũnda la beoogo.» A Moyiiz deng n wilga Israyɛl kamba woto, dẽ poore, b yiisa we-kɛɛnga sẽn da sãama Soaala-Wẽnd yʋʋrã n lab-a ne kuga. La woto b maana wala Soaala-Wẽnd sẽn da wilg a Moyiiz. Soaala-Wẽnd yeela a Moyiiz Sinayi tãnga zugu t'a wilg Israyɛl kamba woto: «Y sã n wa kẽ tẽng ning m sẽn kõt yãmbã, tẽnga na n vʋʋsa wakat kẽere, m waoogr yĩnga. Yʋʋm a yoob pʋgẽ, bʋd f pʋʋgo, yolem f bugsuntundu, tigs b sẽn kõt-fo. Yʋʋmd a yopoe soaba, tẽnga na n vʋʋsame, a na n vʋʋsa Soaala-Wẽnd yĩnga. Da bʋd f pʋʋgo, da yolem f bugsuntund ye. Tigsg kibs ka na n zĩndi tɩ alkama ka na bʋde la bugsuntunda me wil ka na n yolem ye. Yaa tẽnga vʋʋsg yʋʋmde. Yaa tẽnga sẽn na n wom a toore, a vʋʋsga yʋʋmde la fo na n dɩ, foo ne f rakõore, f roog-biiga, f tʋʋmd-tʋmda, sãan sẽn nok foo, neb niyns fãa sẽn be-b ne foo. Sã n ya rũmsã, yir la weoog rũmsi, b rɩ b sẽn paam fãa. Sõd yʋʋm a yopoe naoor a yopoe, dat n yeelame tɩ yʋʋm pis-naas la a wɛ. Kiuug a yopoe soaba, daar piig soaba, bɩ y kɩt tɩ b peeb baorgo, tɩ y tigim n kils Soaala-Wẽnde. Na n yɩɩ sugra kosg da-kãsenga daare la baorga na n peeb tẽnga fãa pʋgẽ. Y na n mooname tɩ pis-nu yʋʋmda yaa yʋʋm-sõngo la yaa tẽnga kamba fãa fãagr yʋʋmde. Na n yɩɩ tigri yãmb yĩnga. Ned kam fãa lebd n deega a ba vẽenem, ned kam fãa lebda a buuda sakẽ. Pis-nu yʋʋmda na n yɩɩ sũ-noog yʋʋmde; rẽ yĩnga y kõn bʋde, y kõn tigsi, la y sẽn ka yolem y bugsuntundã, y kõn fãs b biis ye. Pis-nu yʋʋmdã na n yɩɩ yʋʋmd sõngo la ka y tʋʋmna n na n dɩlg-y ye, yaa pʋtã sẽn wom b toorã, yaa pʋta sẽn wom yaarã n na n dɩlg yã. Yʋʋmd kãng pʋgẽ ned kam fãa reegda a sẽn da so. F sã n koosd bũmbu, bɩ f sã n daad bũmbu, wẽdg ka tog n zĩnd ye, yʋʋmd sõnga yaa bũmb sẽn tog n naag n geelge. F sã n dat n da pʋʋg f to nengẽ, sõd n bãng yaa yʋʋm a wãn la pis-nu yʋʋmda loog yã. Sẽn koosda wã sõtame n bãng yaa yʋʋm a wãn la a na n kell n soog pʋʋgã tɩ yʋʋmd sõnga yaool n ta. Yʋʋmd sõnga sã n ket n zãra, pʋʋga ligda me paasdame; yʋʋmd sõnga sã n pẽ, pʋʋga ligd woogdame. Geenda f sẽn na n tigs bũmb ning pʋʋgẽ wã n yaool n saag a ligdi. Ned ba a ye da wẽd a to ye, la y fãa zoe Soaala-Wẽnd nifu, tɩ yaa maam la yãmb Wẽnnaam, rũnda la beoogo. Deeg-y m noya, tũ-y m dog-n-mikã tɩ woto y na zĩnd tẽnga pʋgẽ ne laafi. Tẽnga na n woma a biisi tɩ y rɩ n tɩge, tɩ y vɩɩnd ne bãane. Y na n wa yeelame: ‹Yaa bõe la d na n dɩ yʋʋmd a yopoe soaba, bʋdb sẽn ka na n bʋde tɩ tigsg ka na n tigsi?› M pʋlemd-y lame tɩ yʋʋmd a yoob soab na yɩ bark yʋʋmde, la yʋʋmd kãnga y na tigs sẽn sek yʋʋm a tãab dɩɩbo. Yʋʋmd a nii soaba y na n bʋdame la yaa kood kʋdga la y na dɩ la y na n le rɩ kood kʋdg yʋʋmd a wɛ soaba, n tãag tigsgu. Ned ka koosd a pʋʋgo, y tẽngẽ wã, t'a yi a soolmẽ zãng ye, tɩ tẽnga yaa mam tẽnga la yãmb yaa mam sãamba la m noakense. Sẽn koos-a a pʋʋg tõe n le wa raa-a lame. F saam-biig a ye n dɩ ned samde, la samda yaoob yĩnga a kong n koosa a pʋʋg n na n paam ligdã, ad-y yaa sẽn pẽ-a yẽnda ne rogem n yɩɩdã, n wat n da pʋʋga sẽn koosã, t'a leb buuda soolmẽ. Fo yaa naong soaba n koos f pʋʋg la f ka tar ned sẽn pẽ foo ne rogem sẽn tõe n wa ra pʋʋga t'a kell n pa buuda soolmẽ ye, ad yaa fo meng n na n maane f sẽn tõe n le soog pʋʋgã. F na n sõda yʋʋma sẽn loog pʋʋga koosg tɛka n yao yʋʋm kãens ligdi la f soog f pʋʋgo. Fo sã n ka tar sẽn na n yao n deeg pʋʋgã, sẽn daa pʋʋgã n na n kell n soog-a n tãag yʋʋmd sõngã. Yaa yʋʋm sõnga pʋgẽ la pʋʋga lebd a pipi soaala nugẽ. Ned sã n koos roogo sẽn be tẽng lal-gũbri pʋgẽ, yaa a koosga yʋʋmd pʋgẽ la a tõe n yao n le reeg-a. Yaa yʋʋmda pʋgẽ bal la roogo tõe n leb a soaba. Dɩlla sã n maan yʋʋmde t'a pa le wa, rooga lebgda sẽn da-a wã ne a kamb soolem. Ba yʋʋmd sõnga sã n ta, yẽ n ket n so-a. Sã n yaa roog sẽn ka be tẽnga lal-gũbr pʋgẽ, roog sẽn be tẽn-bõonesẽ, b tõe n le ra-a lame, la sã n ta yʋʋm sõngã, a lebda b pipi soaala. Sã n ya tẽns niyns a Levi kamba sẽn kẽedã, yaa wakat buud fãa la b tõe n yao n le reeg b roogo. Sã n yaa a Levi biiga n da yirã n kẽ, yʋʋm sõnga sã n ta, yẽ me lebs yirã a soaba la a leb a zakẽ, a leb a tẽngẽ, a me soolmẽ. A Levi kamba tẽnse yaa a Levi kamba soolem, ba b sã n tɩ naag ne Israyɛl kamb a taaba. Pʋta sẽn pẽ ne a Levi kamba tẽns ka tõe n koos ye tɩ bãmb n so-b wakat buud fãa. F saam-biig n be ne foo la naong waa n kẽ-a lame t'a lebg f sam-dɩta, da bas-a ye. Ba a yaa sãana, ba a noka tẽng a to, kell n sõng-a. Da bao n dɩ a yõod ye. Zoe Wẽnnaam nif n bas-a t'a vɩɩnd ne foo. Da peng-a ligdi, n dat t'a wa yao ne roagl ye; da kõ-a rɩɩb n yet t'a wa lebs tɩ yɩɩg a sẽn deeg ye. Yaa maam la yãmb Wẽnnaam. Maam n yiis yãmb Ezipt tẽnga n na n kẽes y Kanaã tẽnga, n na n lebg yãmb Wẽnnaam rũnna la beoogo. F saam-biig sã n be ne foom n wa lʋɩ nimbãaneg pʋgẽ, t'a yet t'a na n koosa a meng ne foo n lebg f rakõore, da zã-a wa a lebga f yamb ye. A na n yɩɩ wala f tʋʋm-tʋmd bala, ned sẽn tʋmd n deegd yaood bala, bɩ f noaka la a na n tʋma ne foo n tãag yʋʋmd sõngã. Rẽ marsã la f na n bas-a t'a loog ne a kamba. A leb a buudẽ n tɩ soog a ba rãmb sẽn bas ne-a pʋɩɩr ninga. Mam sẽn yiis b rãmb Ezipt tẽnga, lebga mam tʋʋm-tʋmdba, b pa tog n koos-b wala yem-daad ye. Da zã-y bãmb toog ye, zã-y-ba la y zoe maam y Wẽnda nifu. F rakõapa, f zak kom-pugli na n yɩɩ tẽn-zẽng rãmba sẽn gũbg yãmba kamba. Yaa bu-zẽng ned bala n tõe n yɩ yãmb sõgne. Sẽn tõe n yɩ-b yãmb sõgen-kamba, yaa sãamba sẽn be-b ne yãmb kamba, bɩ bãmb sẽn so b rãmba kamba, sẽn dog la b vɩ yãmb sʋka, bãmb n tõe yɩ yãmb soolem. Yãmb loogr poore, yãmb kamb n na n soog-ba, daar fãa. Nin-bãmb buud n tõe n yɩ yãmb yem-daado. Sã n ya ne Israyɛl kamba, ka boto ye, ned kõn wẽoog a saam-biig ye. Sãan bɩ noak nug sã n tarẽ tɩ fo saam-biig sẽn be ne yẽnda yaool n tar a samde n kong n dɩk a meng n koos ne yẽnda, bɩ ne sãamb buudu, fo tõe n yaoome n deeg tẽnga biigã. A saam-biig fãa tõe n yaoome n deeg-a. Sẽn tõe n yao-b n deeg-a, yaa a ba kẽema bɩ a ba yao, a ba kẽem biiga bɩ a ba yao biiga, a buuda neda, bɩ a menga, a sã n tõe. A na n yẽsa ne sẽn daa yẽ wã, n ges yaa yʋʋm a wãna n be, a raaba tẽka n tãag yʋʋmd sõngã; ligda geels na n tũu yʋʋma sõore; b na geela wala a sã n da rɩkdẽ la yaood beoog sẽn vẽege. Sã n ket wʋsg tɩ yʋʋmd sõnga yaool n ta, a yao n fãag a menga me na n tũu yʋʋm kãens sõore. Sã n ka le ket wʋsg tɩ yʋʋmd sõnga ta, a geta sẽn keta sõore, n yao n fãag a menga. Na n geelame wala a sã n da tʋmd n deegda ligd beoog sẽn vẽeg fãa. B ra zã-a a yaar ye, b ra namsd-a tɩ fo sĩnd n getẽ ye. Yãmb saam-biiga sã n ka paam tɩ b yao n deeg-a, a gũ yʋʋmd sõngã n paam a menga, yẽ ne a kamba. Israyɛl kamb sẽn tõe n yɩ ned ninga sõgne, yaa maam bala. Yaa maam n yiis-b Ezipt tẽnga. Yaa maam bal la bãmb Wẽnnaam. Da naan-y wẽn-faad n kõ y meng ye, da pees-y nin-naande, daoog bɩ kugri n waoog-a wa y wẽnd ye, da lugl-y kuga n yĩgimd b taoor ye tɩ maam bal la yãmb Wẽnnaam rũnna la beoogo. Deeg-y vʋʋsga noya la y waoog Soaala-Wẽnd waoogra do-sõngẽ: maam la Naaba-Wẽnde. Y sa n vɩ wala m sẽn wilg yã, n deeg m noya y pʋ-tẽerẽ la y manesem pʋgẽ, m na kɩt tɩ saaga sek yã, tẽnga na wom a biisi, tɩɩsa na ning biisi, al tɩ kooda pãbe n tãag tɩɩsa wobre, tɩ tɩɩsa me wob n tãag bʋdbo. Y na rɩ n tɩge la tẽnga me na zĩnd ne laafi. M na n gãnega tẽnga laafi, bũmb kõn yɛɛs-y y gãagẽ ye. M na n zãaga y tẽnga ne bõn-nindi wã fãa; sʋʋg kõn leb n pɩʋʋg y tẽng ye. Y na n diga y bɛɛbã la y sʋʋsa na gãneg-b zãnga. Neb a nu digda bɛɛb koabga, tɩ koabg rigd tus piiga. Y sʋʋs n na n dɩ-b zãnga. M na n gesa yãmb yelle, y na n wekame n lebg zembala la m zooda na n paa ne yãmba. Dɩẽ kooda na n vaagame n yiisi n paam n bĩng rõanda rẽnna. M na n tila m zak yãmb sʋka la m kõn bas-y abada. M na n vɩɩnda ne yãmba, n ya yãmb Wẽnnaam tɩ yãmb ya m neba. Yaa maam la yãmb Wẽnnaam; maam n yiis yãmb Ezipt tẽnga tɩ y ra yɩ be yem-daad ye. M kɩtame tɩ y lub y zɩɩbã n kẽnd marsã ne yẽesem. Yãmb sã n ka kelg maam la y sã n ka reeg m noya, yãmb sã n tusd m noya la m dog-n-mikã n lebsd kɛɛnga, yãmb sã n ka tũud m sẽn wilgi, n sãam zoodã, ma me na n tusa yãmb n lebs kɛɛnga. M na zĩndig-y rabeem la yɩɩr pʋgẽ, y na bẽ bãase, tɩ y nin lebg kõaada, tɩ y vʋʋsg lebg toogo. Y na n namsa y mens n bʋd y pʋt la na n yɩɩ bɛɛb rɩɩbo. M na n bas-y lame la y bɛɛba na n tõog-y lame; yãmb na n kʋɩɩ tĩig tɩ ned yaool n pa rigd-y ye. La y sã n baas n ka kelgdẽ, m na sɩbg y beegrã naoor a yopoe. M na n sika y wilg-m-menga n kɩt tɩ y saag lebg kutu, n kɩt tɩ y tẽnga lebg zũudu. Y na n sɛ-la y pãng zaalem, tɩɩsa wala pʋtã kõn le wom biig ye. Y sã n zẽk y zug ne maam n ka kelg-ma, m na sik yel-beed y zugu tɩ y beegrã paam sɩbgr naoor a yopoe. Yaa we-rũms la m na n bas tɩ b kẽ tẽngã n yõg y kamba fãa, n sɛ y rũmsã, n yãgs-y wa b sẽn yãgsd daaga, tɩ y soy lebg so-vɩɩdo. La rẽ sã n ka wilg y yam, tɩ y ket n zẽkd y zug ne maam, mam me na yik ne yãmba n sɩbg y beegra naoor a yopoe. Y sã n sãam zoodã, m na yiis m sʋʋg n dok m sũuri. Y na n tɩ sũu taab y tẽn-bɛda pʋga la m na n kɩtame tɩ tẽn-kũum babs-y be, m na n kẽesa y bɛɛba be tɩ b yõg yãmba. Koma sã n wa lʋɩ y tẽngẽ, pagb piig na tõog n wʋm zak piig bur, wʋng a ye pʋgẽ. Y na rɩ la kõn ta ni, tɩ moenda na n yɩɩ bilfu. La rẽ sã n ka wilg y yam tɩ y ket n zẽkd y zug ne maam, mam me na yik ne yãmba, m sũur na n puugame, tɩ m sɩbg y beegrã naoor a yopoe. Y na n wãba y kom-dibli nemdo, n wãb y kom-pugli nemdo. M na n menesa y pʋʋsga zĩiga, m na n wã-la y tɩdara maan-kugr. Y wẽn-faada sẽn wã n dɩga zutu la m na n sam y ned woo ned woo sẽn ki. M yam na n laka ne yãmba. M na n kɩtame tɩ y tẽnsa lebg raboodo, m na n zũndga y wẽnd dotã, m kõn le kok y maanda yũug ye. M na n pidsa tẽnga ne sũ-sãanga al tɩ y bɛɛba sẽn na n wa reeg yãmb zĩiga na n yɛɛse. M na n sẽeg-y-la nin-zẽmba sʋka, m na n tʋma bɛɛba tɩ b wa tak zabr ne-yã. Y tẽnga na n lebga zĩ-peen-daaga tɩ y rot lebg raboodo. Y sẽn wat n be y bɛɛba sʋka n ka mi y sẽn lebdẽ wã, wakat kãng la tẽnga na n sɩng vʋʋsgo. A ka na n le paam koob ye. Yãmb nimbãanega wakat la a na n vʋʋse tɩ yãmb sẽn waa n be a pʋgẽ wã, a ka paam vɩʋʋg n vʋʋs ye. Sẽn na n kell n pa-b tẽngẽ wã, m na n kɩt tɩ b vɩɩnd ne yɩɩre, y bɛɛba sʋka. Tɩɩg wã koɛɛng meng sẽn lʋɩt bʋʋre na n yɛɛs-b lame tɩ b kʋɩ tĩig wala b zoet n na n põsa sʋʋga, mik ned ba a ye ka pʋgd-b ye. B na n lagsame n lʋɩ n bʋʋg taaba wala sʋʋg n pʋgd ba, mik ned ka pʋgd-b ye. B ka na n tõog b bɛ ba a ye. Y bɛɛba tẽngẽ la y na n pa gilli; bɛɛba tẽng n na n dɩ-y zãnga. Sẽn põs-b bɛɛba, b yel-wẽna wẽnem n na n lɛɛg n kʋ-ba. La ka na n yɩ bãmb mens yel-wẽna yĩng bal ye, na n naaga ne b ba-rãmb yel-wẽna. Daare b na n waa n baas n deeg b kongre la b ba-rãmb kongre, b na n wa n deeg tɩ b paooga maam, tɩ b zẽka b zug ne maam, la rẽ la mam me yik zabre ne ba n tall ba n kẽes b bɛɛba tẽngẽ. Daar bɩ b wa yik n boog b zẽk-m-menga la b reeg b yel-wẽna sɩbgre. M na yaool marsã n tẽeg zood ning m sẽn yõg ne a Zakoob, ne a Izaak, ne a Abraam. M kõn yĩm m tẽnga yell ye. Rũnda wã m nongame tɩ b yi n bas tẽnga t'a vʋʋse, m nongame tɩ b nams n yao b beegre. Sɩda bãmb n zãgs tɩ b kõn tũ m dog-n-miki, bãmb n yeel tɩ m noya yaanda b sũuri. La ba b sã n wa be b bɛɛba tẽngẽ, m ka na n yi b poorẽ ye, m kõn yeel tɩ m sũur yaanda ne ba n kʋ-b zãng ye; m kõn sãam m zooda ne b ye, tɩ maam la b Wẽnnaam. M na n tẽegame tɩ Ezipt yiib wakato m yõga zood ne-ba tɩ b bɛɛba getẽ la b kũmd sũuri. M maana woto tɩ b bãng tɩ maam la bãmb Wẽnde, rũnda la beoogo.» Woto la Naaba-Wẽnd gom ne a Moyiiz noore, Sinayi tãnga zugu, n wilg b sẽn yals bãmb ne Israyɛl kamba sʋka, n wilg b sẽn tog n dɩk sor ninga, n wilg b noya la b rog-n-miki. Soaala-Wẽnd yeela a Moyiiz t'a togs Israyɛl kamba woto: «Ned sã n pʋlem Naaba-Wẽnd t'a na n kõ-b-la ninsaala, a tõe n pidsa a pʋlemdã ne ligdi yaoobo. Ligda yaooda woto: Sã n ya rao yʋʋm sẽn ta pisi n digd pisoobe, yaa wanzurf wakɩ koeems pis-nu. Wanzurf wakɩr wa b sẽn dɩt a soab Soaala-Wẽnd waoogr do-sõngẽ wã. Sã n ya paga, yaa wanzurf wakɩ koeems pis-tã. Sã n ya bi-ribl sẽn ta yʋʋm a nu n digd pisi, yaa wanzurf wakɩ koeems pisi, sã n ya bi-pugla yaa wanzurf wakɩ koeems piiga. Sã n ya bi-ribl sẽn ta kiuug n digd yʋʋm a nu, yaa wanzurf wakɩ koeems a nu. Sã n ya bi-pugla yaa wanzurf wakɩ koeems a tãabo. Rao sã n ta yʋʋm pisoobe bɩ yɩɩd rẽnna, a yaood yaa wanzurf wakɩ koeems piig la a nu. Sã n ya paga, yaa wakɩ koeems piiga. Ned sã n pʋlem ninsaal Soaala-Wẽnde n yaool n ya naong soaba n ka tar a sẽn tog n kɩsã, b tallda nedã n wa maan-kʋʋda nengẽ t'a ges a sẽn na n yaoolg-a to-to; maan-kʋʋda geta a naongã n geelg n zemse. Sã n ya rũng b sẽn tõe n dɩk n kõ Soaala-Wẽnde, b sã n pʋlem n sɛ, lebga bũmb sẽn ya sõngo, ka tõe n tedg rũng a to, ka tõe n tedg buud a to tɩ bõn-sõng ledg bõn-yoog zĩigẽ, bɩ bõn-wẽng ledg bõn-sõng zĩig ye. B sã n dɩk rũng n tedg ne rũng a to, b yiiba fãa lebga Soaala-Wẽnd pʋɩɩre. Sã n ya rũng sẽn ka tõe n dɩk n kõ Soaala-Wẽnd la b pʋlem yã, b sẽn pʋlma yĩnga, b talld-a lame n wa maan-kʋʋda taoore. Yẽ n na n ges rũngã n bãng a sõng la a goalenga n saag a ligdi la yẽ sẽn wilgã n yɛse. B sã n dat n yao n deeg-a bɩ b paas a ligda bilfu. Ned sã n pʋlem a yir Soaala-Wẽnde, maan-kʋʋdã n get n bãng a sã n bee yõod wʋsgo bɩ a sã n ka be yõodo, la yẽ sẽn yeel n be. Raoã sã n dat n yao n deeg a yiri bɩ a paas ligd bilfu n yao n deege. Ned sã n pʋlem a pʋʋg Soaala-Wẽnde, b geta ka buud pet a wãn la b toe n bʋd a pʋgẽ. Alkam pugsgu pet piig fãa yaa wanzurf wakɩ koeems pis-nu la f kɩta. Sã n ya yʋʋm sõnga pʋgẽ la a pʋlem yã, ka geend n paas bɩ n woog bũmb ye. Sã n ya yʋʋm sõng poore, b sõta yʋʋma sẽn ket tɩ yʋʋmd sõnga ta wã. Yʋʋmda sã n ket n zãra, gɛɛlga woogda bilfu. Sẽn pʋlm-a a pʋʋga sã n dat n le soog a pʋʋgo, a paasda ligda sẽn da geelgã pʋɩɩr a nu soaba. A sã n yak n koos pʋʋgã ne ned a to n yaool n ka reng n yao tɩ pʋʋga sẽn zoe n ya Wẽnd soolma le lebg a rẽnna, yaoolem daadã n so puugã marsã; fo ka tõe n le yao n deeg-a dẽ poor ye. Woto, yʋʋmd sõnga sã n vẽke, sẽn daa-a wã me ka le so-a ye, a lʋɩta Soaala-Wẽnd soolmẽ; ned a to ka le tõe n dɩ a yõodo, a lebgda maan-kʋʋda soolem bala. Fo sã n pʋlem pʋʋg f sẽn da, ka f ba rẽnd ye, maan-kʋʋda geta yʋʋma sẽn kete tɩ yʋʋm sõnga ta, n tõog n geelg pʋʋga ligdi la ligda sẽn geelgã, b yaood-a-la baraar bala tɩ yaa Soaala-Wẽnd bõn-sõngo. Yʋʋm sõnga sã n ta, pʋʋga lebda a pipi soaal nugẽ tɩ yaa a saam-dãmb bũmbu. Geelsã geenda wa b sẽn geend Soaala-Wẽnd waoogra do-sõngẽ. Koeeng a ye wãada bõones pisi. Ned ka tõe n dɩk a rũng bi-rẽeng, rũm-bedr bɩ rũm-bila: nag-bila, bulla, pe-bila, n pʋlem Soaala-Wẽnd ye, a zoe n yaa bãmb soolem. Sã n ya rũng sẽn ka tõe n dɩk n kõ Soaala-Wẽnde, la a ka rat n tek ne rũng a to, b tõe n geelga a ligdã n paas pʋɩɩr a nu soaba t'a yao n deege. B sã n ka yao n deeg-a, b koosda rũnga wala a sẽn tõe n da tɛka. Ned sã dɩk bũmb n kõ Soaala-Wẽnd zãnga, bõn-kãng yii koosgo la raab pʋgẽ. Tõe n yɩɩ ned bɩ rũng la b pʋlem Soaala-Wẽnd zãnga. Bũmb sẽn kõ Soaala-Wẽnd zãng lebga bũmb sẽn ya sõng zãnga, lebga Soaala-Wẽnd b ye soolem. Ninsaal b sẽn pʋlem Soaala-Wẽnd zãnga ka tõe n le yao n deeg ye, dẽnd b kʋ-a bala. Tẽnga biisi, tɩɩsa biisi, na dʋʋga dʋr piig-piiga, n yãk dʋr a ye, pʋɩɩr a ye, n kõ Soaala-Wẽnde, rẽ yaa Soaala-Wẽnd pʋɩɩre. Fo sã n yãk Soaala-Wẽnd pʋɩɩrã n kõ-ba, n yaool n dat n yao n deege, dẽnd f paas bũmb bilfu: Sã n saag a nu fo paasda a ye tɩ lebg a yoobe la f kɩta. Rũmsã, bɛd la bõonego me pʋɩta piig piiga n yãk pʋɩɩr a ye n kõ Soaala-Wẽnde. Wẽnd so-la a ye tɩ fo so a wɛ. B ra kẽ n welg sẽn ya sõmb la sẽn ka sõmb ye; b ra tedg ye, b sã n tedge, rũng a to wã me naag n lebga Soaala-Wẽnd pʋɩɩre; ka tõe n yao n le reeg ye.» Yaa woto la Wẽnnaam noya. B togs-b-la a Moyiiz Sinayi tãng zugu, Israyɛl kamb yĩnga. Soaala-Wẽnd goma ne a Moyiiz Sinayi zĩ-peen-daagẽ, sɛka roog pʋga, kiuug a yiib soaba pipi raare, b yi Ezipt tẽng tɩ yʋʋm-bɩtẽ la b yeel-a lame: «Sõd-y yã a Israyɛl kamba fãa sak-saka, roog-roogo; sõd-y rapa fãa a yembr-yembre. Foo ne a Aarõ, sõd-y Israyɛl kamb yʋʋm sẽn ta pisi la sẽn loog pisi, neb niyns fãa sẽn ya a Israyɛl tãb-biisi, sõd-y-ba, ned kam fãa ne a tãnsoaben-doogo. Buud fãa na n yãka kãsem a ye n kõ-y tɩ b sõng yã. Ad neb niyns sẽn na n sõng yãmba: A Rubẽ roogẽ, a Sedewur biig a Elisur. A Simeõ roogẽ, a Surisadayi biig a Selumiyɛl A Zɩɩda roogẽ, a Aminadab biig a Nasõ. A Isakar doogẽ, a Suwar biig a Nataneyɛl. A Zabulõ roogẽ, a Elon biig a Eliyab. A Zozɛf biig a Efrayim roogẽ, a Amiyud biig a Elisama; a Manase roogẽ, a Pedasur biig a Gameliyɛl. A Bẽnzame roogẽ, a Gideoni biig a Abidã. A Dã roogẽ, a Amisadayi biig a Ayiyezɛr. A Asɛr roogẽ, a Okrã biig a Paziyɛl. A Gad roogẽ, a Deowɛl biig a Eliyasaf. A Neftali roogẽ, a Eyinã biig a Ayira.» Bãmb la b tũus yã tɩ b lʋɩ b ba rooga kamb taoore, bãmb ned kam fãa da soo neb tus wɛɛla. Nin-bãmb me la a Moyiiz ne a Aarõ bool tɩ b wa sõngd-ba. B kɩtame tɩ Israyɛl kamba fãa tigim taab kiuug a yiib soaba pipi raare. Ned kam fãa bao-la a ba-biisi, zak-zaka, roog-roogo, la b ra gʋlsda rao fãa sẽn ta yʋʋm pisi bɩ yɩɩd rẽnna. A Moyiiz sõd-b-la Sinayi zĩ-peen-daagẽ, wala Soaala-Wẽnd sẽn da togs-a. A Israyɛl pipi biig a Rubẽ doogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna n ya tãb-biisi. B saaga zak-zaka, roog-roogo, B paama tus pis-naase la a yoobe la kobs-nu. (46 500) A Simeõ roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo, b paama tus pis-nu la a wɛ la kobs-tã. (59 300) A Gad roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B Paama tus pis-naas la a nu la kobs-yoob la pis-nu. (45 650) A Zɩɩda roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pisopoe la a naase la kobs-yoobe. (74 600) A Isakar roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pis-nu la a naase la kobs-naase. (54 400) A Zabulõ roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pis-nu la a yopoe la kobs-naase. (57 400) Sã n yaa a Zozɛf kamba, a Efrayim doogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pis-naase la kobs-nu. (40 500) A Manase roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pis-tã la a yi la kobs-yi. (32 200) A Bẽnzame roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pis-tã la a nu la kobs-naase. (35 400) A Dã roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pisoob la a yiibu la kobs-yopoe. (62 700) A Asɛr roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pis-naas la a ye la kobs-nu. (41 500) A Neftali roogẽ, b sõda a yembr-yembre, rap niyns yʋʋm sẽn ta pisi bɩ yɩɩd rẽnna, n ya tãb-biisi. B saaga zak-zaka, roog-roogo. B paama tus pis-nu la a tãabo la kobs-naase. (53 400) Woto n yɩ neba sõore sõadga rãmb sẽn paame. Sõadga rãmb la a Moyiiz ne a Aarõ la bãmb sẽn kos b rãmb sõngre. Roog fãa yɩɩ nin-yende. B sõda rao fãa yʋʋm sẽn ta pisi bɩ yɩɩd rẽnna, n ya tãb-biiga. B paama tus kobs-yoob la a tã la kobs-nu la pis-nu. (603 550) A Levi buuda kamb bala la b pa sõde. Soaala-Wẽnd yeela a Moyiiz: «A Israyɛl kamba sʋka, yaa a Levi rooga bal la f ka na n saag n sõde. Bãmb la f na n kos tɩ b ges sɛka roog yelle. B ges rooga la teed niyns fãa sẽn be a pʋgẽ. Bãmb n na n tʋk a teedã, n ges tɩ bũmb fãa wa a zĩigẽ. B na n ti b rotã n gũbg-a. Yikr sã n ta, Levitsa n baasd teedã n tʋk n looge. Sã n le ta sikã, bãmb n lebd n ti-a. Nin-zaalg sã n saag n kolge, b kʋʋd-a lame. Israyɛl kamb a taaba tiida roog-roogo, b tiidame n yegl b tãb-kaoore. Sã n yaa a Levi kambã, bãmb tiidame n gũbg sɛka roogo la woto buuda gill na tɩlg ne Soaala-Wẽnd sũ-puuri. Levitsa bal n na n ges sɛka roog yelle.» Israyɛl kamba maana wala Soaala-Wẽnd sẽn tʋlge, wala b sẽn da wilg a Moyiiz. Naaba-Wẽnd goma woto ne a Moyiiz la a Aarõ: «Bɩ Israyɛl kamba ti b roto n gũbg b tãb-kaoore. Tiidame n zãag bilfu ne sɛka roogo. Yaanga la tãb-biisã sẽn fãoog-b ne a Zɩɩda na n ti n gũbg b tãb-kaoore. A Zɩɩda rooga kãsem la a Aminadab biig a Nasõ. A tãb-biisa sõor yaa tus pisopoe la a naase la kobs-yoobe. (74 600) Sẽn na n fãoog-b ne yẽnda, yaa Isakar la a Zabulõ. A Isakar rooga kãsem la a Suwar biig a Netanɛl. A tãb-biisa sõor yaa tus pis-nu la a naase la kobs-naase. (54 400) A Zabulõ roog kãsem la a Elon biig a Eliyab. A tãb-biisa sõor yaa tus pis-nu la a yopoe la kobs-naase. (57 400) Dɩlla rota sẽn fãoog ne a Zɩɩda n ti n gũbg b tãb-kaoorã tara tãb-biis tus koabg la pis-nii la a yoobe la kobs-naase. (186 400) Bãmb n dengd yikri. Sẽn na n ti-b nug rɩtgo n gũbg b tãb-kaoore, yaa tãb-biis niyns sẽn na n fãoog-b ne a Rubẽ. A Rubẽ rooga kãsem la a Sedewur biig a Elisur. A tãb-biisa sõor yaa tus pis-naas la a yoobe la kobs-nu. (46 500) Sẽn na n fãoog-b ne yẽnda yaa a Simeõ la a Gad doogo. A Simeõ rooga kãsem la a Surisadayi biig a Selumiyɛl. A tãb-biisa sõor yaa tus pis-nu la a wɛ la kobs-tã. (59 300) A Gad rooga kãsem la a Reuwɛl biig, a Eliyasaf. A tãb-biisa sõor yaa tus pis-naas la a nu la kobs-yoob la pis-nu. (45 650) Rota sẽn fãoog ne a Rubẽ n ti n gũbg b tãb-kaoorã paama tãb-biis tus koabg la pis-nu la a ye la kobs-naas la pis-nu. (151 450) Bãmb n pʋgd ne yikri. Bãmb poore, yaa Levitsa n yikd ne sɛka roogo. Bãmb n be sʋk zãnga. Yikra yikda pʋgdg-pʋgdga, yalsga me yaa boto. Nin-taoorã, sẽn na n ti n gũbg b tãb-kaoorã yaa sẽn na n fãoog-b ne a Efrayim. A Efrayim roog kãsem la a Amiyud biig a Elisama. A tãb-biisa sõor yaa tus pis-naas la kobs-nu. (40 500) Sẽn na n fãoog-b ne yẽnda yaa a Manase la a Bẽnzame roogo. A Manase roog kãsem la a Pedasur biig a Gameliyɛl. A tãb-biisa sõor yaa tus pis-tã la a yi la kobs-yi. (32 200) A Bẽnzame roog kãsem la a Gideoni biig a Abidã. A tãb-biisa sõor yaa tus pis-tã la a nu la kobs-naase. (35 400) Rota sẽn fãoog ne a Efrayim n ti n gũbg b tãb-kaoorã paama tãb-biis tus koabg la a nii la koabga. (108 100) Bãmb la yikr a tãab rãmba. Sẽn na n ti-b nug goabga n gũbg b tãb-kaoorã, yaa sẽn fãoog-b ne a Dã. A Dã roog kãsem la a Amisadayi biig a Ayiyezɛr. A tãb-biisa sõor yaa tus pisoob la a yi la kobs-yopoe. (62 700) Sẽn na n fãoog-b ne yẽnda yaa Asɛr la Neftali roogo. A Asɛr roog kãsem yaa Okrã biig a Pagiyɛl. A tãb-biisa sõor yaa tus pis-naas la a ye la kobs-nu. (41 500) A Neftali roog kãsem la Eyinan biig a Ayira. A tãb-biisa sõor yaa tus pis-nu la a tã la kobs-naase. (53 400) Rota sẽn fãoog-b ne a Dã n ti n gũbg b tãb-kaoorã paama tãb-biis tus koabg la pis-nu la a yopoe la kobs-yoobe (157 600) Bãmb n na n yaool yikri, pʋgdg-pʋgdga. Fãa na n dɩka sore n pʋgd b tãb-kaoorã.» Ad Israyɛl kamba sõore: sõda roog-roogo, sõda tãb-sik-tãb-sika la b gill yaa tus kobs-yoob la a tã la kobs-nu la pis-nu. (603 550) B ka naag a Levi kamba n sõd ne a Israyɛl ye. La noor kãng me la Soaala-Wẽnd da kõ a Moyiiz. Israyɛl kamba reega noorã. Sɩd me, b kẽnd bɩ b yalsda, da yaa zak-zaka, roog-roogo, b ra pa kẽnd yaar ye. Ad-a Aarõ ne a Moyiiz kamba la b yagense, Soaala-Wẽnd sẽn waa n gomd wakat ning Sinayi tãnga zugu. A Aarõ kamba yʋy la woto: bi-kẽenga la a Nadab, t'a Abiyu, a Elazar la Itamar pʋgda. Bãmb n yɩ a Aarõ kamba; b taag-b-la kaam sõngo tɩ b reeg maan-kʋʋr naam, Soaala-Wẽnd taoore. Sã n yaa a Nadab ne a Abiyu, bãmb kii Soaala-Wẽnd taoore la rẽ yaa b sẽn saag n yõog wisdu b sẽn da ka kõ-b sor tɩ b yõoge. B kii Sinayi zĩ-peen-daagẽ; b ka rog kamb ye. Yaa a Elazar la a Itamar n da tʋmd maan-kʋʋr tʋʋmd b ba a Aarõ sɛɛgẽ. Naaba-Wẽnd yeela a Moyiiz: «Bool a Levi rooga t'a wa reeg tʋʋmde maan-kʋʋd, a Aarõ, nengẽ. Bãmb n na n sõng-a. B na n pẽnega sɛka roogo n tʋm a tʋʋma n sõng a Aarõ ne rooga gilli. Bãmb n na n ges sɛka roog teeda yelle, bãmb n na n deeg Israyɛl kamba zĩig n tʋm tʋʋm niyns sẽn tʋmd a pʋgẽ. Woto wã, f na n dɩka Levitsa n kõ a Aarõ ne a kamba, Wẽnd waoogr tʋʋma yĩnga. Da tol n kees tʋʋmd sɛka roogẽ sak a to yĩng ye. A Aarõ ne a kambã n na n soog maan-kʋʋr naam. Nin-zaalg da saag n kolg n wa bao a yõor yãkr ye.» Soaala-Wẽnd yeela a Moyiiz yɛsa: «Mam meng m toore n tũus Levitsa Israyɛl kamba sʋka. B lebga m soolem tɩ bãmb la m deeg yã wala a Israyɛl bi-rẽenga. Bi-rẽeng fãa yaa mam soolem. M sẽn kʋ Ezipt kom-dẽemsa raare, m dɩka Israyɛl kom-dẽemsã n kõ m menga. Ninsaal bi-rẽenga, rũng bi-rẽenga, maam n so. Maam la Naaba-Wẽnde.» Soaala-Wẽnd yeela a Moyiiz Sinayi zĩ-peen-daagẽ: «Sõd a Levi kamba, zak-zaka, roog-roogo. Sõd bi-ribl fãa sẽn ta kiuugu.» A Moyiiz maana Levitsa sõadg wala Soaala-Wẽnd sẽn da kõ-a noore. Ad-b sẽn sõd b rãmba wa Levitse: a Gersõ, a Keyat, a Merari. Ad-a Gersõ roogo la a kamba: a Libni, a Simeyi. A Keyat roogo: a Amram, a Yisear, a Ebrõ la a Uziyɛl. A Merari roogo: a Mali la a Musi. Woto n yɩ a Levi kamba b sẽn sõd roog-roogo. B welga a Gersõ yagensa sags a yiibu: a Libni sak, la a Simeyi saka. Sõadga wakato b sõda kom-dibli sẽn ta kiuugu la sẽn yɩɩd rẽnna; b paama tus a yopoe la kobs-nu. A Gersõ yagens da tida b zak sɛka roog kudga, n tees nin-taoore. A Layɛl biig a Elyasaf n da ya kãsma. Ad-b sẽn da get bũmb ning sɛka roogẽ: yaa rooga menga, a pɛɛla sẽn na n lud-a, rignoora peen-lillã. B le geta zaka pɛɛla la zaka rignoora peendã, zak ning sẽn gũbg rooga la maan-kugrã, n paas wĩ wã sẽn na n tall n ti roogã. A Keyat yagensã, b welga bãmb sags a naase: a Amram la a Yisear kamba, a Ebrõ la Uziyɛl kamba. B sõda kom-dibli sẽn ta kiuugu la sẽn yɩɩd rẽnna la b paama tus a nii la kobs-yoobe. Bãmb n na n ges sɛk roog lagdã, te-sõma wã. A Keyat yagensa ra ti-la b rot sɛka rooga nug rɩtgo. Bãmb kãsem da yaa a Uziyɛl biig a Elisafã. Bãmb tʋʋmd sɛka roogẽ: b ra geta kuga walsa koglgo, te-roagendgã, sãnem fitil kãsengã, yũ-noog maan-kugrã, tɩdara maan-kugri la b sẽn tar bũmb ning fãa tʋʋmd, Soaala-Wẽnd waoogra ro-sõngẽ. Sẽn le paas yɛsa yaa sɛka rooga peen-lillã. Bãmb n da get rẽ fãa yelle. B fãa gill kãsem la a Elazar, a Aarõ biiga. Yẽ n da get neb niyns fãa sẽn tʋmd b Soaala-Wẽnd waoogra ro-sõngẽ. A Merari yagense: a Mali la a Musi kamba. B sõda kom-dibli sẽn ta kiuugu la sẽn yɩɩd rẽ la b paama tus a yoob la kobs-yi. Bãmb kãsem da yaa a Abiayil biig, a Suriyɛl. A Merari yagensa da ti b rot sɛka roog nug goabga. Bãmb tʋʋmda ra geta raad niyns sẽn tar n tiid sɛka roogo, a ra-lugsã, a ra paadsã, ra gilsã, b te-sendsã la bũmb niyns fãa sẽn tar n tiid roogã. Le paasa zaka ra-lug gilsã ne b te-sendsã la biili wã ne wĩ wã. Yaa a Moyiiz, a Aarõ ne a kambã n da ti sɛka roog noore, yaang sẽnẽ. Bãmb n da tʋmd Soaala-Wẽnd waoogr ro-sõngẽ, buuda zĩigẽ. Nin-zaalg sã n da saag n ges te-bãmb yelle n yaool n ka maan-kʋʋda, b kʋʋd-a lame. Levitsa kamb sẽn ta kiuug bɩ yɩɩd rẽnna n ya rapa, ad-y b sõora yɩɩ tus pisi la a yiibu. A Moyiiz ne a Aarõ n da maan sõadgã, sak-saka, roog-roogo, wala Soaala-Wẽnd sẽn da kõ-a noore. Naaba-Wẽnd yeela a Moyiiz: «Sõd la f gʋls Israyɛl bi-rẽeng fãa sẽn ya raoa la sẽn ta kiuugu. Levitsa na n yɩɩ mam soolem, maam, Naaba-Wẽnde. A Levi kamba n na n deeg a Israyɛl kom-dẽemsa zĩigẽ, wala b rũmsa kom-dẽems sẽn na n deeg Israyɛl rũmsa kom-dẽemsa zĩigẽ.» Wala Soaala-Wẽnd sẽn kose, a Moyiiz sõda Israyɛl kom-dẽemsa fãa. B sẽn sõd kom-dibli sẽn ta kiuugu la sẽn ya b ma pipi kamba, b paama tus pisi la a yi la kobs-yi la pisopoe la a tã. (22 273) Soaala-Wẽnd yeela a Moyiiz: «Deeg Levitsã a Israyɛl kom-dẽemsa zĩigẽ; reeg Levitsa rũm-dẽemsã a Israyɛl rũm-dẽemsa zĩigẽ. Levitsa yaa m soolem tɩ maam la Naaba-Wẽnde. Israyɛl kom-dẽemsã kobs-yi la pisopoe la a tã sẽn zʋʋg Levitsa kamba sõorã, fo na n deega wakɩ koeems a nu bãmb ned kam fãa yĩnga, la yaa wakɩr ning sẽn dɩt wẽnd doogẽ wã. Wakɩr kãng tekda bõones pisi. Ligd kãng kɩta a Aarõ ne a kamba, kamb niyns sõor sẽn zʋʋga yĩnga.» A Moyiiz reega kamb niyns sõor sẽn da zʋʋga yĩnga, wakɩ koeems sẽn tõe n dɩ wẽnd doogẽ, bãmb tusr la kobs-tã la pisoob la a nu. A Moyiiz kɩsa ligd kãng a Aarõ ne a kamba wala Soaala-Wẽnd sẽn da kõ a noore. Soaala-Wẽnd yeela a Moyiiz ne a Aarõ: «Ges a Levi kamba sʋka n welg a Keyat roogẽ, neb niyns yʋʋm sẽn ta pis-tã n digd pis-nu tɩ b wa tʋm sɛka roogẽ. Ad-b tʋʋmd sẽn na yɩ a soaba sɛka roogẽ: te-sõma wã gesgo. B sã n na n viig sɛka roogo, a Aarõ ne a kamb n na n wa yak peen-lillã la b na n dɩk-a lame n pil kuga walsa koglgo. B lut-a lame n paas ne gãong sẽn ka madgd koom. B lebd n pila fãa ne peend mismiuugu n yaool n tui ra-tuiidsã, koglga zẽkr yĩnga. Te-roagendga zugu b yɛdgda peend mismiuugu, n dɩgl yõg-laasã, laasã, wũmlsã, ko-teesã la bura sẽn ka tõe n vaalã. Dẽ fãa luta ne peen moomd yʋs, n sẽbg ne gãong sẽn ka madgd koom, n yaool n tui ra-tuiidsã te-roagendga zẽkr yĩnga. B baooda peend mismiuugu n lud sãnem fitil kãsengã n paas bug-rɩɩnda sẽn dʋʋgd zĩig ningã, ne yɩʋʋdã, wõrsdgã la kaama tʋgdã. B lut-b-la ne gãnd sẽn ka madgd koom n loe pãndare. Yũ-noog maan-kugra zugu, b tʋɩta peend mismiuugu, n mobg-a ne gãnd sẽn ka tõe n madg koom la b tui a raadã a tʋkr yĩnga. B rɩkda teed niyns fãa b sẽn tar b rãmb tʋʋmde sɛka roogẽ, n lud ne peend mismiuugu, n pil ne gãnd sẽn ka madgd koom, n loe pãndare, n tʋke Bãmb n wʋkd tompɛglma maan-kugra zugu n lɛɛg n gãneg peend miuugu, n wʋk teeda b sẽn tar b rãmb tʋʋmdã maanda yĩnga: yɩʋʋda sẽn na n wʋk bug-saala, kut roɛ sẽn tar n tusd bugum, tompɛglma kardo, tompɛglma laase, nemda kõse, zɩ-mesdma laase la maan-kugra teed a taaba. B luta rẽ fãa ne gãnd sẽn ka madgd koom. B tuiida raadã maan-kugra tʋkr yĩnga. Yikr sã n ta, a Aarõ ne a kamba pinda teeda fãa t'a Keyat kamba wa tʋk n looge. Rooga sã n ket n yɛs a zĩigẽ b pa saagd n sɩɩs bũmb ye. Yɩta b kũum. Sɛka roog teed niyns a Keyat kamba sẽn tõe n sɩɩs la sẽn wilgã. Maan-kʋʋd a Aarõ biig a Elazar, n da get fitilsa kaama yelle, tɩdara sẽn na n yõogã, kũuna burã, kaama sẽn taagd maan-kʋʋdbã. Yẽ n get sɛka roog ne a pʋgẽ teeda fãa.» Soaala-Wẽnd yeela a Moyiiz: «Da bas-y t'a Keyat yagensa kolg roogã n bao b kũum ye. Ad-y sẽn na n maan bũmb ning tɩ b ra ki ye b sã n kolgd zĩ-sõngã: a Aarõ ne a kamba wat n yals ned kam fãa a tʋʋmd zĩigẽ, a sẽn tog n tʋka taoore. B ra saag n kẽ, gesg yĩng bal ye, ba ya nif kamseg pʋgẽ. B na n kiime.» Soaala-Wẽnd yeela a Moyiiz: «Sõd a Gersõ kamba zak-zaka, roog-roogo. Sõd neb niyns yʋʋm sẽn ta pis-tã n digd pis-nu sẽn deeg tʋʋmd sɛka roogẽ. Ad-a Gersõ kamba tʋʋmde, ad-b sẽn na n tʋke. Bãmb n zɩt sɛka zaka pɛɛla, sɛka roog menga ne a pɛɛlã la gãn niyns sẽn ka madgd kooma, sɛka rooga noor peen-lillã, zaka pɛɛla, wĩ wã la teed a taaba fãa, b sẽn deeg bũmb ning fãa b tʋʋmda yĩnga. Yaa a Aarõ ne a kamba noor la a Gersõ yagensa na n tũ, yaa zɩɩb la b yet tɩ b tʋk bɩ yaa tʋʋmd a to la b yet tɩ b maan. Teeda tʋkr n na n yɩ b tʋʋmde. A Gersõ yagensa tʋʋmd la woto sɛka roogẽ; yaa zɩɩba tʋkr tʋʋmde la maan-kʋʋd a Itamar na n kõ-ba. A Itamar yaa a Aarõ biiga.» Soaala-Wẽnd yeela a Moyiiz: «Sã n ya a Merari yagensã, sõd bãmb me zak-zaka, roog-roogo. Sõd neb niyns yʋʋm sẽn ta pis-tã n digd pis-nu n kõ-b tʋʋmde, sɛka roogẽ. Teeda tʋkr n na n yɩ b tʋʋmde. B sẽn na n tʋk la woto: rooga ra-lug paklsã, ra paadsã, ra-lug gilsã ne b te sendsã. Le yaa ra-lug gilsã sẽn gũbg zakã ne b te-sendsã, biili wã ne wĩ wã la tʋʋma teedo. Y na n wilga ned kam fãa a sẽn tog n tʋke. Woto la a Merari kamba tʋʋmde sɛka roogẽ la a Aarõ biig a Itamar n na n ges b yelle.» A Moyiiz, a Aarõ ne kãsem-dãmba sõda a Keyat yagensã zak-zaka, roog-roogo. B sõda neb niyns yʋʋm sẽn ta pis-tã n digd pis-nu la sẽn da tʋmd sɛka roogẽ, b paama neb tus a yi la kobs-yopoe la pis-nu. Ad-y b sẽn waa n na n sõd a Keyat kamba sẽn tʋmd sɛka roogẽ, a Moyiiz ne a Aarõ tũu Soaala-Wẽnd sẽn da kõ-b noor ningã. Ad-a Gersõ kamba sẽn sõd zak-zaka, roog-roogo, kamb niyns yʋʋm sẽn ta pis-tã n digd pis-nu la sẽn da tʋmd sɛka roogẽ, yɩɩ neb tus a yi la kobs-yoob la pis-tã. Ad-y b sẽn waa n na n sõd a Gersõ kamba sẽn tʋmd sɛka roogẽ, a Moyiiz ne a Aarõ tũu Soaala-Wẽnd sẽn da kõ-b noor ningã. Ad-a Merari kamba sõore. Sõd-b-la zak-zaka, roog-roogo. Sõda neb niyns yʋʋm sẽn ta pis-tã n digd pis-nu la sẽn tʋmd sɛka roogẽ, la b paama tus a tã la kobs-yi. Ad-y b sẽn waa n na n sõd a Merari kamba sẽn tʋmd sɛka roogẽ, a Moyiiz ne a Aarõ tũ Soaala-Wẽnd sẽn da kõ-b noor ningã. Sã n ya Levitsa a Moyiiz la Aarõ ne kãsem-dãmb sẽn sõd zak-zaka, roog-roogã, b sẽn sõd neb niyns fãa yʋʋm sẽn ta pis-tã n digd pis-nu la sẽn tʋmd sɛka roogẽ, rooga baasg bɩ a tʋkr sã n wa ta, b paama neb tus a nii la kobs-nu la pis-nii. Wala a Moyiiz sẽn paam Soaala-Wẽnd noor la a sẽn wilgi, ned kamb fãa ra mi-la a sẽn maande la zɩɩb ninga a sẽn tog n tʋke. Naaba-Wẽnd yeela a Moyiiz: «Kõ Israyɛl kamba noore tɩ b yiis sikẽ wã ned ning fãa sẽn bẽed yĩng bãag sẽn dẽgemd-a, sẽn zĩ-a ne a yĩng rẽgdẽ bɩ sẽn sɩɩs-a kũum. B yaa pagb bɩ rapa, yiis-b sikẽ wã; la woto b kõn dẽgem a Israyɛl kamba sika, tɩ m me naag n be-la a pʋgẽ.» A Israyɛl kamb deega noore. B riga nin-bãmb n yiisi, wala Soaala-Wẽnd sẽn da togs a Moyiiz. Soaala-Wẽnd yeela a Moyiiz: «Yeel Israyɛl kamba woto: ‹Pag bɩ rao sã n tõdg Soaala noore n maan sẽn kisi, n bõn a to, a bãng tɩ yell n be a zugu. B wat n togsa b kongrã. Sẽn bõna a to wã lebsda a sẽn dɩka gilli n le paas b sẽn saagd bũmba ligda pʋɩɩr a nu soaba. B sẽn bõn a soaba kiime la a roagd ka sẽn na n deeg a sẽn tog n deega ye, yaa Soaala-Wẽnd la b lebsda, dat n yeelame tɩ yaa maan-kʋʋda la b lebsda. La b leb n paasda pe-raoogo sẽn na n kʋ yel-wẽnd dolb yĩnga, sẽn na n kʋ beegda sugr paoong yĩnga. Israyɛl kambã n so pʋɩɩr ning b sẽn dɩk n kõ Soaala-Wẽnde. Bõn-sõma wã fãa sẽn dɩk n kõ Soaala-Wẽnd yaa maan-kʋʋda n so.› » Naaba-Wẽnd yeela a Moyiiz: «Gom ne Israyɛl kambã n wilg-b woto: Ned tõeeme n wa tags t'a pag ka vɩ neere, t'a maanda yoobo, n wa tags t'a yoodame t'a sɩda ka miẽ ye, tɩ neda to me ka miẽ ye, tɩ ned zɩɩ n ling-a yoob pʋgẽ ye. Baasgo sɩda tagsdame t'a yaa pʋg-yoaada. Yaool n tõeeme me tɩ paga ka pʋg-yoaad ye. Sɩda na n talla a pagã n ta maan-kʋʋd taoore ne kũun ninga a sẽn tog n wa ne. Yaa alkam kɛgeng zom wamd pogbre. Zoma ka naagd ne kaam ye, la tɩdar me ka paasd ye, tɩ yaa bãong lukr kũuni. Maan-kʋʋda kɩtdame tɩ b wa ne paga Soaala-Wẽnd taoore. Maan-kʋʋda ningda ko-sõng tãnd laagẽ la a yõngda sɛka roog tom n yugl-a. Maan-kʋʋda kɩtdame tɩ paga kolg t'a lodg a zug peende. Paga yaagda a nus t'a sagl zom wamdã, bãn-lukr kũuna. Dẽ tɩ maan-kʋʋda meng zãada a nugẽ kãab beed koom, ko-tɩɩsenga. A na n kosa pagã t'a naag yẽ n wẽen n togs a sẽn togsdã la a yetame: ‹Sã n yaa sɩda tɩ f ka yo ne raoa, sã n yaa sɩda tɩ f talla f meng neere, tɩ f ka zãmb f sɩda n faool f menga, bɩ kãab beeda koom da maan f bũmb ye. La sã yaa sɩda tɩ f maana wẽng ne rao a to n faool f menga, sã n yaa sɩd tɩ f kẽ ne raoa to, bɩ Soaala wa ne f sɩbgre. Bɩ Soaala sɛɛs f rogem la f kẽn ne pʋ-wuka. Bɩ b kɩt tɩ f buuda neb wa tẽegd fo yelle b sã n wa kãabd b mens beedo. Bɩ ko-kãnga sẽn ya kãab beed kooma sig f yãadẽ n wuk f pʋga la a sɛɛs f rogem.› La paga na n leokame: ‹Ami, ami! Bɩ sɩd yɩ boto!› Maan-kʋʋda na n gʋlsa a kãab beeda sebr zugu la a na n losa sebra koomẽ tɩ kooma yẽes gʋlsma. A ka na n yãg n kɩt tɩ paga yũ kãab beed kooma ye. Maan-kʋʋda rengdame n deeg paga nugẽ bãn-lukr kũuna n tees Soaala-Wẽnd wala a sẽn tog n maane la a rɩgl-a maan-kugra zugu. Maan-kʋʋda na n yõnga zoma nug koore wala Soaala-Wẽnd pʋ-tẽer nekr bũmbu la a na n yõog-a-la maan-kugra zugu. Dẽ poore, a kõta paga koom t'a yũ. Paga yũuda kooma la sã n mik t'a dẽgmame, t'a sɩd yõka rao a to nugu, kãab beed kooma na n kẽ-la a pʋgẽ n lebg tɩɩsga t'a pʋg wuki, t'a rogem sɛ. Paga na n lebga a buuda sʋka wa Soaala-Wẽnd sẽn yãk a soab barka. Sã n mikame tɩ paga ka yaale, a ka sãam ye, taal yi-la a zugu la a na yɩ roagda.» Ya noor a woto la Soaala-Wẽnd yiis yã, pag bɩ a sɩd poorẽ. B sã n wa yet tɩ b tara kaset tɩ paga yoodame n paoogd a sɩda, bɩ sã n yaa a sɩdã n maand sãmbse t'a yoodame. Wakat kãnga sɩda tallda pagã n wa Soaala-Wẽnd taoore, tɩ maan-kʋʋda maan wa b sẽn wilgã. Dẽ poore, bãonga sã n luki, yell ka le be sɩda zug ye. Pagã n deegd a sɩbgre a sã n sɩd kongame. Soaala-Wẽnd yeela a Moyiiz: Gom ne Israyɛl kambã n togs-ba: «Pag bɩ rao sã n pʋlem a meng Soaala-Wẽnde, bɩ a bas rãam la toose. Rãam sẽn wẽnemd menga, toos sẽn wẽnemd menga, bɩ a ra sɩɩs ye. A ra wẽk bugsuntung biis koom n yũ ye, a ra wãb a biisa meng sẽn ket n ya maas bɩ sẽn kʋɩ ye. Tãag a pʋlenga pidsgu, a kõn dɩ bũmb sẽn maan ne bugsuntung biisi, bɩ a biisa pagd ye. Tãag a pʋlenga pidsgu, barg ka sɩɩsd a zug ye. A na n welga toore, Soaala-Wẽnd yĩnga, n tãag a pʋlenga pidsg raare. A zuga zobd basdame tɩ yi. Sã n ka a pʋlengã n pids zãnga, a ka tõe n pẽneg kũum ye. Ya-la a ba, a ma, a kẽem bɩ a tão n ki, a kõn pẽneg b kũum n rẽgem a meng ye. A welga toor Soaala-Wẽnd yĩnga. A sẽn pʋlem a meng Soaala-Wẽnd tɛka, a welga sõmblem welegre, Soaala-Wẽnd yĩnga. Kũum sã n ling ned t'a lʋɩ a sɛɛgẽ n wẽneg n be kaalem, a rẽgmame; a wõrsda a zoobdo, a pekr yĩnga, n gũ tɩ dasem a yopoe wa pidi. Daar a nii soaba a na n waa sɛka roogẽ ne wal a yi bɩ manwal bõones a yi n wa kɩs maan-kʋʋdã, t'a kʋ a ye, yel-wẽnd sugr kosg yĩnga, n kʋ a to wã, yũ-noog maoongo, la a bõsda sẽn pʋlma wã yel-wẽnd yẽesgo, kũuma sẽn ki a sɛɛgẽ n dẽgem-a wã yĩnga. Badaare, a lebd n pʋlmame tɩ barg kõn sɩɩs a zoobd ye. A lebd n pʋlma a meng Soaala-Wẽnd wala a sẽn da yals pipi raarã, la a wata ne yʋʋmd yɛng pe-bila, yel-wẽnd dolb maoong yĩnga. Pʋlenga sẽn sãama, dɩll a le maneg n sɩng zãnga.» Sẽn pʋlma a meng Wẽndã na n waa sɛka roog noore, a pʋlenga rasma sõor sã n pidi. A wata ne kũuni n wa kõ Soaala-Wẽnde: yʋʋmd yɛng pe-bil sẽn ka tar bãnde. Dẽ yaa yũ-noog maoong yĩnga. N paas yʋʋm yɛng pe-sɛdg sẽn ka tar bãnde, dẽ yaa yel-wẽnd dolbo maoong yĩnga. A le wata ne pe-raoog sẽn ka tar bãnde, laafi kosg yĩnga. A wata ne peoog sẽn pid ne bur sẽn ka lob bɩlle, bur sẽn wẽ ne alkam zom pɛɛlga, ne miisdu sẽn ya tagdo, la miisd sẽn ya faase, n ka ning bɩlle, n paas kaama la rãama b sẽn tog n tũnugã. Maan-kʋʋda taasd-b-la Soaala-Wẽnd taoore n maan sugr kosg la yũ-noog maando. Maan-kʋʋda kodgda pe-raooga laafi kosg yĩnga; a paasda bur peoogo, bur sẽn ka ning bɩlle. A kõta Soaala-Wẽnd kaama la rãama a sẽn tog n tũnugã. Sẽn pʋlma a meng Wẽndã põngda a zuga sɛka roog noore, n wʋk zoobdã n lob laafi kosga maoonga bugmẽ. Pesga bãok sã n bɩ, maan-kʋʋda yãkd-a lame n paas peooga pʋg bur a ye sẽn ka lob bɩlle la miisg faasg a ye sẽn ka lob bɩlle la a sagend-b-la pʋlemda nugẽ, a zuga sã n põnge. Maan-kʋʋda maanda a sẽn tog n maane tɩ b lebg Wẽnd rũuni. Bũmb me sẽn lebgd kũun sõng maan-kʋʋda yĩnga, yaa rũnga yãoogo a sẽn dɩk tees Wẽndã la gerã a sẽn yãkã. Ya rẽ poore marsã la sẽn pʋlma meng Wẽndã tõogd n le yũ rãam. Woto la Soaala-Wẽnd noor b sẽn kõ ned sẽn pʋlem a meng poorẽ. Woto me la kũun niyns a sẽn tog n wa ne la ka yet t'a ka tõe n paas bũmb a to ye. Sẽn maana pʋlenga modg n tũ a meng sẽn yalse. Soaala-Wẽnd yeela a Moyiiz: «Wilg a Aarõ ne a kamba b sẽn tog n ning a Israyɛl bark to-to. B yeel woto: Bɩ Wẽnd ning-f bark la a gũ fu! Bɩ Wẽnd kõ-f laafi la b sudg foom b kũuna! Bɩ Wẽnd seg-f ne zoodo la b kõ-f f laafi! Yaa woto la b na n ning m yʋʋra sʋka tɩ m ning-b barka.» Sɛka roog sẽn ti n sɛ raare, a Moyiiz taag-a-la ne kaam sõngo la a rɩka sẽn be a pʋgẽ wã fãa n kõ Soaala-Wẽnde. A maana boto me ne maan-kugrã ne a teedo. A Israyɛl kãsem-dãmb waa ne b kũuni. Kãsem-dãmba yaa sẽn ges b sõadga yelle. B talla b kũuna n wa Soaala-Wẽnd taoore. Yɩɩ bilim-bilm a yoob sẽn ning maasem tɩɩga, la niis piig la a yi n da tat-ba. Kãsem-dãmb a yi waa ne bilim-bilm a ye la kãsem fãa yɩɩ naafo. B kɩtame tɩ b kolg sɛka roogo. Naaba-Wẽnd yeela a Moyiiz: «Reeg kũuna b sẽn wat ne wã, reeg-ba sɛka roog tʋʋma yĩnga. Bilim-bilma la niisã, Levitsa na n deeg-b lame sɛka rooga tʋʋma yĩnga. Ned kam fãa paam a tʋʋmda sẽn dat t'a paam bũmb ninga.» T'a Moyiiz na n deeg bilim-bilm la niisã n kɩs Levitsã. Bilim-bilm a yi la niis a naase la a kõ a Gersõ kamba b tʋʋmda yĩnga. A Aarõ biig a Merari kamba deega a Itamar nengẽ, b tʋʋmda yĩnga, bilim-bilm a naase la niis a nii. A Keyat kamba ka reeg bũmb ye tɩ yaa b bãgdẽ la b ra tog n zɩ te-sõma wã. Kãsem-dãmba talla kũuna n wa maan-kugra bark ningr daare, a kaam taagr daare. Yɩɩ maan-kugra taoore la b wa ne-ba. La Soaala-Wẽnd yeela a Moyiiz: «Yaa ned kam fãa ne a daare la kãsem-dãmba na n tall b kũuna n wa tɩ b rɩk maan-kugrã n ning Soaala-Wẽnd soolmẽ.» Soaala-Wẽnd yeela a Moyiiz: «Yeela Aarõ woto: ‹F sã n na n widig fitil kãsenga, sõng t'a vẽenema tʋʋs taoore.› » A Aarõ tũ Soaala-Wẽnd daabo: a widiga sãnem fitil kãsengã t'a vẽenema tʋʋsd taoore, wala Soaala-Wẽnd sẽn da wilg a Moyiiz. Ad-b sẽn da maan sãnem fitil kãsenga to-to: Sãnem la b rɩkd n kud-a, a sɛɛgã n tãag a puugã. A kudba tũu wala Soaala-Wẽnd sẽn da wilg a Moyiiz. Naaba-Wẽnd yeela a Moyiiz: «Yiis Levitsã a Israyɛl kamba sʋka n yɩlg-ba. La ad-f sẽn na n maan bũmb ninga: F na n mes-b-la ne ko-sõngo, tɩ b bao barga n saag b yĩnga fãa la b pek b futu n lebg yɩlma. Dẽ poore b rengd n waa ne loalga la zom sẽn nag ne kaam. N wa ne loalg a to yel-wẽnd sugr kosg maoong yĩnga. A Israyɛl rooga zãng na n tigmame la Levitsa na n kolga sɛka roogo. Levitsa na n yalsa Soaala-Wẽnd taoore tɩ Israyɛl kamba tẽeg b nus b zutu. A Aarõ na n deeg-b lame wala a Israyɛl kũuni n dɩk-b n tees Soaala-Wẽnd wala b pʋɩɩre, la b tʋʋmd na n lebga sɛka roog tʋʋmde. Levitsa na n tẽega b nus lols a yiiba zutu tɩ fo reeg-ba n kõ Soaala-Wẽnde. A ye na n kʋʋ sugr kosg maoongo, t'a ye kʋ yũ-noog maoong. Dẽ poor marsã la a Aarõ maand a sẽn tog n maan tɩ Levitsa yɩlge. Foom a Moyiiz na n yalsa Levitsa a Aarõ ne a kamb a yiiba taoore la f na n tees-b-la Soaala-Wẽnd wala b pʋɩɩre. F na n welga Levitsa toore ne Israyɛl kambã la b na n yɩ-la m soolem. B tʋʋmd marsã na n lebga sɛka roog tʋʋmde. Yɩlg ba n dɩk-ba n kõ Soaala-Wẽnde wala b pʋɩɩre. B rɩkd-b lame n kõ maam tɩ m sɩd so-b zãnga rot a taaba kamb zĩigẽ. Bãmb la m deeg n tek ne buuda taab kom-dẽemse, n tek ne bi-ribl fãa sẽn yaa a ma pipi biiga. A Israyɛl kom-dẽemse, b rũmsa kom-dẽemse, yaa maam n so. M sẽn kʋ Ezipt kom-dẽemsa raare, bi-rẽeng fãa lebga m soolem. Rot a taaba kom-dẽemsa zĩigẽ, yaa Levitsa la m deegda. M dɩk-b lame n kõt a Aarõ ne a kamba. N-ye! Ka buud a to, yaa Levitsa buudu n na deeg b zĩiga n tʋm sɛka roog tʋʋma la b kos Soaala-Wẽnd sugr b yĩnga. La woto bũmb kõn le maan-ba b sẽn kolg zĩ-sõnga yĩng ye.» A Moyiiz, a Aarõ la Israyɛl kamba fãa maana ne Levitsa wala Soaala-Wẽnd sẽn wilgi. Levitsa yɩlga b mense, n pek b futu. A Aarõ rɩk-b lame n kõ Soaala-Wẽnd wala b pʋɩɩre la a kosa b pekre. Dẽ poor marsã la Levitsa sɩng b tʋʋmde sɛka roogẽ. A Aarõ ne a kambã n da wilgd-b b sẽn tog n tʋme. Bũmba fãa maana ne Levitsa wala Soaala-Wẽnd sẽn da wilg a Moyiiz. Naaba-Wẽnd yeela a Moyiiz: «M noor la woto Levitsa poorẽ: lebga pakr ne Levitg fãa yʋʋm sẽn ta pisi la a nu t'a reeg tʋʋmde, sɛka roogẽ. A yʋʋm sã n ta pis-nu la Levitga basd tʋʋmde. A tõe n kell n wilgda tʋʋmna a saam-biisi la a meng ka le tʋkd bũmb ye. Yaa woto la f na n wilg Levitsa b tʋʋmdã.» Soaala-Wẽnd yeela a Moyiiz Sinayi zĩ-peen-daagẽ, b sẽn yi Ezipt tẽng tɩ yʋʋm-bɩtẽ, yʋʋm vẽkra pipi kiuugu: «Israyɛl kamba modg n maan paka kibsã, a raare. Yaa kiu-kãng piig la a naas raare, zĩ-sobdo la y na n maan-a. Y na n maana y sẽn minim n maan paka raar fãa.» A Moyiiz kõo Israyɛl kamba noor tɩ b maan pak kibsa. B maan-a-la Sinayi zĩ-peen-daagẽ, zĩ-sobdo, pipi kiuuga piig la a naas raare. Israyɛl kamba tũ zãnga Soaala-Wẽnd sẽn wilg a Moyiiz. Paka yaool n wa sega neb kẽer sẽn da rẽgme, tɩ b ra sɩɩsa kũum. B sẽn da ka tõe n maan pak baraare, b tɩ yãenda a Moyiiz la a Aarõ, n yeel-ba: «Tõnd sɩɩsa kũum n dẽgme la bõe yĩng la d ka tõe n wa ne d kũuni paka raare, wala Israyɛl kamb a taaba, n wa kõ Soaala-Wẽnde?» Dẽ la a Moyiiz yeel-ba: «Yaas-y tɩ m sok Soaala-Wẽnd n bãng d sẽn na n maanega.» Soaala yeela a Moyiiz: «Wilg Israyɛl kamba woto: ‹Ad dũnna bɩ beoogo, ned sã n sɩɩs kũum n dẽgme bɩ a sã n toga so woko, paka kibs wakato, a tõe n maana pak kibsa n waoog Soaala-Wẽnde. Bũmb sẽn na n teeme, yaa raarã: Na n yɩɩ zĩ-sobdo la na n yɩɩ kiuug ninga sẽn pʋgdã piig la a naas raare. B na n wãba pe-bila ne bur sẽn ka ning bɩlle la vã-tɩɩsense. B kõn kees bũmb beoog yibeoog yĩng ye, la kõbr ba a ye kõn wek ye. B maanda pakã wala a noya sẽn siglã. La yell sã n ka be ned zugu la a ka tog sore, t'a tõdg pak kibsa maanego, b yiisd-a-la buudẽ, a sẽn ka tall Soaala-Wẽnd kũuna n wa a wakatã. A na rɩ a yel-wẽnda taale. Ned sẽn nok yãmb buuda sã n dat n maan paka, a tũ b sẽn yeel fãa pak kibsa poorẽ. Pak kibsa noor yaa a ye, sãan wala tẽnga biig yĩnga.› » Sɛka rooga tiib raare, sawadg sablga n waa n lud-a. Zĩig sã n sobge, a ra bee sɛka roog zugu n tãoosd vẽenem tɩ beoog vẽege. Da yaa boto daar fãa: Sawadga ra yɛsa sɛka roog zugu la yʋngo a ra maanda vẽenem wa bugum dẽnna. Sawadga sã n ka le ne rooga zugu, Israyɛl kamba sɩngda kẽnde. Sawadgã sã n le wa yaas a zugu, zĩ-kãng la b tiid b sikã. Israyɛl kamba sã n na n yiki dẽnd b paam Soaala-Wẽnd noore. B sã n na n yalse, dẽnd b le paam Soaala-Wẽnd noore. Sawadga sã n ket sɛka roog zugu, bãmb me keta b sikẽ. Sawadga sã n kaoosd sɛka roog zugu, a Israyɛl da pa loogd ye la sɛka rooga tʋʋm n da pak-a. Wakat kẽere, yaa rasma wãn bala la sawadga paad sɛka rooga zugu. Ad-y sika pa wẽede tɩ b ka paam Soaala-Wẽnd noore, yikra me pa yikd tɩ Soaala-Wẽnd pa kõ sor ye. Wakat kẽere sawadga paada zaabre n ta yibeoogo. Zĩiga sã n yẽeg t'a looda, Israyɛl kamba me loogdame. Ba sawadga kaoosd sɛka roog zugu, dasem a yiibu, kiuug a ye bɩ yɩɩd rẽ, Israyɛl kamba me ra pa loogd ye, b ra paada b sikẽ; a sã n loog bal la bãmb me loagda. Sika pa wẽede tɩ b ka paam Soaala-Wẽnd noore, yikra me pa yikd tɩ b ka paam Soaala-Wẽnd sor ye. Yaa sɛka rooga tʋʋm la b ra tʋmda wala Soaala-Wẽnd sẽn da yalse. Soaala-Wẽnd yeela a Moyiiz: «Kɩt tɩ b maan wanzurf tõntõod a yiibu. Yaa yõgsa n na n dõog-ba. Bãmb la b na n peebe tɩ zãma wã tigim, bãmb la b na n peebe tɩ b sɩng kẽnde. Tõntõod a yiiba sã n naag taaba n peebe bɩ neba fãa wa tigim f taoore, sɛka rooga noore. Sã n ya tõntõog a ye bala n peebe, ya b sẽn yãk b rãmb tɩ b lʋɩ tãb-biis tusr taoorã n tigimd fo sɛɛgẽ. Tõntõoga bʋʋr sã n sigd la rʋʋda, sẽn ti-b yaangã n dengd yikri. Tõntõoga sã n le peeb yãang la raaga, sẽn ti-b nug rɩtgã n yikdi. Yikr tõntõog fãa peebda yãang la raaga. Tõntõoga sã n kell n kũmd raaga, yaa zãma wã gilli n tigimdi. Yaa maan-kʋʋdba, a Aarõ kambã, n na n peeb tõntõodã, la na n yɩɩ woto zamaan woo zamaana. Y sã n wa be y tẽngẽ wã, tɩ y bɛɛba wa kaoog zabr ne-yã, y na kɩt tɩ tõntõoda peeb yãang la raaga. Woto y na nek Wẽnnaam y Soaala pʋ-tẽere tɩ b wa zãag-y ne y bɛɛba. Y sã n wa tar y sũ-noog raare, y kibsa, y tig-raase, y kʋʋda y yũ-noog la y laafi kosg maanda tɩ tõntõoda naag n peebdẽ. B na n neka Wẽnnaam y Soaala pʋ-tẽer. Maam la y Wẽnnaam dũnna la beoogo.» Yʋʋmd a yiib soaba, kiuug a yiib soaba pisi raare, sawadga loogame n bas sɛka roogo. Israyɛl kamba yii Sinayi zĩ-peen-daagẽ n sɩng kẽnd bal-balle la Parã weoogẽ la b wa n yaase ne sawadgã. Woto n yɩ Israyɛl kamba pipi yikri wala Soaala-Wẽnd sẽn da wilg a Moyiiz. Ya neb niyns sẽn dɩk n fãoog ne a Zɩɩda kamb la a tãb-biisã n sɩng yikri. A Aminadab biig, a Nasõ, n da yaa a Zɩɩda tãb-biisa tãnsoaba. A Isakar tãb-biisa tãnsoab da yaa a Suar biig, a Netanɛl, t'a Elon biig a Eliyab, ya a Zabulõ tãb-biisa tãnsoaba. B baasa sɛka roogo t'a Gersõ ne a Merari kamba na n loog ne-a. B sẽn dɩk neb niyns n fãoog ne a Rubẽ kamba la a tãb-biisã n yiki. A Sedewur biig a Elisur, n da yaa a Rubẽ tãb-biisa tãnsoaba, t'a Simeõ tãb-biisa tãnsoab yaa a Surisadayi biig a Selumiyɛl, t'a Deowɛl biig a Elyasaf, yaa a Gad tãb-biisa tãnsoaba. Bãmb poore, a Keyat kambã n tʋk zaka teed n loog. Bãmb sẽn wat n ta tɩ sɛka roog zoe ti n yalsame. B sẽn dɩk b rãmb n fãoog ne a Efrayim kamb la a tãb-biisã n yaoond n yiki. A Amiyud biig a Elisama, n da yaa Efrayim tãb-biisa tãnsoaba, t'a Manase tãb-biisa tãnsoab yaa a Pedasur biig a Gameliyɛl, t'a Gideoni biig a Abidã, yaa a Manase tãb-biisa tãnsoaba. Sẽn yaool b yikra fãa-fãa yaa neb niyns b sẽn dɩk n fãoog ne a Dã kamba la a tãb-biisi. A Dã tãb-biisa tãnsoab yaa a Amisadayi biig a Ayiyezɛr, t'a Okrã biig a Paziyɛl, yaa a Asɛr tãb-biisa tãnsoaba, t'a Neftali tãb-biisa tãnsoab yaa a Eyinam biig a Ayira. B sẽn na n sɩng b kẽna, yaa woto la Israyɛl kamba pʋg taaba. Yaa woto la b rɩk b sore. A Moyiiz yeela Madiã raoa la a rɛɛmba a Reowɛl biig a Obab: «D sẽn dabd tẽng ninga yaa Soaala-Wẽnd sẽn wilg tɩ b na n dɩka a soaba n kõ tõndã. Wa yãag-do! F na naag tõnd n dɩ yõod ning Soaala sẽn kãab a Israyɛl.» La ad-a Obab sẽn leoke: «M ka na n tũ ye, yaa m ba-yira la m dat n lebẽ.» Dẽ me la a Moyiiz yeel-a: «Da bas-d ye. Fo mi d sẽn tõe n wẽ sik zĩig ning zĩ-peen-daagẽ wã, wa yɩ d sɩleto. F sã n tũ tõndo bãng tɩ f na naag n dɩ yõod ning Soaala-Wẽnd sẽn na n kõ-dã.» Dɩlla b siga Soaala-Wẽnd tãngã n kẽn dasem a tãab kẽnde. Kuga walsa sẽn da be koglg ning pʋgã da renga taoore tɩ b da rat n bãnga sika sẽn na n wẽ zĩig ninga. Wĩntoogo sawadga ra buiid-b-la ne a maasem b sã n wa yik n sɩng kẽnde. B sã n wa yikd ne kuga walsa sẽn da be koglg ning pʋgã a Moyiiz ra yetame: «Yiki yã, Soaala, tɩ y bɛɛba na sẽege, tɩ sẽn maand b zabra ne yãmba na kʋɩ tĩiga!» A sã n wa yalsdẽ, a Moyiiz le yetame: «Le waa-y yã, Soaala, a Israyɛl sʋka! A Israyɛl kamba la a tãb-biisa ka tõe n sõd n sɛ ye!» Daar a ye Israyɛl kamba waa n yik n guglma wʋsgo ne Naaba-Wẽnde. La Soaala-Wẽnd sẽn wʋme, pa ta b yam ye. Soaala-Wẽnd sũura puugame tɩ bugum sig tẽnga n yõog neba la a rɩ sika kɩrenga. Neba kelma a Moyiiz tɩ yẽ yõk Soaala-Wẽnd sɛɛga, tɩ bugma ka le kẽng taoor ye. B pʋda zĩ-kãng tɩ Tabera, tɩ bugum, Soaala-Wẽnd sẽn kɩt tɩ bugma rɩ Israyɛl kamba yĩnga. Daar a ye, sãamba sẽn da kalem Israyɛl kamba waa n yik n yãbda velem. Israyɛl kamba meng naag n sɩnga waasgo n yetẽ: «Ãnda n na n kõ tõnd nemd tɩ d wãbe? D ket n tẽrame tɩ d da rɩta d yam, Ezipt tẽnga, kʋɩl-zẽedo, niiri, yoaga, kʋmba, gãmdo, albasle la zẽ-nood buud fãa. Dũnna d zĩime tɩ d vɩɩma ka le wẽnd ye, d ka le tar bũmb ye. D nin sẽn ne bala yaa man, ka-mi-sẽn-ya-lã.» Man ra wẽnda kẽnebd biisi, n ya peels wa siili. Neba ra yit n saad n wʋkd-a lame; b ra werd-a-la neerẽ bɩ b ra tood-a-la teoogẽ, n dʋgl-a rʋkẽ, n wa lebg-a wa samsa, t'a ya noosẽnde wa miisdu. Meenema sã n wa rʋʋgd yʋngo, man me rʋʋgdame. A Moyiiz wʋma a neba sẽn tigim roog-roogo, sɛka rignoorẽ, n zabd ne Soaala-Wẽnde. Soaala sũur puuga wʋsgo la a Moyiiz me zaba ne-ba, n yeel-ba: «Bõe tɩ y rat wẽnga ne y sõgna? Bõe tɩ zooda sãame, bõe tɩ y zɩlg-m y buuda tõr zɩɩbo? Maam n dog-b bɩ tɩ y yet-m tɩ m deeg ba m naoẽ wala ma-wubdg sẽn deegd a biiga? La ka yam-yam ka meng ye, yaa y sẽn kãab b ba rãmb tẽng ninga la m na n tall-b n taase. Yɛɛlẽ la m na n yãe nemdo n kõ zãma sẽn ta woto fãa la sẽn pʋgd-m ne nintãm la a maanẽ: Kõ-d nemd tɩ d wãbe? Ad-y m pa tõe, m yembre, n zɩ zɩɩb a woto fãa ye, looga m pãnga. Y sã n na n zã m vɩɩma woto, ad-y m sẽn kiid n são. Y sã n maan-m-la yardo bɩ yell a woto buud da le lʋɩ m zug ye.» Soaala-Wẽnd yeela a Moyiiz: «Tigim nin-kẽems pisopoe, a Israyɛl buuda sʋka, nin-kẽems sẽn wilg tɩ b tõe n zãa neba. Tall-ba n wa sɛka roog noore, tũ-y taab n wa. Be la m na n wa gom ne foo. M na yãk kũun ning f sẽn paama bilfu n kõ-ba la b na naag foom n tʋk zɩɩbã, fo kõn le zɩ-a f ye ye. Yeel zãma wã: ‹Yɩlg f meng beoog yĩnga n tõog n wãb nemdo. Ka yãmb n kelem tɩ Soaala wʋm bɩ: Ãnda n na n kõ-d nemd tɩ d wãbe? Bõe n da paoogd-d Ezipt tẽnga! Ade, Soaala na n kõ-y-la nemd tɩ y wãbe, la ka na n yɩ daar a ye bɩ rasem a yiib bala, ka na n yɩ rasem a nu, rasem piig bɩ pisi, na n yɩɩ kiuug tõre t'a wa yit y yõe bogdẽ, t'a yʋʋr sã n pʋde bɩ y rat n wʋbe. Na n yɩɩ boto tɩ y basa Soaala kɛɛnga la bãmb yaool n be-la y sʋka. Na n yɩɩ boto tɩ y saag n yeelame: Bõe yĩng tɩ y pʋs n yiis-d Ezipt tẽnga?› » Dẽ me la a Moyiiz leok yã: «M sẽn vɩ ne b rãmba taa neb tus kobs-yoobe. Yãmb na n yɩɩ wãn n yeele: ‹M na n kõ-b-la nemdo tɩ b wãb kiuug tõre?› B kood b rũmsa gilli, bɛd la bõonego, na tõog n sek sɩda? Sã n da tõe n vaagẽ mogra zĩm zãnga n kõ-ba, na sekẽ?» Tɩ Soaala-Wẽnd na n leok a Moyiiz: «Soaala-Wẽnd pãnga menem n kẽe yɛ? Marsã la f na n bãng m sẽn togsã sã n na n yɩɩme bɩ sã n pa na n yɩ.» A Moyiiz yii sɛka roogẽ n taas zãma wã Soaala-Wẽnd leokrã. A yãka nin-kẽems pisopoe n yals-ba n gilg sɛka roogo. Soaala-Wẽnd tũu sawadgã n sig n gom ne a Moyiiz. A Moyiiz yama la b yãk n pʋdg bãmb pisopoe wã. B sẽn paam kũuna b vẽneg n sɩngame n gomd bãngr goama, la ka yãe n kaoos ye. Ad-y neb a yiibu n da pa sikẽ wã: yaa a Eldad la a Medad. Kũuna taa bãmb me, tɩ b ra yãka bãmba la b ra pa yi n ta sɛka roog ye. Bãmb me ra gomda bãngr goama la yaa sikẽ wã. Biig n wudg n wa yeel a Moyiiz: «Mik waa, a Eldad la a Medad be sika pʋg n gomd bãngr goama!» A Nun biig a Zozuwe, da sõngda a Moyiiz al t'a nan paooda Yẽ n kolg n yeele: «Moyiiz, m zu-soaba, da bas-y-b tɩ b gom ye!» T'a Moyiiz na n leok-a: «Bõe tɩ f maand wa rẽ wata ne mam bõne? M nongẽ lame tɩ Soaala-Wẽnd buuda zãng paamẽ Soaala-Wẽnd vẽnegre, n gomnẽ bãngr goama!» Dẽ poore, a Moyiiz ne nin-kẽemsã leba sika pʋgẽ. Soaala-Wẽnd kɩtame tɩ sobg kaooge; sobga yii mogra noorẽ n wa fabg pitr-lʋɩɩse n gil sikã la a yɛdg-b-la wʋsg-wʋsgo. A yɛdg-b-la taoko, na ta kãntɩɩs a yiibu. Neba talla b wʋkre wĩntoogo, yʋngo la vẽkẽmbeoogo. Sẽn paam-a bilf paama sẽn ta bõeens a yiib zɩlgre. B yɛdg-b lame tɩ kʋɩ, b yɛdg-b-la zĩig zãnga n gilg sikã. La neba sẽn waa n da ket n sakemd nemdã b noore, n nan ka paam n vel-a, Soaala-Wẽnd sũur yika ne zãma wã la b nug yɩɩ toaaga. Dẽ yĩng la b pʋd zĩiga tɩ Kibrot Taava, tɩ vels yaoogo, tɩ yaa zĩ-kãng la b mum velma sẽn da yõk b rãmbã. Neba yii Kibrot Taava n dig Aserot. Be la b wẽ b sika. A Miriyam ne a Aarõ guglma ne a Moyiiz, a paga sẽn da ka Israyɛl poaka yĩnga. A Moyiiz ra kẽe kãadem ne Kusitga. B ra yeta woto: «Yaa ne a Moyiiz bal la Soaala-Wẽnd gom yã, bɩ b goma ne tõnd me.» Wɩdga lʋɩ Soaala-Wẽnd tʋbrẽ. A Moyiiz ra yaa sulg-m-meng soaba, tẽng zug ka, ned sulg-m-meng ka yɩɩg a rẽnd ye. Soaala-Wẽnd lɛɛg n yeela a Moyiiz, a Aarõ, a Miriyam: «Kẽng-y, yãmb y tãaba fãa, sɛka roogẽ.» La Soaala-Wẽnd siga ne sawadgo n yals sɛka roog noore. B boola a Aarõ la a Miriyam tɩ b kolge, tɩ b yeel-ba: «Kelg-y m goama. Ned sã n be yãmb sʋka n ya bãngda, ad-y yaa maam n likd m meng a soaba, yaa a zãmsdẽ la m gomd ne a soaba. Yaool n ka boto ne m tʋʋm-tʋmd a Moyiiz ye, t'a yaa m sũurẽ neda la m teeg-a-la m zaka zãab yĩnga. D gomda ne taab tɩ solgr kaẽ ye, d nee taaba, goama me ka goam bɩnem ye, tɩ m ne-la a Moyiiz tɩ yẽ me ne maam. Dɩlla yãmb yɩta a wãn n wɩt m tʋʋm-tʋmda Moyiiz?» Wẽnnaam zabame n bas n looge. Sawadga menema sɛka roog zugu, la a Miriyam tiig n bẽeda yĩng bãaga, n pelg wa goore. A Aarõ sẽn wẽnemd n ges-a, a mikame t'a bẽeda yĩnga, t'a na n yeel a Moyiiz: «D beegame, d zu-soaba, d maana gãeemdo, d maana wẽnga la ra sak-y tɩ d dɩ a taal ye. Bɩ a Miriyam yĩnga ra yɩ wa pa-tar sẽn wat moogo t'a yĩnga zoe n yaa a soaba ye!» A Moyiiz pʋʋsa Soaala-Wẽnd woto: «Soaala, kõ-y yã a Miriyam laafi!» La Soaala-Wẽnd leoka a Moyiiz: «Bãng t'a ba sã n da tʋbs a nenga kolkoodo a na n paẽ la ne yãnde rasem a yopoe. Bɩ a Miriyam zãag ne sika rasem a yopoe n yaool n le wa a zĩigẽ.» B zãaga a Miriyam ne sika rasem a yopoe la yikr pa yiki t'a ka lɛɛg n wa a zakẽ ye. Dẽ poor marsã la neba yaool n yi Aserot n tɩ wẽ b sik Parã zĩ-peen-daagẽ. Soaala-Wẽnd goma ne a Moyiiz: «Tʋm neb tɩ b reng taoore n bãng Kanaã tẽnga nenga tɩ yaa tẽn-kãng la m dɩk n kõ Israyɛl kamba. Y na n yãka ned a ye sak fãa pʋgẽ, ned faa ne a ba-biisi. Y na n tũus-b-la Israyɛl nin-tɩɩsa sʋka.» Yaa Parã zĩ-peen-daaga sɩngrẽ la a Moyiiz paam noore n na n tʋm-ba la b fãa sɩd da yaa Israyɛl sak kãsem-dãmba. Bãmb yʋy wã la woto: A Zakur biig a Sama, a Rubẽ roogẽ. A Ori biig, a Safat, a Simeõ roogẽ. A Yefune biig a Kalɛb, a Zɩɩda roogẽ. A Zozɛf biig a Yigyal, a Isakar roogẽ. A Nun biig a Osea, a Efrayim roogẽ. A Rafu biig a Palti, a Bẽnzame roogẽ. A Sodi biig a Gadi, a Zabulõ roogẽ. A Zozɛf biig a Manase roogẽ yɩ-la a Susi biig a Gadi. A Gemali biig a Amiyɛl, a Dã roogẽ. A Mikayɛl biig a Setur, a Asɛr roogẽ. A Wofsi biig a Nabi, a Neftali roogẽ. A Maki biig a Geowɛl, a Gad roogẽ. Yaa nin-bãmba la a Moyiiz yãk yã tɩ b reng taoore n bãng tẽnga nenga. A Moyiiz teema a Nun biig a Osea, yʋʋrã tɩ lebg Zozuwe. Bãmb la a Moyiiz tʋm yã tɩ b na n karg Kanaã tẽn-peelma. A yeel-b lame: «Reng-y n dʋ Negɛb tɩ b sã zao tãnga zugu, b nee tẽngã sẽn yɛdge, b nee neb niyns sẽn kẽed-a wã sã n tara pãng bɩ b sã n ka tare, neba sã n yaa wʋsg bi-bilfu. Y na bãng neb niyns sẽn kẽed b tẽnga sã n yaa nin-sõma bɩ nin-wẽnse. Y na bãng b tẽnsa sã n me n gũbga ne lalse bɩ b sã n ka gũbgi. Y na bãng tẽnga sã n ket n tara sɩɩlem bɩ a sã n sãbgame; a sã n tara tɩɩse bɩ a sã n ka tare. Modg-y n wa ne b tɩɩsa biisi.» Da yaa Tamuz kiuugu, kiuug a naas soaba, sib moama kiuugu. B dʋʋme la b saaga tẽngã, sẽn sɩng Sin we-raoogo n wat Reob, Lebo-Amat sẽnẽ. B saaga Negɛb n ta Ebrõ, be la a Ayiman, a Sesayi la a Talmayi yagensa da kẽeda. Bãmb la Anakitsa yagense. Yaa nin-wogd buudu. Ebrõ sẽn ya bãmb tẽngã meeme tɩ yʋʋm maana a yopoe, tɩ b yaool n me Tanis, Ezipt tẽnga. B wa n pooga Eskol bãg-faaga la b kɛɛga bugsuntung willi ne a sib gĩndi. B kɛɛga raoog n palg gĩnda tɩ neb a yiib tʋk-a. B fãsa kankama la tɩ-biis sẽn wẽnd pooloomse. B pʋda zĩ-kãng yʋʋr tɩ Eskol bãg-faaga, bugsuntung bãoogo, la rẽ yaa sib gĩndã b sẽn kɛɛg beelẽ wã yĩnga. Dasem sẽn maan pis-naase, sẽn tʋm b rãmba lɛɛg n waame. B waa n yãenda a Moyiiz, a Aarõ, la Israyɛl kamba, Parã zĩ-peen-daagẽ, Kadɛs tẽnga. B wilga b fãa gilli b kẽnda sẽn yɩ a soaba la b wilg-b-la tẽnga tɩɩs biisi. B yeel-b-la woto: «Fo sẽn tʋm tõnd zĩig ningã, d kẽngame la sɩd yaa tẽng sẽn bund sɩɩd la bĩisim. Ges-y b tɩɩsa biisi! Bũmb sẽn be, ad-y b neba tara pãnga la b tẽnsa mee lals n gũbgi la d tol n yãenda Anakitsa yagense. Amalesitsa bee Negɛb, tɩ Ititsa, Zebuzitsa la Amoritsa tiid tãms zutu, tɩ Kanaã rãmb yedg mogra noore la Zʋrdẽ foolle.» Neba da rat n kɩɩsa a Moyiiz, la a Kalɛb kɩtame tɩ b sĩndi la ad-a sẽn yeele: «Yik-y tɩ d looge, n tɩ reeg tẽmsã tɩ daar a ye d na waa n tõog n wõr-ba.» La sẽn tũ-b yẽ n kẽngã leokame: «Tõnd kõn tõog bada n tak zabr ne nin-bãmba ye, b pãng yɩɩda tõndo.» La b sɩngame n na n sãbs b sẽn yãendã n yetẽ: «D sẽn gilg n yãend tẽng ninga yaa tẽng sẽn dɩt a kamba. Tõnd sẽn yãend b rãmba fãa yaa nin-wogdo. D tol n sega nin-daado, a Anak yagense, nin-wobd buudu; d da nee d mens wa pakenlagma, bãmb taoore, la yaa boto la b sɩd da ne tõndo.» Zãma wã gill naaga taab n kelme; b talla yãbr tɩ beoog vẽege. Israyɛl kamba fãa yeelame tɩ b kõn deeg a Moyiiz la Aarõ noor ye. Ad-b sẽn yeele: «D sã da paamẽ n kiẽ Ezipt tẽnga! Ka rẽnd bɩ zĩ-peen-daagẽ wã! Bõe tɩ Soaala kẽes-d sʋʋs sẽn koot tẽngẽ? D pagb la d kamb na n yõg n kẽesa yembdo, d kõn maan d meng neere n leb Ezipt tẽng sɩda?» B walma taaba: «D bao naaba n kõ d menga n leb Ezipt tẽnga!» A Moyiiz ne a Aarõ lʋɩ b yãvabga Israyɛl kamba fãa taoore. A Nun biig, a Zozuwe, la a Yefune biig, a Kalɛb, kẽesa b futu. B yeela buuda fãa: «D kaagame n ges tẽngã la a yaa tẽn-sõngo. Soaala-Wẽnd sõngra sã n pʋgd tõndo, d na n kẽe tẽngã, b na n dɩk-a lame n kõ tõndo; ad-y yaa tẽng sẽn bund bĩisim la sɩɩdo. Da zẽk-y y zug ne Naaba-Wẽnd ye; da maan-y rabeem ne tẽnga rãmb ye. B pa na n sek d velb ye! B wẽn-faada maasem meng ka buiid-b ye, tɩ tõnd Soaala-Wẽnda yaool n be d sʋka, da zoe-y nin-bãmba ye.» Buuda zãng sẽn waa n yɛs n gomd tɩ b na n laba a Moyiiz la a Aarõ ne kugã, la Soaala-Wẽnd sẽn sig ne ziiri, b fãa nifẽ, sɛka roog zugu. Soaala-Wẽnd goma ne a Moyiiz n yeel-a: «Nin-bãmba na n kell n maana wa b toog ka be ne maam n ta da-bʋre? B na n zãgsa m tẽeb n ta da-bʋre tɩ yɛl-bãna m sẽn maan b sʋka yaool n ka be sõore? M na n waa ne tẽn-kũum, n menes-b zãnga. La m na n yiisa f pennẽ, buud sẽn tar sõor la pãnga n yɩɩd a Israyɛl.» A Moyiiz leoka Soaala: «Ezipt rãmba bãngame tɩ yãmb n yiis bu-kãnga b tẽngẽ, la b togsa kaalẽ dãmbã, la bãmb me miime tɩ yãmba, Naaba-Wẽnd, be-la b sʋka, tɩ yãmba, Wẽnnaam, sẽn zãr ne ba, yaa nif la yõore bala. Y sawadga yɛsa b zugẽ. Wĩntoogo y lʋɩta b taoor sawadgẽ la yʋngo yaa bug-witmẽ. Bõe marsã tɩ y na n menes buuda gill wa nin-yende! Y yʋʋra sẽn zẽk neb niyns taoorã na n wa yeelame: ‹Soaala-Wẽnd mikame tɩ b pa tõe n kẽes-b tẽng ning b sẽn da kãab-bã tɩ b na n kood-b zĩ-peen-daagẽ.› Sẽn ya woto wã bɩ m Soaala wilg b pãnga. Yãmb meng n yeele: ‹Maam la Soaala-Wẽnde, m ka yãgd ne sɩbgr ye, m ka kãabd tɩ vaal ye, n maand wa m sakame tɩ ned zẽk a zug ne ma, tɩ ned beeg-ma, mik m ka na n pa n ka sɩbg ye. M na n tol n sɩbga biig a ba rãmb beegr yĩnga, n sɩbg-a a yaaba la a yaab tʋbra-kẽeg beegr yĩnga.› Kõ-y nin-bãmba b beegra sugri, ges-y y nonglma sẽn puk n ta zĩig ninga, la tẽeg-y tɩ y kʋmsa y sũur ne ba al Ezipt tẽng n ta zĩ-peen-daagẽ ka.» Ad Soaala-Wẽnd sẽn leok a Moyiiz: «M basa fãa taale wala f sẽn kot-ma. La m togsda sɩda wala sẽn ya sɩd tɩ m vɩɩme, wala sẽn ya sɩd tɩ Soaala-Wẽnd ziira pida dũniya, m togsda sɩda tɩ nin-bãmba sẽn yãend m ziirã, n yãend bõn-bãna m sẽn maan Ezipt tẽnga la zĩ-peen-daagẽ ka, la b zãgs m kelegrã, n bao m noora naoor piigã, m wẽendame tɩ bãmb ned ba a ye kõn kẽ tẽng ning m sẽn kãab b yaab rãmba ye; sẽn paoog-b maama ned ba a ye kõn yãend-a ye. M sẽn na n bas ned ninga t'a kẽ, yaa m bi-sõng a Kalɛb. Yẽ tara yam sõngo la yẽ pʋga maam ne yẽesem, yẽ la m na n kẽes tẽng ning a sẽn zoe n tabã. A yagensa n na n soog-a. Amalesitsã la Kanaã rãmba na n paa tẽn-nabrẽ wã. Beoog bala bɩ y wẽnemd y neng n tees zĩ-peen-daagẽ, n tees Rudum mogre.» Soaala-Wẽnd goma ne a Moyiiz la a Aarõ: «Nin-bãmba sẽn ka vʋʋsd ne mam kɩɩsgã na n kell n pa-la m taoore n ta da-bʋre? Sɩda m wʋma a Israyɛl kamba sẽn tar zabre ne maam. Yeel-b woto: ‹M wẽenda, maam, Naaba-Wẽnde, tɩ m na n zã-y-la wala y sẽn gom tɩ m wʋma. Yaa zĩ-peen-daagẽ ka la y fãa na n pa, yãmb fãa yʋʋm sẽn ta pisi tɩ b sõd-y zĩ-peen-daagẽ ka; zĩ-peen-daagã n na n dɩ yãmb fãa gill sẽn kɩɩs b maama. M wẽend tɩ y kõn kẽ tẽng ning m sẽn da kãab yãmba ye. Sẽn na n kẽ-ba, yaa a Yefune biig, a Kalɛb, la a Nun biig, a Zozuwe. Y sẽn zoet tɩ b na n wa yõg y kamb niynsi n kẽes yembdã, ad-y bãmb la m na n kẽes be, bãmb n na dɩ yõod ning y sẽn zãgsã. Sã n ya yãmba y kõaba na n weela zĩ-peen-daagẽ ka. Y kamba na n paa zĩ-peen-daagẽ wã yʋʋm pis-naase wa rũm-kɩɩmba, b na n dɩ-la y zãgsga taale n tãag y kõaba sẽn wat n sẽeg zãnga. Wala y sẽn kaag tẽnga rasem pis-naasã, na n yɩɩ yʋʋm pis-naas marsã la y na n le karg-a. Daar donda yʋʋmde, la yʋʋm pis-naas la y na n dɩ y beegra taale la woto y na bãng ned yell sẽn lebgd to-to, a sã n yik n zẽkd a zug ne maam, Naaba-Wẽnde. Maam n gomde, maam, Naaba-Wẽnde, maam n wẽende, yaa woto la m na n maan ne nin-bãmba sẽn sũ taab n na n tak zabr ne maama; b fãa gill paada zĩ-peen-daagẽ ka, b fãa gilli.› » A Moyiiz sẽn tʋm b rãmba tɩ b gilg n ges tẽngã, tɩ b sɩd gilg n lɛɛg n wa yeel tɩ ka tẽn-sõngã, tɩ neba na n yik zabr ne-a wã, sẽn yeel-b tɩ tẽnga ka tẽngã, ad-y bãmb fãa sɩd kii kũ-miiga Soaala-Wẽnd taoore. Sẽn tɩ karg-b tẽngã n lɛɛg n wa n yaool n pa ki kũ-miiga, yɩ-la a Nun biig a Zozuwe la a Yefune biig a Kalɛb, bala. A Moyiiz taasa Soaala-Wẽnd koɛɛgã a Israyɛl kamba, tɩ b na n kelem kʋʋre. La vẽkẽmbeoog yibeoog pĩnda b rʋ tãmsa zutu la b maanẽ: «D na n kẽnga Soaala-Wẽnd sẽn yet tɩ d kẽng zĩig ningã tɩ d sɩda, tõnd kongame.» Dẽ la a Moyiiz yeel-b: «Yaa bõe la y maanda? Y tõdgda Soaala-Wẽnd noore la y raaba ka na n pids ye. Da rʋ-y tãmsa zaalem tɩ Soaala-Wẽnd ka be y poorẽ ye, da tɩ rɩk-y y meng n kõ y bɛɛb ye. Amalesitsa la Kanaã rãmb yɛs n gũud-y lame n na n kood ne b sʋʋse; yãmb sẽn bas n ka le tũud Soaala-Wẽndã, Soaala me yi-la y poorẽ.» Ne rẽ fãa b zãgsame n dʋ tãmsã tɩ kuga wals sẽn be koglg ning pʋga la a Moyiiz meng nan ket sikẽ. Amalesitsa la Kanaã rãmba sẽn da zao tãmsã sig n seg-b lame la b kʋ-b lame n tãag Orma. Soaala-Wẽnd yeela a Moyiiz: «Gom ne Israyɛl kamba n wilg-b woto: ‹Y sã n wa ta tẽng ning m sẽn na n kõ-y tɩ y soogã, y sã n wa ta y zagsẽ, n dat n kõ Soaala-Wẽnd y yũ-noog maoongo, n dat n kõ-b rũnga, bedr bɩ bilfu, pʋleng pidsgu yĩnga, y kibs rãmba wakat bɩ y yamleoog raare, n dat n kõ-b maoong sẽn na sigs b sũuri, bɩ y naag n wa ne zom wamde sẽn nag ne kaam wũmbla. Wa-y ne rãam me n naag ne yũ-noog maoongã la sugr kosg maoongo, sã n ya pe-bil la b kʋʋda. Maoonga sã n ya pe-raoogo la b kʋ yã, b wata ne zom wam a yi sẽn nag ne kaam wũmbl la pʋɩ-sʋka. Tũnugda ne rãam wamde la yaa kũun a woto buud n sigsd Soaala-Wẽnd sũuri. F sã n kõt Soaala-Wẽnd loalga la maoonga yaa yũ-noog maoong bɩ pʋleng pidsgu maoong bɩ laafi kosg maoongo, maoonga tũnugda ne zom wam a tã sẽn nag ne kaam wũmbli a yi, n paas rãam wamde, la kũun a woto n tar yũ-noog n sigsd Soaala-Wẽnd sũuri. Maanda woto daar fãa sã n kʋ loalga, pe-raoogo, pe-bila bɩ bʋʋga. Ba rũmsa sõor sẽn yaa a soaba, maanda woto ne rũng fãa. Woto la tẽnga biig fãa na n maane, a sã n wat ne kũun n na n sigs Wẽnnaam sũuri. Sãan sã n wa yãmb sʋka bɩ a sã n bee yãmb sʋk daar zãra, la a me rat n waa ne kũuni n sigs Soaala-Wẽnd sũuri, bɩ yẽ me maan boto. Buuda zãng fãa sã n na n waoog Soaala-Wẽnde, bɩ a manesma yɩ manes yɛnga, tẽnga dãmba wala sãamba yĩnga, zamaan woo zamaana. Noor a ye bal n be, noor a ye tãa, yãmb ne sãamba yĩnga.› » Soaala-Wẽnd yeela a Moyiiz: «Gom ne Israyɛl kamba n wilg b woto: ‹Y sã n wa kẽ m sẽn tar-y n dabd tẽng ningã, y sã n wa rɩt tẽnga buri, y na yãk lɛnga n kõ Soaala-Wẽnde. Y sẽn na n wẽ bur daar fãa, y na yãk a ye n kõ Soaala-Wẽnd wala b pʋɩɩr dẽenga. Kũun kãng wẽnda kood rẽemsa kũuni. Bura sẽn yãkd wa Soaala-Wẽnd pʋɩɩr dẽenga, y na n kɩs-a-la zamaan woo zamaana.› » Ad-y noy la Soaala-Wẽnd kõ a Moyiiz la noy kãens yiisg raare n tar n digd zamaan ne zamaana, yaa noy d sẽn tog n tũ zãnga. Buuda zãng yaool n tõe n yĩdame n tõdg noorã n ka bãng tiir ye. La buuda sã n wa bãng a kongre, yaa buuda zãng n na n wa ne loalga tɩ b kʋ n yõog bugum tɩ yũ-nooga sigs Soaala-Wẽnd sũuri. Maoonga tũnugda ne a rasem kam bõn-tũnugdi; lebd n paasa boɛɛg sẽn na n kʋ yel-wẽnd sugr kosg yĩnga. Maan-kʋʋda na n kosa sugri buuda fãa beegr yĩnga la a na n paama sugri. Yella maana ne yĩdgu la buuda waa ne a kũuni la a maoong, a sẽn yĩdi n beeg yĩnga. Taal sɛɛme. Yaa Israyɛl kamba fãa n na n paam sugrã n paas sãamba me, tɩ taala yaa kʋʋnga fãa taale. Sã n ya ned a ye n yĩd n tõdg noore, nin-kãng wata ne yʋʋmd yɛng bʋʋga. Soaala-Wẽnd taoore maan-kʋʋda maanda a sẽn tog n maan tɩ neda paam a yĩdga sugri; a kota sugr a yĩnga la a na n paamame. A yaa sãan bɩ tẽnga biiga, sugra kosga tũuda so yɛnga. Noora tõdgr sã n ka yĩdgu, n ya pʋ-toogo, f yaa sãana bɩ tẽnga biiga, yaa Soaala-Wẽnd la f paoog yã. B yiisda beegda buudẽ. Yẽ soab sãbsa Soaala-Wẽnd gomde, n tõdg b noore, yaa tɩlɛ tɩ b yiis a soab buudẽ t'a yella ket n doga a zugu. Israyɛl kamba sẽn waa n ket zĩ-peen-daagẽ, b linga ned sẽn wɩɩsd daad vʋʋsga daare. Neb niyns sẽn ling-a t'a wɩɩsd daada tall-a lame n wa a Moyiiz, a Aarõ la buuda taoore. B gũnug-a-la ne neba, tɩ b ra nan ka yiis noor yell a woto poorẽ ye, n mi a sẽn tog ne sɩbgr ning ye. Soaala-Wẽnd n yeel a Moyiiz: «Bɩ b kʋ nin-kãnga, la yaa buuda zãng n na n laba ne kuga, sika kudgẽ.» B tall-a lame n yi sika kudgẽ n lab-a n kʋ, wala Soaala-Wẽnd sẽn da wilg a Moyiiz. Soaala-Wẽnd yeela a Moyiiz t'a gom ne Israyɛl kamba la f wilg-ba tɩ b ning b futa zerdo, bãmb la b yagense. B ning gĩs mismiigu n gilgi. Gĩs kãng tẽngr la zerda na n luuli. Gĩs kãng n na tẽeg-y Soaala noya, woto y na reeg-ba la y kõn bas tɩ y sũur la y nin kẽes-y moog ye. Woto y na tẽeg n deeg m noya gilli n yɩ sõma y Wẽnnaam taoore. Maam la yãmb Wẽndã, maam n yiis-y Ezipt tẽnga n na n yɩ y Wẽnnaam. Maam la y Wẽnd dũnna la beoogo. A Kore yaa a Yisear biiga, t'a Yisear yaa a Keyat biiga, t'a Keyat yaa a Levi biiga. Yẽ n tõg-tõg a Datã ne a Abiram, a Eliyab kamba, n paas a On, a Pelɛt biiga, a Rubẽ yagenga. B naaga ne Israyɛl kamb kobs-yi la pis-nu n yik zabr ne a Moyiiz. Nin-bãmba da yaa buud kãsem-dãmba la b yʋʋr da yii b taaba sʋka. B sɩnga gugleng ne a Moyiiz la a Aarõ n yetẽ: «Ya n sekame! Zãma wã ka tʋk yell bilfr meng a zug ye la Soaala-Wẽnd be-la d sʋka. Bõe tɩ yãmb dat n maan wala y yɩɩda y taaba?» B goama sẽn lʋɩ a Moyiiz tʋbrẽ la a sẽn lʋɩ a yãvabga. A yeela a Kore ne a nebã: «Beoog yibeoogo Soaala-Wẽnd meng n na n welg b welgre n wilg sẽn ya-a sõngo la a tõe n kolg bãmba. B sẽn welg a soab toorã n na n tõog n kolg-ba. Ad-y sẽn na n maan bũmb ninga: bao-y wisd laase, yãmba la a Kore ne a nebã. Beoog yibeoogo y na ning wisdu, Soaala-Wẽnd taoore, la nin-sõnga na n yɩɩ Soaala-Wẽnd sẽn na n wilg a soaba. Ad-y yaa n seka woto, Levi kamba!» A Moyiiz le yeela a Kore: «Kelg-y yã, Levi kamba! Ad-y y sẽn paam a Israyɛl Wẽnnaama nengẽ ka paood ye. Bãmb welga yãmb toor Israyɛl kamba sʋka tɩ y tõe n kolg Soaala n tʋm b sɛka roog tʋʋma la y reeg zãma wã zĩiga n waoog-ba. B sakame tɩ yãmb ne y saam-biisã, a Levi kamba, tõe n kolg-ba tɩ y yet tɩ rẽ ka sek-y n baood maan-kʋʋr naam. Yaa raab kãnga n be y yamẽ la y yik n na n kɩɩs Soaala-Wẽnde. A Aarõ lebga bõe tɩ y yik n maand beem ne-a?» A Moyiiz kɩtame tɩ b bool a Datã ne a Abiram, a Eliyab kambã la b yeelame: «D ka na n wa ye! Pa sek foo tɩ f zãag-d ne tẽng sẽn da lengd ne bĩisim la sɩɩdo n na n tɩ kʋ-d we-raoogẽ? Bõe tɩ f rat n yɩ d taoor soaba? Sɩda ka tẽng sẽn bund bĩisim la sɩɩd pʋgẽ la f waa n kẽes-d ye, d pa reeg f nengẽ pʋt la bugsuntund ye. Fo tẽedame tɩ d nin ka puk laa? D ka na n dɩk sor ye!» A Moyiiz sũur puuga wʋsgo t'a yeel Wẽnnaam: «Da reeg-y b kũuna ye. M ka reeg ned ba a ye bõanga, m ka wẽg bãmb ned ba a ye.» A Moyiiz yeela a Kore: «Foo ne f nebã, wa-y ka beoogo, Soaala-Wẽnd taoore. A Aarõ me na n waame. Fo nebã, bãmb kobs-yi la pis-nu wã na n dɩka b wisd laase n ning wisdu n tall n wa Soaala-Wẽnd taoore. Foo ne a Aarõ me na n maana wa bãmba.» A Kore ne a poorẽ dãmba reega a noore: ned kam fãa dɩka a wisd laaga, n ning wisdu, n ning tɩdar sẽn tar yũ-noogo, n wa yals sɛka roog noore. A Moyiiz ne a Aarõ me waame. A Kore tigma a neba sɛka roog noore. Wakat kãng la Soaala-Wẽnd puk b ziir zãma wã nifẽ. Soaala yeela a Moyiiz la a Aarõ: «Welg-y y mens ne neb a woto buudu tɩ m bugma na n dɩ-b-la marsã bala.» B kɩ b neng tẽng n yeele: «Soaala-Wẽnde sẽn zãad naand fãa vɩɩm, bõe tɩ nin-yend beeg tɩ y sũura puugd ne zãma wã fãa?» Soaala-Wẽnd leoka a Moyiiz: «Wilg neba tɩ b zãag ne a Kore, a Datã la a Abiram dooga, sikẽ wã.» A Moyiiz yik n bʋʋga a Datã la a Abiram la buuda kãsem-dãmba pʋg-b lame. A Moyiiz goma woto ne zãma wã: «Zãag-y y mens ne nin-wẽnsa roto, da sɩɩs-y bũmb ba a ye b sẽn so ye tɩ b yel-wẽna wa kɩt tɩ y naag-ba n ki ye.» Neba fãa sɩd zãaga ne a Kore, a Datã la a Abiram roto. A Datã, ne a Abiram da yiime n yɛs b roog noore ne b pagb la b kamba la sẽn be-b ne bãmba. A Moyiiz yeelame: «Ad bũmb ning sẽn na n wilg yã tɩ yaa Soaala-Wẽnd n tʋm maam la m ka maand m sẽn dat ye. Ad-y nin-bãmba sã n ki wa neba fãa sẽn kiidã, b loogra sã n wẽneg neb a taaba fãa rẽnna, dẽnd ka Soaala-Wẽnd n tʋm-m ye. La Soaala sã n maan bõn-bãnde, tẽnga sã n yaag a noor n vel bãmba ne b sẽn so fãa tɩ b sig vɩɩs bʋg-tẽngẽ, y na bãng tɩ b ra paooga Soaala-Wẽnde.» A Moyiiz pa yãe n gom n baase la tẽnga sẽn wurg b taoore. Tẽnga noor yaagame n vel-ba, bãmb ne b zak rãmba. Yɩɩ boto me ne neb nins sẽn da kẽed a Kore wã. Bãmb ne b sẽn so fãa siga vɩɩse bʋg-tẽnga tɩ tẽnga lɛɛg n bus-ba. La woto b yẽesa buuda sʋka. Israyɛl gill sɩnga zoeese la b maanẽ: «D zoe tɩ tẽnga ra wa vel-d ye!» Soaala-Wẽnd bugum n sigi n dɩ neb kobs-yi la pis-nu wã sẽn da yõog wisdã b laasẽ. Soaala-Wẽnd goma ne a Moyiiz: «Wilg maan-kʋʋd a Elazar, a Aarõ biiga, t'a yiis wisda laas bugmẽ tɩ yaa te sõma la b zãag zĩig n kiis b bugma. B rɩk nin-bãmba sẽn yao b beegra ne b yõorã, b rɩk b wisda laase n kud-b tɩ b lebg paklse n tableg maan-kugrã; yaa kũun sẽn ta Soaala-Wẽnd taoore n lebg bõn-sõma. B na yɩ wa bũmb sẽn nekd Israyɛl kamba pʋ-tẽere.» Maan-kʋʋda Elazar reesa bugma sẽn dɩ b rãmb wisda laase la b kud-b lame tɩ b lebg paklse tɩ b tableg maan-kugrã. Yaa bũmb sẽn nekd a Israyɛl kamba pʋ-tẽere tɩ nin-zaalga, ned ning fãa sẽn ka a Aarõ buudu, da saag n kolg Soaala-Wẽnd taoor ne wisdu n wa ki wala a Kore ne a nebã, wala Soaala-Wẽnd sẽn da wilg a Moyiiz. Beoog sẽn vẽege, a Israyɛl zãng yika ne a Moyiiz la a Aarõ. B ra yetame: «Yãmb kʋʋ Soaala-Wẽnd neba!» Mik neba sẽn waa n sɩng zabr ne-bã, a Moyiiz ne a Aarõ wẽnemda b neng n tees sɛka roogo. Sawadgo n waa n lud-a la Soaala-Wẽnd ziir pukame, t'a Moyiiz ne a Aarõ na n bʋʋg-b sɛka roogẽ. Wẽnnaam yeela a Moyiiz: «Yi-y nin-bãmba sʋka tɩ m na n menes-b-la vugr bala!» La b yiiba wõgemdame n kɩ b neng tẽnga, t'a Moyiiz yeel a Aarõ: «Dɩk wisd laaga n yãk maan-kugra bugum n ning tɩdare la f ta neba sʋka. Maan f sẽn tog n maan bũmb ning t'a paama a yel-wẽnda sugri, tɩ Soaala-Wẽnd sũura puuga wʋsgo la tẽn-kũuma zoe n sɩngame.» A Aarõ dɩka wisda laaga wala a Moyiiz sẽn yeel-a la a wudg n ta zãma wã sʋka la a mikame tɩ tẽn-kũuma zoe n sɩngame. A ninga tɩdarã n maan sugr kosgo neba yĩnga. A tɩ yalsa sẽn ki-ba la sẽn vɩ-ba sʋka la tẽn-kũuma yalsame. Tẽn-kũuma sẽn loog ne b rãmba taa tus piig la a naase la kobs-yopoe. Ka naag n sõd sẽn deng n ki-b ne a Kore wã ye. A Aarõ leba a Moyiiz sɛɛgẽ, sɛka roogẽ, tɩ tẽn-kũuma ra yalsame. Soaala-Wẽnd yeela a Moyiiz: «Wilg Israyɛl kamba tɩ roog fãa wa ne rasaare: rasab piig la a yiibu. Kãsem-dãmba tall-b lame n wa. B na n gʋlsa roog fãa yʋʋr a rasaara zugu. A Levi rooga rasaar zugu b na n gʋlsa a Aarõ yʋʋre, tɩ roog fãa tara rasaar a ye bala. Tedg rasaba sɛka roogẽ, kuga walsa sẽn be koglg ninga pʋgẽ wã taoore, zĩig ning m sẽn likd m meng yãmbã. Ned ninga rasaar sẽn na n tobe, bãng-y tɩ yaa yẽ soab la m tũus n yãke la wotome la m na n zãag-y ne Israyɛl kamba wɩdsã, b kõn le yaag b noor ye.» A Moyiiz taasa koɛɛga Israyɛl kamba. Kãsem-dãmba waa n kɩs-a-la rasaare, roog fãa waa ne a ye. Dɩlla yaa bãmb piig la a yiib la a reeg yã, a Aarõ rẽnna sã n naage. A Moyiiz rɩgl-b-la sɛka roogẽ, kuga walsa koglga taoore. Vẽkẽmbeoogo, a Moyiiz sẽn kẽ sõmblem dooga pʋga, a mikame t'a Levi yagenga, a Aarõ, rasaara tobame; a ninga vãoogo, a ninga puugu n tol n bɩɩs a biisi. A Moyiiz yiisa rasaba Soaala-Wẽnd taoore n tɩ wilg a Israyɛl kamba fãa. B yãeeme la ned kam fãa le reega a rẽnda. Tɩ Soaala-Wẽnd na n yeel a Moyiiz: «Lebs a Aarõ rasaara kuga walsa koglga sɛɛga. A na n paa be n kõ Israyɛl kamba kaseto tɩ b b yaa tõatb buudu. Woto wɩdsa sẽn wɩt maama na n sɛɛme la kũum kõn le ki ye.» A Moyiiz maana fãa wa Soaala-Wẽnd sẽn wilg-a. Israyɛl kamba waa n yeela a Moyiiz: «Ade, tõnd kiidame, tõnd tara loogre, n tar loogre. Sẽn kolga Soaala-Wẽnd ne b rooga fãa, kũum n dɩkd-a; d na n looga a yeyn-ye n wa sɛ gilli?» Soaala-Wẽnd yeela a Aarõ: «M na n soka foom, n sok f roogã, n sok Levitsã f saam-biisã, y sã n bas tɩ bũmb kedb n ka tũ tɩrga sɛka roogẽ. Taal bee foo ne f kamba zugu bala, sã n ya yãmb n ka modg tɩ y tʋʋma fãa tũ sore. F na n boola f sɛɛgẽ Levitsa, f saam-biisã. Foo ne f yagensa, y sã n wat kuga walsa sẽn bĩngd roog ninga noorẽ, bãmb n na n yɩ y sõangdba la y sõgen-kamba B na n maana fo sẽn yet tɩ b maan fãa, b na n sõng-f la ne sɛka rooga tʋʋma; b sẽn pa na n sɩɩs yaa te-sõma wã, yaa maan-kugrã; woto b kõn bao yell n kõ b menga, la b kõ yãmb ye. Bãmb n na n sõng foo, sɛka roog tʋʋma yĩnga la nin-zaalg da wa naag-y ye. Yãmb n so zakã la sɛka rooga tʋʋma la Israyɛl kamba sũur kõn le kãb ne y ye. Ade, mam meng m toore n dɩk Levitsã, y saam-biisã, n kõt yãmba. M kɩs-b lame tɩ b reeg yãmb zĩiga n tʋm Wẽnd sɛka rooga tʋʋma. Foo ne f kamba n na n tʋm maan-kʋʋra tʋʋma, sẽn get maan-kugrã la sẽn be peen-lilla poore. Maan-y y tʋʋma neere, yɩ-y maan-kʋʋdba, tʋʋmd kãng la m kõt yã. Nin-zaalg fãa sã n kolg be bɩ b yãk a yõore.» Soaala-Wẽnd yeela a Aarõ: «Ade, yaa foo n na deesd neba sẽn wat ne kũun niyns mam yĩngã, Israyɛl kamba sẽn tog n dɩk bũmb ning fãa n kõ maama. Bãmb na n yɩɩ foo ne f kamba soolem, zamaan woo zamaana. Kũun sõma niyns sẽn ka na n yõog bugum la sẽn na n yɩ fo rẽnna yaa zoma, yaa rũms niyns sẽn kʋ sugr kosg la yell manegr yĩnga, Israyɛl kamba sẽn kõt-ma. Bãmb la kũun sõma wã foo ne f kamba sẽn na n sooge. Y na n zĩnda zĩ-sõngẽ n dɩ-ba. Rao fãa tõe n dɩ-b lame, yaa rɩɩb sẽn ya rɩ-sõma. Kũun sẽn le ya fo rẽnna, yaa b sẽn kẽ Israyɛl kũuna pʋgẽ n yãk pʋɩɩr ning toorã. M dɩk-b lame n kõt yãmb ne y kamba, y kom-dibli la y kom-pugli, zamaan sẽn wate. Sẽn be-b fo zakẽ fãa n ka rẽgem tõe n dɩ-b lame. M le kõt-f-la kood paalsã, ka-neema, yʋʋmda rãama; b sẽn kõt Soaala-Wẽndã, yaa foom n so. F na n le sooga kood rẽemsa fãa biisi, tɩɩsa bi-rẽemsa fãa b sẽn tall n wa Soaala-Wẽnd taoorã. Neb niyns fãa sẽn be f zakẽ n ka rẽgem tõe n dɩ-b lame. Foo n so bũmb ning fãa a Israyɛl sẽn le ka tõe n sooge. Foo n so kom-dẽemsa fãa rondi b sẽn wat n kɩt Soaala-Wẽnde, ninsaalba kom-dẽems rondi wala rũm dẽgda kom-dẽems rondi. Bi-ribl ning fãa f sẽn kɩt rondi a yĩnga t'a le wa f soolmẽ, ka tog n loog kiuug biig ye. Rondi wã na n yɩɩ wakɩ koeems a nu, wakɩ koeems wa b sẽn dɩt a soab Wẽnd waoogra zĩigẽ. Woto wã yaa bõones pis-nu la b kɩta. Sã n ya nag-yãanga, pe-yãanga, bʋʋga, rondi ka tõe n kɩs n tõog n soog bãmb pipi biig ye. Yaa Soaala-Wẽnd bala n so. Bãmb kʋʋdame, b zɩɩma raagda maan-kugrã sɛɛga la b kaama rɩta bugum tɩ maoonga yũ-nooga noog Soaala-Wẽnd sũuri. Foo n so nemdã, foo n so yãooga sẽn dɩk n tees Soaala-Wẽndã la rɩtg gerã. Woto m kõt-y-la Israyɛl kamba sẽn kõt maam bũmb ning wala b kũun sõma. La rẽ n na n yɩ yãmb me pʋɩɩre, foo ne f kom-dibli la f kom-pugli, zamaan woo zamaana, zooda yĩnga, zood ning sẽn kõn sãame, m sẽn yõg ne foo la f yagense. Yaa zood yõgb rɩɩbo sẽn ning yamsem.» Wẽnnaam yeela a Aarõ: «F ka tar buud pʋɩɩr Israyɛl kamba raboogẽ ye, Israyɛl kamba tẽngẽ ye, yaa maam la f buuda pʋɩɩre.» Soaala paasame: «A Levi kamba pʋɩɩr la woto: B tʋʋmda keoor yĩnga, b sẽn tʋmd sɛka roog tʋʋma yĩnga, bãmb na n sooga Israyɛl kamba sẽn yãkd b paoong pʋgẽ, pʋɩɩr a ye piig fãa zugu n kõt Soaala-Wẽndã. Bãmb n deeg Israyɛl kamba zĩiga tɩ b pa tõe n le kolg sɛka roogo n bao yell n kõ b mengã. A Levi kambã n na n ges sɛka roog tʋʋma; b ka tʋmd neere, taal be-la b zugu. Tʋʋmd kãng la b yagensa me na n tʋm zamaan woo zamaana. B ka tar b buud pʋɩɩr Israyɛl kamba sʋk ye. M sẽn kõt-b yaa Israyɛl kamba sẽn yãkd b paoong pʋgẽ pʋɩɩr a ye piig fãa zug n kõt Soaala-Wẽndã. Yaa rẽ yĩng la m yet tɩ b kõn paam pʋɩɩr a to Israyɛl kamba nengẽ ye.» Wẽnnaam yeela a Moyiiz: «Ad-f sẽn na n wilg a Levi kambã: Yãmb me sã n wa reeg pʋɩɩr a ye piig zugã Israyɛl kamba nengẽ, y me na n kẽe be n yãk pʋɩɩr a ye piig zugu n kõ Soaala-Wẽnde. Dẽ la yãmb na n kɩse wala neb a taaba sẽn kɩt alkam b sẽn pãb b zɛɛgẽ, bɩ rãam b bugsuntund sẽn kõt-ba. Yãmb me na n yãka bũmb n kõ Soaala-Wẽnde y sẽn paamd Israyɛl kamba kũuna pʋgẽ. B sẽn na n kõ-y bũmb ning fãa, y na kẽ be, wakat buud fãa, n yãk m pʋɩɩr sõngã n kõ-ma. Le togs-b woto n paase: Y sã n kẽ kũun sõma wã pʋgẽ n yãk m dẽnna n kõ-ma, sẽn keta yaa yãmb n so, wala y saam-biis a taaba sẽn kelld b mens yĩnga, b pʋt la b tɩɩs sẽn kõt-ba: alkam, rãam la kaam. Yaa rẽ la y na n dɩ ne y zak rãmba, y sẽn dat zĩig ning fãa, tɩ woto la yãmb me yaood y sẽn deegd y tʋʋma yĩnga, sɛka roog tʋʋma yĩnga. Y sẽn deng n kõ maam sẽn ya sõmbã m bas taal ne sẽn keta rɩɩbo, bũmb fãa be-la a zĩigẽ, y kõn tʋk y zugu bũmb sẽn tõe n wa ne y kũum ye.» Soaala-Wẽnd yeela a Moyiiz ne a Aarõ: «Woto yaa noor m sẽn kõt yãmba: Wilg-y Israyɛl kamba tɩ b wa ne nag-zẽeg sẽn ka tar bãnde, naf sẽn ka tak wãka. Maan-kʋʋd a Elazar nengẽ la b na n tall-a n taase. B talld-a lame n yi sikã la yaa a Elazar nifẽ la b na n kodg-a. Maan-kʋʋd a Elazar yãkda naafa zɩɩm ne a nug-bila la a na n teesa sɛka roogo n mes zɩɩma, naoor a yopoe. B na n yõoga naafã a nifẽ; b na n yõoga gãongã, nemdã, zɩɩma la bĩndã. Maan-kʋʋda na n yãka kʋk raado, tɩɩg a ye sẽn tar yũ-noog vão-killi, n yãk monem n lob bugma sẽn dɩt naafã. Maan-kʋʋda pekda a futu la a so koom n yaool n leb sika pʋga la a na n paa ne rẽgd n ta zaabre. Sẽn yõoga naafa me pekda a futu, n so koom la a paada ne rẽgd n ta zaabre. Yaa yell sẽn ka be ned ninga zugu n na n wolg naafa tompɛglem la a na n zãaga sikã n bao zĩ-sõngo n bĩng-a be. B na n bĩng-a lame tɩ Israyɛl kamba kẽnd n yãkd n maand b ko-sõngo. Yaa sugr kosg maoong rũnga. Sẽn wolga naafa tompɛglma me pekda a futu, la a na n paa ne rẽgd n ta zaabre. Woto yaa noor a Israyɛl kamba sẽn na n deeg zamaan woo zamaana, f yaa tẽnga biig bɩ sãana.» Soaala-Wẽnd yeela a Moyiiz: «Ned ning fãa sẽn sɩɩs kũum, kũum buud fãa, dogla yell a zug, dasem a yopoe yĩnga. A na n yɩlga a meng ne ko-sõngã, daar a tãab soaba, la a na n lebga yɩlemde, daar a yopoe soaba. Yɩlgra sã n ka yɩlg daar a tãab soabã, a soab ket n zĩi ne a rẽgdo, daar a yopoe soaba me. Sẽn na n sɩɩs-a kũum, sẽn na n sɩɩs-a ninsaal sẽn ki paalem, la a zãgs yɩlgre, yẽ soab rẽgemda Soaala roogo la b na n yiisa a soab Israyɛl buudẽ. B sã n ka mes-a ne ko-sõng fãa, a paada ne a rẽgdo, a ka yɩlg ye. Noora la woto: Ned sã n ki a roogẽ, sẽn kẽ-a rooga pʋg fãa, sẽn be-a rooga pʋg fãa, yaa rẽgd, dasem a yopoe yĩnga. Laok buud fãa noor sẽn ka page, sẽn ka loe ne gĩsga, lebgda rẽgdo. Ned sã n kood a pʋʋgo n lak kũum, n lak ned sẽn kodg ne sʋʋga, n lak ninsaal sẽn ki tɩ pa tũ ne sʋʋga, n lak a rɩgre, bɩ n sɩɩs yaoogo, yaa rasem a yopoe la a paad ne rẽgd. Nin kãng yɩlgr yĩnga b yãkda tompɛglem zĩig ning b sẽn yõog yel-wẽnd sugr kosg maoonga rũngã, tompɛglma ningda laok pʋga la b wat n saam-a-la ne kʋɩlg koom. Ned sẽn ka rẽgem n dɩkd tɩɩg a ye sẽn tar yũ-noog vão-killi n tʋm ko-sõngã n mes rooga la a lagdã, n mes neb niyns sẽn be a pʋgẽ, n mes ned ninga sẽn sɩɩs-a kõaba, ned b sẽn kʋ, ned sẽn ki a meng yĩnga, bɩ yaoogo. Ned ninga sẽn ka rẽgma n mesd sẽn dẽgma wã ne ko-sõngo, daar a tãab soaba la daar a yopoe soaba. A yopoe daara marsã la a lebgd yɩlemde. A na n peka a futu la a so koom, la zaabre yell doka a zugu. La ned sã n dẽgem a menga, n yaool n ka yɩlge, b kʋʋda yẽ soaba, ka rẽ, a na n dẽgma Soaala roogo; b sã n ka mes-a ne ko-sõng fãa a yaa rẽgdo. No-kãnga yaa noor b sẽn na n tũ zamaan woo zamaana. Ned ninga sẽn dɩk-a ko-sõngã n mesã, yẽ soab me pekda a futu. Ko-sõnga sẽn sɩɩs a soab paada ne a rẽgd n ta zaabre. Ned sã n dẽgme, a sẽn sɩɩs bũmb ning fãa lebgda rẽgdo, la bõn-kãng me rẽgda rẽgemda a sɩɩsda n ta zĩ-sobdo.» Yaa pipi kiuugã la a Israyɛl kamba ta Sin zĩ-peen-daagẽ. B wẽ b sika Kadɛs. Be la a Miriyam maan kaalem la be me la b mum-a. Koom da ka be sẽn yũud ye tɩ Israyɛl kamba yik zabr ne a Moyiiz la a Aarõ. Neba ra baooda a Moyiiz noore: b ra yetame: «Kato! Bõe tɩ d ka naag d saam-biisã n ki Soaala-Wẽnd taoore? Bõe tɩ yãmb tall Soaala-Wẽnd kamba n wa zĩ-peen-daagẽ ka tɩ d na n ki, tõnd ne d rũmsi! Bõe tɩ y yiis-d Ezipt tẽnga n tall n wa zĩ wẽngẽ ka? Ka zĩig sẽn tõe n bʋd kood ye, ka tõe n sel kankanga bɩ bugsuntungu, bɩ tɩɩg ninga sẽn womd wa poaloanga ye. Ko yũudem meng ka ye.» A Moyiiz ne a Aarõ basa nebã n dig sɛka roogẽ. B wõgemdame n kɩ b neng tẽnga la Soaala-Wẽnd ziira bui-b lame. Soaala-Wẽnd yeela a Moyiiz: «Dɩk f rasaarã, la yi ne a Aarõ, n tigim nebã. Gom ne pĩiga bãmb fãa gill taoore la pĩiga na kõ-y koom tɩ y yũ. F na n kɩtame tɩ pĩiga pusg koom tɩ f kõ neba tɩ b yũ, bãmb ne b rũmsi.» A Moyiiz rɩka a rasaara sẽn da rɩg Soaala-Wẽnd taoorã la a maana b sẽn yeel-a t'a maan bũmb ningã. A Moyiiz ne a Aarõ tigma neba pĩig sɛɛgẽ n yeel-ba: «Kelg-y wɛ, tõatbã! D tõeeme tɩ pĩiga pusg koom bɩ?» A Moyiiz zẽka a nugu, la ne a rasaarã a wẽe pĩiga naoor a yiibu. Kooma pusgame la neba ne b rũmsa paamame n yũ. Soaala-Wẽnd yeela a Moyiiz ne a Aarõ: «Yãmb pa tẽ maam ye, y ka maan tɩ Israyɛl kils m yʋʋra t'a sãd moog ye. Rẽ yĩngã ka yãmb n na n tall buudã n kẽes m sẽn kãab-a tẽng ninga pʋg ye.» Dẽ me yĩng la kooma sẽn pusg zĩig ninga pʋd tɩ Meriba, tɩ zabr koom, tɩ zĩ-kãnga a Israyɛl bao zabr ne Soaala-Wẽnde la Soaala-Wẽnd tũ rẽ n puk b sõmblem. A Moyiiz zĩnda Kadɛs n tʋm neb Edom dĩma nengẽ tɩ b tɩ yeel-a: «F saam-biig, a Israyɛl, koɛɛg la woto: Fo mii yell woo yelle d buuda sẽn sege. D yaab rãmb waa n kẽe Ezipt tɩ d pa be n kaoose. Ezipt rãmb ka zã-d neer ye, tõnd la d yaab rãmba. D sẽn kelem Soaala-Wẽnde, b wʋma d koɛɛga la b tʋma b malɛk t'a wa yiis-d Ezipt tẽnga. Rũnna wã yaa Kadɛs la d be, fo toaagẽ. Bas-d tɩ d tũ f tẽngã n looge! D kõn bʋdg f pʋtẽ, d kõn bʋdg f bugsuntundẽ ye. D kõn yũ f bulsa kom ye. So-kõodra la d na n tũ n ka bʋdg goabga, n ka bʋdg rɩtgo, al n wa yi f soolmẽ.» La ad-a Edom sẽn leoke: «Da saag n kẽ m soolma pʋg ye, ka rẽ m na yiis m tãb-biisa tɩ b seg foo.» Israyɛl kamba taas-a-la gomd kãnga: «Yaa so-kõodra bal la d na n dɩke, la d sã n sɩɩs f koom menga, d na bao ligdi n yao-fo. D sẽn kot bũmb ning bala, yaa d paam sor n loog ne nao.» T'a Edom yeele: «F kõn loog ka ye.» A Edom yi n sega a Israyɛl ne neb ka tɛka la a wilga a nug pãnga. A Edom zãgsame tɩ b kõn tũ a tẽngẽ ye t'a Israyɛl na n kong n zãag. Israyɛl kamba sẽn yi Kadɛs, yaa a Or tãms la b rʋ yã. Yaa a Edom toaagẽ la Soaala-Wẽnd yeel a Moyiiz la a Aarõ: «A Aarõ na n loogame n tɩ sak a saam-dãmba. A pa na n paam n kẽ tẽng ning m sẽn kõt a Israyɛl kamba ye, la rẽ yaa y sẽn pa reeg m gomdã Meriba. Tall a Aarõ ne a biiga, a Elazar, tɩ y rʋ Or tãnga. Yees a Aarõ futã n yeelg a Elazar. Rẽ poore, a na n loogame, be la a na n ki.» A Moyiiz reega Soaala-Wẽnd noore la Israyɛl kamba fãa nifẽ a rʋʋ Or tãnga. A Moyiiz rɩka a Aarõ futã n yeelg a Elazar. Yaa tãnga zug la a Aarõ tɩ sak a saam-dãmba, t'a Moyiiz ne a Elazar na n lɛɛg n sig tãngã. Israyɛl kamba bãngame t'a Aarõ kiime la b yãba a kʋʋr kiuug tõre. Kanaã rãmba da tara b dĩm sẽn kẽed Negɛb la sẽn boond tɩ Arad. Bãmb wʋmame tɩ Israyɛl kamba dɩka Atarim dãmba sor n watẽ. B taka zabr ne a Israyɛl kamba, n yõg wʋsg n kẽes roogo. Dẽ me la a Israyɛl pʋlem Soaala-Wẽnd woto: «Yãmb sã n dɩk buud kãnga n sagl d nugẽ, m na pʋlem b tẽnga beedo, n sãam-a zãnga.» Soaala-Wẽnd deega a Israyɛl kosgo la a tõoga Kanaã rãmba n kãab b tẽnga beedo. Tẽn-kãng pʋdame tɩ Orma, raboogo. Israyɛl kamba yi Or tãnga n dɩk sor ning sẽn tees Rudum mogre, sẽn na yɩlẽ n gil Edom. Sor zugu, neba le waa n konga raoodo. B sɩngame n na n wɩd Soaala-Wẽnd la a Moyiiz. B ra gomda woto: «Pʋs n yaa bõe yĩng la y yiis tõnd Ezipt tẽnga? Ka y sẽn dat tɩ d pa zĩ-peen-daagẽ wã bal laa! Bur ka be ka, koom ka be ka la d yam yaa n yii ne nimbãan-dɩɩbã!» Soaala-Wẽnd tʋma wag-toose sẽn sɩng neba kɛɛbo la wʋsg sɩd kiime. Dẽ me la Israyɛl kamb waa n yãend a Moyiiz n yeel-a: «D maana wẽnga n wɩd foo la d wɩd Soaala-Wẽnde. Yõk sɛɛg d yĩnga tɩ wiisa zãag ne do.» T'a Moyiiz na n yõk sɛɛga, tɩ Soaala-Wẽnd na n yeele: «Naan wag-toaag ne zũudu n dɩk-a n yagl raoogo; waaf sẽn kɛ a soab t'a roog n ges zũud waafã, yẽ soab põsdame.» A Moyiiz kuda waaf ne zũudu n yaglg-a raoogo la waaf sã n da kɛ ned t'a roog n ges zũud waafã, a ra põsdame. Israyɛl kamba le sɩnga b kẽna n wa wẽ b sik Obot. B sẽn yi Obot b waa n yalsa Iye-Abarim, tẽn-kãng tota ne Moab, yaang sẽnẽ. B le yii be n tɩ yals Zerɛd kʋɩl-bɛɛga noor. B sẽn yi be b tɩ wẽe sik Arno kʋɩlga rʋʋnde. Kʋɩl-kãng yita Amoritsa tẽnga n pãrgd we-raoogã la yẽ la Moabitsa ne Amoritsa toaaga. Dẽ la b sẽn wilg Soaala-Wẽnd zaba sebrẽ: Waeb sẽn be Sufa ne a kʋɩlsa sẽn zoet ne bʋʋrã, Arno ne a gõnegõtã sẽn sigd Ar be la a yegd Moab toaaga. Israyɛl kamb yii be n ta Beɛr. Beɛr yaa koom zĩiga. Yaa be la Soaala-Wẽnd da yeel a Moyiiz: «Tigim neba tɩ m kõ-b koom.» Yɩɩn-kãnga la a Israyɛl da pʋd yã: Bulga, tãoos f koom! Kils-y bõn-bãnde, neba! Buuda kãsem-dãmba, buuda na-komse tuka b bulga. La b tuk-a-la ne b rasaba, ne b naam doɛ. Israyɛl kamba waa n yii be n tees Matana, n yi Matana n dig Naaliyɛl, n yi be n dig Bamot n yi Bamot n ta Moab bãg-faaga. Zĩ-kãnga la Pisga tãnga zao a naam zaoore n get we-raooga zãnga. A Israyɛl tʋmame tɩ b tɩ yeel a Siyõ, Amoritsa dĩma: «Kõ-m sor tɩ m tũ f tẽngã n looge. D kõn bʋdg f pʋtẽ, d kõn bʋdg f bugsuntundẽ ye, d kõn yũ f buls koom ye. F soolma pʋga, d sor yaa so yɛnga, yaa so kõodrã.» A Siyõ pa sak tɩ b pãrg a soolma ye. A tigma a neba tɩ b yii n seg a Israyɛl zĩ-peen-daagẽ. Yaa Yasa la b seg taaba. A Israyɛl zẽk a sʋʋga la a wẽe n deega tẽngã, sẽn sɩng Arno kʋɩlga n tãag Yabok, n tãag Amonitsa toaaga sẽn tong ne tãnsoaben-doto. A Israyɛl wẽ b tẽnsa fãa n deeg n kẽedẽ. B kẽe Esbõ ne a tẽn-toosã. A Esbõ da yaa a Siyõ, Amoritsa dĩma na-tẽnga. A Siyõ me n da zab ne Moab dĩma n deeg a soolma zãnga n tãag Arno kʋɩlga. Ad-d sẽn karemd yʋʋmba sɛbẽ: Wa-y tɩ d leb Esbõ! D leb n tɩ yik a raboodo d sõng tɩ Esbõ leb n yɩ tẽnga! Bugum n widig Esbõ, Bug-walem n zomb dĩma Siyõ, bug kãng n dɩ Ar sẽn ti Moab tẽn-peelmẽ, sẽn zao a naam zaoor Arno tãms zutu. Bʋk woo Moab, bʋko! Y yell sãama zãnga, yãmb fãa sẽn waoogd a Kemos! Kom-bɩɩb lebga rabɛɛmba n tõe zoeese. Kom-pugli lebga yem-pogse, Amoritsa dĩm a Siyõ yem-pogse. D pɛɛma po-la b gãndo, D kʋ-b-la zãnga, Esbõ n tãag Dibõ, tõnd varga fãa n ta Nofa, tõnd pɩɩga fãa n ta Madaba. A Israyɛl tɩ kẽe Amoritsa tẽnga. A Moyiiz yiisa neb tɩ b kaag Yasɛr tẽnga la a tãb-biisa pãba a tẽn-toosã n deeg la b riga Amoritsa sẽn da kẽed be wã. Israyɛl kamb waa n teema sore; Bazã sor la b rɩk yã la Bazã rãmb dĩm a Og, yẽ ne a neba gilli, yii n seg-b lame n kaoog zabr Edreyi. Soaala-Wẽnd yeela a Moyiiz: «Da zoe rabeem ye, m dɩk-a lame n sagl f nugẽ, yẽ ne a neba la a tẽngã. Maan ne ba wala f sẽn maan ne a Siyõ, Amoritsa dĩm sẽn da kẽed Esbõ.» A Israyɛl tõog-b lame, yẽ ne a kamba la a soolem. Nin-vɩɩg ka kees ye, tẽnga fãa lʋɩ-la b nugẽ. Israyɛl kamba le rɩka sore, b waa n yalsa Moab pʋ-weesẽ, Zeriko yegende, Zʋrdẽ noor. Zʋrdẽ zoet n teesda yamsem mogrã n basd Zeriko a nug rɩtgo. A Sipor biig a Balak wʋma a Israyɛl sẽn maan Amoritsa bũmb ninga. A Moab yãendame tɩ Israyɛl kamba sõor yaa wʋsg tɩ looge. B sõora yɛɛs-a lame. Dẽ la a yeel Madiã nin-kẽemsã: «Zãma kãnga na n sɛɛsa rɩɩba fãa tõnd sɛɛgẽ, wala niis sẽn sɛɛsd yamd bãoogẽ.» Wakat kãng t'a Sipor biig a Balak n ya Moab dĩma. A Balak tʋma neb a Balaam nengẽ. Yẽ yaa a Beor biiga la a ra bee Petor, Efrat kʋɩlga noore, Amavitsa tẽn-peelmẽ. A tʋmame tɩ b yeel-a woto: «Ad-y neb n yi Ezipt tẽnga la b sẽega mooga tõre la bãmb n wa n kẽed m tẽngẽ. M kot-f lame tɩ f wa kãab-b beedo tɩ b pãng yɩɩda maam. Daare m na tõog-a, n dig-a n yiis. M paam n bãngame tɩ fo sẽn ningd a soab bark paamda barka la fo sẽn kãab a soab beedo, kãabga tũudame.» Moab la Madiã nin-kẽemsa bobame la b talla bũmb n na n tɩ yao baga a Balaam. B sẽn ta a Balaam nengẽ, b togs-a-la a Balak goama. A Balaam yeel-b lame: «Gãand-y ka yʋngã, tɩ Soaala-Wẽnd sẽn wilg-ma la m na n togs yã.» Nin-kẽemsa gãanda a Balaam yiri. Wẽnd kolga a Balaam n yeel-a: «Yaa yɛ rãmb n wa f nengẽ wã?» La a Balaam leokame: «Yaa a Sipor biig a Balak, Moab dĩma n tʋm a neb tɩ b wa yeel-ma: ‹Ad-y neb niyns sẽn yi b Ezipta wa n pida m tẽnga. Wa kãab-b beedo n kõ-ma tɩ daare m na zab n tõog-ba, n dig-ba.› » Soaala-Wẽnd yeela a Balaam: «Da tũ-b ye, da tɩ kãab beed ye, tɩ maam, Naaba-Wẽnd, zoe n ninga buud kãnga barka.» Beoog sẽn vẽege, a Balaam yika yibeoogo n wilg a Balak nin-kẽemsã: «Leb-y y tẽnsẽ, tɩ Soaala-Wẽnd pa rat tɩ m tũ-y ye.» Moab nin-kẽemsa lɛɛg n kul n tɩ yeela a Balak: «A Balaam pa tʋlg n tũ-d ye.» Woto a Balak tʋma kãsem-dãmb a taaba. Yaa neb sẽn ya sʋk neba la b sõora yɩɩga pipi rãmbã. B taa n yeela a Balaam: «A Sipor biig a Balak koɛɛg la woto: ‹Maam a Sipor biig a Balak, maam n kot-f tɩ f ra zãgs waoong ye! Bãng tɩ m na n zam-f-la kũuni la m na n maana f sẽn yeel fãa. Wa tao n sõng-ma, n kãab buud kãnga beedo.› » A Balaam leoka a Balak neba woto: «Ba yaa sãnema la wanzurfa gill sẽn be a Balak zakẽ wã la a rat n kõ-ma, m ka tõe n maan bõn-bedr bɩ bõn-bila sẽn ka Wẽnnaam m Soaala sẽn wilg-m ye. Ne rẽ fãa m kot-y lame tɩ y gãand ka yʋngã tɩ m paam n bãng Soaala-Wẽnd sẽn na n wilg-m yɛsa.» Yʋngo Soaala-Wẽnd wala a Balaam nengẽ n yeel-a: «Nin-bãmba sã n waame bal n na n bool fo tɩ f wa yãag-ba, kẽnge. Fo yee n maan m sẽn na n yeel-fa bala.» Vẽkẽmbeoog yibeoogo a Balaam yikame n ning a bõan-yãang gaare la yẽ ne Moab nin-bɛdã dɩka sore. A Balaam loogra puuga Soaala-Wẽnd sũuri tɩ Soaala malɛk na n tɩ yaas sorẽ n gɩdg-a. A ra zomba bõan-yãanga t'a sõgen-kamb a yiib yãagd-a. Bõanga yãee malɛk sẽn yɛs sora noor ne sʋ-bɛɛga t'a bas sorã n kẽed pʋto. T'a Balaam tãag bõangã n tar a pãbr t'a na le rɩk sore. Soaala-Wẽnd malɛka tɩ yalsa sor sẽn ya longo la sẽn bʋdg n kẽed bugsuntungu tɩ lalg be goabg la rɩtgo. Bõanga nif teega Soaala malɛkã t'a na n dɩdg lalgã. A tol dɩdga a Balaam karga t'a le sɩng a pãbre. Soaala malɛk le loog-b lame n tɩ yals zĩ sẽkẽ, ka tõe n kɩll goabga, ka tõe n kɩll rɩtg ye. Bõanga yãenda Soaala malɛka yɛsa la a bur n lʋɩɩme t'a Balaam sũur puug t'a tar a pãbr ne rasaare. Soaala-Wẽnd kɩtame tɩ bõanga gome la a yeela a Balaam: «M maan-f-la bõe tɩ f pãbd-m al naoor a tã?» T'a Balaam na n leok-a: «Yaa f sẽn yik rũnna n maand f yama. M sã n da tarẽ sʋʋga m naan n kodgẽ foo zĩig pʋgẽ!» Bõanga me paasame: «Fo ka m zu-soab laa? Ka maam la f zao daar fãa laa? M sɩng n maanda wa m sẽn maan rũnna wã bɩ?» T'a leok tɩ ayoo! Wẽnnaam puka a Balaam nini la a yãee malɛka sẽn yɛs ne sʋʋg sora noore. A rõbendame n kɩ a neng tẽnga. Tɩ Soaala malɛk na n yeel-a: «Bõe yĩng la bõanga paam pãbr al naoor a tãabo? Wala f sẽn ne, maam n waa n gɩdg a kẽnde. M pa tẽed tɩ f tagsame tɩ sek n yaool n dɩk f sora ye. Sã n ya bõangã, a yãenda maam naoor a tãab n keke. La a sã n da pa kekẽ m da na kodgẽ foo zĩig pʋgẽ bala n yaool n basẽ bõangã.» A Balaam yeela Soaala malɛka: «M kongame, m sẽn pa bãng tɩ yãmb n da yɛs m taoor sora zugu. La ade, m so-toaka sã n pa noom-y, m na n lebame.» Malɛka yeelame: «Tũ nin-bãmba n looge, la m sẽn yet tɩ f togs bũmb ninga la f na n togse.» A Balaam tũume n loog a Balak nengẽ. A Balak wʋma a Balaam waoongo. A tɩ seg-a-la Ir-Moab, zĩig ning Arno kʋɩlga sẽn bẽeg a soolma toaaga. A Balak yeela a Balaam: «M deng n bool-f-la pipi tɩ f pa wa ye. M sok n gese: sẽn tʋm b rãmb tɩ b wa bool-fã sõor n ka sek bɩ bõe? Yaa m ka tõe n waoog-f lame tɩ ta f raab bɩ bõe?» T'a Balaam na n leoke: «M sẽn ta f nengẽ wã, f tẽedame tɩ koɛ bʋg la m tar n na n kõ-fo? Ad yaa Soaala-Wẽnd sẽn yet tɩ m togs bal la m na n togse.» A Balaam tũ-la a Balak n looge la yaa Kiriyat-Usot la b ta yã. A Balak kʋʋ maando, rũm-bɛd la rũm-bõonego; a yãka a Balaam pʋɩɩre, n yãk a tũud-n-taasa pʋɩɩre. Vẽkẽmbeoog yibeoogo, a Balak ne a Balaam dʋʋ Bamot-Baal. B sẽn be tãnga zugã, b ra nee Israyɛl bogr bala. A Balaam yeela a Balak: «Me maan-kug a yopoe kaalẽ la f wa ne lols a yopoe la pe-raad a yopoe.» A Balak maana wa b sẽn yeel-a. La bãmb b yiiba gilga maan-kugã, n kodg maan-kugr fãa zugu, loalg la pe-raoogo. A Balaam le paasame: «Yals f maanda sɛɛgẽ tɩ m zãag bilfu. Daare Soaala na seg-m la m sẽn na n wʋm bũmb ning b nengẽ, m na wilg-fo, ba koɛɛga sẽn yaa a soaba.» A sẽn gome, a sɩd zãagame n ta sorã. Soaala-Wẽnd seg-a lame la a Balaam yeelame: «M kɩtame tɩ b me maan-kug a yopoe, la a ye fãa zugu, b maana loalg la pe-raoog maoongo.» Soaala-Wẽnd wilga a Balaam a sẽn na n togse, la a yeel-a lame: «Leb a Balak nengẽ la f gom ne-a wa m sẽn wilg-fã.» A Balaam sẽn leb a Balak nengẽ, a mikame t'a ket n yɛsa maan-kuga sɛɛga, yẽ ne Moab nin-bɛdã. A Balaam goma a bãngr goama: A Balak bool-m-la Aram tɩ m yi be n wa; Moab dĩma bool-m-la yaang tãmsẽ: Wudg n wa kãab a Zakoob wẽnga n kõ-ma! Wudg n wa pʋlem a Israyɛl beedo n kõ-ma! M yɩta a wãn n kãab wẽnga, Soaala-Wẽnd sẽn pa yãk a soab barka? M yɩta a wãn n pʋlem beedo Soaala-Wẽnd sẽn ka yi a soab poorẽ? M sẽn zao pĩisa zut n getẽ, m sẽn karg tãmsã n neẽ, yaa Soaala-Wẽnd sẽn bĩng b menga, b toorẽ pʋɩɩre, yaa pʋɩɩr sẽn bĩng kɛɛnga, pʋɩɩr sẽn welg ne buud a taaba. Ãnda n tõe n sõd a Zakoob n kong bĩisra sõadga? Ãnda n tõe n sõd a Israyɛl tus lagem tusã? Soaala-Wẽnd sõng-m tɩ m yi dũniya wa nin-sõma wã sẽn yiti! Soaala-Wẽnd na sõnge tɩ m baasg yɩ bark baasg wa Israyɛl kamba! A Balak yeela a Balaam: «Yaa bõe la f maan-m woto? M tall-f lame n wa tɩ f kãab m bɛɛb beedo tɩ f lɛɛg zam-b kãab noodo!» T'a Balaam yeele: «M sã n gomda, m noora tõe n yiisa gomd Soaala-Wẽnd sẽn ka kõ sor tɩ m yiis bɩ?» A Balak bool-a lame: «Wa tũ ma, wa tɩ d yals zĩig a to tɩ f paam n yãend a Israyɛl zãma wã. Ya bogr bala la f sẽn da ne wã, f ra ka ne-b zãng ye. Wa yals zĩ-kãnga n kãab beed n kõ-ma!» A Balak tall-a lame n dʋ Pisga tãnga zugu n le me maan-kug a yopoe n kʋ loalg la pe-raoog maan-kugr fãa zugu. A Balaam yeel-a lame: «Yaas ka, maan-kugra sɛɛga tɩ m zãag bilfu n gũ Soaala leokre.» Soaala-Wẽnd waa n sega a Balaam n wilg-a b koɛɛga la b yeel-a woto: «Leb a Balak nengẽ la tɩ gom ne-a wala m sẽn togs-fã.» A Balaam leba a Balak nengẽ la a mikame t'a ket n yɛsa maan-kugra sɛɛga, yẽ ne Moab nin-bɛdã. A Balak sok-a lame: «Soaala-Wẽnd yeel-f lame tɩ bõe?» T'a Balaam na n le gom a bãngr goama: Yiki Balak, yik n kelge! Kelg-m neere, Sipor biiga! Soaala-Wẽnd ka ninsaala n mi zirẽ yagb ye, B ka ninsaal n bool n le yet tɩ b vẽ ye; Soaala-Wẽnd pa yiisd gomd tɩ gomda pa faoog ye. Goama pa gomd n ka pidsdẽ ye. M yeelame tɩ bark la m na n ningi, dɩlla m kõn lebs m zelemd ye. Tẽn-kũum kõn lʋɩ a Zakoob buudẽ, namsg kõn nams a Israyɛl tẽngẽ ye, Wẽnnaam a Soaala bee ne-a, Wẽnnaam pẽgra sãta a tẽngẽ. Bãmb n yiis-a Ezipt tẽnga. B kõ-a-la we-naaf pãnga. Bagb korg ka bobd a Zakoob tẽng ye bagr ka bʋgd Israyɛl ye. Wakat sã n ta bala a Zakoob paamda vẽnegre, Soaala-Wẽnd pukda a Israyɛl b tʋʋma. Ges-y buud sẽn yik wa we-rũnga, Ges-y rũng sẽn yɛs wa gɩgemde a ka bri n wãbe, a kõn leb a gãagẽ ye, a ka bri n yũ zɩɩm, a kõn vʋʋs ye. A Balak yeela a Balaam: «F sã n ka tõe n kãab nin-bãmba beed me, bɩ f ra ning-b bark wɛ.» T'a Balaam leok-a: «M da pĩnd n yeel-f lame: ‹Soaala-Wẽnd sẽn yet tɩ m togs bũmb ninga la m na n togse.› » A Balak lɛɛg n yeela a Balaam: «Fo yee n wa tɩ m wilg-f zĩig a to; daare Soaala-Wẽnd na sak tɩ f zĩnd be n kãab neba beedo n kõ-ma.» A Balak rʋʋsa a Balaam Peor tãnga zug tẽnsʋka tɩ we-raooga yɛdg n dɩg a taoore. A Balaam yeelame: «Me maan-kug a yopoe, wa ne lols a yopoe la pe-raad a yopoe.» A Balak maana wala a Balaam sẽn yeel-a la a kʋʋ maan-kugr fãa zugu loalg la pe-raoogo. A Balaam yãeeme tɩ sẽn noom Soaala-Wẽnde yaa a ning a Israyɛl barka. A ka le nams a meng n maan wa rasem kam n gũ Soaala-Wẽnd leokr ye. A wẽnemda a neng bal n tees we-raoogã. A sẽn zẽk a nenga, a Balaam yãenda a Israyɛl sẽn wẽ a sik roog-roogo. Soaala-Wẽnd vẽnega a Balaam t'a na n gom a bãngr goama: Woto la a Beor biig, a Balaam, koɛɛga, bãngd ninga sẽn ne yɩɩg-yɩɩga koɛɛga, bãngd ninga sẽn wʋmda Soaala-Wẽndã n gomda, Pãng Soaba sẽn kõt a soab t'a nee wã n gomda, Sẽn waoogd-a Soaala t'a nin pukdẽ wã n gomda. Ad-f rota be neere, Zakoob, F zagsa tar yamleoogo, Israyɛl! B yɛdg n dɩga wa kʋɩls koom, b tõnda wa tɩɩs sẽn sel kʋɩlg noore, wa pu-neeb Soaala-Wẽnd sẽn sele, wala kʋgs sẽn tãood koom noore. A buls koom ka fẽbgd ye a kood tɩgda koom. A rĩma n tõog a Agag, a naama pãng paasdame n dabda. Soaala-Wẽnd n yiis-a Ezipt tẽnga, a pãng yaa we-naaf pãnga. Yẽ n sɛt a bɛɛba. Yẽ n fõosd b kõaba sɩɩlem, a pɛɛma n lubd-b zãnga. A gãe wa gɩgemde. Ãnda n na n yik-a a gãagẽ? Sẽn kãabda foo noog paam barka! Soaala-Wẽnd na sãam sẽn kãabda foom beedo! A Balak sũur puuga ne a Balaam; a kabsame n yeel-a: «M boola foom tɩ f wa kãab m bɛɛb beedo, la yaa naoor a tãab marsã la f pids-b ne kãab noodo! Sẽn ya woto wã, leb f tẽngẽ. M da yeelame tɩ ma waoog-f sõmb-sõmbo, ad ya Soaala-Wẽnd meng n mongd-f rẽ.» A Balaam leok-a lame: «Fo sẽn tʋm b rãmba, m da togs-b la vẽenega: ‹Ba a Balak kõt maam wanzurf la sãnema fãa sẽn be a zakẽ, m kõn tõog n kɩɩs Soaala-Wẽnd n sik noog bɩ beed wala m sẽn dat ye. Soaala-Wẽnd sẽn yet tɩ m togs la m na n togse.› Ade, marsã m lebda m tẽngẽ la bas tɩ m wilg-f buud kãnga sẽn na n maan f buudã, sã n wa be n beẽ.» A yiisa a bãngr gomde, a wilga woto: A Beor biig a Balaam koɛɛga, bãngd ninga sẽn ne yɩɩg-yɩɩga koɛɛga, bãngd ninga sẽn wʋmda Soaala-Wẽndã n gomda, Yĩngr Naaba sẽn kõt a soab bãngra n gomda, Pãng Soaba sẽn kõt a soab bãngrã n gomda. Sẽn waoogd-a Soaala t'a nin pukdẽ wã n gomda. M neeme la yaa beoog bũmbu. M neeme la yaa bũmb sẽn ket n zãre. M nee a Zakoob ãdg sẽn puk yĩngri. M nee naam dasaar a Israyɛl nugẽ, dasaar sẽn wurd a Moab zugu, la a vargd a Sɛt kamba. A Edom na n lebga ned a to soolem A Seyir na n lebga a bɛɛb soolem. Yaa Israyɛl n tʋmd a pãng tʋʋma. A Zakoob yagens n wõrd a bɛɛba, a karga b tẽngã n sɛɛs-a zãnga. A Balaam yãenda a Amalɛk me la a goma woto a poorẽ: A Amalɛk la fãa taoor soaba la a wãab beoog vẽegdame. A Balaam yãenda Kenitsa la ad-a bãngr gomd bãmb me poorẽ: F roog yɛsa ne pãnga, f tʋɩla f tʋk pĩig zugu. Ne rẽ fãa bugum n na n dɩ a Kaẽ t'a Asʋr na n kẽes-a roogo. A baasa a bãngr goama woto: Bʋk woo, bʋko! Ãnd n na põs Soaala-Wẽnd sɩbgre? Ad Kitim koom kogendo. B na namsa Asʋr, b na n yeega Ebɛr nenga: yẽ me rigda a wãab zĩigẽ. A Balaam loogame n dig a tẽngẽ t'a Balak me rɩk a sor. A Israyɛl wẽe sik Sitim. Neba yika yoob ne Moab kom-pugli. Moab kom-pugli wã boola Israyɛl kambã b wẽn-naandsa maanda kʋʋb zĩigẽ. Neba kẽngame, b tɩ rɩɩme la b kɩɩ rũmdi wẽn-faada taoore. A Israyɛl sakame n tɩ kẽ Baal ning b sẽn waoogd Peor la b yika Soaala-Wẽnd sũuri. Soaala-Wẽnd yeela a Moyiiz: «Yõg buuda taoor dãmba la luul-b Wẽnd taoor zĩig sã n yẽege la woto Soaala sũ-puura na zãag ne b nebã.» A Moyiiz yeela bʋ-kaoodba: «Bɩ ned kam fãa kʋ a saka neb niyns fãa sẽn tɩ waoog a Baal, Peor tẽnga!» Sak a ye ned n waa n tall Madiã pag n wa a saam-biisa sʋka. A waa ne-a, a Moyiiz la Israyɛl kamba fãa nifẽ. Dẽ tɩ b ra ket n zĩi n yãbda, sɛka rooga noore. A sẽn yãend paga ne raoã, maan-kʋʋda Pinas, a Elazar biig la a Aarõ yagenga, yika neba sʋka. A rɩka a kãnde, n bʋʋg-ba b sẽn tɩ kẽ zĩig ningã n wẽneg n be raoã ne Madiã poaka kõsb ne kãndã, tɩ tẽn-kũuma me wẽneg n yaase. Tẽn-kũuma sẽn loog ne b rãmba sõor ta tus pisi la a naase. Wẽnnaam goma ne a Moyiiz: «A Elazar biig a Pinas, maan-kʋʋd kãsenga, sigsa m sũura ne a Israyɛl. A pa sak tɩ ned a to reeg m zĩig bãmb sʋk ye. Yaa rẽ yĩng la m pa sak tɩ m sũura fudg tɩ m kʋ-b zãng ye. Yaa rẽ me yĩng la m yõg laafi zood ne-a. M yõga zood ne yẽ la a yagense. Bãmb n na n soog maan-kʋʋr naam yʋʋm tõt sɛɛbo. A pa sak tɩ ned a to reeg a Wẽnda zĩig ye la a maana a sẽn tog n maan tɩ Israyɛl kamb paam sugri.» Israyɛl biigã b sẽn naag n kʋ ne Madiã pagã, ra boondame tɩ Zimri. A ba ra boondame tɩ Salu, a Simeõ roog kãsem a ye. Sã n ya pagã, Madiã pagã, a ra boondame t'a Kozbi. A ba la a Sur, zak a ye kãsma, a Madiã buudẽ. Wẽnd waa n yeela a Moyiiz: «Kaoog-y zabr ne Madiã rãmba n dig-ba. Dig-y-b tɩ b bao-la y noore la b zãmb-y-la sẽn pa paoode ne Peor wẽn-naanda waoogre la b sãama y yʋʋr ne b taoor soab a ye bi-pugl a Kozbi sẽn ki baraare.» Tẽn-kũuma looga a loogre. Tẽn-kũuma loogr poore, Soaala-Wẽnd yeela a Moyiiz ne a Aarõ biig a Elazar: «Sõd-y roog-roogo, a Israyɛl kamba zãnga. Sõd-y neb niyns fãa yʋʋm sẽn ta pisi bɩ yɩɩd rẽnna n tõe n yɩ tãb-biisi.» A Moyiiz ne a Elazar kõo Israyɛl kamba koɛɛg Moab pʋ-weesẽ, Zʋrdẽ noorẽ, sã n be be n get yamsem mogrã Zeriko bee nug-rɩtgo. B yeel-b lame: «Wala Soaala-Wẽnd sẽn kõ noore, d na n sõda neb niyns fãa yʋʋm sẽn ta pisi bɩ yɩɩd rẽ.» Ad Israyɛl kamba sẽn paam n yi Ezipt tẽnga: A Israyɛl bi-kẽeng a Rubẽ roogẽ: Anokitse, a Anok yagense; Paluwitse, a Palu yagense; Esronitse, a Esrõ yagense; Karmitse, a Karmi yagense. Bãmb la a Rubẽ roogo. B sõor yɩɩ tus pis-naas la a tãabo la kobs-yopoe la pis-tã. (43 730) A Palu biig a ye, a Eliyab, n dog a Nemuwɛl, a Datã la a Abiram. A Datã la a Abiram da yaa taoor dãmba, la bãmb n da yik n guglem ne a Moyiiz la a Aarõ. Bãmb n naag a Kore neba n zab ne Soaala-Wẽnde. Tẽnga noor yaagame n vel-ba, bãmb ne a Kore la a poorẽ dãmba, tɩ bugum me rɩ neb na ta kobs-yi la pis-nu, n puk sẽn põs-ba yam. A Kore meng kamba ra põsa wakat kãnga. B sõda a Simeõ roogẽ: Nemuwɛlitse, a Nemuwɛl yagense; Yaminitse, a Yamin yagense; Yakinitse, a Yakẽ yagense; Zaritse, a Zera yagense; Sawulitse, a Sawul yagense. Bãmb la a Simeõ roogo. B zãng yɩɩ tus pisi la a yi la kobs-yi. (22 200) B sõda a Gad doogẽ: Sefonitse, a Sefõ yagense. Agitse, a Agi yagense; Sunitse, a Suni yagense; Oznitse, a Ozni yagense; Eritse, a Eri yagense; Aroditse, a Arod yagense; Arelitse, a Areli yagense. Bãmb la a Gad doogo. B zãng yɩɩ tus pis-naase la kobs-nu. (40 500) A Zɩɩda roogẽ: a Ɛr la Ona. B yiiba fãa ki Kanaã tẽnga. Ad-a Zɩɩda rooga kamba: Selanitse, a Sela yagense; Perizitse, a Perɛs yagense; Zerayitse, a Zera yagense; A Perɛs roog la woto: Esronitse, a Esrõ yagense; Amulitse, a Amul yagense. Bãmb me la a Zɩɩda roogo. B zãng yaa tus pisopoe la a yoobe la kobs-nu. (76 500) B sõda a Isakar doogẽ: Tolayitse, a Tola yagense. Ypvitse, a Ypva yagense; Yasubitse, a Yasub yagense; Simronitse, a Simrõ yagense. Bãmb la a Isakar roogo. B zãng yaa tus pisoob la a naase la kobs-tã. (64 300) B sõda a Zabulõ roogẽ: Sereditse, a Serɛd yagense. Elonitse, a Elon yagense; Yaleyelitse, a Yaleyɛl yagense. Bãmb la a Zabulõ roogo. B zãng fãa yaa tus pisoobe la kobs-nu. (60 500) B sõda a Zozɛf roogẽ: a Manase la Efrayim kamba. A Manase zakẽ: Makiritse, a Makir yagense. Le yaa Galaaditse, a Galaad yagense. Le paasa Yezeritse, a Yezɛr yagense; Elekitse, a Elɛk yagense. Asriyɛlitse, a Asriyɛl yagense; Sekemitse, a Sekem yagense; Semidayitse, a Semida yagense; Eferitse, a Efɛr yagense. A Efɛr biig a Selofead ka rog bi-ribl ye, yɩɩ kom-pugli bala: a Mala, a Noa, a Ogla, a Milka la a Tirsa. Bãmb la a Manase roogo. B zãng fãa yaa tus pis-nu la a yiibu la kobs-yopoe. (52 700) B sõda a Efrayim doogẽ: Sutelayitse, a Sutela yagense; Bekeritse, a Bekɛr yagense; Tanitse, a Tan yagense. A Sutela roogẽ: Eranitse, a Eran yagense; Bãmb la Efrayim roogo. B zãng fãa yaa tus pis-tã la a yiibu la kobs-nu. (32 500) B zãng fãa yaa a Zozɛf roogo. B sõda a Bẽnzame roogẽ: Beleyitse, a Bela yagense; Asebɛlitse, a Asebɛl yagense; Ayiramitse, a Ayiram yagense. Sufamitse, a Sufam yagense; Ufamitse, a Ufam yagense. B sõda a Bela roogẽ: Arditse, a Ard yagense; Naamanitse, a Naaman yagense. A Bẽnzame roog la bãmba. B zãng fãa yaa tus pis-naas la a nu la kobs-yoobe. (45 600) B sõda a Dã roogẽ: Suamitse, a Suam yagense; a rooga ka weel sags ye. Suamitsa zãng yɩɩ tus pisoob la a naase la kobs-naase. (64 400) B sõda a Asɛr roogẽ: Imnayitse, a Imna yagense; Isevitse, a Isevi yagense; Beriayitse, a Beriya yagense. A Beria roogẽ: Eberitse, a Ebɛr yagense; Malkiyɛlitse, a Malkiyɛl yagense. A Asɛr bi-pugla yʋʋr la a Sera. Bãmb la a Asɛr roogo. B zãng fãa yaa tus pis-nu la a tã la kobs-naase. (53 400) B sõda a Neftali roogẽ: Yasiyɛlitse, a Yasiyɛl yagense; Gunitse, a Guni yagense. Yeseritse, a Yesɛr yagense; Silemitse, a Silem yagense. Bãmb la a Neftali roogo. B zãng fãa yaa tus pis-naas la a nu la kobs-naase. (45 400) Dɩlla Israyɛl kamba zãng fãa yɩɩ tus kobs-yoob la a ye la kobs-yopoe la pis-tã. (601 730) Soaala-Wẽnd yeela a Moyiiz: «F na n tũu sagsa sõor n pʋɩ tẽngã. Saka neb sõor sã n ya wʋsgo, a soolma me yɩta wʋsgo. Ned kam fãa reegda pʋɩɩr sẽn zems ne a neba sõor. Sak ninga neb sẽn ya wʋsgo vẽenem yɩɩda sẽn pa taa yẽnda. Ne rẽ fãa, tẽnga pʋɩɩb na tũu poeere. B na n poeesame n bãng tẽns niyns sẽn na n yɩ sags bɛda la sags bõonesa rẽnna.» B sõda a Levi roogẽ: Gersonitse, a Gersõ yagense. Keyatitse, a Keyat yagense; Meraritse, a Merari yagense; B sõda a Levi roogẽ yɛsa: Libnitse, Ebronitse, Malitse, Musitse, Koreyitse. A Keyat n dog a Amram. A Amram paga ra boondame tɩ Zokbɛd; a yaa a Levi bi-pugla a sẽn dog Ezipt. Yaa ne a paga a Zokbɛd, la a Amram doga a Aarõ, a Moyiiz la b tão a Miriyam. A Aarõ kamb la a Nadab, a Abiyu, a Elazar la Itamar. Kũum looga ne a Nadab la a Abiyu tɩ b yõgna Wẽnd taoore wisdu b sẽn da ka tar sor n yõgne. Levitsa sõda tus pisi la a tã. B sõda kom-dibli sẽn ta kiuugu. B ra ka naag bãmb n sõd ne buuda taaba tɩ b ra pa tog n paam tẽn-kẽedg wa Israyɛl kamb a taab ye. A Moyiiz ne maan-kʋʋd a Elazar n sõd Israyɛl kambã a Moab pʋ-weesẽ, Zʋrdẽ kʋɩlg noor, Zeriko yegende. Bãmb sʋka ned pa zĩnd a Moyiiz ne maan-kʋʋda Aarõ sõadga sẽn maan Sinayi zĩ-peen-daagẽ wã ye. Wẽnd meng n da yeela bãmb dãmbã tɩ b fãa na n paa zĩ-peen-daagẽ wã. Neb a yiib bala n põse: a Yefune biig a Kalɛb la a Nun biig a Zozuwe. A Selofead kom-pugli n kolg ne b sokre. A Selofead yaa a Efɛr biiga, a Galaad biiga, a Makir biiga, a Manase biiga; b ra sõta a Zozɛf biig a Manase sakẽ. B yʋy wã: a Mala, a Noa, a Ogla, a Milka la a Tirsa. B wa-la a Moyiiz la maan-kʋʋd a Elazar la buuda kãsem-dãmb taoore, sɛka roog noore. B yeela woto: «Tõnd ba maana kaalem zĩ-peen-daagẽ. A ra ka naag ne a Kore neba sẽn yik zabr ne Soaala zĩ-peen-daagẽ wã ye. A ka rɩ ned a to yel-wẽnd taal n ki ye. A yaool n ka rog bi-ribl ye. D ba wã yʋʋr tõe n wa kell n menema woto a buudẽ, a sẽn ka rog bi-ribla yĩng bɩ? Kõ tõnd me soolem wala d ba wã saam-biisã.» A Moyiiz taasa Naaba-Wẽnd b koɛɛgã. La b yeela a Moyiiz: «A Selofead kom-pugli wã tara bʋʋm. Dɩlla kõ-b soolem wala b ba wã saam-biisã, kõ-ba b raboog pʋɩɩre. La yeel Israyɛl kamba: ‹Rao sã n wa ki n ka bas bi-ribla, a bi-pugl n deegd a raboog pʋɩɩre. A sã n pa tar bi-pugla bɩ a ba-biig reeg a pʋɩɩre. A sã n ka tar ba-biiga, bɩ y kõ a ba wã kẽem dãmb bɩ a yaopa. A ba wã sã n ka tar kẽem, n ka tar yao, ya rogma sẽn wat n pẽ ne ned ning n yɩɩd, a buudẽ wã, n deegd a pʋɩɩre.› La rẽ na n yɩɩ noor y sẽn na n deeg tɩ woto la noor m sẽn kõt a Moyiiz.» Wẽnnaam yeela a Moyiiz: «Dʋ Abarim tãnga n ges tẽng ning m sẽn kõt Israyɛl kamba. Dẽ poore fo me na loog n tɩ sak f saam-dãmba wala f kẽema, a Aarõ. Na n yɩɩ boto tɩ Sin zĩ-peen-daagẽ, neba sẽn waa n yik n baood m noorã, fo zãgsame tɩ f kõn wẽ pĩigã n pusg koom tɩ m sõmblema me puk b nifẽ ye.» Gomda zabr ning y sẽn zab ne m koom poorẽ Meriba, Kadɛs pĩisẽ, Sin zĩ-peen-daagẽ. Dẽ la a Moyiiz yeel Soaala-Wẽnde: «Bɩ m Soaalã, bɩ m Wẽnd ninga sẽn zãad b yemsa fãa yõorã bao ned n lʋɩɩs buuda taoore, ned sẽn na n kẽedẽ la a yit bãmb taoore, ned sẽn na n yiisd-b la a kẽesd-b, la woto Wẽnd kamba kõn pa wa piis sẽn ka tar pe-kɩɩm ye.» Ad Wẽnd sẽn leok a Moyiiz: «Yãk a Nun biig a Zozuwe, yaa ned yam sẽn bɩ. Yẽ zug la f na n tẽeg f nugu, n kõ-a tõogo, yẽ la f na n tall n kẽng a Elazar la buuda fãa taoore t'a reeg a tʋʋmna b nifẽ. Yãk f pãngã n kõ-a tɩ Israyɛl kamba reeg a noor. A na n bʋʋga a Elazar Wẽnd taoore t'a kos-b tɩ b wilg b raabo. La yaa wala Wẽnd sẽn datã la b na tũ, n yit la b kẽedẽ, yẽ ne Israyɛl buuda zãnga.» A Moyiiz maana wala Wẽnd sẽn wilg-a. A yãka a Zozuwe la a tall-a lame n wa a Elazar la buuda fãa taoore. A tẽega a nus a zugu n kẽes-a a tʋʋmnẽ, wala Wẽnd sẽn da wilg a Moyiiz. Soaala-Wẽnd goma ne a Moyiiz: t'a yeel Israyɛl kamba woto: «Modg-y la y ra bas tɩ wakata looge, tɩ y ka wa ne m kũuna ye. Ma me rɩɩb la bãmba la b yũ-nooga noogda m sũuri. Yeel-ba: ad kũun niyns y sẽn na kõ Soaala-Wẽnd beoog fãa: yaa yʋʋmd yend pe-bi a yiibu sẽn ka tar bãnde, yũ-noog maoong yĩnga. Kõta pe-bil a ye yibeoogo, a to zĩ-sobdo. Tũnugda ne zom wamde sẽn nag ne kaam lengre, oliv sẽn toos kaam lengre. Yaa yũ-noog maoong kãnga la b sẽn da kʋʋd Sinayi tãnga zugu beoog sẽn vẽeg fãa, rɩɩb ne yũ-noog sẽn maagd Soaala-Wẽnd sũuri. Yibeoog pe-bila sẽn tũnugd ne rãam ninga Soaala-Wẽnd yĩnga, sɛka roogẽ, yaa rã-toos wamde. Pe-bil a yiib soaba kʋʋda zĩ-sobdo. Zoma ne rãama sẽn tũnugdã ka teemd ye. Rɩɩb kãng n tar yũ-noogo n sigsd Soaala-Wẽnd sũuri. Vʋʋsg daare b wata ne yʋʋmd yend pe-bi a yiibu sẽn ka tar bãnde. Maoonga tũnugda ne zom wam a yi sẽn nag ne kaam leens a yi n paas rãama. Dẽ la vʋʋsg daar yũ-noog maoongã la a wat n paasda beoog-beoog fãa maoongã ne a bõn-tũnugdsã. Kiuug fãa sɩngrẽ, yaa yũ-noog maoong la y na n kʋ ne lols a yiibu, pe-raoog a ye la yʋʋmd yɛng pe-bi a yopoe la fãa yɩta rũms sẽn ka tar bãnde. Loalg fãa tũnugda ne zom wam a tã sẽn nag ne kaam. Pe-raooga tũnugda ne zom wam a yi sẽn nag ne kaam. Pe-bil fãa tũnugda ne zom wamde sẽn nag ne kaam. Yaa maoong sẽn tar yũ-noog n sigsd Wẽnd sũuri, rɩɩb sẽn noom-ba. Maanda sẽn na n tũnug ne bũmb niynsã la woto: loalga yaa rãam wamd pogbre, pe-raooga yaa wũmbli a yiibu, pe-bil yaa wũmbla. Woto la ki-paal fãa ne a kũuni tɩ zĩig liki. Ka yĩmd yel-wẽnd sugr kosg maoonga boɛɛg ye; yẽ yaa beoog-beoog fãa bũmbu, la tũnugda ne rãam. Pak kibsa maanda Soaala-Wẽnd waoogr yĩnga, pipi kiuugã, piig la a naas raare. Kiu-kãng piig la a nu raare yaa kibsa. Rasem a yopoe pʋgẽ, b na n dɩ bur sẽn ka lob bɩll ye. Pipi raara na n yɩɩ tig-raag Soaala-Wẽnd yĩnga. Baraare tʋʋmd ka tʋmd ye. Ad-y sẽn na n wa ne bũmb ninga, yũ-noog maoong yĩnga: lols a yiibu, pe-raoogo, la yʋʋmd yɛng pe-bi a yopoe. Fãa yɩta rũms sẽn ka tar bãnd ye. Tũnugda ne zom sẽn nag ne kaam. Loalg yaa zom wam a tã, pe-raoog yaa zom wam a yi. Pe-bi a yopoe wã tũnugda ne zom wũmbl rũng fãa. Paasda boɛɛg y yel-wẽna sugr kosg yĩnga. Dẽ fãa wat n paasa ne yibeoog fãa maoonga sẽn ka tõe n viigã. Beoog fãa, rasem a yopoe pʋgẽ, y na n waa ne Soaala-Wẽnd dɩɩbo, rɩɩb sẽn tar yũ-noog n sigsd b sũuri. Y na n naaga ne beoog fãa maoongã la a rãama. Daar a yopoe soaba y na tigim taab Soaala-Wẽnd taoore; baraare y kõn tʋm tʋʋmd ye. Kooda rɩgsg kibsa raare, y sã n na n wa kõ Soaala-Wẽnd y kood rẽemsã, y na n le tigma taab Wẽnd taoore. Baraare y kõn tʋm tʋʋmd ye. Y na kʋ yũ-noog maoongo n sigs Wẽnd sũuri: lols a yi, pe-raoogo la yʋʋmd yɛng pe-bi a yopoe. Maanda tũnugda ne zom sẽn nag ne kaam. Loalg fãa yaa zom wam a tã, pe-raooga yaa zom wam a yi, pe-bil fãa yaa zom wũmbla. Paasda boɛɛg sẽn na n kʋ y yel-wẽna sugr kosg yĩnga. Rẽ fãa wat n paasa beoog-beoog fãa maoonga la a bõn-tũnugdsã. Rũng fãa yaa rũng sẽn ka tar bãnde. Kiuug a yopoe soaba, a pipi raare, y na n maana tigsg Soaala-Wẽnd taoore. Baraare y kõn tʋm tʋʋmd ye. Y na n kõo Wẽnd yũ-noog maoongo: loalg a ye, pe-raoog a ye la yʋʋmd yɛng pe-bi a yopoe. Yaa rũms sẽn ka tar bãnde. Tũnugda ne zom sẽn nag ne kaam: loalga yaa zom wam a tã, pe-raooga yaa zom wam a yi; sã n ya pe-bi wã, pe-bil fãa yaa wũmbla. N le paas boɛɛg, y yel-wẽna sugr kosg yĩnga, tɩ b pa gomd ki-paalg fãa maoongã la beoog-beoog fãa maoongã ne b sẽn tũnugd ne rasem kam bũmb ningã. Dẽ la rɩɩb sẽn tar yũ-noogo n sigsd Wẽnd sũuri. Kiuug a yopoe soaba piig raare, y na n maana tig-raaga. Y na n loe y noor la y kõn tʋm tʋʋmd ye. Y na n kʋʋ yũ-noog maoong Soaala-Wẽnd yĩnga: loalg a ye, pe-raoog a ye la yʋʋmd yɛng pe-bi a yopoe. Na n yɩɩ rũms sẽn ka tar bãnd ye. Tũnugda ne zom sẽn nag ne kaam: loalga yaa zom wam a tã, pe-raooga yaa zom wam a yi, pe-bil fãa yaa zom wũmbla. Le paasda boɛɛg sẽn na n kʋ yel-wẽna sugr kosg yĩnga, n le paas a Azazɛl boɛɛgã, sugr kosg ra kãsengã boɛɛg, n le paas beoog-beoog fãa maoongã ne a zoma la a rãama. Kiuug a yopoe soaba piig la a nu raare, y na n maana tig-raag Soaala-Wẽnd yĩnga. Baraare tʋʋmd ka tʋmd ye. Na n yɩɩ gilgr la y na n gilg Soaala-Wẽnd yĩnga rasem a yopoe tõre. Y sẽn na n kõ Soaala-Wẽnd baraare n sigs b sũuri na n yɩɩ lols piig la a tãabo, pe-raad a yiibu, la yʋʋmd yɛng pe-bi piig la a naase. Na n yɩɩ rũms sẽn ka tar bãnd ye. Tũnugda ne zom sẽn nag ne kaam: loalg fãa yaa zom wam a tã, pe-raoog fãa yaa zom wam a yi, pe-bil fãa, la yaa bãmb piig la a naase, pe-bil fãa yaa zom wũmbla. Le paasda yel-wẽnd sugr kosg boɛɛgã la beoog-beoog fãa maoongã ne a zoma la a rãama. Daar a yiib soaba sẽn na n pʋgã, lols piig la a yiibu, pe-raad a yiibu, yʋʋmd yɛng pe-bi piig la a naase. Fãa yaa rũms sẽn ka tar bãnd ye. Tũnugda rũng fãa ne a zom la rãam wa sẽn maan dasem kam. Paasda boɛɛg yel-wẽnd sugr kosg yĩnga ne beoog-beoog fãa maoongã ne a zoma la a rãama. Daar a tãab soaba sẽn na n pʋgã: Lols piig la a ye, pe-raad a yi, yʋʋmd yɛng pe-bi piig la a naase. Fãa yaa rũms sẽn ka tar bãnde. Rũng fãa tũnugda ne a rasem kam zom la a rãam. Le paasda boɛɛg yel-wẽnd sugr kosg yĩnga la beoog-beoog fãa maoongã ne a zoma la a rãama. Daar a naas soaba sẽn na n pʋgã: lols piiga, pe-raad a yi, yʋʋmd yɛng pe-bi piig la a naase. Fãa yaa rũms sẽn ka tar bãnd ye. Rũng fãa tũnugda ne a rasem kam zom la rãam. Le paasda boɛɛg yel-wẽnd sugr kosg yĩnga la beoog-beoog fãa maoongã ne a zoma la a rãama. Daar a nu soaba sẽn na n pʋgã: lols a wɛ, pe-raad a yi la yʋʋmd yɛng pe-bi piig la a naase. Fãa yaa rũms sẽn ka tar bãnd ye. Rũng fãa tũnugda ne a rasem kam zom la rãam Le paasda boɛɛg yel-wẽnd sugr kosg yĩnga la beoog beoog fãa maoongã ne a zoma la a rãama. Daar a yoob soaba sẽn na n pʋgã: lols a nii, pe-raad a yiibu la yʋʋmd yɛng pe-bi piig la a naase. Fãa yaa rũms sẽn ka tar bãnd ye. Rũng fãa tũnugda ne a rasem kam zom la rãam. Le paasda boɛɛg yel-wẽnd sugr kosg yĩnga la beoog-beoog fãa maoongã ne a zoma la a rãama. Daar a yopoe soaba sẽn na n pʋgã: lols a yopoe, pe-raad a yiibu la yʋʋmd yɛng pe-bi piig la a naase. Fãa yaa rũms sẽn ka tar bãnd ye. Rũng fãa tũnugda ne a rasem kam zom la a rãam. Le paasda boɛɛg yel-wẽnd sugr kosg yĩnga la beoog-beoog fãa maoongã ne a zoma la a rãama. Daar a nii soaba sẽn na n pʋgã na n yɩɩ kibsa baasgo. Tʋʋmd kõn tʋm baraar ye. Y na n kõo Soaala rɩɩb sẽn tar yũ-noog n sigsd b sũuri: loalga, pe-raoogo la yʋʋmd yɛng pe-bi a yopoe. Fãa yaa rũms sẽn ka tar bãnde ye. Rũng fãa tũnugda ne a rasem kam zom la rãam. Le paasda boɛɛg, yel-wẽnd sugr kosg yĩnga la beoog-beoog fãa maoongã ne a zoma la a rãama. Yaa woto la y na n kõ Soaala-Wẽnd b sẽn wilg yãmb dasem niynsã. B pa gomd da-zaan-daar maanda ye: pʋleng maand, yamleoog maand, yũ-noog maand, zom la rãam kũuni, laafi kosg maand.» A Moyiiz taasa Israyɛl kambã, Soaala-Wẽnd sẽn yeel-a t'a wilg-b bũmb ning fãa. A Moyiiz yeela Israyɛl kãsem-dãmba: «Rao sã n pʋlem Soaala-Wẽnde, bɩ a sã n wẽene t'a na maan woto la woto, a modg n tũ a noor sẽn yiis bũmb ninga. Bi-pugl yʋʋm sẽn nan ka sɩlge la a ket a ba zakẽ, sã n pʋlem Soaala-Wẽnde bɩ a sã n wẽen t'a na maan woto la woto, t'a ba wã yaool n wa wʋm marsã t'a pʋlmame bɩ a wẽename t'a na maan woto la woto, la a ka yeel-a tɩ bũmb ye, bi-pugla pʋleng yɛsame, a tog n pidsa a pʋlengo. La a ba wã sã n yeel, a sẽn bãng pʋlenga raare, t'a ka sake, bi-pugla sẽn pʋlem bũmb ninga, a sẽn wẽen t'a na man bũmb ninga lebga bõn-faoogo. Soaala-Wẽnd kõn ning-a taal ye t'a ba wã ka sak ye. Sã n mikame tɩ pag sẽn waa n kẽ kãadem wakato, a ra zoe n loe-la a meng ne pʋlengo bɩ ne wẽenego sẽn yi a noorẽ, la a sɩda sẽn waa n bãng raare, a ka yeel tɩ bũmb ye, paga tog n kell n pidsa a noora gomde; a pʋlenga yɛsame. La a sɩda sẽn waa n bãng raare n yeel tɩ rẽ pa tõe ye, paga me bãng t'a sẽn pʋlem bũmb ningã, a sẽn wẽen t'a na n maana woto la woto wã lebga bõn-faoogo la Soaala-Wẽnd taoore taal yi-la a zugu. Paga sã n ya pʋg-kõore, bɩ a sɩd n yiis-a, a sẽn pʋlem bũmb ning fãa yɛsame. Sã n yaa a sɩd zakẽ la paga pʋlem Soaala-Wẽnde, la a sɩd zakẽ la a wẽen t'a na n maana woto la woto, t'a sɩda wa bãng n yaool n ka yeel-a tɩ bũmb ye, n ka yeel-a tɩ rẽ pa tõe ye, a pʋlenga yɛsame, a tog n kell n pidsa a noor gomde. La sɩda sẽn bãng raare n yeel t'a pa sake, paga pʋlenga lebga bõn-faoogo, a sɩda sẽn pa saka yĩnga, Wẽnd taoore taal yi-la a zugu. Sẽn ya wẽeneg ninga, sẽn ya pʋleng ning la pag pʋlem yã n yet t'a na n loe-la a noore, a sɩda sẽn yeel n yɛse. A sɩda sã n ka yeel-a tɩ bũmb tɩ beoog vẽege, a tog n pidsa a sẽn yiis a noorẽ. Sɩda rata pʋlenga pidsgu la a ka yeel tɩ bũmbu, a sẽn bãng raara tɛka. A sã n kaoos n yaool n wa wilg paga t'a ka sake, taala fãa bee sɩda zugu.» Woto la noy niyns Soaala-Wẽnd sẽn taas a Moyiiz, pag ne a sɩd poorẽ, ba ne a bi-pugl poorẽ, a bi-pugl sẽn ket n be a zakẽ. Soaala-Wẽnd yeela a Moyiiz: «Rok Israyɛl kamba sũuri ne b bɛɛba, ne Madianitsã. Dẽ poore f na loog n tɩ sak f saam-dãmba,» Dẽ me la a Moyiiz yeel zãma wã: «Bɩ yãmb neb kẽer bob zabre. B tak zabr ne a Madiã n dok Soaala-Wẽnd sũuri. A Israyɛl sak fãa pʋgẽ, yaa neb tusr n na n bob zabre.» Woto wã b yãka tãb-biis tusr sak fãa pʋgẽ. Yaa tus piig la a yiibu n bob zabre. A Moyiiz yiisa tãb-biis tusr sak fãa pʋgẽ n tʋm-b zabre, bãmb ne maan-kʋʋd a Elazar biig, a Pinas. Yẽ n da zãad a nusẽ, sɛka roog teed kẽere la tõntõodã sẽn peebd kẽn la yalsg wakatã. B boba zabr ne a Madiã wala Soaala-Wẽnd sẽn da wilg a Moyiiz la b kʋʋ Madiã tãb-biisa fãa. B naaga Madianitsa dĩm dãmb n kʋ: a Evi, a Rekem, a Sur, a Ur la a Reva. Bãmb la Madiã dĩm dãmb a nu wã. B kʋʋ ne sʋʋga a Beor biig a Balaam. Israyɛl kamba yõga Madiã pagba ne b kamba n sui roogo. B looga ne b rũmsa gilli, b looga ne b laogo. B yõoga Madianitsa tẽns fãa la b pʋt-rot fãa bugum. B looga ne b laoga fãa, ne neba la rũmsã b sẽn yõgã. B waa ne pagba la kamba, ne rũmsã la b sẽn wʋka fãa. B waa ne-ba a Moyiiz taoore, maan-kʋʋd a Elazar la zãma wã fãa taoore. Yaa a Moab pʋ-weesẽ, Zʋrdẽ kʋɩlg noore, Zeriko yegende la b tall fãa n kuli. A Moyiiz ne a Elazar la buuda kãsem dãmba yi sikã n seg-ba. A Moyiiz sũur puuga ne tãb-biisa taoor dãmba, ne neb tusr tãnsoaben-dãmba, ne neb koabg tãnsoaben-dãmba, b sẽn yi zabrã n wa. A yeel-b lame: «Yaa bõe tɩ y bas pagba vɩɩse n pa kʋ-ba? Yaool n yaa bãmb n kelg a Balaam saglgo n yik n tus Israyɛl kamba tɩ b tõdg Soaala-Wẽnd, Peor wɩbda wakat, tɩ tẽn-kũum na n loog ne-bã. Dẽ yĩngã, kʋ-y bi-ribl fãa, kʋ-y pag fãa sẽn mi raoa. Y sẽn na n kees y yĩnga, y sẽn na n bas vɩɩse, yaa kom-pugli niyns sẽn ka mi b rapa. Yãmb mens na n paa sika kudgẽ rasem a yopoe. Neb niyns fãa sẽn kʋ, neb niyns fãa sẽn sɩɩs kũum, y na yɩlg y mens ra-yɩta la a yopoe raare. Pagb nins y sẽn pag rooga me na n yɩlga boto. Y na n pegsa y futu, y gãndo, bũmb ning fãa sẽn maan ne bʋ-kõbdo, sẽn pees ne raoogo.» Maan-kʋʋd a Elazar yeela tãb-biisa sẽn tɩ zab-bã: «Ad noy-niyns Soaala-Wẽnd sẽn kõ a Moyiiz: Sãnem, wanzurfu, zũudu, kutu, waasdo la namdo yaa bũmb sẽn tõe n los bugmẽ. Dɩlla yaa bãmb la y tõe n los bugmẽ tɩ b yɩlge. Tõe n yɩlga ne ko-sõng me. Sẽn ka tõe n yɩlg ne bugum fãa pekda ne koom. Y pegsda y fut daar a yopoe soaba n lebg yɩlma. Dẽ poor marsã y tõe n kẽe y sikẽ.» Soaala-Wẽnd yeela a Moyiiz: «Foo ne maan-kʋʋd a Elazar la kãsem-dãmba, sõd-y y sẽn paame, ninsaalba wala rũmsi. Pʋɩɩra na n pʋɩɩme tɩ sẽn kẽng-b zabrã la sẽn ka kẽng-b zabrã paam bũmbu. Y na reeg yaood Wẽnd yĩnga tãb-biisa pʋɩɩrẽ: ned a ye neb kobs-nu zugu, rũng a ye, rũms kobs-nu zugu, sã n ya niisi, bõeense la rũm-bõonese. Yaa tãb-biisa pʋɩɩrẽ la b na n yãke la b na n dɩk-b lame n kɩs maan-kʋʋd a Elazar wala Wẽnd pʋɩɩr. F na n kẽe neb a taaba pʋɩɩrẽ n yãk n kõ Levitsa sẽn tʋmd Soaala sɛka roogẽ: ned a ye, neb pis-nu zugu, rũng a ye rũms pis-nu zugu, rũmb bɛd wala rũm-bõonese.» A Moyiiz ne maan-kʋʋd a Elazar maana wa Wẽnd sẽn wilg-ba. Sẽn bob-b zabrã lɛɛg n wa ne rũmsi b sẽn paam n yõge, la rũmsa sẽn kell sõor la woto: rũm-bõonese wa piis la bʋʋse, tus kobs-yoob la pisopoe la a nu. (675 000) Rũm-bɛda, niisa yaa tus pisopoe la a yi (72 000) Bõeensa yaa tus pisoob la a ye. (61 000) Sã n ya ne kom-pugli sẽn ka mi b rapã, yaa bãmb tus pis-tã la a yi. (32 000) Tãb-biisa reega rũm-bõonese, piis la bʋʋse tus kobs-tã la pis-tã la a yopoe la kobs-nu. (337 500) La b kẽe be n yãk Soaala pʋɩɩre: kobs-yoob la pisopoe la a nu. Tãb-biisa le reega niis tus pis-tã la a yoobe; sẽn yãk Soaala-Wẽnd yĩnga yaa niis pisopoe la a yiibu. B reega bõeens tus pis-tã la kobs-nu. (30 500) Sẽn yãk Soaala-Wẽnd yĩnga yaa bõeens pisoob la a ye. B reega ninsaalb tus piig la a yoobe; sẽn yãk Soaala-Wẽnd yĩng yaa neb pis-tã la a yiibu. Sẽn yãk Wẽnd yĩngã, a Moyiiz reega fãa n kɩs a Elazar wala Wẽnd sẽn da kõ a noore. A Moyiiz sẽn kees Israyɛl kamb a taaba yĩnga ta-la a sẽn yãk n pʋɩ sẽn bob-b zabrã. Dẽnda bãmb me reega piis la bʋʋs tus kobs-tã la pis-tã la a yopoe la kobs-nu. (337 500) Niis yɩɩ tus pis-tã la a yoobe, bõeens tus pis-tã la kobs-nu, ninsaalb tus piig la a yoobe. A Moyiiz kẽe sẽn yãk n kõ Israyɛl kamba pʋga n le wãdg nin-yend neb pis-nu zugu, rũng a ye rũms pis-nu zugu n kõ Levitsa sẽn tʋmd sɛka roogẽ. Rẽ tũu wala b sẽn da wilg a Moyiiz. Sẽn lʋɩ-b tãb-biisa taoore n ya neb tusr bɩ neb koabg tãnsoaben-dãmba kolga a Moyiiz n yeel-a: «Y yemsa sõda b tãb-biisa fãa la ned ba a ye ka pa zabrẽ ye. Yaa rẽ yĩng la d wat Wẽnd taoore tɩ maan-kʋʋdba reeg d kũuna n tees Wẽnd la b kos-b tɩ b bas b kamba beegr fãa taale. Yaa rẽ la d wat ne d sẽn dees bɛɛba nengẽ sãnem teedo: zũya, kagse, nug-bĩnsi, tʋb-londo, te bobdi.» A Moyiiz ne maan-kʋʋd a Elazar reega b sãnema kũuna. Da yaa teed sẽn maneg n dõoge. Sãnema sẽn deeg Soaala-Wẽnd yĩnga taa neb a nii zɩɩbo; yaa sẽn lʋɩ-b tãb-biisa taoore n ya neb tusr bɩ koabg tãnsoaben-dãmba n wa ne kũun kãense. Tãb-biig fãa ra zɛ a sẽn paame la a ra zɛ a meng yĩnga. A Moyiiz ne maan-kʋʋd a Elazar n deeg b kũuna. B tall-b lame wa sɛka roogẽ la b paa be n na n yɩ Wẽnd pʋ-tẽer nekr bũmbu. A Rubẽ la a Gad kamba rũms la b wuba ra yaa wʋsgo. B gesa Yasɛr la Galaad tẽnsã la b yãeeme tɩ yaa zĩis sẽn tog ne gʋʋlgo. A Rubẽ la a Gad kamba waa n yãenda a Moyiiz la maan-kʋʋd a Elazar la taoor dãmbã. B yeel-b lame: «Ges-y Atarot tẽnga, Dibõ, Yasɛr, Nimra, Esbõ, Eleale, Sevam, Nebo la Bal-Meõ. Yaa tẽns Soaala-Wẽnd sẽn wẽ n kõ a Israyɛl la sẽn tog ne rũms gʋʋlgo la y yemsa tara rũms wʋsgo. Y sã n dat tõnd ne neere bɩ y rɩk-ba n kõ y yemsã wala b zu-noog pʋɩɩre. Da kos tõnd tɩ d rʋʋg Zʋrdẽ kʋɩlg ye.» A Moyiiz yeela a Gad la Rubẽ kamba: «Wao! Y saam-biisa na n boba zabre tɩ yãmb yaool n paad ka wɛ! Bõe tɩ y na n woog Israyɛl kamba raoodo, n woog b raood tɩ b zãgs tẽnga kõom, n zãgs tɩ b kõn kẽ tẽng ning Soaala-Wẽnd sẽn kãabd bãmbã? Yaa woto la y ba rãmba maan yã, m sẽn waa n tʋm-b Kadɛs-Barnea tɩ b tɩ kaag tẽngã n bãng a nengã. B kẽn n ta Eskol bãg-faaga n kaag tẽngã la b ka gom n kõ Israyɛl kamba raood ye, b ka pirs-b ye; wa-y tɩ d zoe n deng taab kãabga tẽngẽ wã, ka zĩnd ye. Dẽ me la Soaala-Wẽnd sũur puug baraare la b kãaba neb niyns fãa yʋʋm sẽn ta pisi bɩ yɩɩd rẽnna Ezipt yiiba wakatã, tɩ bãmb nin-yend meng naoor kõn tabg tẽnga ye, tẽng ning b sẽn da yaool n kãab a Abraam, a Izaak la a Zakoob. B kãab-b-la boto b sẽn zãgs tẽeba yĩnga. Sẽn na n tõog n yãend-b kãabg tẽngã na n yɩ-la a Yefune biig a Kalɛb, Kenizitga, la a Nun biig a Zozuwe, tɩ bãmb pʋga Soaalã n ka sãmb ye. Wẽnd sũur puuga ne a Israyɛl tɩ b kɩt t'a gilim zĩ-peen-daagẽ wã yʋʋm pis-naase al tɩ sẽn ka tũ b Soaala raaba fãa wa looge. La yãmba, kɩɩsdb buudu, y reega y ba rãmb zĩiga n na n maan tɩ Soaala-Wẽnd sũur yik ne a Israyɛl. Y sã n zãgs kẽnde, yaa a Israyɛl tõr n na n kaoos zĩ-peen-daagẽ ka la yaa buuda zãng wãab la y segenda.» A Gad la a Rubẽ kamba le kolga a Moyiiz n yeel-a: «D na n mee wuba d piisa yĩnga, n me rot d kamb yĩnga. La tõnd n na n dɩka d zab-teedo n lʋɩ Israyɛl kamba taoore, al tɩ b wa kẽ b soolmẽ. D kamba na n paa ka, tãnsoaben-dot pʋsẽ n tɩlg bɛɛbã sẽn gũbgã. D ka na n leb n lɛɛg n wa d rotẽ tɩ Israyɛl kamba fãa ka kẽ b soolmẽ ye. Tõnd pʋɩɩr kõn naag ne bãmb rẽnna, Zʋrdẽ rʋʋnd ye tɩ tõnd buud pʋɩɩr yaa ka, ka Zʋrdẽ rʋʋnd ye.» A Moyiiz leok-b lame: «Y sã n maan wa y sẽn togsã, y sã n bob zabre Wẽnd taoore, y tãb-biisa fãa sã n dʋʋg Zʋrdẽ kʋɩlga n dig bɛɛba zãnga y taoore, y sã n yaas tɩ bɛɛba fãa kong pãnga tɩ y yaool n leb y tẽngẽ, y kõn dɩ Wẽnd la Israyɛl taal ye, la y sẽn dat n kẽ tẽng ninga na yɩ Soaala-Wẽnd sẽn kõ yãmba. La y sã n ka maan boto, yaa Soaala-Wẽnd la y na n beege, yaa bãmb taal la y na n paame. Me-y tẽns n kẽes y kamba, me-y wuba y piis yĩnga, la pids-y pʋleng ning y sẽn pʋlma.» A Gad la a Rubẽ kamba yeela a Moyiiz: «D na n tũu yãmb noore. D pagb la d kamb la d rũmsa na n paa ka, Galaad tẽnsẽ, la tõnd fãa na n boba zabre ne Wẽnd sõngre, wala y sẽn date.» A Moyiiz yãenda koɛɛg n leok maan-kʋʋd a Elazar la a Nun biig a Zozuwe la a Israyɛl kãsem-dãmbã. A yeel-b lame: «A Gad la a Rubẽ kamba sã n dʋʋg Zʋrdẽ kʋɩlga ne yãmba, b sã n bob Soaala taoore n na n tɩ zabe, tẽnga sã n wa lebg y soolem, y na kõ-b Galaad tẽng wala b buud pʋɩɩre. La b sã n ka bob zabr ne yãmba, yɩta Kanaã tẽng la bãmb me na n paam b buud pʋɩɩr yãmb sʋka.» A Gad la a Rubẽ kamba leokame: «D na n maana Soaala-Wẽnd sẽn yeel-d tɩ d maan bũmb ningã. Tõnd na n boba Wẽnd taoore. D na n saaga Kanaã tẽnga n zabe, la d buuda pʋɩɩr yẽ bee Zʋrdẽ fool ka.» A Moyiiz kõ-la a Gad la Rubẽ kamba, n paas a Zozɛf biig a Manase bogr a ye wã, Amoritsa dĩma, a Siyõ, soolem, la Bazã dĩma, a Og, soolem. A kõ-b-la vẽenema, dota la pʋtã la tẽn-toosã. A Gad kamba le maneg n mee Dibõ, Atarot, Arowɛr, Atrot-Sofã, Yasɛr, Zogbaa, Bɛt-Nimra la Bɛt-Arã. B mee tẽns sẽn tõe n zab n fãag b mense, b mee wuba b piisa yĩnga. A Rubẽ kamba le maneg n mee Esbõ, Eleale, Kiriyatayim, Nebo, Baal-Meõ, la tẽn bãmb yʋy tekame. B mee Sibma me. Yʋ paal la b bao n kõ tẽns niyns b sẽn le maneg n me wã. A Manase biig a Makir kẽnga Galaad n dig Amoritsã n deeg b tẽnse. A Moyiiz kõ-la a Makir, a Manase biiga, Galaad tẽn-peelem t'a me n kẽ. A Yayir, a Manase biig a to, tɩ zab n deega b pʋt-rotã la a bool-b lame t'a Yayir pʋt-roto. A Nova tɩ zab n deega Kenat la a pʋd-a-la a meng yʋʋre: Nova. Ad tẽns niyns a Israyɛl kamba sẽn tɩ kẽ b sẽn yi Ezipt tẽnga ne b tãb-biisi t'a Moyiiz ne a Aarõ be b taoore. A Moyiiz rɩka b sẽn yals tẽng ning fãa yʋʋre, a sã n wa yit be ne Soaala-Wẽnd noor n na n looge. Tẽn-bãmb la woto: B yii Ramsɛs pipi kiuugã, kiuuga piig la a nu raare. Pak yɩ tɩ zaamẽ, la Israyɛl kamba paam sore n loog b loogre, Ezipt rãmba nifẽ, Ezipt rãmba ra mumda b pagba pipi biig woo sẽn ki. Soaala-Wẽnd n da wa ne b kũum. B kʋ-b lame n dok b sũuri ne Ezipt wẽn-yaalsã. Israyɛl kamba yii Ramsɛs n tɩ yals Sukot. N yi be n tɩ yals Etam, we-raooga sɩngrẽ, n lɛɛg n wa Pi-Ayirot sẽn tot ne Baal-Sefõ, n wẽ b sik Migdol. B yii Ayirot n dʋʋg mogrã n ta zĩ-peen-daagẽ. B kẽna Etam zĩ-peen-daagẽ wã ra-yɩten-daare, n wa wẽ b sik Mara. B sẽn yi Mara b taa Elim n yãend buls piig la a yi la koms tɩɩs pisopoe, tɩ b wẽ b sika be. B yii Elim n wa yals Rudum Mogre. N yi be n wa yals Sin zĩ-peen-daagẽ. B yii be n wa yals Dofka. B sẽn yi Dofka b waa n yalsa Alus. N yi Alus n wa yals Refidim, la be b pa paam koom n yũ ye. B yii Refidim n wa wẽ b sik Sinayi. B yii be n wa yals Kibrot-Taava. N yi be n wa yals Aserot. N yi be n wa yals Ritma. N yi Ritma n wa Rimon-Perɛk. B yii Rimon-Perɛk n wa Libna. N yi be n wa Risa. B yii Risa n wa Keelata. N yi Keelata n dʋ Sefɛr tãnga. B yii be n wa Arada. N yi be n wa Makelot. N yi be n wa Taat. N yi Taat n wa Tera. N yi Tera n wa Mitka. N yi be n wa Asmona. N yi be n wa Moserot. N yi be n wa Bene-Yakã. N yi be n wa Or-Gidgad. N yi be n wa Zotbata. N yi be n wa Abrona. N yi be n wa Esiõ-Gebɛr. N yi be n wa Sin zĩ-peen-daagẽ, n wa Kadɛs N yi be n wa Or Tãnga, Edom dãmb toaagẽ. Wẽnd kõo maan-kʋʋd a Aarõ noor t'a rʋ Or Tãnga la yaa be la a maan kaalem. Da yaa yʋʋm pis-naase la Israyɛl kamba ra yi Ezipt tẽnga. Yɩɩ kiuug a nu soaba pipi raare. A Aarõ sẽn waa n ki Or Tãnga t'a yʋʋm yaa koabg la pisi la a tã. Sasa kãnga la Arad dĩma sẽn da kẽed Negɛb, wʋm Israyɛl kamba waoongo. Israyɛl kamba yii Or Tãnga n wa Salmona. N yi be n wa Ypmo. N yi be n wa Obot. N yi be n wa Iye-Abarim, Moab rãmb toaagẽ. B yii be n wa Dibõ-Gad. B yii be n wa Almon-Diblatayim. N yi be n wa Abarim tãmsẽ, be tota Nebo tãnga. B siga Abarim tãmse n wa Moab pʋ-weesẽ, Zʋrdẽ kʋɩlg noore, Zeriko yegende. B wẽ b sik Zʋrdẽ noore, Bɛt-Yesimot la Abɛl-Sitim tẽnsʋka. Soaala-Wẽnd goma woto ne a Moyiiz Moab pʋ-weesẽ, Zʋrdẽ kʋɩlg noor, Zeriko yegende: «Togs Israyɛl kamba: y sã n wa rʋʋg Zʋrdẽ n digd Kanaã tẽnga, bɩ y menes y taoore tẽnga rãmb fãa, n menes b sẽn pees ne kuga, b sẽn dõog ne zũudu, n sãam zĩis niyns b sẽn dʋ n me b maan-kugã. Yãmb na n deega tẽngã n sooge tɩ m dɩk-a lame n kõ yãmb tɩ y sooge. Y na n poeesame n pʋɩ tẽngã, sak-saka. Saka neb sã n ya wʋsgo, a tẽn-peelma me na n yɩɩ wʋsgo; saka sã n ya bilfu a soolma me zemsdame bala. Ned kam fãa paada poeera sẽn kẽes-a; ned kam fãa paada a buuda pʋɩɩrẽ. Y sã n pa menes tẽnga rãmb fãa y taoore, bãng-y tɩ y sẽn na n kees b rãmbã na n lebga gõos n leo y nini, n lebg gõos n po y lʋga. Bãmb n na n tak zabr ne yãmb beoog sẽn vẽege y meng tẽngẽ. La yãmb n na n deeg sɩbgr ning m sẽn da rat n sɩbg bã.» Soaala-Wẽnd goma ne a Moyiiz woto: «Kõ Israyɛl kamba noy-kãensã: Y sã n kẽ Kanaã tẽnga, ad-y sẽn na n sooge, ad-y y tẽnga ne a toose. Nug rɩtg toaaga yaa Sin we-raoogo, n yegd Edom. Yaanga toaaga sɩngda Yamsem mogrã sɛtmẽ. Toaaga na n gõdga Akrabim kunkubrã, namsa kunkubrã n tees Sin, n tũud Kadɛs-Barnea nug rɩtgo n tɩ yi be n tees Asar-Adar n ta Asmo. Sã n ta Asmo toaaga kɩllda bilfu n tees Ezipt kʋɩlga, n wat Tẽnsʋk mogrã. Nin-taoore toaaga yaa Tẽnsʋk mogrã. Nug goabga toaaga sɩngda Tẽnsʋk mogrã n tees Or Tãnga. N yi Or Tãnga n digd Lebo-Amat, n tat Sedad. N yi be n tees Zifrõ, n tat Asar-Eyinan. Nug goabg toaaga la rẽ. Yaang toaaga yita Asar-Eyinan n tees Sefã. N tɩ yi be n sig Ribla, Ayin yaanga, n ket n sigd n wa tãag Kineret yaanga. N ket n sigd n wa tãag Zʋrdẽ kʋɩlga n digd Yamsem mogre. Woto n na yɩɩ y tẽnga ne a toose.» A Moyiiz le yeela Israyɛl kamba woto: «Tẽngã y sẽn na n poees n pʋɩ wã, Soaala-Wẽnd sẽn yet tɩ b pʋɩ ne buuda wɛ wã la a Manase bogr a ye wã me la woto. Y tẽrame t'a Rubẽ ne a kamba, a Gad ne a kamba la a Manase bogr a to wã zoe n deega b pʋɩɩre. Sɩda, a Gad la a Rubẽ la a Manase bogra reega b pʋɩɩr Zʋrdẽ kʋɩlga noor, Zeriko yegende. Bãmb pa rʋʋgd Zʋrdẽ ye.» Wẽnnaam goma ne a Moyiiz: «Ad neb niyns sẽn na n sõng-y tɩ y pʋɩ tẽnga ne taaba: Maan-kʋʋd a Elazar, la a Nun biig a Zozuwe. Y na n paasa sak fãa kãsem a ye t'a sõng yã. Ad nin-bãmb yʋy: A Zɩɩda roogẽ, a Yefune biig a Kalɛb. A Simeõ roogẽ, a Amiyud biig a Semuwɛl. A Bẽnzame roogẽ, a Kislõ biig a Elidad. A Dã roogẽ, a Zogli biig a Buki. A Zozɛf biig a Manase roogẽ, a Efod biig a Aniyɛl. A Zozɛf biig a Efrayim roogẽ, a Siftã biig a Kemuwɛl. A Zabulõ roogẽ, a Parnak biig a Elisafã. A Isakar roogẽ, a Azã biig a Paltiyɛl. A Asɛr roogẽ, a Selomi biig a Ayiwud; A Neftali roogẽ, a Amiyud biig a Pedayɛl.» Yaa nin-bãmba la Soaala-Wẽnd kõ noor tɩ b sõng n pʋɩ Kanaã tẽnga ne a Israyɛl kambã. Soaala-Wẽnd goma woto ne a Moyiiz Moab pʋ-weesẽ, Zʋrdẽ kʋɩlg noore, Zeriko yegende: «Togs Israyɛl kamba tɩ b kẽ b pʋɩɩrẽ n yãk vẽenem n kõ Levitsa tɩ b me n kẽ. Y na n kõ-b-la pʋt me n yegle. B na n tii rot n kẽedẽ; pʋta yaa b rũmsa wãbneg yĩnga, b rũm-bɛd la rũm-bõones yĩnga. Vẽenema Levitsa sẽn na n deeg b pʋt yĩnga la rũmsa wãbneg yĩnga na n taka kãntɩɩs tusri n gilg tẽngã. Woto tẽnga la vẽenema sẽn bas n gilgã magda kãntɩɩs tus a yi goabg la rɩtgo, kãntɩɩs tus a yi yaang la taoore. Yaa tẽns a yoob la y na n kõ Levitsã tɩ b lebg soondg tẽnse. Na n yalsame tɩ nin-kʋʋd tõe n wa kẽe be n põse. Y wat n wa paasa tẽns pis-naas la a yiibu, Levitsa mens yĩnga. Dɩlla sã n sõd b tẽnsa zãnga yaa pis-naas la a nii. Tẽnsã Israyɛl kamba sẽn na n yãk n kõ Levitsa sõor tũuda ne bãmb meng rooga pʋɩɩr bedrem. Yãkda wʋsg bi-bilfu, n kõ Levitsã f meng pʋɩɩr sã n yaa wʋsg bɩ bilfu.» Soaala-Wẽnd yeela a Moyiiz: «Wilg Israyɛl kamba woto: Y sã n wa rʋʋg Zʋrdẽ kʋɩlgã n na kẽ Kanaã, y na yãk tẽnse sẽn na n yɩ soondg tẽnse. Ned sã n yĩd n kʋ a to, a tõe n wa soonda be. Be la y na n kẽ n tɩlg sẽn baooda n na n kʋ yãmb n dok a sũuri. Nin-kʋʋd pa kʋʋd n lebse tɩ b pa reng n bʋ a bʋʋdo buuda taoor ye. Tẽnsa sẽn na n yãk wa soondg tẽnsã na n yɩɩ bãmb b yoobe, a tãab Kanaã tẽnga, a tãab sẽn ka rʋʋg-b Zʋrdẽ kʋɩlga yĩnga. Tẽn-bãmb yaa tẽnga dãmba, bɩ sẽn noka a Israyɛl buudu bɩ sãan loagdga yĩnga. Ned ninga fãa sẽn kʋ a to ne yĩdgu tõe n wa soonda be. Ned sã n wẽ a to ne kut n kʋ, a soab yaa nin-kʋʋda. La b na n kʋʋ yẽnda me. Sã n yaa kugr sẽn tõe n kʋ ned la a soaba lobgre tɩ tũ ne yõore, yẽ soab yaa nin-kʋʋda la b na n kʋʋ yẽnda me. Sã n yaa raoog sẽn tõe n kʋ ned la a soab lobgre tɩ tũ ne yõore, yẽ soab yaa nin-kʋʋda la b na n kʋʋ yẽnda me. B sẽn kʋ a soaba sã n tar ned sẽn tõe n daag zɩɩm n lebs zɩɩma sẽn daagã, nin-kãng n kʋʋd nin-kʋʋdã. Ned sã n wẽ a sẽn kis a soaba, bɩ a sã n lobg-a-la ne bũmb n kʋ pʋ-toogo, a sã n maand beem ne a, n wẽ-a ne nug gilgu n kʋ, b kʋʋda yẽnd soaba t'a yaa nin-kʋʋda. Ned ninga sẽn tõe n daag zɩɩm n dol zɩɩma sã n seg-a fãa, a kʋʋd-a lame. La sã n yaa wa yell n date tɩ beem kaẽ, tɩ pʋ-toog kaẽ, tɩ wẽeda bɩ lobgrã wa ne kũum, wala f tusa doog zug kugr t'a lʋɩ n kʋ ned f sẽn da ka ne la beem me ka be sʋka, pʋ-tooga sẽn ka zĩndã, buuda zãng na n tũ noy-niyns sẽn yals yell a woto poorẽ n paam koɛɛg n leok nin-kʋʋda la sẽn tõe n daaga zɩɩm n lebsã. Buudã n fãagd nin-kʋʋdã n lebs-a a soondga tẽngẽ. La sẽn maana yella paada be n tãag maan-kʋʋd kãsenga kaalem. Nin-kʋʋda sã n belg a menga n yi soondga tẽngẽ, tɩ sẽn tõe n daag zɩɩm n dol zɩɩma soab yãend-a n kʋ, taal ka be a zug ye. Dɩlla nin-kʋʋda paada a soondga zĩigẽ n tãag maan-kʋʋd kãsenga kũum. Maan-kʋʋd kãsenga loogr poore, a tõe n leba a tẽngẽ. Y sẽn be tẽng ning fãa y na n tũu no-kãnga zamaan woo zamaana. Ned sã n kʋ a to, b pa yãkd nin-kʋʋda yõore tɩ b ka paam neb wʋsg kaset ye. B pa kʋʋd ned nin-yend kaset yĩng ye. Nin-kʋʋd sã n tog ne kũum b ka tõe n deeg yaood n bas-a vɩɩg ye. B kʋʋd-a lame bala. B ka tõe n deeg yaood me n bas nin-kʋʋd t'a kẽ soondg tẽngẽ ye; b ka tõe n bas-a t'a leb a tẽngẽ tɩ maan-kʋʋd kãsenga ket n vɩ ye. Da rẽgem-y y tẽnga ye. Zɩɩm yaa bũmb sẽn dẽgemd tẽnga. La yaa sẽn daaga zɩɩma soab zɩɩm n pekd tẽngã. Da rẽgem-y tẽng ning y sẽn kẽeda ye, tɩ m be y sʋka. Maam la Israyɛl kamba Wẽnde, la m be-la b sʋka.» Neb n waa n yãend a Moyiiz. Yaa a Galaad rooga kãsem-dãmba. A Galaad yaa a Makir biiga, a Manase biiga, a Zozɛf roogẽ. B goma ne a Moyiiz la Israyɛl taoor dãmba: B goma woto: «Naaba-Wẽnd sẽn waa n yeel-foo tɩ f maan poeere n pʋɩ tẽnga n kõ Israyɛl sak fãa a tẽn-peelem, b yeelame me tɩ f yãk f saam-biig a Selofead vẽenem n kõ a kom-pugli wã. La Ade, kom-pugli wã sã n yi kãadem ne roog a to kom-dibli, yaa d ba wã pʋɩɩr, b sẽn da poees n kõ-dã n na n wooge. Yʋʋmd pis-nu wã beoog sã n wa vẽege, d rabooga pʋɩɩr na n tɩ paasa d sɩdb rãmba rẽnna.» La Soaala yeela a Moyiiz t'a wilg Israyɛl kamba woto: «A Zozɛf rooga kamb tara bʋʋm. Ad Wẽnd sẽn kõt-b noor ninga a Selofead kamb poorẽ. B na n yii kãadem ne b sẽn dat a soaba, buuda rooga ye n da teem ye. Woto rooga pʋɩɩra kõn yi roog a ye n kẽ roog a to ye. Israyɛl biig fãa na n pala a ba raboogẽ. Bi-pugl fãa sẽn na n dɩ a ba faado, kõn le tõog n yi kãadem ne ned tɩ ka a ba wã sakẽ ye. Woto Israyɛl roog fãa pʋɩɩr na n kell n paa ne-a. Pʋɩɩr ka yit roog a ye n kẽ roog a to rẽnnẽ ye. Israyɛl biig ba a ye kõn bas t'a ba pʋɩɩr woog ba bilfr ye.» A Selofead kamba maana wala Soaala-Wẽnd sẽn da yeel a Moyiiz. A Selofead kom-pugli wã bao sɩdba b ba wã saam-biisa sʋka. Kom-pugli wã yʋy: a Mala, a Tirsa, a Ogla, a Milka la a Noa. B sɩdb rãmba yɩ-la a Zozɛf yagense, a Manase kamba la woto b pʋɩɩra ka long roog ye. Woto la noy-niyns Soaala-Wẽnd sẽn tũ a Moyiiz n taas Israyɛl kamba, Moab pʋ-weesẽ, Zʋrdẽ kʋɩlga noor, Zeriko yegende. Seb kãnga togsda sagls niyns a Moyiiz sẽn sagl Israyɛl kamba fãa b sẽn waa n nan ka rʋʋg Zʋrdẽ kʋɩlgã, n be Suf pʋ-weesẽ, Parã we-raoogẽ. B ra bee tẽn-bãmba sʋka: Tofɛl, Labã, Aserot la Di-Zaab. F sã n be Oreb n dat Kadɛs-Barnea la yaa Seyir tãnga sor la f dɩk yã, f na n kẽna rasem piig la a ye. Ade, yʋʋm sẽn pid pis-naase Ezipt yiiba poore, kiuug piig la a ye wã, kiuuga pipi raare, a Moyiiz le tẽega Israyɛl kambã Soaala-Wẽnd sẽn da yeel-a t'a taas-b bũmb ningã. Yɩ-la a sẽn waa n zab n tõog Amoritsa dĩma a Siyõ sẽn da kẽed Esbõ tẽnga, la a zab n tõog, Edreyi tẽnga, Bazã dĩm a Og, sẽn da kẽed Astarot. A Moyiiz talla Wẽnnaam noora zãmsgo Moab tẽn-peelmẽ. Wakat kãng t'a Israyɛl nan pa rʋʋg Zʋrdẽ kʋɩlga ye. A Moyiiz saglsa la woto: «Wẽnnaam d Soaala goma ne tõnd woto Oreb tãng zugu: ‹Y sẽn be tãn-kãnga sɛɛga yaa n kaoosame. Le sɩng-y kẽn marsã; dʋ-y tãmsã, Amoritsa sẽn zao zĩig ningã, saag-y tẽns niyns sẽn yeg-b bãmbã. Tũ-y Zʋrdẽ foollã n digd Yamsem mogrã, n dʋʋd tãmsã, n sigd kunkubã, n yegd Negɛb la Tẽnsʋk Mogrã, n tees Kanaã la Libã, n tees Efrat kʋɩl-kãsengã. Ade, m kõt-y-la tẽngã. Tɩ reeg-y tẽn-kãng n kẽ tɩ yaa tẽn- kãng la m sẽn wẽen tɩ m na kõ-la y ba-rãmbã, a Abraam, a Izaak, a Zakoob, la bãmb loogr poore, b yagensã.› Dẽ me la m yeel yã: ‹M ka tõe n zɩ yãmb m ye ye. Wẽnnaam, y Soaala, kɩtame tɩ y fɩɩge, la rũnna wã y sõora taa yĩngr ãdse. M datẽ lame tɩ Soaala, y yaab rãmba Wẽnda, le paas y sõora naoor tusri la b ning-y bark wala b sẽn kãabe. La yãmb meng neeme tɩ maam m ye ka tõe n welg y yɛla ye, m ka tõe n tʋk y mo-beedã, y zabã, y no-koɛɛma ye. Bɩ sak fãa wa ne a neba, neb yam sẽn weke, sẽn vẽene, sẽn tar bãngr zulunga, tɩ m dɩk-ba n lʋɩɩs y taoore.› M sẽn gom-y woto wã, y leok-m lame: ‹Y sẽn yet tɩ d maan bũmb ninga yaa sõmbo.› Dẽ me la m tũus y sagsẽ wã neb sẽn da zoe n ya kãsem-dãmba, neb sẽn ka mi pirpir ye, neb bãngr sẽn pidi, la m kõ-b-la naam: bãmb kẽer n lebg neb tusr nanamse, kẽer pis-nu nanamse, kẽer piig nanamse, n le paas-b sõangdb buud toor-toore. Dẽ sẽn maane, ad-m sẽn yeel y bʋ-kaoodbã: ‹Yãmb n na n kelg y saam-biisa koeese la y welg ned kam fãa yell ne zemsgo, ned ne a saam-biiga, ned ne sãan sẽn vɩ ne-a. Da bʋ-y m mi-a-zagl bʋʋd ye. Kelg-y nin-bõonesa wa nin-bɛda. Da zoe-y ned nif ye, tɩ Wẽnd la yãmb bʋ-kaooda. Yell sã n beẽ t'a welgr ya toogo bɩ y bas-a ne maam.› Wakat kãnga m wilg-y-la y sẽn tog maan fãa. Dẽ poore d paama Soaala noore la d yii Oreb n pãrg zĩ-peen-daag sẽn yalem la sẽn dɩt neba wala y sẽn tẽrã. D teesa Amoritsa tãnga. D sẽn ta Kadɛs-Barnea, m yeel-y-la be: ‹Y taa tãnga, Amoritsa tãnga, Soaala-Wẽnd sẽn kõt tõndã. Ade, Wẽnnaam, y Soaala, rɩka tẽngã n kõ yã. Dʋ-y, soog-y tẽngã tɩ Wẽnnaam, y yaab rãmba Wẽnda, da kãab-a-la yãmba. Da maan-y dabeem ye! Da bas-y tɩ bũmb woog y raood ye!› Wakat kãnga y kolg n yeel-m lame: ‹D tʋm neb tɩ b reng taoore n kaag weooga zãng n kõ-do la b lɛɛg n wa wilg-d sor ning d sẽn tog n dɩke, la tẽns niyns d sẽn na n tãage.› M gesame tɩ rẽ segdame la yãmb sʋka m yãka neb piig la a yiibu, sak fãa ne a neda. B sẽn wẽnemd n dʋ tãngã b taa Eskol gõnegõtã, n gilg n sege. B bao tẽnga tɩɩs biisi n zã n wa la b togsa b sẽn yãende. B yeelame: ‹Wẽnnaam, d Wẽnda, sẽn kõt tõnd tẽng ninga yaa tẽn-sõngo!› Ne rẽ fãa yãmb zãgsa Soaala-Wẽnd noor n yeel tɩ y kõn kẽng ye. La y kẽ-la y gãagẽ n yõk b wɩdga n yetẽ: ‹Yaa b sẽn dɩt beem ne tõnda yĩnga la Soaala-Wẽnd yiis tõnd Ezipt tẽnga! B rat n dɩka tõnd n kõ Amoritsã tɩ b kʋ-d zãngã. Pʋs n yaa bõe yĩng la d na n kẽng be? D saam-biisa wooga d raoodo tɩ yaa woto la b gomyã: Tẽnga neb pãng la b sõor yɩɩda tõndo. B kẽeda tẽn-bɛda, tẽns sẽn me n gũbg ne lalse la sẽn zao yĩngri. B tol n yãenda Anakitsa be!› Dẽ la m yeel yã: ‹Da rig-y rabeem ye, da rig-y b taoor ye! Wẽnnaam y Soaala lʋɩ-la y taoor n kẽnda, bãmb n na n zab y zĩigẽ wala b sẽn maan Ezipt tẽnga, y fãa nifẽ. B na n maana wala zĩ-peen-daagẽ, n buk-y wala ned sẽn buk a biiga, n wa tãag y sora baasgo, kaalẽ.› Ne rẽ fãa y kell n pa tẽ Soaala, y Wẽnnaama ye. Yaool n ya bãmb n da kẽnd y taoore, sora zugu, n na n bao y sik zĩiga, bãmb vẽenem n da kẽnd y taoor yʋngo n wilgd-y sore, bãmb sawadga maasmẽ la y ra kẽnd wĩntoogo. Soaala-Wẽnd wʋma y sẽn da gomdã, b sũur puugame tɩ b wẽen woto: ‹Tẽn-noog ning m sẽn kãab y ba-rãmbã, yãmb ned ba a ye, zamaan yoog kãnga ned ba a ye kõn yãend-a ye. Nin-yend bal n na n yãend-a, yaa a Yefune biig a Kalɛb. Yẽ na n yãend-a lame, yẽnda ne a kamba la m na n dɩk-a n kõ, tɩ yẽ tũ Wẽnd n pa tol n bʋdg ye.› Yãmb yĩnga Soaala-Wẽnd sũur tol n puuga ne maam menga, tɩ b yeel-ma: ‹Fo menga kõn kẽ tẽnga ye! Sã n yaa a Nun biig a Zozuwe, sẽn sõngda fooma, yẽ na kẽ. Bɩ f keng a raoodo tɩ yẽ n na n kẽes budã a tẽngẽ.› Dẽ poore Soaala goma ne yãmb gill woto: ‹Y sẽn da gomd tɩ b na n yõga y kambã n kẽes yembdã, kamb niyns sẽn nan ka mi b nensã, yaa bãmb n na n kẽ tẽngã ne a Zozuwe. Yaa bãmb la m na n dɩk tẽngã n kõ tɩ b soog-a. Sã n ya yãmba, wẽnemd-y n tees zĩ-peen-daagã, dɩk-y Rudum Mogr sore.› Yaa woto la y leok maam: ‹Tõnd beega Soaala! D na n bobame n tak zabre, wala d Soaala sẽn kõ-d noorã.› La sɩda, y fãa bobame n tẽed tɩ y na n dʋʋ tãnga naana-naana. La Wẽnd yeel-m lame: ‹Wilg-b tɩ b pa na n dʋ ye! Tɩ zabr pa na n zab ye, tɩ m yi-la y poorẽ! Da bao-y tɩ y bɛɛba wa tõog-y ye.› M gomame la y pa kelg-m ye, y pa kelgd Wẽnnaam gomd ye, y rʋʋ tãnga ne wʋglem. Amoritsa yii n seg-y-la b tãnga zugu la b pʋga yãmb wala sĩ-lolle, b varga yãmb Seyir n ta Orma. Y lɛɛg n waa Soaala-Wẽnd taoor ne nintãm, la b pa kelg-y koɛɛg ye, b tʋbr pa wʋm y gomd ye. Yaa rẽ la y kaoos Kadɛs wala y sẽn kaoosã. D wẽnemda d nens n tees we-raoogo, d dɩka Rudum Mogr sore, wala d Wẽnda sẽn da wilg-ma, la d yõka Seyir tãnga gilgri, n tar gilgri. Soaala-Wẽnd waa n yeel-m-la raar a ye: ‹Yaa raar zãr la y sẽn tar tãnga gilgri, tees-y nug goabg marsã! Yeel-y neba woto: Pãrg-y y saam-biis a Ezayu kamba tẽnse tɩ yaa Seyir la b kẽeda. B na n yãee yãmb n dig rabeem, la maan-y gũusgu. Da maan-y zabr ne b ye, tɩ y ka na n paam fɩ b tẽn-peelmẽ ye. Y kõn paam sẽn sek y nao pʋg tabgr ye, tɩ m dɩka Seyir tãng n kõ a Ezayu. Y na n daa rɩɩbã y sẽn na n dɩ wã, n da kooma y sẽn na n yũ wã. Wẽnnaam, y Soaala, ninga y tʋʋma fãa barka, b yãenda y kẽn we-raoogẽ ka. Yaa yʋʋm pis-naas tõre la y Soaala be ne yãmba la bũmb ka paoog-y ye.› D yeelame tɩ d kõn tũ Seyir, d saam-biis a Ezayu kamba sẽn kẽed tẽng ningã. D basa bãg-faaga sora rɩkre, d gila Elat la Esiõ-Gebɛr. D teema sore, d wẽnemdame n tees Moab zĩ-peen-daaga. Soaala-Wẽnd yeel-m lame: ‹Da saag n zab ne a Moab ye, da bob tãp ye, f kõn paam bũmb n soog a tẽn-peelmẽ ye, tɩ yaa Ar la m dɩk n kõ a Lot kamba.› (Emitsa n da kẽed tẽn-kãnga. Yaa neb yʋʋr sẽn da yi, tɩ b sõor ya ka tɛka, n leb n ya nin-daad wa Anakitse. Kẽer da naagd-b-la ne Refayitse, tɩ kẽer me mams-b ne Anakitsẽ la Moab rãmb ra boond-b lame tɩ Emitse. Yaa wa Oritsa sẽn da kẽed Seyir, la a Ezayu kamba ra waa n dig-b lame n yiisi, n sɛɛs-b zãnga, n deeg-b tẽngã, wala a Israyɛl me sẽn maan ne tẽng ning Wẽnd sẽn kõ-a t'a sooge.) Marsã yik-y n dɩk y sore, gãndg-y Zerɛd kʋɩl-bɛɛgã. Tɩ tõnd na n sɩd gãndg Zerɛd kʋɩlgã. D sẽn da yi Kadɛs-Barnea n sɩng kẽna, yaa yʋʋm pis-tã la a nii la d maan yã n yaool n dʋʋg Zerɛd kʋɩl-bɛɛga. Dẽ tɩ sẽn da tõe n tak-b zabr wakat kãng fãa da loogame. Soaala-Wẽnd meng ra pʋs n kãab-b-la rẽnna. Soaala-Wẽnd meng ra tusd-b-la ne b nug n yiisd-b n togend b bɛɛba n wa sɛɛs-b zãnga. Sẽn zĩnd b zaba sɩngrẽ sẽn waa n loog zãnga, la Soaala-Wẽnd sẽn yeel-m: ‹Dũnna f na n gãndga Moab toaaga, n kẽ Ar tẽn-peelmẽ. F na n kẽe Amon toaagẽ. Da sɩng zabr ne a neba ye, da zẽk zab teoog b zug ye. F kõn paam bũmb Amonitsa tẽn-peelmẽ ye tɩ m dɩk-a lame n kõ a Lot t'a sooge.› B ra geta tẽn-bãmb me wa Refayits tẽnse. Sɩda Refayitsã n deng n zĩnd be la Amonitsa ra boond-b lame tɩ Zamzumitse. Bãmb me yʋʋr da yiime, tɩ b sõor ya ka tɛka, n ya nin-daad wa Anakitse, la Wẽnd basame tɩ Amonitsa sɛɛs-b zãnga n deeg b zĩiga. Yɩɩ boto yɛs la Soaala-Wẽnd maan ne a Edom, a Ezayu kamba sẽn da kẽed Seyir. B menesa Oritsa bãmb taoore, n deeg b zĩig n kẽedẽ n tãag rũnna. Yɩɩ boto me ne Avitsa sẽn da kẽed Gaza tẽn-bõonese. Yaa neb sẽn yi Kaftor n waa sɛɛs bãmb n deeg b zĩig n kẽedẽ. Soaala waa n yeelame: ‹Yik-y n dɩk sore, gãndg-y Arno kʋɩl-bɛɛga, yãmb nugẽ la m na n dɩk n sagl Amoritga Siyõ, Esbõ dĩma, yẽ ne a soolma zãnga. Tɩ sɩng-y zabr ne-a, tɩ reeg-y yã a soolma. Rũnda tɛka m na kɩtame tɩ dũni wã neba fãa rigd la b yɛɛsd y taoore. Y yʋʋra sã n pʋd bala, b na n saoo kalwaare.› M zĩnda Kedemot n tʋm neb Esbõ dĩm a Siyõ nengẽ, m tʋm-b-la ne laafi koeese: ‹Bas-y tɩ m tũ y tẽnga so-raoogã n looge! Dĩma so-raooga la m na n tũ, n ka bʋdg goabg bɩ rɩtg ye. Dɩɩba m sẽn na n dɩ wã, wa ne tɩ m da; kooma m sẽn na n yũ wã, wa ne tɩ m da. Bas bala tɩ m tũ f tẽnga ne nao n looge. A Ezayu kamba sẽn kẽed Seyir, Moabitsa sẽn kẽed Ar, bãmb fãa kõ-d-la sor tɩ d looge. D datame n dʋʋg Zʋrdẽ kʋɩlgã n tãag tẽng ning d Wẽnda sẽn kõt-d tɩ d sooge.› La Esbõ dĩm a Siyõ ka sak tɩ d loog ye, tɩ Soaala, y Wẽnnaama ra kidba a sũuri, sẽn na yɩlẽ n dɩk-a n sagl y nugẽ naana naana, tẽng ning y sẽn be a soab pʋgẽ rũnna. La Soaala-Wẽnd yeel-m lame: ‹Ade, m zoe n dɩkda a Siyõ ne a tẽngã n kõt-fo, sɩng tẽnsa soogre sɩng ne a Siyõ rẽnna.› A Siyõ yii ne a neba n na seg-d la a tak zabr ne-do, Yaas tẽnga. La Wẽnnaam, d Soaala, rɩk-a lame n kõ-do; d zabame n tõog-a, yẽ ne a kamba la a tãb-biisa fãa. D kẽ-la a tẽnsã, n pʋlem tɩ d kõn kees bũmb b pʋgẽ ye: pagba, rapa la kom-bõonego. Bũmb ba a ye ka kees ye. D sẽn kees yaa b rũmsã la b laogã, wala d sẽn maan tẽns a taabã d sẽn pãb n deegã. Sẽn sɩng Arowɛr sẽn be Arno kʋɩl-bɛɛga noore, n ta tẽng ning sẽn be bogda pʋga, n ta Galaad, tẽng ka zĩnd t'a soogr yɩ toog ne-d ye. Wẽnnaam d Soaala dɩka fãa n bas d nugẽ. Yaa Amon kamba tẽng bala la d ka pẽnege. D pa sɩɩs tẽns nins sẽn be Yabok yaanga ye, d pa pẽneg tẽns niyns sẽn be tãmsa zuta ye. Soaala-Wẽnd sẽn yet tɩ d da sɩɩs b rãmbã, d pa sɩɩs ye. D wẽnemdame n tees Bazã tãmse, tɩ Bazã dĩm a Og yi n seg-d Edreyi, n na zab ne-do, yẽnda ne a tãb-biisa gilli. Soaala-Wẽnd yeel-m lame: ‹Da maan dabeem ne-a ye, tɩ m dɩk-a lame n sagl f nusẽ, yẽ ne a tãb-biisã la a tẽngã. Maan ne yẽnd me wala f sẽn maan ne Amoritsa dĩm a Siyõ, sẽn da kẽed Esbõ.› La Naaba-Wẽnd le rɩka a Og, Bazã dĩma ne a neba la a tẽn-peelma, n sagl d nusẽ, la d tõog-b-la zãnga n pa tol n kees bũmb ye. Tõnd deega b tẽnsã n pa londg tẽng ba a ye. Tẽnsa taa pisoobe, yaa sẽn be-b Argob, Bazã tẽn-peelmẽ, a Og soolmẽ. B tẽnsa gill mee n gũbga lals sẽn ya wogd-wogdo, tɩ b kʋɩlensa ya yalemse la b pagd neere, tɩ tẽn-bõones karg n gũbg-ba. Tõnd pʋlmame tɩ d kõn kees bũmb b pʋsẽ, wala d sẽn maan ne Esbõ dĩm, a Siyõ, tẽnse. Rapa, pagba la kamba, fãa kiime. D sooga b laoga la b rũmsã zãnga. Woto wã yaa Amoritsa dĩm dãmb a yiib soolmẽ la d da kẽ yã. Yaa Arno kʋɩl-bɛɛga la Ermo tãnga sʋka, Zʋrdẽ foolle. (Sidõ rãmba da boonda Ermo tãnga tɩ Siriõ, tɩ Amoritsa boond-a tɩ Senir.) D pãb n deega tẽnsa sẽn da zao tãn-bi wã, Galaad tõre, Bazã tõre n ta Salka la Edreyi, Bazã dĩm a Og soolem. Bazã dĩm, a Og, yaool n da yaa Refayitsa sẽn keesa nin-yende. Kug la b pees wa koglg a mumb yĩnga, Raba, Amonitsa na-tẽnga. Koglga woglma yaa kãntɩɩs a wɛ, a yalma yaa kãntɩɩs a naase, kãntɩɩs wa d fãa rẽnna. Dɩlla Tẽns niyns d sẽn wẽ n deege wakat kãnga yɩɩ tẽn-peelma fãa sẽn yɛdg Arowɛr nug goabg, Arno kʋɩl-bɛɛga foolle. M kõ-la a Rubẽ la a Gad yagense Galaad tãmsa pʋɩ-sʋka ne b tẽnsã. Galaad bogr a to wã la Bazã tõre, a Og tẽn-kʋda, m dɩk-b lame n kõ a Manase bogrã. Tẽnsa sẽn yɛdg Argob n ta Bazã ra boondame tɩ Refayitsa tẽn-peelem. A Manase biig a Yayir n soog Argob tẽnsã n ta Gesuritsa la Maakaritsa tẽnse. A menga yʋʋr la a rɩk n kõ Bazã tẽns kãense la rũnda menga b ket n boond-b lame t'a Yayir pʋ-weese. M dɩka Galaad n kõ a Makir, a Manase biiga. A Rubẽ la a Gad yagensa reega tẽns niyns sẽn be Galaad ne Arno sʋka. Toaag yẽne la Arno kʋɩl-bɛɛga, nug rɩtgo. Yabok n ya toaag ne Amonitsã. Nin-taoor toaaga rɩka Zʋrdẽ foolle, Zenezarɛt mogre n ta Yamsem mogre, n tat Pisga tãng sẽn zao yaanga. Wakat kãnga m taasa sẽn paam-b tẽnsa Zʋrdẽ yegendã no-kãnga: ‹Yaa yãmb rũnda la y beoog Wẽndã n dɩk Zʋrdẽ yegend tẽnsã n kõ yã. Woto wã y tãb-biisa fãa na n boba zabre n dʋʋg Zʋrdẽ, n lʋɩ y saam-biisa taoore. Y pagba la y kamba la y rũmsã sẽn labsã, bãmb bala n na n pa m sẽn kõ-y tẽns niynsa pʋgẽ. Y mens na n paa ne y saam-biisa n tãag bãmb me sẽn wat n kẽ b soolmẽ, n kẽ tẽns niyns Wẽnnaam y Soaala sẽn na n kõ bãmb me Zʋrdẽ rʋʋnde. Dẽ poor la y na n lɛɛg n wa m sẽn kõ-y tẽns niynsã pʋgẽ.› Wakat kãng me la m yeel a Zozuwe: ‹Fo yãenda ne f meng nifu bũmb ning fãa Soaala-Wẽnd sẽn maan ne dĩm dãmb a yiibã. Bãng tɩ Soaala-Wẽnd na n kell n maana boto ne dĩm niyns fãa b sẽn na n seg Zʋrdẽ rʋʋnde. Da zoe-y rabeem ye: yaa Naaba-Wẽnd meng n zabd n sõngd-y.› Dẽ me la maam a Moyiiz yõk Wẽnd sɛɛga. M goma woto: ‹Soaala-Wẽnnaam, yãmb sɩng n pukda y sõgna nifẽ, y ziir la y pãnga. D yãeta wẽnd a to yɛ, tẽng bɩ saag zugu, sẽn tar y pãnga la a tõe n tʋm y sẽn tʋma? M kotame n dʋʋg kʋɩlgã, tɩ m nif teeg tẽng ning sẽn be Zʋrdẽ rʋʋnde, n yãend Libã tãnga!› Bãng-y tɩ yãmb yĩnga, Wẽnd sũur yika ne maam wʋsgo, tɩ b pa kelg-m ye. B waa n leokame bala: ‹Sekame, da le gom dẽ yell ye! Dʋ Pisga tãnga zugu, wẽnemd n ges nin-taoore la goabga, n ges rɩtg la yaanga, ges ne f nin pãnga: ad-f kõn dʋʋg Zʋrdẽ kʋɩlga sẽn dɩg tɩ f neẽ wã ye! Wilg a Zozuwe f sẽn dat t'a maane, pids-a ne raood la pãnga tɩ yẽnda n na n lʋɩ neba taoor n dʋʋg Zʋrdẽ la yẽ n na n sõng-b tɩ b soog tẽngã f sẽn ne wã.› Dẽ tɛka, tõnd paa tãnga sɛɛga tɩ Bɛt-Peor yɛs d taoore. Kelg marsã, Israyɛl, noy niyns y sẽn na tũ zamaan ne zamaana. M meng m toor n na zãms-y tɩ y reeg-ba, la woto y na vɩɩnd la y tɩ kẽ tẽng ning y yaab rãmb Wẽnda sẽn kõt-y. M sẽn kõt-y noy-niynsã, gũus-y tɩ gomd da paas ye. Gũus-y me tɩ bũmb da yiis ye tɩ woto la y na n tũ d Soaala-Wẽnnaama raabo. Y nif yãenda Naaba-Wẽnd sẽn maan bũmb ning Baal-Peor. Neb niyns fãa sẽn pʋg-b Peor Baal, ad-y Wẽnnaam, y Soaala, yiisa b fãa nin-vɩɩs sʋka. Y sẽn ket n vɩ rũnna wã, yaa y fãa sẽn tũ tõnd Wẽndã. Noy niyns y sẽn na n deeg zamaan woo zamaana, m wilgd-b-la yãmb wala Wẽnnaam, m Soaala, sẽn yet tɩ m wilg yã. Reeg-y la y tũ-ba tẽng ning y sẽn dabd n na n tɩ sooga pʋgẽ. Reeg-y noya, tũ-y-ba. Woto buud a taaba sã n wa bãng y sẽn tũud noy niynsã b na ges-y wa neb sẽn tar yam la sẽn mi vɩɩm, b na yeele: ‹Sɩlem la yam bala la buud kãseng kãnga pidi n yɛsẽ!› La sɩda, baobg bʋg la bu-kãseng a woto buud be, n tar a wẽnd dãmb sẽn pẽnegd-a wala tõnd Wẽnnaam sẽn pẽnegd tõnd wakat ning fãa d sẽn boond-ba? D yãeta bu-kãseng yɛ t'a noya la a rog-n-mik tũud soy tɩrse wala m sẽn kõt yãmb b rãmb rũnda wã? Maan-y gũusgu ne y mense, gũus-y n da yĩm y sẽn yãend y vɩɩma fãa pʋgẽ ye, bũmb da yi y pʋ-tẽerẽ ye, togs-y-ba y kamb la y yagense. Israyɛl, fo ra yɛsa yĩngri, Wẽnnaam y Soaala taoore, Oreb tãnga sɛɛga, raar ning Soaala sẽn yeel-ma: ‹Tigim nebã m taoore tɩ m gom ne-ba n zãms-b tɩ b zoe m nifu, b vɩɩm tɛka, la b me zãms-a b kamba.› Baraare y sɩd kolgame, y yalsa yĩngr, tãnga sɛɛga. Tãnga ra wita bugum. Bugma ra pãrga sawad tagdã la yʋnga likã, n tãoos n kul yĩngri. Soaala-Wẽnd zĩnda bugma sʋka n gom ne yã. Koɛɛg n da sãte, y ra wʋmda koɛɛgã la y ra ka mi a sẽn yitẽ ye. Koɛɛga bal la y ra wʋmda. B taas-y-la b zooda koeese, yaa noya piigã b sẽn yet tɩ y reeg la y tũ la b gʋls-b-la kug wals a yiib zugu. Sã n ya maam, Soaala yeel-m lame tɩ m zãms-y noya y sẽn na n tũ wakat buud fãa tẽng ning y sẽn dabd n na tɩ reeg n soogã. Maan-y gũusgu! Tẽeg-y tɩ Oreb tãnga zugu, Soaala-Wẽnd zĩnda bugum pʋgẽ n gom ne yãmba la badaare y ka yãend bũmb sẽn tar wẽnd yalẽ ye. Da sak-y yel-beedã n kõ y meng wẽn-naands ye. Da mams-y bũmb wẽnego n lɛɛg n yeel tɩ bõn-kãng la yãmb wẽnd ye. Da yɩ paga, da yɩ rao wẽneg ye. Da yɩ tẽng zug rũng ba a ye wẽneg ye, da yɩ yĩngr luiil ba a ye wẽneg ye. Da yɩ rũng kɩdg sẽn vuud tẽng buud ba a ye wẽneg ye, da yɩ zĩif sẽn dugd koomẽ buud ba a ye wẽneg ye. Da saag-y n ges yĩngri, n ges wĩntoogo, kiuugu, ãdse, bũmb ning fãa sẽn yãgd yĩngri la y lɛɛg n bas tɩ b belg yã tɩ y wõgemd b taoore n yɩ b sõgen ye. Wẽnnaam, y Soaala, basa manes kãens ne dũni wã ninsaalb a taaba. Sã n ya yãmba, y Wẽnnaam, y Soaala, kɩtame tɩ y yi Ezipt tẽnga, b yiisa yãmb bug-toalgẽ, bug-toagl sẽn yẽnegd kut menga, n dɩk-y n maan b buudu la b pʋɩɩre, wala y sẽn yaa a soab rũnna wã. Yãmb yĩnga, Wẽnnaam puuga b sũur ne maam n tol n kãab-m tɩ m kõn dʋʋg Zʋrdẽ kʋɩlgã la m kõn kẽ tẽn-noog ning y Soaala sẽn kõt-y t'a yɩ y soolma ye. M na kii ka, n ka rʋʋg Zʋrdẽ ye. Yãmb yẽ na rʋʋg kʋɩlgã n tɩ reeg y tẽn-noogã n kẽ. Gũus-y n da yĩm tɩ Wẽnnaam, y Soaala, yõga zood ne yãmb ye. Gũus-y n da maan sẽn kis wa fãa fãa n bao wẽneg n kõ bũmbu n yet tɩ yẽ la y wẽnd ye. Bãng-y tɩ Wẽnnaam, y Soaala, yaa bug vɛlga sẽn ka mi rɩ n kees ye la bãmb b ye tãa la yãmb Wẽnnaam la b kõn sak paoogre ye. Y sã n wa paam n kaoos y tẽngẽ wã bilfu, y sã n wa rog kamba, n dog yagense, y sã n wa kʋʋl tẽnga pʋga, y sã n wa yaale n bao bũmb wẽneg n pees, bɩ n dõoge, n yet tɩ yẽ la y wẽnde, y wẽnd y sẽn pees bɩ y sẽn dõoge, a sẽn yaa a soab fãa, ad-y y maana bũmb sẽn ya wẽng, Wẽnnaam y Soaala nifẽ, n paoog-ba. La ad-m boonda tẽnga la saagã tɩ b yɩ m kaseto tɩ b na n menes-y-la zãnga la kõn kaoose, y sẽn dabd tẽng ning n na n tɩ reeg n soog, Zʋrdẽ rʋʋndã. Sɩda y kõn kaoos be ye, b na n sɛɛs-y-la zãnga. Soaala-Wẽnd na n sẽeg-y-la buud a taaba sʋka, buuda wat n keesa bilfr bala Wẽnd sẽn na n kẽes-y tẽng ninga pʋgẽ. Beelẽ, yaa ninsaal sẽn naan la y na n waooge, bũmb sẽn pees ne raoogo, ne kugri, bũmb sẽn ka ne, n ka wʋmde, n ka rɩte, n ka kokd yũug ye. Y wat n yikame marsã n baood Wẽnnaam, y Soaala. Y na yãend-ba y sã n sɩd baood-b-la ne y sũuri, ne y yalẽ wã fãa. Yell sã n wa pak-fo, Israyɛl, yel-beeda sã n wa lʋɩ f zugu, f na lɛɛg n wa Wẽnnaam, f Soaala, nengẽ, la f na kelg b koɛɛga. Wẽnnaam f Soaala pida ne nimbãan-zoeere, b kõn yiis-f kɛɛng ye, b kõn sãam-f ye, b kõn yĩm zooda kãabgã b sẽn kãab f ba-rãmb ye. Sok pĩnd zamaanẽ dãmba, Israyɛl, sok sẽn deng-b foo moogo, sok n ges ninsaal sẽn wa tẽng zug tɛka, sok n ges yaa yaang bɩ taoore la b yãend bõn-bãnd a woto taare? Yɛɛlẽ la b wʋm woto taare? Tẽn-bʋg rãmb n paam n wʋm wala foo, Israyɛl, tɩ b wẽnda koɛɛg yit bugum sʋka n gomd ne ba tɩ b pa ki? M sok n gese wẽnd bʋgo n yiki ne yɛl-bãna, ne tẽn-kũum, ne zaba, ne moadga, ne yɛɛsgo n na n kẽ buud a taab sʋka n tũus buudu, sẽn na n yɩ a rẽnna wala Wẽnnaam f Soaala sẽn maan f yĩnga tɩ y nif rɩ kasto Ezipt tẽngã? Fo paamame n yãende, Israyɛl, sẽn na n yɩlẽ tɩ f bãnge tɩ Soaala la Wẽnde. Wẽnd a to ka be n zʋʋg bãmb ye. B zĩnda yĩngri n yiis b koɛɛg n na n zãms-fo, tɩ fo zĩnd tẽngre n yãend bug-kãsenga, la b zĩnda bugmẽ wã n taas foom b koeese. B nonglma sẽn da kẽ yaab rãmbã n kell n pʋg kambã, yaab rãmba loogr poore, yaa foo la Soaala pʋg yã, la b yiis-f-la ne pãnga, Ezipt tẽnga, n wa reeg buud a taab soolem n kõ-fo, buud sẽn yɩɩd f ne sõor la pãnga, la rẽ la d sẽn ne rũnna wã. Dɩlla ges f yamẽ la f bilg f sũurẽ: ad Soaala bal la Wẽnde. Yĩngri, saag zugu, bɩ kaalẽ, tẽng zugu, Wẽnd a to ka be ye. Reeg b sẽn wilgã, reeg b noya m sẽn yet tɩ m taas-f rũnna, f yell manegr yĩnga la f kamba me yell manegr yĩnga, fo loogr poore. Woto la f na n paam yõ-woko tẽng ningẽ f Soaala sẽn kõt fooma.» A Moyiiz waa n welga tẽns a tãabo, Zʋrdẽ yaanga. Tẽn-bãmb lebga soondg tẽnse. Ned sã n kʋ a to la tũu ne yĩdgu, la beem da ka be sʋk ye, nin-kʋʋda tõe n kẽe be n põse. Besɛr la b welg toore, a Rubẽ kamba yĩnga; tẽn-kãng taoor la we-raooga yɛdg n dɩg. A Gad kamba yĩnga b yãka Ramot, Galaad tẽn-peelmẽ. Bazã tẽn-peelmẽ yɩɩ Golan la b yãk a Manase kamba yĩnga. A Moyiiz n deeg Wẽnd koeesã n taas Israyɛl kamba. Ad-a Moyiiz sẽn wilg Israyɛl kamba: Wẽnd daabo, wẽnd noya la sẽn na n wa lebg a Israyɛl rog-n-miki. Yɩɩ Ezipt tẽng yiib wakato, b sẽn waa n be bãg-faagẽ, Zʋrdẽ yegende, Peor sɛɛgẽ, Amoritsa dĩm a Siyõ soolmẽ. Wakat kãng t'a Siyõ ra kẽeda Esbõ la a Moyiiz ne a neba ra zabame n tõog-a. B deega a tẽngã la Bazã dĩm, a Og, me tẽngã. Bãmb b yiibu n sɩd da ya Amoritsa soaalba, yaanga, Zʋrdẽ yegende. Israyɛl kamba reega tẽnsa sẽn yɛdg Arowɛr, Arno kʋɩl-bɛɛga foolle al n wa ta Ermo tãnga. Tãn-kãng me le boondame tɩ Siyõ. Naaga tẽnsa sẽn yɛdg Zʋrdẽ foolle n ta Yamsem Mogre, Pisga tãnga sɛɛga. A Moyiiz tigma a Israyɛl gilli n yeel-a: «Israyɛl kelge, ad sẽn lʋɩ f tʋbrẽ dũnna wã yaa noya la rog-n-mik f sẽn na n tũ. Y na n zãms-b lame la y modg n tũ-ba. Oreb tãnga zugu, Wẽnnaam, d Soaala, yõga zood ne tõndo. Zood kãng ka zood ning sẽn yõg ne d yaab rãmb ye. Zooda yõga ne tõnd sẽn be ka rũnna, n vɩ ne yõore. Wẽnnaam yalsa y taoore, tãnga zug la bugma sʋka, n gome, dẽ tɩ m yɛsa sʋka n deegd Soaala goama n taasd-y tɩ rabeem n da tar-y tɩ y pa tãnga sɛɛga n pa rʋ ye. Ad-b sẽn yeele: ‹Maam la f Soaala, f Wẽnnaam, yaa maam n yiis-f Ezipt tẽnga, f yembd tẽngẽ. F ka tar Wẽnd a to n zʋʋg maam ye. F kõn bao wẽnego n kõ bũmbu, bũmb sẽn be yĩngr saag zug bɩ tẽng zug bɩ koomẽ, n lɛɛg n yeel tɩ yẽ la f wẽnd ye. Da wõgemd bũmb a to taoor ye, da waoog bũmb a to ye, tɩ maam la f Wẽnnaam. M yaa Wẽnd sẽn ka sakd paoogre; m sɩbgda biiga, yagenga la yagen-tʋbra-kẽeg a ba beegr yĩnga, beem sã n ket n be d sʋka. M yaool n yaa Wẽnd sẽn ka lakd ne sẽn nong-b maam la b reegd m noya, tɩ yʋʋm tong taab n tõt sɛɛbo. Da pʋd yaare Wẽnnaam, f Soaala, yʋʋr ye. Sẽn pʋda Wẽnnaam yʋʋr yaare, Wẽnd ka basd a soab taal ye. B ges vʋʋsga daar wala ra-sõngo la b ra tʋm tʋʋmde wala Soaala sẽn kõ noore. F na n tʋma rasem a yoobe, la rasem a yopoe daarã yaa Wẽnnaam, f Soaala, vʋʋsg raare. Fo kõn tʋm fɩ. Boto me ne f bi-ribla, f bi-pugla, f yamba, f roog biiga, f naafo, f bõanga, f rũng fãa, f noaka sẽn be ne foo. F rakõore, f roog biiga, fãa na vʋʋsa wa foom. Tẽeg tɩ fo me yɩɩ yamba Ezipt tẽnga la Wẽnd n yaoog-fo n yiis-f ne b nug pãnga. Dẽ me yĩng la Wẽnnaam, f Soaala, kõt-f noor tɩ f vʋʋs badaare. Waoog f ba la f ma, wala Wẽnnaam, f Soaala, sẽn wilgi la woto f na paam yõ-woko la f pid ne sũ-noogo, Wẽnnaam f Soaala sẽn kõt-f tẽng ninga pʋgẽ. Da kʋ ned ye. Da yo ye. Da zuk ye. Da rõd f to ye. Da tʋlg f to pag ye. Da tʋlg a zaka, a pʋʋgo, a yamba, a roog biiga, a naafo, a bõanga la a sẽn so bũmb ning fãa ye.› Soaala-Wẽnd goma woto buuda zãng yĩnga, tãnga zugu, tɩ b sa-tãsa pãrgd sawad tagda la likã, tɩ koɛɛga sãt ne pãnga. B goma vugri la tɛkem-tɛkem, b gʋlsa b noya kug wals a yiibu zug n dɩk n kõ-ma. Y sẽn wʋm koɛɛga sẽn sãt tɩ y yaool n pa ne a soaba, tɩ tãnga yaool n yãng ne vẽenem, y buuda kãsem-dãmb la nin-kẽemsã kolg-m lame, la ad-y sẽn yeel-b tɩ b togs-ma: ‹D Wẽnnaam, d Soaala, wilga tõnd b ziir la b pãnga, d wʋma b koɛɛga sẽn da tãsd bugma sʋka. Dũnna d bãngame tɩ Wẽnd tõe n goma ne ninsaala t'a ka ki ye. La ne rẽ fãa, bõe yĩng la d na n bas tɩ bug-kãnga rɩ-do? D sã n kell n tar koɛɛga kelgre, d na n kiime. Zĩ-bʋgo la ninsaal wʋm Wẽnd vɩɩga koɛɛg sẽn tãsd bugum sʋka wala tõnd sẽn wʋma, n ket n vɩ ne yõore? Woto wã fo bal n na n kolg n kelg b koeesã. Fo na yaool n taas-b tõndo la d na reeg la d tũ zãnga.› Soaala-Wẽnd wʋma y sẽn leok maama zãnga la b yeel-m lame: ‹M wʋma nin-bãmba sẽn yeel fooma. B maana neere. Na yɩẽ neer n yɩɩda b sã n da tõe n pa m noya reegre pʋgẽ, beoog sẽn vẽeg fãa. B naan n yãeẽ sũ-noog dar fãa, bãmb ne b kamba! Dɩlla sig n yeel-ba: ‹Leb-y y rotẽ!› Sã n ya foo, fo na n paa ne maam tɩ m zãms-f noya la rog-n-mikã. Dẽ poore f na wilg-b tɩ b reeg la b tũ-ba, b tẽngẽ, tẽng ning m sẽn kõt-b tɩ b soogã.› Modg-y yã, Israyɛl kamba, n vɩɩnd wa Soaala, y Wẽnnaam, sẽn datã, n da kɩll goabga, n da kɩll rɩtg ye. Y na n tũu, daar fãa, sor ning y Wẽnnaama sẽn wilgã la woto y na paam vɩɩm la sũ-noogo la yõ-woko tẽng ning pʋgẽ y sẽn dabd n na n tɩ reeg n soogã. Ad-y yaa woto la noya la rog-n-mikã Wẽnnaam, y Soaala, sẽn yet tɩ m wilg yã tɩ y reeg la y tũ y sẽn dabd tẽng ning n na n tɩ soogã. Rẽ yaa sẽn na n yɩlẽ tɩ y zoe rabeem, Wẽnnaam, y Soaala, rabeem. Yãmb ne y kamba la y yagens na n deega y vɩɩma pʋgẽ Soaala noya la b raabã, n paam yõ-woko. Foo, Israyɛl, f na reeg Soaala noya n tũ zãnga la woto f sũur na yɩ noogo la f na fɩɩg tẽn-noogẽ, tẽng sẽn bund bĩisim la sɩɩdo wala f Soaala, f yaab rãmba Wẽnnaam sẽn da kãab-f. Kelge, Israyɛl: d Soaala bal la Wẽnnaam, bãmb b ye tãa. Bɩ f nong f Soaala, f Wẽnnaama, ne f sũur fãa, ne f yalẽ fãa, ne f pãng fãa. M sẽn kõt-f noor ninga rũnna wã pa f sũurẽ. F na taas-a f kamba, f zĩ f zakẽ bɩ f togda sore, f gãe bɩ f kẽnda. Gʋls-a n loe f kanga, n tabend f rĩirẽ, f nina yiiba sʋka. Gʋls-a f rignoorẽ la f tẽnga noorẽ kʋɩlensẽ. Wẽnnaam, f Soaala, sã n wa kẽes-f tẽng ning b sẽn kãab f yaab rãmbã, a Abraam, a Izaak la a Zakoob, tẽns sẽn pid ne ro-bɛd la ro-neeba f sẽn ka nams n me, tɩ rot pid ne te-sõma fo sẽn ka bao n bĩngi, tɩ buls pid ne koom tɩ f nug yaool n ka tuk bũmbu, tɩ pʋt pid ne bugsuntund la oliviye tɩɩse f sẽn pa sele. F sã n wa tɩg bũmb fãa zãnga, f na n maana tẽegre n da yĩm f Soaala sẽn yiis-f Ezipt, f yembd tẽngẽ ye. Modg n dig rabeem, n dig Wẽnnaam, f Soaala, rabeem; bãmb bal la f na n waoog, bãmb yʋʋr yĩng bal la f na n kãabe. Da pʋg-f f yagsa wẽn-naandsa ba a ye. F Soaala-Wẽnnaama be-la f sʋka wa Wẽnd sẽn mi sũ-kiiri. Gũus tɩ f Soaala, f Wẽnnaama, sũur da yik ne-fo, tɩ b wa yiis-f saaga tẽngr ye. Da fɛɛs Wẽnnaam, f Soaala, wala f sẽn maan Masa wã ye. F na tũ-la a yembr-yembre, raabã, gɩdgrã, rog-n-mikã, Soaala-Wẽnd sẽn kõt yãmba. F na maan sẽn zemse la sẽn ya tɩrga Wẽnnaam nifẽ la f na paam n kẽ la f vɩɩnd ne sũ-noogo tẽng ning b sẽn kãab f yaab rãmbã, la b na zãag-f ne f bɛɛba wala b sẽn le kãab yɛsa. F biig sã n wa sokd-f beoogo: ‹Yaa bõe yĩng la Wẽnnaam, d Soaala, yiis noya, saglse, la rog-n-mik kãensã?› Wakat kãnga f na leok f biigã: ‹Tõnd da yaa Ezipt dĩma yemse, la Wẽnnaam tẽega b kanga n wilg b pãnga n yiis-d Ezipt tẽnga. Wẽnnaam maana d nifẽ bõn-bãna la yɛl bɛd sẽn yɩkd pɛlense, sẽn wa ne Ezipt rãmb bõne, b dĩma la a roog bõne. B yaool n yiisa tõnd be n kẽes-d tẽng ning b sẽn da kãab d yaab rãmba tɩ b na rɩk tẽn-kãens n kõ-dã. Soaala yeel-d lame tɩ d deeg noya zãng fãa la d zoe b rabeem, tɩ woto d na paam sũ-noogo daar fãa la d na kell n pa ne yõore wala y sẽn ne rũnna. D vɩɩma na n yɩɩ wala Wẽnd sẽn date, d sã n modg n deeg noy kãensa fãa, bãmb taoore, wala b sẽn wilg-dã.› Wẽnnaam, f Soaala, na n wa kẽesa foo tẽng ning f sẽn na n deeg n soogã. Y sã n poog b tẽnsẽ, Soaala na rig n yiis y taoore Ititse, Girgazitse, Amoritse, Kanaã rãmba, Perizitse, Ivitse la Zebuzitse, buud a yopoe neb sẽn yɩɩd foo ne sõor la pãnga. F Soaala, f Wẽnnaama, sẽn wat n dɩk-ba n sagl f nusẽ tɩ f zab n tõog-ba, f na kãab b tẽnsa beedo. F kõn yõg zood ne b ye, f kõn bas n ka kʋ ye. F kõn sar yikãadem sard ne b ye, f kõn dɩk f bi-pugla n kõ b bi-ribl ye, f kõn deeg b bi-pugla n kõ f bi-ribl ye. Ka rẽ, b na gɩdg f bi-ribla t'a ka le tũ-m ye. A wat n bas-m lame n na waoog wẽn-naandsa tɩ m sũura wẽneg n fudg, tɩ me yiis-b moog zãnga. Ad-y sẽn na n maan buud kãensa bũmb ninga: Wã-y b maan-kuga zãnga, wã-y b kug peesma, kʋʋs-y b raad niyns b sẽn peesd n sennẽ wã, yõog-y b wẽn-naandsã. Fo buuda yaa buud sẽn dɩk n kõ Wẽnde, f Soaalã. Yaa foo la Wẽnnaam, f Soaala, welg toore, dũni wã buud a taaba sʋka tɩ f na n lebg b pʋɩɩre. Soaala yam kẽ yãmba, Israyɛl kamba, tɩ b welg yãmb toore, ka yet tɩ yãmb buuda la bu kãseng dũni wã pʋgẽ ye, tɩ sã n ya sɩda yãmb n paood n yɩɩd fãa. Soaala wilga b kang pãng n yiis yãmb Ezipt tẽng la b yiis-y Ezipt dĩma yembdẽ, yaa b sẽn nong yãmba bala la pids kãabg ning b sẽn kãab y yaab rãmba. Reeg, Israyɛl, tɩ yaa Soaala, f Wẽnnaam, bal la Wẽnde, Wẽnd sɩda. B zooda paada ne b sẽn nong b rãmba la sẽn deegd b noya, tɩ yʋʋma tong taab koabg-koabg n ka be sɛɛb ye. Ned sã n yaool kis-ba, yaa zĩig pʋgẽ bal la b menesd-a. B pa basd tɩ kaoos ye, yaa zĩig pʋgẽ bal la a soab reegd a kisga rolbo. M yet-f lame, Israyɛl, tɩ f reeg la f tũ rũnna, noya, gɩdgrã la rog-n-mikã. Y sã n zãms neere n tũ rog-n-mikã, Israyɛl kamba, y Soaala-Wẽnnaam zooda paada ne yã, la wala b sẽn kãab y yaab rãmbã, b kõn lak n bas yãmb ye. B sẽn kãab y yaab rãmb tɩ b na n kõ-y-la tẽng ningã, tẽn-kãng pʋgẽ, b na n nong-y lame, n ning-y barka, n kɩt tɩ y buuda fɩɩge, tɩ rogma yalge, tɩ pʋta wom biisi, n kõ koodo, tɩ tɩɩsa wa ne rãam la kaam paalga, tɩ y niis dog y bãgẽ, tɩ y piis rog y wubẽ. Yãmb sẽn na n paam bark ninga na n yɩɩga buud a taaba sẽn paamde. Y nengẽ rao tõogd n lebga ba, tɩ pag lebg ma. Y rũmsa me kõn pa n ka rog ye. Y Wẽnnaama na n zãag-y-la ne bãas buud fãa, ne bã-toos niyns y sẽn da bẽed Ezipt tẽng n ket n tẽrẽ. Y kõn bẽ bã-kãens ye, tɩ b na n yaool fẽeg-b sẽn kis-b yãmbã. Soaala-Wẽnd sẽn sagl buud niyns fãa y nusẽ, bus nimbãan-zoeere la y menes-ba. Da lʋɩ-y b bẽdgẽ n waoog b wẽn-naandsa ye. Y sã n yeel y sũurẽ: ‹Buud kãensa neba sõor yɩɩda tõndo, d maanda a wãn n deeg b tẽngã n sooge?› Ade, da zoe-y rabeem ye. Tẽeg-y bal Wẽnnaam, y Soaala, sẽn maan ne Ezipt dĩma la ne Ezipt tõre. Tẽeg-y yɛl toodã y meng nif sẽn yãende, tẽeg-y yɛl-bãna sẽn yɩkd pɛlensã, tẽeg-y pãng tʋʋm niyns Wẽnnaam, y Soaala, nus sẽn tʋme, b sẽn waa n na n yiis-y Ezipt tẽnga. Bãng-y tɩ yaa tʋʋm kãens la Wẽnnaam, y Soaala, na n kell n tʋm ne buud niyns yãmb sẽn tẽed tɩ b rabeem tõe n yõk-y lame wã. Ad Wẽnnaam, y Soaala, meng n na yiis kãnenkãaga t'a wa menes f bɛɛba, n menes sẽn kell-bã la sẽn solg-b yãmb nifẽ wã. Da rig-y rabeem ye tɩ Wẽnnaam, y Soaala, bee ne yãmba la bãmb n tar pãng sẽn tõe n yɛɛse. Wẽnnaam, y Soaala, na n diga buud kãens bilf-bilfu, y taoore. Ka vugr bal la y na n dig-ba n yiis ye, ka rẽ we-rũmsa tiigd n lebga wʋsgo tɩ y yãe fare. Wẽnnaam yaool n na n dɩk-b lame n sagl y nugẽ. B na n yɛɛsa wa b sẽn zɩ n yɛɛse, n menem zãnga. Y na n tõoga b dĩm dãmba, n menes b yʋʋra saaga tẽngre. Dĩm ba a ye kõn yaas y taoore, tɩ y wa sɛɛs-b zãnga. Y na yõog bugum b wẽn-naandsa. Gũus-y n da lʋɩ bẽdgẽ n wa rat n soog wanzurfa la sãnema sẽn kud n tablg-ba ye. Dẽ yaa wɩɩbdo, Wẽnnaam, y Soaala, nengẽ. Da saag-y n kẽes y zakẽ bũmb sẽn yaand Wẽnnaam sũur ye, ka rẽ b wat n naaga yãmb ne wẽn-naandã n yõog bugum. Zãag-y y meng ne sãnema la wanzurfã, tɩ yaa wɩɩbdo, yaa bũmb sẽn ka tõe n lʋɩ y soolmẽ. Modge, Israyɛl, n deeg noor ning m sẽn kõt-f rũnna wã la tũ neere n paam n vɩɩnd la f fɩɩg zembala, n tɩ soog tẽng ning Soaala-Wẽnd sẽn kãab f ba rãmba. Modg n da yĩm Wẽnnaam, f Soaala, sẽn kɩt tɩ f tũ sor ninga al yʋʋm pis-naas rũnna, we-raoogẽ ka. Yaa naong sore. B fɛɛs-f-la woto n bãng bũmb ning sẽn be f sũurẽ, f sã n na n zãgsame bɩ f sã n na n deega b noya. Soaala-Wẽnd kẽes-f-la naongo, n gãneg-f kom, n dɩlg-f ne man, rɩɩb foo ne f ba-rãmb sẽn da zɩ n dɩ ye. B tʋlgame tɩ f bãng tɩ ninsaal ka rɩlgd a meng vɩɩm ne bur bal ye, a rɩlgd-a la ne bũmb ning fãa sẽn yit Wẽnnaam noorẽ. F fuug pa kʋdg ye, yʋʋm pis-naas kẽna ka mod f karg ye, la f sẽn tags n gese f bãngame tɩ Wẽnnaam, f Soaala, gʋʋl-f-la wa ba sẽn gʋʋnd a biiga. F na n deega Wẽnnaam, f Soaala, noya n tũ b sore la f zoe b nifu. Wẽnnaam, f Soaala, kẽesd-f-la tẽn-noogẽ, kʋɩls sẽn zoet tɩ b koom fõt tẽngẽ, buls zĩisi, koom sẽn pusgd a toore pʋtẽ la tãms zutu, tẽng sẽn womd alkam pɛɛlga, alkam kɛgenga. Bugsuntung bee be n paas kankanga la tɩɩg sẽn womd a biis wa poaloanga. Seem gãe be. Tẽnga pida ne oliv kaam la sɩɩdo, tẽn-kãng bur dɩta f yam, ka kẽgsd ye, bũmb kõn paoog-f be ye. F yẽneg b kugri, ad-f kutu; f yẽneg b tãmse, ad-f zũudu. Beelẽ f na rɩ f yam la f na pẽg Wẽnnaam, f Soaala, b sẽn kõ-f tẽn-nooga yĩnga. Gũus n da yĩm Wẽnnaam, f Soaala ye. Gũus n deeg b noya, n tũ rog-n-mikã la f zãag f meng ne sẽn gɩdge, tɩ m togs-f fãa rũnna wã. F sã n dɩt n tɩgda, n met f ro neeba n kẽedẽ, tɩ f rũmsi, bɛd la bõones, ya ka tɛka, f sã n tar sãnem, wanzurf la laog buud fãa, da maan wakre n wa yĩm f Soaala, f Wẽnnaam, sẽn yiis-f Ezipt tẽnga, f yembd tẽnga ye. Yaa bãmb n kẽes-f we-rao-kãnga sẽn dɩt neba pʋgẽ, weoog sẽn pid ne wag-toose, ne namse, koom sẽn ka n kiisd ko-yũud weoogo. Fo yĩnga b kɩtame tɩ pĩig sẽn ya pĩig meng bul koom. Yaa bãmb n dɩlg foo we-raoogẽ wã ne man, rɩɩb f yaab rãmb sẽn zɩ n dɩ ye. La b maana woto n kẽes f naongẽ n na n fɛɛs-fo la b togl f beoog so-sõngo. Da wa saag n yeele: ‹Yaa m yãoog pãng n kẽes-m tɩgr kãnga pʋga.› Tẽeg bal tɩ tũu ne Wẽnnaam, f Soaala, la f paam pãng n ta zĩ-noogẽ ka la rẽ yaa Soaala sẽn dat n le paas b zooda pãnga, zood ning b sẽn da yõg ne f yaab rãmba la sẽn ket n yɛs rũnna wã. F sã n saag n yĩm Soaala, f Wẽnnaam, yelle, f sã n pʋgd wẽn-naandse, n wõgemd b taoore n waoogd-ba, m wẽend tɩ Israyɛl ne a kamba na menem zãnga. Y na menem wala buud niyns Wẽnd sẽn yiis yãmb taoore. B na menes-y moogo tɩ y pa kelg Wẽnnaam, y Soaala koɛɛg ye. Kelge, Israyɛl! Dũnna f na n dʋʋga Zʋrdẽ kʋɩlga n dig n yiis b tẽngẽ, buud sẽn yɩɩd foo ne sõor la pãnga. B tẽns yaa bɛda, n me n gũbg ne lalse, n zao tãms zutu. Buuda yaa bu-kãsenga, nin-daad buudu, Anakitse. La ade, wala f sẽn wʋm tɩ b gomdã: ‹Ãnna n tõe n yals nin-bãmba taore?› Dũnna f na bãng tɩ yaa Wẽnnaam, f Soaala, meng n lʋɩ f taoore n na n dʋʋg Zʋrdẽ. B na n dʋʋg-a-la wa bugum sẽn zom moogo. Bãmb meng b toore n na n varg bɛɛbã. Bãmb meng b toore n na n gãneg-b fo taoore, tɩ fo yaool marsã n kẽ b tẽngã n menes-b wala Wẽnd sẽn kãab-fo. Soaala-Wẽnd sã n tus-ba n yiis f taoore da yeel f sũurẽ: ‹Yaa m sẽn tar sõmblema yĩnga la Soaala-Wẽnd sõng-m tɩ m deeg tẽngã n sooge.› Bãng tɩ yaa tẽnga rãmb n ya nin-yoodo la Soaala-Wẽnd menes-b fo taoore. Ka foo n tar sõmblem ye, ka fo sũurã n ya tɩrga la f sẽn paam n na n soog b tẽnga ye. Yaa tẽnga rãmb n ya nin-yoodo la f paam b tẽng n sooge. La Wẽnnaam maana woto tɩ b ratame n wilg tɩ b ra kãab-a-la y yaab rãmba, a Abraam, a Izaak la a Zakoob. Bãng tɩ ka fo sẽn tar sõmblema la Wẽnnaam, f Soaala, kõt-f tẽn-noog kãnga tɩ f soog ye, tɩ Israyɛl kamba zug ka mi gõmsg ye. Da yĩm ye, Israyɛl, tẽeg tɩ f yika Wẽnnaam f Soaala sũur zĩ-peen-daagẽ wã, f Ezipt tẽng yiib raare n tãag f sẽn poog ka. F talla gugleng ne bãmba. Oreb tãng zugu f puuga Soaala sũuri la Soaala sũur me yika ne foo tɩ b da rat n menes-f zãnga. M sẽn dʋ tãnga zug n na n deeg kuga walse, zood ning Wẽnd sẽn yõg ne yãmba kaseto, m paa tãnga zug rasem pis-naase, wĩntoog la yʋngo, n pa tol n dɩ buri, n pa tol n yũ koom ye. Wẽnnaam kɩs-m-la wals a yiibã. Bãmb meng n da gʋls b zugu, ne b nug-bila, noy niyns b sẽn da kõ foo tãnga zugã, f sẽn tigim b sɛɛgẽ wã raare, sa-tãsa raare. Yaa rasem pis-naasa sẽn waa n pidi la Wẽnnaam kõ-m wals a yiibã, zooda kaset sẽn gʋls b rãmb zugã. Wakat kãng la b yeel maam: ‹Yiki la f sig tao-tao tɩ fo sẽn yiis b rãmb Ezipt tẽngã wɩɩbame. Ka kaoos la b bʋdg sor ning m sẽn da kõ-ba ye. B yẽnega kut n maan b bõn-naande!› B le paasame: ‹M mii nin-bãmba, ka neb sẽn deegd yell ye! La bas-y tɩ m wa, m na n wã-b-la zãnga, n yẽes b yʋʋr saaga tẽngre. Foo, Moyiiz, fo kamba n na n fɩɩg n lebg bu kãsenga, bu yalengo.› M lɛɛg n siga tãngã n zãad ne m nus a yiibu zooda kaset wals a yiibã. M sigame la m yãeeme. Israyɛl kamba, y beega Soaala, yãmb Wẽndã, n yẽneg sãnem n maan nag-bila. Ka yãee n kaoos tɩ y wẽneg n lak ne sor ning Soaala sẽn da wilg-y wã ye. M wudg n tebla wals a yiibã ne m nus a yi la m fabg-b la me tɩ b wã y nifẽ. M lʋɩɩ tẽng Soaala taoore; wala pipi raarã, m paa rasem pis-naase, wĩntoog la yʋngo, m ka rɩ buri, m ka yũ koom, la rẽ yaa y sẽn da beeg Soaala-Wẽnda yĩnga, n maan sẽn ya wẽng b nifẽ. M da maanda rabeem tɩ b sũura ra yika ne yãmba, b sũura ra fõta ne yãmba tɩ b rat n menes yãmb gilli. La wala pĩndã Soaala-Wẽnd le kelga m pʋʋsgo. Wẽnd sũura ra fõta ne a Aarõ me, al n dat a kũum, tɩ m na n pʋʋs a Aarõ me yĩnga. La y sẽn da maan wɩɩbd ningã, y nag-bilã, m dɩk-a lame n los bugmẽ, n yẽneg-a, n wer-a zom-bʋka, n dɩk n lob koom sẽn da fõt n sigd tãngã. Yãmb puuga Wẽnnaam sũur Tabera, Masa, Kibrot-Taava. Y sẽn waa n ta Kadɛs-Barnea, Soaala-Wẽnd tʋm-y lame: ‹Dʋ-y n deeg tẽngã n sooge tɩ maam n kõt-a yãmba.› Y ka reeg Wẽnnaam, y Soaala, koɛɛg ye, y pa maan b teegr ye, y zãgsame. M sẽn bãng-y tɛka, m bãng-y-la wa neb sẽn kɩɩsd Soaala-Wẽnde. M lʋɩɩ tẽng Soaala taoor dasem pis-naase, wĩndig la yʋngo, tɩ Wẽnd da gomdame tɩ b na sɛɛs-y-la zãnga. M pʋʋsa Naaba-Wẽnd la m yeelame: ‹Soaala-Wẽnnaam da wã-y y buuda ye, da sãam-y y pʋɩɩra ye, yãmb n yik ne y nimbãan-zoeere sẽn ka be tɛkã n wogl a yõore, n yiis-a Ezipt tẽnga ne y kang pãnga. Tẽeg-y y tʋʋm-tʋmdba a Abraam, a Izaak la a Zakoob yelle. Yĩm-y nin-bãmba sẽn ka teemd zʋgã, sẽn ka mi Wẽnd waoogrã, yĩm-y b yel-wẽndã. Da bas-y tɩ b wa yeel Ezipt tẽnga, y sẽn yiis-d tẽng ningã: Wẽnd mikame tɩ b pa na n tõog n kẽes-b tẽng ning b sẽn kãab bã, tɩ zooda ra sãamame, la rẽ la b yiis-b n na n wa kʋ we-raoogẽ. Yaool n yaa yẽ la y buudu, y pʋɩɩre, y sẽn yiis ne y nug pãnga!› Wẽnnaam yeel-m lame: ‹Pees wals a yiibu ne kuga. Pees-b tɩ b wẽneg pipi rãmbã la f rʋ tãnga zug ka n kolg-ma. Kɩt tɩ b maan koglg ne raad me. Walsa zugu m na le gʋlsa m sẽn da gʋls pipi rãmba zugã tɩ fo lob n sẽegã la f na n sagla wals paala koglga pʋga.› M sɩd kaa koglg ne gõ-miig raado, n pees kuga wals a yiib sẽn wẽnd pipi rãmba la m zã-b-la m nugẽ n dʋ tãngã. La Soaala gʋlsa ne pĩnd gʋlsma noya piiga b sẽn da yiis yãmb yĩng tãnga zugã, y tigsga raare, sa-tãsa raare. B lebs-m-la walsã. M sẽn lɛɛg n sigda, m sagl-b-la m koglga pʋga wala m sẽn da paam Soaala noore. (Israyɛl kamba yii Bene-Yaakã bulsã, n tees Mosera. Yaa zĩ-kãng la a Aarõ ki yã tɩ b mum-a, t'a biig a Elazar led-a maan-kʋʋra zĩigẽ. B sẽn yi be, b teesa Gudgoda, n yi be n tees Zotbata, kʋɩl-fõts tẽnga. Wakat kãng la Soaala welg Levitsa toore tɩ b na n tʋkd kuga walsa koglgã, n yɛs Soaala-Wẽnd taoore, n kʋʋd maando la b ningd barka wala b sẽn ket n maand dũnna. Yaa rẽ me yĩng la a Levi buuda ka reegd buud pʋɩɩr wala a taaba. Yaa Soaala la a pʋɩɩre, wala b sẽn da kãab-a.) Ad-y m sẽn le pa tãnga zug wa pĩndã, rasem pis-naase, wĩntoog la yʋngo, Soaala kelg-m lame. B pa tʋlg f sãoong ye. Israyɛl. B yeel-m lame: ‹Yiki, sig n wilg zãma wã tɩ b looge, b loog n tɩ kẽ tẽng ning m sẽn kãab b yaab rãmb tɩ m na kõ bã.› Yaa bõe marsã, Israyɛl, la Wẽnnaam, f Soaala, baood f nengẽ? B sẽn dat bala, yaa f zoe b nifu, n tũ b soya, n waoogd-b la f nong-b ne f sũur fãa, ne f yalẽ fãa. Yaa ra maan Soaala sẽn gɩdge, yaa reeg b noya m sẽn kõt-f rũnna, f yell manegr yĩnga. N-ye! Soaala-Wẽnnaam n so yĩngr ne a teeda fãa. Bãmb n so tẽnga ne a teeda fãa. Yaool n yɩɩ yãmb ba-rãmb, Israyɛl kamba, la Wẽnd pʋg yã, n wilg-b b nonglem, la y ba rãmba poore, yaa yãmb b kamba, yaa yãmb buuda la b welg toore, wala d fãa sẽn ne rũnna. Kʋms-y sũuri, da le yɩɩ tõatb ye. Yaa Naaba-Wẽnd n ya wẽnd dãmba Wẽnde la soaalba fãa Soaala. Bãmb n so kãsengo, n so pãnga; bũmb fãa rigda b taoore, bãmb la zemsg soaba, bʋʋd tɩrg soaba. Bãmb n yaoogd kɩɩba la pʋg-kõore, n kõt sãan dɩɩb la fuugu. Nong-y sãamba tɩ yãmb me yɩɩ sãamb Ezipt tẽnga. Yãmb na n zoe Wẽnnaam, y Soaala, rabeem n deeg b noore, n nong-ba, n ka wẽen ne ned a to yʋʋr sã n ka bãmb dẽnna. Bãmb yʋʋr la y na pẽge, bãmb la y Wẽnde, bãmb n maan y nifẽ, bõn-bɛd sẽn kẽesd dabeem. Y yaab rãmba sẽn waa n dabd Ezipt tẽng tɩ b yaa pisopoe bala la marsã y sõora taa yĩngr ãdse. Bɩ y nong Soaala y Wẽnnaam la y reeg la y tũ beoog sẽn vẽege, b noya la rog-n-miki la b sẽn gɩdg bũmb ninga bɩ yãmb me gɩdg y menga. Y kamba toog sẽn yãke, tɩ bãmb ka yãend y sẽn yãend ye, m tẽedame tɩ yãmb mii rũnna, vẽenega, Wẽnnaam, y Soaala, sẽn zãms-y. Y mi-la b ziiri, y mi-la b nug la b kang pãnga. Y mii wẽnd makr dãmb la tʋʋm-bãn niyns b sẽn tʋm Ezipt tẽnga ne Ezipt dĩma la a soolem dãmba la a tẽnga gilli. Y mii b sẽn maan bũmb ninga ne Ezipt tãb-biisi, ne a bilim-bilm, n kɩt tɩ Rudum Mogra koom dɩ-ba, b sẽn waa n yik y pʋgbo, la Soaala-Wẽnd menes-b-la zãnga n tãag rũnna. Y mii b sẽn maan-y bũmb ninga zĩ-peen-daagẽ wã n tãag y waoong tẽn-kãnga pʋga. Y mii b sẽn maan bũmb ning ne a Datã la a Abiram, a Rubẽ biig a Eliyab kamba. Tẽnga yaaga a noor n vel-ba, a Israyɛl sikẽ, bãmb ne b roto, ne b zak rãmba la neb niyns fãa sẽn da tar b zʋg wẽnga, n pʋgd-ba. Y yãenda y toore Soaala-Wẽnd tʋʋm bãna la tʋʋm bɛdã. Y na reeg zãnga noor ning m sẽn kõt-y rũnna wã, n paam daoodo n kẽ n deeg la y soog tẽngã, n paam yõ-wok zu-noogo, n vɩɩnd tẽng ning Soaala sẽn kãab tɩ b na rɩk-a n kõ y yaab rãmba ne b yagense, tẽng sẽn bund bĩisim la sɩɩdo. Y sẽn dabd n na n tɩ reeg tẽng ning n soogã, ka wẽnd y sẽn yi tẽng ningã, ka wẽnd Ezipt tẽng ye. Beelẽ bʋdb bʋtame n lɛɛg n kẽesd sẽbda koom, n kẽesd ko-sor-ko-sore, wala zẽed tɩɩse. Y sẽn dabd n na n tɩ soog tẽng ninga pɩʋʋma ne tãms la bãado sẽn paamd tɩ saag zãgsd-b, tɩ Soaala-Wẽnd meng n get b yelle. Wakat buud fãa Wẽnnaam, y Soaala, nina pukame n get-a, yʋʋmda sɩngre n tãag a baasgo. Y sã sɩd deegd noya yãmb Wẽnnaama sẽn kõt yãmb rũnna wã, y sã n nong Wẽnnaam la y tũud-b ne y sũur fãa, ne y yalẽ fãa, m na sik, Bul kiuugã, kiuug a nii soaba, saag wala y pʋta sẽn date. A na n nii sẽoogo n ta sɩpalgo, tɩ kood zĩndi, tɩ rãam la kaam da paoog ye. Y rũms na tɩg yamd bãoogẽ, y mens na rɩ n tɩge, y zagsẽ. Da bas-y tɩ bũmb yamleoog wa yõk-y tɩ y bʋdg sore, n pʋgd wẽn-naands la y saag n wõgemd b taoor ye. Y maan dẽ, Wẽnnaam na puug b sũur ne yã tɩ b pag saaga ko-nini tɩ koom da le tosg ye, tɩ tẽnga me ra le wom biig ye, tɩ y menem tao-tao Soaala-Wẽnd sẽn kõt-y tẽn-noog ninga pʋgẽ. M sẽn kõt-y koees niynsã y na ning-b y sũurẽ, y na gʋls bũmb n loe y nugẽ la y tabendg y rĩirẽ, y nina yiiba sʋka. Zãms-y-ba y kamba, y zĩ y zakẽ, bɩ y togd sore, y gãe tẽng bɩ y kẽnd yĩngri. Gʋls-y-ba y rignoorẽ, y tẽns kʋɩlens rĩirẽ. Sã n ya boto, tẽnga sã n ket saaga tẽngr fãa, yãmb me ne y kamba na kaoos tẽnga pʋga, Soaala-Wẽnd sẽn kãab-y tẽng ninga pʋga. Y sã n sɩd deeg m sẽn kõt-y noor ningã, y sã n nong Wẽnnaam y Soaala n tũud b sore, n dɩk y yɛlã n bas ne bãmba, Wẽnnaam na n deega tẽns n kõ yãmba la tẽn-bãmb neba yɩɩda yãmb ne sõor la pãnga. Y naoor sẽn tabg zĩig ning fãa yaa yãmb soolem. Zĩ-peen-daaga la Libã, Efrat kʋɩlg n tãag Tẽnsʋk mogre, dẽ fãa na n yɩ-la y soolem. Buud ba a ye kõn yaas y taoor ye. Soaala na n kẽesa rabeem la rigbu tẽng ning fãa y naoor sẽn na n tabge, wala b sẽn kãabã. Ade, bũmb a yiib la m yals y taoor tɩ y yãke: kãab-nood la kãab-beedo. Y sã n deeg Wẽnnaam, y Soaala, noor m sẽn wilg yãmb dũnna wã, yaa bark la y na n paame. Yaa kãab beedo la m kãabd-y, y sã n pa reeg Wẽnnaam, y Soaala, noore n bʋdg sor ning m sẽn wilgd yãmb dũnna la y pʋg wẽnd-dãmb y sẽn da ka mi. Y Soaala-Wẽnnaam sã n wa kẽes-y tẽng ning b sẽn na n kõ-y tɩ y sooga pʋgẽ, y na n zĩnda Garizim tãnga zug n kãab kãab-noodo, la y zĩnd Ebal tãnga zug n kãab kãab-beedo. (Ad-y tãms kãens pɩʋʋgda so-kõodrã, n dʋʋg Zʋrdẽ, n tat Kanaã rãmb tẽnga, nin-taoore, More kʋgsa taoore, Gilgal yegende.) Zʋrdẽ kʋɩlga la y na n dʋʋg n yaool n ta tẽng ning y Wẽnnaama sẽn kõt-y tɩ y soogã. A na n sɩd lebga y soolem la y na n tila y zags be. Modg-y n tũ noya la rog-n-mikã m sẽn kõt-y rũnna wã. Ad noya la rog-n-mik niyns y sẽn na n tũ y vɩɩma zãnga, tẽng ning y Soaala, y yaab rãmba Wẽnd, sẽn kõt yãmb tɩ y soogã. Sãam-y zĩis niyns fãa buud niyns y sẽn dig n yiisa sẽn da waoogd b wẽn-naandsã, tãmsa zutu, tãn-bi wã zutu, tɩɩsa sẽn tob n yɛsẽ wã tẽngre. Y na pãb b maan-kugã n sẽege, n wã b kug peesdi wã, n yõog b ra-lug-bɛda bugum, n to n bõgs b wẽn-naandsã, n menes b yʋʋra menga. Tẽnga rãmb sẽn da maand bũmb ningã, da maan-y boto ne Wẽnnaam, y Soaala ye. Soaala-Wẽnd sẽn yãk zĩig ning n maan b belem la b waoogr zĩigã na n yɩɩ sags a taaba fãa zĩiga, na n yɩɩ zĩ yɛng la b na n tigim. Be la y na n kẽng n tɩ waoog-ba. Be bal la y na n wa ne y yũ-nood maando, laafi la sugr kosg maando, pʋɩɩr a ye piig zugã, yamleoog kũuna, kũun niyns y sẽn pʋlme, y rũms bɛda la y rũms bõonesa kom-dẽemse. Be la y na n dɩ Wẽnnaam, y Soaala, taoore la y yik n kɩdem sũ-noogo ne y zak rãmba, y mens la y tʋʋma sẽn paam bark wakat ning fãa y Wẽnnaam, y Soaala, nengẽ. Y ka na n kell n maan wala d sẽn maand dũnna, tɩ ned kam fãa maanda wala a sẽn tags tɩ rẽ la neere. Y nan ka kẽ y vʋʋsga tẽng ye, y nan ka reeg y buuda pʋɩɩr y Soaala nengẽ ye. La y na n dʋʋga kʋɩlgã n deeg pʋɩɩrã y Wẽnnaam, y Soaala, sẽn kõt yãmbã. B na n kõ-y-la vʋʋsgo, n zãag-y ne y bɛɛba rɩdgre tɩ y be y zagsẽ n ka mi yɩɩr ye. Zĩig a ye la Wẽnnaam, y Soaala, na n yãk t'a yɩ b waoogr zĩiga, yaa zĩ-kãng la y na n wa ne m sẽn yet tɩ y wa ne bũmb ningã: y yũ-nood maando, y laafi la sugr kosg maando, y yamleoog kũuni, y sẽn wat ne bũmb ning fãa n na n pids y sẽn pʋlem Naaba-Wẽnde. Y na n kɩdma sũ-noog y Soaala taoore, yãmb ne y kom-dibli la y kom-pugli, y yemse la y yem-pogse la Levitsa sẽn naag n kẽed ne yãmba n yaool n ka tar b buud pʋɩɩr wa yãmbã. Da saag-y n yãend zĩ-yaare n yet tɩ be la y na kʋ y maanda ye. Yaa Soaala-Wẽnd sẽn na n yãk zĩig ning y buud a ye rãmb pʋɩɩrẽ la y na n kʋ y yũ-nood maandã. Yaa be la fãa na n maan wa m sẽn wilgã. Bũmb sẽn be, yaa tɩ y tõe n kʋ rũmsi n wãb b nemdo tẽns niyns y sẽn dat pʋgẽ, la wala y sẽn dat tɛka, la wala Wẽnd sẽn kõ-y ne b nonglem. Ka get f yɩlgame bɩ yell ket n be f zug ye, rũms kãens nemd wãbda wa yĩsr bɩ walga. Bũmb sẽn le be yɛsa, y ka na n dɩ zɩɩm ye. Raagd-a-la tẽng wala koom. Da lɛɛg-y n dɩ, tẽn-kãng pʋgẽ, kooda sẽn yãk peoog a ye piig zugu n kõ Wẽnnaama ye; da lɛɛg-y n yũ rãama wamd a ye piig zugu sẽn yãk n kõ Wẽnnaama ye la kaama me lengr a ye piig zugu sẽn yãk n kõ Wẽnnaama ye. Da wãb-y y rũms bɛdã la y rũms bõonesa kom-dẽemsa ye. Da lɛɛg-y n dɩ y sẽn pʋlem n dɩk n kõ Wẽnd ye, y meng y toor sẽn kõ ne yamleoog ye. Yaa Soaala-Wẽnd taoor bal la rɩ kãens rɩta la zĩig ning bal Wẽnnaam y Soaala sẽn na wilg yã. Rɩ-y ne y kom-dibli, y kom-pugli, y yembse, y roog kamba, la Levitg sẽn naag yãmb n kẽed tẽng a ye. Kɩdem-y sũ-noog Wẽnnaam, y Soaala, taore, y tʋʋma sẽn dabd taoora yĩnga. Modg-y n da zẽng Levitg n tãag y kũum ye. Naaba-Wẽnd sã n wa yalg f tẽngã, Israyɛl, wala b sẽn kãab fã, tɩ f wa yeel f sũurẽ: ‹M data nemd n wãbe.› Ad-f na wãb nemd wala f sẽn date. Soaala-Wẽnd sẽn yãk b waoogra zĩig sã n zãr ne f tẽngã, f tõe n kʋ-la f rũm-bɛd la f rũm-bõonego Soaala-Wẽnd sẽn na n kõ-fo, wala m sẽn zoe n wilg fo, f tõe n wãb-b-la f tẽngẽ wã wala f sẽn dat tɛka. F tõe n wãb-b lame wala f sẽn wãbd yĩsr bɩ walga. Sẽn yɩlga woo, sẽn yaa rẽgd woo, fãa tõe n naaga taab n dɩ. Fo ye n da saag n dɩ zɩɩm, tɩ zɩɩma la vɩɩm la f kõn naag n dɩ vɩɩm ne f nemd ye. Da rɩ zɩɩm ye, daag-a tẽnga wala koom. Da rɩ zɩɩm ye, woto f sũur na yɩ noogo, foo la f kamba, fo loogr poore, la rẽ yaa f sã n tũud so tɩrg Soaala-Wẽnd taoore. F sẽn na n tall bũmb ning n wa Soaala-Wẽnd taoore, b waoogra zĩigẽ, yaa f sẽn dɩk n kõ bãmbã, n paas f sẽn pʋlem bãmba. F na wa ne f yũ-noog maand, nemd la zɩɩm, Wẽnd maan-kugra zugu. Maanda zɩɩma raagda Soaala-Wẽnnaama, maan-kugra zugu, la nemdã, wãb-a! Kelg la f reeg m sẽn kõt-f noy niynsa fãa. Woto f na paam sũ-noogo daar fãa. F kamba me na paam sũ-noogo, fo loogr poore, f sẽn maan neere la f kẽn tɩrg f Soaala taoora yĩnga. Wẽnnaam, f Soaala, sã n wa menes f taoore neb niyns fo sẽn na n tɩ reeg b rãmb tẽns n kẽ wã, f sã n wa tõog-b zãnga n led b zĩiga, gũus n da lʋɩ b bẽdga pʋgẽ, b loogr poore, n yik n maand wa bãmb ye. Gũus n da pʋg b wẽn-naandsa ye, da sok f meng f sũurẽ: ‹Bãmba ra waoogda b wẽnd dãmba wãna tɩ m me maan wa bãmba?› Wẽnnaam, f Soaala, yĩnga, da saag n maan boto ye. Bãng tɩ Soaala-Wẽnd sẽn kis bũmb ning wa fãa-fãa wã, bõn-kãng la b maan b wẽn-naandsa yĩnga, n tol n yõ maand b yĩnga, b kom-dibli la b kom-pugli maando. M sẽn yet tɩ y maan bũmb ningã, reeg-y la y tũ fãa. Gũus-y tɩ bũmb da yiisi, gũus-y tɩ bũmb da paas me ye. Tõeeme tɩ daar a ye bãngd bɩ ned sẽn paamd likri poog yãmb sʋka n gomd tɩ yel-bãnd n na n maane. Ad-y yel-bãnd sã n sɩd maan wa a sẽn yeelã, tɩ nin-kãng kos yãmb tɩ y wa waoog la y pʋg wẽn-sãamse, wẽnd-dãmb f sẽn ka mi, da saag n kelg a sẽn yet ye. Ya y Soaala-Wẽnnaam n tʋlg n fɛɛs yãmba n bãng y sã n yaa neb sẽn nong Wẽnnaam, y Soaala, ne y sũur fãa, ne y yalẽ wã fãa. Y Soaala-Wẽnnaama bal la y na n tũ, bãmb nif la y na n zoe, bãmb noya la y na n deege, b koɛɛga bal la y na n kelge, bãmb bal la y na n waooge, y na n dɩka y mens n kõ bãmb bala. Bãngdã, sẽn paamda likrã, y kʋʋd-a lame t'a tʋlgame tɩ y yi Wẽnnaam la y Soaala poorẽ, la yaool n yaa bãmb n yiis yãmb Ezipt tẽnga, bãmb n fãag yãmb yembdo. Nin-kãng da ratame n tak yãmb n yiis sor ning Wẽnnaam, y Soaala, sẽn wilg yãmb tɩ y tũ wã. Y na menes rat-wẽng soabã y sʋka. Y ba-biiga, y ma biiga, y bi-ribl bɩ y bi-pugla, y pʋg-nongre, y tũud-n-taaga sẽn zems wa yãmb, sã n soos n wa yeel yãmba: ‹Wa-y tɩ d pʋg wẽnd-dãmb a taaba,› wẽnd-dãmb y menga la y ba rãmb sẽn ka bãnge, wẽnd-dãmb sẽn paamd waoogr buud niyns sẽn zãr-b ne yãmba nengẽ, bɩ sẽn pẽ-b yãmb n gilgã nengẽ, y kõn sak ye, y kõn kelg-a ye, da yeel-y tɩ y nong-a lame ye, da zoe-y nin-kãng nimbãaneg ye, da zab-y n sõng-a ye. Y tog n kʋ-a lame. Y meng nug n dengd n sɩɩs-a tɩ neb a taaba yaool n wa baas. Y labd-a-la ne kuga t'a ki, t'a baoome n na n zãag yãmb ne Wẽnnaam, y Soaala, sẽn yiis yãmb Ezipt tẽnga, y yembd tẽnga. A Israyɛl kamba na wʋm yellã, b na rig rabeem, la b kõn saag n maan wẽng a woto buud y sʋk ye. Ade, Israyɛl, fo sã n zĩnd f tẽngẽ, tẽng ning Soaala-Wẽnnaam sẽn kõt yãmba pʋgẽ, n wʋm tɩ b gomd tɩ nin-yaals n yik n kẽesd b taab weoogo la b yet-b: ‹Wa-y tɩ d tɩ waoog wẽnd-dãmb a taaba, wẽnd-dãmb y sẽn pa mi,› f na maan gẽesgo, sogsgo, vɛɛsgo, la f sã n wa bãng tɩ wɩɩbd a woto sɩd maana y sʋka, f koota tẽnga rãmb fãa ne sʋʋse la f kãab tẽnga beedo, la f kood a rũmsa fãa. Wʋk b laoga fãa n zam b tẽnga sʋka la f naag-b ne tẽngã n yõog bugum, Wẽnd yĩnga. Tẽnga lebgda raboogo, zamaan sẽn wate la b kõn le yik a raboog ye. F nug ra sɩɩs fɩ: b kãaba tẽnga beedo. Woto la Soaala sũur na n maage, tɩ f rɩ b nonglma kaseto la f lebg tẽn-kãsenga, wala Wẽnd sẽn kãab f yaab rãmba. La rẽ yaa f sẽn kelg m koɛɛgã la f reeg noya m sẽn wilgd dũnna wã, n maand sẽn ya tɩrg Wẽnnaam, f Soaala, nifẽ. Yãmb yaa y Soaala-Wẽnda kamba. Dɩlla da bog-y y yĩns ye, da kõog-y y rĩiri, y ned sã n ki ye. Yãmb buuda yaa Wẽnd soolem, ya yãmb la Soaala yãk yã tɩ y na n yɩ buudu sẽn lebg b meng pʋɩɩr sõngo buud a taaba fãa sẽn be tẽng zuga sʋka. Da rɩ sẽn kis ye. Ad-y sẽn tõe n wãb rũms niynsi: naafo, pe-bila, bulla, yãka, yĩsri, walga, beoko, wilpeoolgo, sɩbga, monfo. Y tõe n wãba rũng ning fãa nao-beong sẽn welg a yi la sẽn bʋgsd yamdo. Rũms kẽer n be n tar nao-beond sẽn welg a yi la rẽ ka sek ye, dẽnd b naag n bʋgsd yamdo tɩ y yaool marsã n ges-b wa rũng y sẽn tõe n wãbe. Woto d tog n gesa wa rũng d sẽn ka tõe n wãbe: yʋgemde, soaamba, marwara; bãmb bʋgsda yamdo, yaa sɩda, la b nao-beong ka welg a yi ye. Sã n ya kurkuri, a nao-beong welga a yi la a ka bʋgsd yamd ye. Ges-y rũms a woto buud wa rũm-dẽgdo; b nemd pa wãbde, b kɩɩng me pa sɩɩsde. Sã n ya koomẽ dũmsã, ad-y sẽn tõe n wãb b rãmba: yaa rũng fãa sẽn tar legbre la pagdo. Y tõe n dɩɩ bãmba. Sẽn ka tar b legbre la pagdo, y kõn dɩ bãmb ye, b yaa rẽgdo. Y tõe n wãba luiil fãa wãbr sẽn ka tar yelle. Ad-y sẽn ka na n wãb b rãmba: pa-nand-tugri, sɩlga, mayaalle, wɩbga, yɩbrgo, bõan-pog-wɩbg buud fãa, gãabd buud fãa, na-neoongo, viuugu, ka-ra-la-m-zomda, kosenkond buud fãa, viuug-luiila, kos-ki, faoogo, salsanga, yɩbr-pɛɛlga, koom-daoogo, nok-naaba, raong buud fãa, bulwãoogo, zãnga. Bõn-yɩgd bõonesa buud fãa yaa bõn-dẽgdo, da wãb-y-b ye. Luiil fãa sẽn tar pɩgsa t'a wãbr ka kɩsa, y tõe n wãb-a lame. Rũng sẽn ki woto wãbr kisame, dɩk-a n kõ sãan sẽn naag foom n kẽed f tẽngẽ, yẽ tõee n wãb-a lame bɩ a tõee n dɩk-a lame n koose ne sẽn ya-b sãamb wa yẽ, la fo ka tõe ye, tɩ Wẽnd welga fo buuda toore. Da rʋg bull ne a ma bĩisim ye. Yʋʋmd-yʋʋmd fãa f na pʋɩ f sẽn bʋde la sẽn ko n paam, zĩis piig-piiga. Piig zugu, f tallda pʋɩɩr a ye n wa rɩ Wẽnnaam f Soaala taoore tẽng ning b sẽn yãk tɩ yaa b belem la b waoogr zĩigã. F wata ne alkam, ne f yʋʋmda rãam la kaam, ne rũng fãa pipi biiga, rũms bɛda wala rũms bõonese. Woto la f na n zãms Wẽnnaam nif zoeere, beoog sẽn vẽeg fãa. Sora sã n ya wok wʋsgo tɩ kũuna zã n kẽnga ya toogo, f sã n zãr ne tẽng ning f Wẽnnaam, f Soaala, sẽn yãk tɩ ya b waoogr zĩigã, la Soaala kũuna yaool n ka zem-zem ye, ad-f tekda ne ligdi la yaa ligda la f na n tall n wa f Soaala-Wẽnnaama waoogr zĩigẽ. Beelẽ f rɩkda ligdã n da f sẽn dat bũmb ninga: rũm-bɛd bɩ rũms bõonese, rãam, toose, f yam sẽn kẽ bũmb ning fãa. Foo ne f zak-rãmb rɩtame la y yũ, la y noog y sũur, Wẽnnaam, y Soaala, taoore. Da rɩ n bas Levitga sẽn be f tẽngẽ n yaool n ka tar pʋɩɩr a ba raboogẽ ye. Yʋʋmd a tãab-tãabo, f piig-piig pʋɩɩra, f yãkda yʋʋmd kãng rẽnna n paalg f tẽngẽ. Woto Levitga sẽn ka tar pʋɩɩr a ba raboogẽ, sãana, kɩɩba, pʋg-kõore sẽn be f tẽngẽ, na yũ la b rɩ n tɩge la Wẽnnaam, f Soaala, me na tũ rẽ n ning f tʋʋm buud fãa barka. Yʋʋm a yopoepoe, yaa sama kiisgu. Ned ka le tar y samd ye. Ad sama sẽn na n kiis to-to: B sã n moon Soaala yʋʋr yĩnga tɩ yʋʋmda yaa sam kiisg yʋʋmde, ned ning fãa sẽn peng a to bũmbu, ka le so a sẽn peng-a ye. A ka tõe n modg tɩ b lebsa a bũmba ye, a kõn modg a ba-biiga bɩ a saam-biiga, tɩ b mooname, tɩ Soaala-Wẽnd yĩnga, bɩ b ra sok samd yʋʋmd kãng ye. Sã n ya sãana b tõe n modga yẽ. Sã n ya f saam-biiga, kell n bas taale. Modge, Israyɛl biiga, tɩ naong soab ra zĩnd f tẽngẽ ye, tɩ Soaala-Wẽnd kũuna ka na n paoog-f tẽng ning b sẽn dɩk n kõ-f tɩ f sooga pʋgẽ ye. Fo yee n modg bala n deeg Wẽnnaam noya fãa b sẽn kõt maam tɩ m deege n wilg-f rũnna wã. Wẽnnaam, f Soaala, kõn pa n ka ning f bark wala b sẽn kãab fooma ye. Woto wã, fo na n deega bobelle buud wʋsg nengẽ n yaool n dɩk f bũmb n peng-ba la buud ba a ye kõn deng n deeg fo bũmb n yaool n peng-f ye. Fo na n sooga buud wʋsgo la buud ba a ye kõn soog foo ye. F saam-biig a ye sã n be ne foo, tẽng a ye pʋgẽ, Wẽnnaam, f Soaala, sẽn na n deeg n kõ fooma, la f saam-biiga yaa naong soaba, fo kõn kʋɩɩs f sũur ne-a ye. F na yaag f nugu yalengo, f na reeg bũmb a nengẽ n yaool n kõ-a a sẽn tar bũmb ning fãa tʋʋmde. Da bas tɩ tags yaals wa f sũurẽ tɩ f yeele: ‹Yʋʋmd a yopoe soaba zoe n taame, bas sama taal yʋʋmda zoe n vẽkame,› tɩ f na n kʋɩɩs f sũur ne naong soaba n bas-a n ka kõ-a bũmb ye. F maan boto, f na maan wẽnga la naonga soab na kãab-f beed ne Soaala-Wẽnde. Bao wʋsg n kõ-a la kõ-a ne sũ-noogo, la Naaba-Wẽnd me na ning f tʋʋma fãa bark la yõodo. La m sẽn mi tɩ naong soab ka tõe n ka zĩnd f tẽngẽ, m kõt-f-la no-kãnga: Ypk f nug yalengo f saam-biig yĩnga. Nimbãan-ned la naong soab sẽn naag-b foom n kẽed tẽng a ye wã, puk f nug b yĩnga. Israyɛl kamba sʋka, pag bɩ rao sã n kẽes a meng yembd f zakẽ, la a sã n tʋma wala yamba, yʋʋm a yoobe, yʋʋmd a yopoe soaba f na bas-a t'a yi n looge. F sã n wa yet t'a yi n looge, f ka basd-a t'a loog ne nug vɩʋʋg ye. F na bao kũun n zam-a, kũun sẽn yi f wubrẽ, f zɛɛgẽ, f bugsuntungẽ. F sẽn kõtã ka yit zĩig a to tɩ ka Wẽnnaam, f Soaala, nengẽ ye. F na tẽeg tɩ f meng yɩɩ yamb Ezipt tẽnga la Wẽnnaam, f Soaala, n yiis-f yembdẽ. Dẽnd me yĩng la m kõt-f no-kãnga rũnna. La f yem-daooga sã n yeel foo: ‹M pa rat n yi n loog ye,› a sẽn nong foo yĩnga, a sẽn nong foo ne f zaka, la a gomd tɩ bũmb k a paoog-a, fo na n baoo pĩim n dɩdg a tʋbra ne f roog lugri n vʋdge la a na lebg f yamba, daar fãa yĩnga. Sã n ya yem-poaka, le yaa boto la f maanda. Bas yamba t'a loog n soog a mengã, da ges rẽ wa bũmb sẽn ya toog ne-f ye t'a sẽn tʋm f zakẽ yʋʋm a yoobã, a kẽes-f-la yõodo naoor a yi, n yɩɩd tʋʋm-tʋmd sẽn deegd yaoodo. Bas-a t'a soog a menga, la bãng tɩ Wẽnnaam, f Soaala, na ning f tʋʋmd fãa yõodo. F na n dɩkame n kõ Wẽnde f rũng fãa pipi biig sẽn ya raoogo, yaa rũng sẽn ya bedr bɩ rũm-bila. Da tʋm ne rũm-bedr pipi biig ye. Da wõrs f pesg bɩ f bʋʋg pipi biig sẽn ya raoog kõbd ye. Yaa Wẽnnaam, f Soaala, taoor la f na n wãb a nemdo, foo ne f zak rãmba, Soaala-Wẽnd sẽn yãk b waoogr zĩigẽ. Rũnga sã n yaool n tar bãnde, n ya woabg bɩ zoanga, bɩ kɩsre, b pa kʋʋd rũng kãng maoong Soaala-Wẽnd taoor ye. B kʋʋd-a-la tẽnga pʋgẽ. Ned ning sẽn ya rẽgdo la ned ning sẽn ka rẽgdo naagda taab n wãb-a wala yĩsr bɩ walga. F kõn sɩɩs a zɩɩma yẽ ye. Zɩɩma raagda tẽng wa koom. Gũ Kara-moosga kiuugu n maan Pak kibsa, Wẽnnaam, f Soaala, yĩnga. Yaa kara-moosga kiuug la Wẽnnaam, f Soaala, yiis foo Ezipt tẽng ne yʋngo. F Soaala-Wẽnnaam yĩnga, f na n kʋʋ maoongo. Na n yɩɩ ne rũm-bedre, bɩ ne rũm-bila, la yaa zĩig ning Soaala-Wẽnd sẽn yãk b waoogr zĩigẽ. F ka rɩt bur sẽn lob bɩll ye. Dasem a yopoe tõre f na n dɩɩ bur sẽn ka lob bɩlle. Yaa nimbãaneg rɩɩbo, tɩ yaa ne yãgbo la f yi Ezipt tẽnga. Woto me la f tẽegd f vɩɩma fãa pʋgẽ tɩ Wẽnd n yiis-f Ezipt tẽnga. Dasem a yopoe pʋgẽ, b kõn yãend ra-bɩll f tẽngẽ ye. Rũmsa sẽn kʋ zĩ-sobd, pipi raarã, ad-y b nemda ka tõe n bas n dɩ vẽkẽmbeoog ye. Ka tẽns niyns fãa f Soaala-Wẽnnaama sẽn kõ foo la f tõe n kʋ Paka maoong ye, yaa tẽns niyns Wẽnnaam, f Soaala, sẽn yãk b waoogr yĩnga pʋgẽ bala. Paka kʋʋda zaabre, wĩndg sẽn lʋɩ n zems ne wakat ning f sẽn yi Ezipt tẽnga. F na n segla rũngã, n wãb a nemdã zĩig ning Soaala sẽn yãk b waoogr yĩngã; vẽkẽmbeoogo f lebda f tẽngẽ. Dasem a yoob tõre f na n dɩɩ bur sẽn ka lob bɩlle. Daar a yopoe soaba yɩta paka kibs baasgo. Baraare f ka tʋmd tʋʋmd ye. F na sõda rasem a yopoepoe naoor a yopoe; daara sõadga sɩngda kooda wʋrba sɩngr daare. F maanda Tigsg kibsa, f Wẽnnaam, f Soaala, yĩnga, f wata ne yamleoog kũuni, wala f Wẽnnaam, f Soaala, bark sẽn sig-f tɛka. Yaa Wẽnnaam sẽn yãk tẽng ning b waoogr yĩnga la f na n kɩdem bãmb taoore, foo ne f bi-ribla, f bi-pugla, f yamba, f roog-biiga, Levitg sẽn naag foom n kẽed f tẽngẽ, sãana, kɩɩba la pʋg-kõore sẽn vɩ f tẽngẽ. F na tẽeg tɩ f me yɩɩ yem-daoog Ezipt tẽnga. Reeg noorã n tũ zãnga. Maan sẽgda kibs rasem a yopoe pʋgẽ, f sã n kẽes koodã f sẽn pãb f zɛɛgẽ la f sã n kẽes f rãama f bugsuntund sẽn kõ-fo. Kɩdem sũ-noog ne f bi-ribla, f bi-pugla, f yamba, f roog-biiga, Levitg sẽn naag foom n kẽed f tẽngẽ, sãana, kɩɩba la pʋg-kõore sẽn vɩ f tẽngẽ. Dasem a yopoe pʋgẽ f na n dɩka sore n tɩ gilg tẽng ning Soaala-Wẽnd sẽn yãk b waoogr yĩngã. La rẽ yaa f sẽn dat tɩ b rɩ kaseto tɩ b ninga f kood la f tʋʋma fãa barka, tɩ f zĩ ne sũ-noog sẽn pidi. Naoor a tãabo, yʋʋmd pʋgẽ, rapa fãa tog n tɩ kaaga tẽng ning Wẽnd sẽn yãk n maan b waoogr zĩigã. Yaa dasem a yopoe niyns bura sẽn ka le lobd bɩllã, n paas tigsg kibsã la sẽgda rota kibsã. La Soaala-Wẽnd taoor pa kẽnd n pa zãad bũmb ye. Ned kam fãa baooda a nug bũmb n kõ Soaala wa Soaala nuga sẽn puk yaleng tɛk a yĩnga. Tẽng ning fãa Wẽnnaam, f Soaala, sẽn deeg n kõ foo pʋgẽ, ning bʋ-kaooda la neb sẽn na n welgd yɛla. B modg tɩ b bʋʋda kao ne zemsgo. Bʋʋda kaooda tɩrga, ka sõngd a zagla n bas a zagl ye, ka reegd bũmb n sui n kedb bʋʋda ye. Kũuna na kɩtame tɩ f nina mum n pa le ne sɩda, tɩ bʋʋda me pa le tũ tɩrg ye. Pʋg sɩda la sɩd bala. Woto me la f na vɩɩnd tẽng ning Wẽnnaam, f Soaala, sẽn kõt fooma pʋgẽ. F sã n me maan-kugr Wẽnnaam, f Soaala, yĩnga, da saag n sel n yegl-a bũmb sẽn pees ne raoogo n na n waoog ye. Da saag n pees bũmb ne kugri n sel-a n yegl ye, tɩ yaa bũmb sẽn yaand Wẽnnaam sũuri. Da saag n wa ne Wẽnnaam, f Soaala, taoore, naaf bɩ pesg sẽn tar bãnd ye. Yaa bũmb Wẽnnaam, f Soaala, sẽn ka reegde. B sã n yãend tẽng ning Wẽnnaam, f Soaala, sẽn kõ fooma pʋgẽ, pag bɩ rao sẽn maand Wẽnnaam, f Soaala, sẽn kisi, bũmb sẽn sãamd b zoodã, b sã n yãend pag bɩ raoa sẽn waoogd wẽnd-dãmb a taaba la a wõgemd b taoore, n wõgemd wĩntoog taoore la kiuugu la yĩngr ãdsa fãa taoore, rẽ yaa bũmb m sẽn pa kose. Sã n yaa ned n wa n togse, bɩ f wʋma woto tɩ b gomda, modg n pʋg yella nao la f sã n sɩd tara kaset tɩ wɩɩbd a woto buud maana Israyɛl tẽn-peelmẽ, f kɩtdame tɩ b tall n wa tẽnga noor, paga bɩ raoã sẽn maan yellã, tɩ y lab-a n kʋ. La tog n paama neb a yiib bɩ a tãab kaseto n yaool n kʋ beegdã. Kaseta sã n ya nin-yend kaseto, b pa kʋʋd a soab ye. Kaseta rãmb n lobgd pipi tɩ sẽn ket-ba yaool n pʋge. Da bas yel-maand f sʋk ye! Zɩɩm sã n daage, bɩ sãmpogre n pogle, bɩ kɩɩs-taab n yiki, la f gesame tɩ yella welgr yaa toogo, f kẽngda tẽng ning Wẽnnaam, f Soaala, sẽn yãk tɩ ya b waoogr zĩigã. F tʋgd n yãenda Levits niyns sẽn ya maan-kʋʋdbã la sẽn so-b bʋʋda wakat kãnga. Bãmb la f na n sok tɩ b wilg-f fo sẽn na n maanega. Fo tũuda b sẽn wilg foom, Wẽnnaam sẽn yãk b waoogr tẽngẽ wã, n da bas tɩ bũmb ba a ye pa ye. Tũ n da kɩll goabg bɩ rɩtgo, tũ b sẽn yet tɩ f maan bũmb ningã. Bãng tɩ ned ninga sẽn na n maan waa a sẽn tagse, n pa kelg Wẽnnaam, f Soaala, maan-kʋʋdã la bʋ-kaoodã, b yiisda yẽ soab nin-vɩɩs sʋka. Zãag a Israyɛl tẽn-peelem ne wẽng buud fãa. Neba fãa na wʋme n dig rabeem la ned kõn le saag n welg yell a meng a toor ye. Israyɛl, ad-f sã n wa kẽ tẽng ning f Soaala-Wẽnnaam sẽn kõt-f tɩ f soogã, f sã n paam n me f roto, la f sɩng n gomd f sũurẽ: ‹M data dĩm n kõ m menga n wẽneg buud niyns fãa sẽn gũbg-b maama,› bãng tɩ f sẽn na n bao a soaba tog n yɩɩ neda f Wẽnnaam, f Soaala, sẽn zoe n yãke. Kẽ f buuda pʋgẽ n bao f dĩma. A ra yɩ sãana la bu-zẽn ye. A wiidi wã ka tog n yɩ wʋsg tɩ loog ye. A ra saag n tall buudã n leb Ezipt tẽng tɩ be n be wiidi wʋsg ye. Soaala-Wẽnd yeel-f lame: ‹Da le gõdg n dɩk so-kãng ye.› Dĩma pagba me ka tog n yɩ wʋsg ye. A sũura wat n tedgame. A wanzurf la a sãnema me ka tog n yɩ wʋsg tɩ loog ye. A sã n wa rʋ a naama goeele, a na kɩt tɩ b gʋls a yĩnga, bũmb ning fãa sẽn be noora sebrẽ. Yaa maan-kʋʋdba sẽn ya Levitsa nengẽ la a na n deeg sebrã. Noora sebr paada a sɛɛgẽ t'a karemda beoog-beoog fãa. Woto a na zãms n zoe Wẽnnaam a Soaala nifu n deeg la a tũ bũmb ning fãa sẽn gʋls a pʋgẽ, n da wa lebg zẽk-m-meng soaba, a soolma rãmb nifẽ, la a bas noorã n bʋdg goabg bɩ rɩtg ye. Woto me la yẽ ne a kamb na n kaoos Israyɛl naama goeela zugu. Levitsa sẽn kʋʋd maandã, a Levi buuda fãa, ka tar a buud pʋɩɩr Israyɛl kamba sʋk ye. B sẽn na n dɩlg b mens ne bũmb ninga yaa rɩɩb niyns b sẽn kõt Wẽndã, sẽn yãk Wẽnd pʋɩɩrẽ wã. Sẽn sõngda maan-kʋʋdba ka tar pʋɩɩr a buudẽ ye. Soaala bal n na n yɩ a buud pʋɩɩre, wala b sẽn kãab-a. Ad-b sẽn na n deeg bũmb ninga buuda nengẽ, la sẽn kos-b maoonga ne naafo bɩ pesga nengẽ. Yaa rũnga bãoko, a yɛga la a pʋʋrã. F sẽn na n kõ-ba n paase, yaa pipi ka-gĩndã, yaa rãama la ka-paalgã, piisa la bʋʋsa kõbdo, pʋɩɩr a ye piig zugu. Yaa Levitga ne a kamba la Wẽnnaam, f Soaala, tũus buuda sʋka t'a na n kʋ maand Soaala yĩng beog-beoog fãa. Levitg tõe n yi-la a tẽngẽ, a tẽnga sẽn be zĩig ning fãa Israyɛl tẽn-peelmẽ, n kẽng a sẽn dat wakat ning fãa, tẽng ning Wẽnnaam, f Soaala, sẽn yãk wala b waoogra zĩiga. A na n kʋʋ maandã Wẽnnaam, a Soaala, yĩnga, wala Levits a taaba sẽn zoe n be be wã. B rɩlgr yĩnga, b fãa pʋɩɩr na n zenga taaba, b sẽn paam b ba rãmba nengẽ n koosã toog sẽn yãke. F sã n wa kẽ tẽng ning Wẽnnaam, f Soaala, sẽn kõt-fã, da saag n tũ b manesma sẽn ya wɩɩbd zãnga ye. Ned da saag, yãmb sʋka, n los bugmẽ, a bi-ribl bɩ a bi-pugl ye. A ra sok wẽn-naandsa ye, a ra pʋg a kõn-togs tɩ vaal dãmb ye. A ra pẽneg sẽn yet-b tɩ b mi b beoog sẽn na n yɩ a soaba ye. A ra kẽ tɩ-rɩtb ye. A ra saag n bõs pãn-wẽns rãmb pãnga n tʋm beed ye. B ra yɩ neb sẽn daagd b taab yam, neb sẽn sokd kɩɩms ye. Ned ning fãa sẽn maan boto maana wɩbd Wẽnnaam nifẽ la yaa rẽnd me yĩng la Wẽnnaam, f Soaala, na n dig-ba n yiis y taoore, y sã n poog b tẽngẽ. Dɩk f meng zãng n loe ne Wẽnnaam, f Soaala, tɩ bũmb da kedb foo ne bãmb sʋk ye. Fo sẽn na n dig b rãmb n yiis n soog b tẽngã, ad bãmb dãmb pʋgda neb niyns sẽn yet tɩ b pa wilgd tɩ bũmb na yɩ tɩ pa yɩ ye. Ad bãmb dãmb sokda wẽn-naandse. Wẽnnaam, f Soaala, pa rat tɩ f maan a boto buud ye. Wẽnnaam, f Soaala, na n yiisa f sʋka, bãngd wa maam. Nin-kãng la yãmb na n kelge. Pʋs n yaa rẽ la f ra kos bãmb, Oreb tãnga zugu, tigsg kãsenga raare, f sẽn waa n yeele: ‹M ka rat n le wʋm Wẽnd menga, m Soaala menga, tɩ b gomd ne m ye. M pa rat n le yãend b bugma tɩ m na n wa kiime.› Dẽ marsã la Soaala-Wẽnd leok-m: ‹Y sẽn gom woto wã yaa neere. Sɩd yaa bãngd wala fooma la m na n yiis buuda sʋk n kõ-ba, m na n ninga m goama a noorẽ, la yaa m sẽn yet t'a togs bũmb ninga la a na n togse. Ned ning fãa sẽn ka kelg m gomdã bãngda sẽn yiis a noorẽ, mam meng n na n sok-a marsã. Sã n ya bãngda meng n saag a toore n yiis gomd n yet t'a reeg-a-la mam nengẽ, tɩ m yaool n pa yeel-a bũmbu, bɩ a sã n gomda wẽnd dãmb a taab yʋʋr yĩnga, ya yẽ meng n na n ki.› Tõeeme tɩ f wa sok f menga: ‹M yɩta a wãn n bãng tɩ gomda pa yi Wẽnnaam nengẽ?› Ade, bãngda sẽn togs bũmb ning m yʋʋr yĩnga sã n pa pidsi, sã n ka taase, dẽnd ka Soaala n yeel ye, ya bãngda meng a toor n saag n yeele. Da zoe rabeem ye! F Wẽnnaam, f Soaala, sã n wa wã bu-zẽmbã f taoore, n deeg b tẽnsã n kõ-fo, f sã n wa kẽed b tẽnsã la b rotã, f na n yãka tẽns a tãabo n welg-b toore, f soolmẽ, Wẽnnaam, f Soaala sẽn na n kõ-fã, f na sõog kug a tãab zugu vẽenem ning f buuda sẽn paam Wẽnnaam, f Soaala, nengẽ wã la soya sẽn digd tẽns a tãabã sẽn yãkã la woto nin-kʋʋd fãa paamda a soondg zĩiga. Ad sẽn na n tũ ne bũmb ninga tɩ nin-kʋʋda wa kẽ tẽn-bãmb pʋsẽ n paam n põse. Yaa a sã n kʋʋ ne yĩdgu, beem da ka be sʋk ye. Yaa wa ned sẽn tũ a to n kẽng weoogo n na n tɩ kɛ tɩɩse. La kɛɛba sẽn waa n kɛɛdẽ wã, ned a ye lar baagame n tɩ wẽ ned a to t'a ki, nin-kʋʋda tõe n zoe n tɩ soond tẽn-kãens pʋsẽ n põse. Ned ninga sẽn tõe n daag zɩɩm n dol zɩɩma da yik ne sũ-puuri n pʋg nin-kʋʋdã, n yet tɩ sora sẽn wogma a na paam n kʋ-a t'a nan ka ta soondga tẽng ye. B ka tog n kʋ-a ye tɩ yaa yĩdgu, beem da ka be sʋk ye. Yaa rẽ me yĩng la m kõt f noor kãngã: ‹Welg tẽns a tãab toore.› La Wẽnnaam f Soaala sã n yãend tɩ f reegame la f tũu noy niyns m sẽn kõt-f rũnna, n nong Wẽnnaam, f Soaala, beoog sẽn vẽege, n ka bʋdg sore, b na yalg f soolma, wala b sẽn pʋlem f yaab rãmbã n dɩk tẽnga zãng n kõ bãmbã. Dẽ marsã la f lebd n paas soondg tẽns a tãabo. Woto, yell sã n ka rog a zugu, b kõn daag ned zɩɩm y tẽngẽ, zĩig ning Wẽnnaam, f Soaala, sẽn yãk pʋɩɩr f yĩngã. Zɩɩm sã n daage, taal be-la f zugu. Ned sã n kis a to, n gũusd-a, n wudg n yẽeg-a n pãb n kʋ, n yaool marsã n zoe n kẽ soondg tẽng a ye, tẽnga nin-kẽemsã na n tʋma neb tɩ b tɩ yõk-a la b na bas-a-la sẽn tõe n daag zɩɩm n dol zɩɩma soab nugẽ, t'a yãk a yõore. Da bas t'a weoog kẽ-f ye, da bas tɩ b raag f tẽngẽ, ned sẽn ka beeg zɩɩm ye, tɩ woto la f na n paam sũ-noogo. Da teem f yak toaag kugr ye. Toaaga pa, wa pipi kẽedba sẽn deege, wa Wẽnnaam, f Soaala, sẽn kõ-b tɩ b sooge. Ned sã n kʋ, ned sã maan wẽnga, a sẽn maan a soab fãa, yella kaset soab ka yikd, yẽnd a ye, n tɩ kõ kaset ye. Yella tog n welga ne kaset dãmb a yiib bɩ a tãabo. Ned sã n wa ne kaset zirẽ n yet t'a zagl sʋgda a taab tɩ b kɩɩs noore, neb a yiiba sẽn tar kasetã, tata maan-kʋʋdba la bʋ-kaoodba taoore, bʋ-kaoodb niyns sẽn so-b tʋʋmd wakat kãngã taoore, bʋ-kaoodba na n vɛɛsa yella neere, la b sã n mik tɩ yaa rõadga, tɩ yaa zirẽ-beedo, b maanda ne yẽ soaba wala a sẽn da rat tɩ b maan a tũud-n-taagã. F yiisda wẽng f tẽn-peelmẽ. Neb a taaba na wʋme, rabeem na yõk-ba, la b na vẽ ne yell a woto maaneg f tẽngẽ. Da bas tɩ nimbãaneg yõk-f ye: vɩɩm donda vɩɩm, nif ronda nifu, yẽnd donda yẽnde, nug ronda nugu, naoor donda naoore. Y sã n yi n na n tak zabr ne y bɛɛba, Israyɛl kamba, y sã n yãend wiidi, bɩ bilim-bilm, bɩ tãb-biis sõor sẽn tagme, da saag-y n maan dabeem ye tɩ Wẽnnaam, y Soaala, bee ne yãmba, la yaa bãmb n yiis yãmb Ezipt tẽnga. Y sẽn wat n na n sɩng zabrã, maan-kʋʋda wata taoore n gom ne nebã. Ad-a sẽn yet-ba: ‹Kelg-y yã, Israyɛl tãb-biisi, y yika rũnna n na n zab ne y bɛɛba. Da bas-y y raooda tɩ boog ye, da zoe-y rabeem ye, y pɛleng ra yɩk ye, la da rig-y b taoor ye. Yaa Wẽnnaam, y Soaala, n be y sʋka. Bãmb n wa y sõngre n na n zab y bɛɛba n kõ yã.› Taoor dãmba na n yeela neba woto: ‹Ned sã n be yãmb sʋka n me ro-paalle la a nan ka kẽ a roogã, a leb a zakẽ n da wa pa zabrẽ tɩ ned a to yõdg n kẽ a zĩigẽ ye. Ned sã n be yãmb sʋka n sel a bugsuntungu n yaool n nan ka rɩ a pipi biisi, a leb a zakẽ n da wa pa zabrẽ tɩ ned a to yaool n wa tõsd bi-kãens ye. Ned sã n pʋlem bi-pugla t'a na yi kãadem ne-a, a leb a tẽngẽ n da wa pa zabrẽ tɩ ned a to wa kẽ kãadem ne bi-kãng ye.› Taoor dãmba wat n le sokame: ‹Ned sã n be yãmb sʋkã, t'a sũur kiuusdẽ, t'a raood boogdẽ, a leb a zakẽ la a ra wa boog a taab raood wa a meng ye.› Taoor dãmba sã n gom n sɛ, b lʋɩsda tãnsoaben-dãmba taoore. F sã n ta tẽnga n na n tak zabr ne-a, f na reng n gom ne-a laafi goama, n yeel-a t'a sak n pak a kʋɩlense. Tẽnga rãmb sã n leoke: ‹D sakame, d basa zabre,› b sã n pak foom b tẽnga kʋɩlense, neba fãa sẽn be tẽnga pʋg na n lebga f zak-tʋʋm-tʋmdba la f sõgen-kamba. Tẽnga sã n zãgs laafi goama kelegre, n kaoog zabre, fo gũbgd-a lame. Wẽnnaam, f Soaala, rɩkd-a lame n sagl f nugẽ la f sʋʋg koota rapa fãa. F na n sooga pagbã, kom-bõonegã, rũmsã la laog fãa sẽn pa tẽnga pʋga. F na n dɩlga f meng ne b laogã tɩ yaa Wẽnnaam, f Soaala, n kõ-fo. Yaa woto la f na n maan ne tẽns niyns fãa toaag sẽn zãr ne fo tẽnsã, ne tẽns niyns fãa sẽn ya toore, ne b sẽn na n sõdg b rãmb marsã wã. Tẽns niyns Wẽnnaam f Soaala sẽn deegd n na n kõ fooma da kees bõn-vɩɩs b pʋgẽ ye. F na ges wa kisgu Ititga, Amoritga, Kanaã rãmba, Perizitga, Ivitga la Zebuzitga, wala Wẽnnaam, f Soaala, sẽn kõ-f noore tɩ f kʋ. Woto b kõn zãms-y tɩ y wɩɩb wala b sẽn wɩɩb ne b wẽn-naandsa ye. Y waoog wẽn-naandsã, bãng-y tɩ y beega Wẽnnaam, y Soaala. F sã n wa gũbg tẽng n na n wẽ-a n sooge, tɩ zabra wa tadgdẽ, da zẽk f zende n kɛɛg tɩɩg ye, tɩ yaa tɩɩsã n na n dɩlg-fo. Dẽnd yĩnga da kɛɛg-b ye. Pʋʋg tɩɩg ka ninsaal tɩ f na n gõdg n zab ne-a ye. Yaa tɩɩs niyns sẽn ka womd-b biisa bala la f tõe n kɛɛg n wʋk n pag tẽngã n wa tõog-a zãnga. Wẽnnaam, f Soaala, sẽn dɩk tẽng ning n kõ-f tɩ f sooga pʋgẽ, fo sã n kẽnd n wa mik tɩ ned ki n dɩg pʋʋgẽ la f ka mi sẽn ya ned ninga n wẽ-a n kʋ, yiis nin-kẽemsã la bʋ-kaoodba tɩ b mag tẽnsa sẽn gũbgã zãrem ne kũuma. B na bãng sẽn ya tẽng ning n pẽ ne kũuma rɩgr n yɩɩda. Dẽ marsã la tẽng ninga sẽn pẽ-a wã nin-kẽems na n yi ne nag-sɛdg sẽn nan ka mi tʋʋmde, sẽn nan ka sog wãk ye. B talda nag-sɛdgã n dig koom sẽn zoetẽ, la be ka bʋde, ka ko n yegl ye. B kẽeda kooma ne nag-sɛdgã n wẽ a kãarã n weke. Dẽ poore, maan-kʋʋdba, a Levi kamba, kolgdame tɩ yaa bãmb la Wẽnnaam, f Soaala, yãk tɩ b kʋ maand la b ning bark b zĩigẽ, la b welg yɛla la b sɛɛs no-koɛɛm, sãmpogr poorẽ. Tẽnga nin-kẽems sẽn kolg-b kũuma lebda kʋɩlga sẽn zoet n watẽ wã, naafa zugẽ, n zãag bilf ne naafã, n pek b nusi. Dẽ poore b yeta woto: ‹D nug ka raag zɩɩm ye, d nif ka yãend zɩɩma raagd ye, Soaala, kõ-y y buuda Israyɛl sugri la zãag-y tẽnga ne nin-sõng zɩɩm bolbo.› Yaa woto la buuda paamd zɩɩma raagra sugri. Bɩ y gũus ne ned sẽn ka beeg zɩɩm daagre, modg-y n kẽn tɩrga Soaala taoore. F sã n kẽng zabre tɩ Soaala rɩk f bɛɛbã n sagl f nugẽ tɩ f yõg-b n pag roogo, la fo yãenda bãmb sʋka bi-pugl sẽn ta f yam tɩ f rat n kẽ kãadem ne-a, f boond-a-la f zakẽ. A põngda a zugu, n wõrs a nug-yẽese, a yeegda tãb-biisa sẽn yiis-a a ba zakẽ ne fut niynsã, la a paada f zakẽ. Kiuug tõre, a yãbda a ba la a ma. Dẽ poor marsã la f peegd-a t'a lebg f kãadem paga. Sã n seg tɩ y yama yii ne taaba f basd-a lame t'a loog a yam. F ka tõe n koos-a n paam ligd ye, f ka tõe n zã-a toog ye, t'a yɩ-la f paga. Rao sã n tar pagb a yiibu, n nong a ye n kis a ye, la b yiiba fãa roga a biiga, la yaa a sẽn ka nong pag ninga biiga n ya kẽema, a sã n yet t'a na n welga a raboogo, a ka tõe n dɩk kãsengã n kõ a sẽn nong pag ninga biiga la yaool n ya a sẽn ka nong pag ning biiga la kãsem ye. A tog n gesa a sẽn pa nong pag ninga biiga wa kãsma t'a pʋɩɩr yɩɩg a to wã rẽnd naoor a yiibu. Yẽ la pipi biiga, a reegda a kãsengã sẽn tog ne pʋɩɩr ninga. Ned sã n tar a biiga t'a wa lebg kɩɩsa la tõtre, yẽ n ka kelgd a ba, n ka kelgd a ma, b sã n sagend-a, bɩ a ba la a ma tall-a n wa tẽnga nin-kẽems taoor, tẽnga noore. B na n yeela nin-kẽemsã: ‹Woto yaa tõnd biiga, a yaa kɩɩsa la tõtre, a ka kelgd tõndo, la a yaa rɩ-rɩt la rã-yũuda.› Tẽnga rãmb labd-a-la ne kug n kʋ. Woto f kõn bas wẽng f tẽngẽ n ka yiis-a ye. Israyɛl zãng na n wʋmame tɩ rabeem yõk-a. Ned sã n maan wẽnga tɩ b tog n kʋ-a la yaa tɩɩg la b luul-a n kʋ, b ka basd-a tɩɩga zug tɩ beoog vẽeg ye, b mumd-a la baraare; Wẽnd yãka sẽn luul-a fãa barka. Da saag n dẽgem tẽng ning Wẽnnaam, f Soaala, sẽn kõt-f tɩ f sooga ye. F sã n yãend f to naaf bɩ a pesg sẽn meneme, da maan wa f ka yãend-a ye, legl-a n kɩs a soaba. Rũnga soab sã n zãr, bɩ f sã n ka mi-a, kẽes rũngã f zakẽ t'a pa be n tãag a soaba sẽn wat n bolg-a. F na lebs-a a rũnga. Maan boto ne a bõanga, ne a fuugu, ne a sẽn menes bũmb ning fãa, tɩ f yãende. Da maan wa f ka yãend ye. F sã n yãend f to naaf bɩ a bõang sẽn pãs n lʋɩ sorẽ, da maan wa f ka yãend ye; tɩ sõng-a t'a yik-a. Bɩ pag ra yeelg rao fuug ye, rao me ra yeelg pag fuug ye. Ned ning fãa sẽn maan woto maanda Wẽnnaam, f Soaala, sẽn kisi. F sã n kẽnd f sore n tees n yãend tɩɩg zug bɩ tẽnga, luiil tʋko, tɩ luiin-bi be a pʋgẽ, bɩ yaa luiil n wũg a gɛlẽ, bɩ a põgna a kamba, da saag n dɩk luiili wã ne b ma ye. Fo basdame tɩ luiila loog tɩ f wʋk a kambã. Dẽ na n waa ne f sũ-noogo la f yõ-woko. F sã n me ro-paalga, f na ning bɛonga zuga kogre: woto ned kõn yi yĩngr n lʋɩ n daag a zɩɩm n tʋk taal f zug ye. Da kẽ f bugsuntung pʋgẽ n le bʋd bũmb a to ye, tɩ naag n dɩ f sẽn bʋde la f sẽn sel zĩ yɛng yaa kisgu. F sã n kooda, da naag n sog wãg yɛnga naaf la bõang ye. Da yeelg fuug sẽn wʋg ne rũng kõbdo la beren-dɩgr gĩs ye. F sẽn tar fu-goabg ning n pinnẽ wã, da saag n ning zʋmba a noorẽ ye. Rao sã n kẽ kãadem ne paga n wa yik n yet t'a pa le nong-a ye, n wa yik n zabd ne-a t'a ka tar a meng neere, la a sãamd a yʋʋr n yetẽ: ‹Maam n dɩk pʋg kãnga n maan m paga la d sẽn waa n na n bãng taabã, m tẽed t'a ra zoe n sãamame.› Paga ba ne a ma wata tẽnga noore, la b kõta nin-kẽemsã kaseto, bʋʋda zĩigẽ, tɩ b biiga ra ka sãam ye. Paga ba yeta nin-kẽemsa: ‹Yaa m biiga, m dɩk-a lame n kõ nin-kãnga t'a maan a paga la a pa le nong-a ye. Dẽ marsã la a yik n sãbsd a vɩɩma n tãag n wilg-ma t'a mikame tɩ m biiga ra zoe n sãamame. La ad-m kaseto tɩ m biiga ra pa sãam pĩnd ye.› La b yɛdgda biiga kãadma fuugu tẽnga nin-kẽemsa nifẽ. Dẽ wã nin-kẽemsa na n yõka paga sɩda n sɩbg-a. B na n kɩtame t'a yao paga ba wanzurf wakɩ koeems koabga, t'a sãama Israyɛl bi-pugl yʋʋre. Paga na n yɩ-la a paga la a kõn tõog n dig-a n yiis abada. La sã n sɩd mik tɩ yaa vẽenega tɩ paga ra sãamame, b talld-a lame n taas a ba zak noore. Tẽnga rãmb labd-a-la ne kuga n kʋ, t'a sẽn maan yoob a ba zakẽ, a maana bũmb sẽn kis Israyɛl tẽn-peelmẽ. Yiis wɩɩbd a woto buud f sʋka! B sã n ling yoaad ne pag sẽn tar sɩda, b kʋʋda b yiiba fãa, paga ne raoã. Yiis wɩɩbd a woto buud Israyɛl sʋka. B sã n zoe n kãaba pa-kul sɩda tɩ ned a to seg-a tẽnga pʋg n sãam-a, y talld-b la b yiib fãa n yiis tẽnga noore la y labd-b lame n kʋ. Y kʋʋda bi-puglã tɩ yella maama tẽnga sʋka la a pa kelem ye. Y kʋʋda raoã t'a kẽe ne a to paga. Yiis wẽng f sʋka. Sã n yaa pʋtẽ la raoã seg pa-kul b sẽn pʋlem sɩda, n sãam-a, raoã bal la b kʋʋda. Da maan pa-kula bũmb, t'a ka maan yel-wẽnd sẽn sek a kʋʋb ye. A ka bãng tiir ye. Yaa wa nin-kʋʋd sẽn yẽeg a soab n kʋ wã sẽn ka bãng tiirã. Sẽn ya pʋtẽ wã la b seg taabã, tõe t'a sã n kelem me bɩ ned ka wa ye. Rao sã n seg pa-kul sẽn nan ka rɩk n kõ sɩda t'a yõg-a tɩ b ling-ba, raoã kɩta pa-kula ba wanzurf wakɩ koeems pis-nu. A sẽn sãam-a wã, a na n lebga a paga la a ka tõe, abada, n wa rig-a n yiis ye. Ned ka kẽed ne a ba pag ye. Ba sẽn so toore, biig rẽnd me toore. Sẽn ka tõe n naag b taab Wẽnd waoogra zĩigẽ yaa zu-soaba. Ka get a zu-soabenda sã n tũu ne toosg bɩ ne barg ye. Le paasa tãmpĩiri. Bãmb yagen-tʋbra-kẽes yagens kamba n wat n tõog n lagem b taab waoogra zĩigẽ. Amonitga la Moabitga kõn tõog bada n poog Wẽnd waoogra zĩigẽ ye. Bãmb yagen-tʋbra-kẽes yagens kamb mens ka wat n tõog ye. La rẽ ya b sẽn zãgs tɩ b kõn yi n seg-y sorẽ ne bur la koom y sẽn wa n yi Ezipt tẽnga. Sẽn ka tõe n naag b taaba Wẽnd waoogra zĩigẽ leb n yaa Moab neda, tɩ Moab tẽnga naab tɩ bõsa kãab beedo f yĩnga, baga, a Balaam, a Beor biiga. Nin-kãng ra kẽeda Petor sẽn be Aram kʋɩls a yiiba noorẽ. Wẽnnaam f Soaala zãgsa a Balaam kelgre. Wẽnnaam, f Soaala, tedga a kãab beeda tɩ lebg kãab noodo, tɩ Wẽnnaam, f Soaala, nong-f lame. A bada ne a bada-bila, f kõn bao buud kãensa yell manegre la b sũ-noog ye. Da rig Edomitg ye, yaa f saam-biiga; da rig Ezipt ned ye tɩ f yɩɩ sãan Ezipt tẽnga. B yagen-tʋbra-kẽes tõe n lagma yãmb waoogra zĩigẽ. F sã n yi zabr ne f bɛɛba n wa vẽ f sika bɛɛba tẽngẽ, f na zãag f meng ne bũmb ning fãa sẽn tõe dẽgem-fo. Wala yãmb tãb-biig a ye sã n dẽgem a meng a gãagẽ, a tog n yii sika poore, n pa be tɩ zĩig sobg-a. Zaabre, a kẽngda kʋɩlgẽ n so koom; wĩndig sã n kẽ, yẽ tõeeme marsã n le wa sika pʋga. F na bao zĩig kɛɛnga n kẽnd be n yolsd f menga. Zɩ rao sɩlenga tɩ f sã n dõbend n yiki bɩ f tu n busi. Bãng tɩ Wẽnnaam f Soaala meng n kẽnd n gilg f sikã n na n fãag-f ne f bɛɛba. F sika yaa sõngo, la Soaala ka tog n yãend bũmb be sẽn ningd-b yãnd ye. B kõn le pʋg f poor ye. Yem-daoog sã n yi a zu-soab yiri n zoe n wa fo nengẽ, da tɩ lebs-a ye. A na n paa ne foo, Israyɛl tẽng ning a sẽn yãk n na n zĩndi. Da rɩ a tʋʋm yõod zaalem n pa kõ-a bũmb ye. D da yãend Israyɛl kom-pugli wã sʋka yoob sẽn yood wẽn-naand yĩng ye. Boto me ne b kom-dibli. Da saag n wa Wẽnd, f Soaala, roogẽ ne yamleoog kũuni sẽn ya pʋg-yoaad la ba-raoog ligd ye tɩ b yiiba fãa yaa Wẽnd sẽn kis wa fãa fãa. Da peng f saam-biiga n wa reeg roaglg n paas ye. Ligdi, rɩɩbo, sẽn yaa a soab fãa, da reeg bũmb n zʋʋg f sẽn kɩsa ye. Sã n ya sãana, f tõe n peng-a lame n wa reeg roaglga. Sã n ya f saam-biiga, kisame. Woto la Wẽnnaam, f Soaala, na n ning f tʋʋma fãa barka, tẽng ning f sẽn dabd n na n tɩ sooge. F sã n pʋlem Wẽnnaam, f Soaala, bũmbu, da kaoos n pids f pʋleng ye. Ka rẽnna Wẽnnaam, f Soaala, wat n sok-f lame la rẽ ka tog ye. F sã n yet tɩ f kõn pʋlem Wẽnd bũmb me, ka yel-wẽnd ye. Modg bal n pids f sẽn yiis f noorẽ. Ka tũ ne moadg ye, pids-a wala f noora sẽn pʋlem Wẽnnaam, f Soaala. F sã n kẽ f to bugsuntungẽ, f tõe n dɩɩ biisã, wala f sẽn dat tɛka. Fo ye n da zɩ n loog ye. F sã n kẽ ned pʋʋgẽ, f tõe n kaoo ka-zuta ne nugu la ra saag n wʋr ne goeeg ye. Rao sã n kẽ kãadem ne paga n wa yik n yeel t'a manesma ningd-a-la yãnde, t'a ka le get-a ne yamleoog ye, n tol n gʋls sebre n kõ-a t'a looge, la paga loogame, n tɩ lebg ned a to paga. Nin-kãng me sã n yik n yet t'a pa le nong-a, n gʋls welgr sebr n kɩs-a t'a looge, bɩ nin-kãng maana kaalem, a pipi sɩda bãng t'a ka tõe n le reeg-a n maan a pag ye, t'a tʋka yell a zugu. Yaa bũmb Wẽnd sẽn kis wa fãa fãa. Gũus n da kẽes wẽng tẽng ning Wẽnnaam, f Soaala, sẽn kõt-fa ye. Rao sã n kẽ kãadem paalem, a ka bobd zabr ye. B ka wat n kos-a tʋʋmd ye. A basda fãa n be a zakẽ, yʋʋmd tõre, n noog a pag sũuri. F sã n ka tar ligd n na yao samde, samda soab ka tõe n deeg wa bobelle, f zom wɛrdga la f neer ye. Ka rẽ yaa f vɩɩma meng la a fãsg n looge. Ned sã n yõk a saam-biig Israyɛl kamba sʋka n tall n looge, n tɩ nams-a bɩ n tɩ koos-a, nin-kãng toga ne kũum. Yiis wẽng a woto buud f sʋka. Maan-y gũusgu, Israyɛl kamba, ne bãas niyns sẽn wẽnd yĩng bãaga. Reeg-y la y tũ maan-kʋʋdba, a Levi kamba, sẽn na n wilg yã. Deeg-y noy niyns fãa m sẽn kõ-bã. Tẽeg-y Wẽnnaam, y Soaala, sẽn maan ne a Miriyam, y sora zug, Ezipt yiib wakato. Fo sã n peng f to bũmbu, da kẽ a zakẽ n dɩk a bũmb ye. Yaa yɩng la f yaasda, tɩ fo sẽn peng a soaba tall bũmbã n wa kõ-fo. Fo sẽn peng a soaba sã n ya nimbãan-neda, da kẽ gãag ne a bũmb a sẽn bobl-f ye. Wĩndig sã n wa kẽedẽ, wa lebs-a a bũmbu. A na gãand ne a fuugu la a na kãab-f noogo, la Wẽnnaam, f Soaala, taoore fo me sõmblem na puki. Naong soaba, ka neng soab, sã n tʋmd n deegd ligdi, a yaa f saam-biig bɩ sãan sẽn naag foo n kẽed tẽng a ye, da yao-a nimbãan-yaood ye. Daar fãa ne a yaoodo, wĩndig ra kẽ tɩ f pa yao-a ye. A yaa naong soaba la yaa rẽ la a teeg yã. Da bas t'a kelem-f Wẽnd ye. A kelem yã, a ning-f-la taale. B pa kʋʋd ba rãmb b kamb yĩng ye, b pa kʋʋd kamba b ba rãmb yĩng ye. B sã n kʋ neda, b kʋ-a-la a meng beegr yĩnga. Da wẽg sãan bɩ kɩɩb bil ye. Da reeg pʋg-kõor fuug ye. F na tẽeg tɩ fo me yɩɩ yamb Ezipt tẽnga la yaa Wẽnnaam, f Soaala, n fãag-fo. Rẽ me yĩng la m yet tɩ f reeg la f tũ noorã. F sã tigsd f koodo, tɩ ka-zut kẽer dʋʋg n pa f pʋʋgẽ da lɛɛg n wʋgs-b ye. Bãmb la sãana, kɩɩba la pʋg-kõor pʋɩɩre, la Soaala-Wẽnd na n tũ rẽ n ning f tʋʋma fãa barka. F sã n pãb n sʋʋg f oliv, da le lɛɛg n wa yiis sẽn pa tɩɩga zug ye. Sẽn pa wã yaa sãana, kɩɩba la pʋg-kõor dẽnna. F sã n tõs f bugsuntungu, ra lɛɛg n wa yiis biisa ye. Sẽn pa wã yaa sãana, kɩɩba la pʋg-kõor dẽnna. F na tẽeg tɩ f me yɩɩ sãan Ezipt tẽnga. Dẽ me la m yet tɩ y reeg noor kãngã. Neb sã n wẽed no-koeemd ne taaba, b kẽng bʋʋdo. Sẽn ka a bʋʋm kongda bʋʋm, sẽn tara bʋʋm deegda a bʋʋm. Sẽn ka tara bʋʋma sã n tog ne pãbre, bʋ-kaooda kɩtdame tɩ b gãneg-a, yẽ taoore, n pãb-a n zems a beegra sẽn tog ne. Pãbra yaa kaas pis-naase la ka loogd dẽ ye. Ka rẽ b tõe n wa pogl-a lame bɩ n wa mams-a ne rũnga. Naaf sẽn tabd ki zɛɛgẽ noor ka ningd yʋk ye. Ba-biis a yiib sã n kẽed zak a ye, t'a ye wa ki n ka rog biig ye, sẽn ki-a wã paga ka tõe n yɩ ned a to paga, sã n ka a sɩda rooga ned ye. A sɩda ba-biiga n peegd-a n maan a paga. Pipi biigã, paga sẽn na n dogã, na n lebga kiida biiga t'a yʋʋr da menem Israyɛl ye. La raoã sã n pa rat n kẽ ne a ba-biig paga, paga babsda nin-kẽemsã tẽnga noor n yeel-ba: ‹M sɩda ba-biiga zãgsame t'a kõn peeg maam n dog-biig n kõ m pipi sɩdã t'a yʋʋr da wa menem Israyɛl tẽn-peelmẽ ye.› Nin-kẽemsa boonda ba-biigã n sagl-a. Ba-biiga sã n yeele: ‹M ka rat n kẽ kãadem ne a ye,› nin-kẽemsa taoore, paga kolgda a sɩda ba-biiga, n zõond n pidg a neodr a ye la a tʋbs a nenga kolkoodo n yetẽ: ‹Yaa woto la b maan ne rao ninga sẽn pa rat n le yik a ba-biig raboogo!› A Israyɛl tẽn-peelmẽ marsã, b na n boola yẽ zaka t'a neood-yɛng zaka. Ned ne a saam-biig sã n sog taaba tɩ bãmb nin-yend pag kolg n na n sõng a sɩda n gãd zabd-n-taaga kur-wĩiri, b fiuugda paga nugu. B kõn zoe a nimbãaneg ye. Da sui f korgẽ zɩslem magds a yiibu, bedre la bilfri n yaool n tar-ba n magd wa b zema taab ye. Peta sẽn tar n magda me ra yɩ b yiib f zakẽ, bedre la bilfr ye. Zɩslma magdsa ka paasde, ka woogde, petã me yalem la b zulum ka woogde, ka paasde. Woto me la f yõor na n yɩ wok Wẽnnaam f Soaala sẽn kẽesd-f tẽng ninga pʋgẽ. Ned ning fãa magb sẽn ka zemse, ned ning fãa sẽn maand zãmbo, yaa yẽ la Wẽnnaam, f Soaala, kis wa fãa fãa. Tẽeg, Israyɛl, a Amalɛk sẽn maan-f bũmb ninga f sora zugu, f sẽn waa n yi Ezipt tẽnga. Tẽeg tɩ yẽ n yi n yek-f sorẽ, f sẽn waa n yɛ zãng fas la f kiid kom, n kʋ f neb niyns fãa sẽn da pa poorẽ. Sɩda a ka zoe Soaala-Wẽnd nif ye. Woto wã, Wẽnnaam, f Soaala, sã n wa kɩt tɩ f tɩlg ne f bɛɛba sɩ-lakre, n kõ-f vʋʋsem, f tẽngẽ, tẽng ning Wẽnnaam, f Soaala, sẽn kõt-f tɩ f soogã, f na yẽes Amalɛk rãmb yʋʋr saaga tẽngre. Da yĩm ye! F sã n wa kẽ tẽng ning Wẽnnaam, f Soaala, sẽn kõt-f tɩ f sooge, f sã n wa me be n kẽedẽ, la tẽnga sã n wa wom a biisã, f na yãk Soaala pʋɩɩr f kood rẽemsa fãa pʋgẽ. F ningd-b-la peoog pʋga n tall n kẽng tẽng ning Wẽnnaam f Soaala sẽn yãk b waoogr zĩigã. F tʋgd n yãenda maan-kʋʋd ning sẽn so-a tʋʋmda wakat kãngã la f na n yeel-a lame: ‹Dũnna m wilgda Wẽnnaam, m Soaala, tɩ m kẽe tẽng ning b sẽn da kãab d yaab rãmba tɩ b na n kõ-a-la tõndã.› Maan-kʋʋda reegda peoogã a nugẽ n dɩgl-a Wẽnnaam, f Soaala, maan-kugra taoore. Wẽnnaam, f Soaala, taoore, f na n yeela woto: ‹M ba sɩnga gilung Aram tẽnga, n wa sig Ezipt tẽnga, beelẽ a vɩɩnda wa sãana ne a kamba sẽn da ya neb a wãn bala. Yaool n yaa be la a wa n lebg bu-yalengo la buud sẽn tar pãnga, la Ezipt rãmba nams-d lame, n kẽes-d naongo, n kẽes-d yembd sẽn yɩ toaaga. Dẽ me la tõnd kelem Wẽnde, d yaab rãmba Wẽnde la b wʋma d koɛɛga, b yãendame tɩ d lebga naong rãmba, nimbãan-dãmba la yemse. Soaala wilga b nug pãnga, n wilg b kang keglem, n maan bõn-bãna, n tʋm tʋʋm bɛd sẽn wa ne yɛɛsgo n paam n yiis tõnd Ezipt tẽnga. B sõng-d lame tɩ d ta ka, tɩ b kõ-d tẽng sẽn bund bĩisim la sɩɩdo. La ade, Soaala, m wata ne y sẽn kõ-m tẽng ninga kood rẽemse.› F rɩgenda peoogã Wẽnnaam, f Soaala, taoore, la f wõgemde. La Wẽnnaam, f Soaala, sẽn pids sũ-noogo, foo la f zak rãmba, f na kɩdem n lang ne Levitga la sãan sẽn be ne foo. Yʋʋmd a tãab-tãab fãa yaa kooda la paoonga yãgsg yʋʋmde. F na pʋɩ f kooda fãa n yãk pʋɩɩr a ye piig zugu n kõ tẽnga Levitga, sãana, kɩɩba la pʋg-kõore tɩ b rɩ n tɩge, ad-f sẽn na yeel bũmb ning f Soaala la f Wẽnnaam: ‹M pʋɩ-la m paoongo n yãk pʋɩɩr sõngã n kõ Levitga, sãana, kɩɩba la pʋg-kõore wala y sẽn wilg-ma zãnga, m deegame la m tũume. M sẽn waa n dɩt m ned sẽn ki kʋʋre n pa yãk fɩ be ye, m sẽn wa n ya rẽgdo, ka paoong kãng pʋg la m kẽ n yãk n tũnug m kosg ye, ka be la m yãk wẽn-kosgo, ned sẽn ki yĩng ye. M kelga Wẽnnaam, m Soaala, koɛɛga, m deega b noora gilli. Zĩnd-y yĩngr do-sõnga pʋga, zĩnd-y saasa zut n sudg y barka y biig a Israyɛl zugu la y sudg-a tẽng ning y sẽn kãab d yaab rãmba, tẽng sẽn bund bĩisim la sɩɩdo.› Dũnna, Wẽnnaam, f Soaala, kot-f lame tɩ f reeg la f tũ noorã la rog-n-mikã. Reeg-b la f tũ ne f sũur fãa, ne f yalẽ fãa. Fo paama rũnna, Israyɛl, tɩ Soaala meng pʋlem tɩ b na yɩɩ f Wẽnde, f sã n maand b sẽn date, f sã n deegd b noya, n tũud sora la rog-n-mikã. Soaala me kɩtame tɩ fo yiis f noorẽ dũnna tɩ fo lebga b buudu, b meng pʋɩɩre, wala b sẽn kãab-fo, la f na n deega b noya fãa. Bãng tɩ sẽn ya woto wã, foo n na n zʋʋg buud a taaba fãa b sẽn naana, ne waoore, la yʋ-noogo la ziiri, foo n na n lebg buud b sẽn welg toore, b meng yĩnga, wala b sẽn kãabe.» A Moyiiz ne Israyɛl nin-kẽemsa kõo neba noor kãnga: «Reeg-y noy niyns fãa m sẽn wilgd-y rũnna wã. Y sẽn na n dʋʋg Zʋrdẽ kʋɩlga raare, n dʋʋg-a n tees tẽng ning Wẽnnaam, y Soaala, sẽn kõt yãmbã, y na wʋk kug bɛda n sel, n fẽ goore. Gʋls-y b zutu, y sẽn dʋʋg Zʋrdẽ kʋɩlga raare, noy niyns fãa m sẽn taas yãmbã. Woto y na tõog n kẽ tẽng ning Wẽnnaam, y Soaala, sẽn kõt yãmba, yaa tẽng sẽn bund bĩisim la sɩɩdo wala y ba rãmba Wẽnda sẽn kãab yãmba. Y sã n wa rʋʋg Zʋrdẽ kʋɩlga, y na n sela kugã wala m sẽn wilg-y rũnna wã, Ebal tãng zugu. Fẽ-y kuga goore. Me-y maan-kugr Wẽnnaam, y Soaala, yĩnga. Maan-kugra na n mee ne kug sẽn ka pees ne kut ye. Yaa kug sẽn ka pees la y na n dɩk n me Wẽnnaam, y Soaala, maan-kugrã. Yaa maan-kugr kãng zug la y na n kʋ yũ-nooda maando, Wẽnnaam, y Soaala, yĩnga. F na kʋʋ laafi kosg maando. F na rɩ ne sũ-noog Wẽnnaam, y Soaala, taoore. Gʋls-y noy kãensa goama kuga zutu. Rɩgl-y-b tɩ b karenga yɩ naana.» A Moyiiz ne Levitsa sẽn ya maan-kʋʋdba le yeela a Israyɛl: «Sĩnd n kelge, Israyɛl, dũnna, Wẽnnaam, f Soaala, welg-f-la toore b meng yĩnga. Bɩ f kelg Wẽnnaam, f Soaala, koɛɛga, n tũ b noya la f lak f meng ne b sẽn gɩdge, wala f sẽn le tẽeg rũnna wã.» Baraare, a Moyiiz yeela neba woto: «Ad neb niyns sẽn na n yaas Garizim tãnga zug n kãab neba kãab-noodo, b sã wa rʋʋg Zʋrdẽ: a Simeõ, a Levi, a Zɩɩda, a Isakar, a Zozɛf la a Bẽnzame. Ad neb niyns sẽn na n yaas Ebal tãnga zug n kãab kãab-beedã: a Rubẽ, a Gad, a Asɛr, a Zabulõ, a Dã la a Neftali. Levitsa na n tãsa woto Israyɛl kambã: ‹Wẽnd na sãam ned ning fãa sẽn na n pees wẽn-naand bɩ nin-naande n na n soos n waoog-a. Ninsaal nug tʋʋmde Wẽnnaam sẽn kis wa fãa fãa la rẽnda.› La neba fãa na n leokame: ‹Ami!› ‹Wẽnd na sãam sẽn sãbsd a ba la a ma!› La neba fãa leokdame: ‹Ami!› ‹Wẽnd na sãam ned ning fãa sẽn teemd a yak toaaga!› Tɩ neba fãa leoke: ‹Ami!› ‹Wẽnd na sãam ned ning fãa sẽn kẽesda zoang moogo!› Tɩ neba fãa leoke: ‹Ami!› ‹Wẽnd na sãam ned ninga fãa sẽn wẽgd sãana, kɩɩba la pʋg-kõore!› Tɩ neba fãa na n leoke: ‹Ami!› ‹Wẽnd na sãam ned ning fãa sẽn kẽ ne a ba paga t'a kẽeda a ba soolmẽ!› Tɩ neba fãa leoke: ‹Ami!› ‹Wẽnd na sãam ned ning fãa sẽn wɩɩbda ne rũnga!› Tɩ neba fãa leoke: ‹Ami!› ‹Wẽnd na sãam ned ning fãa sẽn kẽeda ne a tão, a ba biiga bɩ a ma biiga!› Tɩ neba fãa leoke: ‹Ami!› ‹Wẽnd na sãam ned ninga sẽn kẽeda ne a pag ma!› Tɩ neba fãa leoke: ‹Ami!› ‹Wẽnd na sãam ned ninga sẽn soosd n pãbd a taaba!› Tɩ neba fãa leoke: ‹Ami!› ‹Wẽnd na sãam ned ning sẽn na n deega ligdi n tɩ wẽ n kʋ ned sẽn ka maan wẽnga!› Tɩ neba fãa leoke: ‹Ami!› ‹Wẽnd na sãam ned ning sẽn na n kɩɩsa noy kãensa goama, sẽn na n tõdg b tũubu!› Tɩ neba fãa leoke: ‹Ami!› Fo sã n sɩd kelg Wẽnnaam, f Soaala, koɛɛga, n tũud noya m sẽn kõt foo rũnna wã, ad Wẽnnaam, f Soaala, na n kɩtame tɩ f yɩɩg buud a taaba fãa. La ad bark ning sẽn na n sig f zugu, f sẽn kelg Wẽnnaam, f Soaala, koɛɛga yĩnga: Wẽnd bark na sig neb nins sẽn be b tẽngẽ bɩ b pʋt rotẽ! Wẽnd na kõ-y kamba wʋsgo, n kõ-y kood zembala, Wẽnd bark na sig y pʋtẽ, y bãgrẽ, tɩ y niis la y piis ne y bʋʋs rogdẽ. Wẽnd bark na pids y pet ne tɩɩs biisi, n pids y bur koglg ne buri, Wẽnd ning f yiib la f kõom barka. F bɛɛba sã n yik n teeg ne foo, bɩ Wẽnd yõg-b n sagl f nusẽ. B tũu so yɛng n na n wa tak zabr ne foo, la yaa soy a yopoe la b na n tũ n menem f taoore. Wẽnd na n paalga b barka ne foo, ne f baoa la f tʋʋmd ning fãa f sẽn na n tʋme. Barka na pa ne foo, tẽng ning Wẽnnaam, f Soaala, sẽn kõt-fo. Soaala na n kɩtame tɩ f lebg buud sẽn welg toor b yĩnga, wala b meng sẽn kãabe, la rẽ yaa f sã n deeg noya Wẽnnaam, f Soaala, sẽn kõt-fo, la f sã n tũ b soy wã. Tẽnsa fãa na bãng tɩ Wẽnd barka sig-f lame la b na rig rabeem f taoore. Bãng tɩ f na n paama sũ-noogo, f na n paama rogem wʋsgo, tẽng ninga pʋgẽ, Soaala-Wẽnd sẽn kãab f ba-rãmb tɩ b na kõ-fã. F rũms na n weka balbo, f pʋt na n pelga ne koodo. Wẽnd na n yooga f yĩnga, b saasa ko-nina tɩ saaga rʋʋg f tẽngẽ wakat sẽn ta, tɩ f tʋʋm fãa zĩnd yõodo. F na paam tɩ sek f wa yãk n peng tẽns a taab sõor sẽn pa paood ye, la f kõn bõs tɩ b peng-f bũmb ye. Soaala-Wẽnd na n lʋɩs-f-la taoore, f kõn pa poorẽ ye. B na n zẽka f yʋʋre, f kõn yãend paoor ye. La rẽ yaa f sã n kelg Wẽnnaam, f Soaala, noya m sẽn yet tɩ f reeg rũnna la f tũ wã. La rẽ yaa f sã n tũ soy niyns m sẽn wilgd-f rũnna n ka kɩll goabga, n ka kɩll rɩtgo la f ka yãend wẽn-faado n zoe n pʋg-b ye. Fo sã n pa kelg Wẽnnaam, f Soaala, koɛɛga, n tũ b noya la f zãag f meng ne b sẽn gɩdge tɩ m wilgd-f rũnna, ad kãab beed niyns sẽn na n lʋɩ f zugu: Wẽnd na sãam f zak la f pʋto! Wẽnd na wõr f peoogo la bur koglgo! Wẽnd na gɩdg f buud yalgre la f pʋta wombo! Wẽnd na sãam f niis la f piisi! Wẽnd na sãam f yiib la f lebgre! F sẽn na n sɩng tʋʋmd ning fãa Wẽnd na n yãag-f-la ne bʋko, ne yɛɛsgo tɩ far wa baas-fo, tɩ f wẽneg n menem. La rẽ yaa f sẽn tʋm wẽnga, n lak n bas maama yĩnga. Soaala na kɩt tɩ f bẽ bãaga, bãag sẽn na n yiis-f tẽng ning f sẽn dabd n na n tɩ kẽ n soogã. Ad bãas niyns Soaala sẽn na n lobg-fo tɩ b wa sɛɛs-f zãngã: kɩbga, zu-zabre, pʋ-zabre, zãnkãda la solenkẽense. Sã n yaa f pʋtã na n yɩɩ wãoong la gãnem. Yĩngri, saaga gãnema a neng wa wãre, tɩ tẽnga kʋɩɩs a meng wa kutu. Sa-kooma zĩigẽ, yaa tompɛglem la wubsgu n na n dʋʋge. B na n tara rʋʋgre, tɩ fo wa menem zãnga. Soaala na dɩk-f lame n sagl f bɛɛba nusẽ. So-yɛng la f neba na n yi n tɩ seg bɛɛbã, soy a yopoe n na n yɩ b zoees soy. Tẽns a taaba rãmb sã n yãend-fo b sũur na n yaalame. Yĩngr luiili la we-rũms na n dɩ-la f yĩnga nemsã la b kõn yãend ned sẽn na n dig-b ye. Ezipt yũya la a nod-tãodsã la y na n bẽ, n paas gɛnda la zagengo sẽn ka tõe n tɩp ye. Soaala na n lob-f-la gãeemdo, zondo la zʋbsgo. Wĩnto-sʋka f na n kẽnd n babendame wala yʋn-sʋk zoanga, f kõn yãend f sor ye. Neb n na n belg foom n sɛ f paoong zãnga la f kõn tol n yãend sõangd ye. Fo sẽn bao bi-pugl ning n na n maan f pagã, ned a to n dengd foom a roogẽ. F sẽn me roog ning n na n kẽ wã, f kõn kẽe ye. F sẽn na n sel bugsuntung ningã, f kõn tõs b pipi biisa meng ye. B na n kʋ-la f naaf f nifẽ la f kõn wãb a nemd ye. B na n looga ne f bõanga la f kõn le yãend-a ye. B na n wʋka f piisã n kõ bɛɛba la ned kõn waa n sõng-f ye. Tẽns a taab rãmb n na n loog ne f kom-dibli la f kom-pugli, tɩ f nin wa raag ne b gẽegre, beoog sẽn vẽege, la f kõn le yãend-b ye. F pʋta yõodo, f tʋʋma fãa yõodo, yaa neb n na n dɩ-a, neb fo sẽn ka mi n na n dɩ-a. Fo lebga ned b sẽn zɛɛde la sẽn zĩ ne sũ-toog bala. F na yika gãeemdo: f sẽn tar sẽn dɩg f taoora gesgo la f sẽn tare. Wẽnd na n kɩtame tɩ yũy sẽn zabd pus y rũma la y gɛ, yũy sẽn ka tõe n sãoog ye. B na n pusa y nao-sɩlpama n tãag y zug tẽnsʋka. Yaa tẽn-zãoorgẽ, Israyɛl, tẽns foo ne f ba-rãmb sẽn zɩ n bãnge, la Soaala na tʋm foo ne dĩm ning f sẽn na n bao n kõ f mengã. F na tɩ waoog wẽn-naandse: raad la kug-peesem! Wẽnnaam, f Soaala, sẽn na n tall-f n taas zĩig ning fãa, b na wẽ siri f poorẽ, f na lebg f bɛɛb baobgo la b laado. F na n bʋda pʋt zembala la f kõn yãend kood ye tɩ sʋʋr na n looga ne zãnga. F na n sela bugsuntundu n maneg-b tɩ ya sõmbo la f kõn tol n yũ b rãam, f kõn tol n yãend b biis meng n tõse, tɩ zũnzũur n na n dɩ zãnga. Oliviye tɩɩs na n pida f tẽngã la f kõn paam kaam meng n zɛ f yĩng ye, tɩ b na n sʋʋga kãse. F na n doga kom-dibli la kom-pugli la b kõn pa ne foo ye, tɩ b na n tall-b lame n kẽng yembdo. F tɩɩsa la tẽnga sẽn wom fãa na n yɩɩ sʋ-warõng soolem. Sãana sẽn naag foo n kẽed tẽn-yɛngã na n lʋɩ-la f taoore, tɩ fo tar poorẽ lebre. Yẽ n na n yãe n peng foo, fo kõn tõog n peng-a bũmb ye. Yẽ zĩi taoore tɩ fo paad poorẽ zĩiga. Kãab beed kãensa fãa na n lʋɩ-la f zugu, b na n pʋg-f lame tɩ f wa menem zãnga. La rẽ yaa f sẽn pa kelg Wẽnnaam, f Soaala, koɛɛga n gɩdg f meng ne b sẽn kisi la f reeg b noya b sẽn wilgi. Dẽ n na yɩɩ wa saglgo, yãmb ne y kamba yĩnga, beoog sẽn wate. Fo sẽn ka pʋg Wẽnnaam, f Soaala, ne sũ-noog la kɩdengo, f sẽn waa n tar f sẽn date, f na yɩ sõgne, Wẽnd sẽn na n tʋm-f bɛɛb niynsa sõgne, la f na tɩg kom, ko-yũud, naong la far buud fãa. Wala nag koodre, f yubl na reeg toogo n tãag f loogre. Wẽnd na n yiisa buud t'a wa zab ne fo. Yaa buud sẽn yi tẽn-zãoorgẽ, dũni wã sɛtmẽ, n tar pa-nand-tugr tʋʋlem la a pãnga, buud f sẽn pa wʋmd a goam ye, buud sẽn ya toaaga, n ka mi nin-kẽem waoogre, n ka zoet bi-bilf nimbãaneg ye. A na n dɩ-la f rũmsã, f koodã al tɩ f wa menem zãnga. A kõn kees bũmb f zɛɛgẽ ye, f rã-paalg rʋgdẽ ye, la f kaama sĩmbiẽ ye. A kõn kees nag-bil la pe-bil ye, n wa tãag f loogr zãnga. A na n yẽd-f lame n pag-f f tẽngẽ, al tɩ lalsa wa rʋʋg zãnga, lals niyns sẽn gũbg f tẽngã n ya wogd-wogd, tɩ f sũur kegmẽ wã. Wẽnnaam, f Soaala, sẽn kõ-f tẽng ning tɩ f soogã la bɛɛba na n gũbg zãnga. F bɛɛba sẽn wat n gũbg tẽngã n kẽes-f nimbãaneg ninga pʋgẽ, f na n wãba f sẽn doge, f kom-dibli la f kom-pugli, Wẽnnaam, f Soaala, sẽn kõ fooma. Rao fãa sẽn vɩ f tẽn-peelmẽ, n yet t'a yãee gʋʋlgo sẽn pid gʋʋlgo, n yet t'a sɩlsa a ning-taaba wa pĩim al tɩ rat n kẽke, rao kãng na n mooga a nif ne a ba-biisi, ne a paga a sẽn nonge, ne a kamba sẽn keese, a na n mooga a nif ne ba t'a pa rat n yãk n kõ, ba bilf menga, a kamba nemdã a sẽn na n wãb n pa kees bũmbã, bɛɛba sẽn gũbg tẽngã n kẽes-a nimbãaneg sẽn pid nimbãanega yĩnga. Pag fãa sẽn vɩ f tẽn-peelmẽ n yet t'a yãee gʋʋlgo sẽn gʋʋl n taase, n yet t'a mii ning-taaba sẽn dat bũmb ninga, pag sẽn ka saagd n bas a naoor tɩ sɩɩs tẽnga, a sẽn yet t'a yãee wubr sẽn pid wubri, t'a sɩlsa a ning-taaba wa pĩim al tɩ rat n kẽke, pʋg kãng na n mooga a nif ne a sɩda a sẽn nonge, ne a bi-ribl la a bi-pugla, a na n mooga a nif ne a biig a sẽn doge, ne a kamb a sẽn yiis dũniya, tɩ bɛɛba sẽn gũbg tẽngã n kẽes-a nimbãaneg sẽn pid nimbãanegã, rɩɩb buud pa kees ye, t'a na n soos n wãb a kamba. F sã n ka modg n tũ noorã wala a sẽn gʋls sebr kãnga pʋga, la f zoe Wẽnnaam, f Soaala, n zoe b yʋʋra sẽn yɛɛsd la sẽn kẽesd dabeem, Soaala meng n na n sɩbg-fo, foo ne f buudu. B na n sɩbg-f-la ne sãmpoaga sẽn ka tẽng zug sãmpoag ye, sãmpoag sẽn kẽ pãafo, bãas sẽn zabd n ka maagdẽ ye. B sẽn na n le wa buk f poor bãas niynsã, yaa Ezipt bã-wendã. Bãas niynsi, sãmpoag niyns sẽn pa sõdg noor sebr kãnga pʋga, Soaala na n fẽeg-b-la yãmb gilli tɩ y wa menem moogo. La yãmb sõora sẽn da ta yĩngr ãdsã, y na n keesa fĩyãayõo bala. La rẽ yaa y sẽn pa kelg Wẽnnaam, y Soaala, koɛɛga. La wala Soaala sẽn da nong n koll yã n dat tɩ y yɩ zembala la y pid ne sũ-noogo, b nongame marsã n sõng tɩ y menem, tɩ y sɛ zãnga, tɩ b võ-y wa tɩɩse tẽng ning y sẽn na n tɩ kẽ n soogã. Soaala na n sẽeg-y-la tẽns a taaba pʋgẽ, dũni wã yaang n ta a taoore. Yaa wẽn-naands la y na n waooge: wẽn-naands foo ne f ba-rãmb sẽn ka mi, Israyɛl, bũmb sẽn pees ne raad la kuga. B tẽnsa pʋga f kõn paam vʋʋsem ye, f kõn paam vẽenem sẽn sek f nao-pʋg tabgr ye. Soaala na n kõ-f-la sũur sẽn kiuusdi, nin sẽn suusdi, vɩɩm sẽn maage. F vɩɩ wa f kiime, n digd rabeem wĩndig la yʋngo, n sãmbd f na ki, f na vɩɩnde. Yibeoogo f na n yeela f menga: ‹M nongẽ lame tɩ zĩiga zoe n sobgẽ!› La f tata zaabr n maanẽ: ‹M nongẽ lame tɩ zĩiga zoe n yẽegẽ!› F sẽn ne bũmb ning n tar gesgã n na n kiuus f sũurã. Soaala na n kẽes-f-la kogend pʋgẽ tɩ f leb Ezipt tẽnga la m da yeel-f lame: ‹F kõn le yãend tẽn-kãng bada?› Beelẽ fo meng f toore n na n koos f meng wa yem-daago la yem-poaka la f kõn paam daad ye!» Yɩɩ woto la a Moyiiz yals a Israyɛl zĩigẽ tɩ zooda ne Wẽnda yõge, wala Soaala sẽn da rata. Zooda yõga Moab tẽn-peelmẽ la a yaa toor ne Oreb tãnga zug soabã. Gom bãmba la a Moyiiz yiis yã, a sẽn waa n deeg Wẽnd noor n yõg zood ne Israyɛl kamba, Moab tẽnga. Zood kãng yõg n paasa Oreb tãnga zug soabã. A Moyiiz tigma Israyɛl kamba fãa n yeel-ba: «Y mens yãenda ne y nini Soaala sẽn maan Ezipt tẽng ne a dĩma la a sõgen-kamba la a tẽn-peelma gilli. Y sɩd yãenda ne y nini bõn-bãna la makr-dãmb sẽn wa ne tẽn-kũum menga. La sẽn tãag rũnna, Soaala ra nan pa kõ-y yam tɩ y reege, n ko-y nin tɩ y yãende, n kõ-y tʋb tɩ y kelg ye. B kɩtame tɩ y gilim yʋʋm pis-naas zĩ-peen-daagẽ. Y fut pa ki ye, y neooda ka wur ye. Ka bur la y rɩ ye, ka rãam la rã-toos la y yũ ye; la yaa sẽn na yɩlẽ tɩ y yama puki tɩ y bãng tɩ bãmb la y Soaala la y Wẽnde. D sẽn ta ka, Esbõ dĩm a Siyõ la Bazã dĩm a Og yi n segd-d lame n na n tak zabr ne-do, la d tõog-b lame. Tõnd deega b tẽnsã n kõ a Rubẽ, a Gad la a Manase rooga bogre. Tũ-y zooda noora sẽn sigl bũmb ningã tɩ y sẽn sɩng fãa na baas neere. Yaa Wẽnnaam, y Soaala, taoor la y fãa yɛs rũnna, yãmb ne y taoor dãmba, ne y sagsã, ne y nin-kẽemsã, ne bʋ-kaoodbã, ne y tãnsoaben-dãmbã, ne y kamba, y pagba la sãamba sẽn nok yãmb n wesd y raad la b yõngd y kooma. Y tigma ka n na yõg zoodã, ne Wẽnnaam, y Soaala, n na n wẽen n pidsi n paam n tɩlg kãab beeda sẽn naag n kãabã, la y rɩ b kãab noodã yõodo, n lebg b buudu, tɩ b lebg y Wẽnd, wala b sẽn pʋlme la wala b sẽn kãab a Abraam, a Izaak la a Zakoob. Zooda sẽn yõg tɩ kãab beed naag n kãabã, ka yõg ne yãmb bal ye, a yõga ne ned ning fãa sẽn yɛs ka rũnna n vʋʋsd ne yõore, Wẽnnaam, d Soaala, taoore. Zooda yõgda ne d yagens niyns fãa sẽn nan wat beoogo. Yãmb yẽ mii d vɩɩma sẽn yɩ a soab Ezipt tẽnga, la y yãenda y sẽn pɩʋʋg tẽns niynsã. Y yãenda b yel-yoodã la b wẽn-naandsã b sẽn tarã: raado, kuga, wanzurf la sãnem. Bɩ m da wʋm tɩ yãmb sʋka, raoa bɩ paga bɩ saka a ye neba n lak b yam ne Wẽnnaam, d Soaala, n na n tɩ waoog tẽn-bãmba wẽn-naandsa ye. Bɩ y ra bas tɩ yẽgend toaag wa tão y sʋka n tob a wila, zẽnem la a tɩɩsem wila. Ned sã n wʋm kãabdã n yet tɩ yẽ paama zu-noogo, t'a yɛla fãa na n baasa neere n yaool n ka lak ne a tʋʋm wẽna, nin kãng bãng tɩ Wẽnd ka na n kõ-a sugr ye. B sẽn ka sak paoorã b sũura na wɩdga bugum n dɩ-a. Kãab beeda fãa sẽn gʋlsa na n mobg-a-la vugri tɩ Wẽnd yẽes a yʋʋr saaga tẽngre. Soaala na n welg-a-la toore, Israyɛl kamba sʋka, la na n yɩ-la a bõne tɩ noora naaga ne kãab beed n gʋls n sele. Ad-y zamaan ning sẽn pʋgdã, ad-y yãmb kambã ne sãambã sẽn yi tẽn-zãoorgẽ, sã n wa yãend Soaala-Wẽnd sẽn pogl tẽnga to-to la b fẽeg-a bãase, b na n yeelame: ‹Ad-y tẽnga gill yaa kidibri, yamsem la bugum. Bʋdb ka bʋt ye, tɩɩg ka tobd ye, tɩɩg ka bund n yi ye. Yaa wala Sodom la Gomor, Adma la Seboyim, Wẽnd sũura sẽn fõd wa sob-raoogo n zũndug zãnga.› Tẽnsa taaba fãa na n naaga taaba n yeele: ‹Yaa bõe la Soaala maan tẽn-kãnga woto? Bõe tɩ b sũura puug woto fãa?› La b na n yeelame: ‹Yaa b sẽn daag zoodã n bas tɩ sãama, Wẽnnaam, b Soaala, sẽn yõg zoodo ninga ne b yaab rãmba n sõng-b tɩ b yi Ezipt tẽnga. B pʋga wẽnd-dãmb a taaba, n wõgemd n waoog-ba, wẽnd-dãmb b sẽn dag n ka mi ye; wẽnd-dãmb sẽn da ka b pʋɩɩr ye. Yaa rẽ yĩng la Wẽnd puug b sũur ne tẽngã n bool a zugu kãab beed niyns fãa sẽn gʋls noora sebrẽ. Wẽnd sũur puugame, Wẽnd sũur fõdame tɩ b yiis-b b tẽngẽ n lob-b tẽng a to wa d sẽn ne rũnna.› Soaala-Wẽnd bala n mi sẽn solge. La b sẽn ka solg tõnd me la woto: b sẽn puk tõnd ne d kamba yĩnga, zamaan tõt sɛɛb yĩnga, yaa b noya d sẽn tog n tũ wã. Yɛl kãensa fãa m sẽn gom n wilg-y wã, kãab nooda la kãab beedã, fãa na n pidsame. La y Soaala, y Wẽnnaama, sã n wa sẽeg-y tẽn-zẽngẽ y yama na neke. Y na lɛɛg n wa Wẽnnaam, y Soaala, nengẽ la y na kelg b koɛɛga, yãmb ne y kamba, y na n kelg-b ne y sũur fãa, ne y yalẽ fãa, y na n tũ m sẽn wilg rũnna wã fãa. Wẽnnaam, y Soaala, na n teema b manesem, b na n wilga b nonglem, b sẽn sẽeg-y tẽns niynsa fãa, b na n kams-y lame n le tigim zĩ-yɛnga. Ba sã n da ya tẽnga sɛtme la b ra tall yãmb n looge, Soaala na le tɩ tall-y n wa naag y taaba. Wẽnnaam, y Soaala, na n tall-y lame n kẽes y ba-rãmb tẽngẽ tɩ y soog-a. B na kɩt tɩ y sũ-noog la y sõor yɩɩg y ba rãmb rẽnna. Israyɛl, Soaala-Wẽnd na n kõo-foo ne f kamba sũ-paale tɩ f tõog n nong Wẽnnaam, f Soaala, ne f pãng fãa, ne f yalẽ fãa n paam yõ-woko. Wẽnnaam na n pidsa b kãab beeda fãa ne bɛɛb niyns fãa sẽn na n yik n pʋg-b foo ne beema. Fo yẽ na n maneg n le kelga Soaala koɛɛga la f na n tũu noy niyns fãa m sẽn kõt-f rũnna wã. Wẽnnaam, f Soaala, na n kɩtame tɩ f yãend sũ-noog f tʋʋma fãa pʋgẽ. F rogem na n fɩɩgame, f rũms na n weka balbo, f pʋt na n zõonda ne koodo, tɩ f sũ-noogã n lebg bãmb rẽnna, wa f yaab rãmba wakatẽ. La rẽ na n tõogame tɩ f na n kelga Wẽnnaam, f Soaala, koɛɛg la f reeg b noya, la f tũ b raabã sẽn gʋls noora sebrẽ, la f lɛɛg n wa pʋg-b ne f sũur fãa la f yalẽ wã fãa. N-ye! M sẽn kõt foo noor ninga ka toog wʋsg ne foo ye, a ka loog f yaadma tɛk ye. A ka be yĩngri tɩ f na n yeele: ‹Ãnda n na n dʋ yĩngr tõnd yĩnga n sik-a n kõ-do, n sõng tɩ d wʋm-a n tõog n tũ?› Ka rʋʋgd mogr n tɩ seg-a, tɩ f na n wa yeele: ‹Ãnda n na n dʋʋg mogra tõnd yĩnga n gẽes-a n yãend la a wilg-d tɩ d tũ?› N-ye! Koɛɛga pẽe ne foo, a bee f noorẽ, a be f sũurẽ, tɩ f tõe n tũ. Ade, dũnna m yalsda f taoore, vɩɩm la sũ-noogo, kũum la yel-beedo. Maam n kõt-f noor dũnna, tɩ f nong f Wẽnnaam, f Soaala, tɩ f tũ b sore, n gɩdg f meng ne sẽn kisi la f reeg b noya la b rog-n-miki tɩ woto la d na vɩɩnd, n lebg zembala, tɩ Wẽnnaam, f Soaala, ning f barka tẽng ning f sẽn dabd n na n tɩ kẽ n soogã. La f sũura sã n lak n bas maam, f sã n pa kelgde, f sã n bas tɩ b ta foo n dig wẽn-naands rotẽ tɩ f tɩ wõgemd b taoore n waoog-ba, m wilgd-f-la rũnda bala, tɩ f na menem zãnga; f rasma na sõd koees-koeese, tẽng ninga pʋgẽ f sẽn dabd n na n tɩ soog Zʋrdẽ rʋʋndã. M kaset dãmb a yiib taoore, saaga la tẽnga, la m kot-y tɩ y yãke, Israyɛl kamba: vɩɩm bɩ kũum, kãab noog bɩ kãab beedo. Yãk-y vɩɩm, yãmb ne y kamb yĩnga, n nong Wẽnnaam, y Soaala, n kelgd b koɛɛg, n pʋgd-ba. Yaa woto la y na n vɩɩnd n kaoos tẽng ning Wẽnnaam, y Soaala, sẽn kãab tɩ b na n dɩk-a lame n kõ y yaab rãmba, a Abraam, a Izaak la a Zakoob.» A Moyiiz goma ne Israyɛl kamba, a yeel-b-la woto: «M tara yʋʋm koabg la pisi rũnna. M ka tõe n le tʋm m tʋʋmda ye la Soaala yeel-m lame: Fo kõn dʋʋg Zʋrdẽ kʋɩlga sẽn tõnda ye. Yaa Wẽnnaam y Soaala n na n lʋɩ y taoore la yaa bãmb n na n sɛɛs bɛɛba y taoore n deeg b tẽngã. Yaa a Zozuwe n na n yɩ y sɩleto, wala Wẽnd meng sẽn wilg yã. Soaala na n maana ne Zʋrdẽ rʋʋnd dãmbã, wala b sẽn maan ne a Siyõ la a Og, Amoritsa dĩm dãmba ne b tẽngã. B na n wã-b-la zãnga. Soaala na dɩka Zʋrdẽ rʋʋnd dãmba n sagl y nusẽ la y na n maana ne-ba wala m sẽn wilg-y. Keng-y y sũuri, da bas-y raood ye, da rig-y b taoor ye. Yaa Wẽnnaam y Soaala n kẽnd y taoore. B ka na n bas-y ye, b ka na n zãag ne y ye.» A Moyiiz boola a Zozuwe n yeel-a, Israyɛl kamba fãa taoore: «Keng f sũuri, ra bas raood ye, tɩ yaa foo n na n kẽ tẽnga ne nin-bãmba, tẽng ning b sẽn kãab y yaab rãmba. Fo n na sõng tɩ b reeg tẽng sẽn ya b pʋɩɩre. Yaa Wẽnnaam, f Soaala, n kẽnd f taoore, bãmb n na n pa ne foo, b pa na n bas-f ye; da zoe rabeem, da bas raood ye.» A Moyiiz gʋlsa noora sebrã n kõ maan-kʋʋdba, a Levi kamba sẽn tʋkd-b kuga walsa koglgã, n kõ Israyɛl nin-kẽembã. A Moyiiz wilg-b-la woto: «Yʋʋm a yopoe sã n pidi, sama kiisga yʋʋmde, sẽgda kibs raare, a Israyɛl zãng sẽn wat n tigim Wẽnnaam, b Soaala, taoore, b sẽn yãk tẽng ning tɩ ya b waoogr zĩigã, f na karem noorã a Israyɛl t'a kelge. F na n tigma nebã, pagb la rapa, kom-bõonego, sãamb la sẽn nok-b yãmba. B na n wʋma Noorã, n zãms-a, n bãng n zoe Wẽnnaam, b Soaala, nifu, la b tũ sẽn gʋls fãa noora sebrẽ. B kamba ka mi noorã la b na wʋm-a la b bãng n zoe Wẽnnaam nifu, b sẽn na n vɩɩnd wakat buud fãa tẽng ning b sẽn dabd n na n tɩ kẽ wã pʋgẽ, Zʋrdẽ rʋʋnde.» Soaala yeela a Moyiiz: «Ad-f loogra raar kolgame. Bool a Zozuwe tɩ y kẽ sɛka roogẽ tɩ m kõ-y koɛɛga.» A Moyiiz ne a Zozuwe tɩ saka boolã, sɛka roogẽ. Soaala-Wẽnd lika b meng sɛka roogẽ, sawad-taok pʋgẽ. Sawad-taoka da yɛsa sɛka roog noor. Soaala yeela a Moyiiz: «F na n tɩ saka f saam-dãmba tɩ f neba yõdg n maan wɩɩbdo n pʋg tẽns niyns b sẽn dabd n na n tɩ kẽ wã wẽn-naandse. B na n bas-m lame, zooda sẽn yõg ne bãmba na n sɛɛme. Baraare m sũura na n wɩdga bugum. M me na n bas-b lame, m me na n solg-b-la m nenga, la bũmb na loog ne ba, yel-beed la yel-toodo. Baraar la b na n yeel-ma: ‹Yel-beed a woto sã n lʋɩ d zugu, ka d Wẽnda sẽn ka le be ne tõnda bɩ?› Baraare m na n kell n solga m nenga, b sẽn wɩɩb n bas maam la b pʋg wẽn-naandsa yĩnga. Gʋls-y y mens yĩnga yɩɩn kãnga. Zãms-y yɩɩllã a Israyɛl kamba, b meng yiis b noorẽ tɩ taala bee bãmb zugu. Sɩda m na n kẽesa nin-bãmba tẽn-noogẽ, tẽng sẽn bund bĩisim la sɩɩdo wala m sẽn kãab b yaab rãmba. B na rɩ n tɩge, n nobe, la b wẽnemd n pʋg wẽn-naands, n waoog-ba, n paoog maam, n sãam m zoodã. La yel-beeda la yel-tooda sã n wa pak-ba, yɩɩlla na wilg-b b kongra sẽn yɛsẽ, la yɩɩlla me kõn tol n yi b kamba pʋ-tẽerẽ ye. M zoe n ne b sẽn bilgd bũmb ning b yamẽ, ne b sẽn nan ka kẽ tẽng ning m sẽn kãab bã.» Yaa ra-kãng la a Moyiiz gʋls yɩɩn kãnga tɩ Israyɛl kamba wẽneg n zãms-a. Soaala-Wẽnnaam kõ-la b noya a Nun biig a Zozuwe la b yeel-a-la woto: «Keng f sũuri, da bas raood ye, tɩ foom n na n kẽes Israyɛl kambã m sẽn kãab-b tẽng ningã la m na n zĩnda ne foo.» A Moyiiz sẽn gʋls noy bãmba zãng sebr pʋg n baase, a yeela Levitsa sẽn tʋkd kuga walsa koglgo: «Deeg-y noor sebr kãnga la y sagl-a kuga walsa koglg pʋga, kaset yĩnga. A na n sɩd yɩ y paalgr kaseto. Mam mii y kɩɩsgã, n mi y zuga sẽn pa gõmsdã. Y sã n yɩ tõatb tɩ m ket n vɩ y sʋk ne yõore, bõe la y ka na n maan m loogr poore? Tigim-y m taoore y kãsem-dãmba la y bʋ-kaoodba tɩ m tãs noora b tʋbẽ. M na n bõsa saaga la tẽnga tɩ b yɩ m kaseto. M miime tɩ m loogr poore, y na n wegma zãnga n bas sor ning m sẽn wilgã n kẽ weoogo. Dẽ me la yel-beeda na n lʋɩ y zugu, tɩ y na n maana Soaala sẽn kisi n beeg-b ne y tʋʋm yoodã.» A Moyiiz tãsa yɩɩn kãnga Israyɛl kamba tʋbẽ. Yĩngr dãmb yoog b tʋba tɩ m na n gomame, Tẽng zug rãmb kelg m sẽn na n togse M saglsa na n toka wa saaga, m goama na n dʋʋga wa meenem n madg wa sa-luk sẽn madgd pʋʋgo wa sa mina-mina sẽn bʋkd moogo. M na n moona Soaala yʋʋre. Bãng-y tɩ bãmb n yɩɩd bũmb fãa. Bãmb yaa Pĩiga, tɩ bɛɛb pɛɛm na n tĩni, b tʋʋma fãa tũuda sore. B noya ka yiis yaar ye. B sẽn kãab fãa na pidsi, la zãmb buud ka b nengẽ ye. B mii zemsgo, b bʋʋd kaooda tɩrse. B sã n get yã, Israyɛl kamba, b neeme tɩ y sãama zãnga, y sẽn tar zʋg wẽng ningã y ka le wẽnd b kamb ye. Y sãamame n kẽ moogo. Yaa bõe la y maan ne Soaala, zu-kaoolgo la yam ka yẽeg rãmba? Ka bãmb la y ba, n kõ-y vɩɩm laa? Bãmb n naan yãmba, bãmb n zĩndig-y tẽng zugu. Tẽeg sẽn zĩnd pĩnda, tẽeg sẽn loog al yʋʋm ka tɛka, kos-y y ba, t'a le tẽeg yã, kos-y nin-kẽemsa tɩ b na togse: Sẽn dɩt-a naam yĩngrã sẽn waa n pʋɩt tẽnga Adem biisi, b kõo buud fãa a toaaga. B sẽn waa n welg Adem biisa toor toore, b yãka gũud yĩngr n kõ buud fãa, b waa n keesa a Israyɛl b meng yĩnga, n kees a Zakoob wala b meng pʋɩɩre. Yaa zĩ-peen-daagẽ wã la b seg taaba, zĩig sẽn pid ne we-rũms bʋʋre tɩ b sɩng n na n koll-a, n na wek a yam, n na n gũ-a wa nin-paok sẽn gũud nin-beelle. Soaala wẽnega pa-nand-tugri sẽn yet a kamb tɩ b vẽ ne rabeem t'a meng yɛdga a pɩgsa zãnga n laand b zugu, n mii n wa põgend-ba a pɩgsẽ. Soaala b yembr bal n wilgd-b sore wẽn-naand ka paas bãmb ye. Soaala zombga a nebã tãmsa zutu, tɩ pʋta na n kõ-b b rɩɩbo, tɩ b nus na n leo sɩɩdo, pĩisa bogdẽ, tɩ oliv tɩɩg zao pĩiga n womd a biis sẽn na n wa lebg kaam. Soaala n dɩlg-b ne niis bĩs-kaam, n dɩlg-b ne piis bĩisim, n dɩlg-b ne pe-bi wã nem-bʋgsa ne Bazã pe-raado la ne boees kaam, n dɩlg-b ne alkam zom bãanega, n yũnug-b ne bugsuntung rãam sẽn kũmi. Woto la a Yesurun, a tog ne kãsengo, paam n dɩ n nobe n yik n lebg tõata. - Fo sɩd nobame, n lebg bedre, n lebg taoko. A tog ne kãsengo basa a Wẽnd la a Naanda, a paooga a Teegda la a Fãagda. B sẽn yãend sãamba wẽn-naandsã b mams-b la wa Soaala tũud-n-taase la b sãama Soaala sũur ne b manes yoodã. B kʋʋ maand n kõ sẽn pa wẽnde, n kʋ maand n kõ sʋtãamba, n kõ wẽn-sãamse b sẽn pa mi, wẽnd dãmb sẽn yaool waoongo, tɩ b ba rãmb zɩ n dig rabeem b taoore. F Pĩigã, f teegdã sẽn yiisa foo moogã, Israyɛl, fo pa tẽeg b yell ye; fo yĩma f Wẽnde, sẽn yiisa foo moogo. Soaala sẽn yãend bũmb ninga yika b sũuri; f kom-dibli la f kom-pugli n yik n paoog-ba. Dẽ la Soaala yeel yã: «M na n solg-b-la m nenga n ges-b sẽn na n lebg bũmb ninga. Yaa zamaan yoog kamba, ya kamb sẽn ka tar pʋga. B yãenda sẽn pa wẽnde n baas n mams-a ne m tũud-n-taase; b beeg-m-la ne b wẽn-naandsã. Mam me na mams-b ne buud sẽn ka buudu. M na kɩt tɩ b bɛ yɩ buud sẽn yik gãeemdo. M sũura waa n wɩdga bugum, bugum sẽn dɩ-ba n tãag bʋg-tẽng noore. Bug-kãng n dɩ tẽnga ne a koodo, bug-kãng n dɩ tãmsã n ka kees ye. Ad-y yaa yel-beed la m na n wʋk n sam-ba; bãmb la m na n yãag m tãpã n teese. Koma sã n wa loog ne b pãnga zãnga, tɩ m sa-tãsa la m pɛɛma zẽnem pogl n baase, m na soos rũms toose tɩ b yĩ-ba, tɩ bõn-vuudi wã zẽnema sɛɛs-ba. Yɩnga yaa sʋʋga n na n loog ne b kamb zãnga, roogẽ na n yɩɩ yɛɛsgo; bi-ribl ka põsd tɩ bi-pugla, bi-pɛɛlg na n naaga nin-kẽem n looge. Maam n yeele, maam a Wẽnde: M datẽ lame n tõos-b wa fuugu, m datẽ lame n yẽes b yʋʋr moogo. La bũmb n be, m zoeta b bɛɛba paoore, m zoeta b na n wa tudg n yeele: ‹Tõnd n tʋm daoodo, Soaala ka maan fɩ.› Bɛɛba geelsa fãa na n paa vɩɩdo, tɩ bãmb me pa tags ye. B sã n da tagsẽ, b na bãngẽ vẽenega; b na maanẽ gũusg ne sẽn wat beoogo. Nin-yend yɩta a wãn n wa rigd neb tusri tɩ neb a yiib bal na n sẽeg tus piiga, sã n ka b Teegdã n lɛɛg n koos-b ne b bɛɛba, sã n ka Soaala meng n dɩk-b n sagl b nusẽ? B yaool n ka na n yɩ bɛɛba Sõangda wa b sẽn ya tõnd Sõangda ye. La b mens mi rẽnna. La rẽ yɩɩ vẽenega b fãa nifẽ. A Israyɛl bɛɛba miime tɩ b ka são Sodom dãmba, la b ka são Gomor dãmb ye, fãa yaa bugsuntund sẽn ka tar noosem, b bugsuntunga biis sẽn ya zẽnem, b sib-gĩna yaa tɩsense. B rãama yaa zẽnem, põeer zẽnem, rãama yaa wag-bãnd dẽnna. Ad maam b Wẽnnaam soos n segenda bũmb b yĩnga, M na n zab n doka sũuri, ned kam fãa na n paama a rolbo. B naoor sẽn na n lak raare, (la b zu-bʋka raar zoe n pẽnegame,) b lʋɩɩsa raar kõn le kaoos n wa ye.» Soaala na n yalsa b buuda poore, b na n yãba b kambã tɩ b lebga wa neb sẽn koms n dɩga n ka le tar teegda, n ka le tar sõangda. Wakat kãng la b na n sok-ba: «Y wẽn-naandsa bɛɛ, y pĩigã, y soondga zĩig bɛɛ? Sẽn da yʋbd-b y maanda kaama bɛɛ? Sẽn da yũud-b y rãama bɛɛ? Bãmb kõn yik n n wa sõng yã, bãmb kõn yãend zĩig n kõ-y tɩ b soonde. Ges-y la y reege, ad-y yaa maam bal n tõe n fãage. Wẽnd a to ka paas ye, yaa maam la maam m ye tãa, wẽnd sãang ka wa naag ye, maam n kʋʋd la m vʋʋgdẽ, sẽn kaooge, maam n lebd n tonge, b kõn fãsg bũmb m nugẽ ye. M zẽka m nug n tees saaga la ad-m sẽn yete: maam la Wẽnd rũnna la beoogo! M sã n saas m sʋʋga t'a yãgda, m sã n moon m bʋʋda raare, m na rok m sũur ne m bɛɛba; sẽn kis b maama na reeg b sɩbgre. M na n yũnuga m pɛɛma, n yũnug-b ne zɩɩm tɩ b gãeeme, m na n tɩgsa m sʋʋga ne nemdo. Bɛɛba tãb-biig ba a ye kõn põs ye, sẽn yõg b rãmba wa sẽn pogl b rãmba.» Adem biisi, pẽg-y Wẽnd buudã Wẽnd sɩbga sẽn daag b kamba zɩɩm, Wẽnd doka b sũur ne b bɛɛba; B buuda na n paama sugri b buuda na n zĩnda b tẽngẽ ne bãane. A Nun biig a Osea yãaga a Moyiiz t'a wa wilg zãma wã yɩɩn kãnga goama fãa. A Moyiiz sẽn togs a Israyɛl goam kãensa n sɛ, a yeel-b lame: «Deeg-y ne y sũuri m goama fãa. M goma woto n yiis taal m zugu. Zãms-y y kamba tɩ b modg n tũ noora gilli. Goama ka goam sẽn ka tar yõod y yĩng ye. Yaa y vɩɩm goama, bãmb bal n tõe tɩ y yõor yɩ wok tẽng ning y sẽn na n dʋʋg Zʋrdẽ n soogã.» Baraar bala Soaala yeela a Moyiiz: «Dʋ Abarim tãmsa sẽn tong n dabdã, dʋ Nebo tãnga sẽn be Moab, Zeriko yegende la ges Kanaã tẽng m sẽn kõt a Israyɛl t'a sooge. Tãnga zug la f na n maan kaalem, be la f na n sak f ba rãmba, wala f kẽema Aarõ sẽn maan kaalem Or tãnga, n tɩ sak a ba rãmba. Y ka kõ-m kaset ning m sẽn da rat tɩ y kõ-ma, Israyɛl kamba sʋk ye. Kadɛs Meriba kʋɩlsẽ, Sin we-raoogẽ, y ka puk m sõmblema zãng Israyɛl kamba sʋk ye. F na n yãenda tẽng ning m sẽn na n kõ a Israyɛl sẽn yɛdg f taoore la f kõn kẽ a pʋgẽ ye.» Woto la a Moyiiz, Wẽnnaam neda, ning Israyɛl kamba barka n yaool n na n tɩ sak a saam-dãmba. A yeelame: Soaala yii Sinayi, wala wĩndga, b puka Seyir sẽnẽ, Parã tãnga zugu, b yãnga b vẽenem n tees b buudu b waa n siga b neba sʋka, sẽn yãagd-b yaa kõn-bãng-n-sõde; b Noora sebr la b ra zãada, sebra ra yãgda ne neerem. Soaala nonga a Israyɛl, Soaala kogenda b buudu, la b buuda me tigma b sɛɛgẽ n na n deeg b saglse. A Moyiiz sẽn kõ noor ningã, a Zakoob yagensa sãnem la rẽnna, a Israyɛl arzɛk la rẽnna. A-tog-ne-kãsengo reega a Soaala, bãmb la a neba yi n na n sege, a rĩm-biis wala a talse. A Moyiiz barka yɩɩ woto: Wẽnd na kaoos a Rubẽ, a kõn ki ye; Wẽnd na yalg a rooga sẽn ka zem fɩ wã. Ad-a sẽn yeel a Zɩɩda yĩnga: Soaala, kelg yã a Zɩɩda koɛɛga, sõng-y t'a kamba le wʋm taaba. B yikame la b wɩsga b menga, Sõng-y-b tɩ rig b bɛɛba. Ad-a sẽn yeel a Levi yĩnga: Soaala, a Levi kamba zãada b nusẽ y sẽn dat tɩ b sok-y ne tentees ninsã n bãng y leokra yaa n-yẽ bɩ ayoo, la yaa bãmb la y sẽn fɛɛs Masa, bãmb yɛs la y sẽn fɛɛs Meriba. Ad-y b wilgame tɩ b nonga yãmba n yɩɩd b pagb la b kamba, n yɩɩd b saam-biisi, n yɩɩd b roagdba; dẽ me la b reeg y noore, n ka sak zooda sãoong ye. Bãmb n zãmsd a Zakoob y rog-n-mikã n zãmsd y noya a Israyɛl, bãmb n kʋʋd yũ-nooga maoong bãmb n wat ne kũuna maan-kugra zugu. Soaala, paas-y a Levi sũ-keelma, ning-y bark a nus tʋʋma fãa, kao-y yã a zabd-n-taasa sĩ, zõneg-y yã a bɛɛba po-raoogo. Ad-a Moyiiz sẽn yeel a Bẽnzame poorẽ: Yẽ la Soaala bi-nongre n zĩ n pemsd ne laafi t'a sẽn teeg a soaba gũud-a-la raar fãa, la a vʋʋsda a bãgd zugu. Ad-a sẽn yeel a Zozɛf: Wẽnd na ning a soolma barka! A paam saase, Wẽnd kũun sõngã, n paam ko-bunem, n paam wĩndga sẽn bɩɩsd bũmb fãa, n paam kiuug fãa sẽn wat ne a soaba, a wakato; n paam tãmsa sẽn kõt bũmb ningã, n paam kunkuba sẽn pʋɩt bũmb ningã, n paam bõn-sõng fãa tẽnga sẽn womde, n paam tuuga sẽn wit bugma soab zoodo. Dẽ fãa yɩ a naam zug-peoogo, dẽ fãa yɩ a rĩir fan teedo, Soaala sẽn welg a soab toorã fan teedo. A paam barka t'a yaa loalg sẽn tar pãnga a yɩɩla yaa we-naaf yɩɩla, bãmb la a tar n tãada, n tãad yaang la nin-taoore, goabg la rɩtg rãmba. Ad-a Efrayim tãb-biis sẽn tonge ad-a Manase rẽnd sẽn ka tõe n sõde. Ad-a Moyiiz sẽn yeel a Zabulõ poorẽ, n yeel a Isakar poorẽ: Noog f sũuri Zabulõ, f sã n tond f tolbo, la foo, Isakar noog f sũur f gãagẽ. B tigimda buuda tãnga zugu n na n kʋ b waoogr maando. Bãmb n vuud mogra yõodo bãmb n so laoga sẽn bus bĩisrẽ. Ad-a sẽn yeel a Gad poorẽ: Sẽn sõnga a Gad t'a zãad fãa wã paam barka! A wũunda wa bõnyẽega, n yĩid a rũng bãoko, n wekd a rũng zugu. Yẽ n yɩ pipi n deeg a pʋɩɩre, la yaa pʋɩɩr sẽn tog ne dĩma la a ra rata. A lʋɩ buuda taoore n zab wa Wẽnd sẽn sagl-a la Wẽnd pidsa b sẽn kaool fãa ne a Israyɛl. Ad-a Moyiiz sẽn yeel a Dã poorẽ: A Dã yaa bõnyẽ-bila, la yaa Bazã la a sigd n watẽ. Ad-a sẽn yeel a Neftali poorẽ: B pidsa a Neftali ne kũuni, Wẽnnaam pids-a-la ne bark buud fãa; a soog nin-taoore la nug rɩtgo. Ad-a sẽn yeel a Asɛr poorẽ: Bɩ a Asɛr paam barka n yɩɩg a taaba, a pʋɩɩr zʋʋg a taab rẽnna, bɩ a nao mad ne tɩgr kaam; t'a kʋɩlens sog ne kutu, t'a pa a zakẽ ne laafi n tãag a loogre! Ad-a Moyiiz sẽn le paase: Ned ka be n wẽnd Wẽnnaam ye, n sõngd foo wa bãmb ye, Tog-ne-kãsengo. B zao saasa la sawatã n wat f sõngre ne b pãnga. Sẽn yaa Wẽnd dũnna la beoogã la f na n soonde, b nug tara b tʋʋm n ka mi vʋʋsg ye, f bɛɛba la b rigd f taoore la b yetame: ki-y zãnga! Dẽ me la a Israyɛl zĩ t'a sũur pa kiuusdẽ ye. A Zakoob kʋɩlga naoor teesa toore, a teesa alkam la rã-paalg tẽnga, yĩngr meenema sẽn da zoe n bʋkd tẽng ningã. Foo la zu-noog soaba, Israyɛl! Soaala sẽn sõngd b buudã, ãnda n wẽnd foo? Bãmb gãong n ligind f bɛɛba pɛɛm, bãmb sʋʋg n kõt foom f pãnga. F bɛɛba rat bɩ b wags taab ne sudum f naoor na tabg b tẽnsa sẽn zao yĩngrã. A Moyiiz yii Moab pʋ-weesẽ n tees Nebo tãnga, n ta Pisga zug tẽnsʋka. Tãn-kãng tota ne Zeriko la Soaala-Wẽnd wilg-a-la tẽnga zãnga, n sɩng Galaad n ta Dã. B wilg-a-la Neftali, n wilg-a Efrayim la a Manase tẽnse, a Zɩɩda soolma fãa n ta Tẽnsʋk mogre. B wilg-a la Negɛb ne a sagsã, Zeriko bãg-faaga ne a komsã n ta Soar. Soaala yeela a Moyiiz: «Yaa woto la tẽng ning m sẽn kãab a Abraam, a Izaak la a Zakoob. Tẽn-kãnga poorẽ la m da yeel-ba tɩ b loogr poore, b kamb n na n sooge. Tẽn-kãng la m wilg-f tɩ f ges ne f nini, la f naoor yaool n kõn tab-a ye.» Yaa be la Wẽnd sõgen, a Moyiiz, ki yã, Moab tẽn-peelmẽ wala Wẽnd sẽn da yeele. B mum-a-la Moab bãg-faagẽ, Bɛt-Peor yegende, la ba ne rũnna b ka bãng a yaooga zĩig meng taki ye. A kũuma wakat t'a Moyiiz tara yʋʋm koabg la pisi. A nina ra ket n neeme, a pãng ra ka woog ye. Dasem pis-tã tõre, Israyɛl kamba yãba a Moyiiz Moab pʋ-weesẽ. A Nun biig a Zozuwe ra pida ne yam sõngo. A Moyiiz ra tẽega a nus a zugu. Woto Israyɛl kamba kelg-a lame la b tũu Wẽnd sẽn da wilg a Moyiiz. Israyɛl ka leb n yãend a kamba sʋka, bãngd wala a Moyiiz ye; yẽ ne Wẽnd ra sõsda ne taaba, n ne taaba. Ya yẽnda la Soaala ra tʋm Ezipt tẽnga t'a tɩ berg bõn-bãna la yel-beed sẽn yɩkd pɛlẽnse, dĩma ne a poorẽ dãmb taoore. Yaa a Israyɛl nifẽ la a Moyiiz da wilgd a nug pãnga, la a bõn-bãna ra yɛɛsda wʋsgo. Soaala-Wẽnd tʋʋm-tʋmd a Moyiiz loogr poore, Naaba-Wẽnd goma ne a rakõor a ye, a Nun biiga, a Zozuwe, n yeel-a: «M tʋʋm-tʋmd a Moyiiz loogame, yik marsã tɩ wakat yaa n taame n dʋʋg Zʋrdẽ, foo ne nin-bãmba, n paam n ta tẽng ninga m sẽn kõt a Israyɛl buudu. Y nao sẽn na n tabg zĩig ning fãa lebgda yãmb soolem wa m sẽn da kãab a Moyiiz. Y tẽnga toaag yaa We-raoogã la Libã sẽn dɩg y taoorã n digd Efrat kʋɩl-kãsenga, yaang sẽnẽ, n tãagd Mog Kãsengã, wĩndga sẽn lʋɩtẽ. F na tol n ki tɩ ned pa tõog-f ye. Wala m sẽn pa ne a Moyiiz, m na maan boto me ne foom, m kõn zãag m meng ne foom ye. M kõn bas-f ye. Keng f sũuri, wɩsg f menga. Yaa foo n na n pʋɩ m nebã tẽng ning m sẽn kãab b yaab rãmbã. N-ye! Wɩsg-f menga, keng f sũuri, la tũ neere Noor ning m sẽn kõ m tʋʋm-tʋmd a Moyiiz. Da kɩll goabga, da kɩll dɩtgo, tɩ woto f sẽn sɩng fãa na baas neere. Bɩ m Noora sebr da zãag ne f ye, a goama biis pa f no-gãnnẽ. Walem-a f noorẽ, wĩndig la yʋngo, n wa tõog n tũ-a zãnga. F sã n maan boto la f tʋʋma na tũ rẽ n baas neere. Ka maam n yeel foom: wɩsg f meng la f keng f sũuri bɩ? Dẽ yĩnga da bʋ ye, da zoe rabeem ye, tɩ f sẽn dabd zĩig ning fãa, Wẽnnaam, f Soaala, na zĩnd f sɛɛgẽ.» A Zozuwe yeela taoor dãmba woto: «Saag-y sika tõre n wilg nebã tɩ b segl dɩɩbo tɩ ka ne rasem a tã y na n dʋʋga Zʋrdẽ kʋɩlga sẽn tõndã n tɩ soog tẽng ning y Soaala-Wẽnnaam sẽn kõt yã.» A Zozuwe yaool n yeela a Rubẽ, a Gad la a Manase bogrã: «Tẽeg-y Soaala-Wẽnd tʋʋm-tʋmd a Moyiiz sẽn kõ yãmb noor ningã: ade Wẽnnaam, y Soaala, taas-y-la y vʋʋsg zĩigẽ. B kõo yãmb tẽn-kãngã. Y pagba, y kom-bõonego; y rũmsa na n paa tẽng ning a Moyiiz sẽn kõ yãmb Zʋrdẽ kɩrẽng kãnga. Sã n ya rapa sẽn tõe n tak zabrã, bãmb fãa na n lʋɩɩ b saam-biisa taoore, b me sõng-ba. Y na n maana woto n ta wakat ning Naaba-Wẽnd sẽn na n kõ y saam-biisa a taaba vʋʋsg tẽnga wala y sẽn paama. Yãmb me na yaool marsã n lɛɛg n wa y soolmẽ. Y na lɛɛg n wa Zʋrdẽ kɩrẽng kãnga wala a Moyiiz sẽn kõ yãmbã.» B leoka a Zozuwe: «D na maan f sẽn yet tɩ d maan fãa, fo sẽn yet tɩ d kẽng zĩig ning fãa, d na kẽnge. Wala d sẽn sak a Moyiiz, bũmba fãa pʋgẽ, woto d na sak foom me. N-ye! Wẽnnaam, f Soaala, na n zĩnda ne foo wala b sẽn zĩnd ne a Moyiiz. Ned ning fãa sẽn na n kɩɩs f gomde, ned ning fãa sẽn na n tõdg f noore, sẽn ya noor ning fãa la f kõ yã, a soab bãng t'a na ki. Fo ye n wɩsg f menga la f keng f sũuri.» A Nun biig, a Zozuwe, yiisa neb a yi Sitim tẽnga n tʋm-ba tɩ b tɩ soos n bãng tẽnga pʋg la a yɩnga. Woto la a yeel-ba: «Kẽng-y n tɩ kaag-y Zeriko tẽnga n wa togs ma a sẽn ya-la.» B kẽngame la yaa pʋg-yoodr a ye yir la b sig yã. Paga ra boondame t'a Raab. A Raab zakẽ la b yõg gãag-soabendo. La neb n bʋʋg Zeriko dĩma n togs-a woto: «Ad-y Israyɛl dãmb n wa ka yʋngẽ n dat n tɩg tẽnga yalẽ.» Dẽ la dĩma tʋm tɩ b yeel a Raab: «Yiis neb niyns sẽn sig-b fooma. Neb niyns sẽn wa-b fo yirã, ad-b waame n na n bãng d tẽnga sẽn ya-la.» Bãng-y tɩ paga bao zĩiga n solg neb a yiibã n yaool n yeele: «Yaa sɩda, neb a yiib n sɩd wa ka la m ka mi b sẽn yitẽ ye. La zĩig sẽn waa n sobgdẽ tɩ b pagd tẽnga noor kʋɩlensã, neba yiime la m ka ges b sẽn teesẽ ye. Zoe-y n pʋg-y-b tao-tao, tɩ y ket n tõe n paam-b lame.» Mik a ra kɩtame tɩ b rʋ gaosga zugu t'a wʋk a beren-dɩga sẽn da tigim be n lud-ba, gaosga zugu. Dĩma neba yi-la b pʋgbo, Zʋrdẽ sẽnega, kooma sẽn tõe n dʋʋg zĩig ningã, la b sẽn yi, kʋɩlensã wẽneg n pagame. Neb a yiiba ka paam n sɩng gãag ye; la a Raab bʋʋg-b-la gaosga zugu, n yeel-ba: «M miime tɩ Soaala-Wẽnd dɩka tẽng kãnga n sagl y nusẽ, m miime tɩ d fãa yɛɛsame la tẽnga fãa rigda y taoore. D bãngame tɩ Soaala-Wẽnd kʋɩɩsa Rudum Mogrã y sẽn wa n yit Ezipt tẽnga. D wʋma y sẽn maan bũmb ning, Zʋrdẽ rʋʋnde ne Amoritsa dĩm dãmb a yiibã, a Siyõ la a Og, n kãab-b beedo. D wʋma rẽ fãa tɩ d pɛlẽng yɩke, ned kam fãa vʋʋsem tulugda a yãoogẽ, tɩ Soaala, yãmb Wẽnnaama, n ya Wẽnd, yĩngr, saag zugu, la kaalẽ, tẽng zugu. La mam sẽn deeg yãmb neerã, wẽen-y ne y Wẽnnaama la y kõ-m kaseto tɩ y me na maan neere, maam ne m ba wã zak rãmba. Kõ-y-m kaset vẽenega tɩ y na bas ne yõore, m ba la m ma, m yaop la m kẽem dãmba; bãmb ne b sẽn so fãa na paam n põs kũum.» Dẽ la neb a yiibã leok-a: «Ad-d toga ne kũum d sã n ka yao foom f yel-sõmdã, la dẽn tɩ yãmb me tõog y noore n da wɩdg d sẽn waa n na n maan a soaba ye. Soaala-Wẽnd sã n wa bas tẽngã d nugẽ, d na maan pʋ-peelem ne foo la d kõn zã foo ne f buuda toog ye.» A Raab bao wĩir tɩ neb a yiibã tũ võore n looge, t'a rooga ra mee n dogla lal-gũbrã. A reng n yeel-b lame: «Yaa tãmsa sẽnẽ la y tog kẽng n paam n põs y bɛɛbã. Pa-y be rasem a tã tɩ sẽn yi-b yãmb baobã paam n lɛɛg n wa tɩ y yaool n le rɩk y sore.» Neba leok-a lame: «Fo kɩtame tɩ tõnd wẽene n kãab f bũmbu. Bãng tɩ tõnd kãabga na n pidsame la ad-fo me sẽn na n maanega: Fo sã n wa yãe tɩ d poogd tẽngã, ad makr ning d sẽn tog n yãende: Ad gĩs miuugu, dɩka n yagle tõnd sẽn tũud võor ning n sigdã la tigim do-kãng pʋga f ba, f ma, f tãopa la f buuda fãa. Ned ninga fãa sẽn ka paa rooga pʋga, sẽn saaga n yi yɩnga, na rɩ a zɩɩm daagr taale, dẽ ka pak tõnd ye. Ned sã n pa roogẽ wã ne foom tɩ b baas n sɩɩs-a, ad-a zɩɩma sã n daage tõnd n deegd a taale n dogl d zugu. Fo sã n wɩdg ned a to bũmb ning sẽn wa ne tõnd ka wã, ad tõnd sẽn kãaba fãa me kõn le yals ye.» Paga leokame: «Bɩ yɩ boto!» La a bas-b lame tɩ b yi n looge. A loe gĩs miuugã a rooga võore. Lɩɩsdba tũ tãnga sẽnẽ b paa be rasem a tãabo tɩ sẽn yi-b bãmb baobã wa lɛɛg n kẽ. Baoodba vɛɛsa sora zãnga n pa yãend-b ye. Lɩɩsdba yaool n sigame n dʋʋg kʋɩlgã n leb a Nun biig, a Zozuwe, nengẽ. B togsa a Zozuwe b sẽn yãend fãa. B yeela a Zozuwe: «Soaala-Wẽnd basa tẽnsa fãa d nugẽ la ad-a Israyɛl poorẽ, neba rigda rabeem wʋsgo.» Yaa tõd-beoog la a Zozuwe yik ne Israyɛl kamba n yi Sitim n ta Zʋrdẽ la yaa kʋɩlga noor la b wẽ b sikã n gãand n gũ beoog vẽegre, n yaool n dʋʋg-a. Da-yɩten-daar pʋgẽ, taoor dãmba saaga sikã, n yeel nebã: «Y sã n wa yãend maan-kʋʋdbã, a Levi kamba, tɩ b tʋk b bãgdẽ, kuga walsa koglgã, bɩ y me yik n pʋg-ba. Gũus-y bal n bas yãmb ne koglga sʋka, vɩʋʋg sẽn ta kãntɩɩs tus a yiibu. Da pẽneg-y tɩ yɩɩg rẽ ye. Woto me la y bãngd sor ning, y sẽn na n tũ tɩ y zɩ n dɩk sora ye.» A Zozuwe yeela nebã: «Yɩlg-y mens beoog yĩnga, tɩ beoogo Naaba-Wẽnd na n maana bõn-bãna y nifẽ.» A yaool n yeela maan-kʋʋdbã: «Tʋk-y kuga walsa koglgã, n lʋɩ y neba taoore.» La b sɩd tʋka kuga walsa koglgã n lʋɩ neba taoore. Soaala-Wẽnd yeela a Zozuwe: «Dũnna bala m na kɩt tɩ f yʋʋra sɩng yiibu Israyɛl sʋka tɩ b bãng tɩ m bee ne foo wala m sẽn zĩnd ne a Moyiiz. Ad noor ning f sẽn na n kõ maan-kʋʋdba sẽn tʋk kuga walsa koglgã: ‹Y sã n wa ta Zʋrdẽ kʋɩlga bɩ y yaase.› » A Zozuwe yeela Israyɛl kambã: «Kolg-y n kelg Wẽnnaam, y Soaala, koɛɛga. Ad bũmb ning sẽn na n kɩt tɩ y bãng tɩ Wẽnnaam, y Soaalã, n be yãmb sʋka n na n pĩng y taoore Kanaã rãmba, Ititse, Ivitse, Perizitse, Zirgazitse, Amoritse la Zebuzitse. Dũni Soaala zooda kaseto, kuga walsa koglg, n na n dʋʋg Zʋrdẽ kʋɩlga yãmb taoore. Bao-y neb piig la a yiibu: sak fãa pʋgẽ yaa nin-yend la y yãkda. Yaa maan-kʋʋdb n zɩt kuga wala koglgo; ad-y bãmb naoor sã n tabg Zʋrdẽ kooma, kooma na n welga a yiibu. Kooma sẽn zoet n watẽ wã na n yaasa wa lalga.» Neba sɩd yikame n na n dʋʋg Zʋrdẽ kʋɩlgã la maan-kʋʋdba n da be taoore n zɩt kuga walsa koglgã. Tigsg wakato Zʋrdẽ kooma da gãndgda a koagsã. Kuga walsa koglga zɩtba sẽn ta kʋɩlgã, b nao sẽn sɩɩs kooma, ad-y kooma sẽn da zoetã yalsa zĩig pʋgẽ n lebg wa bõn-taoko, n lebg wa lalg woto, n zãag zĩiga, n ta al Adam tẽnga sẽn yegd Sartã. Koom ninga sẽn digd Yamsem Mogrã pasgame n yals tɩ neba rʋʋg, Zeriko yegende. Kuga walsa koglga zɩtba yalsa soa, kʋɩlga sẽn kʋɩ wã sʋka, tɩ Israyɛl kamb fãa looge. Bãmb me dʋʋga Zʋrdẽ kʋɩlgã tɩ koom ka tol n madg b nao ye. Neba fãa sẽn dʋʋg Zʋrdẽ kʋɩlgã, n sɛ, Naaba-Wẽnd yeela a Zozuwe: «Yãk neb piig la a yiibu, sak fãa yaa nin-yemde, n yeel-ba: ‹Yiis-y Zʋrdẽ kʋɩlga pʋga, maan-kʋʋdba nao sẽn yals zĩig ningã, yiis-y kug piig la a yiibu n tall-ba n ta y sẽn na n sig zĩig ning yʋngã.› » A Zozuwe yeela neb piig la a yiibã b sẽn da yãke, sak fãa nin-yendã: «Loog-y kuga walsa koglga taoore n ta kʋɩlga sʋka la ned kam fãa tʋk kugr a bãokẽ, kug piig la a yi n zems a Israyɛl sagsa sõore. Kuga na n yɩɩ tẽegre y yĩnga. Daar a ye y kamba wat n sok-y lame: ‹Kug bãmba makda bõe yãmb yĩnga?› Y na yeel-ba: ‹Zʋrdẽ kʋɩlga koom pasga a yi, kuga walsa koglg sẽn ta Zʋrdẽ. Kug bãmba n kõt a Israyɛl kaseto sẽn ka tõe n menem abada.› » Neba tũu a Zozuwe noore. B sẽn teeb kug piig la a yiibã, Zʋrdẽ kʋɩlga pʋga, sak fãa ne a kugri, wala Soaala-Wẽnd sẽn da wilg a Zozuwe, b tall-b lame n ta b gãaga zĩigẽ n dɩgl-b be. A Zozuwe meng kɩtame tɩ b bao kug piig la a yiibu n ges kʋɩlga tẽnsʋka, koglga zɩtba sẽn yals zĩig ningã, n sel-ba la b keta ne rũnna. Maan-kʋʋdba yalsa kʋɩlga tẽnsʋka ne kuga walsa koglgo. B yalsa boto tɩ bũmba fãa wa pids, wala Soaala-Wẽnd sẽn da yeel a Zozuwe t'a togs neba, wala a Moyiiz meng sẽn da zoe n wilg a Zozuwe. Yɩɩ ne yãgbo marsã la neba rʋʋg kʋɩlgã. Nebã n dʋʋg zãnga tɩ koglga zɩtba yaool n dʋʋge. Maan-kʋʋdba n da le kẽnd neba taoore. Yɩ-la a Rubẽ kamba, a Gad la a Manase bogre sẽn da bob zabre wala a Moyiiz sẽn da kõ-b noorã, n deng kʋɩlga rʋʋgre tɩ sẽn ket-ba yaool n pʋge. Tãb-biisa sõor da taa tus pis-naase. B boba zabr Soaala-Wẽnd yĩnga n dʋʋg Zʋrdẽ n tees Zeriko pʋ-weese. Baraare Soaala-Wẽnd kɩtame t'a Zozuwe yʋʋr yi Israyɛl kamb sʋka la b zoe-la a rabeem wala sẽn yɩ ne a Moyiiz a vɩɩma pʋgẽ. Dẽ marsã la Naaba-Wẽnd yeel a Zozuwe: «Kõ maan-kʋʋdba sẽn zɩt-b kuga walsa koglgã tɩ b me rʋʋg Zʋrdẽ kʋɩlgã.» T'a Zozuwe sɩd yeel maan-kʋʋdbã: «Rʋʋg-y kʋɩlgã.» Sẽn zɩt-b kuga walsa koglg sẽn sɩng rʋʋgre, b naoor sẽn gãndg kʋɩlga kogrã la kooma sẽn wẽneg n pid kʋɩl-waokã n daannẽ wala pĩnda. Yɩɩ pipi kiuugã piig raare la Israyɛl dʋʋg kʋɩlgã. A ti-la a sik Gilgal, Zeriko yaanga. Yaa Gilgal la a Zozuwe kɩt tɩ b sel kug piig la a yiibã b sẽn da yiis kʋɩlga pʋga. A yaool n yeela Israyɛl kamba: «Y kamba sã n wa yik beoog raar n sok b ba rãmba: ‹Kug bãmba yaa bõe kuga?› Y na wilg-b woto: ‹A Israyɛl dʋʋga kʋɩlgã t'a nao ka mad ye, tɩ Soaala-Wẽnnaam, kʋɩɩsa kʋɩlga koom yãmb taoore, tɩ y fãa tõog n looge wala b sẽn da maan ne Rudum Mogre, b ra Kʋɩɩsa yẽnda me tɩ tõnd paam n loog zãnga. Yaa sẽn na yɩlẽ tɩ dũni ninsaalba reege tɩ Soaala-Wẽnd nug zɩsa la yãmb me zoe-y Soaala, yãmb Wẽnnaama, nifu, beoog sẽn vẽege.› » Amoritsa dĩm dãmba sẽn be b Zʋrdẽ nin-taoore la Kanaã dĩm dãmb sẽn be Mog Kãsenga noore wʋmame tɩ Soaala-Wẽnd kʋɩɩsa Zʋrdẽ kʋɩlga Israyɛl kamba taoore n tãag b fãa gill sẽn waa n dʋʋge. Ad-y b sũura digemdame la b vʋʋsma tulgame. Soaala-Wẽnd yeela a Zozuwe wakat kãnga: «Saas kug-peel paklse tɩ b noora rɩt wa sʋʋga n le sɩng Israyɛl kamba bãong kẽesgo.» A Zozuwe sɩd saasa kug paklse wa sʋʋse n kẽes Israyɛl kamba bãongo, tãn-bil a ye zugu sẽn boond marsã tɩ keoog tãnga. Ad sẽn tũ ne bũmb ninga t'a Zozuwe wa kẽesd bãongo: Ezipt yiib poore, dapa fãa sẽn da sek-b zabr takre da kẽe bãongo la bãmb fãa ra kii we-raoogẽ. Yaool n yaa bãmb bala n da paam n kẽ bãongo. Kamb niyns fãa sẽn dog we-raoogẽ wã, Ezipt yiiba poore, n sɩng kẽna, da ka paam n kẽ bãong ye. Yaa yʋʋm pis-naas tõre la a Israyɛl ra kẽn we-raoogẽ la neb niyns sẽn da tõe n tak zabra fãa ra kiime. B sẽn ki wã, yaa b sẽn pa kelg Soaala-Wẽnd koɛɛga. Dẽ la Soaala-Wẽnd kãab-b tɩ b nif kõn teeg tẽng ninga b sẽn da kãab b ba-rãmbã, tẽng sẽn bund bĩisim la sɩɩdo. Yaa bãmb kamba n deeg b zĩiga. Yaa kom-bãmb la a Zozuwe kẽes bãongo. Kẽna sẽn da sɩng tɛka b ra ka le yãend vɩʋʋgo n kõog keoog ye. Bãongã sẽn kẽ n sɛ, buuda paa sika pʋgẽ n vʋʋse n tãag b ko-noog soobo. Naaba-Wẽnd yeela a Zozuwe: «Dũnna m dɩka Ezipt rẽgdã n gil-gil-a n lob yɩɩga.» Yaa rẽ yĩng la tẽnga boond tɩ Gilgal n tol n tãag rũnna. Israyɛl kamba paa Gilgal la b maana tẽegra kibsa, kiuuga piig la a naas raare, zĩ-sobdo, Zeriko tẽn-nabrẽ. Kibsa yɩ tɩ zaamẽ, bur sẽn ka lob bɩlle la ka-sẽedma wãbr daare, b naagame n dɩ tẽnga koodo. Dɩɩb ninga sẽn da yita yĩngrã ka le rʋʋg ye tɩ b paama tẽnga kood n dɩtẽ. Yĩngr dɩɩbã me sẽn ka le rʋʋgã, Israyɛl kamba me sɩnga, yʋʋmd kãnga, n dɩt Kanaã tẽnga sẽn da womd bũmb ninga. A Zozuwe da paam n pẽnega Zeriko tẽnga. A sẽn zẽk a neng yĩngri, a yãee Soaala-Wẽnd na-yir dao sẽn yɛs a taoore ne sʋ-sẽenga. A Zozuwe kolgame n sok-a: «Fo kẽeda tõnd bɩ f kẽeda d bɛɛbã?» Neda leokame: «M pa kẽed y bɛɛba ye, m yaa Soaala-Wẽnd Tãnsoaba, dẽ la m waoonga võore.» A Zozuwe lʋɩ-la a yãvabga n pʋʋse la a soke: «Yaa koe-bʋg la m zu-soaba wat n na n kõ-ma?» Soaala-Wẽnd Tãnsoaba yeelame: «Pidg f neooda tɩ zĩig ninga fo sẽn yɛsa yaa zĩ-sõngo.» T'a Zozuwe na n piid a neooda. Israyɛl kamba yĩnga, Zeriko kʋɩlensa sẽn da pag la b sẽn page. Ned da ka le kẽede, ned da ka le yita. Naaba-Wẽnd yeela a Zozuwe: «Gese, m basda f nugẽ, Zeriko ne a dĩma la a gãndaadã. Yãmb zab-zabdba fãa, sẽn tar b zabr sũur fãa, y na n gilga tẽngã n sege la beoog sẽn vẽeg fãa, y na n maana boto n ta rasem a yoobe. Maan-kʋʋdba a yopoe n na n lʋɩ zood kasetã, kuga walsa koglga, taoore ne bard a yopoe. Daar a yopoe soaba, y na n gilga tẽnga naoor a yopoe la wakat kãnga, maan-kʋʋdba na n peeba b bardã sẽn maan ne pe-raad yɩɩla. Baorga sã n peeb raaga n kaoose, tɩ y wʋme, bɩ neba fãa naag taaba n wẽ b zabr nobɩnga. Tẽnga lal-gũbrã na n wẽneg n lʋɩɩme. Ned kam fãa teesda a taoore n tak zabre.» A Nun biig a Zozuwe, boola maan-kʋʋdbã n yeel-ba: «Tʋk-y kuga walsa koglgo la neb a yopoe lʋɩ taoor ne bard sẽn maan ne pe-raad yɩɩla.» A Zozuwe yeela zãma wã: «Sɩng-y tẽnga gilgri. Tãb-biis niyns sẽn tog n lʋɩ taoora n na n lʋɩ kuga walsa koglga taoore.» Neba tũ-la a Zozuwe noore. Maan-kʋʋdba a yopoe wã n lʋɩ kuga walsa koglgo, zood kaseta, taoore, ne b bardo sẽn maan ne pe-raad yɩɩla; b kẽndame la b peebdẽ. Bãmb la zood kasetã, kuga walsa koglga, zɩtba ra pʋgda. Tãb-biis la b ra ning bard pɛɛdba taoore. La tãb-biis me n da pʋgd kuga walsa koglga zɩtba, la fãa ra tara kẽna, tɩ barda tar peebgo. Yaa woto la a Zozuwe ra togs zãma wã: «Sã n ya nebã, bas-y bʋʋre, ra sak-y tɩ b wʋm y rãamd ye: gom beel meng da yi y noorẽ n ta daar ninga m sẽn na n yeel yã: ‹Tãs-y y zabr tãsga.› Wakat kãnga y na maan bʋʋre.» A Zozuwe kɩtame tɩ b yi ne zood kasetã, kuga walsa koglgã, n gilg tẽnga vugri n le lɛɛg n kẽ sikã n gũud beoogo. Tõd-beoog pĩnda, a Zozuwe kɩtame tɩ maan-kʋʋdba tʋk kuga walsa koglgã. Maan-kʋʋdb a yopoe wã sẽn da kẽnd ne bard a yopoe kuga walsa koglga taoorã, le sɩnga kẽn la b peebd b bardo sẽn maan ne pe-raad yɩɩla. B ra ninga tãb-biis kãens taoore, n ning tãb-biis me kaseta zɩtba poore, la fãa ra tongame n kẽnd tɩ barda peebdẽ. Daar a yiib soaba b le gilga tẽnga vugri n le lɛɛg n kẽ sikã, la b maana woto dasem a yoob tõre. Dasem a yopoe soaba, b yika pĩnda n sɩng gilgri wa rasem-kam la b gilga naoor a yopoe. Yaool n yɩɩ ba raar bal la b gilg naoor a yopoe. Gilgr a yopoe soaba sẽn gilg n sɛ, la barda rãmb sẽn peebe t'a Zozuwe yeel b fãa: «Tãs-y y zabr tãsga tɩ Soaala-Wẽnd basa tẽngã y nugẽ. Y na n dɩka tẽnga ne a pʋgẽ teed fãa n kõ Soaala-Wẽnde. Pʋg-yoodr a Raab ne a zaka rãmb bala n na n põse, t'a Raab solga d sẽn da tʋm b rãmbã. Maan-y gũusg ne kisgã; da belg-y y menga n sɩɩs sẽn dɩk n kõ Soaala-Wẽnd ye, ka rẽ kãab wẽnga na n leb-y lame, yãmb ne y sikã, n tak wẽng n kõ a Israyɛl gilli. Wanzurf, sãnem, zũudu la kutu, fãa lebga Soaala-Wẽnd soolem, fãa rɩkdame n paas Soaala-Wẽnd arzɛka.» Zãma wã kelmame, bardã peebame. Zãma wã wʋma bardã n kelem b zabr kɛlenga sẽn yɩ kɛleng menga al tɩ tẽnga lal-gũbri lʋɩ a menga toore. Ned kam fãa teesa a taoore n kẽ tẽnga la bũmb ka põs ye. B reega Wẽnd n so-zãnga noore, la woto, sẽn da be-b tẽnga pʋgẽ fãa, b kood-b la gilli: rapa, pagba, nin-kẽemse, kom-bõonego, niisi, piisi, bõeense. A Zozuwe reng n yeela lɩɩsdb a yiibã: «Kẽng-y yã a Raab yira, n tɩ yiis-a ne a nebã wala y sẽn da kãabe.» Bi-bɩɩs a yiiba kẽngame n yiis a Raab ne a a ba la a ma, a tãopa la sẽn da be zaka pʋg fãa. B yiisa a Raab buuda neba n bao zĩ-sõng sika noorẽ n bĩng-b be. Tẽnga ne a teed fãa dɩɩ bugum, sã n ka wanzurf, sãnem, zũudu la kutu b sẽn tall n tɩ ning Soaala-Wẽnd doogẽ. A Zozuwe basa a Raab, pʋ-yoodrã, ne a ba wã zaka la a sẽn so fãa. A buud kell n paa Israyɛl sʋka n ta rũnna. La rẽ yɩ-la a sẽn solg a Zozuwe sẽn tʋm b rãmb tɩ b wa kaag Zeriko wã. A Zozuwe wa n kɩtame tɩ neba wẽen woto Soaala-Wẽnd taoore: «Wẽnd na sãam ned ning fãa sẽn na n tʋlga n le yik tẽn-kãnga lalse. Meeba sɩngr daare a bi-kẽeng yaoog la b na n tuki, a kʋɩlensa pagb daare nugẽ biiga yaoog la b na n page.» Soaala-Wẽnd paa ne a Zozuwe la a yʋʋra sãda beelẽ baobga fãa. Israyɛl kamba tõdgame n dɩk bũmb dɩkr sẽn lebg kisgu. A Akã n dɩk sẽn kisã tɩ Soaala-Wẽnd sũur puugi ne Israyɛl kamba. A Akã yaa a Karmi biiga, t'a Karmi ba yaa a Zabdi, t'a Zabdi yaa a Zera biiga, a Zɩɩda roogẽ. A Zozuwe zĩnda Zeriko n tʋm neb Ayi tẽnga sẽn be Betɛl yaanga. A yeel-b lame: «Kẽng-y n tɩ bãng tẽngã.» B kẽngame n tɩ bãng Ayi. B sẽn lɛɛg n wa b yeela a Zozuwe: «Ka modgre tɩ neba fãa kẽng n tɩ tak zabr ye. Neb tus a tã bɩ a naas bal tõe n sekame. Ka modgre tɩ neba fãa nams n kẽng ye, Ayi rãmb sõora paooda wʋsgo.» Dɩlla yɩɩ sẽn zems neb tus a tã n kẽng Ayi la b zoe Ayi neba taoore n lɛɛg n wa. Ayi rãmba tol n paama neb pis-tã la a yoobe n kʋ, n dig sẽn kell-bã, al tẽnga noorẽ kʋɩlense, n ta Sebarim. Yaa b sẽn wa n lɛɛg n sigdã la Ayi rãmb kʋ-ba. Israyɛl kamba wʋmame tɩ b sũur bondg zãnga. Sũ-sãang kɩtame t'a Zozuwe kẽes a futu la a lʋɩ-la a yãvabg, kuga walsa koglga taoore, n pa be tɩ wĩndig wa kẽ. Nin-kẽemba me maana wa yẽnda; b fãa wʋka tom n yug b zutu. A Zozuwe ra yetame: «Kato, Soaala-Wẽnde, bõe yĩng la yãmb bas y nebã tɩ b rʋʋg Zʋrdẽ n na n lʋɩ Amoritsa nugẽ, n ki? Tõnd n kos n na n kẽe Zʋrdẽ rʋʋnd bɩ? Maan-y sugri, Soaala-Wẽnde, m yetame tɩ bõe marsã, t'a Israyɛl ning tĩig a bɛɛba taoore? Kanaã rãmba la b yagse na wʋmame, b na n sũu taaba n tak zabr ne do la b na n menesa d yʋʋr tẽng zugu. Bõe la y na n maan n le maneg y yʋʋra sẽn tog ne pẽgr kãsengã, Soaala?» Dẽ la Soaala-Wẽnd yeel a Zozuwe: «Yiki, bõe tɩ f kɩ f neng tẽng woto? Ad-a Israyɛl n maan wẽnga n sãam m zoodã. N-ye! Bũmb rɩkr sẽn kis la b rɩk yã, bũmb la b zuk yã n solg b teedẽ wã. A Israyɛl kõn tõog a bɛɛba ye, a na n lɛɛg n zoeeme tɩ yẽ meng rɩka sẽn kis rɩkre, la m kõn le zĩnd ne yã, y meng sã n ka yiis kisga sẽn be y sʋka ye. Yiki, Zozuwe, yɩlg f neba. F na n yeelame: ‹Yɩlg-y mens beoog yĩnga tɩ Soaala, Israyɛl Wẽndã, gomda woto: Tʋʋmd wẽng n tʋm y sʋka, Israyɛl kamba, la y kõn tõog n yals y bɛɛba taoore y sã n ka reng n yiis kisgã y sʋk ye.› Dɩlla beoog yibeoogo bɩ y wa roog-roogo. Roog ninga Soaala-Wẽnd sẽn na n paalg a soaba na n waa sak-saka. Sak ninga Soaala-Wẽnd sẽn na n paalg a soaba na n waa zak-zaka. Zak ning Soaala-Wẽnd sẽn na paalg a soaba na n waa nin-yend, nin-yende. B sẽn na n mik bũmb ning rɩkr sẽn kisa ned ning teedẽ, b yõogda a soab bugmẽ, yẽnda ne a sẽn so fãa, t'a sãama Soaala-Wẽnd zoodo, n maan wɩɩbdo, Israyɛl tẽmpeelmẽ.» A Zozuwe sãda beoogo n kɩt tɩ neba kolg roog-roogo la yɩ-la a Zɩɩda rooga zugu la yella lʋɩ yã. A Kɩtame t'a Zɩɩda rooga kolg la yaa a Zera saka n pa yellẽ wã. A Zera sak kolgame la yella paa a Zabdi zaka, A Zabdi zaka kolgame, nin-yend, nin-yende, la lʋɩ-la a Akã zugu; a Akã yaa a Zera biiga, a Zɩɩda yagenga. Dẽ la a Zozuwe yeel a Akã: «M ned sõngo, pẽg a Israyɛl Wẽnnaam, waoog-ba la togs maam f sẽn maane, da solg bũmb ye.» A Akã leokame: «Yaa sɩda, maam n beeg Soaala, a Israyɛl Wẽnnaam, la ad-m sẽn maane: M yãenda bɛɛba laog sʋka, Sinear fu yorg neer gɩfẽ, wanzurf zɩslem sẽn ta wakɩ koeems kobs-yi rẽnna la sãnem gilgu zɩslem sẽn ta wakɩ keems pis-nu rẽnna. Raab wẽng wala m yamẽ tɩ m dɩk-ba. M solga fãa bokẽ, m doog tẽnsʋka.» A Zozuwe tʋma neb a yirã la b tɩ yãenda me tɩ fãa busa bokẽ, a roogẽ. B yãee fãa a rooga tẽnsʋka n dɩk n wa. A Zozuwe ne nin-kẽembã yãeeme la b reeg-b lame n dɩgl Naaba-Wẽnd taoore. B talla a Zera biig a Akã n looge, yẽ ne wanzurfã, ne fu-yorgã la sãnem gilgã, n paas a kom-dibli la a kom-pugli, a loalga, a bõanga, a rũm bõonese, a rooga raad la pɛɛla la a sẽn da so fãa. Israyɛl zãma wã fãa yãag-a lame n tees Akor weoogo. A Zozuwe yeelame: «Yaa bõe la f tak yel-beed d zugu? Bɩ yel-beeda lɛɛg n dɩ-f rũnna!» Neba fãa wẽneg n lab-a-la ne kuga. B wʋka kug zembala n sam a zugu la kuga saongã keta ne rũnna. Yaa rẽ yĩng me la b pʋd zĩigã tɩ Akor, zu-beed tẽnga, la b ket n boond-a-la boto al ne rũnna. Dẽ marsã la Soaala-Wẽnd sũura maag yã. Soaala-Wẽnd yeela a Zozuwe: «Da zoe rabeem ye, da yɛɛs ye. Yi ne tãb-biisa fãa n tak zabre ne Ayi rãmba. Ade, m sagenda f nugẽ Ayi dĩma, a nebã, a tẽngã, a soolma. Maan Ayi ne a dĩma wala f sẽn maan Zeriko ne a dĩma. Da bas-y neba ye, pʋɩ-y taab teedã la rũmsa bala. Maan yam n deng n solg tãb-biis kẽer tẽnga kudgẽ.» A Zozuwe yiisa a zab-zabdba fãa n tɩ wẽ tẽngã. A tũusa neb tus pis-tã sẽn mi zabr sõmb-sõmbo n kɩt tɩ b yi ne yʋngo, la a reng n yeel-b-la woto: «Ade, solg-y y mens neer tẽnga kudgẽ, da zãag-y ne tẽnga ye la ned kam fãa wɩng ne gũusgu. Maam ne neba sẽn kellã tõnd na n kolga tẽngã. Ayi rãmb sã n wa yi n na n seg tõndo, tõnd na n lɛɛg n zoeeme, wala pipi wã. B na n pʋga tõndo n wa zãag ne b tẽngã. B na n tagsa woto: ‹Ges-y b sẽn lɛɛg n zoet wala pĩndã.› Tɩ tõnd sɩd tar zoeese. Yaa wakat kãng la yãmb na n yi y sẽn da solg zĩig ningã n kẽ b tẽngã, la Wẽnnaam, y Soaala, na rɩk-ba n ning y nugẽ. Y sã n kẽ tẽngã bɩ y ning-a bugum. Yaa woto la y na n maan. Gũus-y tɩ yaa mam meng noore.» A Zozuwe basa neba tɩ b loog n tɩ soond Betɛl ne Ayi tẽnsʋka, Ayi nin-taoore. Yʋn kãnga a Zozuwe paa ne zãma wã. Vẽkẽmbeoogo a yika pĩnda n ges a nebã, n dɩk Ayi sore tɩ nin-kẽemb be a taoore. Tãb-biisã sẽn da ketã pʋg-b lame n ta Ayi tẽnga nug goabga n wẽ b sika. Bok n da be sʋka. A Zozuwe yãka tãb-biis na ta tus a nu n solg-b Betɛl ne Ayi tẽnsʋka, Ayi nin-taoore. Zãma wã wẽe a sik tẽnga nug goabga, n yaool ning tãb-biis niyns sẽn tog n pa poorẽ wã tẽnga nin-taoore. Yʋn kãnga a Zozuwe paa bãg-faagẽ wã. Ayi dĩma sẽn yãe a Israyɛl sẽn segende a yika zãnd-zãnd n na n tak zabr ne-a. A siga ne a nebã n tees Yamsem Mogre. A ra ka mi tɩ tãb-biis n soond a tẽnga kudgẽ ye. A Zozuwe ne a neba pa yaas b taoor ye, b zoeeme n tees weoogo. B tigma tẽnga rãmb fãa tɩ b yi n dig-ba, tɩ b sɩd yi n na n dig a Zozuwe. Mik bãmb sẽn pʋgd a Zozuwe wã b zãaga ne b tẽnga. B fãa yiime. Rao ba a ye ka pa tẽngã n ka yi n pʋg a Israyɛl ye. B yii pʋgbo, n tar pʋgbo, n pa lebs n pag tẽnga kʋɩlens ye. Soaala-Wẽnd yeela a Zozuwe: «Zẽk f kãndã f sẽn zãadã n tees Ayi tɩ m na n ning-a-la f nugẽ.» A Zozuwe zẽka kãndã a sẽn da zãadã n tees Ayi. Nuga sẽn zẽke la sẽn da solg-ba sẽn yi n tar zoeese n tɩ kẽ tẽngã. Tẽnga pa-la b nugẽ, la tao-tao bal tɩ b ning-a-la bugum. Ayi rãmb sẽn wẽnemd b poorẽ, bõe la b yãend yã? Bug-zõos sẽn nukd ne b tẽnga n kuiis yĩngri. Ned ba a ye ka le paam gãbe n na n wudg n leb goabg bɩ rɩtg ye. Woto bãmb sẽn da pʋgd neb niyns n tees we-raoogã, nin-bãmb n lɛɛg n digd-ba. B sẽn bãng tɩ sẽn da soond-ba kẽe tẽngã, b sẽn yãe tɩ tẽnga bug-zõos nukd n kuiis yĩngri, a Zozuwe ne zãma wã wẽnemda b neng n tak zabr ne Ayi rãmba. Wakat kãng me tɩ sẽn kẽ-b tẽnga sãagame n yi n pẽoog Ayi rãmba sʋka. Ayi rãmb kii zãnga, ned ba a ye ka põs ye. Dĩma bal la b yõk vɩɩga n wa kis a Zozuwe. A Israyɛl kʋʋ Ayi tãb-biisa gilli, sẽn da pʋg-b we-raoogẽ wã, wala tẽnga noorẽ. Sʋʋga sẽn wa n dɩ b fãa n sɛ, a lɛɛg n kẽ Ayi, n kood sẽn kell-bã. Sẽn ki-b baraare, pagb la rapa, yɩɩ tus piig la a yiibu. A Zozuwe nuga sẽn da zẽk ne kãndã kell n zẽkame tɩ kãab wẽnga wa rɩ Ayi rãmb n sɛ. A Israyɛl sẽn sooge yɩɩ Ayi laogo la a rũms bala tɩ boto la Soaala-Wẽnd ra yeel a Zozuwe. A Zozuwe kɩtame tɩ b yõog Ayi tẽngã; a lebga yi wãando la raboogo n ta rũnna. A bao tɩɩga n luul Ayi dĩma t'a pa be n ta zaabre. Wĩndg sẽn lʋɩ, a kɩtame tɩ b sik-a. B loba a yĩnga tẽnga noore n wʋk kug n zam-a, la kuga saong ket n bee ne rũnna. A Zozuwe mee maan-kugr a Israyɛl Wẽnd la a Soaala yĩnga, Ebal tãng zugu, wala Soaala-Wẽnd tʋʋm-tʋmd a Moyiiz sẽn da wilg Israyɛl kamba la a sẽn da gʋls a noora sebrẽ. Maan-kugra mee ne kug sẽn ka pees ne lar ye. Yũ-noog maand la b kʋ yã, n paas laafi kosg maand, maand sẽn na n dɩ ne sũ-noog Wẽnd taoore. A Israyɛl yĩnga, a Zozuwe gʋlsa Noorã kug zugu. Yaa noor ninga a Moyiiz sẽn da gʋls Israyɛl kamba fãa taoorã. Israyɛl neba gilli ne nin-kẽembã, ne taoor dãmbã, ne bʋ-kaoodbã, fãa ra yɛsa yĩngri, kuga walsa koglg goabg la rɩtgo. B ra yɛsa Levitsa sẽn ya maan-kʋʋdba la sẽn zɩt-b kuga walsa koglg taoore ne sãamba la tẽnga dãmba, tɩ pʋɩ-sʋk tees Garizim tãnga, tɩ pʋɩ-sʋk tees Ebal. Soaala-Wẽnnaam tʋʋm-tʋmd a Moyiiz da yeelame tɩ b maan boto, n kãab a Israyɛl kãab noodo. Dẽ poore a Zozuwe karma sẽn be sebra pʋgẽ zãnga, kãab noodã wala kãab beedã, n tũ sẽn gʋlsa zãnga. A Zozuwe ka karem n long gom pɛdg meng ye. Neba fãa gill kelg-b lame, pagba la kom-bõonego, sãamba sẽn da nok Israyɛl. Ayi kibara zẽkame n ta dĩm dãmba sẽn da be Zʋrdẽ Dʋʋre, tãng zug rãmba, sẽn da ti-b tẽn-nabrẽ, Mog Kãsenga noorẽ dãmba, n ta Libã. Da yaa Ititse, Amoritse, Kanaã rãmba, Perizitse, Ivitse, Zebuzitse. B sũu taaba n na n tak zabre ne a Zozuwe la a Israyɛl. Gabaõ rãmb me sẽn wʋm a Zozuwe kibare, b sẽn wʋm sẽn yɩ bũmb ning ne Zeriko la Ayi rãmba, b bao yam sɩlenga n kõ b menga. B maana b mens wa so-toagdba, n zɩlg b bõeens ne yond la rãam waoos sẽn po tɩ b zap-zape. B wida neooda sẽn po tɩ b maneg n sẽ, b yeelga fu kʋdse. B sor zug rɩɩb da yaa bur sẽn kʋɩ n kaood zeremse. B kolga a Zozuwe ne Israyɛl kamba Gilgal sika, n yeele: «Tõnd yii tẽn-zãoorgẽ tɩrga n wa ka. Ges-y n yõg zood ne tõndo.» Israyɛl leoka Ivitsã: «Tõe tɩ y wẽneg n be-la d sʋka. D na n yɩɩ wãn n yõg zood ne yãmba.» B yeela a Zozuwe: «Tõnd yaa yãmb yemse.» T'a sok-ba: «Yãmb la m ba bõe rãmba, yãmb yita yɛ?» B leokame: «Tõnd yii tẽn-zãoorgẽ la yaa yãmb Wẽnda waoogr yĩnga, tɩ d wʋma b sẽn maan Ezipt tẽnga. D wʋma b sẽn maan ne Amoritsa dĩm dãmb a yiib sẽn da be Zʋrdẽ rʋʋre, Esbõ dĩm a Siyõ la Bazã dĩm a Og sẽn da be Astarot. Tõnd nin-kẽemse la d tẽnga rãmb yeel-d lame: ‹Bao-y sor dɩɩbo la y yi n tɩ seg-ba la y gom ne b woto: tõnd yaa yãmb yemse.› Wa-y tɩ d yõg zoodo. Ges-y tõnd buri, a ra ket n yaa tʋʋlga d sẽn wa n yitã la marsã a kʋɩɩme n kaood zeremse. Tõnd waoosa ra ket n yaa paala tɩ d sui d rãam la marsã b wurame. D neooda la d fut lebga kʋdse, d sora yɩɩ wok tɩ looge.» Israyɛl taoor dãmba reega rɩɩb bilfu b nengẽ n pa reng n sok Soaala-Wẽnd ye. A Zozuwe saka b zoodã tɩ b paam n põse. Taoor dãmba tol n wẽename tɩ bũmb kõn maan-b ye. La rasem ka yãe n maan a tã zooda yõgb poore, la b sẽn bãnge tɩ b pa yi tẽn-zãoorgẽ ye, b ra yaa a Israyɛl yagse, b ra kẽeda a Israyɛl sʋka. A Israyɛl sẽn yiki, a wẽneg n kẽe b tẽngẽ. B soolem da yaa Gabaõ, Kefira, Beerot la Kiriyat-Yearim. A Israyɛl ka tak zabr ne b ye, a sẽn da wẽen ne Soaala-Wẽnda yĩnga. La zãma wã sɩnga guglengu ne taoor dãmbã. Taoor dãmba tigma taaba la ad-b sẽn yẽse: «Tõnd ka tõe n le sɩɩs-b ye tɩ d wẽena ne Israyɛl Wẽnde. La ad-d sẽn na n maan ne-ba. D na n bas-b lame tɩ b vɩɩnde, ka rẽ d wat n taka Soaala-Wẽnd beem d zugu, tɩ tõnd n wẽene. B pa ne tõndo la b lebg da-wesdba la ko-toadba, zãma wã fãa yĩnga.» La b maana wa nin-kẽembã sẽn togsã. A Zozuwe boola Gabaõ rãmbã la a yeel-b lame: «Bõe tɩ yãmb tudg tõndo? Bõe tɩ y togs-d woto: ‹Tõnd yii tẽn-zãoorgẽ!› Tɩ y tẽng yaool n be tõnd sɛɛgẽ? Dũnna Soaala-Wẽnd yãka y barka la y kõn yi yembdẽ abada ye. Y kõn vʋʋs ne raad wesbo la koom yõngr, Soaala-Wẽnd buuda sʋk ye.» Gabaõ rãmba leokame: «Ade, y yemsa paam n wʋma neere Soaala-Wẽnd sẽn da kõ noor ning b tʋʋm-tʋmd a Moyiiz. B ra kãab-a lame tɩ b na n dɩka tẽnsã n ning a nugẽ. Bãmb n kõ y noore tɩ y kʋ n da kees ned ye. Yaa rẽ yĩnga la y waoonga kẽes-d dabeem kãsenga tɩ d kong n maan wa y sẽn mi wã. Ade, d bee y nusẽ, y sẽn dat n maan d bũmb ninga sã n togame la zemsame bɩ y maan.» Ad-a Zozuwe me sẽn maan bũmb ninga n fãag-ba a Israyɛl nugẽ tɩ b pa ki ye. Ba raar tɛka a rɩk-b lame n kõ zãma wã tɩ b wesd daado la b yõngd koom, Soaala-Wẽnd sẽn yãk b waoogr tẽngẽ, la rẽ n ket n be rũnna. Zerizalɛɛm dĩm, a Adoni-Sedɛk, wa n wʋmame t'a Zozuwe wẽe Ayi n tõog-a, n dɩk-a zãnga n kõ Soaala-Wẽnde la a maana ne a dĩma wala a sẽn maan ne Zeriko soaba. A wʋmame yɛsa tɩ Gabaõ rãmb yõga zood ne a Israyɛl n tɩ kẽe n naag-a. Dẽ waa ne a yɛɛsgo tɩ Gabaõ ra yaa tẽn-bedre, da yaa na-tẽnga n da yɩɩd Ayi tẽnga. Yaa tẽng sẽn pid ne zabr mitba. Dẽ la Zerizalɛɛm dĩm, a Adoni-Sedɛk, tʋm tɩ b tɩ yeel Ebrõ dĩm, a Oam, Yarmut dĩm, a Piream, Lakis dĩm, a Yafia la Eglõ dĩm, a Devir: «Wa-y naag-y taab n sõng-ma tɩ m wẽ Gabaõ tɩ tẽng kãng rãmb yõga zood ne a Zozuwe la a Israyɛl.» Amoritsa dĩm dãmb a nu wã sɩd sega taaba n na n sõng taab n zabe. Yɩɩ Zerizalɛɛm ne Ebrõ, Yarmut, Lakis la Eglõ dĩm bãmb ne b tãb-biisi. Bãmb n gũbg Gabaõ n na n tak zabre. Gabaõ rãmb me tʋmame tɩ b tɩ yeel a Zozuwe, dẽ t'a ket Gilgal: «Da bas f yemsa ye, wa tao-tao n sõng-do n fãag-do tɩ Amoritsa tãmsa zug dĩm dãmba yik n sũu taaba n na n tak zabre ne do.» A Zozuwe wẽneg n yii Gilgal ne a tãb-biisi, ne a zab mitba fãa. Soaala-Wẽnd yeela a Zozuwe: «Da maan dabeem ye, bãng tɩ m dɩk-b lame n sagl f nugẽ, ba a ye kõn yals f taoor ye.» A Zozuwe paam n linga bɛɛbã t'a yii Gilgal n kẽn ne yʋngo. Soaala-Wẽnd meng n kɩt tɩ bɛɛba ning tĩiga b sẽn yãee a Israyɛl. A Israyɛl tõog-b-la sõmbo, n dig-b Gabaõ n tees Bɛt-Orõ la yii vargre, Azeka n ta Makeda. A Israyɛl sẽn wa n tõog bɛɛba tɩ b zoet n sigd Bɛt-Orõ, Soaala-Wẽnd yãag-b-la ne sapɩlem kuga n ta Azeka la kuga pãb-b lame n kʋ. Sapɩlma sẽn kʋ neba yɩɩga Israyɛl kamba sẽn kʋ ne b sʋʋse. Amoritsa sẽn lʋɩ Israyɛl nugẽ daare, a Zozuwe goma ne Soaala-Wẽnd, Israyɛl kamba taoore n yeele: «Bɩ wĩndga yals Gabaõ tɩ kiuug pa Ayalõ bãg-faagẽ.» La wĩndig yaasame la kiuug pa luk a zĩigẽ ye al t'a Israyɛl wa rok a sũur ne a bɛɛba. La ka rẽ n da pĩnd n gʋls Wẽnd nin-sõng sebra pʋgẽ bɩ? Wĩndig yalsa zug tẽnsʋka, n pa raara a ye tõre n pa lʋɩ ye. Raar ka reng n zĩndi la raar ka le pʋgl sẽn wẽneg daar kãng ye, tɩ Soaala-Wẽnd meng deega ninsaal noore, n zab n sõng Israyɛl. Dẽ poore a Zozuwe ne a neba lɛɛg n kẽe Gilgal tẽnga. Dĩm dãmb a nu wã zoe n tɩ soonda Makeda tãng bokẽ. B Wa n togsa a Zozuwe: «Ad-y b yãee dĩm dãmb a nu wã tɩ b sor Makeda tãng bokẽ.» T'a leoke: «Bilim-y kug bɛd n pag boka noore la y ning neb boka noor n gũ-ba. Sã n ya yãmba, da bao-y vʋʋsg ye. Pʋg-y bɛɛba n gõdg-ba tɩ b ra paam n ta b tẽnsẽ ye tɩ Soaala-Wẽnd dɩka b tẽnsã n sagl y nusẽ.» Ade, a Zozuwe ne Israyɛl kamba sẽn waa n na n tõog bɛɛba la b menes-b zãnga, kẽer me paamame n põse n zoe n tɩ kẽ zabr-kõn-ling-m tẽnsẽ. Sã n yaa a Israyɛl, nin-yend meng ka pa moog ye, b lɛɛga zãnga n kẽ Makeda ne a Zozuwe. Ned ba a ye ka le saag n bao b noor ye. A Zozuwe yeelame: «Lak-y kuga tãn-boka noore la y yiis dĩm dãmb a nu wã n kõ ma.» B maana wala a sẽn yeelã n tall dĩm dãmba n wa, yaa Zerizalɛɛm, Ebrõ, Yarmut, Lakis la Eglõ dĩm dãmba. B wa ne ba t'a Zozuwe yaool n bool Israyɛl tõre la a yeel tãnsoaben-damba sẽn yãag-b yẽ wã: «Kolg-y la ned kam fãa teeg dĩm dãmba yubl ne a naoore.» B maama boto. T'a paase: «Keng-y y sũuri la ra maan-y rabeem ye tɩ yaa woto la Soaala-Wẽnd na n maan ne bɛɛb niyns sẽn na n seg yãmb zabrẽ.» Dẽ poore a Zozuwe kʋʋ dĩm dãmbã n kɩt tɩ b yagl-b tɩɩs a nu tɩ b pa be n ta zaabre. Zĩig sẽn wa n sobgdẽ a Zozuwe kõo noore tɩ b sik-ba n lob tãnga bokẽ, b sẽn da solg b mens zĩig ningã. B wʋka kug bɛd n zam boka noore la b keta ne rũnna. Baraare a Zozuwe wẽe Makeda n tõog-a la a kɩtame tɩ b kood a neba la a dĩma. Bõn-vɩɩl fãa soogr da lebga kisgu. Ba a ye ka põs ye. Sẽn maan ne Zeriko dĩma n maan ne Makeda Naaba. A Zozuwe ne a Israyɛl neba yii Makeda n kẽng Libna. B tɩ wẽe Libna tẽnga. Naaba-Wẽnd dɩka Libna ne a dĩma n sagl a Israyɛl nugẽ la a Israyɛl kooda bõn-vɩɩl fãa. Ba a ye ka põs ye. Sẽn maan ne Zeriko dĩma n maan ne Libna rẽnda. A Zozuwe ne a neba yii Libna n wa Lakis. A gũbg-a lame n tak zabr ne-a. Soaala-Wẽnd dɩka Lakis n sagl a Israyɛl nugẽ, a tõog-a-la daar a yiib soaba la a kooda bõn-vɩɩl fãa, wala a sẽn maan Libna. Gezɛr dĩma, a Oram, da yii wakat kãnga n na n sõng Lakis la a Zozuwe wẽ-a lame la a kʋ-la a neba zãnga. A Zozuwe ne zãma wã sẽn yi Lakis, b taa Eglõ. B sẽn gũbg Eglõ, b zaba ne-a. B tõog-a-la baraare la sʋʋg n kood bɛɛba zãnga. Bõn-vɩɩl fãa soogr lebga kisgu baraare wala b sẽn maan ne Lakis. A Zozuwe ne Israyɛl tõre yii Eglõ n ta Ebrõ n tak zabre. B sẽn tõog-a, b kooda dĩma la a soolma neba fãa la bõn-vɩɩl fãa. Ba a ye ka põs ye, wala Eglõ tẽnga, bõn-vɩɩl fãa soogr da lebga kisgu. A Zozuwe ne a Israyɛl wẽneg n teesa Debir n tak zabre ne-a. A dĩma ne a soolem dãmba fãa, a kood-b lame. Bõn-vɩɩl fãa soogr da lebga kisgu la woto, ba a ye ka põs ye. A Zozuwe sẽn maan bũmb ning ne Ebrõ, bõn-kãng la a maan ne Debir la bõn-kãng me la a reng n maan ne Libna la a dĩma. A Zozuwe sẽn tõog tẽns niynsa yɩɩ woto: tãng zug rãmba, Negɛb rãmba, bãadẽ dãmba, kunkubẽ dãmba: Dĩm bi talga, ned ba a ye ka pa vɩɩg ye. Bõn-vɩɩl fãa soogr da lebga kisgu, wala Israyɛl Wẽnnaama sẽn da kõ-a noore. A Zozuwe tõog-b-la fãa gilli: Kadɛs-Barnea n ta Gaza, n ta Gosen, n ta Gabaõ. A Zozuwe tõoga tẽnsa ne b dĩm dãmba, zab-vuk bala. Israyɛl Wẽnnaam n da zabd n sõngd-a. A Zozuwe ne a neba gilli lɛɛg n wa b sikẽ, Gilgal. Asor dĩm, a Yabin, sẽn wʋm a Zozuwe kibare, a tʋlga sõngre n tʋm neb Madõ dĩm a Zobab nengẽ, n tʋm neb Simrõ ne Akesaf dĩm dãmba nengẽ. A le tʋma dĩm dãmb a taab nengẽ: dĩm niyns sẽn be nug goabga, tãnga zug, Zenezarɛt rɩtgo, dĩm niyns sẽn be bãg-faagẽ la Dor tãn-sɩlemsa zut, nin-taoore. Kanaã rãmbã da bee yaang la nin-taoore, tɩ Amoritsã, Ivitsã, Perizitsã la Zebuzitsã be tãnga zugu; tɩ Ivitsã be Ermo tãnga tẽngre, Mispa tẽn-peelmẽ. Bãmb fãa yiime ne b tãb-biisi, zãma kõn bãng-n-sõde, wala mogr noorẽ bĩisrẽ. B yii ne wiidi la bilim-bilm ka tɛka. Dĩm bãmba fãa sũu taab n wa Merõ kʋɩlsẽ n na n tak zabr ne a Israyɛl. Soaala-Wẽnd yeela a Zozuwe: «Da zoe nin-bãmba ye, tɩ beoog wakat kãnga, tɩ m dɩk-b-la kɩɩms zãnga n sagl a Israyɛl nugẽ. Fo na n pasa b wiidi wã nao gĩin la f yõog b bilim-bilm.» A Zozuwe ne a tãb-biisa ling-b-la Merõ kʋɩlse n pãb-ba. Soaala-Wẽnd sagl-b-la a Israyɛl nugẽ t'a tõog-ba n dig kẽer n ta Sidõ Na-tẽnga la Misrefot-Mayim, la Mispa bãg-fool sẽn be yaanga. Pãbra yɩɩ pãbr menga al tɩ nin-yend meng ka paam n zoe n põs ye. A Zozuwe maana ne bãmb wala Soaala-Wẽnd meng sẽn da wilgi, n pas b wiida nao gĩin la a yõog b bilim-bilm. A Zozuwe lɛɛg n wa wẽe Asor, n kʋ a dĩma ne sʋʋga. Tẽnsa sẽn gũbg n gilgã, a Asor n da ya na-tẽnga. Israyɛl kamba sẽn da wẽen tɩ b kõn kees bũmb b mens yĩngã, b kʋʋ bõn-vɩɩg fãa sẽn da be tẽn-kãng pʋgẽ. Bõn-vɩɩg ka põs ye, la b waa n baas n ninga tẽnga bugum. A Zozuwe tõoga dĩm dãmba fãa ne b tẽnsã. A kood-b-la gilli, tɩ b ra wẽename tɩ b kõn kees bũmb b mens yĩng ye, wala Soaala-Wẽnd sẽn da wilg b tʋʋm-tʋmd a Moyiiz. Tẽnsa fãa sẽn da zao tãmsa zutã, a Zozuwe ka yõog tẽng a to n paas Asor ye. Tẽn-kãng bal la a yõog yã. A Israyɛl sẽn kees a meng yĩng tẽn-kãens pʋgẽ yɩɩ b laogã la b rũmsã. Sã n ya ninsaalba, b kood-b la fãa gill ne sʋʋse, b pa kell ned ba a ye ye. Soaala-Wẽnd sẽn da wilg b tʋʋm-tʋmd a Moyiiz bũmb ningã, a Moyiiz me ra taas-a-la a Zozuwe; la rẽ me la a Zozuwe tũ yã. A ka tol n bas noor a yembr meng a sẽn deeg a Moyiiz nengẽ n ka tũ-a zãng ye. Woto wã, yɩɩ tẽnga zãng la a Zozuwe wẽe n deege: Tãnga zug rãmba, Negɛb, Gosen, Bãoogã, Yamsem Mogre, Israyɛl tãn-bɛd la a bãg-faase. Sẽn sɩng Alak tãnga sẽn tõnd Seyir sẽnẽ n ta Baal-Gad, Libã bãg-faagẽ, Ermo tãng sɛɛgẽ, tẽn-bãmb fãa lʋɩ-la a Zozuwe nugẽ. A yõga dĩm dãmbã n pãb n kʋ. B zabra ne taab kaoosa wʋsgo. Sã n ka Ivitsã sẽn kẽed Gabaõ, tẽng ba a ye ka tʋlg laafi ne a Israyɛl ye. A zaba ne tẽns a taabã n tõog-ba n sooge. Soaala-Wẽnd sɩd da tʋlgame tɩ b kɩʋʋlem b sũuri n tak zabr ne a Israyɛl, t'a Israyɛl me wẽen t'a kõn zoe b nimbãanega n sɩd sɛɛs-b zãnga, wala Soaala-Wẽnd sẽn da kõ a Moyiiz noore. A Zozuwe sẽn ta bala la a sẽn kʋ Anakitsã. A kʋʋ tãnga zug rãmba, Ebrõ rãmba, Debir la Anab rãmba, sẽn zao-b Zɩɩda bɩ Israyɛl tãmsã. Bãmb ne b tẽnsa lebga kisgu. Anakitsa ka le zĩnd a Israyɛl tẽn-peelmẽ ye, sã ka Gaza, Gat la Asdod. Tẽnga fãa lʋɩ-la a Zozuwe nugẽ, wala Soaala-Wẽnd sẽn da wilg a Moyiiz. A weel-a lame n pʋɩ Israyɛl, roog fãa ne a rẽnna. Wakat kãng la tẽnga yaa n paam laafi. Ad dĩm niyns a Israyɛl sẽn tõog n dees b tẽnsã, Zʋrdẽ rʋʋnd sẽn tees yaanga, Arno kʋɩl bɛɛga tɛk n digd Ermo tãnga la Yamsem Mogra yaang foolle. Ad Amoritsa dĩm a Siyõ; a da kẽeda Esbõ, a na-tẽngẽ. A ra soo Aroɛr sẽn be Arno noore, n paas Galaad bogre, n ta Yabok kʋɩl-bɛɛga sẽn ya toaag ne Amonitsã. A ra soo Zʋrdẽ bãooga bogr ning sẽn tees yaanga, n paas Zenezarɛt Mogrã, nug goabg sẽnẽ, n ta Yamsem Mogre, Bɛt-Yesimot yegende la Pisga tãng weoogo, nug rɩtg sẽnẽ. Ad Bazã dĩm a Og, Refayitsa buuda nin-yend sẽn kell moogo, a da kẽeda Astarot la Edreyi. Yẽ me ra soo Ermo tãnga ne Salka la Bazã tẽn-peelma zãng n ta Gesuritsa la Maakatitsa toaaga, n paas Galaad bogra sẽn kelle, n tekd Esbõ dĩm a Siyõ toaagẽ. A Moyiiz ne Israyɛl tãb-biisa da reng n tõoga dĩm bãmb b yiibu. Wẽnd tʋʋm-tʋmd a Moyiiz da rɩka b soolma n kõ a Rubẽ, a Gad la a Manase bogrã. Ad tẽns niyns a Zozuwe ne Israyɛl kamba sẽn pãb n deeg Zʋrdẽ rʋʋnde, nin-taoore, Baal-Gad sẽn be Libã bãg-faagẽ n ta Alak Tãng sẽn lug Seyir sẽnẽ. A Zozuwe pʋɩ-la b tẽnsã n kõ a Israyɛl buud fãa a rẽnna. Tẽn-bãmb ra luga ne tãmse bɩ n yɛdg bãado. Le yaa Zʋrdẽ bãg-faaga, ne kunkubã, we-raoogã sẽn kõsd nug rɩtgã. Ra yaa Ititse, Amoritse, Kanaã rãmba, Perizitse, Ivitse la Zebuzits tẽnse. Dĩm niyns a Zozuwe sẽn tõog la woto: Ad Zeriko dĩm la Ayi dĩma. Ayi pẽe Betɛl. Ad Zerizalɛɛm dĩma, ad Ebrõ dĩma Ad Yarmut dĩma, ad Lakis dĩm. Ad Eglõ dĩm, ad Gesɛr dĩma Ad Debir dĩma, ad Gedɛr dĩma. Ad Orma dĩm, ad Arad dĩma. Ad Libna dĩm, ad Adulam dĩma. Ad Makeda dĩm, ad Betɛl dĩma. Ad Tapua dĩm, ad Efɛr dĩma Ad Afɛk dĩm, ad Lasarõ dĩma Ad Madõ dĩma, ad Asor dĩma. Ad Simrõ-Merõ dĩma, ad Akesaf dĩma Ad Taanak dĩma, ad Megido dĩma. Ad Kedɛs dĩma, ad Karmɛl tãng zug dĩm a Yokneam. Ad Dor tãn-sɩlẽnga dĩma, Goyim dĩma, Galile yegende Ad Tirsa dĩm: b zãng fãa yaa pis-tã la a ye. A Zozuwe waa n kʋʋla wʋsgo. Soaala-Wẽnd yeel-a lame: «Ade, fo kʋʋlame, fo kaoosa moogo, la tẽnsa sẽn ket n nan ka kẽ f soolmẽ labsa. Tẽnsa sẽn ketã, yaa sẽn be-b Filisti rãmb la Gesuritsa soolmẽ. Sɩngda Sior sẽn tot ne Ezipt n ta Ekrõ sẽn be nug goabga la b sẽn tog n ges wa Kanaã rãmb soolem. Sẽn ket yɛsa, yaa dĩm dãmb a nu wã sẽn da namsd Filisti rãmbã: Gaza dĩm, Asdod dĩma, Askelõ dĩm, Gat la Ekrõ dĩm dãmba; le paasa Avitsã. Bãmb soolma sɩngda nug rɩtgo ne Kanaã rãmba la Ara sẽn ya Sidõ rãmb soolem n ta Afɛka n digd Amoritsa toaagẽ. Sẽn ket yɛsa: Gebal weoogo ne Libã bogr ning sẽn tees wĩndiga sẽn pukdẽ; sɩngda Baal-Gad sẽn be Ermo tãnga tẽngr n tat Lebo-Amat noorẽ. Ade, tẽns niyns sẽn zao tãmsa zutã, sẽn sɩng Libã n digd Misrefot-Mayim sẽn be nin-taoore, n paas Sidõ rãmbã, maam n na n dig-b fãa Israyɛl kamb taoore. Fo tʋʋmd yaa f reeg tẽnsã n poees Israyɛl kamb wala Naaba-Wẽnd n kõt-ba la wala m sẽn zoe n wilgã. Wakat taame tɩ f na n kõ buudã b pʋɩɩre. Yaa buud a wẽ wã sẽn nan ka paam b rẽnna, n paas a Manase bogrã.» A Rubẽ ne a Gad roogo da naaga a Manase bogrã n deeg b pʋɩɩr a Moyiiz nugẽ Zʋrdẽ yaanga. B sẽn da reegã, yaa Aroɛr sẽn be Arno kʋɩl-bɛɛga noore, yaa Medeba kunkubã n ta Dibõ. Yaa dĩm a Siyõ tẽnsã; la a Siyõ la Amoritsa dĩm ning sẽn da kẽed Esbõ. Yaa yẽ soolma n ta Amonitsa toaaga. Yaa Galaad la Gesuritse la Maakatits soolem, Ermo tãngã, Bazã ne Salka tõre. Yaa Bazã, a Og soolma zãnga. A Og yaa Refayitsa nin-yend sẽn kell moogo; yẽ n da rɩt naam Astarot la Edreyi Bazã tẽn-peelmẽ. A Moyiiz n da pãb dĩm bãmba b yiibã n deeg b soolem. Israyɛl kamba yaool n pa reeg Gesuritsa la Maakatitsa soolem ye. Yaa rẽ la b sẽn ket n be Israyɛl sʋk ne rũnna. A Levi roogo bal la b ka kõ bũmb. Yaa kũuna b sẽn da kõt Soaala, a Israyɛl Wẽnnaama, yaa kũun bãmb pʋgẽ la b ra paamd b pʋɩɩre, wala a Moyiiz sẽn da wilgi. A Moyiiz ra kõ-la a Rubẽ kambã b pʋɩɩre wala b sõora sẽn da tog ne. Ad-b pʋɩɩra yalem: sɩngda Aroɛr sẽn be Arno kʋɩl-bɛɛga noore, la tẽng ning sẽn da be bãg-faaga pʋga, n ta tãnga sẽn da gilg Medeba. Le paasa Esbõ ne tẽns a taaba sẽn zao tãngã: Dibõ, Bamot-Baal, Bɛt-Baal-Meõ. Le paasa Yaak, Kedemot, Mefaat, Kiriyatayim, Sibna, Gor tãnga zug tẽnse: Seret-Saar, Bɛt-Peor, Pisga kunkubã, Bɛt-Yesimot, tãnga pennẽ tẽnsã, a Siyõ soolma zãnga. Yaa Amoritga n da rɩt naam Esbõ. A Moyiiz ra tõoga yẽ ne Madiã rĩm biisi, a Evi, a Rekem, a Sur, a Ur, a Reba: Bãmb da sakda a Siyõ. Sã n yaa a Beor biigã, bag a Balaam, b ra naaga yẽ ne neb a taab n kood ne sʋʋga. A Rubẽ kamb pʋɩɩr da tata Zʋrdẽ. D sẽn wilgã la a rooga pʋɩɩre ne a tẽn-bɛd la a tẽn-bõonego. A Moyiiz kõ-la a Gad kambã b pʋɩɩr wala b sõora sẽn da tog ne. B sooga Yaser, Galaad tẽnse, Amonitsa soolem pʋɩ-sʋka n ta Aroɛr sẽn tot ne Raba. Esbõ n ta Ramat-Mispe la Bertonim, Maanayim n ta Debir toaaga, n paas Zʋrdẽ bãg-faagẽ tẽnsã: Bɛt-Aram, Bɛt-Nimra, Sukot, Safõ, sẽn yaa Esbõ dĩm, a Siyõ, soolma kelle. Zʋrdẽ kʋɩlgã n da ya toaaga n ta Kinerɛt mogra satmẽ la a leb n yaa toaag yaanga. D sẽn wilga me la a Gad roog pʋɩɩre ne a tẽn-bɛd la a tẽn-bõonego. A Moyiiz ra kõ-la a Manase bogrã a pʋɩɩr wala a sõora sẽn da tog ne. B sooga sẽn sɩng Maanayim, Bazã dĩma, a Og soolem zãnga, a Yayir pʋt rot sẽn be Bazã tẽn-peelmẽ, tẽns pisoobe. Galaad bogra sẽn kellã n paas Astarot la Edreyi, a Bazã dĩm, a Og, soolem, bãmb dɩkame n paas a Manase biig a Makir kamba bogre, wala b sõora sẽn tog ne. Yaa woto la a Moyiiz pʋɩ tẽngã, a Moab pʋ-weesẽ, Zʋrdẽ rʋʋnde, Zeriko yaanga. A Moyiiz ka kõ a Levi buuda bũmb ye. A Israyɛl Wẽndã, la a Levi pʋɩɩr, wala bãmb meng sẽn da wilgi. Ad Israyɛl kamb sẽn paam pʋɩɩr ning Kanaã tẽnga. Pʋɩtba yɩɩ maan-kʋʋd a Elazar, la a Nun biiga, a Zozuwe, la Israyɛl buuda kãsem-dãmbã. B poeesame n bãng rot a wɛ wã la a Manase bogrã sẽn na n soog tẽns niynsi, wala Soaala-Wẽnd meng sẽn da wilg a Moyiiz. A Moyiiz ra kõ-la a Rubẽ, a Gad ne a Manase bogr a ye wã b pʋɩɩr, Zʋrdẽ yaanga, la a pa kõ a Levi kambã b pʋɩɩr bãmb sʋk ye. A Zozɛf buuda ra yaa rot a yiibu: a Manase roog la a Efrayim roogo. La Levitsa ka paam soolem sã n ka tẽns kẽer bala b sẽn na n kẽedẽ, bãmb ne b rũmsi n paas pʋt la rũmsa wãbneg zĩisi. Tẽnsa pʋɩɩra tũ-la a Moyiiz sẽn deeg noor ning Soaala-Wẽnd nengẽ. A Zɩɩda neb n waa n yãend a Zozuwe Gilgal. Kenitg a Yefune biig a Kalɛb, yeel-a lame: «Fo mii Soaala sẽn wilg a Moyiiz, Soaala-Wẽnd tʋʋm-tʋmda, mam poorẽ la fo me poorẽ, Kadɛs-Barnea. M da tara yʋʋm pis-naase, Soaala-Wẽnd sõgna, a Moyiiz, sẽn waa n tʋm-m Kadɛs-Barnea tɩ m wa bãng tẽnga nenga. M lebgre m pelga m pʋg n togs m sẽn yãende. Mam tũud-n-taasa gomame n boog saam-biisa raood zãnga la mam tũ-la m Wẽnnaama daabo. Yaa baraar la a Moyiiz wẽen woto: ‹Tẽng ning f sẽn tabg ne f naoorã na n yɩɩ foo ne f kamba soolem, yʋʋm sẽn ka be sɛɛbo, tɩ fo tũu Wẽnnaam, f Soaala zãnga.› Dẽ tɛka Soaala-Wẽnd wogla m yõore wala b sẽn kãabe. Yaa yʋʋm pis-naas la a nu rõanna la Soaala pʋlem-m dẽ, dẽ t'a Israyɛl nan keta we-raoogẽ, la m yʋʋm yaa pis-nii la a nu marsã. M sẽn zĩ ne pãng ning rũnna wã yaa waa a Moyiiz sẽn tʋm maama raare. M ket n tara m pĩnd pãngã, n tõe n zabe, n tõe n tʋm m tʋʋmde. Kõ-m tãms tẽns niyns Soaala-Wẽnd sẽn kãab-m, baraare, tɩ b na n kõ-m lame wã, tɩ baraare f wʋmame tɩ Anakits n da kẽed be la b tẽnsa da yaa tẽn-bɛd n tar pãnga. Daare Naaba-Wẽnd na zĩnd ne ma la m na reeg-b n sooge tɩ Soaala-Wẽnd n pʋlme.» A Zozuwe ninga a Yefune biig a Kalɛb barka n dɩk Ebrõ n kõ-a t'a sooge. Rẽ me yĩng la ba ne rũnna, Ebrõ yaa a Kalɛb soolem tɩ Kenitga a Yefune biig a Kalɛb tũu Soaala-Wẽnd daabo, a Israyɛl Wẽnnaam daabo. Ebrõ ra boonda pĩnd tɩ Kiriyat-Araba. Arba wã n da yɩ Anakitg sẽn yɩɩg a taaba. Tẽnga yaa n vʋʋsa ne zaba. Ad pʋɩɩr ning a Zɩɩda sagsa sẽn deege. Sɩngda Edom toaagẽ, Sin we-raoogẽ wã, Negɛb rɩtg-rɩtgo. B toaag kãng da sɩngda Yamsem mogrã, zĩig ning tẽnga sẽn maan wa a yiisa a zelemd Negɛb n na n leg kooma, n tees Akrabim kunkubri, n pɩʋʋgd Sin, n digd Kadɛs-Barnea rɩtgo, n tagd Esrõ, n dʋʋd Adar, n gõdg be n tees Karka, n tũud Asmo, n tat Ezipt kʋɩl bɛɛga, n tekd Mog Kãsenga. Dẽ n na n yɩ y nug rɩtg toaaga. Yaanga, yaa Zʋrdẽ sɩngre n ta a sẽn wat n kẽed yamsem mogrã n da ya toaaga. Nug goabgã, toaaga sɩngda Yamsem Mogra sẽn yõbg a meng zĩig ningã n ta Zʋrdẽ sẽn kẽed-a zĩig ningã. Toaaga da rʋʋda Bɛt-Ogla, n basd Bɛt-Araba goabga n digd pĩig a ye sẽn boond t'a Boã pĩiga; a Rubẽ biig la a Boã. Toaaga sẽn yi be a le rʋʋ Debir n yegd Akor bãg-faagã n gõdg nug goabg n tees Gilgal sẽn tot Adumim kunkubrã, kʋɩl-bɛɛga rɩtgo. A sẽn yi be a tũuda Eyin-Semɛs bãgse n tat Eyin-Rogɛl. A sẽn le yi be a yegda Ben-Inom bog zulungã n basd Zebuze rãmb tẽnga rɩtgo, dat n yeelame tɩ Zerizalɛɛm, n kul yĩngri n gõdg Inom bokã n tat Refayitsa tẽn-nabrẽ. Toaaga sẽn ta tãnga zug tẽnsʋka a gõdg n teesa Neftoa bãgse, n tees Efrõ tãnga n le gõdg n tees Baala, yẽ la Kiriyat-Yearim. A sẽn yi Baala a gõdga nin-taoore n tees Seyir tãnga n yegd Yearim googã, tãnga goabga, sẽn ya Kesalõ, n sigd Bɛt-Semɛs, n pɩʋʋgd Timna, n tat Ekrõ goabga n lɛɛg n tees Sikarõ, n dʋʋd Baala tãnga la Yabneyɛl, n tekd mog Kãsengã. Mog Kãsenga la toaag nin-taoore. A Zɩɩda rooga la a sagsa sẽn paam tẽng ninga toaag la woto. A Yefune biig, a Kalɛb, paama vẽenem a Zɩɩda tẽnsa sʋka wala Soaala-Wẽnd sẽn da wilg a Zozuwe. A Zozuwe kõ-a-la Kiriyat-Araba, Anakits na-tẽng sẽn lebg Ebrõ rũnna. A Arba n yɩ a Anak ba. A Kalɛb dig n yiisa a Anak kamb a tãabã: a Sesayi, a Ayiman la a Talmayi. Bãmb yaa a Anak yagense. Dẽ poore a taka zabre ne Debir dãmba. Debir la b sẽn da boond pɩnd tɩ Kiriyat-Sefɛr. Yaa wakat kãng la a Kalɛb yeel yã: «Ned ninga sẽn tõoga Kiriyat-Sefɛr t'a lebg a soolem m na kõ-a m biig a Aksa t'a maan a paga.» Yɩ-la a Otniyɛl, a Kalɛb ba a Yefune yao, a Kenaz, biiga n maan raoodo. A Kalɛb rɩka a bi-pugl a Aksa, n kõ-a t'a maan a paga. A sẽn ta a sɩda nengẽ la a sẽn sagl-a t'a kos a ba pʋʋgo. Dẽ la a ta a ba taoore n sig a bõang zugu t'a Kalɛb sok-a: «Bõe la f rata?» T'a leoke: «Bũmb la m kota: Yãmb sẽn dɩk maam n tɩ lob Negɛb we-raoogẽ wã, bɩ y kõ-m koom zĩisi.» T'a na n kõ-a bulsi sẽn be tãms zutu la buls sẽn be tẽn-nabrẽ. A Zɩɩda rooga pʋɩɩr la woto: Tẽns niyns sẽn be a tẽnga sɛtme, Edom toaagẽ, Negɛb we-raoogẽ: Kabsyɛl, Eder, Yagur, Kina, Dimona, Adeada, Kedɛs, Asor, Yitnã, Zif, Telem, Bealot, Asor-Adata, Keryot, Esrõ, bɩ Asor, Amam, Sema, Molada, Asar-Gada, Esmo, Bɛt-Pelet, Asar-Sual, Beerseba, Bizyotea, Baala, Iyim, Esem, Eltolad, Kesil, Orma, Siklag, Madmana, Sanesanna, Lebaot, Silim, Ayin-Rimo. Fãa zãng yaa tẽns pisi la a wɛ n paas b tẽn-kogse. Tẽns niyns sẽn be bãada noorẽ: Estaol, Sora, Asna, Zanoa, Eyin-Ganim, Tapua, Enam Yarmut, Adulam, Soko, Azɛka, Saarayim, Aditayim: Gedera, Gederotayim: tẽns piig la a naase ne b tẽn-kogse. Senan, Adasa, Migdal-Gad, Dilan, Mispe, Yokteyɛl, Lakis, Boskat, Eglõ, Kabõ, Lamas, Kitlis, Gederot, Bɛt-Dagõ, Naama, Makeda: tẽns piig la a yoob ne b tẽn-kogse. Libna, Eter, Asã. Yifta, Asna, Nesib Keyila, Akzib, Maresa: tẽn-toose, bɛd la bõonego, bãmb b wɛ. Ekrõ ne a tẽn-toose, bɛd la bõonego. Sẽn yɩ Ekrõ n tees nin-taoore, sẽn be Asdod sẽnẽ fãa, n paas Asdod ne a tẽn-toose, Gaza ne a tẽn-toose n ta Ezipt kʋɩl-bɛɛga la Mog kãsenga ne a noorẽ tẽnse. Ad tãmsa zut tẽnse: Samir, Yatir, Soko, Dana, Kiriyat-Sanna, yẽ boondame tɩ Debir dũnna, Anab, Estemoa, Anim, Gosen, Olõ, Gilo: tẽns piig la a ye ne b tẽn-toose. Arab, Ruma, Esã, Yanum, Bɛt-Tapua, Afɛka, Umeta, Kiriyat-Araba, yẽ boonda rũnna tɩ Ebrõ, la Sior: tẽns a wɛ ne b tẽn-toose. Maõ, Karmɛl, Zif, Yuta, Zizreyɛl, Yokdeam, Zanoa, Kayim, Gibea, Timna: tẽns piig ne b tẽn-toose. Alul, Bɛt-Sur, Gedor, Maarat, Bɛt-Anat, Eltekon: tẽns a yoob ne b tẽn-toose. Kiriyat-Baal, yaa Kiriyat-Yearim; Raba: tẽns a yiib ne b tẽn-toose. We-raoogẽ: Bɛt-Araba, Midin, Sekaka, Nibsã, Ir-Mela, Eyin-Gedi: tẽns a yoob ne b tẽn-toose. A Zɩɩda kamb ka tõog n dig Zebuzitsa sẽn da be Zerizalɛɛm ye. Yaa rẽ yĩng la ba ne rũnna, Zebuzitsa ket n naag a Zɩɩda kamb n kẽed Zerizalɛɛm. Tẽng ning poeera sẽn poees n kõ a Zozɛf kamba da sɩngda Zʋrdẽ kʋɩlga, Zeriko sɛɛgẽ, Zeriko ko-bundma yaanga; We-raooga ra sɩngda be n tees Betɛl. Toaaga ra taka Betɛl n ta Luz, n yi be n digd Atarot, Arkitsa toaagẽ, n lɛɛg n sigd, nin-taoore, Yafletitsa tẽnga n digd Bɛt-Orõ sẽn be tẽngre, n digd Gezɛr, n tekd mog kãsengã. Woto n yɩ a Zozɛf kamba, a Manase la a Efrayim, pʋɩɩre. Sã n yaa a Efrayim kamba, bãmb soolma ra sɩnga Atrot-Adar sẽn be yaanga n tat Bɛt-Orõ ning sẽn zao tãnga zugu. Nin-taoore, toaaga bẽeg n teesa Mikmetat sẽn be nug goabga n lɛɛgd n gõdgd yaanga n tees Tanaat-Silo, n loog be n digd Yanoa, n yi be n digd Atarot la Naara, n tãagd Zeriko la Zʋrdẽ. Mikmetat nin-taoore, toaaga yita Tapua n tat Kana kʋɩl-bɛɛga, n tat Tẽnsʋk Mogre. Woto me la a Efrayim pʋɩɩrã. Lebd n paasa tẽns niyns sẽn be a Manase soolem tɩ b bas a Efrayim kamb yĩnga, bãmb ne b tẽn-toose. Kanaã rãmb sẽn da kẽed-b Gezɛr kell n paa be ne a Efrayim n ta rũnna la bãmb n so zagsa tʋʋma. Tẽng ning poeera sẽn poees n kõ a Zozɛf bi-kẽeng a Manase, la woto. B da reng n kõo vẽenem gãndaoog a Makir yagensã. A Makir n yɩɩ a Galaad ba. Bãmb la b ra kõ Galaad la Bazã, Zʋrdẽ yaanga. A Manase kamb a taaba me paama b rẽnna wala b rooga sõor sẽn da tog ne. Sẽn le paam-b pʋɩɩr yɛsa: a Abiezɛr kamba, a Elɛk, a Asriyɛl, a Sekem, a Efɛr la a Semida kamba. Bãmb yaa a Zozɛf biig a Manase kom-dibli kamba, ned kam fãa ne a roogo. Sã n yaa a Selofead, a Efɛr biiga, t'a Efɛr ba yaa a Galaad, t'a Galaad ba yaa a Makir, t'a Makir ba yaa a Manase, yẽ ka rog kom-dibli ye. Kom-pugli bal la a rog yã: a Mala, a Noa, a Ogla, a Milka la a Tirsa. Bãmb n bʋʋg maan-kʋʋd, a Elazar, a Zozuwe la kãsem-dãmba taoore, n yeele: «Wẽnd kõ-la a Moyiiz noore t'a kõ tõnd d pʋɩɩr d saam-biisa sʋka.» Woto wã, sẽn tũ ne Wẽnd noora, b reega b pʋɩɩr b ba wã saam-biis sʋka. Dɩlla Galaad la Bazã sẽn be Zʋrdẽ yaang toog sẽn ka, yaa tẽns piig la a Manase paam yã. A Manase kom-pugli wã paama pʋɩɩr b saam-biis sʋka. Galaad tẽn-peelma yɩ-la a Manase kamb a taaba soolem. Ad-a Manase toaaga: a yegda Asɛr; yaa Mikmetat sẽn tot ne Sikɛm. N yi be n teesd Yamin; be yaa sẽn kẽed-b Eyin-Tapua rãmb soolem. Tapua ra yaa a Manase soolem la zĩig a ye, a yãka toaag ne a Efrayim. Toaaga ra sigda Kana kʋɩl-bɛɛga, kʋɩlga rɩtgo. Yaa a Efrayim kamba tẽnse, la b ra be a Manase soolmẽ. A Manase meng soolem ra bee kʋɩlga goabga. Sã n yi be yaa mogra la f tat. A Efrayim n da so nug rɩtgo, t'a Manase so nug goabga. Mogrã n da yaa b toaaga. B ra basda a Asɛr goabga, n basd a Isakar yaanga. B kẽe a Asɛr la a Isakar soolma pʋg n bẽeg n kõ a Manase. Yaa woto la a ra so Bɛt-Seã ne a tẽn-toose, Yibleam ne a tẽn-toose, Dor ne a tẽn-toose, Eyin-Dor, Taanak, Megido ne b tẽn-toose n paas tẽnsa tãabã. A Manase kamba sẽn pa tõog n kẽ tẽn-bãmba yĩnga, Kanaã rãmba kell n paa be. A Israyɛl sẽn wa n mik t'a pãng paasame, a pa rig Kanaã rãmbã n yiis ye la bãmb n deeg zaka tʋʋm n tʋmnẽ. A Zozɛf rooga waa n yik n yeela a Zozuwe: «Bõe tɩ tõnd pʋɩɩr yaa a ye tãa tɩ d sõor yaool n ya wʋsgo, d sẽn paam Wẽnd bark zembal yĩnga?» A Zozuwe leokame: «Efrayim tãnga sã n paood fo yĩnga, tɩ f sõor yaa wʋsgo, kẽng n tɩ kɛ la f soog Perizitsã la Refayitsa googo.» Tɩ b le yeele: «Tãnga ka na n sekd d ye; Kanaã rãmba fãa sẽn be-b tẽn-nabra tara kut bilim-bilm. Bɛt-Seã ne a tẽn-toosa rãmba fãa me yaa boto, Zizreyɛl dãmba me boto.» Dẽ la a Zozuwe yeel a Zozɛf roogo, a Efrayim la a Manase: «Y rooga roga wʋsgo la y tara pãnga. Y soolma ka na n yɩ tẽn-yend bal ye. Y na n sooga tãnga ne a sẽn ya googã. Y na n kʋʋsa tɩɩsã la y pesm-a zãng n maan y soolem. Y na n diga Kanaã rãmbã ne b sẽn ya wʋsgã, ne b bilim-bilma sẽn ya kutã.» Israyɛl kamba fãa tigma taab Silo tɩ b ti Sɛka Roog be. B ra tõoga tẽnsa fãa n maand b sẽn dat ne-ba. Sags a yopoe n yaool n da nan ka paam b pʋɩɩr ye. A Zozuwe yeel-b lame: «Y na n taa wakat bʋgo n yaool sẽbg kalle n tɩ reeg vẽenem ning Soaala, y yaab rãmba Wẽnd, sẽn kõ yãmba? Yãk-y neb a tã, sak fãa pʋgẽ, tɩ m tʋm-b tɩ b tɩ kaag tẽngã la b ges n gʋls sebr zugu, tẽnga sẽn na n pʋɩ seem ninga tɩ ta sagsa sẽn ketã, la y lɛɛg n wa. B na pas-a a yopoe n pʋɩ. A Zɩɩda na n paa a soolmẽ, rɩtgo, t'a Zozɛf paa a rẽnnẽ, goabga. Bɩ yãmb tɩ ges la y pʋɩ tẽnga tɩ zems pʋɩɩr a yopoe wã la y lɛɛg n wa wilg-ma. M na n maana poeere ka, Wẽnnaam, d Soaala, taoore. Sã n ya Levitsã, b ka na n tall pʋɩɩr yãmb sʋk ye. Bãmb pʋɩɩr na n yɩɩ Soaala maan-kʋʋrã. Sã n yaa a Gad, a Rubẽ la a Manase bogrã, bãmb zoe n deega b pʋɩɩr Zʋrdẽ yaanga, wala Wẽnd sõgna a Moyiiz sẽn da kõ-ba.» Neba rɩka sore n na n tɩ kaag tẽngã t'a Zozuwe yeel-ba: «Kẽng-y n tɩ saag tẽngã n bãng a sẽn yaa a soaba la y lɛɛg n wa ka. M na sok Wẽnd n kõ yã, Silo ka.» Neba loogame, b saaga tẽngã la sebr zugu b pʋɩ-a-la sags a yopoe n wa kɩs a Zozuwe, Silo sikẽ. Silo sikẽ, a Zozuwe soka Naaba-Wẽnd n bãng a Israyɛl sak kam fãa pʋɩɩre, n gʋls sebr zugu n wilg buud fãa a rẽnna. Poeera sẽn poeese, pipi pʋɩɩra yɩ-la a Bẽnzame roog rẽnna. Yẽ rẽnda da bee a Zɩɩda la a Zozɛf kamba rẽnd sʋka. Goabga, sɩngda Zʋrdẽ, n dʋʋd Zeriko goabga, n teesd nin-taoor tãmsã n tat Bɛt-Aven we-raoogo. Yita be n kẽed Luz yegende, nug rɩtgo. Luz boonda dũnna tɩ Betɛl. Beelẽ toaaga sigda Atrot-Adar, n dʋʋd tãng ning sẽn be Bɛt-Orõ rɩtgo. Bɛt-Orõ tɛka, a teesda nin-taoore n gõdg n wat Kiriyat-Baal, yẽ boondame tɩ Kiriyat-Yearim, a Zɩɩda kamba na-tẽnga. Toaaga la woto nin-taoore. Rɩtgã, toaaga sɩngda Kiriyat-Yearim. A teesda nin-taoore Neftoa bulsã. A sigdame n teesd tãnga sɛtmẽ, tãng ning sẽn tot ne Ben-Inom sudgã sẽn be Refayitsa goabga. Toaaga ra sigda Inom sudga, Zebuzitsa goabga, n sigd Eyin-Rogɛl. A le gõdgda be n digd Eyin-Semɛs la Gelilot sẽn tot ne Adumim. N yi be n sigd a Rubẽ biig, a Boã, pĩiga. Dẽ poore toaaga yegda nug goabga, n sigd Yamsem Mogra sẽn tõnd a taoore. Toaaga ra yegda Bɛt-Ogla goabga, n tat Yamsem mogrã sẽn yõbg a meng zĩig ningã, nug rɩtgo, Zʋrdẽ sẽn kẽed Yamsem Mogr nug rɩtgo. Rɩtg toaaga la woto. Yaangã yaa Zʋrdẽ la toaagã. Woto me la a Bẽnzame pʋɩɩr la a toaaga sẽn yãk n gilgi. Tẽns niyns a Bẽnzame kamb sẽn paam la woto: Zeriko, Bɛt-Ogla, Emɛk-Kesis, Bɛt-Araba, Semarayim, Betɛl, Avim, Para, Ofra, Kefar-Amona, Ofni, Geva: tẽns piig la a yi ne b tẽn-toose. Gabaõ, Rama, Beerot, Mispe, Kefira, Mosa, Rekem, Yirpeyɛl, Tarala; Sela, Elef, Zerizalɛɛm, Zebuze rãmb na-tẽnga, Gibea, Kiriyat: tẽns piig la a naase ne b tẽn-toose. Woto n yɩ a Bẽnzame rooga pʋɩɩre. Poeera sẽn poeese, pʋɩɩr a yiib soaba yɩ-la a Simeõ roog rẽnna. A Simeõ rooga pʋɩɩra ra bee a Zɩɩda rẽnda sʋka. Ad tẽns niyns sẽn lʋɩ b pʋɩɩrẽ: Beerseba, Seva, Molada, Asar-Sual, Baala, Esem, Eltolad, Betul, Orma; Siklag, Bɛt-Markabot, Asar-Susa; Bɛt-Lebaot, Sarwen: tẽns piig la a tã ne b tẽn-toose. Ayin, Rimõ, Eter, Asã: tẽns a naas ne b tẽn-toose. Paasda tẽn-bõonesa fãa sẽn yegd-bã n ta Baalat-Bɛr la Ramat-Negɛb. Dẽ n yɩ a Simeõ roog pʋɩɩre. B sẽn kẽe a Zɩɩda soolmẽ n bẽeg n kõ a Simeõ kambã, yaa a sẽn da ya yaleng wʋsga yĩnga. Yaa rẽnd me yĩng la a Simeõ kamba pʋɩɩr waa n tɩ be a Zɩɩda soolma sʋka. Poeera sẽn poeese, pʋɩɩr a tãab soaba yɩ-la a Zabulõ roog rẽnna. B soolma ra tẽeg n taa Sarid. Nin-taoore b toaaga teesa Marala n digd Dabesɛt la kʋɩlga sẽn zoet Yokneam taoore. Yaanga a yita Sarid n tat Kislot-Tabor, n teesd Daverat n dʋʋd Yafia. A yita be n ket n digd yaanga, n digd Gat-Efɛr la Et-Kasin, n yi be n tees Rimõ n gõdgd Nea. Nug goabga a gilgda Annatõ n tekd Yifta-Ɛl. Sã n paas Katat, Naalal, Simrõ, Yidala, Bɛtelyɛɛm, yaa tẽns piig la a yiib ne b tẽn-toose. Woto n yɩ a Zabulõ roog pʋɩɩre, a tẽns la b tẽn-toose. Poeera sẽn poeesã, pʋɩɩr a naas soaba yɩ-la a Isakar rooga rẽnna. B soolma tẽeg n taa Zizreyɛl la ad-b tẽnse: Kesulot, Sunem; Afarayim, Siyõ, Anaarat, Rabit, Kisyõ, Ebes, Remet, Eyin-Ganim, Eyin-Ada, Bɛt-Pasɛs Toaaga ra sɩɩsda Tabor, Sasayim, Bɛt-Semɛs la Zʋrdẽ: tẽns piig la a yoobe ne b tẽn-toose. Woto n yɩ a Isakar pʋɩɩr, a tẽns ne a tẽn-toose. Poeera sẽn poeese, pʋɩɩr a nu soaba yɩ-la a Asɛr rooga rẽnna. Ad-b soolma tẽnse: Elkat, Ali, Beten, Akesaf, Alamelɛk, Amad, Misal, nin-taoore a yegda Karmɛl la Sior-Libnat. Yaanga a rigda Bɛt-Dagõ n tãagd Zabulõ la Ifta-Ɛl sudga, nug goabga, n paas Bɛt-Emɛk, Neyɛl la Kabul. A ra tak n digda Abdõ, Reob, Amo, Kana, n tat Sidõ tẽn-kãsenga. Toaaga gõdgda be n tees Rama n tat Tir tãnsoben-doogo, n tat Osa, Maalab, Akzib, Um, Afɛk, Reob n tat Tẽnsʋk Mogrã. Yaa tẽns pisi la a yi ne b tẽn-toose. Woto n yɩ a Asɛr roog pʋɩɩre, a tẽns ne a tẽn-toose. Poeera sẽn poeese, pʋɩɩr a yoob soaba yɩ-la a Neftali roog rẽnna. Nug rɩtgo b toaaga yita Elef, n yegd Saananim kʋka n tees Adami-Nekɛb la Yabneyɛl n tat Lakum la Zʋrdẽ. Nin-taoore toaaga pɩʋʋga Aznot-Tabor, n sɩɩsd Ukok la a Zabulõ soolem, dɩtgo, n basd Asɛr nin-taoore, n basd Zʋrdẽ, yaang sẽnẽ. Tãnsoben-tẽnsa ra yaa Sidim, Ser, Amat, Rakat, Kinerɛt, Adama, Rama, Asor, Kedɛs, Edreyi, Eyin-Asor, Yirõ, Migdal-Ɛl, Orem, Bɛt-Anat, Bɛt-Semɛs, tẽns piig la a wɛ ne b tẽn-toose. Woto n yɩ a Neftali roog pʋɩɩre, b tẽns la b tẽn-toose. Poeera sẽn poeese, pʋɩɩr a yoob soaba yɩ-la a Dã roogo rẽnna. Ad-b soolma: Sora, Estaol, Ir-Semes, Salabim, Ayalõ, Yitla, Elon, Timna, Ekrõ, Elteke, Gibetõ, Baalat Yeud, Bene-Berak, Gat-Rimo; Yarkõ kʋɩlga, Rakõ la Zafa tẽn-peelem. A Dã kamba soolem ka leb-b zãng ye. Dẽ la b tɩ tak zabr ne Lesem la b sẽn tõog-ba b kooda b neba fãa. B kẽe tẽngã. La b teka a yʋʋrã tɩ lebg Dã, b yaaba yʋʋre. Woto n yɩ a Dã roog pʋɩɩre, b tẽns la b tẽn-toose. Tẽnga pʋɩɩb sɛɛ woto. Israyɛl kamba kõ-la a Nun biig, a Zozuwe, a pʋɩɩr, bãmb sʋka. B tũu Naaba-Wẽnd daabo n kõ a Zozuwe a sẽn da kos tẽng ningã, Timnat-Sera, Efrayim tãnga zugu. A Zozuwe le maneg m mee tẽngã n kẽ. Yaa woto la Silo tẽnga, sɛka Roog noore, Wẽnnaam taoore, maan-kʋʋd a Elazar, a Nun biig, a Zozuwe, la kãsem-dãmbã sok Naaba-Wẽnd n bãng buud fãa ne a pʋɩɩre. Yaa woto la pʋɩɩra sɛ yã. Wẽnd yeela a Zozuwe: «Gom ne Israyɛl kamba la f yeel-ba: kõ-y mens soondg tẽnse m sẽn gom b rãmb yell ne a Moyiiz. Ned sã n yĩd n kʋ neda, tɩ raab wẽng ka lʋɩ sʋk bada, a tõe n zoe n tɩ soonda be n põs sẽn ki a soaba roagda sẽn dat n daag zɩɩm n dole. Yaa tẽn-bãmb pʋga la sẽn kʋ-a ned tog n zoe n kẽnge. A sã n ta tẽnga noore, a yaasdame n wilg nin-kẽemba a sẽn maan bũmb ninga. Bãmb n kẽesd-a tẽnga pʋga, n bao zĩig n kõ-a t'a zĩnd. Sẽn kʋ a soaba roagda sã n wa, n dat n dok a sũuri b ka yiisd-a n kõ-a ye. Tɩ pʋ-toog ka zĩnd ye, yɩɩ yĩdgu, ka tũ ne beem kʋdg ye. Sẽn kʋ-a neda tog n paa tẽnga pʋga n ta wakat ning b sẽn na n kao a bʋʋdo, n ta maan-kʋʋd kãseng ning sẽn so-a tʋʋmna wakat kãnga, kũum. Dẽ poor bal la a na n tõog n leb a tẽngẽ la a zakẽ.» Ad tẽns niyns b sẽn yãk tɩ na n yɩ soondg zĩiga: Kedɛs, Galile tẽn-peelmẽ, Neftali tãng zugu. Le paasa Sikɛm, a Efrayim tãnga zugu. Le paasa, a Zɩɩda tãnga zugu, Kiriyat-Araba, sẽn boond dũnna tɩ Ebrõ. Zʋrdẽ rʋʋnde, Zeriko yaanga, a Rubẽ tẽn-peelmẽ la weooga noorẽ, b yãka Besɛr. N yãk a Rubẽ soolmẽ, Ramot-Galaad, a Gad tẽn-peelmẽ. N yãk Golan, Bazã tãng zugu, a Manase tẽn-peelmẽ. Woto n yɩ tẽns niyns b sẽn yãk tẽnga kamba la sãamba yĩnga tɩ b na n yɩ soondg zĩisi ned ning fãa sẽn na n yĩd n kʋ a to yĩnga. La woto a tõogdame n põs sẽn ki-a wã roagda sẽn dat n daag a zɩɩm, n ta a bʋʋda wakato. Levitsa sags kãsem-dãmb waa n yãenda maan-kʋʋd, a Elazar, la a Nun biig a Zozuwe, la a Israyɛl buud kãsem-dãmbã, dẽ tɩ b be Silo, Kanaã tẽnga, la b yeelame: «Wẽnd togsa a Moyiiz tɩ b kõ d tẽns d sẽn na n kẽ, la zĩis d sẽn na n wãben d dũmsi.» Yaa woto la Israyɛl kamba tũ Wẽnd daabo n kẽ b soolmẽ n yãk tẽns kẽere la rũms wãbneg zĩisi n kõ Levitsã. Ad tẽng ning poeera sẽn kõ Keyatitsa roogo. Levitsa kẽere, maan-kʋʋd a Aarõ kamba, paama tẽns piig la a tãabo a Zɩɩda, a Simeõ la a Bẽnzame tẽn-peelmẽ. A Keyat kamb a taaba paama tẽns piig a Efrayim, a Dã la a Manase bogra soolmẽ. B kẽ-la a Isakar, a Asɛr, a Neftali la a Manase bogr a to wã soolmẽ n yãk tẽns piig la a tãabo n kõ a Gersõ kambã. B kẽ-la a Rubẽ, a Gad la a Zabulõ soolmẽ n yãk tẽns piig la a yi a Merari kamba yĩnga, wala b sõora sẽn da tog ne. Wala Wẽnd sẽn da wilg a Moyiiz, Israyɛl kamba kõo Levitsã tẽns la rũms wãbneg zĩisi, ned kam fãa wala Naaba-Wẽnd sẽn leok a yĩnga. Tẽns niyns b sẽn yãk a Zɩɩda la a Simeõ soolmẽ tɩ na n yɩ tẽn-kẽedse la wãbneg zĩisi, la woto: B kõ-b-la Keyatitsã, a Levi kamba, a Aarõ yagense, tɩ poeera sɩnga ne bãmba. Ad-b sẽn paame: Kiriyat-Araba, ne a wãbneg zĩisi, Zɩɩda tãnga zugu. Kiriyat-Araba yaa Ebrõ. A Araba yɩ-la a Anak ba. A Yefune biig, a Kalɛb, n paam pʋtã la tẽn-bõonesã, tɩ maan-kʋʋd a Aarõ kamba deeg n na n maan nin-kʋʋdsa soondg tẽnse la rũmsa wãbneg zĩisi, Ebrõ, Libna, n paas Yatir, Estemoa, Olõ, Debir, Asã, Yuta, Bɛt-Semɛs. Yaa tẽns a wɛ la b paam buud a yiiba soolmẽ. A Bẽnzame soolmẽ b paama Gabaõ, Geba, ne b wãbneg zĩisi, Anatot, Alemet: tẽns a naase. Zãng fãa yaa tẽns pĩig la a tãabo la a Aarõ yagens paam yã. Naaga ne wãbneg zĩisi. Yɩ-la a Efrayim soolmẽ la b yãk tẽns n kõ a Keyat yagense. Poeesame n kõ bãmb tẽns sẽn be a Efrayim tẽn-peelmẽ. B kõ-b-la Sikɛm ne a wãbneg zĩiga, Efrayim tãnga zugu n paas Gezɛr, Kibsayim, Bɛt-Orõ ne b wãneg zĩisi: tẽns a naase. A Dã soolmẽ yɩɩ Elteke, Gibetõ, tẽns a naase. Ayalõ, Gat-Rimo ne b wãbneg zĩisi. A Manase bogr a ye soolmẽ, Taanak, Yibleam ne b wãbneg zĩisi: tẽns a yiibu. Fãa gill yaa tẽns piig ne b wãbneg zĩis la b kõ a Keyat kamba sẽn da kelle. A Manase bogr a to wã soolmẽ, b kõ-la a Gersõ kamba, Levitsã, Golan sẽn be Bazã n paas Besetera, ne b wãbneg zĩisi: tẽns a yiibu. A Isakar soolmẽ b kõo Kisyõ, Dabrat, Yarmut, Eyin-Ganim, ne b wãbneg zĩisi: tẽns a naase. A Asɛr Soolmẽ, Misal, Abdõ: Elkat, Reob, ne b wãbneg zĩisi: tẽns a naase. A Neftali soolmẽ, Galile Kedɛs sẽn ya soondg tẽnga, ne Amot-Dor, Kartã ne b wãbneg zĩisi; tẽns a tã. A Gersõ kamb tẽnsa zãng yaa Piig la a tã ne b wãbneg zĩisi. Levitsa sẽn kellã, a Merari kamba, b kẽ-la a Zabulõ soolmẽ n yãk Yokneam, Karta, Dimna, Naalal ne wãbneg zĩisi: tẽns a naase. Zʋrdẽ rʋʋnd yaanga, a Rubẽ buud soolmẽ b kõ Besɛr n paas Yaas, Kedemot, Mefaat ne b wãbneg zĩisi: tẽns a naase. Gad dãmb soolmẽ, Ramot-Galaad sẽn ya soondg tẽnga, Maanayim, Esbõ, Yazɛr ne wãbneg zĩisi: tẽns a naase. A Merari yagens kamb a taaba zu-nooga pʋɩɩr zãnga yɩɩ tẽns piig la a yiibu. Dɩlla Levitsa sẽn paam tẽns a Israyɛl kamb a taaba sʋk yaa pis-naas la a nii ne b wãbneg zĩisi. Sã n gom tẽng yell fãa naagdame n gom wãbnega zĩig sẽn da gũbga wã. Yɩɩ boto ne tẽng fãa. Yɩɩ woto la Wẽnd pids b sẽn da kãab a Israyɛl. B kõ-b-la tẽnga zãnga. B sɩd deeg-a lame n kẽ. Wẽnd kõ-b-la laafi b tẽn-peelmẽ wala b sẽn da kãab b yaab rãmba la bɛ ba a ye ka yals b taoore ye. Wẽnnaam dɩka b bɛɛba fãa n sagl b nusẽ. Kãobg noog ning fãa Naaba-Wẽnd sẽn da kãab a Israyɛl doogo, ba a ye ka pa n ka pids ye. Fãa taasame. A Zozuwe boola a Rubẽ nebã n paas a Gad la a Manase bogrã n yeel-ba: «Wẽnd sõgne, a Moyiiz, sẽn kõ yãmb noor ningã y reeg-a lame; y le kelga mam meng sẽn yet tɩ y maan bũmb ning fãa. Al n ta rũnna, yãmb pa leb poorẽ n bas y saam-biisã, zabra ne a kaoosda, tɩ y tʋlgame n deeg zãnga, Wẽnnaam, y Soaala, sẽn wilg-y bũmb ninga fãa. Marsã, Soaala, yãmb Wẽnnaam, kõ-la y saam-biisã laafi ninga b sẽn da kãab-bã. Dẽ yĩngã yãmb me leb y rotẽ, Wẽnd sõgen a Moyiiz sẽn kõ yãmb tẽng ninga pʋgẽ, Zʋrdẽ yaanga. Gũus-y neere n tũ saglsã la noya Wẽnd sõgen, a Moyiiz, sẽn wilg-y, n nong Soaala, yãmb Wẽnnaam, ne y sũur fãa, n tũud b soy, n deeg b noya, n bas tɩ y yam kẽ-b zãnga, n waoog-b ne y sũur fãa la y yalẽ fãa.» A Zozuwe ning-b-la barka, n pʋʋs b Wẽnd na taase. Ned kam fãa leba a tẽngẽ. Yaa Bazã tẽn-peelmẽ la a Moyiiz ra kẽes a Manase bogr a ye. Bogra a to wã deega a pʋɩɩr b saam-biisa sʋk Zʋrdẽ nin-taoore. A sẽn waa n kulsd-b, a Zozuwe ning-b-la barka. A yeela woto: «Leb-y y tẽnsẽ ne arzɛk sẽn ka paoode, ne rũms wʋsgo, ne wanzurfu, sãnem, zũudu, kutu la fut sẽn ka tar sõor ye. Bɩ y pʋɩ ne y saam-biisã y bɛɛba laogo.» A Rubẽ kamba, a Gad kamba, la a Manase bogrã leba b tẽnsẽ. Yaa Silo, Kanaã tẽng la b bas Israyɛl kamba a taabã n leb Galaad, b pʋɩɩr tẽnga, wala Wẽnd sẽn da wilg a Moyiiz t'a kõ-ba. B sẽn ta Gelilot, Zʋrdẽ noor, Kanaã tẽn-peelmẽ, a Rubẽ ne a Gad la a Manase bogrã mee maan-kugr kãsenga. Israyɛl kamb a taaba wʋma yellã. B wʋmame t'a Rubẽ, a Gad la a Manase kamba mee maan-kugr kãsenga, Kanaã tẽn-peelem, Gelilot, Zʋrdẽ noorẽ, b sẽn gãndg Israyɛl kamba toaaga. La bãmb sẽn wʋme, b sũu taab n na n wa tak zabr ne-ba. Yaa maan-kʋʋd a Elazar biig, a Pinas, la b reng n tʋm a Rubẽ, a Gad la a Manase bogrã nengẽ. N paas buud kãsem-dãmb piiga, nin-yend sẽn tũus tus-wɛɛl sʋka; B ta-la b nengẽ, Galaad tẽn-peelmẽ n yeel-b woto: «Ad Israyɛl Soaala kamb sẽn yet-y: Yaa bõe tɩ y maan sẽn ya wẽng a Israyɛl Wẽnnaam nifẽ? Bõe tɩ yãmb bas Soaala, y Wẽnnaam, dũnna, n me maan-kugri? Tɩ d mi tɩ maan-kugra meeb yaa y sẽn dat n yi Wẽnd soolmẽ wã tʋʋmde. Peor wɩɩbdã n ka sek bɩ? Al n ta rũnna menga, al ne sɩbgr ning Wẽnd sẽn sɩbg b buudã, d ket n nan ka pek ne Peor rẽgda ye! Yãmb sẽn yik rũnna n bas b pʋgbã, yãmb sẽn zẽkd y zug ne bãmbã, ad-y beoogo, b me na n yika b sũura ne b buud a Israyɛl. Y sã n mikame tɩ tẽng ning b sẽn kõ yãmba ka tẽn-sõngo, bɩ y wa Wẽnd soolmẽ, b rooga sẽn ti zĩig ningã, wa n kẽ-y tõnd sʋka la y ra zẽk y zug ne Naaba-Wẽnd ye, ra zẽk-y y zug ne tõnd me n yik n met maan-kugr a to, Wẽnnaam, tõnd Soaala, maan-kugr sɛɛgẽ ye. M sok n gese, a Zera biig, a Akã, sẽn waa n wɩɩbã, a sẽn waa n dɩk sẽn kisã, ka buuda zãng la Wẽnd sũ-puura rɩr wɛɛ? A ka yɩ a ye n maan kaalem a yel-wẽnda yĩng ye.» A Rubẽ, a Gad la a Manase bogra kamb leoka kãsem-dãmbã. «Bɩ Soaala sẽn ya Wẽndã yɩ d kaseto, a Israyɛl Soaala sẽn ya Wẽnnaama yɩ d kaseto, la a Israyɛl meng yɩ kaseto! Sã n yaa zẽk-m-menga, sã n yaa Wẽnd la d zãgsda bɩ d fãa ki rũnna! D sã n mee maan-kugr n na n yi d Soaala maasmẽ, n na kʋʋd d yũ-nood maand, la d kõt d kũuni, n na n kʋʋd laafi kosg maand, bɩ Wẽnd sok-do! Ayo! Ad-y d sẽn me maan-kugrã yaa wala d sẽn sãmbd d yamẽ tɩ yãmb kamba na n wa yik beoog n sok tõnd kambã: ‹Bõe n be yãmb ne Israyɛl Wẽnnaama sʋka? Tõnd ne yãmb sʋka, Rubẽ la a Gad kamba, Wẽnd yãka toaaga, yaa Zʋrdẽ kʋɩlga. Dɩlla yãmb pʋɩɩr ka le be ne Wẽnd ye!› D zoee yãmb kamba goama na n wa kɩt tɩ tõnd kamba ka le zoe Wẽnnaam, d Soaala, nif ye. Yaa rẽ yĩng la d yeel d mense: ‹D me maan-kugr kãnga.› A pa na n yɩ yũ-nood bɩ maand a taab kʋʋb zĩig ye. A na n yɩɩ kaset bala, tõnd ne yamb sʋka, d kamb ne yãmb kamb sʋka, tõnd loogr poore, tɩ yaa Naaba-Wẽnd la d waoogd ne d yũ-nood maando, d sugr kosg maando, d maan-dɩtse. Woto yãmb kamba kõn tõog n yeel d kambã: ‹Yãmb ka tar pʋɩɩr bilfr meng Wẽnnaam, d Soaala, nengẽ ye.› D yeela d mense: ‹B sã n yik beoogo n gomd woto ne tõnd bɩ ne d kamba, d na yeele: Ges-y Soaala-Wẽnd maan-kugra sẽn da yaa a soab akɩka. D ba rãmba ka mee-a yũ-nood maand bɩ maand a taab kʋʋb yĩng ye, b mee-a-la tõnd ne yãmb kaset yĩnga.› Bũmb sẽn zãr ne tõndo yaa d zẽk d zug ne Wẽnnaam, d Soaala, yaa d wẽnemd d kãare n tees bãmba, n yik n met maan-kugr sẽn ya toore ne sẽn be-a Wẽnnaam, d Soaala, sɛka roogẽ, d yũ-nood maand bɩ d kũuni, bɩ d maand a taab yĩnga.» Maan-kʋʋd a Pinas, nin-kẽembã la buuda kãsem-dãmb sẽn wʋm a Rubẽ, a Gad la a Manase kamba sẽn leoke, b yeelame tɩ zemsame. Dẽ la maan-kʋʋd a Elazar biig, a Pinas, leok-ba: «D mii marsã tɩ Soaala bee ne do y sẽn pa saag n wɩɩb yĩngã la woto y zãaga a Israyɛl ne Wẽnd sɩbgre.» Maan-kʋʋd a Elazar biig, a Pinas, n paas nin-kẽembã basa a Rubẽ, a Gad la a Manase kambã. B yii Galaad tẽng n leb Kanaã, b saam-biisa nengẽ, la b taas-b-la leokrã. Israyɛl kamb sũur yɩɩ noogo. B pʋʋsa Wẽnd barka la b pa le gom b na tak zabre la b sãam a Rubẽ, a Gad la a Manase rãmb tẽng ye. A Rubẽ ne a Gad kamba bao yʋʋr n pʋd maan-kugra. B ra yetame: «Yɩ kaset tõnd ne taab sʋka tɩ Soaala yaa Wẽnnaam.» Wẽnd sẽn kõ a Israyɛl t'a vʋʋs ne a bɛɛba n ka tak zabr, paam n kaoos a wʋsgo. A Zozuwe waa n kʋʋlame, a waa n lebga nin-kẽema. A Zozuwe tigma a Israyɛl, a nin-kẽemba, a taoor dãmba, a bʋ-kaoodba n yeel-ba: «Sã n ya maam, m kʋʋlame, m yʋʋm lebga wʋsgo. Yãmb mens yãee ne y nini, Wẽnnaam, y Soaala, sẽn maan bũmb ning ne sẽn da so-b tẽnga pĩndã. Yaa Wẽnnaam, y Soaalã, n sõng yãmba. Ade, m kõ-y-la wala y zu-noog pʋɩɩre, tẽns niyns y sẽn bas n pa wã wã, wala tẽns niyns m sẽn menes b nebã zãnga, Zʋrdẽ kʋɩlg n ta Mog kãsenga, wĩndga sẽn lʋɩtẽ. Wẽnnaam, y Soaala, n na n dig sẽn ket-bã y taoore. B na n pĩng-b-la yãmb taoore, y na n deega b tẽnsã n sooge wala b sẽn da kãab-y. Dɩlla, maan-y raoodo n deeg la y pids sẽn be a Moyiiz noora pʋgẽ n ka bʋdg goabga, n ka bʋdg rɩtgo. Da saag-y n fãoog y mense ne buud a taba sẽn ket n vɩ-b yãmb sɛɛgẽ wã ye. Da pʋd-y b wẽn-naandsa yʋʋre, da wẽen-y ne bãmba, da pʋg-y-ba, da wõgemd-y b taoor ye. Modg-y n tabend Soaala, yãmb Wẽnde, wala y sẽn maan n tãag rũnna. Na n tũu boto tɩ Wẽnd dig y taoore, buud sẽn labsa la sẽn tar pãng n yɩɩd yãmba, la ba a ye ka tõog-y, n ta rũnna ye. Yãmb nin-yend tõe n diga neb tusri, tɩ yaa Wẽnnaam meng b toore, n da zabd y yĩnga, wala b sẽn da kãabe. Y sã n dat n põse bɩ y modg n nong Soaala, y Wẽnnaam. Y sã n sak wɩɩbdo n tɩ fãoog ne buud niyns sẽn yeg b yãmbã, n kẽ b buudẽ, tɩ b lebg y reem dãmba, tɩ y kẽed b tẽnsẽ tɩ bãmb me kẽed y tẽnsẽ, bãng-y tɩ wakat kãng tɛka Soaala, yãmb Wẽnnaam, kõn le rig-b yãmb taoor ye. La yãmb yĩnga b na lebga tãooga, n lebg bẽdgo, n lebg sãbsga y lugẽ, n lebg gõaag y nini al tɩ y wa tol n menem zãng, tẽn-sõng ning Soaala-Wẽnnaam sẽn kõ yãmba. M ka na n kaoos la m yi moog ye. Na n yɩɩ rũnna bala. Deeg-y y sũurẽ la y yamẽ tɩ kãab nood niyns Soaala, yãmb Wẽnnaam, sẽn kãab yãmba, ka pa vɩɩd ye. Ba a ye ka pa n ka pids ye. Bãng-y tɩ kãab nooda fãa sẽn pidsã, Soaala, y Wẽnnaama, tõeeme n pids kãab wẽnsa me. B tõeeme n menes yãmb tẽng ning b sẽn kõ yãmba pʋga. Sɩda, yãmb sã n sãam zood ning b sẽn yõg ne yãmbã, y sã n pʋg wẽn-naandsã, y sã n wõgemd b taoore, Soaala, yãmb Wẽnnaam, sũur na n puuga ne yã la y kõn kaoos n menem n zãag ne tẽn-sõng ning b sẽn kõ yãmba ye.» A Zozuwe tigma Israyɛl buuda Sikɛm. Yɩɩ Wẽnd taoore la a bool nin-kẽemba, taoor dãmba, bʋ-kaoodba la tʋʋmda zu-raado. A yeela b fãa: «Ad Soaala, Israyɛl Wẽnnaama, koɛɛga: ‹A Tera, y yaab a Abraam la a Nawor ba, da kẽeda Efrat kʋɩlga rʋʋnde. A ra waoogda wẽnd dãmb a taaba. M dʋʋga Efrat kʋɩlgã n tɩ bool y ba, a Abraam, n kɩt t'a wa Kanaã tẽnga. M kõ-a-la rogem, m kõ-a-la a Izaak. M kõ-la a Izaak, a Zakoob la a Ezayu. M kõ-la a Ezayu Seyir tãnga. A Zakoob ne a kamba wa n siga Ezipt. M waa n tʋma a Moyiiz ne a Aarõ la m sɩbga Ezipt ne bõn-bãn m sẽn maan be. M waa n yiis-y-la be. M yiisa y ba-rãmb Ezipt tẽnga. Y teesa mogrã. Ezipt rãmb yii ne wed-dʋʋdba la bilim-bilm, n pʋg y ba rãmba n ta Rudum Mogre. B kelma Wẽnde tɩ b yals lik sẽn tagme yãmb ne Ezipt rãmba sʋka. B kɩtame tɩ mogra lɛɛg n wa rɩ-ba. Y yãenda ne y nin m sẽn maan Ezipt tẽnga. Y kẽna we-raoogẽ wã n kaoose. M waa n kẽes-y-la Amoritsa tẽnga sẽn be Zʋrdẽ yaanga. B sẽn tak zabr ne yãmba, m dɩk-b lame n sagl y nusẽ. M sẽn menes-b yãmb taoore, y paama b tẽngã n sooge. La a Balak, a Sipor biig la Moab dãmb dĩm, waa n yikame n na n tak zabr ne Israyɛl. A tɩ boola a Beor biig, a Balaam, t'a wa kãab-y beedo. M pa sak n kelg a Balaam ye. Menga, a kong ning-y-la barka la m fãag-y-la a Balak nugẽ. Y rʋʋga Zʋrdẽ n ta Zeriko la Zeriko soaalba yik n teega ne yãmba. Amoritse, Perizitse, Kanaã rãmba, Ititse, Girgazitse, Ivitse la Zebuzitse me yika ne yãmba. M dɩk-b lame n sagl y nusẽ. M lʋɩɩsa kãnenkãas y taoore tɩ b rig Amoritsa dĩm dãmb a yiibu, ka tũ ne sʋʋg wõogre bɩ tãp yãagr ye. M kõ-y-la tẽng sẽn dɩlgd a neb tɩ b tʋʋlg ka kaoog ye, tẽns yãmb sẽn ka nams n me, n yaool n kẽ ye, bugsuntund la oliv tɩɩse y sẽn pa sel n yaool n dɩt b biis rũnna.› » A Zozuwe paasame: «Zoe-y Soaala marsã, tũ-y-b zãng ne pʋ-peelem. Zãag-y y mense ne wẽn-naandsã y yaab rãmba sẽn waoog Efrat yaang, la Ezipt tẽnga. Pʋg-y Soaala. Yãmb sã n ka rat n pʋg Soaala bɩ y yãk rũnna wẽnd niyns y sẽn na n pʋgã: y ba-rãmb sẽn pʋg b rãmb kʋɩlga rʋʋnde, bɩ wẽn-naandse, b sẽn ket n waoogd Amoritsa tẽns niyns y sẽn kẽed rũnna. Sã n ya maam ne m roogo, yaa Wẽnnaam, d Soaala, la tõnd na n tũ.» Zãma wã leokame: «Wẽnd na laas d ne Soaala basgo la wẽn-naandsa pʋgbo! Ka Soaala, tõnd Wẽnnaam, n yiis tõnd ne d ba-rãmb Ezipt, d yembd tẽnga, n maan bõn-bãn d nifẽ, n wogl d yõor d so woka zugu la tẽns niyns d sẽn pɩʋʋga laa? Soaala riga tẽnsa rãmb d taoore la Amoritsa tẽn-peelmẽ dãmba n yɩɩda. Tõnd me ratame n kẽ d Soaala tɩ bãmb la tõnd Wẽnde.» Dẽ la a Zozuwe yeel-ba: «Y pa na n tõog n pʋg Soaala ye tɩ b yaa Wẽnd sẽn pid ne sõmblem. Yaa Wẽnd sẽn pa rat tɩ b waoog bũmb a to n paas bãmb ye. B kõ pa n ka sɩbg y tõdgre la y beegr ye. Y sã n bas bãmb pʋgbo n pʋg wẽn-naandsã, bãmb me na nams yã, b na menes yã la bãmb n yaool n sɩng n maan y neere.» Zãma wã leoka a Zozuwe: «Yaa Soaala la tõnd na n pʋge, ka na n yɩ wẽn-naandsa ye.» T'a Zozuwe lɛɛg n yeele: «Yãmb meng kaseto n na n paalg yã la y kõta kaseto tɩ yaa yãmb meng n yãk Soaala la yaa Soaala la y na n tũ bala.» Tɩ b leoke: «N-ye! D meng kõta kaseto.» T'a Zozuwe me yeele: «Sã n ya woto yiis-y bu-zẽmba wẽn-naandsa sẽn be yãmb sʋka la kɩll-y sũuri n tees Soaala, a Israyɛl Wẽnnaam.» Zãma wã yeela a Zozuwe: «Yaa d Soaala, d Wẽnnaam, la d dat n pʋge, bãmb noor sẽn togs la d na n deege.» Ba daare, yɩɩ woto la a Zozuwe ne zãma wã kaool ne taaba. Sikɛm tẽnga; a Zozuwe kõo Israyɛl kamba b rog-n-mik la noy-niyns b sẽn na n deege. A Zozuwe gʋlsa rẽ fãa Wẽnnaam noor sebra pʋga. A Rɩka kug bedre n sel kʋk tẽngre, la kʋk kãng bee Wẽnd sẽn yãk b waoogr zĩigẽ wã. A Zozuwe yeela nebã: «Ade, kug kãnga n na n yɩ d paalgr kaseto t'a wʋma Wẽnd sẽn togsd bũmb ninga fãa; a na n yɩ kaseto n gɩgd-y tɩ y da bas Wẽnnaam, y Soaala ye.» A Zozuwe bas-b lame la ned kam fãa leba a tẽngẽ. Dẽ poore a Zozuwe, a Nun biig la Wẽnd sõgna, ki-la a yʋʋm koabg la piiga. B mum-a-la a pʋɩɩr tẽngẽ, Timnat-Sera sẽn be Efrayim tãnga zugu, Gaas tãng goabga. A Israyɛl pʋga Wẽnd n tãag a Zozuwe kũum la nin-kẽemsa fãa sẽn kell n vɩɩnd, yẽ loogr poore. A Israyɛl pʋga Wẽnd n tãag sẽn da yãend-b tʋʋm sõma niyns Wẽnd sẽn tʋm a Israyɛl yĩnga loogre. Israyɛl kamba da yii Ezipt ne a Zozɛf kõaba la b mum-b-la pʋʋg ninga a Zakoob sẽn da ra a Sikɛm ba, a Amor, kamb nengẽ. A da raa-a-la wanzurf wakɩ koeems koabga la pʋ-kãng ra lebga a Zozɛf kamb pʋɩɩre. A Aarõ biig, a Elazar, me waa n kiime. B mum-a-la Gibea, a biig, a Pinas, tẽnga. Yaa Efrayim tãmsa tãn-bila la b da rɩk n kõ a Pinas. A Zozuwe kũum poore a Israyɛl soka Soaala-Wẽnde: «Ãnda n na n babs Kanaã rãmb pipi n tak zabr ne ba?» Tɩ Soaala-Wẽnd leok: «Na n yɩ-la a Zɩɩda; m na rɩk tẽngã n sagl a nugẽ.» Dẽ n so t'a Zɩɩda me yeel a Simeõ: «Yãag maam m pʋɩɩr tẽngẽ tɩ d zab ne Kanaã rãmba. Dẽ poore m me na yãag foom f soolmẽ n zab n sõng-fo.» A Simeõ sakame. A Zɩɩda dʋʋ n paama a bɛɛbã la Naaba-Wẽnd dɩk-b lame n sagl a nugẽ, yɩɩ Kanaã rãmba n paas Perizitse. Bezɛk tẽnga b kʋʋ neb tus piiga. Sɩd yaa Bezɛk la b seg dĩm a Adoni-Bezɛk. B taka zabre la b tõoga Kanaã rãmb la Perizitse. Dĩma Adoni-Bezɛk loba nao, la b sẽn dig-a n yõke, b fiuusa a nug-raado la a nao-raado. Dẽ la a Adoni-Bezɛk yeel yã: «Dĩm dãmb pisopoe n ka le tar nug-raad la nao-raad n vũnumd, m dɩɩba roagendga tẽngre, n wʋkd dɩ zeremse. M sẽn maan m taaba la Wẽnd dol-ma.» B tall a lame n kẽng Zerizalɛɛm la a tɩ kii be. A Zɩɩda neba taka zabr ne Zerizalɛɛm dãmba. Bãmb n tõoge la b kooda tẽnga rãmb ne sʋʋse n lɛɛg n yõog tẽnga bugum. Zɩɩda neba yaool n sigame n zab ne Kanaã rãmba; kẽer da ti b rot tãnga zugu, tɩ kẽer be Negɛb, tɩ kẽer be tẽn-nabrẽ. Dẽ poore yɩɩ zabre ne Kanaã rãmba sẽn da kẽed Ebrõ. Yaa Ebrõ la b sẽn da boond pĩnd tɩ Kiriyat-Araba. B tõoga dĩm dãmba, a Sesayi, a Ayiman la a Talmayi. B yii be n tɩ zab ne Debir dãmba. Debir da boondame tɩ Kiriyat-Sefɛr. A Kalɛb yeelame: «Ned ninga sẽn na n tõog Sefɛr, m na rɩk m bi-pugla, a Aksa, n kõ-a t'a maan a paga.» A Otniyɛl n tõog Sefɛr tẽnga. Yẽ yaool n da yaa a Kenaz biiga la a Kenaz yaa a Kalɛb yẽere. A Kalɛb sɩd dɩka a Aksa n kõ-a. A Aska sẽn ta a Otniyɛl zakẽ, a sagl-a lame t'a kos a Kalɛb pʋʋgo. Paga ra zomba bõanga la a sẽn sigi, a Kalɛb sok-a lame: «Yaa bõe la f rata?» T'a leoke: «M kot-y-la kũuni, y sẽn kõ-m vẽenem Negɛb bɩ y kõ-m koom zĩisi.» A Kalɛb kõ-a-la zĩis sẽn tar koom, tãnga zug la tẽn-nabrẽ. A Moyiiz rɛɛmba yagense, Kenitsa, yãaga a Zɩɩda kamba. B yii komsa tẽnga n dig Zɩɩda we-raoogẽ sẽn be Arad nug rɩtgo. B waa n fãooga ne Israyɛl. A Zɩɩda yãaga a Simeõ, a saam-biiga. B tõoga Kanaã rãmb sẽn da kẽed Sefat la b kãaba tẽnga beedo. Yaa rẽ yĩng la tẽnga boond tɩ Orma, raboogo. Gaza ne a tẽn-peelma lʋɩ-la a Zɩɩda nugẽ, n paas Askelõ ne a vẽenema, Ekrõ me ne a vẽenema. Soaala zĩnda ne a Zɩɩda t'a tɩ wẽ tãnga zug rãmba. Sã n ya bãoogẽ dãmba, a pa tõog bãmb ye, tɩ b ra zaoo kut bilim-bilm. B rɩka Ebrõ n kõ a Kalɛb wala a Moyiiz sẽn pĩnd n togse, yẽ n tõog a Anak kamb a tãabã. A Bẽnzame kamba ka rig Zebuzitsa sẽn da kẽed Zerizalɛɛma ye, la al ne rũnna, Zebuze rãmb ket n bee Zerizalɛɛm ne a Bẽnzame kamba. A Zozɛf kamba dʋʋ Betɛl la Soaala-Wẽnd pʋga b poore. A Zozɛf kamba tʋma lɩɩsdba, Betɛl tẽnga. Betɛl da boondame tɩ Luz. Lɩɩsdba yãee ned sẽn yit tẽnga pʋga, tɩ b yeel-a: «Daoa, wilg d zĩig ninga d sẽn tõe n paam n kẽ tẽngã tɩ d na bas f ne yõore.» La a wilg-b-la b sẽn tõe n tũ zĩig ninga n paam n kẽ tẽnga pʋga. B kẽe n kooda tẽnga rãmb ne b sʋʋse; sẽn põs yaa raoã ne a zaka la a ba-biisi. Nin-kãng n kẽ Ititsa tẽn-peelmẽ n me a tẽnga n pʋd-a t'a Luz. Yʋ-kãng la b ket n boonda ne rũnna. A Manase pa zab n tõog Bɛt-Seã la a tẽn-toos ye. A pa tõog Taanak ne tẽns niyns sẽn kẽed-b yẽ ye. A pa tõog Dor ne a tẽn-toos ye. A pa tõog Yibleam ne a tẽn-toos ye. A pa tõog Megido ne a tẽn-toos ye. Kanaã rãmba kell n pa b tẽn-peelmẽ. A Israyɛl sẽn wa n mik t'a pãnga paasame, dẽ marsã la a yaool n modg-b ne tʋʋma la a pa rig-b n yiis ye. A Efrayim me ka tõog n yiis Kanaã rãmba sẽn da be Gezer ye. Kanaã rãmba naaga a Efrayim n kẽed Gezɛr. A Zabulõ ka tõog n dig Kitrõ la Naalal dãmb ye. Kanaã rãmb paa ne a Zabulõ la yaa bãmb n da so kooma yõngre la raada wesbo. A Asɛr pa tõog Ako, Sidõ, Alab, Akzig, Elba, Afik la Reob dãmb ye. A Asɛr kamba kong n naaga Kanaã rãmb sẽn da vɩ bãmb sʋka la sẽn yɩ-b tẽnga pipi soaalba. A Neftali kamb ka rig Bɛt-Semɛs la Bɛt-Anat rãmb ye. A tɩ kẽe n naaga Kanaã rãmba sẽn da so tẽngã, b kɩtame bala tɩ Bɛt-Semɛs la Bɛt-Anat rãmb soog tʋʋma n tʋmnẽ. Amoritsa ka bas a Dã kamba tɩ b sig tẽn-nabrẽ ye, b paalg-b-la tãnga zugu. Amoritsa paa Ar-Eres, Ayalõ, Salabim tẽnga. A Zozɛf sẽn wa n mik t'a pãng paasame a kẽes-b-la tʋʋmde. Edomitsa toaaga sɩngda Akrabim tãng pennẽ, sɩngda pĩigã sẽn pukẽ wã n kuiis yĩngri, tãnga zugu. Naaba-Wẽnd malɛk n yi Gilgal n wa Bokim n yeel a Israyɛl: «M yiis-y-la Ezipt n tɩ kẽes-y tẽng ning m sẽn da kãab y yaab rãmba. M da yeelame tɩ m kõn sãam m zooda ne yãmb, abada. Yãmb me ra reegame tɩ y kõn yõg zood ne tẽnga rãmb ye. Y yeelame tɩ y na n wãa b tẽn-kuga zãnga. Y yaool n pa kelg m koɛɛg ye. Ges-y y sẽn maan bũmb ninga! Ad-m sẽn leok wakat kãnga: M kõn dig nin-bãmba y taoore ye. Bãmb n na n wa ne yãmb pɛta la b wẽn-naandsa na n yɩɩ bẽdgo, y yĩnga.» Soaala-Wẽnd Malɛka sẽn gom n sɛ, neba fãa naaga taab n yãbda la b kaasdẽ. Dẽ la b pʋd zĩ-kãng tɩ Bokim: B kʋʋ maando n sigs Naaba-Wẽnd sũuri. A Zozuwe sẽega Israyɛl kambã n kɩt tɩ ned kamb fãa tɩ kẽe a tẽngẽ n deeg-a n soog zãnga. A Israyɛl tũu Soaala-Wẽnd neere n tãag a Zozuwe loogre, n tãag nin-kẽemsa loogre, neb niyns sẽn paam n dɩ Naaba-Wẽnd ne a Israyɛl zooda kaset kãsengã. A Nun biiga la Naaba-Wẽnd tʋʋm-tʋmd, a Zozuwe, ki-la a yʋʋm koabg la piiga. Yaa a sẽn paam a pʋɩɩr zĩig ningã la b mum-a. Yɩɩ Timnat-Eres, a Efrayim tãng zugu, Gaas tãng nug goabga. Sẽn zĩnd-ba a Zozuwe zamaanẽ wã me waa n loogame. Bãmb poore yɩɩ Zamaan sẽn ka paam n bãng Soaala-Wẽnde, n ka paam n bãng b sẽn maan bũmb ning fãa a Israyɛl yĩnga. Israyɛl kamb tʋma sẽn pa ta Soaala-Wẽnd yam, n pʋg Baal dãmba. B basa Soaala-Wẽnde, b yaab rãmb Wẽnd, sẽn sõng-b tɩ b yi Ezipt tẽnga la b pʋga tẽnga rãmb sẽn da waoogd wẽnd niynsã. B wõgemda b taoore la rẽ wã, b beega Soaala-Wẽnd. B basa Naaba-Wẽnd n na n waoog a Baal, n waoog Astarte rãmba, b wẽn-pogse. Dẽ puuga Soaala-Wẽnd sũuri tɩ b bas a Israyɛl fãadb nusẽ, fãadb sẽn loog ne b laogo. Naaba-Wẽnd koos-b-la ne b bɛɛba sẽn da gũbg-bã. B pa le tõog n yaas b taoor ye. B sã n yi zabr fãa, Soaala-Wẽnd basda bãmbã la b rɩɩ bõne, wa b meng sẽn da togs-b la b ra kãab-ba. A Israyɛl nimbãanega sɩd wa n yɩɩ wʋsgo. Dẽ me la Soaala-Wẽnd kõ a Israyɛl bʋ-kaoodba, taoor dãmba, sẽn fãag-b fãadba nusẽ. B pa kelg b sẽn yãk b rãmb tɩ b ges b yella ye. B tɩ kẽe wẽnd dãmb a taaba, n wõgemd b taoore, n bas sor ning b ba-rãmb sẽn sulg b mens n tũ a soabã. B pa wẽneg b ba-rãmb ye. La Soaala-Wẽnd sã n da lʋɩɩs ned b taoore, b ra paada ne b nedã la a vɩɩma tɛka Soaala-Wẽnd da fãagda a Israyɛl ne a bɛɛba. Bɛɛba sẽn mii n wa sɩbgd-b tɩ b waasdẽ wã, Naaba-Wẽnd zoeta b nimbãanega. Bʋ-kaooda sã n ki b le yikda wẽnem sẽn zʋʋg b ba rãmb rẽnna la yaa wẽn-naands la b ra pʋgda n waoogd-ba, n yĩgimd b taoore. B tʋʋm yooda la b minim wẽnsa pa tol n woog ye. Dẽ la Soaala-Wẽnd sũur wa n pʋʋg ne a Israyɛl tɩ b yeele: «Nin-bãmba sãama zoodã m sẽn da yõg ne b yaab rãmba, b pa kelg m koɛɛg ye. Mam me kõn le sẽeg b taoore, bɛɛb niyns a Zozuwe sẽn loog n ka rig b rãmba ye.» Woto la Soaala-Wẽnd fɛɛs a Israyɛl n ges a sã n na n tũume bɩ a sã n ka na n tũ a yaab rãmb sore. Ad-y yaa rẽ yĩnga la Naaba-Wẽnd kees bɛɛbã. B pa yãg ne b rigb ye, b pa rɩk-b zãnga n sagl a Zozuwe nugẽ ye. Ad buud niyns Soaala-Wẽnd sẽn keese n na n fɛɛs neb niyns sẽn ka zĩnd-b Kanaã zabra wakato. Naaba-Wẽnd da ratame bala tɩ sẽn ka bãng-b pĩnd zabã tõog n zãms zabre. Buuda sẽn keesã yɩɩ Filisti dĩm dãmb a nu wã n paas Kanaã rãmba, Sidõ rãmba la Ivitse sẽn da zao Libã tãmsã, sẽn sɩng Baal-Ermõ tãngã n tãag Lebo-Amat. Bãmb la Soaala-Wẽnd bas yã n na n fɛɛs a Israyɛl n ges a sã n na n deega noy-niyns a Moyiiz sẽn wilg b yaab rãmba. Yaa woto la a Israyɛl pa Kanaã rãmb sʋka, n paas, Ititse, Amoritse, Perizitse, Ivitse, la Zebuzits sʋka. A Israyɛl kẽe kãadem ne bãmb kom-pugli, n dɩk a kom-pugli n kõ-ba, n pʋg b wẽn-naandsã. A Israyɛl manesem ka ta Naaba-Wẽnd yam ye. B basa Naaba-Wẽnde, n pʋg Baal dãmba la Asera rãmba. Yaa rẽ la Soaala-Wẽnd sũur puug ne a Israyɛl tɩ b bas-a a Edom dĩm a Kusãn-Risatayim nugẽ t'a soog-a yʋʋm a nii. A Israyɛl kamb kelma Soaala-Wẽnde la Wẽnd kõ-b-la ned sẽn na n fãag-ba. Yɩ-la a Otniyɛl, a Kenaz biiga la a Kalɛb yẽere. A paama Naaba-Wẽnd vẽnegre n lebg a Israyɛl bʋ-kaooda la a sɩngame n na n zab n fãag a saam-biisi. Naab a Wẽnd dɩka Edom dĩm a Kusãn-Risatayim n sagl a nugẽ. A tõog-a-la zãnga. Yʋʋm pis-naas pʋgẽ, tẽnga ka le rãmbe n wa tãag a Otniyɛl kaalem. A Kenaz biiga Otniyɛl kaalem poore, a Israyɛl le yik n tʋma sẽn pa noom Soaala-Wẽnde, la Wẽnd tõg-tõga Moab dĩm a Eglõ t'a yik zabr ne a Israyɛl, a sẽn da ka le maan sẽn tat Naaba-Wẽnd yama yĩnga. A Eglõ tɩ kosa a Amon kamba la a Amalɛk kamb sõngre. B sẽn bob zabre, b tõoga a Israyɛl, n deeg Zeriko, koms tenga. A Israyɛl paa a Eglõ, Moab dĩma soolmẽ, yʋʋm piig la a nii. A Israyɛl kelma Naaba-Wẽnde la Wẽnd kõ-a-la fãagda, a Ewud, Bẽnzame roog dao, a Gera, biiga. A Ewud da yaa gob-tɩɩsenga. Israyɛl kamba wa n yeel-a lame t'a tɩ kɩs fadg a Eglõ, Moab dĩma. A Ewud kuda sʋʋg sẽn dɩt a noya a yiibu. Yaa sʋʋg sẽn ta kãntɩɩga. A loe sʋʋgã a rɩtgo gere, la a fuuga ra luda sʋʋgã. A sɩd kẽnga ne ligdã n tɩ kɩs Moab dĩma, a Eglõ. A Eglõ da yaa ned sẽn nob wʋsgo. B sẽn kɩs ligdã n sɛ b lɛɛg n yiime, yẽ ne sẽn yãag-b ne ligdã. B taa Gilgal tẽn-kuga zĩigẽ t'a Ewud lɛɛg n wa yeele: «Dĩma, ad-y m tara koɛɛg ne yãmba, la yaa maam ne yãmb koɛɛg bala.» Dĩma kɩtame tɩ sẽn da be-b ne yẽ wã fãa yi. A Ewud kẽeme, dẽ tɩ dĩma zao-la a yĩngr doogã n kokd pemsem. A Ewud yeelame: «Yaa Wẽnd koɛɛg la m wat n na n taas yã, dĩm sõngo.» Dĩma yika tao-tao bala a goeela zugu. A Ewud wõoga ne a gobrã, sʋʋga sẽn da sẽbg a rɩtg gerã la a kõsa dĩma pʋga. Sʋʋga rɛɛng meng naag n kẽeme tɩ kaama lɛɛg n bus. A Ewud basa sʋʋga dĩma pʋʋrẽ n ka lɛɛg n feoog ye. A tũu võor n yi n looge. A reng n maneg n paga yĩngr dooga noor ne a pʋgẽ pagdgã, n bas n tũ võor n yi n looge. A paam n loogame tɩ sõgen-kamba yaool n lɛɛg n wa la b mikame tɩ yĩngr dooga kʋɩleng pagame. Dẽ la b walem taaba: «Daare a fẽegda a yõore rooga pẽg-maasgẽ.» B yalsame al tɩ b yam wa yooda, b sẽn yãe tɩ yĩngr dooga kʋɩlenga kaoosda pakrã. B sẽn kẽes kʋɩlem-bil n pake, b yãee b zu-soaba sẽn ki n dɩga. B sẽn wa n yɛs rooga noor n gũudẽ wã, a Ewud paam n loogame. A ra zoe n looga tẽn-kuga zĩigẽ n tees Seyira sẽnẽ. A sẽn paam n ta Israyɛl tẽnga a peeba baorgo Efrayim tãnga zugu. A lʋɩɩ taoore tɩ Israyɛl kamba pʋg-a n sig tãngã. A yeel-b lame: «Pʋg-y maam tɩ Soaala-Wẽnd dɩka y bɛɛbã, Moabitsã, n sagl y nusẽ.» B pʋg-a lame, b zoeeme n wãag kʋɩlga sẽn tõe n dʋʋg zĩig ningã la ned ba a ye ka paam n dʋʋg Zʋrdẽ ye. B tõoga Moab rãmba. Moab rãmba neb ra ta tus-piiga. Da yaa neb sẽn tar yagd sẽn pidi la zabr sũuri la ba a ye ka põs ye. Badaar tɛka a Moab lebga a Israyɛl sõgne la tẽnga paama laafi yʋʋm pis-nii. A Ewud poore yɩ-la a Anat biig, a Samgar. A tõoga Filisti rãmba bãmb na ta kobs-yoobe ne pĩim sẽn tar n kõsd nag-koodse. Yẽ me fãaga a Israyɛl. A Ewud kũum poore, Israyɛl kamb le sɩngame n maan sẽn pa tat Soaala-Wẽnd yam. Yaa rẽ me yĩnga la Wẽnd dɩk-ba n sagl Kanaã rĩm, a Yabin nugẽ. A Yabin n da rɩt naam Asor tẽnga. A Sisera n da yaa a tãnsoaba la a ra kẽeda Arosɛt-Goyim. A Israyɛl kelma Soaala-Wẽnde t'a Sisera da tara kut bilim-bilm kobs-wɛ. Yʋʋm pisi pʋgẽ Israyɛl yãee pɛta. Wakat kãng tɩ bãngd poak, a Debora, a Lapidot paga n da so Israyɛl kãsengo. A ra kaooda a bʋʋdã koang a ye tẽngre, a Debora koanga. Yaa Rama ne Betɛl tẽnsʋka, a Efrayim tãnga zugu; a Israyɛl kamba ra kẽnda a nengẽ n welgd b yɛla. Daar a ye a Debora kɩtame tɩ b bool a Barak, a Abinoam biiga, Kedɛs tẽng raoa, Neftali tẽn-peelmẽ la a yeel-a lame: «Ad Naaba-Wẽnde, ad Israyɛl Wẽnda, n sɩd kõo noore. Yi n tees Tabor, yi ne a Neftali la a Zabulõ kamba tus piiga. Yaa Kisõ kʋɩl-bɛɛga la m na n tus n togl foo, a Yabin tãnsoab, a Sisera, yẽ ne a bilim-bilm la tãb-biisã, la m na n dɩk-b lame n sagl f nugẽ.» T'a Barak leoke: «Fo sã n na n yãag maam, m na kẽnge, la fo sã n pa tũudi m pa na n kẽng ye tɩ m pa mi sẽn ya daar ning la Soaala Malɛk na n kɩt tɩ m tõog bɛɛba ye.» Dẽ la a Debora leok yã: «M na tũ-f n kẽnge la so-kãnga yẽ, ad-f zug ka na n zẽk wʋsg ye, tɩ yaa pag nugẽ la Soaala-Wẽnd na n dɩk bɛɛbã n sagle.» A Debora sɩd yii ne a Barak n kẽng Kedɛs. Yaa be la a Barak tigim a Neftali la a Zabulõ kamba. B sõor taa tus piiga. A Debora yãag-b lame. Ned a ye n da boond t'a Ebɛr, n ya Kenitga, a ra zãaga a Kaẽ buudẽ n ti a zaka, a zãaga ne a Moyiiz rɛɛmba, a Obab yagense, a ra zãaga wʋsgo ne Kananim kʋkã, Kedɛs yegende. A Sisera wʋmame t'a Abinoam biig a Barak wẽ a sik Tabor tãng zugu. Dẽ la a yiis a kut bilim-bilm kobs-wɛ la a tãb-biisa gilli, sẽn sɩng Arosɛt-Goyim n ta Kisõ kʋɩlga. A Debora yeela a Barak: «Yik tɩ yaa rũnna la Naaba-Wẽnd dɩk a Sisera n sagl f nugẽ. N-ye! Naaba-Wẽnd lʋɩ-la f taoore.» A Barak siga Tabor tãnga ne tãb-biis tus piiga. Yaa ne sʋʋs sẽn dɩte la a Barak taoore, Naaba-Wẽnd sẽeg a Sisera bilim-bilm la a tãb-biisi. A Sisera tol n basa a bilim-bilm n na n zoe ne a nao. A Barak riga tãb-biisã la bilim-bilma n ta Arosɛt-Goyim. Sʋʋg n kood a Sisera tãb-biisa fãa, ba a ye ka põs ye. A Sisera ninga tĩiga n tees Kenitga, a Ebɛr paga, a Yaɛl doogo. Wakat kãng tɩ Asor dĩm a Yabin la Kenitga a Ebɛr doog da yaa zoodo. A Yaɛl yaool yi n sega a Sisera n yeel a: «Dĩm sõngo, pa-y ka, pa-y mam zakẽ, da maan-y rabeem ye.» A sɩd pa-la a Yaɛl doogẽ, t'a bao fu taoko n lud-a. A Sisera wa n yeela pagã: «F tõe n kõ-m-la koom bilfu tɩ m yũ tɩ ko-yũud tar-m lame!» A rɩka waoog ne bĩisim n kõ-a t'a yũ n le lɛɛg n pil-a neere. A Sisera le paasame: «Yaas rignoorẽ ka, la ned sã n wa sok-fo: ‹Ned ka wa ka?› Bɩ f leok tɩ ayoo!» Bãng-y t'a Ebɛr pag a Yaɛl feooga a rooga baaf a ye n dɩk zãar n kolg bãanem-bãanem, n ges a Sisera kɩgdga n ka ne baafã t'a sãag n kẽ tẽnga. Yaamsã yĩnga a Sisera gõeema sɩd yɩɩ gõeem yãanga. Dẽ me la a Yaɛl paam-a n kʋ. A Barak sẽn da pʋgda wẽneg n taame t'a Yaɛl yi n seg-a n yeel a: «Wa-y tɩ m wilg-y y sẽn baood a soabã.» A Barak sẽn kẽ, a yãeeme t'a Sisera ki n dɩga, t'a kɩgdga ka ne baafo. Yɩɩ baraare la Naaba-Wẽnd ning Kanaã rĩm, a Yabin, yãnde, Israyɛl dãmb taoore. Dẽ me la a Israyɛl sɩng n zɩsgd a nugu Kanaã rãmba dĩm, a Yabin, zugu, n wa tõog-a zãnga. Badaare a Debora la a Abinoam biig, a Barak, yɩɩla woto: A Israyɛl tẽn-peelmẽ zabr kõn ling ned ba a ye zabre la buuda bob-n-dõbẽ. Bɩ Soaala paam barka! Dĩm dãmba, kelg-y, na-rɩtba, yoog-y y tʋba! M na n pʋda yɩɩle, la Wẽnd la m na n pẽge, Israyɛl Wẽnda la m na n pẽge. Soaala, yãmb sẽn wa n yi Seyir, y sẽn wa n pãrg Edom weoogo, tẽnga miimame la saaga tuumame, sawata dʋʋga koom. Tãmsa miimame, Sinayi Wẽnda taoore, a Israyɛl Wẽnnaama taoore, b miimame. A Anat biig a Samgar wẽnnẽ, a Ebɛr pag a Yaɛl wẽnnẽ soy ra ka le yãet toand ye. So-toagdba soe ra lebga gõtem-gõtem. Israyɛl tẽnsa ra ka le tar naab ye, n tãag m waoongo, n tãag a Israyɛl ma a Debora waoongo. Wẽn-paals la neba ra yik n pʋgda, dẽ me la tẽnga ra pid ne zaba; la tẽns a nu pʋgẽ b ra pa tar gãong a ye, kãnd a ye meng ra pa kete a Israyɛl tãb-biis tus pis-naasa yĩng ye. M nonga a Israyɛl tãnsoaben-dãmbã, m nonga sẽn bob-b tãpa ne yamleoogã. Bɩ d fãa gill pẽg Soaala-Wẽnde! Yãmb fãa sẽn zao-b bõn-yãan-peelse, sẽn tʋɩ-b fu-tagdo n zĩ b rotẽ, la yãmb sẽn kẽnd-b sor zugu, pʋd-y yɩɩlle! Naag-y y koees n kaas sũ-noog kaasgo ne sẽn pidsd-b gaolga kooma, naag-y taab n pẽg Soaala yel-sõmde, b yel-sõmda ne a Israyɛl nanamsã b sã n yi fãa n na n tak zabre. Yiki, Debora, yik n lʋɩɩs f toogo yik n pʋd f zabr kaoogr yɩɩlle. Yiki, Barak, a Abinoam gãndaoogo, yik n bao roog n pag f sẽn yõg b rãmba, la zabra sẽn ka loog ne b rãmbã bãmb me wa tong ne b tãnsoaba, b tong b zug-zẽkr tongre, b sẽn maan raood tongre. Sẽn tõog a Amalɛka yii Efrayim, a Bẽnzame pʋgame n wa kẽ b sʋka. Tãnsoaba yi-la a Makir doogẽ, zab mitba yita a Zabulõ tãpẽ. A Isakar tãnsoaba bee ne a Debora, a Isakar zood pa sãam ne a Barak ye, dẽ me la a yik n pʋga a pʋ-weesẽ. Sã n yaa a Rubẽ sakẽ, b pa vʋʋs ne no-koɛɛm ye. Bõe tɩ f pa yãgrẽ, f rũmsa sɛɛga n kelgd nag-kɩɩmba sẽn boond b rũmsi? N-ye, a Rubẽ sakẽ, yɩɩ no-koɛɛm ne no-koɛɛma. A Galaad paa Zʋrdẽ rʋʋnde, la bõe t'a Dã kogenda lengd kooma zugu? A Asɛr paa mogra noore, a vɩɩ be ne laafi, a koom-kogenda soondg zĩisẽ. Sã n yaa a Zabulõ nebã wala a Neftali rãmba bãmb saka a yii n seg kũum, zabra sẽn na n zab zĩig ning fãa. Bɛɛba nanamse, Kanaã rãmba taka zabre ne a Taanak Megido ko-bundem zĩigẽ. La b zaba zab faado, yõod pa tol n zĩnd ye. B pa lɛɛg n kul ne lagfr ye. Ãdsa zĩnda yĩngr n zab b zabrã, b rɩka sor n wa zab ne a Sisera. Kisõ kʋɩl-bɛɛga pɩɩg-b-la ne a saaga Kisõ kʋɩlga lɛɛg n vel-b lame. Pids-ma, m sɩɩga, pids-m ne raoodo! Wiidi wã nao ninga b rãamde. Wed daada sẽn tar zoees la b sẽn tare! Soaala malɛk yeelame: Wẽnd na sãam a Meroz, Wẽnd na sãam a nebã! B pa zab n sõng Soaala-Wẽnd ye, b ned pa zĩnd gãndaada sʋk ye. Wẽnd na ning a Yaɛl bark pagba fãa sʋka, (Kenitg, a Ebɛr, pag a Yaɛl). A paam barka tẽnga pagba fãa sʋka! Bɛ wã bõs-a koom, t'a kõ-a bĩisim, a bao wam-neere n kõ a bĩisim sẽn põeed kaam. Paga sẽn tẽeg a goabga, baaf la a feoog yã, a sẽn tẽeg a rɩtgo, tʋʋm mitb zãar la a tebg yã. A sẽn wẽ a Sisera a zuga la a wek yã, a kɩgdga la a wurg yã. A Sisera põd n lʋɩɩme, a lʋɩ, pag taoore, la lʋɩɩsa pa lʋɩ n tẽed yikr ye, a sẽn põd n lʋɩ, a kiime. A Sisera ma ra lɩkda võorẽ, võorẽ la a sulgd n getẽ. Võẽ la a Sisera ma ra lɩgsda, la a sokd a menga: «Bõe t'a lebgra kaoosdẽ, bõe tɩ bilim-bilma kẽnd lebg maasga?» Dĩma bi-pugl a ye sẽn pid ne yẽesem n leok-a, t'a reeg n walemd a menga: «Daare b zĩi n sõtame, daare b zĩi n pʋɩta b laogo: bi-pugla, kom-pugli a yi, tãb-biig a ye yĩnga peen gʋmd a ye, sẽn maneg n gʋle, a Sisera yĩnga, a sẽn tõog a bɛɛb yĩnga peen-neer sẽn na n vil a yubla.» Y bɛɛba fãa na ki boto, Soaala-Wẽnde! La neb niyns sẽn nong-b yãmbã yɩ wa wĩntoogo sẽn tãoosd a vẽenem ne pãnga! Tẽnga paa yʋʋm pis-naase n ka le rãmb ye. Israyɛl kamb maana sẽn pa ta Naaba-Wẽnd yam. Dẽ yĩnga Wẽnd dɩk-b lame n sagl Madiã rãmb nugẽ, yʋʋm a yopoe. La a Madiã nug tʋma a Israyɛl beedo. Yaa sẽn na yɩlẽ n põs a Madiã la Israyɛl kamba ra tiid b rot tãmsa pẽgsẽ, b bogdẽ bɩ b rĩ sɩlemsẽ. A Madiã ra basdame t'a Israyɛl bʋd n sɛ la yẽ ne a Amalɛk la yaang rãmb da watame n kẽ a tẽnga zãnga. B ra tiidame n pẽneg a Israyɛl la b ra wʋkda tẽnga kooda fãa n wa tãag Gaza. B ra ka keesd bũmb a Israyɛl yĩng ye. Pesgo, tɩ b loog ne, naafo bɩ bõanga, tɩ b loog ne. B ra wata ne pɛɛla n tid b roto, n wat ne b rũmsi, n wat zembal wa kalwaare. Sɩda bãmb ne b rũmsa yaa kõn bãng n sõde la ra pɩɩsda tẽnga yululul! Woto me, a Madiã yĩnga, a Israyɛl vɩɩm waa n lebga pɛta t'a na n kelem Naaba-Wẽnde. A Madiã sẽn nams a Israyɛl t'a kelem n bool Wẽndã, Soaala-Wẽnd tʋma no-rɛɛs a yĩnga. Wẽnd neda wa n yeel-b lame: «Ad Naaba-Wẽnd, a Israyɛl Soaala, sẽn yete: Yaa maam n yiis-y Ezipt tẽnga, yaa maam n zãag-y ne yembd tẽnga. M fãaga yãmb Ezipt rãmba la y bɛɛba fãa nugẽ. M dig-b lame, m dɩka b tẽngã n kõ yã. M yeel-y lame: ‹Maam la y Wẽnd rũnna la beoogo. Da maan-y rabeem ne y sẽn be ne b rãmbã, ne Amoritsa wẽn-naandsa ye.› Yãmb pa kelg m koɛɛg ye.» Soaala-Wẽnd malɛk n wa n zĩnd Ofra kʋka tẽngre. Kʋka da bee a Abiezɛr biig, a Zoas, pʋʋgẽ. Wakat kãng t'a Zoas biig a Zedeõ da bee zɛɛgẽ n pãbd a ki tɩ Madiã rãmba ra wa wʋk n loog n bas-a ye. Malɛka buug-a lame n yeel-a: «Wẽnd zĩnd ne fo, tãb-biig sẽn pid ne sũ-keelem!» T'a Zedeõ leok: «Y sugri, m Zu-soaba! Wẽnd yɩta a wãna n be ne tõndo tɩ yɛla a woto fãa ket n paam-do? Bõn-bãna sẽn maan pĩnd tɩ d ba rãmba tar n gomda bɛɛ? B ra gomdame la b ra nong n kʋ-la b goama woto: ‹Y ka ne tɩ sɩd yaa bãmb n yiisd-d Ezipt tẽnga?› Rũnna b bas-d lame, b rɩka tõnd n sagl Madiã rãmb nugẽ.» Wẽnd ges-a lame n yeel-a: «Kẽng ne pãng ning f sẽn tar a soabã, kẽng n tɩ fãag a Israyɛl Madiã nugẽ. Ka maam n tʋmd-f laa?» A Zedeõ leokame: «Y sugri, m Soaala, m ba rooga la ro-yaalg a Manase buudẽ, la m ba zakẽ, maam la yao-zʋʋga! M maanda a wãn n fãag a Israyɛl?» Dẽ la Soaala-Wẽnd yeel-a: «M na zĩnd f sɛɛgẽ la f na tõog Madiã rãmba gilli.» A Zedeõ leokame: «Sã n yaa sɩda tɩ yãmb n tʋmd maam, bɩ y kõ-m makr a ye tɩ m bãng tɩ yaa yãmb n gomd ne-ma. Ade, m yõkda y sɛɛga, pa-y ka tɩ m kẽng la m wa. Na n zemsa m tɩ bao m kũuni n wa rɩgl-a y taoore.» Naaba-Wẽnd leokame: «M na yaas n gũ fu.» A Zedeõ sɩd loogame, a tɩ kʋʋ bulla n maneg-a la a bao zom peoogo n wẽ bur sẽn ka ning bɩlle. A baoo peoog n ning nemdã, n ning bɩɩma rʋkẽ, n tall fãa n wa kʋka tẽngre n wa kõ Soaala-Wẽnde. A sẽn wa n kolgdẽ, Soaala-Wẽnd malɛka yeel-a lame: «Dɩk nemdã la burã sẽn ka ning bɩllã n dogl pĩiga zugu la f rɩk bɩɩma n daage!» A Zedeõ maana wala sẽn togsã. Malɛka dɩka a sẽn da zãad dasaar ningã n sɩɩs nemdã la burã. Bugum n yi pĩigã n dɩ nemdã la burã sẽn ka ning bɩllã. Malɛka loog n menemame. Woto a Zedeõ bãngame tɩ sɩd ya Naaba-Wẽnd n tʋm-a. Dẽ la a yeel yã: «Wii! M yãee Soaala-Wẽnd malɛk ne m nini.» La Naaba-Wẽnd yeel-a lame: «Da sãam f sũur ye.» Zĩ-kãnga a Zedeõ mee maan-kugri n pʋd a yʋʋr tɩ Naaba-Wẽnd la laafi Wẽnde la a ket n bee ne rũnna Ofra, a Abiezɛr, tẽn-peelmẽ. Yʋng kãnga Naab a Wẽnd yeela a Zedeõ: «Yõk f ba nag-bil wubdgã n le paas yʋʋm a yopoe naafo. Kẽng n tɩ wã maan-kugr ning f ba sẽn me a Baal yĩngã. Kẽng n tɩ kʋʋg raoog ning a sẽn pees n sel n yegl n boond tɩ bõn-sõngã. Dẽ poore dʋ tãnga sẽn lugẽ wã n maneg n me maan-kugr Naaba-Wẽnd yĩnga. Maneg n me maan-kugrã tɩ zemse, la rɩk nag-bil a ye n yõog-a t'a rɩ bugum zãnga raooga sẽn kʋʋga zugu.» A Zedeõ kɩtame t'a rakõap piig yãag-a la a tɩ maana wa Soaala-Wẽnd sẽn da wilg-a. La yɩɩ yʋngo, pa yɩ wĩntoog ye t'a ra zoeta a buudã neba la tẽnga rãmba. Tẽnga rãmb sẽn yik pĩnda, b mikame t'a Baal maan-kugrã wãame la raoogã sẽn da sel n yegla me kʋʋgame. B bãngame tɩ loalg a yiib soaba maoong la b yõog maan-kug paala zugu. B soka taab: «Ãnda n maan woto?» B sogsame, b kelgame la b yeelame: «Woto yaa a Zowas biig a Zedeõ tʋʋmde.» Tẽnga rãmb yeela a Zowas: «Yiis f biigã n tɩ kʋ a t'a wãa a Baal maan-kugri la a kɛɛga raoogã sẽn da sel a sɛɛgẽ.» Dẽ la a Zowas leok sẽn da be-b be wã: «Yãmb n tog n zab a Baal zabr laa? A sõngr tog n yii yãmb nengẽ bɩ? A Baal sõangd fãa togẽ lame n kʋ tɩ wĩndig nan ka bɩ ye. A Baal sã n ya wẽnde bɩ a zab n kõ a menga, a zab ne a Zedeõ, a maan-kugra wãada.» Badaare b pʋda a Zedeõ ta Yerubaal: a Baal kao bʋʋdo ne a maan-kugra wãada. A Madiã gilli, a Amalɛk la yaang rãmba sũu taaba n dʋʋg Zʋrdẽ n wa wẽ b sik Israyɛl tẽn-nabrẽ. Soaala-Wẽnd pãng me kẽe a Zedeõ, a sẽn peeb baorgo a boola a Abiezɛr la a waa n sakame. A tʋma neb a Manase tẽn-peelmẽ n bool-b tɩ b wa. A le tʋma neb a Asɛr, a Zabulõ la a Neftali la b fãa bobame n yi n wa a sõngre. A Zedeõ yeela Naaba-Wẽnde: «Sã n ya sɩda tɩ yãmb datame tɩ m nug fãag a Israyɛl wala y sẽn togs-ma, ade, m na n yɛdga pe-kõbd zɛɛgẽ: meenema sã n dʋʋg n madg pe-kõbdã tɩ tẽnga yaool n ya koɛɛnga, m na bãng tɩ y ratame tɩ m nug fãag a Israyɛl, wala y sẽn yeelã.» Soaala-Wẽnd tõoga rẽnna. A Zedeõ sẽn sãd beoogo a wẽka pe-kõbdã la meenema pida laaga. T'a Zedeõ na n le yeel: «M kos tɩ y ra puug y sũur ne m ye tɩ m le bõs makr a to ne pe-kõbdã: m kotame tɩ zĩiga fãa yʋgʋmd ne meenem la pe-kõbda bal pa koɛɛnga!» Zĩig sẽn sobge, Soaala-Wẽnd maana wala a sẽn kose. Pe-kõbda bala n pa koɛɛnga tɩ zĩiga yaool n madg n gilg-a. A Yerubaal (yaa a Zedeõ) sãda beoogo ne a nebã n tɩ wẽ b sik Eyin-Arod. A Madiã sika ra bee yẽ rẽnda goabg bilfu, More tãnga pennẽ. Naaba-Wẽnd yeela a Zedeõ: «Ade, sẽn be-b ne fooma waoogame tɩ looge, la m pa na n dɩk Madiã rãmbã n sagl b nugẽ ye. Ka rẽ b wat n basa mam pẽgre n pẽg b menga, b wat yeelame: ‹Yaa tõnd meng nug n fãag do!› Dẽ yĩngã, yeel neba woto: ‹Rabeem sẽn tar a soab fãa t'a yɛs n digda n pa rat n zãag ne Galaad tãnga, bɩ a leb a zakẽ.› » A Zedeõ fɛɛs-b lame n bãng b raoodo la neb tus pisi la a yi n leb b tẽngẽ, n kell tus piiga. La Soaala-Wẽnd leoka a Zedeõ: «Ad neba ket n yaa wʋsgo. Tall-ba n kẽng kʋɩlga noore tɩ m meng na fɛɛs-ba m toore n kõ-fo. M sẽn na n yeel ned ninga t'a pa ne foo, yẽ soab n na n pa. M sẽn na n yeel ned ning t'a ra tũ foo, bɩ a soab ra tũ ye.» A Zedeõ talla a nebã n kẽng kʋɩlga noore la Naaba-Wẽnd yeel-a lame: «Bak toore ned ning fãa sẽn na n lega kooma wa baag sẽn legdã, bɩ f ning yẽ toore. Welg toor me ned ning sẽn na n yĩgimda n yaool n yũ.» Neb niyns sẽn leg b kooma taa kobs-tã. Sẽn ket ba fãa yĩgimdame n yũ. Soaala-Wẽnd yeela a Zedeõ: «Yaa ne kobs-tã wã sẽn leg-b kooma, yaa bãmb nugẽ la m na n sagl Madiã rãmba. Bɩ sẽn ket-ba fãa leb b yiri.» A Zedeõ kɩtame tɩ b rees rɩɩbã b sẽn zɩtã la bardã la a lebs-ba b zagsẽ. Sẽn pa-b ne yẽ yɩɩ kobs-tã wã bala. A Madiã sika ra bee tẽngre, pʋtẽ wã. A Zedeõ sẽn kẽ gõeem, Soaala-Wẽnd yeel-a lame: «Yik n sig Madiã sikẽ tɩ m dɩk-a lame n ning f nugẽ. La ade, dabeem sã n tar foo, bɩ f reng n ta b sikẽ wã foo ne f sõgna, a Ypra. Kelg b sẽn gomd bũmb ninga tɩ f pɛlg na legb kẽnkẽ la woto f na sak n tak zabre.» A Zedeõ siga ne a rakõor a Ypra; b kolga bɛɛba sika wʋsgo. Madiã, Amalɛk la Yaang neba da yɛdgame n pid pʋtã, b ra yaa wʋsgo wa sʋya. Wala bĩisrẽ sẽn be mogr noorẽ, b yʋgma wã ra ka tõe n sõd n sɛ ye. A Zedeõ sẽn kolgã, a wʋma ned a ye sẽn da togsd a sõsd-n-taaga a sẽn zãms bũmb ninga. A ra togsda woto: «Mam zãmsame la ade: miusgu n da bilimd a Madiã sikẽ wã la a sẽn wẽ roog a ye, a lub-a lame n zũndg zãnga.» A sõsd-n-taaga leokame: «Baad tɩ rẽ ka bũmb a to, n zʋʋg Israyɛl daoa, a Zowas biig a Zedeõ, sʋʋga ye. Wẽnd dɩka Madiã sikã n sagl a nugẽ.» A Zedeõ wʋma zãmsdã ne a võore, a yĩgimdame n waoog Soaala-Wẽnde la a sẽn lɛɛg n wa a neba sʋka a tãsame: «Yik-y tɩ Soaala-Wẽnd dɩka Madiã n sagl y nugẽ.» A Zedeõ pʋɩ-la a neba sags a tã. A kõo ned kam fãa baorgo, yubl vɩʋʋgo ne bug-vɩleng sẽn da solg a pʋgẽ. A yeel-b lame: «Ges-y maam la maan-y wa maam! M sẽn kolg bɛɛba sikã n maan bũmb ningã bɩ yãmb me maan boto! Maam ne m sẽn be ne b rãmba na n peeba bardo, yãmb me maan boto y kɩrengẽ la tãs-y tɩ sãde: ‹Wẽnd la a Zedeõ yĩnga!› » A Zedeõ la neb koabga sẽn da be b ne yẽ wã kolga bɛɛba sik yʋn-sʋka, dẽ tɩ sika gũudb reega taab paalem-paalem. B peeba bardo la b wãa yʋy wã b sẽn da zãadã. Neb a taaba me peeba bardo la b wã b yʋy wã. B ra zãadã bug-vɩlensã ne b goabga tɩ bardã ra be b rɩtgo la b kelmame: «Wẽnd la a Zedeõ yĩnga ned kam fãa yiis a sʋʋga!» Ned kam fãa ra yɛsa a zĩigẽ la b ra gũbga sikã. La ade, sika pʋga ned kam fãa ninga tĩiga la a tar kaasgo. Bardã sẽn waa n peebdẽ wã, Soaala-Wẽnd zablga bɛɛba ne taab tɩ b lɛɛg n kẽ taab ne sʋʋse. B zoe gilli n ta Bɛt-Sita, Sereda sẽnẽ, n ta Avɛl-Meola kʋɩlg noore, Tabat sɛɛgẽ. B boola a Israyɛl neba, a Asɛr, a Neftali la a Manase tẽn-peelmẽ dãmbã la b waame n pʋga a Madiã. A Zedeõ tʋma neb tɩ b rʋ tãmsã, n yeele: «Efrayim dãmba sig-y n seg a Madiã, ning-y pãnga n deng b bulsẽ wã, sẽn yɩ Bɛt Bara n digd Zʋrdẽ.» Efrayim dãmb maana boto n gɩdg bulsã n ta Bɛt-Bara la Zʋrdẽ. B yõga Madiã taoor dãmb a yi n pag roogo: a Oreb la Zeeb. B waa n kʋ-la a Oreb zĩig ninga sẽn boond t'a Oreb Pĩiga, n kʋ a Zeeb zĩig ning sẽn boond t'a Zeeb bugsuntung rãam kõgb zĩiga. B pʋga a Madiã n tees a tẽnga la yaa Zʋrdẽ rʋʋnde la b tall a Oreb la a Zeeb zut n wa kis a Zedeõ. Efrayim dãmb leoka a Zedeõ: «Yaa bõe la f maan woto ne tõndo. Bõe yĩng tɩ f pa wɩɩg-do, f sẽn waa n dabd n na n tak zabr ne Madiã rãmbã?» Sɩd pa yɩ naana ne a Zedeõ ye. A Zedeõ leok-b lame: «Bõe la m maan sẽn kolg yãmb dẽnna? A Efrayim sib yiisgu ka são a Abiezɛr sib gĩin kaoob sɩda? Yaa yãmb nugẽ la Soaala-Wẽnd sagl a Oreb la a Zeeb, a Madiã na-komsã. La bõe la m maan sẽn tõe n dɩk n mak ne yãmb rẽnna?» A Zedeõ goama maaga b sũuri. A Zedeõ taa Zʋrdẽ n dʋʋg a kooma, yẽ ne neb kobs-tã wã sẽn da be ne-a wã. Ne b sẽn da yɛ wã, b kell n talla bɛɛba rigbu. A Zedeõ yeela Sukot dãmba: «M kotame tɩ y bao bur-maas n kõ m tũud-n-taasã. B yɛɛme la yaa Madiã dĩm dãmb a Zeba la a Salmuna la m pʋgda.» Sukot taoor dãmba yeelame: «A Zeba ne a Salmuna zoe n saga fo nugẽ laa tɩ f yet tɩ d bao bur-maas n wa tɩ f kõ f tãb-biisi?» Dẽ la Zedeõ leok-ba: «Naaba-Wẽnd sã n wa rɩk a Zeba la a Salmuna n ning m nugẽ, m na sɩ y yĩnga ne we-raooga gõos la sɩlg-nao-yẽese!» A Zedeõ sẽn yi Sukot a kẽnga Penuwɛl n tɩ kos bãmb rɩɩbo la bãmb me leoka wa Sukot dãmba. Dẽ la a Zedeõ yeel Penuwɛl dãmba: «M sã n tõog m bɛɛbã n lɛɛg n wa ne laafi, m na tus y ro lug-lug kãnga n lubi.» A Zeba la a Salmuna da bee Karkor ne b tãb-biisa sẽn da kellã, tus piig la a nu. Bãmb bala n da põs yaang rãmba tãb-biis sʋka, tɩ sẽn ki-ba yɩɩ tãb-biis tus koabg la pisi. A Zedeõ tũu we-gõaadba sore, Noba la Yogboa yaanga. A Zedeõ linga bɛɛbã n tõog-ba. A Zeba ne a Salmuna paam n zoeeme. A Zedeõ pʋga Madiã dĩm dãmbã n yõg-ba. Tãb-biisa yẽ pa zabrẽ wã zãnga. Zabr sẽn sɛ, a Zowas biig, a Zedeõ, tũu Erɛs sorã n lɛɛg n wa. A Zedeõ boola Sukot bi-bɩɩg a ye n sok la a kos-a t'a gʋls Sukot taoor dãmba yʋy n paas nin-kẽemsã, bãmb pisopoe la a yopoe. A Zedeõ taa Sukot dãmb sʋk n yeel-ba: «Ad-a Zeba la a Salmuna. Bãmb poorẽ, yãmb laa maam n tol n sok-ma: ‹Fo zoe n paam n sẽba a Zeba la a Salmuna laa, n yet tɩ b bao bur-maas n kõ f tãb-biisi sẽn kẽnd ne yaamse la kom?› » A yõga tẽnga nin-kẽemsã la b waa ne we-raooga gõos la sɩlg-nao-yẽese la b yora Sukot dãmba. A Zedeõ tɩ wãa Penuwɛl ro-wokã la a kʋ tẽnga rãmba. A yeela a Zeba ne a Salmuna: «Neb niyns yãmb sẽn kʋ Tabor tãnga zugã da wẽnda ãnna?» Tɩ b leoke: «B ra wẽnda foom. Ned kam fãa neng ra yaa na-biig nenga.» A Zedeõ leokame: «Ad-y yaa m kẽem dãmba, m ma-biisi! Ne Naaba-Wẽnde, m wẽend tɩ y sã dag n pa kʋẽ-ba, ma me kõn kʋ yãmb ye.» A yeela a Yetɛr, a bi-kẽenga: «Yik n kʋ ba!» La a Yetɛr ka sak n wõog a sʋʋg ye, rabeem yõk-a lame t'a ra paooda wʋsgo. A Zeba ne a Salmuna yeelame: «Fo yik f toore n kʋ-do tɩ ned pãng zemsa ne a yagdo.» A Zedeõ yikame n kʋ a Zeba la a Salmuna la a looda te-neeba sẽn da loe b yʋgma wã kokore. A Israyɛl yeela a Zedeõ: «Fo fãaga tõnd a Madiã nugẽ, bɩ f rɩ naam d zugu, foo, f biiga la f yagenga.» A Zedeõ leokame: «Ka maam n na n yɩ yãmb dĩm ye, ka m biiga me ye, yaa Naaba-Wẽnde, tɩ yaa bãmb n tog n yɩɩ y dĩm. Bas-y tɩ m kos y bũmbu, bɩ ned kam fãa kõ maam nug-bĩnga a sẽn paam bɛɛba laogẽ.» Bɛɛba sɩd da yaa Ismayɛlitse n tar sãnem nug-bĩnsi. B naaga taab n leok tɩ rẽ ka tũud toog ye la a Zedeõ sẽn yɛdg a fuugu, ned kam fãa kolg n loba nug-bĩng a sẽn da paam bɛɛba laogẽ. Nug-bĩnsã a sẽn paam zɩslem taa wakɩ koeems tusr la kobs-yopoe rẽnna, fan teeda a taaba sẽn pa naag ye: wala sẽn sogd kokoɛ, tʋb-londo, peen-mismiidu Madiã rãmb sẽn tar n sẽt b futu, la bobdse sẽn ningd yʋgma. A Zedeõ rɩka sãnema n dõog nin-naande la a ning-a-la a tẽngẽ, Ofra. A lebga bũmb Israyɛl dãmb sẽn da waoogde. A lebga wa bẽdgo a Zedeõ ne a zak rãmb yĩnga. Yɩɩ woto la a Madiã zug sulg Israyɛl dãmb taoore n pa le tõog n doog ye la tẽnga paama vʋʋsgo yʋʋm pis-naase n ta a Zedeõ yõor tɛka. A Zowas biig, a Yerubaal lɛɛg n tɩ kẽ-la a zakẽ A Zedeõ meng kamb yɩɩ pisopoe. A pagba sõor da yaa wʋsgo. A yem-poak a ye sẽn da be Sikɛm roga biiga t'a pʋd a yʋʋr a Abimelɛk. A Zowas biig a Zedeõ kʋʋla sũ-noog kʋʋlem n yaool n ki. B mum-a-la ne a Zowas, a ba-roaka, Ofra, a Abiezɛr Tẽn-peelmẽ. A Zedeõ loogr poore, Israyɛl kamba sɩngame n le pʋgd a Baal dãmba. A Baal-Berit n waa n lebg bãmb wẽnde. A Israyɛl waa n yĩma Naaba-Wẽnd sẽn fãag-a a bɛɛba nusẽ. La sõngr ninga fãa a Yerubaal-Zedeõ roog sẽn sõng bãmbã, b waa n yĩma rẽ zãnga. A Yerubaal biig a Abimelɛk waa Sikɛm a yɛs-rãmb sʋka n yeel a ma wã roog rãmba: «Gom-y woto ne Sikɛm tẽnsoaben-dãmbã: Bõe n são y yĩnga, a Yerubaal kamb pisopoe sẽn na n dɩt naam y zugu bɩ nin-yend bal sẽn na n ya y soaala? Pʋs n tẽeg-y tɩ maam ne yãmb yaa zɩɩma ye.» A Abimelɛk yɛs-rãmba taasa koɛɛga Sikɛm tẽnsoaben-dãmbã la b yam ra kẽ-la a Abimelɛk tɩ b ra yetame: «A yaa tõnd zɩɩm.» Dẽ la b kõ-a wanzurf wakɩ koeems pisopoe wala b sẽn geend wakɩr to-to a Baal-Berit wẽnd doogẽ. A Abimelɛk rɩka ligdã n na n yao nin-yaals la bi-beese sẽn na n pʋg a poore. A sẽn leb a ba-yiri, Ofra, a kʋ-la a ba-biis la a kẽem dãmba, bãmb pisopoe. Nin-yend n yaool n põse: yaa a Zotam, nugẽ-biigã sẽn da zoe n soonde. Sikɛm la Bɛt-Milo rãmb tigma taaba la b kaasa a Abimelɛk wala b naab, Sikɛm tẽnga, tẽn-kugra kʋka tẽngre. Rẽ waa n lʋɩ-la a Zotam tʋbrẽ, t'a rʋ Garizim tãnga. A zẽka a koɛɛg n tãs neba woto: «Kelg-y-ma, Sikɛm tẽnsoaben-dãmba, tɩ Soaala-Wẽnd me na kelg-y. Tɩɩsa yika raar a ye n dɩk sore n na n tɩ yug ned ninga sẽn na n dɩ-a naam b zugu. B yeela oliviye: ‹Yɩ tõnd dĩma!› Oliv tiig leokame: ‹M yɩta wãna n bas m kaama sẽn tar n waoogd wẽnd-dãmb la ninsaalba n tɩ lengd tɩɩsa a taab zugu?› Tɩɩsa lɛɛg n yeela kankanga: ‹Bɩ fo wa yɩ d dĩma!› Kankanga leok-b lame: ‹M yɩta a wãna n bas m kamba ne b noosma n tɩ lengd tɩɩs a taab zugu?› Tɩɩsa bʋʋga bugsuntungu n yeel-a: ‹Bɩ fo wa yɩ d dĩma!› Bugsuntung yeel-b lame: ‹M maanda a wãna n bas m rãama sẽn noogd wẽnd dãmba la ninsaalb sũuri n kẽng n tɩ lengd tɩɩs a taab zutu?› Tɩɩsa kong n babsa gõaaga n yeel-a: ‹Bɩ fo wa yɩ d rĩma!› Tɩ gõaag leok-ba: ‹Sã n yaa ne yamleoogo la y taagd-m kaam tɩ m yɩɩ y dĩma bɩ y wa soond m maasmẽ. Y ka maan boto me, bugum n na n yi gõ-tuugã la Libã tɩ bɛda na n dɩɩ zãnga!› Dɩlla, m saam-biisi, a Zotam n gomde, sã n yaa ne yamleoogo la pʋ-peelem la yãmb yãk a Abimelɛk, ges-y yãmb sã n ka maan sõm-zɩtem ne a Yerubaal doogo, ges-y y sã n maana ne-a wala a sẽn da tog ne bũmb ninga. La m ba n yaool n zab yãmb yĩnga, a koosa a yõor n na n fãag yãmb Madiã nugẽ, la rũnna yãmb yika zabr ne m ba-roogo, yãmb kooda a kamba la tẽnsoaben-dãmb pisopoe, wakat a ye. La yãmb basa Sikɛm tẽnsoaben-dãmba, n yug wala y dĩma, yem-poak biig, a Abimelɛk, a sẽn yaa y yagenga yĩnga. Sã n yaa ne yamleoogo la pʋ-peelem la y maand dũnna ne a Yerubaal doogo, bɩ a Abimelɛk noog y sũuri la yãmb me yɩɩ a sũ-noogo. Dẽ sã n ka be bɩ bugum yi a Abimelɛk nengẽ n dɩ Sikɛm la Bɛt-Milo taoor dãmba, bɩ bugum yi Sikɛm la Bɛt-Millo taoor dãmba nengẽ n dɩ a Abimelɛk!» A Zotam sẽn gom n sɛ, a zoeeme; a tɩ kẽe Beer; a tɩ kẽe be n paam n zãag ne a saam-biig a Abimelɛk. A Abimelɛk dɩɩ naam yʋʋm a tã a Israyɛl zugu. Wẽnd wa n zablga a Abimelɛk ne Sikɛm tẽnsoaben-dãmbã tɩ bãmb me yik n sɩng a Abimelɛk tõdgre. Ade, yell ning sẽn maane ne a Yerubaal kamb pisopoe wã, da togame tɩ b bãng tɩ yaa a Abimelɛk n na n dɩ zɩɩma raagr taale, tɩ yẽnda n kʋ a ba-biisi, la yaa Sikɛm tẽnsoaben-dãmba me, tɩ bãmb n tus-a t'a kʋ a saam-biisi. Sikɛm taoor dãmba solga neba tãmsa zutu tɩ b gũusd so-loaadbã n fãad-ba. Waa n lʋɩ-la a Abimelɛk, tʋbrẽ. Daar a ye, a Ebɛd biig, a Gaal, ne a yaopa waa Sikɛm la a goama kẽe Sikɛm taoor dãmb sũurẽ. B sak n yi b pʋtẽ n tõs b sib biisi, n kõg b rãam, n maan kibsa la b waoog b wẽnde. B rɩɩme, b yũume la b kãaba a Abimelɛk beedo. A Ebɛd biig, a Gaal, yeel-b lame: «A Abimelɛk yaa bõe. Sikɛm ka labs ne d wa sulg d zug a Abimelɛk taoore? A yaa bõe? A yaa a Yerubaal biiga la yẽ n kõ a tãnsoab, a Zebul, tẽnga soolem. Da maan-y yel-sõm-zɩtem ne a Amor, tɩ yaa yẽ maasem yĩng la Sikɛm be. Bõe yĩng la d na n sulg d zugu a Abimelɛk taoore? Ade, b sã n da rɩkẽ tẽnga gesg n kõ maam, m naan n n tus a Abimelɛk n leb kɛɛnga! M naan n yeel-a: ‹Paas f tãb-biisa sõor la f wa tɩ d seg taaba.› » Kombere a Zebul bãnga goam nins a Ebɛd biig, a Gaal, sẽn yiis a noorẽ la a sũur puugame. A maana zãmbo n tʋm neb tɩ b tɩ yeel a Abimelɛk: «Ad a Ebɛd biig, a Gaal, waa Sikɛm ne a yaopa la b zẽkda tẽnga rãmb zutu tɩ b yi fo poorẽ. Dẽ yĩnga, yi yʋngo, foo ne f nebã n tek n wũund pʋtẽ wã. Yibeoogo, sõor sã n yẽege, f na n yik n tak zabre. A Gaal ne a neba sã n yi n na n seg foo, f na maan ne-a wa f sẽn date.» A Abimelɛk yii yʋngo ne a nebã la b waa n soonda Sikɛm noorẽ. A welga a neba sags a naase. A Ebɛd biig, a Gaal, sẽn waa n yi n tek n yaas tẽnga noorẽ, a Abimelɛk ne a neba me pusga vugri n yi. A Gaal sẽn yãe neba a yeela a Zebul: «Ges-y neb sẽn sigd tãngã.» T'a leok: «Ad yaa tãmsa maasem la fo sẽn mamsd ne nebã.» T'a Gaal le yeele: «Ges-y neb sẽn sigd tãnga yũugẽ, tɩ kẽer yit bagba kʋk sẽnẽ.» Dẽ la a Zebul yeela: «Yaa bõe la f zelemd da togsda? Ka foo n da sokd t'a Abimelɛk yaa bõe tɩ f zug na n sulg a taoore? Ka fo sẽn da sãbsd b rãmba la f sẽn ne wã? Yi marsã n tak zabr ne ba.» A Gaal lʋɩ Sikɛm tẽnsoaben-dãmba taoore n tak zabre ne a Abimelɛk. A Abimelɛk riga a Gaal t'a wudg, a neba wʋsg kiime, b pa paam n kẽ tẽnga pʋg ye. A Abimelɛk waa n kẽe Aruma la a Gaal diga a Zebul ne a ba-biisã tɩ b ra zĩnd Sikɛm ye. Vẽkẽmbeoogo Sikɛm dãmba yii b tẽngẽ tɩ b wa yeel a Abimelɛk tɩ b rabda b pʋtẽ. Woto a welga a neba sags a tã n bao zĩig n solg b pʋtẽ. Neba sẽn waa n yita a bʋʋg-b lame n pãb-ba. A Abimelɛk ne a neba yɛdgame n pag tẽnga noore, tãb-biis a taaba riga Sikɛm dãmba sẽn da sẽeg pʋtẽ wã n kʋ. Raara tõre a Abimelɛk zaba ne tẽnga pʋgẽ dãmba. Tẽnga lʋɩ-la a nugẽ t'a kood nebã, n wã rotã, n bao yamsem n fẽrg tẽngã. B sẽn wʋm dẽ, Migdal-Sikɛm tẽnsoaben-dãmba zoeeme n tɩ soond tãng bokẽ, El-Berit wẽnd doog pʋga. B wilga a Abimelɛk tɩ Migdal-Sikɛm nin-bɛdã tɩ soonda be. A rʋʋ Salmon tãng zug, yẽ ne a nebã. A reeg-a lare n kɛɛg tɩɩg willi n tʋk-a n palg a bãoko, la a yet a nebã: «Yãmb sẽn yãe tɩ m maan bũmb ningã, maan-y boto tao-tao.» Ned kam fãa kɛɛga a willi n tʋk n pʋgd a Abimelɛk, b tɩ sam-b-la tãnga boko la b ning-a-la bugum tɩ bokẽ dãmba paa a pʋgẽ. Migdal-Sikɛm neba kii zãnga, pagb la rap na ta tusri. A Abimelɛk teesa Tebɛk, a sẽn pag tẽnga noya, a tõog-a lame. Do lug-lug a ye n da be tẽnga sʋka tɩ pagba la rapa fãa zoe n tɩ soond be. Tẽnga nin-bɛda me ra bee be. B ra maneg n paga tẽnga noore n yaool dʋ gaosgã. A Abimelɛk paam n taa ro-lug-lugã n tak zabre. A sẽn waa n ta ro lug-luga noorã, a kolg n na n ning-a-la bugum Pag a ye lobga a zug ne neer t'a zuga wã. Tao-tao t'a boola a wed-kɩɩma n yeel-a: «Wõog f sʋʋg n kõs-ma tɩ b ra wa yeele: ‹Yaa pag n kʋ-a.› » Wed-kɩɩma sɩd kõs-a lame n kʋ. Israyɛl kamb sẽn wʋm a Abimelɛk kũum, b fãa leba b tẽnsẽ. Wẽng ning a Abimelɛk sẽn maana lɛɛg n lʋɩ-la a zugu. A ra tʋma a ba wẽnga n kʋ a kamb pisopoe. Yaa boto me la b kɩt tɩ Sikɛm dãmb dɩ b wẽnema taale. A Yerubaal biig, a Zotam, kãab wẽnsa pidsame. Sẽn fãaga a Israyɛl a Abimelɛk poor yɩ-la a Tola, a ba la a Ypa, a yaab la a Dodo. A ra yaa a Isakar sakẽ neda la a ra kẽeda Samir sẽn zao Efrayim tãng zugu. A Tola kaoo Israyɛl bʋʋd yʋʋm pisi la a tã n yaool n ki la b mum-a-la Samir. A Tola poore a Yayir n kao Israyɛl bʋʋd yʋʋm pisi la a yiibu. A Kamb yɩɩ pis-tã, n zombd bõeens pis-tã, n kẽed tẽns pis-tã sẽn ket n boond dũnna t'a Yayir tẽnse, a Galaad tẽn-peelmẽ. A Yayir kiime tɩ b mum a Kamo. Israyɛl kamb le sɩng n maana sẽn ka noom Soaala-Wẽnde. B waooga Baal dãmba la Astarte dãmba n paas Aram, Sidõ, Moab wẽnd dãmba, Filisti la Amonitsa wẽnd dãmba. B Basame n ka le waoogd Naaba-Wẽnd ye. Yaa rẽ la Soaala-Wẽnd sũur puug ne a Israyɛl tɩ b rɩk-a n sagl Filisti rãmba la Amonitsa nusẽ. A Israyɛl yãee naong la pɛta yʋʋm piig la a nii pʋgẽ. Sẽn nams-ba n yɩɩg, yɩɩ Israyɛl kamb niyns sẽn da be-b Zʋrdẽ rʋʋnde, Galaad tẽn-peelmẽ. Amonitsa me yikame n dʋʋg Zʋrdẽ n tak zabr ne a Zɩɩda, a Bẽnzame la a Efrayim. A Israyɛl nimbãaneg waa n sɩd lebga wʋsgo. Wakat kãng marsã la b yaool n kelem Wẽnde, n yetẽ: «Tõnd beega yãmba tɩ tõnd basa yãmb, d Wẽnnaam, n pʋgd Baal dãmba.» Dẽ la Soaala-Wẽnd leok-ba: «Ezipt rãmba, Amoritse, Amonitse, Filisti rãmba, Sidõ, Amalɛk la Madiã rãmb sẽn waa n tar yãmb toogo tɩ yãmb kelem n bool-ma, m zãgsame tɩ m kõn fãag yãmb b nusẽ bɩ? Yaa yãmb n bas maam n pʋg wẽnd dãmb a taaba. Ma me toog ka le be ye, m kõn fãag-y ye. Tɩ waas-y ne wẽnd dãmb nins sẽn ta y yam. Bool-y tɩ b fãag yã y yel-pakr pʋgẽ.» A Israyɛl leokame: «Tõnd kongame, maan-y ne tõnd wala y sẽn date, yãmb yee n fãagd dũnna bala!» B tɩ yiisa wẽn-sãamsã b zagsẽ n le pʋg Naaba-Wẽnde. Naaba-Wẽnd ka le tõog n bas a Israyɛl t'a nams ye. Amonitsa tigima taaba la b wẽ-la sik Galaad. Israyɛl me tigsa a nebã n wẽ a sik Mispa. Galaad neba la a taoor dãmb yeela taaba: «Nin-bʋg n na n wa zab ne a Amon doogã n kõ-do? Nin-kãng na lebg d naab Galaad tẽn-peelmẽ.» Galaad daoa, a Zɛfte, da yaa tãnsoab sẽn pid ne sũuri. A ba sẽn da boond tɩ Galaad rog-a-la ne pʋg-yoodre. Galaad kãng tom-paga roga kamb a taaba, kom-dibli la kom-pugli. La b sẽn waa n bɩ b riga a Zɛfte. B yeel-a lame: «Fo kõn naag tõnd n dɩ d ba paoong ye tɩ f yaa pag a to biiga.» A Zɛfte zoe n zãaga ne a ba-biisi n tɩ kẽ Tob tẽnga. Be a ra wʋka nin-yaalse n saad n takd zaba. Sẽn wa n kaoos bilfu, tɩ Amonitsa yik zabr ne a Israyɛl, Galaad nin-kẽemsã tʋmame tɩ b bool a Zɛfte Tob tẽnga. B yeel-a lame: «Wa, n yɩ d tãnsoaba tɩ d zab ne Amonitsã.» Dẽ la a Zɛfte leok-ba: «Ka yãmb n dɩ beem ne maam n dig-m n yiis m ba zakẽ laa? Bõe tɩ toog tar-y marsã, tɩ y baood m zĩiga?» Nin-kẽemba yeela a Zɛfte: «D sã n lɛɛg n baood foo rũnna, d datame tɩ fo wa kẽ-do, n zab ne Amonitsã, n lebg d naaba, n lebg Galaad tõr naaba.» T'a Zɛfte yeele: «Y sã n bas-m tɩ m lɛɛg n wa tak zabre ne Amonitsã n tõog-ba, ne Naaba-Wẽnd sõngre, m na sak n lebg y naaba.» Tɩ nin-kẽemba paas: «Bɩ Wẽnd yɩ d kaset soaba, d sã n ka maan wala d sẽn yeelã.» A Zɛfte kẽnga zabre ne Galaad nin-kẽemsã la neba sakame t'a lʋɩ b taoore. A Zɛfte le togsa b goama fãa, Mispa, Naaba-Wẽnd taoore. A Zɛfte tʋmame tɩ b tɩ yeel Amonitsa dĩma: «Bõe n be maam ne foom tẽnsʋka n sek zabre tɩ f wat n na n tak zabr ne m tẽnga?» Amonitsa dĩma leoka a Zɛfte sẽn tʋm b rãmbã: «Ade, a Israyɛl sẽn yi Ezipt tẽnga, a waa n deega m soolem. Yɩɩ Arno kʋɩlga n ta Yabok la Zʋrdẽ. Lebs maam m soolem tɩ ket n maasa.» A Zɛfte le tʋma neb Amonitsa mengẽ, tɩ b tɩ yeel dĩma: «Woto la a Zɛfte koɛɛga: A Israyɛl ka reeg fɩ a Moab la Amon tẽn-peelmẽ ye. A Israyɛl sẽn yi Ezipt a pãrga we-raoogo n ta Rudum Mogrã n yaool n dig Kadɛs. B A Israyɛl zĩnda be n tʋm tɩ b yeel Edom dĩma: ‹Kabr tɩ m bʋdg f soolma n looge.› La Edom dĩma pa kelg-a ye. A toola Moab dĩma nengẽ la yẽ me ka sak ye. Dẽ la a Israyɛl kong n pa Kadɛs. Dẽ poore b pãrga we-raoogã n gil Edom ne Moab tẽn-peelem n wa Moab yaanga. B wẽ-la b sika Arno kʋɩlga rʋʋre, la b pa kẽ Moabitsa tẽngẽ tɩ Arno kʋɩlga la a toaaga. A Israyɛl zĩnda be n tʋm neb Amoritsa dĩm a Siyõ nengẽ, Esbõ tẽnga. A tʋmame tɩ b yeel dĩma: ‹Kabr tɩ m bʋdg f soolma n ta m sẽn dabdẽ.› La a Siyõ zãgsame, a tigma a zab-zabdba Yaas tẽnga la a sɩnga zabre ne a Israyɛl. A Israyɛl Wẽndã dɩka a Siyõ ne a nebã n sagl a Israyɛl nugẽ, t'a Israyɛl tõog-ba. A Israyɛl sẽn deege yɩɩ Amoritsa soolem zãnga, sẽn sɩng Arno bãg-faaga n ta Yabok kʋɩl-bɛɛga, sẽn sɩng yaang we-raoogã n tat Zʋrdẽ. Soaala-Wẽnde, Israyɛl Wẽndã, n sõng tõnd tɩ d deeg Amoritsa soolem. Bõe tɩ fo rat marsã n dig-d n yiisi? Fo sẽn kẽed tẽng ningã ka fo wẽnd a Kemos n kõ-f-la? Bãng tɩ tõnd me tara sore n kẽ tẽng ning d Soaala sẽn kõ-d tɩ d sooge. Fo yɩɩda Moab dĩm a Balak, a Sipor biiga laa? Fo pa ne t'a Balak pa yaas n maan nokoeemd ne a Israyɛl? Fo pa ne t'a Balak pa saag n tak zabr ne a bɩ? Ya yʋʋm kobs-tã marsã la Israyɛl kamba kẽed Esbõ la Aroɛr ne b tẽn-toose, n paas tẽns nins sẽn be Arno kʋɩlga noorã, bõe tɩ ta rũnna tɩ y ka rig-ba n yiisi? Mam ka maan kegr ne foom ye la fo maana wẽng ne maam n tak zabr ne ma. Bɩ Wẽnd sẽn ya Bʋ-kaoodã, kao Israyɛl ne Amoritsa bʋʋdo.» Amoritsa dĩm baas n ka kelg a Zɛfte sẽn taas-a koees niynsa ye. Soaala-Wẽnd vẽnega a Zɛfte yam. A tũ Galaad la Manase n sãag n ta Mispa-Galaad soolem n yi be n dʋʋg Amonitsa toaaga. A Zɛfte pʋlma Naaba-Wẽnd a pʋlengo n yeele: «Y sã n sõng tɩ m tõog Amoritsa, ned ninga fãa sẽn na n yi pipi m zakẽ wã n seg-ma, yẽ soab lebga Wẽnd pʋɩɩre la a na lebga yũ-noog maoong bũmbu.» A Zɛfte tɩ kẽe Amonitsa tẽn-peelmẽ n zab ne ba la Naaba-Wẽnd dɩk-b lame n sagl a nugẽ. A rig-b-la Aroɛr n kolg Minit (tẽns pisi la a reeg yã); n dig-b n ta Abɛl-Keramim. A tõog-b-la sõma; Amonitsa sulga b zug a Israyɛl taoore. A Zɛfte sẽn wa n lɛɛg n wat Mispa, a tẽngẽ, yaa yẽ meng bi-pugl n yi n seg-a ne gãngãoog bila la a saoodẽ. Da yaa a bi-yende, a ka paam biig a to, pag bɩ raoa sã ka yẽnda a ye tãa. A Zɛfte sẽn yãend-a, a kẽesa a fut n yetẽ: «M biiga, f kẽes-m-la yell sẽn ka be tɩɩm, fo waa n tʋʋg-m-la zu-beedo! M goma wʋsg Naaba-Wẽnd taoore, m pʋlma Wẽnd la m ka le tõe n lebs m zelemd ye.» La bi-pugla yeel-a lame: «M ba sõngo, yãmb pʋlma Wẽnde, yãmb goma wʋsg Naaba-Wẽnd taoore, bɩ y maan wa y sẽn yeele. Soaala sõng-y lame tɩ y rok y sũur ne y bɛɛba, ne Amoritsã.» A le paasame: «Ad-m sẽn kot y bũmb ninga: Bas-y-m ne m meng kiis a yiibu. M na rʋ n yeeb tãmsã zut ne m tũud-n-taase n yãb m sẽn na n kong rogem sũ-noogã.» A Zɛfte yeel-a lame: «Kẽnge, m biiga!» La a bas-a-la kiis a yiibu. A yii ne a tũud-n-taase la a rʋʋ tãng zugu la a yãba a menga. Kiis a yiiba poore a lɛɛg n waa a ba zakẽ la ba pidsa a pʋlemde. A ka paam n yi kãadem ye. Ad-y yaa rẽ n wa ne rog-n-mik kãngã: Yʋʋmd yʋʋmd fãa, Israyɛl kom-pugli kẽnd n yãbda Galaad dao a Zɛfte bi-pugla, dasem a naas tõre. Efrayim neb n tigim taaba n dʋʋg Zʋrdẽ, n tees Safõ n tɩ yeel a Zɛfte: «Yaa bõe yĩnga la f yi n tɩ tak zab ne Amonitsã n ka bool tõndo tɩ d wa yãag-fo? Tõnd na n yõog-f la bugum, foo ne f zaka!» Dẽ la a Zɛfte leok yã: «Maam ne m neba ra zĩi ne yɩɩre la Amonitsa da tar-d lame n namsdẽ. M bool-y lame tɩ y wa sõng-ma la y ka wa fãag-m ye. M sẽn yãe tɩ ned ba a ye ka wat m sõngre, m ka zoe kũum ye, m boba zabr ne Amonitsã la Soaala-Wẽnd sõng-m lame tɩ m tõog-ba. Y sẽn tigim taab n na n wa zab ne ma võor la bõe?» A Zɛfte me boola a saam-biisi tɩ b tak zabr ne Efrayim dãmba la a tõog-b lame. Efrayim dãmb da yetame: yãmba, Galaad rãmbã, yãmb yaa a Efrayim neb sẽn zoe n wa nok a Manase bala. Woto Galaad dãmb tɩ yalsa neb zĩis nins Efrayim neba sẽn tõe n dʋʋg Zʋrdẽ, n paam n gɩdg-ba. B sã n yãend ned sẽn wat n na n dʋʋg kʋɩlgã, b sokd-a lame: «Fo yaa Efrayim ned bi?» A sã n yet tɩ ayoo, b kot-a lame t'a yeel: Sibolɛt, la yẽ yetame: fibolɛt, b zelemda lakr da ka a ye ye. B wẽnegd n yõka sẽn luk a meng bãongã la b kodgd-a-la kʋɩlga noore. Yaa woto la Efrayim dãmb ki yã, bãmb na ta tus pis-naas la a yiibu. A Zɛfte sooga taoor Israyɛl yʋʋm a yoobe n yaool n ki la yaa a tẽngẽ la b mum-a, yaa Galaad tẽng Mispa. A Zɛfte poore a Ibsã n soog taoor Israyɛl. A ra kẽeda Bɛtelyɛɛm. A kom-dibli yɩɩ pis-tã, a kom-pugli me pis-tã. A kẽnga tẽng a to n bao kom-pugli n kõ a kom-dibli la a yiisa a kom-pugli wã me ne buud a to rãmba. A rɩɩ kãseng yʋʋm a yopoe. A kiime tɩ b mum-a Bɛtelyɛɛm. A Zabulõ ned n led a zĩiga: a Elon. A rɩɩ kãsengo yʋʋm piiga. A kiime la b mum-a-la Ayalõ, Zabulõ tẽn-peelmẽ. A Elon poore yɩɩ Piratõ daoa, a Illɛl biig a Abdõ, n soog taoor Israyɛl. A kamb da yɩɩ pis-naase, a yagens pis-tã, n da zombd bõeens pisopoe sẽn ya poala. A sooga kãsengo yʋʋm a nii. Piratõ daoa, a Illɛl biig a Abdõ, sẽn ki, b mum-a la Efrayim tẽn-peelmẽ, a Amalɛk tãng zugu. Israyɛl kamb le sɩngame n maan sẽn ka tat Naaba-Wẽnd yam tɩ Wẽnd bas-b Filisti rãmb nugẽ, yʋʋm pis-naase. Ned n da be Sorea t'a yʋʋr boond tɩ Manoa, a Dã sakẽ. A paga ra yaa pʋg-kiiri n da ka tar biig ye. Soaala-Wẽnd lika pagã n yeel-a: «Fo yaa pʋg-kiiri n ka rog biig ye. La marsã tɛka, maan gũusgu! Da yũ rãam la sẽn wẽnd rãam buud ye. Da wãb rũn-dẽgd ye. F na n dɩka pʋga n dog biiga. Barg da sɩɩs a zug ye, tɩ b na n dɩk-a lame n kõ Soaala-Wẽnde t'a nan ket a ma pʋgẽ. Yẽ n na n fãag a Israyɛl, Filisti rãmb nugẽ.» Paga bʋʋga a sɩda n yeel-a: «Wẽnd nin-sõng n gom ne maam la f sã n yãee a sẽn yaa a soaba, bãng malɛka. A yãeeb wata ne yɛɛsgo. M pa sok-a a sẽn yitẽ ye, la yẽ me ka togs maam a yʋʋr ye. La ad-a sẽn yeel-ma: ‹F na n dɩka pʋga la f na n doga biiga. Marsã tɛka da le yũ rãam la rãam buud ye, da wãb rũn-dẽgd ye, tɩ biiga na n yɩɩ Wẽnd pʋɩɩr a ma pʋgẽ n tãag a kũum.› » A Manoa goma woto ne Wẽnde: «Soaala, m kot-y lame tɩ y sẽn tʋm ned ninga le lɛɛg n wa n wilg d sẽn na n maan bũmb ning ne biigã, a rogem poore.» Naab a Wẽnd deega a Manoa kosgo la malɛka le waame dẽ tɩ paga ra zĩi a pʋʋgẽ a ye. A sɩda ra ka be ne-a ye. Paga yika tao-tao n bʋʋg a sɩda n yeel-a: «Ad ned ninga sẽn lika maam nin-daarẽ wã le waame.» A Manoa yikame n pʋg a pagã n ta raoa nengẽ n yeel-a: «Yaa yãmb n gom nin-dãarẽ ne pʋg kãnga bɩ?» La a leokame: «Yaa maam!» T'a Manoa le sok n paase: «La y sẽn yeela sã n wa pidsi bõe la d na n maan biiga poorẽ?» Soaala-Wẽnd malɛka yeela a Manoa: «Bũmb ning fãa sẽn ya kisgu paga yĩnga, a yɩ kisgu ne biiga me. Bugsuntungu, rãam, rãam buud fãa, rũn-dẽgd buud fãa, paga ra sɩɩs ye, a reeg noy-niyns fã m sẽn kõ-a.» Dẽ la a Manoa leok malɛka: «M kotame tɩ y pa ne tõnd tɩ d yõk d bullã n maan zẽed bilfu n kõ yã.» A Manoa ra ket n ka mi tɩ yaa Soaala-Wẽnd malɛk ye. Tɩ malɛka na n leok-a: «Ba m sã n sak gõogrã m kõn sak n dɩ bũmb ye. Sã n ya maoong la f rat n kʋ bɩ f kʋ-a Naaba-Wẽnd yĩnga.» A Manoa yeelame: «La yãmb yʋʋr la a bõe tɩ d tõog n pʋʋs d zaamẽ, yɛla sã n taase?» Malɛka yeelame: «Bõe yĩng la f rat n bãng m yʋʋre? Ad yaa yʋ-bãnde.» A Manoa rɩka bullã n paas kũun a taaba la a yõog-b-la pĩig zugu tɩ b rɩ bugum zãnga, Wẽnd ning tʋʋm sẽn ya tʋʋm bãna yĩnga. Maan-kugra bugum dʋʋ yĩngri t'a Manoa ne a paga yãe malɛka sẽn tũud-a n dʋʋda. Dẽ la b wõgemd b neng tẽnga. Malɛka ka le lik a Manoa ne a paga ye la woto b bãngame tɩ sɩd yɩɩ Soaala-Wẽnd n da tʋm-a. A Manoa yeela a pagã: «Tõnd na n sɩd kiime tɩ d yãee Wẽnde.» La paga leokame: «Wẽnd sã n da ratẽ tõnd kũum b kõn deegẽ d maoonga la d kũuna la d kõn paamẽ n bãng d sẽn wʋma ye.» Paga wa n doga biiga n pʋda a yʋʋr Sãmsõ. Biiga bɩɩme, ne Naaba-Wẽnd barka, la yaa a Dã sikẽ, Sorea ne Estaol tẽnsʋka, la Wẽnd sɩng n pids-a ne b pãng la b yam. A Sãmsõ kẽe Timna, dar a ye, la a yãee bi-pugl Filisti kom-pugli wã sʋka. A sẽn leb yiri a tɩ togsa a ba la a ma la a yeelame: «Bi-pugl la m yãe Timna, Filisti kom-pugli wã sʋka, bao yã n kõ-m tɩ m maan m paga.» La a ba ne a ma naag a taab n yeel-a: «Pagb n ka be f saam-biisa kom-pugli wã sʋka la f buudẽ wã bɩ? Yaa bõe tɩ f na n bao nin-dẽgd kamba? La a kell n yeela a ba: Yaa yẽ la m dat tɩ y bao kõ-ma tɩ yẽ n ta mam yam.» A ba ne a ma ka bãng tɩ ra yaa Soaala-Wẽnd daab ye, tɩ Soaala-Wẽnd da baooda Filisti rãmba noore, tɩ wakat kãnga yaa Filisti rãmba n da rɩt naam a Israyɛl zugu. A Sãmsõ rɩka Timna sore la a sẽn wa n kolg Timna rãmb pʋto a yãee bõnyẽ-pol sẽn segd-a la a ningd rãamde. Naaba-Wẽnd pãng kẽe-a lame, a ra ka zãad bũmb ye la a sẽn sog bõnyẽegã a yaang-a lame, wala bulla. A yaool n ka saag n togs a ba bɩ a ma ye. A kell n tũ a sore n tɩ sõs ne pagã Timna la a yam kẽe-a lame. Sẽn maan dasem a wãna a Sãmsõ lɛɛg n waame tɩ b yi kãadem. A sẽn tek n bʋdge n na n ges bõnyẽega rɩgre, a mikame tɩ sĩ n kẽe-a n maan b sɩɩdo. A yãka sɩ-vaka n ta taoore n lemb-a, n kees n tɩ kõ a ma la a ba tɩ b rɩ la a pa saag n wilg a sẽn paam sɩɩda zĩig ninga ye, bõnyẽega rɩgrẽ. A Sãmsõ sẽn ta a paga ba-yiri b maana kibs kãsenga ne rɩ-noodo. Bãmb me rog-n-mik la rẽ. B sẽn yãend-a, tẽnga rãmb baoo kom-bɩɩs pis-tã tɩ b na n pa ne-a. A Sãmsõ yeel-b lame: «M na n wẽe-y-la yelbũndi. Y sã n tõog n wegs-a n wilg maam a võore, rasem a yopoe wã pʋgẽ, m na kõ-y fut pis-tã la m na le paas pis-tã tɩ y yeelgdẽ n tedgdẽ. La y sã n pa tõog n wilg a võore, yaa yãmb n na n kõ fut pis-tã n le paas pis-tã sẽn na n yeelgdẽ n tekdẽ.» B wẽneg n yeel-a lame: «Tão f yelbũndã, d kelgdame.» A yeelame: «Dɩɩb yii rɩ-rɩt noorẽ, tɩ bõn bʋgsgo yi pãnga-nar-soab nengẽ.» Rasem maana a tã, b pa tõog n wa ne baobga võor ye. Daar a nu soaba, b yeela a Sãmsõ pagã: «Belg f sɩdã n bãng kibara võore n wilg-du, ka rẽ d na yõog-f bugum, foo ne f ba wã yiri. Yãmb boola tõnd ka n na n fã d sẽn tar la?» Yaa woto la a Sãmsõ paga sɩng a pʋgb ne nintãm la a yetẽ: «Fo ka nong maam ye. Fo tãoo yelbũnd m saam-biisã la fo pa wilg maam a võor ye.» Dẽ la a Sãmsõ leok yã: «Awa! M sẽn ka wilg a võore m ba la m ma, m yɩta a wãn n wilg-a foom?» Bãng-y tɩ paga yõka yãbre la rasem a yopoe raarã, a Sãmsõ kong n wilga yelbũndã võore t'a ra yɛɛ ne a pagã la paga rɩkame n tɩ togs a saam-biisi. Dɩlla, dasem a yopoe daarã, a sẽn waa n nan ka kẽ gõeem, tẽnga kom-bɩɩba yeela a Sãmsõ. «Bõe n ya noog n yɩɩd sɩɩdo, la bõe n tar pãnga n yɩɩd bõnyẽega?» Dẽ me la a Sãmsõ leok-ba: «Yãmb sã n da ka sogẽ mam nag-sadgã n ko y koobo, y kõn wekẽ m yelbũnda ye.» A Sãmsõ yika ne Naaba-Wẽnd pãnga, n kẽ Askelõ n kʋ neb pis-tã n yees b futã n kõ neb niyns sẽn wilg b yelbũnda võore la a lɛɛga ne sũ-puuri n kul a ba zakẽ. Timna rãmb yõdg n dɩka a pagã n kõ pʋg-reema rãmb nin-yende. Sẽn yɩ bilfu, a Sãmsõ kẽng n na n tɩ gesa a pagã la ra yaa tigsg wakato. A Sẽn waa n na n ges a pagã, a talla bulla, n wa. La a sẽn yeele: m dat n kẽe m paga roogẽ, a rɛɛmba zãgsame. Ad-a sẽn yeel a Sãmsõ: «Sɩda m wa n yeela m sũurẽ tɩ fo sɩnga beem ne f pagã la m dɩk-a lame n kõ pʋg-reema rãmb nin-yende, la m tẽedame t'a yẽerã são-a lame. Bɩ yẽ lebg f paga a zĩigẽ.» A Sãmsõ leokame: «Marsã wã Filisti rãmba da le gũ bũmb m nengẽ, m na n lebs-b-la wẽng bala.» A Sãmsõ loogame, a kẽngame n tɩ yõg waas kobs-tã, n bao vilemse n loe-ba, a yiib-yiibu, zʋʋr-zʋʋre, n yaool n ning bugum. A yaool n basa waasa ne bugma tɩ b kẽ Filisti rãmba pʋto, la sẽn kẽeb n tigs woo, sẽn nan ka kẽeb woo, bugsuntund la oliv tɩɩs woo, fãa rɩɩ bugum. Filisti rãmb soka taaba: «Ãnda n maan woto?» La b yeel-b lame tɩ yaa a Sãmsõ, la yaa a rɛɛmba sẽn be Timna wã n deeg a paga n kõ pʋg-reema rãmb nin-yende. Bãng-y tɩ Filisti rãmb kẽngame n tɩ yõk paga ne a ba n yõog bãmb me bugum. A Sãmsõ yeela Filisti rãmbã: «Yãmb manesma sẽn ya to-to wã kɩtame tɩ m me kõn vʋʋs ne m rẽnna, al n wa rok m sũuri.» A Sãmsõ zaba ne ba la a tõog-b-la sõma. A tɩ kẽe tãng bokẽ, Etam sẽnẽ, la a paa be. Filisti rãmba wa n wẽe b sik Zɩɩda tẽn-peelmẽ n tol n sãag n ta Leyi. Zɩɩda rãmb sok-b lame tɩ yaa wãna tɩ b wa kẽed b tẽngẽ: La b leokame tɩ b waame n na n sẽb a Sãmsõ, tɩ b datame n lebs-a a sẽn maan-d bũmb ningã. Neb tus a tã n kẽng Etam tãnga bokẽ n tɩ yeel a Sãmsõ: «Fo ka mi tɩ yaa Filisti rãmb n so tõnd laa? Yaa bõe la f sẽn maana?» T'a na n leoke: «Yaa b sẽn maan-ma la m maan n lebs.» Dẽ la b wilg a Sãmsõ tɩ b sẽn wa wã, b waame n na n sẽb-a n tɩ kõ Filisti rãmba. T'a Sãmsõ na n yeel-ba: «Kãab-y tɩ ka yãmb meng n na n kʋ m ye.» B yeela woto: «Ayo, d ka na n kʋ-f ye, d datame bala n yõk-fo n kõ Filisti rãmba.» B sẽb-a-la ne wĩ sẽn rĩng paalem, wĩ a yiibu, la b yiis-a-la bokẽ wã n wa Leyi. B kolga Leyi tɩ Filisti rãmba yi n seg-ba la b kilsdẽ tɩ b maana raoodo. Naaba-Wẽnd pãng le kẽe a Sãmsõ. Wĩ wã lebga wa gaars sẽn dɩ bugum, b sʋʋga a nusẽ n dʋʋge. Bõang yeer sẽn nan pees paalem la a yãe yã. A sẽn tẽeg a nugu n dɩk-a, a tall-a lame n kʋ neb tusri. N bas n yeele: «M kʋ-b lame n sam ka la ka, ne bõang yeere, m yeega neb tusr nenga.» A sẽn gom n sɛ, a loba bõanga yeer yɩɩga. B boola tẽnga tɩ Ramat-Leyi, yeera kunkubri. Ko-yũud n da tar-a t'a pʋʋs Soaala woto: «Yaa yãmb n kõ y sõgna nug pãng t'a tõog a bɛɛbã, la marsã y na n bas tɩ ko-yũud kʋ mam n kõ nin-dẽgdo?» Soaala-Wẽnd kɩtame tɩ koom pusg Leyi t'a Sãmsõ yũ t'a pãng le wa. Yaa rẽ yĩng la b pʋd zĩ-kãng tɩ Eyin-Kore, la konifa keta rũnna Leyi tẽnga. A Sãmsõ dɩɩ kãseng Israyɛl tẽng yʋʋm pis-tã dẽ tɩ Filisti rãmba n da so-a. A Sãmsõ yii be n dig Gaza. A yãee pʋg-yoodr zak n kẽ. Ned n togs Gaza rãmbã: «Ad-a Sãmsõ waa ka.» Dẽ la b pag tẽnga noore n gũusd-a. B ka maan bũmb a to n paas ye. B ra yetame bala: «Sẽn ya yʋngã, d yaas tɩ beoog vẽeg tɩ d na paam-a n kʋ.» Mik a Sãmsõ me basame tɩ zĩig zʋʋge la yʋn sʋka a tɩ gãda tẽnga noor kʋɩlensã n võog-ba ne b sogdsa fãa n palg a bãoko n tɩ lob-b tãng ning sẽn tot ne Ebrõ wã zugu. Dẽ poore, a Sãmsõ le yãee Sorɛk kʋɩl-bɛɛga noorẽ, paga a ye n bao. Paga ra boondame tɩ Dalila. Filisti rãmba soaalba sẽn da ya nin-wẽnsa tɩ yãenda a Dalila n yeel-a: «Belg a Sãmsõ n bãng a pãnga sẽn yitẽ la d sẽn tõe n maan bũmb ninga n tõog n yõk-a n sẽbe t'a ka le be vɩg-vɩg ye. Tõnd ned kam fãa na kõ-f wanzurf wakɩ koeems tusr la koabga.» A Dalila tɩ yeela a Sãmsõ: «Wilg maam sẽn tũ ne bũmb ninga tɩ f tar pãng woto fãa, wilg maam d sẽn na n loe-f ne wĩir ninga tɩ f ka tõog n maan vɩg vɩg meng ye.» A Sãmsõ yeelame: «Sã n ya tãp wĩ a yopoe sẽn ket n ya maas n nan ka paam n kʋɩ la y rɩk n loe-ma, m pãnga na sɛ tɩ m lebg wa neb a taaba.» Filisti rãmba soaalba waa ne tãp wĩ a yopoe sẽn ket n ya maasa t'a Dalila reeg n loe a Sãmsõ. A Dalila ra baoo tãb-biis n solg a roogẽ wã. A tãsame: «Sãmsõ, ad Filisti rãmba ta-f lame.» La a Sãmsõ kaoo wĩ wã wala pãnd sẽn kaoode, bugum sã n kolg-a. B ka bãng a pãnga sẽn yitẽ ye. A Dalila yeela a Sãmsõ: «Fo belga maam n togs sẽn pa sɩda. M kotame tɩ f pelg f pʋga n wilg maam b sẽn tog n loe-f ne bũmb ninga.» Dẽ la a leok yã: «B sã n loe-m ne wĩ paal sẽn nan ka rɩk n sẽb bũmbu, m pãng menemdame tɩ m lebg wa neb a taaba.» A Dalila sɩd baoo wĩ paal n loe-a n yaool n tãs: «Sãmsõ, ad Filisti rãmba ta-f lame.» A deng n baoo neb n solg a rooga pẽkẽ; la a Sãmsõ kao wĩ wã sẽn da loe a kamsã wala b sẽn kaoogd gaarga. A Dalila yeel-a lame: «Fo ket n laada maam n yagd zirẽ la wilg maam b sẽn tõe n loe-f ne bũmb ninga.» T'a na n leoke: «B sã n yidg m gɛm a yopoe wã n wʋg-b ne sʋlg niiri wa peende, m pãnga menemdame tɩ m legb wa neb a taaba.» A Sãmsõ gũsame t'a Dalila yidg a gɛma n tui niir n wʋge ne koera. A wa n yaool n tãsame: «Sãmsõ, ad Filisti rãmba n tat-fo.» A Sãmsõ, nekame n bagemd a zug n kao koer-bõangã. B kell n ka bãng a pãnga sẽn yitẽ ye. A Dalila kong n yeela a Sãmsõ: «Fo yɩta a wãn n wẽendẽ tɩ f nonga maam tɩ f sũur yaool n zãr ne maam. Yaa naoor a tãab marsã la fo belg maam, m ket n pa mi f pãn-kãsenga sẽn be f zĩig ning ye.» Beoog sẽn vẽeg fãa a ra tara dɩdgre la sogsgo t'a Sãmsõ yama wa lak zãnga. A Sãmsõ pelga a pʋga n yeel-a: «Ad barg zɩ n sɩɩs m zobd ye tɩ b pʋlem-b-la Naaba-Wẽnde tɩ m nan ket m ma pʋgẽ. M zoobda sã n põnge, m pãnga na n sɛɛme, a na n menemame tɩ m lebg wa neb a taaba.» A Dalila bãngame marsã t'a sɩd pelga a pʋga la a sẽn bool Filisti rãmba soaalba, a yeel-b lame: «Wa-y marsã t'a pelga a pʋg n wilg-ma.» Filisti rãmba waa a nengẽ la b tẽegame n zɩ ligdã. A Dalila gãnega a Sãmsõ a noẽ t'a gũsi t'a bool dao t'a wa põng a zuga gɛma a yopoe wã. A Sãmsõ pãnga sɩnga woogre n wa tol n menem zãnga. A Dalila tãsame: «Sãmsõ, yik tɩ Filisti rãmba waame!» A nekame la a tagsame: «Sẽn ka pak pĩndã kõn pak rũnna ye, m na põs wa rasem kam.» A ra nan ka mi tɩ Naaba-Wẽnd bas-a lame ye. Filisti rãmba paam n yõk-a lame n pẽs a nini, n tall-a n kẽng Gaza. Bee b tɩ baoo bãeens a yi n sog-a la b kɩt t'a bilgd werd-m-toore, n werd zom. Dẽ tɩ b pag-a la bi-bees roogẽ. Zoobda sẽn põngã waa n sɩnga tobre. Filisti taoor dãmba me waa n tigma taaba n na n maan maoong sẽn ya maoong menga b wẽnd a Dagõ yĩnga la b noog b sũuri. B ra yetame: «Tõnd wẽnda dɩka d bɛ, a Sãmsõ, n sagl d nugẽ.» Zãma wã sẽn ta wẽnda taoore a kils-a lame la a yeelame: «Tõnd wẽnda dɩka d bɛ, a Sãmsõ, n sagl d nugẽ, yẽ n da ya fãad la kʋʋda.» B sũ-nooga ra pida zãnga tɩ b yeel tɩ b wa ne a Sãmsõ t'a maan baobgo tɩ b la. B yiisa a Sãmsõ bi-bees roogẽ n tall-a n wa la a reemame tɩ b gese. B tɩ yalsa a Sãmsõ lals a yiib sẽn zɩt dooga sugr tẽnsʋka. Yaa a Sãmsõ meng n yeel biig ninga sẽn da tat-a wã: «Tall-ma tɩ m paam n sɩɩs lals a yiibã sẽn zɩt dooga sugrã.» Rooga yaool n da pida ne Filisti nin-bɛdã. Rooga zugu, pagb la rap na ta tus a tã n da be be n get a Sãmsõ reema. A Sãmsõ pʋʋsa Naaba-Wẽnde n yeele: «Soaala-Wẽnde, m kos tɩ y tẽeg m yelle. Kõ-y maam dũnna yɛsa yãmb pãngã tɩ m dok m sũur ne Filisti rãmba n dol m nin a yiibã b sẽn pẽsã.» A Sãmsõ bablame n sɩɩs lals a yiibã sẽn da zɩt roogã. A rɩka a goabga n teeg lalg a ye, n dɩk a rɩtgo n teeg a to wã la a wɩka a menga. A tãsame: «Bɩ m ki la Filisti rãmba me ra põs ye.» A sẽn tus lalsã ne a pãnga fãa, rooga bur n lʋɩɩme. A bʋʋga nin-bɛdã la zãma wã fãa sẽn da tigma. A Sãmsõ sẽn kʋ neba a kũuma daare, yɩɩga a sẽn kʋ a vɩɩma tõre. A yaopa la a buuda waa n dɩka a yĩngã n tɩ mum Sorea ne Estaol tẽnsʋka, a ba a Manoa yaoogẽ. A Sãmsõ dɩ kãsengo yʋʋm pisi, Israyɛl. Ned n da kẽed Efrayim tãmsã t'a yʋʋr boond tɩ Mika. A Mika wa n yeela a ma: «Wanzurf wakɩ koeems tusr la koabga n wa n menem f roogẽ la fo kãaba b rɩkda beedo tɩ tol n lʋɩ m tʋbrẽ, ade, yaa maam n da rɩk-ba.» A ma wã leokame: «Bɩ Soaala-Wẽnd ning-f barka, m biiga.» A Mika lebsa a ma wanzurf wakɩ koeems tusr la koabgã. Ad-a ma wã sẽn yeele: «Mam meng n da rɩk ligd kãnga n kõ Naaba-Wẽnde, n gũudẽ tɩ foom, m biiga, wa rɩk-ba n dõog nin-naand n kõ-ma. Woto wã m le lebsd-b-la foom.» Dɩlla paga sẽn wa n lebs a biiga ligdã, a keesa wanzurf wakɩ koeems kobs-yi n kɩs yõaka. Yõaka yẽneg-b lame n mams nin-naande t'a Mika tol n baoo zĩig a roogẽ n ning-a be. A Mika zakẽ wã b ra zoe n sela kug peesem bũmbu. A kɩtame tɩ b tol n maam wẽn-naande la nin-naands sẽn paamd waoogre. A yãka a biig a ye n kõ maan-kʋʋr naam. Sasa kãng tɩ Israyɛl da nan pa tar dĩm ye, tɩ ned kam fã da maand a sẽn date, a sẽn tẽed tɩ sõmbame. Bi-bɩɩg a ye n da be tẽngã. A ra yita Bɛtelyɛɛm, Zɩɩda tẽn-peelmẽ; a rooga sak da yaa a Zɩɩda saka, a ra tʋmda Levit tʋʋmde, a ra yaa tẽnga sãana. A ra yii Bɛtelyɛɛm n na n bao tẽng sẽn sakd-a n kẽ. A sẽn kẽne a waa n ta a Mika zaka, Efrayim tãmsa zutu. A Mika sok-a lame: «Fo yita yɛ?» T'a leoke: «M ya Levitga, m yii Bɛtelyɛɛm, Zɩɩda tẽn-peelmẽ; m saad n baooda zĩig sẽn sakd-m n na n kẽ.» A Mika leok-a lame: «Sã n ya boto, bɩ f wa mam zakẽ n lebg m ba la m maan-kʋʋda tɩ m na kõ-f wanzurf wakɩ koeems piig yʋʋmde, m paas rɩɩb la futu.» A Mika goma woto n dɩdg Levitgã, t'a sak n na n zĩnd, n lebg wa zaka biiga. A Mika kõo Levitgã maan-kʋʋr naam. A paa zakẽ be n lebg maan-kʋʋda. Dẽ la a Mika yeel yã: «M sẽn paam tɩ Levit kãnga lebg m maan-kʋʋdã, m miime tɩ Soaala-Wẽnd na ges m yell neere.» Sasa kãng tɩ Israyɛl nan ka tar dĩm ye. Dẽ t'a Dã roog da baooda zĩig n na n kẽ t'a ra ka paam vẽenem a Israyɛl kamb a taaba sʋk ye. Dẽ me la a Dã kamba yiis neb a nu, tãb-biis sẽn tar sũuri. B yiis-b-la Sorea la Estaol tɩ b gilg n bãng tẽnga nenga. B ra yeel-b lame: «Saag-y n gese.» B waa n dʋ Efrayim tãmsã n kẽ a Mika zakẽ n yõg gãag-soabendo. B sẽn wa n kolg a Mika yirã, b wʋma Levitga koɛɛga. Dẽ la b waa n sok-a: «Ãnda n tall foom n wa ka? Fo maanda bõe ka? F paoong zema bõe ka?» A yeel-b lame: «A Mika maan-m-la woto, n paas woto; a yaood-m-la ligdi tɩ m tʋmd maan-kʋʋd tʋʋmde.» Tɩ b yeel-a: «Sã n ya boto, bɩ f sok Wẽnd n gese sorã d sẽn togdã na n baasa neere.» Levitga leok-b lame: «Kẽng-y ne laafi tɩ Soaala-Wẽnd meng n yãagd yãmb y sora zugu.» Neb a nu wã rɩka b sore n tɩ kẽ Layis. B mikame tɩ Layis rãmb da zĩi ne laafi, wala Sidõ rãmba, b ra ka nong zabr ye la b sũur da zãra ne yɩɩre. Nanambg a to ra ka rɩt naam b zug ye la ned ba a ye ra ka kẽed tẽngã n dat n dɩ naam ye. Layis rãmba da zãra ne Sidõ rãmba la b ra ka kẽ ned ba a ye soolmẽ ye. Neb a nu wã leba b tẽngẽ la Sorea ne Estaol dãmb sok-b lame: «Yãmb tagsdame tɩ bõe?» Tɩ b leoke: «Yik yã! D tɩ tak zabr ne-ba. D saaga tẽngã la yaa tẽn-sõngo. La yaa bõe tɩ y zĩ sɩɩ n ka leokdẽ? Da kao-y woto n zĩi n wa pa bob ye, n wa pa kẽng n deeg tẽng sẽn ya tẽn-sõng n maan y soolem ye. Y sã n wa kẽ tẽngã y na mik tɩ tẽnga rãmb ka zĩi n yɩɩdẽ ye. Gɩdgr buud kõn gɩdg-y tẽnga kõom ye, tɩ Soaala-Wẽnd dɩk-a lame n sagl y nugẽ. Tẽn-kãng gãe ne kood buud fãa.» Woto wã, Dã rãmba yii Sorea la Estaol ne tãb-biis kobs-yoobe sẽn bob b zab-teedo. B rʋʋ n tɩ wẽ-la b sik Kiriyat-Yearim, a Zɩɩda soolmẽ. Yaa rẽ me yĩng la boond zĩ-kãng tɩ Maane-Dã, a Dã sika, n tãag rũnna. A bee Kiriyat-Yearim nin-taoore. B sẽn dʋ Efrayim tãmsã, b taa a Mika yiri. Neb a nu wã sẽn da zoe n wa tẽngã, Layis tẽngã, yeela b saam-biisã: «Yãmb ka mi tɩ yi-kãnga rãmb tara b wẽn-naande la nin-naands b sẽn waoogde, n paas wẽn-naand a to sẽn bolg ne wanzurfu? Marsã wã bãng-y y sẽn na n maanega.» B teesa a Mika yirã, n kẽ Levitga sẽn da nok zak ningã; b pʋʋsame n sok zaka rãmb keelem. Tao tao tɩ tãb-biis kobs-yoobã gũbga zaka noore. Neb a nu wã, b sẽn da tʋm b rãmb pipi wã, dʋʋ yĩngr doogã n kẽ n dɩk wẽn-naandsã la nin-naandsã la bũmb ning sẽn da bolg ne wanzurfã. Wakat kãng tɩ maan-kʋʋda ra yɛsa rignoorẽ ne tãb-biisa kobs-yoob sẽn bob zabrã. Maan-kʋʋda sẽn yãe tɩ b kẽeda a Milka zakẽ la b loogd ne bõn-sõma wã, soka woto: «Yaa bõe la y maanda?» B leok-a lame: «Sĩndi, pĩ f noore, la tũ tõndo. Foo n na n yɩ tõnd maan-kʋʋda la d ba. Ges bʋg n são: fo sẽn ya nin-yend maan-kʋʋda bɩ f sẽn na n lebg sak a ye tõre, a Israyɛl doog a ye, maan-kʋʋda?» Leokra taa maan-kʋʋda yam. A reega wẽn-naandsã la nin-naandsã la a tũu Dã rãmb n looge. B le rɩka sore n tees Layis. B lʋɩɩsa kom-bõonesa taoore, rũmsã la teedã. Dã rãmba da paam n zãaga ne a Mika yirã la a Mika yagsa tigma taaba n sɩng Dã rãmba pʋgbo. B kelmame, b kaasa a Dã nebã tɩ bãmb me lɛɛg n teedg n gũud-b la b yet a Mika: «Bõe tɩ f rãmb neba woto?» A Mika leokame: «Ka yãmb n loogd ne m wẽnd-dãmb m sẽn da pees la m sẽn da rõog m yĩng laa, ka yãmb n loogd ne m maan-kʋʋd la? Y kees-m-la bõe? La y yɩta a wãn n le sokd ma: ‹Bõe n tar foo?› » Tɩ Dã rãmb yeele: «D da le wʋm ye, ka rẽ f sẽn lak b rãmb sɩɩga na lɛɛg n yẽeg-f lame n yãk f yõore la b wã f zaka.» Dã neba loogame. A Mika sẽn yãe t'a pãng ka ta bãmba a leba a yiri. Dɩlla Dã rãmb looga ne a Milka wẽn-naandã la a maan-kʋʋdã. B taa Layis la b kẽe n kooda zãng ne b sʋʋse neb sẽn da zĩ sɩɩ n pa tẽed yeele. B tol n yõoga b tẽnga bugum. Ned ba a ye ka wa a sõngr ye t'a ra zãra ne Sidõ la a ra ka lʋɩ ned ba a ye soolmẽ ye. Layis ra bee Bɛt-Reob tãng pennẽ. Dã rãmb le maneg n me-a lame n kẽ. B bool-a lame tɩ Dã, b yaab a Israyɛl biig a ye yʋʋre. Tẽnga pipi yʋra la Layis. Dã rãmb mee waoogr zĩiga n ning a Mika sẽn kɩt tɩ b maana. A Moyiiz yagenga la a Zersom biig, a Yeonatã, ne a meng kamba n yɩ a Dã maan-kʋʋdba n ta wakat ninga b sẽn tall-b n loog yembdo. B baoo zĩig n ning a Mika wẽn-naandã la a paa Silo n tãag wẽnd dooga lʋɩɩse. Wẽnd kãng t'a Israyɛl da nan pa tar dĩm ye. Levit a ye n da kẽed Efrayim tãmsa sʋka. A waa n dɩka pag n paase, a waa n dɩka Bɛtelyɛɛm bi-pugla n maan a paga. Bɛtelyɛɛm bee Zɩɩda tẽn-peelmẽ. B moora waa n yõsga taaba tɩ paga leb a ba zakẽ, Zɩɩda Bɛtelyɛɛm tẽnga. A paa be sẽn ta kiis a naase. A sɩda bʋʋga-a lame n wilg-a sẽn segd la a paam t'a le rɩk yir sore. Sɩda ra yii ne a yamba la a bõeens a yiibu. Paga tall-a lame n kẽes a ba zakẽ. Paga baaba yãend-a lame t'a yik ne sũ-noogo n wa seg-a. Rɛɛmba kos-a lame t'a pa da-yɩten-daare. B rɩɩme, b yũume, b gãanda ra-yɩten-daare. Daara a naas soaba Levitga ne a neba yika pĩnda n na n loog la a rɛɛmba yeelame: «Dɩ-y bilfu, n yẽeg y gĩini ne buri tɩ y na yaool n dɩk sore.» Tɩ b zĩnd n dɩ la b yũ, bãmb b yiibu, tɩ rɛɛmbã, paga ba, yeele: «M kot-f lame tɩ f sak n gãand yɛsa tɩ yɩ f sũ-noogo!» Raoa sẽn yik t'a na n looge, a rɛɛm le rɩdg-a lame t'a le gãand be. Daar a nu soaba, Levitga sãda beoogo n na n looge la paga ba le yeel-a lame: «M kot-f lame tɩ f reng n dɩ la y paa n ta zaabre.» La b yiiba naaga taab n dɩ. A sẽn bob n na n loog ne a pag la a yamba, la rɛɛmba sẽn le yeele: «Gese, wĩndig lʋɩɩme, zĩig zoe sobgame, gãand yʋngã yɛsa n noog d sũuri. Beoogo y na yik pĩnd n loog y tẽngẽ.» Raoa zãgsame n yik n dɩk a sor ne yʋngo n ta Zebuze rãmb tẽnga. (B boond-a lame tɩ Zerizalɛɛm yɛsa.) Da yaa yẽ ne a paga la a yamba la a yaanwaoor bõeens a yiibu. B sẽn waa n kẽed Zebuzitsa tẽng tɩ zĩig sobgame. Dẽ la yamba yeela a zu-soaba: «Wa-y tɩ d kʋʋg d sorã n yõg gãag-soabendo n gũ beoogo.» Tɩ zu-soaba leok: «D pa na n kẽ bu-zẽn-dãmb tẽngẽ ye, neb sẽn ka kĩ ne a Israyɛl ye, d na n taa Gibea. A yeela a yambã: d mogd n paam Gibea bɩ Rama n gãand.» B le rɩka sore n digd taoore. B sẽn paam n kolg Gibea sẽn be a Bẽnzame tẽn-peelmẽ la wĩndg sẽn lʋɩ, tɩ b bʋdg n tũ Gibea n yõg gãag-soabendo n na n gũ beoogo. B sẽn kẽ tẽngã b paa raagẽ wã. Ned ba a ye ka bool-ba a zakẽ n kõ-b roog ye. Zĩiga sẽn sobge, nin-kẽem a ye yi a pʋʋgẽ n watẽ. Da yaa Efrayim tãmsa ned sẽn wa n kẽed Gibea. Gibea rãmba yaa a Bẽnzame yagense. A rooga a neng n yãe Levitgã sẽn zĩ raagẽ wã ta sok-a: «F yii yɛ, f rabda yɛ?» T'a yeele: «D yii Bɛtelyɛɛm, Zɩɩda tẽn-peelmẽ la yaa Efrayim tãmsa poor tẽnsa la d data. Yaa be la m da be. M da taa Bɛtelyɛɛm, a Zɩɩda tẽn-peelmẽ n lɛɛgdẽ la kaanẽ m ka paam gãag-soab ye. M yaool n ket n tara yamdo m bõeensa yĩnga, dɩɩb la rãam me keta maam ne m pagã la m yamba yĩnga. Bũmb ka paoog ye.» Dẽ la Nin-kẽema yeel yã: «Ne y kẽnd-kẽnde! Bas-y tɩ m deeg y sãando la y ra pa raagẽ wã ye.» A tall-b lame n kul a yiri n bao yamdo n kõ bõeensã, n bao koom n kõ neba tɩ b so, n bao rɩɩb n kõ-b tɩ b rɩ la rãam n kõ-b tɩ b yũ. B sẽn waa n ket n dɩtẽ la tẽnga nin-yaals sẽn sũ taaba n wa yɛs n tar ne zaka soaba: «Yiis raoã sẽn sig fooma n kõ-do tɩ d sõs ne a.» Zaka soab yiime n gom ne bãmb woto: «M saam-biisi, pa segd ye, da maan-y bi-beelem ye. Daoã yaa mam gãag-soaba, da maan y sẽn ya wɩɩbd ye. M tara bi-pugla, sẽn nan pa kul sɩd ye, m na rɩk-a n kõ yã. Maan-y y sẽn data ne yẽndã la y sẽn baood ne raoã yaa wɩɩbdo sẽn pa segd ye.» B pa sak n kelg ye, tɩ raoã kong n yiis a pagã n kõ-ba. B yõg-a lame, n yaal-a tɩ beoog vẽeg. Sõor sẽn wa n pukdẽ la b bas-a. Beoog sẽn vẽeg tɩ paga lɛɛg n kẽed zakẽ la a sẽn lʋɩ a sɩda sẽn da be roog ninga noore n kell n pa be tɩ sõor puk zãnga. Sõor sẽn puki, a sɩda yiime n na n le rɩk a sore la a sẽn lak rignoore, a yãee a paga sẽn tẽeg n gãe. A sɩda yeel-a lame: «Yik tɩ d looge!» A pa wʋm kʋrkʋr ye. A rɩk-a lame n palg a bõanga n ta a yiri. A sẽn ta yiri, a rɩka a sʋʋga n ges a pagã n pase, n pase, zĩis piig la a yiibu. Dẽ poore a toola paga neong Israyɛl tẽn-peelma fãa. La ned ning fãa sẽn yãend yellã ra yeta a sũurẽ: «Israyɛl kamb sẽn yi Ezipt tɛka n ta rũnna zĩ n yãend yell a woto buud ye.» Levitga ra kõo noor kãngã a sẽn tʋm b rãmbã: «Gom-y woto ne Israyɛl kamba: Zĩ bug la b yãe yell a woto buudu, a Israyɛl sẽn yi Ezipt tẽng tɛk n tãag rũnna? Dɩlla tags-y, yẽs-y ne taaba la y leoke.» Israyɛl kamba fãa yika wa nin-yɛnga, al Dã n ta Beerseba, la al Galaad tẽn-peelmẽ, n wa tigim Mispa, Soaala-Wẽnd sẽn yãk tẽng ning tɩ ya b waoogr zĩiga. Buuda kãsem-dãmba, Israyɛl sagsa fãa, zĩnda be: neb tus kobs-naase sẽn tõe n bob zabre. A Bẽnzame kamba bãngame tɩ yaa Israyɛl tõr n wa Mispa. Koɛɛg n wa n yi Israyɛl kamba sʋka: «Wilg-y yel-beeda sẽn sɩng to-to?» Tɩ paga sɩda, Levitga, na n yeele: «M da taa Gibea sẽn be a Bẽnzame tẽn-peelmẽ, ne m paga, n na n yõg gãag-soabend tɩ beoog vẽege tɩ m le rɩk m sore. Gibea rãmb yika yʋngo n gũbg m sẽn sig yir ningã. B da rat n kʋʋ maam. Sã n ya ne pagã b maan-a-la pãnga tɩ wa tol n tũ ne a yõore. M yaool n dɩka m pagã n beese, n tool Israyɛl sagsa fãa tɩ yaa wɩɩbdo n maane, bũmb sẽn wat ne buuda yʋ-sãanga. Dɩlla, yãmb fãa Israyɛl kamba, sẽn tigim ka Soaala-Wẽnd taoore, yẽs-y ne taaba la wilg y sẽn na n maanega.» Neba fãa yika wa nin-yɛng n yeele: «Tõnd ned ba a ye kõn le kẽ a zakẽ, ned ba a ye kõn le kẽ a roogẽ! Ad-d sẽn na n maan bũmb ning ne Gibea rãmba. D na n poeesame n sʋk tãb-biis nins sẽn na n tak zabrã. Israyɛl sak fãa pʋgẽ, neb piig koabg zugu, neb koabg neb tusr zugu, neb tusr neb tus piig zugu tɩ b tɩ wa ne rɩɩbo tãb-biisa sẽn na n tɩ zab ne Gibea rãmb yĩnga. B na zabame n wa tol n yẽes wɩɩbda sẽn wɩɩb a Bẽnzame tẽn-peelmẽ.» Yɩɩ woto la Israyɛl kamb sũ taab wa nin-yɛnga n na n zab ne tẽngã. Israyɛl sagsa tʋma neb a Bẽnzame tẽn-peelmẽ. B tɩ sok-b lame: «Yaa bõe tʋʋm wẽns n tʋm y nengẽ? Woto wã, yiis-y nin-yaalsa fãa sẽn be Gibea n kõ-d tɩ d kʋ n yẽes rẽgda sẽn bol a Israyɛl gillã.» A Bẽnzame rooga pa tʋlg n kelg Israyɛl kamb a taaba, b saam-biisa ye. A Bẽnzame kamb yii b tẽnsẽ n wa tigim taab Gibea n na n tak zabr ne a Israyɛl. B sõda a Bẽnzame kamba sẽn yi b tẽnsẽ n wa Gibea wã, la b paama neb tus pisi la a yoobe sẽn tõe n wõog sʋʋga. Gibea rãmba pa sõd n naag ye. Gibea rãmba da yaa neb kobs-yopoe sẽn mi zabr sõmb sõmbo. Bãmb sʋka neb koobs-yopoe n da be tɩ b goabg vɩ wa b rɩtgo. Bãmb la zab mitba meng-menga. B sã n ning b loobsa kuga n gẽeg zoob beelle, b lobgd n yõk-a lame. Israyɛl kamb me sõda taaba. A Bẽnzame toog sẽn kae, b ra yaa tus kobs-naase, n ya zab mitba, al tɩ sʋʋg tʋmd beed b nugẽ. B rʋʋ Betɛl n na n tɩ sok Wẽnde. Israyɛl kamba yeelame: «Tõnd sʋkã, sak bʋgo n na n yɩ pipi n tak zabr ne a Bẽnzame?» La Soaala-Wẽnd yeelame: «Yaa a Zɩɩda n na n yɩ pipi.» Vẽkẽmbeoogo, a Israyɛl bobame la yaa Gibea noorẽ la a wẽe a sika. B sẽn yi n na n tak zabr ne a Bẽnzame, Israyɛl kamba fãa tongame n tees Gibea. A Bẽnzame yii Gibea la badaare, a kʋʋ zĩig pʋgẽ, Israyɛl kamb tus pisi la a yi. A Israyɛl zãma wã le kenga a sũuri n le tɩ yals pipi raara zĩigẽ. Israyɛl kamba waa Soaala-Wẽnd taoore n yãb n ta zaabre la b soka Soaala-Wẽnde: «Ket n yaa tɩlɛ tɩ m zab ne m saam-biig a Bẽnzame bi?» Tɩ Naaba-Wẽnd leoke: «Tak-y zabr ne-a.» Daar a yiib soabã, a Israyɛl yiime n le kolg n na n tak zabr ne a Bẽnzame. Badaare, a Bẽnzame sẽn le yi Gibea, zĩig pʋgẽ bala, a kʋʋ Israyɛl kamb tus piig la a nii. B fãa yaool n da yaa tãb-biis sẽn mi zabre ne sʋʋga. A Israyɛl tãb-biisa la a zãma wã waa Betɛl. B zĩnda Soaala-Wẽnd taoore n sɩng yãbre, n loe b noor tɩ wĩndig kẽ, n kʋ yũ-nood maand la laafi kosg maand. Israyɛl kamba soka Soaala-Wẽnde. Segame tɩ wẽnd kãnga, zood kasetã, kuga walsa koglgã, ra bee Betɛl. A Elazar biig a Pinas, a Aarõ yagenga, da yɛsa a sɛɛgẽ baraare. A Israyɛl sokra yɩɩ woto: «M na n basa zabra t'a sɛ ne m saam-biig a Bẽnzame bɩ m tog n kell n paa ne-a?» Tɩ Naaba-Wẽnd yeele: «Kẽng-y, tɩ beoogo m na rɩk-a n sagl y nusẽ.» A Israyɛl solga tãb-biisi n gilg Gibea. Dasem a tãab daarã, Israyɛl le bobame n na n tak zabr ne a Bẽnzame la b le wa tedga ne Gibea rãmb wa rasem kam. A Bẽnzame kamba yi Israyɛl kamba segbo, b sakame n zãag ne b tẽngã la b le sɩnga wa rasem kam n kʋʋd Israyɛl kamba. B kʋʋ tẽn-nabrẽ wã neb pis-tã, Betɛl la Gibea soya zutu. A Bẽnzame kamba yeelame: «Bãmba le lʋɩ d nugẽ wala pipi raarã.» Sã n ya Israyɛl kamba, bãmb da yetame: «D na n zoeeme tɩ b pʋg tõnd n paam n zãag ne b tẽngã, n dɩk soya.» A Israyɛl neba fãa yika vugri n tong zabr tongre Baal-Tamar. Wakat kãng me la Israyɛl tãb-biis sẽn da solge, pusg wa laoose, Gibea, nin-taoore. Neb tus piig sẽn tũus sõmb-sõmb n wa Gibea noorẽ. Zabra yɩɩ zabre. A Bẽnzame da ka mi tɩ yell n na n pak-a ye. La Soaala-Wẽnd dɩka a Bẽnzame n sagl a Israyɛl nugẽ. Badaare a Israyɛl sẽn kʋ taa tus pisi la a nu la koabga. B fãa gill yaool n da yaa tãb-biis sẽn minim n zab ne sʋʋga. A Bẽnzame mikame t'a konga pãnga. A Israyɛl da basame t'a Bẽnzame kolgdẽ t'a ra teega a sẽn solg b rãmbã Gibea noorẽ. Sẽn solg-ba lɛɛg n kẽe Gibea pʋgẽ n kʋ a neba gilli ne sʋʋse. Yella sẽn waa n da nan ka maana, tãb-biis nins sẽn lik b mense la sẽn da solg-bã da reng n seda ne taab woto: d sã n paam n kẽ tẽngã, bugum la d na n maan t'a bug-zõosa ruk n kul yĩngri, tɩ bãmb sẽn da maan wa b zoetame wã lɛɛg n teeg ne a Bẽnzame. A Bẽnzame sẽn paam n kʋ neb pis-tã a yeelame: «Sɩda bãmba na n le paa tõnd nugẽ wa pipi raarã.» Wala b sẽn da sedã, bug zõos ruka yĩngri, tẽnga pʋga, t'a Bẽnzame wẽnemd n mik tɩ ya tẽnga tõre n tilg bugum sẽn kuiis sagãna. A Israyɛl lɛɛg n teega ne a Bẽnzame. A Bẽnzame yɛɛsame t'a pa sãmb yell ning sẽn lʋɩ a zug ye. B zoeeme n kẽ weoogo, a Israyɛl taoore. Pʋgba ra yaa tʋʋlga. Mik sẽn pa yãe n zãage, b wẽneg n lʋɩ sẽn da zoe n kẽ-b tẽnga rãmba nugẽ. Israyɛl kamba gũbga a Bẽnzame, b ka le vʋʋs ne a rigb ye. B tõog-b la Gibea noorẽ, yaang sẽnẽ. Yɩɩ neb tus piig la a nii n lʋɩ a Bẽnzame sakẽ. Fãa yɩɩ sẽn da tar b zabr sũuri. Sẽn põs-ba wẽnemd n teesa we-raoogo, Rimõ tãnga. Neb tus a nu n pa sor zugu. A Israyɛl pʋga a Bẽnzame n zãag zĩiga, n ta al Gidom, n le kʋ neb tus a yi. B zãng fãa sẽn ki baraar yaa tus pisi la a nu, a Bẽnzame sakẽ. B fãa ra mii zabre, b fãa da tara zabr sũuri. Neb kobs-yoob bala n paam n ta Rimõ tãnga la b paa be kiis a naase. A Israyɛl lebg kẽe a Bẽnzame nebã, n kʋ-ba, ne sʋʋga. Baasda tẽng a ye, n kẽ tẽng a to, baasa nebã, n kẽ rũmsã la sẽn vɩ ne yõor fãa. B sẽn yãe tẽng ning fãa, a Bẽnzame soolmẽ, b ning-a-la bugum. Kãabg ning a Israyɛl sẽn da kãab Mispa la woto: «Ned ba a ye kõn dɩk a bi-pugl n kõ a Bẽnzame ye.» Woto wã zãma wã waa Betɛl, n zĩnd Soaala-Wẽnd taoore tɩ wĩndig wa kẽ la b tar yãbr la waasgo. B ra yetame: «Soaala-Wẽnde, Israyɛl Wẽnde, bõe t'a Israyɛl tak yel-beed a zugu, n zĩ rũnna t'a buuda sak a ye ka le ketẽ?» Vẽkẽmbeoogo b yika pĩnda n me maan-kugri beenẽ, b kʋʋ yũ-noog maand la laafi kosg maando. Dẽ poore b yeelame: «Ya buuda sak bʋgo n pa rũnna tigsga n pa wa?» B ra le wẽename tɩ b na n kʋʋ ned ninga sẽn pa na n wa Mispa, Soaala-Wẽnd taoore. Sɩda a Israyɛl da lɛɛg n yãbda a Bẽnzame n yetẽ: «Rũnna-rũnna, sak a ye n menem Israyɛl tẽn-peelmẽ. D na n yãee pagb yɛ n kõ sẽn põs-bã? Tõnd ka wẽen ne Wẽnd tɩ d kõn dɩk d kom-pugli n kõ-b bɩ?» Dɩlla a Israyɛl sokame: «Yaa sak a bõe n ka wa Mispa tigsgã?» Mik segame tɩ Yasbe sẽn be Galaad ned ba a ye ka wa Mispa tigsga ye. B sɩd sõda taaba la b pa yãe Galaad Yasbe ned ba a ye ye. Dẽ la b tʋm Yasbe tãb-biis tus piig la a yiibu la b kõ-b-la no-kãnga: «Tɩ kẽ-y Galaad Yasbe tẽnga n kʋ Yasbe rapa n paas pagb la kamba. Ad-y sẽn na n maan bũmb ninga. Y na n kãaba beedo rapa gilli la pagb niyns fãa sẽn tar-b sɩdba. Y ka na n kʋ bi-pugl sẽn nan pa kul sɩd ye.» B sɩd maana boto. Pʋg-sɛdba sõor yɩɩ kobs-naase; yaa kom-pugli sẽn nan ka kul sɩdba. B tall-b lame n dig Silo, Kanaã tẽnga. Dẽ poore b tʋma neb Rimõ tãngẽ tɩ b tɩ gom bas-y-tɩ-sɛ goam ne Bẽnzame rãmba. A Bẽnzame sak n waame. B rɩka Galaad Yasbe pabg nins sẽn da kellã n kõ-ba la pa ta b fãa ye. A Bẽnzame nimbãaneg yõk-b lame tɩ Soaala-Wẽnd da sakame tɩ sak a ye boog Israyɛl buudẽ. Buuda kãsem-dãmb waa n yeelame: «Bõe la d na n maane tɩ sẽn kell-bã paam pagba, a Bẽnzame pagb la sẽn ki zãng la. Bũmb tõe n keesa a Bẽnzame yĩnga, t'a rooga ra menem Israyɛl tẽn-peelmẽ? Tõnd la sẽn ka le tõe n dɩk d kamb n kõ bãmb la!» Israyɛl kamba ra waa n kãaba woto: «Wẽnd na sãam ned ning fãa sẽn na n kõ pag a Bẽnzame neda!» B yeela taaba: «Ade, kibs a ye la b maand yʋʋmd-yʋʋmd fãa, Soaala-Wẽnd yĩng, Silo. Silo bee Betɛl goabga, sor ning sẽn dʋʋd Betɛl n tat Sikɛm, n yaool be Lebona rɩtgo.» Ad-b sẽn yeel Bẽnzame kamba: «Kẽe-y bugsuntundã n soonde! Maan-y gũusgu la y sã n wa yãe Silo kom-pugli tɩ b yit n na n sao, bɩ y yi, y sẽn solgẽ wã. Ned kam fãa yõk a paga n leb Bẽnzame tẽn-peelmẽ. B ba-rãmb bɩ b kẽem-dãmb sã n wa n na n zab ne yã, d na yeel-b woto: ‹Maan-y-b sugri, tɩ zabra wakato, b ka tõog n paam pag bãmb ned kam fãa yĩng ye. Yãmb meng pʋs n ka tõe n kõ-b pagb ne yamleoogo, n ka beeg Naaba-Wẽnd, y wẽenega poor ye.› » A Bẽnzame maana wala b sẽn wilgã, b kẽe saoodba sʋka la ned kam fãa yõka a paga n looge, n lɛɛg n wa b tẽngẽ n le maneg-a n me n kẽ. A Israyɛl me sẽegame; ned kam fãa leba a tẽngẽ la a sakẽ. Wakat kãng tɩ Israyɛl nan ka tar dĩm ye la ned kam fãa ra maanda a sẽn date, a sẽn tẽed tɩ yaa sõmbo. Bʋ-kaoodba wakato la kom lʋɩ tẽngã, tɩ Zɩɩda Bɛtelyɛɛm ned a ye yi ne a paga la a kamb a yiibu n tees Moab dãmb wetẽ. Daoã da boondame t'a Elimelɛk, a paga, a Nowemi, a kamba: a Malõ la a Kilyõ. B ra yita Efrata sakẽ, Bɛtelyɛɛm tẽnga, Zɩɩda soolmẽ. B sẽn ta Moab rãmb wetẽ, b paama zĩig n kẽ. A Elimelɛk, a Nowemi sɩda, kiime n bas-a ne a kamba a yiibu. Kamba yii kãadem ne Moab kom-pugli: a Orpa la a Rut. Yaa yʋʋm piig la b pa be. Kamb a yiibã, a Malõ la a Kilyõ waa n kiime t'a Nowemi lebg a ye, yẽ n ka sɩda, yẽ n ka biiga. T'a na n kong n yi a Moab weoogẽ n leb a tẽngẽ tɩ Wẽnd nimbãan-zoeer da leb n waa ne tɩgr be, b neba yĩnga. A Nowemi yi-la a sẽn da beẽ wã, yẽ ne a bi-pagb a yiibã. B rɩka sore n na n le wa Zɩɩda tẽn-peelmẽ. A Nowemi tees n yeela a bi-pagbã: «Lebg-y, ned kam fãa leb a ma roogẽ la Wẽnd na zã-y b nugẽ, daar fãa, wala y sẽn zã y sɩdb rãmba sẽn ka wã la mam menga. Wẽnd na zĩndg-y zĩ-sõngẽ, sɩd-sõng zakẽ.» A sẽn gom n sɛ, a mobg-b lame la bi-pagba sɩngame n zẽk b koɛɛg n tar wiisgu. B naaga taab n yeel a Nowemi: «Tõnd ka na n leb d ma roogẽ ye. D na n tũu-foo n leb f buudẽ.» T'a Nowemi me na n yeele: «Bõe yĩng la y na n tũ-maam, m kamba, kul-y, m tõe n le roga sɩdb-rãmb n kõ-y bɩ? Kuli yã, m kamba, leb-y y tẽnsẽ tɩ m lebga pʋg-yãanga, m ka tõe n le yi kãadem ye. Ba m sã n yeel tɩ tẽeb ket n bee me, m sã n yeel tɩ yʋnga bala m na n paama sɩda n dog kamba, y na yaas n gũ tɩ b lebg bɛda? Y na mong-y mens sɩda? Ayey! M kamba, m sũ-sãanga looga toogo, a zʋʋga yãmb rẽnna, yaa mam zug la Wẽnd zɩsg b nugã n yɩɩda.» Kamba le maneg n ninga nintãm. A Orpa mobg-a lame la a leba a ma roogẽ. A Rut zãgs n paa ne-a. Dẽ la a Nowemi yeel-a: «Ges f tũud-n-taagã, yẽ leba a ba-yiri, a lɛɛg n na n tɩ tũ a saam-dãmb wẽnde. Fo me maan wa yẽ, pʋg-a!» T'a Rut na n yeele: «Da mak tɩ m na bas-foo, tɩ m na zãag ne foom ye. Fo sẽn dabdẽ, be la m na n kẽnge, fo buuda la m buudu, fo Wẽnd la mam Wẽndã. Fo sẽn na n ki zĩig ningã be la m kiida tɩ b mum-ma. Sã n ka kũum n welg-d ne taaba, sã n ya m zʋgã n wa ne welgre, bɩ Soaala-Wẽnd sɩbg-m naoor a yi.» A Nowemi mikame t'a Rut zãgsa loogre t'a sĩnd n bas-a. B tũu taaba n dig Bɛtelyɛɛm. B taame, tɩ Bɛtelyɛɛm na n yɛɛse, tɩ pagb na n sogs taaba: «Yaa a Nowemi bɩ?» La a yeelame: «Da le bool-y-m t'a Nowemi ye, m lebga a Mara, tɩ Naab a Wẽnd pidsa m yama ne tɩɩsem. M da tara fãa m sẽn waa n dabda la Wẽnd ka sak tɩ m lɛɛg n wa ne bũmb ye. Bõe yĩng la y na n kell n bool m t'a Nowemi? Ka Wẽnd nimbãan-zoeer kaset la m dɩ ye, yaa pɛt la m dɩ yã.» Yaa woto la a Nowemi lɛɛg n wa ne a bi-pag, a Rut, Moab bi-pugla. Yaa alkam kɛgenga tigsg wakato la b ta Bɛtelyɛɛm. Roagd a ye, saam-biig a ye, n da kell a Elimelɛk, a Nowemi sɩdã. A nug ra tarame, a ra boondame tɩ Booz. Moab bi-pugl, a Rut, yeela a Nowemi: «M kota sore n tɩ yiis sẽn na n sak a soab pʋʋgẽ.» T'a leok-a: «Kẽng wɛ, m biiga!» A Rut pʋga tigsdba la yaa bãmb sẽn da basd tɩ rʋʋgdẽ wã la a ra wʋkda. A zug sẽn ya noogo, yɩ-la a Elimelɛk roagda, a Booz pʋʋgẽ, la a kẽng yã. Segame t'a Booz yii Bɛtelyɛɛm n nan ta n pʋʋsd tigsdbã: «Wẽnd na ning y barka!» Tɩ bãmb leoke: «Wẽnd na zĩnd ne foo!» A Booz soka sõgen ning sẽn da so-a tʋʋma gesgã: «M ba bõe pag la pʋg kãngã?» Sõgna leokame: «Ad-y yaa pag ninga sẽn tũ a Nowemi Moab weoogẽ n wa wã.» A taa n yeel-m lame: «M kota sore n pa tigsdba poorẽ n yiis. Yaa rẽ la a wa ka, la al yibeoogẽ a sẽn tar yiisgu la a sẽn tare.» T'a Booz na n yeel a Rut: «Kelg neere, m biiga, da kẽng ned a to pʋʋgẽ ye, pʋs n pa ka n pʋg m nebã. Modg n pʋg-b neere tɩ m yeela kom-bɩɩba tɩ b ra sɩɩs-f ye. N paase, m togs-b-la woto: Ko-yũud sã n tar-fo bɩ f tɩ yũ b sẽn sui b yʋyã.» A Rut wõgemdame n kɩ a neng tẽnga n yeele: «M bee yɛ tɩ y get-m ne nimbãan-zoeere, ne m sẽn ya tẽn-zẽng paga?» Dẽ la a Booz me leokre: «Ad-b togs-m lame, n le togs-ma f sẽn maan bũmb ning fãa ne f sɩda ma, f sɩda loogr poore. B wilg-m lame tɩ f basa f ba, la f ma, la f ba-yiri n na n wa kẽ tẽng f sẽn zɩɩ n kẽ zaamẽ la rabɩtẽ ye. Wẽnd na rol f yel-sõmd fãa. Israyɛl Wẽnd na yao-f zãnga, tɩ fo waa n soonda bãmb maasmẽ.» A Rut me leokame: «Wẽnd na kɩt tɩ y kell n tʋlg-m ne neere, m zu-soaba, yãmb nooga m sũuri, n gom bʋgsg-bʋgsgo, ne y yem-poakã, ne ned sẽn zãr tɩ y ges-a wa y yem-poak menga.» Dɩɩb wakat sẽn ta, a Booz yeela a Rut t'a kolge n yãk buri n suk zẽ-miisgã. T'a Rut na n zĩnd n yegl tigsdbã, t'a Booz kɩt tɩ b bao ka sẽedem n kõ-a. A rɩɩme n tɩge tɩ tol n keese. A sẽn le yik n na n yiisi, a Booz yeela nebã: «Bas-y t'a yiis n yeg kalsã la y ra yaal-a bada. Y tõeeme meng n bas y nugẽ tɩ rʋʋge t'a pʋgd n wʋkdẽ la ra y ra yeel-a tɩ bũmb ye.» A Rut rɩgsame tɩ zĩig sobge t'a pãb a sẽn wʋkã n paam alkam kɛgeng peoogo. A tʋkame n kul n tɩ wilg a ma. A wilg-a-la a sẽn dɩ n kellã, n tol n dɩk n kõ-a. Dẽ la a ma sok-a: «Yaa yɛ la f tɩ yiisi? Yaa yɛ la f tɩ tʋme? Bɩ Wẽnd ning sẽn maan-f neer a woto barka!» Dẽ la a Rut wilg a ma a sẽn tʋm ned ninga pʋʋgẽ. A yeelame: «Dũnna m tɩ yiisa a Booz pʋʋgẽ.» A Nowemi yeela a bi-paga: «Wẽnd ninga kɩɩms la nin-vɩɩs sẽn dɩt a soab sõma, paam barka!» N le paase: «A Booz yaa tõnd doagda. Sã n baood ned ninga sẽn tõe n dɩ a Elimelɛk raboog bũmbu, a bee sʋka.» Moabitga, a Rut, kʋʋga a Nowemi: «Ad-a sẽn yeel-m yɛsa: pa ne m neba tɩ tigsga wa sɛ zãnga.» T'a Nowemi na n yeel a bi-pag, a Rut: «Dẽ yaa sõmbo, woto pʋʋg a to rãmb kõn yaal f ye.» A Rut sɩd paa ne a Booz tʋʋm-tʋmdba tɩ alkam kɛgenga la alkam pɛɛlga tigsga wa tol n sɛ. Sasa kãng t'a Rut da ket n bee ne a ma, a Nowemi. A Nowemi wa n yeela a bi-pag, a Rut: «M biiga, ka segd tɩ m pids f sũ-noogo n bao zĩig n kõ-f bɩ? Mik a Booz ne tõnd yaa rogem la yẽ n bas foo tɩ f pʋg a rakõapa. Bãng tɩ rũnna zaabrã a na n tɩ yelga a ki zɛɛgẽ. So koom, bao ka-noog n zɛ, bao fu sõma n yeelg, dɩk zɛɛga sore la ra sak t'a bãng tɩ yaa foo tɩ ka a rɩɩba poor ye. A sã n wa na n gãande, f na bãng a gãaga zĩiga. Wa marsã, n pilg a naoẽ wã n gãande. Yẽ n na wilg foom marsã yɛla sẽn na n yɩ-la.» A Rut leokame: «M na maan wala f sẽn togs-ma fãa.» A Rut sẽn kẽng zɛɛgẽ wã a maana wala a ma sẽn togs-a. A Booz dɩɩme la a yũ, n yik ne sũ-noogo n tɩ gãand n yegl a ka-rʋrã. A Rut kolgame n bao zĩig a naoẽ n gãande. Zĩig wa n zʋʋgame t'a Booz rigemd n nek n ges n mik tɩ yaa pag n gãe a naoẽ, t'a na n sok: «Foo la a bõe?» T'a yeele: «Maam la y yem-poak, a Rut. M kos tɩ y tẽeg y fuuga noor n pil-ma tɩ yãmb me tõe n dɩ-la a Elimelɛk yõodo.» A Booz yeelame: «Wẽnd na ning f bark, m biiga, fo sẽn maand marsã wã yaa neer n yɩɩd waoogr ning f sẽn waoog buuda pĩnda tɩ f ra tõe n baoẽ la arzɛk rãmba bɩ naong rãmba sẽn ya kom-bɩɩba n yi kãadem ne bãmba. Da maan dabeem ye, m na maan f sẽn dat fãa. Ade Bɛtelyɛɛm tẽn-tõra miime tɩ f yaa pag sẽn be yõodo. La m sã n tõe n welg m roagda raboogo, bãng tɩ m ka m ye ye. Ned a to n le pẽ ne rogma n yɩɩd maam. Dɩlla pa ka yʋngã la beoog yibeoogo m na wilg roagdã t'a sã n dat-fo, a na yao a sẽn tog n yao bũmb ningã tɩ f yaool n kul-a. A sã n yeel t'a yam ka foo, m wẽend ne Wẽnd tɩ m na reeg-fo, la pa ka n ta beoogo.» A Rut paa a gãagẽ wã. A Booz yika zĩiga sẽn wa n ket n ya pʋlʋm-pʋlʋm tɩ ned ka tõe n bãng a to n bake. A ra yeta a meng tɩ ka tog tɩ b bãng tɩ pʋg kãnga n wa zɛɛgẽ wã ye. A neka a Rut n yeel-a: «Tẽeg f fuugu.» T'a tẽege, t'a ning ka beel wam a yoobe t'a tʋk n lɛɛg n wa yiri. A Rut sẽn poog la a Nowemi sẽn yeele: «Tɩ yɩɩ wãna, m biiga?» La a Rut togsa fãa. A le paasame: «A Booz n kõ maam koodã n yet tɩ pa segd tɩ m lɛɛg n wa zaalem ye.» A Nowemi yeelame: «M biiga, zĩnd ne laafi tɩ d wa bãng yɛla sẽn na n baas to-to. Nin-kãnga kõn bao vʋʋsem tɩ baas neera ka baas rũnda bal ye.» A Booz tɩ zĩnda noor ninga tẽnga rãmb sẽn kaood b bʋʋdã la a waa n yãee raoa a ye sẽn tõe n welg a roagda a Elimelɛk raboogo, la a bool-a lame n yeel-a: «Zagla, yaas ka! Wa zĩnd ka bilfu!» A waa n zĩndame. A Booz tũusa tẽnga nin-kẽems piiga n yeel bãmb me tɩ b zĩnd la b zĩndame. A yaool n yeela a roagdã: «Ad-a Nowemi, pag ninga sẽn da kẽeda Moab tẽnga lɛɛg n waame la a rat n koosa d kẽem a Elimelɛk pʋʋgã bogre. Dẽ la m tʋlg n wilg-fu, tɩ f bãnge, la m yet tɩ f ra pʋʋgã tɩ tẽnga rãmb la tẽnga nin-kẽemba yɩ d kaseto. F rat n yaoo pʋʋga bɩ f yao, f pa rat bɩ f wilg-ma. Foo n so koɛɛga pipi tɩ sã n ya rogmẽ wã foo n pẽ n yɩɩd maam.» La raoã yeelame t'a na n daa pʋʋgã. T'a Booz na n paase: «Bãng tɩ f sẽn deeg pʋʋga raare, baraar me f reegda a Rut, Moab biigã, a Nowemi bi-pagã, n tong a Elimelɛk rogem yũuga, a Elimelɛk meng soolmẽ.» Raoã leokame: «Sã n ya boto m pa tõe n da pʋʋga ye tɩ m na n bõna m menga. Bɩ fo ra pʋʋgã tɩ mam ka tõe ye.» Yaool n da yaa Israyɛl rãmb dog-n-miki tɩ f sã n da bũmbu, bɩ f sã n tek bũmbu n dat n pids kaseto, bɩ f yãk f neodr n kɩse. Yaa boto la Israyɛl kamba da pidsd b kaseto. Daoã yeela a Booz: «Fo ra pʋʋgã!» A sẽn yeele a pidga a neodr n kɩs kaset yĩnga. A Booz yeela nin-kẽemsã la tẽnga rãmba: «Ya y fãa taoore la m deegd a Nowemi nugẽ, a Elimelɛk, ne a kamba a Kilyõ la a Malõ sẽn da so fãa. Yaa y nifẽ la m deegd a Rut, Moab biiga, a Malõ pʋg-kõorã, n na n tong m kẽema rogem yũuga, a meng soolmẽ t'a yʋʋr da menem a buudẽ la a tẽngẽ ye. Dẽ fãa yaa y nifẽ.» Sẽn da zĩ-b tẽnga bʋʋd sẽn kaood noor ningã, fãa yeelame: «Yaa d nifẽ.» La b paasame: «Bɩ Wẽnd kɩt tɩ pag ning f sẽn na n peegã wẽneg a Rasɛl ne a Lea. Tɩ bãmb b yiib n mee Israyɛl doogo. Wẽnd na kɩt tɩ f kɩ yẽgen Efrata, Wẽnd na kɩt tɩ f yʋʋr yi Bɛtelyɛɛm! Wẽnd na yalg f buudu ne pʋg kãngã, tɩ f buuda wẽneg a Perɛs buudu, a Zɩɩda ne a Tamar biigã buudu!» A Booz peega a Rut n maan a paga. B sẽn bãng taaba, Wẽnd sõngame t'a Rut rɩk pʋga n dog biiga. Tɩ pagb naag taab n yeel a Nowemi: «Wẽnd paam barka b sẽn sõng tɩ roagd kees sẽn na n tong a Elimelɛk rogem yũug a Israyɛl tẽn-peelmẽ. Biiga na le pids f vɩɩma ne sũ-noogo la a na bʋk f sũur f kʋʋlem pʋgẽ. F bi-paga sẽn nong-fa roga biig n kõ-fo la f nanda pʋg kãnga n yɩɩd kamb a yopoe.» A Nowemi reega biigã n sagl a naoẽ. Yẽ n ges a yelle. A Nowemi yagsã kõo biiga yʋʋre. B yeelame: «A Nowemi paama biiga!» B pʋd-a-la Obɛd. A Obɛd n dog a Zese, a Zese n dog a Daviid. A Perɛk kamb la woto: A Perɛk n dog a Esrõ. A Esrõ n dog a Ram, a Ram n dog a Aminadab. A Aminadab n dog a Nasõ, t'a Nasõ dog a Salma. A Salma n dog a Booz t'a Booz dog a Obɛd. A Obɛd n dog a Zese la a Zese n dog a Daviid. Ned n da be Rama, Efrayim tãnga zugu, n boond t'a Elkana. Da yaa a Yeroam biiga, t'a Yeroam yaa a Eliyu biiga, t'a Eliyu yaa a Towu biiga, a Suf biiga, a Efrayim tẽn-peelmẽ. A Elkana da tara pagba a yi: a yembr yʋʋr la a An, a yembr yʋʋr a Penina. A Penina da tara kamba, la a An yẽ da pa tar biig ye. Yʋʋmd fãa, daoã da yita a tẽngẽ, n kẽnd Silo n waoogd Tãnsoaba-Wẽnde la a kʋʋd-b maoongo. A Eli kamba a yiibã n da be be, n tʋmd maan-kʋʋr tʋʋmde. Yaa a Ofni la a Pinas. Daar ning a Elkana sẽn kʋ a maoongã, a yãka pʋɩɩre n kõ a paga a Penina, ne a kom-dibli la a kom-pugli wa a sẽn yib n maandẽ. A Elkana ra nonga a pag a An n yɩɩda, ne Soaala sẽn da mong-a rogma, woto a pʋɩɩra yɩɩ waoor pʋɩɩre. A An pʋg-to wã ra zabda pʋg-taar ne-a, la a paoogd-a, Wẽnd sẽn da mong a rogma yĩnga. La yʋʋmd fãa a Penina da maanda boto, a sã n wa Soaala-Wẽnd waoogr zĩigẽ fãa, dẽnd a maan bũmb n yik a An sũuri. Dẽ la a An wa n yik yʋʋmd a ye n tar yãbr la a zãgsd rɩɩbo. A sɩda, a Elkana, yeel-a lame: «Yaa bõe yĩnga la fo yãbda, n zãgsd rɩɩbo, la f sãamd f sũuri? Mam ka be yõod f yĩnga, n yɩɩd kamb piig bɩ?» B sẽn dɩ la b yũ n sɛ, a An tɩ yalsa Silo pʋʋsga rooga noorẽ. Maan-kʋʋd a Eli da zao a goeel zugu, rignoorẽ be. A An sũur da sãama al wʋsgo; la a ra pʋʋsdame, la a kiigd nintãm. A pʋʋsa Soaala-Wẽnd woto: «Israyɛl Wẽnnaam, ges-y y yem-poaka sũ-sãangã, da yĩm-y m yell ye, zoe-y m nimbãanega, kõ-y-m bi-ribla, mam na rɩk-a n kõ yãmba, a vɩɩm zãnga, la barg kõn tol n põng a zug ye.» A An kaoosame n tar pʋʋsgo. A Eli maaga a meng n get paga noore. A An da gomda ne a menga. A no-gãndã n da yaagde la a koɛɛga ra pa yit ye. A Eli tagsame t'a tɩga rãam. Rẽ la a sok-a: «Rãama na n yɩlma f nengã n ta wakat bʋgo? Bɩ f tɩ gãand tɩ f rãamã yi wɛ!» A An leok-a lame: «Ka boto ye, m naaba, m ka no-koeem ned ye, mam ka yũ rãam bɩ toose sẽn tõe n lub ned ye; mam sũura koees la m da zukd Wẽnd taoore, n wilgd m sũ-sãanga. Bɩ y ra tẽ tɩ yãmb yem-poakã yaa pʋg-yaalg ye; yaa sũ-sãanga la toog n wʋm maam, n kɩt tɩ m yõk goama n ta marsã.» T'a Eli na n leok-a: «Kẽng ne laafi! La Israyɛl Wẽnnaam reeg kosg ninga fo sẽn kos bãmbã!» T'a An yeele: «La Wẽnd na kɩt tɩ m paam bark yãmb nifẽ!» Paga kulame. A rɩɩme, la a neng pa le gãnem wa pĩnd ye. Zaka rãmb yika yibeoogo pĩnda, la b sẽn wõgemd n pʋʋs Soaala-Wẽnd n sɛ, b leba b yiri, Rama. Dẽ loogr poore, a Elkana bãnga a paga, tɩ Naaba-Wẽnd me tẽeg a An yelle. Yʋʋmda pʋgẽ, a An dɩka pʋga, n wa rog bi-ribla, n pʋd a yʋʋr t'a Samwɛl, tɩ yaa Soaala la a ra kos-a. A sɩda, a Elkana tʋlgẽ lame n le kẽne, ne a zak rãmba fãa, n tɩ kʋ yʋʋmd-yʋʋmd maoong, la a pids a pʋlengo. A An barsame n pa kẽng ye, a yeela a sɩdã: «Biiga sã n wa sigi, m na tall-a n kẽng n tɩ wilg-a Wẽnde, t'a kell n pa b roogẽ daar fãa.» A sɩda, a Elkana, yeel-a lame: «Maan wa f sẽn dat, gũ f biiga sigbu. Soaala-Wẽnd ye n sak bala n pids b kãabgo!» La paga paame: a yẽsma a biiga al t'a wa sigi. A sẽn sik a biigã, a tall-a lame n kẽng Silo, la a yãka yʋʋm a tã naafo la zom peoogo, la rãam ne ko-waooga. A talla a biigã n kẽng Wẽnd waoogra zĩigẽ, Silo: la biiga paa be n tʋmnẽ B kʋʋ loalgã, la b talla biigã n tɩ kɩs a Eli. A An yeelame: «M naaba, y kabre! Sɩd ne sɩda, wala yãmb meng sẽn vɩ wã, ad-y yaa maam la pag ninga sẽn yalsa yãmb sɛɛgẽ ka n da pʋʋsd Naaba-Wẽndã. Yaa bi-kãnga yĩnga, la m da pʋʋsda, la Soaala-Wẽnd reega kosgo ninga mam sẽn kos bãmbã. Dẽ n so tɩ mam dɩkd-a n kõtẽ; a vɩɩm zãnga, a na yɩɩ Wẽnd soolem.» B fãa wõgemda Soaala taoore. A An pʋʋsa woto: «M sũur kɩdemda sũ-noogo, Naaba-Wẽnd maasmẽ. Bãmb n le zẽk m zugu. M noor yaagame n kãab m bɛɛba wẽnga, m sũur nooma, m sẽn tõog m bɛɛba yĩnga. Soaala yaa sõngo. Bãmb bal la Pĩiga. Bãmb bal la Wẽnde. Bas-y zẽk-m-meng goama, wilg-m-meng goama da le yi y noorẽ ye! Soaala-Wẽnnaam tara bãngre, bãmb m mi sẽn ya sĩdimdi la faoogo. Pãn-dãmba tãbd kaoome, tɩ koms rãmba rɩk pãng n sẽbg b sɛɛga. Sẽn da rɩt b rɩɩb n tɩgdã, koosa b menga n deeg rɩɩbo, tɩ kom sẽn tar b rãmba rɩt tɩ b pʋg pitẽ. Sẽn zĩ-a n kũm rogem, rogda naoor a yopoe; tɩ sẽn da dogda kamb lebg pʋg-kiiri Soaala n kʋʋde, bãmb n vʋʋgde. Bãmb n sikd bʋg-tẽngẽ. Bãmb n yiisd kɩɩmsẽ. Bãmb n kẽesd naongo, bãmb n samd arzɛgse, bãmb n zẽkd neda, bãmb n sulgd-a. Bãmb n takd naong soaba t'a yit tomẽ, la b takd nimbãan-ned n yiisd-a tãmpʋʋrẽ, n zĩndigd-a ne pãng rãmbã, n kõt-a naam zaoore tɩ yaa a pʋɩɩre. Tẽnga sẽn zao bũmb ning zugã bee Naaba-Wẽnd nugẽ, bãmb n zaoolg dũni wã a zĩigẽ. Bãmb n gũud b zo-rãmba nao kẽndre: tɩ lik na n loog ne nin-wẽnga. Ka ne a yãoog pãnga la ninsaal tõe bũmb ye. Naaba-Wẽnd n na n kao b bɛɛba zãnga, b na n zĩnda yĩngr n tool b sa-tãse. Naaba-Wẽnd na n kao ãndũni rãmba bʋʋdo. Bãmb n na n kõ b dĩma tõogo, b sẽn taag a soab kaama zug na n zẽkame.» A Elkana leba a yir, Rama, la biiga kell n paame n tʋmd Soaala-Wẽnd tʋʋmd ne maan-kʋʋd a Eli. A Eli kamba da yaa bi-beese. B toog ra ka be ne Naaba-Wẽnd ye. B manesem ne b saam-biisa ra yaa woto: Ned sã n da kʋ maoongo, nemda rʋgb wakato, b ra tʋmda neda. Nin-kãng ra wata ne kõse. A da rɩkda kõsã n tʋm kut rʋka pʋga bɩ kut rubla, bɩ tãnd rubla pʋga, la kõsa sẽn da kõs neong ninga, b ra yaagd-a lame n sooge. Yaa woto la b ra maand ne Israyɛl kamba fãa sẽn da wat ne b kũun Silo tẽnga. N yɩɩd rẽnna, b ra ka maagd b meng tɩ b reng n yõog nem-kaama bugum meng ye, sõgna da watame n yeel ned ninga sẽn maana maoongã: «Yãk nemd ninga sẽn nan ka kɩɩm, maan-kʋʋda yĩngã, n wa, t'a kõn deeg nemd sẽn dʋg ye, yaa nemd kãad bal la a rata.» Ned sã n da yeel-a: «Yaas tɩ b reng n yõog nem-kaama bugum, tɩ f na yãk f sẽn date,» a da leokdame: «Ayo! Kɩs mars-mars noogã, tɩ sã n pa rẽ, m na n yãka ne pãnga.» A Eli kamba sẽn da maanda da yaa wẽng wʋsg Wẽnnaam nifẽ. B ra ka get maanda wa yaa bũmb sẽn dɩk n kõ Soaala-Wẽnd ye. A Samwɛl da maanda a tʋʋmde, Wẽnd waoogra doogẽ. A da yeelgda a tʋʋmd fuug sẽn wʋg toore ne gĩs peelse. Yʋʋmd fãa, a ma ra sẽta fu-yorg bila, t'a sã n tũud a sɩdã n wat n na n kʋ yʋʋmd maoongã, bɩ a wa kõ-a a Samwɛl. A Eli ra ningda a Elkana ne a paga barka. A ra yeta a Elkana: «Wẽnd na kɩt tɩ pʋg kãnga le rog kamba a taaba n kõ-fo, n lebs biig ning a sẽn dɩk n kõ Soaala-Wẽndã!» Dẽ poore a Elkana ne a zaka rãmb da lebda b yiri. Soaala-Wẽnd sẽn tẽeg a An yelle, a waa n doga kom-dibli a tã, la kom-pugli a yiibu. La sã n yaa a Samwɛl, yẽ ra bɩta Soaala maasmẽ. A Eli da kʋʋla wʋsgo, la a waa n wʋma a kamba sẽn da maan seem ninga ne a Israyɛl zãng fãa, a wʋmame tɩ b da tol n gãee ne pagba sẽn da tigimd sɛka roog noor, b tʋʋmd yĩnga. A Eli yeela a kambã: «Bõe yĩnga la yãmb tʋmd tʋʋm kɛg woto? Mam wʋma neba fãa sẽn gomd y tʋʋm wẽnã yelle. Ayo! M kamba, bɩ y da maan woto ye! Mam sẽn wʋmd b sẽn yet bũmb ning y poorẽ wã pa neer ye. Ned sã n beeg a to, Wẽnnaam n na n yals sʋka la a sã n beeg Wẽnnaam ãnd n na n yɩ wɛɛmba?» La kamba pa kelg b ba koɛɛg ye tɩ Naaba-Wẽnd da rat n yãka b yõore. La sã n yaa a Samwɛl, a da ket n paasda ne yagdo la rasãndlem, Naaba-Wẽnd taoore la a saam-biisa me taoore. Wẽnnaam bãngd a ye n wa a Eli nengẽ la a yeel-a lame: «Soaala-Wẽnd koɛɛg la woto: Mam vẽnega m meng ne f yaaba zak rãmba, b sẽn da waa n be Ezipt rãmb soolmẽ, Ezipt tẽnga. Ad-f yaabã, a Aarõ, maam n tũus-a, a Israyɛl sagsa kamb sʋka, t'a yɩ m maan-kʋʋda, n dʋʋd m maan-kugrã n yõogd wisdu la a bobd b sẽn tar bũmb ning n sokd Wẽnde. Mam kõo f ba zakã tõog, t'a rɩlg a menga ne pʋɩɩr ninga a Israyɛl kamba fãa sẽn kõt Soaala-Wẽndã. Yaa bõe yĩnga la y maand wala maanda la kũuna, m sẽn yet tɩ b wa kõ-m m doogẽ wã ka bõn-sõma? Bõe tɩ ya nem-sõma wã, m buuda sẽn kõt-ma, n lebg yãmb soolem tɩ y rɩt n nobda? La bõe n maan tɩ fo waoogd f kambã n yɩɩd maam. La sẽn ya woto wã, a Israyɛl Wẽnnaama n gomda, m na n leoka koɛɛg kãngã: M da yeelame tɩ foo ne f ba wã zakẽ la m na n yiis m maan-kʋʋdba, daar fãa yĩnga. La marsã, maam n yete: rẽ sɛɛme. Sẽn waoogda maam, mam na waoog a soaba; la sẽn paoogda maam, mam me na paoog-a! Ade! Kõn le kaoose tɩ m kẽ f roogã la f sakã n yiis kʋdr fãa tɩ nin-kẽem da le kees be ye. Ned a to n na n wa reeg f zĩiga, wẽnd doogẽ wã. F na n yãenda a sẽn na n maan a Israyɛl neer ningã. Sã n ya fo zakã, nin-kẽem kõn le zĩnd a pʋgẽ bada. F roagd a ye la m na n yaool n bas, m maan-kugra sɛɛgẽ; yẽ n na n ges t'a nin wa yiigi, n ges la a kũmd sũuri, la rẽ t'a taaba fãa kiime. F na rɩ m sẽn togsd bũmb ninga kaseto ne yell ning sẽn na n pak f kamb a yiibã: daar a ye la b na n naag taab n ki. Dẽ poore, m na yiisa m maan-kʋʋd a yembre, ned sẽn ka bʋt moogo, ned sẽn na n maan sẽn noom m sũuri. M na n kõ-a-la kamba la bãmb n na n soog maan-kʋʋra naam daar fãa, dĩm ning m sẽn na n tũusa sɛɛgẽ. La ned ninga sẽn na n kella fo zaka pʋga, na n tɩ wõgemd a taoore, n bõs lagfo la miisgu n yetẽ: ‹M yõkda y sɛɛga, sõng-y tɩ m paam tʋʋmd bila a yembre, maan-kʋʋdba nengẽ, n tõog n paam dɩ-võre n ning m noorẽ.› » Biiga a Samwɛl da tʋnda Soaala-Wẽnd tʋʋmde, maan-kʋʋd a Eli sɛɛgẽ. Wakat kãng tɩ b da ka leb n paamd Soaala-Wẽnd koɛɛg tao-tao ye; Soaala da pa le likd b meng naoor wʋsg ye. Yʋng a ye, a Eli da gãe a gãagẽ; a nina pãng ra woogame, a da ka le ne neer ye. A Samwɛl me ra gõeeme. A ra bee sɛka roogẽ. A gãaga ra pa zãr ne Wẽnd zooda kaseta ye. Zĩig ra nan ka sɩng yẽegr ye. Dooga bugum da ket n witame. La Naaba-Wẽnd bool-a lame: «Samwɛl, Samwɛl!» T'a sak: «Naaba!» A wudg n kẽnga a Eli nengẽ n yeele: «Yãmb n bool-ma, ad-ma!» T'a Eli yeele: «Ayo! Mam pa bool-f ye, lebg n tɩ gãande.» La a lebg n tɩ gãandame. Tɩ Naaba-Wẽnd le bool-a: «Samwɛl!» T'a Samwɛl le yik n kẽng a Eli nengẽ n yeel-a: «Ad-ma, tɩ yãmb n bool-m!» T'a Eli leok-a: «M biiga, mam pa bool-f ye, lebg n tɩ gãande.» Mik a Samwɛl da nan pa mi Soaala-Wẽnd ye, la Wẽnnaam koɛɛga me dag n nan pa lʋɩ a tʋbrẽ ye. La Soaala le bool a Samwɛl naoor a tãab soaba, t'a yik n le kẽng a Eli nengẽ n yeele: «Ad-ma tɩ yãmb n boole!» Dẽ marsã la a Eli yaool n bãng tɩ Soaala-Wẽnd n da boond biigã. T'a yeel-a: «Kẽng n tɩ gãnde; la b sã n le bool-fo bɩ f leok: ‹Gom-y wɛ, Soaala, tɩ yãmb rakõora kelgdame.› » La a Samwɛl leb n tɩ gãanda a zĩigẽ. Naaba-Wẽnd le waame n yals wa pĩnda, n bool a Samwɛl: «Samwɛl! Samwɛl!» T'a Samwɛl na n leoke: «Gom-y wɛ, Soaala, tɩ m kelgdame.» Wakat kãnga, Soaala-Wẽnd yeela a Samwɛl: «Ade, mam na n maana bũmb a yembre, a Israyɛl pʋga, la sẽn na n wʋm-a fãa, a tʋb na kʋre. Badaare, mam na pids goam niynsa fãa mam sẽn yeel a Eli ne a zaka poorẽ, bũmb kõn pa n ka pids ye. Maam n wilgd-a tɩ m dat n sɩbga a zaka vugr la tɛka, la a mi-la a beegr tiiri. A dag n miime t'a kamb paoogda Soaala, la a kell n pa sɩbg-b ye. Yaa rẽ yĩnga, la m yet a Eli tɩ bũmb kõn tõog n yẽes a yel-wẽndã, kõn yɩ maoongo, kõn yɩ kũun ye.» A Samwɛl kell n gãandame tɩ beoog vẽege. A paka Wẽnd dooga kʋɩlense. Dabeem da tara a Samwɛl: a maanda a wãna n togs a Eli, a sẽn wʋm bũmb ningã. La a Eli bool a Samwɛl n yeel-a: «Samwɛl, m biig sõngo!» T'a sak: «Naaba!» T'a Eli sok-a: «Yaa bõe koɛɛga, la Soaala-Wẽnd togs foom! Da solg maam bũmb ye. Bɩ Wẽnd sɩbg-fo, la b le sɩbg-fo n bãge, fo sã n solg bũmbu n pa togs maam b sẽn yeel-fa zãnga!» A Samwɛl togs-a-la fãa, n pa solg bũmb ye. La a Eli yeelame: «Bãmb la Soaala-Wẽnde, b maan bũmb ning fãa sẽn ta b yam!» A Samwɛl da bɩtame. Naaba-Wẽnd dag n bee ne-a. A Samwɛl gomd ba a ye ra ka lʋɩt vɩʋʋgẽ ye. Al Dã, n tɩ tãag Beerseba, a Israyɛl bãngame t'a Samwɛl lebga Soaala no-rɛɛsa. Soaala-Wẽnd da kell n likda b meng Silo. B da vẽnegda b meng ne a Samwɛl, Silo; Naaba-Wẽnd da gomda ne-a. A Samwɛl da taasda Soaala-Wẽnd koɛɛgã a Israyɛl gill fãa. Dasem kãense, a Israyɛl yiime n na n tɩ seg Filisti rãmba n zab ne-ba. B wẽ-la b sik Eben-Ezɛr, tɩ Filisti rãmba wẽ b sik Afɛk. Filisti rãmba gãnega tãpo n na zab ne a Israyɛl, la zabrã yɩɩ kãsenga. Filisti rãmba tõoga a Israyɛl, tẽn-nabrẽ, n kʋ b neb na ta tus a naase. Nebã leba b tãb-sikẽ, t'a Israyɛl nin-kẽemsa yeele: «Bõe yĩng la Soaala bas tɩ Filisti rãmba tõog tõnd dũnna? D kẽng Silo n tɩ rɩk zood kasetã n wa, t'a zĩnd tõnd sʋka, n fãag-do d bɛɛb nusẽ.» B tʋma neb Silo, tɩ b tɩ wa ne koglgã, Wẽnd-Pãng-Soaba sẽn zao a soab zugã. A Eli kamb a yiibã, a Ofni la a Pinas, da bee be, koglga sɛɛga. Zood kaseta sẽn waa n kẽ b tãb-sikã, a Israyɛl kamba fãa zẽka koɛɛg n kaas ne sũ-noogo, tɩ tẽnga fãa rĩmda. Filisti rãmb sẽn wʋm b kelemsa rãamde, b sokame: «Kaasgo ning b sẽn kaasd Ebre rãmba tãb-sikẽ wã võor yaa bõe?» La b wʋmame tɩ zooda kaset koglga n wa b tãb-sikẽ. Filisti rãmba yɛɛsame tɩ b ra yetame: «Ade, wẽnd a ye n sig Ebre rãmba tãb-sikẽ la yell n paam tõndo, tɩ daar sẽn zãag bilf marsã, dag n ka le ya woto ye! Na wʋm tõndo! Tõe tɩ yaa Tãnsoaba-Wẽnde. Ãnd n na fãag tõndo bãmb nusẽ? Tõe tɩ yaa Wẽnd ninga sẽn sɩbg Ezipt rãmba ne bãas buud fãa, we-raoogẽ! Baasg zãnga, keng-y y pɛlga, la y wilg tɩ yãmb yaa rapa, la y maan zabre!» Filisti rãmb kaooga zabre la b tõoga Ebre rãmbã, tɩ ned kam fãa zoe. B pogla a Israyɛl tɩ looge; sẽn ki-b tãpẽ yɩɩ neb tus pis-tã. Filisti rãmb reega zooda kaset la a Eli kamb a yiibã, a Ofni la a Pinas kiime. A Bẽnzame doog daoa a yembre, n yi zabra zĩigẽ n zoe n wa Silo, badaar bala; a futã ra pãrsame, t'a zuga ra yug tom. A sẽn ta wã, rẽ t'a Eli da zao a goeel zugu, sora noore, n gũud kibare; a sũur da rigda rabeem, kaseta koglga yĩnga. Daoã sẽn kẽ tẽnga pʋga, a togsa kibarã tɩ tẽnga fãa wẽ no-bɩnga. A Eli sẽn wʋm yãbrã, a sokame: «Bʋʋra võor la bõe?» Tao-tao bala, daoã waa togs-a-la kibarã. A Eli da tara yʋʋm pis-wɛ la a nii; a nina da menemame, t'a ra ka le ne bũmb ye. Daoã yeela a Eli: «Mam sẽn wa wã, ad-m da bee zabra zĩigẽ; yaa zabrã zĩigẽ la m yii n zoe dũnna.» A Eli sokame: «M biig sõngo, bõe n maane?» Sẽn wa-a ne kibarã leokame: «A Israyɛl zoee Filisti rãmba taoore, la neba paama ko-yũud meng-menga, la yãmb kamba a yiibã, a Ofni la a Pinas kiime; la b tol n deega zooda kasetã.» Daoã sẽn gom zood kaseta yell bala, a Eli lʋɩ-la a goeel zug tulumdi, dagnoora sɛɛga, n kaoog a yubla, n ki. A ra kʋʋlame, n ya zɩsgo. A yɩ-la a Israyɛl bʋ-kaood yʋʋm pis-naase. A bi-paga a yembre, a Pinas paga, da tara pʋga n kolg rogem. La a sẽn wʋm tɩ b tol n deega koglgã, la a wʋm t'a sɩda la a sɩda ba wã kiime, a lɛɛg n yĩgimdame; a sẽn da kũumd rogem yĩnga, a rogame. A sẽn da sobg yĩnga, sẽn da be-b a sɛɛgẽ wã yeel-a lame: «Da maan dabeem ye, yaa bi-ribla la f rog yã.» La a pa leok ye, n tol n maan wa a pa wʋm ye. A waa n pʋda a biiga yʋʋre t'a Ikabod, n yetẽ: «Zu-zẽkr sɛɛ Israyɛl tẽn-peelmẽ.» A ra goma woto b sẽn deeg zood kaseta yĩnga, n paas a sɩda ne a sɩda ba wã kaalem yĩnga. Paga ra yeelame: «Zu-zẽkr-sɛɛ Israyɛl» tɩ b reega Wẽnd zooda kaseto. Filisti rãmb reega koglgã. B tʋk-a-la Eben-Ezɛr n tall-a n kẽng Asdod. Filisti rãmba sẽn deeg koglgã, b tall-a lame n tɩ kẽes b wẽnd, a Dagõ, doogẽ; la b rɩgl-a-la a Dagõ sɛɛgẽ. Vẽkembeoogo, Asdod dãmb sẽn yi tõd-beoogo, b mikame, t'a Dagõ lʋɩɩme, t'a neng fõgneg tẽnga, Soaala zood kaseta taoore. Tɩ b rɩk a Dagõ n lebs a zĩigẽ. Vẽkembeoog yɛsa, bãmb sẽn le yi tõd-beoogo, b mikame t'a Dagõ le lʋɩɩme, zood kaseta taoore: da keesa yĩnga bala, zuga la nusa ra wãame n dɩg dooga noorẽ. Yaa rẽ yĩnga, la ba ne rũnna, a Dagõ maan-kʋʋdba la sẽn kẽed-ba a Dagõ doogẽ, Asdod tẽnga, pa tabd dignoora ye. Soaala-Wẽnd nug sɩbga Asdod dãmba, n wa ne sũ-sãang kãsenga b sʋka; b lobg-b-la yũya, Asdod ne a tẽn-kɩremsa fãa. Asdod dãmba sẽn mik tɩ yaa woto, b yeelame: «Wẽnd zooda kaset koglga kõn pa tõnd nengẽ ye, tɩ d yãeta toog wʋsg a sɛɛgẽ, tõnd ne d wẽnd a Dagõ.» Asdod dãmba kɩtame tɩ b bool la b tigim Filisti nanamsã n yeel-ba: «Bõe la d na n maan ne Israyɛl Wẽnda zood kaseta koglgã?» Tɩ b leoke: «D tʋk-a n kẽng Gat.» B sɩd tʋk-a lame. La b sẽn tʋk-a n ta Gat, la Soaala-Wẽnd nug sẽn le sɩbg tẽngã, la yɩɩ rabeem kãsenga. Soaala sɩbga tẽnga rãmba, sẽn sɩng kom-bõonego n ta nin-kẽemba, b fãa yĩnga pusa yũya. Woto bãmb tʋma koglga Ekrõ, tɩ Ekrõ rãmb na n wẽ no-bɩnga n yetẽ: «B tʋka koglgã n wa rɩgl-a tõnd tẽnga, n na n kʋ tõndo ne d buudu.» Bãmb me kɩtame tɩ b bool la b tigim Filisti rãmb nanamse n yeel-ba: «Lebs-y Israyɛl Wẽnda zood kasetã t'a leb a zĩigẽ, la a ra kʋ tõnd ne d buud ye!» Kũum dabeem kãsenga da tara tẽnga rãmba, fãa da rigda dabeem kãseng menga; Soaala-Wẽnd da zɩsga b nugu. Nin-vɩɩg pa kell tẽngã n ka pus yũur ye la tẽnga rãmba kelemsã sãdame n kul yĩngri. Soaala zooda kaset paa Filisti rãmba tẽngẽ, kiis a yopoe. Filisti rãmba boola b maan-kʋʋdba la b bagba n sok-ba: «D maanda bõe ne koglgã? Wilg-y tõnd d sẽn na n maanega n lebs koglgã a zĩigẽ.» B leokame: «Y sã n na n lebs koglgã bɩ y ra lebs-a zaalem ye. Bao-y yaoodo n deng n yao a Israyɛl Wẽndã. Woto yãmb na sãooge, la y na bãng bũmb ninga sẽn da zɩsgd Wẽnda nug y zugã.» B sokame: «Yaa bõe yaoodo la tõnd tog n yao?» Tɩ maan-kʋʋdba la bagba yeele: «Tũuda ne Filisti nanamsa sõore; dɩlla na n yɩɩ sãnem gil a nu sẽn dõog wa yũuri n paas rayʋʋs sẽn dõog ne sãnem, tɩ Naaba-Wẽnd sɩbga tẽns a nu wã la b nanams a nu wã, ne sɩbgr yɛnga. Dõog-y yũya la rayʋʋsã, sẽn sãamd y tẽngã, la y pẽg Israyɛl Wẽnnaam. Daare tõe tɩ b nuga sɩbgre yɩ faasga yãmb yĩnga, y wẽnd dãmba la y tẽng yĩnga. Yaa bõe tɩ yãmb kengd y sũuri wala Ezipt rãmba ne b dĩma sẽn keng b sũuri? Naaba-Wẽnd sẽn leng-b n sɛ, b ka bas Israyɛl kamba tɩ b loog sɩda? Marsã, bɩ y maan bilim-bilm paalga, n wa ne nag-yãans a yiibu sẽn yẽsemd kamba, la sẽn nan ka sog wãk ye; loe-y nag-yãansa ne bilim-bilma la y tall nag-bi wã n tɩ pag yiri! Yãmb na n dɩka zooda kaset n sagl bilim-bilma pʋga. Y na yaool marsã n dɩgl a sɛɛgẽ, koglg bila ne sãnema teedo, yaoodã y sẽn na yao wã, la yãmb na n basa niisa tɩ b looge. Bɩ y pʋg n ges; y sã n mik tɩ b rɩka Bɛt-Semɛs sore, n dabd Israyɛl tẽnga, y na bãng tɩ yaa Israyɛl Wẽndã n maan tõnd wẽngã la sã n pa yɩ boto, d na bãng tɩ pa bãmb nug n sɩbg tõnd ye, dɩlla yaa wa yɛl sẽn seg taab bala.» Neba maana boto: B baoo nag-yãans a yiibu sẽn da yẽsemd kamba, n sẽb-ba ne bilim-bilma. B basa nag-bi wã bãgra pʋga. B rɩka koglgã n sagl bilim-bilma pʋga, n paas sãnema teed sẽn makd rayʋʋsã la yũya. Niigã kell n dɩka Bɛt-Semɛs sor tɩrga; b tũu so-kãng bala la b kũmdẽ, b ka bʋdg goabga, b ka bʋdg rɩtgo. Filisti rãmb nanamse pʋg-b lame al n tɩ ta Bɛt-Semɛs toaaga. Bɛt-Semɛs rãmba da wʋrda alkam tãnga pennẽ; bãmb sẽn zẽk b nenga, b yãee kaseta koglga la b sũur yɩɩ noog b sẽn yãend-a wã yĩnga. Koglga taa Bɛt-Semɛs daoa, a Zozuwe, pʋʋgẽ, n yals be. Kug bedr n dag n be be, b wesa bilim bilma raado n tugl bugum a zugu, n kʋ niisã n yõog n kõ Soaalã. Levitsã sika zood kasetã ne koglg bilã sẽn da rɩg a sɛɛgẽ ne sãnem teedã; la b dogla rẽ fãa kugra zugu. Badaare, Bɛt-Semɛs rãmba kʋʋ yũ-noog maando la maan-dɩtse. Filisti nanams a nu wã sẽn yãe rẽnda, b leba Ekrõ, badaar bala. La ad sãnem gilã sõore, sãnem gila sẽn togsd yũurã, Filisti rãmba sẽn kɩse n na n yao Soaala-Wẽnde: Asdod yaa a yembre; Gaza: a yembre; Askalõ: a yembre; Gat: a yembre; Ekrõ: a yembre. Sã n ya sãnem rayʋʋsã, b ta Filisti nanams a nu wã tẽnsa sõore, b tẽn-bɛd la b tẽn-bõonese. Yell kãensã fãa kaseto, yaa kugr bedre ning b sẽn dogle koglga a zugã, t'a ket n be rũnna, Bɛt-Semɛs, a Zozuwe pʋʋgẽ wã. Soaala-Wẽnd sɩbga Bɛt-Semɛs rãmba b sẽn ges b zooda kasetã. Neb pisopoe n deeg sɩbgrã. Sẽn põs-ba kelma kʋʋre, Soaala-Wẽnd sẽn sɩbg bãmba tɩ yɩ toog wʋsga yĩnga. Bɛt-Semɛs rãmba yeelame: «Ãnd n tõe n tɩlg Soaala-Wẽnd taoore, bãmb sẽn pid ne sõmblema? La zood kaseta koglga sã n yi tõnd nengẽ d na n tees-a-la yɛ?» B tʋma neb tɩ b kẽng n tɩ yeel Kiriyat-Yeyarim rãmba: «Bɩ y wa rɩk koglgã n ta y tẽngẽ, tɩ Filisti rãmba lebs-a lame.» Kiriyat-Yeyarim neb waame, n deeg zood kasetã, n tall-a n kẽng a Abinadab yiri, tãn-bila zugu, la b yãka a biiga a Elazar t'a soog zood kaseta gũudem. B sẽn tɩ bĩng kuga walsa koglg Kiriyat-Yeyarim, a kaoosa be wʋsgo: taa yʋʋm pisi. Dẽ marsã la a Israyɛl waa n yik n yãbd n dat Soaala-Wẽnde. A Samwɛl yeela a Israyɛl rooga gilli: «Sã n yaa ne y sũur fãa, la y lɛɛg n baood Soaala-Wẽnde, bɩ y yiis y sʋkã wẽn-sãamsã: a Baal la a Astarte rãmba. Rɩk-y y sũur n togl Naaba-Wẽnde, sak-y bãmb b yembr bala; la b na n fãag yãmb, Filisti rãmb nugẽ.» A Israyɛl kamba sɩd yiisa Baal la Astarte rãmba, la b tũ Naaba-Wẽnd b yembr bala. A Samwɛl yeelame: «Bɩ Israyɛl kamba fãa tigim taaba, Mispa, tɩ m pʋʋs Soaala b yĩnga.» B tigma taab Mispa. La b yõnga koom n bas Wẽnd taoore; b loe noor badaare n yetẽ: «Tõnd beega Wẽnnaam!» Yaa Mispa la a Samwɛl sɩd lebg a Israyɛl naaba la a bʋ-kaooda. Filisti rãmba wʋmame t'a Israyɛl kamba tigma Mispa, tɩ nanamsa yik n na n wa zab ne a Israyɛl. B sẽn wʋm woto, a Israyɛl kamba diga Filisti rãmb rabeem, la b yeel a Samwɛl: «Kelem Naaba-Wẽnd n kõ-do, la da zĩ sɩɩ woto ye. Bool-b tɩ b wa fãag-d Filisti rãmba nusẽ.» A Samwɛl rɩka pe-bila sẽn ka bas bĩisim, n kʋ yũ-noog maoongo, n yõog-a bugum zãnga n kõ Soaala-Wẽnde. La a kelma ne Naaba-Wẽnde, a Israyɛl yĩnga; la b reega a kosgo. A Samwɛl sẽn da waa n kõt maoongã la Filisti rãmb kolg n na n kaoog zabre ne a Israyɛl. Badaare, Naaba-Wẽnd tʋma sa-tãse, n yɛɛs Filisti rãmba al wʋsgo. A Israyɛl tõog-b lame. A Israyɛl yii Mispa n dig Filisti rãmba, n tar b kʋʋbo al n tɩ yõsg Bɛt-Kar. A Samwɛl tãsa ne pãnga: «Sẽn ta marsã Soaala sõngr ka paoog-d ye.» Dẽ la a rɩk kugri n lugl Mispa ne tẽng a ye sʋka, n pʋd a yʋʋr tɩ Eben-Ezɛr, Wẽnd sõngr kugri. A ra yeelame: «Soaala-Wẽnd sõnga tõndo n ta marsã.» Woto Filisti rãmb pa maam daood ye. B pa le saag n kẽe a Israyɛl soolem pʋgẽ, n ta a Samwɛl loogr ye. Filisti rãmba sẽn dag n deeg a Israyɛl tẽns niynsã le leba a Israyɛl, sẽn sɩng Ekrõ n tɩ tãag Gat. Yɩɩ woto la a Israyɛl bogr kãng tɩlg ne Filisti rãmbã. Laafi zĩnda Israyɛl ne Amoritsa sʋk marsã. A Samwɛl yɩ-la a Israyɛl taoor soab la a bʋ-kaooda, a vɩɩm tɛka. Yʋʋmd fãa, a ra kẽnda Betɛl, la Gilgal la Mispa, n kaood a Israyɛl bʋʋd be, n yaool n lɛɛg n wa Rama, t'a yir da bee be, a ra kaooda a Israyɛl bʋʋd be me, la a mee maan-kugr beene, Soaala-Wẽnd waoogr yĩnga. A Samwɛl sẽn waa n kʋʋle, a kɩtame t'a kambã lebg bʋ-kaoodba, a Israyɛl tẽnga. A bi-kãsenga yʋʋr da boondame t'a Zowɛl, t'a yiib soaba boond t'a Abiya; b ra kaooda bʋʋda Beerseba. A Samwɛl kambã pa rɩk b ba nao ye. B ra nonga arzɛgs tɩ looge, bãmb da reegda neb kũuni, n pa kaood bʋʋd ne sɩd ye. A Israyɛl nin-kẽemsã fãa tigma taaba, n kẽng a Samwɛl nengẽ, Rama. B yeel-a lame: «Ade, fo kʋʋlame, la f kamba pa rɩkd fo nao ye. Marsã, maan wala buud a taaba sẽn maande, la f bao dĩm n kõ-do t'a soog-do.» A Samwɛl sũur pa yɩ noog ne b sẽn yeele: «Kõ-d dĩma t'a soog-do!» La a Samwɛl pʋʋsa Naaba-Wẽnde, la Soaala-Wẽnd leoka a Samwɛl: «Kelg neba koɛɛga, kelg b sẽn na n yeel-f bũmb ninga fãa. Ad ka foom la b pa rat ye, yaa maam la b pa tʋl tɩ m le rɩ naam b zugu. La rẽ ka sɩng rũnna ye, sɩnga al Ezipt yiib n tãag rũnna. Woto la b basd maam n pʋgd wẽn-naands toɛ-toɛ yã. Boto me la b maand dũnna ne foom. Kelg b koɛɛgã, la deng n wilg-ba, dĩma sẽn na n tall-b seem ninga.» Nebã sẽn da kot dĩma, a Samwɛl tɩ togs-b la Naaba-Wẽnd goama fãa. A Samwɛl yeel-b lame: «Ad dĩma sẽn na n dɩ naam yãmb zugã, sẽn na n maan bũmb ninga. A na n deega yãmb kamba n kɩt tɩ b get a bilim-bilma yelle, a wiidi wã yelle, bãmb n na n zoet a bilim-bilma taoore. A na n yãk-b lame tɩ b yɩ neb tusri, neb pis-nu nanamse, tɩ b ko a pʋʋgã, n tigs a tigsgã, n kud a zab teedã la b zap a wiida fan-teedã. A na n deega yãmb kom-pugli tɩ b zɛɛd-a kaam sẽn tar yũ-noodo, tɩ b segend a rɩɩbo la b wẽed a buri. A na n deega y pʋtã, y bugsuntundã, y oliviye sõma wã. A na n dɩk-b lame n kõ a tãnsoaben-dãmba. A na n deega yãmb kood-biisi la y bugsuntund biisi, pʋɩɩr a ye piig zugu, n kõ na-pagba gũudba la a sõgen-kamba. A na n deega yãmb dakõapa la y roog kamba, la y niis la y bõeens sẽn ya-b sõma n yɩɩda, n tʋm a tʋʋma. A na n deega y rũmsã, rũng a ye piig zugu. Yãmb mens na n yɩ-la a yemse. Baraar la y na n yãb ne Naaba-Wẽnde, y dĩma manesma poorẽ, dĩm ning, y meng sẽn tũusi, la Soaala-Wẽnd kõn kelg-y ye.» Neba zãgsa a Samwɛl kelgre. B yeelame: «Ayo, d kõn deeg f goama ye, dĩm n na n dɩ naam tõnd zugu bala! Tõnd me na n wẽnega wala buud a taaba fãa: tõnd dĩma n na kao d bʋʋdo n kõ-do, a na n lʋɩ tõnd taoore, n tall-do, tɩ d kẽng zabre.» A Samwɛl kelga neba sẽn leoka fãa n tɩ togs Soaala-Wẽnde. La Soaala-Wẽnd yeela a Samwɛl: «Kelg b koɛɛga, la f kõ-b dĩma.» T'a Samwɛl yeel a Israyɛl dapã: «Be neere, ned kam fãa kul a tẽngẽ.» Ned a ye n da be, n yaa a Bẽnzame sakẽ daoa, n boond t'a Kis. A nug ra zãadame. A Kis ba la a Abiyɛl, a Abiyɛl ba la a Seror. A Seror ba la a Bekorat, t'a Bekorat ba yaa a Afiya. La a Kis da tara biig sẽn boond t'a Sol, dasãn-beel menga, Israyɛl biig sẽn da ta-a ka ye; a Sol da yaa wok sololl, a zuga woglem da yɩɩda a taaba. A Sol ba, a Kis, bõn-yãans n waa n menem, t'a Kis yeel a biiga a Sol: «Yãk ned a ye t'a yãag fo, tɩ y karg n bao bõeensã.» A dʋʋ Efrayim tãnga zug, n pɩʋʋg Salisa tẽnga, n pa yãend-b ye. B tũu Saalim tẽng me la b ra ka be be ye. B saaga a Bẽnzame soolem, la b pa yãend-b ye. B waa n taa Suf tẽnga, t'a Sol na n yeel a tũud-n-taagã: «Wa tɩ d lebge, tɩ sã n pa rẽ, m ba na n yĩma bõeensã yelle, n wa maand yɩɩre tõnd poorẽ.» Sõgna yeel-a lame: «Ade, dao a yembre n be tẽngã, n ya bãngda, tɩ neba fãa waoogd-a. A sẽn togs bũmb ning fãa pa kongd ye. D kẽng be, daar ninga a na wilg tõnd d sẽn na n bao-b zĩig ninga.» A Sol leoka-a lame: «D na n kẽngame, la bõe la d na n tɩ kõ bãngdã? Bur ka le ket tõnd korgẽ ye, la ka so-toaka rɩ-yaals a taaba la d na n kõ-a ye.» Tɩ sõgna leok a Sol: «Ade, m tara m wakɩ koɛɛnga, m na tɩ rɩk-a n kõ bãngdã t'a wilg tõnd d sora sẽn na n yɩ-la.» Pĩnda Israyɛl rãmb sã n da rabd Soaala-Wẽnd sokre, b ra yetame: «Wa-y tɩ d tɩ yãend sẽn ne-a soabã.» — B sẽn boond b rãmb tɩ bãngdb rũnna wã, pĩnda b ra boond-b lame tɩ sẽn ne-ba, sẽn paamd-b likri. A Sol yeela sõgna: «F bee bʋʋm, wa tɩ d kẽnge!» La b kẽnga bãngda nengẽ, tẽnga pʋga. B sẽn waa n dabdã, b sega kom-pugli sẽn yi n na n toog koom, tɩ b sok-ba: «Sẽn ne a soaba bee ka bɩ?» Tɩ b leok-ba: «N-yẽe! A be y taoore. La kẽng-y tao-tao. A waa tẽnga pʋg rũnna tɩ neb n wa maanda sẽn kʋʋd zĩis niynsã n na n kʋ b maoongo. Ning-y pãnga! Yãmb sã n kẽ tẽnga pʋga, yãmb na seg-a t'a nan pa sɩng rɩɩb ye, tɩ nebã kõn dɩ t'a nan pa wa ye, tɩ yẽ n tog n ning barka la dẽ poor la nebã na n yaool n dɩ. Bɩ y kẽng tɩ marsã y na yãend-a.» B kẽnga tẽnga pʋgẽ. Bãmb sẽn ta tẽnga tẽnsʋk la a Samwɛl sẽn seg-ba: wakat kãng t'a da yit n dabda kunkubra zugu. A Samwɛl waoong ket tɩ beoogo, Soaala-Wẽnd da pĩnd n togs-a lame, t'a bãng tiiri, b yeel-a lame: «Beoogo, wakat kãngã, mam na n tʋma foom a Bẽnzame tẽng dao a yembre, la fo na pʋdga a zug naam kaam t'a yɩ mam buud, a Israyɛl, naaba. A na n fãaga m nebã Filisti rãmba nusẽ; tɩ mam gesa m nebã, la b yãbrã sãta yĩngri tɩ m wʋmnẽ.» A Samwɛl sẽn yãe a Sol, la Soaala-Wẽnd sẽn yeel a: «Ad dao ninga mam sẽn da gom ne foomã, yẽ n na n dɩ naam m neba zugu.» Woto wã a Sol kolga a Samwɛl tẽnga noor n yeel-a: «M kotame tɩ y wilg-m sẽn ne a soaba yiri.» A Samwɛl leoka a Sol: «Yaa maam la sẽn ne a soabã. Lʋɩ m taoore tɩ d rʋ kunkubra zugu. Yãmb na n naaga maam n dɩ rũnna. Beoogo, m sã n wa leok f sẽn sokd f menga marsã wã, m na kõ-y sore tɩ y kuli. Da le bʋ bõn-yãansa sẽn menema poorẽ ye, yaa dasma a tã dũnna: b le yãend-b lame, Dẽ pʋgẽ me, sẽn be yõod a Israyɛl yĩnga bĩnga yɛ sẽ? M yet yaa foo ne f ba wã zakẽ!» A Sol leokame: «Mam ka a Bẽnzame ned bɩ, a Bẽnzame rooga ka roog sẽn paood bɩ? Ka mam ba wã zaka n paood n yɩɩd bɩ? Ad-y goama ka sakd reegr ye.» A Samwɛl peega a Sol ne a tũud-n-taagã tɩ b kẽ rɩɩba roogẽ, n kõ bãmb pipi zĩiga neba sʋka, b ra zemsa neb pis-tã. A Samwɛl yeela sẽn segenda dɩɩbã: «Wa ne pʋɩɩr ninga mam sẽn dag n kɩs foom, n yet tɩ f bĩng-a toorã.» Sẽn segend-a rɩɩbã waa ne bãoko la zʋ-kɛɛga n tẽgen a Sol taoore; t'a Samwɛl yeel-a: «Ad dɩɩb sẽn tẽgen f taoore, dɩ tɩ rẽ la b ra bĩng-fu, naag m sẽn bool b rãmba tɩ y rɩ.» Baraare a Sol ne a Samwɛl naaga taab n dɩ. B siga kunkubrã n kẽ tẽnga pʋgẽ, la a Samwɛl sõsa ne a Sol bɛonga zugu. B yika vẽkembeoogo, yibeoog pĩnda. La zĩig sẽn yeege, a Samwɛl bool a Sol bɛonga zugu n yeel-a: «D dɩk sore, m na n yãag-f lame.» La Sol yikame, tɩ yẽ ne a Samwɛl tũ taab n yi. B sẽn ta tẽnga noore, a Samwɛl yeela a Sol: «Yeel f sõgna, t'a loog n lʋɩ tõnd taoore la fo meng yals marsã tɩ m togs Soaala-Wẽnd gomde tɩ f kelge!» A Samwɛl rɩka kaam tʋko, n pʋdg a Sol zugu, n mobg-a, n yeele: «Ka Naaba-Wẽnd n taag foom ne naam kaam, tɩ f yɩ a Israyɛl naab bɩ? Yaa foo n na n fãag Soaala pʋɩɩrã a bɛɛba sẽn gũbg-a wã nusẽ. Dũnna, fo sã n bas maam n looge, fo na n sega dapa a yiibu, a Rasɛl yaooga sɛɛga, a Bẽnzame soolma toaagẽ, b na n yeel-f lame: ‹Bõeensã fo sẽn da kẽnge n na n tɩ bao wã, yãeeme la ade, marsã, f ba ka le tagsd bõeensã yell ye, b bʋʋda fo poorẽ n yetẽ: m biiga yelle na n yɩɩ wãna?› Fo na n yii be, n yõsg n ta taoore, Tabor tɩɩg ning sẽn wẽnd kʋka tẽngre, bee, fo na n sega dapa a tã sẽn dabd Betɛl, n na n tɩ pʋʋs Wẽnd, t'a yembre tʋk bulli a tã, a yembre bur a tã, a yembr rãam ne ko-waooga. B na n soka foom f keelem, n yãk bur a yiib n kõ-fo, tɩ fo reeg-ba f nusẽ. F sã n yõsg be, f na n taa Wẽnd tãnga, Filisti rãmba sẽn ning b toaaga kugra zĩig ningã. Tẽnga pʋgẽ fo na n sega bãngdba sẽn yit maoonga zĩigẽ n watẽ, tɩ neb lʋɩ b taoore ne kʋnde la gãngãoog, la wɩɩs la pɛndga, tɩ bãmb meng wɩlemd bãngr goama. Wẽnd Pãng na n siga f zugu, tɩ fo lagem bãmba, n wɩlem bãngr goama la fo na n teemame, n paam zʋg a to. Fo sã wa yãe tɩ makr kãens fãa taasame, bɩ f maan f sẽn tog n maan bũmb ningã, tɩ Soaala-Wẽnd bee ne foom. Dẽ poore fo na n denga maam n kẽng Gilgal, la ade mam na n wa bʋʋga foom, n kʋ bark pʋʋsg la yũ-nood maando. Fo na n yalsa dasma a yopoe tɩ m yaool n wa f nengẽ n wilg-f f sẽn tog n maan bũmb ninga.» A Sol sẽn wẽnemd bala, t'a na n loog n bas a Samwɛl, Soaala-Wẽnd kõ-a-la zʋg a to. Yɛla fãa pidsa badaare. A Sol sẽn ta Gibea, la bãngdb kʋʋngo sẽn sũ taaba n wa seg-a; la Naaba-Wẽnd pãng sig-a lame, a yama fʋsga a yĩngã t'a sɩng bãngr goam wɩlengo, bãmb sʋka. Sẽn da mi-b yẽnda al daar zãrã sẽn mik t'a bee bãngdb sʋka n gomd bãngr goama, ra yetame: «Yaa bõe n paam a Kis biigã? A Sol me lebga bãngd laa?» Ned a ye n zĩnd be n sãbse: «Bãmba tara ba meng bɩ?» Yaa rẽ me tɛk la neba sɩng n wẽed baobg n sogsd taaba: «A Sol me lebga bãngd laa?» A sẽn wa n paam t'a yama leb a yĩnsẽ, a Sol kẽnga maoonga zĩigẽ. A ba-bila soka yẽnda ne a sõgna: «Yãmb da kẽnga ye?» Tɩ b leoke: «D ra kẽnga bõeens baoobo. Tõnd ka yãe bũmb ye, yaa rẽ la d kẽng a Samwɛl nengẽ.» A Sol ba-bila yeel-a lame: «Togs maam a Samwɛl sẽn yeel yãmb bũmb ninga.» A Sol leoka a ba-bilã: «A wilga tõnd bala tɩ bõeensã yãeeme.» A pa saag n togs a Samwɛl sẽn yeel bũmb ning naama poorẽ ye. A Samwɛl boola neba fãa tɩ b tigim taaba, Mispa, la a yeela Israyɛl kambã: «A Israyɛl Wẽnnaama koɛɛga: ‹Maam n yiis yãmb Ezipt tẽnga, n fãag yãmb Ezipt rãmb nusẽ, la dĩm dãmb fãa sẽn da wẽoogd yãmba nusẽ.› La rũnna yãmb zãgsda y Wẽnnaama, sẽn yols yãmb ne bãas buud fãa, la namsgã buud fãa, la yãmb yet-b lame: ‹Ning dĩm d sʋka.› Marsã, wa-y Soaala-Wẽnd taoor ka, roogo fãa ne a neba, sak fãa ne a neba.» A Samwɛl kɩtame t'a Israyɛl sagsa kolge, la a sẽn sok Soaala-Wẽnde, b teesa a Bẽnzame saka. A Samwɛl kɩtame t'a Bẽnzame sak kolge, yir woo yiri, la yaa a Matri yiri la b tees yã. Dẽ poore, yaa a Kis biiga a Sol la b yãk yã. B bao-a lame, la b pa yãend-a ye. Tɩ b le sok Soaala-Wẽnde: «Ned a to waa ka bɩ?» Tɩ Soaala-Wẽnd leoke: «Ad-a Sol, a soonda teeda zĩigẽ!» Tɩ b zoe n tɩ yiis-a be, t'a wa yals neba sʋka. A ra yɩɩda bãmb fãa ne zug woglem. Sẽn da taa a bãok ka ye. A Samwɛl yeela neba fãa: «Yãmb yãee Naaba-Wẽnd sẽn tũus a soaba bɩ? Nebã fãa sʋka, a ka tar a to ye.» La neba fãa zẽka b koɛɛg n kaase n yetẽ: «Wẽnd na wogl dĩma yõore!» A Samwɛl wilga neba, naama dɩɩb sẽn na n yɩ a soaba; la a gʋlsa rẽnda sebr a ye pʋgẽ n tɩ rɩgl Naaba-Wẽnd taoore. A Sol me kula a yiri Gibea: la gãndaado, Wẽnnaam sẽn segl b rãmb sũya, yãag-a lame. La nin-yaals me yaool n zĩnda be n yeele: «Bõe? Yão n na n fãag tõnd bɩ?» La b paoog-a lame: b ka wa ne b kũun n pʋʋs-a ye, la a Sol maana wala pa zab-a ye. Amonitsa dĩm, a Naas, yiisa tãpo, n wa gũbg Yabɛs, Galaad tẽnga. Yabɛs rãmba yeela a Naas: «Yõg zood ne tõndo, tɩ d na sak foom.» La a Naas, Amonitga, leok-b lame: «Mam na yõg zood ne yãmb, la rẽnd tɩ m deng n leo yãmb ned kamb fãa rɩtg nifu. M data woto n ning a Israyɛl zãng fãa yãnde.» Yabɛs nin-kẽemba leok-a lame: «Kõ-d dasem a yopoe, tɩ d tʋm neb Israyɛl soolma fãa pʋgẽ, la ned ba ye sã n ka wa sõng-do, d na rɩk d mens n kɩs foom.» Sẽn tʋʋm b rãmba taa Gibea, a Sol sẽn da be tẽng ningã, n togs tɩ neba wʋm. La neba fãa sɩnga yãbre. La ade, a Sol da yi-la a pʋʋgẽ n pʋgd a niis n watẽ, la a sokame: «Bõe n tar nebã tɩ b yãbda?» Tɩ b togs-a Yabɛs rãmba sẽn yeel koɛɛg ningã. A Sol sẽn wʋm rẽndã, Soaala-Wẽnd pids-a-la ne raoodo, t'a sũura sɩng kɛɛbo. A yãka niis a yiibu, n bees ba, n tʋm neb Israyɛl tẽnsa fãa tɩ b tɩ yeele: «Sẽn pa boba zabre ne a Sol la a Samwɛl, yaa woto la b na n bees a soab niisi!» Soaala-Wẽnd kɩtame tɩ rabeem kãseng yõk nebã, tɩ b fãa gill yi wa nin-yende. A Sol sõda neba Bezɛk: a Israyɛl kamba sõor da yaa tus kobs-tã, a Zɩɩda rapã, tus pis-tã. La a yeela b sẽn da tʋm b rãmbã: «Yeel-y Galaad Yabɛs tẽng rãmba: beoogo, wĩndga sã n wa zẽke n zabdẽ, y na n paama sõngre.» B sẽn leb b yiri, b taasa koɛɛgã Yabɛs rãmba, tɩ b sũur yɩ noogo. Yabɛs rãmba yeela a Naas: «Beoogo, tõnd na n yi n sega yãmba, la y na n maana y sẽn dat bũmb ninga ne-do.» Vẽkembeoogo, a Sol welga nebã zĩis a tã. Yibeoog pĩnda, b tɩ kẽe Amonitsã tãb-sikã, n zab ne-ba, al tɩ ta wĩnto-sʋka. Sẽn põs-ba sẽegame. Neb a yiib meng pa tõog n pa ne taab ye. Nebã yeela a Samwɛl: «Ãnd n da yet t'a Sol kõn dɩ naam tõnd zugu? Bɩ y yõg nin-bãmb n kõ-d ka, tɩ d kʋ-ba!» La a Sol yeelame: «B kõn kʋ ned ba a ye dũnna daara ye, tɩ rũnna Soaala-Wẽnd fãaga a Israyɛl.» A Samwɛl yeela nebã: «Wa-y tɩ kẽng Gilgal, n tɩ yug naama n paase.» A Israyɛl kamba fãa kẽnga Gilgal, b zaondga a Sol a naam goeel zug, Soaala-Wẽnd taoore, n yet t'a yɩ b dĩma. Beene, b kʋʋ maando, laafi yĩnga la be me, a Sol ne Israyɛl gill maana kibs kãsenga. A Samwɛl yeela a Israyɛl kamba fãa: «Ade, mam kelga yãmb koɛɛga, m maana y sẽn yeel-m bũmb ning fãa la m ninga dĩm yãmb sʋka. Marsã, ad-y yaa dĩm ninga sẽn na n lʋɩ-a yãmb taoora la woto! Sã n ya maam yẽ, mam lebga nin-kẽema, m zug pelgame, la m kamba bee ne yãmba. Mam kẽna yãmb taoore, al m yãadmẽ n ta rũnna. Ad ma! Togs-y-ma, Soaala-Wẽnd taoore, la b sẽn sõog a soab naam kaama taoore: ãnda la m yẽeg n deeg a naafo, n deeg a bõanga? Ãnda la m weoog yã, la ãnd soab la m tall toogo? Ãnda nengẽ la m deeg ligdi n mum m nini n kedb bʋʋdo? M na lebs-y y ligdi.» Neba leokame: «Ayo! Fo ka maan-d pãng ye, fo ka tall tõnd toog ye, fo ka reeg kũun ned ba a ye nugẽ ye.» T'a Samwɛl le yeel-ba: «Bɩ y wẽen, dũnna daarã, Soaala taoore la kaama sẽn pʋdg a soab zuga taoore, tɩ yãmb ka yãend baa fɩ m nugẽ ye.» Tɩ neba leoke: «D wẽendame!» A Samwɛl yeela nebã: «Ad-y y wẽena ne Naaba-Wẽnd ning sẽn wilg b pãng ne a Moyiiz la a Aarõ la sẽn yiis y yaab rãmb Ezipt tẽnga! Marsã kolg-y ka tɩ m paalg-y bʋʋdo, Naaba-Wẽnd taoore, ne yel-sõma niynsa fãa Soaala-Wẽnd sẽn maan yãmb ne y saam-dãmba yĩnga. A Zakoob sẽn wa Ezipt tẽnga, Ezipt rãmb namsa y ba rãmba la b kelma Naaba-Wẽnde. B tʋma a Moyiiz ne a Aarõ tɩ b tɩ yiis-b Ezipt tẽnga, n tall-ba n wa zĩndig zĩ-kãnga. La bãmb yĩma Wẽnnaam, b Soaala, tɩ b na n bas ba tɩ b lʋɩ, Asor zabrẽ, dĩm a Sisera nugẽ, la b lʋɩ Filisti rãmba la Moab dĩma sẽn kaoog zabre ne bãmb nusẽ. B kelma Soaala-Wẽnd taoore n yetẽ: ‹Tõnd beegame, tõnd basa Soaala-Wẽnd n nok a Baal la Astarte rãmba. Marsã, fãag-y tõndo d bɛɛb nusẽ tɩ tõnd na waoog yãmba.› La b tʋma a Yerubaal, a Bedã, a Zɛfte la a Samwɛl n paam n fãag yãmb y bɛɛba sẽn da gũbg yãmba nusẽ, tɩ y zĩnd b sẽn kõ-y tẽng ninga pʋg ne laafi. La yãmb sẽn yãe t'a Naas, Amonitsa dĩma, yiisa tãpo, n wat n na n zab ne yãmba, yãmb yeela maam: ‹Ad-y tõnd me rata dĩma sẽn na n dɩ naam d zugu.› Naaba-Wẽnd n yaool n ya yãmb dĩma. Ad-y dĩm ninga yãmb sẽn tũusi, y sẽn kose, ad-y dĩm ning Soaala-Wẽnd sẽn kõ yã. Yãmb sã n zoet Soaalã, n sakd bãmba, la y reegd b koɛɛga, yãmb sã n pa kɩɩsd b gomde, n kell n mobg bãmba, yãmb ne y dĩma yam na kẽ Wẽnnaam. La yãmb sã n pa sakd b koɛɛga, yãmb sã n kɩɩsd b gomde, b nug na n sɩbga yãmba, wala b sẽn sɩbg y saam-dãmbã. Le yals-y ka n ges bõn-bãnd ninga Soaala sẽn na n maan tɩ y nif yãende. Marsã ka saas wẽnd ye, yaa alkam kẽebg wakato. Mam na n pʋʋsa Naaba-Wẽnde, la b na tʋma sa-tãse la saaga. Bɩ y bãnge la y gese, tɩ y konga wʋsgo, Soaala-Wẽnd taoore, y sẽn kos tɩ b kõ yãmb dĩma.» A Samwɛl pʋʋsame la badaar bala, Soaala-Wẽnd tʋma sa-tãse, la saaga. Naaba-Wẽnd ne a Samwɛl rabeem kãseng kẽe neba fãa. La b fãa yeela a Samwɛl: «Pʋʋs Naaba-Wẽnd n kõ f yemsã, tɩ b ra ki ye, tɩ tõnd sẽn kos tɩ b kõ-d dĩma, d maana yel-wẽnde, n paas yel-wẽn a taaba.» A Samwɛl yeela neba fãa: «Da zoe-y rabeem ye! Yãmb sɩd maana yel-wẽnde; la da bʋdg-y moog n bas Naaba-Wẽnd ye, la sak-y-ba ne y sũur fãa. Da bas-y bãmb tũudem ye, tɩ sã n pa rẽ, yãmb na n zoe n pʋga bõn-yood sẽn ka võore, sẽn kõn zĩnd yõod yãmb yĩnga, la sẽn kõn fãag yãmba, tɩ b yaa wẽn-faado. Naaba-Wẽnd kõn daag b buud n bas tɩ rẽ wa ne b yʋ-sãang ye. Bãmb n tũus yãmb b sũurẽ, n maan b buudu. La Soaala-Wẽnd na gũ maam, tɩ m da beeg-ba n bas pʋʋsgo yãmb yĩng ye, mam na n zãmsa yãmb sor sẽn ya neere la tɩrga. Yãmb yee n zoe Soaala bala, sak-y bãmb daar fãa ne y sũur fãa; la ges-y b pãngã sẽn maand bũmb ninga fãa yãmb sʋka. La yãmb sã n maan wẽnga, yãmb na n kiime yãmba ne y dĩmã.» A Sol wa n lebga dĩm n sɩng a naam dɩɩb Israyɛl kamb zugu; a naama yʋʋmd a yiib soaba, a tũusa tãb-biis tus a tã, Israyɛl neba sʋka: tus a yiibu n da be ne-a, Mikmas tẽnga la Betɛl tãng zugu; neb tusri n da be ne a Zonatã, Gibea tẽnga, Bẽnzame soolmẽ. A Sol basa sẽn ketã, tɩ ned kam fãa leb a yiri. Daar a ye, a Zonatã luba Filisti rãmba sẽn da ning komber ning Gibea wã. Neba waa n bãnga yellã. A Sol kɩtame tɩ b peeb bargo a soolma fãa pʋgẽ, n yet tɩ b sõng tɩ tẽnga kẽedba, Ebre rãmba fãa wʋm a bʋʋrã. Sɩda, kibarã taa Israyɛl gilli. B bãngame t'a Sol kʋʋ Filisti rãmb kombere, tɩ b yik n maand beem ne a Israyɛl. Woto wã neba fãa sũ taaba a Sol poorẽ, Gilgal tẽnga. Filisti rãmba me sũu taaba n na n tak zab ne a Israyɛl. B da tara bilim-bilm tus pis-tã, wed-dʋʋdb tus a yoobe; tãb-biisa sõor da zema mogra noor bĩisri. B waa n siga Mikmas, Bɛt-Aven yaanga. A Israyɛl mikame tɩ na n yɩɩ yell ne-a. Bɛɛba da rɩdgda wʋsgo tɩ b zoe n tɩ soond tãmsẽ, bogdẽ, pĩisẽ, gasd pʋgẽ solgr zĩisẽ la ko-bao pʋsẽ. Neb kẽer me rʋʋga Zʋrdẽ kʋɩlgã n kẽng Gad la Galaad soolmẽ. A Sol da ket n bee Gilgal, la neba fãa sẽn da be ne-a wã da rigdame. A gũu rasma a yopoe, n zems a Samwɛl sẽn bas-a daarã; a Samwɛl ka wa Gilgal ye tɩ neba fãa sẽeg n basd a Sol. T'a Sol yeele: «Wa-y ne yũ-noog maoongã la maan-dɩtgã.» A kʋʋ maandã. A Sol sẽn kʋ yũ-noog maoongo n sɛ, la a Samwɛl sẽn wẽneg n wa. A Sol yi n seg-a lame n na n pʋʋs-a. A Samwɛl sokame: «Fo maana bõe?» A Sol leokame: «Mam sẽn wa n yãe tɩ neba sẽegdame, n basd maama, tɩ yãmb me pa watã, tɩ wakata yaool n loogã, tɩ Filisti rãmba me sũ taab Mikmasã, mam yeelame: ‹Filisti rãmba na n wa paam-m-la Gilgal tɩ m nan pa sigs Naaba-Wẽnd sũur ye.› Wakat kãng la mam me keng m pelga, n kʋ maoongo.» A Samwɛl yeela a Sol: «Fo maana gãeemdo! Fo ka tũ Soaala-Wẽnnaam, sẽn da kõ-f noor ninga ye. Soaala-Wẽnd da na n paasa f naam pãng tɩ f soogẽ Israyɛl daar fãa. Marsã, f kõn kaoos f naama zaoorẽ ye. Naaba-Wẽnd bao-la b sũur neda, n tũus-a, t'a na n yɩ b buuda naaba, tɩ Soaala-Wẽnd kõo foo noore, la fo ka reeg ye.» La a Samwɛl yika Gilgal n kẽng Gibea, a Bẽnzame soolmẽ. A Sol sõda neba sẽn kell ne-a wã: neb kobs-yoobe. A Sol ne a biiga Zonatã la a neba da bee Gibea, a Bẽnzame soolmẽ, tɩ Filisti rãmba ra be Mikmas. Daar a ye, tãb-biis sẽn pid ne raoodo, yii Filisti rãmba sikẽ n welg sags a tãabo. Sak a ye rɩka Ofra sore, Sual tẽnga. A yiib soaba rɩka Bɛt-Orõ sore, t'a tãab soaba tũud tãng ning sẽn luga Kata bãooga noorẽ, sẽn dabd zĩ pɛɛlẽ. Sẽeb da ka le ket Israyɛl tẽn-tõra ye, tɩ Filisti rãmba ra kõ b meng yam n yeele: «D tog n maoome tɩ Israyɛl kamba ra tõog n kud sʋʋs la kãn ye.» Woto Israyɛl neba gilli ra kẽnda Filisti rãmba nengẽ, n na n saas wãka, lare, kutoaaga bɩ kãnde. F wata ne wakɩ koeems a yiibu f sã n dat saas wãgs a tã, bɩ kutoos a tã, bɩ kõs a tã, bɩ lay a tã, bɩ pɛɛm niyns sẽn tar n tikd nag-koodsã a tãabo. Woto wã Mikmas zabra daar taame, tɩ tãb-biisa fãa sẽn da be-b ne a Sol la a Zonatã ra pa tar sʋʋga bɩ kãnd ye. A Sol ne a biiga Zonatã bala la b da paam n kõ. Filisti rãmba tãb-biis sull a ye wa n yiime n tees Mikmas. Daar a ye, a Sol biiga, a Zonatã, yeela a sõgen ninga sẽn da tʋkda yẽ zab-teedã: «Wa tɩ d loog n ta Filisti rãmba sẽn wẽ b tãb-sika zĩig ningã.» A yaool n ka togs a ba ye. A Sol da yɛsa Migrõ, tẽng sẽn ya toaag ne Gibea, tɩɩg a ye sẽn womd a biis wa poaloanga tẽngre. Neba da tigma taab beene ne-a, b da taa dap kobs-yoobe. Yaa a Ayitub biiga a Ayiya, a Yikabod ba-biiga, a Pinas biiga, la Soaala maan-kʋʋd a Eli sẽn da be Silo wã yagenga, yaa yẽ n da bob bag-teedã n sokd Soaalã. Neba ka bãng t'a Zonatã kẽnga ni ye. A Zonatã da rɩka so sẽkã n na n ta bɛɛba sikã. A tũu pĩ-sɩlens a yiib sʋka. Pĩig a ye yʋʋr da boondame t'a Bosɛs t'a to wã boond tɩ Sene. Pĩig a ye wã da bee goabga n teesd Mikmas, tɩ pĩig a to wã be dɩtgo n teesd Gibea. A Zonatã yeela a sõgna sẽn da tʋkd a zab-teedã: «Wa tɩ d loog n ta nin-dẽgda nengẽ, daare, Soaala na maan bũmb n sõng-do, tɩ bũmb pa tõe n gɩdg Soaala-Wẽnd tɩ b maan daood ne neb wʋsgo bɩ ne neb a yiib bal ye.» Sõgna sẽn tʋkd a zab-teedã leokame: «Maan-y wa y sẽn date. Kẽng-y, m tũuda y sẽn yeele.» A Zonatã yeelame: «Ade, d kẽnd n teesda bɛɛbã marsã la d sẽn lik d mensã, b na n yãend-d lame. B sã n yeel tõndo: ‹Yaas-y be tɩ d wa!› D yalsda zĩ yɛnga n gũ-ba. La b sã n yeele: ‹Kolg-y!› D bʋʋgd-b lame, wala d tara kaset tɩ Naaba-Wẽnd dɩk-b lame n sagl d nusẽ.» Woto wã b lika b mense tɩ Filisti rãmba tõog n yãend-ba. Filisti rãmba yeelame: «Ges-y Ebre rãmb sẽn pusd bogdẽ n yit b sẽn da solgẽ.» Filisti rãmba yeela a Zonatã ne a zab-teeda tʋkda: «Kolg-y tɩ d tara bũmb n na n wilg yã.» T'a Zonatã na n yeel sẽn zɩta a teedã: «Pʋg maam, tɩ Soaala-Wẽnd ning-b la a Israyɛl nugẽ.» A Zonatã vũname n dʋ, t'a sõgna pʋgd a poore. Filisti rãmba da rʋʋgda a Zonatã taoore, t'a sõgna pʋgd n baasd-b. Zĩig pʋgẽ bala, tɩ vɩʋʋga ka yɩɩd nag-koods a yi sẽn tõe n ko daar a ye pʋɩ-sʋk ye, a Zonatã ne a sõgna kʋʋ neb pisi. Dabeem kẽe tãb-sikã, n kẽ tãb-biisa la neba fãa sẽn da pẽ-b be. Filisti neba sẽn da ya-b gũudba, b sẽn da teeg neb niyns n na n maan raooda, bãmb fãa sɩnga rigbu. N paas me tẽnga meng sɩnga miuungu, la rẽ kẽes-b-la rabeem kãsenga, lebga zũnd-zãnde. A Sol da ninga gũudba Gibea, sẽn be a Bẽnzame tẽn-peelmẽ. Gũudba yãeeme tɩ Filisti tãb-sika yaa zũnd-zãnde. Ned kam fãa zoet n teesa a sẽn datẽ. Dẽ la a Sol yeel sẽn da be-b ne-a wã: «Bool-y yʋya n bãng neb niyns sẽn ka be-b tõnd sʋka.» B boola yʋya la b mikame t'a Zonatã ne a sõgna n ka be. Rẽ la a Sol yeel a Aya: «Kolg ne kuga walsa koglgã.» Baraare, koglga ra be-la a Israyɛl tãb-sikẽ. A Sol da ket n gomda ne maan-kʋʋdã, la bʋrgã ra yãngd n paasda Filisti rãmba sikẽ. A Sol yeela maan-kʋʋdã: «Da le nams n sok Soaala-Wẽnd ye!» A Sol ne tãb-biisa fãa sẽn da be ne yẽnda wã tigma taaba, la b taa zabra zĩigẽ. Filisti rãmba ra lɛɛg n kẽe taaba tɩ yaa sʋʋg pa yɩɩd m sʋʋga, yaa ka mi sẽn ya-la. Ebre rãmba sẽn da sõngd Filisti rãmb la sẽn da yãag-b bãmb zabrẽ wã, b fãa bas-b lame, n wa naag Israyɛl rãmbã, n naag ne a Sol la a Zonatã. Israyɛl kamb niyns fãa sẽn da solg-b Efrayim tãnga zugu, bãmb me sẽn wʋm tɩ Filisti rãmba ra zoetame, pʋg-b lame tɩ ya zabr ne zabr bala. Badaare, Naaba-Wẽnd sõnga a Israyɛl t'a tõog a bɛɛbã, Zabra sãag n ta Bɛt-Orõ la sẽn loog be fãa. Badaare toog wʋma a Israyɛl, t'a Sol da kãaba woto: «Wẽnd na sãam ned ning fãa sẽn na n dɩ-a dɩɩbo tɩ zĩig nan pa sobge, tɩ m nan pa zab ne bɛɛbã n sɛ ye.» La ned ba a ye ra pa tol n dɩ rɩɩb buud ye. Neba ra waa n paam n kẽe tʋgrã. Mik tɩɩs n da bas b sũm tɩ rʋʋge la sũma ra yaa sɩɩd-sɩɩdo. Dɩlla neba sẽn kẽ tʋgrã b tuka bõn-sɩɩdã. Neba pa sak n yãk n lemb ye; b ra zoeta kãabga na n wa tũ-ba. La a Zonatã da pa wʋm a ba wã sẽn da kos a nebã no-loeera ye. A rɩka rasaar ning sẽn da be a nugẽ n tẽk sɩɩdã n lembe la a nenga vẽnegame. La ned n waa n yeel-a: «F ba wẽename n kãab tɩ ned ning fãa sẽn na n dɩ-a bũmb rũnna daarã, bɩ Wẽnd yãk a soab barka.» Kom n yaool n da kʋʋd nebã. A Zonatã leokame: «M ba waa ne tẽng wãabo. Ad-m sẽn lemb sɩɩd bilf bala tɩ m neng zoe n yẽege. Neba sã n da dɩ b sẽn fã b bɛɛba nusẽ wã, Filisti rãmba tõogr kõn yɩẽ kãsenga n yɩɩge?» Badaare, b tõoga Filisti rãmba, al Mikmas n ta Ayalõ. Neba ra yɛɛ zãng fas. Neba zɛɛ bɛɛba sẽn da so wã, rũm-bõonego, lolse, nag-bi. B kood-b-la tẽng bala, la b yalsa zɩɩma sẽn daaga zug n wãb nemdã. La kibarã taa a Sol: «Neba bɛɛga Naaba-Wẽnde, b dɩta bũmb ne a zɩɩm, n pa kodg ye.» La a yeelame: «Yãmb beegame! Tall-y kug bedre n wa ka!» A Sol paasame: «Gilg-y n wilg neba tɩ ned fãa tall a naafo bɩ a pesgo n wa mam nengẽ. Y na n kʋ-b lame n wãb ka la y ka na n dɩ zɩɩm sɛɛgẽ n sãam Soaala-Wẽnd sũur ye.» Ned kam fãa talla a sẽn tare n wa badaar yʋngo tɩ b kʋ zĩ-kãnga, kugra zugu. Yaa woto la a Sol me maan-kugr Soaala yĩnga. Dẽ n yɩɩ a pipi maan-kugri. A Sol yeelame: «D na n yika yʋngo n dig Filisti rãmba, n zɛ b teedã n tãag zĩig yẽegre; d kõn bas ned ba a ye t'a põs ye.» Neba leok-a lame: «Maan sẽn ta fo yam.» La maan-kʋʋda yeelame: «D kolg n sok Wẽnde, kaalẽ bala.» A Sol soka Wẽnde: «M tõe n diga Filisti rãmba bɩ? Y na n ning-b la Israyɛl kamba nugẽ bɩ?» La Soaala-Wẽnd pa leok-a badaar ye. La a Sol yeelame: «Kolg-y ka, yãmb fãa, Israyɛl kãsem-dãmba! Tags-y neere, la y wilg rũnna beegrã sẽn yɩ bũmb ning taki. Ne Naaba-Wẽnd sẽn vɩ la b fãagd a Israyɛl, ba sã yaa m biiga a Zonatã, n maan yellã, sɩda, a na ki!» Buuda sʋka, ned ba a ye pa tõog n leok-a ye. Dẽ la a Sol yeel a Israyɛl gilli: «Yãmb ye n yalse kɩrẽng a ye, tɩ maam me ne m biig, a Zonatã, yalsa kɩrẽng a to.» La neba leoka a Sol: «Maan sẽn ta fo yam bala.» A Sol yaool n yeelame: «Soaala, Israyɛl Wẽnnaam, togs-y d vẽenega la zãnga.» Poeera lʋɩ-la a Sol ne a Zonatã zugu, neb a taaba põsame. A Sol yeelame: «Poees-y maam ne m biig a Zonatã.» Poeera lʋɩ-la a Zonatã zugu. A Sol yeela a Zonatã: «Togs maam fo sẽn maane.» A Zonatã leokame: «Mam dɩka dasaar ning sẽn da be m nugẽ, n tẽk sɩɩdo n lembe, sã n ya kũum me, m sakame.» A Sol yeelame: «Wẽnd na sɩbg-m, la b le sɩbg-m n bãge fo sã n pa ki, Zonatã!» La neba yeela a Sol: «A Zonatã na ki sɩda, yẽnda sẽn kɩt tɩ Israyɛl tõog a bɛɛbã ne tõogr kãsengã? Kõn yɩ yel-beedo? Ne Wẽnde, a Zonatã zoobg a ye meng kõn lʋɩ tẽng ye, t'a sẽn maan fãa rũnna, tũu ne Soaala-Wẽnd sõngre. La yɩɩ woto la neba fãag a Zonatã, tɩ b pa kʋ-a ye.» A Sol basa Filisti rãmba pʋgbo, tɩ Filisti rãmba me leb b tẽngẽ. A Sol rɩɩ naam Israyɛl, la a zaba zĩig zãnga ne a bɛɛba: Moabitse, Amonitse, Edomitse, Soba dĩma, la ne Filisti rãmba. A sẽn da tudẽ fãa, a ra tõogda a bɛɛbã. A tʋma raood tʋʋma, n zab n tõog Amalesitse la a fãaga a Israyɛl ne bɛɛb niyns sẽn da fãad-b yẽnda. A Sol kamba la a Zonatã, a Yiswi, la a Malkisuwa. A kom-pugli a yiibã yɩ-la a Merab, kãsma la a Mikal, yao wã. A Sol paga yʋʋr da ya Ayinoam, a Ayimaas biiga. A tãnsoaba yʋʋr da boondame t'a Abnɛr, a Nɛr biiga, a Sol ba-bila. A Sol ba, a Kis, la a Nɛr ba, a Abnɛr, da yaa a Abiyɛl kamba. A Sol talla zabre woo zabre ne Filisti rãmba. A Sol sã n da yãe nin-tɩrg la sũur soaba, a ra maanda zood ne-a, t'a lebg a tãb-biiga. Wẽnd kãnga, a Samwɛl yeela a Sol: «Yaa maam la Naaba-Wẽnd tʋm yã tɩ m wa pʋdg f zugu naam kaam, tɩ f yɩ b buud a Israyɛl dĩma, kelg Soaala-Wẽnd sẽn yet bũmb ning marsã. Ad Soaala sẽn gomde, a Israyɛl tãb-biisa Wẽnd sẽn yete: ‹Mam na n soka a Amalɛk sẽn sɩng tɩ bũmb ninga t'a gɩdg a Israyɛl sore a sẽn waa n yi Ezipt tẽnga n wat ka. Marsã, bɩ f kẽng n tɩ tak zabr ne a Amalɛk. F tog n wẽename tɩ f kõn deeg a bũmb ba a ye n soog ye. Da bas-a ye! F na n kʋʋ fãa, pagba, rapa, kom-peels la kom-kɩdse, niis la la piisi, yʋgma la bõeense.› » A Sol boola neba fãa, n sõd-b Telɛm tẽnga. Tãb-biisa yɩɩ tus bobs-yi. A Zɩɩda neba yɩɩ tus piiga. A Sol sẽn ta Amalɛk rãmb tẽngẽ, a soos n gãnega tãpo kʋɩl bɛɛg noorẽ. A yeela Kenitsã: «Bɩ y loog n yi a Amalɛk sʋka, bɩ y serg n bas-a, tɩ m da wa lagem yãmb ne bãmb n sãam ye, tɩ yãmb maana a Israyɛl kamb fãa neere, b sẽn wa n yit Ezipt n watẽ.» La Kenitsa serg n basa a Amalɛk. A Sol zaba ne a Amalɛk, sẽn sɩng Avila, n tãag Sur sẽn tot ne Ezipt, yaanga. B yõka Amalesitsa dĩma, a Agag, vɩɩga. B kãabame tɩ ned ba a ye kõn põs ye la b kood-b la fãa ne sʋʋse. A Sol ne a neba yaool n basa vɩɩse a Agag, n paas rũms niyns sẽn ya-b sõma, bɛd la bõonese, yʋʋmd yɛng pe-bi. B pa sak tɩ kãab beeda rɩ bãmb ye. Yɩɩ sẽn ka sõmb la sẽn ka yõodã bala la b yõog bugum. Wẽnd kãnga Naaba-Wẽnd goma ne a Samwɛl, b yeel-a lame: «M sẽn kɩt t'a Sol lebg dĩma ka le noom maam ye, t'a wẽnemdame n bas maam, la a pa sakd n deeg m noor ye.» A Samwɛl sũura sãama ali t'a yãbe ne Soaala-Wẽnd, yʋng kãnga. A Samwɛl sãda beoogo n na n tɩ seg a Sol. La b waa n yeel-a lame: «A Sol sẽn ta Karmɛl, a maana yʋ-baoore, n me bũmb be, la a sãag n diga taoore, a taa Gilgal.» A Samwɛl babsa a Sol. La a sẽn ta a nengẽ, a Sol yeel-a lame: «Wẽnd sudg y zug barka! M sakame n deeg Soaala gomde.» A Samwɛl wẽneg n sok-a lame: «La yaa bõe rũmsi, wa piis la niis, n tar yãbre tɩ lʋɩt m tʋbrẽ?» A Sol yeelame: «B tall-b-la Amalɛk rãmba tẽngẽ n wa ka, tɩ neba keesa pe-sõma wã la nag-sõma wã n na n kʋ maoongo n kõ Soaala, fo Wẽnnaama; sẽn keta fãa, tõnd kʋ-b lame.» Dẽ la a Samwɛl yeel a Sol: «Yals ka tɩ m togs-f Naaba-Wẽnd sẽn yeel-m bũmb ninga yʋngẽ.» T'a Sol yeele: «Bɩ y togse!» A Samwɛl yeelame: «Fo sẽn dag n ya wa zaalem f meng nifẽ, fo ka lebg a Israyɛl sagsã naab bɩ? Soaala-Wẽnd ka pʋdg f zug naam kaam, tɩ f yɩ a Israyɛl dĩm bɩ? B tʋma foom, n yeel-fo: ‹Aya! Wẽen tɩ f kõn kees Amalɛk buud ye, zab ne-a n wa menes-a zãnga.› La bõe yĩnga, tɩ fo pa kelg Soaala-Wẽnd koɛɛga? La bõe yĩng tɩ fo kẽng tao-tao n tɩ wʋk te zɛɛdma, n maan yel-wẽnde, Soaala-Wẽnd nifẽ?» A Sol leoka a Samwɛl: «Mam yẽ sẽ, m kelga Soaala-Wẽnd koɛɛg neere, mam tũu sor ning Soaala-Wẽnd sẽn wilg maama, m waa ne a Amalɛk dĩma, a Agag; la mam sãama Amalesitsã. Yaa nebã n yãk te zɛɛdma pʋgẽ, rũm-bɛd la rũm-bõonego, piis la niis, sẽn ya sõmb n yɩɩd-b taaba la sẽn lebg kãab beed bũmbu, n na n tɩ kõ Soaalã, fo Wẽnnaama, Gilgal tẽnga.» A Samwɛl leokame: «Soaala nonga yũ-nood maando, n nong sugr kosg maand wa b sẽn nong b noora deegra bɩ? Ayo! Sakre n são maoongo sulg-m-meng n são pe-raada kaam. Zẽk f meng ne Soaala, wẽen tɩ fo sẽn gãdã, n yɛse dẽ wẽnem yɩɩda kabl Wẽnde, dẽ wẽnem yɩɩda bagr ne a zirẽ-beedã. Fo sẽn zãgs Soaala gomd kelgrã, bãmb me basda foom, f ka le ya rĩm ye.» A Sol yeela a Samwɛl: «Mam maana yel-wẽnde! M zãgsa Wẽnd noore la m pa sak fo goam ye; mam zoe neba nifu, n kelg bãmb koɛɛga. Marsã, m yõkd y sɛɛga; kõ-y maam m yel-wẽnda sugri, la leb-y n wa-y ne maam tɩ m tɩ wõgemd Soaala-Wẽnd taoore n waoog ba.» T'a Samwɛl na n leok a Sol: «Mam kõn leb n tũ-f ye, tɩ fo zãgsa Wẽnd noore, la Soaala-Wẽnd me zãgsa foom, f kõn le yɩ a Israyɛl dĩm ye.» A Samwɛl sẽn wẽnemd t'a na n looge, a Sol gãda a fuug noor tɩ kẽege. T'a Samwɛl yeele: «Dũnna Soaala-Wẽnd gʋsga a Israyɛl rĩung f nugẽ; b na n dɩk-a lame n kõ ned a to sẽn ya sõng n yɩɩd foom.» A tol n le paasame: «Soaala sẽn ya a Israyɛl pãngã, pa gird n le gõms wa ninsaal ye.» A Sol le yeelame: «M maana yel-wẽnde la marsã m kota yãmba, tɩ y ra ning-m yãnde, m nin-kẽembã la a Israyɛl fãa taoore, la y lebg n wa mam nengẽ, tɩ m paam n pʋʋs Soaala-Wẽnnaam.» A Samwɛl lebg n tũ-a lame, la a Sol tɩ wõgemd n pʋʋsa Naaba-Wẽnde. La a Samwɛl yeelame: «Tall-y Amalesitsa dĩma, a Agag, n wa m taoore.» A Agag kolga ne yẽesem. A ra yeta a sũurẽ: «M tẽed tɩ m kõn le lemb kũum ne a tɩɩsma ye.» Mik a Samwɛl na n yeelame: «Wala fo sʋʋg sẽn kɩt tɩ pagba pa na n le yãend b kamba, woto me pagba sʋka, fo ma kõ le yãend a biig ye!» La a Samwɛl kʋ-la a Agag, Soaala-Wẽnd waoogr zĩigẽ, Gilgal tẽnga. Rẽ poore, a Samwɛl leba Rama, t'a Sol me kul a yiri, Gibea. Badaar tɛka, n ta a kũum, a Samwɛl pa leb n yãend a Sol ye. A Samwɛl da yãbda a Sol, tɩ b sẽn bas-a t'a rɩ Israyɛl naama ra pa le noom Naaba-Wẽnd ye. Daar a yembre, Soaala yeela a Samwɛl: «Fo na n kell n yõka yãbre, a Sol poorẽ, n ta da-bʋre? Fo zɩ tɩ m bas-a lame. A kõn le rɩ naam Israyɛl ye. Sui f yɩɩlla kaam tɩ pidi, la yiki! Mam tʋmd-f-la a Zese, Bɛtelyɛɛm neda, yiri, tɩ m yãenda a kamba sʋka dĩm ning m sẽn datã.» La a Samwɛl leokame: «Mam maanda a wãn n ta be? A Sol sã n bãnge, a na n kʋ-m lame.» Soaala yeelame: «Fo na n talla nag-sadg n kẽnge la f na n tɩ yeelame: ‹M wat n na n kʋʋ maoongo n kõ Soaala-Wẽnd.› Fo na n boola a Zese t'a wa maoonga kʋʋbã. M meng m toor na wilg-f f sẽn tog n maan bũmb ninga. Mam sẽn na wilg foom a soaba zug la f na n pʋdg naama kaam.» A Samwɛl maana soaala sẽn togs-a bũmb ning fãa, la a taa Bɛtelyɛɛm. La tẽnga nin-kẽemba seg-a-la ne yɛɛsgo. B sok-a lame: «Yaa noogo, tɩ yãmb wat ka?» T'a Samwɛl leoke: «Yaa noog bala; m wat n na n kʋʋ maoongo, bɩ y segl y mens n yɩ sõma, la y wa tũ maan tɩ d kẽng maoongã kʋʋb zĩigẽ.» La yẽ meng yɩlga a Zese ne a kamba, la a bool-b-la maoonga kʋʋb zĩigẽ. B sẽn ta maoonga zĩigẽ, a Samwɛl yãenda a Eliyab, n yeel a sũurẽ: «M mi tɩ Soaala-Wẽnd sẽn tũus a soabã bee ka m taoore.» La Soaala-Wẽnd yeela a Samwɛl: «Da ges a neng neerem ye, da ges a woglem ye, tɩ ka yẽnda la m yãkd ye; ninsaal geta nin sẽn ne, Soaala-Wẽnd geta sũurẽ.» A Zese boola a Abinadab a Samwɛl taoore la a Samwɛl yeelame: «Ka yẽnda me la Soaala-Wẽnd tũus ye!» A Zese kɩtame t'a Sama wa: t'a Samwɛl yeele: «Ka yẽnda me la b tũus ye!» La a Zese kɩtame t'a kamb a yopoe wã wa bãngda taoore. A Samwɛl yeela a Zese: «Soaala-Wẽnd pa yãk ned ba a ye bãmbã sʋk ye.» La a le yeelame: «Fo kamba tɛk la woto bɩ?» T'a Zese yeele: «B yao n kete, n ya rũm-kɩɩma.» A Samwɛl yeela a Zese: «Tʋm tɩ b tɩ bool-a t'a wa tɩ tõnd kõn sɩng rɩɩbo t'a nan pa wa ye.» La a Zese tʋmame tɩ b babs-a t'a wa; a Daviid nenga da yaa yãag nenga; a neng ra yaa neere n sakd gesgo. La Soaala-Wẽnd yeela a Samwɛl: «Yik n pʋdg a zug naama kaam, tɩ yaa yẽ!» A Samwɛl rɩka kaama ne yɩɩllã, n pʋdg a Daviid zugu, a kẽem dãmba nifẽ. La badaar tɛka, la sẽn pʋge, Naaba-Wẽnd pãng kẽe a Daviid. A Samwɛl dɩka sore la Rama la a leb yã. Soaala-Wẽnd pãnga yi n bas a Sol t'a zʋga tek n lebg yoogo, n tar-a n namsdẽ. A Sol sõgen-kamba yeelame: «Ad-y Naaba-Wẽnd basame tɩ yam yoogo kẽ yãmba n tar-y n namsdẽ. Sẽn be yaa y kõ noor bala tɩ d be-la y yĩnga. D na yãend ned sẽn mi bɛɛl wẽebo, la yam yoogã sã n wa namsd yãmba, nin-kãng na wẽ bɛɛlã tɩ yãmb paam yolsgo.» A Sol leoka a poorẽ dãmba: «Bao-y ned sẽn tõe n maan noog ne bɛɛl, n kõ-ma!» Na-yir dãmba nin-yend yeelame: «Ade, mam yãee Bɛtelyɛɛm daoa a Zese biiga, a mii bɛɛla, n paas me, a yaa gãndaoogo n tar pãnga, n ya zab-zabda, a noor mii goama, la yaa dasãnga, la Soaala-Wẽnd bee ne-a.» A Sol tʋma a Zese nengẽ, tɩ b tɩ yeel-a: «Tʋm maam f biig a Daviid, sẽn gũuda piisã.» A Zese yãka bõang a ye la rãam ne waoog la bulla la a tʋma rẽ fãa, ne a biiga a Daviid tɩ b tɩ kõ a Sol. A Daviid taa a Sol nengẽ, n yals a taoore; la a taa a Sol yam al wʋsgo, t'a yãk-a t'a tʋkd a zab-teedo. La a Sol kɩtame tɩ b tɩ yeel a Zese: «M kotame tɩ f bas f biiga a Daviid, t'a yɩ mam dakõore, t'a taa mam yam.» La yam wẽngã, Soaala-Wẽnd sẽn bas-a ne a soaba, sã n da kẽe a Sol fãa, a Daviid da rɩkda bɛɛl n wẽ. La a Sol da paamda laafi la yolsgo; la yam wẽngã da zoet n basd-a lame. Dasem-kãense, Filisti rãmba da tigma b tãb-biisi n na n maan zabre. B sũu taab Soko, a Zɩɩda soolmẽ la b gãnega tãpo, Efes-Damim, Soko la Azeka sʋka. A Sol ne a Israyɛl kamb me tigma taaba, bãmb me gãnega tãpo, bãoogẽ, la b tonga taab rũnug-rũnuga n na n zab ne Filisti rãmba. Filisti rãmb dag n bee tãng a ye pennẽ; t'a Israyɛl kamba me be tãng a to pennẽ. Bãg-faag n da be sʋka. Gat dao a ye n yɩ Filisti rãmba tãb-sikã, a yʋʋr da boondame t'a Goliyat. A woglem da yaa kãntɩɩs a yoobe la nug-yakemde. A da fõgna kut zug-peoogo, n yeelg kut fuug sẽn wẽnd piryãong poore. Fuuga zɩslem taa neb a yiib zɩɩbo. A ra vila a nao wã ne kut gãmbre, n zãad zũud kãnde. A kãnd-daooga da yaa wa sʋnd koeer-bõanga; kãnda meng zɩslem taa yubl sẽn pid koom. Ned n da tʋk a gãongã n kẽnd a taoore. Filisti rao wã yalsame n gom ne a Israyɛl sẽn da tong taab rũnug-rũnugã, zabra yĩngã, a zẽka a koɛɛg n kelme: «Bõe tɩ y na n yi n tong taaba zabre yĩnga? Mam ka Filisti tãb-biig tɩ yãmb yaa a Sol yem-daada bɩ? Tũus-y nin-yend t'a wa zab ne maam. A sã n tõog n zab ne maam n kʋ-ma, tõnd na lebg yãmb yemse la sã n ya maam n tõoge, n kʋ yãmb nedã, yãmb n na n yɩ tõnd yemse la d tʋʋm-tʋmdba.» Filisti rao wã le yeelame: «Maam n baood a Israyɛl tãb-biisa noor dũnna; kõ-y maam ned a ye, tɩ d zab taab n gese!» A Sol ne a Israyɛl kamba fãa wʋma Filisti rao wã goama, la b yɛɛsame, rabeem kãseng yõk-b lame. A Daviid da yaa Efrata sakẽ daoa, Bɛtelyɛɛm tẽnga, a Zɩɩda tẽn-peelmẽ. A ba wã la a Zese la a Zese kamb yɩɩ bãmb b nii. A Sol wakata t'a Zese da paam n kʋʋlame la a me ra yɩɩ zab-zabda. A Zese kom-bɛd a tãabã da tũ-la a Sol n kẽng tãpo. Kamba a tãabã sẽn kẽng tãpã yʋy la woto: kãsma, a Eliyab, sẽn pʋgda soaba, a Abinadab, a tãab soaba, a Sama. A Daviid n da ya yao-zʋʋga. Yẽ kẽem-dãmb da tũ-la a Sol, zabrẽ. La a Daviid da kẽnda a Sol nengẽ la a lɛɛgd n wat Bɛtelyɛɛm n kɩɩmd a ba rũmsi. Filisti gãndaoogã da wata yibeoog la zaabr fãa, la a tãoosa raooda woto dasem pis-naase. La a Zese waa n yeela a biiga, a Daviid: «Deeg ki sẽn kɩɩm wamd a ye, la bur piiga, n zoe n kẽng n tɩ kɩs f kẽem dãmba sẽn be tãb-sika pʋga. Deeg bĩs kaam gil piiga n tɩ kõ tãb-biis tusr tãnsoabã. F na sok n bãng f kẽem dãmba sã n tara laafi, la reeg b nengẽ bũmb sẽn kõt kaseto tɩ b keta ne yõore. B bee ne a Sol la a Israyɛl tãb-biisã, tɩ-wogda bãoogẽ wã n zabd ne Filisti rãmbã.» A Daviid yika yibeoog pĩnda, n bas a piisã ne rũm-kɩɩma, n tʋk toaalã, n maan wa a ba sẽn yeele. A taa tãb-sikã. Segame tɩ tãb-biis ra yita tãb-sikã n tees zabra sẽn zabdẽ, n kelemd b kɛlenga. Israyɛl kamba ne Filisti rãmba tedgame n tees taaba. A Daviid sika a sẽn da zɩtã n bas ne sẽn get-b teedã. A zoe n taa zabra zĩigẽ, n pʋʋs a kẽem-dãmbã. A sẽn waa gomd ne bãmba, Gat gãndaoog ning sẽn da boond t'a Goliyatã, le yi n yalsa Filisti rãmba ne a Israyɛl kamba sʋka. A le goma wala a sẽn zoe n gom pɩnda, t'a Daviid wʋme. A Israyɛl sẽn yãe neda bala, b fãa zoeeme, tɩ rabeem kãseng yõk-b lame. Israyɛl kamba ra yetame: «Way! Yãmb yãee dao wã sẽn wata bɩ? A kolgdame n na n bao a Israyɛl noore. Ned ninga sẽn na n kʋ-a, dĩma na kõ a soab arzɛgs wʋsgo, b na kõ-a a bi-pugla t'a maan a paga, la b na bas a ba ne a zak rãmba yõor yaood la tʋʋma taale.» A Daviid soka sẽn da be a sɛɛgẽ wã: «Sẽn kʋʋda Filisti rao kãnga, n dok a Israyɛl yãnde, b na n maana a soab bõe? Filisti kãnga, nin-dẽgdã, yaa ãnna, n wat n tʋʋsd Vɩɩm Naaba-Wẽnde tãb-biisi?» Neba le togs-a lame: «Yaa wa d sẽn yeelã la b na n maan ne sẽn na n kʋ-a Filisti rao wã.» A kẽema a Eliyab sẽn wʋm t'a Daviid gomd ne nebã, a sũur puuga ne-a, t'a yeele: «F waa ka n na n maan bõe? F basa rũm-bõonesa gũub ne ãnna we-raoogẽ wã? Mam mi-la f ka tõe n zĩnd f zĩ yɛngã la f raab yoodã. F waame bala n na n ges zabrã.» A Daviid leokame: «Mam maana bõe, ka m sẽn goma bal laa?» A basa yẽnda la a goma ne ned a to, a soka wala pĩnda, la b leok-a la wala b sẽn zoe n leok-a wã. B sẽn wʋm a Daviid goama, b taas-b la a Sol, la a Sol kɩtame tɩ b bool-a. A Daviid tɩ yeela a Sol: «Bɩ ned ba a ye da bas raood, Filisti rao kãngã yĩng ye! Ad-y mam na n zaba ne-a.» A Sol yeela a Daviid: «Fo pa tõe kẽng n tɩ zab ne Filisti rao kãnga ye, fo yaa yãaga, la Filisti raoã yaa zab-zabda al a yãadmẽ.» A Daviid leoka a Sol: «Mam da gũuda m ba rũmsi, m naaba, gɩgemde bɩ rũng sẽn ya toaaga n yɩɩd gɩgemde, sã n da wa n na n yõk rũnga, m da wudgdame, n pʋg-a; m da pãbd-a lame; m da gʋsgda rũngã, a noorẽ. A sã n da baood zabre ne mam menga, m da gãta a gɛdã n tar a pãbre t'a wa ki. Yaa woto la mam kʋ bõnyẽega la gɩgem-padre. La ade, na n yɩɩ boto me ne Filisti rao kãnga, ne nin-dẽgdã, t'a baoo Vɩɩm Naaba-Wẽnd tãb-biisa noore.» A Daviid le yeelame: «Naaba-Wẽnd sẽn fãag maam, tɩ m tɩlg ne gɩgemde la gɩgem-padre, bãmb n na n fãag maam Filisti rao kãnga nugẽ.» A Sol yeela a Daviid: «Kẽnge! La Wẽnd na zĩnd ne-fo!» A Sol yeelga a Daviid a meng futu, n fõgneg-a kut zug-peoogo, n sog kut fuugu a yãoogẽ. A Daviid boba a Sol sʋʋgã n paas futã, n mak t'a na n kẽnge, n pa tõog ye. A ra zɩ n tʋk zɩɩb a woto ye. Woto a yeela a Sol: «Mam pa na n tõog n kẽne ne woto fãa tɩ m ka minim ye.» A piida rẽ fãa n dʋʋge. A rɩka a dasaar a nugẽ, n tũus kʋɩlga kug saal a nu n sui a pe-kɩɩm korgẽ, gɩf a ye pʋgẽ; loaabg bala n da paase la a looga woto n na n tɩ zab ne Filisti raoã. Filisti nin-daooga lʋɩɩsa a taoore sõgna sẽn zɩt a gãongã n segd a Daviid. A nif sẽn pẽnega a Daviid, a yõka a tʋʋre, t'a yãeeme tɩ nan yaa bi-bilf bala, bi-moomde, n tar neerem. Filisti raoã yeela a Daviid: «M yaa baag laa? Tɩ f wat m segbo ne dasaare?» La a kãab-a-la beedo, n bas-a ne a wẽnd dãmba. A le yeel-a lame: «Zoe n wa, tɩ m dɩk f nemdã n kõ yĩngri luiili la we-rũmsi tɩ b rɩ.» A Daviid leoka Filisti raoã: «Fo wat n na n zaba ne maam, ne sʋʋga la kãnde la kãnd bila, mam yẽ wat n na mao ne foo, Pãens rãmba Wẽnda yaa m zab-teedo, Israyɛl Wẽnnaam n pids-m ne raoodo, f sẽn sãbs b tãb-biisa yĩnga. Dũnna menga Naaba-Wẽnd na n dɩka foom n ning m nugẽ; m na n kʋʋ foom, n fiuug f zugu; dũnna, m na n dɩka Filisti rãmba yĩnsi n kõ yĩngr luiili la we-rũmsi. Dũni zãng fãa na bãng t'a Israyɛl Wẽnda la Wẽnd. La zãma wã na bãnge, tɩ Soaala-Wẽnd ka fãagd ne sʋʋga bɩ ne kãnde, tɩ Wẽnd la Tãnsoaba la b na n dɩka yãmb n ning tõnd nugẽ.» Filisti rao wã yikame, n yãosdẽ, n wat a Daviid segbo. A Daviid wudgame n tɩ seg Filisti rao wã n na n zab ne-a. Tao tao bala a Daviid tʋma a nug a korgẽ, n sak kugr a yembre, n lobg-a ne a loaabgã, la a yõka Filisti rao wã dĩiri la kugrã suda Filisti rao wã dĩiri, t'a lʋɩ, t'a neng fõgneg tẽnga. Yɩɩ woto! Ne loaabga la kugri, a Daviid pãng yɩɩga Filisti rao wã, a lub-a lame, n kʋ-a, t'a nug yaool n pa zãad sʋʋg ye. A Daviid wudgame, n tɩ yals Filisti rao wã sɛɛgẽ, n gãd a sʋʋgã n wõog-a a wʋʋgẽ, n kʋ a Goliyat, n fiuug a zugu. Filisti rãmba sẽn yãe tɩ b gãndaoog kiime, b zoeeme. La a Israyɛl ne a Zɩɩda rapã zẽka b koees n kelme, n zoet n pʋgd Filisti rãmba bãooga pʋga, n dig ba, n tɩ tãag Ekrõ. Filisti rãmba sẽn paam sãmpogrã rʋʋga sora zugu, sẽn sɩng Saarayim, n tɩ tãag Gat, la Ekrõ. Israyɛl kamba sẽn dig Filisti rãmba n zãage, b lɛɛg n wa zɛ b tãb-sikã. A Daviid rɩka Filisti rao wã zugu, n tɩ bas Zerizalɛɛm, la a bĩnga a zab-teedã a roogẽ. A Sol sẽn da reng n yãe a Daviid t'a kẽnd n segd Filisti rao wã, a ra soka a Abnɛr, a tãnsoabã: «Bi-bɩɩg kãnga ba yaa ãnda, Abnɛr?» T'a Abnɛr ra leoke: «Ne yãmb sẽn vɩ wã, dĩma, m ka mi ye.» Dĩma yeelame: «Sok f toore n bãng bi-kãnga ba sẽn yaa a soaba.» Yɩɩ woto la a Daviid kʋ Filisti raoa n lɛɛg n wa, tãnsoaba Abnɛr peega a Daviid n kẽng dĩma nengẽ. A ra zãada Filisti raoa zug a nugẽ. A Sol sok-a lame: «M biiga, fo ba la ãnda?» A Daviid leokame: «Mam ba yaa yãmb sõgen a Zese, Bɛtelyɛɛm neda.» A Daviid sẽn gom n sɛ ne a Sol, a Zonatã sũur tabenda a Daviid, t'a na n nong-a ne nonglem kãsenga. Badaare me la a Sol reeg a Daviid, a zakẽ n pa le bas-a t'a leb a ba nengẽ ye. A Zonatã yõga zood ne a Daviid, n da nong-a wala a menga. A tol n yeega a sẽn da yer fu-taok ningã n kõ a Daviid, n paas fut a taaba, n paas a sʋʋga ne a tãpa menga la a sɛɛga sẽbdga. A Daviid da kẽngda a Sol sẽn da tʋmd-a zĩig ning fãa, la zĩig fãa, a ra tõogda bɛɛbã. A Sol kɩtame t'a lebg a tãnsoaba. A Daviid ra tata neba fãa yam. Ba na-yir dãmba da nong-a lame. A Daviid sẽn wa n kʋ Filisti rãmba nin-daoogã n lɛɛg n wa, pagba fãa yii Israyɛl tẽnsa fãa n wa seg a Sol, n zodgd yɩɩla, n pãbd gãngãado, la b wẽed kɛma n saoodẽ la b kilsdẽ. Pagba da zodgda yɩɩla n deesd taab n yetẽ: «A Sol kʋʋ tusri! A Daviid kʋʋ tus piiga!» A Sol sũur puugame. Tus piiga pa ta a yam ba bilfu, t'a yeele: «B yetame t'a Daviid kʋʋ tus piiga tɩ mam kʋ tusr bala. Woto wã ka naama bal n paoog a Daviid marsã!» Badaar tɛka la sẽn pʋge, a Sol gesa a Daviid kegr-kegre. Vẽkembeoogo, Naaba-Wẽnd le basame t'a Sol zʋg yooga le yiki t'a gãeemd a zak pʋga. A Daviid da wẽeda bɛɛl wa dasem kam fãa; a Sol da zãada kãnde, a nugẽ. A Sol zẽka kãndã, n yeel a sũurẽ: «M na n tão a Daviid n ka-a ne lalgã.» La a Daviid ligla tãooba naoor a yi. A Sol da zoeta a Daviid. Soaala-Wẽnd da be ne a Daviid, n yaool n da yi n bas a Sol. A Sol zãaga a Daviid ne a menga, n kɩt t'a lebg tãb-biis tusr tãnsoaba. A Daviid da lʋɩta a neba taoore, tɩ b yit n kẽnd zabr la b watẽ. A sã n da bob zabr fãa, a lɛɛgd n waa ne zu-zẽkre tɩ Soaala-Wẽnd dag n be ne-a. A Sol sẽn mik tɩ bũmba fãa sakda a Daviid, a zoe-la a rabeem. A Israyɛl ne a Zɩɩda zãng da nonga a Daviid, a sẽn da lʋɩt bãmb taoor yĩnga tɩ b yit n kẽnd zabre la b lebgdẽ. Daar a yembre, a Sol yeela a Daviid: «Ad-m kom-pugli wã kãsma, a Merab. Yẽ la m na n kõ-f tɩ f maan f paga. Fo ye n modg bala n keng f sũuri la f zab Wẽnd zabre.» Mik a Sol da yeta a sũurẽ: «Bɩ m nug ra sɩɩs-a, la Filisti rãmba nug maan-a bũmbu!» A Daviid leokame: «M yaa ãnda, m dogma yũug tonga ne ãnda rẽnna, Israyɛl tẽn-peelmẽ tɩ mam na n lebg rĩma rɛɛmba?» La wakat sẽn wa n ta, tɩ b ra tog n kõ a Daviid a Sol bi-pugla, a Merab, a rɩk-a lame n kõ a Adriyɛl, Meola rao, t'a maan a paga. A Sol bi-pugla a Mikal yam waa n kẽ-la a Daviid: tɩ b togs a Sol, la rẽ me ta-la a yam. A ra yeta a sũurẽ: «M na n kõ-a-la a Mikal tɩ yɩ bẽdg a yĩnga n lub-a Filisti rãmba nusẽ.» Dɩlla, paam n taa naoor a yi la a Sol yeel a Daviid: «Dũnna fo na n lebga mam dɛɛmba.» A Sol kõo na-yir dãmba noor kãnga: «Sõs-y ne a Daviid noogo, la soos-y n yeel-y yã: Ade, dĩma dat n maana foom neere; a poorẽ dãmba fãa nonga foo. Yɩ dĩma rɛɛmba!» A Sol na-yir dãmba togsa a Daviid gom bãmba. La a Daviid leokame: «Yãmb tẽedame tɩ lebg dĩma rɛɛmb yaa naana wɛ? Mam yaa naong soaba, la talg sẽn ka võore.» A Sol sõgen-kamba lɛɛg n tɩ taasa dĩma a Daviid sẽn yeel-b bũmb ningã. A Sol yeelame: «Tɩ gom-y ne a Daviid woto: Dĩma ka rat bũmb a to reemda yĩnga, sã n ka Filisti rãmba koabg la f kʋʋ n dok m sũuri. Kʋ-ba, n kẽes-b bõngo, n wa ne b waoosã.» A Sol da tʋllame bala n sagl a Daviid Filisti rãmba nusẽ. A Sol na-yir dãmba tɩ togsa a Daviid dĩma goama. A Daviid gesame tɩ b sẽn yet t'a maan bũmb ning n paam n lebg a Sol rɛɛmbã, da ka wẽnd bõn-toog ye. B sẽn bas daar ningã da nan pa ta ye, la a Daviid yik n looga ne a neba. A Daviid tɩ kʋʋ Filisti rãmb kobs-yi. A waa ne b sẽn kos bũmb ningã n sõd n dɩgl dĩma taoore, n na n tõog marsã n lebg rĩma rɛɛmba. A Sol sɩd dɩka a biig, a Mikal, n kõ-a t'a maan a paga. Dẽ marsã la a Sol yaool n bãng tɩ Soaala-Wẽnd da bee ne a Daviid, la a bãng me t'a biig a Mikal me ra nong-a lame. A Sol zoe a Daviid n yɩɩd pĩnda; a vɩɩm tɛka, a rɩɩ beem ne a Daviid. Filisti rãmba nanamse le yiime n na n tak zabre. Wakat fãa, a Daviid n da maan daoodo n yɩɩd a Sol tãb-biis a taabã. Dẽ me la a yʋʋra paam n yi wʋsgo. A Sol waa n goma ne a biiga, a Zonatã, la a poorẽ dãmba, t'a rat n kʋ-la a Daviid. La a Sol biig, a Zonatã, da yaa zood meng ne a Daviid. Woto a tɩ togsa a Daviid. A yeelame: «M ba, a Sol, baood n na n kʋ-f lame. Bɩ f maan gũusgu, beoog yibeoogo, bao zĩig n soonde. M na n yiime, la m na n yalsa m ba sɛɛgẽ, fo sẽn na n soond zĩig ningã. M na n goma f yelle ne m ba, n ges a sẽn na n leok bũmb ninga, n wa togs fo.» A Zonatã goma a Daviid yell ne a ba, a Sol, n pẽg a Daviid. A yeel-a lame: «M naaba, bɩ y ra saag n maan a Daviid wẽng ye, t'a Daviid ka beeg yãmb ye. A sẽn tʋm daooda ka bũmb sẽn wa ne bõn y yĩng ye. A ka zoe a yõor bõne, n kẽng n tɩ kʋ Filisti gãndaooga ye. La yẽ yĩnga, Soaala-Wẽnd fãaga a Israyɛl zãnga fãa ne fãagr kãsenga. Yãmb meng yãeeme: la y sũur yɩɩ noogo. Bõe tɩ y na n maan yel-wẽnde, n yiis nin-sõngo, ned sẽn pa tar a toor yell, zɩɩm? Bõe tɩ y na n kʋ a Daviid zaalem?» A Sol kelga a Zonatã goama, la a kãabame n yetẽ: «M wẽen ne Wẽnd, t'a Daviid kõn ki ye!» A Zonatã boola a Daviid n togs-a a ba wã gomdã; la a tall-a lame n kẽng a Sol nengẽ, t'a Daviid leb n zĩnd ne-a wa pĩnd n tʋmd a sõgen-tʋʋma. Zabra ra le yikame t'a Daviid kẽng n na tɩ pãb Filisti rãmbã. A pãb-b-la sõma tɩ b zoe. La yam wẽngã, Soaala-Wẽnd sẽn bas-a ne a soabã, le yẽega a Sol. A ra zĩ-la a zakẽ t'a kãnd be a nugẽ, t'a Daviid zĩ a sɛɛgẽ n wẽed bɛɛla. A A Sol da ratame n kõs a Daviid n ka ne lalgã ne a kãnde, la a Daviid liglame tɩ kãnda yõsg n tɩ sel lalgã. A Daviid yi n zoe n põsa yʋng kãnga. A Sol tʋma neba, a Daviid yiri, tɩ b tɩ gũ-a tɩ beoog vẽeg t'a paam-a n kʋ. Mik a pag a Mikal wɩdg-a lame: «F sã n ka zoe yʋngã n fãag f yõore, zĩig sã n yẽege, b na n kʋ-f lame.» A kɩtame, t'a Daviid tũ roog võor n yi n zoe, woto la a paam n põse. A Mikal yaool n dɩka bõn-naande n ning a Daviid gãaga zugu, n pil zuga ne bʋ-gãongo sẽn ka pẽeg ye, n pil a menga ne gãmbre. A Sol tʋma neba tɩ b wa yõk a Daviid. A pagã yeel-b lame: «A pa keem ye.» T'a Sol le tʋm neb yɛsa tɩ b tɩ ges a Daviid, la a soos n gomd woto: «Tɩ tall-y yẽe ne a gãagã n wa kõ-m ka, tɩ m kʋ-a!» Neba kẽe roogẽ la bõn-naanda bal la b yãend yã, gãaga zugu, n paas puglã. A Sol yeela a Mikal: «Bõe tɩ f belg maam woto n bas m bɛyã, t'a zoe n põse?» A Mikal leokame: «A meng m yeel-m: bas-m tɩ m loog, tɩ m da kʋ-f ye!» Yaa woto, la a Daviid zoe n põse. A kẽnga a Samwɛl nengẽ, Rama, n tɩ togsa a Sol sẽn maan-a bũmb ning fãa. La a yaool n tũ-la a Samwɛl n tɩ zĩnd a karen-bokẽ. B tɩ togsa a Sol: «Ade, a Daviid bee a Samwɛl karen-bokẽ, Rama sɛɛgẽ.» A Sol tʋma neba, tɩ b tɩ yõk a Daviid. B taa n mika bãngdba sẽn tigim taaba, n gomd bãngre goama, t'a Samwɛl ya b taoor soaba. Naaba-Wẽnd pãnga yẽega a Sol sẽn tʋm b rãmbã, tɩ bãmb me yɛs n digd wa dindibdu. B tɩ togsa a Sol t'a le tʋm neb a taaba, tɩ bãmb me ta, n yik rigbu la sobgre. T'a Sol le tʋm neba, naoor a tãab soaba, tɩ bãmb me tɩ yik rigbu la sobgre. Wakat kãng marsã, a Sol yika a toore n kẽng Rama. A sẽn ta Seku ko-bao-kãsengã, a sokame: «A Samwɛl ne a Daviid bee yɛ?» Tɩ b leok-a: «B bee Nayot, Rama karen-bokẽ wã!» A Sol teesa be; Wẽnd pãnga siga yẽ me, t'a yik rigb la a kẽnda n wa ta Rama karen-bokã. Yẽ me yeesa a futu, n sɩng rigbu, a Samwɛl taoore. A waa n lʋɩɩme n kel n pa be wĩndga la yʋngo. Dẽ me yĩng la b sok yã: «A Sol lebga bãngd laa?» Dẽ loogre poore, a Daviid yii Rama karen-bokẽ wã n wudg n wa yeel a Zonatã: «M maana bõe? M beegre la bʋgo? Yel-wẽnd bʋgo la m maan n bõn f ba t'a rat n dok m yõore?» A Zonatã yeelame: «Ayɛ! Kõn yɩ boto ye! M ba pa maand bũmbu, tɩ b pa reng n wilg maam ye. M ba na n solga maam yell kãnga bõe yĩnga? Rẽ ka tõe ye.» La a Daviid wẽename n yeel: «F ba mii vẽenega tɩ tõnd moor zemsda taaba, la woto wã a yeela a menga: ‹M modg t'a Zonatã ra wʋm bũmb t'a sũur wa sãam ye.› La yaa sɩda, tɩ maam ne kũum sẽn zãr taaba, yaa nif la yõore bala wala sẽn ya sɩda tɩ Naaba-Wẽnd vɩɩme la fo me vɩɩme.» T'a Zonatã yeel a Daviid: «Fo sẽn dat bũmb ningã, m na maane.» T'a Daviid leok a Zonatã: «Beoog yaa kiu-paalga, la m da tog n naaga naabã n dɩ, la bas tɩ m zoe n tɩ solg m meng weoogẽ n tãag dayɩt zaabre. F ba sã n yãe n sok m kaalma võore, f na n wilg a woto: ‹A Daviid kosa ne dɩdgre tɩ b kõ-a sor t'a kẽng a tẽngẽ, Bɛtelyɛɛm, buuda maoong sẽn kʋʋd yʋʋmd-yʋʋmda yĩnga.› Dĩma sã n yeele: ‹Be neere,› ad-m tɩlgame. La a sã n puug a sũuri, bãng t'a rata m menesgo. Wilg-a tɩ f sẽn yõg zood ne-m, Soaala yʋʋr yĩngã, f kõn bas tɩ zooda sãam ye. La sã n wẽnda m sɩd beegame, bɩ fo meng f toor kʋ-ma. Bõe tɩ b na n tall-m ta f ba taoore?» A Zonatã yeelame: «Dẽ kõn yɩ yel-beedo? M sã n bãng bal tɩ m ba rat n yiisa f yõore, m wẽend tɩ m na wilg-fu.» A Daviid soka a Zonatã: «Ãnd soab n na n wilg maam fo ba sã n leoka ne sũ-puuri?» A Zonatã yeela a Daviid: «Wa tɩ d kẽng we-kɛɛnga!» B sɩd tũu taab n yi we-kɛɛnga. A Zonatã yeela a Daviid: «Ne Soaala, a Israyɛl Wẽndã, m na n fɛɛsa m ba beoogo bɩ ra-yɩta, woto wẽnde, n bãng a raabo. Koɛɛg buug sã n ka be a Daviid poorẽ, m kõn yeel tɩ bũmb ye. Marsã, bɩ Soaala tʋm-m beedo, m ba sã n dat f yõor yãkre, tɩ m pa wilg-fu. Bãng tɩ m na kɩt tɩ f loog ne laafi. Bɩ Soaala zĩnd ne foo wala a sẽn zĩnd ne m ba! Dẽ wã, Naaba-Wẽnd sã n tong m yõore, foom, a Daviid, na wẽen tɩ d zooda kõn sãame, tɩ Soaala-Wẽnd ka rat sãoong ye. M sã n ki, bɩ f ra bas f nimbãan-zoeerã t'a teem ne m zak rãmba, ba Naaba-Wẽnd sã n wa yiis a Daviid bɛɛbã, b yembr yembre, tẽng zugu.» La a Zonatã yõga zoodo ne a Daviid doogo la a kosame tɩ Wẽnd sok zooda sãamda, n sok a Daviid bɛɛba. A Zonatã le kɩtame t'a Daviid wẽene, a sẽn da nong-a yĩnga la a sẽn da nong-a wala a menga yĩnga. A Zonatã yeel-a lame: «Yaa beoogo la kiuuga pukda. F sã n pa zĩnd kibsã, b na n bãngame, tɩ f goeela na n paa vɩʋʋgo. Gũ ra-yɩta. Leb we-kɛɛnga, zĩig ning f sẽn tɩ soond nin-daarẽ wã. Tɩ lill Ezɛl pĩigã. M na n kolga be n tão m pɛɛm a tãabã. M na n yeela m dakõorã: ‹Kẽng n tɩ gẽes pɛɛma!› La a sã n kẽng tɩ m yeel-a: ‹Fo yõsgame! Leb f poorẽ n wʋk-ba!› Dẽ wã fo wata kibsã, tɩ rabeem kaẽ ye. Ne Soaala sẽn ya Wẽndã, bũmb kõn maan ye! La m sã n yeel sõgna: ‹Kẽng taoore!› Da yaas ye, tɩ Soaala-Wẽnd meng n kõt-f sore. La sã n ya koɛɛgã, maam ne foom sẽn leok taabã, bɩ Wẽnd yɩ d yiiba kaset daar fãa.» A Daviid tɩ soonda we-kɛɛnga. Kiu-paalga taame, dĩma me waame tɩ kibsa rɩɩb na n sɩnge. Dĩma zĩnda a goeel zugu la goeela ra dɩdga rooga lalga, wala dasem kam. A Zonatã zĩnd n tees-a lame. A Abnɛr n zĩnd n yegl a Sol. A Daviid goeela paa vɩʋʋgo. A Sol ka yeel tɩ bũmb, baraar ye, n tagsd a sũurẽ tɩ raare yell bilfu n be a Daviid zugu, tɩ raare a rẽgmame n nan ka paam n yɩlg a meng ye. Vẽkembeoogo, kiu-paalgã daar a yiib soaba, a Daviid zĩiga le paa vɩʋʋgo. La a Sol soka a biig, a Zonatã: «Bõe n maan t'a Zese biiga ka wa rɩɩb zaamẽ, n ka wa rũnna?» A Zonatã leoka a Sol: «A Daviid kosa maam sore n na n kẽng Bɛtelyɛɛm. A yeelame: ‹Mam kotame tɩ y kõ-m sore, tɩ tõnd yira rãmb tara b maoong tẽnga pʋgẽ, tɩ m kẽem a ye wa togs tɩ m wa. Dɩlla, fo sã n dat-m ne neere, bɩ f bas-m tɩ m ta yir.› Ad-y yaa rẽ yĩnga la a Daviid ka wa rɩɩba rũnna.» A Sol sũur puuga ne a Zonatã, la a yeel-a lame: «Bi-yoogo, pʋg-kõb-wẽnga la tõat biiga, mam ka mi tɩ fo zoa la a Zese biiga tɩ rẽ ningd f meng yãnde la a ningd f ma yãnd bɩ? Bãng t'a Zese biiga ket ne yõor fãa, fo kõn deeg naam ye! La marsã tʋm tɩ b tɩ bao a Daviid, la b tall-a n wa kõ maam, t'a toga ne kũum.» A Zonatã leoka a ba, a Sol; a sok-a lame: «B na n kʋ-a-la bõe yĩnga? A maana bõe?» A Sol zẽka a kãnde n tees a Zonatã, t'a na n tão-a. A Zonatã bãngame, t'a ba sɩd gãda, a sũurẽ, a Daviid kũum. A yika rɩɩba zĩigẽ, t'a sũur kɛɛda, la a pa naag n dɩ kiu-paalg daar a yiib soaba ye, a sũur da sãama fãa, a Daviid yĩnga, t'a ba ra tʋʋs-a lame. Vẽkembeoogo yibeoogo, a Zonatã kẽnga we-kɛɛnga n bʋʋg a Daviid, wala b sẽn da sed ne taaba, la bi-bilfu n da yãagd-a. A yeela a sõgna: «Wudg n bao pɛɛma mam sẽn na n tão wã.» Sõgna wudgame la a Zonatã maana dabaare n tão pɛɛma tɩ zʋʋg-a. La sõgna kolga a sẽn tão pĩima zĩig ningã t'a Zonatã tãse: «Pĩima ka zʋʋg foo sɩda?» A Zonatã le tãsa sõgna: «Tao tao, maan tao, da yals ye!» Sõgna rɩka pĩima n wa kɩs a zu-soaba. Sõgna da ka wʋmd võor ye; a Zonatã ne a Daviid bala n da mi sẽn zem tɛka. A Zonatã kɩsa biigã a zab-teed n yeel-a: «Kẽng n tɩ lebs-b tẽnga pʋgẽ.» Biiga sẽn looge, a Daviid yii rɩtgo, n wa vabende, n fõgneg a neng tẽnga, n wõgemd naoor a tã. Zo-rãmba mobga taaba, n lagem taab n ning nintãm, la a Daviid n yãb n yɩɩge. A Zonatã yeela a Daviid: «Kẽng n loog ne laafi, tɩ tõnd naaga taab n wẽene ne Wẽnde, tɩ bũmb kõn tol n zĩnd maam ne foo sʋka, fo ba wã la mam ba wã roog sʋk ye.» A Daviid yik n loogame t'a Zonatã me leb tẽnga pʋgẽ. A Daviid zoe n kẽnga Nob, maan-kʋʋd a Ayimelɛk nengẽ. Maan-kʋʋda yɛɛsame, t'a zoe n seg a Daviid n sok-a: «Yaa wãna tɩ yãmb ya y yembre tɩ ned ka tũud yãmba?» A Daviid leoka maan-kʋʋda, a Ayimelɛk: «Naabã n kõ m noore, n yeel-ma: ‹Sõng tɩ ned da bãng yell ninga sẽn kɩt tɩ mam tʋmd fooma ye.› Sã n yaa m poorẽ dãmbã, m yãka zĩiga tɩ b na n seg-m be. La bõe n be y nugẽ? Kõ-y maam bur a nu, bɩ bũmb ning yãmb sẽn tar bala.» Maan-kʋʋda leokame: «Mam ka tar bur zaalga m nugẽ ye; yaa bur sẽn kõ Naaba-Wẽnd bala n be, la y nebã yee n yaa yɩlma n ka pẽneg pagba.» A Daviid leokame: «Sã n ya pagbẽ wã, b gɩdg-d lame, wala rasem kam, d sã n bob zabre. Neba yĩns yaa yɩlma. D da pa yi rũnna n na n tɩ zab ye la baasgo, d pa rẽgem ye.» Maan-kʋʋda kɩs-b la burã sẽn kõ Soaalã, tɩ bur a taab da ka be sã n pa wẽnd doogẽ rẽnda bala; sã n da yiis-ba, b lebsda bur sẽn nan ket n ya tʋʋlga. Segame tɩ dao a ye, a Sol sõgne, n da yɛs Soaala-Wẽnd taoore, a ra yaa Edomitga, n boond t'a Doeg; a dag n yaa a Sol dũm-kɩɩma. A Daviid soka a Ayimelɛk: «Yãmb pa tar kãnde bɩ sʋʋg yam-yam ka? M ka rɩk m sʋʋg bɩ zab-teoog ye, naaba sẽn da yãgd yĩnga.» Maan-kʋʋda leokame: «Ad sʋʋga! Yaa a Goliyat, yaa Filisti rao ning yãmb sẽn kʋ tɩ-wogda bãoogẽ wã, sʋʋgã; b vil-a-la ne peende, a be ne teed niyns sẽn tar n bʋgd bagr ne Wẽndã. B bĩnga zĩ-yɛnga. Yãmb sã n dat n dɩk-a, bɩ y rɩk, tɩ sʋʋg a to ka be ka ye.» A Daviid yeelame: «N-faa! Sʋʋg a to ka be sẽn ta-a ye, bɩ y kõ-m yẽnda.» A Daviid yika badaar n zoe n zãag ne a Sol, a ta a Akis, Gat dĩma, nengẽ. A Akis poorẽ dãmba yeel-a lame: «Ka Daviid ninga sẽn yaa tẽnga dĩma la woto bɩ? Ka yẽnda yẽnẽ yĩng la b da yɩɩnda: ‹A Sol kʋʋ tusri! A Daviid kʋʋ tus piiga.› » Gom bãmba kẽ a Daviid sũurẽ, la a zoe rabeem wʋsgo, a zoe Gat dĩm, a Akis, rabeem. Bãmb nifẽ a Daviid maana wala a yika gãeemdo, a sɩngame n tuumnẽ la latemdẽ, n gʋlsd gʋlsem sẽn ka tõe n karem kʋɩlenga zugu la a basd kolkood tɩ rʋʋgd n mat a toɛɛnga. A Akis yeela nebã: «Yãmb sẽ n pa ne tɩ daoã zug lebgame; bõe tɩ yãmb peeg-a n wa m nengẽ? Yaa gãeems la m kongd bɩ, tɩ y le tall yãoa n wa ka tɩ m ges a zu-lɛbg tʋʋma? Y tẽed tɩ m na bas ned a woto t'a kẽ m zakẽ bɩ?» A Daviid yii a Akis, Gat dĩma, nengẽ, n zoe n kẽng Adulam tãn-bokẽ wã. A kẽem dãmba la a zaka rãmb fãa wʋma rẽnda, n babs-a beene. Neb niyns fãa sẽn dɩt-b pɛta, la sẽn da tar-b sama bɩ sẽn da namsd-ba la sũ-pa-noang rãmba, fãa tigma taab a Daviid nengẽ la a lebga bãmb naaba. Woto sẽn babs-ba a Daviid da ta kobs-naase. A Daviid yii be n kẽng Mispa, Moab tẽn-peelmẽ. A tɩ yeela Moab dĩma: «Kõ-y m ba ne m ma sore, tɩ b wa zĩnd ne yãmba, n gũud m sẽn na n wa bãng Naaba-Wẽnd sẽn dat-m ne bũmb ninga.» La a Daviid talla nebã n kẽng Moab dĩma nengẽ tɩ b kell n zĩnd ne dĩma, la yẽ meng yaool n pa-la a sẽn soondẽ, tãn-bokẽ wã. Bãngda a Gad wa n yeela a Daviid: «Da pa-y y soondga zĩigẽ ye, yi-y be n tɩ kẽ Zɩɩda soolmẽ.» T'a Daviid na n yik n tɩ kẽ Erɛt googo. A Sol wʋma a Daviid ne a neba kibare. A Sol da zĩi pusg tẽngre, Gibea tãn-bila zugu, a ra zãada kãnde, a nugẽ, t'a sõgen-kamba da be ne-a. A Sol yeel-b lame: «Bẽnzame yagense, kelg-y ka! A Zese biigã na n pʋɩ yãmb fãa pʋt la bugsuntund wala m sẽn maand ne yãmba laa? Yaa Yãmb la a na n kõ tãnsobend tɩ y soog a tãb-biisa laa? M pa tẽed ye. Bõe yĩng marsã la yãmb maand sudum, n dat n zab ne maam? Ned ba a ye ka saag n wilg-m tɩ m biiga Zonatã yõga zood ne a Daviid ye. Ned ba a ye ka wa yeel-m tɩ m gũus t'a tusda a Daviid t'a gãneg-m bẽdgo, wala m sẽn ne rũnna wã ye.» A Doeg, Edomitga, ra yɛsa yĩngri, a Sol sõgen-kamba sɛɛgẽ la yẽ n yeele: «Mam yãee a Zese biiga t'a wa Nob, a Ayitub biiga, a Ayimelɛk nengẽ. La a Ayimelɛk tol n soka Soaala-Wẽnd a yĩnga, la a kõ-a sor dɩɩb fãa, la a kɩs-a-la a Goliyat, Filisti raoã, sʋʋga.» Dĩma a Sol sẽn wʋme, a tʋmame tɩ b tall a Ayitub biiga, maan-kʋʋd a Ayimelɛk, n wa, ne a ba roog rãmba fãa la maan-kʋʋdba sẽn da be-b Nob. Bãmb fãa yik n wa saka naaba. A Sol yeelame: «Kelge, Ayitub biiga!» T'a yeele: «Ad-ma, m zu-soaba!» A Sol yeelame: «Bõe tɩ foo ne a Zese biiga naag taab n baood m yõore? Fo kõ-a-la rɩɩbo la sʋʋga, la f sok Naaba-Wẽnd a yĩnga, t'a yik marsã n na n zẽk a zug ne maam la a gãneg-m bẽdgo, wala sẽn maand dũnna wã.» A Ayimelɛk leoka dĩma: «Yãmb sõgen-kamba fãa sʋka, ãnd n tõe n mak a meng ne a Daviid, pʋ-peelem soaba, naab rɛɛmba, sẽn ligind-b fo yõorã, tãnsoaba, la sẽn paamd waoor f meng zakẽ. Ka rũnda bal la m sɩng n sokd Wẽnd a yĩng ye. Ade! M yam zãr ne m maan sudum ne yãmba. M naaba da rɩk yell ba a ye n dogl m zug la m ba roog zug ye, tɩ sɩda, m da ka tar yella buk ba bilf ye.» Dĩma yeela a Ayimelɛk: «Fo na n kiime, Ayimelɛk, foo ne f ba roog gilli!» La dĩma yeela a sõgen-kamba sẽn da yɛs a sɛɛgẽ: «Kʋ-y maan-kʋʋdbã, tɩ bãmb me sõngda a Daviid. B bãngame t'a Daviid da zoetame, la bãmb pa togs maam ye.» La naaba sõgen-kamba pa sak n zẽk b nug n kʋ maan-kʋʋdba ye. Dẽ la dĩma yeel a Doeg: «Bɩ fo wẽnemde! Kʋ-ba!» La a Doeg, Edomitga, wẽnemdame la yaa yẽ n kʋ-ba. Badaare, a kʋʋ dap pis-nii la a nu, bãmb fãa da bobda Wẽnd bagra bag-teedã. A Sol kʋ maan-kʋʋdba, Nob, bãmb tẽngẽ. A kʋʋ dapa, pagba, kom-bõonego, kom-peels sẽn yẽsemde, niis la bõeens la piisi. A kɛɛ-b fãa ne sʋʋga. A Ayitub biig, a Ayimelɛk roagd a ye, n zoe n põse, a yʋʋr da boondame t'a Abiyatar. A zoe n kẽnga a Daviid nengẽ n tɩ togs t'a Sol kʋʋ Soaala maan-kʋʋdbã. A Daviid yeela a Abiyatar: «Nin-daarẽ wã m da miime tɩ Edomitga, a Doeg, da bee d sʋka la a kõn pa n ka wilg a Sol ye. Maam n wẽnemd yellã n tees f ba roogo. Pa ne maam, la f ra zoe rabeem ye, tɩ sẽn baooda n yiis fo vɩɩm, baood n na n yiisa mam rẽnna. F pa ne maam, f tɩlga f bɛɛba zãnga.» Kibar la a Daviid waa n wʋme: «Filisti rãmba gũbga Keyila la b saad n wʋgsda ki zɛɛsẽ.» A Daviid soka Wẽnnaam. «M kẽng n tɩ zab ne Filisti rãmbã, m na tõog ba?» La Soaala-Wẽnd leokame: «Kẽnge! F na tõog Filisti rãmbã, la f na fãag Keyila.» T'a Daviid neba na n yeel-a: «Zɩɩda kaane menga tõnd zoe n maanda rabeem. Yɩta a wãna sã n ya Keyila la d kẽng n na n tɩ zab ne Filisti rãmbã?» A Daviid le soka Naaba-Wẽnd n paase la Wẽnd le leokame: «Dɩk sore, sig Keyila, tɩ m na n ninga Filisti rãmba fo nugẽ.» A Daviid kẽnga Keyila ne neba, a zaba ne Filisti rãmba, n tõog-ba la a reeg b rũmsa. Yɩɩ woto la a Daviid fãag Keyila rãmba. Segame t'a Ayimelɛk biiga, a Abiyatar, sẽn wa n nok a Daviid, Keyila wã, segame t'a ra looga ne sãnem-pɛ-m-poore a ye. A Sol sẽn wʋm t'a Daviid kẽe Keyila, a yeelame: «Yaa Soaala-Wẽnd n yõk-a n kõ-ma tɩ yẽ n kẽng a toore n tɩ pag a meng tẽng sẽn tar kʋɩlense, la kʋɩlens sẽn sogd ne bãeense.» A Sol boola a neba fãa tɩ b wa yẽda a Daviid ne a neba, Keyila. A Daviid sẽn bãng t'a Sol mamsda wẽng ne yẽnda, a yeela maan-kʋʋd, a Abiyatar: «Wa tɩ m na n soka Wẽnde.» A Daviid yeelame: «Soaala, Israyɛl Wẽnnaam, yãmb yamba wʋmame t'a Sol segendame n na n wa Keyila la a wã tẽngã, mam yĩnga. La a Sol sã n wa, tẽnga nin-tɩɩsã na yõk-m n kɩs-a? A Sol na n sɩd waame, wala m sẽn wʋma bɩ? Soaala, a Israyɛl Wẽnnaam, sõng-y tɩ yãmb yamba bãnge!» Soaala-Wẽnd leokame: «A Sol na n waame.» A Daviid le sokame: «Keyila nin-tɩɩsa na n dɩka maam ne m neba n bas a Sol nugẽ sɩda?» Naaba-Wẽnd leokame: «B na n bas-y-la a nugẽ.» Rẽ n so t'a Daviid yik ne a neb sẽn da tõe n ta kobs-yoobe, b yii Keyila, la b sɩnga yeebgo. Kibarã t'a a Sol t'a Daviid yii Keyila la a Sol me basame tɩ sɛ. A Daviid solga a meng tãmsẽ, Zif we-raoogẽ. La a Sol talla a baoobo, la Wẽnnaam pa bas t'a lʋɩ a nugẽ ye. A Daviid bãngame t'a Sol saa wetã n baood-a n na n kʋ. A Daviid yaool n da bee Zif weoogẽ wã, Oresa tẽnga. A Zonatã, a Sol biigã, rɩka sore n wa a Daviid nengẽ Oresa tẽnga, a waa n kenga a Daviid raoodo, Wẽnd maasem yĩnga. A yeel-a lame: «Da zoe rabeem ye. M ba nug kõn sɩɩs-f ye. Fo n na n dɩ naam Israyɛl tẽnga la maam n na n yɩ f pipi sõangda. M ba, a Sol meng mii rẽnna.» B yiiba pʋlma taab zood Soaala-Wẽnd taoore. A Daviid paa Oresa la a Zonatã leba a yiri. Zif neba kẽnga a Sol nengẽ Gibea. B tɩ wilga a Sol: «Ad-y yã a Daviid solgda a meng tõnd sɛɛgẽ, Oresa, Akila tãnga zugu, nug rɩtg pʋ-weesẽ wã. Marsã, y sã dat n waame, dĩma, bɩ y wa! Yaa tõnd n na n yõk-a n ning dĩma nugẽ.» A Sol leokame: «Wẽnd na ning y barka, y sẽn zoe mam nimbãanega. Leb-y n dɩɩ-y kaset n paase, la y bãng zĩig ninga a sẽn kẽne n teesẽ. Modg-y n dɩ y nif kaseto tɩ m wʋmame t'a yaa sɩlem soaba. Mao-y n bãng a sẽn soond zĩis niynsa fãa la y sã n bãng vẽenega, bɩ y lebg n wa wilg maam. D na tũ taab n bao-a. A sã sɩd ket yam-yam, d na vɛɛs a Zɩɩda sagsa fãa, al n wa yãend-a.» B sẽn dɩk sore, b kẽnga Zif, n deng a Sol. A Daviid ne a neba ra be Maõ we-raoogẽ wã, weooga noorẽ pʋtã. A Sol ne a nebã yi-la a baoobo. Kibarã taa a Daviid t'a tees tãng ning sẽn be a Maõ we-raoogẽ wã. A Sol bãnga yellã, la a pʋga a Daviid Maõ we-raoogẽ. A Sol ne a nebã ra tũuda tãnga neng a yembre, t'a Daviid ne a nebã tũud neng a to wã. A Daviid da zoeta a Sol taoore ne a sũur fãa, la a Sol ne a neb ra wẽeda gũbri n na n yõk-a. La ned n wa n yeela a Sol: «Wa tao tao tɩ Filisti rãmba kẽ f tẽngẽ n na n tak zabre.» A Sol basa a Daviid pʋgbo n na n lɛɛg n zab ne Filisti rãmba. Yaa rẽ yĩnga, la b bool zĩ-kãnga tɩ Zab-vaal Pĩiga. Wẽnd kãnga a Daviid dʋʋ Eyin-Gedi tãmse, n tɩ kẽ be. A Sol tɩ zaba ne Filisti rãmba n lɛɛg n watẽ; b yeel-a lame: «Ade, a Daviid be Eyin-Gedi weoogo.» A Sol yãka neb tus a tã, gãndaad sẽn yi a Israyɛl sagsa zãnga, tɩ b na n bao a Daviid ne a nebã, zĩig ninga sẽn boond tɩ Yãgs Pĩisẽ. B wa n yãee piis bãgre sẽn da be sor noore. Tãn-bok n da pẽ be, t'a Sol kẽe n na n dõbende. Mik a Daviid ne a nebã da bee tãn-boka yaanga. T'a Daviid neba yeele: «Ad daar ninga Soaala-Wẽnd sẽn yet fo: M yõka f bɛyã n sagl f nugẽ, bɩ f maan ne-a wa f sẽn date.» La a Daviid soosame n wõrg a Sol kobra noore. Dẽ poore, a Daviid sũura kiuusame, a sẽn wõrg a Sol kobra yĩnga. La a yeela a nebã: «Wẽnd na gũ maam, tɩ m da maan wẽnga la m nug ra sɩɩs m zu-soabã, Soaala sẽn kõ a soab naama ye!» A Daviid goma ne a nebã woto, tɩ b tõog b menga, tɩ b ra yõk a Sol ye. La a Sol yik n yii tãn-bokã n dɩk a sore. Dẽ poore, a Daviid yik n yiime la a kelma a Sol poorẽ: «M zu-soab la m dĩma!» T'a Sol wẽneg n ges a poorẽ. La a Daviid wõgemdame n fõgneg a neng tẽnga. A Daviid yeela a Sol: «Bõe tɩ yãmb kelgd neb goama, neba sẽn tar t'a Daviid dat n sãama yãmb yellã? Ade! Yãmb meng nif yãenda rũnna. Soaala-Wẽnd da bas-y-la m nugẽ, rũnna, tãn-boka pʋga. M neba ra bilgda y kũum la m zoe-la y nimbãanega n yeel tɩ m nug kõn sɩɩs m zu-soaba ye, tɩ yaa Naaba-Wẽnd n kõ-a naam. M dĩma, bɩ y gese! Ges-y yãmb kobra noore, m sẽn zãad m nugẽ! M wõrga yãmb kobra noore, n yaool n pa kʋ-y ye. Bɩ y bãng la y tags tɩ m ka tar pʋ-toog la beem ne y ye la m ka beeg-y ye. Yãmb yẽ, yãmb gũusda maam bala n na n dok m yõore. La Wẽnd na kao d yiiba bʋʋdo! Wẽnd n na rok m sũurã n kõ-ma. Maam yẽ nug kõn sɩɩs yãmb ye. Kʋdem dãmba maana b yelbũndi: ‹Wẽnem n dogd wẽnem.› Rẽ n so tɩ mam nug ka na n tol n sɩɩs yãmba. Yaa ãnna la a Israyɛl dĩma zoet n pʋgda? Ba kɩɩnga! Karenga! Wẽnd kao d yiiba bʋʋdo! B gese! B bʋ n sõng maam la b kõ-m bʋʋm, n fãag maam y nugẽ.» A Daviid sẽn gom woto n sɛ, a Sol yeelame: «M biiga, a Daviid, sɩd yaa fo koɛɛg bɩ?» La a Sol kelmame t'a nintãma sodgdẽ. A yeela a Daviid: «Fo pʋ-peelem yɩɩda maam al wʋsgo. Fo maana maam neere, la mam yẽ maana foom wẽnga. Sũ-maasem ninga fo sẽn maan-m dũnna wã, wilgda f sũ-bʋgsem ne maam; tɩ Naaba-Wẽnd yõka maam n ning fo nugẽ la fo ka kʋ-m ye. Ned tukda a bɛ sor zugu, n bas-a t'a loog ne laafi sɩda? Wẽnd na rol f sẽn maan maam neer ning rũnna wã! Mam miime marsã, tɩ fo na n wa rɩɩ naam, ka leb n ya sãmbg ye, la a Israyɛl rĩung na n yɩ-la f soolem. Wẽen ne Wẽnd, tɩ mam sã n loog n sɛ, fo kõn sãam m buuda ye, la fo kõn kɩt tɩ m buuda yʋʋr menem ye.» A Daviid wẽena ne a Sol. A Sol leba a yiri, t'a Daviid me ne a nebã leb b sẽn da soondẽ wã. Wẽnd kãnga, a Samwɛl kiime, t'a Israyɛl kamba fãa tigim taab n maan a kʋʋre; b mum-a-la a yiri, Rama. Rẽ poore, a Daviid yik n tɩ kẽe Parã weoogo. Dakãagr a ye n da be Maõ, n tar arzɛk wʋsgo, Karmɛl tẽnga. A da tara pe-yãans tus a tã, la bʋʋs tusri la a da waa Karmɛl n na n kɩt tɩ b wõrs a piisa kõbdo. Dao wã yʋʋr da boondame t'a Nabal t'a pag yʋʋr da boond t'a Abigayil. Yaa pag sẽn da tar yẽesem, la pag sẽn da yaa neere. La dao wã yẽ da yaa nin-wẽnga la nin-toaaga, a rag n yaa a Kalɛb yagenga. A Daviid zĩnda Parã weoogẽ n wʋm t'a Nabal da wõrsda a piis kõbdo, t'a bao kom-bɩɩb piig n tʋm a nengẽ, n yeel-ba: «Kẽng-y Karmɛl, a Nabal nengẽ, n tɩ pʋʋs a mam yʋʋr yĩnga, la y yeel-a woto: ‹Laafi zĩnd ne yãmba! Laafi zĩnd ne y zak rãmba la ne y sẽn tar fãa› La marsã mam wʋmame, tɩ y wõrsda y piis kõbdo. Bala yãmb dũm-kɩɩmbã zĩnda ne tõndo, d ka yɩ toos ne b ye, la b sẽn pa ne tõnd tɛk Karmɛl, b rũng ba a ye pa menem ye. Sok-y y tʋʋm-tʋmdba, tɩ b na togs yãmba. La Wẽnd na kɩt tɩ m kom-bɩɩbã paam bark yãmb taoore, tɩ b waame n na n pʋʋs yãmb ne y zu-noogo, y sũ-noog daare, Marsã mam bõsd-y lame, tɩ y sak n kõ y yemsã la a Daviid, bũmb ning sẽn be y nugẽ.» A Daviid sẽn tʋm b rãmba taa n togsa a Nabal a Daviid goama n gũud a leokre. La a Nabal leoka a Daviid nebã: «A Daviid yaa ãnna? La a Zese biigã zema bõe sẽ? Yembs wʋsgo bee rũnna sẽn zoet n basd b zu-soaben-dãmba. La m na rɩk m dɩɩbo, la m niis m sẽn kʋ m tʋʋm-tʋmdba yĩnga, n kõ neba, n yaool n ka mi b sẽn yitẽ?» A Daviid neba le rɩka b sore, n ta n togs a Daviid daoã goama fãa. La a Daviid yeela a nebã: «Bɩ ned kam fãa sẽbg a sʋʋga a sɛɛgẽ.» A Daviid sẽbga a sʋʋga a sɛɛgẽ, la yaa neb kobs-naase n tũ-a, tɩ b na n kẽng Karmɛl, tɩ neb kobs-yi pa teeda zĩigẽ. A Nabal dakõor a yembre n waa n yeel a Nabal paga, a Abigayil: «Ade, a Daviid zĩnda weoogẽ n tʋm neb tɩ b wa pʋʋs d zu-soabã, la a waag-b la no-beedo. Nin-bãmba yaool n talla tõnd neere, b pa tol n zẽng tõnd sẽn zĩnd ne bãmb tɛk ye. D bũmb pa tol n menem, d sẽn zĩnd ne bãmb weoogẽ wã tɛk ye. Wĩntoogo, yʋngo bãmb yɩɩ d ba n gũ tõndo la b ra gũuda tõnd rũmsi. Bãng-y tiiri la ges-y y sẽn na n maan a soaba, tɩ tõnd zu-soaba ne a roog zãng fãa sãoong basa daare. Bãmb yaa nin-toaag tɩ looge al tɩ ned pa tõe n gom ne b ye.» Zĩig pʋg bala, a Abigayil rɩka bur kobs-yi, la ko-waoos a yiib ne rãam, ne rũms a nu sẽn segle, n paas ki sẽn kɩɩm pet a nu, ne bugsuntung bi-koeems gĩn koabga, la kankam miisdu kobs-yi. A rɩka rẽ fãa n zɩlg bõeense, n yeel a sõgen-kamba: «Lʋɩ-y mam taoore, tɩ m pʋg yã!» A pa wilg a sɩda ye. A zomba bõanga, n tũ so-buka n sig tãngã la ade, a Daviid ne a nebã dag n sigdame la a seg-b lame. A Daviid da yetame: «Yaa zaalem bala, la m gũ dao kãnga sẽn da tar fãa weoogẽ, tɩ fɩ pa tol n meneme. M maan-a-la yel-sõmde t'a rol maam beed bala! Naaba-Wẽnd na sɩbg a Daviid bɛɛba ne b toolma fãa, la b ra bas tɩ ka ne beoogo bɩ bũmb kell a Nabal ye, rao ra kees a zakẽ ye.» A Abigayil sẽn yãe a Daviid, a siga a bõanga zug tao-tao, n vabend a Daviid taoore, n fõgneg a neng tẽnga. A wõgemda a Daviid taoore n yeele: «M naaba! Ad-y yaa maam n konge, m zu-soaba! Bɩ y sak n kõ y yem-poaka sor t'a gom tɩ y kelge. M naaba, nin-wẽng a Nabal sẽn maan bũmb ningã bɩ y ra ning-a y sũurẽ ye, t'a yaa wa a yʋʋra sẽn togsã, nabd bala, tɩ yẽnda nengẽ wã, sɩd yaa yalemdo. La m naaba, ad-y m pa yãend neba yãmb sẽn tʋm b rãmba ye. La marsã, m naaba, sɩd menga, wala m Soabã sẽn ya Wẽndã, tɩ yãmb me vɩ wã, yaa Soaala-Wẽnd n kokd yãmb nug, tɩ y da raag zɩɩm ye. Bɩ yãmb bɛɛbã, m naaba, la sẽn dat-b yamb ne wẽngã fãa, yɩ wala a Nabal! Bɩ y sak kũuna, m sẽn tall n wa kõ yãmbã la y reeg m pʋɩ nebã sẽn pʋgb-b yãmba, m Naaba. M kotame tɩ y kõ y yem-poakã a kongra sugri, tɩ Soaala-Wẽnd bala, m naaba, bãmb na tilg roog a ye sẽn kõn lʋɩ n kõ yãmba. Maan-y sugri, m naaba, tɩ yãmb zabda Wẽnd zabre; la b kõ tol n yãend pʋ-toogo yãmb nengẽ ye. Neb n yik n digd yãmba, n baood y yõore, mik yãmb vɩɩma waa, m naaba, b na n bĩng-a-la Wẽnd nengẽ, Soaala, yãmb Wẽnnaam, nengẽ; la Wẽnnaam na n loba yãmb bɛɛba, wala ned sẽn ning kugri a loaabgẽ n lobge. M naaba, Soaala-Wẽnd sã n wa maan yãmb yel-sõmd ningã b sẽn da pĩnd n yeele, n kõ yãmb naam tɩ yɩ a Israyɛl dĩma, yãmb kõn tol n bʋ ne y menga, la y yam kõn tol n bondg tɩ y daaga zɩɩm zaalem la y tuga ned beem y toor ye. La Soaala-Wẽnd sã n wa maan yãmb neere, m naaba, bɩ y tẽeg m yelle.» A Daviid yeela a Abigayil: «D Soaala, a Israyɛl Wẽnnaam, paam pẽgre, bãmb sẽn tʋm foom dũnna tɩ fo wa seg maama yĩnga! Wẽnd na ning-f barka, f yẽesem yĩnga! Wẽnd na ning-f barka, fo sẽn sagl maam dũnna tɩ m da yiis zɩɩm, la fo sẽn kok m nug yĩnga. M Soaala, a Israyɛl Wẽnnaama, sẽn gɩdg maam tɩ m da maan wẽngã, m wẽend ne bãmb sẽn so vɩɩm, tɩ fo sã n da pa zoe tao tao n wa seg maam, ka la beoog tɛka m na menesẽ yẽe a Nabal ne rao fãa sẽn be a zakẽ.» A Daviid reega a Abigayil nugẽ a sẽn wa ne kũun ninga fãa, la a yeel-a lame: «Wẽnd na n kuls-f f yir ne laafi! Gese! Mam kelga f koɛɛga, la m deeg f kosgã neere.» A Abigayil sẽn ta yiri, a mikame t'a Nabal da segla dɩɩbo, dĩm dɩɩb menga, a sũur da yaa noogo, al t'a yũ rãam n tɩge, a Abigayil pa togs fɩ, yell kãsenga bɩ yell bil ye, al tɩ beoogo vẽege. La yibeoogo, a Nabal dãama yiime, t'a pagã na n togs-a yɛla fãa. La a Nabal sũurã yalsa a yãoogẽ, n lebg wa kugri. Sẽn maan wa dasem piiga, a Nabal tɩ saka Naaba-Wẽnde. A Daviid sẽn wʋm a Nabal kũumã, a yeelame: «Wẽnd paam pẽgre! Tɩ bãmb gesa m yelle ne a Nabal sẽn da zẽng maamã, la bãmb n gɩdg maam tɩ m pa maan wẽng ye. Soaala-Wẽnd kɩtame t'a Nabal pʋ-toogã leb a menga.» A Daviid tʋmame tɩ b kos a Abigayil t'a sak n legb a paga. A Daviid tʋʋm-tʋmdba ta-la a Abigayil nengẽ, Karmɛl, n gom ne a woto: «A Daviid tʋma tõnd yãmb nengẽ, tɩ d wa peeg yãmb n wa t'a maan a paga.» A Abigayil yikame n wõgemd n fõgneg a neng tẽng n yetẽ: «M naaba! Sẽn zems ne maam bala, yaa m waasd y tʋʋm-tʋmdba nao!» La tao-tao bala, a Abigayil zomba bõanga, n yik n looge, tɩ kom-pugli a nu na n yãag-a. A tũ a Daviid tʋʋm-tʋmdba. A tɩ lebg a Daviid paga. A Daviid da zoe n peega Zizreyɛl bi-pugla a ye, a Ayinoam, n maan a paga. Bãmb b yiibã n yɩ a Daviid pagba. A Sol da pĩnd n deega a bi-pugla, a Mikal, a Daviid pagã, n kõ a Palti, Galim dao, a Layis, biiga. Zif tẽngẽ dãmba waa n yeela a Sol, Gibea: «A Daviid pa kẽng n tɩ soond Akila weoog tãn-bila zugu laa?» A Sol yikame n kẽng Zif weoogo, ne rap tus a tã, gãndaad menga, a Israyɛl sʋka, n na n babs a Daviid. A maana tãb-sika Akila tãn-bila zugu, sor noore, n tees weoogo. A Daviid da bee weo-kãnga la a bãngame t'a Sol waa n na n pʋg-a-la be. A tʋma lɩɩsdba, sẽn na yɩ-la n bãng vẽenega, a Sol sã n sɩd waame. Woto wã, a Daviid yikame n ta a Sol sẽn da sig zĩig ningã. La a yãee a Sol sẽn dag n gãe zĩig ningã, yẽ ne a Abnɛr, a Nɛr biigã, a tãnsoaba. A Sol da gãee tãb-sika tẽnsʋka tɩ neba da gũbg-a. A Daviid goma ne a Ayimelɛk, a Ɛt yagenga, ne a Abisayi, a Seruya biiga la a Zoab ba-biiga, a yeel-b lame: «Ãnd dat n tũ maam, tɩ d sig n kẽ tãb-sikã n ta a Sol.» T'a Abisayi yeele: «Maam n na n tũ yãmb n sigi!» A Daviid ne a Abisayi kẽnga neba nengẽ yʋngo. La ade, a Sol dag n gãeeme n gõe tãb-sika tẽnsʋka, a kãnd da sela tẽnga, a zugẽ. A Abnɛr ne a neba fãa da gũbg-a lame n gãe. A Abisayi yeela a Daviid: «Soaala-Wẽnd yõka y bɛyã n sagl y nugẽ; m kotame tɩ y kõ-m sore, tɩ m kõs-a ne kãndã, n ka a ne tẽngã, vugri bala, la na seke, m kõn le kõs n paas ye!» La a Daviid yeela a Abisayi: «Da maan-a bũmb koe, ãnd n na n kʋ Naaba-Wẽnd sẽn kõ a soab naama n kong sɩbgre? Ayo! Ne Wẽnd sẽn vɩ wã, yaa bãmb bala n na n kʋ-a; a kũum daar sã n ta, bɩ a kẽnga zabre, n tɩ ki. Wẽnd dɩ beem ne-ma, m sã n zẽk m nug Wẽnd sẽn kõ a soab naama zugu. Bɩ f rɩk kãndã sẽn sel a zugã la lɩnga ne kooma tɩ d looge.» Woto, a Daviid rɩka kãndã ne lɩnga ne koomã sẽn da be a Sol zugẽ wã tɩ b looge. Ned pa yãe bãmba, ned pa bãng bũmbu, ned ba a ye pa tol n neke, tɩ bãmb fãa da gõee gõeem kãseng ning Wẽnd sẽn da lub-ba a soaba pʋgẽ. A Daviid sẽn yi tãb-sikã, a yalsa al yɩɩga, tãnga zugu. B sɩd da paam n vẽsga taaba. A Daviid teesa a Nɛr biig, a Abnɛr, nebã n tãse: «Abnɛr, f ka na n leok-m laa?» A Abnɛr sokame: «Foo la a bõe n wekd dĩma tʋba?» T'a Daviid yeel a Abnɛr: «Fo ka yet tɩ f yaa raoa la f to ka Israyɛl tẽn-peelmẽ bɩ. Bõe tɩ f pa gũ dĩma, f zu-soaba, tɩ ned a yembre yi kɛɛnga n wa n na n kʋ dĩma, fo zu-soabã? Ade, fo sẽn maana ka neer ye! M wẽend ne Wẽnde, tɩ fo toga ne kũum, fo sẽn pa gũ f zu-soaba, Soaala-Wẽnd sẽn kõ a soab naama. Bɩ f ges marsã naab kãnde, la b lɩnga ne koomã sẽn da be b zugẽ wã, ges-y b sẽn be zĩig ning marsã.» A Sol bãnga a Daviid koɛɛgã n yeele: «Sɩd yaa fo koɛɛg bɩ, m biiga a Daviid?» T'a Daviid leoke: «Yaa mam koɛɛga, m zu-soab la m dĩma!» La a yeelame: «Yaa bõe tɩ m naaba pʋgd a sõgne? M maana bõe? Yell bʋg n be m zugu? M zu-soaba la m dĩma sak bala n kelg y sõgna koɛɛga. Sã n yaa Soaala-Wẽnd n ning yãmb yamẽ tɩ y zab ne maam, bɩ b kok m vɩɩma sẽn tees bãmb wa yũ-noog kũuni! Sã n ya ninsaalba n dat m vɩɩma, bɩ Wẽnd yãk b bark zãnga. Ade, dũnna b digd-m lame, b digd-m lame n zãagd ne tẽng ning Soaala sẽn kõ b buudu la yaa wala b yet-m lame: ‹Zãag n tɩ waoog wẽn-naandse!› Bɩ m zɩɩm da raag tẽnga tɩ Soaala-Wẽnd nenga zãr ne m ye. Yaa bõe tɩ Israyɛl dĩma bob zabr ne maam? M sãoo kareng ne bõe? Yaa bõe tɩ y rigd-m wala tãms zut koadenga?» A Sol yeelame: «M maana yel-wẽnde; m biiga a Daviid, lebg n wa tɩ m kõn le maan-f wẽng ye, tɩ dũnna daarã fo gesame tɩ mam vɩɩm bee yõodo. Mam maana wa yalma: m tudga wʋsgo.» A Daviid leokame: «Ad dĩma kãnde, bɩ ned a ye wa reeg-a! Wẽnd na rol ned kam fãa ne b zemsgo la b sɩda, tɩ rũnna, bãmb da ninga yãmb mam nugẽ, la m pa sak tɩ m nug sɩɩs dĩma Wẽnd sẽn taag a soab kaama ye. La wala yãmb vɩɩm sẽn be yõod mam nifẽ wã, woto me, mam vɩɩm bee yõodo, Naaba-Wẽnd nifẽ, la bãmb na zãag-m ne bũmb ning fãa sẽn tõe n yãk yõore.» A Sol yeela a Daviid: «M biiga Daviid, Wẽnd na ning f barka! F na tʋm tʋʋm bɛda, f tʋʋma na zĩnd yõod wakat fãa!» A Daviid le rɩka a sore, t'a Sol me leb a yiri. A Daviid kõ-la a meng yam n yeele: «Daar a ye bala, a Sol nug na kʋʋ maam; mam sẽn na n zoe n kẽng Filisti rãmba tẽng na sãoog m yĩnga. Daare, a Sol na yaa n bas m pʋgbo a Israyɛl soolmẽ, tɩ m paam n tɩlge.» Woto a Daviid rɩka sore ne a neb kobs-yoobã, la b kẽnga a Akis nengẽ, a Maok biiga, Gat dĩma. A Daviid tilga a yiri n pẽnega a Akis, Gat tẽnga, yẽnda ne a neba, ned fãa ne a zaka, a Daviid ne a pagba a yiibu, a Zizreyɛl biig, a Ayinoam, la a Abigayil, Karmɛl dao a Nabal pʋg-kõore. Kibara taa a Sol t'a Daviid zoeeme n kẽng Gat la a basame n le ka baood-a ye. A Daviid yeela a Akis: «Y sa n sɩd zoeta m nimbãanega, m yõkd-y sɛɛga tɩ y kõ-m zĩiga y tẽnga a ye pʋgẽ, tɩ m zĩndi. Yãmb yamba yɩta wãna n zĩnd y sɛɛgẽ, y na-tẽnga pʋgẽ.» Badaar bala, a Akis kõ-a-la Siklag tẽnga, yaa rẽ yĩnga, la Zɩɩda dĩm dãmba so Siklag n tãag rũnnã. A Daviid zĩnda Filisti rãmba tẽnga yʋʋmd la kiis a naase. A Daviid ne a neba kẽng n tɩ taka zabre ne Gesuritse, Girgazitse la Amalesitse, tɩ yaa bãmb buudã n da kẽed tẽnga al daar zãra, sẽn sɩng Sur, n tãag Ezipt tẽnga. A Daviid ra kʋʋda rapa la pagba, ba a ye ra ka põsd ye. A ra loogda ne rũm-bɛda la rũm-bõonego, bõeense la yʋgma la futu; la a sã n lɛɛg n wa, a ra tallda fãa n kɩt a Akis. A Akis sã n da soke: «Y tɩ zaba yɛɛne rũnna?» A Daviid da leokdame tɩ yaa ne Zɩɩda Nug-rɩtg rãmba, bɩ ne Yerameyɛl Nug-rɩtgo bɩ ne Kenitsa Nug-rɩtg rãmba. A Daviid da pa sakde tɩ rao bɩ pag põse n tũ n wa Gat ye. A ra zoeta rabeem tɩ b na n wa gome n luk a bãongo. Tɩ b na n wa gome n yet t'a maana woto la woto. Woto n sɩd yɩ a manesem a sẽn waa n be Filisti rãmba tẽngẽ. Dẽ me la a Akis da pelga a pʋg ne a Daviid; a ra gomda a yamẽ: «A Daviid manesma kɩtame t'a buuda a Israyɛl kis-a, woto a na n yɩɩ m sõgen wakat buud fãa.» Wẽnd kãnga Filisti rãmba tigsa b tãb-biisi n na n zab ne Israyɛl; la a Akis yeela a Daviid: «Bãng tɩ foom ne f neba na n tũu maam n kẽng zabrã.» T'a Daviid leoke: «Yaa woto marsã la f na n bãng f yamba sẽn na n tʋm tʋʋmd ninga.» T'a Akis yeela a Daviid: «Fo na n yɩɩ mam gũuda, daar fãa.» A Samwɛl da kiime, t'a Israyɛl da yãb-a, n mum-a a tẽngẽ, Rama. A Sol da gɩdg a soolma fãa pʋgẽ, wa bũmb sẽn kisi, kɩɩms boolgo, kũum sokre. A waa n kong n kɩɩsa a meng noore. Ad sẽn tũ ne bũmb ninga. Filisti rãmba da tigma taaba n wa gãneg tãp Sunem. A Sol tigma a Israyɛl zãng fãa la yaa Gilboa la a tɩ gãneg tãpo. A Sol yãee Filisti rãmba tãb-sikã n yɛɛse, a sũur kiuusame t'a rigd wa rindibgu. A Sol makame n na n sok Naaba-Wẽnde la bãmb pa leok-a ye. B pa leok-a ne bag-teedã n-yẽe bɩ Ayoo, b pa leok a zãmsd pʋgẽ, b pa leok-a ne bãngd noor ye. Dẽ la a yeela a neba: «Wilg-y m pag a ye sẽn sokd kɩɩmse sẽn be zĩig ninga tɩ m tɩ sok-a bũmbu.» A poorẽ dãmba yeel-a lame: «Pag a ye n be Eyin-Dor, n boond kɩɩmse.» La a Sol yeesa a fut n dɩk fut a taaba n yelge tɩ b ra bãng tɩ yaa yẽ ye, n loog ne neb a yi. B taa paga nengẽ ne yʋngo. A Sol yeel-a lame: «Bũmb la m dat tɩ f togs-ma, ned a ye sẽn ki la m dat tɩ f bool-a n kõ-ma. M na n pʋd a soab yʋʋre.» Paga leokame: «Ade, fo mii a Sol sẽn maan bũmb ninga; a soolma fãa pʋgẽ a gɩdga kɩɩms boolgo la b sokre. Yaa bõe marsã la y gãnegd-m bẽdgo sẽn tõe n wa ne m kũum?» A Sol wẽename n yeele: «M wẽend ne Wẽnd tɩ bũmb kõn maan-f yell kãnga yĩng ye!» Paga yeelame: «F ratame tɩ m bool ãnna?» T'a Sol leoke: «Bool a Samwɛl n kõ-ma!» Paga yãenda a Samwɛl n kelme. A lɛɛg n yeela a Sol: «Yaa bõe tɩ yãmb belg maam? Yaa yãmb la a Sol!» Dĩma yeel-a lame: «Da zoe rabeem ye! La togs maam f sẽn yãende.» Tɩ paga na n leoke: «Mam nee kɩɩm a ye sẽn yit kɩɩmsẽ n watẽ!» A Sol sokame: «A wẽnda ãnna?» Tɩ pagã leoke: «Yaa nin-kẽem n wate, a pila fuugu!» A Sol bãngame tɩ yaa a Samwɛl la a sulgame, n fõgneg a neng tẽnga, n wõgemde. A Samwɛl yeela a Sol: «Bõe tɩ f sãamd m vʋʋsgo, Bõe tɩ f boond-m ka?» A Sol leokame: «Yaa yell n pak maam la wʋm-m lame: Filisti rãmba kaooga zabre ne maam la Soaala-Wẽnd loogame n bas-ma. Bãmb pa le leokd-m ne bãngdba noore, bɩ ne zãmsd ye. La mam boola yãmb, tɩ y wilg maam, bũmb ning m sẽn tog n maane.» A Samwɛl yeelame: «Bõe yĩnga tɩ fo sokd maam. Fo meng neeme tɩ Naaba-Wẽnd zãagame n bas foom, n dɩt beem ne foo. B maana foom wala m sẽn da pĩnd n togs foo bãmb yʋʋr yĩngã. B reega naama f nusẽ n kõ a Daviid. Fo pa reeg Soaala-Wẽnd koɛɛg ye, fo pa kɩt tɩ b rok b sũur ne Amalesitsa kʋʋb ye. Yaa rẽ me yĩng la yɛla sẽn ya woto wã. La rẽ pʋgẽ me, Naaba-Wẽnd na n naaga foom ne a Israyɛl kamba n sagl Filisti rãmba nusẽ. Beoogo foom ne f kamba, yãmb na n looga ne maam kɩɩmsa zĩigẽ la Soaala-Wẽnd na n basa Israyɛl ne a tãb-sikã Filisti rãmba nusẽ.» Wakat kãng bala, a Sol lʋɩɩ tẽng sara, ne a woglma fãa; a Samwɛl goama da kẽes-a-la waood kãsenga, n paas me, a pãng da pa waoog ye, t'a noor da pa tol n lemb dɩɩb daara tõr ye. Paga wa n bʋʋga a Sol, n mik t'a yɛɛsa al wʋsgo; a yeel-a lame: «Ade, yãmb yem-poaka reega yãmb noore; m saka yãmb goama. M pa zoe m vɩɩma bõn ye. Marsã bɩ yãmb me kelg m koɛɛga, la y sak tɩ m kõ-y bur girga tɩ y rɩ n paam pãng n le rɩk y sore.» A Sol zãgsame n yetẽ: «Mam pa na n dɩ ye!» A poorẽ dãmba ne paga modg-a lame, t'a sak n kelg-ba. A yikame n zaoond goeele. Paga da tara nag-bil wubdga a zakẽ, t'a kʋ-a tao-tao, n yãk zom n nage, n wẽ bur sẽn pa ning bɩlle. Paga rɩka fãa n wa tẽgen a Sol ne a poorẽ dãmba, tɩ b rɩ n yaool n yik n kul yʋng kãng bala. Filisti rãmba tigma b tãb-biisa fãa Afɛk; la Israyɛl kamba ra siga kʋɩls niyns sẽn be Zizreyɛl tẽnga sɛɛga. Filisti tãnsoaben-dãmba ra lʋɩ b tãb-biisa taoore. A Daviid ne a poorẽ dãmba la a Akis n da baasd kẽndã. Filisti nanamsã sokame: «Ebre kãensa yita yɛ?» La a Akis leoka Filisti nanamsã: «Yaa a Daviid, Israyɛl dĩm, a Sol, sõgne! A yʋʋmde bɩ a yʋʋm a yiib marsã a sẽn be ne maam, la a sẽn waa n nok maama tɛka n tãag rũnna daare, m pa yãe a kɛk la a goaleng ye.» Filisti nanamsã puuga b sũur ne a Akis, n yeel-a: «Rig nin-kãnga t'a leb tẽng ning fo sẽn kõ-a wã, a ra yi zabre ne tõnd ye, n da wa ta zabr zĩigẽ n tulg n zab-d ye! Yõa na n yɩ wãna n paam a zu-soab yel-sõmde, tɩ pa tũ ne tõnd neba zut fiuusgu? Ka Daviid kãnga la b sẽn yɩɩnd woto wã laa: ‹A Sol kʋʋ neb tusri, la a Daviid kʋʋ tus piiga.› » A Akis boola a Daviid n yeel-a: «Ne Wẽnd sẽn vɩ wã, fo ya pʋ-peelem soaba la m sũur da yaa noogo d sẽn waa n tũud taab n zabdẽ, n kẽnd la d lebgdẽ. M pa yãe sẽn yɩ wẽng f nengẽ ye, al daar ning fo sẽn wa m nengẽ n tãag rũnna. La nanamsã tugda beem ne foom. Woto yĩnga, bɩ f leb ne laafi, n da sãam Filisti nanamsã sũur ye.» A Daviid yeela a Akis: «Mam maana bõe? Mam sẽn sɩng n kẽ yãmb tãpa tɛka, m maana bõe tɩ y sũur puug ne maam tɩ sek m kõn le tõog n tɩ zab ne m zu-soaba bɛɛba?» A Akis leoka a Daviid: «Fo meng miime tɩ m sũur nooma ne foom wala Soaala malɛka, la yaa Filisti nanamsã n yeele: ‹Pa tog t'a kẽng zabrã ne tõnd ye.› Rẽ yĩnga yik-y yibeoog pĩnda, foo ne f zu-soaba neb sẽn tũ foom n wa ka wã, la y leb zĩig ning mam sẽn kõ yãmba. Da sãam f sũur ye, tɩ mam nong-f lame. Yik-y tõd-beoogo, tɩ zĩig sã n yẽege, bɩ y sɩng kẽnde.» A Daviid ne a neba yika tõd-beoog pĩnda n loog n leb Filisti rãmb tẽngẽ. Sã n ya Filisti rãmba, bãmb teesa Zizreyɛl. Da-yɩten-daare, a Daviid ne a neba taa Siklag. B mikame tɩ Amalesitsa ra zaba ne Negɛb rãmba, ne Siklag: b ra sãama Siklag n tol n yõog-a bugum. B ra yõga pagba ne neb niyns fãa sẽn da be tẽnga pʋga, bɛda la bõonego. B ra pa kʋ ned ba a ye ye, la b ra talla b sẽn yõg b rãmba, n kell n dɩk b sore n looge. A Daviid ne a neba sẽn ta b tẽngẽ, b mikame tɩ b yõog-a lame la b looga ne b pagba, b kom-dibli la b kom-pugli. Woto, a Daviid ne a neba sẽn da pʋgda sɩnga kelemse la b kũmame al tɩ b pãnga fãa sɛ. B ra yõga a Daviid pabga a yiiba me n looge. Yaa Zizreyɛl tẽng paga, a Ayinoam ne a Abigayil, Karmɛl Nabal pʋg-kõorã. A Daviid sũur da sãama al wʋsgo, neba ra gomdame tɩ b na n lab-a-la ne kuga, tɩ ned kam fãa da zĩi ne sũ-sãanga la a yãbd a bi-ribl bɩ a bi-pugla. La a Daviid sũur le kengame, Wẽnnaam, a Soaala yĩnga. A Daviid yeela maan-kʋʋda, a Abiyatar, a Ayimelɛk biiga: «Tall sãnem-pɛ-m-poore n wa.» La a Abiyatar talla sãnem-pɛ-m-poore n wa. A Daviid soka Wẽnnaam: «M tõe pʋga zab-zabdbã la m na paam-b sɩda?» La leokrã yɩɩ woto: «Pʋge, tɩ f na paame, la f na n fãag b sẽn yõg b rãmba.» A Daviid kẽna ne a neb kobs-yooba sẽn da be ne yẽnda, la b ta Besor kʋɩlgã. Neb kobs-yi n pa tɩ b ra yɛɛ wʋsgo n pa tõe n gãndg Besor kʋɩlga ye: woto a Daviid kell n kẽnga ne neb kobs-naase. B yãee Ezipt ned a yembre weoogẽ wã, la b tall-a lame n wa a Daviid taoore. B kõ-a-la buri t'a wãbe, la b kõ-a-la koom t'a yũ. B leb n kõ-a-la kankama la bugsuntung biis sẽn kʋɩɩse, gĩin a yiibu. A rɩɩme t'a pãng le wa; sɩd me a ra ka tol n dɩ la a yũ bũmbu al sẽn ta dasem a tã, wĩntoog la yʋngo. A Daviid sok-a lame: «Ãnd n so foom, la fo yita yɛ?» A leokame: «M yaa Ezipt bi-bɩɩga, Amalesitg a yembre yem-daoogo. Ad dasem a tãab rũnna, mam zu-soaba sẽn bas maam, m sẽn ka laafi yĩnga. Tõnd zaba ne Krɛt Nug-rɩtg rãmba, ne a Zɩɩda la a Kalɛb Nug-rɩtg rãmba la d yõoga Siklag bugum.» A Daviid sok-a lame: «F tõe n yãag-m-la zab-zabdb kãens nengẽ?» La a leokame: «Wẽen ne f Wẽnnaamã tɩ f pa na n kʋ-m ye, la f pa na n dɩk maam n kõ m zu-soaba ye. F sã n sak boto, m na tall foom n kẽng zab-zabdba nengẽ.» La a yãag-a lame, la b mikame tɩ b ra sẽeg n pida ne tẽnga, n dɩtẽ la b yũuda, la b maand b kibsa, tɩ sɩda, teed wʋsgo la b wʋk Filisti rãmba tẽnga la Zɩɩda tẽnga. A Daviid kʋ-b lame al yibeoogo n tãag zaabre n kãab-b ne Wẽnde. Ned ba a ye ka põs ye, sã n ka kom-bɩɩb kobs-naase sẽn zomb yʋgma n zoe n põse. A Daviid reega Amalesitsã sẽn dɩk bũmb niynsa fãa. A Daviid fãaga a pagb a yiibã. Bũmb ba a ye ka menem ye, al ba teedo n tɩ tãag kom-dibli la kom-pugli, bũmb ning fãa b sẽn da zɛ n loog ne wã, a Daviid le talla fãa n wa. B riga rũm-bõonego la rũm-bɛda n taas a Daviid taoore n yetẽ: «A Daviid zabr pʋɩɩr la woto.» A Daviid babsa neb kobs-yi wã sẽn da yɛ n le pa tõe n kẽna, t'a bas-b Besor kʋɩlga rʋʋre. B yik n sega a Daviid ne a neba sẽn da pʋgdã: a Daviid ne a neba me seg-b lame n pʋʋs-ba. Neb kẽer n da be a Daviid neba sʋka n ya nin-toose la nin-yaalse, b zẽka b koeese n yeel: «Nin-bãmba sẽn ka rʋʋg kʋɩlga wa tõndã, bɩ b ra kõ-b bũmb ba a ye tõnd sẽn deega pʋgẽ, sã ka b toorẽ pagba la b kamba; b reeg-ba n zoe.» La a Daviid yeelame: «Naaba-Wẽnd sẽn maan bũmb ning n kõ tõndã, pa tog tɩ y tʋm woto ye, d saam-biisi. Soaala-Wẽnd yalsa tõnd sɛɛgẽ, la bãmb n ning tõnd nusẽ zab-zabdba sẽn wa n zab ne tõndã. Ãnd n na n kelg y gomdã? Sẽn kẽnga zabrã sẽn deegd bũmb ninga, boto me la b kõt sẽn yaas-b n gũ teedã. B naagda fãa n pʋɩ taaba.» La badaar tɛka, a Daviid kɩtame tɩ rẽnda lebg noor a Israyɛl yĩnga, la rog-n-miki sẽn ket n yɛs ne rũnna. A sẽn ta Siklag, a Daviid tʋma Zɩɩda nin-kẽemba pʋɩɩr, tẽng-tẽnga, ne koe-kãnga: «Yãmb yĩnga, baad-y kũuni sẽn yãk Wẽnd bɛɛb teedẽ, tõnd sẽn zab n paame.» Kũuna sẽn ta b rãmb la woto: Betɛl rãmba, Negɛb-Ramot rãmba, Yatir rãmba, Aroɛr dãmba, Sifmot rãmba, Estemoa rãmba. Rakal rãmba, Yerameyɛl dãmba, Kenitsa tẽns rãmba, Orma rãmba, Bor-Asã rãmba, Atak rãmba, Ebrõ rãmba n paas tẽns niyns fãa a Daviid sẽn zĩnd ne a nebã. Filisti rãmba zaba ne a Israyɛl la a Israyɛl dapa fãa zoe Filisti rãmba taoore, la b kʋ kẽer n gãneg Gilboa tãnga zugu. Filisti rãmba diga a Sol ne a kamba, n kʋ a Zonatã, a Abinadab, la a Malkisuwa, a Sol kamba. Zabra tooga fãa lʋɩ-la a Sol zugu; tãbda rãmb n yãend-a. Yẽ me nif sẽn teeg-ba, a yɛɛsame. A Sol yeela sõgen ninga sẽn da tʋkda a zab-teedã: «Wõog-f sʋʋga n kõs-ma, tɩ nin-dẽgd bãmba na n wa tão-ma, la b yaal-m, n ning-m yãnde.» La sõgna sẽn da tʋk a zab-teedã pa sak ye, tɩ rabeem da tar-a lame, la a Sol lʋɩ n bʋʋga a sʋʋgã n kõs a menga. Sõgna sẽn yãe t'a Sol kiime, yẽ me lʋɩɩ n bʋʋga a sʋʋga la a naaga a Sol n ki. Yɩɩ woto la b ki daar a ye, a Sol ne a kom-dibli a tã la sõgna sẽn da tʋkd a zab-teedã. B sẽn yãend b neba sẽegre, n wʋm a Sol ne a kamba kũum, Israyɛl kamba sẽn be-b bãg-faaga rʋʋnde la sẽn be-b Zʋrdẽ rʋʋnde, b fãa yi-la b tẽnsẽ n zoe la Filisti rãmba tɩ reega b tẽnsã n kẽedẽ. Vẽkembeoogo, Filisti rãmba wa n zɛɛ teedã. B yãenda a Sol ne a kamba a tãabã sẽn gãe Gilboa tãnga zugu. B fiuuga a Sol zugu, n wʋk a zab-teedo. B kɩtame tɩ b sa n togs kibarã b wẽn-naandsa dotẽ la zĩis fãa. B bĩnga a Sol zab-teedã a Astarte rãmb doogẽ, la b yagla a Sol Bɛt-Seã lalga zugu. Galaad soolem, Yabɛs tẽng neba wʋma Filisti rãmba sẽn maan a Sol bũmb ninga. La gãndaada fãa kẽna yʋng a ye tõre, n wa rok a Sol yĩnga Bɛt-Seã lalga zugu la b rɩka a kamba me. La b lebg n waa Yabɛs n yõog kũuma bugum. B wʋka b kõaba n tɩ bus Yabɛs, tɩɩg sẽn wẽnd pusg tẽngre; b loe b noor dasem a yopoe. A Sol kũuma poore, a Daviid tõoga Amalesitsã, n lɛɛg n wa Siklag. A paa be rasem a yiibu. Da-yɩten-daara la rao a ye n yii a Sol tãb-sikã n wa. A futã ra kẽesame, t'a zug ra yug tom. A sẽn ta a Daviid taoore, a lʋɩɩ tẽnga n wõgemde. T'a Daviid sok-a: «Fo yita yɛ?» T'a leoke: «M yi-la a Israyɛl tãb-sikã n zoe n põse.» T'a Daviid sok-a: «Bõe n maam be? Bɩ f togs ma!» Daoã leokame: «Neba kong n zoeeme, neb wʋsg paa tãpẽ. A Sol meng ne a Zonatã maana yõore.» A Daviid soka bi-bɩɩga sẽn waa ne kibarã: «F yɩɩ wãn n bãng t'a Sol la a biig a Zonatã maana yõore?» Daoã sẽn waa ne kibarã leokame: «Segame tɩ m da bee Gilboa tãnga zugu; la m yãee a Sol sẽn tik a kãnde, n yɛsẽ, tɩ bilim-bilm la wed-dʋʋdb gũbg-a n sege. Dĩma sẽn wẽnemd n yãend-ma, b bool-m lame tɩ m leoke: ‹M Naaba!› Tɩ b soke: ‹Fo yaa ãnna?› Tɩ m yeele: ‹M yaa Amalesitga.› Tɩ b yeel maam: ‹Kolg-la f kʋ-ma. M ket n mi m nenga, la m gãba paooda.› La mam kolgame, n kʋ-ba tɩ m da miime tɩ b kõn põs bɛɛba ye. M fõka b naam pugla b zugu, n pidg zũurã b sẽn da ning b kanga. M waa ne-ba n na n kõ yãmba, m dĩma.» A sẽn wʋm woto, a Daviid taka a futu n kẽese, la neba fãa sẽn da be-b ne-yẽ wã me kẽesa b futu. B pogla kʋʋre, n yãb n yãbe, n zãgs rɩɩbo al tɩ ta zĩ-sobdo. B maana rẽ a Sol ne a biiga, a Zonatã, yĩnga, la Wẽnd buudu, a Israyɛl kamba, sʋʋga sẽn kooda yĩnga. A Daviid yeela bi-bɩɩga sẽn wa ne kibarã: «Fo yita yɛ?» T'a leoke: «M ba yaa noaka, a yaa Amalesitga.» A Daviid yeel-a lame: «Fo yɩɩ wãna n pa zoe rabeem n sak n zẽk f nugu n kʋ Soaala-Wẽnd sẽn kõ a soab naama?» La a Daviid boola ned a yembre n yeel-a: «Kolg n wẽ-a!» T'a sɩd wẽ-a n lubi. A Daviid yeelame: «Yaa fo meng n bao f kũum n saag n yiis f noorẽ tɩ foo n kʋ Soaala-Wẽnd sẽn kõ a soab naama.» Yɩɩn-kãnga la a Daviid pʋd yã n na n yãb a Sol ne a biiga, a Zonatã, kʋʋre. Tãp yɩɩlle, Zɩɩda kamba sẽn tog n zãmse, la sẽn gʋls Nin-sõngã sebr pʋga. A Daviid yɩɩla woto: A Israyɛl zu-zẽkra paa tãng zugu, gãndaada lʋɩ-la b lʋɩɩse! Da togs-y rẽ Gat tẽng ye, da moon-y kibarã Askalõ tɩ Filisti kom-pugli wã wa noogd b sũur ye, tɩ nin-dẽgda kamb wa kɩdemd n langdẽ ye. Gilboa tãmse! Bɩ meenem la sa-koom da le rʋʋg y zug ye! Bɩ pʋt da le pelg kood y pennẽ ye! Yaa yãmb zutu la rẽgd bol gãndaada gãndo. Be la a Sol gãonga rẽgem yã; a Sol gãonga kõn le sõ kaam ye A Zonatã tãpa yaool n zɩ n tare tɩ bɛɛbã n pid ne pãng ye. A Sol sʋʋga sẽn da tar vargr la a sẽn tare. A Sol ne a Zonatã yam kẽe taaba b vɩɩma fãa pʋgẽ, la ka kũuma n waa n welg-b ne taab ye. B tʋʋlem da yɩɩda sɩls tʋʋlem, b sũ-keelem yɩɩga bõnyẽes sũ-keelem! Israyɛl kom-pugli, ning-y nintãm n yãb a Sol! A ra yeelgda yãmb ne nufa, a ra zam-y-la ne fan teedo. Y futa ra tisa ne sãnem n tar yãgbo. Zabra sẽn waa n kɛɛd wa bẽere, wakat kãng la gãndaada lʋɩ yã, tãmsa zut la a Zonatã gãand yã! Zonatã, m yao sõngo, ges m sũ-sãanga! Ges m sẽn da nong-f ne nonglem ninga! Fo nonglma la m da pẽgd n yɩɩd fãa, n pẽgd-a n yɩɩd rao ne pag nonglem. Bõe tɩ gãndaada lʋɩ b lʋɩɩse? Bõe tɩ bãmb ne b zab teeda pa tãpẽ? Dẽ loogr poore, a Daviid soka Soaala-Wẽnde; a goma woto: «M tõe n kẽng n tɩ zĩnda Zɩɩda soolmẽ bɩ?» Tɩ Soaala-Wẽnd leok a: «Kẽnge!» La a Daviid le sokame: «M na kẽnga tẽn-bʋgo?» Tɩ b leok-a: «Ebrõ!» A Daviid kẽnga be ne a pagb a yiibã: a Ayinoam, Zizreyɛl tẽng biigã la a Abigayil, sẽn yɩ Karmɛl dao, a Nabal, paga. A Daviid kɩtame tɩ sẽn da be-b ne-yẽ wã kẽng, ned kam fãa ne a zaka, n tɩ zĩnd Ebrõ ne a tẽn-toose. A Zɩɩda neba waa Ebrõ, n pʋdg a Daviid zug naam kaam, t'a yɩ a Zɩɩda dĩma. La b waa n yeela a Daviid: «Yaa Galaad Yabɛs rãmb n solg a Sol yaoogẽ.» A Daviid tʋma neba tɩ b tɩ yeel Yabɛs-Galaad dãmba: «Wẽnd na ning y barka! Yãmb sẽn puk y pʋ-peelem ne y dĩm a Sol, n bao zĩig n mum-a. Bɩ Wẽnd kell n pʋg-y daar fãa ne b nonglem! La yãmb sẽn maan sõm ninga ne a Sol, mam me na maan-y neere. La marsã, bɩ y keng y pɛlga la y maan daoodo. Yãmb zu-soaba a Sol maana yõore, la a Zɩɩda rooga rãmb pʋdga m zug naam kaam, tɩ m led a Sol zĩiga.» A Nɛr biiga, a Abnɛr, a Sol tãnsoaba, da peega a Sol biiga, a Isbaal la a tall-a lame n kẽng Maanayim. A kitame t'a lebg dĩm Galaad, Asʋr, Zizreyɛl, Efrayim, Bẽnzame la Israyɛl tõre. A Sol biiga, a Isbaal, yʋʋm da taa pis-naase, a sẽn wa n lebg Israyɛl dĩma; la a rɩɩ naam yʋʋm a yiibu. Yaa a Zɩɩda roog bala n da kẽed a Daviid. A Daviid sẽn pa Ebrõ wala a Zɩɩda rĩm, yɩɩ yʋʋm a yopoe la kiis a yoobe. A Nɛr biiga, a Abnɛr, la a Sol biig, a Isbaal gũudba yii Maanayim n tees Gabaõ. A Seruya biiga, a Zoab, ne a Daviid gũudba me boba zabre. Yaa Gabaõ ko-baoora sɛɛg la b seg taaba tɩ bãmb dãmb be ko baoora kɩreng a ye, tɩ bãmb dãmb be kɩreng a to. A Abnɛr yeela a Zoab: «Bɩ neba yik n mao taab tõnd taoore!» A Zoab leokame: «B yiki!» B yikame. B sõda a Bẽnzame roogẽ, a Sol biig a Isbaal neba bãmb piig la a yiibu, n sõd a Daviid neba, bãmb piig la a yiibu. Ned kam fãa gãda a zabd-n-taag yubla, la a rɩk a sʋʋga n kõs a lʋgre, tɩ b fãa naag taaba n lʋɩ. Yaa rẽ yĩnga la b sẽn bool zĩ-kãng tɩ sʋʋs pĩisẽ, la a bee Gabaõ. Badaare zab toaag n zĩndi la a Daviid tãb-biisa tõoga a Abnɛr ne a Israyɛl neba. A Seruya kamb a tãaba zĩnda be: a Zoab, a Abisayi la a Asayɛl. A Asayɛl da tʋʋla ne zoeese wala yãka. A Asayɛl wudgame n pʋgd a Abnɛr, la a pa tol n bʋdg goabg bɩ rɩtg ye. A Abnɛr wẽnegame n yeele: «Yaa foom bɩ, Asayɛl.» La a leokame: «N-yẽe!» A Abnɛr yeelame: «Kek goabg bɩ rɩtgo, yõk tãb-bi-pol a ye n deeg a sẽn so fãa.» La Asayɛl pa tʋlg n bas pʋgbo la a pa kek ye. A Abnɛr le yeela a Asayɛl: «Kek la f bas m pʋgbo, ka rẽ m na n wẽ-f lame n lubi. La f sã n lʋɩ, m na le tõog yals f ba-biig a Zoab taoore?» A Asayɛl tõdgame t'a kõn serg ye. Woto wã a Abnɛr kõsa a pʋga ne a kãndã, la kãnda sãag n yi-la a poorẽ t'a lʋɩ n ki zĩig pʋgẽ. Ned ning fãa sẽn da ta a Asayɛl sẽn lʋɩẽ wã da yalsdame. A Zoab ne a Abisayi zoe n pʋga a Abnɛr, la wĩndg lʋɩɩs sasa, b taa Gibea-Ama, sẽn be Gia yaanga, Gabaõ we-raooga sor zugu. A Bẽnzame kamba sũu taaba, a Abnɛr poorẽ, la b yalsa tãn-bil a ye zugu. A Abnɛr zĩnda tãn-bila zug n bool n tees a Zoab n yetẽ: «Sʋʋgã na n kell n tara varg bala? Fo ka mi tɩ sã n ya woto kõn baas neere? Wakat bʋg la f na n yaa n kabs f neba tɩ b vẽ ne saam-biisa zab-taasma?» A Zoab leokame: «Ne Naaba-Wẽnd sẽn vɩ wã, ad-fo sã n da pa gomẽ, neba kõn basẽ taab pʋgbo, tɩ beoog raara ka vẽeg ye.» A Zoab kɩtame tɩ b peeb tõntõogo, tɩ tãb-biisã fãa yalse. B basa a Israyɛl pʋgbo, tɩ zabra sɛ. A Abnɛr ne a neba kẽname n tees Araba, yʋng kãng tõre. B rʋʋga Zʋrdẽ kʋɩlgã; b kaaga Gesur n wa kẽ Maanayim. A Zoab basa a Annɛr pʋgbo, n tigim a tãb-biisã fãa. A Daviid tãb-biis piig la a wɛ n ki, n paas a Asayɛl. La a Daviid neba da kʋ a Bẽnzame la Abnɛr nebã, neb kobs-tã la pisoobe. B talla a Asayɛl n tɩ solg a ba yaoogẽ, Bɛtelyɛɛm. A Zoab ne a neba kẽna yʋnga tõre, la zĩig sẽn waa n yẽegdẽ la b yaool n ta Ebrõ. Zabra kaoosa a Daviid ne a Sol rooga sʋka, la a Daviid roogã pãng ra paasdame t'a Sol rooga rẽnd ra woogdẽ. A Daviid roga kamb Ebrõ tẽnga: a pipi biiga yʋʋr da boondame tɩ Amnon. A ma la Zizreyɛl pag, a Ayinoam. Yẽ yao wã la a Kilab, a ma a Abigayil, Karmɛl Nabal paga; a tãab soaba la a Absalom, a ma la a Maaka, Gesur dĩma, a Talmayi, bi-pugla. A naas soaba la a Adoniyas, a Agit biiga: a nu soaba la a Sefatiya, a Abital biiga, a yoob soaba la a Itreyam, a Daviid paga Egla biiga. Kom kãens la a Daviid paam Ebrõ tẽnga. A Sol ne a Daviid rooga sẽn da waa n ket n zabd taaba, a Abnɛr maana yam n dʋʋs a meng a Sol neba taoore. A Sol ra tara paga t'a yʋʋr boond t'a Rispa, n yaa a Aya bi-pugla. A Isbaal yeela a Abnɛr: «Ya bõe tɩ fo kolg m ba wã paga?» A Isbaal goama puuga a Abnɛr sũur wʋsgo t'a yeele, «Mam yaa baag sẽn dɩt a Zɩɩda rãmb nugẽ laa? M ka zãmb f saamba a Sol roog ye, m ka zãmb a saam-biisi, a zo-rãmb ye; m pa bas foom a Daviid nugẽ ye, la f yik n zabda ne maam pag poorẽ, dũnna! Wẽnd na sik yel-beed a Abnɛr zugu, n sik-a n bãge, mam sã n pa pids Soaala-Wẽnd sẽn kãab a Daviid, la m yiis naama a Sol roogẽ, n sõng a Daviid t'a rɩ naam Israyɛl la Zɩɩda zãnga, n sɩng Dã n ta Beerseba.» A Isbaal pa saag n le paas gomd ye, t'a ra zoeta a Abnɛr. A Abnɛr meng a toore tʋma neb tɩ b tɩ yeel a Daviid: «Ãn n so tẽn-peelma?» N le paas woto: «Wa yõg zood ne maam tɩ m na sõng tɩ f paam tɩ Israyɛl neba fãa wa kẽ-fo.» A Daviid leokame: «Be neere! M sakdame n na n yõg zood ne foom. La bũmb a ye bal n be tɩ m na kos foom: f ka na n wa mam taoore, tɩ f ka reng n wa ne a Mikal, a Sol bi-puglã.» La a Daviid tʋma neb tɩ b tɩ yeel a Sol biiga, a Isbaal: «Kõ-m paga, a Mikal, tɩ m paam-a-la ne Filisti rãmb koabg waoose.» A Isbaal tʋmame tɩ b tɩ reeg-a a sɩda, a Paltiyɛl nengẽ. A Paltiyɛl yaa a Layis biiga. A sɩda yik n yãag-a lame. A pʋg-a-la ne nintãm n ta Bawurim, t'a Abnɛr yeel-a be: «Lebge!» La a Paltiyɛl sakame, a lebgame n kuli. A Abnɛr sɩnga yẽsgo ne a Israyɛl nin-kẽemba n yeel-ba: «Yaa al daar zãra la yãmb dat t'a Daviid yɩ y dĩma. Bɩ y mao tɩ yɩ marsã, tɩ Soaala-Wẽnd ra pĩnd n yeela woto a Daviid poorẽ: ‹Na n tũu ne m yamba, a Daviid, tɩ m fãag m buudu, a Israyɛl, Filisti rãmba la b bɛɛba fãa nugẽ.› » A Abnɛr goama lʋɩ-la a Bẽnzame tʋbrẽ. A taa Ebrõ, n wilg a Daviid, Israyɛl rãmba ne a Bẽnzame sẽn sakd bũmb ninga. A Abnɛr taa a Daviid nengẽ Ebrõ ne neb pisi. A Daviid maana a Abnɛr ne a poorẽ dãmba sãando. B sẽn waa n dɩ n sɛ, a Abnɛr yeela a Daviid: «Ade, m naaba, m tõe n tigma a Israyɛl tõre m dĩma taoore, m tõe tɩ tẽnga neba fãa yõg zoodo ne yãmba tɩ y rɩ naam b fãa zugu wa y sẽn date.» A Daviid kõ-la Abnɛr sore, t'a kul ne laafi. Mik a Zoab ne a Daviid tãb-biisa ra tɩ zabame la b fã n lebg n watẽ; b ra paama rɩɩb sõma. Dẽ t'a Abnɛr ra ka le ket a Daviid nengẽ, Ebrõ tẽng ye, tɩ bala a Daviid ra kõ-a-la sore t'a kuli, t'a sɩd da kul ne laafi. La a Zoab ne a tãb-biisa fãa sẽn wa n ta yiri, b togs-b la woto: «A Nɛr biiga, a Abnɛr, yõsg n waa dĩma nengẽ, la b bas-a lame t'a leb n kuli ne laafi.» Rẽ la a Zoab kẽ dĩma nengẽ n yeele: «Yaa bõe la yãmb yõdg n maan ka? A Abnɛr waa yãmb nengẽ, yaa bõe tɩ yãmb bas-a t'a looge? Yãmb mi-la a Nɛr biiga, a Abnɛr, bɩ? A ratame bala n tudg yãmba. A waame bala n na n bãng y sẽn gõod zĩis niynsi, n bãng y sẽn maand fãa.» A Zoab yi-la a Daviid nengẽ n tʋm neb tɩ pʋg a Abnɛr. B tɩ paam-a-la Sira ko-baoora sẽnẽ la b le tall-a lame n wa t'a Daviid zɩ tiiri. A Abnɛr sẽn ta Ebrõ, a Zoab peeg-a lame n kẽ tẽnga pʋga, n bool-a kɛɛnga, wala a tara koɛɛg n na n walem-a, mik a sɩlmame n paam-a n kõs a pʋga t'a ki. Woto me la a rok a sũur ne a Abnɛr, t'a ra kʋ-la a saam-biig a Asayɛl. A Daviid wa n bãnga yellã, la a yeelame: «Beoogo, ra-yɩta, bɩ Soaala-Wẽnd da ning m meng la m soolma taale a Nɛr biiga, a Abnɛr, zɩɩma daagr poorẽ ye. Taalã roga a Zoab la a zaka rãmb fãa zugu. Bɩ a Zoab rooga rãmb bẽ mende la wãoodo! B ra tõog n kẽn b nao a yiiba zug ye, la zabr sʋʋg sẽn base, bɩ tẽn-kũum loog ne!» A Zoab ne a yao a Abisayi kʋ-la a Abnɛr tɩ yẽ n da yiis b yao, a Asayɛl, yõore, Gabaõ zabrẽ. A Daviid yeela a Zoab ne tãb-biisã sẽn da yãagd-a wã: «Kẽes-y y futu, la y yeelg sũ-pa-noang futu, tɩ d yãb a Abnɛr kʋʋre.» B tʋka kũuma pãndare t'a Daviid pʋgd poorẽ. B muma a Abnɛr Ebrõ. Dĩma sɩnga kũmkũma a Abnɛr yaoogã zug tɩ zãma wã fãa kiigd nintãm. Dĩma yãba a Abnɛr woto: «A Abnɛr ra tog n kii wa nin-yaalg woto sɩda? F nus ra pa loe, f kars ra pa sog ne bãeense, f lʋɩ wa ned sẽn lʋɩ yel-wẽn-maandb nusẽ!» Tɩ zãma wã fãa nintãm na n sodg n paase. Neba waa n kosa a Daviid t'a rɩ tɩ wĩndg nan pa lʋɩ ye, la a Daviid wẽena woto: «Wẽnd na sik yel-beedo m zugu la b le sik-a n bãge, m sã n ning bur m noorẽ, bɩ bũmblem buug a to tɩ wĩndga nan pa kẽ!» Zãma wã wʋmame la b mikame tɩ rẽ yaa sõmbo, tɩ bala dĩma sẽn da maand fãa neba ra pẽgdame. Badaare, zãma wã fãa ne Israyɛl tõre bãngame t'a Nɛr biiga a Abnɛr sẽn ki wã da ka dĩma yell ba bilfu. Dĩma yeela a tãnsoaben-dãmba: «Y ka mi tɩ Israyɛl na-biiga, tɩ Israyɛl nin-kãseng n ka rũnna laa? Sã n ya ne maam, m pãng paooda rũnna ne b sẽn taag m naam kaama; a Seruya kom-kãensã sũur kegmame tɩ looge. La Soaala-Wẽnd na lebs wẽnem soab a wẽnem.» A Sol biiga a Isbaal wʋmame t'a Abnɛr ki Ebrõ, t'a yɛɛse, tɩ Israyɛl tõr sũur sãame. A Sol kamba zakẽ, nin-daad la bi-bees a yiibu n da be be. A ye yʋʋr a Baana, a yiib soaba a Rekab. B ra ya Beerot rao a Rimõ kamba, a Bẽnzame roogẽ, tɩ bala b geta Beerot me wala a Bẽnzame soolem. Beerot neba ra zoeeme n wa kẽ Gitayim, la b keta be n ta rũnna n lebg be noakense. A Sol biig a Zonatã da tara a biig a yembre, la a karsa ra fabame. A ra tara yʋʋm a nu, a Sol ne a Zonatã kʋʋra sẽn yɩ Zizreyɛl n wa, a ma wubdga põk-a lame n na n zoe, la zoeesa sẽn yɩ ne yãgb bala, biiga fʋrg n lʋɩɩme t'a kars sãame. Beerot rao, a Rimõ, kamb a yiibã, a Rekab ne a Baana, waa n yika wĩnto-sʋka n kẽng a Isbaal yiri wa b na n tɩ sika koodo. B kẽeme n mik t'a kẽe vʋʋsgo. B sẽn ta woto n mik t'a gãe a gãag zugu, a ro-gãagẽ b kõs a pʋʋrã. B sẽn kʋ-a woto, a Rekab ne a Baana fiuuga a zugã n zoe n looge. B teesa Zʋrdẽ bãg-faaga la b kẽna yʋnga tõre. B talla a Isbaal zugã n wa a Daviid taoore, Ebrõ, la b yeela dĩma: «Ad-a Sol biiga a Isbaal zugu, yãmb bɛyã sẽn da rat y yõore. Soaala-Wẽnd saka rũnna tɩ d soaala la d dĩma paam n dok a sũur ne a Sol la a buudu.» La a Daviid goma ne Beerot Rimõ kambã, a Rekab ne a yao a Baana, n yeel-ba: «Bas-y tɩ m wẽen ne Wẽnd sẽn vɩ la sẽn yiisd maam toog buud fãa pʋgẽ wã la m yeel-y woto: Sẽn da wa-a n togs maam a Sol kũuma, ra tẽeme t'a waa ne koe noogo, la mam kɩtame tɩ b yõk-a n kʋ Siklag, n yao a koe noogã. M maanda wãn marsã ne bi-bees sẽn kʋ nin-tɩrga a zak pʋgẽ, rẽ yẽne me a gãag zugu! M pa tog n sok sẽn daag-b zɩɩma la m kɩt tɩ b menem dũniya sɩda?» A Daviid kõ-la a neba noor tɩ b kʋ-ba. B kʋʋsa b nus la b nao n lul-b Ebrõ ko-baoora sɛɛga. La b rɩka a Isbaal zugã, n tɩ mum a Abnɛr yaoogẽ, Ebrõ tẽnga. Wẽnd kãnga Israyɛl sagsã fãa wa a Daviid nengẽ Ebrõ. B yeel-a lame: «Ade, tõnd yaa f buudu la f rooga neba. Pĩnda, a Sol sẽn da waa n ya tõnd dĩma, yaa foom n da talld Israyɛl kamba n kẽnd tãpo la f le talld-ba n watẽ. Soaala-Wẽnd yeela foom: ‹Foom n na n yɩ m buud a Israyɛl ba-wubdga, foom n na n yɩ a Israyɛl dĩma.› » La woto, a Israyɛl nin-kẽemba waa dĩma a Daviid nengẽ Ebrõ. La dĩma a Daviid yõga zood ne bãmba, Ebrõ, Soaala-Wẽnd taoore. B pʋdga a Daviid zug naam kaam, t'a lebg a Israyɛl dĩma. A Daviid da tara yʋʋm pis-tã, a sẽn waa n na dɩ naam. A rɩɩ naam yʋʋm pis-naase. A rɩɩ Zɩɩda naam, Ebrõ, yʋʋm a yopoe la kiis a yoobe n dɩ Zɩɩda la a Israyɛl fãa naam Zerizalɛɛm, yʋʋm pis-tã la a tã. La Dĩma ne a tãb-biisa waa n taka zabr Zerizalɛɛm ne Zebuzitsa sẽn da be tẽn-kãnga. Sɩda tẽnga rãmb yeela a Daviid: «Yãmb naoor sẽn wat n na n tabg ka tɩ ya zoeense la wobs la y na n pĩngd goabg la rɩtgo.» Bãmb da rat n yeelame t'a Daviid kõn tol n kẽ be lɛ-lɛ. La a Daviid zabame n deeg Siõ tãnsoaben-doogo; dẽ n lebg a Daviid na-tẽnga. Baraare a Daviid yeelame: «Ned sã n dat n kẽ Zebuzitsa tẽnga a maanda sɩlem b bas zoeensa la wobsa pĩngr yɩnga n tũ bok ning b sẽn wedg n na n wa ne kooma tẽnga pʋga.» A Daviid sẽn kis wa fãa-la woabg la zoanga. Yaa rẽ yĩnga la b yeta: «Wobs la zoeense pa tar zĩig Wẽnd zakẽ ye.» A Daviid kẽe tãnsoben-dooga pʋga, n bool-a t'a Daviid na-tẽnga. La a mee lalg n gilgi, n sɩng Milo n digd pʋgẽ. A Daviid pãng da tara paasgo daar fãa tɩ Tãnsoaba-Wẽnd ra bee ne yẽnda. A Iram, Tir dĩma tʋma a Daviid tʋʋm-tʋmdba ne ra sĩdma la da-wãadba la kug-peesdba, tɩ b me roogo n kõ a Daviid. A Daviid bãngame tɩ Soaala-Wẽnd n da paasd a naama keelem, t'a yɩ a Israyɛl dĩma, la b zẽk a rĩungu, bãmb buud a Israyɛl yĩnga. A Daviid sẽn yi Ebrõ, n ta Zerizalɛɛm, a le kẽesa pagba. A le roga kom-dibli la kom-pugli. Ad kamb niyns sẽn dog Zerizalɛɛma yʋya: a Samua, a Sobab, a Natã, a Salomo. A Yivar, a Elisuwa, a Nefɛg, a Yafiya. A Elisama, a Elyada, a Elifelɛt. Filisti rãmba sẽn wʋm tɩ b taaga a Daviid kaam t'a yɩ Israyɛl dĩma, b rʋʋsa tãpo n na n yõk-a. A Daviid sẽn wʋm boto, a zoeeme n tɩ kẽ tãnsoaben-doogã. Filisti rãmba, taa Refayitsa tãnnaokã, n tong b tãb-biisã. A Daviid soka Wẽnde: «M tõe n zaba ne Filisti rãmbã la y na n ning-b-la mam nugẽ bɩ?» La Soaala-Wẽnd leoka a Daviid: «Zab ne-ba! Vẽenega m na n ninga Filisti rãmbã f nugẽ!» Dẽ la a Daviid tees Baal-Perasim, la zĩ-kãnga a tõoga Filisti rãmba; la a yeelame: «Naaba-Wẽnd bɛɛga m bɛɛba lalga, wala koom sẽn kaoog bɛongo.» Yaa rẽ la b boond zĩ-kãnga tɩ Baal-Perasim. Filisti rãmba ra zoe n basa b wẽnd dãmba, la a Daviid ne a neba wʋk-b lame. Filisti rãmb le rʋʋsa tãpo Refayim tãnnaokẽ wã. A Daviid soka Soaala-Wẽnde la b leok-a lame: «Da tees b taoore n sɩng zabr ye. Gilg b poorẽ pargen-tuudẽ wã. Fo sã n wa wʋm nao rãamde, pargensa zutu, maan gũusgu, tɩ yaa Soaala-Wẽnd n lʋɩt f taoore n na pãb Filisti rãmba.» A Daviid maana wala Soaala-Wẽnd sẽn da kõ a noore, la a tõoga Filisti rãmba, Gezɛr tẽnga noorẽ. Dẽ loogr poore, dĩma a Daviid tigma a Israyɛl nanams bɛdã la a nin-kẽemba fãa, na ta neb tus pis-tã. A Daviid ne neb niyns fãa sẽn da be ne-a wã teesa Zɩɩda-Baala n na n tɩ tall zooda kasetã n wa; yaa yẽ linga zugu, la Tãnsoaba-Wẽnde da sigda, malɛgs a yiiba pɩgsa maasmẽ. B rogla koglga bilim-bilm paalg zugu; b tɩ rɩk-a-la a Abinadab yiri. A Uza ne a Ayio, a Abinadab kamba, n da tat bilim-bilm paalgã. B yiis-a koglgã a Abinadab yiri, tãnga zugu, la a Ayio n da kẽnd taoore. A Daviid ne a Israyɛl roog rãmba fãa da reemda koglga taoore ne yʋʋm teed buud fãa: duudsi, koala, pendse, gãngãado, kɛma. B waa n ta-la a Nakõ zɛɛgẽ wã, t'a Uza tẽega a nugu, n na n kok koglgã tɩ niiga ra maaname t'a kɩlle. La Naaba-Wẽnd sũur puuga ne a Uza; la b wẽ-a-la zĩ-kãng bala, a kongr yĩnga. A Uza kii be, koglga sɛɛga. A Daviid yɛɛsame tɩ yɩɩ wa lalg la b wurg yã t'a Uza sãd n yi. Ne rũnna zĩ-kãng ket n boondame tɩ Uza lalg bɛɛga. Badaare, a Daviid zoe Soaala-Wẽnd rabeem; a yeelame: «Kuga walsa koglg yɩta a wãna n kẽ mam yiri?» Woto, a Daviid pa sak n bĩng zood kasetã a yiri, a na-tẽng pʋgẽ ye. A tall-a lame, n tɩ bas a Obɛd-Edom, Gat daoa, yiri. Koglgã paa a Obɛd-Edom, Gat daoã, yir na maan kiis a tã. La Soaala-Wẽnd ninga a Obɛd-Edom ne a zak fãa barka. B waa n yeela a Daviid: «Naaba-Wẽnd ninga a Obɛd-Edom ne a zak la a sẽn tar fãa barka, kuga walsa koglg yĩnga.» Woto, a Daviid kẽngame n tɩ kɩt tɩ b rɩk-a a Obɛd-Edom yiri, n tall-a n wa ne kɩdengo, a Daviid na-tẽngẽ. La koglga tʋkdba sẽn maan nao yakem a yoobe a Daviid kʋʋ loalga ne nag-bil noabdg maoongo. Dĩma a Daviid da saooda ne a pãng tɛka, Soaala taoore, a ra yera maan-kʋʋdba fu-bil-pɛɛlgã. A Daviid ne a Israyɛl kamba fãa waa ne koglgã n kaasdẽ la b peebd bardo. Kuga walsa koglg sẽn ya Wẽnd zood kasetã sẽn waa n kẽed a Daviid na-tẽnga, a Sol bi-puglã, a Mikal, lɩka võorẽ n getẽ: la a yãee dĩma a Daviid sẽn yɩgd la a wẽnegd Soaala-Wẽnd taoore; la a sãbs-a-la a sũurẽ. B kẽesa koglgã, n dɩgl-a a zĩigẽ, pɛɛl roogẽ, a Daviid sẽn kɩt tɩ b ti a yĩnga. A Daviid kʋʋ, Soaala-Wẽnd taoore, yũ-noog la laafi kosg maando. Maanda sẽn kʋ n sɛ, a ninga neba barka Tãnsoaba-Wẽnd yʋʋr yĩnga. A kɩtame tɩ b pʋɩ, a Israyɛl zãma wã fãa, dapa la pagba, rɩɩbo; ned kam fãa reega bur gilga, la miisd sẽn dõos ne bugsuntung la tɩɩs a taab bi-koeemse, tɩ b fãa yaool n kuli. Dẽ poore, a Daviid kulame n na n tɩ ning a zak rãmb barka, t'a Mikal, a Sol biigã yii n seg-a n yeele: «Ad-y Israyɛl dĩma paama waoogr dũnna koe! A pidga a futu n sao bɩlgemd la bala, a yems yem-pogs taoore, wa talga!» A Daviid leoka a Mikal: «M saoo Soaala-Wẽnd taoore, bãmb sẽn nong maam n yɩɩg f ba, la f ba roog gilli, n tũus maam, tɩ m yɩ b buud, a Israyɛl naaba. M da nongẽ lame n yɩẽ nin yaalga n yɩɩd woto, la m sulgẽ m menga, m meng nifẽ n paase, la ad-m kõn kong waoogre fo sẽn gomd yem-pogs niynsa taoore ye.» Woto wã, a Mikal, a Sol bi-puglã, ka le rog biig ye. Dĩma waa n kẽ-la a yi-paalẽ n na n zĩndi, tɩ Soaala-Wẽnd kõ-a-la vʋʋsgo la b fãag-a-la a bɛɛba fãa sẽn da gũbg-a wã nusẽ. Dẽ la a yeel bãngd a Natã: «Gese, mam kẽeda roogo sẽn maan ne ra-sĩdma, tɩ kuga walsa koglg yaool n be zãnd sẽn ti ne pɛɛl tẽngre.» T'a Natã leok dĩma: «Aya! Bɩ y maan y sũur sẽn dat bũmb ning fãa, tɩ b bee ne yãmba.» Badaar yʋngo, Naaba-Wẽnd leoka bãngda a Natã gomd kãngã: «Kẽng n tɩ togs m tʋʋm-tʋmda a Daviid tɩ Soaala-Wẽnd koɛɛg la woto: ‹Yaa foom n na n me roogo n kõ-m tɩ m kẽ bɩ? M pa bao roogo m sẽn yiis Israyɛl kamba Ezipt tẽnga n tãag rũnna. Kẽna kẽname tɩ m be sɛk roogẽ, zãnd tẽngre. Mam sẽn tũ a Israyɛl kamba zĩig ning fãa, m yeel-b tɩ bũmbu? M goma ne a Israyɛl naaba a bõe, nanams niyns m sẽn kõ noor tɩ kɩɩm m bãgre, a Israyɛlã? Dĩm bʋg la m yeel yã: Bõe tɩ y pa kẽes-m doog pʋg sẽn maneg n ka ne kʋgs ra-sidma?› Marsã, tɩ yeel m tʋʋm-tʋmda a Daviid: Ad Tãnsoaba-Wẽnd sẽn yet bũmb ninga. Yaa maam n tɩ yiis foom pʋ-weesẽ, f sẽn waa n pʋgd f rũmsi, n bool-f tɩ f wa yɩ m buud a Israyɛl dĩma. Fo sẽn kẽng zĩig ning fãa, mam da bee ne foom; mam kʋ-la f bɛɛba fãa f taoore. Mam kɩtame tɩ fo yʋʋr yi n zʋʋg tẽng zug nanams bɛda fãa yʋʋr sẽn yitã. Mam kõ-la m buud a Israyɛl zĩig t'a zĩndi; m na n vigla yẽnda be, t'a kɩ yẽgna, n kell n pa a zĩigẽ la nin-wẽnsã kõn le yaal-a wa pĩnd ye, wala m sẽn waa n kõ m buud a Israyɛl bʋ-kaoodb tɩ b ges a yelle. Mam kõ-f-la vʋʋsgo, n fãag-f ne f bɛɛbã. La mam meng n togsd foo tɩ m na n yalga f buudu. F yõor sã n wa ta a tɛka, tɩ fo sak f saam-dãmba, mam na zẽk f kamb, fo poorẽ, m na zẽk biig f sẽn doge. M na n zaoolg-a-la naam goeel sẽn vigl kẽnkẽ zugu. La yaa yẽ n na n me roogo, mam yʋʋr pẽgr yĩnga. La mam na viglg a naam zaoore t'a ra le vik ye. Mam na n yɩ-la a ba, la a na n yɩɩ mam biiga. A sã n maan wẽnga, mam na sɩbg-a ne gʋlgo la gʋlga na n yɩɩ ninsaalba. La m kõn yiis m barka a zug, wala m sẽn yãk a Sol barka, la dig-a n yiis fo taoora ye. Fo roogo la f rĩunga na kaoose, a kõn sɛ ye; f zaoorã na n viglame la a kõn vik abada.» Bãngda a Natã n tɩ togsa dĩma a Daviid Soaala-Wẽnd likrã la b koeesa fãa. La a Daviid kẽng n tɩ pʋʋsa Soaala-Wẽnd la a yeela b taoore: «Mam yaa ãnna, Soaala-Wẽnde? La mam buud zema bõe, tɩ yãmb zẽk mam n ta zĩig ninga m sẽn beẽ wã? La yãmb gesa rẽnda n yet tɩ paooda, Soaala-Wẽnde; yãmb kãaba m roog neer la neere, n pʋlem-a noog ti nan ket n zãra. Bõe la a Daviid tõe n togs yãmb n paase? Yãmb mi-m lame, Soaala, yãmb gomd yĩnga, la y sũur daab yĩnga, yãmb maana yel-kãsense la y sak n wilga y tʋʋm-tʋmdã. Yãmb waooga, Soaala-Wẽnde! Sẽn wẽnda yãmb ka be ye! La Wẽnnaam a to me ka be, sã n pa yãmba, wala d tʋb sẽn wʋmde. Buud a ye bee tẽng zugu, sẽn wẽnd yãmb buudu, sẽn wẽnd a Israyɛl bɩ? Wẽnnaam sẽn wa n fãag a Israyɛl, n kɩt t'a lebg bãmb pʋɩɩre, n kɩt t'a yʋʋr yi, b maana a yĩnga, a tẽnga yĩnga, wẽnd-makr dãmba la bõn-bãna, n dig nin-zẽmba ne b wẽn-naandse n yiis a Israyɛl taoore. Yãmb vigla y buudu, a Israyɛl, t'a yɩ yãmb soolem daar fãa; la yãmba, Soaala, yãmb lebga a Israyɛl Wẽnnaam. Marsã yãmb sẽn kãab y tʋʋm-tʋmda bũmb ningã, y sẽn pʋlem a rooga bũmb ningã, bɩ y sõng tɩ y gomda pids daar fãa, la y sak n maan wala y sẽn yeele. Bɩ yãmb yʋʋr paam pẽgre daar fãa! Wẽnd na kɩt tɩ b yeele: Dũni fãa Soaala, la a Israyɛl Wẽnnaam! Wẽnd na kɩt tɩ yãmb tʋʋm-tʋmda roog paam pãng yãmb taoore! Sɩd yaa yãmb menga, la dũni fãa Soaala la a Israyɛl Wẽnnaam. Yaa yãmb n vẽneg y meng ne yãmb tʋʋm-tʋmda a Daviid, n yeele: Mam na n mee roogo n kõ-fo! Yaa gom kãnga n keng mam pɛlga, tɩ mam saag n pʋʋs yãmb woto. La marsã, Soaala-Wẽnde, yãmb la Wẽnde, la yãmb goama fãa yaa sɩd bala, la yaa yãmb n wilgd yãmb tʋʋm-tʋmda kiba noogã. Bɩ y sak n ning yãmb tʋʋm-tʋmda yir barka, t'a kell n kaoos yãmb taoor daar fãa! Tɩ yaa yãmba, Soaala-Wẽnde, n gome, la y kãabg yĩnga, yãmb tʋʋm-tʋmda roog na n paama bark zamaan fãa.» Rẽ poore a Daviid tõoga Filisti rãmba. A ning-b-la yãnde n deeg b sẽn da so tẽns niynsã. A le tõoga Moabitsã, n gãneg-b tẽnga, n kʋ bãmb neba a yi neb a tãab zugu. Woto Moabitsa kẽ-la a Daviid soolmẽ n yaood fadgo. A Daviid tõoga a Adadezɛr, a Reob biiga, sẽn ya Soba dĩma, a sẽn wa n tʋlg n yalg a soolem n tãag Efrat kʋɩl-kẽengã. A Daviid yõga wed-dʋʋdb tusri la kobs-yopoe, n yõg sẽn ka zao b wiidã bãmb tus pisi. A wõrsa wiidi niyns sẽn tat-b bilim-bilma kars gĩini. A keesa bilim-bilm koabg bala a meng yĩnga. Aram neb sẽn da kẽed Damas waame n na n sõng a Adadezɛr, Soba dĩma, t'a Daviid kʋ bãmb neb tus pisi la a yiibu. Dẽ poore a Daviid zĩndga komber Damas, Aram dãmba yĩnga. Bãmb lebga a Daviid yemse n kɩt-a yõor yaood. A Daviid sẽn kẽng zĩig ning fãa n tak zabre, a tõoga a bɛɛba. A Daviid reega sãnem gãnda fãa, a Adadezɛr tãb-biisa sẽn da zãadã la a tall-b lame n wa Zerizalɛɛm. A Adadezɛr tẽnsẽ, Beta ne Berotayi, a Daviid wʋka zũud teed wʋsgo. A Towu, Amat dĩma, wʋmame t'a Daviid tõoga a Adadezɛr tãb-biisã fãa. A tʋma a biiga, a Zoram, tao-tao, a Daviid nengẽ n na n pʋʋs-a la a pẽg-a, a sẽn zab n tõog a Adadezɛr yĩnga. A Adadezɛr da rɩta beem ne a Towu. A Zoram waa ne wanzurf, sãnem la zũud teedo n kõ a Daviid. Dĩma a Daviid rɩka rẽ fãa n naag ne tẽns a taaba a sẽn da wõra wanzurf la sãnem n kõ Naaba-Wẽnde. Kũuna yii Edomitse, Moabitse, Amonitse, Filisti rãmba la Amalesits tẽnsẽ, n paas a sẽn deeg a Adadezɛr nengẽ. A Adadezɛr la a Soba biiga la Soba dĩma. A Daviid yʋʋra yii wʋsgo a sẽn tɩ pãb Aram nebã n lɛɛg n wa. Zabra zaba yamsem bãg-faagẽ, la neb tus piig la a nii la a tõog yã. A ninga komber Edom tɩ Edom neba fãa lebg a Daviid soolem. A Daviid sẽn da kẽndẽ fãa, Soaala-Wẽnd da sõngd-a lame t'a tõog a bɛɛba. A Daviid rɩɩ naam Israyɛl fãa zugu. A ra zãada neba ne pʋ-peelem la zemsgo. A Seruya biiga, a Zoab, n da yaa a tãnsoaba, t'a Zozafat, a Ayilud biiga, yaa a koe-moanda. A Ayitub biiga, a Sadok, a Abiyatar biig a Ayimelɛk n da ya maan-kʋʋdba; a Seraya n da ya a sɛb gʋlsda. A Zoyada biig, a Benaya, n da ya Krɛt la Pelɛt dãmba sẽn da gũud dĩma tãnsoaba. A Daviid kamba da yaa maan-kʋʋdba. A Daviid waa n yeelame: «Ned keta a Sol roogẽ tɩ m tõog n maan-a neere, m zooda ne a Zonatã yĩng bɩ?» A Sol sõgen a ye n da be, n boond t'a Siba; b tall-a lame n wa a Daviid nengẽ. Dĩma sok-a lame: «Yaa foom la a Siba bɩ?» T'a leoke: «M naaba, yaa maam, y sõgna!» Tɩ dĩma soke: «Ned pa ket a Sol doogẽ tɩ m pids m sẽn kãab ne Wẽnde?» T'a Siba leok: «A Zonatã biig a ye n kete, la a yaa põore.» Dĩma sokame: «A bee yɛ?» T'a Siba leoke: «A bee Lo-Debar rao, a Amiyɛl biig, a Makir, yiri.» Dĩma a Daviid tʋmame tɩ b kẽng a Makir, a Amiyɛl biiga, yiri, Lo-Debar tẽnga, n tɩ tall-a n wa. A Mefibaal, a Sol yagenga, la a Zonatã biiga, waa a Daviid nengẽ n wõgemd a taoore, n fõgneg a neng tẽnga. A Daviid yeelame: «Mefibaal!» T'a sake: «Ad-y y sõgna!» T'a Daviid paase: «Da zoe rabeem ye, tɩ mam dat n maan-f la yel-sõmde, f ba a Zonatã yĩnga. Mam na n lebsa foom, f yaaba a Sol pʋtã fãa, la fo na n dɩɩ daar fãa ne maam laag a ye pʋga.» A Mefibaal wõgemdame n yeele: «Yãmb yamba zema bõe, tɩ y wẽnemd y neng n tees ba-kɩɩng wala mam to wã?» Dĩma boola a Siba, a Sol sõgnã, n yeel-a: «Mam kõta f zu-soaba biiga, a yaab ne a buuda sẽn da so bũmb ning fãa. Ko pʋtã a yĩnga, foom ne f kamba la f tʋʋm-tʋmdba; la fo na n tɩgsda bõn-koadi wã tɩ f zu-soaba biig paam dɩɩb n dɩ. La f zu-soaba biiga, a Mefibaal, na n dɩ ne maam daar fãa laag a ye pʋga.» A Siba da tara kom-dibli piig la a nu la tʋʋm-tʋmdb pisi; a yeela dĩma: «Yãmb yamba na maan dĩma, a zu-soabã, sẽn kõ noor ningã. Sã n ya ne a Mefibaal, a minim n dɩta ne maam, a sẽn yaa a Sol yagenga yĩnga.» A Mefibaal da tara bi-ribla a yembre sẽn da boond t'a Mika. Sã n ya yẽ menga yell gesgo, dẽ ra paka a Siba ne sẽn naag-b yẽ a zakẽ wã. A Mefibaal sẽn da ya põora yĩnga a tɩ kẽe Zerizalɛɛm, n na n paam n dɩt daar fãa marsã ne dĩma laag a yembr pʋga. Dẽ poore, Amonitsa naaba kiime t'a biiga, a Anun, led a zĩigẽ n dɩt naam. A Daviid yeelame: «Mam na n lebsa a Naas biiga a Anun yel-sõm niyns a ba sẽn maan maama.» A Daviid tʋma sõgen-kamba tɩ b tɩ pʋʋs a ba wã kʋʋre. A Daviid sõgen-kamba sẽn ta Amonitsa tẽngẽ, Amonitsa na-biis yeela b zu-soaba, a Anun: «Yãmb tẽedame tɩ yaa a sẽn dat y saamba waoogre la a Daviid sẽn tʋm tɩ b wa pʋʋs a kʋʋra bɩ? Pa sẽn na n yɩ bala n tõog n bãng d tẽngã, n bãng a pãnga sẽn be zĩig ninga, n wa lub-a, ka rẽ la a Daviid tʋm a sõgen-kamba sɩda?» T'a Anun na n yõg a Daviid sõgen-kamba n kɩt tɩ b wõrs b toeemsã bogre la b wõrs b futã n zems b kɩgba, n yaool n kõ-b sor tɩ b kuli. A Daviid sẽn wʋm yellã a tʋma neb tɩ b seg-ba, tɩ bala yãnde n da tar nebã; dĩma kɩtame tɩ b yeel-ba: «Pa-y Zeriko al tɩ y toeemsa wa yi sõma tɩ y yaool n wa.» Amonitsã mikame tɩ b sẽn maan woto wã b rɩɩ beem ne a Daviid. Woto wã b tʋma neba sẽn na n tɩ yao Aramsã ligdi tɩ b wa sõng-ba. Bɛt-Reob la Soba Aramsã yɩɩ tãb-biis tus pisi, n paas Maaka dĩma tãb-biis tusri. Tob dĩma yɩɩ tus piig la a yi la yẽ wa ne. A Daviid wʋma rẽ n yiis a Zoab ne tãb-biis niyns sẽn ya-b zabra gãndaado. Amonitsa yiime n tong zabre tẽnga noore. Sã n ya Soba, Reob, Tob la Maaka Aramsã, bãmb ra yɛdga toore n pid pʋ-weesã. A Zoab mikame t'a taoore la a poorẽ yaa bɛɛba, t'a na n tũus Israyɛl rap meng-menga n tong-b Aramsa taoore. Yaa a yao, a Abisayi la a kõ tãb-biisa sẽn kellã tɩ bãmb me tong Amonitsa taoore. A yeel-a lame: «F sã n yãe tɩ Aramsa na n tõog-ma bɩ f zoe n wa sõng-ma. Sã n ya foo la Amonitsa tõogda, m na zoe n wa sõng-fo. Keng f sũuri tɩ d zab ne raoodo, d buuda la Wẽnd tẽnsa yĩnga. La Soaala maan b sẽn date.» A Zoab ne a neba sɩnga zabre ne Aramsã, la Aramsa zoeeme. Amonitsa sẽn yãe tɩ Aramsa zoeeme, bãmb me wẽnemda b nao a Abisayi taoore n zoe n kẽ tẽnga pʋga. A Zoab sẽn yi a zabrã ne Amonitsã, a lɛɛg n wa Zerizalɛɛm. Aramsa yãeeme t'a Israyɛl n tõog bãmba tɩ b na n tigs b nebã. A Adadezɛr tʋma neba tɩ b tɩ yiis kʋɩlga rʋʋnd dãmb fãa tɩ b bob zabre. B waa Elam; a Adadezɛr tãnsoab a Sobak n da be b taoore. A Daviid wʋmame, a me tigim Israyɛl zãnga tɩ b rʋʋg Zʋrdẽ n ta Elam. Aramsa tongame n tak zabr ne a Daviid. Aramsa le konga pãng n zoe a Israyɛl taoore. A Daviid kʋʋ wiidi kobs-yopoe sẽn sog bilim-bilm la wed-dʋʋdb tus pis-naase. B tol n pogla tãnsoab a Sobak menga, la a waa n konga pãng be. Nanams niyns sẽn da kẽed a Adadezɛr yãeeme t'a Israyɛl n tõoge tɩ b gom laafi goam ne a Israyɛl, n sulg b mense. Dẽ tɛka Aramsa maana rabeem ne Amonitsa sõngre. Yʋʋmd sẽn vẽke tɩ dĩm dãmb le sɩng b zaba, a Daviid tʋma a tãnsoaba a Zoab ne a neba, ne a Israyɛl fãa, tɩ b tɩ sãam a Amon yagense la b tɩ gãneg tãpo n gũbg Raba, b na-tẽngã. Dĩma a Daviid paa Zerizalɛɛm. Daar a ye, zĩ-sobdo, dĩma a Daviid yika a gãagẽ, n gõod na-yir bɛonga zugu la a zĩnda bɛonga zugu n yãe pag a ye sẽn sood koom: la pagã da yaa neer al wʋsgo. La a Daviid kɩtame tɩ b sok n bãng sẽn yaa a soaba. B waa n leokame: «Yaa a Batseba, a Eliyam biiga, la Ititga, a Uri, paga.» A Daviid tʋma neda tɩ b tɩ wa ne pagã. La dĩma gãanda ne-a. Paga ra nan yɩlga paalem. Paga leba a yiri. Paga rɩka pʋga, n tʋm tɩ b tɩ yeel a Daviid: «Mam tara pʋga!» A Daviid toola sebre a tãnsoaba a Zoab n yeel-a: «Tʋm Ititga Uri t'a wa sak maam.» A Zoab tʋma a Uri a Daviid nengẽ. A Uri sẽn ta a Daviid nengẽ, a sok-a-la a Zoab ne a tãb-biisã la zabrã sẽn yaa a soaba. A Daviid yaool n yeela a Uri: «Bɩ f kul yir n tɩ waas f nao.» La a Uri yii na-yirã ne dĩma kũuni. La a Uri zãgsa kulbu, n gãand dĩma sɩmandẽ, ne a zu-soaba sõgen-kamba. B tɩ yeela a Daviid: «A Uri pa kul a yir ye.» T'a Daviid sok a Uri: «Fo pa yi so-toak n wa laa? Bõe yĩnga tɩ fo pa kul f yiri?» A Uri leoka a Daviid: «Kuga walsa koglga, a Israyɛl ne a Zɩɩda tãb-biisa gãee zãnd tẽngre; y tãnsoaben-kãseng a Zoab la a tãnsoaben-taasa gãee tãb-sikẽ. Woto wã marsã, m maanda a wãna n tɩ kẽ m zakẽ, n dɩtẽ, n yũuda la m gãe ne m paga? M kõ maan yell a woto buud ye, m wẽenda!» A Daviid yeela a Uri: «Bɩ f yaas ka rũnna, tɩ beoogo m na bas-f tɩ f lebe.» La a Uri paa Zerizalɛɛm badaare. La dĩma bool-a lame t'a wa rɩ ne bãmba, n kõ a rãam ali t'a yũ n gãeeme. La zĩ-sobdo a Uri sẽn yi naaba zakẽ, a pa kul a meng yir ye, a kell n paa ne tãb-biis niyns sẽn gũud-b dĩma. Vẽkembeoogo, a Daviid gʋlsa a Zoab sebre, t'a Uri tall n tɩ kɩs-a. A gʋlsa woto sebra zugu: «Bɩ f ning a Uri zĩig ning zabrã sẽn ya toogã, la y yi a poorẽ, n bas tɩ b tão-a n kʋ.» A Zoab sẽn da gũbg tẽngã n mi zabra nengã, tɩ ninga a Uri, n togl bɛɛba gãndaada sẽn da ya wʋsg zĩig ningã. Tẽnga rãmba yiime n sɩng zabre, la b kʋ-la a Daviid tãb-biisa la a tãnsoaben-dãmba kẽere. Ititga a Uri me kiime. A Zoab tʋma neda t'a wa togs a Daviid zabra kibar fãa. A kõ-la a sẽn tʋm a soaba noor kãnga: «Fo sã n togs dĩma zabra yelle n sɛ, tõe tɩ dĩma puug a sũur n sok-fo: ‹Yaa bõe yĩnga, la yãmb pẽneg tẽngã n kaoog zabre? Yãmb ka mi tɩ b tõe n yalsa lalsa zut n tão yãmb pɛɛm laa? Ãnna n kʋ a Abimelɛk, a Yerubaal biigã? Ka pag n yals lalg zugu n lobg-a ne neer laa? La a ka ki Tebɛs bɩ? Bõe n maan tɩ yãmb pẽneg lalgã?› Dĩma sã n gom-f boto bɩ f yeel-ba: ‹Yãmb tãnsoaba, Ititga a Uri, me kiime.› » Sẽn tʋm a soaba loogame, la a sẽn ta, a goma ne a Daviid wala a Zoab sẽn da ratã. A yeela a Daviid: «Neba tõoga tõndo; b yii n zaba ne tõnd pʋtẽ, tɩ tõnd lɛɛg dig ba n tɩ ta tẽnga noorẽ. Tãoodba zĩnda lalga zugu n tão yãmb tãb-biisã, m naaba, la b kʋʋ yãmb neb wʋsgo, la yãmb sõgna, Ititga Uri, me kiime.» A Daviid yeela raoã: «Tɩ yeel a Zoab woto: ‹Da sãam f sũur tɩ loog, yell kãnga yĩng ye, tɩ sʋʋg rɩta yaare, rũnna yaa ka, beoog ka sẽnẽ. Aya! Ning pãng n zab ne tẽngã n lub-a. Modg n keng f pɛlga!› » A Uri paga wʋmame t'a sɩd kiime; la a yãba a sɩda. A Batseba sẽn dɩ a sɩd kʋʋr n sɛ, a Daviid tʋmame tɩ b tɩ peeg-a n wa t'a reeg-a a yiri. A Batseba lebga a Daviid paga, n dog a biiga. A Daviid sẽn maan bũmb ningã pa ta Soaala-Wẽnd yam ba bilfu. Naaba-Wẽnd tʋma a Natã a Daviid nengẽ, t'a tɩ yãend-a n yeel-a: «Neb a yiibu n da be tẽng a yembre, a ye dakãagre, a yembrã naong soaba. Dakãagrã da tara piisi la niis ka tɛka. Naong soaba da ka tar fɩ, sã n ka a pe-sɛdga a sẽn da ra. Yẽ meng n da kõt pesga rɩɩbo, t'a bɩt a zakẽ ne a meng kamba. A da rɩta a meng sẽn dɩte, n yũud a wamnẽ, n gãe a sɛɛgẽ. A ra get-a lame bal wala a bi-pugla. Sãan n wa n sig dakãagrã yiri, la rakãagra pa sak n bao a meng pesgo bɩ a meng naafo n segl dɩɩb n kõ sãana ye. Yɩɩ naonga soab pe-sɛdga la a kʋ n segl sãana.» Dĩma a Daviid sũur puuga al wʋsgo ne dakãagrã, t'a yeel a Natã: «M wẽen ne Wẽnde tɩ daoã sẽn maan woto wã toga ne kũum. B reeg rakãagra sẽn pa tar sũura nengẽ piis a naas n dol pe-sɛdgã zĩigẽ.» A Natã yeela a Daviid: «M naaba, yaa yãmb la nin-kãnga! A Israyɛl Wẽnnaam koɛɛg la woto: ‹Maam n pʋdg f zug kaam, tɩ f yɩ a Israyɛl dĩma; la maam n fãag foom a Sol nugẽ. Mam kɩtame tɩ fo soog f zu-soaba roogo, la m dɩk f zu-soaba pagba n ning f zakẽ; la m kõo foom a Israyɛl la a Zɩɩda roogo. F sã n yet tɩ paooda, m na le paas sẽn ta rẽ. La bõe yĩnga marsã, tɩ fo sãbs Soaala-Wẽnd goama, n maan sẽn yaa wẽng bãmb nifẽ. Fo kʋ-la a Uri, Ititga. Fo maana f sẽn na maane tɩ Amonitsa sʋʋg yãk a yõore tɩ fo reeg a pag n maan f paga. Marsã tɛka, sʋʋg kõn le zãag ne f zak ye; tɩ fo nif sãaga maam, tɩ fo yẽeg a Uri, Ititga, n deeg a paga, n maan f rẽnna. M koɛɛg la woto: Ade! Mam na kɩtame tɩ yel-beed yi f meng zakẽ n lɛɛg n lʋɩ f zugu. Mam na n deega f meng pagba n kõ f roagda t'a gãand ne-ba. Dẽ yaa bũmb sẽn na n yɩ vẽenega wa wĩndga. Fo maana f yɛla ne soosgo, la mam dẽnd na n yɩ-la a Israyɛl zãng nifẽ, wĩndga vẽenemẽ.› » Dĩma a Daviid leoka a Natã: «M beega Soaala-Wẽnde!» T'a Natã yeel-a: «Soaala-Wẽnd kõ-la y yel-wẽnda sugri. Y ka na n ki ye. La yãmb sẽn beeg Soaala wʋsgo ne y yel-wẽndã, la y kõ bɛɛba bũmb b sẽn na n lʋɩɩs taoor n paoog Soaalã, ad f sẽn dog biig ninga na n kiime.» La a Natã leba a yiri. Bãag n yõk biig ning a Uri pagã sẽn dog n kõ a Daviidã. A yika bã-toogo. La a Daviid pʋʋsa Soaala-Wẽnd biiga yĩnga, la a loe noore, la a sã n da kẽed a roogẽ, yʋngo, a ra gãe tẽnga. Dĩma kug-zĩidba modg-a lame t'a yiki, la a zãgsame, a pa naag bãmb n dɩ bũmb ye. Sẽn maan dasem a yopoe biiga kiime. A Daviid sõgen-kamba da zoeta rabeem n pa rat n wilg-a tɩ biiga maana yõor ye. B ra gomda woto: «Biigã sẽn da wa n ket n vɩ wã b goma ne bãmba la b pa reeg ye. D na maana wãna n yeele: ‹Biiga kiime!› Dĩma ka na n tʋm beedo?» La a Daviid yãeeme t'a sõgen-kamba da bʋkda b koɛɛg n gomd ne taaba, woto a bãngame tɩ biiga konga pãnga. A soka sõgen-kambã: «Biiga maana yõor laa?» Tɩ b leok: «N-ye! M naaba!» A Daviid yikame n so koom, n zɛ a meng yũ-noog kaam, n tek futu, n yaool n yi n kẽng wẽnd doogẽ n tɩ wõgemde. A sẽn lebg n wa yiri, a kosame tɩ b wa ne rɩɩbo la a rɩɩme. Tɩ sõgen-kamba sok-a: «Yãmb sẽn maanda võor yaa bõe? Biigã sẽn da waa n ket n vɩ, yãmb da tõdgda rɩɩbo n tar yãbre; la marsã biiga sẽn maan yõore, yãmb yik n dɩtame.» A Daviid leok-b lame: «Biiga sẽn da waa n ket ne yõorã, mam da loeta m noore la m kiigd nintãm n tagsd m sũurẽ: ‹Daare Soaala-Wẽnd na zoe m nimbãanega tɩ biiga tɩlge.› La marsã biiga sẽn maan yõore, mam na n le zãgsa dɩɩb bõe yĩnga? Mam tõe t'a le vʋʋg bɩ? Yaa maam n na wa babs yẽ, la ka yẽnda n na n lɛɛg n wa mam nengẽ ye.» A Daviid belsa a paga, a Batseba, la b kẽe ne taaba. La a Batseba waa n doga biiga, t'a Daviid pʋda yʋʋr a Salomo. Soaala-Wẽnd yam kẽe biigã la b tũnuga a Natã maasem n wilg a Daviid. Nonglem kãng yĩng me la a Natã pʋd a yʋʋra woto: Yedidiya, Wẽnd Noanga. A Zoab zaba ne Raba, Amonitsa na-tẽnga, n tõog-a. A Zoab tʋma neb tɩ b tɩ yeel a Daviid: «Mam zaba ne Raba; m tol n deega b ko-yũudma sẽn be sak ningã. Marsã, bɩ y tigim tãb-biisã, n wa reeg sẽn kellã n soog zãnga, ka rẽ yaa maam n na n lub tẽngã la m na n pʋd-a-la m meng yʋʋre.» A Daviid tigma tãb-biisã fãa n kẽng Raba, n tɩ wẽ tẽnga n tõog-a. A fõka b wẽnda Milkom zugẽ, sãnem pugl sẽn da ta nin-tɩɩg a ye zɩɩbo. Kug neer sẽn saas a toore n pɩnda la b da rɩk n tablg-a. A Daviid tall-a lame n tɩ maneg a meng pugla. Pʋs n yɩɩ teed wʋsgo la sẽn tar yõodo la a tall n looge. La sã n ya ne tẽnga nebã, a Daviid tall-b lame n wa Zerizalɛɛm. B zãmsa raad wãabo, kug peesgo, tãn-koɛɛm wẽebo. A ra maanda woto Amonitsa tẽnsẽ. A Daviid ne a tãb-biisã lɛɛg n waa Zerizalɛɛm. Ad yɛl-niyns sẽn pʋge. A Daviid biig a Absalom da tara tão, ba a ye, ma a ye. Bi-pugla da yaa neere, n boond t'a Tamar. A Daviid biig a to, a Amnon, da nonga a Tamar. La a Amnon sũur da pa gãe ye. A tol n wa lʋɩɩ bãaga, a ba bi-poaka a Tamar yẽnẽ yĩnga. Bi-pugla ra nan pa kẽ kãadem ye. A Amnon da pa ne sɩlem baaf ning a sẽn na n sɩlem tɩ b zems taab ye. A Amnon da tara a zoa a ye sẽn boond t'a Zonadab, a Daviid ba-biig, a Simea biiga, la a Zonadab da yaa sɩlem soaba. A waa n soka a Amnon: «Bõe n be tɩ dĩma biig neng ka lebd a zĩigẽ beoog sẽn vẽeg fãa? Fo ka na n togs maam?» A Amnon leok-a lame: «Yaa a Absalom tão, a Tamar, poorẽ, m nong-a lame.» A Zonadab yeel-a lame: «Kẽ n gãand n maan wa f ka laafi ye. F ba sã n wa ges fo, bɩ f yeel-a: ‹Bɩ y kõ a Tamar sore, t'a wa kõ-m dɩɩb tɩ m dɩ. A wa segle dɩɩbã mam nifẽ, tɩ m yãe la m deeg a nugẽ n dɩ.› » La Amnon gãandame n maan wa a pa keem ye tɩ dĩma wa ges-a, t'a yeel-ba: «M kotame tɩ m tão, a Tamar, wa rõos miisd a yi m nifẽ tɩ m deeg a nugẽ n dɩ.» A Daviid tʋmame tɩ b kẽ na-zakẽ n yeel a Tamar: «Kẽng f tão, a Amnon, yiri n tɩ segl rɩɩbo n kõ a.» A Tamar kẽnga a tão, a Amnon, yiri, n tɩ mik t'a gãe t'a rɩk zom sẽn nage, n wẽ, n dõos miisd a yiibu a Amnon nifẽ. A yiisa miisda laagẽ, a taoore, la Amnon zãgsa rɩɩbo, n yeele: «Neba fãa yi ka!» La neba fãa yi-la a roogẽ. T'a Amnon yaool n yeel a Tamar: «Bɩ f tall rɩɩbã n ta m gãaga roogẽ tɩ m deegd-a f nugẽ n dɩtẽ.» A Tamar rɩka miisdã a sẽn dõosã n wa kɩs a tão a Amnon, a gãag roogẽ. A Tamar sẽn tud a nug t'a reeg n dɩ, a Amnon yõk-a lame n yetẽ: «M tão, wa gãand ne maam!» A Tamar leokame: «Ayo, m ba-biiga! Da maan-m pãng ye tɩ yaa bũmb sẽn kis Israyɛl. Da maan wɩɩbd ye! Mam na n deega yãnd a woto n kẽ ye? La yãmb na n lebga nin-yaalg Israyɛl pʋgẽ. Marsã m kotame tɩ y gom ne dĩma, tɩ b kõn gɩdg d kãadem ye.» La a Amnon zãgsame t'a kõn kelg ye; a maana a Tamar pãnga, n gãand ne-a. La rẽ poore, a kisg-a lame, al t'a beema yɩɩd a sẽn da nong-a ne nonglem ningã. A yeel-a lame: «Yɩk n menem!» T'a Tamar leoke: «Bɩ y ra rig-m marsã, n paas wẽng ning y sẽn zoe n maana ye.» A Amnon pa sak n kelg a Tamar ye; a boola a sõgne n yeele: «Zãag bi-pugla ne maam ka! Yiis-a yɩnga la f lebs n pag kʋɩlengã a poorẽ!» Tɩ sõgna sɩd yiis-a n lɛɛg n pag kʋɩlengã. A Tamar da yeelga fuug, sẽn tar nus wogdo tɩ dĩma kom-pugli da yeelgda fu-kãng buudu b sã n nan ka mi raoa. A Amnon sõgna yiis a Tamar n lebs n pag kʋɩlengã a poorẽ. A Tamar yugla a zug tompɛglem, n kẽeg a fuug n dɩk a nug n tik a zugu, n kuiisẽ la a yãbda. La a kẽem, a Absalom, seg-a lame n sok-a: «Sãnd f ba-biig a Amnon ka zĩnd ne foom? Marsã, m tão sõngo, bɩ f sĩnd tɩ ya f ba-biiga, la ra ning yell kãnga f sũurẽ ye.» La badaar tɛka, a Tamar pa-la a ye, a tão, a Absalom, yiri. Dĩm a Daviid dɩɩ yellã n tɩge la a sũur yika wʋsgo. A yaool n ka yeel a Amnon tɩ bũmb ye. Ra yaa a bi-kẽenga, la a ra nong-a-la wusgo. Dẽ tɛka a Absalom pa le gom ne a Amnon ye la a kisg-a lame, a sẽn maan a tão, a Tamar, pãng yĩnga. Sẽn maan yʋʋm a yi, rẽ loogre poore, a Absalom waa n pʋʋsa neb tɩ b wa wõrs a piis kõbdo, Baal-Asor tẽnga, Efrayim yegende. A boola dĩma kamb fãa. A Absalom tɩ yeela dĩma: «Ade, yãmb sõgna pʋʋsame tɩ b wõrs a piis kõbdo n kõ-a; la m kotame tɩ dĩma ne a poorẽ dãmb sak n wa a sõgna yiri.» Tɩ dĩma yeel a Absalom: «Ayoo! M biiga, d fãa pa na n wa ye, tɩ na yɩɩ zɩɩb f yĩnga.» A Absalom pẽdga dĩma; la dĩma pa sak n kẽng ye. Dĩma ning-a-la bark bala. A Absalom yeelame: «Sã n ya woto, bɩ y kõ sore, t'a Amnon tũ tõndo.» Tɩ dĩma leoke: «A na tũu bõe yĩnga? A na n kẽnga f yiri n tɩ maan bõe?» La a Absalom pẽdgr yĩnga, dĩma sakame t'a Amnon ne a kamb a taaba tũ-a n kẽnge. A Absalom da kõ-la a sõgen-kamba noor kãnga: «Bɩ y gũus neere, yãmb sã n wa mik t'a Amnon yũu rãam t'a sũur yaa noogo, tɩ mam yeel yãmba: ‹Aya! Bɩ y wẽ a Amnon.› Wakat kãng bɩ y kʋ-a! Da maan-y dabeem ye! Ka maam n kõt yãmb noora laa? Keng-y pɛlga la y maan sũ-keelem!» A Absalom sõgen-kamba maana ne a Amnon wala a Absalom sẽn yeel bãmbã. La dẽ poore, dĩma kom-dibli wã yikame, tɩ ned kam fãa zomb a bõn-wɛɛg tɩ b zoe. La b sẽn da waa n ket sor zugu, koɛɛg n taa a Daviid t'a Absalom kʋʋ dĩma kom-dibli wã fãa, tɩ ba a ye pa kell ye. La dĩma yik n kẽesa a futu, n gãand tẽnga, t'a kug-zĩidba fãa sẽn da be-b be me kẽes b futu. A Zonadab, a Daviid kẽema, a Sama, biiga, leoka koɛɛga; a yeela dĩma: «M naaba, bɩ y ra saag n tags tɩ b kʋʋ y kom-dibli wã fãa ye. Ad-y yaa a Amnon bal a ye n ki. A Amnon sẽn sãam a tão wã tɛka, a Absalom da gãda a sũurẽ la a noor ra tol n gomdame t'a na tʋm dẽ. M naaba! Bɩ y ra sãam y sũur n tagsdẽ tɩ na-biisa fãa kiime ye, tɩ yaa a Amnon bal n ki.» A Absalom zoeese. Bi-bɩɩg ninga sẽn da gũud dĩma zaka noorã nak n gesame, la a yãee neb kʋʋng tɩ b tũud Oronayim sor n watẽ, tãnga pennẽ. Gũuda yeela dĩma: «M nee neb ka tɛk sẽn yit Oronayim tãnga pennẽ n watẽ!» T'a Zonadab yeel dĩma, «Ad dĩma kamb sẽn wate, yaa wala y sõgen sẽn yeel yãmba bala.» A sẽn da ket n gomda, dĩma kamb taame. B zẽka b koees n kelem tɩ dĩma ne a na-yir dãmba me ning nintãm n yãb n yãbe. La rẽ t'a Absalom da zoeeme la a ra kẽnga Gesur dĩma, a Amiyud biig, a Talmayi, mengẽ. A Daviid da yãbda a biiga a Amnon kʋʋr daar fãa. A Absalom da zoeeme n kẽng Gesur la a paa be yʋʋm a tã. Dĩm a Daviid waa n basa a zaba ne a Absalom. A sũura waa n maaga ne a biiga Absalom, sẽn da kʋ a yao, a Amnon. A Seruya biiga, a Zoab, wa n yãeeme tɩ dɩma le rata a Absalom. Woto, a tʋmame tɩ b kẽng Tekoa n tɩ bao pag a ye sẽn tar yam n yeel-a: «Maan wa f sũur sãamame la yeelg kʋʋr futu, da sõog f neng kaam ye, maan wa pag sẽn kũmd al daar zãra a ned sẽn ki. Kẽng dĩma nengẽ n tɩ gom ne b woto la woto.» A Zoab ninga paga noorẽ a sẽn na n tɩ yeel bũmb ninga. Tekoa paga tɩ goma ne dĩma. A fõgnega a neng tẽnga, n vabend b taoore n yeele: «M naaba! Fãag-y-ma!» Tɩ dĩma sok-a: «Bõe n tar foom?» Tɩ paga leoke: «M yaa pʋg-kõore; m sɩda kiime. La m da tara m kom-dibli a yiibu. Bãmb b yiiba yika ne taab zabre we-kɛɛnga la ned da ka be ne b ye, tɩ ned a ye wẽ a ba-biiga n kʋ. La buuda yikame ne maam n yetẽ: ‹Wa ne sẽn kʋ-a a ba-biigã! Tõnd dat n kʋ-a lame n lebse! Woto ned kõn kees sẽn na n dɩ a ba raboog ye.› Woto b na n kiisa m bug-saallã sẽn kellã, tɩ m sɩda yʋʋr tũ rẽ n menem, t'a roog lebg ro-vɩʋʋgo, nin-vɩɩsa tẽngẽ.» Dẽ la dĩma yeel pagã: «Leb yiri, tɩ m na togs b sẽn na n maan bũmb ning fo yĩnga.» Tɩ Tekoa paga le yeel dĩma: «M naaba! Sẽn na yɩ bɩ yɩ, la maam ne m buudã, tõnd saka a na rɩ yell kãnga taale. Bũmb da kẽ sʋka n bõn yãmb ne y rĩunga ye.» Dĩma yeelame: «Ned gom ne foom wẽnga, bɩ f tall a soab n wa mam nengẽ t'a kõn le saag n maan-f bũmb ye.» Tɩ pagã yeel-a: «Bɩ m naaba wẽen ne Wẽnnaam, b Soaala, tɩ ned ninga sẽn tõe n daaga zɩɩm n dol zɩɩm sẽn daagã, kõn wã m yirã n baase, n wã m yirã n kʋ m biiga ye.» Tɩ dĩma leok-a: «M wẽend tɩ fo biiga zoobg meng kõn lʋɩ tẽng ye!» Wakat kãnga, pagã yeela dĩma: «Bas-y yãmb yem-poakã, t'a leok a naaba la a zu-soaba gomd a ye.» Tɩ dĩma yeel-a: «Gome!» Tɩ paga yeele: «Yaa bõe yĩnga la yãmb bõn Soaala-Wẽnd buudã? M naaba goama meng wilgdame tɩ y pa tar bʋʋm, y sẽn pa basd b sẽn dig a soabã t'a lɛɛg n wa wã. Sã n yaa sɩda, d na kiime, rẽ yaa tɩlɛ. La d na yɩɩ wala b sẽn daag koom tẽnga n ka le tõe n wʋk-a ye. La Wẽnd ka mi zab-taasem ye, la b maana b sẽn na maanega tɩ b sẽn dig a soaba ra kell n pa moog ye. La mam sã n wa togsd m naaba la m zu-soaba yell kãngã, yaa tɩ neba yɛɛsa maam. Rẽ n so tɩ m yeel m menga: m na n goma ne m naaba n gese; daar ninga m naaba na maan wa m sẽn sagend-b bũmb ningã. Daare dĩma na sake n zãag-m ne ned ninga sẽn dat n kʋ-a tõndã. Mam da tagsda woto: ‹Bɩ m naaba gomd kɩt tɩ m yam gãande; tɩ m naaba la m zu-soaba yaa wa Wẽnnaam malɛka, n mi neere la wẽnga.› Bɩ Soaala, y Wẽnnaama, zĩnd ne yãmba!» Dĩma yeela pagã: «M sẽn na n sok-f bũmb ningã bɩ f da solg-m ye!» Tɩ paga yeele: «M naaba la m zu-soaba, bɩ y gome!» La dĩma sok-a lame: «A Zoab ka lob a toog yell kãnga pʋgẽ bɩ?» Tɩ pagã leoke: «Sɩd menga wala yãmb sẽn vɩ ne yõorã, m naaba la m zu-soaba sẽn yeel bũmb ninga fãa, bũmb ba a ye pa kedb rɩtgo bɩ goabg ye. Sɩd yaa y sõgna a Zoab n kõ maam yam kãnga, la yẽ n ning goam kãensa m noorẽ. La yaa sẽn na n yɩ-la tɩ yellã teem sore, la a Zoab maan woto. La sɩd-sɩda, m naaba la m zu-soaba tara yam wa Wẽnnaam malɛka, n mi bũmb ning fãa sẽn maand tẽng zugu.» Dĩma yeela a Zoab: «M sakame, m na maan boto, bɩ f kẽng n tɩ peeg m biiga a Absalom n wa.» A Zoab wõgemdame n fõgneg a neng tẽnga, n pẽg dĩma n yaool n yeel-a: «Yãmb sõgna bãnga rũnna tɩ m paama bark yãmb nifẽ, m naaba la m zu-soaba, tɩ dĩma maana wala m sẽn yeele.» La Zoab yikame n kẽng Gesur n tɩ peeg a Absalom n wa Zerizalɛɛm. La ne rẽ fãa dĩma yeelame: «Bɩ a leb a yiri, la a ra wa m taoor ye.» A Absalom leba a zakẽ, la dĩma sɩd pa sak t'a wa a taoor ye. Israyɛl soolma fãa pʋgẽ, ned ba a ye ra pa kolg a Absalom ne rasãndlem ye. Neba fãa ra pẽgda a neerma wʋsgo: a ra yaa rasãn-beelle, a ra pa tar bãnd ye. Yʋʋmd-yʋʋmd fãa, a zug sã n kẽ, a põngdame. La a sã n põng a zugu, a makda a zoobda zɩslem; la sã n ya ne na-yir magdga, a zoobda zɩslem da taa yubl koom zɩslem. A Absalom doga kom-dibl a tãabo la bi-pugl a yembre, yẽ da boondame tɩ Tamar, a da yaa pʋg-neere. A Absalom zĩnda yʋʋm a yiibu Zerizalɛɛm, tɩ dĩma pa tol deeg-a a zakẽ ye. A Absalom boola a Zoab t'a wa t'a tʋm-a dĩma nengẽ, la a Zoab pa sak n wa ye; ta le bool a yɛsa, la a pa sak n wa ye. A Absalom yeela a sõgen-kamba: «Y mi a Zoab pʋʋg ning sẽ yeg-a mam dẽnna la, bɩ y ning-a bugum.» A Absalom sõgen-kamba ninga pʋʋga bugum. A Zoab wa n yãee a Absalom, a zakẽ, n yeel-a: «Yaa bõe tɩ f sõgen-kamba tɩ ning m pʋʋga bugum?» A Absalom leoka a Zoab: «Ad-m da kos-f lame tɩ f wa ka tɩ m tʋm-f dĩma nengẽ ne koe-kãnga: ‹Bõe yĩng la m yi Gesur n wa ka? M sã n da ketẽ be ka são. Marsã m dat n taa dĩma taoore. Yell sã n ket m zugu bɩ a kʋ-ma.› » A Zoab kẽnga naaba nengẽ n taas koɛɛgã. A Absalom sẽn ta dĩma nengẽ, a wõgemda b taoore, n lʋɩ n fõgneg a neng tẽnga. La dĩma mobga-a lame. Sẽn maan yʋʋm a yi rẽ loogr poore; a Absalom daa bilim-bilm a ye ne wiidi a meng yĩnga; a baoo tãb-biis pis-nu sẽn na n gũud a meng yõore. A Absalom da yikda tõd-beoogo, n tɩ yals sor ning sẽn dabda dĩma zãongẽ wã; la neba sã n da wat bʋʋd dĩma nengẽ fãa, a Absalom da boond-b lame n sok-ba: «Yãmb yita yɛ tẽnga?» B sã n leoke: «Tõnd yita Israyɛl tẽng a ye,» a Absalom da yet-b lame: «Ges-y! Yãmb koɛɛgã yaa sɩd menga yãmb n so bʋʋm, la yãmb kõn paam tɩ dĩma ned ba a ye maag a meng n kelg yãmb ye.» La a Absalom da le paasdame: «Ges-y wɛ! M sã n da soẽ-la bʋʋda kaoobo, zamaan kãnga, sẽn tar-a bʋʋd fãa watẽ la mam taoore tɩ m kao bʋ-tɩrse.» Ned sã n da kolg a Absalom t'a na n vabend n kud kãntɩɩse, a Absalom da tuta a nugu, n zẽk-a, n mobg-a. A Absalom da maanda woto ne a Israyɛl kamba sẽn da wat-b ne bʋʋdo, dĩma nengẽ, n da kɩt t'a Israyɛl neba sũur la b yam da lɛɛg n kẽed yẽnda. Sẽn waa n ta yʋʋm a naase, a Absalom tɩ yeela dĩm a Daviid: «Kõ-y-m sore, tɩ m kẽng Ebrõ n tɩ pids m pʋleng a ye m sẽn pʋlem Soaala; tɩ mam sẽn waa n be Gesur, Aramsa soolmẽ, m da pʋlma woto: ‹Soaala-Wẽnd sã n le tall maam tɩ m leb Zerizalɛɛm, m na kẽng Ebrõ n tɩ pʋʋs-ba.› » Tɩ dĩma yeel-a: «Kẽng ne laafi!» T'a Absalom yik n dɩk sore, n kẽng Ebrõ. Mik a Absalom tʋma neb a Israyɛl sagsa fãa pʋgẽ tɩ b tɩ yeele: «Yãmb sã n wʋm baorg rãamde, bɩ y yeele t'a Absalom lebga dĩma, Ebrõ tẽnga.» Neb kobs-yi n yik Zerizalɛɛm n yãag a Absalom. B da bool-b lame, tɩ bãmb me yi ne b pʋ-peelem n ka mi bũmb ning sẽn be tẽngr ye. A Absalom sẽn da waa n kʋʋd maandã, a tʋma Gilo tẽnga tɩ b tɩ wa ne a Ayitofɛl, a Daviid sagenda. Woto suduma paama pãnga, a Absalom poorẽ lebga taoko. Nina n wa n togs a Daviid: «M naaba, a Israyɛl kamba yam wẽnemdame tɩ b tũuda a Absalom.» A Daviid yeela a poorẽ dãmba fãa sẽn da be-b ne-a Zerizalɛɛm: «Yik-y kaane tɩ d zoe, t'a Absalom bʋʋg tõndo, tõnd kõn põs ye. Aya! Nadg-y pãng tɩ d loog, tɩ pa rẽnda, a na n wa paam-d lame n tʋm beedo la a kood tẽnga gill ne sʋʋga.» Dĩma poorẽ dãmba leok-a lame: «D naaba la d zu-soaba sẽn dat fãa, d na maane.» Dĩma yii ne nao, yẽ ne a zak rãmba. Pagb piig bal la a bas tɩ b yõdg n gũ zakã. Dĩma yii ne nao, tɩ neba fãa pʋgda la a tek n yalsa satem dooga sɛɛga. A Daviid poorẽ dãmba fãa: Krɛt dãmba, ne Pelɛt dãmba n paas Gat tãb-biisi, bãmb kobs-yoobe, sẽn da tũ a Daviid, bãmb fãa tonga zabre, a taoore. Dĩma yeela a Itayi, Gat tãb-biisa tãnsoaba: «Fo na n tũu tõnd n tɩ maan bõe? Lebg n tɩ pa ne dĩm paalga Zerizalɛɛm tɩ fo yaa sãan ka, la f yaa bu-zẽna. Fo nan wa zaamẽ bala, la ad-f kõn yi rũnna n sɩng m pʋgbo, tɩ mam meng ka mi m sẽn dabdẽ taki ye. Lebe! Peeg f ba-biisã. La Soaala-Wẽnd na pʋg-f ne b kũuna, f pʋ-peelma yĩnga.» La a Itayi leoka dĩma: «M wẽen ne Soaala la ne m naaba la m zu-soaba, tɩ y sẽn na n zĩndẽ fãa, yãmb sõgna me na n zĩnda be, vɩɩg bɩ kɩɩnga.» Dẽ la a Daviid yeel a Itayi: «Bɩ f wa loog!» Woto Gititga, a Itayi, looga taoore ne a tãb-biisa la b zak rãmba. Tẽnga fãa da wulumda ne yãbre, ne kɛlenga; tẽnga fãa ra loogdame. Dĩma da tũuda Sedrõ kʋɩlgã tɩ neba dɩk sor ning sẽn yegd zĩ-peen-daagã. Maan-kʋʋd a Sadok me ra bee be ne Levitsã la b ra tʋka Soaala zooda kasetã. B sika koglgã, la maan-kʋʋd, a Abiyatar, gũume tɩ sẽn yi-b tẽnga fãa wa rʋʋg kʋɩlgã. Dẽ poor marsã la dĩma yeela a Sadok: «Tɩ lebs koglga tẽnga pʋgẽ. M sã n paam tɩ Soaala-Wẽnd maan-m nimbãan-zoeere, bãmb na le tall maam n wa la m nif na le yãe b zood kasetã la b waoogra zĩiga. La b sã n yeele: ‹M yam yii foom!› Ad ma, bɩ b maan bũmb ning fãa sẽn noom bãmba!» Dĩma le yeela maan-kʋʋd, a Sadok: «Gese! Leb tẽnga pʋgẽ ne laafi, ne f biiga a Ayimaas la a Abiyatar ne a biiga a Zonatã. Ade, sã n ya maam, m na n tɩ yalsa weoogẽ, Zʋrdẽ kʋɩlga sẽn tõe n dʋʋg zĩig ningã n gũud y kibare.» Woto, a Sadok ne a Abiyatar tɩ lebsa zood kaseta Zerizalɛɛm la b kell n paa be. A Daviid da rʋʋda Oliviye tãngã la a yãbda. A ra baoo peende n lud a nenga la a kẽnd a nao zaala. Neba fãa sẽn da pʋgd dĩma me da luda b nense, la b me da rʋʋda tãngã la b tar yãbre. B wa yeela a Daviid: «A Ayitofɛl lagma ne suduma rãmba n be a Absalom poorẽ.» T'a Daviid na n yeele: «Kɩt-y wɛ Soaala, t'a Ayitofɛl saglsa yɩ gãeen-saglse!» La ade, a Daviid sẽn ta tãnga zugu, b sẽn waoogd Naaba-Wẽnd zĩig ningã, Arkitga, a Usayi wa-la a taoore; a futa ra pãrsame, a zug ra kõda ne tom. A Daviid yeel-a lame: «Da wa ne maam ye; f na n yɩɩ zɩɩb m yĩng bala. Fo na n leba tẽnga pʋgẽ n tɩ yeel a Absalom: ‹M yɩ-la y ba sõgne, la marsã m na n yɩɩ yãmb sõgne.› Woto f na sagl a Absalom t'a Ayitofɛl saglsa lebg vɩɩdo. La Woto f na naf maam. Dẽ yẽnẽ me f na n paama sõngre maan-kʋʋdba, a Sadok ne a Abiyatar nengẽ, n wilgd bãmb b sẽn gomd na-yira tɩ f wʋmnẽ. B tara b kamb a yiib sẽn be ne bãmbã, a Ayimaas, a Sadok biiga, la a Zonatã, a Abiyatar biiga; bãmb na taas maam fo sẽn na n wʋma fãa.» A Usayi, a Daviid zoa la a sagenda leba tẽnga pʋgẽ. Segame t'a Absalom me kẽed Zerizalɛɛm. A Daviid sẽn wa n loog tãnga zug tẽnsʋk bilfu, a Mefibaal dakõor a Siba wa n seg-b-la ne bõeens a yiibu, sẽn zɩlg bur kobs-yi, sib koeems gĩin koabga, zĩ-lik paalg tɩɩs bi-moaama n paas lɩng sẽn pid ne rãam. Dĩma soka a Siba: «Fo rat n maana bõe?» T'a Siba leoke: «Dĩma zak rãmba n na n zomb bõeensã, burã ne tɩɩsa biis na n yɩɩ kom-bõonega rɩɩbo, la rãama na yɩ-la b bõn-yũudla, b sã n wa yɛ we-raoogẽ wã!» La dĩma sokame: «Fo zu-soaba a Sol biiga bee yɛɛlẽ?» La a Siba leoka dĩma: «A paa Zerizalɛɛm, t'a tagsame: ‹Rũnnã Israyɛl na n lebs-m la m ba naam.› » Dẽ la dĩma yeel a Siba: «A Mefibaal sẽn tar bũmb ning fãa, rũnna tɛka yaa foom n so.» T'a Siba fõgneg a neng tẽnga n yeele: «Y barka, m naaba, y yama sẽn kẽ-m yĩnga!» A Daviid waa n ta Bawurim. La ade, daoa a yembre n yi be, a ra yaa a Sol buudu la a boondame t'a Simeyi, a ba yʋʋr la Gera. A ra yita tẽngã la a kãabd kãab wẽnse, la a wʋkd kug n lobd a Daviid ne a poorẽ dãmba. Neba fãa, gãndaada fãa yaool n da be-la a Daviid goabg la rɩtgo. A Simeyi da kãabda dĩma woto: «Aya! Kẽng n menem! Kẽng n menem! Nin-wẽng menga la zɩ-yũuda! N-faa! Soaala-Wẽnd lɛɛg n sudg f zugu, a Sol rooga fãa zɩɩm, f sẽn daage n paam n gʋsg a naama n deege. La gese, Wẽnd le reega f naama n ning f biiga, a Absalom, nugẽ. Ad fo sẽn lebg nin-yaalga, la foom n bao, tɩ fo yũu neb zɩɩm.» A Abisayi, a Seruya biigã, yeela dĩma: «Bõe n maan tɩ baagã, ba-kɩɩngã, wa tʋʋd m naaba la m zu-soaba? M naaba, y kabre! Bas-y-m tɩ m kẽng n tɩ rok a zugu!» Tɩ dĩma yeel-a: «Maana a wãn tɩ m weoog kẽed foom, Seruya biiga? A sã n tʋʋd maam, Naaba-Wẽnd sã n yeel-a: ‹Kẽng n tɩ kãab a Daviid beedo,› ãnna n be noor n sokd-a: ‹Bõe yĩng la a maand woto?› » Dĩma le yeela a Abisayi ne a poorẽ dãmbã: «Mam meng bi-roak sẽn tʋlg n dok m yõore, tõnd na le gom dao kãnga sẽn yaa a Bẽnzame sakẽ neda? Bɩ y bas-a t'a kãab beedo, Soaala-Wẽnd sã n yeel-a t'a kãab beedo. Daare Naaba-Wẽnd na n gesa m sũ-toogã n maan-m neer n lebs dũnna tʋʋra zĩigẽ.» A Daviid ne a neba kell n tuda b sore. La a Simeyi da kẽnda tãnga pennẽ n yegd a Daviid; a ra kẽndame la a kãabd dĩma la a lobd-a kuga la a wʋkd tom n fẽed-a. Dĩma ne zãma wã taa tẽng a ye; la b vʋʋsa be. A Absalom ne a zãma wa, a Israyɛl neba, dag n kẽe Zerizalɛɛm, la a Ayitofɛl da bee ne a Absalom. A Usayi, a Daviid zoa wã, sẽn ta a Absalom nengẽ a yeel-a lame: «Wẽnd na kaoos dĩma! Wẽnd na kaoos dĩma!» T'a Absalom yeel a Usayi: «Nonglem ninga fo sẽn tar f zoa wã yĩng la woto bɩ? Bõe yĩng la fo ka tũ f zoa?» T'a Usayi leok a Absalom: «M sẽn pa tũ-a wã, yaa m sẽn dat n pa ne ned ninga Soaala-Wẽnd la Israyɛl sẽn yãk a soab wa b dĩma. Woto wã yaa ne foom la m na n pa. Pʋs n bãng tɩ mam sẽn kẽed fooma ka zaalem ye. Fo ka m zoa wã biig laa? Wala m sẽn pʋg f ba wã n ta rũnna wã, ya foom marsã la m na n pʋge.» A Absalom yeela a Ayitofɛl: «Maan-y yẽsgo ne taaba n gese d na n maana wãna?» A Ayitofɛl yeela a Absalom: «Kẽ-y ne y ba sẽn bas pagb niyns tɩ b gũ zakã, la woto, a Israyɛl zãng fãa na bãnge tɩ y kɩtame, tɩ y ba wã pa tõe n pa rɩ beem ne y ye, la y na keng sẽn be-b yãmb poorẽ wã fãa sũuri.» B tilga pɛɛl roogo a Absalom yĩnga, bɛonga zugu, t'a Absalom gãand ne a ba pagba, a Israyɛl zãng fãa nifẽ. Wakat kãnga, a Ayitofɛl sẽn da sagend sagls niynsã fãa, b da reegd-b lame, wala sagls sẽn yi Soaala-Wẽnd nengẽ. A Ayitofɛl saglsa fãa da tara pãnga a Daviid wala a Absalom yĩnga. Dẽ poore, a Ayitofɛl yeela a Absalom: «Bas-y tɩ m tũus tãb-biis tus piig la a yi n yik n babs a Daviid yʋnga bala. Mam na n tɩ ling-a-la ne yaamse la nug sẽn komse, mam na n yɛɛs-a lame, tɩ neba fãa sẽn pʋgd a wã sẽege. Mam na n wẽe dĩma a sã n wa lebg a yembre bala, la m na tall neba fãa n wa kõ yãmba. M sã n paam yãmb sẽn baood ned ningã, m paama sẽn ket-ba fãa. Neba fãa na paam laafi.» Gomda taa a Absalom ne a Israyɛl nin-kẽemba fãa yam. La baasgo a Absalom yeelame: «Bɩ y le bool a Usayi, Arkitgã tɩ d kelg yẽ me koɛɛga.» A Usayi waa a Absalom nengẽ, t'a Absalom sok-a: «A Ayitofɛl yeela woto la woto, d tog n maana a sẽn yeelã bɩ d pa toge? Fo me gome!» La a Usayi leokame: «Sor kãnga yẽ, a Ayitofɛl sẽn wa ne saglg ninga ka sõmb ye.» La a yeelame: «M naaba, yãmb mi y ba wã ne a neba sũ-keelem sẽn zem bũmb ninga; marsã tɩ b sũur yikame, wala gɩgemd padr biig sẽn menem t'a yik n zabd ne weoog tõre. Yãmb ba wã yaa dao sẽn mi zaba, la a kõn pa ne a nebã yʋng ye. Marsã t'a soonda bokẽ, bɩ zĩig a to. La neb sã n ki tɩ zabra pa yãe n sɩnge, kõn kaoos tɩ neba bãng la b yeele: ‹B tõoga sẽn be-b a Absalom poorẽ.› La woto marsã, ba sẽn tara sũ-keelem wa gɩgemde, yẽ soab na yɛɛse, t'a Israyɛl zãng fãa miime tɩ yãmb ba yaa gãndaoogo, la sẽn be-b ne-a wã me yaa gãndaado. Mam yẽ sagendame t'a Israyɛl kamb fãa tigim taaba yãmb nengẽ, sẽn sɩng Dã n tɩ baas Beerseba; neba na n tigma taab kʋʋngo, wala bĩisri sẽn dɩg mogr noore, tɩ yãmb meng y toor bob zabre. Tõnd na n paam-a-la a sẽn be zĩig ning fãa la d na n lʋɩ-la a zug sɩɩ, wala meenem sẽn dʋʋgd tẽnga, la ned ba a ye kõn põse: yẽnda ne neba fãa sẽn be-b ne-a wã. La a sã n zoe n tɩ kẽ tẽng a ye, a Israyɛl gill na bao wĩya, n kẽng tẽn-kãnga, la d na n vuu tẽn-kãnga n tɩ lub-a a sẽn be kʋɩlg ninga noore; kugr meng kõn pa, tɩ b pa gomd ninsaal ye.» A Absalom ne a neba fãa yeelame: «Arkitga, a Usayi, saglgã la sõmbo n yɩɩd a Ayitofɛl dẽnna.» Mik yaa Soaala-Wẽnd n da tʋlg t'a Ayitofɛl dẽnna sẽn da ya sõmb n yɩɩdã lʋɩ vɩʋʋgẽ, n tak yel-beed a Absalom zugu. Dẽ poore, a Usayi tɩ yeela maan-kʋʋdba a Sadok la a Abiyatar woto: «A Ayitofɛl kõ a Absalom la a Israyɛl nin-kẽemba saglg kãnga, n le paas saglg kãnga, la mam me sagl-b-la woto la woto. Marsã bɩ y tʋm tao-tao tɩ b tɩ wilg a Daviid. Yeel-y dĩma woto: ‹Da pa pʋ-weesẽ wã yʋng kãnga ye; modg n dʋʋg kʋɩlgã, ka rẽ b na wa n vel-f wa rɩ-võre n naag ne f poorẽ dãmbã.› » A Abiyatar biig a Zonatã ne a Sadok biig a Ayimaas da solga Eyin-Rogɛl. Ko-bunem n da be be tɩ fu-pɛgdba wat n pekd b futu. Be la roog bi-pugl a ye ra tog n wa wilg-b yɛlã tɩ bãmb deeg n taas dĩm a Daviid. Bãmb da solgame, b ra pa tog n kẽ tẽnga pʋga tɩ ned wa yãend-b ye. La bi-bɩɩga a yembre n baas n yãend-ba n tall kibarã n taas a Absalom. Dẽ la a Zonatã ne a Ayimaas yɩ tao tao n ta Bawurim, raoa a yembre zakẽ. Bulg n da be zaka pʋgẽ la b kẽe be. Rao wã pag rɩka fuugu n pil bulga noore n lɛɛg n yɛdg kood a zugu, al tɩ ned pa tõe tags tɩ b luda bũmb ye. Woto wã a Absalom neba kẽe zaka pʋga, n soke: «A Ayimaas ne a Zonatã bee yɛ?» Tɩ paga leok-ba: «B tuda ko-baoora sẽnẽ.» B baoome la b sẽn pa yãend-bã, b leba Zerizalɛɛm. Bãmb loogr poore, a Ayimaas ne a Zonatã yi bulgẽ wã n tɩ bʋʋg a Daviid n wilg-a. B yeel-a lame: «Aya! Yik-y tao-tao n dʋʋg kʋɩlgã, t'a Ayitofɛl goma woto la woto yãmb poorẽ.» La a Daviid ne a neba sẽn da tũud-a wã yik n dʋʋga kʋɩlgã la sõor sẽn waa n pukdẽ, ned ba a ye ra ka be, sẽn pa rʋʋg Zʋrdẽ kʋɩlga ye. A Ayitofɛl sẽn mik tɩ b pa tũ yẽ saglsã, a loe a bõang gaare n yik n loog a yiri, a tẽngẽ. La a basa a koees ne a yira rãmba la a tɩ luulame. A sẽn ki, b mum-a-la a ba yaoogẽ. A Daviid taa Maanayim, a Absalom sẽn waa n dʋʋgd Zʋrdẽ, yẽ ne a Israyɛl tãb-biisã. A Absalom yãka a Amasa t'a led a Zoab zĩig n yaa a tãnsoaba. A Amasa yaool n da yaa Israyɛl neda, a Yetɛr, biiga. A Yetɛr pag yɩ-la a Abigayil, a Naas bi-pugla, a Seruya tão la a Zoab ma. A Israyɛl ne a Absalom wẽe b sika Galaad tẽn-peelmẽ. A Daviid sẽn ta Maanayim, a Naas biiga a Sobi, sẽn yit Raba, Amonitsa na-tẽnga, n paas a Amiyɛl biiga a Makir, Lo-Debar tẽng raoa la Galaad Rogelim tẽng rao, a Barzilayi, waa ne gãase, fu tagdo, laase, n paas alkam pɛɛlga, alkam kɛgenga, zom, bɛnga, sũma, ka-kɩɩmnem, sɩɩdo, bĩs-gõeem, ne bĩs kaam, piis la niis nemdo, n wa kõ a Daviid ne a neba sẽn da yãagd-a wã, tɩ b na n dɩlg n mense. Sɩd me, b ra tagsame tɩ kom, yaamse la ko-yũudu namsa tãb-biisa we-raoogẽ wã. A Daviid gilg n gesa neba sẽn da be ne-a wã, a kõ-b-la nanamse, kẽer soo neb tusri, tɩ kẽer so koabga. A welga a tãb-biisã sags a tã, n yãk a ye n kõ a Zoab t'a yɩ b naaba, n kõ a Abisayi a ye, n kõ a Itayi, Gat daoã, a ye. La dĩma yeela neba: «Mam dat n tũu yãmb n kẽng zabrã.» Tɩ neba yeele: «Ayo! Yãmb kõn tũ tõnd n kẽng ye! Tɩ b sã n tɩ rigd-d tɩ d zoe, rẽ ka yell ye; la ba b lubd tõnd neba pʋɩ-sʋka, rẽ ket n ka yell ye, la sã n yaa yãmba, ad yãmb zema tõnd neb tus piiga; la sãoome tɩ yãmb kell n pa tẽnga pʋgẽ n yaool n wa sõng-do, d sã n tar sõngr tʋʋmde.» La dĩma leokame: «Mam na n maana yãmb sẽn tẽed tɩ bũmb ninga la neerã.» La dĩma yalsa tẽnga noor kɩrenga, tɩ neb tong koabg-kaobga, tusr-tusri n yita. Dĩma kõ-la a Zoab ne a Abisayi la a Itayi noor kãngã: «Mam nonglem yĩnga, bɩ y zoe m biiga a Absalom nimbãanega.» La neba fãa wʋma dĩma sẽn kõ nanamsa fãa noor ninga a Absalom poorẽ. B yiime, n na n tɩ seg a Israyɛl, la zabrã kaooga Efrayim googẽ wã. A Daviid neba tõoga a Israyɛl la badaare yɩɩ neb tus pisi n pa zabrẽ. Zabra yɩɩ tẽn-kũum menga. Zabrã wulumdame n yɛdg zĩig zãnga, la googa rɩɩ neb n yɩɩg sʋʋga. Zabra zĩigẽ, yaa a Daviid gãndaada la Absalom seg yã. A ra zomba bõn-wɛɛga. Bõn-wɛɛga zoe n tɩ kẽe tɩɩg a ye tẽngre, t'a Absalom zuga tɩ sẽgdg wila t'a yag n luund tɩɩga tẽngre, tɩ bõn-wɛɛga foog a meng n looge. La ned a yembre yãee rẽnda n tɩ togs a Zoab: «Ade! Mam yãee a Absalom sẽn luund tɩɩg a ye tẽngre.» La a Zoab leoka sẽn togsa yẽnda kibarã: «Fo yãe-a lame! Bõe n maan tɩ fo ka tão-a n lub zĩig pʋgẽ? Woto mam da na kõẽ foom wanzurf wakɩ koeems piiga n paas sẽbdga.» La daoa leoka a Zoab: «Ba sã da yaẽ la wanzurf wakɩ-koeems tusri la m zãadẽ m nugẽ menga, m nug kõn tol n sɩɩs dĩma biig ye, tɩ tõnd fãa wʋma noorã dĩma sẽn kõ yãmb ne a Abisayi, la a Itayi. A yeelame: ‹Bɩ ned da maan m biiga, a Absalom, bũmb ye.› M sã dag n wɩɩb n kʋ-a, b kõn pa n ka togs dĩma ye, y meng na n foosẽ la y nus la y kõn gom kũun yell ye.» T'a Zoab na n kong n yeel-a: «Mam ka na n sãam m vɩʋʋgo n yals ne foom ye!» La a Zoab rɩka ra sɩlems a tã la a tão-la a Absalom sũurã. A ra ket n vɩɩme, n luund tɩɩga tẽngre. Kom-bɩɩb piigã sẽn da tʋkd a Zoab teedo gũbga a Absalom n wẽ-a n baase. A Zoab kɩtame tɩ b peeb baorgo tɩ neba fãa lebg n wa n pa le rig a Israyɛl n kẽng taoor ye. A Zoab n yals zabrã. B sika a Absalom yĩnga n lob bok kãsenga a ye pʋga sẽn da be weoogẽ be, la b wʋka kug n sam n bʋʋg-a. A Israyɛl zoeeme, ned kam fãa leba a roogẽ. A Absalom, ra wa n kɩtame tɩ b pees la b sel kugr kãseng naaba bãoogẽ. A ra tagsa woto a sũurẽ: «Mam pa tar biig sẽn na n tall m yʋʋra t'a ra menem ye.» Yaa rẽ me yĩnga la a pʋd kugrã a meng yʋʋre. B ket n boonda kugra rũnna t'a Absalom kugri. A Sadok biiga, a Ayimaas yeelame: «Bas-y tɩ m wudg n tɩ togs dĩma kibar noogã tɩ Naaba-Wẽnd kõ-b-la bʋʋm n fãag-ba b bɛɛb nusẽ.» La a Zoab yeel-a lame: «Dũnna ka kibar noog la f na n paam n tɩ kõ dĩma ye. Na n yɩɩ nin-daare. Dũnna kibara ka noom ye tɩ dĩma biig kiime.» A Zoab boola Kusitga n tʋm-a: «Zoe n kẽng n tɩ togs dĩma f sẽn yãende.» Kusitga wõgemda a Zoab taoore n yik n tar zoeese. A Sadok biiga, a Ayimaas, gomame n paase n yeel a Zoab: «Sẽn na yɩ bɩ yɩ, mam me rat n zoe n pʋga Kusitgã.» A Zoab yeelame: «M biiga, yaa bõe la f na n zoe n tɩ togse tɩ kibar noog sẽn na n wa ne f rolb yaool n ka beẽ?» T'a leoke: «Sẽn na yɩ bɩ yɩ! M na n zoeeme.» T'a Zoab yeel-a: «Bɩ f zoe!» T'a Ayimaas sɩng zoeese, n dɩk Zʋrdẽ bãooga sore, la a looga Kusitgã. Wakat kãnga tɩ dĩm a Daviid da zĩi tẽnga noor kʋɩlens a yiiba sʋka. Yell sẽn ka lingd tãb-biig ninga rʋʋ bɛonga zugu n tees n gese. La ade! A yãenda rao sẽn da zoet a yembre, la a zẽka a koɛɛg n togs dĩma t'a bãng tiiri. La dĩma yeel-a lame: «A sã yaa a yembre, rẽnd a tara kibar noogo, n na n togse.» La raoa sẽn wa n kolgdẽ, gũusda yãee ned a to sẽn da zoete, la a le zẽka a koɛɛg n togse: «Ad-y ned a to n le zoet n watẽ!» La a Daviid yeelame: «Yẽnda me yaa kibar noog soaba.» La yɛla gũusdã yeelame: «M mii pipi soaba a zoeesẽ wã bala, a zoeta wa a Ayimaas, a Sadok biigã.» Tɩ dĩma yeele: «Yaa nin-sõngo, yaa kibar noogo menga n wat ne-a ka.» A Ayimaas sẽn ta, a zẽka a koɛɛg n yeel dĩma: «Ayoo! Yell ka ye!» La a wõgemdame n pʋʋs naaba, n yaool n yeel: «Soaala-Wẽnnaam, paam pẽgre! Tɩ bãmb kɩtame tɩ b yõg neb niyns sẽn zẽk b nug n na n wẽ naaba, m zu-soabã.» La dĩma sokame: «La m biiga, a Absalom, bee laafi bɩ?» T'a Ayimaas yeele: «M yãeeme tɩ neba sɩng n sogsd taab goabg la rɩtgo la wakat kãng la a Zoab tʋm dĩma sõgen a ye n paas maam, y yamba, la m ka paam n bãng sẽn ya bũmb ning taki ye.» La dĩma yeelame: «Bɩ f serg bilfu n wa yals ka.» A Ayimaas sɩd sergame n bas vɩʋʋgo. La Kusitga taame n yeele: «M naaba la m zu-soaba, kelg-y kibar noogo: Soaala-Wẽnd kõo yãmb bʋʋm, n fãag yãmb, n yiis-y sẽn da zabd-b ne yãmba nusẽ.» Tɩ dĩma soke: «La m biiga Absalom bee laafi?» La daoã yeelame: «Wẽnd na kɩt tɩ m naab la m zu-soaba bɛɛba fãa dɩ bõne wa bi-kãnga, la yɩ boto me ne sẽn kis b yãmba la b rat yãmb ne wẽngã!» Toog wẽnemda rĩma sũur a yãoogẽ, t'a rʋ yĩngr doogã, tẽnga kʋɩlensã sẽn lugl zĩig ningã, n tar yãbre. A ra kẽndame la a yetẽ: «Kato! M biiga Absalom! M biiga Absalom! Bõe tɩ mam pa reeg fo zĩig n ki? M biiga Absalom! M biiga Absalom!» B tɩ wilga a Zoab: «Ad-y dĩma kũmdame, b yãbda b biiga, a Absalom.» La badaare, tãb-biisa sẽn tõog b bɛɛba n da zĩ ne sũ-noog ninga tekame n lebg kʋʋr sũ-sãanga, b fãa gill sẽn waa n wʋm woto: «Dĩma sũur sãama wʋsgo, b biiga kaalma yĩnga.» Badaare, neba soos n kẽe tẽnga pʋga, wala neb sẽn kẽng zabre n zoe n lɛɛg n wa tɩ yãnd tar-ba. Dĩma ra pĩ-la a neng ne a nugu la a ra tara yãb-toose: «M biiga Absalom! M bi-nongr a Absalom! M bi-nongre!» A Zoab kẽnga dĩma nengẽ, a roogẽ, n yeel-a: «Rũndã, y ningda y neba fãa yãnde, bãmb fãa sẽn fãag y vɩɩm, y kom-dibli la y kom-gugli vɩɩm, y pagba ne b pʋg-taaba vɩɩm. Yãmb nonga sẽn kis-b yãmba, la y kis sẽn nong-b yãmba. Yaa sɩda, yãmb wilga rũnna tɩ tãnsoaben-dãmba la tãb-biisa, fãa yaa zaalem yãmb yĩnga. Ade, mam miime marsã t'a Absalom sã n da vɩẽ tɩ tõnd fãa yaẽ kɩɩms rũnna, y yetẽ lame tɩ rẽ n zemsẽ. Aya! M bõsd-y lame, yi-y n keng-y tãb-biisã pɛlga la m wẽend ne Wẽnde tɩ y sã n pa yi, ned ba a ye kõn pak yãmb yʋng kãnga ye, la rẽnda na yɩ yel-beedo n zʋʋg yel-beed niyns fãa yãmb sẽn seg al y yãadmẽ n tãag rũndã.» Dĩma yikame n wa zĩnd tẽnga kʋɩlensa noore. B taasa kibarã tãb-biisã fãa gilli: «Ade, naab yiime n zĩ dignoorẽ.» La tãb-biisã fãa waa dĩma taoore. Wẽnd kãng t'a Israyɛl da zoeeme, tɩ ned kam fãa da leb a roogẽ. A Israyɛl sagsa fãa pʋgẽ, neba da gomdame n yetẽ: «Dĩma yiisa tõnd d bɛɛb nusẽ; yaa bãmb n fãag tõnd Filisti rãmba nusẽ; la b kong n zãaga tẽngã n na n põs a Absalom. Tõnd da pʋdga a Absalom zuga kaam t'a rɩ naam n soog-do, la a kii zabrẽ, bõe la d gũud marsã n na n kɩt tɩ dĩma le wa?» A Daviid me zĩnda a zĩigẽ n tʋm tɩ b yeel maan-kʋʋdba a Sadok la a Abiyatar: «Gom-y ne a Zɩɩda nin-kẽemba, la sok-y-ba: ‹Bõe yĩnga tɩ yãmb na n pa poorẽ, n kɩt tɩ rĩma le lɛɛg n wa a yiri; a Israyɛl zãng raab zoe n lʋɩɩ dĩma tʋbrẽ. Yãmb yaa m saam-biisi, yãmb yaa m buudu, bõe yĩnga tɩ b na n deng yãmba n tɩ tall dĩma n wa?› Y na yeela a Amasa: ‹Fo ka m buud laa? Soaala-Wẽnd sɩbg-ma la b sɩbg-m n bãge, f sã n ka reeg a Zoab zĩiga, n lebg m tãnsoaben-dãmba kãsma.› » A Daviid tõogame tɩ Zɩɩda rãmb fãa yama lebg yam yɛnga. Woto Zɩɩda rãmb tʋmame tɩ b wa yeel dĩma: «Leb-y n wa yã, yãmb ne y sõgen-kamba fãa!» Zɩɩda rãmba ra waa Gilgal n na n seg a Daviid la b sõng-a t'a rʋʋg kʋɩlgã. La a Simeyi, a Gera biigã, a Bẽnzame roogẽ, Bawurim tẽnga, da siga ne yãgbo n tũ nebã n na n wa seg a Daviid. A peega a Bẽnzame saka neb tusri tɩ b tũ-a. N paas a Siba, a Sol sõgen ne a zak rãmba, bãmb piig la a nu la a rakõap pisi. Bãmb n da tog n sõng dĩma t'a rʋʋg Zʋrdẽ kʋɩlgã. Koom koglga sẽn zɩt dĩma zaka neb sã n wa n na n dʋʋg kʋɩlgã, bãmb n da na n kelg la b maan dĩma sẽn date. La dĩma sẽn dʋʋg kʋɩlgã, a Simeyi, a Gera biigã, wõgemda naab taoore. A yeela dĩma: «Bɩ m naaba da ning-m taale m beegra yĩng ye; b ra le tẽeg m sẽn paoog m dĩma la m zu-soaba, a sẽn wa n yit Zerizalɛɛma ye. M naaba da gãd rẽ a sũurẽ ye. M bãngame tɩ m maana yel-wẽnde. La ade! A Zozɛf roogẽ wã, maam n yi n deng taoore n na n seg m dĩma la m zu-soaba, m denga nug goabg rãmba fãa n wa.» A Seruya biiga, a Abisayi goma ne dĩma woto: «A Simeyi ka tog ne kũum bɩ? Ka yẽ n kãab kãab beedo Soaala sẽn kõ ned ninga naama laa?» A Daviid leoka a Abisayi: «Mam tara koɛɛg ne yãmb bɩ, Seruya kamba? La yaa bõe yĩng la yãmb wilgd dũnna tɩ yãmb yaa mam bɛɛba? Dũnna, b na kʋ ned Israyɛl pʋgẽ sɩda? Maam n ka mi tɩ rũnna mam dɩta naam a Israyɛl zug bɩ?» La dĩma yeela a Simeyi: «Fo kõn ki ye!» La dĩma wẽena rẽ. A Sol yagenga, a Mefibaal, da waame n na n seg dĩma, a ra pa tol n ges a nao wã yelle, a ra pa tol n põng a no-kõbdo, a ra pa tol n pek a futu, al dĩma yiib daare n tãag a sẽn lebg n wa ne laafi daar ye. A sẽn yi Zerizalɛɛm n ta dĩma taoore, dĩma sok-a lame: «Yaa bõe tɩ f pa tũ maam, Mefibaal?» A leokame: «M naab la m zu-soaba, yaa m sõgne n tudg maam. Yãmb yamba da yeel-a lame: ‹Ning m bõn-yãanga gaare, m na n zomb-a lame n paam dĩma.› Y mi tɩ y yamba yaa koamsa. M sõgna wa-la y nengẽ n rõd maam. La ade, m naaba, yãmb yaa wa Wẽnd malɛk m yĩnga, la b tõe n maana wala b sẽn date. M saamba zak gilli ra toga ne kũum bala, la ne rẽ fãa, yãmb sak n deega y yamba neb niyns sẽn dɩt-b ne yãmba sʋka. Bõe la m tõe n le saag n kos m dĩma?» Dĩma yeel-a lame: «Yaa bõe tɩ f ket n tar goama? Maam n dat tɩ foo ne a Siba pʋɩ taab pʋtã.» A Mefibaal yeela dĩma: «A Siba tõe n deega fãa n sooge, sẽn noom maam n yɩɩd yaa dĩma le kẽ a zakẽ ne laafi la bãane.» Galaad raoa, a Barzilayi, ra yii Rogelim. A rʋʋga kʋɩlga ne dĩma n yaool n lɛɛge. A Barzilayi da lebga nin-kẽema, a yʋʋm da taa pis-nii. Yẽnda n da ges naaba yelle b sẽn da wa n zĩnd Maanayim, t'a ra yaa arzɛk soaba. Dĩma yeela a Barzilayi: «Bɩ f kell n tũ maam tɩ m na ges f yelle, f kʋʋlem pʋgẽ, Zerizalɛɛm tẽnga.» La Barzilayi leoka dĩma: «Yʋʋm a wãna la m na n le paam n vɩɩnde, tɩ m na n tũ m dĩma n kẽng Zerizalɛɛm? Mam yʋʋm yaa pis-nii marsã: mam tõe n le bãnga sẽn be neere la sẽn ka neer sɩda? Yãmb yamba noor le mi noog la beedo n bak sɩda? Mam tõe n le wʋma yɩɩn-yɩɩndb koeese. Bõe tɩ y yamba na n le yɩ zɩɩbo, a soaala la a dĩma yĩnga? Y yamba yãaga dĩma n dʋʋg Zʋrdẽ kʋɩlgã, la rẽ n waa n sekd yaoodo? Kõ-y yamba sore t'a leb a poorẽ; m na n kii m ba yiri, m ba la m ma yaoog sɛɛgẽ. La ad-m biiga a Kimam, bɩ yẽ tũ d zu-soaba la d dĩma, la y maan ne-a y sẽn dat bũmb ning fãa.» La dĩma yeelame: «Bɩ a Kimam tũ maam, m na maan ne yẽnda fo sẽn date; fo sẽn na n kos maam bũmb ning fãa, m na maana a yĩnga.» Neba fãa gilli dʋʋga Zʋrdẽ kʋɩlga n looge, dĩma me loogame; a moka a Barzilayi n ning a barka. A paama sore n leb a yiri. Dĩma teesa Gilgal la a Kimam tũ-a lame n kẽnge. Zɩɩda neba fãa gilli la Israyɛl neba pʋɩ-sʋka ra yãagda dĩma. Israyɛl nug goabg rãmbã waa n yeela dĩma: «Yaa bõe yĩnga, tɩ tõnd saam-biisã, a Zɩɩda nebã, maan wa tõnd ka naag n ya yãmb neba n kaoog zãng n wa peeg yãmb tɩ y rʋʋg kʋɩlgã, yãmb ne y zak gilli, ne y tãb-biisa gilli? Y tãb-biisa gill da ka zoe n yãagd-y laa?» T'a Zɩɩda neba na n leok-ba: «Dĩma yaa rogem ne tõnd n yɩɩd yãmba! Yaa bõe tɩ y sũur pa noom ne d sẽn maana? Tõnd soola naaba maasem n paam dɩɩbo, bɩ tõnd deega a kũuni?» Israyɛl neba leoka Zɩɩda rãmba: «Tõnd tara bʋʋm naoor piiga, dĩma poorẽ, n tar bʋʋm naoor piig a Daviid meng poorẽ. Bõe tɩ y rat n bas-d kɛɛnga? Ka tõnd n deng n kos dĩma t'a leb a naama zaoorẽ laa?» La Zɩɩda leoka a Israyɛl ne gãgs la gãgse. Nin-yaalg a ye n da be n yaa a Bẽnzame roog neda. Yaa a Bikri biiga, a Seba. A waa n peeba baorgo n yeele: «Tõnd pa tar pʋɩɩr ne a Daviid ye, tõnd ka tar bũmbu a Zese biiga nengẽ ye! Bɩ Israyɛl biig fãa leba a roogẽ!» Israyɛl neba fãa basa a Daviid, n pʋg a Bikri biiga, a Seba. Zɩɩda neba bala n pʋg b dĩma, a Daviid, n yãag-a Zʋrdẽ kʋɩlga n tãag Zerizalɛɛm. A Daviid lebg n kula a yir, Zerizalɛɛm. Dĩma ra basa b pagb piig tɩ b gũ na-yirã. A kɩtame tɩ b peeg-ba n tɩ ning zak sẽn tar gũuda. A kɩtame tɩ b ges b yelle, la a pa tol n le kolg-b ye. N tãag b yõor tɛka, b paa wala pʋg-kõapa, tɩ b sɩd yaool n ket n vɩ. Dĩma yeela a Amasa: «Bool Zɩɩda tãb-biisa fãa; la m gũud-y-la ka ne ra-tãta.» A Amasa rɩka sore n na n saa n bool Zɩɩda tãb-biisã la a kaoosame n loog a Daviid sẽn da kõ-a daar ningã. Dẽ la a Daviid yeel a Abisayi: «Marsã wã a Bikri biiga a Seba wẽnem ne tõnd yɩɩda a Absalom. Bɩ f yiis tãb-biis niyns sẽn gũud f zu-soaba yõorã tɩ y gɩdg-a t'a ra wa paam n ta tẽn-bɛdã sẽn me lals n gũbgã, n paam n põs ye.» A Zoab ne Krɛt rãmba, Pelɛt rãmba ne gãndaada fãa yik n pʋga a Abisayi n na n kẽng zabrã. B yii Zerizalɛɛm n na n babs a Bikri biiga, a Seba. B sẽn wa n kolg Gabaõ pĩ-kẽengã, la a Amasa paam n naag bãmba. A Zoab da yera a tãnsoben-futu, n sẽbg sʋʋga a sɛɛgẽ. Sʋʋga wõog n lʋɩɩme, t'a sulg n dɩk-a ne a goabga. A Zoab soka a Amasa: «F keemame, m saam-biiga!» La ne a rɩtgo, a gãda a Amasa toɛɛnga n na n mok-a. A Amasa pa maan gũusgu ne sʋʋgã a Zoab sẽn da zãad a nugẽ wã ye. A Zoab kõsa a Amasa pʋgã, t'a yãada yʋʋl tẽnga. A pa yãee n kõs n yɩlme la a Amasa kiime. Dẽ poore a Zoab ne a yao, a Abisayi, kell n diga a Bikri biiga a Seba. A Zoab tãb-biig a ye ra yɛsa a Amasa sɛɛgẽ la a yetẽ: «Ned ning sẽn nonga a Zoab la a be a Daviid poorẽ fãa, bɩ a pʋg a Zoab.» A Amasa ra bilma a meng a zɩɩmẽ sora pʋga. Daoa sẽn yãe tɩ neba fãa sã n ta a sɛɛgẽ, b ra yalsdame wã, vuug-a lame n kẽes pʋʋgẽ n bas sorã la pil-a-la fuugu. A sẽn yiis a Amasa sora zugu n sɛ tɛka, neba pʋga a Zoab n na n dig a Bikri biiga, a Seba. A Zoab zoe n saaga Israyɛl rooga sak-saka al n ta Abɛl Bɛt-Maaka ne a tẽn-toose. Berit dãmba sũu taaba n kẽ a Zoab tãpẽ. A Zoab ne a tãb-biisa yẽda a Seba tẽn-kãng pʋga. B wa n zãma tãnd wa lalga n gũbg Abɛl Bɛt-Maaka tẽnga n paam n kolg lalgã n paam n sʋg-a n tus n lubi. Pʋg-yẽesenga a yembre zĩnda tẽnga pʋgẽ lalga sɛɛgẽ, n zẽk a koɛɛga n yeele: «Kelg-y yã, kelg-y yã! Bɩ y yeel a Zoab: Kolg ka tɩ m dat n goma ne foo.» A kolgame tɩ paga sok-a: «Yaa foo la a Zoab bɩ?» T'a yeele: «Yaa maam!» Tɩ paga yeele: «Kelg-y m gomde.» T'a leoke: «M kelgdame!» Paga goma woto: «Pĩnd rãmb ra mi n yetame: ‹Koɛɛg ta Abɛl a ta-la a tɛka!› Israyɛl ka, ned ka be n pʋgd laafi la sɩd wa maam ye. Fo yẽ sẽn baoode yaa tẽn-tõr wãabo, Israyɛl na-tẽng wãabo. Yaa bõe tɩ yãmb rat n menes Soaala-Wẽnd sẽn kõ tõnd d pʋɩɩre?» A Zoab leokame: «Abada ne abada bila! M pa rat n menese bɩ n sarem ye. Pa rẽ gomd ye, yaa Efrayim tẽng daoa a Bikri biiga, a Seba, n yik n yet tɩ yẽ pa le pʋgd dĩma ye, t'a pa le pʋgd a Daviid ye. Yãmb sã n kõ tõnd yẽnda bala mam kɩtdame tɩ d yik n bas y tẽnga wãabo.» Paga yeela a Zoab: «Sã ya rẽ, d na gãndg lalgã n lobg foom a zugu.» Pagã kẽnga tẽnga pʋgẽ n tɩ gom ne buuda fãa wala sẽn zemsde: b fiuuga a Bikri biiga, a Seba, zug n lob a Zoab. A Zoab kɩtame tɩ b peeb baorgo, tɩ b zãag ne tẽngã, ned fãa rɩka a yir sore. Sã n yaa ne a Zoab, a kell n leba Zerizalɛɛm, dĩma mengẽ. A Zoab n da yaa Israyɛl gill tãnsoaba, a Yeoyada biiga, a Benaya, n da ya Krɛt la Pelɛt rãmba tãnsoaba. A Adoram n da ya tʋʋma pʋɩta. A Ayilud biiga, a Zozafat n da so dĩma koeesa moonego. A Seva n da ya sɛba gʋlsda, t'a Sadok ne a Abiyatar ya maan-kʋʋdba. N paas a Ira, Yayir neda, yẽ n da yaa a Daviid maan-kʋʋda. A Daviid zamaanẽ, kom n zĩndi, n kaoos yʋʋma a tã. T'a Daviid ta Naaba-Wẽnd taoore n soke. Tɩ b leok-a: «Yaa a Sol ne a roog rãmba n wa ne yellã, bãmb sẽn kɩt tɩ b kʋ Gabaõ neba n dɩt b zɩɩma raagr taale.» Dĩma boola Gabaõ rãmba n gom ne-ba. Gabaõ rãmba da ka a Israyɛl buud ye, bãmb da yaa Amoritsa yagense. A Israyɛl ra kãabame t'a na maan zood ne bãmba. Ne rẽ fãa, a Sol wa n yik n dat n menes-b-la Israyɛl la Zɩɩda sʋka. A Daviid soka Gabaõ rãmba, «Bõe la d tõe n maan yãmb yĩnga? La bõe la d dɩkd n kos sugri, n paam tɩ yel-beeda zãag ne Soaala-Wẽnd buudã?» Gabaõ rãmb leokame: «Tõnd ne a Sol sʋka, la a buuda sʋka, ka ligdi, ka sãnem bɩ wanzurf yell ye; ka yõor yiisg Israyɛl pʋgẽ yell ye.» La dĩma sok-b lame: «Bõe la y rata tɩ m maan yãmb yĩnga?» Tɩ b leok dĩma: «A Sol yũu tõnd zɩɩm la a da ratame n sãam la a menes tõnd, a Israyɛl soolma fãa pʋgẽ. Woto wã bɩ y yãk neb a yopoe, a kamba sʋka n kõ-do, tɩ d luul-b Soaala-Wẽnd taoore Gibea, Naaba-Wẽnd sẽn da tũus a soaba tẽngẽ.» Tɩ dĩma yeel ba: «M na bao-ba n ning y nugẽ.» Dĩma pa kɩs a Sol yagenga, a Zonatã biiga a Mefibaal ye, a Daviid ne a Zonatã sẽn da yõg zood ne taaba yĩnga. La dĩma reega a Sol kamb a yiibu, a Armoni la a Mefibosɛt. Bãmb ma la a Sol pag a Rispa, a Aya biiga. Le paasa a Mikal kamb a nu. A Mikal yaa a Sol bi-pugla, la kamb a nu wã ba yaa a Adriyɛl, a Barzilayi biiga, Abɛl-Meola raoa. A Daviid ning-b-la Gabaõ kamba nugẽ, tɩ b reeg-ba, n tɩ luul-b tãnga zugu, Soaala-Wẽnd taoore. B naaga taab bãmb b yopoe wã fãa n ki. Yɩɩ alkam kɛgenga wʋrb sɩngr daare, a pipi raare, la b kʋ-ba. A Rispa, a Aya bi-pugla, rɩka sũ-pa-noang fuugu, n lud-b pĩiga zugu, tigsgu sɩngre wakato al tɩ ta saag niibu la a riga yĩngri luiili wĩntoogo, tɩ b ra pẽneg kũuma ye; a diga we-rũmsã me yʋngo. B tɩ togsa a Daviid a Sol paga a Rispa, a Aya biiga, sẽn maan bũmb ningã. A Daviid tɩ reega a Sol ne a biiga a Zonatã kõaba, Yabɛs-Galaad neba nengẽ, tɩ bãmb n da tɩ zu-ba, Bɛt-Seã tẽnga, Filisti rãmba sẽn da tall-ba n tɩ luul zĩig ningã, bãmb sẽn wa n tõog a Sol ne a Zonatã, Gilboa tãmsẽ. Dĩma tɩ rɩka a Sol kõaba beenẽ, n paas a Zonatã kõaba, la b wʋka sẽn da luul b rãmba me yĩnsi. B muma a Sol ne a biiga a Zonatã kõaba, Sela tẽnga, a Bẽnzame tẽn-peelmẽ. Yɩ-la a Sol ba, a Kis, yaoogẽ. La b maana dĩma sẽn da kõ noor tɩ b maana fãa. Dẽ poore, Soaala-Wẽnd sũur maaga ne tẽngã. Zabra a yembre n le yiki Filisti rãmba ne Israyɛl sʋka. A Daviid tik n yika ne a tãb-biisi n tɩ zab ne Filisti rãmba. A Daviid waa n yɛɛme. La wakat kãng la a Isebi-Benob, a Arafa yagenga, yik n baood n na n kʋ a Daviid. A zab-teeda fãa ra yaa paala. A kãnda zũuda zɩslma taa tor-bila. La a Seruya biiga, a Abisayi wudg n wa-la a Daviid sõngre. A wẽe Filisti raoã n kʋ. La a Daviid neba zemsa taaba n na n yeele: «Daviid, fo pa na n le tũ tõnd n kẽng zabr ye, t'a Israyɛl fitila bugum na n wa kii zãnga.» Rẽnda loogre poore, zabr n le yik Gob tẽng ne Filisti rãmba la yaa be me la Usa rao a Sibkayi kʋ a Saf, a Arafa yagenga. Zabre le yika Gob tẽng yɛsa ne Filisti rãmba, la be, Bɛtelyɛɛm dao a Yari biig a Elana kʋʋ Gat dao a Goliyat. Nin-kãng kãnda raoog da zema koeer-bõanga. Zabra a to n le zĩnd Gat tẽnga, tɩ nin-wobg a ye zĩnd be, t'a nug fãa ra yaa nus-bi a yoobe la a naoor fãa da tara nao-bi a yoobe. Sẽn naag taaba, nus-bi la nao-bi yaa pisi la a naase. Yẽnda me ra yaa a Arafa yagenga. A sẽn da baood Israyɛl noor yĩnga, a Zonatã, kʋ-a lame. A Zonatã ba la a Sama la a Sama yaa a Daviid ba-biiga. Nin-daad a naasa fãa yaa a Arafa yagens sẽn dog Gat, la b fãa ki-la a Daviid ne a tãb-biisa nugẽ. Soaala-Wẽnd sẽn fãag a Daviid a Sol la bɛɛb a taab nusẽ, a yɩɩla yɩɩn kãnga: Soaala la m pĩiga, m soondg zĩiga, bãmb la m fãagda. B yaa pĩig n ligind maam, bãmb la m gãongo, m raood zab teoogo, bãmb la m põasg zĩiga, m soondg roogo, bãmb n fãagd-m nin-toosa nusẽ. Bɩ b soog pẽgre! M Sẽn bool Soaalã, m tõoga m bɛɛba. Kũuma kʋɩl-bɛɛga tigsa a ko-beedo la maam la a da rat n dɩ bala. Wẽnem-naaba sũu tãpo, la a ling-m lame. Sẽn dat-b maam ne kɩɩm-kulga naaga taaba n wẽ-m gũbri, b gãnega bẽdgo m taoore. M boola m Soaala m yɩɩra pʋgẽ, m Soaala la m tees n kelem. B zĩnda b ro-sõnga pʋga n wʋm m koɛɛga. M kɛlenga lʋɩ-la b tʋbrẽ. Tẽnga yɛɛsame n sɩng miuungu; Soaala basa b sũura t'a yiki la ba yĩngr teeda kẽna lɛbla. Bug-zõos n yi b yõorẽ tɩ bug-walem yi b noorẽ, n paas bug-saan-moama. B laka yĩngri n ges b sẽn na n sigẽ. B sẽn tabg sawadg taoko, malɛk la b zomb n yɩke, bãmb yĩnga sobga yɛdga a pɩgsa. Lik la b rɩk n gũbg b menga, wa roogo, n yit sawadgo n kẽed sawadg taokẽ. Vẽenem n yãg b taoore, bug-saala bugum yãngame. Yĩngr-Soaala zĩnda b zĩigẽ n tãse, yaa al yĩngri la b koɛɛga sãd yã. B pɛɛma tãooda wɛɛla, saaga yãgdame n sẽegd-b. Mogra gãag pukdame n dɩga, dũni wã sẽn zao bũmb ninga zuga likda vẽenemẽ, Soaala sã n tãs b tãsgã, b sã n tĩs tɩ pemsma yi b yõorẽ. Bãmb n zĩnd yĩngri n tʋm tɩ b yaag-ma, n yaag-m ko fõtmẽ wã. B fãag-m-la m bɛ-gãndaooga nusẽ, b fãag-m-la pãng sẽn yɩɩd maama soab nusẽ. Bɛɛba pʋg-m-la m zu-beed daare, la Soaala yɩ-la m teegre. B wa n gaag-m lame n yiis tɩ pemsem wẽed-m; b fãag-m lame tɩ b nong-m lame. Soaala geta m sõmblem, b geta m pʋ-peelma n dond-ma. M pa zãag ne m Soaala sor ye, m ka yɛ ne Soaala pʋgb ye. B noya ka yi m pʋtẽerẽ ye, m pa kẽn n kẽ moog ye. M wa-la b taoor ne m pʋ-peelma zãnga, m zãaga m meng ne wẽng la beegr buud fãa. Soaala dol-m-la m sõmblem wala b nif sẽn yãende. Ned sã n ka bas Soaala, bãmb me ka basd a soab ye. Taal sã n ka f zugu, bãmb me kõn ning-f taal ye. Bãmb n dond pʋ-peelem, la b demsd sẽn kedbe. Buud ning sẽn da kong pãngã n maand raoodo. Yãmb getame la y sãbsd zẽk-m-meng soaba. Yãmb la m fitila, Soaala, yãmb n vẽnegd m lika. Y sõng-m lame tɩ m gãndg bog zulunga, n sõng-m tɩ m kal lalg sẽn zãnde. Soaala sor ka tar goaleng ye, Soaala ka gomd tɩ ka pids ye, sẽn teega bãmb paama a gãongo. Ãnda la Wẽnde, sã n ka Soaala, ãnda la pĩiga, sã n ka tõnd Wẽndã? Bãmb la m tãnsoaben-doogo bãmb n kɩt tɩ m vɩɩm ka tar kegre ye. B kõ-m-la wals karse b kõ-m-la nao sẽn gãensd pĩisi. Bãmb n wilg m nuga sʋʋg zãabo, bãmb n kõ m kang pãnga t'a rõosd kut tãpo. Bãmb n kõ maam b fãagre gãongo, b nonglma ne maam zẽkda m zugu. M kẽnd pa tadgd ye, m nao ka mi yaams ye. M pʋga m bɛɛba n kʋ-ba a yeyn-ye, m pa lebd m poorẽ tɩ m ka baas-b zãng ye. M baas-b lame, m beds-b lame la b kõn le yik ye, b fãa gill lʋɩɩ sasa, ba a ye kõn le yiki tɩ m naoor tabga b sʋka. Y kõ-m-la zabr pãnga, m zabd-n-taasa fãa sura m taoore. Y tẽega m nug tɩ m gãd b kãare, m menes-b-la zãnga. B kelemdame, la fãagd ka ye. B bõsda Soaala la leokr ka ye, tɩ m na neem-ba wala tom, m fẽt-b-la wala b sẽn fẽt begdo. Y fãag-m-la ne m tẽnga rãmb zaba, y lʋɩɩs-m-la bu-zẽmba taoore, m sẽn da ka mi buud ninga lebga m yamba. Sãamb wat n baooda m yel-sõmde. M sẽn yaag m noor bal la b sẽn gõmsde. Bu-zẽna konga pãng n dʋʋgdẽ; b yi-la b roogẽ tɩ b wẽneg n dig-b n yõge. Bɩ Soaala-Wẽnd kell n soog pẽgre! B yʋʋr paam pẽgre! M pĩiga sõng-m lame tɩ m maan raoodo. Bãmb n sõngd-m tɩ m dokd m sũuri, bãmb n sulgd m bɛɛba m taoore. Bãmb n fãagd-m m bɛɛba nusẽ, bãmb n kõt-m pãnga, tɩ m maand daood ne m bɛɛba bãmb n deegd-m nin-toosa nusẽ. Dẽ me la m pẽgd Soaala, Adem biisa sʋka! Ad-m sẽn yɩɩn n pẽgd b yʋʋre. Bãmb maasem yĩnga, dĩma tara a bɛɛba nombo, Soaala pa yi b sẽn kõ a soab naama poorẽ ye, b bee ne a Daviid, ne a yagensã, zamaan ne zamaana! Ad-a Daviid yaoolem koeese: A Zese biiga, a Daviid n na n gome, yaa nin-kãsenga n na n gome, a Zakoob Wẽnda sẽn kõ a soab naama koɛɛga la y na n kelge, a Israyɛl yɩɩn-nooda soab koɛɛga, la y na n kelge, Wẽnd sẽn pʋdg a soab bãngrã n na n gome bãmb zĩigẽ la a noor na n gome. A Zakoob Wẽnnaam yeel-m lame, a Israyɛl Pĩiga togs-m lame: Ned ning sẽn dɩta naam ne zemsgo, sẽn dɩta naam la a zoet Wẽnd nifu, wẽnda yibeoog vẽenem, sõor pukr wakato, sawat sẽn ka be raare. Saag niime n yooge, tɩ wĩndga yãngd ne moodã, mood sẽn nan yit paalem. N-ye! M zaka yɛsa wɩla Wẽnd taoore, la rẽ yaa b sẽn yõg zood ne maama, b zood sẽn ka be sɛɛbã, b zood sẽn yals neere, n ka mi kɩllgã. Sẽn ya wakat ning fãa, maam n maand raoodo, m daaba pita wakat buud fãa. Wẽnem-naaba tãb-biisi wẽnda we-raoogẽ gõaaga, ka bũmb sẽn na wʋk n pĩ yãoog ye, kãasda ne kutu la kãn-tʋbre, koondame n gil n wẽneg n yõoge. Ad-a Daviid gãndaado: A Isbaal, Akmonitga la gãnda-bɛd a tãaba tãnsoaba. B ra boond-a-la yɛsa: Adino Esnitga. A dɩka a kãnde n kʋ neb kobs-nii, zĩig pʋgẽ bala. Sẽn pʋgda, yaa a Dodo biig, a Elazar. A Elazar yaa Aoyitga. A yɩɩ tãb-biis a tãaba nin-yende, tãb-biis niyns sẽn da yãagd a Daviid a sẽn waa n baood Filisti rãmba noorã, Filisti rãmba sẽn waa n tong zabre, n yɛs-b taoorã. A Israyɛl tãb-biisa basa raoodo, n kong n zoe. A Elazar tedga ne Filisti rãmbã n tar kɛɛbo al t'a nuga sẽn sog sʋʋga wa ki n ka le tõe n puk ye. Baraare, ne Soaala-Wẽnd sõngre, yɩɩ kʋʋb tɛka. Tãb-biisa lɛɛg n waame n na n zɛ teeda bala. Gãndaoog ning sẽn le pʋgdã, yɩ-la a Sama; yẽ yaa Araritga, a Age biiga. Filisti rãmba da tigma taab Leyi tẽnga. B ra bee bɛng pʋʋgẽ; a Israyɛl zoe-la b taoore. La yẽ tɩ yalsa pʋʋga tẽnsʋka, n dig bɛɛbã n deeg pʋʋgã. Yɩɩ tõogr kãseng la a Israyɛl tõog a bɛɛba ne Soaala sõngre. Daar a ye, tigsg wakato, neb a tãabo n yi gãndaad pis-tã wã sʋka n wa yãend a Daviid, Adulam tãn-bokẽ wã. Dẽ tɩ Filisti rãmba wẽe b sik Refayim dãmba tãnga sigdgẽ. A Daviid da be-la a zabr kõn-ling-m doogẽ, tɩ Filisti rãmba be Bɛtelyɛɛm. A Daviid waa n yik n yãbda ko-yũudu la a sokame: «Ãnda n na n wa kõm-m koom tɩ m yũ, ko-baoor ning sẽn be Bɛtelyɛɛm noorã kooma?» Dẽ la gãndaad a tãabã wẽdg n kẽ Filisti rãmba sika, n tɩ toog kooma n wa kɩs a Daviid. A Daviid pa tʋlg n yũ ye. A rɩk-a lame n bas Soaala-Wẽnd taoore. A yeelame: «Soaala-Wẽnd na laas-m ne ko-kãnga yũubu. M sã n yũ, yaa zɩɩm la m yũ yã, sẽn bas-b vɩɩma taale n kẽng n tɩ bao kooma zɩɩm la m yũyã.» A sɩd zãgsa yũubu. Gãndaad a tãab kãensa me sẽn tʋm la woto. Sẽn ket n pʋgd yaa a Abisayi, a Seruya biiga, la a Zoab saam-biiga. Yẽ me ra yaa gãndaad pis-tã wã nin-yende. Yẽ me zẽka a kãn-dibg raar a ye, neb kobs-tã zugu la a kʋ-b lame. A yʋʋr yii gãndaad pis-tã wã sʋka, a yʋʋr yiime, n yɩɩg a taaba. A tol n wa lebga b naaba. A gãndalsma sẽn pa yɩɩg yaa tãnsoaben-dãmb bɛd a tãaba rẽnda. Sẽn le tʋma gãndalsem tʋʋm ka tɛka, yaa a Benaya. A ba yaa a Zoyada; a yaa tãb-biig a ye sẽn pid ne sũ-keelem yagenga. A tẽng yaa Kabseyɛl. Yẽ n kʋ Moab Ariyɛl dãmb a yiibã. Yẽ n sig loangẽ, saag sẽn yɛdg a zom maas daare, n kʋ bõnyẽega. A le kʋʋ nin-daoog a ye sẽn ya Ezipt neda. Ezipt daoã da tara kãnde; yẽ seg-a-la ne dasaar bala, n deeg a kãndã n wẽneg n kʋ-a ne rẽ. A Zoyada biig a Benaya me sẽn tʋm la woto. Dẽ me la a yʋʋr yi tãb-biis pis-tã wã sʋka. La a yʋʋr yii wʋsgo gãndaad pis-tã wã sʋka. Yẽ me gãndalsem sẽn pa kolge yaa tãnsoaben-dãmb bɛda a tãaba rẽnda. A Daviid kɩtame t'a lebg a meng gũudba taoor soaba. A Asayɛl, a Zoab saam-biiga, a Elana, Bɛtelyɛɛm Dodo biiga, a Sama, Arod tẽnga, a Elika, Arod tẽnga, a Eles, Pelɛt tẽnga, a Ira, Tekoa rao a Ikɛs biiga, a Abiyezer, Anatot tẽnga, a Mebunayi, Usa tẽnga, a Salmon, Aoya tẽnga, a Marayi, Netofa tẽnga, a Eleb, Netofa Baana biiga, a Itayi, a Ribayi biiga, Gibea sẽn be Bẽnzame tẽn-peelmẽ, a Benaya, Piratõ tẽnga, a Idayi, Gaas kʋɩl-beesẽ, a Abiyalbõ, Bɛt-Araba tẽnga, a Azmavɛt, Bawurim tẽnga, a Eliyaba, Saalbõ rao a Yasen biig a ye, a Zonatã, a Sama, Arar tẽnga, a Ayiyam, a Sarar biiga, Arar tẽnga, a Elifelɛt, a Aasbayi biiga, Maaka rao a ye yagenga, a Eliyam, a Ayitofɛl biiga, Gilo tẽnga, a Esrayi, Karmɛl tẽnga a Paarayi, Arabga, a Igal, a Natã biiga, Soba raoa, a Bani, a Gad roogẽ, a Selɛk, Amonitga, a Narayi, Beerot tẽnga, a Seruya biig. a Zoab zab-teeda tʋkda, a Ira, a Yetɛr sakẽ, a Gareb, a Yetɛr sakẽ, a Uri n baasde. Yẽ yaa Ititga. B fãa gill yaa pis-tã la a yopoe. Soaala-Wẽnd sũur le puuga ne Israyɛl dãmba, tɩ b na n tus a Daviid t'a maan bũmb sẽn na n wa ne b bõne. Soaala ninga a Daviid yamẽ t'a sõd Israyɛl ne a Zɩɩda. Dẽ la dĩma yeel a tãnsoab a Zoab sẽn da be ne-a wã: «Saag Israyɛl tẽnsa fãa, n sɩng Dã n ta Beerseba, la sõd neba tɩ m bãng b sõore.» A Zoab leoka dĩma: «Wẽnd na kɩt tɩ y neba sõor paas naoor koabga, tɩ y ket n vɩ ne yõore, la bõe la m zu-soaba dat ne sõadga woto?» A Zoab ne tãnsoaben-dãmba yãeeme tɩ dĩma raab ka tõe n ka pids ye, la b loogame n na n tɩ sõd Israyɛl nebã. B rʋʋga Zʋrdẽ n wẽ b sik Aroɛr, tẽng ning sẽn be Gad kʋɩl-bɛɛga sudga nug rɩtgo, Yazɛr sẽnẽ. B kẽname n wa ta Galaad la b kẽe Ititsa tẽnga sẽn boond tɩ Kadɛs, n yi be n ta Dã, n gõdg n tees Sidõ. B taa Tir tãnsoaben-doogã, n kẽ Ivitsa ne Kanaã rãmba soolem, n wa ta Zɩɩda Negɛb, Beerseba. B sẽn saag tẽn-peelma n sɛ b leba Zerizalɛɛm, b kiis a wɛ la rasem pisi yĩnga. A Zoab wilga dĩma b sẽn sõd nebã n paam sõor ninga: Israyɛl neba ra yaa tãb-biis tus kobs-nii sẽn tõe n bob sʋʋga. Zɩɩda yaa tus kobs-nu. Dẽ poore a Daviid sũur kiuusame, a sẽn maan sõadga yĩnga la a yeela Soaala: «M beega wʋsgo! Sak-y n kõ-m sugri tɩ y yamba maana gãeemd mengã.» Beoog ne a na n vẽeg tɩ Soaala-Wẽnd da zoe n wilga b koe-kãnga a Gad, bãngd a ye sẽn da be a Daviid sɛɛgẽ n taasd-a Soaala-Wẽnd koeesã: «Tɩ yeel a Daviid: Yaa woto la m gomd ne foo: sɩbgr buud a tã la m tõe n sɩbg-fo. Yãk f sẽn date, tɩ m na tũ f raabo.» Vẽkembeoogo, a Daviid sẽn neke, a Gad kẽnga a nengẽ, n tɩ toags-a. A yeela woto: «F ratame n yãend kom f tẽnga pʋgẽ yʋʋm a tã, bɩ f ratame n zoe f bɛ taoor kiis a tã, bɩ f ratame tɩ tẽn-kũum lʋɩ tẽnga rasem a tãabo? Marsã, tagse la f kõ-m koɛɛg ning m sẽn na n tɩ leok sẽn tʋm-a maama.» A Daviid leoka a Gad: «M ka mi m sẽn na n leok bũmb ninga tɩ m zĩi ne yɩɩre. La ade, d lʋɩ Naaba-Wẽnd nugẽ tɩ b nimbãan-zoeer waooga. D da lʋɩ ninsaalb nugẽ ye!» Woto wã yaa bãag sẽn wat ne kũum la Soaala-Wẽnd fẽeg tẽnga, yibeoog kãng n ta ra-yɩten-daare, la neba sẽn ki Dã n ta Beerseba, yɩɩ tus pisopoe. Malɛka zẽka a nug n na n wã Zerizalɛɛm, la Naaba-Wẽnd lebsa b noore, n yeel tẽn-kũuma malɛkã: «Sekame. Yõbg f nugu.» Malɛkã ra bee Zebuze rao a Aravna zɛɛgẽ. A Daviid sẽn yãe tɩ malɛk n wa ne bã-longdma a yeela Naaba-Wẽnde: «Yaa maam n beege, yaa maam n maan wẽnga, la nin-bãmba, zãma wã, b maana bõe? Bɩ y sɩbg maam ne m zaka bala.» Badaare a Gad taa a Daviid nengẽ n yeel-a: «Kẽng n tɩ me maan-kugr Zebuze raoa, a Aravna zɛɛgẽ wã.» A Daviid kẽnga wala a Gad sẽn wilg-a, la wala yẽ me sẽn deeg Soaala nengẽ. A Aravna yãee dĩma ne a tãnsoaben-dãmba tɩ b wat a nengẽ. A Aravna waa n yĩgimda dĩma taoore, n kɩ a neng tẽnga. N yeele: «Yaa bõe tɩ m dĩma, m zu-soaba wat a yamba nengẽ?» T'a Daviid yeele: «M dat n daa f zɛɛgã n me maan-kugr m Soaala yĩnga. Woto bãaga na zãag ne tẽngã.» A Aravna leoka a Daviid: «Bɩ m zu-soaba deeg zɛɛgã n kʋ b sẽn date. Ad-m niisã, maoonga yĩnga. Ad-m kũura raado n paas raoogo ning sẽn palgd nag koodsa yublã. Y yamba dɩkda rẽ fãa n kõt a dĩma.» La a paasame: «Wẽnd na reeg y kosgo!» Dĩma leokame: «Bada! M dat n daame. M pa rat n kõ Soaala maoongo n pa tol n yiis m toorẽ bũmb ye.» A Daviid daa zɛɛga la niisã, wakɩ koeems pis-nu. Zĩ-kãnga a Daviid mee maan-kugri Soaala yĩnga. A kʋʋ yũ-nood la laafi kosg maando. Soaala-Wẽnd kũma tẽnga rãmb nimbãanega la bãaga zãaga ne a Israyɛl. A Daviid waa n lebga nin-kẽem kʋdre. B ra pind-a-la fu-gobse la baasg fãa a ra ket n digda waoodo. Dẽ la a sõgen-kamba yeel-a: «Dĩma, d na n bao-la y yĩnga pa-kuli sẽn na n get y yelle, la y sẽn na n kʋgl n paam n wɩng y yĩnga.» B saaga Israyɛl vẽenema n bao bi-pugl sẽn ya neere. Bi-pugl a ye la b yãend yã, Sunamitga sẽn boond tɩ Abisag, la b tall-a lame n wa. Bi-pugla ra yaa neer wʋsgo. A gesa dĩma yelle, n tɩp-a la dĩma pa bãng-a ye. A Adoniyas, a Agit biiga, da yaa rasãnga. A waa n tẽeme tɩ yẽe n na n led a Daviid zaoorẽ, la a ra zoe n maanda wa yẽ la na-bi-kẽenga n yetẽ: «Maam n na n dɩ naama.» A ra baoo bilim-bilm la wiidi la tãb-biis pis-nu sẽn na n zoet a taoore. A ba zɩ n sãam a sũuri n yeel-a: «Yaa bõe la f maand woto ye.» A Adoniyas me ra yaa rasãnga la a Absalom poore yẽ n da pʋgd ne kãsengo, tɩ yẽ n da pʋgd ne rogem. A tɩ yẽsa ne a Seruya biiga, a Zoab, la maan-kʋʋd a Abiyatar, tɩ bãmb kẽ a tãpẽ. Sẽn yaool n da pa kẽ a Adoniyas tãpẽ, yaa maan-kʋʋd a Sadok, yaa a Zoyada biiga, a Benaya, yaa bãngd a Natã, yaa a Simeyi, yaa a Reyi, yaa a Daviid gãndaadã. Daar a ye, a Adoniyas maana kibsa, yɩɩ pĩ-saalga zugu, pĩ saalg ning sẽn pẽ fu-pɛgdba bãkã. B kʋ piisi, niisi, nag-bi-nobdse. A boola a ba-biisã, a kẽem-dãmb la a yaopa la Zɩɩda neb niyns fãa sẽn da tʋmd-b dĩm a Daviid zakẽ. A sẽn pa boole yɩɩ bãngd a Natã, n paas a Benaya, ne gãndaadã la a Salomo bala. A Natã yeela a Salomo ma, a Batseba: «Fo ka wʋm t'a Agit biiga, a Adoniyas, lebga dĩma, tɩ d zu-soab a Daviid ka mi tiir bɩ? Bas tɩ m sagl-fo, tɩ foo ne f biiga a Salomo paam n põse. Kẽng a Daviid nengẽ n tɩ yeel-a: ‹M zu-soaba, ka yãmb n kãab maam tɩ m biig a Salomo n na n dɩɩ naam yãmb poore, tɩ yẽ n na n ledg yãmb zaoorẽ? Maana wãn marsã tɩ yaa a Adoniyas la dĩma?› Fo sẽn wat n be ne dĩma n sõsdã la mam na n yaool n kẽ la m gom n dig fo sẽn zoe n tʋɩɩsẽ wã.» A Batseba bʋʋga dĩma a ro-gãagẽ. Dĩma ra kʋʋlame la Sunamitga, bi-pugl a Abisag, n da get a yelle. A yĩgimdame la a sulga a meng dĩma taoore tɩ dĩma yeel-a: «Yaa bõe la f rata?» Paga yeelame: «M zu-soaba, yaa ne Naaba-Wẽnd la y wẽen n kãab maam tɩ m biig a Salomo n na n dʋ zaoorã yãmb poore. La ade, a Adoniyas sẽn lebg dĩma, m zu-soaba ka mi tiiri? A tɩ kʋʋ niis ka tɛka, nag-bi-nobdse, piisi la a boola a ba-biisa fãa, n paas maan-kʋʋd a Abiyatar, tãnsoab a Zoab, y biiga, a Salomo, bal la a ka boole. Yaool n yaa m zu-soaba la a Israyɛl gill gũuda tɩ b wilg sẽn na n deeg-a b zĩiga. M zu-soaba sã n wa maan kaalem, yaa maam ne m biig a Salomo n na n yãe toogo!» A Sẽn da ket n gomd la bãngd a Natã sẽn ta. B yeela dĩma: «Ad-y bãngd a Natã, n be yɩnga.» A Natã sẽn kẽ, a wõgemda dĩma taoore, n kɩ a neng tẽnga. Ad-a sẽn yeele: «M zu-soab la m dĩma, yaa yãmb n yeele: ‹A Adoniyas n na n dɩ naam mam poore, yẽ n na n dʋ m zaoore?› Dũnna, a kẽnga fu-pɛgdba bãkẽ, a tɩ kʋʋ niis ka tɛka, nag-bi-nobdse, la piisi. A boola a ba-biisa fãa, tãnsoaben-dãmba, maan-kʋʋd a Abiyatar. B bee be n dɩtẽ la b yũuda la b kaasdẽ: ‹Wẽnd na kõ a Adoniyas yõore!› La a ka bool tõnd ye, a ka bool maam, y yamba, bɩ maan-kʋʋd a Sadok, bɩ a Zoyada biig, a Benaya, bɩ y biiga, a Salomo ye. M sok n gese, ya m zu-soaba la m dĩma n kõ noor bɩ? Yãmb yaool n nan ka yaag y noor n wilg sẽn na n dɩ a naama yãmb poor ye.» Dĩm a Daviid yeelame: «Bɩ y bool a Batseba.» A kẽe dĩma nengẽ n zĩnd b taoore. Tɩ dĩma na n wẽene: «Ne vɩɩm Naab a Wẽnde sẽn yiis maam yɩɩr buud fãa pʋgẽ, m na pids rũnna m sẽn kãab-fo, bãmb taoore, n yet tɩ f biiga a Salomo n na dɩ naam mam poore la a dʋ m zaoorẽ.» A Batseba yĩgimdame n kɩ a neng tẽnga n yeele: «Wẽnd wogl m zu-soaba, a Daviid, yõore!» T'a Daviid yeele: «Bɩ y bool a Sadok, maan-kʋʋdã, bãngd a Natã, a Zoyada biig, a Benaya, n kõ-ma.» B waame. Tɩ dĩma yeele: «Yi-y ne tãb-biisa sẽn gũud dĩma, zombg-y a Salomo dĩma bõn-wɛɛgã, n tall a n kẽng Giõ. Beene, maan-kʋʋd a Sadok la bãngd a Natã na taag-a kaam t'a lebg a Israyɛl dĩma, dẽ tɩ y peebda baorgo la y yetẽ: ‹Wẽnd na kaoos dĩma, a Salomo!› Y na pʋg-a n lɛɛg n wa, a na dʋ m naama zaoore la a na rɩ naam m zĩigẽ tɩ yaa yẽ la m yãkre t'a na n yɩ Israyɛl la Zɩɩda dĩma.» A Zoyada biig a Benaya leoka dĩma: «Sɩd ne sɩda, yaa woto la Soaala-Wẽnd gomd ne dĩma, m zu-soaba: Wala b sẽn pa ne m dĩma, m zu-soaba, woto me b na pa ne a Salomo, n zẽk a naama t'a zʋʋg m dĩma la m zu-soaba, a Daviid, rẽnna.» Maan-kʋʋd a Sadok, bãngd a Natã, a Zoyada biig, a Benaya, Krɛt la Pelɛt dãmba siga Giõ, b zombga a Salomo bõn-wɛɛgã. A Sadok kẽe sɛka roogẽ n dɩk yɩɩlle ne kaam n pʋdg a Salomo zugu. Baorg peebame la neba fãa naaga taab n kelme: «Wẽnd na kaoos dĩma, a Salomo.» A lʋɩɩ taoore tɩ neba pʋgd-a, n peebd wɩɩse, la b kaasd sũ-noog kaasgo, tɩ yaa wa tẽnga na n ninga mugnum. A Adoniyas ne a sẽn da bool b rãmba wʋma bʋʋre. B ra rɩɩ n sɛɛme. A Zoab me wʋma baorga rãamde n sok: «Bõe n yɛɛs tẽngã tɩ bʋʋr sãta?» A sẽn da ket n gomd la a Abiyatar biig, a Zonatã, sẽn pooge. A Adoniyas yeel-a lame: «Wa, tɩ f yaa pu-peen-neda la yaa kibar noog la f wat ne.» T'a Zonatã leoke: «Sɩd ne sɩda, m ka wat ne koe-noog ye, a Daviid kõ-la a Salomo naam! Dĩma yiis-a-la ne maan-kʋʋd a Sadok, bãngd a Natã, a Zoyada biig, a Benaya, Krɛt la Pelɛt dãmba: B zombg-a-la b meng bõn-wɛɛga. A Sadok ne a Natã kõ-a-la naam Giõ. B yii be n lɛɛg n wa tẽngã ne sũ-noog kilsgu, tɩ tẽnga fãa wulumdi, yaa rẽ bʋʋr la yãmb sẽn wʋmdã. Yɩɩd rẽ, a Salomo dʋʋ naama zaoore. La tãnsoaben-dãmba wa n pʋʋsa a Daviid bark la b yetẽ: ‹Bɩ Wẽnd zẽk a Salomo yʋʋr n zʋʋg yãmb dẽnna, bɩ a zaoora paam waoogre n yɩɩd yãmb dẽnna.› Dĩma wõgemda a gãagẽ, n tol n yeele: ‹A Israyɛl Wẽnnaama paam barka, tɩ rũnna b kõ-d-la ned sẽn na n dɩ naam m zaoorẽ wã la b kõ-m lame tɩ m yãend a soab ne m nifu.› » Dabeem yõka a Adoniyas ne a sẽn da be ne b rãmba, tɩ ned kam fãa yi n tees a sẽn paame. A Adoniyas zoe rabeem, n yik n tɩ gãd maan-kugra yɩdba. B tɩ wilga a Salomo: «A Adoniyas zoeta a Salomo dabeem n tɩ gãd maan-kugra yɩdba n yetẽ: ‹A Salomo wẽen dũnna t'a kõn kʋ-m ne sʋʋg ye.› » A Salomo yeelame: «A sã n tall a meng neere a zoob-yend meng kõn lʋɩ tẽng ye. La sã n ka rẽ b na kʋ-a.» A Salomo kɩtame tɩ b babs a Adoniyas wẽnd doogẽ. B yiis-a lame n tall n wa a Salomo taoore la a sẽn ta, a wõgemda a taoore la a Salomo yeel a lame: «Leb f yiri!» A Daviid sẽn mik t'a kũum kolgame, a sagla a biig a Salomo woto: «M dɩka neba fãa sẽn dɩkd sor ninga n yit moogo. Keng f sũuri, yɩ raoa! Tũ Naaba-Wẽnd, f Soaala, sẽn wilgi, tũ b soya, reeg b noya, b raabo, b sẽn togse, b sẽn yals zamaan fãa yĩnga, b sẽn gʋlse a Moyiiz sebrẽ, la woto f sẽn sɩnge bɩ sẽn dat n sɩng tʋʋm niynsa fãa na baas neere. La Wẽnd na pids b sẽn kãab maama n yeel-ma: ‹F kamba sã n tall b mens neere, n kẽn tɩrg m taoore, ne b sũur fãa, ne b yalẽ wã fãa, f kõn kong ned sẽn na n dɩ naam Israyɛl ye.› Fo mi-la a Seruya biig a Zoab sẽn maan-m bũmb ninga, a sẽn maan Israyɛl tãnsoaben-dãmb a yiibu, a Nɛr biig a Abnɛr la a Yetɛr biiga a Amasa. F mii a sẽn kʋ-b to-to, a yika laafĩ wakato n kʋ, n bol ne zɩɩm a sɛɛg sẽbdg la a neooda. F na maan sẽn segd n ka bas-a t'a sig bʋg-tẽng bãane ne zoob-peend ye. Sã n yaa a Barzilayi Galaad daoã kamba, f na zã-b ne nonglem la b na lagm-f laag a yembre, tɩ m sẽn waa n zoet f kẽem a Absalom taoore, b sõng-m lame. Ade, a Gera biig, a Simeyi, Bẽnzame Bawurim daoã, n be fo sɛɛgẽ. Yẽ tʋʋ maam tʋ yoodo, m sẽn dɩk Maanayim sor daare. A lɛɛg n seg-m lame, Zʋrdẽ kʋɩlgã, tɩ m wẽen ne Soaala tɩ m sʋʋg kõn sɩɩs-a ye. Marsã f kõn bas-a n pa sɩbg-a ye, la f mi f sẽn na n sɩlem sɩlem ninga t'a sig bʋg-tẽng ne zoob peendo.» A Daviid gãanda ne a saam-dãmba la b mum-a-la a Na-tẽngẽ. A Daviid dɩɩ naam Israyɛl, yʋʋm pis-naase: Ebrõ yɩɩ yʋʋm a yopoe, Zerizalɛɛm yɩɩ pis-tã la a tã. A Salomo dʋ-la a ba zaoorẽ, la a naam paama pãnga. A Agit biiga, a Adoniyas, kẽnga a Batseba, a Salomo ma nengẽ la a wõgemda a taoore. Paga sokame: «Yaa laafi tɩ f wat ka?» T'a leoke: «N-ye!» A paasa woto: «M tara m koɛɛg ne foo.» Tɩ paga yeele: «Gome!» A Adoniyas yeel-a lame: «Fo miime tɩ naama ra tog n yɩɩ m dẽnda. A Israyɛl gilli me da tẽed-m la ne naama, la ade a yii mam nugẽ n lʋɩ m yao nugẽ, tɩ Wẽnd n kõ-a. Bũmb a ye marsã la m dat n kos-fo, da zãgs ye.» Paga yeel-a lame t'a gome. T'a yeel: «M kot-f lame tɩ f yeel dĩma, a Salomo, tɩ b kõn tõdg ye, yeel-ba tɩ b kõ-m Sunamitga, bi-pugla a Abisag tɩ m maan m paga.» Paga leokame: «Yaa neere, m na gom dĩma f yelle.» A Batseba kẽnga dĩm a Salomo nengẽ n tɩ gom a Adoniyas yelle. Dĩma yik n seg-a lame, n yaool n lɛɛg n zĩnd a zaoorẽ. B waa ne goeel dĩma ma yĩnga la a zĩnda a biiga rɩtgo. Ad-a sẽn yeele. «Yaa bũmb bilf bala la m tar n na n kos-fo, da zãgs ye.» Tɩ dĩma yeele: «Kos-ma tɩ m kõn tõdg ye.» Tɩ paga yeele: «B tõe n dɩka Sunamitgã, bi-pugl a Abisag, n ko f kẽema Adoniyas t'a maan a pag bɩ?» Dẽ la a Salomo leok a ma: «Yaa bõe la f kot a Adoniyas yĩnga Sunamitga, a Abisag? Bõe tɩ f pa kot naama a yĩnga? A Adoniyas ka mam kẽem La? Bõe tɩ naama pa na n deeg n kõ-yẽ, n kõ maan-kʋʋd a Abiyatar, la tãnsoab a Zoab, a Seruya biiga?» A Salomo wẽena woto: «Bɩ Wẽnd bãg-m wẽnga la b leb n bãg n paase, sã n ka kũum la Adoniyas bao n kõ a menga, n gom wa a sẽn goma. Ne Wẽnd ninga sẽn vɩ la sẽn zĩndga maam m ba a Daviid zaoorẽ dũnna, la sẽn kãab naam maam ne m yagense, m wẽen ne Wẽnde, t'a Adoniyas na n kii rũnda bala.» Yaa a Zoyada biig, a Benaya, la dĩma yeel t'a tɩ kʋ-a. Yɩɩ woto la a Adoniyas maan yõore. Dĩma yeela maan-kʋʋd a Abiyatar: «Kẽng Anatot, f buud tẽngẽ, tɩ f toga ne kũum, la ka rũnna la m na n kʋ-f ye tɩ pĩnda f paam n tʋka Soaala-Wẽnd zooda kasetã, m ba a Daviid wakato la m ba sẽn wʋm toog ningã fo me yãend-a lame.» A Salomo yiisa a Abiyatar Soaala-Wẽnd maan-kʋʋdba sʋka. La woto b pidsa Wẽnd sẽn da kãab bũmb ninga a Eli, Silo. A Zoab wʋma kibarã; yẽ ra yi-la a Absalom poore n kẽe a Adoniyas; woto, a zoe n kẽe sɛka roogẽ, n bri maan-kugra yɩdba. B tɩ yeela dĩma a Salomo t'a Zoab kẽe sɛka roogẽ la a mobga maan-kugrã. A Salomo tʋmame tɩ b tɩ yeel-a: «Yaa bõe yĩnga la f zoe n tɩ mobg maan-kugrã?» T'a Zoab yeele: «M zoe yãmb rabeem n tɩ yõk Wẽnd sɛɛga.» A Salomo tʋma a Zoyada biig, a Benaya, t'a tɩ kʋ-a. A Benaya kẽnga sɛka roogẽ n yeel a Zoab: «Dĩma n kõt f noor, wa yi yɩnga.» A Zoab yeelame: «Ayo, yaa ka la m na n ki.» A Benaya tɩ wilgã dĩma: «A Zoab yeela woto, n le paas woto!» Dĩma leok-a lame: «Maan wa a sẽn yeele: kʋ-a la f mum-a. Woto f na zãag ne maam la m ba-roogã a Zoab sẽn daag zɩɩm ninga zaalem-zaalma taale. Wẽnd kɩtame t'a zɩɩm lɛɛg n mad a zugu t'a wẽe neb a yi sẽn yɩɩd yẽnda ne sõmblem, la a kʋ-b-la ne sʋʋga tɩ dĩm a Daviid ka bãng tiir ye. Yaa a Nɛr biig a Abnɛr, a Israyɛl tãnsoaba, la a Yetɛr biig a Amasa, a Zɩɩda tãnsoaba. Bɩ bãmb b yiib zɩɩm lɛɛg n daag a Zoab ne a buud zugu, zamaan ne zamaana. La Wẽnd na kɩt t'a Daviid ne a buudu, a naama la a zaoorã paam laafi, Wẽnd maasmẽ, beoog sẽn vẽeg fãa.» A Zoyada biig a Benaya kẽngame, a wẽ a Zoab n kʋ la b mum-a-la a sẽn so vẽenem ninga pʋga, we-kɛɛnga. Dĩma ninga a zĩigẽ a Zoyada biig, a Benaya; yẽ n lebg a tãb-biisa tãnsoaba. Maan-kʋʋd a Abiyatar zĩigẽ, a ninga maan-kʋʋd a Sadok. A Salomo kɩtame tɩ b bool a Simeyi n yeel-a: «Me f zak Zerizalɛɛm la zĩnd be la ra le zãag ne-a, n kẽn goabg bɩ rɩtg ye. Daar ninga f sẽn na n dʋʋg Sedrõ bokã, bãng tɩ f na n kiime. La dẽ yaa foo n daag f meng zɩɩm.» A Simeyi leoka dĩma: «Yaa neere, m na n maana wala m zu-soab, m dĩma, sẽn yeele.» A Simeyi paa Zerizalɛɛm. La sẽn maan yʋʋm a tã, a Simeyi yem-daad a yi n zoe n kẽng Gat dĩm a Maaka biig a Akis nengẽ. B waa n wilg-a lame t'a yemsa bee Gat. A Simeyi ninga a bõang gaare n ta Gat, a Akis nengẽ, n tɩ reega a yemse, n lɛɛg n wa. B wilga a Salomo t'a Simeyi yi Zerizalɛɛm n kẽng Gat la a lɛɛg n waame. Dĩma bool-a lame n yeel-a: «M da ka kɩt tɩ f wẽen ne Wẽnd, la m da ka wilg f vẽenega tɩ f sẽn kẽng zĩig ning fãa, tɩɩm ka ye, f na ki? Fo yeelame: ‹M sẽn wʋm bũmb ninga yaa sõmbo.› Bõe tɩ fo wẽen ne Wẽnd n pa yals f wẽenega zugu, la f reeg m sẽn da kõ f noor ningã?» Dĩma paasame: «F tẽra wẽng ning fãa f sẽn maan ne m ba, a Daviid. Ad yaa rẽ la Soaala-Wẽnd kɩt tɩ f wẽnema lɛɛg n dɩt-fo, la Soaala yaool n na n sõnga a Salomo tɩ dĩm a Daviid zaoora da luk a zĩigẽ badaar a ye.» Dĩma kõ-la a Zoyada biig a Benaya noor t'a kʋ-a. A yii ne-a, yɩnga, n wẽ-a n kʋ. Naama pãng paasa a Salomo nugẽ. A Salomo waa n lebga Ezipt naab rɛɛmba. A kẽe kãadem ne Ezipt dĩma bi-pugla, n tall-a n wa a Daviid na-tẽngẽ, n gũud a sẽn na n wa me na-yirã, n gũud wẽnd doogã la Zerizalɛɛm lal-gũbrã sã n me n baase. Maanda ra ket n kʋʋda yaare, tɩ b ra nan ka me roog Soaala-Wẽnd yĩng ye. A Salomo yam kẽe Naaba-Wẽnde. La woto a vɩɩnda wala a ba, a Daviid. Sã n ya ne maandã la wisdã, rẽ fãa ra ket n maanda kunkuba la tãmsa zutu la tɩɩsa sẽn gũmẽ. Dĩma kẽnga Gabaõ n na n tɩ kʋ maando tɩ be la tãmsa ra lug n yɩɩda. A Salomo sẽn kʋ maand be taa tusri. Gabaõ tẽnga, Soaala-Wẽnd lika a Salomo yʋngo, a zãmsdẽ, n yeel-a: «Wilg-ma! Bõe la m tõe n kõ-fo?» T'a Salomo leoke: «Yãmb maana neer wʋsgo ne m ba, a Daviid. Yẽ me modgame n kẽn yãmb taoore, ne pʋ-peelem, ne zemsgo, ne sũ-tɩrga. Yãmb nonglem ka zãag ne-a ye, la y sõngame t'a biig a ye dʋ a naam zaoore. N-ye! Soaala-Wẽnde, yãmb n kɩt tɩ m lebg dĩma n led m ba. La ade, mam ket n yaa yãaga, n ka mi naam dɩɩb ye. Yãmb yamba bee y buuda sʋka, la yaa buud sẽn labsa, al tɩ b pa tõe n sõd n bãng a sõor ye. Y tog n kõ-la y yamba yamvẽenem la sũ-tɩrga t'a bãng neer la wẽnga, n bake, tɩ buuda tõog n zã, tɩ buuda yaa bu-yalengo t'a zãab ya toogo.» A Salomo pʋʋsg kãnga taa Soaala-Wẽnd yam. Woto b yeel-a lame: «Fo sẽn kos woto wã, n ka kos yõ-woko, n ka kos arzɛka, n ka kos bɛɛba wãabo, f sẽn kos yamvẽenem la yẽesem, m kõt-f-la f sẽn kose: yamvẽenem, la yẽesem, wa ned ba a ye sẽn zɩ n paam, sẽn deng b fooma bɩ sẽn na n yaool n wa-b fo poorẽ. La f sẽn pa kos bũmb ninga, m kõt-f la rẽ fãa: arzɛka la ziiri, f vɩɩma tõre, la dĩm ba a ye sẽn na n wẽneg foo kõn zĩnd ye. La f sã n dɩk sor ning m sẽn wilg-fã, n deeg m noore la m sẽn yalsa fãa wala f ba a Daviid, m na kõ-f yõ-woko.» A Salomo nekame la a tẽega a sẽn zãmse. A leba Zerizalɛɛm, a tɩ yalsa zooda kaset taoore, a kʋʋ yũ-noog maando la laafi kosg maand, la a boola a poorẽ dãmba fãa tɩ b wa rɩ kibsa. Pʋg-yoaadb a yi n waa n tɩ yãend dĩma. Paga a ye yeelame: «Ade, m zu-soaba, maam ne pʋg kãnga da bee roog a ye; m doga m biiga, rẽ t'a bee ne maam. La mam sẽn doge tɩ maan da-yɩten-daare, yẽ me rogame. D da bee ne taaba, ned da ka paas tõnd ye, tõnd d yiib bala n da be roogẽ wã. Yʋng a ye, pʋg kãnga biiga kiime, a gãandame n bʋʋg-a. A yika ne yʋngã n dɩk m biiga m sɛɛgẽ, dẽ tɩ m ra gõe. Mam biiga la a rɩk n ning a yãoogẽ n yaool n lebs maam a bi-kɩɩngã. M sẽn yik tɩ m na n yẽsem m biiga, m mikame t'a kiime. Beoog sẽn vẽeg tɩ m maneg n gese, m yãeeme tɩ ka biig ning m sẽn doga ye.» Dẽ la pag a to wã yeel yã: «Pa sɩd ye! Bi-vɩɩga la mam biiga, bi-kɩɩnga la fo rẽnna.» Tɩ pag a to wã leoke: «Ka sɩd koe! Bi-kɩɩnga la fo biiga, bi-vɩɩga la mam biiga!» La b kaooga zabr ne taab dĩma taoore. Dĩma yeelame: «Yãoo yetame: ‹Mam biiga n vɩ wã, fo biigã n ki.› Tɩ yãoo yetẽ: ‹Pa sɩd ye, fo biig la bi-kɩɩngã, mam biig la vɩɩgã!› » Dĩma yeelame: «Wa-y ne sʋʋga!» La b talla sʋʋg n wa dĩma taoore, t'a paase: «Pasg-y bi-vɩɩgã n dɩk bogra a ye n kõ pag a ye, n dɩk bogr a to n kõ pag a to wã me.» Pag a ye la bi-vɩɩga weoog yõk yã t'a yeel dĩma: «Wẽnd na kõ y yõore, la y ra kʋ biiga ye, dɩk-y biigã n kɩs pag a to wã.» Pag a to wã yẽ da gomda woto: «B paasge, woto mam kõn soog-a, la fo me kõn soog-a ye.» Dĩma yeelame: «Da kʋ-y biiga ye, kɩs-y biigã pipi pagã, yaa yẽ la biiga ma.» A Israyɛl tõr wʋma dĩma sẽn kao bʋʋda to-to la b waooga dĩma. B yãeeme tɩ yaa yĩngr yam la a paam yã n kaood bʋʋdo. A Salomo dɩɩ naam Israyɛl tõre, Israyɛl ne Zɩɩda. Ad-a rĩunga taoor dãmba, a kug-zĩidba: A Azariyas, maan-kʋʋda la a Sadok biiga; a Elirɛf la a Ayiya, sɛb-gʋlsdba a Sisa kamba a Zozafat, koe-moanda la a Ayilud biiga; a Benaya, tãnsoaba, a Zoyada biiga; a Sadok ne a Abiyatar, maan-kʋʋdba; a Aziya, kombɛɛmba taoor soaba la a Natã biiga; a Zabud, maan-kʋʋd la dĩma sagenda, a Natã biiga; a Ayisar, sɩmand naaba; a Adoniram, zaka tʋʋm pʋɩta, a Abda biiga. Kombɛɛmb piig la a yi la a Salomo zĩndig Israyɛl tõre. Bãmb da wata ne dĩma la a zaka rãmb sẽn da tar bũmb ninga tʋʋmde. B ra geta rĩma yell yʋʋmda pʋgẽ, ned kam fãa ne a kiuugu. Ad-b yʋya: A Ur biiga, Efrayim tãmsa zut rãmb yĩnga; a Dekɛr biiga, Makas, Saalbim, Bɛt-Semɛs la Elõ-Bɛt-Ana rãmb yĩnga; a Arubot, a Esɛd biiga, Soko la Efɛr dãmb yĩnga, a Abinadab biiga, Dor tãmsa rãmb fãa yĩnga; yẽ ra yii kãadem ne a Tafat, a Salomo bi-pugla; a Baana, a Ayilud biiga, Taanak, Megido la Bɛt-Seã rãmb yĩnga. Bɛt Seã tɩ yega Sartã, Zizreyɛl tẽngre, al Abɛl-Meola n ta Yokneam. Galaad Ramot tẽng rao a Gebɛr biiga, a Manase biiga a Yayir pʋ-weesẽ dãmb yĩnga, Galaad tẽn-peelmẽ, n paas Argob rãmb yĩnga, Bazã tãmsa zutu; tẽn-bɛd pisoobe sẽn me lals n gũbg la sẽn tar kʋɩlens sẽn sogd ne zũud la bãeense. A Ayinadab, a Ido biiga, Maanayim rãmb yĩnga; A Ayimaas, Neftali rãmb yĩnga (yẽ me yii kãadem ne a Salomo bi-pugla, a Basmat). A Baana, a Usayi biiga, Asɛr la Bealot rãmb yĩnga; a Zozafat, a Paruwa biiga, Isakar dãmb yĩnga; a Simeyi, a Ela biiga, a Bẽnzame rãmb yĩnga; a Gebɛr, a Uri biiga, Galaad rãmb yĩnga, Amoritsa dĩm a Siõ soolma yĩnga, la Bazã dĩm a Og soolma yĩnga. Ned a to n le wa paas bãmb piig la a yiibã, Zɩɩda tẽn-peelma yĩnga. A Zɩɩda ne a Israyɛl neba da yaa ka tɛka wala mogr noorẽ bĩisri. B ra ka kongd sẽn na yũ la sẽn na n dɩ ye. Woto me b vɩɩma ra sakd-b lame. Sɩda, yaa dĩm dãmb wʋsg zugu la a Salomo da rɩt naam. A soolma yɛdga al Efrat kʋɩl kãsengã, n wat Filisti rãmb tẽnga, n tat Ezipt toaaga. Dĩm bãmb fãa da reegda a noore la b ra kɩta yõor yaoodo, n tãag a Salomo kaalem. Daar fãa ad-a Salomo sẽn da reegd a meng yĩng la sẽn vɩ-b ne yẽnda wã yĩnga: alkam pɛɛlg zom yaa bõeens pis-tã sẽn tõe n zɩlge. Alkam kɛgenga yaa bõeens pisoob sẽn tõe n zɩlge. N paas nag-wubds piiga, bãgr niis pisi, piis koabga, n le paas yãgse, walse, yĩsa, lad dãmb buudu sẽn tar kaam wʋsgo. A Salomo rĩunga ra yãagame n ta tẽns niyns sẽn be Efrat noorẽ, sẽn sɩng Tifsa n ta Gaza. Laafi da bee yẽ ne a yags sʋka. Zɩɩda ne Israyɛl neba vɩɩnda ne laafi, b bugsuntund la b kankams tẽngre, al Dã n ta Beerseba, a Salomo vɩɩma fãa pʋgẽ. A Salomo ra tara wiidi tus piig la a yiibu. Rota sẽn da me wiidi wã yĩnga da tõe n deega bãmb tus pis-naase; yaa wiidi sẽn tõe n vu bilim-bilm. Kombɛɛmba ra wat n kõta a Salomo, ned kam fãa ne a kiuugu, a meng la a zaka rãmb rɩɩbo. A ra ka basd tɩ bũmb paoog ned ba a ye. Sã n ya alkam kɛgenga la yamdã, rũmsa yĩnga, b ra tar-b lame n wat a Salomo sẽn be zĩig ninga, la wala a sẽn kõ noor ninga. Soaala kõ-la a Salomo bãngr la sɩlem yam. A Salomo yama sẽn da vɛɛsd n na n bãng bũmb niynsa sõor zema bĩisri sẽn sam mogr noore. A Salomo bãngr yɩɩga Yaang rãmba fãa rẽnna, a yɩɩga Ezipt rãmb fãa rẽnna. Ned ba a ye ka paam yamzulung wala a Salomo rẽnna ye. A yamvẽenem yɩɩga Ezrayitga a Etã rẽnna, n yɩɩg a Ema, a Kalkol la a Darda, a Maol kamba. A yʋʋra taa tẽnsa fãa sẽn gũbgã. A yiisa yelbũn tus a tã, la a yɩɩla yɩɩ tusri. A goma tɩɩs yelle; a goma tɩ-bɛd sẽn be Libã yelle, wala a sẽn gom tɩ-bõones sẽn lolemd lalse yelle. A goma rũms yelle, luiili yelle, wiis la kʋɩl-zẽed yelle. Neba yii zĩig zãnga. B dĩm dãmb n tʋm-b tɩ b wa kelg la b rɩ a Salomo bãngra kaseto, tɩ b ra wʋmame tɩ b kilsd-a zĩig zãnga. Tir dĩma, a Iram tʋma a sõgen-kamb a Salomo nengẽ a sẽn wʋm t'a lebga dĩma, a ba zĩigẽ. A Iram ne a Daviid da pĩnd n yaa zoodo. A Salomo taasa a Iram koe-kãnga: «Y paam n bãnga neere tɩ m ba, a Daviid, ka tõog n me roogo Soaala-Wẽnd waoogr yĩng ye. A zaba ne a bɛɛba, goabg la rɩtgo, n tãag Wẽnd sẽn na n kɩt t'a maan raood n tõog a bɛɛbã. Marsã, Soaala-Wẽnd kõ-m-la laafi, goabg la rɩtgo, tɩ zabr bɩ zabr bʋʋr ka le be maam ne m yak ba a ye sʋk ye. Woto wã m tagsa m na me roogo Soaala-Wẽnd waoogr yĩnga, wala b meng sẽn wilg m ba, a Daviid, n yeel-a: ‹Yaa fo biiga la m na zaoolg f zaoora zugu la yẽ n na n me roog m waoogr yĩnga.› Dẽ yĩnga, kɩt tɩ b kɛ Libã ra-sĩdma. M neba na n naaga fo neba. M na yao f neba sẽn tʋmd m yĩnga wala d sẽn na n sed ne taabã. Tõnd ka tar neb sẽn mi raad kɛɛbo wala Sidõ rãmb ye!» A Salomo koɛɛga sẽn ta a Iram, a sũur yɩɩ noog wʋsgo, t'a yeele: «Naaba-Wẽnd paam pẽgr dũnna b sẽn kõ a Daviid bi-sõngo t'a soog a bu-yalengã.» A Iram gʋlsa woto: «M wʋma y sẽn yeelã. M na pids y raabo ne ra-sĩdma, wala y sẽn date. M neba na n tall-b lame n sig mogrã, n yi be n wa ne b zĩig ning y sẽn na n wilgi. M na lood-b be n kõ yã. Mam sẽn dat wa m dolbo, yaa y sõng-m ne koodo, m zak yĩnga.» Woto a Iram kõ-la a Salomo ra-sĩdma wala a sẽn dat tɛka. A Salomo toola a Iram alkam; yaa bõeens tus pisi n zɩlg alkama n kẽng, yẽ ne a neba yĩnga, n paas oliv ka-yɩlgemde bõeens pisi sẽn tõe n zɩ. A Salomo ra kɩt-b la boto yʋʋmd-yʋʋmd fãa. Wẽnd kõ-la a Salomo yamvẽenem wala b sẽn da kãab-a. A Salomo ne a Iram kell n wʋma taab moore, n yẽs n zems taaba. A Salomo rɩka tʋʋm-tʋmdba. Israyɛl tõre, yaa neb tus pis-tã la a modg n kẽes-b tʋʋmna. A tʋm-b-la Libã. Kiuug fãa yaa neb tus piiga. B maanda kiuug a ye Libã, n maan kiis a yiib b tẽngẽ. A Adoniram n da ya tʋʋma taoor soaba. A Salomo da tara kug-zɩtb tus-pisopoe la kug-peesdb tus pis-nii, tãnga zugu. Tog n naagame n sõd kãsem-pʋgdsã, kombɛɛmba sẽn lʋɩɩs neba taoore b sõngr yĩnga, bãmb tus a tã la kobs-tã. Dĩma yeelame tɩ b vigs kug-bɛda, kug-neeba, sẽn na n tʋɩɩs Wẽnd doogã. Yaa kug sẽn peese. A Salomo ne a Iram tʋʋm-tʋmdba la Gebal dãmba peesa kugã la b kɛ raadã n tall-ba n wa wẽnd doog meeb zĩigẽ. Yʋʋm kobs-naase la pis-nii Ezipt yiib poore, a Salomo sẽn waa n dɩt a yʋʋmd a naas soab naam, Israyɛl tẽnga, kiuug a yiib soaba, Ziv kiuugu, Wẽnd dooga meeb sɩngame. Ad-y roog ning a Salomo sẽn me Soaala-Wẽnd yĩngã woglem da yaa kãntɩɩs pisoobe, a yalma pisi, a zãndlema pis-tã. Zãong la a me taoore, zãonga woglem yaa wẽnd dooga yalem, la a menga yalem yaa kãntɩɩs piiga. A ninga wẽnd dooga vẽ-yalemse, n maneg kud-bõonese n pɩk-pɩk wa gãmbre. A mee n dɩdga wẽnd dooga lalse, n gilgi, a sɩngre n taa a sɛtmẽ, n ta sõmblem pid sõmblem doogã; a meeme n yegl yɛsa, dot sẽn dogl taaba a tãab-tãabo. Tẽngr dotã yalem yaa kãntɩɩs a nu, rot niyns sẽn zao-b bãmba yalem yaa kãntɩɩs a yoobe, tɩ zugẽ dota ya kãntɩɩs a yopoe. Wẽnd dooga lalg sã n zẽkdẽ, a taglma ra woogdame. Rẽ me la rota sẽn doglem taaba yalem da ka a ye. Wẽnd dooga mee ne kug sẽn zoe n pees b zĩigẽ, woto wã meeba wakato b pa tol n wʋm zãar bɩ lar, bɩ kut bʋʋr ye. Sã n ya rot niyns sẽn me n yeglã, bãmb no-yɛnga ra bee wẽnd dooga yaang pẽkẽ. Dɩlla kẽeda pipi roogã tɩ yẽ pʋgẽ marsã la noor da bee n dʋʋd tẽnsʋk soabã, tɩ noor me le be be n dʋʋd a tãab soabã. A Salomo mee wẽnd doogã n sɛ, a paga a yĩngra ne ra-gils sẽn dɩgl n yegl taaba. Sã n ya rot niyns sẽn me n gilgã, roog fãa zãndlem da yaa kãntɩɩs a nu. Ra-sĩdma da roga lalsa zugu. Soaala-Wẽnd koɛɛg ta-la a Salomo, b yeelame: «Roog ning f sẽn metã, ad-f sã kẽn wa m noora sẽn date, f sã n deeg m sẽn wilgi, f sã n tũ m sẽn zãms-fo, m na pids m sẽn kãab-f bũmb ninga, la m sẽn kãab f ba, a Daviid. M na waa n zĩnd m buud a Israyɛl sʋka, m kõn bas m buud a Israyɛl ye.» A Salomo n sɩng wẽnd doogã la yẽ n baas-a. Pʋgẽ wã yaa ra-pegd sĩdma la b rɩk n ka n lud lalgã; sẽn sɩng tẽnga n tãag sugra ra-paadse, b kaa ra-pegdo. Rooga tẽngr gãnega tɩ-wogd ra-pegd sĩdma. Rooga yaangã, kãntɩɩs pisi wã fãa kaa ne ra-sĩdma, sẽn sɩng tẽngr n ta yĩngri. Be la b pasg ro-sõng mengã. Wẽnd dooga menga, ro-sõngã sẽn pasg a soab taoorã, ra yaa kãntɩɩs pis-naase. Ra-sĩdma la b ra ning a pʋgẽ. Raada ra maneg n peesame n gʋl kitrizĩgninsi ne puud sẽn weke. Ra-pegd n da lud kuga fãa. A Salomo manega Sõmblem pid sõmblem doogã, do-kãsenga pʋga n ning zood kaseta be. Sõmblem pid Sõmblem dooga woglem yaa kãntɩɩs pisi, a yalma me boto, a zãndlem me boto, a tablg-a-la ne sãnem. B da rɩgla a taoore maan-kugrã sẽn maneg n tablg ne ra-kegemse. Dooga pʋg zãng fãa ra yaa sãnem sẽn yɩlge. Do-sõnga noorẽ, b ninga sãnem yãndo. Rooga pʋg fãa ra bolga sãnem; maan-kugr ninga sẽn da na n kẽes a pʋgẽ wã tablga ne sãnem. Pʋs n yaa wẽnd dooga zãng zãnga la a pɛ ne sãnem. Maan-kugr ninga sẽn na n dɩgl kuga walsa sẽn be roog ninga noorã, yẽ me ra pɛɛ ne sãnem. Sõmblem dooga pʋga a ninga malɛgse, sẽn pees ne oliv raado. B zãndlema yaa kãntɩɩs piiga. Pɩgsr a ye woglem yaa kãntɩɩs a nu, pɩgsr a to wã me boto, tɩ naag taaba n ya kãntɩɩs piiga. Malɛk a yiib soaba me pɩgsa yaa kãntɩɩs piiga. B yiiba fãa ra wẽnda taaba la b bedrema me taa taaba. Malɛk fãa zãndlem yaa kãntɩɩs piiga. Malɛgs a yiiba da rɩgla Sõmblem dooga tẽnsʋka. B ra yɛdga b pɩgsã. Malɛk a ye pɩgsa ra sɩɩsda kɩreng a ye lalgã t'a to wã rẽnd sɩɩsd lalg a to wã. B pɩgs a taaba ra tẽegame n sɩɩsd taab sʋka. B manega malɛgsã n bolg ne sãnem. Rooga lals fãa, pʋgẽ la yɩnga, gʋla malɛgs nense n gilg, n paas komse la tɩɩs vãado la puud sẽn weke. Wẽnd dooga tẽngr gãnega ne ra-pegdo la fãa bolga ne sãnem, pʋgẽ doogã wala yɩng soabã. Sõmblem dooga kʋɩlengã maana ne oliviye raoogo. Kʋɩlenga boka a sʋka, n pakd goabg la rɩtgo. Ra-luga la yĩngr rigno-koaka ra ninga maaba a nu. Kʋɩlensa sẽn lakd goabg la rɩtgã la sẽn pees ne oliviye raoogã, ra gʋla malɛgs nense, tɩɩs vãado la puud sẽn weke la b bolg-b la ne sãnem; b bolga malɛgsa la tɩɩsa vãada me ne sãnem. Yaa boto me la b maan ne maan-kugra rooga kʋɩlense. Kʋɩlensa ra-luga la yĩngr rigno-koaka ra yaa oliviye raoogo la b ra ninga maaba a naase. Kʋɩlens kãens raada ra ka pees ne oliviye raad ye, yaa tɩɩg a to. B ra zao sãnga a yiib sẽn maneg n dõog zutu, n pakd goabg la rɩtgo. B gʋla bãmb me zugu malɛgs nense, tɩɩs vãado, la puud sẽn weke, la sẽn bolg ne sãnem. Pʋgẽ zaka lals mee ne kug sẽn dogl taab naoor a tã n baas ne ra-pegd tagdo. Yaa a naama yʋʋmd a naas soaba, Ziv kiuugu, la a Salomo sɩng wẽnd doogã. Yaa a naama yʋʋmd piig la a ye soaba, Bul kiuugu, kiuug a nii soaba la a Salomo baas wẽnd doogã, wala a sẽn da tog n yɩ la b sẽn da rat t'a yɩ a soaba. Yaa yʋʋm a yopoe la a Salomo me roogã. Sã n yaa a meng roogã, yaa yʋʋm piig la a tãabo la a Salomo me-a. A mee roogo n pʋd-a tɩ Libã googo. Kãntɩɩs koabg la a woglem, a yalem yaa pis-nu, a zãndlem pis-tã. Rooga ra boondame tɩ Libã googo tɩ raado, ra-sĩdma wa kʋgse, n da tedg taab rũnus a naase, tɩ ra-gilsi ne ra-peg tagd palg b zutu. Dooga yĩngr da paga ne ra-sĩdma. Ra-kãens ra sẽba ne ra-paadsa pis-naas la a nu sẽn pɩkã, rũnug fãa bãmb piig la a nu n da zao ra-lug gils zutu. Vẽ wã ra tonga rũnug a tãabo. Rũnug fãa võor me ra tota a to. Kʋɩlensa ne b ra-lugsã ra yaa mags-magse la bãmb me ra tota taab zĩis a tãabo. A Salomo mee zãong ning sẽn boond tɩ ra gils zãongo. A woglem yaa kãntɩɩs pis-nu, a yalem kãntɩɩs pis-tã. A ra bee Libã googa taoore n tar bũmb sẽn kokd wĩndga. A Salomo mee zãong a to, zaoora yĩnga, n kaood bʋʋda be, tɩ b boond tɩ bʋʋd zãongo. A pʋga ra kaa ra-pegd sĩdma, a tẽngr n ta a yĩngri ra-paadsã. A mee a meng zaka kɩreng a to, zaoora zãong poorẽ, la meeba ra wẽnda taaba. A le mee roog a to sẽn wẽnd yẽnda, Ezipt dĩma bi-pugla yĩnga, t'a ra yii kãadem ne Ezipt dĩma bi-pugla. Ro-bãmb fãa ra mee ne ra-sĩdma sẽn pees n zems taaba, pʋgẽ la poore. Bãmb bal la b tall n me roogã, a tẽngre n ta a yĩngri. Kug niyns sẽn tʋɩ-b tẽngã ra yaa bɛda: kãntɩɩs piiga, bɩ kãntɩɩs a nii. B tʋɩɩsa rotã ne kug sẽn pees rẽnd yĩnga n paas ra-sĩdma. Zag-yalenga n da mee n gilg n sege ne kug peesem sẽn dogl taab rũnus a tãabo la sẽn baas ne ra-pegd-tagdo. Wẽnd dooga zaka la a zãonga me mee boto. A Salomo kosame n na dɩk a tʋʋmẽ wã Tir tẽng dao a Iram. A yaa Neftali pʋg-kõor a ye biiga. A ba wã da yaa Tir neda. A ra yaa yõaka. A ra miime la a ra tõeeme n tʋm neere zũud tʋʋmd fãa. A waa a Salomo nengẽ, la yẽ n tʋm zũuda tʋʋm fãa. Yẽ n dõog zũud ra-lug bɛd a yiibã. Ra-luk fãa woglem da yaa kãntɩɩs piig la a nii, la gĩsg sẽn ta kãntɩɩs piig la a yi n da mobgd-a n sege. Ra-luk a to wã me ya boto. A baoo zũudu n dõog sẽn na n baas ra-luga zutã, la a ye fãa zãndlem yaa kãntɩɩs a nu. A maana fan-teed buud toor-toore ne zũudu, wa kut gãmbse, wa puud pãneng n kʋk a sẽn dõog n dogl ra-luga zutã, bãmb b yopoe. Zũud ra-luk fãa paama a rẽnna. A rõoga fan-teedo, n mams tɩ-biis wa pooloomse, n sog-b rũnus a yiibu n gilg bũmb ning sẽn na n dogl ra-luga zutã. Ra-luk fãa paama a rẽnna. Sã n ya zãongẽ ra-lug bɛdã, bũmb ning sẽn na n dogl b zutã zãndlem yaa kãntɩɩs a naase, la b ra wẽnda lɩɩn-puugu. Sẽn na n dogl ra-lug bɛda zuta tẽngre, gãmbsã la pooloomsa kobs-yi wã tẽngre, maabre n da tʋʋg n gilgi. Yaa wẽnd dooga zãonga taoore la b yals zũud ra-lugã. B yalsa rɩtg soabã n pʋd-a t'a Yakẽ, n yals goabg soabã n pʋd-a t'a Boaz: Wẽnd n wat ne keglem la Wẽnd la pãnga. Zũud ra-luga tʋʋmde, a Iram tõog n baas-a-la neere. A Iram maana ko-sĩnga. A rõog-a-la bedr-bedre ne zũudu; a maan-a-la gilga. A sɛɛga yaa kãntɩɩs piiga. A zãndlem yaa kãntɩɩs a nu. Gĩsg sẽn ta kãntɩɩs pis-tã n da tõe n mobg a lʋgrã n sege. Sĩnga noora tẽngre, n gilgi, b ningame n na n paas a neerem, bũmb wa pooloomse. Kãntɩɩg fãa yaa bãmb pisi. B ning-b-la rũnus a yiibu la b ra naagame n dõog ne ko-sĩngã rõog yɛnga. Sĩnga ra doga zũud niis piig la a yiib zugu. Lols a tãab neng teesa goabga; a tãab neng teesa nin-taoore, t'a tãab tees rɩtgo, t'a tãab tees yaanga. Sĩnga ra zao b zugu la b seesa ra teesa pʋgẽ. Sĩnga taglem yaa nug pʋg yalem la a noor da kõoga wa laag rẽnna, ne lɩɩns puudu. A ra tõe n deega ko-yʋy tus a yiibu. A Iram maana bilim-bilm bõonese ne zũudu. Bilim-bilm fãa woglem yaa kãntɩɩs a naase, a yalem kãntɩɩs a naase, a zãndlem kãntɩɩs a tãabo. B ra kud-b-la woto: bilim-bilma yaaga ra wʋga ne zũud sẽn ya paklse n ka yalem ye la yɩɩ woto a tẽngr n wat a yĩngri, n maneg n sẽbg ne kud-tagd a naase. Bilim-bilma ra ninga fan-teedo: bõnyẽese, lolse, la malɛgse. Yĩngrã, bõnyẽesa la lolsa sẽn tek zĩig ningã, b tablga pãnega, tɩɩs vãad la puudu, tɩ b luundẽ. Zũud gʋl a naase n da be bilim-bilm fãa tẽngre. B paasa gʋla sẽn tuiid zĩig ninga pãnga la rẽ fãa naagame n dõog wakat yɛnga. Bãeens niyns Sẽn paasd pãnga ninga sĩnga tẽngre, n welg ne fan-teeda sẽn dõog n naagã. Bilim-bilma yĩngrã ra kɩbga no-gilga. Noora ra zẽka sẽn ta kãntɩɩga ne bãeensa sẽn pɩʋʋmd taab tẽngrã la ko-sĩng la b wat n sagl a pʋgẽ. Noora yalma yaa kãntɩɩg la pʋɩ-sʋk gĩsg n gilgda n sege. Sĩnga sẽn da sẽgdg zĩig ninga da ka le ya gilg a zugẽ wã ye, lebga maka, la b ra manegame n gʋl bõn-neeba tɩ sakd gesgo. Gʋl a naasa ra tuii kud taokã sẽn be tẽngrã. Gĩsg ning sẽn tõe n gilg gʋlã n sege tata kãntɩɩg la pʋɩ-sʋka. Gʋla ra kuda wa bilim-bilm dẽnna. Kud-bɩlgemda sẽn zãad gʋlã, gʋla nao-beongã, gʋla tẽnsʋk bokã, a tẽnsʋk bãn-dibli wã, fãa ra naag n dõoga rõog yɛnga. Ko-sĩnga sẽn da zao bãeens a naas niyns sẽn pɩʋʋmd-b b taab tẽngrã ra naagame n dõog rõog yɛnga. Bilim-bilma yĩngrã, b ra gõda bãng sẽn ta kãntɩɩg pʋɩ-sʋka n maan gãtga. Gãtga maneg n soga ne tẽngr bãn-tagdã. Ko-sĩnga zugu, gãtsa la tẽngr bãeensa zugu, b ra kɩɩsa ne kɩtga, n gilgi, malɛgse, bõnyẽese, koms vãado; tɩɩs vãad ne puud pãnega la b rõog n gilgi. Yaa woto la a Iram kud bilim-bilm piigã. B fãa rõoga rõog yɛnga, b bedrema ra taa taaba, la b ra wẽnda taaba. A Iram maana zũud sĩms piiga. A ye fãa da reegda ko-yʋy pis-naase, a ye fãa da magda kãntɩɩs a naase. Bilim-bilm fãa da tara a ko-sĩnga. A yalsa bilim-bilm a nu wẽnd dooga goabga, n ning a nu rɩtgo. Sã n ya ne mogrã (ko-sĩng bedrã), yaa wẽnd dooga nug rɩtg la b yals yẽnda, n tees yaang bilfu. A Iram sẽn yõg yõg-laase, zɩ-mesdem laase la kardo, a baasa tʋʋmd ning fãa a Salomo sẽn da yet t'a tʋm a yĩng wẽnd dooga pʋgẽ. Ad teeda sõadga: A yõga zũud-ra-lug bɛd a yiibã, n paas sẽn dog b zugẽ wã, gãms a yiibã sẽn mobg ra-lug bɛda zug sʋka, kitrizĩgnis kobs-naasã, sẽn da sog gãmsa, rũnus a yiibu, ra-luga sɛtmẽ. A yõga bilim-bilm piiga la sĩms piigã b sẽn da zɩtã, sĩn-kãseng a ye wã ne a lols piig la a yiibã; tompɛglma laase, zɩ-mesdma laase, kardã la ted a taaba sẽn kella fãa. A Iram sẽn maan bũmb ning a Salomo yĩng wẽnd dooga pʋga da yaa zũud sẽn maneg n duugi. Yaa Zʋrdẽ sɛɛgẽ la a rõog teedã, Sukot ne Sartã sʋka. Yagd da ka tuud n kong be sẽn na n maan teeda gãag-lung ye. Teeda fãa wala b zĩigẽ. Teeda ra labsame, b pa tõog n geelg zũudã b sẽn dɩk n tʋma zɩslem ye. A Salomo kɩtame tɩ b maan wẽnd dooga pʋg teeda fãa, sãnem maan-kugrã la te-roagendgã, Soaala-Wẽnd bura yĩnga. Yẽ me yaa sãnem. Fitils piig la b rõog ne sãnem; sõmblem dooga yĩnga, a nu rɩtgo, a nu goabga. Le paasa puudã, fitilsã, yɩʋʋda sẽn bolg sãnema, la-bõonesã, wõrsdsã, zɩ-mesdma laase, yõg laasã, wisda laase sẽn dõog ne sãnem menga, kut niyns sẽn be kʋɩlensa rĩirẽ, sõmblem dooga la maanda rooga rĩirẽ. Tʋʋm niyns fãa a Salomo sẽn kɩt tɩ b maan wẽnd dooga yĩnga sẽn waa n baase, a waa ne a ba, a Daviid, sẽn da kõ Soaala-Wẽnd teed niynsã: wanzurfã, sãnema, yõg-laasã, la a ning-b la wẽnd doogẽ, wa Soaala-Wẽnd arzɛka. A Salomo boola a sɛɛgẽ, Zerizalɛɛm, Israyɛl nin-kẽemsã, sagsa kãsem-dãmba, zagsa kãsem-dãmba tɩ b tɩ yiis kuga walsa koglg n wa ne-a Siõ, a Daviid na-tẽnga. Israyɛl nin-kẽemsa fãa tigma taab a Salomo zakẽ, Etanim kiuugu, kiuug a yopoe soaba, kibs raare. La Israyɛl nin-kẽemsa sẽn ta, maan-kʋʋdba tʋka kuga walsa koglgã. B tall-a lame n dʋʋs Siõ. Sɛka roogo, la te-sõma wã fãa sẽn da be a pʋgẽ wã me tall n waa Siõ. Tʋkdba yɩɩ maan-kʋʋdba ne b sõangdba. Dĩm a Salomo ne Israyɛl neba sẽn da tigim ne yẽnda, zood kaseta taoore, da tara maanda kʋʋbo, rũm bɛd la rũm bõonese la b sõora ka tõog n sõd lɛlɛ. Maan-kʋʋdba kẽesa koglga a zĩigẽ, sõmblem dooga pʋga, malɛgsa pɩgsa tẽngre. Malɛgsa ra tẽega b pɩgsa zĩig ning a sẽn da tog n diglẽ; malɛgsa ra yɛdga b pɩgsa wa maasem tɩɩga, koglga ne a ra-tuiidsa zugu. Raada ra wogmame. F sã n da be maanda kʋʋb roogẽ, f ra ne-b lame, f sã n yɛs zĩig ning sẽn be sõmblem dooga taoore. Ra ka tõe n zĩnd yɩng n yãend-b ye. B keta be ne rũnna. Bũmb da ka be koglga pʋga sã n ka kuga wals a yiibã. Yaa a Moyiiz n da sagl-b be, Orɛb tãnga, Soaala-Wẽnd sẽn waa n yõg zood ne Israyɛl kamba, Ezipt yiiba wakato. Maan-kʋʋdba sẽn yi wẽnd dooga pʋg n sɛ, la sawadg sẽn waa n deeg zĩig n yãmbe. Maan-kʋʋdba ka le tõog n maan bũmb sawadga yĩnga, tɩ Wẽnd zɩɩra ra pida wẽnd doogã. T'a Salomo na n yeele: «Naaba-Wẽnd yeelame tɩ b rat n paa likẽ! Ne rẽ fãa, bãng-y tɩ yaa yãmb yĩng la m me ro-kãnga. Yaa na-yir la m me yã tɩ y zĩnd a pʋgẽ zamaan ne zamaana.» A Salomo wẽnemdame n ning a Israyɛl zãma wã sẽn yɛs yĩngra barka. A yeelame: «A Israyɛl Wẽnnaama paam barka! Bãmb n yaag b noore n togs m ba, a Daviid, la bãmb nug tʋmame n pids kãabg kãnga: ‹M sẽn yiis m buud a Israyɛl Ezipt tẽng tɛka, m pa bao tẽng a Israyɛl tẽnsa sʋka n na n maan m na-tẽng ye, m pa yet tɩ b me roog n kõ-m tɩ m deegd y waoogr a pʋgẽ ye. A Daviid bal la m yãk t'a ges m buud a Israyɛl yelle.› M ba a Daviid da tʋlga ne a sũur fãa n me roogo Wẽnd yĩnga, Israyɛl Wẽnda yĩnga. La Soaala leok-a lame: ‹F sẽn tʋlg n na n me roog n kõ-ma, f maana neere. La ade, ka foom n na n me rooga ye, yaa f meng biig n na n me roogã n kõ-ma.› Soaala pidsa b sẽn da kãabe. Woto m leda m ba, a Daviid, la m deega Israyɛl naam wala Soaala sẽn da kãabe la m mee roogo Wẽnd yĩnga, a Israyɛl Wẽnda waoogr yĩnga. M yãka zĩig n bĩng kuga walsa koglgo; yẽ yaa zood kaseto, zood ning b sẽn yõg ne y yaab rãmba, b sẽn wa n yi Ezipt tẽnga, kaseto.» A Salomo yalsa Soaala maan-kugrã la zãma wã taoore, a zẽka a nus yĩngri, n yeele: «Soaala, Israyɛl Wẽnnaam, yãmb pa tar to yĩngr bɩ tẽng zug ka ye. Yãmb pa basd y zood t'a sãam ye, yãmb yam pa yit y yemse sẽn kẽnd tɩrg y taoor ye. Yãmb pidsa y sẽn da kãab m ba, y yamba a Daviid. Y sẽn yiis y noorẽ, y nug pãng taas-a-la rũnna, wa d fãa sẽn ne wã. La marsã, Soaala, Israyɛl Wẽnnaam, pids-y kãabg ning me y sẽn kãab m ba, a Daviid, tɩ yãmb n da yeel-a: ‹F kõn kong biig sẽn na n zĩnd m taoor a Israyɛl naama zaoor zugu, f kamba sã n gũusi n kẽn tɩrga m taoore wa fo meng sẽn kẽne.› Dɩlla, Soaala, Israyɛl Wẽnnaam, kɩt-y tɩ y sẽn yeel m ba, a Daviid, pids zãnga. La m kotame n sok n gese Wẽnd sã n sɩd tõee n zĩnda ninsaalb sʋk tẽng zug ka? Yĩngr saasa meng yaool n ka tõe n deeg yãmb ye, m kõn gom do-kãnga m sẽn me y yĩnga ye. Kelg-y y yamba pʋʋsg neere, Soaala-Wẽnde, tɩ rũnna y yamba wa-la y pʋʋsgo. Ypk-y y nin n ges ro-kãnga, wĩndg la yʋngo, n ges roog ning y sẽn yeele: ‹Ka n na n yɩ m pẽgr zĩiga!› Bɩ y kelg y yamba sẽn pʋʋsd yãmb a pʋgẽ. Kelg-y y yamba la y neba pʋʋsgo b sã n wa ka. Zĩnd-y y sẽn beẽ wã, zĩnd-y yĩngri n kelge la y maan sugri. Ned sã n beeg a to tɩ bʋʋda rãmb yet tɩ b wa wẽnd dooga pʋga la b kãab taab beed maan-kugra taoore, bɩ y zĩnd yĩngri n kelge. Kao-y y yemsa bʋʋdo, kɩt-y tɩ nin-wẽnga bãng t'a kongame n deeg a sɩbgre, tɩ nin-sõnga dɩ a pʋ-peelem yõodo. Y buud a Israyɛl sã n beeg yãmb n kong raood bɛɛba taoore, a sã n lɛɛg n wa n pẽg y yʋʋre, a sã n lɛɛg n wa yõk y sɛɛga wẽnd do-kãnga pʋga, zĩnd-y yĩngri n kelge, kõ-y buuda Israyɛl sugri n le tall-a n wa tẽng ning y sẽn kõ a yaab rãmba. Buuda sã n beeg yãmb tɩ saag pag n ka le niida, a sã n wa zĩ-kãnga n pʋʋs yã la a pẽg y yʋʋre, la a tuub a yel-wẽna, a sẽn deeg sɩbgre yĩnga, zĩnd y yĩngri n kelge, la y kõ y yambã la y buud a Israyɛl sugri, la y wilga so-sõng t'a rɩke, la y sik y saag tẽng ning y sẽn kõ y buuda tɩ yaa a pʋɩɩre. Kom la tẽn-kũum, wãoongo la gãnem sã n lʋɩ tẽnga, sʋʋr la kalwaare, sã n lʋɩ tẽngã, bɛɛb sã n wẽe a gũbri, bãag bɩ yell a to sã n pak-a, sẽn ya bũmb ning fãa yĩng la y buud a Israyɛl biig pʋʋsd la a yõkd y sɛɛga, a sã n wa bãng yell ning sẽn pak-a n tees do-kãnga n zẽk a nugu, bɩ yãmb zĩnd yĩngri, y sẽn be zĩig ningã, n kõ sugri, la y lebs ned kam fãa wala a manesem sẽn tog ne, tɩ yãmb mii sẽn be ninsaal sũurẽ. La woto, b na zoe y nifu, b vɩɩma fãa pʋgẽ, b ba rãmb tẽngẽ. Ba sãan meng sẽn ka kĩ ne yãmb buuda Israyɛl, sã n yi tẽn-zãorgẽ n wa y waoogre, tɩ sẽn ya zĩig ning fãa b na wʋm tɩ b gomd y yelle, n gomd y kanga la y nuga pãnga yelle, a sã n kẽ ro-kãnga n pʋʋse, zĩnd-y yĩngri, y sẽn be zĩig ningã, n deeg sãana kosgo la woto tẽng zug rãmba fãa na bãng y yʋʋre la wala y buud a Israyɛl, b na zoe rabeem la b na bãng tɩ yaa m sẽn me roog ninga pʋga la b waoogd y yʋʋre. Y kamba sã n dabd zabre, la b rɩka sor ning yãmb sẽn wilg-bã, b sã n wẽnemd b neng n tees yãmb b Soaala, n tees tẽng ning y sẽn yãkã la roog ning m sẽn me y yʋʋra kilsga yĩngã, zĩnd-y yĩngr n kelg b pʋʋsgo la y reeg b kosgo tɩ ned da maan-b pãng ye. B sã n beeg yãmba, tɩ ned ka be n ka beegdẽ ye, y sũur sã n wa kãbd ne-ba, tɩ y bas-ba b bɛɛba nusẽ tɩ b tall-ba n loog pa-weere, tẽn-zãorgẽ bɩ tẽng sẽn pẽ, b sã n zĩnd be n kẽ b sũurẽ n tuubi la b pʋʋs yãmba b bɛɛba tẽngẽ, n yetẽ: ‹Tõnd beegame, tõnd mana wẽnga, d maana kegre,› b sa n lɛɛg n wa kẽ yãmb ne b sũuri la b yam, b yembda tẽngẽ, b sã n wẽnemd b nense n tees tẽng ning y sẽn kãab b ba rãmba, n tees tẽng ning y sẽn yãke, n tees wẽnd doogã m sẽn me y waoogr yĩngã, zĩnd-y yĩngr, y sẽn be zĩig ningã n kelg b pʋʋsgo la b fĩinigu, tɩ ned da maan-b pãng ye. Kõ-y y kamba sugri, tɩ b beega yãmba, tɩ b zẽka b zug ne yãmba, kõ-y b bɛɛba sũ-maasem, tɩ b zoe b nimbãanega, tɩ b yaa y buudu, la y pʋɩɩre, bãmb la yãmb sẽn yiis Ezipt, tẽng ninga tʋʋlem sẽn tõe n yẽneg kutu. Ypk-y y nini n ges y yamba ne y buud, a Israyɛl sẽn pʋʋsde, yoog-y y tʋba n kelg b sẽn na n bool-y wakat ning fãa. Yãmb n welg-b toore tɩ b yɩ y pʋɩɩre, buud a taab sʋka, wala y sẽn togs ne y yamba, a Moyiiz, noore, y sẽn waa n yiis d ba rãmba Ezipt tẽnga, Soaala-Wẽnde!» A Salomo sẽn gome la a taas Wẽnd a pʋʋsg n baase, a yika a sẽn da yĩg zĩig ningã, maan-kugra taoore, n tẽeg a nus yĩngri. A yalsa yĩngri, n ning a Israyɛl zãma wã barka ne koe-kãsenga: «Soaala-Wẽnd paam barka, bãmb sẽn kõ b buud, a Israyɛl, laafi tẽnga wala b sẽn da kãab-a. Gom noodã b sẽn yiis ne a Moyiiz noora, ba a ye ka pa n ka pids ye. D Soaala-Wẽnnaama paa ne-do, wala b sẽn pa ne d ba rãmba, la b ra bas-do, b da bas-d kɛɛng ye. B wẽnemd d sũya n tees b menga, tɩ d tũ b sorã la d deeg b noorã, b saglsã b sẽn zãms d ba rãmba. Wẽnd na kɩt tɩ koees niyns fãa m sẽn taas Soaala pa b pʋtẽerẽ wĩndg la yʋngo, tɩ b zã maam b yamba la b buud, a Israyɛl, wala b sẽn tog ne, beoog fãa ne a noore. Woto dũni wã fãa na bãng tɩ Soaala bal la Wẽnde la a to ka be ye, la yãmb me na rɩk y sũur n kõ Wẽnnaam y Soaala la y reeg b noya la b sẽn yalse wala y sẽn maand rũnna.» A Salomo ne a Israyɛl kʋʋ maand Soaala taoore. A Salomo kʋʋ laafi kosg maando. Yɩɩ rũm bɛd tus pisi la a yi, rũm bõones tus koabg la pisi. Yɩɩ woto la a Salomo ne a Israyɛl maan Soaala-Wẽnd yi-kẽer kibsa. Badaare dĩma welga toore wẽnd dooga taoor zakã la yaa zag kãng sʋk la a kʋ yũ-noog maoongo la a kõ kũuna la laafi kosg maanda nem-kaama tɩ zũud maan-kugra ra paooda ne a reeg yũ-noog maoongã la kũuna n paas laafi kosga maand nem-kaam. Yɩɩ kiuug a yopoe soaba la a Salomo naag ne a Israyɛl zãng n maan kibsã. Yɩɩ zãma kãseng sẽn yi al Lebo-Amat la al Ezipt kʋɩl-bɛɛga. Dasem a yopoe sẽn pid zãnga, b paa Soaala taoore. Daar a nii soaba a Salomo sẽega nebã. Bãmb me pʋʋsa dĩma, la ned kam fãa leba a yiri. Yɩɩ kaasgo tɛka la b sũur yɩɩ noogo ne Wẽnd sẽn maan ne b tʋʋm-tʋmd a Daviid la buud a Israyɛl. A Salomo sẽn me wẽnd doogã, a zakã la a sẽn tʋlg fãa, n sɛ, Soaala-Wẽnd lika a Salomo, naoor a yiib soaba, wala b sẽn da lik-a Gabaõ tẽnga. Soaala yeel-a lame: «M wʋma f sẽn pʋʋs n kos-m bũmb ninga. F sẽn me roog ning n kõ-ma m deeg-a lame n dat n puk a pʋgẽ tɩ m be ne yãmb daar fãa. M nin la m sũur na n paa ne-a, wakat buud fãa, m sẽn nong yãmba yĩnga. Sã n ya foo, ad-f sã n kẽn wa f ba a Daviid, ne sũ-tɩrga, ne pʋ-peelem, n deeg m noya la m sẽn yals fãa, m na kɩt tɩ f rɩ naam a Israyɛl zugu, wala m sẽn kãab f ba, a Daviid, m sẽn waa n yeel-a: ‹F kõn tol n kong biig sẽn na n zaoond a Israyɛl naama zaoor ye.› La yãmb bɩ y kamba sã n wa bas maam, y sã n ka reeg noya la saglsã m sẽn kõ yãmbã, y sã n tɩ pʋg wẽn-naandsã n waoog-ba, m na yiis a Israyɛl m sẽn tɩ kẽes-a tẽng ningã, m na yi n bas doog ning m sẽn kẽes m mengã, la a Israyɛl na lebg a bɛɛb yelbũndi la b laado dũni wã fãa pʋgẽ. Ned ning fãa sẽn na n kolg rooga sẽn me woto wã na n yɛɛsame la a na n yeelame: ‹Ya bõe yĩng la Soaala-Wẽnd maan woto ne b tẽnga la b roogã?› La b na n leokame: ‹Yaa b sẽn bas Wẽnnaam, b Soaala, sẽn yiis b ba rãmba Ezipt tẽnga, n yaool n tɩ kẽ wẽn-naandse, n pʋg-ba la b waoog-ba; yaa rẽ yĩng la Soaala tool-b yel-beed kãensã.› » Yaa yʋʋm pisi pʋgẽ la a Salomo me wẽnd doogã ne a meng yiri. A Iram, Tir naabã, sẽn da wa ne ra-sĩdma, n wa ne sãnem, wala a sẽn dat tɛka, kosa a Salomo t'a kõ-a tẽns pisi Galile tẽn-peelmẽ. A Iram yii Tir n wa n na n kaag tẽns niyns a Salomo sẽn kõ-a wã la b pa ta a yam ye. A yeelame: «Yaa bõe tẽn yood la f sẽn kõ maama, m saam-biiga?» Yaa rẽ yĩng la, ba ne rũnna, b boonda tẽn kãense tɩ Kabul tẽnse, zĩ yood tẽnse. A Iram kõo dĩma Salomo sãnem gil sẽn ta neb koabg la pisopoe la a nu zɩɩbo. Ad-a Salomo sẽn maan bũmb ning n paam tʋʋm-tʋmdba n tõog n me wẽnd doogã, a meng yiri, Milo, Zerizalɛɛm lal-gũbrã, Asor, Megido, la Gezɛr. Sã n ya Gezɛr, ad-y yaa Ezipt naab n waa n zab n deeg Gezɛr, n yõog a bugum, n kʋ Kanaã rãmba sẽn da be a pʋgẽ, n dɩka n kõ a bi-pugl a sẽn yiis kãadem ne a Salomo menga. Yaa rẽ la a Salomo maneg n me Gezɛr la Bɛt-Orõ sẽn be bãoog noore. N paas Baalat, la Tamar sẽn be Zɩɩda we-raoogẽ. A Salomo le mee tẽns kẽere, teed bĩngr yĩnga, n paas tãb-biisi, bilim-bilm, la wed-dʋʋdba yĩnga. A saa n mee meeb a taab wala a sẽn dat Zerizalɛɛm, Libã la a sẽn da so tẽns niynsa pʋgẽ. Ad-y yaa neb sẽn pa kĩ ne a Israyɛl la sẽn da kell n pa ne bãmba, wa Amonitsã, Ititsã, Perizitsã, Ivitsã la Zebuze rãmba, ad-y yaa bãmb yagense sẽn dog bãmb poorẽ t'a Israyɛl bas n pa kʋ wã, yaa bãmb la a Salomo wʋk n kẽes a tʋʋma. La ket n yaa boto ne rũnna. A ka kẽes Israyɛl kamba tʋʋmd ye. Bãmb n da ya tãb-biisã, a sõgen-kamba, a kug-zĩidba, a wed-kɩɩm dãmba, a bilim-bilma la a wed-dʋʋdba nanamse. Sẽn da get-ba a Salomo tʋʋma da taa kobs-nu la pis-nu. Yaa Ezipt dĩma bi-puglã sẽn yi Siõ na-zakã n wa kẽ ro-paalã a Salomo sẽn me a yĩnga poore, la b yaool n pids bok ning sẽn da be wẽnd dooga la a Daviid zaka sʋka, Milo bokã. Yʋʋmd pʋgẽ yaa naoor a tã la a Salomo ra wat ne maand Soaala maan-kugra zugu, yaa yũ-nood maando la lagm-n-dɩ maando. B ra yõogda wisdu me maan-kugra zugu. Woto me la Soaala-Wẽnd daab ne b rooga pids yã. Dĩma a Salomo da tara koom-kogend Esiõ-Gebɛr, sẽn pẽ ne Eyilat, Rudum mogra noore, Edom tẽn-peelmẽ. A Iram sakame, n kõ a Salomo neb sẽn mi koom-kogend zãabo la sẽn mi mogra menga. B naaga a Salomo nebã. B kẽn n taa Ofir la b waa n kõ-la a Salomo sãnem gil bɛd kobs-naas la pisi. Saba dĩm-poaka waa n wʋmame tɩ b gomd a Salomo yelle t'a yʋʋra ra yii wʋsgo. Woto a waame n na pẽrs a Salomo ne yelbũna n bãng a bãngra zulum tɛka. A waa Zerizalɛɛm ne neb ka tɛka la yʋgma sẽn zɩlg kaam sẽn tar yũ-noodo, sãnem zembala, kug neeba. A sẽn taa a Salomo taoore, a wilg-a-la a sũura sẽn da gãd bũmb ninga. Tao-tao bala a Salomo leoka a sogsga fãa. La bõn-toog ka zĩnd sʋk t'a wilgr nams dĩma ye. Saba dĩm-poaka sẽn dɩ a Salomo bãngra kaseto, a sẽn yãend na-yira sẽn me to-to, dĩma sẽn dɩt bũmb ningã, a sõgen-kamba roto, b sẽn deegd sãan to-to, b sẽn yer fut niynsi, rãama rãmb sẽn da pʋdgd b rãama to-to, yũ-nood maanda sẽn da kʋʋd Soaala roogẽ wã, a vʋʋsma tulgame. A tol n leoka dĩma: «M sẽn zĩnd m tẽngẽ wã n wʋm tɩ b gomd y gom-minim la y bãngra yelle yaa sɩd menga! M pa sak n deeg b sẽn togsã tɩ m pa reng n wa la m yãend fãa ne m nin ye. M neeme tɩ b sẽn togsã ka ta pʋɩ-sʋk meng ye. Y bãngrã la y arzɛka yɩɩda m sẽn wʋma. Zu-noog pagba la yãmb pagbã, zu-noog rãmb la y sõgen-kamba, sẽn zĩ-b yãmb taoor wakat fãa n kelgd y bãngra koɛɛga. Wẽnnaam y Soaala paam pẽgre, bãmb sẽn tʋlg n zaoolg-y Israyɛl naama zaoor zugu. Yaa b sẽn nong a Israyɛl ne nonglem sẽn ka viigdã la b kõ yãmb naam, tɩ bũmb na n kell n pa a soaal nugẽ, tɩ sẽn tara bʋʋm na n kell n pa ne a bʋʋm.» Saba dĩm-poaka kõo dĩma sãnem gil koabg la pisi, yũ-nood kaam sẽn ka paoode, la kug neeba sẽn yãngd faongo. Saba dĩm-poaka sẽn wa ne yũ-nood kaam niynsã, a Salomo pa le paam sẽn ta rẽnda bada. A Iram koom-kogenda sẽn wa ne Ofir sãnema, waa ne ra neeb ka tɛka la kug neeb me. Ne ra-neebã a Salomo kitame tɩ b pees-ba n ning wẽnd doogã la a menga roogo, rellgo bɩ tikr yĩnga. B rɩk-b lame me n pees bɛɛla la kola, yɩɩn-yɩɩndba yĩnga. Raad a woto ka le wa la b ka le yãend b buud n ta rũnna. Dĩma kõo Saba dĩm-poaka a sẽn tʋlg bũmb ning fãa n paas kũun a taaba wala yẽnda, a Salomo, bala a ye sẽn tõe n yãe n kõ neda. Dĩm-poaka ne a sõgen-kamba leba b tẽngẽ. Yʋʋmd a ye pʋgẽ a Salomo ra tõe n paama sãnem gil sẽn ta neb tusr zɩɩbo. La b pa sõt b sẽn da yãgsd lɛɛbdba nengẽ la koasdba nengẽ, b pa sõt tẽn-zẽnsa nanamsa sẽn da yaoodã, b pa sõt kombɛɛmba sẽn da saad n deesd tẽnga kamba nengẽ ye. A Salomo kɩtame tɩ b kud gãndo, gãnd bɛd, bãmb kobs-yi, gãnd sẽn kud ne sãnem, tɩ gãong a ye fãa sãnema sẽn dɩk n bolg-a wã zɩslem taa koom yubl zɩslem. A kuda gãnd bõonese, bãmb kobs-tã, n bolg-b ne sãnem. Gãong bedr a ye bolgda ne sãnem zɩslem sẽn ta ko-wamde. Dĩma reega gãndã n tedg b Libã googa pʋga. A Salomo maana naam zaoor sẽn tablg ne wob-yẽna, n lɛɛg n bolg ne sãnem sẽn yɩlge. Zaoora rellga ra yaa gilg bilfu la a ra tara nus palgr zĩiga. Nusa sẽn palgd zĩig ninga yegende, b naana bõnyẽese, a ye goabga, a ye rɩtgo. Bõnyẽes piig la a yiibu n da be teedsa zutu, a yoob goabga, a yoob rɩtgo. Rĩung ba a ye pʋgẽ b zɩ n maan zaoora a woto buud ye. A Salomo sẽn da tar lagd niyns n yũud a rãamã yaa sãnem zãnga. Teed niyns sẽn da rɩgl Libã googa roogẽ wã fãa da yaa sãnem sẽn maneg n yɩlge; wanzurf ka rɩk n tʋm bũmb be ye; a Salomo wakatẽ wã b ra pa get wanzurf wa bõn yõod ye. Dĩma da tara Tarsis koom-kogendo sẽn naag n maand tolbo ne a Iram dẽnna, la yʋʋm a tãab-tãab fãa Tarsis kogenda ra lɛɛgd n wata ne sãnem, wanzurfu, wob-yẽna, wãamse la wãam-kãdse. A Salomo waa n lʋɩɩ tẽng zug dĩm dãmba fãa taoore ne arzɛka la yamzulum. Tẽnga ween-vɩɩs a naasa fãa da rat n yãend-a lame n paam n kelg bãngr kãseng ning Soaala-Wẽnd sẽn da ning a yamẽ. Ned kam fãa ra wata ne a kũuni: sãnem la wanzurf teedo, futu, zab-teedo, yũ-nood kaam, wiidi, bõn-weese; la yʋʋmd fãa ra yaa boto. A Salomo baoo bilim-bilm la wed-dʋʋdba. Bilim-bilma ra yaa tusr la kobs-naase, tɩ wed-dʋʋdba ya tus piig la a yiibu. B ra tigm-b-la tãnsoaben-tẽnsẽ, Zerizalɛɛm yegende. A Salomo kɩtame tɩ Zerizalɛɛm pʋgẽ, wanzurf yãeeb ra pa toog n yɩɩd kugr ye. Tẽnga tɩ-bɛd sõor da taa kooma noorẽ yɩlse. A Salomo wiida ra yita tẽns sẽn zãrẽ, al Silisi. A Salomo ra tʋmda neb ne ligdi tɩ b tɩ raad-b be. Ezipt rãmba da koosda bilim-bilm a ye fãa wakɩ koeems kobs-yoobe, tɩ weef ya koabg la pis-nu. Yẽ nebã n da wat ne-ba, n yãkd n koosd ne Ititse la Aramsa dĩm dãmba. A Salomo kẽe kãadem ne sãam-pogs wʋsgo, Ezipt dĩma bi-pugla toog sẽn yãke. A pabga yɩɩ Moabitse, Amonitse, Edomitse, Ititse la Sidõ rãmb buudu. Buud kãens poorẽ Soaala-Wẽnd da yeela a Israyɛl: «Da kẽng-y b nengẽ ye. Ka rẽ b na wẽnemd y yam la y sũuri n tees b wẽnd-naandsã.» A Salomo yaool n basame t'a yam kẽ bu-zẽna; bu-zẽna pagb yamleoog yõk-a lame. A pagb sẽn yɩ rĩm-biis yɩɩ kobs-yopoe; talsa kamb yɩɩ kobs-tã. Yaa a Salomo pagbã n kẽes-a moogo. A Salomo sẽn waa n kʋʋle, a pagba kɩtame t'a yam gãd wẽnd-naandse, woto a sũura ka pa zãng ne Naaba-Wẽnd wala a ba a Daviid sũur ye. A Salomo pʋga a Astarte, Sidõ rãmb wẽn-poaka n paas a Milkom, Amonitsa yel-yooko. A Salomo maana sẽn ka noom Soaalã, a ka sak-b wala a ba, a Daviid ye. A tɩ mee wẽnd doog tãng ning sẽn tot ne Zerizalɛɛma zug, a Kemos yĩnga; yẽ yaa Moab rãmba yel-yoogo. A mee wẽnd doog me a Molɛk yĩnga, Amonitsa ka-mi-sẽn-ya-la. A maana boto ne pabg a taab fãa wẽnd dãmba. Pagba ra kõta b wẽnd dãmba wisdu la maand. Wẽnd puuga b sũur ne a Salomo, t'a ra basa bãmba, a Israyɛl Wẽnnaam, sẽn da lik-a naoor a yiibu, n yeel-a t'a ra pʋg wẽnd-naandsa ye, t'a zãgs n pʋg-ba. Soaala-Wẽnd yeela a Salomo: «F sẽn maan woto wã, n sãam m zoodã, n pa reeg m sẽn wilg-fã, m na n deega f naama n kõ f sõgne. Kõn yɩ f vɩɩmẽ, f ba a Daviid yĩnga. Yaa f biiga nugẽ la m na n gʋsg naama. Ka na n yɩ naama zãng ye. M na basa buuda sak a ye n kõ f biig t'a sooge, m sõgen a Daviid yĩnga la Zerizalɛɛm m tẽn-sõnga yĩnga.» Soaala kõ-la a Salomo bɛ a ye: yɩ-la a Adad, Edom dĩm biiga. A Daviid da waa n zaba ne Edom n tõog-a. A tãnsoaba a Zoab, n tɩ mum sẽn pa-b zabrẽ n lɛɛg n kood Edom dapa fãa. A Zoab ne a Israyɛl tõr paa tẽnga kiis a yoobe, n tãag b sẽn waa n kʋ rapa fãa. A Adad paam n zoe n kẽnga Ezipt ne neb niyns sẽn da gũud a ba zaka. Wakat kãng t'a nan paoodame. B yii Madiã n wa Parã. B peega Parã neb kẽere la b tɩ noka Ezipt dĩma. Ezipt dĩma kõ-a-la zaka, n dɩlg-a, n kõ-a pʋʋgo. Ezipt dĩma yõga zood ne a Adad n tol n kõ-a paga, a meng pag a Tafnɛs yao. Dĩm-poaka tão doga a biiga, a Genubat. A Genubat wuba dĩma zakẽ ne Ezipt dĩma kamba. A Adad zĩnda Ezipt n wʋm t'a Daviid kiime, la a tãnsoab a Zoab me kiime. Dẽ la a Adad yeel dĩma: «Bas-m tɩ m leb m tẽngẽ.» Tɩ dĩma leok a: «Yaa bõe n paoog f ka, mam seegẽ, tɩ f rat n leb f tẽngẽ?» A yeelame bala: «Ka bũmb ye! Bas-m tɩ m leb bala.» Soaala le paasa a Salomo bɛ a to, yaa a Elyada biig a Rezõ. Yẽ ra zoeeme n zãag ne a zu-soaba, a Adadezɛr, Soba dĩma. Neb a taab waa n paas-a lame, la yẽ n lebg b kãsma. B sẽn mik t'a Daviid tara b kʋʋbo, b ra zoe n taa Damas n tɩ me n kẽ be, n tol n dɩ naam Damas. A Salomo vɩɩm tɛka a Rezõ yɩ-la a Israyɛl bɛyã. A paasa yel-beed niyns a Adad sẽn wa ne, la a sẽn dɩ naam Siri tɛka, a ka tol n vʋʋs ne a Israyɛl beem-tugb ye. A Zeroboam da yaa a Nebat biiga. A tẽnga la Sereda, Efrayim tẽn-peelmẽ. A Zeroboam ma yɩ-la a Seruya. A ma waa n lebga pʋg-kõore tɩ yẽ meng lebg a Salomo sõgne, la b moor waa n yõsga taaba. Ad bũmb ninga sẽn kɩt tɩ b moora yõsg taaba. A Salomo ra kɩtame tɩ b pidsd Milo boka sẽn be wẽnd dooga la na-zaka sʋka la b yẽt lal-gũbra sẽn da wurgi. A Zeroboam da yaa ned sẽn pid ne raoodo la sẽn tar pãnga. A Salomo gesa a sẽn da tʋmd to-to, la a yeel-a lame t'a yɩ Efrayim la Manase tʋʋm-tʋmdba gɛta. Ade, a Zeroboam waa n yii Zerizalɛɛm, tɩ bãngd a Ayiya, Silo rao, seg-a sor zugu. Bãngda ra yera fu paalga, la b ra yaa bãmb b yiib bala. A Ayiya yeega fu paallã n kẽes-a pɛɛl piig la a yiibu. A yeela a Zeroboam: «Deeg pɛɛl piiga, tɩ Soaalã, a Israyɛl Wẽnnaam koɛɛg la woto: ‹M na gʋsga naama a Salomo nugẽ la yaa foom la m na n kõ sags piiga. M sã n kees-a soolma a ye, yaa Wẽnd maag a Daviid, m sõgna, la Zerizalɛɛm m sẽn kõ m meng a Israyɛl tẽn-peelmẽ. Yaa a Salomo ne Israyɛl sẽn bas maama, n tɩ wõgend a Astarte taoore, Sidõ rãmb wẽn-poaka, n tɩ wõgemd a Kemos taoore, Moabitsa wẽnde, n tɩ wõgemd a Milkom taoore, Amonitsa wẽnde; yaa Salomo sẽn ka tũ sor ning m sẽn wilg-a, yaa a sẽn ka maan neer m nifẽ, n ka reeg m noya la m saglse wala a ba, a Daviid. Ka yẽ meng nugẽ la m na n gʋsg naama ye, tɩ m kõ-a-la naam a yõor tɛka, a ba, a Daviid, yĩnga, tɩ maam n yãk yẽ la a reega m noya la m saglse. Yaa a biig nugẽ la m na n deeg naama la m na n kõo foom a Zeroboam buuda sags piig tẽn-peelem. M na n kella sak a ye, a biiga yĩnga, sẽn na yɩ-la t'a Daviid fitil kell n widi m taoor Zerizalɛɛm, tẽng ning m sẽn yãk n na n paalg m ziiri. M na n yãka foom, Zeroboam, tɩ f rɩ naam wa f sẽn date, Israyɛl sags piig zugu. F sã n deeg m sẽn na n togs-f bũmb ning fãa, f sã n tũ sore, n maan sẽn ya neer m nifẽ, n deeg m noor la m saglse wala m sõgna a Daviid sẽn maane, mam me na pa ne foom, la m kãabdame tɩ f yagens na rɩ naam daar fãa, wala a Daviid yagensã. M na kõ foom a Israyɛl sags piigã. Woto m na ning a Daviid yagensã yãnde b beegra yĩnga, la ka wakat buud fãa la b na n tʋk yãndã b zug ye.› » A Salomo baoome n na n kʋ a Zeroboam. Woto a zoeeme n kẽng Ezipt dĩm a Sisak nengẽ. A paa be n tãag a Salomo kũum. A Salomo vɩɩma yɛl a taaba, a tʋʋma, a yam zulungã, fãa pa gʋls a kibara sebrẽ bɩ? Yaa yʋʋm pis-naase la a Salomo dɩ Israyɛl tõr naam, Zerizalɛɛm. A kiime. B mun-a-la a ba, a Daviid, tẽngẽ, a biig a Roboam n led a zaoorẽ. A Roboam kẽnga Sikɛm tɩ yaa be la a Israyɛl tõr da tigim n na n yug-a. A Nebat biig a Zeroboam wʋma a Salomo kũum. A yii Ezipt n lɛɛg n wa t'a ra zoe n kẽnga be n na n põs a Salomo. B tɩ boola a Zeroboam la Israyɛl tigmame n yãag-a n wa. B yeela a Roboam woto: «Y ba wã ra zɩlga tõnd zɩɩb sẽn zɩs wʋgo, d kos tɩ y yols-do, tɩ woto d na pʋg yãmba.» A leok-b lame: «Kul-y, la sã n maan dasem a tã bɩ y lɛɛg n wa.» A Roboam yẽsa ne nin-kẽembã sẽn da sõngd a ba, a Salomo, a sẽn waa n ketẽ la a sok-b lame: «M tog n leok-b-la wãna?» Tɩ b yeele: «Yãmb sã n sak n lebg buuda zɩɩba tʋkda, n sõng-a, y sã n kõ-b koe-noogo, b na tũ yãmb daar fãa.» A Roboam zãgsa nin-kẽemba saglgã, n bʋʋg a tũud-n-taase, la a reem-n-taase, sẽn tʋmd a zakẽ, n yẽs ne-ba. A sok-b lame: «Y yeelame tɩ m leok nin-bãmba wãna tɩ b waa n goma woto: ‹Yols-y zɩɩb ning y ba sẽn da zɩlg tõndã.› » Kom-bɩɩbã, a reem-n-taasã leokame: «Ad-y y sẽn na n leok sẽn yeel-b yãmb woto wã: ‹Y ba zɩlga tõnd wʋsgo, la yãmba, yols-y-do,› leok-y woto: ‹M pãnga sẽn tɩ paoog-m zĩig ninga ket n yɩɩda y ba wã pãng sẽn tɩ tigim zãng-zãng a nugẽ. M ba tʋka yãmb sẽn zɩse, la mam na paas y zɩɩbo. M ba pãba yãmb ne kaase, mam na pãb-y ne gãnd sẽn yod kutu.› » Neba le tigma taab a Roboam taoor da-yɩten-daarã, wala a meng sẽn da wilgi: «Lɛɛg-y n wa-y ka ra-yɩta.» Dĩma leoka neba pãr-pãre, a pa reeg nin-kẽemsa sagls ye. Yaa a reem-n-taasa la a kelg yã. Ad-a sẽn yeele: «M ba tʋka yãmb sẽn zɩse, la mam na paas y zɩɩbo, m ba pãb-y la ne kaase, la mam na pãb-y ne gãnd sẽn yod kutu.» Dĩma pa kelg zãma wã ye. La rẽ yɩ Wẽnd n lʋɩ sʋka, sẽn na n yɩ-la n pids b sẽn da kãab a Nebat biig a Zeroboam, ne Silo bãngd, a Ayiya, noore. Neba sẽn mik tɩ dĩma pa kelg-bã, b leokame: «D pʋɩɩr bʋgo n be ne a Daviid? Tõnd pʋɩɩr ka be a Zese biig nugẽ ye. Israyɛl, leb f rotẽ. Daviid doogo, bãng n dɩlg f menga.» A Israyɛl leba a tẽnsẽ. A Roboam naama dɩɩb teka ne buud niyns sẽn da kẽed-b Zɩɩda tẽn-peelmẽ bala. A Roboam tʋlg n maneg n yẽsa ne Israyɛl nebã la yẽ sẽn tʋm b nengẽ, a Adoram, a tʋʋma gɛta, rẽ puuga b sũur tɩ b lab-a ne kug n kʋ. A Roboam paam n kẽ-la a bilim-bilm n zoe n tees Zerizalɛɛm. Yaa woto la a Zɩɩda ne a Israyɛl roog welg taaba n ta ne rũnna. Israyɛl rãmba sẽn wʋm t'a Zeroboam lɛɛg n waame, b bool-a-la b tigsga zĩigẽ n yug-a t'a lebg Israyɛl dĩma. Woto a Zɩɩda ne a Bẽnzame bala n kell n pa a Daviid rooga naamẽ. A Roboam waa Zerizalɛɛm, n tigim a Zɩɩda ne a Bẽnzame tãb-biis sẽn mi zabre, bãmb tus koabg la pis-nii, n na n tɩ tak zabr ne a Israyɛl, n deeg naama n lebs a Roboam, a Salomo biigã. La Wẽnd koɛɛg taa b no-rɛɛs a Semaya: «Yeel a Salomo biig, a Roboam, Zɩɩda dĩma, n paas a Zɩɩda ne a Bẽnzame roog gilli: ‹Woto la Soaala koɛɛga: Da bob-y zabre ne y saam-biis a Israyɛl kamb ye. Ned kam fãa leb a yiri, tɩ sẽn maana zemsa ne mam daabo.› » B kelga Soaala-Wẽnd gomdã, la wala Soaala sẽn wilgã, b rɩka sore n leb b tẽnsẽ. A Zeroboam maneg n mee Sikɛm, Efrayim tãnga zugu, n maan a na-tẽnga. A maneg n mee Penuwɛl me n paas a pãnga. A Zeroboam yeela a menga: «Yɛla sã n kell n yɩ woto, naama na n leba a Daviid doogo. Neba sã n ket n digd Zerizalɛɛm n kʋʋd b maando, b yama na n lɛɛg n kẽ-la a Roboam, Zɩɩda dĩma, la b na n kʋʋ maam, n lɛɛg n kẽ yẽnda.» A paama yam n maan sãnem nag-bi a yiibu n yeel zãma wã: «Yaa yʋʋm sẽn ka paood la yãmb tʋgd Zerizalɛɛm. La ade, Israyɛl, ad wẽnd niyns sẽn yiis-b-foo Ezipt tẽnga!» A ninga nag-bil a ye Betɛl, n ning a ye Dã. Dẽ me n wa ne Wẽnd beegrã. Neba tonga taab n tall nag-bil a ye n wa Dã. A Zeroboam mee pʋʋsg zĩiga, tãmsa zutu la a baoo maan-kʋʋdba yaare, ka tũus a Levi buudẽ ye. A Zeroboam maana kibsa, kiuug a nii soaba, kiuuga piig la a nu daare, wala b sẽn da maand Zɩɩda. A meng dʋʋ maan-kugra sẽn me tãng ning zugã; yaa woto la a maan Betɛl, n kʋʋd a nag-bi wã maando, n ningd maan-kʋʋdba, tãmsa zut maanda kʋʋb yĩnga. Kiuug a nii soaba, kiuuga piig la a nu daare, raar a sẽn yãk wa sẽn waa a yamẽ, a dʋ Betɛl maan-kugra, tãnga zugu. A maana kibs Israyɛl kamba yĩnga la a rʋʋ maan-kugrã n yõog wisdu. Wẽnd yeela b ned a ye t'a yi Zɩɩda n wa Betɛl, dẽ t'a Zeroboam da yõoda maandã, maan-kugra zugu. A kãaba maan-kugra kãab beedo n yeele: «Maan-kugri, maan-kugri, Wẽnd koɛɛga la woto: Biig n na n dog a Daviid buudẽ n boond tɩ Zoziyas, la fo zug la a na n kʋ maan-kʋʋdba sẽn tʋmd tãmsa zutã, f zugẽ b na n yõog ninsaalb kõaba.» Bãngda paasa woto: «Maan-kugra na n tãsa mugnum, tɩ rũm-kaama tompɛglma sẽn dɩg a zuga dʋʋge la woto y na bãng tɩ Soaala n gome.» Dĩma sẽn wʋm Wẽnd neda sẽn yeel Betɛl maan-kugra poorẽ, a tẽega a nug n tees bãngdã n yeele: «Yõk-y bãndã!» La a nuga kell n kʋɩɩme, n pa tõe n le gõd ye. Maan-kugra pusgame, tɩ rũm-kaama tompɛglma sẽn da be a zuga rʋʋge, wala Soaala-Wẽnd sẽn da wilg ne b neda noore. Dĩma goma woto ne bãngdã: «Sigs Soaala-Wẽnd sũuri tɩ m nuga leb a zĩigẽ.» Bãngda sigsa Soaala sũuri, la dĩma nug leba a zĩigẽ wa pĩnda. Tɩ dĩma yeel-a: «Wa tũ maam tɩ d kuli, tɩ m tɩ kõ-f bũmbu tɩ f rɩ, la m kõ-f kũuni.» Bãngda leoka dĩma: «Ba ya f zaka pʋɩ-sʋk la f na n kõ-ma, m kõn tũ n kul ye. M kõn dɩ, m kõn yũ bũmb f zakẽ ye.» Wẽnd yeel-m la woto: «Da rɩ be, da yũ be, da le tũ so yɛng n wa ye.» A tũu sor a to, ka yɩ a sẽn dɩk a soab n wa Betɛla ye. Bãngd kʋdgo n da be Betɛl. A kamba wa n wilg-a-la Wẽnd neda sẽn maan baraare, Betɛl. B wilg-a la bãngda sẽn togs dĩma. B ba wã sok-b lame: «Yaa so-bʋg la a rɩk yã?» T'a kamba wilg Zɩɩda raoã sẽn dɩk sor ninga. A yeela a kambã: «Ning-y bõanga gaare!» Tɩ b ning bõanga gaare t'a zombe, n pʋg Wẽnd nedã, la a tɩ paam-a lame t'a zĩ tɩɩg tẽngre, t'a sok-a: «Yaa yãmb la Wẽnd ned ning sẽn yit Zɩɩda wã bɩ?» T'a yeele: «N-ye!» Tɩ bãngd kʋdga yeel-a: «Tũ maam n kuli, n tɩ paam bũmb n ning f noorẽ.» T'a yeele: «M pa tõe n leb ne foo ye, m pa tõe n dɩ bɩ n yũ bũmb ka ye. Wẽnd kõ-m-la no-kãnga: Da rɩ, da yũ bũmb ba a ye, da tũ f pipi sorã n lɛɛg n wa ye.» Dẽ la nin-kẽema yeel yã: «Mam me yaa bãngd wa foo, la malɛk n yeel maam: ‹Wẽnd kõt-f la noore tɩ f tall daoã n kul f yir t'a rɩ la a yũ.› » La ra yaa ziirẽ la a togsda. Woto wã bãngda tũ-a lame la a tɩ yũume, la a rɩ a zakẽ. B sẽn waa n dɩtẽ Wẽnd yiisa gomd bãngd kʋdga yĩnga, la bãngd kʋdga taasa Zɩɩda nedã: «Naaba-Wẽnd koɛɛga: Fo sẽn kɩɩs Wẽnde, fo sẽn pa reeg f Soaala-Wẽnnaam noore, fo sẽn lɛɛg n wa rɩ la f yũ zĩig ning b sẽn da yeel f tɩ f da rɩ la f ra yũ wã, ad-f yĩnga kõn mum f ba rãmba yaadẽ ye.» Sɩda a sẽn dɩ la a yũ n sɛ, b ninga bõanga gaar t'a zomb n looge. La bõnyẽeg n seg-a n kʋ-a. A paa sora noore. Bõanga ne gɩgemda kell n pa-la a sɛɛgẽ. Neb n tũ sorã, n yãend kũuma la bõnyẽega sẽn yɛs a sɛɛgẽ, n wa wilg bãngd kʋdgã, tẽnga pʋga. Bãngda sẽn da kɩt t'a lɛɛgã sẽn wʋme, la a sẽn yeele: «Yaa bãngd ning sẽn kɩɩsa Wẽndã. Wẽnd bas-a la ne bõnyẽega, t'a lub-a n kʋ-a, wala a sẽn da paam Wẽnd vẽnegre.» A yeela a kambã: «Ning-y bõanga gaare.» Tɩ b ning bõang gaare. Bãngda tɩ yãenda kũuma t'a rɩg sora pʋga, tɩ bõnyẽega yɛs a sɛɛgẽ. Bõnyẽega pa sɩɩs kũuma, a pa kaoog bõanga kõbr ye. Bãngda rɩka kũuma n palg a bõanga, n tall-a n wa Betɛl n na n maan a kʋʋre la a mum-a. A ninga kũuma a meng yaoogẽ, n kelm a kʋʋre: «Wiyee, m yao sõngo!» A sẽn mum-a n sɛ, a yeela a kamba: «M sã n ki, bɩ y naag-m ne Wẽnnaam neda yaoog a ye pʋga. Gãneg-y m kõaba n yelg a rẽnna. Sɩda nin-kãnga goma Soaala yʋʋr yĩnga a sẽn togs Betɛl maan-kugra poorẽ Samari tẽn-peelmẽ tãmsã zutu pʋʋsga zĩisi poorẽ, sɩda a sẽn togsa fãa na n pidsame.» Yell kãensa logr poore, a Zeroboam ka tedg a manes wẽnsa ye. A kell n bao maan-kʋʋdba a sẽn paamẽ. Sẽn data fãa ra lebgda tãmsa zut maan-kʋʋda. Dẽ kɩtame t'a roog lʋɩ yel-wẽndẽ, tɩ Soaala-Wẽnd wa ne a sãoongo la a wãab, saaga tẽngre. Wẽnd kãnga, a Zeroboam biiga a Abiya lʋɩɩ bãaga. A Zeroboam yeela a paga: «Yik la f teem futu, tɩ b ra bãng tɩ f yaa Zeroboam pag ye. Fo na n kẽnga Silo, tɩ bãngda a Ayiya bee be, yẽ n da pĩnd n togs tɩ m na n lebga nin-bãmba dĩma. Zɩ bur piig ne samsa la sɩɩd ne yubla; kẽng a nengẽ t'a tɩ wilg-fu biiga yell sẽn na n yɩ-la.» A Zeroboam paga maana boto, n yik n kẽng Silo n tɩ kẽ a Ayiya yiri. A Ayiya da pa le ne ye, a nin da pa le noom ye, kʋʋlem yĩnga. Wẽnd da yeela a Ayiya: «Ade, a Zeroboam pag n wat n na n kudg kãntɩɩga tɩ f leok-a koɛɛga a biiga bãag poorẽ t'a pa keem ye. Fo na n leok-a la woto ne woto. Mik a sã n wa a na n maana wa ka yẽ la a Zeroboam pag ye.» La a Ayiya sẽn wʋm a nao wã rãamd bal dignoorẽ, a yeelame: «Aya! Kẽ wɛ, Zeroboam paga! Bõe yĩnga tɩ fo teem f menga. M tara koɛɛg f yĩnga la ka koe-noog ye. Lebg n tɩ yeel a Zeroboam woto: ‹Ad-a Israyɛl Wẽnnaama koɛɛga: Mam sẽn zẽk foom zãma wã sʋka, n kɩt tɩ fo lebg a Israyɛl naaba, mam gʋsga naama a Daviid roogẽ n kõ foom; la fo ka togs m tʋʋm-tʋmda a Daviid, sẽn sak mam noya la a tũ maam ne a sũur fãa, n pa maan bũmb a to, sã n ka sẽn noom maam bala. Fo maana wẽng n yɩɩg sẽn deng-b fooma fãa. Fo kẽng n tɩ maana wẽn-naandse, yõak tʋʋmde, n na n puug m sũuri, n dɩk maam n lob f poorẽ. Dẽ fãa yĩnga, ade, m na n taka yel-beedo a Zeroboam roog zugu, la m na sãam a Zeroboam zaka, n kʋ rapa fãa a buudẽ, kom-bõones wala kom-bɩɩba; mam na n pɩɩga a Zeroboam rooga zãng kas, wẽnd b sẽn kãagd sagdo, n menes zãnga. A Zeroboam zak biig fãa sẽn ki tẽnga pʋgẽ, baas n na n wãb-a, la sẽn ki-a weoogẽ, yĩngri luiili n dɩt-a.› Soaala-Wẽnd n togsd rẽnna.» Bãngd a Ayiya paasa woto: «Fo na n yik n kula yiri, fo naoor sẽn poog tẽnga bala la f biiga na n ki. A Israyɛl gill fãa na n wiisa a zugu, tɩ b yaool n mum-a yaoogẽ, tɩ yaa yẽnda a ye, a Zeroboam kamba sʋka, n na n mum yaoogẽ, yẽnda nengẽ bala la b na n yãe bũmb sẽn ta a Israyɛl Soaala yam. La Wẽnd na n zẽka dĩm a to t'a soog Israyɛl la a wã a Zeroboam roog gilli. La rẽ fãa na n yɩɩ rũnna bala, la kabre tɩ m togs n baase: na n yɩɩ mars-mars nooga bala! Wẽnd na n lenga a Israyɛl wala rudum sẽn lengd koomẽ. B na n feooga a Israyɛl tẽn-noogã pʋgẽ, bãmb sẽn dag n kõ a saam-dãmba, la b na n tɩ sẽeg-a la kʋɩlga poore. La rẽ yaa b sẽn saa n sel wẽn-peesdi, n yõog Soaala-Wẽnd sũuri. B na n basa a Israyɛl, t'a Zeroboam maana wẽnga la a tusa Israyɛl kamba tɩ b maan wẽnga.» A Zeroboam paga yik n kulame. A leba Tirsa. La a sẽn gãndg dignoorã, la a biiga sẽn ki. B mum-a la yaoogẽ; a Israyɛl gill fãa wiisa a zugu, wala Wẽnd sẽn da yeel ne bãngda a Ayiya noore. A Zeroboam vɩɩma yɛla, a sẽn zabe la a sẽn dɩ naam to-to, fãa gʋlsa Israyɛl dĩm dãmba kibarẽ. Yaa yʋʋm pisi la a rɩ naam. A saka a saam-dãmba la a biig a Nadab n dʋ a zaoorẽ. A Roboam ba la a Salomo. A ma la a Naama, Amonitga. A rɩɩ naam Zɩɩda. A Roboam da tara yʋʋm pis-naase la a ye, a sẽn waa n sɩng naam rɩɩbo. A rɩɩ naam yʋʋm piig la a yopoe Zerizalɛɛm; Wẽnd tũusa Zerizalɛɛm, Israyɛl tẽnsa fãa sʋka, n na n zĩndg b meng b buuda sʋka. A Roboam maana sẽn ya wẽnga, n yɩɩg a saam-dãmbã. A kɩtame tɩ Soaala-Wẽnd sũur yiki. Saam-dãmba mee pʋʋsg roto tãms zutu, la kunkubr fãa zugu la tɩɩg fãa sẽn tar maasem tẽngre. Neb tol n yoo yoob, tɩ woto la b wẽn-naandsa rat tɩ b balem-ba, tẽn-kãng pʋgẽ; b togsa yell yood buud fãa neb a taab sẽn maane tɩ Soaala-Wẽnd da rig-ba n yiis a Israyɛl kamba taoore. A Roboam naam yʋʋmd a nu soaba, a Sisak, Ezipt dĩma, wa n pãba Zerizalɛɛm; a wʋka arzɛka sẽn da be wẽnd doogẽ wã, la arzɛkã sẽn da be dĩma roogẽ. A wʋka sãnem gãndã fãa a Salomo sẽn kɩt tɩ b kudã. Dĩm a Roboam kɩtame tɩ b maan zũud gãndo n lebs sãnem gãnda zĩigẽ la a kɩs-b-la tãnsoaben-dãmba sẽn da gũud dĩma zaka noore. Dĩma sã n da kẽed wẽnd doogẽ, gũudba da rɩkd-b lame, n yãag-a n yaool n le wa lebs-b gũudba roogẽ. A Roboam tʋʋma, la a sẽn maan fãa, rẽnda pa gʋls a Zɩɩda dĩm dãmba kibara sebrẽ bɩ? A Roboam ne a Zeroboam zaba taab wakat buud fãa. A Roboam tɩ saka a saam-dãmba tɩ b mum-a yaoogẽ ne a saam-dãmba, a Daviid na-tẽngẽ. A Naama la a ma wã yʋʋre, ra yaa Amonitga. A biig, a Abiyam, n led a zaoorẽ. Dĩma a Zeroboam, a Nebat biiga, naam yʋʋmd piig la a nii, a Abiyam n lebg Zɩɩda dĩma. A rɩɩ naam yʋʋm a tã Zerizalɛɛm; a ma yʋʋr da boondame t'a Maaka la a ra yaa a Absalom bi-pugla. A Abiyam rɩka a ba nao n maan yel-wẽn niynsa fãa a ba sẽn reng n maane, la a sũur pa kẽ Soaala, a Wẽnnaam, wala a saamba, a Daviid ye. La baasg zãnga, a saamba, a Daviid, zug maasem yĩnga, Soaala-Wẽnnaam ka bas tɩ b fitila ki Zerizalɛɛm ye; b kõ-a-la biig sẽn dɩ naam a poorẽ; Zerizalɛɛm kell n yɩɩ na-tẽnga. A Daviid maana sẽn ya tɩrga Wẽnd nifẽ, la sã n pa Ititga a Uri yella sẽn lʋɩ sʋkã, a pa bʋdg moogo n zãgs b noor ba a ye, b sẽn kõ-a, a vɩɩma zãnga. Zabre zĩnda a Roboam ne a Zeroboam sʋka, a vɩɩma zãnga. A Abiyam tʋʋm a taabã la a sẽn maan fãa, pa gʋls a Zɩɩda dĩm dãmba kibar sebrẽ bɩ? Zabre zĩnda a Abiyam la a Zeroboam sʋka. A Abiyam tɩ saka a saam-dãmba, la b mum-a-la a Daviid na-tẽngẽ. A biiga a Asa n led-a zaoorẽ. A Zeroboam, a Israyɛl dĩma, naam yʋʋmd pisi soaba, a Asa n lebg Zɩɩda dĩma. A dɩɩ naam yʋʋm pis-naas la a ye Zerizalɛɛm; a yaab poaka da boondame t'a Maaka, a Absalom biiga. A Asa maana sẽn ya tɩrga, Soaala-Wẽnd nifẽ, wala a saamba a Daviid sẽn maane. A riga yoaadba fãa n yiis a soolmẽ la a menesa wẽn-naandsa fãa a ba rãmb sẽn da peese. A lebsa naab ma a Maaka poorẽ, a sẽn da pees Asera yooka nin-naand yĩnga. A Asa kʋʋsa wẽn-naand yookã n yõog-a bugum, Sedrõ sudga pʋga. La baasgo zãnga, pʋʋsg rotã sẽn da me tãmsa zutã pa menem ye. A Asa sũura kell n kẽe Soaala zãnga a vɩɩm tɛka. A tall n waa wẽnd doogẽ wã a ba sẽn da kõ Wẽnde n paas a meng kũuni: wanzurf, sãnem la lagdo. A Asa ne a Basa sʋka yɩɩ zabre daar fãa. Israyɛl dĩma, a Basa, waa n kaooga zabre ne a Zɩɩda dĩma, la a mee Rama n na n gɩdg a Asa, a Zɩɩda dĩma, t'a ra tõog n yi la a kẽ a tẽngẽ ye. A Asa kong n wʋka wanzurf la sãnema fãa sẽn da kell Wẽnd arzɛka roogẽ la dĩma arzɛka roogẽ n ning a sõgen-kamba nusẽ tɩ b kẽng Damas n tɩ kɩs Siri dĩm, a Ben-Adad, a Tabrimo biiga la a Eziõ yagenga, la b taas-a woto: «Maam ne yãmb, mam saamba ne yãmb saamba, yaa zoodo. Ad-y m toonda yãmb kũuni, wanzurfu la sãnem. Bɩ y bas tɩ zooda sẽn be yãmb ne Israyɛl dĩm a Basa sʋka sãame t'a ra le wat n takd zabr ne-m ye.» A Ben-Adad kelga a Asa koɛɛgã, n tʋm a tãnsoaben-dãmba tɩ b tak zabre ne Israyɛl tẽnse. A reega Iyõ, Dã, Abɛl-Bɛt-Maaka, Kinerɛt tẽng gilli, la Neftali zãnga. A Basa sẽn wʋm rẽnda, a basa Rama meebo la a leba Tirsa. A Asa, Zɩɩda dĩma, boola Zɩɩda gilli n ka bas ned ba a yembre, la b tɩ wʋka kuga la raado b sẽn da tigsi n met Rama, la dĩma rɩk-b la lame n me Gibea, a Bẽnzame soolmẽ, la Mispa. A Asa kibara zãnga, a raoodã, a tʋʋma, rẽ fãa pa gʋls a Zɩɩda dĩm dãmba kibara sebrẽ bɩ? B sẽn pa wilgi yaa a sẽn n waa n lebg nin-kẽema n bẽed nao bãaga. A Asa tɩ saka a saam-dãmba, tɩ b mum-a, a saamba, a Daviid, na-tẽngẽ; a biiga, a Zozafat, n led a zaoorẽ. A Nadab, a Zeroboam biiga, rɩɩ naam, Israyɛl, a Asa, Zɩɩda dĩma naam yʋʋmd a yiib soaba, la a dɩɩ yʋʋm a yi bala. A maana sẽn ya wẽnga Wẽnd nifẽ, a kell n dɩka a ba sore, la a ba sẽn kɩt t'a Israyɛl maan yel-wẽng ninga, yẽ me maan-a lame. La a Basa, a Ayiya biiga, a Isakar roogẽ, n zãmb-a. A Basa kʋ-la a Nadab Gibetõ, Filisti rãmba soolmẽ; wakat kãng t'a Nadab ne a Israyɛl gilli da gũbga Gibetõ. A Basa kʋ-a lame n deeg naam, a Asa, a Zɩɩda dĩma, naam yʋʋmd a tãab soaba. A sẽn lebg dĩm bala, a Basa wã-la a Zeroboam doog gilli. Ned ba a ye ka põse, wala Wẽnd sẽn da pĩnd n yeel ne b bãngda, a Ayiya, noore. Bãngda da yaa Silo raoa. Yɛla yɩɩ woto, t'a Zeroboam beega Wẽnde la a ra luba a soolem dãmb yel-wẽnd pʋgẽ la rẽ n da wa ne Israyɛl Wẽnnaama sũ-puuri. A Nadab tʋʋm a taabã, a sẽn maan fãa, pa gʋls a Israyɛl dĩm dãmba kibar sebrẽ bɩ? A Asa ne a Basa, a Israyɛl dĩma, zaba taab b vɩɩm tõre. Zɩɩda dĩma a Asa, naam yʋʋmd a tãab soaba, a Basa, a Ayiya biiga, rɩɩ naam Tirsa, Israyɛl zãng fãa zugu, yʋʋm pisi la a naase. A maana wẽnga Soaala-Wẽnd nifẽ; a rɩka a Zeroboam nao, la a togs n maana yel-wẽnd ning a Zeroboam sẽn da lub Israyɛl a soab pʋgẽ. Wẽnd goma ne bãngd a Yewu, a Anani biiga, a Basa poorẽ n yetẽ: «Mam yiisa foom tãmpʋʋrẽ, m zẽka foom tɩ f yɩ m buud a Israyɛl dĩma, la fo rɩka a Zeroboam sore, n kɩt tɩ m buud a Israyɛl lʋɩ yel-wẽnd pʋgẽ, n puug m sũuri. Dẽ yĩnga, mam na n pɩɩga a Basa ne a roog gill kas, m na kɩt t'a rooga lebg wa a Zeroboam, a Nebat biiga roogo. A Basa ned sã n ki tẽng pʋgẽ, baas n wãbd-a, la a sã n ki we-kɛɛnga, yaa yĩngri luiili n dɩt-a.» A Basa kibare, a sẽn maan fãa, a raoodã, rẽ fãa pa gʋls a Israyɛl dĩm dãmba kibara sebrẽ bɩ? A Basa tɩ saka a saam-dãmba, la b mum-a-la Tirsa t'a biiga, a Ela, led a zaoorẽ. Soaala-Wẽnd sẽn waa n tũnug bãngd a Yewu, a Anani biiga, n taas b koɛɛgã, a Basa ne a zaka rãmba, yɩɩ bũmb a yiib yĩnga: Pipi yaa a Basa ne a zaka rãmb sẽn maan wẽng Soaala-Wẽnd nifẽ, n puug b sũuri, n wẽneg a Zeroboam roogo. A yiib soaba a kɩtame tɩ b kood a Zeroboam yagensa gilli. Zɩɩda dĩma, a Asa naam yʋʋmd pisi la a yoob soaba, a Basa biiga, a Ela, n lebg Israyɛl dĩma; a rɩɩ naam yʋʋm a yi, Tirsa. A tãnsoaba a Zimri n da get a bilim-bilm pʋɩ-sʋk yelle. A Zimri zãmb-a lame, dẽ t'a bee Tirsa n dɩtẽ la a yũud al tɩ rãam wa lub-a, samand naab a Arsa zakẽ. A Zimri kẽeme n wẽ-a n kʋ, n deeg a naam. Zɩɩda dĩm, a Asa, da zao a naama zaoorẽ yʋʋmd pisi la a yopoe. A Zimri sẽn lebg dĩm bala n zaond a zaoorẽ, a luba a Basa roog gilli, a ka bas ned ba a ye t'a põs ye, a ka bas bi-ribla, sẽn paood bɩ sẽn sɩlge, a Basa buud bɩ a zo-rãmb ye. Woto a Zĩmbri sãama a Basa roog gilli, wala Wẽnd sẽn da pĩnd n yeel-a ne bãngda a Yewu noore. A Basa, ne a biiga, a Ela, yel-wẽndã, yɩɩ bãmb sẽn kɩt t'a Israyɛl maan wẽn-yaalse n puug Soaala, a Israyɛl Wẽnnaam, sũuri. A Ela sẽn maana fãa pa gʋls a Israyɛl dĩm dãmba kibar sebrẽ bɩ? Zɩɩda dĩm a Asa naam yʋʋmd pisi la a yopoe soaba, a Zimri dɩɩ naam dasem a yopoe Tirsa. Tãb-biisa da gãnega tãpo Gibetõ, Filisti rãmba soolmẽ. La b sẽn wa n gãneg tãpã, tãb-biisa wʋma b sẽn yeele: «A Zimri zãmbame n tol n kʋ dĩma.» La Israyɛl tãb-biisa gilli, zĩig pʋgẽ bala, tãb-sika pʋga, b yuga tãnsoab a Omri, t'a soog Israyɛl naam. A Omri ne a Israyɛl gilli basa Gibetõ n kẽng n tɩ gũbg Tirsa. A Zimri sẽn mik tɩ b rat n deega tẽngã, a kẽe dĩma gaosga pʋga n yõog rooga bugum, la a meng paa bugmẽ. Rẽ yaa a sẽn maan yel-wẽnda yĩnga, a sẽn tʋm wẽng Soaala nifẽ, n dɩk a Zeroboam nao, n togs-a, n kɩt t'a Israyɛl maan yel-wẽnde. A Zĩmbri tʋʋm a taaba, a sẽn zãmb dĩma zãmb ninga, dẽ fãa ka gʋls a Israyɛl dĩm dãmba kibar sebrẽ bɩ? La a Israyɛl neba welga taaba sags a yi; neba pʋɩ-sʋk da kẽeda a Tibni, a Ginat biigã tãpẽ, n dat n kõ-a naam, tɩ pʋɩ-sʋk me kẽeda a Omri tãpẽ. La sẽn da kẽed-b a Omri wã, bãmb pãng n yɩɩge. A Tibni, a Ginat biigã, kiime. Woto a Omri rɩ naam. A Zɩɩda dĩma a Aza naam yʋʋmd pis-tã la a yembre soaba, a Omri n lebg Israyɛl dĩma, n dɩ naam yʋʋm piig la a yi. A rɩɩ yʋʋm a yoob Tirsa. A ra-la a Semɛr nengẽ ne wanzurf gil a yi, Samari tãnga. A ninga tãnsoaben zak, tãnga zugu, la a pʋda tẽngã a sẽn me wã, tɩ Samari, yaa sẽn da so-a tẽnga yʋʋre, a Semɛr yʋʋre. A Omri maana wẽnga Soaala-Wẽnd nifẽ; a maana wẽng n yɩɩg sẽn deng-b yẽnda fãa, Bũmba fãa pʋgẽ, a rɩka a Zeroboam, a Nebat biiga, nao, a togsa a sẽn maan fãa, a luba a Israyɛl yel-wẽndẽ n puug a Israyɛl Wẽnnaam sũuri ne wẽn-naandsa sẽn ka võorã waoogre. A Omri tʋʋma, a sẽn maane, a raooda yelle, dẽ fãa pa gʋls a Israyɛl dĩm dãmba kibar sebrẽ bɩ? A Omri tɩ saka a saam-dãmba, tɩ b mum-a Samari. La a biiga a Akab n led a zaoorẽ. A Akab, a Omri, biiga, n lebg dĩma, a Israyɛl tẽnga, Zɩɩda dĩma a Aza naam deegr yʋʋmd pis-tã la a nii soaba; a Akab, a Omri biiga rɩɩ naam Samari yʋʋm pisi la a yi. A Akab, a Omri biiga, maana wẽnga Soaala-Wẽnd nifẽ n yɩɩg sẽn deng b yẽ wã fãa. A rɩka a Zeroboam nao, n togs a yel-wẽna, dẽ t'a nan paooda, a peega a Zezabɛl, Sidõ dãmba dĩma, a Itobaal, bi-pugla, n maan a paga, la a kẽng n tɩ waooga a Baal la a wõgemda a taoore. A Akab mee maan-kugri a Baal yĩnga, a Baal roogẽ, Samari. A Akab peesa wẽn-naands ne raado n lugl la a maana yɛl a taaba n paase. A maana wẽnga n puug Soaala, a Israyɛl Wẽnnaam, sũuri, n yɩɩg Israyɛl dĩm dãmba fãa sẽn deng-b yẽ wã. Yẽ zamaanẽ, Betɛl nedã, a Iyɛl leb n mee Zeriko. La a Zozuwe, a Nun biiga sẽn da togs bũmb ninga ne Soaala vẽnegrã pidsame: A Iyɛl bi-kẽeng a Abiram maana kaalem b sẽn waa n na n sɩng meebã la a kamba yao-zʋʋg, a Segub, me kii tẽnga kʋɩlens sẽn lugl daare. A Eli, Tisbe dao, Galaad tẽn-peelmẽ, yeela dĩm a Akab: «M wẽen ne Soaala, a Israyɛl Wẽnnaama, mam sẽn pʋgd a soaba, tɩ yʋʋma sẽn pʋgdã, saag kõ le ni la meenem kõ dʋʋge sã n ka maam n kose.» Wẽnd goma ne a Eli: «Yik ka n kẽng yaang sẽnẽ n tɩ soond Kerit sudgã, Zʋrdẽ yaanga. Fo na n paama kʋɩlga koom be n yũuda, la m na n kõo gãabd noore tɩ b kõt-f rɩɩb beelẽ.» A Eli kẽngame, a maana wala, b sẽn da kõ a noore, la a tɩ zĩnda Kerit sudgã, Zʋrdẽ yaanga. Gãabda ra wat n kõt-a-la bur la nemd yibeoogo, n kõt-a bur la nemd zaabre, la a ra yũuda kʋɩlga koom. La sẽn wa n yɩ bilfu, kʋɩlga koom fẽbgame, tɩ saag da pa le niid tẽnga ye. Soaala-Wẽnnaam goma ne a Eli la b yeelame: «Yik n kẽng Sarepta sẽn be Sidõ soolmẽ n tɩ zĩnd be, mam kõo pʋg-kõor noore t'a kõt-f rɩɩb beelẽ.» A Eli yik n kẽnga Sarepta, la a sẽn ta tẽnga noore, ade, a yãee paga, a yãee pʋg-kõor sẽn da wɩɩsd raado. T'a bool-a n yeel: «M kotame tɩ f toog koom bilfu n wa kõ-m tɩ m yũ.» A sẽn yet t'a rabda la a Eli sẽn tool n bool-a n yeele: «M kotame tɩ f zɩ bur bilfu f nugẽ n wa kõ-ma.» La paga leokame: «M wẽen ne Soaala, yãmb Wẽnnaama, tɩ m pa le tar bur pɛdg menga, m pa le tar bũmb sã n ka zom na pid nugu tɩ be m rʋkẽ, n paas kaam bilfu bala ne yubla. La ade, mam wɩɩsda ribli a yiibu n na n tɩ segle rẽndã, maam ne m biiga yĩnga, tɩ d rɩ la d yaool n ki.» La a Eli leokame: «Da maan rabeem ba bilfu, leb yiri n tɩ maan wa m sẽn yeele; la reng n segl dɩɩb bilfu n wa kõ-ma, tɩ f na yaool n segl foom ne f biiga yĩnga. Israyɛl Wẽnnaama, koɛɛg la woto: ‹Zoma sẽn be rʋkẽ wã kõn tol n sɛ ye, la kaama sẽn be ne yubla kõn tol n woog tɩ ta daar ninga Soaala-Wẽnd sẽn na n tool saaga n madg tẽnga.› » La pagã kẽng n tɩ maana wa a Eli sẽn yeele. A rɩɩme tɩ kaoose, yẽ ne a Eli la a zak rãmba. Zoma sẽn da be rʋkẽ pa sɛ ye, la kaama sẽn da be ne yublã ka woog ye, wala sẽn da pĩnd n togs ne a Eli noore. Dẽ loogre poore zaka pag biig lʋɩɩ bãaga al tɩ wɩnge, al t'a wa tol n ki. Paga yeela a Eli: «Bõe n be maam ne yãmb sʋka, Wẽnnaam neda? Yãmb siga mam yiri n na n le tẽeg m yel-wẽna la y kʋ mam biiga?» A Eli leok-a lame: «Kõ maam f biiga ka!» A reega biigã a nugĩ n dʋ ne-a, yĩngri doogã, a sẽn da be zĩig ningã la a gãneg-a-la a meng gãag zugu. A pʋʋsa Wẽnde n yeele: «Soaala, m Wẽnnaam, pʋg-kõora sẽn deeg maam sãandã, yãmb na n maana wẽng ne-a n kɩt t'a biiga ki bɩ?» La a yaool n gãanda naoor a tã n bʋʋg biigã, n pʋʋs Soaala-Wẽnd woto: «Soaala, m Wẽnnaam, kɩt-y tɩ bi-kãnga vɩɩma leb n wa a pʋgẽ.» La Soaala-Wẽnd kelga a Eli koɛɛga; biiga vɩɩma leb n wa a pʋgẽ, t'a vʋʋge. A Eli rɩka biigã n sig tẽnga n kɩs-a a ma, la a yeelame: «Ade, f biiga vɩɩme.» Pagã leoka a Eli: «Mam bãngame marsã tɩ yãmb yaa Wẽnnaam neda la Wẽnnaam gomd n sɩd yit y noorẽ.» Sẽn kaoos rẽ loogr poore, yʋʋm sẽn taa a tã, Soaala-Wẽnnaam goma ne a Eli n yeel-a: «Kẽng n tɩ wilg f meng a Akab; mam na n kɩtame tɩ saag ni tẽnga zugu.» La a Eli yikame n dabd a Akab nengẽ. Koma sɩd da wɩnga Samari; a Akab boola a samand naaba, a Obadiya. Bãng-y t'a Obadiya, yaa ned sẽn da mi Naaba-Wẽnd waoogre. Sɩd me, a Zezabɛl sẽn da waa n kʋʋd Wẽnd no-rɛɛsdbã, a Obadiya da peega no-rɛɛsdb koabga, n solg bãmb pis-nu-nu tãn-bogd a yiib pʋgẽ, m da rɩlgd-b beene ne buri la koom. A Akab yeela a Obadiya: «Wa tɩ d na n saaga tẽnga fãa kobumdum la bãad zĩisi, daare d na yãe yamdo n kõ wiidã la bõn-weesã la kõ yɩ modgre tɩ d kʋ bãmb kẽer ye.» B pʋɩ tẽnsã n na n saag-ba; a Akab rɩka sor a yembre, t'a Obadiya me rɩk sor a to. A Obadiya sẽn wa n kẽnda, a sega a Eli, n bãng-a, n wõgemd n fõgneg a neng tẽnga n yeele: «Sɩd yaa yãmb bɩ, m naaba Eli?» T'a leoke: «N-yẽe, yaa maam! Tɩ yeel f zu-soabã: Ad-a Eli bee ka.» A Obadiya leokame: «Mam beeg-y-la ne bõe tɩ yãmb na n dɩk maam n ning a Akab nugẽ t'a kʋ-ma? M wẽen ne Soaala, yãmb Wẽnnaama, tɩ soolem bɩ rĩung ba a ye ka be, m dĩma sẽn pa tʋm tɩ b bao yãmb ye; la b sã n da yeele a ka be ka ye, a ra kɩtdame tɩ tẽng kãng bɩ rĩunga rãmb wẽene tɩ b sɩd ka yãe yãmb ye; tɩ yãmb yet maam marsã: Kẽng n tɩ yeel f zu-soaba: ‹A Eli bee ka!› Bũmb ning sẽn na n yɩ, yaa tɩ maam sã n wa zãag ne yãmba, Soaala-Wẽnd pãnga na n dɩka yãmb n kẽng zĩig a to mam sẽn ka miẽ, dẽ tɩ mam yaool n zoe n togsa a Akab. A sã n bao yãmb be n konge, maam la a kʋda. Y yamba yaool n zoeta Soaala-Wẽnde al a yãadmẽ. M naaba, b ka togs yãmb mam sẽn maan bũmb ninga, n solg Wẽnd no-rɛɛsdb koabga, n welg-b pis-nu-nu tãn-bogd a yiib pʋgẽ n dɩlg-b ne bur la koom laa? Yãmb sẽn yet maam marsã: ‹Kẽng n tɩ yeel f zu-soaba: ad a Eli bee ka,› y ratame t'a kʋ-m bala!» A Eli leokame: «M wẽen ne Wẽnde, dũni fãa Soaala, m sẽn yɛs a soab taoorã, tɩ dũnna bala mam na n kẽnga a Akab nengẽ.» A Obadiya kẽng n tɩ sega a Akab n togs-a t'a bãng tiiri, la a Akab tɩ sega a Eli. A Akab sẽn yãee a Eli, a yeelame: «Foom n sɩd be ka, Israyɛl nin-yoogo?» T'a Eli leok-a: «Ka maam la a Israyɛl sabaab ye, yaa foom ne fo ba-roogo, tɩ yãmb tõdga Soaala-Wẽnd noya, la yãmb zoe n pʋga a Baal dãmba. La marsã, bɩ f kɩt tɩ b tigim Israyɛl gill n kõ-ma, Karmɛl tãnga zugu, ne a Baal no-rɛɛsdba fãa, bãmb kobs-naas la pis-nu, la Asera no-rɛɛsdb kobs-naase sẽn dɩt a Zezabɛl zakẽ.» A Akab boola Israyɛl kamba fãa, la a tigma bãngdba Karmɛl tãnga zugu. A Eli kolg n yeela zãma wã: «Yãmb na a n keoosa woto n kɩlld goabg la rɩtgo n ta da-bʋre?» Sã n yaa Soaala-Wẽnd la y pʋgda, bɩ y pʋg bãmba, la sã n yaa a Baal la y pʋgda, bɩ y pʋg yẽndã. La neba pa yãe koɛɛg n leok ye. A Eli yeela zãma wã: «Maam m ye tãa la Wẽnd no-rɛɛs n ket dũnna, ne yõore, la a Baal no-rɛɛsdb yaa kobs-naas la pis-nu. Kõ-y tõnd lols a yiibu, tɩ bãmb yãk a yembre n bees n dogl daad zugu la b da tugl bugum ye; mam me na n beesa loalg a to wã la m kõn ning bugum ye. Yãmb na n pʋʋsa y wẽndã tɩ mam me pʋʋs m Soaala. Wẽnd ning sẽn waa ne bugum, yaa yẽ la Wẽnnaam.» La neba fãa leokame: «N fãa, dẽ be neere!» A Eli yeela a Baal no-rɛɛsdba: «Bɩ y yãk loalg a yembre la sɩɩg-y loalgã, tɩ yãmb sõor n yɩɩde, pʋʋs-y yãmb wẽndã, la y ra tugl bugum ye.» B reega loalg ning b sẽn kõ bãmbã, n bees, n yaool n bool a Baal yʋʋr, al yibeoogo n tãag wĩnto-sʋk n yetẽ: «Baal woo, leok-y-do!» La b pa wʋm koɛɛg ye, b ra yĩgimdame la b saood b maan-kugra taoore. La sẽn waa n ta wĩnto-sʋka, a Eli laa bãmb n yeele: «Zẽk-y y koɛɛg n kelem t'a Baal yaa wẽnde, a nug ka zaalem ye, bɩ a toga sore; daare a gõeeme la a na neke.» B kelma ne b koɛɛg pãng tɛka, la b kõsd b mense, ne sʋʋse la kãna tɩ zɩɩm yita, wala b sẽn yib n maanẽ. Sẽn wa n yõsg wĩnto-sʋka, b sɩnga goama, n gom n ta wakat ning b sẽn kʋʋd zafar maoongo. La b pa tol n wʋm koɛɛga, b pa tol n wʋm ned leokre, b pa yãend bũmb a to ye. A Eli yeela kʋʋnga: «Bɩ y kolg!» La neba fãa kolga a Eli. A le manega Soaala maan-kugrã b sẽn da lubã. A Eli rɩka kug piig la a yi n zems ne a Zakoob kamba sõore, wala Soaala-Wẽnd sẽn da gom ne-a n yeel: «B na n pʋda foom t'a Israyɛl.» La ne kugã a mee maan-kugr, Soaala waoogr yĩnga, la a tuu boko n gilg maan-kugrã, bok sẽn tõe n deeg ko-yʋy a yiibu. A sigla raado, n bees loalgã n dogl raada zugu. A yeelame: «Pids-y yʋy a naas ne koom n dɩk n budg maoongã ne raada zugu.» Tɩ b maan boto. A yeelame: «Le maan-y n paase!» N le yeele: «Le maan-y n paas-y yɛsa.» Tɩ b le maan boto n daag tɩ ta pipi kooma naoor a taabo tɩ kooma gilg maan-kugrã n pid bokã n duki. Wakat ning b sẽn mii n kʋʋd zaabr maoongo, bãngda a Eli kolg n yeelame: «Soaala-Wẽnde, a Abraam la Izaak la a Zakoob Wẽnde, bɩ b bãng dũnna tɩ yãmb la a Israyɛl Wẽnnaam, tɩ mam ya yãmb tʋʋm-tʋmda, la tũu ne yãmb gomde la m sẽn maand yell kãnga wã. Leok-y-ma, Soaala-Wẽnde, leok-y-ma tɩ nin-bãmba bãng tɩ yaa yãmba, Soaala, la Wẽnnaam, la y le wẽnemd b neng n tees y menga.» Wẽnd bugum sigame n dɩ maoongã ne raadã la kugã la toma, n fõog kooma sẽn da pid bokã. Dabeem yõka zãma wã. B wõgemdame n fõgneg b neng tẽnga n yetẽ: «Yaa Soaala la Wẽnnaam, yaa Soaala la Wẽnnaam!» T'a Eli yeel-ba: «Aya, bɩ y yõk a Baal no-rɛɛsdba fãa, la b ned ba a ye da põs ye!» La b yõg-b lame. A Eli kɩtame tɩ b tall-ba n sig Kisõ sudga pʋga t'a kood-ba. La a Eli yeela a Akab: «Dɩ la f yũ, tɩ mam wʋmda saag kɛleng rãamde.» La a Akab kẽngame n na n tɩ rɩ la a yũ. A Eli rʋʋ Karmɛl tãnga zug tẽnsʋka la a sulgame n ning a zugã a rũma sʋka. A yeela a dakõore: «Rʋ n ges mogra sẽnẽ!» Dakõorã rʋ n gesame n yeel: «Bũmb ka ye!» A Eli yeel-a-la naoor a yopoe: «Leb n ges!» A yopoe soaba a yeelame: «Ade, sawad-bila n zẽkd mogra zugu, a paooda wala ned nug gilgu.» T'a Eli leok-a: «Kẽng n tɩ yeel a Akab: ‹Segl f bilim-bilm tao tao n sigi tɩ saag da gɩdg f ye.› » La sẽn yɩ bilf bala saag kʋɩɩme tɩ sobg yiki tɩ sa kãseng na n ni. A Akab kẽ a bilim-bilma n dɩk Zizreyɛl sore. Wẽnd pãng kẽ-la a Eli t'a sẽbg a sɛɛga n lʋɩ a Akab taoore n zoe n tɩ tãag Zizreyɛl tẽnga. A Akab tɩ togsa a Zezabɛl a Eli sẽn maan fãa la a sẽn kʋ bãngdba fãa ne sʋʋga. A Zezabɛl tʋma ned a Eli nengẽ, t'a tɩ yeel-a: «M wẽnd dãmba sãam-ma, n le sãam-m n bãge, mam sã n ka maan ne foo wa f sẽn maan ne bãngdbã.» La a Eli sẽn wʋm woto a yik n zoeeme n na n fãag a yõore. La a taa Beerseba, a Zɩɩda soolmẽ, la a basa a dakõora be. La a meng kẽna weooga pʋga daar a ye tõre, la a tʋlga kũum n yeele: «Sekame marsã, Soaala-Wẽnde. Bɩ y reeg m vɩɩma, tɩ mam pa são m saam-dãmb ye.» La a gãand n gũsa tɩɩg a ye tẽngre. La ade, malɛk n sɩɩs-a n yeel-a: «Yik n dɩ!» La a sẽn gese, a yãee a sɛɛgẽ, miisgu sẽn dõos kug paklg sẽn wɩng bugmẽ, n paas koom ne yubla. A rɩɩme, a yũume, a le gãandame. La Soaala malɛkã le wa naoor a yiib soaba n le nek-a n yeele: «Yik n dɩ tɩ sora ra yɩɩ wok f yĩng ye.» A yik n dɩɩme la a yũ. La rɩ-kãnga pãng yĩnga a kẽna dasem pis-naase, wĩntoog la yʋngo n wa ta Orɛb, Wẽnd tãngã. Beene, a Eli kẽe tãn-boko n gãand n vẽeg beoogo la ade, Soaala-Wẽnd leok-a la b koɛɛg: «Eli, fo maanda bõe ka?» T'a yeel: «Soaala-Wẽnde, dũni fãa Soaala, yãmb nonglma yik-m-la wa bãaga la m ka le tõe n sak tɩ Israyɛl kamba paoog-y woto ye. B sãama zoodã, b wãa yãmb maan-kugã, n kʋ y bãngdbã. Kella maam m ye bala tɩ b baood maam n na n dok m yõore.» Soaala-Wẽnd yeelame: «Yi n yals tãnga zugu, Wẽnd taoore. Gese, Soaala-Wẽnd na n loogame.» Sobg kãseng yika ne pãnga, n miim tãmsã, la a wãad pĩisi, Soaala-Wẽnd taoore. La Soaala-Wẽnd da ka be sobga pʋg ye. Sobgã sẽn looge, yɩɩ tẽng n miimi. La Wẽnd da ka be tẽnga miuungẽ wã ye. Tẽnga miuung poore yɩ bugum. La Wẽnd da ka be bugma pʋgẽ ye. La bugma sẽn looge, yɩɩ pems maasga la faasg bʋʋre. La a Eli sẽn wʋm rẽnda a rɩka a fuug n lud a nenga n yi. A yalsa tãn-boka noore, la a wʋma sẽn yeele: «Eli, fo maanda bõe ka?» T'a yeele: «Soaala-Wẽnde, dũni fãa Soaala y nonglma sũur n yik-ma tɩ m pa rat tɩ Israyɛl kamba le paoog-y ye. Sɩda b sãama zoodã, n wã y maan-kugã, n kʋ y bãngdbã. La kella maam m ye bala, tɩ b baood maam n na n dok m yõore.» Wẽnd yeela a Eli: «Aya! Kẽnge, le rɩk f sor, n pɩʋʋg weoogã n leb Damas. F sã n ta beelẽ bɩ f zɛ a Azayɛl naam kaam t'a yɩ Aram dĩma; La f zɛ a Yewu, a Nimsi biigã, t'a yɩ Israyɛl dĩma; la f zɛ a Elize, a Safat biigã, Abɛl-Meola, t'a yɩ bãngda n led fo zĩigẽ. La bũmb ning sẽn na n yɩ, yaa tɩ sẽn põsa a Azayɛl sʋʋga, a Yewu n kʋʋd-a, la sẽn põs a Yewu sʋʋga, a Elize na kɩt tɩ b kʋ-a. La mam na n basa a Israyɛl pʋgẽ dap tus a yopoe, sẽn pa ning rũmdi a Baal taoore, tɩ b noor ka mogs-a ye.» A Eli yika zĩ-kãng n looge, n seg a Elize, a Safat biigã, wakat kãng t'a ra koodame; nag-koods sẽn balg a yiib-yiibu, bãmb sags piig la a yi n da be a taoore t'a ra pʋgd piig la a yiib soaba. A Eli kolg-a lame n dɩk a fuug n lob-a. La a Elize basa a niisã n zoe n pʋg a Eli; a yeelame: «Kõ-y maam sore, tɩ m tɩ mobg m ba la m ma, la m yaool n wa tũ yãmba.» La a Eli leok a lame: «Aya, lebe! M kos-f la bũmb bɩ?» La a Elize lebame n tɩ yõk a nag-koods a yiibu n kʋ, n dɩk nag-koodsã yubl daoog n dʋg b nemdã n kõ neba tɩ b rɩ, la a yaool n tũ-la a Eli n lebg a sõgne. A Ben-Adad, Siri dĩma, tigma a tãb-biisa fãa. Nanams pis-tã la a yi n da be ne-a ne b wiidi la b bilim-bilm. A Ben-Adad waa n gũbga Samari, n kaoog zabre. A tʋma neb tẽnga pʋgẽ, Israyɛl dĩma Akab nengẽ, tɩ b tɩ yeel-a: «A Ben-Adad koɛɛg la woto: Fo wanzurf la f sãnem, maam n so; fo pagba la f kamba, maam n so.» La Israyɛl dĩma leokame: «M zu-soaba, m dĩma, yãmb yam bala; yãmb n so maam ne m sẽn tar fãa.» La a le tʋma neb tɩ wa yeele: «A Ben-Adad koɛɛg la woto: Mam sɩd tʋmame tɩ b wa yeel foom: ‹F wanzurfu, f sãnem, f pagba la f kamba, yiis fãa n kõ-ma.› Bãng tɩ beoog, wakat kãnga, mam na n tʋma m sõgen-kamba, tɩ b vɛɛs f roogo la f neba roto la bũmb ning fãa sẽn ta b yam, bɩ b rɩk n loog.» La Akab boola tẽnga nin-kẽemba fãa n yeele: «Bɩ y ges la y bãng vẽenega, tɩ nin-kãnga rat-m-la ne wẽnga! A sẽn tʋm tɩ b wa reeg m pagba la m kamba, m wanzurf la m sãnem, m pa zãgs ye.» Dẽ la nin-kẽemba la zãma leok yã: «Bɩ y ra kelg la y ra sak fɩ.» Woto a Akab yeela a Ben-Adad sẽn tʋm b rãmba: «Tɩ yeel-y y zu-soaba woto: ‹Yãmb sẽn deng n kos y sõgna bũmb ningã, a ra tõe n maaname, la y sẽn le paas bũmb ninga marsã wã, ka tõe ye.› » La b sẽn tʋm b rãmba lebg n tɩ togsa leokrã a Ben-Adad. A Ben-Adad tʋmame tɩ b le wa yeel-a: «Bɩ m wẽnd dãmba sɩbg maam n le sɩbg n bãge, Samari sã n kell tom sẽn sek a na pid nebã fãa sẽn pʋgd maama nusi.» La a Israyɛl dĩma leokame: «Tẽeg-y dĩm-y a Ben-Adad yelbũnd kãnga: ‹Sẽn nan bobd-a n dabd zabre da maan wa sẽn zab-a n tõog n lɛɛg n watẽ ye.› » A Ben Adad sẽn wʋm woto, rẽ t'a ra zĩ n yũuda rãam a nanams rotẽ, a yeela a neba: «Aya! Ned kam fãa leb a zĩigẽ!» Tɩ neba leb b zĩisẽ n segl n na n tak zabr ne tẽngã. La ade, bãngda a ye n kolg a Akab n yeel Israyɛl dĩma: «Soaala-Wẽnd n gomd woto: Yãmb nee zãma kãsengã? Ade, dũnna, m na n ning-a la y nugẽ, la woto fo na bãng tɩ maam la yãmb Wẽnde.» A Akab sokame: «Na n tũu ne ãn nugu?» Tɩ bãngda yeele: «Wẽnd leoka woto: Na n tuu ne kom-bɩɩbã b sẽn sa n yãgs tẽn-bɛdẽ wã.» T'a Akab soke: «La ãnd n na n tak zabrã?» Tɩ bãngda leoke: «Foom!» Dĩma saame n sõd tẽnsa kom-bɩɩba, kãsem-dãmba sẽn da sa n bool b rãmb tãpẽ wã, da yaa bãmb kobs-yi la pis-tã la a yi. La a yaool n saag n gesa a Israyɛl tãb-biisa fãa, da yaa bãmb tus a yopoe. Dĩma Akab boba tãpa wĩnto-sʋka, dẽ t'a Ben-Adad da yũuda rãam a roogẽ n gãeemnẽ, yẽ ne dĩm dãmb pis-tã la a yi sẽn da yõg zoodo ne-a. Kom-bɩɩbã n deng yiibu n na n tɩ zabe. A Ben-Adad tʋmame tɩ b tɩ ges sẽn ya-la; tɩ b lɛɛg n wa togs-a woto: «Neb n yi Samari n wa.» A yeelame: «B sã n yii laafi baoobo, yõg-y-b vɩɩse n wa, b sã n yii ne zabr daabo, yõg-y b vɩɩse n wa ne!» Dẽ tɩ kom-bɩɩba la tãb-biisa sẽn da pʋgdã da paam n yi tẽngã. Ned kamb fãa kʋʋ sẽn waa a taoore. Aramsa zoeeme, t'a Israyɛl pʋgd n digd-b. A Ben-Adad, Aram dĩma, zomba weef n zoe, yẽ ne wed-dʋʋdb kẽere. Israyɛl dĩma yiime, n yõg wiidã la a reeg bilim-bilma. A tõoga Aram dãmba tõogr kãsenga. Bãngda kolg n yeela Israyɛl dĩma: «Keng f sũuri la ges f sẽn na n manega, tɩ yʋʋm vẽkrã, Aram dĩma na n lɛɛg n wa zaba ne foom.» Aram dĩma poorẽ dãmba yeel-a lame: «Israyɛl Wẽnda yaa Wẽnd sẽn nong tãmse, yaa rẽ yĩng la b tõog tõndo. D kaoog zabre ne bãmb tẽn-nabrẽ n ges d kõn tõog-ba. Bɩ y maan woto, dĩma: deeg-y dĩm dãmba sẽn sõngd yãmba naam la y ledg-b ne y kombɛɛmba. Yãmb meng yiis tãb-biis sõor sẽn zem sẽn ki-bã, wiid sõor sẽn zem sẽn pa-b zabrã, bilim-bilma me sõor sẽn ta pĩnd dẽnna la d kaoog zabra tẽn nabrẽ. D tẽed tɩ d na maan raoodo, n tõog Israyɛl dãmbã.» La a Ben-Adad kelga b saglgo la a tũume. La yʋʋmdã sẽn vẽke, a Ben-Adad tonga Aramsã, la a kẽnga Afɛk n na n tɩ kaoog zabre ne a Israyɛl. Israyɛl kamba me tongame, b reega tãnsoaben-dãmba sẽn tog n kõ-b bũmb ning fãa la b looga Aramsa segbo. Israyɛl kamba gãnega b tãpo, tãb-sik a yiib pʋgẽ, tɩ bãmb ne Aramsa get taaba. Israyɛl tãb-biisa ra yaa wa bʋʋs bãg-bõones a yi, tɩ Aramsa yɛdg n pid tẽngã. Wẽnnaam neda kolgame n gom ne Israyɛl dĩma n yeel-a: «Soaala-Wẽnd koɛɛg la woto: Aramsa sẽn yeel tɩ maam a Wẽnd yaa Wẽnd sẽn nong tãmsã, la ka Wẽnd sẽn kẽed tẽn-nabre, mam na n ninga zãma kãnga fãa fo nugẽ, la woto y na bãng tɩ maam la Wẽnnaam.» Zab-zabdba zĩnda woto n get taaba, dasem a yoobe. La a yopoe daare zabra kaoogame. A Israyɛl tõoga Aramsã n kʋ b neb tus koabga daar a ye pʋgẽ. Sẽn kell-bã zoeeme n tud Afɛk, n tɩ kẽ tẽnga pʋgẽ, tɩ lal-gũbra lʋɩ n bʋʋg neb tus pisi la a yopoe sẽn da kell-bã. A Ben-Adad zoeeme n tɩ kẽ tẽnga pʋgẽ. A Paama roog n soond be. A kug-zĩidba yeel-a lame: «Tõnd wʋmame t'a Israyɛl dĩm dãmba, yaa dĩm dãmb sẽn be sugri. Wa-y tɩ d sẽgen sũ-pa-noang futu la d loe d nus ne tãando n kʋk d zutu n yaool n kẽng Israyɛl dĩma nengẽ; daare a na bas-d ne yõore.» B rɩka sũ-pa-noang futu n sẽgen b seese, la tãando n vil b kamse n kẽng Israyɛl dĩma nengẽ n yeel-a: «Yãmb yamba, a Ben-Adad, tɩ b wa yeelyã: M yõkd y sɛɛga, bas-y-m ne yõore.» T'a Akab soke: «A keta ne yõor laa? Yaa m saam-biiga!» B yãeeme tɩ na n zemsame. Woto wã b yeelame: «A Ben-Adad yaa yãmb saam-biiga?» T'a Akab yeele: «Bɩ y kẽng n tɩ bool-a t'a wa.» A Ben-Adad yi-la a sẽn da solgẽ wã, a waame, t'a Akab kẽes-a a bilim-bilm pʋga. A Ben-Adad yeel-a lame: «M na n lebsa yãmba, tẽnsã fãa m ba sẽn deeg y ba nugẽ. La yãmb na n mee roto Damas pʋgẽ, teed koosgo yĩnga, wala m ba sẽn dag n me Samari pʋgẽ. Mam sẽn kote, f sã n sake, yaa f wogl m yõore.» A Akab saka a sẽn yalsã n bas-a n pa kʋ ye. Wakat kãnga Soaala-Wẽnd kõo bãngd karen-biig a ye noor t'a yeel a tũud-n-taaga: «M kotame tɩ f wẽ-m n kʋ!» La a tũud-n-taagã zãgsame t'a kõ kʋ-a ye. T'a yeel: «Fo sẽn pa kelg m koɛɛg yĩnga, ade, fo sã n loog n bas maam, gɩgemde n na n yõk foom.» La a tũud-n-taagã sẽn yi n looge, gɩgemd seg-a lame n yõk-a n kʋ. La bãngdba karen-biiga sega ned a to n yeel-a: «Wẽ-m n kʋ!» La daoã wẽ-a lame n pogle. Bãngda teema futu, n tak a puglã n lud a nenga, n kẽng n tɩ yals dĩma Akab sẽn na n loog sor ninga noore. Dĩma sẽn wa n loogdẽ, a kelmame n yetẽ: «M zu-soaba, yãmb sõgna dag n zabda ne a bɛɛba, la ned n yi zabra zĩigẽ n tall ned a sẽn yõke n yeel-ma: ‹Gũ nin-kãnga t'a ra loog ye. A sã n zoe n põse, fo yõor la b na n deeg n ledg yẽ rẽnna sẽn põsã, ka rẽ bɩ f yao wanzurf gilgu.› La yãmb yambã sẽn wa n maand woto la woto, daoã menemame.» Israyɛl dĩma leokame: «F bʋʋd kaoome, la yaa ne f meng noore.» La bãngda yãka peenda sẽn da lud a nengã tao-tao, tɩ Israyɛl dĩma na n bãng tɩ yaa bãngdba nin-yende. Bãngda yeel-a lame: «Soaala koɛɛg la woto: ‹Fo sẽn bas neda t'a põsã, ne m sẽn da kãab a beedã, foo n na n ki a zĩigẽ, la fo soolma rãmba n na n ki a soolma rãmb zĩigẽ.› » La Israyɛl dĩma kula a yiri, Samari tẽnga, ne nen-gãnenga la sũ-beedo. Ad bũmb ning sẽn zĩndi, rẽ loogr poore. Zizreyɛl dao a Nabot n da tar a bugsuntun-sõng pʋʋgo. Pʋʋga ra bee Zizreyɛl, Samari dĩma Akab na-yira sɛɛga. A Akab yẽsa ne a Nabot n yetẽ: «Kõ maam f bugsuntunga pʋʋgo, tɩ m maan zẽedo, n sel tɩ-rɩtse t'a pẽe ne mam zaka, la m na kõ foom zĩig a to sẽn yaa sõmbo n yɩɩda, n lebs f pʋʋgã, bɩ f sã n dat me m na kõ-f ligdi.» A Nabot leoka a Akab: «Soaala gũ ma tɩ da beeg-ba n dɩk m buuda pʋɩɩre n kõ yãmb ye.» La a Akab leba a yiri ne nen-gãnenga la sũ-beedo. Zizreyɛl dao a Nabot sẽn leok-a woto wã yĩnga: M kõ dɩk m buuda pʋɩɩr n kõ yãmb ye. La a gãanda a gãagẽ n wẽnemd a neng, n tees a roog lalga la a zãgs dɩɩb buud fãa. A paga, a Zezabɛl, bʋʋg-a lame, n soke: «Yaa bõe sũ-sãang n tar yãmba tɩ y zãgsd rɩɩbo?» T'a yeele: «Yaa m sẽn kos Zizreyɛl dao, a Nabot t'a kõ maam a bugsuntungã la a reeg ligdi, bɩ a sã n data, m na n kõ-a pʋʋg a to n lebse, t'a leok: ‹Mam ka na n kõ m pʋʋg ye.› » A paga a Zezabɛl yeel-a lame: «Ka foo n dɩt naam Israyɛl bɩ? Bɩ f yik n deeg dɩɩb n dɩ la f noog f sũuri, tɩ mam na kõ-foo Zizreyɛl dao a Nabot pʋʋgo.» A Zezabɛl gʋlsa sɛba a Akab yʋʋr yĩnga, n ning sɛba zugu bũmb sẽn kõt kaseto tɩ b yii dĩma nengẽ, n tool nin-kẽemba la kãsem-dãmba sẽn da be-b tẽnga pʋgẽ, a Nabot sɛɛgẽ. A gʋlsa woto sɛba pʋsẽ: «Moon-y no-loeere, la y yiis a Nabot t'a zĩnd neba fãa taoore. La bao-y neb a yiibu, nin-yoodo, tɩ b zĩnd a taoore n dõd a n yetẽ: ‹Fo tʋʋsa Wẽnnaam la dĩma.› La y yaool n tall-a n yi kɛɛnga n lab-a kuga, t'a ki.» La nin-kẽemba la kãsem-dãmba sẽn da be-b tẽn kãng maana a Zezabɛl sẽn yeele, wala a sẽn gʋls sɛba pʋsẽ. B moona no-loeere, b kɩtame t'a Nabot yi n yals neba taoore, tɩ nin-yood a yiibã yaool n wa, n zĩnd n togl a Nabot. La nin-yoodã rõd-a lame n yetẽ: «Yõa tʋʋsa Soaala-Wẽnd la dĩma!» La b yiisa a Nabot tẽngã kɩrenga n lab-a kuga t'a ki. B tʋmame tɩ b yeel a Zezabɛl: «B laba a Nabot kug la a kiime.» A Zezabɛl sẽn wʋm tɩ b laba a Nabot kuga la a kiime, a yeela a Akab: «Yik-y n tɩ soog a Nabot, Zizreyɛl daoã, pʋʋgã, a ra zãgsa a kũuni la a koosgo, a ka le ket ne yõor ye, a kiime.» A Akab sẽn wʋm t'a Nabot kiime, a yikame t'a na n sig n deeg a Nabot pʋʋgã n sooge. La Wẽnd goma ne Tisbe rao, a Eli n yeele: «Yik n sigi n seg a Akab, Israyɛl dĩma sẽn be Samari. Ade, a bee a Nabot pʋʋgẽ wã, a siga be n na n soog pʋʋgã. Fo na n goma ne-a: ‹Wẽnd koɛɛg la woto: Ya f sẽn wẽ n kʋ wã yĩng la f geen tɩ f na lebg pʋʋga soaala?› F na yeel-a: ‹Ad Soaala koɛɛg: Baasã sẽn leg a Nabot zɩɩma zĩig ningã, zĩ-kãng la b na n leg fo meng zɩɩm.› » A Akab yeela a Eli: «Foo n le seg maam, m bɛyã?» T'a Eli leoke: «N-yẽe, maam n le seg foom, tɩ f saka zãmbo la f maana sẽn ka sõmb Wẽnnaam nifẽ! Ade, mam na n sika yel-beed fo zugu, m na pɩɩg f sagda zãng kas. Rao fãa sẽn be a Akab soolmẽ, yamb bɩ burkĩna, m na loog ne-a. Mam na kɩt tɩ f roog yɩ wala a Nebat biiga a Zeroboam roogo, la Ayiya biiga, a Basa roogo, fo sẽn puug m sũura yĩnga, fo sẽn luba a Israyɛl yel-wẽnd pʋgẽ yĩnga.» La Soaala-Wẽnd goma a Zezabɛl me yelle: «Baas na n wãba a Zezabɛl, Zizreyɛl tẽnga pʋgẽ. A Akab yira ned sẽn ki tẽnga pʋg fãa, baas n wãbd-a, la sẽn ki-a we-kɛɛnga, yĩngri luiili n dɩt-a.» Sɩd-sɩda, ned pa zĩnd t'a wẽnema kolg a Akab wẽnem ye. A saka zãmbo n maan sẽn pa sõmb Soaala-Wẽnd nifẽ, la yaa a pag a Zezabɛl n kẽes-a moogo. A maana yel-yoodo la sẽn yɩɩd fãa, a pʋga wẽnd dãmba sẽn ka võore, wala Amoritsa sẽn da maande tɩ Wẽnd reeg b tẽng n kõ Israyɛl kamba. A Akab sẽn wʋm gom kãensã, a kẽega a fugu, n pil a meng ne sũ-pa-noang futu, n loe noore, n gãe tẽnga la a kẽnd soaala, soaala! La Naaba-Wẽnd goma ne a Eli, Tisbe dao, n yetẽ: «Fo yãee a Akab sẽn sulg a meng seem ninga mam taoor bɩ? A sẽn sulg a meng mam taoor woto yĩnga, ka a vɩɩm wakat la m na n wa ne yel-beeda ye. La yaa yẽ poore, a biig sẽn wat n dɩt naama wakato la m na n wa ne yel-beed a roog zugu.» Pemsem paama yʋʋm a tã, zabr pa zĩnd Aram la a Israyɛl sʋk ye. Yʋʋm a tã wã, a Zozafat, Zɩɩda dĩma, wa n gesa Israyɛl dĩma. Israyɛl dĩma da yeela a poorẽ dãmba: «Yãmb miime tɩ Galaad-Ramot yaa tõnd soolem: La tõnd yaool n ka maan fɩ n le reeg-a Aram dĩma nugẽ ye.» La a soka a Zozafat: «Yãmb na n yãaga maam tɩ d kẽng n tɩ kaoog zabre Galaad-Ramot bɩ?» Tɩ Zɩɩda dĩma leok Israyɛl dĩma: «Tõnd na n yɩɩ bũmb a ye bala, maam ne foo, mam soolma rãmba na n yɩɩ fo soolem, mam wiidi wã na n yɩɩ fo rẽnna.» La a Zozafat yeela Israyɛl dĩma: «Mam kotame tɩ y sok Soaala-Wẽnd n paam b koɛɛga.» Tɩ Israyɛl dĩma tigim a bãngdba na ta kobs-naase, n sok-ba: «M kẽng n tɩ kaoog zabre ne Galaad-Ramot bɩ m base?» Tɩ b leoke: «Kẽng-y tɩ Soaala na ning tẽngã dĩma nugẽ.» A Zozafat yeelame: «Wẽnd bãngd ka ket ka tɩ d yõk a sɛɛg n paam Soaala-Wẽnd koɛɛg laa?» La Israyɛl dĩma leoka a Zozafat: «Ned a ye n kete tɩ d tõe n kudg-a kãntɩɩs n sok Soaala-Wẽnde, la mam kɩs-a lame, t'a zɩ n togs koɛɛg sẽn ya noog m yĩng ye, dẽnd beed bala; yaa a Yimla biiga, a Mise.» A Zozafat yeelame: «Y kabre, dĩma, da gom-y woto ye!» Tɩ Israyɛl dĩma na n bool a sõgne n yeel-a: «Kẽng tao-tao n tɩ wa ne a Yimla biiga, a Mise!» Israyɛl dĩma, a Akab la Zɩɩda dĩma, a Zozafat, da maneg yeelga fan-teedo, tɩ ned kam fãa zao a naam zaoore, vɩʋʋg ninga sẽn da be na-yira sɛɛga, n tees Samari rãmba sẽn tũud noor ning n kẽedẽ wã. B ra zĩndga bãngdba fãa b taoore tɩ ned kam fãa zɛɛgd ne a bãngr wilgri. A Kenaana biiga, a Sedekiyas, kuda kut yɩɩla, n yik n yeele: «Wẽnd koɛɛg la woto: Ne yɩɩl bãmbã, fo na n tãa Aramsã n kʋ-b zãnga!» Bãngdba fãa da gomdame n lebd zĩ-yɛnga n yetẽ: «Aya! Yik-y, kẽng-y Galaad-Ramot, tɩ y na maan raoodo, Wẽnd na rɩk-a n sagl dĩma nugẽ.» B sẽn da tʋm dao ninga t'a tɩ bool a Mise wã da gomda ne-a n yetẽ: «Gese, bãndgba fãa goama yaa a yembre, bãmb fãa yaa zelemd a ye n kãabd dĩma noogo. Bɩ fo me toagsga wẽneg bãmb rẽnna. Yiis koɛɛg sẽn ya noogo!» T'a Mise na n leok-a: «M wẽen ne Wẽnde, tɩ b sẽn yeel bũmb ning bal la m na n togse!» A sẽn ta dĩma nengẽ, dĩma sok-a lame: «Mise, d tõe n kẽng n tɩ kaooga zabre Galaad-Ramot bɩ d ka tõe?» T'a leoke: «N-yẽe! Kẽng-y tɩ y na tɩ tõoge, Soaala na n sagla tẽnga dĩma nugẽ.» La dĩma yeelame: «Mise m na n kudg-f la kãntɩɩga naoor a wãna, tɩ f togs-m sɩd bala, Soaala-Wẽnd yĩnga?» T'a Mise na n yeele: «Mam yãee a Israyɛl kamba sẽn sẽeg tãng zugu, wa piis sẽn pa le tar pe-kɩɩma; tɩ Soaala yeel maam: ‹Nin-bãmba ka le tar Soaal ye; bɩ ned kam fãa leb a tẽngẽ ne laafi!› » Israyɛl dĩma yeela Zɩɩda dĩma: «Mam da pa pĩnd n yeel yãmb tɩ nin-kãnga zɩ n togs koɛɛg sẽn noome, dẽnd beed bala!» La a Mise le paasame: «Bɩ f kelg Wẽnd gomde. Mam yãee Soaala-Wẽnd tɩ b zao b zaoorẽ, tɩ b na-yir dãmba fãa da yɛs bãmb sɛɛgẽ, rɩtgo la goabga. La Naaba-Wẽnd sokame: ‹Ãnd n na n belg a Akab t'a kẽng Galaad-Ramot n tɩ ki?› La yõa soab yeela woto, tɩ yõa soab me yeel woto. Wakat kãng marsã, la Wẽnd sõsd-n-taag a ye wa n yals b taoore n yeele: ‹Maam n na n belg-a.› Tɩ Wẽnd sok-a: ‹Fo na n maana a wãna?› T'a leoke: ‹Mam na n kẽngame n tɩ pʋdg-a bãngdba fãa sẽn be-b ka wã zirẽ-beeda yama.› Tɩ Wẽnd leoke: ‹Kẽng n tɩ belg-a, tɩ m kõt-f la rẽ tõogo. Kẽng n tɩ belg-a.› Ade, bãng tɩ bãngdba fãa gill noor sã n togsd zirẽ, yaa Wẽnd meng sẽn pa gom noog f yĩnga la b pa rat n togs fo.» A Sedekiyas, a Kenaana biiga, kolgame, n wẽ a Mise pɛka n yetẽ: «Wẽnd tũu yɛɛnẽ n yi n bas maam, n gom ne foom?» T'a Mise leok-a: «Fo na bãng rẽndã, daar ninga f sẽn wat n zoet n kẽed f rotẽ n na n soonde.» Israyɛl dĩma yeelame: «Bɩ b yõk a Mise n tɩ kɩs a Amon, tẽnga naaba, la na-biiga, a Zoas, la yeel-ba: Dĩma noor la woto: sui-y nin kãnga bi-bees roogo, n kõt-a buri la ko-zaalga n zems bala, n gũud m sẽn na n lebg ne laafi.» T'a Mise leok-a: «Fo sã n lebg ne laafi, bɩ f bãng tɩ ka Wẽnd n gomd ne mam noor ye.» Israyɛl dĩma ne a Zozafat, Zɩɩda dĩma kẽnga zabre Galaad-Ramot. Israyɛl dĩma yeela a Zozafat: «Mam na n teema m fut n kẽng zabre, la yãmba, bɩ y yeelg y naama fuug.» La Israyɛl dĩma teema a fut, n kẽng zabre. Mik Siri dĩma dag n kõ-la a bilim-bilma nanams pis-tã la a tã wã noore, a ra yeel-b lame: «Da kaoog-y zabre ne nin naaba bɩ ne talg ye, maan-y zabre ne Israyɛl dĩma bala.» Bilim-bilma nanams sẽn yãe a Zozafat bala, b yeelame: «Sãmbg ka ye, a Israyɛl dĩma la yõa.» La b kolgame tɩ b na n kʋ-a. T'a Zozafat tãs a zabr tãsga. Nanamsã sẽn bãng tɩ ka Israyɛl dĩma, b loogame n bas-a. La dao a yembre yãaga a tãpo n tão yaar bala, tɩ yõk a Akab, Israyɛl dĩma, kuta fuug sogb zĩiga; t'a yeel a wed-kɩɩma: «Wẽnemd ka tɩ m yi zabra sʋka, tɩ m paama sãmpogre.» Zabra wɩnga badaare, tɩ b kong n bas Israyɛl dĩma a bilim-bilma pʋga, n tees Aram; a kii zaabre, a zɩɩma da raaga bilim-bilma pʋga. Wĩndg sẽn kẽ, b kelma zĩis fãa: «Ned kam fãa leb a tẽngẽ. Ned kam fãa leb a ba yiri, tɩ dĩma maana kaalem!» Dĩma kũuma poore, b tall-a lame n wa Samari la be la b mum-a. B peka bilim-bilma Samari bãka pʋga. Baas lega a Akab zɩɩma. A zɩɩma kalma ne pʋg-yoadba sẽn wa n so koom beelẽ wã rẽgdo, la Wẽnd da pĩnd n togsa rẽnna. A Akab tʋʋm a taabã, a sẽn maan fãa, wob-yẽna roogã, ne tẽnsã a sẽn me wã, dẽ fãa pa gʋls a Israyɛl dĩm dãmba kibar sebrẽ bɩ? A Akab tɩ saka a saam-dãmba, t'a biiga, a Akaziyas led a zaoorẽ. A Zozafat, a Asa biiga deega a Zɩɩda naam, a Akab, a Israyɛl dĩma naam yʋʋmd a naas soaba. A Zozafat sẽn wa n dɩt naam, t'a tara yʋʋm pis-tã la a nu. A rɩɩ yʋʋm pisi la a nu Zerizalɛɛm. A ma yʋʋr da boondame t'a Azuba, a Sili biiga. A kell n dɩka a ba, a Asa, sẽn tũ sor ningã, la a pa tol n bʋdg moog ye, la a maana sẽn ya tɩrga Wẽnd nifẽ. La baasgo, pʋʋsga roto sẽn da be tãmsa zutã pa menem ye, neba da ket n kẽnd n kʋʋda maand be la b wisd tɩdare. A Zozafat yẽsa ne Israyɛl dĩma tɩ laafi zĩnd b sʋka. A Zozafat tʋʋm a taaba, a raoodã a sẽn maan zabrẽ, dẽ fãa pa gʋls Zɩɩda dĩm dãmb kibar sebrẽ bɩ? Yoaadba sẽn da ket-b tẽngã, al a ba, a Asa, zamaanẽ, a pɩɩg-b la zãng fãa n yiis a soolem pʋgẽ. Wakat kãng tɩ dĩm da ka le be Edom tẽng ye. A Zozafat kɩtame tɩ b maan Tarsis koom-kogend n na n kẽng Ofir n tɩ wa ne sãnem; la b pa tõog n kẽng ye, tɩ koglga wesga Esiõ-Gebɛr. A Akaziyas, a Akab biigã, yeel a Zozafat: «Bɩ mam tʋʋm-tʋmdba lagem ne yãmb tʋʋm-tʋmdba n dugs koom-kogendã.» La a Zozafat pa sak ye. A Zozafat tɩ saka a saam-dãmba, tɩ b mum-a a saamba, a Daviid, na-tẽngẽ, t'a biiga a Zoram led a zaoorẽ. A Akaziyas, a Akab biigã, rɩ Israyɛl naam Samari, a Zozafat, a Zɩɩda dĩma naam yʋʋmd piig la a yopoe soaba; a rɩɩ Israyɛl naam yʋʋm a yi. A maana sẽn ya wẽnga Wẽnd nifẽ; a tũ-la a ba la a ma sore, la a Zeroboam, a Nebat biiga, sore, sẽn lub a Israyɛl yel-wẽnd pʋgẽ. A waooga a Baal la a wõgemda a taoore, a puuga Soaala, Israyɛl Wẽnnaama sũuri wala a ba sẽn maane. Dĩma a Akab poore, Moab zãgsame t'a kõn le kẽe a Israyɛl ye. A Akaziyas zĩnda a roog noorẽ kogsre n lʋɩ n pogle, Samari tẽnga. La a tʋma neba n yeel-ba: «Bɩ y kẽng-y n tɩ sok a Baal-Zebub, Ekrõ wẽn-naandã, n ges m na n tɩlga ne m sãmpogrã bɩ m ka na n tɩlge?» Soaala Malɛk yeela a Eli, Tisbe rao: «Yik n seg Samari dĩma sẽn tʋm b rãmba la f yeel-ba: ‹Yaa Soaala-Wẽnd n ka le be Israyɛl pʋgẽ bɩ bõe tɩ y na n tɩ sok a Baal-Zebub, Ekrõ tẽng wẽn-naandã?› Dẽnd yĩnga, Soaala-Wẽnd koɛɛg la woto: ‹Fo sẽn dʋ gãag ninga zugã, fo kõn le sig ye. Sɩd ne sɩda, fo na n kiime.› » La a Eli loogame. Dĩma sẽn tʋm b rãmbã leba a Akaziyas nengẽ t'a sok-ba: «Bõe yĩng tɩ yãmb lɛɛg n wa?» Tɩ b leoke: «Dao a ye n seg tõndo n yeel tõndo: ‹Leb-y dĩma sẽn tʋma yãmba nengẽ, la y yeel-a: Soaala-Wẽnd koɛɛg la woto: Yaa Soaala-Wẽnd n ka le be Israyɛl tẽng bɩ tɩ f tʋm tɩ b tɩ sok a Baal-Zebub, Ekrõ tẽng wẽn-naandã? Woto wã, fo sẽn dʋ gãag ninga zugã, f kõn le sig ye. Sɩd-sɩda fo na n kiime.› » A Akaziyas sok-b lame: «Dao ninga sẽn sega yãmb n gom woto ne yãmba da yaa wãna?» Tɩ b leoke: «Yaa dao sẽn da yer fuug sẽn wʋg ne pe-kõbdo la yaa gãong n da mobg a sɛɛga.» A Akaziyas yeelame: «Yaa a Eli, Tisbe daoã!» Dĩma tʋma a nengẽ tãnsoab ne a neb pis-nu. Tãnsoaba babsa a Eli. A ra zao Karmɛl tãnga zug tẽnsʋka. Tãnsoaba yeel-a lame: «Wẽnd neda, dĩma tɩ y sig n wa!» A Eli yeela tãb-biis pis-nu tãnsoaba: «M sã sɩd yaa Wẽnd neda, bɩ bugum yi saag zugu n dɩ-fo, foom ne f neb pis-nu wã!» La bugum yii saag zugu n dɩ tãnsoaba ne a neb pis-nu wã. Tɩ dĩma le tʋm tãb-biis pis-nu tãnsoaba a to ne a neb pis-nu. Tãnsoaba yeela a Eli: «Wẽnnaam neda, naab tɩ y sig tao-tao koe!» T'a Eli leoke: «M sã n ya Wẽnnaam neda bɩ bugum yi saaga zugu n dɩ-fo, foom ne f neb pis-nu wã!» La bugum yii saag zugu n dɩ tãnsoaba ne a neb pis-nu wã. Dĩma le tʋma tãb-biis pis-nu tãnsoaba, naoor a tãab soaba. Tãnsoaba babsa a Eli la a sẽn ta, a yĩgimda a Eli taoore, n yõk a sɛɛga n yeel-a: «Wẽnnaam neda, bɩ y ges wa sẽn zem bũmbu maam la m neb pis-nu wã vɩɩm! Ade bugum yii yĩngri n dɩ tãb-biis pis-nu nanams a yi ne b neba. Marsã, y kabre! Bɩ m vɩɩma la m tãb-biisa vɩɩm wẽneg bũmb sẽn tar yõod y nifẽ.» Soaala malɛka yeela a Eli: «Tũ daoã n sigi la f da zoe rabeem ye!» A Eli yikame la a tũ-a lame n leb dĩma nengẽ, n yeel-a: «Soaala-Wẽnd koɛɛga la woto: Fo sẽn tʋm neb a Baal-Zebub, Ekrõ wẽn-naanda nengẽ wala Wẽnd n kongd Israyɛl sẽn tõe n leok fooma, ade, fo sẽn dʋ gãag ninga zʋgã, fo kõn sig ye, tɩ fo na n kiime, dẽ yaa vẽenega.» A Akaziyas kiime, wala Naaba-Wẽnd sẽn da togs a Eli, t'a yao a Zoram deeg naam n led-a zaoorẽ, t'a da ka tar biig ye. La yɩ-la a Zozafat biiga, a Zoram, Zɩɩda dĩma naamẽ, a naama yʋʋmd a yiib soaba. A Akaziyas tʋʋm a taaba, a sẽn maan bũmb ninga, dẽ fãa pa gʋls a Israyɛl dĩm dãmba kibar sebrẽ bɩ? Ad bũmb ning sẽn maane Soaala-Wẽnd sẽn wa n kɩt t'a Eli tũ sɩlmand n dʋ yĩngrã. Sega yẽ ne a Elize sẽn waa n zãagd ne Gilgal, t'a Eli yeel a Elize: «Kabre! La kell n yaas kaalẽ, tɩ Soaala-Wẽnd tʋm-m-la al Betɛl.» La a Elize leokame: «M wẽend ne Wẽnd la ne yãmb menga, tɩ mam kõn serg n bas yãmb ye!» B tũu taab n ta Betɛl. Bãngdba karen-biis sẽn da be Betɛl yii n sega a Elize n sok-a: «Yãmb bãngame tɩ dũnna Soaala-Wẽnd na n dɩka y zu-soabã n loog ne b yĩngri bɩ?» T'a leoke: «Mam me miime, bɩ y da le gom ye!» A Eli yeela a Elize: «Bɩ f pa kaalẽ tɩ Soaala-Wẽnd tʋm-m-la Zeriko bala.» T'a Elize leoke: «M wẽend ne Wẽnde, la ne yãmb menga, tɩ m kõn serg n bas yãmb ye!» B tũ taab n kẽng Zeriko. Bãngdba karen-biis sẽn da be Zeriko, bãmb me kolg n soka a Elize: «Yãmb bãngame tɩ dũnna Soaala-Wẽnd na n dɩka y zu-soabã n loog ne b yĩngri bɩ?» T'a leok-ba: «Mam me miime, bɩ y da le gom ye!» A Eli yeel-a lame: «Bɩ f yaas kaalẽ tɩ Soaala-Wẽnd tʋm-m-la Zʋrdẽ.» La a leokame: «M wẽend ne Wẽnd la ne yãmb menga, tɩ mam kõn serg n bas yãmb ye!» Bãmb b yiib le rɩka sore. Bãngdba karen-biis pis-nu yõsg-b lame n tɩ yals b taoore, yɩɩga, tɩ bãmb b yiib yaool n yɛs Zʋrdẽ kʋɩlga noore. A Eli yeega a fuug n kʋ n dɩk n wẽ kooma t'a welg rɩtg la goabga, tɩ bãmb tab tẽn-koɛɛnga n dʋʋge. B sẽn waa n dʋʋgd kʋɩlgã, a Eli yeela a Elize: «Sok n ges yaa bõe la m na n maan f yĩnga tɩ m nan ka loog n bas-fo?» T'a Elize leoke: «Pʋdg-y maam y yama, la m pʋɩɩr yɩ pidungu.» T'a Eli leoke: «Fo kota bũmb sẽn ya toogo; b sã n wa loogd ne maam tɩ fo yɛs n getẽ, f na pam f sẽn kotã, la kõn yɩ boto f sã n ka yãend-m ye.» Bãmb sẽn da kẽnd la b sõsd ne taaba, bugum bilim-bilm la bugum wiidi n waa n welg-b ne taaba, t'a Eli tũ sɩlmand n dʋ yĩngri. A Elize da ne-a lame la a kelemdẽ: «M ba, m ba, a Israyɛl bilim-bilm la a wed-dʋʋdb tãnsoaba!» A waa n pa le ne-a ye; la a taka a fuug n kẽeg a yiibu; A rɩka fuugã sẽn da paag a Eli bãgdo n lʋɩ wã, n lɛɛg n wa Zʋrdẽ n yals kʋɩlga noor. A rɩka a Eli fuugã n wẽ kooma n yetẽ: «Soaala-Wẽnde, a Eli Wẽnda bɛɛ?» Yẽ me wẽe kooma t'a welg rɩtg la goabga t'a rʋʋge. Bãngdba karen-biis sẽn yi-b Zeriko la sẽn da yɛs n getẽ yãenda a Elize sẽn maana la b yeelame: «A Eli pãnga siga a Elize zugu.» B kẽngame n tɩ seg-a la b wõgemda tẽnga, a taoore. B yeel-a lame: «Ad-y neb pis-nu sẽn tar raoodo n paas tõnd y yemsã n be ka. Bas-y tɩ d saag n bao y zu-soabã. Tõe tɩ Soaala-Wẽnd pãnga dɩk-b lame n tɩ bas tãng ninga zug bɩ longẽ.» T'a Elize leok-ba: «Da tʋm-y ned ye!» B sẽn da ket n tar-a pẽdgre yĩnga a yeel-b lame: «Bɩ y tʋm neb!» B tʋma neb pis-nu wã tɩ b bao a Eli dasem a tã la b pa yãe-a ye. Tɩ b lebg n wa bʋʋg a Elize sẽn da be Zeriko, n togs, t'a yeel-ba: «Mam da pa pĩnd n yeel yãmb tɩ ra kẽng bɩ!» Tẽnga rãmba wa n yeela a Elize: «Wala d zu-soaba sẽn ne wã, tẽnga zĩndgu bee neere, la yaa kooma bal n pa sõmbe, n sãamd dogem.» A Elize yeelame: «Wa-y ne lengre paalga la yamsem.» Tɩ b tall n wa. A Elize kẽnga kooma sẽn da bund zĩig ninga, n yãk yamsem n lob koomẽ wã n yeele: «Naaba-Wẽnd koɛɛg la woto: Mam manega kooma t'a lebg sõngo, a kõn le wa ne kũum, a kõn le sãam dogem ye!» La kooma lebga sõmbo n ta ne rũnna, wala a Elize sẽn yeele. A Elize yii be b dʋ Betɛl, la a sẽn da wa n dʋʋda, kamb yii tẽng pʋgẽ n laad-a n yetẽ: «Zug kõoga rʋ! Zug koella rʋ!» T'a Elize wẽneg poorẽ n ges-ba, n kãab-b beed ne Wẽnde. La rũms a yi toolem sẽn yɩɩd gɩgemde yii kãoongẽ n wãb bãmb pis-naas la a yi. A Elize yii be n kẽng Karmɛl tãngã la a yaool n lebg n waa Samari. A Akab biiga, a Zoram, yɩɩ Israyɛl dĩm Samari. Yɩɩ Zɩɩda dĩma, a Zozafat wakatẽ, a sẽn waa n dɩt a yʋʋm piig la a nii naam. A Zoram rɩɩ naam yʋʋm piig la a yi. A sẽn maana yɩɩ wẽng Naaba-Wẽnd nifẽ. Baasgo, a wẽnema ka ta a ba la a ma rẽnd ye. A vika Baal kug peesma a ba sẽn da lugli. A yam pa tol n lak ne yel-wẽnd ning a Nebat biig a Zeroboam sẽn da kɩt t'a Israyɛl lʋɩ a soab pʋgẽ wã ye. Bũmb pa woog ye. Moab dĩm, a Mesa, da gʋʋnda rũmsi, la yʋʋmd fãa, a ra yaooda a Israyɛl dĩma fadgo ne pe-kõbdo. Yaa pe-bi tus koabga la pe-raad tus koabg rẽnna. A Akab kũum poore, Moab dĩma zãgsame t'a kõn le yao a Israyɛl dĩma bũmb ye. Dẽ la a Zoram yi Samari n saag n sõd a Israyɛl gilli. A tɩ kɩtame tɩ b yeel Zɩɩda dĩm, a Zozafat: «Moab dĩma tõdga m noore, f na n tũ-m lame tɩ d tɩ tak zabr ne-a bɩ?» T'a yeele: «Mam na n tũume. Ad tõnd na n yɩɩ bũmb a ye bala, maam ne foom, mam soolma rãmb na n yɩɩ wa fo soolem, mam wiida na n yɩɩ wa fo rẽnna.» La a le yeelame: «D tũuda so-bʋgo n kẽnge?» T'a leoke: «Edom we-raooga sore!» Israyɛl dĩma, Zɩɩda dĩma la Edom dĩma loogame. B sẽn kẽne, b maana rasem a yopoe la koom waa n paooga tãb-biisã la rũmsã sẽn da pʋgd-b ne teedã. Tɩ Israyɛl dĩma yeele: «M ba yeee! Yaa Naaba-Wẽnd n tigim tõndo, dĩm dãmba a tã, n na n dɩk-do n sagl Moabitsa nugẽ» T'a Zozafat soke: «Wẽnd bãngd a ye ka be ka, tɩ d tũ a maasem n sok Soaala-Wẽnd laa?» La Israyɛl dĩma na-yir-dao n leoke: «A Elize, a Safat biigã, n be ka la yẽ ne a Eli n da zemsd taaba.» Tɩ Zɩɩda dĩm yeele: «Soaala-Wẽnd bee ne-a n gomd ne-a.» Israyɛl dĩma, Zɩɩda dĩma, la Edom dĩma kẽnga a Elize nengẽ. A Elize yeela Israyɛl dĩma: «M toogo be ne foom? Kẽng n tɩ bʋʋg f ba wã la f ma wã wẽn-faada bãngdba.» Dẽ la Israyɛl dĩma leok yã: «Ayey! Yaa Naaba-Wẽnd meng b toore n bool tõnd d tãabo, n na n dɩk-d n sagl Moab rãmb nusẽ.» A Elize yeelame: «M wẽend ne Naaba-Wẽnde, pãng rãmba Zu-soaba, m sẽn tũudã, tɩ m sã n da ka ningdẽ sʋka, Zɩɩda dĩm, a Zozafat, m kõn kelg f leokr ba a ye, m kõn ges-f ne m nif meng ye! Ges marsã n bao yɩɩn-yɩɩnd a ye sẽn mi yɩɩla n kõ-ma!» Yʋʋmba sẽn waa n yɩɩnẽ, Soaala-Wẽnd nug tika a Elize, t'a yeele: «Soaala-Wẽnd koɛɛg la woto: Kẽ-y sudga pʋga n tu bogd wa y sẽn dat tɛka! Wala Soaala-Wẽnd sẽn togsde, yãmb nif kõn yãend sobgo, a kõn yãend saag ye, la sudga na n pida ne koom, tɩ y yũ, yãmb ne y tãb-biisi la y rũmsi. La rẽ yaa wa zaalem, n ka tõe n mak ne b sẽn na n dɩk a Moab n sagl y nugẽ wã ye. Yãmb na n pãbame n sẽeg b tẽnsã sẽn gũbg ne lalse, la b tẽn-bɛdã; yãmb na n kɛɛ b tɩ-rɩtsa fãa, yãmb na n yẽda b bulsa fãa, yãmb na n wʋka kug n sam b pʋtã n sãam ba.» Beoog sẽn vẽege, maoonga kʋʋb wakato, koom fõda Edom n wa yʋgemd tẽngã zãnga. Moabitsa sẽn da wʋm tɩ dĩm dãmba sũu taaba n wat n na n tak zabr ne bãmba, boola neb niyns fãa sẽn da tõe n bob zab teedo, kom-bɩɩba la neb yʋʋm sẽn paam n fisgi, la b tɩ yalsa tẽnga toaagẽ. Dɩlla b sẽn nek yibeoogo la b ne wĩndgã sẽn yãgd koom zugu, Moabitsa yãendame tɩ kooma rɩga b taoor miuug wa zɩɩm. B yeelame: «Yaa zɩɩm! Daare dĩm dãmba wõoga b sʋʋse n zab n kɛ taaba. Aya, Moab kamba, d zoe marsã n tɩ zɛ d zɛɛbo!» La bãmb sẽn kolg Israyɛl kamba tãb-sika, a Israyɛl kamb yik n kaooga zabre ne bãmb n tõog-ba, tɩ b zoe. B kell n pʋg-b-la b tẽngẽ n kʋ-ba. B luba tẽnsa lalse, tɩ ned kam fãa wʋk kug n lob b pʋtẽ, n yẽd b bulsã, n kɛ b tɩ-rɩtsã. Kir-Aresɛt bal n wa n kelle, tɩ loobsa rãmb gũbg-a n lob-a kuga. Moab dĩma sẽn mik tɩ zabrã yɩɩda a pãnga, a yãka neb kobs-yopoe sẽn bob sʋʋse la b yii ne pãnga n na n bʋʋg Edom dĩma, la b pa tõog ye. Woto wã, a yõka a bi-kẽenga, sẽn da tog n led-a a zaoorẽ wã, n kodg-a, n maan maoong lalga zugu, la nebã yika beem menga ne Israyɛl kamba tɩ b bas Moab dĩma n zoe n leb b tẽnsẽ. Daar a ye, bãngdba karen-biig a ye paga n wa n yõk a Elize sɛɛga n yetẽ: «Mam sɩda maana yõore la yãmb mi t'a ra zoeta Naaba-Wẽnde; la ade, a da rɩɩ ned samde t'a soaba wa n na n deeg m kamb a yi n maan a yemse.» T'a Elize leok-a: «Bõe la m tõe n maan n sõng-fo? Bɩ f wilg-ma f sẽn tar f zakẽ.» Tɩ paga leoke: «Mam ka tar bũmb m yir sã n ka yũ-noog kaam bilf bala m sẽn tar n zɛɛd m yĩnga.» T'a Elize yeele: «Kẽng n tɩ peng f yags la-vɩɩdo, wa f sẽn tõe tɛka. Dẽ poore, kẽ f roogẽ, foom ne f kamba, lɛɛg n pag roogã, la f pʋdg laasã fãa kaam tɩ pidi tɩ f bĩng kɛɛnga.» Paga yi-la a Elize nengẽ. A sẽn ta yiri, a tɩ pag a meng ne a kamba roogẽ, tɩ kamba kɩt-a laasã t'a pʋdgd kaama. Laasã wa n pidame t'a yeel a biiga: «Le wa ne a to!» Tɩ biiga leoke: «Laag ka ket vɩʋʋg ye!» Wakat kãnga kaama yõkame. Paga tɩ togsa Wẽnnaam nedã, t a yeel-a: «Kẽng n tɩ koos kaama n yao f samdã, la foom ne f kamba rɩ ligda sẽn na n kellã.» Daar a ye, a Elize waa n looda Sunem tẽnga. Pag a ye nug sẽn da zãad bool-a lame t'a wa rɩ. Rẽ tɛka a Elize sã n da tũud tẽnga fãa, be la a ra kẽnd n dɩtẽ. Paga waa n yeela a sɩda: «Gese mam miime tɩ nin-kãnga sẽn tũud tõnd nengẽ daar fãa wã yaa Wẽnnaam nin-sõngo. Wa tɩ d me ro-bil bɛoonga zug n kõ-a, la d ning rooga pʋga: gãaga, te-roagendga, goeele la fitila, t'a sã n mii n wat tõnd yiri bɩ a kẽed be.» Daar a ye, a Elize waa yirã n dʋ yĩngr doogã n gãande. A yeela a sõgna, a Geazi: «Bool Sunem pʋg-sõngã n kõ-ma.» Tɩ sõgna tɩ bool paga tɩ paga wa yals sõgna taoore. A Elize yeela a sõgna: «Gom ne paga woto: Fo waooga tõnd ne bũmb wʋsgo, bõe la m tõe n maan f yĩnga? Koɛɛg be sẽn na leok dĩma bɩ tãnsoaba f yĩng bɩ?» La paga leokame: «Mam bee ne m buudu n vɩ bãane.» T'a Elize le sok a rakõorã: «Bõe la d tõe n maan a yĩnga?» A Geazi leokame: «Ade, paga pa tar biig ye, la a sɩda kʋʋlame.» A Elize yeelame: «Bool-a t'a wa ka!» Tɩ sõgna bool pagã t'a wa yals dignoorẽ. T'a Elize yeele: «Vẽere, sasa kãnga, fo na n mobga biiga f nugẽ.» La paga yeelame: «Ayo! M naaba, ra belg-y yãmb yem-poakã n gom sẽn pa sɩd ye!» Paga yaool n wa rɩka pʋga n dog bi-ribla, la yɩɩ sasa ning a Elize sẽn da wilgã. Biiga tol n bɩɩme. Daar a ye, tigsg wakato, a babsa a ba pʋʋgẽ. A waa n kelmame: «M zug wɛɛ, m zugu!» La biiga ba yeela a sõgne t'a tall-a n tɩ kɩs a ma. Tɩ sõgna tall biigã n kẽng a ma nengẽ; la biigã kell n paa a ma naoẽ tɩ ta wĩnto-sʋk t'a na n yaool n ki. La a ma rʋ n gãneg-a-la Wẽnnaam neda gãag zugu n n lɛɛg n yi n pag roogo. A bool a sɩda n yeele: «Tʋm-y sõgen t'a wa ne m bõn-yãanga tɩ m wudg ta Wẽnnaam neda nengẽ la m lebg n wa.» T'a sɩda sok-a: «Bõe tɩ f rat rũnna n ta a nengẽ? Ka ki-paalg kibsa, ka vʋʋsg raar me ye.» Dẽ la paga yeel yã: «Da-bʋ rẽ poorẽ ye!» A kɩtame tɩ b loe bõanga gaare, la a yeela sõgna: «Tall-ma, kẽne la ra tek n yaas sorẽ tɩ m pa kõ-f sor ye!» A rɩka sore, n tɩ ta Wẽnnaam neda nengẽ, Karmɛl tãnga. La Wẽnnaam neda yãee-a lame t'a nan ket yɩɩga, t'a yeel a sõgna Geazi: «Ad Sunem pagã, bɩ f zoe n tɩ seg-a, la f sok-a: ‹F bee laafi, f sɩd bee laafi, f biig bee laafi?› » La pagã leokame: «Laafi bala!» La a sẽn bʋʋg Wẽnnaam nedã, tãnga zugu, a gãda a karsã, t'a Geazi kolg n na n kɩt t'a serge. Tɩ Wẽnnaam neda yeel-a: «Bas-a t'a sɩɩga tara toogo; Soaala-Wẽnd solg-m-la rẽnna n pa togs-m ye.» Tɩ pagã na n yeele: «Maam n kos-y biiga bɩ, m naaba? Mam pa pĩnd n yeel yãmb tɩ y ra belg maam bɩ?» A Elize yeela a Geazi: «Yiki, deeg m dasaarã f nugẽ, n looge! F sã seg ned bɩ f da pʋʋs a ye, la ned pʋʋs-f bɩ f da leok-a ye. Dogl m dasaarã biiga nenga.» La biiga ma yeelame: «M wẽend ne Wẽnde la ne yãmb menga, tɩ mam kõn serg n bas yãmb ye!» La a Elize yik n pʋga pagã. A Geazi da renga bãmb taoore, la a tɩ gãnega dasaarã biiga nenga, la wõo menga ka wʋm ye, la bũmb ka maan ye; t'a lɛɛg n wa bʋʋg a Elize n yeele: «Biiga pa nek ye.» A Elize taa yiri, n mik tɩ biiga ra kiime n dig a meng gãagẽ. A Elize kẽeme n lɛɛg n pag yẽ ne biiga, roogẽ, n yõk Soaala-Wẽnd pʋʋsgo. A Elize dʋʋ gãaga zugu n gãand n bʋʋg biigã, n dɩk a noor n togle biiga noore, a nin n togl a nini, a nus n bogl a nusi, n tẽeg a meng n bʋʋg biigã la biiga yĩns wɩngame. A Elize sigame n kẽnd tẽnga, n gõod dooga pʋga, n pɩkd ka la ka, n le wa rʋ n gãand n bʋʋg biigã tɩ biiga tĩs naoor a yopoe, n puk a nini. La a Elize boola a Geazi n yeel-a: «Bool Sunem pʋg-sõngã.» T'a Geazi bool-a t'a wa sak a Elize. T'a Elize yeele: «Dɩk f biigã.» Pagã kẽeme n wõgemd a taoore n fõgneg a neng tẽnga n yaool n dɩk a biig n yi. A Elize lɛɛg n waa Gilgal. Kom n da be tẽngã. Bãngdba karen-biis wa n zĩ-la a Elize taoore, t'a yeel a sõgna: «Bɩ f rʋgl rʋg-bedrã n dʋg zẽedo, bãndgba karen-biis yĩnga.» Bãmb nin-yend kẽnga we-kɛɛnga n tɩ bao zẽedo. La a yãee bũmb wa no-raoog-kʋmba t'a tõs n yondg a fuugu, n wa bog ba n dɩk n los zẽeda rʋkẽ. Ned ba a ye ra ka mi a sẽn wa ne bũmb ninga ye. B tẽgna neba zẽedã tɩ b yʋbe; b sẽn lem zẽedã b kelmame n yetẽ: «Wẽnnaam nedã, ad zẽnem n be rʋka pʋga!» La b ka tõog n dɩ ye. T'a Elize yeele: «Tall-y zom n wa kõ-ma!» La a yãk n loba rʋkẽ wã n yeele: «Yãk-y n kõ nebã, tɩ b rɩ.» La zẽnem buud ka le kell rʋka pʋgẽ ye. Dao a yembre n yi Baal-Salisa. A waa n kõo Wẽnnaam nedã korgo ne kood rẽems buri. Yaa alkam kɛgeng bur pisi sẽn wẽ ne zom paalga. T'a Elize yeel a sõgna: «Pʋɩ neba tɩ b wãbe!» La a sõgna leokame: «M na n yɩɩ wãna n pʋɩ woto neb sẽn ta koabga?» T'a Elize le paase: «Pʋɩ-b tɩ b wãbe! Naaba-Wẽnd koɛɛg la woto: ‹B na n dɩɩme la na n kellame.› » Sõgna pʋɩɩ nebã. B rɩɩme la kellame wala Soaala Wẽnd sẽn da yeele. Siri dĩma tãnsoaba, a Naama, yamleoog ra kẽ-la a zu-soabã. Dĩma sɩd da nong-a-la wʋsgo, tɩ da tũu ne yẽnda tɩ Naaba-Wẽnd fãag Siri dãmba. Tãnsoaba sẽn da pid ne raoodã da bẽeda yĩng bãaga. La Siri dãmba da kẽnga fãabo n tɩ peeg a Israyɛl tẽng bi-pugla n maan yem-poaka, t'a ra tʋmd a Naama paga roogẽ. Bi-pugla yeela a zu-soaba paga: «M zu-soaba sã n da tõe n taẽ bãngda sẽn be Samari wã nengẽ, a ra na yols-a ne a bãagã.» T'a Naama kẽng n tɩ togs a zu-soaba woto: «Israyɛl tẽng bi-pugl n gom woto la woto.» La Siri dĩma leok-a lame: «Bɩ f kẽng tɩ m na tool Israyɛl dĩma sebre.» La a Naama kẽngame. A zɩɩ wanzurf sẽn ta neb piig la a nu zɩɩbo, sãnem sẽn ta neb a tãab zɩɩbo la fut piiga, a sẽn na n yeelgdẽ n teemnẽ. A Naama sẽn ta Israyɛl dĩma nengẽ, dĩma kɩs-a la sebre Siri naaba yĩnga. Sebra ra gʋlsa woto: «Sebrã sã n ta yãmb bala, bãng-y tɩ maam n tʋm m sõgne, a Naama, tɩ y sõng t'a tɩlg ne a yĩnga bãaga.» Israyɛl dĩma sẽn karem sebrã, a kẽesa a futu n yetẽ: «Mam yaa Wẽnd laa, n kʋʋd la m kõt vɩɩm, tɩ b tʋmd wãoor m nengẽ tɩ m sãoog a wãoodo? Ges-y, a ka baood m noor sɩda!» A Elize, Wẽnnaam neda, sẽn wʋm tɩ Israyɛl dĩma kẽesa a futu, a tʋmame tɩ b yeel dĩma: «Yãmb kẽesa y fut bõe yĩnga? Bɩ a Naama wa m nengẽ la a na bãng tɩ bãngd bee Israyɛl tẽnga.» A Naama waa ne a wiidi la a bilim-bilm n tɩ yals a Elize dignoorẽ. A Elize tʋmame tɩ b yeel-a: «Kẽng Zʋrdẽ kʋɩlgã n tɩ so naoor a yopoe tɩ f yĩng na sãooge la f kõn le yɩ rẽgd ye.» A Naama sũur puugame t'a loog, n yeele: «Ade mam da tẽedame t'a na n yiẽ n sega maam, la a wa a toore n pʋʋs Wẽnnaam, a Soaala, la a rɩk a nugu n sɩɩs mam yĩngã n sãoog m bãagã. Damas kʋɩlsã, Abana la Farfar, pa são a Israyɛl kʋɩlsa fãa bɩ? Mam ka tõe n so be n paam laafi laa?» La a wẽnemdame n dɩk a sor n kuiisẽ ne sũ-puuri. T'a sõgen kãsenga kolg n gom ne-a, n yeele: «Ba bãngda sã n da kosẽ yãmb bũmb sẽn ya toogo, y ra kõn maanẽ bɩ? Tɩ b pa gomd a sẽn yeel bala: ‹So tɩ f na paam laafi!› » Dẽ marsã la a Naama sig n lis Zʋrdẽ koomẽ naoor a yopoe, wala Wẽnnaam neda sẽn kõ noore, la a yĩng lebga wa bi-bilf yĩnga, la a paama laafi. A leba Wẽnnaam neda nengẽ ne a poorẽ dãmba fãa n tɩ yals a taoore n yeele: «Marsã, mam miime tɩ Wẽnd ning sẽn be Israyɛl tẽnga bala la Wẽnnaam tẽng zug ka. La marsã, m kotame tɩ y sak n deeg yãmb yamba kũuni.» A Elize leokame: «M wẽend ne Wẽnd ning m sẽn tũud a soabã, tɩ m kõn deeg ye.» Ne a Naama sẽn da pẽdgd-a t'a reegã, a pa sak ye. A Naama yeelame: «Sã n ya boto bɩ y kõ-m sore tɩ b yãk tẽnga tãndo n zɩlg bõn-wees a yiibu, m yĩnga, tɩ m ka na n le kʋ yũ-noog maoongo bɩ yamleoog maoong n kõ ned a to sã n ka Naaba-Wẽnd ye. M sẽn kot yaa Naaba-Wẽnd maan-m sugri tɩ m zu-soaba sã n kẽed a Rimõ doogẽ n na n pʋʋse b minim n tikda m kanga, tɩ ma me naagd bãmb n wõgemd a Rimõ roogẽ. Bɩ Naaba-Wẽnd kõ-m sugri manesem kãng yĩnga.» A Elize leok-a lame: «Bɩ f kẽng ne laafi!» La a kulame. A Naama sẽn zãag bilfu, Wẽnnaam neda, a Elize sõgne, a Geazi yeela a sũurẽ: «Mam zu-soaba basa a Naama, Siri nedã, t'a loog n ka reeg bũmb ye; la m wẽend ne Wẽnd tɩ m na babs-a n tɩ paam bũmbu.» La a Geazi zoe n babsa a Naama. A Naama sẽn yãe t'a zoet n pʋgd a poore, a zĩnda a bilim-bilma pʋga n sig tao-tao n seg-a, n sok-a: «Yaa noogo?» T'a leoke: «Noog bala! M zu-soabã n tʋm-m tɩ m wa yeel yã: ‹Kom-bɩɩb a yiib n yi Efrayim tãngã n wa mars-mars noogã; b yaa bãngdb karen-biisi; mam kotame tɩ y yãk wanzurf wakɩ koɛɛng a ye n kõ-ba, n paas fut a yiibu.› » T'a Naama yeele: «Bɩ y sak n deeg wakɩ koeems a yi.» La a pẽdg-a lame t'a reeg, la a kɩtame tɩ b loe wanzurf wakɩ koeems a yi sẽn wã bõonego, yond a yi, n kɩs sõgen-kamb a yi, tɩ b tʋk n lʋɩ a Geazi taoore. B sẽn ta Ofɛl, a reeg-b-la bãmb nusẽ n tɩ bĩng a yiri, la a kulsa sõgen-kamb a yi wã tɩ b looge. La a Geazi yaool n bʋʋga a zu-soaba, a Elize, tɩ yẽ sok-a: «Geazi, f yita yɛ?» T'a leoke: «Yãmb sõgna pa kẽng ni ye.» La a Elize yeel-a lame: «Ka vẽnegre n vẽneg-m tɩ m yãe ned sẽn yi a bilim-bilma n tiimd tẽng n zoe n seg fooma laa? La m sok n gese, yaa marsã, la fo na n deeg fu-neeba la ligdi, n da oliviye tɩɩse, bugsuntundu n paas piisi, niisi, yem-daado la yem-pogs bɩ? Bãng t'a Naama bãaga na n yõka foom ne f yagens daar fãa.» A Geazi sẽn yi a Elize nengẽ, a lebga yĩng soaba n pelg wa goore. Bãngdba karen-biis yeela a Elize: «Ade, tõnd sẽn be zĩig ning ne yãmb ka wã yaa sẽk d yĩnga. Bas-y tɩ d kẽng Zʋrdẽ tɩ ned kam fãa tɩ wa ne raoog tɩ d tilg yiri n zĩndi.» T'a Elize leoke: «Aya bɩ y kẽnge!» Tɩ ned a ye yeele: «D kotame tɩ y sak n yãag-do» T'a leoke: «M na yãag yã.» La a yãag-b lame tɩ b kẽnge. B sẽn ta Zʋrdẽ, b kɛɛ raado. La ned a ye waa n kɛɛgda da-bedre, t'a lar fʋrg n lʋɩ koomẽ t'a kelme: «M ba ye, mam da penga larã!» Tɩ Wẽnnaam nedã sok-a: «A lʋɩ yɛ?» T'a wilg zĩiga t'a Elize kɛɛg raoogo n lob zĩ-kãnga tɩ larã ruki. T'a yeele: «Rɩk-a!» T'a tẽeg a nug n dɩk-a. Siri dĩma da kaooga tãpo ne a Israyɛl. A sã n da maan yẽsgo ne a tãnsoaben-dãmba n yeel-ba: «Yãmb na n gãnega tãpo zĩ-kãnga la zĩ-kãnga,» Wẽnnaam nedã ra tʋmdame tɩ b tɩ yeel a Israyɛl dĩma: «Maan-y gũusg zĩ-kãnga, tɩ Siri dãmba na n siga beene.» A Israyɛl dĩma da tʋmda neb Wẽnnaam nedã sẽn wilg zĩig ningã, n maand gũusgu, la pa yɩ vugr bala, bɩ naoor a yi bal ye. Siri dĩma yam waa n yooda ne yell kãnga, t'a tigim a tãnsoaben-dãmba n yeel-ba: «Yãmb pa na n yaa n togs maam ned ninga sẽn be-a yãmb sʋka, n kẽnd n zãmbd tõndo Israyɛl dĩma nengẽ?» Tɩ ned a ye leoke: «D zu-soab la d dĩma, ad-y ka tõnd ned ba a ye. Yaa a Elize, bãngd ning sẽn be Israyɛl tẽngã. Yẽ tõeeme n togs Israyɛl dĩma gomd ning fãa yãmb sẽn gomd y roogẽ.» Tɩ dĩma yeele: «Bɩ y kẽng n tɩ gese a be yɛ, tɩ m kɩt tɩ b yõk-a!» Tɩ b wa yeel-a: «Ade, a bee Dotã.» Dĩma tʋma wiidi la bilim-bilm la tãb-biis wʋsgo tɩ b wa zembala n gũbg tẽnga ne yʋngo. A Elize sõgna sẽn yi tõd-beoogo, a yãee tãb-biisi sẽn gũbg tẽngã ne wiidi la bilim-bilm. T'a sõgna sok-a: «M naaba, d na n maana wãna?» T'a Elize leok-a: «Da zoe bũmb ye tɩ sẽn be-b ne tõnd yɩɩda sẽn be-b ne bãmba.» A Elize pʋʋsame. A yeela woto: «Naaba-Wẽnde, puk-y m sõgna nini t'a yãe!» Soaala-Wẽnd puka a nini la a yãeeme: Ade, tãnga fãa da berga ne wiidi la bugum bilim-bilm sẽn gũbg a Elize. Siri rãmba sẽn wa a nengẽ, a Elize pʋʋsa Wẽnd n yeele: «M kotame tɩ y lob nin-bãmba zondo.» La Soaala-Wẽnd lob-b-la zondo, wala a Elize sẽn kose. La a Elize yeel-b lame: «Sor ka be ka ye, la yãmb sẽn baood a soaba ka kẽed tẽn-kãnga ye. Wa-y ka, pʋg-y maam tɩ m yãag y sẽn baood dao ninga nengẽ.» La a peeg-b lame n tɩ kẽes Samari. B sẽn kẽ Samari, a Elize yeelame: «Naaba-Wẽnde, puk-y nin-bãmba nini tɩ b yãe.» La Soaala-Wẽnd puka b nin la b yãeeme la ade, b ra bee Samari tẽnsʋka. Israyɛl dĩma yãend-b lame n sok a Elize: «M ba, m kʋ-b bɩ?» T'a Elize leoke: «Yãmb pa na n kʋ-b ye. Yãmb sẽn mi n gũbg b rãmb ne sʋʋs la tãbdo n yõg n kẽes yembdã, yãmb kʋʋd-b lame bɩ? Tẽgen-y dɩɩb la koom b taoore tɩ b rɩ la b yũ la b yaool n leb b zu-soaba nengẽ.» Dĩma kɩtame tɩ b segl dɩɩb n kõ-b tɩ b rɩ la b yũ, la a yaool n bas-b tɩ b leb b zu-soaba nengẽ. Dẽ tɛka Siri fãadba, pa le tag a Israyɛl soolmẽ ye. Dẽ loogr poore, a Ben-Adad, Siri dĩma, tigma a tãb-biis fãa n wa gũbg Samari. Kom kãseng lʋɩɩ Samari, tẽnga sẽn paga yĩnga. Bõang zug waa n daada wanzurf wakɩ koeems pis-nii, tɩ sũm ne wũmbl koosd wanzurf wakɩ koeems a nu. Israyɛl dĩma waa n loogda lalga zugu la pag a yembre kaasame n bool-a n yetẽ: «Sõng-y-m wɛ, m naaba la m dĩma!» Tɩ dĩma leok-a: «Soaala-Wẽnd pa sõng-fo, m na n sõng-f-la ne bõe? Ne kood sẽn dʋr zɛɛgẽ bɩ ne bugsuntung rãam?» La dĩma le paasame: «Bõe la f rata?» Tɩ pagã leoke: «Pʋg kãnga n yeel maam: ‹Wa ne f biigã tɩ d wãb-a rũnna tɩ beoogo d na wãb maam dẽnna.› Tɩ tõnd dʋg mam biigã n dɩ; vẽkembeoogo, mam sẽn yeel-a: ‹Wa ne f biigã tɩ d wãbe,› a solga a biiga.» Dĩma sẽn wʋm paga goama, a kẽesa a futu, la rẽ t'a ra loogda lalga zugu, la nebã yãeeme t'a yeelga sũ-pa-noang fuugu, a futã tẽngre. Dĩma yeelame: «Soaala-Wẽnd na sɩbg ma, n le sɩbg n bãge, mam sã n ka rok a Safat biiga a Elize zug rũnna.» A Elize da zĩi a roogẽ tɩ nin-kẽemsa da zĩ n yeg-a, la dĩma waa n tʋma ned a nengẽ. Sõgna ra nan ka paam n ta ye, la Elize zoe n yeela nin-kẽembã: «Yãmb ne-la, nin-kʋʋda biig tʋma ned t'a wa rok m zugu, bɩ y gũus t'a sẽn tʋm a soaba sã n wa bɩ y pag roogã la y ra bas-a t'a kẽ ye. La ade, sãnd ka a zu-soabã n pʋgd-a tɩ d wʋmd a kẽnd rãamda bɩ?» A sẽn da nan ket n gomd woto, la dĩma sẽn sig a yiri n yeel-a: «Ade, yel-beed kãnga fãa yita Naaba-Wẽnd nengẽ, m yɩta wãna n le maan teegre ne Soaala-Wẽnde?» A Elize yeelame: «Kelg-y Soaala-Wẽnd gomde, Wẽnd koɛɛg la woto: ‹Beoog wakat kãnga, zom wamde na ra wakɩre, tɩ alkam kɛgeng wama a yi ra wakɩre, Samari tẽng noorẽ.› » La dĩma sẽn da tikd wed-kɩɩm ningã, yeelame: «Soaala-Wẽnd poog vẽya, saaga zug menga, tɩ kood rʋʋge, gomd kãnga na tõog n yɩ sɩda?» T'a Elize leok-a: «F nif na yãe, la f kõn dɩ-a ye» Dap a naase da be tẽnga noorẽ; b da bẽeda yĩng bãaga, la b ra yeta taaba: «Bõe yĩng tɩ tõnd zĩ ka n gũud kũum? Koma sẽn lʋɩ tẽngã, d sã n yeele: ‹D kẽ tẽnga pʋga,› d na n kiime. D pa ka me d na n kiime. Sẽn ya woto wã d loog n tɩ kẽ Siri rãmba nengẽ; b sã n ka kʋ-do, d na vɩɩnd, b sã n kʋ-do, rẽ la bala.» Zĩig sẽn waa n sobgdẽ neb a naasa yik n dabda Aramsa tãb-sikẽ. Bãmb sẽn ta tãb-sika noorẽ, b pa mik ned ba a ye. Soaala-Wẽnd da kɩtame tɩ bʋʋr wulumd Aramsa tãb-sikã: dag n yaa bilim-bilm la wed-dʋʋdb rãamde, tãb-biis zãma kẽeng rãamde, tɩ Aramsa yeel taaba: «Israyɛl dĩma, yaoo Ititsã nanamse la Ezipt nanamse n dɩk tãb-biisi tɩ b wat n na n kaoog zabre ne tõndo.» Dɩlla zĩiga sẽn sobge, b zoeeme n bas b roto, b wiidi b bõeense, b tãb-sikã, wa a sẽn da ya-la, b zoeeme n na n fãag b yõore. Woto wã bãad dãmba sẽn ta tãb-sikã, b kẽe roog a ye pʋga la b rɩɩme, la b yũume, la b rɩka ligd ne sãnem la futu n tɩ solge. B lɛɛg n wa kẽe roog a to la b sẽn yãend be wã me, b yãkame n tɩ solge. Bãad dãmba waa n yeela taaba: «Tõnd sẽn maanda ka neer ye. Dũnna daarã, yaa kibar noog daare. Tõnd sĩnd d noor n gũ tɩ beoog vẽege, d kõn põs sɩbgre ning sẽn na n lʋɩ d zuga ye. Dẽ yĩnga wa-y tɩ d kẽ tẽngã, d kẽng na-yiri n tɩ togs kibar noogã.» B waa n boola tẽnga noor gũudba n wilg-b woto: «Tõnd kẽe Aramsa tãb-sika la tõnd pa yãend ninsaala, d ka wʋm ninsaal koɛɛg ye. D sẽn yãend bala yaa wiidi sẽn za b baarẽ la bõeense, la ro-vɩɩdo.» Tẽnga noor-gũudb boola pʋgẽ n wilg dĩma zaka rãmba. Dĩma yika ne yʋngo n yeel a sõgen-kambã: «Bas-y tɩ m wilg-y Aramsa sẽn bilgd sɩlem ninga. B sẽn mi tɩ kom namsda tõndã, b yik n basa b tãb-sikã n tɩ soond weoogẽ, n yeel taaba: ‹D sẽn pag b rãmb b tẽngẽ wã ma n yi b tẽngã tɩ d kell n yõg-b vɩɩse la d na paam n soog tẽngã.› » Dẽ me la sõgen a ye leok yã: «Bɩ d yiis wiidi a nu wã sẽn kellã, la sẽn na n ki, wa tẽnga rãmb fãa sẽn ka na n põsã. D tʋm-ba n gese.» B yiisa bilim-bilm a yiibu tɩ dĩma tʋm-ba tɩ b rɩk Aramsa nao. A yeel-b lame: «Aya, bɩ y kẽng n tɩ gese!» B rɩka Aramsa nao al n tɩ tãag Zʋrdẽ kʋɩlga, la sorã ra pida ne futu la teedo Aramsa sẽn da zoetẽ la b lobda. B sẽn tʋm b rãmba lebg n wa togsa dĩma. Dẽ marsã la neba yii n tɩ zɛ Aramsã tãb-sikã. Dẽ me la alkam pɛɛlg zom bãaneg wamd koos wakɩre tɩ alkam kɛgeng wam a yi da raad wakɩre, wa Naaba-Wẽnd sẽn da pĩnd n togse. Dĩma da kɩtame tɩ sõgen ninga a sẽn da tikd a soab n kẽnda tɩ yals n gũud tẽnga noor kʋɩlengã; la nebã tab-a lame n beds t'a ki, wa Wẽnnaam nedã sẽn da yeele. A Elize da wilga dĩma rẽnna a sẽn waa a nengẽ wã raare. Sɩda, Wẽnnaam neda da waa n yeela rĩma: «Beoog yibeoog wakat kanga, Samari tẽnga rãmb raagẽ, alkam kɛgeng wam a yi na n daa wakɩre, tɩ zom pɛɛlg wamd a ye raad wakɩre.» Wed-kɩɩma ra yaool n yeela a Elize: «Ba Soaala-Wẽnd yoog saaga vẽya, tɩ kood dʋʋge, gomd kãnga kõn taas ye.» T'a Elize ra yeele: «F na yãend ne f nifu la f kõn dɩ ye.» La yɩɩ boto. Neba tab-a-la tẽnga noore la a kiime. A Elize da gomda ne pag ninga a sẽn da vʋʋga a soab biigã n yeel-a: «Yiki, foom ne f zak rãmba, n tɩ zĩnd f sẽn tõẽ tɩ Naaba-Wẽnd boola kom la a na n sɩbga tẽnga yʋʋm a yopoe.» Paga maana wa Wẽnnaam nedã sẽn yeele, n yik ne a yir dãmba n kẽng n tɩ zĩnd Filisti rãmba tẽngẽ yʋʋm a yopoe. Yʋʋm a yopoe sẽn looge, pagã yii Filisti rãmba tẽnga n lebg n wa, la a tɩ yõka naab sɛɛga t'a lebs-a a yiri la a pʋʋgo. Dĩma da sõsda ne a Geazi, Wẽnnaam nedã sõgne, la rĩma ra yetame: «Bɩ f maneg n togs maam tʋʋm kãsensa fãa, a Elize sẽn maana.» A Geazi da togsda dĩma a Elize sẽn vʋʋg bi-kɩɩng a ye to-to. Mik a sẽn waa n gomdã, biig ning sẽn vuuga ma taame, n kudg naab kãntɩɩga t'a lebs-a a pʋʋgo la a yiri. T'a Geazi na n yeele: «M naaba, ad-y pagã, ne a biigã, a Elize sẽn vʋʋgã!» Dĩma soka pagã t'a na n maneg n togs kibarã. La dĩma boola a tãnsoab a ye n kõ-a noor t'a ges paga yelle n yetẽ: «Sõng tɩ b lebs pagã a sẽn so zãnga, ne a pʋʋgã sẽn paam yõod ninga, paga sẽn yi tẽnga tɛka, n ta rũnna.» A Elize kẽnga Damas. Segame tɩ Aram dĩma, a Ben-Adad, da ka laafi ye. B tɩ togs-a-la woto: Wẽnnaam nedã taa ka. Tɩ dĩma yeel a Azayɛl: «Rɩk kũuni f nugẽ n tɩ seg Wẽnnaam nedã, la f bõs t'a pʋʋs Wẽnd n bãng m sã n na n tɩlga ne bã-kãnga.» A Azayɛl kẽng n tɩ sega a Elize ne kũuni a sẽn zɩ, a yĩnga. A yãka bõn-yõod fãa sẽn be Damas n zɩlg yʋgma pis-naase. A taame n yals a Elize taoore n yeele: «Y biig a Ben-Adad n tʋm maam tɩ m wa sok yãmb woto: ‹M na n tɩlga ne m bãaga bɩ?› » A Elize leok-a lame: «Kẽng n tɩ belg-a n yeel-a t'a sɩd na n tɩlgame, la Soaala-Wẽnd yaool n wilga maam t'a na n kiime.» La vugr bala Wẽnnaam neda waa n yɛsa sɩɩ t'a nina nood t'a get a Azayɛl n ka kamsdẽ la a yãbda. T'a Azayɛl sok-a: «Yaa bõe yĩnga tɩ mam zu-soaba yãbda?» A Elize leokame: «Yaa tɩ mam mii wẽng ning fo sẽn na n maan a Israyɛl kambã. Fo na n yõoga b tãnsoben-dota bugum, fo na n kooda b kom-bɩɩba ne sʋʋse; b kom-peelse, fo na n tag-b lame n bedse; b pagba sẽn tʋte, fo na n weed-b lame.» La a Azayɛl leokame: «Yãmb yamba me zema bõe? Baag wa maama na n yɩɩ wãn n maan yɛl a woto?» T'a Elize leok-a: «Soaala-Wẽnd wilga maam, foo n na n lebg Aramsa dĩma.» A Azayɛl basa a Elize n leb a zu-soaba nengẽ t'a sok-a: «A Elize yeelame tɩ bõe?» T'a leoke: «B yeela maam tɩ sɩd menga yãmb na n tɩlgame.» Vẽkembeoogo, a Azayɛl rɩka fu-goabga n los koomẽ n yaag n pil dĩma nenga. A Ben-Adad kiime t'a Azayɛl led-a a zaoorẽ. A Akab biig a Zoram da rɩta naam Israyɛl. Dẽ tɩ yaa a Zozafat n da rɩt naam Zɩɩda. Yʋʋm sẽn maan a nu t'a Zozafat looge, yẽ me biig sẽn boond tɩ Zoram lebga Zɩɩda dĩma a ba zĩigẽ. A Zoram, naama deegr wakato t'a da tara yʋʋm pis-tã la a yi. A rɩɩ naam Zerizalɛɛm yʋʋm a nii. A rɩka a Israyɛl dĩm dãmba nao, wala a Akab roog rãmba sẽn tũ a soaba, t'a da peega a Akab bi-pugla n maan a paga. A maana wẽnga, Soaala-Wẽnd nifẽ. La ne rẽ fãa, Naaba-Wẽnd pa sak n bas t'a Zɩɩda wã ye, b tʋʋm-tʋmda a Daviid maasem yĩnga. Bãmb n da kãabe tɩ b na kell n basa a roogẽ la a yagensa roogẽ, roagd a ye, fitil a ye, la a bugma na n wida yʋʋm sẽn kõn sɛ. Dĩm kãng zamaanẽ, la Edom zẽk a zug ne a Zɩɩda. Edom dãmba baoo dĩm n kõ b menga. A Zoram yik n kẽnga Sayir ne bilim-bilma gilli. A ra yika ne yʋngo n zab ne Edom dãmba sẽn da gũbg-a, yẽ ne bilim-bilma nanamse, tɩ neba zoe n leb b rotẽ. A Edom kell n zẽka a zug ne Zɩɩda rĩm n tãag rũnna. Yɩɩ wakat kãng me la Libna rãmb me zãgs t'a kõn dɩ naam b zug ye. A Zoram tʋʋm a taaba, a sẽn maan fãa, rẽ fãa sẽ pa gʋls a Zɩɩda dĩm dãmb sebra pʋgẽ bɩ? La a Zoram tɩ saka a saam-dãmba, tɩ b mum-a ne a saam-dãmba, a Daviid na-tẽngẽ, t'a biiga a Akaziyas led a zaoorẽ. A Zoram, a Akab biiga la Israyɛl dĩma naam yʋʋmd piig la a yi soaba, a Akaziyas, a Zoram biiga, n dʋ zaoor n lebg Zɩɩda dĩma. Ad-y rẽ t'a Akaziyas da tara yʋʋm pisi la a yi la a rɩɩ naam Zerizalɛɛm yʋʋmde. A ma yʋʋr da boondame t'a Atali, a Israyɛl dĩm, a Omri, bi-pugla. A rɩka a Akab roog rãmba nao la a maana sẽn ya wẽnga Naaba-Wẽnd nifẽ, wala a Akab roog rãmb sẽn maane, t'a da kĩi ne a Akab. A yãaga a Zoram, a Akab biiga, n tɩ zab ne Aram dĩma, a Azayɛl, Ramot-Galaad. Aramsa pogla a Zoram. Dĩma a Zoram lebg n waa Zizreyɛl n na n tɩbs Siri dãmba sẽn pogl-a poglg ningã Ramot, a sẽn da wa n zabd ne a Azayɛl, Aram dĩma. A Akaziyas, a Zoram biiga la Zɩɩda dĩma kẽnga Zizreyɛl n na n tɩ ges a Akab biiga a Zoram gãase, t'a ra pa keem ye. Bãngda a Elize boola bãngdba karen-biig a yembre n yeel: «Wudg n wa tɩ m tʋm-fo, reeg kaama ne tʋkã n kẽng Ramot-Galaad. Fo sã n ta, bɩ f bao a Zewu, a Zozafat biiga, a Nimsi yagenga; f sã n yãe-a, bɩ f yiis-a a tũud-n-taas sʋka, n peeg-a n kẽ roogẽ. Fo na rɩk kaama tʋkã n pʋdg a zug n yetẽ: ‹Naaba-Wẽnd koɛɛg la woto: Mam pʋdgda f zug kaam tɩ f yɩ Israyɛl dĩma.› Dẽ poore, bɩ f pak kʋɩlenga n yɩ n zoe la f da yaas ye.» Bãngdba karen-biiga kẽnga Ramot-Galaad, a tɩ mika tãnsoaben-dãmba tɩ b zĩ la a yeelame: «M naaba, m tara koɛɛg ne yãmba.» A Zewu sokame: «Tõnd yaa wʋsg ka, f tara koɛɛg ne ãnda?» T'a leoke: «Ne yãmba, m naaba» La a Zewu yik n kẽe roogẽ. Bãngda pʋdga a zug kaam n yetẽ: «Naaba-Wẽnde, a Israyɛl Wẽnnaama, koɛɛg la woto: ‹Mam pʋdgda f zug kaam tɩ f yɩ dĩma n soog Wẽnnaam buudu, a Israyɛl. Fo na n pãba f zu-soaba a Akab roogo, la maam n na n sok a Zezabɛl samde, m tʋʋm-tʋmdba, m no-rɛɛsdba zɩɩma a sẽn daaga samde. A Akab roog gilli na n wãame, rao fãa, yem-daoogo wala burkĩna, a Israyɛl pʋgẽ, na n kiime. Mam na n sɩbga a Akab roogo, wẽnd m sẽn sɩbg a Zeroboam, a Nebat, biiga, wẽnd m sẽn sɩbg a Basa, a Ayiya biiga. Baas na n wãba a Zezabɛl, Zizreyɛl pʋgẽ, la ned kõn mum-a yaoogẽ ye.› » La bãngdba karen-biig paka kʋɩlengã n yi n zoe, a sẽn gom n sɛ. A Zewu yii n bʋʋga a zu-soaba tãnsoaben-dãmb a taabã tɩ b sok-a: «Yaa noogo? Zu-lɛbga waa fo nengẽ, bõe yĩnga?» T'a Zewu leoke: «Y mii raoã ne a sẽn saad n gomd goam niynsã.» La b yeelame: «Zirẽ! Maneg n togs fãa.» La a Zewu yeel-b lame: «A goma ne maam woto, n le paas woto la baasgẽ a yeelame: ‹M na n pʋdga f zug kaam tɩ f yɩ Israyɛl dĩma.› » La b wẽneg n pidga b koaba n yɛdg geera zugu t'a zĩndi, la b peeba baorgo la b kelennẽ: «A Zewu yaa dĩma!» Segame t'a Israyɛl tãb-biisa gilli da zabd n na n fãag Ramot Galaad Aram dĩm a Azayɛl nugẽ. Zabra sẽn waa n zabd ne a Azayɛl, Aram dãmba ra pogla dĩm a Zoram. Woto a ra lebg n kẽe Zizreyɛl n na tɩp a menga. A sãmpogra ra paam n gãneg-a lame. A Zewu, a Zozafat biiga, a Nimsi yagenga, soos n zãmba a Zoram. A Zewu yeela tãnsoaben-dãmbã: «Y sã n lɛɛg n kẽeda mam tãpẽ, bɩ ned ba a ye da yi n kẽ Zizreyɛl tẽngã n togs yella sẽn maana ye.» A Zewu kẽe bilim-bilm n kẽng Zizreyɛl. A Zoram bãaga da gãneg-a lame t'a Akaziyas, a Zɩɩda dĩma, wa n na n ges a gãaga. Tãb-gũuda sẽn da gũud Zizreyɛl tẽnga zĩnda yĩngr n tees n yãend a Zewu ne a tãb-biisa sẽn wate, t'a yeele: «Mam nee tãb-biis kʋʋngo» T'a Zoram yeele: «Tʋm-y wed-dʋʋda t'a kẽng n tɩ n seg-ba n sok-b n gese yaa laafi yĩng la b wat bɩ.» Wed-dʋʋda tɩ seg-b lame n sok-ba: «Naab tɩ b wa ges yaa laafi yĩng la y wat bɩ?» T'a Zewu leoke: «Sã n yaa laafi, bõe n ta foom. Loog n leb mam poorẽ!» Tãb-gũuda le togsame: «Ad-y y sẽn tʋm a soaba bʋʋg-b lame, la a pa lebg ye.» Dĩma tʋma wed-dʋʋd a to tɩ yẽ me bʋʋg-ba n yeele: «Naaba tɩ m wa soke, yaa laafi?» A Zewu leokame: «Sã n yaa laafi bõe n ta foom? Loog n leb mam poorẽ!» Tɩ tãb-gũuda leb n yeele: «A bʋʋg-b lame la yẽ me pa lebg ye; la wa m sẽn ne: kẽndã yaa a Zewu, a Nimsi yagenga kẽnde, t'a zoeta tʋʋle wa gãeenga.» A Zoram yeelame: «Bɩ y sog m bilim-bilma!» Tɩ b sog bilim-bilma. A Zoram, Israyɛl dĩma ne a Akaziyas, Zɩɩda dĩma, kẽng n na n tɩ sega a Zewu, ned kam fãa a bilim-bilm pʋga. B tɩ mik-a-la Zizreyɛl dao a Nabot pʋʋgẽ. A Zoram sẽn yãee a Zewu bala a sokame: «Yaa laafi bɩ Zewu?» T'a Zewu leoke: «Laafi bee yɛ, tɩ f ma a Zezabɛl wẽn-naandsa pʋgb la a tɩta tar paasg n dabda?» A Zoram wẽnemda a salbre t'a na n zoe, n yeel a Akaziyas: «Zãmbo Akaziyas!» La a Zewu dɩka tãpo n tão a Zoram bãgdã sʋka, la pĩima sãaga a sũurã n yi, tɩ dĩma lʋɩ a bilim bilma pʋga. A Zewu yeela a wed-kɩɩm-naaba, a Bidkar: «Rɩk-a n lob Zizreyɛl dao a Nabot pʋʋgẽ. Tẽeg bala Soaala-Wẽnd sẽn yeel a ba wã poorẽ, dĩm a Akab poorẽ, daar ning maam ne foom la neb a taaba sẽn waa n yãag-a ne bilim-bilma. Soaala yeelame: ‹Maam a Wẽnde, m yãenda fãa, zaamẽ, f sẽn waa n kʋʋd a Nabot ne a kambã. Maam n wẽende, maam a Naaba-Wẽnde, tɩ m na sɩbg-f rẽnd yĩnga f pʋʋgẽ ka bala.› » Woto wã a Zewu paasame bala: «Bidkar, dɩk a Zoram n lob pʋ-kãnga, n zems wala Soaala sẽn da pĩnd n wilgi.» A Akaziyas, Zɩɩda dĩma, sẽn yãee woto, a rɩka Bɛt-Gã sor n zoetẽ, la a Zewu pʋg a poore n kõ noor kãnga: «Bɩ y tão yẽ me!» Tɩ b tão-a n pogl, a bilim bilma pʋga, Gur Kunkubrã zugu, sẽn be Yibleam sɛɛga, t'a zoe n tɩ kẽ Megido n ki be. A sõgen-kamba tall-a-la ne bilim-bilma n tɩ mum-a yaoogẽ, a Daviid na-tẽngẽ. Yɩ-la a Zoram, a Akab biiga, naam yʋʋmd piig la a yembr soaba, la a Akaziyas da lebg Zɩɩda dĩma. A Zewu da taa Zizreyɛl la bala la a Zezabɛl sẽn wʋm a waoongo. A baoo kɩrʋ n ning a nini, n pãnem a zuga neere, n lɩkd a roog võorẽ. A Zewu sẽn gãndg tẽnga noore, a Zezabɛl yeelame: «Yaa laafi, dĩm-kʋʋd-taag wa a Zimri?» A Zewu zẽk a nenga n ges võora sẽnẽ n yeele: «Ãnd n be mam poorẽ, ãnda?» Na-yir dãmb a yiib bɩ a tã n lɩke. T'a yeel-ba: «Bɩ y lob paga tẽnga» B tus a Zezabɛl n lub tẽnga t'a zɩɩm fẽeg lalgã la wiidã. T'a Zewu tab-a ne a bilim bilma n looge. La a Zewu kẽe rĩma zakẽ n kɩt tɩ b wa ne bũmb t'a rɩ la a yũ, n na n yaool n yeel a tũud-n-taasã: «Tɩ ges-y pʋg-kõb-wẽngã yelle, la y mum-a t'a yaa dĩm biiga.» B kẽngame tɩ b na n tɩ mum-a la b ka yãe bũmb sã n ka a zu-wanga, a karse la a nus-pʋs a yi. Tɩ b lɛɛg n wa togs a Zewu, t'a yeele: «Soaala-Wẽnd gomdã taasame, b sẽn kɩt t'a Eli, Tesbe daoã, yeele: ‹Zizreyɛl pʋʋgẽ, baas na n wãba a Zezabɛl nemdo. A Zezabɛl yĩnga na n lebga wa birga b sẽn birg pʋʋgo, b kõn tõog n yeele tɩ wã la a Zezabɛl ye.› » A Akab kamb pisopoe n da be Samari. A Zewu gʋlsa sebr n tool Samari nanamsã la nin-kẽembã la a Akab kamba ba wubdsã. A gʋlsa woto: «Ade, yãmb sẽn get dĩma kamb yelle, n tar bilim-bilm, wiidi, zab-teedo la y kẽed tãnsoben-doogẽ, y sã n deeg sebr kãnga, bɩ y ges yãmb zu-soaba kamb sʋka ãnd la nin-sõng la nin-tɩrga; zĩndg-y bi-kãng a ba naama zaoorẽ la y zab n fãag y zu-soaba roogo.» Dabeem yõk-b-la al wʋsgo tɩ b yeel taaba: «Dĩm dãmb a yiib sã n ka tõog nin-kãnga, tõnd yɩta a wãna n tõog-a?» Dẽ me la sõgen-kãsenga, tẽnga kombere, nin-kẽemba la kamba ba-wubds tʋm tɩ b yeel a Zewu: «Tõnd yaa yãmb yemse, yamb sẽn yet bũmb ninga bala la d na n maane; tõnd pa na n kõ ned naam ye, maan-y bũmb ninga sẽn zems yãmb nifẽ.» A Zewu leb n gʋls-b-la sebre n yetẽ: «Sã n ya boto, yãmb sã n kẽeda maam la yãmb sã n kelgda mam koɛɛga, bɩ y fiuus y zu-soaba kamba fãa zutu n wa ne b beoog woto wẽnde, mam nengẽ, Zizreyɛl tẽnga.» Dĩma kamb da yaa pisopoe n be tẽnga nin-bɛd zagsẽ tɩ b wubd-ba. Sebra sẽn ta bãmba, b yõga dĩma kamba n kood bãmb pisopoe wã fãa, n sagl b zutã pet pʋga n tool a Zewu, Zizreyɛl tẽnga. B sẽn tʋm a soaba kẽe n yeela a Zewu: «B waa ne dĩma kamb zutu.» T'a yeele: «Bɩ y rɩgl-b n tedg, tẽngã noorẽ, zĩis a yiibu, tɩ beoog vẽege!» Beoog sẽn vẽege, a Zewu yii yɩnga n yals n yeel neba fãa: «Ad-y yãmb la nin-sõma tɩ taal ka y zug ye! Maam bal zug la yell dog yã tɩ maam n zãmbe la m kʋ a Zoram. La nin-bãmba fãa sẽn ka wã, ãnda n kʋ-ba? Bɩ y bãng tɩ Soaala-Wẽnd gomd ba a ye ka lʋɩt vɩʋʋgẽ ye. Bãmb n gom n kãab a Akab roogo. Naaba-Wẽnd pidsa b gomdã b sẽn yeel ne b bãngd a Eli noorã.» La a Zewu kʋ-la a Akab doog rãmb fãa sẽn kell Zizreyɛl, a kombɛɛmba, a na-yir dãmba, a maan-kʋʋdba, ali n ka bas ned ba a yembre t'a põs ye. La a Zewu sẽn yi be, a kẽnga Samari. A rɩka sore, n ta Rũm-kɩɩms Bɛt-Ekɛd, n seg Zɩɩda dĩma saam-biisi, n sok-ba: «Yãmb yaa ãnd dãmba?» Tɩ b leoke: «Tõnd yaa a Akaziyas saam-biisi, la d wat n na n pʋʋsa dĩma kamba la a kamba ma, a Zezabɛl.» La a Zewu, yeelame: «Yõg-y bãmb fãa vɩɩse» B yõg-b-la vɩɩse, t'a kood-ba Bɛt-Ekɛd ko-baoora sɛɛga, bãmb pis-naase la a yi. A Zewu ka bas ned ba a ye t'a põs ye. A Zewu yiime n yãend a Zonadab, a Rekab biiga, sẽn da wat a segbo. A Zewu pʋʋs-a lame la a yeel-a lame: «Fo pʋg yaa pɛɛlg ne maam, wala mam pʋg sẽn ya pɛɛlg ne fooma bɩ?» T'a yet tɩ n-yẽe! T'a paas: «Sã n ya boto bɩ f tud f nugu.» T'a Zonadab yõk a nugu; t'a Zewu tak-a t'a rʋ bilim-bilma pʋga, yẽ sɛɛgẽ. A yeelame: «Tũ maam tɩ f na yãe m sũur sẽn yik seem ninga, n na n zab Soaala-Wẽnd yĩnga!» A tall-a-la ne bilim-bilma n ta Samari, n kʋ a Akab doog-rãmb sẽn da ket Samari. A kʋ-b-la zãng fãa, wa Soaala-Wẽnd sẽn da yeel a Eli. A Zewu yaool n tigma neba fãa n yeel-ba: «A Akab waooga a Baal bilf bala, a Zewu yẽ na n waooga a Baal wʋsg-wʋsgo. Marsã, bɩ y bool a Baal bãngdba ne a maan-kʋʋdba fãa tɩ b wa sak-ma, la ned ba a ye da vaal ye, tɩ mam dat n maana maoong kãsenga n kõ a Baal. Sẽn vaala fãa kõn tɩlg ye.» Mik a Zewu da maanda yam n na sãam a Baal kẽedba fãa. A kõo noor n yetẽ: «Bool-y neba tɩ b maan tigsg sõngo n waoog a Baal» B boola neba tɩ wa tigsgã. A Zewu tʋmame tɩ b sa n togs Israyɛl gilli la a Baal kẽedba fãa waame, la ned ba a ye ka pa n ka wa ye. B kẽ a Baal wẽnd doogẽ, tɩ Baal wẽnd doogã pid zãnga. A Zewu yeela ned ninga sẽn da so-a futa bĩngri: «Yiis futã n kõ-ba.» A Zewu tũ-la a Zonadab, a Rekab biiga, n kẽ a Baal wẽnd doogẽ, la a yeela nebã: «Bɩ y bao n gese sãnd sẽn pʋʋsd-b Naaba-Wẽnd ka naage, n ges yaa a Baal kẽedba bala n be ka.» La b kẽeme n na n kʋ laafi kosgo la yũ-noog maoongo. A Zewu yaool n da yãka neb pis-nii tɩ b yals yɩnga, la a da yeel b lame: «Nin-bãmba sẽn dɩk n sagl yamb nusẽ wã, bɩ nin-yend meng ra põs ye. Sẽn basa ned t'a põse, yẽ la b kʋʋda.» A Zewu sẽn kʋ yũ-noog maoongã n sɛ, a kõo tãb-biisa sẽn zao wiidi la wed-kɩɩmbã noor kanga: «Aya, wa-y! Bɩ y kʋ b fãa tɩ ned ba a ye da yi ye.» La tãb-biisa ne wed-kɩɩmba kẽeme n kʋ-b ne sʋʋse. B tɩ loba b yĩnsa we-kɛɛnga n le kẽ a Baal wẽnd doogẽ wã n yiis da-peesma n yõog bugum. B luba a Baal maan-kugrã, n lub a waoogra roogo, n maan t'a lebg neb rõbendg zĩiga; la rẽ n ket n be rũnna. Woto, a Zewu kɩtame t'a Baal menem a Israyɛl sʋka. La baasgo fãa, a Zewu ka bas yel-wẽna fãa a Nebat biig, a Zeroboam, sẽn maane, n lub a Israyɛl, yel-wẽnd pʋgẽ ye. A ka yiis sãnem nag-bi wã sẽn da be Betɛl la Dã ye. Soaala-Wẽnd yeela a Zewu: «Fo sẽn maan sẽn ya neer la tɩrga mam nifẽ yĩnga, n maan m sũur sẽn da rat ne a Akab roogã, f yagens na n zaoonda a Israyɛl naam zaoore tɩ maan zamaan a naase.» Baasgo, a Zewu pa modg n tũ Israyɛl Wẽnnaam noor ne a sũur fãa ye. A pa zãag a meng ne yel-beed niyns a Zeroboam sẽn maan n lub a Israyɛl yel-wẽnd pʋgẽ ye. Dẽ me la Naaba-Wẽnd le sɩng a Israyɛl soolma wãdsgo, t'a Azayɛl, Siri dĩma, kaoog zabre ne Israyɛl kamba, Israyɛl soolmẽ gilli, n tõog-ba. A tõog n deega tẽns niyns fãa sẽn be Zʋrdẽ kʋɩlga yaanga la tẽns niyns sẽn be Aroɛr goabga, Arno kʋɩl bɛɛga noorẽ, dat n yeelame tɩ Galaad la Bazã. Be la a Gad, a Rubẽ la a Manase yagensa da kẽeda. A Zewu tʋʋm a taaba, a sẽn maana fãa, a sũ-keelma, dẽ fãa pa gʋls dĩm dãmba sebr pʋgẽ bɩ? A Zewu tɩ saka a saam-dãmb, b mum-a-la Samari; a biiga a Zoakaz n led-a zaoorẽ. A Zewu dɩ a Israyɛl naam, Samari, tẽnga, yʋʋm pisi la a nii. A Atali, sẽn yãe t'a biiga Akaziyas kiime, a kɩtame tɩ b kʋ Zɩɩda dĩm biisa fãa. A Zoseba, dĩma a Zoram bi-pugla, la a Akaziyas tão, rɩka a Akaziyas biiga, a Zoas. A kɩtame t'a Zoas ma-wubdga yiisa b sẽn da na n kood b rãmba sʋka n tɩ solg-a gãasa roogẽ. B pa bas t'a Atali yãend-a ye, woto me b pa kʋ-a ye. Biiga paa ne a ma-wubdga wẽnd doogẽ. B soonda be yʋʋm a yoobe, dẽ t'a Atali n dɩt naam. Yʋʋmd a yopoe soaba, maan-kʋʋd a Zoyada tʋmame tɩ b bool noakens sẽn yit Kari la sẽn ya tʋʋm-tʋmdb koabg nanamse n paas tãb-biis sẽn zao wiidi, tɩ b wa sak wẽnd doogẽ. A yõga zood ne bãmb n kɩt tɩ b kãab wẽnd doogẽ, la a wilg-b-la dĩma biiga, a Zoas. A kõ-b-la noor n yetẽ: «Ad yãmb sẽn na n maan bũmb ninga: Yãmb neb kẽer rɩkda tʋʋmd, vʋʋsg raare. Yaa woto la neb kẽer so dĩma zaka gũub baraare, tɩ neb kẽer gũud Sur noorã, tɩ neb kẽer gũud noor ning sẽn be tãb-biisa sika poore. Bãmb n na n gũud dĩma zakã n deesd taaba. Sẽn pa so-b gũub vʋʋsga raarã, bãmb n na n wa baraare n gũ wẽnd doogã, dĩm bila sẽn beẽ wã. Tãb-biig fãa zãada a sʋʋg a nugẽ, n tigim taab dĩma sẽn be zĩig ninga, n yãagd-a a sẽn dabd zĩig ninga. Ned ning fãa sẽn na n kolg y sẽn yɛsẽ wã tog n kiime.» Sẽn so-b neb koabg nanamsa maana maan-kʋʋd a Zoyada sẽn kõ noor ninga fãa; bãmb ned kam fãa peega a neba, sẽn kẽed-b tʋʋmd vʋʋsg daare wa sẽn sigd b tʋʋmde, b fãa waa n bʋʋga a Zoyada. Maan-kʋʋda pʋɩ tãb-biisa kãsem dãmba dĩma a Daviid kãna la gãndo sẽn da bĩng wẽnd doogẽ. Tãb-biisa zã b zab-teed b nusẽ, n yals yĩngri wẽnd dooga nug rɩtgo n tɩ tãag wẽnd doogã nug goabga, maan-kugra la Rooga taoore, n gũbg dĩma. A Zoyada yiisa dĩma biiga, n fõgneg a zug naam pugla, n kɩs-a zooda noya sebre; b kõ-a-la naam, n pʋdg a zug kaam tɩ b wẽ nug pogse la b kelem woto: «Wẽnd na kaoos dĩma!» A Atali wʋma zãma wã sẽn kaoog n watẽ wã bʋʋre t'a me yi n naag zãma wã n kẽ wẽnd doogẽ. La a sẽn gese, a yãeeme tɩ b zaoolga dĩma bũmb sẽn zãnd zugu, wala dog-n-mik sẽn da rate, tɩ kombɛɛmba la tõntõodã rãmba da be dĩma sɛɛgẽ, tɩ neb fãa kɩdemd sũ-noogo, tɩ tõntõod peebdẽ, t'a Atali na n kẽes a futu, la a kelem: «Zãmb wɛɛ! Zãmbo!» La Maan-kʋʋd a Zoyada kõo tãb-biisa kãsem dãmba noor n yetẽ: «Yiis-y pagãb! Sẽn yik-a t'a be-la a Atali poorẽ, bɩ b kodg-a ne sʋʋga!» Maan-kʋʋda ra yeelame: «Pa tog tɩ b kʋ-a wẽnd dooga pʋg ye.» B yõka a Atali, t'a tũ wiidi wã noor n tees dĩma zaka. La b tek n kʋ-a lame. A Zoyada kɩtame tɩ dĩma la buuda maan kãabgo tɩ b na n yɩɩ Naaba-Wẽnd buudu. Tẽnga fãa yaool n kaoogame n kẽng a Baal wẽnd doogẽ, la b luba wẽnd doogã, b sarma a maan-kugã la nin-naandsã. A Matã sẽn da yaa a Baal maan-kʋʋdã, b kʋ-a-la maan-kugra taoore. Maan-kʋʋd a Zoyada ninga tãb-biisi, Soaala rooga gũub yĩnga. A peega neb koabg nanamsã, Kari rãmba la gũudba la neba fãa tɩ b na n yiis dĩm a Zoas, wẽnd doogẽ. B waa n zaoondg-a-la dĩm dãmba naam zaoorẽ. Tẽnga rãmb fãa da kɩdemba sũ-noogo, la na-tẽnga ka rãmb ye. La sã n yaa a Atali, b ra kʋ-a-la ne sʋʋga dĩma zakẽ. A Zowas da tara yʋʋm a yopoe, a naam reegr wakato. A Zewu naam yʋʋmd a yopoe soaba, la a Zowas lebg dĩma; a rɩɩ naam yʋʋm pis-naase, Zerizalɛɛm, a ma da boondame t'a Sibiya, t'a ba yir ya Beerseba. A Zowas maana sẽn ya tɩrga Wẽnd nifẽ daar fãa, a vɩɩm tɛka tɩ maan-kʋʋd a Zoyada da gʋʋl-a-la neere. La baasgo, wẽn-naandsa waoogra ka boog ye; b da ket n kẽnd n kʋʋda maando la b yõogd tɩdare. A Zowas yeela maan-kʋʋdba: «Ligda fãa sẽn kõt Naaba-Wẽnd b ro-sõngẽ wã, ligd-dɩtma, b sẽn deegd ned kam fãa nengẽ, wa a sẽn tõe n kɩse, yamleoog kũuna, bɩ maan-kʋʋdba reeg rẽ fãa n maneg wẽnd doogã, a sẽn wat n dat manegre zĩig ninga.» La a Zowas naam yʋʋmd pisi la a tã soaba taame tɩ maan-kʋʋdba pa tol n maneg wẽnd dooga sẽn sãam zĩig ning ye. La dĩma a Zowas boola maan-kʋʋd a Zoyada ne a tʋmd-n-taase n yeel-ba: «Yaa bõe yĩnga la yãmb pa maneg bũmb ninga fãa sẽn sãam wẽnd doogẽ wã? Marsã tɛka bɩ sẽn deesd-b ligda da le reeg-a n kɩs yãmb ye. B na n kɩsa ligd kãng wẽnd dooga manegdbã.» La maan-kʋʋdba sakame tɩ b kõn le reeg neba ligd ye, la b kõn le soog wẽnd dooga manegre ye. Maan-kʋʋd a Zoyada dɩka koglg a ye n poog a limda võore n dɩgl maan-kugra sɛɛga. F sã n kẽed wẽnd doogã, a bee f nug rɩtgo. B sẽn zĩndig maan-kʋʋdb niyns tɩ b gũud wẽnd dooga noor n da tog n deegd n ning koglga pʋga ligd ning fãa b sẽn da tar n wat wẽnd dooga yĩnga. B sã n da mik tɩ ligda waooga koglga pʋga, b ra boonda dĩma sɛb gʋlsda la maan-kʋʋd kãsengã tɩ b wa yiis ligda fãa n sõde. Ligdã sẽn sõdã kɩta sẽn tʋmd-b tʋʋma la sẽn get-b tʋʋma tɩ bãmb deegd-a n yaood da-wãadbã, tãn-metbã ne kug peesdbã la b daad raado la kug sẽn peese, wẽnd doogã manegr yĩnga, la b yaood manegra sẽn dɩ ligd ning fãa. Sãnema la wanzurfã b sẽn da reegdã, b ra ka reegd n yõg wẽnd dooga yĩnga, yõg-la-zulumsi, wõrsdse, zɩ-mesdem laase tõntõodo bɩ bũmb a to ye. Ligd kãng ra kɩta sẽn da tʋmd-b tʋʋmna tɩ b reeg-a wẽnd dooga manegr yĩnga. B sã n sõd ligdã n kɩs tʋʋmda rãmba b pa le yɛs n kot bãmb tɩ b wilg b sẽn dɩka n maan bũmb ning ye. B rãmba da maanda bũmba fãa ne pʋ-peelem. B sẽn da kɩt ligdã sugr kosg bɩ yell manegr maoong yĩnga, ligd kãng n da pa kẽed wẽnd dooga rẽnnẽ. A yaa maan-kʋʋdba soolem. Wakat n waa n zĩndi t'a Azayɛl, Siri dĩma wa kaoog zabre ne Gat tẽng rãmba. B sẽn tõog tẽn-kãnga, a seglame n na n wa tak zabre ne Zerizalɛɛm. La a Zowas, Zɩɩda dĩma, wʋka laog ning fãa yẽ saam-dãmba: a Zozafat, a Zoram, a Akaziyas la yẽ meng sẽn da kõ Soaala-Wẽnde, n paas sãnema fãa sẽn da be wẽnd doogẽ, la dĩma koglgẽ, a pɩɩga fãa n tʋm tɩ b tɩ pʋʋs a Azayɛl, Aram dĩma, t'a sak n loog la a bas Zerizalɛɛm laafi. A Zowas tʋʋm a taaba la a sẽn maan fãa, pa gʋls Zɩɩda dĩm dãmba kibara sebr pʋg bɩ? A tãnsoaben-dãmba sũu taaba n soos n yẽs ne taaba n na n lub-a. B pãba a Zowas n kʋ. Yɩ-la a Zozabad, a Simeat biiga, la a Yeozabad, a Somɛr biiga n pãb-a n kʋ, Bɛt-Milo. B mum-a-la ne a saam-dãmba, a Daviid na-tẽngẽ, t'a biiga a Amaziyas led a zaoorẽ. A Zowas yaa Zɩɩda dĩma a Akaziyas biiga. A Zowas naama pisi la a tãab yʋʋmde la dĩm me reeg naam Israyɛl tẽn-peelmẽ, Samari tẽnga. Yɩ-la a Zoakaz, a Zewu biiga. A Zoakaz dɩɩ naam yʋʋm piig la a yopoe. A maana sẽn ya wẽnga, Soaala-Wẽnd nifẽ; a togsa a Zeroboam sẽn lub Israyɛl yel-wẽnd ninga pʋgẽ; a pa tol n woog a wẽnema ye. Soaala-Wẽnd sũ-puur yãnga ne a Israyɛl kamba, tɩ b bas-ba Aram dĩma, a Azayɛl, nugẽ, n le bas-ba a biiga, a Ben-Adad, nugẽ, wakat buud fãa. La a Zoakaz yõka Soaala-Wẽnd sɛɛga n sigs b sũuri la b reega a kosgo, tɩ b yãee wẽoogr ninga Aram dĩma sẽn da wẽoogd a Israyɛl. Naaba-Wẽnd kõ-la a Israyɛl fãagda; a Israyɛl kamba tɩlga Aramsã. B leb n zĩnda b rotẽ wẽnd pĩnda. La baasgo bãmb kell n ka bas a Zeroboam dooga sẽn maan n lub a Israyɛl yel-wẽnd pʋgẽ wã ye. B pʋs n yɩɩga ne wẽnem menga. Ra-peesdma da ket n lugla Samari tẽnga. Neb sẽn da tõe n bob zabr la sẽn da ket ne a Zoakaz da pa yɩɩd wed-dʋʋdb pis-nu, bilim-bilm piiga la tãb-biis tus piig bal ye. Yaa Aram dĩma sẽn da kʋ n keesa la rẽ. Aram dĩma ra tab-b-la wa nao sẽn tabd tẽng tom. A Zoakaz tʋʋm a taaba a sẽn maane, la a raoodã, dẽ fãa pa gʋls Israyɛl dĩm dãmba kibara sebr pʋgẽ bɩ? A Zoakaz tɩ saka a saam-dãmb tɩ b mum-a Samari, t'a biiga a Zowas led-a a zaoorẽ. Zɩɩda dĩma, a Zowas da ta-la a naama pis-tã la a yopoe yʋʋmde. Wakat kãng la Zowas a to, a Zoakaz biig lebg dĩm Samari tẽnga, Israyɛl tẽn-peelmẽ. A rɩɩ naam yʋʋm piig la a yoobe. A maana sẽn ya wẽnga Soaala-Wẽnd nifẽ; a ka bas a Zeroboam, a Nebat biiga sẽn maan n lub a Israyɛl yel-wẽnd pʋgẽ ye. A kell n maana wẽng bala. A Zowas tʋʋm a taaba, a sẽn maan fãa, a sẽn zab ne a Amaziyas, Zɩɩda dĩma, ne raood ningã, dẽ fãa pa gʋls Israyɛl dĩm dãmba kibara sebr pʋgẽ bɩ? A Zowas tɩ saka a saam-dãmba t'a Zeroboam led-a a zaoorẽ. B muma a Zowas Samari ne Israyɛl dĩm dãmbã. A Elize yika pa-keem, a da bẽeda bãag ninga sẽn na n yɩ a yõor bãaga. A Zowas, a Israyɛl dĩma, wa-la a nengẽ, n mobg-a n yãbd la a yetẽ: «M ba, M ba, a Israyɛl pãnga, a tãnsoab menga!» A Elize yeel-a lame: «Rɩk f tãpo, la f pɛɛma.» T'a rɩk tãp la pɛɛma. T'a Elize yeel-a: «Dõos tãpã ne f nugu.» Tɩ dĩma dõos tãpã ne a nugu. La a Elize ninga a nugu dĩma nusẽ n yaool n yeel-a: «Pak võore n tees yaanga» Tɩ dĩma pake. La a Elize yeel-a lame: «Tão!» T'a tão. T'a Elize yeele: «Ad fãagr pĩim sẽn yit Soaala-Wẽnd nengẽ. Yaa pĩim sẽn na n fãag yãmb ne Aram. Fo na n pãba Aramsa Afɛk, ali n sãam-b zãnga.» A Elize le yeelame: «Rɩk pɛɛma!» Tɩ dĩma dɩk-ba, T'a Elize yeele: «Wẽ tẽngã!» Tɩ dĩma wẽ tẽngã naoor a tã n yaase. La Wẽnnaam nedã sũur yika ne-a, a yeelame: «Fo ra kõn wẽẽ naoor a nu bɩ a yoobe woto fo ra na pãbẽ Aram n sãam zãnga la marsã fo na n tõog-a-la naoor a tã bala» A Elize kiime tɩ b mum-a. La ade, Moabitsa tãb-biis da mi n kẽeda tẽnga, yʋʋmd yʋʋmd fãa. Daar a yembre neb da tʋka kũum n na n tɩ mum, la b yãee Moabitsã n lob kũuma a Elize yaoogẽ la b looge. Kũuma sẽn sɩɩs a Elize kõaba, a vʋʋgame n yik n yals yĩngri. A Azayɛl, Aram dĩma wẽooga a Israyɛl, a Zoakaz vɩɩm tɛka. La Soaala-Wẽnd maan-b-la bãn-loeere n zoe b nimbãanega, n wilg-b nonglem, n wẽnemd b neng n ges-ba, zooda sẽn da yõg ne a Abraam, la a Izaak, la a Zakoob yĩnga. B ka sak n sãam-a zãng ye. Wakat kãnga b ka rig-ba n yiis b taoor n zãag ye. Dĩm a Azayɛl kiime t'a biiga Ben-Adad led a zaoorẽ Wakat kãnga, a Zowas, a Zoakaz biigã, le reega a Azayɛl biig a Ben-Adad nugẽ tẽns-niyns a sẽn da gʋsg a ba a Zoakaz naamẽ, zabr wẽnde. A Zowas tõog-b-la naoor a tã n le reeg a Israyɛl tẽnse. Israyɛl dĩma a Zoakaz biig a Zowas sẽn lebg dĩm tɩ yʋʋmbitẽ la Zɩɩda dĩm a Zowas biig a Amaziyas lebg dĩma. A naam deegr wakato, rẽ t'a tara yʋʋm pisi la a nu, a rɩɩ naam yʋʋm pisi la a wɛ Zerizalɛɛm. A ma yʋʋr da boondame t'a Zoadã, n da ya Zerizalɛɛm paga. A mana sẽn ya tɩrga Soaala-Wẽnd nifẽ, la yaool n ka yɩ wala a saamba a Daviid ye; yɩɩ wala a ba, a Zowas. Ne rẽ fãa tãmsa zut wẽn-naands waoogr zĩisa ra ketame tɩ neba ket n kʋʋd maando la b yõogd tɩdare. A naama pãng sẽn waa n paase, a kʋʋ na-yir dãmba sẽn da yiis a ba yõore. A pa kʋ b kamb ye, tɩ wala sẽn gʋls a Moyiiz noora sebr pʋgẽ, dẽ ra kisame. Naaba-Wẽnd da yeelame: Ba rãmba kõn kʋ, b kamb beegr yĩng ye, kamb me pa kʋʋd, b ba rãmb beegr yĩng ye; b kʋʋda neda a meng yel-wẽnd yĩng bala. Yẽ n zab ne Edomitsã yamsem aoogẽ n tõog-ba, dap na ta tus piiga; yẽ n zab n deeg Sela n pʋd a yʋʋr tɩ Yokteyɛl, la b ket n boonda yʋ-kãng al ne rũnna. A Amaziyas kong n tʋmame tɩ b tɩ yeel Israyɛl dĩma a Zowas, a Zoakaz biiga la a Zewu yagenga: «Aya, wa-y tɩ d seg taaba!» La a Zowas, Israyɛl dĩma tʋmame tɩ b tɩ yeel a Amaziyas Zɩɩda dĩma woto: «Libã yõeens-tabda tʋmame tɩ b yeel Libã kʋka: ‹Rɩk f bi-pugla n kõ m bi-ribla t'a maan a paga.› La ade, Libã we-rũnga taba a yõeens-tabdo. Yaa sɩda, fo zaba ne Edom la fo tõog-a lame, tɩ f sũur wʋk ne wilg-m-menga. Nage la f kell n pa f yiri. Bõe tɩ f na n bao yelle n kõ f menga, n wa ne f menga la Zɩɩda fãa sãoongo?» La a Amaziyas pa kelg-a ye. Yẽ ne Israyɛl dĩma, a Zowas, sega taaba Bɛt-Semɛs, Zɩɩda soolmẽ. A Israyɛl tõoga a Zɩɩda, tɩ rapa fãa zoe n tɩ kẽ b rotẽ. La a Zowas, Israyɛl dĩma, yõka Zɩɩda dĩma, a Amaziyas, a Zowas biiga la a Akaziyas yagenga, n tɩ pag roog Bɛt-Semɛs. Dẽ poore a waa Zerizalɛɛm; a luba Zerizalɛɛm lalga wɛdga, a Efrayim dagnoorẽ n tãag Gõdra dagnoorã; lalga lʋɩɩ na ta kãntɩɩs kobs-naase. A Zowas wʋka sãnema la wanzurf la laoga fãa sẽn da be wẽnd doogẽ la dĩma ligda koglgẽ. A yõga neb n paas tɩ ya waa a raa bãmb dãmba yõore, n mi tɩ nin-bãmb yĩnga ned kõn tees n gɩdg-b ye, la a leba Samari. A Zowas tʋʋm a taaba a sẽn mane, a raooda yelle, a zaba ne a Amaziyas, Zɩɩda dĩma, dẽ fãa pa gʋls a Israyɛl dĩm dãmba kibar sebrẽ bɩ? A Zowas tɩ saka a saam-dãmba, b mum-a-la Samari ne a Israyɛl dĩm dãmba, t'a biiga a Zeroboam led-a a zaoorẽ. A Zowas biiga, a Amaziyas, Zɩɩda dĩma, le kaoosa ne yõore, yʋʋm piig la a nu, Israyɛl dĩma, a Zowas kũum poore. A Zowas yaa a Zoakaz biiga, A Amaziyas tʋʋm a taaba, dẽ fãa pa gʋls Zɩɩda dĩm dãmba kibarã sebrẽ bɩ? Neb seda ne taaba Zerizalɛɛm n na n lub-a, t'a zoe n kẽng Lakis, tɩ b tʋm neba tɩ b babs-a Lakis, la b kʋ-a lame. B rɩk-a-la ne wiidi n tɩ mum Zerizalɛɛm ne a saam-dãmba, a Daviid na-tẽngẽ. Zɩɩda neba fãa tũusa a Azariyas sẽn da tar yʋʋm piig la a yoobe t'a rɩ naam, n led a ba, a Amaziyas, naama zaoorẽ. Yẽ n le n maneg n me Ebat tẽnga n yalse, Zɩɩda dĩma kũum poore. A Zowas biiga, a Amaziyas, Zɩɩda dĩma, naam piig la a nu yʋʋmde, Israyɛl dĩma, a Zowas biig a Zeroboam n dɩ naam Samari, yʋʋm pis-naas la a ye. A maana sẽn ya wẽnga Naaba-Wẽnd nifẽ; a pa tol n bas a Zeroboam, a Nebat biiga sẽn maan n lub a Israyɛl yel-wẽnd pʋgẽ wã ye. Yẽ n lebs a Israyɛl toaagã a zĩigẽ, sẽn sɩng Lebo-Amat n tɩ tãag Yamsem Mogre, wala Naaba-Wẽnd, a Israyɛl Wẽnnaam, sẽn da pĩnd n togs ne a Zonas noore. A Zonas yaa Gat-Efɛr bãngda, yaa a Amitayi biiga, Naaba-Wẽnd da yãee yãnd kãseng ning a Israyɛl sẽn da paame. Yamba bɩ burkĩna, ned ba a ye da ka be sẽn fãagda Israyɛl ye. Naaba-Wẽnd yaool n da nan pa kaool tɩ b na n yẽesa Israyɛl yʋʋre saaga tẽngr ye. Yaa rẽ yĩng la b lʋɩɩs a Zowas biiga a Zeroboam taoore, n fãag-a. A Zeroboam tʋʋm a taaba a sẽn maan fãa, a sẽn zab ne raood ning n le reeg Amat la Damas n lebs a Israyɛl, dẽ fãa pa gʋls a Israyɛl dĩm dãmba kibar sebr pʋgẽ bɩ? Dẽ poore a Zeroboam tɩ saka a saam-dãmba, tɩ b mum-a Samari ne Israyɛl dĩm dãmba, t'a biig a Zakari led-a a zaoorẽ. Israyɛl dĩma a Zeroboam naam pisi la a yopoe yʋʋmde, a Amaziyas biiga a Azariyas n dɩ Zɩɩda naam. A naam reegr wakato t'a tara yʋʋm piig la a yoobe; a rɩɩ naam Zerizalɛɛm yʋʋm pis-nu la a yi. A ma yʋʋr da boondame t'a Yekoliya, t'a ba yir ya Zerizalɛɛm. A maana sẽn ya tɩrga Soaala-Wẽnd nifẽ, wala a ba Amaziyas sẽn maane. La baasgo tãmsa zut wẽn-naandsa waoogr zĩisa ra ketame tɩ neb me ra ket n kẽnd be n kʋʋd maand la b yõogd tɩdare. Naaba-Wẽnd wẽe dĩma t'a lebg yĩng soaba n tãag a kũum, t'a kell n zĩnd, a ye, roog sẽn zãag ne a taaba pʋga. A biiga a Zotam n da get a yir yelle la a soolma. A Azariyas tʋʋm a taaba la a sẽn maan fãa, dẽ pa gʋls a Zɩɩda dĩm dãmba kibar sebrẽ bɩ? A Azariyas tɩ saka a saam-dãmba tɩ b mum-a a Daviid na-tẽngẽ, t'a biiga a Zotam led-a a zaoorẽ. A Azariyas, Zɩɩda dĩma, naam pis-tã la a nii yʋʋmde la a Zeroboam biiga a Zakari lebg Israyɛl dĩma, Samari, n dɩ naam kiis a yoobe. A maana sẽn ya wẽnga Soaala-Wẽnd nifẽ, wala a saam-dãmba sẽn maane a pa tol n bas a Zeroboam, a Nebat biiga, sẽn maan n lub a Israyɛl yel-wẽnd pʋgẽ wã ye. A Yabɛs biiga, a Salum, zãmb-a lame, a pãb-a-la neba fãa nifẽ n kʋ, n led-a a zaoorẽ. A Zakari tʋʋm a taabã, ade, b gʋls-b-la a Israyɛl dĩm dãmba kibar sebr pʋga. Yaa Soaala-Wẽnd gomd n pidsi, bãmb sẽn da pĩnd n yeel a Zewu: «Fo yagens na n zaoonda a Israyɛl naam zaoore tɩ ta zamaan a naas soaba.» Sɩd yɩɩ boto. A Salum, a Yabɛs biigã, lebga dĩma, Zɩɩda dĩma a Azariyas naam pis-tã la a wɛ yʋʋmde. A rɩɩ naam kiuug a ye, Samari. A Menaem, a Gadi biiga, yii Tirsa n wa Samari, n pãb a Yabɛs biig, a Salum, n kʋ, la a led-a, a naam zaoorẽ. A Salum tʋʋm a taabã la a suduma, ade, yɛl bãmb fãa gʋlsa Israyɛl dĩm dãmba kibar sebr pʋgẽ. Wakat kãnga la a Menaem pãb Tifsa n kʋ nebã sẽn da be a pʋgẽ la a tẽn-toosa gilli, sẽn sɩng Tirsa. A maana boto tɩ tẽnga rãmb zãgsame tɩ b kõn pak b kʋɩlens ye. La a sẽn kẽ, a weeda tʋtr-pʋsa fãa sẽn da be-b tẽn-kãnga. A Azariyas, a Zɩɩda dĩma, naam yʋʋmd pis-tã la a wɛ yĩnga, a Menaem, a Gadi biiga, lebga a Israyɛl dĩma, a rɩɩ naam Samari yʋʋm piiga. A maana sẽn ya wẽnga Soaala-Wẽnd nifẽ; a pa tol n bas yel-wẽna fãa a Zeroboam, a Nebat biigã, sẽn maan n lub a Israyɛl yel-wẽnd pʋgẽ wã ye. Asiri dĩma a Ypl waa n kẽe tẽngã. La a Menaem kõ-a-la wanzurf sẽn ta neb tusr la kobs nu zɩɩbo t'a sõng t'a naama paam pãnga a nugẽ. Ad-a Menaem sẽn paam ligda to-to. Israyɛl biig fãa nug sẽn da zãade da tog n kɩsa bũmbu tɩ b saglg Asiri dĩma nugẽ, ned kam fãa ra kɩta wanzurf wakɩ koeems pis-nu. Woto a leba a tẽngẽ. A Menaem tʋʋm a taaba, a sẽn maan fãa, dẽ pa gʋls a Israyɛl dĩm dãmba kibar sebra pʋgẽ bɩ? A Menaem tɩ saka a saam-dãmba, t'a biiga a Pekaya led-a a zaoorẽ. Zɩɩda dĩm a Azariyas naam pis-nu yʋʋmde, a Pekaya, a Menaem biiga, lebga Israyɛl dĩm yʋʋm a yi, Samari. A maana sẽn ya wẽnga Soaala-Wẽnd nifẽ, a pa bas yel-wẽna, a Zeroboam, a Nebat biiga, sẽn maan n lub a Israyɛl wẽng pʋgẽ wã ye. A Peka, a Remaliya biiga sẽn da ya wed-kɩɩma zãmb-a lame, a kʋ-a lame, dĩma gaosg pʋga, neb pis-nu n da be ne-a, Galaad dãmba. A kʋʋ dĩma n led-a a naam zaoorẽ. A Pekaya tʋʋm a taaba, a sẽn maane, yell bãmb fãa gʋlsa a Israyɛl dĩm dãmba kibar sebr pʋgẽ. A Zɩɩda dĩma, a Azariyas naam pis-nu la a yi yʋʋmde, a Remaliya biiga, a Peka, n lebg a Israyɛl dĩm Samari; a dɩɩ naam yʋʋm pisi. A maana sẽn ya wẽnga Soaala-Wẽnd nifẽ; a pa tol n bas a Zeroboam, a Nebat biiga, sẽn maan n lub a Israyɛl yel-wẽnd pʋgẽ wã ye. A Israyɛl dĩma a Peka zamaanẽ, a Teglat-Falasar, Asiri dĩma waa n zabame n deeg Iyõ, Abɛl-Bɛt-Maaka, Yanoa, Kedɛs, Asor, Galaad, Galile la Neftali tẽnsa fãa, n wʋk neba n kẽng yembdo, Asiri. A Oze, a Elat biiga, soos n zãmba a Peka, a Remaliya biigã, n pãb-a n kʋ, n led-a a naam zaoorẽ, a Azariyas biig a Zotam naam pisi yʋʋmde. A Zotam dɩɩ naam Zɩɩda. A Peka tʋʋm a taabã, a sẽn maan fãa, ade, yell bãmb gʋlsa a Israyɛl dĩm dãmba kibar sebr pʋgẽ. A Peka, a Remaliya biigã, Israyɛl dĩma, naam yʋʋmd a yiib soaba, a Zotam, a Azariyas biiga, n dɩ Zɩɩda naam. A ra tara yʋʋm pisi la a nu a naam deegr wakato, la a rɩɩ yʋʋm piig la a yoobe Zerizalɛɛm, a ma yʋʋr boondame t'a Yerusa, a ra yaa a Sadok biiga. A mana sẽn ya tɩrga Soaala-Wẽnd nifẽ, wala a ba a Azariyas sẽn maane. La baasgo, wẽn-naandsa waoogra ra ketame; neba ra ket n kẽnd n kʋʋda maanda yaare la b yõod tɩdare. Yaa a Zotam n me wẽnd dooga dignoor ninga sẽn zãnda n yɩɩd a taabã. A Zotam tʋʋm a taaba, a sẽn maan fãa, rẽ fãa pa gʋls Zɩɩda dĩm dãmba sebr pʋgẽ bɩ? Yɩɩ yẽnda wakatẽ la Aram dĩm, a Resẽ la a Remaliya biig a Peka paam Soaala-Wẽnd sore n kaoog zabre ne a Zɩɩda. A Zotam saka a saam-dãmba; b mum-a-la a saamba, a Daviid, na-tẽngẽ, ne a saam-dãmba, t'a biiga Akaz led-a a zaoorẽ. A Peka, a Remaliya biiga, naam piig la a yopoe yʋʋmde, Zɩɩda dĩma a Zotam biiga, a Akaz, lebga dĩma. A Akaz yʋʋma da taa pisi a naam deegr wakato, la a rɩɩ naam Zerizalɛɛm, yʋʋm piig la a yoobe. A pa maan sẽn ya tɩrg Naaba-Wẽnd nifẽ wala a saamba a Daviid ye. A rɩka Israyɛl dĩm dãmba nao, n tol n kɩt t'a biig pɩʋʋg bugum wa bu-zẽmba sẽn da maand yel-yood niynsã tɩ Soaala-Wẽnd rig-b Israyɛl kamba taoore. A kʋʋ maando, n yõog tɩdare, tãmsã zutu la tɩɩg sẽn tobd maasem wʋsg fãa tẽngre. Wakat kãnga, a Resẽ, Aram dĩma, ne a Peka, a Remaliya biiga la Israyɛl dĩma, yiisa tãpo n na n tak zabre Zerizalɛɛm. B gũbga a Akaz la b pa tõog n tak zabr ne-a ye. Yaa wakat kãng me la a Resẽ, Aram dĩma, dig Zɩɩda rãmba n yiis Elat tɩ Edomitsa paam n kẽ be, la b kell n paa tẽng kãnga tɩ tãag rũnna. A Akaz tʋma neba tɩ b tɩ yeel a Teglat-Falasar, Asiri dĩma, woto: «Mam yaa yãmb yamba la y biiga. Wa-y n fãag-y-ma, Siri dãmba la a Israyɛl dĩma nusẽ tɩ b yika zabr ne maam» A Akaz wʋka wanzurf la sãnem fãa sẽn da be wẽnd doogẽ la dĩma ligda koglgẽ, la a tʋmame tɩ b tɩ pʋʋs Asiri dĩma. Asiri dĩma kelga a koɛɛga; Asiri kẽng n tɩ pãba Damas n sooge. A wʋka a nebã n kẽng yembdo al Kir la a kʋ-la a Resẽ. Dĩma Akaz tɩ sega a Teglat-Falasar, Asiri dĩma, Damas tẽnga. A yãee maan-kugr ninga sẽn da be Damas. La dĩma Akaz maga maan-kugrã, a woglem, a yalem, a zãndlem n tool a Uriya, maan-kʋʋdã. Dĩma a Akaz sẽn zĩnd Damas n tool tɩ b maan bũmb ningã, maan-kʋʋd, a Uriya, tũu fãa kɛpi tɩ dĩma Akaz nan pa yi Damas n wa ye. Dĩma sẽn yi Damas n wa, a yãee maan-kugrã, a kolga maan-kugrã n dʋ-a. A menga toor kʋʋ yũ-noog maoongo n tũnug ne zom la rãam n le paas laafi kosg maoongo, n dɩk zɩɩma n daag maan-kugra zugu. A kɩtame tɩ b viig zũud maan-kugr sõngã sẽn da be wẽnd dooga noorã, wẽnd dooga ne maan-kugr paalga sʋka. A tɩ ning-a-la maan-kugr paalga poore, nug goabga. La dĩma Akaz yaool n kõo maan-kʋʋd a Uriya noor kãnga: «Yaa maan-kugr kãsenga zug la f na n kʋ maoongo. F na n kʋʋ yibeoog yũ-noog maoongã; zaabre, be la f na n kõ zoma, be la f na n kʋ dĩma yũ-noog maoongo la f tũnug-a a sẽn tog n tũnug bũmb ningã. Lebd n kʋʋ buuda maandã la f tũnug-b ne zom la rãam la f raag rũmsa zɩɩm. Sã n ya zũud maan-kugrã mam meng na ges m sẽn na n maanega.» Maan-kʋʋd a Uriya maana dĩma a Akaz sẽn yeela fãa. Dĩma a Akaz kɩtame tɩ b kɛ wẽnd dooga bilim-bilma n lags b zũudã la b sik b sĩmsã sẽn da zao b zugã. A kɩtame tɩ b sik n dɩgl kug peesem zugu sĩn-kãsenga sẽn da zao niis piig la a yiiba zugã. A sẽn da rat n noog Asiri dĩma sũuri, a Akaz teema zãong ning sẽn da be wẽnd dooga kɩreng tɩ b boond tɩ Vʋʋsg raar zãongã; a le teema dĩma sẽn da tũud noor ning n kẽed wẽnd doogã. A Akaz sẽn maan fãa, rẽ fãa pa gʋls Zɩɩda dĩm dãmba kibar sebr pʋgẽ bɩ? A Akaz tɩ saka a saam-dãmba tɩ b mum-a a Daviid na-tẽngẽ ne a saam-dãmba; a biiga a Ezekiyas n led-a a zaoorẽ. Zɩɩda dĩma a Akaz naam piig la a yiib yʋʋmde, a Oze, a Ela biiga, lebga Israyɛl dĩma, Samari. Yaa yʋʋm a wɛ la a a rɩ naam. A maana sẽn pa neere Soaala-Wẽnnaam nifẽ, la pa yɩ wala Israyɛl dĩm dãmba sẽn deng yẽ wã ye. Asiri dĩm a Salmanazar waame n na n zab ne a Oze, la a tõog-a lame n kit t'a yaood fadgo. Asiri dĩma waa n bãngame t'a Oze da zãmbd-a lame. A Oze da soos n tʋma neb tɩ b kẽng Ezipt dĩm a So nengẽ, la a da pa yao Asiri dĩma fadgo wala yʋʋmd fãa ye. Asiri dĩma kẽes-a-la bi-bees roogẽ, n balg-a bãnga. Asiri dĩma bobame n na n zab ne tẽnga fãa, n wa gũbg Samari, n na n yẽd-a, n pãb-a, yʋʋm a tã tõre, n tõog-a. La a wʋka Israyɛl kamba n kẽng yembdo Asiri. A tɩ zĩndig-b-la Ala, la Abor, Gozã kʋɩlga noorẽ, la Mɛd dãmba tẽnsa pʋsẽ. Sẽn yɩ woto wã, yaa a Israyɛl kamba sẽn beeg Naaba-Wẽnd, bãmb Wẽnnaam, sẽn da yiis-b Ezipt tẽnga, n yols-b ne Ezipt dĩma wẽoogre. Yaa b sẽn bas tɩ wẽn-naandsa rabeem yõk-bã. Bãmb tũu bu-zẽmba noya, bu-zẽmb niyns Naaba-Wẽnd sẽn da rig b rãmba n yiis bãmb taoorã. B tũu noy-niyns Israyɛl dĩm dãmba sẽn da kõ b mense. Israyɛl kamba tʋma sẽn kisi, n paoog Naaba-Wẽnde, bãmb Wẽnnaam. B mee roto b kunkuba zutu, wẽn-naandsa waoogr yĩnga, b sẽn kẽ tẽng ning fãa, gasda zutu wala b tãnsoben-dotẽ. B lugla maan-kuga, n sel ra-peesdi tãmsã fãa zutu, la tɩɩsa maasmẽ. B kunkuba zutu b yõoga tɩdare wala buud a taaba, Soaala-Wẽnd sẽn dig b rãmb n yiis bãmb taoore. B tʋma tʋʋm yoodo n beeg Naab Wẽnde. Bãmb waooga wẽn-naandse, la Naaba-Wẽnd da yaool n yeela bãmba: «Da saag-y n maan dẽnna ye.» Naaba-Wẽnd da sagla a Zɩɩda ne a Israyɛl ne no-rɛɛsdba la bãngdba fãa. B sagl-b la woto: «Bɩ y teem zʋgo, reeg-y m noya, pids-y m daabã. Noy bãmb la m sẽn kõ y ba rãmba tɩ m tʋʋm-tʋmdba la bãngdba reeg n taas yãmbã.» La b pa reeg noora ye; b kenga b yubla n yɩɩd b saam-dãmba sẽn maane, n pa tẽ Naaba-Wẽnd, bãmb Wẽnnaam ye. B sãbsa b noya ne b Zoodã b sẽn yõg ne b saam-dãmbã. Naaba-Wẽnd maka zaalem n na leb n nek b pʋtẽere. Bãmb zoe n pʋga sẽn ka võore, la ad-b sẽn yɛs zaalem. B pʋga buud niyns sẽn da gũbg bãmbã. Soaala-Wẽnd da yaool n sagl-b lame tɩ b ra maan wa bãmb ye. Bãmb zãgsa Naaba-Wẽnd, bãmb Wẽnnaam, noya fãa; bãmb yõga zũudu n maan nag-bi a yiibu. Bãmb peesa raado, n sel, n sɩng-b waoogre, b waooga yĩngr ãdsã, b waooga a Baal. Bãmb kɩtame tɩ b kom-pugli la b kom-dibli pɩʋʋg bugum; b bʋga bagre, n sok wẽn-naandse, n sak wẽnem n beeg Wẽnnaam b Soaala. La Naaba-Wẽnd sũur yĩiga ne a Israyɛl, ali wʋsgo, tɩ b yiis-a b taoore, n kees a Zɩɩda bal a ye. A Zɩɩda me ka reeg Naaba-Wẽnd noya ye. Yaa a Israyɛl sẽn da yals bũmb niynsa la a tũ yã. Dẽ n so tɩ Soaala-Wẽnd yam yi ne Israyɛl buud gilli, tɩ b ning-a yãnde n bas-a ne fãadba, n wa baas n dig-b n zãag bãmb taoore. Sɩd me, Naaba-Wẽnd sẽn waa n welg a Israyɛl ne a Daviid roogo, t'a Israyɛl yãka a Zeroboam, a Nebat biigã, n kõ a naam, ad-y yaa yẽnna, ad-y yaa a Zeroboam n zãag a Israyɛl ne Naaba-Wẽnde, n kɩt t'a lʋɩ yel-wẽn-kãseng pʋgẽ. A Israyɛl kamba togsa a Zeroboam n maan yel-wẽn niyns fãa a sẽn maana. Naaba-Wẽnd me waa n makame n kong n dig a Israyɛl n yiis b taoore, wala b sẽn da kɩt tɩ bãngdbã, bãmb neba, pĩnd n togs-ba. B waa n kong n basame tɩ b wʋka a Israyɛl kamba n kẽng Asiri, tɩ b zãag ne b tẽnga, n ta rũnna. Asiri dĩma kɩtame tɩ neb yi Babilon, n yi Kuta, Ava, Amat la Sefarwayim, n zĩndig-b Samari tẽnsã fãa pʋsẽ tɩ b reeg a Israyɛl kamba zĩiga. B reega Samari n maan b tẽnga n kẽ a tẽn-peelma fãa. B sẽn wa n ta tẽnga paalem, bãmb sẽn da pa waoogd Naaba-Wẽnd yĩnga, Naaba-Wẽnd tʋma gɩgma tɩ b wat n kʋʋd-ba. Dẽ me la b waa m yeel Asiri dĩma: «Neb niyns fo sẽn wa n zĩndig Samari wã pa mi tẽnga rãmb wẽnda sẽn waoogd seem ning ye, la yaa rẽ la b wẽnda tʋm gɩgma tɩ b wa wãb-ba.» Asiri dĩma kõo noor kãnga: «Bɩ y yãk maan-kʋʋd a ye m sẽn kẽes yembdo t'a lebg n wa zĩnd ka n zãms-b Israyɛl Wẽnnaam pʋʋsgo.» La maan-kʋʋdba b sẽn da yõg Samari n loog pa-weerã sʋka, ned a yembre n wa n zĩnd Betɛl: la a da zãmsd-b-la Naaba-Wẽnd sẽn tog n waoog seem ninga. La sã n ya sɩda, Asiri rãmba maana wẽn-naandse n kõ b menga, n ning-b pʋʋsga zĩisẽ, Samari dãmba sẽn da me wã. Buud kam fãa ra maanda boto, a sẽn da be tẽng ning pʋgẽ: Babilon dãmba da maana b Sukot-Benot, tɩ Kuta rãmba maan b Nergal, tɩ Amat rãmba maan b Asima. Awa rãmba maana b Nibaz la b Tartak, tɩ Sefarwayim dãmb ket n yõod b kamb bugum a Adramelɛk la a Anamelɛk waoogr yĩnga. Bãmb n da ya Sefarwayim wẽn-naandsã. B da rigda Naaba-Wẽnd dabeem la bãmb sʋka, b ra tũusa neba n maan b maan-kʋʋdba, sẽn da pʋʋsd bãmb zĩigẽ, b wẽn-naandsa rotẽ. Woto b ra waoogda Naaba-Wẽnd la b ra waoogda b wẽn-naandsa me, wala bu-zẽna sẽn da maand b tẽnsẽ. Al ne rũnna, b ket n tũuda b pĩnd dog-m-mika. B ra pa waoogd Naaba-Wẽnde, b pa tũud b sẽn yeel-b tɩ b waoog b seem ninga, b pa tũud saglsã la noya Naaba-Wẽnd sẽn da kõ a Zakoob kamba n tol n pʋd a yʋʋr t'a Israyɛla ye. Naaba-Wẽnd da yõga zoodo ne bãmba n da kõ-b noor kãnga: «Bɩ y da saag n waoog bu-zẽn wẽn-naandsa ye, da wõgemd-y bãmb taoor ye; da pʋʋs-y-b ye; la y da kõ-b maand ye. Yaa Naaba-Wẽnd bal n yiis yãmb Ezipt soolmẽ ne b pãng kẽeng ningã, b sẽn tẽeg b kanga raarã. Yaa bãmb la yãmb na n pʋʋs la y waoog ne maando. Yãmb na n tũ b sẽn wilg yãmb tɩ y pʋʋs seem ninga, n deeg noya b sẽn gʋls n kõ yãmba, la y reeg b neer daar fãa, la y ra waoog wẽn-naandsa ye. Bɩ y da saag n yĩm zooda mam sẽn yõg ne yãmb ye, la y da waoog wẽn-naandsa ye. Waoog-y Naaba-Wẽnd, yãmb Wẽnnaam bala, la bãmb na n fãaga yãmb y bɛɛb nusẽ.» La a Israyɛl kamb pa reeg b noor ye, bãmb kell n tũu b pĩnd dog-n-mikã. Woto nin-bãmba buudu da waoogda Naaba-Wẽnd, la b da waoogd wẽn-naandse tɩ b kamba la b yagens ket n maand dẽ rũnna. Yaa a Ela biiga a Oze, Israyɛl dĩma, naama yʋʋmd a tãab soaba la a Ezekiyas, a Akaz biiga, lebg Zɩɩda dĩma. A naama sɩngrẽ t'a ra tara yʋʋm pisi la a nu; a rɩɩ naam yʋʋm pisi la a wɛ Zerizalɛɛm; a ma yʋʋr da boondame t'a Abi; a ra yaa a Zakari biiga. A maana sẽn noom Soaala-Wẽnd sũuri, n togs a saamba, a Daviid, sẽn maane. Yẽ m sãam pʋʋsga zĩisi, n wã tẽn-kuga fãa, la a kɛ da-peesdi wã fãa n kʋʋse, la a wã zũud waafã a Moyiiz sẽn da maana. Bãng-y tɩ Israyɛl kamba da yik n yõogda tɩdare, zũud waafa taoore, n ta a Akaz biiga waoongo la b da boond-a zũud waafa t'a Newustã. Yaa Naaba-Wẽnd, a Israyɛl Wẽnnaam bala, la a Ezekiyas da teegre. Yẽ poore, dĩm a to ka zĩnd Zɩɩda pʋgẽ sẽn wẽneg a ye, la pa zĩnd pĩnd me ye. A kẽe Soaala-Wẽnde, n pa tol n yi b poorẽ, abada. A tũu noy-niyns fãa Soaala-Wẽnd sẽn da kõ a Moyiiz. Yaa rẽ n so tɩ Soaala-Wẽnd pa ne-a, daar fãa, al t'a sẽn maan fãa zĩnd barka. A zẽka a zug ne Asiri dĩma, a pa le sak-a ye. Yẽ n pãb Filisti rãmba n tɩ tãag Gaza, n sãam b tẽngã, n lub tãb-gũudba roto la tãnsoben-doto. A Ezekiyas naama dɩɩb yʋʋmd a naas soaba, a Ela biiga a Oze, a Israyɛl dĩma, sẽn sɩng a naama rɩɩbo tɩ yʋʋm maan a yopoe, a Salmanazar, Asiri dĩma, waa n kaooga zabre ne Samari, n gũbg-a n pãbe. Yʋʋm a tã pʋgẽ la b tõog-a. A Ezekiyas sẽn deeg naam tɩ yʋʋm yoaablẽ, t'a Oze rɩt naam tɩ yʋʋm wɛɛlẽ la b tõog Samari. Asiri dĩma wʋka Israyɛl kamba n kẽng pa-weere, Asiri, n tɩ zĩndig-b Ala, Abor, Gozã kʋɩlga noore, la Mɛd rãmba tẽns pʋsẽ. La yaa bãmb sẽn pa sak Naaba-Wẽnd gomdã, bãmb Wẽnnaam gomdã, la zooda sẽn sãama. A Moyiiz, Wẽnd tʋʋm-tʋmda, sẽn da yeel bãmb bũmb ningã, b pa kelge, b pa tũ gomd ba a ye. Dĩm a Ezekiyas naama piig la a naas yʋʋmde, a Senakerib, Asiri dĩma, taka zabre ne Zɩɩda tãnsoben-tẽnsã, n tõog-ba. A Ezekiyas, Zɩɩda dĩma, tʋmame tɩ b yeel Asiri dĩma Lakis tẽnga: «Mam pa maan neer ye, m kotame tɩ y ra maam zabr ye; mam na n saka yãmb sẽn na n kõ-m noor ning fãa.» La Asiri dĩma kõ-la a Ezekiyas, Zɩɩda dĩma, noore t'a bao wanzurf sẽn ta neb kobs-naas la pis-nu zɩɩbo, la sãnem sẽn ta neb pis-naas la a nu zɩɩbo. La a Ezekiyas kɩs-a-la ligd ning fãa sẽn da be wẽnd doogẽ, la naaba ligda kogendẽ. Yaa wakat kãnga la a Ezekiyas lags sãnema dĩma a ye sẽn da tablg wẽnd doog kʋɩlensã n dɩk n kɩs Asiri dĩma. La Asiri dĩma zĩnda Lakis n tʋm a Ezekiyas nengẽ, a tãnsoaben kãsenga ne a pʋgdga la tãb-biis wʋsgo. B fãa waa Zerizalɛɛm, la b sẽn ta be, b yalsa ko-sor ning sẽn takd kooma n wat ko-baoor ning sẽn be fu-pɛgdba pʋʋga sora noorã. B bolga dĩma, tɩ na-yiri sõgen-kãsenga, a Eliyakim, a Ilkiya biiga n paas seb gʋlsda a Sebna, la no-rɛɛs a Zoa, a Asaf biiga, yii n bʋʋg-ba. La tãnsoab kãsenga yeel-b lame: «A Ezekiyas tog n bãngame tɩ dĩm kãsengã, Asiri dĩma, gomda woto: ‹Yaa bõe teegre la f teeg yã? Fo tẽedame tɩ noor gomd bal seka a kõ-f raoodo la sɩlem sẽn na n kiis zabr bɩ? Pʋs n yaa ãnd la f teeg yã n yik n zẽkd f zug ne maam? Ad-fo teega Ezipt rudum kãoongã sẽn sorgd ned ning fãa nug sẽn tikd-a. Woto la Ezipt dĩma maand ne ned ning fãa sẽn teegd-a! Daare, yãmb na n yeelame: Tõnd teega Naaba-Wẽnd, tõnd Wẽnnaam; la ka bãmb yẽne wẽnd doogo la foom a Ezekiyas sẽn lubã la f kõ Zerizalɛɛm la Zɩɩda rãmba noor tɩ b ra le waoog Naaba-Wẽnd sã n ka Zerizalɛɛm maan-kugra taoor bɩ? Be neere, bɩf maan sardo ne m zu-soaba, Asiri dĩma, mam na n kõ foom wiidi tus a yi, fo sã n tõe n yãe wed-dʋʋdba sẽn na n zomb-ba. Fo pãng bɛɛ tɩ f tõe n tus mam zu-soaba komber a ye, a sõgen bil a ye menga t'a serge. Bõe tɩ f teeg Ezipt dĩma, n gũud bilim-bilm la wed-dʋʋdba? La y tẽedame tɩ ka sẽn zems ne Naaba-Wẽnd daabo la m sẽn wa Zerizalɛɛm ka, n na n wã-a wã bɩ? Yaa Naaba-Wẽnd n yeele: kẽng n tɩ tak zabr ne tẽngã n sãam-a.› » A Ilkiya biig a Eliyakim, a Sebna la a Zoa yeela sõgen kãsenga: «Y kabre, gom-y ne yãmb tʋʋm-tʋmdba Aramde tɩ tõnd wʋmdame, la y da gom ne Ebre dãmba goam tɩ neba sẽn be lalga zugã kelgdame.» La sõgen kãsenga yeel-b lame «Fo tẽedame tɩ yaa foom bɩ f zu-soaba la b tʋm tɩ m wa togs-y gom kãensã? Ka yãmb bal ye, yaa nim bãmba sẽn zao lalga zugu, n ka le tar dabaar a to sã ka b rɩ b bĩndu la b yũ b rʋʋd kooma wala yãmbã?» Sõgen kãsenga yalsa lalga zugu n zẽk a koɛɛga n moon ne Ebre rãmb goama, la a yeela woto: «Kelg-y Asiri dĩma koɛɛga: A Ezekiyas da belg yãmb zaalem t'a kõn tõog n fãag yãmb mam nugẽ ye. A Ezekiyas da belg yã tɩ y maan tẽeb ne y Naaba-Wẽnd n yetẽ: ‹Sɩda Soaala-Wẽnd na n fãag-d lame, d tẽnga kõn lʋɩ Asiri dĩma nugẽ ye.› Bɩ y da kelg a Ezekiyas ye tɩ Asiri dĩma koɛɛg la woto: ‹Bɩ y yẽs laafi yẽsgo ne maam. Rɩk-y y mense n kõ maam, la yãmb ned kam fãa na n rɩ a bugsuntund biisi, la a kankams kankama, la a yũu a ko-baoã koom, n gũudẽ tɩ m wa peeg-y n kẽng tẽng a ye sẽn wẽnd yãmb tẽngã, alkam la rãam tẽngã, kaam la sɩɩd tẽnga, tɩ y vɩɩnde la y ra ki ye.› Da kelg-y dĩm, a Ezekiyas, t'a belga yãmb n yetẽ: ‹Naaba-Wẽnd na n fãaga tõndo!› M sok n gese: buud a taaba wẽnd dãmba tõoga da-bʋre n fãag b tẽngã Asiri dĩma nugẽ? Amat ne Arpad wẽnd dãmba maana a wãna? Sefarwayim la Ena la Iwa wẽnd dãmba maana a wãna? Samari tẽng wẽnd dãmba maana a wãna? Bãmb fãaga Samari mam nugẽ bɩ? Tẽnsa fãa wẽnd dãmb bʋse n fãag b tẽng mam nusẽ tɩ Naaba-Wẽnd na n tõog n fãag Zerizalɛɛm?» La neba sĩnda b noor n pa leok tɩ bũmb ye, tɩ naab da kõo noor tɩ b ra leok-a ye. Na-yir sõgen-kãseng a Eliakim, a Ilkiya biiga, n paas sɛb gʋlsda a Sebna, la no-rɛɛs a Zoa, a Asaf biigã, kẽnga a Ezekiyas nengẽ. B futã ra kẽesame la b togsa Asiri dĩma tãnsoaba sõgen-kãsenga goama fãa. Dĩma a Ezekiyas sẽn wʋm woto, a kẽesa a futu, n yeelg sũ-pa-noang futu n kẽng wẽnd doogẽ, la a tʋma sõgen-kãsenga a Eliakim, la sɛb-gʋlsda a Sebna la maan-kʋʋdba kãsem-dãmba tɩ bãmb me yeelg sũ-pa-noang futu n kẽng bãngd a Izayi, a Amos biiga nengẽ. A yeelame: «A Ezekiyas koɛɛg la woto: Dũnna yaa sũ-sãang daare, sɩbgre la yãnd daare. A Israyɛl kamba kũmda rogem, la pãng ka n na n dog ye. Wẽnd na kɩt tɩ Naaba-Wẽnd, fo Wẽnnaam wʋm sõgen-kãsenga goama, Asiri dĩma sẽn tʋm a soab t'a wa tʋʋs Soaala-Wẽnde. Wẽnd na kɩt tɩ gom-bãmba paam b sɩbgre. Maan pʋʋsgo n kõ a Israyɛl kamba sẽn ket-bã.» Dĩma Ezekiyas na-yir dãmba sẽn ta a Izayi nengẽ, a yeel-b lame: «Tɩ yeel-y yãmb zu-soaba: Wẽnd koɛɛg la woto: ‹Da zoe-y goama y sẽn wʋma dabeem ye, ne tʋya fãa Asiri sõgen-kãsenga sẽn tʋ maama dabeem ye. Dĩma na n wʋma kibare, tɩ leb yiri n tɩ ges bõe n be, waa a yamẽ; la be, a soolmẽ, sʋʋg n na kodg-a.› » Tãnsoaba sõgen-kãsenga wʋmame tɩ Asiri dĩma da yii Lakis n looge. Dẽ la a bʋʋg-a Libna, a sẽn tɩ zabd zĩig ningã. Kibar ninga a sẽn da wʋm Kus dĩma, a Tiraka, poorẽ da yaa woto: A Tiraka wat n na n zaba ne foo. A Senakerib le tʋma neba tɩ b wa a Ezekiyas nengẽ la woto la a gom ne a sẽn tʋm b rãmbã: «Tɩ gom-y ne a Ezekiyas, Zɩɩda dĩma, woto: Bɩ f Wẽnnaam, fo sẽn teeg a soaba da belg-fo, n yet tɩ Zerizalɛɛm kõn lʋɩ Asiri dĩma nugẽ ye. Fo wʋma Asiri dĩm dãmba sẽn maan tẽnsa fãa bũmb ninga, n kãab b fãa beedo, tɩ fo yẽ tẽed tɩ f na põse? Mam saam-dãmb sẽn sãam soolem niynsã, bãmb wẽnd dãmba sõng-b-la wãn wãna? Gozã, Arã, Resɛf, Edenitsa sẽn da be-b Telasar, Amat dĩma, Arpad, Layir, Sefarwayim, Ena la Iwa dĩm dãmba bɛɛ?» A Ezekiyas reega sebrã b sẽn tʋm b rãmba nugẽ n karem. A dʋʋ wẽnd dooga sẽn be zĩig ningã n lak sebrã n dɩgl Naaba-Wẽnd taoore. A Ezekiyas maana pʋʋsg kãnga: «Israyɛl Wẽnnaam sẽn zao sa-gãnẽ, yaa yãmb bal la tẽng zug dĩm dãmba fãa Wẽnnaam. Yãmb n naan saaga la tẽnga. Yoog-y y tʋbre n kelge, Soaala-Wẽnde, la y puk-y y nini n gese. Naaba-Wẽnde, kelg-y dĩm a Senakerib goama, a tʋmame tɩ b wa tʋʋs yãmba, sẽn vɩ-ba fãa Wẽnnaam! Naaba-Wẽnde, Asiri dĩm dãmba menesa ninsaalb buudu wʋsgo, yaa sɩda, b yõoga b wẽn-naandsa bugum, tɩ b da ka Wẽnd ye, da yaa ninsaalb nus tʋʋmde, daoog bɩ kugri, yaa rẽ yĩnga la Asiri dĩm dãmb tõog n wã-ba. La marsã, Naaba-Wẽnde, fãag-y tõnd a nusẽ; m yõkd y sɛɛga, bɩ y fãag tõnd a Senakerib nugẽ tɩ tẽng zug dĩm dãmba bãng tɩ yãmb bal la Wẽnnaam.» Wakat kãnga, a Izayi, a Amos biiga, tʋmame tɩ b tɩ yeel a Ezekiyas: «Naaba-Wẽnde, a Israyɛl Wẽnnaam, koɛɛg la woto: Mam wʋma f pʋʋsgã f sẽn taas maama, Asiri dĩm, a Senakerib poorẽ wã. Ad koe-beed ning Soaala-Wẽnd me sẽn leokd-a: Ad bi-puglã, a Siõ bi-pugla laada foom, a toog ka be ne f ye. Wẽnemd f poor n ges a sẽn yĩgsd foom, ges Zerizalɛɛm pa-kula sẽn laad foom. Yaa ãnda la f tʋʋs yã, ãnda la f paoog yã? F zẽka f koɛɛga ne ãnda, ãnda la f get la f sãbsdẽ? Yaa a Israyɛl Wẽnnaama, yaa mam menga la f tʋʋsyã. Ne f sẽn tʋʋm b rãmba noore la f tʋʋs Soaala-Wẽnde. Fo yeelame: ‹M bilim-bilma tĩig rʋʋs-m-la yĩngri, maam a Senakerib dʋ tãmse, m kẽe Libã tẽnsʋka n tɩ kɛɛ a tɩ-wogdã, n lub a tɩɩsã sẽn lugã, m saaga a tãmsa fãa, m saaga a tʋgra fãa. Mam tuu bulsi n yũ bu-zẽn koom, m tabame n kʋɩɩs ne m nao Ezipt ko-soya fãa.› Fo ka mi-la, Senakerib, tɩ yaa al daar zãra, la maam a Naaba-Wẽnd sed m sɛdga, la m sẽn seda la m pidsd dũnna. M da bĩnga foo tɩ f wa sarem tẽnse, tẽns sẽn me lals n gũbgi. Tẽnga rãmb nus ka pãng ye, b komsame n zĩ ne yãnde, b lebga wa pʋt moodo, b lebga wa luiili-saase, n lebg kar-kar wa gaosg zug moogo, n lebg wa wãoong sẽn dɩ kood niynsi tɩ b nan ka paam n bɩ zãngã. Bãng tɩ m mi-f-la zãnga. Bãng tɩ f zĩ, bɩ f yit la f kẽedẽ, f sã n zĩi n digd la f yãbd sũ-toogo m mii fãa. Ade, fo yik n zabda ne maam m wʋma f sẽn tãoosd raoodã, m yãenda f sẽn maan tɩtaama. Dẽ me la m na n yõg-f wa weefo n vʋdg f yõore n sog bãnga, n yaag f noor n ning salbre. Woto f sẽn tũ sor ning n wa wã so-kãng la f na n tũ n lebe. Ade woto n na n yɩ makre n yɩ makr fo yĩnga, Ezekiyas: Doanna, yãmb na n dɩɩ koodo, kood sẽn yi a toore. Vẽer me na n yɩɩ boto. Yʋʋmd ninga sẽn pʋgdã, y na bʋde la y kẽeb y koodo, n sel y bugsuntundu n dɩ b biisi. La sẽn kell Zɩɩda roogẽ, sẽn põs fãa na n kɩɩ yẽgna, n kɩ yẽgen tẽngre, wa tɩɩga, la b wila na n woma biisi. Zerizalɛɛm pʋgẽ, kelle n na n keese, la Siõ tãnga zugu põasg n na n põse. Wẽnd pãngã n na n tʋm dẽnna. Sã n ya Asiri dĩma poorẽ woto la Soaala yeta: A kõn kẽ tẽn kãnga ye. A kõn tão pĩim ye. A kõn zẽk a gãong ye. A kõn sam tãndo m paam n kẽ ye. A sẽn tũ sor ning n wa, so-kãng la a na n le tũ n kuli. Soaala-Wẽnd n yeele: A kõn kẽ tẽn-kãnga ye, m sẽn nong a Daviid yĩnga. Mam na n gũu tẽngã, la m na fãag Zerizalɛɛm, tɩ maam la Naaba-Wẽnde!» La yʋn-kãng bala, Wẽnd malɛka yiime, la a wẽ Asiri dãmba tãb-sika; la a pʋgẽ, neb tus koabga la pis-nii la a nu n ki. Beoog sẽn vẽege, da yaa kũum ne kũum n diga. A Senakerib kɩtame t'a tãb-biis yiki la a kulame. A leba Niniv n tɩ pa beene. La daar a ye, a da wõga a wẽnd, a Nisrok, roogẽ t'a meng kom-dibli a yi, a Adramelɛk la a Sarezɛr, kɛ-a ne sʋʋga n yi n zoe n kẽng Ararat tẽnga, t'a biiga a Asaradõ led-a a zaoorẽ. Dasem kãense, a Ezekiyas lʋɩɩ bãag sẽn da tõe n yãk yõore. Bãngd a Izayi, a Amos biiga, tɩ yeel-a lame: «Naaba-Wẽnd koɛɛg la woto: ‹Bɩ y maneg y zak yɛla tɩ y na n kiime, y kõn le vɩɩnd ye.› » La a Ezekiyas, wẽnemdame n tees lalga n pʋʋs Naaba-Wẽnde n yetẽ: «M yõkd y sɛɛga, tẽeg-y tɩ m kell n talla m menga, m manesem fãa pʋgẽ, ne zemsgo la pʋ-peelem, yãmb taoore, la m maana sẽn da noom y sũuri.» La a Ezekiyas kelmame t'a nintãm sodge. La a Izayi da nan pa yi na-zaka pʋg ye, la Naaba-Wẽnd le taas-a-la gomd kãngã: «Lebg n tɩ yeel woto a Ezekiyas, mam buuda naaba: ‹Ad Naaba-Wẽnd, f saamba a Daviid Wẽnda, gomde: M wʋma f pʋʋsgo; m yãenda f nintãm; mam na n sãoog-f lame, ka la dasem a tã fo na n kẽnga wẽnd doogẽ. Mam na n le paasa f pʋlemd yʋʋm piig la a nu, mam na n fãaga-foo, foom ne f tẽngã, Asiri dĩma nugẽ; mam na n gũ tẽn-kãngã, mam maasem la m tʋʋm-tʋmd a Daviid maasem yĩnga.› » A Izayi, yeelame: «Wã-y ne kankam miisgu.» Tɩ b wa ne, la b yãkame n bɛ naaba nodre, la naab sãoogame. Dẽ t'a Ezekiyas da reng n soka a Izayi: «Bõe n na n yɩ makre tɩ m bãng tɩ Soaala-Wẽnd na n sãooga maam la ka ne dasem a tã m na n kẽnga wẽnd doogẽ?» A Izayi leoka me: «Ad Soaala-Wẽnd sẽn yeel tɩ b kõ f makre ninga tɩ f bãng tɩ b na n pidsa b kãabgo: Fo ratame tɩ wĩndga maasem kẽng taoore bɩ a leb poorẽ nug yakem piiga!» A Ezekiyas leokame: «Maasema kẽng taoore nug yakem piiga ka toog ye. Ayo! A leb poorẽ nug yakem piiga!» A Izayi pʋʋsa Soaala-Wẽnde, la bãmb kɩtame tɩ maasem woog n leb poorẽ nug yakem piiga a Akaz yĩngr dooga teedsa zugu. Wẽnd kãnga, a Baladã biig a Merodak-Baladã, Babilon dĩma, tʋma sɛba ne kũuni tɩ b wa pʋʋs a Ezekiyas, t'a da wʋma a ka laafi wã kibare. A Ezekiyas, sũur yɩɩ noogo, la a wilga b sẽn tʋʋm b rãmbã, doog ning a sẽn bĩngd a wanzurfã, a sãnema, a tɩdarã, a yũ-nood kaama, la zab teedã la a laoga fãa. Bũmb ka zĩnd na-yiri la a soolma pʋga a sẽn pa wilg-b ye. La bãngda, a Izayi, waa dĩma nengẽ n sok-a: «Sãamba yeelame tɩ bõe la b yii yɛɛlẽ n wa f yiri?» T'a Ezekiyas leoke: «B yii tẽn-zãorgẽ, al Babilon.» T'a Izayi le sok-a: «B yãee bõe fo zakẽ?» La a Ezekiyas leokame: «B yãee bũmb ning fãa sẽn be na-yiri, bũmb pa be m teeda rotẽ mam sẽn pa wilg-b ye.» La a Izayi yeela a Ezekiyas: «Bɩ f kelg Soaala-Wẽnd gomde: Ade, daar n wate, tɩ bũmb ning fãa sẽn be f zakẽ la f saam-dãmba sẽn bĩng laog ning fãa n ta rũnna, b na n wʋk-b lame n kẽng Babilon la b kõn bas bũmb ye. Soaala-Wẽnd n gomd boto. B na n wʋka f kamb wʋsgo, kamb fo meng sẽn doge, n kẽng tẽn-zẽngẽ. B na n yãka kẽere n maan zu-soaben-dãmba, tɩ b zĩ Babilon dĩma zakẽ.» A Ezekiyas yeela a Izayi: «Soaala-Wẽnd gomdã f sẽn togsã yaa sõmbo» A tagsa a sũurẽ: «Gomda yaa sõmbo tɩ m na n kell n yãee laafi la yĩn-maasem m vɩɩmẽ.» A Ezekiyas tʋʋm a taabã, a sẽn me ko-baoor la ko-sore n na n tak koom n wa tẽnga pʋgẽ, dẽ fãa pa gʋls a Zɩɩda dĩm dãmb kibara sebr pʋgẽ bɩ? A Ezekiyas tɩ saka a saam-dãmba la a biiga a Manase n led-a a zaoorẽ. A Manase da tara yʋʋm piig la a yi a naam deegr wakato la a rɩɩ naam yʋʋm pis-nu la a nu Zerizalɛɛm. A ma ra boondame t'a Efsi-Ba. A maana sẽn pa sõmb Naaba-Wẽnd nifẽ, a togsa bu-zẽmba tʋʋm yooda fãa, bu-zẽn niyns Soaala-Wẽnd sẽn da rig b rãmba n zãag a Israyɛl taoore. A le mee pʋʋsg rot niynsi a ba a Ezekiyas sẽn da lub b rãmbã la a lugla maan-kugri a Baal yĩnga, la a sela da-peesdi, wala Israyɛl dĩma, a Akab. A wõgemdame la a waooga yĩngr ãdsã. A mee maan-kug wẽnd doogẽ wã, la Soaala-Wẽnd da yaool n yeelame: «Yaa Zerizalɛɛm la m maand m belem la m waoogr zĩiga.» A mee maan-kuga, yĩngri teedã fãa waoogr yĩnga, wẽnd dooga zags a yiiba pʋsẽ. A kɩtame t'a biig a ye pɩʋʋg bugum, a boola zĩn dãmba, a kẽe tẽn-kuga, a zĩndga neb sẽn sogsd kɩɩms la bagba. A sãama Soaala-Wẽnd sũuri ne a manes yoodã. A ninga a Asera nin-naand a meng sẽn kɩt tɩ b rõoge la a ning-a-la wẽnd doogẽ wã. Soaala-Wẽnd da yaool n yeela a Daviid ne a biiga a Salomo woto: «Yaa wẽnd doogã la yaa Zerizalɛɛm la m yãk Israyɛl tẽnsa fãa sʋka, n maan m belem la m waoogr zĩiga, zamaan woo zamaana. Woto m kõn le tall a kambã n zãag ne tẽng ning m sẽn kõ b ba rãmba ye. La rẽnd bãmb me modg n maan m sẽn yeel bũmb ninga fãa, n tũ noor ning m sẽn kõ m sõgen a Moyiiz. La bãmb pa sak ye, a Manase kẽes-b-la weoogo, al tɩ b maan wẽnga n yɩɩg bu-zẽn niynsi Naaba-Wẽnd sẽn menes a Israyɛl taoore.» Naaba-Wẽnd goma ne bãmba ne b sõgen-kamba la bãngdba noore n yetẽ: «Zɩɩda dĩm a Manase sẽn tʋm tʋm yood yĩnga, n maan wẽng n yɩɩg Amonitsa sẽn deng b yẽ wã, la a tus a Zɩɩda me t'a naag yẽnda n maan yel-wẽnde ne a wẽn-naandsã, Naaba-Wẽnde, a Israyɛl Wẽnnaam, koɛɛg la woto: ‹Mam na n waa ne a Zɩɩda la Zerizalɛɛm zugu yel-beed a ye, ali tɩ ned ning fãa sẽn na n wʋm-a bɩ a tʋb a yiiba fãa naag n kʋre. Mam na n wãa Zerizalɛɛm wa m sẽn wã Samari. M na n sarma Zerizalɛɛm wala m sẽn sarem a Akab roogo. M na nedg Zerizalɛɛm wala b sẽn nedg lengr pʋg la a poore. Mam na n daaga a neb sẽn kellã n base; mam na n yõk-b lame n ning b bɛɛba nugẽ, bãmb na n yɩɩ b bɛɛb mogbo la b dɩɩbo, la rẽ yaa b sẽn maan tɩ pa ta m yam, la b kɩt tɩ m sũur puugi, sẽn sɩng b saamb dãmb sẽn yi Ezipt tẽnga n tãag dũnna.› » A Manase naagame n daag zɩɩm, neb sẽn ka tar b toorẽ yell zɩɩm, al n pid Zerizalɛɛm zãnga, tɩ b pa gomd a sẽn kɩt t'a Zɩɩda maan sẽn ya wẽng woo wẽnga, Naaba-Wẽnd taoore. A Manase sẽn maana fãa, rẽ fãa pa gʋls Zɩɩda dĩm dãmba kibar sebr pʋgẽ bɩ? A Manase tɩ saka a saam-dãmba, b mum-a-la zẽed sẽn da be a zaka pʋgẽ, a Uza zẽedẽ wã, a biiga Amon n led-a a zaoorẽ. A Amon da tara yʋʋm pisi la a yi, a naam deegr wakato, la a rɩɩ naam yʋʋm a yiib Zerizalɛɛm, a ma yʋʋr da boondame t'a Mesullemet, a Arus biiga, a ba yir da yaa Yotba. A maana sẽn pa ta Soaala-Wẽnd yam, wala a ba, a Manase, sẽn maane. A togsa a ba a Manase n waoog wẽn-naandse la a wõgemda bãmb taoore. A basa Naaba-Wẽnd, a saam-dãmba Wẽnnaam, la a pa tũ b sor ye. A Amon poorẽ dãmba yẽsa ne taaba n na n lub-a, la b kʋʋ dĩma, a zakẽ. La tẽnga rãmb kʋʋ neb niyns fãa sẽn da yẽs-b ne taaba n na lub dĩma la b kɩtame t'a biiga a Zoziyas rɩ naam a zaoorẽ. Tʋʋm a taabã a sẽn maana, dẽ fãa pa gʋls Zɩɩda dĩm dãmba kibar sebr pʋgẽ bɩ? B mum-a-la a ba yaoogẽ, a Uza zẽedẽ wã la a biiga a Zoziyas n led-a a zaoorẽ. A Zoziyas sẽn waa n na n deeg naam, t'a tara yʋʋm a nii; a rɩ naam yʋʋm pis-tã la a ye Zerizalɛɛm, a ma yʋʋr da boondame t'a Yedida, a Adaya biiga, a ba yiri da yaa Boskat. A maana sẽn ta Soaala-Wẽnd yam la a togsa a saamba a Daviid manesem fãa, n pa bʋdg rɩtgo, n pa bʋdg goabga. A Zoziyas naam yʋʋmd piig la a nii soaba, dĩma tʋma wẽnd doogẽ, a sɛb gʋlsda a Safã, a Asaliya biiga, a Mesulam yagenga. A yeel-a lame: «Kẽng maan-kʋʋd kãsenga a Ilkiya nengẽ la f kɩt t'a geelg ligdã b sẽn wat n kɩt Wẽnd doogẽ wã, dagno-gũudba sẽn deesd neba nengẽ wã. A rɩk ligd kãnga n kɩs tʋʋma nanamse sẽn get b wẽnd dooga manegrã, tɩ b reeg-a n yao tʋʋm-tʋmdba sẽn manegd-b wẽnd doogã. Bɩ b yao da-wãadba la tãn-metba, tʋʋm-tʋmdb a taabã; b yãk n yao daada la kuga sẽn pees wẽnd doogã yĩnga. La b ra sok-b ligda geels ye, tɩ b maanda pʋ-peelem.» Maan-kʋʋd kãsenga a Ilkiya yeela sɛb-gʋlsda a Safã: «Mam yãenda Noora sebrã wẽnd doogẽ.» La a Ilkiya kɩsa a Safã sebra t'a karem. Sɛb-gʋlsda kẽnga dĩma nengẽ n tɩ yeel-a: «Tõnd tigsa ligdã sẽn be wẽnd doogẽ wã fãa, la d kɩs-a-la tʋʋma nanamse sẽn get-b wẽnd dooga manegrã.» La sɛb-gʋlsda, a Safã, togsa naaba kibar kãnga: «Maan-kʋʋd a Ilkiya kɩsa maam sebr a yembre.» La a Safã karma sebrã dĩma taoore. Dĩma sẽn wʋm goama sẽn da be Noor sebra pʋgã, a kẽesa a futu. A kõo maan-kʋʋd a Ilkiya, a Ayikam, a Safã biiga, a Akbor, a Mikaya biiga, sɛb gʋlsda a Safã, la dĩma sõgen a Asaya noor kãngã: «Kẽng-y, tɩ sok-y Naaba-Wẽnd bũmbu. Tɩ sok-y m yĩnga, buuda fãa yĩnga, a Zɩɩda fãa yĩnga. Sok-y sebra poorẽ, sebr ning b sẽn yãenda poorẽ. Ade, Naaba-Wẽnd sũur puuga wʋsgo ne tõndo, tɩ tõnd saam-dãmba pa tũ sebr kãng goama, b pa tũ bũmb ning fãa b sẽn gʋls a pʋgẽ ye.» Maan-kʋʋd, a Ilkiya, n paas a Ayikam, a Akbor, a Safã la a Asaya kẽnga bãngd poaka a Ulda nengẽ. Yaa a Salum paga la yẽ n da gũud futã. A Salum da yaa a Tikwa biiga, a Aras yagenga. Paga ra bee Zerizalɛɛm, Kẽedpaoolgo. B togsa paga kibara zãnga. La a leok-b lame: «Naaba-Wẽnde, Israyɛl Wẽnnaama koɛɛg la woto: ‹Tɩ togs-y ned ninga sẽn tʋma yãmb mam nengẽ wã: Naaba-Wẽnd yetame: Mam na n waa ne yel-beedo tẽn-kãnga neba zutu, la m na n pidsa bũmb ning fãa sẽn be sebra pʋgã tɩ Zɩɩda dĩma karma, bãmb sẽn daag maam n bas yĩnga, la b kʋ maando n waoog wẽn-naandse, n na n puug m sũuri. Mam sũur puuga ne tẽn-kãnga, la a kõn sig ye. La yãmb na n yeela Zɩɩda dĩma sẽn tʋm yãmb tɩ y wa sokã, tɩ Naaba-Wẽnd, a Israyɛl Wẽnnaam Koɛɛg la woto: Fo wʋma sebra sẽn togs bũmb ninga. Fo kelga m sẽn togs bũmb ning Zerizalɛɛm ne a neba poorẽ. M sɩd na n kɩtame tɩ tẽnga lebg tẽn-weongo, tẽng sẽn ka le be barka. La fo sakame tɩ f sũur bondge, tɩ f reeg foo ne buuda kongre, fo kẽesa fut la f yãba mam taoore, bãng neere, ad yaa maam n gomde, bãng tɩ mam me wʋmame. Yaa rẽ yĩnga la mam na n lagem foom ne f saam-dãmba tɩ f gãand ne laafi f yaoogẽ; fo nin kõn yãend yel-beed ning m sẽn na n wa ne zĩ-kãnga ye.› » Sẽn tɩ kelg-b bãngd poaka koɛɛga tɩ taasa dĩma Soaala-Wẽnd leokrã. Wẽnd kãnga, dĩm a Zoziyas kɩtame tɩ b bool Zɩɩda ne Zerizalɛɛm nin-kẽemba tɩ b wa sak-a. La dĩma kẽnga wẽnd doogẽ ne Zɩɩda la Zerizalɛɛm dãmba fãa, la buuda fãa, talga la na-koambga. Bãmb taoore a karma bũmb ning fãa sẽn da be zooda sebra pʋgẽ. Yaa sebr ning b sẽn yãend wẽnd doogẽ wã. Dĩma da yɛsa yĩngri, geer zugu, Wẽnd taoore; a le kãaba zooda kãabgo, t'a na n tũu Soaala-Wẽnde, a na n saka b noya ne b zãmsga fãa la b saglsa fãa, ne a sũur fãa la a pãng fãa; a na n maana bũmb ning fãa sẽn gʋls sebrã pʋga. La zãma wã fãa wẽename tɩ b na n tũ zoodã kãabgo. Dĩma kõ maan-kʋʋd kãsenga, a Ilkiya, ne kãsem-pʋgdgã la wẽnd doog dagno-gũudbã noore, tɩ b yiis wẽnd dooga pʋga teed fãa b sẽn da rõog n na n waoog a Baal, la a Asera, la yĩngri bõn-naands fãa; a yiis-b-la Zerizalɛɛm n yõog-ba Sedrõ longẽ, n wʋk b tompɛglma n tɩ rʋʋg Betɛl. A riga maan-kʋʋdba dĩm dãmba sẽn da zĩndig tɩ b kʋʋd maand pʋʋsga zĩisẽ, la Zɩɩda tẽnsẽ la Zerizalɛɛm tẽn-kɩremsã la a riga sẽn da kʋʋd-b maando n kõt a Baal, n kõt wĩndgã, kiuugã, ãdsã la yĩngri teeda fãa. A yiisa a Asera ra-peesma wẽnd doogẽ la Zerizalɛɛm pʋgẽ, n tall-a n kẽng Sedrõ longẽ wã, la a yõog-a-la bugum be; a Kɩtame t'a lebg tompɛglem, t'a lob tompɛglma talsa yaadẽ; a luba yoaadba rotã sẽn da be wẽnd dooga pʋgã tɩ pagba da wʋgd pɛɛl beene, a Asera yĩngã. A boola maan-kʋʋdba fãa sẽn da be Zɩɩda tẽnsa pʋgẽ tɩ b wa, la a sãama zĩisa fãa, maanda sẽn da kʋʋdẽ wã, sẽn sɩng Geba n tɩ tãag Beerseba. Zerizalɛɛm pʋgẽ, a luba maan-kug niyns sẽn da pẽ-b tẽnga kʋɩlensã, bũmb zãnga sẽn da pẽ-b kombere a Zozuwe rẽnna. F sã n kẽedẽ, yaa nug goabga. Maan-kʋʋdba sẽn da be pʋʋsga zĩisẽ wã, da pa tar sor n wa kʋ maoong Zerizalɛɛm maan-kugra zug ye, la b da naagda b saam-biisã n dɩt bur sẽn pa ning bɩllã. A Zoziyas gɩdga sagda yõogr Tofɛt boka sẽn da be Ben-Inom tãn-longã pʋga, woto ned ba a ye ka le yõog a bi-ribla bɩ a bi-pugl bugum, n waoog a Molok ye. A yiisa wiidi wã dĩm dãmba sẽn da gʋʋnd wĩntooga waoogr yĩnga. Wed bãmb ra bee wẽnd dooga dagnoorẽ, zu-soaba a Netã-Melɛk dooga sɛɛga, dĩma zakẽ; a yõoga bugum bilim-bilm niyns sẽn da rɩk n kõ wĩndgã. Dĩma wãa maan-kug niyns sẽn da be a Akaz bɛongã zugu. Zɩɩda dĩm dãmbã n da me-ba. A wãa a Manase sẽn da me b rãmba wẽnd dooga zãong a yiiba pʋsẽ. Dĩma tus-b lame n lubi, n wã-ba, n wʋk b toma n tɩ lob Sedrõ tãn-longa pʋga. A Zoziyas sãama pʋʋsga rotã sẽn da tot ne Zerizalɛɛm, n be Oliviye tãnga nug rɩtgo, Israyɛl dĩma a Salomo sẽn da me n na n waoog wẽn-poak a Astarte, Sidõ kẽedba wɩɩbdã, a Kemos, Moabitsa yel-yoogã, la a Milkom, Amonitsa bõn-dẽgdã. A Zoziyas wãa kug-peesma, n kʋʋs ra-peesdi wã, n wʋk ninsaalba kõaba n bus b zĩigẽ. A Zoziyas le sãama maan-kugr ning sẽn be Betɛl, A Nebat biig a Zeroboam, sẽn me a soaba n lub a Israyɛl yel-wẽnd pʋgẽ wã. A sãam-a lame, n wã kugã, n wer-b tɩ b lebg zom, la a yõoga ra-peesma bugum. A Zoziyas waa n wẽnemda a nenga n yãe yaadã sẽn da be tãnga zugu la a tʋmame tɩ b tɩ wʋk yaada kõaba n wa yõog-b maan-kugra zugu. A mana woto n dẽgem maan-kugrã la woto a taasa bãngd a ye sẽn da pĩnd n togse. A Zoziyas le sokame: «Yaa ãnda yaoog kugr n tond tɩ m neẽ wã?» Tɩ tẽnga neb na n yeele: «Yaa bãngd a ye sẽn yi Zɩɩda tẽng yaoogo la bãngd kãng n da pĩnd n togs fo sẽn maan mars-marsã kaalẽ, maan-kugra poorẽ wã.» T'a Zoziyas na n yeele: «Bas-y yao kãnga, bɩ ned ba a ye da sɩɩs bãngda kõab ye!» La woto b pa sɩɩs a kõaba wala b sẽn pa sɩɩs Samari bãngda me kõabã. A Zoziyas kɩtame tɩ b sãam wẽnd dota fãa, a Israyɛl kamba sẽn da me Samari tẽns pʋsẽ n puug Naaba-Wẽnd sũurã; a maana ne bãmba, wa a sẽn maan Betɛl. A Zoziyas kooda maan-kʋʋdba sẽn da be pʋʋsga rotẽ wã, la a yõoga ninsaalb kõaba maan-kuga zutu. A lɛɛg n waa Zerizalɛɛm. Dĩma kõo neba fãa noor kãnga: «Maan-y pak kibsa Soaala-Wẽnd waoogr yĩnga, wala b sẽn gʋls tɩ b maan bũmb ninga zood sebra pʋgẽ.» B ra pa le maan pak kibs a woto buudu al bʋ-kaoodba zamaanẽ ye. Yaa a Zoziyas naam yʋʋmd piig la a nii soaba bala la b maan pak kãnga buudu n waoog Naaba-Wẽnd, Zerizalɛɛm. N paas me, sẽn boond b kɩɩmse, bagba, la tɩto, la tẽn-kuga, la yel-yoodã fãa b sẽn da tõe n yãend Zɩɩda soolmẽ la Zerizalɛɛm pʋgẽ, a Zoziyas yiisa bãmb fãa, n na n tũ Noora goama sẽn gʋls sebra pʋgã, sebr ninga maan-kʋʋd a Ilkiya sẽn yãend wẽnd dooga pʋgã. Dĩm ba a ye pa reng n zĩnd pĩnda sẽn tũ Soaala-Wẽnd ne a sũur fãa la a pãng fãa la a sak a Moyiiz Noor ne pʋ-peelem wa a Zoziyas ye, la yẽ poore, a to pa zĩnd sẽn wẽneg-a ye. La ne rẽ fãa, Soaala-Wẽnd sũ-puur kãsengã da ket n yãnga ne Zɩɩda tʋʋm yoodã a Manase sẽn maan n bao b noorã. B sũura pa sig ye. Soaala-Wẽnd yeelame: «Mam na n yiisa Zɩɩda m taoore, wala m sẽn yiis Israyɛl, mam na n daaga tẽngã mam sẽn da tũus a soabã n base, n bas Zerizalɛɛm ne wẽnd doog ning mam sẽn da yeel tɩ na n yɩɩ m naam la m waoogr zĩiga.» A Zoziyas sẽn maan fãa, rẽ fãa pa gʋls dĩm dãmba kibar sebr pʋgẽ bɩ? A Zoziyas zamaanẽ, A Nekao, Ezipt dĩma, kẽng n na n tɩ sega Asiri dĩma, Efrat kʋɩlga sẽnẽ. Dĩma a Zoziyas yika zabr ne-a, a tʋlgame n gɩdg-a, la Nekao kʋ-la a Zoziyas, Megido tẽnga. A sõgen-kamba rɩka a yĩnga ne bilim-bilm, Megido, n le tall-a n wa Zerizalɛɛm, n mum-a yaoogẽ, la tẽnga rãmba rɩka a Zoziyas biiga, a Zoakaz, n pʋdg a zug naam kaam, t'a rɩ naam a ba zaoorẽ. A Zoakaz da tara yʋʋm piig la a tã, a naam deegr wakato; a rɩɩ naam kiis a tã, Zerizalɛɛm, a ma yʋʋr da boondame t'a Amutal, a Zeremi bi-pugla, a ba yir da yaa Libna. A maana sẽn pa ta Soaala-Wẽnd yam ba bilfu, wala a saam-dãmba sẽn da maane. A Nekao yõk-a lame n balg-a bãeense, Ribla, Amat tẽn-peelmẽ, la a saaga a tẽnga yaoodo, wanzurf sẽn ta neb koabg la pis nu zɩɩbo, la sãnem sẽn ta neb piig la a nu zɩɩbo. A Nekao zĩndiga a Eliyakim, a Zoziyas biiga, t'a rɩ naam a ba zaoorẽ la a teka a yʋʋr n pʋd t'a Zoakim, la a Zoakaz tall-a lame n kẽng Ezipt t'a tɩ ki beenẽ. A Zoakim yaoo Ezipt dĩma wanzurfa la sãnema; la sẽn na n yɩ-la n paam ligdã n kɩse, a kong n saaga a tẽnga rãmb yaoodo. Ned kam fãa ra kɩta a sẽn tare, wanzurf bɩ sãnem, t'a reeg n kɩs a Nekao. A Zoakim da tara yʋʋm pisi a naam deegr wakato; a rɩɩ naam yʋʋm piig la a yembre, Zerizalɛɛm, a ma yʋʋr da boondame t'a Zebuda, a Pedaya biiga, a ba yir da yaa Ruma. A maana sẽn pa neer Soaala-Wẽnd nifẽ, wala a saam-dãmba sẽn da maane. A Zoakim zamaanẽ, a Nabikodonozor, Babilon dĩma, yiisa tãpo; a Zoakim saka a noore, yʋʋm a tã, n yaool n wa yik n giri. Naaba-Wẽnd basame tɩ so-gɩtb sẽn yit Kalde, Aram, Moab la Amon wa tak zabr ne a Zoakim. Yaa Zɩɩda la b ra baood n na n wã wala Naaba-Wẽnd sẽn da wilg ne b bãngdba noore. Rẽ fãa lʋɩɩ a Zɩɩda zugu, t'a Manase yel-wẽna kɩtame tɩ Soaala-Wẽnd yam lak tɩ b ra pa rat n le zĩnd ne bãmb ye. Leb n yɩ-la a sẽn daag nin-sõma wã zɩɩm n pids Zerizalɛɛm la Naaba-Wẽnd pa tʋlg n kõ sugri. Yɛl a taaba fãa a Zoakim sẽn maane, dẽ fãa pa gʋls a Zɩɩda dĩm dãmba kibara sebrẽ bɩ? A Zoakim tɩ saka a saam-dãmba, t'a biiga a Zoakẽ led-a a zaoorẽ. Ezipt dĩma pa le yi a soolmẽ ye, tɩ Babilon dĩma da reega a sẽn da so tẽns niynsa fãa n yãmbe, sẽn sɩng Ezipt kʋɩlga n tãag Efrat kʋɩlgã. A Zoakẽ da tara yʋʋm piig la a nii a naama deegr wakato; a rɩɩ naam kiis a tã Zerizalɛɛm pʋgẽ; a ma yʋʋr da boondame t'a Newusta, a Elnatã biiga, a ba yir da yaa Zerizalɛɛm. A maana sẽn pa ta Soaala-Wẽnd yam wala a ba sẽn da maane. La wẽnd kãnga, Babilon dĩma, a Nabikodonozor, yiisa tãpo n na n pãb Zerizalɛɛm; la b sẽn gũgb tẽngã, n sege, Babilon dĩma, a Nabikodonozor wa a toore n na n kaoog zabrã. La Zɩɩda dĩma, a Zoakẽ, rɩka a meng n kɩs Babilon dĩma, yẽ ne a ma, a sõgen-kamba, a kombɛɛmba la a tãnsoaben-dãmba. A Zoakẽ lebg Zɩɩda rĩm tɩ yʋʋm niini la Babilon dĩma, a Nabikodonozor kẽes-a roogo. Wala Naaba-Wẽnd sẽn da pĩnd n yeele, a Nabikodonozor wʋka wẽnd dooga arzɛgsa fãa, na-yir arzɛgsa fãa. A wãa sãnem lagda fãa, a Salomo, Israyɛl dĩma, sẽn da rõog wẽnd dooga yĩnga. A wʋka Zerizalɛɛm tẽnga rãmba, sẽn so-b tʋʋma, tẽnga nin-bɛda, bãmb na ta tus piiga, n paas sẽn mi-b kut tʋʋma, n tõe n maan kʋɩlen-kuri la kʋɩlen-toore. Sẽn ka tar-b tʋʋmde la sẽn ka mi-b tʋʋmd buud ba a ye bal la a bas yã. A peega a Zoakẽ n kẽng Babilon yembdo, ne naab-ma, na-pagba, sõgen-kamba, tãnsoaben-dãmba, la na-komsa fãa; a wʋk-b-la Zerizalɛɛm n loog yembdo Babilon. Dakãagba fãa, bãmb tus a yopoe, la sãaba ne yõgsã fãa, bãmb tusri, la tãb-biisa sẽn tar sũuri, Babilon dĩma peeg-b lame n kẽng yembdo. A Zoakẽ zĩigẽ, Babilon dĩma yãka a saam-bila, a Matãniya, t'a rɩ naam. A teema a yʋʋrã n pʋd-a Sedesiyas. A Sedesiyas da tara yʋʋm pisi la a yembre a naam deegr wakato; a rɩɩ naam yʋʋm piig la a ye Zerizalɛɛm; a ma yʋʋr da boondame t'a Amutal, a Zeremi biiga, Libna tẽnga a maana sẽn pa ta Soaala-Wẽnd yam, wala a Zoakim sẽn da maane. La yell bãmb fãa lʋɩɩ Zerizalɛɛm la Zɩɩda zugu, tɩ Soaala-Wẽnd sũur da puuga ne-ba al tɩ b rig-ba n yiis b taoore. A Sedesiyas me waa n yeelame t'a kõn le kẽ Babilon dĩma tãpẽ ye. A Sedesiyas naama yʋʋmd a wɛ soaba, kiuug piig soaba, kiuuga piig daare, Babilon dĩma a Nabikodonozor, waa ne a tãb-biis fãa n kaoog zabre ne Zerizalɛɛm, a gãnega a tãpo tẽngã noore n tu boko n gũbg-a. A gũbga tẽnga n pãb-a tɩ ta a Sedesiyas naam yʋʋmd piig la a ye soaba. Kiuug a naas soaba, a daar a wɛ soaba, kom sẽn wa n wɩng tẽnga fãa, tɩ neba da pa le tar dɩɩbo, b pooga lal-gũbra võore. Dĩma yii yʋngo n zoe ne a tãb-biisa fãa, a tũu dagnoor ninga sẽn be lals a yiibã sʋka, naab zẽeda dignoore. Dẽ tɩ Kalde rãmba da gũbga tẽngã, la a rɩka Yamsem Mogra sore. Kalde rãmba riga dĩma n paam-a Zeriko tẽn-nabrẽ wã t'a tãb-biisa fãa sẽeg n bas-a. Kalde rãmba yõka rĩma n tall a n kẽng Ribla, Babilon dĩma nengẽ, la dĩma kɩtame tɩ b bʋ-a bʋʋdo. A kɩtame tɩ b kood a Sedesiyas kamba, a nifẽ, t'a yaool n leo a Sedesiyas nini, n balg-a bãnga, n tall-a n kẽng Babilon. Kiuug a nu soaba, daar a yopoe daare, a Nabikodonozor, Babilon dĩma, naama yʋʋmd piig la a wɛ soaba, a Nebuzaradã, tãnsoaba, la Babilon dĩma komber a yembre, kẽe Zerizalɛɛm. A yõoga wẽnd dooga bugum ne na-yirã la Zerizalɛɛm dota fãa. Kalde dãmba sẽn da be-b ne tãnsoabã, luba lalgã sẽn da gũbg Zerizalɛɛm. A Nebuzaradã wʋka neba b sẽn da bas Zerizalɛɛm tẽngã n loog yembdo ne neb niyns fãa sẽn da wa n nok Babilon dĩma la zãma wã sẽn da ketã. Tãnsoaba basa talsã kẽer bala, tɩ b send bugsuntung la b kooda. Kalde rãmb wãa zũud da-lugã sẽn da be wẽnd dooga noore, ne sĩmsã la zũud ko-sĩngã sẽn da be wẽnd doog sɩmandẽ, la b wʋka zũudã n zɩ n loog Babilon. La b wʋka lagdã sẽn da tar n ningd tompɛglma, kardã, sʋʋsã, laasã, la teeda fãa sẽn da yaa zũudu tɩ b da tar n maan maan-kʋʋr tʋʋma. Gũudba naaba wʋka laasã sẽn da tar n wisd tɩdarã, la laas a taabã, la bũmb ning fãa sẽn da ya sãnem la wanzurf. Sã n yaa zũud da-lugã ne ko-sĩngã la sĩmsã, a Salomo sẽn da maan wẽnd dooga yĩnga, b ka tõog n mag te-bãmb fãa zɩslem ye. Da-luk a ye fãa woglem da yaa kãntɩɩs piig la a yopoe. B ra paasa b woglem na ta kãntɩɩs a tãabo ne zũudu la b paasa b neerma ne zũud gãmbre la tɩ-biis wa pooloomse sẽn dõog ne zũudu. Zũuda ra-luga ra wẽnda taaba, gãmbs a yiiba me ra wẽnda taaba. Gũudba naaba yõka a Seraya, maan-kʋʋd kãsenga, n paas a Sefaniya kãsem-pʋgdgã ne zaka noor gũudba a tãabã. Tẽnga pʋgẽ a yõka ned ninga sẽn da so tãb-biisa yɛla welgre, n paas neb a nu sẽn be dĩma zakẽ, n paas ned ninga sẽn geta tãb-biisa yãkre, n ya tãnsoaba, n paas Zɩɩda tẽnga kamb pisoobe; bãmb fãa da bee Zerizalɛɛm. A Nebuzaradã, gũudba naaba, yõga bãmb fãa n kẽng Ribla, Babilon dĩma nengẽ. Yẽ kɩtame tɩ b kood b fãa Ribla, Amat tẽn-peelmẽ. Yɩɩ woto la b wʋk Zɩɩda n yiis a tẽngẽ n tall n kẽng yembdo. Neba sẽn pa-b tẽnga, Asiri dĩma sẽn bas b rãmba, a Nabikodonozor kõ-b-la a Gedaliya, a Ayikam biiga, a Safã yagenga, t'a yɩ kombere. Tãnsoaben-dãmba la neba fãa bãngame tɩ Babilon dĩma da yãka a Gedaliya t'a yɩ kombere, tɩ b waa a nengẽ, Mispa: yaa a Ismayɛl, a Netaniya biiga; a Zoana, a Karea biiga; a Seraya, a Tanewumɛt biiga, Netofɛt daoa; a Yazaniya, Maaka daoa. A Gedaliya wẽename n yeel-ba, bãmb ne b poorẽ dãmba: «Da maan-y rabeem ne Kalde rãmba ye. Pa-y tẽngã, sak-y Babilon dĩma, la bũmb kõn maan-y ye.» Kiuug a yopoe soaba sẽn ta, a Ismayɛl, a Netaniya biiga la a Elisama yagenga, na-koms buudu, wa n kʋ-la a Gedaliya n paas Zɩɩda la Kalde rãmba sẽn da be-b ne bãmb Mispa. Dẽ n so tɩ sẽn kell-ba fãa, bɛd woo, bõoneg woo, tãnsoab woo, bãmb fãa zoe Kalde dãmba dabeem n wudg n kẽng Ezipt. Zɩɩda dĩm a Zoakẽ sẽn kẽ yembdo tɩ yʋʋm pis-tã la a yopoe, kiuug piig la a yiib soaba, kiuuga rasem pisi la a yopoe daare, Babilon dĩma, a Evil Merodak, kũma dĩma nimbãanega n yiis-a roogo. A goma noog ne-a, n tol n kõt-a zĩig sẽn ya waoogr zĩiga n yɩɩd dĩm dãmb a taaba sẽn da be ne-yẽ Babilon. A Zoakẽ yeesa a yembd futu la a rɩɩ ne Babilon dĩma n tãag a yõor tɛka. Dĩma n ges a yelle wakat fãa, beoog sẽn vẽege, n tãag a kũum. A Adem doogo: a Sɛt, a Enos, a Kena, a Malaleyɛl, a Yerɛd a Enok, a Matusela, a Lamɛk, a Nowe, a Sem, a Kam, a Zafɛt. A Zafɛt roogo: a Gomɛr, a Magog, a Madayi, a Yavã, a Tubal, a Mesɛk, la a Tiras. A Gomɛr kamba: a Askenaz, a Difat, la a Togarma. A Yavã kamba: a Elisa, a Tarsis, a Kitim, la a Rodanim. A Kam kamba: a Kus, a Misrayim, a Ypt, la a Kanaã. A Kus kamba: a Seva, a Avila, a Sabta, a Ragma la a Sabteka. A Ragma kamba: Saba la a Dedã. A Kus roga a Nemrod; yẽ n deng n yɩ pipi gãndaoog, tẽng zugu. A Misrayim n dog Lud, Eyinam, Leav, Naftuwa rãmba, n paas: Patros, Kasluwa, Filisti rãmba yaaba la Kaftor rãmba. A Kanaã n dog a Sidõ, a bi-kẽenga la a Ɛt. Yẽ n dog Zebuzitse, Amoritse, la Girgazitse, Ivitse, Arkitse, Sinitse Arvaditse, Semaritse, la Amatitse. A Sem kamba: a Elam, a Asʋr, a Arpaksad, a Lud, Aram, Us, Ul, Getɛr, la a Mesɛk. A Arpaksad n dog a Sela, a Sela n dog a Ebɛr, A Ebɛr kamb yɩ-la a yiibu. Pipi soaba ra boondame t'a Pelɛg tɩ yaa yẽ zamaanẽ wã la ninsaalba sɩng n welg taaba. A yao wã yʋʋr la Yoktã A Yoktã doga a Almodad, a Selɛf, a Asarmavɛt, a Yera, a Adoram, a Uzal, a Dikla, a Eval, a Abimayɛl, a Saba, a Ofir, a Avila, la a Zobab, bãmb yɩ-la a Yoktã kamba. D le sõdg: a Sem, a Arpaksad, a Sela, a Ebɛr, a Pelɛg, a Rewu, a Serug, a Naoor, a Tera, a Abram, bɩ Abraam. A Abraam kamba: a Izaak la a Ismayɛl. Bãmb dooga rãmba: a Nebayot, a Ismayɛl bi-kẽenga, a Kedar, a Adbey-el, a Mibsam, a Misma, a Duma, a Masa, a Adad, a Tema, a Yetur, a Nafis, a Kedma. A Ismayɛl kamb la bãmba. A Ketura, a Abraam pag a ye kamba: a Zimrã, a Yoksã, a Medã, a Madiã, a Yisbak la a Suwa. A Yoksã kamba: a Saba la a Dedã. A Madiã kamba: a Efa, a Efɛr, a Anok, a Abida, a Elda. A Ketura kamba la bãmb fãa. A Abraam doga a Izak, a Izak, kamba: a Ezayu la a Israyɛl. A Ezayu kamba: a Elifaz, a Reuwɛl, a Yewus, a Yalam la a Kora. A Elifaz kamba: a Temã, a Omar, a Sefi, a Gatam, a Kenaz, a Timna la a Amalɛk, a Reuwɛl kamba: a Naat, a Zera, a Sama, la a Miza. A Seyir kamba: a Lotã, a Sobal, a Sibeõ, a Ana, a Disõ, a Esɛr la a Disã. A Lotã kamba: a Ori la a Omam. A Lotã tão da yaa a Timna. A Sobal kamba: a Aliyam, a Manaat, a Eval, a Sefi, a Onam. A Sibeõ kamba: a Aya la a Ana. A Ana biiga a Disõ: a Disõ kamba: a Amrã, a Esbã, a Yitrã, a Kerã. A Esɛr kamba: a Bileã, a Zawã, a Yakã. A Disã kamba: a Us la a Arã. Ad dĩm niyns sẽn dɩ-b naam Edom tẽnga, Israyɛl dĩm dãmb sẽn da waa n nan pa soog b tẽnga: a Bela, a Beor biiga; a na-tẽnga ra boondame tɩ Dinaba. A Bela kiime t'a Zera biiga a Zobab, Bosra rao, led-a a zaoorẽ. A Zobab kiime t'a Usã sẽn ya Temanitga led-a a zaoorẽ. A Usã kiime, t'a Bedad biiga a Adad, led-a a zaoorẽ. Yaa yẽ n tõog a Madiã, Moab weoogẽ wã. A na-tẽnga da boondame tɩ Avit. A Adad kiime, t'a Samla, Masreka dao, led-a a zaoorẽ. A Samla kiime, tɩ Efrat kʋɩlg noorẽ Reobot dao a Sol deeg naam a zĩigẽ. A Sol poore yɩ-la a Akbor biiga a Baal-Ana n dɩ naam. A Baal-Ana poore, yɩ-la a Adad. Payi n yɩ a na-tẽnga; a pag boondame tɩ Metabeyɛl, yaa Mezaab biiga a Matrɛd bi-pugla. A Adad poore, a Edom nanamse yɩ-la: a Timna, a Aliya, a Yetɛt, a Oolibama, a Ela, a Pino, a Kenaz, a Temã, a Mibsar, a Magdiyɛl, a Iram. Bãmb n yɩ Edom nanamse. A Zakoob yʋʋr a to la a Israyɛl; a kamba la woto: a Rubẽ, a Simeõ, a Levi, a Zɩɩda, a Isakar, a Zabulõ, a Dã, a Zozɛf, a Bẽnzame, a Neftali, a Gad la a Asɛr. A Zɩɩda kamba: a Ɛr, a Ona, la a Sela. Bãmb b tãaba fãa ma yɩɩ Kanaã paga, a Suwa biiga. A Zɩɩda bi-kẽenga, a Ɛr, maana sẽn ya wẽng Naaba-Wẽnd nifẽ, tɩ b yãk a yõore. A Tamar, a Zɩɩda bi-paga, doga a Zɩɩda kamb a yi: a Perɛs la a Zera. A Zɩɩda kamba fãa yɩɩ bãmb b nu. A Perɛs kamba: a Esrõ la a Amul. A Zera kamba: a Zimri, a Etã, a Eman, a Kalkol, a Dara, bãmb b nu. A Karmi biiga: a Akar, waa ne yel-beed a Israyɛl zugu. A rɩka sẽn da kis rɩkre, zabr zĩigẽ. A Etã biiga, a Azariya. A Esrõ kamba: a Yerameyɛl, a Ram, a Kelubayi (Kalɛb). A Ram doga a Aminadab; a Aminadab roga a Nasõ sẽn yɩ a Zɩɩda yagensa naaba. A Nasõ n dog a Salma, a Salma n dog a Booz. A Booz n dog a Obɛd, a Obɛd n dog a Zese. A Zese n dog a Eliab, a bi-kẽenga; a Abinadab la a yiib soaba, t'a Sama yaa a tãab soaba. A Netaneyɛl, a naas soaba, a Radayi, a nu soaba. A Osem, a yoob soaba, a Daviid, a yopoe soaba. Bãmb tãopã da yaa a Seruya la a Abigayil. A Seruya kamba: a Abisayi, a Zoab, a Asayɛl, bãmb b tãabo. A Abigayil roga a Amaza; a Amaza ba yaa a Yetɛr, Ismayɛlitga. Ad-a Esrõ biiga a Kalɛb sẽn paam kamb niynsi ne a paga, a Azuba, yaa bi-pugl a ye, a Yeriot la kom-dibli a tãabo: a Yesɛr, a Sobab, la a Ardõ. A Azuba kiime t'a Kalɛb peeg a Efrata n maan a paga t'a rog a Ur. A Ur roga a Uri, t'a Uri rog a Besaleyɛl. Dẽ poore a Esrõ kẽe ne a Makir bi-pugla. A Makir ba la a Galaad. A Esrõ da tara yʋʋm pisoobe a sẽn waa n kẽ kãadem ne pʋg kãngã, la paga roga a biiga, a Segub. A Segub n dog a Yayir, la yẽ n waa n lebg tẽns pisi la a tã naaba, Galaad tẽn-peelmẽ. Gesur ne Aram dĩm dãmb n wa n deeg Yayir pʋ-weesã, n paas Kenat ne a tẽn-kogse, bãmb pisoobe. Bãmb fãa da yaa a Galaad ba a Makir yagense. A Esrõ kũum poore, a Kalɛb kẽe ne a Efrata, a ba a Esrõ pʋg-kõore, n dog a Asewur, a Tekoa ba. A Yerameyɛl, a Esrõ bi-kẽenga, roga kamba: a pipi biig a Ram, n paas a Buna, a Oren, a Osem, a Ayiya. A Yerameyɛl paama paga a to sẽn da boond t'a Atara; yẽ yɩ-la Onam ma. A Ram, a Yerameyɛl bi-kẽenga kamba: a Maas, a Yamin la a Ekɛr. A Onam kamba yɩ-la a Samayi la a Yada. A Samayi kamba: a Nadab la Abisur. A Abisur paga yʋʋr da ya a Abiayil, a roga a Abã la a Molid. A Nadab kamba: a Selɛd la a Apayim; a Selɛd kiime n ka rog biig ye. A Apayim biiga: a Yiseyi. A Yiseyi biiga: a Sesã; a Sesã biiga: a Alayi. A Samayi ba-biiga a Yada kamba: a Yetɛr la a Zonatã. A Yetɛr kiime n pa rog biig ye. A Zonatã kamba: a Pelɛt la a Zaza. A Yerameyɛl yagensa la bãmba. A Sesã pa rog bi-ribl ye, a roga kom-pugli bala; la a Sesã da tara yem-daoogo sẽn da yaa Ezipt neda t'a yʋʋr bond t'a Yara. A Sesã kõ-la a yem-daoogã a bi-pugla t'a maan a paga, tɩ pagã dog biiga, a Atayi. A Atayi roga a Natã, a Natã doga a Zabad. A Zabad roga a Efial, a Efial roga a Obɛd. A Obɛd roga a Yewu; a Yewu roga a Azariya; a Azariya roga a Elɛs, a Elɛs roga a Elasa, a Elasa roga a Sismayi; a Sismayi roga Salum. A Salum roga a Yekamiya; a Yekamiya roga a Elisama. A Yerameyɛl ba-biiga a Kalɛb kamba: a Mesa, a bi-kẽenga, sẽn yɩ a Zɩf ba, n paas a Maresa, a Ebrõ ba. A Ebrõ kamba yaa a Kora, a Tapuwa, a Rekem, a Sema. A Sema roga a Rãam, a Zorkoam ba. A Rekem roga a Samayi. A Samayi biiga la a Maõ la a Maõ yɩ-la a Bɛt-sur ba. A Efa, a Kalɛb pag a to, doga a Arã, a Mosa, a Gazɛz. A Gazɛz ba la a Arã. A Yadayi kamba: a Regem, a Zotam, a Gesã, a Pelɛt, a Efa la a Saaf. A Kalɛb pag a to, a Maaka, roga a Sebɛr la a Tirana, pʋg kãng n dog a Saaf, a Madmana ba la a Seva, a Makbena la a Gibeya ba. A Kalɛb bi-pugl la a Aksa. Ad-a Kalɛb yagens a taab yɛsa: a Ur, a paga a Efrata bi-kẽenga doga a Sobal, a Salma la a Aref. A Sobal n me Kiriyat-Yearim, t'a Salma me Bɛtelyɛɛm, t'a Aref me Bɛt-Gedɛr. Kiriyat-Yearim Sobal yagensã yɩɩ Aroe kẽedbã, n paas Menuwot kẽedba pʋɩ-sʋka, n paas Kiriyat-Yearim kẽedbã: Itritse, Yptitse, Sunatitse, Misrayitse, Sorea ne Estaol rãmba. A Salma yagense: Bɛtelyɛɛm, Netofa, Atrot-Bɛt-Zoab kẽedba, sẽn da kẽed-b Manaat la Sorea pʋɩ-sʋka, n paas Yabɛs bogre, neb sẽn da mi sebre n ya Tiratitse, Simatitse la Sukatitse. Nin-bãmb yaa Kenitse, Rekabitga a Amat yagense. Ad-a Daviid kamb niyns sẽn dog Ebrõ tẽnga: a bi-kẽenga: a Amno, a ma la a Ayinoam, Zizreyɛl bi-pugla. A yiib soaba, a Daniyɛl, a ma la a Abigayil, Karmɛl paga, a tãab soaba, a Absalom, a Maaka biiga, Gesur dĩma a Talmayi bi-pugla, a naas soaba, a Adoniyas, a Agit biiga. A nu soaba a Sefatiya, a ma la a Abital; a yoob soaba, a Yitream, a paga a Egla sẽn doge, yẽ me yɩɩ rĩma biiga. Bãmb b yooba doga Ebrõ, t'a Daviid dɩɩ naam be yʋʋm a yopoe la kiis a yoobe n yaool n wa rɩ naam Zerizalɛɛm, yʋʋm pis-tã la a tã. A Daviid doga kamb a naas Zerizalɛɛm ne paga a Batseba, a Amiyɛl bi-pugla. Bãmb la woto: a Sima, a Sobab, a Natã, a Salomo. A Daviid le roga kamb a wɛ: a Ibar, a Elisuwa, a Elpelɛt, a Noga, a Nefɛg, a Yafiya, a Elisama, a Eliyada, la a Elifelɛt. A Daviid yem-pogsã kamba pa sõd n naag ye. Bi-pugl a ye la a rog yã, a Tamar. A Salomo sẽn dog kamb niynsa la woto: a Roboam, a Abiya, a Zoram, a Akaziyas, a Zowas, a Amaziyas, a Azariyas, a Zotam, a Akaz, a Ezekiyas, a Manase, a Amon, a Zoziyas. Bãmb fãa yɩ-la a kamba. A Zoziyas kamba: a bi-kẽenga, a Zoana, a yiib soaba, a Zoakim, a tãab soaba, a Sedesiyas, a naas soaba, a Salum, a Zoakim kamba: a Yekoniya, a biiga, a Sedesiyas, a biiga. A Yekoniya, b sẽn tall a soab n loog yembd Babilona kamba: a Salatiyɛl, a Malkiram, a Pedaya, a Senasar, a Yekamiya, a Osama, a Nedabiya. A Pedaya kamba: a Zorobabɛl la a Simeyi. A Zorobabɛl kamba: a Mesulam, a Ananiya, la a Selomit, bãmb tão. A Mesulam kamba: a Asuba, a Oyɛl, a Berekiya, a Asadiya, a Yusab-Esed: bãmb b nu. A Ananiya yagense: a Pelatiya, a Yesaya, n paas a Refaya, a Arna, a Obadiya la a Sekaniya kamba. A Sekaniya roga kamb a yoobe: a Semaya, a Atus, a Yigal, a Bariya, a Neariya, a Safat. A Neariya kamba: a Eliyoenayi, a Iskiya, a Azrikam: bãmb b tã. A Eliyoenayi kamba: a Odabiya, a Eliyasib, a Pelaya, a Akus, a Zoana, a Delaya, a Anani: bãmb b yopoe. A Zɩɩda kamba: a Perɛs, a Esrõ, a Karmi, a Ur, la a Sobal. A Reaya, a Sobal biiga, doga a Yaat, la a Yaat roga a Awumayi ne a Laad. Soreatitsa yagens la bãmba. A Ur, a Efrata bi-kẽenga la Bɛtelyɛɛm metã, roga a Etam, a Zizreyɛl, a Yisma, a Yidbas; bãmb tão la a Aslelponi. Kamb a taab n paase: a Penuwɛl, Gedor meta, a Ezɛr, Usa meta. A Asewur n me Tekoa; a da tara pagb a yi: a Ela la a Naara. A Naara kamba: a Awuzam, a Efɛr, a Temni, a Aasetari. A Ela kamb yɩ-la a tãabo: a Serɛt, a Soar la a Etna. A Kos roga a Anub la a Sobeba n paas a Aareyɛl yagensa ba a Arum. Neba ra waoogda a Yabɛs n yɩɩd a saam-biisã, a ma pʋda a yʋʋra Yabɛs, t'a namsa wʋsg a rogma wakato. A pʋʋsa Soaala woto: «Israyɛl Wẽnnaam, pids-y maam ne y barka, paas-y m paoongo, tẽeg-y y nug n gũ-ma, zãag-y-m ne yel-beedo la pɛta!» Soaala kõ-a-la a sẽn kose. A Kelub, a Suwa ba-biiga, roga a Meyir sẽn yɩ a Estõ ba; A Estõ doga a Bɛt-Rafa, a Pasea, a Teyina, a Ir-Naas ba, Bãmb yagense n waa n kẽ Reka. A Kenaz kamba: a Otniyɛl la a Seraya. A Otniyɛl kamba: a Atat la a Meonotayi. A Meonotayi roga a Ofra, a Seraya doga a Zoab. Yẽ la nus-tʋʋm-mitba yaaba, Ge-Arasim ba. B yaa nus tʋʋm-tʋmdba. B bãg-faaga ra boondame tɩ nus-tʋʋm-tʋmdb bãg-faaga. A Yefume biiga a Kalɛb kamba: a Iru, a Ela, a Naam. A Ela biiga: a Kenaz. A Yaalelɛl kamba: a Zɩf, a Zifa, a Tiriya la a Asarɛl. A Ezra kamba: a Yetɛr, a Merɛd, a Efɛr, a Yalõ. A Merɛd kẽe kãadem ne Ezipt rĩm bi-pugla sẽn boond tɩ Bita la a Bita kõ-a-la a Miriyam, a Samayi la a Yisba, Estemoa meta. A Merɛd da kẽe kãadem ne Zɩɩda bi-pugla la a doga a Yerɛd, Gedor meta, n dog a Ebɛr, Soko meta, n dog a Yekutiyɛl, Zanoa meta. A Odiya kẽe kãadem ne a Naam tão. Bãmb kamba la Garmitsa sẽn kẽed Keyila. Le paasa Maakatitse sẽn kẽed Estemoa. A Simo kamba: a Amno, a Rinna, a Ben Ana, la a Tilõ. A Yiseyi kamba: a Zoɛt, la a Ben-Zowɛt. A Zɩɩda biiga a Sela kamba; a Ɛr, Leka meta, a Laada, Maresa meta, n paas nus tʋʋm-mitb niyns sẽn da wʋgd-b gĩs bãanes sʋndo, Bɛt-Asbea. A Sela yagense le yɩ-la a Zokim, n paas neb niyns sẽn da kẽed-b Kozeba. A yagensa le yɩ-la a, Zoyas la a Saraf sẽn kẽng Moab soolmẽ n tɩ yi kãadem n lebg n wa Leyɛm; la rẽ fãa daar zãagame. Bãmb da yaa yagdba, n da kẽed Netayim la Gedera; b ra bee be n pẽ dĩma n tʋmd a tʋʋma. A Simeõ kamba: a Nemuwɛl, a Yamin, a Yarib, a Zera, a Sol. A Sol sẽn dog kamb niynsi: a Salum, a Mibsam, a Misma. A Misma kamba: a Amuwɛl, a Zakur, a Simeyi. A Simeyi roga kom-dibli piig la a yoobe la kom-pugli a yoobe, la a ba-biisa pa rog kamb wʋsg ye, woto bãmb sags pa yalg wala a Zɩɩda rẽnd ye. B da kẽeda Beerseba, Molada, Asar-Suwal, Bila, Esem, Tolad, Betuwɛl, Orma, Siklag, Bɛt-Markabot, Asar-Suzim, Bɛt-Bireyi, Saarayim. Woto n yɩ bãmb tẽn-bɛda n ta a Daviid naam. La b tẽn-bõonego n paase, Etam, Ayin, Rimon, Token, Asã: tẽns a nu, n paas tẽn-bõoneg sẽn da gũbg b tẽn-bɛdã al n tɩ tãag Baalat. B sẽn zĩnd tẽns niyns la woto. La woto me n be b sõadga sebrẽ. Sẽn yɩ-b a Simeõ buud sags nanamse; A Mesobab, a Yamlɛk, a Yosa, a Amasiya kamba. A Zowɛl, a Yewu, a Zosibiya kamba, t'a Zosibiya meng yaa a Seraya biiga la a Asiyɛl yagenga. A Eliyoenayi, a Yakoba, a Yesoaya, a Asaya, a Adiyɛl, a Yesimiyɛl, a Benaya, a Ziza, a Sifeyi biiga, a Alõ yagenga, a Yedaya yagen-tʋbra-kẽega, a Simri biiga, a Semaya biiga. B sẽn togs b rãmb yʋya, yɩɩ b buuda sags nanamse, bãmb buuda fɩɩgame tɩ looge. B kẽna al Gerar noorẽ, n tɩ ta tẽn-nabrã sẽn be yaanga, n baood yamd maasa b rũms yĩnga. La b tuka yamd maasa, yamd sõma, ne tẽng sẽn yalem wʋsgo, tɩ fãa ya laafi la bãane; sẽn da be-b tẽng kãng pĩnda da yaa a Kam yagense. B b sẽn gʋls b rãmb yʋʋr mars-marsã, bãmb n wa Zɩɩda dĩma a Ezekiyas zamaanẽ, b kʋʋ tẽnga rãmba fãa sẽn da be be, la b kãab-b kãab beed sẽn ket n yɛs ne rũnna, la b reesa b zĩisã n zĩndi, tɩ yamd maas da bee beene, b rũmsã yĩnga. Neb kẽere, bãmb sʋka, a Simeõ yagense, kẽnga Seyir tẽnsã sẽnẽ. Yaa neb kobs-nu, ne b taoor dãmba: a Pelatiya, a Neariya, a Refaya, a Uziyɛl, a Iseyi kamba. Bãmb luba a Amalɛk yagensã sẽn keesã, n deeg zĩig n zĩnd be n ta rũnna. A Rubẽ n da yaa a Zakoob bi-kẽenga. La a sẽn wa n dẽgem a ba gãaga, a bi-kẽemdã rɩk n kõ-la a Zozɛf. Yẽ me ra yaa a Zakoob biiga. Woto a Rubẽ buud pa le soog kãseng ye. A Zɩɩda yɩɩga a ba biisa fãa, tɩ yẽ yageng a ye n waa n lebg Israyɛl dĩma. La a Zozɛf n baas n soog bi-kẽemdã ne a yoodã. A Rubẽ, a Israyɛl bi-kẽenga kamba: a Enok, a Pallu, a Esrõ la a Karmi. A Zowɛl kamba: a Semaya, a Gog, a Simeyi, a Mika, a Reaya, a Baal, a Beera, yẽ la Asʋr dĩma a Teglat-Falasar yõk n tall n loog yembdo, yẽ la a Rubẽ yagensa kãsma. Ad-a ba-biisi sẽn da ya sags kãsem-dãmba tɩ b yʋʋr gʋls sõadga sebr zugu. Pipi, a Yeyiyɛl, sẽn pʋgda, a Zakari; sẽn pʋgd yɛsa, a Bela, a Azaz biiga, a Sema yagenga, a Zowɛl yagen-tʋbra-kẽega. A Rubẽ yagensa ra kẽeda tẽns niyns sẽn be Aroɛr la Baal-Meõ sʋka. Aroɛr bee nug rɩtgo, tɩ Nebo la Baal Meõ be nug goabga. Yaangã, b ra tɩ kẽeda we-raaog ning sẽn da welgd bãmb tẽn-peelma ne Efrat, Babilon kʋɩlgã. B rũmsa ra yaa wʋsgo Galaad tẽnga. Dĩm a Sol zamaanẽ b yiisa tãpo n zab ne Agritsã n tõog-ba, n dees b roto n zĩndi, Galaad yaanga. A Gad yagens da zĩi Rubẽ rãmba yegende, Bazã tẽng n tɩ n ta Salka, yaanga. A Zowɛl yagensã n da ya pipi, t'a Safã pʋgda, t'a Yanayi la a Safat pʋgda. Sẽn da kẽed-b be yɛsa n ya yẽgr a ye yaa nin-bãmba: a Mikayɛl, a Mesulam, a Seva, a Zorayi, a Yakã, a Ziya, la a Ebɛr: bãmb b yopoe. B fãa ra yaa a Abiayil kamba: a Uri yagense, n paas a Yaroa, a Galaad, a Mikayɛl, a Yesiayi, a Yado, a Buz yagense. A Ayi, a Abdiyɛl biiga, a Guni yagenga n dag n ya b rooga kãsma. B rag n tilga b yiya, Galaad, Bazã ne b tẽn-kogse n paas Sarõ, zĩig ning fãa b sẽn tõe n wãbneg rũnga. Bãmb fãa yʋya da bee sõadga sebrẽ, Zɩɩda dĩma a Zotam la Israyɛl dĩma a Zeroboam zamaanẽ. A Rubẽ yagense, a Gad la a Manase bogre, da tara zab-zabdba sẽn pid ne zabr sũuri, sẽn tar gãndo la sʋʋse, la tãbdo, bãmb tus pis-naas la a naase la kobs-yopoe la pisoobe. B zaba ne Agritse n paas a Yetur, a Nafis, la a Nodab yagense. Bãmb kosa Soaala-Wẽnd sõngre b zabra wakato. B sẽn da teeg Wẽnd yĩnga, b deega b kosgo la b sõng-b lame. Woto b tõoga Agritsã la sẽn da kẽed-b bãmb tãpẽ. B zɛɛ b rũmsã, yʋgma tus pis-nu, piis tus kobs-yi la pis-nu, bõn-yãans tus a yi, la neb tus koabga. Bɛɛba ra kii ka tɛka. Soaala-Wẽnd n zab n sõng Rubẽ, Gad la Manase yagensã. Woto b reega Agritsa tẽns n kẽ n tãag yembda kẽnd wakato. A Manase bogra da waa n kẽe Bazã ne Ermo sʋka. Bazã bee nug rɩtgo tɩ Baal-Ermo, Senir la Ermo tãnga be nug goabga. Ad b rota nanamse: A Efɛr, a Iseyi, a Eliyɛl, a Azriyɛl, a Yirmea, a Odaviya, a Yadiyɛl. Bãmb da yaa zabr gãndaado, b yʋʋr yiime, b da yaa b buuda kãsem-dãmba. La bãmb beega b saam dãmba Wẽnnaam; wa pʋg-yoodr sẽn bas a sɩda n baood dapa, bãmb bao bu-zẽna wẽn-naandse, bu-zẽmb niyns Naaba-Wẽnd sẽn sãam a Israyɛl kamba taoore. A Israyɛl Wẽnnaam pirsa a Ypll ne a Teglat-Falasar, Asʋr dĩm dãmba. B wʋk-b lame n tɩ kẽes yembdo, b wʋka a Rubẽ, a Gad yagense, ne a Manase bogre, b peeg-b lame n tɩ bas Ala, Abor, Ara la Gozã kʋɩlga noore. B keta be ne rũnna. A Levi kamba: a Gersõ, a Keyat, a Merari, A Keyat kamba: a Aram, a Isar, a Ebrõ la a Uziyɛl. A Amram kamba; a Aarõ, a Moyiiz, a Miriyam. A Aarõ kamba: a Nadab, la a Abiyu, a Elazar la Itamar. A Elazar doga a Pinas; a Pinas roga a Abisuwa, a Abisuwa roga a Buki, a Buki roga a Uzi, a Uzi roga a Zeraya, a Zeraya roga a Merayot; a Merayot roga a Amariya; a Amariya roga a Ayitub. A Ayitub roga a Sadok, a Sadok roga a Ayimaas, a Ayimaas roga a Azariya, a Azariya roga a Zoana; a Zoana roga a Azariya a yiib soaba; yaa yẽ n tʋm maan-kʋʋd tʋʋmde, Naaba-Wẽnd yĩnga, a Salomo sẽn me roog ninga pʋga, Zerizalɛɛm. A Azariya roga a Amariya, a Amariya roga a Ayitub a Ayitub roga a Sadok, a Sadok roga a Salum, a Salum roga a Ilkiya, a Ilkiya roga a Azariya. A Azariya roga a Seraya, a Seraya roga a Zozadak. A Zosadak looga wakat ninga Naaba-Wẽnd sẽn tũ a Nabikodonozor nugu n wʋk a Zɩɩda ne Zerizalɛɛm dãmba n kẽng yembdo. A Levi kamba: a Gersõ, a Keyat a Merari. A Gersõ kamba: a Libni, ne a Simeyi. A Keyat kamba: a Amram, a Isar, a Ebrõ, a Uziyɛl. A Merari kamba: a Mali, la a Musi. Bãmb sɩgda a Levi. A Gersõ kamba: a Libni, a Yaat, a Zima, a Zoa, a Ido, a Zera, a Yeatrayi. A Keyat kamba: a Aminadab, a Kore, a Asir, a Elkana, a Ebiyasaf, a Asir, a Taat, a Uriyɛl, a Uziya, a Sol. A Elkana doga kamb a yiib n paase: a Amasayi la a Ayimot. A Ayimot kamba yɩ-la a Elkana, a Sofayi, a Naat, a Eliab, a Yeroam; a Elkana n dog a Samwɛl. A Samwɛl kamba: a Zowɛl, a bi-kẽenga, la a Abiya a yiib soaba. A Merari kamba: a Mali, a Libni, a Simeyi, a Uza, a Sima, a Agiya, a Asaya. Ad-a Daviid sẽn yãk b rãmba tɩ b soog yɩɩla, wẽnd doog pʋga, kuga walsa koglga, zood kaseta, sẽn waa n paam zĩiga. Bãmb tʋʋmd da yaa yɩɩla, sɛka rooga taoore, n tãag a Salomo sẽn waa n me wẽnd dooga Zerizalɛɛm. B ra maanda b tʋʋmdã wala b sẽn kõ-b noore. Ad sẽn da tʋmd-b tʋʋm kãnga ne b kamba: a Keyat kamba sʋka: a Eman, yɩɩn-yɩɩndã, a Zowɛl biiga, a Samwɛl biiga, a Elkana biiga, a Zeroboam biiga, a Eliyɛl biiga, a Toa biiga, a Suf biiga, a Elkana biiga, a Maat biiga, a Amasayi biiga, a Elkana biiga, a Zowɛl biiga, a Azariya biiga, a Sefaniya biiga, a Taat biiga, a Asir biiga, a Eviasaf biiga, a Kore biiga, a Isar biiga, a Keyat biiga, a Levi biiga, a Israyɛl biiga. A ba-biiga a Asaf da yɛsa yẽ nug rɩtgo. A Asaf ba wã yaab rãmba la a Berekiya, a Sima, a Mikayɛl, a Baaseya, a Malkiya, a Etni, a Zera, a Adaya, a Etã, a Zima, a Simeyi, a Yaat, a Gersõ, a Levi. Yɩɩn-yɩɩndba sẽn yaa a Merari yagensa ra yɛsa b nug goabga. A Etã n da lʋɩ b taoore tɩ yɩɩla yɩɩnẽ la yẽ yaab rãmba la a Kisi, a Abdi, a Maluk, a Asabiya, a Amasiya, a Ilkiya, a Amsi, a Bani, a Semɛr, a Mali, a Musi, a Merari, a Levi. Bãmb ba-biisi, Levits a taaba, da tʋmda wẽnd doog tʋʋma. A Aarõ ne a kamba da yõogda maanda maan-kugra zugu la b yõogd wisdu, la tɩdare. Bãmb n da so tʋʋm sõma fãa maanego ne maoong kʋʋbo, a Israyɛl yel-wẽna sugr kosg yĩnga wala a Moyiiz, Wẽnnaam tʋʋm-tʋmdã sẽn da kõ noore tɩ b maane. Ad-a Aarõ roogo: a Elazar, a Pinas, a Abisuwa, a Buki, a Uzi, a Zeraya, a Merayot, a Amariya, a Ayitub, a Sadok, a Ayimaas. La ad zĩisã b sẽn da bẽeg n kõ bãmba tɩ b tilg b yiya, ad-a Aarõ biiga a Keyat roogo sẽn paam zu-noog pʋɩɩr ninga: B kẽesa bãmba, a Zɩɩda soolem pʋga, Ebrõ ne a tẽn-kɩremsẽ. Sã n ya weoogã ne tẽn-bõonesã, b kõ-a-la a Kalɛb, a Yefune biigã. A Aarõ kamba, b kõ bãmb soondg tẽnse, Ebrõ, Libna ne a bãoogo, Yatir, Estemoa ne b bãado, Ilez ne a bãoogo, Debir ne a bãoogo, Asã ne a bãoogo, Bɛt-Semɛs ne a bãoogo, la b yãka a Bẽnzame soolmẽ: Alemɛt ne Geba ne b bãado, Anatot ne a bãoogo. B tẽnsã fãa-fãa yaa piig la a tã. A Keyat kamba: sẽn da kell-bã, b kõ bãmba, n zems ne b sagsã, tẽns piiga b sẽn yãk a Manase bogr soolmẽ. B kõ-la a Gersõ kamba n zems ne b sagse, tẽns piig la a tã b sẽn yãk a Isakar, a Asɛr, a Neftali la a Manase bogre tẽn-peelmẽ, Bazã. A Merari kamba: b poeesame n kõ bãmb sẽn zems ne b sagse, tẽns piig la a ye, b sẽn yãk a Rubẽ, a Gad la a Zabulõ tẽn-peelmẽ. A Israyɛl kamba kõo Levit dãmba tẽn-bãmba ne b weto. B poeesame n yãk a Zɩɩda yagens pʋɩɩrẽ, a Simeõ, la a Bẽnzame yagens pʋɩɩrẽ n kõ-ba, b pʋda tẽnsã fãa b meng yʋʋre. B sẽn poeese, a Keyat yagens sags paama tẽnse, b sẽn yãk a Efrayin pʋɩɩrẽ. B kõ-b-la soondg tẽnse, Sikɛm, ne a weoogo, Efrayim tãnga pendẽ, Gezɛr ne a weoogo, Yokmeam ne a weoogo, Bɛt-Orõ ne a weoogo, Ayalõ ne a weoogo, Gat-Rimo ne a weoogo, la a Manase bogre soolma pʋga b yãka Anɛr ne a weoogo, Bileam ne a weoogo n kõ a Keyat yagens a taaba. A Gersõ kamba: b kõ-b-la sẽn zems ne b roogo, tẽns b sẽn yãk a Manase bogrẽ, Golan, sẽn be Bazã, ne a weoogo, Astarot ne a weoogo, B yãka a Isakar roog soolmẽ Kedɛs ne a weoogo, Daverat ne a weoogo, Ramot ne a weoogo, Anem ne a weoogo, b yãka a Asɛr buud soolmẽ: Masal ne a weoogo, Abdõ ne a weoogo, Ukok ne a weoogo, Reob ne a weoogo. B yãka a Neftali roogẽ: Kedɛs sẽn be Galile ne a weoogo, Amo ne a weoogo, Kiriyatayim ne a weoogo. A Merari kamba a taabã, b yãka a Zabulõ soolmẽ n kõ bãmba, Rimon ne a weoogo, Tabor ne a weoogo, la Zʋrdẽ kʋɩlgã poore, al Zeriko n tɩ ta al Zʋrdẽ yaanga, b yãka a Rubẽ soolmẽ, Besɛr sẽn be zĩ-pɛɛlẽ ne a weoogo, Yasa ne a weoogo, Kedemot ne a weoogo, Mefaat ne a weoogo; b yãka a Gad soolmẽ, Ramot sẽn be Galaad ne a weoogo, Maanayim ne a weoogo, Esbõ ne a weoogo, Yazɛr ne a weoogo. A Isakar kamba: a Tola, a Ypva, a Yasub, a Simrõ, bãmb b naase. A Tola kamba: a Uzi, a Refaya, a Yeriyɛl, a Yamayi, a Ibsam, a Semwɛl; bãmb la a Tola roog nanamse. Da yaa nin-tɩɩse b zagsẽ. A Daviid zamaanẽ b zabr gãndaada da taa tus pisi la a yiibu la kobs-yoobe. A Uzi biiga, a Izraya; a Izraya kamba: a Mikayɛl, a Obadiya, a Zowɛl, a Isiya, bãmb b nu fãa yɩɩ sak kãsem-dãmba. B ra tigma tãb-biisi zabr yĩnga, sẽn zems ne b saka la ba rãmb roto, neb tus pis-tã la a yoobe. Pagba la kamba da yaa wʋsgo b sakẽ wã. Bãmb saam-biisi, a Isakar sags kamb a taaba, da yaa zab-zabdba, sũ-keelem dãmba: Sõadga sebrẽ, b fãa da yaa tus pis-nii la a yopoe. A Bẽnzame kamba: a Bela, a Bekɛr a Yediayɛl: bãmb b tã. A Bela kamba: a Esbõ, a Uzi, a Uziyɛl, a Yerimot, a Iri: rot kãsem-dãmba a nu sẽn da yaa tãb-biisi, sũ-keelem dãmba bãmb ne b roog rãmba sõor da yaa dap tus pisi la a yi la pis-tã la a naase. A Bekɛr kamba a Zemira, a Zowas, a Eliezɛr, a Eliyoenayi, a Omri, a Yerimot, a Abiya, a Anatot, a Alemɛt, bãmb fãa da yaa a Bekɛr kamba. B sẽn gʋls-ba, roog fãa ne a nanamse la a kamba, b sõda tãb-biisi, sũ-keelem dãmba, dap tus pisi la kobs-yi. A Yediayɛl biiga: a Bileã; a Bileã kamba: a Yewus, a Bẽnzame, a Ewud, a Kenaana, a Zetã, a Tarsis, a Ayisaar. Bãmb fãa da yaa a Yediayɛl kamba la a roog nanamse la tãb-biisi, sũ-keelem dãmba; b sõor da yaa rap tus piig la a yopoe la kobs-yi sẽn da tõe n kẽng tãpo. A Supim la a Upim da yaa a Ir kamba: a Usim da yaa a Aɛr biiga. A Neftali kamba: a Yaaziyɛl, a Guni, a Yesɛr, a Salum; a Bila yagens la bãmba. A Manase kamba: a Asriyɛl la a Makir. B ma yɩɩ yem-poaka la aramga. A Makir n dog a Galaad. A Makir paama pagba n kõ a Upim la a Supim; a tão yʋʋr da yaa Maaka. A Makir doga biig a to, a yʋʋr a Selofead. A Selofead roga kom-pugli bala. A Makir paga a Maaka le roga a biiga, la a pʋda biiga yʋʋr t'a Perɛs. A sẽn le rog a to, a pʋd-a-la Serɛs, la yẽ kamb la a Ulam, la a Rekem, a Ulam biiga: a Bedã. Woto la a Galaad yagense. A Galaad, yaa a Makir biiga, la a Manase yagenga. A Galaad tão, a Amolekɛt n dog a Isod, a Abiezɛr la a Mala. A Semida kamba: a Ayã, a Sekɛm, a Liki la a Aniam, Kom-dibli gilli. A Efrayim doogo: a Sutela, a Berɛd, a Taat, a Elada, Taat a to. A Zabad ne a Sutela n paas a Ezɛr ne a Elad, a Efrayim kamba, tʋlg n looga ne Gat rãmb rũmsi tɩ Gat rãmb kʋ-ba. B ba, a Efrayim, maana b kʋʋr n kaoos wʋsgo. A ba-biisa n kong n wa n bels-a, n bʋk a sũuri. A waa n kẽe ne a paga t'a rɩk pʋga n dog biiga, t'a pʋd a t'a Beriya n yetẽ: yel-beedo kẽ-la m zakẽ. A Efrayim da tara bi-pugla, a Sera; bi-kãng n kɩt tɩ b me Bɛt-Orõ Tãn-sɛɛgẽ la Bɛt-Orõ Tãngẽ, n paas Uzẽ-Sera. A Beriya rooga kamba: a Refa, a Resɛf, a Tela, a Taã, a Ladã, a Amiyud, a Elisama, a Nun, yẽ biig la a Zozuwe. Ad tẽnsã b sẽn da kõ a Efrayim yagense: yaa Betɛl ne a tẽn-kogse wala Naaram sẽn be yaanga, Gezɛr ne a tẽn-kogse, nin-taoore, la tẽn-peelma sẽn be Sikɛm ne Aya sʋka. A Manase kamba n dag n so Bɛt-Seã, Taanak, Megido la Dor ne b tẽn-kogse. Yaa tẽn-bãmba pʋsẽ la a Israyɛl biiga a Zozɛf kamba ra kẽeda. A Asɛr kamba: a Imna, a Iseva, a Isevi la a Beriya. B tão wã la a Sera. A Beriya kamba: a Ebɛr la a Malkiyɛl; a Malkiyɛl n me Birzayit tẽnga. A Ebɛr doga a Yaflɛt, a Semɛr, a Otam, la a Suwa, b tão. A Yaflɛt kamba: a Pasak, a Bimal a Asevat. A ba-biiga a Semɛr kamba: a Ayi, a Roga, a Uba, a Aram. A ba-biiga a Otam kamba: a Sofa a Imna, a Selɛs, a Amal. A Sofa kamba: a Suwa, a Arnefɛr, a Suwal, a Beri, a Imra, a Besɛr, a Od, a Sama, a Silesa, a Itrã, a Beera. A Itrã kamba: a Yefune, a Pispa, a Ɛra. A Ula kamba: a Ara, a Aniyɛl, a Risiya. Bãmb fãa yaa Asɛr yagense. B ra zãada b zags neere, b yʋʋr yiime la b tʋʋma fãa sakame. Sõadga sebr zugu b ra yaa bãmb tus pisi la a yoobe sẽn tõe n bob zabre. A Bẽnzame n dog a Bela, a bi-kẽenga, a Asbɛl, a yiib soaba, a Ara, a tãab soaba, a Noa, a naas soaba, a Rafa, a nu soaba. A Bela roga kom-dibli: a Adar, a Gera, a Abiyud, a Abisuwa, a Naama, a Aowa, a Gera, a Sefufã, la a Uram. Ad-a Ewud kamba; Geba zak nanamse waa n kɩtame tɩ b yi n tɩ kẽ Manaat; ad b yʋya: A Naama, a Ayiya, a Gera. A Gera n lʋɩ taoore tɩ b yi n teem tẽngã la yẽ n dog a Uza la a Ayiyud. A Sarayim yiisa a pagb a yiibu: a Usim la a Baara. A sẽn ta Moab wetẽ, a kẽe kãadem ne pag a ye, a Odɛs, n dog a Zobab, a Sibiya, a Mesa, a Malkam, a Yewus, a Sakiya, la a Mirma. Bãmb la a kamba, bãmb n lebg rota nanamse. A Sarayim da roga kamb a yiib ne a paga a Usim, yɩ-la a Abitub la a Elpaal. A Elpaal kamba: a Ebɛr, a Misam, a Semɛd. A Semɛd n me Ono tẽnga ne Lod la a tẽn-kogse. A Beriya ne a Sema, Ayalõ tẽnga kãsem-dãmba, bãmb n dig Gat tẽng rãmba tɩ b zoe. A Beriya kamba: a Ayiyo, a Sasak, a Yerimot, a Zebadiya, a Arad, a Edɛr, a Mikayɛl, a Yispa, la a Zoa. A Elpaal kamba: a Zebadiya, a Mesulam, a Iski, a Ebɛr, a Yismerayi, a Yizliya, a Zobab. A Simeyi kamba: a Yakim, a Zikri, a Zabdi, a Eliyoenayi, a Siletayi, a Eliyɛl, a Adaya, a Beraya, a Simrat. A Sasak kamba: a Yispã, a Ebɛr, a Eliyɛl, a Abdõ, a Zikri, a Ana, a Ananiya, a Elam, a Anetotiya, a Yifdeya, a Penuwɛl. A Zeroam kamba: a Samserayi, a Seariya, a Ataliya a Yaresiya, a Eliya, a Zikri. Bãmb n yɩ rot kãsem-dãmba, ned kam fãa a wakatẽ, b da kẽeda Zerizalɛɛm. Sẽn me-a Gabaõ tẽnga n pʋd-a a meng yʋʋrã da kẽeda be, yẽ ne a paga a Maaka. A bi-kẽenga a Abdõ, ne a yaopa: a Sur, a Kis, a Baal, a Nadab, a Gedor, a Ayio, a Zekɛr, la a Miklot, a Simea ba. Zerizalɛɛm tẽnga, b rota ra tota b saam-biisa rẽnna. A Nɛr roga a Kis, a Kis roga Sol; a Sol roga a Zonatã, a Malkisuwa, a Abinadab, a Isbaal. A Zonatã biiga: a Meribaal; a Meribaal roga a Mika. A Mika kamba: a Pitõ, a Melɛk, a Tarea, a Aaz. A Aaz roga a Zoada; a Zoada roga a Alemɛt, a Azmavɛt, la a Zimri. A Zimri roga a Mosa, a Mosa roga a Binea, a Binea roga a Rafa, a Rafa roga a Elasa, a Elasa roga a Asɛl. A Asɛl roga kom-dibli a yoobe, la ad-b yʋya: a Azrikam, a Bokru, a Ismayɛl, a Seariya, a Obadiya, a Anan. Bãmb fãa ya a Asɛl kamba. A Asɛl ba-biig a Esɛk kamba: a Ulam, a bi-kẽenga, a Yewus, a yiib soaba, a Elifelɛt, a tãab soaba. A Ulam kamba yɩɩ zabre gãndaado sẽn da mi tãpo. B paama kamba la yagense wʋsgo: bãmb koabg la pis-nu. Bãmb fãa yaa a Bẽnzame roogo. A Israyɛl kamba fãa yʋy gʋlsame, ned fãa a ba roogẽ la b gʋls-b-la a Israyɛl dĩm dãmba sebra pʋgẽ. B ra waa n wʋka Zɩɩda rãmb n kẽng Babilon n tɩ kẽes-b yembdo, Soaala-Wẽnd tũudma sẽn pa yɩ neer yĩnga. Sẽn lɛɛg-b n wa b tẽnsẽ la b soolmẽ pipi, yɩɩ nin-zaalse n paas maan-kʋʋdba, ne Levit dãmba la sẽn da tʋmd-b wẽnd doogẽ la b get a yellã. Sẽn waa n kẽ-b Zerizalɛɛma yɩ-la a Zɩɩda, a Bẽnzame la Efrayim ne Manase rãmba. Zɩɩda rãmba yɩ-la a Utayi, a Amiyud biiga, tɩ yẽ meng yaa a Omri biiga, a Imri yagenga, a Bani yagen-tʋbra-kẽega, a Perɛs roogẽ. Sã n yaa a Sela roogẽ, yɩ-la a bi-kẽeng a Asaya ne a kamba. A Zera roogẽ yɩ-la a Yeuwɛl. Zɩɩda rãmb sẽn da kẽed Zerizalɛɛm yɩɩ bãmb kobs-yoobe la pis-wɛ. Bẽnzame rãmba yɩ-la a Salu, a Mesulam biiga, a Odaviya yagenga la a Asenuwa yagen-tʋbra-kẽega. Le paasa a Ibneya, a Yeroam biiga. Le paasa a Ela, a Uzi biiga la a Mikri yagenga. Le paasa Mesulam a to, a Sefatiya biiga, a Reuwɛl yagena la a Ibniya yagen-tʋbra-kẽega. Bãmb fãa da yaa b buuda sags kãsem-dãmba. Bẽnzame rãmb sẽn da kẽed Zerizalɛɛm da yaa kobs-wɛ la pis-nu la a yoobe. Maan-kʋʋdba roogẽ da yaa a Yedaya, a Zoyarib, a Yakẽ, ne a Azariya, bãmb yaab rãmb la a Ilkiya, a Mesulam, a Sadok, a Merayot, la a Ayitub. Sẽn get wẽnd dooga yell fãa da roga a zugu. Le paasa a Adaya; yẽ yaab rãmb la a Yeroam, a Pasewur la a Malkiya. Le paasa a Masayi, yẽ yaab rãmb la a Adiyɛl a Yazera, a Mesulam, a Mesilemit, a Imɛr. Maan-kʋʋdb a taaba sẽn paas zagsa kãsem-dãmba, b gill fãa ra yaa nin-tɩɩse, bãmb tusr la kobs-yopoe la pisoobe n da get wẽnd dooga yelle. Levitsa roogẽ yɩ-la a Semariya, yẽ yaab rãmba la a Asub, a Azrikam a Asabiya, a Merari roogẽ. Le paasa a Basbakar, a Ɛres, a Galal, a Mataniya, bãmb yaab rãmba la a Mika, a Zikri, a Asaf. Le paasa a Obadi yẽ yaab rãmb la a Semaya, a Galal, a Yedutun, la a Berekiya, a Asa biiga, la a Elkana yagenga; a Elkana ra kẽeda Neftoa tẽn-toosẽ. Dagno-gũudba roogẽ da yaa a Salum, b kãsma, n paas a a Akub, a Talmo, la a Ayiman. Yaa bãmb yagensã n ket n tʋmd ne rũnna. Bãmb n so yaang noorã, dĩma noorã gũudem. Bãmb yaab rãmba sẽn da gũud noor ninga ra yaa Levitsa sika noore. Yaa bãmb yaab rãmba a Salum, a Kore biiga, a Ebiyasaf yagenga, a Kore yagen-tʋbra-kẽega la a Kore rooga neba n da gũud sɛka rooga noore, wala b yaab rãmba sẽn da maand Soaala buuda sikẽ. A Pinas, a Elazar biiga, n da yɩ bãmb naab pĩnda, Soaala sẽn da be ne a yĩnga. A Meselemiya biig a Zakari me ra yɩɩ dagno-gũud sɛka rooga noorẽ. B sẽn da tũus b rãmba tɩ b ya dagno-gũudba, b fãa da yaa kobs-yi la piig la a yiibu, b ra sõd-b-la b tẽnsẽ. Yaa a Daviid la bãngd a Samwɛl n da zĩndig bãmb b tʋʋmda zugu daar fãa yĩnga; B pʋg sẽn da peel ne bãmb yĩnga. Bãmb ne b yagensã n tong taaba n soog Wẽnd waoogr dooga gũudem. Wẽnd dooga noya, yaanga, nin-taoore, goabga, rɩtgo, noor fãa ra tara a gũudba. Gũudb kẽer da be b tẽnsẽ n wat wakat-wakato n sõngd ne gũubã, dasem a yopoe pʋgẽ. Dagno-gũudba nanams a naasã, bãmb yẽ da be b tʋʋmd zĩigẽ n ka viigdẽ ye. La Levitsa la b ra gũnug rotã la wẽnd dooga arzɛgse. Yʋngo b ra pa gãe n zãr ne wẽnd dooga ye. Bãmb n so a gũubu la a noya pakre, beoog sã n vẽege. Bãmb sʋka b ra yãka kẽere tɩ b gũud Wẽnnaam waoogre teedã. B sõt-b-la b yiisg wakato n le sõd-b b kẽesg wakato. B ra yãka kẽere me tɩ b pekd wẽnd dooga lagd sõma wã. Kẽer getame tɩ bũmb da paoog ye, wala zoma, rãama, kaama, wisdã la yũ-noog kaama. La sã n da ya yũ-nood kaama seglg la b kalengo, yaa maan-kʋʋdba n da get rẽnna. A Matitiya, Levit a yembre, a Salum bi-kẽenga, a Kore roogẽ, n da so bura wẽebo, bur ning sẽn na n dɩk n kõ Wẽndã. B saam-biisa kẽere, a Keyat yagense, n da wẽed bur sõma wã b sẽn da kõt Wẽnd vʋʋsg raar fãa wã. Yɩɩn-yɩɩndba sẽn da ya-b zags kãsem-dãmba n da so Soaala-Wẽnd balengã ne yɩɩlã, bãmb da kẽeda b meng rotẽ. B ra ka tʋmd tʋʋmd a to n paas ye. B ra ka tar vʋʋsg yʋng woo tɩ wĩntoogo. Levitsa nanamse sẽn sõd n gʋls sebrẽ, ned kamb fãa ne a roog-roog la woto. Zerizalɛɛm la b ra kẽeda. A Gabaõ ba, a Yeyiyɛl da kẽeda Gabaõ ne a paga a Maaka, ne a Abdõ, a bi-kẽenga, ne a yaopã: a Sur, a Kis, a Baal, a Nɛr, a Nadab, a Gedor, a Ayiyo, a Zakari, la a Miklot. A Miklot roga a Simam. Bãmb me da naag n kẽeda Zerizalɛɛm wa b saam-biisi la b rota ra tota taaba. A Nɛr roga a Kis, a Kis roga a Sol, a Sol roga a Zonatã, a Malkisuwa, a Abinadab, a Isbaal. A Zonatã biiga: a Meribaal, a Meribaal roga a Mika. A Mika kamba: a Pitõ, a Melɛk, a Tarea. A Aaz roga a Yara, a Yara roga a Alemɛt, a Alemɛt roga a Azmavɛt, a Azmavɛt roga a Zimri. A Zimri roga a Mosa, A Mosa roga a Binea, a Binea roga a Refaya, a Refaya roga a Elasa, a Elasa roga a Asɛl. A Asɛl doga kom-dibli a yoobe. B yʋya la woto: a Azrikam, a Bokru, a Ismayɛl, a Seariya, a Obadiya, a Ana: bãmb la a Asɛl kamba. Filisti rãmba waa n kaooga zabre ne a Israyɛl, Gilboa tãnga. Israyɛl kamba zoe Filisti rãmba taoore, b pogl-b lame tɩ b lʋɩ n ki Gilboa tãnga zugu. Filisti rãmba lɛɛg n kẽ-la a Sol ne a kamba n kʋ-ba, B kʋ-la a Zonatã, a Abinadab, a Malkisuwa, a Sol kamba. Zabra waa n wɩnga a Sol zĩigẽ n yɩɩda, la tãb-biisa paama a Sol n pogle. A Sol yeela sõgna sẽn da zãad a zab-teedã: «Wõog f sʋʋgã n kõs-ma, tɩ nin-dẽgd bãmba da wa yaal maam ye.» La sõgna pa sak ye. Dabeem da tar-a-la wʋsgo. A Sol wõoga a sʋʋga n bas a meng n lʋɩ n bʋʋg-a, n kʋ a menga. Sõgna sẽn mik t'a Sol kiime, yẽ me lʋɩ n bʋʋga a sʋʋga n kʋ a menga. A Sol kii woto ne a kamb a tãabã t'a roog gill naag n wã. A Israyɛl neba fãa sẽn da be tãn-longẽ wã sẽn yãend tɩ neba zoeeme la a Sol ne a kamba kiime, bãmb me basa b tẽns n zoe, tɩ Filisti dãmba wa reeg b tẽnse n kẽedẽ. Vẽkembeoogo Filisti rãmba waame n na n zɛ sẽn ki-ba teedo. B yãenda a Sol ne a kamba sẽn gãe Gilboa tãnga zugu. B yeesa a Sol futã la b looga ne a zugu la a zab teedo, n yaool n tʋm tɩ b saag Filisti rãmba tẽns n togs kibar sẽn ya noogo, b wẽn-naandsa la b buuda yĩnga. B bĩnga a Sol zab-teedã b pʋʋsga roogẽ, n yaool n ka a zu-wangã a Dagõ doogẽ. Yabɛs-Galaad dãmba fãa wʋma Filisti rãmba sẽn maana. Gãndaadã fãa kẽngame n tɩ rɩk a Sol ne a kamba n wa Yabɛs, la b muma b kõaba Yabɛs, tɩ-kãseng tẽngre, la b loe b noor dasem a yopoe. A Sol kii woto, a sẽn da beeg Wẽnd yĩnga, n pa reeg b noore, la a sẽn kos pagã t'a sok kɩɩmsa yĩnga. Yẽ pa bõs Wẽnd saglg ye, dẽ n so tɩ b bas t'a ki, n deeg a naama n kõ a Zese biig a Daviid. Wẽnd kãnga, a Israyɛl kamba fãa tigma taaba a Daviid sɛɛgẽ, Ebrõ, la b yeel-a lame: «Gese, tõnd yaa fo kõaba, la f yĩng nemdo. Pĩnda a Sol sẽn da waa n dɩt a naama, foom n da zoet n lʋɩt a Israyɛl taoore, a yit bɩ a kẽeda. Soaala, f Wẽnnaam, yeel-f lame: yaa foom n na n kɩɩm m buudu, a Israyɛl, la foom n na n yɩ a naaba.» Yaa woto la a Israyɛl nin-kẽemsa fãa wa dĩma nengẽ, Ebrõ. A Daviid wẽena Ebrõ, Naaba-Wẽnd taoore, t'a na pids b sẽn datã. B pʋdga a zug kaam, t'a lebg Israyɛl dĩma, wala Naaba-Wẽnd sẽn da yeel ne a Samwɛl noore. A Daviid ne Israyɛl gilli kẽngame n tɩ wẽ Zerizalɛɛm gũbri n lub-a. Tẽnga ra boondame tɩ Zebus tɩ Zebuzitse n da kẽed-a. La Zebuzitsa yeela a Daviid: «Fo ka na n kẽ d tẽnga ye.» La a Daviid deega Siõ tãnsoben-doogã, tɩ lebg a na-tẽnga. La a Daviid yeelame: «Sẽn denga Zebuzitg kʋʋbo yẽ soab n na n lebg m tãb-biisa tãnsoaba.» A Zoab, a Seruya biiga n deng n dʋ n tak zabrã la a lebga tãnsoaba. A Daviid tɩ kẽe tãnsoben-doogã tɩ zĩ-kãng na n bool t'a Daviid na-tẽnga. A maneg n mee tẽngã n gilgi, n sĩd Milo longã, n me lal-gũbrã. A Zoab n me tẽnga sẽn kellã. A Daviid naama waa n paama pãnga tɩ Naaba-Wẽnde, a Israyɛl Wẽnnaam, ra bee ne-a. A Daviid gãndaada kãsem-dãmb naaga ne a Israyɛl zãng fãa n sõng a Daviid t'a rɩ naama wala Naaba-Wẽnd sẽn date. A Daviid gãndaada yʋy la woto: a Isbaal; a ba yaa Akmonitga la gãndaad pis-tã wã nin-yende. Yaa yẽ n kaoog zabre, daar a ye, ne neb kobs-tã la a kʋ-b-la zãnga t'a nug na n yaool n vʋʋs ne a kãnda zẽkr la kõsbo. Sẽn pʋgda yẽ, yaa a Elazar, Awoyitga a Dodo biiga, a da yaa gãndaad a tãabã nin-yende. A da bee Pa-Damim ne a Daviid. Filisti dãmba waa be n na n kaoog zabre. Pʋʋg me n da be be n pelg ne alkam kɛgenga la tãb-biisa sẽn da zoet Filisti rãmba taoore, waa n kẽ-a lame. Bãmb b tãaba tɩ yalsa pʋʋga tẽnsʋka n dig beebã, n kʋ Filisti rãmba. Wẽnd yĩnga a Israyɛl tʋma raood beelẽ n tõog bɛɛba gilli. Gãndaad pis-tã wã sʋka neb a tãabo n bʋʋg a Daviid Pĩig ninga sẽn pẽ Adulam tãn-bokã; dẽ tɩ Filisti rãmba da maana b tãb-sika Refayim dãmba tãn-longẽ. A Daviid da bee tãn-boka pʋga, tɩ Filisti rãmba tãb-biis bogr da be Bɛtelyɛɛm. A Daviid waa n kosa woto: «Ãnna n na n kõ-m koom tɩ m yũ? M data bulg ninga sẽn be Bɛtelyɛɛm noorẽ wã koom n yũ!» Gãndaad a tãabã fõrg n kẽe Filisti rãmba tãb-sikã n tɩ yõng koom Bɛtelyɛɛm noorẽ kobaoorã n tall n wa kõ a Daviid. A Daviid pa sak n yũ kooma ye, la a raag-a-la Naaba-Wẽnd taoore. A yeelame: «Bɩ Wẽnd sɩbg maam n bãge m sã n yũ ko-kãnga. Na yɩẽ wala yaa nin-bãmba zɩɩm la m yũ-ya tɩ b saka b yõor yãkre n tõog n paam ko-kãnga.» Gãndaad a tãabã sẽn maan la boto. A Abisayi, a Zoab ba-biigã, yẽ me da yaa gãndaad pis-tã naaba. Yẽ me kaooga zabre ne neb kobs-tã la a kʋ-b-la ne a kãnde, t'a yʋʋr yi gãndaad pis-tã wã sʋka. A paama ziiri n yɩɩd gãndaad pis-tã wã n wa tol n legb b naaba, la a ziira ka ta gãndaad a tãabã rẽnd ye. A Benaya, a Zoyada biiga, Kabseyɛl dao, yẽ la gãndaoog menga sẽn tʋm tʋʋm bɛda. Yẽ n kʋ Moab gãndaad a yiibu, yẽ n sig loangẽ n kʋ gɩgemde, wulg sẽn maan daare. Yaa yẽ me n le kʋ Ezipt ned ninga woglem sẽn da ta kãntɩɩs a nu, n zãad a nugẽ, kãnde sẽn zem koeer bõanga. A seg-a-la ne a dasaar bala, n fãsg kãndã Ezipt daoa nugẽ n lɛɛg n kʋ-a ne a meng kãnde. A Benaya, a Zoyada biiga me sẽn maan la woto, la rẽ kɩtame t'a yʋʋr yɩ gãndaad pis-tã wã sʋka. A paama ziiri n zʋʋg gãndaad pis-tã wã, la a ziirã ka ta gãndaad a tãabã rẽn ye. A Daviid kẽes-a-la a tãb-gũudba sʋka, sẽn gũud-b yẽnda menga sʋka. Gãndaad la sũ-keelem dãmba a taaba sẽn kellã yʋy la woto: a Asayɛl, a Zoab ba-biiga, a Elana, a Dodo biiga, Bɛtelyɛɛm daoa. A Samot: Arotitga, a Elɛs: Pelonitga. A Ira, Tekoa daoa a Ikɛs biiga; a Abiezɛr, Anatot daoa. A Sibkayi, Usa daoa; a Ilayi, Aoya daoa. A Marayi, Netofa raoa; a Elɛd Netofa raoa, a Baana biiga. A Itayi, Gibeya daoa, a Ribayi biiga, a Bẽnzame roogẽ; a Benaya, Pireatõ raoa. A Urayi, Gaas kʋɩlsẽ dao; a Abiyɛl, arvatitga; a Azmavɛt, Bawurim daoa; a Eliyaba, Saalbonitga; a Bene-Asem, Gizõ daoa; a Zonatã, Arar daoa a Sage biiga. A Ayiyam, Arar daoa a Sakar biiga; a Elifal, a Ur biiga; a Efɛr, Mekera daoa; a Ayiya, Pelonitga. A Esrõ, Karmɛl daoa; a Naarayi, a Ezbayi biiga; a Zowɛl, a Natã ba-biiga; a Mibar, Agritga. A Selɛk, Amonitga; a Narayi, Beerot daoa, sẽn da zãada a Seruya biiga, a Zoab, zab teedã. A Ira, a Yetɛr roogẽ; a Garɛb, a Yetɛr biiga. A Uri, Ititga; a Zabad, a Alayi biiga, a Adina, a Siza biiga, a Rubẽ yagensã kãsma la gãndaad pis-tã taoor soaba. A Ana, a Maaka biiga la a Zozafat, Mitenitga; a Uziya, Astarot daoa; a Sama la a Yeyiyɛl, Aroɛr daoa a Otam kamba, a Yediayɛl, a Simri biiga, n paas a ba-biiga, a Zoa, Tisitga; a Eliyɛl Maavim daoa; a Yeribayi la a Zosabiya, a Elnaam kamba; a Itma, Moabitga; a Eliyɛl, a Obɛd ne a Yasiyɛl, Soba dapa. Ad neb niyns sẽn pʋga a Daviid, Siklag, a sẽn waa n zãag ne a Sol, a Kis biigã. Fãa da yaa gãndaado, n da sõngd-a zabr zĩigẽ. B ra boba logdo. B goabg ra vɩɩ wala b rɩtgo tɩ b tõe n lobg kugr bɩ b tão pĩim. Ad-a Bẽnzame roog kamba, a Sol ba-biisi: b naaba, a Ayiezɛr, yẽ yao, a Zowas, Gibeya dao a Sema kamba; a Yeziyɛl la a Pelɛt, a Azmavɛt kamba; a Beraka la a Yewu, Anatot dapa; a Ismaya, Gabaõ daoa, gãndaoog menga, gãndaad pis-tã wã nin-yende la b taoor soaba; a Irmeya, a Yaaziyɛl, a Zoana la a Zozabad, Gedera daoa. A Eluzayi, a Yerimot, a Bealiya, a Semariya, a Sefatiya, Aruf dapa; a Elkana, a Isiya, a Azarɛl, a Zoezɛr, a Yasobam, Koreyitse; a Zowɛl la a Zebadiya, Gedor daoa a Yeroam kamba. A Gad roog rãmb me welgame n bʋʋg a Daviid a soondg zĩigẽ, we-raoogẽ, bãmb da yaa tãb-biisi sẽn tar sũ-keelem, sẽn da minim zabre al n mi neere gãong la kãna zãabo, b raooda da taa gɩgemd dẽnna, la b tĩigã da zema yãgs sẽn zoet tãmsa zut tĩiga. A Ezɛr n da yaa kãsma, t'a Obɛd pʋgda, t'a Eliab yaa a tãab soaba, a Mismana, a naas soaba, a Irmeya a nu soaba, a Atayi, a yoob soaba, a Eliyɛl, a yopoe soaba, a Zoana, a nii soaba, a Elzabad, a wɛ soaba, a Irmeya, piig soaba, a Makbanayi, piig la a ye soaba. A Gad yagens sʋka sẽn yɩ b tãnsoaben-dãmb la boto. Sẽn da yaa faoor bãmb sʋka da zema tãb-biis koabga, tɩ gãndaoog menga zem neb tusri. Bãmb n dʋʋg Zʋrdẽ kʋɩlga, pipi kiuugu, wakat ninga a sẽn pid n daannẽ, n dig bãg-faaga nebã, yaanga la taoore. A Bẽnzame la a Zɩɩda yagense me bʋʋga a Daviid, a soondg zĩigẽ, t'a Daviid yi n seg-ba n gom ne ba n yeele: «Yãmb sẽn wa mam nengẽ ne pʋ-peelem n na n sõng maam, ad-y yaa ne sũ-noogo la d na n fãoog taaba. La yãmb sã n waa ne zãmbo n na n sõng m bɛɛba tɩ m yaool n ka maan ned pãnga, bɩ d saam dãmba Wẽnnaam ges la b kao d bʋʋdo.» La Wẽnd pãng siga a Amasayi, gãndaad pis-tã wã naab a ye, t'a yeele: «Foom la tõnd soaala, Daviid, tõnd me bee ne foo, Zese biiga! Laafi la laafi sig f zugu. Laafi ne sẽn sõngda foo, tɩ yaa Naaba-Wẽnd meng n wat f sõngre!» A Daviid deeg-b lame la a kẽes-b-la a tãb-biisa nanams sʋka. A Manase yagens me kẽ-la a Daviid, a sẽn wa raar ning ne Filisti rãmba n na n kaoog zabre ne a Sol. La b yaool n ka naag Filisti rãmba n zab ye, tɩ Filisti rãmba nanamse ra yẽsa ne taaba n lebs a Daviid, n yetẽ: «A rat n koosa tõnd yõore n paam n le kẽ a zu-soaba, a Sol tãpẽ.» A Daviid sẽn wa n lebd Siklag, ad-a Manase neb niyns sẽn waa n kẽ-a: a Adna, a Zozabad, a Yediayɛl, a Mikayɛl, a Zozabad, a Eliyu la a Siletayi, sẽn da ya a Manase tãb-biis nanamse. Bãmb n sõng a Daviid n zab, tɩ b fãa da yaa tãb-biisi sẽn tar daoodo la b lebga tãnsoaben-dãmba. Beoog sẽn vẽeg fãa a Daviid da reegd-b lame al t'a tãb-sikã yalge n ka le tar maken-taag ye. Ad zab-zabdba ne b sagsa sõore, sẽn bob-ba n babs a Daviid Ebrõ n na n kõ-a naam, a Sol naama, wala Naaba-Wẽnd sẽn da kõ noore: A Zɩɩda roogẽ: dap tus a yoob la kobs-nii, sẽn bob zabre n zãad gãongo la kãna. A Simeõ roogẽ: zabr gãndaado, tus a yopoe la koabga. A Levi roogẽ: tus a naase la kobs-yoobe, n paas a Zoyada, a Aarõ yagenga, yẽ bobame n wa ne rap tus a tã la kobs-yopoe. Bi-bɩɩg la gãndaoog a ye, a Sadok, ye me waa ne a sags nanams pisi la a yiibu. A Bẽnzame roogẽ: a Sol saam-biisi, dap tus a tã; sã n ka baraare, b da kell n kẽeda a Sol tãpẽ. A Efrayim roogẽ: zabr gãndaado tɩ b yʋʋr da yi b buuda sʋka, bãmb tus pisi la kobs-nii. A Manase bogra sẽn da be nin-taoora roogẽ: dap tus piig la a nii. B ra tũusa bãmb a yembr-yembre tɩ b wa yug a Daviid naam. A Isakar roogẽ: tãnsoaben-dãmb kobs-yi ne b tãb-biisi sẽn da tar yẽesem, sẽn da mi sẽn ya wakat ninga la seem ninga la naama na n yugi. A Zabulõ roogẽ: neb tus pis-nu, sẽn da tõe n maan zabre ne zab-teed buud fãa la sẽn da mi zabra meng sẽn zabd to-to. A Neftali roogẽ: tãnsoaben-dãmb tusri ne b tãb-biis sẽn zãad gãndo la kãna, bãmb tus pis-tã la a yopoe. A Dã roogẽ: tãb-biis tus pisi la a nii la kobs-yoobe sẽn tõe n tak zabre. A Asɛr roogẽ: dap tus pis-naase sẽn zãms la sẽn mi zabr takre la sẽn segl n gũudẽ. Zʋrdẽ kʋɩlga rʋʋre, a Rubẽ, a Gad, a Manase bogra roogẽ: dapa sẽn bob zab-teed buud fãa, bãmb tus koabga la pisi. Nin-bãmba fãa, tãnsoaben-dãmba wala tãb-biisã boba b zab-teedo n kẽng Ebrõ ne pʋ-peelem n tɩ yuga a Daviid t'a lebg Israyɛl gill naaba. Israyɛl kamba a taaba fãa yɩɩ sũur a ye n na n kõ a Daviid naama. B zĩnda ne a Daviid dasem a tã, n dɩtẽ la b yũud b saam-biisa sẽn da segl bũmb ning fãa b yĩnga. Ebrõ tẽn-toosã, la ba Isakar, Zabulõ la Neftali rãmba, da zɩlga teedo ne bõeense, yʋgma, bõn-weese, la niis n wat n kõt-ba: yaa zom, kankam koeemse, sib koeemse, dãam la kaam, piis la niis zembala tɩ dag n ya kɩdeng kãsenga ne a Israyɛl. A Daviid maana yẽsgo ne tãb-biisa nanamse la taoor dãmbã. A yeela Israyɛl tigungã gilli: «Sã n zems ne yãmba, la Naaba-Wẽnd me sã n data, bɩ d tʋm neba d saam-biis a taaba nengẽ, saam-biis niynsi, maan-kʋʋdba la Levitsa sẽn pa-b tẽnsẽ la b pʋtẽ wã, d bool-ba tɩ b wa naag tõndo. D na naag taab n tɩ lebs zooda kaseto, kuga walsa koglgã, d tẽngẽ, tɩ sɩda, tõnd pa ges a yelle, a Sol zamaanẽ wã ye.» A Israyɛl kamba fãa reegame tɩ leokra yaa neere la b tog n maana wa sẽn togsã. A Daviid kɩtame tɩ b bool Israyɛl kambã b sẽn be zĩig ning fãa, al Ezipt toaaga sẽn be nug rɩtgo n ta Lebo-Amat sẽn be nug goabga, tɩ b kẽng Kiriyat-Yearim n tɩ tall kuga walsa koglgã n wa. Dɩlla a Daviid ne Israyɛl kamba fãa kẽnga Baala, sẽn boond me tɩ Kiriyat-Yearim, n be Zɩɩda tẽn-peelmẽ. B kẽng n tɩ waa ne koglgã la yaa yẽ zug la Naaba-Wẽnd zao n deegd d pẽgre, tɩ malɛgsa me yɛdg b pɩgsã. Yaa a Abinadab yiri la b zɩlg koglga bilim-bilm paalga. A Uza ne a Ayiyo n da yegd bilim-bilma. A Daviid ne Israyɛl gill saoo ne b pãng fãa Wẽnnaam taoore. B yɩɩla ne koala, la gãngão-gilsi, la kɛma la tõntõodo. La b sẽn waa n ta Kidõ zɛɛgẽ, a Uza tẽega a nug n na n kok koglgã tɩ kellẽ la bilf bala tɩ niisa lubẽ-yẽe. Soaala-Wẽnd sũur puuga ne a Uza tɩ b wẽ-a, a sẽn dɩk a nug n sɩɩs koglga yĩnga; a Uza kii Wẽnnaam taoore. A Daviid sũur sãama wʋsgo, tɩ Soaala-Wẽnd sẽn maan ne a Uza wẽnega ned sẽn wurg zak lalga. Dẽ me la a pʋd zĩ-kãng t'a Uza lal-bɛɛga, tɩ b ket n boond dũnna. Badaare a Daviid zoe Wẽnd dabeem la a yeelame: «M yɩta a wãna n kẽes kuga walsa koglgã m zakẽ?» La a Daviid pa tall koglgã n kẽng a yiri, a na-tẽngẽ ye, a kɩtame tɩ b tall-a n tɩ bĩng a Obɛd-Edom, Gat dao yiri. Kuga walsa koglg paa kiis a tã a Obɛd-Edom zakẽ la Naaba-Wẽnd ninga barka a Obɛd-Edom zakã ne sẽn be a pʋgẽ fãa. A Iram, Tir dĩma, tʋma neb a Daviid nengẽ. B waa ne ra-sĩdma, ne neb sẽn mi kug peesgo, la raad bogbo n na n me na-yir n kõ a Daviid. Wakat kãnga, a Daviid bãngame tɩ Wẽnnaam da kõ-a-la naam, la naam sẽn tar ziir la pãnga, b buud a Israyɛl yĩnga. Zerizalɛɛm tẽnga, a Daviid le peega pagba, la a roga kom-dibli la kom-pugli. A Daviid kamba sẽn dog-b Zerizalɛɛm yʋya la woto: a Samuwa, a Sobab, a Natã, a Salomo, a Ibar, a Elisuwa, a Elpelɛt, a Noga, a Nefɛg, a Yafiya, a Elisama, a Beeliyada, la a Elifelɛt. Filisti rãmba vʋmame tɩ b taaga a Daviid ne kaam t'a ya Israyɛl zãng dĩma, la b yiime n na n tak zabr ne-a. La a Daviid sẽn wʋm woto, yẽ me yiime n na n tɩ seg-ba. Filisti rãmba tʋg n wẽe Refayitsa, bãg-faagẽ. La a Daviid deng n soka Naaba-Wẽnde: «M tɩ seg Filisti rãmba? Y na ning-b mam nusẽ?» La Soaala-Wẽnd yeelame: «Kẽng tɩ m na ning-b fo nusẽ!» Filisti rãmba sega a Daviid Baal-Perasim la a Daviid tõog-b-la zĩ-kãnga. A Daviid yeelame: «Wẽnnaam sõnga m nugu tɩ m wurg m bɛɛba wa koom sẽn wurgd bɛongo.» Yaa rẽ yĩng la b boond zĩ kãanga tɩ Baal-Perasim. La zĩ-kãnga Filisti rãmba zoeeme n bas b wẽn-naandsã la a Daviid yeelame: «B yõog b fãa bugum!» Filisti rãmba le boba tãpo n wa. A Daviid le soka Naaba-Wẽnd n ges a sã n tog n seg-b lame? Tɩ Soaala-Wẽnd yeel-a: «Da seg-b ye, gilg al yɩɩg n tɩ seg-b pargensa goog noore. Fo sã n wa wʋmd nao rãamde pargensa zutu, f na tak zabre marsã tɩ yaa wakat kãng la maam, Naaba-Wẽnd, na n lʋɩ fo taoore, tɩ f zab n tõog Filisti rãmba.» A Daviid maana wala Soaala-Wẽnd sẽn yeel-a. Israyɛl kamba tõoga Filisti rãmba al Gabaõ, n tɩ ta Gezɛr. A Daviid yʋʋr yii tẽnsa fãa pʋsẽ la Naaba-Wẽnd kɩtame tɩ tẽnsã fãa zoe a rabeem. A Daviid me-la a zak a na-tẽngẽ. A segla zĩig be la a tii roog ne futu n na n wa kẽesd kuga walsa koglga be. A yiisa noore tɩ Levitsa bala n tõe n tʋk koglgã. Yaa bãmb bal la Naaba-Wẽnd tũus dar fãa yĩnga tɩ b tʋkd-a la b tʋmd sɛka roog tʋʋma. A Daviid tigma Israyɛl kamba fãa Zerizalɛɛm tɩ b na n tɩ rɩk koglgã n wa bĩng-a zĩig ning sẽn da segl a yĩngã. A Daviid tigma a Aarõ yagense, la a Levi yagense. Ad-ba: a Keyat roogẽ, saka naab, a Uriyɛl, ne a yaop koabg la pisi. A Merari roogẽ, saka naab, a Azaya, ne a yaop kobs-yi la pisi. A Gersõ roogẽ, saka naab, a Zowɛl, ne a yaop koabg la pis-tã. A Elisafã roogẽ, saka naab, a Semaya, ne a yaop kobs-yi. A Ebrõ roogẽ, saka naab, a Eliyɛl, ne a yaop pis-nii; A Uziyɛl roogẽ, saka naab, a Aminadab, ne a yaop koabg la piig a la yiibu. A Daviid boola maan-kʋʋdba, a Sadok la a Abiyatar, n bool Levitse a Uriyɛl, a Asaya, a Zowɛl, a Semaya, a Eliyɛl la a Aminadab. A yeel-b lame: «Yãmb la Levit dãmba sak nanamse. Yɩlg-y y mense, yãmb ne y saam-biisi, la y tɩ tall Naaba-Wẽnd, a Israyɛl Wẽnnaam, kuga walsa koglgã, n wa rɩgl-a m sẽn segl zĩig ningã. Yãmb ka zĩnd kaane pipi rɩkra ye. Dẽ me la Naaba-Wẽnd, tõnd Wẽnnaam yẽeg tõndo, tɩ tõnd ka reng n sok-b wala sẽn da segd ye.» Maan-kʋʋdba la Levitsa yɩlga b mense n tɩ wa ne Israyɛl Wẽnnaam zooda kasetã, kuga walsa koglgã. Levista tʋk-a lame n palg b bãgdo, wala a Moyiiz sẽn da kõ noore, la wala Naaba-Wẽnd sẽn da yeele. A Daviid yeela Levitsa nanamse, tɩ b yals yʋʋmba, b zĩisẽ ne b yʋʋm teedo la b wilg b sũ-noogo. B zodg yɩɩla, tɩ ruudsa wãagdẽ, tɩ koala la kɛm wẽedẽ, tɩ zĩig fãa wulumd ne noogo. Levitsa sẽn yãk b rãmb la woto: a Zowɛl biiga a Eman, a Berekiya biig a Asaf, a Kusaya biig a Etã, a Merari yagenga. Levits kẽere waa n paasame. Yaa sẽn gũud-b noya, wala a Zakari, a Ben, a Yaaziyɛl, a Semiramot, a Yeyiyɛl, a Uni, a Eliyab, a Benaya, a Maaseya, a Matitiya, a Eliflewu, a Mikneya, a Obɛd-Edom, a Yeyiyɛl. Yʋʋmba kẽere, wa a Ena, a Asaf, a Etã, da tara kɛma sẽn yõg ne zũudu, la sẽn zãeed wʋsgo. A Zakari, a Yaaziyɛl, a Semiramot, a Yeyiyɛl, a Uni, a Eliyab, a Maaseya, la a Benaya da wẽeda pɛndga, bãmb da sokda raaga. A Matitiya, a Eliflewu, a Mikneya, a Obɛd-Edom, a Yeyiyɛl la a Azaziya bãmb da tara gĩs a nii koala n sokd yãanga. A Kenaniya, n da ya naaba n so Levits niyns sẽn zɩt-b koglgã, ya ned sẽn sɩd mi gũusgu tɩ bũmb pa yõsd a to ye. Dagno-gũudba A Berekiya la a Elkana, da tog n yegla koglgã. A Obɛd-Edom ne a Yeyiya me ra yaa boto. Maan-kʋʋdba, a Sebaniya, a Zozafat, a Netaneyɛl, a Amasayi, a Zakari, a Benaya la a Eliezɛr, bãmb n da tog n peebd tõntõodo, Wẽnnaam zood kaseta taoore. A Obɛd-Edom la a Yeyiya, bãmb da yaa koglga sẽn bĩngd doog ninga noor gũudba. A Daviid ne Israyɛl nin-kẽemba la neb tusri tãnsoaben-dãmba da kẽngame n na n tɩ rɩk koglgã a Obɛd-Edom yiri, ne sũ-noogo. Sẽn na n yɩlẽ tɩ Levitsa sẽn da tʋkd koglga paam Wẽnnaam sõngre, b kʋʋ lols a yopoe la pe-raad a yopoe maoongo. A Daviid da yeelga fuugu sẽn maneg n wʋg ne gĩs bãanese sẽn pɩnda. A ra saoodame n naag ne Levitsa sẽn da tʋk koglgã n paas yɩɩn-yɩɩndbã la a Kenaya sẽn da get tʋkra yelle. A Daviid da ninga sãnem-pɛ-m-poore sẽn wʋg ne gĩs peelse. A Israyɛl gilli da yãagda kuga walsa koglg tɩ b tar kilsgu, n tar bardo la tõntõod peebgo, la b wẽed kɛma la koala. La koglga sẽn waa n poog a Daviid na-tẽnga, a Sol bi-pugã a Mikal lɩka võorẽ n gese, la a sẽn yãend dĩma a Daviid t'a saood la a yɩgda, a sãbs-a-la a sũurẽ. B kẽesa kuga walsa koglgo, n dɩgl-a a Daviid sẽn segl zĩig ningã. B kʋʋ Wẽnnaam taoore yũ-nood maando, laafi kosg maando. A Daviid sẽn kʋ yũ-nood maandã la laafi kosg maandã n sɛ, a ninga neba barka Naaba-Wẽnd yĩnga. La a kɩtame tɩ b pʋɩ neba fãa rɩɩbo, dapa la pagba, ned kam fãa reega buri ne naaf neongo, ne pesg neongo, n paas miisd sẽn dõos ne bugsuntung bi-koeemse. A Daviid yãka Levitsa tɩ b yals kuga walsa koglga taoore la b tʋʋmd lebga b waoog la b pẽge, la b balem Naaba-Wẽnd, a Israyɛl Wẽnnaam. Yaa a Asaf, yẽ la kãsma, la a Zakari, yẽ la kãsem pʋgdga, a Aziyɛl, a Semiramot, a Yeyiyɛl, a Matitiya, a Eliyab, a Benaya, a Obɛd-Edom la a Yeyiyɛl bãmb da zãada kʋnde la b wãagd ruudsi, t'a Asaf da wẽed kɛma. Maan-kʋʋdba a Benaya ne a Yaaziyɛl da peebda tõntõogo n pa sĩndidẽ, kuga walsa koglga taoore. Badaare a Daviid deng n pẽga Naaba-Wẽnd, la a Asaf ne a ba-biis reega yɩɩlã n yɩɩle. Pẽg-y Naaba-Wẽnde, kaas-y b yʋʋre, ninsaalb buud fãa sʋka, moon-y b tʋʋm-bãna. Balem-y bãmba, zodg-y yɩɩla bãmb yĩnga. Kils-y b bõn-bãna fãa. B sõmblema zẽkda d zugu, sẽn baood-b Wẽnd kɩdem sũ-noogo! Bao-y Soaala-Wẽnde, bao-y b sõngre. Bao-y bãmb nenga la y da vʋʋs ye. Tẽeg-y bõn-bãna fãa bãmb sẽn maane. Ges-y b pãnga sẽn tʋme. Ges-y b yama sẽn kaoole. Wẽnd Sõgne a Israyɛl yagense, Wẽnd yembse, a Zakoob kamba, bãmb zo-rãmba, bãng-y tɩ bãmb la Naaba-Wẽnde, tõnd Wẽnnaama n kaood tẽng zug-rãmb bʋʋdo. Tẽeg-y b zooda yell daar fãa. Yaa gomde sẽn moon zamaan tusr yĩnga. Yaa zoodo b sẽn yõg ne a Abraam. Yaa b kãabgo b sẽn kãab a Izaak. B yalsa b noore, a Zakoob yĩnga, n yals zood sẽn kõn sɛ a Israyɛl yĩnga. Bãmb n yete: m kõt-f-la tẽng a ye, Kanaã tẽnga la f buud pʋɩɩre! Wakat kãng tɩ yãmb sõor da paoodame. La y da yaa sãamba, tẽng kãnga pʋgẽ, n yit tẽn-kãngã n kẽ tẽn-kãngã n tat taoore n lebgdẽ, tɩ f yam la poorẽ. Soaala pa sak tɩ bu-zẽmba wẽoog-y ye. Yãmb yĩnga b sɩbga dĩm dãmba, n yeel-b tɩ b ra saag n sɩɩse b sẽn kees b meng yĩnga ye. La b da saag n maan b norɛɛs wẽng ye. Yɩɩl-y n pẽg Wẽnde, tẽng zug rãmba, beeog-beoog fãa bɩ y moon bãmb fãagre! Togs-y b ziirã ninsaalba fãa, Adem biisa fãa moon b tʋʋm-bãna. Wẽnd waooga, bãmb n tog ne pẽgre! Bãmb kẽesda rabeem n yɩɩd wẽn-naandsa fãa. Bu-zẽmba wẽn-naandsa fãa yaa zaalem. Yaa Naaba-Wẽnd n nan saaga. Bãmb nenga yãgda ne neerem la ziiri. Pãng la ziir n pid b ro-sõngã. Ninsaalb buudu, pẽg-y la y waoog Soaala, kils-y Soaala ziir la b pãnga! Pẽg-y b yʋʋre, wa sẽn segde. Tall-y y kũun n wa b taoore, wõgemd-y n waoog-ba, tɩ b puka b sõmblem. Rig-y rabeem bãmb taoore, tẽng zug rãmba fãa! Bãmb n vigl dũniya t'a pa tõe n vik ye. Yĩngr dãmba kaas b sũ-noog kaasgo, tɩ tẽng zug rãmba kɩdem b kɩdengo. B moon n sok taaba tɩ bu-zẽmba wʋme tɩ Naaba-Wẽnd n so naam! Mogra ne a pʋgẽ te-neeba, vũ a vũubu; pʋta yɛdg b kooda ne b biisi n wilg b zu-noogo, googa ne a tɩɩsã leng b sũ-noog lengre, tɩ tẽnga Soaala n wa n kaagd a soolem dãmba. Pẽg-y Wẽnnaam, tɩ b yaa nin-noanga, la b nonglem ka be sɛɛb ye. D tees n yeel-ba: Fãag-y-do Wẽnnaam, Fãag-y-do! Tigim-y-do n yiis-d bu-zẽmba sʋka woto d na tãs y pẽgre, woto d na pʋd y yʋʋre, d na bãng y yʋ-sõnga pʋdbo, Israyɛl Wẽnde. D pʋʋsda a Israyɛl Wẽnnaam barka; zamaan woo zamaana, d kãntɩɩg bee tẽnga. Tɩ neba fãa naag taab n deege: «Ami! Wẽnd paam pẽgre!» A Daviid basa a Asaf ne a ba-biisi, kuga walsa koglga taoore. Bãmb n da tog n ges, ned kam fãa ne a wakato, tɩ Wẽnnaam waoogra ra tol n vaal koglga taoor ye. A basa noya gũudem ne a Obɛd-Edom, la a saam-biisi bãmb pisoob la a nii. A Yedutun biiga a Obɛd-Edom le boondame tɩ Oze. A Daviid ninga maan-kʋʋda, a Sadok, ne maan-kʋʋdb a taaba, a saam-biisã, kuga walsa koglga taoore, Gabaõ tãnga zugu. B da bee be daar fãa n kʋʋd maand Naaba-Wẽnd yĩnga, yũ-noog maan-kugra zugu, yibeoog la zaabre, la b ra getame tɩ b maan bũmb ning fãa sẽn gʋls noora sebrẽ, noor ninga Soaala sẽn kõ a Israyɛl. Sẽn da be-b ne bãmba, yaa a Eman la a Yedutun. Neb a taaba sẽn ketã, b da tũusa bãmb ned kam fãa, tɩ b tʋʋmd ya b peebd tõntõodo, bɩ b wẽed kɛma, bɩ b reemd ne yʋʋm teeda a taaba, Wẽnnaam pẽgr yĩnga. N pẽg-b tɩ b nonglem ka be sɛɛb ye. Sẽn naag-ba a Eman la a Yedutun da reesda pẽgra yɩɩlã. A Yedutun kamba n da so noya gũudem. Neb fãa kulame, ned kam fãa a yiri, t'a Daviid me kul n le tɩ ges a yir dãmba. A Daviid sẽn n kẽ a meng yiri, a waa n yeela bãngda a Natã: «Gese, mam sẽn be roog ning pʋga tilga ne kʋgs raado, tɩ Wẽnd zood kasetã, kuga walsa koglg, be pɛɛl zãnd tẽngre.» T'a Natã yeel a Daviid: «Yãmb sũur sẽn dat fãa bɩ y maane tɩ Naaba-Wẽnd bee ne yãmba.» Mik yʋng ninga sẽn pʋga bala, Soaala-Wẽnd koɛɛga taa a Natã n yeel-a: «Kẽng n tɩ yeel m tʋʋm-tʋmd a Daviid: ad Naaba-Wẽnd koɛɛga: ka foom n na n me roog n kõ maam tɩ m kẽ ye, tɩ mam sẽn wa ne Israyɛl tɛka n ta rũnna daare ka roog pʋgẽ la m zĩndri ye; mam zĩnda zãnd tẽngre, la m sẽn paamẽ. M sẽn tũ a Israyɛl n ta zĩig ning fãa, koɛ bʋg la m yiis n wilg Israyɛl bʋ-kaooda, bɩ a naaba, sẽn wẽnd m zabame n yetẽ: ‹Ya bõe tɩ y pa tilg roogo ne kʋgs daado n kõ maam?› La marsã, fo na n yeela m tʋʋm-tʋmd a Daviid woto: a Israyɛl Wẽnnaam gomd la woto: Maam n yãk foom rũm-kɩʋng weoogẽ, tɩ fo da yaa pe-kɩɩma; maam n yãk foo tɩ f yɩ mam buud a Israyɛl naaba. Fo sẽn kẽng zĩig ning fãa, mam zĩnda ne foom, la mam sãama f bɛɛbã. Maam n kɩt tɩ fo yʋʋr zeng pãn-dãmba sẽn be tẽng zug rẽnna. Mam na n yãka zĩig a ye n kõ m buud, a Israyɛl, mam na vigl-a t'a kell n pa zĩig a ye; la b kõn le kẽes-a rabeem ye. Bi-bees me kõn leb n koms-a wa pĩnd ye. Mam sẽn yãk bʋ-kaoodba tɩ b soog Israyɛl tɛka, mam ninga f bɛɛba fãa yãnde la mam pĩnd n wilga foom, tɩ m na tilga yiri f yĩnga. F pʋlemd sã n ta a daare tɩ f na n tɩ sak f saam dãmba, mam na n zẽka f yagens sẽn na n pʋg foom, la f yageng a ye maasem yĩnga, m na paas f rĩunga pãnga. Yaa yẽ n na n me rooga mam yĩnga; la mam na n vigla a naama zaoor kẽnkẽ, daar fãa yĩnga. Mam na n yɩɩ wala ba a yĩnga, tɩ yẽ yɩ wala biiga, mam yĩnga, la mam kõn zãag m yel-sõmd ne-a wa dĩm ninga sẽn denga foo zaoora zuga ye. Mam na kɩt t'a rɩ naam m yiri la m soolmẽ, daar fãa, la a naam zaoore na n lugla kẽnkẽ zamaan sẽn wate.» A Natã togsa rĩma gom kãensã la yɛla sẽn wat beooga fãa. Dĩm a Daviid kẽe n zĩnda Wẽnd taoore n yeele: «Mam yaa bõe, Soaala-Wẽnde, la m yir zema bõe, tɩ y zẽk-m woto fãa? La y kell n gesa rẽ wa zaalem, Naaba-Wẽnde, tɩ yãmb na n kãab noogo y yamba roogo, zamaan woko sẽn wat beoog yĩnga. Naaba-Wẽnde, y ges-m-la wa nin-kãsenga. Maam, a Daviid, na n yeela yãmb tɩ bõe n paase, waoogr ning yãmb sẽn waoog-ma poorẽ? Ad-y y sɩd nonga y yambã! Soaala, y nonglma sẽn labs yĩnga, y gesa y yambã la yaa tʋʋmd kãseng la y tʋm yã n le puk y ziiri. Soaala, d sã n tũ d tʋba sẽn wʋma, yãmb ka be taar ye. Tẽng zug ka, buud bʋgo n wẽnd yãmb buud a Israyɛl, buud y sẽn tũus y meng yĩnga, buud yʋʋr sẽn yi moogo, la sẽn kẽesd dabeem. Buudu y sẽn tɩ fãsg Ezipt ne pãng la tʋʋm bana? Yãmb tũusa y buud a Israyɛl n kõ y menga, t'a yɩ yãmb buudu daar fãa, la yãmba, Naaba-Wẽnd n lebg a Wẽnnaam. La marsã, koɛɛgã yãmb sẽn leok y tʋʋm-tʋmdã poorẽ, a yira poorẽ, bɩ y kɩt tɩ gomd kãng yɩ sɩd daar fãa la a pids wala y sẽn yeelã. Y sẽn pʋlem bũmb ninga da vaal ye la woto b na pẽg y yʋʋr zamaan woo zamaana. B na tõog n yeele: ‹A Israyɛl Wẽnnaam, Wẽnd ninga sẽn yaa a Israyɛl Soaala la dũni wã fãa Soaala, Wẽnd na kaoos-m m zaoorẽ!› Soaala, sɩd yaa yãmb meng n wilg m zaoorã la y wilg-m lame tɩ y na n kõ-m-la kamba sẽn na n wa led maam m zaoorẽ. Yaa rẽ me yĩng la a paam daoodo n yɛs y taoore n pʋʋsd-y. N-ye, yãmba, Naaba-Wẽnd, n kãab y tʋʋm-tʋmdã tɩ y na maan-a yel-sõmde! Bɩ y sak n ning a rooga barka t'a yals n kaoos yãmb taoor daar fãa. Yãmb sẽn ningd-a barka, Naaba-Wẽnde, Wẽnd na kɩt tɩ y barka pa ne a daar fãa!» Dẽ poore a Daviid tõoga Filisti rãmbã. A ning-b-la yãnde, a fãsga b nugẽ Gat ne a tẽn-toosa fãa. A Daviid tõoga Moab me, la Moabitsa sakame n yao-a fadgo. A Daviid tõoga a Adadezɛr, Soba dĩma, Amat tẽnga, yẽ da rat n yãaga a soolma n ta Efrat kʋɩlga. A Daviid reega a bilim-bilm tusri, n yõg wed-dʋʋdb tus a yopoe, la tãb-biis tus pisi; a Daviid pasa wiida nao-gĩini, a yãka bãmb koabg bala n base. Aramsã yii Damas n na n wa sõng a Adadezɛr, Soba dĩma la a Daviid kʋʋ Aramsã neb tus pisi. A Daviid ninga kombɛɛmb Aram tẽnga, Damas tẽn-peelmẽ; Aramsã lebga neb sẽn yaood-a fadgo. A Daviid sẽn da kẽngẽ fãa, Wẽnnaam da sõngd-a lame t'a tõog a bɛɛba. A Daviid deega sãnem gãndo, a Adadezɛr tãb-biisa sẽn da zãada n tall n wa Zerizalɛɛm. Tibat ne Kun, a Adadezɛr tẽnsẽ, a Daviid pãb n deega zũud al wʋsgo, la yaa ne rẽnna la a Salomo kɩt tɩ b maan ko-sĩnga, sĩn kãsenga, n paas zũud ra-lugã la teed a taabã. A Towu, Amat dĩma, sẽn wʋm t'a Daviid tõoga Soba dĩma, a Adadezɛr, tãb-biisa fãa, a tʋma a biiga, a Adoram, t'a wa pʋʋs a Daviid la a pʋʋs-a ne a zu-noogo a sẽn zab ne a Adadezɛr n tõog-a wã yĩnga, t'a Adadezɛr da yaa yẽ bɛyã. A Towu tʋma a Daviid teed buud toor-toore, sẽn ya sãnem, wanzurf bɩ zũudu. La a Daviid rɩka rẽ fãa n kõ Soaala-Wẽnd, n paas sãnem la wanzurfã a sẽn da reeg buud a taaba nengẽ: Edom, Moab, Amon, Filisti la Amalesitsa nengẽ. A Abisayi, a Seruya biiga, pãba Edom dãmba, yamsem longẽ, n tõog-ba, bãmb tus piig la a nii. A ninga kombɛɛmb me Edom, la Edomitsa fãa lebga a Daviid talse. A Daviid sẽn kẽndẽ fãa, Wẽnd da kõt-a-la pãng t'a tõog a bɛɛba. A Daviid rɩɩ naam a Israyɛl zãng fãa zugu; a talla a soolem dãmba fãa ne pʋ-peelem la zemsgo. A Seruya biig a Zoab n da ya a tãnsoaba. Sẽn bĩngda sɛbã da yaa a Ayilud biig a Zozafat. Maan-kʋʋdba da yaa a Ayitub biiga, a Sadok, la a Abiyatar biiga, a Abimelɛk. A Zoyada biiga, a Benaya, n da get Krɛt la Pelɛt rãmba yelle. A Daviid kambã n da so pipi zĩisi, a sɛɛgẽ. Dẽ loogr poore, a Naas, Amonit dĩma, kiime, t'a biig led-a a zaoorẽ. T'a Daviid yeele: «Mam na n maana a Anun, a Naas biiga, yel-sõmde, t'a ba maana maam neere.» La a Daviid tʋma neba tɩ b tɩ pʋʋs-a toogo, a ba wã kaalem yĩnga. La a Daviid tʋʋm-tʋmdba sẽn ta Amonitsa tẽngẽ, a Anun nengẽ, n na n pʋʋs-a toogã, Amonitsa kombɛɛmba yeela b naabã: «Fo tẽedame t'a Daviid dat n waooga f ba, la rẽ yĩng la a tʋm neb tɩ b wa pʋʋs-f toogã? Bãmb ka wa ka n na n gese, la b lɩɩse n paam n lub tẽn-kãnga bal bɩ?» Woto, a Anun yõka a Daviid sẽn tʋm b rãmbã n põng b toɛɛnga, n wõrs b futa pʋɩ-sʋka n ta b kɩgbã, n yaool n kõ-b sor tɩ b kuli. B wa n togsa a Daviid b sẽn yaal a neba yaoolg ningã, t'a tʋm ned a ye t'a zoe n tɩ seg neb niyns sẽn da yer futu sẽn da pa lut b yãndã. B yeel-b lame: «Bɩ y kell n pa Zeriko tɩ y toeemsã yi tɩ y yaool n wa.» Amonitsa yãeeme tɩ b bao beem ne a Daviid. Woto b yiisa ligd ka tɛka, wanzurf sẽn ta neb tusr la koabg zɩɩbo la b paama Mezopotami tãb-biisi la zabr bilim-bilm la wed-dʋʋdba, Maaka la Soba Aramsa nengẽ. Woto wã a Anun ne Amonitsa yii n tigma ne bilim-bilm tus pis-tã la a yiibu, tɩ Maaka dĩma me yi ne a neba n wa wẽ b tãb-sik Madaba yegende. A Daviid sẽn wʋm dẽ a tʋma a tãnsoab a Zoab ne a tãb-biis la a gãndaadã. Amonitsa yiime n tong taaba zabr yĩnga, tẽnga noorẽ, la nanams a taaba yalsa toore, ween-vɩʋʋgẽ. A Zoab sẽn mik tɩ zabrã na n kaooga a poorẽ la a taoore, a tũusa Israyɛl tãb-biisa sẽn ya-b gãndaad n yɩɩd b fãa wã tɩ b togl Aramsã. A kõ-la a yao, a Abisayi, tãb-biisa sẽn ketã n tong-ba n togl Amonitsa. A yeelame: «Aramsã sã n tõogd maam, bɩ f wa sõng-ma. Amonitsa sa n tõogd foom, m na wa n sõng-fo. Tall daoodo. Maan sũ-keelem, d buuda yĩnga, la Wẽnnaam tẽnsa yĩnga. La Wẽnd maan b yam sẽn date.» A Zoab tãb-biis kaooga zabre ne Aramsã, la Aramsã zoe bãmb taoore. Amonitsa sẽn mik tɩ Aramsã zoeeme, bãmb me ninga tĩiga, b basa a Abisayi, a Zoab yao wã, n leb b tẽngẽ. A Zoab leba Zerizalɛɛm. Aramsã sẽn mik t'a Israyɛl tõoga bãmba, b tʋma neba tɩ b tɩ bao Aramsa taaba sẽn be b kʋɩlga rʋʋndã. A Sofak, a Adadezɛr tãnsoaba, n da lʋɩ b taoore. B tɩ togsa a Daviid, t'a tigim a Israyɛl gilli n dʋʋg Zʋrdẽ kʋɩlgã n tɩ paam-ba, n gãneg tãpo b sɛɛgẽ. A Daviid tonga a neba n togl Aramsã tɩ b kaoog zabre. La Aramsã leb n wudga a Israyɛl taoore. A Daviid kʋʋ tãb-biis niyns sẽn zao-b bilim-bilma tus a yopoe, la tãb-biis niyns sẽn kẽnd-b tẽngã bãmb tus pis-naase; a kʋʋ tãnsoaba a Sofak. A Adadezɛr neba sẽn mik t'a Israyɛl tõog-b lame, b kosa a Daviid tɩ b bas tɩ zabra sɛ, la b lebga a Daviid tʋʋm-tʋmdba. Aramsa pa le sak n sõng Amonitsa ye. Yʋʋmd sẽn wẽke, dĩm dãmba sẽn mii n kẽnd tãp sasa ningã, a Zoab peega a tãb-biisã n tɩ zab ne Amonitse. A waa n gũbga Raba dẽ t'a Daviid bee Zerizalɛɛm. A Zoab tõoga Raba n lub-a, n sarem-a. A Daviid fõka naama pugl sẽn da be b wẽn-naand a Milkom zugu, n mik t'a zɩslem taa nin-tɩɩg zɩɩbo. Kugr a yembre sẽn yãgd a toore la sẽn be yõodo la b ra tablg-a. B rɩka puglã n fõgneg a Daviid. A yii tẽnga ne laog sẽn ka paood ye. A talla tẽnga rãmba n looge la a kõ-b-la tʋʋm teedo: sʋʋs sẽn kɩ yẽna, teed sẽn tar n saremd pʋt kaalem la lɛ sẽn na n kɛ tɩɩse. A maana boto ne Amonitsa tẽnsã fãa. A Daviid ne a tãb-biisã yaool n lɛɛg n waa Zerizalɛɛm. Dẽ poore, zabr n waa n kaoog ne Filisti rãmba Gezɛr tẽnga. Wakat kãng la a Sibkayi, Usa daoã, kʋ a Sipayi, Refayitg a ye. Filisti rãmba lebga yem-daado. La zabr n waa n le kaoog ne Filisti rãmbã. A Elanan, a Yayir biiga, kʋ-la a Lami, Gat dao a Goliyat yao. A kãnda raoog ra zema koeer-bõanga. Zab kãseng n le zĩnd Gat, la nin-daoog a yembre n da be beene, n tar nus-bi la nao-bi pisi la a naase, nug fãa nus-bi a yoobe, naoor fãa nao-bi a yoobe; yẽ me da yaa a Arafa yagenga. La a sẽn da tãoosd daoodo ne a Israyɛl yĩnga, a Zonatã, a Sama biiga, a Daviid kẽem biiga, yõk-a lame n kʋ. Nin-bãmb fãa da yaa a Arafa, Gat daoã yagense; la a Daviid ne a tãb-biisã n wẽ-b n kʋ. Bɛ-Kudga, Sʋtaana, yikame n na n sãam a Israyɛl yelle n kʋɩɩb a Daviid t'a sõd a soolma rãmba. A Daviid yeela a Zoab ne a tãnsoaben-dãmbã: «Kẽng-y n tɩ sõd a Israyɛl, sẽn sɩng Beerseba n tɩ ta Dã, n lebg n wa n togs-m tɩ m bãng m neba sõore.» T'a Zoab yeele: «M dĩma, ba Naaba-Wẽnd yalg y buudã ne a sẽn ka paoodã naoor koabga, bãmb fãa ka m naaba yems laa? M naab tʋlla sõadga bõe yĩnga? Yaa wãna tɩ b na n kɩt t'a Israyɛl maan yel-wẽnde?» La baasg zãnga, yɩɩ pakre ne a Zoab, t'a rɩk sore, n sa n sõd Israyɛl gilli, n yaool n lebg n wa Zerizalɛɛm. A Zoab kɩsa dĩma sõadgã sebre, buuda neba sõore; a Israyɛl zãng fãa da yaa tus-kẽemde la tus koabga, neb sẽn da minim tãpo, la a Zɩɩda da yaa tus kobs-naase la pisopoe, sẽn minim tãpo. A Zoab da pa sõd a Levi ne a Bẽnzame neba n naag ye, tɩ dĩma noor da yaa wẽng wʋsgo, a nifẽ. Noorã pa ta Soaala-Wẽnd yam ye, tɩ b sɩbg a Israyɛl. A Daviid yeela Naaba-Wẽnde: «Mam sẽn maan woto wã, mam beega al wʋsgo. La marsã bɩ y sak n kõ y yambã a yel-wẽnda sugri, tɩ sɩda mam maana yalemdo.» Wẽnd goma ne bãngda a Gad a Daviid sagenda: «Kẽng n tɩ yeel a Daviid: Wẽnd koɛɛg la woto: mam dɩgla f taoore sɩbgre buud a tã; bɩ f yãk a yembre tɩ m tõog n sɩbg-f wa f sẽn date.» A Gad kẽnga a Daviid nengẽ n yeel-a: «Naaba-Wẽnd koɛɛga la woto: Bɩ f yãke: Kom yʋʋm a tã, bɩ f bɛɛba sẽn na n digd-f tɩ f zoetẽ kiis a tã tõre, tɩ b sʋʋg yãgd n pʋgd-fo. Tõe n yɩɩ Wẽnd sʋʋga bɩ bã-longdem sẽn na n kẽ f soolmẽ, da-yɩten-daare, tɩ malɛk sɩbgd a Israyɛl gilli. La marsã bɩ f tagse, yaa koɛ bʋgo la f na n leok-m tɩ taas sẽn tʋm-b maama?» A Daviid yeela a Gad: «Yɩɩr kãsenga n tar maam! La ade, mam sẽn lʋɩt Soaala-Wẽnd nugẽ n são, tɩ Naaba-Wẽnd nimbãan-zoeer labsa la m yee n da lʋɩ ninsaalb nusẽ ye.» Wẽnd tʋma bãaga, bã-longdem, a Israyɛl sʋka, t'a Israyɛl neb tus pisopoe ki. Soaala-Wẽnd tʋma malɛka Zerizalɛɛm t'a tɩ sãam tẽnga zãnga; la a sẽn sɩng tẽnga sãoongo, Soaala-Wẽnd gesame la b sũur sãamame la b waa n yeela malɛka sẽn da sãamd tẽngã: «Sekame marsã, yõk f nugu.» Malɛkã da yɛsa a Orna, Zebuzitga zɛɛg sɛɛgẽ. A Daviid sẽn zẽk a nenga, a yãee Wẽnd malɛkã sẽn zẽk yĩngri bilfu, tɩ sʋʋg wõog n be a nugẽ, n teesd Zerizalɛɛm. A Daviid ne a nin-kẽemsã sẽn da yeelg sũ-pa-noang futã, wõgemdame n fõgneg b neng tẽnga. A Daviid yeela Soaala-Wẽnd: «Ka maam n maan yel-wẽnda bɩ? Ka maam n maan n yet tɩ b sõd neba bɩ? La nim bãmba, bãmb maana bõe? Bãmb ka tũud bal laa? M Soaala-Wẽnde, bɩ y nug sɩbg maam la a sɩbg m ba roogo, la bã-longdem da kʋ neb a taab ye.» Wẽnd malɛkã kosa a Gad t'a yeel a Daviid woto: «Kẽng n tɩ lugl maan-kugr a ye, Soaala-Wẽnd yĩnga, Zebuzitga a Orna zɛɛgẽ.» A Daviid kẽngame wala a Gad sẽn yeel-a wã. A Orna wẽneg a poorẽ n yãe malɛkã. A kamb a naasa sẽn da be ne-a wã zoeeme n tɩ solge, wakat kãng t'a Orna da pãbda a alkam. A Daviid taa a Orna nengẽ; a Orna gesame la a yãee a Daviid. Woto, a yi-la a zɛɛgẽ wã n wa wõgemd a Daviid taoore n fõgneg a neng tẽnga. A Daviid yeela a Orna: «Kõ maam f zɛɛga tɩ m me maan-kugri Naaba-Wẽnd yĩnga; kõ-a maam tɩ m na bao wanzurf ligd ninga sẽn zems ne a yaoodo la woto tẽn-kũuma na zãag ne buudã!» A Orna yeela a Daviid: «Bɩ y reeg zɛɛgã, m dĩma, n maan y yam sẽn dat ne-a. Ade, mam kõta yãmb m niisã yũ-noog maoong yĩnga, bilim-bilma yaa maoonga raado la y na n yãk be; alkama zom la y na n dɩk n tũnug maoongã; mam kõt-y-la rẽ fãa.» La dĩma a Daviid leoka a Orna: «M na n daa zɛɛgã n yao sẽn zems yaood ninga tɩ mam pa rat n deeg f sẽn so, n kõ Soaala-Wẽnd ye, la m pa rat n kʋ maoong ne bũmb m sẽn pa yiis m ligd n da ye.» A Daviid yao a Orna zɛɛga sãnem wakɩ koeems kobs-yoobe. A Daviid mee maan-kugra zĩ-kãnga, Soaala-Wẽnd yĩnga, n kʋ sugr kosgo maand a zugu; a yõka Soaala-Wẽnd sɛɛga tɩ b reeg a pʋʋsem, n zĩnd saag zugu n tʋm bugum maan-kugrã la maoongã zugu. Naaba-Wẽnd kõo malɛkã noore t'a lebs a sʋʋgã a wʋʋgẽ. Wakat kãnga, a Daviid sẽn mik tɩ Soaala-Wẽnd deega a kosgo, Zebuzitga zɛɛgẽ, a kʋʋ maando. Wakat kãng tɩ sɛka roogo, a Moyiiz sẽn da maan zĩ-pɛɛlẽ, Naaba-Wẽnd yĩnga, n paas maan-kugrã b sẽn da tar n kʋʋd maandã, bãmb b yiib fãa dag n keta Gabaõ kunkubra zugu. La a Daviid da pa tõog n ta, al beene, n yõk Soaala-Wẽnd sɛɛg ye, tɩ Soaala-Wẽnd malɛka sʋʋg da yɛɛs-a-la al wʋsgo. Yaa rẽ la a Daviid da gomd woto: «Yaa ka la wẽnd doogo la ad maan-kugri; yẽ zug la Israyɛl kamba tog n kɩs b maoong bũmbu.» A Daviid kõo noore tɩ b tigim sãamba fãa sẽn da be Israyɛl soolmẽ, la a yãka tʋʋm-tʋmdba sẽn na n pees kuga tɩ b me Naaba-Wẽnd doogo. A Daviid segla kut me zembala sẽn na n maan kaadse, kʋɩlensã yĩnga, n maan zũud sogdse zembala, al tɩ b ra ka tõe n mak b zɩslem sẽn zem to-to ye. A Daviid segla kʋgs raad ka tɛka. Sidõ rãmba ne Tir rãmba da waa ne ra-sĩdma al wʋsgo n kõ a Daviid. A Daviid da yetame: «Mam biiga a Salomo nan paooda la a pãng ka waoog ye, la roogã sẽn na n me Wẽnd yĩnga, tog n yɩɩ kãsenga la neere n yɩɩd rota fãa, tɩ b gomd a yelle la b pẽgd-a zĩis fãa la buud fãa soolmẽ. Mam na n segla a meebo, m biiga yĩnga.» A Daviid sẽn segl bũmb ning wẽnd dooga meeb yĩng t'a nan ket ne yõore, yɩɩ teed ka tɛka. A Daviid waa n boola a biiga a Salomo n kõ a noor t'a me roogo Naaba-Wẽnd, Israyɛl Wẽnnaama, yĩnga. A Daviid yeela a Salomo: «M biiga, mam da tʋlla ne m sũur fãa n me roogo, Soaala-Wẽnd yʋʋr waoogr yĩnga. La bãmb taasa maam koe-kãnga: ‹Fo raaga neb zɩɩm al wʋsgo, fo zaba zab bɛda, ka foom n na n me roogã mam yʋʋr waoogr yĩng ye, tɩ fo raaga zɩɩm wʋsgo mam taoore. Ade, fo na n doga biiga, a na n yɩɩ laafi baooda; mam na n kõ-a-la laafi ne yags fãa sẽn gũbg a soolem, tɩ b na n pʋd a yʋʋr t'a Salomo, la mam na kɩt t'a Israyɛl zĩnd ne laafi la yĩn-maasem, yẽ zamaanẽ. Yẽ n na n me roogo mam yʋʋr waoogr yĩnga, a na n yɩɩ m biiga, tɩ m yɩɩ a ba. La m na n vigl a naama zaoore, a Israyɛl sʋk daar fãa.› La marsã, m biiga, bɩ Wẽnd zĩnd ne foom tɩ f tõog n me b roog wala b meng sẽn tʋlge. Wẽnd na kõ-f gũusgu la yẽesem, bãmb sã n wa kõ foom naam Israyɛl zugu tɩ f vɩɩma me tũud b noya. Sɩda, fo sã n mao n tũ noya la saglsã, b sẽn kõ a Moyiiz a Israyɛl yĩnga, f sẽn maand na zĩnd barka. Aya! Keng f pɛlga la f maan sũ-keelem, da zoe rabeem la f ra yɛɛs ye. Ade, mam wɩnga ne m naongã n paam n segl roog bãmb yĩnga. M paama sãnem zɩslem sẽn ta neb tus koabg la pis-nu zɩɩbo, la wanzurf zɩslem sẽn yɩɩd rẽ naoor pis-tã. La sã n ya zũudã ne kutã, ned ka tõe n mak b zɩslem, tɩ waoogame al tɩ looge. La m segla daado ne kug me, la fo na le bao n paase. F tara tʋʋm-tʋmdb wʋsgo sẽn ya kug-peesdba la da-wãadba, sẽn tar yam, n mi tʋʋm buud fãa. Sãnema, wanzurfã, zũudã la kutã ned ka tõe n bãng b sẽn zem tɛk ye. Aya, yik n sɩng tʋʋmde, la Wẽnd na zĩnd ne foom!» A Daviid kõ-la a Israyɛl nanamsa fãa noore tɩ b sõng a Salomo. A goma woto: «Naaba-Wẽnd, yãmb Wẽnnaam ka be ne yãmb bɩ? La bãmb ka kõ laafi zĩig zãng fãa bãmb sẽn yõk tẽn-kãnga neba n ning mam nugẽ wã bɩ? Ges-y tẽn-kãens sẽn sulg b mens marsã Naaba-Wẽnd la b buuda taoore. Bɩ y mao n bao Naaba-Wẽnde, yãmb Wẽnnaam, ne y sũur fãa, ne y pãng fãa, la y me yãmb Wẽnnaam doogo. Tall-y koglgã, Soaala zooda kasetã ne a teedã, n tɩ bĩng b rooga pʋga, roog ning y sẽn na n me b yʋʋra waoogr yĩnga.» A Daviid sẽn lebg nin-kẽema n kʋʋl sũ-noog kʋʋlem, a kõ-la a biiga a Salomo naam t'a lebg a Israyɛl dĩma. A tigma a Israyɛl nanamsa fãa ne maan-kʋʋdba la Levitsã. B sõda Levitsa sẽn da tar yʋʋm pis-tã bɩ yɩɩd rẽ. B sẽn sõde, b mikame tɩ b dapa yaa tus pis-tã la a nii. A Daviid yeelame: «Bɩ y yãk bãmb sʋka neb tus pisi la a naase, tɩ b soog wẽnd doog tʋʋma, la b yãk tus a yoobe, tɩ b yɩ sɛb gʋlsdba, bʋ-kaoodba. B yãk tus a naase tɩ b pẽgd Soaala-Wẽnd ne yʋʋm teedã mam sẽn kɩt tɩ b maan bãmb waoogr yĩnga.» A Daviid welg-b-la sags-sagse: ad-a Gersõ saka, ad-a Keyat la a Merari sagse. A tũ-la a Levi kamba roto. A Gersõ kamb yɩ-la a Ladã la a Simeyi; A Ladã kamba yɩ-la a tãabo: a Yeyiyɛl, b kãsma, a Zetam, a Zowɛl. A Simeyi kamb yɩ-la a tã: a Selomit, a Aziyɛl, a Yaat. A Simeyi waa n le roga kamb a naase: a Yaat, a Ziza, a Yewus, a Beriya. A Yaat n da ya b kãsma, t'a Ziza yaa a yiib soaba, a Yewus la a Beriya pa rog kamb wʋsg ye, dẽ n so tɩ b naag bãmba n sõd roog a ye. A Keyat kamb yɩ-la a naase: a Amram, a Isar, a Ebrõ, la a Uziyɛl. A Aram kamba: a Aarõ la a Moyiiz; b welga a Aarõ toore t'a kõt Soaala-Wẽnd b kũun-sõma wã. Yẽ ne a kamba welga toore daar fãa yĩnga, tɩ b tʋʋmde ya b wis tɩdare Naaba-Wẽnd taoore la b kʋʋd maando la b sik b bark b buuda zugu. La sã n yaa a Moyiiz, Wẽnnaam nedã, b sõda yẽ kamba n naag ne a Levi roogo. A Moyiiz kamba: a Gersõ la a Eliezɛr. A Gersõ kamba: a Sebuwɛl, kãsma. A Eliezɛr biiga: a Reabiya, yẽnda a ye zãn-tãa. La sã n yaa a Reabiya yẽ kamba yɩɩ wʋsg-wʋsgo. A Isar kamba: a Selomit, kãsma. A Ebrõ kamba: a Yeriya, kãsma, a Amariya, a yiib soaba, a Yaaziyɛl, a tãab soaba, a Yekamam, a naas soaba. A Uziyɛl kamba: a Mika, kãsma, la a Isiya, a yiib soaba. A Merari kamba: a Mali la a Musi. A Mali kamba; a Elazar la a Kis. A Elazar kiime n ka rog bi-ribl ye, a ra roga kom-pugli bala. Yẽ ba-biig a Kis kamba peeg-b lame n maan b pagba. A Musi kamba yɩ-la a tãabo: a Mali, a Edɛr, a Yerimot. A Levi kamb la bãmba ne b ba-rãmb roto, la b ba rot nanamse. Bãmb la b sõdyã, ned fãa ne a yʋʋre; bãmb n da tʋmd wẽnd dooga tʋʋma, tɩ b yʋʋm ta pisi bɩ yɩɩd rẽ. A Daviid da yetame: «Naaba-Wẽnd, a Israyɛl Wẽnnaam, kõ-la b buuda laafi, la bãmb meng zĩi Zerizalɛɛm daar fãa yĩnga. Woto wã Levitsa ka na n le tʋk sɛka roogã ne teedã sẽn be a pʋgẽ wã ye.» Wala a Daviid yaoolem noora sẽn tʋlgã, b gʋlsa Levit rãmba yʋy, tɩ b sɩng tʋʋmde, b yʋʋm sã n ta pisi bala. La bãmb tʋʋmda da yaa Aarõ yagensa sẽn yet tɩ b maan bũmb ning bal wẽnd doogẽ, a sɩmannẽ, a ro-bõonesa pʋsẽ, rot niyns sẽn yeg-b wẽnd doogã. Bãmb n pekd te-sõma wã la b maan tʋʋm a taaba, wala: wẽ bur-sõma wã sẽn dɩkd n kõ Soaalã. Wa segl zoma sẽn na n tũnug ne maandã, miisda sẽn ka ningd bɩllã; ges bõn-kɩɩmdi wã yelle; ges teed niyns sẽn tar n magd woglem bɩ zɩslem. Soaala-Wẽnd pẽgr yibeoog la zaabrã maanda b nifẽ. Sẽn tog n kʋ b nifẽ yɛsa, yaa yũ-noog maoong buud fãa, vʋʋsg raare, kiuug pipi raare, kibs raare. Beoog beoog fãa tʋʋma sõor pitame la ka basd tɩ b wakata yõsg ye. Bãmb n gũud sɛka roogo la b gũud Sõmblem zĩigã. A Aarõ yagensã, b saam-biisã, n so tʋʋma sẽn tʋmd Soaala rooga pʋgã. Ad-a Aarõ yagensa sẽn pʋɩ to-to, tʋʋmda yĩnga. A Aarõ meng kamba yɩ-la a Nadab, a Abiyu, a Elazar la a Itamar. A Nadab la a Abiyu, denga b ba n ki, n ka rog kamb ye la yaa a Elazar la a Itamar n da tʋmd maan-kʋʋr tʋʋmde. Sẽn waa n kaoose, a Sadok, a Elazar yagenga ne a Ayimelɛk, a Itamar yagenga, sõnga a Daviid n welg maan-kʋʋdba sak-saka, n zems ne tʋʋmdã b sẽn kõ-bã. La b wa n mikame t'a Elazar kamba da tara neba n yɩɩd a Itamar kamba. Dẽ wã b welga a Elazar kamba sags piig la a yoobe, n welg a Itamar kamba sags a nii. B poeesame n kẽes ned kam fãa a tʋʋmnẽ, a Elazar kamba wala a Itamar kamba. Kẽer ra boondame tɩ wẽnd doog na-biisi, tɩ kẽer boond tɩ Wẽnd na-yir dãmba. Tʋʋmd pa yãk n ya a Itamar bɩ a Elazar kamb dẽnd bal ye, b kalma taaba. Yɩɩ dĩma a Daviid taoore, na-komsa taoore, maan-kʋʋd a Sadok taoore, a Abiyatar biig a Ayimelɛk taoore, maan-kʋʋdba la Levitsa buud nanams taoore, la tʋʋmda pʋɩɩra pʋɩ yã. La Levit dãmba sakẽ, sɛb-gulsd a ye, a Netaneyɛl biig a Semaya, n da rɩkd sebr zugu ned kam fãa tʋʋma sak la a raare. Pʋɩɩra pʋɩ woto: sã n paam taoor dãmb a yi sẽn yit a Elazar roogẽ, yãkda a ye, a Itamar roogẽ. Pipi poeerã yãka a Zoyarib, a yiib soaba yaa a Yedaya, a tãab soaba, a Arim, a naas soaba, a Seorim, a nu soaba, a Malkiya, a yoob soaba, a Miyamin, a yopoe soaba, a Asos, a nii soaba a Abiya, a wɛ soaba, a Zesuwa, piig soaba a Sekaniya, piig la a ye soaba a Eliyasib, piig la a yiib soaba a Yakim, piig la a tãab soaba a Upa, piig la a naas soaba a Yesebab, piig la a nu soaba, a Bilga, piig la a yoob soaba a Imɛr, piig la a yopoe soaba, a Ezir, piig la a nii soaba a Apisɛs, Piig la a wɛ soaba, a Petayiya, pisi soaba, a Ezekiyɛl pisi la a ye soaba, a Yakẽ, pisi la a yiib soaba, a Gamul, pisi la a tãab soaba, a Delaya, pisi la a naas soaba, a Maaziya. Yaa bãmb la b welg sags-sagse, tɩ b na n paam n tʋm wẽnd doogẽ wala b ba a Aarõ sẽn zãms bãmbã, wala Naaba-Wẽnde, a Israyɛl Wẽnnaam, sẽn da kõ-a noore. Ad-b sẽn gʋls b rãmba a Levi kamba sẽn kella sʋka: a Amram yagensẽ: a Subayɛl; a Subayɛl yagensẽ: a Yediya. A Reabiya roogẽ, yẽ ne a kamba: a Isiya, kãsma. A Isar yagensẽ: a Selomot; a Selomot kamb sʋka a Yaat. A Ebrõ yagensẽ: a Yeriya, kãsma, a Amariya, a yiib soaba; a Yaaziyɛl a tãab soaba; a Yekamam, a naas soaba. A Uziyɛl yagensẽ: a Mika; a Mika biiga: a Samir. A Mika ba-biiga: a Isiya; a Isiya biiga: a Zakari. A Merari yagensẽ: a Mali, a Musi la a Yaziya. A Yaaziya yagenga a Merari kamba: a Soam, a Zakur la a Ibri. A Mali yagensẽ: a Elazar; yẽ ka rog bi-ribl ye. A Kis kambẽ: a Yerameyɛl; a Musi kambẽ: a Mali, a Edɛr, a Yerimot. Yaa woto la b gʋls roog-roogo, a Levi yagensã. B poeesame n welg-ba, wala b sẽn maan ne b saam-biisi, a Aarõ kamba, dĩma taoore, a Sadok, a Ayimelɛk, maan-kʋʋdba la Levitsa kãsem-dãmb taoore. La b maana woto ne yao zʋʋga roogo wala b sẽn maan ne a kẽem dãmba. A Daviid ne a tãnsoaben-dãmba welga toore, b tʋʋmda yĩnga, yɩɩn-yɩɩndba a Asaf, a Eman la a Yedutun kamba: bãmb da vẽena ne Wẽnd gomd kelgr la a võor wilgri, n wẽed koala la pendse la kɛma. Ad neb niyns sẽn da ya-b yɩɩn-yɩɩndba. Ad-a Asaf kamba: Yaa a Zakur, a Zozɛf, a Netaniya la a Asarela; a Asaf da vẽena ne Wẽnd gomda kelgre la a wilgri. Yẽ n da yɩɩnde n tũud dĩma sẽn kose. Sã n yaa a Yedutun, yẽ kamba la woto: A Gedaliya, a Seri, a Yesaya, a Simeyi, a Asabiya, a Matitiya; bãmb b yooba la b ba wã ra wilgd a sẽn dat yɩɩll ninga. A meng ra vẽena ne Wẽnd gomd kelgre la a võor wilgri la a ra wẽeda pɛndga n pẽgd Soaala. Sã n yaa Eman, a Eman kamba sʋka; a Bukiya, a Mataniya, a Uziyɛl, a Sebuwɛl, a Yerimot, a Ananiya, a Anani, a Eliyata, a Gidalti, a Romameti-Ezɛr, a Zosebekasa, a Maloti, a Otir, a Maaziyot. Bãmb fãa da yaa bãngda a Eman kamba; Wẽnd da gomda ne a Eman la yẽ da reegda b goama n taasd dĩma tɩ dĩma mi Wẽnd sẽn dat t'a maam bũmb ninga t'a naama kɩ yẽgna. Soaala-Wẽnd kõ-la Eman Kom-dibli piig la a naase la kom-pugli a tã. Bãmb da sokda b ba yɩɩla wẽnd doogẽ. B ra wẽeda kɛma, pendse la koala, wẽnd doogẽ; bãmb ne a Asaf, a Yedutun la Eman da ka zãagd ne dĩma ye. B da zãmsa pẽgra yɩɩla neere, n yɩɩnẽ tɩ tũudẽ, Soaala pẽgr yĩnga. Bãmb ne b ba-biisa sõor da yaa kobs-yi la pis-nii la a nii. Sã n ya yɩɩn-yɩɩndba sẽn na n pʋg taab to-to, b maana poeere, nin-bɛda wala nin-bõonegã, karen-saam-dãmba wala karen-biisi. B sẽn poees pipi, lʋɩ-la a Asaf buudẽ, a Zozɛf zugu. A yiib soaba, yɩ-la a Gedaliya, yẽ ne a ba-biisi la a kamba, bãmb piig la a yiibu. A tãab soaba, a Zakur ne a ba-biisi la a kamba, bãmb piig la a yiibu. A naas soaba, yɩ-la a Isri, a kamba la a ba-biisi, bãmb piig la a yiibu. A nu soaba, yɩ-la a Netaniya, a kamba la a ba-biisi, bãmb piig la a yiibu. A yoob soaba, yɩ-la a Bukiya, a kamba la ba-biisi, bãmb piig la a yiibu. A yopoe soaba, yɩ-la a Yesarela, a kamba la a ba-biisi bãmb piig la a yiibu. A nii soaba, yɩ-la a Yesaya, a kamba la a ba-biisi, bãmb piig la a yi. A wɛ soaba, yɩ-la a Mataniya, a kamba ne a ba-biisi, bãmb piig la a yi. Piig soaba, yɩ-la a Simeyi, a kamba ne a ba-biisi, bãmb piig la a yi. Piig la a ye soaba, yɩ-la a Azarɛl, a kamba ne a ba-biisi, bãmb piig la a yi. Piig la a yiib soaba, yɩ-la a Asabiya, a kamba ne a ba-biisi, bãmb piig la a yi. Piig la a tãab soaba, yɩ-la a Subayɛl, a kamba ne a ba-biisi, bãmb piig la a yi. Piig la a naas soaba, yɩ-la a Matitiya, a kamba la a ba-biisi, bãmb piig la a yi. Piig la a nu soaba, yɩ-la a Yerimot, a kamba ne a ba-biisi, bãmb piig la a yi. Piig la yoob soaba, yɩ-la a Ananiya, a kamba ne a ba-biisi bãmb piig la a yi. Piig la a yopoe soaba, yɩ-la a Zosebekasa, a kamba ne a ba-biisi, bãmb piig la a yi. Piig la a nii soaba, yɩ-la a Anani, a kamba ne a ba-biisi, bãmb piig la a yi. Piig la a wɛ soaba, yɩ-la a Maloti, yẽ ne a kamba la a ba-biisi, bãmb piig la a yi. Pisi soaba, yɩ-la a Eliyata, la a kamba ne a ba-biisi, bãmb piig la a yi. Pisi la a ye soaba, yɩ-la a Otir, la a kamba ne a ba-biisi, bãmb piig la a yi. Pisi la a yiib soaba, yɩ-la a Gidalti, la a kamba ne a ba-biisi, bãmb piig la a yi. Pisi la a tãab soaba, yɩ-la a Maaziyot ne a kamba la a ba-biisi: bãmb piig la a yi. Pisi la a naas soaba, yɩ-la a Romameti-Ezɛr, la a kamba ne a ba-biisi, bãmb piig la a yi. Ad-y dagno-gũudba me ra welga sagse. A Meselemiya, a Kore biiga, a Abiyasaf yagenga, roga kamb a yopoe. Bãmb la woto: a Zakari, a bi-kẽenga, a Yediayɛl, a yiib soaba, a Zebadiya, a tãab soaba, a Yatniyɛl, a naas soaba, a Elam, a nu soaba, a, Zoana, a yoob soaba, a Eliyoenayi, a yopoe soaba. A Obɛd-Edom roga kamb a nii: a Semaya, a bi-kẽenga, a Zozabad, a yiib soaba, a Zoa, a tãab soaba, a Sakar, a naas soaba, a Netaneyɛl, a nu soaba. A Amiyɛl, a yoob soaba, a Isakar, a yopoe soaba, a Pewultayi, a nii soaba. Sɩd me Naaba-Wẽnd da ning-a-la barka. A biiga a Semaya doga kamba sẽn paam pãnga b buuda sʋka. Yɩɩ neb sẽn ka bas b meng poorẽ ye. Bãmb sẽn leok n yɛse. A Semaya kamba yɩ-la a Otni, a Refayɛl, a Obɛd, a Elzabad, ne b yaop a yiibu, gãndaad menga, a Eliyu la a Semakiya. Bãmb b yiiba la b ra pẽgd n yɩɩda. Bãmb fãa da yaa a Obɛd-Edom yagense. B fãa ra yaa sũ-keelem dãmba la neb sẽn ka yogd ne b tʋʋm ye. B ra yaa bãmb pisoobe la a yi. A Meselemiya ne a kamba la a yaopa sʋka neb piig la a nii n sɩd da yɩɩd b taaba, n da ya sʋk neba. A Osa, a Merari yagenga, roga kamb a naase: a Simri, yẽ da ka bi-kẽeng ye, la a ba da kõ-a-la kãsengo. A Ilkiya la a yiib soaba, a Tebaliya, a tãab soaba, a Zakari a naas soaba. A Osa ne a kamba la a ba-biisa ra yaa bãmb piig la a tãabo. Dagno-gũudba ne b kãsem-dãmba da naaga taab n tʋmd wẽnd doogẽ wã. B pʋɩɩme n wilg ned kam fãa sẽn na n gũ noor ninga. B poeesame n kõ nin-bɛdã wala nin-bõonegã, ned kam fãa a zĩiga. B sẽn poeese yaang noorã, lʋɩ-la a Selemiya zugu. Poeera wilgame t'a biig a Zakari n so goabg noorã; a Zakari, da yaa nin-yẽesenga, n mi saglgo. Poeer wilgame t'a Obɛd-Edom n so dɩtgo noore, t'a kamba so teeda sẽn bĩngd doog ninga noora gũubu. Poeer wilgame t'a Supim la a Osa n so nin-taoor noore, n tees Salekɛt (Tɩ-viuku) sor ning sẽn dʋʋd yĩngrã. Ad tʋʋmda sẽn pʋɩ to-to. Yaang kɩrenga, daar a ye Levitsa a yoobe; dɩtg kɩrenga, daar a ye, Levitsa a naase, goabg kɩrenga, daar a ye fãa Levits a naase; teed bĩngri zĩisẽ, roog a ye fãa, Levits a yi. Ro-gãasa noore, nin-taoor kɩrenga yaa Levits a naase, ro gãasa pʋga Levits a yi. Woto la dagno-gũudba, a Kore ne a Merari kamba, deeg b zĩisi. Levits a taaba, da geta arzɛgsa sẽn da be wẽnd doogẽ, arzɛgs sẽn da kõ Soaala-Wẽnde. A Ladã kamba, a Gersõ yagense, bãmb taoor dãmba yaa a Yeyiyɛli ne a kamba, a Zetam ne a yao a Zowɛl, bãmb n soog wẽnd dooga arzɛka gũudem. Sã n yaa a Amram, a Isar, a Ebrõ, la a Uziyɛl doogẽ, yaa a Sebuwɛl, a Gersõ biiga, a Moyiiz yagenga, n da ya arzɛka gũub naaba. A Sebuwɛl rogma yũug ra tɩ tonga ne a Eliezɛr, a Gersõ ba-biiga; ad-a Eliezɛr yagensã: a Reabiya, a Yesaya, a Zoram, a Zikri la a Selomit. A Selomit ne a ba-biisã, bãmb n da gũud arzɛgsã sẽn da ya Wẽnd soolma. Yaa arzɛk ninga dĩm a Daviid, rota nanamse, neb tusr tãnsoaben-dãmba, neb koabg tãnsoaben-dãmba la tãnsoaben-dãmb a taaba sẽn da rɩk n kõ bãmbã. Yaa arzɛgs b sẽn da zɛ tãpẽ la b yãk n maan Wẽnd pʋɩɩre, sẽn na yɩ-la n paas Naaba-Wẽnd rooga ziiri. Le paasa teed niynsi, bãngda a Samwɛl, la a Sol, a Kis biiga, la a Abnɛr, a Nɛr biiga la a Zoab, a Seruya biiga, sẽn da kõ Soaala-Wẽnde. A Selomit ne a saam-biisã n da so kũun bãmb fãa gũudem. A Isar yagens sʋka, a Kenaniya ne a kamba n da gʋlsde la b bʋʋd bʋʋdo, n welgd a Israyɛl yɛla ne a yagse tɩ kalwẽdg ra wa kẽ sʋk ye. A Ebrõ yagens sʋka, yɩ-la a Asabiya ne a ba-biisi, sũ-keelem dãmba, bãmb tusri la kobs-yopoe, n da get Israyɛl kamba soolma sẽn da be Zʋrdẽ nin-taoore n welgd yɛl niyns sẽn tõe n be bãmb ne Naaba-Wẽnde, n be bãmb ne dĩma sʋka, n dat welgre. A Ebrõ yagensa roogẽ, a Yeriya n da rɩt kãsengo. A Daviid naama yʋʋmd pis-naas soaba, b bao-la b rogma soy la b mikame tɩ b rogma yũug waa n tɩ tonga ne neb sẽn pid ne sũ-keelem, Yazɛr tẽnga, Galaad tẽn-peelmẽ. Yaa rẽ yĩnga la dĩm a Daviid tũus neb tus a yi la kobs-yopoe, n paas a Yeriya. Nin-bãmb yaa buud a ye rãmba la b ba rot nanamse, la dĩma yãka bãmba tɩ b ges a Rubẽ, a Gad ne a Manase bogre yelle, n welg yɛl niyns sẽn tõe n be bãmb ne Naaba-Wẽnd sʋka, bãmb ne dĩma sʋka, n dat welgre. Ad sebr ning sẽn sõdgd a Israyɛl kamba sẽn da kẽ dĩma tʋʋmẽ. B yaa b ba rot nanamse, neb tusri bɩ neb koabg tãnsoaben-dãmba, tẽns zãadba. Bãmb la dĩma bas ne a tãpa yɛla. Dĩma ra weel-b-la woto: Kiuug fãa a ra yãkda neb tus pisi la a naase. Kiuuga sã n ki, tãb-biis a taab n wat n deeg-ba. Ad kiuug fãa ne a tãnsoaben-dãmba, tãnsoab fãa ne a yʋʋre: Pipi kiuugu, a Yasobam, a Zabdiyɛl biiga, a da yaa Perɛs yagenga, la yẽ n da so tãnsoaben-dãmba fãa sẽn get-b tʋʋmda pipi kiuugã. Kiuug a yiib soaba, Awoyitga a Dodayi, t'a Miklot sõangd-a. Kiuug a tãab soaba, a Benaya, maan-kʋʋd kãsenga a Zoyada biiga. A Benaya da yaa gãndaoog menga. A sẽn waa n lebg gãndaad pis-tã wã naaba; a biig a Amizabad n deeg a zĩiga. Kiuug a naas soaba yĩnga, yaa a Zoab yao a Azayɛl. A biiga a Zebadiya n led a zĩigẽ. Kiuug a nu soaba yĩnga, Ezrayitga a Samut. Kiuug a yoob soaba yĩnga a Ira, Tekoa daoa a Ikɛs biiga. Kiuug a yopoe soaba yĩnga, Pelonitga a Elɛs, a Efrayim roogẽ. Kiuug a nii soaba yĩnga, a Sibkayi, Usa neda, Zareyitga. Kiuug a wɛ soaba yĩnga, a Abiezɛr, Anatot daoã, a Bẽnzame yagenga. Kiuug piig soaba yĩnga, a Marayi, Netofa daoa, Zareyitga. Kiuug piig la a ye soaba yĩnga, a Benaya, Pireatõ neda, a Efrayim doogẽ. Kiuug piig la a yiib soaba yĩnga, a Eldayi, Netofa daoa, a Otniyɛl roogẽ. Sẽn get-ba Israyɛl tẽnsa yelle: a Rubẽ sakẽ, da yaa a Eliezɛr, a Zikri biiga. A Simeõ sakẽ, da yaa a Sefatiya, a Maaka biiga. A Levi sakẽ, da yaa a Asabiya a Kemwɛl biiga. A Aarõ sakẽ, da yaa a Sadok. A Zɩɩda sakẽ, da yaa a Eliyu, a Daviid kẽem a ye. A Isakar sakẽ, da yaa a Omri, a Mikayɛl biiga. A Zabulõ sakẽ, da yaa a Yerimot, a Azriyɛl biiga. A Efrayim sakẽ, da yaa a Oze, a Azariya biiga. A Manase bogrẽ, nin-taoore, da yaa a Zowɛl, a Pedaya biiga. A Manase bogr sẽn da be Galaad, da yaa a Ido, a Zakari biiga. A Bẽnzame sakẽ, da yaa a Yaaziyɛl, a Abnɛr biiga. A Dã sakẽ, da yaa a Azarɛl, a Yeroam biiga. Woto la Israyɛl tẽnsoaben-dãmba. Sã n ya neba gill sõadga poorẽ, a Daviid pa sõd sẽn zems-b yʋʋm pisi bɩ sẽn pa ta rẽ ye, tɩ Soaala-Wẽnd da kãabame tɩ b na kɩt t'a Israyɛl fɩɩg n zeng ãds sẽn be yĩngri. A Zoab, a Seruya biiga, sɩnga sõadga la a ka baas ye, tɩ sõadga poorẽ, a Israyɛl da rɩɩ Wẽnd beem, la yaa rẽ yĩnga la sõadgã pa gʋls zãng a Daviid rĩung kibar sebr pʋgẽ ye. Taoor soaba sẽn da get dĩma arzɛka da yaa a Azmavɛt, a Adiyɛl biiga. Taoor soab sẽn da get dĩma kood sẽn da be tẽnsẽ, tẽn-bɛd la tẽn-bõonesẽ, la gasda pʋsẽ, da yaa a Zonatã, a Oziyas biiga. Taoor soaba sẽn da get pʋta koaadba da yaa a Ezri, a Kelub biiga. Taoor soaba sẽn da get bugsuntundã da yaa a Simeyi, Rama daoa. Taoor soab sẽn da get neb niyns sẽn da bĩngd-b dĩma rãama da yaa a Zabdi, Sefam daoa. Taoor soaba sẽn da get oliviye tɩɩse la tɩɩs niyns biis sẽn tõe n wõd kaam la sẽn da sel bãadẽ wã da yaa a Baal-Ana, Gedɛr daoa. Taoor soaba sẽn da get kaama bĩngrã da yaa a Zowas. Taoor soaba sẽn da get niisã b sẽn da kɩɩmd Sarõ bãoogẽ da yaa a Sitrayi, Sarõ tẽng neda. Taoor soaba sẽn get niisã b sẽn da kɩɩmd bãad a taabẽ, da yaa a Safat, a Adlayi biiga. Taoor soaba sẽn da get yʋgma wã yelle, a Obil, Ismayɛlitga. Taoor soaba sẽn da get bõn-yãansa yelle, da yaa a Yediya. Meronot daoa. Taoor soaba sẽn da geta wuba yelle, bʋʋsa la piisa yelle da yaa a Yaziz, Agritga. Yaa nin-bãmba n da ya dĩm a Daviid paoonga gũudba. A Zonatã, a Daviid ba-bila, da yaa dĩma sagenda, dag n yaa ned sẽn tar yam, n ya sɛb-mita, yẽ ne a Yeyiyɛl, Amonitgã, n da get dĩma kamba gʋʋlg yelle. A Ayitofɛl da yaa dĩma sagenda; a Usayi, Arkitga, da yaa dĩma zoa; a Zoyada, a Benaya biiga ne a Abiyatar n led a Ayitofɛl zĩigẽ; a Zoab da yaa dĩma tãnsoab kãsenga. A Daviid tigma Zerizalɛɛm Israyɛl kombɛɛmba fãa, buuda nanamse, sagsa nanamse, neb tusri la neb koabg tãnsoaben-dãmba, sẽn da gũud-b dĩma ne a kamba arzɛgse la b rũmsi, na-pagba gũudba, tãb-biisã, sũ-keelem dãmbã la zabr gãndaada fãa. Dĩma a Daviid yik n yalsa yĩngri la a yeelame: «M saam-biisi la m soolem dãmba, kelg-y maam. Mam tʋlga ne m sũur fãa n me roogo, la ro-kãng pʋg la b na n ning zooda kasetã, Wẽnd sẽn nong n likb meng zĩig ningã. M da tol n segla bũmba fãa, la Soaala-Wẽnd yeelame: ‹Ka foom n na n me roogã m yʋʋr waoogr yĩng ye, tɩ f yaa zab-zabda la fo daaga zɩɩm.› Naaba-Wẽnde, a Israyɛl Wẽnnaama, tũusa maam, m ba roog kamba fãa sʋka, tɩ m yɩ dĩma, n soog a Israyɛl daar fã. Sɩd me yaa a Zɩɩda buuda la b tũus yã t'a yɩ sora wilgda, la a Zɩɩda roogẽ, ya m ba roog la b tũus yã; la m ba-biis sʋka, taa bãmb yam tɩ b yãk maan tɩ m yɩ dĩma, n soog a Israyɛl gilli. Mam kamba fãa sʋka, tɩ sɩda Soaala-Wẽnd kõ maam kamb wʋsgo, yaa m biiga, a Salomo, la b tũus yã t'a zaoond naam zaoorẽ, n soog a Israyɛl gilli. Soaala-Wẽnd yeela maam: ‹Yaa fo biiga a Salomo n na n me mam doogo la m zaka tɩ mam yãk-a lame t'a yɩ m biiga la mam na n yɩ-la a ba. La mam segla naam sẽn kõn sɛ a yĩnga; a sã n kell n tũ wala a sẽn tũud dũnna, mam noya la m saglsã.› Bɩ rũnna tɛka, a Israyɛl gill fãa nifẽ, Wẽnd tigungu taoore, Wẽnd meng taoore, bãmb sẽn wʋmd d koɛɛgã, bɩ y mao n deeg b noya, n bʋgs-ba, n wʋm b sẽn date, n tõog n soog tẽn-noog kãnga la y wa bas-a ne y kamba tɩ b soog-a yãmb poorẽ, daar fãa yĩnga. La foom, m biiga a Salomo, bɩ f bãng f saamba Wẽnnaam, la f tũ bãmba, ne f sũur zãnga, ne f yalẽ fãa, tɩ Wẽnd fɛɛsda ninsaalba sũya la b mii neere tagsg buud b sẽn tagsde. Fo sã n baood-ba, b na n sak tɩ fo yãend ba; la fo sã n bas bãmba, bãmb me na bas-fo. Bɩ f maag f meng n tags tɩ b tũusa foom tɩ f me roogo, sẽn na n yɩ Soaala-Wẽnd doogo. Aya! Wẽnd na n kõ-f raoodo, sɩng tʋʋmde!» A Daviid wilga a biig a Salomo wẽnd doogã, sẽn na n sõog to-to, wẽnd doogã ne rotã sẽn na n gũbg-a wã, arzɛgsã sẽn na n bĩngd rot niyns pʋgẽ, roog ninga kuga walsa koglg sẽn na n bĩngẽ. A wilg-a-la a sẽn da tʋlg n me wã fãa sẽn sõog sebr zugu, wẽnd dooga sɩmande, dot niyns sẽn na n me n gilg-a wã, kʋɩlen-dotã sẽn na n pagd arzɛgsã la te-sõma wã b sẽn wat n kõt Naaba-Wẽndã. A kɩsa Levitsa la maan-kʋʋdba yʋy la b sagse, n kɩs sebr ninga sẽn wilgd tʋʋma sẽn na n tʋmd wẽnd doogẽ wã, n sõdg lagda sẽn na n tar n tʋmd wẽnd doogẽ wã. A wilga sãnema la wanzurfa zɩslem sẽn na n ta to-to tɩ b paam n dõog sãnem bɩ wanzurfa teedã, tɩ teed kẽer tog n dõoga ne sãnem tɩ kẽer dõog ne wanzurfu. A wilga sãnema bɩ wanzurfa sẽn na n dɩk n dõog fitilsa ne b roagendgã, tɩ fitils kẽer tog n dõoga ne sãnem, tɩ kẽer dõog ne wanzurfu. A wilga sãnema sẽn na n yãk n dõog sãnem te-roagendg ning Soaala bura sẽn na n dɩgend a soab zugã, n wilg wanzurfa sẽn na n yãk n dõog wanzurfa te-rogendse. A wilga kuta zɩslem, sẽn na n dɩk n kud nemda kõsã, n dɩk n kud zɩ-mesdma laase; n wilg sãnema la wanzurfa zɩslem sẽn na n dɩk n dõog la-bõonesã la la-bɛdã, tɩ kẽer tog n dõoga ne sãnem tɩ kẽer dõog ne wanzurfu. A wilga tɩdara maan-kugra sẽn tog n kud ne sãnem yʋllã zɩslem. A wilg-a-la bilim-bilm sõnga sẽn na n kud to-to, n paas sãnema malɛgsa sẽn na n dõog to-to, malɛgs niyns sẽn yɛdg b pɩgsa kuga walsa koglga linga zugã. A Daviid yeelame t'a sẽn sõdg bũmb ninga fãa bee sebra zugu, sebr ninga a sẽn paam Soaala-Wẽnd nengẽ la sẽn wilgd tʋʋma fãa sẽn tog n tʋm to-to n pids b raabo. A Daviid baasa a koɛɛgã n yeel a biig a Salomo woto: «Wɩsg f menga, keng f sũuri, da zoe rabeem ye, da rig ye, tɩ Naaba-Wẽnd, m Wẽnnaama, bee ne foo. B kõn mong foom b pãng la b sõngre al tɩ f wa baas tʋʋma f sẽn na n sɩngã. Ad-y Levitsa la maan-kʋʋdba sẽbga b kalle, wẽnd dooga tʋʋm yĩnga. Ad-y mitba yik n na n wilga b tʋʋm-minim, ad-y yamleoogo tʋʋm-tʋmdba, la buuda kãsem-dãmba na n tũu f sẽn na wilg-ba tɩ tʋʋmda kẽn neere.» Dĩm a Daviid yeela zãma wã: «M biiga Salomo bala la Naaba-Wẽnd tũus b toore. La ade, a yʋʋma sõor nan paooda la a pãnga, ka sek ye, tɩ tʋʋmda bedmame. Ka ninsaal yĩng la rooga na n me ye, yaa Naaba-Wẽnd yĩnga. M segla m Soaala la m Wẽnnaama roog ne m pãng fãa. Sẽn tog n yɩ sãnem fãa na n dõoga ne sãnem. Sẽn tog n yɩ wanzurf fãa, na n dõoga ne wanzurfu. Sẽn tog n kud ne kut fãa tog n kuda ne kutu. Sẽn tog n dõog ne zũudu na n dõoga ne zũudu. Sẽn tog n maan ne raoog fãa na n yɩɩ raoogo. Kugr sẽn tog n ning zĩig ninga b na ning-a: kug sẽn yãgd b toore, kug-neeba, kug gʋlem-gʋlem, kug sẽn mobgd ne sãnem, t'a lebg faong bũmbu, kug sẽn peel wa goore. Sẽn be me, m sẽn dat m Soaala roog ne m sũur fãa wã, m le paasda m sẽn tare tɩ ya m meng rẽnna, sãnem bɩ wanzurfu; m kõta rẽ fãa ne yamleoogo, m Soaala roog yĩnga. M sẽn kɩt la woto: yaa sãnem sẽn sek neb tus a nu zɩɩbo sãnem sẽn yi Ofir. Yaa wanzurf sẽn sek neb tus piig la a yiib zɩɩbo, wanzurf sẽn ka lagem ne rẽko; wanzurf kãng la b na n maneg n tablg wẽnd dooga lalse. La yãmb sʋka, ãnda n na n sak rũnna n dɩk n kõ wẽnd dooga yĩnga, a sãnem, a wanzurfu? Ãnda n dat n sõng tʋʋm-tʋmdba ne b beoog-beoog fãa yaoodo?» Ad Israyɛl buuda kãsem-dãmba, sagsa rãmba, tusr bɩ koabg tãnsoaben-dãmba, sẽn get-b dĩma tʋʋma sẽn kɩs ne yamleoogo Naaba-Wẽnd dooga yĩnga. Ad kũuna sẽn yɩ a soaba: Sãnema zɩslem: neb tus a nii la kobs-nu zɩɩbo. N le paas sãnem ligd dɩtem bãmb wakɩ koeems tus piiga. Wanzurfa zɩslem: neb tus pis-tã zɩɩbo. Zũuda zɩslem: neb tus pisoob zɩɩbo. Kuta zɩslem: neb tus koabg la pis-nu zɩɩbo. Rẽ fãa waa n paasa kug neeba neb kẽer sẽn tall n wa wã la b rɩka rẽ fãa n kɩs a Gersõ yagenga a Yeyiyɛl, wẽnd dooga yĩnga. Neba sũur yɩɩ noogo b sẽn maana yĩnga. Yɩɩ ne b sũur zãnga, la neba tʋlg n maan bũmb, Naaba-Wẽnd yĩnga. Dĩma a Daviid me sũur yɩɩ noog wʋsgo. Woto wã dĩma pẽga Naaba-Wẽnde b fãa taoore. Ad-a sẽn yeele: «Israyɛl Wẽnde, sẽn ya tõnd Wẽnda, soog-y pẽgre zamaan buud fãa! Yãmb n so kãsengo, n so neerem, n so naam, n so ziiri. Yãmb n so sẽn be yĩngri la tẽng zug fãa. Yãmba, Naaba-Wẽnde, n so naam. Yãmb zaoor vigla al yĩngr-yĩngri. Arzɛk la ziir yita yãmb nengẽ. Yãmb la bũmb fãa Soaala, y nug zãada pãng la tõogo. Yãmb nug n zẽkd ninsaala, yãmb nug n vigind naam. Marsã, Soaala, d pʋʋsda yamb barka, d balemda y yʋʋr, t'a sãda zĩis fãa. Maam la a bõe, la m neba pãng bela b yɛ tɩ d kãab-y wala d sẽn kãabã? Fãa yita yãmb nengẽ, la yaa yãmb nugẽ la d deeg d sẽn lɛɛg n kõt yãmbã. Tõndo, wala d ba rãmba, tõnd yɛsa yãmb taoore wa sãamba. D tẽng zug vɩɩma loogda wala sulunsuku, la d ka saagd t'a na gɩmb n ka loog ye. Naaba-Wẽnde, d Wẽnnaam, d sẽn sam bũmb niyns fãa y rooga meeb yĩngã la y waoogr yĩnga yita y nengẽ la yãmb n so fãa. Soaala-Wẽnde, m tara kaseto tɩ y mii sẽn be y kamba sũurẽ la y sẽn pẽgd yaa pʋ-peelem. Y yãeeme tɩ yaa ne pʋ-peelem la m kãab y rẽ fãa. M yãee ne sũ-noogo, y buuda neba sẽn yas y taoor dũnna la b sẽn kãab-y bũmb ningã. Naaba-Wẽnd, d ba a Abraam, a Izaak la a Zakoob Wẽnnaam, deeg-y d kũnna fãa n sooge. Tũ-y rẽ n segl y buuda sũuri t'a kẽ yãmba. Kõ-y m biig a Salomo sũur sẽn kis wẽnga t'a tõog n deeg y noya, y salgsã, y sẽn wilg fãa n wa paam n me roog ning m sẽn segl y yĩngã.» Dẽ poore a Daviid yeela zãma wã: «Pẽg-y Naaba-Wẽnd y Wẽnnaam!» Tɩ zãma wã fãa kils Naaba-Wẽnd, b ba rãmb Wẽnde. B yĩgimdame la b wõgemda Naaba-Wẽnd la dĩma a Daviid taoore. Vẽkembeoogo, zãma wã kõo Wẽnd yũ-nood maando la maand dɩtse, yɩɩ lols tusri, pe-raad tusri, pe-bi tusri, ne kũun niyns sẽn tũnugd maandã, n paas sugr kosg maando, a Israyɛl yĩnga. B rɩɩme, b yũu ne sũ-noog baraare, Naaba-Wẽnd taoore. B yãka a Daviid biig a Salomo n kõ-a naam, b pʋdga kaam a zugu t'a lebg dĩma, n pʋdg a Sadok zug t'a lebg maan-kʋʋda. A Salomo zaoonda Wẽnd sẽn kõ b rãmb naama zaoorẽ. A rɩɩ naam a ba a Daviid zĩigẽ. Bũmb fãa sak-a lame, neba fãa saka-a lame. Tãnsoaben-dãmba fãa, a Daviid gãndaadã la a kamba meng reega a Salomo noore. A Israyɛl kamba nifẽ, Wẽnd zẽka a Salomo naama. B kõ-a-la ziiri. Sẽn deng-b yẽnda a Israyɛl zaoorẽ wã zɩɩ n paam a taar ye. A Zese biig a Daviid rɩɩ naam Israyɛl zãng zugu. A rɩɩ naam yʋʋm pis-naase, yʋʋm a yopoe Ebrõ, yʋʋm pis-tã la a tã Zerizalɛɛm. A kʋʋla sũ-noog kʋʋlem, n tɩg ne raare, n tɩg ne arzɛka, n tɩg ne ziiri, n yaool n ki. A Salomo n dʋ a zaoorẽ. A Daviid kibare, pipi raare n tãag a yaoolem daar pa gʋls bãngda Samwɛl sebra pʋgẽ bɩ? Pa gʋls bãngdba a Natã la a Gad kibarẽ bɩ? Sɛb kãens togsa a naama sẽn yɩ a soab zãnga, a gãndalsem, a zaka pʋgẽ vɩɩm, a vɩɩma ne Israyɛl nanamse la dũni wã nanams a taaba. A Daviid biig a Salomo naama waa n paama pãnga. Naaba-Wẽnde, a Wẽnnaama, da bee ne-a. B zẽka a naam n ta naam zĩigẽ. Dẽ la a tigim a Israyɛl gilli, tãnsoaben-dãmba sẽn da rɩt naam neb tusr bɩ neb koabg zugu, bʋ-kaoodba, kombɛɛmba, sags kãsem-dãmba gilli. B tigma taaba, bãmb ne a Salomo, n dʋ Gabaõ tãnga tɩ be la b ra bĩng Sɛka roogo, roog ninga a Moyiiz, Wẽnnaam neda, sẽn da kɩt tɩ b ti Wẽnd yĩng we-raoogẽ wã. Sã n ya Wẽnd zooda kasetã, a Daviid yaool n da yiis-a-la Kiriyat-Yearim n tɩ bao zĩig n bĩng-a Zerizalɛɛm, zãnd a to tẽngre. A Uri biiga la a Ur yagenga, a Besaleyɛl, da kuda zũud maan-kugri la b da rɩgl-a-la wẽnd dooga taoore. Ad-y yaa yẽ sɛɛgẽ la a Salomo tigim a zãma wã n na n waoog Naaba-Wẽnde. Yaa maan-kugr kãng zugu, la Soaala-Wẽnd taoore, la a Salomo kɩt tɩ b rʋʋ n kʋ yũ-noog maoong ne rũms tusri. Yʋng sẽn ta, Soaala-Wẽnd lika a Salomo n yeel-a: «F sẽn dat tɩ m kõ-f bũmb ning bɩ f kose.» T'a Salomo leoke: «Yãmb maana neer wʋsgo ne m ba a Daviid la y kõ-m-la naam a zaoorẽ. Soaala-Wẽnde, y pidsa kãabg ning y sẽn da kãab m ba a Daviid, tɩ marsã y kõ-m-la naam bu-yaleng zugu, buud neb sõor sẽn ta tẽnga bĩisri. Dẽ yĩnga kõ-y maam yam la bãngre, tɩ m tõog n zã m meng neere, y buuda taoore. Ãnda n tõe n zã bu-yalengo wa buud kãnga?» Dẽ la Naaba-Wẽnd leok a Salomo: «Sẽn ya fo raabã, tɩ fo pa kos arzɛka, n pa kos sãnem, n pa kos ziiri, n pa kos f bɛɛba wãabo, n pa kos yõ-woko f meng yĩnga, f sẽn kos yam la bãngre n tõog n zã m sẽn kõ-f neb niynsã, ad yaa yam la bãngr zulunga la m na n kõ-fo. La m na n paasa f arzɛka, la f ziiri wala dĩm dãmba sẽn deng-b fooma bɩ sẽn na n wa-b fo poorẽ wã sẽn ka na n tõog n paam abada.» Dẽ poore, a Salomo zãaga ne sɛka roogo, a yii Gabaõ n leb Zerizalɛɛm. A dɩɩ naam Israyɛl. A Salomo baoo bilim-bilm la wiidi. A bilim-bilm yɩɩ tusri la kobs-naase, a wed-dʋʋdba tus piig la a yi. A tɩ kẽesa kẽer tãnsoben-tẽnsẽ, n kẽes kẽer n pẽneg a meng Zerizalɛɛm. A Salomo yĩnga, Zerizalɛɛm pʋgẽ, wanzurf la sãnem yãeebo ra pa toog n yɩɩd kugr ye. Tɩ-bɛda me ra yaa wɛɛla wa yɩls, baoog noore. Yaa Musri la Koa la a Salomo wiida ra yita. Yaa Koa la a Salomo neba ra kẽnd n daad-ba. B sã n lebg n watẽ, b tekd n da bilim-bilm Ezipt. Bilim-bilm a ye da raada wakɩ koeems kobs-yoobe, tɩ weef ya wakɩ koeems koabg la pis-nu. Ititsa la Aramsa dĩm dãmb fãa da raada b rẽnna a Salomo neba nengẽ. A Salomo waa n yeelame tɩ b me roog a ye Soaala-Wẽnd yĩnga la b me a meng na-yiri. A Salomo rɩka neb tus pisopoe, teeda tʋkr yĩnga, n dɩk tus pis-nii n na n vigs la b pees kug tãnga zugu, n dɩk neb tus a tã la kobs-yoobe sẽn na n ges-b tʋʋmdã. Dẽ poore a toolame tɩ b tɩ yeel Tir dĩma a Iram woto: «Maan wala f sẽn maan ne m ba a Daviid n tool-a ra-sĩdma t'a me a na-yirã. Sã n ya maam a biigã, yaa roog la m dat n me Naaba-Wẽnd, mam Wẽnnaama, waoogr yĩnga. M datame tɩ wakat buud fãa, a Israyɛl pʋgẽ, bɩ tɩdar tõog n wis Naaba-Wẽnd taoore, tɩ bura b sẽn kõt bãmba tedg b taoore n ka vaanẽ, tɩ yibeoog la zaabr paamd a yũ-nood maando, tɩ vʋʋsg raare, ki-paala la tig-raase me paam b rẽnna, wala Soaala-Wẽnnaam sẽn yalse. Roogã m sẽn dat n me wã na n yɩɩ ro kãsenga, tɩ tõnd Wẽndã n yɩɩd fãa. La sã n ya sɩda, yĩngr saasa sẽn ka tõe n deeg a soaba, ãnda n tõe n me roogo n kõ bãmba? La sã n ka m sẽn dat n dʋʋs tɩdara yũ-noogã b taoorã, m na n mee rooga bõe yĩnga? Tʋm ned sẽn mi sãnem, wanzurfu, zũudu, la kut tʋʋmd neere, ned sẽn tõe n wʋg peende t'a yɩ moomde, miuugu, mismiuugu, ned sẽn mi bõn-neeb peesgo. A na n waa Zerizalɛɛm, Zɩɩda tẽn-peelmẽ, n naag mam nebã, mitba sẽn zĩnd-b ne m ba a Daviid. Tʋm Libã tɩ b wa kõ-m ra-sĩdma wa kʋgse, la sɩɩse. M wʋmame tɩ f nebã mii Libã tɩɩsa kɛɛbo. M neba na naag fo nebã n tʋm. B na segl daad wʋsgo tɩ yira m sẽn dat n me wã bedrema la a neerma na n yɩka pelense. Ra-kɛɛdba yĩnga, m na kõ alkam zom pet tus pisi, alkam kɛgeng zom pet tus pisi, rãam lagd tus pisi, kaam tʋgd tus pisi.» Tir dĩma, a Iram, gʋlsame n leoke: «Naaba-Wẽnd nonga b buudã, b sẽn kõ-a dĩm wala yãmb to.» A paasame: «Israyɛl Wẽnnaam paam pẽgre! Bãmb n naan yĩngri la tẽnga. Bãmb n kõ a Daviid bi-sõngo sẽn pid ne tõog-m-meng la pãnga t'a na n me roog n kõ a meng la a me roog n kõ Naaba-Wẽnde. Rũnda bala, m tʋmd-f-la ned sẽn mi tʋʋmd sõmbo: yaa a Uram-Abi. A ma yaa a Dã buud paga, t'a ba ya Tir neda. A mii sãnem tʋʋmde, wanzurfu, zũudu, kutu, kuga, daado. A tõe n wʋga peen moonde, mismiuugu, miuugu. A tõe n wʋga beren-dɩgre gĩs bãanese la a yũnug pɛɛl kẽer tɩ wẽneg saag-paga a Ninanina. A tõe n peesame bɩ n dõog bũmb fãa tɩ wẽnda. Yẽnda n na n tʋm ne yãmb nebã la y ba a Daviid sẽn bas b rãmbã. Yãmb ye n sõng ne alkam pɛɛlga, alkam kɛgenga, kaama la rãama, wala y sẽn togsã. B tool dẽ marsã tɩ wa. Tõnd na kɛ Libã tɩɩsã wala y sẽn dat tɛka. D na rugs b koomẽ n wa Zafa. Y na yaool marsã n sõng tɩ b ta Zerizalɛɛm.» A Salomo tʋlg n bãnga sãamba fãa sẽn be Israyɛl tẽng sõore. A rɩka a ba a Daviid sõadga sebre la a mikame tɩ yaa tus koabg la pis-nu la a tã la kobs-yoobe. A Yãka neb tus pisopoe tʋkr yĩnga, tus pis-nii kuga peesg yĩnga, tus a tã la kobs-yoobe tʋʋmda gesg yĩnga. Yɩɩ Zerizalɛɛm, Soaala-Wẽnd sẽn wilg a Ba a Daviid t'a me wẽnd dooga zĩig ningã, yaa zĩ-kãng la a Salomo me wẽnd doogã. Yɩɩ Zebuzitga a Orna zɛɛgẽ. Yɩ-la a naam dɩɩb yʋʋmd a naas soaba, kiuug a yiib soaba. A Salomo sõoga wẽnd dooga woto: a woglem yaa pĩnd kãntɩɩsã pisoobe, a yalem kãntɩɩs pisi. A Salomo gesa wẽnd dooga noorẽ n ning zãongo. Zãonga woglem yaa kãntɩɩs pisi, wa rooga meng yalem. A zãndlem yaa rooga meng zãndlem: kãntɩɩs pisoobe. A baoo sãnem meng n kɩt tɩ b tablg a pʋga zãnga. A baoo ra-sĩdma n ka rooga lalse n lɛɛg n tablg sãnem, n ning sãnem komse, tɩ sãnem pãneng luunẽ. A yãka zĩiga n ning kug sẽn pɩnda. Sãnema yii Parwayim. Sãnem kãng n tablg roogã, a ra paadsã, a lalsã, a peemleesã. A rõoga malɛgse n tablg lalsã. A yaoolame marsã n me sõmblem doogã. Yẽ me woglem la a yalem da yaa kãntɩɩs pisi. A woglem zemsa ro kãsenga yalem. A rɩka sãnem meng n tablg-a. Sãnema taa neb tusr zɩɩbo. Sẽn da ka fãa ra kaa ne sãnem kaadga. B maga kaadg fãa zɩslem: kuten-giling rẽnna. Yĩngr dota fãa tablga sãnem. Sõmblem dooga pʋgẽ a ninga malɛgs a yiibu. Yõga ne zũudu n yaool n bolg sãnem. Malɛgsa ra yɛsa yĩngri. B ra yega taaba la b nensa ra wẽnemdame n tees rooga noorã. Malɛk fãa pɩgs a yiiba ra tẽega kãntɩɩs piiga. Malɛk fãa pɩgsr a ye da sɩɩsda rooga lalga, t'a pɩgsr a to wã ra sɩɩsd malɛk a to rẽnd, tẽnsʋka. Fãa yaadma yaa kãntɩɩs pisi. Peen-lutga sẽe ne peen-mismiuugu, peen-moomde pɛɛl sẽn yũnug tɩ wẽnd saag-pag a Ninanina. Pɛɛla me buka malɛgs wẽnego. Dooga noorẽ, a yalsa kut ra-lug bɛd a yi. B woglem taa kãntɩɩs pis-tã la a nu. B rogla kut na ta kãntɩɩs a nu n kʋ ra-luga zutã. A yagla kut ra-luga zutu kut pãneng sẽn lɩʋs ne vãad la tɩ-biis sẽn wẽnd pooloomse, bãmb na ta koabga. Yaa dooga noorẽ la b yals kut ra-lugã, a ye rɩtgo, a ye goabga. Rɩtg soaba boolame tɩ Yakẽ, a ka tõe n ka yalse; goabg soaba boolame t'a Boaz, a pãnga. A Salomo maana zũud maan-kugri; a woglma taa kãntɩɩs pisi, a yalem kãntɩɩs pisi, a zãndlem kãntɩɩs piiga. A yẽnega zũudu n maan sĩng sẽn ya bedr-bedre, n pʋd-a tɩ mogre. A noora yalem yaa kãntɩɩs piiga, a yaa gilga. A zulum yaa kãntɩɩs a nu; gĩsg sẽn ta kãntɩɩs pis-tã bal n tõe n mobg-a n sege. Rũms sẽn wẽnd niis la b naan n ning sĩnga noore, n gilgi, naoor a yiibu. Sõta bãmb piig, kãntɩɩg a ye zugu. Fãa naaga ne sĩngã n dõog wakat yɛnga. Ko-sĩnga da roga zũud niis piig la a yi zugu. A tãab geta rɩtgo, t'a tãab get nin-taoore, t'a tãab get goabga, t'a tãab get yaanga. Sĩnga da roga bãmb zugu. B seesa ra togla pʋgẽ. Sĩnga taglem yaa nug pʋga. A noora lɛɛ wa laaga, wa lɩɩng puugu. A ra tõe deega rʋg bɛd sẽn ta tus a yi, rʋk fãa sã n pit ne ko-yʋy a tãabo. B maana zũud sĩn-bi n tong a nu rɩtgo, n tong a nu goabga, maanda rũmsa pegb yĩnga. Yaa ko-sĩnga pʋga la maan-kʋʋdba ra pekd b mense. B rõoga sãnem fitils roagends piiga tɩ b ra tog n yɩɩ piiga, ro kãsenga pʋga, a nu goabga, a nu rɩtgo. B maana te-roagends piiga n ning b ro-kãsenga pʋga, a nu rɩtgo, a nu goabga. B maana zɩ-mesdem laas koabga. B maan-b-la ne sãnem. B maana zak kãsenga, maan-kʋʋdba yĩnga, ne a kʋɩlense la kʋɩlensa tablga ne zũudu. Ko-sĩnga ra tara a zĩiga. A ra bee sẽn lebd rɩtg bilf, yaanga. A Uram-Abi maana tompɛglem laase, kardo, zɩ-mesdem laase. A maana a Salomo sẽn da kos a bũmb ning fãa wẽnd dooga yĩnga. Le paasa kut ra-lug bɛd a yiibã, ne kutã sẽn dogl b zugu n paas b yalma. N paas gãms a yiibu sẽn da mobg ralugsa zugẽ kutã. N paas tɩ-biisa sẽn wẽnd pooloomse; bãmb kobs-naase n da yag gãmsã n tong rũns a yiibã. N paas sĩn-bi piiga la b roagendsã. N paas mogrã, yẽnda a ye bala, ne niis piig la a yiibã sẽn da be a tẽngrã. N paas la-zulumsã, tompɛglem laasã, kardã, bãn-sɩlemsã sẽn tar n yaasd nemdã. D yeel bala t'a Uram-Abi sẽn da rõog teed niynsa fãa wẽnd dooga yĩnga, a da rõog-b-la ne zũud sẽn ya yɩlemde, wala a Salomo sẽn da kose. Yɩɩ Zʋrdẽ bãoogẽ la a yõg-ba, Sukot la Seredata sʋka. Boaaga yɩɩ yagd sõngo la yagd taok boaaga. A Salomo kɩtame tɩ b maan bũmb fãa zembala al tɩ b pa tõe n geelg zũuda sẽn dɩk n tʋma zɩslem ye. A Salomo le kɩtame tɩ b rõog teed a taaba ne sãnem: ad sãnem maan-kugrã, te-roagendsã, bura kũun yĩnga, fitilsã ne b roagendse, fitils sẽn dõog ne sãnem, sõmblem dooga yĩnga tɩ b ra tog n wid a pʋgẽ. Paas-y puudã, fitilsã, wõrsdsã sẽn maan ne sãnem sẽn yɩlg zãnga. Paas-y sʋʋse, zɩ-mesdem laasã, ko-teesã, wisda laasã, la laas a taabã. Paas-y wẽnd dooga noya, sõmblem dooga kʋɩlensã, zaka kʋɩlensã, bãmb me yɩɩ sãnem. Wẽnd dooga tʋʋmd kãsengã sẽn baase, a Salomo kɩtame tɩ b wa ne teed niyns a ba a Daviid sẽn da zoe n kõ Soaala-Wẽndã: wanzurfã, sãnema, lagdã. A rɩka rẽ fãa n paas Soaala-Wẽnd arzɛkã. A Salomo tigma nin-kẽemba, buud kãsem dãmbã, nanamsã, Zerizalɛɛm, la a kɩtame tɩ b yiis Soaala zooda koglg a Daviid yiri, Siõ tãnga. Israyɛl zãng tigma taab dĩma yir n maan kibs kãsenga, kiuug a yopoe soaba. A Israyɛl nin-kẽemba fãa waame. A Levi kamba n da tʋk kuga walsa koglgã. B rɩka koglgã, sɛka roogã la te-sõma wã fãa sẽn da be a pʋgẽ. Levit dãmba la maan-kʋʋdba n tʋk-ba. A Salomo ne a Israyɛl sagsa sẽn da tigma kʋʋ piisi la niisi sẽn ka tõe n sõd n sɛ. Maan-kʋʋdba kẽesa kuga walsa koglg a zĩigẽ, sõmblem dooga pʋga, malɛgsa pɩgsa tẽngre. Malɛgsa ra yɛdga b pɩgsã n lut koglgã ne a ra-tuiidsã. Raada sẽn da tar n zẽkd koglgã da yaa wogdo. Do kãsenga pʋgẽ dãmb da tõe n yãend-b-la bilfu, sõmblem dooga noore. La f sã n da be yɩnga, f ka ne-b ye. B keta ne rũnna. Bũmb da ka be koglga pʋga, sã n ka kuga wals a yiibã, a Moyiiz sẽn da sagl Oreb tãng zugu, zooda yõgb wakato, Ezipt tẽng yiib wakato. Maan-kʋʋdba sẽn yi, la dooga sẽn lɛɛg n pid ne sawadgo. Maan-kʋʋdba fãa da paam n yɩlga b mense la b yaool n da ka welg sak-sak wala b sẽn da welg-b tʋʋmda yĩng ye. Yɩɩn-yɩɩndba da bee sʋk zãnga: a Asaf, a Eman, a Yedutun ne b kamba la b yaopa, n maneg n yeelg fu-peelse. B ra wẽeda waase, pendga, kʋnde. B ra yɛsa maan-kugra yaanga. Maan-kʋʋdb koabg la pisi n da be ne-ba n sokd-b ne tõntõodo. Sẽn peebd-b bardã wala sẽn da yɩɩnd-ba da naaga taab sũur a ye n pẽgd la b kilsd Naaba-Wẽnde. B ra zẽkda b koeese tɩ bardã peebdẽ, tɩ waasa la pendsã wẽedẽ, tɩ ruudsa wãagdẽ, tɩ b pẽgd Soaala-Wẽnd n yetẽ: «Naaba-Wẽnd la sõngo, b nonglem ka be tɛk ye.» Sawadga kɩtame tɩ maan-kʋʋdba ka tõog n le rɩk b tʋʋma ye. Wẽnd dooga ra pida ne Naaba-Wẽnd ziiri. A Salomo goma woto: «Naaba-Wẽnde, yãmb da yeelame tɩ y na n solga y meng sawad-sablgẽ, tɩ m yet tɩ m na me roog sẽn tog ne rĩma n kõ yã tɩ y tõe n zĩ be daar fãa.» Dĩma sẽn wẽnemde, a yãee Israyɛl zãma wã fãa sẽn yɛs yĩngri t'a pʋʋs-a. A yeelame: «M pʋʋsda Naaba-Wẽnd barka, a Israyɛl Wẽnnaam barka! Bãmb noor sẽn da kãab bũmb ning m ba a Daviid, b meng nug pids-a lame. B ra yeel-a-la woto: ‹M sẽn yiis m buud, a Israyɛl, Ezipt tẽng tɛka m pa yãk tẽng, Israyɛl tẽnsa sʋka, n kɩt tɩ b me roogo tɩ m kẽes m meng a pʋgẽ ye. M pa yãk ned me sẽn na n lebg m buuda dĩm ye. Ade, Zerizalɛɛm tẽng la m wa n yãk n zĩnd a pʋgẽ la foom a Daviid la m yãk yã tɩ f na n yɩ m buud, a Israyɛl, dĩma.› M ba, a Daviid, sẽn waa n dat n me ro-sõng n kõ a Israyɛl Wẽndã, Soaala meng n waa n leok-a: ‹F sẽn tʋlg n me roogo m waoogr yĩngã, f maana neere. La ade, ka foo n na n me rooga ye, na n yɩ-la f biiga. N-ye! Na n yɩ-la f kur-wĩir biiga n na n me roogo m yʋʋra waoogr yĩnga.› Bãmb pidsa b sẽn da kãabe, tɩ m dʋ m ba zaoorẽ n lebg a Israyɛl dĩma, wala b sẽn da wilgi. M mee roogo bãmba, a Israyɛl Wẽnnaam, waoogr yĩnga. M tol n ninga dooga pʋga kuga walsa koglgã. Zood ning bãmb sẽn yõg ne a Israyɛl kamba kaset bela a pʋgẽ.» A Salomo yalsa Soaala-Wẽnd maan-kugra taoore n tees a Israyɛl zãma wã la a tẽega a nusi n na n pʋʋse. A Salomo ra maana geer ne zũudu la a da rɩgl-a-la sɩmanda tẽnsʋka. Geera woglem da yaa kãntɩɩs a nu, a yalma kãntɩɩs a nu, a zãndlma kãntɩɩs a tãabo. A Salomo dʋʋ n yĩgimda a zug, Israyɛl zãma wã taoore la a zẽka a nus n na n pʋʋse, la a yeelame: «Naaba-Wẽnde, a Israyɛl Wẽnnaam, yãmb ka tar y to, yĩngri la tẽng zug ye. Yãmb zood la y yamleoog ka tol n lak ne y kamba sẽn kẽn tɩrg, n kẽn ne nonglem y taoora ye. Y pidsa kãabg ning y sẽn da kãab y biig a Daviid, mam ba nongrã. Yãmb nug pãng pidsa y noor sẽn da togse, wala d sẽn ne rũnna wã. Marsã, Naaba-Wẽnde, kãabg a ye la y kãab m ba a Daviid tɩ m kot-y tɩ y pids-a. Yaa yãmb sẽn yeele: ‹F kamba sã n maan gũusgu, n deeg m noor la b kẽn m taoore wala fo sẽn kẽne, a Israyɛl kõn kong dĩm sẽn yi f pennẽ, la sẽn na n dɩ naam m taoor ye.› N-ye, Naaba-Wẽnde, pids-y rũnna bũmb ning y sẽn togs y sõgna, a Daviid! La m na n sokame n gese, Naaba-Wẽnd tõe n zĩnda ninsaalb sʋk tẽng zug bɩ? Yĩngri la yĩngr saas sẽn ka tõe n deeg a soaba, doogã m sẽn me wã maanda a wãna n deeg-ba? Kelg-y y yamba kosgo neere, Naaba-Wẽnde, m Wẽnnaam, kelg-y sẽn be-a yãmb taoora koɛɛg la a pʋʋsgo. Ypk-y y nin wĩndg la yʋngo n ges ro-kãnga, n ges y sẽn yet tɩ b pʋd y yʋʋr zĩig ninga. Kelg-y pʋʋsg ning m sẽn pʋʋsd yãmb zĩ-kãngã. Maam, a Salomo, la y buud a Israyɛl sã n pʋʋs y zĩ-kãngã bɩ y kelg-do. Zĩnd-y yĩngri, y sẽn be zĩig ningã n kelg la y kõ sugri. B sã n dõnd neda n yet tɩ yẽ n kɩt t'a to dɩ bõne la woto wã bɩ a wẽen n kãab a meng beedo yãmb do-sõnga pʋga la y maan-kugra taoore, zĩnd-y yĩngr n kelg la y leoke. Bʋ-y bʋʋdo n paalg nin-wẽngã la y kõ nin-sõngã wala a sẽn tog ne. Yãmb buud a Israyɛl sã n beeg yãmb n kong pãng a bɛɛba taoore, a sã n deeg a kongre, n wa pẽg yãmba, n wa pʋʋs yãmb doog ning y sẽn be a soab pʋgẽ wã, zĩnd-y yĩngri n kelge la y kõ sugri la y bas-a t'a lɛɛg wa kẽe a tẽngẽ ne bãane. Yĩngr ko-yũusa sã n wa page tɩ saag ka le niida, y kamba sẽn beeg yãmb yĩnga, la b wẽnemd n teesa zĩ-kãngã n pʋʋse, n pẽg y yʋʋre, n deeg b kongre ne sũur sẽn tuubdi, zĩnd-y yĩngri n kõ y yemse, n kõ y buud a Israyɛl sugri la y wilg so-sõng ning b sẽn tog n dɩke la y kõ tẽnga saaga, tẽng ninga sẽn ya b pʋɩɩre. Kom sã n lʋɩ tẽngã, tɩ y neba bẽed nod kegemse, tɩ kooda wãkdẽ, tɩ gãnem sobd koodo, tɩ sʋʋr la kalwaar dɩt-a, tɩ bɛɛb pag tẽnga noore, sẽn ya yel-beed la bãag ning fãa n yõk y nebã, pʋʋsg la kosg sã n kose, sẽn ya bũmb ning yĩng la pʋʋsga pʋʋs yã, tɩ kosga kose, yaa nin-yend bɩ Israyɛl tõr n kote, tooga la yel-beeda sã n nek pʋtẽere, tɩ nus zẽk n tees ro-kãngã, zĩnd-y yĩngri n kelge, n kõ sugri la y maan ne ned kam fãa wala a sẽn tog ne, wala y sẽn mi ninsaal sũuri tɛka, tɩ yãmb bala n mi ninsaal sũuri. Woto b na zoe yãmb la b tũ yãmb sore, b vɩɩm fãa pʋgẽ y sẽn kõ d ba rãmb tẽng ninga pʋgẽ. Sãan meng sẽn ka kĩ ne y buud a Israyɛl, sẽn yi tẽn-zãorgẽ n wa, t'a wʋmame tɩ b gomd y yelle, tɩ b gomd y nug pãng yelle, t'a wa ro-kãnga pʋga n pʋʋs yãmba, zĩnd-y yĩngri, y sẽn be zĩig ningã n kelg-a, reeg-y, Soaala, a kosg fãa, woto bu-zẽmba fãa na wʋm y yʋʋre la b na yik wala y buud a Israyɛl, n dig rabeem y taoore la b bãng tɩ yaa m sẽn me roog ninga pʋga la b na n pẽg y yʋʋre. Y neba sã n tũ sor ninga y sẽn wilg-ba, n kẽng zabre, b sã n tẽeg n pʋʋs yãmba, b sã n wẽnemd b neng n ges roog ning m sẽn me yãmb yĩngã, y tẽn-sõnga pʋga, zĩnd-y yĩngri n kelg b pʋʋsgo, n kelg b koɛɛga la y maan wa b sẽn tog ne. B sã n beeg yãmba, tɩ d mi tɩ ned ka be n ka beegd yãmb ye, y sũur sã n wa puug ne-ba, tɩ y rɩk-ba n sagl b bɛɛba nusẽ, tɩ bɛɛba tall-ba n loog yembdo, tẽng sẽn pẽ bɩ tẽng sẽn zãrẽ, b sã n sulg b menga n zẽk b koɛɛg b yembda tẽngẽ n yeele: ‹Tõnd kongame, tõnd ka maan neer ye, tõnd wegmame,› b sã n zĩnd be n wẽnemd b neng n tees tẽng ning m sẽn me n kõ yã, ne yam paale la sũ-paale, b sã n tees y tẽn-nongrã, n tees y roogã m sẽn me y yʋʋr waoogr yĩngã, zĩnd-y yĩngri, y zaoora zugu, n kelg b kosgo, n kelg b pʋʋsgo, n maan-b neere la y kõ-b b beegra sugri. La marsã, m Wẽnnaam, puk-y y nin la y yoog y tʋba n kelg sẽn pʋʋsd-b yãmb do-kãnga pʋga. M Wẽnnaam, sig-y marsã y vʋʋsga zĩigẽ n vigl y naam zaoore, sagl-y maan-kʋʋdba nao y fãagr sor pʋgẽ, kõ-y y buudã sũ-noogo. Naaba-Wẽnde, da zãag-y y menga ne y sẽn kõ a soab naama ye, tẽeg-y kũun sõma niynsi y sẽn kõ y yamb a Daviid.» A Salomo sẽn pʋʋs n sɛ la bugum sẽn yi yĩngri n wa rɩ maandã tɩ sõmblem dooga lɛɛg n pid ne Naaba-Wẽnd ziiri. Maan-kʋʋdba ka tõog n yals a pʋgẽ ye, tɩ Naaba-Wẽnd ziira ra pid-a lame. B sẽn yãend yĩngr bugma sẽn sigi la Naaba-Wẽnd ziira sẽn pid ne sõmblem doogã, a Israyɛl gill wõgemdame n kɩ a neng tẽnga la a kilsa Naaba-Wẽnd n yet tɩ b yaa nin-noanga la b nonglem ka be sɛɛb ye. Dĩma ne zãma wã kʋʋ maand Naaba-Wẽnd taoore. Ad-a Salomo sẽn kʋ: niis tus pisi la a yi, piis tus koabg la pisi. B rɩka roogã n kõ Soaala-Wẽnde. Maan-kʋʋdba ra yɛsa b zĩigẽ la Levitsa ra pẽgda Naaba-Wẽnd ne yʋʋm teed niyns a Daviid sẽn da maan Soaala-Wẽnd pẽgra yĩnga; b ra yetame tɩ b yaa nin-noanga la b nonglem ka be sɛɛb ye. Yaa bãmb n da yɩɩnd pẽgr yɩɩla a Daviid sẽn da maane. Maan-kʋʋdba ra yɛsa bãmb sɛɛgẽ n peebd tõntõodo, la zãma wã ra yɛsa yĩngri. A Salomo ninga zaka tẽnsʋka barka, la be n lebg zĩig ning b sẽn na n kõ yũ-nood maanda, la laafi kosg maanda kaam. Maan-kugr ninga a Salomo sẽn maan ne zũuda ra pa tõe n deeg yũ-noog maoonga, ne kũuna sẽn tũnugdã la kaama ye. Yɩɩ rasem a yopoe tõre la a Salomo maan sẽgd kibsã, ne Israyɛl kamba sẽn da yi zĩig zãnga, al Lebo-Amat sẽn be nug goabga, al Ezipt kʋɩl-bɛɛga sẽn be nug rɩtgo. Daar a nii soaba le yɩɩ sɛɛg yõkr daare. Yɩɩ rasem a yopoe tõre la wẽnd dooga kibsa tõog n maane. Tisri kiuugu, kiuug a yopoe soaba, pisi la a tãab raare, a Salomo basa ned kam fãa t'a leb a tẽngẽ, n noogd a sũuri la a kɩdemnẽ tɩ Naaba-Wẽnd maana a Daviid neere, n maan a Salomo neere, n maan b buud a Israyɛl neere. A Salomo baasa wẽnd doogã la a meng rooga tʋʋma, wala a sẽn da rata. Dẽ marsã la Soaala-Wẽnd lika a Salomo yʋngo n yeel-a: «M wʋma f sẽn pʋʋs n kos bũmb ningã. M deega ro-kãnga t'a na n yɩ maanda roogo. M sã n wa pag yĩngr ko-yũusã tɩ saag paooge, m sã n wa yeel sʋʋr t'a rɩ tẽnga koodo, m sã tʋm bã-longdem m buuda sʋka, b sẽn yõkd m sɛɛg buud ning yĩngã, sã n sulg a menga, a sã n pʋʋse, a sã n baood m zĩiga, a sã n deeg a kongre, m na zĩnd yĩngr n kelge, m na kõ beegra sugr, m na le maneg tẽnga nenga. Marsã tɛka, m na n puka m nini la m yoog m tʋba n kelg pʋʋsg ning fãa sẽn na n pʋʋs zĩ-kãnga. Yaa ro-kãnga la m welg toore n na n zĩndg m meng a pʋgẽ. M nin la m sũur na n zĩnda be daar fãa. Sã n ya foom, f sã n kẽn m taoor wala f ba a Daviid sẽn kẽne, f sã n maan mam sẽn wilg-fã, f sã n deeg m noore la m saglsã, f naama na kaoos a zaoorẽ, wala m sẽn kãab f ba, m sẽn waa n yeel-a: ‹F buuda kõn kong biig sẽn na n dɩ naam Israyɛl ye.› La yãmb sã n bas maam, y sã n pa reeg m noya la m saglse, y sã n pʋg wẽn-naandse, y sã n waoog-ba, m na yiis a Israyɛl tẽng ning m sẽn da kõ-a, m na yiis m taoore doog ning y sẽn me m waoogr yĩngã, la a na lebg bu-zẽmba fãa laado. Ned ninga fãa sẽn da mi wẽnd do-kãnga, n da mi a neerma, sã n wa pẽneg-a, a na n yɛɛsame la a yetẽ: ‹Bõe tɩ Soaala-Wẽnd maan woto ne tẽn-kãnga la wẽnd do-kãnga?› La b na n leok-b lame: ‹Yaa b sẽn bas Naaba-Wẽnd, b yaab rãmb Wẽnnaam, sẽn yiis bãmb Ezipt tẽnga, yaa b sẽn tɩ kẽ wẽn-naandse, n waoog-ba, n kʋ b maandã, la Soaala-Wẽnd tʋm b yel-beed a woto fãa.› » Yaa yʋʋm pisi pʋgẽ la a Salomo me wẽnd doogã la a meng yiri. A manegame n me tẽns niyns a Iram sẽn da kõ-a. A kẽesa Israyɛl kamb be. A paama Soba la Amat n sooge. A le maneg n me Tadmor, we-raoogẽ, n paas tãnsoben-tẽnse sẽn da be Amat tẽn-peelmẽ. A le manega tãng zug Bɛt-Orõ la tãng sɛɛg Bɛt-Orõ tɩ b lebg tãnsoben-tẽnse, n tar lal-gũbri la kʋɩlens sẽn sogd ne kutu. A le manega Baalat, la tẽns niyns a sẽn da bĩngd a bilim-bilm, la tẽns niyns a sẽn kẽes a wed-dʋʋdba. A Salomo me a sẽn dat fãa Zerizalɛɛm, bɩ Libã, bɩ zĩis a taaba, a soolma pʋgẽ. Neb n zĩndi n da ka Israyɛl buud ye, la a Israyɛl da bas-b lame n ka kʋ ye. B yaool n da keta Zerizalɛɛm. Yaa Ititsã, Amonitsã, Perizitsã, Ivitsã, Zebuze rãmba. A Salomo kẽe bãmb kamba sʋka n yãk a tʋʋm-tʋmdba, la ket n yaa boto ne rũnna. A Salomo ka kẽes Israyɛl kamba a tʋʋmnẽ ye. Yaa zabra yell bala n da pak bãmba. Bãmb n da rɩt naam n so sẽn tʋkd-b zab teedã. Bãmb n da ya wed-kɩɩmbã, la bilim-bilm nanamse. Sẽn da get-b tʋʋma sẽn welg toora nanamse da yaa bãmb kobs-yi la pis-nu. Bãmb n da sõngd a Salomo n gũud a zãma wã. A Salomo yiisa Ezipt dĩma bi-pugla a sẽn da be zĩig ninga, a Daviid na-tẽngẽ, n tall-a n wa kẽes roog a to a sẽn me a yĩngã. A ra yeta a meng woto: «M pag ka tõe n pa Israyɛl dĩm a Daviid zakẽ ye tɩ kuga walsa koglg sẽn bĩng zĩig ning fãa n baas n yɩɩd ne sõmblem.» A Salomo kõo Naaba-Wẽnd yũ-nood maando, maan-kugr ninga a sẽn dɩgl zãonga taoora zugu. Maanda kʋʋba ra tũuda a Moyiiz sẽn da yals a soaba beoog-beoogã, sibr daarã, kiu-paalgã, kibs bɛd a tãabã sẽn ya bur sẽn ka ningd bɩll kibsa, tigsgu kibsa, la sẽgd kibsa. A pa teem a ba, a Daviid, sẽn da yals noy niynsa ye. A pa tedg maan-kʋʋdba sẽn tog n dees taab seem ning ye, a pa teem Levitsa noya ye, tɩ b na n kell yals maan-kʋʋdba sɛɛgẽ n pẽgd la b yɩɩnd beoog sẽn vẽege. A basa ragno-gũudba b zĩisẽ, wala a ba, a Daviid, Wẽnd tʋʋm-tʋmda, sẽn da wilgi. Maan-kʋʋdba la Levitsa dɩ-rɩtem poorẽ menga, b ka bas noor ba a ye n pa reeg ye. Woto la yɛl niyns sẽn zĩndi wẽnd doga poorẽ, a teeda seglgo, a meeba sɩngre n tãag a baasgo, wala sẽn be dĩm dãmba kibara sebrẽ. A Salomo yikame marsã n ta Esiõ-Gebɛr la Eyilat, Rudum Mogra noore, Edom tẽn-peelmẽ. Beelẽ a Iram kɩsa a neba koom-kogendo tɩ b wa kõ-a. A paasa Fenisi neb sẽn mi koom-kogenda rugsgu la mogra nenga. Nin-bãmb n yãag a Salomo neba tɩ b kẽng Ofir n lɛɛg n wa kɩsa sãnem. Sãnema zɩslem: seka neb kobs-yoob la pis-nu zɩɩbo. A Salomo yʋʋra sẽn da yi n zãag yĩnga, Saba dĩm-poaka wʋma rẽ n wa Zerizalɛɛm. A talla yɛl wʋsg ne pagdo n kos a Salomo t'a wegs n wilg b võore t'a rɩ a bãngra zulum kaseto. A waa ne arzɛgs me, ne yʋgma sẽn zɩt yũ-nood kaam, sãnem, la kug-neeba. A sẽn ta a Salomo nengẽ a yiisa a sẽn da bʋgs a yamẽ wã fãa. A Salomo leoka a sokr fãa. Bũmb pa zĩnd t'a wilgr yi toog ne-a ye. Saba dĩm-poaka sẽn bãng a Salomo yama sẽn zẽk n ta zĩig ninga, a sẽn yãe na-yira sẽn me to-to, dĩma sẽn dɩt bũmb ninga, a tʋʋma sẽn pʋɩ to-to, tʋʋmd fãa ne a taoor soaba, futa b sẽn yerã, sõgen-kamba ne b faongã, maanda sẽn da kʋʋd wẽnd doogẽ, a yɛɛsa wʋsgo. Dẽ la a yeel dĩma: «M sẽn wʋm tɩ b gomd bũmb ninga m tẽngẽ yãmb ne y bãngra poorẽ da yaa sɩd bala! M pa tʋlg n deeg tɩ m pa reng n wa m toor la m yãend ne m nif ye. La sã n ya sɩda, b pa wilg maam y bãngra pʋɩ-sʋk ye. Yãmb zʋʋga b sẽn togsdã al wʋsgo. Sũ-noog rãmb la f pagba, f sõgen-kamba sẽn be f taoore n kelgd f bãngre! Naaba-Wẽnd, f Wẽnnaam paam barka, b sẽn maan f neere n dʋʋs-fo b naam zaoorẽ, bãmb pẽgr yĩnga! Yaa f Wẽnnaam sẽn nong a Israyɛl wʋsgo, n dat t'a ziira paasã la b kõ-f naam tɩ f na n wilg-a sẽn tog la sẽn kisi la f da bas-a t'a kong legend ye.» Saba dĩm-poaka kõo dĩma sãnem. Sãnema zɩslem: seka neb koabg la pisopoe la a nu zɩɩbo. A paasa yũ-nood kaam ka tɛka, la kug-neeba. Yũ-nooda kaama taare da ka yãet moog ye. A Iram ne a Salomo neba me lɛɛg n wa ne Ofir sãnem, n paas ra-sĩdma, la kug neeba. Dĩma rɩka ra-sĩdma n pees n gãneg wẽnd dooga pʋga la na-rotã, n pees bɛɛla la pendse, yʋʋma yĩnga. B zɩ n yãend woto taar Zɩɩda tẽn-peelmẽ ye. Dĩm a Salomo kõo Saba dĩm-poakã a sẽn tʋlg bũmb ning fãa. Dĩma pa ges a sẽn tall n wa n yaool n kõ-a ye. Yɩɩga rẽ al wʋsgo. Saba dĩm-poaka ne a neba yaool n leba b tẽngẽ. Yʋʋmd a ye pʋgẽ sãnem sẽn wa a Salomo yĩng yɩɩ sãnem gil sẽn sek neb tusr zɩɩbo. B pa naag n sõd lɛɛbdba ne b neba sẽn da tar n watẽ wã ye. B pa sõd Arabsa dĩm dãmba la tẽnga kombɛɛmbã rẽnd ye. Bãmb fãa ra wat n kõta a Salomo sãnem la wanzurfu. A Salomo maana gãndo, bãmb kobs-yi, gãnd sẽn da ya bɛd-bɛda. Kuta la sãnema sẽn dɩk n dõog a ye fãa zɩslem taa yubl sẽn pid koom. A maana gãnd sẽn ya bõonese, bãmb kobs-tã; kuta la sãnema sẽn dɩk n dõog a ye fãa zɩsa wa wam-pogbr sẽn pid ne koom. B tɩ yagl-b-la Libã Googa zãongẽ. Dĩma maana naam zaoor sẽn ya bedre, n tablg ne wob-yẽna la sãnem sẽn yɩlge n le yɩlge. Zaoora ra zẽkame. Tũuda sãnem teedse n dʋ la teedsa ra yaa a yoobe. Zaoora ra tara nusa sẽn gãte bɩ kamsa sẽn palgd zĩiga, goabg la rɩtgo. Kamsa sẽn palgd zĩig ninga b rõoga bõnyẽes a yi, b rõoga bõnyẽes piig la yi n tedg teeds a yoobã, goabg la rɩtgo. B zɩ n maan a buud rĩung ba a ye pʋg ye. A Salomo sẽn da tar lagd niyns n yũudã da yaa sãnem gilli. Teed niyns me sẽn da be Libã googa zãongẽ wa da maana ne sãnem sẽn yɩlge. A Salomo wakatã, b ra pa get wanzurf wa bõn-yõod ye. Dĩma ra tara koom-kogend sẽn da tʋgd Tarsis ne a Iram nebã, la yʋʋm a tãab fãa b ra lɛɛgd n wata ne sãnem, ne wanzurf, ne wob-yẽna, ne wãmse la noos-buudu sẽn ya neeba n sakd gesgo. A Salomo waa n yɩɩga dũni nanamsa fãa ne arzɛk la bãngre. Dũni dĩm dãmb fãa da rat n taa a Salomo nẽngẽ n bãng a menga la b kelg a bãngra goama, bãngr zulung ning a sẽn da paam Naaba-Wẽnd nengẽ wã. Ned kam fãa ra wata ne kũuni: sãnem lagdo, wanzurf lagdo, futu, zab teedo, yũ-nood kaam, wiidi, bõn-weese, yʋʋmd-yʋʋmd fãa. A Salomo mee do-bõones tus a naase wiida yĩnga. A ra tara bilim-bilm la wed-dʋʋdb tus piig la a yi. A da basa kẽer a sɛɛgẽ, Zerizalɛɛm. A Salomo dɩɩ naam Efrat kʋɩlga n ta Filisti, n ta Ezipt toaaga. A kɩtame tɩ wanzurf lebg wa kug zaal Zerizalɛɛm pʋga, tɩ tɩ-bɛd yãeeb ka toog n yɩɩd kankamse, bãada tẽnsẽ ye. A Salomo wiida ra yita Ezipt la tẽns a taabã. A Salomo vɩɩma kibare, a sɩngre n tãag a baasgo, dẽ fãa pa gʋls bãngd a Natã sɛbẽ, la Silo bãngd a Ayiya sebẽ, la bãngd a Yedo sɛbẽ bɩ? Bãngd kãng yãenda bũmb wʋsgo la a togsa yɛl wʋsgo a Nebat biig a Zeroboam poorẽ. A Salomo dɩɩ Israyɛl naam Zerizalɛɛm, yʋʋm pis-naase. A gãanda ne a saam dãmba tɩ b mum-a a ba a Daviid na-tẽngẽ la a biig a Roboam n led-a a zaoorẽ. A Roboam kẽnga Sikɛm tɩ yaa Sikɛm la a Israyɛl tigim n yug a na-paalga. A Nebat biig a Zeroboam sẽn bãng rẽ, a yii Ezipt n wa. Yẽ ra zoe-la a Salomo rabeem n dig Ezipt tẽnga. B bool-a lame la a waa Sikɛm tigsgã. Buuda goma woto ne a Roboam, dĩm paalgã: «Y ba wã ra zɩlga tõnd zɩɩb sẽn zis wʋsgo, d kos tɩ y yols-do tɩ woto d na pʋg yã.» A leoka buudã: «Kul-y la sã n maan dasem a tã bɩ y lɛɛg n wa.» La neba loogame. A Roboam soka nin-kẽemsã sẽn da sõngd a ba a Salomo a sẽn waa n ketẽ: «M tog n leok-b-la wãna?» Tɩ b yeele: «Yãmb sã n yɩ bʋgsgo, n kelgd-ba, n kõt-b koe noodo, b na tũ yãmb daar fãa.» A Roboam basa nin-kẽemsa saglse, n sok a reemd-n-taase sẽn da paam tʋʋmd a sɛɛgẽ, zãma wã zãab tʋʋmde. A sok-b-la woto: «Y yetame tɩ m leok nin-bãmba wãna? Ad-y yaa woto la b gom ne-ma: ‹Yols-y zɩɩb ning y ba sẽn da zɩlg tõndã.› » Kom-bɩɩbã, a reemd-n-taasã leokame: woto la y na n yeel sẽn togs b yãmbã: «Y ba zɩlga tõnd wʋsgo, la yãmb yols-dã. Yeel-y woto: ‹M nug-bila pãng yɩɩda m ba kanga. M ba tʋka yãmb sẽn zɩse la mam na n paasa y zɩɩbo. M ba pãba yãmb ne sãbse la mam na pãb-y ne kaas sẽn yod kutu.› » Dɩlla a Zeroboam ne zãma wã le tigma taab a Roboam taoore dasem a tã wã sẽn waa n pidi, wala a meng sẽn da wilgi: «Lɛɛg-y n wa ka ra-yɩta.» Dĩma leok-b-la pãr-pãre. Dĩma pa reeg nin-kẽemsa sagls ye. Yaa a reemd-n-taasa la a kelg yã. Ad-a sẽn yeele: «M ba tʋka yãmb sẽn zɩse, la mam na n paasa y zɩɩbo. M ba pãba yãmb ne sãbse la mam na pãb-y ne kaas sẽn yod kutu.» Dĩma pa kelg zãma wã ye, la rẽ yɩɩ Soaala-Wẽnd n lʋɩ sʋka sẽn na n yɩlẽ n pids b sẽn da kãab a Nebat biig a Zeroboam ne Silo bãngd a Ayiya noore. Dĩma sẽn pa sak n kelg zãma wã, Israyɛl nug goabg rãmba me leokame: «D pʋɩɩr bʋgo n be ne a Daviid? Tõnd pʋɩɩr ka be a Zese biig nugẽ ye. Dẽ yĩnga, Israyɛl leb f rotẽ. Marsã tɛka, a Daviid soolem tek a na-tẽngẽ.» A Israyɛl leba a tẽnsẽ. A Roboam dɩɩ naam tẽns niyns sẽn da be a Zɩɩda tẽn-peelmẽ bala. A Roboam tʋma a Adoram, yẽ n da get a tʋʋma. A tʋm-a lame t'a kẽng tɩ b le tɩ maneg n yẽse, la b lob-a-la ne kug n kʋ. A Roboam kong n kẽe a bilim-bilm n zoe n tees Zerizalɛɛm. Yaa woto la a Zɩɩda ne a Israyɛl roog welg taaba n ta rũnna. A Roboam sẽn ta Zerizalɛɛm, a tigma a Zɩɩda la a Bẽnzame roogo, bãmb tus koabg la pis-nii, tãb-biis sẽn mi zabre, n na n tɩ zab ne a Israyɛl, sẽn na yɩlẽ t'a leb a Roboam soolmẽ. Naaba-Wẽnd koɛɛg ta-la b neda, a Semaya. Koɛɛga yeelame: «Taas a Salomo biig a Roboam, taas a Zɩɩda dĩma la Israyɛl kamb sẽn be Zɩɩda la a Bẽnzame tẽn-peelmẽ, wilg-b tɩ Naaba-Wẽnd yet-b lame: ‹Da tak-y zabre ne y saam-biisa ye. Ned kam fãa leb a yiri, tɩ welgra yaa mam tʋʋmde.› » B kelga Soaala-Wẽnd koɛɛga, b lɛɛgame, b pa tɩ zab ne a Zeroboam ye. A Roboam tɩ kẽe Zerizalɛɛm, n me tãnsoben-tẽns Zɩɩda. A le maneg n me Bɛtelyɛɛm, Etam, Tekoa, Bɛt-Sur, Soko, Adulam, Gat, Maresa, Zɩf, Adorayim, Lakis, Azeka, Sorea, Ayalõ, Ebrõ. Bãmb la tãnsoben-tẽns sẽn da be Zɩɩda la Bẽnzame tẽn-peelmẽ. A maneg n me-b lame n paas b pãng wʋsgo, n ning tãnsoab bɛda, n pag a dɩ-rɩtem, a kaam la a rãam be. Gãndo la kãn da be tẽn kãens fãa pʋsẽ. A paasa b pãnga. A waa n sɩd lebga Zɩɩda la Bẽnzame soaala. Maan-kʋʋdba la Levitsa sẽn da sẽeg Israyɛl tẽn-peelma yi b tẽnsẽ n wa kẽ dĩm a Roboam. Levitsa basa b wãbnega zĩisi la b buuda pʋto n wa Zɩɩda la Zerizalɛɛm. La rẽ yaa a Zeroboam ne a kamba sẽn yeel-b tɩ b kõn le paam maan-kʋʋr tʋʋmd n tʋma yĩnga. A Zeroboam da bao-la a toorẽ maan-kʋʋdba wẽn-naandsa waoogr yĩnga. Yaool n da yaa boees la nag-bi la b da rõogd ne zũudu, n boond rẽ tɩ b wẽnde, n kʋʋd maand b yĩnga. Sagsa toor-toor neba sẽn da be Israyɛl n yaool n ket n dat n waoogd Naaba-Wẽnd, a Israyɛl Wẽnnaam, tũ-b lame n wa Zerizalɛɛm n na n pʋg b yaab rãmb Wẽnde. Woto b paasa Zɩɩda rĩunga pãnga. B yalsa a Salomo biiga Roboam poorẽ, yʋʋm a tã, tɩ yaa yʋʋm a tã bala la a Roboam tũ a Daviid la a Salomo sẽn tũ sor ningã. A Roboam kẽe kãadem ne a Maalat. Yaa a Yerimot bi-pugla t'a Yerimot me yaa a Daviid bi-ribla. A ma, a Abiayil, da yaa a Eliab bi-pugla, la a Zese yagenga. Ad-a sẽn dog kamb niynsi: a Yewus, a Semariya, a Zaam. Dẽ poore a kẽe kãadem ne a Maaka, a Absalom biiga n dog a kamba, a Atayi, a Ziza la a Selomit. A Roboam waa n nonga a Absalom biig, a Maaka, n yɩɩd a pagb a taabã la pʋg lemsã. A pagb ra yaa bãmb piig la a nii, tɩ pʋg lemsa ya pisoobe. A roga kom-dibli pisi la a nii, a doga kom-pugli pisoobe. A Maaka biig a Abiya la a kõ kãsengo, a lʋɩs-a-la a ba-biisa taoore, n dat t'a wa lebg dĩma. A ra tʋllame n sẽeg a kamba Zɩɩda la Bẽnzame tẽn-peelma fãa, tãnsoben-tẽnsa fãa. A sõng-b-la ne kood la ligdi, n sõng-b ne pagb ka tɛka. A Roboam naam ra paam n viglame n tar pãnga, la wakat kãng la a yik ne a Israyɛl tõre n zãgs Soaala-Wẽnd noore. A naama yʋʋmd a nu soaba, Ezipt dĩm a Sisak gãnega tãp Zerizalɛɛm, a sẽn da yi Wẽnd poorẽ wã yĩnga. A waa ne bilim-bilm tusr la kobs-yi, ne wed-dʋʋdb tus pisoobe la tãb-biis ka tɛka sẽn yi Ezipt ne-a, ne Libi, Suk la Nubi. A pãba Zɩɩda tãnsoben-tẽnsa la a taa Zerizalɛɛm. Bãngd a Semaya waa n yãenda a Roboam la a tãnsoaben-dãmba tɩ b sẽn wʋm a Sisak rãamde, b fãa zoe n wa tigma Zerizalɛɛm. Ad-a sẽn yeele: «Naaba-Wẽnd koɛɛg la woto. Yãmb basa maam, yaa rẽ me yĩng la mam me bas yãmb ne a Sisak.» Woto wã tãnsoaben-dãmba ne a Roboam sulga b meng Soaala-Wẽnd taoore. B yeelame: «Naaba-Wẽnd sẽn maana zemsame.» La Naaba-Wẽnd sẽn yãend tɩ b tuubame b yeela a Semaya: «B sẽn deeg b kongra yĩnga, m kõn kʋ-b zãng ye. Sã n yɩ bilfu m na fãag-ba, tɩ ka na n tũ ne a Sisak nugu tɩ m sũura bugum yõog Zerizalɛɛm ye. La ade, a na n kẽes-b-la a tʋʋma la woto b na bãng são-sãood sẽn be zĩig ninga. Yaa mam nengẽ, yaa bɛɛba nengẽ, b na bãnge.» Ezipt dĩm a Sisak waa Zerizalɛɛm. A kɩtame tɩ b yiis Soaala-Wẽnd arzɛka sẽn da be wẽnd doogẽ la dĩma arzɛkã. A looga ne fãa gilli; sãnem gãndã a Salomo sẽn kɩt tɩ b kuda fãa loogame. A Roboam kuda zũud gãndo n lebse. A yeela sẽn da kogend b dĩma yõora kãsem-dãmba sẽn da be dĩma zaka noorã tɩ b ges b yelle. Dĩma sã n da rabd wẽnd doogẽ fãa, sẽn da kogenda a yoorã ra wat n dɩk-b lame n yaool n le wa lebs-ba. Dĩma sẽn sulg a meng yĩnga, Wẽnd ka bas tɩ b sũurã fudg n daag n sãam-a zãng ye. Zɩɩda tẽn-peelma ra ka pid ne wẽnem bal ye. Bõn-sõma me ra ket n bee be. Dĩma naam maneg n vigla Zerizalɛɛm n paase. A Roboam da tara yʋʋm pis-naase la a ye a sẽn waa n lebg dĩma la a dɩɩ naam Zerizalɛɛm, tẽng ning Naaba-Wẽnd sẽn tũus Israyɛl tẽnsa sʋka n na n maan b na-tẽnga. A Roboam ma ra boondame t'a Naama. A ra yaa Amonitga. A sẽn maan tɩ ka yɩɩ neere, yaa a sẽn pa kẽ Naaba-Wẽnd ne a sũuri. A Roboam vɩɩma kibare, a sɩngre n taa a baasgo, fãa pa gʋls bãngd a Semaya sebrẽ n paas bãngd a Ido me rẽnnẽ? A Roboam ne a Zeroboam zaba ka yãk raar n yals ye. A Roboam kiime tɩ b mum-a a Daviid na-tẽngẽ. A biig a Abiya n led-a a zaoorẽ. A Zeroboam naam yʋʋmd piig la a nii soaba la a Abiya lebg Zɩɩda dĩma. A rɩɩ naam yʋʋm a tã Zerizalɛɛm. A ma ra boondame t'a Mikaya n ya Gibeya rao a Uriyɛl bi-pugla. A Abiya ne a Zeroboam talla zabr ne taaba. A Abiya yi n seg-a-la ne tãb-biis sẽn pid ne raoodo, tãb-biis tus kobs-naase sẽn mi zabr sõmb-sõmbo. A Zeroboam me yii ne tãb-biis sẽn pid raoodo, sẽn mi zabr sõmb sõmbo, bãmb tus kobs-nii. A Abiya dʋ Semarayim tãng sẽn be Efrayim tãmsa sʋka, n yeele: «Zeroboam, la yãmb fãa, Israyɛl kamba, kelg-y yã! Yãmb da tog n tẽegame tɩ Naaba-Wẽnd, a Israyɛl Wẽnnaam, kõ-la a Daviid Israyɛl naam daar fãa yĩnga. Yaa zood sẽn yalse n pa le tõe n viigi, a Israyɛl ne a kamba yĩnga. A Nebat biiga a Zeroboam, a Daviid biiga a Salomo sõgne, yik n zẽka a zug ne a soaala. Nin-yaalse, nin-yoodo n yik n kẽ sʋka n sagl-a Roboam la a sẽn da nan ket n ya yãag yĩnga a basame tɩ b belga n tõog-a. Marsã y yetame tɩ y kõn sulg y mens a Daviid yagensa taoore, tɩ naama yaool n ya Naaba-Wẽnd n ning-a a Daviid kamba nugẽ. Ad-y y sẽn sũ taaba zembala, tɩ y wẽn-naandsa ya sãnem nag-bi a Zeroboam sẽn dõog n kõ yã! Yãmb rigame n yiis y sʋka, Naaba-Wẽnd maan-kʋʋdba, a Aarõ kamba, n paas Levitsã, n yaool n bao y toorẽ maan-kʋʋdb wala bu-zẽmba sẽn maandã. Yãmb nengẽ, ned ning fãa sẽn wata ne loalga la piis a yopoe n dat maan-kʋʋr tõogo, ra tõe n lebga maan-kʋʋda, wẽn-naand maan-kʋʋda! Sã n ya tõndo, Naaba-Wẽnd la d Wẽnde la d ka bas-b ye. A Aarõ kamb la maan-kʋʋdba, tɩ Levitsa sõngd-ba. Yibeoog la zaabr fãa d kʋʋda d yũ-noog maando Naaba-Wẽnd, d Wẽnnaama yĩnga. D tara tɩdar sõngã, d dɩgenda kaset buri, a roagendga zugu, d tara sãnem fitil kãsenga n yõgend zaabre. Tõnd ket n deegda Naaba-Wẽnd, d Wẽnnaam noor, tõnd ka bas-b wa yãmb ye. Tõnd Tãnsoab la Naaba-Wẽnde la d le tara b maan-kʋʋdba ne b tõntõodo. Bãmb n na n peeb tɩ tõnd kelem la d sɩng zabr ne yãmba! Israyɛl kamba, da kaoog-y zabr ne Naaba-Wẽnd, y yaab rãmb Wẽnd, zaalem ye! Ka na n yɩ raood tʋʋmd la y na n tʋm ye.» A Zeroboam yãka tãb-biis kẽere tɩ b na n soos n leb Zɩɩda rãmba kudgẽ. Woto a Zɩɩda ra nee Israyɛl zãma wã a taoore mik neb n solg poorẽ. B sẽn wẽnemde, Zɩɩda rãmb yãeeme tɩ zab-zabdba gũbg-b-la taoor la poorẽ. B yõka Soaala-Wẽnd sɛɛga. Maan-kʋʋdba peeba tõntõodo. A Zɩɩda rãmb tãsa b zabr kɛlenga, la wakat kãng bala Naaba-Wẽnd kʋ-la a Zeroboam ne a nebã, a Abiya la Zɩɩda taoore. A Israyɛl kʋɩɩ tĩig a Zɩɩda taoore, Naaba-Wẽnd sagl-b-la a Zɩɩda nugẽ. A Abiya ne a tãb-biisa tõog-b-la sõmb-sõmbo. B neb tus kobs-nu sẽn ya zab-mitb lʋɩɩme. A Israyɛl paama yãnde, a Zɩɩda raood paasame, tɩ b teega Naaba-Wẽnd, b ba rãmb Wẽnde. A Abiya pʋga a Zeroboam n deeg a tẽns kẽere. Betɛl ne a tẽn-kogse, Yesana ne a tẽn-kogse, Efrõ ne a tẽn-kogse. A Abiya wakato Soaala-Wẽnd wooga a Zeroboam naama pãnga. Naaba-Wẽnd wẽ-a lame n kʋ. A Abiya maneg n vigla a naam zaoore. A kẽe kãadem ne pagb piig la a naase, n dog kom-dibli pisi la a yi, kom-pugli piig la a yoobe. A Abiya kibare, a vɩɩma sẽn yɩ a soaba, a tʋʋma, fãa gʋlsa bãngd a Ido sebrẽ. A Abiya kiime tɩ b mum-a a Daviid na-tẽnga. A biiga Asa n led-a a zaoorẽ. A Asa naama wakato, tẽnga zĩnda yʋʋm piig ne laafi. A Asa naama yɩɩ sõmb la neere Soaala-Wẽnnaam nifẽ. A wãa sãamba maan-kuga, n gɩdg wẽn-naandsa waoogre, n vigs wẽn-naandsa sẽn da pees ne kug la raadã. A wilga Zɩɩda rãmb tɩ b bao Naaba-Wẽnd, b ba rãmb Wẽnd, zĩiga, la b reeg b noya la b saglse. Zɩɩda pʋgẽ, a menesa wẽn-naanda maan-kuga la tɩdara yõogr zĩisi. Tẽnga yãee laafi a zamaanẽ. A le maneg n mee Zɩɩda tãnsoben-tẽnsa. Zabr sẽn da ka le zabd yĩnga, Naaba-Wẽnd sẽn kõ-b laafi yĩnga, vɩʋʋg ra bee tʋʋm kãens yĩnga. Yaa rẽ yĩng la a yeel yã: «D le maneg tãnsoben-tẽnsã, d me lals n gũbg-ba, n ning kʋɩlens sẽn sogd ne kutu. D pa d tẽngẽ, d bao Naaba-Wẽnd, d Wẽnnaam, tɩ bãmb me pʋga tõndo n kõ-d laafi ne d yags fãa.» Woto wã b rɩka tʋʋmda ne raoodo la b tõog n yika lal-gũbrã. A Asa ra tara tãb-biis Zɩɩda tẽnga, bãmb tus kobs-tã, sẽn zãad gãnd yalemse la kãna. A ra tara a Bẽnzame tẽn-peelmẽ tãb-biis tus kobs-yi la pis-nii, sẽn zãad gãnd bɩ sẽn mi tãbdo, fãa ra yaa neb sẽn tar raoodo. Nubi rao a Zera waa a Asa soolmẽ ne tãb-biis tus kẽemde la bilim-bilm kobs-tã. A taa Maresa, t'a Asa yi n seg-a, la a tonga a zabr tongr Sefata bãg-faagẽ, pẽe ne Maresa. A Asa pʋʋsa Naaba-Wẽnd, a Wẽnnaam, woto: «Yãmb bal la Wẽnde, n na n lʋɩɩs y toog nin-gãndaado la koams sʋka, wa-y n sõng-y-do, Naaba-Wẽnde, d Wẽnnaam. Tõnd teega yãmba, la yaa yãmb yʋʋr yĩnga la d na n wẽ nin-bãmba sẽn ka be tɛkã. Naaba-Wẽnde, yãmb la d Wẽnde. Tõnd ninsaalba basda fãa ne yãmba.» Naaba-Wẽnd pãba Nubi rãmbã, a Asa ne a neba taoore, tɩ b na n zoe. A Asa pʋg-b-la ne a tãb-biisi n ta Gerar. Sẽn pa b zabrẽ wã sõor n yɩɩge. Naaba-Wẽnd da wẽeme, tɩ tãb-biisa me naag n wẽ. B wʋka laog wʋsgo. B reega tẽns wʋsgo sẽn da pẽ Gerar, tɩ b ra ket n yɛɛsa Soaala yɛɛsgo. B reesa-b laog tɩ b ra tara laog wʋsgo. B tol n kẽe wuba pʋsẽ n yiis piis la yʋgma, n yaool n n lebg n dɩk Zerizalɛɛm sore. Soaala-Wẽnd vẽnega a Odɛd biig a Azariya. A yɩ n sega a Asa n yeel: «Asa, la yãmb fãa Zɩɩda la Bẽnzame rãmba, kelg-y! Yãmb sã n pa ne Naaba-Wẽnde, bãmb me paada ne yãmba. Yãmb sã n gẽesd-ba, b basdame tɩ b yãend-ba. Yãmb sã n zãag ne-ba, bãmb me zãagda ne yãmba. A Israyɛl kaoosame n ka le tar Wẽnd sɩda, n ka le tar maan-kʋʋd sẽn na n zãms-a, wilg noorã, n ka le tar noora ye. La a pɛta pʋgẽ, a lɛɛg n wa kẽe Naaba-Wẽnd. B bao-b lame, la b basame tɩ b yãend-ba. Sasa kãnga, tɩ ned ba a ye ka zĩ n pa yɩɩdẽ, tɩ pa gomd a sã n togd sore. Sẽn lebẽ fãa yaa yɛɛsgo la rabeem. Rĩung ra yikda zabr ne a to, tɩ tẽng yik ne a yaka. Naaba-Wẽnd da gãneg-b-la yɩɩr pʋgẽ. Sã n ya yãmba, keng-y y sũuri, la y da bas raood ye tɩ y tʋʋma na n paama b rolbo.» A Asa wʋma bãngda goama, n yeel t'a na n yiisa wẽn-naandsa sẽn da be Zɩɩda ne Bẽnzame tẽn-peelmẽ la tẽnsã sẽn be Efrayim tãnga zugu, a sẽn da pãb n deese. A le manega maan-kugrã sẽn da rɩg wẽnd dooga zãonga noore. A kɩtame tɩ Zɩɩda ne Bẽnzame tigim taaba, n paas sẽn da yi-b Efrayim, Manase la Simeõ tẽn-peelmẽ tɩ bãmb wʋsg da zoe n kẽ-la a Asa, b sẽn yãend tɩ Naaba-Wẽnd da pʋgda a poore. A Asa naama yʋʋmd piig la a nu soaba, kiuug a tãab soaba, Sivã kiuugu, b fãa waa n tigma Zerizalɛɛm. Baraare b yãka b sẽn tɩ paam zabra weoogẽ n kʋ maand Naaba-Wẽnd yĩnga, niis kobs-yopoe la rũms bõones tus a yopoe. B wẽename tɩ b na n baoo Naaba-Wẽnde, b ba-rãmb Wẽnde, ne b sũur fãa, ne b pãng fãa. Ned ninga sẽn ka na n bao Naaba-Wẽnd, a Israyɛl Wẽnde, b na n kʋ-a lame, a ya nin-kãseng bɩ nin-bila, pag bɩ raoa. B kãaba Naaba-Wẽnd ne bʋ-raase, tɩ tõntõod la bard peebdẽ. Zɩɩda rãmba fãa sũur yɩɩ noogo ne b kãabgã, tɩ ya bũmb sẽn sɩd yi sũurẽ. B bao Naaba-Wẽnd yamleoogo. La rẽ yĩnga, Naaba-Wẽnd me basame tɩ b yãend-ba la b kõ-b-la laafi ne b yagsa fãa. Dĩm a Asa ma menga, a Maaka, ka le bool tɩ naab ma ye, tɩ yẽ ra kɩtame tɩ b pees wẽn-poak a Asera nin-naande. A Asa luba a yel-yaalgã, n to-a n bõgse, n yõog a bugum Sedrõ. A sãama waoogra zĩis fãa. A Asa yaool n yɩɩ pʋ-peelem soaba a vɩɩma fãa pugẽ. A bĩnga wẽnd dooga pʋga, a ba kũum sõma, a meng kũuni, wanzurfu, sãnem la lagd wʋsgo. Zabr ka le zĩnd n tãag a Asa naam yʋʋmd pis-tã la a nu soab ye. A naama yʋʋmd pis-tã la a yoob soaba, Israyɛl dĩm a Basa yika zabr ne a Zɩɩda. A maneg n me Rama n paas a pãnga la a tõog n gɩdga Zɩɩda dĩma a Asa leebgo. A Asa kong n kẽe wẽnd doogẽ, n kẽ dĩma roogẽ n yãk wanzurf la sãnem n tool Aramsa dĩma, a Ben-Adad. Dĩm kãng ra kẽeda Damas. A Asa yeel-a-la woto: «Zood n be maam ne foom tẽnsʋka, m ba la fo ba tẽnsʋka; m toond-f-la wanzurf la sãnem. Ade, sãam f zooda ne a Basa, Israyɛl dĩma, t'a zãag, la a ra le wa zab ne m ye!» A Ben-Adad deega dĩma Asa kosgo. A yiisa a tãnsoaben-dãmb tɩ b tɩ zab ne Israyɛl tẽnse. A pãba Iyõ tẽnga, Dã, Abɛl-Mayim, la Neftali tẽnsã, a sẽn da bĩngd a kood zĩis niynsã. A Basa sẽn wʋm dẽ a bas a meeba a sẽn da met Rama. A Asa tɩ wʋka fãa n wa Zɩɩda. Yaa kuga la raadã, la b tall-b lame n me Geva la Mispa, n paas b pãnga. Yaa wakat kãng la bãngd a Anani wa dĩma a Asa mengẽ. Ad-a sẽn yeele: «Fo sẽn bas Naaba-Wẽnd teegre n teeg Aram dĩma, bãng t'a tãb-biisa na n fʋsg n yi-la f soolmẽ. Nubi la Libi tãb-biisa ra naaga tãaba n ya neb ka tɛka, n tar wiidi la bilim-bilm ka tɛka. Fo sẽn da teeg Naaba-Wẽnd yĩnga, b rɩk-b lame n sagl f nugẽ. Naaba-Wẽnd nin kargda tẽnga gilli n na n keng sẽn kẽed b bãmb sũuri. Fo maana yalemdo, la marsã tɛka yaa zabr la f na n yãe.» A Asa sũur puuga ne bãngdã, la a sẽb-a lame n kẽes roogo. Baraar tɛka a zãa toogo, a soolma neb kẽere. A Asa kibare, a sɩngre n ta a baasgo, fãa gʋlsa a Israyɛl la a Zɩɩda dĩm dãmba sebrẽ. A naam yʋʋmd pis-tã la a wɛ soaba, a yika bãag sẽn zab a nao. A bãaga pʋgẽ a basa Naaba-Wẽnd teegre n teeg tɩt rãmba. A Asa kiime, a naam yʋʋmd pis-naas la a ye soaba. B mum-a-la yaoog ning a meng sẽn da kɩt tɩ b tu a Daviid na-tẽngẽ. B gãneg-a-la a gãagẽ n wʋk yũ-nood kaam, la tɩdare la bõn-yood a taaba n zam-a. A waoogr yĩnga, b widga bugum sẽn ka zĩnd taar ye. A Asa biig a Zozafat n led zaoorẽ, a paasa a naama pãnga. A ninga tãb-biis a Zɩɩda tãnsoben-tẽnsẽ, n ning kombɛɛmba Efrayim tẽnse a ba, a Asa, sẽn pãb n deege. Naaba-Wẽnd zĩnda ne a Zozofat t'a vɩɩma wẽneg a ba, a Daviid, rẽnd sẽn sɩng to-to. A ka pʋg a Baal dãmb ye. A baoo Naaba-Wẽnd, a ba rãmb Wẽnde, la a reega b noore. A ka maan wa Israyɛl dĩm dãmb ye. Naaba-Wẽnd kenga naama a nusẽ. Zɩɩda neba fãa ra yaooda fadgo la woto a paama waoor la arzɛk wʋsgo. A sũura tol n kẽe Wẽnd n paase t'a wã wẽn-naandsã, n menes ra-peesdi wã fãa. A naam yʋʋmd a tãab soaba, a yiisa a taoor dãmb kẽere tɩ b sa n karem Zɩɩda tẽnsa rãmba n nek b yam. Yɩ-la a Ben-Ayil, a Obadiya, a Zakari, a Netaneyɛl, a Mikaya. Levitsa kẽer n yãag-ba. Yɩ-la a Semaya, a Netaniya, a Zebadiya, a Asayɛl, a Semiramot, a Zonatã, a Adoniya, a Tobiya, a Tob-Adoniya, n paas maan-kʋʋdba a Elisama la a Zoram. B sɩnga b zãmsga Zɩɩda ne Wẽnd noora sebre. B saaga Zɩɩda tẽnsa fãa n zãmsd neba. Naaba-Wẽnd kɩtame tɩ tẽns niyns sẽn da gũbg-b Zɩɩda rig rabeem kãsenga. B pa tak zabr ne a Zoazafat ye. Filisti rãmba mens ra wata ne kũuni la ligdi. Arabsa waa ne rũmsi, pe-raad tus a yopoe la kobs-yopoe la boees tus a yopoe la kobs-yopoe. A Zozafat pãnga da tara paasgo, a mee tãnsoben-doto la kood bĩngr tẽnse. B paam n bĩnga kood zembala Zɩɩda tẽnsẽ. A ninga tãb-biis sẽn tar sũur Zerizalɛɛm. Ad-b sõore, roog-roogo. A Zɩɩda roogo: tãb-biis sẽn tar sũuri, bãmb tus kobs-tã, tɩ b tãnsoaba yaa a Adna, n le paas tãb-biis tus kobs-yi la pis-nii tɩ b tãnsoab yaa a Zoana. Sẽn waa n paas-a yɩ-la ned sẽn kẽ Naaba-Wẽnd tʋʋmda ne yamleoogo, a Zikri biig a Amasiya. A neba yɩɩ tãb-biis sẽn pid ne raoodo, bãmb tus kobs-yi. Sã n yaa a Bẽnzame roogo, yɩ-la a Eliyada, gãndaoog menga ne neb tus kobs-yi, sẽn bob tãbdo la sẽn zãad gãndo. Yẽ sɛɛgẽ da yaa a Zozabad, yẽ ra tara tãb-biis tus koabg la pis-nii sẽn bob zabre. Sẽn da sõngd-b dĩma la woto, la pa gomd neb niyns a sẽn da ning tãnsoben-dotẽ wã, Zɩɩda tẽn-peelma fãa pʋgẽ ye. A Zozafat paama waoor la arzɛka wʋsgo. A yõga zood ne a Akab la zooda waa n baasa ne reemdo. Sẽn maan yʋʋm a wãna, a waa Samari n na n ges a Akab. A Akab kʋʋ piis la niis ka tɛka, yẽnda ne a poorẽ dãmba yĩnga, la rẽ yaa sẽn na n yɩlẽ t'a wa sõng-a n tak zabre ne Galaad-Ramot dãmba. Israyɛl dĩma Akab yeela Zɩɩda dĩm a Zozafat: «F na n waa ne maam Galaad-Ramot bɩ?» T'a yeele: «Foo ne f neba sẽn maand bũmb ninga, maam ne m neba me maanda boto.» A Zozafat le yeela Israyɛl dĩma: «Mam kotame tɩ f sok n paam Wẽnd koɛɛga.» Dẽ la Israyɛl dĩma tigim bãngdba na ta kobs-naase n sok-ba: «D tog n kẽng n tɩ kaooga zabre Galaad-Ramot bɩ m tog n basame n pa kẽnge?» Tɩ b naag taab n leoke: «Kẽng-y tɩ Soaala na ning tẽnga dĩma y nugẽ.» T'a Zozafat yeele: «Naaba-Wẽnd bãngdba ba a ye ka ket tɩ d kudg yẽ me kãntɩɩga?» Israyɛl dĩma leoka a Zozafat: «Ned a ye n kete tɩ d tõe n kudg kãntɩɩga n sok Naaba-Wẽnde, la mam kis-a lame, a zɩ n togs koɛɛg sẽn noom-m ye, dẽnd beed bala. Yaa a Yimla biig a Mise.» A Zozafat yeelame: «Bɩ dĩma da gom woto ye!» Israyɛl dĩma boola a sõgen a ye n yeel-a: «Bool a Yimla biig a Mise t'a wa tao-tao!» Israyɛl dĩma ne Zɩɩda dĩma da zao b naam goeele, n yeelg naam futu. B ra bee vɩʋʋg ninga sẽn be Samari Noorã tɩ bãngdba da yɛs b taoore n gomd b bãngra goama. A Kenaana biiga a Sedesiyas ra kuda kut yɩɩla la a yeelame: «Wẽnd koɛɛg la woto: ‹Ne yɩɩn-bãmba, fo na n tãa Aramsã n kʋ-b zãnga.› » Bãngdba fãa da gomda gom yɛnga n yetẽ: «Kẽng Galaad-Ramot, f na tõoge. Wẽnd na n ning-a-la dĩma nugẽ.» B sẽn tʋm dao ninga t'a tɩ bool a Mise wã goma ne a woto: «Bãngdba fãa zemsa taab noor a ye n gomd noog dĩma poorẽ. Fo me maan wa bãmb nin-yende n kãab noogo.» Dẽ la a Mise leok yã: «M wẽend ne Wẽnd sẽn vɩ, tɩ m Soaala sẽn yeel-m bũmb ninga bal la m na n togse.» A sẽn ta dĩma taoore, dĩma sok-a lame: «Mise, d kẽng n tɩ kaoog zabr Galaad-Ramot bɩ d ra kẽnge?» T'a leoke: «Kẽng-y, y na tõoge, Wẽnd na n ninga tẽnga zãng y nugẽ.» La dĩma yeel-a lame: «Yaa naoor a wãna la m na n kos-fo tɩ f togs sɩd bal Naaba-Wẽnd yĩnga?» Dẽ marsã la a Mise yeel yã: «Mam yãenda Israyɛl gill sẽn sẽeg tãmsa zutu, wala piis sẽn ka tar pe-kɩɩma. La Naaba-Wẽnd yeelame: b ka le tar Soaal ye, la rẽ yĩng bɩ ned kam fãa leb a yir ne laafi.» Israyɛl dĩma yeela Zɩɩda dĩma: «M da ka pĩnd n yeel tɩ nin-kãnga zɩ n togs koɛɛg sẽn noome, dẽnd beed bala?» T'a Mise yeel: «Maneg-y n kelg Naaba-Wẽnd koɛɛga. M yãee Naaba-Wẽnd tɩ b zao b zaoorẽ, tɩ b sõsd-n-taasa fãa yɛs b sɛɛgẽ goabg la rɩtgo. Tɩ Wẽnd soke: ‹Ãnda n na n belg a Akab, Israyɛl dĩma, t'a kẽng Ramot-Galaad n tɩ pa be.› La nin-yend leoka woto, t'a to leok woto. Wakat kãng marsã la yam soab a ye kolg Naaba-Wẽnd taoore, n yeele: ‹Yaa maam n na n belg-a!› Tɩ Wẽnd sok a: ‹Fo na n maana wãna?› T'a yeele: ‹M na kẽngame, m na n lebga zirẽ-beed zelemde, bãngdba fãa sẽn be ka wã noorẽ.› Tɩ Soaala le yeele: ‹F na belg-a, f na tõog n tudg-a, kẽng la f maan boto!› A Mise paasame: Goam sɛɛme. Soaala-Wẽnd zoe n ninga zirẽ-beedo bãngdba sẽn be ka wã noorẽ, ad yaa b meng sẽn dat beed ne fooma yĩnga.» Dẽ la a Kenaana biiga a Sedesiyas kolg n wẽ a Mise noore n yetẽ: «Naaba-Wẽnd yam tũu so bʋgo n bas maam n lɛɛg n kẽ foom?» T'a Mise yeele: «F na bãng rẽ raar ning f sẽn wat n zoe n soonde, f zaka ro-likẽ.» Israyɛl dĩma kõo no-kãnga: «Yõk-y bãngd, a Mise, n tɩ kɩs tẽnga kombere, Amon tẽnga naba, la na-biiga a Zowas. Y na yeel-ba: ‹Dĩma koɛɛg la woto: Sui-y nin-kãnga bi-bees roogo, n kõt a bur la koom bala, n gũud m sẽn na n lɛɛg n wa ne laafi.› » T'a Mise yeel-a: «F sã n lɛɛg n wa ne laafi, dẽnd Soaala-Wẽnd ka gom ne mam noor ye.» Israyɛl dĩma ne Zɩɩda dĩm a Zozafat, kẽnga zabre, Galaad-Ramot. Ad Israyɛl dĩma sẽn yeel a Zozafat: «Mam na n teema m fut n kẽng zabrã, la yãmba, bɩ y yeelg y fuugu.» Israyɛl dĩma sɩd teema futu tɩ b kẽng zabre. Aram dĩma yaool n da kõ-la a bilim-bilm nanams no-kãnga: «Da kaoog-y zabre ne nin-naaba bɩ ne talg ye, kaoog-y zabre ne Israyɛl dĩma bala.» Bilim-bilm nanamse sẽn yãend a Zozafat, b yeelame: «Yaa Israyɛl dĩma,» la woto wã b fãa wẽnemdame n tees yẽnda. A Zozafat kelmame, tɩ Naaba-Wẽnd wa sõng-a n tall-a n zãage. Nanamsa sẽn bãng tɩ ka Israyɛl dĩma, b loogame n bas-a. Dao a ye n waa n yãag a tãpo n tão yaare tɩ yõk Israyɛl dĩma kuta fuug sogb zĩiga. Dĩma yeela sẽn tata bilim-bilma wiidã: «Wẽnemd tɩ m yi zabra sʋka, tɩ m paama sãmpogre.» Zabra wɩnga wakat kãnga. Israyɛl dĩma kell n yalsa yĩngri a bilim-bilm pʋga, n ta zaabre, n get Aramsã, la wĩndg sẽn lʋɩ, a kiime. Sã n yaa a Zozafat, yẽ leba a tẽngẽ n ka tol n pogl ye. Bãngd a Anani biig a Yewu n yi n seg dĩma n yeel-a: «Yɛ la yãmb yãe tɩ b sõngd nin-yaalga? Bõe tɩ y na n nong sẽn kis-b Wẽnde, n tak Wẽnd beem y zugu? Bũmb la b yãe yãmb nẽngẽ sẽn ya sõmbo; yãmb yiisa ra-peesdi wã fãa sẽn da be tẽnga pʋga la y sũur yaa ned sẽn baood Wẽnd sũuri.» A Zozafat yalsa Zerizalɛɛm bilfu, la dẽ poore a yi n saag n gesa a nebã, sẽn sɩng Beerseba n ta Efrayim tãnga. La yaa sẽn na n le tall-ba n wa b yaab rãmb Wẽnda nengẽ, Naaba-Wẽnd nengẽ. A ninga bʋ-kaoodb tãnsoben-tẽnsẽ la tẽns a taaba pʋga. A yeel-b-la woto: «Bãng-y y tʋʋmna võore tɩ ka ninsaal yĩng la y kaood bʋʋdo, yaa Naaba-Wẽnd yĩnga, la b bee ne yãmba y bʋʋda wakato. Dẽ yĩnga zoe-y Soaala-Wẽnd wʋsgo. Tũ-y noorã, deeg-y y vɩɩma pʋgẽ, tɩ Naaba-Wẽnd ka sak zãmbo, b ka sak a zagl yɩɩda a zagl ye, b ka rat tɩ b reeg kũuni tɩ bʋʋda tũ rẽ n kedb ye.» A Zozafat ninga maan-kʋʋdb Zerizalɛɛm, n ning Levitse la sags kãsem-dãmba. Bãmb n da wilgd sẽn toge la b paasd zaba. B ra bee Zerizalɛɛm. A Zozafat yeela bãmb me: «Tʋm-y tʋʋma woto, n zoet Soaala-Wẽnde, la y maand pʋ-peelem la y gãd rẽ y sũurẽ zãnga. Koɛɛg ning fãa y saam-biisa sẽn na n tall n wa y nengẽ: yaa zɩɩm la b rat n daag n dole, yaa no-koeemde, noora poorẽ, saglsa poorẽ, dog-n-mika poorẽ, bɩ y vẽneg-ba, tɩ b ra beeg Naaba-Wẽnd ye la woto b sũura kõn yik ne tõndo la y saam-biisa ye la yãmb me kõn dɩ taal ye. A Amariya, maan-kʋʋdba kãsma, n na n lʋɩ y taoore, n leok-y sẽn segd la sẽn pa segd ne Naaba-Wẽnde. Sã n ya sẽn get dĩma yelle na n yila a Zebadiya, a Yismayɛl biiga, sɩmand naaba. Levitsa n na n sõng-y ne gʋlsgo. Da reem-y ye, tũ-y m sẽn wilga fãa. Wẽnd na zĩnd ne ned ning fãa sẽn baood neere!» Dẽ sẽn looge, Moabitsã la Amonitsã, ne Maonitsã waa n yika zabre ne a Zozafat. B waa n togsa a Zozafat woto: «Zãma ka tɛk n yi mogra rʋʋnde la Edom, n wat n na n tak zabre ne foo. Marsã b taa Asasõ-Tamar, dat n yeelame tɩ En-Gedi.» Rabeem yõka a Zozafat t'a na n yõk Naaba-Wẽnd sɛɛga. A yiisa a koɛɛga, a yeela Zɩɩda tõre tɩ b loe noore. Zɩɩda rãmb fãa tigma taab n na n yõk Naaba-Wẽnd sɛɛga. Tẽng fãa sẽn be Zɩɩda yiisa a neb tɩ b wa Zerizalɛɛm. B sẽn waa n naag Zerizalɛɛm dãmbã, a Zozafat yaasa yɩng zãong paalga taoore, n yeele: «Naaba-Wẽnd, d yaab rãmb Wẽnde, ka yãmb n so bʋ-zẽmba fãa rĩunda bɩ? Pãng la tõog be-la y nugẽ. Ned ka be n kolg yãmb ye. Ka yãmb la tõnd Wẽnd bɩ, ka yãmb n dig a Israyɛl taoore tẽn-kãnga pipi soaalba bɩ? Yãmb pa rɩk-a n kõ y sẽn nong b rãmba, a Abraam yagens bɩ? B kẽe tẽn-kãnga, n me roogo y yʋʋr yĩnga, la b yetẽ: ‹Yell sa n pak do, zabre, sɩbgre, bã-longdem, kom, d na wa y taoore la y rooga taoore, tɩ y zĩndga y meng a pʋgẽ. D yɩɩra pʋga d na tees-y n kelem, y na wʋme la y na fãag-do.› Ges-y Amonitsã, Moabitsã, Seyir tãng zug rãmbã. Yãmb ka bas t'a Israyɛl sãam-ba, a sẽn wa n yi Ezipt n watẽ ye. A lakame n bas-ba, n ka sɩɩs-b ye. Ges-y b sẽn don b sõm to-to, n wat n na n yiis tõnd y sẽn kõ-d soolem ninga pʋgẽ. Soaala, y ka na n kao d bʋʋdo n fãagd-d nin-bãmba sẽn ka be tɛka nugẽ, tɩ b waa n na n zaba ne-do? Tõnd ka mi d sẽn na n maneg ye. Woto wã yãmb bal la d geta.» Zɩɩda neba fãa, b pagb la b kom-bõones ra yɛsa Soaala-Wẽnd taoore. Soaala-Wẽnd vẽnega a Yaaziyɛl, a Zakari biiga la a Benaya yagenga. A Benaya ba la a Yeyiyɛl, a Yeyiyɛl ba la a Mataniya, Levitga la a Asaf biiga. A tãsame: «Kelg yã, yãmb fãa Zɩɩda la Zerizalɛɛm dãmba, la yãmba, dĩm a Zozafat, ad Soaala-Wẽnd koɛɛga: ‹Da zoe-y rabeem ye, da yɛɛs-y zãma kãsenga taoor ye. Ka yãmb n so zabra ye, yaa Naaba-Wẽnde. Beoog bɩ y sig n seg y bɛɛbã. Yaa puuda kunkubra sor la b rɩk yã. Y na seg-b sudga noorẽ, Yeruwɛl weoogẽ. Ka zabr la y na n zab ye. Yals-y bala, tong-y bala la y na yãend fãagr ning Soaala-Wẽnd sẽn segl Zɩɩda la Zerizalɛɛm yĩnga. Da zoe-y rabeem ye. Da yɛɛs-y ye, yi-y beoogo n seg-ba, tɩ Soaala-Wẽnd na zĩnd ne yã.› » A Zozafat wõgemdame n kɩ a neng tẽnga. Zɩɩda la Zerizalɛɛm dãmba me wõgemdame n waoog Naaba-Wẽnde. Levitsa, a Keyat la a Kore yagense, sɩnga Soaala-Wẽnd pẽgre ne b koees pãng tɛka. B sãda beoogo n dɩk Tekoa we-raooga sore. B sẽn waa n looda, a Zozafat yaasa yĩngr n yeele: «Kelg-y-ma, Zɩɩda la Zerizalɛɛm dãmba. Da yi-y Naaba-Wẽnd poorẽ tɩ y na tilge. Tẽ-y bãngdba sẽn togsã tɩ y yɛl na baas neere.» A reng n yẽsa ne zãma wã, la tãb-biisa taoore, a lʋɩɩsa Naaba-Wẽnd yɩɩn-yɩɩndba sẽn da yeelg b tʋʋmda fu-sõma n tar b pẽgre. B ra yetame: «Pẽg-y Naaba-Wẽnd, tɩ b nonglma ka be sɛɛb ye.» B sẽn waa n pʋt b pẽgr la b sũ-noog yɩɩla, Wẽnd lobga sẽeg-taab yam, Amonitsã, Moabitsã la Seyir tãnga zug rãmba. Amonitsã la Moabitsã yika zabre ne Edomitsa, Seyir tãnga zug rãmbã, la b kʋ-b-la zãnga n pa tol n kees ned ye. Amonitsa la Moabitsa me lɛɛg n kẽe taaba n kʋ taaba. B sẽn ta we-raoog noore t'a Zozafat dʋ kunkubr n na n gese, ad-a sẽn yãende: yaa sẽn ki n dɩg bala. B pa yãe sẽn põs ye. A Zozafat waa ne a nebã n zɛ-ba. B yãee rũms ka tɛka, lagdo, futu, la sãnem teedo. B waa n wʋkame tɩ yaa n loog b zɩɩbo. Te-zɛɛdma sẽn da labs yĩngã, dasem a tã tõre la b zõond ne b wʋkre. Ne rẽ fãa b pa tõog n sɛ ye. Daar a naas soaba, b tigma taab Beraka bãg-faagẽ. B pẽga Soaala-Wẽnd be, b pʋʋs-b-la barka la yaa rẽ yĩng la b boond zĩiga tɩ pẽgr la bark puusg zĩiga, n ta ne rũnna. Zɩɩda ne Bẽnzame neba lɛɛga ne sũ-noogo n wa Zerizalɛɛm. A Zozafat da kẽnda b taoore. Wẽnd deega b bɛɛba sũ-noogo n kõ bãmba. B sẽn ta Zerizalɛɛm, b kẽe wẽnd doogẽ wã tɩ kola wẽedẽ, tɩ ruuds wãagdẽ, tɩ tõntõod peebdẽ. Dabeem kãseng yõka tẽnsa fãa b sẽn waa n wʋm tɩ Naaba-Wẽnd meng b toore n da tak zabre ne a Israyɛl bɛɛbã. A Zozafat rɩɩ a naam ne bãane. Wẽnd kõ-a-la laafi ne a yagse. A Zazafat dɩɩ naam Zɩɩda. A ra tara yʋʋm pis-tã la a nu a sẽn waa n lebg dĩma, la a rɩɩ a naama yʋʋm pisi la a nu Zerizalɛɛm. A ma la a Azuba, a Sili biiga. A tũ-la a ba, a Asa, vɩɩm n ka bʋdg ye, n maand sẽn ya neere Naaba-Wẽnd nifẽ. Wẽn-naandsa ka wã zãng ye, woto zãma wã sũur ka tõog n kẽ b ba rãmb Wẽnda zãng ye. A Zozafat vɩɩma, a sɩngre n ta a baasgo, fãa gʋlsa a Anani biig a Yewu tʋʋma sebrẽ, seb kãng pʋgẽ la b gʋls Israyɛl dĩm dãmba kibare. A Zozafat waa n yik n tɩ yõga zoodo ne Israyɛl dĩm a Akaziyas, la yẽ n tus-a t'a maan wẽnga. A naag-a lame n maan koom-kogend sẽn na n tʋgd Tarsis. Yaa Esiõ-Gebɛr la b maan-ba. Maresa dao a Dodava biig a Eliezɛr, yiisa bãngr goam beed a Zozafat poorẽ. «Fo sẽn tɩ yõg zood ne a Akaziyas yĩngã, Naaba-Wẽnd wurga f tʋʋm sõma wã lalga.» Kogenda fãa wãame, b pa tõog n loog Tarsis ye. A Zozafat kiime. B mum-a-la a saamb a Daviid na-tẽngẽ. A biig a Zoram n led-a a zaoorẽ. A Zoram yaopa, dĩm a Zozafat kamba, yɩ-la a Azariya, a Yeyiyɛl, a Zakari, a Azariya, a Mikayɛl, la a Sefatiya. B ba a Zozafat ra kõ-b-la ligd naoor yaka, n kõ-b sãnem, wanzurfu, fan teedo, tãnsoben-tẽns sẽn be Zɩɩda tẽn-peelmẽ; naama la a bas n kõ a Zoram, tɩ yẽ la kãsma. A Zoram deega naama, la a naama sẽn waa n paam pãnga, a kooda a yaopa fãa ne Israyɛl taoor dãmb kẽere. A sẽn waa n na n dʋ zaoorã t'a tara yʋʋm pis-tã la a yiibu. A rɩɩ naam yʋʋm a nii Zerizalɛɛm. A togsa Israyɛl dĩm dãmba vɩɩm. A maana waa a Akab, t'a ra yii kãadem ne a Akab bi-pugla. A maana sẽn ka ta Soaala-Wẽnd yam. Baasgo Naaba-Wẽnd ka tʋlg n wãa a Daviid doogo, tɩ b ra yõga zood ne a Daviid, la b ra kãab-a lame tɩ wakat buud fãa fitil na widgi, yẽ yĩnga la a kamb yĩnga. Yaa yẽ zãmaanẽ la Edom yi a Zɩɩda soolmẽ; a bao dĩm n kõ a menga. A Zoram gãndga a Edom toaaga ne a tãnsoaben-dãmba la a bilim-bilm gilli. A yika ne yʋngo, n pãb Edom tãb-biisa sẽn da gũbg-a. A tõoga bilim-bilma tãnsoaben-dãmba. Dẽ tɛka Edomitsa fʋsg yi-la a Zɩɩda soolmẽ, n ta ne rũnna. Yaa wakat kãng me la Libna fʋsg n yi a soolmẽ. La rẽ yaa a Zoram sẽn da bas Naaba-Wẽnd, a ba-rãmb Wẽnde. Yẽ n wa ne wẽn-naandsa waoogre Zɩɩda tẽn-peelmẽ. Yẽ n kɩt tɩ Zerizalɛɛm la Zɩɩda rãmb wɩɩbe. Bãngd a Eli waa n tool-a-la sebr a ye. Sebra ra yetame: «Ad Naaba-Wẽnd, f ba a Daviid Wẽnda koɛɛga: Fo sẽn pa tũ f ba a Zozafat la Zɩɩda dĩm a Asa nao, n yaool n tũ Israyɛl dĩm dãmba, f sẽn kɩt t'a Zɩɩda la Zerizalɛɛm dãmba wɩɩbe, wala a Akab roogo, f sẽn kʋ f yaopa, f ba-biisã sẽn da são fooma, rẽ fãa yĩnga, Naaba-Wẽnd na n sɩbg-f-la ne sɩbgr kãsenga, foo ne f nebã, f kamba, f pagba, f sẽn tar fãa. Fo meng na n bẽe bã-toose, na n yɩɩ pʋg roog bãaga la f na wʋba f yãada zãnga.» Soaala-Wẽnd tusa Filisti rãmba, Arabsã, Nubi rãmbã tɩ b maan zabre ne a Zoram. B waa n wẽe Zɩɩda, n tõog-a, n wʋk dĩma zak teedo ne a kamba, la a pagba. A kamba yao-zʋʋg bala, a Akaziyas, n põse. Dẽ sẽn looge, Naaba-Wẽnd lob-a-la pʋg-roog bãag sẽn ka tɩɩm ye. Bãaga kaoosa sẽn yɩɩd yʋʋmde. Sẽn maan yʋʋm a yi, a wakat sẽn ta, a wʋba a yãadã, n nams wʋsgo, n ki. B pa yõog tɩdar a yĩng wala b sẽn maan a ba wã kaalmẽ ye. A Zoram sẽn waa n na n dʋ zaoore t'a yʋʋm yaa pistã la a yiibu; a rɩɩ naam yʋʋm a nii Zerizalɛɛm. A loogame tɩ ned ba a ye ka yãb-a ye. B mum-a-la a Daviid na-tẽngẽ la pa yɩ dĩm dãmba yaadẽ ye. Zerizalɛɛm dãmb dʋʋsa a Zoram biig, a Akaziyas, zaoorẽ. Yẽ la a kamba yao zʋʋga. Arabsa n da waa n kẽ Zɩɩda n kʋ a kẽem dãmba fãa. Yɩɩ woto la a Zoram biig a Akaziyas lebg Zɩɩda dĩma. A sẽn waa n dʋʋd zaoorã t'a yʋʋm yaa pisi. A rɩɩ naam yʋʋmd Zerizalɛɛm. A ma ra boondame tɩ Atali. A Atali ba la a Omri. Yẽ me togsa a Akab rooga vɩɩm, a ma sagl wẽnsa yĩnga. A maana sẽn ka ta Soaala-Wẽnd yãm wala a Akab roogo. A ba kũuma poore, nin-wẽnsa sagl-a lame n kẽes moogo. A tũ-la b saglse n kẽng ne a Zoram, Israyɛl dĩm a Akab biiga, n tɩ zab ne Aramsa dĩma, a Azayɛl, Galaad-Ramot. Aramsa pogla a Zoram. Yaa Zizreyɛl la a lɛɛg n wa n na n tɩp sãmpogrã a sẽn paam Ramot, a sẽn waa n zabd ne Aramsa dĩm, Azayɛl. A Zoram biiga a Akaziyas, Zɩɩda dĩma, waa Israyɛl n na n ges a Zoram, a Akab biigã, t'a ra ka keem ye. Naaba-Wẽnd kɩtame t'a Zoram gesga wa ne a Akaziyas kũum. Ade, a taa a Zoram nengẽ tɩ b yi n na n zab ne a Zewu, a Nimsi biiga, Soaala-Wẽnd sẽn kõ naam, t'a na n sɛɛs a Akab buudu. A Zewu sɩd da baood n na n menesa a Akab roogo, a sega Zɩɩda tãnsoaben-dãmbã, a Akaziyas kẽem dãmba kambã, la a sõgen-kamba. A kʋ-b lame. A kɩtame tɩ b bao a Akaziyas. A Akaziyas ra kẽe Samari n na n soonde la b yõk-a lame n wa kɩs a Zewu t'a kʋ-a. B mum-a lame n yetẽ: «Yaa a Zozafat biiga, ned sẽn da baood Soaala-Wẽnd ne a sũur fãa, biiga.» Ned ka kees a Akaziyas roogẽ sẽn da tõe n dɩ naam ye. A Akaziyas ma, a Atali, sẽn wʋm a biiga kũum, a me baoome n na n wã Zɩɩda dĩm dãmb roogo. Dĩma bi-pugla, a Zoseba, solga a Akaziyas biiga a Zowas, b sẽn wa n kʋʋd a kẽem-dãmbã. A solg-a lame, yẽ ne a ma wubdga, gãag roog a ye pʋga, wẽnd doogẽ. Yɩɩ woto la a Atali ka paam-a n kʋ ye. A Zoseba da yaa maan-kʋʋd a Zoyada paga, n leb n ya Zɩɩda dĩm a Zoram bi-pugla la a Akaziyas tão. A Zowas paam n solga yʋʋm a yoobe, wẽnd doogẽ, ne sẽn tʋlg-ba n fãag a yõorã. Dẽ t'a Atali n lebg dĩm poaka. Yʋʋmd a yopoe soaba, a Zoyada baoo yella tɩɩm. A kɩtame tɩ b tɩ bool neb koabg tãnsoaben-dãmba: a Azariya, a Yeroam biiga, n paas a Yismayɛl, a Zoana biiga, n paas a Obɛd biiga a Azariya, n paas a Adaya biiga a Maaseya, n paas a Zikri biig a Elisafat, la b yẽsame n zems taaba. B saaga Zɩɩda tõre n bool Levitsa la buud kãsem-dãmba; fãa waa Zerizalɛɛm. La b fãa wẽename tɩ b na n pʋga rĩm biiga poore, la yaa Wẽnd dooga pʋga la b wẽen dẽnna. A Zoyada yeelame: «Ad dĩma biiga. Bɩ a rɩ naam wala Naaba-Wẽnd sẽn kãab a Daviid kamba. Ad-y y sẽn na n maan bũmb ninga. Y na n weela sags a tãabo, maan-kʋʋdba la Levitsã, sẽn na n kẽ wẽnd doogẽ, vʋʋsga raar pʋʋsg yĩnga, bãmb kẽer n na n lebg dagno-gũudbã. Bãmb kẽer na n paa dĩma zakẽ, tɩ kẽer pa gũudba rota noore, tɩ zãma wã fãa pa wẽnd dooga sɩmannẽ. Ned ba a ye ra saag n kẽ wẽnd dooga pʋga sã n ka maan-kʋʋdbã la Levitsã sẽn so b tʋʋna baraare, tɩ b welga toor rẽ yĩnga. Bãmb yẽ tõe n kẽeme. Zãma wã na n tedgame n gilgi. Levitsa na n gũbga dĩma, tɩ ned kam fãa zãad a zab teedo, b na n yãaga dĩma a sẽn dabd zĩig ninga fãa. Sẽn kɩɩsa n kẽ wẽnd dooga pʋg bɩ b kʋ-a.» Maan-kʋʋd a Zoyada sẽn yals bũmb ningã, Zɩɩda rãmba deega fãa. Sẽn baasd-b tʋʋmde wala sẽn da sɩngd-bã, fãa yalsa b sẽn yet tɩ b yals zĩig ninga tɩ maan-kʋʋd a Zoyada ka bak ned ba a ye n bas ye. A kõo tãb-biisa kãna, gãndo, bɛd la bõonego, a Daviid dẽnna sẽn da be Wẽnd doogẽ wã. A tonga zãma wã, ned kam fãa ne a zab teed a nugẽ. B tonga pipi gõdrã nug rɩtgo n tãag nug goabg gõdrã. B gũbga maan-kugrã ne wẽnd dooga, n bas dĩma a zĩigẽ. B yaoolame marsã n yiis dĩma biiga, n fõgneg-a naam pugla, n kõ-a naam. A lebga dĩma. A Zoyada ne a kamba pʋdga kaam a zugu. Dẽ poore b tãsame tɩ sãde: «Wẽnd na kõ dĩma yõore!» A Atali wʋma zãma wã sẽn kilsd la a kaasd dĩma, t'a na n kolg Naaba-Wẽnd roogã. A sẽn yãend dĩma t'a yɛs yĩngr, wẽnd dooga noore, a sẽn yãend nanamsa la tõntõodã dĩma sɛɛgẽ, a sẽn yãend zãma wã t'a kɩdemnẽ la a peebd tõntõodo, a sẽn yãend yɩɩn-yɩɩndba ne b yʋʋm teedo tɩ b putẽ la b reesd yɩɩlã, a Atali kẽesa a futu n yetẽ: «Zãmbo, zãmbo!» Maan-kʋʋd a Zoyada yiisa tãb-biisa ne b nanamse. A yeel-b lame: «Yiis-y paga, a Atali, yɩnga, la ned sã n kẽed a tãpẽ, bɩ b kʋ-a.» Maan-kʋʋda ra yeelame: «Da kʋ-y paga wẽnd dooga pʋg ye.» A sẽn ta dĩma yiri b yõk-a-la wiida noorẽ, n kʋ. A Zoyada yalsa ne nebã la dĩma tɩ b na n modgame n yɩ Naaba-Wẽnd neba. B tũu taaba n dʋ a Baal wẽnd doogã, n wãa-a zãnga. B sarma a maan-kugã, a wẽn-naandsã; b kʋ-la a Baal maan-kʋʋdã, a Matã. A Zoyada gũnuga wẽnd doogã a Levi maan-kʋʋdbã. Yaa bãmb la a Daviid da kõ wẽnd doogã wala b pʋɩɩre, tɩ b na n tõog n kõ yũ-nood maando, wala sẽn gʋls a Moyiiz noora sebrẽ la b yɩɩla ne sũ-noogo wala a Daviid sẽn da rate. Wẽnd dooga noyẽ, a ninga gũudba, sẽn na yɩlẽ tɩ nin-dẽgd da tõog n kẽ ye. A boola tãb-biisa nanamse, nin-bɛda sẽn da tar-b naam buud fãa la zãma wã la b yisa dĩma wẽnd doogẽ. B kẽe dĩma zakẽ. B tũu tẽnsʋk noorã. B tɩ zĩndg-a-la a zaoorẽ. Neba fãa ra kɩdemda sũ-noogo la tẽnga pa kaoog ye. Sã n yaa a Atali, b kʋ-a-la ne sʋʋga. A Zowas sẽn waa n na n dʋ zaoorẽ t'a tara yʋʋm a yopoe. A rɩɩ naam yʋʋm pis-naas Zerizalɛɛm. A ma ra boondame tɩ Sibiya, yaa Beerseba tẽng paga. Maan-kʋʋd a Zoyada vɩɩma wẽnde, a Zowas maana sẽn tat Naaba-Wẽnd yam. Maan-kʋʋda sõng-a lame t'a yi kãadem ne pabg a yiibu n dog kom-dibli la kom-pugli. A waa n tʋlgame n le maneg wẽnd doogã. A tigsa maan-kʋʋdba la Levitsã n yeel-ba: «Kẽ-y Zɩɩda tẽnse, n dees ligd Israyɛl kamba nengẽ, n wa maneg wẽnd doogã, wala sẽn tog, yʋʋmd fãa. Maan-y tao-tao.» Levitsa yaool n ka maan yãgb ye. Woto wã dĩma boola a Zoyada, bãmb kãsma, n yeele: «Bõe tɩ f pa wilg Levitsa vẽenega tɩ b wa ne yaood ninga, Zɩɩda tẽnse la Zerizalɛɛm dãmb sẽn da tog n kɩs tɩ b maneg zood kaseta sẽn da bĩngd roog ning pʋgẽ wã, wala a Moyiiz, Wẽnd sõgna, la Israyɛl kambã sẽn da naag taab n yalsã? Pʋg-yoog, a Atali, ne a kamba wegmame n bas-a t'a sãame. B tol n kẽe Soaala-Wẽnd roogẽ n yiis te-sõma wã b wẽn-yooda yĩnga!» Dĩma kɩtame tɩ b maan koglgo n dɩgl wẽnd dooga dignoorẽ. B moona Zerizalɛɛm la Zɩɩda tẽns a taaba, tɩ b tog n wa kõo Soaala-Wẽnde, b tʋʋm-tʋmd a Moyiiz sẽn da yals yaood ning we-raoogẽ wã. Taoor dãmbã la zãma wã waa ne sũ-noogo, n lob koglga pʋga b sẽn da tog n kɩs fãa. B sẽn waa n na n dɩk koglgã n tɩ kɩs dĩma, ligd naaba yãeeme tɩ ligda yaa wʋsgo. Dĩma sɛb gʋlsdba sõnga taab n dɩk-a n tɩ vaage n le tall-a n wa rɩgle. B maana woto beoog-beoog fãa la b paama ligd wʋsgo. Dĩma ne a Zoyada rɩka ligdã n kɩs wẽnd doog tʋʋma naaba. Tʋʋm-tʋmdba, tãn-metba, ra-wãadba sɩnga wẽnd dooga manegre. Sãaba la yõgsa me waa n sɩngame. Tʋʋmda kẽnga tao tao tʋʋm-tʋmdba nugẽ. B kell n manega wẽnd doogã n paas a pãnga la a woglma ka paase, a yalma me ka teem ye. B sẽn tʋm n sɛ, b lebsa dĩma la a Zoyada ligda sẽn kellã. Woto wã b paam n maana teed wẽnd dooga yĩnga: zɩ-mesdem laase, sãnem la wanzurf lagd a taaba. A Zoyada vɩɩma tõre b tõoga beoog fãa n kʋ maand wẽnd doogẽ wã. A Zoyada waa n kʋʋlame. A paama yõ-woko n yaool n ki. A paama yʋʋm koabga la pis-tã. B mum-a-la ne dĩm dãmba a Daviid na-tẽngẽ. La rẽ yaa a sẽn maan neer ne Israyɛl Wẽnd la b roogo. A Zoyada kũum poore, Zɩɩda tãnsoaben-dãmba waa n wõgemda dĩma taoore la dĩma yaa n sak n kelga b koɛɛga. Zɩɩda rãmb basa b ba rãmb Wẽnda roogo, n saad n waoogd ra-peesdi la nin-naandse. Dẽ yɩɩ wẽng sẽn yik Naaba-Wẽnd sũuri, n wa ne Zɩɩda la Zerizalɛɛm wãabo. Baasgo Naaba-Wẽnd kõ-b-la norɛɛs sẽn na n sõng-b tɩ b lɛɛg n kẽ bãmba. La Soaala-Wẽnd sẽn taas b koees niynsã b zãgsa kelgre. Naaba-Wẽnd waa n vẽnega maan-kʋʋd a Zoyada biiga a Zakari. A sẽn yals zãma wã taoore a yeelame: «Ad Naaba-Wẽnd sẽn sokde: ‹Bõe tɩ y namsd y mens zaalem n tõdgd Naaba-Wẽnd noore? Bãng-y tɩ yaa yãmb sẽn bas Naaba-Wẽndã la bãmb me bas yãmba.› » Dẽ la b yik zabr ne-a, tɩ dĩma tol n kõ noor tɩ b lab-a ne kuga Wẽnd sɩmannẽ. Dĩm a Zowas yĩma sõm ning a Zakari ba a Zoyada sẽn da maan-a. A kʋ-la a Zakari, la a sẽn waa n kiidẽ, a yeelame: «Wẽnd neeme la b na soke.» Yʋʋmd sẽn vẽke, Aram dãmb kaooga tãpo ne a Zowas. B sẽn poog Zɩɩda la Zerizalɛɛm, b kooda tãnsoaben-dãmb fãa n dees b laogo n tool Damas dĩma. Sã n ya sɩda tɩ Aram dãmba da waa ne neb bilfr bala, yaa sɩd me tɩ yaa neb ka tɛka la Naaba-Wẽnd ning b nugẽ. La rẽ yaa b sẽn bas Naaba-Wẽnd, b yaab rãmb Wẽndã. Yaa a yel-manesem la Aram dãmba dol a Zowas. A ra gãee n bẽeda bã-toogo tɩ Aram dãmba loog n bas-a la yẽ meng sõgen-kamb n yɩk n kʋ-a, a gãag zugu, n dok b sũuri, a sẽn da kɩt tɩ b lab a Zoyada biig a Zakari yĩnga. A Zowas sẽn ki, b mum-a-la a Daviid na-tẽngẽ la pa yɩ dĩm dãmba yaadẽ ye. Neb niyns sẽn naag taab n sed a kũuma yɩɩ Amonitga a Simeat biig a Zabad, n paas Moabit poak a Simrit biig a Zozabad. A Zowas kamba kibare, a sẽn yaoolg neba to-to, a sẽn maneg wẽnd doogã, dẽ fãa gʋlsa dĩm dãmba vɩɩma sebrẽ. A biiga a Amaziyas n led-a a zaoorẽ. A Amaziyas yʋʋm pida pisi la a nu t'a yaool n deeg naam la yaa yʋʋm pisi la a wɛ la a rɩ naam Zerizalɛɛm. A ma ra boondame tɩ Zoadã la a ma wã roga Zerizalɛɛm. A Amaziyas maana taa Naaba-Wẽnd yam. Baasgo d ka tõe n yeel t'a maana pʋ-peelem zãng ye. A naama sẽn waa n paam pãnga, a kʋʋ neb niyns sẽn da yãk a ba wã yõore. A yaool n pa kʋ b kamb ye tɩ gʋlsa Noora pʋgẽ, a Moyiiz sɛba pʋgẽ, sebr ning a sẽn da paam Soaala-Wẽnd nengẽ. Ad sebra sẽn da yete: «Ba rãmb ka tog n ki b kamb beegr yĩng ye, kamba me ka tog n ki b ba-rãmb beegr yĩng ye; f kũum tũuda f meng beegre.» A Amaziyas tigma Zɩɩda rãmb gilli, n tigim b sak-saka, n kõ-b neb tusr la neb koabg tãnsoaben-dãmba, a Zɩɩda wala a Bẽnzame. A sõda sẽn da tar-b yʋʋm pisi bɩ yɩɩd rẽ la a paama neb sẽn ta tus kobs-tã la yaa zab-mitb sẽn tõe n zẽk kãnd la gãongo. Israyɛl pʋgẽ a yãee gãndaad tus koabga, n yao wanzurf zɩslem sẽn ta neb koabg la pis-nu zɩɩbo n kẽes-ba a tãpẽ. Wẽnd norɛɛs a ye yaool n wa yeel-a lame: «Ad-y pa tog ye, dĩma, tɩ Israyɛl tãb-biis wa naag yãmb ye, tɩ Israyɛl la Efrayim ned fãa, Soaala-Wẽnd lak n bas-a lame. B sã n naag foo, ba f modgda, ba f zabd ne raoodo, Soaala-Wẽnd kõn sõng-f tɩ f ka lʋɩ f bɛɛba nugẽ ye. Naaba-Wẽnd b ye tãa n tõe n sõnge la bãmb me n tõe n bas tɩ lʋɩ.» Dẽ la a Amaziyas leok norɛɛsã: «La m wanzurfa sẽn ta neb koabg la pis-nu zɩɩba, ãnda n na n lebs-ma?» T'a yeele: «Soaala-Wẽnd tõe n kõo foo tɩ yɩɩg rẽ wɛ!» Neb niyns sẽn da yit Efrayim tẽn-peelmẽ wã, a Amaziyas welg-b-la ne a nebã n lebs-ba, b tẽngẽ, tɩ b sũur kɛɛda. A Amaziyas yii ne nebã n tɩ tak zabre. Yaa Yamsem bãg-faaga la a tũ yã. Neb tus piig la a tõog Seyir. Zɩɩda kamba talla b sẽn yõg b rãmba n dʋ pĩig sẽn lugi n tus b tɩ b lʋɩ n bõgse. Sã n ya ne neb niyns a Amaziyas sẽn pa reeg a tãpẽ tɩ b lɛɛg n leb b tẽngẽ wã, ad-y b tɩ kẽe Zɩɩda ne Samari tẽnse la Bɛt-Orõ. B sega zab-zabdb sẽn ta tus a tã n tõog-ba la b zɛɛ b zɛɛbo. Zabr sẽn zab ne Seyir dãmb n sɛ, a Amaziyas waa ne Seyir wẽn-naandse; a waoog-b-la wa wẽnd, a wõgemda b taoore la a yõoga wisdu b yĩnga. Dẽ la Naaba-Wẽnd sũur puug ne a Amaziyas tɩ b tʋm bãngd a nengẽ. Bãngda sokame: «Bõe tɩ f pʋgd wẽnd dãmba sẽn ka tõog n fãag b neb fo meng nugẽ?» Bãngda yaasame n le baas n yeele: «M miime tɩ yaa Wẽnd n yẽs b na sãam f yelle la f sẽn ka reeg b saglsã n maan f sẽn maana.» Zɩɩda dĩma, a Amaziyas, rega saglgã n tʋm tɩ b tɩ yeel a Zoakaz biiga, la Israyɛl dĩm a Yewu yagenga a Zowas: «Wa tɩ d wags taaba.» La Israyɛl dĩm a Zowas leoka a Amaziyas, Zɩɩda dĩma, koe-kãnga: «Libã yõees-tabda tʋmame tɩ b wa yeel Libã kʋkã: ‹Dɩk f bi-pugla n kõ m biig t'a maan a paga.› Mik Libã we-rũmsa waa n taba yõees-tabdã. Fo yeelame: ‹M tõoga Edom,› n na n maan wilg-m-menga. Pĩnd n pa ne f raoodã f zakẽ. Bõe yĩng la f baood n na n wã f menga la f naag n wã Zɩɩda?» A Amaziyas pa kelg ye. La yaa Soaala-Wẽnd n wa ne rẽ, n dat n ning b yãnde b sẽn kẽ Edom wẽn-naandsa yĩnga. Israyɛl dĩma, a Zowas, boba zabre. Yẽ ne Zɩɩda dĩm a Amaziyas sega taab Bɛt-Semɛs, Zɩɩda tẽn-peelmẽ. Zɩɩda dãmbã n kong raoodo n lɛɛg n zoe a Israyɛl taoore. Sã n yaa a Amaziyas, Zɩɩda dĩma, a Zowas biig la a Akaziyas yagenga, Israyɛl dĩm a Zowas pag-a-la roog Bɛt-Semɛs, n wa yiis-a be n dig Zerizalɛɛm. A luba lal-gũbrã, sẽn sɩng Efrayim noore n ta gõdra noore, kãntɩɩs kobs-naase. A looga ne sãnema fãa, wanzurfã, teeda fãa sẽn da be wẽnd doogẽ t'a Obɛd-Edom da gũudẽ, n paas na-yira arzɛka, la yemse, la a leba Samari. Zɩɩda dĩm a Zowas biiga a Amaziyas paa tẽng zug yɛs yʋʋm piig la a nu, a ba a Zowas kũum poore. A Amaziyas kibɛ a taaba, a sɩngre, n tãag a kũum, dẽ fãa pa gʋls Zɩɩda la Israyɛl dĩm dãmb sebrẽ bɩ? La a Amaziyas sẽn waa n lak n bas Naaba-Wẽnde, b seda a kũum Zerizalɛɛm. A zoe n diga Lakis. La b pʋg-a-la be n yõk n kʋ. B tʋk-a-la ne wiidi la b waa n mum-a-la ne a saam dãmba, a Daviid na-tẽngẽ. Zɩɩda rãmb lagma taaba n yãk a Oziyas n maan b dĩma, a ba a Amaziyas zĩigẽ. A yʋʋm da zemsa piig la a yoobe. Yẽ n le maneg n me Elat la a lebs-a Zɩɩda soolmẽ, a ba kũum poore. A Oziyas sɩnga a naam dɩɩb a yʋʋm piig la a yoobe. A rɩɩ naam Zerizalɛɛm, yʋʋm pis-nu la a yiibu. A ma ra boondame tɩ Yekoliya, a ba yir yaa Zerizalɛɛm. A maana sẽn ta Wẽnd yam, wala a ba a Amaziyas. A modgame n bao Soaala-Wẽnde, a Zakari vɩɩma tɛka. A Zakari yɩ ned sẽn loog a taab ne Wẽnd nif zoeere. A Oziyas sẽn bao Soaala-Wẽnd wakat ning fãa a yell manegame. A Oziyas tɩ zaba ne Filisti rãmba, n wã Gat lalse, Yabne la Asdod dẽnna. A le maneg n mee tẽns kẽer Asdod sẽnẽ la Filisti rãmb tẽn-peelmẽ. Naaba-Wẽnd sõng-a-la a zabrẽ ne Filisti rãmba, ne Arabsã, ne Gur-Baal la Mewunitsã. Amonitsa mens yaoo a Oziyas fadgo. A Oziyas pãnga waa n paasa wʋsgo. A yʋʋr yiime n ta Ezipt toaagẽ. A Oziyas mee ro-lug-lug Zerizalɛɛm, gõdra noorẽ, Bãooga noorẽ, la lalsa pẽkẽ. A paasa b pãnga. A mee ro-lug-lug we-raoogẽ, n ning ko-bao ka tɛka, tɩ rũmsa ra yaa wʋsgo. Koaadba ra yaa wʋsgo tẽn-nabrẽ wala tãmsa zutu. Bugsuntunda me ra yaa wʋsgo, tãmsa zut la Karmɛl. A Oziyas ra nonga koobo. A Oziyas tãb-biis ra zãmsa b tʋʋmda neere. B ra bob-n-dõbame, b ra weela sak-saka la a Yeyiyɛl ne a Maaseya da gʋlsa ned kam fãa ne a zĩiga la a tʋʋmde. A Ananiya, dĩma tãnsoab a ye, n da get b yelle. Yaa tãb-biis sẽn tar sũur ne zabre. B sagsa kãsem-dãmba da yaa bãmb tus a yi la kobs-yoobe. Bãmb n da so tãb-biisã sẽn tõe n bob zabrã, bãmb tus kobs-tã la a yopoe la kobs-nu. B ra mii b tʋʋmda neere n tõe n sõng dĩma n zab a bɛɛba. B sã n dabd zabr fãa, a Oziyas ra kõt-b-la gãndo, kãna, kut zug-peto, kut-futu, tãbdo la loob-kuga. Zerizalɛɛm pʋgẽ a kɩtame tɩ sɩlem-dãmb maan zab-teedo, a ro-lug-luga zutu la lal-gũbra gõdrẽ. Yaa zab-teedo sẽn tõe n tão yɩɩg-yɩɩga la ne pãnga, kãn buudu la kug bɛda. A Oziyas yʋʋra zãaga zĩiga. La rẽ sɩd yɩɩ Soaala-Wẽnd n sõng-a. A sẽn wa n mik t'a pãnga lebga wʋsgo, a maana wilg-m-menga la rẽ n wa ne a sɩbgre. A tar n basa Naaba-Wẽnd, a Wẽnnaam. A saag n kẽe wẽnd dooga pʋga, n wis tɩdar maan-kugra zugu. A Azariya ne Wẽnd maan-kʋʋdba, nin-tɩrse sẽn ta pis-nii, pa sak ye la b yeela a Oziyas: «Ka yãmba, d dĩm sõngo, n tog n yõog wisd Naaba-Wẽnd taoor ye, yaa maan-kʋʋdba, a Aarõ kamb sẽn welg toor dẽnna yĩnga. Yi-y wẽnd dooga pʋga tɩ y wɩɩbame, la ziir ninga Wẽnd sẽn kõ yãmb ka le tog ne y ye.» A Oziyas sũur puugame t'a nan ket n zãad wisda laaga. A sũura sẽn yik ne maan-kʋʋdba n sɛ, la yĩng bãag sẽn puk a rĩirẽ, maan-kʋʋdba taoore, wẽnd dooga pʋga, tɩdar maan-kugra taoore. Maan-kʋʋd kãseng a Azariya ne a tũud-n-taasã yãee yĩnga sẽn puk a rĩirã tɩ b rig-a tao-tao la yẽ meng sakame n yi, a sẽn yãe tɩ yaa Soaala-Wẽnd meng nug n sɩɩs-a. A Oziyas paa ne a bãagã n tãag a kũum. A paa roogẽ, b ka le bas-a t'a kẽ wẽnd dooga pʋg ye. A biig a Zotam n da get a zaka yelle la a soolma me yelle. A Oziyas kibare, a sɩngre n taa a baasgo, bãngd a Izayi, a Amos biigã, n gʋls-a. A Oziyas kiime tɩ b mum-a dĩm dãmb yaad sẽn tuudẽ, la a ka naag ne a saam dãmba ye. B ra yeela woto: «A bẽeda yĩng bãaga.» A biig a Zotam n led-a a zaoorẽ. Zotam sẽn waa n dʋ zaoor t'a yʋʋm yaa pisi la a nu, a rɩɩ naam yʋʋm piig la a yoob Zerizalɛɛm. A ma, a Sadok biiga, da boondame tɩ Yerusa. A maana sẽn ya neer Naaba-Wẽnd nifẽ. A wẽnega a ba a Oziyas. A pa saag n kẽ wẽnd dooga pʋg n tʋm wẽng ye. A neba vɩɩma yaool n da pa lebd Soaala sẽn datẽ ye. A maneg n me wẽnd dooga no-kãsengã, a mee meeb wʋsgo, Ofɛl lalga sẽn tẽeg n kẽngã. A mee tẽns Zɩɩda tãmsa zutu. A ninga tãnsoben-doto la ro-lug-lugi pʋta noore. A zaba ne Amonitsa dĩma, n tõog-a, la yʋʋm kãnga a reega b nengẽ, wanzurf sẽn ta neb koabg la pis-nu zɩɩbo, alkam pet tus piiga, alkam kɛgeng pet tus piiga. Dẽ n yɩ b yaoodo, yʋʋm kãng la yʋʋm a yiibã sẽn pʋg-bã. A Zotam waa n paama pãng wʋsgo. A ra kẽnda neere Naaba-Wẽnd, a Wẽnnaam taoore. A Zotam vɩɩma kibare, a zaba, a manesem ne dĩm dãmb a taaba, fãa gʋlsa Zɩɩda la Israyɛl dĩm dãmb sebrẽ. A sɩnga a naama rɩɩb a yʋʋm pisi la a nu la a rɩɩ naam yʋʋm piig la a yoob Zerizalɛɛm. A kiime tɩ b mum-a a Daviid na-tẽngẽ. A biiga Akaz n led-a a zaoorẽ. A Akaz sẽn waa n na n dʋ zaoora t'a tara yʋʋm pisi. A rɩɩ naam yʋʋm piig la a yoob Zerizalɛɛm. A ka maan sẽn ta Soaala-Wẽnd yam wa a yaab a Daviid ye. Yaa Israyɛl dĩm dãmba vɩɩm la a togs yã. A tol n kɩtame tɩ b rõog Baal dãmba. A yõoga wisdu b yĩnga, Inom bãg-faagẽ. A yõoga a kamb bugum, wala bu-zẽmb niyns Naaba-Wẽnd sẽn dig n zãag a Israyɛl taoorã sẽn da maande. A kʋʋ maando, a yõoga wisd tãmsa zutu, kunkuba zutu la tɩɩs sẽn tar maasem tẽngre. Naaba-Wẽnd, a Wẽnnaam, dɩk-a lame n sagl Aramsa nugẽ. B yõga neb wʋsgo n tall n kẽng yembd Damas tẽnga. Soaala-Wẽnd bas-a-la Israyɛl dĩma me nugẽ. A konga raood zabrẽ. A Remaliya biig a Peka kʋʋ Zɩɩda rãmb neb tus koabg la pisi raar a ye. Fãa ra yaa zab-mitba la b sẽn pa zabrẽ wã yaa b sẽn lak ne Naaba-Wẽnd, b ba rãmb Wẽnde. Efrayim gãndaoog a ye, a Zikri, kʋʋ na-biig a Maaseya, n paas samand naab a Azrikam, la dĩma komber, a Elkana. B yõga Zɩɩda neb tus kobs-yi, pagba, rapa, kom-pugli, kom-dibli. A loga ne teed zembal Samari. Bãngd a ye n da be n boond t'a Odɛd. A yi n sega tãb-biisa Samari noorẽ n yeel-ba: «Ade, Naaba-Wẽnd, yãmb Wẽnnaam, sagla Zɩɩda rãmb y nugẽ, b sũur sẽn puug ne b yĩnga. Yãmb sẽn kʋ-b kʋʋb ninga, saaga meng reeg n wiisdame. Y gomdame tɩ y na n dɩka Zɩɩda kamba n maan y sõgen-kamba. Woto wã ka yãmb meng n dogl yell y zugu Soaala-Wẽnd taoore? Kelg-y m koɛɛga, bas-y y saam-biisã tɩ b soog b mense, tɩ Soaala-Wẽnd sũur da yik ne y ye.» Efrayim kãsem-dãmba kẽer sɩd yika ne sẽn kẽng-b zabr n lɛɛg n watẽ wã. Yaa a Zoana biig a Azariya, a Mesilemot biig a Berekiya, a Salum biig a Yeyizkiya la a Adlayi biig a Amasa. B yeelame: «Da wa-y ne y sẽn yõg b rãmba ka ye, ka rẽ d na n beega Naaba-Wẽnde. Y datame n paas d yel-wẽna la d samde sẽn zoe n ya wʋsgo, n takd Naaba-Wẽnd sũ-puur, a Israyɛl zugu.» Tãpa rãmb basa fãa kãsem-dãmba la zãma wa taoore. B yãka neb tɩ b na n bels b sẽn yõg b rãmbã. B baoo fut n yeelg sẽn da ka tar-b fuugu; b pʋɩ-b-la futu, neooda, dɩɩbo, koom, la roogo. B zombga bõeens zutu sẽn da pogl-bã la b talla b fãa n wa lebs Zeriko, koms tẽnga; b le lɛɛg n dɩka Samari sore. Yaa wakat kãng la a Akaz tool Asiri naab nengẽ t'a wa sõng-a. Edomitsa le wa kẽe Zɩɩda. B tõog-a lame, la b wʋka b neb n looge. Filisti rãmba sẽegame n pid tãmsa zut la tãmsa sees tẽnsã, la Zɩɩda Negɛb. B pãbame n deeg Bɛt-Semɛs, Ayalõ, Gederot, Soko, ne a tẽn-kogse, Timna ne a tẽn-kogse, Gimzo ne a tẽn-kogse la b kẽe be n zĩndi. Naaba-Wẽnd kɩtame t'a Zɩɩda rɩ bõne, Israyɛl dĩm a Akaz yĩnga. A basa Zɩɩda t'a maan a raabo la yẽ meng laka ne Wẽnde. A Teglat-Falasar, Asiri dĩma, zãgsa a wa sõng-a, n wa gũbg-a a tẽngẽ n pãb-a n tõog. A Akaz kong n yãka Soaala-Wẽnd arzɛka, ne dĩma la na-komsa rẽnna n tool Asiri dĩma, la pa zĩnd yõod ye. Tẽnga sẽn waa n wẽe n gũbgã, dĩm a Akaz maneg n laka ne Soaala-Wẽnd n paase. Damas wẽn-naandsa sẽn da tõog yẽnda wã, a baas n kʋʋ maand b yĩnga. Ad-a sẽn yeel a menga: «Aramsa dĩm dãmb tara wẽn-naands sẽn sõngd-ba, woto wã m na kʋ-b maando tɩ daare b na sõng-ma.» Mik yaa bãmb n na n wa ne a meng wãabo la Israyɛl gill wãabo. A Akaz tigsa wẽnd dooga teed kẽere, n wã-ba, n pag Soaala rooga kʋɩlensã, n sa n ning maan-kug Zerizalɛɛm pʋga. Tẽng fãa pʋgẽ a yãka zĩiga n na n yõog wisd wẽn-naandsa yĩnga, n puug Naaba-Wẽnd, a ba-rãmb Wẽnda sũuri. A vɩɩma kibare, a sɩngre n taa a baasgo, a manesem ne dĩm dãmb a taaba, fãa gʋlsa Zɩɩda la Israyɛl dĩm dãmba sebrẽ. A Akaz kiime tɩ mum-a Zerizalɛɛm, Israyɛl dĩm dãmba yaadẽ. A biig a Ezekiyas n led-a a zaoorẽ. A Ezekiyas yʋʋm da yaa pisi la a nu a sẽn waa n lebg dĩma. A dɩɩ naam yʋʋm pisi la a wɛ Zerizalɛɛm. A ma ra boondame t'a Abiya. A Abiya yaa a Zakari biiga. A naana taa Soaala-Wẽnd yam, tɩ bãmb taoore a kẽna wa a yaab a Daviid. Yẽ n kɩt tɩ b le pags wẽnd dooga kʋɩlense, a naama pipi yʋʋmda pipi kiuugu. A le lebsa bũmb fãa b zĩisẽ. A boola maan-kʋʋdba la Levitsã, n tigs b yaang kɩrenga n yeel-ba: «Kelg-y ka, Levitse, yɩlg-y y mense, la y yɩlg d yaab rãmba Wẽnnaam doogo. Yiis-y rẽgd buud fãa. Y ba-rãmb wegmame, n maan sẽn pa ta Naaba-Wẽnd yam. B basa bãmba, b pa le ges b rooga ye, b wẽnemda b kãare. B paga zãonga noore, n kiis bugma, b pa le kʋ yũ-noog maoongo, b pa le wis tɩdare, b ro-sõnga pʋg ye. Naaba-Wẽnd sũur puuga ne Zɩɩda la Zerizalɛɛm la yaa woto la Soaala-Wẽnd kɩt t'a lebg yel-yoogo, la bɛɛb laado, wala a sẽn yaa a soab rũnna. Yaa rẽ yĩng la sʋʋg kʋ d ba rãmba, tɩ b wʋk d kom-dibli, d kom-pugli la d pagb n loog pa-weere. M dat n yõga zood ne Naaba-Wẽnd, a Israyɛl Wẽnnaam, n kos-b tɩ b sigs b sũuri. M kamba, da le lak-y ne Soaala-Wẽnd ye tɩ yaa yãmb la b yãk n na n yals b taoore, tɩ y tʋm b tʋʋma, n ges b waoogre yelle, n ges b wisda yelle.» Levitsa yikame. Yɩ-la: a Amasayi biig a Maat, a Azariya biig a Zowɛl, a Keyat doogẽ, sã n yaa a Merari doogẽ, a Abdi biiga a Kis, a Yealelɛl biig a Azariya, a Gersõ doogẽ, a Zima biig a Zoa la a Zoa biig a Eden. A Elizafã kamba: a Simri ne a Yeyiyɛl. A Asaf kamba: a Zakari ne a Mataniya. A Eman kamba: a Yeyiyɛl ne a Simeyi; a Yedutun kamba: a Semaya ne a Uziyɛl. B tigma b saam-biisã, n yɩlg b mense, wala dĩma sẽn yeele, wala Soaala-Wẽnd sẽn date. Dẽ poore b yɩlga wẽnd doogã. B kẽe wẽnd doogẽ wã n na n yɩlg a. B yiisa wẽnd dooga sɩmannẽ bũmb ning fãa b sẽn yãend a pʋgẽ tɩ ya bõn-dẽgdo. B yiis-b-la bal-balle, n tɩ rʋʋg b Sedrõ bãg-faagẽ. B sɩnga yɩlgrã kiuuga pipi raare. Yaa kiuuga raar a nii soaba la b ta wẽnd dooga zãongẽ. B yɩlga rooga dasem a nii. Dɩlla b sɛɛ pipi kiuuga piig la a yoob daare. B bʋʋga a Ezekiyas a zakẽ n yeel-a: «Tõnd yɩlga wẽnd dooga zãnga. Sẽn sɩng maan-kugrã ne a teedo. A Akaz sẽn da yiis teed niynsa fãa, tõnd le lebs-b-la b zĩisẽ. D dɩgl-b-la Naaba-Wẽnd maan-kuga taoore.» Dĩm a Ezekiyas wẽneg n yikame, n tigs a taoor dãmba tɩ b kẽng wẽnd doogẽ. B waa ne lols a yopoe, pe-bi a yopoe n paas boees a yopoe yel-wẽna sugr kosgo maoong yĩnga. Maoonga na n kʋʋ dĩma yĩnga, wẽnd dooga yĩnga, Zɩɩda yĩnga. Dĩma kõo maan-kʋʋdba, a Aarõ yagensa, noore tɩ b kood dũmsã maan-kugra zugu. B kooda niisã tɩ b kok b zɩɩma n daal a zugu. B kolga ne sugra kosg boeesã dĩma la zãma wã taoore tɩ b tẽeg b nus b zutu. B kood-b lame n daag b zɩɩma maan-kugra zugu tɩ yɩ sugr kosgo a Israyɛl gill yĩnga. La sɩda, ra yaa a Israyɛl gill yĩnga la dĩma tʋlg yũ-noog maoongã la sugra kosg maoongã. B kẽesa Levitsa wẽnd doogẽ ne kɛma, pendse, ruudsi wala a Daviid sẽn da yalse, tɩ dĩma bãngd a Gad, la Naaba-Wẽnd bãngd a Natã wilgi. Noorã ra yaa Soaala-Wẽnd noore tɩ bãngdba reegd-a n taasdẽ. Levitsa sẽn ta b zĩisẽ ne a Daviid yʋʋm teedã, tɩ maan-kʋʋdba me yɛs ne b tõntõodo, a Ezekiyas yeelame tɩ b kʋ yũ-noog maoongã. La b sẽn sɩng kʋʋbo, la yɩɩla me sẽn sɩnge, tɩ tõntõoda peebdẽ tɩ kɛma wẽedẽ, tɩ pɛndga la ruudga wãagdẽ, wala a Israyɛl dĩma a Daviid sẽn yalse. Zãma wã wõgemdame, n yɩɩnẽ, tɩ tõntõoda peebdẽ, n ta maoonga baasgo. A sẽn baase, dĩma ne a poorẽ dãmb yĩgimdame, la b wõgemdame. Dĩma ne a poorẽ dãmba yeela Levitsã tɩ b pẽg Soaala-Wẽnde ne a Daviid la bãngd a Asaf yɩɩla. Sɩd yɩɩ pẽgr menga. Bãmb me waa n yĩgimdame, b wa n wõgemdame. A Ezekiyas zẽka a koɛɛg marsã n yeele: «Marsã yãmb n so Naaba-Wẽnd tʋʋma. Kolg-y, wa-y ne y maan-dɩtse, la y pẽgr maando.» Tɩ zãma wã wa ne maan-dɩtse, pẽgr maando la yamleoog kũuni. Yũ-nood maanda niis yɩɩ pisopoe, pe-raad koabga, pe-bi kobs-yi. Fãa kʋʋ Naaba-Wẽnd sũur maagr yĩnga. Dẽ poore, yɩɩ niis kobs-yoobe la piis tus a tã la b kõ Soaala-Wẽnde. Maan-kʋʋdba sõor da paood ne b tõog n sɩɩg maanda fãa. Woto wã Levitsa sõng-b lame, tɩ fãa wa sɛ, tɩ b fãa yɩlge. Levitsa pus n wilgame tɩ bãmb n dat b mens yɩlgre n yɩɩda. B yõoga kaama me la ra yaa wʋsgo. B waa ne kũuna sẽn tũnugd maandã. Woto Wẽnd doog pʋga b le rɩka pĩnd waoogra sore. A Ezekiyas ne zãma wã sũur yɩɩ noogo b sẽn sak tao n pa kɩɩsã. A Ezekiyas tʋma neb Israyɛl la Zɩɩda, n gʋls sebr a Efrayim la a Manase n yeel tɩ b wa Zerizalɛɛm wẽnd doogẽ n maan pak kibsa, n tẽeg a Israyɛl Wẽnnaam sẽn pɩʋʋg b sʋkã. Dĩma, a poorẽ dãmbã, zãma wã sedame tɩ b na n maana kibsã kiuug a yiib soaba, t'a wakata da zoe n loogame. Maan-kʋʋdba ka paam n yɩlg b mens a wakata ye, la neba me ra ka paam n tigs Zerizalɛɛm ye. Dĩma la zãma wã gesame tɩ boto n zemse. B maana wa b sẽn yalsã. Woto b toola sebre n bool Israyɛl neba gilli, sẽn sɩng Dã n ta Beerseba, tɩ b wa Zerizalɛɛm tɩ b maan paka kibs Naaba-Wẽnd, a Israyɛl Wẽnnaama yĩnga, tɩ ka wʋsg n da paam n maan kibsa wala sẽn gʋls sebra pʋg ye. Dĩma ne a poorẽ dãmba gʋlsa sɛba la b yiisa neba tɩ b saag Israyɛl la Zɩɩda tõre n moon woto: «Israyɛl kamba lɛɛg-y n wa kẽ a Abraam, a Izaak la a Zakoob Wẽnnaam, tɩ bãmb me na pa ne yãmba. Da maan-y wa y ba rãmba la y saam-biisa ye, bãmb lak n basa Soaala-Wẽnde, tɩ Wẽnd me bas-b ne fare wala d sẽn ne a soab rũnna wã. Da nak-y y kãare wa y ba rãmba sẽn maana ye. Lɛɛg-y n kẽ-y Wẽnde la y wa b roogẽ tɩ b welg-a-la toor b meng yĩnga la b na n zãaga b sũ-fõora ne yãmba. Yãmb sã n lɛɛg n wa kẽ Naaba-Wẽnde, y saam-biisã la y kambã na paam tɩ b bɛɛba zoe b nimbãanega n bas-b tɩ b lɛɛg n wa b tẽngẽ, tɩ Naaba-Wẽnd, yãmb Wẽnnaama, yaa nin-noanga la nimbãan-zoeta, yãmb sã n lɛɛg n kẽ bãmba, b me kõn wẽnemd b neng ye.» Sẽn tʋm b rãmba kẽe tẽng woo tẽnga, n ta Efrayim, Manase la Zabulõ. La bãng-y tɩ b yãee laado la paoogre. Asɛr neb kẽere la Zabulõ neb kẽer bala n sulg b meng n wa Zerizalɛɛm. Yɩɩ Zɩɩda bala la Soaala-Wẽnd nek neba raabo tɩ b na n deeg dĩma ne a poorẽ dãmba noore sẽn ya Naaba-Wẽnd meng noorã. Neba tigma taab Zerizalɛɛm, kiuug a yiib soaba, Ziv kiuugu, n maan bur sẽn ka ning bɩll kibsa. Neba sɩd waa wʋsgo. B sɩngame n wã maan-kuga sẽn be Zerizalɛɛm la wisda maan-kuga la b tɩ lob-b-la Sedrõ sudga pʋga. B kʋʋ paka rũmsi kiuug a yiib soaba piig la a naas raare. Maan-kʋʋdba la Levitsã zoe yãnde n yɩlg b mense la b tõog n kolga ne maanda rũmsa wẽnd doogẽ. Ned kam fãa tɩ yalsa a zĩigẽ wala a Moyiiz noora sẽn da wilgi. Maan-kʋʋdba da reegda zɩɩma Levitsa nusẽ n daagdẽ. Ka zãma wã fãa n da paam n yɩlg ye. Woto wã Levitsa reega nin-bãmb zĩiga n koot rũmsã, b sẽn da ka tõe n kolg Naaba-Wẽnd taoorã. Sɩda neb wʋsgo wala Efrayim dãmba, Manase rãmba, Isakar la Zabulõ rãmba da ka paam n yɩlg b mens ye. B da rɩɩ pakã la b pa tũ noora sẽn da rat ye. A Ezekiyas yõka sɛɛg bãmb yĩnga. A yeela woto: «Ned ning fãa sẽn tʋl ne a sũur n bao Soaala-Wẽnnaam a ba rãmb Wẽnde, bɩ a paam a yel-wẽna yẽesgo, a sã n ka tõog n yɩlg a meng wa sẽn segde wakat fãa a sẽn kolgd Soaala-Wẽnde.» Naaba-Wẽnd deega a Ezekiyas kosgo, n pa maan neba bũmb ye. Neb niyns sẽn da be-b Zerizalɛɛm maana bur sẽn ka ning bɩll kibsa ne sũ-noogo. Levitsa ne maan-kʋʋdba da pẽgda Naaba-Wẽnd ne b pãng fãa. A Ezekiyas pẽga Levitsa sẽn da wʋm Soaala-Wẽnd daabo, n wa rasem a yopoe tõre, n na n dɩ la b pẽg Naaba-Wẽnde la b kõ-b maando. B naaga taab n yeel tɩ b na n paasa rasem a yopoe yɛsa, la sɩd yɩɩ dasem a yopoe sũ-noogo. Zɩɩda dĩm a Ezekiyas kɩtame tɩ b wa ne lols tusri, la piis tus a yopoe zãma wã yĩnga, tɩ dĩma poorẽ dãmb me wa ne niis tusri la piis tus piiga. Maan-kʋʋdba waa wʋsgo la b yɩlga b menga. Yɩɩ sũ-noog kãseng ne Zɩɩda rãmba, ne maan-kʋʋdba la Levitsã sẽn yi Israyɛl. Yɩɩ sũ-noogo ne b sẽn da yiis b rãmb b tẽnsẽ tɩ b be Zɩɩda bɩ Israyɛl tẽn-peelmẽ. Yɩɩ sũ-noog kãseng Zerizalɛɛm, tɩ b ra pa le yãend kibs a woto buudu al Israyɛl dĩma a Daviid biig a Salomo loogr poor ye. Levitsa sẽn ya-b maan-kʋʋdba ninga zãma wã barka. Soaala-Wẽnd zĩnda b yĩngr do-sõnga pʋga n wʋm b koɛɛga la b reega b pʋʋsgo. Dẽ poore Israyɛl kamba fãa sẽn da tigma kẽe Zɩɩda tẽnsa fãa n wã kuga la raada sẽn pees n selã, n bugs tãmsa zut maan-kugã n menes-b zãnga, Zɩɩda, Bẽnzame, Efrayim la Manase tẽn-peelmẽ. B yaoolame n leb b tẽnsẽ la b zagsẽ. A Ezekiyas le pʋɩɩ maan-kʋʋdba la Levitsa sags-sagse. F ya maan-kʋʋd bɩ Levitga, f paamda f tʋʋmde. Tõe n yɩɩ yũ-nood maand tʋʋmde, bɩ laafi kosg maando, tõe n yɩɩ wẽnd doog tʋʋm a taaba, bark pʋʋsgo bɩ pẽgr yɩɩla, wẽnd dooga dagnoya gũubu. Dĩma kɩsa a meng ligdi yũ-nood maanda yĩnga, yibeoog la zaabr dẽnna, vʋʋsg raar la ki-paal dẽnna, tig-raasa rẽnna, wala sẽn gʋls noor sebra pʋga. A yeela zãma wã la Zerizalɛɛm dãmba, tɩ b ges tɩ maan-kʋʋdba la Levitsa paam b pʋɩɩre, b me tõog n deeg Soaala-Wẽnd noore. Koɛɛga sẽn lʋɩ b tʋbrẽ, Israyɛl dãmb waa ne b kood rẽemsa lems zembala, paas rãam, kaam, sɩɩdo, la b sẽn paam b pʋtẽ fãa. Israyɛl kamba la Zɩɩda tẽnsa neba waa ne rũmsa kom-dẽemse, b rũm-bɛd la b rũm-bõonese, b waa ne b yamleed kũun sõma, b talla fãa n wa zam taaba. Yaa kiuug a tãab soaba la b sɩng yã, la yaa kiuug a yopoe soab la b baas yã. A Ezekiyas ne a poorẽ dãmba kolg n gesa kũuna sẽn same la b pẽga Naaba-Wẽnd la b buud a Israyɛl. A Ezekiyas soka maan-kʋʋdba la Levitsã kũuna poorẽ. Yɩ-la a Azariya, maan-kʋʋdba kãsma, la a Sadok yagengã n leoke: «B sẽn sɩng n wat ne kũuna tɛka tõnd me modga ne rɩɩbo la sẽn kella labsa tɩ Naaba-Wẽnd ninga b buuda barka. Yaa kũuna la sẽn ket n sam woto fãa wã.» A Ezekiyas yeelame tɩ b maneg dot wẽnd dooga pʋga, tɩ b manege. Woto b tõog talla wakat buud fãa n wa bĩng be neba kũuni, lemsã la yamleoog kũun sõma wã. Levit a Konaniya ne a yao a Simeyi n soog b bĩngri. Dĩma Ezekiyas naaga maan-kʋʋd kãseng a Azariya, tɩ yẽ n da get wẽnd dooga yelle la b bao nin-bãmba n paas a Konaniya ne a Simeyi, teeda gũub yĩnga. Yɩ-la a Yeyiyɛl, a Azaziya, a Naat, a Asayɛl, a Yerimot, a Zozabad, a Eliyɛl, a Ismakiya, a Maat, la a Benaya. Levitga a Imna biig a Kore da soo yaang noorã gũudem, la yẽnda la b leb n kos t'a reegd yamleoog kũuna sẽn kõt Naaba-Wẽndã la a welg toore kũun-sõma ne kũun niyns sẽn ya-b sõmb n yɩɩdã. Sẽn da sõngd a Kore wakat buud fãa, maan-kʋʋdba tẽnsẽ da yaa a Eden, a Miniyamin, a Yesuwa, a Semaya, a Amariya la a Sekaniya. Bãmb n da so rɩɩba pʋɩɩbo. B ra pʋɩt-a-la b tũud-n-taasã, bɛd la bõonese, ned kam fãa a tʋʋmda zĩigẽ. Sẽn paama t'a yʋʋr gʋls fãa da reegda a pʋɩɩre, ba a yʋʋma sã n zems yʋʋm a tãabo. B ra pʋɩta neb niyns fãa sẽn da wat-b n tʋmd wẽnd dooga pʋga, ned kam fãa ne a sull la a raare. B ra gʋlsda maan-kʋʋdba roog-roogo; la sã n ya Levitsã yʋʋm sẽn ta pisi, b tʋʋmda sull la b ra get n gʋlsd-ba. B ra naagd n gʋlsa b zaka rãmb fãa, b pagba, b kom-dibli la b kom-pugli, b zĩnd-n-taas fãa sẽn tar sor n dɩt maanda ne b sẽn tũnugd bũmb niynsã. Sã n ya maan-kʋʋdba, a Aarõ yagensã sẽn be-b rũmsa wãbneg zĩisẽ, n pẽ tẽns niyns b sẽn bok n kõ bãmbã, b ra yãka neb be tɩ b get b yelle n kõt bãmba b sẽn tog n deeg bũmb ningã, wala Levits niyns yʋʋr sẽn be sebra zugã. A Ezekiyas sẽn maan woto a soolma pʋgẽ a maana sẽn tog la sẽn ya sõmbo, Wẽnnaam a Soaala sẽn nonge. A sẽn waa n na n maneg wẽnd doogã, a sẽn waa n yet tɩ b modg n deeg Soaala noor la b saglsã, a tʋlg n maana b sẽn dat fãa ne pʋ-peelem la rẽ me yĩng la bũmb ka tol n kedbe n baas neer zãnga. Ne a Ezekiyas vɩɩma sẽn yɩ sõngã, Asiri dĩm a Senakerib waa n kẽ-la a tẽngẽ. Sɩda a kẽe Zɩɩda n wẽ a sik tãnsoben-tẽnsa noore la a yeelame tɩ b po lalsã. A Ezekiyas bãnga neere t'a sẽn dat n lub n yɩɩda yaa Zerizalɛɛm. Dẽ la a kɩt t'a tãnsoaben-dãmba la a gãndaadã pag bulsã sẽn da be lalga poore. B sõnga taaba. Neb wʋsg waame n yẽd bulsã la sẽn yɩɩda, kʋɩlg a ye sẽn da zoet ko-sorẽ, ko-sor sẽn tuk zulunga. B ra yeta taab woto: «Bõe yĩng la d na n bas tɩ Asiri neba wa mik koom sẽn ka sɛt kaalẽ.» A Ezekiyas yika ne raoodo, n le kɩt tɩ b me lal-gũbrã a sẽn da lʋɩ zĩig ningã. A paasa ro-lug-lugi, n le paas lalg a to yɩnga. A Daviid na-tẽngẽ, a le maneg n sĩda Milo bokã. A kuda kãna la gãnd ka tɛka. A baoo tãnsoaben-dãmba n zĩndig-b tẽnga pʋga. B tigma neba tẽnga noore la b gomame n kõ-b raoodo, n yeele: «Keng-y sũuri, maan-y raoodo, da zoe-y rabeem ye, da rig-y Asiri rĩma taoor ye, da rig-y rabeem a tãb-biis ka tɛka sẽn pʋgd-a wã taoor ye. Sẽn be-a ne tõndã pãng yɩɩda sẽn be-a ne Asiri rĩma. Yẽ sẽn teegã yaa ninsaalba. Sẽn sõngd-a tõndã, yaa Naaba-Wẽnd meng nugu. Bãmb n zabd tõnd zĩigẽ.» Zãma wã sẽn wʋm Zɩɩda rĩm a Ezekiyas goama, b raood paasame. Dẽ wẽnde tɩ Asiri dĩma, a Senakerib da bee Lakis ne a tãb-biisa fãa. A tʋma a neb a Ezekiyas nengẽ la Zɩɩda rãmba fãa sẽn da kẽed Zerizalɛɛma nengẽ. Sẽn tʋm b rãmba waa n yeela woto: Ad Asiri rĩm a Senakerib koɛɛga: «Yãmb teega bõe taki la y sẽn paad Zerizalɛɛm sẽn gãneg tãp n gilgã? A Ezekiyas n belgd yãmba tɩ y Wẽnnaama na n fãaga yãmb mam nugẽ. Ad-y belgr la a belg yãmb, tɩ y rɩk kom la ko-yũud sore, a belg-y lame tɩ y rɩk kũum sore. M yet tɩ yaa Ezekiyas kãng n menes wẽn-naandsa waoogre la a wilg Zɩɩda la Zerizalɛɛm tɩ yaa maan-kugr a ye taoore, la y tog n wõgemde, tɩ maan-kugr a ye bal la y na n wisi. Yãmb yĩma maam ne m ba sẽn maan bũmb ning ne tẽns ka tɛka laa? M sok n gese tẽn-kãens wẽnd dãmba tõog n fãag-b-la mam nugẽ bɩ? Yaa tẽns ka tɛk la m wã yã la tẽn-bʋg wẽnde n tõog n fãag a neba mam nusẽ? Y tẽedame tɩ yãmb dẽnna n na n fãag-y bɩ? A Ezekiyas da belg-y ye, a ra tudg-y woto ye. Da tẽe-y y rĩma goama ye, tɩ tẽng ba a ye wẽnde, rĩung ba a ye wẽnde, ka tõe n fãag-a, maam la m ba rãmb nusẽ ye. Yãmb Wẽnda me kõn fãag-y mam nugẽ bada.» Asiri dĩma sẽn tʋm b rãmba ra ket n gomdame n paoogd Soaala-Wẽnd la b tʋʋm-tʋmd a Ezekiyas. Asiri dĩma meng ra gʋlsa sebre n na n tʋʋs Soaala-Wẽnde, a Israyɛl Wẽnnaama. Sebra ra gʋlsa woto: «Wala buud a taab wẽnd dãmba sẽn pa tõog n fãag fɩ mam nugẽ, a Ezekiyas Wẽnnaama me kõn tõog n fãag bũmb ye.» A Senakerib sẽn tʋm b rãmba ra gomdame Ebre rãmba goama n zẽkd b koɛɛga. B ra gomda ne Zerizalɛɛm nebã sẽn zao lal-gũbrã zugu. B da baood n na, n yɛɛs-b lame la b woog b raoodo tɩ b paam n kẽ tẽngã. B ra gomda Zerizalɛɛm Wẽnda yelle wala b sẽn da gomd wẽnd dãmb a taaba yelle, neb sẽn maan ne b nusi. Yaa rẽ yĩng la dĩm a Ezekiyas la bãngda a Izayi, a Amos biiga, pʋʋs yã n yõk Naaba-Wẽnd sɛɛga. Naaba-Wẽnd tʋma malɛka Asiri dĩma tãb-sikẽ t'a kʋ gãndaadã la tãnsoaben-dãmba. Dĩma lɛɛga ne yãnde n leb a tẽngẽ. A sẽn kẽ a wẽnd doogẽ a meng kamb kʋ-a-la ne sʋʋga. Yaa woto la Naaba-Wẽnd fãag dĩm a Ezekiyas la Zerizalɛɛm dãmba, Asiri dĩma a Senakerib nugẽ, la a bɛɛb a taaba nugẽ. Naaba-Wẽnd kẽesa laafi a Ezekiyas soolmẽ. Wʋsg waa Zerizalɛɛm ne b kũuni Naaba-Wẽnd yĩnga la Zɩɩda dĩm a Ezekiyas yĩnga. Yell kãensa poore dĩma yʋʋr yiime n paas, bu-zẽmba sʋka. A Ezekiyas waa n lʋɩ bãaga la kella bilf bal t'a kiẽ. A pʋʋsame tɩ Soaala-Wẽnd sãoog-a b toore. A Ezekiyas ka lebs Naaba-Wẽnd sõm ye. Wilg-m-meng wuka a sũuri la Soaala-Wẽnd zaba ne dĩma, n zab ne Zɩɩda la Zerizalɛɛm. La a waa n tuubame, tɩ Zɩɩda ne Zerizalɛɛm me maan wa yẽ. Naaba-Wẽnd sigsa b sũuri, la b sũura ka le yik ne a Ezekiyas n tãag a kũum ye. A Ezekiyas paama ziiri la arzɛk ka tɛka. A tigsa sãnem, wanzurfu, kug neeba, kaam sẽn tar yũ-noodo, fan-teedo, laog sẽn be yõodo. A manega tẽnse a kooda bĩngr yĩnga, a rãama la a kaama yĩnga. A mee wuba a rũmsa yĩnga. A daa bõeense, a daa rũms wʋsgo, rũm-bɛd la rũm-bõonese. Naaba-Wẽnd da kõ-a-la b kũuna zembala. Yaa a Ezekiyas n gõdg Giõ kʋɩlgã n tees a Daviid na-tẽnga, nin-taoore. A Ezekiyas tõoga a sẽn mak fãa. A sẽn waa n yik ne tɩtaam n gom ne Babilon dĩma tãnsoaben-dãmba, n wilg-b bõn-bãndã sẽn maan a soolmẽ wã, Soaala-Wẽnd bas-a lame bala n na n gese bõe n be a sũurẽ. A Ezekiyas vɩɩma, a nonglma ne Soaala kaseto, dẽ fãa gʋlsa bãngd a Amos biiga a Izayi sebrẽ la Zɩɩda ne Israyɛl dĩm dãmb sebrẽ. A Ezekiyas kiime tɩ b mum-a a Daviid kamba yaadẽ. Zɩɩda la Zerizalɛɛm dãmb waoog-a lame. A biig a Manase n led-a a zaoorẽ. A Manase da tara yʋʋm piig la a yi a sẽn waa n lebg dĩma, a dɩɩ naam yʋʋm pis-nu la a nu Zerizalɛɛm. A maana sẽn ka ta Naaba-Wẽnd yam, a togsa bu-zẽmba wɩɩbdo, bu-zẽmb niyns Naaba-Wẽnd sẽn da rig bãmb taoorã wɩɩbdo. A le yalsa wẽn-yooda waoogre, wẽnd niyns waoogre a ba a Ezekiyas sẽn da gɩdge. A mee maan-kug Baal dãmb yĩnga la a peesa raad n sele. A yĩgimda n waoog yĩngr ãdsa. A saag n mee Naaba-Wẽnd dooga pʋga, wẽn-naandsa maan-kuga, n yĩm tɩ Soaala-Wẽnd da yeelame: «Yaa Zerizalɛɛm la m yãk n na n kẽes m ziira daar fãa yĩnga.» A mee maan-kuga yĩngr ãdsa yĩnga, Naaba-Wẽnd dooga sɩmannẽ. Yaa yẽ n yõog a kamb bugum Inom bãg-faagẽ. A bʋga bagre, n sogs kɩɩmse, n kẽ tɩto. A maana bũmb ning fãa Soaala-Wẽnd sẽn get wa wẽnga la sẽn yikd b sũuri. A kɩtame tɩ b rõog bũmbu t'a tɩ kẽes-a wẽnd doogẽ. La Wẽnd da yeelame: «Yaa wẽnd dooga pʋga, yaa Zerizalɛɛm la m tũus Israyɛl sʋka, n na n kẽes m ziir daar fãa yĩnga. M kõn le zãag Israyɛl kamba nao ne tẽng ning m sẽn kõ b ba rãmba ye. B ye n modg n tũ m sẽn wilgi, n deeg m noya, m saglse, m dog-n-mik, a Moyiiz sẽn taas bãmba.» A Manase kẽesa moogo Zɩɩda la Zerizalɛɛm neba, al tɩ b wẽnema wa yɩɩg buud niyns Naaba-Wẽnd sẽn menes b rãmb bãmb taoorã. Soaala-Wẽnd goma ne a Manase la a soolma rãmba la b pa kelg ye. Naaba-Wẽnd yiisa Asiri tãnsoaben-dãmba tɩ b wa zab ne-a. B yõk-a lame n balg ne yãndo n tall a n kẽng Babilon. Woto wã a baoome n na n sigs Naaba-Wẽnd sũuri, n sulg a meng sõmbo a ba-rãmb Wẽnd taoore. A sẽn sɩd pʋʋs-ba, b zoe-la a nimbãanega. B wʋma a kosgo n le tall-a n wa Zerizalɛɛm, a naama zaoorẽ. A reegame tɩ Naaba-Wẽnd la Wẽnde. A Manase le manega a Daviid na-tẽnga yɩng lalgã, Giõ nin-taoore, bog zulunga yegende, n ta Zĩma noorẽ. Lalga tõogame marsã n gũbg Ofɛl, la a paasa a zãndlma wʋsgo. A ninga tãnsoaben-dãmb Zɩɩda tãnsoben-tẽnsa fãa pʋgẽ. A zãaga Naaba-Wẽnd dooga marsã ne sãamba wẽn-naandse, ne naandã a meng sẽn da kudi, n paas maan-kugã a sẽn da me wẽnd dooga sẽn zao tãng ninga zugu, la Zerizalɛɛm pʋgẽ. A lebsa Naaba-Wẽnd maan-kugrã a zĩigẽ, n kʋ laafi kosg maand la pẽgr maando. A wilga Zɩɩda rãmba tɩ b waoog Naaba-Wẽnd, Israyɛl Wẽnnaam. Zãma wã sã n da ket n kʋʋd maand b tẽnsẽ, b pĩnd zĩisẽ, da ka le ya wẽn-naandsa yĩng ye, da yaa Soaala b Wẽnnaama yĩnga. A Manase vɩɩma kibar gʋlsa Israyɛl dĩm dãmba sebrẽ. Sebr kãng pʋg la b gomd pʋʋsgã a sẽn pʋʋsa yelle, n gomd Soaala-Wẽnde, Israyɛl Wẽnda koees a sẽn paam bãngdb kʋʋng nengẽ. B gomda a kosgã la Wẽnd sẽn deeg-a to-to. B sõdga a yel-wẽna, a wẽn-kɩɩsgã, zĩis niyns fãa a sẽn yals wẽn-faada waoogre, n sel da-peesdi, n dõog nin-naandse. B goma a sẽn deeg a kongre Wẽnd taoore. Dẽ fãa gʋlsa bãngdba sebrẽ. A Manase gãanda ne a saam dãmba, tɩ b mum-a a zakẽ, a biiga Amon n led-a a zaoorẽ. A Amon da tara yʋʋm pisi la a yiibu a sẽn waa n dʋ zaoore. A rɩɩ naam yʋʋm a yi Zerizalɛɛm. A maana sẽn ka ta Soaala-Wẽnd yam, wala a ba, a Manase. A Amon kʋʋ maando n waoog nin-naandse, a sẽn da rõoge. A ka sulg a meng Naaba-Wẽnd taoor wala a ba a Manase sẽn da sulg a meng ye. A pʋs n yɩɩga a Manase ne beegre. A sõgen-kamb maana sudum n kʋ-a a zakẽ. Zãma wã me yika ne neb niyns sẽn kʋ a Amon n kʋ bãmb me. A Amon biig a Zoziyas la b dʋʋs a zaoorẽ. A Zoziyas da tara yʋʋm a nii a sẽn waa n lebg dĩma. A maana sẽn ta Soaala-Wẽnd yam, a togsa a yaab a Daviid n ka bʋgd goabg bɩ rɩtg ye. A naama yʋʋmd a nii soaba, dẽ t'a nan ket n yaa bilfu, a sɩng n na n baoo Naaba-Wẽnd, a yaab a Daviid Wẽnde. A naama yʋʋmd piig la a yiibu soaba, a yiisa Zerizalɛɛm la Zɩɩda tãmsa zut maan-kuga, ra-peesdi, nin-naandse. B sarma Baal dãmb maan-kuga a nifẽ, la tɩdara sẽn da wisd zĩis niynsã, a wãa ra-peesdi, wẽn-naandsa, a to-b-la wa zom, n dɩk n yugl sẽn da kʋʋd-b bãmb maanda yaado. A yõoga maan-kʋʋdba kõab b maan-kuga zugu. Yaa woto la a yɩlg Zɩɩda la Zerizalɛɛm. A Zoziyas maana boto me Manase, Efrayim, Simeõ la Neftali tẽn-peelmẽ, la b tẽn-kogse sẽn da zĩ ne nimbãanega. A wãa maan-kugã la ra-peesdi, a too wẽn-naandsa n bõgse, a sarma tɩdara maan-kuga zĩig zãnga, n yaool n lɛɛg n wa Zerizalɛɛm. A Zoziyas naam yʋʋmd piig la a nii soaba, a tʋlg n yɩlga wẽnd doogã. Woto wã a yiisa a Asaliya biig a Safã, tẽnga kombere a Maaseya, la koe-moãnd a Zoa, a Zoakaz biiga, tɩ b tɩ maneg Naaba-Wẽnd doogã. B tɩ kɩsa maan-kʋʋd kãseng a Ilkiya, b sẽn da tall ligd ning n wa wẽnd doogẽ tɩ dagno-gũudba reegã. Ligda ra yita Manase tẽnsẽ, Efrayim tẽnsẽ, la Israyɛl tẽns a taaba, n paas Zɩɩda la Bẽnzame rãmb sẽn da kẽed Zerizalɛɛm. B kɩsa ligdã wẽnd doog tʋʋm nanamse, a manegra yĩnga. B kõo ligdã ra-wãadbã, la ro-metbã tɩ b paam n da kuga la raado n tõog n maneg wẽnd doogã, Zɩɩda dĩm dãmba sẽn bas tɩ sãama. Neba tʋmame, b modgame. Sẽn da get b yelle yaa Levitse, a Merari yagense, a Yaat ne a Obadiya la a Keyat yagense, a Zakari la a Mesullam, bãmb la tʋʋmda zu-raoogo. Levitsa sẽn da minim yʋʋm teeda zãabã, bãmb n da get zɩtba yelle, la b ra yaa tʋʋma pʋɩtba, ned kam fãa ne a tõog la a bãngre. Levits kẽer da yaa sɛb-gʋlsdba, bɩ tʋʋma wilgdba, bɩ ragno-gũudba. B sẽn waa n vaagd ligdã b sẽn da tall n wa wẽnd dooga yĩnga, maan-kʋʋd a Ilkiya me yãenda a Moyiiz noora sebre. A Ilkiya yeela sɛba naab a Safã: «M yãenda Noora sebr wẽnd doogẽ.» La a rɩka sebrã n kɩs a Safã. A Safã tall-a lame n tɩ kɩs dĩma la a naagame n wilg yɛla sẽn be zĩig ninga. A yeela woto: «Y sẽn kõ y neba tʋʋmd ninga, b tar-a lame n dabd a baas-neera zĩigẽ. B kɩsa tʋʋm-tʋmdba la tʋʋmda getba ligda sẽn da be wẽnd doogẽ wã.» Dẽ poore sɛb gʋlsd a Safã yeela rĩma: «Maan-kʋʋd a Ilkiya kõ-m-la Sebr a ye.» A karma sebrã dĩma taoore. A sẽn wʋm Noora karõngo, dĩma kẽesa a futu. A yeela a Ilkiya, la a Safã biig a Ayikam, a Mika biig a Abdõ, a Safã menga, sɛba naaba, la a Asaya, dĩma kombere: «Kẽng-y n tɩ sok Soaala-Wẽnde b sebra poorẽ tɩ maam ne Israyɛl la Zɩɩda bãnge. B sũur tog n puuga wʋsg ne tõndo tɩ d ba rãmb ka reeg la b pa tũ sẽn gʋls sebra pʋgẽ wã ye.» A Ilkiya ne dĩma neba kẽnga bãngd poaka a Ulda nengẽ. Da yaa a Salum paga, a Tokeyat biiga, a Asra yagenga. A sɩda n da gũud futã. A ra bee Zerizalɛɛm Kẽedpaolgo. B goma ne-a n wilg yɛla sẽn be zĩig ninga. Dẽ la a Ulda yeel-b tɩ b taas dĩma koe-kãnga: «Ad Soaala-Wẽnd meng sẽn yete: ‹M na n taka yel-beed tẽn kãnga ne a neba zugu. La yaa kãab wẽns niyns sẽn be sebra pʋgẽ, sebr ning b sẽn karem Zɩɩda dĩma taoorã. B basa maam n waoog wẽn-naandse, n tʋlg n puug m sũuri ne b tʋʋm wẽnse. La sɩda m sũur widga bugum ne tẽngã la m bugma kõn kiis ye. La tɩ yeel-y Zɩɩda dĩma sẽn tʋm tɩ b wa sok-ma, ad maam a Israyɛl Wẽnnaam koɛɛga: Fo sẽn wʋm koees niynsa na n taasame. La ade, fo sẽn sãam f sũuri, n sulg f meng Naaba-Wẽnd taoore, f sẽn wʋm b sẽn segend bũmb ning tẽnga yĩnga, fo sẽn sulg f meng mam taoore n kẽes f futu n yãb m taoorã, ad-m yãeeme, maam, Naaba-Wẽnde. M na n bas-f lame tɩ f tɩ sak f saam dãmba, tɩ f sig f yaoogẽ ne laafi, tɩ f nin ka yãend yel-beeda fãa sẽn na lʋɩ tẽn-kãnga ne a neba zug ye.› » Maan-kʋʋd kãseng a Ilkiya ne a tʋmd-n-taasã lɛɛg n tɩ wilga dĩma Naaba-Wẽnd leokre. Dĩma kɩtame tɩ b tigim Zɩɩda la Zerizalɛɛm kãsem-dãmba. Dĩma tũ-b lame n kẽ Wẽnd doogẽ, ne Zɩɩda la Zerizalɛɛm neba, maan-kʋʋdba, Levitsã, zãma wã fãa, nin-bɛd la kom-bõonego. Bãmb taoore a karma Zooda sebre b sẽn yãend wẽnd doogẽ wã. Dĩma da yɛsa yĩngri a zĩigẽ la a kãaba Naaba-Wẽnde t'a na n modga a meng n deeg b noya, b salgse, b rog-n-miki, t'a na n tũ ne a sũuri, ne a pãng fãa, sebra, sẽn yet bũmb niynsã fãa. A goma neba fãa zĩigẽ, f be Zɩɩda bɩ Bẽnzame tẽn-peelmẽ. Zerizalɛɛm dãmba saka zoodã ne Naaba-Wẽnd, b ba rãmb Wẽnde. Bũmb ning fãa sẽn da be Israyɛl tẽn-peelmẽ n ka tog ne Soaala-Wẽnde, a Zoziyas menes-a lame. A vɩɩma tõre, Israyɛl kẽed fãa lebga wẽnd-tũuda. B pa le lak ne Naaba-Wẽnd, b ba rãmb Wẽnnaam ye. A Zoziyas maana Pak kibs Naaba-Wẽnd yĩnga, Zerizalɛɛm. Paka maana pipi kiuugã piig la a naas daare. A Zoziyas le kõo maan-kʋʋd fãa a tʋʋmde, la a gesame tɩ ned kam fãa sɩd tõog n maan a tʋʋmd wẽnd doogẽ. A yeela Levitsã sẽn da tar yẽesem n yɩɩd b taaba ne Naaba-Wẽnd sorã tũudem, la sẽn da welg toor Naaba-Wẽnd yĩnga: «Ning-y kuga walsa koglga wẽnd dooga pʋga, Israyɛl dĩm a Daviid biig a Salomo sẽn me roog ningã. A ra le yɩ zɩɩb y bãgdẽ ye. Tʋm-y marsã, Soaala-Wẽnd la buud a Israyɛl yĩnga. Zĩnd-y toor-toore, ned kam fãa a tʋʋmda rãmb sakẽ, wala a Daviid sẽn ning a sebr zugu, t'a biig a Salomo, reeg n taase. Pa-y wẽnd doogẽ, buuda yĩnga, la sẽn ka tõe n kolg-b Soaala-Wẽnd yĩnga. Buuda me na ges Levitsa yelle. Kʋ-y paka, yɩlg-y mense, vɩɩnd-y y saam-biisa yĩnga wala Soaala-Wẽnd sẽn taas b koɛɛg a Moyiiz.» A Zoziyas yãka nin-zaalsa yĩnga rũm-bõonese, pe-bi la bulli, bãmb tus pis-tã. Yɩɩ pak kibs rũmsi, sẽn tigim-ba yĩnga, n paas niis tus a tã. Rũmsa yii dĩma soolmẽ. A poorẽ dãmba me baoo b yamleoog maand rũmsi, zãma wã, maan-kʋʋdba la Levitsa yĩnga. Sẽn get-b tʋʋma kõo wẽnd doogẽ maan-kʋʋdbã, a Ilkiya, a Zakari la a Yeyiyɛl, dũm-bõonese, pe-bi la bulli tus a yi la kobs-yoobe, la rũm-bɛda, niis kobs-tã. Levitsa kãsem-dãmba, a Konaniya, a Semaya la a yao a Netaneyɛl, a Asabiya, a Yeyiyɛl ne a Zozabad kɩsa Levitsa yĩnga pak rũm-bõones tus a nu la niis kobs-nu. B wilga bũmb fãa ne a wakato, tɩ maan-kʋʋdba kẽng b zĩisẽ, tɩ Levitsa tigim sak-saka, wala dĩma sẽn da yalse. B kʋʋ pakã, maan-kʋʋdba da reegda zɩɩma Levitsa nusẽ n daannẽ. Levitsã n da sɩɩgd dũmsã. B ninga toore, rũmsã, la sẽn yɩɩda lolsa sẽn da tog n kʋ yũ-nood maando Soaala-Wẽnd yĩnga. Rũms kãens yaa Israyɛl sagsa toor-toor sẽn da tog n wa ne wala sẽn gʋls a Moyiiz noora sebrẽ. Wala noora sẽn date, b sẽe pak pe-bilã la rẽ tɩ b rʋgda nemdã rʋgd pʋgẽ, miisd laas pʋsẽ, la-bõones pʋsẽ. B yika ne yãgbo n saa n pʋɩ nemdã Israyɛl kamba. Dẽ poore Levitsa segla pakã bãmb la maan-kʋʋdba yĩnga. A Aarõ kamba tʋʋmde yɩɩ yũ-nood maanda kʋʋbo la kaama yõogre n tar yõogre, n ta yʋngo. Yɩɩn-yɩɩndba, a Asaf kamba, da be b zĩigẽ, wala a Daviid sẽn da yalse. A Asaf, a Eman, a Yedutun, dĩma bãngdã, dagno-gũudbã, ned ba a ye ka luk a naoor ye, tɩ Levitsa segla fãa b yĩnga. Yaa woto la badaare Naaba-Wẽnd pẽgrã yɩ yũ-nood maand kũuni, b maan-kugra zugu, wala a Zoziyas sẽn da tʋlge. Israyɛl kamba sẽn da tigim-b be wã maana paka rasem a yopoe, n pa rɩt bɩll ye. Bãngd a Samwɛl loogr tɛka, b ka maan Israyɛl tẽn-peelmẽ wã pak sẽn wẽneg pak kãnga ye. Israyɛl dĩm ba a ye ka maan Pak wa a Zoziyas rẽndã n paam tɩ maan-kʋʋdba fãa, Levitsa fãa, Zɩɩda la Israyɛl, la Zerizalɛɛm dãmb fãa zĩnd be ye. Paka kibsa maana a Zoziyas naam yʋʋmd piig la a nii soaba. A Zoziyas waa n tõogame tɩ yɛla fãa leb b zĩisẽ, Naaba-Wẽnd doogẽ wã. Ezipt dĩm a Neko me yikame n na n tak zabre al Karkemis sẽn me Efrat kʋɩlg noore. A Zoziyas pa sak tɩ Ezipt rãmba bʋdg a soolmẽ ye. Ezipt dĩm a Neko tʋmame tɩ b wa yeel-a: «M koɛ-bʋg n be ne foom, Zɩɩda dĩma? M ka wat dũnna n na n zab ne foom ye. Yaa ne ned a to la m wat zabre la Wẽnd yeel-m lame tɩ m maan yãgbo. Wẽnd sẽn be ne maama, da kẽ sʋk tɩ b wa kʋ-f ye.» A Zoziyas da ninga a yamẽ tɩ rẽnd a zab ne a Neko bala, woto a pa kelg koɛɛga sẽn yaool n da ya Wẽnd meng koɛɛg ye. A boba zabre. B sega taab Megido sigdgẽ. B tão a Zoziyas ne tãpo t'a yeel a sõgen-kamba: «Tall-y-ma n looge, tɩ toog tar-m lame.» A sõgen-kamba yiis-a-la a bilim-bilma n kẽes a to pʋgẽ n tall-a n leb Zerizalɛɛm la a kii be. B mum-a-la a ba rãmb yaadẽ. Zɩɩda ne Zerizalɛɛm gill maana a Zoziyas kʋʋre. A Zeremi maana yɩɩla n yãb a Zoziyas, la yɩɩn-yɩɩndba ket n yɩɩnd-b-la ne rũnna. Waa n lebga rog-n-miki; yɩɩn kãens la sẽn boond tɩ kʋʋr yɩɩlã. A Zoziyas vɩɩma kibare, a nonglem ne Wẽnd sẽn yɩ wa Soaala-Wẽnd sẽn da rat a soaba, wala sẽn gʋls bãmb noora sebrẽ, a kibarã, a sɩngre n ta a baasgo, fãa gʋlsa Israyɛl la Zɩɩda dĩm dãmb sebrẽ. A Zoziyas biig a Zoakaz lebg dĩma; b yuga a naama Zerizalɛɛm na-tẽnga. A Zoakaz sẽn waa n na n dʋ zaoor t'a tara yʋʋm pisi la a tã. A dɩɩ naam kiis a tã Zerizalɛɛm. Ezipt dĩma wa n yiis-a-la Zerizalɛɛm, la a kɩtame tɩ tẽnga rãmb yao wanzurf sẽn ta neb koabg la pis-nu zɩɩbo la b yao sãnem sẽn ta neb piig la a nu zɩɩbo. A Zoakaz ba-biiga a Eliakim la a kõ Zɩɩda naam. A teka a yʋʋrã tɩ lebg Zoakim. Ezipt dĩm a Neko talla a Zoakaz n kẽng Ezipt. A Zoyakim sẽn waa n na n dʋ zaoor t'a tara yʋʋm pisi la a nu. A rɩɩ naam yʋʋm piig la a ye Zerizalɛɛm. A maana ka ta Naaba-Wẽnd, a Wẽnnaama, yam ba bilfu. Babilon dĩm, a Nabikodonozor zaba ne-a n yõk-a n balg bãense n tall-a n loog Babilon. A looga ne wẽnd dooga teed kẽer me n tɩ bĩng a na-yir, Babilon. A Zoyakim kibare, a sẽn lak ne Naaba-Wẽndã, a sẽn maan tɩ neba fãa mii, fãa gʋlsa Zɩɩda la Israyɛl dĩm dãmb sebrẽ. A biig a Zoakẽ n led-a zaoorẽ. A Zoakẽ da tara yʋʋm a nii a sẽn waa n dʋ zaoore la a dɩɩ naam Zerizalɛɛm kiis a tã la la rasem piiga. A maana sẽn ka ta Soaala-Wẽnd yam. Yʋʋmd sẽn vẽke, dĩm a Nabikodonozor toolame tɩ b tɩ wa ne-a. A tall-a lame n kẽng Babilon ne wẽnd dooga teedo, n yaool n lebs a ba-biig a Sedesiyas a zaoorẽ, Zerizalɛɛm. A Sedesiyas da tara yʋʋm pisi la a ye a sẽn waa n dʋ zaoore la a dɩɩ naam yʋʋm piig la a ye Zerizalɛɛm. A ka maan sẽn ta Naaba-Wẽnd, a Wẽnnaam, yam ye. A ka reeg a kongre bãngd a Zeremi taoor ye. Soaala-Wẽnd n yaool n da tʋm a Zeremi a nengẽ. A zẽka a zug ne dĩm a Nabikodonozor; a yaool n da kãaba Naaba-Wẽnd taoore t'a na n tũu bãmba. A Sedesiyas naka a kãare, n kidb a sũuri, a ka lɛɛg n pʋg Naaba-Wẽnd a Israyɛl Wẽnnaam ye. Sẽn paas wẽnema, ad-y maan-kʋʋdba taoor dãmba, ne kãsem dãmb a taabã ka vʋʋs ne b tʋʋm yooda ye, b maan bu-zẽmba wɩɩbda gilli, n dẽgem doog ninga sẽn da me Zerizalɛɛm Soaala-Wẽnd yĩngã. Naaba-Wẽnd, b yaab rãmb Wẽnnaama, tʋma bãngdb ka tɛka, la naoor yaka, n yeel-b tɩ b maan gũusgu. La rẽ yaa b sẽn da zoet b buuda nimbãanega la b ra pa rat b rooga sãoongã. B laa bãngdbã, b sãbsa b goama, al tɩ Naaba-Wẽnd sũur wa puug ne-ba, la b sũ-puura ka le yãend tɩɩm ye. Dẽ me la b kɩt yã tɩ Babilon dĩma kood b kom-bɩɩba, b wẽnd dooga pʋga, n ka kees bi-ribla, bi-pugla, bɩ nin-kẽem zug sẽn pelg ye. Soaala-Wẽnd bas-b-la fãa Babilon dĩma nugẽ. Wẽnd dooga teed fãa, te-bɛd la te-bõonese, wẽnd dooga laogo, dĩma arzɛka, nin-bɛda rẽnna, a looga ne fãa Babilon. B yõoga wẽnd doogã, n tus Zerizalɛɛm lal-gũbrã n lubi, b yõoga dĩma zak la a roto, la a sẽn da tar fãa tɩ ya yõodo. Sʋʋga sẽn ka kʋ b rãmba, a Nabikodonozor wʋk-b lame n kẽng yembd Babilon. B paa be n tʋm dĩma ne a kamb yĩnga, n ta Pɛrs rãmb sẽn wa n vigl b rĩungu Babilon. Woto taasa Soaala-Wẽnd sẽn da yeel ne bãngd a Zeremi noore: «Tẽnga na n yaoo vʋʋsga raar sama, a me na vʋʋs ne wombo, yella sẽn na n lʋɩ a zugu tɛka, tɩ yʋʋm wa pid pisopoe.» Pɛrs dãmb dĩm, a Sirus, pipi yʋʋmde, sẽn na n yɩlẽ n pids koɛɛg ning b sẽn yiis ne a Zeremi noore, Naaba-Wẽnd kõ-la a Sirus yam sõngo, t'a kɩt tɩ b moon la b gʋls n yaglge, a soolma fãa pʋgẽ. Ad-a Sirus, Pɛrs dãmb dĩma koɛɛga: «Naaba-Wẽnd, yĩngr Wẽnnaam dɩka dũni wã rĩunda fãa n sagl m nugẽ. Bãmb n yeel maam tɩ m me roog n kõ-b Zerizalɛɛm. Ned ning fãa sẽn yaa b buuda ned, bɩ Wẽnd zĩnd ne-a la a rɩk Zerizalɛɛm sore!» Ade, sẽn na n yɩlẽ tɩ koɛɛg ning Naaba-Wẽnd sẽn yeel a Zeremi wã taase, Pɛrs dãmb dĩm a Sirus paama yam sõngo, a naama dɩɩb pipi yʋʋmd bala. A toola sebr la a kɩtame tɩ b moon woto a soolma fãa pʋgẽ: «Ad Pɛrs dãmb dĩm a Sirus koɛɛga: ‹Soaalã, yĩngr Wẽnda dɩka dũniya rĩunda fãa n ning m nugẽ. Bãmb n yeel maam tɩ m me b roog Zerizalɛɛm, Zɩɩda tẽnga. Dɩlla yãmb sʋka, ned sã n beẽ n ya Israyɛl biig fãa bɩ Naaba-Wẽnd zĩnd ne-a. A leb Zerizalɛɛm, Zɩɩda tẽnga, tɩ b me roog Israyɛl Wẽnda yĩnga. Bãmb la b sẽn waoogd Zerizalɛɛma. Israyɛl biig sã n ket yãmb sʋka, a sẽn be zĩig ning fãa, bɩ tẽn kãng rãmb wa sõng-a ne wanzurf, ne sãnem, ne koodo, ne rũmsi, ne a yamleoog kũuni, wẽnd dooga sẽn be Zerizalɛɛma meeb yĩnga.› » Tũu boto t'a Zɩɩda ne a Bẽnzame roog kãsem-dãmbã, n paas maan-kʋʋdba, Levitsã la Wẽnd sẽn yẽeg b rãmb yama yik n dɩk sore n kẽng Zerizalɛɛm n tɩ me wẽnd doogã. B yagsa fãa sõng-b lame wa b sẽn tõe ne b sãnem, b wanzurf, b koodo, b rũmsi, b laog ka tɛka, b yamleoog kũuni, Zerizalɛɛm wẽnd dooga yĩnga. Dĩm a Sirus kɩtame tɩ b tigs teed niyns a Nabikodonozor sẽn da wʋk Zerizalɛɛm wẽnd doogẽ n wa ning a meng wẽnda roogẽ. Pɛrs dãmb dĩm, a Sirus, reeg-b lame n ning a Mitridat nugẽ, arzɛka gũud kãsengã. Yẽ reeg-b lame n kɩs a Sesbasar, Zɩɩda rĩm-biiga. Ad-a sẽn sõde: sãnem laas pis-tã, wanzurf laas tusri, sʋʋs pisi la a wɛ, sãnem la-bɛda pis-tã, wanzurf la-sɩnsɩlse kobs-naas la piiga; teed a taaba: bãmb tusri. Sãnem la wanzurf lagda gilli: tus a nu la kobs-naase; b sẽn waa n yit Babilon, b yembda sẽn sɛ wã, a Sesbasar talla rẽ fãa n wa Zerizalɛɛm. Ad neb niyns sẽn yi yembdo n lɛɛg n wa. Yembdã, yaa a Nabikodonozor n da kẽes-ba, Babilon tẽnga. A Nabikodonozor da yaa Babilon dĩma. B sẽn ta Zerizalɛɛm ned kam fãa leba a a tẽngẽ, Zɩɩda tẽn-peelmẽ. B taoor dãmba la woto: a Zorobabɛl, a Zozuwe, a Neemi, a Seraya, a Relaya, a Mordokayi, a Bilsã, a Mispar, a Bigwayi, a Rewum la a Baana. Ad sull fãa ne a neba: Neb tus a yi la koabg la pisopoe la a yiibu (2172) a Paros roogẽ; neb kobs-tã la pisopoe la a yiibu (372) a Sefatiya roogẽ; neb kobsopoe la pisopoe la a nu (775) a Ara roogẽ; neb tus a yi la kobs-nii la piig la a yiibu (2812) a Paat-Moab roogẽ, dat n yeelame t'a Zozuwe ne a Zoab yagense; neb tusr la kobs-yi la pis-nu la a naase (1254) a Elam roogẽ; neb kobs-wɛ la pis-naas la a nu (945) a Zatu roogẽ; neb kobs-yopoe la pisoobe (760) a Zakayi roogẽ; neb kobs-yoob la pis-naas la a yiibu (642) a Bani roogẽ; neb kobs-yoob la pisi la a tã (623) a Bebayi roogẽ; neb tusr la kobs-yi la pisi la a yiibu (1222) a Azgad roogẽ; neb kobs-yoob la pisoob la a yoobe (666) a Adonikam roogẽ; neb tus a yi la pis-nu la a yoobe (2056) a Bigwayi roogẽ; neb kobs-naas la pis-nu la a naase (454) a Adim roogẽ; neb 98, a Atɛr roogẽ; dat n yeelame t'a Yeyiskiya yagense; neb kobs-tã la pisi la a tã (323) a Besayi roogẽ; neb koabg la piig la a yiibu (112) a Zora buudẽ; neb kobs-yi la pisi la a tã (223) a Asum roogẽ; neb 95, a Gibar roogẽ; neb koabg la pisi la a tã (123) Bɛtelyɛɛm dãmba; neb 56, Netofa rãmba; neb koabg la pisi la a nii (128) Anatot rãmba; neb 42, Bɛt-Azmavet dãmba; neb kobs-yopoe la pis-naas la a tã (743) Kiriyat-Yearim, Kefira la Beerot rãmba; neb kobs-yoob la pisi la a ye (621) Rama ne Geba rãmba; neb koabg la pisi la a yiibu (122) Mikmas rãmba; neb kobs-yi la pisi la a tã (223) Betɛl ne Ayi rãmba; neb 52, Nebo rãmba; neb koabg la pis-nu la a yoobe (156) Magbis rãmba; neb tusr la kobs-yi la pis-nu la a naase (1254) Elam a to roogẽ; neb kobs-tã la pisi (320) a Arim roogẽ; neb Kobs-yopoe la pisi la a nu (725) a Lod, a Adid la Ono tẽng rãmba; neb kobs-tã la pis-naas la a nu (345) Zeriko tẽng rãmba; neb tus a tã la kobs-yoob la pis-tã (3630) Senaa tẽng rãmba; neb kobs-wɛ la pisopoe la a tã (973) maan-kʋʋdbã, a Yedaya kamba dat n yeelame t'a Zozuwe yagense: neb tusr la pis-nu la a yiibu (1052) a Imɛr roogẽ; neb tusr la kobs-yi la pis-naas la a yopoe (1247) a Pasewur kamba; neb tusr la piig la a yopoe (1017) a Arim kamba; neb 74, Levit dãmba, a Zozuwe yagense, a Kadmiyɛl, a Odaviya kamba; neb koabg la pisi la a nii (128) yɩɩn-yɩɩndba a Asaf kamba; neb koabg la pis-tã la a wɛ (139) dagno-gũudba a Salum a Atɛr n paas a Talmo, a Akub, a Atia la a Sobayi kamba; noakense: a Siba, a Asufa, a Tabaot kamba; a Keros, a Sia, a Padõ kamba; a Lebana, a Agaba, a Akub kamba; a Agab, a Samlayi, a Ana kamba; a Gidɛl, a Gaar, a Reaya kamba; a Resin, a Nekoda, a Gazam kamba; a Uza, a Pasea, a Besayi kamba; a Asna kamba, a Meon ne a Nefusa yagense; a Basbuk, a Akufa, a Arur kamba; a Baslut, a Meyida, a Arsa kamba; a Barkos, a Sisra, a Tema kamba; a Nesiya, a Atifa kamba. A Salomo yem-daada kamba: a Sotayi, a As-Soferet, a Peruda kamba, a Yala, a Darkõ, a Gidɛl kamba; a Sefatiya, a Atil, a Pokerɛt-Sebayim, a Ami kamba. Noakensa la a Salomo yem-daada kamba, fãa gill yaa kobs-tã la pis-wɛ la a yi (392). Sã n ya neb niyns sẽn yit Tel-Mela, Tel-Arsa, Kerub, Adãn-Imer, b pa tõog n wilg b roogo la b buuda sẽn kĩ ne a Israyɛl buud to-to ye. Yaa a Delaya, a Tobiya, a Nekoda kamba: kobs-yoob la pis-nu la a yi (652). Maan-kʋʋdba sʋka, a Obaya kamba, a Akos la a Barzilayi kamba me ka tõog n wilg b ba rooga vẽeneg ye. Yaa a Barzilayi paga sẽn da yaa a Barzilayi biigã la yẽ me rɩk yʋ kãnga. A Barzilayi da yaa Galaad neda. Bãmb me vɛɛsa b buuda sɛba la b pa yãe tɩ b kĩi ne a Israyɛl buud ye. Dẽ la b lebs-b kɛɛnga wa neb sẽn pa tõe n tʋm maan-kʋʋr tʋʋmde. Kombera meng tol n yeel-b lame tɩ b da rɩ maanda rɩɩbo, tɩ b pa reng n sok Wẽnd n ges b yeetame tɩ N-yẽe bɩ Ayoo. Israyɛl kamb sẽn yi pa-weerã n lɛɛg n wa wã sẽn naag taaba yaa tus pis-naas la a yi la kobs-tã la pisoobe (42 360) B rakõapa, kom-dibli la kom-pugli, da yaa tus a yopoe la kobs-tã la pɩstã la a yopoe (7337). Yɩɩn-yɩɩndba, pagb la rapa, yaa bãmb kobs-yi. B wiida yɩɩ kobs-yopoe la pis-tã la a yoobe; b bõn-wees kobs-yi la pis-naas la a nu (2045), b yʋgma kobs-naas la pis-tã la a nu, b bõeense tus a yoob la kobs-yopoe la pisi. B sẽn ta Zerizalɛɛm, wẽnd dooga sẽn me tẽng ningã, sags kãsem-dãmb kẽer yiisa b yamleoog kũuni sẽn na n yɩlẽ tɩ wẽnd dooga le wa tõog n me a pĩnd zĩigẽ. B maana b sẽn tõe la a ad-b sẽn paam Wẽnd waoogr yĩnga: sãnem wakɩ koeems tus pisoob la a ye, wanzurfa ta neb koab la pisi la a nu zɩɩbo. Maan-kʋʋra fut yɩɩ koabga. Maan-kʋʋdba, Levit dãmba la neb kẽere wala yɩɩn-yɩɩnba, dagno-gũudba la wẽnd dooga tʋʋm-tʋmdba tɩ kẽe b sẽn zĩndg-b tẽns niynsã. Zerizalɛɛm; noakensã, dagno gũudba, yɩɩn-yɩɩndba la a Israyɛl kamb a taaba leba b buud sagsẽ. Kiuug a yopoe soaba la Israyɛl kamba fãa yi b tẽnsẽ n lɛɛg n wa Zerizalɛɛm wa nin-yende. A Zosadak biig a Zozuwe ne a yaopa sẽn ya maan-kʋʋdba n paas a Salatiyɛl biiga a Zorobabɛl ne a yaop sɩnga maan-kugra meebo, a Israyɛl Wẽnda yĩnga. Yaa sẽn na n yɩlẽ n tõog n kʋ yũ-nood maandã wala b sẽn wilg Wẽnd ned a Moyiiz noor sebra pʋga. B sũur da ka kegem ne tẽnga rãmb ye. B ra waa n kẽ n sooga tẽngã pa-weera wakato. Baasgo b mee maan-kugrã a zĩ kʋdgẽ. B kʋʋ yũ-nood maand, yibeoog la zaabre, Soaala yĩnga. B maana sẽgda kibsa wala a sẽn da tog n yɩ a soaba. Maanda sõor pida zãnga beoog-beoog fãa. Baraar tɛka b kʋʋ beoog-beoog maanda, vʋʋsg raare, ki-paalse la tig-raas rẽnna. M paas yamleed kũuna. Yɩɩ woto la kiuug a yopoe soaba pipi raare, b sɩngame n kʋ yũ-noog mando, Naaba-Wẽnd yĩnga. Dẽ tɩ wẽnd dooga nan ka sɩng meeb ye. B kõo kug-peesdba la ra-pɛɛsdba ligdi. B baoo koodo, rãam la kaam n kõ Tir dãmba tɩ b tall Libã ra-sĩdma n wa Zafa wala Pɛrs dãmb dĩm a Sirus sẽn da sed bũmb ningã. B sẽn yi yembdo n wa Zerizalɛɛm tɩ yʋʋmd la kiis a yi la a Salatiyɛl biig a Zorobabɛl, a Zosadak biig a Zozuwe ne maan-kʋʋdba la Levit dãmba, b saam-biisi, la pa-weta fãa sɩng tʋʋma. Yaa Levit dãmb yʋʋm sẽn pid pisi, bɩ yɩɩd rẽ, la b tũusyã tɩ b na n yɩ tʋʋmna zu-raoog rãmba. A Zozuwe ne a kamba la a yaopa, a Kadmiyɛl, ne a kamba, a Odaviya yagense, bãmb n sõng taab ne wẽnd dooga tʋʋma gesgo, bãmb ne a Enadad yagense, Levitse. Metba sẽn wa n sɩng meebo, n gãneg pipi kugã, maan-kʋʋdba yeelga b maan-kʋʋra futu n yi ne tõntõodo t'a Asaf yagensa yi ne waase la kɛma n pẽgd Soaala-Wẽnd wala Israyɛl dĩm a Daviid sẽn da wilgi. B pẽga Soaala n kils-ba la yaa yɩɩn-kãnga la b ra yɩɩn n deesd taaba: «Soaala yaa nin-noanga la b nonglem ne a Israyɛl ka be sɛɛbo.» Zãma wã ra pẽgda Soaala la b kaasd sũ-noogo, wẽnd dooga meeb sẽn sɩnga yĩngã. B sẽn yãend tɩ wẽnd dooga meeb sɩngame neb kẽere, wala maan-kʋʋdba, Levitsa, sagsa kãsem-dãmb da kiigda nintãm tɩ b da tẽra rooga sẽn yɩ a soab pĩnda. Wʋsg me bʋʋrã la b kaasgã ra yaa sũ-noog kaasgo. Dɩlla yɩɩ sũ-sãang la sũ-noog kɛlenga n da naaga taab n sãt al yɩɩga, la ned da ka tõe n bãng-b n welg ne taab ye. A Zɩɩda la a Bẽnzame bɛɛba sẽn bãng tɩ pa-weta meta roog a Israyɛl Wẽnda yĩnga, b kolga a Zorobabɛl, a Zozuwe la sagsa kãsem-dãmbã n yeel-ba: «Tõnd dat n naaga yãmb n me. Tõnd ne yãmb pʋgda Wẽnd a ye. Tõnd kõt-b-la maando al a Asaradõ, Asʋr dĩma, sẽn tall tõnd tɩ d yi yembdã n lɛɛg n wa ka. Al n ta rũnna d ka teem ye.» Dẽ la a Zorobabɛl, a Zozuwe la kãsem-dãmb a taabã leok-ba: «Meeba ka tõnd ne yãmb n na n naag taab n me ye, ya tõnd bala n na n me roogã n kõ Naaba-Wẽnde, a Israyɛl Wẽnnaam. Pʋs n yaa woto la Pɛrs dãmb dĩm a Sirus kõ noore tɩ b maane.» Tẽnga kamba gomame n woog Zʋɩf rãmba raoodo, n yɛɛs-ba, sẽn na n yɩlẽ tɩ b bas rooga meebo. Pɛrs rãmb dĩm a Sirus sẽn waa n ket n dɩt naam n tãag a Dariyus naam, b tol n bao ligd n kõ kug-zĩidba tɩ daare tʋʋmda na mudi. A Zerksɛs sẽn waa n sɩng a naam dɩɩbo, Samari rãmba da gʋlsa sebr n wilg tɩ bãmb ne Zɩɩda, la Zerizalɛɛm dãmb ka zemsd taab ye. A Artazerksɛs wẽnde, a Bislam, a Mitridat ne a Tabeyɛl la b tũud-n-taase le gʋlsa beedo Zerizalɛɛm dãmb poorẽ. Sebra goama la a gʋlsga da yaa Aram dãmb dẽnna. Sebr kãnga la komber a Rewum la sɛba gʋlsd a Simsayi tool dĩm a Artazerksɛs Zerizalɛɛm poorẽ: «Sɛba bĩngr naaba a Rewum, sɛb gʋlsd a Simsayi, n paas b tũud-n-taase, sẽn yit Din, Afarsatak, Tarpɛl, Afaras, Erek, Babilon, Suz, Dea, la Elam tẽnse, tõnd ne d buuda rãmb dĩm kãseng a Asnapar sẽn yiis yembdo n tall n wa kẽes Samari la tẽns niyns sẽn be Efrat rʋʋnde, ad-y yaa tõnd n toond pʋʋsem. Yaa tõndo, y yemsa sẽn be Efrat rʋʋndã n gʋlsd a Artazerksɛs. Dĩm sõngo, togame tɩ d wilg yã tɩ neb niyns sẽn yi fo nengẽ n lɛɛg n wa be ne tõnd Zerizalɛɛm, dat n le yika Zerizalɛɛm, tẽng ning sẽn ka be sugri la sẽn ya tõata. B rat n le yika a lalsã. Yaa meeb sẽn tar pãng zugu la b na n dogl lal-gũbrã. Y tog n bãngame tɩ tẽnga sã n me tɩ lal-gũbra yiki, a kẽedba pa na n le yao yõor yaood ye, b kõn wa ne kood ye, b kõn yao sor n paam n kẽedẽ la b yit ye, yaa bõne la bõn bala la y na n dɩ, yãmb la dĩm dãmb sẽn na n pʋg b yãmbã. Tõnd sẽn dɩt dĩma rɩɩbo, d yeelame tɩ pa tog tɩ y yãe paoogr a woto buud ye, tɩ d gʋlsd-y n na n wilg yã. Y sã n kɩt tɩ b karem y ba-rãmb sẽn gʋls fãa tẽnga poorẽ, y na bãng tɩ tẽnga ka reegd naana ye, n takd yel-beedo a neb la a soaalb zugu al daar zãra, la rẽ n pus n wa ne a wãaba, pĩnda. D wilgda dĩma tɩ tẽn-kãnga sã n me, a lal-gũbra sã n le yiki, y soolem sɛɛ Efrat rʋʋnde.» Dĩma leoka woto: «Wẽnd laafi zĩnd ne a Rewum, tẽnga sɛba gũuda la a sɛb gʋlsd, a Simsayi, la b zĩnd-n-taase sẽn be-b Samari, bɩ tẽns a taaba, Efrat rʋʋnde! Ade, sebrã y sẽn gʋls-ma, b lebg-a-la ne tõnd buuda goam n togs-ma. D kɩtame tɩ b lags d sɛbã la d yãeeme tɩ yaa naoor yaka, la daar zãra la tẽn-kãnga sɩng a zug zẽkre ne a soaalba. Tẽnga zɩɩ n sak naana, a zɩɩ n kong zab ye. Sɩda dĩm bɛd dɩɩ naam Zerizalɛɛm, n sãag n dɩ naam Efrat rʋʋnd menga tɩ b yaood b yõor yaoodo, n kõt-b koodo la b yaood soy wã b sẽn tũudã. Modg-y tɩ tʋʋmd ninga sẽn sɩngã ra baas ye; b ra saag n le maneg tẽnga tɩ ka tũ ne mam noor ye. Da maan-y reem ye, ka rẽ wẽnem na n paasame la dĩm dãmb na n dɩɩ bõne.» Tẽnga taoor soaba a Rewum, sɛba gʋlsd a Simsayi ne b zĩnd-n-taas kelga a Artazerksɛs sebra karengo la b yika tao-tao n kẽng Zerizalɛɛm n babs Zʋɩf rãmbã la b wõosa b sʋʋse, tɩ metba bas meebã. Yɩɩ woto la b yals wẽnd dooga meeb Zerizalɛɛm, n tãag Pɛrs dãmb dĩm a Dariyus naam yʋʋmd a yiib soaba. Bãngdba n waa n yiki, Israyɛl Wẽnnaam pãng la b yʋʋr yĩnga, n gomd Zɩɩda la Zerizalɛɛm poorẽ. Yɩ-la bãngda a Aze ne a Zakari, a Ido biiga. Woto me la a Salatiyɛl biig a Zorobabɛl, a Zosadak biig a Zozuwe yik n sɩng wẽnd dooga meebo Zerizalɛɛm. Wẽnd neba ra bee bãmb ne tʋʋm-tʋmdba sʋka n kengd b pɛlga. Yaa wakat kãng la Efrat rʋʋnd komber a Tatnayi n paas a Setar-Boznayi ne b tũud-n-taas waa n sok-ba tɩ ãnda n kõ bãmb sore tɩ b me wẽnd doogã la b le yik a lal-gũbrã? D datame tɩ y wilg tõnd sẽn met-ba yʋʋre! Wẽnd da bee ne Zʋɩf rãmba taoor dãmba, woto b pa gɩdg metba ye. B da gũudame bal tɩ sebr taa a Dariyus nengẽ n lɛɛg n wa tɩ b bãng sẽn na n yɩ a soaba. La b ra ket n tara meebo. Seb kãnga la a Tatnayi, Efrat rʋʋnd komberã n paas a Setar Boznayi, ne b tʋmd-n-taase, Arfasak rãmb sẽn be Efrat rʋʋnde, tool dĩm a Dariyus. Yaa woto n da gʋls b sebra pʋga: «Bɩ laafi pemsem wẽ dĩm a Dariyus zãnga! Dĩma bãng tɩ d taa Zɩɩda. D taa b Wẽnd kãsenga roogẽ. B met-a-la ne kug sẽn peese la raad la b rɩkd n pɛ lalsã. Tʋʋmda tʋmda neere la a kẽndame. Tõnd goma ne nin-kẽembã n sok-ba: ‹Ãnda n kõ yãmb sore tɩ y me ro-kãnga la y le yik n ka-a raado?› Tõnd soka sẽn be-b taoor dãmbã yʋya n na n gʋls n wilg yã. Woto la b leok tõndo: ‹Tõnd yaa yĩngr la tẽng Soaala sõgẽn-kamba, la Israyɛl dĩm kãseng a ye n me roog al daar zãra, la yaa ro-kãng lals sẽn lʋɩ la d le yikda. Yaa tõnd yaab rãmb n puug yĩngr Wẽnda sũuri tɩ b rɩk-ba n sagl a Nabikodonozor nugẽ, Kalde rao la Babilon dĩma. Yẽ n wã roogã la a wʋk buudã n kẽng pa-weere, Babilon. Babilon dãmb dĩm a Sirus, a naama pipi yʋʋmde, kõo sor ti b le maneg roogã n me. A tol n kɩtame tɩ b yiis Babilon wẽnd dooga pʋga sãnem la wanzurf teed niynsi a Nabikodonozor sẽn da yiis Zerizalɛɛm wẽnd doogẽ n tall n wa be. Yaa a Sesbasar la a lebs teedã tɩ yẽ la a yãk n maan a kombere. A yeel-a lame t'a reeg teedã n tɩ lebs Zerizalɛɛm wẽnd doogẽ la a kɩt tɩ b le maneg n me-a, a pĩnd zĩigẽ. A Sesbasar meng n wa n sɩng rooga meebo, Zerizalɛɛm, la rẽ tɛka n ta rũnna, d tall-a a meebo la nan ka sɛ ye.› Sã n taa dĩma yam bɩ a kɩt ti; b vɛɛs sɛba sẽn bĩngd zĩig ningã, Babilon tẽnga, n ges dĩm a Sirus sã n sɩd kõo noore rooga poorẽ la b togs dĩma sẽn yals bũmb ninga tɩ d bãng.» A Dariyus kɩtame tɩ b vɛɛs sɛba sẽn bĩngd zĩig ningã, Babilon tẽnga. Yaa Mɛd dãmb Ekbatan tãnsoben-doog a ye pʋga la b yãend sebr la b gʋlsa sebra zugu tɩ woto yaa sebr sẽn tog n bĩngi. A Naama pipi yʋʋmde, a Sirus kõo noor kãnga, Zerizalɛɛm wẽnd dooga poorẽ: «B na n le maneg n me roogã, zĩig ning b sẽn da kʋʋd maandã, a zĩ kudgẽ. A zãndlem na n yɩɩ kãntɩɩs pisoobe, a yalem me boto. Kug sẽn pees rũnus a tãab zugu, b gãnegda ra-sĩdim paals rũnug a ye. Tʋʋmda yaood paka dĩma. Rooga teed fãa sẽn ya sãnem bɩ wanzurf, t'a Nabikodonozor tall n loog Babilon, teoog fãa na n leba a zĩigẽ, wẽnd doogẽ wã, fãa na n bĩnga be. Marsã, bɩ a Tatnayi, Efrat rʋʋnd komber, n paas a Setar-Boznayi, a tʋmd-n-taase la sẽn yi-b Pɛrs tẽnsẽ, bɩ bãmb fãa ra lʋɩɩs b toog ye. B bas tɩ wẽnd dooga tʋʋm baase, b bas tɩ Zʋɩf rãmba sẽn lʋɩɩs a soab b taoora la b nin-kẽemba lebs roogã n me a zĩ kudgẽ. Y sẽn na n maan bũmb ning ne Zʋɩf rãmbã nin-kẽemsa sẽn na n lagem yãmb rooga meebẽ la woto: m datame tɩ ligda yi yõora yaoodẽ y sẽn deesd neba nengẽ b tẽnsẽ wã. Yãk-y ligda be n kɩs y sẽn tog n kɩse, wakat fãa la bũmb da paoog ye. Ad-b sẽn tog n deeg bũmb ninga: lol-bõonese, pe-raado, pe-bi, yũ-noog maoonga yĩnga, alkam, yamsem, rãam, kaam, wala Zerizalɛɛm maan-kʋʋdba sẽn na n wilgã. Y tog n kõ-b-la beoog sẽn vẽeg fãa. Woto b na tõog n wa ne kũun sẽn na n sigs yĩngr Wẽnda sũuri la b pʋʋs tɩ b wogl dĩma ne a kamba yõore. Ad-m sẽn leok bũmb ning noora poorẽ; sẽn saaga n tõdg noorã, bɩ b võog a soab roog baafo n lɛɛg n ka-a menga la b kɩt t'a roog lebg tãmpʋʋre. Bɩ Wẽnd ninga sẽn yãka zĩ-kãnga n na n maan a waoogr zĩiga tus n lub dĩm ning fãa la buud ning fãa sẽn na n tõdg noorã n yik n dat ro-kãnga sẽn me Naaba-Wẽnd yĩng Zerizalɛɛma lʋɩɩse. Yaa maam a Dariyus n yiis no-kãnga la m datame tɩ b tũ m sẽn wilga zãnga.» Efrat rʋʋnd komberã, a Tatnayi ne a Setar-Boznayi ne b tʋmd-n-taasa maana wala dĩm a Dariyus sẽn datã. Zʋɩf rãmba nin-kẽemsa kell n talla wẽnd dooga meebo neer-neere, wala bãngd a Aze la a Ido biig a Zakari sẽn da togse. B baasa rooga meebo wala Pɛrs dĩm dãmba, a Sirus, a Dariyus la a Artazerksɛs sẽn da rate. B baasa roogã Adar kiuug pisi la a tãab daare. Dĩm a Dariyus naam yʋʋmd a yoob soaba. Israyɛl kamba, b maan-kʋʋdba, b Levitsã sẽn da yi yembd weooga, fãa maana Naaba-Wẽnd dooga bark ningr kibsa ne sũ-noog kãsenga. Rooga bark ningri yĩnga, b kʋʋ lols koabga, pe-raad kobs-yi, pe-bi kobs-naase. A Israyɛl yel-wẽna sugr kosg yĩnga, boees piig la a yiibu, tɩ Israyɛl buuda sags yaa piig la a yiibu. Wala a Moyiiz noora sẽn date, b pʋɩɩ maan-kʋʋdba b raare, n wilg Levitsa ned kam fãa a tʋʋmde, Naaba-Wẽnd waoogr yĩnga. Pa-weta maana paka kibsa pipi kiuuga piig la a naas raare. Maan-kʋʋdba la Levitsa ra paam n naaga taab n yɩlge. Woto b tõog n maana Pakã. Paka maand kʋʋ pa-weta fãa yĩnga, b saam-biisa sẽn ya maan-kʋʋdba yĩnga, buuda fãa yĩnga. Woto pa-wetã, a Israyɛl kamba, naagame n dɩ pakã ne neb niyns fãa sẽn zãag b mense ne bu-zẽmba rẽgdã, n baood a Israyɛl Wẽnnaam. B maana bur sẽn pa lob bɩll kibs ne sũ-noogo dasem a yopoe tõre. B sũ-nooga ra yita Wẽnd meng nengẽ, tɩ bãmb n tedg Asiri dĩma sũuri la b kõ b nus pãnga tɩ b baas Israyɛl Wẽnnaam doogo. Dẽ fãa sẽn looge, Pɛrs rãmb dĩm a Artazerksɛs zamaanẽ, a Esdras yii Babilon n wa. A Esdras ba la a Seraya, a Azariya biiga, a Ilkiya biiga. A Ilkiya ba la a Salum, a Salum ba la a Sadok, a Sadok ba la a Ayitub. A Ayitub ba la a Amariya, a Amariya ba la a Azaria, a Azariya ba la a Merayot. A Merayot ba la a Zeraya, a Zeraya ba la a Uzi, a Uzi ba la a Buki. A Buki ba la a Abisuwa, a Abisuwa ba la a Pinas, a Pinas ba la a Elazar, a Elazar ba la maan-kʋʋd kãsenga a Aarõ. A Esdras da yaa sɛb gʋlsda sẽn da mi a Moyiiz noora neere, Israyɛl Wẽnnaam sẽn da yiis noor ningã. La Naaba-Wẽnd sẽn da nong-a yĩnga, dĩma me kõ-a-la a sẽn kos bũmb ning fãa. Wakat ning Israyɛl kamba, maan-kʋʋdba, Levitse, yɩɩn-yɩɩndba, dagno-gũudba la sõangdba kẽer sẽn wa Zerizalɛɛm, dĩm a Artazerksɛs naama yʋʋmd a yopoe soaba, a Esdras me waa Zerizalɛɛm, ne bãmba, kiuug a nu soaba. Ade, Babilon yiiba ra yãkame tɩ na n yɩ pipi kiuuga pipi raare, la yaa kiuug a nu soaba pipi raare la a ta Zerizalɛɛm t'a Soaala-Wẽnda nug ra gũud-a lame. A Esdras da modga ne a sũur fãa n ning Naaba-Wẽnd noor a pʋtẽerẽ, n tũ-a a vɩɩmẽ la a wilg a Israyɛl a sẽn segd la a sẽn tog n tũ wala a rog-n-miki. Sebr la dĩm a Artazerksɛs da tool maan-kʋʋd la sɛb gʋlsd a Esdras. A Esdras n da wegsd neba yĩnga Naaba-Wẽnd sẽn da yiis koees niyns la noy-niyns a Israyɛl yĩnga. Gʋlsa woto: «Dĩm a Artazerksɛs n pʋʋsd a Esdras, Yĩngr Wẽnnaama noya gʋlsda. M noora la woto: m soolma pʋgẽ, ned ninga fãa sẽn yaa a Israyɛl buudu, n ya maan-kʋʋda, bɩ Levitga, n dat ne yamleoogo n leb Zerizalɛɛm, bɩ a leb ne foo! Yaa dĩma ne a kug-zĩidba a yopoe n tʋmd foo tɩ f tɩ ges Zɩɩda la Zerizalɛɛm tõnd noya sã n zemsda ne Wẽnd ning sẽn nonga yãmba rẽnna. Sẽn le paas yaa ligdã, wanzurfa la sãnema dĩma ne a sagendba sẽn kõt ne yamleoogo Israyɛl Wẽnnaama sẽn yals a waoogr zĩig Zerizalɛɛm. Zɩ wanzurfa la sãnema la yamleoog kũun a taaba maan-kʋʋdba bɩ neb a taab sẽn be Babilon soolma pʋga n dat tɩ f reeg-b Zerizalɛɛm wẽnd dooga yĩnga. Dẽnd yĩnga, f na modg n da ne ligdã, lolse, pe-raado, pe-bi la f ra maanda sẽn tũnugd ne bũmb ningã. F na tall-ba n tɩ rɩgl y Wẽnnaama roogẽ sẽn be Zerizalɛɛma maan-kugra zugu. Maan bũmb ning fãa f sẽn ne tɩ segdame ne ligda sẽn na n kellã, foo ne f poorẽ dãmba, la wala Wẽnd meng sẽn date. Teed niyns f sẽn na n deeg wẽnd dooga tʋʋma yĩnga, f na tɩ rɩgl-b Wẽnd taoor Zerizalɛɛm. Bũmb sã n na n paoog f Wẽnnaama roog yĩnga tɩ f tog n tall n wa, f na yãk ligda dĩma koglgẽ. Yaa maam a Artazerksɛs meng m toore n kõt ligd nanamsa sẽn be Efrat rʋʋnde, noor kãnga: Yĩngr Wẽnnaama norɛɛs, a Esdras sẽn na n kos-y bũmb ning fãa bɩ y maan wala a sẽn togse. A yeeg n da kos tɩ yɩɩg wanzurf zɩslem sẽn ta neb koabg la pis-nu zɩɩbo, alkam pet koabga, rãam yʋy koabga, kaam yʋy koabga. Sã n ya yamsem, yaa waa a sẽn dat tɛka. Naaba-Wẽnd sẽn dat bũmb ning fãa b roog yĩnga, bɩ f maan fãa ne yãgbo, tɩ b sũur da wa yik ne dĩma tẽn-peelem la a neba ye. Sẽn ket yaa y bãng tɩ y ka tõe n deeg yaood ba a ye maan-kʋʋd nengẽ, bɩ Levitga, bɩ yɩɩn-yɩɩnda, bɩ dagno-gũuda bɩ sõangd ye. Sã n yaa foo, Esdras, yik ne yam pidung ning f Wẽnd la f noanga sẽn kõ fooma, n zĩndig bʋ-kaoodba la sɩlem dãmba tɩ b welgd sẽn be b Efrat rʋʋnda yɛla, sẽn mi-b Wẽnnaam noora fãa yɛla la b sõng tɩ sẽn ka mi-b noora wa bãng-a. Ned ning fãa sẽn ka reeg neere Wẽnnaam la dĩma noore, bɩ b paalg-a bʋʋdo n kʋ-a, bɩ b dig-a n yiis y tẽn-peelmẽ, bɩ b yaoolg-a ligdi, bɩ b kẽes-a roogo.» A Esdras yeela ne koe kãsenga: «Wẽnnaam d ba rãmb Wẽnde paam barka! Yãmb ninga dĩma sũurẽ t'a tʋlg n waoog yãmba la y rooga sẽn be Zerizalɛɛm. Yãmb kelga y nonglem sẽn ka be tɛka n waoog maam dĩma taoore, a sagendba la a kug-zĩidb taoore. Yaa woto me la m pam raoodo, yãmb sẽn pʋg maam yĩnga tɩ m me yik n tigim Israyɛl kãsem-dãmb kẽere tɩ d tũ taab n lɛɛg n wa. Wẽnd paam barka, b sẽn kõ yam sõngo, dĩma, a kug-zĩidbã la a tẽnga nin-bɛda. Sã n ya maam, Wẽnd kõ-m la sũ-keelem la b sẽn da be ne maam yĩnga, m tõog n tigima buuda kãsem-dãmba tɩ d tũ taab n wa.» Ad sagsa kãsem-dãmb niyns sẽn yi-b ne maam Babilon dĩm a Artazerksɛs naamẽ n lɛɛg n wa ka, bãmb ne b zak rãmba. A Pinas roogẽ, a Gersõ, a Itamar roogẽ, a Daniyɛl, a Daviid roogẽ, a Atus, a Sekaniya biig a ye; a Paros roogẽ, a Zakari la neb 150 n yãag-a. Paat-Moab rãmb sakẽ, a Zeraya biig a Eliyoenayi, neb 200 n yãag-a; a Zatu sakẽ, a Yaziyɛl biig a Sekaniya, neb 300 n yãag-a; a Adin sakẽ, a Zonatã biig a Ebed, neb 50 n yãag-a; a Elam sakẽ, a Ataliya biig a Yesaya, neb 70 n yãag-a; a Sefatiya roogẽ, a Mikayɛl biig a Zebadiya, neb 80 n yãag-a; a Zoab roogẽ, a Yeyiyɛl biig a Obadiya neb 218 n yãag-a; a Bani roogẽ, a Zosifiya biig a Selomi, neb 160 n yãag-a; a Bebayi roogẽ, a Bebayi biig a Zakari, neb 28 n yãag-a; a Azgad roogẽ, a Akatã biig a Zoana, neb 110 n yãag-a; a Adonikam rooga yao-zʋʋse, a Elifelɛt, a Yeyiyɛl ne a Semaya, neb 60 n yãag-a; a Bigwayi roogẽ, a Utayi, a Zakur, neb 70 n yãag-a. Yaa ko-sor ning sẽn teesd Aava noor la m tigim pa-wetã, la d paa be ra-yɩten-daare. M gesa neere la m pa yãend maan-kʋʋdba la nin-zaalsa sʋka, Levits ye. Dẽ la m tʋm kãsem-dãmb a Eliezɛr, a Ariyɛl, a Semaya, a Elnatã, a Yarib, a Elnatã, a Natã, a Zakari la a Mesulam n paas noora karen-saam-dãmba a Zoyarib la Elnatã. M kõ-b-la noore tɩ b babs Kasifiya naab a Ido. M wilg-b-la b sẽn na n togs bũmb ning a Ido ne a tʋmd-n-taasã la sõangdba sẽn be Kasifiya. M yeel-b lame tɩ b wa ne neb, wẽnd dooga pʋgẽ tʋʋma yĩnga. La Naaba-Wẽnd sẽn be ne-do n dat d sõngrã, b talla ned sẽn be yam n wa kõ-do. Yɩ-la a Serebiya, a Mali biiga, a Levi biiga, a Israyɛl roogẽ. Yɩɩ yẽ ne a kamba la a saam-biisi, bãmb piig la a nii. Sẽn waa n paas-a: a Asabiya ne a ba-biig a Yesaya, a Merari roogẽ, bãmb ne b kamba, bãmb pisi. A Daviid sẽn dɩk b rãmba n kɩs Levitsa sõngr yĩnga, bãmb kobs-yi la pisi, fãa yʋy ra gʋlsa sebr zugu. Aava ko-sora noore m moona no-loeere la d sulga d mens d Soaala taoore n bõs tɩ b ges-do tɩ d tõog n sɩng d kẽna ne laafi tõnd ne d kamba la zɩɩbã d sẽn tʋkã. M da zoeta yãnde ne m kos wed-dʋʋdba sẽn na n kogl-d ne d bɛɛbã, sora zugu. Tõnd meng n da pʋs n yeel dĩma tɩ Wẽnd sõngr ka paoogd sẽn baood-b bãmb ye tɩ b sũur yaool n fõt ne neb niyns toog sẽn ka be ne bãmbã. Tõnd loee d noore n pʋʋs Wẽnde, la b sõng-d lame. M yãka maan-kʋʋd kãsem-dãmb piig la a yiibu n paas a Serebiya ne a Asabiya la b ba-biis piiga. Bãmb taoore, m maga sãnema, wanzurfã la teeda fãa dĩma, la a kombɛɛmba, la taoor dãmba, la Israyɛl kamba sẽn kɩs wẽnd dooga yĩnga. M maga b zɩlem n yaool n sagl-ba b nusẽ. Wanzurfa yɩɩ neb tusr zɩɩbo, wanzurf lagdo, neb koabg la pis-nu zɩɩbo, sãnema, neb koabg la pis-nu zɩɩbo. Sãnem laas wakɩ koeems tusri, zũud lagd a yi sẽn pɩnd, n ya neere, n tar yõod wa sãnem, Dẽ poore m yeel-b lame: «Y rɩka y meng n kõ Wẽnde, teeda me rɩkame n kõ Wẽnde, wanzurfa la sãnema yaa kũun sẽn kõ yaab rãmb Wẽnda ne yamleoogo. Bɩ y zã-ba, n le wa magb-b maan-kʋʋdba nanams taoore, Zerizalɛɛm, do-bõonesa pʋga.» Maan-kʋʋdba, Levitsa yaoolame marsã n deeg wanzurfã, sãnema la teedã, b tall-b lame n loog Zerizalɛɛm wẽnd doogẽ. D gãndga Aava ko-sorã pipi kiuuga pipi raare n dɩk Zerizalɛɛm sore. Naaba-Wẽnd sẽn gũ d sor yĩnga, b zãaga tõnd ne bɛɛba la fãadba sɩlem. D sẽn ta Zerizalɛɛm, d vʋʋsa rasem a tã. Daar a naas soabã, d talla wanzurfã, sãnema la lagdã n tɩ mag-b wẽnd doogẽ n yaol n dɩk-ba n kɩs maan-kʋʋd a Meremot. Naaga ne a Pinas yagenga, a Elazar, n paas Levits a Zesuwa yagenga a Zozabad la a Binuwi yageng a Noadiya. Marsã ne pĩnd magbã zemsa taaba; sõora, a ye; zɩslma, a ye; la rẽ fãa gʋlsa sebr zugu. Dẽ poor marsã, la pa-weta kʋ yũ-noog maoongo Israyɛl Wẽnda yĩnga: yɩɩ lols piig la a yiibu, a Israyɛl kamba yʋʋr yĩnga, la pe-raad pis-wɛ la a yoobe, pe-bi pisopoe la a yiibu. Yel-wẽna sugr kosg yĩnga b kʋʋ boees piig la a yiibu. Maanda fãa yɩɩ yũ-noog maando. B kɩsa sɛbã Efrat rʋʋnd kombɛɛmba la taoor dãmbã. B fãa sõnga nebã wẽnd dooga tʋʋmd yĩnga. Sẽn waa n maan kiis a wãna, kãsem-dãmba kolg-m lame n wilg-m woto: «Israyɛl zãma wã, a maan-kʋʋdba, a Levitsa wegma wa tẽnga rãmba. B maana wa Kanaã rãmba, Ititsã, Perizitsã, Zebuzitsã, Amonitsã, Moabitsã, Amoritsã la Ezipt rãmba. Bãmb ne b kamba kẽe kãadem ne bu-zẽmba la woto buud sõnga tɩ fãooga a meng ne buud a taaba la yaa kãsem-dãmba la nin-bɛdã n dẽgem pipi.» M sẽn wʋm dẽ, m kẽesa m futu la m gʋsa m zoodbo la m toɛɛnga la m pãs n lʋɩɩ ne sũ-sãanga. Neb niyns fãa sẽn da zoet-b Israyɛl Wẽnnaama nif waa n tigma mam seegẽ tɩ d yẽs pa-weta bʋdgra yelle la m zĩnda woto ne sũ-sãang n ta zafar maoonga sasa. Zaabr maoonga wakato la m yik yã, ne m futa sẽn kẽesã la m yĩgimdame n tẽeg m nusa Wẽnnaam m Soaala taoore, n yeele: «M Wẽnnaam, yãnd tar-m la wʋsgo tɩ m pa rat n doog m neng yãmb taoor ye, Soaala. Tõnd yel-wẽna looga d zĩnd n sõdg-ba, b sama wa tãnga. Al d yaab rãmba zamaanẽ n ta marsã, d tara y beegr bala n dabda. Yaa d yel-wẽna yĩng la d mense, d dĩm dãmba, d maan-kʋʋdba lʋɩ dũni wã dĩm dãmb a taab soolmẽ, tɩ b koot tõnd ne sʋʋse, n kẽesd tõnd yembdo, n fãad d paoongo, n ningd-d yãnde, la rẽ yaa vẽeneg rũnna. Daar sẽn nan ka zãage, Soaala nimbãan-zoeera kees-d-la neb kẽere, n yãend zĩig n kẽes-ba, b tẽn-sõnga pʋgẽ. Woto d Wẽnnaama vẽnega d yam la b le kõ-d-la saagre, d yembda pʋgẽ. D yaa yemse, la d yembda pʋgẽ, d Wẽnnaama ka raag-do n bas ye. Pɛrs rãmba dĩma taoore, b puka b nonglem, n kõ-d pãnga tɩ d le me b roogo n yalse, n yik raboodã, n le me Zɩɩda la Zerizalɛɛm lalse. La marsã, Naaba-Wẽnde, d na n yeelame tɩ bõe? Tõnd basa y sora tũudem, d basa noya bãngdba sẽn da taas tõndo. Yãmb n da yeel-do: ‹Ad-y m sẽn na n kẽes-y tẽng ninga yaa tẽn dẽgdo. Tẽnga rãmb rẽgem-a-la ne yel-yoodo niyns b sẽn pids-a, goabg la rɩtgo, poorẽ la taoore. Woto wã, dũnna tɛka bɩ y ra le rɩk y kom-pugli n kõ b kom-dibli ye, da reeg-y b kom-pugli n kõ y kom-dibli ye, da bao-y laafi ne b ye, da bao-y nin-bãmba yĩn-maasem la b naar ye. Yaa woto bal la y wat n lebg buud sẽn tar pãnga, buud sẽn na n dɩ tẽnga yõodo, tẽng y sẽn na n bas ne y yagense zamaan ne zamaana.› D Soaala-Wẽnde, yɛl wʋsgo n pak tõndo, d yel-wẽna yĩnga, d kongra sẽn yɩ wʋsg yĩnga, la ne rẽ fãa y kell n kõo beegra sugri n kees tõnd sẽn yɛs y taoor ka wã. Ad-y d pa rat n le saag n tõdg y noor ye; d kõn bas tɩ kãadem le zĩnd tõnd ne bãmba sẽn pid ne wẽnema sʋk ye. Ka rẽ y sũura na n puuga ne tõndo tɩ y kʋ-d zãng n ka kees bũmb ye. D Soaalã, a Israyɛl Wẽnnaama, yãmb ka bʋʋd kɛg soab ye, dẽ n so tɩ tõnd ket n yɛs y taoor dũnna. La yãmb bal n tõe tɩ sẽn beega yãmb ket n yɛs ne yõore.» A Esdras sẽn waa n pʋʋsdẽ la a reegd a kongre la a tees roogã n yãbd la a zĩ ne sũ-sãanga, Israyɛl kamba waa n tigma taab zembala, a sɛɛgẽ: rapa, pagba, kamba la b tar nintãm kiigri. Dẽ la a Yeyiyɛl biig a Sekaniya, a Elam yagenga, yeel a Esdras: «Tõnd tõdga Wẽnde n kẽ kãadem ne tẽnga bu-zẽmba pagba. Marsã a Israyɛl saagdame tɩ rẽ kõn le mak ye. D le yõg zoodo ne Naaba-Wẽnd la d dig bu-zẽn-pogsã ne b kamba, wala Esdras la sẽn zoet-b Wẽnd nif sẽn sagend tõndã. Bɩ d sẽn maand fãa marsã tũ wa noora sẽn date. Yiki Esdras, tɩ foo n tar yella tɩɩm la d bee f poorẽ. Wɩsg f menga tɩ d sɩnge.» A Esdras yikame n kɩt tɩ zagsa kãsem-dãmba, maan-kʋʋdba, Levitse la a Israyɛl gill wẽen wala a sẽn da yalse. A Esdras yika a sẽn da be zĩig ningã n tees wẽnd doogã la a rɩka a Eliyasib biig a Zoana yir sore. A taa be n kell n zãgs koom la rɩɩbo, n yõk yãbr pa-weta sẽn bʋdg mooga yĩnga. A kɩtame tɩ b moon Zerizalɛɛm la Zɩɩda n wilg pa-weta fãa tɩ b tigim Zerizalɛɛm. Ned ning fãa sẽn zãgsa waoong rasem a tãab pʋgẽ, wala nin-kẽemsa sẽn yẽs n dɩglã, bɩ a sẽn so fãa lebg kisgu la b yiis-a pa-weta sʋka. Dasem a tãab pʋgẽ, a Zɩɩda la Bẽnzame neba gill tigma taab Zerizalɛɛm, Tebɛt kiuugu, kiuug a wɛ soaba, kiuuga pisi raare. Neba fãa gill paa wẽnd dooga sɩmannẽ. Yella kẽes-b-la rabeem n paas saaga me sẽn yõk niibã. Maan-kʋʋd a Esdras yik n yeel-b lame: «Yãmb pa maan neere; y sẽn kẽ kãadem ne bu-zẽn-pogsã, yaa a Israyɛl doog la y kẽes moog zãnga. Reeg-y y kongr Naaba-Wẽnd taoore, y yaab rãmb Wẽnda taoore, n maan b raab marsã la y zãag-y mens ne tẽnga rãmba, ne bu-zẽn-pogsã.» Zãma wã fãa leoka ne pãnga: «F gomd yaa sɩda la d na n maana wala f sẽn togsã! D na n kong n wilg-f lame bala tɩ zãma wã labsa la yaa sa-sika. Yals saagẽ wã yaa toogo, la ka dasem a yiib pʋgẽ la d tõe n welg yella ye. Sẽn ya woto wã bɩ zagsa kãsem-dãmb bal pa b zĩigẽ ka. Neb niyns sẽn tar b bu-zẽn-pogsa na tɩ sak b tẽnga nin-kẽems la b bʋ-kaoodba, b sẽn bool-b raare n na n welg yellã. Na n yɩɩ woto n tãag Naaba-Wẽnd sũura maagre.» Neb a yiibu n yeel tɩ sẽn leok woto wã ka zems ye. Yɩ-la a Asayɛl biig a Zonatã la a Tikva biig a Yasega. A Mesulam ne Levitg a Sabetayi me goma boto. Pa-weta yẽ maana wala b sẽn yeel-bã. B yãka maan-kʋʋd a Esdras, yẽ ne neb a taaba, ned kam fãa a ba roog yĩnga, n gʋls b yʋʋr tɩ b sɩng yɛla vɛɛsgo, kiuug piiga soaba pipi raare, n baas pipi kiuuga pipi raare. B paama neb niyns fãa sẽn da tar b bu-zẽn-pogse. Ad maan-kʋʋdba yagensa sʋka neb niyns sẽn kẽ-b kãadem ne bu-zẽn dãmba. A Zozuwe roogẽ: yaa a Zosadak biiga, la a saam-biis kẽere, a Maaseya, a Eliezɛr, a Yarib la a Gedaliya. B wẽename tɩ b na yiis b pagbã la b beegra yĩnga b yõka pe-raoog n maan sugr kosg maoongo. A Imɛr roogẽ: a Anani la a Zebadiya. A Arim roogẽ: a Maaseya, a Eliya, a Semaya, a Yeyiyɛl la a Uziya. A Pasewur roogẽ: a Eliyoenayi, a Maaseya, a Yismayɛl, a Netaneyɛl, a Zozabad la a Elasa. Levitsa sʋka yɩ-la a Zozabad, a Simeyi, a Kelaya, kẽer t'a Kelita, a Petayiya, a Yewuda la a Eliezɛr. Yɩɩn-yɩɩndba sʋka: a Eliyasib. Dagno-gũudba sʋka: a Salum, a Telem, a Uri. Israyɛl nin-zaalsa sʋka, a Paros roogẽ: a Ramiya, a Iziya, a Malkiya, a Miyamin, a Elazar, a Malkiya la a Benaya. A Elam roogẽ: a Mataniya, a Zakari, a Yeyiyɛl, a Abdi, a Yerimot, a Eliya. A Zatu roogẽ: a Eliyoenayi, a Eliyasib, a Mataniya, a Yerimot, a Zabad, a Aziza. A Bebayi roogẽ: a Zoana, a Ananiya, a Zabtayi, a Atlayi. A Bani roogẽ: a Mesulam, a Maluk, a Adaya, a Yasub, a Seal, a Yerimot. A Paat-Moab roogẽ: a Adna, a Kelal, a Benaya, a Maaseya, a Mataniya, a Besaleyɛl, a Binuwi la a Manase. A Arim roogẽ: a Eliezɛr, a Isiya, a Malkiya, a Semaya, a Simeõ, a Bẽnzame, a Maluk, a Semariya. A Asuwum roogẽ: a Matenayi, a Matata, a Zabad, a Elifelɛt, a Yeremayi, a Manase, a Simeyi. A Bani roogẽ: a Maadayi, a Amram, a Uwɛl, a Benaya, a Bediya, a Keluwu, a Vaniya, a Meremot, a Elyasib, a Mataniya, a Matenayi, la a Yasayi. A Bani, a Binuwi, a Simeyi, a Selemiya, a Natã la a Adaya. A Maknadebayi, a Sasayi, a Sarayi, a Azarɛl, a Selemiya, a Semariya, a Salum, a Amariya, a Zozɛf. A Nebo roogẽ: a Yeyiyɛl, a Matitiya, a Zabad, a Zebina, a Yadayi, a Zowɛl, a Benaya. Bãmb fãa da kẽe ne bu-zẽmb pagba. La b yiis-b-la gilli, bãmb ne b kamba. Pagb kẽer da roga kamba. Ad-a Akaliya biig a Neemi sẽn togse. Kislewu kiuugu, a Artazerksɛs sẽn waa n dɩt a yʋʋm pisi naam, tɩ m da bee Suz pʋgẽ, tẽng sẽn tõe n zab n fãag a meng pugẽ. M yao a ye sẽn boond tɩ Anani waa ne neb sẽn yi Zɩɩda. M sẽn sok-b Zʋɩf rãmb yelle, yembda sẽn dɩ n keesa yelle, Zerizalɛɛm yelle, b leok m lame: «Yembdã sẽn dɩ n kees tɩ b lɛɛg n wa b tẽngẽ wã tara pɛt la yãnde. Sã n ya Zerizalɛɛm lal-gũbrã, a yaa begse la kʋɩlensa dɩɩ bugum.» M sẽn wʋm dẽ m lʋɩɩme n sĩng yãbre, m paa sũ-sãang pʋgẽ dasem a wãna, n loe m noore la m pʋʋsa Yĩngr-Soaala taoore. M yeel-b lame: «Naaba-Wẽnde, Yĩngr-Soaala, Pãng sẽn kẽesd dabeem soab la yãmba. Wakat buud fãa y nonglma pʋgda sẽn nong-b yãmb la b reegd y noya. Bɩ y yoog y tʋb la y puk y nini la y kelg y yamba pʋʋsgo. Yaa wĩndg la yʋng marsã la m tar pʋʋsgo, y kamba yĩnga la m wilgd beegr ning d sẽn beeg yãmbã. Maam ne m saam-biisa sɩd beegame. Tõnd ka maan neer ye, d ka reg y noya, y saglse la dog-n-mik ning y sẽn kõ a Israyɛl ne a Moyiiz noora ye. Tẽeg-y gomd ninga y sẽn ning y sõgen a Moyiiz noorẽ. Yaa woto la y ra yeel-a: ‹Y sã n yɩ tõatba, y na sẽeg buud a taab sʋka. Y sã n le gãd maam, n deeg m noya, y sã n tũ-ba, ba ya mooga satmẽ la b loog ne y nebã, m na tɩ tall-ba n wa tẽng ning m yʋʋr sẽn na n paam pẽgrã, m sẽn yãk tɩ ya m waoogr zĩigã.› Ade, yaa bãmb la y sẽn fãag ne pãnga la rugdu. Soaala, kelg-y y yamba pʋʋsg neere. Kelg-y y buuda pʋʋsgo tɩ b nonga yãmba n pẽgd y yʋʋra ne rabeem. M kot y lame tɩ m tʋʋmd zĩnd yõodo la y sak tɩ dĩma deeg-m neere.» Tʋʋmd ning m sẽn da paam dĩma nengẽ, yaa n pʋdgd dãam n kõt-a t'a yũuda. A Artazerksɛs naam sẽn wa n pid yʋʋm pisi, nizã kiuug pʋgẽ, m waa n kotã rĩma rãam tɩ rẽ n da ya m tʋʋmde la a mikame tɩ m neng gãnemame, la m neng da zɩ n gãnem bada. Yaa rẽ la dĩma sok-ma: «Yaa bõe yĩng la f neng ya dusa? F yaool n ka bãad la? Yaa bõe sũ-sãang n tar-fo?» M sũura sɩnga kiuusgu, la m waa n tõog n yeela dĩma: «Dĩm sõngo, Wẽnd na wogl y yõore! La ges-y wɛ, m neng yɩta wãn n ka gãneme tɩ m ba rãmb sẽn gãe tẽng ninga lebg raboogo, t'a kʋɩlens lebg bug-rɩɩndo?» Dẽ la dĩma sok yã: «Bõe la f rata?» M sẽn pʋʋs yĩngr Soaala, m leoka dĩma woto: «Wẽnd na kaoos-y y gãagẽ la y sã n nong-ma bɩ y bas-m tɩ m kẽng Zɩɩda, m ba rãmba yaad sẽn be tẽng ningã n tɩ yik a lalse.» Dĩma sok-m lame, la dẽ tɩ na-paga ra zĩ-la a sɛɛgẽ: «F kẽnda na n kaoosa kiis a wãna? F na n lɛɛg n waa ra-bʋre?» M le paasame: «Sã n ta y yam, y kõn kɩs-m sɛb tɩ m kõ Efrat rʋʋnd kombɛɛmba tɩ b bas-m tɩ m loog n ta Zɩɩda? La y kõn paas sebr a to a Asaf yĩnga, dĩma tɩɩs naaba yĩnga t'a sõng-d ne raado sẽn na n ka tãnsoben-dooga kʋɩlense? Ro-kãng la sẽn pẽ wẽnd dooga. A sõngd ne raad niyns fãa d sẽn tar b rãmb tʋʋmde, lal-gũbrã la m meng roog yĩnga.» Dĩma kõ-m-la sɛbã. Soaala-Wẽnd ka zãag-m ne b sõngr ye. M sẽn ta kombɛɛmba nengẽ, kombɛɛmb nins sẽn kẽed nin-taoor tẽnsã, m kɩs b la sɛbã. Dĩma kɩtame tɩ tãnsoab-bi la wed-dʋʋdb yãag maam. A Sanebalat, Orõ tẽng raoa la a tʋmd-n-taaga, Amonitga a Tobiya, sẽn wʋm m waoongã, b sũur pa yɩ noog ye. B ra pa rat tɩ ned pʋg Israyɛl dãmba poor ye. M sẽn ta Zerizalɛɛm, m paa be rasem a tã. M pa wilg ned ba a ye Naaba-Wẽnd sẽn da ning m sũurẽ tɩ m maan Zerizalɛɛm yĩng ye. Dẽ poore m yika ne yʋngo n kɩt tɩ neb bilf bal yãag-ma. Rũng a to me ra ka paase sã n ka m sẽn zomb bõang ningã. M yii ne yʋngo. M tũu noor ning sẽn tees bãg-faagã. M teesa wag-bãnda bãka la tãmpʋʋra noore. M gesa Zerizalɛɛm lal-gũbra. M yãeeme t'a lʋɩɩ zĩig-zĩiga la bugma dɩ-la a kʋɩlensã. M kell n gilgame n ta ko-bundga noore, n ta dĩma kʋɩlga. Be tɛka bõanga ka le yãend a sẽn tõe n tũ zĩig ning ye. M lɛɛg dʋʋga Sedrõ sudga ne yʋngo n maneg n ges lal-gũbrã. Woto m sẽn ta tãnga pende, m gilga fãa n sege. Tẽnga soaalba ka bãng m sẽn kẽngẽ la m sẽn da rat n maan bũmb ning ye. M da nan pa yaag m noor n togs Zʋɩf rãmba tɩ bũmb ye. M da nan ka wilg maan-kʋʋdba, bɩ kãsem-dãmba, bɩ nin-kẽemba, bɩ a mi-saglsa rãmba, bɩ taoor dãmba ye. Yaa wakat kãng marsã la m yeel-ba: «Yãmb nee d sẽn be nimbãaneg ning pʋga, Zerizalɛɛm rota lebga wãando, a kʋɩlens rɩɩ bugum. Wa-y tɩ d le me a lal-gũbra tɩ b ra le paam n tʋʋs-d ye.» M wilg-b lame menga Wẽnd nimbãan-zoeera nug sẽn tik-m to-to. M wilg-b-la dĩma koɛɛga. Dẽ la b naag taab n yeele: «D yik n sɩng meebo.» Baad-y b sɩd ninga pãng ne b tʋʋmd sõngã. B sẽn wʋm dẽ, Orõ daoa a Sanebalat, Amon daoa a Tobiya, a tũud-n-taaga la arabga a Gesem sɩnga tõnd laado. B waa n yeel-d lame: «Bõe la yãmb maand ka? Yãmb dat n yii dĩma soolmẽ laa?» Dẽ la m leok-ba: «Yaa Yĩngr Soaala n na n kɩt tɩ tʋʋmda baas neere; tõnd sẽn ya bãmb yemsã, yaa tõnd n na n yik n sɩng tʋʋmna. Yãmb yee n bãng tɩ Zerizalɛɛm pʋgẽ y ka so fɩ, y ka tar noor n kõtẽ, ned ka sokd-y yell ye.» Maan-kʋʋd kãseng a Eliyasib ne maan-kʋʋdb a taaba yikame n sɩng Rũmsa pegba noor meebo. B me-a lame n sɛ n ning-a barka, n lugl a kʋɩlensã. B talla lal-gũbra manegre n ta neb koabg ro-lug-lugã, n ning-a barka; n le tall meebo n ta a Ananeyɛl ro-lug-lugi. Zeriko rãmb n dɩk sẽn pʋgdã, t'a Imbri biig a Zakur me rɩk sẽn pʋgdã. Yaa Senaa tẽng rãmb n maneg n ta Zĩm noora zãongo. B maneg-a lame n me n ning sugri, n yals kʋɩlengã a nao zugu, n ning kut sogdse. A Uriya biiga la a Akos yagenga a Meremot n da yegd bãmba. Bãmb yegende yaa a Berekiya biiga a Mesulam, a Mesezabɛl biiga. Bãmb yegende, a Baana biig a Sadok. Bãmb yegende, Tekoa rãmba. B tẽnga nin-kẽems zãgsame tɩ b kõn wa n naag n tʋm ne tʋʋmda taoor dãmb ye. Sã n ya Kẽedpaoolg zãongã ne a kʋɩlenga yaa a Zoyada, a Paseya biiga la a Besodiya biig a Mesulam n maneg-a. B maneg-a lame n me n ning sugri, n yals a kʋɩlengã, a nao zugu, n ning kut sogdse. Sẽn pʋg-b bãmba: Gabaõ raoa a Melatiya, Meremot daoa a Yadõ ne Gabaõ la Mispa rãmb neb kẽere. Efrat rʋʋnd komberã n yeel bãmb tɩ b wa tʋme. Sẽn yõsg bãmba, yaa yõaka a Uziyɛl, a Araya biiga, n paas yũ-nooda kalemda, a Ananiya. B sɛɛsa b tʋʋmda Zerizalɛɛm b sẽn ta lal-gũbra sẽn lebg yaleng zĩig ningã. Bãmb yegende yɩ-la a Refaya, a Ur biiga, Zerizalɛɛm bogr a ye soaala. Bãmb yegende: a Yedaya, a Arumaf biiga; a manega sẽn tot ne a roogã. Sẽn pʋge, yɩ-la a Asabneya biig a Atus. Sẽn pʋge: a Arim biig a Malkiya la a Paat-Moab biig a Asub, la b manegame n ta sãaba bugtoolsa zĩisẽ. Sẽn pʋge: Zerizalɛɛm bogr a to wã soaala, a Aloɛs biig a Salum, yẽ ne a kom-pugli. Sã n ya bãg-faaga zãongã, Zanoa tẽng rãmb ne a Anun maneg-a lame n me, n ning sugri, n yals a kʋɩlengã, a nao zugu, n ning kut sogdse. Bãmb n kell n maneg lal-gũbrã n ta Tãmpʋʋra dignoore. B manegra taa kãntɩɩs tusri. Tãmpʋʋra dignoorã, Bɛt-Kerem soaal a Malkiya, a Rekab biiga, maneg-a lame n me n ning sugri, n yals a kʋɩlengã, a nao zugu n ning kut sogdse. A Kol-Oze biig a Salum sẽn ya Mispa soaalã n maneg Ko-bundma zãongã n me, n ning sugri, n yals a kʋɩlengã, a nao zugu n ning kut sogdse. A naagame n maneg lal-gũbr ning sẽn yegd Siloe kʋɩlgã, sẽn sɩng dĩma zẽedẽ n ta teedsã sẽn dʋʋd a Daviid na-tẽnga. Yẽ poore: Bɛt-Sur soaala, a Neemi, a Azbuk biiga, n maneg lalgã n ta dĩm dãmba yaado, n ta kooma sẽn gɩdg zĩig ningã, n ta dĩma gũudba tãb-sika. Yẽ poore, Levit dãmb n pʋge: A Bani biig a Rewum n yɩ pipi; sẽn pʋge yɩɩ Keyila bogre soaal, a Asabiya. A tʋma Keyila bogr a sẽn so wã yĩnga. A Bavayi n pʋge, yaa a Enadad biiga la Keyila bogr a to wã soaala. Sẽn pʋge yɩ-la a Ezɛr, Mispa naaba la a Zesuwa biiga. A manega kɩreng ning sẽn tot ne zab-teeda bĩngr zĩigã, zĩig ning lalga sẽn tʋʋg n yi yɩngã. Bãmb yegende: a Zabayi biig a Barʋk, ra zɛɛgda ne tʋʋmna; yẽ sɩnga lalga sẽn tʋʋg n yi yɩngã n ta maan-kʋʋd kãseng, a Eliyasib, dooga noore. Yẽ yegende, a Uriya biig la a Akok yagenga, a Meremot. A sɩnga a Eliyasib doogã n ta a satem. Sẽn pʋg-b yẽ yɩɩ maan-kʋʋdb niyns sẽn pẽ-b Zerizalɛɛm. A Bẽnzame ne a Asub manega sẽn tot bãmb dotã, t'a Ananiya yagenga la a Maaseya biig a Azariya soog lalg ning sẽn pẽ a roogã. Sẽn pʋge: a Enadad biig a Binuwi; yẽ manega Gõdra tɛka ne a Azariya dooga sʋka. Sẽn pʋge: a Uzayi biig a Palal; yẽ meeba sɩnga lalga gõdre n ta ro-lug-lugã, dĩma zak taoore, gũudba tãb-sika yegende. Yẽ taoore, a Paros biig a Pedaya, da naaga ne sẽn da sõngd-b wẽnd dooga tʋʋm-tʋmdbã la sẽn da kẽed Ofɛl la bãmb n maneg n ta ro-lug-luga la gõdra sẽn be kooma noora yaanga. Bãmb yegende: Tekoa rãmba. B mee ro-lug-luga tɛka n ta Ofɛl lalga. Sẽn sɩng Wiidi noorã, yɩɩ maan-kʋʋdba n tʋme la ned kam fãa manega sẽn tot ne a roogo. Bãmb taoore, a Imɛr biig a Sadok manega sẽn tot ne a roogo. Sẽn pʋga yẽ yɩ-la a Sekaniya biig a Semaya, yaang dignoora gũuda. Sẽn pʋgde: a Selemiya biig a Ananiya, n paas a Salaf a Anun biiga, yẽ kẽem-dãmb ya-la b nu. Yẽ yegende: a Berekiya biig a Mesulam; yẽ me manega lalg ning sẽn tota ne a yiri. Yẽ taoore: noakensã la lɛɛbdba roto, sẽn sɩng Gũudb noore n ta do-lug-luga sẽn me gõdrẽ wã. Yõgs a taaba la lɛɛbdba n maneg sẽn tot gõdrã n ta Dũmsa pegb noore. A Sanebalat sẽn wʋm tɩ tõnd le yikda lalgã, a sũura wẽnemdame, a sũura puuga wʋsgo. A sɩnga Zʋɩf rãmba laado. A yeela a saam-biisi la Samari ligd bɛda rãmba: «Yaa bõe la Zɩɩda nin-yaalsa maand ka. B tẽedame tɩ b daaba na waa n pidsi? Tɩ b na le tõog n kʋ maand ka? Tʋʋmda na baase? Lalg kõn lʋɩ tɩ b gaas a kuga n yiis bug rĩungẽ n le lɛɛg n dɩk-ba n me lalg tɩ yaas ye.» Dẽ la Amonitga, a Tobiya, sẽn da yɛs a sɛɛgẽ yeel-a: «B ning pãng ne meebo. We-baag yee n da wa fão b kuga lalgã n lub-a sara!» Tɩ m gom ne Wẽnd n yeele: «Ges-y b sẽn laad tõndo; kɩt-y tɩ b paoogr lɛɛg n dɩ-ba. Bao-y yembd tẽng n kẽes-ba tɩ b me yãe yaoolgo. Da yĩm-y b wẽnema ye, da pek-y b yel-wẽnda ye tɩ b yaala y tẽnga metba.» Tõnd yika lal-gũbra n dʋʋs-a a zãndlma pʋɩ-sʋka la neba ra tʋma ne sũuri. B sẽn wʋm tɩ Zerizalɛɛm lalsa yikda sõmb-sõmbo, tɩ bogda sɩngd yẽdbo, a Sanebalat, a Tobiya, arab dãmba, Amon dãmba la Asdod dãmb puuga b sũuri. B sedame tɩ rẽnd b wa tak zabr ne Zerizalɛɛm, n ning-a yãnde. Dẽ la tõnd pʋʋs d Wẽnnaam tɩ b gũ d tẽngã la d yalsa neb sẽn na n maan gũusgu ne bɛɛba, wĩndg la yʋngo. A Zɩɩda kamba ra zoe n basa raoodo n yetẽ: «Kug zɩtba pãng komsame, toma yaa wʋsgo! D kõn tõog abada, n le yik lal-gũbra ye!» Dẽ tɩ d bɛɛba me ra gomda woto: «D na n soos n kẽ-la b sʋka tɩ b pa bãng la b pa yãend fɩ la d na n kʋ-b-la zãnga tɩ b tʋʋmda pa tõog n baas ye.» B ka bãng tɩ Zʋɩf rãmba sẽn ya bãmb yagse n waa n wilg naoor yaka: «Ad f sẽn be zĩig ning fãa, f nee bɛɛba sẽn baood n na lʋɩ n yẽegd-do.» M tɩ yalsa m neba lal-gũbra tẽngr pẽgsẽ. M yals b la zak-zaka, ne sʋʋse la kãna la tãbdo. M neba da rigda rabeem. Dẽ la m yeel zãma wa ne tẽnga nin-bɛd la a nin-kẽemse: «Dã zoe-y nin-bãmba ye, tags-y Soaala-Wẽnd yelle, tẽeg-y tɩ b tara pãnga, tɩ ned fãa tog n zoe-ba, zab-y saam-biisa yĩnga, y kom-dibli la y kom-pugli yĩnga, y pagb la y rot yĩnga.» Bɛɛba waa n bãngame tɩ tõnd mi-la b tiiri. B bãngame tɩ Soaala-Wẽnd pa sak tɩ b raab wẽnga pids ye. Woto d fãa le sɩnga lalga tʋʋmde, ned kam fãa leba a zĩigẽ. Baraar tɛka neba pʋɩ-sʋk bala n da tʋmdẽ. Pʋɩ-sʋka ra yɛsa ne kãna la gãndo la tãbdo la kut futu. Zagsa kãsem-dãmba fãa ra kogenda Zɩɩda lal-gũbra metba. Sẽn dʋʋsd-b lalgã, sẽn zɩt-b kuga la raadã ra boba b zab-teedo. Nug a ye n da tʋmde, tɩ nug a to wẽbg zab-teoogo. Metba sẽbgda sʋʋg b sɛɛgẽ n yaool n sɩng tʋʋmde. M da yalsa baorg pɛɛdb m sɛɛgẽ. M yeela nin-bɛdã, nin-kẽemsã la zãma wã fãa: «Tʋʋmda labsa la a wogma, woto tõnd sẽega taaba la d zãra ne taaba la ade, tigim-y taab baorga sẽn na n peeb zĩig ningã la Wẽnd na zab n sõng do.» Yaa woto la tõnd pʋɩ-sʋk ra tʋʋmda, tɩ d nug a ye tik kãnde, zĩig yẽgre n tãg ãds pukri. Wakat kãnga m le yeela zãma wã me woto: «Ned fãa ne a dakõor tog n paa Zerizalɛɛm tɩ yʋngo bɩ d tar gũusgu, tɩ wĩntoogo bɩ d tar meebo.» Maam woo, m saam-biisa woo, zãma wã woo, sẽn so-b gũusgã, ned ba a ye pa yeeg a fuugu, zab-teoog pa yi ned ba a ye nug rɩtg ye. Nin-zẽmba ne b pagbã waa n yika guglgu ne Zʋɩf rãmba. Kẽer da yetame: «Tõnd ne d kamba yaa wʋsgo, d datẽ lame n paam alkam, n dɩ n põse.» Kẽer da yetame: «Yaa pakr ne tõndo tɩ dɩk d pʋto la d bugsuntundu la d zagsa mense n boble, d sã n dat alkam, kom wẽnde.» Kẽer da yetame: «Sẽn na n yɩlẽ n paam naaba yaoodã n kɩse, tõnd kong n sarda d pʋt la d bugsuntundu. Tõnd yaool n yaa buud a ye, d kamba zema bãmb kamba, la bõe marsã tɩ d tog n koos d kom-dibli la d kom-pugli? D kom-pugli kẽer meng zoe n lebga yemse tɩ d ka tar noor n leokdẽ ye. D putã la d tɩɩsã zoe n yaa d sẽn dɩ b rãmb samda soolem.» Ma me sũur yika wʋsgo m sẽn wʋm b guglgu la b goama. M bilga yellã m yamẽ la ne m zaba nin-kẽembã la taoor dãmbã. M yeel-b lame: «Yaa bõe tɩ yãmb zɩlg taab zɩɩb bɛda?» M kɩtame tɩ neba fãa tigim. M goma woto: «D maana d sẽn tõe n yiis d saam-biisã sẽn da kẽes yembd bu-zẽmba tẽnsẽ. Bõe marsã tɩ yãmb lɛɛg n koosd-b ne taaba?» La b fãa paa sɩɩ n pa tõog n leok bũmb ye. Tɩ m paase: «Y sẽn maanda ka neer ba bilf ye. Y vɩɩm tog n yɩɩ neb sẽn zoet Wẽnd nif vɩɩm, n da wa lebg bu-zẽmba sẽn ya tõnd bɛɛba laad ye. Maam me, wala m yaopã la m saam-biisã, mam me ra peng-b-la ligd la koodo. D da sok d samda ye. Lebs-y rũnda menga b pʋt la b tɩɩse la b roto, d bas b sama taale: ligda samdã, koodã, dãama, kaamã.» La b fãa naaga taab n leoke: «D na n lebsa fãa mars-marsã bala, d basa fãa taale, wala fo sẽn wilgã.» La m boola maan-kʋʋdbã n kɩt tɩ b wẽen tɩ b na pids b kãabgã. Dẽ poore m fugumda n fuug n yeele: «Bɩ Wẽnd fugumd ned ning fãa sẽn ka pids a kãabgo, n yiis a soab b tẽn-peelmẽ la b soolmẽ! Bɩ Wẽnd fugumd a soaba wa m sẽn fugumd m fuugã t'a fɩk n menem!» La b zãng fãa naaga taab n yeel: «Ami!» La b pẽga Naaba-Wẽnde la b pidsa b pʋlengo. Dẽ n so tɩ yʋʋm piig la a yiib pʋgẽ, dĩma sẽn yet tɩ m lebg Zɩɩda komber tɛka, a Artazerksɛs naam sẽn ta pisi yʋʋmde n digd a yʋʋmd pis-tã la a yiibu, maam ne m saam-biisa ka le reeg yõor yaood ye. Kombɛɛmba sẽn deng b maama yẽ da zɛɛda nebã. Beoog fãa, b bura raab yĩnga b ra reegda wanzurf wakɩ koeems pis-naase. B sõgen-kamba meng ra namsda nebã. La mam sẽn zoet Soaala-Wẽndã, m zɩɩ n maan boto ye. M modga ne lalga meebo ne m sẽn da ka tar pʋʋgã. M tigma m neba fãa tʋʋmda yĩnga. Sẽn yaool da naagd-b maama n dɩtẽ wã yaa taoor dãmbã la kãsem-dãmbã, neb koabg la pis-nu. La m pa gomd sẽn mi n yi b tẽns a taab n wa wã ye. Beoog fãa, m da kõt-b-la loalg a ye, pe-wubds piiga la noose. Dasem piig fãa m da kɩtdame tɩ b wa ne rãam lagd ka tɛka. M zɩ n deeg yõora yaood ye tɩ neba ra zoe n tʋmda tʋʋmd toogo. Tẽeg-y m yelle, Soaala, tẽeg-y m sẽn maan fãa y buuda yĩnga. B sẽn waa n togs a Sanebalat, a Tobiya, arabg a Gesem la d bɛɛb a taabã tɩ tõnd yika lalgã n pa tol n kees wɛdg ba a ye, dẽ tɩ m da ka paam n lugl kʋɩlensa zãng ye. Ad-b sẽn tʋm tɩ b wa yeel-ma: «Wa tɩ d seg taab Kefirim, Ono sẽne.» B ra baood-m-la ne wẽnga. M tʋma b nengẽ tɩ b tɩ yeel-ba: «M tara tʋʋmd kãsenga, m pa tõe n bas n wa be ye. Bõe tɩ m na n bas n wa sak y boolla tɩ tʋʋmda yõdg n yalse?» Yɩɩ naoor a naas la b sẽn bool-m woto la wakat fãa m leok-b-la leok-yɛnga. La a Sanebalat sẽn da gãd yella kẽnkẽ tʋma a sõgen naoor a nu soaba ne sebr sẽn ka pag ye. Woto n da be sebra zugu: «Kibar n wa m nengẽ tɩ foo ne Zʋɩf rãmbã dat n fugumda y mens n yɩ dĩma soolmẽ la yaa rẽ yĩng la y le yikd lal-gũbrã, la b paasame tɩ foo n na n lebg dĩma. Tɩ rẽnd yĩnga f bao bãngdba sẽn na n sõng-fo, bãngdb sẽn na n moone: a Zɩɩda paama dĩm marsã. Ade, dẽ fãa na n lʋɩ dĩma tʋbrẽ, dẽ la m yet tɩ f wa tɩ d yẽse.» M yeelame tɩ b tɩ leok-a woto: «Bũmb ka be n wẽnd fo sẽn togsa ye; foom n naan dẽ fãa f yamẽ.» B da baood n na n yɛɛsa tõnd, tɩ d yɛ ne d tʋʋma, n ka baas-b ye, la dẽ kenga tõnd daoodo. «Soaala, sõng-y-ma tɩ m tʋʋmda baas neere!» M waa n kẽnga a Delaya biig a Semaya nengẽ; a Delaya ba la a Metabeyɛl; m kẽnga a nengẽ t'a ra ka paam vɩʋʋg n wa ye la ad-a sẽn yeel-ma: «D seg taab Naaba-Wẽnd doogẽ. D kẽ wẽnd dooga tẽnsʋka, d pag a kʋɩlensã neere, tɩ b rat n wa kʋ-f lame. N-ye, yʋng kãnga bala, b na n wa kʋ-f lame.» M leokame: «Mam to wã na zoe? Ãnda wa maama n na n saag n kẽ wẽnd doogẽ n le vɩɩnde? M pa na n seg-y ye!» M bãngame tɩ ka Wẽnd n tʋm-a ye, m bãngame t'a sẽn gom woto wã, a Tobiya n da kõ-a ligdi t'a togs boto. A ra tʋll n kẽesa rabeem m sũurẽ tɩ m maan wẽnga la woto b na tõog n sãam m yʋʋr la b paoog-ma. Tẽeg-y-yã, Soaala, a Tobiya la a Sanebalat yelle, da yĩm-y-yã b sẽn maana ye. Tẽeg-y bãngd-poak a Noadiya yelle, da yĩm-y bãngdba taaba me sẽn da rat n kẽes-m dabeema ye! Lal-gũbra mee n sɛɛ dasem pis-nu la a yiib pʋgẽ, Elul kiuug pisi la a nu raare. Bɛɛba fãa sẽn wʋme tɩ d le yika lal-gũbrã, bu-zẽmba sẽn ya tõnd yagsã riga rabeem la yãnd yõk-b lame. B reegame tɩ Wẽnd yalsa d poorẽ tʋʋmd kãnga yĩnga. Wakat kãng tɩ Zɩɩda nin-bɛd wʋsgo da tara a Tobiya gʋlsgo la b reesd a sɛba. B ra gʋlsdame n dat n sãam m yelle. A Tobiya zo-rãmb da yaa wʋsg Zɩɩda pʋgẽ t'a Ara biig a Sekaniya n da yaa a rɛɛmba la a biig a Zoana da kẽe kãadem ne a Berekiya biig a Mesulam bi-pugla. B ra tol n pẽgda a Tobiya tʋʋma mam taoore, n deesd mam goama n togsd-a. A ra gʋlsda sɛb n na n kẽes-m rabeem. Lal-gũbrã sẽn mee n sɛ, m lugla kʋɩlensa fãa la m ninga gũudba n paas yɩɩn-yɩɩndba la Levitse. M kõ-la m yao a Anani Zerizalɛɛm gũudem, n kõ a Ananiya tãnsoben-zaka gũudem. M pʋg ra pɛɛla ne-a, tɩ ned da ka zoet Soaala-Wẽnd wa a Ananiya ye. M yeel-b lame: «Da pak-y Zerizalɛɛm kʋɩlensã sã n ka wĩndg sẽn zẽke tɩ dagno-gũudba yɛs b zĩigẽ la pag-y kʋɩlensã tɩ wĩndg nan ket n zãr lʋɩɩse. Yals-y gũudb Zerizalɛɛm pugẽ, kẽer b zĩigẽ la kẽer me pa b zags noore.» Zerizalɛɛm tẽnga ra yalmame, la a ra wogmame, a neba yaool n da ka waoog ye, tɩ rota ra ka le maneg n me ye. Dẽ la Wẽnd ning m yamẽ tɩ tigim tẽnga nin-bɛda, a taoor dãmba la a zãma wã n maan sõadga, yaa buud sõadga. M yãenda pa-weta sõadg sebre la ad-m sẽn karme. Sẽn yi-b yembdo la pa-weer n lɛɛg n wa la woto. Babilon dĩm a Nabikodonozor n da kẽes b yembdo. Yaa Zerizalɛɛm ne Zɩɩda la b lɛɛg n wa, ned kam fãa a tẽngẽ. B lɛɛg n waa ne a Zorobabɛl, la a Zozuwe, a Neemi, a Azariya, a Raamiya, a Naamani, a Mordokayi, a Bilsã, a Misperet, a Bigwayi, a Newum la a Baana. Israyɛl kamba sõor la woto: Neb 2172, a Paros roogẽ; neb 372, a Sefatiya roogẽ; neb 652, a Ara roogẽ; Neb 2818 a Paat-Moab roogẽ, dat n yeelame t'a Zozuwe la a Zoab yagense; neb 1254 a Elam roogẽ; neb 845 a Zatu roogẽ; neb 760 a Zakayi roogẽ; neb 648 a Binuwi roogẽ; neb 628 a Bevayi roogẽ; neb 2322 a Asgad roogẽ; neb 667 a Adonikam roogẽ; neb 2067 a Bigwayi roogẽ; neb 655 a Adin roogẽ; neb 98 a Atɛr roogẽ, a Iskiya yagense; neb 328 a Asum roogẽ; neb 324 a Besayi roogẽ; neb 112 a Arif roogẽ; neb 95, Gabaõ tẽng rãmba; neb 188, Bɛtelyɛɛm ne Netofa rãmba; neb 128, Anatot rãmba; neb 42, Bɛt-Azmavet rãmba; neb 743, Kiriyat-Yearim dãmba n paas Kefira la Beerot; neb 621, Rama ne Geva rãmba; neb 122, Mikmas rãmba; neb 123, Betɛl ne Ayi rãmba; neb 52, Nebo rãmba; neb 1254 a Elam a yiib soab roogẽ; neb 320 a Arim roogẽ; neb 345 Zeriko rãmba; neb 721, Lod, Adid la Ono rãmba; neb 3930 Senaa rãmba. Neb 973, maan-kʋʋdba roogẽ, a Yedaya, a Zozuwe yagense; neb 1052 a Imɛr roogẽ; neb 1247 a Pasewur roogẽ; neb 1017 a Arim roogẽ. Neb 74, Levitse a Zozuwe roogẽ, dat n yeelame t'a, Kadmiyɛl, a Odwa yagense. Neb 148, yɩɩn-yɩɩndba: a Asaf kamba. Neb 138, dagno-gũudba: a Salum, a Atɛr, a Talmo, a Akub, a Atita la a Sovayi kamba. Noakensã, a Sia, a Asufa, a Tabaot kamba; a Keros, a Sia, a Padõ kamba; a Levana, a Agaba, a Salmayi kamba; a Anan, a Gidɛl, a Gaar kamba; a Reaya, a Resin, a Nekoda kamba; a Gazam, a Uza, a Pasea kamba; a Besayi, a Meunim, a Nefis kamba; a Bakbuk, a Akufa, a Arur kamba; a Baslit, a Meyida, a Arsa kamba; a Barkos, a Sisera, a Tama kamba; a Nesiya, a Atifa kamba. A Salomo yem-daada kamba, a Sotayi, a Soferɛt, a Perida roogẽ, a Yaala, a Darkõ, a Gidɛl roogẽ, a Sefatiya, a Atil, a Pokerɛt-Sebayim, a Amon roogẽ. Noakensã la a Salomo yem-daad kamb sẽn naag taaba: 392. Sẽn kell-bã ra yita Tel-Mela, Tel-Arsa, Kerub-Adõ la Imɛr la b pa tõog n wilg b buudã la b rogma yũug sẽn tong to-to ne Israyɛl buud ye. Yɩ-la a Delaya kamba, a Tobiya kamba la a Nekoda kamba, bãmb kobs-yoob la pis-naas la a yiibu. Maan-kʋʋdba sʋk me, a Obaya kamba la a Akok kamba, n paas a Barzilayi kamba. Nin kãnga da rɩka Galaad Barzilayi bi-pugl n maan a paga tɩ b kell n pʋda a rɛɛmba yʋʋre. Bãmb me vɛɛsa b buuda sɛba la b pa mik tɩ b yaa Israyɛl buud ye. Dẽ yĩnga b ges-b-la wa nin-dẽgdo la b pa sak tɩ b tʋm maan-kʋʋr tʋʋmd ye. A Neemi yeel-b lame tɩ b ra le rɩ wẽnd dooga rɩɩbo n gũ Wẽnd leokre, n-yẽe, bɩ ayoo! Zãma wã fãa sẽn tigim taaba yɩɩ tus pis-naas la a yiibu la kobs-tã la pisoobe. B pa naag b yemsã la bãmb me ra taa tus a yopoe la kobs-tã la pis-tã la a yopoe. Sã n ya yɩɩn-yɩɩndbã, pagb la raop, yaa kobs-yi la pis-naas la a nu. Wiidi wã sõda kobs-yopoe la pis-tã la a yoobe, bõn-wees kobs-yi la pis-naas la a nu; yʋgma kobs-naas la pis-tã la a nu, bõeens tus a yoob la kobs-yopoe la pisi. Sagsa kãsem-dãmb kẽer waa ne b yamleoog kũuni. Kombera kɩsa sãnem wakɩ koeems tusri, rã-yũudem lagd pis-nu, maan-kʋʋr fut kobs-nu la pis-tã. Sags kãsem-dãmb kẽer kõo sãnem wakɩ koeems tus pisi. Wanzurfa zɩslem taa neb pis-nu la a nu zɩɩbo. Neb a taaba sẽn kɩs yaa sãnem wakɩ koeems tus pisi. Wanzurfa zɩslem taa neb pis-nu zɩɩbo. Maan-kʋʋr fu-yord yɩɩ pisoob la a yopoe. Maan-kʋʋdbã, Levit dãmbã, dagno-gũudbã, yɩɩn-yɩɩndbã, sõangdbã tɩ kẽ-la b tẽnsẽ. Yʋʋmda kiuug a yopoe soaba, Israyɛl kamba fãa yii b sẽn da be tẽns niynsa n le wa. Zãma wã fãa tigma wala nin-yend, Zerizalɛɛm, neba sẽn segd taab zĩig ning Kooma rignoorẽ la b yeela sɛb gʋlsda a Esdras t'a wa ne a Moyiiz noora sebrã, noor ning Soaala-Wẽnd sẽn da kõ a Israyɛl. A Esdras ra vẽena ne noora wʋsgo. Maan-kʋʋd a Esdras waa ne noora sebre zãma wã taoore, pagba, rapa la kamb sẽn wɩsge taoore. Yɩɩ kiuug a yopoe soaba pipi raare. Kooma rignoorẽ, a Esdras karma sebrã, al yibeoogo n ta wĩnto-sʋka, pagba, rapa la kamba taoore la b fãa ra yooga b tʋba. B ra kaa ra-pegdo n zẽke t'a Esdras dʋ be n karemdẽ. Ad neb niyns sẽn da yeg a Esdras, a rɩtgo: a Matitiya, a Sema, a Anaya, a Uriya, a Ilkiya la a Maaseya. A goabga: a Pedaya, a Misayɛl, a Malkiya, a Asum, a Asbadana, a Zakari la a Mesulam. A Esdras laka sebrã neba fãa nifẽ, neba fãa ra tõe n yãend-a lame. A sẽn lak sebrã b fãa gill yika yĩngri. A Esdras pẽga Naaba-Wẽnde, Pãng-Soaba, la neba fãa zẽka b nus yĩngr n yeele: Ami, ami! La b zõondame, b yĩgimdame n kɩ b neng tẽnga Naaba-Wẽnd taoore. Zãma wã ra yɛsame t'a Zozuwe, a Bani, a Serebiya, a Yamin, a Akub, a Sabetayi, a Odiya, a Maaseya, a Kelita, a Azariya, a Zozabad, a Ana, a Pelaya, Levitse, bãmb da reesda goama n togsd neba sẽn da yɛs zĩ yɛnga. Bãmb n da karemd noora sebrã vẽeneg vẽenega la b wilgd a võore sẽn na yɩlẽ tɩ b rɩk zãng fãa. A Neemi la sɛb naab a Esdras ne Levitsa sẽn da zãmsd neba, yeela zãma wã: «Ad-y rũnna raarã yaa Wẽnd daare, yaa ra-sõngo, dẽ yĩnga ra yãb-y ye.» Sɩda zãma wã ra yãbdame la a kelgd sebra karengo. B le yeelame yɛsa: «Kẽng-y n tɩ rɩ-y rɩ-sõma la y yũ rã-sõma la bao-y rɩɩb n kõ sẽn ka segla rɩɩb t'a rɩ; raarã yaa Naaba-Wẽnd raare. Zãag-y mens ne sũ-sãang. Y sũ-noog sã n yit Wẽnd nengẽ a pidsd-y-la ne pãnga.» Levitsa maasa zama wã sũuri, b ra yetame: «Da yãb-y ye tɩ rũnna yaa Soaala raare, da sãam-y y sũur ye!» Woto wã b baoo koom n yũ, n bao rɩɩb n dɩ la b kell n tɩ kõ, la b kɩdem wʋsgo. B ra paam n wʋma karenga võore. Daar a yiib soaba, buud kãsem-dãmba ne maan-kʋʋdba la Levitsa le gũbga a Esdras n bao sebra võor n paase. Ad-y b sẽn karem sebrã, sebr ning Soaala sẽn da kõ a Moyiiz, b wʋmame tɩ Israyɛl kamb da tog n paa sẽgdẽ kiuug a yopoe soaba kibsa wakato. B bãngame tɩ yaa bũmb sẽn da tog n moone Zerizalɛɛm la tẽns a taaba tɩ neba dʋ tãmsã n kao tɩɩs wila, wala oliviye, kankamse, komse la tɩɩs fãa sẽn tob vãado, n wa ti roto. Israyɛl kamba tɩ baoo wila n ti roto, kẽere, b gasd zugu, kẽer, b sɩmannẽ, kẽer, wẽnd dooga sɩmannẽ, kẽer kooma rignoorẽ, la a Efrayim dignoorẽ. Zãma wã fãa sẽn yi yembd weoogo maana sẽgdo n kẽ. Yɩɩ kibs la sũ-noog menga. A Nun biig a Zozuwe loog poore, Israyɛl kamb zɩ n maan a taar ye. Beoog sã n vẽeg fãa, a Esdras da karemda bũmb sebra pugẽ, kibsa sɩngra daare n tãag sɛtma raare. Kibsa maana rasem a yopoe. La wala Noora sẽn date, raar a nii soaba yɩɩ baasg tig-raaga. Kiuuga pisi la a naas daare, Israyɛl kamb yeelga sũ-pa-noang futu, n yug b yĩng tom la b tigim taab n na n loe b noore. A Israyɛl buuda welga ne buud a taabã, b yalsa yĩngri n na n deeg b mens la b yaab rãmb kongre. B yalsa yĩngri, ned kam fãa a zĩigẽ tɩ b karem Sebrã Wẽnd sẽn kõ-bã, wakat a tãabo. Wakat a tãaba sẽn pʋgã, b yõka b yel-wẽna tẽesgo la sugr kosgo n wõg Wẽnnaam b Soaala taoore. A Zozuwe, a Bani, a Kadmiyɛl, a Sebaniya, a Buni, a Serebiya, a Bani, a Kenani yika b sẽn da zao zĩig ningã n tees Naaba-Wẽnd, b Wẽnnaam, n kelem tɩ sãde. Levitsã: a Zozuwe, a Kadmiyɛl, a Bani, a Asabneya, a Serebiya, a Odiya, a Sebaniya, a Petayiya yaool n yeelame: «Yɩk-y yĩngri, pẽg-y Wẽnde! Naaba-Wẽnde, tõnd Wẽnda, paam pẽgr wakat buud fãa. Bɩ ned kam fãa kils y yʋʋr sẽn tog ne pẽgre, yʋʋr sẽn zʋʋg pẽgr la kilsgu! Yãmb la Naaba-Wẽnde, yãmb y ye tãa! Yãmb n naan yĩngri, ne a yalma la a ãdsã. Yãmb n naan tẽngã ne a teeda fãa, n naan mogra ne a pʋgẽ teedo! Yãmb la bõn-vɩɩl fãa vɩɩm kõata. Yĩngr tãb-biisa fãa wõga yãmb taoore. Naaba-Wẽnde, yãmb la Wẽnd ninga sẽn yãk a Abram, n yiis-a Ur, Kalde tẽnga; y teka a yʋʋre la Abram waa n leb a Abraam. Y sẽn yãe t'a yaa pʋ-peen-neda, y yõga zood ne-a. La y kõ-a-la Kanaã rãmb tẽnga n paas Ititse, Amoritse, Perizitse, Zebuzitse ne Girgazits dãmb tẽnga. Y kõ-a-la yẽnda ne a yagense. La y sẽn ya sõng yĩnga, y kãabg ka pa vɩʋʋg ye. Y yãenda d yaab rãmba nimbãaneg Ezipt tẽnga; y wʋma b kɛleng Rudum Mogra noore. Y maana yel-soalem la yel-ban Ezipt dĩma taoore, a sõgen-kamb la a soolem dãmb taoore. Y yãenda wʋglem la tɩtaam ninga b sẽn maan d yaab rãmba taoore. Y tʋmame tɩ y yʋʋr sãde n ta rũnna. Y kɩtame tɩ mogr kʋɩ d yaab rãmba taoore la b rʋʋg-a-la koɛɛnga. Y lobga b bɛɛba kooma sʋka wala b sẽn lobgd kugr ko-zulungẽ. Wĩndga, sawadg n da wilgd-b sore, la yʋngo, sawadga ra lebgda b vẽenem. Yãmb siga Sinayi tãnga zugu, yãmb zĩnda yĩngri n gom ne-ba, n kõ-b no-sõma, noy sẽn ka kẽesd moogo, noy sẽn wat ne fãagre. Yãmb wilg-b-la y raare, vʋʋsg raare, yãmb yalsa noya la y saglsã ne a Moyiiz zelemde, yãmb tʋʋm-tʋmd a Moyiiz zelemde. Yãmb yiisa b kom ne yĩngr dɩɩbo. Yãmb yiisa b ko-yũud ne pĩig koom. Y kõ-b-la noore tɩ b tɩ reeg tẽng ning y sẽn da wẽen n kãab-ba. La d yaab rãmb maana nagre, n nak b kãare, n yet tɩ b kõn sak ye. B zãgsa y noora reegre, b yĩma y tʋʋm-bãna y sẽn maan b yĩnga. B naka b kãare n yet tɩ rẽnd b leb Ezipt tẽnga, dẽnd b leb b yembd tẽngẽ. Yãmb wilgame tɩ y yaa sugr soaba, sũ-bʋgsem soaba nimbãan-zoeta la sũ-maasem soaba, y wilga y sũur sẽn pid ne yardo tɩ y ka tʋlg b basg ye. B waa n yẽnega b sãnem n maan b nag-bila la b saag n yeela vẽenega: ‹Woto la wẽnd ninga sẽn yiisa tõnd Ezipt tẽnga!› Y ka bas-b ye tɩ yɩɩ paoogre, yɩɩ yãmba Wẽnd paoogr kãsenga. Yãmb tũ-la y sũ-maasem n ka bas-b tɩ b pa weoogẽ ye, sawadga ka zãag ne bãmb ye, a ka pa n ka wilg b sor wĩndg ye, a ka pa yʋngo n ka yãng a vẽenem ye. Yãmb pʋdga y yam n kõ-ba, la b lebga yẽesem dãmba. Yĩngr dɩɩba pa zãag ne b noore ye la y kõ-b-la koom tɩ b kiis b ko-yũudu. Yãmb gesa b yell yʋʋm pis-naase. Zĩ-peen-daagẽ wã, bũmb ka paoog-b ye, b fut ka lebg kʋɩdse la b nao ka mod ye. Yãmb sagla b nugẽ tẽns la neb ka tɛka, bãmb la y rɩk n ning b toosẽ: Esbõ dĩm a Siyõ la Bazã dĩm a Og. Yãmb kɩtame tɩ b wek balbo. B sõorã, bãng yĩngr ãdse. Y tall b lame n kẽes b tẽngẽ, tẽng ning y sẽn da yeel b ba rãmb tɩ b wa sooge. B kamba sɩd wẽe tẽngã n soog-a, tẽnga rãmba, Kanaã rãmba tɩtaam sigame la b zã-b-la b nugẽ wala b sẽn date. B reega tẽns sẽn tar lal-gũbri, b koo pʋt sẽn pa faagd ye. B kẽe zags sẽn pid ne bũmb fãa, tẽns sẽn tar bulsi, sãbse, oliviye la tɩɩs a taab ka tɛka. B rɩɩme, b tɩgame, b nobame, b pidsa b yamleoogo ne arzɛk sẽn ka tõe n sɛ ye. La ade, b waa n lebga tõatba, b waa n wegmame n dɩk yãmb Noorã n lobe, b rɩk-a lame n lobg b zãnkudgẽ, la b kood bãngdb niyns sẽn da legend-bã; mik b sẽn maan dẽ, b maana wɩɩbdo. Yãmb bas-b-la ne b bɛɛba tɩ b sɩbg-ba. Sɩbgra wakato b ra kaasdame n boond yãmba la yãmb zĩnda yĩngr n kelg b boaala la y yika ne y nimbãan-zoeerã n kõ-b neb sẽn na n fãag-ba. La b sã n paam laafi bilf bala b le rɩkda b wẽnema tɩ yãmb me le bas-b ne b bɛɛba tɩ bɛɛba le sɩbg-ba, tɩ b le sɩng yãbre, tɩ yãmb le zĩnd yĩngr n kelg-ba. La y sẽn ya nimbãan-zoeer soab yĩnga, yaa naoor ka tɛka la y sig n fãag-ba. Yãmb sagl-b la naoor yaka n na n wẽnemd b meng n tees y menga la b wilg-m-meng tus-b lame tɩ b zãgs y noore. B tõdga noya sẽn wat ne vɩɩma, b yeelame tɩ b kõn zõond n tʋk zɩɩba ye, b naka b kãare, b tõdga sakre. Yãmb maaga y meng ne-ba n kaoose, yãmb wɩnga ne b saglgo, yãmb kõ-b-la bãngdba la b zãgsa kelgre. Dẽ la yãmb bas-b tẽnga rãmb nusẽ. Y sũ-maasem yĩnga b ka wã zãng ye, y ka bas-b ye, y sɩd yaa nimbãan-zoeta, y sũur sɩd pida ne nonglem. La yãmb sẽn ya Pãng-Soaba, Soaala, yãmb sẽn kẽesd dabeem wʋsgo n yaool n ya bʋgsem la nonglem, da ges-y wa bõn-faasga pɛt ning d sẽn tʋk d zugẽ, tõndo, d dĩm dãmba, d nanamse, d maan-kʋʋdba, d bãngdba, d buuda gilli. D tʋka d pɛtã, Asiri rãmba wakatẽ n ta rũnna. Yɛla pak d lame la y nengẽ kegr pa zĩnd ye, yãmb nonglem kell n yalsa a zĩigẽ, yaa tõnd n yɩ wẽn-kɩɩsdba. N-ye, d dĩm dãmba, d taoor dãmba, d maan-kʋʋdba, d ba rãmba ka tʋ noora ye. B pa kelge, b pa reeg y sagls ye! B sẽn kẽ kãoobg tẽnga, b sẽn mik tɩ yaa tẽng sẽn sakd koodo n yɛdg n dɩg b taoore, b pa le nams n pʋg-y ye, b pa vʋʋs ne tʋʋm wẽn ye. Yaa rẽ yĩng la d lebg yem-daad dũnna, tẽng ning y sẽn da kõ d yaab rãmba tɩ b kẽ n me la b rɩ a yõodo. Sẽn dɩt-b tẽnga yõod marsã, yaa dĩm niyns yãmb sẽn dɩk tõndo n sagl b rãmb nusẽ, d wẽnema yĩnga. Bãmb n so tõnd ne d dũmsi n maand b sẽn date. Kato! D pɛta ka zem-zem ye!» Yaa rẽ fãa yĩng la d kãab yã la d gʋlsa d sẽn kãabã sebrẽ. Sebra sẽn gʋls n sɛ d lɛɛg n pag-a lame la neb niyns sẽn gʋls b yʋʋr sebra zugu yɩ-la d taoor dãmbã, d Levitsã la d maan-kʋʋdbã. Ad yʋy niyns sẽn be sebra pʋga: komber a Neemi, a Akaliya biiga, ne a Sidkiya, a Seraya, a Azariya, a Irmeya, a Pasewur, a Amariya, a Malkiya, a Atus, a Sebaniya, a Maluk, a Arim, a Meremot, a Obadiya, a Daniyɛl, a Ginetõ, a Barʋk, a Mesulam, a Abiya, a Miyamin, a Maaziya, a Bilgayi, a Semaya. B gill yaa maan-kʋʋdba Levitsa la woto: a Yesuwa, a Azaniya biiga, a Binuwi, a Enadad roogẽ, a Kadmiyɛl, la b yaop a Sebaniya, a Odiya, a Kelita, a Pelaya, a Anan, a Mika, a Reob, a Asabiya, a Zakur, a Serebiya, a Sebaniya, a Odiya, a Bani, a Beninu. Buuda kãsem-dãmb la woto: a Paros, a Paat-Moab, a Elam, a Zatu, a Bani, a Buni, a Azgad, a Bebayi, a Adoniya, a Bigwayi, a Adin, a Atɛr, a Izkiya, a Azur, a Odiya, a Asum, a Besayi, a Arif, a Anatot, a Nebayi, a Magpias, a Mesulam, a Ezir, a Mesezabɛl, a Sadok, a Yaduwa, a Pelatiya, a Anan, a Ananiya, a Osee, a Ananiya, a Asub, a Aloɛs, a Pila, a Sobek, a Rewum, a Asabna, a Maaseya, a Ayiya, a Ana, a Anan, a Maluk, a Arim, a Baana, tẽnsa koagendba. Sẽn kell-bã, buudã, maan-kʋʋdba, Levitsa, dagno-gũudba, yɩɩn-yɩɩndba, noakense, neb niyns fãa sẽn welg b ne b tẽng rãmba n na n tũ Wẽnde, ne b pagba, b kom-dibli la b kom-pugli sẽn wɩsge, fãa naaga b saam-biisã la taoor dãmba n wẽen la b kãab tɩ b na n deega Noor ning b sẽn kõ a Moyiiz, Wẽnd tʋʋm-tʋmdã. B kãbame tɩ b na n tũu Wẽnd daabo, b rog-n-mik, b na n gɩdga meng ne Wẽnd sẽn gɩdge. B tol n kãabame tɩ b kõn dɩk b kom-pugli n kõ bu-zẽnd dãmb ye la bãmb me kõn deeg b kom-pugli n kõ b kom-dibli ye. La vʋʋsga daare, tẽnga rãmb sã n wa ne b teed bɩ rɩɩbo n na n koos ne tõndo, b bãng tɩ b kõn paam daag ye. Fɩ kõn da vʋʋsg daar bɩ kibs raar ye. Yʋʋm a yopoe-poe, d kõn yãk koadba kood lems ye la d kõn sok samd ye. Ad-d sẽn kãab-b tɩ d na n maana bũmb ninga n paase: yʋʋm a tãab-tãabo, ned kam fãa na n kɩsa wakɩre, wẽnd dooga yĩnga. Woto b na paam n daad buri, la beoog beoog fãa maamda rũmsi ne kũun a taaba, n paas vʋʋsg raar, ki-paalse, la tig-raasa maanda rũmsi, n paas sẽn tʋmd-b wẽnd dooga pʋgẽ dɩɩbo, a Israyɛl yel-wẽna rolb maand rũmsi, la bũmb ning fãa sẽn get wẽnd dooga yɛla. Tõnd maan-kʋʋdbã, Levitsã la zãma wã d maana poeere n bãng buuda sẽn tog n wa ne raad yʋʋmd fãa, wakata sã n ta, maan-kugra bugma yĩnga, wala sẽn be Noora sebrẽ. Yʋʋmd-yʋʋmd fãa d na tall n wa wẽnd doogẽ d kood rẽemse la d tɩɩs bɩ-rẽemse, d kom-dẽems la d rũms kom-dẽemse, wala sẽn gʋls Sebra pugẽ, rũm-bɛdã wala rũm-bõonesa kom-dẽems yaa maan-kʋʋdba yĩnga. D na n paasa zom bãanega, tɩɩs biisi, rãam, kaam; dẽ fãa na n tall n waa d Soaala roogẽ. D na n yãka d kooda pʋɩɩr piig soaba n kõ Levitsa la yaa Levit dãmbã b toore n na n sa n dees pʋɩɩrã, tẽng ning fãa b sẽn kẽedẽ. A Aarõ roogẽ maan-kʋʋd a ye n na n yãag Levit dãmbã b sã n saad n deesd b pʋɩɩrã. Levit dãmba me na n kẽe b sẽn paama pʋgẽ n yãk pʋɩɩr piig soaba n kɩs wẽnd doogẽ. Da yaa wẽnd dooga pʋga la Israyɛl dãmba la Levitsa da bĩngd koodã, rãama bɩ kaamã. Beenẽ me la b ra bĩngd lagdã, wẽnd dooga rẽnna; maan-kʋʋdba, yɩɩn-yɩɩndba ne ragno-gũudba me ra kẽeda be. Sã n ya woto d kõn pa n ka ges d wẽnd dooga yell ye. Buuda kãsem-dãmb tɩ kẽe Zerizalɛɛm. Neba taaba ra leba b tẽnsẽ. Sẽn na n yɩlẽ n pids na-tẽngã, neb piig zugu, b sʋka nin-yend n paalg Zerizalɛɛm, Wẽnd tẽn-sõnga pʋgẽ. Sẽn kell-bã kẽe b tẽnsẽ. Neba sũur yɩɩ noog wʋsgo b sẽn paam tɩ kẽer sak n tɩ kẽ Zerizalɛɛm. Ad kombɛɛmba sẽn kẽ-b Zerizalɛɛm yʋya. Sã n ya ne maan-kʋʋdbã, Levitsã, noakensã, na-yir dãmba kamba (a Salomo na-yir dãmba) ned kam fãa paa a tẽngẽ. A Zɩɩda ne a Bẽnzame kamba da kẽeda Zerizalɛɛm. A Zɩɩda kamba: a Ataya, a Perɛs roogẽ, a Malaleyɛl biig a Sefatiya yagenga. Ad-a Amariya, a Zakari, ad-a Uziya, ad-a Maaseya, a Barʋk biiga, a Kol-Oze biiga, a Azaya biiga, a Adaya biiga, a Zoyarib biiga, a Zakari, Silo raoa A Perɛs yagensa sẽn ti-b Zerizalɛɛm da yaa kobs-naase la pisoob la a nii, neb sẽn sek zabr bobre. Ad-a Bẽnzame kamba: a Salu, a Itiyɛl biiga a Yesaya yagenga, a Maaseya, a Kolaya, a Pedaya, a Zoyɛd la a Mesulam, biiga, n paas a yaopa: a Gabayi, a Salayi, bãmb kobs-wɛ la pisi la a nii. Yaa a Zikri biig a Zowɛl n da ya bãmb kãsma, n paas a Yewuda, a Asenuwa biiga, yẽ n da ya tẽnga naab sõangda. Ad maan-kʋʋdbã: a Yedaya, a Zoyarib biiga, a Yakẽ, a Seraya, maan-kʋʋd kãseng a Ayitub ba a Merayot yagenga, ne a Sadok, a Mesulam, la a Ilkiya, n paas neb kobs-nii la pisi la a yiibu, sak a ye kamba, sẽn da get wẽnd dooga tʋʋm yelle; n paas a Adaya a Malkiya, a Pasewur yagense, n paas a Zakari, a Amsi, a Pelaliya, la Zeroam, bãmb ne b sak kãsem-dãmba, bãmb kobs-yi la la pis-naas la a yiibu; n paas a Amasesayi, a Imɛr ba a Meselimot yagene; n paas a Azayi, a Azarɛl, bãmb ne tãb-biis sẽn yaa sũ-keelem dãmba, bãmb koabg la pisi la a nii. A Zabdiyɛl, a Agedolim biiga n da so ba. Levit dãmba: a Semaya, a Buni ba a Asabiya yagense, a Azrikam, a Asub. Le paasa Levitsa kãsem-dãmba a Sabetayi ne a Zozabad, sẽn so wẽnd dooga yɩng tʋʋma. Le paasa a Mataniya, a Asaf ba, a Zabdi yagenga ne a Mika, yẽ n da pʋt pẽgr yɩɩla pʋʋsga wakato, ne a Basbukiya, a Mataniya saam-biig a ye, n da sõangd-a. Ad yɛsa a Abda, a Yedutun ba, a Galal yagenga, n paas a Samuwa. Dɩlla Zerizalɛɛm pʋgẽ Levitsa zãng da taa neb kobs-yi la pis-nii la a naase. Ad dagno-gũudbã: a Akub, a Talmo ne b yaop sẽn da so rignoya gũubu, bãmb koabg la pisopoe la a yiibu. Israyɛl kamb a taaba, maan-kʋʋdba la Levitsa kẽer pa b tẽnsẽ, a Zɩɩda soolmẽ, ned kam fãa a buud pʋɩɩrẽ. Sã n ya noakensã, bãmb da kẽeda Ofɛl; b kãsem-dãmb la a Sia la a Gisepa. A Uzi n da ya Levit dãmba naab Zerizalɛɛm. A Uzi da yaa a Mika ba, a Mataniya yagenga, a Asabiya ne a Bani n da sõangd-a. B ba roog la a Asaf roogo, bãmb n so yɩɩla wẽnd doogẽ. Dĩma ra kõo noor yɩɩn-yɩɩndba poorẽ la b ra yiisa sebr n wilgd ned kam fãa tʋʋm beoog sẽn vẽege. A Petayiya, a Mesezabɛl biiga, a Zɩɩda biig a Zera roogẽ n da get zãma wã yell Pɛrs dĩma zakẽ. A Zɩɩda yagens kẽer da kẽeda tẽn bõonesã sẽn da yɛdg tẽn-nabrẽ wa Kiriyat-Arba ne a tẽn-toose, Dibõ ne a tẽn-toose, Yekabseyɛl ne a tẽn-toose. N le paas Yesuwa, Molada, Bɛt-Pelɛt, Asar-Suwal, Beerseba ne a tẽn-toose, Siklag, Mekona ne a tẽn-toose, Eyin-Rimo, Sorea, Yarmut, Zanoa, Adulam ne b tẽn-toose, Lakis ne a pʋto, Azeka ne a tẽn-toose; bãmb da basda Beerseba nug-rɩtgo, n basd Inom bãg-faaga nug goabga. A Bẽnzame kamba ra kẽeda Geba, Mikmas, Aya, Betɛl ne b tẽn-toose, Anatot, Nob, Ananiya, Asor, Rama, Gitayim, Adid, Seboyim, Neballat, Lod, Ono la tʋʋm-mitba bãg-faagẽ. Zɩɩda Levit dãmb kẽere tɩ kẽe n naaga a Bẽnzame rãmba. Ad maan-kʋʋdb la Levits niyns sẽn tũ-b a Salatiyɛl biiga, a Zorobabɛl, ne a Zozuwe n wa: a Seraya, a Irmeya, a Ezra, a Amariya, a Maluk, a Atus, a Sekaniya, a Rewum, a Meremot, a Ido, a Ginetoyi, a Abiya, a Miyamin, a Maadiya, a Bilga, a Semaya; a Zoyarib, a Yedaya, a Salu, a Amok, a Ilkiya, a Yedaya. A Yesuwa wakatẽ bãmb n da ya maan-kʋʋdba la Levitsa sags kãsem-dãmba. Levitsa sʋka ad-a Yesuwa, a Binuwi, a Kadmiyɛl, a Serebiya, a Yewuda, a Mataniya. Yaa a Mataniya ne a yaopã n da so pẽgr yɩɩlã. B saam-biis a Basbukiya ne a Uni n da zĩ n tot bãmba, n yɩɩnẽ n sokd bãmba. A Yesuwa n dog a Zoakim, a Zoakim n dog a Eliyasib. A Eliyasib n dog a Zoyada, a Zoyada n dog a Zoana, t'a Zoana dog a Yaduwa. Ad neb niyns sẽn da ya-b maan-kʋʋdba sags kãsem-dãmba a Zoakim wakato, a Seraya roogẽ: a Meraya; a Irmeya roogẽ: a Ananiya, a Ezra roogẽ: a Mesulam; a Amariya roogẽ: a Zoana; a Meliku roogẽ: a Zonatã; a Sebaniya roogẽ: a Zozɛf. A Arim roogẽ: a Adna; a Meremot roogẽ: a Elkayi, a Ido roogẽ: a Zakari; a Ginetõ roogẽ: a Mesulam; a Abiya roogẽ: a Zikri; a Z... roogẽ: a Miniyamin; a Moadiya roogẽ: a Piltayi. A Bilga roogẽ: a Samuwa; a Semaya roogẽ: a Zonatã, n paas a Zoyarib roogẽ: a Matenayi; a Yedaya roogẽ: a Uzi. A Salayi roogẽ: a Kalayi; a Amok roogẽ: a Ebɛr; a Ilkiya roogẽ: a Asabiya; a Yedaya roogẽ: a Netaneyɛl. A Eliyasib, a Zoyada, a Zoana la a Yaduwa sẽn waa n ya maan-kʋʋdba sags nanamse, gʋlsa sebr zugu Levitsa yʋya, Levits niyns sẽn da ya-b sags nanamse. Woto me b gʋlsa sebr zugu me maan-kʋʋdba la yɩɩ woto n tãag Pɛrs dĩma a Dariyus naam. Sã n yaa a Levi yagensã, buuda kãsem-dãmb gʋlsa na-rota sebrẽ la gʋlsga teka a Eliyasib yageng a Zoana naam. Levit dãmba kãsem-dãmba: a Asabiya, a Serebiya, a Zesuwa, a Kadmiyɛl biiga da zĩ n tota Levits a taaba n na n yɩɩl Soaala pẽgr la b kils bãmba, b wakata sã n gilg n sege tɩ b le rɩk tʋʋmd wẽnd doogẽ. B ra tũuda Wẽnd sõgen a Daviid sẽn da siglã. Dagno-gũudbã a Mataniya, a Basbukiya, a Obadiya, a Mesulam, a Talmo la a Akub n da gũud teda sẽn da bĩngd rot niyns sẽn me n pẽneg wẽnd dooga rignoya. Yɩɩ boto a Zoakim, a Yesuwa biiga la a Zosadak yagenga wakatẽ. Boto me komber a Neemi wakatẽ la a Esdras wakatẽ. A Esdras la maan-kʋʋd ning sẽn da vẽena ne Soaala noorã. Zerizalɛɛm lal-gũbra kibsa yĩnga, b tɩ yiisa Levitsa b sẽn da be zĩig ning fãa n wa ne-b na-tẽnga. Da togame tɩ sũ-nooga yɩ kãsenga, tɩ b yɩɩl bark pʋʋsg yɩɩla, tɩ kɛm wẽ, tɩ pends la ruuds wãage. A Levi kamb sẽn ya-b yɩɩn-yɩɩndba fãa waame. B yii tẽns niyns sẽn da pa zãr ne Zerizalɛɛm bɩ Netofa, b yii Bɛt-Gilgal sɛɛgẽ, Geba la Azmavɛt sɛɛgẽ, tɩ b ra pa zãag Zerizalɛɛm n me b tẽnsa ye. Maan-kʋʋdba la Levit rãmb deng n yɩlga b mense n yaool n yɩlg zãma wã, kʋɩlensã la lal-gũbrã. M kɩtame tɩ Zɩɩda nanamsã dʋ lal-gũbrã. M welga yɩɩn-yɩɩndbã sags a yiibu. Pipi saka dʋʋ lal-gũbra zug tẽnsʋka, b teesa rɩtgo, la Tãmpʋʋra Noor la b tũyã. A Osaya n pʋg-b ne a Zɩɩda nanamsa bogre, bãmb poore a Azariya, a Ezra, a Mesulam, a Yewuda, a Bẽnzame, a Semaya, a Irmeya. Bãmb poore da yaa maan-kʋʋdba la b ra zãada tõntõodo. Bãmb poore, a Zakari, a Zakur biiga, a Asaf yagenga. Yẽnda poore, a Mikaya, a Mataniya, a Semaya la a Zonatã, A Zonatã tũud-n-taase: a Semaya, a Azarɛl, a Milalayi, a Gilalayi, a Maayi, a Netaneyɛl, a Yewuda, a Anani. Bãmb da zãada yʋʋm teedo, Wẽnd sõgen a Daviid sẽn da kɩt tɩ b maane. A Esdras, noora mita, n da be nin-bãmb taoore. B sẽn ta ko-bundma noorã, b ta teedsã sẽn dʋʋd a Daviid na-yirã. B rʋʋ lalga zug n ne dĩma roog sẽn wẽneg n dɩg b taoore la b kell n kẽname n ta kooma noorã, n tees tẽnga yaanga. Yɩɩn-yɩɩndba bogr a yiib soaba teesa goabga, maam, a Neemi, pʋg-b-la lalga zugu, tɩ zãma wã bogra pʋgd m poorẽ. D taa bugtoaalsa ro-lug-lugã, n ta zĩig ning lal-gũbrã sẽn tɩ yɛdg zĩig ningã. D yii be n loog a Efrayim noore, a Yesana noore, kʋɩl-zẽeda noore. D sẽn loog a Ananeyɛl ro-lug-lugi la neb koab ro-lug-lugã, d waa n looga Piisa noore n ta gũudba noore. Yɩɩn yɩɩndba sags a yiibã taa wẽnd doogã. Mam me yalsame, maam ne taoor dãmba sẽn da yãagd-ma. Maan-kʋʋdba a Elyakim, a Maaseya, a Miniyamin, a Mikaya, a Eliyoenayi, a Zakari la Ananiya da peebda tõntõodo. N paas a Maaseya, a Semaya, a Elazar, a Uzi, a Zoana, a Malkiya, a Elam la a Ezɛr. A Izrayiya, yɩɩla naaba, kɩtame tɩ yɩɩn-yɩɩndba tãs tɩ sãde. Baraare b kʋʋ maamd ka tɛka la ra yaa kibs kãsenga. Soaala ra pidsa b buuda ne sũ-noog kãsenga. Zerizalɛɛm pabga la kamba me wilga b sũ-noogo la bʋʋra ra sãta al yɩɩga. Wẽnd kãnga b yãka neb sẽn na n ges kũuna neba sẽn tar n watẽ wã. Yaa Maan-kʋʋdba la Levit dãmba sẽn da tog n paam bũmb ninga b tẽnsẽ la b soolmẽ, wala kood rẽemsã lemsã la kũun a taabã. A Zɩɩda zãng da tara sũ-noogo tɩ maan-kʋʋdba la Levitsa tʋʋmd da yaa sõma. Wẽnd maag bãmba, Soaala-Wẽnd da paamda waoogre tɩ zãma wã paamd yɩlgre, bãmb ne yɩɩn-yɩɩndbã la ragno-gũudbã, wala a Daviid la a biig a Salomo sẽn da yals bũmb ningã. Pĩnd-pĩnda, a Daviid ne a Asaf wakatẽ, b yãka yɩɩn-yɩɩndb taoor dãmba la b ra yɩɩnda pẽgr la bark pʋʋsg yɩɩla. Yaa rẽ yĩnga la a Zorobabɛl la a Neemi wakatẽ, b ra dɩlgda yɩɩn-yɩɩndbã la ragno-gũudba, wala sẽn segde. Levitsa da reegda maanda kũun sõma wã la b ra taasda maan-kʋʋdbã, a Aarõ yagensã, b rẽnna. B waa n karma woto a Moyiiz sebra pʋgẽ tɩ b ra saag n deeg Amonitga la Moabitga neb niyns sẽn waoogd-b Israyɛl Wẽnnaama buudẽ ye. Bãng-y tɩ Amonitsa la Moabitsa pa seg Israyɛl kamba ne rɩɩb la koom, b sẽn waa n poog b tẽngẽ ye. Yɩɩd rẽ, a Moab yao a Balaam ligdi, t'a kãab-b kãab wẽnga. Yaa Soaala-Wẽnd n tedg kãab wẽngã t'a lebg kãab noogo. B sẽn karem woto sebra pʋga, b yiisa bu-zẽmba gilli, b buudẽ. Maan-kʋʋd a Eliyasib la b waa n kõ wẽnd dooga teed gesg kãsengo. Yẽ ne a Tobiya ra yaa rogem la boto yĩnga a baoo do-yalengo n kõ a Tobiya t'a bĩngd teedã. Yɩɩ roog ning b sẽn da bĩngd yamleoog kũuna, tɩdarã, lagdã, kooda lemse, rã-paalgã, kaama, b sẽn da reegd bũmb ning fãa Levitsa yĩnga, gũudba yĩnga la maan-kʋʋdba yĩnga. Wakat kãng tɩ m da ka be Zerizalɛɛm ye. M da babsa Babilon dĩm a Artazerksɛs, a naam yʋʋmd pis-tã la a yiib soaba. M zĩnda be bilfu la m sẽn paam sore, m lɛɛg n waa Zerizalɛɛm. M sẽn ta, m yãenda a Eliyasib sẽn maan ne a Tobiya, n kõ a zĩ-sõngo tɩ f sã n be zĩ-kãng bɩ f ne wẽnd dooga sɩmande. M sũur puuga wʋsgo la m kɩtame tɩ b vaag a Tobiya teeda fãa n dɩgl yɩnga. M kɩtame tɩ b yɩlg roogã neere, n lebs wẽnd dooga teed bala n bĩng be n paas kũuna la tɩdarã. M wʋmame tɩ Levitsa da ka le paamd b pʋɩɩr ye, woto bãmb ne yɩɩn-yɩɩndba sẽn da tog n ges wẽnd waoogrã, zoe n diga b pʋ-weesẽ. Dẽ la m zab ne taoor dãmbã n yeel-ba: «Bõe tɩ y pa le get wẽnd dooga yelle?» M boola ned kam fãa t'a le wa rɩk a tʋʋmde. A Zɩɩda tõre le waa ne koodã, rãama la kaama lemse. M dɩka teeda roto n gũnug a Selemiya ne seb gʋlsd a Sadok. M kɩtame tɩ Levitga a Pedaya n paas a Ana, a Zakur biiga, a Mataniya yagenga, wa sõng-ba. Bãmb n deeg pʋɩɩrã n pʋɩt b saam-biisã. Soaala, yell kãens fãa m sẽn maan y roogã la y pẽgra yĩnga, tẽeg-y m yelle! Vʋʋsga daare, m waa n yãee neb sẽn wẽkd b sibi n na n maam dãam. Kẽer me ra zɩlga bõeens alkam kalse, rãam, sibi, la zɩɩb buud toor toore, n kẽed Zerizalɛɛm. M yeel-b lame tɩ b ra saag n koos bũmb ye. Vʋʋsg daar yɛsa, m yãee Tir dãmb tɩ b tond zĩma la teed a taaba n wat n na n koos ne Zɩɩda la Zerizalɛɛm rãmba. M zaba ne taoor dãmbã n sok-b tɩ yaa bõe yĩnga tɩ b maand wɩɩbdo n pa tũud vʋʋsg daar noore. Ka woto la y yaab rãmb maan pĩnda la ka rẽ yĩng la Soaala-Wẽnd kɩt tɩ tõnd ne d tẽnga yãend pɛt buud fãa? Bõe tɩ y tõdgd vʋʋsg noore n na n yãng Wẽnd sũ-puuri? Dẽ n so tɩ m sã n mik tɩ zaabr maasem tat kʋɩlensã n wilgd tɩ vʋʋsg daar taame, m kɩtdame tɩ b pag kʋɩlensã la b ra ka le pakd-b tɩ vʋʋsga raar ka loog ye. M da baooda neb n zĩndg noyẽ wã tɩ zɩɩb ra tõog n kẽ vʋʋsg raar ye. Woto naoor a yi bɩ a tã lɛɛbd kẽer ka paam Zerizalɛɛm pʋg n gãand ye. M yeel b la woto: «Bõe tɩ yãmb gãe lalg poore, y sã n le paase, m na kɩt tɩ b yõg yã.» Baraar tɛka b ka le saag n wa vʋʋsg daar ye. M kosa Levitsa tɩ b yɩlg b mense la b gũ ragnoya tɩ b ra le tõdg vʋʋsg daar noor ye. Dẽ yĩng me, Soaala, y nimbãan-zoeer sẽn ka be tɛka, bɩ y tẽeg m yelle la y kũm-ma! M waa n mikame tɩ Zʋɩf rãmb kẽer pagb yita Asdod, Amon la Moab tẽnse. La b kamba pʋɩ-sʋk ra gomda Asdod dãmb bɩ bu-zẽmb a taab goama n yaool n ka le wʋmd Zʋɩf rãmb goam ye. M zaba ne-ba, n pãb kẽer la m võ b zut zoobdo, n kɩt tɩ b wẽen ne Wẽnd tɩ b kõn le rɩk b kom-pugli n kõ bu-zẽmba ye la bãmb me kõn deeg bu-zẽmba kom-pugli n maan b pagb ye. Ka yell a woto buud n wa ne Israyɛl dĩm a Salomo lʋɩɩs bɩ? Dĩm ba a ye pa wẽneg a Salomo. Soaala-Wẽnd da nong-a lame, Soaala-Wẽnd da kõ-a-la Israyɛl naam la bu-zẽmba pagb kɩtame t'a lak n lʋɩ. Ka segd tɩ b wʋm tɩ yãmb me maana yẽ wɩɩbda ye. Maan-kʋʋd kãseng a Eliyasib biig a ye, a Zoyada ra yaa Orõ dao a Sanebalat rɛɛmba. M dig a lame n zãage. Tẽeg-y nin-bãmba yelle, b sãama maan-kʋʋdb yʋʋre, b sãama zood ning sẽn da be maan-kʋʋdba la Levit dãmb sʋka. M yiisa bu-zẽmba Israyɛl sʋka la m wilga maan-kʋʋdba la Levitsa ned kam fãa tʋʋmd sẽn yaa a soaba. M wilga wakat ning b sẽn na n wa ne raado la kood rẽemsa lemse. Tẽeg-y m yelle, Soaala! Ned n da be Us tẽnga, t'a yʋʋr boond t'a Zoob. A ra yaa nin-tɩrga, ned sẽn ka tar a toorẽ yelle, n zoet Wẽnd la a zãagd a meng ne wẽnga. A roga kom-dibli a yopoe, la kom-pugli a tã. A ra tara piis tus a yopoe, yʋgma tus a tã, niis tusri, n paas bõan-yãans kobs-nu; a zak neb ra yaa wʋsg-wʋsgo. Nin-kãnga n da yɩɩd a taaba Yaang kẽedba sʋka. Ade, a kamba da mi n kẽnd n maanda kibsa ned kam fãa yiri, ned fãa ne a daare, la b mi n boonda b tãop a tãabã tɩ b wat n dɩtẽ la b yũud ne bãmba. La b sã n mi n wa maan kibs rãmba n gilg b zags fãa n sege, b ba, a Zoob, da boond-b lame n yɩlg-ba tɩ b lebg sõma. Woto wã, vẽkembeoogo, sõor pukri, a ra kʋʋda yũ-noog maoongo bãmb ned kam fãa yĩnga. Bala a da tagsda a yamẽ: «Daar ninga mam kamba maana yel-wẽnde, n beeg Wẽnnaam b sũurẽ.» Yaa woto la a Zoob da maand wakat fãa. Daar n zĩndi tɩ sẽn balemd-b Naaba-Wẽnd wa seg taab Naaba-Wẽnd zãongẽ n na n wilg yɛla sẽn be zĩig ninga tɩ Bɛ-kʋdga, Sʋtãana, me tũu n wa. Dẽ la Wẽnnaam sok-a: «Fo yita yɛ?» T'a leoke: «Mam gilga moogo n lɛɛg n watẽ.» Tɩ Naaba-Wẽnd leb n sok-a: «La fo yãenda m sõgna a Zoob bɩ? A ka tar a to moog ye: a yaa nin-tɩrga, ned sẽn ka tar a toorẽ yelle, n zoet Wẽnde la a zãagd a meng ne wẽnga.» Dẽ la Bɛ-kʋdga gõgneme n leoke: «Yaa zaalem t'a Zoob zoet Wẽnnaam nifu? Yãmb ka wẽ yãgr n gũbg a menga, a zaka la a soolma fãa wɛ? Y ninga a tʋʋm fãa barka, a rũmsa yẽnegda tẽnga pʋtẽ. La yãmb ye n tẽeg y nug n sɩɩs a paoongã, m mii vẽenega t'a na tʋʋs yãmba.» Wẽnnaam yeela Bɛ wã: «Dẽ ka yell ye, a paoongã, fãa be f nugẽ, gũus bala n da sɩɩs a meng ye.» Tɩ Bɛ wã yik n loog Wẽnnaam taoore. Daar a ye, a Zoob kamba da rɩtame la b yũud, b kẽema yiri. La ned a ye n wa a Zoob nengẽ n wilg-a: «Fo niisa da koodame, tɩ bõan-yãansa da wãbd yamdo pʋʋga noorẽ. Saba fãadb kell n wa kʋʋ nebã n loog ne rũmsã; maam m ye tãa bala n põse n zoet n na n wa togs fo.» Yẽ sẽn nan ket n gomda, la ned a to sẽn wa, n yeele: «Ad Wẽnnaam bugum yii yĩngri n lʋɩ; a yõoga fo piisã la f nebã, n dɩ-b zãnga. Maam m ye tãa bala n põse, n zoet n na n wa togs fo.» Yẽ soaba ka paam n gom n sɛ ye la ned a to sẽn wa n yeele: «Kalde rãmb sẽn welg sags a tãabo zoe n kẽe rũn-kɩɩmbã n kʋ-ba, n loog ne yʋgma wã. Maam m ye tãa bal n põse n zoet n na n wa togs fo.» Yẽ sẽn da ket n gomda la ned a to sẽn wa n yeele: «Fo kom-dibli la f kom-pugli da bee b kẽema yiri n dɩtẽ la b yũuda, la sob-kãseng sẽn yi we-raooga yaanga waa n zũndga zaka kɩrems a naasã t'a lʋɩ n buug kambã n kʋ. Maam m ye tãa bala n põse, n zoet n na n wa togs fo.» Dẽ la a Zoob yik yã, n pãrg a fuugu, n põng a zugu; dẽ poore, a lʋɩɩ tẽnga, a yãnvabga n yetẽ: «Mam yii m ma pʋgẽ bilemde, mam na n leba bilemde. Wẽnd da kõome, Wẽnd le reegame. Bãmb yʋʋr paam pẽgre.» Ne yella sẽn yɩ toog ne-a wã, a Zoob ka maan wẽng ye, a ka tʋʋs Wẽnnaam ye. Daar a ye n le zĩndi tɩ sẽn balemd-b Wẽnda le seg taab Naaba-Wẽnd zãongẽ wã, tɩ Bɛ wã me tũ n wa t'a me na n wilga sẽn be. Wẽnnaam soka Bɛ wã: «Fo yita yɛɛne?» T'a leoke: «Maam gõ n gilga moogo n lɛɛg n watẽ.» Tɩ Wẽnnaam leok-a: «Fo tẽeg n gesa m sõgna a Zoob bɩ? A ka tar a to moog ye: a yaa nin-tɩrga, ned sẽn ka tar a toorẽ yelle, n zoet Wẽnde la a zãag a meng ne wẽnga. A kell n pa-la a pʋ-peelma zugu la yaa zaalem la f tõg-m tɩ m fɛɛs-a.» La Bɛ wã gõgnemame n leoke: «Yõor la gɛla; ninsaal sẽn tar fãa, a kɩt-a lame n fãag a yõore. Dɩlla y sã n tẽeg y nugu n sɩɩs a yĩnga kõaba la a yĩnga nemdo, m mii vẽenega t'a na tʋʋs yãmb.» Tɩ Wẽnnaam leok Bɛ wã: «Be neere, a Zoob yɛla fãa be-la f nugẽ, fo yee n da sɩɩs a vɩɩma!» Bɛ wã yik n looga Wẽnd taoore. A loba a Zoob yĩng bãaga, sɩnga a nao-pʋga n ta a zug tẽnsʋka. A Zoob kong n dɩka sa-pɛɛga n wurd a yĩnga, la a tɩ gãe tampʋʋrẽ. Dẽ la a paga yeel-a: «Fo na n kell n vɩɩnda wa ned sẽn ka tar zʋga bɩ? Ges n yaa n tʋʋs Wẽnnaam la f ki!» La a Zoob leokame: «Fo gomda wa yam kɩdg soaba; tõnd sã n deegd sũ-noog Wẽnnaam nengẽ, bõe yĩnga la d ka na n deeg sũ-sãang me boto?» Ne a yɛla sẽn yɩ a soab fãa, a Zoob ka tol n tʋʋs Wẽnnaam a goamẽ ye. La yɛl kãensã fãa wa n lʋɩ a Zoob zo-rãmba a tãab tʋbrẽ, la ned kam fãa yi-la a tẽngẽ n wa: yaa, a Elifaz, Tema raoa, a Bildad, Suwa raoa, la a Sofar, Naama raoa. B sega taaba n yet tɩ b na n tɩ kũma a Zoob la b maas a sũuri. B tool n gesa a Zoob yɩɩga la b ka le bãng-a ye. Tɩ b sɩng yãbre. Ned kam fãa pãrga a fuugu la a wʋka tom n lob yĩngr t'a lɛɛg n dʋʋg a zugu. Dẽ poore b zĩnda tẽnga, a sɛɛgẽ, la b paa ne-a dasem a yopoe, wĩntoog la yʋngo. La ned ba a ye ka tõog n yaag a noor n gom ne-a ye, a namsga toolem yĩnga. A Zoob waa n yaaga a noore n na n kãab a rogma raar beedo. A goma woto: M tʋllẽ-la ne sũur fãa tɩ Wẽnd yẽesẽ m dogma daare, n yẽesẽ yʋng ninga sẽn walme: «Biig n na n wa moogo!» Bɩ b sõd ra-kãnga wa lik sẽn pid lik raare! Bɩ Wẽnd da le zĩnd yĩngrã n tẽeg a yell ye! Bɩ vẽenem buud da yãg a zug ye! Bɩ lik sẽn pid lik wa reeg-a n yãmbe, tɩ sawad-taok wa lud-a, tɩ wĩndga booga a vẽenema boog-bãnde! Bɩ yʋng kãng yɩɩg a taab ne lika, a raara kell n menem zãnga tɩ b sõt n boogd kiuug kãng raar a ye. Bɩ rogem zãag ne yʋng kãnga, a beoog vẽeg tɩ sũ-noog kaasg pa tol n kaas ye! Bɩ bagba la mitba sẽn tõe m kãab tɩ tũ, la b tõe n nek wag-bãnd a Leviatã, bɩ b kãab yʋng kãnga kãab-beedo. A tõd-beoog ãdg ra tõog n puk ye a gũ beoogo tɩ sõor tõdg pukri, a gũ beoog vẽegre n kell n pa ne lika. La rẽ yaa a sẽn ka maan bũmbu n gɩdg m waoong dũni pʋgẽ, n gɩdg nimbãaneg ning sẽn yaa m dẽnd dũnna wã. Bõe yĩng tɩ mam ka ki m ma pʋgẽ, bɩ m sẽn doge, bõe yĩng tɩ m pa wẽneg n ki? Bõe tɩ pag sagl-m a naoẽ? Bõe tɩ m yẽsma a bĩs a yi n vɩɩnde? Marsã tɩ m pa gãeẽ yĩn-maasem zĩigẽ, marsã tɩ m gõẽ-la m laafi gõeem, ne rĩm dãmba la nin-bɛda, ne dĩm niyns sẽn da baood yʋʋre, n yikd raboodo sẽn da lʋɩ. Ka rẽ bɩ m beẽ ne na-koms sẽn gãe ne sãnem, tɩ b rot bolg ne wanzurfu. M yɩtẽ la wa pa-tare sẽn wẽneg n bus n menese, m yɩtẽ la wa bi-pɛɛlg sẽn ka yãend wĩntoog vẽenem. Ad-y kɩɩmkulgã, nin-wẽnsa ka le mi vɩg-vɩg ye, beelẽ yaamsa rãmb sɩnga vʋʋsgo. Sẽn da pag b rãmb rooga paamda laafi, b ka le wʋmd b gũudb toosa bʋʋr ye. Yem-daoog ne a zu-soaba, wĩir ka b sʋk ye. Bõoneg la bɛda, fãa zema taaba, Vɩɩma kõta sẽn namsda bõe yĩnga? Sẽn tar-a tooga reegd-a-la bõe yĩnga? Wʋsg boonda b kũum t'a tõt waoongo, sẽn vɛɛsd-ba n baood kũum bãmb sõor n yɩɩd arzɛka baoodba; b baood a lame n yɩɩd arzɛka, bãmb sũ-noogo yãẽ la yaoogo, b kɩdeng la b sẽn taẽ a pʋgẽ. M yaa ned sẽn ka mi a sẽn lebdẽ ye la ya wa Wẽnd mee lalga n gũbg-ma. Sã n yet tɩ m dɩ, yaa kũsga, yaa toog bal n tar-m tɩ m waasdẽ. M sẽn zoet bũmb ningã n tat-ma, m sẽn ligind bũmb ningã n gãd-ma. Mam nengẽ vʋʋsg ka ye, laafi ka ye, sẽk ka ye, pɛt bal la m zĩ ne. A Elifaz, Tema raoa, goma ne a Zoob woto: M mi tɩ m sã n gome m na n paasa f naongo m yaool n ka tõe n le sĩnd n paas ye. Gese, fo menga sagla neb kʋʋngo, n da kengd yaams sẽn tar b rãmb sũuri. Sẽn da reegd-a fo saglgã da le paamda raoodo; sẽn pãsd-a n lʋɩtẽ da le paamda pãnga. Marsã, taa foo tɩ fo burd n lʋɩtẽ, tooga sãaga foom tɩ f ka le mi f sẽn kẽedẽ ye. Yel-beeda taa foo marsã tɩ f basd raoodo, taa foom marsã tɩ f yɛɛsdẽ. Fo yeelame tɩ f tũuda Wẽnde la f vɩɩma ka tar goaleng ye, bõe tɩ f ka na n kell n zĩnd ne f saagre? Tags n gese, ka-yell-soab a bõe la nin-tɩrg a bõe la yel-beed peeg n loog tɩ fo mii? Mam sẽn mi bala, yaa tɩ f sã n bʋd nimbãanega f sã n bʋd zãmbo, f tigsda zãmbo la nimbãanega. Neb sã n tʋm n puug Wẽnd sũuri, b fʋʋsd-b lame tɩ b menem, n menem wa saag sobgo ne mo-paoko. Wẽnd n tõe tɩ gɩgemd sĩndi tɩ bõnyẽ-bi yɩ lamboama. We-rũmsa tõe n konga rɩɩb n ki, tɩ b kamba sẽeg taaba! M zãmsdẽ, koɛɛg n waa n walme, la m tʋbr wʋma bʋrbʋre. Yʋng zãmsd sẽn waa n lengd m tagsgo tɩ Adem biisa gãe wa bõn-kɩɩmse, yɛɛsg n digimd-m waoodo, n kɩt tɩ m kõaba wẽ taab koe-koe! Pemsem n wẽ m nengã valɛll, tɩ m yĩnga kõbd fãa yik n yɛsẽ. Ned n da yɛs m taoore la m da ka mi a soab ye, m da nee bũmb bal sẽn yɛs m taoore. Fãa ra yaa sɩɩ, la m waa n wʋma koɛɛg: «Adem biig tõe n bʋʋ tɩrga, a bʋʋda tõe n yɩɩ tɩrga n yɩɩg Wẽnd dẽnd bɩ? Ninsaal sõmblem tõe n yɩɩga a Naanda rẽnd bɩ? Gese, Wẽnd sũur ka peel ne b buuda kamb ye, b malɛk rãmba nengẽ menga b nee bũmb wa gãeemdo. M na n yeelame tɩ bõe marsã ne nin-tãndã, ne sẽn ya-b tom-pʋlempʋk rãmba? Bãmb na n bedsa wa karenga. Yibeoog n ta zaabre tɩ goama gilame, bilf-bilf bala b wat n menema zãng fas. B rooga tii ne pɛɛla la a wĩ wã zoe n loodame. B yalemdã n dɩt-b zãng kas.» F bolgda ãnna t'a wa leok fo, Zoob? F na n goma ne Wẽnd yamba a bõe, malɛk sõng a bõe la f na n gom ne? Sɩda, sũ-toogo n kʋʋd ka-yõod-soaba, tɩ zoe-bõn baasd yalma. Mam yãenda nin-yoog zak sẽn piuugdi, la m wẽneg n kãaba a zaka beedo: «Bɩ a kamba bolg sõngre n konge, bɩ bʋʋd zĩigẽ, b bʋʋda yɩ toogo, la ned da sõng-b ye. A wãka sẽn kõ-a kood ninga lebg kom sẽn tar a soab rɩɩbo, b kao a gõosa yãgrã n kẽ n wʋke, a ba sẽn bas ne a fãa gilli, bɩ zɛɛdba loog ne!» Yɛl kɛga ka pusgd tẽng n yi abada, nimbãaneg me ka bund wa kood n yi ye. Ninsaal yẽ dogame n na n wʋm toogo wa bug-pãrg sẽn baood n na n zom moogo. M sã n da yaẽ foo, yaa Wẽnd la m na n taasẽ m koɛɛga, m bʋʋda yaẽ-la bãmb n na n bʋ-ma. Bãmb tʋma tʋʋm kãsense sẽn zʋʋg ninsaal yam. B tʋʋma yãgda ne neerem la b yaa kõn-bãng-n-sõde. Bãmb n zãgsd tẽnga ne b sa-koom, pʋta paamda koom n yɛs ne tɩgre. B dat n zẽka nin-bõoneg zutu, la b kõ neng sẽn gãnem b rãmba fãagre. B sãamda sɩlem dãmba magbo, n kɩt tɩ b geels fãa pa fãado. Bãmb n yõkd sɩlem dãmba b sɩlma bẽdgẽ, bãmb n dengd n puk zãmb rãmba zãmbo. Wĩnto-sʋka, zãmb dãmba fãooda lika, n babend wĩnto-sʋka wa yʋn-sʋka. Wẽnd fãagda naong soaba, t'a põs a bɛɛb sʋʋga n põs b yẽna, n põs b nug-yẽese sẽn ya barse. Yaa boto la nimbãan-ned lɛɛg n bilgd tɩlgre, tɩ nin-wẽng fãa za wĩir n yɛsẽ. Sɩd sɩda, sũ-noog soaba la Wẽnd sẽn demsd a soab kẽnde! Bɩ f sake, Zoob, n tũ Wẽnd-Pãng-Soaba saglse. Wẽnd n wat ne toogo la b wat ne pemsem, bãmb n kaoogd ne b nus n lɛɛg n wobge. B na n yiis-f-la yɩɩr a yoob pʋgẽ, la a yopoe soaba na n gil n bas-f lame. Kom wẽnde, b na fãag-f ne kũum, la f põsda sʋʋga, zabr wakato. Zelem toaag soab sãbsg kõn sãbs-f ye, f kõn maan dabeem ne beoog yel-beed ye. Kom la tẽn-kũum ka loe f zug ye, f ka rigd we-rũng poorẽ ye. Bũmb kõn sɩɩs f pʋʋg ye, kugr kõn fẽrg a pʋʋgẽ ye, rũng kõn wõrg bũmb ye. F zak pida ne laafi, f rũmsa wãbneg zĩigẽ yamd kõn paoog ye. F na n yãee f buuda fɩɩre, la f yagens na n yãmba zĩiga wa moog sẽn dɩ pʋ-wɛɛga. F kõn zarbe n yaool dɩk yaada sor ye. F kooda rengd n kalsame, n kals n sam zĩ yɛnga, tɩ f ket n pid ne vɩɩm dẽ poor marsã la kũuma na n yaool n wa. Tõnd vɛɛsame la d yãendame la sɩd yaa woto, Bas tɩ b wilg-fu, n paas f bãngre, Zoob. A Zoob le yaaga a noor n yeele: M nongẽ lame tɩ m sũ-sãangã yaẽ la bũmb sẽn tõe n mage, tɩ m sũ-kãbrã tarẽ magdga! M tẽed t'a zɩsame n yɩɩd mogr noorẽ bĩisri; ya rẽ la yiis gomd biig n togs lebg toog ne m no-gãndo. Wẽnd-Pãng-Soaba pɛɛma kõsa maam n gilgi, la m fõosa b zẽnema zãnga, Wẽnd sẽn yiisd bũmb ning fãa tɩ tõe n yɛɛs ninsaala, m seg-b-la zãng kasi, b zãng bobame n na n zab ne maam. Burgumd na yãbd kom yamd noog sɛɛgẽ? Ka rʋʋgd loalg yamdo t'a le mi kɛleng ye. Rɩ-sãbsgo tog n dɩɩme n ka ning yamsem bɩ? Gel-kood nooma noorẽ bɩ? M pa rat rɩɩb a woto buud ye, namsg ka bur sẽn sakd dɩɩb ye. La ãnd n na n sõng tɩ m kosga pidsi, n sõng tɩ Wẽnd kõ-m m sẽn saagde? Wẽnd sã n da sakẽ n neem maam b teoogẽ, n wãagẽ maam wa sʋlg sẽn wãagd a peende! M sũur na maagẽ, m sũur na yɩẽ noogo, m namsg kẽenga pʋgẽ, la rẽ yaa m meng sẽn tar kaseto, tɩ m pa tol n kɩɩs Sõmblem-Naaba noor ye. Mam na n yãee pãng yɛɛnẽ n yaas n gũ; m kũuma sẽn ya tɩlɛ, m vɩɩma yõod la bʋgo? Mam keelma taa pĩig dẽnd bɩ? Mam yĩnga tara zũud keglem bɩ? M sẽn gũud sõngr ninga ka loog n tɩ yag vɩʋʋgẽ bɩ? Zĩ bʋg la m kẽed n paam n põse? Saagr bilfr menga ka le ket m nengẽ ye. Toog sẽn wʋm a soaba tog n paama a tũud-n-taasa sõngre, ka rẽ a kõn zoe Wẽnd-Pãng-Soaba nif ye. M saam-biisa yɩɩ sõm-zitba, b zoe n looga wa koom, wa koom sẽn zoe n bas kʋɩl-waoko. Waooda sã n nan ket bilfu, kʋɩlsa wuk n yɛsame, kooma sẽn da gũsa boogd n watame, zĩiga sẽn wɩng bala, kʋɩlsa kʋɩtame, tʋʋlga fẽbgd-b-la zãnga. Ko-yũud mii n wa legla toandba n legl-ba n kẽes moogo, n legl-ba n tɩ menes we-raoogẽ. Tema toandba, Saba leebdba nin kargda weoogã, tɩ koom sẽn na n furg la b baooda, n tẽed tɩ kʋɩl-waoka na pids b tẽebo, mik b sẽn kolge lebga teeg lemde, tẽeb loogame n bas b rãmb ne yɩɩre. Ad-y yaa woto me, maam ne yãmb sʋka, y sẽn yãend m bãaga la y sẽn yɛs ne yɩɩre. Da-bʋr la m yeel yã: «Wa-y n kõ-y kũuni, wa-y n zam-y maam y sẽn tare? Wa-y n yao m bɛya tɩ m paam n põse, wa-y n fãag-y-m pãn-tõoga soab nugẽ.» Tẽeg-y fãa n wilg mam tɩ m na sĩndi, wilg-y maam m tudugra zĩiga. Togs sɩd ka mot noor ye. Togs-y y sẽn yãend m nengẽ tɩ ya goalenga, togs-y-m m goalenga sẽn golmẽ. Yãmb bilgda y na yãe kegre m goama pʋgẽ wɛ? A ka-neng-soab goam me yaa bõe tɩ ka gom faad sobg sẽn loogd ne bala? Y na sak n bas tɩ b koos kɩɩba a sẽn ka tɛɛgd yĩnga, n bas tɩ b koos y zoa sẽn ya y zoa menga? Ade, wɩsg-y y meng n doog n ges-ma, m na saag n yag-y zirẽ bɩ? Lebg-y n wa yã la y da maan zãmb ye, bi y lebg n wa tɩ m yiis m meng yellẽ. Mam zelemde n yagd zirẽ, bɩ sɩd la m ka mi n bakd ne zirẽ-beedoo? Ninsaal vɩɩm tẽng zug yaa bõe, sã n ka yem-da-tʋʋma tʋm n baase? Beoog vẽegd-a-la tʋʋmd zugu, tɩ sẽoog wa reeg sɩpaolgo. Wala yem-daoog sẽn sesd n baood maasem, wala tʋʋm-tʋmd sẽn gũud a yaoodo, m gũume la kiuug fãa waa ne a belgre, tɩ yʋng fãa wa ne a yaamse. M sẽn lʋɩ m gãagẽ tɩ m na n gãande la m sẽn sokd m menga: «M na n yika wakat bʋgo?» Zĩig sã n sobg la a sẽn sobge, beoog ka le pʋgd ye, tɩ m gãe n zʋbsdẽ n gũud sõore. Rẽgd la karense wʋma maam, tɩ m yĩn-gãongã wukd ne meto. Mam daara zoee tʋʋlg-tʋʋlga, n yɩɩd koeer-wamde. La gĩsga sẽn taa a tɛkã, wʋgb me sɛ yã. Tẽeg-y yã, Wẽnde, tɩ m vɩɩma yaa noor pemsem la m nif kõn le teeg sũ-noog bada. Adem biig nif kõn le teeg maam ye, m loogdame la yãmb bal y ye n ket ne maam. Wala sawadg sẽn wɩlg n looge, sẽn lisa bʋg-tẽng kõn le puk ye, a kõn le kẽ a zakẽ ye, a yir dãmb kõn le sok a yell ye. Dẽ n kɩt tɩ m ka na n sĩnd ye; ba m na gomd la m sesdẽ, m na gome, m na n gom n wilg tɩ m pɛtã n wa ne m guglgu. M yaa mogra bɩ bõn-ninda sẽn be a pʋgẽ wã, tɩ y bao gũudb sẽn na n gũusd m yikr la m gãaga? M sã n yeele: «M na n paama yolsgo m gãagẽ, m debra zugu m namsgã na wooge,» y wat n yɛɛsd-m-la ne zãmbsdo. Mam sẽn tull la sãrg m menga, mam kũum n são m yĩnga vuubu. Ad-y m ya n yɛɛme, m ka na n vɩɩnd daar fãa ye. Bas-y-ma tɩ m daara loogda wa bug walem. Ninsaal pus n yaa bõe tɩ y mams-a wa bũmb sẽn pid ne yõodo, wa bũmb sẽn sek y ning-a sʋka? Y lɩkd n get-a-la yibeoog fãa, n dat n bãng a gãag sẽn yɩɩ a soaba; Y na n basame n ka le ges-ma tɩ m yãe vɩʋʋg n vel m kolkood bɩ? M sã n maana yel-wẽnde, yel-wẽnda maand-y-la bõe waare, tɩ y tar m gũusgu wĩndg la yʋngo? Bõe yĩng tɩ y nif kell n tuk maam woto? M zãab paasda yãmb zɩɩb bʋgo? Y sɩd ka tõe n bas m beegra taale, n mum y nif n kõ sugri? Bala sã n yɩ bilfu tɩ m yaa tom y na n babl n bao-m lame la rẽ tɩ m ka ket ye. A Bildad, Suwa raoa, sɩnga goama n yeele: Zoob, fo na n kell n tara yɛla toagsg woto, n gomd goam sẽn kaood sɩlmana? Wẽnd-Pãng-Soaba tõe n tedga bʋʋm? Naaba-Wẽnd tõe n bʋʋ tulma? Fo kamb sã n beeg Wẽnde, Wẽnd-Pãng-Soaba, basd-b-la ne b yel-wẽnde. Fo menga, sã n baood Wẽnde, n yõkd b sɛɛga, f sã n ya pʋ-peen-needa la nin-tɩrga, Wẽnd na gũ-f goabg la rɩtgo, n le zaoolg fo f sõmblema zugu. Fo sẽn da yɩ a soab pĩnda na n lebga zaalem sã n mak ne beoog rẽnna. Sok pĩnd dãmba, gese, sok n ges b yaab rãmba sẽn seg bũmb ninga. Tõnd dũnna kamba, tõnd nan mii bõe, d vɩɩm ka maasem bal sẽn buid tẽnga bɩ? Pĩnd dãmba na gom n wilg-fu, b pʋtẽer na yiis yelbũna. «Rudum yita yɛ tɩ ka bãoogẽ? Kʋɩlg moog tõe n bɩ tɩ koom ka beẽ? Koom ka be, kʋɩlg moog kiidame t'a nan puudẽ, a rengda a taab n kʋɩ tɩ b pa kũug-a ye.» Ad-y sẽn yĩma Wẽnnaam yell me yaa boto; nin-wẽng sẽn gãe n tẽed fãa paada sãoogo. A ra-tɛɛgdg na n kaoogame la a sẽn teega yaa sʋlg gaam-gaam. A sã n dell a roogo, tɩ roog kɩlle t'a maneg n gĩd kẽnkẽ tɩ roog lʋɩ. Sẽn ka mi a Wẽnde, wẽnda tɩɩga tɩɩga tobame n yɛs wĩndgẽ, a yɛdga a wila n lud tɩɩs a taaba. A yẽgna sʋg n kẽe kuga n kẽ n gaam kuga pẽgsẽ. Mik b sã n võog-a a sẽn da yɛsẽ wã b na wẽen tɩ tɩɩg zɩ n zĩnd be ye. Yaa woto la sẽn yĩm-b Wẽnda pʋɩɩre. Bãmb zĩigẽ tɩɩg a to n na n yi. Abada, Wẽnd ka basd nin-tɩrg kɛɛng ye, la b ka sõngd yɛl kɛga rãmb ye. Wẽnd na n le pidsa f noor ne laado, f noor na n le wuka ne kilsgu. Fo bɛɛb na sud ne yãnde, nin-wẽens rot na sarem zãnga. A Zoob leokame la ad-a sẽn yeele: Mam mi tɩ sɩd yaa woto. Adem biig na bʋ ne Wẽnd n paam bʋʋm? Fo sã n wẽed no-koeemd ne Wẽnde, fo goam yaa tusr tɩ b nan pa yaag b noor ye. B pida ne bãngr zulunga la pãnga; ãnd n tak zabr ne-ba n ka reeg toogo? B tusda tãmse n teemd zĩisi tɩ b ka mii ye, b tusd-b lame n lubd, b sũ-puur daare. Tẽnga miimda a zĩigẽ, a sẽn vigl n yɛs bũmb niyns zuta kɩldame. Wĩntoog reegda b noor n ka puk ye, tɩ ãdsa fãa tõdg yiibu. Wẽnd b ye tãa n tẽeg sa gãongã n yɛdge, la b karg n tabd mogra ko-wiisã. Ãds niyns b sẽn boond tɩ Bʋdb kukuri, susi, noaag ne a kamba, yʋʋm toadga, fãa yaa bãmb nug tʋʋmde. Bãmb nug tʋʋma sɩd labsame; b sẽn maan ka tõe n sõd n sɛ ye. Bãmb kẽnd m sɛɛgẽ me, m ka ne-b ye, b loodame la m ka tar b buk ye. B sã n dɩk bũmbu, ãnda n gɩdgde, ãnda n sokd tɩ bõe la b maanda? Wẽnd sũur sã n yiki, sikd ka ye. Mogr pʋgẽ pãn-dãmba fãa sura bãmb taoore. La woto wã mam na saag n leok bãmba? M na n bao gomd n bẽd-ba? Ba m sã n tar bʋʋm, m na n leokame tɩ bõe? M tɛk la m kos m bʋ-kaooda sugr bala. Mam bool b tɩ b sak n wa me, m kõn sak n deeg tɩ b kelga m koɛɛg ye. Bãmb sob-raadã n fãood-m n lubdẽ, n tar-m poglgo tɩ m ka wʋmd võor ye. B ka basd-m tɩ m vʋʋs ye, b sẽn tɩgs-m ne bũmb ning yaa toog ne toogo. M na bao n maan raood ne bãmba? Ka bãmb la Pãng-Naaba? M kos tɩ yella welg bʋʋdẽ, ka bãmb taoor bal la bʋʋda na n bʋ laa? Ba m tar bʋʋm me, mam noor goam bala n paalgd-m. M tags tɩ yell ka m zug me, m noorã n lɛɛgd n puk m wẽnem. La bãng yell ka m zugã, m tũuda bõe n wa bãng rẽnna? Wẽnd na laas-m ne dũnna vɩɩma! Yaa wala m sẽn yeelã: Yell sẽn ka be ned ning zugu kiida wala nin-yoogo Yel-beedo sã n tiig n lʋɩ pʋ-peen-dãmb zugu, tɩ b rigd rabeem la b kiidẽ, bãmb toogo? Nin-yood tõeeme n wa reeg tẽng n yãmbe, la sã n ka bãmb n lud bʋ-kaoodba nini, maana a wãn tɩ ya sɩɩ? Sẽn tõe n zoe-ba kõn dig m daarã n yõk ye, m daara loogame tɩ m pa yãend sũ-noog ye. M dasma salgame n looge wala b kẽe koom-kogend faase sẽn wʋg ne rudma, b looga wala sɩlg sẽn loogd ne a sẽn bri. Mam sã n yeel m menga: bas gõgnego yõgem f noore, la f la f laado, m fara rabeem yõkd-m lame; tɩ m mi tɩ y ka na n bas taal ye. Sẽn yaa a soab fãa, dẽnd m deeg tɩ maam n konge! Bõe tɩ m le yɛs n namsd m meng zaalem? M nong bɩ m so ko-yɩlgemde, m nong bɩ m nudgd m nusi ne zẽem, y na tus-m n lub begdẽ, tɩ m futa lɛɛg n wʋk-m wa waoosa. Sɩda Wẽnd ka ninsaal wa maam tɩ m tõe n wẽ no-koeemd ne bãmb ye, tɩ b naagd d yiiba fãa, bãmb ne maam, n kẽesd bʋʋd ye. Ned sã n da beẽ tõnd d yiiba sʋk n na n paas do, ned sã n beẽ sẽn na n sõng tɩ d zems taaba, a na n zãagẽ Wẽnd kaasa ne maam, la m kõn le rigẽ bãmb dabeem ye. M naan n kengẽ m sũur n gome; la rẽ sẽn ka be wã, m paada m ye ne m menga. Mam yam yaa n laka ne vɩɩma, dẽ yĩnga, m goama na n pãrame; m na n goma ne sũur sẽn sãame. M na n yeela Wẽnde: da paalg-y-m ye, wilg-y maam yãmb zabra võore. Y sũur nooma m sẽn zĩ ne yɩɩra laa? Y pa le nand y sẽn nams n yag laa? Y rat n sõnga sẽn wʋgd b zãmb sʋnda laa? Y nina ka ne n yɩɩd ninsaal dẽnd laa? Y sẽn ne tekda ninsaal nif yaadem bal laa? Yãmb vɩɩma yaa koɛɛg wa ninsaal rẽnd bɩ? Yãmb daara loogda tao tao wala ninsaal rẽnd bɩ, tɩ y baood n na n bãng mam beegrã, n sokd n na n tɩg m yel-wẽnda sẽn yɩ a soaba? Y yaool n mi vẽenega tɩ m pʋg yaa pɛɛlga, la ned sɩd ka tõe n fãag maam yãmb nugẽ? Y nus n gãd maam, n wẽoog maam, y nus n naag taab n yag-ma la b naag taab n sor-m begdẽ. Tẽeg-y tɩ yãmb sɩd yag-m-la ne yagdo la y na n le kɩtame tɩ m leb tomẽ. M sɩnga koaag-koaaga n wa lebg kɩd-kɩda. Y waa n yaool m kõ-m-la nemdo, n dɩk yĩn-gãong n yeelg-ma, n zĩnd be n kãam m yĩnga ne kõab la gĩin. Yãmb n kõ-m vɩɩm la pãnga la y gũudem tonga m yõore. Y sẽn da solg y sũurẽ wã la woto, y sẽn da wʋgd wa sʋnda la woto. Y yõka m nug laagẽ, m beegra wakato, n yet tɩ y kõn bas beegrã n ka sɩbg ye. Mam sã n maana yell kegre, m bʋko! M sã n ya nin-tɩrg me, m zug kõn doog ye, yãnd bal n tar maam, far bal n wʋm maam. M yet tɩ m yikda, y wudgd n bri-m-la wa ãbga. Y le sɩngda y tʋʋm beeda ne maam, y le yãngda y sũ-puura ne maam, y tãb-biisa zabda ne maam n deesd taaba. Bõe tɩ yãmb yiis maam m ma pʋgẽ? M sã n da kiẽ, nif kõn yãee-m ye, da na n yɩẽ-la wa m ka zĩnd ye, n yi m ma pʋgẽ n yak yaoogẽ. La yaa m daarã n tong wok-wok tẽng zug ka, bɩ bõe, tɩ y ka na n bas-ma, tɩ y ka na n yols tɩ m me paam n deem bilfu, n yaool n kul zãng-zãng m tẽngẽ, lik la kɩɩms na-tẽngẽ? Beelẽ sõor yaa ki-lika, beelẽ zĩiga pila ne kũum sõngo, beelẽ vẽenem la yʋn-sʋk lika. A Sofar, Naama daoa, n deeg goama, n yeele: Gom minem soaba pa tẽed leokr laa? Dẽ yĩnga bʋrg la gom toodo n wat ne bʋʋm bɩ? Ad-f goama pãrãrr kɩtame tɩ neba yaag b noor n kelgdẽ. Fo bee yɛ n laad neb tɩ b pa tõe n kʋɩdg-fo? Fo saag n yeelame: «M zãmsga ka pa sãoog ye, la m neeme tɩ yell ka m zug ye!» Ade, Wẽnd sã n da ratẽ goama, b sã n da yaagẽ b noore n leoke, b sã n da rat n vẽnegẽ b sẽn mi, la rẽ yaa bũmb sẽn zʋʋg ninsaal yam pãnga, f na bãngẽ tɩ Wẽnd sẽn bas taal n ka sɩbg labsa. Fo tagsdame tɩ f tõe n bãnga Wẽnde n paam b bãngra zulma tɛk wɛ, fo tagsame tɩ f tõe n bãnga Wẽnd pãnga zãng wɛ? Baad a lug n yɩɩda sagãna, fo na n maana wãna? A zulum n yɩɩda bug-tẽnga, bõe la f tõe n bãnge? A woglem yɩɩda tẽnga t'a yalem zʋʋg Mogrã. Wẽnd loogda, yalsd ka ye, b yõkda, deegd ka ye, b boond bʋʋdo, tõat ka ye. Bala Wẽnd mii zirẽ-be-rãmbã, b welgda neer la wẽng tɩ ka tũ ne toog ye, tɩ ninsaal yɩɩra yaool n menesd a yam, t'a rogma daare ninsaal ya wa burgumd bila. Fo sã n paam tɩ f yama sĩdi, fo sã n wa yɛdg la f tẽeg f nusã n tees bãmba, f sã n mik tɩ yel-yood tab-f lame, bɩ f pĩng rẽ n lob yɩɩga la f ra lɛɛg n gãe f meng rẽgdẽ ye. Woto la f na n tõog n zẽk f zug ne pʋ-peelem. Fo sũura sẽn pek ne a rẽgdã kõn kiuus rabeem ye. F fara fãa na tiig n sɛ tɩ f ka le tags a yell ye; f wat n tẽra a yelle wa koom sẽn daage. Fo vɩɩma na n yãnga wala wĩnto-sʋka, tɩ ki-lik legb wa sõor sẽn pukdi. F na n le sɩng saagre, f na le yik ne raoodo. F sẽn ne tɩ bũmb fãa le wa-la a zĩigẽ f na gãand ne laafi. Fo sã n vʋʋsdẽ, ned kõn saag n nek-f ye, f sõsd-n-taasa na le wa tigim f sɛɛgẽ. Sã n ya nin-wẽensa b yiiga b nin n zĩi n getẽ, b kõn yãend zĩig n lamdg ye, la yaa kũum bala la b zĩi n gũudẽ. A Zoob reega goama n yeele: Sɩda yãmb gomda wa wulwaalbdã, bãngr zulung na n naag-y lame n menem moogo. Ad-y mam me tara yam wa yãmba, y ka yɩɩd-m ne baa fɩ. Y sẽn lʋɩɩs bũmb niyns taoorã, mam me tõe n waa ne bãmba. Maam la y zo-rãmb laad n tuumnẽ. B laada maam tɩ m ket n teesda Wẽnd n kelemdẽ, n kelemdẽ tɩ b yaool n ka le leokd wa pĩnd ye. Nin-tɩrg la nin-sõngo la bɛɛb laado. F meng sã n ka namsde f nong n sãbsa sẽn tar-b toog la naongã. Bi-beesa yaool n gãee b zakẽ ne laafi. Sẽn boond b Wẽnd tɩ b wa tɩ b sog maoora, zĩime tɩ bũmb ka yɛɛsd-b ye; b ka teeg wẽnd a to tɩ ka b yãoog pãng ye. Modg n sok rũmsã tɩ f na paam leokre, sok yĩngr luiili wã tɩ b na zãms-fo. Gom ne tẽngã t'a na kõ-f bãngre, sok mogra zĩm tɩ b na zãms-f wʋsgo. Sɩda, bãmb sʋka ãnna n ket n zɩ tɩ sẽn maan fãa yaa Wẽnnaam nug tʋʋmde? Bõn-vɩɩl fãa vɩɩm bee bãmb nugẽ, bãmb pãng n tongd Adem biig fãa yõore. Neb maana b sɩɩlga: «Gomd nooma tʋbre, wala rɩɩb sẽn noom dasendaka. Gom minim yaa nin-kẽem bũmbu, zug sẽn pelg n tar yɛl welgre yam.» Bãngr zulung la Wẽnd ning b rɩtgo, tɩ pãng kẽnd b goabga, bãmb n so saglg la yɛla-welgre. Wẽnd sẽn sãamẽ, manegd ka ye; b sẽn pag roogẽ, pak tɩ yi soab ka ye. B tõdg b saaga, kũuni, fãa zĩi ne ware; b bas tɩ saaga ni, tẽnga fãa na n teema nenga. Pãng la minem soab la bãmba, n lekd sẽn menesda la sẽn menema. Sẽn mi a saglg lebga zʋbsa, tɩ gãeemd zomb tẽnga soaalba. Bãmb n deegd dĩm dãmba naam, bãmb wĩir n loe b sɛɛg tɩ b tat n dabd yembdo. Maan-kʋʋdba piita b neooda wã b taoore, Sẽn da pa tẽed b tekra teema zãnga. A-mi-goam rãmb yaa sɩɩ, tɩ nin-kẽems yẽesem lebg kʋʋsem. Bãmb sẽoosda na-komse, la b loota pãn-tõog rãmba sɛɛs sẽbdse. Bʋg-tẽng rãmb likã, bãmb n menesd-a, la b wata ne vẽenem lik sẽn kẽ pãf zĩig ningã. Bãmb n tõe n zẽk buudu n le lɛɛg n fabg-a tẽnga. B kɩtdame tɩ buud a ye yalge n pid tẽnga, n le maan b yam n wʋk-a n kẽng pa-weere. B sobda tẽng soaalba yam tɩ b saad likẽ n ka le mi sor ye, tɩ b babend likẽ, vẽenem sẽn kaẽ, la Wẽnd menesda b yam wa ned sẽn tɩg rãam. Ad-y m nif yãee woto fãa; tɩ m tʋbr wʋme, tɩ m yam deege. Yãmb sẽn mi bũmb ningã, mam me mii rẽ, y yama ka yɩɩd-m ye. La yaa ne Wẽnd-Pãng-Soabã la m dat n gome; mam dat n goma ne bãmb n yiis m meng yellẽ. Yãmb yẽ, yaa tã-met faado, yãmb yaa m-bũmb-ka-zabd tɩɩm kõatba. Ãnna n na n yaa n mum y noorã, tɩ y bãng yam? Yoog-y y tʋbre n kelge, tɩ m gom n yiis m meng yellẽ Bɩ y tʋba kelg m noora gomde. Yaa Wẽnd yʋʋr yĩng la y gomd n tuut neb bɩ? Yaa Wẽnd sõngr yĩng la y yelgd zirẽ-beed bɩ? Yaa Wẽnd bʋʋda sẽn yɛs bũmb ninga zugã la y wat ne y sõngra bɩ? Wẽnnaam maag b menga n vɛɛs y pʋga na zems y yĩnga? Y tẽed tɩ y na paam n la bãmb wala y sẽn laad ninsaala? Ad-y b na waa n zab ne yã tɩ y soos n kẽe a zagl n bas a zagla. Wẽnd ziira ka yɛɛsd yãmba? B ka kẽesd yãmb dabeem? Y sẽn gãd bũmb ning n tarẽ wã yaa tompɛglem bala, y sẽn dat n lill bũmb ning n paam n goma, yaa tãnd la boll bala. Bɩ y sĩnd y noor marsã tɩ maam n na n gome: sẽn na n yɩ a soaba, bɩ yɩ! Ba sã n na n tũu ne m yõore, mam me na gãd m sẽn gãde. M mii vẽenega tɩ b na n kʋ-m lame, põasg ka ye. Baasgo, bãmb taoore m na gom n wilg m bʋʋma sẽn beẽ. Dẽ meng n na n wa ne m fãagre, tɩ m ka tarẽ pʋ-peelem m kõn sak n kolg bãmb ye. Kelg-y, kelg-y mam goama, wʋm-y m sẽn na n togs bũmb ninga võore. Ade, mam kosame tɩ b kẽes-m bʋʋdo, la m miime tɩ maam n na n paam bʋʋm! Ãnna soaba n na n yɩ m bʋʋd-n-taaga? M sã n kong bʋʋm, m saka m na n sĩndi, m na ki menga. M Wẽnnaama zãag-m ne bũmb a yiib bala, tɩ m kõn bao n le solg m meng yãmb taoor ye. Zãag-y-m ne y sɩbgr buud fãa. Da yɛɛs-y-ma, da kẽes-y-m dabeem ye. Sɩng-y bʋʋdo, tɩ m na yãe koɛɛg n leoke; la ma me sã n gome, bɩ y leok-ma. M beega naoor a wãna? M yel-wẽna sõor yaa a wãna? Wilg-y y noor m sẽn tõdge, wilg-y m sẽn kong ne bũmb ninga. Bõe tɩ y solgd y nenga? Bõe tɩ y get-m wa y bɛyã? Y na yɛs n gũusd vãoog sobg sẽn laande, la y rigd mo-paoko? Y na wɩɩg n kao m bʋʋda toaag-toaaga n le kẽesd sʋka beegr sẽn beeg al m yãadmẽ? Bõe tɩ yãmb n dat n sog m nao rabõanga, Bõe tɩ y baood n bãng m sẽn mand fãa, n pʋgd n dɩgsd m nao-kẽndre? Mam vɩɩma ka besd n sʋʋgd a toore, wa yõgdr sẽn sʋgd daoogo, bɩ bugd sẽn kʋʋd fuugu bal bɩ? Pag biig vɩɩm yaa koɛɛga, tɩ pɛt baas n wʋmd-a. Ninsaala, yaa puugu, a wekdame n wẽneg n lʋɩ, fãa loogda wa maasem, n ka yɛs n kaoosdẽ ye. La yaa bõn-yaalg a woto la y puk y nif n getẽ; maam la yãmb tar n wat bʋʋd y taoore? La ãnna n tõe n yiis neer wẽng pʋgẽ? Ned ba a ye. Yãmb zoe n sõda ninsaal daare, n yals a kiisa fãa sõore, t'a kell n sɩd ka tõe n yõsge daar ning y sẽn sõd n kõ-a ye. Bi y wẽnemd y neng n loog la y bas-a. Bas-y ninsaal t'a pemse; t'a vʋʋs wa tʋʋm-tʋmda, a vʋʋsg daare. Sã n ya tɩɩga, a tara a saagre, kɛɛgd-a lame t'a le lɛɛg n tobe, n tobd n ka yɛɛdẽ ye. A yẽgna ye n paam n kʋʋl b bokẽ; ba a sɛɛga sã n sɩng kʋɩɩbo, a sã n le paam tɩ koom madg-a, a le tara tobr bala, a le tobda vãad wa tɩ polle. Ninsaal sã n ki, a loogame. Ninsaal sã n ki a rigda yɛ? Mogra koom wat n yõbgame, kooma wat n fẽbga kʋɩlgẽ, n le wa pid n daale. Ninsaal ka kiid n le tõog n yik a gãagẽ ye; a kõn lebg a nugu, a kõn nek a gãgẽ n tãag sa-gãongã sẽn wat n pilg n looge. Kato! M paamẽ lame tɩ y solg-m bokẽ tɩ m sor be n gũud y sũura sigbu, tɩ y wa yãk daare n le wa tẽeg m yelle. La ay! Ninsaal sã n ki ka sɛ wɛɛ? M tɛk la m tʋm m tʋʋma, tɩ ned a to wa led m zĩigẽ. Tõe tɩ y toog le wa zĩnd ne y sẽn naane, la ad-y sẽn bool-m daar ning fãa, m na n sakame. Dũnna yãmb sõta m nao-yakma, Tõe tɩ beoog bɩ y ra le gũus m beegr ye Y tõe n baoo waooga waoog sẽn ya taoko n solg m kongrã, y na tõog n sɩd maan wa y ka yãe bũmbu? M neeme tɩ tãng meng baasdame n sirgi, tɩ pĩig meng bilim n serg a zĩigẽ, koom meng wat n baas n pedsa kuga, tɩ sa-koom kãagd tãndo, n tuud bogdo, woto me la ninsaal wat n miki t'a sẽn gãe n tẽed bũmb ningã, a tẽeba wat n menema zãnga. Yãmb wat n koms-a lame t'a looge, y wat n menesa a neerma n dig-a n kẽes weoogo. B yõdg n pẽgd a kamba, a kõn bãng ye, b yõdg n sãbsd a kamba, a zɩ ye. A sẽn yãet toog ningã n namsd-a, a sẽn yãbd yaa a meng bala. A Elifaz, Tema raoã, goama ne a Zoob: Gom vɩɩd ka be yẽesem ye, yẽesem soab goam ka faad wa fo rẽnna ye. Gom faad na wa ne bʋʋm? Gom pererr ka zaalem sɩda? F wat n gom n kõo Wẽnd bɛɛba bʋʋm b ka wat n le ne fo tẽeba sẽn sog bũmb ning ye. Yɛl yooda f sẽn maana n pirsd foom tɩ f gome, la lebga f gom bal n wilg tɩ f mii goama. La fo meng noorã n ningd-f taale, ka maam ye; fo zelemd bala n paagld-f bʋʋdo. Dẽ yĩnga fo la a Adem, n deng fãa n wa moog laa? Fo renga kunkubã fãa n wa dũni laa? Fo zĩnd n kelga Wẽnd yẽsgo n tẽed tɩ foo bal la mita? Fo mii bõe tɩ tõnd zɩ? Yel-bʋg võor la fo wʋmda tɩ wẽnd yell sãamga? Ad neb kẽer n be tõnd sʋka n tar bãngre, ad neb sẽn kʋʋle n yɩɩd fo ba menga n be ka. Tõnd sẽn maasd-f sũur ne Wẽnd saglsã n ka noom-foo? Tõnd sẽn bʋk d sũuri n gomd ne fooma n ka ta f yam? Bõe tɩ fo bas f sũur tɩ fõta, bõe tɩ f kamsdẽ, tɩ d wa kẽ f tãpẽ? Bõe tɩ f wuk ne Wẽnde, n zĩ ne sũ-toogo, bõe tɩ f goama ya pererr n ka sɛtẽ? Ninsaal sõmblem be-la a yɛ? Pag biig tũuda yɛ n yɩ nin-tɩrga? Ne b sõsd-n-taasa menga, Wẽnnaam pʋg ka peel ye, bãmb nifẽ yĩngri dãmba meng ket n ka sõma ye. Tɩ b ka gomd ninsaal, bõn-zʋklgo la zʋg yoog soaba, sẽn dɩk wẽnem tɩ lebg a koom t'a yũuda. Kelg ka tɩ m wilg-fu. Mam dat n togs-f-la m nif sẽn yãende. M dat n togs-f-la kʋdem dãmba sẽn wilg n pa solge b sẽn wilg tɩ yaa b ba rãmb nengẽ la b zãms yã, tɩ yaa Wẽnd sẽn kõ b rãmb tẽnga pipi wã, yaa bãmb dãmb nengẽ la b paam yã, dẽ tɩ sãan ba a ye nan ka wa naag bãmb ye, yaa wakat kãng la b wʋm yã. Ade, nin-wẽng vɩɩm yaa namsg wakat buud fãa, ba Wẽnd sã n pʋlem-a-la yõ-woko, a na n wʋma kaasgo a zak pʋgẽ. A sẽn pa tẽed wakat ningã, laafi wakato la a bɛ na n yik zabre ne-a. A pa tẽed t'a na yi a likẽ wã ye, t'a zoe n nee sʋʋg sẽn luund a zugu. A saad n na n baoo rɩɩbo, la yɛ la a na n teese? A mii bũmb ning sẽn gũud-a: a kũuma raare. Rigb la yɩɩre na n yɛɛs-a lame, toog la pɛt sũu taab a zug wala dĩm sẽn kaoog a tãpo. La rẽ yaa a sẽn sak n tees Wẽnnaam nug gilgu; yaa a sẽn zẽk a zug ne Wẽnd-Pãng-Soabã. A ra sɩd fõrd n kẽed-b lame, n yet t'a boba a kut gãondo. La rẽ yaa a sẽn nobe t'a nenga pɩnd ne kaam, t'a lʋga fãa yɛdge. A tɩ yãee tẽng b sẽn wã t'a kẽ n yãmbe; a ra kẽeda ro-põaasa, sẽn besd n dʋʋgdẽ. A ka na n legb rakãagr ye, a paoong fãa sɛta bõra. A maasem kõn bui tẽng yɛs ye. A kõn zãag ne lik abada. A wẽnegda wa tɩɩga, bugum n na n kʋɩɩs a vã-miinim, tɩ sobg fãra a puudu. A ra teeg a zãmba ye t'a na n tudga a menga, tɩ zãmb n na n yao zãmbo. Dẽ fãa na n waame tɩ wakat nan ka ta ye, la a vãoog buug kõn le tob ye. Wala bugsuntungu, a kamba na n sʋʋga kãse, wala oliviye tɩɩga, a puuda na n sʋʋga zãnga. Sɩd sɩda nin-wẽng buud yaa bu-kɩɩnga, Nin-yoog zaka, bugum n dit-a zãng buga. Sẽn tʋta wẽnem pʋga, dogda yel-beed biiga. A biigã n na n lɛɛg n kʋ-a. A Zoob yeelame: Naoor a wãna la m kelg goam faad a woto. Sã n ya neb sẽn dat n maas m sũur koees la woto, sũur maagr nan ka ye. Y sẽn leok-m-la woto: «F goam faada sɛɛme?» N le paas yɛsa: «Ãnda n modg-foom tɩ f gome?» Y sã n da beẽ la m zĩigẽ tɩ mam beẽ y zĩigẽ, m me ra na gomẽ wa yãmba, la m me na tãoosẽ daoodo, m me ra na gomẽ ne tɩtaam. M me ra na gomẽ n keng y sũuri, la m goam minima na sõogẽ y sũura kaam. Mam sã n gomda, m namsga ka woogd ye, m sĩndri me, bõe n na n loog ne-a? Marsã wã yaa n looga toogo. N-ye! M yagsa fãa wɩlg n bas-m lame. Kʋʋlma kell n bẽesa m diira ne a wãka, tɩ m faagra ya kaset sẽn naag n mongd-m bʋʋm, n mongd m bʋʋm tɩ Wẽnd bɛ bal la b zãad woto. N-ye! M bɛ wã baood-m-la ne sũ-puuri n na n tõs zɛrma, a yẽna kẽrsdame n dat n yĩ-m, m bɛ wã nin gẽend-m lame. A yaaga a noor n tees-ma, n tʋʋsd-m la a laand-m pegse, neba fãa sũu taab n na n yẽeg-ma. N-yẽe, Wẽnd n bas maam bi-yaalg nugẽ, bãmb n bas maam nin-wẽens nugẽ! M da zĩi ne laafi tɩ b wa miim-m wa tɩɩga; n gãd m kãare n kaoog m yubla, n yals-m tɩ tãbda rãmb tar-m tãoobo. Pɛɛma tão-m lame n gilgi, b pooda m lʋga, n pa zoet m nimbãaneg ye, m yama pusgame n daag m sãoorẽ. B kõsa m yĩnga n põ yaare, b wudg n kẽe-maam wala tãb-biiga. Sũ-pa-noang fuuga ka le yeegdẽ ye, la dĩira yuga tom. M yãbame tɩ m nina fãa mooge, m nina vẽbsd n paasdame. M yaool n ka maan ned pãn-tõog ye, la m kosga ra ket n tũuda sore. Bɩ tẽnga ra yũ m zɩɩma ye, bɩ m kɛlenga sãde, n sãde. Yĩngri m tara m kaset soaba, m tara ned sẽn na n wa yals m poorẽ. M vɩɩma kaset soab la sẽn bɛɛ yĩngrã la bãmb la m tees n gomd tɩ m nintãm dʋʋgdẽ Bɩ sẽn na n sõnga maam n zab ne Wẽndã, a wa sõng-m wa Adem biig sẽn sõngd a to. La kato! A kaoosda, tɩ m yʋʋma yaool n sõd n dɩg, tɩ m zoe n dɩk ra-babs-sore. M vʋʋsma tulgame, m wĩndga lʋɩtame, m yao-tuudba zoe n wa sɩngame. Neb n zoe n wa yaand maam, b wẽnema kɩtame tɩ m bao gõeem n konge. Wẽnde, bɩ yãmb lʋɩ taoore, n yɩ m Fãagda. Ãnda n na n kẽ m tãpẽ sã n ka yãmba? M zo-rãmba ka le mi b sẽn maand ye. Da bas-y tɩ b tẽ tɩ bãmb n maan daood ye. B ra wẽneg wa b sẽn togsd kibarẽ tɩ ned n bool a zo-rãmb n kõ-b rɩɩbo, t'a kamb yaool n gũ b rẽn n ka yãend bũmb ye. M lebga bɛɛb laado. M yʋʋr ka pʋt tɩ ned ka yɛɛs ye. Mam nina mumda ne pɛta, tɩ m yĩnga wils pãng sɛ zãnga. Nin-tɩrg yãeta woto t'a pɛleng yɩke, sũ-tɩrg soab puugda a sũur ne nin-wẽnga. Pʋ-peelem soab kell n tall a vɩɩm sõngo; la nug sẽn ka mi-a wẽng fãa kell n maan daoodo. Aya, bɩ y fãa wa tedg tɩ d gese! M kõn yãend ned sẽn mi gũusg yãmb sʋk ye. Mam wakat zoe n loogame, m sẽn da baood wa fãa-fãa wã me tũ n yɩkame. B yeetame tɩ yʋng la wĩntoogo, wĩndg sã n wa lʋɩtẽ b gomdame tɩ sõor n pukdi. Bõe la m ket n zĩ n saagdẽ? Bʋg-tẽng la m zĩiga. Yaa likẽ la m tʋɩ m gãaga. M boonda yaooga tɩ m ba n boond mogda tɩ m ma bɩ m tão. M sẽn da gãe n saagdẽ wã kẽe yɛ? Ãnda nif n le ne-a? A na n lisa bug-tẽnga, al tẽngr tẽngre. Yaa tom-pʋlempʋkẽ la d fãa na n lagem n gãande. A Bildad, Suwa daoa, deega goama n yeele: Yãmb na n yaa n sĩnda da-bʋre? Yaas-y n tags-y. Dẽ poore tõnd n na n gome. Bõe tɩ d na n bas tɩ b bool-d tɩ neb sẽn ka yam? Bõe tɩ f mams tõndo, Zoob, wa neb sẽn ka tõe n wʋm bũmb võore? Fo sũurã sẽn fõog la fudugd woto wã, fo ratame tɩ nin-yend yĩnga, bɩ tẽnga fãa wa lebg zĩ-peen-daaga, tɩ pĩisa bilim n teem zĩis laa? Nin-wẽng vẽenem sobdame, a bug-toaalga ka tog n le wid ye. A roog lebgda lika, a fitila sẽn da wit a zugẽ wã kiida tama. A da kẽndame t'a nao kida limsd taaba, marsã a kẽnd n lamsdame. Bẽdgo n koomd a nao, la yaa bẽdga wĩ wã la a tabd n kẽnda. Bẽdga na n gaaga a nao-kãsen-kãarã, wĩira na n loe-a-la ra-long-sore. Wĩir n maneg n gãneg tẽnga n maneg n solg bokẽ, a sora zugu. Pɛlen-yɩk n tar-a, n pʋgd-a a sẽn dabd zĩig ning fãa. Yẽ sẽn da ket n wɩɩd ne pãnga, ad kom sẽn gãneg-a tẽnga tɩ nimbãaneg lebg a pak-n-taaga, a na kɩt t'a lelem a yĩn-gãongo. La tẽn-kũum sẽn ya toaaga n yɩɩd a taaba, n wat n vel-a. B na n yiisa nin-wẽng a roog maasmẽ n vuu-a, n tɩ kɩs a yɛɛsgo naaba. A le ka so a roog ye, tɩ neb na n deeg n kẽ, b na n dɩka kidibri n yugl a vẽenema gilli. Tɩɩga na n kʋɩ-la a yẽgnẽ t'a wil be yĩngri n kaoodẽ. Tẽnga fãa gilli yĩma a yelle, t'a yʋʋr kell n menem zãnga. B yiis-a-la vẽenemẽ n tɩ lob likẽ, b yiis-a-la zamaana rãmb sʋka. Yẽ n ka roagda, yẽ n ka yagenga nin-vɩɩg ka kell a zakẽ ye. A baasga wẽnema yɩka nin-taoor dãmb pɛlenga, n yaand yaang rãmb sũuri, tɩ b gomda: «Sẽn kees a ka-zoet-Wẽnd-nif zakẽ la woto, zak ning sẽn ka mi Wẽnda sẽn lebg la boto!» A Zoob le reega goama n yeele: Da-bʋre la yãmb na n yaa n bas m namsgo la y bas-m taal ningri ne y goama? Yãmb sẽn tʋʋs maam woto ka be sõor ye, y sẽn tar maam n yaanẽ wã yãnd ka tar yã? Ba sã n ya sɩd tɩ m tudgame, m tudugra pakẽ la maam bala. Y sã n dat n lʋɩɩs y mens taoore la y lebs m poorẽ, y sã n zabd-m bũmb sẽn ningd m yãnd poorẽ, bãng-y tɩ yaa Wẽnd n maan-m pãnga, Wẽnd n tilg-m ne b zulunga. M sã n kelem tɩ yaa pãn-tõog la Wẽnd maan-ma, kɩɩsd ka ye. M bool bʋʋd me, bʋ-kaood ka ye. B gɩdga m sor tɩ m da loog ye, lik la b kẽes m soy wã zutu. B wobga m ziira fãa, n fõk m naam pugl n bas-ma. B sãama m yell zĩig fãa n bas-m ne kũum bala; b võoga m saagre wala tɩɩga. B sũurã puuga ne maam tɩ b get maam wala b bɛyã. B tãb-biisã sũu taab n wa, b tuka b sore n tãag maam n gũbg m zaka n sege. Wẽnd zãaga m saam-biisa ne maam, tɩ m sõsd-n-taasã gind-m wa sãana. M yags ne m tũud-n-taas wɩlgame, m gãa-soaben-dãmb yĩma m yelle. Mam lebga sãana m zak neb la m kom-pugli taoore, n legb ned b sẽn zɩ n yãende. M boola m dakõore, la a ka sak ye, la m meng m toor n yaool n yet t'a wa. M noora vʋʋsma yaanda m paga sũuri, m lebga waoosa m kamb yĩnga. Kom-bõonesa meng pursda maam, mam sã n yɛsẽ b tara m wɩdga. M zĩnd-n-taasa fãa lebga beem ne maam, ba m zo-rãmba wẽneg n kis-m lame. M kõaba yii n dʋra yɩnga, m no-gãonga vɛɛgame n bas m yẽna yɩnga. M zo-rãmba, kũm-y-ma, zoe-y m nimbãanega, tɩ yaa Wẽnd nug n maan-m woto. Bõe yĩnga la y na n togs Wẽnd n zab ne maam? M yĩnga la y rɩt n pa tɩgd bɩ bõe? M sẽn nongẽ yaa b gʋlsẽ m goama n gʋls-b ne kɩtga kugr zugu! N gʋls-b pĩig zugu n lɛɛg n gãneg namdo, tɩ ra yẽes lɛlɛ. Mam miime tɩ m fãagda vɩ ne yõore, b na n tik n yika tẽn-peelma zug, yaoolem daarã. M yĩn-gãongã sã n wa tõose yaa ne m nin la m na n ges Wẽnde. Yaa maam n na n tall b nenga gesgo, mam menga! M nif sẽn na n teeg a soabã kõn yɩ sãan m yĩng ye; la m sũura tʋll-b-la wa fãa-fãa. Y sã n yeele: «Namsg bʋg la d na n namsa t'a gom tɩ d paam n kẽes-a bʋʋdo?» Wakat kãng bɩ y mens maan sʋʋga rabeem, tɩ Wẽnd sɩbgda beem kʋdg ne sʋʋga, la rẽ me n wilgd-y tɩ Wẽnd bʋʋd na n kaoome. A Sofar, Naama daoa, n deeg gomdã n yeele: M tagsame la m dat n leok-f lame, m yãgdame n na n yiis m sẽn mi. Gomd la m wʋm yã, sẽn yɩ m tʋʋre, la ad-m yama sẽn kõt-m tɩ m leoke. Fo zɩ tɩ al zamaan woko, Wẽnd sẽn ning ninsaal tẽng zug tɛka, fo zɩ tɩ nin-wẽng zu-noog kõn yɩ woko? Nin-wẽng sũ-noog ka longd daar ye. Ba a zuga woglem tõkd saaga, ba a zug sɩɩsd sa-gãongã, a na menema wa rẽgdo, b kõn le bao a zĩig ye, tɩ sẽn da mi-a sokdẽ: «A kẽe yɛ?» A menemda wala zãmsdo, ãnd n na n le yãend-a? A sẽn yɩ pɩʋla, tɛk la tɛka. Nif sẽn minem a yãeebo kõn le yãend-a ye, a zaka meng ka mi a sẽn tɩ solgẽ ye. Na yɩ modgr ne a kamba tɩ b lek naong rãmb sãoogo, a meng nus n na n vaag n kõ a taaba. Ba a yĩnga kõabã nan ket n kegmẽ, n ket n kegmẽ wala bi-bɩɩg rẽnna, fãa naagdame n bus tomẽ. Wẽng da yaa wa sɩɩd a noorẽ, dẽ la a ra wukda a kokoɛ n mogsd a noosma, n ka tol n vʋʋsdẽ ye, mik a rɩɩba na n põoga a pʋgẽ, n lebg wag-toaag zẽnem. Lebga modgr tɩ laoga sẽn da wʋk n sama, yiis n pʋɩ. Wẽnd na kɩtame t'a wʋk-a. Yaa põeer zẽnem la a ra mogsd n venda, põeerã noor n na n lɛɛg n kʋ-a. A nif kõn le yãend kʋɩlsa ye, a kõn le yãend a kʋɩlsa sẽn fõt ne sɩɩd la bĩisim ye. A sẽn paam n ka tõe vel la a wʋkda, a sẽn leeb n paama fãa, a kõn dɩ b yõod ye. A sẽn wẽg naong rãmba la a pa ges b yellã, a sẽn zãgs meebo n zuud dot n kẽedẽ wã, a pʋga sẽn sak yão-beed yĩnga, a laog ba a ye kõn põs ye. Bũmb ba a ye sẽn da ka põsd a velma a sũ-nooga kõn kaoos ye, t'a meng n vel fãa vugri. Tɩgr wẽnde, kom na n kẽe a zaka, nimbãan-neba nus na n naaga taab n kud-a. A sẽn ket n baood n na n pids a pʋga wakato, la Wẽnd sũura na n fudg ne-a. Sũura sẽn fudg n daagã n na n wẽneg n waag-a. Yaa kut zab-teoog la a zoet n na n põse, yaa zũud tãp n na n lub-a. A takda pĩima n feoog a lʋgrẽ, la pĩima sẽn yi sãoorẽ wã lebga waood la rigbu. Lik na n yãmba a rooga pẽgs zãnga, Bugum n dɩt-a t'a yaool n ka ne a tugund ye; sẽn pa a rooga pʋg fãa lebga bõne. Yĩngr dãmba puka a beegrã, tɩ tẽng zug rãmb yik ne-a. A rooga sẽn da pid ne paoong ninga fãa loogame, wala koom sẽn fãood ne pãnga n tees a teesgo. Ade, Wẽnd donda nin-wẽng fãa woto, woto la pʋɩɩr a sẽn paamd Wẽnd nengẽ. A Zoob gomame n yeele: Kelg yã, kelg-y mam goama, sak-y woto tɩ y na maas m sũuri. Yaas-y tɩ m togs y koɛɛg a yembr bala, m sã n gom n sɛ, y na yaool n yaal-ma. M sẽn zabdã, yaa ne ned bɩ? Dẽ yĩnga, bõe la m na n maan yãgbo? Wẽnemd-y n ges-ma, y pɛleng na yɩke, la y na mobg y noore. Mam menga sã n mi n tagse, m yɛɛsdame, m yĩnga fãa rigdame. Bõe yĩng tɩ nin-wẽnsã ket n vɩ ne yõore? Yaa waa b sã n kʋʋnẽ la b pãnga paasda. Bãmb yagensa paamda pãng b nifẽ, b kamb sõor paasdame tɩ b zĩi n sõta. Bãmb zags gãee ne laafi tɩ rabeem ka ye, Naaba-Wẽnd sãbsga gind-b lame. B lols tara rogem pãnga tɩ b nag-yãans rogd wa bʋʋse. B basda b kom-bõonese tɩ b zoet n kɩdemd wa pe-bi, tɩ b kamb yɩgd n tiisd n saood b saooga. B wẽeda gãngãado la b kʋnde, n peebd b wɩɩse, n kɩdemd sũ-noogo. Bãmb daar loogdame tɩ b ket n zĩ ne sũ-noogo, la b na n wa siga bʋg-tẽnga ne laafi. Bãmb n yaool n da yeel Wẽnde: «Zãag-y ne tõndo! Y soya tũudem ka noom tõnd ye. Wẽnd-Pãng-Soaba yaa ãnda tɩ tõnd na n wõgemd b taoore, d pʋʋsd-b lame n dok yõod bʋgo?» Gese, ne b sẽn basd Wẽnd kɛɛngã, b sũur baas n pida ne sũ-noogo. Ka naoor wʋsg la nin-wẽensa fitil kiida tɩ yel-beed lʋɩt b zugu, tɩ Wẽnd sũur puugd ne b ye. Bãng-y tɩ kãab wẽng n be b zugu: «B yɩ wa moogo sobg sẽn dɩkde, la ka-fɩɩb sɩlmand sẽn tʋke!» B maana yelbũndi tɩ biig reegda a ba sɩbgre. La ba wã sã n deegdẽ a rẽnd ka são? B kɩt t'a yãend a meng wãabo, t'a lemb Wẽnd-Pãng-Soaba sũ-puur dãam! A raara sã n wa ta t'a looge, a toog be ne a yira sẽn na n yõdg n lebg a soaba? Ãnda n tar yam n na n peng Wẽnde, n na n peng sẽn daaga zɩɩm fãa bʋ-kaooda? Yõa soab loogda a bi-bɩɩlemẽ, ne sũ-noog la laafi, t'a lʋg zɩs ne kaam, t'a kõab pid ne sɩɩlem. Kũum wa n mika yõa soab ne sũ-toogo, a waa n mika ned sẽn zɩ n lemb sũ-noogo. Bãmb b yiib fãa naaga taab tomẽ, la b mogda sẽn dɩt-ba zem taaba ne toolem. Ade, mam mii yãmb sũur tagsgo, m mii y sẽn bilgd m poorẽ. Y sokda woto: «Dakãagra yir lebga wãna? Fãadba sẽn da nok roog ninga bɛɛ?» Sok-y so-toagdbã, wʋm-y b goama võore! Tẽn-kũum daare nin-wẽng põsdame, Wẽnd sũ-fõora raare, b baooda zĩig n solg-a. Ãn n na n sak n wilg-a a kongre, ãnd n lebsd-a a tʋʋm kɛga yaoodo? B yãagd-a-la yaadẽ, b gũuda a yaoogo t'a ra sirg ye. Tẽnga na n maaga a yĩnga, neba fãa n na n yãag-a a gãagẽ, la yãagdba sak n yii wʋsgo. B ka tõe n sõd n sɛ ye. Woto wã, f leokra maanda wãn n maag sũuri? Y goama pʋs n wʋga ne bõe sã n ka zirẽ-beedo? A Elifaz, Tema daoa, n wa ne a leokre: M sok n gese sẽn pida ne raooda sõngda Wẽnd wãn wãna? Ninsaal bãngr zulunga nafda ãnda sã n ka a meng bala. Pãng soab a Wẽnd toog bee ne fo sõmblema? Bõe la f paasd Wẽnd ne f zʋga tekre? B yɛɛsda-foom n na n gom n yiis b meng yellẽ bɩ? Foo n na n lebg b bʋʋd-n-taag bɩ? Sã n ya sɩda, f tʋʋm dẽgda labsa. F yɛl kɛga ka tar tɛk ye. Fo ra reesda boabla f saam-biisa nengẽ, fo reesa b fut n bas-b tɩ b kẽnd bɩlma. Ko-yũud sẽn tar a soaba kõn paam koom f nengẽ ye, kom sẽn tar b rãmba, fo mongd-b-la rɩɩbo. Fo sẽn tar pãngã, fo n da so tẽngã, Wẽnd sẽn maan-f zu-noogo, f reega tẽngã n yãmbe. Pʋg-kõapa waa fo bõsgo tɩ fo kʋls-b zaalem, la kɩɩb-bi wã nus yɛɛ ne f tʋʋma. Yaa rẽ yĩnga la b karg bẽdgo n gilgi-fu, tɩ f mi n yik n tar digbu. Wakat ninga yaa lika, tɩ fo ka le neẽ ye, wakat ninga yaa ko-kẽeng n loogd ne-fo. Ade, Zoob, yaa woto la f tagsda: Wẽnd ka tʋg n be al sagãnẽ wã bɩ? Ges ãdsa zĩiga sẽn zãr ne tõndo. Bãmb sẽn tɩ be yĩngrã la f yeel yã: «Wẽnd mii bõe, b nif tõe n yãe sẽn be sawad-sablga poor sɩda? Bala sawatã tagma wʋsgo n lut b nini. Yaa saaga sẽn karg n gilga bal la b ne.» Fo rat n tũu kʋdem-wẽnnẽ sorã, sor ninga nin-wẽng fãa sẽn da tũuda laa? Bãng tɩ b looga ne-ba tɩ b daar nan pa ta ye, b ra zaoolga b meng ko-zoetem zugu. Bãmb sɩd da gomda ne Wẽnd woto: «Zãag y ne tõndo.» B goma woto n tẽed tɩ Wẽnd-Pãng-Soaba ka tõe n maan-b bũmb ye. Maam, a Elifaz ka tõe n sak bada tɩ nin-wẽnsa gom wa b sẽn gomda ye, tɩ Wẽnd n da yaool n pids nin-wẽnsa zagsã ne sũ-noogo, B yik n zãag ne b zirẽ-be-goama! Nin-tɩrsã na n kɩdma sũ-noogo b lʋɩɩsa yĩnga. Pʋ-peelem soab na n laa bãmb n yetẽ: «D bɛɛba konga pãnga bugum n dɩ b paoongã tẽma!» Maneg f yell ne Wẽnde, tɩ sɛ, woto f sũur na le yɩ noogo. Kok b zãmsga sẽn yit b noorẽ, deeg b koees n ning f sũurẽ. Fo sã n lɛɛg n le kẽ Naaba-Wẽnde, la f kɩt tɩ zãmb buud fãa zãag ne f zaka, na zemse. Tɩ lob f sãnem gila tomẽ, lob Ofir sãnem gila kʋɩlga koomẽ. Naaba-Wẽnd na lebg sãnem neere fo yĩnga, n lebg wanzurf baoor fo yĩnga. Dẽ la Naaba-Wẽnd na n pids-f ne sũ-noogo. Dẽ me la f na n doog f nenga n ges Wẽnd-Pãng-Soaba. F sã n bõs-ba, b na reeg f kosgo, tɩ fo me tũ rẽ n pids f pʋlengo. Fo sẽn sed fãa na baas neere, la f sor na yɩ vẽenega f taoore. Neb kẽer sã n bas raoodo, f na tõog n yeel-ba: «Yik-y!» Bãmb n doogd neng fãa sẽn sũuri. Ba yell sẽn be b rãmb zuga na n paama fãagre. B nug sẽn pa rat sɩbgrã n na n wa ne tɩlgre. A Zoob gomame n yeele: M modgame n na n sɛɛs m yãbrã mik m yãngd-a lame n paasdẽ. M sã n da miẽ Naaba-Wẽnd sẽn beẽ wã m na maanẽ m sẽn na n maanega n paam n ta b zaoorẽ wã. Bãmb taoore m na togsẽ m koɛɛga, m noora na bãng a sẽn na n togsẽ. M na bãng b sẽn na gomẽ n leok-ma, la m na wʋmẽ b goama võore. B leoba na yɩẽ zabr sɩda? Ayo! B maagdẽ la b meng n kelg-ma. B na mikẽ tɩ b bʋʋd-n-taaga yaa nin-tɩrg menga, m na gomẽ n yiis m meng yellẽ. Bʋko! M ka mi b sẽn beẽ ye. Yaanga, b ka beelẽ ye. Nin-taoore, m ka yãet-b be ye. B tʋmda b tʋʋma nug goabga, m ka ne-b be ye, B solga b meng nug rɩtgo, dẽ la zãng zãnga. Wẽnd yẽ yaool n mii sor ning m sẽn dɩke, b sã n los maam b boaagẽ, m na yi yɩlgemde wa sãnem. Mam zẽka m naoore n sagl bãmb dẽnnẽ, m tũu bãmb sorã n ka bʋdg moog ye, m deega b noore la m pa salg n lʋɩ ye. M lebsa m meng poorẽ n tũ bãmb raabã. La bãmb sẽn pa gird n le gõmsã, ãnda n na n lek-ba? B yamleoog la b tũuda. Bʋʋda b sẽn bʋ wã n yɛse, m dẽnna wala m taaba bʋʋd ka teemd ye. Dẽ n kɩt tɩ mam yɛɛsd bãmb taoore, m sã n tags fãa b rabeem kẽed-m lame. M raooda booga Wẽnd taoore, Pãng-Soaba yaool n maana m sẽn da pa tẽede tɩ b ka põsg-m me ne lika sẽn wat me, b pa menes-ma tɩ lik nan ka yãmb zĩig ye. Bõe tɩ Naaba-Wẽnd ka kees daar n bĩngi, yɛla sẽn na n puk nin-sõma nifẽ daare? Nin-sõma wã toaag kuga la nin-wẽnsa wat n teeme, wagdem dũms la kẽer deegd n teesd yamd zĩiga, tɩ kẽer loogd ne kɩɩb-bil bõanga, tɩ pʋg-kõor naaf tat n tɩ kɩt bobelle. Koms rãmba rigdame n yiis sorẽ, lebga tẽnga nimbãan-dãmba zoe n soond zãnga. B lebga wa burguma sẽn be we-raoogẽ, tɩ b sãt beoog n sɩng rɩɩb gẽesgo, yaa pʋ-weesã n na n dɩlg b kamba. A ka-neng-rãmb n na tɩ wʋr rũmsa yamdo, pʋtẽ, bãmb n na n tõs nin-wẽnsa bugsuntundu, la yʋngo b gãe bɩlgemde tɩ b ka tar fuug ye, yaa waoodo, la b pa tar fu-goabg ye. Tãmsa zut sa-mina-mina yʋgemda b fut, la rot ka ye, tɩ b kong n kẽed pĩis bogdẽ. Kɩɩb bila tõsgda a ma bĩisrẽ, naong soab bobenda a fu-goabga tɩ b yaool n sak n peng-a bũmbu. B kɩtdame t'a kẽnd a bɩlgemd waare, b zɩlgd-a-la ka-gĩna t'a yaool n kẽnd ne pʋ-vɩʋʋgo, b tãngd-a-la ne oliviye biis sĩm-bila t'a wõt b kaam, ka rẽ bɩ a yɛs rã-rʋgd sʋka tɩ ko-yũud kʋʋd-a. Tẽnga pʋgẽ b wʋmda yãbre, sẽn pogl b rãmba kũsga sãtame, la Wẽnnaam ka kũmd b nimbãaneg ye. Sẽn maand-b wẽnga kisa vẽenem, vẽenem sor ka bãmb sor ye, b pa tagd be ye. Zĩig sobg yã, tɩ nin-kʋʋd yiki, n na n kʋ naong soaba la nimbãan-neda, yʋng taame t'a na n tʋm wagdem tʋʋma. Ra-taag me teega zĩ-sobdo, la a gomda a yamẽ: «Ned kõn yãend-m ye.» A takda peende n pil a nenga. Yaa likẽ la wagdr pood roto. Wĩntoogo a ka yit a roogẽ ye, a ka mi meng tɩ sõor yẽegame ye. Bãmb fãa gill yamẽ wã, sõora la yel-beedo, sẽn ta b yam yaa yʋngã la tʋʋm-beedã b sẽn tʋmna. Yãmb yetame: «Tao tao tɩ koom peega nin-wẽnsã n looge, tɩ b tẽng lebg ka bark tẽnga. Ned kõn le yi t'a rabda a bugsuntungẽ ye. Wala wĩndg sẽn boog waooda tẽnsẽ kooma, koom sẽn gũs wa ka-neema, yaa woto la nin-wẽnsa na n boog tɩ bʋg-tẽng yaag a noor vel-ba. B ma na yĩm b yelle la b na lebg mogd dɩ-noogo. Ned kõn le tẽeg b yell ye. Yaa wa b tiig n kʋʋsa tɩ-wẽnga wila. Nim bãmba yikd n namsa paga, a sẽn ka rogd yĩnga, tɩ bãmba rãmb ka kũmd pʋg-kõor ye. La ade, Wẽnd pãnga tõe n looga ne pãn-dãmba, b yikda ne bãmba tɩ b wẽneg n menem moogo. Wẽnd mi n bas-b lame tɩ b tẽed tɩ bũmb kõn tol n maan-b ye. Mik b nif ket n geta b sẽn tʋmde. Wat n yaa wala b na n le rooga b nenga, mik nenga na n le sulga wala puug sẽn zelgde, n wãk wala ka-zug sʋʋg sẽn kẽbge.» Ad-y m sẽn togsã n ya sɩda n yɩɩd y rẽnna. Da le bool-y-m tɩ pʋ-yags ye! Ãnda n na n tõog n lub-m ne a goama? Suwa daoa, a Bildad, reega goama n yeele: Sẽn kõta yĩngr dãmb laafi wã, yaa dĩm sẽn kẽesd rabeem. Wẽnd tãb-biisa sõor ka tɛk ye, b wĩndga vẽenema paoogda ãnd dãmba? Adem biig yɩta a wãn n bʋ ne Wẽnde n paam bʋʋm tɩ Wẽnd konge? Pag-biig maanda a wãna n kẽes a meng pʋ-peen-neba sʋka? Bãmb nifẽ kiuug peelem yaa zaalem, b geta ãds wa rẽgd bala. Wala bõe marsã la b na n ges ninsaala? Adem biig ka zũnzũur bala? A Zoob n gome n yeele: Yaa ninsaal la f rat n sõng bɩ? F rat n sõnga ned sẽn ka tar yõnofre bɩ? Ad foo n mi ninsaal, a ka yam, saglgo, ad foo n mi bãngr pʋdgre! La fo goama gomda ne ãnd dãmba, yɛ la f paam bãngrã sẽn yit f noorẽ wã? Yeel tɩ yaa Wẽnd-Pãng-Soaba nengẽ. Ad yaa bog-zulunga pʋga, bok sẽn zulme n yɩɩd mogre, n yɩɩd mogra sẽn bĩng a pʋgẽ teeda zĩig ningã, ad yaa be la kɩɩmsa gãe n digd. Bũmb ka lud bʋg-tẽnga t'a yɛdg n dɩg Wẽnd taoore, la a noora me ka lud bũmb, bãmb nifẽ ye. Yaa Wẽnd n yɛdg, vɩʋʋgẽ, yĩngr saasã, bãmb zãnegẽ la b sagl tẽnga tɩ yẽ me luund vɩʋʋgẽ. Bãmb n tigsd kooma sawatẽ, t'a be be n ka niid yaar ye. B yɛdga sawadgo n lud kiuuga tɩ b pa tõe n yãend-a ye. Vẽenema la lika toaagẽ la b ning kooma koaka. Bũmb niyns sẽn zãad saaga miimdame, Wẽnd sã n tãse b rigdame. Wẽnd pãnga sigsa mogrã rãamde, b yama sɛɛsa ko-wiiga pãnga. B nor pemsem fʋʋsa saagã n pɩɩs-a. B tẽega b rɩtg kanga n kõs rũm-bãnde, a Leviatã. D mii vẽenega tɩ d bãngr paooda, yaa b tʋʋma sẽn lʋɩ d nifẽ bilf bal la woto, b pãn-tʋʋma marsã, ãnna n tõe n bilg-ba a yamẽ? A Zoob kell n yõka goama n yeele: Ne Naaba-Wẽnd sẽn mong maam bʋʋma, ne Wẽnd-Pãng-Soaba b sẽn kɩte tɩ m vɩɩma lebg miisg tag-tagã, mam sã n ket n vʋʋsd ne yõore, Wẽnd vʋʋsem sã n ket n kẽed m yõ-bogdẽ, m wẽend tɩ m noor kõn togs sẽn tõe tudg m to ye, tɩ zirẽ-beed kõn yɩ m gomd ye. Bɩ yell pak-ma, m sã n ka pids m sẽn kãabã! Al n wa tãag m kũum, m na kell n tall m pʋ-peelem. M gãda m pʋ-peelma la m kõn bas-a abada, m sẽn ges m vɩɩma, yãnd ka tar-m ye. Bɩ m bɛyã deeg nin-wẽns dolbo, tɩ m zabd-n-taaga ra põs kʋʋdba sɩbgr ye. Yãmb meng n gomd woto: «Toog-sẽn-ka be-a-ne-Wẽnda soab saagda bõe, Wẽnd sã n deeg a vɩɩm? B na n wʋma a kɛlengã yel-beeda sã n wa tiig n lʋɩ a zugu bɩ? Maan zood ne Wẽnda sã n da yɩẽ la noogo ne-a, a na yõkẽ b sɛɛg wakat buud fãa.» M wilg-y lame n puk Wẽnd tõogã, sẽn be Wẽnd-Pãng-Soaba sũurẽ, m ka na n solg-y bũmb ye. Wala yãmb meng sẽn ne wã, m zo-rãmba, bõe tɩ y goama fãa ya gom faado? Ad Wẽnd sẽn segl nin-wẽng yĩnga, ad pʋɩɩr ning a sẽn deegd Pãng Soaba nengẽ: «A kamb sõor sẽn ya a soab fãa, sʋʋg n kʋʋd-ba, a yagens na n konga rɩɩbo. Sẽn põs-b kom la sʋʋga, bã-longdem n loogd ne-ba, la a pʋg-kõap kõn yãb-a ye. A samd wanzurf wa bĩisri, n samd futa wa yagd sẽn samd a yagdo, yaa nin-sõng n wat yeelg futã. Sã n ya wanzurfã, sẽn ka mi a zãmbo n soogd-a. A roogã, yaa nadga la a me n kõ a menga, yaa pʋʋg roog la a tɩ n kõ a menga. Ka tar pãng ye. A kẽeda a gãagẽ ne ligdi la a kõn yik a gãagẽ ye. A puk a nini a kõn yãend fɩ. Rabeem la yɛɛsgo n fãood-a wa kʋɩlg ko-ralem. Yʋng a ye, sɩlmande n loogd ne-a. Yaang sob-tʋʋlga n zẽkd-a n looge, yaang sobg n võogd-a a zĩigẽ. Yẽ bal la ned kam fãa kʋɩɩs a sũur n tãoodẽ, t'a baood n na n põs tãoodba pɛɛm. A bɛɛba kɩdemda a lʋɩɩse, a zaka rãmb meng n lɛɛg n kis-a lame.» Zĩis ka kongd sẽn na n tu bogdo n vaag wanzurf ye, sãnem yɩlgr zĩis ka baood n ka yãend ye. Kut tuuda tãngẽ n vaage, zũud yẽnegda kuga n sɩlge. B widigda bugum n gaas tẽngã n zulgi, n ta zĩ-likẽ n buk kug sabla. B zãagda neba sẽn kẽedẽ wã n wedg bogdo, zĩig ninga so-loaadba sẽn ka tatẽ wã, la boka pʋg la neb lengd wĩ zutu. Tẽnga sẽn dɩlgd ninsaalã la bugum dɩ n sãam fãa. Yaa kuga pʋg la b yiisd kug neeba, kẽeg yom, yaa bãmb zomẽ la b yãet sãnem. Sɩlsa ka yãend so-kãens n dɩk ye, wɩbsa nif pa seg-b ye. We-rũng naoor nan ka tab-b ye, bõnyẽeg zɩ n pɩʋʋg be ye. Ninsaal zaba ne pĩ-kegemde. Ninsaal wura tãmse n tãag b seese. B weeda pĩisi, n tuk soy, bɛd la bõonego la sẽn be yõod fãa ninsaal nif yãend-a lame. B kʋɩɩsda kʋɩls ko-nini, n yiisd sẽn da solg wĩndga. La m na sok n gese, bãngr pidung yãeta yɛ? Yam sẽn pid yam zak tii yɛɛlẽ? Ninsaal ka mi a yõod saagr ye, a ka be nin-vɩɩs sʋk ye. Bʋg-tẽng yetame: «A ka be m nengẽ ye.» Tɩ mogr me yeele: «A ka be m pʋgẽ ye.» A ka tõe n tek ne sãnem gilgu ye. Ka magd wanzurfu n da-a ye. Ofir sãnem ka tõe n dɩk n mak-a ye, tɩ b pa gomd kug neeba buud toɛ-toɛ ye. A yõod ka tek sãnem la nin-gɛtg rẽnd ye, a pa tek sãnem laok sẽn tekẽ ye, tɩ b pa gomd kug-neeb la bõn-neeb a taab ye. Yam pidung baoob n são miuzãan neeba. Nubi kug moam neeba yaa zaalem, sãnem yõod yaa bilf a taoore. La m sok n gese bãngr pidung yita yɛ? Yam sẽn pid yam yãeta yɛ? Nin-vɩɩg nif pa segd-a ye, yĩngr luiili pa yãet-a ye. Bʋg-tenga, kɩɩmkulgu rãmba yetame: «A kibar bal n lʋɩ d tʋbrẽ.» Wẽnnaam b yembre bala n bãng a sore, la a menga sẽn beẽ. Yɩɩ wakat ninga b sẽn sulg n ges dũni wã zãnga, n ges bũmb ning fãa sẽn be saaga tẽngre, n na n sigs sobda pãnga, la b yãk toaag n kõ kooma. Yɩɩ wakat ning b sẽn wilg saagã a niib sasa la b tuk sor n kõ sawadga ne a bʋ-raasã. Yɩɩ wakat kãng la b yãend yã la b pẽg yam pidungu, wakat kãng la a bas tɩ b yãenda a sẽn tõe bũmb ninga. B yaool n yeela ninsaalba: «Soaala nif zoeese la bãngr sẽn pid bãngre, la yam sẽn pid yam la zãag f meng ne wẽnga.» A Zoob le paasa gomde; ad-a sẽn yeele: Ãnna n na n sõng-m tɩ m le yãend kiis niyns sẽn loogã? Daar niynsi Wẽnnaam sẽn da kogend maama, b fitila sẽn waa n wit mam zugẽ, tɩ m kẽnd yʋngo ne a vẽenema, wala m sẽn da yaa a soaba m zĩ-lik paallẽ, Wẽnd zooda maasem sẽn waa n buid m doogã, Wẽnd-Pãng-Soaba sẽn waa n da ket n be ne maam tɩ m kom-dibli wã ra gũbg-ma, bũmb da ka paoog-m ye, bĩisim ka paooge, kaam ka paoog-m ye. M sã n da yit tẽnga noorẽ, mam sã n da rɩgl m goeele tigsga zĩigẽ, kom-bɩɩba sã n da yãend maam, b loogdame, tɩ nin-kẽemsã yik n yɛs yĩngri, m taoore. Tẽnga kãsem-dãmba basda b goama, n dɩk b nus n pĩ b noore. Nanamsa koeesa ra gĩtame, tɩ b zɛlma tabend b dasendagsẽ. Tʋbr ninga fãa sẽn wʋm m goama da boond-m lame tɩ zu-noog soaba, nifr ninga sẽn yãenda maam ra pẽgdame. M da fãagda naong soab sẽn kot m sõngre, n paas kɩɩb bil sẽn ka tar teegda. Sẽn kiid-ba kãab nooda ra lʋɩta m zugu, la m da kõta pʋg-kõap sũ-noogo. M da yera sõmblem wa m fuugu, zemsgo n da ya m fuyorgo la m zu-vindga. M da lebga zoeensa nini, n lebg wobs karse. M da yaa nimbãan-dãmba ba, maam n da wegsd sãan yɛla n fãagd-a bʋʋd zĩigẽ. M da kaooda sẽn dat-b n wãb b taaba yẽna, m da yaagda b noorã n gʋsg b sẽn da yõke. M da yeta m menga: «M sã n wa kiid m gãagẽ, badaar la m na n le wẽneg n vʋʋge wa tɩɩga. Kooma na ta tɩɩga yẽgna, yʋngo, menem na madg a vãado. M yʋʋra na le tus ne pãn-paalg n sãde, la m nugẽ, m tãpa na le rõos a gĩindi.» Ned kam fãa ra maagda a meng n kelgdẽ. Ned kam fãa da reegda m saglgo. M sã n da gom n sɛ, ned ka le yaagd a noor ye, b fãa da reegda m goama a yembr-yembre. B ra gũuda m leokr wa b sẽn gũud saaga, wa b sẽn gũud sigr saag sẽn kaoosd niibu. M da yõgemda m noor ne-ba, la b ra pa tẽed-m ne rẽ ye, la b ra kokda ne sũ-noogo, bũmb ning fãa sẽn ya kaseto tɩ m ket n dat-b-la ne neere. M da zĩi wa naaba n wilgd-b sore, m da zaoo wa rĩma, m tãb-biis sʋka, m tʋʋmd yaa sũ-sãang sẽn tar b rãmba belsgo. Ade, marsã mam lebga kom-bõoneg laado, kamb sẽn ka mi b kẽem waoogr ye. Pĩnda m yaool n da pa get b ba rãmba wa neb sẽn zem baasã m sẽn wubd m zakẽ wã ye. Yõod bʋg la m da na n dokẽ ne b nusa tʋʋmde ne neb sẽn da zĩ wa b kiime? B mensa ra kʋɩɩme, nimbãaneg la kom yĩnga, weooga la b ra pɩkda n baood n na n kõ b noore, la weooga me la sẽn pid ne kom la fare. Vãad sẽn ya yamsem-yamsem la b ra gẽemd tuuda sɛɛsẽ, b da rɩlgda mens ne kʋɩlgen-bengdo. B yiisa bãmb Adem biis sʋka, n kaas-ba tɩ b yaa wagda. Tãmsa pɛlẽ la b ra baood zĩis n na n soonde, n soond tẽnga bɩ pĩisa bogdẽ. B bee tuuda pʋgẽ n yãbda, b tɩ samda taab gõosa tẽngre, n wẽnd gãeemse, neb sẽn ka tar yʋʋre, b sẽn dig n yiis tẽnga pʋg ne rasaba. Marsã, maam la b yɩɩn n laadẽ, maam n lebg b baobgo. B kis-m lame la b zãagda ne maam, b yɛsa m taoore n tar m nenga sẽnesg bala. Wẽnd sika m tãpa wĩiri, la b tusa maam n lubi, la mam taoore bũmb ka be b sẽn ka maand ye. M dɩtgo, b ka tɛk ye, b gũuga m nao tɩ m lʋɩ, b tuka b sor n ta m sẽn beẽ n na n kʋ-m. B kell n gũbga maam n seg zãnga, b baooda m yõor yãkre, la rẽ ka bũmb sẽn ya toog ne b ye. B wedga m lalg n kẽedẽ, n tusd taaba a tãnda zugu. Dabeem buud fãa lebg n kẽe maam, tɩ m daooda tũ rẽ n loog wala sobg n dɩk-a, tɩ m yĩn-maasma loog wala sawadgo. Marsã mam vɩɩma salgda m pʋgẽ n menemdẽ, yaa namsgo daare n vẽeg m yĩnga, n yẽeg-ma. Yʋngo, toog tara m kõaba n podẽ, m yĩnga tara wɩngre n ka maagdẽ ye. Wẽnd gãda m fuuga ne pãnga, la yaa wa m fuuga loore n tiig n lebg sẽk n sãrd-ma. Yaa begdẽ la b lobd-ma, m lebga wubsgu la tompɛglem. Mam zẽka m koɛɛg n boond yãmba, la y pa leokd-m ye, m yɛsa y taoore tɩ ya wa y nina pa ne-m ye. Yãmb lebga nin-kʋʋd m yĩnga, tɩ y nugã ne a keelma wẽoogd-m. Yãmb tũnuga maam y sobgo, tɩ y saaga na n ni n boog-ma. M sɩd miime tɩ y le rat n kẽes-m-la kũum soolmẽ, tɩ bõn-vɩɩl fãa rigda be. Sã n ya sɩda, nuga sã n zẽk n sɛ, ba b rãmba kaasda, sɛɛga yõkr ka le tar võor ye. Sẽn yãbd b rãmbã, m naaga bãmb n yãbe, m sã n ne nimbãan-ned fãa, yaa tɩlɛ tɩ m kũm-a. M da tẽeda sũ-noogo n mik sũ-sãang n wa, m da tẽeda vẽenem, la lik n wa n yãmbe. Mam pʋga roog gudgda wakat buud fãa, beoog sẽn vẽeg fãa yaa namsg la a wat n kõt-m. M yĩnga gãong tekame tɩ m kẽnda, la ka wĩndgã n yõog-m ye. Tigsga zĩigẽ, dẽn m yik n yals n wese. Mam lebga we-baas sõsd-n-taaga, mam tũud-n-taas yaa na-neoondo. Mam yĩnga gãonga sobdame n dʋʋgdẽ, M yĩnga kõab fãa digimda waoodo. M kʋnda wãagda kʋʋr yɩɩla tɩ m wɩɩga wiisd ne kʋ-yãbdbã. Mam da kaoola ne m nini, tɩ m kõn ges pa-kul ye. Kaẽ boto, bõe la m na n gũẽ Pãng-Soaba-Wẽnd sẽn bee yĩngra nengẽ? Wala y sẽn gomd n yetẽ tɩ pɛt bala la nin-wẽng segda, la zu-beed bal la b tʋk n kẽnda, Wẽnd ne tɩ mam nengẽ wã ka boto ye. Naaba-Wẽnd mi m vɩɩma sẽn yaa a soaba, b tara m buka, b sõta m nao-yakma fãa. M ka rɩk zirẽ-beed sor ye! M naoor ka tall-m ne yãgbo n tees zãmb zĩigẽ ye. Bɩ b meng wa bʋ m bʋʋdo bãmb meng na reeg tɩ m pida ne pʋ-peelem. Mam sã n bas so-tɩrga n bʋt moogo, m nif sã n belg-m lame tɩ m sũur baood wẽnga, rẽgd sã n dẽgma m nusã, bɩ Wẽnd kɩt tɩ m sẽn bʋd m pʋʋgẽ yɩ ned a to rɩɩbo, la b võ m sẽn sela fãa gilli! M sũura sã n tʋlga paga, al tɩ m tɩ yals m yak zak noor n gũ-a, bɩ mam meng paga kẽ neere n wer ned a to yĩnga, tɩ rapa a taaba pʋg-a. M maan dẽ, m tʋmẽ la kegre wakat kãnga, n togẽ tɩ paalg-m bʋʋdo. M naan n widgẽ bugum t'a rɩ-m zãnga, ali n loog n dɩ m paoonga gilli. Mam sã n maana no-koeemde ne m dakõapa n tol n mong bi-ribla bɩ bi-pugla b sẽn da tog n paame, Wẽnd bʋʋda raare, m maanda wãna? Bãmb sã n sokd võore, m leokdame tɩ bõe? Sẽn naana maam m ma pʋgẽ wã, n naan bãmb me. Yaa Wẽnd a ye tãa n yag tõnd d ma pʋgẽ. Daar bɩ y tagse tɩ naong rãmb kos-m-la bũmbu tɩ m zãgse, tɩ pʋg-kõor gũ-la m sõngre t'a nin wa yiigi; tɩ m dɩ m dɩɩb m yembre, n ka yãk n kõ kɩɩb bil ye. La ayoo! Al m yãadmẽ, kɩɩb bila bɩɩ m zakẽ wala a ba sɛɛgẽ. Al m yãadmẽ m yɩɩ pʋg-kõor so-sõng wilgda. Daar bɩ y tagse tɩ m yãee naong soab t'a ka tar fuugu, la nimbãan-neda t'a ka tar fu-goabga, tɩ mam ka modg t'a pʋʋs m barka, a sɛɛg sẽn paam fuug yĩnga, fuug sẽn wʋg ne pe-kõbdo n tõe n yiis waoodo. Daar bɩ y tagse tɩ m teesa m nug-bil kɩɩb bil, bʋʋd zĩigẽ, m mi tɩ bʋʋdb a taaba na n maana wa maam, bada! Sã n ya boto, bɩ Wẽnd fãsg m kangã m bãokẽ, bɩ m nug sũk m kãntɩɩgẽ. M digda rabeem wʋsg ne Wẽnd sɩbgre; m maanda wãn n yaas b ziira taoore. M sã n da teeg sãnema, m sã n yeel sãnem yullã: «Foo la m fãa-fãa,» m sã n da ningẽ m sũ-noog m arzɛk sẽn waooga pʋgẽ, arzɛk ninga mam sẽn tʋm n paama pʋgẽ, m sã yãenda wĩndga t'a tãoosd a vẽenem, n yãend kiuug t'a pelgda, tɩ m sũur soos n yeel t'a wẽnd puk yã, tɩ m zẽk m nug n waoog-a, dẽ na yɩẽ yell kegr bʋ-kaooda sẽn sɩbgde, tɩ rẽ yaẽ la yĩngr Wẽnda kɩɩsgo. M pa tẽed tɩ m bɛyã paama bõne tɩ mam kɩdem a bõna yĩnga, tɩ m noog m sũur yel-beeda sẽn lʋɩ a zuga yĩnga ye, tɩ m zɩ n bas m noor t'a kãab wẽnga, m zɩ n kãab m bɛ kũum ye. M zak rãmb ka mi n gomd woto sɩda: «Ãnna soab n ka paam nemd a nengẽ n wãb n tɩge?» Ba vugr menga sãan ka wa m yir n gãand yɩng ye, so-toagd mikda m zaka noore tɩ pak yã. Mam yɩta wãna n maan wa Adem biisã n solg ned m yell kegre, n solg m beegrã m pʋgẽ? M maan dẽ fãa, yɩtẽ la neb goam dabeem sẽn tar-m yĩnga, yɩtẽ la m sẽn zoet neba sãbsgo yĩnga; tɩ m na n kong n sĩnd m noor la m pa rat n yi m zakẽ. M yaoolem koɛɛg la woto: M yãeta yɛɛlẽ ned sẽn na n kelg-ma? Bɩ Pãng-Soaba wa leoke! Sã n kella m bɛ wã sẽn sõdg yɛl niyns toor-toorã, m na rɩk-ba n palg m bãoko, m na rɩka n maan m faong rĩ-tɛɛgdga. Yaa Pãng-Soaba la m na n wilg n kẽnda sẽn yɩ a Soaba, bãmb la m na seg ne zu-zẽkre! M pʋʋga koaadba sã n yika zabr ne maam, sẽn bʋd-ba la sẽn ko-ba sã n ninga nintãm, tɩ m sɛɛsa b pãnga n yaool n ka yao-b ye, bɩ a tõdg kood wombo n yi gõose, bɩ a tõdg ki wekre n wek lamzʋʋdo. La woto me n baasd a Zoob goama. Neb a tãabã makame n kong n sĩnd b noor n bas a Zoob, bala a Zoob da tagsdame t'a yaa nin-tɩrga. La ade, a Barakeyɛl biig a Eliyu, Buz tẽng neda, a Ram doogẽ, kolga a Zoob ne sũ-puuri, a sẽn da gomd wala a sɩda yɩɩda Wẽnd dẽnna. A ra puuga a sũur ne a Zoob zo-rãmb a tãabã la rẽ yaa b sẽn ka tõog n leok a Zoob neere, tɩ lebg wala Wẽnd n sɩd ka bʋʋma. Bãmb sẽn wa n tar goama a Eliyu da maag a meng n sĩnd a noore, bala yẽ n da yaa bãmb fãa yao-zʋʋga; la yẽ sẽn wa n mik tɩ bãmba ka le tõe n leok a Zoob tɩ fɩ, a sũura puugame. Dẽ la yẽ menga, a Eliyu, a Barakeyɛl, Buz daoa biiga, sɩng goam n yeele: Mam yẽ sɩd ket n paoodame, la yãmb yaa nin-kẽemse. Dẽ yĩng la mam da zoet dabeem, n da ka rat n wilg yãmb m sẽn mi ye. Mam da yeelame: «Kãsem dãmba n na n gome, yʋʋm sẽn waoogẽ dãmbã n na n puk sɩda.» La sã n ya sɩda, bũmb a to la ninsaal paamda, Ninsaal paamda Wẽnd-Pãng-Soaba yam n lebg mita. Yʋʋm ka wat ne yam ye, leb n ka kʋʋlem n wat ne sẽn ya tɩrg bãngr ye. Woto wã, m na n kos-y lame tɩ y kelg maam: tɩ m dat n wilga mam me sẽn mi. Sẽn ta marsã, m da teega yãmb goama pãnga, n da yoog m tʋbre n kelgd yãmb wilgrã, n kelgd ned kam fãa sẽn leokd a Zoob to-to. Mam sɩd da kʋmba m menga n kelgd-y neere, la bʋko! M yãeeme tɩ ned ba a ye ka leok a Zoob ye, ned ba a ye ka tõog n leok n koms a goama pãng ye. Bɩ y da le yeele: «Tõnd n tar yam: tɩ ka ninsaala, yaa Wẽnd bal n tõe n gom n lub-a.» Ad-y yẽ gomd ba a ye ka gomd sẽn tar yõod m yĩng ye, la mam me pa rat n leok-a wa y sẽn leok-a wã ye. Yãmb kell n yɛsa woto sɩɩ, n ka leokdẽ ye n ka tõog n yiis gomd y noorẽ ye. M yaas n gũume la y sẽn ka le gomdã, tɩ y zuka y sẽn da tar fãa y yãmẽ, leokrã, yaa maam n na n leok m dẽnna, m me na wilg m sẽn mi. Mam yẽ ka tõe n kong sẽn na n togs ye, m bãngr zulunga n tusd-m tɩ m gome. M pʋgẽ wã yaa wa bũmb sẽn wuk n dat n pusgi, yaa wa rãam sẽn wukd ko-wao-paalle t'a rat n pusgi. La m sã n paam n gome m vʋʋsga na lebg naana, m na yaag m noor n sɩng ned kam fãa leobo. Mam kõn gom n sõng ned ba a ye ye; m kõn gom n bao n noog ned ba a ye sũur ye. M pʋs n ka mi belg ned n noog a sũur ye, m pʋs n maan dẽ m Naanda na wẽneg n yãk m yõore. Zoob, maag f meng n kelg m goama, yoog f tʋbre n kelg m toagsgã. M yaagda m noore, tɩ m zelemd leebd m goama. M sũ-tɩrga koɛɛg la m na n yiisi, la m noor na n togsa sɩd bala. Wẽnd n fʋʋs b pemsem m yõorẽ, Pãng-Soaba maasmẽ la m vɩ. Fo sã n tõe, bɩ f leok-ma, segl f menga n gũ-ma. Gese, maam ne foom yaa bũmb a ye, Wẽnd taoore, b yiisa maam tãndẽ wa foom. Woto wã f ka tog bas tɩ m goama yɛɛs-fo, bɩ n tẽ tɩ m baood n na wilg-f-la m pãng ye. Fo n gom tɩ m tʋbr wʋme, f koɛɛga rãamd ket n tat-m lame, la f ra yetame: «Mam yaa sõng zãnga, m ka yɩ tõat ye yel-wẽnd ka m zug ye, ne rẽ fãa Wẽnd baooda yɛla n dogend m zugu, la b get maam wa bɛyã. B balga m naoor ne kutu, m pa tõe nang bũmb tɩ b ka bãng ye.» La zĩ-kãnga wã m na yeele, Zoob, tɩ f konga bʋʋm. Bala Wẽnd yɩɩda ninsaala, la b na yɛs n wẽed no-koeemd ne ninsaal, sɩda? Bõe yĩng tɩ fo maand zabr ne-ba n yet tɩ b pa leokd b sẽn sok-b bũmb ningã, n yaool n mi tɩ ka modgr tɩ b wilg b sẽn maande? Wẽnnaam bẽta yell dũnna n gome, n bẽd yell a to n gom beoogo, la rẽ pa wat neba yamẽ ye. Tõe n bẽda ne yʋng zãmsdo bɩ likri, yaamsa sã n mii n lub ninsaalbã. Wakat kãnga, b watame n gomd ninsaal tʋbrẽ, n wilg vẽenega b sẽn dat t'a gũus ne bũmb ninga, sẽn na n yɩlẽ tɩ ninsaal bas a tʋʋm wẽna, tɩ sẽn maana raooda me tuub a wilg-m-mengã. Woto a zãagda a meng ne yaoogo, la a zãag a vɩɩm ne kãna sẽn wat ne kũum. Wakat ninga b demsda ninsaala n gãneg-a t'a gãe n bẽedẽ, tɩ tooga sãag n kẽ a kõaba, tɩ rɩɩb sã n ta a noorẽ bɩ a rat n wʋke, t'a yam lak ne a rɩ-noodo. A yĩnga kʋɩtame tɩ b neẽ, t'a kõaba sẽn da busã, sãd n dʋr yɩnga. Wakat kãng la a kẽnd n yegd a yaoogo, wakat kãng la b bas-a nin-kʋʋdba nusẽ. Wakat kãnga, a sã n paam tɩ malɛk yaas a sɛɛgẽ, ned sẽn tũus neb tusr sʋka, n tõe n taas-a Wẽnd koɛɛga neere, la a wilg-a a tʋʋm-pakre, a sã n paam t'a zoe a nimbãanega n yeel a: «Da bas-y t'a sig yaoogẽ, tɩ m paama a vɩɩma rondo n na n kɩse,» a yĩnga lebd n bʋkame, n lebg wa a sẽn da yaa a soaba a bi-bɩɩlmẽ. A na n pʋʋsa Wẽnnaam sẽn nong-a n kelem sũ-noog a sẽn ne b nengã, neng ning sẽn kõt ninsaal sõmblema. A tara yɩɩn-kãnga n yɩɩn neba taoore: «Mam da maana yel-wẽnd n bʋdg moogo, la Wẽnd ka sɩbg-m wala m sẽn da tog ne ye Bãmb fãaga m sɩɩga ne kũum, la m vɩɩma na n le koka b vẽenem.» Ade, wã fãa la Wẽnd tʋmda, naoor a yi, naoor a tã, ninsaal yĩnga, sẽn na n yɩlẽ t'a tɩlg kũum, tɩ nin-vɩɩs vẽenem bui-a. Zoob, maag f meng neere n kelg maam, sĩnd f noore tɩ m na n le goma me yɛsa. Fo sã n tara koɛɛga n na n gome bɩ f gome tɩ m dɩ f sõmblema kaseto, sã n ka rẽ bi f sĩnd n kelg maam, sĩnd f noore tɩ m zãms f yam sẽn pid yam. A Eliyu le gomame n yeele: Sã n ya ne yãmba, yẽesem dãmba, kelg-y m goama; yãmba, mitba, bi y yoog y tʋbre n kelge. Sɩda, yaa tʋbre n mi gomd noom, wala zelemd sẽn mi rɩɩb noosem. D lagem taaba n ges sẽn be neere. D ges ne taaba sẽn ya sõmbo. Kelg-y a Zoob sẽn gomd t'a tara bʋʋma, tɩ Wẽnd ket n ningd-a taalã, tɩ Wẽnd bʋʋda ka tũud sorã, tɩ b pogl-a lame t'a rat n ki, la yell ka a zugu ye, a ka beeg ye. Pʋs n yaa bõe ned la nin-kãnga? Fo leokd-a-la bũmb t'a lɛɛg n yaal-fo la yaoolga ka toe ne-a ye. A naaga nin-wẽnsã n dɩk so-yɛnga nin-wẽnsa la a tũud-n-taase. Sɩda yẽ n be tẽngr n gomda: «Zems f vɩɩma ne Wẽnd daabã ka kõt ninsaal fɩ.» Bɩ y kelg-ma, sẽn tar-b yama rãmba, Wẽnd zãra ne wẽnga. Wẽnd-Pãng-Soaba zãr ne wʋg yell kegre. Bãmb n dond ninsaal tʋʋma yõodo, n dond ned kam fãa wala a manesem sẽn tog ne. Sɩd sɩda, Wẽnd ka tʋmd wẽng abada, Naaba-Wẽnd ka basd sɩd t'a golem ye. M sok n gese: ned a to n gũnug bãmb tẽngã laa? Ned a to ka kos bãmb tɩ b ges dũni wã yell koe! B sã n da tagsdẽ b meng yell bala, n yõk pemsma ninsaalba sẽn vʋʋsde, nin-vɩɩs fãa kõn naagẽ taab n ki. Ninsaal fãa kõn lebgẽ tẽng tom. Zoob, f sã n tara yɛla wõore bɩ f modg n kelg-ma, kelg la f wʋm m sẽn na n togs-fo. Wẽnd sã n ka tũudẽ zemsgo b na tõogẽ n zãẽ dũni wã bɩ? Fo na saag n mong bʋʋd tɩrsa soab bʋʋm bɩ? Bãmb bal n tõe n yeel dĩma: «Ad-f ka võor ye,» bãmb n tõe n yeel dĩm biisi: «Y sẽn mi yaa zɩɩm daagr bala.» Wẽnd pa ges n welg bãmb toor ye bãmb nengẽ arzɛk soab pa yɩɩd naong soab ye, b yiiba fãa ya bãmb nug n naane. Vugri bala zĩig sobgdame tɩ kũum deeg tẽng n yãmbe, tẽnga wat n wulumdame n kʋ a soaalba. B tusda naaba ne a pãn-tõogã n lebs kɛɛnga, tɩ rẽ ka tũ ne toog ye. Wẽnd neng ka lakd ne ninsaal ye, b dɩkda a nao kẽndra gilli, n mi a tʋʋma. Lik ka be n ya lika n sãamd yãeebo, n sãamd tʋʋm wẽna yãeeb ye. Ka modgr tɩ Wẽnd bool bʋʋdo, tɩ ninsaal wẽnema tõog n puk b nifẽ ye. B ka sokd la b sik pãn-dãmbã la b bao ned a to n ning b zĩigẽ ye. La yaa b sẽn mi ned kam fãa manesem; yʋn yɛng bala tɩ b sik-ba tɩ neb fẽd-ba. B reegda b wẽnema sɩbgr neba fãa taoore. Nin-kãens da wẽnemda b kãare n tees bãmba; n maand wa b ka mi Wẽnd sẽn dat tɩ b maan ye. La woto b kɩtame t'a ka-neng-soaba la a nug-pa-zãad soaba kong n kelem Wẽnde, la nin-koam kɛleng ka paad n ka lʋɩ b tʋbrẽ ye. La Wẽnd sã n da maanẽ wala b toog ka be, ãnda n na n ning-b taale? B sã n solg b nenga, ãnda n na n yãend-ba? B tõe n dɩka tẽnga naam, n kõ dĩm yoogo, n kõ na-yaalga, la sẽn maanda pãn-tõog bala. D mak wala ned n yik n yeel Wẽnde: «M namsame n dol m beegrã, m kõn le paas beoog ye, wa-y y toore n wilg-ma m sẽn bas b rãmb n ka sõdgã la m tuuba fãa gilli. M kõn le paas ye.» Foom a Zoob, fo tagsdame tɩ bõe fo tagsdame tɩ Wẽnd na sɩbg a soab bɩ? Gome, wilg f sẽn tagsde, foo n so yella welgre, ka maam ye! Ad-y yẽesem dãmba fãa, yam sẽn puk b rãmba fãa, na naag maam n yɩ zelemd a ye. D na n naaga taab n yeele: «A Zoob ka mi a sẽn gomd ye, t'a goama ka gomd tɩ tũudẽ ye. A sã n gomd n sõngd nin-wẽnse, bɩ a kell n tall boto. D na yãend tɩ beegr a to n wat n paas a sẽn zẽk a zug ne Wẽndã, t'a na n sɩnga Wẽnd tʋʋr la b sãbsgo, la a na n kɩtame tɩ d maand sãmb-sãmbe, n maand sãmb-sãmb ne Wẽnde.» A Eliyu n kell n tall goama: M ned sõngo, Zoob, fo sã n yet Wẽnde: «M be bʋʋm, m ka bʋʋm fãa yaa bõn-yɛng ne maam,» fo tẽedame tɩ Wẽnd taoore, f goama tũuda sore? Ad-m sẽn na n leok-foo, foom ne f zo-rãmba. Nak n ges saaga neere; ges sawatã sẽn lug to-to b pa zʋʋg foo n kul yĩngr sɩda? Fo sã n maan yel-wẽnde bõe n maand Wẽnde? Fo beeg-b naoor yaka, b nod bʋgo la f rãmsda? Fo ka maand-b fɩ! Fo sã n ya nin-tɩrg me, bõe la f kõt-ba? Yaa f bõe la b reegd f nugẽ? Yaa f taaba bala la f wẽnema namsda, Adem biis bala la fo sõmblema nafda. Nanamsa sã n maand b neba pãn-tõogo, b neba ka pẽgd ye. B boonda goabg la rɩtg tɩ b wa fãag-ba. Ned ba a ye ka tẽegd n yeele: «Wẽnd la m Naanda bɛɛ? D sẽn mii n kilsd a soab ne yʋnga bɛɛ?» Bãmb n yaool n pukd d yam n yɩɩd we-rũmsa vɩɩm, n yɩɩd luiili wã rẽnna. Wilg-m-meng rãmba la nin-wẽnsã sã n zãad tõnd toogo tɩ d bool Wẽnd me, ad-y b pa leokd ye. D tar waasgo me, yaa zaalem, Pãng-Soaba ka wʋmde, b ka kelgd wa d yiisa gomd sẽn be yõod ye. M pa tẽed tɩ b na leoke, f sã n wa yɛs n gomda tɩ f yiisa f koɛɛga daar zãra la f ket n ka ne-b ye la f ket n gũuda b leokre, M pa tẽed tɩ fo tara bʋʋm ye, Zoob, fo sã n tagsd tɩ Wẽnd pa sɩbgd yel-wẽnde. Woto wã fo goama fãa yaa gom faado, fo gomda wʋsgo, la f ka mi f sẽn yet ye. A Eliyu kell n talla goama woto: Maag f meng bilfu, Zoob, tɩ m wilg-fu. Bũmb wʋsg n ket m sẽn tõe n leoke n puk bʋʋm n kõ Wẽnde. Bala, m na n ta-la m bãngra sẽn zulmẽ, n yiis bʋʋm n kõ m Naandã. Zirẽ-beed ka naag m sẽn na n togsa ye, la bãng tɩ yaa mit meng n yɛs f taoorã. Gese, Wẽnd ziira labsa, ka bãmb n na n sak n yeel tɩ b toog ka ye. B yalsda b gomda zĩ yɛnga, b pa gird n le gõms ye. B kõn bas nin-wẽng t'a vɩɩnd ye, b na sõng b sẽn maand b rãmb pãnga. B yama kẽeda nin-tɩrse la yaa daar fãa yĩnga. D gom dĩm dãmb yelle: bãmb n zaoolg-b b naama goeel zugu, n dat tɩ b rɩ naama n kaoose. Dẽ me la kẽer mi n yik n maand wilg-m-menga. La wakat kãnga marsã Wẽnd zad-b lame, b zad-b-la ne bãeense wa bi-beese, b kẽesd-b-la toog ne toog pʋgẽ. Wẽnd pukda b yam tɩ b mi b kongra sẽn beẽ, tɩ b mi tɩ b wilg-m-menga n wa ne zẽk f zugu ne Wẽnde. B pakda tʋba tɩ b reeg b saglse, b wilgd-b lame tɩ b tek b naoor wẽnga sor zugu. Bãmb sã n kelg la b sak n tũ, b vɩɩma na baas sũ-noog kãseng pʋgẽ. La b sã n tõdg kelegre, tɩlɛ tɩ kũum lʋɩ sʋka la yaa wʋmba sẽn ka pida yĩnga la b na n ki. B sẽn pa rɩk b mens n kɩs Wẽnd zãngã, b maanda zabre ne bãmba la b pa teesd Wẽnd kelme, b sã n wa yõk-ba n na n pag roog ye. Bãmb dãmb loogdame n pa kʋʋl ye, n loog ne vɩɩm sẽn sãam ne yoobo. Naong soab naong n fãagda, naonga rengda taoore n yet t'a maan gũusgu. Wẽnd ra kɩtame tɩ fo me põs yɩɩre yĩn-maasem n wa n deeg pɛta zĩiga, tɩ f rɩɩba roog lɛɛg n pit ne rɩ-noodo. La ad Wẽnd sẽn kao f bʋʋdo n paalg-fo, la ra tẽ tɩ sɩbgra na tõog n boog ye. Da bas tɩ f sũura sẽn puugã tus-fu n lub wẽng a to pʋg ye. Da wa tẽ tɩ f sã n zamd kũun dũnna n le yik n zam kũun beoogo, f na tõog tɩ Wẽnd tũ fo raab ye, Wẽnd ka bõn-daadg ye. Ad-f arzɛkã, ad-f sãnema kõn sek ye, dẽnd f modg f meng rũnna, n le modg beoogo. Da gãe n boond yʋng ninga sẽn na n yɩ dũni wã tɛkem-tɛkema ye. Tɩɩma yaa ra wẽnemd f neng n tees wẽnga tɩ wẽngã n wa ne naongã la pɛtã. Gese, Wẽnd n yɩɩd fãa la b pãng labsa. Karen-saamb a bõe n tõe n zãms a karen-biis wa bãmba? Ãnna n be n wilgd-b b sẽn tog n maane? Ãnd n saagd n yeel bãmba: «Ad-y y ka maan neer ye!» Woto wã da yĩm ye, tẽeg n pẽg bãmb tʋʋma, tʋʋm niyns Adem biis fãa sẽn kilsdã, tʋʋm niyns fãa b sẽn maane, tɩ ninsaal tõe n yãend ne a nifã. Sɩda Wẽnd waoogame n zʋʋg tõnd yama zãnga, bãmb yʋʋm ka tõe n sõd ye. Bãmb n tigsd yĩngri kooma, bɛɛl-bɛɛla, b fẽegd-a-la wa wulgu, sawata na n pʋdga kooma tẽnga, n pʋdg-a bɛɛl-bɛɛla n madg ninsaalb kamba. Ãnna n tõe wilg sawatã sẽn tʋɩt to-to, n wilg yĩngr sa-tãsa võore? Ade, fo neeme tɩ yaa Wẽnde n gũbg b meng ne sa-yãgdo, bãmb n pids mogra bog-zulung ne kooma. Wẽnd saaga niidame n na n dɩlg ãndũni rãmba, n kõt ninsaalba kood tɩ b rɩt n tɩgda. Bãmb nusa mumda sa-tãsã, b zab-teoogo, dẽ tɩ b nina kargdame n baood b sẽn na n wẽ a soaba. Sa tãsã n wilgd b waoongo, la b waoonga ka lingd rũmsa mens ye. Saaga sã n tãse, m sũura deegd n digimdame, al tɩ ya waa a yɩk n yi-la m yãoogẽ. Bɩ y sĩnd n kelge; kelg-y b koɛɛga rãamde, kelg-y bʋʋr ninga sẽn yit b nengẽ. Yaa ween-vɩɩs a naasa fãa n deegd koɛɛgã n sokd taaba. La kãna sẽn tãoodã tata dũni wã sɛtmẽ. Saaga sã n yãgemd n looge la koɛɛg sẽn vũudi, sẽn pida ne ziira soab koɛɛga wat n sãta ne pãnga. Wẽnd koɛɛga sãtame n pukd b yel-bãna. B yel-bãna sɩd zʋʋga tõnd yama pãnga. Wẽnd yeta sẽn wẽnda sapɩlem faagã dʋʋg tẽnga, wa zom pɛɛlga. Dẽ poore yaa saluka, dẽ poore yaa bedg-bedge, saaga niidame n tõt yoogre, tɩ tʋʋmd buug ka le tõe n tʋm ye, tɩ neba na n tũ rẽ n bãnge tɩ Wẽnd n tʋmd b tʋʋmde. Rũng lebda a gãagẽ, sẽn gãe a bokẽ tʋgd n soonda a pẽkẽ. Sob-raoog yita nug rɩtgo, tɩ sob maasga yit goabga. Wẽnd fʋʋsda kooma zug t'a sɩng gĩsbu, kooma sẽn da ya koaagã ginda taok wa kutu. Wẽnd pidsda sawata ne koom, la b pidsd-b-la ne sa-tãse la b tʋmd-b-la goabg la rɩtgo. B sɩngda gilgr yĩngri la zĩig ka yaagd n bas ye, b reegda b noorã n taas zĩig zãnga, bũmba fãa maanda wa b sẽn date b sikda b toolem ka, n puk b nonglem ka-sẽnẽ. Zoob, fo ra tog n maana gũusgu, f ra tog n kʋmsa f yĩnsi n ges Wẽnd bõn-bãna. Fo mii Wẽnd sẽn sigind b yɛl bãna to-to? Fo mii sawata sẽn yiisd sa-tãsa to-to bɩ? Pɩgs bʋg la b tar n laand yĩngri? Wã ka bãngr sẽn pid bãngr sɩda? Tẽnga sã n sɩng n na n namse n nams ne nug rɩtg sob-tʋʋlgã ad-y futa yeelgr lebgda sɛsga. Wẽnnaam sẽn waa n yɛdgd sa-gãongã b sẽn saas-a t'a lebg wala zũud nin-gɛtgã, fo n zĩnd be n sõng-b bɩ? Wilg maam d sẽn tõe n togsẽ Wẽnde? D meng sẽn zĩ ne lik ningã n pa tẽed d na walem bõn-sõng ye. M sã n wa rat n gome m tog n deng n wilg-b lame bɩ? M sã n gom n sɛ, tog n pʋg n yeelame tɩ yaa a Zagl n gom bɩ? Ade, nif kamsg pʋgẽ bala vẽenem wat n menemame, sawatã n wat n luda wĩndga zãnga, tɩ sobg na n yik n pek sa-gãongã. Vẽenem sẽn ya neer wa sãnem n wat n puk nug goabga. Yaa Wẽnd n gũbg b meng ne vẽenem vẽenem sẽn wat ne rabeem la yɩɩre. Bãmb la tõnd sẽn ka tõe n kolg ned ningã, bãmb la Pãng-Soabã, sẽn pid ne naam la zemsgã, n pa sɩɩsd yell sẽn ka be a soab zug ye, Dẽ me la ninsaal fãa rigd dabeem b taoore. Dẽ me la bãmb ka sulgd n gese sẽn yet-a t'a yama pida zãnga ye, Bãmb me ka sokd yẽ soab yell ye. Naaba-Wẽnd zĩnda sob-raooga pʋgẽ n leok a Zoob: Yaa ãnna soab n gomd goam faado la a wɩt yĩngr la tẽnga Naanda? Yik n sẽbg f kalle, la kolg ne sũ-keelem la f leok m sokre n paas m bãngre. Mam sẽn wa n vigind tẽnga tɩ fo bee yɛ? Leok-m wɛ, pid ne bãngr soaba! Fo mi ned ninga sẽn maga tẽngã, sẽn tar-a a yalem la a woglem? A sud n yɛsa bõe zugu. Ãn n kõ a yasra pãnga, ãnda n kɩt tɩ ãdsa na n naag taaba, n naag taab n pɩl tõd-beoogo pɩlbo tɩ Wẽnd kamba na n naag taab n yeele: «Ne y tʋʋmd-tʋʋmde!» Ãnna soab n yõk mogrã n page, a sẽn wa n yi paalem n yɛdg yaarã, m sẽn waa n dɩk wulgu n pil-a wa fuugu, n bao sawat wa fuugu n tʋɩ a gãaga? Maam n yiis noor n koms mogra pãnga, n lɛɛg n pag a noora kẽnkẽ, ne kʋɩlenga. Mam n yeel-a: «Da long n ta taoor ye! F ko-wiisã sã n yiki, bɩ b pa ka bala.» Fo sẽn doga tɛka, fo zoe n kõo yibeoog noor la f yals sõor a zĩigẽ bɩ? Fo n gãd tẽnga kɩrems a naasã n fugumd nin-wẽnsa bɩ? Tẽnga ne a teedã paamda neng a Yagda nugẽ. Fãa yitame n yɛs ne faongo. Nin-wẽnsã vẽenem bal n menemde, Kang ninga sẽn da zẽkda n na n wilg a pãngã n kaoogde. La fo kẽe mogrã pʋgẽ n taa a ko-nina bɩ? F gõ n saaga mogra tẽngr bɩ? B wilga-foom kɩɩmsa dooga noore kʋɩlens bɩ? Fo yãenda kʋɩlens niyns sẽn pag kũuma a likẽ wã bɩ? Fo nan bilga f yamẽ, tẽnga yalem sẽn yaa a soaba? Fo sã n mi a zãng bɩ f mak n wilg-ma. Vẽenema bee kɩreng bʋgo? Lika yẽ yita al yɛ? Kẽng n tɩ gẽes-b b soolmẽ, f sã n mi sor ning sẽn dɩkd n ta be. Fo yaool n tog n mii sorã, tɩ f sẽn wa moog daar zãra. M sok n gese: fo kẽname n ta kooma sẽn gĩs n gãneg zĩig ningã, fo yãee sapɩlma sẽn sam zĩig ninga? Mam bĩnga rẽ fãa n gũud yɩɩr daare, zabre la tẽn-kũum daare. Wĩntooga vẽenema tãoosd n teesda yɛ? Sob tʋʋlga yii yɛ n wẽed tẽngã? Ãnna soab n tuk ko-soya n kõt sa-kooma? Ãnd n tuk sor n kõ sawata sẽn maand bʋʋrã la a kɩt tɩ b niid n kõt ninsaalb kooma, n madgd we-raoogo la zĩ-peen-daaga, n yũnugd tẽn-koɛɛnga tɩ mood buli n paam n yi? Saaga sẽn niida tara ba bɩ? Meenema sẽn dʋʋgda yita yɛ? Ko-gĩsdma ma la a bõe, la ãnda n dog fʋlfʋl-bi wã? Kooma maanda a wãna n gũsi, n lebg kẽnkẽ wa kugri, mogra kooma maanda a wãn n gãd taab zãnga? Fo tõe n paam n loe Susã ne taaba? La f lodg yĩngr tãb-biiga sɛɛg sẽbdga? Fo mii wakat bʋg la sẽoog na n deeg sɩpaolgo, la wakat bʋg la f na n kẽes noaaga ne a kambã? La fo mi yĩngri teedã sẽn tũud noy niynsã? Fo n wilgd sẽn be-b tẽng zugã noy niyns b sẽn na n deege? Fo sã n tees saagã n tãse, na sek tɩ sa-koom kiigi? Yaa foo n tʋmd sa-tãsa tẽnga? Yaa f sẽn bool-ba la b leokda: «Ad tõnd wooo! Tõnd la f rat bɩ?» Ãnna soab n kõ kʋɩl-pesg yam, ãnd n kɩt tɩ no-raoog tar pʋtẽere? Ãnna n tõe n sõd sawatã neere, n kɩll yĩngri ko-yũusã tɩ b raag b koom, tɩ wubsga lebg begdo, tɩ tãndaga boogdẽ? Fo n baood rɩɩb n kõt gɩgemd yãang bɩ? Foo n yiisd a kamba kom, kamb niyns sẽn wũg b gãasẽ la sẽn sor-b tuudẽ wã bɩ? Gãoobg rɩɩb yita ãnna nugẽ tɩ yẽ paam n kõt a kamba, b sẽn wat n tees Wẽnd n yãbdã, koma sẽn wat n yilimd b nenga? Fo mii tãmsa zut bʋʋsã sẽn dogd wakat ning bɩ? La fo zoe n wʋma b sẽn kũmd dogem bɩ? B pʋga kaoosda kiis a wãna? Wakat bʋg la b rogda? Ad-b yĩgimdidame n doge, n wẽneg n vʋʋs ne toogo. B kamba wɩsgdame, b pãnga wat n paasame tɩ b ka tol n yãend põnegr ye, la b wat n looga b sẽn datẽ n bas b ma. Ãnna n bas burgumdi t'a saad a yam? Ãn n kõt bõan-wɛɛg soog-m-menga? M dɩka zĩ-peela n kõ-a tɩ lebg a na-tẽnga. A toog ka be ne tẽng pʋgẽ bʋrg ye. Bõan-kɩɩm ka be n na n yaal-a ne a guug ye. A vɛɛsda tãmsã n baood a wãbr zĩiga, n baood yam maasa menga sẽn tõe n paam bilfr bal zĩig ninga. We-naaf na sak n yɩ f sõangda, a na sak tɩ f loe a bãgrẽ yʋngo, f na moadg-a t'a ko pʋʋgo, a na leb fo poorẽ n saremd kaalma? Fo na teeg a pãngã n dɩk f tʋʋma fãa n bas ne-a? Fo na yet tɩ f bas-a-la ne f kooda tall n taas f zakẽ, n bas-a ne wʋk n sui baoorẽ? Naneong tara pɩgsa, la dũni na yiki, t'a pa tol n yɩk wa kʋɩl-pesgo bɩ raong ye! A basda a gɛla tẽnga, tɩ tẽngã tʋʋlem wek-ba. A yĩmdame tɩ naoor tõe n tabg-b lame, la we-rũng tõe n wʋk-b lame. A tara a kamba toogo wala ka yẽ kamb ye, a ka zoet a naonga na n wa yɩ zaalem ye. Bala Wẽnd mong-a-la yam, b pa kõ-a tags wok ye. La a sã n yik n na n kʋɩ tĩiga a laada wed raoog ne a wed-dʋʋda. Yaa foom n kõt weef sũ-keelem bɩ, bɩ foom n ningd a yubla gɛde? Fo tõe t'a yɩk wala sʋʋre; a sã n kelem, rabeem yõkda neb fãa. A yɛsa tãnga pennẽ n tibd ne pãnga; a wʋm zabr rãamde, a zoet n dabdame. A toog ka be ne rabeem ye, a sũur me ka kiusd ye, sʋʋg ka wõogd t'a targ ye. Lok kaglemda a zugu, n paas kãnd sẽn yãgd la kãn-dibga. A yɛsame t'a yĩnga tõsbdẽ t'a na n ning tĩiga, baorgo sã n peebe, a ka le tõe n yaas ye. Sã n peeb fãa, a kelemdame: Ẽee, ẽee! A rɩkda zabra yũug al yɩɩga, a wʋmda tãnsoaben-dãmba tãsga la b bʋʋre. Wɩbg kõbd sẽn pusd to-to wã, fo n wilg-a yam kãnga? A sã n yɛdga a pɩgsã n dɩɩmd wĩntoogo, foo n wilg-a rẽ? Fo n kot panantugri noor t'a yɩk n kul yĩngri, n tɩ maan a tʋko? A gãag zĩig yaa pĩig zugu, a zaoo pĩ-sɩlenga, ned sẽn ka tõe n taẽ. A zaoo be n gẽesd a rɩɩbo, t'a nin tõe n long n tɩ ne rɩɩbã al sẽn zãrẽ. A kamba rɩɩb yaa zɩɩm bala. Dɩgre sẽn be zĩig ninga, be la a be. Soaala boola a Zoob n yeel-a: Wẽnd-Pãng-Soaba zabd-n-taaga tara bũmb n na n paas bɩ? Sẽn tara goam pererr ne Wẽnda ket n tara leokr bɩ? T'a Zoob me na n yeele: Soaala pãnga yɩɩda maam, woto wã m leokdame tɩ bõe? Mam sẽn tõe marsã, yaa m pĩ noor bala. M zoe n gomame, m kõn leb n paas ye, m zoe n leoka naoor a yiibu, m kõn le tõog ye. Wẽnnaam zĩnda sa-raooga pʋgẽ n yeel a Zoob: Sẽbg f kall kẽnkẽ wa gãndaoogo. M na n sok-f lame tɩ f vẽneg-ma. Fo ratame tɩ b le maneg n sɩng bʋʋdã, tɩ b mong maam bʋʋm n kõ-foom. Fo kanga tara Wẽnnaam kanga pãng bɩ, fo koɛɛga tõe n tãsa wala Wẽnnaam dẽnna? Aya! Bao naam la ziir n yeelge, yãg ne pãng la neerem. Bas tɩ f sũurã puugi, gẽen wilg-m-meng rãmba tɩ b zug sulgi. Gẽen zẽk-m-meng soaba n sik-a, tab nin-wẽns n beds zĩig pʋgẽ bala. Naag b fãa n bus tomẽ, kɩt tɩ b mum b noor bʋg-tẽnga. Dẽ marsã la m menga na n pẽg-fo, fo nuga pãng sẽn kɩt tɩ f maan daooda yĩnga. Ges Rũn-bãnd a Beemot, maam n naan-a wala m sẽn naan fooma. A wãbda yamdo wa naafo. Ges pãng ning sẽn be a kɩgbẽ, ges a pʋga gĩin sẽn wɩk wɩkr ninga. A nakda a zʋʋrã wala kʋk willi, a gɛyã gĩina kẽe taaba wa pãnenga. A kõaba keelem, zũud dẽnna, a sĩ-bi wã, kut sẽn toos ne zãar. M bõn-naandsa fãa sʋka, yẽ la m nand n yɩɩda maam bal a Naanda la a zoeta. Dẽ la tãmsa me kõn dɩlg-a, b kõn dɩlg-a ne bũmb a to tɩ ka yamd ye. Pʋ-weesa rũms reemd n gilgd-a lame. A gãee mugnusa tẽngre, a sora bãada moodẽ. Mugnusã n kõt-a maasem kʋɩlga yɩlsa sʋk la a vʋʋsda. Kʋɩlga koom rat bɩ a yik n vũ, ad-y a ka tol n yɛɛsdẽ ye, Zʋrdẽ koom lim-a n tãag a noora me, ad-y a ka bʋʋd ye. Sẽn noom-a la rẽ. A pukda a nina n getẽ tɩ f yõk-a wãn-wãna? N yãend ra-sɩleng yɛ n vʋdg a yõore? Ges koomẽ rũn-toaaga a Leviatã, fo yõkd-a-la ne lɛoog bɩ, f lɛooga kõsda a zelemd bɩ? Fo na n vʋdga a yõ-bogdã ne susutga bɩ f poogda yeera ne bãn-sɩlenga? Foo la a na n kudg a kãntɩɩga la a gom ne f gom-noodo? A na sak tɩ yãmb sed ne taaba, t'a lebg f sõgne, a vɩɩm zãnga? Fo na sak n deem ne-a wa luiil sẽn ka yẽna, f na loe-a ne wĩir n kõ f kom-pugli tɩ b reemd ne-a? Koos rãmb na sũ taab n wa kẽes-a raaga? Raadba na pas-a nemdã n weele? Fo na po a gãongã ne pɛɛma, la f na vʋdg a zug ne kãnd bɩ? Tik a ne nug bala: fo na yẽ maoore, fo kõn le mak yɛs ye. Da belg f meng a taoor ye, n yet tɩ rabeem ka ye, bala a nif gẽeneg meng seka lʋɩɩse. Ãnd n na n puk a gẽemdo n maan bũmb n yik a sũuri? La ãnda n na n puk a gẽemdo n yɩɩda, n maand no-koeemd ne maam, Naaba-Wẽnde? Ãnna samd la m dɩ yã, n tog n bao n lebse? Sẽn be saaga tẽngr fãa yaa maam n so. M ka na n sĩnd n ka gom a Leviatã yĩnga wils yell ye. M kõn sĩnd n ka gom a pãngã la fuug ninga sẽn lud a poor wa kuta ye. Ãnna n tõog n lak fuug ninga sẽn lud a yãoogã? Ãn n saag n kẽ a yɛga pʋgẽ? Ãnna n modg-a t'a yaag a noorã yalengo n wilgd a yẽn-daada sẽn sel n gilgã? Pɛlen-yɩk bala la a yẽna! A poorã yaa wa kut gãnd n pʋglem taaba, n maneg n sũg wa kur dẽnna. Gãnda sũga taaba tɩ pemsem meng ka tõe n kẽ ye. Paoko n tablg paoko tɩ fãa tabend n naag taaba, n ka tõe n welg lɛ-lɛ. A Leviatã tĩsga yaa bug-pãrse, a nina mooga wa sõore. A noorã yiisda bug-zɩlemse, la bug-pãrs yɩgdame n yita. A yõ-bogdã nukda bug-zõose, wa rubl bɩ bugum-dʋk sẽn yiisd a waolgo. A vʋʋsem widigda bug-saala, tɩ bug-zɩlemse yit a noorẽ. A yubla pida ne pãnga, tɩ sẽn yɛs a taoor digd dabeem. A yubla gãong luunda yalengo, a tẽname n lebg weoglgo. A kʋɩɩsa a sũura wa kugri, wala neguug kugri. A sã n doog a nenga, pãn-dãmba meng zoetame. Dabeem kɩtdame tɩ b kʋɩ tĩiga. Sʋʋg tat-a lame n ka kẽ ye, la kãnde, kãn-bila, kʋɩ tĩiga, fãa makd n kongame. Sã n ya ne-yẽ, kut yaa moogo, tɩ kud-kɛgeng ya wa ra põosgo. Lok pĩim ka tõe t'a wudg ye. A reegda loaabg kugri wa a reega mo-paoko. A reegda guugu wa katrefeoogo, a laada kãnd sẽn dĩmdi. A tẽngr pagda peesa wa wãgse, a sã n tũ kʋɩl-waoko a bẽesd-a lame n dɩgle. A kɩtame tɩ bog-zulunga kɛɛd wa rʋko, tɩ Mogre lebg tɩdar wisb sare. A basda a vuri, a poorẽ, la woto mogra pelgda ne puudu. Tẽng zug ka a to ka ye, m naan-a lame n kõ a sũ-keelem. A ka kamsd a nif bɛ ba a ye taoor ye, yẽ la rũn-toosa fãa naaba. A Zoob leoka Naaba-Wẽnd woto: Mam mi tɩ bũmb ka be y sẽn ka tõe n maan ye, y tõe n maana y sẽn tagsd fãa! M ba bõe n sãbsd Wẽnd sẽn gũud dũni wã to-to n yaool n ka mi ba fɩ wã? M saag n goma m sẽn ka mi, sẽn yɩɩd-ma, tɩ yɛl kãens wʋmb le lebg toog n paase, Y ra yet-m lame: kelg la f bas tɩ m gome, bas tɩ m sok-f tɩ f na leoke. Ad-y m sẽn da mi yãmb poorẽ, yaa b sẽn gom tɩ lʋɩ m tʋbrẽ bala la marsã, mam nin yãe-y lame. Woto wã m lebsda m noore m deegda m kongre la m sulga m menga, m faoola m menga n zĩ tomẽ la tompɛglemẽ. B sẽn gom ne a Zoob n sɛ, Wẽnd yeela Tema raoa, a Elifaz: «M sũur puuda ne foom la f tũud-n-taasã, tɩ yãmb pa togs sɩd mam poorẽ wala a Zoob ye. Dẽ yĩnga, bao-y lols a yopoe la pe-raad a yopoe, n bʋʋg a Zoob. Yãmb na n maana yũ-noog maoongo, a Zoob na n pʋʋsa y yĩnga; m na n deega a Zoob pʋʋsgã, m kõn dig yãmb n yiis m taoore ne y sẽn pa gom m yell neere wala rao kãngã.» Tema raoa, a Elifaz, Suwa raoa, a Bildad, Naamat rao, a Sofar tɩ maana wala Wẽnd sẽn wilg-bã. Wẽnd maan-b-la sugri, a Zoob yĩnga. A Zoob sẽn yõk sɛɛg a tũud-n-taasa yĩngã, Wẽnd lebsa a Zoob a pĩnd paoongã naoor a yiibu. A saam-biisi, kom-dibli la kom-pugli n paas sẽn da mi-ba a Zoob, wa-la a nengẽ n wa ges-a. B ra naaga taab n dɩtẽ, la yĩn-sirg ra tar-b lame, la b ra maagda a sũuri, t'a ra yãee toog Wẽnd nengẽ. Ned kam fãa kõ-a-la ligdi, la sãnem nug bĩnga. Wẽnd barka siga a Zoob zug n yɩɩg pĩnda. A paama piis tus piig la a naase, yʋgma tus a yoobe, niis tus a yi, bõn-yãans tusri. A paama kom-dibli a yopoe, kom-pugli a tãabo. Bi-pugl a ye pʋdame tɩ Walle: a to wã: a Yp-neere, a to wã: a Kirʋ. B pa yãend tẽnga pʋgẽ pagb sẽn ya neer wala a Zoob kom-pugli wã ye. B ba naag-b-la ne a kom-dibli wã n pʋɩ-ba a paoongo. Wẽnd sẽn mak a Zoob poore, b sẽn fɛɛs-a wã poore, a vɩɩnda yʋʋm koabg la pis-naase. A yãe-la a yagense, la a yagen-tʋbra-kẽese. A Zoob waa n kiime, n pid ne yʋʋma la raare. Tɛk la tɛka! Zu-noog soaba la ned ning sẽn ka kelgd nin-yood saglse, n ka rɩkd so goalenga la a ka sõsd ne sẽn nong-a a taab laado. Sẽn noom nin-sõng yaa Soaala noorã, la rẽ la a bʋgsd wĩntoog la yʋngo. A wẽnda tɩɩg sẽn sel kʋɩlg noore, n womd a biisi, a wakato, t'a vãad ka tol n sʋʋgdẽ ye. Nin-sõng sẽn sɩng fãa baasda neere, la bada, ka woto ne sẽn ka mi-b Wẽnda ye! Sẽn ka mi-b Wẽndã, bãng ka-fɩɩba sobg sẽn dɩk n looda. Bʋʋda raare nin-yooda zug kõn zẽk ye, nin-sõma wã lageng zĩigẽ, nin-wẽnsa me zug kõn doog ye. Soaala mii nin-sõma wã sore, a yaa tɩrga, la nin-wẽnsa sor bʋta moogo. Bõe tɩ zamaana yik n kɩrda? Bõe tɩ b yik n tar bʋrbʋre? Dĩm dãmb yẽsda b yẽsgo, kombɛɛmba sũuda taab n na tak zabre n na n zab ne Soaala la b sẽn tʋm a soabã. Woto la b gomda: «D kao bãeensã la wĩirã, n fugumd n yi b soolmẽ!» Sẽn dɩt-a naam yĩngra pusga laado, b laad-b-la a yeyn-ye. La wa n lebga mo-beedo la sũ-puuri, tɩ b na n sɩng yɛɛsgo. B yeelame: «Maam n yãk m dĩm n kõ-a naam. M vigla a naama Siõ, m tãn-sõnga zugu.» Wẽnd sẽn togsa la m na n moone. La woto la Soaala togs-m: «Fo yaa m Biiga; maam n dog-foo rũnna! Yaag f noor n kos-ma tɩ m na dɩk bu-zẽmba zãng n kõ-fo, f naama sɩngda dũni wã sẽn sɩngdẽ n wa baas a sẽn baasdẽ. Kut door la m na n kõ-fo, tɩ pãbr wʋm-ba, f pãbd-b lame n bõgse wa yagd laoko.» Dɩlla, dĩm dãmba, bao-y yam sõng n kõ y menga Bas-y tɩ b sagl yã, dũni wã bʋ-kaoodba! Noog-y y sũuri la y waoog Soaalã, sulg-y meng bãmb taoor ne rigbu. Sak-y n deeg b zãmsgo. Ad-y b sũura sã n puugi, y yaa bõne; la b sũura tõe n wa yika vugr bala. Zu-noog soaba la sẽn na n soond-a bãmba! A Daviid yɩɩla woto a sẽn waa n zoet a Absalom taoore. Soaala, ad-y m bɛɛba sõor labsa b yika ka tɛka n na n zab ne maam, b yika zembala n wẽenẽ: «A yell sɛɛ zãng a Wẽnda taoore!» La yãmba, m Soaala, yãmb la m gãongo, la m ziir la zu-zẽkre. M teesa m Soaala n kelemd ne pãnga, la b zĩnda b tãn-sõnga zug n leok-ma. Woto m sẽn gãande, gõeem sakame. M nekame n mik tɩ b ket n gũuda b yamba. Bɛɛba sẽn gũbga sõor ka tɛk ye la mam nengẽ rabeem buud ka ye. Yiki-y yã, Soaala! Fãag-y-ma, m Wẽnde! Bɩ m bɛ fãa yeer deeg toogo, la nin-yooda yẽn sʋʋg zãnga. Fãagra na n yi-la Soaala-Wẽnd nengẽ. Bɩ b barka sig b buudã! Yaa a Daviid yɩɩlle. Yɩɩla naab kɩtdame tɩ kʋnd la ruuds naag n wãagdẽ. M sã n bool-y bɩ y leok-ma tɩ yãmb la m Wẽnd la m bʋ-kaooda! M sẽn paam toog la yɩɩr daare, y fãag-m lame; zoe-y m nimbãanega la y reeg m kosgo! Ninsaalb kamba, y na n kell n basa m ziira waoogre n pʋgd pemsem la zirẽ-beedo? Ad-y Soaala bao zĩiga n bĩng b noanga, woto m sã n bool-ba b kelgdame. Ba y sũura sã n yiki bɩ y ra kẽ moog ye. Pam-y tags sõma y gãag zugu, da bas-y tɩ bũmb yɛɛs-y ye. Kɩs-y b sẽn wilg-y maoong ninga la y bas sẽn kella ne Wẽnde. Wʋsg sokdame: «Ãnda n na n wilg-d sũ-nooga sẽn beẽ?» Yãmb ye n wilg-du y nenga vẽenem, Soaala, Tõnd sũ-noog bal la y nenga gesgo. Y nenga gesg pidsd-m-la ne sũ-noogo, n yɩɩd nin-bãmba baoã la b sĩmsã sẽn ges n pid ne kood la rãam. Bũmb sẽn pa paoog-m yĩnga, m gõeem sakd-m lame. Soaala yĩnga, m zãra ne rabeem buud faa. Yɩɩla naab sebrẽ la yɩɩlla be, la yaa a Daviid yɩɩlle. Yɩɩn-kãnga yɩɩndame tɩ wɩɩs peebdẽ. Soaala, kelg-y m koɛɛga, wʋm-y m wõosgo; kelg-y m koɛɛga, m yãbra lʋɩ y tʋbrẽ, m dĩm la m Wẽnde, tɩ yaa y sɛɛg la m yõkda. Y kelgda m koɛɛga yibeoogo la yibeoogo m segenda m kũuni, n gũudẽ! Yãmb pa Wẽnd sẽn sakd wẽng ye, nin-yoog ka tar zĩig y sɛɛgẽ ye. Goam põaas soab ka wat y taoore, y kisa yel-wẽn-maandba fãa, y menesda zirẽ-be-rãmba, soey! Y menesda zãmb soaba la sẽn daagd-a a taab zɩɩm; Wẽnd sẽn kis la bãmb dãmba, Wẽnd yãka b bark zãnga. Soaala sẽn ket n nong-m yĩnga, ad-m sẽn kẽed b zakẽ, ad-m sẽn wõg ne waoogre tɩ m neng tees b ro-sõngo. Soaala, y sõmblema sor la m dat n dɩke, sõng-y tɩ m da rɩk m bɛɛba zak sor ye. Sɩd ka be b noorẽ ye, b pida ne wẽnem bal n kẽnda; b yaaga b kokora wa yaoogo, b gom yã, b gãnegda bẽdgo la salse. Soaala, bao-y sɩbgre n sɩbg-ba, bas-y tɩ b bẽdga lɛɛg n yõk-ba; b tʋʋm yooda yĩnga, pĩng-y-ba, b sẽn zẽkd b zug ne yãmba yĩnga, rig-y-ba. Sẽn dɩk-b yɛla fãa n bas ne yãmbã, bãmb fãa langda ne sũ-noogo. B sũ-nooga yaa b sẽn mi tɩ y kogend-b lame. Bas-y tɩ sẽn nong-b yãmba kaas b sũ-noogo. Soaala, yãmb n pidsd nin-sõng ne barka; yãmb nonglma lebga a gãongo, n kokd bɛɛb pɛɛm. A Daviid yɩɩlle; a bee yɩɩla naab me sebrẽ; yɩɩnda ne pɛndg buudu. Sɩbg-y-ma, Soaala, la ra yɩ ne sũ-puur ye. Sɩbg-y-ma la ra tũ ne sũ-fõor ye. Zoe-y m nimbãanega tɩ m sɛt n dabdame. Sãoog-y-ma, waooda kẽla m kõaba fãa, m digda wala kõb yɛnga. Soaala, y na n maana a wãna? Lɛɛg-y n waa-y yã, Soaala, n fãag-ma fãag-y-m yɛsa wa y sẽn maand daar fãa! Kɩɩmkulgu ãnda n pʋt y yʋʋre, la bʋg-tẽnga ãnda n pʋt bark pʋʋsg yɩɩlle? Waasga sɛ-la m pãng fãa, yʋng fãa m gãaga yʋgemda ne m nintãm, m nintãma madgda m gãaga. M sũ-sãangã n vẽbs m nina; m bɛɛba labsa, b sõadg yiigda m nini. Bɩ nin-wẽnsa fãa zãag b meng ne maam, tɩ m kɛlenga lʋɩɩ y tʋbrẽ, Soaala. Soaala wʋma m kosgo, m kosga ta-la b yam. Bɩ yãnd la rabeem yõk m bɛɛbã, yãnd kɩt tɩ b lɛɛg n kʋɩ tĩiga! A Daviid yɩɩlle. Wẽnda a sẽn yɩɩle, a sẽn seg Bẽnzame tẽng Kus raare. Soaala, m wat n na n soonda y nengẽ. Fãag-y maam m bɛɛba nusẽ! Y ka wa, b na n kodg-m-la wa bõnyẽese, y mi tɩ b sã n bri, reegd ka ye. Soaala-Wẽnde, m sã n maana wala n bola m nug ned zɩɩmẽ, n zãmb m zoa, n bas m bɛ t'a põse, bɩ m bɛ me rig-m n yõke, a me nao tab-m n kʋ, a bilim m zuga tomẽ n ning-m yãnde! Yik yã, Soaala, puug-y y sũuri la y wõd m bɛɛbã, yals-y m sɛɛgẽ tɩ y sẽn togsa la d fãa tog n tũ. Neb ka tɛk n gũbg yãmba, Soaala, dɩ-y naam b fãa gill zugu! Soaala n kaood Adem biisa bʋʋdo, kao-y m bʋʋdo, Soaala, tɩ m sõmblem puki, tɩ m bãng tɩ yell ka m zug ye. Da bas-y tɩ nin-wẽnsa wẽnem le kẽng taoor ye. Le pids-y nin-sõng ne raoodo! Ned ninga sẽn tara ninsaal buka, yaa yãmb bala Soaala, bʋʋd tɩrg soaba. Wẽnd sɛɛgẽ la m dell m gãongo bãmb n fãagd sũ-tɩrg soaba. Bʋʋd tɩrg soaba la Wẽnde, la d tog n maana rabeem beoog sẽn vẽege. Nin-wẽng sã n ka tuubd a wẽnem, la bãmb me sẽn saasd b sʋʋga la b dõos b tãp n delle. B paka b kudgu n na n kud pɛɛm la yaa pɛɛm sẽn kʋʋde, sẽn yõogd wa bug vɩlenga. Wẽng rɩkda pʋga n tẽed biiga, mik fɩ ka na n dog ye. F tuuda bok n maneg n zulg-a, mik fo meng n na n lʋɩ a pʋgẽ. Fo sẽn da rat f to ne wẽng ningã n lɛɛgd n dɩ-fo, pãn-tõog ning f sẽn da rat n maan f taabã, pãng kãng n lɛɛgd n yẽeg-fo. M kõn vʋʋs ne Soaala-Wẽnd bark pʋʋsgo tɩ b sõmblema ka be taar ye, m na kils yĩngr Soaala yʋʋre. Yaa a Daviid yɩɩlle; yɩɩla naab yɩɩnd-a lame t'a wẽneg: Bugsuntunga biis yɩɩlle. D Soaala-Wẽnnaam, y yʋʋra sãdame, a gilga tẽnga zãng fãa; la yĩngr dãmba fãa kilda y ziiri. Kom-bõonego, kom-peelsa noore zoe n tara y pẽgre. Rẽ yaa lalg la b zẽk bɛɛba taoore, bɛɛb tɛk yaa b noor mudi la b vel b beem. M sã n get saaga sẽn ya y nug tʋʋmde, m sã n get kiuuga la ãdsã y sẽn yagle m nong n bãnga y sẽn tagsd to-to ne ninsaala n wa tẽegd a yell woto fãa. Kellẽ-la bilf bal t'a yɩẽ wa malɛka y pids-a-la ne neerem la ziiri; y kõ-a-la naam y naands a taaba zugu, a paama bũmb fãa n sooge. Ad rũmsã, bɛd la bõonego, ad we-rũmsa menga, yẽ n so, n le so yĩngr luiili la mogr zĩma, la bũmb ning fãa sẽn vɩ mogrẽ. Soaala-Wẽnnaam, y yʋʋra la yʋ-sõngo dũni wã fãa pʋgẽ! Yaa a Daviid yɩɩlle; yɩɩlla bee yɩɩla naab sebrẽ. Yɩɩnda wa biig kʋʋre. Soaala, m na n pʋʋs-y-la bark ne m sũur fãa, m na n moona y tʋʋm-bãna. Y saoolg-m-la sũ-noog saooga la m kilsda y yʋʋre, yĩngr Wẽnnaam. Ges-y m bɛɛba sẽn lɛɛg n zoetẽ, ad b sẽn lʋɩt la b kiid y taoore, la rẽ yaa y sẽn bʋ m bʋʋda neerã, yaa y sẽn sak n zaond y bʋʋd tɩrsa goeela zugu. Y yeela bu-zẽmba tɩ b maan gũusgu, tɩ y ra wa kʋ-b ye, n menes b yʋʋr moog ye. Bɛ wã lʋɩ zãnga, a kõn le yik ye, yãmb sarma tẽnse tɩ b pa le tẽr b yʋʋr meng ye. Soaala la rĩm, beoog sẽn wate, b maneg n vigla b goeel n na n kao bʋʋdo. B geta dũni wã ne zemsgo, n zãad ãndũni rãmb wa sẽn toge. Bɩ b sẽn namsd b rãmba tɩ sool bãmba, n sool bãmba n tɩlg pɛta. Yɩ-y sẽn mi-b yãmba teegda, yãmb zɩ n bas sẽn baood-b yãmb ye, Soaala! Bɩ d pʋd yɩɩlle n pẽg sẽn dɩt-a naam Siõ, d kils b tʋʋm bãna bu-zẽmba tẽnsẽ! Sẽn daag-a zɩɩm la Wẽnd pʋgda la bãng-y tɩ b pʋtẽer wogma, b sẽn mi, b kõn nams n soke: «Ãnda la b kʋʋd t'a kelemd woto?» Zoe-y m nimbãanega, Soaala, ges-y m bɛɛba sẽn paoogd maam to-to; yãmb sẽn tõe n zãag-m ne kũuma, zãag-y-m tɩ m paam n pẽg y yʋʋr, Siõ tẽn-sõng pʋgẽ la m kɩdem m sẽn paam y fãagra sũ-noogo. B sẽn zulg bok ningã, be la bɛɛba sig yã. Bẽdg ning b sẽn da maneg n solgã, n paam n kolemd b nao. Soaala bʋ-la b bʋʋdo n wilg yɛla sẽn yɛsẽ; la yaa nin-wẽngã n lʋɩ a meng bẽdgẽ. Bɩ bʋg-tẽng leb n deeg a soolem, sẽn yĩm-b Soaala fãa leb zĩ-kãnga. Bada, Wẽnd kõn yĩm a-ka-neng soab yell ye, nimbãan-dãmba saagr kõn pa n ka pids ye. Aya, m Soaala, bɩ ninsaal da maan daood ye! Yals-y bu-zẽmbã y taoore, y bʋʋda zĩigẽ. Wilg-y-ba y pãnga n yɛɛs-ba; wilg-y-b tɩ b pãnga teka ninsaal pãngẽ. Bõe tɩ y maan wa y zãra ne-do, Soaala, n solgd y meng d pɛta wakato? Ad-y yaa a toog-ka-be-ne-Wẽnd soaba tɩtaama n yaand nimbãan-dãmbã. A toog-ka-ne-Wẽnde n tusd-b n lubd a bẽdgẽ. A tusd n lubame n tẽed t'a maana raoodo, a raaba sã n yaool n pidsi, ka Wẽnd la a pʋʋsd barka, yaa Wẽnd la a lɛɛg n laadẽ. A toog-ka-ne-Wẽnd pida ne yamsekre, A sẽn ka le baood Wẽndã, wã bal n be a noorẽ: «Wẽnd ka ye!» La rẽ sek-a lame. Yaa wa a raaba pidsda wakat buud fãa, la wa yãmb sẽn leokd bũmb ning yĩngrã zãra ne a wʋmbo, dẽ la a kẽnd n sẽoosdẽ la pursdẽ. Woto la a gomd a sũurẽ: «M paam n kɩɩ yẽgna, yel-beed buud kõn tol n pak-m ye.» A noora pida ne kãab beedo, a raaba yaa tudg m to la m maan-a pãnga, a zelemd sẽn gomd yaa a zãmbã la a tʋʋm yoodã. Tẽn-bõonesa noorẽ la soondeda, n maneg n solg n na n kʋ ned sẽn ka yelle, ka võor dãmba la a gũusda. A maneg n solga a tʋgrẽ n gũusd wa bõnyẽega, a sorame n na n bri zu-bʋk soaba; f lʋɩ a bẽdgẽ, t'a vu n looge. Ad-a sẽn sore, ad-a sẽn vũnumdi n na n yɩk ne a pãng fãa n lʋɩ n yẽege. A bee tẽngr n maane: «Wẽnd yĩmame, tõnd solga b nini, b ka ne fɩ.» Yik-y yã, Soaala, zẽk-y y nugu, da yĩm-y nimbãan-dãmba yell ye! Pʋs n yaa bõe yĩnga la a toog-ka-ne-Wẽnd laad Wẽnd la a yetẽ: «B na n yi n gẽes-m-la yɛɛnẽ?» A yĩmame bal tɩ y yãenda a tʋʋm yoogã la a sẽn wa ne naong ninga, a yĩmame tɩ y kolda bũmb fãa, a yĩmame tɩ ka yõod soab teega yãmba, a yĩmame tɩ kɩɩb rɩt mɛdga, yãmb n pʋgd n punda bɩɩm. Yik-y yã, Soaala, n menes a toog-ka-ne yãmb dãmba! Tɩ y sã n wa yik n baood-b ne b zɩtma bɩ y ra yãend fɩ ye. Wẽnd n so naam beoog sẽn wate: nin-dẽgdã kõn le kell y soolmẽ ye. Soaala, yãmb deega a ka mi zẽk-m-meng kosgo, n kengd a sũuri, yãmb yoogda y tʋbre n kelgdẽ, woto kɩɩb-bil la ka neng soaba lebda b zakẽ ne b bʋʋm, woto me la y na n sɛɛs tẽng zugu zãmb la pãn-tõog buud fãa. Yɩɩla bee yɩɩla naab sebrẽ. Yaa a Daviid yɩɩlle. M Soaala la m sool yã y yɩta a wãn n le tõog n yeele: «Leb-y tãmsa zutu, lʋɩn-yirsi!» Nin-wẽns rõosda b tãbdo, b yãagda b pɛɛma, n na n soos n tão nin-tɩrga, Sẽn da tog ne taoora la b lebs poorẽ, nin-sõng yell na n yɩɩ wãna? Soaala be-la b ro-sõngẽ, Soaala naama goeel vigla yĩngri, be la b zao n getẽ, n get neba ne b tʋʋma. Soaala pẽgda nin-sõngo, n yaool n sãbsd nin-wẽnga la sẽn maand-a a taab pãnga. Yel-beed na n naga nin-wẽns wa saaga, tɩ kidibr bugum wa zom-b wa sɩlmande; bãmb me pʋɩɩr la rẽ tɩ b tugund taaba. Soaala pida ne zemsgo, b pẽgda nin-sõma tʋʋma; bãmb ne nin-sõma wã nens n na n tees n get taaba. Yaa a Daviid yɩɩlle; yɩɩla naab kɩtdame tɩ b yɩɩl ne koala la ruuds. Wa-y n fãag-y-do, Soaala, nin-sõng ka le ket ye, ba a ye, ninsaalba menesa b pʋ-peelem zãnga. B leokda taab beed bala, b mii belgr ne goama, n naag n kalemd zirẽ la sɩda. Bɩ Soaala wõrg zelemd fãa sẽn mi belgre la zelemd sẽn lasd tɩtaam goama, zelemde fãa sẽn yete: «M na gom n lubi, m tara m zab-teoogo, ãnda n le tõe-ma?» Dẽ me la Soaala yeel yã: «M nee a ka-neng rãmb pɛta, la naong rãmb kɛleng lʋɩ-la m tʋbrẽ, tɩ m me vaag n yiki, n bao zĩ-sõng n solg b sẽn paoogd b rãmbã.» Soaala gomd yaa vẽenega, yaa wala wanzurf sẽn yɩlg boaagẽ n le yɩlge. Soaala, yãmb pidsda y sẽn yeele. D tẽed tɩ y na fãag-d daar fãa ne neb a woto buudu. Nin-wẽnsa pida zĩig zãnga, tɩ ninsaalba tẽnga reeg zãng n pid ne wẽnem. Yaa a Daviid yɩɩlle; a bee yɩɩla naab sebrẽ. Soaala, nan n yaa n taa da-bʋre? Y na n yĩma m yell zãng laa? Y na n solg-m-la y nengã n ta da-bʋre? Y na n bas-m lame tɩ m zĩ ne sũ-sãang la m bʋʋd ne m menga beoog sẽn vẽege, n ta da-bʋre? M bɛɛba na n zao n kutame n ta da-bʋre? Ges-y tɩ m paam leokre, Soaala-Wẽnde! Bɩ y kell n bas y vẽenema t'a tʋʋs m nina ka rẽ yaa m kũuma gãag la m na n gãande; la bɛ wã na paam n yeele: «M tõog-a lame!» M lʋɩsa na noog m bɛɛb sũuri. M sẽn mi tɩ y kãabga ka vaandã m saagda y fãagr m sũurẽ, la m sɩnga bark pʋʋsgo, y yel-sõmda yĩnga. Yaa a Daviid yɩɩlle. Yɩɩla bee yɩɩla naab sebrẽ. Gãeemsã n gomd woto: «Wẽnnaam ka ye!» Ad-y b wegmame n tʋm yɛl yoodo; sẽn maand-a neer le ka ye. Wẽnd zĩnda yĩngr n sulg n ges ninsaalba, b sulg n gesa yam soab sã n ketame n baood Wẽnd zĩiga. Mik b fãa bʋdgame n dɩk wẽng sore; sẽn maand-a neer le ka ye, a ye meng ka yãet ye. Dẽ la Soaala yeta: «Sẽn pʋgd-b wẽnga konga yam woto fãa laa? Bãmb n yaool n wat ne b taab nimbãanega, n zɛɛd m nebã, n gʋsd b burã n deesdẽ, n ka mi m sɛɛg yõkr ye.» Bãmb n yik marsã n tar digbu n neẽ tɩ Wẽnd be-la b sɩd zĩigẽ. Y baood n na n sãama naong rãmba saagre, mik Soaala la b sool yã. Ãnda n zĩnd Siõ tãnga zug n sõng a Israyɛl t'a tõog a bɛɛba? Bõe t'a Zakoob langdẽ, bõe t'a Israyɛl pid ne sũ-noogo? Yaa Soaala sẽn lɛɛg n wat ne pa-wetã! Yaa a Daviid yɩɩlle. Soaala, ãnda la y na n deeg y zakẽ? Ãnda n na n pa y tãn-sõnga zugu? Yaa ned ning vɩɩma sẽn tũud tɩrga, yaa sẽn tũud-a zemsgo sore, sẽn pʋgd-a sɩd ne a sũuri. A zelemd ka gomd yaar ye, a ka wat ne a taab bõne, a ka paoogd a taab ye. A mii sẽn beeg-b Soaalã n tog ne sãbsgo; a waoogda sẽn zoet-b Wẽnde. A sẽn pʋlem Wẽnd bũmb ning fãa, a pidsda a pʋlengo, ba a sã n mi t'a pʋlenga wata ne a meng bõne. A ka pengde n wa reeg roaglg ye, a ka reegd lagfo n bõn ned sẽn ka tar yell ye. Ned ninga sẽn vɩ-a woto vigla wa pĩiga. Yaa a Daviid yɩɩlle. Bʋkda koɛɛg n yɩɩle. Sõng-y tɩ m pa ne yãmba tɩ m soonda yãmba. M yeela Soaala: «Yãmb la m Wẽnde, M sũ-nooga zãng-zãng fãa la yãmba.» Tẽng zug ka wẽn-naandsã, m sẽn da teeg b rãmb pãnga la m sẽn da pʋgd ne sũ-noog mengã, ad-y bãmb n tar neba sãoong n dabda, bãmb la neba zoet n pʋgda; wẽn-naand bãng t'a kõn le paam m rũng ye, la m noor kõn le walem a yʋʋr meng ye. Soaala, yãmb la m paam wa m pʋɩɩre, wa pʋɩɩr sẽn pid zãnga. M pʋlemda zãng sɩd be-la y nugẽ. M sẽn paam pʋɩɩr ninga noom-m lame, yẽ n be neer n yɩɩd fãa. M pẽgda Wẽnd ne b saglsã, ba m gãag zĩigẽ m tagsda b yelle. M ne-b-la m taoor wakat fãa. B zĩ-la m dɩtgo, m pa le ya bõn-lubdg ye. Dẽ me la m sũur nooma tɩ m sɩɩg pẽgda, tɩ m yĩng pemsd ne laafi la bãane. Y pa basd-m kũum soolmẽ ye, y ka basd y yamba nif meng t'a karg bog zulunga ye. Y sẽn wilgd-m yaa vɩɩm sore, m neng togla yãmba tɩ ya laad ne laado, m pĩir dɩgla y rɩtg tɩ m sũ-noog tõt sɛɛbo. A Daviid pʋʋsgo. Maan-y-m neere, Soaala, n kelg m pʋʋsgo, yoog-y y tʋb n wʋm m waasgo kelg-y m kosgo, ka zirẽ-be-ned kosg ye. Ges-y-m ne neng sẽn mi sugri ges-y-m ne bʋʋd tɩrg nini! Soaala, yãmb tɩga m sũurã, yʋng tõre y sogs-m lame, y fɛɛs-m lame n ka yãend fɩ ye, sẽn wa m yamẽ ka yi m noorẽ ye. La rẽ yaa m sẽn tʋlg n wẽneg ned sẽn deegd y noor sẽn togse, la m tũu sor ning y sẽn wilgi. Y naoor sẽn tabgẽ la m me sẽn sagl m nao, dẽ me la m pa lak bũmb ye. M boond-y lame, Soaala, la m miime tɩ y na n leokame. Wʋm-y m koɛɛga la reeg-y m kosgo. Soaala, sẽn waa n soonda yãmba, ka paad a bɛɛb nusẽ ye, tɩ y pʋgd-a-la ne y nonglem, y rɩtgã n na n wa ne a fãagre. Gũ-y maam tɩ m zoeta toog wa fãa-fãa n zoet toog wa nin-beelle, solg-y maam y fãagra maasmẽ, n tall-m n zãag ne m laoga zɛɛdba, zãag-y-m ne bɛɛba sẽn gũbg maama. B pida ne wakre, n kẽnda; tɩtaam goam bal la b yiisd b noorẽ. Ges-y b sẽn lagsd m nao, ges-y b sẽn zoe n gũbg-ma; b baood n n na n tebg-m lame n fabge. B wẽnda gigma, n baood n na n yĩigi, n wẽnd we-rũng sẽn sor tʋgrẽ. Yik-y yã, Soaala, seg-y bɛ wã, tõog-y bɛ wã! Wa-y ne y sʋʋga n fãag-ma! Pĩng-y-b ne y nugu n yiis ninsaalb sʋka, yiis-b nin-vɩɩs sʋka, dũni wã pʋga! Boto n tog n yɩ b pʋɩɩra tẽng zug ka. Modg-y tɩ b reeg sɩbgr ning y sẽn bĩng-bã. Sek-ba la sek b kamba, tɩ b kees n bĩng b yagense. Wala sẽn yẽs n dɩgle, mam yẽ na yãend y nenga. M nin sẽn puk fãa, y nenga bal la m tar gesgo. Yɩɩn-kãnga bee yɩɩla naab sebrẽ. A Daviid n gʋls-a; yɩɩ Soaala sẽn fãag-a raare ne a bɛɛbã la a Sol menga. A Daviid yeelame: M nong-y lame, Soaala, yãmb la m pãnga. Soaala yaa m pĩiga la m lilli, bãmb la m tãnsoben-doog la m fãagre, bãmb la m gãongo la m fãagr zab-teoogo. Bɩ Wẽnd paam pẽgre, tɩ m sẽn bool-ba b waame la m tõoga m bɛɛba. Kũum kolga ne a wĩ, n gũbg-ma, a kolga ne a ko-wiiga n na n ling-ma. Bʋg-tẽng kolga ne a wĩ n gũbg-ma, Kũum kolga ne a sʋgre n na n tiig-ma. M tees n kelma Wẽnd m yɩɩra pʋgẽ, m tees n bool-b lame la b zĩnda b ro-sõngẽ n wʋm m koɛɛga m koɛɛga waa n lʋɩ-la b tʋbrẽ. Tẽnga rigimdame tɩ tãmsa vigs b seesẽ tɩ Wẽnd sũur puugame. Ad-y bug-zõos n nuki, Wẽnd sũ-puurã n widg a bugum, tɩ b noora puusd bug-walem la bug saala. Soaala pilga saagã n sigi sawad taok la b naoora teeg n sigi. B looga wala b yɩk n zomba weoofo, wala b laanda ne sobg pɩgsa. Likẽ la b zoe n tɩ solge lik sẽn pid lik menga, sawadg sẽn pid sawadgo. Vẽenem n deng taoore tɩ sawadga yaool n pʋgda, n le paas sapɩlem la bug pãrse. Soaala zĩnda yĩngri n kũms bʋʋre, Yĩngr Pãng-Soaba tãsame tɩ sãde, tɩ sapɩlem la bug saal na n le bare. B sẽn yãag b tãpo, pɛɛm sẽega zĩig zãnga, saaga sẽn tãse la b sʋʋga sẽn yãg goalma. Ad-y kʋɩlsa koom fẽbga vugri, sẽn da be zugẽ zoe n busa tẽnga, la y tãsgã n wa ne rẽ fãa, Soaala-Wẽnde! Y tĩsga n wa ne bũmb fãa zũndugri. Soaala zĩnda yĩngr n tʋm la b waa n yaag-m-la ko-liungẽ. B waa n fãag-m-la ne bɛɛb toose, bɛɛb sẽn da tãag-m yĩid ne pãnga. B sẽn tẽ raar ning tɩ m na n konga pãngã, baraare la Soaala yik n teeg n sõng-ma. B fãag-m lame, m paam n põsame, b fãag-m lame tɩ b nong-m lame. Soaala zã-m-la wa sẽn tog ne-ma, wala m sõmblem sẽn tog tɛka. M dɩka Soaala sore, n pa kɩɩs b noor ye M tũ-la b soya tɩ b fãa rɩga m taoore, m ne-b lame la m pa kɩɩs ba a ye reegr ye. M pelga m pʋga n tũ Soaala, m modg n zãaga m meng ne wẽnga. B maana ne maam wa sẽn segde, wala m pʋ-peelma sẽn tog ne. Wẽnd pʋgda sẽn pʋgd-b bãmba, b pʋg peela ne pʋ-peen neda. Sẽn ka tar-a a toorẽ yelle, Wẽnd ka rat yẽ soab ne yell ye. Ned sɩlsda a wẽnem wa baafo, tɩ Wẽnd sɩls b sɩlem wa pĩim. Wẽnd doogda sulg-m-meng soaba, la b sulgd sẽn zẽkd b mense. Wẽnd maag yãmba, m naama nan ka gʋsg ye! Soaala, m Wẽnnaam, vẽnegda m lika. M yɩgd n gãeesda bogd ne sũ-keelem, m yɩgd n kanda lalse ne bãmb pãnga. Soaala sora la so-sõngo, bãmb gomd ka lʋɩt vɩʋʋgẽ ye, b kogenda sẽn baood-b bãmb zĩiga. Ãnda la Wẽnde, sã n ka tõnd Soaalã? Ãnda la pĩiga, sã n ka tõnd Wẽndã? Bãmb n mobg-m ne b pãnga, bãmb n dems m sora tɩrga. Bãmb kõ-la m nao keglem wa walg rẽnna, b tol n zẽk-m lame n dʋʋs yĩngri. B zãmsa m nusa zab-teed zãabo, m kang rõosda kut tãbdo. Y gãong yĩnga m maanda raoodo, y kõ-m-la pãnga, y pʋg-m-la ne y nonglem, y zẽk-m lame n dʋʋs yĩngri. M kẽnd lebga faasga la m pʋs n ka le mi yaams ye. M pʋgd n yõgda m bɛɛba, m pa lɛɛgd n wa tɩ b ket vɩɩs ye. M kʋʋd-b lame n gãnege, b fãa rʋʋgda m taoore. Soaala yĩnga m boba zabr ne raoodo, bãmb yĩnga m bɛɛba gãnegda m taoore. Ad-m nug sẽn teeg b kãare, tɩ m kʋʋd-b yaare. B tara kɛlenga la yɛ la b fãagr na n yi? B boola Soaala la b pa leokd-b ye; m neem-b lame tɩ b lebg tom tɩ m dɩk n kõ yĩngr sobgo. M kãagd-b lame n lobd wa sor zug begdo. M neba sã n mi n yik n wulumd ne-ma, yãmb n kongd n wa fãag-ma, Soaala, yãmb kõt-m-la naam bu-zẽmba zugu, m sẽn da ka kĩ ne b rãmba, yik n kẽeda m soolmẽ. Sãamb waa n nok-m lame. M sã yaag m noor bala b tũudame, m sã n gome b basda raoodo b zoet n yi n basa b roto. Soaala paam pẽgre, m pĩiga soog barka! Wẽnd ninga sẽn kõt-m pãnga soog naam! Bãmb n kõt-m tɩ m dokd m sũuri bãmb n kõt-m naam bu-zẽmba zugu. Bãmb n sõngd-m tɩ b tõe m bɛɛba, bãmb n sõngd-m tɩ m maand raoodo ne m zabd-n-taase, bãmb n fãagd-m pãn-tõog rãmb nusẽ. Soaala, m pẽgd-y-la bu-zẽmba sʋka, m na n yɩɩlame n kils y yʋʋrã. Dĩma tõe-la a bɛɛba, Wẽnd sõngda b sẽn taag a soab naam kaama, B ket n pʋgd-a-la ne b nonglem, beoog sẽn vẽege, b ket n data a Daviid buuda ne naam, zamaan ne zamaana! Yɩɩlla bee yɩɩla naab sebrẽ. Yaa a Daviid yɩɩlle. Yĩngr teeda fãa kilsda Wẽnd ziiri, sa-gãonga reegame tɩ yãmb nug n yɛdg-a. Dũnna raara reegdame n togs beoog raare, tɩ rũnna yʋnga reegd n togs beoog yʋngo. B goama ka gom-biis n togsd bũmb ye, ka gomd tɩ koɛɛg sãt ye. B sẽn yaool n gʋls bũmb ninga vẽneg n dɩgame, b sẽn dat tɩ d wʋm bũmb ninga yaool n tata tẽnga tɛka. Wẽnd kula al yĩngri n bao zĩig n kõ wĩndga. Yibeoogo a yita a gãagẽ wa yi-kãad paalga, n baood sẽn na n wagsa ne-yẽ n kongdẽ. A sẽn puk kɩreng a ye, a gildame n wa kɩreng a to tɩ zĩiga reeg n wɩng zãnga. Soaala noor sẽn yals fãa toga ne pẽgre la a kõta vɩɩm yamleoogo; bãmb sora ka kẽesd moog ye, a lekda yam sẽn pa sãoogo. Soaala noora n ka tar goaleng ye, a pidsda sũur ne sũ-noogo, nora rɩga wa ko-yɩlemde, a vẽenema leooda nini. Zoe Soaala nif ka tar no-koeemd ye, yaa bũmb sẽn tog wakat buud fãa, Bãmb yɛsa b sɩd zug bala, b sẽn yals fãa yaa sõmbo. M pẽgda Soaala noorã n yɩɩd sãnem yulli, m pẽgd-a lame n yɩɩd sãnem gilgu, n yɩɩd sɩ-vak la sɩ-kaam. Yãmb noora la m tũuda n kẽnd vẽenemẽ, y noora tũudem pida ne yõodo, Soaala. Ãnda n tẽr a zaamẽ kongr zãnga? Yiis-y wẽng sẽn ket n solg m pʋgẽ, Soaala. Zãag-y-m ne wilg-m-meng rãmba, sõng-y tɩ m lok m toog ne bãmba, la m tõog rẽ, m põs yel-wẽnde, m tõog rẽ, m pida m sõmblem. Bɩ m noora goama la m sẽn walemd m sũurẽ ta y yam, m Soaala, m Pĩiga la m Sõangda! Yɩɩlla bee yɩɩla naab sebrẽ. Yaa a Daviid yɩɩlle. Bɩ Wẽnd leok-fo f sũ beeda raare! A Zakoob Wẽnda gũ-f baraare, b zĩnd b ro-sõngẽ wã n tool-f b sõngre, b zĩnd Siõ n kogl-fo. Bɩ b tẽeg f kũuna fãa, b bas tɩ f yũ-nooga maoong ta b yam, n kõ-f f sẽn date la y pids-f ne f sẽn gãe n tẽede. Woto f bɛɛba tõogr na yãk daare, baraar d na tong d Wẽnda yʋʋr pẽgr yĩnga. Bɩ Wẽnd deegd f kosga fãa! M mii marsã tɩ Wẽnd na n kɩtame tɩ b sẽn taag a soab ne b ka-sõngã tõog a bɛɛba gilli. B na n zĩnda b yĩngr do-sõnga pʋg n leoke n kãab-ba tɩ b rɩtg kanga yaagame n na n tʋm b pãn-tʋʋma. Neb kẽer teega b bilim-bilma sõore, tɩ kẽer teeg b wiida tĩiga; tõnd yẽ teega Soaala yʋʋr bala, bãmb yʋʋra bal la d boaanda. D ne d bɛɛba sẽn pãsd n lʋɩtẽ tɩ tõnd ket n teeg n yɛsẽ. Soaala, wa sõng-y dĩma t'a maan raoodo, woto la yẽ me tõogd n sõng-do, d sẽn na n bool-a raare. Yɩɩlla bee yɩɩla naab sebrẽ. Yaa a Daviid yɩɩlle. Dĩma sũur noomame tɩ y pãnga labsame. A sẽn tõog a bɛɛba pids-a-la ne sũ-noog kãsenga. Ad-y y pidsa a sũur daabo, y reega a sẽn yaag a noor n kose. Yãmb barkã n deng taoore t'a zug paam naam pugla, n fõgen. A sẽn kos y vɩɩm, a paamame, a paama yʋʋm sẽn tong taab wogd-wogdo. A sẽn tõog a bɛɛba, a ziir kula yĩngr; y yeelg-a-la ne naam la faongo. Y pids-a-la ne daar fãa barka. Y zĩndig-a-la y taoore t'a sũur tosd kaam. Dĩma teega Soaala, bɩ Yĩngr-Soaala kãabg sẽn ka vaandã, maneg n vigl a naama goeele. Zɩsg-y y nuga bɛɛba fãa zugu, zɩsg-y tɩ b yubla wa põde. Y sã n lik tɩ bɛɛba yãend y nengã, yaa wa bugum n na n dɩ ba, tɩ sɩda y sũura na n puugame la a bugma na n widg n dɩ-b lame. B buuda na menes baraar tẽnga zugu, baraar tɛk la b tɛka. B rat-y ne wẽng, n yik n maand sudum me, b kõn tõog n maan bũmb ye. Y lub-b-la b po-raoog zugu, la y sẽn yãag y tãpã n tees-bã, b neeme. Yik-y yã, Soaala, wilg-y y pãnga; tõnd me na n baoo yɩɩlle n kils y tʋʋm sõngã. A Daviid yɩɩlle. Yɩɩla naab yɩɩnd-a lame t'a wẽneg: Sõor yĩsr kilsga yɩɩlle. Y bas-m-la bõe yĩnga, Soaala? M tara yãbre la m ket n zãra ne fãagre. M kɛlenga ka paamd leokr wĩntoog ye, la yʋngo gõeem ka-m ye, m Wẽnnaam. Yãmb yaool n pida ne sõmblem, n pid ne naam, n yaa a Israyɛl zu-zẽkre. D ba rãmba ra teega yãmba tɩ y wat n yolsd-b. B ra teesa yãmb n kelemdẽ, la y wat n fãagd-b lame, b ra teega yãmba la y ra pidsda b raabo. Mam yẽ lebga wa bɛdenga, n ka le wẽnd ninsaal ye; neba tara m tʋʋre, tɩ buuda lebsd-m poorẽ. Sẽn seg-a maam fãa tara-m laado, b laad-m lame la b tara m pursgu. Bãmb n gomd ne-ma tɩ m wẽnemd n ges Soaala, tɩ Soaala sẽn nong-ma, b na fãag-ma. Yãmb n yiis maam m ma pʋgẽ. Yãmb n gãneg-ma a yãoogẽ ne laafi. M sẽn wa moogo, b rɩk-m lame n gũnug yãmba. Yãmb la m Wẽnde, m dogem tɛka. Da pa-y yɩɩg a woto tɩ yel-beeda pẽnegame la sõangd a to ka ye. Lols ka tɛk n gũbg maam, Bazã rũm-nobdsã n wẽ-m gũbri. B yaaga b noor n tees-ma, bãng-y bõnyẽes sẽn tõosd zɛrma la b yãbda. M lebga ko raandem, m kõaba fãa sũgsame, m pʋgẽ, m sũura booga wa siribdu. M yagda sɛɛme tɩ m kʋɩ wa sa-pɛɛga, m zelemda taba m dasendaka, y zoe n bus-m-la tomẽ wa kũum. Baas n gũbg-ma, tɩ nin-wẽens yegd-ma, b sẽb-m-la wa bõnyẽega, b sẽba m nus la m nao, M tõe n sõda m kõaba fãa. Sẽn yãend-b maama tara m gesgo. B rɩk m futã n pʋɩt taaba b poees n bãnga ned fãa ne a zu-noogo. Soaala, da yals-y yɩɩg ye, yãmb la m Sõangda, maan-y tao tao. Zãag-y maam ne b sʋʋse, baasa zoe n gãneg-m-la b naoẽ n gusda. Fãag-y maam bõnyẽesa noorẽ, we-niisa yɩɩl da tã-m ye; la y bark tɩ y reega m kosgo! M na n le kilsa y yʋʋr m saam-biisa taoore, m na n le yika kʋʋnga sʋka n pẽg yãmba. Yãmb fãa sẽn zoet Soaala, pẽg-y-ba! Yãmb fãa, a Zakoob yagense, pẽg-y-ba, yãmb fãa, a Israyɛl buudu, zoe-y-ba. B zɩ n zãgs nimbãan-ned kelgr ye, b zɩ n wẽnemd b nenga kɛɛng ye, d kelemsa lʋɩta b tʋbrẽ. M sẽn pẽgd yaa yãmb bala, yãmb bal la m kilsd kʋʋnga sʋka, la yaa sẽn zoet-b yãmba fãa taoore la m na n pids m pʋlengo. Naong rãmb dɩta b yam, sẽn baood-b Soaala tara b pẽgre; la woto la b gomda: «Wẽnd na pids y vɩɩma zãnga!» Tẽnga gill na n maana tẽegre, n le lɛɛg n wa kẽ a Soaala, dũni ninsaalba na n lɛɛge n wa wõgemd Soaala taoore. Naam toga ne Wẽnde, n tog ne bu-zẽmba Soaala! Tẽnga pãn-dãmbã na n wõgemdame, sẽn ya-a bõn-kiidg fãa na n wõgemda Wẽnd b ye bal taoore. Sẽn ki-a basda buudu, a buudã n na n zãms a zamaana rãmba tɩ bãmb me kẽ Soaalã. Bãmb me na wilg zamaana sẽn pʋgdã Soaala tʋʋma sẽn tʋm ne zemsgã, la zemsg tʋʋm n sɩd tʋme. Yaa a Daviid yɩɩlle. Soaala la mam gũuda menga la bũmb fãa bee m nugẽ. M paama bʋgsg zĩig n tʋɩ m gãaga, b tall-m lame n ta koom noore, tɩ m vʋʋsd be. M vɩɩma le yẽegame. B kẽes-m-la so-sõng pʋgẽ tɩ m kẽnd la m pẽgd b yʋʋre. Ba m sora yegd bog-zulunga n yegd kũum, dabeem ka tar-m ye, tɩ m Soaala bee ne maam. M teega b roorã la b rasaarã pãnga. Rɩɩb la y tẽgen m taoore, tɩ m bɛɛba zĩ n getẽ. Y bao yũ-noog n sudg m zugu, ad-y bũmb sɩd ka paoog-m ye. N-ye! Y nonglma tara m pʋgbo, la yaa sũ-noog ne sũ-noogo, beoog sẽn vẽeg fãa. M na n le tɩ pa-la m Soaala roogẽ, be la m na n pa n sõt kiis la yʋʋma. Yaa a Daviid yɩɩlle. Soaala n so tẽnga ne a laogo, bãmb n so dũni wã ne a kẽedba. Mogra sʋk la b viglig tẽngã, n maneg n kɩls-a n yals-a kooma zugu. Ãnda n na n dʋ Soaala tãnga, ãnda n na n tɩ kẽ b ro-sõngẽ? Yɩta nus sẽn pa rẽgem la sũ-tɩrg soaba, yɩta sẽn ka pʋgd-a wẽnga, kõn yɩ wẽen-faad soab ye. Sũ-tɩrg soab n paamd Soaala barka, n paamd b sõmblem la b fãagre. Nin-bãmb buud n baood Wẽnd zĩiga, nin-bãmb la a Zakoob kamba. Rĩm biisi, paks-y kʋɩlense, tẽnkʋdem-wẽnnẽ kʋɩlensã la y na n pagse tɩ d Dĩma sẽn pida ne ziira loog n kẽ. Dĩm kãng la ãnd soaba? Yaa bũmb fãa Soaala, bãmb la Dĩma sẽn pid ne ziirã. Rĩm biisi, pags-y kʋɩlense, tẽnkʋdem wẽnnẽ kʋɩlensa la y na pagse tɩ d Dĩma sẽn pid ne ziira loog n kẽ. Dĩm kãng la ãnd soaba? Yaa Soaala, yaa Pãng-Soabã, bãmb la Dĩma sẽn pid ne ziirã. Yaa a Daviid yɩɩlle. M wẽnemda m neng n tees yãmba. Soaala, m teega yãmba, pids-y m daabo, da sak-y tɩ m bɛɛba tõog-m ye. Ned zɩ n teeg yãmb n kul zaalem ye. Ad-f sã n ka leb ne bũmbu, f ka wa b nengẽ ne pʋ-peelem ye. Wilg-y maam y noya, Soaala. Wilg-y maam b sẽn teesd-m. Zãms-y-ma, togl-y-m sɩd sore, yãmb m Wẽnde la m Fãagda. M gũud-y-la wakat buud fãa. Tẽeg-y tɩ y yaa nin-bʋgsgo la y pʋleng zɩ n vaal ye. Yĩm-y m bi-bɩɩlmẽ wẽnnẽ yel-wẽna, ges-y-m ne nonglem la nimbãan-zoeer bala. Soaala yaa noanga la b ka mi zãmb ye, n ket n wilgd yel-wẽn-maand so-sõngo. Sõmblem sora la y teesd sulg-m-meng rãmba, so-kãng la b zãmsd tɩ b rɩke. Soaala sor fãa yaa nonglem la sɩd sore. F rat tɩ b kãabga pids f yĩnga, bɩ f rɩk so-kãnga. Y ziira labs ne m wa beeg yãmb woto fãa, la rẽ me yĩng la m kot-y sugri. Fo nif sã n ka sãag Wẽnde, ad-b wilgd-f-la sor ning f sẽn na n dɩke. Yʋngo gõeem na n saka yẽ soaba, la bãmb buudã n na n wa soog moogo. Wẽnd pakda b sũur ne sẽn zoet-b bãmbã, b wilgda bãmb b zoodã. M sẽn teeg a soaba la Soaala tɩ b tõee fãa; bãmb n tõe n lood bɛɛba sẽn za-m ne wĩ niynsã. Wẽnemd-y y neng n tees-ma, Soaala, zoe-y m nimbãanega, tɩ m yaa m ye la m ka yõod ye. M nina yaee yɛl bɛda tɩ m yam puki. Wa-y n fãag-y-ma! Ges-y m nimbãanega la m pɛta, loog-y ne m wẽnema fãa. Ges-y tɩ m bɛɛba sõora labsa, ges-y tɩ b pʋ-toogã n yɩɩda. Wogl-y m yõore, fãag-y-ma, m sool-y lame, kogl-y-ma. M gũuda yãmba, Soaala, zãag-y-m ne yel-wẽnde, wilg-y-m sõmblem sore. Fãag-y Israyɛl wɛ, Wẽnde! Gũ-y y buudã, a zu-loeesa fãa pʋgẽ. Yaa a Daviid yɩɩlle. Kõ-y maam bʋʋm, Soaala, m teega yãmb zãnga la m kẽnd yaa tɩrga! Fɛɛs-y-ma, Soaala, ges-y m neng la m poore, pãrg-y m pʋga ne m sũurã. M ne y sẽn ket n pʋgd-m ne nonglem ninga, m vɩɩnda wala y sẽn wilg-ma. M pa saag n kẽ zirẽ-be-rãmb zakẽ ye, m pa sõs ne ninsaan-kazukem ye. Nin-wẽnsa n lebg m bɛɛba, bãmb ne wẽn-kɩɩsdba sʋka, m pa saag n zĩnd ye. M peka m nusi n na n kõ kaset tɩ yell goaleng ka m zug ye. M dat n kolga y maan-kugrã, ne m bark pʋʋsg yɩɩla la m kilsd y tʋʋm sõma wã. M nonga y ro-sõngã, yẽ pʋgẽ la yãmb yʋʋra zẽk yã. Welg-y-m toore ne yel-wen-maandba, da rɩk-y-m n fãoog ne nin-kʋʋdba ye. B sɩɩsa rẽgma zãnga, b reega ligd n na n tʋm beedo. M vɩɩma yaa tɩrga, la zoe-y m nimbãanega, n fãag-ma. M naoor paama zĩ-sõngo tɩ m teeg n yɛsẽ, Soaala, m tara y pẽgr kʋʋnga sʋka. A Daviid yɩɩlle. Soaala n ya m vẽenem, m fãagra yita bãmb nengẽ. M na n zoe ãnda rabeem? Soaala kẽes-m-la b tãnsoben-doogẽ, m na n diga ãnda taoore? Nin-wẽnsa sã n baood-m n na n kʋ, ad-y yaa bãmb n lɛɛgd n pãsd n lʋɩtẽ. Bɛɛba tãp sã n gũbg-ma, m sũur ket n ka rigd ye. B sɩng b zabra takre, m ket n zĩi ne saagre. Bũmb a ye la m kos Soaala, la m kos-a-la me m sũur fãa, yaa m pa b ro-sõngẽ, m vɩɩma zãnga, n tõog n tɩg b rasãndlem, la m me tõog tɩ rooga pa ne a neerem. Ra-beeda raare, b baooda pẽk n solg-ma b baooda zĩ lilli n kẽes-ma, b baooda pĩig n lill-ma. Marsã yaa m bɛɛba n sur m taoore. Ro-sõnga pʋga mam tõe n kẽe ne m kũuni, m tõe n waa ne maand sẽn naagd ne kilsgu, maand sẽn naagd ne Soaala pẽgr yɩɩla. Soaala, kelg-y m boolgo, zoe-y m nimbãaneg n leok-ma. M tẽra y sẽn yeele: «Bao-y m zĩiga, tɩ mam me baood-y lame.» Da solg-y y nenga ye, da pĩng-y y yamba ye, da lak-y n bas-ma tɩ y zoe n wa fãag-m lame. Yãmb la m Wẽnd la m Fãagda. M ba ne m ma bas-m lame, tɩ yãmb deeg maam y sɛɛgẽ. Wilg-y maam y sora, Soaala, kẽes-y maam y so-sõngẽ, woto m na põs sẽn baood-b maan ne wẽngã. Da bas-y maam m bɛɛba nusẽ ye. Ad-y b waa ne neb sẽn na n dõd-ma, b waa ne neb sẽn baood n na n maan m pãnga. M yella yɩtẽ la wãna m sã n da pa tarẽ kaseto tɩ Soaala na yeg-m ne b nonglma tẽng zug ka, nin-vɩɩsa sʋka? N-ye! Ninsaal biiga, teeg Soaala. Wɩsg f menga la f yik ne raoodo, teeg Soaala ne sũ-maasem. A Daviid yɩɩlle. Soaala, m boond-y lame, yãmb la m dell wa pĩiga, kelg-y-ma! Y sã n sĩnda, m na n lebga bõn-kɩɩnga. M sã n tees yãmb n kelme bɩ m koɛɛga lʋɩ y tʋbrẽ, m sã n zẽk m nus fãa n tees ro-sõngã. Da naag-y-m n vu ne nin-wẽnsa ye, la sẽn daagd-b zɩɩma ye, ne neb sẽn gomd laafi goama, tɩ b sũur yaool n pid ne wẽnema ye. Zãag-y-ba tɩ b vɩɩm yooga sẽn tog la rẽ. Rol-y-ba wa b tʋʋm yooda sẽn tog ne. B pa pẽgd Wẽnd sẽn tʋm ye, b pa get Wẽnd tʋʋma sẽn yaa a soab ye. Bɩ Soaala pãb-ba n sẽege la bũmb da le yals ye. Wẽnd soog pẽgre tɩ b kelga m pʋʋsgo! Soaala yaa m tãnsoben-doogo la m gãongo. M sẽn teeg bãmba b wa n sõng-m lame. M kɩdemda sũ-noogo, m tãsda m pẽgr yɩɩla. Soaala kõta b buuda pãnga, B sẽn taag a soab ne b naama kaama, Soaala gũbga a zaka, bɛ ka tõe n ta ye. Soaala, fãag-y y buudã, pids-y y soolma rãmb ne barka, yɩ-y b gũuda la y buk-ba y poore, daar buud fãa yĩnga. A Daviid yɩɩlle. Yĩngr ne a pãn-dãmba fãa pẽg Wẽnde, pẽg-y b pãnga ne b ziirã, Kils-y b ziira wa a sẽn tog ne, wõgemd-y b taoore, b sõmblema pukr daare. Soaala koɛɛg limda ko-wiisa rẽnna, Soaala sẽn pid ne ziirã kũmsa saagã, Soaala koɛɛg limda ko-wiisa rẽnna. Soaala koɛɛg tara pãnga, Soaala koɛɛg sãta zĩig zãnga; Soaala koɛɛg kaooda tɩɩse, b lubda Libã tɩ bɛda mense. B kɩtame tɩ Libã pʋgemd wa nag-bila, n kɩt tɩ Siriõ yɩgd wa we-naaf biiga. Satãsa yaa Wẽnd n gomde. Wẽnd gomdame tɩ we-raooga tar rigbu, Wẽnd gomdame tɩ Kadɛs rãmb neng tak bem-bem. Wẽnd tãsdame tɩ rogem waood kẽed walse, Wẽnd gomdame tɩ wil na n sʋʋg goodẽ. Ro-sõnga meng reegd n sokame: «Soog-y ziiri!» Saag niid n ka yoogdẽ wã, Wẽnd-Pãng n tõe rẽnna. Soaala la rĩma, zamaan woo zamaana! Soaala na n kõ-la b buuda pãnga, Soaala bark yĩnga laog buud fãa kẽeda b buudã. A Daviid yɩɩlle, a dooga bark ningr daare. M pẽgd-y-la ne m pãng fãa, Soaala, y yaag-m-la bul-zulungẽ, m bɛɛba ka paam n la-m ye. Soaala, m Wẽnde, yãmb la m tees n kelme la y sãoog-m lame. Soaala, y yiis-m-la bʋg-tẽnga, yãmb le vʋʋg-m lame ne m sẽn da zoe n lebg yaoog bũmbã. Wẽnd kamba yɩɩl Soaala yĩnga; kils-y-b tɩ b pida ne sõmblem. Y sũura puuga bilf bal ne-ma la yaa m vɩɩma tõre la m tɩg y nonglem. M yãbra yãba yʋngo n zʋʋg zĩiga, la beoog sẽn vẽege, lebga sũ-noogo. M da zĩi ne laafi n gomda: «Bũmb kõn zãag-m ne Wẽnd ye! Mik yãmb yika ne nonglem n kõ-m tãng keglem.» Y yaool n wa yik n solga y nengã tɩ rabeem yõk-ma. Dẽ me la m bool-y, Soaala, dẽ me la m kolg n yõk y sɛɛga, n yeele: «M zɩɩma daagr ka yõod yɛ, m yaoog pʋgẽ sigb ka yõod ye, Sẽn lebg-a tom ka tõe n le pẽg-y ye, a ka tõe n le kils y nonglem ye.» Kelg-y-ma, Soaala, zoe-y m nimbãanega! Zoe-y n wa sõng-y-ma. Y teka m kʋ-yãbra tɩ lebg saooga, Soaala Wẽnde, m na pʋʋs-y barka, beoog sẽn vẽeg fãa, tɩ m tar yɩɩl n pa rat n sĩnd ye, n tar y bark pʋʋsg daar fãa. Yɩɩlla bee yɩɩla naab sebrẽ. A Daviid yɩɩlle. Yãmb doogẽ wã la m wa n na n soonde, bɩ bũmb da wa maan-m be ye, bɩ y sõmblema wa fãag-ma. Kelg-y m pʋʋsgã la fãag-y-ma. Yɩ-y pĩig sẽn pid ne keglem n lill-ma. Kẽes-y maam y tãnsoben-dooga pʋga. Yãmb n naag n ya m pĩiga la m tãnsoben-doogo. Y wilg-m-la y ziira sẽn labs to-to, y lʋɩ-la m taoore n wilg-m sore. Lood-y b sẽn za-m ne wĩ niynsã, yãmb la m soond n na n põse. Y nugẽ la m lebsd m vɩɩma, Yãmb fãag-m-la ne y sɩda, Soaala. M kisa sẽn tar-b tẽeb yoodo, yaa Soaala bal la mam yẽ teeg yã. Soaala ket n pʋgd-m-la ne nonglem tɩ m na n sigl saooga. Yãmb gesa m nimbãanega la m pɛta. Y ka bas maam m bɛɛba nusẽ ye; m le kẽnda m nao zugu, n zãr ne yel-beedo. Zoe-y m nimbãanega, Soaala, m sũ-sãanga kiisa m nini, n kʋɩɩs m pʋg la m koɛɛga. M vɩɩma baasda ne nintãm la waasgo, m yel-wẽna yĩnga m pãng sɛɛ fas! M kõaba sɩɩlem fõoga zãnga. Bɛɛba naaga taab n tar m tʋʋre la m yagsã n yɩɩd ne wẽnem; m zo-rãmba yɛɛsd-m lame, b sã n seg-m kɛɛnga, b ningda tĩiga. B yĩm-m-la wala bõn-kɩɩnga, m yʋʋra menema b pʋtẽerẽ, b sã n tẽrẽ me yaa wedse. M wʋmda neba sẽn togsde: «A bugsda nebã n gilgdẽ, wa kɩɩma.» B zemsa taab n na n yãk m vɩɩm. M teega yãmba, Soaala, m yetame tɩ yãmb la m Wẽnde. M vɩɩma saga y nugẽ, fãag-y-m tɩ bɛɛba pʋgd-m-la ne sũuri. Bɩ y vẽenema le bui y yamba nenga. Kell-y n pʋg-a ne nonglem n fãag-a. Bɩ m da bool n ka paam leokr ye! Bɩ m bɛɛba wʋm y leokre la b kell n pa sɩɩ, wa bʋg-tẽng rãmba. Mum-y noor ning fãa sẽn yagd ziri, noor sẽn dõt nin-sõng la sẽn ka tar a toorẽ yelle, noor sẽn dõt ne tɩtaam la wʋglem. Yaa yel-sõma sõor sẽn ka be tɛka la y bĩng sẽn zoet-b yãmb nifã. Yel-sõmda yaa sẽn waa n soond-b yãmba yĩnga, la na n yɩɩ neb fãa nifẽ, Y sẽn solg y meng zĩig ningã, Soaala be la y na n solg y neba tɩ b paam n zãag ne ninsaalb zelem goalma. Soaala paam barka! Y wilg-m-la y sũ-maasma sẽn ka taarã. Bɛɛb sẽn wẽed tẽng gũbri t'a lebg a soabã, m da wẽnda boto. M da ka le mi m sẽn beẽ ye, n ka le tẽed tɩ y ne-m lame ye; mik m sẽn tees n kelma, y wʋma m koɛɛga. Nong-y Soaala, Wẽnd kamba, tɩ Wẽnd kogenda sẽn kẽed-b bãmba la yaa naoor a yi la b sɩbgd sẽn paoogd-b bãmba. Yãmb fãa sẽn saagd Wẽnde, keng-y y sũuri, da bas-y raood ye! A Daviid yɩɩlle. Zu-noog soab la sẽn paamd-a a beegr ludbu la a yel-wẽnd yẽesgo. Zu-noog soaba la Wẽnd sẽn bas a soab taale, t'a modg n zãagd a meng ne nagre. M sẽn da waa n ka reeg m kongrã, m pãnga ra sɛta zãnga ne m meng zabre. Wĩndg bɩ yʋngo, yãmb da ka basd-m ye, m da namsda wa tʋʋlg sẽn kʋɩɩsd tɩɩga. M wilg-y-la m yel-wẽndã m pa tol n solg bũmb ye, m yeelame tɩ m na wilg Soaala m kongre la m paam n tɩlga ne m zɩɩbo. Dẽ me la y neba nong n pʋʋs yã, b sẽn paam wakat ning fãa. Yel-beed fõd n wa wa kʋɩl bɛɛga, bũmb kõn sɩɩs-b ye. Yãmb yaa m doogo, y yiis-m la yɩɩr pʋgẽ, m wʋmda m fãagr yɩɩl sẽn yɩɩnde. M na n wilg-y-la sor tɩ y rɩke, m na n sagl-y-la sagl-sõngo. Da wẽneg-y weoof bɩ bõan-wɛ-yalenga, tɩ b boogd b tĩig ne wĩir la salbr ye. Da wẽneg-y bãmb tɩ bũmb kõn maan-y ye. Toog ne toog n nan gũud nin-yoogo, tɩ Soaala nonglem pid sẽn teeg-a bãmba. Kɩdem-y yã, nin-sõma, kɩdem-y Wẽnd yĩnga, lang-y sũ-noogo, sũ-tɩrs rãmba! Nin-sõma, pẽg-y Soaala yʋʋre! Ad-y Wẽnd pẽgr toga nin-tɩrs noorẽ. Pʋʋs-y b barka ne ruudga, ruudga susa yegl taab piig piiga, tɩ y pʋd y yɩɩn-paale n kils-ba; maan-y noog wala y sẽn tõe tɛka. Wẽnd sẽn yeel n yɛse, b sẽn maan fãa yaa sõngo la b sẽn nong yaa zemsgo la sɩda; tẽnga fãa pida ne b nonglma kaseto. Wẽnd gomdã n naan yĩngr ne a teedã; yɩɩ ne b noora gomd bal la rẽ fãa maan yã bãmb n kaad kooma la b bɛɛd a soya, bãmb n wat n pag-a mog-bɛd pʋgẽ. Bɩ tẽnga fãa maan dabeem ne Soaala, bɩ tẽnga rãmb fãa rig b taoore. B gomame bala la bũmba fãa yalsame, b yaaga b noore la bũmba fãa waa moogo. Soaala kɩtame tɩ bu-zẽmba sẽn da seda vaale, bu-zẽmba sẽn da seda fãa lʋɩɩ vɩʋʋgẽ. Bãmb daab bal n pidsd wakat buud fãa, b sũura raab pita fãa zamaan ne zamaana. Zu-noog rãmb la neb niyns Soaal sẽn ya b Wẽnde. Zu-noog la buud ning Wẽnd sẽn yãk wa b pʋɩɩre. Wẽnd bee yĩngri n getẽ, la b nee ninsaalba fãa. B sẽn be zĩig ninga, b getame, b nee tẽng zug rãmba fãa. Wẽnd neeme tɩ b yaga b fãa ne tãnd yɛngã la b gũud-b-la gũub-yɛnga. Ka tãb-biis sõor n fãagd dĩm ye ka sũ-keelem n fãagd gãndaoog ye. Ka weoof n tõe n fãag ye, ka weoof n tõe n zoe n põs ye. Yaa sẽn zoet-b bãmb la Soaala fãagda, yaa sẽn saagd-b kãabga sẽn ka vaandã. Sẽn teeg-b bãmb la b na n fãag ne kũum, bãmb dãmb n na n põs kom wẽnde. Tõnd yẽ gũuda Soaala, bãmb la d sõangda la d gãongo. D sũ-noog yita bãmb nengẽ, d teega b yʋʋra sẽn ya sõngã. Bɩ Wẽnd nonglma kell n pa ne-do, tɩ d saagra me paada ne bãmba! A Daviid yɩɩlle. A sẽn waa n faool a meng dĩm a Abimelɛk taoore, tɩ dĩma dig-a n zãage. M na n pẽga Soaala wakat buud fãa, m noora ka na n vʋʋs ne b pẽgr ye. M sũur nooma ne m Soaala. M kota a ka-neng rãmba tɩ b kelg-m-la b noog b sũuri. D naag taaba n pẽg Soaala, d naag taab n zẽk b yʋʋre. M boola Soaala la b leok-m lame, b zãag-m-la ne yɛɛsg buud fãa. Sẽn doog-a a neng n tees bãmba, yẽ soab lɛɛgd n pida ne sũ-noogo. D ka ne bũmb ning sẽn na n le wa ne b yãnd ye. Ned zĩnd a pɛt pʋgẽ fãa n bool Soaala, b na wʋme la b na fãag a soaba, ba a yɛla sẽn yaa a soab fãa. Soaala malɛka ka zãagd bada ne sẽn zoet-a Wẽnnaam nif ye la a soab paamda fãagre. Ges-y-la y bãng Wẽnd nonglem sẽn zem to-to! Zu-noog soab la sẽn wat-a n soond bãmba. Maan-y rabeem ne Soaala, ad-y y sẽn paam tɩ b welg-y toorã, bũmb ka na n tol n le paoog-y ye. Bõnyẽeg tõeeme n dat bũmbu, kom tõee n wa tar-a lame, la bũmb kõn paoog sẽn baood-a Wẽnd ye. Wa-y n kelg-y-ma, m kamba, tɩ m na zãms-y tɩ y zoe Soaala nifu. Ned sã n beẽ n nong vɩɩm, n sɩd dat t'a vɩɩma yɩ sũ-noog vɩɩm, bɩ a soab noor da yiis beedo la wɩds ye. A zãag a meng ne wẽnga, a maan neere, a bao la a pʋg laafi sõmb-sõmbo. Wẽnd nif teega nin-sõma, Wẽnd tʋbr kelgda b boolgo. Wẽnd kaoogda zabr ne nin-wẽnga, la a soab yʋʋr na menem tẽng zugu. Sẽn zoet-b Wẽnda sã n boole, Wẽnd wʋmdame, la b zoet n wa fãag-b lame. Soaala pẽe ne sẽn zĩ-b ne yɩɩre, n fãagd sẽn zĩ-b ne sũ-sãanga. Nin-sõng segda yel-beed ka tɛka la Wẽnd menesd-b-la fãa gilli. Wẽnd gũuda b kõaba fãa, ba a ye meng kõn kaoog ye. Yell beed n na n loog ne yel-wẽn-maanda, Sẽn dɩt-a beem ne nin-sõng na reeg a sɩbgre. Wẽnd fãagda b yemse. Sẽn soond-a bãmba, põsda sɩbgre. A Daviid yɩɩlle. Soaala, bool-y sẽn dõt-b maama bʋʋdo, zab-y ne sẽn zabd-b maama. Dɩk-y y gãong la y kut fuugu, zoe-y n wa sõng-ma. Zẽk-y y kãnde tɩ sẽn digd-b maama kẽ moogo. Gom-y tɩ m bãng tɩ yãmb la m Fãagda. Sẽn baood-b n na n kʋ maama, yãk-y b barka la pids-y-b ne yãnde. Sẽn baood-b maam ne wẽng tare n leb poorẽ, b fãa gill leb poorẽ ne yãnde! B wẽneg ka-fɩɩb sobg sẽn dɩke, Wẽnd malɛka sẽn na n pĩng-b raare, b sor sẽn na n lebg lik la sals raare, Soaala malɛka sẽn na n fugumd-b raare. M ka ne m sẽn maan-b bũmb ning ye, b tuka loanga, n gãneg b wĩ n na n yõk-ma. Bɩ yel-beed wa ling-ba n tus-b n lub, tɩ b bẽdga yõk-ba tɩ b pa be. M na paam dẽ n kɩdem Soaala yĩnga, b sẽn fãag-ma yĩnga, m na sigl saooga. M na yeele: «Ãnda n wẽnd yãmba, Soaala? Y fãaga ned sẽn ka tar yõnofre nin-daoog nugẽ, y zãag-a-la ne sẽn tar-a n fãadã.» Zirẽ-be-rãmb yikame n sogsdẽ, m sẽn ka tar yell ning buka la b sokd-m. M maan-b-la neere tɩ b lebsd-m wẽnga, ad-m sẽn lebg m ye marsã. B sẽn waa n bẽedẽ, m da yera peen-gʋsd futu m da sɩbgda m meng ne no-loeere, b yĩnga, m da ka yɛɛd ne pʋʋsg ye. M da kẽndame la m watẽ, wa ned sẽn maand a zoa bɩ a roagd yĩnga. M da zĩi ne sũ-sãanga wala m dɩta m ma kʋʋre. M sẽn lʋɩ bãaga, b kaoog n waa ne sũ-noogo. Kar-kegd mens yik n baooda zabr ne maam. B tãag n yĩid-m lame tɩ m ka wʋmd a võor ye. Nin-dẽgda zĩndg-m-la sʋka, n tugd beem ne maam. Soaala maana wãn n ne yel-beedo, yel-beed sẽn ta woto fãa la b sĩnda? Zãag-y-m ne vɩɩm a woto buudu, zãag-y-m ne bõnyẽesã. Woto m na zĩnd kʋʋnga sʋka n pʋd m bark pʋʋsg yɩɩlle, m na zĩnd b sʋka n pẽg y yʋʋre. Da sak-y tɩ sẽn kis-b maam zaalma wa tõog n lang sũ-noog m poorẽ ye. Sẽn kis-b maam zaalma ra wa yõgem b noor ye. Tẽnga rãmb ka baood laafi ne ned ba a ye, b rõta neb sẽn ka tar b toorẽ yelle. Bɛɛba yaaga b noor n tar goama: «N-faa, n-faa! D nif yãend-a lame!» Y wʋmame la, Soaala, da maan-y wa y ka wʋm ye. Da zãag-y ne maam ye. Yik-y n bʋ m bʋʋdo, m Soaala la m Wẽnde, bʋ-y n yiis-m yellẽ. Yals-y m poorẽ, m Soaal la m Wẽnde, y mong-m bʋʋm, y na pids m bɛɛba ne sũ-noogo. Bɩ bɛɛba ra wa gomd ne taab woto: «N-faa! D na n vel-a-la vugr bala.» Soaala, ra sak-y tɩ b tõog n yeel bada: «Tõnd vel-a-la vugr bala.» M pɛta sẽn noogd b sũurã bɩ Wẽnd naag n sudg-b yãnde! Sẽn da tẽgd-b maama, b fãa deeg yãnd la paoore! Sẽn da tʋll-b tɩ m paam bʋʋma, kaas sũ-noogo la b yeel wakat buud fãa: «Soaala tõoga b bɛɛba, Soaala tʋlga b yamba ne sũ-noogo.» Mam me noor na moon tɩ y pida ne zemsgo, la m na kils y yʋʋr beoog sẽn vẽege. Yɩɩlla bee yɩɩla naab sebrẽ. A Daviid yɩɩlle. Nin-wẽnga gomdã n wat m yamẽ: «Da tol n dig Wẽnd dabeem ye.» Nin-wẽng pẽgda a menga n ka nee a wẽnem ye, a pa tẽed t'a beegame n tog n tuub ye. Sẽn be a noorẽ bala, yaa tudg f to, yaa f tʋʋs-a. A ka le mi bõe n ya neer ye. A keta a gãagẽ la a zoe n dat n tʋma beedo. Sor sẽn ka so-sõng la a yãe n dɩke, wẽng bal la a yãend n tar pʋgbo. Soaala, y pʋ-peelma la yĩngr dãmba kilsda, y sõmblema la sagãna moonda. Y sõmblema gãndga y tãn-wogda gilli, y yama zulum le gãndga bʋg-tẽnga. Yãmb n fãagd ninsaalba la rũmsã. Soaala, y nonglma yaa bõn-sõngo! Ninsaalba zoe n wa soonda y maasmẽ. Y zaka pʋgẽ dɩ-nooda la b pidsd b pʋga, sẽn nooma fãa la y tugl-b tɩ b yũuda. Yãmb n tãoosd vɩɩma ko-nifu, yãmb vẽenema n kõt tõnd vẽenem. Bɩ sẽn mi-b yãmba le tɩg y nonglma n paase, tɩ sũ-tɩrsa rãmb me tɩg y sõmblem. Wʋglem soab naoor da tag m zakẽ ye, la nin-dẽgda me nus da sɩɩs-m ye. Ad-y nin-wẽnsa sã n ta y ro-sõngã, b rʋʋgdame. B sẽn lʋɩ zĩig ninga, b paada be, ka le tõe n yik ye. A Daviid yɩɩlle. Da nams-y n puug y sũur ne nin-wẽnsa ye. Da maan sũ-kiiri b nuga sẽn zãada yĩng ye. Ad-y b na n wẽneg n zelga wa moogo, vã-maasa na n wẽneg n kʋɩɩme. Teeg-y Wẽnd bala la y maan neere, woto la y paad tẽngã n vɩ ne laafi. Sõng tɩ Wẽnd yɩ f sũ-noogo, bãmb n na n pids f sũura raab zãnga. Wẽnemd f neng n tees Wẽnde, teeg bãmba tɩ f tẽeb na pidsi. B sõmblem na puk wa sõore, tɩ f bʋʋma me puk wa wĩntoogo. Yaas sɩɩ Soaala sɛɛgẽ la teeg bãmba, Da maan sũ-kiir ne ned ninga nug sẽn zãad ye, maan gũusg ne zãmb soaba. Bas sũ-puuri, bas sũ-fõore, da widg wa bugum tɩ rẽ ka baasd neer ye. Nin-wẽnsa na n wa võo raar a ye. Sẽn gũud-b Soaala n na n wa soog tẽngã. Keta bilf bala tɩ nin-wẽng yãeebo wa lebg toogo. Fo tata a zĩigẽ la f kõn yãend fɩ. Sulg-m-meng rãmba n na n soog tẽngã. B sẽn na n tɩg yaa laafi la laafi. Nin-wẽng baooda zabr ne nin-sõngo, n tol n tugd beem ne-a. Dẽ me la Wẽnd pusg laado, tɩ b zoe n nela b wãaba sõor sẽn pukdi. Naongo soaba, a ka-neng-soaba la b rat n tus n lubi, sẽn ket n kẽnda tɩrg la b rat n kodge, dẽ la nin-wẽnsa wõogd b sʋʋse la b rõosd b tãbdo. Ad-y b sʋʋsa na n lɛɛg n kõsa b sũuri tɩ b tãbda lɛɛg n kao zãnga. Nin-sõng sẽn tar bilfã n são wẽn kɩɩsdb ka tɛk arzɛka. Wẽn-kɩɩsdba kams pãng na n sɛɛme, la Wẽnd n ket n ya nin-sõma wã sõangda. Wẽnd sõda nin-sõma wã yʋʋma, b buuda ka buud sẽn na n tol n sɛ ye. Ra beeda yʋʋmde, bũmb kõn paoog-b ye, koma yʋʋmde na kell n yɩ tɩgr yʋʋmde. Nin-wẽnsa na n wãame, Soaala bɛɛba na n wẽnega pʋt moogo, b na n dɩɩ n looga wala bug-zõose. Nin-wẽng ka pengd n lebs ye, tɩ nin-sõng kũmd nimbãaneg n kõt zaalem. N-ye, Wẽnd sẽn ning b rãmb bark n na n soog tẽngã, la sẽn ka paam-b bãmb barka na n loogame. Wẽnd sẽn zẽkd a soab naoor ka tabd n yõsd ye la a kẽna tata b yam. A sã n lak me a ka lʋɩt ye tɩ Wẽnd kokd-a-la ne b nusi. M yɩɩ yãaga, n wa kʋʋle, la m zɩ n yãend Wẽnd sẽn bas nin-sõng ye, m zɩ n yãend a buud ne bõs-wamd ye. Beoog sẽn vẽege nin-sõng kũmda nimbãanega n yãet n pengdẽ, la a buud na paam Wẽnd barka. Bas wẽnga, maan neere, tɩ f roog kõn tol n sirg ye. Soaala nonga sẽn ya tɩrga b ka basd b zo-rãmba, b bee ne b raar fãa, n yaool n na n menes nin-wẽnsa zãnga. Nin-sõma wã n na n soog tẽngã, la bãmb n na n paa a pʋgẽ daar fãa. Nin-sõng sã n zĩẽ yaa Wẽnd tʋʋm sõma wã la a noor bilgd n gomda, la a zelemd zãmsd a taab sẽn toge. A Wẽnnaama noor be-la a sũurẽ a ka mi kẽnd n lagsdẽ ye. Nin-wẽns baooda nin-sõngo, b baood n na n paam-a lame n kʋ; la Soaala ka basd-a bãmb nugẽ ye, b ka basd tɩ b bʋ-a n paalg-a bʋʋd ye. Gũ-y Soaala la rɩk-y b sorã, tɩ b na rɩk tẽngã n kõ yã, la b na n deng n diga nin-wẽnsa zãnga. M yãee nin-wẽng t'a maand pãn-tõogo, n yik n tão vugr bala wa tɩɩga, wa kos-zĩig-n-yãmb-zãnga. La ade, a loogame n ka bas buk ye, m bao-a lame la m pa le yãend-a ye. Ges-y nin-sõngo, ges-y sẽn kẽnd-a tɩrga ad-y sẽn nong-b laafi wã rãmb buudu zɩ n yɩ yõ-koees buud ye. Sã n yaool n ya nin-wẽnsa buudu, ad-y b naagda zãng n menem, b buuda võogda vugr n looge. Nin-sõma wã fãagr yita Soaala nengẽ, Yel-pakr daare bãmb la b tãnsoben-doogo. Soaala sõngd-b lame la b fãagd-b lame. B reegd-b-la nin-wẽnsa nusẽ, n kõ-b laafi tɩ b bãngame n wa soond bãmba. A Daviid yɩɩlle. A sẽn wa n dɩgl wisdu t'a nukd Wẽnd taoore n nekd b pʋtẽere. Soaala, sɩbg-y-ma la ra tũ ne sũ-puur ye. Dems-y m zʋgã la ra naag-y ne sũ-fõor ye. Y pɛɛma fãa yõka maam, y nuga yɩ-m-la zã! M yĩng wilg ka be n ka reeg toogo, y sũura sẽn puug wʋsga yĩnga. M yel-wẽnda yĩnga, m kõaba fãa tara toogo. M sama m yel-wẽna tɩ wa loog m zɩɩbo. Sɩd yaa zɩɩb meng sẽn yɩɩd m pãnga. M noada wõsgame n ningd koom tɩ yaa wa yalemd la m maan yã. Ad-m sẽn gõd n zĩ ne sũ-sãanga! Nenga gãoogame la m yẽrda ne m sɛɛga. M yĩnga wɩnga bas, a zabd-m-la zĩig zãnga. M yĩnga tõrame, m zĩi ne waoodo, m sũura la m yãooga tara kũsga. Soaala, m sɛsga sesda y taoore, m wõosga lʋɩ-la y tʋbrẽ. M sũura tara kiuusgu, m pãng sɛ zãnga, m nina meng ka le ne bũmb ye. M zo-rãmba, m tũud-n-taasa yãenda m noadã; ned fãa tarame n leb kɛɛnga. Sẽn dat-b n kʋ-ma gãnega b bẽdgo. Ned kam fãa gomame n dat tɩ b yiis m yõore. Beoog ka vẽegd tɩ b ka yãend yelle n dogl m zug ye. M lebga wa wʋnga n ka le wʋmd bũmb ye. M lebga muka n ka le yaagd m noor meng ye. M lebga wʋnga n ka le wʋmd bũmb ye. M dat n gom me, m ka tar sẽn leokd ye. M saagra fãa paa ne yãmba, Soaala, m Soaal la m Wẽnde, yãmb n na n leok-ma! M da kota woto: «Da bas-y tɩ m sẽn pãsd n lʋɩt b rãmb taoora wa yik n tar-m laad ye.» La ade, m lʋɩɩme la bala, toog tar-m-la wakat fãa. M deega m kongre, m yɛɛsda m yel-wẽna yĩnga. M bɛɛba wɩɩda ne pãnga, sẽn kis-b maam zaalma sõor labsa. M sẽn maan b rãmb neer tɩ b lebsd-m wẽnga bãmb dãmb beema, yaa m sẽn maan neera yĩnga. Soaala, da bas-y-m ye, da pa-y yɩɩg ye, m Wẽnde! Zoe-y n wa-y n sõng-y-ma, m Soaal la m Fãagda! Yɩɩlla bee yɩɩla naab la Levit dãmba sebrẽ. A Daviid yɩɩlle. M da yeela m menga: «Maan gũusgu f vɩɩma pʋgẽ ne f goama. Kʋɩdg la f na n bao n tẽo f noore, nin-wẽng fãa sã n be f sɛɛgẽ.» M paga m noor n ka le gomd ye, m sĩndgu meng waa n looga toogo, la m tooga waa n yɩɩga m zɩɩbo. M sũura da widgda bugum m yãoogẽ. M yaamsã la bugma toolem kɩtame tɩ m gome. Soaala, wilg-y maam m sẽn na n baas to-to, wilg-y m raara sẽn mag n tek zĩig ninga tɩ m bãng tɩ m bee rũnna n ka beoog ye! M yõora woglem, nug pʋg yalem bala. Sã n ya ne yãmba, dẽ yaa zaalem. Ninsaal ne a keglem, yaa sobg bala. Ninsaal kẽndame la a watẽ, wa sulunsuku, a sẽn samd goabg la rɩtgo, yaa sobg bala, sẽn sama menga a ka mi a wʋkd ye. Woto wã, bõe la m na n gũ, Soaala? Y nengẽ bal la m saagr keta. Fãag-y-m ne m yel-wẽna fãa. Da bas-y tɩ m wa lebg gãeemsa laad ye. M sẽn mum m noorã a kõn le pak ye. M basda yãmb ne sẽn ketã, yãmb soog tʋʋm kãnga. Da le pãb-y-m ye, tɩ y na n va-m lame n lubi. Y sɩbgda ninsaala a zʋg tekr yĩnga, rasempʋɩɩg la y lobgd a yĩn-nongrã. Soaala, ninsaal yaa sobg bala! Soaala, m kosgo la m kɛlenga lʋɩ y tʋbrẽ. Ges-y m nintãma sẽn daagde, kelg-y m yãbrã. M yɛsa y taoor wa sãan bala, m yaa noaka wa m saam-dãmba. Bas-y-m bilf bala tɩ m noor le sɩng laado tɩ m yaool n loog la m menem zãnga. Yɩɩlla bee yɩɩla naab sebrẽ. A Daviid yɩɩlle. M zĩndame n gũ Soaala; b kelga m sẽn beẽ la b wʋma m kɛlenga. B yiis-m-la bog zulungẽ, b buk-m-la begd sẽn tagmẽ. B le yik-m-la yĩngri, m karg teega pĩiga, m kẽnd le yaa sõmbo. Yɩɩn-paalle la b ning m noorẽ, m Wẽnnaama pẽgr yɩɩlle. Wʋsg na yãende n woog b yɛlã, n lɛɛg n kẽ la b teeg Wẽnde. Zu-noog soaba la sẽn teeg-a Soaalã, n ka wẽnemd a neng n tees wẽn-naand ba a ye, n ka bao sõngr zirẽ-be-rãmba nengẽ ye. Ad-y b labsa, Soaala, yɛl bɛda la bõn-bãna y sẽn maan m yĩnga! Y ka tar to ye. Bõe la y pʋs n pa maan d yĩnga? M datẽ lame bala n pord-ba m noorẽ, la labsa. Yãmb sẽn nong bũmb ningã, ad-y ka maoong bɩ kũun ye, y sõng-m lame tɩ m wʋm rẽ vẽenega. Y pa kos-m yũ-noog bɩ sugr maoong ye. Dẽ la m yeel yã: «Ad ma, m wata m toore. M tol n zãada y sebr m nugẽ, la m dat n tũ-la y raabo, m Wẽnde, m data ne m sũur fãa n tũ-a zãnga.» M zĩnda kʋʋnga sʋka n moon y sõmblem, wala y sẽn mi Soaala, m ka sĩnd m noor ye! Y sẽn zãad-m neerã m pa solg rẽ m sũurẽ ye. M moona y sẽn pʋgd n tar-m fãagrã, m pa solg y nonglma la y sɩdã, m sẽn kẽ kʋʋnga sʋk fãa ye. Soaala, y pa tol n zãag y nimbãan-zoeera ne m ye. Y sẽn pʋgd-m ne nonglem sɩdã n fãagd-m daar fãa. Yɛl sẽn ka sõor n da yik n na n lim-ma. M yel-wẽna wulumd-m lame n loog ne m pʋtẽere. B sõora yɩɩda m zuga zoobdo, m pãnga zoe sɛɛ zãnga. Soaala, sak-y n fãag-y-ma. Zoe-y n wa tao-tao n sõng-ma! Kɩt-y tɩ sẽn baood-b n na n menes m vɩɩma naag taab n zʋʋl ne yãnde! B tar n leb poorẽ ne paoore, sẽn baood-b maam ne yel-beedo! Bɩ yãnd pʋg-ba, n dɩ-b zãnga. Bãmb n yaool n da kẽnd la b maanẽ: «N-faa, n-faa!» Yãmb yĩng bɩ b kɩdem sũ-noogo, Soaala; neb niyns fãa sẽn baood-b yãmbã, kɩdme! Yãmb fãagra sẽn noom b rãmbã talla toagsg bala n ka wʋʋsdẽ, la b yetẽ: «Soaala yaa nin-kãsenga!» M yaa nin-bila la naong soaba tɩ Soaala tẽegd m yelle. Yãmb la m sõangd la m fãagda. M Wẽnde, da kaoos-y ye! Yɩɩlla bee yɩɩla naab sebrẽ. A Daviid yɩɩlle. Zu-noog soab la sẽn tẽegd-a nin-koam yelle! Yẽ me sũ-beed raare, Soaala na n fãag-a lame. Wẽnd na n kõ-a-la vɩɩm noog tẽng zugu. Soaala kõn bas t'a bɛɛba tõs-a ye. Sẽn tẽegd-a nin-koam yell sã n gãee ne toogo ad-y Soaala-Wẽnd n ya ye me sõangda, n wat n lebgd-a a gãaga zugu. Mam yẽ da gomda woto: «Soaala, zoe-y m nimbãanega, sãoog-y-ma tɩ sɩda maam n beeg-y.» M bɛɛba wɩt-m lame la b maanẽ: «Da-bʋr la a na n ki t'a yʋʋr meneme?» Bɛɛba nin-yend sã n wa n na n ges-ma, a watame bala n na n paam n yi n wɩd-ma. A wat n tigsa a zirẽ-beedo la a sã n yi, dẽ bal n be a noorẽ t'a tar n gomda. Dẽ la bɛɛba na n sũ taab n wa. B na n walma taaba b na geela b gɛɛla n yetẽ: «Ad-y yaa bã-yoog la a bẽeda. A rʋ-la a gãag la a kõn le sig ye.» Zoa ning m sẽn da nong n yɩɩdã, mam pʋg sẽn da peel ne a soabã, sẽn da naagd-a maam n dɩtẽ wã menga, zẽka a nao-kãsen-kãare, n na n tão-ma. Soaala, yãmb yee n maan sugri, tɩ m yik m gãagẽ wã m me paam n dok m sũuri. Ya woto la m bãngd tɩ y be-la m poorẽ m sã n mik tɩ m bɛ wã ka le tãoosd raoodo. Zãag-y m zug ne yelle tɩ m paam zĩig yãmb sɛɛgẽ. Bɩ Soaala, Israyɛl Wẽnda, paam barka zamaan sẽn ka sɩng n ka be sɛɛbo! Ami! Wẽnd na kɩt tɩ yɩ boto! Yɩɩlla bee yɩɩla naab sebrẽ. A Kore kamb zãmsgo. Wala yĩsr sẽn yɩɩd n baood kʋɩlg koom, woto me la m sesdẽ n baood yãmba, m Wẽnde. Wẽnd ko-yũudu, Wẽnd vɩɩga ko-yũud n tar maam. Wakat bʋg la m na n tõog n kolg y ro-sõngã? Wakat bʋg la d nensa na n yaa n togl taaba? Wĩndg la yʋngo, m nintãm la m moende. M wʋmda b sẽn sokd-m beoog sẽn vẽege: «Fo Wẽnda pʋs n tʋmda bõe taki?» M wat n le tẽega pĩnd yɛlã, m sẽn da waa n be sẽn tong-ba taoore, n dɩk Wẽnd do-sõnga sore, n kaasd d sũ-noog la d bark pʋʋsg yɩɩla. Bõe tɩ m na n sãam m sũuri la m yõk yãbre ne m menga? M sẽn na n teeg Soaala n são, m sẽn na n le sɩng b pẽgrã n são, tɩ bãmb la Wẽnd la m Fãagda. Ad-y m na n basa yãbre, m na n goma ne yãmba, m Wẽnde, m na n zĩnda m sẽn be zĩig ningã, Zʋrdẽ ko-nifa sẽn pusg zĩig ningã, tãn-bila sɛɛgẽ, Ermo tãmsa zutu. Yãmb basa kʋɩl-beesã tɩ b fõta, tɩ ko-wiig loogd ne ko-wiiga, tɩ y basd-b tɩ b fãa wẽed-m la b rat n lim-ma. Bɩ Wẽnd nonglma kell n pʋg-m wĩndga, tɩ m kell n tall b yɩɩl yʋngo, la m pʋʋsd-b tɩ bãmb n kõt-m vɩɩm. M dat n soka Wẽnde, n sok m pĩ-lillã: «Bõe tɩ y yĩm m yelle, bõe tɩ m na n kong n loog ne nen-gãnenga, bõe tɩ y basd m bɛɛba tɩ b na n beds-ma?» M yĩnga komsa zãnga, m bɛɛba sẽn tar m tʋʋr yĩnga, tɩ beoog sẽn vẽeg fãa bɩ sokd-m: «Fo Wẽnda tʋmda bõe taki?» Bõe tɩ m na n sãam m sũuri, la m yõk yãbr ne m menga? M sẽn na n teeg Soaalã n são, m sẽn na n le sɩng b pẽgrã n são tɩ bãmb la m Wẽnde la m Fãagda. Soaala, bool-y m bɛɛba bʋʋdo; fãag-y-ma tɩ yaa nin-yaalse, neb sẽn mi zirẽ-beedo la sẽn ya nin-kʋʋdba. Yãmba, m Wẽnd la m tãnsoben-doogo, maana a wãn tɩ y basd-m kɛɛnga? Bõe tɩ m na n kong n loog ne nen-gãnenga? Bõe tɩ y bas m bɛɛba tɩ na n beds-ma? Tool-y-m y vẽenema la y sɩda tɩ b vẽneg m sora tɩ m dʋ y tãn-sõngã, la m paam n kẽ y ro-sõnga pʋga. M sã n paam n ta y maan-kugrã m sã n paam n kolg Wẽnde, Wẽnd ninga sẽn pids-m ne sũ-noogã, tɩ m zĩi tɩ yaa saoog la m lengdã, ad-y m na rɩk m kʋnde n pẽg m Soaala la m Wẽndã! Bõe tɩ m na n sãam m sũuri, la m yõk yãbre ne m menga? M sẽn na n teeg Soaalã n são, m sẽn na n le sɩng b pẽgrã n são, tɩ bãmb la m Wẽnde la m Fãagda. Yɩɩla naaba la a Kore kamb yɩɩlle. Wẽnd tʋʋm-bãna tẽegre. D wʋma ne d tʋba, d yaab rãmb togsa tõndo y sẽn maan bõn-bãn niynsi tẽn-kʋdem-wẽnnẽ. Y sẽn waa n baood zĩig n na n zĩndg-ba y diga neb n deeg b tẽnga. Y sẽn waa n baood vɩʋʋg n na n kõ-ba tẽns wʋsg yãenda pɛta. Ka yaab rãmba sʋʋs n sõng-b tɩ b soog tẽnga ye ka ne b kang pãnga la b tõogr ye, tũu ne yãmb pãnga, tũu ne y sẽn ka lak n bas-bã, tũu ne y nonglma sẽn da kẽ bãmbã. M Wẽnd la m dĩma, yɩ-y y sõgen, a Zakoob, tãnsoaba t'a na maan daoodo! Y maasem yĩnga d tõoga d bɛɛba, y yʋʋr yĩnga d taba d zabd-n-taase. M da ka teeg m tãp la m lok ye. M sʋʋga ra ka tõe n sõng-m ne fɩ. Yãmb n sõng tɩ d tõog bɛɛbã, yãmb n ning d bɛɛba yãnde. Beoog sẽn vẽeg fãa, d na n pʋda yɩɩla, Soaala la d na n pẽge, bãmb yʋʋr la d na n kilsi. Sã n ya marsã, Soaala, y basd-d-la kɛɛnga, y pa le yãagd d tãb-biisa ye. Y basd-d lame tɩ d tard bɛɛba taoore, d bɛɛba looga ne d laog zãnga. Y tees-d-la d kʋʋb zĩigẽ wa pe-bi, y sẽega tõnd, buud a taaba sʋka. Y rɩka y pʋɩɩr n kɩs zaalem, y pa koos-a n dok yõod ye. Y kɩtame tɩ d lebg d bɛɛba yaoolgo y basame tɩ d lebg d yagsa laado. Tõnd lebga bu-zẽmba baobg tɩ b wẽed n gilgdẽ, b sẽn yãend-d zĩig ning fãa, yaa bãgd yĩgsgu la pursgu. Beoog sẽn vẽeg fãa, m nee m sẽn sãamd n dabda, m nee m sẽn tʋk yãnd ning n zĩi, tɩ bɛɛba tar m tʋʋr la kãab wẽnse, n baood n na n dok b sũuri. Dẽ fãa yaa yɛl sẽn lʋɩ d zugu la baasgo d pa yĩm y yell ye, d ka bas zooda tɩ sãam ye, d ka tol n lebs d zelemd ye, d nao da ka paam n bʋdg sor ye, ba y sẽn waa n basd-do d bɛɛba nusẽ, we-baasa tãmsẽ, tɩ kũuma tʋm a tʋʋm sablego. Tõnd sã n da yĩmi-la d Wẽnda yelle, n yãend wẽnd sãang a ye n kos sõngre, yãmba Wẽnd naan n bãngẽ, tɩ y mii sẽn solg sũurẽ. D sẽn ne, yaa tɩ yãmb yĩnga, la beoog sẽn vẽeg fãa, d saga kũum nusẽ, b koota tõnd wa pe-bi, rũmsa koodg zĩigẽ. Nek-y yã, Soaala, bõe tɩ y ket n gõe? Yik-y-la y ra le bas tɩ kaoos woto ye! Bõe tɩ y solgd y nenga, n yĩmd d bɛɛba sẽn tar-d toogã? D pãs n lʋɩɩ tomẽ, d pãs n lʋɩ-la d yãvabga. Yik-y yã, Soaala, wa-y n sõng-y-do! Y sẽn ket n pʋgd tõnd ne y nonglma wa-y n fãag-y-do. Yɩɩlla bee yɩɩla naab sebrẽ, Yɩɩla naaba yɩɩnd-a lame t'a wẽneg lɩɩnga puug pẽgr yɩɩlle. Yɩɩlla be a Kore kamb sebrẽ. Nonglem yɩɩlle. Gom nood n pid m sũuri tɩ m wɩɩdẽ la m na n pʋda m yɩɩlle, m dĩma yĩnga. La Wẽnd na kɩt tɩ m zelemda lebg m gomda naana wa gʋls mit nug sẽn maand sebr zugu. Dĩma zʋʋga a Adem kamb a taaba ne neerem, gom nood ka kongd a noorẽ ye, a naama na yɩɩ daar buud fãa yĩnga. Tãb-biig sẽn pid ne sũuri, sẽbg f sʋʋg f sɛɛgẽ. Sʋʋga naag n yɩ f arzɛka la a yɩ f naama kaseto. Dõos f tãpo, la Wẽnd na sõng-fo! Zomb f weoof n tak f zab-sõngo, n wa fãag naong rãmb la f yals zemsgo zamaane. Bɩ f rɩtg kanga tʋm a pãn-tʋʋma. Fẽeg f pɛɛma sẽn maneg n sɩlse tɩ b rʋʋg bu-zẽmba zut, tɩ b fãa yɛɛse. Dĩma, y naama zaoor wẽnda Soaala rẽnna, ka bũmb sẽn vigl daar a ye yĩng ye. Naama na n dɩɩ ne zemsgo. Y nonga sẽn zemse n kis sẽn ya wẽnga. Yaa rẽnd me yĩnga la Wẽnnaam, y Wẽnda, taag-y sũ-noog kaam n welg y toore, y taaba sʋka. Y futa yũugu, yũ-nood a yeyn-ye! Ro-neeba wulumda ne yʋʋm-teed bʋʋre bʋʋr sẽn noom n sakd kelgre. Zĩiga pida ne kom-pugli, yaa na-biis sẽn maneg n fam b mense, y nug rɩtgo, la y yals na-pagã, t'a yãgd ne Ofir sãnem. Kelge, bi-pugl sõngo, ges la f yoog f tʋba, yĩm f roagdba la f buudu. Bas tɩ f yamleoog kẽ rĩma, Bãmb la f zu-soaba, yĩgimd b taoore, la bãng marsã, Tir bi-pugla, tɩ sẽn gãe-b ne arzɛka na kaoog n wa belem-f ne b kũuni. Dĩma bi-pugl sẽn tog ne naama be-la a roogẽ. A fuuga maneg n buka ne sãnem. Fuga peende, saag gomtɩʋʋg rẽnna; b tall-a-la woto n wa kɩs dĩma. A tũud-n-taasa me naagame n wa dĩma taoore, b tongame n kẽed dĩma zakẽ ne sũ-noog yɩɩla. Kamba na n leda ba rãmba zĩiga dũni wã nanams na n yɩɩ bãmba. Sã n ya maam, m na kɩt tɩ b tẽeg dĩma yelle, zamaan ne zamaana, la neba na kell n talla a pẽgre, zamaan sẽn wate. Yɩɩla naab la a Kore kamb yɩɩlle. Yɩɩnda wa biig kʋʋre. Tõnd yĩnga Soaala yaa soondg zĩiga, yell sã n pake, bãmb la d sõangda. Woto wã, ba tẽnga miimda, d ka rigd ye, ba kooma pʋgẽ tãmsa tar kɩllgo, dabeem ka ye. Mogra koom ningda a rãamde, a zẽkdame n kuiis yĩngri tɩ tãmsa rigda. La kʋɩlg a ye n be n kõt sũ-noogo, t'a naoor yegd Wẽnd tẽnga, tẽng ning sẽn yɩɩd a taaba ne sõmblem. Wẽnd zĩi tẽn kãng sʋka la bũmb kõn maam-a ye. Wẽnd tẽra a yelle, beoog sẽn vẽege. Bu-zẽmba yik n wilgda b sũ-pa-noanga, nanams yik n boba tãpo, la Wẽnd sẽn tãse, tẽnga sɩnga miungu. Dũni fãa Soaala bee ne tõndo, a Zakoob Wẽnda la tõnd tãnsoben-doogo. Wa-y n ges-y Soaala sẽn maan d yĩnga. Wa-y n ges-y tʋʋm-bãna b sẽn tʋm tẽng zugu. B kɩtame tɩ zab yalse, al tẽnga sɩngrẽ n ta a sɛtmẽ, n kɩt tɩ tãbd la kãn kao, n kɩt tɩ bugum na n kok gãndo. Kelg-y b sẽn yete: «Bas-y zaba, deeg-y tɩ maam la Wẽnde, m luba dĩm dãmba, m soo tẽnga gilli.» Dũni fãa Soaala bee ne tõndo, a Zakoob Wẽnda la tõnd tãnsoben-doogo. Yɩɩla naab la a Kore kamb yɩɩlle. Dũni rãmba pãb-y nug pogse, kils-y Wẽnde ne sũ-noog kaasgo. D tog n diga Soaala la Yĩngr Wẽnda taoore. Bãmb la dĩm kãseng tẽng zugu. Bãmb n kẽesd dĩm dãmb a Israyɛl soolmẽ, bãmb n lubd bu-zẽmba tõnd taoore. B bao tẽng n kẽes tõndo, d zu-zẽkr tẽnga, tõnd b bi-nongr a Zakoob yagense. Wẽnd wata Siõ tãnga zug tɩ b kilsd-b tɩ barda tar peebgo, n tar peebgo. Pẽg-y Wẽnde, pẽg-y ba, yɩɩl-y d dĩma yĩnga, yɩɩl-y! Tẽnga fãa dĩma la Wẽnde, yɩɩl-y yɩɩn-noogo n togs-b rẽnna. Wẽnd dɩta naam bu-zẽmba zutu, Wẽnd zaoonda b naama goeele. Bu-zẽmba dĩm biisa waame n naaga a Abraam Wẽnda buudu, tɩ dĩm dãmba fãa miime tɩ Wẽnd n so-ba, Wẽnd n so sẽn so-b tẽngã, la ned ka so bãmba, tɩ b zʋʋga fãa. A Kore kamb yɩɩlle. Soaala yaa nin-kãsenga tõnd Wẽnda yʋʋr sãta ne pẽgre, b tẽn-sõnga pʋga. B tãnga yaa tãn-sõngo, n tar neerem, n tar zãndlem, yaa Siõ tãnga, dĩm kãsenga tẽngẽ. Wẽnd nif karda a lal-gũbrã, yẽ la b tãnsoben-doogo. Dĩm dãmb n da waa n yik n sũ taaba n na n tak zabr ne Siõ, la b sẽn yãend Soaala bala, rabeem yõk-b lame, b sẽn yɛɛse, b lɛɛg n zoeeme. Vugr bala b sɩnga rigbu, vugr bala waood kẽ-b lame waood wa pag sẽn kũmd dogem. Yɩɩ vugr bala wa yaang sobg sẽn wegsd koom-kogendo. D sẽn yãend ne d nifu, dũni fãa Soaala tẽngẽ, d Wẽnnaama tẽngẽ, wẽnega b sẽn da togsd tɩ d kelgdẽ. Ne bãmb tõogo a ket yɛsa yĩngri. Soaala, d sẽn be y ro-sõnga pʋga, d le rɩta y nonglma kaseto. Al dũni wã sɛtmẽ b mii yãmba, al dũni wã sɛtmẽ b pẽgda yãmba. Y rɩtg pida ne kũuni tɩ y saad n pʋɩta. Bɩ Siõ tãnga zug rãmb kɩdem sũ-noogo, tɩ Zɩɩda tẽnsa noog b sũuri, ne y sẽn kaood y bʋʋda seem ninga. Bɩ y tong taaba n gilg Siõ tãngã, bɩ y sõd b ro-lug-lugã. Ges-y lal-gũbrã, ges-y b keglem; woto y na tõog n togs zamaan ning sẽn watã, t'a bãng tɩ Wẽnd kãng la tõnd Wẽnde, dũnna la beoogo, bãmb nug n zãad tõndo. Yɩɩla naaba la a Kore kamb yɩɩlle. Dũni rãmba, kelg-y woto: dũni wã kẽedba, yoog-y y tʋba. Nin-bɛd la nin-bõonese, arzɛk bɩ naong rãmba, kelg-y, y fãa gilli. Yaa yam zulung goama la m noor yiisda, yaa goam sẽn be võor la m yiisd m sũurẽ. M maaga m meng n kelg yelbũna la m dɩka m kʋnde n na n wegs-a ne yɩɩlle. Bõe tɩ m na n maan yɩɩre, ra-beeda raare, yɩɩre tɩ nin-wẽns n gũbg-ma, yɩɩre tɩ neb sẽn teeg-b laogo n yegd-ma, la yaa b arzɛk sẽn waoogã la b kilsda? Ned ka tõe n fãag a to ye, a ka tõe n deeg-a Wẽnd nugẽ ne ligd ye. F sẽn kɩs bũmb ning fãa n na n fãag yõore, raara sã n ta, f yõora ta-la a tɛk bala. Ned tõee n kell n vɩɩnda woto raar fãa? N vɩ woto n ka tol n yãend a yaoogo? D ka nee nin-tɩrs sẽn kiid bɩ, d ka ne b sẽn kiid zãnga ne ka-yõod rãmba bɩ nin-toos bɩ? N kiidẽ tɩ neb a taab yõneg n dɩt b raboog bɩ? B ra tẽedame tɩ bũmb kõn luk-ba b zĩisẽ ye, n tẽed tɩ b roog kõn tol n kɩll ye, n tol n dɩk b yʋʋr n pʋt b tẽnse! Ad-y b sẽn zẽk ninsaal n ta zĩig ning fãa, a miime t'a wat n kẽe gãag n ka vẽeg beoog ye, a wat n lebga bõn-muka wa rũnga. Ad neb niyns sẽn teeg-b meng zãnga, ad sẽn kilsd-b mens ne b noor goama, ad-b sẽn na n baas to-to: B wẽnda piisi la kũum n tar-ba n digd bʋg-tẽnga. Na n pag-b-la bʋg-tẽnga wa pe-bi. B loogra poor marsã, nin-sõma n wat n tab-ba n bedse. B fãa gill sigda yaoogẽ, n menem, b zãagda ne b ro-neeba. Sã n ya maam, Wẽnd n na n wa fãag-ma, bãmb n na n wa yiis-m bʋg-tẽnga. Da le maan yɩɩr lɛ-lɛ f sã n ne neb sẽn tiig n lebg arzɛk rãmba, tɩ b zak pid ne faongo, n pid ne ziir ye. B sã n kiidẽ, ad-y b pa zɩt bũmb n loog ye, b ziira pa tũud-b yaoogẽ ye. Neda sẽn waa n vɩ wã, ba a sã n da pẽgda a menga n yet tɩ bũmba fãa zemsa a nengẽ, a bãng t'a na n leba a saam-dãmbẽ, la ba a ye nif kõn le teeg vẽenem ye. Ãnda n be n ka miẽ, tɩ ninsaal ne a ziira fãa, wat n lebga muk wa rũnga? A Asaf yɩɩlle. Soaalã, Wẽnd akɩkã, goma ne tẽnga rãmba, b boola yaang la nin-taoor dãmba. Wẽnd yãgda ne ne neerem menga Siõ tãnga zugu. Bɩ d Wẽnd wa la b gome, b gom la b ra sĩnd ye. Bugum n zoet bãmb taoore n tar dɩɩbo la b meng be sob-raoog sʋka. B boola yĩngr la tẽng zug rãmba tɩ b buuda bʋʋdo, na n bʋ b b taoore. Ad-y b yeelame: «Tigim-y m neba n kõ-ma, tigim-y sẽn yõg-b zood ne maam, zood sẽn yõg maan-kugra taoore.» Ad-y yĩngr dãmb deegame tɩ bãmb la Wẽnd ninga sẽn bʋʋd-a ne zemsgã. Kelg-y yã, m neba, tɩ m na n gomame, Israyɛl kelg tɩ maam n bool f bʋʋdo, maam, fo Wẽnnaama. M tara zabr ne foo la ka f maanda poorẽ ye tɩ m ne-b-la m taoor wakat buud fãa. La kelge, m kõn yõk f zak naaf ye, m kõn yõk f wubr boɛɛg ye. We-rũmsa fãa ka maam n so laa? Maam n le so rũms niynsi sẽn kɩɩmd tãms ka tɛka zutu. M mii luiili wã sẽn yɩgd yĩngra fãa, we-rũmsa fãa yaa maam n so. Kom da tarẽ maam me, m kõn leok-y tɩ bũmb ye, tɩ dũni wã ne a pʋgẽ teeda fãa yaa maam n so. Niisa nemd la m na n wãb bɩ, bɩ yaa boeesa zɩɩm la m na n yũ? Sõng n pẽg Wẽnde, f pẽgra la f maoongo. Sõng n pids f sẽn pʋlem Yĩngr Soaala. Gũ ra-beeda marsã n bool-ma, ad-m na fãag-fo la f na kils m ziiri. Ad Wẽnd sẽn leokd wẽn-kɩɩsa: «Bõe tɩ f zĩ n sõdgd m noya, tɩ f noor gomd zood goama, zood ning d sẽn yõg ne taabã, tɩ f yaool n pa reegd m saglgo? Fo sã n yãend wagdre, y na zems taaba, f be yoaadb sʋka, fo lebga b tũud-n-taaga. F noor sẽn mi yaa wɩdse, f zelemd sẽn tõe yaa zirẽ-beedo. Fo moor kõn zems ne f to ye, f saam-biiga la f vuud begdẽ. Woto la f tʋʋma, n yaool n yet tɩ m sĩndi? F tẽedame tɩ m wẽnd-f lame? M yɛdgda f beegra fãa f taoore, m ningd-f-la taale. Ning-y rẽ y yamẽ, yãmb fãa sẽn yĩmd Wẽnd yelle! Ka rẽ m na n tõosa zɛrma la ned kõn tõog n gɩdg-m ye. Ned ninga sẽn mi-a mam pẽgre, yẽ soab n wat ne a bark pʋʋsg bũmbu. Ned ninga vɩɩm sẽn tũud sore, m na wilg yẽ soab tɩ maam la Fãagda.» Yɩɩlla bee yɩɩla naab sebrẽ. A Daviid yɩɩlle. A sẽn waa n seg a Natã, a yel-wẽnda poore. Zoe-y mam nimbãanega, Wẽnnaam, wa y sẽn miẽ n maanẽ. Y nimbãan-zoeera sẽn labsã bɩ y yẽes m yel-wẽndã. Wa-y ne koom waare, n pek-ma, tɩ m lebg yɩlgemde n zãr ne m yel-wẽndã. M deega m kongre, maam n beege, la m beegra dɩga m taoor wakat fãa. Yaa yãmb y ye bal la m beeg yã. Y sẽn ka rata la m maan yã. Y sã n yãe koɛɛg n na n leoke, y tara bʋʋm, y bʋʋda me bʋʋda tɩrga. N-ye! M doga ne yel-wẽnde, la m ma sẽn dog-m tɛka, m ket n vɩ-la a pʋgẽ. Yãmb sẽn dat ninsaal ne bũmb ninga yaa pʋ-peelem la sɩd nonglem. Bɩ y kẽ m pʋgẽ n zulg m yama n kõ-ma. Menes-y m yel-wẽndã, n yɩlg-ma pek-y-m n yɩlem tɩ m lebg pɛɛlg wa laongo. Wilg-y-m tɩ m paama sugri, n lɛɛg n pisd-m ne sũ-noogo tɩ m sẽn da zĩ ne sãmpogrã, bɩ m yik n sɩng kibsa. Da ges-y m yel-wẽna ye, yẽes-y b fãa gilli. Soaala, kõ-y m sũur sẽn nedge, tek-y m yama t'a lebg yam paale. Da rig-y-ma n zãag ne y meng ye, da reeg-y y Yam sõnga n bas-m ye. Kõ-y maam y sẽn fãagd b rãmba sũ-noogo, Pids-y-m ne y kũuma n paas m pãnga! Sẽn bʋdg b rãmba fãa na paam m koɛɛga b na bãng y sẽn gũud b nengẽ la fãa gill na le lɛɛg n wa kẽ yã. M Wẽnnaam, Wẽnd sẽn mi fãagre, zãag-y-m ne kũum tɩ m wilg y sẽn fãag-m to-to la m kaas m sũ-noogo. Soaala, yaag-y m no-gãndã, tɩ m noora tõog n pẽg y yʋʋrã. Ka maoong buud la y rat ye, yũ-noog maoong meng kõn noogd y sũur ye. Soaala, maoong ning m sẽn na n wa ne ya m meng sẽn ka le tar zẽk-m-menga. Soaala da zãgs-y tɩ m tuubga pida zãnga. Bɩ Siõ le yãend y yel-sõmde, la Zerizalɛɛm lalsa le paam yikri. Dẽ marsã la maanda na n noog y sũuri, y na tʋlg yũ-nood maandã, la d na tõog n wa ne lolse, y maan-kugra zugu. Yɩɩlla bee yɩɩla naab sebrẽ. A Daviid yɩɩlle. A tẽegda Edomitg a Doeg sẽn waa n wilg a Sol t'a Daviid kẽla a Abimelɛk zakẽ. Wʋglem bãag bʋg la f bẽeda n yet tɩ wẽng bala la fo na n tʋme? Beoog sẽn vẽeg fãa wẽng bala la f yama tar bilgri. F zelemda rɩta wala wanzam barga, f sẽn mi bal la neb kãnegre. Fo nonga wẽnga n kis neere, n nong zirẽ-beed n yɩɩd sɩda. F zelemd goalenga sẽn mi yaa sẽn sãamd bala. F sẽn leok fãa yaa kalem-kalem. Wẽnd na n bas-f lame tɩ f lʋɩ n da le yik ye, b na n tak-f lame n yiis f roogẽ, b na n võog-f lame n yiis nin-vɩɩs sʋka. Dẽ marsã la nin-sõma wã na n yãende, n wẽed siri la b gomda: «Ges-y rao ninga sẽn da maand wʋglma, n da teeg a paoongã n yɩɩd Wẽndã!» Sã n ya maam, m na n wẽnega oliviye, sẽn tãood a wil Wẽnd zakẽ. M teega Wẽnd nonglma sẽn ket n pʋgd-m wakat fãa. Y tʋʋm sõnga yĩnga, m na pʋʋs-y barka, la m gũuda wa bũmb sẽn toge, daar ning b sẽn na n pẽg y yʋʋrã nin-sõma wã sʋka. Yɩɩlla bee yɩɩl-naab sebrẽ. A Daviid yɩɩlle. Yɩɩndame tɩ wɩɩs peebdẽ. Gãeemsa gomdame: «Wẽnd ka ye!» Adem biig fãa sãamame, b kẽesa b mens yel-yoodẽ. Sẽn le maand-a neer ka ye. Soaala sulgame n na n gese, n na ges yam soab sã n ketame n baood Wẽnde. Fãa kẽe moogo, fãa zaa ne wẽnem wĩiri. Sẽn maand-a neer ka be, ba a ye. B yalemdã n zem b wẽnema. Bãmb n tãag m neba n sɛ zãng wa buri, n yaool n zɩ n gomd ne Wẽnd ye. B waa n yikame n tar digbu tɩ sẽn sek rigb yaool n da kaẽ ye. Wẽnd meng b toor n na n sẽeg b bɛɛba kõaba, b na n dɩɩ yãnde. Ãnda n be Siõ n sõngd a Israyɛl t'a tõogd a bɛɛba, sã n ka Soaalã? A Zakoob langdame, t'a Israyɛl kɩdemd sũ-noogo, tɩ Soaala-Wẽnd n lɛɛg n wat ne b pa-weto. Yɩɩla naab kɩtdame tɩ b yɩɩle ne ruuds la koala. A Daviid yɩɩlle. Yɩɩ Zif tẽng rãmba sẽn waa n wilg a Sol t'a Daviid waa n solga a meng bãmb sʋka. Soaala, wa-y ne y pãnga n fãag maam. Wilg-y tɩ b bãng tɩ yãmb n kõt-m bʋʋm. Soaala, wʋm-y m pʋʋsgo, kelg-y m sẽn togsde. Bu-zẽmba baoo zabr ne maam, nin-kʋʋdba dat n daaga m zɩɩm la b pa geelg n ning Wẽnd sʋk ye. Mik Wẽnd ya-la m sõangda, bãmb bala. Woto wã bɩ b ra bas sẽn dat-b maam ne wẽnga ye, y sẽn nong maama bɩ y menes-ba. Yɩta ne yamleoog la m na n kʋ maando y yĩnga, la m pẽg y yʋʋr sẽn pid ne sõmblem. Soaala yols-m-la ne yɩɩr buud fãa, tɩ m me kẽnd la m yĩgsd m bɛɛba. Yɩɩlla bee yɩɩla naab sebrẽ. Yɩɩnda ne koala la ruudsi. A Daviid yɩɩlle. Soaala, kelg-y m pʋʋsga neere. M sã n pʋʋsd-y bɩ y ra solg ye. Ges-y-ma la leok-y-ma. M ka le mi m sẽn beẽ ye, n lebd goabga, m lebd rɩtgo, n zĩ ne yɩɩre, n ka wʋmd bɛɛba sẽn gomd n lebdẽ ye, n ka mi nin-wẽnsa dɩdgr sẽn na n tekẽ ye. B boola yel-beed m zugu, b pʋgd-m-la ne sũ-puuri. M sũura yalsa m yãoogẽ, m waa n yik n yɛɛsda yɛɛsg sẽn tõe n kʋ-m, m waa n yik n digda rabeem kãsenga, m waa n yik n digda waoodo. Tɩ m yeel m menga: «M sã n da tarẽ la wal pɩgsa m na yɩkẽ n bao zĩiga, m naan n zoẽ n zãagẽ n tɩ gãand we-raoogẽ, m na tɩ baoẽ zĩig n soond n tɩlg sobg la sob raado.» Soaala, kalm-y m bɛɛba zɛlma, sõng-y tɩ b ra le zems taab ye. M sẽn ne tẽnga pʋga yaa neb sẽn kaood zaba la sẽn maand b taab pãnga. Bãmb n gilgd tẽnga wĩndg la yʋngo. Tẽnga pʋg marsã, yaa yel-beed la pɛta; tẽnga pʋg pida ne wagdem la koodgo, la pãn-tõog la zirẽ-beedo. Sẽn tʋʋsd-a maam dũnna wã yaool n da ka m bɛ ye, yaẽ m bɛyã, m yetẽ lame tɩ ka yell ye. Sẽn zabd-a ne maama ra ka tar beem ne m ye, beem da beẽ m da na lak n basẽ-yẽe. Woto wã yaa fo menga, m neda m sõsd-n-taaga, m zoa menga. D da togsda taab d pʋga la Wẽnnaam sɩmannẽ wã, d da kẽnda ne taaba. Bɩ kũum vẽ m bɛɛba wa sɩlga, tɩ b sig vɩɩs bʋg-tẽnga, tɩ wẽnem ti-la a zak b sũurẽ. Mam yẽ boonda Soaala la b na wa n fãag-ma. M da tara waasgo yibeoogo, wĩntoog la yʋngo, la b wʋma m koɛɛga. B tol n yaoome n na n fãag-ma; ad-b sẽn wat m nengẽ, neba fãa sẽn waa n sẽeg n bas-ma. Bɩ Wẽnd wʋm m kosgã n sɩbg bɛɛbã, Bãmb la rĩm zamaan ne zamaana! Maam ne bɛɛba kõn tõog n zems taab bada, tɩ b ka le zoet Wẽnd ba sẽn paood ye. Ned kam fãa zãmbda a zoa, a lebsda a sẽn da wẽen a noorẽ. Ad-y nina sã n gomda, yaa kaam la a sɩlgda, la sũura yaool n pida ne zaba, a noor bʋgsame n yɩɩd kaam, mik yaa sʋʋga la a zẽk n na n kɛ. F zoa wã sẽn zãmbd-fã dɩk f yellã n bas ne Soaala. F na kell n yaas yĩngri tɩ b pa basd nin-sõng t'a lʋɩ ye. Soaala, tus-y sẽn nong-b zɩɩm la zãmbo n tɩ lub bog zulungẽ, tɩ b vɩɩma pʋlemd nan ka ta a pʋɩ-sʋk ye. Mam yẽ teega yãmb bala. Yɩɩlla bee yɩɩla naab sebrẽ. A Daviid yɩɩlle. Filisti rãmba sẽn waa n yõk-a, Gat tẽnga. Zoe-y m nimbãanega Soaala tɩ bɛ n pʋgd-ma. Beoog sẽn vẽeg fãa a sogda m kokoɛ la yaa zabr tɛka. Neb sẽn mi sudum n pʋgd-m daar fãa b yaool n ka mi tɩ m sõangda bee yĩngri ye. B ka mi tɩ yaa Pãng-Soab ye. Dabeem sẽn tar-m wakat ning fãa, yaa yãmb sɛɛg la m yõkda. B gomda yaa sɩda, tɩ m pẽgda tɩ rabeem me menem zãnga. Bõe la ninsaal tõe n maan-ma? B namsd-m-la beoog sẽn vẽege, b baooda m sãoong bala. B soos n lamame n gũud-m, n gẽesd yɛ la m tees yã, n na n paam-m n kʋ. Soaala, y ka na n sɩbg-b rẽ fãa? Bas-y tɩ y sũura fudg n waag-ba! Ade, wala y sẽn ne, m kong n zoeeme. Kok-y m nintãma, ges-y m yãbra sẽn ta zĩig ninga. M sẽn bool-y tɩ y wa sõng-m daare, m bɛɛba bãng tɩ b na tare n leb poorẽ. M miime tɩ yãmb be-la m sɛɛgẽ. M pẽgda Wẽnd ne b sẽn taas-m gomd ningã. N-ye, m pẽgda Soaala b gomda yĩnga! M teega bãmba tɩ rabeem sɛ zãnga. Bõe la ninsaal tõe n le maan-m yɛsa? M na n pidsa m pʋlengo, Soaala, m na n waa ne bark pʋʋsg maando. Yãmb fãaga maam ne kũum, salga ka paam n taas-m tẽng ye. M le kẽnda y taoore, n vɩ vẽenemẽ ne nin-vɩɩse. Yɩɩlla bee yɩɩla naab sebrẽ. A Daviid yɩɩlle. A Sol sẽn waa n digd-a. Zoe-y m nimbãanega, Soaala, yãmb nengẽ la m na n wa soonde, yãmb maasmẽ la m na n vʋʋse, n gũud yel-beeda loogre. Yaa Yĩngr Soaala la m boonda. Wẽnd ninga sẽn na n maan fãa m yĩngã. B zĩnd yĩngri n tool-m laafi! Ade, m bɛ wã tʋʋsda yãmba, bɩ y puk y meng ne y nonglem! M bee bõnyẽes sʋka, m bee nin-toos sʋka. B yẽna, bãng kãn la pɛɛma; b zelemdã, sʋʋg sẽn saas n dɩga. Soaala, dɩ-y naam yĩngri yɩ-y tẽnga fãa dĩma! Bẽdgo la b gãneg m sor zugu, b bao wĩir n na n sãr-ma. Loang la b tuk m yĩnga la bãmb n wẽneg n lʋɩ a pʋgẽ. Y pids-m-la ne sũ-keelem, Soaala tɩ m na n pʋd yɩɩlle. M kos tɩ y neke, m Soaala! La yãmb me bee yɛ, m ruudg la m kʋnde, tɩ m man noog n nek sõore? Soaala, m na n pẽg-y-la kʋʋnga sʋka, bu-zẽmba sʋka, m na kils yã. Y nonglma tãoome n kul sagãna, y pʋlenga kõn vaala le yaa vẽeneg ne neba fãa. Soaala, zẽk-y y yʋʋra t'a kul yĩngri tɩ y ziira reeg tẽngã n yãmbe! Yɩɩlla bee yɩɩla naab sebrẽ; yɩɩnd-a lame tɩ wẽneg: Da sãam-y ye. A Daviid yɩɩlle. Ninsaalb kamba, ned tõe n pelga a pʋg ne yãmb bɩ? Y sã n wilgd zemsg sore d tõe n dɩk-a lame bɩ? La y bʋʋda bʋʋda tɩrs bɩ? M pa tẽed ye, ka tẽng zug ka ye. Yãmb sẽn mi yaa tʋm beedo, yaa y zablg tẽng zug rãmb ne taaba. Nin-wẽng sẽn wa moog bala, la a sẽn zoe n lebg tõata. Zirẽ-be-ned sẽn dog bala la a sẽn zoe n sɩng a zirẽ-beedo. B zẽnem kʋʋda wa waaf rẽnna, b gãee wa raob-kiugu, n maand wa b ka tʋb ye. B kõn maan b sẽn kos-b bũmb ning ye, pa saoolgd-b saoog tɩ b le gele b zug ye. Soaala, kao-y b yẽna b noorẽ, kao-y bõnyẽesa yẽn-daado. Raag-y-b wa koom tɩ b zoe n looge. Gẽeg-y-b neere tɩ y pɛɛma tʋm b tʋʋmde. B kʋɩɩs b meng wa garweongo sẽn kẽnd t'a kolkood yʋʋnẽ, b loog wa pa-tar sẽn ka yãet wĩndga! Bɩ sɩlmand loog ne b yõeestabda tɩ b nan ket n ya pẽba bɩ bugum n paam n dɩ-b n keese. Nin-sõng sũur na yɩ noogo, a na n yãee Wẽnd sẽn dok b sũuri, tɩ nin-wẽnsa rugd b zɩɩmẽ wa koomẽ. Wakat kãng la b fãa na n yeele: «Nin-sõma wã na n deega b rolbo, tɩ Wẽnd sẽn mi bʋʋd kaoobo, n dɩt naam tẽng zugu.» Yɩɩlla bee yɩɩla naab sebrẽ. A Daviid yɩɩlle. A Sol sẽn waa n kos-a t'a gũ a zaka, n dat woto n paam-a n kʋ naana. Soaala, fãag-y maam m bɛɛba nusẽ, gũ-y maam ne m bɛɛba. Zãag-y maam ne nin-wẽnsã, zãag-y-m ne sẽn nong-b zɩɩma raagrã. B bao zĩig n sorẽ n gũud-ma, yaa nin-bɛd mens n yik n na n zab ne-ma. La ade, Soaala, m pa beege, m pa maan wẽng ye. Ne m sẽn ka beegã, b zoet n beoogd-m lame. Yik-y y gãagẽ, Soaala, seg-y-ma, tɩ y na yãe! Yãmba, Soaala, Pãng Naaba, a Israyɛl Wẽnde, yik-y n sɩbg-y bu-zẽmba fãa. Da zoe-y ned ba a ye nimbãaneg ye, b fãa maana zãmbo n bõn b mense. Zĩig sã n sobge, b lɛɛgd n watame. B saada tẽngã n wũund wa baase, b noora pida ne tãntãmpuudu, tɩ b yẽna lebg wa sʋʋs b noorẽ. Woto wã ãnd n tõe n wʋm b goama? Bãmb n gãgnemd ne taaba. La yãmb laada bu-zẽmba, Soaala, yãmb toog ka ne b ye. M na n dooga m neng n ges yãmba, yãmb la m pãnga, m tãnsoben-dooga yaa Wẽnde. Wẽnd ning kãabg sẽn ka vaandã wata m segbo; bãmb la m teeg yã n yĩgsd m bɛɛba. Da menes-y b zãng ye, ka rẽ m buuda wat n yĩma a yel-sõmd soaba. Y pãnga yee n vigs-ba la y ning-b yãnde, d Wẽnd la d gãongo! Zãmb rãmba sã n yaag b noore, yaa b wẽnema bal la b pẽgda. B kãab beedo, b wẽn-tʋʋr la zirẽ yĩnga, bas-y tɩ b wilg-m-menga lebg bẽdgo n yõk-ba. Ypug-y y sũuri n sɛɛs-ba, da kees-y bũmb ba a ye ye. Woto yaang la taoor dãmb na bãnge tɩ Israyɛl Wẽnda pida ne naam la tõogo. Zĩig sobgdame tɩ bu-zẽmba lɛɛg n wa. B lɛɛgd n waame la b wũund wa baase, n saad n pɩkd tẽngã. Yaa sẽn na ning b noorẽ wã la b baooda. B pa rɩ n tɩg fãa, b yãbdame tɩ beoog vẽege. Sã n ya maam m yɩɩndame n pẽgd y pãnga, y nonglma sẽn ket n pʋgd-ma la m kilsd yibeoogo, tɩ y yɩɩ tãnsoben-doog m yĩnga, m soondg zĩig m yɩɩra pʋgẽ. M na n yɩɩlame n pẽg y pãnga, m Wẽnd la m tãnsoben-doogo, tɩ y nonglma ket n pʋgd-m-la beoog sẽn vẽege! A Daviid yɩɩlle. Yɩɩla naab yɩɩnd-a lame t'a wẽneg: lɩɩng kaseto. Yaa yɩɩlle sẽn naag ne zãmsgo. Yaa a sẽn waa n zabd ne Mezopotami la Sova Aramse. Yaa a Zoab sẽn waa n tõog Edom dãmb, bãmb tus piig la a yiibu, yamsem bãg-faagẽ. Soaala, yãmb basa tõndo tɩ d zoe n sẽeg zãnga. Y sũur da kãbda ne tõndo, leb-y n tigim-y-do. Yãmb kɩtame tɩ tẽnga digimdi, yãmb kɩtame t'a pus mugnum. Wa-y n sẽ-y tẽnga peesã tɩ b ra sẽeg ye. Y buuda vɩɩm waa n yɩɩ toogo, y waa n yũnug-d-la rãam sẽn lubdi. Y wilga sẽn zoet-b yãmb nifu wakat ning, b sẽn na n zoe n põs bɛ ninga sẽn tãood pɛɛma. Bɩ y modg n leok-do; la y rɩtga me maan bũmbu n fãag y sẽn nong b rãmbã. Wẽnd zĩnda b roogẽ wã n leoke, tɩ m kɩdemnẽ. M maanda Sikɛm wa m sẽn date, m pasda Sukot vẽenem. M soo Galaad la Manase. A Efrayim la m dɩk n fõgne m zug wa zug-peoogo, t'a Zɩɩda ya m naam dasaare. A Moab yaa la-zulunga, yẽ pʋgẽ la m pegd m menga. A Edom yaa m soolem, rẽ ka be no-koeemd ye. M tõoga Filisti n kaas m sũ-noog kaasgo. Ãnda n na n sõng-m tɩ m ta tãnsoben-doogã? Ãnda n na n tall-m n ta Edom? Sã n ka yãmba, m Soaala? D Yaool n neeme tɩ yãmb bas-d lame, y pa le yãagd d tãb-biisa zabrẽ ye. Wa-y n sõng-y-d ne d bɛyã tɩ laong ka yiisd laong bugmẽ ye. Wẽnd sã n be sʋka d na maan daoodo, tɩ yaa bãmb n na n tab d bɛɛba gilli. Yɩɩla naab kɩtdame tɩ b yɩɩl ne ruuds la koala. A Daviid yɩɩlle. Soaala, kelg-y m boolgo, kelg-y m pʋʋsgo. M bee tẽnga yaanga n boond-y, m sã n wa ka le mi m sẽn maande. Sõng-y tɩ m ta m pĩiga zug tẽnsʋka tɩ pĩiga zãndame. M ta be, m ta m põasg zĩigẽ, tãnsoben-doog pʋgẽ la m paam n kẽ, tɩ m bɛɛba na n tare. M nongẽ lame n pa y sɩmannẽ wã daar fãa, n paam n solgẽ y maasmẽ. Ya yãmba, Soaala, n deeg m kosgo, n kõ sẽn nong-b yãmba b sẽn date. Kõ-y dĩma yõ-woko, a yʋʋmd a ye kaoos wa yʋʋm koabga! Kell-y n zĩndg-y dĩma y taoore. A kell n pa y nonglem la y sɩda vẽenemẽ. Woto m na tõog n pẽg y yʋʋra raar fãa, woto m na pids m sẽn kãab-y wã fãa. Yɩɩla naab basdame tɩ Levitsa pʋde. A Daviid yɩɩlle. Sɩda, m gãee ne laafi Wẽnd taoore, m fãagra yita bãmb nengẽ. Bãmb la m pĩiga la m lilli, m paama m tãnsoben-doogo, bɛɛb kõn ling-m doogo. Rasma a wãn yɛsa la m bɛɛba na n kell n naag taaba n tar nin-yend pʋgbo, n baood n na n lub-a, n lub-a wa lalg sẽn kɩlle, wa wubri sẽn wurgi? M yʋʋra sẽn yi wã yĩng la b rat n dig-ma; n yik n lebg ninsaan-kazukma: b noora gomda noogo, la sũurẽ wã yaa kãab wẽnse. M neda, da maan dabeem Wẽnd sɛɛgẽ ye tɩ bãmb bal la m teeg yã. Bãmb la m pĩiga la m fãagr lilli, bãmb la m tãnsoben-doogo, zabr kõn ling-m doogo. Wẽnd la m fãagda, bãmb n sõng tɩ m yʋʋr yi; bãmb la m tãnsoben-doogo la m soondg zĩiga. Bɩ Adem biisa teeg bãmb wakat buud fãa, bɩ b wa b taoore n wilg sẽn be b sũurẽ. Wẽnd la d soondg zĩiga. Adem biisa faasa wa pemsem, rĩm biisa ne b naama me yaa belgre; f mag b zɩslma, f mag pemsem. Da teeg-y pãn-tõog ye, da teeg-y fãab la wagdem ye. Y arzɛka sã n wa paasdẽ, bɩ y ra yãg n yõgem y noor ye. Yaa naoor wʋsgo la m wʋm Wẽnd tɩ b gomda: «Yaa maam bal n tar pãnga!» Ad-y yãmb n naag n so nonglem, Soaala, tɩ y rond ned kam fãa wa sẽn segde. A Daviid yɩɩlle, a sẽn waa n be Zɩɩda we-raoogẽ. Yãmb la m Wẽnde, tɩ m baood-y. M menga zãng n tʋl yã wa naka, wa tẽn-koɛɛnga. M tõta beoogo n baood y zĩiga. Ade, m zĩnda y ro-sõnga pʋga n ges-y n tɩge, n tɩg y ziir la y pãnga. M Yãeeme tɩ yãmb nonglma ne maam n be yõodo n yɩɩd vɩɩm, tɩ m yaag m noor n sɩng y kilsgu. Yaa m vɩɩma tõre la m na n pẽg yã. M na n zẽka m nus n pʋʋs-y barka. Wala ned sẽn tɩg rɩ kaam, n zota, m pida ne sũ-noogo, m noora na kils yã. M sã n tẽegd y yelle, m gãag zugu, m sẽn tar y pʋʋsg la m sẽn tare. La rẽ yaa y sẽn yɩ m sõangda, la rẽ yaa m sẽn kaas sũ-noog y maasmẽ. Yãmb bal la m dat ne m sũur fã, tɩ y kanga pãng n gũud maam. Sẽn baood-b n na n kʋ-ma, yãend b menesgo! B sud n ta tẽnga tɛka! Kʋ-y-b zãnga n kõ we-baase! Woto dĩma sũur na yɩ noog ne Wẽnde. Sẽn na n wẽen-a fãa n yet tɩ Wẽnd la a kaset soaba, bɩ a bãng tɩ yẽ la yam soaba, tɩ zirẽ-beed fãa na n sɛɛme. Yɩɩlla bee yɩɩla naab sebrẽ. A Daviid yɩɩlle. Soaala, kelg-y m sẽn wat ne koɛɛg ningã; zãag-y m vɩɩma ne bɛ-toaag a woto buudu. Solg-y maam tɩ sẽn minim-b sudum n zoe n tigs taab n dat-m ne wẽnga. Ad-y b zɛlma saasa wa sʋʋga, b zẽna b goama wa pɛɛma; zĩig bal la b baood n na n lilli n paam n tão ned sẽn ka tar a toorẽ yelle. B wat n kenga b sũur n tão bala. Yam la b baooda n na n solg b bẽdgã. B wat n tol n yeela woto: «Ãnda n pus n na n tagse tɩ yaa bẽdgo la d gãneg yã?» B zĩndame n sõdg tʋʋm beed niyns fãa b sẽn na n tʋma la b pẽgd b mense n yetẽ: «D geelsa maneg n geela neere; ninsaal sẽn tõe n yiis a yamẽ labsa.» Mik Wẽnd n deng tãoobo, b waa n yãenda pĩima vugr bala, tooga lɛɛg n lebga b rẽnna. B gom yoodã n lɛɛg n dɩ-ba. Ned ninga fãa sẽn yãend-b bãmb marsã tara b laado la b sãbsgo. Dabeem kẽeda Adem biig fãa t'a sɩng n na n pẽg Wẽnde la a bao yam sõng n kõ a menga. Bɩ nin-sõma wã noog b sũur ne Soaala, la b wa soomd bãmb bala, la b pẽg b sẽn bãng so-sõngã n dɩkã. Yɩɩlla bee yɩɩla naab sebrẽ. A Daviid yɩɩlle. Siõ Wẽnde, ad-y yãmb n tog ne pẽgre. Yaa d kãabg la d wa n na n pidsi. Y sẽn kelgd kosg yĩnga, ned kam fãa tõe n kolgame. M beegra waa n looga toogo, la y sak n yẽesa fãa gilli. Zu-noog rãmb la tõndo tɩ y bool-d lame tɩ d na n pa y sɩmannẽ. Y na tɩgs tõnd ne y zaka kũun sõma, ne kũun sõma niyns sẽn gãe y ro-sõngẽ wã. Y maan-d-la neere n wilg y bõn-bãna. D Wẽnd la d Fãagda, yãmb n kõt y laafi, tẽng zug la mogra sʋk-rãmba. Yãmb pãn-kẽenga la y sẽbg y meng wa kalle n vigl tãmsa kẽnkẽ, b zĩisẽ. Y sigsda ko-wiisa ne b bʋʋrã. Neba sẽn mi n yik n wulumd ne taabã, yãmb n leb n kẽed sʋka n sɛɛsd b no-koɛɛma. Dũni wã tõr fãa ne-la y bõn-bãna, yaang la taoor dãmba kɩdemda sũ-noogo. Yãmb kargame n ges tẽngã, n zãgs-a koom, yãmb pids-a-la ne laogo. Wẽnd kʋɩlga pidame n daannẽ, alkam la y segenda n na n kõ y nebã. Yaa woto la y segend n na n kõ-d koodo: wãka sẽn vɛɛg tẽngã rengd n pidsa koom, tãnda manegd n bẽega vuk-vuka, tɩ sa-koom wa yʋgumd fãa gilli, tɩ y sik y bark tɩ sẽn bʋda bul n yi. Yʋʋmda baasda wa a sẽn sɩnge ne yãmb kũun sõma, la sẽn lebẽ fãa yaa tɩgr ne tɩgre. Rũmsa paamda b wãbneg zĩiga, tãmsa zut menga yaa sũ-noog kaasgo. Pʋ-weesa na n yẽnega ne rũmsi, tɩ pʋta pelg ne koodo. Zĩis fãa yaa kaasgo la yɩɩla. Yɩɩlla bee yɩɩla naab sebrẽ. Bɩ tẽnga gill kils Soaala, tẽnga yɩɩl b yʋʋr la b pẽg b ziiri, tẽnga kils la a sond-ba. Yeel-y Soaala woto: «Ad-y tʋʋma yɩkda pɛlenga! Y pãnga sẽn labsa yĩnga, bɛ tata y taoore n lebg kʋʋsa. Tẽnga gill wõga yãmb taoore, yãmb la a yɩɩnda, y yʋʋra la a kilsda.» Wa-y tɩ y na yãend Wẽnd sẽn maane, la b tʋʋma sɩd yɩkda ninsaalb pelense. Bãmb n welg tẽn-koɛɛnga ne mogre, n kɩt tɩ kʋɩls kʋɩ n bas sore la woto seka kibs maanego. Wẽnd maana raoodo, n lebg dĩm zĩig zãnga. B nin kargda bu-zẽmba tẽns fãa. Tõatba kõn le tõog n doog b zut ye. Adem biisi, kilsi tõnd Wẽndã, kɩt-y tɩ b pẽgra sãde. Bãmb n kõt-d vɩɩm, bãmb n kɩt tɩ d yɛs d nao zutu. Yãmb fɛɛsa tõndo, n los-d boaagẽ tɩ d yɩlg wa wanzurfu. Y kẽes-d-la yɛl toodẽ, y bas-d-la ne yɩɩre. Y basame tɩ wiidi tab d zut n looge, y kẽes-d-la koomẽ la bugmẽ, la y sẽn yiis-d be, lebga tɩgre. M kẽeda y zaka ne yũ-nood maando, tɩ m dat n pidsa m kãabgo, kãabg ning m sẽn yaag m nore n kãabe yɛla sẽn waa n sẽbga raare. Yaa rũms sẽn yẽnegd ne kaam maoong la m na n kõ yã, n paas pe-raad dẽnna, n paas lols la boeese. Yãmb fãa sẽn zoet Wẽnde, wa-y tɩ m na togs b sẽn maan m yĩnga. M sẽn waa n boond-ba, dẽ tɩ m zelemda da zoe pʋta pẽgr yɩɩlle. Wẽnem sã n da be m yamẽ, b naan n bãngẽ la b pa na n kelgẽ ye. Soaala yaool n kelgame, b kelga m kosga neere. B soog pẽgre, bãmb sẽn pa zãgs m kosgã, bãmb sẽn kell n pʋg maam ne b nonglma. Yɩɩla naab kɩtdame tɩ b wẽ bɛɛl la kʋnde. Soaala, zoe-y d nimbãanega la y ning-d barka! B togl tõnd b nenga sẽn tar yãgbã. Woto, tẽng zug ka, b na bãng y soya, la bu-zẽmba mens na yãend y fãagrã. Soaala, bɩ Adem kamba pʋʋs-y barka. Bɩ b naag taab gilli n pʋʋs yã. Bu-zẽmba yɩɩl b sũ-noogo tɩ y zãad-b-la ne zemsgo, la tẽng zug ka bãmb n wilgd b sore. Soaala, bɩ Adem biisa pʋʋs-y barka! Bɩ b naag taab gilli n pʋʋs yã! Tẽnga woma a biisi, Soaala tõnd Wẽnda ningd-d-la barka. N-ye! Bɩ Soaala-Wẽnd ning-d barka, bɩ tẽn-zãorgẽ dãmba reeg tɩ bãmb la b Soaala. Yɩɩlla bee yɩɩla naab sebrẽ. A Daviid yɩɩlle. Bɩ Wẽnd yiki tɩ b bɛɛba fãa sẽege, tɩ b fãa ning tĩig b taoore. Wala bug-zõose sẽn nukd n looge, wala siribdu sẽn yẽnegd bugmẽ, bɩ nin-wẽnsa me menem woto Soaala taoore. Bɩ nin-sõma wã yẽ noog b sũuri, Wẽnd taoore bɩ b sɩng kɩdengo la saooga! Yɩɩl-y Wẽnd yĩnga, pẽg-y b yʋʋre, n deeg sẽn zao-a sawadga wa weefo; b yʋʋr la Soaala, d kɩdem b taoore. B ro-sõnga pʋga bãmb la kɩɩb-bi ba, pʋg-kõapa sã n paamd bʋʋm tũuda ne bãmba. Zĩ-m-ye soab wat n lebga zak soaba. Sẽn pag-b rãmb roogo wat n paama yɩng pemsem noogo. Tõatba bal n ka na n paam zĩ-bʋgsgo. Soaala, y sẽn waa n yi ne y buudã n kẽne n ta we-raoogẽ, tẽnga miimame tɩ saag meng minisi, Sinayi Wẽnde, Israyɛl Wẽnde! Yãmb kɩtame tɩ saag ni wʋsgo. Tẽnga sẽn da kʋɩ wã le vʋʋgame. Yaa be la y zĩndg y buudã, yaa zĩ-kãng la y nonglma ra segl n bĩng naong soaba. Soaala yiisa b koɛɛga tɩ sẽn na deeg-ba n yelg mooga ya tãb-biis ka tɛka. Dẽ me la dĩm dãmb ne b tãb-biisa sẽn sɩng zoees la b sẽn tar zoeese. Pagba sẽn pa yira na paam teed n pʋɩ. Da bõn-y y mens n pa y tãb-sikẽ ye. A Israyɛl pʋɩɩra wẽnda walle la a pɩgsa tablga wanzurfu, la pigsa kõbdã yaa sãnem. Wẽnd sẽn waa n sẽeg dĩm dãmba zĩ-kãnga, dẽ tɩ waooda saag gĩsa kooma, tɩ tãn-sablga zugu lebg pɛɛlg-a. Bazã tãmse, tãms sẽn lug n kul yĩngri, tãms ne kũna, Bazã tãmse, bõe tɩ y maan sũ-kiiri, Bazã tãmse, bõe tɩ y sɩndge n get tãng ninga Wẽnd sẽn dat n zĩnd a soab zugã? N-ye! Soaala na n zĩnda a zug daar fãa. Wẽnd wed-dʋʋdba sẽn yer miida ka tõe n sõd ye. Soaala yii Sinayi n wa ne bãmba, b ro-sõngẽ. Yãmb dʋʋ yĩngr tẽnsã n yõg neb kẽere, be me y reega kũuni, ba tʋb-pa-wʋmdba rẽnna, la y tilga y zak Siõ. Bɩ Wẽnd paam pẽgr beoog sẽn vẽege! Yaa bãmb n wat ne d bɛɛba tõogre. Wẽnd ning sẽn kõt-d daooda la bãmba la bãmb n naag n pagdẽ la b pakd bʋg-tẽng noore. Wẽnd bõgsda b bɛɛba zutu, zut ne zoobd sẽn ka põngde, wa sẽn tog ne tʋʋm-beed rãmba. Soaala yeelame: «M na n talla m sẽn yõg b rãmb Bazã n wa, n paas m sẽn yõg b rãmb mogra ko-zulungẽ. F nao na fẽd-ba, b zɩɩmẽ, f baasa fãa zelemd na lemb b sẽn pʋɩ n kõ-ba.» Wẽnnaam, Adem biisa yãenda y neba sẽn tonge, m Wẽnd la m dĩma neb sẽn tong y do-sõnga pʋga. Yɩɩn-yɩɩndba n be taoore, tɩ yʋʋm teeda rãmb be poorẽ, tẽnsʋk yaa kom-pugli wã, kom-pugli niyns sẽn wẽed gãngão-gilsã. Bɩ Wẽnd paam pẽgr kʋʋnga sʋka Bɩ Israyɛl kamba sẽn tigim taaba pẽg Wẽnde. A Bẽnzame n lʋɩt taoore. Yẽ n paood n yɩɩd sags a taabã. Sẽn pʋgd yaa a Zɩɩda sak kãsem dãmba, sẽn yer fut sẽn maneg n buk ne sãnem, Dẽ poore a Zabulõ la a Neftali sak kãsem dãmba. F Wẽnda yalsame tɩ b na tʋm daoodo. Wilg-y-du, m Wẽnde, y pãn-kẽengo, bũmb ka be a sẽn pa tõog d yĩng ye. Dĩm dãmba sã n yãeend dĩma zakã sẽn lug yĩngr Zerizalɛɛm, ad-y b na wa ne b kũuni. Bɩ dĩma gẽen rudma bõn-nindã n gẽen lol-toosã, gẽen koomẽ rũmsã, gẽen sẽn kũud-b f taoor ne b ligdã! Dĩma sẽeg buud niyns sẽn baood-b zabrã, tɩ peen neeba le tõog n yit Ezipt n watẽ, tɩ Etiopi wat Wẽnd taoore, t'a nug teesd-b kũuni. Tẽng zug dĩm dãmba, pʋd-y yɩɩl Soaala yĩnga. Kils-y Soaala-Wẽnde, maan-y sũ-noog bãmb yĩnga. Bãmb weoof zomb n kẽeda sawad-kutẽ, bãmb koɛɛga la saaga peng n tãsd ne pãnga. Reeg-y tɩ bãmb n so pãnga. B siga Israyɛl ne naam tɛka. B pãnga tigma sawatẽ. Wẽnd bee b ro-sõngẽ wã n wilgd tɩ b pãnga ka be taar ye, bãmb la Israyɛl Wẽnnaam, bãmb n kõt b neba pãng la tõogo. B soog barka! A Daviid yɩɩlle. Yɩɩla naab yɩɩnd-a lame t'a wẽneg: lɩɩnsa yɩɩlle. Soaala, fãag-y-ma kooma tata m kokoɛ. Begd a nare pʋgẽ la m lisda la bũmb kaa n gãtẽ ye. M na n lisa ko-zulungẽ, t'a peeg-m n looge. M sɛla m pãng ne yãbre; m kokora yõogda bugum; m yõka Soaala gẽesgo la b gũubu tɩ m nin wa yiigi. Ad-y sẽn kis-b maam tɩ m yaool n ka beegã, ad-y b sõora yɩɩda m zuga zoobdo. Ad-y sẽn dat b maam ne wẽnga la m yaool n ka tar m toorẽ yell ye, yaa nin-kʋʋdb sẽn dat n maan pãng bala. M maanda a wãn n lebs m sẽn pa zuki. Soaala, yãmb mi m sẽn maane, m beegr ba a ye pa solg-y ye. Soaala, Wẽnd-Pãng-Soaba, Israyɛl Wẽnnaam, m da yɩ sẽn teeg-b yãmba nin-zʋklg ye, m da yɩ sẽn baood-b yãmba nin-yaalg ye. Yaa yãmb yĩng la b tʋʋsd-m tɩ m sĩnda, yãmb yĩng la m bas tɩ m zuga wuk ne yãnde. M lebga sãan m saam-biis yĩnga, n lebg sãan m ma-biisa yĩnga. M basame tɩ yãmb ne y ro-sõnga nonglem dɩ-m zãnga, woto neba sẽn tʋʋsd yãmbã na lɛɛg n zab maam. M Yãbame, m loe m noore, la rẽ waa ne m tʋʋre. M bao sũ-pa-noang fuug n yeelge, m lebga bɛɛb laado. Sẽn zĩ-b tẽnga kʋɩlensa noor gomda m yelle. Rã-yũudba ka yɩɩnd ned tɩ ka maam ye. Soaala, m pʋʋsga la woto; da zãgs-y m kosga ye. Yãmb nonglma sẽn ket n pʋgd-ma bɩ y leok-ma, tɩ yãmb bal la m Fãagd menga. Bɩ y wa yiis-m begdẽ wã, tɩ m da sud ye! Bɩ y wa zãag-m ne sẽn kis b maama! Bɩ y wa yaag-m ko-liunga pʋga! Kooma ko-wiig da tall-m n loog ye! Kʋɩlga bog zulunga ra yɩ m yaoog ye! Bulga sẽn yaag a noora ra vel-m ye! Soaala, leok-y-m tɩ y ket n nong-m lame. Y nimbãan-zoeera sẽn waoog yĩnga, wẽnemd-y n ges-ma. Da le solg-y y nenga y yamba ye. M zĩi ne yɩɩre, leok-y-m tao-tao. Wa-y n yegl-y-ma, n zab n sõmg-ma. M bɛɛba labsa, fãag-y-ma. Y miime tɩ b tar-m lame n tʋʋda, n tar m paoogr tɩ m zug wuk ne yãnde; m bɛɛba fãa yɛsa m taoore. Tʋʋra kẽla m sũurẽ n pogl-ma. M tẽe bũmb y nengẽ, la ayo! M gũu neb sẽn na n wa yãb-ma, la m pa yãend ye! Nin-bãmb mens soosd n yugla m dɩɩba zẽnem; ko-yũud sã n tar-ma, b kõt-m-la rãam sẽn kẽke. Bɩ b rɩɩba roog lebg b bẽdgo n lebg bãng b zo-rãmb yĩnga! B nina mumi n bas-b ne lika; la y nuga pãng kaoog b po-raoogo. Waag-y-ba ne y sũ-puuri, y sũ-fõora bugum dɩ-ba! Bũmb da kees b tãb-sikẽ wã ye, ned da le kẽ b roogẽ ye. B sẽn dat a soab ne wẽng n yɩɩda, yaa yãmb sẽn zoe n sɩbg a soaba b wat n paasa yẽ soab namsgo. Yãmb me sõd b beegre, n paalg-b bʋʋdo. Yẽes-y b yʋyã vɩɩma sebrẽ, da naag-y-ba n sõd ne nin-sõma wã ye. Sã n ya maam, m paam yaoolgo, b tol n pogl-m lame la wa-y yã, Soaala, tɩ m na põse. Mam me na pʋd yɩɩlle n pẽg y yʋʋre. M na kils y yʋʋr tɩ y zʋʋga bũmb fãa. Y yʋʋra pẽgr n noom-y n yɩɩd sẽn ketã, n yɩɩd loalg ne yɩɩl la naobeong sẽn kãde. Nin-koama na yãend m fãagre n noog a sũuri, n noog a sũur la a yetẽ: «Yãmb fãa sẽn baood Wẽndã, Wẽnd na wogl y yõore! Bãng-y tɩ Soaala reegda nimbãan-dãmb kosgo. Ba b yõg-ba n pag roogo, Wẽnd ket n pʋgd-b lame. Bɩ yĩngri la tẽng pẽg Soaala, bɩ mogra la sẽn vɩ-a pʋgẽ pẽg-ba! Wẽnd na n fãaga Siõ, Wẽnd na n le yika Zɩɩda tẽnse, rota soaalb na n le reega b rot n kẽ n zĩnd b pʋsẽ. Yaa sẽn kẽed-b Wẽnda buudu n na n soog-ba, yaa sẽn nong-b Soaala n na n vɩɩnd b pʋsẽ.» Yɩɩlla bee yɩɩla naab sebrẽ. A Daviid yɩɩlle. Soaala, wa-y n fãag-y-ma, Zoe-y tao n wa sõng-ma! Bɩ yãnd yõk sẽn dat-b n kʋ maama. B tar n leb poorẽ ne yãnde sẽn dat-b maam ne yel-beedã. Sẽn da yãet-b maam tɩ ya: «N-faa, n-faa!» Bãmb fãa kũ n tɩ roog ne yãnde. Sẽn baood-b yãmba, Soaala, b fãa lang ne sũ-noogo! Bɩ sẽn baood-b yãmb fãagrã kẽnd la b yetẽ: «Wẽnd waooga! Wẽnd waooga!» M zĩi ne naong la fare, Soaala, wa-y tao. Yãmb la m Sõangda la m Fãagda, Soaala, da kaoos-y ye! Soaala, m yãk-y lame tɩ y yɩ m soondg zĩiga. Da le sak-y tɩ b paoog-m ye. Y sẽn pid ne zemsgã, yãmb n na n fãag-ma. Kelg-y m koɛɛg n fãag-ma. Yɩ-y pĩig ning sẽn na n lill-ma, soondg zĩig m sẽn tõe n ta wakat buud fãa. Yãmb kãab-m-la y fãagre. Sɩda yãmb la m pĩiga, m tãnsoben-doogo. Fãag-y-m nin-toaaga nugẽ ne nin-kʋʋdba la pãn-tõog rãmb me rẽnnẽ. Soaala-Wẽnde, yãmb la m saagre. Al m yãadmẽ yãmb sɛɛgẽ bala la m sũur da ya kẽnkẽ. M sẽn wa dũni tɛka, yãmb bal la m teegda, m dogem tɛka, yãmb bal la m pẽgda. M da yaa wa bõn-bãnd neb wʋsg nifẽ m sẽn paam tɩ y lebg m tãnsoben-doogo. M noor sẽn da mi yaa yãmb pẽgr bala, tɩ m da nee wakat fãa, y sẽn da pid ne ziir ningã. M sẽn kʋʋl marsã wã bɩ y ra bas-m kɛɛng ye. M pãnga sẽn woogd n dabdã, da zãag-y-m ye. M bɛɛba gomda m yelle, lɩɩsdba kʋ-la b yẽsgo. Ad-b sẽn yeele: «Wẽnd bas-a lame wẽ-y gũbri n yõk-a. Ned ba a ye kõ wa n fãag-a ye!» Soaala, da zãag-y ne m ye, zoe-y tao n wa fãag-ma. Sẽn baood-b maama zoe n menem ne yãnde. Sẽn baood-b maam ne wẽnga sẽgen paoor la yʋ-beed kʋɩdse. Sã n ya maam, m ket n saagdame la m ket n tara y pẽgra yɩɩla. Beoog sẽn vẽeg fãa m noor le sõdgda y sẽn maan bũmb ning fãa n wa ne zemsgo la fãagre. Ad-y y sẽn maana yaa kõn bãng n sõde. Maam n dɩ Wẽnd tʋʋm-bãna yõodo. Yãmb sõmblema bal n pid zãnga. Soaala, al m yãadmẽ la y pʋgd-m ne y wilgri la sẽn ta marsã, m tara y tʋʋm-bãna moonego. M kʋʋlame la m zug pelgame, Soaala, da bas-y m kɛɛng ye. M dat n tõog n wilga dũnna zamaana rãmba y sẽn maan ne y kang pãnga, n wilg beoog zamaana rãmba y sẽn tʋm ne raoodo. Y sõmblema zẽk n kula yĩngri, Soaala. Y maana yɛl bɛda, Soaala, ãnda n tõe n wẽneg yãmba? Y basame tɩ m yãe bʋko la yel-beed wʋsgo, bɩ y le bas-m bilf bala tɩ d vɩɩnde, Wa-y n yiis-y-ma m sẽn sud n be zĩig ninga. Wa-y n le paas m ziiri, la y le keng m pɛlga. M na n baoo bɛɛla n pẽg Soaala, n pẽg b sẽn pʋgd maam ne b nonglma. M na n bao kʋnde n wẽ y yĩnga, Israyɛl Wẽnnaam! M na n wãaga ruudg y yĩnga la m noor na n pʋda sũ-noog yɩɩla, tɩ yãmb n fãag m vɩɩm. M zelemda na n kilsa y sõmblem beoog sẽn vẽege. Yãmb maasem yĩnga, sẽn da baood-b maam ne wẽngã, ad-y yaa bãmb n seg yãnde, n tʋk yʋ-beedo. A Salomo yɩɩlle. Wẽnnaam, kõ-y dĩma yam ning y sẽn tar n kaood y bʋʋdã; kõ-y dĩm biigã y yam sõngã. Woto a na bʋ y neba ne zemsgo, n bʋ y yemsa wa sẽn toge. Y sẽn maand fãa ne zemsgã, bɩ tãmsa la kunkuba dɩlg dĩma soolem. Bɩ nin-koam paam a sẽn tog n paame, tɩ naong soab paam a teenda, tɩ kalwẽdg la zãmb sɛ zãnga. Wĩndga la kiuuga sã n ket n wit b bugma fãa, bɩ a neba fãa dig dabeem a taoore, n tãag dũni wã tekre. Dĩma yɩ kõata, wa saaga n ni bedg-bedg n yʋgemd tẽnga, n ni tɩ yamda wuk bãoogẽ! A zĩnd a zaoora zugu, n sik arzɛk la tɩgr nin-sõng zakẽ, tɩ yʋʋma tong taab n tõt sɛɛbo! Dĩma rĩunga toaag sɩngda mogrã n ta mog-kãsengã, n sɩng kʋɩl-kãsengã n ta dũni wã tɛka. We-raoogẽ dãmba na n wõgemda a taoore, a bɛɛba na n moga tom. Tarsis rãmb la tẽnsa sẽn puk koomẽ dãmba na n toola b kũuni; Saba la Seva dĩm dãmb na n yaoo fadgo. Dĩm dãmb a taaba na n wõgemda a taoore, bu-zẽmba fãa zug la a na n dɩ naam. A na n fãaga naong soab sẽn kos a sõngre, la nin-koam sẽn ka tar teegda. A na n gesa naong la sẽn ka-a pãng soab yelle, a na n fãaga naong rãmb yõore. A na fãag-b sũ-to-rãmba la nin-toose nusẽ, a kõn bas tɩ b kood-b zaalem ye. Wẽnd na kaoos rĩma! A soolma rãmba na ges t'a paam Saba sãnema, b na pʋʋs a yĩng n ka vʋʋs ye, b na kils-a beoog sẽn vẽege! Bɩ tẽnga tõre, tẽn nabrẽ n tãag tãmsa zutu, yɛdg ne pʋto, tɩ kooda zut sulgdẽ la b roogdẽ wa Libã googa sẽn maande. F sã n be tẽnga pʋga, f sẽn ne yaa vã-maas bala. Bɩ dĩma yʋʋr da menem moog ye, a yʋʋra zẽk saaga tẽngre, tɩ ned fãa pʋd a yʋʋra ne pẽgre, tɩ neba fãa boola tɩ zu-noog soaba. Bɩ Wẽnd paam pẽgre, bɩ Israyɛl Wẽnda paam pẽgre! Bãmb b ye bala n maan bõn-bãna. B yʋʋr sẽn tog ne pẽgra soog barka! B pids mooga ne b ziiri! Ami, ami! Woto n baasd a Zese biig a Daviid yɩɩla. A Asaf yɩɩlle. Sã n ya sɩda, Wẽnd pida ne nonglem a Israyɛl yĩnga n pid ne nonglem sũ-tɩrg soab yĩnga. M yaool n da sɩnga lʋɩɩse, bilf bal tɩ m taẽ tẽnga. M da maanda sũ-kiiri ne sẽn tiig-ba n lebg arzɛk rãmba. M da nee nin-wẽnsa zu-noogo. B ka mongd b meng bũmb n tãag b kũum ye, b pʋʋra maneg n zɩsgame tɩ b kẽnda, b pa namsd wa neb a taab ye, b pa reegd toog ning sẽn lʋɩt b taab zug ye. B kẽnda ne tɩtaam, tɩ rẽ yaab zu-zẽkre. Maan ned pãng toga ne-ba wa fuug sẽn mag n yaool n sẽ sẽn tog ne a soaba. B arzɛka sẽn ya wʋsgã, b geta neb a taaba wa zaalem, la ned kam fãa mii b sẽn tagsd b sũurẽ. Ad-y b laadame la b gomd ne wẽnem, la yaa tɩtaam bal la b maanda, b pa togsd sɩd ye. B noor sã n yaage, ya Wẽnd bal la b rat n tʋʋse; b ka yãet bũmb tẽng zug ka n ka gom n yãk a zak ye. Dẽ me la neba fã wẽneg n get-b la b gagd b zirẽ wã wa zom-koom. Ad-y nin-wẽnsa yetame: «Wẽnd kõn bãng fɩ! Sẽn zao-a yĩngrã yɩta wãn n yãende?» Nin-bãmba sɩd vɩɩ wa bũmb ka be d sẽn tog n gãd wa bõn-pakdem ye. Yel-beed ka tat-b ye, b yɛla manegdame n dabda. Dɩlla, mam sõmblema, yaa zaalem, m mi m na kell pa ne-a? Yaa zaalem la m nus na n pek n wilg tɩ yell ka m zug bɩ? M yãeta toog buud fãa beoog sẽn vẽege, yibeoog fãa sood-m-la a ko-tʋʋlga. M yik n gomd wa bãmba, m kõn le wẽneg y buuda kamb ye. M tagsdame n baood sẽn ya toog ne maama võore, la rẽ fãa waa n lebga m zu-loɛɛga, n tãag daar ning m sẽn kẽ Soaala roogẽ; wakat kãng la m bãng yã nin-wẽnsa yɛla sẽn na n baas to-to. Yãmb yalsa salse nin-wẽnsa nao tẽngre n na n tus-b tɩ b lʋɩ bẽdgẽ. Ad-y nin-wẽnsa sãoonga na n yɩɩ vugr bala, vugr bal tɩ b na n lebg zaalem, vugr bal tɩ rabeem ne yɛɛsgo loog ne-ba! Soaala, y sã n sɩng b menesgo, ad-y na n yɩɩ wa ned sẽn zãms n neke, yɛla soy kaa n dɩkdẽ ye. M sẽn da waa n zĩ ne sũ-pa-noanga, n zĩ ne yɩɩr la yɩɩre, m da wẽnda wa yalma, n ka ne fɩ, m ra yaa wa rũnga, yãmb taoore. M yaool n da bee ne yãmb daar fãa, tɩ y zãad-m y nugẽ. Y sẽn wilg-m sor ninga la m vɩɩma tũuda, y zɩɩra sẽn pukẽ wã la m tees yã. Yĩngri, ãnda n na n wa sõng-ma sã n ka yãmba. La tẽng zug ka, m sẽn tar yãmbã, bõe la m na n tʋlg n paase? Kʋʋlem tõe n sɛla m yĩngã, n loog ne m daooda fãa, la m teegdã, m daoodã, m fãa-fãa wã, na n yɩɩ yãmba, Wẽnde, daar fãa yĩnga. Ad-y sẽn zãag-a ne yãmb baooda a kũum. Sẽn bas-a yãmb n baood bũmb a to, menemdame. Pa yãmb sɛɛgẽ la m sũ-noogo, Soaala, tɩ yaa yãmb sɛɛgẽ la m waa n soond la m na n tõog n moon y tʋʋm-bãna. A Asaf yɩɩlle. Bõe tɩ y basd-m kɛɛng daar fãa, bõe tɩ y puug y sũur ne y bãgra rũmsi? Tẽeg-y buud ning y sẽn bao n kõ y meng sɩngrẽ, buud ning y sẽn yãk wala y pʋɩɩre. Tẽeg-y Siõ tãnga, yẽ zug la b tii y ro-sõngã. Kẽn-y n tees a raboogã sẽn yɛdg n dɩgã. Bɛɛba wãa fãa y ro-sõngã. Yaa yãmb sẽn da segd tõnd zĩig ninga la bɛɛba kẽ n kaase b zabr kaasgo. Be la b kẽ n yagl b zab-yʋy. B ra wẽnda ra-kɛɛdba sẽn kẽ goog ne b lare, n tãag b kʋɩlensã n pãbe la b kɛ n kʋʋse. B tugla y dooga bugum, b rẽgmame la b sarma b sẽn waoogd-y zĩig ningã. B zemsa taab gilli n na n yõog tẽnsa pʋsẽ, zĩis niyns fãa d sẽn da tar sɛk ne Soaala. D ka le ne bõn-bãn ye, bãngd ka le ket ye, la ned ba a ye ka mi sẽn na n ta wakat ning ye. Soaala, keta rasma a wãna, rasma a wãn tɩ bɛ wã na n kell n tall y tʋʋre? A na n kell n laa maam n ta da-bʋre? Bõe tɩ y na n yõbg y rɩt kanga? Bõe tɩ y pa na n zẽk-a n va? Yãmb la m Wẽnd la m dĩm al sɩngrẽ, la yaa yãmb maasem yĩng la m tõog bɛɛbã. Yãmb yalsa mogrã a toaagẽ, wag bãnda zuta koglma taab koomẽ n bõgs taab wa yoaga. Yãmb bedsa a Leviatã zutã, la y rɩgs-b lame n lob we-rũmsi. Yãmb kɩtame tɩ ko-nin pusi n kɩt tɩ kʋɩls zoe ne pãnga, n kɩt tɩ kʋɩls niyns sẽn da pid n daannẽ, lebg kʋɩl wagdo. Yãmb n so raare, n so yʋngo, yãmb n yagl-b, b zĩigẽ, wĩntoog la kiuugu. Yãmb n karg tẽnga toaaga, n welg sẽoog la sɩpaolgo. Tẽeg-y tɩ bɛ wã tʋʋsa Wẽnde, tẽeg-y tɩ gãeemse n sãam y yʋʋre. Da rɩk-y y wallã n lob wɩbg ye, tẽeg-y toog sẽn gũbg-b rãmb vɩɩma yelle. Le nek-y zoodã; ges-y tãmsa bogd sẽn pidi; neba zoe n wa soonda be n na n tɩlg pãn-tõogo. Modg-y tɩ ned da paoog a to, modg-y tɩ neba zã taab ne laafi la bãane, sõng-y tɩ sẽn ya-a naong la sẽn tar-a pɛta tõog n pẽg y yʋʋre. Yik-y yã, Soaala, zab-y y zabre. Tẽeg-y tɩ b yika wa gãeemse n tar y tʋʋre, la b tʋʋd-y lame tɩ wĩndg kẽ. Da bas-y tɩ bɛɛba bʋ-raasa wek y tʋb ye, Da bas-y tɩ b bʋra le yãng paas ye. A Asaf yɩɩlle. Yɩɩla naab yɩɩnd-a lame t'a wẽneg: Da sãam-y ye. Soaala, d pẽgda yãmba; d kilsda y yʋʋrã tɩ y waa n be-la d sʋka. D datame tɩ neba tẽeg tʋʋm-bãna y sẽn tʋm d yĩnga. Naaba-Wẽnd sã n bool bʋʋdo, yella welgda ne zemsgo. Tẽnga na n looga ne a neba fãa. Ka maam a Wẽnde n yals-a a zĩigẽ laa? M yeela sẽn wuk-b n zĩi wã: «Bas-y wilg-m-menga!» M yeela sẽn ka mi-b Wẽndã: «Da maan-y zẽk-m-meng ye! Da nak-y y kãara woto n gomd ye!» Y fãagra ka na n yi yaang bɩ taoor ye, a ka na n yi we-raoogẽ wã ye. Yaa Wẽnd n so bʋʋdo, bãmb n paalgd yãoo soaba, bãmb n yiisd yãoo soab yellẽ. Ya wamd la Soaala zãad b nugẽ, a pida ne rãam sẽn kũmi n miki; la b na n tugla tẽnga wẽn-kɩɩsdba tɩ b yũ-a n tãag bɩlle. Sã n ya maam, ad-m sẽn na n yɩɩl bũmb ninga, ad-m sẽn na n yɩɩl daar fãa a Zakoob Wẽndã: «B na sulga nin-wẽnsa fãa zutu la b na n dooga nin-sõma wã fãa rẽnna.» A Asaf yɩɩlle. Yɩɩnda ne ruuds la koala. Wẽnd lika b meng Zɩɩda, b yʋʋra yii wʋsg Israyɛl. B wẽ-la b sika Salɛm, Siõ tãnga la b zaoolg b ro-sõngo. Yaa be la b kao bɛɛba tãbdo b gãongo la b sʋʋga, n sɛɛs zabre. Siõ yãgda ne neerem, be la bɛɛba laog reeg n zam wa tãnga. Tãb-biisa sẽn da pid ne raooda waa n mikame tɩ b reesa b teedo. B basame tɩ gõeem lub-ba. B sẽn neke b pa le yãend zab teoog b nugẽ ye. Yãmb mooga y nif ne bãmba, Zakoob Wẽnde, tɩ wiid la wed-dʋʋdb gĩin wẽneg n maage. Yãmb sɩd kẽesda rabeem, la ãnda n tõe n yals y taoore, y sũura sã n wa yik n kɛɛda? Yãmb bee yĩngri n kaood y bʋʋdo, tɩ dabeem kẽed dũni wã, t'a zĩ sɩɩ, yãmb sã n wa yik n yeele tɩ y na n fãaga dũni wã nin-bõonesã. Ad-y neba sũur sẽn puuga menga na n lɛɛg n waa ne yãmb yʋʋra pẽgre. Sẽn põs-b bʋʋda, b sẽn ka paalg b rãmbã na n maana kibs n pʋʋs-y barka. Pʋlem-y y pʋleng y Soaala la y Wẽndã, la modg-y n pids y pʋlengo. Yãmb fãa sẽn be b sɛɛgẽ wã, wa-y ne kũuni n kõ Pãng-Soabã. B taoore rĩm biisa yɛɛsdame, tɩ tẽnga dĩm dãmba rigda. Yɩɩlla bee yɩɩla naab la Levitsa sebrẽ. A Asaf yɩɩlle. Yaa Wẽnd la m kaasd n boondẽ. Yaa Soaala la m boonda, b wa kelg-ma. M yɩɩra pʋgẽ, m bao Soaala, m wẽnemda m neng n tees bãmba, yʋnga tõre m nusa zẽkame n tees bãmba, m pa teeg ned a to yolsg ye. M tẽegda Wẽnd yelle, n yãbda la m sẽn tar tẽegrã, m yama maneg n kẽeda weoogo. M gãeeme n ka gõe ye, m yama bondgame, m ka mi m sẽn gomd n lebdẽ ye. M le tẽegda pĩnd wakatã, m sõta yʋʋma sẽn looge. Zĩig sã n sobge, m tẽra m sẽn da yɩɩnde m le rɩkd-a-la m sũurẽ tɩ m yam le sɩng gõobo. Soaala tõe n wa bas-m-la zãng bɩ? B kõn waa n le bao m zĩiga? B ka le pʋgd-m ne b zooda bɩ? B koɛɛga pa na n le yiis bada bɩ? Soaala yĩmame n ka le kõt sugr bɩ? B sũura puugame tɩ b pag b nonglma zaka noor laa? Sɩda, m sẽn zĩ tɩ m yama yoodã yaa m sẽn pa le ne Yĩngr Soaalã n pa le ne-b ne b pĩnd tʋʋm-bãna. M tẽra b nug sẽn da tʋmd pĩnda; m tẽra b pĩnd wẽnd-makrã, m le tẽegda y sẽn maana fãa a yeyn-ye. Soaala, yãmb sora yaa sõmblem sore. Wẽnd bʋg n ya Wẽnd wa tõnd Wẽnnaama? Yãmb la Wẽnd ninga sẽn maanda bõn-bãna. Yãmb n wilg y pãng bu-zẽmbã. Y Nug pãng n fãag y buudã, a Zakoob la a Zozɛf yagensã. Kooma yãenda yãmba, Soaala, kooma yãenda yãmba, n leng ne rabeem, mogra meng ra yɛɛsdame. Sawata budga b kooma fãa, sa-tãsa maana bʋʋr yĩngri, saaga sʋʋs yãga goalma. Saaga tãsame la a naag n yãge t'a vẽenema reeg zĩig n yãmbe, tɩ tẽnga na n yɛɛs la a miimi. Y kẽe mogra pʋga n tuk y sore, n tuk so-yaleng mog-zulungẽ la sã n ka yãmba, ned ba a ye ka tar a buk ye. Yãmb gũ-la y buuda wa rũm-kɩɩm sẽn gũud a rũmsi. A Moyiiz la a Aarõ nug n tʋm dẽnna. A Asaf yɩɩlle. M buudu, kelg m gomde! M noora goam lʋɩ f tʋbrẽ. M na n yaaga m noor n gome tɩ zaamẽ yɛla yik rũnna n le kõ-d zãmsgo. Tõnd sẽn wʋme, d sẽn yãende, d ba rãmba sẽn taas tõndo, d ka na n sĩnd-b ye, d na n deeg-b lame n wilg d yagense, d na wilg-b bõe yĩng la Soaala tog ne pẽgre, d na puk b pãnga ne bõn-bãna sẽn maana. Noor la b yals a Zakoob tẽn-peelmẽ, a Israyɛl buuda yĩng la b yiis noore, la noora ra yeta d yaab rãmbã tɩ b wilg b yagensã, tɩ bãmb me wa reeg n taas b sẽn na n dog kamb niynsã. Noora ratame tɩ b teeg Wẽnde, tɩ b da yĩm wẽnd-makr dãmba ye, tɩ b tũ sor ning b sẽn wilgi, n da wẽneg b yaab rãmba, tɩ yaab rãmba zamaan yɩɩ tõatb zamaana, ninsaan-yiu la pilimpigd zamaan, ninsaalb sẽn ka pelg b pʋg ne Wẽnd zamaana. A Efrayim yagensã sẽn da bob logdo n na n tak zabrã kong n lɛɛg n zoe tula, zabra raare, tɩ b zãgsa Wẽnd noora reegr n sãam zoodã. B ra yĩma b bõn-bãna, n yĩm b tʋʋm-bãna b sẽn maan b barãmb nifẽ. B ba rãmba nifẽ, b ra maana makr-dãmb a taaba: Ezipt tẽnga, Tanis noorẽ, mogra koom waa n yik n yalsa wa lalga goabg la rɩtgo tɩ b loog sʋka. B ra wilgd-b-la sor wĩntoogo ne sawadgo, yʋngo sawadg kãng kelld n yãngda ne vẽenem. We-raoogẽ pĩisa ra pusda koom, tɩ b ra tar koom n yũud b yam wa b pooga tẽngr ko-yũugã. Pĩisa pusga koom la b kooma zoe wa kʋɩlse. Ne rẽ fãa yaab rãmba kell n talla Wẽnd beegre. Pʋ-weesẽ wã b yõka Pãng-Soaba tõdgre. B yika ne pʋ-toogo n fɛɛs Wẽnde. B kosame tɩ b kõ-b tɩ b rɩ wa b sẽn dat tɛka. B guglma ne Wẽnde, la ad-b sẽn yeele: «D ges Wẽnd sã n tõe n kõ-d-la rɩɩb we-raoogẽ. D yãenda b sẽn wẽ pĩigã, n sɩd tõog tɩ koom zoe wa kʋɩlse, la sã n ya bura la nemdã, b yãet-a-la yɛ n kõ nebã?» La Wẽnd me sẽn wʋm dẽ, b sũura puugame, tɩ bugum widg n na n dɩ a Zakoob, tɩ b sũura na n fudg n waag a Israyɛl. B ra ka bas b yɛla ne Wẽnd ye, b ra pa tẽed tɩ b na fãag-b ye. Soaala kõo yĩngr sawata noore, b pagsa yĩngr ko-nina. B kɩtame tɩ rɩɩb yi yĩngr n dʋʋge, alkam sẽn bʋd yĩngr la b kõ-ba. Woto ned kam fãa paama yĩngr dãmba dɩɩb n dɩ. B kõ-b lame tɩ b rɩ n tɩge. Yĩngri, b tusa yaang sobga t'a menem, b Pãnga boola nug rɩtg sobgã. Nemd kaooga wa sobg n dʋʋge, luiili nemd la b kõ-ba, la luiili wã sõor zema mogr noor bĩisri. Luiili wã ra wat n dʋʋgda b sika pʋga, b rʋʋgame n gilg b rotã. B rɩɩme la yɩɩ rɩɩb tɛka; Wẽnd da reega b kosgo. B velma ra ket n zabd-b lame, b noor da ket n pida ne nemdo, la Wẽnd sũur puuga ne-ba la sẽn da ya-b nin-tɩɩsa fãa loogame, a Israyɛl kom-bɩɩba me naag n dʋʋgame. Ne rẽ fãa b ra ket n beegda Wẽnde, bõn-bãna sẽn da maanda ka gãneg b yam ye. B raar ra loogda wa sobg sẽn loode, tɩ b yʋʋma ra pid ne yɛɛsg la yɛɛsgo. B sẽn wat n kiidẽ wã la b baood Wẽnd zĩiga; wakat kãng bal la b ra teemd zʋgo, la b wẽnemd b neng n tees bãmba. B ra lebd n tẽegame tɩ Wẽnd la b pĩiga, tɩ Pãng-Soaba la b Sõangda. La b waa n gomdame n dat n tudug Wẽnde, b zelemda da ka leokd sɩd ne Wẽnd ye. B sũura ra ka loe ne bãmb ye, b ra ka maand pʋ-peelem ne Wẽnd zooda ye. Wẽnd kelga b nimbãan-zoeerã n da yẽesd b beegrã, la b ra basd-lame n pa kʋʋd ye. Naoor wʋsgo Wẽnd yõka b menga, b pa bas tɩ b sũura fudg zãng ye. Wẽnd tẽrame tɩ b naan-b-la ne nemd bala, la b yaa pemsem sẽn lood n ka na n lebg ye. Yaa naoor ka tɛka la b yɩ tõatb, we-raoogẽ wã, yaa naoor ka tɛk la b yɩ kɩɩsdb, zĩ-peen-daasẽ wã. Yaab rãmba ka wʋʋs ne Wẽnd fɛɛsg ye. B sãamda Israyɛl Nin-sõnga sũur dũnna, n le sãam-a beoogo. B wa n yĩma tʋʋm-bɛd niyns b nug sẽn tʋme, tɩ b paam n yi b soaalba yembdẽ. B yĩma b sẽn maan Ezipt, b sẽn maan Tanis. B yĩma b sẽn yũnug b tẽnga t'a lebg zɩɩm, zĩig zãnga, tɩ ko yũudem ka le tõe n paam n yũ ye. B yĩma b sẽn tʋm dũms la keooda, n tʋm loms b zagsẽ la b ko-yũusẽ. B yĩma b sẽn tʋm sʋʋre t'a wa sɛɛs b bõn-koadi, n tʋm kalwaare t'a wa loog ne sẽn bʋde. B yĩma b sẽn bas tɩ sapɩlem sʋʋg b bugsuntundu, n bas tɩ waood pus b kankama. B yĩma b sẽn bas tɩ sapɩlem lab b rũmsi, n bas tɩ sa-tãs yõog b bãg la b wuba. B yĩma b sẽn bas tɩ b sũura puug n waag-ba, n bas-b ne sũ-beed la yɩɩre, n bas-b ne tẽn-kũum malɛgse. B yĩma b sẽn bas-b ne b sũ-fõore, tɩ kũum kẽed b zagsẽ, tɩ bã-longdem loogd ne yõore, B yĩma b sẽn kʋ Ezipt kom-dẽemse, tɩ b zags fãa dig rogem waoodo. B sẽn yiis b neba wa niisi, b sẽn tees-b we-raooga wa piisi. B yĩma b sẽn kiis b yɩɩre n wilg-b so-sõma n yaool n bas tɩ mogra rɩ b bɛɛba. B yĩma b sẽn tall-ba n kẽes b soolmẽ b sẽn deeg tãn-sõnga ne pãnga, n tall-ba n dʋʋs a zug tẽnsʋka. B yĩma b sẽn dig bu-zẽmbã b taoore, b sẽn kõ buud fãa a zu-noog pʋɩɩre b sẽn kẽes Israyɛl sak fãa a roogẽ. Yaab rãmba le yik n yeelame tɩ zãaba pa ta b yam ye, tɩ b le yik n tar yĩngr Wẽnda fɛɛsgo, tɩ b le yik n zãgs b noora reegre, tɩ b le sɩng zãmbo ne Wẽnde, n sɩng zoe n zãag ne Wẽnde. B yɩɩ wa pĩim sẽn lɛɛg n kõs a tãooda. B ra yaanda Wẽnd sũuri ne b tãmsa zut maan-kugã, Wẽnd sũur da kãbda ne b wẽn-naandsã. Wẽnd wʋmame n sɩd yik ne b kamba, a Israyɛl la b yik n dig zãnga. B meng zãaga ne Silo, n zãag ne roog ning b sẽn da kõ b menga, b sẽn waa n dat n zĩnd b neba sʋkã. B basame tɩ b loog ne zood kasetã, n bas tɩ bɛɛba na n sɩng b ziira paoogre. B basa b buuda ne bɛɛba sʋʋse, b zaba ne b sẽn da kees buud ning wala b pʋɩɩrã. Bugum tilgame n dɩ b kom-bɩɩbã, b kom-pugli ka le paam tɩ b yãb b kʋʋr ye. Maan-kʋʋdba mens kooda ne sʋʋse, la pʋg-kõapa pa yãb b sɩdb rãmb ye. Wẽnd waa n neka wa ned sẽn da gõe, wa gãndaoog sẽn paam dãam n yẽeg a gĩini. B leba poorẽ n wẽ b wẽedo, la bɛɛba kõn tõog bada n pek rẽgd ning sẽn dẽgem-b baraara ye. B basa a Zozɛf buuda kɛɛnga, b basa a Efrayim roogo. A Zɩɩda buuda la b yãk yã, Siõ tãnga n waa n ta b yam n yɩɩd. B mela b rooga tɩ yẽ me lug wa tãnga, b yals-a-la wa b sẽn yals tẽngã, yaa daar fãa yĩnga. B sõgen, a Daviid, la b lʋɩɩs taoore, la rẽ t'a ra yaa pe-kɩɩma. A Daviid basa a piisã n wa sake, la Wẽnd kɩtame t'a lebge a Zakoob buuda pe-kɩɩma, n kɩt t'a lebg a Israyɛl, bãmb pʋɩɩra, pe-kɩɩma. Pe-kɩɩma sũur da yaa tɩrga, la a sɩd gũ piisa ne yam sõngo. A Asaf yɩɩlle. Bu-zẽmba reega y soolma n yãmbe, Soaala, b rẽgma y ro-sõngã, b kɩtame tɩ Zerizalɛɛm lebg raboogo. B sẽn kood b rãmbã yĩnsi, b rɩk-b lame n lob yĩngr luiili, b rɩk-b lame n lob we-rũmsi. B budga b zɩɩma n gilg Zerizalɛɛm, la ba a ye sẽn paam yaoog ka ye. D yagsa tar-d lame n yaannẽ, d lebga d bɛɛb laad n gilgi. Soaala, y sũura sẽn ka maagdã, na n kell n yɩɩ woto n ta da-bʋre? Y sũura na n kell n kãba ne tõnd n ta da-bʋre? Fudg-y y sũura ne buud niyns sẽn ka mi-b yãmbã ne buud niyns sẽn ka waoogd-b yãmbã, tɩ yaa bãmb n tak zabr ne a Zakoob, la yaa bãmb n wã a soolem. Da rogl-y d zugu pĩnd yel-wẽna ye. Aya! Seg-y-d ne nimbãan-zoeere, tɩ yɛla sẽbga wʋsgo. Sõng-y-do, d Wẽnd la d Fãagda, tɩ y yʋʋra na paam pẽgre. Bõe tɩ y bas bu-zẽmba tɩ b gomda: «B Wẽnda bɛɛ?» Bɩ bu-zẽmba bãng rũnda bala, tɩ b na n doka b sũuri, b sẽn kʋ b neba yĩnga. Bas-y tɩ b sẽn pag b rãmb rooga kɛleng ta yã. Y pãnga sẽn labs yĩnga, bɩ b ra kʋ b sẽn paalg b rãmb bʋʋda ye. Bɩ d yagsa reeg naoor a yopoe, b zugẽ, paoogr ning b sẽn paoog yãmba, Soaala. Tõnd sẽn ya yãmb buudã, y sẽn get b rãmb yelle wa rũm-kɩɩm ne a rũmsã, tõnd na tõog marsã n pẽg y yʋʋre, la d kils yã, zamaan ne zamaana. A Asaf yɩɩlle. Yɩɩla naab yɩɩnd-a lame t'a wẽneg: Tees lɩɩnse. Israyɛl pe-kɩɩma, kelge! Yãmb n get a Zozɛf yelle wa rũm-kɩɩm ne a rũmsi. Yãmb sẽn tɩ zaoolg y meng malɛgsa zutu, puk-y y meng a Efrayim, a Bẽnzame la a Manase. Le yik-y ne d sẽn mi-y ne raood ningã n wa fãagd-do. Le kẽes-y tõnd d soolmẽ. Sõng-y tɩ y nenga vẽenem bui-du tɩ d na paam fãagre. Soaala, Pãng-Soaba, y sũura na n puugame n ta da-bʋre, y buuda neba kosg na n yaal-y lame n ta wakat bʋgo? Y na n kell n dɩlga y kamba ne bur sẽn wẽ ne nintãm, n yũnug-b ne nintãm wam pogbre? Yãmb kɩtame tɩ d bɛɛba tar no-koɛɛm tõnd poorẽ, yãmb kɩtame tɩ d lebg d bɛɛba laado. Soaala, Pãng-Soaba, le kẽes-y tõnd d soolmẽ, Bɩ y nenga vẽenem bui-du, tɩ d na paam fãagre. Bugsuntung ning y sẽn võog Ezipt tẽnga, y lebs-a lame n sel zĩig ning y sẽn dig bu-zẽmbã n yiisã. Y pesma tẽngã a yĩnga, sẽn na n yɩlẽ t'a kɩ yẽgen sõma n wa reeg zĩigã n yãmbe. Tãmsa ra bãma ne a maasem, t'a biisa gaam tɩ bɛdã, t'a tão a wila n tãag mogre, n tão a yagense n tãag kʋɩlgã. Bõe tɩ y bas t'a yãgra wurgi, tɩ so loaadba kẽed n kaood a biisi? Reoog yita a tʋgrẽ n wa rɩ-a tẽnga rũms wat n wãbd-a lame. Wẽnnaam Pãng-Soaba, lɛɛg-y n wa-y yã. Zĩnd-y yĩngr n ges y bugsuntungã, la y y maan bũmbu a yĩnga. Maan-y bũmb y tɩɩga yĩnga tɩɩg ning y nuga sẽn selã, maan-y bũmb y dĩma yĩnga, y sẽn taag a soab naama kaama yĩnga. Bɩ sẽn yõog-b la sẽn kʋʋg-b tɩɩga da le yaas Wẽnd sẽn pid ne sũ-fõora taoor ye. Bɩ y nuga kell n tik dĩma y sẽn zĩndg y rɩtgo n kõ naama. Woto d kõn le bas-y ye, y na paas d vɩɩma noogo, la d na waoog y yʋʋre. Soaala Wẽnd-Pãng-Soaba, le kẽes-y tõnd y soolmẽ, bɩ y nenga vẽenem le bui-du tɩ d na paam fãagre. A Asaf yɩɩlle. Yɩɩla naab yɩɩnd-a lame t'a wẽneg: Bugsuntunga biis yɩɩlle. Kaas-y sũ-noog Soaala yĩnga: bãmb la d pãnga. D kils a Zakoob Wẽndã. Maan-y noogo, ne gãngãoogo ne ruudg la kʋnde. Kũms-y baorg ki-paalga yĩnga, a rãamd sãd ki peoolgo la yʋʋm-vẽkre. Yaa noor sẽn yals a Israyɛl yĩnga, yaa noor a Zakoob Wẽnda sẽn yiisi. Yaa noor b sẽn kõ a Zozɛf buudu, Wẽnd sẽn wa n yik zabr ne Ezipt tẽnga. No-rɛɛs n deeg n gome n yeele: M sika zɩɩbã f bãgdẽ, m yolsa f nug ne yembd-tʋʋma. F sẽn waa n zĩ ne yɩɩre f bool-m lame la m fãag-f lame. M zĩnda sa tãsa sʋka n leok-fo. M fɛɛs-f-la Meriba ko-nifẽ. M buudu, kelg-ma, tɩ m tara bũmb n na n wilg-fu, la fo sã n da tõe bɩ f kelgẽ, Israyɛl! Fo nengẽ, bɩ weer da le zĩnd wẽnd sãang yĩng ye! Wẽn-naand da paam waoogr f nengẽ ye! Maam f Soaala la f Wẽnde, la maam n yiis-f Ezipt tẽnga. Wilg maam f raaba fãa t'a na pidsi. M buuda ka kelg-m ye, a Israyɛl ka le tʋlg maam ye. Ya rẽ me yĩng la mam me bas-a ne a tʋb-pa-wʋmdem. B maan b sẽn date. M buud a Israyɛl sã n da kelgẽ a sã n da rɩkẽ sor ning m sẽn wilg-a, kõn le kaoosẽ tɩ bɛɛba tũ sor ye. M naan n zẽkẽ m nug n pãb-b n tõoge. Wẽnd bɛɛba naan n sulgẽ b menga la Israyɛl na n yãeẽ-la vɩɩm noogo daar fãa. Wẽnd na dɩlgẽ-yẽe ne alkam sõngo n tɩgs-a ne weoog sɩɩdo. A Asaf yɩɩlle. Wẽnd dʋ-la b zaoore la malɛgsa sʋka b sɩngame n na n bʋ bʋʋdo. Ad-y yaa woto la Wẽnd sokda: «Y na n talla y bʋʋd lɛbla kaoobo, n bʋʋd n fãagd nin-wẽnga, la y paalgd nin-sõngo, n ta da-bʋre? Bɩ kɩɩb-bil bʋʋdo la a ka neng soab bʋʋd bʋ tɩrga, sẽn zĩ-a ne pɛta, a nug ka zãad soaba, da sak-y tɩ bãmb dãmb bʋʋda golem ye, bʋ-y n fãag-b nin-wẽnsa nugẽ.» La ayoo! Y ka mi rẽ ye, y ka baood rẽ ye. Bʋʋda bʋʋda likẽ, y babenda goabg la rɩtgo wa zom-bi la woto y na n wãa tẽngã. M togsda sɩda, y yaa wẽn-bi, y zãng yaa Yĩngr Wẽnda kamba. Y fãa yaool n na n kii wa ninsaalba y na n dʋʋga wa rĩm biisi. Dʋ-y y zaoorẽ, Soaala, kao-y dũni wã bʋʋdo, bu-zẽmba fãa ya y soolem. A Asaf yɩɩlle. Soaala, yãmb zĩi sɩɩ n pa gomda, gom-y! Kelg-y y bɛɛba sẽn guglemdi, ges-y y zabd-n-taasa sẽn zẽkd b zutu. B zemsa taab n na n tʋm y buuda wẽnga, n na n kãag y arzɛkã n looge. B gomda woto: «Wa-y tɩ d menes b buudu, d sõng tɩ Israyɛl yʋʋr da le pʋd ye!» Bɛɛba zemsame n sũ taaba n na n tak zabr ne yãmba. Ad Edom la a Ismayɛl yagense, n paas a Moab ne a Agar kamba a Geval, a Amon, a Amalɛk, Filisti la Tir dãmba. A Asur meng waa n naag-b lame, a waa n sõnga a Lot kamba. Zã-y-ba wa y sẽn maan ne Madiã rãmba, wala y sẽn maan ne a Sisera la a Yavẽ, Kisõ kʋɩl-bɛɛgẽ. B kʋ-b-la zãng Eyin-Dor, la b yĩnsa põnega tẽngã. B rĩm biisa wẽneg a Orɛv la a Zeev, b nanamsa fãa wẽneg a Zeva la a Salmuna! Yaa bãmb n da gomde: «D tɩ reeg Wẽnd soolma n sooge!» Bɩ y sɩlmanda wa tebg-b wa ka-fɩɩba n looge! Pʋg-y-ba wa bugum sẽn kẽ googo, wala bug-walem sẽn zomb tãnga. Y sob-raooga kell n wulumd ne-ba, a kell n kẽes-b rabeem pʋgẽ. Bɩ yãnd yõk-ba, Soaala, tɩ b lɛɛg n wa kẽ yãmba. B rigba da le sɛ ye, b yãnda ra le woog ye, tɩ b yi dũni wã ne paoore. Bɩ b bãng tɩ yãmb la Soaala, la Yĩngr Wẽndã; tẽng zug ka y yaa y ye tãa! A Kore kamb yɩɩlle. Yɩɩla naab yɩɩnd-a lame t'a wẽneg: Bugsuntunga biis yɩɩlle. Wẽnnaam Pãng-Soaba, ad-y m nonga y sẽn kẽed dot niynsã. M gãeeme n sũkdẽ la m wẽed siri la yaa Soaala zaka la m data. M yama ne m sũurã baooda Wẽnd ning sẽn kõta vɩɩma. Koobr paamda a roogo tɩ sɩlaal tʋɩ a tʋko n wekd a kamba yãmb maan-kugra sɛɛgẽ, dũni fãa Soaala, m dĩma la m Wẽnda sɛɛgẽ. Yãmb zaka rãmb la sũ-noog rãmba tɩ b tar yãmb pẽgr n ka vʋʋsdẽ ye. Zu-noog soab la sẽn paamd a roog y sɛɛgẽ a sã n wa rat n gilg y waoogr zĩigã. Gilgra rãmb sã n kẽn n ta pargma bãg-faaga, zĩ-kãng tekd n lebga zĩ-noogo. Saaga wat n pids-a-la ne ko-ralem. Woto kẽndba kolgda ne pãn-paalga, Siõ Wẽnda taoore. Soaala, dũni fãa Wẽnde, kelg-y m pʋʋsgo, Zakoob Wẽnde, kelg-y m kosgo. Soaala, ges-y d dĩma, d gãongã, ges-y y sẽn kõ a soab naama nenga. Daar a yembre y sɩmannẽ zĩndgu wẽnda dasem tusri. Woto wã m yãkame tɩ m sẽn na n pa y zaka noorẽ, são m sẽn na n tɩ m zaka neb niyns sẽn ka tũud-b Wẽnda sʋka. Soaala-Wẽnd yaa d wĩntoog la d gãongo. B kõta sõmblem la ziiri. Yell sẽn ka be b rãmb zugã ka tõe n kong sũ-noog ye. Soaala, Wẽnd-Pãng-Soaba, zu-noog soab la sẽn teeg-a yãmba! Yɩɩlla bee yɩɩla naab sebrẽ. A Kore kamb yɩɩlle. Soaala, yãmb wilga y nonglma ne y buuda tẽnga! Y tɩ lɛɛg n waa ne a Zakoob yemsã. Y luda y buuda rẽgdo, y yẽesa a yel-wẽna zãnga. Soaala, y sigsa y sũuri, y kiisa y sũ-puurã. Le kẽes-y tõnd y soolmẽ, Soaala la d Fãagda. Da bao-y n dok y sũur ne tõnd ye. Bõe tɩ y sũur na n kell n puug ne tõndo? Bõe tɩ y sũura na n zab dar fãa? D yet tɩ yaa yãmb n na n kõ-d vɩɩm? D yet tɩ yãmb n na n yɩ y buuda sũ-noogo? Kell-y n pʋg-y tõnd ne y nonglma, tɩ d paam fãagre. M na kelga Soaala-Wẽnd sẽn yete; yaa woto la b gomda: «Bɩ laafi zĩndi.» A zĩnd b buudã, la sẽn nong-b bãmba yĩnga. La rẽ yaa bãmb me sã n tedg zʋgo. Sẽn zoet-b bãmba fãagr pẽnegame, la Wẽnd yʋʋr na n yiime n pid d tẽngã. Nonglem sẽn ka mi welgre na n zĩndame zemsgo la laafi na n kẽnd n yegda taaba. Nonglem sẽn ka mi welgre na n bula tẽngã n yi la zemsgo zĩndida yĩngr n sig tẽnga. Yaa Wẽnd meng n kõt sũ-noogã, tɩ tẽnga kõt a biisi. Zemsgo lʋɩta taoor n kẽnda, n tukd sorã n kõt-ba. A Daviid pʋʋsgo. Soaala, kelg-y m pʋʋsgo, leok-y-ma; m yaa nimbãan-neda la naong soaba. Gũ-y m vɩɩma tɩ m yaa yãmb yamba. Soaala-Wẽnde, fãag-y y nedã t'a teega yãmba. Zoe-y m nimbãanega, Soaala, yaa yãmb la m boond beoog sẽn vẽege. Noog-y y yamba sũuri tɩ yaa yãmb bal la m baooda. Yãmb yaa nin-bʋgsgo n kõt sugri, yãmb deegda sẽn boond-b yãmba pʋʋsg daar fãa, bɩ y kelg m pʋʋsgo, Soaala, bɩ y wʋm m koɛɛga rãamde. M zĩi ne yɩɩre n boond-y, bɩ y kelg-ma. Yãmb ka tar mak-n-taag ye, Soaala, Yãmb n yɩɩd ne bũmba fãa. Buuda fãa sẽn yi y nugẽ na n wa wõgemda y taoore, Soaala, b na n wa pẽga y yʋʋre. Yãmb pãnga labsa tɩ y maand bõn-bãna. Yãmb yaa Wẽnde, yãmb y ye tãa! Soaala, wilg-y maam m sore tɩ m paam n kẽn y vẽenemẽ. Kõ-y-m yam sõngo tɩ m zoe yãmba. Soaala-Wẽnde, m dat n pẽg-y-la ne m sũur fãa, m dat n pẽg-y-la wakat buud fãa. Yãmb sẽn tar mam pʋgb la y sẽn tar m pʋgbo; y waa n yiis-m-la bog zulunga pʋga. Soaala, wilg-m-meng rãmb n yik zabr ne maam, la nin-toos n sũ taaba n na n yãk m yõore; la b geela b geelsã n bas yãmb kɛɛnga. Soaala, yãmb sẽn pid ne nimbãan-zoeere, yãmb sẽn pid ne sõmblem, yãmb sẽn tar sũ-maasem, n pid ne nonglem la zemsgo, wẽnemd-y y nengã n tees maam, le kõ-y m gĩina pãnga la y fãag-ma. Tʋm-y pãng tʋʋmd m yĩnga la m bɛɛba na rɩ yãnde b sã n wa mik tɩ yãmb n sõngd-m la y yẽesd m nintãm. A Kore kamba yɩɩlle. Soaala vigla Zerizalɛɛm b tãn-sõnga zugu. Wẽnd nonga Siõ n yɩɩd tẽns a taaba fãa sẽn be Israyɛl tẽn-peelmẽ. Siõ, Wẽnd tẽnga, ad-b sẽn togsd f poorẽ n kilsd f ziiri. B koɛɛg la woto: «Neb niyns fãa sẽn mi-b Wẽndã sʋka, m sõta Ezipt la Babilon. Ned dogda Filisti, Tir, bɩ Nubi. La sã n ya Siõ, b yetame: be la ned kam fãa datẽ tɩ yɩ a ba rãmb tẽnga. La sɩda, Yĩngr Pãng-Soabã n me Siõ.» Wẽnd tara buud fãa rogem sebre, b gʋlsa ned kam fãa a sẽn dog zĩig ninga. Nebã sã n yaool n yɩɩndẽ la b saoodẽ b yetame: «M ba-yir la Siõ.» Yaa rẽnd yĩnga, Siõ, Wẽnd tẽnga, la neba saood la b yɩɩnd n pẽgd f ziiri. Yɩɩlle. Yɩɩlla yɩɩnda ne wɩɩse. A Zera biig a Eman yɩɩlle. Soaala, m Wẽnd la m Fãagda, m kelma yãmb wĩndg la yʋngo. Bɩ m kosga lʋɩ y tʋbrẽ, tɩ y reeg-a. M vɩɩma pida ne yel-beedo ad-y yaa bʋg-tẽng sor la m kẽnd n yegda. B sõt-m-la sẽn zoe n ki-ba sʋka, m yell gila zãnga. B gãneg-m-la toor kɩɩms sʋka, wala b sẽn gãnegd kũum yaoogẽ, tɩ f na n wẽneg n yĩm a yʋʋre, tɩ f nif ka le ne-a ye. Y sik-m-la bog zulunga pʋga, y sik-m-la bog zulungẽ, lik tam. Mam zug la y waa n zɩsg y sũ-puuri, maam la a ko-wiiga wa n na n peeg n looge. Y zãag-m-la ne m zo-rãmba, bãmb nifẽ m lebga yel-beedo. B pag-m lame tɩ m pa tõe n yi ye. Nimbaanega kiisa m nina vẽenem. M boola yãmb daara tõre, Soaala, m zẽka m nus n tees yãmba. Y na n maan wẽnd-makr kɩɩmsa yĩnga? Sẽn ki-ba na tõog n yik n pẽg yãmba? B le gomda y nonglma yell yaoogẽ bɩ? Bʋg-tẽngẽ la m na n gom y zemsg yell bɩ? Wẽnd-makra na puk lik naab soolmẽ, y zemsga na yãend Yĩmb-tẽngẽ? M yãbd n boonda yãmba, Soaala. Yibeoogo m yɛsa y taoor ne m pʋʋsgo. Yaa bõe, Soaala, tɩ y rigd-ma? Yaa bõe tɩ y solgd y nenga? M zu-bʋka sɩnga m yãadmẽ la m yɛɛme, yɛɛsg la b yɛɛs-m, tɩ m ka le mi m sẽn beẽ ye. Y sũura fudg n waag-m lame, y yɛɛsga kʋ-m-la zãnga. Y yɛɛsga gũbg-m-la zĩig zãnga, n gũbg-m wa kʋɩlse, tɩ m be sʋka. Yãmb zãaga maam ne zoa la sõsd-n-taaga, m sõsd-n-taaga la m zoa lebga likã. Noog sɩlgre — Ezrayitga a Etã yɩɩlle. Soaala yel-sõmda la m na n yɩɩl wakat fãa. M noor na kɩt tɩ b bãng zamaan sẽn wate tɩ Wẽnd pʋlemd ka vaal baraar a ye. Ade, Soaala, y nonglma kaset yalsa daar fãa yĩnga, yaa al yĩngr la y tɩ yals y kasetã. Yãmb n yeele: Neba fãa taoore m kaoola zooda ne m sẽn yãk a soabã, ne m sõgna a Daviid. N-ye, Daviid, yaa fo buuda la m kõt naam daar fãa yĩnga! Yaa fo n na n zaond zaoorã zamaan ne zamaana. Bɩ yĩngr dãmba kils bõn-bãnd a woto buudu! B kils pʋlenga sẽn ka vaal ba raar a ye wã, nin-sõma wã kʋʋng sʋka. Yĩngrã, ãnda n be n zem Soaala? Ãnda n wẽnd Soaala, wẽn-naandsa sʋka? Nin-sõma wã tigsg zĩigẽ Wẽnd ket n kẽesda rabeem wʋsgo. Nin-sõma wã ne sẽn gũbg-b bãmba fãa yɛɛsdame. Soaala, Pãng rãmb Wẽnde, ãnda n tar pãng wa yãmba? Ãnda pʋ-peelem n zem yãmba? Yãmb n tõe n sik mogra zẽk-m-mengã, a kooma sã n rãmbe yãmb n lebd n sik-a. Yãmb n beds rũm-bãnd a Raab, bũmba fãa sɩngrẽ, yãmb kanga pãng n kɩt tɩ y bɛɛba sẽege. Yãmb n so yĩngri, yãmb n so tẽnga. Dũni wã ne a arzɛka, yãmb n naan-a. Dũni wã goabg la a rɩtgo, y nug tʋʋmde. Tabor la Ermo reesda y yʋʋra n sokd taaba. Yãmb kanga wɩɩda ne pãnga, y zẽk y rɩtgã la y sẽn tʋm raoodo. Y naama zaoor vigla zemsgo la sõmblem zugu. Y sẽn poog zĩig ninga, y waa ne nonglem la sɩda. Zu-noog soaba la buud ninga sẽn mi y pẽgre. Buud kãng kẽnda ne Wẽnd nenga vẽenem. Y buuda sã n wʋm y yʋʋrã a sũ-nooga na n saoolg-a-la saooga, beoog sẽn vẽege. Wẽnd sõmblema na dooga a nenga. N-ye! Yãmb la buuda pãn-kẽeng, yãmb sẽn welg-d toora yĩnga, d zug zẽkame. Tõnd dĩma bee Wẽnd nugẽ, a soolga Israyɛl Soaala la Nin-sõngã. Yaa woto la y lik y nebã raar a ye n gom ne-ba: «M yãenda gãndaoogo n sõng-a, m yãenda m buuda bi-bɩɩga n zẽk a yʋʋre. M yãenda m sõgna a Daviid, n pʋdg a rĩir naam ka-sõngo. M kõn zãag ne-a la a na pid ne raoodo. Bɛ kõn tõog n ling-a ye, ned zẽk a zugu n dat n paoog-a, a kõn tõog ye. M na n fẽda a bɛɛba fãa a taoore, m na n kʋʋ sẽn kis-a fãa. M na n pẽneg-a-la ne m sɩda la m nonglem. M yʋʋra sẽn pʋd bala la a zug sẽn dooge. M na n dɩka mogra meng soolem n kõ-a, n dɩk kʋɩlsa fãa n sagl a rɩtg-nugu. Yẽ na n boola maam t'a ba, t'a Wẽnde, n bool-m t'a soondg pĩiga. Mam me na bool-a tɩ m bi-kẽenga, m na kõ a Daviid naam sẽn yɩɩd a taab rẽnda, tẽng zug ka. M nonglem na kell n pa ne-a daar fãa, d zooda na kell n yɩ bũmb sẽn ka na n kao ye. M na kɩt t'a rɩ naam daar fãa yĩnga. A na kaoosa wa saagã, a naama goeela zugu. La ade, a kamba sã n bas m noorã n ka le maand sẽn segde, b sã n tõdg m noorã n pa le sakdẽ, m na bao rasaar n sɩbg b tõdgre, beegr fãa na reeg a wẽedo. La kõn tũ ne m nonglma boogre, kõn tũ ne zooda sãoong ye. M kõn bas tɩ zooda sãam ye, m kõn lebs m noor sẽn yiis ye. M wẽena rẽ ne m menga sẽn pid sõmblem, m kõn tudg a Daviid bada! A naama na n kaoosa daar fãa. A naama zaoor na n yalsa m taoor wa wĩntoogã. A na n yalsa wa kiuugu, n yals yĩngr wa kaset sẽn ka tõe n kɩɩs ye.» D yaool n tẽedame tɩ ya yãmb n sãbse la y bas kɛɛnga y sẽn da taag a soab y naama kaama, yãmb m maan zabr ne-a. Yãmb n kao zooda sẽn da yõgã, yãmb n fabg tẽnga la y tab a naama pugla. Yãmb kao-la a yãgrã, n lub a tãnsoben-dotã. Soloadba fãa paam n zɛ-a lame, a yagsa fãa waa n paoog-a lame. Y paasa bɛɛba pãnga, n noog b fãa gill sũuri, y tol n salga a sʋʋga noor menga, y ka yals a sɛɛgẽ zabra sẽn waa n wulumda ye. Yãmb waa n wooga a naama pãnga, n tus a naama goeel n sik tẽnga. Y kʋʋga a bi-bɩɩlma yʋʋma, y kɩtame t'a rɩ yãnde. Soaala, na n yɩɩ woto n ta da-bʋre? Y na n kell n talla y meng solgre, n ta da-bʋre? Y na n basa y sũura t'a fudg laa? Ges-y m vɩɩma sẽn kaoosd tɛka; y naana ninsaal t'a na n kell n looge, n kell n loog yaleng-yaleng a woto bɩ? Ãnda n na n vɩ n ka na n bãng kũum, la a ka na n bãng bʋg-tẽng sor sẽn dɩkdẽ? Soaala, yɛɛlẽ la y solg y pĩnd nonglma? Yãmb n da wẽen ne y meng n kãab a Daviid. Soaala, ges-y y buuda sẽn zĩ ne paoogrã; tẽeg-y y sẽn yet tɩ m ges b rãmba yelle. Soaala, ad-y bɛɛba paoog-a lame, bɛɛba tʋʋsa y sẽn welg a soab toore n taag-a y naama kaama. Wẽnd paam bark daar buud fãa! Ami! Ami! Wẽnnaam ned a Moyiiz yɩɩlle. Soaala, zamaana sẽn tong taabã, yãmb maasmẽ la d waa n soonde. Tãmsa sẽn waa n nan ka pusi n yi, tɩ tẽnga la dũnĩ, nan ka naane, yãmb yaa Wẽnd zamaan ne zamaana. Yãmb tõeeme tɩ ninsaal leb tẽng tomẽ, Yãmb n pʋs n yeele: «Adem biisi, leb-y y tomẽ!» Ade, yãmb nifẽ, yʋʋm tusr yaa wa daare, sẽn ta n kaoose, yʋng wakat a ye. Y menesd-b-la wala yʋng gõeem sẽn menemde, beooga sẽn vẽeg tɩ gõeema loogã, wẽnda wa moodo ne b pu-neeba. Moog ningda a puug yibeoogo, tɩ sɛ; a zelegda sõore, la zaabre a zoe n kʋɩɩme. Sɩda yãmb sũ-puura yɛɛs-d-la wʋsgo, tɩ y sũ-fõora wa loog ne-do. Yãmb dɩgla d yel-wẽna y taoore n getẽ, d yel-wẽna sẽn solgã puka y nenga vẽenemẽ. Y sũur sẽn puug ne tõndã, y looga ne tõnd vɩɩm; d kaoosg ka yɩɩd vʋʋsgo, pemsem fõogre la a lebsgo, zoe n yaa vɩɩma n looge. D yʋʋma sõor yaa pisopoe, sẽn pid-b ne keglem n tat pis-nii. La rẽ fãa yõod yaa naong la pɛta, tao-tao tɩ d yɩk n loogame. Ãnda n tõe n bãnge y sũura sẽn fudg n ta zĩig ninga? Sẽn mi-b yãmb sũura sẽn fudg n ta zĩig ninga, yaa sẽn digd-b rabeem yãmb taoorã. Woto wã, Soaala, zãms-y tõnd d daara sõadga tɩ d yama na lebg yam zulunga. Lɛɛg-y n wa-y yã, Soaala. Y na n le taa da-bʋre? Kʋʋg-y y raarã, zoe-y y yemsa nimbãanega! Yibeoogo pids-y tõnd sũura ne y nonglem; woto d vɩɩma tõre d na kell n pa sũ-noog pʋgẽ. Teem-y y sɩbgra raare tɩ lebg sũ-noog raare. Sũ-beeda yʋʋm me tek boto. D datame tɩ y tʋʋm-bãna le sɩng d nifẽ d datame tɩ d yagensa bãng tɩ y ziira labsa. Soaala tõnd Wẽnde, bas-y tɩ y nonglma kel n pʋg tõndo! Sõng-y tɩ d tʋʋma wom biisi la biis sẽn na naf-do. Ned ninga sẽn paam n be roog ningã Yĩngr Wẽndã sẽn solg b mengã, yẽ soab gãee Wẽnd-Pãng-Soaba maasmẽ, yẽ soab gomda ne Soaala woto: «Yãmb la m soondg zĩiga, m tãnsoben-doogo, yãmb la m Wẽnde, yãmb la m teeg yã.» Yaa Soaala n na n fãag-f bẽdgẽ. Bãmb n na n fãag-f ne bãag sẽn wat ne tẽn-kũum. B na n kogl-f lame, b na n yɩɩ f soondg zĩiga. F na n soonda bãmba wa no-bi, b ma pɩgsẽ. F sẽn tar Wẽnd nonglma yaa gãong la f zãada, yaa kut fuug la f yeelg yã. F ka na n zoe yʋng yɛɛsg ye, f ka na n zoe pĩim sẽn tãood wĩntoog ye, bɩ tẽn-kũum sẽn gilgd rot yʋngo, bɩ bã-longdem sẽn tũud wĩnto-sʋgs ye. Ba neb tusr lʋɩt f sɛɛgẽ, tɩ tus-piig lʋɩt f rɩtgo, bũmb kõn maan-f ye. Ypk f nin bala tɩ f na yãend Wẽnd sẽn sɩbgd sẽn ka kẽed-b bãmba. N-ye, yaa Soaala la f tɩ soonde! La sɩda yĩngr Wẽnda sɛɛgẽ la f tʋɩ f gãaga. Bũmb kõn maan-f ye, bũmb kõn lɩk f roogẽ ye. B malɛgsa la b na n kõ noore, tɩ b gũ f nao kẽndre. B na n kok-f-la b nusẽ tɩ f naoor da sɩɩs kugr ye. F na n taba bõnyẽeg la põeere, n tag ãbga la wag-bãnde. Wẽnd leokd a la woto: «A sẽn teeg maama yĩnga, m na fãag-a, m na kogl-a t'a mi-la m yʋʋre. A sã n bool-ma, m na leoke, m na zĩnd ne-a, a yɩɩra pʋgẽ, m na fãag-a la m na kõ-a pẽgre. M na pids-a ne raare la yʋʋma, m fãagra sõor na puk a yĩnga.» Yɩɩlle. Vʋʋsg raar yĩnga. Yãmb pẽgr nooma, Soaala, Yaa sõmbo, yĩngr Soaala, tɩ d pẽg-y ne yɩɩla. Yik yibeoogo n kils b nonglma yaa sõmbo! Ta yʋng n ket n kilsd b nonglma yaa neere! A nooma ne kʋnd la bɛɛla, n noom ne ruudga! M sũur nooma ne y sẽn maan m yĩnga, Soaala. M sã n get y tʋʋm-bãna fãa, m kaasda sũ-noogo. Sɩda y tʋʋma labsa, Soaala, b tagma la b zɩsa ne ninsaala. Yalma n ka mi tɩ bũmb n maane, yam kɩdg soab ka wʋmd võor ye. Nin-wẽnsa piuugda wa kɩmgo, bũmb ka paoogd nin-wẽnsa ye, b yaool n na n wẽneg n menema gill beoogo. Sã n ya yãmba, Yĩngr Soabã, Yãmb la Soaala daar buud fãa yĩnga. Sẽn na n loog bala, Soaala, yaa yãmb bɛɛba. Bãmb ne sẽn tʋʋmd-b taab beedã, bãmb fãa na n sẽega vugri. Ade, y kõ-m-la we-naaf pãnga, n pʋdg ka-bʋgsg m zugẽ. M neeme tɩ m bɛɛba konga pãnga, toog tara m zabd-n-taasa tɩ b kelemdẽ. Nin-sõng tãooda wa koanga, n yɛdgd wa Libã kʋka. Yaa tɩɩg sẽn sel wẽnd dooga sɩmannẽ tɩɩg sẽn tãood d Soaala-Wẽnd sɛɛgẽ. A sã n kʋʋl me, a ket n womda biisi, a ket n pida ne vɩɩm la pãnga. Dẽ me n kõt kaseto tɩ Wẽnde, m pĩiga pida ne zemsgo, la b ka sak goaleng ye. Soaala yaa rĩma, naam la naam bal la b yeelg wa fuugu, pãng bal la b rɩk n sẽbg b sɛɛga. Dũni wã na n kell n yals a nao zutu. Sɩda y naama zaoor vigla kẽnkẽ, y sẽn be la y sẽn be, Soaala. Soaala, mogra paasa a bʋʋre ko-wiisa tara rãmbgo. Koɛɛg ninga sẽn sãta n yɩɩda, n yɩɩd ko-wiisa bʋ-raasã yaa yãmb dẽnna, yãmb sẽn be yĩngra rẽnna. Yãmb noyã n wilgd so-sõngo, yãmb zaka la zag-sõngo, Soaala, zamaan sẽn wate. Soaala, yãmb la Wẽnd ninga sẽn dokd sũuri. N-ye! Wilg-y y nenga tɩ b bãng yã. Yik-y n kao-y dũni wã bʋʋdo, tɩ wilg-m-meng rãmba reeg b sɩbgre, sɩbgr ning b sẽn tog ne a soaba. M sok-y n gese, Soaala, m sok-y nin-wẽnsa poorẽ, y na n bas-b lame n ta da-bʋre, n bas-b tɩ b maan daoodo n ta da-bʋre? B kẽndame n wukdẽ, n gomd tɩtaam goama, n gomd wa b mi fãa la b tõe fãa. Soaala, bãmb n namsd y neba n paoogd y pʋɩɩra kamba, n kʋʋd pʋg-kõor la sãana, n koot kɩɩb-bi. Bãmb n gomde: «Wẽnd ka ne ye a Zakoob Wẽnda ka mi fɩ ye!» Bãng-y yã tɩ nin-wẽnsã n yɩɩd fãa me yalemdo, yam kɩds rãmba, da-bʋr-daare la y yama na n puki? Wẽnd na naan tʋbre, n yaool n ka wʋmnẽ? N naan nifu n yaool n ka tõe n yãende? B sẽn tõog n dems bu-zẽmbã, b maanda a wãn n kong nin-yend vɩɩma remsgo? Ka bãmb n zãmsd ninsaal laa tɩ bãngr na n wa paoog-ba? Soaala mii ninsaal geelse, b mii neere tɩ yaa geel-faad bala, Soaala, zu-noog soaba la sẽn paam-a tɩ yãmb demsd a vɩɩma ne y noorã! Yẽ soab n na n yãe a pɛta sɛɛbo, la a yãend bok ning b sẽn tuud nin-wẽnsa yĩnga. Wẽnd pa basd b buuda ye, b pa basd b pʋɩɩra ye. Nin-tɩrg bʋʋd na le kaoo wa sẽn segde la no-koeemd kõn zĩnd ned ba a ye poorẽ ye. Bʋʋda zĩigẽ, Soaala n na n sõng-ma, bãmb n na n gom n fãag-m nin-wẽnsa nugẽ. Soaala sã n da ka sõngẽ maam m gãeẽ-la ne kɩɩmse, bʋʋr sẽn kaẽ zĩigẽ. M sẽn yeel wakat ning fãa: «M na n lʋɩɩme,» wakat kãng la y nonglma pʋg-m ne y sõngre. M sẽn waa n zĩi n yɩɩd yɛl ka tɛk poorẽ la m paam tɩ y wa ne yolsgo la sũ-noogo. F bõe n be ne nin-yood a woto sẽn kaood bʋʋdã? B yetame tɩ b tũuda noorã n bʋʋdẽ, mik yaa nimbãaneg bala la b paasda. B sẽn kis yaa neb sẽn ka tar b toorẽ yelle, b bʋʋdame n paalgd nin-tɩrse. Wẽnd lebga m tãnsoben-doogo. B lebga m Pĩiga tɩ m lilld bãmba. Wẽnd donda nin-yoodã b tʋʋm wẽna, b pʋ-toogã lɛɛgdame n wɩbg-ba. D Soaala-Wẽnd menesd-b lame. Wa-y tɩ d kaas sũ-noog Soaala yĩnga, d kils pĩiga sẽn fãagd tõndã. D kẽng b taoor ne bark pʋʋsgo, d bao yɩɩl n zodg noogo. Soaala la Wẽnd kãsengã, bãmb la dĩm kãsenga, wẽn-naandsa sura b taoore. Tẽnga ne sẽn sud a pʋgẽ yaa bãmb n so, n le so tãmsa ne sẽn zao-b a zug tẽnsʋka. B soo mogrã, bãmb n naan-a, tẽn-peelma gilli b nusã n sa n yɛdg-a. Kẽ-y! D ta n sulgi, d ta n wõgemd b taoore, d kɩ rũmd b taoor tɩ bãmb n yiis tõnd moogo. Bãmb la tõnd Wẽnde, d buuda yaa bãmb bãgre, bãgra rũms b sẽn gũuda la tõndo. Dũnna bɩ y kegl b koɛɛga. Da kidb-y y sũur wa zabra raar ye, wa fɛɛsga raare, we-raoogẽ wã ye. Beenẽ y barãmb zaba ne-ma la b fɛɛs-m lame, ne b nina sẽn da ne m tʋʋma. B yika m sũuri, yʋʋm pis-naas pʋgẽ. Dẽ me la m yeel yã: «Buud kãnga yam menemame, a ka mi m sẽn tũud soy niyns ye.» La mam me sũura puugame tɩ m wẽene: «Ayo! B kõn kẽ m vʋʋsga zĩigẽ ye!» Yɩɩl-y yɩɩn-paal Soaala yĩnga, Tẽnga gilli, yɩɩl-y Soaala yĩnga yɩɩl-y n pẽg b yʋʋre! Moon-y b fãagra rũnna la beoogo. Ypk-y b ziira bu-zẽmba yĩnga, wilg-y Adem kamba b sẽn maan bõn-bãn niynsã. Wẽnd yaa nin-kãsenga tɩ b pẽgdba me ya ka tɛka. B kẽesda rabeem la b yɩɩda wẽn-naandsa fãa. Bu-zẽmba wẽnd dãmba fãa: sobgo. Tõnd Soaala n naan yĩngr teedã. B nenga yãgda ne ziiri, la b rooga pida ne pãng la naam. Kils-y Soaala, Adem biisi, Kils-y Soaala ziir la b pãnga. Kils-y n pẽg b yʋʋrã. Wa-y ne y kũuna, ta-y sɩmannẽ. Wõgemd-y tẽnga, Soaala taoore, b sõmblema sẽn wat n pukdẽ. Bɩ tẽnga gilli rig rabeem b taoore. Togs-y bu-zẽmba sʋka: «Soaala yaa rĩma. Dũni wã vigla kẽnkẽ, n pa sergd zĩig ye, Wẽnd kaooda dũni wã bʋʋd ne zemsgo.» Bɩ yĩngr dãmba lang sũ-noogo, tɩ mogra ne a pʋgẽ teeda reeg n soke. Pʋta gill moon b tig-raaga tɩ gooda kelem sũ-noogo, Soaala taoore. B watame n na n dɩ naam tẽnga zugu. B na n dɩɩ naam ne zemsgo, b na n gesa tẽnga yelle ne pʋ-peelem. Soaala yaa Dĩma, bɩ tẽnga kɩdem sũ-noogo bɩ kooma noorẽ dãmb maan kibsa! Lik la sawadgo n gũbg Soaalã, b tʋɩ zemsgo la sõmblem n zaoolg b naama goeele. Bugum n kẽnd b taoore, n dɩt bɛɛba n gilgdẽ. Sa-yãgba vẽenem vẽnega dũniã la tẽnga yãendame n yɛɛse. Tãmsa yẽnega wa siribdu, Soaala taoore, dũni wã Soaala taoore. Yĩngr dãmb moona b zemsgo la tẽng zug rãmba yãenda b ziiri. Bɩ sẽn waoogd-b wẽn-faadã, bɩ b fãa zuta wuk ne yãnde! Wõgemd-y Soaala taoore, wẽn-faado, y fãa gill wõgemd! Siõ rãmb sẽn paam vẽnegre, b kaasa sũ-noogo, Zɩɩda tẽnsa fãa langda sũ-noogo tɩ Soaala yalsa yɛlã b zĩigẽ. Sɩd yaa yãmb la Soaala, yãmb n zao yĩngr-yĩngr, n zʋʋg wẽn-faada fãa gilli. Yãmb fãa sẽn nong-b Soaala, kisg-y wẽnga! B gũuda sẽn kẽed-b bãmba vɩɩm, b fãagd-b-la nin-wẽnsa nusẽ. Vẽenem n yãgd sẽn tũud-ba yĩnga, sũ-tɩrs rãmb pida ne sũ-noogo. Yãmba, tũudba, noog-y y sũur Soaala yĩnga, pẽg-y Wẽnde n tẽegd tɩ b yaa sõngo. Yɩɩlle. Yɩɩl-y Soaala yɩɩn-paalle tɩ b maana bõn-bãna, b maana raoodo ne b rɩtg kang sõngã. Soaala wilga dũni wã tõre tɩ bãmb la Fãagda, B puka b sõmblema ne bu-zẽmbã. B tẽega b nonglma sẽn ka viigdã, n tẽeg tɩ b pa kãabd a Israyɛl bũmbu n ka pids b sẽn kãab ye. Yaa dũni wã tõre n dɩ kaseto tɩ d Soaalã n sɩd fãag-do. Tẽnga rãmb naag taab n kils Soaala. Tãs-y y yɩɩla, tɩ yʋʋmba maan noogo. Maan-y noog b yĩnga ne ruudga la reem teed a taaba. D kils dĩma, d Soaalã, d kils-b ne tõntõog la bargo. Bɩ mogra ne a pʋgẽ teedã, dũni wã ne a nebã maan noogo. Kʋɩlsa me fõd ne bʋʋre, tɩ tãmsa naag n kaas sũ-noogo. B kaas Wẽnd sẽn wat n na n dɩ naam tẽng zugu. B geta neb yell ne zemsgo, n zãad ãndũni rãmba wa sẽn segde. Yɩɩlle! Soaala yaa dĩma, bɩ zãma wã sɩng rigbu! B zaoo al yĩngr-yĩngri, bɩ tẽnga dĩmi! Wẽnd n so naam Siõ, bãmb n so dũni wã. Bɩ dũni wã gill pẽg b yʋʋre, yʋʋr sẽn ya sõng la sẽn kẽesd dabeem. Dĩm pãnga ya a nong zemsgo, yãmb n wilg bũmb ning fãa sẽn toge, Yaa yãmb n wilg a Zakoob buudã sẽn zems la sẽn segde. Kils-y Soaala tõnd Wẽnnaam la y wõgemd b taoor tɩ b yaa sõngo. Maan-kʋʋdba a Moyiiz ne a Aarõ la b sɛɛg yõkda, a Samwɛl, da boonda Soaala la b ra leokd-b lame. B ra gomda ne-ba sawad-taoka pʋga. Ad-y b reega b zãmsgo, b reega b noyã. D Soaala-Wẽnde, yãmb meng y toore n da leokde. Y yɩɩ Wẽnd sẽn bʋk b sũur ne bãmba la sẽn da rokd b sũur ne b bɛɛbã. Kils-y Soaala tõnd Wẽndã! Wõgemd-y n tees b tãn-sõngã, tɩ Wẽnnaam tõnd Soaala yaa sõngo! Yɩɩlle. Bark pʋʋsgo. Tẽnga gill kils Soaala! Waoog-y b naama ne kɩdengo! Kolg-y b taoore n kaas y sũ-noogo. Reeg-y tɩ Soaala la Wẽnde, b naana tõndo, n so tõndo, tõnd la b buudu, b yãgra rũmsi. Kẽ-y b roogẽ n pʋʋs-b barka, sɩng-y b pẽgr b sɩmannẽ, kils-y-ba, pẽg-y b yʋʋre. Soaala yaa bʋgsgo, n pʋgd tõnd ne b nonglem beoog sẽn vẽege, la b kõn lebs b zelemd zamaan sẽn wat ye. A Daviid yɩɩlle. M sẽn dat n pẽg ne m yɩɩla la woto: n pẽg y nonglma la y sẽn dat zemsgã. Yaa yãmba Soaala la m dat n pẽg ne yɩɩla. M na n baoome n bãng bõe la m na n maan tɩ zemse. M dat n bãnga y sẽn na n sig maama wakato, tɩ m bãng n tall m meng neere, n da wa wẽneg m yagsa ye. M kõn pʋg sẽn ka sõmb ye, m kõn bas m tẽeb tɩ sãam ye, m kõn maan bũmb sẽn wẽnd dẽ buud ye. M na n zãaga m meng ne nin-yoogo tɩ m ka rat n bãng yel-wẽnd ye. Ned ninga sẽn soosd n lukd a taab bãongo, m na modg-a t'a sĩndi, m pa nong sẽn get-b taab ne sãbsg ye la sẽn wuk-b ne wilg-m-meng ye. M na n tũusa tẽnga neba, m sẽn mi b rãmb pʋga, n zĩndig m sɛɛgẽ. Ned ninga wɩɩm sẽn ka tar kɛka, yẽ soab n na n yɩ m kug-zĩida. Ned ninga sẽn minima n tudgd a taaba yẽ soab ka tar zĩig m zakẽ ye, zirẽ-be-rãmba me boto. Beoog sẽn vẽeg fãa m na kɩte tɩ tẽnga nin-wẽnsa fãa noor mumi. M na yiis nin-wẽnsa fãa Wẽnd tẽnga. Nimbãan-ned pʋʋsgo Soaala taoore. Kelg-y m pʋʋsgo, Soaala, bɩ m boolga lʋɩ y tʋbrẽ. Da solg-y maam y neng m yɩɩra raar ye. Wʋm-y m sẽn na n bool-y raare n leok-m tao-tao. M daara loogda wa bug-zõose, m kõab zab-m-la wala m lʋɩɩ bug-toaalgẽ. M yagda kʋɩ n menema zãnga, bũmb fãa yamleoog sɛɛ m sũurẽ, rɩɩba meng ka le sakd-m ye. M yãbra sɛ-la m nemsã n kell gãong la kõaba. M wẽnda we-raoogẽ gãoobgo, n wẽnd raboodẽ viuug luiila. M nif ka tol n pugl gõeem ye, m wẽnda wa luiil sẽn zao a ye sugr zugu. M bɛɛba paoogd-m-la beoog sẽn vẽege; b sũur sẽn puud ne-ma, b geenda m zug rokre. M dɩɩb lebga tompɛglem, m koom kalemda ne m nintãm. Y sũura puugame, a fõoga ne maam tɩ y gãd-m n lobg yɩɩga. M daara menemda wa sulunsuku, tɩ m kʋɩt wa moogo. Sã n ya yãmba, Soaala, y rɩta y naam daar fãa yĩnga. B tẽra y yelle, zamaan woo zamaana. Y na yiki, Soaala, a Siõ nonglem yĩnga, y na yiki tɩ wakata nan ka looge, n zoe a nimbãanega; la d pʋs n tẽedame tɩ wakata la marsã. Tõndo, yãmb kambã, d nonga Siõ kugã, n nong a rabooda toma menga. Bɩ bu-zẽmba rig Soaala rabeem, la dũni wã dĩm dãmba sulg b mense la b kils bãmb ziiri. Soaala sã n kɩt tɩ Siõ rota le yiki, n le yik n yals ne a ziirã, ad-y b na n le wẽnemda b nenga n tees b sẽn welg-b rãmb toorã, n deeg b kosgo, n da le rig-b ye. Ad-y y sẽn na n gʋls bũmb ning sebr zugu, n gʋls sẽn na n dog-b beoog rãmba yĩnga, tɩ buud paalga wa bãng n pẽg Soaala: «B zĩnda b ro-sõnga zug n sulg n gese, b zĩnda yĩngr n sulg n ges tẽnga, n sulg n kelg sẽn be-b bi-bees roogẽ waasgo, n yet tɩ b ra kʋ sẽn da tog-b ne kũuma ye.» B na n kilsa Soaala yʋʋr Siõ, b na n pẽg-b-la Zerizalɛɛm, wakat ning Adem biisa nanamse sẽn na n lagem taaba n kẽ Wẽnde. M da yeela woto, Soaala: «Y wooga m tĩiga, m sẽn waa n ket n zoet ne pãnga, y kʋʋga m yʋʋma, da loog-y ne-ma tɩ nan zemsa m pʋlenga pʋɩ-sʋka, la yãmb yʋʋma tonga taab n tõt sɛɛbo. Yãmb n naan tẽnga pĩnda la saaga yaa y nug tʋʋmde. Yãmb na n paame tɩ bãmb fãa looge. Fãa na n kʋdga wa fuugu, fãa na n teka wa fu-goabga, t'a to led a zĩiga. Yãmb yẽ bee woto, y yʋʋm ka sɛt ye, Yãmb sõgen-kamba kamb na waa n lebg zak rãmba, la b yagensa meng na n wa-la y taoore.» A Daviid yɩɩlle. Pẽg Soaala, m ned sõngo, kils b yʋʋr sõngã ne f sũur fãa. Pẽg Soaala, m ned sõngo, da yĩm b yel-sõmd ba a ye! Yaa Soaala n kõ-f yel-wẽnda sugri, yaa bãmb n sãoog f bãasa zãnga. Bãmb n zãag-f ne yaoogã, bãmb n pids fo vɩɩma ne nonglem, nonglem sẽn wẽnd ma rẽnna. M vɩɩma pida ne sũ-noogo, m le wɩɩda ne m bi-bɩɩlmẽ pãngã. M dɩta m pãngẽ wa wɩbga. Soaala bʋʋda b bʋʋdo, tɩ sẽn da rɩt-b bõna lɛɛg n paamd bʋʋm. B wilga a Moyiiz b soyã, n wilg Israyɛl kamba b tʋʋm-bãna. Wẽnd pida ne nimbãan-zoeere la bʋgsem, b sũura ka puugd tao-tao ye, b pʋleng ka vaand ye. B bʋʋd ka bʋʋd n ka sɛtẽ ye, b pa rɩkd yelle n paalg b sũurẽ ye. B pa sɩbgd tõnd ne sɩbgr ning d sẽn da tog ne ye. B pa sokd beegra samd zãng ye. B nonglma ne sẽn zoet-b bãmba zʋʋga saaga sẽn zãr ne tẽngã. B zãagda tõnd ne d tʋʋm dẽgdã wala yaang sẽn zãr ne nin-taoore. Wala ba sẽn nong a kamba, woto la Wẽnd nong sẽn pʋgd-b bãmba. Bãmb mii b sẽn yag tõnd ne bũmb ninga, b yag-d-la ne tom bilfr bala. Ninsaal vɩɩm, bãng moog rẽnna. A ningda puugu wala moogo, la sob tʋʋlg sã n wẽ-a, a ka ye. F bao-a me f kõn le yãend-a ye. Soaala nonglem yaool n pʋgda wakat buud fãa neb niyns sẽn zoet-b bãmba. Wẽnd na n zãa yagensa wala b sẽn zã ba rãmba, bãmb me sã n n ka bas zooda tɩ sãame, bãmb me sã n sak n deegd b noore. Wẽnd vigla b naama zaoor yĩngri, Wẽnd dɩta b naama bũmb fãa zugu. Yãmba, b malɛgse, pẽg-y Soaala! Yãmb n deegd b koeesã n taasd zĩig zãnga, b sẽn tʋm-y-la y sẽn looge. Yãmba b sõgen-kamba, sẽn tũud b raabo, wɩng-y ne bark pʋʋsgo. Yãmb fãa b sẽn yiis moogo, pẽg-y-ba y sẽn be zĩig ning fãa. M ned sõngo, fo me pʋʋs-b barka! M ned sõngo, pẽg Soaala! Soaala-Wẽnde, yãmb labsa! Yãmb naama pɩnda wa wĩntoogo, vẽenem la yãmb dɩk n pil wa fuugu, y yɛdga saaga wa maasem tɩɩga. Yaa yĩngr la yãmb tɩ zaoolg y roogã, y zomba sawatã wa naab sẽn zomb a bilim-bilm, yaa ne sobga pɩgs la y kẽnda. Y tʋʋm-tʋmdba la sobgo, la sobga tʋʋla wa bugum. Yãmb n vigl tẽngã a zĩigẽ la bũmb kõn luk-a abada. Mogra la y rɩk n pila wa fuugu; tãmsa me n da kokd kooma. La y sẽn wilg kooma y raabo, kooma wʋma saaga sẽn kelme n yɛɛse, n na n sig tãmsã la bãg-faasã n tees y sẽn wilga zĩig ningã. Y wilg-a-la toaag a sẽn ka tog n gãndge, y yeel-a lame t'a ra le wa rɩ tẽnga ye. Wẽnd kɩtame tɩ kooma sẽn pusg n yi wã kẽ sudsã wa b sore, n gind tãmsã. Ko-kãng n yũnugd yir rũmsã bãmb me la burgumd teeg n na n kiis a ko-yũudu. Yĩngr luiili wã me pa zãagd b tʋgdã ne kooma ye, la b bee tɩɩsa maasmẽ n yɩɩnẽ. Wẽnd be-la b zĩigẽ n zãgsd tãmsã b modgdame tɩ koom sek tẽngã. Yaa bãmb n kõt rũmsã b yamdo, bãmb kɩt tɩ tɩɩsa womd biisi, tɩ ninsaal paamd a rɩɩbo; n paamd rãam sẽn noogd sũuri, n paamd kaam n zɛɛd b yĩnga, n paamd bur n paasd b pãnga. Tɩ bɛda menga, wala sẽn yit-b Libã, paamda koom tɩ sekd-ba, Soaala. Luiili wã wat n yagenda b tʋgdo, tɩ kʋɩl-piisa me samd b rẽnna tɩ-neeba zutu. Tãmsa zutu la yãgsa me sõsda, tɩ kɩɩsa reemd pĩisa bogdẽ. Kiuuga yitame la a kiidẽ, yaa y tig-raasa la b sõta. Wĩndga mi-la a lʋɩɩs sasa. Y bool yʋngo, y bool lika, tɩ tʋgẽ dũmsa fãa na yi b gãasẽ. Bõnyẽeg ningda rãamde, n baood bũmb n na n yõke, a kota Wẽnd tɩ b kõ-a a rɩɩbo. Zĩig sã n yẽeg tɩ bõnyẽeg leb a gãagẽ. Ninsaal me yita a tʋʋmde, a na n pa-la a pʋʋgẽ n ta zaabre. Ad-y y tʋʋma labsa, Soaala, la y zulga y yam n maan bũmb fãa, tẽnga fãa pida ne y sẽn naane. Ad mogrã. A wogma, a yalma, a zulma. A pʋgẽ wã yaa rũms ka tɛka, bɛd la bõonego. Mogra zug la koom kogenda kẽnda, mogra pʋg me y ninga bõn-nind a Leviatã a bee be n pʋgemdẽ, tɩ y mii n wa ges-a n pusg laado. B fãa teega yãmba n na n dɩ b rɩɩbo, wakat sã n ta bala. Y sã n kõ-ba b reegdame, y sã n yaag y nugu, b rɩtame n tɩge. Yãmb solgda y nenga tɩ rabeem kẽ-ba. Y sã n deeg b yõore, b yita moogo. Toma lebda a tomẽ. Y sã n le lebs-b vɩɩm, bõn-paals la y yag yã, tẽnga neng lebd n teemame. Bɩ y paam pẽgr wakat fãa Soaala. Noog-y y sũur ne y sẽn maana fãa. Yãmb geta tẽngã t'a sɩng miungu, y nug-bil sɩɩs tãmsã la b sẽn sobd ne bug-zõose. M dat n pẽg-y-la ne yɩɩla, m vɩɩma tõre. Beoog sẽn vẽeg-m fãa ne yõore, m na pẽg yã. Bɩ m yɩɩla ta y yam, m Soaala. Yãmb sẽn yaa m Wẽndã, m sũ-noog pida zãnga. Ad-y neb niyns toog sẽn ka be ne yãmba tog n yii moogo. Bɩ yel-wẽn-maandba la sẽn ka mi-b yãmba naag n menem zãnga. N-ye! M dat n pʋʋs-y-la barka, Soaala. Soog-y pẽgre, kaoos-y zamaan ne zamaana! Kils-y Soaala, pẽg-y b yʋʋre! Ta-y bu-zẽmba sʋk n moon b sẽn maane. Yɩɩl-y b yĩnga, sigl-y reem b yĩnga, le togs-y b tʋʋm-bãna fãa. Bɩ y zug roog yĩngri, b yʋʋra sẽn paamd pẽgra yĩnga, la y sũur yɩ noogo y sẽn baood b zĩiga yĩnga. Bao-y Soaala ne b pãngã, bao-y b nenga vẽenem. Tẽeg-y b tʋʋm-bãna la koees niyns sẽn yi b noorẽ. Yãmba, b sõgna a Abraam buudã, maan-y tẽegre, tẽeg-y yã, Zakoob kamba, b kom-nongdsã. Bãmb la Soaala tõnd Wẽnde, bãmb n dɩt naam dũni wã zugu. B tẽega b zooda yelle, zood ning sẽn yõg yʋʋm ka tɛka yelle. Zood sẽn yõg ne a Abraam, kãabg sẽn kãab noogo a Izaak yĩnga, tẽeg-y b zelemd sẽn yiis a Zakoob yĩnga, tẽeg-y b sẽn yals daar fãa a Israyɛl yĩnga. Ad-y kãabga kãaba woto: «M kõt-f-la Kanaã tẽnga, yaa fo ne f yagensa pʋɩɩr la rẽnna.» Dẽ tɩ b sõora nan paooda, da yaa neb a wãn bala sẽn yi b tẽngẽ. B ra yita buudu n tɩ kẽ buudu, n yi buud a ye soolmẽ n tɩ kẽ a to rẽnnẽ. B pa bas tɩ bu-zẽmba yaal-b ye, b tol n sɩbga dĩm dãmb, bãmb yĩnga. B ra yeelame: «Da sɩɩs-y m sẽn welg b rãmb toora ye, da sɩɩs-y m bãngdba ye!» B boola kom t'a wa lʋɩ tẽngã, rɩɩb buug ra ka le yãet ye. Ned la b reng n tʋm b taoore: a Zozɛf, yɩ-la a Zozɛf la b ra koos wa yem-daoogo. B bao bãng n sog a karga, n bao bũmb n sog a kokore, la a gũu woto n tãag wakat ninga Wẽnd meng sẽn wa n yiis-a yellẽ. Dĩma kõo noor tɩ b yiisa bãngẽ, Ezipt dĩma kɩtame tɩ b yiis-a roogẽ. A tol n kɩtame t'a lebg a zaka soaala, n lebg a sẽn so bũmb ning fãa soaala. A paamame tɩ rĩm biis wa kẽ a tãpẽ, n paam t'a yama nek nin-kẽems rẽnna. A Israyɛl tũ rẽ n kẽ Ezipt. A Zakoob wa n lebga sãan a Kam tẽnga. Wẽnd sõnga a buuda t'a fɩɩge, a pãnga waa n yɩɩga a bɛɛba rẽnna. Wẽnd tedga bɛɛba zʋgo tɩ b na n yik n maan beem ne b buudã, tɩ b na n yik n zã a Israyɛl ne wẽnem. Dẽ me la b tʋm b sõgna a Moyiiz n paas a Aarõ, a sẽn da yãke. Ezipt tẽnga b maana bõn-bãn niynsi Wẽnd sẽn kõ-b noor tɩ b maan a Kam tẽn-peelmẽ. Lik la b tʋm yã la a waame tɩ b sɩng marsã n bas no-koeemde. Kooma tekame n lebg zɩɩm la zĩma tũu rẽ n ki. Loms yãmba b tẽngã n tãag b dĩma roogẽ. B sẽn le gome, la keooda sẽn wa, tɩ keooda loog tɩ rũm-pigli wa reeg n yãmb zãnga. B mong-b-la saaga n kõ-b sapɩlem yɩɩ bugum la bug-walem la saaga ni yã. B yorga b bugsuntund la b kankamse, b tol n kʋʋsa tẽnga tɩɩse. B sẽn gom yɛsa sʋy waame, n gãneg b gɛl n wek b kamba, la bãmb n sɛɛs tẽnga yamdo la tɩɩsa biisi. B kʋʋ tẽnga kom-dẽemse. Bãmb n yaool n da ya yõod ninga b sẽn da paam ne rogem pãnga. Wẽnd yaool n yiisa b neba wa rakãagba, ne wanzurf la sãnem, tɩ b kẽnd sakdẽ. B loogra pidsa Ezipt ne sũ-noogo tɩ b sẽn loogã b yɛɛsga kolga weoogo. B yɛdga sawadgo sẽn na n lebg b maasem tɩɩga, la sawadga widga bugum n kõ-b vẽenem yʋngo. B neba sẽn kose, sobg waa ne pitr-lʋɩɩse; yĩngr bura me la b paam n dɩ n tɩge. Pĩig sẽn wẽ n wurgi, koom dʋʋgame, la kʋɩlg n tuk a sore n kẽed pʋ-weese. B tẽega b sẽn da yiis gomd sõng ninga b sõgen, a Abraam, yĩngã. B yiisa b buuda ne kɩdengo, b yiisa b sẽn tũus b rãmba tɩ b kaasd sũ-noogo. Bu-zẽmba tẽns la b rɩk n kõ-ba, b tʋʋma yõod la b tigs n kõ-ba. B kos-b lame bala tɩ b reeg b noorã la b tũ b rog-n-miki. Wẽnd paam pẽgre! Wẽnd paam pẽgre! Pẽg-y Soaala tɩ b pida ne sõmblem la b pidsda b kãabga raar fãa. Ãnda n tõe n togs Wẽnd sẽn maana fãa, ãnda n tõe n pẽg b tʋʋm sõma wã fãa? Zu-noog soaba la sẽn tũud-a Wẽnd sẽn yalse la a maan sẽn ya sõmb wakat buud fãa. Tẽeg-y d yelle, Soaala, yãmb sẽn get y buuda ne nimbãan-zoeerã, ges-y d yelle tɩ yãmb la Fãagda. Sõng-y tɩ m yãend y nin-sõma wã sũ-noogo, m me naag y buuda n kɩdme, tɩ m zuga zẽk wa sẽn paam b pʋɩɩr yãmb nengẽ. Wala d ba rãmba, d beega yãmba, d bʋdga sore n tog ne sɩbgre. Ezipt tẽnga d ba rãmba ka wʋm y bõn-bãna võor ye, b yĩma y nonglma sẽn zã-b zãab ninga. B taa Rudum mogrẽ n zẽk b zut ne yãmba. La Wẽnd sẽn pa rat yʋ-beoog yĩnga n yaool n dat n wilg b pãnga, b fãag-b lame. B tãsa Rudma Mogre t'a kʋɩ. Woto b naoor paa koɛɛnga wala b kẽna zĩ-pɛɛlẽ. B fãag-b-la b bɛɛba nusẽ, bɛɛba kang ka tõog n zẽk n wẽ-b ye. Kooma rɩ-la b bɛɛba n pa kees ba a ye. Ba rãmba tẽe b goama n pʋd pẽgr yɩɩlle. La pa yẽ n kaoos ye, b ka paam n pids b sẽn data ye la bãmb zoe n yĩmame. We-raoogẽ wa, kom n yõk-ba; zĩ-peen-daasẽ wã b yik n fɛɛsa Wẽnde. Wẽnd ra kõt-b-la b sẽn da rate, la bãmb yeelame tɩ ka sek ye, tɩ ka waoog ye. B yika sikẽ wã n maan sũ-kiiri ne a Moyiiz, n maan sũ-kiir ne a Aarõ, Wẽnd nedã. Tẽnga yaaga a noore n vel a Datã, tẽnga lɛɛg n busa a Abiram ne a poorẽ dãmba. Bugum yõog-b lame, bugum dɩɩ kɩɩsdbã. Orɛb tãnga zugu yõgsa yõga nag-bila la b fãa wõgemda yõak tʋʋmd taoore, la b teka Wẽnd ziirã ne naaf dẽnna, b tek-a-la ne yamd wãbd dẽnna. B yĩma Wẽnde, bãmb Fãagda, sẽn da maan bõn-bãn b yĩng Ezipt tẽnga, n maan bõn-bãn Kanaã tẽnga, n tʋm tɩ pɛleng yik Rudum mogrẽ. B yeelame tɩ b na n kʋ-b-la zãnga. Dẽ la b sõgna a Moyiiz lʋɩ sʋka n kos-b tɩ b sigs b sũuri la b ra maan bũmb ye. B pa tẽ Wẽnd sẽn gom ne b ye, b pa pẽg tẽnga ne a sõmblema ye. B kẽ-la b rotẽ n guglme, b pa sak Soaala noor ye. Dẽ la bãmb me wẽen yã tɩ b fãa na n paa we-raoogẽ wã, tɩ b sɩd na n sẽeg-b bu-zẽmba tẽnsẽ n paam n menes-b zãnga. Peor tẽnga b sak n kẽ-la a Baal, tẽnga rãmb wẽn-naand a ye, woto b rɩ maand sẽn da kʋ kɩɩms yĩnga. B tʋʋm yooda puuga Naaba-Wẽnd sũuri la tao bala bã-longdem kõsa a kãnde. Wakat kãng me la a Pinas yik yã n na n kẽ Soaala tãpẽ, n kʋ, n kʋ n same, tɩ tẽn-kũuma na n yaool n looge. Wẽnd gesa rẽ wa raood tʋʋmde, tʋʋmd sẽn tog ne pẽgre, zamaan ne zamaana! Ba rãmba puuga Wẽnd sũuri, Meriba tẽngẽ la rẽ taka yell beed a Moyiiz zugu. B waa n menesa a Moyiiz yam tɩ yẽ me gome, la pa yɩ wa Wẽnd sẽn da rat ye. Ba rãmba ka menes bu-zẽmba Wẽnd sẽn da gom b rãmb yella ye. B rɩka b nao, n zãms b tʋʋm yoodã. B waooga b wẽn-naandã, n lʋɩ bẽdgẽ, n yik n koot b kom-dibli la b kom-pugli, tɩ bãmb n waa n lebg b Sʋtãana maand rũmsi. B raaga zɩɩm sẽn ka tog n daag ye, b raaga b kom-dibli la b kom-pugli zɩɩm, Kanaã wẽn-naandsa yĩnga, la zɩ-kãng n dẽgem tẽnga zãnga. B lebga rẽgdo tɩ b basa Wẽnd vɩɩga n tɩ kẽ wẽn-faado. Wẽnd sũur puuga ne b buudã, Wẽnd sũur waa n yaanda ne b pʋɩɩrã, tɩ b na n kong n bas-b bu-zẽmba nusẽ, la b bɛɛba maan-b-la pãnga. Bɛɛba yaal-b lame, bɛɛba zisga b nus b zugu. Yaa naoor ka tɛka la Wẽnd waa n fãag-ba. Bãmb pa sak n teem zʋg ye, b wẽnema le maneg n paasame. Wẽnd waa n wʋma b kɛlenga n kũm b nimbãanega. B tẽega b zooda ne bãmba, n tẽeg b kãabga sẽn pa tog n vaalã n na n bas taale. B kɩtame tɩ b weoog kẽ b bɛɛbã. La rẽ yaa b sẽn yiis b noorẽ: «Fãag-y-do, Soaala-Wẽnde, yiis-y tõnd bu-zẽmba sʋka. Woto d na kils y yʋʋre, woto d zug na kell n zẽke d sẽn ya yãmb pẽgdbã. Soaala, a Israyɛl Wẽnnaama paam barka zamaan ne zamaana!» Tɩ buuda gill na n naaga taab n yeele: «Amina! Wẽnd soog pẽgre!» D kils Soaala tɩ b pida ne sõmblem la b nonglma ka be sɛɛb ye. B le togs rẽnna n yɩlme, Wẽnd sẽn fãag b rãmba, b sẽn fãag b rãmba b bɛɛba nusẽ, b yit yaang bɩ taoore. Goabg bɩ mogra sẽnẽ. Kẽer waa n menema zĩ-peen-daasẽ, n pa le ne tẽng sẽn na n kẽ ye. Kom la ko-yũud n da kʋʋd-ba. B yɩɩra pʋgẽ b teesa Wẽnd n kelme la b waa n fãag-b lame. B kɩtame tɩ b rɩk sore n kẽn n tãag neb sẽn kẽedẽ. Bɩ b pẽg Wẽnnaam sẽn pʋg bãmb ne zoodã, b pẽg-ba, b wẽnd-makr dãmba yĩnga. Sɩda, kokor sẽn da kʋɩ zãng paama koom tɩ pʋg sẽn da ya vɩʋʋg rɩ n tɩge. B ra yõga kẽere n balg bãnga la b gãneg-b ne lik bi-bees roogẽ. B ra tõdga Yĩngr Pãng-Soaba noore, b ra pa yɛɛsd ne Wẽnd sẽn gɩdg bũmb ning ye. Wẽnd kɩtame tɩ b yãend toogo, la b zãag-b-la ne yolsda. Woto b nimbãanega pʋgẽ b tees n kosa Wẽnd sõngre la b waa n fãag-b lame. B yiis-b-la b ro-likẽ wã, n kao b wĩ. Bɩ b pʋʋs Wẽnd bark b maan-neera yĩnga, b pʋʋs barka b sẽn maan bõn-bãn ninsaal yĩnga. Sɩda b kao kut kʋɩlense ne b bãn-sogdse. Neb kẽer vɩɩma meng sẽn ya yoogã n da wilgd tɩ b zuta ra menemame. Rɩɩb menga yamleoog ra ka le tar b ye, bãmb ne Kũum zak noore: nif la yõore. B le yika b yɩɩra pʋgẽ n kelem Wẽnde, la Wẽnd waa n fãag-b lame. Wẽnd sẽn yiis b koɛɛga, B tool-b-la fãagre, n zãag-b ne yaooga. Bɩ b kils Wẽnnaam sẽn ket n pʋgd-b ne nonglma, b pẽg-b bõn-bãna sẽn maan ninsaalba yĩnga. B kʋ pẽgr maando la b kils b tʋʋm sõma wã ne sũ-noogo. Sẽn togd b sor ne koom-kogendo tɩ b tʋʋma fãa tʋmd kooma zugu, bãmb fãa yãenda sẽn maane, b yãenda bõn-bãna sẽn maan mogrẽ. Wẽnd sẽn gome la sobg sẽn kaooge, sobg sẽn na n zẽk ko-wiisi, tɩ kogenda rãmb na n zẽkd n kuiis yĩngri la b lɛɛgd n sigd bʋg-tẽnga, tɩ b sũur yaanẽ, tɩ yaa wala b na n wʋba b yãado. B sigdame la b rʋʋda, n lebd goabga n lebd rɩtgo wa rã-yũudba, la ya wa b zɩɩ n dugs koglg ye. B sẽn yik b yɩɩra pʋgẽ n kelem Wẽnde, b yols-b-la ne rabeem buud fãa. Sobga sẽn kaooga ne ko-wiisa sigsame, tɩ neba sũur na n yɩ noogo, tɩ b na n paam n yals b sẽn da rat zĩig ningã. Bɩ b kils Soaala sẽn ket n pʋgd-b ne b nonglma, b pẽgb ba, b sẽn maan bõn-bãn ninsaalba yĩnga, b pẽgb-b buuda sʋka, nin-kẽemsa tigsg zĩigẽ. B tõeeme tɩ kʋɩlsa nao lebg zĩ-peen-daase, tɩ kooma sẽn be zĩig ninga wa lebg ko-yũud tẽnga, tɩ kooda sẽn sakd zĩig ninga wa lebg lɛɛlga, tẽnga rãmb wẽnema yĩnga. B tõeeme tɩ we-raooga lebg ko-ralem, tɩ koom sẽn ka be zĩig ninga lebg ko-bundem zĩiga, al tɩ kom sẽn tar b rãmba na n wa kẽ n me tẽn-sõngo. B na n bʋda pʋto, n sel bugsuntundu, la b na n tõsa biisi. B na n paama Wẽnd barka, n wek balbo. Bãmb ne b rũmsi. Neb kẽer me beeme tɩ b sõora tar woogr n dabda tɩ b paoonga tar woogr n dabda n bas-b ne zu-beed la toogo. Wẽnd basdame tɩ na-komsa yãe paoore, tɩ b rɩk so-yoog n tees n menem. B yaool n kogenda naong soaba a naonga pʋgẽ; a zaka pita ne neba, wala a wuba sẽn pit ne rũmsi. Nin-tɩrsa yãeta rẽ n noog b sũuri, tɩ zelem goalma ka tõe n leok bũmb ye. Sẽn tar-a yam sẽn weke na n gesa ne yam, la a na bãng tɩ sõmblem bal n pid Soaalã. A Daviid yɩɩlle. Y pids-m-la ne sũ-keelem, Soaala, tɩ m na n yɩɩlle la m pẽg-y ne m sũura pãng tɛka. La yãmb me bee yɛ, m ruudg la m kʋnde, tɩ m maan noogo n nek sõore? M na n pʋʋs-y-la barka, kʋʋnga sʋka m dat n pẽg-y-la bu-zẽmba sʋka, Soaala. Y nonglma tãoome n kul sagãna y pʋlenga kõn vaala le yaa vẽeneg ne neb fãa. Soaala, zẽk y yʋʋrã t'a kul yĩngri, tɩ y ziira reeg tẽngã n yãmbe! Bɩ y modg n leok-do la y rɩtga me maan bũmbu n fãag y sẽn nong b rãmbã. Wẽnd zĩnda b roogẽ wã n leoke: Maam n maand raoodo. M maanda ne Sikɛm wa m sẽn date, m pasda Sukot vẽenem. M Soo Galaad, n so Manase, a Efrayim la m dɩk n fõgne m zugu wa zug-peoogo, a Zɩɩda n ya m naam dasaare. A Moab yaa m la-zulunga, yẽ pʋgẽ la m pegd m menga. A Edom yaa m soolem, rẽ ka be no-koeemd ye. Filisti poorẽ, m kaasa m sũ-noog kaasgo. Ãnda n na n sõng-m tɩ m paam n ta tãnsoben-dooga pʋga? Ãnda n na n sõng-m tɩ m ta Edom? Sã n ka yãmba, Soaala? La yãmb yaool n basa tõndo n pa le yãagd d tãb-biisa zabrẽ ye. Wa-y n sõng-y-d ne d bɛyã tɩ laong ka yaagd laong bugmẽ ye. Wẽnd sã n be sʋka d na maan daoodo tɩ yaa bãmb n na n tab d bɛɛba gilli. Yɩɩlla bee yɩɩla naab sebrẽ. A Daviid yɩɩlle. Yãmb la m pẽgda Soaala. Bõe tɩ y ya sɩɩ n ka leokdẽ? M bɛɛba yaaga b noor n dat n wãb-ma, b yaaga b noor n dat n tudg-ma, b zelemda yiisa goam sẽn pa sɩd ye, b gomame n wilg tɩ b kis-m lame, b zabda ne-ma la m ka tar b zabra võor ye. B yao-la m zooda ne wɩdse dẽ la m tar y sɛɛga. M maan-b-la neere la b lebs-m-la wẽnga, mam nonga bãmba tɩ b lɛɛg n kis maam. Ad-b sẽn gomd m poorẽ: «D bao yelle n dogl a zugu, n bao kaset soab n zĩndg a rɩtgo. Sõng-y tɩ b paalg-a bʋʋdo. Bɩ a kosga ra yɩ bũmb y sẽn na n sak kelgr ye. Kɩt-y t'a yõor lebg koɛɛga, tɩ ned a to led a zĩiga, t'a kamb lebg kɩɩb-bi, t'a pag lebg pʋg-kõore, t'a kamb lebg gõaadba la bõs rãmba, tɩ b rig-b n yiis b raboodẽ, tɩ bobl-wẽng soab wa loog ne a paoong fãa, tɩ sãamb wa loog ne a sẽn tar fãa, t'a ra le yãend pʋ-peen-ned a sɛɛgẽ ye, tɩ ned da yãb a kɩɩbsa ye, tɩ b menes a yagensa fãa gilli, tɩ yʋʋm a wãn pʋgẽ bɩ a yʋʋr menem moogo, tɩ b le tẽegd Wẽnde a ba la a saamb dãmb yel-wẽna, t'a ma beegr ra tol n paam sugr ye! Bɩ b wẽnema fãa pa Wẽnd pʋtẽerẽ, tɩ b yʋʋr yẽes tẽng zugu! Ad-y nin-kãnga pa tol n bao n na n vɩɩnd ne pʋ-peelem ye. A namsa naong soaba, a pʋga nimbãan neda, a pʋgame n na n kʋ ned yam sẽn yi vɩɩm zãnga. A sẽn da nong n kãab beedã, bɩ a kãab beeda lɛɛg n lʋɩ a zugu. A sẽn pa tʋlg n kãab noogã, bɩ kãab beed pa ne-a. A sẽn dat beedã bɩ beeda lebg a ko-yũudem a bʋk a yĩnga wa ka-zɛɛdem. A pil-a wa fu goabga a mobg-a wa sẽbdga.» Yaa woto la m kaset zirẽ dãmba maanda, yaa woto la b rõt-m Wẽnd taoore. La yãmba, m Soaala-Wẽnnaam, maan-y ne maam wala y sẽn sɩng n maandẽ, y nonglma n tat m yam, fãag-y-ma. M yaa naong soaba la nimbãan neda, m sũura võoga m pʋgẽ. M yõbgda bilf bilfu wa lika; b pĩngd-m-la wa zõ-ralle. M no-loeera sɛ-la m pãng zãnga, m faagame tɩ rɩɩb ka le kẽed m noorẽ ye. B sã n laad ned fãa, yaa mam bala, b sã n yãend-m fãa, b girda b zutu. Wa-y n sõng-y-ma, Soaala-Wẽnde! Y sẽn nong-ma bɩ y fãag-ma. Bɩ neba fãa bãng, Soaala, tɩ yãmb n maan woto m yĩnga. Bãmb kãabd beed me, yãmb dẽnd yaa noogo. B sã n baood zabr ne maam b na n lebga b bɛɛb laado, tɩ y yamba sũur lɛɛg n tosd kaam. Sã n ya sẽn dõt-b maama, bɩ paoor lebg b fu taoko, bɩ b yeelg yãnde n vuud-a wa kobre. M dat n pẽga Soaala ne m koɛɛg pãng tɛka. M dat n pẽg-b-la kʋʋnga sʋka. Bãmb bʋʋdo n yiisd nin-koam yellẽ, bãmb n fãagd-a sẽn dat-b tɩ b kʋ-a wã nugẽ. A Daviid yɩɩlle. Zu-soaba yeela dĩma, m soaala: «Wa-y n zĩnd-y m dɩtgo, tɩ m modg y bɛɛbã n zõneg y taoore tɩ y palgd y nao b poor zugu.» Bɩ Soaala rɩ naam siõ b pãb b bɛɛbã n gilgi. Dũnna y tigimda y tãb-biisã la yaa neb sẽn mi b zab-teed zãab n yãagd-y. Ad-b sẽn sigd tãn-sõngã, ad kom-bɩɩba sẽn sigd wa tõd-beoog meenem. Soaala wẽename la b kõn lebs b zelemd ye: «Yãmb yaa maan-kʋʋd daar fãa yĩnga, wala a Melkisedɛk maan-kʋʋra sẽn date.» Soaala be-la y sɛɛgẽ. B sũ-puura raare b fẽta dĩm dãmba, b kaooda bu-zẽmba bʋʋdo, tɩ b bãg-faasa fãa na n pid ne kũum, tɩ nanamsa fãa kõab na n weel zĩig zãnga. Sor zugu dĩma paama kʋɩlg koom n yũ n le yik ne raoodo. Wẽnd soog pẽgre! M na pẽga Soaala ne m sũur fãa, na n yɩɩ nin-tɩrsa sɛk la b tigung raare. Soaala tʋʋma labsa. B tata wʋsg yam tɩ b baood ne yamleoogo n na n bãng-ba. Wẽnd tʋʋma yãgda ne neerem la b wilgdame tɩ b nonglma ka lebd poorẽ ye. B ratame tɩ b tẽegd b bõn-bãna. Soaala pida ne nonglem la nimbãan-zoeere. B rɩlgda sẽn pʋgd-b bãmba, b kõn bas b kãabg tɩ vaal ye. B wilga b buuda b sẽn tõe n maan fãa b sẽn waa n deeg buud a taab tẽns n kõ-ba. B sẽn maan fãa tũuda ne nonglem la zemsgo, b sẽn wilg tõnd sor ninga la tɩrga, b noyã yalsa daar buud fãa yĩnga la b sẽn yet tɩ d maana yaa sẽn segd la sẽn zemse. B toola b buuda fãagre, buud ning b sẽn tũus n kõ b mengã, buud ning b sẽn kãab b zood daar fãa yĩngã. B yʋʋr yaa sõngo la d tog n zoe-b lame. Yam sõng sẽn tʋɩɩs ne bũmb ninga yaa rabeem Wẽnd taoore. Sẽn maand-b woto la yam zulung rãmba. Wẽnd soog pẽgre, zamaan fãa yĩnga! Wẽnd soog pẽgre! Zu-noog soaba la sẽn zoeta Soaala n deegd b noyã. A buud kɩɩ yẽgna tẽng zugu, la Wẽnd ningda nin-tɩrs buud barka. A zak kõn kong laogo la arzɛk ye, a keld n yɛsa a sõmblem zugu daar fãa. Vẽenem n na n puk likẽ nin-tɩrs yĩnga, tɩ Wẽnd mii zemsgo, n tar nonglem la nimbãan-zoeere. Sẽn kũmd-a a to n pengd a bũmbu maanda neere. A na n gesa a zaka yɛl ne zemsgo. A vigla a meng daar fãa yĩnga, a yʋʋr kõn tol n menem ye. A kõn zoe soy zut gom-yood ye, a teega Soaala t'a sũur kegme, a ka na n zoe bũmb ba a ye; a tõe n yĩgsa a bɛɛba. A paama wʋsg n kõ naong rãmba, a sõmblem na kell n pʋg-a, a zug na kell n zẽke. Nin-wẽng nee-a lame t'a kẽnda t'a sũur puudẽ. A wuka ne beem la a ka le so a meng ye; nin-wẽnsa geels na n paa faado. Wẽnd soog pẽgre! Wẽnd yemse, pẽg-y Soaala, Wẽnd yemse pẽg-y b yʋʋre. Bɩ Wẽnd yʋʋr paam pẽgre marsã la daar fãa! B yʋʋr paam pẽgr wĩntoog pukri n tãag a lʋɩɩse! Wẽnd la bu-zẽmba fãa dĩma, b ziira kula sagãna. Ãnda n wẽnd Soaala tõnd Wẽndã? Bãmb tɩ vigla b naama zaoor al yĩngri. B geta tẽngr-tẽngre, saaga la tẽngã. B roogda tomẽ ka-pãng-soaba, n yiisd naong-soab tãmpʋʋrẽ, n na n tɩ zĩndg-a rĩm biis sʋka, ne bãmb buuda na-komse. Pag ninga sẽn da ka rogdã b baooda zak n kõ-a, a lebgda ma sẽn pid ne sũ-noogo. Wẽnd soog pẽgre! A Israyɛl sẽn yi Ezipt, a Zakoob sẽn zãag ne nin-toosã, Zɩɩda tẽn-peelmẽ la b waa n tilg b zag-sõngo la Israyɛl n lebg b pʋɩɩre. Mogra yãee rẽ n kʋɩ tĩiga, tɩ Zʋrdẽ zoe tula. Tãmsa pʋgma b zĩisẽ wa pe-raado, tɩ kunkuba yɩg wa bulli. Bõe tɩ f zoetẽ, mogre? Bõe tɩ f kẽnd tula, Zʋrdẽ kʋɩlga? Tãmse, bõe tɩ y pʋgemd wa pe-raado, bõe tɩ y yɩgd wa bulli, kunkuba? Tẽnga, miim f Soaala taoore, miim a Zakoob Wẽnda taoore, tɩ bãmb yĩnga kʋɩlg pusga kugrẽ, tɩ pĩig tõog n bul koom. Ka tõnd n na n soog pẽgr ye, ayo! Ka tõnd ye, yaa yãmb yʋʋrã, tɩ y nonga tõndo, tɩ y kãabga ka vaanẽ ye. Yaa bõe tɩ bu-zẽmba gomda: «A Israyɛl Wẽnnaama bɛɛ?» Tõnd Wẽnda zao yĩngri, b maanda b sẽn dat fãa. Sã n ya bu-zẽmbã, b wẽnd dãmba yaa wanzurf la sãnem, fãa yaa ninsaal nug tʋʋmde. B tara noore la b pa gomd ye, n tar nini la b pa ne ye. B tara tʋba la b pa wʋmd ye, n tar yõore la b pa kokd yũug ye. B tara nusi la b ka tõe n sɩɩs bũmb ye, b tara nao la b pa lukd b zĩigẽ ye, gomd buud ka yit b kokorẽ ye. Bãmb ne sẽn naan b bãmba zem taaba, bãmb ne sẽn teeg-b bãmba pa são to ye! Israyɛl kamba teeg-y Soaala, bãmb la y sõangda la y gãongo. Aarõ roogo, teeg-y Soaala, bãmb la y sõangda la y gãongo. Yãmb fãa sẽn zoet Soaala, teeg-y bãmba, bãmb la y sõangda la y gãongo! Wẽnd ket n tẽra y yelle, b na ning-y barka, b na ning a Israyɛl buud barka, n ning a Aarõ buud barka. B na ning Wẽnd kẽed-paalsa barka, nin-bõoneg wala nin-bɛda! Bɩ Wẽnd paas y kamb sõore, n paas y yagensa me sõore! Bɩ Wẽnd ning-y barka, bãmb n naan yĩngr la tẽnga. Yĩngrã Wẽnd bas-a-la b meng yĩnga, la b rɩka tẽngã n kõ ninsaalba. Ka sẽn ki-ba n pẽgd Wẽnd ye, bãmb sigda noor kõn le tõog n yaag zĩigẽ. Sã n ya tõndo, tõnd kilsda bãmba marsã la wakat buud fãa. Wẽnd soog pẽgre! M nonga Soaala tɩ m sã n bool-ba, b wʋmdame. B teesame n kelg-ma, la yaa m vɩɩma tõre la m na n bool-ba. Kũum gadra waa n za-m lame, wĩ niyns sẽn tat n digd bʋg-tẽnga waa n sẽbd-m lame, m da zĩi ne toog la yɩɩre, tɩ m pʋd Soaala yʋʋre; m yeelame: «Soaala, fãag-y-ma!» Soaala pida ne nonglem la zemsgo. Tõnd Wẽnda pida ne nimbãan-zoeere. Wẽnd nonga neb sẽn ka tar wilg-m-menga. M da yaa nin-koama la b fãag-m lame. Zĩnd ne laafi, m ned sõngo, tɩ Wẽnd maan-f-la neere. Y fãag-m la kũum nugẽ, Soaala, y zãaga m nini ne nintãm, n tɩlg m nao ne lʋɩɩse, tɩ m paam n kẽn Soaala taoore nin-vɩɩs tẽngẽ. Ba m sẽn waa n gomd tɩ m yaa nimbãan-neda, m da ket n teega Wẽnde. M waa n ka mi m sẽn gomd n lebdẽ n maandẽ tɩ neba fãa yaa zirẽ-be-rãmba. M yɩta a wãn n lebs Wẽnde neer ning b sẽn maan maama? M na n zẽka m bark pʋʋsg kũuni, n tees-ba, la m na n pʋda Soaala yʋʋre. M na n pidsa m sẽn kãab Soaala fãa, buuda sẽn tigimd taaba zĩigẽ. Bũmb sẽn ka noom Wẽnde yaa kũuma sẽn loogd ne b kambã. Woto m sẽn ya y yamba yĩnga, Soaala, m sẽn ya y yem-poaka biiga, y looda m wĩ. M na n kõ-y-la pẽgr maoongo la m na n pʋda y yʋʋre. M na n pidsa m sẽn kãab Soaala fãa buuda fãa gill taoore. Na n yɩ-la y sɩmannẽ Zerizalɛɛm tẽnsʋka! Wẽnd soog pẽgre! Y fãa gill pẽg Soaala, Adem biisa gilli kils-y-ba. Wẽnd sẽn pʋgd tõnd ne nonglem ninga zʋʋga tõnd sẽn tõe n tagse, la b kãabga na n pidsa zamaan ne zamaana. Wẽnd soog pẽgre! D kils Soaala tɩ b pida ne sõmblem, la b nonglma ka be sɛɛb ye. A Israyɛl le yeel n paase: B nonglma ka be sɛɛb ye! A Aarõ rooga le yeele: B nonglma ka be sɛɛb ye. Sẽn zoet-b Soaala le togse: B nonglma ka be sɛɛb ye! Tãb-biisa sẽn waa n gũbg maam, m boola Soaala la b leok-m lame, n fãag-ma. Soaala bee m poorẽ, rabeem sɛɛme. Bõe la ninsaal tõe n le maan-ma? Soaala be-la m poorẽ n na n sõng-ma la m yĩgsda m bɛɛba. Teeg Wẽnd sãoo teeg ninsaala. Teeg Soaala sãoo teeg rĩm biisi. Bu-zẽmba gill da gũbg-m lame, la Soaala yʋʋr yĩnga, m sẽeg-b lame. B gũbg-m lame, n gũbg-ma, la Soaala yʋʋr yĩnga, m wes-b-la wa raado. B gũbg-m-la wa kãnenkãase la b wẽneg n kii wa gõaag-tuug bugum, Soaala yʋʋr yĩnga, m da pʋgd n pãbd-b lame. B tus-m lame n na n lubi la Soaala kok-m lame. Bãmb n kõ-m pãnga, bãmb n tãs m zabr tãsga. Bãmb yĩng la m maan raoodo. Nin-sõma rot pida ne sũ-noogo, b sẽn paam fãagra sũ-noogo, n gomda: «Soaala zẽka b ritgã n zabe la bãmb n tõoge. Wẽnd zẽka b nug rɩtgo la b rɩtg tʋma a tʋʋma.» Ayey! M kõn ki ye, m na n vɩɩndame la yaa Wẽnd tʋʋma la m na kilsi. Sɩbgre, Wẽnd sɩbg-m lame la b pa bas-m ne kũum ye. Nin-sõma sẽn tũud noor ning n tat yãmbã, pak-y no-kãnga tɩ m kẽ n kaas m Soaalã. Soaala roog noor pakame, bɩ nin-sõma wã loog n kẽ! M pẽgd-y lame tɩ y leok-m lame la yãmb maasmẽ m maana raoodo. Kugr ninga tãn-metba sẽn da bas kɛɛngã kug kãng la b rɩk yã n wa ne rooga pãng la a neerem. Dẽ yaa Wẽnd tʋʋmde la yaa tʋʋmd bãnde. D pẽg raara Wẽnd sẽn kõ tõndã. A pids-du ne sũ-noog la langre. Soaala, sõng-y-d tɩ d tõog d bɛɛba. Sõng-y-d tɩ d maan daoodo! Sẽn wat-a Soaala yʋʋr yĩnga paam pẽgre! Yaa Soaala roogẽ la d be n pẽgd-ba. Soaala yaa Wẽnde, bãmb n kõ-d vẽenem. D kaoog willi n zã d nugẽ n sɩng gilgri, d gilg n ta maan-kugra menga. Yãmb la m Wẽnde tɩ m kilsd-y. Yãmb la m Wẽnde tɩ m zẽkd y yʋʋre. D kils Soaala tɩ b pida ne sõmblem la b nonglma ka be sɛɛb ye! Zu-noog soaba la nin-tɩrga sẽn deegd-a Soaala noore. Sẽn tũud-a b sẽn yalse, n sakd noora zãnga. Yẽ soab n vɩ wa Soaala sẽn date n ka maand wẽng ye. Soaala n yiis b noore la d tog n tũ-a-la neere. Sõng-y-m-tɩ m kẽn tɩrga, sõng-y-m tɩ m wɩng n tũ zãnga, woto m kõn kong m sẽn datã, m sã n modg n tũ-ba a yeyn-ye. M na pẽg-y ne m sũur fãa. M miime tɩ y sẽn yals fãa yaa sõmbo. M na modg n deeg y noorã, la bɩ yãmb me keng m daoodo. Bi-bɩɩg rat t'a kẽnd yɩ tɩrga bɩ a reeg Soaala noor. M data ne m sũur fãa n tũ y raabo, da bas-y-m tɩ m bʋdg ye. M sã n kẽnd n ka yĩmd y saglsã m kõn tol n beeg-y ye. Y barka, Soaala, tɩ y wilg-m-la y raabo. M zĩi n sõta m yamẽ y sẽn gɩdg bũmb ning fãa. Y noora reegr pids-m-la ne sũ-noogo, yaa arzɛk kẽeng la m paam yã. M na n zĩnd n bilga y raabo n tɩg sor ning y sẽn tuk m yĩnga. Y noora tũudem la m sũ-noogo, m kõn yĩm y gomda ye. Maan-y neer ne y yambã tɩ m le yik n tũ y sẽn togse. Ypk-y m nina tɩ m yãend neere, m yãend y noora sẽn pid ne bõn-sõma niynsã. M yaa sãan tẽng zug ka, da solg-y maam y noya ye. Bɩ m yam kẽ y sẽn yalsã la y sẽn yet tɩ m maan fãa. Y kãabda y sɩbgr tɩtaam dãmba la b fãa na n kẽe moogo. M sẽn tũud y noora zãngã bɩ y ra bas tɩ b wa la-ma la b sãbs-m ye. Rĩm biisa nong bɩ b yik n maan beem ne maam, Wẽnd sẽn yals bũmb ninga la m tũuda, b sẽn gɩdg bũmb ninga la m gɩdg m menga. Y noyã pʋs n noogda m sũuri, bãmb n sõngd-m tɩ m vɩ neere. M faoolame n gãe tomẽ wa-y n vʋʋg-y-ma wa y sẽn kãab-ma. M wilg-y-la m vɩɩma sẽn yɩ a soaba n dat leokre la y leok-m lame. Kell-y n wilg-y maam y raabo. Wilg-y maam y sẽn gɩdg bũmb kẽera võore, sõng-y tɩ m bilg fãa m yamẽ. M sũur sãamame tɩ m tar yãbre, keng-y m vɩɩma wa y sẽn kãabe. Zãag-y-m ne zirẽ-beedo, paalg-y maam y noora pʋgẽ. M deegame tɩ m tog n tũ-la y noya. M na tũ y sẽn yalse. M saka y sẽn date, Soaala, bɩ m da yãend paoogr ye. M tũuda y noya faasg-faasga, tɩ m yama tar yẽegre n dabda. Wilg-y maam y sẽn gɩdgã tɩ m gɩdg m menga la m vɩɩnde. Wilg-y maam y raaba neere tɩ m na pids-a ne m sũuri. Wilg-y maam y sẽn date, tɩ m nonga y sẽn nonge. Pa sẽn noom maama n so taoor ye, yaa sẽn noom yãmba la m sũura pʋgda. M da belg m meng n pʋg yell yaals ye, sõng-y tɩ m vɩɩnd y noora pʋga. Pids-y y kãabgo y yamba yĩnga, tɩ neba na rig y rabeem. Y sẽn yalsa noom-m lame, zãag-y-m bal ne bɛɛba tʋʋre. M sẽn nong y sẽn kõ-m noy-niynsã, bɩ m paam y sõmblema n tõog n vɩɩnde. Kõ-y maam y nonglem kõ-y maam y fãagrã wala y sẽn kãabe. M na tõog n leok sẽn tʋʋsd-b maama la m leokra na n tũu yãmb dẽnna. M noora ra yiis bũmb a to tɩ ka yãmb sẽn togs ye, tɩ m tara y kãabga saagre. M na n tũ y noorã n ka vʋʋs ye dũnna la beoogo. M na n kẽna faasg-faasga, tɩ m tũuda y sẽn wilgi. Dĩm dãmb taoore m na goma y noora sẽn gɩdge, la m kõn paam yãnd ye. Yãmb daaba maneg n pids-m-la ne sũ-noogo, sɩda m nong-y lame. M kokda y sẽn yiis noor ning fãa tɩ m yama kẽ-b la zãnga. Tẽeg-y y sẽn yeel y yambã, tɩ gomd kãng n wa ne m saagre. M sã n zĩ ne toogo, yaa yãmb nengẽ la m paamd belsgo, yãmb noya n le yãngd m vɩɩma. Wilg-m-meng rãmba yik n laada maam, la m yaool n ka bʋdg ye. M tẽra y sẽn yals al daar zãra la yãmb daaba pidsgu n wat ne m sũ-noogo. M sũur yikda nin-wẽnsa taoore, la yaa b sẽn bas y sorã. Yãmb noya n lebg m yɩɩl tɩ m zodgdẽ, m pa-weera tẽngẽ. Yʋngo m tẽegda y yelle, Soaala, m kotame n tũ y noya. Tʋʋmd a ye bal la m kõ m menga: yaa y noora reegre. M wilga yãmb m zu-noog pʋɩɩra sẽn yaa a soaba, ya m tũ y noora bala. M gũuda ne m sũur fãa tɩ y tees maam y nenga, m tẽed tɩ y na maan sugr wa y sẽn kãabã. M gesa m sẽn tũud sor ningã, m kõn sak n kẽn n zãag ne y noya ye. M kẽna ne yãgbo, m ka vʋʋs ye, la yaa y sora bala la m dɩk yã. Nin-wẽnsa yõk-m-la b bẽdgẽ la ad-y b pa tõog tɩ m yĩm y noora ye. Y sẽn yalsa yaa sõmbo tɩ m yikd ne yʋngo n pʋʋsd-y barka. M yõga zood ne neb niyns fãa sẽn zoet b yãmbã, n deegd y noya. Dũni wã gill pida ne y nonglma kaseto, wilg-y maam y raabo. M sũ-nooga sɩd yi-la y nengẽ wala y sẽn da kãab-ma, Soaala. Wilg-y maam tɩ m bãng y sẽn yalsã n maneg n pẽge. M sẽn waa n nan ka wʋm toogo m da bʋta moogo, marsã ya y sora bal la m tũuda. Soaala pida ne nonglem n maand-m neere, wilg-y maam y noya. Wilg-m-meng rãmb n yiki n sãam m yʋʋr ne b rõadga, m yaool n tũuda sora ne m sũur fãa. Nin-wẽnsa sũur gũsa wa kaam; sã n ya maam, y raaba pidsgu n wat ne m sũ-noogo. M sẽn dɩ tooga waa ne m nafre, tɩ m zĩnd n vɛɛsa y noorã. Sagls niyns y sẽn yiis y noorẽ wã, m pẽgd-b lame n yɩɩd sãnem la wanzurfu. Yãmb nusã n yag maam n zĩndgi. Kõ-y-m yam tɩ m zãms y sẽn dat ne maam. Sẽn zoet-b yãmba sã n yãend maam b sũur yaa noogo; b neeme tɩ ya yãmb bal la m teeg yã. M deegame, Soaala, tɩ y sẽn yalsa yaa sõmbo, y talla bʋʋm y sẽn waa n bas tɩ bɛɛba laad-m. Bɩ y pʋlenga sẽn ka vaanda bʋk m sũuri, tɩ boto la y rat m yĩnga. Bɩ y kũm m nimbãanega la y sõng tɩ y noora paalg-ma vɩɩm sõnga so-raoogẽ. Bɩ sẽn dõd-b maam zirẽ-beeda loog ne yãnde, Soaala nee m sẽn bʋgsd b noora seem ninga. Sẽn zoet-b yãmba lɛɛg n wa m nengẽ tɩ m zãms-b yãmb daabã. Mam me na modg n deeg y noya neere n da wa paam yãnd ye. M zĩndame n kaoos n gũud y fãagre, ad-y m da saagda y kãabgã. M nina waa n yiigdame tɩ m ket n vɛɛsd y noya. Dẽ me la m sokda: «Y na n wa bʋka m sũur da-bʋre?» M waa n lebga wa ko-waoog sẽn kʋɩ n weglme, ne rẽ fãa m pa yĩm y noya ye. Ya rasma a wãn yɛs la m na n le gũ? Da-bʋr la y na n yik n wɩbg m bɛɛbã? Wilg-m-meng rãmb n kɩɩs y noorã n yik n bẽd b bẽdgo. Y noya fãa pid n daanda ne nonglem. Sõng-y-ma tɩ neb n pʋgd-m ne raab wẽnga. M yɛɛ zãnga, b lub-m lame la bala, la m ka zãgs y sora tũudem ye. Y nonglma sẽn ka be sɛɛba yĩnga, wa-y n vʋʋg-y-ma tɩ m na tũ y noor sẽn togse. Soaala, y noora la m wĩndga t'a zao yĩngri n vẽnegd-m. Y nonglma pʋgd-d-la zamaan ne zamaana; wala y sẽn vigl tẽngã, y nonglma me vigla boto. Bũmb fãa yɛsa a zĩigẽ wa y sẽn tʋlge; dũni wã yaa yãmb sõgne. Y noora sã n da ka pids-m ne sũ-noogo, pɛt n da na n kʋẽ maam. M kõn yĩm y noya abada tɩ bãmb n tong m yõore. M yaa yãmb soolem, fãag-y-ma, y sora la m bao yã. Nin-wẽnsa tẽeme tɩ b na n kẽes-m-la moogo, m tara gũusgu ne y sẽn wilgi. M yãee bõn-sõng fãa ne a sõmblem tɛka, yãmb noora sõmblem tɛk bal la m pa yãende tɩ yẽ la a sõmblem ka tar tɛka. Ad-y m nonga y noora wʋsgo, m bilgd-a-la m yamẽ beoog sẽn vẽege. Y noora la m paoong wa fãa fãa, tɩ m pẽgda, a kõ-m-la yam n yɩɩg m bɛɛba. M yama zulgame n yɩɩd m karen-saam-dãmba, la rẽ yaa m sẽn zĩnd n bʋgs y noorã m yamẽ. M mii yɛla welgre n yɩɩd nin-kẽemsã tɩ m deega y noya fãa. M pa saag n dɩk wẽng sor ba a ye, sẽn na n yɩlẽ n tũ y raabo. M pa zãgs y sẽn yalsa ye, tɩ yãmb n yɩ m karen-saamba. Y noya nooma m noorẽ, a noomame n yɩɩd sɩɩdo. Y gomda yĩnga m tara yell ne a võore, la m kisa zirẽ-beeda soya. Y gomda yaa vẽenem m nao-kẽndr yĩnga, a yaa vẽenem sẽn vẽnegd m sore. M wẽename la m kõn lebs m noor ye, tɩ m na n tũ-la y sẽn wilg ne y zemsgo. M pãnga sɛɛ zãnga, Soaala, bɩ y gomda le wa vʋʋg-ma. Reeg-y yã, Soaala, m pʋʋsgo, wilg-y maam y sẽn date. Da tõe n tũla m yõor yãkre la ne rẽ fãa m pa bas y sora tũudem ye. Nin-wẽns n bẽd b bẽdgo, b pa yõk-ma tɩ m pa zãag ne y sora ye. Y noya sẽn kõ-m bãngr ninga la m buud pʋɩɩre. M sũur yaa noogo. M modgdame n na n deeg y noore. Be la m dolb na n yi. M pa rat n be zĩis a yi wa kazukemd ye, y noora bal la m nonga. Yãmb la m soondg zĩiga la m gãongo, m saagda y kãabgã. Nin-wẽnse, da pʋg-y-m ye, yaa m Wẽnda noor la m dat n tũ. Wala y sẽn yiis y noorẽ, Soaala, yɩɩ-y m teegda tɩ m na vɩɩnde. M da gũ sõngrã n kong ye. Teel-y-ma tɩ m na põse la m kõn yĩm y saglsa ye. Yãmb basa sẽn da bʋdg-ba n kẽed moogã, tɩ b manesma fãa ra yaa tuud taaba. Noora nonglem n be yõodo, la nin-wẽnsa sẽn ka nong-a wã, Wẽnd lobda bãmba wa boaag pʋgẽ sagdo. M sã n be yãmb taoore m yĩnga rigda rabeem, m yɛɛsda y sẽn yalsã. M vɩɩma tũu zemsg so-tɩrga. Da bas-y-ma m bɛɛba nusẽ ye. M maanda saagr tɩ m na yãend sũ-noogo, tɩ wilg-m-meng rãmba kõn wõd-m ye. M yiiga m nin n gũ y fãagre, la sõmblem sore m sẽn na n dɩke. Maan-y ne y yamba wala y nonglma sẽn sede, zãms-y maam y raabã. M ya-la y yamba, puk-y m yama zãnga tɩ m na bãng y noya gilli. Soaala, y yaa n tog n maana bũmbu tɩ neba tõdga y noorã. Bãng-y tɩ m nonga y noorã, m nong-a lame n yɩɩd sãnem sẽn yɩlge. M deegame tɩ fãa zemsa noora pʋgẽ la m kisa zirẽ-beeda soya. Y sẽn yalsa yaa sõmbo, dẽ me la m tũud bãmba. Sẽn wʋm-a y sẽn togsa fãa paamda vẽnegre, yam bõonesa rãmb fãa yam wekdame. M yaaga m noor n gũud n na vel-ba tɩ m nong-b-la fãa. Wẽnemd-y n tees-ma la y maan m sugri, tɩ woto la y maand ne sẽn nong-b yãmb yʋʋrã. Y gomda wa paas m karsa keglem, da bas-y tɩ wẽng buud tõog-m ye. Fãag-y-m ne ninsaalba wẽoogre, tɩ m na reeg y noya. Bɩ y yamba paam tɩ y nenga vẽenem tʋʋs-a, tɩ m tũ rẽ n bãng y raabã. Ad-y m nintãm dʋʋgdame m sẽn ne tɩ b pa tũud y noorã. Soaala, yãmb pida ne zemsgo, la y sẽn yet tɩ b maan fãa yaa sõmbo. Y kõ-d-la noore la y tũ-la y sõmblema la y kãabga sẽn ka vaandã. M sũura puuda wʋsgo m sã n ne tɩ m bɛɛba yĩmda y saglsã. Bũmb ka kalem y noorã n pa zems ye, la yaa rẽ me la y yamba nong-a. Ba m sẽn waa n ka pãnga tɩ b pa nand-ma, m ka yĩm y noya reegr ye. Y sẽn yals bũmb ningã, y yals-a-la daar fãa yĩnga la y noora tũuda sɩda. M sega yɩɩre la sũ-beedo, la y noora pids-m-la ne sũ-noogo. Y tũ-la y sõmblema sẽn ka teemna n na n gome bɩ y puk m yama zãnga tɩ m na vɩɩnde. M bool-y-la ne m pãng fãa, Soaala, leok-y-ma! M na maan y sẽn date. M bool-y lame, fãag-y-ma, m na tũ y noorã. M bool-y-la tõd-beoogo tɩ m saagda y kãabgã. M nekame tɩ beoog nan ka vẽeg ye, la yaa sẽn na tõog n bʋgs y goama. Tũ-y y nonglma n kelg m koɛɛga, sõng-y tɩ m vɩɩnd wa y sẽn yalsã. Ad-y b watame, neb niyns sẽn namsd m vɩɩma la sẽn kẽnd n zãagd ne yãmb noorã. Yãmb yẽ pẽeme, Soaala, la y sẽn wilga fãa yaa sɩd bala. M mii al daar zãra tɩ y sẽn yals y noya yaa yʋʋm sẽn ka be sɛɛb yĩnga. Ges-y m pɛta, fãag-y-ma, ad-y m pa yĩm y noora ye. Bʋ-y m bʋʋdã n kõ-ma, Gom-y n le nek m vɩɩma. Nin-wẽnsa zãr ne fãagre, tɩ b pa bao n na n pids y raaba ye. Soaala, y nimbãan-zoeera labsa, wa-y n vʋʋg-y-ma tɩ rẽ la y kãab-m. Ad-y m bɛɛba waooga, sẽn tar-b maam n namsdẽ wã labsa, ne rẽ fãa, m pa bʋdg sor ye. M yãenda zirẽ-be-rãmba la m sũur puugame tɩ b pa tũ y noora ye. Ges-y m sẽn nong y noya to-to sõng-y tɩ m vɩɩnd wala y sẽn kãab-m. Y gomd fãa tʋɩ-la a gãag, sɩd zugu; y sẽn yals yaa daar buud fãa yĩnga. Rĩm biisi n yik n namsd-m tɩ m ka wʋmd a võor ye. B bãng tɩ m sẽn zoet yaa yãmb bala. Wala ned sẽn paam laog n wʋk t'a sũur ya noogo, woto la y noora noogd m sũuri. M sẽn kis wa fãa-fãa ya zirẽ-beedo, m sẽn nong yaa y noorã. Beoog sẽn vẽeg fãa, m pẽg-y-la naoor a yopoe, y noy-sõma wã yĩnga. Sẽn nong-b yãmb noora zĩi ne laafi, gɩdgr ka le ket b yĩng ye. Soaala, yaa yãmb nengẽ la m gũ m fãagre. M tũ-la y noya fãa. M deega y saglsã, m sɩd nong-b lame. M maana y sẽn date, m zãgsa y sẽn kisi, m sẽn tũ soy niynsa fãa rɩga y taoore. Bɩ m kɛlenga sãd n ta yãmba, Soaala wek-y m yama n kõ-ma wa y sẽn kãabe. Bɩ m kosga lʋɩ y tʋbrẽ fãag-y-ma wala y sẽn kãabe. Bɩ m nora sɩng y kilsgu tɩ yãmb la m karen-saamba. Bɩ m zelemda yɩɩl y noya tɩ y noya fãa wata ne sõmblem. Bɩ y rɩtga wa sõng-ma, yaa y noora la m dat n tũ. Yaa yãmb fãagra la m bõsda, Soaala, y noora noogda m sũuri. Sõng-y tɩ m vɩɩnd y pẽgra yĩnga, Sõng-y-m ne y noya reegre. M saada zĩis fãa wa pe-yãang sẽn meneme, bao-y y yamba t'a ka yĩm y noora ye. Gilgra kẽna yɩɩla. M sẽn waa n ka mi m sẽn lebdẽ, m boola Soaala la b leok-m lame. M da yeel-b-la woto: «Fãag-y maam ne zirẽ-be-neba, fãag-y maam ne zelem goalma.» Sɩbgr bʋg la y tog ne, noor kõn-togs-sɩd dãmba? M na n tool-y-la zabr pɛɛm, pɛɛm sẽn kud noɛɛk bug-saalẽ. M zĩi ne bʋk sẽn pid bʋko tɩ m kong n tɩ tii m zaka nin-toos sʋka neb sẽn ka yãe wubr sʋka. M kaoosa tẽng zug tɩ looge, ne neb sẽn kis laafi. Mam nengẽ yaa laafi bal la m baooda, la yaa zabra bal la bãmb pʋgda. Gilgra kẽna yɩɩla. M teesa tãmsã n getẽ: sãnd m fãagra kõn yi be sẽnẽ, sãnd Soaala, yĩngr la tẽng Naanda, kõn tall-a n wa kõ-ma. Bɩ m gũuda ra suus ye, b ra bas tɩ salg koomd m naoor ye. Ayo, a Israyɛl gũuda pa suusdi, a pa gõe ye! Soaala na n pa-la f sɛɛgẽ n gũ-fu, n zĩndig foom b rɩtgo, bãmb maasmẽ. Wĩntoogo, wĩndg kõ zab-f ye, la kiuug me kõn tak yell f zug, yʋng ye. Soaala na n wogla f yõore, b na n zãag-f-la ne wẽng buud fãa. Bãmb n na n gũ f yiib la f kõom, marsã la wakat buud fãa. A Daviid yɩɩlle. Gilgra kẽn yɩɩla. M sũur kiuusa ne sũ-noogo b sẽn waa n yeel-ma: «D kẽng Soaala zakẽ!» D yaa n paam n ta-la f tẽn-peelmẽ, Zerizalɛɛm. Zerizalɛɛm tẽnga meeb be neere, b zẽka a lalsã n gilgi. Yaa Zerizalɛɛm la Israyɛl kamb wata yaa be la Wẽnd kamba kẽeda. B wata wa noora sẽn yals buuda yĩnga, n na n pẽg b Soaala. Yaa Zerizalɛɛm la a Daviid vigl a naam zaoore, be la a biiga zĩ n kaood bʋʋdo. Kos-y laafi Zerizalɛɛm yĩnga! Bɩ sẽn nong-b Zerizalɛɛm vɩɩnd a pʋgẽ ne laafi. Bɩ laafi zĩnd a pʋgẽ, n zĩnd a ro-neeba pʋsẽ. Laafi la m kot f yĩnga, Zerizalɛɛm. M saam-biisi la m tũud-n-taasa yĩnga, Soaala tõnd Wẽnda rooga yĩnga, yaa laafi bal la m kot f yĩnga, Zerizalɛɛm! Gilgra kẽna yɩɩla. Y naama zaoor vigla yĩngri, Soaala, dẽ la m zẽk m neng n tees yãmba. Wala yem-daoog sẽn get a zu-soaba, wala yem-poak sẽn get a roog-ma, woto me la m doog m neng n get yãmba, la yaa y sõngra la d gũuda, d Soaala la d Wẽnde. D tar y sɛɛga, Soaala, d tar y sɛɛga! D ya n yɛɛ ne d bɛɛba sẽoosgo. D yɛɛ zãnga, d tɩg-b-la fas. Bɛɛba zut na wuk ne yãnde, b tɩtaama na sig zãnga. A Daviid yɩɩlle. Gilgra kẽna yɩɩla. Sã n ka Soaala b ye tãa ãnda n da sõngd tõndo a Israyɛl n gomd woto, Sã n ka Soaala b ye tãa ãnda n da sõngd tõndo neba sẽn da waa n yik ne tõndã? Ad-y b sũura sẽn da fudg fudgr ning ne tõndã, ad-y b velẽ-la tõnd vɩɩse. Ko-wiig n loogẽ ne tõndo, kʋɩl-bɛɛg n dɩẽ tõndo. Ko-fõtma loogẽ la ne tõndo. Bɩ Wẽnd paam barka tɩ b pa sak tɩ d lebg d bɛɛb rɩɩb ye. D paam n fãaga wa luiil sẽn fãag bẽdgẽ. Bẽdga wĩir kaoogame tɩ tõnd paam n põse. Tõnd sõangda yaa Wẽnnaam, bãmb la yĩngr la tẽng naanda. Gilgr kẽna yɩɩla. Neb niyns sẽn teeg-b Wẽnde wẽnda Siõ tãnga sẽn yɛs a zĩ yɛng ne keglem, la daar buud fãa yĩnga. Tãms n gũbg Zerizalɛɛm, Soaala me gũbga b kamba la rẽ yaa sɩd rũnna la beoogo. Na-yook kõn dɩ naam be lɛlɛ, a kõn dɩ naam Wẽnd kamba zug ye, n wa zãms a soolma kamb wẽng ye. Soaala, wilg-y y nonglma ne neb niyns sẽn ya-b sõma la sẽn kẽnd-b tɩrga. Sẽn tũud-b so-wẽnse la sẽn baood-b taab bõne, pĩng-y-ba n yiisi, Soaala. Kõ-y y buud a Israyɛl laafi! Gilgra kẽna yɩɩla. Bũmb sẽn wẽneg zãmsdo d yĩnga, yɩɩ Soaala sẽn lɛɛg n wa Siõ ne pa-wetã. Da lebga sũ-noog la laad bala. Bu-zẽmba mens ra gomdame: «Ad Wẽnd maan-b-la neer wʋsgo!» Wẽnd sɩd maan-d-la neer wʋsgo, la d da pida ne sũ-noogo. Soaala, le tek-y d vɩɩma yɛs n kõ-do, a le pid vugr bala wala Negɛb kʋɩlse. Sẽn da bʋt-a la a yãbd-a kẽebdame la a laadẽ. A ra yita ne bõn-buudu n kẽnd la a yãbda. Ad-a sẽn lebg n wat ne kals paala t'a sũur tosd kaam. A Salomo yɩɩlle. Gilgra kẽna yɩɩla. Soaala sã n ka sɩng rooga meebo, metba na n namsa b mense. Soaala sã n ka gũud tẽngã, gũuba yaa zaalem. Yik pĩnd me yaa zaalem, kʋʋg f gõeem me yaa zaalem, gõe n pa nekdẽ me yaa zaalem, rɩ rɩɩb sẽn ya naong rɩɩb me ka yõod ye. Wẽnd zoa paamda sõngr yɛnga, a gõe bɩ a nek yã. Zak yõod la kamba la Wẽnd dolba la rẽ. Wa tãb-biig sũur sẽn ya noogo a sã n zãad pɛɛma, roagd sũur me nooma boto a sã n ne a sɛɛgẽ kamb niyns a sẽn dog a bi-bɩɩlmẽ. Sẽn paama pɛɛm n pids a loko la zu-noog soaba, tẽnga noorẽ bʋ-kaoodba kõn ning a yãnde a bʋʋd-n-taasa taoor ye. Gilgra kẽna yɩɩla. Zu-noog rãmba la sẽn zoet-b Soaala n tũud b sora neere. Fo sã n dɩt f tʋʋmda yõodo, zu-noog soaba la foom, sũ-noog soab la foom! F pag wẽnda bugsuntung womdga f sẽn sel f zak pʋga. F kamba wẽnda oliviye tɩ poala sẽn tão n gũbg-fu. Yaa woto la Wẽnd barka sigd ned ning fãa sẽn ya-a wẽn-tũuda. Bɩ Soaala zĩnd Siõ do-sõngã n sik b barka, tɩ f paam n yãend Zerizalɛɛm ne a neerma f vɩɩma pʋgẽ, beoog sẽn vẽeg fãa. Wẽnd na kɩt tɩ f yãend f yagense! Wẽnd na zĩndga a Israyɛl ne laafi! Gilgra kẽna yɩɩla. A Israyɛl tõr tõe n kõo kaseto tɩ al m yãadmẽ, neba yika ne maam. Sɩda al m yãadmẽ, b yika ne ma, la b pa tek bũmb m nengẽ ye. Wala koaad pʋʋg sẽn bẽes to-to, b bẽesa m poorã. Bẽesga rɩga wogd-wogdo. Soaala pida ne zemsgo, woto m tõog n kao bɛɛba gada. Bɩ Siõ bɛɛba fãa dɩ yãnde, bɩ b fãa tar n leb poorẽ. B wẽneg bɛoong zug moodo, n pa yãee n bɩ n wẽneg n sʋʋge. Sẽn dʋ-a a roogã n na n wʋr-a kõn pids a nug ye, ka tigsdi n paam kalg ye. Ka wʋrd n paam tɩ b yeele: «Wẽnd ning-y-la barka sõmbo!» Sã n ya tõndo d kotame tɩ Soaala bark sig-y. Gilgra kẽna yɩɩla. M zĩnda al tẽngr-tẽngre n bool yã, Soaala. Kelg-y m sẽn dat bũmb ningã la y reeg m kosgo. Yãmb sã n tẽegd beegrã, ãnda n na n põse? Sugra bee y nengẽ, tɩ fãagr bee y nugẽ. Soaala, m gũud-y-la ne m sũur fãa, m gũuda y leokre. M gũuda y sõngra ne yãgbo, wala zag gũud sẽn gũud beoog vẽegre. M yãgba yɩɩda yẽnd dẽnna. Bɩ Israyɛl teeg Wẽnd tɩ b yaa nin-noanga la b tara rabaar buud fãa n na n fãag-do. Yaa Soaalã n pekd a Israyɛl ne a rẽgda fãa. A Daviid yɩɩlle. Gilgra kẽna yɩɩla. Soaala, m ka mi zẽk-m-meng ye, m pa baood sẽn yɩɩd-m ye, m pa baood m yʋʋr kilsgu, m pa baood sẽn zãr ne m ye. M yõka m sũura tʋlsem n yɛs m zĩ-yɛng, sɩɩ, wa bi-pɛɛlga a ma naoẽ, sẽn ka rat bũmb a to ye. A Israyɛl teega Soaalã, rũnda la beoogo. Gilgra kẽna yɩɩla. Soaala, bɩ y tẽeg a Daviid yelle la a namsga sẽn yɩ a soaba. Yẽnda n pʋlem Wẽnde, n pʋlem a Zakoob Wẽnd-Pãng-Soaba woto: «M kõn saag n kẽ m doogẽ, m kõn dʋ m gãag zugu, m kõn mum m nin ba bilfu, m kõn zuk gõeem, tɩ m ka reng n paam doogo m Soaala yĩng ye, a Zakoob Wẽnd-Pãng-Soaba yĩng ye. D waa n wʋmame tɩ b gomda tɩ zooda kaseta paa Efrata, la Yaar sẽnẽ la d waa n yãend-a. D kẽ d Soaala roogẽ, d kolg b zaoorã n sulg d menga. Yik-y yã, Soaala, wa-y n kẽ y vʋʋsg zĩigẽ, yãmb ne kuga walsa koglgo, koglg kãng zug la y zaoolg y pãngã. Bɩ y fãagra yãag maan-kʋʋdba, b sẽn wat n kolgd maan-kugra ne b fu-neebã, bɩ y ning sũ-noog kaasgo y kamba noorẽ. Y sõgna a Daviid yĩnga, da bas-y kɛɛnga dĩm ning y sẽn kõ naama ye.» Wẽnd kãaba a Daviid noogo la b kõn lebs b zelemd ye: «Yaa f biig a ye la m na n yãke, t'a wa ledg-foom f zaoorẽ. A sã n kell n pids zooda sẽn yalsã, a sã n tũ m noorã, yaa yẽ meng biiga n na n dɩ naam a zaoorẽ zamaan woo zamaana.» Yaa Siõ tãnga la Soaala yãk yã. Be la b tʋlg n me b roogo, n yeele: «Kaalẽ n na n yɩ m vʋʋsg zĩig daar fãa, Yaa kaalẽ la m tʋlg n me m zaka. M na n maana Siõ neere, m na kõ-a tɩ seke, a naong rãmba na rɩ b sẽn dat bũmb ning fãa. Yeelg-y maan-kʋʋdba ne manegr pãnga, la ning-y sũ-noog kaasg y kamba noorẽ. Dĩm sẽn tar pãng la m na n yiis Siõ, A Daviid buudẽ la m na n yiis-a. M sẽn kõ a soab naama la m na n zaoolg a zaoorẽ, wa fitil sẽn zaoolgd a widb zĩigẽ. M na n bao fuug sẽn pa lut yãnde n yeelg bɛɛbã, n yaool fũgneg dĩma sãnem pugla.» A Daviid yɩɩlle, Gilgra kẽna yɩɩla. Ad-y zĩnd ne taab wa ba-biisi dẽ la bõn-sõng la bõn-noogo! Yaa wa yũ-noog kaam sẽn pʋdgd zugu tɩ lɛɛg n sigd toɛɛnga, n lɛɛg n sigd a Aarõ toɛɛnga, n lɛɛg n mat a fuug loore. Yaa wala meenem sẽn dʋʋgd Ermo tãnga meenem sẽn lɛɛg n sigd Siõ tãnga. Be la Soaala ningd barka, be la vɩɩma ka tar sɛɛbo! Gilgra kẽna yɩɩla. Kils-y Soaala yãmb fãa gilli, yãmb fãa sẽn tʋmd-b b sɛɛgẽ, yãmb fãa sẽn tʋmd-b b roogẽ, zĩig sã n sobge. Zẽk-y y nus n tees b ro-sõngã la y tar bark pʋʋsgo. Bɩ Soaala sẽn naan yĩngr la tẽnga zĩnd Siõ tãnga zugu n sik b barkã f yĩnga. Wẽnd soog pẽgre! Pẽg-y Soaala yʋʋre! Yãmb fãa sẽn tʋmd b zakẽ, yãmb fãa sẽn kẽed b ro-sõngẽ, yãmb fãa sẽn yɛs b sɩmannẽ. Pẽg-y Soaala! B yaa nin-noanga kils-y b yʋʋre, bãmb la d zoodo. Soaala n tũus a Zakoob, a Israyɛl la b reeg n kõ b menga. N-ye! M miime tɩ Soaala yaa nin-kãsenga, tõnd Wẽnda n yɩɩd sẽn keta fãa. B maana b sẽn dat bũmb ning fãa, yĩngri, saasẽ wala tẽng zug ka, mogra ne a bog zulunga, bãmb n naana. Bãmb n zẽkd sawat tɩ b kuiis yĩngri, bãmb n tãsd n sik saaga, bãmb n kõt sobgã a pãnga. Soaala zẽka b nug Ezipt tẽnga, t'a kom-dẽemsa na n loog zãnga, rũmsa kamba wala rĩm biisi. B sẽn tʋm b rãmba me nus zĩnda pãnga; t'a Moyiiz na n pids Ezipt ne bõn-bãna, t'a Aarõ na n pids-a ne yɛl soalma; tɩ b na n lub dĩma ne a poorẽ dãmba. B tõoga bu-zẽmb ka tɛka, n kʋ dĩm dãmb sẽn da tar pãnga, yɩ-la a Siyõ, Amoritsa dĩma, n le paas a Og, Bazã dĩma la Kanaã tẽng dĩm dãmba. Bãmb tẽnsa la b reeg n kõ a Israyɛl, t'a Israyɛl lebga bãmb pʋɩɩre. Soaala, b na n kilsa y yʋʋrã; b na n tẽega y yell zamaan woo zamaana. Wẽnd n pukd b buuda sõmblem, bãmb n kogend neb niyns sẽn waoogd-b bãmbã. Bu-zẽmba wẽn-naandsa, sẽn dõog ne wanzurf bɩ sãnema, yaa ninsaal nug tʋʋmde. B tar noor me, b pa gomd ye, b tar nin me b pa ne fɩ, B tara tʋba la b pa wʋmd ye, pemsem buud ka yit b noorẽ ye. Bɩ sẽn naan-b bãmba wẽneg-ba, la sẽn teeg-b bãmba me boto. Yãmba, Israyɛl kamba, pʋʋs-y Wẽnd barka; yãmba, a Aarõ yagense, pʋʋs-y Wẽnnaam barka. Yãmba, Levitsa buudu pʋʋs-y Wẽnd barka. Yãmb fãa, Wẽnd kẽed-paalsã, pʋʋs-y Wẽnd barka. Bɩ Zerizalɛɛm sẽn zao Siõ tãnga kaas a barka pʋʋsg tɩ kul yĩngri. Wẽnd soog pẽgre! Pẽg-y Soaala tɩ b yaa nin-noanga la b nonglma ka be sɛɛb ye. D pẽg Wẽnd sẽn ka be taare tɩ b nonglma ka be sɛɛb ye. D pẽg bũmb fãa Soaala, tɩ b nonglma ka be sɛɛb ye. Bãmb bala n yiisd bõn-bãna, tɩ b nonglma ka be sɛɛb ye. Bãmb la yam bedr soab sẽn naana yĩngr teedã, tɩ b nonglma ka be sɛɛb ye. Bãmb n kɩʋʋlem tẽngã n kõ-a yako, tɩ b nonglma ka be sɛɛb ye. Bãmb n yals bug-bɛda yĩngri, tɩ b nonglma ka be sɛɛb ye. Wĩndg la bug bedra rɩt a naam, tɩ b nonglma ka be sɛɛb ye. Tɩ kiuug la ãds so yʋngo, tɩ b nonglma ka be sɛɛb ye. Bãmb n loog ne Ezipt kom-dẽemsa vɩɩm, tɩ b nonglma ka be sɛɛb ye. Bãmb n sɛɛs a Israyɛl yembdo, tɩ b nonglma ka be sɛɛb ye. B nuga tʋma pãng la raoodo, tɩ b nonglma ka be sɛɛb ye. Bãmb n pasg Rudma mogre tɩ b nonglma ka be sɛɛb ye. La a Israyɛl looga nao koɛɛnga, tɩ b nonglma ka be sɛɛb ye. Mog-kãng n yaool n lɛɛg dɩ Ezipt tãb-biisi, tɩ b nonglma ka be sɛɛb ye. Bãmb n yãag b buuda we-raoogẽ, tɩ b nonglma ka be sɛɛb ye. Bãmb n lub a Israyɛl zabd-n-taasã, tɩ b nonglma ka be sɛɛb ye. B luba dĩm dãmb sẽn tar pãense, tɩ b nonglma ka be sɛɛb ye. Yaa Amonitsa rĩm a Siyõ, tɩ b nonglma ka be sɛɛb ye. Yaa Bazã dĩm a Og, tɩ b nonglma ka be sɛɛb ye. B reega rĩm kãens soolem n kõ b kamba, tɩ b nonglma ka be sɛɛb ye. B reeg-b lame n kõ b sõgen, a Israyɛl, tɩ b nonglma ka be sɛɛb ye. Tõnd pɛta pʋgẽ b tẽega d yelle, tɩ nonglma ka be sɛɛb ye. B fãag-d-la bɛɛba nusẽ, tɩ b nonglma ka be sɛɛb ye. B kõta rɩ-rɩt fãa a rɩɩbo, tɩ b nonglma ka be sɛɛb ye. Yĩngr Wẽnda soog barka, tɩ b nonglma ka be sɛɛb ye! Babilon kʋɩlsa noor la d da zĩi n tar yãbre, d da gomdame la d tẽegd Siõ yelle. D da baoo kooma noor tɩɩse n yagl d koala. Ad-y sẽn da kẽes-b tõnd yembdã, sẽn da namsd-b tõndã saag n kosa yɩɩla. B saag n kosa sũ-noog yɩɩla, n yetẽ: «Yɩɩl-y Siõ yɩɩl tɩ d kelge!» D maanda wãna n pʋd yɩɩlle n pẽg Soaala n yaool n be pa-weere? M sã n yĩm f yelle, Zerizalɛɛm, bɩ m rɩtg lebg nug-kɩɩnga! M sã n yĩm f yelle, Zerizalɛɛm, fo yell tẽegr sã n ka le ya m sũ-noog menga, bɩ m zelemd tabend m dasendaka! Tẽeg-y Edom kamba yelle, Soaala, tẽeg-y b sẽn yeel Zerizalɛɛm lʋɩɩsa raare: «Kõog-y tẽnga zãnga!» Ade Babilon, fo na n lebga raboogo. Fo tʋma tõnd beedo, la m pẽgda neb niynsi sẽn na n lebs-foom f sẽn maan tõndã. M pẽgd ned ninga sẽn na n yõg f kom-peelse n fabs b zuta ne pĩig n wegse! A Daviid yɩɩlle. Yaa ne m sũur fãa la m pʋʋsd-y barka, Soaala. M pẽgd-y-la malɛgsa taoore. M teesa y ro-sõngã n wõgemde, m pʋʋsda barka tɩ y nong-m lame. Y kãab kʋdga ka vaal ye, tɩ y ket n wat ne kãab noodo. M sẽn bool-y tɩ y sak raarã, baraare y kenga m pɛlga. Bɩ dũni wã dĩm dãmb fãa pẽg yã tɩ b wʋma y sẽn kãab-m. Bɩ b yɩɩl b sẽn be zĩig ning fãa tɩ Wẽnnaam ziira labsa! Ba b sẽn zao al yĩngr-yĩngrã b nee sulg-m-meng soaba n bak ne wilg-m-meng soaba. Ba m kẽnd ne sũ-sãamse, yãmb n kõt-m vɩɩm. Y nug na n wẽ-la m bɛɛba sẽn wuk ne sũ-puuri, y kanga pãng yĩnga, m na n le tʋma raoodo. Soaala na n maana fãa m yĩnga, Soaala, y nonglma ka be sɛɛb ye! Bɩ y nug ra vʋʋs ne y tʋʋm sõma wã ye. Yɩɩlla bee yɩɩla naab sebrẽ. A Daviid yɩɩlle. Soaala, yãmb vɛɛsa m sũurã la y tɩg-m-la zãnga. M zĩ tẽnga, y miime, m yɛs yĩngri, y neeme. Y beool n mi-la m raaba fãa. M be m zakẽ bɩ zĩig a to, bũmb ka ling-y ye. Y mi-la m sẽn maand fãa. M noor nan ka yaag ye la yãmb zoe n mi-la m sẽn na n yeele. Y be-la m taoore, n be m poorẽ y rɩka y nug n tik-ma. Y sẽn mi-m woto wã yaa bũmb sẽn yɛɛsd-m, bũmb sẽn zʋʋg m tagsgo. M teesda yɛ n zãag ne yãmba? M wudgdame n ta yɛ n põs yãmba? M dʋ yĩngri, yãmb la m segda, m sig n solg kɩɩmsa sʋka, y ne-m lame. M tees wĩndg sẽn pukdẽ, ad-y! M tees a sẽn lʋɩtẽ, ad-y! Y nuga ket tat-m lame, y nug rɩtg zoe n gãd-m lame n pa basdẽ ye. M kos-y-la woto, tɩ y bas y lika t'a wa solg-ma, n bas y wĩndga t'a tiig n lebg yʋngo, la ayoo! Lik pa lebg lik y yĩng ye yãmb nengẽ yʋng yãga ne vẽenem wa wĩntoogo, lika lɛɛg n tãoosda vẽenem. Yãmb n naan maam wa m sẽn ya-la, yãmb n wʋg maam wa fuugu m ma pʋgẽ. M pʋʋsd-y-la barka, Soaala, y sẽn kãam m yĩnga t'a ya neera, yaa yell bãnd la y maan yã, m mii rẽ neere. Bũmb ka m yĩngẽ wã tɩ y ka yãend zĩig n kõ-a, y sẽn waa n naand maam m ma pʋgẽ wã ye. M sẽn da waa n nan ka tar nenga, y ra zoe n ne-m lame, y ra zoe n gʋlsa fãa n ning y sebrẽ, y ra zoe n sõda m daarã n bĩng-ma, tɩ m nan ka rog meng ye. M ka tõe n bãng y sẽn sed m yĩng ye, y sẽn tags m poorẽ labsa. M datẽ lame n sõde, la sõora yɩɩda tẽnga bĩisri. M tõog n sõd n sɛ me m ket n ka tar b võor ye. Soaala, m nongẽ lame tɩ y menes nin-wẽnsã, tɩ sẽn nong-b yɛl kɛga zãagẽ ne maam. Bɛɛba sãamda y yʋʋr bala, b pʋt-a lame n na n kãab beed bala. Soaala, d maanda wãna n ka kisg y bɛɛbã, n ka sẽoos tẽn-wãadbã? M kis-b-la ne kisg menga, m bɛɛba mens la bãmba. Vɛɛs-y-ma, y na bãng m tagsgo, fɛɛs-y-ma, y na tɩg m daabo. M da rɩk wẽn-naandsa waoogr sor ye, togl-y maam vɩɩm sẽn kõn sɛ sore. Yɩɩlla bee yɩɩla naab sebrẽ. Soaala, fãag-y maam ne nin-wẽnga, zãag-y maam ne ned sẽn maand pãn-tõogo, ne neb sẽn segend wẽng m yĩnga, ne sẽn wat-b ne zaba, beoog sẽn vẽege. B zelemda kʋʋda wa waafo, põeer zẽnem n be b noorẽ. Soaala, fãag-y maam nin-wẽng nugẽ, fãag-y maam ne sẽn maand-b pãn-tõogo, ne neb niyns sẽn baood m lʋɩɩse. Zẽk-m-meng rãmba n solg bẽdgo m taoore, m sora noore, b solga b wĩ la b gãmbre, b solga bãng sẽn na n sog-ma. M yeela Soaala: «Yãmb la m Wẽnde!» Soaala, kelg-y m koɛɛga sẽn leokd-y. M Soaala Wẽnde yãmb pãnga n fãagd maam. Zabra raare y lill-m-la m bɛɛba. Soaala da reeg-y bɛɛba kosg ye, da sak-y tɩ b zãmba wĩ paam n loe-m ye, ka rẽ b na maneg n paas b wẽnem. Bɩ m bɛɛba lɛɛg n dɩ b no-beeda taale. Bɩ bug-saal widg b zugu tɩ b rɩ bugum b lʋɩ bog zulungẽ n da le tõog n yik ye! Gom-yooda rãmb kõn yals tẽnga ye, n paas pãn-tõog soaba la nin-toaaga, b rig-ba n yiis zĩig zãnga. M miime tɩ Wẽnd n na n dok nimbãan-ned sũuri, naong rãmb na n paama bʋʋm bãmb taoore. Bɩ nin-sõma wã kils y yʋʋre, Soaala, Bɩ nin-tɩrsa paam zĩig y sɛɛgẽ. A Daviid yɩɩlle. M boonda yãmba, Soaala, wa-y tao n fãag-ma. M sã n boond-y bɩ y kelg-ma. M pʋʋsga dʋ tɩrga n ta yãmba, a rʋ wa tɩdar bug-zõose, n ta y nengẽ wa m zaabr kũuni. M noora ra yaag bada n togs beed ye, m goama fãa yɩ gũusg goama. Da sak-y tɩ m gom beed ye, da sak-y tɩ m kʋɩɩs m sũuri wa nin-wẽnsã n tʋm beedo, n bõn m to ye. Da bas-y tɩ b yam wẽnga long-m ye. M sakdame tɩ nin-sõng laal-m pegse, m sakda nin-tɩrs saglse tɩ saglg yaa nonglem kũuni, tɩ m ka rat n zãgs ye. M sẽn zãgsde, yaa nin-wẽnsa wẽnem tõog n zãag-m ne y sɛɛg yõkre. M da pa gomd ne wẽng tʋlsem ye, la m bɛɛba na wʋm neere, b sã n wa neẽ tɩ bʋ-kaoodba zut kuglemd ne pĩisi. Wala b sẽn mi n wedg bok tẽnga, Kɩɩmkulg me na n paka a kʋɩlensa yalengo a na n vela b kõaba sẽn weele. Mam yẽ wẽnemda m neng n tees yãmba, Soaala, m yõkda y sɛɛga, fãag-y m vɩɩm. Da sak-y tɩ bẽdga yõk-m ye da sak-y tɩ nin-wẽnsa wĩira gĩd-m ye. Bɛɛba bẽdg lɛɛg n yõk-ba tɩ mam paam n põse. A Daviid yɩɩlle. Yaa a Daviid koɛɛg ne Wẽnde a sẽn waa n be tãnga bokẽ. Soaala la m kaasd n boondẽ m tara wiisgu, n yõkd b sɛɛga. M wilgda m yãbra wõore, m wilgda m pɛta sẽn yaa a soaba. Y mii m sẽn nong n dɩk sor ninga, m daooda sã n mii n wa sɛ zãnga la y mii m bɛɛba sẽn gãnegd-m bẽdg ninga. Bãng-y tɩ ned ka m sɛɛgẽ n yet t'a toog bee ne maam ye. M pʋs n ka le tar zĩig sẽn na n solg ye la m yella ka le pak ned ba a ye ye. Yaa yãmb la m boonda Soaala, yãmb n lebg m fãa-fãa tẽng zug ka. Kelg-y m kosga neere. Ad-y m lʋɩɩ zãnga. Fãag-y-m ne m zabd-n-taase, b pãng yɩɩd-m-la wʋsgo. Yiis-y maam bi-beesa roogẽ tɩ m tõog n pẽg y yʋʋre ne sẽn ket n pʋgd-b yãmbã. La rẽ me la m gũud wa y kũun sõngo. A Daviid yɩɩlle. Soaala, kelg-y m pʋʋsgo, m pʋʋsga yee n lʋɩ y tʋbrẽ. Y nonglma sẽn pʋgd-m daar fãa tɩ y ka basd-m kɛɛngã, bɩ m paam y leokre. Mam yaa y sõgne, da kẽes-y-m bʋʋd ye, tɩ y mi tɩ d fãa tʋka yelle n kẽnda. M tara bɛyã, ned sẽn yaand maam, ned sẽn lub-m tẽnga n dʋʋ n tabda. A tusd-m lame n kẽesd kũum likẽ, a rat n naag-m-la ne sẽn ki-b al daar zãrã. M raood sɛɛ gilli, m pãnga looga zãnga, m ka tõe n maan fɩ. M tagsda sẽn looge, m tagsda y sẽn maane, m bilgda y sẽn tʋme. M tẽega m nus n na n yõk-y sɛɛga, m yɛsa y taoore n yãbd ko-yũudu, wa tẽng sẽn gũud saaga. Soaala, ad-y m ka le tõe ye, da kaoos-y m leokr ye, da wẽnemd-y y nenga ye, tɩ m yell wa wẽneg n sãam ye. Tõd-y beoogo n wilg maam y nonglem; yãmb bal la m teeg yã. Wilg-y m sor ning m sẽn tog n dɩke, tɩ yãmb la m tees n getẽ. Soaala, fãag-y maam m bɛɛba nusẽ. Yãmb sɛɛgẽ bal la yell ka le tõe n pak-ma. Zãms-y-m tɩ m maan y raabo tɩ yãmb la m Wẽnnaam, la y tõe n kõ-m-la y yam sõngã, la y tees-m so-saalle. Yãmb sẽn yaa m Wẽndã, le vʋʋg-y-ma. Yãmb sẽn pidsd y pʋleng daar fãa wã, wa-y tɩ m tɩlg yɩɩre. Yãmb sẽn pid ne nonglma, mum-y m bɛɛba noore, sõng-y tɩ m tõog-b zãnga, sõng-y-m tɩ m yaa yãmb sõgne. A Daviid yɩɩlle. Bɩ Soaala soog barka tɩ bãmb la m pĩiga, bãmb n wilgd-m zabr takre, bãmb n zãmsd m bɛɛba fabgre. Bãmb la m sõangda, m tãnsoben-doogo, bãmb zakẽ la m soond yã. Bãmb n kokd m bɛɛba pɛɛma, bãmb n sulgd dĩm dãmb a taabã m taoore. La sã n ya sɩda, ninsaal zema bõe, Soaala, tɩ y na n ges a yelle? Ninsaal zema bõe tɩ y ningd-a sʋka? Ninsaal zɩslem, pemsem dẽnna, a vɩɩma, bõn-yɩgdr sulunsuku. Soaala, kɩll-y saagã n sigi. Sɩɩs-y tãmsã ne y nug-bila tɩ b nuk bug-zõose. Tão-y y saaga kãna goabg la rɩtgo, tão-y y pɛɛma poorẽ la taoore. Zĩnd-y yĩngri n tẽeg y nugu, tɩ m paam fãagre, tɩ m põs yel-beedo, n põs bu-zẽmb sẽn sũ taab n watẽ. Ad-y ka neb sẽn mi sɩd ye, b nug zɩ n pids b noor sẽn pʋlem ye. Soaala, m dat n pʋda y pẽgr yɩɩn-paale, m dat n yɩɩla y pẽgr ne m kʋnde. Dĩm pãng yita y nengẽ, yãmb n tõe n fãag y sõgna a Daviid. Fãag-y mam ne sʋ-bɛɛga, fãag-y maam bu-zẽmba nusẽ. Bãmb noor zɩ n togs sɩd ye, b nug zɩ n pids b sẽn pʋlem b noorẽ ye. Bɩ d kom-dibli lebg wa tɩɩse, sẽn pus tẽnga n yi tɩrse, tɩ d kom-pugli pa ne neerem, wa met-mit sẽn nagsd na-yir lal-gilsi. Bɩ d baoa lʋg wɩk ne koodo, n wɩk ne kood buud fãa, tɩ d bãada yẽnegd ne piis la rũms a taaba, tɩ d sã n sõd tus piiga, bɩ d yet tɩ nan paooda. Bɩ niis la bõeens pid bãga. Bɛ ra wa reeg d tẽns ye, la pa-weer sor da rɩk ye, tɩ kɛleng me ra kelem d dotẽ ye. Zu-noog buudu la buud ninga sẽn paam-a Wẽnd kũuna, zu-noog buudu la Naaba-Wẽnd sẽn yaa a soab Wẽnnaam. A Daviid yɩɩlle. Ade, m Soaala, yãmb la dĩma tɩ m dat n kils y pãnga. M datame tɩ m bark pʋʋsga rɩg y taoore zamaan ne zamaana. Yaa beoog sẽn vẽeg fãa la m na n pẽg-ba, m dat n pẽg-b-la zamaan ne zamaana. Sẽn ta-a bãmb ka ye, sẽn tog-a ne pẽgrã la bãmba. B sẽn tar ziir ninga ka tõe n gom ye. Da bas-y zamaan kãnga t'a loog woto n ka wilg zamaan ning sẽn pʋgdã, y sẽn maan fãa tɩ tog ne pẽgr ye. M na n sõdga a yeyn-ye y sẽn tʋm n yɩk d pelense, m na n puka b ziira la b neerem. Yãmb sẽ n ka ne tɩ b pãnga labsa la b tʋʋm-bɛda sõor ka be tɛka? Gom-y b sẽn zam ninsaal ne kũun niynsã, gom-y b sẽn maan fãa ne zemsgã. A Israyɛl Wẽnnaam kũmda nimbãanega, a Zakoob Wẽnda pida ne sũ-maasem la nonglem. Ka nin-yend bal la b nong ye, b nonga b sẽn maan fãa. B sẽn maan fãa tõnd yĩngã, bɩ d fãa naag n pẽg b yel-sõmde. Modgr tɩ b gom b naama yelle, modgr tɩ b togs b sẽn tõe n maan bũmb fãa wã yelle. Ninsaalba na paam n wʋm y tʋʋm-bãna. B na sak n kils naam sẽn ya naama. Õõ! Ka yʋʋm a wãn bal la y na n dɩ naam ye, y na n yɩɩ dĩm zamaan woo zamaana! Wẽnd zɩ n pʋlem n ka pids ye, Wẽnd sẽn tũ zĩig ning n looge zĩ-kãng pita ne b nonglem la b kũun sõma. Soaala kokdame tɩ lʋɩɩs ra lʋɩ ye, la b yikda sẽn paam-ba n ta tẽnga. Reeg-y b kosgo tɩ b gũuda y sõngre, Kõ-y b rɩɩbo, la daar fãa wa ne a rẽnna. Sẽn vɩ-a fãa tara a raabo n dat tɩ pidsi. Yaag-y y nug yalengo tɩ y kũuna bar n dʋʋge. Tõnd Soaala sẽn zɛɛgd ne bũmb ninga, yaa b tʋʋmd fãa kõ kaseto, b nonglma sẽn ka sɛɛba kaseto. Tao-tao bala tɩ b taa b sẽn bool-b zĩig ningã, boola sã n bool ne raab tɩrga. Yaa vẽeneg tɩ b na kelg kosgã; bõasa koɛɛg sã n lʋɩ b tʋbrẽ la fãagra sẽn paame. Wẽnd kogenda sẽn nong-b bãmba, Wẽnd sẽn basd kɛɛng yaa nin-wẽnga. M noor na n pẽga, Soaalã, ninsaal fãa na n kilsa b yʋ-sõngã, zamaan woo zamaana! Wẽnd soog pẽgre! M ned sõngo, pẽg Wẽnde! Beoog sẽn vẽeg-m fãa m na pẽg Soaala, m vɩɩma zãnga m na pẽg m Wẽnnaam. D da wẽnemd d neng n tees dĩm biisã tɩ bãmb me yaa ninsaalb wa tõndo, b ka tõe n fãag-d ye. Bãmb me vɩɩma tara tɛka. Bãmb sã n poog ra-babs-tẽnga, b geels la b saagr naagd n busa tomẽ. Zu-noog soab la ãnda? Sẽn teeg-a a Zakoob Wẽnda la yẽ soaba, tɩ bãmb sõngr n wat ne fãagre. Bãmb n naan yĩngr la tẽnga, n naan mogr ne sẽn be a pʋgẽ. Bãmb la d na n pʋg beoog sẽn vẽege. Bãmb bʋʋd yaa bʋ n wa ne laafi bʋʋdo. Bãmb n tɩgsd kom sẽn tar a soaba, bãmb n zaagd b sẽn za a soab wĩiri. Bãmb n pukd zoensa nini. Bãmb n yikd sẽn pãsda n lʋɩtẽ. Bãmb n pʋgd sẽn nonga bãmba. Sãan lebgda tẽngen-neda kɩɩb la pʋg-kõor teegd la bãmba, tɩ wakr dãmba tẽeb faagd bãmb nugẽ. Soaala n na n dɩ naam bãmb la f Wẽnde, Siõ, tɩ yʋʋma pʋgd taab n zãgsd sɛɛbo. Bɩ Wẽnd soog pẽgre! Wẽnd soog pẽgre! Wẽnd pẽgra segda, la pẽg Wẽnd wa sẽn segdã n wat ne ninsaal sũ-noogo. Soaala le yikda Zerizalɛɛm lalse n na n le pids-a ne Israyɛl pa-weto. Sũ-sãang sẽn da tar b rãmb nintãma yẽesame, b noada la b sãmpoag maagame. Soaala tara ãdsa fãa sõore, b boonda ãdg fãa ne a yʋʋre. Naaba-Wẽnd pãng labsa, Naaba-Wẽnd bãngra zulma. Bãmb n zẽkd sẽn sulgd a menga, bãmb n turgd tẽnga zẽk-m-meng soab noore. D pʋʋs-b barka b kũuna yĩnga. D pẽg-b ne ruudg la kʋnde. Ad-y yaa bãmb n lut saaga ne sawato, bãmb n tigsd sa-kooma sẽn na n bʋk tẽnga, tɩ tãmsa sũur na n yɩ noogo ne b yamd paala, tɩ rũmsa na n paam dɩɩbo. Gãab-bi wã sẽn yãbd koma, bãmb nug n fẽegd-b rɩɩbo. Soaala sẽn pẽgd ninsaal nengẽ, ka a raood la a pãng ye, Sẽn noom Soaala, ya b zoe bãmb nifu, yaa teeg b kãabga sẽn ka vaandã. Bɩ f pẽg f Soaala, Zerizalɛɛm! Siõ pẽg f Wẽnde! Ad Soaala lugla f kʋɩlensa kẽnkẽ. Soaala bark siga f kamba fãa. F yagsa bas-f-la ne laafi, f kamb dɩlgda b mens ne rɩ-noodo. Bãmb sã n yaag b noore, b koɛɛga tata dũni wã tɛka, la b raab fãa pidsdame. Bãmb gomdã n wat ne fu pɛɛlga n yeelg tẽngã, tẽnga pelgdame n dɩg wa bãmb n yɛdg b lamdo. Sapɩlem n dʋʋgde la yaa bãmb nug n fẽegd-a. Waood sẽn ya waood n wat n kẽed kõaba la rigb ka tõe n ka rig ye. B sã n bool tʋʋlgo, fãa wẽnegd n boogame. Kooma sẽn da gĩs n dɩga na n zoeeme. Soaala yãenda gomd n taas a Zakoob, a Israyɛl deega b noya la b saglse. Ka buuda fãa n paam dẽ ye, ka neba fãa n bãng b raab ye. Wẽnd soog pẽgre! Wẽnd soog pẽgre! Soaala paam pẽgr al yĩngri! Sẽn be-b yĩngrã tall Soaala pẽgre! Pẽg-y-ba malɛgse, pẽg-y-ba yĩngr tãb-biisi! Wĩntoog la kiuugu, ãdsa fãa sẽn yãgdã, yĩngr wen-vɩʋʋgã, sawata poorẽ-poorẽ ko-yũusã, fãa naag taaba n pẽg Soaala, tɩ tũu ne Wẽnd gomd bala tɩ fãa wa beẽ. B yalsa ned kam fãa a zĩigẽ zamaan fãa yĩnga, n wilg ned kam fãa sor sẽn ka tar badga. Tẽng zug rãmba pẽg Soaala, mogra ne a pʋgẽ wag-bãna, la yãmb me, bugum la sapɩlem, koom sẽn gĩs n yɛsẽ la wulgu, sob-raad sẽn vũud Wẽnd nug sẽn teesẽ. Pẽg-y-ba, tãmse la kunkuba, pẽg-y-ba ne y biisã, moog tɩ-noodo, pẽg-y-ba, kʋgse ne y woglem la y maasem, pẽg-y-ba, yir la weoog rũmsi, luiili la wiisi, pẽg-y-ba, tẽnga dĩm dãmba ne b soolem, pẽg-y-ba, na-komse la dũni soaalba, pẽg-y-ba, kom-dibli la kom-pugli yãas la nin-kẽemse. B pẽg b yʋʋre tɩ b yɩɩda fãa ne ziiri, b ziira pida yĩngr la tẽnga. Bãmb n pids b neba ne raoodo, bãmb me la Israyɛl kamb pẽgda; yaa buud sõnga kamb la bãmba. Wẽnd soog pẽgre! Wẽnd soog pẽgre! Pʋd-y yɩɩn-paalle tɩ d pẽg Soaala, d naag taab n kils bãmba. A Naanda taoor bɩ a Israyɛl kaas a sũ-noogo, a dĩma taoor bɩ a zodg a yɩɩn-noodo. Sigl-y saoog n pẽg bãmba, tĩng-y gãngãoogo, wãag-y ruudsi. Soaala maand b buuda neere, b sõngda nin-bi wã meng tɩ b maand daoodo. Wẽnd pẽgra yĩng la d maand kibsa n kelemd d sũ-noog ne yʋngo. Wẽnd pẽgrã n pid Wẽnd kamba noore tɩ b sũura pid ne raoodo, tɩ b nug zãad zabr sʋʋga, n na n dok b sũur ne Wẽnd bɛɛba, n na n sɩbg bu-zẽmbã, n na n loe ne wĩiri, dĩma la kombere, n sɩbg-b wa Wẽnd sẽn date, la rẽ me la Wẽnd kamba zu-zẽkre. Bɩ Wẽnd soog pẽgre! Wẽnd soog pẽgre! D pẽg Naaba-Wẽnd b ro-sõngẽ, d pẽgb-b b yĩngr naama zaoorẽ, D pẽg-b b tʋʋm sõma wã yĩnga, d pẽg-b tɩ b yaa nin-kãsenga. D kũms baorgo n pẽg-ba d pẽg-b ne pɛndg la ruudga. D pẽg-b ne gãngãoog la saooga, d pẽg-b ne kʋnd la wɩɩse. D sigl noog ne kɛm sẽn sãte d pẽg-b ne waaga la kilsgu. Bɩ nin-vɩɩg fãa pẽg Naaba-Wẽnde. Wẽnd soog pẽgre! Israyɛl dĩma a Daviid biiga, a Salomo, yelbũna. Ad-y yelbũna na n zãmsa ninsaala t'a zã a meng ne yẽesem, n paam gʋʋl-sõngo la a wʋm b sẽn zulg n togsd bũmb ninga võore. B wilgda ninsaal sẽn na n tũ sor ninga n yẽege, n zoe Wẽnd nifu, n lak ne so-goalma, n pid ne zemsgo. B zãmsda neb niyns vɩɩma sẽn nan ka sĩdã tɩ b maan gũusgu la sõngda kom-bɩɩba tɩ b modg n bãng n bak bũmb ne a taaga. Woto, sẽn zoe n tar-b bãngre, bɩ b karem-ba, n paas b bãngre, n sɩls b yama n paase. Sẽn zoe n pid-b ne yam na tõog n wilg b taab tɩ b rɩk so-sõngo. B na n tõog n wegsa yelbũn kẽer pagdo, b na n sɩd paama karen-saamb dãmba yam zulungã n dɩke. Bãngr zulunga yẽgende yaa zoe Soaala Wẽnd nifu. Sẽn tar-a yam vẽenem, gʋʋla gʋʋlg sõngo; gãeeng bala n ka baood yam vẽenem la a zãgsd a tũudem. Kelge, m biiga, kelg f ba saglse la da sãbs f ma wilgri ye. Ad-b saglsã na n manega f vɩɩma wa pugl neere sẽn fõgneg f zugu, bɩ faong teedo sẽn luund f yãoogẽ. M biiga, dar ninga kamb sẽn ka paam gʋʋlg sõngo wat n dat n kʋɩɩb-f lame, bɩ f da sak ye. B sã n yeel-fo: tũ tõndo, d bao zĩig n soonde n paam ned zɩɩm n yiis zaalem, d bao zĩig n soonde, n tʋm beedo ned sẽn ka tar a toorẽ yelle, d vel-a vɩɩga wala bʋg-tẽnga, d vel-a mumdi wala bo zulunga, b sã n yeel-fo: wa tɩ d na paam arzɛka, wa tɩ d pids d roto ne fãab teedo, wa tɩ f na paam f zu-noog sẽn na n tʋʋg foom a soaba fãa, wa tɩ ligda korgo na yɩ-la d fãa korgo, m biiga, da sak n tũ-b ye. Zãag f nao ne b soya tũudem. Ad-b nao zoet n dabda wẽng zĩigẽ, ad yaa zɩɩm la b yãgd n na n tɩ raage. Ade, da nams zaalem, tɩ bẽdg ka rɩgend luiil nifẽ t'a le yõk-a ye. B bãng tɩ b bẽdgã n na n wẽneg n daag b zɩɩm. Na n yɩɩ woto ne ned ning fãa sẽn fãad a taaba: b wat n fãsga yẽ meng vɩɩm. Yɩnga yam vẽenem kẽndame la a boondẽ. A koɛɛgã n sãt soya zutu. A yɛsa sobadsẽ n boondẽ, a yɛsa tẽns noore n sokdẽ: Yalemse, yaa bõe tɩ yãmb nong yalemdo? Yam-pa-wisg rãmba, yaa bõe tɩ yãmb pa rat n yẽege? Sẽn nong-b taab laado y na n laa taaba n ta wakat bʋgo? Yalemse, y na n baoo bãngre da-bʋre. Deeg-y m saglgo n teem y zʋgo. M na n zuka sẽn be m sũura pʋga tɩ y wʋm m koeesa fãa. M bool-y lame tɩ y zãgse, m tuda m nug, la y pa yõk-a ye. M sagl-y lame tɩ y kɩɩse, y pa sak n deeg y kongre ye. Yaa rẽ yĩnga la mam me na n la yã, y rigba wakato. Y sã n wa yɛɛsdẽ, m na n pusga laado. Yɛɛsgã yaool n na n tiig-y-la wa saluka, tɩ y rigbã yik-y wa sɩlmande, tɩ y sɩbgre la y sũ-beedo wẽneg n ta. Wakat kãnga la y na n bool ma, la m kõn sak ye. B na n bao-m lame la b kõn yãend-m ye. B pa rat bãngr ye, b pa rat n zoe Soaala nif ye. B pa rat m saglgo ye, b toog ka be ne m leokre ye. Ad-y b na n dɩ b tudgrã yõodo, b na tɩge ne b meng saglse. Yaa b sẽn pa sakd n deeg yella n kʋʋd yam kaoolg soaba, yaa yalem sẽn gãd t'a miime wã n kẽesda moogo. Sẽn yaool n kelgd-a maam zĩi ne laafi. A zĩi ne laafi, a ka rigd bũmb ba a ye rabeem ye. M biiga, f sã n deeg m goama, f sã n deeg m noya f sũurẽ, f sã n yoog f tʋba n deeg yam zulunga saglse, f sã n gãneg f sũurã sɩda zugu, f sã n nek f pʋtẽere, f sã n bao yam sõngo n pẽneg f menga, f sã n bao-a wala f arzɛka, ad yaa wakat kãnga, la f na sɩng n zoe Soaala nifu, wakat kãnga la f na n sɩng Wẽnd bãngre. Yaa Wẽnd n kõt yam sõngo: bãmb noor n yiisd minim la bãngre. B sõngda nin-tɩrse la b yaa nin-sõma gãongo. Bãmb n get tɩ bũmb ba a ye da kedb ye, bãmb n togend b zo-rãmba so-sõngo, tɩ b mii sẽn zemse, sẽn toge, sẽn yaa tɩrga, tɩ b mii sor ninga sẽn dabd sũ-noog zĩigẽ. Yam sõngo kẽeda f sũuri, tɩ f bãngre pids-f ne sũ-noogo. Wakat kãng la gũus-m-meng na n yẽeg-fo tɩ yam minim fãag-fo. F kõn le saag n dɩk so wẽng ye, n le saag n tũ gom yood soab ye, n le saag n tũ sẽn basd-b so vẽenese n kẽnd likẽ ye. Bãmb dãmb sũ-noogo la wẽng maanego, kẽes moogo la b tʋʋmde, tɩ b pẽgda. B soya fãa yaa goalma, b soya teesa pɩgla. Yam sõngo n na n zãag foom ne sãana, ne pag sẽn ka tẽnga paga, pag sẽn gomd gom noodo. Ade, a basa a pipi zoa, a basa a sẽn loe a meng ne a soaba Wẽnd taoore. Ade, a roog kɩlla a wãab kɩllgo. A sẽn tũud soy niyns fãa kẽesd-a-la Likẽ, kũuma zakẽ. Sẽn sõs-a ne-a ka lɛɛgd n wa ye, a pa le tõe n paam vɩɩm sor n dɩk ye. Bao nin-sõma sor n dɩke, bao nin-tɩrs sor n tũ. Nin-tɩrse n na n vɩɩnde, sẽn ka mi b wẽng roto n na n yalse. Nin-wẽnsã la tẽng kãnga nin-yoodã na n digame n yiisi. M biiga, da yĩm m zãmsga ye, bĩng m noya f sũurẽ. Woto f yõor na yɩ woko, n pid ne yʋʋma la sũ-noogo. Da zãag f meng ne sũ-bʋgsem ye, da zãag f meng ne pʋ-peelem ye, bao wĩiri n tui-ba n bob f kokore, gʋls-ba f sũurẽ. F sor na yɩ sõngo la f na paam f sẽn date Wẽnd la ninsaal nengẽ. Dell Soaala-Wẽnd ne f sũur fãa, da teeg f meng bãngr ye. F sẽn maan bũmb ning fãa bɩ f tags Wẽnd yelle tɩ f sor kunkub na sirgi. Da kao tao tɩ f yaa ned sẽn mi vɩɩm ye. Zoe Wẽnd nifu n zãag f meng ne wẽnga. Woto, f na n paam yĩn-maasem, woto f kõab kõn wãg ye. Yãk f sẽn tare n waoog Soaala-Wẽnde. Yãk f kood rẽemse n kõ-ba. Woto f bao na pid n sudg ne koodo la f sĩmsa na raal ne rã-paalga. M biiga, da sãbs Soaala-Wẽnd sɩbgr ye, da bas tɩ zabr puug f sũur ye. Yaa b sẽn nong a soaba la Wẽnd zabd ne, wala ba sẽn maand ne a bi-nongre. Zu-noog soaba la sẽn pam-a yam sõngo, sẽn paam-a t'a yam weke. Yam sõng yõodo yɩɩda ligdi, f sã n tar-a n são f sẽn tar sãnem. A yõod yɩɩda muizãana, bũmb ka be f sẽn tõe n mak-a f bõn datsa sũk ye. Dɩtgo a zãada yõ-woko, goabga, a zãada arzɛk la ziiri. Soy niyns a sẽn tũudi yaa sũ-noog sẽn pid zãng soy, a soy fãa digda sũ-noog sẽn beẽ. Sẽn paam-a n gãd, bee vɩɩm tɩɩg tẽngre, sẽn gãd-a zĩi ne sũ-noogo. Wẽnd ne b bãngrã n maan tẽngã b yamẽ, bãmb n yals yĩngri teedã. Bãmb minima n tuk mogre, bãmb yama n le zĩnd tẽngre n kɩt tɩ sawat dʋʋgd meenem. M biiga, tũ b sẽn wilg-fu, maan gũusgu, puk f nin neere. Gũusgu la saglsã deegre n na n kõ f vɩɩm, n na n yɩ faoong bũmbu f sẽn bob n kẽnda. F pa kẽnd tɩ f sũur kiuusdẽ ye, f pa kẽnd n lagsdẽ ye. F sã zĩẽ, rabeem ka ye, f sã n gõe, f gõeem sakd-f lame. Bɛɛba yɩɩr pa tar-f ye, b kõn soos n tak zabre ne f ye. Wẽnd na n yɩ-la f sõangda, Soaala-Wẽnd kõn bas tɩ f lʋɩ bẽdgẽ ye. Ned sã n kos f sõngre, tɩ f tõe n sõng-a, bɩ f da zãgs ye. Da yeel f saam-biiga: kẽnge tɩ f na lɛɛg n wa wakat a to, beoogo, m na kõ-fo, n yaool n tõe n kõ-a dũnna ye. Da tʋlg ne wẽnga ned sẽn tẽed tɩ fo ket n dat-a-la ne neer ye. Ned sã n ka maan f wẽnga, bɩ f ra yaas n maan no-koeemd ne-a ye. Da wẽneg sẽn ka mi-a sugri soab ye, da togs a manesem ye. Wẽnd pa nong nin-wẽng ye, Wẽnd data nin-tɩrse n maan b zak kamba. Wẽnd kãab wẽnga n sirgd nin-wẽng roogo, Wẽnd kãab noodo n pid nin-sõng dẽnna. B laada sẽn nong-b taab laado, la b kũuna zamda sulg-m-meng rãmba. Sẽn tar-a yam sõngo, n paamd ziiri, la yalemsã n so yaoolgo. M kamba, kelg-y y ba zãmsgo, ning-y pãnga n bãng sɩda. M sẽn togsda ya bõn-sõngo, da bas-y m sẽn wilg-y wã ye. Mam me yɩɩ m ba biiga, mam me yɩɩ m ma bi-nongre, m ma bi-zelle. Yaool n ya woto la b zãms ma, modg tɩ m goama pa f sũurẽ, modg n deeg m noya, n paam n vɩɩnde. Bao yam sõngo, maan tẽegre, da yĩm m goama, da bas-b tɩ b looge. Tall yam sõngo t'a fãag-fo, nong-a t'a gũ-fu. Deeg tɩ yẽ la pipi kũuni, dɩk f sẽn tare n tek ne-a. Sog-a dɩm-dɩm n paam n yɩ neda. Ad-f sã n mobg-a, a na n wa ne f zu-zẽkre. A na fõgneg f zugu ne neerem pugla, a na n mobg f dĩir ne sãnem peende. M biiga, deeg m goama tɩ f yʋʋm lebg kʋʋma. M kẽes-f-la yam sõng sor pʋga, m kẽes-f-la so-tɩrs pʋga. F sã n ka teem sore, f kẽnd na n yɩɩ faasga. F zoet me f kõn lak n lʋɩ ye. Deeg noore, da bas-a ye, tũ-a, yaa yẽ n wat ne vɩɩm. Da tũ nin-wẽns sor ye, da pɩʋʋg b sẽn kẽnd zĩig ning ye. Bas-a, da tũ be ye, da ges be ye, gãndg-a. Bãng tɩ nin-wẽns sã n ka maan wẽnga b gõeem pa sakd ye, b sã n pa kʋ b pa suusd ye. B rɩɩb yaa sãmpog rɩɩbo, b rãama yaa pãn-tõog rãam. Nin-sõma sore yaa wa sõore, wĩntooga zẽkdame t'a vẽenema paasdẽ. Nin-wẽns sore yaa lika, b kẽnd n lagsdame la b pa ne b sẽn lakda ye. M biiga, kelg m koeesã neere, kelg m goama ne f tʋb fãa. Tees f nengã b sẽn dat-f zĩig ninga; bĩng-ba f sũurẽ. B kõta vɩɩm, b kõta yĩng laafi. Gũus f sũurã n yɩɩd sẽn keta fãa, vɩɩma ko-nin bunda sũurẽ. Da saag n yag zirẽ ye, da kãneg f to ye. F gesg yɩ pʋ-peelem la a ra yɩ zãmb gesg ye. Da kẽnd n tugd bogd ye, da bʋdg sore ye. Da leb goabg bɩ rɩtg ye, da sak n zoe n pʋg wẽng ye. M biiga, deeg m sẽn zãmsd-f bũmb ninga, kelg m yama sẽn wilg-f bũmb ninga, n tõog n paam gũusgu, n tõog n lebg bãngda, n tõog tɩ f noor da yiis beed ye. Da kelg pʋg yoog ba bilfu. Sãan a woto tara gom noodo, a goama bʋgsem zem kaam. Mik a na n waa ne yell tɩɩsem sẽn yɩɩd kʋk tɩɩsem t'a yaa wa sʋʋga sẽn dɩt a noya a yiibu. A rɩka kũum sore, bʋg-tẽng sor la a tũuda. A kẽnd n zãagda ne vɩɩm sore, a pʋs n ka mi a sẽn dabdẽ la a ka bʋʋd ba bilfu. Kelg-m marsã, m biiga, da bas tɩ b zãag-fo ne mam goama kelgr ye. Sõng tɩ f sore da pẽneg pʋg yoog dẽnd ye, sõng n da pẽneg a dignoorẽ ye. Ka rẽ, f yʋʋr na sãam f taab nengẽ, tɩ f samd dɩt a ye wa kʋʋg f yʋʋma, tɩ f paoong na n wa lebg sãamb rẽnna, tɩ f rĩir tʋʋlg yõodo wa lebg sãan dẽnna, tɩ kʋʋlem wa lʋɩ sʋka, tɩ f loogdẽ la f waasdẽ la f kelemdẽ: «M ba ye, ye! M ka bao yam vẽenem ye, m ka kelg a saglsa ye, m ka kelg m zu-soaben-dãmba goama ye, m ka kelg m karen-saamb-dãmb ye.» Yaa rẽ la m yɛs ne sũ-beedo m taab sʋka. Ade, yũ f meng bulg koom, da sak t'a yɩ neb fãa dẽnd ye. A yɩ fo koom, da saag n kõ-a sãan t'a yũ ye. F kooma yɩ bark koom f yĩnga. Da bao sũ-noogo pag a to nengẽ sã n ka sẽn kul-a foom f bi-bɩɩlem wẽnnẽ. A yɩ neere, f nifẽ wala walga, wala yĩsri, tɩ y sõsd ne taaba, n tɩgd taaba, n yãngd y nonglem ne taaba. M biiga, yaa bõe la f bas tɩ sãan kẽes-f moogo, yaa bõe yĩnga la f na n mobge f sẽn ka mi a soaba? Wẽnd geta ninsaala, Wẽnd geta a sẽn tũud soy niynsi. Nin-wẽng lʋɩta a meng bẽdgẽ, a yel-wẽna wĩiri n na n wẽneg n sãr-a. Gũusga sẽn ka beẽ, yaa kũum la gãeemd sẽn galẽ, yaa meneng zĩiga. M biiga, fo sã n yeel neda tɩ foom n na n yao a samde, fo sã n wẽen tɩ f na yao sãan samde, sã n ya fo meng n yaag f noor n pʋlme, sã n ya fo meng bẽdgo n lɛɛg n yõk fo, ad-f sẽn na n maan bũmb ninga n põse: yella sẽn pak-fã, kẽng n tɩ yãend f tũud-n-taagã, yẽs ne-a, dɩdg ne-a. Da bao vʋʋsgo, da bao gõeem, tɩ y wa zems taaba. Modg n yi wĩirẽ wã, wala yãk sẽn fãagd bẽdgẽ, wala luiil sẽn fʋremd n yi nakalbteongẽ. Kʋɩɩm daolgo, yi n ges gũuri! Ges a sẽn maan bũmb ninga n bao yam n kõ f menga. Gũuri ka tar ned sẽn wilgd-a tʋʋmda ye, ned ka pʋʋsd-a tʋʋmde, la a ka tar soansoa-ma ye. La sɩpaolgo, a tigsda a sẽoog dɩɩbo. Tigsgu sã n ta, yẽ me tigsdame. Kʋɩɩma, fo yẽ na n paa f gãagẽ n ta wakat bʋgo? Wakat bʋg la f na n neke? F yetame tɩ f rat n gũsa bifu, tɩ f na n suusa bilfu, n kalemd f nusi, n gãe. Ad wakat kãng la naong na n soos n kẽ-fo, a na n soos n waa wa wagdre la fãada tɩ lebg pɛta. Ka võor soaba la sẽn saad-a n yagd zirẽ. Dẽ ka sõma ye. A kamsda ne a nini, n kamsd ne a nus la a nao. A yamleoog sẽn beẽ, yaa wẽng bala. Tʋʋm yood la a baood n na n tʋme, zab la a rʋʋsda. Yaa rẽ me yĩng la a yella na n sãame. A lʋɩta vugri bala tɩ tɩɩm kaẽ ye. Bũmb a yoob n be tɩ Soaala-Wẽnd kisa, b ka tat b yam ba sẽn paood ye. Yaa gesg sẽn ya wilg-m-meng gesgo, zelemd sẽn ya zelem goalenga: nus sẽn daagd ned sẽn ka tar a toorẽ yell zɩɩm, sũur sẽn bilgd wẽnga, nao sẽn tʋʋl ne wẽng babsgo. A yopoe soaba yaa kaset zirẽ soaba, pʋ-yagsa la tẽn-kãn-neda. M biiga, deeg f ba noore, da zãgs f ma wilgri ye. Loe a goama f sũurẽ tɩ b da zãag ba bilfu, loe-ba f loorẽ wa fan-teoogo, tɩ b yãagd foom zĩis fãa, la b gũud foom, f gõeemẽ. B yɩ f sõsd-n-taaga, f sã n nek n sɛ. Soaala noor yaa wa fitila sẽn paalgd tõnd vɩɩma sor zugu. Noora n na n sõng-f tɩ f maan gũusgu ne pʋg yoogo, n gũ-f ne f to pag sẽn pid ne goam bʋgsa. Da bas f sũurã t'a tʋlg a neerma ye, da bas t'a nina kamsgo lub foom a bẽdgẽ ye. Pag sã n yooda n baood ligdi, la a ka tar sɩd ye, bur gɩrg sekd-a lame. Pag sẽn tar sɩda sã n dat n yõg zood ne foo, ad yaa f kũum la a rata. F sã n dat n mok bugum, ka ningd gɩfẽ ye; kɩɩs n ning tɩ fuug yõk bugum. Bug-saal ka tabd ne nao ye, kɩɩs n tabe tɩ nao feebe. Yaool n yaa boto la f maanda, f sã n baood f to paga, f kõn sɩɩs-a n looge tɩ yell ka pak-f ye. B pa ningd wagdre sẽn zuud n na pidsa a pʋg taal ye, yaa kom n tar-a. Baasgo b sã n yõk-a, a na n yaoo naoor a yopoe, a na vaag a roog zãng n kɩse, la sẽn baood-a a meng wãabo yaa yam kaoolgo soaba a ra-taaga. B na n pãb-a lame, b na n laa-a lame, a kõn yi yãnd pʋgẽ bada. Sũ-kiir bugum sã n wit rao pʋgẽ, bãng-y t'a sũur dokre daare, sugri kõn zĩnd ye. Nimbãan-zoeer ka ba bilfu, ba f rɩgl f kũuna a taoore, a kõn bars ye. M Biiga, kelg m goama, bĩng koɛɛgã f sũurẽ. Deeg m salgsã tɩ f na vɩɩnde, nong m saglsã wala bũmb sẽn be yõod wʋsgo. Gãd-b ne f nus-bi, gʋls-ba f sũurẽ. Bool yam vẽenem tɩ f tão, bool-a tɩ f zoa. Woto a na zãag-f ne sãana, ne pag sẽn tar zelem noogo. A lɩka a peemlɛɛgẽ, a karga tẽnga ween-vɩʋʋgo, a yãenda a yam-pa-seke, kom-bɩɩba sʋka. A yam-pa-sek dɩk a yir sore, a tũuda so-buka sẽn yegd sãana doogo. Zĩig yaa pugsgu, zĩig zoe n sobgame, ya yʋn-sʋka, yaa lika, la paga yiime n seg-a, a baoo peend n lud a nenga wa bi-pugla. A ka yɛɛsd bũmb ye, a ka zoet nif ye, a ka tõe n zĩnd yir ye. A saada so bɛda, a saada so-tiisã, a baooda zĩiga n yɛs n gũud neba. A wudgdame n mobg a sẽn seg a soaba, a wɩsga a meng n yeele: «M da tara bark pʋʋsg maando n na kʋ; n pidsa m pʋlong dũnna. Yaa rẽ yĩng la m yi n seg foom, m yiime n na n bao foom, la m yãend-f lame. M gãaga tʋɩ ne peend neere, yaa peend sẽn yit Ezipt tẽnga. M baoo bũmb sẽn tar yũ-noogo n mese, bũmb sẽn tar gondreyẽoogo, la wisao yũugu. Wa, tɩ d bao sũ-noogo tɩ beoog vẽege, wa tɩ d dɩk d meng n kõ sũ-noogo. M sɩd ka yir ye, a toga so-woko, a looga ne ligda korgo, dẽn kiuugã lebg ki-peelgo t'a yaool n lɛɛg n wa.» A tara goama n tar goama, t'a yam-pa-sek yama wẽnemde. A goama paama pãnga t'a yam-pa-sekr na n tũ-a. A tũud-a lame t'a sũur kiuusdẽ, a tũuda wala naafo b sẽn tat n na n tɩ kʋ, wala yãk sẽn lʋɩ loangẽ. La pĩim n gũud a wakato, n na n kõs a lʋgre, wala tãoog sẽn yõk luiila t'a miẽ tɩ yaa a vɩɩm baasgo. M biiga, kelg maam marsã, kelg m goama neere, sõng tɩ f sore da bʋgd n yek a yam-pa-sek dẽnd ye, da saag n tũ a menesg soy wã ye. Ad neb niyns a sẽn wẽ n kʋ sõor labsa, sẽn da teeg-b meng pãnga paame. A yirã yaa bugum yir sore, a sorã sigd n dabda kɩɩms zĩigẽ. Yam vẽenem ka kaasd n boondẽ sɩda? A pa zẽkda a koɛɛg sɩda? Tãms zutu, soy zutu, so-tiisẽ la a yɛsa, a yɛsa tẽnga noore, a yɛsa sobadsẽ wã n boondẽ. Adem biisi, yaa yãmb la m boonda, ninsaalba, yaa ne yãmb la m kaasda. Yam-pa-sek rãmba, zãms-y yam sõngo, yam kaoolgo rãmba, bao-y sɩlem. Kelg-y, m tara m sũur koɛɛga n na n togs yã; m noor na n yiisa gomde sẽn yaa tɩrga. Yaa sɩd la m na n wilgi, wẽng pa tõe n yi m noorẽ ye, m noora goama fãa yaa sɩda, zirẽ-beed la bõn-goaleng ka be sʋk ye: b fãa yaa vẽenese ne ned ning fãa sẽn tar-a yam, ne ned ning fãa yam sẽn vɩ. Bao-y mam zãmsgo, da bao-y ligd ye, bao-y bãngre n yɩɩd sãnem sẽn yɩlge. Yam sõngo são muizãanfo; bũmb ka be sẽn tog baoobo wala yam sõng ye. Maam, a yam vẽenem, maam n tar bãngre. Maam n wa ne bãngre sẽn yaa zulunga. Wẽng kisgu n wilgdi tɩ f zoeta Wẽnd nifu. M kisa wilg-m-menga la tɩtaam, vɩɩm sẽn ka tũud tɩrga, zelem golongo. Maam n so saglgo la neer wilgri, maam n so wʋmbo la m tar tõogo. Maam n kõt dĩm dãmb b naam. B pãnga yita mam nengẽ, b tõoga yaa mam tõogo. B sã n dɩt naam, yaa maam n kõ-ba, b sã n kaood bʋʋdo, yaa mam maasem yĩnga. Mam nonga sẽn nong-b maam, sẽn baood-a maam ne raab sɩda yãet-m lame. Mam nengẽ yaa faongo la ziiri, arzɛka la sõmblem. M sẽn kõt bee yõodo n yɩɩd sãnem, sãnem sẽn yɩlge, n yɩɩd wanzurg sẽn yit boaagẽ. M sẽn be sor ning zugã yaa sõmblem sore. So-kãng zugu yaa zemsgo tʋʋm la b tʋmda, yaa vɩɩm sõng la b vɩ. So-kãng zugu m pʋɩta sẽn nong-b maama m kũun sõma wã. M pidsda b rota ne arzɛka. Naaba-Wẽnd n naan maam sɩngrẽ, mam la pipi soaba, b bõn-naandsa fãa sʋka. B naan-m lame tɩ bũmb nan ka be ye, b naan-m-la sɩngrẽ, dẽ tɩ tẽnga nan ka yals ye. B naan-m lame dẽ tɩ mogra nan ka tigs a kooma ye, tɩ ko-bulsa nan ka sɩng b kooma bulb ye, tɩ tãmsa nan ka tilg b nao zug ye, tɩ kunkuba nan ka vigl ye. B naan-m lame tɩ tẽnga ne a tẽn-peelma nan ka be ye, dẽ tɩ b sẽn dɩk bũmb ninga n yag dũni wã nan ka be ye. B sẽn wa n yɛdg sa-gãongã, tɩ m beeme, b sẽn wa n kargd mogra toaaga, tɩ m beeme. B sẽn waa n kɩt tɩ sawatã tigimd yĩngri, b sẽn wa n pood mogra ko-nina, b sẽn waa n yãkd mogra toaaga, n yeel a kooma t'a da fudg n yi wã, b sẽn wa n kɩʋʋlemd tẽnga gãongo, m da yɛsa b sɛɛgẽ wala tʋʋmda soaba, n noogd b sũuri beoog sẽn vẽege. M kɩdemda b taoore wakat buud fãa, m da saad n pʋgemda zĩis fãa tɩ m daab yaa m vɩɩnd Adem kamba sʋka. La marsã, m kamba kelg-y m goama: sũ-noog soaba la sẽn tũud-a mam sore; kelg-y m goama, n lebg sẽn mi-b meng võore. Da sãbs-y m saglga ye. Zu-noog soaba la sẽn wʋmd-a m goama, sẽn yɛs-a m dignoorẽ beoog sẽn vẽege n gũud-ma. Sẽn yãend-a maam paamda vɩɩm, a paamda Soaala-Wẽnd yel-sõmde. Sẽn beeg-a maam pogenda a menga, sẽn kis-b maam, nonga kũum. Yam vẽenem soab me-la a roogo, ra-nina a yopoe la a yals yã, a kʋ-la a rũmsi, n kõg a rãam, n maneg a rɩɩb roogo. A tʋma a roog kamba tɩ b moon tẽnga fãa. Sẽn ka tar-a yam tɩ seke, wa ka, yalem buud fãa, wa ka. Wa-y n dɩ m dɩɩbã la y yũ m rãama m sẽn kõgã, bas-y yalemdã tɩ y na vɩɩnde, kẽn-y tɩrga so-sõng pʋgẽ. Fo sã n dat n sagl ned sẽn ka reegd yelle, yaa f sãbsg bala la f bao yã. Fo sã n wilg nin-wẽng a kongre, yaa a tʋʋr bal la f bao yã. Fo sã n wilg sẽn ka reegd-a a kongre, a na n kisg-f lame. Sã n ya nin-sõng la f wilga a kongre, a na n nong-f lame. Kõ nin-sõngo t'a na lebg sõng n paase, zãms nin-tɩrga n paas a bãngre. Yam vẽenem yẽgre yaa Naaba-Wẽnd nif zoeese. Sẽn tara-a yam vẽenem, sẽn mi-a Wẽnde, la nin-sõgo. Maam a yam vẽenem, n na paas f raara sõore, la m na kõ-f yõ-woko. F sã n tar sõmblem yam, f na rɩ a yõodo, f yam sã n ya la f taab yam, f na rɩ bõne. M ba yam kaoolgo yaa pirpiri, a pa tagsd yɩɩga la a ka vʋmd fɩ. A zĩ-la a dignoorẽ, tãng zugu, a zao a goeele, n kamsd so-loaadba, sẽn lood b sore: «A Yam pa sek soab wa ka.» La a yeta yam sẽn paoog a soabã: «Rãam sẽn ya wagdem rãam nooma, tɩ rɩɩb sẽn soosd n dɩtẽ me sakd velbo.» A yĩmdame bala tɩ lik tara a na-tẽnga, tɩ rɩɩba fãa segl be n gũud b rɩ-rɩtba. A Salomo yelbũna: Bi-sõng noogda a ba sũuri, tɩ bi-wẽng sãamda a ma sũuri. Arzɛk sẽn paam ne tʋʋm yoodo ka yõod ye, f sẽn paam ne f tʋʋm sõma bala n tõe n zã f vɩɩm. Sẽn pʋʋsd-a Wẽnde ka kiid kom ye; la Naaba-Wẽnd mongda nin-wẽng a sẽn datã. Nug sẽn pa tʋmd wata ne naongo, tɩ nug sẽn tʋmd wat ne arzɛka. Yam soaba tigsda sɩpaolgo, la sẽn basd-a tigsgu n kẽed gãaga yaa nin-yaalga. Naaba-Wẽnd bark bee nin-sõng zugu, la nin-wẽng noor la a kũum loko. Nin-sõng tẽegre yaa pẽgre tẽegre, nin-wẽng yʋʋre ka zɛɛd sãoong ye. Sẽn tar-a yam sõngo deegda noore, yam kaoolgo soaba goam wãad-a lame. Sẽn kẽnd-a tɩrga tata a sẽn datẽ, sẽn kẽnd-a n tuumnẽ baooda a meng sɩbgre. Sẽn dat-a a to ne wẽnga na n dɩɩ bõne, wa yam kaoolg soab goam sẽn lɛɛg n dɩt-a. Nin-sõng noore: vɩɩm ko-yũuga, nin-wẽng noore: kũum gʋlgo. Beem yaa zabre bug-vɩlenga, tɩ nonglem ya peende sẽn tar n lut kongre. Yam sõng n yaagd nin-sõng noore, la dasaare n palg nin-wẽng bãgdo. Bãngre la yam sõng soab tigsda wa arzɛka, tɩ nin-wẽng zelemde wat ne a wãabo. Arzɛk soab pãng la a arzɛkã, la bũmb ka wãad naong soaba n zʋʋg a naonga ye. Yaa vɩɩm la nin-sõng dolbo, yaa kũum la nin-wẽng laogo. Vɩɩm sore: noor tũudem. Meneng sore saglgo zãgsgo. F sã n tugd beem f ka togsd f pʋg ye, f sã n yelgd rõadga f zema gãeenga. Goam pa gomd n sesdẽ tɩ wẽng ka tũ ye, sẽn mi-a n gom n zemse la gũusg soaba. Nin-sõng zelemde yaa wanzurf sẽn yɩlg zãnga, nin-wẽng sũur ka yiisd bũmb sẽn be yõod ye. Nin-sõng zelemde dɩlgda neb ka tɛka, la gãeemsa gãeemdo n kʋʋd-ba. Wẽnd barka n wat ne arzɛka n yɩɩd m kaaga m rĩir tʋʋlgo. Nin-wẽng wɩsgda a gĩini ne wẽng maanego, tɩ nin-sõng yẽegd a gĩini ne yam sõng baoobo. Nin-wẽng sẽn ka rat yell ningã n pakd-a, nin-sõng sẽn kot bũmb ninga la a paamda. Nin-sõng maneg n wẽrs n zĩime, tɩ sɩlmand sẽn wa bɩ a loogd ne nin-wẽnga. F bao kʋɩɩm daolgo n kẽes f tʋʋmdẽ, f paama bõn-miisg sẽn na n zãab f yẽna la bug-zõos sẽn na n leo f nini. Sẽn zoet-a Soaala nif paasda a yʋʋm sõore, la nin-wẽng yʋʋm tara woogre n dabda. Nin-sõng yɛl baasda ne sũ-noogo, tɩ nin-wẽng saagr faagd n dabda. Sẽn tũud-a Wẽnd be-la a tãnsoben-doogẽ, sẽn pa tũud-a bãmb wãada a menga. Nin-sõng nao ka lukd b zĩigẽ ye. Nin-wẽng roogo ka tiid tɩ yals ye. Nin-sõng zelemda gomda yam goama, la b na n kong n võoga nin-wẽng dẽnna. Nin-sõng noor gomda sẽn sakd kelgre, tɩ nin-wẽng gomd gom yoodo. Naaba-Wẽnd sẽn kis wa fãa-fãa yaa zãmb magbo. B sẽn nong yaa pʋ-peelem magbo. Ned sã n tãoosd daoodo, a yãnd pa zɛɛd ye, sẽn sulgd-b mense, bãmb dãmb n taar yam sõngo. Nin-sõma kẽnda b pʋ-peelem zugu, tɩ nin-wẽns zãmbo wãad-b zãng-zãnga. Naaba-Wẽnd sũ-fõora raare, arzɛk lebgda bõne, la sõmblem na n waame tɩ kũum zãage. Nin-sõng sor yaa saalga, la nin-wẽng paada a wẽnema bẽdgẽ. Nin-tɩrs fãagre la b pʋ-peelem, nin-wẽns wãabo la b tʋls yoodã. Nin-wẽng tẽeb yaalsã yaa kũum n loogd ne-ba, la b tẽeb faadã na n paa koeese. Nin-sõng ka mi yɩɩr ye, nin-wẽng n gãe ne yɩɩre. Nin-yoogo wãad a to ne a zelemde, nin-sõng bãngre yĩnga a yiisda a meng yellẽ. Nin-sõng sũur noomame, tɩ tẽnga fãa naag n kɩdemnẽ, nin-wẽng yell sãamdame, tɩ tẽnga fãa kaasd sũ-noogo. Nin-sõma maasem yĩnga la tẽng meta, la nin-wẽns zelemde n wãad-a. Yam kaoolg soaba n pursd a taaba, yam soab sẽn mi la sĩndgu bala. Sẽn gomd-a wʋsgo lukda a taab bãongo, yam sõng soaba solgda yɛla. Buud sẽn be n ka tar naaba ka yẽegd ye; sagendb lagem koabga tɩ yõod kẽ tẽnga. Sẽn yet-a t'a na n yao a taab sama, bõnda a menga, sẽn dat-a laafi ka lʋɩɩsd a toog samd a woto yaoobẽ ye. Pag sẽn tar neerem paamda waoogre, la rao sẽn modgd a menga paamda arzɛka. Bũmb sẽn manegd nin-noanga yaa a nonglma. Sẽn ya-a nin-toaaga lɛɛg n sɩbgda a menga. Nin-wẽng tõe n paama bũmbu la a ka mi a na rɩ a yõod ye, sẽn tũud-a zemsgo paamda a rolbo. Sẽn yet-a t'a baooda sõmblem dɩkda vɩɩm sore, tɩ sẽn baood-a wẽng dɩkd kũum sore. Wẽnd sẽn kis wa fãa-fãa yaa ninsaan-kazukma. Wẽnd sẽn nonge la ned ninga sẽn tara a meng neere. Nin-wẽng pa tõe n pa reeg a sɩbgre ye, nin-sõma buudu na n tɩlgame. F sã n dɩk bũmb sẽn dõog ne sãnem n sog kurkur yõore, f maana wa paga sẽn tar neerem, n yaool n ka mi sẽn toge la sẽn segd ye. Nin-sõng yam sẽn date, yaa vɩɩma tũ neere. Nin-wẽng sẽn kãabd a meng neera wat n teka Wẽnd sɩbgre. A kõ n da kees paoong fɩɩdame, la a tigsd-n-bĩngdẽ naong sɩlgdame. Sẽn ya-a kõata, b na n kõo yẽ soaba, la sẽn kõt-a koom me na paam n yũ n tɩge. Sẽn daad-a kood zãng n basd a taaba ka tar zoa ye. Neba sẽn nonge la sẽn sakd-a a teed koosgo. Sẽn baood-a neere baooda Wẽnd sõm, sẽn dat-a wẽnga, wẽng n dɩt a. Sẽn teeg-a arzɛka, arzɛk n wãad-a. Nin-sõng wẽnda tɩɩg sẽn tobd vãado. Fo zak sã n ya zũna, fo yaooga sobgo, f sã n ya yalma fo lebga yam soab yamba. Nin-sõng pʋɩɩr la vɩɩm tɩɩga, yam vẽenem soab paamda neba pẽgre. Nin-sõng sã n paam dolb tẽng zug ka menga, nin-wẽng me kõn kong a sɩbgr ye. Sẽn nong-a zãmsgo nong n deega saglgo; sẽn ka rat-a saglgo wilgdame t'a ka yam ye. Soaala sõm la nin-sõngo takd a zugu, b ka basd yam wẽng soab n pa sɩbg ye. Wẽnem pa paasd keglem ye, sõmblem yẽgendã n ka tar vikda. Pag sẽn tar sũ-keelem yaa a sɩd faongo. Pag sã n pa zoet yãnde, a sɩd zĩime tɩ ya wa zũnzũuri n fõosd a kõaba sɩɩlem. Nin-sõng sẽn baoode yaa zemsgo, nin-wẽng sẽn baoode yaa tudgri: nin-wẽns goama yaa bẽdgo sẽn kʋʋde, nin-sõma noor n fãagd-b. F lub nin-wẽnse, sɛɛme, la nin-sõma roog na n kell n yalsame. B pẽgda ned sẽn gomd tɩ tũudẽ, b sãbsda ned ne a goam kɛdba. Fo sẽn na n mams f meng wa nin-bila, tɩ f sõgna yaa a ye bala, dẽ n são fo sẽn get f meng wa nin-kãsenga, n yaool n ka tar bur n wãbdẽ ye. Nin-sõng geta a rũmsa mens yell neere, nin-toaag sẽn mi yaa toolem bala. Sẽn kood-a pʋʋgo kõn kong dɩɩb ye, geel faad soab bal la yalma. Wẽn-kɩɩs tʋlsem yaa nin-wẽnsa paoongo; nin-sõma kɩda b yẽgna bilf-bilfu n wa tõe n wom biisi. Nin-wẽng zelemd golemd n wẽneg n yaa a bẽdgo, nin-sõng ka mi zĩi n yɩɩdẽ ye. Ninsaal zelem sõngo n kõt-a rɩ noodo, ned kam fãa zĩ-la a tʋʋm maasmẽ. Yam kaoolg soaba tagsdame t'a kẽnda tɩrga, yam sõng soaba n kelgd saglgo. Yam kaoolg soab ka tõe a menga, n wẽneg n basd a sũ-puura tɩ pukd yɩnga, yam soab tʋʋsdame tɩ yaa wa b ka tʋʋs-a ye. Sɩd togsdame tɩ bʋʋd tõog n kao tɩrga, kaset zirẽ wata ne tudgri bala. Goam toog ned sẽn be zĩig ninga, sʋʋg zẽkdame. Nin-sõng zelemd liginda sãmpoaga. Noor sẽn togs sɩd kõn mum abada ye, sẽn tuut-a neba kõn kaoos ye. Nif pa yãet n kams t'a loog ye. Sẽn bilgd-a wẽng sũurẽ ya zirẽ-beed n gãe, sẽn sagend-a laafi saglse tara sũ-noogo. Yel-beed buud kõn lʋɩ nin-sõng zug ye, nin-wẽns nengẽ yel-beed la b arzɛka. Wẽnd sẽn kis la zirẽ-be-neda; Wẽnd sẽn nonge la sɩd soaba. Yam soab ka zukd a sẽn mi fãa yɩng ye, yalemsa bala n moond b sũura gãeemdo. Sẽn nong-a tʋʋmde la naam tog ne, sẽn kis-a tʋʋmde, la yembd tog ne. Sũ-sãang kʋɩɩsda neda, tɩ gom nood maagd sũuri. Nin-sõng wilgda a to so-sõngo, nin-wẽns sore ya b meneng sore. Kʋɩɩm-daolg ka kẽnd gʋga n paam bũmb n sẽ ye, wɩng-m-meng bala n wat ne yõodo. Sõmblem sore: vɩɩm sore; wẽnem sore: kũum sore. Bi-sõng vɩɩm pukda a ba sẽn wub-a to to. Sẽn sek-a a menga ka reegd saglgo ye. Ninsaal zelemd sõngo n kõt-a rɩ noodo, nin-wẽnsa vɩɩm yaa maan f to pãng bala. Sẽn maand-a gũusgu ne a zelemde n paamd yõ woko, sẽn gomd-a wʋsgo kẽeda moogo. Kʋɩɩm-daolg dat rɩɩb n zoet toogo, tɩ sẽn ka zoet-a toog raab na n pid zãnga. Nin-sõng kisa zirẽ-beedo, tɩ nin-wẽng paoogdẽ la lukd a taab bãongo. Sõmblem gũuda sẽn kẽnd-a tɩ yell ka a zugu, la yel-wẽnd n sãamd nin-wẽnsa yelle. Nina maanda wa a tarame, n yaool n ka tar fɩ, tɩ nina maand wa a ka tare n yaool n ya arzɛk soaba: Wakat ninga arzɛk soab wat n kong n yiisa ligdi n fãag a yõore, la kõn yɩ boto ne naong soab ye. Nin-sõng vẽenem n wit neere, nin-wẽng fitila ka zɛɛd kũum ye. Titaam soaba nonga no-koɛɛma. Sẽn tar-b yam sõngo la sẽn kelgd-b saglse. Arzɛk sã n tigs wakat yɛnga, daar a ye n sɛt-a, arzɛk sẽn paasd bilf-bilfu fɩɩdame. Tẽeb sẽn vaale yaa sũur sẽn yaale, raab sẽn pidsi vɩɩm n tão n yit wat tɩɩga. Sẽn ka kelgd-a sõmblem koɛɛga kẽeda moogo, sẽn deegd-a noore paamda dolbo. Yam sõng sẽn zãmsd a soaba wata ne vɩɩm, t'a sõngdame tɩ f põs kũum bẽdgo. F tagsgo sã n wẽnd neba fãa rẽnna, neba fãa nong-f lame; la ka zu-noog kãng sora la nin-wẽnsa na n yãend n dɩk ye; soy na n yɩɩ goalma, kẽnd na n yɩɩ toogo. Yam soab tʋmda ne gũusgu, yalem daoog yalemdã pukda zĩig zãnga. Nin-wẽng sã n wat ne koe-beedo, a wata ne yell sẽn tõe n lɛɛg n dɩ-a. Ned sẽn ka tar a toorẽ yell tʋmbo n be zĩiga. Sẽn yet-a t'a toog ka be ne a kamb gʋʋlgo, yẽ soab soga yãnde la fare. B sẽn wilg a soab t'a reege, yẽ soab na n paama waoogre. F raab sã n pidsi, f yam gãee bãane, la yalem sẽn get wa yel-beedo: yaa zãag a meng ne wẽnga. Tũ yam sõng soaba n paam yam sõngo, f tũ yalma, f wʋm toogo. Bõne n lɩgsd yel-maand naoore, nin-sõma gala ne yõodo. Nin-sõng yagense n dɩt a raboogo, yel-maand sẽn paam arzɛk ninga lebda nin-sõngo. Nin-sõng kooda a naong pʋʋgo t'a kẽesd-a tɩgre, la nin-wẽng kũuma, a wẽnema n wat ne rẽ. Ba sã n ka mi a biig sɩbgre, a ka nong-a ye, ba sã nong a biiga, a ka kaoosd a sɩbgr ye. Nin-sõng ditame tɩ sig a yĩnga, la nin-wẽng pʋg yãbda kom bala. Pʋg sõng meta a roogo tɩ pʋg gãeeng wa tus-a ne a nus n lubi. Sẽn tũud-a noor yaa sẽn zoet-a Wẽnd nifu, sẽn sãbsd-a Wẽnde yaa sẽn tũud-a so-yoodo. Yam kaoolg soab goamẽ ka kongd zẽk-m-meng ye, la yam sõng goama zãra ne rẽ. Nag koodse sã n kaẽ, kood me ka ye, nag koaadg sã n tar pãnga kooda me waa zembala. Nin-sõng togsda a nif sẽn yãende, kaset zirẽ yũug yaa zirẽ-beed yũugu. Fo baooda yam sõng ne f toorẽ pãnga, ad-f kõn yãend-a ye, la a paoong yaa naana ne yam sẽn wɩsg a soaba. Zãag f meng ne yalma, yẽ sɛɛgẽ f kõn tol n wʋm gomd sẽn tũud ye. Wilg f vɩɩma sẽn tũud sor ninga, yaa yam sõng tʋʋmde, yaa ned sẽn tar gũus-m-menga tʋʋmde; nin-wẽng bus sɩdã n pukd a gãeemdo. Nin-wẽng toog ka be ne a tudgr ye, la Wẽnd zood sigda nin-tɩrse. Sũur mii a meng sũ-sãanga, la a ka basd t'a sũ-noog lebg sãan dẽnd ye. Nin-wẽng roog lʋɩta bõra, nin-sõng zãnde yɛsa wɩla n kaoose. Nina yãeta a sore n yet t'a yaa tɩrga, n mik yaa kũum sore n dɩg a taoore. Laad tõe n laame, tɩ sũ-noog kaẽ ye, sũ-noog me tõe n wa baasa ne sũ-sãanga. F yama na n wẽneg n yii ne f menga f sã n ka yɛs f zĩ-yɛnga, nin-sõng yẽ sũur na n kell n yɩ noog ne a tʋʋma. Yam kaoolgo soab deegda a sẽn wʋm fãa, yam sõng soab maanda gũusgu n pa kẽnd yaar ye. Yam sõng zoeta wẽnga n lebda a poorẽ, yam kaoolg soaba yɩkda ne tɩtaam n lʋɩ pʋgẽ. Sũ-pu-ned maanda sẽn pa toge, yam kaoolg soab maandame tɩ b kis-a. Yam kaoolg soab pʋɩɩr yaa gãeemdo, yam sõng soab zu-zẽkre yaa a bãngre paasgo. Nin-wẽns yĩga nin-sõma taoore, nin-sõma dignoorẽ pida ne nin-wẽnse. Ba a yak nengẽ naong soab yẽta kisgu, arzɛk soaba zo-rãmb yaa wʋsgo. Ned ninga sẽn sãbsd a to maanda wẽnga, sũ-noog soaba la sẽn zoet-a naong rãmb nimbãanega. Wẽng maaneg yaa bõe sã n ka tudgri, sẽn baood-b neere la Wẽnd nonga la b pʋgda. Tʋʋmd fãa tara a yõodo, gom-toog yõod la pʋg vɩʋʋgo. Yam sõng rãmb zu-zẽkre la b arzɛka, yalemsã zu-zẽkre, yaa b yam kaoolgã sẽn pid zãngã. Sẽn kõt-a kaset sɩda fãagda neb yõore, sẽn yagd-a zirẽ yaa tẽn-wãada. Sẽn zoet-a Soaala-Wẽnd nifu zĩndga a menga laafi zĩigẽ la a kamb tara soondg zĩiga. Naaba-Wend nif zoeese wata ne vɩɩm, a sõngdame tɩ f gãndg f kũum bẽdgo. Naab zu-zẽkre yaa a poorẽ sã n ya yalengo. Naab neb sã n ya karkare naam sɛ yã. Sũ-bʋgsem soab tara yam, sẽn yãgd-a ne sũ-puuri pukda a gãeemdo. Vɩɩm sẽn sakde yaa sũur sẽn zãr ne yɩɩre, raab wagl lebga zũnzũuri n fõosd f kõaba sɩɩlem. Sẽn maand-a a ka neng soab pãnga, tʋʋsda a Naanda, sẽn maand-a neer ne-a, waoogda Wẽnde. Bũmb ka lubd nin-wẽnga n zʋʋg a wẽnem ye. Ba kũum wakato nin-sõng ket n tara saagre. Yam vẽenem sigda sẽn tar-a yam, yaa gãeemsa nengẽ bal la b pa na n yãend-a. Sõmblem zẽkda tẽnga rãmba, yel-wẽnd bala la b yãnde. Dĩm sẽn nong yaa sõgen sẽn tar yam, la a sũur puuda ne sẽn ningd-a yãnde. Leok noog gãnegda sũuri, leok wẽng puugda sũuri. Yam sõng rãmb zelemde kɩtame tɩ b nong bãngre, yam kaoolg rãmb noor wukda gãeemdo. Naaba-Wẽnd nina nee zĩig zãnga, b nee nin-sõma la nin-wẽnse. Zelemd sẽn mi sũur bʋkre kõta vɩɩm. Zelem toaag kɩtdame tɩ f bas raoodo. Yam kaoolg soab sãbsda a ba wubri, la biig sẽn maand b sẽn wilg-a la yam soaba. Nin-sõng yiri yaa arzɛka, nin-vẽng paoong yaa sãmb-sãmbe. Nin-sõng gomdame n zãmsd bãngre, yalem nengẽ, yaa bũmb a to. Wẽnd sẽn kis wa fãa-fãa yaa nin-wẽns maoongo, b sẽn nonge yaa nin-tɩrs wẽn-kosgo. Wẽnd sẽn kis wa fãa-fãa yaa vɩɩm yoogo, b sẽn nonge yaa sẽn zoet-a n pʋgd sõmblem. Sẽn zãag-a ne so-sõng sɩbgre kõn yɩ bilf ye, sẽn ka reegd-a saglgo na ki. Wẽnd nee sẽn be bʋg-tẽnga pʋga, la b nee ninsaal sũuri n yɩɩda. Zẽk-m-meng soab pa rat tɩ b rems-a ye, a ka tũud yam sõng rãmb ye. Sũur sã n yaa noogo, neng yaa neere, sũur sã n sãame yam me sãamdame. Yam soab baood n paasa a bãngre, yalem noor pida ne yalemdo, rẽ la a rɩɩbo. Nimbãan-ned beoog wẽnda a zaame, beoog sẽn vẽege sũ-noog soab tara a kibsa. Fo sã n zoet Soaala nifu tɩ f paoong ya bilfu dẽ pa são fo sẽn tar arzɛka n yaool n zĩ ne yɩɩre? B sẽn na n kõ-f zẽ-zãgs ne nonglem são b sẽn na n kõ-f ne beem, naaf sẽn nob a nobr tɛka. Sũ-pu-ned takda zabre, sũ-bʋgsem soaba sigsd-a lame. Kʋɩɩm daolg sor pida ne gõose, tʋʋm noang sor yaa so-kõodre. Bi-sõng noogda a ba sũuri, bi-wẽng sãbsda a ma. Yam kaoolg soab yalemda noom-a lame, yam sõng soab tũuda a sor tɩrga. Yẽsg sã n ka pidi, f sẽn dat ka taasd ye. Sagendb lagem koabga tɩ b fãa pids zãnga. Ned sã n bãng leokre a sũur yaa noogo, leokre sẽn ya-a sõmbo sɩd wata ne sũ-noogo. Yam sõng soaba sor kuiisa yĩngri, woto a ka sigd tẽngre, bʋg-tẽngẽ ye. Naaba-Wẽnd tusda wilg-m-meng soab roog n lubi, bãmb n yaool n lebsd naong soab toaag kugri a zĩigẽ. Naaba-Wẽnd sẽn kis wa fãa-fãa: yaa nin-wẽnsa sẽn mii n zĩnd n geel b geelsã, Wẽnd nonga goam bʋgsa tɩ bãmb yaa sõmbo. Wagdr zak ka laafi zak ye. Sẽn ka sãamd-a bʋ-tɩrse ne kũuni na n vɩɩndame. Nin-sõng tagsdame n yaool n leoke, nin-wẽnsa yiisda goam sẽn ka võor ye. Wẽnnaam zãagda b menga ne wẽnem dãmba, n yaool n kelgd nin-sõma pʋʋsgo. Gesg sẽn noogd sũuri, yaa sẽn ka naag-a ne sũ-sãanga, kiba noog wata ne pãn-paale. Fo tʋbr sã n modg n deeg saglse, ad-f ti-la f zaka yam sõma rãmb sʋka. Sẽn bas-a so-sõng tũudem sãbsda a menga, sẽn deegd-a saglgo paamda yam. Naab a Wẽnd nif zoeese yaa yam sõng zãmsgo. Sulg-m-meng n dengd taoore tɩ ziir yaool n pʋge. Ninsaal sẽn tõe yaa yɛla bilgri, sõng tɩ pidsa marsã bee ne Wẽnde. Ninsaal yamẽ, soya fãa yaa sõmbo, Naaba-Wẽnd bala n yaool n tar ned kam fãa neer la a goalenga. Wilg Wẽnd f sẽn dat n tʋm tʋʋmd ninga, tɩ f sẽn dat na pidsi. Wẽnd n naan bũmb fãa ne b raabo, n naan nin-wẽnga t'a yẽ toogo, sɩbgr kãsenga daare. Wẽnd sẽn kis wa fãa-fãa yaa wilg-m-meng soaba, a pa tõe n pa reeg sɩbgr ye. F sã n dat f yel-wẽna yẽesgo, modge ne sulg-m-menga la noor tũudem, modge n zoe Wẽnd nifu, n paam n põs wẽnga. Ned vɩɩm sã n tat Wẽnd yam, Wẽnd meng n sõngd t'a yell maneg ne a bɛɛba. F sẽn paam bilfu sã n yaa sõmblem paoongo, yɩɩda arzɛk wʋsgo sẽn ka tũ so-sõng n paame. Ninsaal sũur baooda so-sõngo, la Wẽnd bala n kõt a Wẽnd pãnga. Dĩma sẽn togse, Wẽnd n togse, bʋʋd zĩigẽ a ka mi ned wẽgb ye. Sẽn tar n makd zɩslma, ne a laas a yiibã, yaa Naaba-Wẽnd n so. Sẽn dɩkd n ning laasã pʋgẽ n bãng zislema le yaa Naaba-Wẽnd n so. Ninsaal da tall-ba n maan a sẽn dat ye. Sẽn ka tog wa fãa-fãa ne dĩma yaa wẽng maanego. Naam goeele zaoolgda neer sõmblem zugu. Zelem sõng paamda dĩm sõm, la dĩm nonga ned ninga sẽn gomda t'a goama tũud sore. Dĩm sũur sã n puugi, sõgen kãsenga la a yiisda: m ba Kũum. Nin-sõng n sigsd dĩm sũ-puuri. Dĩm neng yãgda vɩɩm yãgbo, dĩm yel-sõmde maagda yĩnga wala pipi sa-koom. Yam sõng pʋgb yõodo yɩɩda sãnem, a yõod yɩɩda wanzurf. Nin-sõma so-sõngo yaa wẽng basgo; yõ-wok soaba la sẽn maand-a gũusgu a tʋʋma fãa pʋgẽ. Titaam soaba wãab ka zɛɛd ye, wilg-m-meng lʋɩɩse segl n sɛɛme. Sulg-m-menga n lebg bilfu ne nin-bõonese bee yõodo n yɩɩd naag nin-bɛdã n dɩ b paoongo. F sã n tags bũmb neere, f yãeta f sẽn na n maanega, sẽn teeg-a Naaba-Wẽnd n maand zu-noogo. F tagsgo sã n ya sõngo, b tõe n bool-f lame tɩ yam vẽenem soaba. Sẽn sakd kelgre yaa koɛɛg sẽn bʋk n gome. Sẽn tar-a yam sõngo tũuda vɩɩm sore, yalemsa yalemdo la b sɩbgre. Nin-sõng sẽn tagsd n yaool n goma yiisda gom tɩrse, a noor goama me yaa tɩrse, n sakd deegre. No-noom wẽnda sɩ-vaka: yẽ n noom noore, yẽ n noom yĩnsi. Nina yetame t'a sor yaa tɩrga, n mik yaa kũum sore n dɩg a taoore. Sẽn tusd tʋʋm-tʋmda yaa a pʋga, noora sẽn dat dɩɩbã, n tusd-a. Nin-yaalg baooda wẽnga, t'a zelemd yaa bug-vɩlenga. Ninsaan-kazukemdi yaa zab-taasa, tẽn-kãn-neda zablgda zo-rãmba ne taaba. Sũ-pu-neda tata a to n kẽesd-a a sẽn pa ratẽ. Sẽn bilgd-a wẽnga, la a mumd a nin la a noore, yẽ soab zoe m maana wẽnga. Zoob peendo yaa zɩɩr pugla, zɩɩr soaba segda sõmblem sor zugu. Ned sẽn tõe a sũuri yɩɩda gãndaoogo, maag-m-meng soaba yɩɩda tãnsoaba sẽn tõe n wã tẽnse. Tentees loadb lagem koabga tɩ Wẽnd daab reng pidsgu. Rɩ-faasga ne laafi são zak sẽn pid ne nemd la zaba. Sõgen sẽn tar yam são bi-roak sẽn wegme, n ningd a ba yãnde; sõgen sõng lebgda zak biiga n dɩt zaka soab raboogo. Wala wanzurf la sãnem sẽn yɩlg boaagẽ, woto me la Wẽnd vɛɛsd sũya. Nin-wẽng kelgda zelem goaleng soaba, tɩ zirẽ-be-ned kelgd gom yood soaba. Sẽn laad-a naong soaba laada a Naanda, ned ka laad nimbãan-neda n ka paam sɩbgr ye. Nin-kẽem zu-zẽkre: a yagense, la kamba faongo: b ba. Gom minim ka tog ne yam kaoolg ye, la sẽn ka tog n yɩɩda, yaa naab ne zirẽ-beedo. Kũun yaa wa zu-noog tɩɩm, f sã n yãend bũmb n kõ, f sẽn dat fãa na yɩ. Sẽn yĩmd-a yelle n mi zood korem; sẽn ka tõe-a a zelemde welgda zo-rãmb ne taaba. Saglg manegda sẽn tar-a yam soab yelle n yɩɩd dasab koabga sẽn mamegd yalem yelle. Nin-wẽng sẽn dat yaa a zẽk a zug ne a zu-soaben-dãmba, la a bãnge tɩ na-yir nin-toaaga la b na n wa tʋm a nengẽ. Fo sẽn seg bõnyẽega b sẽn dɩgs a kamba, são fo sẽn na n seg zu-kaoolg soab gãeemda yikri. Sẽn maand a soab neere t'a lebsd wẽnga, kõn zãag a yiri bada ne yel-beed ye. F sã n sɩng zabre yaa ko-sor la f pak yã, bas zabra tɩ sɛ t'a nan ka yãng ye. Paalg nin-sõng bʋʋdo, n yaool n bas nin-wẽnga, yaa bũmb a yiibu sẽn ka tat Wẽnd yam ba bilfu. Ligd yõodo la bʋgo a sã n be yalem nugẽ, yaẽ la rɩk n da yam sõngo, la yɩta a wãna tɩ yalemd be sʋka. Yamleoog tɛka, zood tɛka, la rogem ket n yɛsame, ba ya bãaga. A yam-pa-sek nonga pãsg a gɛde, a nonga kãab a to t'a na sõng-a. Sẽn nong-a zabre nonga wẽnga, mo-be-neda baooda a meng wãabo. Laafi ka be nin-wẽng sũurẽ ye; zelem goaleng ka põsd yell ye. F rog yalma, f rog sũ-toogo; f rog gãeenga, f kõn le bãng sũ-noog ye. Sũ-noogo la bãag tɩɩm, a tɩ-sõngo, sũ-beed waglemda kõaba. Sẽn nong-a ligd tɩ looge soosdẽ n deegda kũuni, tɩ bʋʋda na n lebg kɛdba. Sẽn tar-a yam soab neng pukame n dɩga ne yẽesem; a yam-pa-sekr nini wẽnda bi-pɛɛlg rẽnna: pɛɛla la ka ne ye. Bi-yalem yaa a ba sũ-toogo, a yaa a ma sũ-beedo. Ka tog tɩ b sɩbg nin-tɩrg ye, la na-biig pãbr yaa wẽng n yɩɩda. Sẽn tõe-a a noore, la yam soaba, sẽn tõe-a a menga tʋmda yam tʋʋmde. Yalem sẽn tõe a noore, lebgda yam soaba. A sã n ka yaagd a noore b yetame t'a yaa sɩlem soaba. Sẽn vɩ-a kɛɛnga la a meng yĩnga vɩ-la wala a sẽn date, saglgo buud fãa puugda a sũuri. A yam-pa-sek pa wɩngd ne tagsg ye, a sẽn nong yaa a wilg a sũur daabo. Pʋ-toog sẽn be zĩig ninga sãbsgo me bee be; ned sã n ka le kẽed f tãpẽ, legba pursgu. Ninsaal goama, bãng ko-zulunga, koom sẽn fõt ne pãnga, boto la yam sõngo. Bũmb sẽn pa segde, yaa bʋ n yiis nin-wẽng yellẽ, n yaool n paalg ned sẽn ka tar a toorẽ yelle. A yam-pa-sek zelemd kẽesd-a-la zabẽ, a yam-pa-sek noor n wat ne a pãbre. A yam-pa-sek noor n wãad-a, a yam pa sek noor n lebg a kũum loanga. Tẽn-kãn-ned goam zɛɛda wa rɩ-noodo, tɩ f sã n wãbd-a bɩ a sigd f yĩnga. Kʋɩɩm daolgo yaa tẽn-wãad ma-biiga. Soondg zĩiga: Naaba-Wẽnd yʋʋre; nin-sõng bas a meng ne Wẽnde, yell buug kõn le tõog n pak-a ye. Arzɛk soab arzɛka la a tãnsoben-doogo, arzɛka soab yamẽ a gũbga a meng ne lalg sẽn zãnde. Ned sã n zẽkd a menga, a lʋɩs n yao, ned sã n sulgd a menga, a ziir n yao pʋkri. Ka kelg n tɩge n yãgd leokre, yaa wilg f gãeemdo n paas f yãnde. Ninsaal tõe n deega yĩnga bãaga, la a sã n bẽed yam bãaga, a na n yɩɩ wãna n maan daoodo. Sẽn tar-a yam baooda a bãngr paasgo. A sẽn nong kelgre yaa sẽn tõe n paas a bãngre. Kũun pakda kʋɩlensa fãa, kũun kɩtdame tɩ dĩm dãmba taoor taab ka le yaa toog ye. Sẽn deng-a toagsga kõta a meng bʋʋm; mik zabd-n-taaga na n waame tɩ lebg sogsgo. Wẽnd leokre sɛɛsda zaba, nanamsa meng tũuda b sẽn yalse. Ma biig sẽn paam paoogre ka le tõe n ta ye, lebga tãnsoben-doogo, lebga tẽng sẽn tõe n zab n fãag a menga. Noor sã n ka sakme, pʋg ka pit ye, ninsaal zelemde n kõt-a t'a rɩ. Zelemde n tõe tɩ f vɩɩnde, zelemde n tõe tɩ f kɩ, sẽn mi-a goam n dɩt a yõodo. F sã n paam paga, f paama sũ-noogo; yaa kũun la f paam Wẽnd nengẽ. Naong soab gomdame n bõsd tɩ b leok-a, la arzɛk soaba leokda ne pãnga. F sã n tar zo-rãmb wʋsgo, f ka le so f meng ye. Zoa ninga f nong-a lame n yɩɩd f ma-biiga. Naong soab sẽn vɩ a pʋ-peelem vɩɩm, são arzɛk soaba sẽn zĩ ne zelem golemde. Tʋlg bũmb n yaool n ka reng n tagse ka bõn-yõod ye, woto f sã n maand yãgbo, f tudgame. Yaa tõnd yalemdã n wat ne d meng bõne tɩ d lɛɛg n ningd Wẽnd taale. Arzɛk soab sõta a zo-rãmb ka tɛka, naong soab pa tar zoa ye. Kaset ziri ka paade n ka yãend a sɩbgr ye, la sẽn yagd-a zirẽ ka põsd ye. Kõat tara neb ka tɛka sẽn belgd-a n dɩtẽ, ned kam fãa yõgda zoodo ne sãonsãood soaba. Naong soaba, saam-biis kis-a lame, naong soab zo-rãmba zoet n bas-a lame; a yɛs n tara goama, mik b sẽegame. Sẽn nong-a a menga modgdame t'a tagsg yɩ tɩrga. Sẽn ka basd-a t'a yam kẽ moogo, yẽ soab yell yaa neere. Kaset zirẽ ka paad n ka reeg sɩbgr ye, sẽn togsd-a zirẽ-beedo wãada a menga. Yalem ka tog n vɩɩnd wala naab ye, yamba me ka tog ne naam ye. Ned ninga yam sẽn sek-a yaa sũ-bʋgs soaba, a zu-zẽkre yaa a tõog n kõ beegr sugri. Dĩm sũ-puuri, bãng bõnyẽeg kɛlenga, dĩm yel-sõmde yaa meenem sẽn dʋʋgd mood zutu. Biig sẽn ya gãeenga lebga sabaab a ba yĩnga, pag kɛlenga yɛsa wa toaka n ka yoogd tao-tao ye. Yir ne arzɛka yaa f ba n bas n looge, pʋg-sõng ne yam sẽn pidi yaa Naaba-Wẽnd kũuni. Kʋɩɩm tʋɩta a gõeem gãaga, sẽn ka nong-a tʋʋmde kiida kom. Sẽn deegd-a noore wogenda a meng yõore, sẽn ka rat-a n tũ baooda a kũum. Sẽn zoet-a nin-koam nimbãanega, pengda Wẽnde la Wẽnd yaa roanda. Tẽeb sã n ketẽ bɩ f sɩbg f biiga, fo yee n da sɩbg-a tɩ tũ ne a yõor ye. Sẽn puugd-a a sũur wʋsgo toga ne sɩbgre, f sã n bas-a, n ka sɩbg-a, f yet-a lame t'a paas beoogo. Deeg saglgo, tũ noore, tɩ f na paam yam sõngo. Ninsaal sẽn dat a sũurẽ ka tɛk ye, la Wẽnd pʋlemd bala n ka vaande. Neb sẽn dat ne ninsaala yaa sõmblem vɩɩm, woto naong soab la b nonga n yɩɩd zirẽ-be-neda. Naaba-Wẽnd nif zoeese wata ne vɩɩm, bãmb nengẽ f tarame n dɩtẽ, la yʋngo yell ka wat n pak-f ye. Kʋɩɩm daolg nug tʋmda laagẽ la a nug ka pãnga n na n ning sag-võra a noorẽ ye. Wẽ sẽn nong-a a tãab laado, tɩ tembenda na bãng yam. Wilg nin yẽesenga t'a tudgame t'a yam na puki. Biig sẽn wat ne yãnd la paoor, maanda a ba pãnga la a kɩtdame t'a ma kʋɩ tĩiga. M biiga, zãag f menga ne zãms wẽnse, n da wa zãag f meng ne bãngr sõng ye. Kaset faoog soaba laada bʋ-kaooda, nin-wẽns noor venda wẽnga wala koom. Yaa sẽn nong-b taab laad yĩnga, la b pees rasaare, la yam kaoolg soab poore n tog ne pãbre. Taab laado la rã-yũud tʋʋmde, rãam wata ne zaba. Sẽn bas-a tɩ rãam lub-a ka yam soab ye. Naab sũur puug yã: bõnyẽeg n kelme. Sẽn baood-a a noore baooda a kũum. Paam n põs zaba yaa bũmb sẽn waoogd neda, yam ka kɛɛg soaba n tʋkd zaba a zugẽ. Sẽoog tatame tɩ kʋɩɩm zãgs koobo. A ta sɩpaolgo, bãng-y t'a kõn tigs fɩ. Tagsgo pita ninsaal sũuri wa ko-liungu, tɛk lebga yam soab toog n yũ. Neb wʋsgo beeme tɩ b pẽgd b tũudem, la bãng-y tɩ nin-sõng yãeeb yaa toogo. Ned sã n vɩ sõmblem vɩɩm, a loogre poore a kamb na yãe sũ-noogo. Naab sã n kaood bʋʋdo, ka yãet n kaoos t'a nif welg nin-wẽngã ne nin-sõng ye. Ãnda n tõe n yeele: m sũura pekame, m zãaga ne yel-wẽnd zãnga? Bũmb a yiibu la Wẽnd kis wa fãa-fãa, yaa magb zĩigẽ laag sẽn yɩɩd laaga, tɩ kãntɩɩg yɩɩd kãntɩɩga. Biig zoe n wilgda a sẽn ya a soaba ne a tʋʋmde, tʋʋmda sã n ya pʋ-peelem la zemsg tʋʋmde. Tʋbr yaa kelgr yĩnga, tɩ nif ya gesg yĩnga, la a yiiba fãa yaa Wẽnd tʋʋmde. Da nong gõeem n wa lebg naong soab ye. Ypk f nini tɩ f na paam n dɩ n tɩge. Koaas taoore, daada gomda woto: yõod ka ye, yõod ka ye mik a na n kẽnd n zãagdame la a sɩng a meng pẽgre. Sãnem la muizãan neeb ka baood n kong ye, goam sẽn wat ne bãngr zulunga yaa arzɛk sẽn pid ne yõodo n yɩɩda. Ned dɩ fo samde tɩ ned a to wa yeel tɩ yẽ n na n yao samdã, deeg bobell a nengẽ, deeg a fuugu. Zãmb dɩɩbo nooma noorẽ, mik noor sã n pid ne-a, yaa waa a pida ne kuga. Sagl sõng sã n deng taoore, f tõogda f tʋʋmna wa f sẽn kaoole. Goam goamd maanda zãmbo n lukd bãongo, zãag f menga ne gom toog soaba. Sẽn kãabd-a a ba la ma wẽnga, yaa ned sẽn kẽ likẽ t'a fitil wẽneg n ki. Arzɛk sẽn paam n ka namse, rɩtame n ka kaoose. Da yeel lɛ-lɛ: m na n maana wẽnga n lebs wẽnga. Teeg Wẽnde tɩ Wẽnd na fãag-fo. Naaba-Wẽnd sẽn kisi: yaa laag fãa tõe n yɩɩ magb laaga. Bõn-magdga sã n ka magd neere, ka sõma ye. Ninsaal naoore Soaala n zẽkd-a, ninsaal yɩta a wãna n bãng a sẽn dabdẽ. Da yeel yĩngr-yĩngr tɩ f pʋlma Wẽnd woto la woto ye. Da pʋlem n sɛ n yaool n sɩng tagsgo ye. Dĩm sõngo yelgda a soolem dãmba wa ki sẽn yelgd zɛɛgẽ, n bas nin-wẽnsã kɛɛnga tɩ b wẽnema lɛɛg n dɩ-ba. Sũura koɛɛg yaa fitila la Wẽnd sẽn kõt ninsaala t'a na n bas t'a vẽenema kẽ a yama zãnga. Sẽn wogend dĩma yõore yaa sõmblem la noora reegre; naama zaoor viginda sõmblem zugu. Kom-bɩɩb faong yaa b pãnga, nin-kẽems faong la b zoob peendo. Poglg sẽn zabde tõe n laka tõnd yam ne wẽng tʋlsem, la pãbrã sẽn pãbã tõe n demsa d tags wẽnsa zãnga. Dĩm sũuri bee Naaba-Wẽnd nugẽ wala kʋɩlga tɩ Wẽnd teesd-a goabg bɩ rɩtgo, wala b sẽn date. A meng nifẽ ninsaal tẽedame t'a baooda sẽn ya neere Naaba-Wẽnd yaool n nee a sẽn lʋɩɩs taoore. Wẽnd nifẽ sẽn tũud-a sɩda la zemsgo maanda neere n yɩɩd sẽn kʋʋd-a maando. Sẽn get-a a to la a yĩgsdẽ, sẽn wukd-a a menga, sẽn maand-a wilg-m-menga, rẽ fãa yaa wẽnga. Sẽn nong-a tʋʋmde zĩndame n tagse, la rẽ yaa yõodo a yĩnga; sẽn maand-a yãgbo mii kom-gãaga. Yag zirẽ n paam arzɛka, ka bũmb a to n zʋʋg kẽne n babs kũum ye. Nin-wẽnsa toolma n wãad-ba tɩ b zãgsa zemsg tũudem. Nin-wẽng sor yaa goalenga, la nin-sõng manesem yaa tɩrga. F sẽn na n pa rakõ-roogẽ são f sẽn na n be roogẽ ne pʋg gãeenga. Nin-wẽng yalẽ wã fãa teesa wẽnga, a ka be sugri ne a tũud-n-taag ye. Yalem yam yẽegre yaa a sẽn yãete tɩ b pãbd sẽn yaanda a taaba. Yam soab meng sã n paam zãmsgo, a bãngr paasdame. Nin-sõng nee nin-wẽng zak sẽn yaa a soaba, a neeme tɩ yaa far bala. Ned ninga sẽn ka rat-a n kelge naong soaba, n pag a tʋba, yẽ soab me watẽ n kelmame, la ned kõn leok ye. Kũun sẽn soos n kõ maagda sũuri, a kiisda sũur sẽn wit wa bugum. Nin-sõng sũur yaa noogo a sẽn tũud tɩrgã, tɩ nin-wẽns sẽn tũud wẽnga zĩ ne rabeem. Sẽn zãagd-a a menga ne gũusgu sore, teesa kɩɩmsa ba yiri. Sẽn nonga noogo kiid-a ne naongo, sẽn nong-a rãam la rɩ-noodo kõn tol n tigs arzɛk ye. Beed ninga nin-sõma la nin-tɩrsa sẽn ka na n segã n na n yɩ nin-wẽnsa pʋɩɩre. F sẽn na n tɩ f zak we-raoogẽ são f sẽn na n tɩ f zaka ne pʋg-gãeenga la sũ-beed soaba. Yam sõng soaba sẽn bĩngd a roogẽ, yɩɩda sãnem la arzɛk buud fãa. Yalem bala n ka tẽegd beoogo. Sẽn baood-a sõmblem, sẽn ya-a nimbãan-zoeta, yẽ soab na n paama vɩɩm, sõmblem la sũ-noogo. Tẽnga meeme n ning lal-gũbri tɩ rabeem kaẽ ye, mik yam zulung soab tat n tus-a lame n lub bõra. Sẽn tõe-a a noore la a zelemde põsa yɩɩr buud fãa. Sẽn ka ningd-a a taab sʋka, n pid ne tɩtaam yẽ soab toog ka be ne bũmb ba a ye, a wilg-m-menga bal la a wuk n zĩ ne. Kʋɩɩm daolg daab waglsã n kʋʋd-a, a raabã pa naagd ne a nug tʋʋmd ye. Beoog vẽegdame tɩ nin-wẽng zĩ n saagdẽ, nin-sõng vaagd n kõtame t'a ka mi beed ye. Wẽnd sẽn kis wa fãa-fãa yaa nin-wẽns maoongo, yaa maoong sẽn kʋʋd ne wẽnem. Kaset zirẽ soab na ki; sẽn mi-a a sĩnd n kelge n wat n lebg goam mita. Nin-wẽng kẽndame wa a pa zoet fɩ; nin-sõng manegda a vɩɩm sore tɩ ya sõngo. Soaala-Wẽnd taoore ninsaal yam vẽenem, a gũusgu, a saglse, yaa zaalem. Tãnsoab weef sẽbda zabre daare, la Naaba-Wẽnd n kõt daoodo. Yʋ-noogo são sãnem baoore; paam tɩ ned waoog-fo la sãnem la wanzurfu. Arzɛk soaba la naong soaba sõsda maasem yɛnga, Naaba-Wẽnd n naan-b fãa. Yam soab yãeta yel-beedo sẽn wate n solg a menga, tɩ yam kaoolg soab wudgi n kẽ sʋka, n pa yellẽ. Sulg-m-meng yõodo yaa Wẽnd nif zoeese, n paas arzɛka, waoore, la yõ-woko. Nin-wẽng sor gãnega bãeense la gõose; sẽn nong-a tẽng zug vɩɩm, zãaga ne vɩɩm menga. Zãms bi-bɩɩga minim sõma a tʋʋmda sɩngrẽ, t'a wa kell n vɩɩnd boto. Naong rãmb naaba: arzɛk soaba; ned sã n peng f ligdi, a lebga f zu-soaba, tɩ fo lebg a yamba. F sã n bʋd zãmbo, f kẽebda bõne; la pãng ning f sẽn tar n tʋmd beeda na n sɛɛme. A mi sugri n paamd Wẽnd barka, t'a rɩkda a meng rɩɩbo n kõt naong rãmba. Dig zab-baooda tɩ zabre na wẽneg n sɛ, tɩ gãgsa la tʋya pa koees-koeese. Ned sã n nong pʋ-peelem soaba la nin-bʋgsgo, dĩma me nonga nin-kãnga. Naaba-Wẽnd sõngda mita la bãmb n kalemd nin-wẽng zelemde. Kʋɩɩm daolg yetame: bõnyẽeg n be yɩnga, m sã n yi a nan kʋ-m lame. Loang sẽn zulum wʋsgo la pag sẽn ka zoet yãnde Wẽnd sẽn bas a soaba lʋɩta a goama bẽdgẽ. Kom-bɩɩba sũur bãag la gãeemdo, dasaar sẽn mukd sõmbo n sãoogd-b. Naong soab tara pɛta la pɛta n na n wa ne a yidgri; sẽn kõt-a arzɛk soaba paasda a naong bala. Kɩll f tʋbre n kelg yam vẽenem rãmb goama, nek f yam n deeg bãngr ning m sẽn dat n kõ-fo. Bĩng-ba f yamẽ, pẽneg-ba f noorẽ tɩ b na wa ne f sũ-noogo. M tʋllame tɩ f rɩk f saagre n bas ne Wẽnde, yaa rẽ la m dat n wilg-f rũnna. Ade, fo yĩnga, m gʋlsa naoor yaka n dat n sagl-fo la m kõ-f bãngre. F sẽn na n paam zãmsg ninga na n sɩd puka f yam. Woto ned sã n baood bãngre f na tõog n zãms-a sɩda la sɩd bala. Da tũ naong soab ka pãngã n loog ne a sẽn tar ye; bʋʋd zĩigẽ me bɩ f ra wɩbg sẽn ka tar-a sõangd ye. Naaba-Wẽnd na n sõng-a lame, la yaa fãadba vɩɩm la b na n deege. Da yõg zood ne sũ-pu-ned ye, da tũ sũ-to-ned ye. F wat n lebga wa yẽnda n lʋɩ a bẽdgẽ. Da saag n kãab ned tɩ f na n yao a sam ye. Ad-f sã n ka tar n yaooda b wat n looga ne f gãaga. Da saag n vik toaag kugri f yaab rãmb sẽn vigli ye. Yɩ ned sẽn mi-a a tʋʋmde la ra yɩ tʋʋm-tʋmd yaalg ye tɩ woto rĩma meng wat n kẽes-f-la a tʋʋmnẽ. F sã n zĩi n dɩt ne nin-kãsenga, maan gũusgu ne f sẽn zĩ a soab taoorã. F puk f yão-beedo, sʋʋg la f pẽneg f kokore. Da tʋlg a rɩ-nooda ye, tɩ tõe n dɩɩme tɩ wa kãgemd-fo. Da nams n bao arzɛk ye, da tags a yell meng ye. Fo pa yãet n ges-a n kaoos, t'a loog ye, a mii pɩgs pusbu. A wat n yɩka wa sɩlga n loog yĩngri. Da rɩ zoe-bõn soab rɩɩb ye, da tʋlg a rɩ-nood ye. A na n maana wa ta-la a yam, n yet tɩ f rɩ la f yũ, tɩ yaool n pa yit a sũurẽ ye. A sag-võr sẽn ta f noorẽ la f sẽn lɛɛg n wʋk-a, tɩ fo sẽn yiis gom nood niynsa na n lebg zalem. Da gom tɩ yalem tʋbr dɩk ye, a na sãbs f goama yẽesem. Da viig kʋdem-wẽnnẽ toaag kugri ye, da ko n kẽ kɩɩb vẽenemẽ ye. Sẽn na n deeg-a kɩɩbsa zĩigẽ n zaba tara pãnga. La yẽ soabã n na n bʋ ne foo n paalg-fo. Ning pãng n deeg saglgo, ning pãng n kelg mitba. Da zoe yaams ne biig sɩbgre ye, sãbsg wẽedo ka kʋʋd biig ye. Bao sãbsga n sɩbg-a, n fãag-a ne bʋg-tẽng rãmba. M biiga, f sã n tar yam soab sũuri, ad mam me sũura na n yɩɩ noogo. Ad-m yĩnga fãa na n langame, f noorã sã n wa togsd sẽn ya sɩda. Bas nin-wẽnsa togsgo n sulg f meng raar fãa Soaala taoore, la noog f sũur tɩ f sẽn saagd bũmb ning beooga kõn vaal ye. M biiga, kelge, lebg yam sõng soaba, tɩ f sora na yɩ tɩrga. Da yɩ rã-tɩgd ye, da yɩ vɛlg ye. Dã-yũud la vɛlga kẽesda a meng naongo. Sẽn ka wɩsgd-a a meng ne tʋʋmde, yeelgda kʋdse. Kelg sẽn dog-a fooma, da sãbs f ma sẽn lebg pʋg-yãang ye. Bao sɩda, yɩ ned sẽn dengd n tagse, ned sẽn sak noora tũudem. Nin-sõng ba zĩi n kɩdemdame, sẽn dog-a yam sõng soaba tara sũ-noogo. Wẽnd na kɩt tɩ f lebg f ba la f ma kɩdengo. Wẽnd na kɩt tɩ f ma lang ne sũ-noogo! M biiga kelg m neere, f sẽn yãend bũmb ning m nengẽ wã, modg n vɩɩnd boto. Loang sẽn zulum la pʋg-yoodre, bulg sẽn ya sẽka la sãama. A maanda wa fãada, n bao zĩig n soonde, la yaa rap wʋsgo la a tudgda. Ãnda rãmb n maand: kato! Ãnda rãmba n maand: m sã n da bãngẽ? Ãnda rãmba la zabre, ãnda rãmb n tar guglengu, ãnda rãmba la b pãbd n yɩlemnẽ, ãnda rãmba nini n ka ne b taoore? Yaa sẽn kaoosd-b rãam zĩigẽ, yaa sẽn yũud-b toose. Da ges rãam n yeele: ges a nifã sẽn mooge, ges a sẽn kũmd yʋʋrẽ wã, ges a sẽn vend naana naana. A wat n dũma wa waafo, n kɛ wa põeere. F nina na n sɩng n nee bõn-bãna, tɩ f noora na n yiis gãeeng goama. Fo wat n tẽeme tɩ f bee mogre kosʋka, n be koglg zugu, n dʋ n sog koglga ra-wokã n be be n lengdẽ. F wat n zaoo be n maandẽ: «Yaa waa m poglame, yaa waa b pãb-m lame tɩ m ka bãng ye. M na n yaa n neka wakat bʋgo? M yikyã, ad-m na n le kosame n yũ!» Gũus n da maan sũ-kiir ne nin-wẽns ye, da tʋlg b tũudem ye. B sẽn baood yaa maan pãnga. B noor sẽn yiisd fãa yaa beedo. Minim n lʋɩt taoore tɩ yir tõog n me. Yɩlẽ t'a pʋgẽ sak zĩndigu bee ne yam vẽenem dãmba. Yam vẽenem n lʋɩt taoore tɩ teoog fãa paam a zĩiga, teed sẽn tar yõodo, teed sẽn sakd gesgo. Ninsaal yam vẽenem n wat ne a pãnga, a bãngra paasda a pãnga. Zabr zabda ne yam: sagend-b lagem koabga tɩ zab-zabd maan raoodo. Yalem nifẽ, yam vẽenem wẽnda bũmbu a sẽn ka tõe n paame. B sã n gomd sẽn wat ne tẽnga manegr yelle, yẽ tɛk la a sĩnda. Sẽn dat-a wẽnga, bool-y yẽ soaba tɩ lɩɩsa. A yam-pa-sek tagsda wẽng bala, la neb fãa sẽn kis a soaba, wa fãa-fãa, yaa ned ninga toog sẽn ka be ne a taaba. Yɩɩr sã n tar-fo, bɩ f ra bas raood ye, ka rẽ f pãng na n lebga komslem. Fãag b sẽn tar b rãmb fãa n dabd kʋʋbo, da bas tɩ b tall-ba n loog ne nen-soabg b sɩbgr zĩigẽ ye. Da wa yeele: tõnd da miime la? Fo zɩ tɩ sẽn zãad-a tõnd yõora miime. Bãmb n na n dol ninsaala wala a tʋʋm-manesem sẽn tog ne. M biiga, dɩ sɩɩdo tɩ yaa noogo; sɩ-vak nooma noorẽ. Bãngre me yaa noog boto f yamẽ. F sã n paam-a, ad beoog saagr beeme, f sẽn saagd bũmb ninga kõn vaal ye. Nin-wẽnga, da gãneg bẽdgo nin-sõng zakẽ ye, da zɛ a yir ye. Nin-sõng lʋɩ naor a yopoe me a na n yikame, nin-wẽng yẽ paada a wẽnemẽ. F bɛ sã n lʋɩ bɩ f ra la ye, da noog f sũuri a sẽn lakẽ n lʋɩ wã yĩng ye. Wẽnd sã n vʋm f laadã b sũur puugdame tɩ b bas-a n ka le sibg-a ye. Da maan gãgs ne nin-wẽns ye, da maan sũ-kiir ne b ye. Nin-wẽns ka tar beoog yell saagre ye, b fitil na n kiime. Zoe Wẽnd nifu, m biiga, zoe dĩma, lak ne zãms paala. B wãab na n tiiga vugri bala, la d ka mi wɩɩbd ninga sẽn na n lʋɩ f zug ye. Woto ket n yaa yam dãmba goama. Ka tog tɩ b ges neng n bʋ bʋʋd ye. Ned ninga fãa sẽn na n yeel-a nin-wẽnga: ad-fo yaa nin-sõngo, yẽ soab bãng tɩ neba fãa kis-a lame, tɩ neba kãab-a-la wẽnga. Sẽn sagend-a nin-wẽnga zĩi ne laafi, Wẽnd bark sigda a soab zugu. Sẽn leokd-a n togs sɩda, b mok a soab yɛgdga. Sɩng f tʋʋmda yɩnga, sɩng f pʋta tʋʋma; dẽ poore, f na yaool n tɩ tɩ f yiri. Da kõ kaset faad ye, da tudg neb ne f goama ye. Da yeele: «A zagl sẽn maan maam woto wã, m na maan-a n lebse. M na n dola ned kam fãa a tʋʋm-manesem.» M bʋdga kʋɩɩm daolg pʋʋgo, m yega a sẽn sel a tɩɩs zĩig ningã. M sẽn yãende, yaa gõose; gõos tuudu n da gãneg zĩig zãnga, kuga lalga da lʋɩɩme. M yẽeme la m tagsa m yamẽ la m yeelame: mik m na n gũsa bilfã, m na n suusa bilfã, m na n kalma m nusã, m na n tẽega m nao bilfã, mik yaa rẽ n soos n wat ne naongo, wala wagdre sẽn soosd n wat zuubu; koma me na n soos n sig-f-la sãando. Woto le yaa a Salomo yelbũna, la Zɩɩda dĩma a Ezekiyas n kɩt tɩ b gʋls-ba. Bũmb ning sẽn wat ne Wẽnd pẽgrã yaa b sẽn solg n tʋmd b tʋʋma. Bũmb sẽn wat ne rĩm pẽgre, ya a sã n tags neere n yaool n tʋme. Bũmb bãngr sẽn ya toogo yaa yĩngr zãrem, yaa tẽnga sẽn sud n ta zĩig ninga, la bũmb ning sẽn be rĩm sũurẽ. Yõak yiis wanzurf rẽgdo a na yõg laok neere, dĩm yiis nin-wẽng a taoore, a zaoor na lebg zemsg zaoore. Dĩm taoore da maan wa f yaa nin-kãseng ye, da rɩk nin-bɛdã n maan f sõsd-n-taas ye, b sẽn na n yeel foom: dʋ ka, são b sẽn na n sik foom dĩm biig taoore. Da yãg ne toagseg bʋʋd zĩigẽ ye, f tũud-n-taaga sã n kʋɩdg-fo, fo maanda a wãna? Bʋ ne f bʋʋd-n-taaga la ra luk ned a to bãong ye. Ka rẽ a wat n tʋ-f lame, a sã n wʋme, la f kõn le tõog n lebs f zelemd ye. Gomd sẽn yiis tɩ neb fãa zut gõmsdẽ, wẽnda tɩɩg biis sẽn dõog ne sãnem la wanzurfu: yaa laogo. Fo sã n sagl ned t'a reege, yaa sãnem tʋb-longo la muizãan miidu la f pid a kokore, bɩ bõn-neer a to la f yõg n kõ-a. Wala saag sẽn maagd pemsem tigsgu wakato, sẽn taasd-a koe noogo me yaa boto. Sẽn tʋm-a yẽnda wã sũur na n bʋkame. Sẽn pʋlemd-a wʋsgo n yaool n ka kõt fɩ, wẽnda sawato la sobgo sẽn be, tɩ saag yaool n ka niid ye. Yam ne yam tɩ b tudg la b lub bʋ-kaooda, zelemd bʋgsgo tara yẽn pãnga n wegsd kõaba. F sã n yãe sɩɩdo bɩ f rɩ n tɩge, gũus n da rɩ tɩ looge, ka rẽ f na wʋbe. Da lɩkd naoor wʋsgo f zoa zakẽ ye, a wat n yɛɛ ne foom tɩ lebg mo-beedo. Sẽn maand-a kaset zirẽ, wẽnda guugu, sʋʋga, la pĩ-sɩlenga. Yell sã n pak-fo, tɩ zãmb soaba lebg f teegda, fo n bao f yẽn-feedo, la f kar-keoko. Kɩt tɩ b yeeg fu taoko waood wakato wẽnda zẽem sẽn paas miisem. Yɩɩl yɩɩl sũ-beed soab taoore, me wẽnda rẽnna zãnga. Kom sã n tar f bɛyã, kõ-a t'a rɩ, ko-yũud sã n tar-a bɩ f kõ-a t'a yũ. Woto wã f woogda a waoodo, la Naaba-Wẽnd na role. Nug goabg sobgo wata ne saaga, neng gãneng wata ne gom n tudg f to. F sẽn na n pa zãnnẽ são f sẽn na n be roog a ye ne pʋg-gãeenga. Kibar noogo sẽn yi al mooga satmẽ n wa wẽnda ko-maasga ne kokore sẽn kʋɩ zãnga. Nin-sõng sẽn lʋɩ yel-wẽnd pʋgẽ, nin-wẽng nifẽ wẽnda bãk sẽn bendge, ko-sõng sẽn dẽgme. Ka tog tɩ b rɩ sɩɩd tɩ loog ye. Bũmb sẽn wẽnd f tõe n baoome tɩ looge, ya yell sẽn tog ne bãngra bãngre. Tẽng sẽn wã n ka tar lal-gũbri wẽnda ninsaal yam sẽn tagsd a sẽn date. Yalem pa tog ne waoogr ye, wala waood sẽn pa tog sɩpaolgo, tɩ saag pa tog tigsg wakato. Wala luiil sẽn yɩgd a yɩgbo, tɩ sɩlaall kõosd a kõosgo, woto me kãab vɩɩd ka tũud ye. Weefo la sãbsega, bõang la wĩiri, yam-pa-sek po-raoogo la gʋlgo. Da leok yam kaoolg soab wala a yam kaalma sẽn data ye, ka rẽ f meng wat n wẽneg-a lame. Leok yam kaoolg soaba, wala a yam kaoolga sẽn tog ne t'a ra wa tẽ t'a tara yam vẽenem ye. F sã n tʋm yalma; ko-tɩɩseng la f yũuda, Tõe t'a wa ne yel-beedo sẽn na n wẽneg n dɩ-fo. Wala wabg karg sẽn keoosde, woto me yelbũndi keoosda yalem noorẽ. Sã n ka gãeenga, loaabg kugr ka sẽbd ne loaabga meng ye, la sã n ka gãeenga, ned ka pẽgd yalem ye. Yelbũnd sẽn be yalem noorẽ wẽnda rã-yũud sẽn zãad gõaag a nugẽ. Naab bõnda a soolma gilli a sã n dɩkd a tʋʋmnẽ yalem ning fãa a sẽn paame. Yalem lebda a yalem tʋʋmẽ, wala baag sẽn lebda a wʋbdẽ. Teeg yalma n yɩɩd ned ning sẽn ya yam soab a meng nifẽ. Kʋɩɩm daolg yetame: bõnyẽeg n be sorẽ wã, bõnyẽeg n be tẽnga pʋga. Wala kʋɩleng sẽn yɛs woto zĩ yɛnga n bilgdẽ, woto me la kʋɩɩm maanda, a gãagẽ. Kʋɩɩm daolg nus tʋmda laagẽ, la zẽk n wa noorẽ wã namsd-a lame. Kʋɩɩm daolg tẽeda a yamẽ t'a mii yam n yɩɩd neb a yopoe sẽn ya mitb kʋda. Ned sẽn yɩgd n kẽed zabr sẽn pa a zabre wẽnda ned sẽn dat baaga n yõke, n gãt a tʋba. Wala ned sẽn maand gãeemdo n tãood pɛ-zẽnem, pɛɛm sẽn tõe n kʋ, woto la f maanda, f sã n tudg f to n lɛɛg n zĩ tẽngre n maandẽ: «M deemdame!» Raad sã n kaẽ, bugum kiidame, woto me la zabre sɛta, tẽn-kãn-ned sã n kaẽ. Zab-rʋʋs rʋʋsda zaba, wala saala, wala raoog sẽn paasd bugum pãnga. Tẽn-kãn-ned goama wẽnda nem-võya sẽn sakd wãbre, sẽn noom yĩnga. Tãnd laaga sẽn maneg n mobg ne wanzurf wẽnda zelemd sẽn ya noogo tɩ sũur yaool n kegmẽ. Sẽn dɩt-a beem gomda gom noodo a noorẽ t'a sũur yaool n gãe ne zãmbo. A goama sã n ya bʋg-bʋge bɩ f maan gũusgu tɩ zãmb sẽn be a sũurẽ wã ta-la a yopoe. Sẽn dɩt-a beem modgd ne a beema solgre me, a na waa n puk neba fãa nifẽ. Sẽn kɩbgd-a boko lɛɛgd n lʋɩ-la a pʋgẽ. Ned bilgda kugri tɩ kugrã lɛɛg n fẽdg-a. Zelemd sẽn minim zirẽ, kisa a sẽn dõt b rãmba, zelemd sẽn minim gom-noodo n minim wãabo. Bũmb sã n ya beoog tẽebo, bɩ f ra yãg n noog f sũur ye, tɩ f ka mi rũnna sẽn na n wa ne bũmb ning ye. Bas tɩ ned a to kils-fu la f da kils f meng ye, bas tɩ ned a to pẽge, ra yɩ fo meng ye. Kugr zɩsame, bĩisri zɩsame, la yalem sũ-puur zɩslem yɩɩda rẽ fãa. Sũ-puur dɩta wa bugum, n fõt wa kʋɩlga la ãnda n tõe yals sũ-ki-ned taoore? Zabre sẽn ya vẽenega, são nonglem sẽn ya mugri. Zoa pãbre são bɛ mogsgo. Mogsga yaa belgre. Kokor sẽn tɩge pa rat sɩɩd ye, kokor sẽn sõs kom yetame tɩ bõn tɩɩsensa fãa yaa noogo. Ninsaal sẽn zãr ne a ba yiri, yaa luiil sẽn zãr ne a tʋko. Kaam sẽn tar yũ-noogo kõta sũ-noogo, zood naagda ne saglgo n zãagd yɩɩre. Da bas f zoa, da bas f ba zoa ye. Yell sã n pak-fo, bɩ f ra zoe n babs f saam-biig sẽn be yɩɩg ye; zoa sẽn pẽ são f ba biig sẽn zãre. Bao yam sõngo, m biiga, n noog m sũuri tɩ m toog n leok sẽn paoogd-b maama fãa. Yam soab yãeta yel-beedo n zoe n soonde, t'a yam-pa-sek zãgs soondgo n bao yell n kõ a menga. Ned sã n yet t'a na yao samd sãan zĩigẽ, bɩ a kɩs bobelle. Reeg bobelle, ka rẽ samda wat n paame n ka yao ye. Ned sã n sãd beoogo n pord a yibeoog pʋʋsgo, b na n deega a pʋʋsga ne tʋʋre: «Menem!» Pʋg-mo-be-neda wẽnda roog sugri sẽn tokd koom n pa sɛtẽ, saag niib raare. Kok sobg tã ra loog yaa naana n yɩɩd gɩdg pʋg-kãnga t'a ra gome. Zã kaam f nugẽ tɩ ra rʋʋge, yaa naana n yɩɩda. Kutu n saasd kutu, tɩ ninsaal yam zulgd a to rẽnna. Sẽn get-a a kankang yell nere, rɩta a biisi, sẽn get-a a zu-soab yell neere, paamda waoogre. Wala ned sẽn get a neng koomẽ, woto me ninsaal ne-la a sũuri a to sũurẽ. Wala bʋg-tẽnga la mogr sẽn pa tɩgdã, ninsaal me zɩ n yeel t'a raab pidame ye. Wanzurf la sãnem yɩlgda boaagẽ, ninsaal me yʋʋr sẽn ka sãame n wilgd a sõmblem. Ba b sã ning yalem teoogẽ n to ne koodo, a yalemdã kõn fʋk n bas-a ye. Bãng f rũm-bõonego sã n bee laafi bɩ b sã n ka keem, ges b yelle. Arzɛk ka bũmb sẽn ka tar sɛɛb ye, arzɛka yaa wa naam pugla, ka tolemd zamaana n dabd zamaan ye. Wʋr pʋtẽ yamdã, bas yamda sẽn na n lɛɛg n yi wã wʋrbo la f wʋk sẽn zoe n wʋr tɩ be tãnga zugã. Wõrs f piisa kõbdo n wʋg futu n paam n yeelge; koos f boeesã n da pʋʋgo. F bʋʋsa sẽn kõt-f bĩisim wʋsgã, dɩk rẽ n dɩlg f menga, f zak rãmba la f roog kamba. Nin-wẽng kʋɩta tĩiga tɩ ned yaool n ka pʋgd-a ye, nin-sõngo yaa wa bõnyẽ-bila a ka zoet sẽn wãgd ye. Tẽng rãmb sã n zẽk b zugu ne b naaba, nanamsa lebgda kʋʋngo. Naaba sã n tar yam la bãngre, bũmb fãa lebda a zĩigẽ. Zu-soab sẽn ya naong soaba n dɩt a ka-neng rãmba, wẽnda saag sẽn ni ne pãnga n loog ne fãa, tɩ rɩɩb kaẽ n dɩtẽ ye. Sẽn ka tũud-b noore pẽgda nin-wẽnga, tɩ sẽn tũud-b noor puugd b sũuri ne-a. Nin-wẽns ka mi noor deegre sẽn dat n yeel tɩ bũmb ning ye. Sẽn deegd-b noor bala n tar dẽ võore. Naong soab sẽn vɩ ne sõmblem, são nin-wẽnga sẽn tũud so-golemse, n yaool n ya arzɛk soaba. Sẽn tũud-a noor yaa biig sẽn tar yam, sẽn tũud-a yoaadba lebgda a ba yãnde. Sẽn paasd-a a paoongo ne peng-wẽnse, tigsda arzɛka, ned a to sẽn na n wa rɩk n kõ naong rãmba. Sẽn yẽt-a a tʋba n pa rat n bãng noore, Wẽnd ka reegd a soab pʋʋsg ye. Sẽn takd-a nin-sõma n kẽes a so wẽng pʋga, yẽ soab lɛɛgd n lʋɩ-la a meng loangẽ. Arzɛk soab tẽedame t'a tara yam, mik naong soab yam n na n yɩɩg-a. Nin-sõma paoongo sã n paasdẽ yaa sũ-noogo, sã n yaa nin-wẽns dẽnd n paasde, lebga f zoe n bao zĩiga. Sẽn solgd-a a wẽnem ka tõe n yɩ ned ye, sẽn pukd a wẽnem wilgdame t'a kis-a lame la a paamda sugri. Sũ-noogo soaba la sẽn maand-a gũusgu, sẽn zãgs-a gũusgu, lʋɩta yell pʋgẽ. Na-wẽnga sẽn dɩt naam t'a soolem dãmba zĩ ne pɛta, wẽnda bõnyẽega la gɩgemd-padre, bãmb tɛk yaa kelem la wudg n bri. Naab sẽn ka tar yam pida ne pãn-tõogo; sẽn ka tar-a fãad yam tara yõ-woko. Ned sẽn mi a sũurẽ t'a kʋʋ neda, zoet n digda a meng yaoogẽ, bɩ ned da gɩdg-a ye. Sẽn tar-a a meng neere, yell kõn pak-a ye. Zãmb soab kõn põs ye; a sã n põs rɩtgo, a paada goabga. Sẽn kood-a a pʋʋgo kõn kong rɩɩb ye, la sẽn pʋgd-a a kuroogo na tɩg kom gãase. Pʋ-peelem soab n paamd Wẽnd barka, sẽn dat-a n lebg arzɛk soab tao-tao ka põsd sɩbgr ye. Ges ned nenga n kao a bʋʋdo, ka sõma ye, la neb a wãna n sakd yel-wẽnde, dɩɩb bilfu yĩng bala? Sẽn zoet-a n pʋgd arzɛk nini ka noom ye, a ka mi tɩ nimbãaneg na n wẽneg n lʋɩ-la a zug ye. Sã n ka zoet ned nifu n wilg-a a kongre, f wat n mikame tɩ foo ne-yẽ lebga zoodo, n yɩɩd sẽn pʋgd-a n belgd-a. Ned sã n zuk a ba bɩ a ma n yet tɩ rẽ ka yel-wẽnde, yẽ soab ne fãad zem taaba. Rat wagl soaba wata ne zaba, la sẽn teeg-a Wẽnde, bũmb kõn paoog-a ye. Sẽn teeg-a a meng dabaar yaa yalma; sẽn kẽnd-a ne gũusgu na n põsame. Ned ka kõt naong soaba n lɛɛg n ki kom ye, la sẽn yãet-a naong soaba n mum nini n looge, Wẽnd yãkda a soab barka. Nin-wẽns sã n so tẽnga, ned kam fãa baooda zĩig n soonde, b sã n looge, nin-sõma wekda balbo. Sã n sagend neda t'a nakd a kãare, a bãng t'a na wã vugri la tɩɩm kõn le zĩnd ye. Sã n ya nin-sõma n dɩt naam b soolem dãmb sũur yaa noogo. Sã n ya nin-wẽnse, b yãbdame. Sẽn pʋgd-a yam sõngo noogda a ba sũuri, sẽn pʋgd-a pʋg-yoaad sãamda a paoongo. Dĩm sa n tũud zemsgo a tẽng zĩi ne laafi; sẽn ka zãad-a a soolem dãmb ne zemsgo, wãad-b lame. Fo sã n belgd neda, bẽdgo la f gãnegd a naoẽ. N-ye, yel-wẽnd gãnegda bẽdg nin-wẽng yĩnga, la nin-sõng zoetame t'a sũur pa kiuusdẽ ye. Nin-sõng tẽegda naong rãmb yelle la nin-wẽng toog ka be ne-b ye. M toog-ka-be rãmba zũndgda tẽnga, la nin-sõma wã n sigsd sũuri. Yam soaba sã n bʋʋd ne yalma, a nong bɩ a gãnem a nenga, a nong bɩ a la, a kõn paam vʋʋsg ye. Sẽn nong-a zɩɩm daagre pa nong nin-sõng ye, la nin-sõma ket n baooda a zĩiga. Yam kaoolg soaba basdame tɩ sũ-noog buud fãa yamleoog yõk-a; wakat buud fãa yam soab toẽ-la a menga. Naab sã n kelgd zirẽ-be-neda, a tãnsoaben-dãmba fãa lebgda bi-beese. Naong soaba la sẽn maand-a zãmbo, wẽnda taaba. Wẽnd kõo bãmb b yiiba fãa nina vẽenem. Dĩm sã n bʋʋd naong rãmba ne zemsgo, a naam zaoore vigla zamaana n dabd zamaana. Dasaare la saglgo wata ne yam sõngo; biig sẽn bas ne a meng bala lebgda a ma yãnde. Nin-wẽns sã n so kãsengo, yel-wẽna kɩɩda yẽgna, la nin-sõma nini na yãend b lʋɩɩse. Sɩbg f biiga n zãag f meng ne yɩɩr buud fãa la f paam sũ-noogo. Bãngd sã n ka tẽngẽ, ned kam maanda a sẽn date; la sẽn deegd-a noor la zu-noog soaba. Yamb zʋgo ka tekd ne goam bal ye: a tõe n wʋmame n yaool n ka reeg ye. F yãee ned sẽn nong goama, ad yalem kelgre n são ne yõodo. Fo sã n põneg f yamba t'a paooda, a wat n yɩɩ kʋɩɩma. Sũ-pu-ned wata ne zaba, tɩ sũur sẽn yiki maanda yel-wẽn n yɩlemdẽ. Wilg-m-meng takda kʋɩdgre, sẽn sulg a meng paamdame t'a zug zẽke. Sẽn naag-a wagdre n pʋɩt a teedo kisa a menga, t'a wʋmda b sẽn kãabd-a beedo, la a pa lukd a bãong ye. Fo sã n digd rabeem neb taoore, fo yõka f meng n kõ. Fo sã n teeg Wẽnnaam f zĩi ne laafi. Wʋsg ratame tɩ dĩma nif teeg-ba la Wẽnd bala n tõe n dol wala sẽn segde. Nin-sõma sẽn kis wa fãa-fãa yaa nin-wẽnga. Nin-wẽns sẽn kis wa fãa-fãa yaa nin-sõngo. Wã yaa a Yake biig a Agur goama: bãngd goama. A Agur goma ne a Itiyɛl, a Itiyɛl la a Ukal. N-ye, maan la dũni wã fãa yalma, n ka tar ninsaal yam ba bilfu. Mam ka tʋlg yam vẽenem ye, Wẽnd bãngra la m tʋlg yã. Ãnda n dʋ yĩngri n lɛɛg n sigi? Ãnda n kogl a nusin kok pemsem, ãnda n yondg a fuugu n yõng koom? Ãnda n kɩʋʋlem tẽngã, a taoor la a yaanga? A yʋʋr la bõe, a biig yʋʋr la a bõe, fo miime? Wẽnd goama fãa kõt-b-la kaseto. Ned ninga fãa sẽn soonda Wẽnd maasmẽ paama a gãongo. Da paas bũmb b goamẽ wã ye tɩ b na n zaba ne-fo, la b ges-fo wa zirẽ-be-neda. Bũmb a yiib la m kot yãmba, Soaala, kõ-y-ma tɩ m nan ket n vɩ. Zãag-y-m ne zirẽ-beedo la pʋ-lika. Da kõ-y-m arzɛka, da kõ-y-m naong ye. Bas-y-m tɩ m rɩ m pʋɩɩr n zemse; m sã n dɩ tɩ looge m wat n yik n basa yãmba la m gomd woto: «Soaala la ãnda?» Ka rẽ bɩ m naonga kẽes-m wagdem tɩ m sãam m Wẽnda yʋʋre. Da kãneg yamba ne a zu-soab ye, tɩ yãmba na n wa kãab-f lame tɩ tũ. Neb n be n kãabd b ba la b yãkd b ma zaka. Neb n be n yet tɩ b ka tar yell ye, tɩ b wẽnema yaool n nan ka pek ye. Neb n be n sãbsd b taaba, b nina kʋɩɩme, nina ka kamsd ye. Neb n be tɩ b yẽna ya zãngoeego, tɩ b noora ya sʋʋga, tɩ b tar n wãbd nin-koam dãmba la naong rãmba. Rendeoogo tara kom-pugli a yiibu: a wa ne, la a wa ne yɛsa. Bũmb a tãab n be n ka tɩgd ye, t'a naas soaba zɩ n yeele tɩ sekame ye: Yaa bʋg-tẽnga, pʋg-kiiri, tẽng sẽn zĩ ne ware, bugum sẽn zɩ n yeele: m tɩgame. Nif sẽn sãag ba, nif sẽn sãbsd ma-pʋg-yãanga, kʋɩlsa noorẽ gãabdo la yĩngr sɩlse n na feoog nif kãnga. Bũmb a tãab n yɩɩd mam yam, la a naas soaba m ka tar a sor ye: sɩlg sẽn tũud sor ning yĩngri, waaf sẽn tũud sor ninga pĩig zugu, koom-koglg sẽn tũud sor ninga mogr zugu n paas rogem buka. Pʋg-yoodre maanda woto: a rɩtame, n yẽes a noore n yetẽ: m ka maan wẽng ye. Bũmb a tãab n yɛɛsd tẽnga, la a naas soaba la a ka tõe n tʋke: yem-daoog sẽn lebg dĩma, yalem sẽn paamde n dɩt n tɩgda; bi-pugl neb fãa sẽn kis sẽn paam sɩda, roog-biiga sẽn deeg a roog ma zĩiga. Bũmb a naas n be tẽng zugu n paoodẽ n yaool n tar yam n yɩɩd yẽesem dãmba fãa: Yaa gũuri, a paooda, la sɩpaolgo a tigsda a rɩɩbo. Yaa marawa, nao paooda la b rot yaa pĩis bogdo. Sʋya: b ka tar naab ye, la b pa yɩgd yaar ye. Bõnpoaka, kamb sẽn digd n yõgda, la a yaool n gãee dĩm dãmb zakẽ. Bũmb a tãabo n sakd gesgo, la a naas soaba m mi kẽnde: yaa bõnyẽega, yẽ la sũur soaba rũmsã fãa sʋka, bũmb ka tõe t'a tar ye; yaa no-raoogo, sẽn tabgd naam tabgre noosa sʋka: yaa pe-raoogo sẽn lʋɩt piisa taoore le paasa dĩma a sã n wa kõta a soolma rãmb a koɛɛga. Fo yalemdã sã n da kɩtame tɩ f baood n na zẽk f menga, la marsã f tagsame tɩ yaa wẽnga, dik f nugu n pĩ f noore. Bĩisim sã fɩre n yooge, kella kaam; yõor sã n deeg wẽedo, a yũnda zɩɩm, sũur sẽn fõta bolgda zabre. Woto yaa yelbũna Maasa dĩma, a Lemuwɛl, sẽn zãms a ma nengẽ: M biiga, m bi-nongre, biig m sẽn tʋlg ne m sũur fãa! Da sɛɛs f pãng ne pagb ye, da rɩk f menga n bas ne sẽn wãada dĩm dãmb ye. Bũmb sẽn ka segd ne dĩma, Lemuwɛl, bũmb sẽn ka segd wa fãa-fãa, yaa rãam yũubu; ka segd tɩ dĩm-bi wã nong toos ye. B wat n yũume n yĩm noy niynsi sẽn yalse, b wat n tudgame tɩ nin-koam fãa paad bʋʋd zĩigẽ. B bao rã-toose n kõ sẽn dɩk b kũum sore, b bao rãam n kõ sẽn zĩ-a ne sũ-toogo, t'a yũ n kiis a yɩɩre, n yĩma a sũ-sãanga. Yaag f noore n gom muk zĩigẽ, yaag f noore n sõng sẽn ka tar-a sõangda. Yaag noore n kao bʋʋd sẽn ya tɩrse, n kao nimbãan-dãmba la naong rãmb bʋʋdo. *Ad tõog n yãend pag sẽn pid pag yaa toogo; a bee yamleogo n yɩɩd muizãan neeba fãa. *Bɩ a sɩd teeg-a zãng zãnga, bɩ a sɩd dɩ a yõodo. *Ka sũ-sãang la a na n seg ye, na n yɩɩ sũ-noog beoog sẽn vẽege. *Dɩk gendre n wĩ lamdo, dĩng beren-dɩgre bɩ pe-kõbd gĩsi la a tʋʋmde, la tʋʋmda tʋmda ne minim. *Ey! Ad-y yaa nanamsa dɩ-noodã la a na n segl n kõ a zak rãmba. Yaa wa pʋg-sõnga paama koom kogend n zɩlgd a koodã n watẽ. *Fooda kallã tɩ zĩig nan pa yẽeg ye, n segl dɩɩbo a zak rãmb yĩnga, n wilg a roog kamba fãa b tʋʋmde. *Gese, a wa n tʋlga pʋʋgo la a ra-a lame; a yiisa a meng ligdi, n kɩt tɩ b sel tɩɩse. *Israyɛl bi-pugla sẽbga a kalle, a wilga a nug pãnga. *La a sẽn ne a tʋʋmda yõodã, beoog vẽegdame t'a fitil yaool n kiisi. *Ma sõnga yãenda sõore n dɩka a gendre, n sɩng wĩibu. *Naong rãmba yĩnga, a puka a nusi n kõ rɩɩbo; a tuda a nug nimbãan-dãmba. *Õ-õ! A zak rãmb kõn dig waood ye, ned kam fãa yera fut a yiib-yiibu. *Pʋg-sõnga wʋga fu-gobse a meng yĩnga, a yera gormuska la nufa. *Rao a ye la b sõt tẽnga nin-bɛd sʋka, yaa a sɩdã la a zug zẽkame. *Sẽbdse la paga le wʋgd n koosdẽ, n paas peen neeb buud toor-toore. *Tɩgr la a kẽes a zakẽ, dabeem ka beoog yĩng ye, la a yeelga pãng la ziir n kẽnda. *Ur daoã yagenga yaagda a noor ne gũusgu, a zelemda goama yaa sõmblem goama. *Vɩɩm kõata mi-la a zak rãmb gãaga la b sõasg zĩiga, a ka sak a ya kʋɩɩma la a rɩtẽ ye. *Wʋsg yikame n kils a zu-noogo, b sɩd yikame n kils a sõmblem. *Yaang la taoor pagba sẽn tʋm b tʋʋm bɛdã ad foom n loog b fãa gilli! *Zĩ ne faong yaa zaalem, tar neerem yaa zaalem, sẽn toga ne pẽgre, yaa pag sẽn zoet Wẽnde. Bɩ a sɩd la a kamb rɩ a tʋʋma yõodo, bɩ a tʋʋma wa ne a pẽgre. Zamaan ne zamaana! Zerizalɛɛm dĩm a Daviid biig, a Kowelɛt, karen-saamb kõn yɛ ne kareng soab, a Kowelɛt, goam la woto. Ka yõod ne ka yõodo, a Kowelɛt n yete, ka yõod ne ka yõodo, bũmba fãa yaa ka yõodo sẽn pid ne ka yõodo. Ninsaal sẽn namsd a meng namsg ninga, wĩndga tẽngrã, bõe yõod la a rɩt a pʋgẽ? Zamaan kãnga loogdame, tɩ zamaan a to wa, tɩ tẽng ket a zĩigẽ daar faa. Wĩndg pukdame, wĩndg kẽedame: a sẽn yi zĩig ninga la a yãgd n dat n lebe. Sobgo teesda rɩtgo n wẽneg n tees goabga, n gilim n gilim n le rɩk a sore, n ket n tar gilgri. Kʋɩlsa fãa zoet n dabda mogrẽ, la mogre ka pit ye, tɩ kʋɩls ket n zoetẽ bala n tar kẽnde, b sẽn teesẽ zaamẽ wã, be la b le teesd rũnna. Bũmba fãa wata ne yam yiisgu, bũmba fãa togs n sɛɛme. Nif kõn tɩg gesg ye, tubr kõn tɩg kelgr ye. Sẽn yɩ pĩnda na n le yɩɩme, tɩ sẽn maan pĩnda le maane. Bũmb ka be saaga tẽngre t'a taar pa reng n zĩnd ye. D sã n wa yãend bũmb n yeele: «Wã yaa yell sãanga,» d bãng tɩ reng n zĩnda al daar zãra, pĩnd zamaanẽ wã. Tõnd yĩmda d yaab rãmb sẽn yãende. Ad-y sẽn na n wa-b tõnd poorẽ wã ka na n bas bũmbu b yagensa sẽn na n yõdg n tẽeg n gomd ye. Maam, a Kowelɛt, mam yii Israyɛl Dĩm, Zerizalɛɛm tẽnga. Mam maaga m meng ne yam kãsenga, n ges neere bũmb fãa sẽn maand saaga tẽngre. Mik waa! Yaa tʋʋm toog bala la Wẽnnaam rɩk n tãng ninsaalba. Yaa tʋʋmd sẽn dat gũusgu la b kõ Adem biisi. Mam maaga m menga n ges bũmbã fãa sẽn maande, saaga tẽngre, la ade, bũmb ba a ye ka yõod ye, la yaa wudg n bir sobgo. Sẽn golem ka tõe n yɩ tɩrga; sẽn yãk me ka tõe n le sõd n naag ye. M tẽedame tɩ dĩm niyns fãa sẽn deng b maam Zerizalɛɛma, ba a ye ka paam yam vẽenem wala maam ye. M paama yam vẽenem la bãngr kãsenga vɩɩma poorẽ. Mam maaga m menga n welg yam vẽenem soaba la gãeenga, n welg sẽn wẽnd yam bũmbu ne sẽn wẽnd yalemdo. M bãnga tʋʋmd ning m sẽn kõ m menga sẽn wẽnd a soaba: yaa wudg n bir sobgo bala. Yam wʋsgo wata ne sũ-sãang wʋsgo. Sẽn paas-a a bãngre paasa a naongo. Mam da kõo m meng yam kãnga: yik n maan f yamleoogo, loog n dɩ naare! La kato! Dẽ me yaa wudg n kok zaalem. M waa n leoka laad poorẽ tɩ yaa yalemdo! N leok yĩng sũ-noog poorẽ tɩ m pa yãend a sẽn paasd bũmb ning ye. M kaoola m sũurẽ tɩ m na n tɩgsa m yĩnga ne rãam, n kaool tɩ m kõn bas n yẽesma zãng yẽ ye. La baasgo n na maan yalemdo sẽn zems bala, m bãng bõe n tog ne Adem biig a tẽng zug vɩɩm koɛɛga pʋgẽ. La mam maana sẽn labsa. M yik n mee roto, m sela bugsuntungu, m koo zẽedo, n sel tɩɩse. M sela tɩɩs sẽn womd biisi, buud toor-toore. M tuu bãgse n tõog n zãgs m tɩ bõonese sẽn piuug wa googo. M daa yem-daado la yem-posge; m baoo sõgen-kamba la rũmsi, m niis la m piis sõor yɩɩ ka tɛka. M yɩɩga sẽn deng-b maam Zerizalɛɛma fãa. M baoo arzɛka n zame, wanzurf la sãnem. M deeg-b-la dĩm dãmb kẽere nengẽ, b soolem dãmb nengẽ. M baoo yɩɩn-yɩɩndba, dapa la pagba. M paama paga, m paasa pagb wʋsgo, la rẽ la Adem biis sẽn pẽgd wa fãa-fãa wã. M lebga nin-kãsenga, m lebga arzɛk soaba, m yɩɩga sẽn deng-b maam Zerizalɛɛm. Yam vẽenem ning m sẽn paama n sõng-m. Mam gesa m nini sẽn tʋlg n ges bũmb ninga fãa, la m ka mong m sũurã sũ-noog ba a ye. M sũur yɩɩ noogo ne m tʋʋmda fãa, dẽ n yɩ yõod ninga m sẽn dɩ, m tʋʋma pʋgẽ. La mam gesa m nus sẽn tʋm tʋʋm ninsa fãa; m gesa naong ning m sẽn namsã, la ayo! Dẽ fãa ka yõod ye, la yaa wudg n bir sobgo; ad-y yõod ka be saaga tẽngr ye. M tʋlgame n bãng yõoda sã n bee yẽesmẽ wã n yɩɩd gãeemdẽ la yalemdẽ. M tʋlgame n bãng ned ninga sẽn na n dʋ zaoora mam poorẽ wã manesma sã n na n yɩɩ toore. Sɩda m miime tɩ yam vẽenema n são yalemdã wa m sẽn mi tɩ vẽenem n são likã. Sẽn tar-a yaam nee a sẽn dabdẽ la yalma babendame n baood a sore. Yaa sɩda! La mam miime tɩ bãmb b yiib fãa baasg na n yɩ-la a ye. Tɩ mam yet m sũuri: gãeeng baasgo sẽn yaa a soaba, mam me baasgo yɩta boto, dẽ yĩnga, m yẽesmã yõod be yɛ marsã? La mam yeta m sũurẽ tɩ rẽ me m ka tar võor ye. Yam soab woo, gãeeng woo, b sẽn tẽegda a soab yell n kaoos ka ye, beoog ne a na n vẽege tɩ yĩma bãmb b yiib yelle; yam soab na n wa kii wala yalma la neba pa na n tẽeg a ye yelle n yɩɩg a to ye. La yɛla sẽn ya woto wã, m yam ka be ne m vɩɩma baa bilfu; tɩ sẽn maan fãa saaga tẽngre pa tat m yam ye, la bũmb fãa yaa ka yõodo, yaa wudg n bir sobgo. Mam kisga tʋʋmda ne a naongã a sẽn pids m vɩɩma tẽng zug ka, la rẽ yaa m sẽn ne tɩ yaa tɩlɛ tɩ m wa bas-a ne sẽn na n deega mam zĩigã. Ãnd n mi la ãnda n tõe n bãnge a na n yɩɩ yẽesem soaba, bɩ gãeenga? Yẽnda n yaool n na n wa soog yõodo, m tʋʋmdã m sẽn tʋm saaga tẽngrã ne yama yõodo. Dẽ me yaa bũmb m sẽn ka wʋmd a võore. Woto marsã la m waa n dat n bas raoodo, ne m tẽng zug tʋʋma fãa. Ges-y ned sẽn tʋm a tʋʋna ne yam la minim tɩ sake, la yaool n yaa ned sẽn pa naag n tʋme, n na n deeg a pʋɩɩre. Ad-y m ka ne rẽ me yõod ye, yaa naong kãseng bala. La woto marsã, bõe n kees nin-kãnga yĩnga? A tʋʋm tooga ne a namsgã, a sẽn yãend a vɩɩma pʋgẽ, tẽng zug ka wã, bõe yõodo la a rɩkd a pʋgẽ? Beoog sẽn vẽege, yaa namsg ne namsgo, tʋʋmda menga yaa sũ-sãanga, la yʋngo gõeem ka laafi gõeem ye. Dẽ me yõoda la bʋgo? Ninsaal raab yaẽ la a rɩẽ la a yũẽ la a lembẽ sũ-noogo ne a tʋʋmde. M neeme tɩ yaa Wẽnd me raabo. Ned sɩd ka be n tõe n dɩ la a noog a sũuri, Wẽnd sã n ka kõ-a ye. Wẽnd kõta b sẽn dat a soab yam vẽenem, bãngre la sũ-noogo. B sẽn kõt yel-wẽnd maand tʋʋmd ninga yaa bao la a tigs nin-sõng yĩnga. Woto wã yel-wẽn-maanda yõodo ne sẽn bira zaalem yõod zem taaba. Bũmb fãa bee ne a a wakato, la saaga tẽngre, wakato me bee bũmb kam fãa yĩnga. Dogem bee wakato tɩ kũum me be wakato. Sel tɩɩg bee wakat tɩ võog tɩɩg me be wakato. Kʋʋb bee wakato tɩ sãoogre me be wakato. Tus n lubi bee wakato tɩ meeb sɩngr be wakato. Yãbr ne a wakat, laad ne a wakat, kʋʋr kɛleng ne a wakat, saoog ne a wakat. Kug lobr ne a wakat, kug tigsgu ne a wakato. Yõk nug bee wakato, da yõk nug me be wakato. Baoob bee wakato tɩ bao n kong me be wakato. Bũmb zãab bee wakato, a lobr me bee wakato. Pãrg fuug bee wakato, t'a sẽeb me be wakato. Sĩndgu bee wakato tɩ goama me be wakato. Zabr bee wakato, bas tɩ zabr sɛ me bee wakato. Yõod bʋg la tʋʋmda soab rokd ne a tʋʋmna? M nee tʋʋm niyns fãa Wẽnd sẽn kõ ninsaal t'a tʋme. Bãmb sẽn maan fãa zemsa ne a wakato. B basda ninsaala t'a ges zamaana sẽn tong taaba, n yaool n pa basd t'a wʋm bãmb sẽn maan bũmb niynsa võore, b sɩngre n tãag b baasgo. Mam miime tɩ ninsaal ka rat bũmb a to sã n ka a noog a sũuri la a pems ne vɩɩma yɩɩre. Ned sã n dɩtẽ la a yũuda, a sã n paamd sũ-noog a tʋʋmd fãa pʋgẽ, a bãng tɩ rẽ yaa Wẽnd kũuni. Mam miime tɩ Wẽnnaam sẽn yalse yalsa wakat fãa yĩnga. Bũmb ka be sẽn na n paase, bũmb me ka be sẽn na woog ye. Wẽnd kɩtdame tɩ b rigd rabeem b taoore. Sẽn be zoe n zĩndame, la sẽn na n yɩ, zoe n zĩndame. Wẽnd na n sokame la b sɩbg sẽn looge. Ad-m sẽn le maag m meng n ges la m sẽn yãend tẽng zugu: wẽnem n dɩt naam tɩ sẽn da toga ne bʋʋd paalgr põsd bʋʋd toogo. Tɩ mam yeel m sũurẽ: Wẽnnaam n na n kao nin-sõng ne nin-wẽng bʋʋdo, tɩ bũmb fãa bee ne a wakato la d yɛla toor-toorã na n waa Bʋʋda taoore. Sã n ya ne ninsaalba, m tẽedame tɩ Wẽnd dat n fɛɛs-b lame la woto b bãngdame tɩ b yaa wa rũmsa bala. La sɩd me, ninsaal baasgo ne rũng baasgo yaa a ye; yãoo soaba kida woto, tɩ yãoo soaba ki boto. Rũng ne ninsaala, bãmb b yiiba fãa yaa vʋʋsma a ye, la ninsaal sẽn yɩɩd rũng ne bũmb ninga, m sɩd ka ne a yõod ye, tɩ bũmba fãa yaa ka yõod ne ka yõodo. Bãmb b yiib fãa teesda zĩ yɛnga; fãa yita tomẽ la fãa lebda tomẽ. Ned ba a ye ka tõe n yeele tɩ ninsaalba sẽn vʋʋsd n vɩ wã, bãmb vʋʋsma lebda yĩngri, tɩ rũmsa rẽnd lebd tẽng ye. Mam neeme tɩ ninsaal sũ-noog yaa a kɩdem a tʋʋma yĩnga; tɩ rẽ yaa ninsaal pʋɩɩre. Ãnna n na n tall-a t'a lɛɛg n wa ges sẽn yõdg n maan a poorẽ? Mam le nee pãng ning neb sẽn maand taaba, saaga tẽngre. D nee neb kẽer nintãm sẽn dʋʋgde tɩ b zĩi n pa tar belsd ye. N-ye! Pãnga rãmb maand-b-la pãnga la belgd ka ye. Woto la m yam be kɩɩmsa pẽgre n yɩɩd nin-vɩɩse. La m sẽn pẽgd a soab n yɩɩda, yaa b sẽn nan ka naan a soaba, woto a ka mi yel-beed ning sẽn tʋʋmd saaga tẽngr ye. Mam neeme tɩ tʋʋmde sã n tʋme la a sakame, a sẽn wat ne bũmb ninga yaa neb maand sũ-kiir ne taaba. La rẽ me yaa dig sobg n biri. Yalma nug zoeta tʋʋmde t'a rɩt bõne, n wãad a menga; la m tẽed tɩ vʋʋsg sẽn ka zem bũmbu, n ka pit nug-koore sãoo tʋʋm-tãnde sẽn ka bũmb a to n zʋʋg rig sobg n bri. Mam le nee bũmb a to sẽn ka yõod saaga tẽngre. Ges nin-kãnga, a yaa a ye, a ka tar tũud-n-taag ye, a ka tar biiga, a ka tar kẽem bɩ yao ye; a tʋʋmda ka be vʋʋsg wakat ye, arzɛka bal la a tar pʋgbo, ad-y m na sok n gese yaa bõe yĩng la a tʋmda, la a mongd a meng sũ-noogo? Sɩda m ka ne rẽ me yõod ye, yaa zãngr-bõne. Neb a yiibu sẽn be ne taaba, dẽ n são, f sã n tʋmd f ye, woto me la tʋʋmda tõe n zĩnd yõodo. Ned a ye lʋɩ yã, a to na yiki. La ned sẽn kẽnd a ye sã n lʋɩ, yaa yell n paam-a, tɩ ned ka be sẽn na n tak a t'a yik ye. Yãmb y yiib naag taab gãag a ye, y yĩng na wɩnge la f sã n ya f yembre, f yĩng na n wɩnga wãn wãna? Ned sã n yaa a ye b tõe n yõk-a lame n lubi; b sã n yaa b yiibu, a yiib lubri pa naana ye, la gĩs a tãab sẽn kalem taab n dĩng pa kaood tao tao ye. Bi-bɩɩg sẽn ya naong soaba la yẽesenga são nin-kẽem sẽn ya dĩm n ka le reegd ned saglgo. Ba bi-bɩɩga sã n yii bi-bees roogo n wa reeg naama dẽ n são. Ba a sã n dag n yaa bõasa, n wa lebg dĩma, dẽ n são. M yãeeme tɩ sã n ya yell a woto n be, neba fãa yik n dat bi-bɩɩga ne naama n yɩɩd ned a to wã. Dĩm kʋdga yaool n da rɩta naam neb ka tɛk zugu. Yẽ sẽn na n loog n bas b rãmba tõe n wa yĩma a yell fas. La rẽ me yõod la bõe sã n ka wudg n bir sobgo? F rigd wẽnd doogẽ bɩ f gũus f nao-kẽndre. F raaba yɩ kẽ n kelge. Dẽ n são kolg ne maando wa gãeemsa sẽn maande n yaool n ka mi tɩ rẽ ka segd ye. Da yãg ne goam ye. La f da yãg tao-tao n pʋlem f pʋlen-bɛd Wẽnnaam taoor ye. Tɩ Wẽnnaam be yĩngri tɩ fo be tẽnga. Bɩ goama gom n zemse. F sã n gomd wʋsgo, f tõeeme n ka tags tɩ sek ye. Yaa wala ned sẽn zĩi n yɩɩdẽ sẽn tõe n zãms yoodo. F sã n pʋlem Wẽnnaam bũmbu, bɩ f ning pãnga n pids f pʋleng tao, tɩ Wẽnnaam pa nong yalemd ye. Pids f kãabgo. Da pʋlme n são f sẽn pʋlemd n pa pidsi. Maan gũusgu, tɩ f noor gomd da wa kɩt tɩ f menga tõre dɩ taale, la f da wa yeel maan-kʋʋdã tɩ f tudgame ye. Ad goam a woto tõe n puuga Wẽnd sũuri tɩ f sẽn tʋlg neera wa lebg zaalem. Goam pererr ne ta yʋng n zãmsd zãmsd ka tɛka zem taab ne yõodo. Woto wã ges n lʋɩɩs Wẽnd waoogra taoore. Fo sã n wa yãe tɩ tẽnga pʋgẽ b namsda naong soaba, la b kaood bʋʋdo n ka yɛs n get ãnna n so bʋʋm, n pa baood sɩda, bɩ f ra maan wa ling-f lame ye. Ad nin-kãseng n be nin-kãseng zugu, tɩ bɛd-bɛd me le be bãmb zugu. Tẽngã n waa n tɩ gal ne yõodo, tɩ dĩma meng teega pʋtã. Sẽn nong-a ligdi, ligdi pa sekd-a ye; sẽn dat-a naare arzɛk pa paad a nugẽ ye. Dẽ me ka võor ye. Rɩɩba sẽn nar zĩig ninga, ad rɩtb tigimdta taab be zembala. La bõe la dɩɩba soab paamd a arzɛka pʋgẽ sã n ka nina gesg yamleoogo bala? Sẽn nong-a tʋʋmd soab gõeem noma, a rɩ n tɩge t'a pa rɩ n tɩge; la arzɛk soab pʋg pitame tɩ gõeem yaool n pa sakd-a ye. Mam le yãeta yell a to saaga tẽngre sẽn pa zems baa bilfu: yaa arzɛk sẽn bĩngi t'a na n yaool n wa wã a soaba. Yel-beedo n wat n sɛɛs arzɛka gilli. A sã n dog biiga a ka basd a nug ne bũmb ye. Ned dogda bɩlgemde n na n loog bɩlgemde wala a sẽn wa bɩlgemde, t'a tʋʋmnã pʋgẽ, a pa rɩkd bũmb n tall n loog ye. Yell kãng me ka zemsg baa bilfu, fo sẽn lebd bɩlgemde, wala f sẽn dog bɩlgemdã, bõe yõod la f rɩk yã, f sẽn tʋme, f bira sobg bala! Dẽ pʋgẽ me beoog sẽn vẽeg fãa, pɛt bala n tar foom la sũ-sãang la yɩɩre la bãase la sũ-toogo. Ade, sũ-noog ninga sẽn tog ne ninsaala m sẽn yãende, yaa a rɩ la a yũ, yaa a rɩ yõod ne tʋʋma fãa a sẽn tʋmd tẽng zugã; tɩ zems ne Wẽnd sẽn kõ a dasem sõor ninga, tɩ rẽ la a pʋɩɩre. La f sã n zãad arzɛka, n zãad paoongo, f sã n paam n dɩt f tʋʋma yõodo la f kɩdemnẽ, ad rẽ yaa Wẽnd kũuni. Ninsaal ka le tagsd a pʋlemdã sõor tɛka, Wẽnnaam sã n yãmb a sũurã ne sũ-noogo ye. Wẽng a to n be tẽng zug ka tĩ mam maag m meng n get-a la a rɩta ninsaala. Yaa wala ned a yembre Wẽnnaam sẽn tʋʋg-a ligdi, arzɛk la waoogre; bũmb ka le be a soab sẽn na n tʋlg ye. Tɩ Wẽnnaam wa yaool n pa bas a soab t'a soog la a rɩ ye; bãmb kɩtdame tɩ ned a to, tɩ sãan menga, wa reeg a zĩig n dɩ. Dẽ me yaa bõe n zʋʋg bir sobgo. Ned sã n dog kom-dibli la kom-pugli koabga, n vɩ yʋʋn kʋʋma, tɩ ba a yʋʋma sõor sẽn zemb bũmb ninga, bɩ a ka tɩg ne sũ-noogo, la a ka paam tɩ b mum-a wa sẽn segde, ad-y pa-tar menga lɛɛg n são yẽnda. Pa-tar sũ-noog n yɩɩd-a, t'a soos n waa likẽ, n le soos n leb likẽ, la yẽ me yʋʋr na n kell n paa likẽ. A nif pa yãend wĩntoog vẽenem, a ka mi a sẽn ya-la, yẽ n são ne laafi vʋʋsgo, n yɩɩd sẽn vɩɩnd-a yʋʋm tus a yi menga la a me ka yãend sũ-noogo. D sẽn tees n dabd zĩig ninga sɩd yaa zĩ yɛng bala. Ned namsdame n na n paam n kõ a noore, t'a pʋg ket n kũmnẽ t'a pa tɩgd ye. Sẽn tar-a yam me pa são yalem ye. A sẽn mi dabaare n lut a bãonga yõod la bʋgo? F sẽn na n noog f sũuri ne f sẽn tare n são f sẽn na n bas tɩ f sũur pʋgd bũmb yõod sẽn ka yɩɩd bir sobg ye. Yaa daar zãra la b mi ninsaala t'a ka rũnda sãan ye. Ad-a kõn saag n wẽ no-koeemde ne sẽn yɩɩd-a ye. D sã n wẽed no-koeemde, la d goama meng sẽn maneg n lebgd gom-vɩɩdo. B yõoda la bʋgo? Ninsaal vɩɩma loogda wa sulunsuku. Ãnd n mi a sẽn tog n maan bõn-sõng ning n yɩɩda ne vɩɩm koɛɛg a woto buudu? Yʋ-noog são ka-noog sẽn daad toogo, tɩ kũum daar são dogem daare. Kẽ kũum zakẽ são f sẽn kẽed kibs sẽn dɩt zĩig ninga, tɩ ninsaal fãa baasgo na n yɩɩ boto, la kũum zakẽ sẽn vɩ-a ne yõor fãa bɩɩsda a tagsgo. Yãbre são laado; yãbr wata ne nen-gãnenga la a pekda sũuri. Yam yẽesem soaba la b segd sũ-sãanga zakẽ, yalem la b segd sũ-noog yiri. Kelg yẽesem soab saglgo são yalma pẽgr yɩɩl kelgre. Gãeeng laad sẽn wẽnd bũmb ninga, bãng tuud sẽn dɩt bugum yɩgrẽ la b pusdẽ. La sẽn ka be võor n yɩɩda, yaa pãn-tõog sã n lobgd yam soab gãeemdo, tɩ kũun sẽn kõt menesd a pʋ-peelem. Baas neer são sɩng neere. Maag-m-menga n são wilg-m-menga. Da yãg n puug f sũur ye, tɩ yalem sũuri n puugd tao-tao. D da sok yaa bõe yĩnga la zaamẽ são rũnna ye. Sokr a woto buud ka segd ye. Yẽesem nooma wa buud pʋɩɩre la a nafda sẽn be a tẽng zugu ka. Yẽesem sõngda wala ligdi n ligind yɛla. Yẽesem rõnegda vɩɩm dẽ me la paam-a la bãng n sog-a tar yõodo. Ges Wẽnnaam tʋʋma. Ãnna n tõe n tẽeg Wẽnd sẽn põde? Kɩdeng daar bɩ f noog f sũuri, la ko-yũud daare bɩ f tagse: ad Wẽnnaam n maan bãmb b yiibã fãa la ninsaala ka tõe n yãg n bãng bõe n na n lʋɩ taoore, t'a to pʋg ye. Mam vɩɩma ne a ya koɛɛga, ad-m paam n bãngame tɩ d tõe n sega fãa. Nin-sõng sẽn kiid ne a sẽn yaa nin-sõngã, tɩ nin-wẽng ket ne yõore ne a sẽn yaa nin-wẽngã. Gũus n da mams f meng wa nin-sõng tɩ yõsg ye, la f da maan tɩ foom n tar yẽesem tɩ loog ye. F bõnda f meng bõe yĩnga? Da maan wẽnem tɩ loog ye, da yɩ yalem ye. Bõe yĩng la f na n ki tɩ nan pa ta? Togame tɩ d gãd sagls a yiibã. Sẽn waoogd-a Wẽnde ka kongd a sẽn na n yalsẽ ye. Yẽesem kõta yẽesem soaba vẽenem n yɩɩd tẽn-soaben-dãmb piiga sẽn get tẽng a ye yelle. Ninsaal ka be tẽng zug t'a sõmblema sek a vɩɩnd neere n ka tol n tudg bada ye. Ka tog tɩ d gãd wa sɩd menga neba sẽn gomd goabg la rɩtga ye. Ka rẽ f na wʋm tɩ b yet tɩ f dakõor gomda beed f poorẽ. Naoor a wãna la f meng rɩ kaseto tɩ f wɩta f taaba? M gesa dẽ fãa ne gũusgu n tẽed tɩ m na paam yam vẽenem la m neeme t'a paoong yaa toogo. Tõnd sẽn ne bũmb ning marsã wã yita sẽn zulmẽ. A yita al yɩɩga. Yɩlẽ n wʋm a võor zãng yaa toogo. M nadga pãnga ne gẽesgo la vɛɛsgo. M tʋlgame n wʋm yɛla võore. M pa rat n dok zugẽ n bas sẽn tagem tẽngr tẽngra ye. M bãngame tɩ sẽn pʋgda wẽnga bɩ yalma, fãa wẽnda gãeemdo. M yãendame tɩ pag nina yaa wa bẽdgo la a sẽn wat ne sũ-sãang ninga yɩɩda kũum sẽn wat ne a soaba. Pag nina sũur yaa gãmbre t'a kams yaa loetse. Sẽn tũud-a Wẽnd daabo, yẽ soab põsdame. Yel-wẽnd maand yẽ paada a bẽdgẽ. Woto la m yãe yã, a Kowelɛt n gomde, m sẽn waa n zĩnd n pʋg yɛla a yeyn-ye n na n bãng b võore tɩ baas n pa yãk neng ye. Neb tusri sʋka mam yãeta dao sẽn tõe n bool tɩ yẽesem soaba. Pagba ka tɛka sʋka m baoo pag sẽn tog ne waoogre n konge. Ad mam sẽn wʋm bũmb ninga: Wẽnnaam naana ninsaala t'a pʋg ya pɛɛlg fas la yaa ninsaal n yik n baood gõdem-gõdem. Ned ka be n yet t'a tara yam vẽenem la a tara yell fãa buk ye. La bãng-y tɩ ned sã n tar yam vẽenem, a noor yõgemdame t'a nen-gãneng teeme. Mam yeta foom, reeg dĩma noore. Tẽeg f sẽn kãab bũmb ning Wẽnd taoore. Da yãg ne f lak n bas dĩma ye. Sã n mik t'a pa gomd n lebd fo sẽn datẽ bɩ f yõbge, bɩ f tar n leb poorẽ, tɩ yaa a sẽn data bal la a na n maane. Dĩma gomd n so taoore. Ned pa tõe n sok-a yaa bõe la a maand woto ye. Sẽn deegd-a noore tɩlgda ne yel-beedo, la yẽesem soab mi a sũurẽ tɩ bũmb fãa tara a wakato la Wẽnd leokr na n waame. N-ye! Bũmb fãa bee ne a wakato, la ne a bʋʋdo, tɩ ninsaal wẽnem labsa. Ned ka mi sẽn wat beoog ye. Ãnda n na n wilg yɛla sẽn na n yɩ to-to? Ned ba a ye ka tar pãng n na n paas a vɩɩm la a tadg a kũum daar ye. Zabr daar sã n ta, ka tõe n le tare n leb poorẽ ye; la bi-beelem pa fãagd bi-bɛɛg ye. M maaga m meng n ges bũmb ninga fãa sẽn maand tẽng zugu la m yãeeme tɩ zamaan kãnga, ned n so a to. La ade, ned sã n so a to zamaan kãnga, yaa pãng bal la a maand-a n menesd a sũ-noogo. Mam yãee b sẽn yãbd nin-wẽns kʋʋre; Zerizalɛɛm dãmb da yãet-b la wẽnd doogẽ ye, la Zerizalɛɛm dãmb wẽneg n yĩma b vɩɩm wẽngã. La rẽ me yaa bũmb sẽn ka tũ sore. Vɩɩm wẽng bʋʋd sẽn pa kaoode t'a soaba wẽneg n deeg a sɩbgra yĩnga, wʋsgo ka zoet wẽng maaneg ye. Nin-wẽng yɛl kɛga tõe n taa koabga me, la a yõor tõe n kell n yɩɩ woko. M miime tɩ wusg gãdame: tɩ sẽn mi-b Wẽnd waoogr bala la b zoet b nifu, n na n paam sũ-noogo; b sẽn sulg b mens Wẽnd taoora yĩnga. Nin-wẽng yẽ kõn paam sũ-noogo, la a kõn paas a yõor woglem ye, a na n looga wala sulunsuku, a na n kii pẽbgo a sẽn pa zoet Wẽnda yĩnga. La bõe la d yãeta tẽng zugu? Nin-sõma beeme tɩ b zãad-b wa nin-wẽnse, la nin-wẽens me beeme tɩ b yɛla kẽnd wa b sẽn date tɩ paamd sẽn togẽ ne nin-sõngo. M yetame tɩ rẽ me yaa a ye ne wudg n bir sobgo. La mam yẽ pẽgda sũ-noogo tɩ ninsaal yĩnga, bũmb ka be saaga tẽngr sẽn ya sõmbo sã n ka rɩ la f yũ la f noog f sũuri. Dẽ n tog n yãag-a la sõng-a a tʋʋmnẽ, a vɩɩma zãng, tẽng zug ka. Mam modga m menga n bao yam vẽenem dãmba sẽn maand n paam yam vẽenem; m gesa ne gũusgu ninsaalba tʋʋm sẽn yaa a soab tẽng zugu. M yãendame tɩ ba d sã n tagsd wĩndg la yʋngo, n mong d nina gõeem, d ka tõe n bãng Wẽnd sẽn tʋmd to-to dũni wã pʋg ye. Ninsaalba tõe n namsame n bao la b kõn bãng fɩ. Neb niyns sẽn yet tɩ b paama yam vẽenema sã n gomd tɩ b miime, bãng-y tɩ b ket n ka tar a võor ye. Ad-y m ka mag n bas bũmb kɛɛng ye, m dɩka fãa m yamẽ la sẽn lebg vẽenega, yaa tɩ Wẽnd bala n so nin-sõma wã vɩɩm la b tʋʋma. Ninsaalba ka mi sã n yaa nonglem bɩ beem la b na n sege. B ka tõe n bãng rẽ b toor ye. Ket n yaa bõn-yɛnga ne nin-tɩrg la nin-wẽnga, ne pʋ-peelem soaba la nin-kʋʋda. Bũmb pa welg sẽn deegd-b noya ne sẽn pa reegd-b ye, sẽn kʋʋd-b maand la sẽn pa kʋʋd-b ye, sẽn yaa nin-sõngo ne yel-wẽn maand ye, sẽn pʋlma la sẽn pa pʋlma ye. Ninsaalba fãa yĩnga yaa so yɛng n tuki la rẽ me n wat ne yel-beedo. Ninsaalb maanda wẽnga, b raaba yaa wẽnga, la tallda woto n wa tãag b kũum. Ned ninga sẽn ket vɩ bala n tar saagre. Baag sẽn vɩ sãoo bõnyẽeg sẽn ki. Sẽn vɩ-ba miime tɩ b na n kiime. Sẽn ki-ba ka mi fɩ. B ka le gũud fɩ tɩ b rʋʋ yĩmb-tãnga. B sẽn nong bũmb ninga, b sẽn kis bũmb ninga, b sẽn da zoet bũmb ning bõne, rẽ fãa sɛɛme. Bãmb ka le tõe n kẽes b toogo bũmb ning fãa sẽn maand saaga tẽngr ye. Dẽ yĩnga, bɩ f rɩ f dɩɩbo, ne sũ-noogo, la f yũ f rãam ne yamleoogo, tɩ Wẽnnaam zoe n mi-la f pʋga, b zoe n mi-la f tʋʋma. Daar fãa yeelg kibs futu la f zug da kong yũ-noog kaam ye. Vɩɩnd f vɩɩm ne pag ninga f sẽn nongã, ka võor vɩɩma tɛka, Wẽnnaam sẽn kõ-f saaga tẽngre, tɩ rẽ la fo me pʋɩɩre, rẽ la f rolbo, f tẽng zug vɩɩm tooga rolbo. Tʋʋmd ninga fãa f sẽn tõe n maane bɩ f maan-a wa f sẽn tõe tɛka, tɩ tʋʋmde, bɩ tagsgo, bɩ yam minim, bɩ yẽesem ka be kɩɩmkulgu f sẽn dabdẽ wã ye. M le yãenda yɛl a taab tẽng zug ka. Ad-y ka sẽn be-b tĩigã n wudgd n loog b taaba, la ka sẽn be-b sũuri n yɩɩd b taaba n maand raood zabrẽ ye. Ka sɩlem dãmbã n paamd n dɩlgd b vɩɩm ye. Sẽn tar-a rabaar ka lebgd arzɛk soab daar fãa ye. La mitba ka paamd waoogr daar fãa ye. Ned kam fãa tõe n sega zu-beedo. Ninsaal ka mi a zu-beed daar ye; wala zulung sẽn soosd n yõkd zĩma, tɩ bẽdgo yõkd luiila woto me la yell tiigda. M le yãenda bũmb a to sẽn be n sek toagsga, yaa yam vẽenem tʋʋma dũni wã pʋgẽ. Tẽn-bila a ye n da be t'a neba pa waoogẽ ye, tɩ dĩm kãseng wa kaoog zabre n gũbg-a, n me lals bɛd-bɛda n pag-a. La naong soaba a ye sẽn tar yam n yaool da be tẽngã la a ra tõe n fãaga tẽngã, a yama yĩnga. La ned pa tags naong a woto soab yell ye. Mam yetame tɩ yam yɩɩda pãnga la ad-b pa mi tɩ naong soaba bee yam ye, b pa waoogd-a-la b pa kelgd a goama ye. Fo sẽn kelgd ned sẽn tar yẽesem la a gomd bʋg-bʋge, dẽ n são f sẽn kelgd dĩm sẽn porda ne yalemdo. Yẽesem yɩɩda zab-teedo, tãbdo la logdo, la yel-wẽnd a ye tãa bala tõe n gɩdga bũmb wʋsgo manegre. Yalemd bilf sãamda yẽesem la yʋ-sõngo, wa zõos bilfu sẽn ki sẽn sãamd yũ-noog kaam. Yẽesem soaba togenda a meng so-sõngo la yalem gõod n tuumdame. Yalem kẽnd sor zugu me yam ka ye, la a maandame tɩ neb fãa mi t'a yaa yalma. Naab sã n yik mo-beed ne foom bɩ f da loog n bas f tuumd ye, tɩ maag-m-meng gɩdgda yel-wẽn wʋsgo. Tẽng soaal tõe n tudgame. La m sɩd nee sẽn ka zemse tẽng zug ka. Yaa yalem sẽn paam zẽkre ne naam la waoogre, tɩ arzɛk rãmba sur tẽng ne yãnde. Mam yãeta yem-daado tɩ b zombd wiidi n looda tɩ na-biis kẽnd ne nao wa yem-daado. Sẽn tuud-a bulg loang n lʋɩt a pʋgẽ, sẽn lubd-a lalga, waaf tõe n kɛ-a lame, sẽn wʋkd-a kuga pogenda a menga tɩ sẽn kɛɛd, a raad me tõe n pogl a menga. Lar sã n kong saasgo n pa rɩtẽ, modgre n be tɩ b kɛ ne pãnga, la yẽesem yõodo yaa tɩ bũmb fãa sakda a soab nugẽ. M mii saoolg waaf t'a são wã yõod la bʋgo, fo sã n bas tɩ waafa kɛ-fo? Yẽesem dãmb noor sẽn yet bũmb ninga nooma sũuri, la yalem zelemde wata ne a sãbsgo. A goama sɩngre yaa yalemdo tɩ b baasgo ya zu-kaoolg meng-menga. Yaa yalem n paasd goam ne goama. Ninsaal ka mi beoog yell ye, a maanda wãn n tõog n togs sẽn na n wa maan yẽ meng poorẽ? Yalem tʋʋmd kõt-a-la yaamse, a ka mi sor ning sẽn dɩkd n kẽ tẽnga pʋgẽ ye. Ad na pak yãmba, tẽnga rãmba, bi-bilfu sã n ya y dĩma tɩ kombɛɛmba sãt beoogo n tar dɩɩb bala. Zu-noog tẽnga la tẽng ning sẽn tar dĩm sẽn dog ne naam t'a kombɛɛmba dɩt wakat sẽn zemse bala. B baood n na n paasa b pãnga n yɩɩd b tɩgs b mens ne rãam. F nus a yi wã sã n zãms kʋɩɩm, f roog bɛɛda ne ra-põaasa. Nus sã n pa le nong tʋʋmde, roog yũnda koom. Nin-bɛda segenda rɩ-noogo n na n kiis b yɩɩre, la rãam kɩtdame tɩ vɩɩm yaa noogo, la ligdi sõngame tɩ f paamd f sẽn dat fãa. Da wɩd dĩma f sũur pʋgẽ meng ye, da gom wẽng nin-kãseng poore ba ya nin-yend taoor ye. Tõe tɩ luiil deeg f gomdã n sa n togse. F sã n mak vugr n kong bɩ f ra bas raood ye, tõe n wa zemsa raar a to. Yãk n pʋɩ tɩ ta neb a yopoe bɩ a nii, tɩ f ka mi yel-pakdem ninga sẽn na n paam-f tẽng zug ye. Sawat sã n pid ne sa-koom, ad-b kiigd-a-la tẽnga zugu. Tɩɩg lʋɩ goabga bɩ rɩtgo a paada a sẽn lʋɩẽ wã. Sẽn zoet-a sobgo la saaga kõn bʋde, la a kõn tigs ye. Fo ka mi biig vɩɩm sẽn bɩɩsd to-to a ma pʋgẽ ye. F kõn tõog n bãng bada Wẽnd sẽn maand bũmb fãa wã sẽn tʋmd b tʋʋma ye. Woto wã bʋd f koodo, sɩng yibeoogo n gũud zaabre. Ad-f ka mi bõe n na n sake, bõe n ka na n sak ye, f ka mi f tʋʋmda fãa sã n na n yɩɩ yõod ye. Vẽenem nooma la nin me nonga wĩntoog gesgo. Ninsaal sã n kaoosd ne yõore bɩ a ning pãnga n noog a sũuri la a yʋʋma fãa zĩnd yõodo a yĩnga. A bãng bala tɩ zu-beed dasem sõore n na n yɩɩge. Bi-bɩɩga, dɩ f bi-bɩɩlma yõodo, noog f sũuri wakat kãnga. Maan f sẽn dat fãa, sẽn noom-f fãa. Bãng bala tɩ Wẽnd na n bʋ-la f bʋʋdo. Yiis sũ-sãanga f sũurẽ la f zãag namsgo ne f yĩnga. Bi-bɩɩlem la vɩɩma sõor pukri la ka na n kaoos n loog ye. Tẽeg f Naanda yelle tɩ f ket n ya pẽbre. Tẽeg b yelle tɩ raara nan ket n zãra, daar ning f sẽn wat n yeele: «M ka le rɩt m vɩɩma sũ-noog ye.» Wakat kãng tɩ wĩndga kɩllame tɩ ya lika. Wakat kãng tɩ kiuuga la ãdsã sobame, tɩ saaga niid n pa yoogdẽ ye. Wakat kãnga f na n wẽnega ro-gũud sẽn digd rabeem a roog noore, n wẽneg bi-bɩɩg sẽn wẽneg n kʋʋl n zõonde, n wẽneg roog-biig sẽn zãgs neerẽ werbo, a sẽn lebg a ye yĩnga, n wẽneg pag sẽn ka le rat tɩ b yãend a neng yɩnga. F vɩɩma na n lɛɛg n paga a toore wa kʋɩlenga sẽn lug roog noore. Werd-m-toor sã n yaasdẽ, a bʋʋra me woogdame; luiila, yɩɩn-yɩɩnda sã n yɩɩl n tɩge, a koɛɛga boogdame. Sor sã n dʋʋda, a tũub wat n lebga rabeem ne-fo, nao wã zẽkr meng wat lebga toogo; f zoobda na n pelga wa laongo; yɩgd n vũud f yam wa sʋʋra ka na n le yɩg ye, f zelemda ka na n le bak toog la miisg ye. Daar n wate tɩ Adem biig fãa na n dɩk ra-babs sore la kʋ-yãbdba zoe n seglame n gũudẽ. Daara na n taame, vɩɩma gĩsga, a gĩs pɛɛlg wa wanzurfa, na n tõsgame, sãnema wamda na n wãagame, yʋʋra na wesga kʋɩlgẽ, lɩʋʋga na pa bulgẽ. Wakat kãng la ninsaal yĩnga na n leb a tomẽ tɩ yaa be la a yi yã, tɩ vɩɩma vʋʋsem me leb Wẽnnẽ tɩ bãmb n da fʋʋs-a. Wa a Kowelɛt sẽn togse, sɩda, bũmba fãa yaa zaalem sẽn pid zaalem. Tog n paasame t'a Kowelɛt ka vʋʋs ne zãma wã zãmsg ye. A zuka a bãngra zãnga n kõ-ba. A dõoga yelbũn ka tɛka. A modgame tɩ yelbũnd fãa pid ne yõodo. A Kowelɛt modgame n togs yɛla wa b sẽn ya-la, la a baas n yãe goam sẽn kõt-d daoodo. Mitba goam yaa wa bũmb sẽn nekd yam, yaa wa wĩir sẽn loet bãngra ne taaba, tikem-tikem. Yaa Wẽnnaam n walemd gom-kãense, tɩ bãmb bala n mi sor n wilgdẽ. M biiga m na n wilg-f lame tɩ f ra saag n gʋls bũmb n paas ye. Sɛba sõor paasgo yaa tʋʋmde sẽn ka be baasg ye la sẽn sɛt ninsaal pãnga. Goama tɛk yɩ woto. D zems taab zãnga. Zoe Wẽnd nifu la f tũ b noore tɩ rẽ la ninsaal fãa tʋʋm-pakre. Bãng tɩ d yel-manesem buud fãa, sẽn solge bɩ sẽn puki, sẽn ya neere, bɩ sẽn yã wẽnga, fãa na n bool-d-la bʋʋdo Naaba-Wẽnd taoore. Ad yɩɩll sẽn noom n yɩɩd a taab fãa. Yaa a Salomo yɩɩlle. Kolg n mok m wɛ, m noanga, kolg n mok-m tɩ f nonglem noom-m lame n yɩɩd rãam, n yɩɩd yũ-noog kaama f sẽn dɩk n zɛ f yĩngã. Fo menga kõta sũ-noogo wa yũ-noog kaam sẽn maneg n sɩlge, yaa rẽ me la kom-pugli wã nong-fo n zoet n pʋgd f poore. Yõk m nugu tɩ d wudgi, m dĩma, tɩ d wudg n kẽ f roogẽ, tɩ f nonglma noog sẽn yɩɩd sɩdã la d dat n naag taab n kilsi. Ad kom-pugli wã sẽn nong fooma tar bʋʋm! M nenga sobr me, Zerizalɛɛm kom-pugli, m baas n tara neerem, wa Kedar dot sẽn pil ne bʋ-sabl gãndo wa roog sẽn tʋɩ ne nufa. Da ges-y m yĩnga sẽn soba ye, tɩ rẽ yaa wĩndg tʋʋmde, yaa m ma-biis n yik zabr ne-ma n yet tɩ m pa wĩndgẽ n gũ b tɩɩse. M yaool n da ka mi m meng tɩɩs gũub ye. Wilg m wẽ, m noanga, yaa yɛ la f na n kɩɩm f rũmsã, wĩnto-sʋka, yaa yɛ la f na n paam maasem n vʋʋse? Wilg-ma, tɩ m da wa saad n yegd f tũud-n-taasa rũms ye. Pag sẽn ya neer n yɩɩd a taaba, f ka mi zĩig bɩ f pʋg piisã, tees f bulli wã rũm-kɩɩmba sikẽ. Bãng yaa, m Zoodo, tɩ m yamẽ wã fo wẽnda weef sẽn maneg neere tɩ b zombg rĩm biiga. F yɛga yaa neeba la f tʋb-londã n pʋgd n saasd-ba. F paasda f yubla neerem ne puud pãnenga. Wanzurf la sãnem la d na n mobg f kamsã. D yam la d dõog sãnem tʋb-londo sẽn naag n wẽn ne wanzurf n sog f tʋbã. Bɩ m zĩnd n kokdẽ m ka-nooda yũugu, n gũudẽ tɩ m dĩma yi a rɩɩba roogẽ. M noanga lebga wa wisao will sẽn wulum ne yũ-noogo, m sẽn dɩk n dogl m yãoogẽ; A wẽnda bugsuntundẽ puugu, wala En-Gedi pɛlg pu-killi. M zoodo, fo yaa neere, n-ye, fo yaa neere, kirʋ meng la f nina rõog yã! Fo me yaa neere, m noanga, fo me yaa neer wʋsgo! D gãaga tʋɩɩ ne vã-miinim, d dooga ra-paadse yaa kʋgsa wila, lalsa la kamsãooga vãado. Mam yaa Sarõ bãg-faagẽ puugu, mam yaa bãg-faagẽ lɩɩnga. M zood bee kom-pugli a taaba sʋka, la a yaa wa lɩɩnga sẽn be pulgumd sʋka. M noanga, fo yẽ bee kom-dibli a taaba sʋka wala tɩ-yõodo sẽn be tɩ-yaals sʋka. M zĩ-la m tɩ-nongra maasmẽ n tar a bi-moaama rɩɩbo la b yaa noog m zelemdẽ. M noanga tɩgs-m-la ne a nonglma rãam, a nonglma roogẽ. Bao-y rɩɩb n kõ-m tɩ m dɩ, sõng-y-m ne bugsuntung biisi tɩ nonglem kom zabda. M zug kʋgla m noanga goabga, t'a rɩtg mobg-ma. M tar y sɛɛga, Zerizalɛɛm kom-pugli, zoe-y weooga walse, zoe-y weooga yĩsã, la y ra nek m zooda ye, la y ra nek m noangã lɛ-lɛ; bas-y m noanga t'a gũs a raab tɛka. M wʋmda m noanga koɛɛga. Ad-a sẽn gãensd tãms la kunkuba. M noanga yaa wa walga bɩ yĩsri biiga. Ad-a sẽn be m dooga poore ad-a sẽn lɩkd peemlɛɛgẽ, ad-a sẽn lɩgsd vẽya. Ad-a sẽn yɩɩnde n yetẽ: «Wa wɛ, m zoodo, bi-neere, wa wɛ! Zĩig likame, saag yooga zãnga, Ypud weka zĩig zãnga, yɩɩn nood wakat taame; kelg watreguusgu, a zodgda a yɩɩla, a zodgd-b-la tõnd sɛɛgẽ. Gese, kankang yoda a pipi kankama tɩ sãbsa yelgd b yũ-noodo. Wa wɛ, m zoodo, wa wɛ! M walla solgda a meng pĩis bogdẽ, a solgda a meng pĩisa poore. Sõng tɩ m yãe f nenga tɩ m wʋmda f koɛɛga la a nooma m tʋba. Bãng tɩ f nenga me sakda gesgo.» Sõng-y-do n yõg d kẽesã bãmb n na n sãam d tɩɩsa zãnga. La d tɩɩsa zoe n yoda b puudu. M noanga ra kɩɩmda a rũms lɩɩns pʋ-weesẽ la m noang lebga m soolem tɩ mam me lebg a soolem. Tũ zaabr pems maasgã, tɩɩsa sẽn wat n takd b sulunsugdã n lɛɛg n wa, m zoodo, n lɛɛg n wa wala yãka, wala yãg-bila sẽn lolemd kunkubã. Zĩig sobgame tɩ m kẽ m gãagẽ n bao m yam sẽn kẽe a soaba. M bao-a lame la m pa yãend-a ye. Tɩ m na n yik n gilg tẽnga tõre, tɩ m na n sa soya la so-tiisã n bao m yam sẽn kẽe a soabã. M bao-a lame la m pa yãend-a ye. Sẽn gũud-b tẽngã, sẽn gilgd-b tẽnga, m seg-b lame n sok-ba n gese b sã n ka yãend m noangã. M sẽn loog bãmbã, m wẽneg n yãenda m sũur sẽn nong a soabã, tɩ m gãd-a n yet tɩ m kõn bas-a ye, tɩ rẽnd m tall-a n kẽes m ma roogẽ, sẽn doga maama roogẽ. M tar y sɛɛga Zerizalɛɛm kom-pugli, zoe-y weooga walse la weooga yĩsã la y ra sɩɩs m noanga ye, la y ra nek-a ye. Bas-y m noanga t'a gũs a raab tɛka. Yaa ãnda n yit zĩ-pɛɛlẽ wã n watẽ, n nukd wa bug-zõose, n nukd wa sawadgo n nukd tɩdare la gondreyẽoog yũugu, t'a yũug ya tẽn-zẽng tɩɩs yũugu? Ad-y yaa a Salomo ne a sẽn zao pãndar ning zugã. Tãb-biis pisoobe n gũbg-a, tãb-biis sẽn tũus Israyɛl tãb-biis sʋka, sẽn mi sʋʋg zẽk n kɛ, sẽn kaoos zabrẽ. Ned kam fãa sʋʋg bela a sɛɛgẽ la rabeem ka tar-b yʋng ye. Dĩm a Salomo peesa Libã tɩɩs pãndare, n kẽ n sag a pʋgẽ. A sã n dɩg tẽnga, yaa ra-sĩdim zutu; zuga kugenda wanzurfu, sãnem zug la a zĩ, la maneg n tʋɩɩ ne peen-miidu, la Zerizalɛɛm kom-pugli wã n maneg pɛɛla ne nonglem. A sẽn dellda yaa sãnem la fãa maneg n tʋɩ peen neeba. Tẽnga kom-pugli n maneg a pʋgã, la b maneg-a-la ne nonglem. Wa-y n ges-y yã, Siõ kom-pugli, wa-y n ges a Salomo sẽn fũgna a kãadem pugla la yaa a ma n wʋg n kõ-a, a sũ-nooga raar pugla. Ad-f be neere, m zoodo, ad-f sɩd be neere. Peenda ludame n bas nina yɩnga. Põeer-bi-yooll bala n tar f neerem. Zoobda yɛdga f poore n zẽkdẽ la b sigd wa bʋʋs sẽn dʋʋd Galaad tãnga, n kũudẽ la b roogdẽ. F yẽna pelga wa piis sẽn wors paalem la sẽn so koom. Yẽna fãa be-la b zĩisẽ, ned kam fãa tara a pak-n-taaga. F no-ganda moosem: gĩs miuugu rẽnna, f zelemda yaa bõn-neere. F yɛga nukda f zug peenna. F yubla yaa rog-roge la bũmb ninga sẽn kolg-a ne neerem, ya-la a Daviid gasgo sẽn me ne kug gilsi. Gãong woo sẽn yagl n gilga na ta tusri, la yaa tãb-biis sẽn pa yɛɛsd-d bũmb dẽnna. F bĩs a yi wã, bãng bulli a yiibu bãng yĩsr kamb a yi sẽn wãbd yamdo lɩɩns pʋ-wɛɛgẽ. M na n tũu zaabr pems maasga, tɩɩsa sẽn wat n takd b sulunsugdã, tɩ m dat n wa rʋʋ tãmsa la kunkubã sẽn wulumd ne gondreyẽoog yũugu, n wulumd ne tɩdar yũugu. Fo yaa neer zãnga, m zoodo, bũmb-bulen-buug ka paoog-f ye. Yi Libã n wa, m zoodo, yi Libã n wa ne ziiri. Sig Amana n wa, sig Senir la Ermo n wa, zãag f meng ne bõnyẽes la ãbs tãmse, n wa. Ad-f nifr kamsg bala la m sũura sẽn tosd kaam, m zoodo. Ad sãnema pãneng sẽn luund f kokorã loet-m-la f soolmẽ, wa b sẽn loet bi-bɛɛga ne bãn-kagbre. Fo nonglma pids-m-la ne sũ-noogo; m zoodo, m tão sõngo, fo nonglma pids-m-la ne sũ-noogo, sẽn yɩɩd dãam sẽn wat ne a soabã. Yũ nood niyns fo sẽn dɩk n zɛ f nenga noom-m lame n yɩɩd kaam buud fãa. M zoodo, ad-f noora goama yaa wa sɩ-kaam; sɩɩd la f rɩɩbo, bĩisim la f koom, f futa yũug yaa Libã rẽnna. M zoodo, ad-f yaa wa zẽedo sẽn gũbg yãgre, m tão wã yaa wa zẽed sẽn gũbg neere. Yaa bulg sẽn page. Zẽeda yaa tẽn-noogẽ zẽedã, n tar bʋgsem, n womd a pooloomse, tɩ-biis sẽn sakd diibo. Tɩ-puuda me yelgda b yũugu. Tɩɩg fãa ne a yũ-noogo: wala yulunyuug rẽnna, gondreyẽoog rẽnna, tɩdar dẽnna, naglɛng rẽnna, wisao rẽnna, ka-noog fãa sẽn tar n zɛɛd yĩng rẽnna. Fo kooma bunda a toore, n zãgsd zẽedã, a bunda a toore n sigd Libã tãnga. Goaabg sobdo, yik-y, rɩtg sobdo, zoe-y n wa-y. Bui-y m zẽedã t'a tɩɩsa yũug yãng tɩ m noang wa kẽ n dɩ a tɩ-nood biisi. M wata m zẽedẽ wã, m tão sõngo, m wat n na n tõsa bi-sõma, biis sẽn tar yũ-noogo, m wat n na n dɩ-la m sɩɩdo, m sɩ kaam, m wat n na n yũ m rãam la m bĩisim. Wã-y n dɩ-y yã, m zo-rãmba, la y yũ, la y tɩgs y meng ne nonglem. M da gõeeme la m sũura pa gõe ye. M wʋmda m zoa sẽn kabsde n yetẽ: «Pak m wɛ, m zoodo, m tão sõngo, m noanga, pak-m wɛ, dog ne neerem soaba! M zuga mada ne meenem, m zobda tosda yʋng meenem.» La m zĩnda pʋgẽ n leok-a: «M zoe n yeega m fuugu, m ka na n le yeelg-a ye. M zoe n peka m nao, m ka rat n le rẽgem-b ye.» M zoa tʋma a nug kʋɩlenga võorẽ tɩ m pɛleng yɩke. Tɩ m yɩk tɩ m na n pak-a tɩ ka-sõngã m sẽn zɛ wã na n kao wa tʋʋlgo n mad kʋɩlenga pagdga. M pakame tɩ m noanga kẽ, mik a lɛɛg n zoeeme. M yama bondgame. M yii n pʋg-a lame m baoo-a lame la m pa yãend-a ye, m bool-a lame la a pa leok-m ye. Sẽn gũud-b tẽnga seg-m lame, sẽn kargd b tẽnga yʋngã seg-m-la lal-gũbra zugu, B pãb-m lame, b pogl-m lame, b tol deega m bãg-paagã. M tar y sɛɛga, Zerizalɛɛm kom-pugli, y sã yãenda m noangã, bõe la y na n leok-a? Leok-y m noangã tɩ m sũur bẽedame, tɩ nonglma yik-m-la bãaga! Fo zoa wã tara bõe n yɩɩd a taaba? Dog ne neerem soaba, fo zoa wã tara bõe n yɩɩd a taaba tɩ f yõkd d sɛɛga? M zoa wã neng yaa rasãng nenga. Rasãmb tusr lagem taaba, tɩ yẽnda lʋɩ b taoore. A zuga yaa wa b bolga sãnem sẽn yɩlge. Zobda gila wa ga-bi sabla, n lob sabl wa salsang kõbdo, A nina yaa wa kʋɩl-wall dẽnna, kʋɩl-wall sẽn be koom noore, kʋɩl-wall sẽn pelg wa a soo bĩisim. A yɛɛma tobda wa googo, tɩɩs sẽn tar yũ-noog googo. A no gãnda pɛɛla wa lɩɩng puugu a noora sɩlgda noogo. A nusa pida ne sãnem zũya la kug neeb kagse. A pʋga yaa pɛɛlg wa goore, n pɛ muizãan kẽega. Karga yaa wa kugr la b pees yã tɩ nao wã ya waa b rõoga sãnem. A sẽn wẽnd yaa Libã kʋka, ka be taar ye. A goama yaa gom-noodo, a bũmba fãa tara yamleoogo. Ad-y m zoa wã yaa woto, ad-y m noãnga yaa woto, Zerizalɛɛm kom-pugli. Dog ne neerem soaba, f zoa wã kẽnga yɛ? F noanga teesa yɛ tɩ d sõng foom n bao-a? M noang kẽ-la a zẽedẽ, yũ nooda sẽn wulumd zĩig ningã, a kẽ-la a zẽedẽ n na n wãben a rũmsi la a bao lɩɩng pu-neeba. Mam yam kẽ-la m noang zãnga la m noang yam me kẽe maam zãnga. M noang wãbenda a rũmsi lɩɩns pʋ-wɛɛgẽ. M zoodo, fo yaa neer wala Tirsa tẽnga, fo gesg noogda sũuri wa Zerizalɛɛm yãeebo. Pʋs n da le ges-m ye tɩ f nina rɩt-m lame. F zoobda zẽkdame la b sigd wa bʋʋse b sã n dʋʋd Galaad tãnga. F yẽna pɛɛla wa piis sẽn wõrs paalem wa piis sẽn so koom. Ned kam fãa tara a pak-n-taaga sẽn ka tara yak ka ye. F yɛga nukda f zug peenna wa poaloang bi-bogre. Dĩma pagba taa pisoobe, pʋg-lemsa taa pis-nii tɩ pʋg-bi wã ya ka tɛka, la m noanga ka tar a to ye, a yaa a ye tãa, a yaa neer zãnga, a yaa a ma bi-yende, a ma bi-nongre. Kom-pugli wã yãend-a lame n pẽge, pagba naaga taaba n kils-a. B yeela b sũurẽ: Bõe n pɩnd wa sõore, n ya neer wa kiuugu, n yãgd wa wĩntoogo, n kẽesd dabeem wa tãb-biis sẽn sũ tãpo? D taa nobsa sẽn tigim zĩig ningã, n na n ges kʋl-waoka sẽn ningd vã-miinim; n na n ges sãbsa sã n tobdẽ, n na n ges sẽn wẽnda poaloanga sã n pu-la a puudu. Ade, m ka mi bõe n waa n lʋɩ sʋk ye. M lɛɛg n yɛɛsd-f lame, m noangã, buud sõng bi-pugla. Wẽnemd ka, wẽnemd ka, zɩ-yɩɩr soaba, wẽnemd ka n bas tɩ d ges f nenga. Y na n maana a wãn n paam n ges a Zɩ-yɩɩre? Bas-y t'a saodame, a saooda ne a tũud-n-taase, la saooga ka basd n vʋʋs ye. Dĩm biiga, ad-f nao la f neooda be neere! Rũma tɛka n digd yĩngri, yõak-mita n dõog a rõogre, la yaa neerem sẽn pid neerem. F pʋga gila wa koore la rãam sẽn tar yũ-noogo, ka tõe n kong a pʋgẽ ye. F pʋga peela wa zom bɩ lɩɩn-puugu. F bĩs a yiibã, bõn neeba b wẽnda bulli a yiibu, b wẽnda yãk kamb a yiibu. F yubla rooga sas la fan-teed n pelg-a n gilgi. F nina, wẽnda Esbõ bãgse, Bat-Rabim noorẽ; f yõorã yaa neere wa Libã gũudba ro-lug-lugã sẽn lug n tees Damas. F zuga rooga ne naam wa Karmɛl tãnga; f zoobdã, bãng pĩir sẽn wʋg ne nufa. Dẽ la dĩma yãee n lʋɩ f bẽdgẽ. Ad fo sɩd yaa neere, bi-nongre, ad-f neng sɩd sakda gesgo, bi-sõngo! Fo tãoo n kula yĩngr wala koanga, koanga biis yaa f bĩsã. Dẽ la m yeel yã: M na n dʋʋ koangã n tõs a biisã, la b na n yɩ-m-la noogo wa sib gĩndi; a noora na wẽ-m-la pemsem, pemsem sẽn tar tɩ-noog yũugu. Ad-y m yũuda f goama wa rã-noogo. Rãam sẽn ya noogo la m bĩng m noangã, yaa rãam sẽn sakd yũubu, ba m sã n zoe n suusdẽ. M lebga m noang soolem, tɩ m yam kẽ-a-la zãnga. Wa wɛ, m noanga, wa tɩ d kẽ weoogo tɩ yʋngo d na lɛɛg n wa tẽnga pʋgẽ. Zĩiga sã n yẽege d na leb pʋtẽ n tɩ ges siba sã n yodame, n ges sẽn wẽnda poaloanga puuda sã n lebga biisi, n ges tɩɩs a taaba sã n ninga puudu. M na yaool marsã n dɩk m meng n kõ foo. Tɩɩs kẽer zoe n yelgda b yũugu la b pa yelgd b yũ-nooga yaar ye. Tɩɩs wʋsg womame n yɛs d dignoorẽ. Yaa tɩ-rẽems la tɩ-yaoose, m noanga, ad fãa basa fo yĩnga. Ges wɛ! Tõnd dag n yaẽ ma-biisi, n yẽsmẽ ma a ye bĩisim, m sẽn yãendẽ foo zĩig ning fãa m tõe n mobgẽ-f lame tɩ ned ba a ye ka sãbs-d ye. Sã n yaẽ woto m lʋɩtẽ la f taoore, m taldẽ-f lame n kẽes m ma roogẽ, n kelg f koɛɛga zãnga la m yũnug-f ne rãam sẽn tar yũ-noogo, wa weooga fãa sẽn yelgd a soaba soom-saar wakato. M na yũnug-f ne m meng rã-toose. M zug kʋglẽ-la f goabga tɩ f rɩtg mobgẽ-ma. M yõkda y sɛɛga, Zerizalɛɛm kom-pugli tɩ y ra nek-a ye, tɩ y ra nek m zooda ye, bas-y m zooda t'a gũs a raab tɛka. Yaa ãnda n tik a noanga n yit we-raoogẽ n watẽ? Yaa maam n nekd foo tɩɩga tẽngre, f ma sẽn dɩk f pʋg zĩig ningã, sẽn doga fooma sẽn dɩk f pʋg zĩig ningã. Bas tɩ m yɩ wa makre f sũurẽ, tɩ m yɩ wa makre f kangẽ, tɩ zood yaa pãng soaba wala m ba kũum. To nonglem ka be kabsg ye, A sẽn sog ka le tõe n fãag ye. A bugum ka rɩt n kees ye a zabda wa Wẽnd bugum. Sa-bɛd lagem koabga tɩ nonglem bugum tõt kiusgu. Kʋɩls sũ tãpo n na n dɩ-a t'a tõt kiusgu. Ned sẽn ka tõe n yɩ a bɛɛb laado yaa sẽn wʋka a zak arzɛk fãa n da nonglem. Tõnd tão wã nan paooda, a bĩsa nan ka yod ye. Bõe la d na n maan a yĩnga, a yell sã n wa be sʋka? D tão wã da yaẽ lal-gũbri d na n roglẽ wanzurf lill a zug n paase. D tão wã sã n da yaẽ dignoore, d na n kɛ tɩ-kegemse n maneg n page. Mam mee wa zabr kõn-ling-m doogo, ne a lal-gũbri. Bũmb ka paoog ye. Sẽn zao-b ro-lug-lugã, n gũusd bɛɛba me meeme. Woto wã m sɩd yaa a Zɩ-yɩɩre, la pidsda m noanga ne sũ-noogo. A Salomo sela a bugsuntung Baal-Amo sẽnẽ. A baoo neb n gũnug tɩɩsã. Sẽn data n kẽ n tõs wata ne wakɩ koeems tusri. Sã n ya maam, maam bal n get m tɩɩsa yelle. A Salomo nong bɩ a kẽ wakɩ koeems tusra pʋgẽ n yãk koeems kobs-yi n kõ gũudba. Fo bee zẽeda tẽnsʋka, m zoodo, tɩ m tũud-n-taasa rat n wʋm f koɛɛga. Sõng tɩ d wʋm f koɛɛga, m noanga! Zoe n looge, m noanga! M noanga; zoe tao tao wa yãg-bila, zoe wa yĩs-bila, wudg n dʋ f yũ-nood tãmse! Ad-a Amos biiga, a Izayi, sẽn yãende. Yaa yɛl niyns fãa sẽn na n pak Zɩɩda la Zerizalɛɛm. A yãend-b-la a Zɩɩda dĩm dãmba, a Oziyas, a Zotam, a Akaz la a Ezekiyas wẽnnẽ. Soaala-Wẽnd n gomde: Bɩ yĩngr dãmb kelge, tɩ tẽng zug rãmb yoog b tʋba: M yɩta a wãna n wub m kamba, tɩ b tol n bɩ, n wa rat n yi m soolmẽ? Naaf ka yãet a zu-soab n kong ye, bõang me ka kongd a gãag zĩiga, a zu-soab zakẽ ye. A Israyɛl bala n ka mi fɩ, m buuda yam bal n ka weke. Bʋk ne foo, bʋk ne foo, yel-wẽn-maandb tẽnga! Fo neba yaa neb sẽn pid ne wẽnem, yaa bi-bees buudu, yaa buud sẽn sãame. B basa Soaala-Wẽnde, b paooga a Israyɛl Nin-sõngo, b wẽnemda b kãare n tees bãmba. Y sẽn ket n zãgsd bãmbã, yɛ la b na n le tõog n wẽ yã? Zuga fãa zoe n yaa noada, sũura pãng sɛɛ zãnga. Sẽn yi zug tẽnsʋka n wat nao wã, zĩig ka le beẽ n ka sãmpogr ye. Yĩngã bugame, n meede, n feebe, fãa yaa noada, la b ka bãn kaam, b ka vil peend ye. Y tẽnga fãa lebga we-raoogo, y zagsa fãa yõoga bugum, la ad tẽn-zẽng rãmba sẽn sãamd y pʋto tɩ y zĩi n getẽ. Zerizalɛɛm lebga wala pʋʋg-roogo, wala niir pʋ-wɛɛgẽ ro-zaoko, wala tẽnga, bɛɛb sẽn gũbgi. Ad-y Soaala-Wẽnd sã n da pa sʋkẽ neb kẽere, n base tõnd yaẽ la wala Sodom, tõnd yaẽ la wala Gomor. Yãmba, taoor dãmba, nin-wẽns wa Sodom dãmba, kelg-y Wẽnd koɛɛga! Nin-wẽns wa Gomor dãmba, wʋm-y Wẽnd saglgo! Yãmb maandã, ne b ya ka tɛkã, b maanda maam bõe? Yaa Wẽnd n gomda. M yam yii ne y piisi sẽn kãbd bugmẽ, la ne y nag-bi nobdsa kaam. Y lolsa la y boeesa zɩɩm, m pa le rat ye. Y wata m taoore, la ãnda n kos-y tɩ y kẽ m zakẽ? Vʋʋs-y ne y kũun yoodã, ad-b ka tar yõod ye. Y pa ne tɩ y b bug-zõosã ka tat m yam! Vʋʋs-y ne y kibs rãmbã, kiu-paalle, tig-raase, vʋʋsg daare. Y kibs bɛd la bõonese, fãa lebga m sɩ-lakre tɩ b naaga ne yel-wẽna. Tigr ninga fãa y sẽn maande, y kibs buud fãa, m yɛɛ ne bãmba, b lebga zɩɩb ne-ma. Yãmb zẽkda y nusi n na n pʋʋs maam, tɩ mam wẽneg m nenga. Y pʋʋsga sã n pʋʋsdẽ n ka yɛɛdẽ me, ad-y mam ka le kelgd ye. Y nusa mooga ne zɩɩm. Pek-y y mense, yɩlg-y y mense, zãag-y y wẽnema ne maam, vʋʋs-y ne wẽng maanego. Zãms-y neer maanego, bao-y zemsgo, zãag-y sẽn dat-ba n maan pãnga; zoe-y kɩɩb nimbãanega, da bas-y tɩ b zãmb pʋg-kõor ye. Soaala-Wẽnd meng n yete: Wã-y tɩ d yẽse, ad-y y yel-wẽna sã moos wa zɩɩm, m tõe tɩ b pelg wa goore, b moos wa nufa, m tõe tɩ b pelg wa lamdo. Y sã n sɩng m noora reegre, y na rɩ y tẽnga yõodo. Y sã n yet tɩ y kõn sulg y zugu, sʋʋg n na n dɩ yã. Maam a Naaba-Wẽnd n yeele. M tẽn-sõnga maana a wãna n wa rɩk pʋg-yoodr zʋgo? A Siõ da yaa tẽng sẽn nong sɩda, n da baood zemsgo, la marsã a pida ne nin-kʋʋre. Zerizalɛɛm, ges f sẽn lebge, ad fo wẽnda wanzurf sẽn kalem ne rẽgdo, n wẽnd rã-toos sẽn pul koom. F nanamsa ka le tũud maam ye, b yõga zoodo ne wagda. B sẽn nong la ligd bala. Kɩɩb la pʋg-kõore kõn paam sõngre b bʋʋd zĩigẽ ye. Yaa rẽ me yĩnga - yaa Soaala-Wẽnd Pãng soabã n gomde, a Israyɛl Wẽndã n gomde: M na tõog m bɛɛbã, m na rok m sũur ne-ba. Zerizalɛɛm, m na n zaba ne-fo, m na n los-f-la boaagẽ, n yiis f namdã, n pek f rẽgda fãa ne safãnde tɩ f lebg yɩlemde. Sẽn bʋʋd-b bʋʋda na n le paama pĩnd dãmba zʋgo, sẽn sagend-ba na n le rɩka pĩnd dãmba nao. Fo na n deega yʋ-paalle: Zemsg tẽnga, Ka mi zãmb tẽnga. A Siõ na paam fãagre a sã n lebg sɩd-baooda, a kamba sã n tuub n baood zemsgo. Sẽn ka sak-bã la yel-wẽn-maandbã, b na n dɩka b zutã n wẽ taaba n sẽege, sẽn bas-b Soaala-Wẽnd na n kiime. N-ye! Yãnd na yõk yã, y sẽn da maand bũmb niyns y tɩɩsa tẽngrã na n waa ne y yãnde, y maand yooda sẽn da kʋʋd y tɩɩsa tẽngrã na n kɩtame tɩ y zug sulgi. Y na n wẽnega wa tɩɩse sẽn ka le tar vãad ye n wẽneg wa zẽed tɩɩs sẽn ka le tar koom ye. Tẽnga ned fãa sẽn pid ne pãnga na n lebga gʋmdo, t'a tʋʋm yooda lebg bug-pãrga, tɩ b fãa naag taab n yõk bugum, la bugma kõn yãend ned sẽn na n kiis-a ye. Ad-a Amos biig a Izayi sẽn yãend bũmb ning yɛsa Zɩɩda la Zerizalɛɛm poorẽ. Wakat n wate tɩ Soaala roogã sẽn me tãng ning zugã, tãng kãng na lugame n zʋʋg a taaba, n lug n zʋʋg kunkuba fãa. Zamaana buud toɛ-toɛyã neb na n waa be. Buud wʋsgo na n yiime n dɩk sore; b na n yeela taaba: «Wa-y tɩ d dʋ Soaala tãnga, wa-y tɩ d kẽ a Zakoob Wẽnnaam doogẽ, tɩ b wilg tõnd b noya tɩ d dɩk b sore.» N-ye! Yaa Siõ la Wẽnd zãmsga yita, yaa Zerizalɛɛm la Soaala Gomd sigda. Bãmb n na n kao dũni rãmba bʋʋdo, bãmb n na n paas b zaba, n deeg b sʋʋsã n kud wãgse, n deeg b kãna n kud goeto. Tẽnsa kõn le yik zabr ne taab ye, la ned ba a ye kõn le zãms zabr takr ye. Zakoob buudu, wa tɩ d kẽn Soaala vẽenemẽ. Soaala, y pa le rat y nebã, y pa le rat a Zakoob buuda ye. Yaang rãmba n waa n deeg tẽngã n yãmbe. Filisti rãmba sõor sẽn zem to-to, b bagba me sõor zema boto. Y buuda yõgda zood ne sãamba. Tẽnga pida ne wanzurfu la sãnem; arzɛka ka tõe n geelg n sɛ ye. Tẽnga pida ne wiidi. Bilim-bilma ka tõe n sõd n sɛ ye. Tẽnga pida ne wẽn-faado, tɩ b wat n yĩgimd b taoore n waoogd b mens nus sẽn naane, b nus sẽn dõoge. Yaa rẽ la na n yɩ pakre tɩ b noor turg tom. La yãmba, Soaala-Wẽnde, da sak-y tɩ b le roog ye! Ninsaalba, bao-y pĩisi n lilli, bao-y bok n kẽ, n põs Soaala-Wẽnde, tɩ b pãnga na n kẽes-y-la rabeem la b ziira na n yɛɛs-y lame. Ninsaal zẽk-m-meng na n sikame, a tɩtaam na n sɛɛ daar a ye, la baraare, Soaala-Wẽnd yʋʋr bal n na n zẽke, bãmb b ye tãa. Sɩda daar n na n zĩndi, Wẽnd-Pãng-Soaba raare. Baraare la nagra sɛɛb raare, tɩtaama sɛɛb raare, zẽk-m-menga sikr raare. Na n yɩɩ Libã tɩ-bɛda lʋɩɩs raare, Bazã tɩ-bɛd wa kʋgsa tõrb raare, tãm-bɛda la tãm-bi sirgri raare, ro-lug-lug la lals sẽn ka tõe n gãndg boogre raare, Tarsis koom-kogend bɛda ne b arzɛka lisb raare. Ninsaal zẽk-m-menga na n sigame, a tɩtaama na n sɛɛme, badaare Soaala-Wẽnd yʋʋra na n zẽkame, bãmb b ye tãa. Bõn-naandsa fãa sẽn da paamd waoogrã, fãa na n tus n menesame. Bao-y pĩisa pẽkse, sig-y tãmsã bogdẽ n paam n tɩlg Soaala-Wẽnd sũ-fõore. Ad-y badaare, b ziira na kẽesa rabeem kãsenga, b na kɩtame tɩ tẽnga fãa digimdi. Badaare ninsaal na n dɩk a sẽn waoogd b rãmba, n lob sãbtõaase la zãnkiti. A yaool n da yagb-b-la ne sãnem la wanzurfu n na n yĩgimd b taoore. B na n bas-b lame n zoe n tɩ soond tãms bogdẽ la pĩis pẽgsẽ n paam n tɩlg Wẽnd ziira la b sũ-puura sẽn wat ne rabeem ningã, tɩ badaare, b na n yik n kɩtame tɩ tẽnga digimdi. Vʋʋs-y ne ninsaal teegre, bãng-y t'a yõor koɛɛma. A yaẽ bõn-koosem a ka beẽ saag-toog ye. Ad-y bũmb fãa Soaala, yĩngr la tẽng Soaala, na n monga neba bũmb fãa, n mong Zerizalɛɛm dãmba, n mong Zɩɩda rãmba. B na n mong-b-la rɩɩb la koom, b na n mong-b-la b sẽn teeg fãa. B na n mong-b-la zabr gãndaoogo, n mong-b tãb-biiga, bʋ-kaooda, bãngda, baga, buud kãsma, tãnsoaba, kug-zĩida, sagenda, zʋʋr soaba, tɩ-rɩtba la tɩ-busdba. B na-rɩtba na n yɩɩ kom-bõonego, sẽn na n zã-b wala b sẽn date. Neba na n yika zab ne taaba, yãag pat-n-taaga la nin-kẽema, tɩ talg rẽnd yaa na-koambga. Ned na n yikame n sog a saam-biiga, a ba zakẽ, n yeel-a: «Foom n tar fu woko lebg tõnd naaba, zã d tẽnga sẽn wẽnd raboogã.» La sẽn yẽeg a soaba na n yeelame: «Ade, m ka tɩɩm soab ye, m ka tar dɩɩbo, m ka tar fu-songo m doogẽ ye. Da rɩk-y tẽnga naam n kõ-m ye.» Zerizalɛɛm dãmb sɩd kẽnd n lagsdame, tɩ Zɩɩda rãmb tar lʋɩɩse; la ad-y ka bũmb a to, ya b sẽn yaag b noore la b zẽk b nugu n paoog Soaala-Wẽnd ne b ziirã. B nenga meng pa yãet n sãmb ye, wẽnema lebga b yẽesem, b yel-wẽna yɛdga zĩig zãnga wa Sodom dãmba rẽnna, lebga b zu-zẽkre. Ad-y rẽ n na n wã-b zãnga. Yeel-y tɩ zu-noog soaba la nin-sõngo, a na n dɩ-la a tʋʋm sõma yõodo. Yeel-y tɩ far soaba la nin-wẽnga, a na n deega a tʋʋm yooda sɩbgre. Kato! Bi-bilfr bala n tar m neba n yaandẽ! Katõ! Naama sẽn lʋɩ b rãmb nusẽ wã nan yaa kom-bõonese, ad-y pagbã n dɩt naama. Kato, f soaalba tat-f lame n kẽed moogo! Kẽnda ka tees a sẽn togẽ ye. Soaala-Wẽnd yikame n na n kao b bʋʋdo, b yik n yɛsa yĩngri. Soaala-Wẽnd sẽn na n bool b rãmb bʋʋdã yaa rĩm-biisi la nin-kẽembã; b na n yeel-b lame: «Yãmb n deeg naong soab bugsuntungu, n deeg a sẽn da so, a sẽn da tar n lut a naongo, yaa rẽ la yãmb yeeg n bas-a. Ãnda n kõ yãmb sore tɩ y nams m nebã, bõe tɩ y sulgd naong rãmb zug n paasdẽ? Dũni fãa Wẽndã n sokde.» Soaala yeelame: «Siõ kom-pugli wã wilg-m-menga waooga. B kẽndame n dõond b yubla, n kẽnd tɩ b nina kamsd kams yoodo, tɩ nao wã solsdẽ, tɩ b bugla wẽed taaba.» Yaa rẽ yĩnga la Soaala-Wẽnd na n bas Siõ pagba zut tɩ b kẽ rasempʋɩɩga, la bũmb kõn lud b rĩir ye. Badaare Soaala-Wẽnd na n piida fan-teedã, nao-zũya, wĩntoog la kiuug sẽn dõog n pit yublã, n paas tʋb-londã, kagsã, pɛɛla sẽn lut nenga, zu-vindsi, yãndo, pãnense sẽn mobgd sɛɛga, tɩto, gãn sẽn boond zu-noogo, nug-bĩnsi, fan-teed sẽn sogd yõore, kibs futu, fut sẽn ka tar nusi, pɛɛl sẽn teegd zugu, kordo, fu-tagdo, fu-yord faase, pɛɛl sẽn tar n vind kokoɛ la bãg-paase. Ad-y bõn-põosg yũugu n na n deeg yũ-nooda zĩiga, la wĩir bala n na n lebg sɛɛga sẽbdga. Zoobda sẽn pãnem ne nagra na n kõogame. Fu-neeba na n lebga sũ-pa-noang futu, kut sẽn mooge, la b na dĩ b yɛgdgã, yɛgdga dĩida ne kud moomde n sãam b neerem. Sʋʋg n na vɩlem tãb-biisã tɩ gãndaadã pa tãpẽ. Wakat kãng marsã la tẽnga tõr na n kelem. B na kʋka zug n kelem kʋʋre. B na n yɩɩ wala pag sẽn menes a sẽn tar fãa, t'a pãs n lʋɩ tẽnga. Daar n wate tɩ pagb a yopoe na n pʋg rao yende la b na yeel-a lame: «Tõnd n na n dɩlg d menga, tõnd n na n bao d toor futu, fo ye n bas-d bala tɩ d soond f yʋʋra maasmẽ n tɩlg yãnde.» Daar n wate, Soaala-Wẽnd na n kɩtame tɩ bũmb bul n yi tẽngã la a na n yɩɩ Israyɛl kamba sẽn põsã zu-zẽkre la b pẽgre. Sẽn pa-b Zerizalɛɛm, sẽn na n põs-b Siõ, bãmb fãa na n boolame tɩ neb sẽn welg toor Soaala-Wẽnd yĩnga; bãmb fãa yʋy la Soaala gʋls b vɩɩma sebr pʋgẽ tɩ b na n vɩɩnd Zerizalɛɛm. Soaala-Wẽnd na n waa ne zemsgo la b neba yɩlgre. Ad-y Zerizalɛɛm pagba sã n wa paam tɩ Soaala pek b rẽgdã, Siõ sã n wa paam tɩ Soaala buuda pek zãnga, n pek zɩɩma sẽn daagã, n yõog rẽgda fãa ne b sũ-fõora bugum, wakat kãng la Soaala-Wẽnd meng b toore na n maan woto: Siõ tãnga zugu, sẽn na n tigim-b be wã yĩnga, bug-zõos sawadg n na n puki wĩntoogo, tɩ vẽenem na n yãng yʋngo. La Wẽnd ziira na pukame n gũ-ba. Na n yɩɩ wala maasem tɩɩga, wala zãnde sẽn ti ne tɩɩs vãado tɩ b neba na n tɩlg tʋʋlgo wĩnto-sʋka la b põs sa-koom la sob-raado. M na yɩɩla yɩɩlle n kõ m zoa: ya m zoa ne a bugsuntunga yɩɩlle. M zo-nongre n da paam zĩ-sõngo n sel bugsuntungu. A maaga a menga n wʋgs kuga n sam zĩ-yɛnga, m maag a meng n ko, n bao bu-sõng n sele. A gesa pʋʋga tẽnsʋka n ning gũud roogo, la a vigl sĩnga, rãama yĩnga. Mik bugsuntunga zãgsa moogre, n pa kãse. M kot-y lame marsã, Zerizalɛɛm la Zɩɩda rãmba, tɩ y kao maam ne m bugsuntunga bʋʋdo. Bõe la m da tõe n paase n ka paase? Bõe tɩ m da gũud bɩgma n wa yɛs ne kãse? Bas-y tɩ m wilg yã m sẽn na n maan m tɩɩsa bũmb ninga: yãgrã m na yãk-a lame tɩ rũms kẽ n wãbe; lalgã m na n lub-a lame tɩ b kẽ n tabe. A sãoongo la m data, m pa le rat n ko, m pa le rat n kʋʋs wila tɩ maneg n tob ye; gõos rat bɩ b wulumdi. M na n diga sawato tɩ saag da le tosg ye. Bãng-y t'a Israyɛl la dũni fãa Wẽnda pʋʋgo; tɩɩsã sẽn tũus n yãkã, yaa Zɩɩda kamba. Wẽnd da tẽeda ka-yell dãmba, n wa yɛs ne nong-b-zɩɩm-daagre; zems taaba la b da rat n yãe, mik yaa waasgo la b na n wʋme. Yell be-la y zugu, yãmb fãa sẽn met doogo n paasd roogo, yãmb fãa sẽn tukd pʋʋgo n paasd pʋʋgo, zĩis fãa lebga yãmb soolem, yaa wa yãmb bala la tẽnga kẽedba. Wẽnd sẽn walem m tʋbrẽ la woto: Yaa rot ka tɛka n na n dʋʋge, dot sẽn tar yalem la neerem; nin-vɩɩg ka ket sẽn na n kẽ-b ye. Tɩɩsa senda ka tɛka la biisã wat n yaa pet a wãn bala; bʋta peoogo n kẽeb wamde. Yell be la y zugu yãmb fãa sẽn vẽegd beoogo tɩ yaa rã-rot bala la y sɩngd saabo; zĩig wat n sobgame tɩ y ket n be be n tuumnẽ. B tara b pendse la b ruuds wãagre, n pãbd b gãngãado la b peebd b wɩɩse, la b gagd b rã-yũura rãam. Sã n yaool n ya Soaala-Wẽnd poorẽ b toog ka be ye, Soaala-Wẽnd tʋʋma, b pa ne rẽ ye. La m neba sẽn ka tar yama, b na n wʋk-b lame n kẽes yembdo; kom n na n kʋ b nin-bɛdã, b zɛlma na n kʋɩ ne ko-yũudu. Bog-zulung n yaagd a kokore, n yaagd a no-yalenga n na n vele, n vel zãma sẽn kɩdemd sũ-noogo la sẽn yer kibs futu. Yaa rẽ yĩnga la ninsaal fãa na n turg a neng tẽnga, sẽn da get a taaba ne sãbsgo na n kong n sulga a nenga. Dũni fãa Soaala na n puka b ziiri tɩ yaa dũni paall la b na n wa ne. Naaba-Wẽnd yaa sõngo, b zemsgã n na n puk b sõmblem. Pe-bi na n paama b wãbneg zĩiga, rabooda yamdo la b na wãbneg bulli la rũms sẽn be kaam. M sẽn yãbd neb niynsi yaa yel-wẽnda wĩir sẽn zoe n gaag b rãmbã la a vuud-ba n digd b sɩbgr zĩigẽ, n vuud-b wa b sẽn vuud bilim-bilm. M yãbda sẽn yet-ba: «Wẽnd na n sɩnga b tʋʋmdã da-bʋre b na n sɩnga da-bʋr tɩ d gese, da-bʋre la Wẽnd pʋlemde a Israyɛl Wẽnda pʋlemd na yẽrge n kolg a pidsgu zĩiga tɩ d yãende?» Yell me ne neb niynsi sẽn boond-b wẽng tɩ neere, la b boond neere tɩ wẽnga; sẽn kɩt-b tɩ lik lebgd vẽenem, tɩ vẽenem lebgd lika, tɩ tɩɩsg lebgd sɩɩdo, tɩ sɩɩd lebg tɩɩsga, yell be la b zugu! Sẽn tẽed-b tɩ b yaa neb sẽn maan gũusgu la sẽn tar-b yam, yell be la b zugu! Sẽn deeg-b rã-yũur naam, n yũud rã-toosã n kalem taaba, tɩ bũmb ka maand-bã, yell be la y zugu. Yel-maand sã n yiis a ligdi n kõ yãmba, yẽ soab n so bʋʋm, tɩ nin-sõng na n paam taale. Ade, wala yamda sẽn dɩt bugum to-to, wala bug-vɩlenga ne vãado, woto me b yẽgna na n lebga tompɛglem tɩ b wila go tom pɛɛlga, la ya b sẽn ka reeg dũni fãa Wẽnda noor yĩnga, yaa b sẽn sãbs Israyɛl Soaala gomde. Wẽnd sũur yika ne b neba, tɩ b zẽk b nug n wẽ. Yaa zẽk-m-meng rãmba la b kʋ yã, b bilim-b lame n dʋʋg soya zutu. Ade Wẽnd sũur nan pa sig ye, b ket n zẽka b nugu. Wẽnd na n kamsa tẽn-zãorgẽ dãmba, b na peeba wɩɩg n bool-ba, la tao-tao bala tɩ b zoe n waame. Koamsa la sẽn yɛɛ soab ka b sʋk ye, sẽn suusda, gõeem sẽn tar a soaba, ka b sʋk ye, ned ba a ye ka lodg a sɛɛg sẽbdg ye, ned ba a ye gãndalsa pa yols ye. B pɛɛm sɩlsa neere, b tãbd dõosa dɩm-dɩm, b wiidi wã nao-bend keglem, bãng bug-bãng kugri, b bilim-bilm tĩiga, bãng sɩlmande. B bʋʋrã: bõnyẽ-yãang dẽnna; kelemda wa bõnyẽega, n wudg n bri, la ned ka n deegdẽ ye. N-ye! Daar a ye, bʋʋr n na n maane wala mogr dãamde, Zɩɩda tẽnga. La fo sẽn ges zĩig ning fãa yaa lik sẽn wat ne rabeem, lebga lik tuu, tɩ vẽenem sɛɛ zãnga. Dĩm a Oziyas kaalem yʋʋmde, m yãee Soaala-Wẽnde tɩ b zĩ b naan goeel zugu. Naama goeel da vigla yĩngri, Wẽnd futa ra pida rooga fãa. Malɛk rãmb n da pẽ-ba. Ned kam fãa tara pɩgs a yoobe: a yiib tarame n lut nenga, t'a yiib tar n lut nao, t'a yiib tar n yɩgda. B ra moondame n deesd taaba: «Sõmblem Naaba, Sõmblem Naaba, Sõmblem Naaba la Wẽnde, dũni fãa Soaala! Yĩngri la tẽnga pida ne bãmb ziiri!» La yɩɩla sẽn pʋdã, kʋɩlensa deeg n dĩmsame la bug-zõos n wẽneg n pid wẽnd doogã. La mam yeelame: «Ade, m ka le tõe n yaag m noore, tɩ m noor yaa rẽgdo, m ka tõe n naag n pẽg ye; pʋs n yaa m buuda zãnga n ya rẽgdo. M sẽn yaool n yãend a soaba yaa Dĩma, dũni fãa Soaala.» Malɛk a ye yɩk n kolga maam, a saka bug-saalle maan-kugra zugu ne yɩʋʋgo, la a sɩɩsa m no-gãongã n yetẽ: «Bug-saala sẽn sɩɩs f noorã, f yel-wẽna yẽesa zãnga, f wẽnema peka zãnga.» La m wʋma Soaala sẽn soke: «Ãnda la m na n tʋme, ãnda n na n taas m koɛɛgã?» La m yeelame: «Ad-ma, tʋm-y maam!» La b yeelame: «Kẽnge la f tɩ togs neba: B rat bɩ b yoog b tʋba, b kõn wʋm fɩ, b rat bɩ b puk b nini, b kõn yãend fɩ. Pag nin-bãmba yam la b tʋba la b nini tɩ b legb zoeense la wʋmse la yam kɩdg rãmba, tɩ b zʋga da tedg ye, tɩ m pa rat b sãoogr ye.» Dẽ la m sok yã: «Na n talla woto n tãag wakat bʋgo, Soaala?» La b leok-m lame: «M na gũu tẽnsã sẽn wat n lebg vɩɩdo, tɩ ned ba a ye ka le kẽed-b ye, tɩ pʋʋg ba a ye pa le tar koaad ye.» Soaala na n tɩ kẽesa neb wʋsg al yɩɩga, woto vɩʋʋg na n yãenda wʋsg tẽnga pʋga. La tẽn-kãnga pʋgẽ, nin-yend sã n põse, neb piig sʋka, ad-y b na n wẽnega tɩ-tobendo, kʋk bɩ tɩ-wok tobendo. Ad-y b na n lebga rũms rɩɩbo. La bãng-y tɩ tɩɩga yagenga na n yɩɩ bõn-paall a to sɩngre. Da yaa a Akaz zamaanẽ. A Akaz ba la a Zotam, a Zotam ba la Zɩɩda dĩm a Oziyas. Dɩlla a Akaz zamaanẽ, dĩm dãmb a yiibu n sed ne taaba n na zab n deeg Zerizalɛɛm la b ka tõog ye. Dĩm a ye la a Resin, yẽ yaa Aram dĩma; la a waa ne Israyɛl dĩm a Peka, a Remaliya biiga. B wa n yeela a Akaz, a Daviid yagenga, yẽnda ne a poorẽ dãmba tɩ Aram dĩma kẽe Efrayim. La dĩma ne a neba sɩnga rigbu, wa sobgo sẽn kẽ kãoongo tɩ tɩɩsa vãad lengdẽ. Wẽnnaam yeela a Izayi: «Kẽnge, fo ne f biiga a Sear-Yasub, n tɩ seg rĩma. A bee zugẽ ko-baoora ko-sora sɛtmẽ. Yaa fu-pɛgdba pʋʋga sor zugu. Ad-f sẽn na n yeel-a: Gũus n da yɛɛs ye, da zoe rabeem ye, da bas raood ye. Da zoe Aramga a Resin, la a Remaliya biiga sũur sẽn puuga ye. Yaa ra-giis a yiib sẽn nukd bug-zõos bala. M miime tɩ Aramsa, ne a Peka la a Efrayim tãb-biisa baood n na n taka zabr ne foo. D wʋma b sẽn yeele: d bob zabre n kẽ Zɩɩda! D kẽes-a rabeem; d modg-a t'a wa naag tõndo, d kẽes-a a Tabeyɛl biiga soolmẽ. La ad Soaala-Wẽnd sẽn yete: Dẽ kõn saage, dẽ kõn tõog ye. Aram na-tẽnga yaa Damas, la a Resin yaa dĩm Damas pʋgẽ bala. — Ka ne yʋʋm pisoob la a nu tɩ Efrayim yell sɛɛme. A Efrayim na-tẽng yaa Samari, la a Remaliya biiga yaa dĩm Samari pʋgẽ bala. Y sã n pa teeg Soaala-Wẽnd bala yãmb me yell sɛɛme.» La Soaala-Wẽnd le yeelame tɩ b wilg a Akaz woto: «Kos f Soaala-Wẽnd tɩ b kõ-f makre, n wilg tɩ b be-la f poorẽ. F ratame tɩ makra yi tẽnga, togse; f ratame t'a yi sa-gãnẽ, togse.» A Akaz leokame: «M kõn saag n kos makre, m kõn saag n kʋɩɩb Soaala-Wẽnd ye.» T'a Izayi na n yeele: Kelg-y ka, Daviid doogo neba, pa sek tɩ y lak ninsaalb yam tɩ y rat n lak m Soaala-Wẽnd dẽnna? Yaa Soaala meng n na n kõ-y makre. Ade: Pa-kuli n dɩk pʋga n na n dog a biiga la a na pʋd-a-la a Emmanwɛl, Wẽnd bee ne-do. Biiga rɩɩb na n yɩɩ bĩisim la sɩɩdo, n tãag wakat ninga a sẽn wat n mi wẽng kisgu la neer baoobo. La ka ne rẽ, tɩ tẽns a yiibã fo sẽn digd b dĩm dãmba taoorã lebga we-raoogo. Sã n ya foo, sã n ya f buudã la f naama roogo, Soaala-Wẽnd na n sika a zugu yel-beedo wa b sẽn zɩ n yãend a taare, al Israyɛl ne Zɩɩda welgra tɛka. — Wã gom n yegda Asiri. Daar n wate, Soaala-Wẽnd na n peeba wɩɩga la neb sẽn ya wa zõose, n ka tõe n sõde, na n dʋʋga Ezipt kʋɩlgã n wa, la neb sẽn ya toos wa sĩ na n yi Asiri n wa. B fãa na n wa kẽe tãmsa londẽ la pĩisa bogdẽ, n kẽ tuuda fãa n kẽ bãadã fãa. Daar n wate, Soaala-Wẽnd na n dʋʋga Efrat kʋɩlga n peng barga n põng y zug zoobdo la kõbg fãa la toɛɛnga. Yaa dasem kãense la ned kam fãa na n gʋʋl nag-yãang a ye la bʋ-yãans bɩ pe-yãans a yiibu. Rũmsa sẽn tar bĩisim wʋsgo yĩnga, ned fãa na n tõog n dɩɩ bĩs-naare. Sẽn pa-b tẽnga fãa dɩɩbo na n yɩɩ bĩs-naare la sɩɩdo. Dasem kãense, pʋʋg sẽn sel bugsuntungu, bugsuntung tɩɩs na ta tusri, n da tõe n koos n paam ligd ka tɛka, pʋ-kãng na n piuuga ne kãgre la gõose. Tãbda rãmb na n wa tãoosa be. Tẽnga gill na n lebga gõos ne gõose. Tãmsa pend sẽn da ya pʋtã, ned ba a ye wãk kõn le kõrg be, sɩlg-nao-yẽes la gõosa yĩnga. B na n lebga niis la piis wãbnego zĩiga. Soaala kõ-m-la noor kãnga: «Dɩk bũmb sẽn ya gilga la sẽn bedme, dɩk f sẽn paam kut ninga n gʋls woto a zugu: A Wudg-n-deeg-f-pʋɩɩre, a Wudg-n-zɛ-f-zɛɛbo.» M wilga gʋlsma kaset dãmb a yiibu sẽn ya pʋ-peelem dãmba, maan-kʋʋd a Uriya, n paas a Yeberekiya biiga a Zakari. Mam sẽn yõk m pag nugu, bãngd poaka nugu, a tedgame. A waa n tol n doga biiga tɩ Soaala yeel-ma: «Pʋd a yʋʋra woto: Wudg-n-deeg-f-pʋɩɩre, Wudg-n-zɛ-f-zɛɛbo. Ad biiga sẽn wat n na n bãng a ba la a ma boolgo, tɩ Damas la Samari arzɛka fãa wʋk n tɩ sama Asʋr dĩma taoore.» La Soaala-Wẽnd le kõ-m-la koɛɛga: «Nin-bãmba sẽn ka pẽgd Siloe kooma koom sẽn zoet n ka maand bʋʋre, n long n n pẽgd a Resin, n long n pẽgd a Remaliya biigã, m na n kɩtame tɩ Efrat kʋɩlga fõde n wa rɩ yã; yaa kʋɩlg sẽn tar ko-wiiga la sẽn zulme, kʋɩlg sẽn ya Asiri dĩma la a pãnga makre. Efrat kʋɩlgã na wukame la a na n gãndga a koagsã, a na lima a Zɩɩda n tãag yubla n lɛɛg n daale, n yɛdg n saag zĩis fãa, n saag f soolma fãa wɛ, Emmanwɛl.» Bãng-y-yã, Adem biisi, y nong bɩ y sũ taaba ad-y yaa yɛɛsg la y na n yɛɛse. Tẽn-zãorgẽ dãmba, gũus-y! Y nong bɩ y yiis y zab-teedo, yɛɛsg bal la y na n sege. N-ye, y nong bɩ y yiis y zab-teedo, yɛɛsg bal la y na n sege! Y sẽn sed bũmb ning fãa, y kõn tõog n pids-a ye. Yẽs-y ne taaba wala y sẽn date, bũmb kõn maan a to. Tõnd sẽn teeg a soaba la a Emmanwɛl, a Wẽnd bee ne-do. Ade, Soaala-Wẽnd sẽn gãd maam b yeel-m lame tɩ m modge n da togs buuda manesma ye. Ad-b sẽn yeel-ma: Da togs-y nin-bãmba n boond tɩ sudum b sẽn zoet bũmb ning rabeem n boond tɩ sudum mengã. Gãd-y bala tɩ yaa dũni fãa Soaala n tõe n teem bũmb la yaa ne bãmb la y na n maan rabeem, yaa bãmb la d tog n yɛɛse. Soaala-Wẽnd na n teka bũmb a Israyɛl soolma a yiiba pʋgẽ. B na n yɩɩ kugri tɩ neb na n lakdẽ, b na yɩɩ pĩiga tɩ neb na n lakd n lʋɩtẽ. Wʋsg na n lak n lʋɩɩme la b na n kaoome. Yaa bẽdgo n na n gãneg Zerizalɛɛm dãmb yĩnga; a na n koomda wʋsg nao la b kõn tẽb n põs ye. M na n baoo zĩiga n gãneg m sẽn da rat n togsã; kʋɩlen-doogẽ la m na n pag n sẽn tog n wilgã; m karen-biisa bal la m pa na n solge. M gũuda Soaala-Wẽnde. La yaa wa b pa rat a Zakoob buuda gesg ye. M yaool n maaga m meng n ket n teeg bãmba. Maam ne kamb niyns Soaala sẽn kõ maama, tõnd lebga makre la bãnde Israyɛl yĩnga; dẽ yaa Wẽnd daabo, bãmb la dũni fãa Soaala. Bãmb n ti b zak Siõ tãnga zugu. B na n wa yeela yãmba tɩ y sogs kũum, tɩ kẽer tõe n walem-y-la beoog yelle. B yetame tɩ segdame tɩ buuda gom ne a wẽnd dãmba, tɩ segdame tɩ b gom ne kɩɩmsã, n yõk b sɛɛg sẽn vɩ-ba yĩnga. B sã n gom-y boto, bɩ y yeele: Yaa Soaala-Wẽnd sẽn wilga la d na n lɛɛg n tũ. Sẽn ka rata n tũ boto me, beoog kõn vẽeg-a ye. Tẽnga kẽedb zĩi ne pɛta, n zĩ ne pʋ-vɩʋʋgo. Koma namsd-b lame tɩ b tʋʋd dĩma la Wẽnde. B nakdame n ges yĩngri, n le wẽneg n sulg tẽnga, la b sẽn ne yaa pɛt bala, b sẽn ne yaa lik bala n paas sũ-weoogre la yʋng sẽn pid yʋngo. Yʋng a woto buud ka tar beoog n vẽegdẽ ye. Soaala-Wẽnd deng n basame tɩ yãnd dɩ Zabulõ la Neftali tẽn-peelem, la beoog raarã b na n le pids-a ne b ziiri mogra noorẽ dãmba, Zʋrdẽ yaang rãmba, la Galile rãmba, tẽns sẽn da lebg bu-zẽmba soolem. Buud ninga sẽn da kẽnda likẽ wã yãee vẽenem kãsenga: vẽenem n yik n yãgd sẽn vɩ-b lik tẽngẽ. Soaala, buuda sũ-noog paasa zembala, buuda kɩdeng lebga wʋsgo. Buuda langenda yãmb taoore wala koaad sẽn langd kooda rɩkr daare, wala te-zɛɛdem pʋɩɩb daare. Wala y sẽn maan pĩnda, y sẽn waa n dig Madianitsã n sẽege, y le maanda boto rũnna. Y sika zɩɩb ning sẽn da zɩlg a bãgdo wa raoog sẽn palg nag-koods yubla, y kaoo gʋlg ning tʋʋma gɛta sẽn da yulumd a nugẽ. Zabr sɛɛme tɩ neooda la fut sẽn mad zɩɩm na n los bugmẽ tɩ b rɩ zãnga. Biig n doge, bi-ribl la b kõ-do, dũni wã soolem la b zɩlg a bãgdo, a yʋʋr la woto: a Mi-saglgo, Pãng soaba Wẽnde, Zamaan sẽn wat beoog Ba, Laafi-Dĩma. A soolem na n yɩɩ kãsenga, a naama na n yɩɩ laafi tõt sɛɛb naam, a Daviid naama zaoor la a rẽnna, a Daviid soolma n na n yɩ a soolem. A na n vigla a naam, la a na n paasa a naama pãnga, la naama na n tũu zemsg sore. Na n yɩɩ woto dũnna la wakat fãa, la yaa Wẽnd sẽn ka mi yaamse, Soaala sẽn ka yɛɛd ne ninsaal pʋgbã, yaa bãmb n yals rẽnna. Soaala-Wẽnd kãaba a Zakoob beedo, sẽn pa sakd kelgre la b togs a Israyɛl. Beeda pʋgda a Efrayim a pʋgda Samari rãmba tɩ b neẽ. B yikame n yeele ne wʋglem la tɩtaam: Tan-koɛɛm sẽn wʋm bugmẽ roto la b tus n lubi, la d na maneg n pees kug n lebs n me. Rota bɛɛnd ra paga ne ra-pegd pãng sẽn zemse, d na bɛ marsã ne kʋgs ra-pegdo. Ad-y Soaala kɩtame tɩ b bɛɛba kaoog zabr ne-ba, b kɩtame t'a Resin kaoog zabr ne-ba. Sɩnga yaanga ne Aramsã tɩ Filisti rãmb pʋgda. B sɛɛ Israyɛl zãnga. Soaala sũur ket n na n pa maag ye, b nug ket n zẽkame n na n wẽ. Ne rẽ fãa a Israyɛl pa lɛɛg n wa a poorẽ, a ka kẽ dũni fãa Soaal sẽn sɩbgd yẽnda wã ye. Dẽ la Soaala-Wẽnd fiuug zugu la b kʋʋg zʋʋre, n yãk vãoog la willi, daar a ye. Zuga yaa nin-kẽemba la taoor dãmba, zirẽ-be-bãngdba la zʋʋrã. Sẽn da tog n wilg-b sorã kẽe moogo, bãmb n deng menengo. Yaa rẽ yĩnga, la Soaala-Wẽnd ka na n bas kom-bɩɩbã. B pa na n zoe kɩɩb-bi nimbãanega, b ka na n zoe pʋg-kõap nimbãaneg ye. Buuda yaa zãmb la nin-wẽns buudu, b goama fãa yaa gãeen-goama. Dẽ la Soaala sũur ket n pa maage, b nug ket n zẽkame n na n wẽ. Sɩda wẽnem dɩta wa bugum; a na n sɩnga kãgre la gõose, n wa tat tʋga gilli, tɩ bug-zõos na n tão yĩngri, n tão wala sɩlmande. Dũni Soaala-Wẽnd sũ-puura bugum n dɩt tẽnga ne a nebã. Ned ka le rat a to ne yõor ye. F sã n paam f yaka yaa rɩɩb bala, fo wẽnegda rɩtgo n wãag tɩ kom ket n tar-fo, tɩ f yĩig goabga, n ket n pa tɩgd ye, ned kam lɛɛg n dɩta a menga. A Manase zɛɛda a Efrayim, a Efrayim zɛɛda a Manase, t'a Manase ne a Efrayim naag taaba n digd a Zɩɩda. La Soaala sũur ket n pa maag ye, b nug ket n zẽkame n na n wẽ. Neb niyns sẽn kõt-b noya sẽn pa segde la sẽn gʋlsd-b sɛb sẽn pa sɛba, yell be-la b rãmb zugu. Bãmb n mumd naong rãmb noore tɩ b pa tõe n wilg b sẽn dat ye, bãmb n kɩt tɩ buuda naong rãmb dɩt bõne. Bãmb n fãad pʋg-kõapa la b zɛɛd kɩɩb-bi. La y na n maana bõe n põse, Soaala sɩbgr la tẽn-kũuma raarã? Y na n zoe n kẽnga yɛɛnẽ n paam n tɩlge? La ãnda meng la y na gũnug y paoongã? Paka y sulg n deeg y yembd wĩiri, keta y naag sẽn ki-bã n looge. Soaala sũ-puur ket n pʋgda y fãa gilli, b nug ket n zẽkame n na n wẽ. Yell be la f zugu, Asʋr, foom la m sũ-puura zãande la a guugu. Maam n tʋm Asiri, nin-wẽnsa sʋka, Maam n kõ-a noore t'a zab ne sẽn da yikd-b mam sũurã, n kõ-a noore t'a fã la a zɛ b laoga gilli, la a fẽd b mensã wa sor zug begdo. Mik pa wa Asiri yamẽ tɩ maam n tʋm-a ye; a tagsga yaa toore, a baoodame n na n sãam la a menes buud a taaba wala a sẽn tõe tɛka. A waa n yeta a meng woto: «M tãnsoaben-dãmb sẽn tar naam ninga ka yɩɩd dĩm dãmba rẽn sɩda? M ka maana ne Kalno tẽnga wala m sẽn maan ne Karkemis bɩ bõe? Yaa Amat la m pa sɩbge wa m sẽn sɩbg a Arpad bɩ bõe? La m pa sɩbga Samari wa m sẽn sɩbg Damas bɩ bõe? M nug wãa rĩundu, sẽn da waoogd wẽn-naandse, - b wẽn-naandsa togsenda sõor da yɩɩda Zerizalɛɛm la Samari rẽnda, - bõe tɩ m pa na n maan ne Zerizalɛɛm wẽn-naandsã wala m sẽn maan ne Samari rẽnna. M ka tõeeme bɩ bõe?» Soaala sã n wa sɛ b tʋʋma Siõ tãnga zug la Zerizalɛɛm, b na sɩbga a Asʋr, t'a sũur pida ne zẽk-m-menga, la a pa get wa ned toga ne waoogr ye. Bãng-y t'a yetame: M nug n tʋm a pãng tʋʋma, m yam n tʋm a yam tʋʋma. M sɩlma yɩɩda m taab rẽnna. M vigsa nanams toose n loog neb arzɛka, la wala gãndaoogo, m sik-b-la b naama goeels zugu. M nug wʋka tẽnsã arzɛgse wala gɛl sẽn be tʋkẽ; m wʋk-b-la naana-naana, la pɩgs pa laal m zugu, noor pa yaag n kelem ye. La Soaala-Wẽnd n sokde: Ned na zẽk lare n na n pees bũmbu, tɩ lara lɛɛg n wukd a menga? Ned na kɩ a sʋʋg yẽna n na n wãag bũmbu t'a tãoosd daood wala a wãada a toore? Yaa wala dasaarã n yuumd sẽn yuumda yẽ wã, bɩ kukurã n zẽkd sẽn zẽka yẽ wã. Dẽ n so tɩ bũmb fãa Wẽndã, dũni fãa Soaala na n kɩt tɩ sẽn tar-b arzɛka fãa Asiri tẽng na n lebga naong rãmba. B sẽn pɩnd ne neerem ninga na n yɩɩ bugum dɩɩbo. Soaala-Wẽnde, a Israyɛl vẽenema, na n lebga bugum; a Israyɛl Soaala na n lebga bug-witem n dɩ tʋga la gõosa daar a yembre bala. Kãoonga maasem, zẽeda bʋgsem, neba fãa sẽn pẽgdã, rẽ fãa na n sɛɛ zãnga; yita wa bãada, kũum sẽn loogd ne. Tɩɩs niyns sẽn na n põs-ba b sõor na yɩɩ bilfu, põadg meng tõe n sõd-b lame. Badaar tɛka a Israyɛl la a Zakoob zakẽ dãmba sẽn paam-ba n põsã, b yam na n laka ne Asiri sẽn da zãad-b toogã. Yaa Soaala-Wẽnde, a Israyɛl Nin-sõngã nengẽ la b na n bao sõngre. Bilfra sẽn põs a Zakoob zakẽ wã na n lɛɛg n kẽe Pãng soaba Wẽnde. Ade, Israyɛl, ba fo kamba sõor da taẽ bĩisri sẽn sam mogr noore, yaa bilfr bala n na n lɛɛg n wa kẽ Soaala-Wẽnde. Buuda wãab yals n sɛɛme. Sẽn tog la sẽn zems la d na n maane. Bũmb fãa Soaala-Wẽnda na n waa ne sãoong ning b sẽn kãabe. Ne rẽ fãa, Soaala-Wẽndã, dũni fãa Soaalã gomda woto: «M buuda sẽn kẽed Siõ, da zoe a Asʋr sẽn pãbd-f ne guugu la zãande, wala f sẽn yãend Ezipt tẽnga ye. Kõn le kaoos tɩ m sũura maag ye. La yaa ne bãmb marsã la m na n pa, n kʋ-b zãnga.» Wẽnd na n pãba Asiri rãmba ne kaase wala b sẽn maan ne a Madiã, Orɛb tãnga zugu, b na n zẽka b dasaare n va sẽn be-b mogra sẽnẽ, wala b sẽn maan ne Ezipt. Badaar tɛka, f bãgd na tɩlg ne zɩɩbo, f zug na vʋʋs ne tʋkre. Raoog ning sẽn palgd nag-koodsa yublã na n yãkame n lob yɩɩg-yɩɩga. Bɛ wã rʋʋda Samari a tata Ayat, n pɩʋʋgd Migrõ, n wat Mikmas n bĩngd a teeda be. Bɛ wã wẽdga so-sẽka n ta Geva, n yeele: «D gãand ka. Rama rãmb gãeeme n digda, tɩ Gibea rãmb ning tĩiga, t'a Sol tẽng rãmb sɩng zoeese. Kelem-y-yã, Bat-Galim dãmba, wẽ-y no-bɩnga. Layisa rãmba modg-y ne kelgre, Anatot rãmba, sak-y boole!» Madmena rãmb zoetame, tɩ Gebim dãmb baood zĩig n soondẽ. Baraar bala, bɛ wã taa Nob n yals be, n zẽk a nug gilgu n na n yeel Siõ, la a yeel Zerizalɛɛm tɩ b maan gũusgu. Mik bũmb fãa Soaala, dũni fãa Naanda na n tusa tɩɩsa wil n lub ne pãnga; tɩ-wogda fãa rʋʋgame, b fãa rʋʋgame. Googa tɩɩse, lar n lub-b fãa gilli. Libã kʋgsa ne b rasãndlma dʋra tẽnga. A Zese tɩɩga na n tãoo will polle, tɩ-polle n na n tãoo a yẽgnẽ n yi. Soaala-Wẽnd na n kõ-a-la b meng Vʋʋsem sɩlem la yɛl-welgr yam, saglgo la sũ-keglem yam, bãngre la Wẽnd nif zoees yam. Sɩda b na n wilg-a lame t'a zoe Soaala-Wẽnd nifu. A ka na n tũ a nif sẽn yãend ye, a ka na n tũ a tʋbr sẽn wʋme n kao bʋʋd ye. M ba-ka-neng rãmb bʋʋd tũuda tɩrga, tẽnga naong-rãmb paamdame tɩ b bʋʋd tũud sɩda. A gomd lebga daasare t'a tar n pãbd nin-yoodo, a noor pemsem kʋʋd-b lame, Zemsgo la a bob n kẽnda, a sɛɛg sẽbdg yaa pʋ-peelem. Digd-n-yĩidga ne pe-bila na n vɩɩnda ne taaba, tɩ ãbg gãe n yeg bulla. Nag-bila la bõnyẽ-bila na n wãba bãoog a ye la yaa bi-bilfu n kɩɩmd-ba. Nag-yãanga la katre rɩɩb na n yɩ-la a ye tɩ b kamb sõsd maasem yɛnga. Bõnyẽeg na n wãba yamdo wala naafo. Yãag reemda ruruug bok noore, a na n dɩka a nugu n ning boosr bokẽ. Wẽng buud ka le tʋmde, sãoong buud ka le sãamd Soaala tãn-sõnga zug ye; tẽnga pida zãng marsã ne Wẽnd bãngre wa mogr sẽn pid ne koom. Wakat n wate t'a Zese yagenga na n lebg wa tãb-kaoore ninsaalb fãa yĩnga la a na n pida ne ziiri. Wakat n wate tɩ Soaala na le zẽk b nugu n fãag b buuda sẽn kellã, sẽn kees-b Asiri la Ezipt, sẽn be-b Patros, Kus, Elam, Sinear, Amat la mogra tẽnsʋk tẽnsã. Tãb-kaoor n na n zẽk neba fãa yĩnga tɩ Israyɛl pa-weta fãa na n yi ween-vɩɩs a naasã n lɛɛg n wa tigim Zɩɩda. A Efrayim Zab-taasma la a zoe-bõna na n sɛɛme, a Zɩɩda bɛɛba na n menesa zãnga, a kõn le zab ne a Efrayim ye. B na n naaga taaba n kaoog zabre ne nin-taoor dãmba, ne Filisti rãmba; b na n naaga taaba n tɩ zɛ yaang rãmbã. B kams na n tẽega a Edom la Moab zugu la Amon kambã n na n lebg b soolma neba. Wẽnd na n kʋɩɩsa Rudum mogre. B na n tẽega b nugu Efrat kʋɩlga zugu, b na fʋʋsa a kooma ne b noor pemsem la a na weela nao a yopoe, la b na n dʋʋg-a lame tɩ neooda pa woob ye. Woto, buuda sẽn kellã, sẽn da paa a Asʋr nugẽ, na n tũu sore sẽn ya naana wala Israyɛl sẽn paam sor ninga a sẽn waa n yit Ezipt tẽnga. Badaare a Israyɛl na n yeelame: «Soaala-Wẽnde m pẽgd yã, yãmb da puuga y sũur ne maam la y sigsa y sũuri n wa belgd maam. Ade, Soaala n yaa m Fãagda, m basa m meng bãmb nugẽ la dabeem ka le tar-m ye; Soaala n kõ-m pãnga tɩ m yɩɩnd-ba. Yaa bãmb n wa ne m fãagre. Soaala la y Fãagr kʋɩlga, kẽng-y ne kɩdengo n tɩ toog koom.» Badaare y na n yeelame: «Pẽg-y Soaala, kils-y b yʋʋre, moon-y b tʋʋm bãna nin-vɩɩs sʋka, moon-y tɩ b yʋʋr yaa sõngo. Kils-y Soaala-Wẽnd tɩ b maana bõn-bãna. Tãs-y tɩ tẽng zug rãmb fãa wʋme. Siõ kamba, kaas-y sũ-noogo la kɩdem-y! A Israyɛl Nin-sõnga paam pẽgr f tẽn-peelmẽ!» Ad-a Amos biiga a Izayi sẽn wʋm Naaba-Wẽnd nengẽ, ad Wẽnd koɛɛg ne Babilon. Dʋ-y tãng sẽn ka tar tɩɩse n yagl tãb-kaoore, wẽ-y no-bɩnga, zẽk-y y nugu n kams tãb-biisã tɩ b wa na-komsa noorẽ. Maam, Naaba-Wẽnd, n boond m tãb-biisi tãb-biis niyns m sẽn welg toorã, tãb-biis niyns m sẽn mi b rãmb tiirã gãndaad sẽn pid ne mam ziira kilsg sũ-noogã, m boond-b lame tɩ b wa zab n sõng-ma. Kelg-y tɩ bʋʋre n maand tãnga zugu la yaa neb ka tɛk sẽn lood bʋʋre. Kelg-y dĩm dãmb sẽn sũ taab bʋʋre. Ad-y yaa dũni fãa Soaala-Wẽnd n segend zabre n tongd b tãb-biisa sẽn na n tak zabrã. B yita tẽn-zãorgẽ, al saaga satmẽ. Yaa Soaala n puug b sũuri n wat ne b zab-teedo n na wã tẽnga zãnga. Wiis-y, kelem-y kʋʋre tɩ Soaala-Wẽnd daar kolgame! Yaa Soaala n wat n na n wã b wãabo. Yaa rẽ la nug kaẽ n na maan daoodo, tɩ sũur kaẽ n na n yals ye. B fãa gill tara yɛɛsgo, baag-po-rũng gesa b gĩina n sẽbe, toog lebsda b yĩnga goabg la rɩtgo; pag sẽn kũmd rogem bas n vʋʋse. B yiiga b nina n get taaba, rabeema teema b yĩn-gãongã. Soaala daara waa n sɛɛme. Yaa sũ-puuri daare, ka-sugri daare, tɩ tẽnga na n lebg rasempʋɩ-kãsenga, tɩ yel-wẽn-maandba fãa na n sɛ baraare. B kõn le yãend yĩngri ãdsã ne b tikim-tikma ye; b kõn le yãend b vẽenema ye. Wĩndga na n puka sablgo, la kiuug kõn le yãg a yãgb ye. Soaala-Wẽnd gomda woto: «M na n sɩbga dũni wã, a wẽnema yĩnga, n sɩbg, nin-wẽnsã b bi-beelma yĩnga; m na sika na-toosã wilg-m-menga la b tɩtaama. Sãnem yãeeb sẽn ya toog ningã, ninsaalba yãeeb na n yɩɩ toog n yɩɩge. B yãeeb na n yɩɩ toogo n yɩɩg Ofir sãnem. Ade, m na n miima saagã tɩ tẽnga na n deeg n dĩmi, dũni fãa Wẽnd sũ-puurã raare, dũni fãa Wẽnd sũ-fõora raare. Ninsaalba na n wẽnega yãk sẽn yɛɛse, n wẽneg wala piis sẽn ka tar gũuda, ned kam fãa na n bao a buud zĩiga, ned kam fãa na n zoe n dɩk a ba yir sore. Sẽn basa tɩ b yõk-a, b kodgda a soaba. Sẽn basa tɩ b paam-a, sʋʋg n lubd-a. B na kooda b yagense b nifẽ, n zɛ b roog teedo, n sãam b pagba. M na n tusa Mɛd dãmb tɩ b yik zabr ne-ba, la Mɛd toog ka be ne wanzurfu la a ka ges sãnem wa bũmb ye. B pɛɛma na n kõsa kom-dibli wã, b na taba kom-pugli wã n bedse. B ka zoet pag biig nimbãaneg ye, b nin kõn kals tɩ bi-bilf n tar toog ye. Wẽnd na n kɩtame tɩ Babilon, Kalde dãmb na-tẽnga, b tẽn-neere la b faong menga, lebg raboog wala Sodom la Gomor, Soaala-Wẽnd sẽn tus pĩnd n lubi. A kõn le paam tɩ ned le wa ti a yir be n tãag dũni wã yikri. Arab kõn pɩʋʋg be, la rũm-kɩɩm kõn bas a niis tɩ b gãand be. Na n lebga we-rũms gãaga, rota na n pida ne viuug luiili, na-neend meng na n waa be, wãams na n saoo be. Kata na n kõo taab sɛk tẽnga do-neeba pʋga, we-baas me boto. Tẽnga wãab daar kolgame, Babilon lʋɩɩs ka na n le tadg ye.» Ade, Soaala na n wilgame tɩ b nonga a Zakoob yagensã. B na n wilgame tɩ bãmb n yãk a Israyɛl. B na n le kẽesa b nebã b saam-dãmb tẽngẽ. Sãamba na n wa naaga ne bãmba, b na n fãooga ne a Zakoob buudu. Yaa bu-zẽmbã n na n sõng a Israyɛl t'a leb a tẽngẽ. La zĩig ning Soaala-Wẽnd sẽn yãk tɩ yaa b soolma, a Israyɛl na zã bu-zẽmb kãense wala yem-daado la yem-pogse. A pĩnd soaalba la a na n sooge, sẽn da paga yẽ roogã la a na n lɛɛg n pag roogo. Ade, Israyɛl, Soaala-Wẽnd sã n le wa kõ-f laafi f pɛta la f nimbãanega poore, f yembda sẽn yɩ tooga poore, fo na n pʋda yɩɩn-kãnga n la n kaas Babilon dĩma. Ges-y yel-bãnde! Dĩm toaaga wẽneg n baasa woto, sẽn da tara nebã n wẽoogdẽ wã baasa woto? Soaala-Wẽnd kaooga nin-wẽng dasaare. B tõra dĩm toaaga naam dasaare. Sɩda, rasaar n da pãbd buud a taabã dasaar sẽn ya zɩsgo la sẽn da pãbd n yɩlemnẽ. Babilon dĩma, foo n da wõrda, foo n da pãbd dĩmd dãmb a taab n ka tol n mi yaamsa bɩ? Marsã dũni wã gill yaa n vʋʋsdame, laafi yaa n waame, la neba kaasda b sũ-noog kaasgo. Tɩɩsa mens tara sũ-noogo. Wakat n zĩndi tɩ bãmb me ra tar toogo. Tɩ-bɛda naaga ne Libã kʋgsã n tãsdẽ: «Ad-b sẽn maan fo kʋʋr tɛka, b ka le wat n kɛɛd tõnd ye!» Bʋg-tẽng me yika ne foo, rĩm toaagã. Ad-a sẽn wʋm f waoongã a neka a kɩɩmsa fãa, a neka sẽn yɩ-b rĩm bɛda, sẽn yɩ-b dũni wã soaalba, fãa yikame n yɛsẽ. B fãa na n naaga taab n moone: «Õõ! Fo me pãnga sɛɛme, fo me yaa wa tõnd bala!» F naama busa tẽngr-tẽngre n naag ne f ruudsa rãamde. F gãaga yolgo yaa karen-tʋko, zũnzũi la f fu-goabga. Fo maana wãna n fare n lʋɩ, ka fo taoore la dũni wã ninsaalb da sur laa, tõd-beoog ãdga, puk tɩ zĩig yẽeg soaba? Ad-f sẽn gãe tẽnga, foom, sẽn da lubda dũni nanamse! Ka foom n da yet f sũurẽ: «M na dʋʋ yĩngri n zʋʋg Wẽnd ãdse, m na n tɩ zaoonda tãnga wẽnd dãmba ne b kug-zĩidba tãnga, tãng sẽn lug nug goabg, yɩɩg yɩɩga. M na n dʋʋ sawad-sabla zugu, maam ne yĩngri Soaala na n zenga taaba.» Maana a wãn marsã tɩ f sigi n sig bʋg-tẽnga, bog-zulung pʋgã? Be rãmba sẽn ne foom tɩ f watã kolgame n get-fo n ka kamsdẽ la b yetẽ: «Yaa rao-kanga n da rĩmsd tẽnga bɩ? Yẽ n da sikd dĩm dãmba b zaoorẽ wã bɩ? Yaa yẽ n da tekd tẽnsa neng tɩ lebgd we-raada bi? N wãad rotã la a zãgsdẽ t'a kõn yiis a sẽn sui b rãmb rooga bɩ?» N-ye! Dĩm dãmb a taaba paama b vʋʋsg zĩiga, b yaoogẽ, Foom bala la b lob yɩnga, n ka paam yaoogo n kõ-fo, tɩ f rɩg wa pa-tare, wala bũmb sẽn ya waoosa, wala kũum b sẽn tabe. Neb sẽn ki la b rɩk n zam foom, bãmb fãa na n wa gãnega yaoogẽ, foom bala n ka na n yãag-ba, b yaada zĩigẽ, tɩ f wã-la f tẽnga, f raaga f soolma rãmb zɩɩm. Abada, b kõn le pʋd f buuda yʋ-yooga ye. Bɩ b segl kamba kʋʋbo, b kʋ-b n dolb b ba rãmb tʋʋm wẽna, tɩ b me ra wa yik n le baood n na n soog dũni wã la b le me tẽns ye. Dũni fãa Soaala le paasame: «M na yika zabre, la m na n menesa Babilon yʋʋre, fãa na n sɛɛme, a kõn le paam biiga tɩ b pa gomd yageng ye. Babilon na n lebga bãoogo la raond na-tẽnga. M na pɩɩsa Babilon ne saaga, ne saag sẽn menesd sagd zãnga.» Dũni fãa Soaala kãaba woto: «M sẽn sed bũmb ninga, n na n yalse, m sẽn yalsã n na n pidsi. M na n luba Asiri m tẽngẽ, m na n tab-a-la m tãmsa zutu. A ra kẽesa m nebã a yembdẽ, m na rig-a n menese; zɩɩb bɛd la a ra zɩlg m kamba, m na tus zɩɩb kãng n lubi.» Woto la Soaala yals dũni wã fãa yĩnga, woto me la b yet ãndũni rãmba tɩ b maan gũusgu. Dũni fãa Soaala sã n yals bũmbu, ãnda n tõe tɩ pa pidsi? B nug sã n zẽk n na n wẽ, ãnna n tõe tɩ wẽed ka wẽ? Dĩma Akaz sẽn ki yʋʋmd ningã la Soaala yiis koe-kãnga. Yãmb fãa, Filisti rãmba, ad-y dasaar ning sẽn da tar n pãbd yãmba, dasaar kãng sã n kaooge, bɩ y ra yãg n kɩdem ye. Bãng tɩ b sã n kʋʋg wag-maasre a tobda põeere, la põeera na n lebga wag-bãnde sẽn yɩgd n kɛɛdẽ. Ad-y naong rãmba na n paama dɩɩb zĩiga, sẽn tar-b pɛta na n paama vʋʋsem la laafi. Sã n ya foo, Filisti, ad-f bɛ wã na n waa ne kom n sɛɛs f buuda zãnga, a na n kooda koma sẽn na n kees b rãmbã. Yãmb fãa, tẽns sẽn tõe n zab n fãag y mense, naag-y taab n kelem Filisti kʋʋre, Filisti rãmb gĩin maagame tɩ b zĩ ne yɩɩre, tɩ b nee bug-zõos sẽn nukd nug goabga sẽnẽ. B nee tãb-biisa sẽn sũ taab gilli n watẽ. Bõe la b na n leok Filisti rãmba? Leok-y-ba tɩ Soaala-Wẽnd mee Siõ; la nimbãan-dãmba na n zĩnda a pʋgẽ ne laafi. Soaala-Wẽnd koɛɛg ne a Moab. Yʋng ning b sẽn tõog-a wã ad-y Ar-Moab rãmb lebga sɩɩ. Ad-y yʋng ning b sẽn tõog-a wã, Kir-Moab me lebga sɩɩ. Dibõ neba kẽnga Wẽnd waoogra zĩ-sõngẽ n na n tɩ yãbe. Nebo tãnga zug la Mɛdeba, a Moab kelma kʋʋre. Zug fãa põngame, toɛɛng fãa wõrsame. Neb sẽn yer sũ-pa-noang fuug la b ne tẽnsa pʋgẽ, la bɛɛnda zutu la raasẽ wã yaa kaasg bala la b wʋmda. Sẽn lebẽ fãa yaa nintãm. Esbõ ne Eleale rãmb kotame tɩ b wa sõng-ba. Yãbra rãamd sãag n ta Yaas. Yaa rẽ la a Moab tar kaasgo, a pɛleng yɩkame, t'a yam bonnege. M boondame tɩ b wa sõng a Moab. A neba zoe n digda Soar, la Eglat-Selisiya. B rʋʋda Luyit ne nintãm, Oronayim sor zugu b wiisdame. Nimrim, koom zĩiga, lebga tẽn-koɛɛnga, tɩɩsa kʋɩɩme, mooda wãkame, mo-maas yãeeb lebga toogo, vã-maas ka le ket ye. B sẽn da ket n tõe n sõng b mens ne bũmb ningã neba tall-a lame n kẽng taoore, b tall-a lame n dʋʋg tɩ-wogda kʋɩlga. A Moab kɛlenga gilga tẽnga fãa n sege. A kɛlenga taa Eglayim, n ta Elim bulga. Divõ kʋɩlga na n mooga ne zɩɩm. La Soaala-Wẽnd le paasame: «Sɩbgr n nan ket n wate: sẽn paam-ba n zoe n põse, a Moab kamba sʋka sẽn ka paam-b n zoe n põse, tẽnga pʋgẽ fãa na n yɩɩ bõnyẽeg dɩɩbo.» Moabitsa yeelame tɩ b zĩnd Sela, al zĩ-peen-daagẽ wã, n tool dĩma pe-bila, dĩm ning sẽn dɩta naam Siõ bi-pugla tãnga zugu. Yaa Arno kʋɩlga sẽn tõe n dʋʋg zĩig ningã la Moab pagba ra tigim taaba. B da yaa wa luiili b sẽn yɩk b tʋgdẽ, tɩ b sẽeg yaare. Moabitsa ra kota Zerizalɛɛm woto: «D bõsda y saglgo, leok bũmb tɩ d kelge. Yɛdg f pãnga wa maasem n gũ tõnd wĩntoogo, la wala yʋngo tẽeg f likã n pil sẽn zoe-b n wa kẽ ka wã, da luk sẽn zoet-ba bãong ye. Kõ sẽn waa n soond-b ka wã sore, tɩ b kell n pa f tẽngẽ. Sõng-b tɩ b põs sẽn data n kʋ-bã. La ned sã n wa ka le wẽoogd a to, pãn-tõoga sã n wa sɛ fãada sã n wa looge n bas tẽngã, wakat kãnga, f nonglma yĩnga, naam zaoor la b na n le maneg n vigl zaoor sẽn tar pãnga, sẽn na n kaoos, a Daviid sɩmannẽ, a Daviid yagenga yĩnga. A na n yɩɩ bʋ-kaooda la bũmba fãa na n tũu sɩd la zemsgo.» D mi-la a Moab wilg-m-mengã, a wilg-m-menga yaa wʋsgo. A tɩtaama la a wʋglma waooga, a pa gomd wa bũmb n be t'a pa tõe n maan ye. Moab rãmb zĩime n tar waasgo. B fãa yɩɩnda b yɩɩlle, n tẽegd Kir-Erɛs rɩ-noodã sẽn da maan ne bugsuntung biisi. B sũur da zabda wʋsgo tɩ b wiisdẽ. Ges-y yel-beedo! Esbõ pʋta sãamdame, pʋt sẽn da zao wa b lolomda tãnga. Sibma bugsuntunda kʋɩtame, bãmb rã-toosa n yaool n da lubd dũni wã soaalba. B ra yɛdgame n ta Yazɛr n tol n kõs weoogã n wa menem be, n tol n tão yagense n wa tãag Yamsem mogre. Yaa rẽnna la m naag Yazɛr rãmba n yãbd Sibma bugsuntundu. M yãbd-y lame, Esbõ ne Eleale, tɩ m pa le wʋmd sũ-noog kaasgo, y bugsuntunda tõsb raar ye. Sũ-noogo la kɩdengo buud fãa sɛɛ y bugsuntunda pʋtẽ. Rʋgd ka le tar rãam ye, sẽn wẽkd-b siba biis ka le tar tʋʋmd ye, b ka le kelemd n deesd taab ye. Yaa rẽ me yĩnga la m yɩɩn n kũmd a Moab wala ruudg sẽn kũmdi, m kũmda a Kir-Erɛs m sũurẽ. B na n le yãenda a Moab t'a le yẽrd n pʋgd a wẽn-naandsã, t'a le babsd-b tãmsa zutu, n yõkd b sɛɛga, la fɩ ka na n tek ye. Woto n yɩ koɛɛg ninga Soaala-Wẽnd sẽn yiis a Moab poorẽ al daar zãra. Ad-b sẽn yet dũnna: «Ka ne yʋʋm a tã muka, Moab ne a nin-tɩɩsã, ne a zãma wã, na n paama yãnde: sẽn na n kellã na yɩɩ bõn-mɛdga, bũmb sẽn ka sek sõadg ye.» Ad Naaba-Wẽnd koɛɛg ne Damas: Yɩ bilfu Damas kõn le sõd tẽn-bɛda sʋk ye, a na n lebga raboogo. Tẽns niyns sẽn gũbg yẽ wã, ned kõn le kẽ bãmb me abada. B na n lebga rũms wãbneg zĩiga. Be la b na n vʋʋse la ned kõn dig-b ye. A Efrayim lal-gũbrã na n lʋɩɩme. Damas naam na n sɛɛme. Aram kamb sẽn na n keese pa na n yɩɩg Israyɛl kamb ye. Yaa woto la dũni fãa Soaala gom yã. Daar n wate t'a Israyɛl na n faage, a pʋʋra na n woogame. Na n yɩɩ wala tigsg wakato tɩ b wʋrd alkam, la b rɩgsd kalse; na n yɩɩ wa tigsgu Refayitsa bãg-faagẽ, sẽn kees yaa yiisgu rẽnna; na n yɩɩ wa oliv yagsgo: yiib bɩ tãab sẽn pa yĩngr-yĩngri; naas bɩ nu sẽn pa will poala zugu. Woto yaa Soaala-Wẽnde, a Israyɛl Wẽndã koɛɛga. Badaare ninsaal na n gesa a Naanda, a na gesa a Israyɛl Nin-sõngã. A kõn le ges maan-kuga sẽn yaa a nus tʋʋmde, a kõn le yãend a nus-bi piiga sẽn dõoge bɩ sẽn peese, wala a sẽn ka na n le ges raadã a sẽn peesã, la a wisda laase. Badaare, soond-n-põs kũuma tẽnse na n lebga vɩɩdo, fãa na n lebga raboodo wala Amoritsa la Ivitsa tẽns sẽn lebg to-to, a Israyɛl kamba taoore. Na n yɩɩ we-raoogo. Ade, Israyɛl, fo yĩma Soaala-Wẽnde, Wẽnd ninga sẽn fãaga fooma. Fo yĩma f pĩ-kɛgengã la lillã. Dẽ la f send tɩɩse n na n waoog f wẽnde la f bʋt f bʋdbo tẽn-zẽng wẽn-naands yĩnga. Fo sẽn bʋd-b daare la b wẽnegd n yi, la vẽkembeoogo b zoe n yaa puudu. F yaool n kõn dɩ f sẽn bʋda yõodo tɩ yel-beed sõor n puki, bũmb ka be sẽn na n tõog n tigsi la rẽ ka be tɩɩm ye. Ade, neb ka tɛk bʋʋr n sãte, bu-zẽmba bʋʋr n sãt wa mogr sũur sẽn puug bʋʋre, bu-zẽmba bʋʋre, mogr sũur sẽn yik bʋʋre. Ade, neb ka tɛk bʋʋr n sãte, bu-zẽmba bʋʋr n sãt wa ko-kẽenga rẽnna. Mik Soaala-Wẽnd na n mooga b nifu, tɩ b kʋɩ tĩiga, n zãage, tɩ b yɩk wala sobgo sẽn dɩkd ka-fɩɩba sẽn yɛdg tãng zugu, tɩ b yɩk wala sɩlmand sẽn loogd ne bõn-faoogo. Sẽn da yɛɛsd-b neb zaabrã, vẽega beoogo n kaẽ ye, sẽn zɛɛd-b tõndã yell na n yɩɩ woto, sẽn fãad-b tõndã yell baasda yoogo. Yel-beed ne-fo, tẽng sẽn pid ne rũmsi, tẽng sẽn me Nubi kʋɩlsa noore! Yaa foo n tʋm f neba ne koom-kogend faase, koom-kogend sẽn wʋg ne rudma. Bɩ y fãa zoe tao-tao n leb y nin-wogd tẽngẽ, neb sẽn kõogd b yɛɛm tẽngẽ, tẽng sẽn kẽesd a yags rabeem. Leb-y-yã, gãndaad sẽn tabd b bɛɛba. Leb-y y kʋɩl-fõtsa tẽngẽ! Yãmb fãa, dũni ninsaalba, tẽng zug nin-vɩɩsa fãa, ges-y tãnga zugu, tãb-kaoora sã n wa laannẽ, yoog-y y tʋb n kelge, baorga sã n wa peebd n zẽesdẽ. Ad-y Soaala-Wẽnd goma ne m woto: «M zao m doogẽ wã n get sɩɩ yɛla sẽn maandã. M zĩi sɩɩ tɩ b pa ne-ma, wala wĩntoog tʋʋlgo, wala sawadg sẽn dʋʋgd a meenem ka-kɛɛr wakato.» La bãng-y tɩ tigsga wakato, bugsuntunga sẽn wat n ning a puudã n sɛ, a sẽn wat n sɩng n na n yod a biisã, tɩ biisa me sɩng moogre, b rɩkda sʋ-yaleng n kʋʋs wila wil niyns sẽn ka wome la b yolem vãada la tobendã. Rẽ fãa rɩkdame n bas ne tãng zug sɩlse la we-rũmsi. Sɩlsã n na sõs ne-ba, tʋʋlgo, la we-rũmsã n so b rɩgra waood wẽnde. Yaa wakat-kãng marsã la b na n tall kũuni n wa kõ dũni fãa Wẽnde. Sẽn na n wa-b ne kũuna yaa nin-wogdo, yaa neb sẽn sõ b nens kaam tɩ pɩnda, yaa buud sẽn kẽesd dabeem dũni wã yaang la a taoore, buud sẽn tabd a bɛɛba, la sẽn yit kʋɩl-bɛd tẽngẽ. La kũuna na n tall n wa kõo dũni fãa Wẽnde, Siõ tãnga zugu, b waoogr zĩigẽ. Naaba-Wẽnd koɛɛg ne Ezipt. Ade, Soaala-Wẽnd zomba sawad-faasga n ta Ezipt tɩ Ezipt tẽng wẽnd dãmba, zirẽ-be-wẽnd dãmba digd rabeem, tɩ Ezipt dãmba sũur bendg b pʋgẽ. «M na zablga Ezipt rãmba ne taaba: yao na n yika ne a kẽema, tɩ zoa yik ne a noanga, tɩ tẽng yik ne a tẽn-taaga, tɩ rĩung yik ne rĩungu. Ezipt yẽesem sɛɛme, a bãngre sɛɛme, tɩ b na bʋg b zirẽ-be-wẽnd dãmba, n bʋg b bagba, b tɩt rãmba, n sogs b kɩɩmse. M dɩka Ezipt rãmba n ning nin-toaag nugẽ; dĩm sẽn kʋʋd nugẽ la m na n ning-ba. Soaala-Wẽnd n yeele, dũni fãa Soaala n yeele.» Mogr kooma na n sɛɛme, kʋɩlga koom na n fõogame. Ko-soya na n lebga yũugu, Nil kʋɩlgã na yõbgame, a na kʋɩɩme; rudma la bãng-n-sãag na n lʋɩɩme. Nil kʋɩlga moodo na n wãkame, b pʋs n sʋʋgame, b kõn le yãend bũmb ye. Kʋɩl-zẽ-yẽedba na n kelmame, zĩm-leoosa rãmba na n yãbame, zulumsa rãmba na n waasame. Sẽn kood-b lamda ka na n naf ye, gurs-kãna rãmba, sʋnda rãmba, bãmb pa na n dɩ yõod ye. Sʋnda rãmb sũur sãamame, sʋnda sẽn da rɩlgd b rãmba basda raoodo. Ad-y Tanis nanamsa ka tar yam ye. Sẽn sagend-b Ezipt dĩma yam paooda. B yɩta a wãn n yeel dĩma: «Mam yaa yam vẽenem dãmb biiga, pĩnd dĩm dãmba yagenga?» Yam vẽenem dãmba bɛɛ? Kos bãmb tɩ b wa wilg-fu dũni fãa Wẽnd sẽn yals Ezipt poorẽ. Tanis dĩm biis yaa gãeemse. Memfis dĩm biisi belgda b mense, b taoor dãmba kɩtame tɩ Ezipt tõr saad n tuumnẽ. Naaba-Wẽnd lob-b-la nen-yilinga dẽ la Ezipt kẽnda n ka le mi a sẽn maande, wala rãam sẽn lub rã-yũuda t'a sãad n wʋbdẽ. Ezipt ka le tõe fɩ, a taoor dãmb ka le tõe fɩ, a poorẽ dãmb ka le tõe fɩ. Badaare Ezipt rãmb na n diga rabeem wa pagba, b na yɛɛsame, b sã n wa yãend dũni fãa Wẽnde sẽn zẽk b nug bãmb zugu. Zɩɩda soolma na n kẽesa Ezipt rãmb rabeem kãsenga, Ezipt rãmba na n saoo kalwaare, b sã tẽeg Zɩɩda yelle, b sã n tẽeg dũni fãa Wẽnd sẽn dat bãmba ne wẽng ningã. Badaare tẽn-bɛd a nu n na n gom Ebre rãmb goama la b na n yik n wẽename tɩ b na n kẽe dũni fãa Wẽnde. Ir-Aeres, sãoong tẽnga, na n zĩnda sʋka. Badaare b na n mee maan-kugri dũni fãa Wẽnd yĩnga, Ezipt tẽnsʋka. Ezipt toaagẽ me, b na vigla kugri, Soaala-Wẽnd yĩnga. Dẽ n na n kõ kaseto, dẽ n na n wilgi tɩ dũni fãa Wẽnd tara waoogdb Ezipt tẽnga. B sã n namsd-b tɩ kelem n tees Soaala-Wẽnde, b na tʋm-b fãagda, b na tʋm ned sẽn na n zab n sõng-ba tɩ b tɩlge. Wẽnd na n lika b meng Ezipt rãmba la Ezipt rãmb me na n bãng-b lame. B na n waa ne b maand la b kũuni. B na n pʋlma Soaala-Wẽnde la b na pidsa b pʋlengo. Ba Soaala-Wẽnd sã wa wẽ Ezipt rãmba, b na n sãoog-b lame. B na n pʋga Soaala-Wẽnde la Soaala-Wẽnd na n deega b kosgo la b fãag-ba. Badaare sor n na n yi Ezipt n dig Asiri tẽnga. Asʋr na n waa Ezipt tɩ Ezipt kẽng Asʋr. B fãa na n naaga taaba n waoog Soaala-Wẽnde. Badaare, a Israyɛl na n naaga Ezipt la Asʋr, tɩ bãmb b tãabã reeg kaseto tɩ b paama Wẽnd barka. Dũni fãa Wẽnd na n ning-b-la bark woto: «M ningda Ezipt, m buuda, barka. M ningda Asiri, m nus sẽn naana barka. M ningda m pʋɩɩr, a Israyɛl barka.» Yʋʋmd n zĩndi tɩ Asʋr dĩm a Sargõ tʋm a tãnsoaba t'a wa zab ne Asdod, n tõog-a. Yaa yʋʋm kãnga la Soaala-Wẽnd taas b gomdã a Amos biiga, a Izayi, n yeel-a: «Ade, sẽk sũ-pa-noang fuugã f sɛɛgẽ la piid f nao wã gãndalsa.» T'a Izayi sɩd maan wala Soaala-Wẽnd sẽn yeele, n da kẽnd a zaala, la a ka wid neooda ye. Asdod lʋɩɩsa wakato, Soaala yeela a Izayi t'a togs woto: «M sõgna, a Izayi, kẽna a zaala la a ka wid neoodr yʋʋm a tã ye. Rẽ n na n yɩ makre Ezipt la Kus yĩnga. Ade, Asʋr dĩma na n talla Ezipt rãmb n tɩ pag roogo la a loog ne pa-weere Nubi rãmba, b kom-bɩɩb la b nin-kẽemse neodr kõn ningi la fuug kõn lud kɩgbr ye. Na n yɩɩ yãnde, yãn-pʋ-lʋʋmd ne Ezipt rãmba! Sẽn da teeg-b Kus, sẽn da get-b Ezipt wa b zu-zẽkre, bãmb dãmb zĩi ne rabeem la yãnde.» Mogra noorẽ dãmba na n yeela badaare: «Ges-y tõnd saagra sẽn sãam zãnga! Tõnd da teega bãmba n zoe n wa soond bãmb tẽngẽ, n paam sõngre, n põs Asʋr dĩma; woto wã marsã d yɩta wãna n põse?» Ad Naaba-Wẽnd koɛɛg ne Babilon sẽn na n lebg we-raoogo. Bɛɛb n yit we-raoogẽ wã n watẽ, n yit tẽng ning sẽn kẽesd rabeema n watẽ, la a wẽnda Negɛb sob-raoogo. Sẽn pa sõmbe tɩ Soaala wilg-ma la woto. Pĩnd zoa wã n lebg zãmb soaba, la bɛ wã zoe n sɩnga wãabo. Dẽ me la Soaala yeta: «Elam dãmba, wa-y Babilon! Mɛd dãmba, wẽ-y gũbri! Yaa rũnna la m na n sik a wilg-m-mengã.» Ad-y m sẽn wʋme, toog sãaga m yĩnga, m digimda waoodo, wala pag sẽn kũmd dogem. M sẽn wʋma leeba m yama zãnga, m sẽn ne wã yɛɛsd-m-la wʋsgo. M dat n basa raoodo, m digda rabeem kãsenga. M da gũuda zaabre n na n paam pemsem maasga, la a teemame n lebg yɛɛsg wakato. Rɩɩba tall n waa rɩɩba roogẽ, roog manegame n tʋɩ pɛɛla, tɩ b sɩng rɩɩb la yũubu; la koɛɛg lʋɩɩme n yetẽ: «Tãnsoaben-dãmba, yik-y-yã! Dɩk-y y zab-teedo!» Ad-y Soaala yeel-m-la woto: «Kẽnge, dʋʋs gũud rooga zugu t'a wilg a sẽn na n yãend bũmb ninga! A sã n ne bilim-bilm sẽn sog wiidi zabr yĩnga, n ne bõeens bɩ yʋgma, bɩ a maan gũusgu, a maan gũusg wʋsgo!» Gũuda yeelame: «M pa-la m zĩigẽ wã daara tõre, yʋnga tõre m maana gũusgu, la ade, ges-y, ned n yi yɩɩg n watẽ. Ned n zao bilim-bilm, la wiidi n tat-a. Nin-kãng n yet woto: ‹Babilon lʋɩɩme, Babilon lʋɩɩme! A wẽnd dãmba togsendã, fãa wãame n dɩg tẽnga!› » M buudu, Soaala sẽn pãb a soaba wala ki sẽn dʋʋg zɛɛgẽ, ade, m buudu, yaa woto la m wʋm yã, dũni fãa Wẽnda nengẽ, woto la m wʋm Israyɛl Soaala nengẽ, la m waame n na n wilg-fu. Naaba-Wẽnd koɛɛg ne Duma. Koɛɛg n yi al Seyir, m sok ma: «Gũuda, yʋnga ta-la a wakat bʋgo? Yʋnga ta-la a wakat bʋgo?» Tɩ gũuda leoke: «Zĩiga sɩngda yẽegre la ket n yaa yʋngo, la y sã n dat leokre, y tõe n le lɛɛg n waame.» Bãngda sẽn yeel Arabi poorẽ. Dedã toandba, leb-y weoogẽ wã, leb-y pʋ-weesẽ wã n gũ beoog vẽegre. Tema kẽedba, wa-y ne koom, yi-y n seg-y ko-yũud sẽn kʋʋd b rãmbã, yi-y ne buri n seg sẽn zoet-bã. Yaa sʋʋs la b zoeta, sʋʋs sẽn wõos n dat kɛɛb la b zoeta, yaa tãbdo sẽn dõos la b zoeta, tɩ yaa zabre sẽn zabd ne rugdu. N-ye! Soaala goma ne maam woto: Yʋʋmd a ye yɛsa, yʋʋmd muka, t'a Kedar pãnga la a ziir sɛɛ zãnga. Sẽn na n kees Kedar tẽnga, a tãb-tãoodb ka tɛkã sʋka, a tãb-biisa sẽn ya gãndaadã sʋka, sẽn na n keesa ka na n zeng bũmb ye. La rẽ yaa Soaala, a Israyɛl Wẽnnaama, n yeele. Naaba-Wẽnd sẽn yeele b likra bãg-faag poorẽ. Yaa bõe n wate Zerizalɛɛm? Bõe tɩ f neba fãa zoet n dʋʋd b bɛɛndo? Bõe tɩ tẽng pid ne bʋʋre n pid ne kaasgo? Bõe tɩ tẽnga wulumd zãnga? Sẽn ki-ba n gãe f tẽn-peelmẽ wã, ka zabrẽ la b kʋ-b ye ka zabr zĩigẽ la b lʋɩ ye. F tãnsoaben-dãmba naaga taaba n zoe. Tãp sẽn yãage, zabr sɛɛme, tɩ bɛɛba na n yõg-ba n pag roogo, b tol n yõga sẽn da paam-ba n zoe n zãagã. Yaa dẽ la m yet-y marsã: «Zãag-y ne maam, bas-y tɩ m yãb m yãb toogo, da mak-y m belgr ye, maam ne m buuda sẽn dɩ bõna belgr ye. Dũnna, Soaala, dũni fãa Wẽnda, waa ne d sũ-bondgre, tɩ d konga raoodo n zĩ ne yãnde.» Bãngda sẽn yɛs bãg-faag ninga noorã n yãet a yãeebã, bãg-faag kãng wulumda ne bʋʋre kelensa sãt n kuiisa yĩngri. Elam tãb-biisa dɩka b tãbd la b logdo, bilim-bilma pida ne neb tɩ wiid tatẽ, Kir tãb-biisa segenda b gãndo. Zerizalɛɛm tẽnga, ad bãg-faag neerem sẽn yɩɩd a taaba, pida ne bilim-bilm la wiidi; fãa tonga tẽnga noore. A Zɩɩda ka le tar sõngr ye. Badaare yãmb wẽnemda y nenga, n tees zab teeda sẽn bĩngd doog ningã, n tees na-zaka, Libã googã. Y yãeeme t'a Daviid tẽngẽ lalsa poo zĩis ka tɛka, y koka koom n pids pipi ko-baoorã, y sõda Zerizalɛɛm dota fãa; y wãa rot kẽere n na n paam n zab tɩ lal-gũbrã ra lʋɩ bɛɛba nusẽ ye. Y mee ko-baoor lals a yiiba tẽnsʋka n na kok zugẽ soaba koom. Y nenga sẽn pa wẽnemd n ges a soab bala, yaa Soaalã, sẽn tara bũmb fãa tɩɩma. Soaala sẽn da segl yɛla al pĩndã yaa bãmb bal la y pa yãende. Ad-y marsã wã, dũni fãa Soaala da ratẽ lame tɩ y yãbẽ, n kelmẽ kʋʋre, n põngẽ y zugu la y sẽgnẽ sũ-pa-noang futu. La ayoo! Yãmb maanda sũ-noog la kɩdengo; yãmb koota y niisi la y piisi, yãmb wãbda y nemdo la y yũud y rãam, la y yetẽ: «D dɩ la d yũ tɩ beoogo d na n loogame.» La dũni fãa Soaala menga n kõ maam koe-kãnga: «M wẽendame tɩ yell a woto ka tõe n manege, tɩ yãmb ka reng n ki ye.» Dũni fãa Soaala goma woto: Kẽng sõgen kãsenga a Sebna nengẽ, kẽng sẽn geta dĩma zaka nengẽ. Sok-a n gese a soo bõe ka, a kĩi ne ãnda ka, t'a tol n kɩt tɩ b wedg pĩiga, n ning a yaoogo tãnga lʋgrẽ, la a maneg n pees-a n gilgi, tɩ be n na n yɩ a yaoolem doogo? Ade, vugr bala Soaala-Wẽnd na n lub-f lame, nin-sõngo, b na n baoo bũmb n sagl-fo, b na n lob-f lame tɩ f bilim wa koaasga, n tees-f tẽn-yalengẽ. Be la f na n ki, be la f na n pa ne f bilim-bilma sẽn ya f zu-zẽkrã, tɩ fo meng yaool n ya f zu-soaba yãnde! M na n vik-f-la f zĩigẽ, yaa Soaala n gomde, m na n yiis-f-la f tʋʋmnẽ. Badaare bala m na n boola m sõgne, a Ilkiya biig a Eliyakim. Yẽnda la m na yeelg fo fu-yorgo n sẽbg-a fo sẽbdga, n deeg fo naama n kõ-a, la a na n lebga wa ba Zerizalɛɛm dãmb yĩnga, a Zɩɩda rĩunga yĩnga. M na n dɩka kʋɩlen-bila, a Daviid dooga kʋɩlen-bila n bobl-a a sã n pake, ned kõn page, a sã page ned kõn pake, M na n vigla a naama zĩig sẽn ya kɛgengẽ; a naama zaoor na n viglame a na n lebga a buuda zu-zẽkre. Bũmb ning sẽn be, yaa a Eliyakim sẽn base t'a buuda neba fãa, bɛd la bõonese, wa n fãoog yẽnda wala b sẽn mii n naag n yagl zĩ yɛnga: leense, laase, yʋya, tɩ lebg zɩsgo. La ade, dũni fãa Wẽnd n gomde, daar n wate, tɩ kaadga menga, ne b sẽn ka-a zĩ kɛgengẽ wã, na n feoogame n lʋɩ tẽnga, la teeda fãa sẽn da yagla na n wãame. Soaala-Wẽnd n yals rẽnna. Naaba-Wẽnd koɛɛg ne Tir. «Kelem-y kʋʋre, Tarsis koom-kogendo, tɩ y tẽnga wãame, la roog pa kees ye.» Ad-y yaa b sẽn ta Sipr la b yaool n wʋm rẽnna. Yɛɛs-y la mum-y y noore, mogra noorẽ dãmba, Sidõ toandba, toandba, sẽn dʋʋgd mogre. Kood niyns fãa sẽn bʋd Nil kʋɩlga noore yaa Sidõ n da tʋkd n looge. Yẽ n da rɩt ãndũni rãmba fãa yõodo. Yãnde, Sidõ, Yãnde! Foo la mogra noorẽ dãmba tãnsoben-doogo! Mogra meng yaaga a noor n gomda: «M zãgsda rogem waood rigbu, m zãgsda rog kamba, m zãgsda wub kom-dibli la kom-pugli.» Ezipt rãmba sã n wʋm kibarã, b na n yãee toog wa pag sẽn kũmd rogem, b na n yãee toogo wala b sẽn yãe toog ninga yɛla sẽn waa n pak Tir. Mogr noore dãmba, rʋʋg-y mogrã n ta Tarsis n kelem y kɛlenga! Y sũ-noog tẽnga n lebg woto? Y tẽnga sẽn ya tẽn-kʋdem-wẽnnẽ tẽnga, t'a kamba sẽeg n kẽed al yɩɩga la woto? Yaa ãnda n yals woto Tir yĩnga, tẽng sẽn da ya naam pugli pʋɩta? A toandba ya na-komse tɩ raadba ya tẽng nin-bɛd gilli. Ad-y yaa dũni fãa Wẽnde n yals woto, sẽn na yɩ-la n sik wilg-m-menga, sẽn baood-b waoogra wilg-m-menga, la b sik sẽn paamd-b waoogr dũni rãmba nengẽ. Tir, ko pʋt marsã, tɩ zĩig ka le ket koom-kogenda sẽn na n soond sobg ye. Soaala-Wẽnd yeela mogra t'a maan gũusgu, b kɩtame tɩ nanams dig rabeem, b kõo noore tɩ b menes tao-tao Kanaã tãnsoben-dota fãa. Bãmb n sɩd yeele: «Da le bao sũ-noog ye, Siõ bi-pugla, tɩ fo sãamame tɩ f nan pa kul sɩd ye. Ba f sã n yik n dɩk sore, f sã n dʋʋg mogrã n ta Sipr f na bao vʋʋsg n konge. Ges Sipr dãmba tẽnga: bũmb ka le ket ye. Asʋr da rɩk-a lame n maan a koom-kogend tigsg zĩiga, la b waa n mee ro-lug-lugi n wa tak zabr ne-a; b sɩd waa n wã-la a ro-neeba tɩ fãa lebg raboogo. Kelem-y, Tarsis koom-kogendo, tɩ y sẽn da soond sobga zĩig ningã tẽn-kãng wãa zãnga.» Wakat n na n zĩndi, yʋʋm pisopoe pʋgẽ, dĩm a ye naam dɩɩb tõre, b pa na n le tags Tarsis yell ye. La yʋʋm sã n wa maan pisopoe, Tir na n wẽnega pʋg-yoodr ninga b sẽn togsd a soab kibar woto ne yɩɩllã: Dɩk f pɛndga, ka le tar sõm soaba, saag tẽnga roto n wẽed f pɛndgã, le wẽ-a wa f sẽn mi tɛka, le rɩk f pĩnd yɩɩlã tɩ daare b na le tẽeg f yelle. Yʋʋm sã n pid pisopoe, ad Soaala na n le gesa Tir yelle la Tir na n le sɩng n deegda a yooba ligdi, a na le rɩka a menga n kõ ãndũni rãmba. La a yaoodã, a sẽn paamda fãa na n lebga Wẽnd soolem, pa tõe n le bĩng ye, pa tõe n le tisg ye, yaa sẽn tʋmd-b wẽnd dooga tʋʋma n na n soog ligd kãnga, n paam n dɩlgd b menga, n dɩt n tɩgda la b yeelgd fut sẽn ya neeba. Ad-y Wẽnd meng n na n wa sãam tẽngã, n sãam-a t'a nenga tedg fasi, n sẽeg a kamba zĩig zãnga. Maan-kʋʋda wala neb a taaba, zu-soab wala yamba, roog-ma wala roog-biiga, sẽn yaa pengda wala sẽn deegda pengrã, sam-dɩta wala b sẽn dɩ a soab samde, fãa na n wẽnega taaba. Tẽnga na n sãama zãnga, zɛɛdba na n zɛɛ-a lame. Soaala-Wẽnd yalsa woto: «Tẽnga lebga kʋ-yiri, a lebga raboogo, dũni wã sãamdame, a lebgda raboogo, yĩngra meng naaga tẽngã n teemnẽ.» Tẽnga rẽgmame, tẽnga kamb n tʋm dẽnna tẽnga kamb tõdga noore, tẽnga kamb kɩɩsa Wẽnd noore, n sãam zoodã sẽn da yõg daar fãa yĩnga. Yaa rẽ yĩnga la kãab wẽng pʋg tẽnga zãnga t'a reeg a sɩbgre, yaa rẽ la bugum dɩt tẽng zug rãmba, tɩ sẽn na n põs-ba sõor lebgd bilfu. Rãam ka le kõgd ye, bugsuntunda bẽedame, sũ-nooga rãmba waasda toog waasgo. Gãngãad pa le maand noog ye, sũ-noog kaasgo ka le kaasd ye. Rã-yũudba ka le yɩɩnd b yɩɩl ye, rã-toosa lebga tɩseng b noorẽ. Tẽnga lebga vɩʋʋgo, n lebg zũnd-zãnde, zak fãa noor pagame, noor ka bee n kẽedẽ ye. B yãbda soya zutu, tɩ dãam sɛɛme, tɩ sũ-noog buud fãa sɛɛme, sũ-noog digame n zãag ne tẽngã. Tẽnga pʋgẽ, bũmb ba a ye ka le ket a zĩigẽ ye, tẽnga noor kʋɩlenga kaoome. Tẽnga ninsaalb na n lebga yiisgu wala oliviye tɩɩg sẽn tõs n looge, wala sãbse sẽn kao n sɛ. Soaala-Wẽnd sẽn fãag b rãmba, n zẽkd b koeese, Soaala-Wẽnd ziira la b kilsd ne yɩɩla, sũ-noog kaasgo la b kaasda; b yii nin-taoor n watẽ, la woto la b yɩɩnda: «Yaang rãmba, pẽg-y Soaala yʋʋre, moon-y mogra noorẽ tɩ Soaala-Wẽnd la a Israyɛl Wẽnnaam.» Tõnd wʋmda yɩɩn-kãnga, yaa al tẽnga satmẽ la a yit woto: «Sẽn nonga zemsg soaba, paam pẽgre!» M wʋmame n yeele: «Yel-beed lʋɩ m zugu, yel-beed lʋɩ m zugu! Ad-y lebga bʋk ne bʋko! Zãmb n zãmbde, ned kam fãa zãmba wa a sẽn tõe tɛka. Y sẽn lebẽ fãa na n yɩɩ yɛɛsgo, loanga, bẽdgo n gũud-y, yãmb fãa, tẽng zug rãmba. Yɛɛsda bʋ-raasã n wudg n lʋɩ loangẽ, n paam n yi loangẽ, n tees n pa wĩir bẽdgẽ. Kooma rat n dɩɩ tẽngã, tẽnga tara miuungu. Tẽnga tara pusbu, ad-a sẽn kɩllde, ad-a sẽn lʋɩte. Tẽnga tuumda wala rã-yũuda, a zũndga wala roog sugri, a yel-wẽna zɩsg-a lame, a sẽn lʋɩ, a ka le tõe n yik ye.» Baraar me, zabre n na n yiki, n yik ne yĩngr-yĩngr dãmba, n yik ne tẽng zug dĩm dãmba fãa. B na tigs-b lame n kẽes bokẽ, b na n pag-b-la roogo n bas tɩ kaoose n yaool n wa kao bʋʋdo. Kiuug na n moogame, yãnd n na yõk-a, yãnd n na n yõk wĩntoogo tɩ yẽ me vẽenem booge. Dũni fãa Wẽnd n na n dɩ naam Zerizalɛɛm, Siõ tãnga zugu. B kug-zĩidba taoore, sẽn wat-b bãmb taoor ne koeesa toor-toorã, b na n basame tɩ b ziira yãge. Soaala, yãmb la m Wẽnnaam, m datame n kils la m pẽg y yʋʋre, m datame n wilg y sẽn yaa a soaba. Sɩda yãmb pidsa y kãab-noogã, kãabgo y sẽn zĩnd n tagse, tɩ bũmb ka be sẽn na teem ye. Yãmb kɩtame tɩ tẽnga lebg kug-saongo, y kɩtame tɩ ka sugr dãmba tãnsoben-dooga tek n lebg raboogo, wilg-m-meng rãmb tẽnga ka le ya tẽng ye, b kõn le tõog n me-a n yik abada. Yaa rẽ la buud sẽn tar pãnga na n pẽg y yʋʋre. Bu-zẽmb toosa tẽnsẽ, Soaala, yãmb n na n dɩ naam. La rẽ wã yaa y sẽn sõng nin-koam dãmba, n sõng naong sẽn tar b rãmbã, b sẽn da waa n zĩ ne b farã. Yãmb yɩ-la b roogo saag niib wakato, n yɩ b maasem tɩɩga, wĩntoogẽ. Ad-y na-toosa sũura fõta wa saag sobgo, tɩ b sũ-puura maand wa wĩntooga tʋʋlem sẽn maand ne tẽn-koɛɛnga. Yãmb sɛɛsda wilg-m-meng rãmba bʋʋre. Wala sawadg maasem sẽn woogd wĩndg waolgo, woto me na-toosa sẽn wat n dat n wilg b pãnga, wakat kãng la b noor ka na n le tõog n yaage. Dũni fãa Wẽnd na n segla dɩɩbo, Siõ tãnga zugu, ninsaalb buud fãa yĩnga. Na n yɩɩ nemd sẽn be kaam, la rã-sõma me pa na n paoog ye, nemd sẽn bʋgse la sẽn tar kaam, rãam sẽn pid rãam, n ka tar zurbzutu. Bũmb ning sẽn lud b yama wa fuugã bũmb ning sẽn mum bu-zẽmba nina, Wẽnd na pilg-a-la Siõ tãnga zugu. Kũum na n menema zãng-zãnga, Soaala-Wẽnd na n yẽesa nensa fãa nintãm, b na peka b buuda rẽgdo n menes zãnga; rẽ yaa Soaala n kãabe. Baraare b na n yeelame: «Bãmb la tõnd Wẽnde. Bãmb nengẽ la d da gũud fãagre, la b sɩd fãag-d lame, bãmb la tõnd teegre, d kɩdem la d lange tɩ b sɩd fãag-d lame. Wẽnd pãng siga tãn-kãnga zugu.» Sã n yaa a Moab, b tabd-a lame wala b sẽn tabd yamdo b sẽn gãneg bokẽ tɩ põogẽ. A Moab zẽkda a nusi n kabend wa ko-rugsa, la a sẽn maand fãa Soaala na n sɛɛsa a tɩtaama. Ad-f lal-gũbrã sẽn me ne kug sĩdma la sẽn ka tõe n gãndgã, Soaala-Wẽnd tus-a lame n lub tomẽ. Badaare b na yɩɩla yɩɩn-kãnga a Zɩɩda tẽn-peelmẽ: «Tõnd tẽng yaa tãnsoben-tẽnga, Soaala-Wẽnd sẽn dat-a ne fãagr yĩnga, a tara lal-gũbri la pʋgẽ lalse. Pak-y kʋɩlense tɩ nin-sõma wã buud kẽ, buud ning sẽn deegda Soaala noore. Ad-y yaa neb sẽn tar zʋg sõngo, la yãmba, Soaala, y zãad-b-la y laafi pʋgẽ tɩ yaa yãmb bal la b teeg yã. Dɩk-y yɛla wakat fãa n bas ne Soaala-Wẽnde tɩ bãmb yaa pĩig sẽn kõn wã abada. Bãmb n sikd sẽn da zao-b yĩngri, n sikd tẽnga, sẽn da zao-a tãn-silenga zugu. Tẽng sã n beẽ n yet tɩ b ra tag a pʋgẽ bada, bãmb tusd-a lame n lubi la b bilim-a tomẽ. Bãmb basdame tɩ buud ninga sẽn yaa naong la ka-pãng-soaba wa tab-a n bedse.» Nin-tɩrg sor yaa tɩrga, nin-sõng sor ka tar bogdo la goaleng ye. N-ye! D da yɛsa yãmb so tɩrga zugu n get yãmba, Soaala-Wẽnnaam, tõnd teega yãmba! Ned kam fãa sẽn date yaa pʋd y yʋʋre, yaa bool yãmba. Yʋngo, mam me ratame tɩ y pẽneg-ma m baood-y-la ne m sũur fãa. Yãmb sã n maand ne tẽng zug rãmba wala y sẽn yiis y noorẽ, b manegd n tũu so-tɩrga. La yãmb sã n zoet nin-wẽnsa nimbãanega, b ka zãmsd b sẽn tog n maan ye, b golemda sẽn ya tɩrga, b pa ne yãmb ziira ye, Soaala. Soaala-Wẽnde, yãmb basda ninsaalba tɩ b gũusi, la b pa ne fɩ. Bɩ b paam yãnde, bãmb sẽn pa ne y sẽn zabd ne sũur ninga, y buuda yĩnga! Bɩ bugum ning sẽn da segl bɛɛba yĩnga, bɩ bug kãng dɩ-b zãnga. Soaala-Wẽnde, y na kõ tõnd d sẽn datã. Sõng-y tɩ d sẽn sɩng bũmb ninga wa tõog n baas neere. Soaala-Wẽnnaam, tõnd sulga d zugu dĩm dãmb a taab taoore, la yãmb bal yell la d ket n dat n tẽege. D soaalba taaba kiime la b kõn le vʋʋg ye, b kẽe kũum zamaanẽ b kõn le yik b gãagẽ ye. Sɩda yaa yãmb n wa n menes-ba n menes bũmb ning fãa sẽn tõe n kɩt tɩ b le tẽeg b yelle. Yãmb paasa d buuda neba sõore, la rẽ yaa yãmb zu-zẽkre, Soaala; yãmb zẽka d buuda yʋʋre, yãmb yalga d tẽnga toose. Wẽnnaam, d nimbãanega pʋgẽ yaa yãmb la d bao yã, tɩ d zoe-la y sɩbgr rabeem. Wala pag sẽn kũmd dogem, n waasdẽ la a kɩlld goabga la rɩtgo, tõnd me yɩɩ boto, yãmb taoore, Soaala-Wẽnde. Yɩɩ wa tõnd me da rɩka pʋga n kũmd dogem, wala d na n sɩd dogame, la kato, yɩɩ sobg bal la d wa ne, tõnd ka maan fɩ n fãag dũni wã ye, d ka rog nin-paalse n kõ dũni ye. M buudu, sẽn ki-b yãmb maasmẽ wã na n vʋʋgame, m neba na n nekame. Sẽn gãee-b tẽnga tomẽ wã fãa gilli, la b na n kelma b sũ-noogo. Dũni fãa Wẽnd na n kɩtame tɩ vẽenem sig wa meenem, tɩ tẽnga na n lebsa kɩɩmsã b vɩɩm. M buudu, kẽ f roogẽ n lebs n pag f kʋɩleng neere, solg f meng bilfu tɩ Soaala-Wẽnd sũur paam n sigi. Ade, b yita b roogẽ n na n sɩbg tẽng zug rãmba gill yel-kɛga, tẽnga na n basa zɩɩma a sẽn da busã t'a le ruki; a ka na n le solg kɩɩmsa sẽn da muma ye. Badaare, Soaala-Wẽnd na n dɩka b sʋ-yalenga, n dɩk b sʋ-kɛgenga, b sʋ-rɩtga, b sʋ-taoko, la b na n sɩbga a Leviatã. Yẽ la koomẽ rũm-bãndã, waaf sẽn ka sɩɩsde. yẽ la waaf ne põada, Ad-y Soaala na n kʋʋ yẽnd me. Baraare, yɩɩl-y m bugsuntunga yɩɩlle, tɩɩg ninga biis sẽn kõgd rã-noogã. Yaa m menga, Soaala-Wẽnd menga, n gũud-a, m zãgsd-a-la koom wala a sẽn date, m gũud-a-la wĩndg la yʋngo, tɩ ned da wa kẽ a pʋgẽ ye. M sũur ka le puud ne-a ye, gõose la pulgumdi sã n belg b meng n yi, m na zab ne-ba, m na yõog b bugum zãnga. Sẽn kete yaa bɛɛba wa soond mam maasmẽ, yaa b wa maan zood ne maam, n-ye, yaa b bao laafi ne maam! Sã n yɩ bilfu a Zakoob buuda na n pusa yẽgen-paala, a Israyɛl na n tobame la a na n ninga puudu, la tẽnga gill na n pida ne a biisi. Soaala-Wẽnd pãba b buud a Israyɛl wala b sẽn pãb a bɛɛba bɩ? Soaala-Wẽnd kodg-a lame wala b sẽn kood a bɛɛba bɩ? B kʋ-a lame wala b sẽn kʋ a bɛɛba bɩ? Ayey! Soaala bʋ-la a Israyɛl kamba bʋʋdo n dig-b bala n yiisi, n dig-b bala n zãage. Daar a ye bala la b tũnug-b ne yaang sobgo n loog ne b pa-weere. Ad-a Zakoob yel-wẽnda sẽn na n yẽes to-to marsã, ad sugra sẽn kõ wã yõodo sẽn na n yɩ a soaba. Kug niyns sẽn tall n me maan-kugrã, b na n pãb-b lame n bõgse, la a na n booga wa goore, la b kõn le yãend tɩ b peesd da-lugri, b kõn le yãend tɩ b rõogd wisd laas ye. Tãnsoben-tẽnga lebga raboogo, ned ka le be a pʋgẽ ye, a lebga wa we-raoogo, wa pʋ-wɛɛga, tɩ nag-bi wat n wãbd yamd be, la b wat n gãe be, la b wat n wãbd tuudu. Wil niyns sẽn kʋɩ-bã, sẽn kao-bã, pagba wat n ning-b-la bugum. Ad-y yaa buud sẽn ka tar yam, dẽ me la a Naanda pa le nong-a, dẽ la sẽn wuba bãmba ka le wat ne sõngr ye. Baraare, ad-y Soaala-Wẽnd na n pãba b koodo, b na n sɩnga Efrat kʋɩlga n wa baas ne Ezipt kʋɩl-bɛɛga. Wakat kãng marsã, Israyɛl kamba, la b na n dɩgs yãmb a yeyn-ye Baraare, b na peeba tõntõ-kãsenga tɩ sẽn menem-ba n be Asʋr tẽnga lɛɛg n wa, sẽn be-b Ezipt tẽnga me na n waame la b na n waooga Soaala-Wẽnde b tãn-sõnga zugu, Zerizalɛɛm pʋgẽ. A Samari la a Efrayim naam pugla, yẽ la a rã-yũudba na-tẽnga la b zu-zẽkre, la yell be-la a zugu! A zao yĩngri n get a bãg-faagã. Bãg-faaga ra tog n pidẽ la ne yõodo, la bũmb sẽn kete yaa puud sẽn zelge a kamba sẽn tɩg rãama sẽn dɩk n bɛ b zutu. Ade, buud sẽn tar pãng n na n wa, la Soaala-Wẽnd n tʋmd-a; a na n waa wala sapɩlem-saaga, wala saag sẽn lubd fãa, a sor zugu, wala sa-ko-bɛd saaga, saag ne koom sẽn na n dɩ tẽnga zãnga. Soaala-Wẽnd nugã n na n tus tẽngã n lubi. B na taba naama pugl ne nao, n tab a Efrayim rã-yũudba na-tẽng la b zu-zẽkrã. B na n taba ne nao, Samari faonga sẽn zelgã wa puugã, Samari sẽn zao yĩngr n get a bãg-faaga, bãg-faag sẽn togẽ n pidẽ ne yõodo. Samari na n wẽnega kankamde, kankamd sẽn bɩ tɩ wakat nan pa ta ye. Sẽn deng-a a yãeebo, fãsgd-a-la a nugẽ la yaa leems vuka. Daar n wate tɩ dũni fãa Wẽnda na n waa ne naam pugla, pugl sẽn be neere, bu-kella yĩnga. Bãmb n na kɩt tɩ bʋ-kaood fãa bʋ a bʋʋda ne zemsg yam, bãmb n na n kõ tãb-biig fãa raoodo, t'a zãag bɛɛba ne tẽnga noor kʋɩlenga. Ad-y neb n be tɩ rãama kẽesd-b moogo, neb n be tɩ rãama kɩt tɩ b kẽnd n lagsdẽ: yaa maan-kʋʋdba la bãngdbã. Rãam sẽn tar pãnga la b yũ n kẽed moogo, rãama kɩtame tɩ b kẽnd n lagsdẽ n ka le mi b goabg la b rɩtg ye. Rãama sẽn tar pãng la b yũ n tuumnẽ, b pa le tẽr Wẽnd sẽn lik bãmba n yeel-b tɩ bũmb ning ye. Dẽ la b gomd b bãngra goama n kalemd taaba. Rɩɩba zĩig rẽgma ne wʋbdo, zĩ-yɩleng ka le ket ye. Dẽ me la b sokda: «Ãnda la Izayi rat n karme? Ãnda la a rat n wilg a sẽn yãenda võore? Daare yaa kamb sẽn nan bas bĩisri paalem, yaa kamb sẽn nan ka yi b ma roogẽ. Kelg-yã a goma: ‹S-A-S-A, S-A-S-A, T-A-T-A, T-A-T-A, pĩnd boto, marsã woto.› » N-ye, yaa ne bidg noore, yaa ne goam sẽn ka tõe n wʋme yaa ne bu-zẽnd goam bala la Soaala-Wẽnd na n gom ne b buudã. Wẽnnaam yaool n da yeel-b lame: «Vʋʋsg tõe n vʋʋsa ka, bas-y sẽn yɛɛ t'a vʋʋse tɩ kaalẽ ka be bʋʋr ye.» La b pa tʋlg n kelg ye. Yaa rẽ yĩnga la Wẽnd gomda na n wẽneg bãmb rẽnna n ka tar võor ye: «S-A-S-A, S-A-S-A, T-A-T-A, T-A-T-A, pĩnd boto, marsã woto.» Tɩ b sã n tarẽ, bɩ b wa lɛɛg n lʋɩ zãmbɛɛla, n kaoog-b sɛɛga, tɩ wĩir sog b nao. Kelg-y Soaala-Wẽnd koɛɛga, yãmb fãa sẽn laad y taaba, la sẽn ya-b Zerizalɛɛm soaalba. Y yetame: «Tõnd yõga zoodo ne kũum, la d maana sardo ne bʋg-tẽng rãmba. Y yetame tɩ yel-beed ning sẽn wata kõn ta yãmb ye tɩ yãmb tara y soondg zĩiga, y mii y sẽn na n yag zirẽ ninga n põse, y mii y sẽn na n padem padeng ninga.» Ad-y Soaala-Wẽnd yet-y lame: M na n vigla kug-kɛgeng Siõ pʋgẽ, yaa kugr sẽn maneg n pees meeb yĩnga, yaa kug-neere sẽn vigl sõmbo. Kug kãng la sẽn teeg-b maama na n wẽnege, n wẽneg ne neerem la keglem. Wĩir ning m sẽn na tall n mage tɩ bũmb da yõsg a to, bũmb ning m sẽn na n tall n ges tɩ meeba ra kɩll goabg bɩ rɩtgo, na n yɩɩ zemsgo ne y meng la y taaba. Yaa roog la y me n na n kẽ, yaa bũmb la y me n na n soond a pʋgẽ, ad-y m sã n pa yãend zemsg a pʋgẽ, sapɩlem n na n pãb n sẽeg y zirẽ-be-roogã la koom n na n looge ne soondg zĩigã. Woto yãmb ne m ba kũum zooda na sɛ, yãmb sarda ne bʋg-tẽnga ka na n yals ye. Yel-beed ninga sẽn na n fõd wa koom n wa wã la sẽn na n kãag bũmb fãa n loogã, na n wẽneg n bedsa yãmb zãnga. Yel-beeda segd-y yibeoogo, a segd-y wĩntoog bɩ yʋngo a na n yẽeg-y lame. Y sẽn bãng a waoong raar fãa na n yɩɩ yɛɛsgo. Ade wala yelbũnda sẽn togsde Gãaga na n yɩɩ koɛɛga tɩ pa tõe n tẽeg n gãand ye, fu-goabga na n yɩɩ bilfu tɩ pa tõe n yɛdg n pil ye. N-ye, wala Perazim tãngẽ, Soaala-Wẽnd na n yikame, wala Gabaõ pʋtẽ, b na n sɩngame n tʋm b tʋʋmde, n yals b sẽn sede, la tʋʋmda yaa tʋʋm-bãnde, ka beoog-beoog fãa tʋʋmd ye. Woto wã, bɩ laada rãmba, bas-b laado tɩ b ra wa sãrg wĩ niyns sẽn pid b kokorã n paas ye. M wʋma dũni fãa Soaala nengẽ, tɩ tẽnga fãa wãab ya bũmb b sẽn yalse. Maneg-y tʋba n kelg m koɛɛga, wʋm-y m sẽn na n togsa neere! Wala y sẽn mi wã, ka-koaad sã n tʋmnẽ a ka tar a pʋʋga koob bal ye, a ka maand vugs bala, ka mooga bal la a tar pĩngr ye, A sã n sarem kaalma n sɛ a bʋta kood buud toor-toore. A rengda ne puudã, n wat zẽ-biisã sẽn tar yũ-noogo, n wat alkam pɛɛlga, la alkam pugsgu, ned kam fãa ne zĩig ning sẽn tog ne-a, n yaool marsã n bʋd alkam kɛgeng n gilgi. Ka-koaad zãmsa a tʋʋma a Naanda nengẽ, b sẽn zãms-a wã la a tũuda. Ypuda ka tabd n beds ye, bilim-bilma nao ka sɩɩsd zẽ-biisa sẽn tar yũ-nooga ye, b sʋʋgd-b-la ne rabãande. Alkam pɛɛlga, bilim-bilma n tabd rẽ, la ka tar tabr tɩ wa beds ye. Bilim-bilma tabdame n looge la bũmb ka bedsd ye. Dẽ me yaa Soaala-Wẽnd n wilgi. Woto me la d ne tɩ bũmb fãa tara a zĩiga, la b bãngra me ya zulunga. Ariyɛl, Ariyɛl, kato! Kato, Zerizalɛɛm tẽnga! Yaa ne foo la a Daviid waa n na n tak zabre. Ba f sã n ket n maand f kibs rãmba n gilgdẽ, tɩ yʋʋmd pʋgd yʋʋmde, ad-m na n nams-f lame, Soaala-Wẽnd n gomde. Fo kõn tol n tɩlg ne sũ-sãang la pɛt ye, la mam yĩnga fo ka na n le yɩɩ Laafi tẽng ye, f na n yɩɩ maan-kugra zĩig bala, maanda yõogr zĩig bala. M na taka zabr ne foo wala a Daviid, m na n tuu bok n gũbg-fo, f sẽn na n tɩ kẽ zĩig ningã, m na n bʋʋg-f-la be n zabe la m zẽk tãnd wa lal-gũbri, n yẽd-f zãng-zãnga. Fo na n lʋɩ bog-zulungẽ, tɩ f koɛɛga na n yit wala bʋg-tẽngẽ, koɛɛg sẽn ka le sãt ye, n ya wala kɩɩm koɛɛga, koɛɛg sẽn yit wala no-bi fɩɩlgo. F bɛɛba yaa wa wubs-bãanega, yaa nin-toose la b sõor ka tɛk ye, yaa wa ka-fɩɩba sobg sẽn dɩke. La Ade, vugr bala, dũni fãa Wẽnd na n wa sõng-f lame, b na n waa ne sa-tãsg bʋʋre, bʋʋr sẽn kẽesd rabeem, n naag ne sobg sẽn zẽkd wubsgu, la bug-walem sẽn yõogde. Ade, na n yɩɩ wa zãmsdo, n yɩ wa bõn-bãnd la f yãend yʋngo. F bɛɛba sẽn da sũ ka tɛka la b wat n na n zab ne-fã, n da segd-f ne b zab-teedã, la b tuud bogd n gilgd fooma, Ariyɛl, ad-b fãa sẽn menemde, n menemd wala yʋng yãeeb bɩ zãmsdo. Lebga wa ned sẽn da gãe n zãmsdẽ, n zãmsd t'a rɩta noogo, n wa nek ne pʋ-vɩʋʋgo. Yaa wa ko-yũud sẽn tar ned t'a gãe n zãmsdẽ, t'a paama koom n yũuda, n wa nek ne yaamse, n nek ne kokor sẽn kʋɩ zãnga. Na n yɩɩ woto ne bu-zẽmba tãb-biisi sẽn da zabd-b ne Siõ tãnga. Yɩɩ-y neb wa bũmb sẽn lingi tɩ b yɛs sɩɩ, n ka yaagd y noor ye, yɩɩ-y wa neb sẽn ka tar nini, la y yɛs sɩɩ n ka yaagd y noor ye. Yɩɩ-y wa neb sẽn kẽnd n tuumnẽ la ka rãam la b tɩg ye, n kẽnd n latemnẽ n yaool n ka yũ fɩ ye. Sɩda, Soaala-Wẽnd daag-y-la suusgu bãaga. Y nina mumame, gomda ne bãngdbã, y nenga luda peende, gomda ne sẽn yet tɩ b neeme wã. Yɛla yãeeb lebga toog ne yãmba, wala sebr sẽn ka lak gʋlsem, wala sebr sẽn pag ne siribdu. Dɩkda sebrã n kɩs sẽn mi-a karengo, n yeel-a t'a reeg n karem, tɩ yẽ me na n leok tɩ pa tõe ye, tɩ sebra pagame. Dɩkda sebra marsã n lake, n kis ned sẽn ka mi karengo n yeel-a t'a karem, t'a na n leoke t'a ka mi kareng ye. Soaala-Wẽnd yeta b buuda poorẽ: «Nin-bãmba kolgda maam ne b noor goam bala, n pẽgd maam ne b no-gãnd bala, la sũurã paada yɩɩga, b zãra ne maam. Woto wã mam tũudma, mam waoogrã lebga maan woto tɩ yaa boto n toge; lebga reeg ninsaal sẽn togse n ning f pʋtẽerẽ. Yaa rẽ la m na n kell n wilg-b yɛl-soalma n wa tol n kẽes moogo sɩlem dãmba sɩlem, n menes yam dãmba yam.» Yell bee nin-bãmba zugu! Yaa neb sẽn solgd b meng Soaala-Wẽnde, n solgd b sẽn dat n tʋm beedã, n geend b geels likẽ n yetẽ: «Ãnna n ne-do, ãnna mi-do. Ãnda n tõe n bãng d sẽn dat n maane?» Yaa bõe wẽnem yãanga la woto? La m sok n gese, yagdo la yagda yaa a ye bɩ? Bũmb tõeeme n yiki n yeele sẽn maana yẽ wã: «Ad ka foom n maan maam koe!» Yʋʋr tõe n yeela yagdã: «Yõa yaa nin-yaalga?» Daare y ka mi ye, sã n yɩ bilfu, la kõn le kaoos ye, Libã googa na n tedg n lebga wa zẽedo, tɩ zẽeda tedg n lebg googo! Baraare, wʋms na n wʋma sebra karengo tɩ zoeens na n tɩlg lika, b na n sɩnga yãeebo. Naong rãmb yĩnga, Soaala-Wẽnd na n yɩ-la b sũ-noogo; tɩ nimbãan-dãmb na n kɩdem b kɩdengo, a Israyɛl Nin-sõnga maasmẽ. Ade na-toosa kõn le rɩ naam ye, sẽn nong-ba n la b taaba, sẽn baood-b wẽng ne b taaba na n wãa zãnga. Neba na paam b mense ne sẽn kãnegd-b b taaba, la sẽn gãnegd-b bẽdgo, n na n paalg b taab bʋʋdo, n na n paalg ned sẽn ka tar a toorẽ yelle. Yaa rẽ fãa yĩnga la Soaala-Wẽnd kõt b koɛɛga, la a Zakoob ne a yagensa Wẽndã, Wẽnd ninga sẽn fãaga a Abraama yet woto: Yãnd kõn le yõk a Zakoob buuda ye, a zug kõn le sulg ye. Bãmb ne b kamba sã n wa yãend m sẽn na n tʋm tʋʋm niynsi bãmb sʋka, b na reeg tɩ yaa Soaala la maam, tɩ maam la a Zakoob Wẽnd sõngã. Rabeem na yõk-ba tɩ b pa saage n sãam a Israyɛl Wẽnda sũur ye. Bãmb sẽn dag n ka le tar yama b na sɩng n wʋm taab moore, bãmb sẽn da pa rat n deeg bũmbã, b na bas tɩ b karem-ba. Wẽnd n gomde: yell bee kom-bi-beesa zugu! B geenda geels sẽn ka mam rẽnd ye, b yõgda ne taaba zood sẽn ka tat m yam ye, la woto b rɩkda kongre n dogl kongr zugu. B yit n kẽnda Ezipt n yaool n ka reng n sok-m ye. B kẽnd n na n tɩ soonda Ezipt tãnsoben-doogẽ b kẽnd n na n tɩ soonda Ezipt dĩma maasmẽ. Mik Ezipt tãnsoben-doogo mik Ezipt dĩma sõngre, fãa na n waa ne b yãnde. M nee b taoor dãmba sẽn ta Tanis m ne b sẽn tʋm b rãmba sẽn zoe n be Anes. B raaba ka na n tõog n pids ye, Ezipt rãmb ka na n tõog n sõng-b ye, b ka na n tõog n maan bũmb b yĩng ye, dẽnd yʋ-sãoongo, dẽnd yãnd tʋkre. Rũms n yõrd ne zɩɩbo n tees nug rɩtgo. B sẽn kẽndã yaa pɛta, sũ-wẽnegr la war tẽngẽ, yaa bõnyẽes sẽn tar kaasg tẽngẽ, yaa boosr la wag-bãnd sẽn yɩgd n kɛɛdẽ tẽngẽ. Yaa be la bõeense ne yʋgma tʋk laogo, n dabda. B rabd n na n tɩ kõo nin-yaals sẽn ka tõe fɩ b yĩnga. Yaa rẽ yĩnga la m pʋd a yʋʋr woto: «A Gãe-tẽng-n-zabdẽ.» Soaala yeela a Izayi: «Kẽng marsã n bao bũmb n gʋlse, n gʋls Zerizalɛɛm dãmb taoore, t'a yɩ beoog raare kaset sẽn kõn menem.» Yaa bi-bees buudu, yaa zirẽ-be-rãmba sẽn pa rat n kelg Wẽnd gomd ye. B yeta sẽn ne-b bõn-bãna: «Sã n ya tõnd yĩnga, da yãend-y bũmb ye.» B yeta bãngdba: «Sã n ya tõnd yĩnga, da paam-y bãngre n wilg sɩd ye. Togs-y tõnd sẽn noom tõndo, belg-y tõnd ne bõn-faado. B sẽn dat tɩ bãngdba maan bũmb ninga, yaa b bʋdg n kẽ moogo yaa b bʋdg n bas so-sõngã. B yet-b lame tɩ b ra yɛs b taoore n tar goama la yaa Israyɛl Wẽnnaama, yaa Israyɛl Nin-Sõnga yell bal la b gomd ye.» Yaa rẽ yĩnga la Israyɛl Nin-Sõngã yeel yã: «Yãmb ka rat n deeg m saglgo ye, y sẽn teege, y sẽn dell b rãmba yaa sẽn nong-b n wẽoog b taaba, yaa sẽn nong-b n zãmb b taaba. Yel-wẽnd kãng sẽn na n wẽneg a soaba, yaa lalg sẽn tãs mugnum; lalga sẽn ya wokã, a na n põdame, n nuki, a na n kaoogame n lʋɩ vugri. Yaa woto me la tãnda rʋk wãagda; yaa pees la a tãsda tɩ tɩɩm ka ye; f kõn yãend peesa sʋka, pɛɛg sẽn tõe n mok bugum bug-toaalgẽ, bɩ sẽn tõe n zolg koom bãkẽ ye.» Yaa rẽ yĩnga la Soaala-Wẽnd yeel yã, rẽ yĩng la a Israyɛl Nin-sõnga yeel yã: «Y zʋga tekre n na n wa ne y fãagre la y laafi. Y sã n ket n teegd Soaala y na pid ne pãng la raoodo. La yãmb ka rat rẽ ye.» Yãmb leokdame: «Tõnd na n zoee ne weefo!» Y na zoe la d na gese. Y le yeelame: «D na kẽe bilim-bilm sẽn tar tĩiga.» Kato, ad-y sẽn pʋgd-b yãmba n yɩɩd ne tĩiga! Nin-yend bala, bɛ a ye bala seka a fʋʋs yãmb tusri; neb a nu sã n pʋgd yã, y gill fãa n na n kʋɩ tĩiga, la y wat n wa keesa nin-yende, wa tãb-kaoor sẽn laand a ye, tãng bɩ kunkubr zugu. Ad-y Soaala-Wẽnd gũuda b wakato n na n yik n maan-y sugri. N na n yik n zoe y nimbãanega, Soaala-Wẽnd yaa zemsg soaba: sũ-noog rãmba la sẽn teeg b bãmba! N-ye! Siõ rãmba, Zerizalɛɛm rãmba, y kõn le yãb ye. B sẽn wʋm y kosg bala la b sẽn wẽneg n deeg-a. Y pɛta pʋgẽ Soaala-Wẽnd na kõ-y rɩɩbo, la b yũnug-y koom, y sũ-pa-noanga pʋgẽ; sẽn da tog n zãmsa wã kõn le solg a meng ye, y nin na yãend yẽnda soaba. F tʋbr na wʋm koɛɛga, n wʋm sã n ya rɩtg bɩ goabg la f tog n kẽnge. Koɛɛgã n na n yeele: «Ad sor ning f sẽn tog n dɩke!» F na n gesa wa rẽgdo wanzurf la sãnem sẽn dɩk n bolg nin-naandsã; fo na n lob-b-la wala bõn-dẽgdo la f na n yeel-b lame: menem-y ka! Wẽnd na kõ-y-la saaga y kooda yĩnga, la tẽnga sẽn na n kõ-y rɩɩb ningã na n yɩɩ kũun sẽn ya zembala la sõmbo. Y rũmsa na n paama yamdo b wãbneg zĩ-yalensẽ. Niisa la bõeensa sẽn koodã, bãmb rɩɩb na n yɩɩ yamd sẽn kʋʋse, sẽn welg ne sagdo, sẽn dɩɩme la sẽn ning yamsem. Zɩɩma daagr poore, zaba la ro-wogda lʋɩɩs poore, tãng fãa, tãn-woko, tãn-bil fãa pennẽ, b na yãe koom sẽn zoete n zãgsd pʋto. Kiuuga vẽenem na n yɩɩ wa wĩntooga rẽnna, la wĩntooga vẽenem na n paasa naoor a yopoe, wala dasem a yopoe vẽenem sẽn naag taaba. Yaa wakat kãnga la Soaala-Wẽnd na n tɩp b neba noada la b sãoog pãbra sãmpoagã. Ges-y, Soaala-Wẽnd yita al yɩɩg n watẽ. B sũur wita wa bugum, wa bug-toaaga, b noor yiisda b sũ-fõora walem, b zelemda põngda wa barga. B noor pemsem yaa wa kʋɩlg sẽn pid n daannẽ, n limd n tat kokoɛ. B waame n na n go bu-zẽmba ne goaadg sẽn ka basd rẽok tɩ loog ye. B waame n na n ning salbre bɛɛba noorẽ, n paam n tall-ba n zãage. Sã n ya yãmba, Zerizalɛɛm dãmba, yãmb yɩɩlle na n yɩɩ sũ-noog yɩɩlle, a na n yɩɩ wala yʋn-sʋk kibsa rẽnna. Y sũur na pida ne sũ-noogo, wala f sẽn dʋʋd Soaala tãngã, tɩ wɩɩg peebdẽ, n dʋʋd n babsd Soaala a Israyɛl Pĩigã. Soaala-Wẽnd na n basa b koɛɛga t'a sãde wa nin-naab koɛɛg sẽn sãte, la b na n yãenda b nug sẽn zẽke n na n wẽ sũ-puur wẽebo, n na n widg bugum sẽn ka sugri, n na n kiig koom la sapɩlem. La Soaala-Wẽnnaam koɛɛga sã n sãde, Asʋr na n yɛɛsame. Soaala na n waa ne dasaare. Soaala-Wẽnd sã n wa pãbd ne dasaarã, yaa yam la b na n wilg ninsaala; gãngãoog bil la pɛndg me na n naagame n kũmdẽ n sokd Soaala-Wẽnd wẽedo. Yaa al daar zãra la wʋnga segl n yɛsẽ, la a bugma wita Asiri rĩma yĩnga. Wʋnga segla zĩ-vɩʋʋgẽ, zĩ-yalengẽ, wʋnga kɩbga bog-zulungẽ. Buguma sẽn na n widgã raado manegame n tigim, n tigim ka tɛka. Soaala-Wẽnd na n fʋʋsa bugma la a na n widgame, n widg wala kidbri bugum. Yell bee ne neb niyns fãa sẽn kẽnd-b Ezipt n na n tɩ bao sõngre, n teeg b wiid tĩiga, n teeg b bilim-bilm! B teega b wiidi wã, b teega b bilim-bilma tɩ b sõor ka be tɛk ye. B teega b wiidi wã pãnga. B yaool n ka teeg Israyɛl Nin-Sõnga baa bilfu, b yaool n pa sokd Soaala-Wẽnd daab ye. Wẽnd me ra tõeeme n wa ne sagl-sõngo, b ra tõee n wilgẽ-b lame tɩ b ka pʋlem Ezipt noog ye. B yeelame tɩ b na n yika ne nin-wẽnsã, n yik ne nin-yood niyns y sẽn kot b rãmb sõngrã. Ezipt ned yaa ninsaala, a ka wẽnd ye, b wiidi wã yaa nemdo, ka malɛgs buud ye, Soaala-Wẽnd sã n tẽeg b nug bala, la sõangda sẽn latemde, la a sẽn da waa a soab sõngrã na n konga sõngre, b yiiba na n naaga taab n ki. N-ye! Naaba-Wẽnd goma ne maam woto: «Bõnyẽega bɩ bõnyẽ-bila sã n yõk rũnga, n gãe n wũunẽ, ad-y yã a pa yɛɛsde, a pa suusdi; a toog ka ne pe-kɩɩmba kɛlenga, a toog ka ne pe-kɩɩmba gãngãada ye. Na n yɩɩ boto me ne maam, dũni fãa Soaalã. M na n siga Siõ tãmsã zugu, n zab m zabre. Wala luiili sẽn tẽegd b pɩgsa, n põgend b kamba, woto me dũni fãa Soaala na n gũu Zerizalɛɛm n lill-a ne a bɛɛba, n fãag-a, n bas n ka sɩbg-a, t'a tɩlge. Lɛɛg-y n wa kẽ yãmb sẽn bas a soab zãngã, Israyɛl kamba. Daar n wate tɩ ned kam fãa na n bas a wanzurfu, n bas a sãnem nin-naandse a sẽn kɩɩs n dõog ne a nugu. Pa sʋʋg sẽn ya ninsaal sʋʋga, n na kʋ Asʋr ye, la pa sʋʋg sẽn ya ninsaal sʋʋga n na n pas-a ye. A na n wudg n põsa sʋʋga la b na n paama a kom-bɩɩbã n kẽes tʋʋma. Asʋr ne pĩig ning a sẽn dellã na n diga rabeem wʋsgo, n zoe n looge, a tãnsoaben-dãmba sẽn wat n yãend Wẽnd tãb-kaoorã sẽn laande.» Yaa Soaala n togsd rẽnna, bãmb bugum n wit Siõ, bãmb bug-toaalga yõgna Zerizalɛɛm. Dĩm a ye n na n wa, la a na n dɩɩ naam ne zemsgo; nanamsa na n tũu noora sẽn date. B na n naaga taaba n yɩɩ wa lilli: sobgo, tɩ fo tɩ soond bãmba, saaga, tɩ fo tɩ soond bãmba. B na n yɩɩ wa kʋɩlse, war tẽnsẽ, b na n yɩɩ wa pĩig sẽn lug n tar maasem, maasem sẽn da ka tõe n saag zĩig ningã. Woto wã sẽn ne-ba nin kõn le mum ye, sẽn kelgd-ba yoogda b tʋba. Sẽn ka yaasd-b n tɩg yellã na yaas n baoo võore; bids zelemd na n lakame. B kõn tudg n bool gãeenga tɩ nin-tɩrg ye, b kõn tudg n bool zãmb-soaba tɩ nin-kãseng ye. Sẽn yaa gãeenga yiisda gãeen-goama, a sũur data wẽnga t'a baood a sẽn na n maanega, t'a baood Soaala-Wẽnd sãbsgo, t'a yet tɩ b bas kom sẽn tar b rãmba tɩ b bas-b ne pʋ-vɩʋʋgo, n bas ko-yũud sẽn tar b rãmba ne zelem-koɛɛnga. Zãmb soab baoodame n na wã neba, a baooda a yamẽ zirẽ-beed ninga sẽn na n bõn naong rãmba, ba b sã n yɛs b bʋʋm zugu. Sẽn yaa nin-tɩrga, yẽ tagsg yaa neer tagsgo, yaa zemsg la a baood bala. Pagb niyns sẽn ka yɛɛsd-b bũmbã, yãmb me yik n kelg m koɛɛga. Ka ne yʋʋmde la dasem a wãna, y na rigi, ka mi yɛɛsg rãmba; bãng-y tɩ ka ne kiuug a yoob soaba, ka ne Elul kiuugã, bugsuntung biis ka ket n na n tõs ye, kood me ka be n na n tigs ye. Dig-y rabeem, ka yɛɛsd bũmb dãmba, dɩka mi rabeem dãmba? Yees-y futu, kẽne y bɩlgemde, mobg-y y sɛɛg ne sũ-pa-noang fuug bala. Kelm-y kʋʋre, koaadba, yãb-y pʋtã sẽn da yɛs ne koodã, tɩɩsã sẽn da womd sõma wã; yãb-y tẽnga kʋʋre, tɩ marsã, a lebga gõose n lebg sɩlg-nao-yẽese. Sũ-noog zãaga ne tẽnga kẽedba, n zãag ne b sẽn da kɩdemd zĩig ningã. Dĩma zak lebga vɩʋʋgo, bʋʋr sɛɛ tẽnga pʋga, bogd sẽn kõn le yẽde n tu tẽnga pʋga, a lebga bõn-weese kɩdeng zĩiga, a lebga rũms wãbneg zĩiga. Wakat n wate, tɩ Soaala-Wẽnd pãnga na n sig-du. Wakat kãnga zĩ-peen-daaga na n lebga bãoogo, n lebg googo. Zĩ-peen-daagẽ b na tũ noorã sẽn yalse, la bãoogẽ, zemsg na n siga be. Zemsga na n waa ne laafi, noora tũubu na n waa ne zĩ n ka mi rabeem, la na n yɩɩ daar buud fãa. M neba na n kẽe laafi tẽnga, n tar dot sẽn tõe n gũ-ba, n tar zags sẽn ka wãgd ne bʋʋr ye. Dẽ tɩ sapɩlma kaoo googa tɩɩse, dẽ tɩ tẽnga me paam n siigame la yaa siigr kãsenga. Y na n lebga sũ-noogo rãmba, tɩ y na bʋda koom sẽn be zĩig ning fãa, la naaf bɩ bõanga kõn le za ye. Yell ne foom, wãab naab sẽn põs wãabo, zãmb soab sẽn põs zãmbo! Fo sã n wã n sɛ, wakat kãng la b na n wã foom me, fo sã n zãmb n sɛ, wakat kãng bal la b na zãmb foom me. Soaala-Wẽnde! Zoe-y tõnd nimbãanega. Tõnd da teega yãmba, yɩɩ-y tõnd pãng beoog sẽn vẽege, yɩɩ-y d fãagre, d sũ-sãanga pʋgẽ. Yãmb tãsame tɩ ninsaalb kʋɩ tĩiga, yãmb yik n yalsa yĩngri tɩ b lob naoore. B na n wʋka teedã sẽn bar n lʋɩ wã wala b sẽn wʋkd sʋya la wa sʋʋr sẽn zɛɛd koodo, woto me la b maan ne zɛɛdã. Soaala-Wẽnd paam pẽgre, bãmb sẽn zao b yĩngri zaoorã, n pidsd a Siõ ne zemsgo la sõmblem! La sã n ya yãmba, Soaala-Wẽnd buudu, Wẽnd na kaoos-y ne laafi! Paam yam vẽenem, paam n bãng Wẽnde, dẽ n wat ne fãagr-yõodo. Bãng Soaala-Wẽnd waoogre, dẽ n na n yɩ f fãa-fãa! Ges-y-yã a Ariyɛl neba sẽn yãbd soya zutu, b sẽn tʋm b rãmba ne laafi koɛɛga lɛɛg n watame la b yãbd yãb toogo. Soya lebga vɩɩdo, ned ba a ye ka le lood be ye. Na-toaaga sãama zoodã, a riga zooda yõgb kaset rãmba; a sẽn mi yaa neba sãbsg bala. Tẽnga yãbda kʋʋre n faagdẽ, yãnd tara Libã t'a lʋɩtẽ. Sarõ lebga dasempʋɩɩga, Bazã, ne Karmɛl lebga wa zɛɛga. M yikdame marsã, m yikda yĩngri, Soaala-Wẽnd n gomde. Yãmb dɩka mood pʋga, la y na n doga mo-kila, la wala bugum, m noor pemsem na n dɩ-y lame. Bu-zẽmbã, ad-y b na n yõog-b-la bugum, b na n dɩɩ bugum wa gõos sẽn kʋʋs n same. Sẽn be-b al yɩɩga, kelg-y m sẽn maane! Sẽn pẽ-ba, ges-y m pãnga sẽn tõe bũmb ninga! Yel-wẽn-maandba zĩi ne yɩɩre, Siõ, sẽn ka zoet-b Wẽnd nifã, digdame. Ãnna n tõe n yals bug-vɩɩga a woto taoore, ãnna n tõe n yals bug-walem a woto taoore, bug-walem a woto sẽn ka boogd taoore? Yaa sẽn mi a zemsgo, sẽn togsda sɩda, sẽn ka nonga wagdem, sẽn vẽsda a nugu n pa rat n bas tɩ b kõ-a ligdi tɩ bʋʋda tũ rẽ n golme, sẽn ka kelgda zɩɩm na raag goama, sẽn ka rata wẽng gesgo n mumd a nini. Yẽ soab zak bee yĩngri, a soab kẽe yir sẽn kõn wã, la sẽn me pĩig zugu. F nin na n yãee dĩm sẽn yɛs ne rasãndlem, f na n yãee tẽng ne yalem. F na n tẽega bũmb ning sẽn da yɛɛsd fooma: «Sẽn da saada n sogsdẽ wã bɛɛ? Sẽn da saada n sõt fadga ligd bɛɛ? Sẽn da saada n get lal-gũbra manegra bɛɛ?» F kõn le yãend buud sẽn pid ne tɩtaam ye, sẽn gomd-b goama tɩ b pa tõe n wʋma ye, sẽn gomd gom-zẽnd sẽn ka tar võor ye. Ges Siõ, d kibs bɛda tẽnga, ges Zerizalɛɛm, laafi tẽnga; a yaa wala roog sẽn ti ne pɛɛla t'a biili wã pa na n tol n le feoos bada, t'a wĩr ba a ye ka na n le kaoog bada. Yaa tẽng kãng pʋgẽ, la Soaala-Wẽnd na n wilg b pãnga, tẽnga na n paama kʋɩlse, a na n paama kʋɩls sẽn ya yalense, la zab-zabdb koom-kogend kõn kẽ be ye, koom-kogend bɛda ka na n dugs be ye. Soaala-Wẽnd n wilgd tõnd sore, bãmb la tõnd sɩleto bãmb la tõnd dĩma, bãmb la tõnd Fãagda. Kogenda wĩ wã yolsame n ka le sog da-woka ye, b pa le loet tãb-kaoorã a zug ye. Laoga sẽn paama la b na n zĩnd n pʋɩ. Ba kar-kegda fãa zĩnda zɛɛbẽ wã. Ned ba a ye kõn tõoge n le yeel Zerizalɛɛm pʋgẽ t'a ka keem ye. La neb niyns sẽn be tẽnga pʋgẽ na n paama b yel-wẽna sugri. Kolg-y-yã, bu-zẽmba, kolg-y, yoog-y y tʋba; tẽnga ne sẽn be-b a pʋgẽ wã, fãa yoog b tʋba n kelge! Soaala-Wẽnd sũur puuga ne yãmb fãa, b sũur fõta ne bu-zẽmba fãa, tɩ b kãab tɩ b na wã-ba, la b na kood b fãa. Sẽn kood b rãmba, b lobd-b-la sor zugu tɩ yũuga reeg zĩig n yãmbe. Ges-y zɩɩm sẽn zoet n sigd tãmsã! Yĩngr teeda fãa na n lebga zũnd-zãnde, saaga na n paga wa sebre b sẽn dat n bĩngi, ãdsa ne b bugma na n sʋʋga zãnga, wala bugsuntung vãad sẽn dʋʋgde bɩ wala kankang vãado. Soaala n gomd woto: yĩngri, m sʋʋga tɩga zɩɩm la a tɩga zɩɩm wa ned sẽn tɩg rãam. Ad-a sẽn lʋɩt a Edom zugu, Edom ninga m sẽn kãab sɩbgrã. Soaala-Wẽnd sʋʋga lebga zɩɩm, n mad ne kaam, zɩɩma yaa pe-bi la boees dẽnna, kaama yaa pe-raada yɩɩma rẽnna. Maoongo la Naaba-Wẽnd kʋʋd Bosra, koodgo la Soaala-Wẽnd koot Edom. Ka yikayã la b na n gãneg ye, yaa ninsaalba, ka niis la b na n kood ye, yaa kom-koeemsã; b na n yɩɩ sʋʋg rɩɩbo, b tẽnga na n tɩga zɩɩm, a toma na n gĩsa ne kaam. Yaa Soaala-Wẽnd sũur dokre daare, yaa Siõ gũuda daood yʋʋmde. B kʋɩlsã lebga ka-sablgo, tɩ tẽnga tom ya kidbri, tẽnga tõre na n lebga bugum, yʋng la wĩntoog bugma kõn ki ye, a bug-zõosa dʋʋda yĩngri, wakat buud fãa; tẽnga na n lebga zĩ-peen-daaga, tɩ zamaan pʋg taaba; ned ba ye kõn le tũ be meng ye. Tẽnga na n lebga bakardo la yʋgenpɛl na-tẽnga, viuug la gãoobgo na n kẽe be. Soaala-Wẽnd na n kɩtame t'a lebg ween-vɩʋʋgo, Soaala-Wẽnd na n sarem-a-la zãnga. Wãams na n ti-la b rot be, na-koms kõn le zĩnd ye, naam kõn le deeg be ye, na-biisa fãa na n kiime. Gõos na n yii do-neeba pʋsẽ, sɩlg-nao-yẽese la pulgumdi na n yii be, na n yɩɩ we-baas zaka, na n yɩɩ na-neend vagse. We-yũus ne kata na n kõo taab sɛk be, wãams na n boola taab be. Be la bõn-nind a Lilit na n wũundi be la yʋng naab a Lilit na n paam n vʋʋse. Põeere na n paama a roog be n lob a gɛla, n wũnug-ba, n wek-ba. Yɩbrend na n tigma taab be, ned kam fãa ne a tũud-n-taaga. Lak-y Soaala sebre n karem sẽn gʋlse: B nin-yend meng kõn pa poorẽ ye, ba a ye sũur kõn kiuus a tũud-n-taag poorẽ ye, tɩ yaa Soaala-Wẽnd meng noor n yet tɩ b maan boto; yaa bãmb n tʋlg tɩ b tigim taaba. Soaala-Wẽnd tũusa pʋɩɩre ned kam fãa yĩnga, b magame n pʋɩ tẽnga zãnga, b neba n na n soog-a la b zĩnd a pʋgẽ zamaan sẽn wate. Tẽns sẽn ya zĩ-peen-daase, tẽns sẽn kʋɩ, lang-y sũ-noogo, la ning-y puudu. Ypuda reeg b pʋtã n weke; tẽng koɛɛnga yɩge la a sao la a kelem sũ-noogo! A na n paama ziir wa Libã n paam ziir wa Karmɛl la Sarõ; yaa Wẽnde, tõnd Wẽnda la d Soaala, bãmb vẽenema la b ziirã n na n bui-a. Kɩt tɩ yaamse da kẽ nus ye, kɩt-y tɩ rũma da le rig rabeem ye. Yeel-y yɩɩr sẽn tar b rãmba: «Aya! Keng-y y sũuri, da zoe-y rabeem ye, Soaala n wat n na n dok b sũuri, b wat n na sɩbga b bɛɛbã, b wat n na n fãag-y lame.» Wakat kãnga zoeens nin na n pukame, wʋms tʋb na n yoogame. Woabg na n wudga wa walga, muk zelemd na n pãra a sũ-noogo. Zĩ-peen-daag na n bula koom, ko-zoetem na n zoe zĩ-pɛɛlẽ. Dasempʋɩɩg na n lebga bãoogo, ko-yũud tẽng na n tẽgna ko-yɩlma, we-baas tẽnga na n lebga rudma la bãng-n-sãag sẽn pag n yɛsẽ. So-raoog na n pɩʋʋga be, tɩ b bool-a tɩ sor sẽn welg toore; nin-dẽgd soab pa rɩkd so-kãng ye, Soaala meng n na n pak sorã, gãeems kõn saag n tũ so-kãng ye. Bõnyẽeg kõn le zĩnd ye, we-rũng kõn le tab be ye; b sẽn fãag b rãmba bala n na dɩk so-kãnga. So-kãng la Wẽnd sẽn fãag b rãmb na n dɩke, b na n waa Siõ, n kaasd sũ-noogo, b nensa na n pɩla ne sũ-noog sẽn ka be sɛɛb ye. Kɩdengo la saooga n kelle, namsgo la waasgo sɛɛme. A Ezekiyas sẽn wa n dɩt a yʋʋm piig la a naas naam, Asʋr dĩma, a Senakerib, taka zabre ne Zɩɩda tãnsoben-tẽnse la a tõog-b lame. Asʋr dĩma zĩnda Lakis n tʋm Zerizalɛɛm, a Ezekiyas nengẽ, a meng sõgne ne tãb-biis wʋsgo. Sõgna kolga pipi ko-baoora ko-sorã, fu-pɛgdba pʋʋga sor zugu. Neb n yi n tɩ seg-a. Yɩ-la a Ilkiya biiga, a Eliyakim, yẽ n get dĩma zak yelle, n paas a Sebna, yẽ la sɛba gʋlsda, la a Azaf biig a Zoa, yẽ n deegd koeesã n togsdẽ. Asʋr tãnsoaba sõgna yeel-b lame: «Kẽng-y n taas a Ezekiyas Asʋr dĩm kãsenga, koɛɛg kãnga. ‹Ãnda soaba la f sẽn dɩk f yɛla fãa n bas a soab nugẽ wã? Fo tẽedame tɩ zabre zabda ne wakre goama bala tɩ zĩnd n yẽs ka lʋɩ taoore, tɩ raood ka be sũurẽ? Fo teega bõe n na n yik n zẽk f zugu ne maam. M mi tɩ f teega Ezipt la! La Ezipt ka rudum kãoonga laa? A tɛka yaa kõs n sãag nug ninga sẽn palga yẽ wã, la neb niyns fãa sẽn teega yẽ wã.› Daare f na n yeel-m lame: ‹Yaa Naaba-Wẽnde la f teeg yã! M sok n gese, ka bãmb waoogr zĩisi la f sẽn wã wã laa? Ka foo n kõ noor Zɩɩda ne Zerizalɛɛm dãmba tɩ b ra le waoog Wẽnd zĩig a to sã n ka Zerizalɛɛm maan-kugra taoor bal laa?› Dɩlla, yẽs ne Asʋr dĩma, m zu-soaba, la a sã n sake, m na kõ-f wiidi tus a yi f sã n tõe n paam wed-dʋʋdb sẽn na n zomb-ba. La rẽ sẽn ka wã, fo yɩta a wãn tɩ tõnd zu-soaba tãnsoab-bila a ye meng tar n leb poorẽ? Ka Ezipt la fo teeg n na n paam bilim-bilm la wiidi bɩ? La bũmb a to me la m na n soke: yãmb tẽedame tɩ mam dĩma kẽe yãmb tẽnga n na n wã-a tɩ Naaba-Wẽnd zɩ tiiri la b ka sak bɩ? Yaa Naaba-Wẽnd n yeel-ma: tak zabre ne tẽn-kãnga n wã-a!» Dẽ la a Eliyakim, a Sebna la a Zoa yeel a Rabsas, tãnsoaba sõangda: «D kotame tɩ f gom ne-do ne Aram dãmb goama tɩ d wʋmdame la f ra gomd ne-do ne tõnd buuda goama tɩ neba sẽn zao lal-gũbrã wʋmdame.» La a Rabsas leokame: «Yaa ne yãmba bɩ ne y zu-soaba la m wa ne koɛɛga laa? M yet yaa sẽn zao-b lalga zugu la b tʋm-m tɩ m wa togse? M yet tɩ yaa tãb-biisã sẽn kong n naag yãmba n dɩt b bĩndu la b yũud b rʋʋdma?» Sõgna yika yĩngri, a pora ne Zɩɩda rãmba goama: «Kelg-y dĩm kãsenga koɛɛga, Asʋr dĩma koɛɛga. Asʋr dĩma tɩ m togs y woto: ‹Da bas-y t'a Ezekiyas belg-y ye. A ka na n tõog n fãag-y ye. Da bas-y t'a Ezekiyas belg yã n yeel-y tɩ y teeg Wẽnd bala, tɩ b na fãag yã, la tẽnga kõn lebg Asʋr soolem ye. Da kelg yã a Ezekiyas ye, tɩ Asʋr dĩma yet-y-la woto: Maan-y zood ne maam. Bas-y tɩ m soog yã tɩ woto ned kam fãa na rɩ a bugsuntung la a kankang biisi, la a yũ a bulg koom, n gũudẽ tɩ m wa tall-y n kẽng tẽng sẽn wẽnd yãmb dẽnna, tẽng sẽn sakd alkam, n tar koodo, n tar bugsuntund la rãam. Da bas-y t'a Ezekiyas belg yã n yetẽ: Naaba-Wẽnd na fãag-do. M sok n gese buud a taaba wẽnd dãmba tõogame n fãag b meng tẽng Asiri dĩma nugẽ bɩ? Amat la Arpad wẽnd dãmba bɛɛ? Sefarwayim wẽnd dãmba bɛɛ? B tõog n fãaga Samari mam nugẽ bɩ? Samari wẽnd dãmba bɛɛ? B deega a Samari mam nugẽ bi? Tẽnsa fãa sʋka, tẽn bʋg wẽnd dãmba n tõog n fãag a tẽng mam nugẽ, tɩ yãmb Wẽnd na n fãag Zerizalɛɛm m nugẽ?› » B fãa yɛsa sɩɩ n pa tol n leok-a ye, tɩ dĩm a Ezekiyas ra kõ-b-la noore tɩ b ra leok-a tɩ bũmb ye. Sõgen kãsenga a Ilkiya biiga, a Eliyakim, n paas sɛb gʋlsda, a Sebna, la a Azaf biiga, a Zoa, dĩma no-rɛɛsa, taka b fut n kẽese la b lɛɛg n waa a Ezekiyas nengẽ la b wilg-a-la Asʋr daoa sẽn togse. Dĩma Ezekiyas sẽn wʋm goama, yẽ me kẽesa a futu, n bao sũ-pa-noang fuug n yeelge n dɩk wẽnd doogã sore. A kɩtame t'a Eliyakim, a Sebna la maan-kʋʋdba taoor-dãmb me yeelg sũ-pa-noang futu t'a tʋm-ba a Amos biiga, a Izayi, nengẽ. B yeela a Izayi: «A Ezekiyas koɛɛg la woto: ‹Dũnna yaa sũ-sãanga, sɩbgre la yãnd daare. Pʋga bɩɩme la pãng ka n dogdẽ ye. Daare Wẽnnaam f Soaala wʋma tʋɩ niyns Asʋr dĩma sõgen sẽn wa n tʋ Vɩɩm-Naabã la daare b na sɩbg-a. Woto wã maan pʋʋsgo m neba sẽn kella yĩnga.› » A Ezekiyas sẽn tʋm b rãmba sẽn ta a Izayi taoore, a Izayi yeel-b lame: «Y na tɩ togs y zu-soaba tɩ Wẽnd koɛɛg la woto: ‹Da maan dabeem ne goam niyns f sẽn wʋma, ne tʋʋr ning Asʋr dĩma sõgna sẽn tʋʋs maama ye. Ad-m sẽn na n walma bũmb ninga: a na n wʋma bũmbu n zoe n leb a tẽngẽ la a sã ta a tẽngẽ, m na n kɩtame tɩ sʋʋg kodg-a, a meng tẽngẽ.› » Asʋr tãnsoaba sõgna leba a tẽngẽ la a tɩ yãenda rĩma. Wakat kãng tɩ rĩma ra takda zabre ne a Libna. Sõgna ra wʋmame tɩ dĩma da yii Lakis n wa. La rẽ yaa a sẽn da wʋm kibare tɩ Nubi dĩm a Tiraka bobame n wat n na n zab ne-a. Asiri dĩma wʋma kibarã la a tʋma neba tɩ b tɩ yeel Zɩɩda dĩma, a Ezekiyas: «Da bas tɩ f sẽn teeg Wẽnd ninga wa belg-fo n yeel-f tɩ Zerizalɛɛm kõn lʋɩ Asʋr dĩma nugẽ ye. Fo wʋma Asʋr dĩm dãmba sẽn maan ne tẽnsã fãa, b sẽn kãab beedã la fo tẽedame tɩ fo na põse? Tẽns niyns m ba sẽn wã wã, b wẽnd dãmba tõogame n deeg-ba? Tẽeg Gozã, Arã, Resɛf la Telasar, Edenitsa na-tẽnga! Sok f memg n gese: Amat dĩma bɛɛ, Arpad dĩma bɛɛ? Layir, Sefarwayim, Ena la Iwa dĩm dãmba bɛɛ?» A Ezekiyas deega sebrã b sẽn tʋm b rãmba nugẽ, n karem la a yikame n kẽng wẽnd doogẽ, a laka sebrã n dɩgl Wẽnd taoore. A pʋʋsa woto Wẽnd taoore: «Dũni fãa Wẽnde, Israyɛl Wẽnnaam, yãmb vigla y zaoora al yĩngr-yĩngri, yãmb y ye la dũni wã fãa Wẽnnaam, yãmb n maan yĩngri la tẽnga. Bɩ y yoog y tʋbre, m Soaala, n kelge; puk-y y nini, Soaala, n gese. Kelg-y yã a Senakerib goama, t'a tʋmame tɩ b wa tʋʋs yãmba, Vɩɩm Naaba-Wẽnde. Yaa sɩda, Asʋr dĩma wãa buud ka tɛka, a wãa tẽns ka tɛka. B loba b wẽnd dãmba bugmẽ tɩ ra yaa wẽn-faado; ninsaal nugu n da pees raad bɩ kuga, yaa rẽ la b tõog n menes-ba. La marsã Soaala, tõnd Wẽnnaam, fãag-y-do a Senakerib nugẽ, tɩ tẽng zug rãmb fãa na bãnge, Soaala, tɩ yãmb bal la Wẽnde.» A Amos biiga, a Izayi, tʋmame tɩ b tɩ yeel a Ezekiyas: «Woto la Israyɛl Wẽnnaam leokd kosgã f sẽn kos dĩma a Senakerib yĩnga. Kelg kãab beed niynsi Wẽnd sẽn kãabd-a: Ad Siõ bi-pugla laada foom, a pursda foom, Zerizalɛɛm bi-pugla yĩgsda foom. Ãnda la fo tʋʋs yã n paoog-a? Ãnda poorẽ la fo gom beedo? Ãnda taoore la f zẽk f zug ne nagre? Ad yaa maam, a Israyɛl Nin-sõngã. Fo tʋma neb tɩ b wa tʋʋs-ma, maam Naaba-Wẽnde, fo yeelame: Maam a Senakerib, m tara bilim-bilm ka tɛka, la yaa ne bãmb la m dʋ tãms ka tɛk zug tẽnsʋka, m taa Libã sẽn lug n sãdẽ wã, m kʋʋsa tɩ bɛda googo, m kʋʋsa a tɩ neebã, m bʋʋg-a-la a soondg zĩigẽ, a tʋgra pʋgẽ. Maam a Senakerib, m tuu bulsi la m yũu tẽn-zẽng koom, m nao kẽe Nil kʋɩlga pʋgẽ n kʋɩɩs-a m naoor sẽn tabg Ezipt bala. Sãnd fo miime, Senakerib, tɩ al daar zãra mam segla m seglgo n na n wã foo? M sẽn zĩnd n bʋgsã la m na pids rũnna Mam da kõo foo tõogo tɩ f kɩt tɩ tẽn-bɛd lebg raboodo. Tẽnsa rãmb nus da maagame, b pãng ra sɛɛme, rabeem la yãnd tar-b lame tɩ b lebg wala pʋt moodo, wa mood sẽn sele, wa tɩɩs sẽn yit roog zugu, bɩ pʋ-wees mood sẽn nan ka bɩ n yãg n sʋʋgdẽ. Ad mam mii f sẽn yikd wakat ninga, m mi f zĩndigu wakato, f kẽed bɩ f yita m miime, m mi f sẽn wuk n zĩ ne sũ-puur wakato, La f sẽn puug f sũurã ne maama yĩnga, f sẽn yiis tɩtaam goam tɩ lʋɩ m tʋbrẽ, m na vʋdg f yõore n sog bãnga, n ning salbre f noorẽ, n kɩt tɩ f rɩk sor ninga f sẽn tũ a soab n wa wã. Woto n na n yɩ makre f yĩnga: rõanna, ka-yiisem la y na n dɩ; vẽere, ka-yogdo biisi, la yʋʋm yita bʋd-y-la y tigsi, sel-y tɩɩse la y rɩ b biisi. Sẽn na põs Israyɛl kamba sʋka m na n yiisa yẽgen paal tẽngre, la b na n wom biis b wilẽ. Kelle n na n kell Zerizalɛɛm, bũmb n na n põs Siõ tãnga zugu.» A Izayi paasame: «Yaa woto la dũni fãa Wẽnd na n maan b nonglma sẽn ka mi maagra yĩnga. Yaa rẽ me yĩnga la Soaala-Wẽnd gomd woto Asʋr poorẽ: ‹A kõn kẽ tẽn-kãnga ye, a kõn tão a pĩim ye, a kõn zẽk a gãong ye, a kõn sam tãndo n gilg-a ye, sor ninga a sẽn tũ n wa wã a na tũ so-kãng n lebe, a kõn kẽ tẽn-kãnga ye. Dẽ yaa maam a Wẽnd n yeele. M na n gũu Zerizalɛɛm la m na fãag-a lame, m meng yĩnga la m sõgen a Daviid yĩnga.› » Badaare yʋngo, Soaala-Wẽnd malɛka kẽnga Asʋr dãmba gãagẽ n kʋ neb tus koabg la pis-nii la a nu. Yibeoogo, sẽn loog-b be yãenda kũum bala. Asʋr dĩm a Senakerib yika a tãpã n looge, a tees n paa Niniv, a na-tẽnga. Daar a ye, a Senakerib kẽ a wẽnd a Nisrok roogẽ n pʋʋsdẽ t'a meng kamb a yiibu: a Adramelɛk ne a Sarezɛr n kɛɛ-a ne sʋʋga n lɛɛg n zoe n dig Ararat. A Asaradõ, a Senakerib biig a ye, n led a zĩiga. Wakat n zĩndi tɩ bã-kʋʋdg yõk a Ezekiyas; bãngda Izayi, a Amos biiga, wa n yãend-a lame n yeel-a: Soaala gomd la woto: «Marsã, maneg f zaka yɛla tɩ f bãaga na n tõog-f lame.» A Ezekiyas wẽnemda a neng n tees a roog lalga la a pʋʋsa Soaala-Wẽnde. A yeela woto: «Ade, Soaala-Wẽnde, tẽeg-y neere tɩ mam vɩɩnda wala y sẽn date; m pelga m sũuri n tũ yãmba, m maan sẽn ta y yam.» La a Ezekiyas yõka yãbre. Soaala-Wẽnd yeela a Izayi t'a gom ne a Ezekiyas: «A Daviid Wẽnnaama koɛɛg la woto: ‹M wʋma f koɛɛg, m yãe-la f nintãm. M na n paas-f-la yʋʋm piig la a nu. M na fãag-f lame la m fãag Zerizalɛɛm Asʋr dĩma nugẽ, m na n gũu tẽngã.› » A Izayi yeelame: «Soaala na n kõ-f-la makre tɩ f bãng tɩ b na n pidsa b sẽn kãabã. Ade, a Ezekiyas tũuda teedse n dʋʋd a roogo; teedsa ra bee wĩntoogẽ, n wa n kẽe maasmẽ. Bãng tɩ Soaala na n kɩtame tɩ maasma le yõbg teeds piiga!» La sɩda, maasma le yõbga teeds piiga, n leb poorẽ. Ad yɩɩll ninga, Zɩɩda rĩma, a Ezekiyas, sẽn yɩɩle a bãaga sẽn wa n sãooge: M da yetame: m vɩɩnda m vɩɩma pʋɩ-sʋk bala n na n zoe n looge, n na n zoe n loog kɩɩmsa sẽn beẽ wã, n tɩ baas bogra sẽn pa wã. M da yetame: m kõn le yãend Soaala nin-vɩɩsa zamaanẽ ye, m kõn le seg ned ba a ye tẽng zug ka ye. Roog ning m sẽn da kẽedã, sobg looga yɩɩg ne-a, wala rũm-kɩɩm sẽko. B wʋka m vɩɩma wala sʋlg sẽn wʋkd a peende, n vili n sɛ n kedg n kʋʋg gĩsgã. Ka ne zaabra bala, Soaala, tɩ y sɛɛ ne maam, ka ne beoogo tɩ kũuma looga ne maam. Soaala wera m kõaba wa bõnyẽega, n-ye! Ka ne zaabrã tɩ m yell sɛɛme. M fɩɩnda wala sɩlaalle, la m guusda wa walle. M gesa yĩngr tɩ n nin yiigi. M yɩɩra pʋgẽ, Soaala, maan-y bũmb n kõ-ma! M na n yeelame tɩ bõe? M na n yeela yãmb tɩ bõe? M yet yaa bãmb n wa ne rẽ fãa wɛ! M sũ-tooga labsa tɩ gõeem yɩk n bas-ma. Soaala, yãmb da mii tiiri, y ra mii yɛl niyns sẽn na n pak-ma fãa la y le vʋʋg-m lame, y le waa ne pãn-paalga, y kell n wogla m yõore. M tooga na n tedgame n lebg m laafi y nonglma yɩɩ wʋsgo, tɩ y põsg-m ne kũum; y teeba m yel-wẽna n lob y poorẽ la y teeb-b lame n lob al yɩɩga. Kɩɩmsa ka mi yãmb pẽgr ye, ka sẽn gãe-b tẽngã n na n kils-y ye. F sã n sig yaoogẽ n sɛ, ne y nonglma sẽn ka tɛka, saagr ka le bee n saagdẽ ye. Nin-vɩɩsa bal n tõe n pẽg yãmba, wala mam sẽn ket n maand dũnna wã, wala ba rãmb niynsi sẽn ket n tõe n wilg b kamba tɩ yãmb ka yɛɛd ne ninsaal pʋgb ye. Soaala, yãmb fãag-m lame. Dẽ la d na kils yãmb ne yɩɩla d vɩɩma fãa pʋgẽ, y ro-sõnga pʋgẽ, Soaala! A Izayi yeela woto: «Bɩ b to kankama n bɛ zĩig ninga sẽn zabdã tɩ rĩma na sãooge!» Dẽ la a Ezekiyas sok yã: «Makr bʋg la f kõt-ma tɩ m na n le tõog n taa wẽnd doogẽ?» Wakat kãnga, Babilon dĩma a Baladã biiga, a Merodak-Baladã, da wʋmame t'a Ezekiyas lʋɩ bãaga la a sãoogame. A toola sebre la kũuni tɩ b wa kɩs a Ezekiyas. A Ezekiyas sũur yɩɩ noogo t'a na n wilg b sẽn tʋm b rãmba a arzɛka roogo, a wanzurf la sãnem, wisdu, kaam sẽn tar yũ-noogo, a zab teedo, bũmb ning fãa sẽn da be a rotẽ wã. Bũmb ka pa a zakẽ la a soolma pʋga t'a Ezekiyas ka wilg ye. Dẽ la bãngda wa n yãend-a n sok-a: «Nin-bãmba yeelame tɩ bõe? B yii yɛ?» T'a Ezekiyas yeele: «B yii al zĩig sẽn zãrẽ, al Babilon n wa ges-ma.» T'a Izayi na n yeele: «Bõe la b yãe yãmb zakẽ wã?» A Ezekiyas yeelame: «B yãenda m zaka teed fãa, m sẽn bĩng rotẽ wã fãa, bũmb ka be b sẽn ka yãend ye.» T'a Izayi yaool n na n yeel: «Kelg dũni fãa Wẽnd koɛɛga: ‹Daar n wate, la bũmb ninga fãa sẽn be f zakẽ wã, f saam-dãmba sẽn tigs bũmb ninga fãa gill na n looga Babilon. Bũmb ba a ye kõn pa, Wẽnd n yeele!› Fo kamba sʋka, fo meng kamb sʋka, kẽer na n lebga zu-soaben-dãmba, Babilon, dĩma zakẽ.» A Ezekiyas leoka a Izayi: «Ad ket n yaa Wẽnd koe-noogo la f sẽn wilgd-ma.» A ra yeta a sũurẽ: Sã n ya woto, m sã n ket n vɩ, m na kell tɩlg yɩɩre la m yãend laafi. Yaa yãmb Wẽnda koɛɛga: «Maas-y m neba sũuri, la yɩ tao-tao! Gãneg-y Zerizalɛɛm dãmb yam, Yeel-y-b tɩ b yembda sɛɛme, tɩ b yel-wẽna paama sugri, tɩ b paama sɩbgr m nengẽ, n yao b samda naoor a yiibu.» Koɛɛg n moonde: «Ges-y we-raoogẽ wã n segle, n segl sor Soaala-Wẽnd yĩnga. Kõog-y so tɩrg zĩ-peen-daagẽ kõog-y so tɩrg n kõ d Wẽnde. Long buud fãa yẽde, tãng la kunkubr fãa sarme, sẽn zẽk fãa lebg bõn-langa, kunkuba lebg tẽn-nabre. Yaa wakat kãng marsã la Naaba-Wẽnd na n wilg b ziiri la ninsaalb buud fãa na bãnge, tɩ Soaala-Wẽnd noor n gome.» Koɛɛg n yete: «Moone!» Tɩ m leoke: «M moon bõe?» T'a yeele: «Moon woto: moon tɩ ninsaal ne moog zem taaba, moon tɩ ninsaal keglem ne puug zem taaba. Moog kʋɩtame, puug zelgdame, Wẽnd pemsma sã n bui-b ne pãnga. N-ye, ninsaal keglem, moog rẽnna! Moog kʋɩtame, puug zelgdame, tõnd Wẽnda kãabg bala n yɛs wakat buud fãa.» Zerizalɛɛm dãmba, neb sẽn zao tãn-lug-lugi Siõ rãmba, zẽk-y y koɛɛga. Yaa kiba-noog la y wat n na n togse, bɩ y ra zoe rabeem la y moon tɩ b wʋm-a. Yeel-y Zɩɩda tẽnse: «Baad-y y Wẽnde. Ad Soaala-Wẽnde, b wata ne pãnga, Bũmb pa tõe tɩ b pa rɩ naam ye, b sẽn zab n paama yãagd-b lame, n watẽ b sẽn nams n paama lʋɩta b taoore. B wẽnda pe-kɩɩma, sẽn kɩɩmd a piisi, n zẽkd a kang bala tɩ b wẽneg n tigim taaba; a põkda pe-bi wã a yãoogẽ, a lekda pe-yãansã sẽn yẽsemd kamba, tɩ b kẽ maasmẽ.» Ãnda n mak mogrã koom a nug koorẽ? Ãnd n yaag a nus-bi n mak saaga yalem? Ãnda n mag tẽnga tom ne peoogo? Ãnda n mag tãmsã la tãm-bi wã zɩslem? Ãnna n mag Soaala yama zulum? Sagend a bõe n zĩnd b sɛɛgẽ n walem-ba? Ãnda la b yɛdg n wilg b sẽn dat n maane? B zĩnda ne ãnda n yẽse? Ãnna la b zãms t'a bãnge sẽn tog n maane? T'a bãng sẽn tog n bãnge? N bãng tʋʋmda sẽn tʋmd ne bũmb ninga? Ãnna zãms b sɩlem? Soaala-Wẽnd nifẽ bu-zẽmba ka zem ko-beelle sẽn yi sĩn-bil noorẽ n lʋɩ ye. B zɩslma pa yɩɩd bĩisri beell zɩslem ye. Ad-y Soaala-Wẽnnaam nusẽ tẽn-zãorgẽ dãmba pa yɩɩd tom bilfr bal ne zɩslem ye. Libã googa rũms ka sekd maoong sẽn tog ne bãmb ziira ye, Libã googa tɩɩs ka sekd maoonga bugum raad ye. Ninsaalba sẽn naag taaba ket n yaa zaalem bãmb yĩnga, yaa zaalem a nare. Ãnda la y na gese n yeele: woto la Wẽnd wẽnego! Bõe la y na n dɩk m mams ne Wẽnde; Y na mak-b ne wẽn-naande? Wẽn-naanda yaa yõak n dõoge, tɩ tʋʋm-mit bao sãnem n bole, n bao wanzurf yãndo n ning ka la ka. F pãng sã n ka sek f na rɩk wanzurfu f baooda raoogo, yõgdre sẽn na n wẽneg n kẽ, n bao ra-pɛɛs sẽn mi a tʋʋmde n tõe n pees wẽn-naanda togsende, n tõe n yals-a a nao zutu. Y ka mi tɩ ka rẽ la Wẽnd sɩda, y pa wʋm tɩ b gomd b yell sɩda, b ka togs yãmb al sɩngrẽ sɩda? Y ka mi tẽnga sẽn naan to-to sɩda? Soaala-Wẽnd vigla b naama goeel yĩngri; b sã n be be n get tẽng zug rãmba, b yaa wa gũuri. B yɛdga saaga wa peende, peen-kãsenga, b yɛdg-a-la wala peende, wa peend sẽn tar n tiid roto, b ti-a-la wala bãmb me roogo. Tẽnga soaalba lebga zaalem, tẽnga bʋ-kaoodba lebga zaalem. B pa yãet n paam zĩiga, b pa yãet n zĩnd b zĩigẽ, b pa yãet n kɩ yẽgna la Soaala-Wẽnd sobga sẽn pɩɩsd-b la a kʋɩɩsd-b la a loogd ne b wa mo-pagdo. Ãnda la y na n gese n yeele: Wẽnd wẽneg la woto? Sõmblem Wẽndã n sokd woto: «Maam ne ãnda n zem taaba?» Zẽk-y neng yĩngri la y gese, ãnda n naan ãdsã la sẽn be yĩngrã? Sã n ka Wẽnd ninga sẽn yalsa ned kam fãa a zĩigẽ, n yals-b b zĩigẽ wala tãb-biisi, la b boond ned kam fãa ne a yʋʋre, tɩ ned ba a ye ka be n kɩɩsdẽ ye. Yaa bõe Zakoob? Yaa bõe Israyɛl, tɩ fo yet tɩ Soaala-Wẽnd ka mi m sẽn na yɩ a soaba? Tɩ b ka ne m sẽn tog ne a soaba? Fo ka mi? Fo ka zãmse, fo ka wʋm tɩ b gomda? Soaala-Wẽnd yaa zamaan buud fãa Wẽnde. Bãmb n naan tẽngã ne a yalma fãa, b ka namse, b pa yãe yaams ye, la ned ka tõe n mage n bãng b yama sẽn ta zĩig ning ye. Yaamsa sẽn kẽ a soaba, b kõta pãnga, pãn-kaoolg soaba, b kõta sõngre. Kom-bɩɩb yaandame, b yam yita ne b menga, b mi n wa pãsd n lʋɩtame. Sẽn teeg-b Soaala-Wẽnde, bãmb kõt-b-la pãn-paalle, b paamda pɩgs wala sɩlga, b zoetame n ka mi yaams ye, b kẽnda taoore la b pãng pa woogd ye. Tẽn-zãorgẽ dãmba, bas-y bʋʋr m taoore, Soaala-Wẽnd n gomde, dũni rãmba, keng-y y pɛlse la y wa tɩ m boond-y-la bʋʋdo. Y na waa n leok-ma. D kolg taaba, yãmb ne y wẽn-naandsã. tɩ bʋʋda sɩnge. M yet yaa maam n yiis yaang raoã rao ninga sẽn lubd a bɛɛbã la a tabd-b ne a naoore. A kɩtdame tɩ bu-zẽmba basd raood a taoore, a naoor tabda rĩm dãmba, a sʋʋg kɛɛd-b-la zeremse, a tãp sẽegd-b-la wa sobgo wa sobg sẽn sẽegd mo-pagdo. Ade, a rigda a bɛɛba a pɩʋʋgda a bɛɛba sʋka tɩ rabeem kaẽ ye, a pa sigd a weefã, a nao pa sɩɩsd tẽng ye. La yaa ãnda n tagse la a wa ne yɛl niyns d sẽn gomdã? Ad-y yaa ned ninga sẽn deng n gomd bũmb yelle tɩ b nan ket al yɩɩg-yɩɩgã. Ad-y yaa maam, Naaba-Wẽnde. Maam n be bũmba fãa sɩngrẽ. Yaa maam a Wẽnde n so Kãsengo, pipi zamaana rãmb sʋka, n na n le soog Kãsengo ne yaoolem dãmba. Tẽns sẽn puk koomẽ dãmb yãenda rẽnna, tɩ rabeem tar-ba, tẽnga yaang rãmb kolgame n digda. Ned sõngda a tũud-n-taaga, tʋʋmd zugu, n yet t'a ning pãnga! Sẽn yẽnegda kutã kõta yõaka raoodo, sẽn toosda ne zãar sõngda sẽn kut a soabã, a yeta sẽn bolgd a soaba: ning pãnga, yaa sõmbo la a baooda kaadse n ka nin-naandã t'a tõog n yals a nao zugu. Foo, Israyɛl, m biiga, foom Zakoob, m sẽn tũus a soaba, m zoa a Abraam buudu, m tɩ yiis-f-la tẽnga yaanga, m tɩ bool-f-la tẽnga sɛtmẽ. M yeel-f lame: «Foom la m Tʋʋmd-tʋmda. M yõga zood ne foom la zoodã pa sãam ye.» Da maan dabeem ye, m bee ne foom. Bas yɩɩre, tɩ m yaa f Wẽnde. M bɩɩsda f pãnga la m sõngd-f lame, m teend-f-la ne m dɩtg nugu, ne m raood nugu. N-ye! Yãnd na yõk sẽn da yik-ba n na tak zabre ne foom. B na n kiime n menem zãnga sẽn baood-b zabr ne foom. Fo na n baoo f zabd-n-taasã la f pa na n yãend-b ye; f zabd-n-taasã na n kiime n menem zãnga, bũmb kõn kell ye. Yaa maam la Naaba-Wẽnde. M gãd-f-la ne m dɩtgo, m yet-f lame: «Bas rabeem, m wata f sõngre!» Da zoe rabeem ye, Zakoob, zũnzũur sẽn ka tõe n fãag a menga, da zoe rabeem ye, Israyɛl, bɛdẽng, ka pãng soaba! M wata f sõngre! Maam Naaba-Wẽnde n gomde, a Israyɛl Nin-sõngo la f Fãagda. Ade, m yals-f lame wa bũmb sẽn na n wes tãndaga; m ning-f-la kud-paala la sẽn tar pãnga, f tʋʋmd na n yɩɩ tãmsa werbo la b wesbo wesda kunkunba tɩ b wa lebg bõonese n wa lebg faase wa ka-fɩɩba, tɩ b yelg tɩ sobg sẽeg-ba, tɩ sɩlmand tall n looge, la foom, fo na kɩdem sũ-noogo, Wẽnnaam maasmẽ, a Israyɛl Nin-sõnga maasmẽ. Nimbãan-dãmba la naong rãmba baooda koom, la fɩ! Ko-yũud kʋɩɩsa b zelemde, la maam, Naaba-Wẽnde, na n deega b kosgo. Maam, a Israyɛl Wẽnnaama, m kõn bas-f ye. Tãms sẽn ka yit mood b zutu, m na kɩt tɩ kʋɩls tãoos koom, m na kɩt tɩ tãmsa sigdsa pusg koom, m na kit tɩ zĩ-peen-daag lebg bãoogo, m na kɩt tɩ tẽn-koɛɛng bul ko-vɩɩse. M na n sela kʋk zĩ-peen-daagẽ, n sel dõaaga, n sel lɛɛlga, n sel taanga. M na n sela sãbga, sãbtulga, kagdga tɩɩsa buud toɛ-toɛ, n yegl taaba. Woto b na yãe la b bãnge, b na tags la b wʋme, tɩ Soaala-Wẽnd n maan rẽ fãa, tɩ Israyɛl Nin-sõngã n yiis b fãa. La yãmba, bõn-naandse, bu-zẽmba sẽn boond tɩ b wẽndã wa-y tɩ m bool-y-la bʋʋdo, wa-y n gom tɩ m kelge, Soaala, a Zakoob dĩma, n gomde. Kolg-y n wilg-y-do, n wilg sẽn yɩ pĩnda, n wilg-d tɩ d le tẽege. Ka rẽ bɩ y gom beoog yelle tɩ d bãng sẽn na n yɩ-la. N-ye! Wilg-y bũmb ning sẽn na n wa tɩ woto d na bãnge tɩ y sɩd yaa wẽnd dãmba. Maan-y bũmb bilfu, yĩngr bɩ tẽnga n yik d pɛlenga, tɩ d kilsi. Yãmb yaa zaalem, y tʋʋma me yaa zaalem, yãmb pʋgb yaa wɩɩbdo. Nug goabg sẽnẽ, al yɩɩga m kɩtame tɩ ned yi n dɩk sore, la ad-a sẽn wate. Al yɩɩga, wĩndga sẽn pukd zĩig ningã, b gomda a yelle, b pʋta a yʋʋre. A tabda kombɛɛmba wa tãndo, wala yagd sẽn nomd a yagdo. Ãnda n deng n wilg yell kãnga tɩ d wʋm-a tɩ ket n zãra? Ãnda n yɩ pipi n gome tɩ d yet t'a togsa sɩda? M miime tɩ ka yãmb nin-yend ye, sẽn tõee rẽ ka be y sʋk ye. Y ned ba a ye ka yaag a noor ye. Maam n yɩ pipi n taas yella Siõ. Maam n deng n tʋm Zerizalɛɛm kibar nooga soaba. M gẽesa wẽnd bãmba sʋka la m pa yãend ye, sagend ka ye, m sẽn tõe n sok a soaba n paam leodre ka ye. B naaga taab n ya zaalem, b tʋʋma yaa zaalem. Bõn-naandsã: sobgo la viʋ-raoogo! Ad-m tʋʋm-tʋmda, m nug tik-a lame; ad-m Nin-sõngo, Yẽ zug la m sik m Vʋʋsem. M yam sig-a lame, t'a na n wa ne zemsgo n kõ ãndũni rãmba. A ka pord ye, a ka zẽkd a koɛɛg ye, a ka maand bʋʋr so-tiisẽ ye. A ka kũugd rudumd sẽn kaoog ye, a ka kiisd fitil sẽn fibd ye; zemsg ning m sẽn data la a wat ne. A kõn bao vʋʋsg ye, a kõn bas raood ye n tãag wakat ninga tẽnga sẽn wat n pid ne zemsgo; tẽn-zãorgẽ dãmba me gũuda Noora zãmsgo. Yaa woto la Soaala-Wẽnd gomda. Soaala la yĩngri Naanda, bãmb n yɛdg saaga, bãmb n pids tẽnga ne a tɩɩsã; sẽn vɩ-ba a pʋgẽ wã reega vɩɩm bãmb nengẽ, b tʋmda b tʋʋma bãmb maasmẽ. Ad Soaala sẽn gomd ne b sẽn tũus a soabã: «Yaa Soaala-Wẽnde, yaa maam n bool-fo tɩ m dat n pidsa m sẽn yals ne zemsgã. M sõngra kõn paoog-f ye. M naan-f lame n dat-f ne m tʋʋmde, n dat tɩ m zooda ne ninsaalba tõog n yõge, n dat tɩ f yɩ dũni wã fãa vẽenem. Tɩ woto bɩ zoeens nin puki, tɩ b sẽn pag b rãmb doog tõog n yi, tɩ sẽn zĩ-b likẽ toog n wa vẽenemẽ. Maam la rũnda la beoog Wẽnde, m yʋʋr la boto. M kõn dɩk m ziirã, n kõ ned a to ye, m kõn bas me tɩ nin-naandsa deeg m pẽgra ye. Pipi yella taasa wa m sẽn da rate, m na togs-y yɛl niyns sẽn pʋgd-ba marsã, tɩ b nan ka sɩng ye.» Yɩɩl-y yɩɩn-paalle Soaala yĩnga! B pẽgrã yi al tẽnga satmẽ, mogra ne a pʋgẽ teed fãa kils-ba, tẽn-zãorgẽ rãmb fãa kils-ba. Zĩ-peen-daaga ne a tẽn-toosã, b fãa zẽk b koeese; a Kedar pʋ-weesẽ dãmba yɩɩl, pĩigẽ dãmba tãs tɩ sãde, tãng zug rãmba kelem. B pẽg Soaala-Wẽnd yʋʋre, tẽn-zãorgẽ dãmb moon b pẽgre. Wẽnd wata wala tãb-biiga, wala tãb-biig sẽn pid ne raoodo, t'a yĩnsã tõbsd wala tãnsoab yĩnsi, t'a kelm a zabr sɩngr kɛlenga, t'a segd a bɛɛba ne sũ-keelem. Al daar zãra m da sĩndame, m da ka gomd ye, m da yõkda m menga. M waasda wala pag sẽn kũmd dogem, m vʋʋsem tulgame, tɩ m sũur dat n yalse. M na n sãama tãmsa la tãn-bi, m na n kɩtame tɩ tãn-bɛda la tãn-bõonego kʋɩ zãnga, m na n kɩtame tɩ moog buud fãa, tɩɩg buud fãa zelge, n kɩt tɩ kʋɩls sẽn zoet lebg ko-ralem, n kɩt tɩ ko-ralma fẽbg zãnga. M na kɩt tɩ zoeens kẽne, so-raad zugu, m na kɩt tɩ b tũ so-bõonese, m na kɩt tɩ b lika lebga vẽenem, n kɩt tɩ so-ruda lebg saalse; ad-m sẽn na maanega, la kõn pa n ka taas ye. B na tar n leb poorẽ ne yãnde, neb niyns fãa sẽn teeg-b nin-naande, neb niyns fãa sẽn get-b yõak sẽn yõge, n maanẽ: «Yãmb yaa tõnd wẽnd dãmba.» Wʋmse, kelg-y! Zoeense, ges-y la y yãe! Ãnda la zoanga, sã n ka m no-rɛɛsã? Ãnda la wʋnga wala no-rɛɛsã m sẽn tʋmdã? Ãnna n ya zoanga wala m tʋʋm-tʋmda? Ãnda n ya wʋnga wala ned ning m sẽn tʋmdã? Ãnda n ya zoanga wa a Le-wa-yã? Ãnda n ya wʋnga wa Soaala-Wẽnd sõgna? Fo yãee bũmb wʋsgo, n yaool n ka le tẽr baa fɩ. Fo tʋb yoogame tɩ f yaool n ka wʋmnẽ ye. B sõmblema yĩnga, Soaala-Wẽnd dat n wilgame tɩ b sẽn yiis noor ninga yaa no-kãsenga, a reegr wata ne kẽn-tɩrse. La ade, m nebã, b zɛ-b lame tɩ b ka le tar fɩ. B kẽes-b-la loangẽ, b solg-b-la ro-likẽ. B ra get-b-la wa bõn-zɛɛdem, n get-b wa bũmb b sẽn dig n yõke, la ned da pa leokd tɩ pa tog ye, ned da ka yet-b tɩ b lebs ye. Yãmb sʋka, ãnda n na n maan gũusgu? Ãnda n na n kelge la a ning a yamẽ? Ãnda n bas a Israyɛl a zɛɛdba nugẽ? Ãnda bas a Zakoob ne a fãadba? M yet yaa Soaala-Wẽndẽ, m yet yaa tõnd sẽn da beeg a soabã. A Israyɛl ka tʋlg n tũ b sor ye, d ka tʋlg n deeg b noor ye. Yaa rẽ me yĩnga la Soaala-Wẽnd bas b sũ-puurã t'a raag a Israyɛl zugu, n bas zaba tɩ b fõd a zugu. Sũ-puura gũbg-a-la ne bug walem, la a ka bãng ye, a yõog-a-la zãnga t'a yam ket n nan pa nek ye. Ad yaa f Naanda, Israyɛl, yaa sẽn welga foo toorã, Zakoob, yaa Soaala-Wẽnd n yet-f woto: «Da zoe rabeem tɩ m fãag-f lame m boola f yʋʋre, fo lebga m soolem. F sã dʋʋgd ko-ralma, m na zĩnd f sɛɛgẽ; f sã dʋʋgd ko-zoetem, a kõn dɩ-f ye. F sã loogd bugum sʋka a kõn yõog-f ye, bug-walma kõn maan-f bũmb ye. Mam la fo Soaala, fo Wẽndã, maam, Israyɛl Nin-sõngã, la f Fãagdã. Yaa Ezipt tõre la m kɩs yã, n deeg foom, a Kus la Seba la m kis f zĩigẽ. Ya m sẽn nand f wʋsga yĩnga, ya f sẽn be yõodo tɩ m nong-fã yĩnga. Neb la m kɩs f zĩigẽ, buud la m kɩs n yao f yõore. Da zoe rabeem ye, m bee ne foo. M na kit tɩ f yi yaang n lɛɛg wa, m na kɩt tɩ f yi taoore n lɛɛg n wa tigim ka. M na yeel goabg rãmba: ‹Wa ne-ba!› N yeel dɩtg rãmba: ‹Bas-y-ba!› Yiis-y m kom-dibli wã be n kõ-ma, yiis-y m kom-pugli wã tẽnga sɛtmẽ n kõ-ma. Le tall-y n wa-y mam sẽn kõ b rãmb m yʋʋrã, la m sẽn naane la m welg toore m pẽgr yĩnga!» Kɩt tɩ sẽn tar-b nini n ka neẽ wã kolge, tɩ sẽn tar-b tʋba n ka wʋmdẽ wã kolge. Kɩt tɩ bu-zẽmba fãa tigim, tɩ tẽnsa kẽedba fãa tigim. La sok-y b wẽn-naandsã n gese, bãmb sʋka, ãnda n da pĩnd n gom yɛl niyns sẽn maana, tɩ d wʋme? Yeel-y-b tɩ b wa ne b kaset dãmba tɩ d kelge n kelge la d tõog n yeele: «Yaa sɩda!» M buudu, yaa yãmb la m kaset dãmba, Naaba-Wẽnd n gomde, yaa yãmb la m sẽn tũus b rãmba n yet tɩ b wʋm yɛla võore la b dɩk b saagrã n dell maam. M daab la b bãng la b wilg m sẽn yaa a soaba, la b reeg tɩ wẽnd ba a ye pa reng maam, la sẽn le wẽnda maam me ka ye. Yaa maam, la maam bala la Soaala, Fãagda a to ka be sã n ka maam ye. Yaa maam n wilgi, yaa maam n fãage. Yaa maam n togse ka wẽn-sãang ba a ye. Dẽnd yĩnga, yãmb la m kaset dãmba. Yaa Soaala n togse, la maam, yãmb Soaala, la Naaba-Wẽnde. M na n kell n yɩɩ wala m sẽn yaa a soabã. M ka tõe gãd bũmbu tɩ ned deeg-a m nugẽ ye. M ka yalsd bũmb tɩ ned tus-a n lub ye. Yaa woto la b gomda, woto la yãmb Fãagdã, a Israyɛl Nin-sõnga gomda: «Yaa yãmb yĩnga la m tʋm neb Babilon tɩ b tɩ kao yemsa rot kʋɩlense. Yaa rẽ me yĩng la Kalde rãmba nengẽ sũ-noog yɩɩl na n lebga wiisgu. Maam la Naaba-Wẽnde yãmb Nin-sõngo, a Israyɛl Naanda, yãmb Dĩma.» Yaa Soaala-Wẽnde n gomd woto, yaa bãmb n tuk sore mogrẽ n tuk sor mogr pʋga, mogr sẽn dãmbd a ko-wiis pʋga. Bãmb n yiis pĩnda bilim-bilm, wiidi, tãb-biis sẽn mi zabre. Bãmb fãa gãandame n ka le yik bada, b fãa rɩɩme n ki wa lam-palg bugum. Soaala koɛɛga la woto: «Da le tẽeg-y pipi yɛla ye, da le tẽeg-y sẽn maan pĩnd ye. M wata ne bõn-bãn-paala, la b zoe n waame, yãmb sẽ n ka ne-ba. N-ye! M na n tuka sore we-raoog tẽnsʋka, n tuk sor zĩ-peen-daasẽ. We-rũms na n pẽga m yʋʋre, we-baase la na-neendo na n pẽgame tɩ m na n kõ-b-la koom we-raoogẽ, tɩ ko-zoetem na n saag zĩ-peen-daaga, n yiis m neba ko-yũudu, n yiis buud ning m sẽn kõ m menga ko-yũudu la woto b na kils m yʋʋre. La buud ning m sẽn gʋʋlã na wilg a sẽn pẽgd maama võore.» Soaala-Wẽnd yetame: «Israyɛl, ka mam sɛɛg la fo yõkr ye, fo maana wala f yama yii ne maam, Israyɛl, m buud nongre. Ad ka mam yĩnga la f ra kʋʋd pe-bi maand ye, ka maam la f ra waoogd woto ye. Bũmb sẽn ka sɩd yaa f sã n tẽed tɩ m kẽes-f-la yembdo tɩ beoog-beoog fãa bɩ m tarẽ: ‹Wa ne maando, wa ne maando!› Da tẽ tɩ m sɛɛsa f pãnga ne beoog-beoog fãa tãsgã: ‹Yõog tɩdare, yõog tɩdare!› Ka mam yĩng la f da yiis ligd wʋsgo n na n paam n da wisdu ne yũ-noog ye. F maanda sẽn tosd kaama ra ka mam yĩng ye. Ad yaa foo n kẽes maam yembdo ne f yɛl kɛgã, foom n kẽes maam yaamse ne f yel-wẽna. Yaa maam n modge n yĩm f beegrã, yaa maam n modg n bas taale. Le maneg n togs bũmb ning sẽn kɩt tɩ d da ka zemsd taabã. D naag taab n bao a tɩɩm. Gome n kõ-f meng bʋʋm. F pipi ba wã n deng n maan wẽnga, fo no-rɛɛsdba me taka zabr ne maam. Ya rẽ la m ning f maan-kʋʋdba yãnde, n yet tɩ m na n wãa a Zakoob buudu, tɩ m na n basa a Israyɛl t'a bɛɛba paoog-a.» M tʋʋm-tʋmda, Zakoob, kelg neer marsã: Israyɛl, m sẽn tũus a soaba, yoog f tʋba. Yaa woto la sẽn naana fooma, sẽn yaga foom f ma pʋgẽ wã, sẽn sõngda fooma, gomd ne foom: Da maan dabeem ye, Zakoob, m tʋʋmd-tʋmda, da maan dabeem ye, Israyɛl m sẽn maneg a soab yelle. M na n daaga koom n yiis ko-yũudu, ko-yũud sẽn kʋɩɩs koɛɛg ninga na n le paam n bʋkame; m na sika m Vʋʋsem f buuda zugu, m na sika m barka f yagensã zutu. B na tãoome wala moog sẽn yi koom sʋka, wala kankanga sẽn sel kʋɩlg noore. Nin-yend na n yeelame: «Maam la Naaba-Wẽnd soolem,» la a to na n yeelame tɩ b bool-a t'a Zakoob; a to na n gʋlsa a nugẽ: «Naaba-Wẽnd n so maam,» la a kot tɩ b bool-a t'a Israyɛl tɩ rẽ la a zu-zẽkre. Yaa woto la Soaala, a Israyɛl dĩma, gomda, yaa woto la dũni fãa Wẽnde a Israyɛl Fãagda, gomda: «Maam la sɩngre la baasgo; sã n ka maam bala Wẽnd a to ka ye. Ãnda n ya wa maam? A soab yiki la a gome, a wilgi m taoore, a bʋʋma sẽn yɛs zĩig ninga? Ãnna n wilg al sɩngrẽ yɛla sẽn da na n yaool n wa wã? B puk sẽn be beoogo n wilg-du. Da zoe-y dabeem, da bas-y raood ye. Ka al daar sẽn zãre la m togs-y la m wilg-y rẽnna fãa? Yãmb la m kaset dãmba. Wẽnd a to beeme sã n ka maam? Ad-y teegd a to ka ye, m ka ne pĩig a to ye!» Bãng-y tɩ neb niyns tʋʋmde sẽn ya nin-naands peesgo, bãmb la tʋʋm yaals rãmba la yaoolg rãmba; sẽn peesd-ba miime, tɩ b sẽn pees b rãmba ka ne ye, b ka tar yam ye, la rẽ lɛɛg n wata ne bãmb meng yãnde. Pees bɩ rõog wẽnde, sẽn ka be yõodo yaa yalemdo. Neb niyns me sẽn sõngd-bã, bãmb me na n paama yãnde. Sẽn peesd-ba yaa ninsaalb bala. B naag taab n wa sak bʋʋdo, b na rig rabeem la b na paam yãnde. Sẽyã ningda saala tɩ kuta sã n mooge bɩ a pãb ne zãare. A namsda a menga, kom tar-a lame, ko-yũud tar-a lame, la yaams kẽed-a lame. Da-pɛɛsa sɩngda magbo, n karg ne bug-zẽongo a sẽn dat tɩ naanda yɩ a soaba, n yaool n dɩk a pɛsga n tũ sõogrã n pees raoogã, n kõ-a ninsaal yagdo la ninsaal nenga, n wa tol n kẽes-a a waoogr doogẽ. A ra tɩ kɛɛga kʋka, bɩ pusga, bɩ sãbga, bɩ raoog a to, la rẽ wã, a ra kẽe tʋgr pʋgẽ n bao. Dag n tõe n yɩɩ tɩɩs menga a sẽn sele ne a raab a to, n zãgs koom. Sã n ya ne ninsaala, raoog fãa tar n widgda bugum. B mi n yãkame n tugl bugum n woode bɩ n segl dɩɩbo. Pɛɛsa nengẽ raoog lebgda Wẽnde, t'a wõg a taoore, a lebgda wẽn-naande t'a kẽnd n yĩgimd a taoore. Pɛɛsa yãkda daada pʋɩ-sʋka n ning bugum, n sẽed a nemdo, n wãbd n tɩgda. A tõeeme bala n woot bugma la a yetẽ: «M woota bugum, m geta bugma sẽn wit ne sũ-noogo.» A rɩkda raooga sẽn kellã n pees a wẽnde, n pees a nin-naande, n tat a taoore n sulgdẽ la a wõgemdẽ, la a pʋʋsdẽ, n yetẽ: «Fãag maam tɩ foom la m wẽnde.» Pɛɛsdba ka tar yam ye, b ka tagsd ye, b ka ne ye, b ka tar b tʋʋmda võor ye. Ned ba a ye ka tagsd ye, ned ba a ye ka tagsd tɩrg ye, ned ba a ye ka leokd a menga: «M dɩka pʋɩ-sʋka n ning bugum, n dʋg m miisgu, n sẽ m nemdo n wãbe la sẽn kellã n dɩkame n maan wɩɩbdo, m yita a wãna n sulg m meng da-giig taoore?» Yaa tompɛglem marsã la ra-pɛɛsa pʋgda, a belgda a menga n kẽed moogo. A kõn fãag a yõor ye; a ka na n tõog n yeel bada: «M sẽn gãd a soab ne m nugã, sãnd ka belgre bala?» Tẽeg woto, Zakoob, tẽege Israyɛl, fo ya m sõgne, m naan-f lame tɩ f yɩ m sõgne, dɩlla da maan m sẽn pa tẽed ne f ye. M yẽesa f beegra, n yẽes f yel-wẽna wa sobg sẽn loogd ne sawadgo. Lebg n wa mam nengẽ tɩ m yaoome n deeg-fo. Yĩngr dãmba kaas-y sũ-noogo tɩ Soaala-Wẽnd tʋmame. Tẽnga bog zulungẽ dãmba, lang-y sũ-noogo; tãmse, kelem-y y zu-noogo; tʋgre ne f tɩɩsã fãa, fo me lange? Soaala-Wẽnd n fãag a Zakoob, b wilga b ziirã a Israyɛl. Woto la Soaala-Wẽnd yeel yã, Wẽnd ninga sẽn naana foom f ma pʋgẽ, n gomde: «Yaa maam, Naaba-Wẽnde, n naan fãa gilli. Mam m ye n yɛdg saaga, maam m ye tãa, maam n kɩt tɩ tẽnga sĩdi la m pa yãe sõaangd ye. Maam n kɩt tɩ bag rãmb bagre yaa zaalem. M lebsda sɩlem dãmba poorẽ, m kɩtame tɩ b bãngra lebg zɩtem. Maam n kõt m tʋʋmd-tʋmdba goama pãnga, mam n kɩt tɩ b sẽn yeela taasdẽ. Maam n yeel tɩ Zerizalɛɛm na paam kẽedba, n yeel tɩ Zɩɩda tẽnsã sẽn wã na le me, la m sɩd na n le yika a lalsã. Maam n yet tɩ mogrã fẽbge; maam n kɩtd tɩ kʋɩlsa koom yõbgdẽ. M yeta a Sirus poorẽ: ‹Yaa m pe-kɩɩma. Sẽn ta m daab fãa, a na pids-a.› M na n leoka Zerizalɛɛm poorẽ: ‹B le maneg-a n me.› n leok wẽnd dooga poorẽ: ‹Le maneg-y n me-a.› » Woto la Soaala-Wẽnd koɛɛga ne b sẽn tũus a soabã, ne a Sirus, ne bãmb sẽn gãd a soab nug rɩtgã. Soaala-Wẽnd gomda woto: «M na n wãa tẽnsã, f taoore, n deeg dĩm dãmb naam, n pags fo taoore tẽns kʋɩlens sẽn da maneg n sog kẽnkẽ. Mam meng na n kẽna f taoore m na n sarma tãmsa fãa, m n na kaoo kuta kʋɩlensã la m na n kaoo b kuta sogdsã. M na n yiisa f yĩnga, arzɛk sẽn da solge, m na n yiisa laog sẽn da bĩngi, tɩ f bãng tɩ maam la f Wẽnde, a Israyɛl Wẽnnaam, sẽn bool foom ne f yʋʋre. Yaa m sõgen a Zakoob yĩnga, m zoa a Israyɛl yĩnga la m bool foom ne f yʋʋre, n waoogd foom tɩ f yaool n ka mi maam ye. Yaa maam la Soaala-Wẽnde, m ka be taare, Wẽnd a to ka be n zʋʋg maam ye. Maam n sog f sɛɛg sẽbdga tɩ f yaool n ka mi-m ye. M datame tɩ b bãng al yaanga la nin-taoore tɩ sã n zʋʋg maam, Wẽnd a to ka ye. Yaa maam la Soaala, a to ka ye. Maam n naan lik la vẽenem, n wat ne sũ-noog la sũ-beedo. Yaa maam, Naaba-Wẽnd, n maan dẽ fãa. Bɩ zemsga yi yĩngr n dʋʋge, n yi yĩngr n dʋʋg wa meenem; bɩ sawata sik saaga tɩ tẽnga yaag a noor n koke, tɩ zemsga la fãagra bul n yi! Maam, Naaba-Wẽnd, n yag m daoa.» Yãb-y ninsaal sẽn ya tãnd rʋko wala rʋgd a taaba bala, la sẽn yik n na n zab ne a yagda. Yagd sã n nomd a yagdo tãnda na sok sẽn nomd-a wã: «Bõe la f maanda?» Yagda sẽn yag laok ninga na wẽneg n yeel-a: «Fo yaa nug-kɩɩng laa?» Yell ne ned ninga sẽn yet biig ba-roaka: «Yaa bõe biig la f rog yã?» N yet biig ma: «Yaa bõe la f yiis dũniya?» Soaala-Wẽnde, a Israyɛl Nin-Sõngã, bãmb sẽn naan b buudã, n sokde: «Yaa ne maam la y gomd m kamba poorẽ bɩ, la y wilgd-m m sẽn tog n maan ne b bɩ? Yaa maam n naan tẽnga ne ninsaalba sẽn be a pʋgẽ, yaa maam n yɛdg yĩngri ne m nugu, maam n so yĩngri tãb-biisã fãa yaa maam n kõt b noore. Yaa maam n yiis m gãndaoogo sẽn na n waa ne fãagrã. M na zĩnd a sɛɛgẽ, t'a tʋʋmda yi naana ne-a. A na le mee m tẽnga, a na n le mee Zerizalɛɛm, m kamba sẽn kẽng yembdã na lɛɛg n wa tɩ pa tũ ne yaood ye. Dũni fãa Wẽnd n yeele!» Woto la Soaala-Wẽnd le gomda: Ezipt rũm-kɩɩmba, Kus toandba, Seva dãmba, nin-wogd buudu, na n tong n wa f nengẽ la foom n na n soog-ba, f na n ning-b-la wĩiri tɩ b pʋg foom, b na n wõgemda f taoore, b na pʋʋsa foom n yetẽ: «Yãmb Wẽnda bal la Wẽnde, Wẽnd a to ka ket zĩig a to ye.» Israyɛl Wẽnd sẽn wat ne fãagre yãmb yaa Wẽnd sẽn solgd a menga. Sẽn yagd-b wẽn-faada sã n ningd-b mens yãnde la b paoogd b mense b nenga sã n surẽ n le ka tõe n dooge, ad-y ka boto ne Israyɛl buud ye. Yẽ paama Wẽnd fãagr zãnga, yẽ kõn tol n yãend yãnd la paoor ye. Soaala n naan saaga bãmb la Wẽnd ninga sẽn naana tẽngã; bãmb n yɛdg-a la b kɩʋʋlem-a bãmb n pids-a ne teedo, bãmb n naan-a n na n kẽes ninsaalba. Woto la b gomd marsã: «Maam la Soaala, Wẽnd a to ka ye. M ka soos n gom ye, m pa bao pẽk n solg ye. M pa kos a Zakoob kamba tɩ b bao-ma m sẽn ka be zĩig ning ye. Maam, Naaba-Wẽnde, m goma vẽenega, m sẽn yet tɩ bũmb ning n na n yɩ wã n ka be sãmbga.» Naag-y taab n wa, naag-y taab n kolge, yãmb fãa sẽn paam n põsã. Sẽn ka mi-b bũmbu, yaa neb niynsi sẽn tʋk-b da-peesdi n kẽnda, neb niyns fãa sẽn pʋʋsd wẽnd sẽn ka tõe n fãag-ba. Gom-y-yã, wa-y ne kaset dãmba, yẽs-y ne taaba. Ãnda n dag n wilg al pĩnd-pĩnda bũmb ning sẽn maand marsã wã? Ãnda n da zoe n togse? Ka maam, Naaba-Wẽnd laa? Wẽnd a to ka paas maam ye. Wẽnd sẽn mi zemsgo la sẽn ya Fãagda, ned a to ka le paas maam ye. Dũni wã sɛtmẽ dãmba, wẽnemd-y y neng n tees maam tɩ m fãag yã, y sẽn be zĩig ninga fãa, wẽnemd-y y neng n tees maam, Naaba-Wẽnd ka be taar ye. M wẽenda ne m menga, m noor sẽn yiis yaa sɩda, yaa gomd sẽn ka tõe n ka pidsi. Yaa mam taoor bala la rũmd fãa tog n yĩgimdi yaa ne mam yʋʋr bala la zelemd fãa na n wẽene, n na wẽene n yeele: «Ne Wẽnd tõogo, ne Wẽnd pãnga!» Sẽn da yik-b zabr ne bãmba na n lɛɛg n waa ne yãnde. Wẽnd maasem yĩnga, a Israyɛl buuda na paam tõog la ziiri! A Bel kɩldame, a Nebo wata tẽnga. B rɩka b togsendã n zɩlg b rũmsi, n tʋk zɩɩb zɩtba; wẽn-naanda sẽn zoe n zɩt bãmb yɩɩrã la b kong n dɩk n tʋk rũmsã; sɩd ya bõn-zɩsd menga la rũmsa tʋk n yõrdẽ. La ad-a Bel sẽn kɩllde, ad-a Nebo sẽn wat tẽnga. Ka tʋk-b tɩ b yi n kaag moog ye; b ka tõe n fãag sẽn zɩt-b bãmba meng ye, yaa yembdo la bãmb meng dabda. Kelg-y-ma, Zakoob doogo, kelg-y-ma sẽn ket-ba, a Israyɛl zaka! Mam buga yãmba al y ma pʋgẽ, mam gesa y yelle al y yãadmẽ. Yãmb na waa n kʋʋle la y na mik tɩ m pa teem ye, yãmb na kʋʋle tɩ m ket n lobd m toogo; yãmb zug na pɛlge tɩ m ket n be y poorẽ. Yaa bũmb sẽn zoe n maane, m zoe n bug-y lame, m na kell n bug yã, m na kell n fãag yã. Ãnda la y na yãe n mams maam? Ãnda la y na n yet tɩ m wẽnda a soaba? Ãnda la y na yeele t'a soab tõe n maka ne maam? Ges-y neb sẽn sãamd b ligdi b magda b sãnem la b wanzurf n dɩkd n kɩs yõaka t'a na n maan wẽnde, tɩ b sã n dõog-a n sɛ, bɩ b wẽneg n wõgemd a taoore n waoog-a. Ad-b sẽn tʋkd-a, ad-a sẽn zɩsgd b bãgdo, ad-b sẽn baood zĩig n na n sik-a n pemse, wala a yɛɛ ne kẽnde la a yaool n pa kẽn ye. Zĩ-kãnga a kõn le serg ye, la b sã n pʋʋsd-a, a sĩndame, la yell sã n pak-a, a ka fãagd a meng ye. Tẽeg-y dẽnna tɩ yãnd yõk yã, yel-maandba, teem-y zʋgo. Maan-y tẽegre ne yɛl niyns fãa sẽn looge, maam la a ka be taar soaba Wẽnde, Maam la Wẽnd sẽn ka tar mak-n-taaga. Al sɩngrẽ m wilga sẽn na n yaool n wa, m togsame tɩ nan ka ta ye, m gomame la m sẽn yeelã n yalse, m sẽn dat fãa pidsame. M boola m sɩl-bedr, yaanga, m boola ned al zĩig sẽn zãre, la yẽ soab n na n pids m daabã. M boond-a-la al zĩig sẽn zãre, a na n wẽneg n waame, m sẽn tʋlge wẽnegd n pidsame. Kelg-y maam, kõn-teem-zʋg rãmba, yãmb fãa sẽn ket n zãr ne y bɛɛba lubri! M fãagra kolgame, a kõn le kaoos ye, a ka le zãr ye. A Siõ na n paama fãagre, a Israyɛl na yãenda m ziiri. Aya! Zĩnd tomẽ, Babilon bi-pugla, b sẽn deeg a soab naama zĩnd tẽnga, Kalde biiga, zãag ne naam goeele n zĩnd tẽnga; f kõn le paam tɩ b bool foom Tɩg-põnegre, bada. Kẽ neerẽ n wer f zom, yidg f zoobdo, kool f fuugu, kool-a n ta rũma, rʋʋg kʋɩlga, Sẽk f fuugu, yals f zaala tɩ yãnd yõk fo. M dat n sɩbg-f lame n dok m sũuri, la ned a to kõn gɩdg-m ye. Tõnd Fãagda, sẽn boond a soab tɩ dũni fãa Wẽnde, n boond tɩ Israyɛl Nin-Sõngã, n gome. Zĩnd-y sɩɩ, pa-y likẽ, Kalde rãmba, b kõn le bool Kalde tɩ dũni wã soaal ye. M sũur da puuga ne m neba tɩ m yãk b barka, m da rɩk-b lame n bas fo nugẽ, la fo me wilgame tɩ f yaa ned sẽn ka be sugri. M nin-kẽemba, fo zɩlg-b-la zɩ-bedre. Fo ra yetame: m yaa dĩma la m naam kõn zĩnd sɛɛb ye; fo ka zĩnd n tags yɛla neer ye, fo ka zĩnd n bao b sẽn na n baas to-to ye. Kelg marsã, nong-m-meng soaba, nonga-noog soaba, fo zĩime tɩ f sũur ka kiuusdẽ ye, tɩ f yetẽ: «Maam, maam bal la neda, sẽn keta yaa zaalem; m kõn tol n yɩ pʋg-kõore, m kamba me kõn loog n bas-m ye.» Bãng tɩ yɛl a yiibã fãa na n lʋɩɩ f zugu daar a ye, vugr bala, f kamb na n kiime, f na n lebga pʋg-kõore. F sẽn na maan bɩ f maane, f bagba ne f tɩta rãmb me yik n guri tɩ põasg kõn põs ye. Fo ra teega f wẽnema n yetẽ: «Ned ka ne-m ye.» Ad yaa f sɩlma la f bãngr-yaalsã ad yaa bãmb n kẽes-f moogo, tɩ f na n yeel f sũurẽ: «M ka tar mak-n-taag ye!» Yel-beedo, f sẽn ka tõe n põse, n na n lʋɩ f zugu, wɩɩbdo, f sẽn ka tõe n gili n na n lʋɩ f zug vugr bala; zɛɛbo n na n zɛ la ka bũmb sẽn tõe n bilg ye. Pa ne f tɩtã, f tɩt kʋʋma, fo sẽn pʋg b rãmba f yãadmẽ n sɛɛs f pãng zãnga, pa ne bãmba tɩ daare, f na rɩ b yõodo, tɩ daare, f na le wa ne neb yɛɛsgo. Fo yɛɛme ne sẽn da sagend-b fooma laa? Bool-b tɩ b wa, n wa fãag-fo, bool f karen-saam-dãmbã, bool sẽn mi-b yĩngr ween-vɩɩs a naasã, bool sẽn karemd-b ãdsa gʋlsem, la b wilgd kiu-paal fãa sẽn wat ne a pʋɩɩr ningã. B na n yɩɩ wala moodo la bugum n na n zomb-ba, b kõn tõog n fãag b yõore tɩ bugma gũbg-b lame, la ka bugum sẽn zems kolg n wood ye. Yaa bãngr bɛda rãmb nengẽ la fo sẽn sɛɛs f pãngã; yaa bãmb n dɩt foom al f yãadmẽ la ned kam fãa yeebda a yeebgo, sẽn ya-a fo fãagd ka ye. Kelg-y woto, Zakoob kamba, b sẽn boond yɛs tɩ Israyɛl kamba tɩ y sũur tosd kaam! Kelg-y woto, sẽn yit-b Zɩɩda tẽn-peelmẽ. Ade, yãmb wẽenda ne Soaala yʋʋre, n wɩngd ne Israyɛl Wẽnda boolgo, n yaool n ka boond ne yam tɩrga, n ka boond ne pʋ-peelem ye. Kelg-y woto, yãmb fãa sẽn paame tɩ b boond-y tɩ Tẽn-sõnga kamba, n yet tɩ y sẽn dell Wẽnd ninga, yaa Israyɛl Wẽndã, yaa dũni fãa Wẽndã! Ade, yaa al daar zãra la m togs yɛl niyns sẽn loogã, maam n dag n wilg-b ne m noor gomde; vugri bala m tʋlgame tɩ b taase, la b taasame. M da miime t'a Israyɛl yaa bi-tõtre, t'a yubla yaa kẽnkẽ wa kutu, t'a zuga keelma yɩɩd kutu. M bãnga rẽ n togs yɛlã tɩ b nan ket n zãra, n togs yɛlã tɩ b nan ka wa ye, tɩ f ra wa tudg f menga n yeele: «Wã yita mam wẽnda nengẽ, yaa mam nin-naandã, mam kutã n yeel tɩ rẽ yɩ.» Fo wʋma rẽ fãa; fo yãee rẽ fãa, f tõe n le kɩɩsame bɩ? Marsã, m wata ne koe-paalse, koees sẽn solge, ned ba a ye sẽn nan ka mi. Ka bũmb sẽn naan al pĩnd ye, Israyɛl, yaa mars marsã bala, la fo na n yãend-ba, sã n ka rũnda bala, f zɩɩ n wʋm ye. Woto f kõn saag n yeel tɩ f ra miime ye. Sã n ya sɩda, Israyɛl, f pa kelg ye, f ka tʋlg n wʋm bũmb ye, f zɩ n maan gũusg ye. M mi f kamba wa sudum dãmba; bãmb la b ra boond tɩ ka pʋg rãmba, al tɩ b nan ket n paoodẽ. Ya m sẽn zoet m yʋʋrã sãoongo, la m sẽn da yõk m sũuri, ya m sẽn da baood m yʋʋrã pẽgre, la m da sĩnda, la m ka sɩbg-f ye. Ade, m yɩlg-f lame, la ka bugmẽ la m lob-f tɩ f yɩlg wa wanzurf ye, m yɩlg-f-la ne sulg-m-menga. Yaa mam yĩnga, maam m yembr yĩnga la m sẽn maan woto wã, tɩ m yʋʋr da sãam ye, la ned a to me da reeg pẽgre sẽn ya m dẽnd ye. Kelg-ma, Zakoob, kelg-ma, m biiga Israyɛl, yaa maam la sɩngre, maam la baasgo. Ya m nugu n sigl tẽnga, yaa mam dɩtgo n yɛdg saaga. Maam n yagl sẽn be yĩngra fãa m sã n bool-ba, vugr bala, b watame. Tigim-y taaba n kelge: m tara m zoa sẽn na n pids m daaba fãa, n pids m sẽn togs fãa Babilon poorẽ, la Babilon dãmb na bãng tɩ maam n so-ba. La yãmb sʋka ãnd n tõog n wilg rẽnna? Ned ba a ye! Yaa maam n gome, yaa maam n bool m nedã, maam n kɩt t'a wa, maam n na n kɩt t'a tõog n pids m daabo. Kolg-y n kelg woto: Wakat ka tol n zĩndi tɩ m solg-y bũmb ye. Yɛla fãa sɩnga m nifẽ. Marsã wã Soaalã n tʋmd-ma, yaa maam la b tool b Vʋʋsem. Woto la Wẽnd gomda, woto la f Fãagda, a Israyɛl Nin-Sõngã, gomda: «Maam la Soaala, f Wẽnde, maam n wilg-f sẽn ya yõodo, maam n kẽes-f sor ninga f sẽn kẽnd a soab pʋgẽ. Fo sã n da reegẽ-la m noya, f rugdẽ la laafi pʋgẽ wa kʋɩlgẽ, tɩ f sõmblema yɛdg n dɩgẽ wa mogr koom. Buuda yaẽ-la wala bĩisri, fo yagensa yaẽ-la wala zẽka. Fo yʋʋra kõn tõog n menemẽ, a kõn tõog n yẽesẽ m taoor abada.» Yi-y Babilon tẽnga! Zoe-y n bas-y Kalde rãmba! Tãs-y tɩ b wʋme. Moon-y tɩ ta tẽnga sɛtmẽ, yeel-y woto: «Wẽnd fãaga b sõgen, a Zakoob.» Ko-yũud pa yõk-b we-raoogẽ, b sẽn tall-ba n gõtem zĩig ninga ye. Bãmb yĩnga b kɩtame tɩ pĩig pusg koom. Pĩiga sẽn wẽ la koom sẽn zoe n sigi. Nin-wẽns bal n ka na n paam laafi. Soaala-Wẽnd n yeele. Tẽn-zãorgẽ dãmba, kelg-y, tẽnga sɛtmẽ dãmba, kelg-y! Soaala-Wẽnd boola maam, tɩ m nan ka rog ye, b boola m yʋʋre tɩ m ket m ma pʋgẽ. B saasa m noore wa sʋ-rɩtga, b solg-m-la b nug pʋga, b sɩlsa maan wala pĩim, n dɩk n solg b lokẽ. Soaala yeel-m lame tɩ m taas a Israyɛl: «Fo yaa m sõgne, na n tũu ne foom a Israyɛl, tɩ m puk m ziiri.» M da yeta m sũurẽ tɩ m namsa zaalem, tɩ m sɛ-la m pãng zaalem, mik m pʋɩɩr da keta m Soaala nengẽ, m dolb da keta Wẽnnaam nengẽ. Marsã wã Soaala-Wẽnd sɩd gomame, bãmb yeelame tɩ b naana maam m ma pʋgẽ, tɩ m yɩ b tʋʋm-tʋmda, la m sõnge t'a Zakoob lɛɛg n wa, n sõng t'a Israyɛl lɛɛg n wa tigime. Woto wã m be yõodo Wẽnd nifẽ, la m Soaala-Wẽnd meng la m pãnga. Bãmb n yeel maam: «Ka sek tɩ f yaa m tʋʋm-tʋmd ninga sẽn na yik a Zakoob kamba sẽn lʋɩ wã la f tall a Israyɛl kamba sẽn kellã n wa ye. M datame tɩ f lebg bu-zẽmba fãa vẽenem, tɩ m fãagrã ta dũni wã yaanga.» Soaala-Wẽnd gomda ne foo, a Israyɛl Fãagda, a Israyɛl Nin-Sõnga gomda ne ned ninga sẽn ka yãe waoogre, ne dũni ninsaalba sẽn ges a soab wa wɩɩbdã, ne ned ninga na-toosã sẽn kẽes yembdã: «Ad-y dĩm dãmb sã n yãend-fo, b na n yika b zaoorẽ n yals yĩngri, na-komsa na n wõgemda f taoore.» Woto la b na n wilg tɩ b waoogda Soaala, Israyɛl Nin-Sõngã, ned ninga sẽn tũusa foom la b pids b pʋlemde. Naaba-Wẽnd yeta woto: «M nimbãan-zoeera wakatã, m deega f kosgo, f fãagra raare, m wa n sõng-f lame, m welg-f-la toore la m segl-f lame, la m yalsa f poorẽ tɩ zooda na n le tõog n yõge. M na le yik tẽn-sõngã, sẽn sãam n dɩgã n le maneg-a n pʋɩ. M na yeel b sẽn pag b rãmb doogo: ‹Yi-y-yã!› M na yeel sẽn be-b likẽ: ‹Wa-y vẽenemẽ!› La soya zutu, tãmsa zutu, b na yɩ wa rũms sẽn kẽnd la b wãbdẽ la sẽn paamd yamdo kunkuba fãa zutu. Kom sɛɛme, ko-yũud sɛɛme, wĩnto-raase, pemsem sẽn yõogd wa bugum sɛɛme. B sẽn zoe b nimbãanegã, b na tees-b ko-vɩɩs zĩiga. Tãmsa fãa na n lebga sore londa fãa na n pidsame. Ad-b sẽn wate, la yaa yɩɩg la b yita; kẽer yita nug goabg sẽnẽ, tɩ kẽer dʋʋg mogre, nin-taoore, tɩ kẽer yit Ezipt sẽnẽ.» Yĩngri dãmba, kaas-y sũ-noogo, tẽng zug rãmba, kɩdem-y! Sẽn be-b tãmsa zutu, tãs-y sũ-noogo! Wẽnd wa n maaga b neba sũuri, Wẽnd kũma b neba nimbãanega. A Siõ da yetame: «Soaala-Wẽnd yĩma m yelle, Soaala-Wẽnd bas-m lame.» M sok n gese: pag tõe n yĩma a biiga a sẽn yẽsem bɩ? Pag tõe n kisga biig sẽn dog a pʋgẽ bɩ? La rẽ sã n da beẽ, mam yẽ kõn yĩm f yell abada. Gese Siõ, m gʋlsa foom m nuga pʋga, f tẽnga lalse la m nina karg n getẽ. Sẽn wat-b n na n le yik fo lalsã, ad-b sẽn wat ne yãgbo, fo wãadbã la f zɛɛdba loogame. Wẽneg f neng n gese, ad-f kamba fãa gilli sẽn tigim taab n watẽ, n wat f nengẽ. La m wẽenda, yaa Wẽnd n gomde, m wẽenda, tɩ b na n yɩɩ fo yĩnga wala faong bũmbu sẽn tar neerem, wala sẽbdg b sẽn sogd pʋg-paala. Ade, fo tẽnga sẽn ka tar zãma la sẽn ya raboogã, fo tẽnga sẽn wã wã ka na n sek a kẽedba, wãadba sã n wa looge. La fo sẽn da tẽed tɩ b menemame wã, bãmb dãmb n na n walem foom: «Zĩiga paooda wʋsgo, yalg-a tɩ d tõog n zĩndi.» Fo na n yeela f sũurẽ: «Ãnna n dog woto fãa n kõ-ma, m da yaa pʋg-kiiri, n ka tar kamb ye, ãnna n wub bãmba tɩ b bɩ? B ra basa maam tɩ m zĩ m ye; dɩlla bãmba yita yɛ?» Soaala-Wẽnd yeela woto: «M na n kamsa dũni wã rãmba, m na n dʋʋsa m tãb-kaoore b yĩnga. B na n yondga kom-dibli b futẽ n wa kõ foom, la b na n tʋka kom-pugli wã gʋbla n wa kõ foom. Dĩm dãmb na n yɩ-la f ba-wubdsi, tɩ dĩm-pogsã yɩ f ma rãmba. B na n wõgemda fo taoore, b na n lelma f nao wã tom. Woto f na bãnge tɩ maam la Soaala-Wẽnde. Sẽn teeg-b maam kõn paam yãnd abada.» Gãndaoogo a bõe n tar a bũmbu tɩ b le reege? Na-toaag a bõe n yõk a bɛyã n le bas tɩ looge? Ade, Soaala-Wẽnd yeta woto: «B na n deega zabr gãndaooga nugẽ a sẽn da yõk a soaba n pag roogo, n deeg nin-toaaga nugẽ, a sẽn da fãag laog ningã! Zerizalɛɛm, ad yaa mam meng n na n zab n sõng-fo, la m fãag f kambã. Sẽn tar-b foom toogã, m na kɩt tɩ b wãb b meng nemdo, m na kɩt tɩ b yũ b zɩɩm n gãeeme wala b yũu rã-paalga, la ninsaalb fãa na n bãngame tɩ maam, Naaba-Wẽnd, la Fãagda, b na bãng tɩ m lʋɩɩsa m toogo, maam, a Zakoob Wẽnd pãng soabã.» Soaala-Wẽnd tara b sokre n na n sok yã: «Sã n yaa sɩda tɩ m yiisa Zerizalɛɛm, yãmb ma wã, wa-y ne sebr ninga m sẽn gʋls n yiis-a wã, ka rẽ bɩ y wilg maam ned ninga m sẽn koos yãmb ne a soabã tɩ y lebg a yem-daadã, tɩ m paam ligdi n yao m sama. Ade, b sã n koos yãmba yaa y yel-wẽna yĩnga la b koos-y-yã. La m sã n yiis y ma wã, yaa a tõdgra yĩnga, yaa y tõdgra yĩnga. M sẽn wa yirã, yaa bõe yĩng la m pa yãe neda? Bõe tɩ m bool tɩ ned pa leok-ma? Yao ligd n deege yaa toog ne maam bi? M konga pãng sẽn na n fãag-y bi? M gomd a ye bala tɩ mogr kʋɩ, m gomd a ye bala tɩ kʋɩlg lebg dasempʋɩɩga, m gomd a ye bala tɩ zĩma kong koom, n ki ko-yũudu n põoge. Ad-y m datame n yeelg saaga fu-sablga, n yeelg-a kʋʋr futu.» Soaala-Wẽnd kõ-m-la karen-biig zelemde, n wilg mam sẽn tog n togse, n wilg mam sẽn na n yiis gomd ninga, n le yẽeg sẽn basd-b raooda gĩini. Yibeoog fãa b nɛkd-m lame, yibeoog fãa b yoogda m tʋbre tɩ m le kelg wa karen-biig sẽn tog n kelge. Soaala-Wẽnd yoogda m tʋbre, tɩ m kelge la m ka zãgs ye, m ka tar n leb poorẽ ye. M sulga m poore n kɩs pãbdba, m teesa m yɛgdga tɩ b gʋs m toɛɛnga, m basame tɩ b tʋbs m neng kolkoodo, m sakame tɩ b paoog-m ne tʋʋre. Soaala-Wẽnd wa-la m sõngre, yaa rẽ me la m pa bas raoodo, m wɩsga m nenga wa wãre, la m saagdame tɩ maam n na n tõoge. Soaala-Wẽnd be-la m sɛɛgẽ la b na n kõ-m-la bʋʋm. Ãnda n na n sak n bool-m bʋʋdo? A soab wa tɩ d babs bʋ-kaooda! Ãnda n dat n yɩ m bʋʋd-n-taaga? A soab wa tɩ d seg taaba! Soaala-Wẽnd wa-la m sõngre, ãnda n na paalg-ma? M bʋʋd-n-taasa na n kʋdga wa fuugu, wa fuug sẽn kẽ bugdu n tõosd kʋdse. Ned sã n be yãmb sʋka n zoet Soaala-Wẽnd nifu, bɩ a kelg Wẽnd tʋʋm-tʋmda koɛɛga! Ned ninga fãa sẽn kẽnda likẽ n pa tol n ne vẽenem wa sẽn paoode, a soab rɩk a meng n bas ne Wẽnde, a soab teeg Soaala-Wẽnde! La sã n ya yãmb fãa sẽn yõgen bugma, tɩ y logd pid ne pɛ-zẽnema, ad bũmb ning sẽn gũud yãmba: Yaa yãmb menga bugum n gũud yã yaa yãmb menga pɛɛma, yaa pɛɛm niyns yãmb sẽn zẽna n gũud-y. Soaala-Wẽnd sẽn bĩng yãmba la rẽnna, y na n kii kũ-toogo. Soaala-Wẽnd gomda woto: «Yãmb fãa sẽn baood-b fãagre, yãmb fãa sẽn baood-b maama, kelg-y m koɛɛga: Ges-y pĩig ninga b sẽn dɩk n pees yãmbã, ges-y b sẽn tu n buk yãmb zĩig ningã! Ges yã a Abraam, yãmb ba, ges yã a Sara, y ma! M sẽn waa n bool a Abraam t'a nan ka rog biig ye, la m ning-a-la barka, n kɩt t'a lebg bu-yaleng ba.» N-ye, Wẽnd zoe-la a Siõ nimbãanega, b zoe-la a rota sẽn wã nimbãanega! Soaala-Wẽnd na n kɩtame tɩ zĩ-peen-daaga lebg Eden, n kɩt tɩ rasempʋɩɩga lebg Wẽnd zẽedo. Yaa sũ-noogo la kɩdeng bʋʋre la b na n wʋm be, na n yɩɩ bark pʋʋsgo sẽn tũnug ne yɩɩla. Woto la Soaala-Wẽnd na n gome: «Kelg-y m goama neere, m buudu, yoog-y y tʋb n kelg-ma, Noorã na n yii mam nengẽ, sor ning m sẽn yet tɩ b tũ wã n na n yɩ dũni wã vẽenem. M sẽn wat n na n kõ-f fãagr ningã, ad-a wakata kolgame, a pukra wakata zoe n taame. M na n kɩtame, m na n modgame tɩ buuda fãa tũudma yɩ tɩrga. Ba tẽn-zãorgẽ dãmba na n teega maam, b na n teega m pãnga. Doog-y nini n ges yĩngri, sulg-y y menga n ges tẽngre, saaga na n looga wala bug-zõose, tɩ tẽnga tõose wala kʋdse. Ninsaalba na n kii wa zõose. La m na n yalsa m fãagra daar buud fãa yĩnga, a ka na n tol n zĩnd sɛɛb ye. Kelg-y-ma, yãmb fãa sẽn mi sẽn zemse, yãmb fãa sẽn deegd m noya y sũurẽ. Da zoe-y ninsaal tʋʋr ye, da sak-y n bas raoodo, tʋʋra yĩng ye. Tɩ sẽn tʋʋsd-b yãmba yelle na n baasa wa pe-kõbd fuugu sẽn kẽ bugdu, bugd a nare. M sẽn wat ne fãagr ninga na n yalsame, a na n yɩɩ fãagr daar buud fãa yĩnga.» Nek-y wɛ, Soaala, nek-y tao-tao, yẽeg-y y gĩini, nek-y wala pĩnda, nek-y wa kʋdem-wẽnnẽ zamaana. Ka yãmb sʋʋga n kɛ rũm-bãndã ka yamb sʋʋgã n pas a Raab? Ka yãmb n fẽbg mogra koom, ka yãmb n kʋɩɩs-a zãnga? Ka yãmb n kɩt tɩ sor tuk a pʋgẽ tɩ y sẽn fãag b rãmba tõog n looge? Ad Soaala-Wẽnd na n fãaga b neba tɩ b le lɛɛg n wa Zerizalɛɛm, tɩ b le wa kẽed Siõ, la b kilsd b sũ-noogo kilsgu. Sũ-noog sẽn kõn sɛ sõore n na n puk b nini, langre la kɩdengo n yãagd-ba, yãbre la sũ-beed zoe n menemame. Yaa maam la maam bala, yaa maam y Soaalã n tõe n sigs y sũuri. Yaa bõe la m buuda maand dabeem, ninsaal taoore, ned sẽn be dũnna n ka beoog taoore? Sẽn yaa wa mooga soab taoore? Fo yĩma Soaala-Wẽnde, f Naanda, bãmb n yals yĩngri la tẽnga. Beoog sẽn vẽege, fo rigda rabeem f na-toaaga taoore, wala a menes-f lame la bala. A puugda a sũuri la bõe n pʋgde? Keta bilf bala tɩ sẽn be a roogẽ wã yi, a kõn le yaal likẽ wã ye, rɩɩb kõn le paoog-a ye. Yaa maam f Soaala la f Wẽnde, maam n dãmbd mogre t'a ko wiisa bʋʋr sãta, m yʋʋr la dũni fãa Wẽnde. M le yɛdgda saagã, n le vigind tẽngã a zĩigẽ la m yeta Zerizalɛɛm: «Foo la mam buudu fo n na n deeg m koɛɛgã n taase, fo la m na n solg m nugẽ.» Zerizalɛɛm, nek tao, yik yĩngri! Wẽnd yũnug-f-la b sũ-puur dãam, la rãama yɩɩ rã-toaaga, n lebgd zugu, fo yũ-a lame, fo yũ-a-la zãnga, fo yũume tɩ neng yilimdẽ. F sẽn dog kamb niynsa sʋka ba a ye ka wa wilg-f so-sõnga ye. F bi-wubdg ba a ye ka wa gãd f nug ye. Yɛla lʋɩta f zugu a yiib-yiibu: tẽnga wãab la a zũnd-zãnde, zabr sʋʋga la kom. Ãnda n na n wa yãb-fo, ãnda n na n wa maas f sũuri? Ad-f kamb sẽn gãe vãna soya zutu, b gãee wala walga sẽn lʋɩ bẽdgẽ, tɩ Soaala-Wẽnd sũ-puura rɩt-ba, n yɛ ne Wẽnd tãsga. La ade, Zerizalɛɛm sẽn gãe ne pɛta, kelg neer marsã, foom a ka yũ rãam n yaool n kẽnd n tuumnẽ: Soaala, f zu-soaba, f Wẽnda na n sõnga b buudã la b gomda woto: «M na n deega f nugẽ f wamdã, rã-toaaga sẽn yũud n tuumnẽ wã wamde m sũ-puura wamde la f kõn le yũ a pʋgẽ ye. M na ning-a-la f bɛɛba nugẽ, bɛɛb niyns sẽn da yet-b fooma: ‹Zõond tɩ d tabe n looge.› Tɩ fo sɩd zõond tɩ b tabe, tɩ fo po-raooga sɩd lebg b sore.» Zerizalɛɛm neke, nek tao! La wɩsg f menga, Siõ, tẽn-sõngo, yeelg f fu-neeba. Ad sãan la nin-dẽgdo kõn le tag f sɩmand ye. Fo rẽgma ne wubsgu, fugumd wubsgã, Zerizalɛɛm, Yik yĩngri, leb f zĩigẽ, Siõ, foom b sẽn yõk n pag roogo, kao wĩ wã sẽn pid f yublã. N-ye! Woto la Soaala-Wẽnd gomd ne buudã: «B ka ra yãmb ne ligd ye, dẽ yĩnga mam me na reeg yã tɩ ka tũ ne ligd ye.» N-ye, woto la Wẽnd gomda: «M buuda neba da kẽnga Ezipt n na n tɩ zĩnd be, la rẽ loogr poore yɩɩ Asʋr n tall-a toogo. La woto wã m yõoda la bʋgo? Naaba-Wẽnd meng n sokde. B looga pa-weer ne m buuda zaalem, m pa reeg lagfr ye. B sẽn be b rãmb nugẽ wã kaasdame tɩ bãmb n maan raoodo. Ket n yaa Soaala-Wẽnd n gomde. Beoog sẽn vẽege m yʋʋra tara sãoong n dabda! Yaa rẽ yĩnga la raar a ye, m buuda na bãng m sẽn yaa a soaba la raara zoe n waame.» Zu-noog soaba la sẽn dʋ-b tãnga zugu ne kiba-noogo, n na wilg laafi la sũ-noog zamaan paalga, n wilg fãagre, n na n yeel a Siõ: «Wẽnd sɩnga b naama rɩɩbo.» Bʋʋr n sãte, yaa tẽnga gũudba koees n sãte, b naaga taab n kelemd sũ-noogo, tɩ b nin nee Soaala-Wẽnd sẽn kẽed Zerizalɛɛm. Naag-y taaba n kils y sũ-noogo Zerizalɛɛm dot sẽn da sarem, Soaala-Wẽnd maagda b kamba sũuri, Soaal le deega Zerizalɛɛm. Soaala-Wẽnd wilgda b pãnga, n wilgd b sõmblem ãndũni rãmba, ba sẽn be-b mooga sɛtmẽ, na n yãenda fãagre ninga Wẽnd sẽn wa ne a soaba. Yik-y, yik-y, yi-y n loog-y, yãmb fãa sẽn zɩt-b Soaala-Wẽnd waoogr teedã, yi-y Babilon tao-tao. Da sɩɩs-y bũmb sẽn ya rẽgd ye, woob-y y rẽgda fãa n base. La y ka na n zoe yãgb zoees ye, y ka na yi wa b rigd-y lame ye; sẽn pakda y sorã yaa Soaala-Wẽnde, sẽn le be a poorẽ n gũusdẽ le yaa Israyɛl Wẽnnaam. Ad Soaala sẽn le gomde: «M tʋʋm-tʋmda yell na n manegame, a yʋʋr na n yiime, a pẽgr na n paasame. Neb wʋsgo da yãee-a lame n yɛɛse t'a nenga da sãama zãnga, t'a ra ka le tar ninsaal wẽneg ye. Marsã wã b pɛleng na n yɩkame tɩ b nee dĩm dãmba sẽn sur a taoore n ka yaagd b noore, tɩ b nee b sẽn zɩ n yãende, la yaa wa b kelgda b sẽn zɩ n wʋme.» Ãnda n deeg sẽn lʋɩ tõnd tʋbrẽ, tõnd sʋka, ãnda n tagse tɩ yaa Soaala-Wẽnd n lʋɩɩs b toogo? Bãmb nifẽ, b tʋʋm-tʋmda bɩɩme, a bɩɩ wala will sẽn tão tɩɩg sɛɛga, wala tɩɩg sẽn kɩ a yẽgna zĩ-koɛɛngẽ. A ka tar yagd sõngo la rasãndlem ye. Yẽ la dũni rãmba sãbs yã, yẽ la b bas kɛɛnga, yẽnda n yãe toogo la fare. F pa yãet-a n pa lud f neng ye, yaoolgo la paoor bala n yɩ a rɩɩbo. Yaool n yaa tõnd namsgo la a reeg n namse, a wʋma toogo sẽn da tog n yɩ tõnd dẽnna. Tɩ tõnd bas n tẽed tɩ Soaala-Wẽnd n sɩbg-a, tɩ Wẽnd, n wẽ-a, tɩ Wẽnd n ning-a yãnde. Mik yaa tõnd yel-wẽna yĩnga la b da paoogd-a mik yaa tõnd yel-wẽna zɩslem n to-a teoogẽ. A yãee toogo tɩ tõnd yãend laafi, a noadã n maag tõnd dẽnna. Tõnd da kẽeda moogo wala piisi. Ned kam fãa da tũuda a meng sore, dẽ la Soaala-Wẽnd dogl a zug tõnd fãa yel-wẽna. B talla a lengre, t'a bas a menga, a pa yaag a noor ye. Wala pe-bila b tall-a lame n na tɩ kʋ, wala pe-yãanga b tall-a lame n na n tɩ wõrs a kõbdo t'a pa yaagd a noor ye. Tʋʋm-tʋmda me pa yaag a noor ye. B paalg-a-la pãn-tõog bʋʋdo, la a zamaana ned pa gom n yiis-a wĩirẽ ye. N-ye! B yiis-a-la nin-vɩɩs sʋka, yɩɩ buuda yel-wẽna yĩng la b kʋ-a. B bao-la a gãag zĩig nin-wẽns yaadẽ, b bao-la a yaoog arzɛk rãmb sʋka. A yaool n zɩ n maan kegre, a noor zɩ n togs zirẽ-beed ye. Yaa Soaala n da yalse tɩ b sõgna yãend toogo la b waa n sãoog-a lame, t'a sɩd kɩsa a vɩɩma a taab yĩnga. A yõor na n yɩɩ woko la a na n le roga kamba. Soaala-Wẽnd na n tũ yẽ maasem n pids b raabo. «A namsga sẽn yɩ wʋsga poore, Soaala n gomde, m tʋʋm-tʋmda na n vɩɩndame la a vɩɩm na n yɩ-a-la noogo. Ninsaalba taoore m na n yals-a-la wa nin-sõngo t'a sak n tʋka b yel-wẽna a zugẽ. Yaa rẽ yĩnga la m na n zẽk a zugu nin-bɛda sʋka la a na n naaga pãn-dãmbã n deeg a raood pʋɩɩre. Bãng-y t'a rɩka a menga n bas ne kũum tõogo, t'a basame tɩ b sõd-a yel-maandb sʋka. La yaool n yaa zãma wã beegre la a tʋk yã, yaool n yaa yel-maandba yĩnga la a ra yõkd sɛɛga.» Kɩdem sũ-noogo, Zerizalɛɛm, pag sẽn da ka le rogdẽ, kelem f sũ-noogo tɩ sãde sẽn da ka le kũmd-a rogma! Soaala-Wẽnd yet-f lame: «Ad pʋg-beoogã kamb sõor yɩɩda rʋmda kamba.» Yalg f roogo, tẽes f pɛɛla, tẽes f wĩya, ka biili n paase. Fo na n yɛdga goabga la rɩtgo, fo buudã na n sooga dũni wã ninsaalba, bãmb n na n pids tẽns niynsi sẽn lebg-b tẽn-vɩɩdã. Da zoe rabeem tɩ yãnd kõn le yõk-f ye, da zoe yãnde tɩ b kõn le paoog-f ye, yĩm f bi-bɩɩlma yãnde, da le tẽeg f pʋg-kõtã me rẽnd ye. Fo Naanda n lebg f sɩda, la bãmb la dũni fãa Wẽnde, bãmb la Fãagda, bãmb la Israyɛl Nin-Sõngo, bãmb la b sẽn boond tɩ dũni fãa Wẽnnaam. Fo ra zĩi ne pʋg-beoog sũ-sãanga, la Soaala-Wẽnd bool-f lame. «Ned tõe n basa a pipi pag bi? Yaa Wẽnd n sokde. M da bas-f-la dasem a wãn bala, la f weoog yõk-m lame, la m waame n na le tigs f kamba. M sũur puuga al wʋsgo tɩ m da solg foom m nenga dasem a wãn bala, la m nonglma sẽn ka be sɛɛba yĩnga, m zoe f nimbãanega. Yaa Wẽnd n yeele. Yaa maam n na n sõng-fo. M sẽn tar sũur ning rũnda wã yaa m sẽn da tar a soab a Nowe wakatẽ; wala m sẽn wẽen wakat kãnga tɩ sa-kãseng kõn le sãam tẽnga, woto me m wẽenda dũnna tɩ m sũ-puurã, m kãab beedã, kõn le lʋɩ f zugu n wã-f ye. Tãmsa tõeeme n looge, tãn-bi wã tõeeme n vik b zĩigẽ la mam nonglma ne foom kõn viig ye, f zooda kasetã kõn sãam ye. Yaa nimbãan-zoeer soaba Wẽnd n yeele.» Ade, Zerizalɛɛm, fo zĩi ne nimbãanega, b tusda fo n lengd goabg la rɩtgo, fo ka tar ned sẽn na n yẽes f nintãm ye. Ad Soaala-Wẽnd sẽn leokde: «M na n tʋɩɩsa f lalsa meebo ne kug neeba, n gilgi. B tẽnsʋka na yɩɩ kug moama, dignoor fãa yaa kug-peelle, lal-gũbra meng yãgda a toore. Soaala-Wẽnd n na n yɩɩ f kamba fãa karen-saamba, f kamba sũur na n tosa kaam. M na n kẽes-f-la zemsg tẽngẽ, tɩ f tɩlg ne moadg buud fãa la yɩɩr buud fãa, la f tɩlg ne rabeem sẽn pʋs n ka na n le zĩnd bada. Ned sã n baood zabr ne yã, ned sã n dat-y ne beedo, ade, kõn le yɩ maam ye, la sẽn na n baoo-a zabr ne yãmbã, m sẽn nong yãmb yĩnga, m na lub a soaba. Maam n yiis sẽyã, tʋʋm-mita. Sẽn zugda bug-saala sã n wa tʋm n yiis zab teoogo, sẽn tõe n tʋm tʋʋm beedo, ad yaa maam n kõ yẽ soab sãoong yam, wala m sẽn kõ sẽn na n wãa yẽnda wã me yam. Bãng marsã tɩ zab-teoogo sẽn na n dɩk n zab ne foom kõn tõog kudb ye. Ned ninga me sẽn na n boola foo bʋʋdo yẽ soab n na n paa bʋʋdo. Soaala-Wẽnd tʋʋm-tʋmdba pʋɩɩr la woto, m sẽn tog n sõng-b ne bũmb ningã, bõn-kãng kõn paoog-b ye.» Ko-yũud sẽn tar b rãmb fãa, wa-y tɩ koom bee ka ba y ka tar ligdi bɩ y wa. Wa-y tɩ kood me la b kẽes raaga la ka yiisd ligdi n daadẽ ye. Bĩisim la rãam me yaa boto. Bõe tɩ y na n sãam y ligdi n da bur sẽn ka yiisd kom, bõe tɩ y na n nams y mense n yaool n ka ne yõodo? Y sã n sak n kelg-ma, y na paam rɩ-sõng n dɩ, y na tɩgs y mens ne sẽn ya sõmb n yɩɩda. Kelg-y neere, wa-y mam nengẽ! Kelg-y tɩ y na vɩɩnde! Ad-y yaa Soaala n gomde: «Yaa zood sẽn kõn sɛ la m na n yõg ne yãmba. A Daviid sẽn paam kũun niynsa la m na n kõ yã. Ade, m kɩtame t'a Daviid kõ bu-zẽmba kaseto kaset tɩ m pãnga labsa, m kɩtame t'a soog-ba, n dɩ naam b zugu. Foo me, Israyɛl, fo na n kamsa sãamba neb sẽn ka mi-fu, tɩ fo me ka mi-b ye, la mam yĩnga b na n zoe n waame, tɩ maam, Soaala-Wẽnd, a Israyɛl Nin-Sõngo n kõt-f zu-noog kãnga.» Bao-y Soaala-Wẽnde tɩ y ket n tõe n yãend-ba, yõk-y Soaala-Wẽnd sɛɛga tɩ b nan ket n pẽ. Bɩ nin-wẽng yi a so-wẽng pʋgẽ, tɩ yel-wẽn-maand bas a tags wẽnse. B sã n lɛɛg n wa Soaala-Wẽnd nengẽ, Wẽnd na n zoe-la b nimbãanega, tɩ tõnd Soaala-Wẽnda sũur yalma, la b pa mongd b sugr ye. Soaala-Wẽnd n yeele: «Yãmb tagsgo ne mam dẽnna ka a ye ye, mam soya ne yãmb dẽnna ka a yembr ye. Wala saaga ne tẽnga sẽn zãr ne taaba, woto me la tõnd soya zãr taaba, woto me la mam tagsgã zʋʋg yãmb dẽnna. Tʋʋlgo bɩ waoodo, saaga pa rʋʋgde tɩ kooma le lɛɛg n kul yĩngri tɩ tẽnga ka madg ye. A madgda tẽnga tɩ b bʋde, tɩ sẽn bʋd yi n wom biisi, tɩ koaada paam a rɩɩbo. Woto me Wẽnd gomna ka yit b noorẽ n ka wom biis ye, n ka pids b sẽn dag n dat bũmb ninga ye.» N-ye! Yãmb na n yii ne sũ-noogo n lɛɛg n wa y tẽngẽ, tɩ bũmb pa maan-y ye. Tãmse la kunkuba na n kilsa b sũ-noogo, tɩɩsa fãa na n pãba nug-pogse. Gõosa zĩigẽ yaa taamse n na n yi, sɩlg-nao-yẽesa zĩig na n yɩɩ luiili sibi. Rẽ na n waa ne Soaala-Wẽnd pẽgr kãsenga a na n yɩɩ zood kaseto, zood sẽn ka tõe wã abada. Soaala-Wẽnd n gom woto: «Reeg-y noore, maan-y sẽn zemse tɩ m fãagra pẽnegame la m sõmblema pukri me taame. Zu-noog soaba la ned ninga sẽn maana wa m sẽn togsã, n ka viig ye: a kõn saag n tõdg vʋʋsg raara noor ye, a kõn saag n tʋm tʋʋm-kegr ye.» Bɩ sãamba kamba sẽn pʋgd-b maama da saag n yeele: «M mii vẽenega tɩ Soaala na n welga maam ne b buudu.» La zu-soab me ra saag n yeele: «Mam ya tɩ-koɛɛng bala.» «Yaa woto la Soaala-Wẽnd leokd zu-soaben-dãmba sẽn deegd-b vʋʋsga raar noore sẽn maand-b mam sẽn date, sẽn dat-b zood ninga m sẽn yõg ne a Israyɛl, m na kõ bãmba, m dooga pʋga, m tẽn-sõngã pʋga, yʋʋr sẽn yɩɩd rogem dẽnna, n yɩɩd rogem sẽn wat ne yʋʋr ninga. Kugr zugu la m na n gʋls b yʋʋrã, la a kõn menem abada.» Sãamba kamba sẽn pʋgd-b Soaala n maand b raabo, sẽn pẽgd-b bãmb yʋʋre, sẽn dat-b n yɩ bãmb tʋʋmd-tʋmdba, ad Soaala sẽn yet bãmb poorẽ: «B sã n deegd vʋʋsga raar noor neere, b sã n sak m sẽn kaool ne m buud a Israyɛl, b bãng tɩ m na n tall-b lame n dʋʋs-m tãn-sõngã zugu. M na noog b sũuri m pʋʋsga zĩigẽ. Kũuna la maandã b sẽn na dɩgl maan-kugra zugu mam na reeg-ba ne sũ-noogo. B na n boola m roogã tɩ ninsaalba buuda fãa pʋʋsg roogo.» Ad-y Soaala-Wẽnd sẽn tigim a Israyɛl kamba sẽn da sẽegã, ad-y Naaba-Wẽnd n paasd woto: «M zoe n tigmame la m na n le tigmame n paase.» Yir rũmsa fãa, wa-y, wãb-y yamdo. Weoogẽ rũmsa fãa, wa-y n wãb-y y yam. Tõnd rũn-kɩɩmbã ya zoeens gilli, b fãa gill ka mi baa fɩ. B fãa yaa ba-mugsi n ka tõe n wes ye. B gãeeme n zãmsdẽ, la b tar suusgu. Yaa baas sẽn ya yão-be-rãmba, n ka tɩgd dɩɩb ye. B zɩ n yeele: «Sekame!» Yaa rũn-kɩɩmba sẽn ka wʋmd baa fɩ. Ned kam fãa tũuda a sore, n get a fãaba sẽn na n tekẽ. Bãmb n gomd woto: «Wa-y-yã, d na n baoo rãam; d na n tɩga rã-toose n gãeem, la beoogo na n yɩɩ wa rũnna, rãama sẽn ket pa paood ye.» Nin-sõma loogdame la yaa wa rẽ ka lam ned ba a ye. Nin-sõma kiidame tɩ ned ba a ye ka mi tiir ye. N-ye! Nin-sõma loogdame, la yaa sẽn na n yɩ-la tɩ b põs yel-beedã. Laafi wã na n waame, nin-tɩrg na n gũsa ne laafi. Kolg-y, wa-y, dat-b-wẽng kamba, da-taase la pʋg-yoaadb kamba! Ãnda la yãmb belgda, ãnda noor la y baooda, ãnda la y laada? Yãmb buuda yaa yel-maandb buudu, yaa zirẽ-be-rãmb buudu. Yãmb saa n vigla y tẽn-kugã tɩ bɛd tẽngre la maasem sẽn beẽ. Yãmb kooda y kamba kʋɩls noorẽ la pĩis pẽgsẽ. Yãmb sẽn baood wa fãa-fãa yaa kʋɩlsa kug saala, yaa bãmb sɛɛgẽ la f sũur nooma, Israyɛl, Bãmb yĩnga la f tũnugd rãam la kũun a taaba. M tõe n saka rẽ sɩda? Soaalã n sokde. Fo rɩgla f gãag tãn-wok zugu, be la f rʋ yã n na n kʋ f maandã. F rignoorẽ, f kʋɩlenga sɛɛga la f yasl f wẽnda togsende, f solgda f meng maam n yees f futã n maneg n dʋ f gãaga n bao ligd n yao f roellã la f yaal f yaalgo. Fo zoe n pʋga a Melɛk ne kaam fo kõ-a-la yũ-nood kaam fo tʋma f neba al tẽn-zãorgẽ fo sika f meng n ta bʋg-tẽnga. F wa n yɛɛ ne f so-wogdã la f ka saag n yeele: m kõn le kẽn ye. F le yẽega f pãnga wa bi-bɩɩga wa yaams ka tol n kẽ-f ye. La m sok n gese, fo sẽn bas maama, f ra zoeta ãnna rabeem, f ra zoeta ãnda nifu. Fo ka tẽeg maam yell ye, fo ka kees vɩʋʋg bilfr menga mam yĩnga, f sũurẽ ye, la rẽ wã m sĩnda m noore, m muma m nini; yaa rẽ la f ka zoe m nifu. F wẽnema na n vẽnegame la f kõn dɩ f tʋʋma yõod ye. Toogã sã n wa tar-fo, kelem tɩ sãde tɩ daare wẽn-yoodã sẽn tigim f sɛɛgẽ wã na naag taaba n wa fãag-fo. Bãng tɩ sobgo n na loog ne b fãa. Sẽn teega maam, yẽnda n na soog m tẽnga, n soog m tãn-sõngã. Daar n wate tɩ b na n yeele: «Maneg-y sore, tuk-y sorã yalengo, tɩ m neba tõog n looge naana-naana.» Yaa woto la Wẽnd ninga sẽn zʋʋga bũmb fãa wã, sẽn kẽed-a roog sẽn kõn wã abada, la sẽn tar yʋ-sõngã, gomda: «Maam, Sõmblem naaba sẽn zao yĩngrã, ad-y m bee ne nimbãan-dãmba, n be ne neng sẽn sur-a tẽngã, tɩ m datame n keng b sũuri, m datame n doog b nenga la m vʋʋg tooga sẽn zɩsg b rãmbã. M ka na n yɛs n tar no-koeemde daar fãa, n tar zab la m puugd m sũur ye. Ka rẽ m neba sʋka, ned ba a ye kõn põs ye. A Israyɛl n beege tɩ m sũur puug wakat yɛnga tɩ m nug zẽk n wẽ, tɩ m da ka rat n le yãend-a ne m nif ye. Yaa bãmb n kell n yɩ tõatba n bao sor ning b sẽn dat n dɩke. M mi-la a Israyɛl tʋʋm wẽnsã la ne rẽ fãa, ad-m sẽn na n maane: M na sãoog-a lame, m na n wilg-a-la sore, m na maasa a kamba sũuri: M na n kɩtame tɩ b yɩɩl sũ-noog yɩɩla, Wẽnd n yeele. Sẽn pẽ-ba zĩnd ne laafi, sẽn zãr-ba zĩnd ne laafi, m na n waa ne laafi!» Bas-y tɩ m mak nin-wẽnsã ne mogre: Mogrã dãmbame n ka le tõe n sigs ye, t'a wʋkd a noorẽ, rẽgdo la begdo. Soaala-Wẽnd n yeele: «Nin-wẽnsa kõn paam laafi abada.» Da zoe yaamse la f tãs ne pãnga. Yaa Wẽnd n gomde. Zẽk f koɛɛg wala baorgo, n wilg m neba b yel-wẽna, n wilg a Zakoob a kongre. Beoog sẽn vẽeg fãa b baood n na n bãngame, yaa bõe la m dat tɩ b maane. B maanda wala buudu sẽn nong zemsgo, sẽn ka mongd Wẽnd bũmb ye. B ratame tɩ m bʋʋda tũ zemsgo sore, B sũ-noog wa fãa-fãa yaa b yẽrg n kolg Soaala-Wẽnde. B yaool n sokdame: «Bõe yĩnga la d na n loe d noore? Soaala-Wẽnd sã n ka ne-do? Bõe yĩng la d na sɩbg d menga bãmb sã n ka mi tɩ d sɩbgda d menga?» Dẽ la m leokda: Yãmb sẽ n pa ne tɩ y loeta y noore la y ket n leebdẽ, n baood yõodo, la y ket n namsd y tʋʋm-tʋmdba. Y loeta y noore tɩ mobeed ketẽ, tɩ pãb taab ket n pãbda! Y noora sã n loet woto ad-y y pʋʋsga ka tat-m ye. M sẽn dat no-loeer ningã, sulg-m-meng ningã, tõe n yɩɩ woto bɩ? Yeelame tɩ f sulg f zugu wa moog sẽn kaooge, n tʋɩ yondo tompɛglmẽ n lʋɩ n gãande? Yaa rẽ la fo boond tɩ no-loeere, la f yet t'a tara bark Soaala-Wẽnd nengẽ? Y ka mi tɩ no-loeer ninga m sẽn data la woto: Y sẽn yõg b rãmb n sẽbe tɩ yaool n ka segdã, lood-y bãmb dãmba wĩ. Sik-y zɩɩb ning y sẽn zɩlg b bãgdã. Yiis-y sẽn tar-b toogo b pɛta pʋga; zãag-y-ba ne yembd buud fãa. No-loeer ning m sẽn datã yaa: Kaoog f buri n kõ kom sẽn tar a soaba, pak f roogo n deeg sãana, yeelg sẽn kẽnda a zaala, kũm f meng roagda. Sã n ya woto f vẽenem na n puka wala wĩntoogo la f noadã na n wẽneg n maagame; f sõmblema na n kẽna f taoore, la Soaala-Wẽnd pẽgra na n pʋga f poore. F sã n yiis f koɛɛga, Soaala-Wẽnd na n kelgame, f sã n boole b na n leokame: «Ad-ma!» Moadg sã n kaẽ, mobeed sã n kaẽ, kãab yood sã n kaẽ, kom sẽn tar a soaba sã n paamd f dɩ-võre, far sẽn tar a soaba sã n paamd bũmbu n ningd a noorẽ, f vẽenema na n puka likẽ, f lik na n lebga vẽenem wa wĩnto-sʋka. Soaala-Wẽnd n na n lʋɩ f taoore wakat buud fãa, la bãmb n na n kiis f ko-yũud wĩnto-sẽengẽ. B na n paasa f kõaba keelem. F na n lebga wa zẽed sẽn tɩg koom, f na n lebga wala ko-bundga sẽn bund n ka vʋʋsdẽ ye. Fo maasem yĩnga, b na n leb n yika pĩnd raboodã. B sẽn na n le yik-b zĩig ningã, yaa meeba sẽn da tʋɩɩs zĩig ning pĩnda la b yaool n ka me fɩ n tãag rũnna wã. Zĩ-kʋd kãens zutu la b na n le yik ro-paala. B na bool foom tɩ yi-wãoong maanegda, rabood yikda. Ad Soaala-Wẽnd sẽn yete: «Fo sã n vẽ vʋʋsg daare ne bũmb raabo bɩ koosgo, f sã n yãend ra-sõnga raare bũmb sẽn be yõodo, n dat-a, la fo sẽn boond vʋʋsga raare tɩ f sũ-noogo yĩnga, n boond Soaala-Wẽnd daarã tɩ raar sẽn tog ne pẽgrã, fo kʋʋga f naoore, ad-f zug na n sɩd zẽkame, f sã n bas bõn-yõoda pʋgbo n bas tʋʋm buud toor-toore, la f bas goam sẽn pa gomd n sɛtẽ. Wakat kãnga, Soaala-Wẽnd na pids-f ne sũ-noogo, b na tall-fo n dʋʋs tãnga zugu tẽnsʋka ne kilsgu; Soaala-Wẽnd na lebs foom f ba a Zakoob pʋɩɩre.» Woto yaa Wẽnd n togse. Soaala-Wẽnd tara pãnga tɩ sek a fãag-do; b tʋbr pa yẽde tɩ d gomd tɩ b sĩnd ye. Yaa tõnd wẽnema n ning gɩdgre tõnd ne Wẽnd tẽnsʋka, yaa yel-wẽna yĩnga la b wẽnemd b neng n pa rat n kelgd-d ye. Yãmb nus rẽgma ne zɩɩm, yãmb nus-bi soba ne yel-wẽna, y sã n yaag y noore, ya zirẽ la y yagda, bɩ yaa rõadg la y rõata. Bʋʋd zĩigẽ, y wata ne yɛl sẽn pa sɩda. Ned ba a ye pa gomd ne pʋ-peelem ye, y sẽn lʋɩɩsd taoora yaa yɛl-faado, y sẽn gomd n na n yiis y meng yellẽ wã yaa gom-vɩɩd zãnga; y raaba yaa sãoong raab bala, y sẽn na n tõog n wa ne bũmb ning yaa yel-beedo. Y sẽn dat bũmb ninga yaa bũmb sẽn na n wa ne y bõne, wa ned sẽn wũnugd wag-gɛla. Lebga sɩɩs n bao f kũum, tɩ gella sẽn lake, la põeer sẽn yi. Pɛɛl niyns y sẽn wʋgdã yaa sʋlg gaam-gaam la y gaamda; y ka wʋgd-ba n na n yeelg ye, ka waood la y rat n dig ye, yaa yel-beed la y rata; y sã n kẽes y nug tʋʋmnẽ, ya pãn-tõog bal la y rat n tʋme. Y nao wã sẽn tõe yaa wudg tao-tao n tɩ maan yelle, yaa zoe tao-tao n tɩ raag zɩɩm, n daag sẽn ka tara a toorẽ yell zɩɩm. Y ka bilgd bũmb a to tɩ ka wẽng bilgri ye, y sẽn tũ sor ninga yaa sãoongo la wãabo. Y zɩ n dɩk laafi sor ye, y zɩ n tuk sor n kõ zemsgo ye. Yãmb soya yaa so-golomse; sẽn dɩka yãmb soya kõn tãag laafi tẽng ye. Yaa rẽ yĩnga la Soaala pa yãgd ne tõnd ye, n gũud beoogo n na pids b sẽn kãabe. Tõnd da gũuda vẽenem, la ket n yaa lik zĩig zãnga, d da gũuda sõore, la d ket n kẽnda ne yʋngo. D babenda wala zoanga sẽn yegd lalga, wala zoanga, nao wã sordame n pa zẽkdẽ ye. D lagsda wĩnto-sʋka wala zĩ-lik menga, d kẽnda ne laafi, la d pa são sẽn ki-b ye. D fãa zĩ n waasda wala we-rũnga, la d guusda wala malwalle. D da tẽedame tɩ Soaala-Wẽnd na n lʋɩɩsa b toogo, la zaalem; fãagre la d da gũuda, la d ket n zãr ne-a. Yãmb taoore tõnd beegra yaa wʋsgo, Soaala, la tõnd yel-wẽna n paalgd tõnd bʋʋdo. D yel-wẽna dɩga d taoore, d mi d kongrã sẽn yaa a soaba. D ka sulg d meng y taoor ye, Soaala-Wẽnde, d zãgsa y pʋgbo, yãmb d Soaala. Sẽn be d noorẽ bala, ya maan to pãnga, ka rẽ bɩ d zoe n yi yãmb soolmẽ. Sẽn be tõnd sũurẽ, sẽn be tõnd yamẽ, ka bũmb a to n zʋʋg zirẽ-beed ye. Rɩk so-tɩrgã, kẽn tɩrga ka le noom-d ye. Paam tɩ bʋʋda bʋ tɩrse lebga toogo. Raaga pʋga, togs sɩd le ka ye, zãmb geels geendame n kalemd fãa. Ned ba a ye ka le togsd sɩd ye, sẽn ka rata wẽnga yẽ soab la b maan wẽnga, n deeg a sẽn tar fãa. Soaala-Wẽnd yãee rẽnna. B yãee ne sũ-sãanga tɩ bʋʋd ka le bʋʋd ye. Bãmb yɛɛsa ned sẽn ka ningd a toogã, tɩ b yet tɩ b na ges rẽ b toore, tɩ b yet tɩ b na n della b zemsgo la b teeg b meng pãnga, n le wa ne fãagre. B dɩka zemsgã n yeelg wa kut fuugu, fãagrã n lebg b kut pugla. B yeelga b zab-n-dok-sũur fu-yorgo, la wala fu-goabga, b rɩka b nonglma sẽn ka mi belgrã n pil b menga. Ninsaalba na n deega sɩbgr ning b sẽn tog ne, Soaala na n basame tɩ b sũura pusgi n waag b bɛɛba gilli, ba sẽn be-b yɩɩgã. La woto b yʋʋra na paam waoogre yaang la taoore, goabg la rɩtgo, b sẽn na n wa ne ziira raare, n wa wala kʋɩl-bɛɛg koom sob-raoog sẽn tusd ne pãnga. Soaala-Wẽnd na n waame, Zerizalɛɛm la b na n wa fãage, n paas Israyɛl kamb niyns sẽn tuub b wẽnema. Dẽ yaa bãmb meng n togse. Soaala-Wẽnd paasame: «Sã n ya maam, zooda na n yõga woto: m Vʋʋsma sẽn be ne fooma, m goama m sẽn ning f noorẽ wã, bãmb bal la f na n togse, bãmb bal la f yagensa na n pore, maam, Naaba-Wẽnd, n gomde, na n yɩɩ boto zamaan ne zamaana.» Zerizalɛɛm yiki, yik n yãge tɩ f vẽenem waame, yik tɩ Soaala-Wẽnd ziira buid-f lame, a buiid-f-la wa sõore. Tẽnga gill zĩi ne lika, bu-zẽmba zĩi ne yʋngo, tɩ Soaala-Wẽnd ziirã yaool n puk foom wa sõore. B vẽenema puka f zugẽ. Vẽenem ninga fo sẽn deeg n tãoosdẽ wã vẽenem kãng n na n tak bu-zẽmba dĩm dãmba. Zẽk f nenga, karg n ges f taoore, ges f kamba fãa sẽn wate, ges b sẽn wat n tigimd f sɛɛgẽ. F kom-dibli yita tẽn-zãorgẽ f kom-pugli wã, b tat-b lame n watẽ. F na yãend-ba, f na n kɩdmame, f sũur na yɩ noog wʋsgo, f sũ-nooga na pusgame n lebg langre, tɩ mogra pʋgẽ arzɛka, ne bu-zẽmba rẽnna, fãa tigmame n wat f nengẽ. Yʋgma ka tɛka n na n pid f tẽn-peelma. Yaa Madiã la Efa yʋgma, la b fãa yita Saba la b fãa wata ne sãnem la tɩdare, la b fãa watame la b pẽgd Soaala-Wẽnde. Kedar rũmsã fãa na n tigma f sɩmannẽ, Nebayot pe-raadã wata f yĩnga. B na n tall-b lame n wa Soaala maan-kugra zugu, la b maoonga na reege; la woto me la b na n zẽk b buuda yʋʋre. Yaa yɛ rãmb la woto fãa, tɩ ya wa sawadg n maand zĩ-boogo, tɩ ya wa malwal n sigd b roogẽ? N-ye! Koom-kogend tigma taaba al yɩɩga koom-kogend bɛdã n lʋɩt b taoore. Yaa al tẽn-zãorgẽ la b wat ne f kamba, n wat ne f kamba wanzurf la b sãnem, n wat n na n waoog Soaala-Wẽnde, n wat n na n waoog Israyɛl Wẽnnaama, la b kos tɩ b kõ-f sũ-noogo, Zerizalɛɛm. Sãamba n na n le yik f lalse, b dĩm dãmb na n lebga f sõgen-kamba. Dẽ yaa Soaala n togse. Yaa mam sũur n dag n puugi tɩ m wẽ-fo, Israyɛl, la noom-m lame marsã tɩ m wilg foom m nonglem. F kʋɩlensã kõn le pag ye, wĩntoog bɩ yʋngo b kõn le sog ye, sẽn na n yɩ-la tɩ b kẽes-f pʋgẽ bu-zẽmba arzɛgsã, tɩ b dĩm dãmba yaool n pʋgd a yeyn-ye. Tẽng ninga la rĩung ninga sẽn ka na n kẽ-a foom, na n menemame, b fãa na n wãa zãnga. Sẽn ya Libã googa faong la a zu-zẽkre tɩɩs sẽn wẽnd kʋgse, noense, ãoose, fãa na n wa paasa wẽnd dooga neerem. Woto b sẽn waoogd maam zĩig ningã m na pids zĩ-kãng ne m ziiri. Sẽn da maan b foom pãnga, ad-b kamb sẽn kũudi n wat fo nengẽ, ad sẽn da sãbsd-b fooma sẽn yĩg f taoore. B na n bool-f lame tɩ Soaala-Wẽnd tẽnga, t'a Israyɛl Nin-sõnga Siõ. B ra basa foom, ned da ka le nong-f ye, ned da ka le lɩkd n get-f ye. Rẽ sɛɛme, tɩ marsã tɛka m na n kɩtame tɩ f zug zẽk wakat buud fãa, m na n kɩtame tɩ f lebg sũ-noog bũmb tɩ yʋʋm tong taab n tõt sɛɛbo. Bu-zẽmba ne b nanamsã n na n dɩlg-foo. Dẽ marsã la f na n bãnge tɩ maam f Soaala la f Fãagda, tɩ m sẽn pid ne pãnga, maam n yaa a Zakoob Wẽndã, maam n na n ges f yelle. Yaa sãnem la m na n tall n wa f nengẽ kõn le yɩ zũud ye, yaa wanzurfu n na n deeg kut zĩiga, zũudu n na n deeg raoog zĩiga, kutu n na n deeg kugri zĩiga. Sẽn na n deeg pãng zĩiga, la ad-y pãn-tõog zĩiga, na n lebga laafi la zemsgo. Bãmb n so taoore. B kõn le wʋm tɩ ned maand a to pãng tẽnga pʋgẽ ye; b kõn le gom sãoongo la wãab yelle f tẽn-peelmẽ wã ye. F na n tõog n boola f lal-gũbrã tɩ Wẽnd fãagre, n bool f kʋɩlensã tɩ Wẽnd Pẽgre. Ka wĩntoogã n na n le vẽneg f raar ye, ka kiuugã n na n le kõ-f vẽenem yʋng ye, na n yɩɩ maam, f Soaala-Wẽnde, maam n na n kõ-f vẽenem wakat buud fãa la f na n yãga vẽenem tɛka. Fo vẽenema kõn tol n menem wa wĩndg sẽn pukd la a lʋɩtẽ ye; vẽenem kõn paoog f yʋngo wa ki-lik wakat ye. Maam, f Soaala-Wẽnde, n na n yɩ f vẽenem wakat buud fãa. M na wa ne kʋ-yãbra me tɛkem-tɛkem. F tẽnga kẽedba na n yɩɩ nin-sõma bala, bãmb n na n soog tẽnga zamaan sẽn wate tɩ bãmb la m yag ne m nusi tɩ b puk m ziiri; b na n yɩɩ wa tɩɩse m sẽn sel m zẽedẽ. Zak ninga sẽn ka weka wʋsgo na paam neb tusri la nug sẽn pa zãada soaba, a buuda na n lebga pãn-dãmb buudu. Yaa woto la maam, Soaala-Wẽnd meng yãgd n na n pidsi, wakata sã n ta. Soaala-Wẽnd pids-m-la ne b Vʋʋsem, b taaga maam b kaam la b kõ-m-la tʋʋmd kãnga: tɩ m taas naong rãmba koe-noogo, tɩ m maas sũ-sãang sẽn tar b rãmb sũuri, tɩ m wilg pa-weto tɩ b pa-weer sɛɛme, n wilg sẽn be-b roogẽ, tɩ b bãeensa na n loodame; tɩ m moon Soaala yʋʋmde, yʋʋmd ning b sẽn na n wilg b buudã b nonglem, raar ning tõnd Soaala sẽn na n dok b sũur ne bɛɛbã, la b wa menes sũ-sãanga, sẽn zĩ-b n yãbd kʋʋr sũ-sãanga. B rɩta Siõ kʋʋre, la mam waame n na n yẽes makr buud fãa sẽn da wilgdi tɩ b bee sũ-sãang pʋgẽ n lebs makr niynsi sẽn na n wilg marsã tɩ b bee sũ-noog pʋgẽ. Tɩ m ledga b zuta tompɛglem ne zu-vindg sẽn be neere, n tek b nintãm ne kaam sẽn tar yũ-noogo; tɩ m teka b nimbãan-nenga ne fuug sẽn ya kibs fuugu. Wakat kãng marsã la b na n mams-ba, n mams-b ne tɩɩse, sẽn pẽgd Soaala-Wẽnd ne b woglem, n mak-b ne zẽed tɩ-neeba, sẽn pukd Soaala ziiri. Kʋdem-wẽnnẽ lalsã na n le yikame, kʋdem-wẽnnẽ dotã na n le meeme, raboodã na n le maneg n yikame, tẽns niyns sẽn da wã n dʋr al daar zãra na n le maneg n mee paala. Sãamb n na n wa kɩɩm y rũmsi, neb sẽn yi tẽng a to n na n wa ko y pʋto la b ges y bugsuntundu. B na n boola yãmba tɩ Soaala-Wẽnd maan-kʋʋdba, b sã n gomd y yelle b na n goma woto: «Tõnd Soaala-Wẽnda sõgen-kamba.» Y na dɩɩ dũni rãmba arzɛgse, y fan-teedã na n yii bãmb laogẽ. Soaala-Wẽnd n gomd woto: «Yãmb paama yãnd wʋsgo, yãmb paam-a lame n bãge; yãmb sẽn da reegd yaa paoore, neba ra tʋbsda y nenga. Yaa rẽnd me yĩnga, la b na n dol-y naoor a yiibu nin-bãmba rãmb tẽngẽ, la y na n bãnga sũ-noogo, sũ-noog sẽn ka be sɛɛbo. Maam, Naaba-Wẽnde, m baooda zemsgo. M kisame la m yetame tɩ pa segde tɩ b reeg bũmb ne pãng ye. Woto wã m na lebs-y b sẽn yõk n deege, la m na yõg ne yã, zood sẽn ka tõe n le sãame.» Y yagensã, b na bãng-b zĩig zãnga, b na bãng-b bu-zẽmba tẽnsẽ fãa. Sẽn na n yãend-ba, na n bãng-b lame n welge tɩ yaa buudu Soaala-Wẽnd sẽn ning barka. Soaala-Wẽnd pidsd-m-la sũ-noogo, M Wẽnda pidsd-m-la ne kɩdengo; sõngr ning b sẽn sõng-ma, wẽnda fuug b sẽn yeelg-ma. M sũ-noog yaa pʋg-sɩd sũ-noogo, pʋg-sɩd sẽn ning a kibs pugla, m sũ-noog yaa pʋg-paal sũ-noogo, pʋg-paal sẽn ning a fan-teedo. Wala koodã sẽn bund n yit tẽnga, wala zẽedo sẽn sakd koobo, woto me Soaala-Wẽnd na n kɩtame tɩ b fãagre la b pẽgre pusgi n yi ãndũni rãmba sʋka. Fo nonglem yĩnga, Zerizalɛɛm, f nonglem yĩnga Siõ, m kõn le sĩnd ye, m kõn zĩi n ka maand bũmb ye, n tãag wakat ning f fãagra sẽn wat n puk wa sõore, bɩ n wit wa bug-vɩlenga. Bu-zẽmba na yãende tɩ Soaala-Wẽnd fãag-f lame, dĩm dãmba na yãend f ziiri. B na n boola f yʋ-paalã Soaala-Wẽnd sẽn pʋd-fã. Soaala f Wẽnnaama nugẽ f na n wẽnega wa naam zu-vindga n wẽneg pugl sẽn yiis kibs yĩnga. B kõn le bool foom tɩ pʋg-beoog ye, b kõn le bool foo abada, tɩ tẽng sẽn lebg raboog ye. B na n boola foom a rʋmde, n bool f tẽngã tɩ pag sẽn paam sɩd sõngo. Soaala na n pidsa f tẽnga ne sũ-noogo, f tẽnga na n wẽnega pag sẽn paam sɩd sõngo. N-ye! Wala rasãng sẽn kẽed kãadem ne bi-pugla, woto me, sẽn le maneg n meta fooma, na n yɩ-la f sɩda. La wala pʋg-bil sẽn noogd a sɩd sũuri woto me foo n na yɩ f Wẽnda sũ-noogo. Zerizalɛɛm, f lal-gũbra zugu, neb la m ning tɩ b gũ tẽngã, la wĩndg bɩ yʋngo b pa tog n sĩnd b noor ye. M yeel-b lame: «Yãmb tʋʋmd yaa y tẽeg Zerizalɛɛm yelle, n tẽeg y Soaala-Wẽnd tẽnga yelle; dẽnd yĩng bɩ y ra vʋʋs ye. Da bas-y Wẽnd ne laafi ye, n tãag wakat ninga b sẽn na n le maneg n me Zerizalɛɛm n kɩt t'a lebg dũni wã tõr zu-zẽkre.» Soaala-Wẽnd wẽena woto: «Wala sẽn ya sɩda la sɩd bala tɩ tõog buud fãa be-la m nugẽ, m wẽenda ne foo, m buudu, tɩ m kõn le bas bɛɛba tɩ b rɩ f sẽn ko ye, la ned kõn le yi kɛɛnga, n wa yũ f yʋʋmda rãam f sẽn nams f meng n paam ye. Yaa sẽn na n tigs-b koodã n na dɩ-a la b naag n pẽg Soaala-Wẽnde; yaa sẽn na n fãs-b bugsuntunga biisi n na yũ rãama, Wẽnd sɩmannẽ.» Zerizalɛɛm dãmba, yi-y, yi-y la y bas y tẽngã! Pak-y tɩ sẽn wat-ba tõog n kẽ; maneg-y n yẽd-y sora londo, yiis-y kuga zãnga, la rʋʋs-y tãb-kaoor tɩ bu-zẽmba yãende. Ad Wẽnd na n kõo noore, dũni wã yaang la a taoor dãmba. Yeel-y Siõ rãmba: «Ad-y Fãagda sẽn wate, a wata ne a sẽn zab n deeg b rãmba, a wata ne a sẽn nams n paame.» B na boola yãmb ne bãmba tɩ buud sõngo, Soaala-Wẽnd sẽn fãag b rãmba. La foo Zerizalɛɛm, b kõn le bool foo tɩ tẽng b sẽn zoe n bas ye, b na n bool-f lame: tẽng b sẽn nonge. Yaa so-toagd a bõe n yit Edom, n yit Bosra, a na-tẽngẽ, t'a futa maneg n moog ne zɩɩm? A pila fu-taoko, n kẽnd ne naam, n kẽnd la a mi a sẽn wɩɩd ne pãng ninga. Soaala yeelame: «Yaa maam, la m watame n na n kao bʋʋdo, m watame n na n zab ne bu-zẽmbã la m fãag m buudu.» «La yaa bõe yĩnga la y fuuga tẽk miuugu, bõe n bol y futã? Yaa waa y kẽ-la y sĩngẽ n wẽk y bugsuntung biisi.» «N-ye! M tʋma m ye, m buuda ned ka sõng-m ye. M sũura sẽn da fudgã, m sũura sẽn da wit bugma, m tabame, n tab neba, m nao tabame n bedse m tabame tɩ sib moaama yɩg n bol-ma, tɩ sib moaama rẽgem m futã. M da yeta m yamẽ: m paama m dok-m-sũur daare, tɩ m buuda fãagr wakata ra yaa n taame. M gesame, la m pa yãe sõangd ye, la ned sẽn ka wa sõng-ma, ad-y rẽ sɩd yɩɩ lingri, la rẽ me n kɩt tɩ m yik m toore la m sũ-puura paasa m pãnga. Yaa neba la m sũ-puurã kɩt tɩ m tab n bedse, b tɩga m sũ-puurã wa ned sẽn tɩg rãam, m daaga b zɩɩma tẽnga.» M dat n tẽega Wẽnd kũuni, n tẽeg sẽn kɩt tɩ b tog ne pẽgrã; m dat n tẽega b sẽn maan fãa d yĩnga, n tẽeg b nonglma fãa ne b buud a Israyɛl n tẽeg b nonglma la b nimbãan-zoeera sẽn tʋme. Soaala-Wẽnd yeela a Israyɛl poorẽ: «Bãmb sɩd yaa mam buud neba, neb sẽn na n tʋm tɩ m pẽge.» La Soaala sɩd yɩ-la b Fãagda. Ka ned la b tʋm yã t'a wa fãag-ba b zu-loeesa pʋgẽ ye, b meng b toore n zẽk b naoore, b meng b toore n wa ne nonglem la nimbãan-zoeere, n na n ges b yelle, n na n zã-ba, b nusẽ, yʋʋm wogd sẽn pʋg taaba. La Israyɛl kamb yɩɩ tõatba, b waa n lebga b Vʋʋsma sɩ-lakre, tɩ bãmb me yik beem ne-ba, tɩ bãmb me tak zabre ne-ba. Buuda wa n yik n tẽega pĩnd yelle, b wa n tẽega a Moyiiz yelle, la b sokame: «Sẽn fãaga buuda koomẽ, n fãag a rũmsã ne b rũn-kɩɩmba bɛɛ? B sẽn da pids a soab ne b Vʋʋsma bɛɛ? Ad-y yaa bãmb n yals a Moyiiz rɩtgo, bãmb n wilga a pãng la a naam. Bãmb n welg mogrã b buuda taoore, tɩ b yʋʋr na n yi zamaan ne zamaana. Yaa bãmb n kɩt tɩ b buuda neba dʋʋg kooma wa weef sẽn ka ning gadre, tɩ kẽnd ya naam kẽnde, tɩ lakr pa tol n lak ye. Yɩɩ wala rũms sẽn digd bãoogẽ, la ya b vʋʋsg zĩigẽ la Wẽnd Vʋʋsma ra tusd bãmb n dabda.» Dɩlla yɩɩ woto, Soaala, la y tall y nebã, yɩɩ woto me la y paam yʋ-sõngo. Zĩnd-y yĩngr n gese, zĩnd-y y ro-sõnga la y ro-neera pʋg n gese, ges-y yell ning sẽn dat n dɩ tõndã. Y sẽn da nong tõnd ne nonglem ninga kẽe yɛ? Y sẽn da zabd n sõngd tõnd ne pãng ninga bɛɛ? Y bʋgsma, y sũ-maasma kẽe yɛ? Da vʋʋs-y ye, Soaala, wilg-y tõnd y nonglem. Yãmb bal la ba. D yaaba Abraam ka mi tõnd ye, a Israyɛl ka tẽr tõnd yell ye, yaa yãmba, Soaala, la tõnd Ba, yãmb la d boond tɩ d Fãagda, al daar zãra. Yaa bõe la yãmb bas tõndo tɩ d bas yãmb sor n kẽed moogo? Yaa bõe tɩ tõnd sũura kidbi tɩ d ka le rat n sak y noore? Le wa-y-yã, d nonglem yĩnga, tõnd la y sõgen-kamba la buud ning sẽn ya y pʋɩɩre. Tõndo, y buud sõngã, d ka paam n soog d tẽngã n kaoos ye, d bɛɛba kẽe n taba y ro-sõngã. Ad-y daar zãr marsã d lebga wa neb sẽn yi yãmb soolmẽ, n lebg wa neb sẽn ka le kĩ ne yãmb ye. Y ka na n pãrg saagã n sigi, la y sigd tɩ tãmsa mens rigd y taoore? Y yɩtẽ-la wa bugum sẽn dɩt tuudu, wa bugum sẽn na n kɩt tɩ koom kɛɛge; la woto y bɛɛba na bãngẽ y sẽn ya Wẽnd ninga. Bu-zẽmba me na digẽ dabeem y taoore, tɩ yaa bõn-bãna la y na n maanẽ. Y sã n sigda, tãmsa mens na rigimd y taoore. Ned zɩɩ n wʋm tɩ b gomda, ned nif zɩɩ n gese, bɩ n yãende, tɩ wẽnd a to sẽn ka yãmba tõog n maan, a neba yĩnga, a teegdba yĩnga, bõn-bãn a woto buud ye. Yãmb yikd n sega sẽn maand-b yãmb raabo, sẽn maand-b yãmb raab ne sũ-noogo, la b sak n dɩkd sor ning y sẽn tuk b yĩnga. Yãmb sũur waa n puuga ne tõndo, la rẽ yɩɩ tõnd n konge. Marsã d sã le rɩk d pĩnd so-sõngã, d na paam fãagre. D fãa da lebga wa nin-dẽgdo n ka le tõe n maan bũmb y yĩng ye. D tʋʋma fãa ra yaanda y sũuri wala fuug sẽn kõd ne zɩɩm. D wẽnema tall-d lame n looge wa sobgo sẽn loogd ne tɩɩg vã-koeemse. Ned ba a ye ka le ket sẽn yõkd y sɛɛg ye, sẽn dat-a n le maneg a yelle la a le rɩk a meng n kõ yãmb ye. D neeme tɩ y ka le get d neng ye, la y bas-d-la d yel-wẽna maasmẽ. Ne rẽ fãa, Soaala-Wẽnde, yãmb bala la tõnd ba. Tõnd yaa yagdo, tɩ yãmb ya d yagda, tõnd yaa yãmb nug tʋʋmde. Da puug-y y sũur tɩ loog ye, Soaala-Wẽnde, da zĩi n tar d yel-wẽna tẽesg ye, n tar d kongra tẽegr ye. Lʋɩɩs-y taoor bala d sẽn ya y buudã. Y tẽn-sõma wã lebga raboodo, Zerizalɛɛm lebga zĩ-peen-daaga Siõ lebga vɩʋʋgo, Doog ning sẽn da ya y rẽnna, d ba rãmba sẽn da waoogd-y zĩig ningã, d wẽnd do-neerã, b ning-a-la bugum. Zĩ-kãng la d ra nonga la a lebga raboogo. Yãmb tõe n nee raboogã n sĩnda, Soaala-Wẽnde, n sĩnd tɩ tõnd yãnd paasdẽ n dabda? A pus n zoe n looga toaag menga. M da rat n leokame la b pa sok-m tɩ bũmb ye. M da ratame n sõnge la ned pa kos-m sõngr ye. Dẽ la m yeel yã: «Ad-ma, m watame,» mik yɩɩ waa m goma ne buud a to, ne buud sẽn da ka gomd ne maam ye. M da tuta m nugu buud sẽn nak a kãare, sẽn tũud sor sẽn ka so-sõngo, sẽn maanda a sẽn date. Yaa buud sẽn da baood m noore, dẽ yɩɩ vẽenega, la rẽ yɩɩ wakat fãa. Buud kãng n da kʋʋd maand tɩɩs sẽn gũmẽ, la a yõod tɩdare wẽn-naandsa yĩnga. Buud kãng ra kẽed n zĩi yaadẽ, n gãe bogdẽ, n wãbd kurkuri, tɩ b laas reegd nemdo, la nemd dɩɩb sẽn da kisi. Buuda kamb ra yeta sẽn segd-b bãmbã: «Pa-y yɩɩga, da sɩɩs-y-d ye ka rẽ d sõmblema na wa ne y kũum.» Ad-y m sã n ne Wẽnd tũudem a woto buudu, m sũur puugdame n yõogd-ma. Ade, m gesa b manesma n tɩge la m ka na n le sĩnd ye, dẽnd m dok m sũuri, n kõ ned kam fãa a sẽn tog ne, pʋs n na n zʋʋga a sẽn dat menga. Maam a Naaba-Wẽnde, n gomd woto: m naagame n sõta b mensã la b ba rãmba yel-wẽna. Bãmb me ra yõoda wisdu b wẽn-naandsa yĩnga, tãms sẽn lug zutu, b kunkuba zutu, la yaa woto la b ra baood m noore. Dẽ me yĩng la m na n sɩbg-ba, la m na n sɩbg-b lame n bãge. F sã n yãend bugsuntung willi sẽn tar biis sẽn bɩ n sakd dɩɩbo, f yetame: «D da kaoog-a ye, tɩ yaa rãam sẽn na n tall pãnga la a na n wa kõ-d tɩ d yũ.» Yaa woto la m na n maan ne m nebã, Soaala-Wẽnd n gomde, m nug ka na n sɩɩs-b ye. M na n kõo yagense a Zakoob, n kõ yagens a Zɩɩda; bãmb n na n soog m sẽn kõt-b tãms niynsã, bãmb n na n soog-b zãnga, bãmb zut la m neba na n wa ti b zagse. Sẽn na n lɛɛg-ba n kẽ maama Sariõ bãg-faagã n na n lebg b rũmsa wãbneg zĩiga, Akor bãooga la b na n wẽ yãgre b rũmsa yĩnga. La yãmb sẽn basd maama, yãmb la m na n leok marsã, n leok-y tɩ y ka le rɩkd ba bilfu sor ning sẽn dʋʋsd yãmb m tãn-sõnga zuga ye. Y sẽn mi marsã yaa y sam rɩ-noodo a Gad, y zu-noog wẽndã, wa y sẽn gomdã. Y sẽn mi marsã, yaa y pul rã-toose n kõ a Meni, la y yetame tɩ y pʋlemd nooga be-la a Meni nugẽ. Yaa kũ-toog la m pʋlemd y fãa gili. Y fãa na n pãs n lʋɩɩme tɩ b kood yã. M boolame la yãmb pa sak ye, m gomame la yãmb pa wʋm ye, m sẽn get tɩ ya wẽnga la yãmb maan yã, sẽn ka noom maama n noom yãmb sũuri. Yaa rẽ yĩnga, Naaba-Wẽnd n gomde, m kamba na rɩtẽ tɩ kom kʋʋd yãmba, m kamb na yũud tɩ ko-yũud kʋʋd yãmba. M kamba na kɩdem sũ-noogo, tɩ yãmb zĩ ne yãnde. B sũ-nooga sẽn na n pid zãng yĩnga, b na n zodga yɩɩn noodo la yãmb kɛlenga na n yɩɩ toog waasgo; yãmb na n waasame, y na n basa raoodo. Y na n basa y yʋʋre t'a yɩ kãab-beed yʋʋre m kamba nengẽ, tɩ b na n gomd woto: «Bɩ Soaala-Wẽnd bas-f tɩ f looge wala a Zagla bɩ a Zagla!» Yʋʋr ning m kamba sẽn na n sakã na n yɩɩ toore. B tẽngẽ wã, ned ninga sẽn dat-a n kãab a to kãab noogo, yaa bãmb b ye bal sẽn ya Wẽnda yʋʋre la b na n pʋde. Sẽn dat-ba n wẽene, yaa Wẽnde, sɩd Naaba, yʋʋr bal la b na n wẽene. N-ye! Yel-beed niyns sẽn loogã Soaala-Wẽnd na n yĩm-b lame, b na luda Wẽnd nifẽ. Yaa Soaalã n gomde. M na n naana yĩngri la tẽnga, b na n yɩɩ paala. B kõn le tẽeg yĩngr la tẽnga sẽn looga yell ye, Bɩ y kɩdem sũ-noogo, bɩ y ra vʋʋs ne kilsgu ye; ad-y bũmb la m na n maane, m na n naana Zerizalɛɛm sẽn mi kɩdengo, t'a kamba me pid ne sũ-noogo. M sũur yaa noogo ne Zerizalɛɛm, m sũur yaa noogo m sã n tẽegd m buuda yelle. B kõn le n wʋm yãbr dãamd ye, b kõn le wʋm waasg ye. Bi-pɛɛlg sẽn na n doge n wẽneg n pa ne dasem a wãna kõn le zĩnd ye; bi-bɩɩg me kõn loog t'a pa reng n kʋʋl ye. F sã n ki f yʋʋm kobaga, f kii pẽbgo. F sã n ki n pa ta yʋʋm koabga, b na n ges-f-la wa b kãab-f-la wẽnga. B sã n me roto, b na kẽ b pʋsẽ, b sã n sel bugsuntundu, b na rɩ b yõodo, B kõn le me tɩ ned a to wa reeg n kẽ ye, b kõn le sel tɩɩse tɩ ned a to wa rɩ b biis ye; m neba na kaoosame wala b tɩɩsã sẽn kaoosde, m kamba na n dɩ-la b tʋʋma yõodo. Nams zaalem kõn le zĩnd ye, b kõn le rog kamba sẽn na n wẽneg n kɩ b nifẽ ye. Bãmb n na n lebg buud ning sẽn paamd m barkã. M na sake, tɩ b nan ka bool-m meng ye, b ka na n gom n baase, tɩ m zoe n wʋma b sẽn date. Digd-n-yĩidg ne pe-bila na n naaga taab bãoog a ye, bõnyẽeg na n wãba yamdo wa naafo, waaf rɩɩb na n kong n yɩɩ tẽnga tom bala. Tãn-sõnga zugu, sãoong buud kõn le sãam ye, wẽng buud me kõn le tʋm ye, Wẽnd n yeele. Ad Soaala-Wẽnd sẽn gomde: «Yĩngra ya m zaoore, tẽnga ya m nao teegr zĩiga; doog ninga y sẽn na n me m yĩngã, do-kãng buud na n yɩɩ wãn wãna? Yaa zĩ-bʋgo la m vʋʋsga rooga na n ti? Y sẽn ne wã fãa yaa mam nug tʋʋmde, fãa gill yaa maam n so, yaa maam n gomde. Mam sẽn pẽgd a soaba, yaa naong soaba, yaa nimbãan-neda, sẽn kelgd m goama n yɛɛsdẽ la a rigd dabeem. La yaa bõe la m ne yã? Kẽer maoong rũng sã n ya naafo, kẽer dẽnd yaa ninsaala, tɩ kẽer ya pesgo. Kẽer me yaa baag la b wẽeda; kẽer wata ne zom wamde, tɩ kẽer wat ne kurkur zɩɩm; kẽer yaa wisd la b yõogda. Kẽer yaa wẽn-naands la b waoogda. La bãmb sẽn yãk b so-yoog n tũudẽ wã, b sẽn bas maam n pʋgd yel-yoodã b yetame tɩ rẽ n tat bãmb yam. Ad-y mam me sedame tɩ m na sɩbg b tʋʋm yoodã, tɩ m na tak b zugu b sẽn zoet bũmb ninga wa fãa-fãa wã. Sɩda, mam boolame la ned pa sak ye, mam gomame la ned pa wʋm ye, mam sẽn get bũmb ning wa bõn-wẽngã ad-y yaa bõn-kãng la b maan yã, sẽn ka noom maama la b yãk yã.» Kelg-y Soaala-Wẽnd gomde, yãmb fãa sẽn yɛs ne rigbu m koɛɛga sã n lʋɩ y tʋbẽ. Kelg-y tɩ y sẽn nong maama yĩnga, y tara saam-biis sẽn kis yãmba, sẽn lebsd yãmb poorẽ. Bãmb n gomd n laadẽ la b yetẽ: «Soaala-Wẽnd ziira pukr daare, sãnd d ka na yãend y sũ-noog langre!» Ad-y yaa bãmb dãmb n na n paam yãnde. Kelg-y koɛɛg ning sẽn sãta, bʋʋr ning sẽn yit tẽnga pʋgã, sẽn yit wẽnd doogẽ wã. Yaa Soaala-Wẽnd n dond b bɛɛba b sẽn tog ne rolb ningã. Yɛ la pag rog biiga n ka reng n kũm dogem, n dog bi-ribla n ka tol n dig rogem waoodo? Ãnda n zoe n wʋm yell a woto buudu, ãnda n zoe n yãend yell a woto buudu: tẽng sẽn tiig vugr n lebg tẽn-kãsenga? Buud yikda vugri n lebg bu-yaleng bɩ? Yaool n na n yɩɩ woto ne Siõ: a na n doga a kamba t'a pa yãe n kũm dogem ye. «M sã n sak tɩ pag pʋg bɩ, yaa Soaala-Wẽnd n gomde, m na gɩdg biiga rogem sɩda? Maam, Naaba-Wẽnd, kõn bɩɩs pʋga la m le kẽ sʋk n sãamd dogem ye.» Dɩlla, yãmb fãa sẽn nong Zerizalɛɛm bɩ y naag-a n kɩdem sũ-noogo, bɩ y naag-a n lange. Yãmb fãa sẽn da yãend a bʋko n zoe n kelem a kʋʋrã, naag-y-yẽe marsã n bas y sũ-nooga t'a fudg n daale. Woto a na bels yãmb n gãneg y sũuri, y na lebg wa kom-peelse b ma rãmb sẽn bugd b yãoogẽ tɩ bĩisim noog ka le tõe n paoog-b ye. Ad Soaala-Wẽnd sẽn yete: «M na n teesa Zerizalɛɛm m kũun sõma wã, n tees-a bu-zẽmba arzɛgsã, tɩ b fõd wa kʋɩl-bɛɛga, n madg-a zãnga. M na n gesa y yelle wa ma sẽn get a bi-pɛɛlg yelle, n bugd-a, n gãnegd-a a naoẽ, n laad ne-a. Wala ma sẽn belgd a biiga, mam me na belg yã, Zerizalɛɛm pʋgẽ, m na belg yã. Y na n yãee rẽnna la y sũur na n yɩɩ noogo la y vɩɩma na n le yãnga y pʋgẽ, tɩ y wuk wa sẽoog moogo.» Soaala-Wẽnd na n wilga b pãnga b kambã la b sũura na n fudgame n yõog b bɛɛba. Soaala-Wẽnd zomba bugum sawadgo, b sẽn zomba wẽnda sɩlmande. Ad-y b pida ne sũ-puuri, b wata wa bugum sẽn zomb tʋgre n na n wilg b sũ-puuri la b pids b kãab beedo. Wẽnd na n bʋʋ ninsaalba fãa, ne bugum la sʋʋga. Sẽn na n pa-b Wẽnd nugẽ wã na n yɩɩ wʋsgo. M gomda neb niyns sẽn yɩlgd b mense n na n kẽ tɩɩs sẽn gũmẽ la b gũbg b wẽn-naanda sẽn yɛs tẽnsʋkã, n naag ne sẽn zĩ n wãbd-b kukuri nemdo, bɩ laoose, bũmb fãa sẽn ya wɩɩbdo. Ad-y nin-bãmba fãa na n menema vugri! Soaala-Wẽnd mi b sẽn maanda fãa, Wẽnd mi b sẽn tagsd b yamẽ. M watame, yaa Soaala-Wẽnd n gomde, n na tigim ninsaalba buud toɛ-toɛyã la zɛlma buud toɛ-toɛyã. M yeelame tɩ b wa tɩ m puk bãmb m ziirã. M na ning makre b tẽngẽ tɩ b bãng tɩ maam n so-ba. M sẽn na n kao b rãmb bʋʋdo n bas-b ne yõore, m na n tees-b-la Tarsis, Ypl la Lud tẽnse. Tẽn kãens neba tãp ka yãagd n tão n yõsg ye. M na n tees-b-la Tubal la Yavã tẽnse. M na n tees-b-la al tẽn-zãorgẽ, al zĩis niyns b sẽn zɩ n wʋm tɩ b gomd m yelle, zĩis niyns b sẽn zɩ n yãend m ziirã. M sẽn na n tʋm neb niynsã n na n puk-a. Tẽn kãens na n le talla y saam-biisa fãa sẽn da be ne bãmbã n wa. B na n zombg-b-la wiidi, bilim-bilm, bõones la bɛda, n zombg-b bõn-wees bɩ yʋgma, n dʋʋs m tãn-sõnga zugu, Zerizalɛɛm. Soaala-Wẽnd n gomde. Dẽ n na n yɩ kũun b sẽn na n wa kõ maam; la m na reeg b kũuna wala m sẽn maand ne a Israyɛl kamba sẽn wat ne b kũuni, la-sõma pʋsẽ, m do-sõngẽ. M na tũus kẽer meng bu-zẽmba sʋka n maan m maan-kʋʋdba, n maan maan-kʋʋdba sõangdba. Soaala-Wẽnd n gomde. Ad-b sẽn le paase: m na n le naana bõn-paala, sa-paalga la tẽn-paalga. La al n gũud sa-paalgã la tẽn-paalga yikri, yãmb yagensã na kell n pa m taoore ne yʋʋr sẽn tar pẽgre. Kiuug na n pʋga kiuugu, tɩ vʋʋsg raar pʋg vʋʋsg raare, tɩ ninsaal buud fãa wat n yĩgend m taoore. Dẽ yaa Soaala-Wẽnd n yeele. La wakat kãng marsã la b na n yi n ges neb niyns sẽn zãgs-b maama n ki n dɩgã. Zũnzũra sẽn dɩt-ba pa kiidi, bugma sẽn dɩt-ba me ka na n wẽneg n ki ye. B gesgo na n yaala ninsaal buud fãa sũuri. Sebr kãnga wilgda a Zeremi sẽn togs la a sẽn maane. A Zeremi yaa a Ilkiya biiga, maan-kʋʋdba buud neda, sẽn da be Anatot, a Bẽnzame soolmẽ. Soaala-Wẽnd sẽn gom ne a Zeremi wakatã la woto: Yɩɩ Zɩɩda dĩma a Amon biiga a Zoziyas wakato. A naama yʋʋma sẽn waa n ta piig la a tãabo. B goma ne-a yɛsa, Zɩɩda dĩma a Zoziyas biig a Zoakim wakato. N paas Zɩɩda dĩma a Zoziyas biig a Sedesiyas wakato. A Sedesiyas rɩɩ naam yʋʋm piig la a ye la kiis a nu. Kiuug a nu soaba pʋgẽ la b wʋk Zerizalɛɛm dãmb n kẽng yembdo. Soaala-Wẽnd goma ne maam n yeele: «Mam da zoe n mii fo tiiri tɩ m nan pa yag foo f ma pʋgẽ ye. Mam da zoe n welga foo toore m tʋʋmd yĩnga tɩ f ma nan ka rog foom ye. M da yãk-f lame tɩ f yɩ m no-rɛɛsa bu-zẽmba tẽngẽ.» Tɩ mam leoke: «Katõ! Soaala-Wẽnde! Ad-y m paood ne m gom kʋʋng sʋka.» Tɩ Soaala-Wẽnd leok-ma: «Da sak n yet tɩ fo yaa yãaga n paoodẽ ye. Ad foo n tog n kẽng mam sẽn na n tʋm foom neb niyns nengẽ, n wilg-ba m sẽn yet tɩ f wilg-b bũmb ning fãa. Da zoe neba rabeem ye, tɩ mam bee ne foom, n na n yiis foom yell fãa pʋgẽ.» B sẽn togs maama la woto. Soaala-Wẽnd yaool n tẽega b nugu, n sɩɩs mam noore n yeel maam: «Ade, yaa foom n na n togs m koeesã. Rũnna m kõt-f-la tʋʋmde m tʋmd-f-la bu-zẽmba tẽnsẽ: tɩ f võ la f tus n lubi, tɩ f sirg zãng la f pãb n wã, tɩ f me la f sele.» Soaala-Wẽnd le goma ne maam n yeele: «Bõe la f ne Zeremi?» Tɩ m leoke: «M nee tɩɩg willi, tɩɩg ning sẽn yãgd ne puud wekra willẽ.» Tɩ Soaala-Wẽnd yeel maam: «F yãee neere, m sɩd yãgdame n na n pids m sẽn yeela fãa.» Soaala-Wẽnd le goma ne maam n sok-ma: «Bõe la f ne marsã?» Tɩ mam leoke: «M nee rʋg-bedr sẽn kɛɛde, la yaa nug goabg sobdã n fʋʋsd a bugma.» Tɩ Soaala-Wẽnd yaool n na n wilg-ma: «Yaa Goabg la yel-beeda kɛɛda n watẽ la yaa tẽn-kãnga rãmb yĩnga. Maam n yeele, mam na n boola goabg rãmba, b sagsa ne b rĩundã. B na n waame, n vigl b rĩm dãmba naam goeel Zerizalɛɛm dignoy wã. B na n gũbga a lalsã. B na n taka zabre ne Zɩɩda tẽnsa fãa. Woto m na pids m sẽn kãab tẽnga rãmb bũmb ning fãa. La rẽ yaa b sẽn beeg-ma yĩnga; yaa b sẽn bas maam n tɩ kʋ maand wẽn-naands yĩnga. Yaa wẽnd dãmb b sẽn naane n na n waooge. Aya, Zeremi! Bɩ f sẽbg f sɛɛga, yiki! Moon bũmb ning fãa m sẽn na n yeel tɩ f togs-ba. Da bas tɩ b yɛɛs-f ye, sã n ka rẽ maam n na n kɩt tɩ f rig rabeem bãmb taoore. Dũnna menga m kõt-f-la pãnga wa tãnsoben-tẽng sẽn tar a soabã; m na n yals-f-la wa kut lalga, wa zũud ra-luka, tẽnga rãmb taoore, a Zɩɩda rĩm dãmba taoore, a kug-zĩidba, a maan-kʋʋdba, a nin-zaalsa fãa taoore. B na n zaba ne foom la b ka na n tõog-f ye. Mam bee ne foom n na n fãag-fo. Maam n yeele, maam a Naaba-Wẽnde.» Soaala-Wẽnd goma ne maam n yeel woto, tɩ tãs woto Zerizalɛɛm neba tʋbẽ, ad Soaala sẽn yeele: «M tẽegda f nonglma ne maam, f sẽn waa n ya pʋg-sɛda, la f sẽn waa n ya m pʋg-paala, f ra tũuda maam zĩ-pɛɛlẽ, zĩig ninga bũmb sẽn ka tõe n yi. Israyɛl, fo ra yaa maam m ye soolem, wala kood-rẽeng biisi. Ned sã n da sɩɩs-fo, d da reegda toogo, yel-beed da wẽnegd n lʋɩta a soab zugu.» Soaala-Wẽnd n gomde. Zakoob zak rãmba, Israyɛl buud rãmba, kelg-y koɛɛg ninga Soaala-Wẽnd sẽn kõt yãmba: «Kegr bʋg la y yaab rãmba yãend m nengẽ? Bõe tɩ b lak ne maam? B laka ne maam n na n pʋg wẽn-faado, tɩ bãmb me na n tũ rẽ n lebg nin-faado. B ka sok lɛ-lɛ: ‹Soaala-Wẽnd bee yɛ? Bãmb n yiis tõnd Ezipt tẽngã, n yɩ d sɩleto zĩ-pɛɛlẽ, tẽn-koɛɛngẽ, lond la lik tẽnga, tẽng ned sẽn ka pɩʋʋgde, tẽng ned ba a ye sẽn ka tiid n kẽedẽ.› Maam n yaool n tall yãmba n tɩ kẽes-y tẽn-noogẽ, tẽng sẽn bĩm ne tɩɩse tɩ y na n dɩ bi-noodo, la y rok y nin yõodo. Be la m tẽnga, la y tɩ kẽeme n dẽgem-a; da yaa m soolem, la y kɩtame t'a lebg wɩɩbdo. Maan-kʋʋdba ka saag n sok-ma: ‹Soaala-Wẽnd bee yɛ?› Noora karen-saam-dãmb me boto, tẽnga taoor dãmba zẽka b zug ne maam, bãngdba sẽn da taasd-b koees niynsa ra yaa wẽn-faoog a Baal koeese. B fãa tɩ noka wẽn-faadã. Yaa rẽ yĩnga la m boond-y bʋʋdo, n na n wa bool bʋʋd yɛsa y kamba la b yagense. Yaa maam n gomde, yaa Soaalã n gomde. Kẽng-y Kitim sẽn puk koom sʋka, ka rẽ bɩ y tʋm tɩ b sok Kedar n gese be rãmba ne ka rãmba manesem sã n yaa a ye. B maneg n sok n ges tẽn-bʋg rãmba n teem b wẽnd dãmba? Ad-y yaool n da ka wẽnd me ye. Mam buuda zug sẽn noome t'a paam tɩ m yaa a Wẽnde, yẽnda n tek a rẽnda sẽn pid ne ziir, yẽnda n bas maam n kẽ wẽn-faado. Yĩngr saase, bɩ y yɛɛse, bɩ y zoe rabeem, zoe-y rabeem wʋsgo. Maam n yeele, maam, y Soaalã. Yaa yel-wẽna a yiib la mam neba maan yã: b basa maam, mam sẽn ya ko-vɩɩga, ko-nifu, n na n tu bul-kẽoto, buls sẽn yũnd koom. A Israyɛl lebga yamb bɩ bõe, a roga ne yembdo bɩ bõe, tɩ neb a taab na n wa soog-a? B yik n yɛsa ne-a wa bõnyẽese, b tees-a lame n wũundẽ, b kɩtame t'a tẽnga lebg zĩ-pɛɛla, a tẽn-bɛda fãa rɩɩ bugum, tɩ ned ba a ye ka ket b pʋgẽ ye. Memfis la Tapanɛs rãmb menga wa n põng-a-la wa zugu. La rẽ fãa yaa foo n bao, Israyɛl, yaa foo n bas Soaala, f Wẽnnaam, bãmb n da kẽnd taoore n wilgd-f sore. Marsã fo na n le kẽnga Ezipt tẽnga n tɩ maan bõe? N tɩ yũ Nil koom bɩ bõe? Fo na n kẽnga Asiri bõe yĩnga? N tɩ yũ a kʋɩl-kãsenga koom bɩ bõd? Bɩ f bi-beelem dɩ-fo, bɩ f yel-wẽna sɩbg-fo! Woto la f bãngd Soaala-Wẽnd basgo sẽn ya wẽng la tɩɩseng to-to. Woto la f bãngda, tɩ ka segd tɩ f zẽk f zug ne bãmb ye. Yaa Soaala n gomde, yaa dũni fãa Wẽnd n gomde. Kelge, Israyɛl, f Soaala koɛɛga! N-yẽe! Al daar zãra, fo tara f zug zẽkr ne maam, fo basa maam la yaa woto la f zĩ n gomda: M dat n sooga m menga, la sɩda, wa pʋg-yoodre, f tʋɩta f gãag tãms zutu la tɩɩs tẽngre. Mam yaool n da sela foom wala bugsuntungu sẽn ya sõmbo, t'a biisa me ya sõma. La maana a wãn marsã tɩ fo lebg bugsuntung yooko, n womd biis sẽn ka lebd be? Ba fo pek f meng ne zẽ-koom, ba f sõ safãnd tɩ wʋme, mam taoore fo yel-wẽna ket n tab-f lame. Maam n yeele, maam a Wẽnde. Fo na n maana wãna n tõog n yeele: Mam ka rẽgem m meng ye, m ka zoe n pʋg Baal dãmb ye. Ges f nao-tagdr sẽn dɩg bãg-faagẽ, reeg f kongre. Ad-f wẽnda yʋgem-sɛdga, n saad n zoet goabg la rɩtgo. Ad-f wẽnda burgumd yãanga sẽn nok zĩ-pɛɛla. A sã n doog a neng n kok yũugu a ningda tĩiga, n ka le tõe n yaas ye. Burgum-daada ka namsd ba bilfu t'a meng a toore n wat n seg-ba, a raab wẽnga sã n tus-a t'a yiki. Gũus f menga Israyɛl! F sã n zoet ne tĩiga, f na n pogla f naoore ko-yũud na n yõk-f lame. La fo leokdame tɩ m da wɩɩg n gom ye, tɩ f nonga f wẽn-sãamse, tɩ bãmb bal la f rat n pʋge. La ade, raar a ye, Israyɛl kamba, pagb la rapa, dĩm dãmb ne b kug-zĩidba, maan-kʋʋdba la bãngdba, ad-y y zug na n wuka ne yãnde wala wagdre, b sẽn lingi. Yãmb gomda ne raoog sẽn maneg n peese la y yetame: ‹Foo la m ba.› Y gomda ne kugr sẽn maneg n pees tɩ y boond rẽnda tɩ y wẽnde, la y yetame: ‹Foo n dog maam.› Y zãgsa a tees n ges maam, n wẽneg y poor n tees maam. Toog sã n tar-y marsã bɩ y yaool n tees maam n kelemdẽ: ‹Yik n fãag-do!› Ad-y m na n leok-y-la woto: ‹Wẽnd dãmba fo sẽn maana bee yɛ? Bɩ bãmb yik n fãag-fo, f yell pakr wakato, b sã n tõe. Sɩda Zɩɩda, fo wẽnd-naandsa sõor zema f tẽnsa sõore.› Bõe yĩng tɩ f rat n dogl yell m zugu? - Soaala-Wẽnd n gomde. Yãmb fãa ka bas maam laa? Mam sɩbga yãmba la yaa zaalem bala; yãmb pa reeg m saglga ye. Y tol n yika wa bõnyẽese n kʋ y bãngdbã. Zamaan kãnga rãmba, wʋm-y Soaala-Wẽnd gomde! Israyɛl kamba, m lebga yãmb yĩnga wa we-raoog sẽn kẽesd dabeem bɩ wa tẽng sẽn gãe la a yikd ne lika. M buudu, bõe tɩ y gomd tɩ y so-la y menga, la y kõn lɛɛg n wa kẽe maam yɛsa? M sok-y n gese, bi-pugl yĩmda a fan-teedo, pʋg-paal yĩmda a sɛɛg sẽbdg sẽn maneg n pãneme? M pa tẽed ye! La sã n ya foom, m buudu, f yĩma m yelle, al daar zãra; dasma ka le tõe n sõd ye. Sã n ya sɩda, ad foo n mi f sẽn na n tũ sor ninga n bao f sũ-noogo, woto, ba na tũ ne yel-kɛga, fo na rɩk f sorã, tʋm tɩ narã lebga f minungu, al tɩ b ne f futa zugu neb sẽn ka tar-b toorẽ yell zɩɩm. F pa ling-ba tɩ b kaood kʋɩlens ye. Ne rẽ fãa, fo raaga b zɩɩm, la fo ket n yetame tɩ f yaa nin-tɩrga, la ka tog tɩ m sũ-puura kell n pʋg-f ye. Ade, fo sẽn yeel tɩ f ka maan bũmbã m na n bool-f-la bʋʋdo. Fo sɩd ka zɛɛd ne sor tedgr ye, f ka zɛɛd ne f zo-rãmba teengo ye. La Ezipt na n ning-f-la yãnde wa Asiri sẽn ning-f yãndã. Fo na n kʋka f zugu n yi Ezipt tɩ maam a Wẽnd ka rat fo sẽn teeg b rãmba ye. F yɛla ka tõe n maneg woto ye.» Soaala-Wẽnd goma ne maam n yeel: «Ned sã n dig a paga, tɩ paga yi n tɩ rɩk sɩd a to, sɩda tõe n le reeg-a-la a nengẽ bɩ? Ka tõe ye, ka rẽ, yaa tẽngã n dẽgemde. La foo, Israyɛl, yaa Soaala-Wẽnd n gomde, fo saka yoob ne neb wʋsgo, n ket n dat tɩ m le reeg-fo. M sok n ges na tõoge? Zẽk f neng n tees tãmsã la ges yaa tãn-bʋg zugu la f ka yaale. Wala we-raoogẽ fãada, sẽn soos n gũud so-loaada woto me fo ra zĩi soya noore n gũud f ra-sãmba. Fo rẽgma tẽnga ne f yoodem la f tʋʋm wẽna. Yaa rẽ yĩng la m mong-f saaga n mong-f sa-yaoose, la f zãgsame n kell n tar yoobo, n zãgs tɩ f kõn deeg f kongr ye. Ne rẽ fãa fo saagd n gomda m yelle, n yetẽ: ‹M ba wã, m yãadmẽ zoa wã, na n dɩɩ beem ne-m daar fãa laa?› N-ye! Yaa woto la f gomda n yaool n ka basd f wẽnema ye, la sã n ya wẽnem, f sɩd tõe ne wẽnem.» Soaala-Wẽnd yeela maam, naab a Zoziyas zamaanẽ: «Fo yãenda a Israyɛl, a long rõaag long sɩɩga, sẽn maana bɩ? A saa n yoo tãn-bɛda fãa zutu la tɩɩg fãa sẽn tob tẽngre. Tɩ mam da tagsdẽ t'a sã n maan woto fãa n sɛ, a na lebg n wa mam nengẽ. La a ka lɛɛg n wa ye. A Zɩɩda, a Yi-saada, a yao wẽnga yãee rẽ. A yãeeme tɩ m da kɩsa a Israyɛl, a long rõaag long sɩɩga, kãadma kaoob sebre, tɩ m da yiis-a lame, a yeebga yĩnga. Mik a yao, a Zɩɩda, mik a Yi-saad, ka zoe rabeem ye; yẽ me saame n yo. Yẽ me saame n yo ne wẽn-naandse, sẽn pees ne raoog bɩ kugri. A rẽgma tẽngã. A Zɩɩda, a Yi-saada, ne a long rõaag long sɩɩga, a Israyɛl tão wã, ka le lɛɛg n wa kẽ maam ye, a ka lɛɛg n wa ne a sũur fãa ye, a noor bal n yaag n togse. Yaa maam a Wẽnde n yeele.» La Soaala-Wẽnd yeela maam: «A Israyɛl, a long rõaag long sɩɩga, maanda wala a be-la a sɩd zugu, sã n mak-a ne a Yi-saada, a Zɩɩda. Bɩ f tees goabga sẽnẽ n tãs woto: ‹Israyɛl, long rõaag long sɩɩga lɛɛg n wa tɩ m ka rat-f ne wẽnga la m kõn gãnem m neng ye. M ka mi beem tugb ye, Soaalã n yeele. Fo we n sak n deeg f kongre, n deeg tɩ f zaba ne Soaala-Wẽnde, n deeg tɩ f saa zĩis fãa n pʋg wẽn-sãamse, tãmsa zutu la tɩɩg sẽn tob tẽngre; fo ka kelg mam koɛɛg ye. Maam n yeele, maam a Wẽnde.› Lebg-y n wa-y yã, tõatba. Maam n yeele, maam, Naaba-Wẽnde, maam la Soaala. M na n yãka nin-yend tẽng a ye pʋgẽ, n yãk neba a yiib buuda a ye pʋgẽ, n tall-ba n wa Siõ. M na n kõ-y-la pe-kɩɩmba sẽn tat m daabo, tɩ b kɩɩm yã, ne yam la gũusgu. Wakat ning sẽn watã, Soaala n gomde, y na n doga kamba n lebg bu-yalengo. Wẽnd zooda kaset sẽn pag koglgo ninga pʋgã, y kõn le sok a yell ye. Ned ba a ye kõn le tẽeg a yelle ye. B na n yĩma a yelle, b kõn le bao a zĩig ye, b kõn le maan a taar ye. Wakat kãng b na n boola Zerizalɛɛm tɩ Soaala-Wẽnd naam zaoore. Ninsaalb buud fãa na n tigma taab be, m waoogr yĩnga. B sẽn da keng b sũuri n tũud sor ningã, wẽnem la yalemd sorã, b kõn le rɩk so-kãng ye. Wakat kãnga, a Zɩɩda tẽn-peelma neba la a Israyɛl tẽn-peelma neba na n tɩ fãooga taaba. B fãa na n yii nug goabg sẽnẽ n lɛɛg n wa tẽng ning m sẽn dɩk n kõ b yaab rãmba wala b toorẽ pʋɩɩre.» M da yeta m memga: M da nongẽ lame tɩ f lebgẽ m bi-kẽenga, tɩ m kõ-f tẽng sẽn ya f raab tẽnga, tẽng noom sẽn ka taar dũni wã pʋgẽ! M da tagsdame: Fo na n boola maam tɩ f Ba, la f kõn le bas mam pʋgb ye. La ayo, yãmb ka pʋg-m ye, Israyɛl kamba, y zãmba maam wa pag sẽn zãmbd a sɩda. Yaa Soaalã, yaa mam menga n togsd boto. Kɛleng n kelem tãmsa zutu. Yaa Israyɛl kamb n yãbd la b kũmdẽ, yaa b sẽn tudg sora yĩnga, ya b sẽn yĩm mam yelle, b sẽn yĩm maam b Soaala yelle. Lebg-y n wa-y yã, wa-y n pʋg maam, bi-beese, m na sãoog y tʋb-pa-wʋmdma. Ade, tõnd wata y nengẽ, tɩ yaa yãmb bala, Soaala, la tõnd Wẽnde. Sɩda, tõnd basame tɩ b belg-do ne d sẽn da waoogd b rãmb kunkuba zutã, ne kaasg ning sẽn da kaasd tãmsa zutã. Yaa d Soaala-Wẽnd nengẽ bala la a Israyɛl tõe n paam fãagre. D bãnga al d yãadmẽ tɩ d saka yãnde n waoog wẽn-naand a Baal la rẽ n sɛɛsd d yaab rãmba paoongo, rẽ n sɛɛs b rũmsi, bɛd la bõonese, b kom-dibli la b kom-pugli. Bɩ d sak n dɩ yãnde la paoore, tɩ tõnd n beeg d Soaala la d Wẽnde, tõndo, wala d ba rãmba, al d yãadmẽ n tãag rũnna. Wẽnnaam d Soaala sẽn da togs-d bũmb ningã, d pa reeg ye. Israyɛl, ad-f sã n leb poorẽ, yaa Soaala n gomde, f tõe n le wa-la m nengẽ. Fo sã n zãag ne maam f wẽn-naan-yoodã, f kõn le baood n na n zoe ye. Zirẽ-beed sã n ka f noorẽ, tɩ f wẽen wa sẽn tog la sẽn zemse, n wẽen ne Soaala, vɩɩm naaba, ad bu-zẽmba mens na kos-ma tɩ m ning-b barka, la b na kils m yʋʋre. Ad Soaala-Wẽnd sẽn yet Zɩɩda neba la Zerizalɛɛm tẽng rãmba: Pesem-y y meng pʋ-paalle, da le bʋd-y gõos sʋk ye. Ade, sã n yaa mam yĩnga la y zãag y sũura ne a rẽgdã, Zɩɩda rãmba, Zerizalɛɛm kẽedba, bɩ y kell n dɩk y mens n kõ maam. Y ka maan boto, y tʋʋm yooda yĩnga, m sũura na n widga wa bugum, bugum sẽn pa tõe n kiisi, bugum sẽn na n dɩ-y zãnga. Wẽ-y kũnga, a Zɩɩda yĩnga, tãs-y koɛɛg, Zerizalɛɛm yĩnga Peeb-y baorg tẽnga fãa pʋgẽ, tãs-y ne y koɛɛg pãng tɛka. Wilg-y tɩ b wa tigim tãnsoben-dotẽ, Wilg-y tɩ b yagl tãb-kaoore n tees Siõ, Wilg-y tɩ b bao zĩig n soonde, la ned ba a ye ra paa a zĩigẽ ye. Yaa nug goabg sẽnẽ la Soaala-Wẽnd tusd yel-beed t'a watẽ; yaa wɩɩbd sẽn pid wɩɩbdo. We-naaba yi-la a tʋgrẽ, dũni wã tẽn-wãada yikame n dɩk sore; a yi-la a sẽn da sorẽ la a wat n na n zɛ-la y tẽnsã. Y tẽnsa na n lebga raboodo, ned ba a ye kõn le pa b pʋgẽ ye. Yeelg-y sũ-pa-noang futu, wilg-y y sũ-sãanga, kelem-y kʋʋre; Soaala-Wẽnd pa rat n bas-d taal ye: b sũura sɩd puuga wʋsgo. La rẽ sã n wa beẽ - Maam n yeele, maam a Wẽnde, - dĩma meng na n basa raoodo, yẽ ne a kug-zĩidba; maan-kʋʋdba sũur na n yaalame, bãngdba na n yɛɛsame. B na n yeelame: «Soaala-Wẽnde, sɩda yãmb belga buud kãnga, yãmb belga Zerizalɛɛm, n yeel-a tɩ fãa na n zemsame, tɩ sʋʋg yaool n pẽneg d kokore!» Badaare, koe-kãnga la Soaala-Wẽnd na n togs Zerizalɛɛm dãmba: «Tãmsa zut sob-tʋʋlga n wẽed m buudu la sobga yita zĩ-pɛɛlẽ. Ka sob-bil sẽn zems kood yelgr ye, Yaa sobg sẽn tar pãnga, la maam n yiis-a a sẽn yitẽ wã. Yaa marsã la m na n kao bʋʋd ne bãmba.» Ad bɛ wã sẽn wate, a fõta wa sa-raoogo, a bilim-bilma tʋʋla wa saag sobgo, a wiidi wã tĩig yɩɩda sɩlg rẽnda. D yell sãamame, d wãa zãnga! Zerizalɛɛm, f sã n dat fãagre pek f sũuri, yiis a wẽnema. F sũura na n kell n paa ne a tags wẽnsã n ta da-bʋre? Kelg bʋ-raasa sẽn yit al Dã, kelg yel-beeda kibar sẽn yit Efrayim tãmsẽ. Wilg-y tẽnga rãmba, wilg-y Zerizalɛɛm dãmba, wilg-y-b tɩ bɛɛba kolgdame la b yii tẽn-zãorgẽ n watẽ, la b teesa Zɩɩda n kelemd b zabr kɛlenga. Wala gũudb sẽn gũbg pʋʋgo, woto me la b gũbg Zerizalɛɛm. La Soaala-Wẽnd yetame t'a tõdgra rolb la rẽnna. Ad yaa Zerizalɛɛm tʋʋm kɛgã n tak yel-beedã a zugu, yaa so-wẽngã a sẽn dɩka yĩnga. Yel-beeda sẽn lʋɩ a zugã la a lemb yã; ad-a yaa tɩɩsenga la a wẽnemdeda sũuri. Soaala-Wẽnd koɛɛga sẽn lʋɩ a tʋbrẽ a Zeremi yeelame: «Aba, m pʋga zabdame! Tooga wẽnd-a-la wa fuugu, m sũura rat n tõsgame, m yĩnga saooda kalwaare! M ka tõe n sĩnd ye: m wʋma tõntõoga bʋʋre m wʋma zabr sɩngr kaasgo. Yaa yel-beed woo yel-beed bal la b gomda. Tẽnga fãa paama zɛɛbo, vugr bala d pɛɛla-rota fãa rʋʋgame, sẽgda fãa siiga nif kamsg pʋgẽ. M na n gesa tãb-kaoorã n ta da-bʋre? Da-bʋr la zabra bard na n sĩndi? M buuda yaa yalma, m buuda ka mi maam ye.» Yaa Soaalã n gomde. Yaa yãas sẽn ka tar yam ye, b ka wʋmd bũmb ye. B sẽn mi la b sẽn tõe yaa wẽng maaneg bala. Sã n ya maan neerã, b ka mi la b ka tõe fɩ. Mam sulg n gesa tẽngã la a yaa vɩʋʋgo, vɩ-raoogo, la yĩngr vẽenema me kii tam. M le gesame, la ade, tãmsa ka le yɛs b nao zut ye, la tãn-bi wã miimdame. Mam gesame, la ned ba a ye ka le ket ye; yĩngr luiili fãa menemame. Mam gesame: tẽnga sẽn da bĩm wa zẽedã lebga zĩ-peen-daaga, tẽn bɛda fãa lebga raboodo. La rẽ yaa Soaala-Wẽnd tʋʋmde, yaa b sũ-fõora tʋʋmde. N-ye! Woto la Soaala-Wẽnd gomda: «Tẽnga gilli na lebga zĩ-pɛɛla, sã n ges bala f sũur sãamdame; m yaool n ka na n menes-a gill ye. Woto wã tẽnga na kelem kʋʋre la yĩngri, saaga na n sobame. M sẽn da yeela la m na n pidsi m daaba kõn tek ye, m kõn bars bũmb ye.» Kɛleng n kelme tɩ b baad bilim-bilm, tɩ b baad tãbda rãmba. Tẽnga neba fãa sɩnga zoees bala. Kẽer soonda tʋgẽ, tɩ kẽer dʋʋd pĩisi. Tẽnsa fãa lebga vɩɩdo, ned ba a ye ka le ket b pʋsẽ ye. La foom Zerizalɛɛm, maana a wãna tɩ f ket n yeelgd fu-neeba tɩ neba fãa nina yiig n get-fo, maana a wãn tɩ f famd f meng ne sãnem teedo, la f maneg f nini n dõos kɩrʋ? F manegda f meng zaalem: ra-sãmba ka le baood-f ye, f kũum la b baood marsã. N-yẽe! M sẽn wʋmd marsã wã wẽnda pag sẽn kũsd rogem kũsga, wẽnda pag sẽn nan dogd a pipi biig waasgo. Koɛɛga yaa a Siõ koɛɛga, yẽ n waasd la a zẽkd a nus n yetẽ: «M yell sãamame, m lʋɩ m kʋʋdba nusẽ yeee!» Zoe-y n saag-y Zerizalɛɛm, ges-y neere, sa-y n sogs-y, gilg-y raasã n gese y na yãend ned sẽn tũud so tɩrga, ned sẽn baood sɩda? Y sã n yãend nin-yend menga m na maan sugri ne Zerizalɛɛm. Maan n yeele, maam, Naaba-Wẽnde. Ad-y tẽnga rãmb sã n wẽenẽ la b yet woto: «M wẽend ne Soaala-Wẽnd, Vɩɩm Naaba,» b wẽena Soaala yʋʋr zaalem. Soaala-Wẽnde, yaa bõe la y gũuda? Yaa y neba ra bas yãmb pʋgbo. Yãmb sɩbgd-b lame la b ka yɛɛsd ye. Yãmb sɛɛsd-b-la a yeyn-ye la b baas n zãgsda y kelgre. B kʋɩɩsa b nens wa pĩig kugri, b ka rat n lɛɛg n wa kẽ yãmb ye. Mam da yeta m menga tɩ b sẽn maand woto wã, b maanda wa yãas sẽn ka mi bũmb ye; m yetame tɩ b ka mi Soaala-Wẽnd daab ye, tɩ b ka mi Soaala sẽn dat tɩ d modg n pʋg-b n ta zĩig ning ye. Woto m yeelame tɩ m na n pẽnega são-sãood rãmba tɩ daare bãmb mii Soaala raabo, b mi Naaba-Wẽnda sẽn dat tɩ b modg n ta zĩig ninga, la kato, piig ka são a nu ye! Bãmb me kaoo bũmb ning fãa sẽn da loe-b ne b Wẽnde. Yaa rẽ yĩnga la bõnyẽeg yit tʋgrẽ n yõgd-ba, yaa rẽ yĩng la digd-n-yĩidg tõsd-ba, tɩ ãbg wat n sor b tẽnsa noore, la a sɩɩgd sẽn yit-a fãa. Kato, b sẽn tar tõdgr la b sẽn tare, b zãmba ka be tɛk ye! Zerizalɛɛm, m na n kõ-f-la sugr bõe yĩnga? Fo kamb basa maam, b wẽenda b wẽenego ne wẽnd sẽn ka wẽnd ye. M ka bas tɩ bũmb paoog-b ye, la b saa n yo-la b yoobo, Yooba zĩigẽ la b ra zoet n dengd taaba. B sẽn wẽnd bũmb ninga: bãng wed-nobdse sẽn pʋgd wed-yãanse. Ned kam fãa yãeta a to paga n kelem bõndre. Ka tog tɩ m lʋɩɩs m toog sɩda? Ka tog tɩ m sɩbg nin-bãmba sɩda? Yaa Soaala-Wẽnd n sokde. Ka tog tɩ m maan buud kãnga bũmbu n paam n dok m sũur sɩda? Bɩ b kɛ a bugsuntundã sẽn lolemd tãnga, n kẽ a pʋgẽ n kɛ fãa n dʋʋge, n kees bala bũmb sẽn pa zem fɩ; bɩ b võ tobendã tɩ m pa so bãmb ye. A Israyɛl roogo wala a Zɩɩda roogo ka maan pʋ-peelem ne maam ye. Maam n yeele, maam, Naaba-Wẽnde. Zɩɩda rãmb yeelame tɩ b ka mi Soaala ye. Bãmb n maand tɩ Wẽnd ka tar pãng ye, la woto yel-beed kõn ta-b ye, b ka na n seg zabre bɩ kom ye. B bãngdba goama yaa sobgo, b ka tar sẽn sek toagsg ye. Bɩ b sẽn gomd yel-beed ninga lɛɛg n lʋɩ b zugu! Yaa rẽ yĩnga la Soaala-Wẽnde, dũni fãa Wẽnda, gomd woto: Kelge, Zeremi, sẽn ya woto la b gomdã ad koɛɛg ning m sẽn na n kõ fooma na n lebga bugum, tɩ buuda lebg raado, tɩ bugma rɩ-a. Sã n ya yãmba, Israyɛl kamba, yaa Soaala n gomde, m na n boola tẽn-zãorgẽ dãmba, tɩ b wa yik zabr ne yãmba. Ned zɩ n tõog bãmb ye, yaa buud sẽn pid ne yʋʋma, buud kʋdg menga, y ka tõe n gom b goama, y ka tõe n wʋm b goama ye. B lok kʋʋdame, b tãb-biis yaa gãndaado. Buud kãnga n na sɛɛs zãnga: y kood biisi la y buri, y kom-dibli la y kom-pugli, y rũmsi, bɛd la bõonese, y bugsuntund biisi la y kankama. Zabr na n luba y tãnsoben-doto, y sẽn tẽed zĩig ninga tɩ bũmb kõn maan-y wã. Baasgo, yaa Soaala-Wẽnd n gomde, m kõn sak n menes-y gill ye. La b sã n wa soke tɩ yaa bõe yĩng la Soaala sɩbg-ba ne yel-beed a woto fãa, fo na leoke, foom a Zeremi, tɩ yaa b sẽn bas b Soaala n na n waoog, b meng tẽngẽ, bu-zẽn wẽn-naandse. Woto wã b na yɩ sãamba sõgen-kamba, b pa-weoog tẽngẽ! Soaala-Wẽnd n yeele: Bɩ b taas a Zakoob yagense, bɩ y sõng tɩ Zɩɩda rãmb wʋme. Bɩ y kelge woto, yalems buudu, yãmb tara nin la y ka ne ye, y tara tʋba la y ka wʋmd ye. Maam n sokde, maam, Naaba-Wẽnde: Bõe tɩ y ka na n deeg tɩ maam la y Soaala? Bõe tɩ y ka na n dig rabeem m taoore? Yaa maam n kok mogr ne bĩisri, dẽ la a toaag a sẽn kõn gãndg bada. Mogra nong bɩ a rãmb a rãmbgo a kõn tõog n gãndg-a ye; ko-wiisa nong bɩ b ning rãamde b kõn tõog fɩ. Buud kãnga bala la buudu sẽn tar zʋg-wẽnga, yẽ bala n ka reegd m noore. Yẽ bal n lake, n looda, a zãgsame t'a kõn yeele: tõnd da togame n deeg tɩ Naaba-Wẽnd la d Soaala. Yaa bãmb n kõt tõnd saaga, sẽego la sɩpaolgo, b wakata sã n ta bala. Bãmb n kõt-d wakato, d kooda tigsgu yĩnga. Yãmb yel-wẽna sãama rẽ fãa, y yel-wẽna kɩtame tɩ y ka le tõe n paam kũun kãens ye. Bi-bees n be m buudẽ wã. La ad-y b wẽnda luin-bẽtba sẽn sor moogẽ n gũudẽ. B bẽda b bẽdgo la yaa ninsaalba la bãmb baood n na n yõge. Wala b sẽn pidsd no-sẽko ne noose, b pidsa b rota ne wagdem laogo. La yaa woto la b paas b arzɛka la b pãnga. B nobame n pidi; b wẽnema ka be tɛk ye. B ka kaood bʋʋd ne sɩd ye; b bʋʋd zĩigẽ b zãmbda kɩɩba, ka rẽ kɩɩbã n soẽ bʋʋm. Yaa rẽ yĩng la b paam n lebg arzɛk rãmba. B zãmbda naong rãmba. Da ka tog sɩda, yaa Soaala-Wẽnd n gomde, da ka tog tɩ m maan buud kãnga bũmbu, n paam n dok m sũur bɩ? Ad-y yel-beedo, bũmb sẽn yikd sũuri n tʋmd tẽnga pʋga: Bãngdba gomda wẽn-faoog yĩnga, tɩ maan-kʋʋdba baood sẽn ya yõod b yĩng bala, tɩ m buuda get rẽ wa bõn-sõngo. Yɛla baasg raare, y na n maana bõe? Bẽnzame kamba, zoe-y n yi Zerizalɛɛm n bao zĩig n soonde, peeb-y baorg Tekoa; ning-y tãb-kaoore Bɛt-Kerem tãnga zugu, tɩ yel-beed n yit Goabg n watẽ, yaa tẽn-kũum menga. Siõ bi-pugla ne a neerma fãa, sãamame n dɩga. Neb n wat a nengẽ neb ka tɛka wa rũn-kɩɩmb ne b rũmsi. B waa n tii n gũbg-a lame, tãb-biig fãa ne a zĩiga. B moondame: Yik-y! D sɩng zabre! D sɩng zabra wĩnto-sʋka. Kato, wĩntooga na n paoog-d lame, wĩntooga zoe n kɩllame n dabd lʋɩɩse, zaabr maasem zoe n dõnega wʋsgo. Bɩ y yik tɩ d sɩng zabrã ne yʋngo, n wã tẽnga ro-neeba gilli. B kelg dũni fãa Wẽnd sẽn yet-ba: Lub-y tɩɩsã la y sam tãndo, sam-y tãndo n pag Zerizalɛɛm. D tara kaset vẽenega, tɩ b maanda pãn-tõog a pʋgẽ. A wẽnema tãoosdame, wa ko-bunem sẽn tãoosd a koom. Tẽn-kãnga pʋgẽ, yaa zabr la pãng bʋrg bala la b wʋmda. M nin nee daar fãa, sãmpoaga la namsg sẽn pid namsgo. Zerizalɛɛm, maan gũusgu ka rẽ m na n lak n basa foo tɩ f lebg zĩ-peen-daaga la raboogo. Ad dũni fãa Wẽnd sẽn kõt noor ninga: Wʋk-y, wʋk-y Israyɛl bu-kellã, yiis-y yã, wala b sẽn yiisd bugsuntung biisi; y nusa saag wilã a yeyn-ye. M na n goma ne ãnna? M na n togsa ãnna t'a kelg-ma? Ade, b tʋba ka yoog ye, b ka tõe n maag b meng n kelg ye. Soaala-Wẽnnaam gomdã lebga b laad bũmbu. B ka rat-a n kelg ye. Ad-y sã n ya maam, Soaala, m zĩime tɩ m sũur fõta, m pa le tõe t'a ka fudg n daal ye. Ypug f sũura, Zeremi, puug n waag f sẽn paam a soaba, n waag kamba sẽn be soya zutu, puug f sũur ne kom-bɩɩbã. Ad-b pagba la rapa, nin-bɛd ne nin-kẽem kulkuugu, fãa na n kãag n loogame. B na n kõo neb a taaba b zagse, b pʋtã, b pagba menga. N-ye! M na n tẽega m nug tẽn-kãnga rãmb zutu. Maam n yeele, maam, Naaba-Wẽnde. B fãa, b kom-bõoneg ne b nin-bɛda, b fãa baooda b yõod bala. Bãngdba wa maan-kʋʋdba, zirẽ bal la b tʋʋmde. B geta m buuda neba sãmpogre wa yel-yaalga la b yetẽ: «Laafi bal la d gãe ne!» Tɩ laafi yaool n kaẽ ye. Y tẽedame tɩ b tʋʋm wẽnsã yãnd tar-b lame bɩ? Baa bilfu! Deeg tɩ b kongame wã ka wat b yamẽ ye. Yaa rẽ yĩnga, maam Naaba-Wẽnd n yete, m waoonga raare, fãa na sõd sẽn lʋɩ-ba sʋka. Ad Soaala-Wẽnd sẽn le paase: Yals-y y sora zug n gese, sok-y n bãng pĩnd ra yaa wãna. Sok-y n bãng so-sõngo n tũ, tɩ y na paam laafi. La ayo, b yeelame: «Tõnd kõn maan fɩ!» Mam ninga neb sẽn na n wilg-ba tɩ b maam gũusgu, baorga sã n wa peebdẽ la b leokame tɩ rẽ ka pak-b ye. Woto wã, bu-zẽmba, kelg-y la y bãng yell ning sẽn na n pak-ba. Kelg-y yã, dũni ninsaalba m na n tool-b-la yel-beed ninga sẽn na n dol b raab wẽnsã. B pa maan gũusgu wa m sẽn da kos-ba ye, b ka tʋlg n kelg m goama ye. Y sẽn tʋgd Saba n wat ne bũmb ningã tɩdarã la yẽgen sẽn tar yũ-noodã, y sẽn kẽnd al yɩɩg n wat ne bã dẽ maanda maam bõe? Rũmsã b sẽn kʋʋd m yĩnga, n basdẽ tɩ bugma rɩt-b zãnga ka wat ne m sũ-noog ba bilfu, b maand a taaba me yaa boto. Yaa rẽ yĩng la Soaala-Wẽnd gomda: Mam na n bẽda tẽn-kãnga rãmba, bũmb la m na n ning b taoore tɩ b lake; b na n lak n lʋɩɩme n ka le yik ye: ba rãmba, kamba, yagse, zo-rãmba, b fãa na n kiime. Ad Soaal Wẽnd sẽn yeele: Bɛɛb n yit Goabg n watẽ, Tẽn-kẽeng rãmb n yit al tẽnga sɛtmẽ. B tãb-biisa zãada tãbdo la sʋʋse yaa nin-toose sẽn ka mi sugr ye. B bʋrga sãta wa mogr dẽnna. B zaoo wiidi la b tonga b zabr tongre, tongr sẽn sakd gesgo, la yaa fo yĩng la b wata, Siõ! Tõnd sẽn wʋm kibarã, d raood menemame, rabeem kẽe tõndo, tɩ d digd waoodo wa pag sẽn kũmd rogem. Woto wã bɩ y da kẽn y pʋtẽ ye, da kẽn-y sor zug ye, tɩ bɛ-wã yɛsa be n kʋʋda. Sẽn lebẽ fãa yaa tẽn-kũum. M buuda kamba, bao-y sũ-pa-noang fuugu n sẽgen y sɛɛga, bilim-y tompɛglmẽ. Kelem-y kʋʋre, bi-yend sẽn ki kʋʋre, pʋd-y kʋ-toog yɩɩlle, tɩ bɛ wã yika vugr bala n wat n na n wã-fo. M yãka foo, Zeremi, tɩ f yɩ wa ned sẽn losd kut buud boaagẽ n tõe n bãng a sã n ka kalem ne bũmb a to. M datame tɩ f mak m buudã, woto m na bãng a vɩɩma sẽn yaa a soaba. B fãa yaa tõatba, tẽn-kãnem dãmba, b fãa sũurã kʋɩ wa zũud bɩ kutu, b fãa yaa wãadba. Zugba soab zugame n kong pãnga, bugma ra tog n yẽnegame n welg namdã, la ayo! Wanzurfa zãgsa yɩlgre, rẽgda ka yit ye. B boonda nin-bãmba buudu tɩ wanzurf sẽn ka yõodo, Soaala-Wẽnd pa rat b buud ye. Soaala-Wẽnd yeela a Zeremi t'a tɩ yals wẽnd dooga noore n moon woto: Kelg yã, Zɩɩda rãmba, yãmb fãa sẽn tũud digno-kãensa n kẽed n waoogd Soaalã, kelg-y b sẽn yete. Ad-y yaa maam, a Israyɛl Wẽnda n yet tɩ y tall y mens neere, la y vɩɩnd wa sẽn segde tɩ m na pa zĩ-kãnga ne yãmba. Dɩlla, da kelg-y zirẽ-be-goama ye. B vẽegda beoog n tarẽ: Soaala roogo, Soaala roogo, Soaala roogo la woto! Tall-y y mens neere, vɩɩnd-y wa sẽn segde. Neb a yiibu sã n bool taab bʋʋdo y taoore bɩ y bʋ tɩrga. Yãmb sã n ka maan sãan pãnga, bɩ kɩɩba, bɩ pʋg-kõore, yãmb sã n ka raagd pʋ-peelem soab zɩɩm zĩ-kãnga, la y sã n ka pʋgd bu-zẽmba wẽn-naandsã, tɩ yaa wẽn-naandsa pʋgb n wãad yãmba, ad-y mam na pa zĩ-kãnga ne yãmba. Y na kell n pa tẽng ninga mam sẽn dɩk al daar zãra n kõ y saam-dãmb tɩ b soog-a daar fãa yĩngã. La ade, yãmb sakdame n deegd zirẽ goama, goam sẽn ka yõodo la sẽn tudgd yãmba. Sɩda, y zuudame, n kʋʋda, n yooda, n kãabdẽ n yaool n ka pidsdẽ, n kẽnd a Baal taoore ne y maando, n pʋgd wẽn-sãamse la m yaool n ka ne bũmb ninga sẽn be yãmb ne bãmb sʋk ye. Y yaoondame marsã n wa m taoore, wẽnd dooga pʋga, m waoogra roogẽ la y yetẽ: «Tõnd yell manegame,» la y baas n ket n tʋmda y tʋʋm wẽna. Yãmb sẽn getã, do-kãnga sẽn ya m waoogr zĩigã yaa wagda tigsg zĩig sɩda? La wagdem bal la m ne, ad-y m ka zoang ye. Yaa Soaala n gomde. Bɩ y kẽng zĩ-sõng ninga m sẽn da tar Silo, m sẽn da vigl m naama zaoor zĩig ningã la ges-y mam sẽn kɩt t'a lebg raboog ninga, m buud a Israyɛl yel-wẽna yĩnga. M yet-y lame, Soaala n gomde, y tʋma wẽng wa pĩnd dãmbã. M wilgame n le wilg n paase la y pa kelg ye. M bool-y lame la y pa sak ye. Woto wã mam na n maana do-kãnga sẽn welg toor mam yĩngã, roog ninga yãmb sẽn teeg a soab wa fãa fãa wã, roog ning m sẽn dɩk n kõ y yaab rãmb la yãmb mensã, mam na n maan-a-la wa m sẽn maan ne Silo. Mam na rig yãmb tɩ y menem mam taoor wa m sẽn dig y saam-biisi, a Efrayim kamba. La foo, Zeremi, bɩ f ra yõk m sɛɛg buud kãnga yĩng ye. Ra zẽk f koɛɛg n kelem, da pʋʋs-m nin-bãmba yĩng ye. Ra pẽdg-ma ne f pʋʋsgo tɩ m pa na n kelg-f ye! Fo yẽ sẽ n pa ne b sẽn maan bũmb ning Zɩɩda tẽnsa pʋsẽ, la Zerizalɛɛm soya zut bɩ? Kambã n dɩgsd raado, tɩ ba rãmba tugund bugum, tɩ pagba nagd zoma n na n dõos miisdu, yĩngr dĩm poaka yĩnga, la b wat ne rãam la kũun a taaba wẽn-sãamsa yĩnga. La woto wã yaa maam la b beegd bɩ? Soaalã n sokde. Ayo, yaa bãmb n baood yãnde la bõne n kõt b mense! Yaa rẽ yĩng la Soaala-Wẽnd gomd woto: «Ade, m na n basame tɩ m sũura fudg n waag b tẽngã, b nebã, rũmsã, pʋtã, tɩɩsã, tẽnga kooda biisi. Bugum ning sẽn widg m sũurẽ wã ka tõe n kiis ye.» Ad Soaalã, a Israyɛl Wẽnnaama, koɛɛga, wʋk-y y maanda nemd n wãbe; naag-y yũ-nood maanda la maand a taabã n wãb y toore. Mam sẽn wa n yiis y saam-dãmba Ezipt tẽnga, mam pa kõ b noor yũ-noog maoong la maand a taaba poorẽ ye. Ad mam sẽn da kõ bãmb noor ninga: «Kelg-y mam koɛɛga tɩ m yɩ yãmb Wẽnde, tɩ yãmb yɩ m neba. Tũ-y sor ninga mam sẽn wilg yãmba tɩ y na paam sũ-noogo.» La ayo, b pa kelg ye, b pa yok b tʋbr ye; b kẽna b yam, b kidba b sũuri, b tũ-la b yalemdo. B zãgsa b ges maam n wẽnemd b kãare n tees-ma. Yãmb saam-dãmba sẽn yi Ezipt tẽnga n tãag rũnna, mam tʋma yãmb m tʋʋm-tʋmdba, m bãngdba, beoog sẽn vẽeg fãa. M da tʋmd-b lame n ka yɛɛdẽ ye. La yãmb ka kelg ye; y ka yok y tʋbr ye; y naka y kãare; y wẽnema yɩɩga y saam-dãmba rẽnna. Foo, Zeremi, fo na n togs-b-la gom-bãmba fãa, la b kõn kelg-f ye. Fo na n taas-b-la m toollã, la b kõn leok-f ye. Wakat kãng marsã la f na n yeel-ba: Yãmb la buud ninga sẽn pa kelgd a Soaala, n pa kelgd Soaala-Wẽnd koɛɛga la a pa sakd b saglgo. Pʋ-peelem ka le be ye, a menema bãmb nengẽ. Soaala-Wẽnd yeela Zɩɩda nebã: Wõrs-y y zoob-wogdã n lobe. Wõrs-y zoobd niyns sẽn wilgd tɩ y rɩka y meng n kõ Wẽndã. Dʋ-y tãmsa zutu n pʋd sũ-sãang yɩɩlle. Zɩɩda, fo yaa buudu sẽn sãamd m sũuri m ka le rat-f ye, m lob-f-la kɛɛnga. N-yẽe! Soaalã n gomde, a Zɩɩda kamba maana sẽn ya wẽng m nifẽ. B ninga b rẽgdã, b wẽn-naandsa m dooga pʋga, doog ning m sẽn welg toore m meng yĩnga, la b rẽgem-a lame. Zɩɩda kẽedba kẽe Ben-Inom bãg-faagẽ, n me b yao rasãnde la yẽ sɛɛgẽ la b yõod b kom-pugli la b kom-dibli. Man yaool n zɩ n kos bũmb a woto, tagsg a woto zɩ n wa m yamẽ ye. Yaa rẽ yĩnga la Soaala-Wẽnd gom woto: «Daar n na n wa zĩndi, tɩ b pa na n le bool tɩ Tofɛt bɩ Ben-Inom long ye, b na n boolame tɩ Tẽn-kũum longo.» Weer sẽn na n wa paoog yĩnga, Tofɛt meng n na n lebg kũuma lobr zĩiga. Tẽnga rãmb na n kii ka tɛka. B na n yɩɩ yĩngr luiili la we-yũus rɩɩbo. B na rɩ b rɩɩbo tɩ ned pa tol n dig-b ye. Mam na kɩt tɩ sũ-noog kaasgo la kilsgu buud fãa sɛ Zɩɩda sagsa pʋgẽ la Zerizalɛɛm soya zutu. B kõn le wʋm yikãad paalsa yɩɩl ye, tɩ tẽngã na n lebga raboogo. Soaala le paasame: Wẽnd kãnga b na n vaaga Zɩɩda dĩm dãmb kõaba b yaadẽ, b kug-zĩidba kõaba, b maan-kʋʋdba, b bãngdba, la Zerizalɛɛm dãmb kõaba. B na n yɛdg-b-la wĩndga la kiuuga vẽenemẽ, yĩngr ãdsã vẽenemẽ, tɩ bãmb la b ra nonga, bãmb la b ra kʋʋd maando, bãmb la b ra pʋgd ne b sũur fãa, bãmb la b ra bʋgda n na n bãng beoog yɛla. Bãmb la b waoog yã. Kõaba pa na n n wʋk ye, b ka na n le bus yaoogẽ ye, b na n yɛdg-b-la wa birga. Buud yoog kãnga neba sẽn keesa yĩnga, b sẽn sẽeg n be zĩig ning fãa, ad-y ka vɩɩm n le tar yamleoog ye, lebga kũum. Woto la dũni fãa Wẽnda leok yã. Fo na n togs-b lame tɩ Soaala-Wẽnd n sokde: Ned lʋɩtame n zãgs yikr laa? Ned tudgda sore n zãgs a poorẽ lebr laa? Yaa bõe marsã tɩ Zerizalɛɛm dãmba wẽnemd b kãare la b ket n wẽenẽ tɩ b kõn tek zʋgo? B yam kẽ-la b wẽn-naandsã tɩ b zãgs a le wa kẽ maam. Mam kelga b sẽn gomda neere, la b goama ka be võor ye. Ned ba a ye sẽn yet t'a tudgame ka ye; sẽn sokd-a a meng tɩ bõe la a maan, ka ye. Ned kam fãa vẽegda beoogo n kẽnd a kẽn-faadã wa weef sẽn ka le mi-a sẽn lebdẽ, zabr zĩigẽ. Ba sigr-walle mi-la a sẽn na n teem tẽng wakato; walle, sɩlaalle, kʋʋl-n-ki, b fãa mi-la b tẽnga lebr wakato. Mam neba bala n ka mi Soaala sẽn kõ d noy niynsã. Yãmb tõog n yeelame: «Tõnd yaa neb sẽn tar yam vẽenem, tɩ Soaala wilga tõnd b raab la b noore.» Awa! Yãmb yɩta a wãn n gom woto tɩ sẽn gʋlsd-b Noora reegd-a n gʋlsd lɛbl-lɛbla n tudgd b taaba? Yãnde na n yõka mitbã, tɩ b ka le yaa n mi b sẽn beẽ ye; b lɛɛg n lʋɩ-la b meng bẽdgẽ. B sẽn pa rat Soaala-Wẽnd Gomdã, b yam yẽesma na n naf-b-la wãn wãna? Sẽn ya woto wã, Soaala n gomde, m na n dɩka b pagbã n kõ neb a taaba, n dees b pʋto n kõ sẽn dat-ba. Bãng-y tɩ b fãa gill, sẽn sɩng kom-bõonego, n digd bɛda yaa b meng yõod bal la b baooda; sẽn sɩng bãngda n wat maan-kʋʋda fãa yaa ninsaan-kazukma. B tɩbsda yood-yoodo mam bi-pugla sãmpogre, n yetẽ: «Laafi beeme, tɩ laafi yaool n kaẽ ye.» Y tẽedame tɩ b sẽn tʋmd beedã, b tʋʋm-wẽna yãnd tar-b lame bɩ? Yãnd ka baa bilfu! Reeg tɩ b kongame, yaa bũmb b sẽn ka mi lɛ-lɛ. Yaa rẽ me yĩnga la Soaala yet-ba, tɩ b na n zĩnda sẽn lʋɩ-ba sʋka, b sã n wa yik ne bãmba. Soaala-Wẽnd yeelame: mam datẽ lame n paam bũmb bãmb nengẽ, la m pa ne bugsuntung biig bugsuntunga zug ye, m pa ne kankamd kankanga zug ye; tɩɩsa vãad wãkame; dɩlla m bas taale, bɩ b lebg so-loaadba soolem. Bõe tɩ ned kam fãa yɛs a zĩigẽ? D tigim taaba tɩ rẽ n são, d tɩ kẽ tãnsoben-tẽnse n gũ d kũuma beelẽ. Wẽnnaam d Soaala data d kũum, b rat n yũnug-d-la ko-zẽnem, la rẽ yaa d sẽn beeg-ba yĩnga. Tõnd da tẽeda laafi, la fɩ! Tõnd da saagda sãoogre, d tol n da gũuda a wakato, la yɛɛsg bala la d seg yã. Bɛ wã zoe n kẽe Dã, be rãmb wʋmda b wiidi wã sɛsga. B wed-daadã kɛleng miima tẽngã. B waame la bũmb kõn kell ye, tẽn-peelma ne a pʋgẽ teedo, na-tẽnga ne a kẽedba fãa. Ade, mam na n tʋma wag toose, la ka wiis sẽn tõe n saolg tɩ sao ye, b na n wa kɛ-y lame. Soaala-Wẽnd n gomda! Sũ-sãang kãsenga n paam maam la m sũ-sãanga ka tar tɩɩm ye. Kelg-y tɩ yaa buudã n gomd woto, a boondame n kot sõngre, la a boolgã zĩig zãra, la a sokdame: «Soaala-Wẽnd ka leb n be Siõ yɛs laa? Siõ dĩma ka leb n be be laa?» Yaa bõe yĩng la b bao m noore n sak n waoogd wẽn-naandse, tẽn-zẽngẽ dãmba yel-yoodo? Tigsgu wakat loogame, tʋʋlg wakat loogame la bala, la tõnd ket n gũuda fãagre. Yel-beed ninga sẽn lʋɩ buuda zugã n lɛɛg n dɩt maam M tara sẽn dɩt-a kʋʋr sũ-sãanga m yama yi-la m menga. Tɩɩm ka leb n be Galaad yɛs laa? Tɩpd ba a ye menga ka le be be laa? Bõe yĩnga tɩ m buuda bãag ka sãoogdẽ? M datẽ lame tɩ m zuga pidẽ ne koom tɩ m nina wukẽ ne nintãm, tɩ m tõog n kũmi, wĩndga la yʋngo, mam buuda neba sẽn ki wã! M sã n da tõe n taẽ we-raoogẽ n paam n tiẽ so-toagd sẽko, m basdẽ la m buudã, m zãagdẽ-la ne-a. B fãa gill zãmbda b Soaala, wa pʋg-yoodre sẽn maan ne a sɩdã. Ad-y b zelemda yaa zab-teoog menga Soaalã n gomd boto. Zirẽ n so naam n yɩɩd sɩda, a Zɩɩda tẽn-peelmẽ. B sẽn tar beegre la b sẽn tare. B ka mi maam wa sẽn paood ye. Bɩ ned kam fãa gũus a menga ne a to, a ra pelg a pʋga ne a saam-biig ye, fo saam-biiga, bãng Zakoob a to zãmb ka tõe n ka zãmb ye, t'a tara pipi Zakooba zʋgo. Ad-y f zoa meng yaa tẽn-kãn-neda. Ned kam fãa zãmbda a to, sẽn togsda sɩd ka be ye b minima zirẽ yagbo, B ka tõe n le wa kẽ maam, b beegra sẽn ya wʋsg yĩnga. B goabg yaa pãn-tõogo b rɩtg yaa pãn-tõogo; zirẽ yagda rũnna n le yag beoogo; b pa rat tɩ tõnd seg taab ye, Soaala-Wẽnd n gomde. Yaa rẽ yĩnga la dũni fãa Soaala gomda: M na n los-y-la bugmẽ tɩ y yɩlge m na n ning-y-la boaagẽ. M ka ne m sẽn na n maan bũmb ninga, tɩ m buuda wẽnem sɩd pida wẽnem. B zelemd yaa wala pĩim b sẽn zẽne, sẽn zẽne neb kʋʋb yĩnga, b sẽn togsda yaa zirẽ-beedo. Goama yaa gom noodo, yɩnga, la pʋgẽ wã, b sũurẽ wã, yaa bẽdg la b bẽta. Y pa tẽed tɩ m tog n yika ne-ba, yaa Soaala n gomde, la m dok m sũuri ne neb a woto buud bɩ? Tãmsã zutu mam zẽkda m koɛɛga m yãbra la m waasga sãtame; m pʋta m sũ-sãang yɩɩlle n yãbd rũmsa wãbneg zĩis sẽn lebg a soabã. Fãa rɩɩ bugum, ned ka le pɩkd be ye, b ka le wʋmd piisa rãamd ye. Luiil wala rũnga, ka le yãet ye, fãa loogame. M na n kɩtame, yaa Soaala n gomde, tɩ Zerizalɛɛm lebg raboogo, n lebg we-yũus gãaga, n kɩt tɩ Zɩɩda tẽnsa lebg we-raoog sẽn kẽesd rabeem tɩ ned ka leb n zĩ a pʋgẽ ye. Yam soaba a bõe n tõe n wilg yɛl kãensa võore? Sã n yaa Soaala n gom ne-a bɩ a wilg tẽnga wãab võore, n wilg bõe n kɩt t'a lebg we-raoogo tɩ ned ka le rat n tag a pʋgẽ. Ad Soaala-Wẽnd sẽn leokde: «Yaa b sẽn pa tũ m sẽn wilgã, b sẽn tõdg Noor ninga mam sẽn da kõ-bã, b sẽn ka kelg m gomdã; yaa rẽ fãa yĩng la m bas-ba. B kʋɩɩsa b sũur n tũ wẽn-naandsa, a Baal dãmb sore, sor ning b ba rãmb sẽn zãms-b al b yãadmẽ. Dẽ n so tɩ dũni fãa Wẽnde, a Israyɛl Wẽnnaama gomd woto: Ade, mam na n kõo nin-bãmba ko-tɩɩsga, la ko-zẽnem tɩ b yũ. Mam na n sẽeg-b-la bu-zẽmba tẽnsẽ, m na n kẽes-b la tẽnsẽ bãmb sẽn ka mi, la b ba rãmb me sẽn ka bãng ye, m na kɩtame tɩ b pʋg-ba ne sʋʋse n kʋ-b pẽs.» Woto la dũni fãa Wẽnd leok yã. Tẽeg-y n bool-y kʋ-yãbdba tɩ b wa! Tʋm-y tɩ b tɩ bool sẽn mi-b yãbr neer-neere tɩ rẽ yaa b tʋʋmna tɩ b wa! B wa ne yãgbo, la b yãb b yãbra n kũm-do al tɩ d mensa nin wa reeg n wuk ne nintãm al tɩ nintãm wa sord d nenga! N-yẽe! Kũmkũma yita Siõ, a yita be tɩ d wʋmnẽ: «Aya! Ges-y d sẽn be zĩig ninga, d yãnda ka tõe n bilg ye, tɩ d tog n yii tẽngã, tɩ d rota fãa zoe n lʋɩɩme.» Pagba, bɩ y kelg Soaala-Wẽnd gomd kãnga, yoog-y y tʋba n kelg b koɛɛga, zãms-y y kom-pugli wã sũ-sãang yɩɩl kãnga; b zãms b yags kũmkũm kãnga: Kũum tũu tõnd dota vẽya n kẽ kũum kẽ-la d ro-neebẽ, a kʋʋda kamb sor zugu, n kʋʋd kom-bɩɩba sõasg zĩigẽ. Foo, Zeremi, togs-b Soaala gomd kãnga n paase: Neba kii n dʋra zĩis fãa, wala põosg sẽn gãneg pʋʋgẽ, wala kood sẽn kẽebe, wala kood sẽn lʋɩ tɩ wʋrdba gãndgd n loogdẽ. Ad Soaala-Wẽnd sẽn yete: «Bɩ yam yẽesem soaba da maan wilg-m-menga ne a yẽesem ye! Bɩ pãng soaba, da maan wilg-m-menga ne a pãng ye! Bɩ arzɛk soaba da maan wilg-m-menga ne a arzɛk ye. Ned sã n dat n pẽg a menga bɩ yɩ a sẽn tõe n bãng maama, yɩ a sẽn mi maam a Soaala, n mi tɩ m pida ne nonglem n pid ne zemsgo m tʋʋma fãa, tẽng zugu, yaa pʋ-peelem tʋʋma. N-yẽe! Ya bãngr a woto n tat mam yam.» Soaala n gome. Ad daar n wate, Soaala koɛɛga, tɩ m na n yik ne sẽn kẽ-a bãongo sẽn ya yĩng bãong bala. Ad Ezipt rãmba Zɩɩda, Edom, Amon kamba, Moabitse la neb niyns fãa sẽn kõogd b yɛɛma, n vɩ zĩ-pɛɛlẽ. Tɩ bala tẽn-kãens rãmba la a Israyɛl buuda menga, ka kẽ b bãongã Soaala yĩng ye. Israyɛl buudu, kelg-y Soaala-Wẽnd koɛɛga. Yaa woto la b gomda: Da nong-y n dɩk bu-zẽmba sor ye, Da maan-y dabeem ne bõn-bãna yãmb sẽn yãet yĩngrã, ba neb a taab sã n zoet-b rabeem. N-yẽe! Buud a taaba wẽn-tũudma ka bũmb a to n zʋʋg sobg ye. Gese, raoog bal la b kɛɛgd tʋgrẽ tɩ da-pɛɛsa pees wẽn-naande. B bolgd-a-la ne wanzurfu bɩ sãnem. B baooda kaadse la bũmb sẽn na n tall n ka, n maneg n ka sẽn peesã t'a tõog n yaas tɩrga La wala belsem-belsem sẽn yag niir pʋʋgẽ, luiili yĩnga, ad-y wẽn-bãmb yɛsame la b ka mi goam ye; b sẽn pa kẽndã, dɩll b põk-ba. Da zoe-y bãmb rabeem ye, b pʋs n ka tõe n maan bũmb ye, b ka tõe bõn-wẽng y yĩnga, wa b sẽn ka tõe bõn-sõng y yĩnga. Soaala-Wẽnde, yãmb bal n ka tar mak-n-taaga Yãmb yʋʋra naaga y pãngã n sãag n ta zĩig zãnga. Dĩm dãmba fãa ne b soolma da tog n sulga b mens yãmb taoore, dẽ togame la segdame. Yam vẽenem dãmba fãa sʋka, y ka tar y to moog ye. Bãmb fãa gill kɛpi, yaa yalemse. Buud a taaba karen-doogẽ, f kõn bãng b wẽn-tũudma naoor n dɩk ye, f kõn zãms sẽn be yõod ye. Ya wanzurf sẽn yi Tarsis bɩ sãnem sẽn yi Ufaz, la b bẽesd pakls-paklse n tabend wẽn-naandsã sẽn na n yɩlẽ n paas b neerem. Pɛɛsã n peesd-ba tɩ yõaka tablgdẽ. B yeelgd-b-la fu-miidu, fu-mismiidu. Wẽn-naandsa fãa yaa ninsaal nug sẽn tʋme, a nug sẽn tʋm ne minim la bãngre. Sã n ya Soaala-Wẽnde, bãmb sɩd yaa Wẽnnaam, b yaa Wẽnd sẽn vɩ, b yaa Na-kãsenga, daar fãa yĩnga. B sã n puug b sũuri, tẽnga fãa miimdame; b sã n puug b sũuri, bu-zẽmba fãa ka le tar daood ye. Ad yãmb sẽn na n togs bu-zẽmba, togs-y-ba tɩ wẽn-naandsã, ka bãmb n naan yĩngr la tẽng ye la b na n menes-b-la tẽng zugu, weer ka na le zĩnd bãmb yĩnga, saaga tẽngr ye. Soaala-Wẽnd naana tẽngã n wilg b pãnga, b wilga b yẽesma n naan dũniyã; b wilga b yama-zulum n yɛdg saaga. Soaala-Wẽnd sã n gome kooma sẽn be yĩngra tigimda taaba, Sawad-tagd zẽkda yĩngri. Sa-yãgr sikda sa-koom, sobda kaoogdame n fugda. Sẽn yãenda woto fãa yɛsa yɛɛ, n ka wʋmd võor ye. Yãnd tara sẽn dõog-a wẽn-naandsã; b dõoga belsem-belsem, bũmb sẽn ka vɩ ye. B yaa wa sobg bala b yaa bũmb sẽn wat ne laado. Rẽ fãa yaa bũmb sẽn na n menese, Soaala-Wẽnd sã n wa yik ne-ba. Ad-y Soaala ka wẽnd bãmb ye, bãmb me ka wẽnd a Israyɛl Pʋɩɩr sõnga ye, b ka wẽnd dũni wã fãa Naanda ye. Dũni fãa Naanda la a Israyɛl Wẽnde, b yʋʋra la dũni fãa Soaala. Zerizalɛɛm, bɛɛba sẽn pag n gilgi wʋk f teedo n looge! Ad Soaala gomda woto: «Mam na n diga tẽn-kãnga rãmba n zãag wʋsgo, la m sẽn na n pʋg-b pʋgb ningã, ba a ye kõn põs ye.» Zerizalɛɛm yeta woto: Kato! Mam sãmpogra yaa kãsenga. La m da baas n yetame tɩ bãaga yaa mam bãaga, tɩ m na sak n deeg toogã. Mik m dooga sirgame, m sẽn ti-a ne pɛɛla, a wĩ wã fãa kaoome; mam kamba zoe n basa maam, ned ka le be n na n yik m doogã, tɩ m le paam m sẽn na n kẽẽ ye. Ad-y yaa taoor dãmba yelle, b maana yalemdo, b ka sok Soaalã n paam b leokr ye. Yaa rẽ la b raaba ka pids ye, yaa rẽ la b sẽeg b neba zãnga. Kelg-y rãamde, bʋʋr n kolgde: yaa bũmb n yit nug goabga, la a wata ne zũnd-zãnde; a na n kɩtame tɩ Zɩɩda tẽnsã lebg we-raoogo n kẽesd rabeem, n lebg we-yũus roogo. Mam miime, Soaala-Wẽnde, tɩ ninsaal ka so a vɩɩm ye, so-toagd ka mi a sor sẽn na n baas to-to ye. Soaala-Wẽnde, sɩbg-y-ma, la ra yɩ ne sũ-puur ye, ra yɩ toog wʋsg ye, ka rẽ y wã-m-la zãnga. Ypug-y y sũuri ne bu-zẽmbã, ne neb niyns sẽn ka mi-b yãmbã, la ne neb niyns toog sẽn ka be ne yãmbã. Bãmb dãmb n zɛɛd y buudã, n zɛɛd a sẽn tar fãa, n wãad a tẽnga zãnga. Soaala-Wẽnd goma ne a Zeremi n yeele: Tũ-y m sẽn kɩt tɩ y pʋlem bũmb ningã. La b le wa paasame: «Ad-y y sẽn na n togs Zɩɩda rãmba, la Zerizalɛɛm dãmba. Fo na n wilg-b lame tɩ Soaala, a Israyɛl Wẽnnaam gomda woto: m na n sɩbga ned ning fãa sẽn ka tũud m sẽn kɩt tɩ m buuda pʋlma; yaa pʋleng ning y yaab rãmba sẽn pʋlme, m sẽn wa n yiis-b Ezipt, b namsga tẽngã. Wakat kãnga la m yeel-b tɩ b kelg la b tũ wa m sẽn wilgã tɩ yaa noor la m kõt-ba, la woto b na yɩ mam neba, la mam na lebg bãmb Wẽnnaam. M na pids kãabg ninga mam sẽn kãab y ba rãmba n yet tɩ m na n kõo bãmb tẽnga, bĩisim la sɩɩd sẽn zoetẽ, tẽn-kãng la y sẽn be a soab pʋgẽ dũnna wã.» Tɩ maam a Zeremi leoke: «Soaala, yaa boto la d na n maane!» La Soaala-Wẽnd paasame: «Zɩɩda tẽnsẽ la Zerizalɛɛm soya zutu, fo na n mooname n yeele: Maan-y wa y sẽn pʋlma, tũ-y m sẽn wilgã. M goma naoor yak ne y yaab rãmbã, m sẽn yiis-b Ezipt tẽnga wakato la m ket n tara yãmb dɩdgre dũnna, n kot-y tɩ y kelg-ma. La ad-b ka kɩll b tʋbre n kelg m goama ye. B pa kelg-a neer ye. Ned kam kʋɩɩsa a sũuri n kell n tũ a zʋg wẽnga. Woto bãmb sẽn zãgs tũubã mam me kong n pidsa m sẽn da kãabe.» Soaala-Wẽnd le paasame: «Sɩd-sɩda, Zɩɩda rãmba la Zerizalɛɛm rãmb gãe tẽngr n bilgd wẽnga. B leb n sɩnga tʋʋm wẽns niynsi b ba rãmba sẽn da tõdg mam noor n tʋma. B yõga zood ne wẽn-sãamse n waoog-ba. A Israyɛl ne a Zɩɩda sãama zood ning m sẽn da yõg ne b yaab rãmbã, zood ninga sẽn da waa n yõgd tɩ saaga kũmdẽ la a yãgdã.» Dẽ n so tɩ Soaala-Wẽnd gomd woto: «Ade, mam na n kɩtame tɩ yel-beed lʋɩ b zugu, la b kõn põs ye; b na n kelmame n wat mam nengẽ, la mam kõn kelg-b ye. Zɩɩda tẽnse, la Zerizalɛɛm dãmba na n kẽngame n tɩ bõs sõngre. B sẽn waoog wẽnd niyns ne b kũna la b na n kos sõngre. Wẽnd kãens yaool n pa na n fãag-ba b yel-beeda raar ye. A Zɩɩda, tẽnsã sõor sẽn zem to-to, a wẽn-naandsa me sõor zema rẽnna. Maan-kuga sẽn me Zerizalɛɛm sõor zema a soya sõore. Bãmb zutu b na n kʋʋ maand n kõ b wẽn-dẽgd a Baal. Sã n ya foo, Zeremi, da saag n kos maam bũmb buud kãnga yĩng ye; da pʋʋs la f ra yõk m sɛɛg ye, tɩ m pa na n kelge, yell sã n wa pak-b ye, b sã n wa kot-m sõngr ye.» Soaala gomda woto: «M sẽn nong buud ningã ka tar pʋ-peelem ye. A wata m doogẽ wã bõe yĩnga? A tẽedame t'a sẽn pʋlemd bũmb ninga bɩ a sẽn kõt-m maand niynsã, tõe n zãag-a-la ne yel-beed bɩ? Yel-beeda sã n wa n sɛ, a le tara tɩɩm bɩ? M da pʋda a yʋʋr tɩ Oliviye sẽn tõe wombo, t'a biis ya sõmbo, t'a vãad sob n yɛsẽ. La ade, y sẽn wʋmd bʋʋr ningã, yaa bugum n dɩta ne pãnga, yaa a wila la b kaooda. Yaa dũni fãa Soaala-Wẽnd n da sel tɩɩgã la bãmb n wilgd-a marsã tɩ yel-beed be-la a zugu, a Israyɛl yel-wẽna yĩnga, a Zɩɩda yel-wẽna yĩnga. B kʋʋ maand n kõ a Baal, n beeg bãmb Soaalã.» Soaala-Wẽnd wilg-m lame tɩ m bãng a Israyɛl neba sẽn be tẽngr n sʋgdã. La maam a Zeremi mam da yaa wala pe-bila b sẽn tar n dabd rũms kʋʋb zĩigẽ, m da ka mi tɩ b rat n tʋm-m-la beed ye. Ad-b sẽn da gomde: D kɛɛg tɩɩga sẽn tar pãngã n lubi; d yiis a bõn-vɩɩs sʋka tɩ ned ba a ye ra le tẽeg meng t'a zĩndame ye. La yãmba Wẽnde, dũni fãa Soaala, yãmb bʋʋd fãa kaooda tɩrga. Yãmb mii sẽn solg sũurẽ, la m tẽedame tɩ m sẽn dɩk m yellã n bas ne yãmbã, m na yãend y sẽn dokd m sũuri. Bɩ Anatot rãmba bãng tɩ dũni fãa Wẽnd tara koɛɛg ne-ba, bãmb sẽn baood n na n kʋ maam la b yetẽ: «Fo ka na n le gom bãngr goam Soaala yʋʋr yĩng ye, ka rẽ tõnd nug n na n kʋ-fo!» Yaa rẽ yĩnga la Soaala-Wẽnd gomd woto: «Ade, mam na n yika ne-ba la zabr sʋʋg n na n kʋ b kom-bɩɩba, tɩ kom loog ne b kom-dibli la b kom-pugli. Yʋʋmd ning m yel-beeda sẽn na n lʋɩ Anatot rãmba, zugu, ba a yembr meng kõn põs ye, na wʋm b fãa.» Soaala-Wẽnde, yãmb pida ne zemsgo, woto m zãr ne m maan zabr ne yãmba. M yaool n nongẽ lame n bãnge yaa bõe yĩnga la nin-wẽnsa yɛl baasd neere? Bõe tɩ sẽn ka tũud-b yãmba, vɩ b laafi vɩɩm? Bãmb sela wa tɩɩse b kɩɩda yẽgna, n bɩtẽ, n womd biisi. Yãmb yʋʋr pʋta b noorẽ tɩ b sũura yaool n zãr ne yãmba. Yãmba, Soaala, yãmb mii maam, yãmb nee maam, yãmb dat n bãngame tɩ m kẽeda yãmba. Sã n ya nin-wẽnsa, m na n kos-y lame tɩ y wʋk-ba wala piisi n tees b kʋʋb zĩigẽ. Bĩng-y-b toore, kodg la f kõ-m sʋʋg raara yĩnga! Ges-y wɛ, tẽnga na n paa ne sũ-sãanga n ta wakat bʋgo? Ges-y weooga mood fãa sẽn kʋɩ, na n talla woto n ta wakat bʋgo? Tẽnga rãmb wẽnem yĩnga, dũmsã tara kũum, tɩ b yaool n be tẽngre n gomda: «Soaala-Wẽnd ka ne d sẽn maand ye.» Fo sã n pa tõe n tũ sẽn zoet-b ne nao, fo yɩta a wãn n wags ne wiidi? Soaalã n gomde. Fo sã n zoe n yɛɛsdẽ n nan ket tẽng sẽn ka tar tʋga, fo na n maan wãna Zʋrdẽ tʋga sʋka? Ad-f saam-biisa menga, f buudu meng zãmba foo, yaa bɛɛb ka tɛka la b tigsd fo yĩnga. Da pelg f pʋg ne b ye, tɩ b na n goma ne foom gom noodo, goam sẽn zãr ne sɩda. Mam basa roog ning sẽn da ya m roogã, m basda m sẽn da so wã fãa M basda bɛɛba nusẽ m sẽn da nong wa m fãa-fãa. Mam neba yikame n na n yɩ toos ne maam. B yik n kelma maam wala weoog bõnyẽega; yaa rẽ la m pa nong-ba. Sẽn da ya-b mam soolma bãmb n lebg luin neera sɩlsa sẽn laand n pʋgda bɩ? Bɩ b tigim we-rũmsa fãa gilli! B tall-b fãa n wa kibsa rɩɩb zĩigẽ! Dũn-kɩɩmb wʋsgo waame n sãam mam bugsuntungu, b taba mam pʋʋgo, pʋʋga da yaa pʋ-sõngo; b kɩtame t'a lebg zĩ-peen-daaga. Tẽnga lebga sũ-sãang zĩiga, kʋʋr yãbre n yãbd a pʋgẽ. Tẽnga sãamame n dɩg m taoore la ned ka kũmd-a ye. Fãadba, tẽn-wãadba waa tãmsa zutu. Ad-y yaa wa Soaala zãada sʋʋg sẽn dɩte n vargd tẽnga fãa, la ned ba a ye ka na n põs ye. Y ra bʋda alkam, la gõos la y na n wʋre; y namsa y meng zaalem bala, y ka rok yõod ye. Y kooda yãnd tar-y lame. Yaa Soaala-Wẽnd me sũura sẽn puug wʋsgã la y paam yãnd a woto fãa. Soaala-Wẽnd n yet woto, b buuda yags wẽnsa poorẽ: b saag n sɩɩsa vẽenem ning m sẽn da bẽeg n kõ a Israyɛl, m buudu. Woto ma me na rig-ba n yiis-b b tẽngẽ, wala m sẽn na n kẽ bãmb tẽngẽ n yiis a Zɩɩda kamba. M sã n yiis m nebã n sɛ, m na yaool marsã n zoe b yagsa nimbãanega, n kɩt tɩ ned kam fãa kẽng a soolmẽ, tɩ ned kam fãa leb a tẽngẽ. B ra zãmsa m buuda t'a wẽend ne a Baal yʋʋre. La b sã n tõog n zãms n vɩɩnd wa m neba sẽn tog n vɩɩndã, b sã n wẽend ne Soaala, ne Vɩɩm Naaba yʋʋre, bãmb me na paam zĩiga m buuda sʋka. La b sã n ka rat n tũ dẽnna, m na n dig-b lame n yiisi, la b na menem moogo. Soaala-Wẽnd n gome. Ad noor ning Soaala-Wẽnd sẽn kõ-ma: «Kẽng n tɩ ra sẽbdga sẽn wʋg ne beren-dɩgr gĩsi, n sẽbg f sɛɛga. Da los-a koomẽ n pek ye.» Mam daa sẽbdga, wala Soaala-Wẽnd sẽn wilg-ma, n sẽgne. Naoor a yiib soaba, Soaala-Wẽnd waame n gom ne-ma, n yeele: «Dɩk sẽbdga f sẽn da sẽgna. Aya, yiki! Kẽng Efrat kʋɩlga n tɩ solg-a pĩig bokẽ.» Mam sɩd kẽngame n tɩ maan wala Soaala-Wẽnda sẽn kõ maam noorã. Sẽn kaoos wʋsg dẽ poore, Soaala-Wẽnd yeela maam: «Aya, yiki! Mam sẽn da kõ foom noor tɩ f tɩ solg sẽbgd ningã, kẽng Efrat kʋɩlga n tɩ rɩk-a n wa!» Mam kẽnga Efrat n tɩ rɩk sẽbdgã mam sẽn da solgã. La mam mikame t'a sãamame n ka le tar yõod yɛs ye. Dẽ zugẽ, Soaala-Wẽnd goma ne maam n yeele: Ad-m koɛɛg: «Yaa woto la m na n sik a Zɩɩda zẽk-m-menga, n sãam Zerizalɛɛm neerma. Nin-bãmba sẽn tõdge tɩ b ka na n kelg mam goama, nin-bãmba sẽn tũud b sũ-wẽnga sẽn kʋɩ wa kugri, la b zoet n pʋdg wẽn-naandse n wõgemd b taoore n waoogd-ba, mam me na n kɩtame, tɩ b lebg wala sẽbdg kãnga sẽn põog n ka leb n tar võor yɛsã. Wala sẽbdga sẽn sẽbdg ned sɛɛga, boto me mam da ratame t'a Israyɛl buuda fãa, a Zɩɩda buuda fãa tũ maam koɛɛga, n lebg mam neba, mam zu-zẽkre, mam waoogre, la mam faongo, la ade, b pa kelg ye.» Fo na n yeela nin-bãmba: «Maam a Israyɛl Wẽndã n gomde. Yʋʋr yagda a na sui rãam.» La b sã n leok foom: «Tɩ ãnda n ka mi tɩ yʋʋr fãa tõe n pidsa ne rãam,» fo na yeel-ba: «Soaala-Wẽnd n gomd woto: Ade, mam na n tɩgsa tẽn-kãnga rãmb fãa ne rãam; m na n tɩgsa b dĩm dãmb sẽn zĩ a Daviid naam goeel zugu, maan-kʋʋdba, bãngdba, la Zerizalɛɛm dãmb fãa. Dẽ poore mam na n sãama b fãa yell ne taaba. M na n kalma ba rãmb ne b kamba, maam, Naaba-Wẽnd n gome, la sugr ka ye, nimbãan-zoeer ka ye, m na kʋ-b fãa.» Kelg-y yã, yoog-y y tʋba, da maan-y tɩtaam ye, yaa Soaala-Wẽnd n gomde. Yeel-b tɩ b waoog bãmb Soaala la b Wẽnnaam, tɩ b nin ket n neẽ n da wa kẽnd n lagsd tãms ne lik ye. Yãmb da gũuda beoog vẽegre, la m na n kɩtame tɩ vẽenem lebg lik bãm, wala saag n kʋɩ. Yãmb sã n ka kelge, m yama na n bondgame, tɩtaam a woto yĩnga, mam nintãm na n dʋʋgame, n dʋʋg zembal waare, tɩ yaa pa-weere la b tar Soaala wubrã n dabda. Togs dĩma ne a ma wã: Zĩnd-y tẽnga, tɩ ad yãmb naama pugla, fõka yãmb zugẽ n lʋɩ. B paga Negɛb tẽnsa kʋɩlense. Ned ka le tõe n kẽ be ye. B talla Zɩɩda tẽnga fãa tõre n na n loog pa-weere. Pa-weera yaa b fãa gill n na n looge. Zerizalɛɛm zẽk f nin n gese, ges f bɛɛb sẽn yit Goabg n watẽ. Piis niynsi b sẽn dɩk n gũnug fooma, b yell na n yɩ-la a wãna? Piis niynsi sẽn da ya fo zu-zẽkrã b yell na n yɩ-la a wãna? Fo na n yeelame tɩ bõe, fo sẽn minim b rãmba, sẽn lebg-b fo sõsd-n-taasa sã n wa yik ne foo n na n soog foo, ad-f na n wʋma toog bala wa paga sẽn kũmd dogem. La fo sã n yeel f sũurẽ: «Bõe n maane tɩ yell kãensã fãa wa lʋɩ mam zug woto?» Bãng tɩ yaa fo wẽnema sẽn ka tɛka yĩnga la b kolemd fo futu n ningd f yãnde. Etiopi ned tõeeme n tek a gãong bi? Ãbg tõeeme n tek a kõbg bi? La yãmba, yãmb sẽn tar yel-wẽna minungã, yãmb tõeeme n maan neer bi? Mam na n sẽeg-f lame, Zerizalɛɛm wala sobgo sẽn sẽegd mo-faado, zĩ-pɛɛlẽ. Fo pʋɩɩr la woto, fo zẽk-m-meng dolbo la woto. Woto yita mam nengẽ, yaa f Soaala-Wẽnda koɛɛga, tɩ ya maam f Wẽnda la fo yĩm yã, n dɩk f menga n kɩs zirẽ. Mam menga, maam f Wẽnnaam n na n kolemd f futã n ta f nenga, tɩ neb yãend f yãnde. Kato! Fo yooba tʋʋma, la fo sũ-nood wẽnsa kaasgã, f tʋʋm dẽgdã fãa sẽn wat ne f yãndã, m yãend-b-la fãa gilli. M yãenda tãmsa zutu, la wetẽ wã fãa, f wẽn-naandsa gilli! Kato! Zerizalɛɛm, bõe tɩ f pa rat n yɩlg ne f rẽgdã? Na n yɩɩ woto n ta da-bʋre? Soaala-Wẽnd sẽn taas koɛɛg ning a Zeremi war kãsenga wakato. A Zɩɩda rɩta a kamb kʋʋre sũ-noog fãa sɛ-la a tẽn-kogsẽ, fãa pida ne lik la sũ-sãanga, Zerizalɛɛm waasg bal la b wʋmda. Taoor dãmba yiisa b nebã tɩ b tɩ bao koom n wa la b sẽn ta kʋɩlgẽ b mikame tɩ koom ka ye, tɩ b na n leb n wa ne yʋ-vɩɩdo. Yãnd tar-b lame, tɩ b lud b zutu. Pʋt ka le kõt bũmb ye, saag kaalem yĩnga; yãnd tara koaadba tɩ b lut b zutu. B nee tẽnga sẽn tãs mugnum. Ba yãk sẽn be weoogẽ, a sã n dog a biiga, a basd-a lame n zoe, yamd kaalem yĩnga. Kunkuba zutu, yamd ka le ket ye, Burguma yɛsa wa waase n kokd yũugu. Ad-y b nina yiigame la yaa mo-maas la b saad n baoodẽ, la mo-maas ka le ket ye. Tõnd tʋʋm wẽnsã sã n kɩt tɩ tõnd yãend woto, Soaala, bɩ y maan y sẽn na n maanega, yãmb yʋʋr pẽgr yĩnga. Yaa sɩda, tõnd wilg-m-menga ka tɛk ye, tõnd maana yel-wẽna n ka sak n sulg d mens yãmb taoore ye, tõnd beega yãmba. Soaala, a Israyɛl teegda, a Israyɛl Fãagda, yel-pakdem wakato, bõe yĩnga tɩ yãmb maandẽ wala y yaa sãan tẽn-kãnga pʋgẽ, wala so-toagd sẽn ta tẽngẽ n na n gãand be la a yik n loog bala? Yaa bõe yĩnga la y maand wa nin-bãada, wala gãndaoogo sẽn ka tõe n fãag a taaba? Yãmb be-la d sʋka, Soaala, Yãmb n so tõnd gõeem la d gũsma da bas-y-d tɩ d lʋɩ ye! Ad Soaala-Wẽnd sẽn gomd nin-kãensã poorẽ: «B nong n saada zĩis fãa, b ka zoet kẽna ye! La Soaala-Wẽnd toog ka be ne b ye; marsã b na n tẽega b yel-wẽna n sɩbg-ba.» Ad Soaala-Wẽnd sẽn yeel maam: «Da bao nin-bãmba sõngr ye, da bao b sũ-noog ye. Ba b sã n loet noore, mam kõn deeg b pʋʋsg ye; ba b sã n kʋʋd maoongo, la b tar kũuna n watẽ, mam toog ka ne nin-bãmba ye; mam na kʋ b fãa gill pẽs ne sʋʋga, ne kom la ne bã-longdem.» La mam leokame: «Soaala-Wẽnde, bãngdba yet-b lame: ‹Y kõn seg sʋʋga, y kõn seg kom ye, kaalẽ y yɛla na n manegame n paas bala.› » Dẽ la Soaala me yeel-m: «Bãngdba sẽn yet tɩ b gomda mam yʋʋr yĩnga, ad yaa zirẽ-beedo. M ka tʋm-b ye, m ka kõ-b noor ye, m ka yeel-b tɩ bũmb ye. B pa ne fɩ; b togsda sẽn ka na n yɩ ye; b yʋng zãmsd la b togsda, yaa rẽ bala.» Dẽ n so tɩ m meng yet woto bãngdba poorẽ: «Ka maam n tʋm-b ye, yaa bãmb n yik b toore n gomd tɩ maam n yeele tɩ zabre la kom kõn zĩnd tẽn-kãnga ye. Bɩ b bãng tɩ yaa zabre la kom n na n menes-b fãa gill. Sã n ya ne buuda neba sẽn kelg-b zirẽ-beedã, bãmb fãa la zabre la kom na n gãneg Zerizalɛɛm soya zutu la ned kõn zĩnd sẽn na n mum-b ye, bãmb ne b pagba, b kom-dibli la b kom-pugli. Maam, Naaba-Wẽnd, na n lebs-b-la b wẽnema.» Fo na n taas-b-la koe-kãnga: M datẽ lame tɩ m nina pidẽ ne nintãm, n pid yʋngo la wĩndga, al tɩ laafi kaẽ ye, tɩ m buuda paama sãmpogr kãsenga, a nodra yaa solenkẽega. Mam sã n yi we-kɛɛnga mam yãetame tɩ neb n gãe, zabra sʋʋg n kʋ bãmba; mam sã n kẽ tẽnga pʋgẽ yaa koma sẽn kʋ b rãmba la m yãeta. Bãngdba ne maan-kʋʋdba saaga tẽngã, b ka tar yella moor ye. Woto la buuda sokd Soaala: Y basa a Zɩɩda kɛɛng laa? A Siõ yaanda y sũur laa? Bõe tɩ d sãmpogra ka tõe n maage? D da tẽedame tɩ yɛla na n wa zemsame, la fɩ ka teem ye. D da gũuda d noada maagre, la d zĩi ne yɩɩre. Soaala d miime tɩ d ka maan neer ye, tõnd deegame tɩ d ba rãmb tʋʋm yɩɩ wẽnse; tõnd beega yãmba. Maan-y sugri tɩ y yʋʋra ra wa tũ rẽ n sãam ye. Da maan-y wa y ka le rat y ziira goeel ye, da tus-y y goeelã n serg ye. Tẽeg-y y sẽn kãab tõndã, da sãam-y y zooda ne tõnd ye. Bu-zẽmba wẽn-naandsa sʋka yɛɛlẽ soaba n tõe n bool saaga? Yaa saagã n wat ne saas bɩ? M yet yaa yãmba, Soaala-Wẽnde. Soaala-Wẽnde, yãmb la d teegre, yãmb la bũmb fãa Naanda. Ad Soaala-Wẽnd sẽn yeel-ma: «Ba yaa a Moyiiz ne a Samwɛl n yõkd m sɛɛg buud kãng yĩnga, b kõn tõog tɩ m yama tedg ye. Dig buud a woto t'a menem mam taoore n zãag zĩiga. La b sã n sok-fo: ‹D na n kẽnga yɛ?› Bɩ f leok-b tɩ Soaala goma woto: ‹Ned kam fãa ne a sẽn tog ne: bã-longdem n kʋʋd kẽere kẽer yaa sʋʋga, kẽer yaa kom, kẽer na n looga pa-weere.› » Soaala-Wẽnd gomdame tɩ bũmb a naase n na n sõng-ba n zabe: sʋʋg na n kʋ-b lame, bãas na n vu-b lame, yɩbrendo la we-yũusi n na dɩ-ba, n menes-ba. Woto dũni wã pʋgẽ dãmba fãa na yãend la b yɛɛse. Ad-y ka ned a to yell ye, yaa Zɩɩda dĩma a Ezekiyas biiga, a Manase, yelle; a maana sẽn ka neere Zerizalɛɛm. Ad Soaala-Wẽnd sẽn sokd Zerizalɛɛm: Ned ba a ye ka le ket moogo sẽn na n zoe fo nimbãaneg laa? Ned ka ket sẽn na n kũm-fo, la a sok-f n ges f gãas yaa wãna? Mik yaa fo meng n yeele tɩ f toog ka le be ne maam ye, fo n tud maam f zãnkudga. Yaa rẽ yĩnga la m sɩbg-fo. Mam yɛɛ ne belsgo! Tẽnga fãa sagsẽ, m waa ne m zɛɛdga, n na n yelg tɩ sobg loog ne-ba. M monga m buuda kamba, n boog a neba sõore. Ne rẽ fãa a pa tek a manesem ye. M kɩtame tɩ b pʋg-kõapa sõore yɩɩd bĩisra sẽn be mogra noore. Mam kɩtame tɩ fãada wa wĩnto-sʋka n sɩng zabre ne tãb-biig ma, vugr bala a yɛɛsa yɛɛsg kãsenga. Pag ninga sẽn doga kamb a yopoe wã pʋg kang vʋʋsma tulga a yãoogẽ, A wĩndga lʋɩɩme tɩ daara nan ka ta a pʋɩ-sʋk ye. A konga waoor n zĩ ne yãnde. Neb a taaba sẽn kell-ba ra tẽ põasg ye; m na n bas-b-la bɛɛba nusẽ: Soaala n togs rẽnna. M ma, fo ra ka rogẽ-ma, m kõn tɩlgẽ ne yel-beedo! Tẽnga pʋgẽ, maam la b kisa, maam la b tugd beem. M ka peng ned ye ned me ka peng-m ligd ye, la neba fãa naaga taab n kis-ma. Dẽ la Soaala yeel yã: M wẽendame tɩ neer maaneg yĩnga m bas-f lame tɩ f so f menga. M na tus bɛ wã menga t'a wa yõk f sɛɛga a pɛt la a yɩɩr wakato. Kut na kaooge, Goabg zamaanẽ dãmb kutu, bɩ b zũudu, fo maanda a wãna n kaoog-ba? Gese, Zɩɩda, fo arzɛka la f paoong fãa, m dɩk-b lame n basd ne fãadba. Woto la f na n yao f yel-wẽna, yel-wẽna fo sẽn maan tẽnga fãa pʋgẽ wã. F na n lebga yamba f bɛɛba tẽngẽ, tẽng f sẽn ka mi la sẽn zãre. Sɩda m sũura wuka ne foo, m sũura widga bugum. Soaala, yãmb mii yell ning sẽn pak maama. Dẽnd yĩnga tẽeg-y m yelle, sɩbg-y m bɛɛba n dok m sũuri. Da kaoos-y waoong ye. Y meng miime tɩ yaa yãmb yĩnga la m basd tɩ b tʋʋsd-m. Mam sã n da wʋm yãmb gomd fãa, mam da kelgd-a-la neere, y goama ra pidsda maam ne sũ-noogo, m sũura ra tosda kaam, tɩ m dɩka m meng zãng n kõ yãmba, dũni fãa Wẽnde. Abada, m ka bao reem, m ka na n tɩ naag sẽn nong-b reema tɩ sũ-noog la m baood ye Yãmb modg-m lame tɩ m pa kɛɛnga, y kɩtame tɩ m sũura yik ne ba. Yaa bõe tɩ mam namsg ka sɛtẽ, tɩ mam sãmpogr kẽ pãafo, tɩ tɩɩm buudu ka be n tõe n sãoog-a? Sɩd-sɩda, yãmb belga maam y belg-m-la wala kʋɩls kẽere, n pid dũnna n daannẽ n yik beoog n ya koɛɛnga. Ad Soaala-Wẽnd sẽn leok-m bũmb ninga: Fo sã n leb n wa, ne m sõngre m na n le reeg foo f tʋʋmnẽ. F sã n mi tɩ ka goam vɩɩd la f na n gome, f sã n mi tɩ f na n goma sẽn be yõodo, fo na yɩ m no-rɛɛsa. Yaa Zɩɩda rãmba n na n lɛɛg n kẽ foo, ka foo n na n pʋg bãmb ye. Bãmb taoore, m na n kɩtame tɩ fo lebg wala zũud-lalga, bũmb sẽn ka tusd n lub naana. B na n zaba ne foom, la b kõn tõog foom abada, tɩ bala, mam bee ne foom, n na n fãag fo, n na n yiis f roogo. Soaala-Wẽnd n leok rẽnna. Mam na n fãaga foom nin-wẽnsã nugẽ, la m zãag-f ne pãn-tõog rãmba pãnga. Soaala-Wẽnd yeel-m-la woto: «Da rɩk paga n dog bi-ribla bɩ bi-pugl zĩ-kãnga ye. Ad-m menga sẽn yet bũmb ninga kom-dibli la kom-pugli wã sẽn na n dog zĩ-kãnga poorẽ, b ba rãmba, b ma rãmba, poorẽ. Koma na n nams-b lame n kʋ-ba. B kõn paam yaoogo, b kõn yãmb b kʋʋr ye; b na n lebga põosg bala, n dʋr tẽnga. Sʋʋga la kom n na n kʋ-ba, la b na na lebga yĩngr luiili la we-rũms rɩɩbo.» Sɩda, Soaala-Wẽnd le yeel-m-la woto: «Da kẽ kũum sẽn ki zak ning pʋg ye; da yãbe, la f da kũm zaka rãmb ye, tɩ mam zãaga m laafi, la m nimbãan-zoeere ne-ba. Nin-bɛd woo, kom-bõoneg woo, sẽn be tẽn-kãnga, b fãa na n kiime, b kõn paam mumb ye, la b kõn kelem b kʋʋr me ye; ned kõn põng zugu la ned kõn kɩɩs a yĩng ye. Ned sã n tar kʋʋre, a buuda ka na n paam tɩ b wa maas a sũuri la b kõ-a rɩɩb ye. B ka na n kõ kʋʋra soab rãam t'a yũ n gãneg a sũuri, a ba bɩ a ma sẽn ki yĩng ye. Neb sã n be zakẽ n maand kibsa, da kẽ be n naag-b n zĩnd n dɩ la f yũ ye, tɩ woto la m gomda, maam dũni fãa Soaala, a Israyɛl Wẽndã, la m yetame tɩ m na n sɛɛsa kibs fãa bʋʋre, n sɛɛs sũ-noog kaasgo la kãad-paalsa yɩɩla. La rẽ fãa na n yɩ-la y nifẽ. Fo sã n wa taas nin-bãmba koe-kãnga, tõe tɩ b sok foom tɩ yaa bõe yĩnga la Soaala-Wẽnd kãabd tõnd kãab-wẽns a woto fãa? Yell bʋgo la tõnd maan yã? Yel-wẽnd bʋgo la tõnd maan n beeg Soaala-Wẽnde? Fo na n leok-b lame: ‹Yaa yãmb ba rãmba sẽn bas maama yĩnga, n bas maam n tũ wẽn-sãamse, n maan b yam, la b wõgemd b taoore n waoog-bã. Sã n ya maam, m leokd-b lame tɩ b basa maam, b ka reeg mam noor ye. Soaalã n gomde! Sã n ya yãmba, yãmb wẽnem yɩɩda y ba rãmb dẽnna. Ade, yãmb ned kam fãa tũ-la a sũurã sẽn dat wẽng ninga n ka kelg mam goama ye. Ad-y mam na n diga yãmb n yiis tẽn-kãnga tɩ y kẽng tẽngẽ yãmb sẽn ka mi ye, la y ba rãmba me sẽn ka bãng ye. Beenẽ, wĩntoog la yʋngo, y na n waooga wẽn-sãamse tɩ m na n maana wa m toog ka le be ne yãmb yɛs ye.› » Wakat n wate, Soaala-Wẽnd koɛɛga, tɩ b ka na n leb n yeele: «M wẽend ne Soaala sẽn vɩ la sẽn yiis-a a Israyɛl Ezipt dãmb tẽngẽ. B na n yeelame: ‹M wẽend ne Soaala sẽn vɩ la sẽn tɩ reeg a Israyɛl nug goabg tẽnsẽ, la tẽns niyns b sẽn da sẽeg-ba fãa.› M na n tall-b lame n wa tẽng ninga mam sẽn da kõ b ba rãmba.» Ade, mam a Wẽnde, m na n tʋma kʋɩl-zẽ-yẽedba wʋsg-wʋsgo tɩ b tɩ yõg-ba, la m na n tʋma tãoos rãmba tɩ b tɩ rig-b zĩis fãa: tãms zutu, kukumba zutu, la pĩis bogdẽ. Mam nin nee b soya fãa, b manesma fãa ka solg-m ye la mam mi-la b yel-wẽna fãa. Mam na n sɩbg-b-la b yel-manesem a yiib yĩnga, m na n sɩbg-b-lame tɩ b rẽgma m tẽngã la b ra pids-a-la ne b waoosa la b yell yoodã. Soaala-Wẽnde, yãmb la m pãnga, m teegd fãa-fãa, m gũuda, m soondg zĩiga m yɩɩr wakato! Ad-y bu-zẽmba na n yii zĩis fãa n wa yãmb taoore. B na n yeelame: D ba rãmba sẽn da pʋgd wẽnd niynsã yaa belgem-belgem bala, yaa sobgo, yaa zaalem. Ninsaalba sẽn ka wẽndã tõe n naana wẽnd n kõ b mens bɩ? Ade, dũnna sẽ, Soaala n gomde, m na kɩt tɩ b bãng mam tõog sẽn ya a soaba, mam nug pãng sẽn ya to-to! B na bãng marsã tɩ maam la Naaba-Wẽnde. A Zɩɩda yel-wẽnda gʋlsa ne kut kɩtga ne kɩtg keglem sẽn pid keglem. Gʋlsma gʋlsa ninsaal sũurẽ. Yaa bũmb sẽn dɩg vẽenega wa maan-kuga sẽn me zĩig zãngã. Bãng-y tɩ wala ned sẽn gomd a kamb yelle, yaa b maan-kuga yell la b gomda, n gomd ra-lugã sẽn sel kunkuba zut bɩ tɩɩsa sẽn gũma maasmẽ. M sẽn na n bas tɩ zɛɛdba zɛ n loog ne wã, na n yɩɩ foom a Zɩɩda, sẽn waoogd wẽn-naandsã la f pʋgd-b pʋt noore bɩ tãmsa zutu. Na n yɩɩ f arzɛka, f laoga fãa la b na n loog ne. La rẽ n na n yɩ f sɩbgre, f wẽn-naandsa pʋgba sɩbgre. Woto me la f na n yao pʋta la rũmsa lemse f sẽn da zãgs yaoob pĩndã. F meng n na lebg yaoodã bɛɛba nusẽ, pa-weer tẽngẽ. Woto me la f bãngd tɩ f widga m sũura bugum la bũmb kõn le tõog n kiis-a ye. Soaala-Wẽnd goma woto: M na gesa wa ka bark soaba, ned sẽn wẽnemda a kãar n tees maam, ned sẽn teeg ninsaala, nemd bala. A yell na n yɩɩ wa tuugu sẽn be zĩ-koɛɛngẽ, a ka tẽed zu-noog ba bilfu. A yɛsa a ye we-raooga kuga sʋka, a sela birg sẽn paoog zĩigẽ, yaa zĩ-peen-daaga, yaa yams-neere. M yaool n ningda barka ned ninga sẽn teegda maam, n dɩkd a menga n ningd maam nugẽ. A yell na n yɩɩ wa tɩɩga sẽn sel kʋɩlg noore, t'a yẽgna tẽeg n tat kooma. A ka na n zoe rabeem, tʋʋlg ye, a vãada ka na n kʋɩ ye. Ba ya sa-paoor yʋʋmde, a ka ne a sẽn na n bʋ bũmb ning poorẽ ye, Biisa sẽn tar wombo la b sẽn tare. Ninsaal sũur pida ne sẽn golme, sẽn golme n ka le tõe n tẽeg ye. Ãnda n tõe meng n bãng sẽn be sũurẽ? Maam, Naaba-Wẽnde, maam bala n vɛɛsd ninsaal tagsgo, maam bal n ne sẽn be a sũurẽ, maam bal n tar ned yel-manesem fãa n tõe n wa rol-a. Ad-y ned sẽn tũ noor tõdgre n lebg arzɛk soaba, wẽnda koadeng sẽn wũg gɛla, gɛla a sẽn pa lobe. A arzɛka menemda a nifẽ la a vɩɩma baasgẽ, t'a yama menem n bas-a-la zãnga. Al dũni sɩngrẽ tõnd wẽnd doogo tɩ zaoolga yĩngr wala naam zaoore. Soaala-Wẽnde, yãmb la a Israyɛl saagre, la sẽn ka pʋgd-b yãmbã, bãmb na looga ne yãnde. Sẽn wẽnemd-b b kãare n tees yãmbã bãmb yʋʋra kõn pa dũniya, t'a gʋlsa tom zugu. La rẽ yaa b sẽn bas yãmba, vɩɩma ko-nifu. Tũuda ne yãmba, Soaala tɩ m paam tɩlgre. Fãag-y maam tɩ m na põse, M ziira zãng-zãng la yãmba. Ad neba fãa sẽn sokde: «Soaala gomda na n pidsa da-bʋre? Bɩ b bas b gomda t'a pids wɛ!» Soaala, ka maam n dɩdgd yãmba tɩ y bool yel-beeda ye, m pa kos tɩ y bas-a t'a lʋɩ d zug ye; y mii rẽ neere; y ket n tẽra m sẽn yaag m noor n togs fãa. Da maan-y tɩ m wa ka le mi m sẽn beẽ ye tɩ yel-beed sã n wa fãa, yaa yãmb nengẽ la m wat n soonde. Sẽn namsd-b maama n togẽ ne yãnde, kaẽ maam ye. Bãmb n tog n zĩẽ ne sũ-sãanga la kaẽ maam ye. Bool-y yel-beeda raare n kõ-ba, pãb-y-ba n beds zãnga. Soaala-Wẽnd meng n yeel maam: Kẽng n tɩ yals buuda dignoorẽ; dignoor ninga a Zɩɩda nanamse sẽn tũud n kẽedẽ la b yitã. Dẽ poore, saag Zerizalɛɛm dignoya fãa. Fo na n yeel-b lame: Kelg-y Soaala koɛɛga, Zɩɩda nanamse, Zɩɩda rãmba, Zerizalɛɛm kẽedba, la yãmb fãa sẽn tũud a kʋɩlensã n kẽedẽ la y yitã. Soaala-Wẽnd yet-y lame tɩ y gũus y menga la y da tʋk zɩɩbo, vʋʋsga raar ye. Da sak-y tɩ b tall zɩɩbo n tũ Zerizalɛɛm dignoya n kẽ ye. Da tʋk-y zɩɩbo n yi yãmb zagsẽ, vʋʋsga raar ye. Baraare da tʋm-y tʋʋmd ye. Yaa Soaala raare wala m sẽn da wilg y ba rãmba. Yaa sɩda tɩ ba rãmba pa kelg ye; b pa kɩll b tʋbre n kelg goama neer ye. B naka b kãare, b pa tʋlg n kelge, b pa tʋlg m deeg saglgo ba a ye. Yãmba, b kamba,- yaa Soaala n gomde — yãmb sã n kelg-m neere, vʋʋsga raare, y sã n ka sak tɩ b tʋk zɩɩbo, zɩɩb buud ba a ye, n tũ tẽn-kãnga dignoya n kẽ, tɩ daara yaa m daare la y kõn tʋm tʋʋmd buud ba a ye, ad-y y dĩm dãmba sẽn zao a Daviid naama goeela zugu, n kẽnd ne wiidi bɩ n zao bilim-bilm, bãmb ne b kug-zĩidba, bãmb ne Zɩɩda neba la Zerizalɛɛm dãmba, bãmb fãa na n kell n tũuda noya n kẽed tẽngã la neba na n kell n pa-la a pʋgẽ. Sã n ya woto neb na n yii Zɩɩda tẽnga n wa pid wẽnd doogã. B na n yii Zɩɩda tẽnsẽ, Zerizalɛɛm tẽn-kɩremse, a Bẽnzame tẽn-peelmẽ, kunkuba zutu, bãg-faagẽ, la Negɛb zĩ-pɛɛlẽ. B na n wa kʋʋ maando, maanda buud toor-toore: yũ-nood maando, laafi kosg maando, bark pʋʋsg maando, n paas alkam la tɩdar kũuni. La yãmb sã n ka kelg mam goama, y sã n pa kees vʋʋsga raare n kõ maam, n saag n tũ noya n kẽ Zerizalɛɛm ne zɩɩbo, m na widg bugum tẽnga pʋga, bugum sẽn na n dɩ a ro-neeba la sẽn ka na n tõog n kiis ye. Ad noor m sẽn paam Soaala nengẽ: «Yiki, Zeremi n kẽng yagda yiri; beenẽ la m na n togs foom m koɛɛga.» Mam kẽnga yagda nengẽ n tɩ yãend t'a be a yagd-doogẽ. A ra sagla yagd a tebra pʋgẽ n tʋmnẽ. A sẽn da yagd bũmb ninga ka sak ye, t'a le maneg n yag a to, tɩ tũ wala a sẽn da rata. La Soaala-Wẽnd goma ne maam n sok-ma: Mam ka tõe n maan ne a Israyɛl zaka rãmba, wa yagda sẽn maanda bɩ? Gese, Israyɛl, wala yakã sẽn be yagda nugẽ, yãmb me bee mam nugẽ boto! Wakat ninga mam mii n gomda buud kẽer yelle, n gomd rĩund kẽer yelle n yet tɩ m na n võome, tɩ m na n tus n lubame, tɩ m na n wãame. Bãng-y tɩ buud kãens sã n tuub b wẽnema, mam basdame tɩ sɛ, n ka lebd n sɩbg-b ye. Daar ninga, mam mii n yeelame tɩ m na n manega soolma a yembre t'a yɩ sõngo, tɩ m na n meeme la m sele. La mam sã n mik tɩ b maanda wẽnga, n ka kelgd mam goama, mam me ka kelld n maan neer ninga m sẽn da rat n maana ye, m tekda m daabo. Marsã, Zeremi, fo na n goma ne Zɩɩda rãmba, la ne Zerizalɛɛm neba: Wilg-b tɩ m temdame n na n kɩt tɩ yell pak-ba, mam bʋgsda m yamẽ n dat n sɩbg-ba. Bɩ ned kam fãa bas so-wẽng ninga a sẽn tũudã. Bɩ a modg t'a tʋʋma yɩ sõma t'a manesma tek n yɩ neere. La ayo, b pa rat n lak n bas b tʋʋm wẽna ye, b yetame tɩ m da wɩɩg ye, tɩ b na maana wala b sẽn yalse. Soaala-Wẽnd goma woto: Sogs-y bu-zẽmbã n gese, ãnna n wʋm yell a woto! M bi-pugla, a Israyɛl, maana yell sẽn ka sakd kelgre, a maana yel-beedo. Waooda sẽn gĩs Libã tãmsa zug kooma, ko-maasga sẽn fõt n sigdã, y na wʋm tɩ b gomd tɩ b pa rat ko-kãnga? Tõe n sãbsa koom sẽn yit yɩɩga, tõe n sãbsa koom sẽn ya maasg yʋdʋd? Mam neba bala n yĩmd mam yelle! B wisda wẽn-naands tɩdare, wẽnd dãmb sẽn pa wẽnde, sẽn gãnegd beoos b sor zugu tɩ b kẽnd n lagsdẽ. B basa so kʋdre n dɩkd soy sẽn ka manege. La woto la b tẽng lebg zĩ-peen-daaga. Ned ka yãet-a n ka wiis ye. Ned ninga fãa sẽn loogda be pɛleng yɩkdame, la a girda a zugu. M maanda ne-ba wala yaang sobg sẽn maande m sẽegd-b-la b bɛɛba taoore. B sẽn kong pãng raare mam na n wẽnemda m kãare, kõn yɩ m neng ye, m kõ ges-b ye. Neb n waa n yeele: «Aya, wa-y yã tɩ d kɩt tɩ wʋm a Zeremi, tɩ bala, ka maan-kʋʋdb sẽn na n zãms-do n paoog-d ye, ka neb sẽn tar yẽesem n na sagl n paoog-d ye, ka bãngdb sẽn na n taas tõnd Soaala koɛɛg n paoog-d ye. D zãgs a karenga kelgre, d modg n sãam a yell zãnga ne d wɩdse!» Soaala-Wẽnde, kelg-y-m neere kelg-y m bɛɛba rõadga. Ned na maan wẽnga n dol yel-sõmde. B yaool n segenda bẽdgo mam yĩnga. Tẽeg-y mam sẽn yaas yãmb taoore n da pẽgd-ba, la m da yõkd sɛɛga b yĩnga, tɩ y sũur da puuga ne-ba. Woto wã bas-y b kamba tɩ b ki kom, tus-y-ba n lub sʋʋs zutu! Kɩt-y tɩ b pagba kelem b kamb kʋʋre, kɩt-y tɩ b pagba lebg pʋg-kõapa! Kɩt-y tɩ bã-longdem kʋ b sɩdb rãmba fãa! Kɩt-y tɩ b kom-bɩɩba fãa pa tãpẽ! Kɩt-y tɩ b wʋm kũmkũma b yiya pʋsẽ, daar ning y sẽn na n tiig n tʋm bɛɛb b nengẽ. B baood n na n yõk-m lame, b gãneg-m-la b bẽdgo. Sã n ya yãmba, Soaala, yãmb mi-la b sẽn dat n maan bũmb ning fãa, n kʋ-ma. Da kõ-y-b sugr ye; da yẽes-y b yel-wẽna ye. Kɩt-y tɩ b fãa lʋɩ yãmb taoore, puug-y y sũuri n kɩt tɩ wʋm-ba! Dẽ zugẽ, Soaala-Wẽnd yeela a Zeremi: Kẽng yagd nengẽ n tɩ bao yʋʋr n da. Bool buuda kãsem dãmb kẽere, bool maan-kʋʋdba me kẽere. Fo na n tũu Sapeesa noorẽ n dɩk Ben-Inom bãg-faaga sore. Fo na n yeelame: Zɩɩda nanamse, la yãmb sẽn kẽed Zerizalɛɛm, kelg-y dũni fãa Wẽnd, a Israyɛl Wẽnnaama, koɛɛga: Mam tara yell kãsenga n wat tẽn-kãnga yĩnga, al tɩ ned ninga fãa sẽn na n wʋm yellã, a tʋba na n kʋrame! Sɩda, Zɩɩda rãmb basa maam, b tedga zĩ-kãnga nenga; b kʋʋ maando n kõ wẽn-naandse, yaa wẽn-sãamse, bãmb da ka mi-ba, sẽn deng-b bãmba da ka mi-ba, Zɩɩda rĩm dãmba me ra ka mi-b ye. B pidsa zĩ-kãnga ne neb sẽn ka tar b toorẽ yell zɩɩm. N paas me, b manega zĩiga a Baal yĩnga n wat be n kʋʋd b kamba n yõod bugum. Mam zɩɩ n kõ b noore tɩ b maan dẽ ye, m zɩɩ gom maand a woto buud yell ye, b tagsg meng zɩɩ n wa m yamẽ ye. Woto fãa yĩnga, la Soaala gomd tɩ daar n wate tɩ b ka na n le bool zĩ-kãnga tɩ Tofɛt bɩ Ben-Inom bãoogo, b na n bool-a lame tɩ nin-kʋʋr bãg-faaga. Zɩɩda ne Zerizalɛɛm dãmb sẽn geen bũmb ninga kõn toog ye. M na n lub-b-la ne sʋʋga b bɛɛba taoore. M sʋʋga na n sagla sẽn dat n yãk-b bãmb yõora nusẽ. M na n basa b yĩnsã ne yĩngr luiili la we-rũmsi. M na n bas tẽnga t'a lebg raboogo; f sẽn yãend tẽnga fãa dẽnd f kelem a kʋʋre. F sã n ta a pʋgẽ fãa dẽnd f wẽ siri, dẽnd f pɛleng yɩke. Ad bɛɛb sẽn ka be sugri na n wa gũbga tẽngã. Tẽnga rãmb yɩɩre la b nimbãanega na n looga toogo, tẽnga rãmb na n kong n wãba b kamb nemdo la b lɛɛg n wãbd taaba. Zeremi, fo na n wãaga yʋʋrã neb niyns sẽn yãag-b fooma nifẽ, la fo na n yeel-b lame: Ad maam, Naaba-Wẽnde, dũni fãa Soaala, na n wãa tẽn-kãnga ne a nebã, wala b sẽn wãad yagd yʋʋre tɩ tɩɩm ka le beẽ ye. B na n muma neba Tofɛt, vɩʋʋg kaalem yĩnga. M na n maana ne zĩ-kãnga la ne a neba wa m sẽn maan ne Tofɛt. Zerizalɛɛm yiya, la Zɩɩda nanamsa yiya, na n lebga yi-yoodo, zĩ-põosgo wala Tofɛt zĩiga. Na n yɩɩ boto tɩ do-kãsensa fãa zutu, b wisa tɩdare yĩngri ãdsa yĩnga, la b basa rãam tẽn-taas wẽn-naands yĩnga. A Zeremi yii Tofɛt, Soaala-Wẽnd sẽn da tʋm-a zĩig ninga, t'a tɩ togs b koɛɛgã. A sẽn lɛɛg n wa, a yaasa wẽnd dooga taoore, n zẽk a koɛɛga n yeel neba fãa: «Ad Yĩngr Soaba, a Israyɛl Wẽnnaam, gomde: Ade, yel-tood buud toor-toore la m kãab tẽn-kãnga ne a yagse, m na n waa ne-ba b fãa zutu, tɩ bala b tuda maam b kãare la b yeelame tɩ b kõn kelg mam goama ye.» Bala Maan-kʋʋda a Pasewur, a Imɛr biiga, n da ya wẽnd dooga gũudb naaba. A wʋma Soaala koeesa fãa a Zeremi sẽn togsã. A wẽ-la a Zeremi pɛka, n kɩt tɩ b loe-a ra-luka a Bẽnzame digno-kãsengẽ, dignoor ninga sẽn tota ne wẽnd dooga rẽnna. Vẽkembeoogo, a Pasewur kɩtame tɩ b lok a Zeremi. Dẽ la a Zeremi yeel-a: «Soaala-Wẽnd ka leb n boond foo tɩ Pasewur ye, fo yʋʋr lebga a Yɛɛsgo-naaba.» Ad Soaala-Wẽnd sẽn gomda: «Mam na n kɩtame tɩ f yɛɛs yɛɛsgo kãsenga, foom ne f zo-rãmba fãa. Bɛɛba na n kʋ-b-la ne sʋʋga; fo nif na n yãenda b kũum. N paas me, m na n kɩtame tɩ Babilon naaba wa wʋk Zɩɩda tẽnga fãa n tall n kẽng Babilon, ka rẽ bɩ a kʋ-b ne sʋʋga. Tẽnga arzɛka fãa, tẽnga laog fãa, bũmb niyns fãa sẽn tar yõodo, Zɩɩda nanams arzɛgs fãa, m na kɩtame tɩ b bɛɛba wa wʋk-b fãa gilli n tall n kẽng Babilon. La sã n ya foom, Pasewur, foo ne f zak rãmba fãa, b na n talla yãmb fãa n kẽng yembdo Babilon. Fo na n kẽnga be, la fo na n kii be, la b na n muma foom be, foom ne f zo-rãmba, fo sẽn da yagd zirẽ tɩ neb niyns kelgdẽ wã.» Soaala-Wẽnde, yãmb gomame n belg-ma, la m basame tɩ yãmb yõk-ma. Yãmb wõra maam, yãmb tõog-m lame. Woto me la neba paam yã, beoog sẽn vẽeg fãa, n laad-m la b tar-m n yaanẽ. M sã n gom fãa n sɛ dẽnd m lɛɛg n yõk sɛɛga dẽnd m kelme n wilg tɩ b maand-m-la pãnga. Taas neba yãmb gomd fãa wata ne m laado la m tʋʋre. M sã n wa yik n yeel m menga tɩ m ka na le gom Soaala yʋʋr yĩnga, bũmb n widgd m pʋgẽ wa bugum, n yõogd maam, tɩ m baood n na n kiis-a la m pa tõe ye. M wʋmda neb wʋsg sẽn wɩt-ma, b yãee yʋʋr n pʋd-ma: a Yɛɛsgo-naaba, poorẽ la taoore, goabg la rɩtg Yɛɛsgo. Tɩ zĩig sɩd wulumd ne: «Yõk-a, yõk-a n wa!» M zo-rãmba meng gũusda m goama, b ratame tɩ m tudg tɩ b yõk-ma. B pʋs n yetame: «D na yõk-fo, d na paam n dok d sũuri.» La yãmba Soaala, yãmb pida ne pãnga la yãmb n zabd n sõngd-m. Woto wã yaa m bɛɛba n na n kong pãnga bãmb neng n na n turg tẽnga. B lʋɩɩsa yãnd na n yõk-b lame, b zug na n sulgame n ka le roog bada, la neba na tar n gomda. Yãmba, dũni fãa Soaala, yãmb mii sẽn ka pʋgd-b yãmb ne belgrã. Yãmb mii sẽn solg sũurẽ. Mam yẽ basa m yɛla fãa ne yãmba, m saagda m na yãend ne m nini, y sẽn na n dok y sũura to-to ne m bɛɛbã. M buudu, sõng-y-ma n kils Soaala, yɩɩl-y n pẽg-ba tɩ b fãag-m-la nin-wẽnsa nugẽ. Wẽnd na sãam m dogma daare, Wẽnd na yãk m ma sẽn dog-m daar ninga barka! Ned ninga sẽn pidsa m ba ne sũ-noogo n wilg-a t'a paama bi-ribla, bɩ b maan ne nin-kãnga wa b sẽn maan ne tẽns niyns sẽn tiig n lebg raboodã, tɩ sugr ka zĩndã. Bɩ nin-kãng sãd beoog n wʋm kɛlenga, la zabr kaasgo, wĩnto-sʋka! M yee n da paamẽ bala tɩ Soaala bas-m tɩ m ki tɩ m nan ka rogẽ ye! M ma wã n yɩtẽ m yaoogo, tɛk la tɛka. Bõe tɩ m yi m ma pʋgẽ, vɩɩma sã n ya bãng toog la namsgo, n wa ki ne yãnd bala? Ad koɛɛg ninga Soaala-Wẽnd sẽn taas a Zeremi dĩm a Sedesiyas yĩnga. Dĩma da tʋma a Zeremi nengẽ a Pasewur, a Malkiya biiga, n paas maan-kʋʋda a Sefaniya, a Maseya biiga. A ra tʋm-b lame tɩ b tɩ yeel-a tɩ sã n ta a raabo, bɩ a tɩ gom ne Soaalã Babilon dĩm a Nabikodonozor poorẽ, tɩ dĩm kãng waa n maanda zabr ne tõndo. Daare Soaala na maan makre d yĩnga, n zãag-d ne Babilon tãb-biisã. A Zeremi yeela b sẽn tʋm b rãmbã: «Tɩ yãend-y dĩm, a Sedesiyas, la y wilg-a leokr ninga, Soaala-Wẽnde, a Israyɛl Wẽndã sẽn leokde: ‹Yãmb na n taka zabre ne Babilon dĩma tãb-biisa sẽn gũbg yãmbã. M na n modga tãb-biis niynsi sẽn zabd-b lal-gũbra taoorã tɩ b leb poorẽ, n tɩ tigim tẽnga pʋga. Mam menga n na n yik ne m sũura sẽn puug wʋsgã, n zab ne yãmba n wilg-y m nugu la m kang pãnga, n wilg m zab-minim. M na n zaba ne tẽn-kãnga bõn-vɩɩl fãa: ninsaalba, rũmsi; bãag sẽn ka sugri n na n loog ne b fãa. Dẽ poore, ket n yaa Soaala koɛɛga, mam na n ninga Babilon dĩma nugẽ, Zɩɩda dĩm a Sedesiyas, n paas a kug-zĩidba la a soolma rãmb sẽn põs-b bãagã, zabra sʋʋga la koma. N-ye, m na n bas-b-la b bɛɛba nugẽ, sẽn dat-b n kʋ-ba nusẽ! A Nabikodonozor na kɩt tɩ b kʋ-ba; a kõn zoe ned ba a ye nimbãanega, a kõn bas ned ba a ye, a kõn sak belgr ye.› » Soaala le kɩtame t'a Zeremi taas buuda koe-kãnga: «M yalsda yãmb so-badgẽ. Soy a yiibu n dɩg y taoore: vɩɩm la kũum sore. Sẽn na n paa tẽn-kãnga pʋgẽ, sʋʋg n na n kʋ-a, ka rẽ bɩ kom, bɩ bã-longdem. Ned ninga marsã sẽn na n yɩ tẽngã n tɩ rɩk a meng n bas ne Kalde rãmba sẽn gũbg tẽngã, yẽ soab na n vɩɩndame. Tɩ bala m ka rat tẽnga fãagr ye, a wãab la m data; a na n lʋɩɩ Babilon dĩma nugẽ la a na n ning-a-la bugum.» Koɛɛg a Zɩɩda na-yira rãmb yĩnga: Ad Soaala sẽn yete: Zɩɩda Na-yiri, Daviid buudu, kelg-y. Sɩng-y y raarã ne bʋ-kaoor sẽn ya tɩrga. Reeg-y pãng rãmba sẽn yõkd n deesdẽ wã. Ka rẽ m sũura na widga wa bugum Bugma na n dɩɩ zãnga, la yaa bugum sẽn ka tõe n kiis ye. Dẽ me n na n yɩ y tʋʋm wẽnsa yaoodo. Maam, Naaba-Wẽnd, na n zaba ne yãmba, ne sẽn be-b tãnga pennẽ, pĩ-labra zugu; m na n zaba ne yãmb fãa sẽn gomd-ba tɩ y ka ne bɛ ninga sẽn na n sig n ta yãmbã, bɩ sẽn na n saag-a n kẽ y rotẽ wã. Ade, maam Naaba-Wẽnd n gomde, woto n na n yɩ y tʋʋm wẽnsa yaoodo: m na n ninga y tɩ-wogda googa bugum la bugma kõn kees bũmb ye, bũmb kõn kees poorẽ la taoor ye. Soaala-Wẽnd kõ-la a Zeremi noor kãnga: «Kẽng Zɩɩda, na-yirã, ad fo sẽn na n tɩ yeel bũmb ninga: ‹Kelg Soaala gomde, Zɩɩda dĩma, sẽn zao a Daviid naam goeel zugu n paas yãmba, kug-zĩidba, la yãmb fãa sẽn kẽed la y yit dĩma zakẽ, ad-y Soaala gomd-y-la woto: Bɩ y bʋ-kaoor yɩ tɩrga, reeg-y pãng rãmba sẽn yõgd n deesdẽ wã. Sã n yaa sãana bɩ yaa kɩɩba, bɩ pʋg-kõore, da tũ-y b sẽn ka pãngã n zãmb-b ye, n deeg b paoong ye. Da le sak-y tɩ nin-sõng zɩɩm daag ka ye. Yãmb sã n mao n deeg mam saglgo, nanams na n kell n zaoonda a Daviid naama goeel zugu, b na n kell n zomba wiidi bɩ b na n kẽe b bilim-bilma. B na kell n tõog n kẽed na-yirã, bãmba, wala b kug-zĩidba, la b soolma rãmba. La yãmb sã n ka kelg mam goama, sɩd ne sɩda, yaa Soaala koɛɛga, do-kãnga na n lebga do-wãoongo.› » Sɩda, yaa woto la Soaala-Wẽnd gomd Zɩɩda naaba roog poorẽ: Ne m sẽn get-fo tɩ f neerma pida wa Galaad googo, wala Libã zug-tẽnsʋka, ad-m kãabdame tɩ m na kɩte tɩ f lebg zĩ-peen-daaga, f na lebg raboogo. Fo yĩnga m na tigs tẽn-wãadba, m na yiis-b ne wãab te-bɛda b na kɛ y kʋgsã, y tɩ-neebã, la b na n ning-b-la bugum. Neb wʋsgo na n wa loogda tẽn-kãnga sɛɛgẽ, b na n wa sogsda taaba: «Bõe la Soaala-Wẽnd maan yã tɩ tẽn-kãseng kãnga lebg woto?» Dẽ marsã la b na n leok-ba tɩ yaa tẽnga rãmb sẽn wõgemd wẽn-naands taoore n waoog-bã. La woto b basame n ka pids b sẽn da kãab Soaala, bãmb Wẽnnaama ye. Zɩɩda rãmba, da kũm-y ned ninga sẽn ki-a wã ye, da kũm-y dĩm a Zoziyas ye, da sãam-y y sũur ye. Kũm-y ned ninga sẽn loogd-a yembdã, kũm-y dĩma a Salum, tɩ bala a ka na n lɛɛg n wa ye, a ka na n leb n yãend a ba yir ye. Yaa woto la Soaala-Wẽnd gom Zɩɩda rĩm a Salum poorẽ. Zɩɩda dĩm kãng dɩɩ naam a ba a Zoziyas poore, la b tall-a lame n loog pa-weere: b yeelame t'a kõn lɛɛg n wa ye. B sẽn tall-a n kẽng tẽng ningã, a na n kii be, la a kõn leb n yãee a ba yir abada. Yell n na n pak foo, Zoakim, fo kɩtame tɩ b me na-yiri, la fo yaool ka maand sẽn tog ye. Fo meta roto n dogend doog a to zugu, la f ka maand neer ne f soolma rãmb ye. Fo kẽesda neb tʋʋmde n yaool n ka yaood-b ye. Fo yetame tɩ f rat n me f yĩnga ro-kẽeng-kẽenga, ro-roglem-roglem. Fo kẽe n ningda ro-vẽ-yalense. Fo tablgda rooga lalse ne ra-peg-sĩdma; fo kɩtdame tɩ bolg-b tɩ b lebg miid yʋs. Yaa fo sẽn dat n wilg tɩ f yaa dĩma la f n ning ra-sĩdma. Fo ba wã da rɩtame la a yũuda wa neb a taaba sẽn maande, la yẽ ra maanda sẽn tog la sẽn zemse la rẽ da ka sãamd bũmb ye. A ra ka sãbsd naong soaba, a ra ka paoogd nimbãan-ned ye. La rẽ n da noom ned fãa. Sẽn maanda woto wilgdame t'a mii maam, Naaba-Wẽnde. Fo sẽn ne yaa sẽn nafd foom bala. Sẽn pak foo bala yaa f kʋ sẽn ka tar b toorẽ yelle, yaa f maan bi-beelem la pãn-tõog. Yaa rẽ yĩnga, la Soaala-Wẽnd yet a Zoakim poorẽ, a Zɩɩda dĩm a Zoziyas biiga poorẽ: A kũum daare, b kõn kelem kʋʋr ye, Ned ba a ye kõn yeele: «M saam-biiga, ges yel-beedo! M tão sõngo, ges yel-beedo!» B kõn daagd nintãm la b yetẽ: «Ges yel-beedo, m zu-soaba! Ges yel-beedo, m naaba!» B na n mum-a-la wa rũnga, B na vu-a lame n tɩ lobe Zerizalɛɛm digem-poore. Dʋ Libã tãnga zugu n kaase, Zerizalɛɛm, Dʋ Bazã tãnga n kelem tɩ sãde. Kelem lolle Abarim tãmsa zutu, woto f zo-rãmba na bãng tɩ f yell sɛɛme. Yel-beeda sẽn da waa n ket n zãra, m da zoe n togs-f lame, la f leok-m lame bala: «M pa na n kelg ye.» La yaa woto la f ra sɩng n maanẽ, f zɩɩ n kelg m goam ye. Sobg peega f taoor dãmbã, f zo-rãmba boba yembdo. Yaa f tʋʋm wẽnsã n wa ne f paoor la f yãnde. Fo sẽn da zao ne laafi Libã tãmsa zutu, n da tʋɩ f tʋk kʋg-wogda zutu, kelg waasg ning f sẽn waasde, ges f sẽn tiig n wẽnd f yĩnga n lebsd-a goabg la rɩtgo, wa pag n digimd rogem waoodo. Fo na n togsa Zɩɩda dĩm a Koniya, a Zoakim biiga, maam, Naaba-Wẽnd n gomde, tɩ ba a sã da yaẽ nug-bĩnga nug-bĩn-neere, ad-m naan n pidgẽ yã n lobe. M wẽend ne m menga! M sẽn basd foo neb niyns nusẽ, yaa sẽn dat-b fo kũuma. Yaa neb niyns fo sẽn yɛɛsd wʋsgã, yaa Babilon dĩm, a Nabikodonozor, ne a tãb-biisã. M na n diga foom ne pag ning sẽn dog foomã tɩ y tees tẽng a to. Tẽn-kãng ka wẽnd fo tẽnga lɛ-lɛ; be la foo ne f ma wã na n tɩ ki. Y na n tʋlga ne y sũur fãa n lɛɛg n wa y tẽngẽ, la y kõn tõog ye. La tẽng ninga y sẽn dat ne y sũur fãa n leb n wa wã, y kõn le tag be ye. Woto la neba sokda: «A Koniya yaa rʋk sẽn ka be barka la sẽn wãage, bɩ a yaa bũmbu ned sẽn ka rata? Bõe n maame, tɩ b dig yẽnda ne a buudu, tɩ b kẽng tẽng ninga bãmb sẽn ka miẽ?» M tẽnga! M tẽnga! Kelg Soaala-Wẽnd koɛɛga. Soaala-Wẽnd gomda woto: «Gʋls-y nin-kãnga wa ned sẽn ka tar kamb ye. Bi-ribl kãnga vɩɩma ka pids ye. A buuda sʋka, ned ka be sẽn na n paam zu-noogo n zaond a Daviid naama goeela zug ye, la a kõn dɩ naam Zɩɩda ye.» Yell na n paka pe-kɩɩmb niynsi sẽn get m buuda yellã, yaa Soaala-Wẽnd n gomde. Ad-y b yaa pe-kɩɩmb wẽnse. B basdame tɩ piisa kiid kom la b menemdẽ. Dẽ n so tɩ Soaala, a Israyɛl Wẽnnaam, gomd woto ne pe-kɩɩmbã: Yãmb basa m piisa tɩ b menemdẽ la b sẽegdẽ, y pa ges b yell ye. Mam yẽ na ges y yelle n sɩbg y manes yoodã. Ade, mam meng n na n tigim piis niynsi sẽn ket-bã, m na n tigim-b-la m sẽn sẽeg-b tẽns niynsa fãa. Maam n na n tall-ba n kẽng b wãbneg zĩigẽ. B na n noba sõma, la b na n doga wʋsgo tɩ b sõora paase. Mam na n baoo pe-kɩɩmb sõma n gũnug-ba. Ne pe-kɩɩmb kãense, b kõn yɛɛse, b kõn dig bũmb rabeem ye, ba a ye menga kõn le menem ye, Soaala gomde. Ade, daar n wate, Soaala n gomde, mam na n kɩtame tɩ nin-sõngo, nin-tɩrga, yi a Daviid meng buudẽ. Na n yɩɩ dĩm sẽn mi naam dɩɩbo, sẽn zãad a soolma rãmb sɩd la zemsg pʋgẽ. A sã n wa rɩt a naama a Zɩɩda na paam fãagre, t'a Israyɛl vɩɩma ya laafi vɩɩm. Ad yʋʋr ninga b sẽn na n pʋd-a: «Bʋ-kaood tɩrg soaba Wẽnde.» Daar n wate, Soaala-Wẽnd koɛɛga, tɩ Israyɛl dãmb ka na n leb n wẽen woto: «M wẽen ne Wẽnd sẽn vɩ la sẽn yiis-a tõnd Ezipt tẽnga.» Woto la b na n wẽen marsã: «M wẽen ne Vɩɩm Naaba-Wẽnd sẽn yiis Israyɛl buudu, nug goabg rãmba soolmẽ, la zĩis niyns fãa b sẽn da sẽegẽ, tɩ b na n le vɩɩnd b tẽngẽ.» Bãngdba poorẽ, goam n gome la m sũ-keelma menema zãnga, mam yĩnsã fãa digimdame. Soaala yiisa goam sẽn ya sõma la tagdo tɩ m digimdi, n tãag n yɛsẽ wa rã-tɩgda, rãam sẽn lubi. Goama goma woto: Tẽnga pida ne yoaadba. B fãa zoet n pʋgda wẽnga. B pa yɛɛd ne tʋʋm wẽns ye. Yaa rẽ la tẽnga yãbd a neba kʋʋre, yaa rẽ la yamd kʋɩ rũmsa wãbneg zĩisẽ. Bãngdba wa maan-kʋʋdba, b fãa lebga bi-beese. B tol n talla b manes wẽnsã n wa Soaala-Wẽnd roogẽ. Yaa Soaala n wilg-m rẽ. Dẽ n so tɩ b soya na n pid ne salse. B na n kẽnd n fãooda taab likẽ la b pãsd n lʋɩtẽ, m sã n wa tool yel-beedã, m sã n wa yik ne bãmba. Soaala n gome. Bũmb la m yãend Samari bãngdba nengẽ, Soaala-Wẽnd n gomde, la yaa bũmb sẽn ka sakd toagsg ye. Ad-y b ra gomda a Baal yĩnga, n kẽesd m buud a Israyɛl moogo. La m sẽn yãet bũmb ning bãngdba nengẽ Zerizalɛɛma pʋgẽ, n yɩɩd ne wẽnem: yoobo, zirẽ yagbo, fãadba pirsgu. B pa basd tɩ ned ba a ye tõog n vʋʋs ne wẽng maaneg ye. M sẽn get-ba, b wẽnda Sodom dãmba, la Zerizalɛɛm dãmba pa são Gomor dãmb ye. Yaa woto la dũni fãa Soaala gomd Zerizalɛɛm bãngdba poorẽ: M na n yũnug-b-la ko-tɩɩsenga, n yũnug-b ne ko-zẽnem. Zerizalɛɛm bãngdba lebga zẽnem sẽn sãamd tẽnga zãnga. Ad dũni fãa Wẽnd sẽn leokde: Da kelg-y bãngdb kãensã sẽn togsd yãmb ye, b tudgda yãmba, b togsda yãmba, bũmb ninga sẽn be b yamẽ; b goama ka yit maam Naaba-Wẽnd nengẽ ye. Neb n be tɩ b toog ka be ne mam goama ye. Yaa bãmb dãmb la b yeta: «Na n zemsame!» Neb niyns sẽn kʋɩɩs b sũuri n giri, bãmb dãmb la b yeta: «Bũmb kõn maan-y ye.» Bãmb sʋka, ãnd n zĩnd d yẽsga wakato? Ãnda n yãende, ãnda n wʋme m sẽn togs bũmb ning wakat kãnga? Ãnda n wʋm maam, Naaba-Wẽnd, goama, ãnda n wegs-ba? Ges-y sobg kãseng sẽn wate, Yaa Soaala sũur n puugdi. Sɩlman-daoogo n wat nin-wẽnsa yĩnga. Soaala sũ-puura ka na n yõke tɩ b pa pids b sẽn yalsa ye. Y na waa n wʋm dẽ, raar a ye. Mam ka tʋm bãngdb kãensã ye, tɩ b yaool n tar zoeese. Mam ka yeel-b tɩ fɩ, la koees buud fãa yita b noorẽ. B sã n da zĩndẽ d yẽsga wakato ad-y b na tõogẽ n taasẽ buudã m goama n kɩtẽ tɩ neba bas b so-wẽnga tũubu, la b tʋʋm-yooda fãa. Soaal Wẽnd n sokde: «Mam yaa ned sẽn ka ne yɩɩg laa? Ayo! M yaa Wẽnd sẽn ne yɩɩga. Ned sã n solg a menga a tõeeme tɩ m ka le ne-a bɩ? M bee zĩis fãa, yĩngr la tẽnga; y ka mi rẽnda sɩda?» Mam Naaba-Wẽnde, mam wʋma bãngdba sẽn gomd to-to, b gõod n yagda zirẽ mam yʋʋr yĩnga n yetẽ: «Mam zãmsa woto m gõeemẽ, mam paama likri.» Na n yɩɩ woto n ta da-bʋre? Nin-bãmba tagsdame tɩ bõe b zirẽ-beeda moonega wakato, b sẽn wat n yelgd b meng sẽn naana wakato? B sẽn togsd taaba b sẽn paam likri niynsã, ka bũmb a to la b rata n zʋʋg maam, Naaba-Wẽnd, leb kɛɛnga. B raab la b yĩm m yelle wala b ba rãmba sẽn da yĩm m yelle n pʋgd Baal dãmbã. Bãngd ninga sẽn paam-a zãmsgo, bɩ a togs a zãmsgo! La a sã n wʋma mam gomde, bɩ a togs mam gomde n da rogl bũmb ye! B ka tõe n dɩk kãnkãre n mak ne kaaf ye, Soaalã n gomde. Mam gomda yaa wa bugum. Mam gomda yaa wala zãar sẽn wãad pĩiga. Yaa rẽ yĩnga la m na n yik ne bãngdba sẽn be tẽngre n zuud taab m goama. Mam na n zaba ne bãngdb niyns sẽn ka bãngdba n kalemd m goama ne bãmb mens rẽnna. Mam na n zaba ne bãngdb niynsi sẽn yagd-b zirẽ tɩ b paama beoog yɛla pukri. Zirẽ-be-wagla rãmb tar m buudã n kẽesd moogo. Mam pa tʋm-ba, m pa kõ-b noore. B pa sõngd m buuda ba sẽn paood ye. Soaala n gome! Soaala-Wẽnd yeela a Zeremi: «Bãngd bɩ maan-kʋʋd, bɩ ned a to sã wa sok-fo: ‹Bõe tɩ Soaala gomda ya woto, bõe t'a ya zɩɩbo?› F na leok a soaba: ‹Yaa yãmb meng la m zɩɩbo. La m na n sik-y lame n vʋʋse.› Bãngd bɩ maan-kʋʋd, bɩ ned a to sã n gomd tɩ yaa zɩɩb la Soaala zɩlgd-a, m na yik ne yẽ soaba, la m yik ne a zak rãmba. Yãmb sẽn tog n sogs taaba, yaa Soaala leokame tɩ bõe, Soaala yeelame tɩ bõe? Sã n ya sẽn gomd-b zɩɩb yellã, m da le wʋm dẽ ye. Soaala gomd maanda wãn n lebg zɩɩbo, ninsaal yĩnga. F sã n gomd woto f ka togsd sɩd ye la f tekda Vɩɩm Naaba gomde, dũni fãa Soaala la a Israyɛl Wẽnda gomde. Fo sẽn tog n sok bãngda, yaa a wilg-fu Soaala sẽn leok yẽnda, Soaala sẽn togs yẽnda. La yãmb sã n ket n gomd zɩɩbo, Soaala sẽn zɩlg yãmba yelle, ne m sẽn yet tɩ m pa rat n le wʋm-a, m yet-y-la woto: ‹Ade mam na n zẽk yãmba n palg m bãgdo wala zɩɩbo n tɩ bao zĩig n lob yãmb n zãag ne tẽn-kãnga, m sẽn da rɩk n kõ y yaab rãmbã.› Man na n ning-y-la yãnde, yãnd sẽn kõn sɛ, la yãnd sẽn ka tõe n yĩm tɩ ka yʋʋm wɛɛla.» Soaala-Wẽnd wilga maam pet a yi sẽn pid ne kankama n dɩg wẽnd dooga noore. Dẽ t'a Nabikodonozor, Babilon dĩma, talla yembsã n zãag ne Zerizalɛɛm. Yɩ-la a Yekoniya, Zɩɩda dĩma, a Zoakim biiga, n paas kug-zĩidba, tʋʋm-mitba la Zerizalɛɛm kʋɩlensa pagdsa manegdb, la a tall n kẽng Babilon. M yãee pet a yiibu, peoog a ye da pida ne kankam sẽn ya sõma, n ya noog wʋsgo, wala kankam dẽemse. Peoog a to wã da pida ne kankam põaasa; b da põoga wʋsg wʋsgo n ka tõe n le yɩ rɩɩb ye. Soaala-Wẽnd yeela maam: «Zeremi, fo nee bõe?» Tɩ mam leoke: «Kankama! Kẽer yaa sõma, n ya neeba. Sẽn ka-b sõma wã, põogame; b põoga wʋsg-wʋsgo al tɩ b ka tõe n le wãb-b ye.» Dẽ la Soaala-Wẽnd yeel maam: «Ad maam, Naaba-Wẽnde, a Israyɛl Wẽnnaama, sẽn togsde: Kankam sõma wã gesg sakdame. Woto me noom-m lame tɩ m ges Zɩɩda yemse, mam sẽn yiis tẽn-kãnga pʋgẽ n kɩt tɩ b kẽng Kalde dãmb tẽnga. N-ye! M get-b lame tɩ m sũur noom wʋsgo, tɩ m na n le tall bãmba n wa tẽn-kãnga. M pa rat n sãam-b ye, m datame n le lebs-ba b pĩnd zĩigẽ. M pa rat n võ n lobe, m datame n maneg n sele. M na kɩt tɩ b bãng tɩ maam la Soaala. B na n lɛɛg n wa kẽe maam ne b sũur fãa. B na lebg m buudu tɩ m lebg b Wẽnnaam.» Ad maam, Naaba-Wẽnd sẽn leokd Zɩɩda dĩma, a Sedesiyas, poorẽ, a kug-zĩidba poorẽ, neb niyns fãa sẽn pa Zerizalɛɛm poorẽ, neb niyns fãa sẽn tɩ kẽ Ezipt poorẽ: m na n maana ne bãmba wa b sẽn maand ne kankama sẽn sãame n ka tõe le yɩ rɩɩbã. Woto dũni wã rĩunda na yãend a Sedesiyas n yɛɛse. M sẽn na n sẽeg-b zĩig ning fãa, yẽ yellã n na n lʋɩ taoore; al tɩ b sã n dat n la, bɩ n tʋ, bɩ n pʋd yɩɩlle, bɩ n kãab kãab beedo, yẽ bal la b bẽt n gomda. Yel-beed ka tɛk na n lʋɩ-la b zugu: zabr-sʋʋga, kom, la bã-longdem, n wa menes-b zãnga tẽng ning m sẽn da reeg n kõ b yaab rãmba la bãmb mense. Gomd sẽn get Zɩɩda neb fãa yelle. Gomd kãnga taasa a Zeremi, dẽ t'a Zoakim, a Zoziyas biiga, Zɩɩda dĩma, deeg naam tɩ yʋʋm naasẽ, dẽ t'a Nabikodonozor nan dɩt a naama pipi yʋʋmde, Babilon tẽnga. Bãngd a Zeremi goma Zɩɩda neba taoore, n paas Zerizalɛɛm dãmb fãa taoore. A goma woto: «Sẽn sɩng a Amon biig a Zoziyas naam deegre yʋʋm piig la a tãab soaba n tãag dũnna, ad-y m sõta yʋʋm pisi la a tã la Soaala-Wẽnd sẽn yõk goam ne maam tɩ mam me ka vʋʋsd ne m deeg b goama n taas yã. Yãmb bala m pa kelgde. Dẽ pʋgẽ me, Soaala-Wẽnd pa vʋʋs ne b tʋm bãngdba y nengẽ ye. B pʋga yãmba n tʋm b tʋʋmd sõngã la yãmb pa kelg-b ye, y pa maan gũusg ye. B gomdã da yetame: ‹Ned kam fãa bas a so-wẽnga, n bas a tʋʋm yaalsã, tɩ woto y na tõog n vɩɩnd tẽng ning m sẽn dɩk n kõ y yaab rãmba la yãmb mense, zamaan sẽn pʋgd taab n zãage. Yãmb sã n pa pʋgd n waoogd bu-zẽn wẽn-naandse, y sã n ka pees wẽn-naandse, n puug m sũuri, mam kõn maan-y bũmb ye.› La yãmb yaool n ka kelg maam ye; Soaalã n gomde, y tol n maana wẽn-naandse n puug m sũuri, la rẽ n wa ne yel-beedã.» Yaa rẽ yĩnga la dũni fãa Wẽnd, gomd woto: «Yãmb sẽn pa kelg m sẽn togsã, ade, mam na tʋmame tɩ b kẽng n tɩ bool goabg rãmba fãa la b bool m tʋʋm-tʋmd a Nabikodonozor, Babilon dĩma. M na n kɩtame tɩ b wa zab ne tẽn-kãnga nebã la a yagsã sẽn ya bu-zẽmba. M na naag bãmb ne yãmb n wã zãnga, la m na n kɩtame tɩ tẽnga lebg raboogo, la sẽn na n yãend-a na n yɛɛsame la a fɩɩle n wilg a sũ-beedo. Yaa maam, Naaba-Wẽnd n gomd woto. Ad-m sẽn na n menes y tẽngẽ: kibs bʋʋre, sũ-noog kaasgo, kãad-paalsa yɩɩla, werb-bʋʋr neerẽ, fitil vẽenem. Tẽn-kãnga na n wãa gilli n lebg raboogo la yʋʋm pisopoe pʋgẽ, bu-zẽmba na n paa Babilon dĩma soolmẽ. La yʋʋm pisopoe wã sã n wa pidi, mam na n soka Babilon dĩma a tʋʋm yoodã, a neba tʋʋm yoodã; m na n yika ne b tẽngã n kɩt t'a lebg daar fãa yĩnga, we-raoog sẽn kẽesd rabeem. Yel-beed niyns sẽn na n lʋɩ tẽn-kãnga zugã, yaa yel-beeda sẽn na n dɩ bu-zẽna, yaa yel-beed niyns a Zeremi sẽn gome la sẽn sõdg sebr kãnga pʋgã. Tẽn-bɛda neba la dĩm dãmb sẽn tar pãnga n na n wa soog Babilon dãmba, bãmb me wakata sã n ta. Woto la m na n dol b yel-wẽna.» Ad noor ninga Soaala, a Israyɛl Wẽnda, sẽn kõ a Zeremi: «M kɩt-f-la wam-pobgr kãnga sẽn pid ne m sũ-puura rãam. Reeg-a la f yũnug bu-zẽmba mam sẽn tʋmd foom b rãmb nengẽ wã. Bɩ b yũ n tuum la b gãeeme, b sã n wa yãend yel-beedã m sẽn na n bool b yĩngã.» Maam a Zeremi deega wamda ne rãama Soaala-Wẽnd nugẽ la m kɩtame tɩ Soaala-Wẽnd sẽn tʋm maam b rãmb nengẽ wã yũ-a. M sɩnga ne Zerizalɛɛm la Zɩɩda tẽnse, n sɩng ne b nanamse, b kug-zĩidba. M kɩtame tɩ b tẽnga na n lebg kãab-wẽns sẽn sãame, n lebg raboogo la we-raoogo, al tɩ sẽn na n yãend-a na n yɛɛs la a fɩɩle la woto n be rũnna. Zɩɩda poore, bu-zẽmba n pʋge: Ezipt tẽng naaba, ne a tãnsoaben-dãmba, a kug-zĩidba, a neba fãa Adem biis toɛ-toɛ sẽn kalem taab Us pʋgẽ la Us dĩm dãmba, Filisti tẽn-peelmẽ dĩm dãmba wala Askalõ, Gaza, Ekrõ la Asdod bogre. Edom, Moab la Amon kamba; Tir dĩm dãmba fãa, Sidõ dĩm dãmba fãa, mogra rʋʋnd dĩm dãmba fãa; Dedã, Tema, Buz, la neb niyns fãa sẽn kõogd-b yɛɛma; Arabi dĩm dãmba fãa la sẽn vɩ-b zĩ-pɛɛlẽ; Zimri, Elam la Mɛd dĩm dãmb fãa; Nug goabg dĩm dãmba, sẽn pẽ-b la sẽn zãr-ba; Ad-y yɩɩ dũni wã ninsaalb fãa n deeg rãama, a yeyn-ye, n yũ. Sẽn na yũ-a, yaoolem soaba na n yɩɩ Sesak dĩma. Soaala-Wẽnd wilga maam a Zeremi tɩ m yeel-ba: «Woto la dũni fãa Wẽnde, a Israyɛl Wẽnnaam, kõt yãmba. Yũ-y yã, n wa gãeemnẽ, n wa wʋbdẽ, n wa lʋɩtẽ n ka le tõe n yik ye, n ka le tõe n põs tẽn-kũum ninga sẽn wata wã ye.» Ad Soaala-Wẽnd sẽn le paase: «Ned sã n zãgs t'a kõn deeg n yũ, wilg a soab t'a rat t'a pa rat me a na yũ, tɩ yaa dũni fãa Wẽnd noore. M yɩta a wãna n ka bas tẽng ning sẽn ya m tẽngã n wa basd yãmb wala y ka maan bũmbu. Ayo, m kõn maan wa y ka tar yell y zug ye; sʋʋg la m na n yiis dũni wã yĩnga. Maam, dũni fãa Soaala, n gomde.» Soaala le yeel-m lame: «M datame tɩ f wilg-ba mam sẽn togsa fãa; la ad-f sẽn na n paase: Soaala zĩnda yĩngri n tãse b zĩnda b ro-sõnga pʋga n gome, b zabda ne b soolma, b tara kaasgo wa sẽn fẽt-b bugsuntung biisi. Bʋʋra sãtame n tat tẽnga sɛtmẽ, n tat ãndũni wã ninsaalba. Yaa bʋʋd la Soaala yik ne bãmba, yaa neba fãa la b bool bʋʋdo. Sẽn beeg-a fãa kõn põs ye. Yaa boto la Soaala gom yã.» Dũni fãa Soaala sɩd yeela woto: «Yel-beeda na n sɛɛ tẽng a ye n long tẽng a to, la sɩlmanda na n yii tẽnga sɛtmẽ. Baraare, ned kõn zĩnd dũni n na n yãb sẽn pa-b Soaala nugẽ ye, ned kõn zĩnd sẽn na n dɩk-ba n mum ye. B na n yɛdga tẽnga wa põosgo. Pʋd-y Sũ-sãang yɩɩlle la-n-kaas-y yã, yãmba, dũni soaalba. Lʋɩ-y n bilim-y tẽnga, yãmba, pe-kɩɩmba tɩ yãmb daar n ta tɩ b tat yãmb n dabd rũmsa kʋʋb zĩigẽ. B na n lub-y lame wala wubra pe-ra-nobdse. Taoor dãmba ka na n põs ye. Pe-kɩɩmba taoor dãmba ka tõe n tar n leb poorẽ ye. M zoe n wʋmda b bʋʋre m wʋmda b tooga waasgo; Soaala-Wẽnd kʋɩɩsa wãbnega zĩisi. Soaala sũura bugum yõoga yamda sẽn da sakd gesgã fãa rɩga sɩɩ wa kũum. Yaa wa gɩgemd sẽn mi n yi a tʋgrẽ tɩ fãa lebg sɩɩ. Tẽnga fãa lebga zĩ-peelle. La zabra tẽn-kũuma n wa ne rẽnna, Soaala sũura sẽn puugã n wa ne rẽnna.» Soaala-Wẽnd goma ne a Zeremi. Yɩɩ Zɩɩda dĩma, a Zoziyas biig a Zoakim sẽn deeg naam paalem. Ad-b sẽn yeel-a: «Yaa maam, Naaba-Wẽnde, n kõt-f noore: kẽng n tɩ yals wẽnd dooga sɩmandẽ la wilg neb niyns fãa sẽn yit-b Zɩɩda tẽnsẽ n wat n na n waoog Soaalã, togs-b bũmb ning fãa, m sẽn yet tɩ f togs-ba n da kees bũmb a ye meng ye. M saagdame tɩ b na kelge tɩ ned kam fãa bas a wẽnem. M dat n sɩbga b tʋʋm wẽnsã. La b sã n kelge, m na bas n ka sɩbg-b ye. Woto wã fo na n yeel-b lame: Ad Soaala gomde: ‹Kelg-y m goama, tũ-y m sẽn wilgã; la reeg-y m bãngdba la m sõgen-kamba, sẽn togsd yãmba wa bũmb sẽn tog kelgre. M tʋm-b-la yãmb nengẽ wakat buud fãa la yãmb pa kelg-b ye. Ad-y y sã n pa kelg-ba, m na n wãa wẽnd do-kãnga wala m sẽn wã Silo rẽnna la m na n kɩtame tɩ Zerizalɛɛm yɩ tẽng ning f sẽn wat n dat tɩ f bɛ tẽng fãa wẽneg a soab ne sãoongo.› » Maan-kʋʋdba, bãngdba, la sẽn da be-b be wã wʋma a Zeremi t'a taasd Wẽnd gomda wẽnd dooga sɩmandẽ. La a Zeremi sẽn wa n tosg Soaala koees niyns b sẽn da kõ yẽ noor t'a togsã, neba fãa yõk-a lame n yeel-a: «Fo na n kiime! Yaa bõe yĩnga tɩ fo yet tɩ Soaala n kõ-f noore tɩ f togs tɩ wẽnd do-kãnga na n wãa wala Silo, tɩ tẽn-kãnga me na n wã, la ned kõn leb n zĩnd a pʋgẽ?» Sẽn da be-b wẽnd doogẽ wã wa n gũbga a Zeremi, n zabd-a. Zɩɩda kug-zĩidba sẽn wʋm dẽnna, b yii dĩma zakẽ n wa wẽnd dooga No-paallẽ n sɩng bʋʋdo. Woto la maan-kʋʋdba ne bãngdba yeel kug-zĩidba la neba fãa: «Dao kãnga toga ne kũum, t'a goma gom-wẽnse tẽn-kãnga poorẽ, wala yãmb meng sẽn wʋme!» La a Zeremi leoka kug-zĩidba la neba fãa. A yeelame: «Yaa Soaala meng n tʋm maam tɩ m wa pĩnd n togs yell ninga sẽn na n pak do-kãnga la tẽn-kãnga; yaa bãmb meng noore. Sẽn ya woto wã marsã, bɩ y maneg n dɩk soy-sõma, maan-y tʋʋm sõma, kelg-y Soaala sẽn togse. Woto b kõn bas yel-beedã b sẽn togsã t'a lʋɩ y zug ye. Sã ya maam, mam be yãmb nugẽ; bɩ y maan wala yãmb sẽn tẽed tɩ m toga ne. La bɩ y pĩnd n bãng neere tɩ yãmb sã n kʋ maan, yaa ned sẽn ka tar a toorẽ yelle la y kʋ yã la y na rɩ m zɩɩma taale, yãmb ne y tẽnga, tɩ bala, yaa Soaala meng n tʋm maam tɩ m wa togs-y koees niyns fãa mam sẽn togs yãmba, tɩ yãmb meng tʋbr wʋma.» B sẽn wʋm woto, nanamsa la neba fãa gilli yeela maan-kʋʋdba la bãngdba: «Nin-kãnga ka tog ne kũum ye, t'a sẽn gom ne tõndã, yaa Soaala, tõnd Wẽnnaama yʋʋr yĩnga la a gom yã!» La tẽnga nin-kẽems kẽere yikame n yeel sẽn tigim-b be wã: «Zɩɩda dĩma a Ezekiyas wakato, bãngd a ye n zĩnd Moresɛt n boond t'a Mise. A Mise waa n yeela Zɩɩda nebã: ‹Dũni fãa Wẽnda tɩ m wilg-y woto: Siõ na n lebga pʋʋgo tɩ b kooda, Zerizalɛɛm na n lebga raboogo, la wẽnd dooga tãnga na n wuka ne tuudu.› D sok n gese, yãmb yãeeme tɩ Zɩɩda dĩm a Ezekiyas, la Zɩɩda neba kʋ-la a Mise bi? Ayoo! B sulga b meng Soaala taoore la b kos-b lame tɩ b maan sugri. La sɩda Soaala ka bas tɩ b sẽn gom yel-beed ninga lʋɩ b zug ye. Tõnd sã n kʋ a Zeremi rũnna, d kõn dogl yell kãseng d zugu?» A Zeremi wakatẽ me bãngd a ye n zĩndi n da taasd Soaala koeese. Yaa a Uriya, a Semaya biiga, Kiriyat-Yeyarim tẽng neda. Yẽ soab me da goma wa a Zeremi, n pĩnd n togs yell ninga sẽn na n pak Zerizalɛɛm la Zɩɩda tẽnga. Dĩm a Zoakim ne a zaka gũudba la a kug-zĩidba sẽn wʋm a Uriya goama, b yikame tɩ b na n kʋ-a. A Uriya sẽn wʋm woto, dabeem yõk-a lame, t'a zoe n kẽng Ezipt tẽnga. La naab a Zoakim tʋma Ezipt tẽnga, a Akbor biiga a Elnatã, n paas neb a taaba. B sẽn ta be, b yãee a Uriya n tall-a n wa kɩs dĩm a Zoakim. Dĩma kõo noore tɩ b kʋ-a ne sʋʋga n dɩk a n tɩ lob tẽnga rãmb yaadẽ. Sã n yaa a Zeremi, Wẽnd maag a Ayikam, a Safã biiga, tɩ yẽ põse; a Ayikam maasem yĩnga, neba ka paam n kʋ-a ye. A Zoziyas biig a Sedesiyas waa m lebga Zɩɩda dĩma la ka yãend n kaoos tɩ Soaala-Wẽnd taas gomd kãnga a Zeremi: «Bẽes gãndo la pees raado sẽn tar n palgd nag-koods yubla. Yãk a ye n palg f bãgdo n maneg n loe! Dẽ poore; fo na n toola a taabã Edom dĩma, Moab dĩma, Amonitsa dĩma, Tir dĩma, la Sidõ dĩma. Woto wã fo na n dɩk-b lame n kɩs sẽn wa-b b dĩm bãmb zĩigẽ, Zerizalɛɛm ka, a Sedesiyas nengẽ, tɩ bãmb na taas-ba b zu-soaben-dãmba. Fo na n yeel-b lame tɩ b tosg b zu-soaben-dãmba, mam sẽn togsã, maam, dũni fãa Soaala, a Israyɛl Wẽnnaam. M wilga m pãnga, n wilg tɩ m mii tʋʋmde la m naana tẽnga, n naan ninsaalba la rũmsa sẽn vɩ wã. Mam sẽn naana m dɩkd-b lame n kõt m sẽn dat a soaba. Bɩ y bãng tɩ m yeelame tɩ m na n dɩka y tẽnsa fãa n sagl m ned nugẽ, Babilon dĩm, a Nabikodonozor, nugẽ. La ba we-rũmsa menga, mam ning-b-la yẽ nugẽ t'a soog-ba. Tẽnsa fãa na n lebga a soolem, a kamb soolem, a yagens soolem n tãag wakat ninga yẽ meng tẽnga sẽn na n lebg tẽns a taaba soolem, dĩm dãmb pãng sẽn yɩɩd yẽnd rẽnna soolem. Tẽng ninga fãa, bɩ rĩung ninga fãa sẽn ka na n kẽ a Nabikodonozor, Babilon dĩma, la a tẽeg a yubla tɩ Babilon dĩma palg nag-koodsa raoogã, m na n kɩtame tɩ b pa zabrẽ, tɩ kom lʋɩ b tẽngẽ, tɩ bã-longdem yõk-ba. M na kɩt tɩ Babilon dĩma sõng-ma tɩ m menes tẽn-kãnga. La yãmba, da kelg-y yãmb bãngdba ye, bɩ bagba sẽn lobd kuga, bɩ neb sẽn wilgd zãmsd võore, n wilgd sawat sẽn yɛdg võore, sẽn tar yel-bãn-tɩto. Bãmb fãa togsd-y lame tɩ ka Babilon dĩma n na n soog yãmb ye. Bãng-y tɩ yaa zirẽ, la y sã n kelg-ba b na n tall-y lame n zãag ne y tẽnga. M na rig-y n yiisi la y kõn põs sʋʋg ye. La tẽng ninga sẽn na n saka n tẽeg a yubla tɩ Babilon dĩma palg a yubla, nag-koodsa daoogã, la a sak n lebg a soolma neda, mam na n kɩtame t'a pa a tẽngẽ la a ko a pʋʋgo. Soaala n yeele.» Koɛɛg sẽn wẽnd koe-kãnga la a Zeremi le taas Zɩɩda rĩm a Sedesiyas n gom ne-a woto: «Foo ne f nebã, yãmb tog n sak n kẽ-la a Nabikodonozor soolmẽ. Bas t'a soog-fo, foo ne f nebã tɩ woto la y na n põse. Bõe yĩnga tɩ yãmb na n bas y menga la y neba tɩ sʋʋg kʋ yãmba, tɩ kom la bã-longdem kʋ yãmba. Yaool n yaa woto la tẽng fãa na n baase, a sã n zãgs t'a kõn sulg a meng Babilon dĩma taoore, wala Soaala-Wẽnd sẽn wilg-ma. Bãngdba n bee n gomda tɩ kõn le yɩ pakr ne yãmba tɩ y pa Babilon dĩma soolmẽ ye. Ad-y b sẽn togsda ka sɩd ye, da kelg-y-b ye. Soaala paasame tɩ ka bãmb n tʋm-b ye, ba b sã n yet tɩ b gomda Soaala yʋʋr yĩnga, wakat kãnga b yagda zirẽ. Yãmb sã n kelg-ba, m na n dig-y lame n zãag ka la y kõn põse, yãmb ne y bãngdbã sẽn gomd ne yãmbã.» A Zeremi goma ne maan-kʋʋdba la neb niyns fãa sẽn da tigma la a yeel-b lame: «Ad Soaala koɛɛga: ‹Da kelg-y bãngdb kãensa ye. B yetame tɩ ka na n le kaoos tɩ b le tall wẽnd dooga teedã n wa ye. Yaa teed niyns b sẽn da wʋk n loog Babilon tẽngã. Dẽ fãa ya zirẽ la b togsd yãmba. Da kelg-y ye. Maan-y Babilon dĩma yam, tɩ y na põse. Bõe yĩng la tẽn-kãnga na n wa lebg raboogo?› » A Zeremi paasame: «Nin-bãmba sã n sɩd ya bãngdba, sã n sɩd ya Soaala yʋʋr yĩnga la b gomda bɩ b yõk dũni fãa Soaala sɛɛga, tɩ b ra wʋk n loog Babilon teed sõma niyns sẽn ket wẽnd doogẽ wã, Zɩɩda rĩma zakẽ, bɩ tẽnga pʋga. Soaala-Wẽnd ket n tara koɛɛga ra-lug-bɛd a yiiba poorẽ, zũud-sĩn-kãsenga poorẽ, sĩmsa sẽn zao bilim-bilma la teed a taaba sẽn pa Zerizalɛɛm poorẽ. Ad-y Babilon dĩma ra pa wʋk te-bãmba, a sẽn wa n looge ne a Yekoniya, a Zoakim biiga la Zɩɩda rĩma, yẽ ne Zerizalɛɛm la Zɩɩda rakãagba ye. Soaala-Wẽnde, dũni fãa Soaala la a Israyɛl Wẽnnaama gomda woto te-sõma wã poorẽ, teed niyns sẽn pa wẽnd dooga pʋga bɩ Zɩɩda dĩma zakẽ, bɩ Zerizalɛɛm: ‹Te bãmb fãa na n wʋk n looga Babilon la b na n paa be n tãag wakat ning m meng m toore sẽn na n le tall-ba n wa ka. Mam koɛɛg la woto.› » Yʋʋmd n zĩndi, yɩ-la a Sedesiyas, Zɩɩda dĩma, naam deegr yʋʋmd a naas soaba, yʋʋmda kiuug a nu soaba. Dẽ wakato la a Ananiya sẽn ya bãngda la sẽn ya Gabaõ rao, a Azur biiga, ra be wẽnd dooga pʋga n gomda. A goma a Zeremi taoore, maan-kʋʋdba taoore, la sẽn da tigim-b be wã fãa taoore la a yeel-a-la woto: «Soaala-Wẽnde, dũni fãa Soaala la Israyɛl Wẽnnaama tɩ m wilg-fu: M na n deega Babilon dĩma naam wa b sẽn kaoogd raoog ning sẽn palgd na-koaadg yubla. Keta yʋʋm a yiib muka tɩ m kɩt tɩ b le wa ne zĩ-kãnga, wẽnd dooga teedo la teed a taabã Babilon dĩm, a Nabikodonozor, sẽn wʋk n loog a tẽngẽ wã. N paas me, m na n kɩtame t'a Yekoniya, a Zoakim biiga, Zɩɩda dĩma lɛɛg n wa, yẽnda ne a neba sẽn da be Babilon. Wẽnd n gome. N-ye! M na n deega Babilon naama, m na n paag-a-la y zugẽ wa b sẽn paagd raoog nag-koaadg yublẽ.» Bãngd a Zeremi leoka bãngd a Ananiya, ne maan-kʋʋdba la neba sẽn da be wẽnd dooga pʋga: «Amina! Wẽnd na kɩt tɩ yɩ boto! D data ne d sũur fãa tɩ Soaala-Wẽnd goama pidsi. Wẽnd na kɩt tɩ goam niyns fo sẽn togsã, taase! Tɩ b kɩt tɩ wẽnd dooga teed fãa, ne yemsa sẽn be Babilon, le lɛɛg n wa zĩ-kãnga! La koɛɛg n be tɩ m na n togs fo: Kelg neere goam niynsi mam sẽn na n togs foo ne neba fãa sẽn be ka wã. Bãngdba sẽn deng tõnd taoore, maam ne foom taoore, al daar zãra, b wɩng n goma zabre, la yel-beedo, la bã-longdem yelle, sẽn na n zĩnd tẽns wʋsg pʋgẽ, la rĩund wʋsg pʋgẽ. Bãngd ninga sẽn gomda laafi yelle marsã, ad-y yaa a sẽn togsã sã n sɩd taase, la b bãngda tɩ sɩd-sɩda, a ya bãngd akɩka, Soaala-Wẽnd sẽn tʋme.» Dẽ marsã la bãngd a Ananiya yãk daoogã sẽn da palg bãngd a Zeremi yublã la a kaoog-a lame. La a Ananiya yaool n yeela neba: «Ad Soaala koɛɛga: ‹Ka ne yʋʋm a yi muka, maam, Naaba-Wẽnd, na n kao gɩrse Babilon dĩma a Nabikodonozor naama wa nag-koodsa raoog sẽn kao y nifẽ wã. A da rɩka a naama n zɩsg ãndũni rãmba wa raoog sẽn palg nag-koaadg yubla.› » Dẽ poore, bãngd a Zeremi loogame. Bãngd a Ananiya sẽn wa n kaoog raoogã sẽn da palg bãngd a Zeremi bãgdã, Soaala-Wẽnd kõ a Zeremi no-kãnga: «Kẽng n tɩ yeel a Ananiya, tɩ Soaala-Wẽnd koɛɛg la woto: ‹Fo sẽn kaoog raoogã a Zeremi sẽn da palg a bãgdã, ad yaa kut dẽnda la f na n ledge.› » A Zeremi paasame: «Kelg-y dũni fãa Wẽnde, a Israyɛl Wẽnnaam, sẽn togsde: ‹Dĩm niyns fãa sẽn gũbg Zɩɩda tẽn-peelma, wilg-b tɩ yaa kut zɩsgo la m na n palg b bãgdo; b na n lebga Babilon dĩm, a Nabikodonozor, soolem. Ba we-rũmsa meng na yɩ-la a soolem.› » La bãngd a Zeremi le yeela bãngd a Ananiya: «Ananiya, kelg neere: Gese, ad Soaala-Wẽnd ka tʋm foom ye, la fo yaool n kɩtame tɩ neba tẽ f zirẽ-be-goama. Dẽ n so tɩ Soaala wilgd-fo tɩ b na n menes-f-la tẽn-kãngã. Fo na n kiime, yʋʋm paalga ka na n vẽk-f ye, tɩ fo tusa neb tɩ b tõdg Soaalã.» Yʋʋmda kiuug a yopoe soaba pʋgẽ bala bãngda a Ananiya sɩd kiime. Bãngd a Zeremi zĩnda Zerizalɛɛm n tool sebre a Nabikodonozor sẽn da peeg b rãmb n kẽng Babilon tẽnga. A gʋlsa dĩma sagendbã, maan-kʋʋdbã, bãngdbã la pa-weta fãa. Sebra gʋlsa dĩm a Yekoniya sẽn waa n yi Zerizalɛɛm, yẽnda ne a ma, ne kug-zĩidba, ne sagendba, ne Zerizalɛɛm la Zɩɩda taoor dãmba, ne tʋʋm mitba la sẽn manegdb kʋɩlensa pagdsã. Segame tɩ Zɩɩda dĩm a Sedesiyas da tʋma a Elasa, a Safã biiga, a Gemariya, a Ilkiya biiga, tɩ b kẽng Babilon, a Nabikodonozor nengẽ. Bãmb la a Zeremi kɩs sebrã la ad bũmb ning sẽn da be a pʋgẽ: «Woto yaa dũni fãa Wẽnd, a Israyɛl Wẽnnaama, koɛɛga ne neb niyns fãa sẽn yi Zerizalɛɛm n digd Babilon: Mee-y roto n kẽ be; tu-y bãado, n sel tɩɩse tɩ b wome, tɩ y rɩ b biisi; bao-y pagba n maan kãadem, n dog kamba, kom-dibli la kom-pugli; y kom-dibli wã paam pagba, y kom-pugli wã paam sɩdba, tɩ bãmb me rog b kamba. Modg-y tɩ y sõor paase, da sak-y t'a woog ye! Modg-y tɩ b sẽn kẽes-y tẽng ninga lebg tẽng sẽn gãe ne laogo, pʋʋs-y tẽn-kãng yĩnga tɩ tẽnga manegre yaa yãmb manegre. Dũni fãa Wẽnd, a Israyɛl Wẽnnaama, wilgd-y lame tɩ y maan gũusgu. Da bas-y tɩ bãngdb niyns sẽn be-b ne yãmba tudg-y ye. Da bas-y tɩ sẽn gomd-b tɩ b nee beoog yɛla tudg-y ye. Da kelg-y wa bũmb sẽn be yõodo, neb niyns sẽn wilgd yãmb y zãmsd võor ye. Bala b yetame tɩ b sẽn gomdã yaa maam, Naaba-Wẽnd n tʋm-ba la yaa zirẽ. Bãng-y tɩ mam ka tʋm-b ye. Yaa Soaala n gomde. Soaala le yetame tɩ yʋʋm pisopoe sã n ta, b na waa n ges yãmba, la b na n pidsa b sũ-noog kãabgo, bãmb sẽn da kãab yãmba: b na n le tall-y lame n wa y tẽngẽ. Mam, Naaba-Wẽnde, mam mii m sẽn dat bũmb ning y yĩnga. Yaa laafi la m data, ka sũ-sãang ye, m sẽn dat yaa y yell yɩ neer beoogo. Yãmb sã n wa bool-ma, n wa pʋʋs-ma, m na kelg-y. Y sã n wẽnemd y neng n tees-ma, y na le yãend-ma sã n sɩd yaa ne y sũur fãa la y baood maam. M na sak n wa zĩnd yãmb sʋka. Yaa Soaala n gomde. Y sã n bao maam ne y sũur fãa, m na lik m menga. M na tedg y vɩɩma; y sẽn sẽeg n be zĩis niyns fãa bu-zẽmba tẽnsẽ, m na le tɩ tall-y n wa. M na n tigim-y lame n le wa kẽes ka, tɩ ka la m da rig-y n yiisi. Soaala togsd-y-la woto fãa tɩ y sẽn be y pa-weera tẽngẽ, Babilon tẽnga, y yetame tɩ Soaala kõ-y-la bãngdb be. Ad Soaala sẽn leokd bũmb ning dĩma poorẽ, sẽn da rɩt-a a Daviid naama poorẽ, la neb niyns fãa sẽn kell-b Zerizalɛɛm poorẽ, y saam-biis niyns sẽn ka tũ-b yãmb n loogã, Sɩd yaa dũni fãa Soaala n gomde: Bũmb a tãab n na n zab ne bãmba: zabre, kom la bã-longdem. B sẽn na n lebg bũmb ninga na kɩt tɩ b tags tɩ b lebga wa kankam sẽn põoge, tɩ ned ka le rat ye. Mam na n pʋg-b-la ne sʋʋga, ne kom la ne bã-longdem. Woto neb niyns fãa sẽn na n yãend-ba, na yɛɛse, dũni wã tõre na yɛɛse. M sẽn na n sẽeg-ba n kẽes tẽng ning fãa, b na tees bãmba wala f sẽn dat n kãab f bɛ t'a lebg a soaba, bɩ wala f sã n dat n gom yel-beed yelle, bɩ bũmb sẽn kẽesd rabeem wʋsgo yelle, bɩ bũmb sẽn ya yãnd wʋsgo yelle. Dẽ fãa yaa b sẽn ka kelg mam goama yĩnga, maam, Naaba-Wẽnd, sẽn togs-bã. M yaool n tʋma m bãngdba bãmb nengẽ wakat buud fãa, la ade, b pa kelg-b ye. La sã n ya yãmba, pa-weto, m sẽn yiis b rãmb Zerizalɛɛm n tɩ kẽes Babilon, yãmb yee n kelg maam! Dũni fãa Soaala, a Israyɛl Wẽnnaam gomda woto, a Kolaya biiga, a Aab, poorẽ, ne a Maaseya biig, a Sidekiya, poorẽ, bãmb sẽn ka bãngdba n yaool n gomd mam yʋʋr yĩnga wa yaa maam n tʋm-ba: m na n bas-b-la Babilon dĩma, a Nabikodonozor, nugẽ, la yẽ na n kood-b-la yãmb taoore. Zɩɩda rãmb sẽn lebg Babilon pa-weto na pʋta bãmb yʋʋre, dũnna tɛka, b sã n wa rat n kãab ned beedo. B na n yeela woto: Bɩ Soaala maan ne foo wa b sẽn maan ne a Sidekiya la Aab, Babilon dĩma sẽn kɩt tɩ b kɩɩm bugmẽ! La yell a woto sẽn na n pak neb a yiibã, ka bũmb a to n zʋʋg b sẽn ya ra-taase, bũmb sẽn kis wa fãa-fãa Israyɛl tẽn-peelmẽ. B yoome n ket n yet tɩ yaa mam yʋʋr yĩng la b gomda la m yaool n pa kõ-b noor ye. M mi b sẽn maana fãa, m nif yãenda fãa.» — Soaala n gomda. Dũni fãa Soaala, a Israyɛl Wẽnde, tʋma a Zeremi ne b koɛɛg, Neelam dao a Semaya nengẽ. Bãng-y tɩ Neelam dao a Semaya da gʋlsa sebr a toore n tool maan-kʋʋd, a Sefaniya, a Maaseya biiga, la maan-kʋʋds a taaba la neb niyns sẽn pa-b Zerizalɛɛma fãa. A ra gʋlsa woto: «Soaala-Wẽnd sẽn kɩt tɩ fo lebg maan-kʋʋda, a Yeoyada zĩigẽ la f gũd wẽnd doogã, foo n tog n gũus ne neb niyns fãa sẽn yet tɩ b yaa bãngdba la f yõg-ba n pid b yubl ne kutu la f loe-b ne yãndo. Maana a wãn marsã tɩ Anatot rao, a Zeremi, gomd yãmb fãa taoore n yet t'a yaa bãngda tɩ fo ka maan-a bũmbu? Yella fãa bee fo zugu, tɩ foo n bas-a la a tõog n tool tõnd sebr Babilon ka, n tol n yetẽ tɩ d na n kaoosa ka la d me roto ka n kẽ, la d maan zẽedo n dɩlg d memse ne d kooda biisi.» Maan-kʋʋd a Sefaniya karma a Semaya sebrã bãngd a Zeremi taoore, la Soaala-Wẽnd kõ-la a Zeremi noor kãnga: «Taas yemsã fãa koe-kãnga: ‹Woto la Soaala gomd a Semaya, Neelam raoa, poorẽ: A Semaya sẽn gom ne yãmb wa bãngda yĩnga, tɩ mam yaool n ka tʋm-a wã, la a kɩtame tɩ yãmb tẽ zirẽ goama, woto wã, maam, Naaba-Wẽnde, mam na n sɩbga a Semaya, Neelam neda, ne a poorẽ dãmba fãa. Yẽ ned ba ye menga kõn zĩnd yãmb sʋka n yãend sũ-noog ninga mam sẽn na n kõ m nebã. Tɩ bala a sagla m neba tɩ b tõdg Soaala. Soaala-Wẽnd n gomde!› » Soaala-Wẽnd togsa a Zeremi woto: «Yaa maam, a Israyɛl Wẽnnaam, n gomd ne foom marsã. Gʋls f meng yĩnga, sebr zugu, goam niyns fãa mam sẽn togs foomã. Wakat n wate tɩ m neba yelle, a Israyɛl la a Zɩɩda yelle, na n teeme. Mam na n leb n tall-b lame n wa tẽng ninga mam sẽn da kõ b ba rãmba la b na n le soog-a lame. Dẽ yaa Soaala gomde.» Ad koɛɛg ning Soaala-Wẽnd sẽn wilg a Zeremi t'a taas a Israyɛl la a Zɩɩda me. Soaala-Wẽnd gomda woto: «Pɛlen-yɩk kɛlenga n sãte, yaa bʋʋr sẽn paasd n dabda. Sok-y n gese rao sã n zoe n dogame. Bõe marsã tɩ m ne rapa fãa sẽn teeg-b sɛɛga wa pag sẽn kũmd dogem, tɩ b sobd n kiidẽ, tɩ b neng yeege? Kato! Yaa da kãsenga! Daar sẽn ka wẽnd a taaba! Yaa yɩɩr wakato, a Zakoob yĩnga, la a n na põsame.» Daara sã n wa ta, dũni fãa Wẽnd n gomde, m na n kao raoog ning sẽn palg b yubla la m na kãs b wĩya. B kõn leb n yɩ sãamb yems ye. Yaa maam b Wẽnnaam yam la b na n maane. M na n lebsa a Daviid a naama zaoorẽ la b na n sak-a-la wa b rĩma. Sã n ya foo, Israyɛl, m neda, da zoe rabeem ye, Yaa Soaala n gomde, foom a Zakoob, da maan dabeem ye tɩ bala m watame n na n fãag-fo, m wat n na n yiis-f-la tẽn-zãorgẽ, m wat n na n yiisa f kamba, b yembd tẽngẽ. Israyɛl, f na n le paama laafi, ned kõn le wa sãam f gãag ye. M bee ne foo n na n fãag-fo Soaalã n yeele. M datame tɩ d yɛla yaa n baase, maam ne bu-zẽmbã, mam sẽn sẽeg foo b rãmb tẽngẽ. Sã n ya foo, m ka bas-f saal ye; M waa n kong n sɩbg-f lame wala sẽn segde, m da ka tõe n bas f saal woto ye. N-yẽe! Soaala-Wẽnd gomda woto: Fo sãmpogrã kẽe pãafo, fo nodrã ka bõn-maagdg ye. Ned ka be sẽn sõngd foo ye; nodr fãa mii n paamda tɩpgo; sã n ya foom, tɩɩm ka ye. Fo roell fãa, yĩma f yelle; b ka leb n baood fo zĩig ye. Mam sɩbga foom wala m da yaa f bɛyã m sɩd yɩɩ toaag ne foo. Bõe yĩnga la f kũmd f sãmpogr yĩnga, n kũmd f tooga sẽn ka woogda yĩnga? Ad-m sã n maan-f woto, yaa f beegra sẽn yɩ kãsenga yĩnga, yaa f kongra sõor sẽn labsa yĩnga. La bãng tɩ sẽn da namsd-b fooma, na n paama namsgo fo bɛɛba nengẽ. Sẽn kis-b fooma na n looga yembdo; sẽn yeesd-b fo futã, b na n yeesa bãmb me futu; sẽn zɛɛd-b fooma, b na n zɛɛ bãmb me. Bɛɛba fãa na n looga yembdo. B boonda foom tɩ nin-faoogo, b boonda foo, Siõ tɩ ned ba a ye toog sẽn ka be ne a soaba; kelge, m na n sãooga f sãmpogrã. Soaala-Wẽnd n gome! Ad Soaala-Wẽnd koɛɛg a to: «Israyɛl buudu, m na n teema y vɩɩm, m na n zoe-la y nimbãanega; tẽnsa na n le maneg n meeme la na n yɩɩ rabooda zugu. Ro-neeba na n le me b pĩnd zĩisẽ. Neb na n zĩnda yɩng n wʋm yɩɩla, n wʋm sũ-noog yɩɩla; la yãmba, Zakoob kamba, ad-y y sõora ka na n boog ye. M na n paasa y neba sõore. B kõn saag n le ges yãmb kegr ye, m na n pids-y-la ne waoogr kũuni. La yãmba, Zakoob kamba, y na n le maana y tig-raasã m nifẽ la m na zẽk m nug ne sẽn wẽoogd-b yãmba. Yãmb nin-yende n na n lebg yãmb naaba; N-ye, yãmb nin-yend n na n yɩ-y naaba! M na n kõ-a-la sore t'a pẽneg maam, tɩ ned ba a ye ka na le saag n koos a yõor ye, n sak n kolg maam tɩ m ka bool-a ye, yaa Soaala-Wẽnd n togs rẽnna. Woto y na n leb n yɩɩ mam buudu, tɩ mam me lebg yãmb Wẽnnaam.» Ad-y sɩlmande n yiki. Yaa Soaala sũ-puuri. Sob-raoogo n buiid nin-wẽnsã. Soaala-Wẽnd sũura ka na n sigi tɩ b ka pids b sẽn da yalsa ye. Dẽ na waa n lebg vẽeneg y yĩnga, daar a ye! Wakata sã n wa ta, Soaala n kãabd noogo, mam na n yɩ-la a Israyɛl buud fãa Wẽnde, la a Israyɛl na n yɩɩ mam buudu. Woto la Soaala gomda: Buud ninga sẽn põs-a sʋʋga a pa-weera tẽnsẽ, yẽ la m pʋgd ne nonglem, la woto me la a Israyɛl le wɩɩd ne a bi-bɩɩlmẽ pãnga. Ad Soaala sẽn zĩnd yɩɩg n leok-ma: M ket n nong-f-la ne m pĩnd nonglem, m ket n nong-f lane n ka teemnẽ ye. Israyɛl, m pʋg-nongre f na n le yik n yalsa f nao zutu, f na le tõog n dɩk f gãngão-gilga f me lagem sẽn saood-b ne sũ-noogã. Fo na n le sela bugsuntung Samari tãmsã zutu; bugsuntunda rãmb na yaa n dɩ b tʋʋmd yõodo. Sɩda, daar n wate, tɩ gũudba na n tãs Efrayim tãnga zugu: «D dʋ Siõ tãnga zugu, d dʋ n paam Soaala, tõnd Wẽnnaam.» Tãs-y sũ-noog yɩɩlle a Israyɛl yĩnga. D wek bu-zẽmba tʋba ne d kaasgo, zodg-y y pẽgr yɩɩla, yeel-y: «Soaala, fãag-y y buudu, fãag-y Israyɛl bu-kellã.» Sɩda yaa woto la Soaala gomda: «M na tɩ yiis-b-la nug goabg n wa, m na n yiis-b-la tẽn zãoorgẽ n wa. B fãa gill bee ka, zoeens la wobse, tʋtr-pʋse la kom-peels ma rãmba. M buuda lɛɛg n wata zãnga. B lɛɛg n wata ne nintãm tɩ mam yãagd-b la m belgd-b. M tar-b lame n teesd koom zĩigẽ, b tũuda so naana, bɛoog ka be n na n lub-b ye. M yaa ba a Israyɛl yĩnga la a Efrayim la m bi-kẽenga.» Yãmba, bu-zẽmba, kelg-y Soaala koɛɛga. Taas-y b koɛɛga tẽn-zãorgẽ dãmba, al tẽnsa sẽn puk koom sʋka; yeel-y yã: «Soaala ra sẽega a Israyɛl la bãmb n lɛɛg n tigimd-a marsã la b get a yelle, wa rũm-kɩɩm sẽn get a rũmsi.» Soaala fãaga a Israyɛl nebã, b fãag-b-la bɛ sẽn tar pãng nugẽ. B na n lɛɛg n waame ne sũ-noogo, Siõ tãnga zugu. B neng na n pɩla ne sũ-noogo tɩ yaa kũun ka tɛk la b na n paame: B na n paama alkam, rã-paalga la ka-paalga; n paas piisi, bʋʋse, niisi. B na n kẽe tẽns sẽn wẽnd zẽedo, zẽed sẽn gãe ne koom. Beenẽ, fãagr saagr ka le ya toog ye. Wakat kãnga, kom-pugli na n sao ne sũ-noogo; na n yɩɩ boto me ne kom-bɩɩba la nin-kẽemse. Sɩda, Soaala n gomde, b sũ-beeda na n tedgame n lebg sũ-noogo. M na n maasa b sũuri n menes b sũ-sãangã, m na n pids-b-la ne sũ-noogo. M na n tɩgsa maan-kʋʋdba ne rũm-kaam, m na n kõ-la m buudã bũmb ning fãa sẽn ya sõmbo. Woto la Soaala le gomda: Kelg-y tɩ koɛɛg n yit Rama, yãb toog n yit be, yaa a Rasɛl n yãbd a kamba, la a tõt belgre, tɩ b ka ket ye. La Soaala yeta a Rasɛl woto: «Sigs f sũuri, yẽes f nintãm, f naong na n paama rolbo. Yaa maam n yete, maam, Naaba-Wẽnde. F kamba na yi-la bɛɛba tẽngẽ n le wa. Beo-sõng na n le vẽeg-f lame. Yaa Soaala n gomde. F kamba, na n lebg n waa b ba yiri.» M wʋma a Efrayim guglengu, a yetame: «Soaala, yãmb sɩbga tõnd al wʋsgo, y noma tõnd wa nag-bi-tõtre. Sõng-y tɩ d le lɛɛg n kẽ yãmba, n wa kẽ yãmb ne d sũur fãa, tɩ yaa yãmb bala la tõnd Wẽnde. N-ye! Tõnd da basa yãmba, la d tuubame marsã. D deega d kongre la d tooda d yãoogo; d vɩɩma yãnd tar-d lame, a yãnda tar-d-la wʋsgo, d tẽra wẽng ning d sẽn tʋme d sẽn waa n ya kom-bɩɩba.» A Efrayim ya m bi-nongre. Yaa Soaala n gomde, m yama kẽe-a lame. A sã n beeg n tog ne sɩbgre, m baas n kũmd-a lame m sẽn nong-a wʋsg yĩnga, m ka tõe n ka zoe a nimbãaneg ye. Ning makre f sora zugu ges f sẽn dɩk sor ningã. Israyɛl bi-pugla lɛɛg n wa, lɛɛg n wa f tẽnsẽ! F lebgra na n le tadgame n ta da-bʋre, bi-tõtre, ra-bʋg la f yãk yã? Mik Soaala le waa ne bõn-paal tẽng zugu: marsã yaa pagã n na n belma a sɩda. Dũni fãa Soaala, a Israyɛl Wẽnda, gomd la woto. M sã n le wa tedg Zɩɩda ne a tẽnsa nenga yaa woto la b na n le yeele: «Bɩ Soaala ning-f barka, Siõ tãn-sõngo, fãagr doogo!» Wakat kãnga sẽn be-b pʋtẽ, sẽn kẽed-b Zɩɩda tẽnsã na n sooga tẽnga gilli, koaadba, rũm-kɩɩmba ne b rũmsi. Pãng sẽn sɛɛ a soaba na n paamame tɩ mabge, sẽn yãbd-a kom, m na n dɩlg-a lame. La neba na n wa gomda woto: «M sẽn gũs n neke, m pa yãend bũmb sẽn paoog ye, m yãeeme tɩ m gõeem yɩ noogo.» Soaala gomde: daar n wate tɩ m na n pids Israyɛl la Zɩɩda tẽns ne neba la rũmsi wala b sẽn pids pʋt ne koodo. Sẽn ta marsã, m da yika ne bãmba n võod la m tusd n lubdẽ, n vigsdẽ, la m sãamnẽ, n maandẽ wẽnga. Dũnna tɛka m na n wẽneg n teesa yãmba, n modg ne maneg n me la maneg n sele. Soaala n gomde. Wakat kãnga, b pa na n le yeel abada: «Saam-dãmbã n wãb sib kãse tɩ kamb yẽn deeg n zãabe.» Ned sã n wãb sib kãse, yaa yẽ soab yẽna n na n zãabe; ned kam yel-wẽnd n kʋʋd-a. Soaala n gomde: «Daar n wate, tɩ m na n yõg zood paalga ne Israyɛl roogo, ne Zɩɩda roogo. A kõn yɩ wa zood ninga m sẽn yõg ne b yaab rãmba, m sẽn waa n gãd bãmb nug daare n yiis-b Ezipt tẽnga ye. Zoodã, bãmb b toore n sãam-a la mam yaa bãmb zu-soaba.» Soaala-Wẽnd n yeele. Soaalã n gomde: «Zood ninga m sẽn na n yõg ne Israyɛl roogo wakat kãnga la woto. M na n ninga m noorã neba sũurẽ, m na n gʋls-a-la b sũurẽ. Rẽ wẽnde m na n lebga b Wẽnde tɩ bãmb yɩ mam neba. Bãmb sʋka ned kõn le yeel a tũud-n-taaga, a saam-biiga t'a wa t'a wilg-a maam, Naaba-Wẽnd, sẽn yaa a soaba, tɩ b fãa na n bãng-m lame, nin-bila n wat nin-kãsenga. Wakat kãng tɩ m basa fãa taale, m ka le tẽr b beegra ye.» Ad-y ned ninga sẽn yagend-a wĩndga a zĩigẽ t'a kõt raara vẽenema, sẽn kõt-a kiuug la ãdsa noore tɩ b tʋʋs vẽenem yʋngo, sẽn dãmbd-a mogra t'a ningd bʋʋre, yaa dũni fãa Wẽnde, yaa maam. La woto la m yeta: «M sã n tõog, ba raar a ye bala, n yeel tɩ m sãama m noorã, tɩ noor ning kiuuga la ãdsa sẽn deegdã lebga no-kʋdgo, lebga no-faoogo, Soaalã n gomde, wakat kãng marsã la m me na n tõog n yeele t'a Israyɛl ka le ya m buud ye. Ned sã n tõe n yeele tɩ saaga ne tẽnga sẽn zãr taaba yaa bũmb sẽn tõe n mage, n yeel t'a mii tẽnga sẽn sudi n ta al zĩig ninga, mam me na yeel marsã tɩ m tõeeme tɩ maam ne a Israyɛl zooda sãame. M na yeel tɩ m tõe n zãaga ne a Israyɛl a beegra yĩnga.» Yɩɩ woto la Soaala gom yã. Daar n wate, Soaala gomde, la daara zoe n kolgame, tɩ b na n le me Zerizalɛɛm lalsã, mam waoogr yĩnga. Na n sɩnga a Ananeyɛl gaosgã n ta b sẽn boond tɩ Gõdr-noorã. B na n sõoga tẽnga toaag paalle; na n deng n teesa nin-taoore, Gareb tãn-bilã, n gõdg n tees Goa. Vɩʋʋg ning b sẽn na n dɩk n kõ maama la woto: bãg-faag ning b sẽn mumd kũuma la b lobd maanda tompɛglma, vɩʋʋg ning sẽn yegd Sedrõ kʋɩl-bɛɛgã n tat yaanga, wiida noora gõdrã. Bũmb kõn le tõog n võog be, bũmb kõn le tõog n lub be ye. Soaala taasa b gomd a Zeremi, Zɩɩda dĩm a Sedesiyas naamẽ, a yʋʋmd piig soaba, rat n yeelame tɩ Babilon dĩm, a Nabikodonozor, naam yʋʋmd piig la a nii soaba. Babilon naab da yẽda Zerizalɛɛm. Rẽ wakat tɩ b da paga a Zeremi Zɩɩda dĩma yiri, gũudba zakẽ. Zĩ-kãng la a Sedesiyas ra kɩt tɩ b pag a Zeremi. La rẽ yaa a sẽn zab ne-a n yeel-a tɩ yaa bõe yĩng la a taas Soaala gomd kãnga: «M na n dɩka Zerizalɛɛm n sagl Babilon dĩma nugẽ. Babilon dĩma na n kẽ-la a pʋgẽ. A Sedesiyas, Zɩɩda dĩma, kõn põs Kalde rãmba, tɩ m yalsame t'a na n paa Babilon dĩma nugẽ. A na n wa-la a Nabikodonozor taoore tɩ b neng tees taaba, t'a gomd t'a leokdẽ. Dẽ poore b na n talla a Sedesiyas n kẽng Babilon t'a tɩ pa be n ta wakat ning m sẽn na n wa ges-a. Maam, Naaba-Wẽnd n gomde la m paasdame tɩ ba yãmb sã n ket n maand zabre ne Babilon me, y kõn tõog-a bada.» Dẽ me wakat la a Zeremi ra togsda: «M wʋma Soaala sẽn gomd ne-ma la b maanẽ: ‹Ad a Anameyɛl, f roagda, a Salum biiga, na n wa yãend-f lame, a pʋʋgẽ, Anatot poorẽ; a na n goma ne foo tɩ f ra pʋʋgã, tɩ foo n pẽ yẽ ne rogem; fo n so raaga pipi.› » Wala Soaala sẽn da wilg-ma, m doagda a Anameyɛl waa n yãend-m-la gũudba zakẽ n yeel-ma: «Foo n tog n da m pʋʋg ning sẽn be Anatotã, a Bẽnzame tẽn-peelmẽ. Fo n tog n da-a, tɩ foo n pẽ maam ne rogem. Foo n tog n da-a pipi n soog-a.» Woto wã m bãngame tɩ yaa Soaala n da gom ne maam. Woto wã m da-la a Anameyɛl pʋʋga sẽn da be Anatot n yao ligdi. Yɩɩ wakɩ koeems piig la a yopoe. Sɛb a yiib zugu la m gʋls pʋʋga raabã. M paga sebr a ye kaset dãmb taoore n ning m meng kaseto, la m maga ligda zɩslem. La m dɩka sɛb a yiiba sẽn kõt pʋʋga raaba kasetã t'a ye page wala noora sẽn datã, t'a to wã ka pagã, la m kɩs-b-la a Barʋk, a Neriya biiga la a Maaseya yagenga. M doagd a Anameyɛl ne neb niyns sẽn da naag maam n kõ b kasetã, ra bee be, n paas Zɩɩda rãmb sẽn da be gũudba zakẽ. M yeela a Barʋk neba fãa taoore: «Woto la dũni fãa Wẽnde, a Israyɛl Wẽnnaama gomda: Rɩk sɛb kãensã, sẽn paga ne sẽn ka paga wã, n ning-b yagd rʋk pʋgẽ, sẽn na yɩ-la tɩ b tõog n bĩng be n kaoose.» Yaa woto la dũni fãa Soaala, a Israyɛl Wẽnd, gomda: «B na n le raa pʋto la roto la bugsuntundu, tẽn-kãnga pʋgẽ.» M sẽn kɩs a Neriya biiga a Barʋk sɛb a yiibã, m pʋʋsa Soaala woto: «Soaala-Wẽnde, yãmb wilga y pãnga la y tʋʋm-minim n naan saag la tẽnga. Ne yãmba, bũmb ka be n ya toog ye. Yãmb wilgda y nonglem ne ninsaalba, nonglem sẽn ka be sɛɛbo; ba rãmb sã n beege, yãmb kɩtdame tɩ b kamba dɩ b beegra taale. Yãmb la pãng la ziir soaba Wẽnde, yãmb la dũni fãa Wẽnde. Yãmb sẽn dat bũmb ninga zulma la y pãnga tõe n pids-b-la fãa. Yãmb geta ninsaalba sẽn maande n na n dol ned kam fãa wala a tʋʋma sẽn tog ne. Yãmb wilga y sẽn yaa a soaba ne yel-bãna y sẽn maan d yaab rãmba nifẽ, b sẽn waa n be Ezipt, la rũnna menga, ka Israyɛl buuda bala n ket n ne-b ye, yaa ninsaalba fãa buudu. Y wilga y pãnga, n wilg y tʋʋm-minim n maan yel-bãn sẽn yɩkd pɛlenga, n paam n yiis y buud, a Israyɛl, Ezipt tẽnga. Y ra kãaba d yaab rãmbã tɩ y na n kõ-b-la tẽng ning d sẽn kẽed dũnna wã, tẽng sẽn bund bĩisim la sɩɩdo, la y sɩd tõog n pidsa y kãabgo. B wa n deega tẽngã n sooge. B yaool n pa kelg y goama ye, b pa tũ y sẽn wilg ye, b pa reeg y noor ye. Yaa rẽ la yɛla rɩt-b rũnna. Ges-y Babilon tãb-biisã, b yẽrgda Zerizalɛɛm wãaba seglgo n digd a baasga zĩigẽ. B na n deega Zerizalɛɛm, a zoe n lʋɩ-la b nugẽ la bala, b rat n tõog-a-la ne b zab-teedo, ne kom la bã-longdem. Soaala sẽn da kãabã n pidsi, wala y nin sẽn ne. N-ye! Tẽnga lʋɩ Babilon dãmb nugẽ la bala. Bõe yĩng marsã la y yeel-ma, Soaala-Wẽnde, tɩ m da pʋʋgo la m yao vẽenega, kaset dãmb taoore?» La yaa woto, a Zeremi n gomde, la Soaala leok maam: «Ade maam la Wẽnde, bõn-vɩɩs fãa Wẽnde. Maam la Soaala. Bũmb ka be sẽn toe ne maam ye. Yaa rẽ yĩnga, Soaalã n gomde, m yeta woto: m na n dɩka tẽngã n sagl Babilon dĩm, a Nabikodonozor, nugẽ, a tãb-biisa nugẽ. Tẽnga na n lʋɩɩme. Babilon dãmba sẽn da sɩng tẽnga wãabã na n kẽ-la a pʋgẽ la yaa bugum la b na n ning-a. B na n yõoga rot niynsi b sẽn da paoog maam b rãmb pʋsẽ, n yõogd wisdu a Baal yĩnga la b wat ne kũuni la rãam, bu-zẽna wẽn-naandsa yĩnga.» «Sɩda, Soaala n ket n gomda, al b kibara sɩngrẽ, Israyɛl la Zɩɩda rãmb maana sẽn ka tat m yam bala. Israyɛl dãmb sẽn tõog bũmb ninga bala yaa m beegre. Zerizalɛɛm tẽngã n wa ne m sũ-puurã la m sũ-fõorã, a meeb raare n tãag rũnna, la dẽ wã m pa rat n le yãend-a m taoor ye. Yaa yel-wẽna a Israyɛl la a Zɩɩda sẽn maana n zabd-ma, a dĩm dãmba yel-wẽna, a nin-kẽemsã, a maan-kʋʋdbã, a bãngdbã la Zerizalɛɛm kẽedbã yel-wẽna. B teesa maam b kãare, ka b neng ye; m yaool n ka vʋʋs ne b saglgo, m ka vʋʋs ne wilg-b tɩ b gũusi, la ned ba a ye ka sak n kelg-m ye. Yɩɩd rẽnna, b waa n kẽesa b wẽn-naandsã m dooga pʋga, n dẽgem-a. B manega zĩiga, Ben-Inom bãoogẽ wã, b wẽn-naand a Baal yĩnga; b wẽnd a Molɛk yĩnga b maana b kom-dibli la b kom-pugli maando. M yaool n zɩ n kos-b bũmb a woto ye. Yell a woto buud da zɩ pɩʋʋg m yam ye. B sẽn maan yel-beed a woto fãa, b dogla yell kãseng a Zɩɩda zugu. Ne rẽ fãa, maam, Naaba-Wẽnde, a Israyɛl Wẽnnaama, m tara sẽn na n paas Zerizalɛɛm poorẽ. Tẽn-kãng poorẽ, fo naaga neb n gomd woto: ‹Zabr sʋʋga, kom la bã-longdem kẽes-a-la Babilon dĩma soolmẽ.› Ade, mam daaba yaa toore. M sũur sɩd waa n puugame, m da ka nonge, m sũur waa n fõtame ne tẽnga rãmba la m dig-b lame n sẽeg tẽns ka tɛk pʋsẽ. La m na le tigim-ba la m tall-ba tɩ b wa vɩɩnd ka ne laafi. Woto b na leb n yɩ m buudu, tɩ mam yɩ b Wẽnde. M na kõ-b sũ yɛnga tɩ b pa ne maam daar fãa, n paam sũ-noogo, bãmb ne b kamba. Mam wẽendame tɩ m na ges b yelle, m pids-b ne m kũuni. M na n yõga zood sẽn ka sɛɛb ne bãmba. M na tõog tɩ b waoog-ma n da le saag n zãag ne-m ye. M sũur na yɩ noogo m sẽn paamd n maand-b neere la m na vigl-b tẽn-kãnga, daar fãa yĩnga.» «M le yeta woto, Soaala-Wẽnd n gomde, maam n tall yel-beedã n wa kõ a Zɩɩda. La maam n na n pidsa ne sũ-noog ning m sẽn kãab-a. Fo naaga neb a taab n gomda tɩ tẽn-kãnga lʋɩɩ Babilon nugẽ, n lebg we-raoog sẽn kẽesd rabeem, tɩ ned ka tiid a pʋgẽ, tɩ rũng me ka a pʋgẽ ye. Yaool n yaa tẽn-kãnga pʋga la b na n le sɩng n daad pʋto. N-ye, a Bẽnzame tẽn-peelmẽ, Zerizalɛɛm vẽenemẽ, a Zɩɩda tẽnsẽ, sẽn zao-b tãmsa zutu, bãadẽ dãmba, sẽn be-b Negɛb, b na n le raa pʋto, b na n le koosa pʋto, b na n waa ne kaset rãmba, b na n ninga kaset pʋta koosga sɛb zutu. M na n teka tẽnga kẽedb nenga.» Soaala n gomde. A Zeremi da ket n zĩi ne bãeense gũudba zakẽ; Soaala le goma ne-a n yetẽ: «Woto la sẽn naana tẽnga, n kõ-a nenga la keglma, woto la sẽn boond a soab tɩ Soaala gomda: ‹Bool maam tɩ m na leok-fo; mam na n togs-f-la yell kãsens sẽn solge tɩ f ka mi baa fɩ. Ade, maam a Israyɛl Wẽnda tara koɛɛg n na n wilg-fu tẽng kãnga roto la Zɩɩda dĩm dãmba rot poorẽ. Fãa lebga raboogo. Yaa zaalem la b na n mak n gɩdg wãaba sẽn segendã, n gɩdg Babilon dãmbã. Dẽ na n wa pidsa tẽnga bal ne kũum. M sũura yika ne Zerizalɛɛm dãmba. B wẽnema sẽn ya wʋsg yĩnga mam me maana wa m toog ka le be ne-b ye. Ad-m sẽn le yik n wat n na n tɩp-ba wala b sẽn tɩpd ned sẽn paam sãmpogre. B na n sãoogame, b na n le paama laafi, m na n kɩtame tɩ tẽnga le zĩnd laafi la a tɩlg rabeem buud fãa. Mam na n teka a Zɩɩda la a Israyɛl vɩɩma, m na n le yals-b-la b pĩnd zĩigẽ. M basa b beegra taale, m kõ-b-la b sẽn welg ne maama sugri. Dẽ marsã la m sũur na n yɩ noogo m sã n pʋt Zerizalɛɛm yʋʋre, a na n lebga m zu-zẽkre la m faongo ãndũni rãmba fãa taoore. B sã n wa bãng m sẽn segend n na n kõ-b kũun niynsã, b na n diga rabeem, b na n yɛɛsa b sẽn na n gale ne sũ-noog la arzɛk ningã.› » Woto la Soaala gomda: Zɩɩda rãmba, yãmb saad n pordame tɩ b wʋka y tẽnga laog fãa n looge, ned ka kete, rũng ka kete. Yaa sɩda, Zɩɩda tẽnse la Zerizalɛɛm soya lebga vɩɩdo, nin-vɩɩg ka kete, ninsaal bɩ rũnga. Bãng-y tɩ tẽn-kãens pʋgẽ b na n le wʋma sũ-noog kaasgo, kibs rãmb bʋʋre. B na n le wʋma kãad-paals yɩɩla, b na le wʋm tɩ b yɩɩnd yɩɩll kãnga: Dũni fãa Wẽnd paam pẽgre! B pida ne bʋgsem la b nonglma ka be sɛɛb ye. B na n le wʋma yɩɩla, neb niyns sẽn wat wẽnd doogẽ ne b maanda yɩɩla. Yaa Soaala-Wẽnd n gomd tɩ b na n le tall-b lame n wa b pĩnd zĩigẽ. Woto la dũni fãa Wẽnd gomda: Tẽn-kãnga sẽn sãama pʋgẽ tɩ ned bɩ rũng ka le ketẽ, tẽns a taaba pʋgẽ, vɩʋʋg na n le yãenda rũn-kɩɩmba yĩnga, rũn-kɩɩm niyns sẽn gũud-b bʋʋsa la piisa yʋngã. Tãnga zugu, bãoogẽ, Negɛb, Bẽnzame tẽnsẽ, Zerizalɛɛm, la Zɩɩda tẽnsẽ, rũn-kɩɩmba na n le leglame la b sõd b bʋʋs la b piisi. Soaala n gomde. Soaala n gomde: «Ade daar n wate, la a zoe n pẽnegame tɩ sũ-noog kãabgo mam sẽn kãab Israyɛl roog ne Zɩɩda roogo na n taase. Wakat kãnga mam na n yiisa a Daviid yagenga. A na n dɩɩ naam ne zemsgo tẽn-kãnga pʋgẽ. Dasem kãense, Zɩɩda na n paama fãagre, Zerizalɛɛm na n zĩnda ne laafi. Ad yʋʋr ninga b sẽn na n bool tẽngã: Soaala-Wẽnd la d bʋ-kaooda.» Ad Soaala koɛɛg a to: A Daviid kõn kong yagenga sẽn na n dɩ naam Israyɛl zug abada. Boto me a Levi buudẽ wã maan-kʋʋd kõn konge abada sẽn na n yaas m taoore n kʋ, beoog-beoog fãa, yũ-noog maoongo, laafi maoongo la a yõog wisdu ye. La Soaala le goma ne a Zeremi: «Maam, Naaba-Wẽnde n sokde: Yãmb tõe n teema noor ning m sẽn kõ daare la yʋnga bɩ, y tõeeme tɩ bũmb viig bɩ? M pa tẽed ye! Bɩ y bãng tɩ zood ning m sẽn yõg ne m sõgna a Daviid kõn kao ye. Ned kõn tõog t'a Daviid yageng ka rɩ naam Zerizalɛɛm ye. Ned me kõn tõog t'a Levi yageng ka yals m taoore n tʋm maan-kʋʋr tʋʋmd ye. M na n kɩtame tɩ m sõgna a Daviid yagensa yɩ wʋsgo, n kɩt t'a Levi yagens yɩ wʋsgo. B sõora ka na n tõog n sõde, wa ãds sẽn be yĩngri, wa bĩisri sẽn sam mogr noore.» Soaala-Wẽnd goma woto yɛs ne a Zeremi: «F ka kelgd neba sẽn yete? B gomdame tɩ m basa a Israyɛl ne a Zɩɩda: buud a yiibã, m sẽn da tũusã. Ad-y sẽn gomd-b woto wã ka le get m neba wa buud sẽn zem bũmb ye. B sãbsd-a lame. Ad-m sẽn yete: M wilga wĩndg la yʋngo m daab sẽn yaa a soaba, m yalsa m noya yĩngr la tẽng yĩnga. Dɩlla ned tõe n deegame tɩ m basa m sõgna a Daviid yagense, n zãgs tɩ m kõn tũus bãmb sʋka ned ninga sẽn na n dɩ naam a Abraam, a Izaak la a Zakoob buuda zug bɩ? M sũura pida ne nonglem bãmb yĩnga la m na sɛɛsa b yembdo.» Babilon dĩm, a Nabikodonozor, da taka zabre ne Zerizalɛɛm la Zɩɩda tẽnsã. A ra waa ne a tãb-biisã la a sẽn da so tẽns niynsa fãa tãb-biisi. Wakat kãng me la Soaala taas a Zeremi koees kãensã: «Maam, a Israyɛl Wẽnnaam, maam n kot-f tɩ f kẽng n tɩ yãend a Sedesiyas, Zɩɩda dĩma la f yeel-a: Kelg Soaala koɛɛga: ‹M na n dɩka tẽn-kãnga n sagl Babilon dĩma nugẽ la a na n sãam-a-la ne bugum. La foom, Zeremi, fo kõn põs ye; b na n yõka foom n n kɩs dĩma. F na tõog n ges Babilon naaba ne f nini; f na n leok a sokre, f meng f toore, n yaool n dɩk Babilon sore. Yeel a Sedesiyas, Zɩɩda rĩma, t'a sã n maan wa m sẽn yeel-a, a na n põsa kũ-toogo. Yaa maam, Naaba-Wẽnde, n togsd-a woto. A kũuma ka na n yɩ kũ-toog ye, a na looga ne bãane. B na n mum-a-la wala a ba rãmba, wa dĩm dãmba sẽn deng-b yẽnda; b na wisa tɩdar a yĩnga la kʋʋr yɩɩll kãnga la b na n pʋd a yĩnga: Kato, dĩma konga pãnga! Yaa maam, Naaba-Wẽnd n togsd rẽnna.› » Woto la koees niyns bãngd a Zeremi sẽn taas Zɩɩda rĩm a Sedesiyas. Yɩɩ Zerizalɛɛm. Rẽ tɩ Babilon dĩma tãb-biis ra wẽeda Zerizalɛɛm la tãnsoben-tẽnsa sẽn be Zɩɩda n ket n nan pa lʋɩ, wala Lakis la Azeka. Soaala gomd le taa a Zeremi, rẽ tɩ dĩm a Sedesiyas kaoola ne Zerizalɛɛm na-biisa fãa, t'a na n basa yemsã. Ned kam fãa da tog n basa a yemse sẽn ya Ebre-buudu, raoa bɩ paga, ned ba a ye da ka tog n le tall Ebre buud wa yamb ye, t'a yaa a saam-biiga. Na-biisã ne neba fãa sakame n bas b yemse tɩ b soog b mense, b yaa raoa bɩ paga, b ka na n le kẽes-b yembd ye. La rẽ poore b teka yam n le yõg b yemsã, b sẽn da base, la b le kẽes-b-la yembdo, rapã ne pagbã. Rẽ la Soaala taas a Zeremi gomd kãnga: «Woto la Soaala, a Israyɛl Wẽnda, gomda: ‹Mam yõga zoodo ne y yaab rãmba, mam sẽn wa n yiis-b Ezipt, b yembd-tẽngẽ, m yeel-b lame: Yʋʋmd a yopoe soaba poore, fo na n basa f sẽn da yamb ning fãa t'a soog a menga. Yʋʋm a yoobe, a na n yɩɩ f yãmba, rẽ poore fo na n lebs-a-la a yiri ne a burkĩndlem. Y ba rãmba ka kelg mam gomda ye. Sã n ya yãmba, yãmb da wɩsga y meng y toore n bas y yemsã tɩ m da pẽgd yã. Y ra tol n wẽena, mam taoore, m waoogra roogẽ ka, tɩ na n yɩɩ boto. La y teka yam, n paoog maam, n le reeg y yemse la yãmb n yaool n da bas-ba, pagb la rapa, tɩ b kẽng b sẽn datẽ.› » Woto wã, ad Soaala-Wẽnd koɛɛga: «Ned kam fãa tog n basẽ-la a yamba t'a soog a menga. F yamba yaa f saam-biiga, a yaa f to. Yãmb pa reeg m noor ye. Yaa rẽ yĩnga la maam, y Wẽndã, na n bas sʋʋga, bã-longdem la kom tɩ bãmb me soog b menga n tʋm b soog-m-meng tʋʋma ne yãmba. Bãng-y tɩ ãndũni rãmba fãa sẽn na n yãend-b yãmba, b na yɛɛs la b pĩ b noore. M na n sɩbga neb niyns fãa sẽn ka pids-b kãabgã m sẽn yet tɩ b kãabã. B yaool n da kaoolame tɩ b yemsa na n sooga b mense. B kaoola rẽ mam taoore, maoonga wakato, b sẽn waa n pasg nag-bila boaag a yi n dɩgl tɩ b tũ sʋk n loogã. M sẽn na n dɩk b rãmba n kɩs b bɛɛba la woto: Zɩɩda na-biisi n paas Zerizalɛɛm dãmba, maan-kʋʋdba la tẽnga neb niyns sẽn tũ-b nag-bila boaag a yiiba sʋkã n loogã. Mam na n bas-b lame tɩ b lʋɩ b bɛɛba nusẽ, sẽn dat n yãk b yõora nusẽ. B rɩgre na n yɩɩ yĩngri luiili la tẽng rũms rɩɩbo. Zɩɩda dĩma, a Sedesiyas menga, m na n dɩka yẽnda ne a kug-zĩidba, n bas b bɛɛba sẽn dat b kũuma nusẽ. M na n bas-b-la Babilon dĩma nugẽ. Babilon tãb-biisa yaool n n zoe n yikame menga n tar n lebd poorẽ, n zãagd ne Zerizalɛɛm b sẽn da gũbgã. Ad-y m na bool-b tɩ b lɛɛg n wa tẽn-kãnga, n zabe, n lub-a, n yõog-a bugum. La mam na n tedga Zɩɩda tẽnsã tɩ b lebg we-raoog sẽn kẽesd rabeem. Maam, Naaba-Wẽnd, n gome.» Soaala goma ne a Zeremi. Yɩ-la a Zoziyas biiga, a Zoakim sẽn waa n dɩt naam Zɩɩda tẽn-peelmẽ. Ad-b sẽn yeele: «Kẽng n tɩ yãend a Rekab yagense n peeg-ba n kẽ wẽnd dooga zãong a ye pʋga la kõ-b rãam be tɩ b yũ.» Rẽ la a Zeremi tɩ peeg a Yazaniya sẽn ya a Irmeya biiga la a Abasiniya yagenga. A le peega a Yazaniya saam-biisi n paas a kom-dibli la Rekabitsa gilli. A kẽes-b-la wẽnd dooga ro-bil a ye pʋga, a Anan karen-biisa roogẽ. Nin-sõng a Anan yaa a Igdaliya biiga. Rooga ra pẽe ne gũudba rẽnna, a ra zao a Maaseya rẽnna zugu la a Maaseya yaa a Salum biiga, maan-kʋʋd ninga sẽn da gũud wẽnd dooga noorã. A Zeremi rɩgla Rekabitsa taoore yʋy sẽn pid ne rãam n paas koteese n yaool n yeel-ba: «Yũ-y rãam bilfu.» Tɩ b leoke: Tõnd ka yũud rãam ye, tɩ tõnd yaaba a Zonadab, a Rekab biiga, kõo tõnd noor kãnga: «Y kõn yũ rãam abada, yãmb bɩ y biiga. Woto me y ka tog n me roogo, bɩ n ko, bɩ n sel bugsuntungu bɩ n tall pʋ-wɛɛg ye; la na n yɩɩ sẽgd-rot pʋsẽ la y na n vɩɩnde y vɩɩma zãnga, n paam n kaoos tẽng zugu, zĩig ninga y sẽn ya sãamba.» Tõnd deega d yaaba a Rekab biiga, a Zonadab, noor neere, n ka yũud dãam abada, tõnd ne d pagba, d kom-dibli la d kom-pugli, n ka met roogo, n ka tar bugsuntund bɩ pʋʋg sẽn na n ko ye, n vɩ sẽgd rotẽ. Tõnd reega fasi la d tũu noor ninga d yaaba a Zonadab sẽn kõ tõndo. Yaa a Nabikodonozor, Babilon dĩma, sẽn wa n tak zabr ka, la d yeel d mense: Aya! D kẽ Zerizalɛɛm n põs Kalde la Aram tãb-biisi! Rũnda wã, d vɩɩ Zerizalɛɛm pʋgẽ. Rẽ la Soaala gom ne a Zeremi woto: «Gom ne Zɩɩda, ne Zerizalɛɛm kẽedba la yeel-ba: Ad dũni fãa Soaala, a Israyɛl Wẽnda koɛɛga: yãmb da tog n sakẽ-la m saglgo la y kelgẽ m goama. Yaa Soaala n gomde. A Rekab biig, a Zonadab, da kõ-la a kamba noore tɩ b ra yũ rãam ye. A kamba tũ-la a noore wa bũmb sẽn toge la al n ta rũnna b ka yũ ye, n deeg b yaab noore. La sã n ya maam, yãmb Soaala, m pa vʋʋs ne y saglgo la y pa kelg m koɛɛg ye. M tʋm-y-la naoor ka tɛka bãngdba, m sõgen-kamba tɩ b yeel yã: bas-y y so-yoodã, vɩɩnd-y wala sẽn segde, zãag-y y mens ne wẽn-naandsa pʋgbo la b waoogre, tɩ sã n ya woto y na tõog n vɩɩnd tẽn-kãnga pʋgẽ, tẽng ning m sẽn kõ y yaab rãmba ne b yagense. La yãmb pa maan gũusg ye, yãmb pa kelg ye. Sã n yaa a Rekab biiga, a Zonadab, yagensã, bãmb reega b yaab noore, la yãmba, Zɩɩda rãmba y ka kelg mam goam ye.» A Zeremi paasame: «Ad-y yaa rẽ yĩnga la dũni fãa Soaala la a Israyɛl Wẽnde, gomd woto: Mam na n taka yel-beed ninga m sẽn kãabã n sik Zɩɩda la Zerizalɛɛm neba fãa gill zugu: m goma ne bãmba la b pa kelg maan ye, m bool-b lame la b tõdga sakre.» A Zeremi yaoola me marsã n yeel a Rekab yagensã: «Woto la dũni fãa Wẽnde, a Israyɛl Wẽnnaama gomda: Yãmb sẽn sak y yaab a Zonadab noore, n tũ a sẽn wilga fãa neere, woto wã a Zonadab kõn kong yageng a buudẽ sẽn na n tʋm maam, Naaba-Wẽnd, tʋʋmd ye. Dũni fãa Soaal la Israyɛl Wẽndã n gome.» A Zoakim yaa Zɩɩda rĩm, a Zoziyas biiga. A naama yʋʋmd a naas soaba, Soaala goma ne a Zeremi woto: «Dɩk sebre, la f gʋls sebrã zugu goam niyns fãa mam sẽn togs foo, a Israyɛl, a Zɩɩda, la bu-zẽmba tẽnsa fãa poorẽ, sẽn sɩng wakat ning mam sẽn gom ne foom, a Zoziyas zamaanẽ, n tãag rũnna. Daar ninga Zɩɩda rãmb na wʋm sɩbgr ninga mam sẽn dat n sɩbg bãmbã, n bas so-wẽng ninga bãmb sẽn dɩkã. Tɩ sã n ya boto, mam na tõog n kõ b yel-wẽna sugri, la m bas b tʋʋm wẽnsã taale.» A Zeremi boola a Barʋk, a Neriya, biiga, n kɩt t'a gʋls sebr zugu goam niyns fãa Soaala sẽn da togs yẽ wã. A Zeremi n da gomda t'a Barʋk gʋlsdẽ. A Zeremi kõ-la a Barʋk no-kãnga: «B ka le sakd tɩ mam kẽ Soaala roogẽ ye. Dɩlla m pa tõe n ta be m toor ye. Sã n ya foo, ad-f na n kẽnga be, no-loeera raare la f na tɩ zẽk f koɛɛga n karem Soaala koees niyns m sẽn kɩt tɩ f gʋlsã. Fo na n karma sebrã Zɩɩda rãmb fãa taoore. Daar ninga, b na sɩng n kos Soaala tɩ b bas-ba. Daare bãmb me na yaa n bas b vɩɩm yoogã. Soaala pa solg-ba tɩ b sũura puuga wʋsg ne b buuda ye.» A Barʋk, a Neriya biiga, tũu neer-neere, bãngd a Zeremi sẽn da kõ yẽ noor ningã: la a karma Soaala goama fãa sẽn gʋls sebra zugã, Soaala roogẽ. A zẽka a koɛɛg tɩ neb tõog n wʋme. Yɛl kãensa maana Zɩɩda dĩm a Zoakim, a Zoziyas biiga, wakatẽ, a naam yʋʋmd a nu soaba, kiuug a wɛ soaba. B ra boola Zerizalɛɛm dãmb fãa, la Zɩɩda tẽns neba fãa tɩ b na n maan no-loeer Soaala taoore. Wẽnd dooga pʋga, sẽn da tigim-ba fãa taoore, a Barʋk zẽka a koɛɛg n karem a Zeremi sẽn da kɩt tɩ b gʋls sebra zugã. A ra be-la a Gemariya zãongẽ. Yẽ yaa a Safã biiga, sẽn yɩ dĩma sɛba gɛta. Zãonga ra bee wẽnd dooga sɩmandẽ, No-paala sɛɛga. A Mika, a Gemariya biiga, a Safã yagenga, sẽn kelg Soaala-Wẽnd goama sẽn gʋls sebra pʋgã, a Mika siga dĩma zakẽ, n tɩ kẽ sɛb-gʋlsda roogẽ. Beene la kug-zĩidba fãa ra tigim n yẽsd b yẽsgo. Bãmb la woto: Sɛba gɛta kãsma, a Elisama, a Delaya, a Semaya biiga, a Elnatã, a Akbor biiga, a Gemariya, a Safã biiga, a Sidekiya, a Ananiya biiga, n paas kug-zĩidba a taaba. A Mika wilg-b-la goam niyns fãa yẽ sẽn wʋm a Barʋk sẽn togs nebã, sẽn gʋls sebra zugã. Dẽ poore kug-zĩidba seda ne taaba, n tʋm a Barʋk nengẽ, a Yewudi, a Netaniya biiga, a Selemiya yagenga, la a Kusi yagen-tʋbra-kẽega. A tɩ yeel-a lame t'a wa ne sebr ninga a sẽn karem neba taoorã. A Barʋk sẽn wa, b yeel-a lame: «Zĩnd n karem tõnd sebrã.» B sẽn kelg sebra karengo n sɛ, dabeem kẽ-b-la wʋsg-wʋsgo tɩ b wẽneg n get taaba, la b yeela a Barʋk: «D na n togsa dĩma tõnd sẽn wʋma fãa.» B yeela a Barʋk: «Wilg fo sẽn yɩ to-to n gʋls goam kãensa fãa.» T'a Barʋk leok-ba: «Yaa a Zeremi n da gomda tɩ mam gʋlsd sebra zugu ne rʋba.» La kug-zĩidba yeel a Barʋk: «Yik n zoe n tɩ solge, foom ne a Zeremi fãa; tɩ ned da bãng yãmb sẽn beẽ ye.» B bĩnga sebrã sɛb-gʋlsda, a Elisama, doogẽ, n yik n kẽng dĩma nengẽ, na-zakẽ. B sẽn ta, b togsa dĩma bãmb sẽn wʋma fãa. Tɩ dĩma tʋma a Yewudi t'a tɩ rɩk sebrã n wa; a Yewudi kẽngame n tɩ wa ne sebrã la a zẽka a koɛɛg n karem-a dĩma la kug-zĩidba sẽn da zĩ n yeg-a wã taoore. Da yaa yʋʋmda kiuug a wɛ soaba tɩ dĩma ra be roog ning a sẽn kẽed waood wakato, n da tugl bugum a pʋgẽ n zĩi n wootẽ. A Yewudi sã n paam n karem sebra rũnus a wãna, dĩma wãagda a sẽn karma, ne sʋ-bila, n dɩk n lob bugmẽ. A maana woto tɩ sebra wa sɛ zãnga. La dĩma ne a kug-zĩidba sẽn wʋm gom-kãensã, b ka yɛɛs ye la b ka kẽes b fut ye, ba a ye. A Elnatã, a Delaya la a Gemariya da yaool n yõka dĩma sɛɛga t'a da yõog sebra bugum ye, la dĩma ka kelg b goama ye. N yɩɩd rẽ, a kõo gũudba naab a Yerameyɛl noore, n paas a Seraya, a Azriyɛl biiga, la a Selemiya, a Abdeyɛl biiga, tɩ b yõk sɛb-gʋlsda, a Barʋk, la bãngda a Zeremi. La Soaala-Wẽnd solg-b lame. Dĩma sẽn waa n yõog sebr ninga a Barʋk sẽn da gʋls a Zeremi koeesã, Soaala goma ne a Zeremi n yeel-a: «Bao sebr a to, n leb n gʋls a zugu goam niyns fãa sẽn da gʋls pipi sebra pʋgã, sebr ninga dĩm a Zoakim sẽn yõogã. Dẽ poore fo na yeel woto a Zoakim, Zɩɩda dĩma poorẽ: ‹Soaala-Wẽnd kõ-la a Zeremi koɛɛg la yẽ gʋlsame n wilg tɩ Babilon dĩma na n sɩd wa wãa tẽngã n kʋ rũmsa la ninsaalbã la Zoakim zaba ne-a n deeg sebrã n yõog bugum. Yaa rẽ yĩnga la Soaala-Wẽnd gomd woto Zɩɩda dĩm a Zoakim poore: A Zoakim kõn paam ned a to yɛs sẽn na n zaond a Daviid naama goeel zug ye, la a sã n ki b na n dɩka a yĩnga n bas wĩntoog tʋʋlmẽ la yʋng waoodẽ. Mam na n yika ne yẽ menga, ne a buudu, a tãnsoaben-dãmba la m na sɩbg-ba, b tʋʋm yooda yĩnga. M na n kɩtame tɩ lʋɩ bãmb zugu, Zerizalɛɛm dãmba zugu, Zɩɩda soolma fãa zugu, yel-beed ning sẽn da gʋls sebra pʋgã. M yeel-b lame tɩ b maan gũusgu la b pa ges rẽ wa bũmb sẽn sek kelgr ye.› » A Zeremi bao sebr a to n kɩs sɛb-gʋlsda a Barʋk, a Neriya biiga. A Barʋk gʋlsa seb-kãng zugu a Zeremi sẽn da yet t'a gʋlse. A gʋlsa goam niyns fãa sẽn da gʋls pipi sebra zugã, sebr ning Zɩɩda dĩma a Zoakim sẽn deeg n yõogã. Goama wʋsg ra wẽnda pipi rãmbã. A Zoziyas biiga, a Sedesiyas n lebg dĩma, a Zoakim biig a Koniya zĩigẽ. Yaa a Nabikodonozor, Babilon dĩma, n da kõ-a Zɩɩda tẽnga naam. La yẽ menga, la a tãnsoaben-dãmba, n paas Zɩɩda rãmba, ka kelg Soaala goama bãngda a Zeremi sẽn da togsd bãmba ye. Dĩm a Sedesiyas tʋma a Yukal, a Selemiya biiga, la maan-kʋʋd a Sefaniya, a Maaseya biiga, bãngd a Zeremi nengẽ. A tʋm-b lame tɩ b tɩ yeel-a: «D kotame tɩ f pʋʋs Soaala, tõnd Wẽnnaam, d yĩnga.» A Zeremi da bee neba sʋka n kẽnd la a watẽ. Dẽ tɩ b da nan ka kẽes-a bi-bees roogẽ ye. Wẽnd kãng la Ezipt dĩma tãb-biis yii Ezipt. Kalde rãmba da gũbga Zerizalɛɛm la b sẽn wʋm kibarã, b yikame n bas tẽngã. B zãaga bilfu. La Soaala goma ne a Zeremi n yeel-a t'a leok a Sedesiyas sẽn tʋm-b rãmba woto: Ad Soaala, a Israyɛl Wẽnnaama koɛɛga: «Tɩ yeel-y Zɩɩda dĩma sẽn tʋm yãmb tɩ y wa sok maama; tɩ leok yã tɩ Ezipt naaba tãb-biisa sẽn da wat y sõngrã lɛɛg n lebda b tẽngẽ. Kalde rãmba na n le waame n zab ne tẽn-kãnga, n tõog-a, n ning-a bugum. Maam, Naaba-Wẽnde, n yet-y woto: Da belg-y y menga, n tẽed tɩ Kalde rãmba loog n basa tẽnga zãng-zãng ye, tɩ bala b ka na n loog ye. Ad-y y sã n wa tẽed tɩ y tõog n diga Kalde rãmba sẽn zabd ne yãmbã, n tẽed tɩ sẽn kell-bã yaa neb sẽn gãe b sẽgdẽ ne sãmpoaga, bãng-y tɩ bãmb n na n yik n wa sãam tẽn-kãnga n yõog-a bugum. Ba yãmb sã n da tõog n digẽ-la Kalde rãmba tãb-biisi, sẽn zabd ne yãmbã, ba sã n da keesẽ-la sẽn paam-b sãmpoag n be b rotẽ, b na mao n yik n yõog tẽnga bugum.» Wakat ninga Kalde rãmba tãb-biisi sẽn wa n zãag bilf ne Zerizalɛɛm, Ezipt dĩma tãb-biisa rabeem yĩnga, a Zeremi tʋlgame n yi Zerizalɛɛm n kẽng a Bẽnzame tẽngẽ n tɩ naag tẽnga rãmba tɩ b welg sagsa pʋɩɩb no-koɛɛma. A sẽn waa n tũud a Bẽnzame dignoor n na n yi la ned a yembre, gũudba naaba, sẽn gãd-a. Yɩ-la a Iriya, a Selemiya biiga la a Ananiya yagenga. A Iriya sẽn gãd a Zeremi, a yeel-a lame: «Fo zoet n na n tɩ koosa tõnd ne Babilon dãmba!» T'a Zeremi leoke: «Yaa zirẽ, mam ka kẽed Kalde rãmb ye!» A Iriya pa yaas n kelg a Zeremi ye; a yõk-a lame n tɩ kɩs a kãsem-dãmba. B sẽn yãee a Zeremi, b sũur puuga ne-a wʋsgo, tɩ b pãb-a la b tɩ kẽes-a bi-bees roogẽ, sɛb-gʋlsda a Zonatã yiri sẽn da lebg bi-bees roogo. Yɩɩ ro-munumdẽ la b ning a Zeremi. A Zeremi waa n kaoosa be, tɩ dĩm a Sedesiyas wa tʋm ned tɩ b bool-a t'a wa, t'a soos n sok-a, a na-zakẽ. A sẽn taa, dĩma sok-a-la woto: «Fo tara Soaala-Wẽnd koɛɛg m yĩng bɩ?» T'a Zeremi leoke tɩ koɛɛg kõn kong ye: «Fo na n lʋɩɩ Babilon naab nugẽ!» Dẽ poore, a Zeremi yeela a Sedesiyas: «Bõe beegre la mam beeg yãmba, yãmb bɩ y na-yir dãmba, bɩ tẽnga rãmba, tɩ yãmb sui maam doogo? Yãmb bãngdba, sẽn da yet-b yãmb tɩ Babilon dĩma kõn wa n zab ne yãmb la ne tẽn-kãnga wã bee yɛ?» A Zeremi yõka sɛɛg woto: «M naaba, m kotame tɩ y sak n kelge m kosgo: Da lebs-y maam sɛb-gʋlsda a Zonatã nengẽ, tɩ m na n kiime.» Dẽ la dĩm a Sedesiyas kõ noore tɩ b ning a Zeremi gũudba zakẽ la b kõt-a bur gilga; bura ra koosda Bur-wẽedba sora zugu. Bura sẽn da tõe n paam tẽnga pʋgẽ daar fãa, a Zeremi me ra paamda a rẽnna. Tũu boto t'a Zeremi kell n pa gũudba zakẽ. Ad-y a Sefatiya, a Matã biiga, a Gedaliya, a Pasewur biiga, a Yukal, a Selemiya biiga, la a Pasewur, a Malkiya biiga, ad-y b wʋma goama a Zeremi sẽn da togsd neb niyns fãa sẽn da pɩʋʋgd-b gũudba zakẽ: «Ad-y Soaala-Wẽnd gomda woto: ‹Ned ninga fãa sẽn na n paa tẽn-kãnga pʋgẽ, sʋʋg n na n kʋ-a, ka rẽ bɩ kom, bɩ bã-longdem; la ned ninga sẽn na n yi-a tẽn-kãnga n tɩ kẽ Kalde rãmba, yẽ soab na n vɩɩndame, vɩɩm n na n yɩɩ yẽ pʋɩɩre.› » A Zeremi ra yetame yɛsa: «Soaala-Wẽnd wilgdame tɩ b na n sak n dɩka tẽn-kãnga n bas Babilon tãb-biisa nugẽ tɩ b soog-a.» B sẽn wʋm woto a Zeremi noorẽ, tãnsoaben-dãmba yeela a Sedesiyas: «Tõnd datame tɩ b kʋ a Zeremi, t'a sẽn gomd woto wã a woogda tãb-biisa raoodo, sẽn pa-b tẽnga pʋgẽ wã raoodo. A ka baood n na n yols neb pɛt ye, b nimbãanega la a baood n na n paase.» Dẽ la dĩm a Sedesiyas leok woto: «Maan-y y sẽn dat ne-a, m yaa dĩm, yaa sɩda, la m ka tõe n gɩdg-y ye.» Tãnsoaben-dãmb a naasa kɩtame tɩ b yõk a Zeremi n tɩ bas-a a Malkiya ko-baoora pʋga; a Malkiya yaa gũudba naab a ye. Ko-baoora ra bee gũudba zakẽ. B bao wĩiri n loe a Zeremi n sik-a be. Koom da ka leb n be ko-baoorẽ wã ye, a da pida ne begd bala; a Zeremi da suta begdã. A Ebed-Melɛk, Kus neda, ra paamame tɩ dĩma lakd a sũuri n wilgd-a. Yẽ n wʋme tɩ b ninga a Zeremi ko-baoorẽ. Woto a sẽn yãend dĩma a Bẽnzame dignoorẽ, a yi na-zakẽ wã n wa yeel dĩma: «M naaba, nin-bãmba sẽn maan bãngda a Zeremi bũmb ningã ka neer ye, b ning-a-la ko-baoorẽ, a na n kii kom beene, tɩ bala bur ka leb n yãet tẽnga pʋgẽ ye» La dĩma kõo Kus rao a Ebed-Melɛk noore: «Bao neb pis-tã tɩ b tũ foom n tɩ yiis bãngda a Zeremi ko-baoorẽ wã t'a nan ka ki ye.» A Ebed-Melɛk sɩd baoo neba wala dĩma sẽn kõ noorã; a kẽnga na-yiri n kẽ teeda bĩngr roogẽ n wʋk kʋds rãmba, n dɩk wĩ n loe kʋds rãmba, n sik ko-baoorẽ wã a Zeremi yĩnga. Kus rao a Ebed-Melɛk yeela a Zeremi: «Dɩk kʋds rãmba n yaag f bãgdo n ning n yaool n dɩk wĩya n bʋʋge.» A Zeremi sɩd maana boto. B naaga taaba n tak a Zeremi n yiis ko-baoorẽ wã. Dẽ poore, a Zeremi paa gũudba zakẽ. Dĩm a Sedesiyas tʋmame tɩ b tɩ bool bãngd a Zeremi t'a wa sake. Dĩma da bee Soaala rooga dignoor a tãab soaba. Dĩma yeela a Zeremi: «M na n soka bũmb a yembre, la togs m sɩda, da solg-m bũmb ye!» T'a Zeremi leok a Sedesiyas: «Mam sã n togs m sẽn tog n togs-y bũmb ningã, y na kɩt tɩ b kʋ maam. M sã n sagl yãmba, yãmb ka na kelg maam ye.» Tɩ dĩma na n soos n kãab a Zeremi woto: «M wẽend ne Wẽnd ninga sẽn vɩ la sẽn kõt vɩɩma, m wẽend tɩ m ka na n kɩt tɩ b kʋ-f ye, la m ka na n ning foo neb niyns sẽn dat-b n kʋ fooma nugẽ ye.» Dẽ la a Zeremi yeel a Sedesiyas: Ad dũni fãa Soaala, a Israyɛl Wẽnnaama koɛɛga: «Fo sã n yi n tɩ kẽ Babilon dĩma, fo na n põsa kũum, foo ne f zaka, la b ka na n yõog tẽn kãnga bugum ye. La fo sã n zãgse, tẽn-kãnga na n lʋɩɩ Kalde dãmb nugẽ tɩ b yõog-a bugum; la fo menga ka na n põs ye.» Dẽ la dĩm a Sedesiyas yeela a Zeremi: «Mam zoeta Zɩɩda rãmb sẽn kẽ-b Kalde rãmba dabeem. M zoeta b na n wa yõk maam n kɩs-ba tɩ b yaal maam.» T'a Zeremi leoke: «B ka na n kɩs-f ye, kelg Soaala-Wẽnd koɛɛga mam sẽn wilg foomã, boto bũmb kõn maan-f ye, la fo na n vɩɩndame. La fo sã n tõdg tɩ f kõn kẽnge, ad Soaala-Wẽnd sẽn wilg maam bũmb ninga: Pagb niyns fãa sẽn na n pa-b na-zakẽ wã, b na n tall-b lame n tɩ kɩs Babilon dĩma tãnsoaben-dãmba. Fo pagba mens n na n pʋd yɩɩl kãnga n la-foo: Ges belgr ninga f zo-rãmba sẽn belg foo. Yella sẽn pak fooma b ka bas-f tɩ f lʋɩ sɩda? N-yẽe! Yaa sɩda, f pagba fãa ne f kamba, b na n tall-b lame n tɩ kɩs Kalde rãmba. La fo ka na n põs-b ye, b na n suii foom bi-bees roogẽ. Sã n ya tẽn-kãnga, b na n yõog-a-la bugum!» Woto wã a Sedesiyas yeela a Zeremi: «Mam pa rata tɩ ned wʋm goam kãensã ye; ka boto fo na ki. Tãnsoaben-dãmba kãsem-dãmba na n bãngame tɩ tõnd sõsa ne taaba. Ad-b na n wa sok-f lame n bãng d sẽn gom bũmb ningã. B na n tol n kãab-f lame tɩ bũmb kõn maan-fo, fo sã n ka solg-b bũmb ye. Fo na n leok-b lame bala: M kosa dĩma tɩ b ra lebs-ma a Zonatã zakẽ ye, tɩ m sã n leb be m na n kiime.» Tãnsoaben-dãmba kãsem-dãmba sɩd waa a Zeremi nengẽ n sok-a. La a Zeremi leoka wala dĩma sẽn da yeel yẽ t'a leok bũmb ningã. B sẽn wʋm woto, b bas-a-la ne laafi, la b ka bãng dĩma ne a Zeremi sõasgã sẽn yɩ a soab ye. A Zeremi kell n paa gũudba zakẽ n ta wakat ninga b sẽn wa n tõog Zerizalɛɛm. Ad yɛl niyns sẽn maane, Zerizalɛɛm lʋɩɩsa wakato. Yɩ-la a Sedesiyas, Zɩɩda dĩma, naam yʋʋmd a wɛ soaba, kiuuga piig soaba la a Nabikodonozor, Babilon dĩma wa ne tãpo n gũbg Zerizalɛɛm. Yɩ-la a Sedesiyas naam yʋʋmd piig la ye soaba, kiuug a naas soaba, kiuuga daar a wɛ soaba la Babilon dãmba poog lal-gũbra zĩig a yembre. A Nabikodonozor tãnsoaben-dãmba kẽe tẽngã la b wẽ-la b sika n pẽneg Sʋk dignoorã. Yɩ-la a Nergal-Sarezɛr, b na-kãsengã, n paas a Samgar-Nebo, a Sar-Sekim, dĩma yam sẽn da kẽ a soab n yɩɩdã la tãnsoaben-dãmba fãa. Zɩɩda dĩm, a Sedesiyas, ne a tãb-biisa fãa sẽn yãend-ba, b zoeeme n tũ dĩma zẽedã n yi tẽngã ne yʋngo; noor n da be lals a yiib sẽn ya bɛd sʋka la be la b tũ n yi n dɩk Zʋrdẽ bãg-faaga. Kalde rãmba tãb-biis pʋg-b lame, la b tɩ paama a Sedesiyas Zeriko sẽnẽ. B sẽn paam-a n yõke, b tall-a lame n kẽng Ribla, Amat tẽnga, Babilon dĩm a Nabikodonozor nengẽ. A Nabikodonozor kẽes-a-la bʋʋdo, n paalg-a. Yaa be la a kɩt tɩ b kood a Sedesiyas kamba, a nifẽ. Babilon dĩma kɩtame yɛsa tɩ b kood a Zɩɩda nin-bɛda fãa. Dẽ poore, a leo a Sedesiyas nini, n kɩt tɩ b balg-a bãnga n tall-a n loog Babilon. Kalde rãmba ninga naaba zak bugum, la b yõoga neb a taab me roto; b wãa Zerizalɛɛm lal-gũbrã. Gũudba tãnsoabã, a Nebuzaradã, talla neb niynsi sẽn da ket tẽngã n kẽng Babilon, n paas neb niynsi sẽn zoe-b n wa kẽ yẽ, la tʋʋm mitbã, a tall-b-la fãa n loog Babilon. Sã n ya a Nebuzaradã, gũudba tãnsoaba, yẽ basa Zɩɩda neb niynsi sẽn da ya-b naong rãmba n ka tar bũmbu; dẽ pʋgẽ me, a pʋɩɩ-b-la bugsuntund pʋto, n paas pʋt a taaba. Sã n yaa a Zeremi, a Nabikodonozor, Babilon dĩma, kõo a Nebuzaradã, gũudba tãnsoab, noore. A yeel-a lame: «Peeg a Zeremi, ges a neere, da maan-a bũmb ye, a sẽn dat tɩ f maan bũmb ninga, bɩ f maane.» Yaa rẽ yĩnga la gũudba tãnsoaba, a Nebuzaradã, yẽs ne a Nebusazbã, dĩma sẽn da lakd a sũur zãng n wilgd a soabã, n yẽs ne a Nergal-Sarezɛr, tãnsoaben-dãmba kãsma, n paas Babilon dĩma tãnsoaben-dãmb a taaba, tɩ b tɩ yiis a Zeremi gũudba zakẽ n tɩ kɩs a Gedaliya, a Ayikam biiga la a Safã yagenga. A Gedaliya ra kõt-a-la sore t'a lebd a zakẽ. Dẽ la a Zeremi tõog n paad ne tẽnga rãmba. A Zeremi sẽn da waa n nan ket n be gũudba zakẽ, Soaala-Wẽnd da goma ne-a n yeel-a: «Kẽng n tɩ yeel a Ebed-Melɛk, Kus raoa tɩ dũni fãa Soaala, a Israyɛl Wẽnda, gomda woto: ‹Ade, mam sẽn da kãab tɩ m na maana tẽn-kãnga bũmb ninga na n taasame, ka na n yɩ b sũ-noog yĩng ye, na n yɩɩ b sũ-sãang yĩnga. M na n taasa kãab-beedã la ka na n le kaoos ye. Daarẽ kãnga, mam na n fãaga foom, m kõ sak tɩ f lʋɩ f sẽn yɛɛsd b rãmba nugẽ ye. Yaa Soaala n gomde. N-yẽe! Sɩd menga, mam na n kɩtame tɩ fo põse: b ka na n kʋ foom ne sʋʋg ye, vɩɩm n na n yi fo pʋɩɩre, tɩ bala fo pelga f pʋg ne maam. Soaala n yeele.› » Ad Soaala sẽn taas a Zeremi koɛɛg ninga gũudba naab a Nebuzaradã sẽn waa n bas-a t'a yi Rama. B ra sẽba a Zeremi ne bãeense n naag Zerizalɛɛm la Zɩɩda neb niyns sẽn da na n loog yembd Babilon. Gũudba naab tɩ bak-a-la toore. A sẽn bool-a n yi kɛɛnga, a yeel-a lame: «Yaa yel-beed a woto la Wẽnnaam, f Soaala, da kãab tẽn-kãngã, la b sɩd waa ne-a. Soaala maana waa b sẽn da wilgi, tɩ yãmb ka kelg b goama ye. Dẽ n so tɩ yell kãnga paam yãmba. Marsã gese, dũnna menga, mam na n looda bãeensã sẽn sog fo nusã. Fo sã n dat n yãag maam Babilon, bɩ f wa tɩ d kẽnge tɩ bũmb kõn maan-f ye. La sã n ka ta f yam bɩ f base. Gese, tẽnga fãa dɩga fo taoore; zĩig ninga fãa fo sẽn dat n kẽnge, sã n noom foom, bɩ f kẽnge.» La a Zeremi sẽn pa leokd tɩ bũmbã, a yeel-a lame: «Fo tõe n kẽnga a Ayikam biiga, la a Safã yagenga a Gedaliya nengẽ tɩ yẽ la Babilon dĩma kõ tõogo t'a ges Zɩɩda tẽnsã. Fo tõe n zĩnda tẽnga pʋgẽ ne yẽnda, wala f sẽn tõe kẽng fo sẽn datẽ fãa.» Tãnsoaba kõ-a-la sor zug rɩɩbo n paas kũuni, n bas-a t'a looge. A Zeremi kong n dɩka Mispa sore, n ta a Ayikam biiga, a Gedaliya nengẽ, la a paa be ne neb niynsi sẽn da ket-b tẽngã. Ad-y Zɩɩda neb n da ket tẽngã n baood zabre ne Babilon dãmbã. Bãmb dãmb n waa n wʋme tɩ Babilon dĩma kõ-la a Gedaliya, a Ayikam biiga, tẽngã naam t'a soog dapa, pagba, kamba, la neb niyns fãa sẽn da ka tall n loog yembdo Babilon. B kẽnga a Gedaliya nengẽ Mispa: yɩ-la a Ismayɛl, a Netaniya biiga, ne a Zoana la a Zonatã, a Karea kamba, ne a Seraya, a Tanewumɛt biiga, ne Netofa rao a Efayi kamba, la Maaka rao a Yazaniya. A Gedaliya, a Ayikam biiga, yeel-b lame, bãmb ne b poorẽ dãmba: «Da zoe-y rabeem ne Kalde rãmba sẽn dɩt naam y zuga ye. Ti-y roto, n zĩnd b pʋsẽ la y maan Babilon dĩma yam n tʋm a tʋʋma neere, pa-y y tẽngẽ tɩ m wẽendame tɩ bũmb kõn paoog-y ye. Sã n ya maam, mam zĩi Mispa wala yãmb no-rɛɛsa, Kalde rãmba sẽn wat-b ka wã yĩnga. La yãmba, kõg-y y tɩɩs biis rãam, rɩgs-y y tɩɩs biisi, bao-y kaam n pids y rʋgdo la pa-y tẽns niynsi yãmb sẽn beẽ wã, tɩ b tog n le yɩɩ yãmb soolem.» Zɩɩda rãmba fãa sẽn da be ne Moabitse, ne Amonitse, ne Edomitse bɩ ne tẽnsa taab rãmba, wʋmame tɩ Babilon dĩma da basa neb kẽer Zɩɩda n dɩk-ba n gũnug a Gedaliya, a Ayikam biiga, a Safã yagenga. Zɩɩda nin-bãmba fãa yii zĩis niynsi b sẽn da sẽeg bãmba n wa. B sẽn wa n ta Zɩɩda tẽnga, Mispa, a Gedaliya nengẽ, b paama kood wʋsgo, n paas tɩɩs biis me wʋsg-wʋsgo. A Zoana, a Karea biiga, n paas zab-zabdb kẽer sẽn da ket wetẽ, waa Mispa, a Gedaliya nengẽ, n yeel-a: «Fo bãngame t'a Baalis, Amonitsa naaba, kõ-la a Netaniya biiga a Ismayɛl noore t'a wa kʋ foom?» A Gedaliya pa reeg tɩ yaa sɩd ye. A Zoana, a Karea biiga, yaool n da soos n tɩ yeela a Gedaliya Mispa: «Fo ratame tɩ m kẽnge n tɩ kʋ a Ismayɛl, a Netaniya biiga bɩ? Ad ned ka na n bãng ye. Bõe yĩnga la a rat n kʋ foom? Fo sã n ki, bãng tɩ Zɩɩda dãmb fãa sẽn be ne fooma na n sẽegame. Bilfa sẽn kell Zɩɩda rĩunga pʋg na n menemame.» A Gedaliya, a Ayikam biiga, n leok a Zoana, a Karea biiga: «Da maan woto ye, tɩ bala fo sẽn yet a Ismayɛl poorẽ wã yaa zirẽ!» Bãng-y tɩ kiuug a yopoe soaba, a Netaniya biiga la a Elisama yagenga a Ismayɛl sẽn da ya na-koambga, la sẽn da zĩnd dĩma zakẽ, waa ne neb piiga a Ayikam biiga a Gedaliya nengẽ, Mispa. La b sẽn da waa n zĩẽ n dɩtẽ, a Netaniya biiga, a Ismayɛl, yika ne a neb piigã n kõs a Ayikam biig a Gedaliya ne sʋʋga. Dɩlla yɩɩ woto la b kʋ ned ninga Babilon naab sẽn da rɩk n lʋɩɩs tẽnga taoore. Paas me, Zɩɩda rãmba fãa sẽn da be-b ne a Gedaliya Mispa, la Kalde tãb-biisã, a Ismayɛl kʋ-b-la fãa. B kʋ a Gedaliya tɩ maan dasem a yi tɩ ned ba a ye nan ka wʋm a kũuma kibar ye. Ade neb n yi Sikɛm, Silo la Samari, bãmb pis-nii; b da kõosa b toeemse, b fut fãa da kẽesame; b da boga b yĩnga, b da tara kũuni n paas tɩdare n na n tɩ kõ Soaala, Zerizalɛɛm wẽnd doogẽ. A Netaniya biiga, a Ismayɛl yɩ Mispa n seg-ba, la a da kẽndame la a kũmnẽ. A sẽn seg-ba, a yeel-b lame: «Wa-y yã a Ayikam biiga, a Gedaliya, nengẽ.» B sẽn kẽ tẽnga pʋgẽ n sɛ, a Netaniya biiga, a Ismayɛl ne a neba kʋ-b lame, la b dɩk-b lame n lob ko-baoorẽ. Bãmb sʋka, neb piig n zĩnd be n paam n yeel a Ismayɛl: «Da kʋ-d ye; ade, tõnd tara dɩɩbo tõnd sẽn solg pʋtẽ: alkam, alkam pugsgu n paas kaam la sɩɩdo.» A sẽn wʋm woto, a Ismayɛl bas-b lame n ka kʋ-b ye. Ko-baoor ninga a Ismayɛl sẽn da kɩt tɩ b lob a sẽn da kood b rãmba, da ya ko-bao-kãseng ning dĩm a Asa sẽn da kɩt tɩ b manege, a sẽn waa n takd zabre ne a Basa, a Israyɛl dĩma. Yaa ko-baoor kãng pʋga la a Ismayɛl, a Netaniya biiga, ning neba yẽ sẽn da kʋ wã. Dẽ zugẽ, a Ismayɛl kɩtame tɩ b yõg neb niyns sẽn da ket-b Mispa n kẽes-b bi-bees roogẽ, bãmb ne dĩma kom-pugli, la neb niyns fãa a Nebuzaradã, gũudba tãnsoaba, sẽn da gũnug a Ayikam biiga, a Gedaliya, Mispa. A Netaniya biiga, a Ismayɛl tall-b lame wala bi-beese n tũ Amonitsa nengẽ. A Zoana, a Karea biiga, ne tãb-biisa sẽn da be-b ne-yẽ wã waa n wʋma tʋʋm wẽns niyns fãa, a Netaniya biiga, a Ismayɛl sẽn maana. Woto b waa ne b neba n na n zab ne a Netaniya biiga, a Ismayɛl. B tɩ paam-a-la Gabaõ ko-ralma noorẽ. Neb niyns sẽn da be ne a Ismayɛl sẽn yãend a Zoana, a Karea biiga, la tãb-biisã sẽn da tũud yẽ, b sũur yɩɩ noogo. Neb niyns fãa sẽn da yi-b Mispa n tũud a Ismayɛl, a Netaniya biiga, bãmb fãa zoe n waa a Zoana nengẽ. A Ismayɛl zoe ne neb a nii n tɩ kẽ Amonitse. Dẽ zugẽ a Zoana, a Korea biiga n paas zab-zabdba sẽn da yãagd-b yẽ wã, tigma neb niyns a Ismayɛl, a Netaniya biiga sẽn da wʋk Mispa wala yemse, a sẽn wa n kʋ a Gedaliya, a Ayikam biiga: dapa, zab-zabdba, paga la kamba, n paas na-yir dãmba sẽn da be Gabaõ. B yikame n sɩng kẽnde la b tɩ yalsa Kimam, tẽng sẽn pẽ ne Bɛtelyɛɛm. B yama ra yaa b ta Ezipt, tɩ bala a Ismayɛl, a Netaniya biiga, da kʋ-la a Gedaliya a Ayikam biiga, la Babilon naaba n da kõ a naam, t'a gũ tẽngã. Dẽ yĩnga dabeem da tar-b lame. Dẽ zugẽ tãb-biisã kãsem-dãmb la sẽn yɩɩd fãa: a Zoana, a Karea biiga, a Azariyas, a Osaya, biiga, n paas neba fãa, kom-bõonego wa kom-bɛda, wa n yeela bãngda a Zeremi: «Wẽnd na sõng tɩ d kosgo kẽ f sũurẽ! Yõk fo Wẽnnaam, Soaala-Wẽnda sɛɛga n kõ-do, yõk b sɛɛg nin-bãmba sẽn keta yĩnga, tɩ wala fo sẽn da ne d sõorã sẽn yɩ zembalã, tõnd sẽn ket bal la woto. Kos tɩ Soaala, fo Wẽnnaama, sak n wilg tõndo, sor ninga tõnd sẽn na n dɩke, la d sẽn tog n maan bũmb ninga.» Tɩ bãngda Zeremi yãe n leok-ba: «M wʋmdame. M na n yõka Soaala yãmb Wẽnnaam sɛɛga n kõ yã wala yãmb sẽn kotã; la Soaala-Wẽnd sẽn na n leok a soaba, m na taas yã, m kõn solg fɩ ye!» La bãmb me yeela a Zeremi: «Bɩ Soaala sẽn ya sõngo la sɩd soaba, da bas-d ye, tõnd sã n pa tũ goam niynsi, b sẽn wilg foom, tɩ f togs tõndã. Tõnd wẽenda rẽ bãmb yʋʋr yĩnga. Yaa foo la tõnd kos yã tɩ f sok Soaala-Wẽnd n kõ-do. Tõnd na n tũ-la b sẽn yeel tɩ d maan fãa, noom-d tɩ ka noomd-do. Woto bũmba fãa na zems d yĩnga, tɩ d deega Soaala, tõnd Wẽnnaam, noore.» Dasem piiga, dẽ poore, Soaala goma ne a Zeremi: La a Zeremi boola a Zoana, a Karea biiga, la tãb-biis kãsem-dãmba, la neba fãa sẽn da be-b ne-yẽ, n pa kees ned ba a ye. La a yeel-b lame: «Yãmb da kosame tɩ m taas y koɛɛga Soaala, a Israyɛl Wẽnnaam, ad b leokre: ‹Yãmb sã n pa tẽn-kãnga, yãmb yɛl na manege: m na n mee yãmb doogo, la a kõn lʋɩ ye. Tɩ bala yel-beed ninga sẽn paka yãmbã mam tuubd-a-la zãnga. Da zoe-y Babilon dĩma dabeem ye; yẽ taoore yãmb digdame. Da zoe-y dĩma ye. Soaala koɛɛga. Bala mam bee ne yãmba n na n fãag yãmb na-kãnga nugẽ. Mam na n kɩtame t'a zoe yãmb nimbãanega, la a bas yã tɩ y leb n wa y tẽngẽ.› » A Zeremi paasame: «D mak wala y zãgsame tɩ y kõn tũ Soaala y Wẽnnaama noore, la y ka na n tɩ vɩɩnd tẽn-kãnga pʋg ye, yãmb sã n yeele: ya Ezipt tẽnga la tõnd na n kẽnge, beene, tõnd ka na n leb n yãe tãp ye, tõnd ka na n leb n wʋm zabr baorg peebg ye, la bur kõn le paoog tõnd ye, ya be la tõnd dat n zĩndi! Be neere, sẽn ya woto wã, yãmba, Zɩɩda rãmb sẽn ketã, kelg-y Soaala koɛɛga: Dũni fãa Soaala, a Israyɛl Wẽnnaam gomda woto: Yãmb sã sɩd yet tɩ yamb datame n kẽng Ezipt n tɩ zĩnd be, bãng-y yã tɩ sʋʋg ninga yãmb sẽn zoet a soabã na n paama yãmb be; Ezipt tẽnga la yãmb sẽn zoet n dabdã, kom kõn bas yãmb Ezipt tẽng ye: yaa be la y na n ki! Neb niyns fãa sẽn yet-ba tɩ bãmb datame n tɩ zĩnd Ezipt tẽnga, b fãa gilli, sʋʋg n na n kʋ-ba, ne kom, la bã-longdem; ba a ye menga, bãmb sʋk, kõn põs yel-pakr ninga mam sẽn na kɩt tɩ pak-ba ye. Sɩda, yaa woto la dũni fãa Soaala, a Israyɛl Wẽnnaam, gomda: Wala mam sũur sẽn puug wʋsgo ne Zerizalɛɛm dãmba, boto me, mam sũur na n puuga ne yãmb al wʋsgo, yãmb sã n ta Ezipt tẽnga. Beene, y sũur na sãam wʋsgo, la tʋʋr ka be b sẽn ka na n tʋʋs-y ye, kãab wẽng ka be b sẽn ka na n kãab-y ye la y kõn le yãend tẽn-kãnga ye.» A Zeremi kell n paasame: «Zɩɩda rãmba sẽn ket-bã, Soaala-Wẽnd yeela yãmba: Da kẽng-y Ezipt tẽng ye! Bãng-y yã tɩ ya sɩd menga la mam togsd yãmb rũnna. Yãmb sẽn ka reng n tags neerã, y wa n kosa maam tɩ m yõk Soaala, yãmb Wẽnnaama sɛɛg y yĩnga. Y kos-m lame tɩ m wilg-y zãng d Soaala-Wẽnnaam sẽn na n leoke, tɩ y na maan wa b sẽn yeele. La ade, mam taasa yãmb Soaala, yãmb Wẽnnaam, koɛɛga, la yãmb pa reeg bãmb goama, ba a ye menga. Bɩ y pĩnd n bãng neere tɩ ade, sʋʋg n na n kʋ yãmba, n paas kom la bã-longdem, zĩig ninga yãmb sẽn dat n tɩ kẽ n soondã.» A Zeremi sẽn wa n togs neba, goam niyns fãa Soaala-Wẽnd, bãmb Wẽnnaam sẽn da kõ-yẽ noore t'a togse, a Azariyas, a Osaya biiga, a Zoana, a Karea biiga, n paas nin-yaalsa fãa, leoka a Zeremi woto: «Fo sẽn togsda fãa yaa zirẽ bala. Soaala, tõnd Wẽnnaam ka yeel foom tɩ f togs tõndo tɩ d da kẽng Ezipt tẽnga n tɩ zĩnd be ye. Yaa a Barʋk, a Neriya biiga, n pirsd foom, a sẽn kis tõnda yĩnga, n dat tɩ fo ning tõnd Kalde rãmba nugẽ, tɩ b kʋ tõndo, bɩ b tall tõnd n kẽng yembdo al Babilon.» Woto wã a Zoana, a Karea biiga, n paas tãb-biis kãsem-dãmba la tẽnga rãmb ka kelg Soaala gomde n pa Zɩɩda tẽng ye. A Zoana, a Karea biiga, la tãb-biis kãsem-dãmb peega Zɩɩda neb sẽn da keta fãa, sẽn da yi-b tẽns a taabã n leb n wa b tẽngẽ, b peega sẽn da sẽeg-bã fãa: dapa, pagba, kamba n paas naab kom-pugli la neb niyns fãa a Nebuzaradã, gũudba tãnsoaba, sẽn da bas ne a Gedaliya, a Ayikam biiga, a Safã yagenga, la sẽn yɩɩd fãa, b peega bãngd a Zeremi la a Barʋk, a Neriya biiga. B sɩd looga ne-b Ezipt tẽnga n tõdg Soaala noore, la b taa Tapanɛs. A Zeremi yaool n da pĩnd n wilgame t'a Nabikodonozor na n wa pãba Ezipt tẽnga. Soaala taasa b koe-kãnga a Zeremi, Tapanɛs tẽnga: «Bao kug-bɛda n wʋke, fo na n bus-b-la tẽnga kombera rooga noore. F na n bus-b-la a Zɩɩda neba nifẽ. La f yeel neba: Dũni fãa Soaala, a Israyɛl Wẽnnaam, gomda woto: ‹Ade mam tʋmame tɩ b tɩ bool a Nabikodonozor, Babilon dĩma, mam tʋʋm-tʋmdã, a na n wa vigla a naam goeele kug kãensã zutu, la a tilg a naam zãongo. A na n waame, la a na n sɩbga Ezipt tẽnga: a na n kʋʋ kẽere, n tall kẽer n loog yembdo, a na n kooda kẽere. A na n yõoga Ezipt tẽng wẽn-naandsã dot bugum, a na n yõoga b mensa bugum, bɩ a na wʋk-b lame n loog a tẽngẽ. A na n zɛɛ Ezipt zãnga wa rũn-kɩɩm sẽn saagd a fuugu n menes a karens zãnga. Dẽ poor marsã la a na n yaool n loog a tẽngẽ ne yẽesem. A sã n ta Eliopolis, a na n tusa kuga lal-gilsã n lubi la a yõog Ezipt wẽn-naandsa rota bugum.› » Koɛɛg a Zeremi sẽn deege n na n taas Zɩɩda rãmb fãa sẽn be Ezipt tẽnga, sẽn kẽed-b Migdol, Tapanɛs, Memfis la Patros tẽnga. A Zeremi goma ne b woto: Dũni fãa Soaala, a Israyɛl Wẽnnaam n togsde: «Yãmb yãee yel-beed niyns fãa mam sẽn tak Zerizalɛɛm la Zɩɩda tẽns fãa zugu. Ade, dũnna b lebga raboodo, neb ka leb n be be yɛs ye. Yaa b yel-wẽna n puug mam sũuri. B tɩ kʋʋ maando la b waooga tẽn-zẽng wẽn-naandse. M yaool n da ka ne bũmb ninga sẽn be bãmb ne taab sʋka. Y ka bãng-b pĩnda, y yaab rãmb me ka bãng-ba. M ka vʋʋs ye, m tʋma m bãngdba, a yeyn-ye, yãmb nengẽ tɩ b wa yeel yãmba tɩ y bas yel-yood a woto tɩ b ka tat m yam ye. La yãmb pa kelg ye, yãmb pa maan gũusgu, yãmb pa tek y zʋg wẽngã, la y kell n waooga tẽn-zẽng wẽn-naandse. Yaa rẽ yĩnga la m sũura widg bugum n yõog Zɩɩda tẽnse, la Zerizalɛɛm soya. Bũmb ka kelle sã n ka raboog sẽn kẽesd rabeem wa d sẽn ne a soab rũnna wã.» A Zeremi le paasame: «La marsã, dũni fãa Soaala, a Israyɛl Wẽnnaama, gomda woto: ‹Bõe tɩ yãmb na n sãam y meng yell woto? Yãmb na n kɩtame tɩ b kʋ Zɩɩda rãmb fãa, dapa, pagba, kom-bɩɩse la yagense. Y ratame tɩ m sɛɛs-b zãng laa? Bõe tɩ y baood n na n beeg-ma ne y tʋʋm yoodo, n kʋʋd wẽn-sãams maando, y sẽn waa n na n soond tẽng ninga, Ezipt tẽnga? Bõe tɩ y rat tɩ m menes yã tɩ dũni ninsaalba wa get-y wa yãnde la kãab wẽng bũmbu? Yãmb yĩma y ba rãmb tʋʋm wẽna, Zɩɩda nanams tʋʋm wẽna, yãmb meng tʋʋm wẽna, yãmb pagba tʋʋm wẽna, tʋʋm wẽns niynsi fãa sẽn maan Zɩɩda tẽnsẽ, la Zerizalɛɛm soya zutu? Al n tãag dũnna, ned ba a ye ka tol n tuub ye, ned ba a ye ka reeg tɩ maam la Soaal ye, ned ba a ye ka reeg m zãmsgo, ned ba a ye ka reeg m noorã m sẽn kõ y ba rãmba ye, la m sẽn kõ yãmba, bãmb kamba ye.› » A Zeremi paasame: «Rẽ fãa yĩnga dũni fãa Soaala a Israyɛl Wẽnnaam leokda woto: ‹Ade, marsã mam na n sɩbga yãmba. M na n kʋʋ Zɩɩda rãmba fãa. M na n deega Zɩɩda rãmb sẽn kẽng-ba n na n tɩ zĩnd Ezipt tẽnga. B fãa na n kii be, sʋʋg n na n kʋ-ba, kom n na n kʋ-ba. Ned ba a ye kõn põs ye. B fãa na n paa tẽn-kãnga. Zabr sʋʋg bɩ kom n na n loog ne-ba. Yaa woto la b fãa na n looge. Bãmb zu-beeda la f na n tagse f sã n dat n kãab ned kãab-beedo; bɩ f sã n dat n tẽeg bũmb sẽn ka sakd tẽegr, n ya wẽnga, n ya yãnde. Neb niynsi sẽn be-b Ezipt tẽnga, m na n kãab-b lame, wala m sẽn kãab Zerizalɛɛm dãmba, na n yɩɩ sʋʋga, kom, la bã-longdem. Neb niynsi, sẽn yi-b Zɩɩda n wa soond Ezipt tẽng ka, ba a ye kõn põs ye, ba a ye kõn leb Zɩɩda, la yaa be la b yaool n dat n lɛɛg n wa kẽ, daar a ye, la ayo, na n yɩɩ neb a wãn bala.› » Rap niyns fãa sẽn da mi tɩ b pagba da kʋʋda maand wẽn-sãams yĩnga, pagba sẽn da tigim ka tɛka, neb niyns fãa sẽn da kẽed Paros, Ezipt tẽnga, naaga taab n leok a Zeremi woto: «Goam niyns fãa fo sẽn togs tõnd tɩ yaa Soaala goama, tõnd pa rat n kelg-b ye. Tõnd na n kell n maana tõnd sẽn da kãabe. D na n waa ne tɩdare la rãam n kõ a Astarte, yĩngr dĩm-poakã, wala d sẽn da maan n tãag rũnna, tõndo wala d ba rãmba, d dĩm dãmba, d kug-zĩidba, Zɩɩda tẽnsẽ la Zerizalɛɛm soya zutu. Wakat kãng tɩ d da rɩtame tɩ seke, d zug ra yaa noogo, yel-beed da ka pʋgd-d ye. La ade, tõnd sẽn bas n ka leb n wisd yĩngr dĩm-poaka tɩdare, n ka leb n kõt-a rãam, bũmb fãa paoogda tõndo, zab la kom namsda tõndo.» Pagba tol n paasame: «Tõnd sã n kõt kũuni yĩngr dĩm-poak a Astarte, tõnd sɩdb rãmba mii tiiri. B miime tɩ tõnd dõosda miisdu sẽn tar a Astarte wẽnego n kõt-a, n paas ne rãam.» A Zeremi goma woto ne sẽn da leok-b yẽ wã, pagba la rapa: «M miime tɩ Zɩɩda tẽnsẽ la Zerizalɛɛm soya zutu y ra zoe n kõta kũun kãense, yãmba, y ba rãmba, y dĩm dãmba, y kug-zĩidba la zãma wã fãa. Dẽ yaa vẽenega! M sok n gese, y tẽedame tɩ Soaala ka mi bɩ b yĩmame? Soaala ka yĩm ye, dẽ me la b ka le tõe n nee y tʋʋma, y manes yaalsã la b sĩnd ye. Dẽ me la y tẽnga lebg raboogo, wala a sẽn yaa a soab rũnna wã: b looga ne a paoonga fãa, ne a neba fãa. La yaa yel-beed ninga sẽn lʋɩ a zugã la ned kam fãa tar n kãabd a bɛɛba. Dẽ me yaa vẽenega. Yel-beeda sẽn lʋɩ y zug rũnna wã, ka bũmb a to n wa ne-a, n zʋʋg y sẽn kʋ maand wẽn-sãams yĩnga n beeg Soaalã. Y pa kelg b koɛɛg ye, y pa tũ b sẽn wilg ye, y pa reeg b saglse, y pa tũ b noya ye.» A Zeremi le yeela neba fãa, pagb la rapa: «Kelg-y Soaala koɛɛga, yãmba, Zɩɩda rãmb sẽn wa Ezipt tẽngã. Woto la dũni fãa Soaala, a Israyɛl Wẽnnaam, gomda: ‹Yãmba, pagbã, y sẽn yiis y noorẽ la y sẽn wẽnegd n pids ne y nusi, y yetame tɩ y sẽn pʋlem bũmb ningã, y na pids-a, yĩngr dĩm-poaka yĩnga, y na n waa ne wisdu la rãam. Y sɩd maana boto. M nong-y, kell-y n tall-y boto! Bɩ y fãa gill kelg neer marsã, yaa mam meng m toore, yaa maam, Naaba-Wẽnde, n togsde, yaa mam meng n wẽende ne m yʋʋra sẽn ka be taarã, tɩ Ezipt tẽn-peelma fãa pʋgẽ Zɩɩda ned kõn le wẽen ne mam yʋʋra ye; b kõn le yeele: m wẽend ne Soaala-Wẽnd sẽn pid ne vɩɩma ye. Ad-m sẽn na n modg n tool-y bũmb ninga: ka na n yɩ sũ-noog ye, na n yɩɩ yel-beedo. Zɩɩda neb niyns fãa sẽn be-b Ezipt tẽnga, sʋʋga la kom n na n kʋ b fãa gilli. Yaa neb kẽer bala, neb sẽn ka zem bũmbu la sʋʋga bɩ koma na n keese. Bãmb na yi Ezipt n leb Zɩɩda tẽn-peelmẽ la bãmb dãmba n na n kõ kaseto sã n ya mam gomdã n pidsi, bɩ sã n yaa bãmb dẽnna. M na n yika ne yãmb kaalẽ bala, Soaala n gomde. M na n kõ-y-la makre la woto y na bãnge tɩ m na n waa ne m sẽn kãab-y yel-beed ningã. Makra la woto: Soaala-Wẽnd gomda woto: ade, mam na n ninga a Ofra, Ezipt tẽnga naaba, a bɛɛba nusẽ, neb niyns fãa sẽn da tʋl a kũuma nusẽ, wala mam sẽn ning a Sedesiyas, Zɩɩda dĩma, bɛ ninga sẽn da rat a kũuma nugẽ, a Nabikodonozor, Babilon dĩma nugẽ.› » Ad-y yɩ-la a Zoziyas biig a Zoakim sẽn waa n lebg Zɩɩda rĩma tɩ yʋʋm pids a naase la a Zeremi kɩt t'a Neriya biig a Barʋk gʋls sebre. Yɩɩ wakat kãnga la a Zeremi yeel a Barʋk: «Ad Soaala-Wẽnde, a Israyɛl Wẽnnaam, gomda woto fo poorẽ, Barʋk: ‹Fo yeela woto: kato, m tara zu-bʋko! Tɩ Soaala-Wẽnd kɩtame tɩ yel-beed buud toor-toore, paam maam! M pãng sɛɛme, m yaalame, mam tara kũmkũma bala al tɩ vʋʋsg kaẽ ye. Ad Soaala sẽn yet tɩ m wilg-fu: Ad-m tʋʋma sẽn lebg a soaba: mam sẽn da me la m tusd n lubdẽ, mam sẽn da sele la m pʋgd n võoda. Na n yɩɩ woto ne tẽnga gilli, m na n leeb-a-la lɛbla! La foo, fo baoodame n na n maan yɛl kãsense, bas tɩ sɛ woto! Yaa yel-beed n na n wa ninsaalb fãa yĩnga. M sẽn na n maan bũmb ning bal f yĩnga, yaa kẽng f sẽn datẽ tɩ m ka na n yãk f yõor ye.› » Ad koees niyns Soaala-Wẽnd sẽn taas bãngda a Zeremi bu-zẽmba poorẽ. Ad Soaala koees ne Ezipt dĩm a Neko, ne Ezipt tãb-biisi. Dĩma ra bee Karkemis, Efrat kʋɩlga noore, la a wʋmame tɩ Babilon dĩm a Nabikodonozor zaba ne a neba n tõog-ba. Yɩ-la a Zoakim naamẽ, a sẽn deeg naam tɩ yʋʋm naasẽ. A Zoakim yɩɩ Zɩɩda dĩm a Zoziyas biiga. Tãnsoaben-dãmba tãsda woto: Aya, segl-y gãndo; bõonego la bɛda, tɩ yaa zabr loogre! Segl-y wiidi, wed-dʋʋdbã, zomb-y y wiidi! Ning-y zug-peto, yals-y y zĩigẽ! Maneg-y y kãna n saase bob-y y zab-teedo! Bõe la m yaool n neẽ? Tãb-biisa basda raoodo, b tard n lebda poorẽ. B sẽega b gãndaadã, ned kam zoet n tees a sẽn teesẽ, ned ba a ye ka wẽnegd a poorẽ ye, sẽn lebẽ fãa yaa yɛɛsgo. Soaala n gomde. Sẽn tõe n wudga wʋsgo ra tẽ t'a na põs ye, gãndaada ra tẽ tɩ b na põs ye. Sẽn lebd Goabg sẽnẽ, Efrat kʋɩlga noorẽ, la b pãsd n lʋɩtẽ. Ãnna n wẽnd Nil kʋɩlga Nil kʋɩlg sẽn pid n daannẽ, Nil kʋɩlg sẽn fõt wa kʋɩl bɛɛga? Ad-y yaa Ezipt tẽng n gomde: «Wala Nil kʋɩlg sẽn pid n daannẽ Nil kʋɩlg sẽn fõt wa kʋɩl-bɛɛga, m na n gãndg m yiime n lim tẽngã, n sãam dotã la nebã. Wiidi, wudg-y! Bilim-bilm, aya, wɩng-y! Tãb-biis gãndaado, loog-y taoore! Lʋɩ-y taoore Kus la Pʋt dãmba, lʋɩ-y taoor ne y gãndo, y gãnd-bõonese, loog-y yã, Lud rãmba ne y tãbdo!» Mik bala, da-kãng la Soaala daare, dũni fãa Wẽnda sẽn da gũud la ra-kãnga. Da-kãng la b ra gũuda n na n tug beem ne b bɛɛba. Dẽ la b sʋʋga tar velbo, wa rũm-bãnde, la a yiisd a kom la a ko-yũud ne zɩɩm. Sẽn lebẽ fãa Soaala tara kɛɛbo, dũni fãa Wẽnda kʋʋd n samdame, yaa sẽn lebd nug goabg sẽnẽ, yaa Efrat kʋɩlga noore. M yãbd fo, Ezipt! La rʋ Galaad tãmsã tɩ f na paam kaam n bãn f noada. La m yet-f lame tɩ f ra nams ne tɩpg ye ad-f sãmpogra ka na n sãoog ye. Bu-zẽmba bãngame tɩ f paama yãnde, f waasga sãta zĩig zãnga. Gãndaoog n seg a gãnda-taaga, la b yiiba fãa naaga taab n lʋɩ. Woto la koɛɛg ninga Soaala-Wẽnd sẽn taas a Zeremi, Babilon dĩm a Nabikodonozor sẽn waa n na n zab ne Ezipt raare: Wilg-y kibara Ezipt rãmba, taas-y kibara Migdol rãmba, taas-y Memfis la Tapanɛs tẽnse. Yeel-y-ba: «Ned kam fãa yals a zĩigẽ!» Zabra zoe n looga ne y yagse. Bõe n maane? Loalgã, f wẽn-naanda, lʋɩɩme? Soaala sẽn tus-a, a taa tẽnga? Yɩɩ wala b sẽn tusd tãb-biisã n lubdẽ tɩ ned kam fãa sã n yik bɩ a yetẽ: «Wa-y tɩ d leb d tẽngẽ, d zãag ne zabra la a yel-beedã.» La sã n ya Ezipt dĩma, a bãng t'a sẽn tog ne yʋʋr ninga yaa a Be bʋʋr zaalem. Ad-y Soaala, dũni fãa Wẽnd, wẽendame: «Bɛ wã na n waame, dẽ yaa bũmb sẽn ya sɩda wa sẽn ya sɩda tɩ Tabor yaa tãnga n leb n ya sɩda tɩ Karmɛl sulgd n geta mogrã. Ezipt tẽng rãmba, kẽ n wʋgs-y y teedo n tees y pa-weer tẽnga, Memfis na n lebga we-raoogo, weoog sẽn kẽesd rabeem, we-raoog sẽn ya vɩʋʋgo. Ezipt da yaa nag-sɛdga sẽn ya neere, la keoodre n yi nug Goabga, n wa tabend-a. Tãb-biis niyns sẽn da zabd n deegd ligda da tara fãa, bũmb da ka paoogd-b ye. Mik bãmb fãa na n lɛɛg n zoeeme. Sẽn na n sak-a n yaas ka ye, ra-beeda raare, m sẽn na n yik ne bãmba raare, sẽn na n sak-a n yaas ka ye. Ezipt tãb-biisa soos n loogame n pa tol n maan bʋʋre, wa waafo, a sẽn yãend tɩ bɛɛba watame n na n tak zabr ne-a, n wat wala ra kɛɛdba, n yuumd b lare la b zende. B kɛɛda googã; da yaa tɩ bɛd bala n sẽg taaba, wa Soaala sẽn wilg-ma. Da-kɛɛdba sõor da ka tɛk ye, b da wẽnda sʋya, n ka tõe n sõd ye. Ezipt tẽng neera zĩi ne yãnde, a lʋɩɩ Goabg rãmba nugẽ.» Dũni fãa Wẽnde, a Israyɛl Wẽnnaam, yeelame: «Mam na n yika ne a Amon, Tɛɛb wẽn-naandã, n yik ne Ezipt wẽn-naandsã, ne a dĩm dãmba. M na n yika ne Ezipt dĩma la sẽn teega yẽ fãa. Mam na ninga bãmb fãa neb niyns sẽn dat n kʋ bãmba nugẽ: Babilon dĩma, a Nabikodonozor, nugẽ, la a tãb-biisa nugẽ. La kaoosg pʋgẽ, naab na n le wa zĩnda Ezipt tẽnga wala pĩnda.» Soaalã n wilg rẽnna. Sã n ya foom, m biig a Zakoob, da zoe rabeem ye. Da bas raood ye, Israyɛl! Tɩ bala, ade, mam na n fãaga foom tẽn-zãorgẽ dãmb nugẽ, f yembda tẽngẽ dãmb nugẽ. A Zakoob na n le wa zĩnda ne laafi, tɩ ned ka be n na n kẽes-a rabeem ye. Sã n ya foom, m biig a Zakoob, da maan dabeem ye! Soaala n gomde. Tɩ bala, mam bee ne foom. Mam sẽn da sẽeg yãmb tẽns niynsa pʋsẽ wã, tẽn-kãens na n wãame. Sã n yaa foom, m ka na n sɛɛs f rooga ye, m sɩbg-f lame bala wa sẽn da segde, m da ka tõe n bas-f saalle, wa ned sẽn ka tol n beeg ye! Koɛɛg ning Soaala-Wẽnd sẽn togs bãngd a Zeremi Filisti rãmb poorẽ, dẽ tɩ Ezipt dĩma nan ka yik zabr ne Gaza ye. Soaala koɛɛga yɩɩ woto: Ad koom sẽn yit Goabg n watẽ, a lebga kʋɩl-kãsenga t'a kooma pidi, n zoet zĩis fãa. A limda tẽnga, la roto, neba tara yãbre, tẽnga rãmb fãa yɩɩnda b kʋʋr yɩɩlle. B wʋmda wiidi nao sẽn tibda, b wʋmda bilim-bilma sẽn maand bʋʋr kãsenga, n wʋmd bilim-bilma gʋla sẽn tõgd tẽnga. Ba rãmb ka le tẽr b kamb yell yɛs ye, n wa tong n zĩ zaalem. Daara taame, Filisti rãmb wãab raare. Ned ka le ket n na n sõng Tir la Sidõ ye. Filisti rãmb tẽns wãa zãnga, b bu-kella la Kaftor rãmba. Gaza rãmb zut põngame, yaa kʋʋre. Bʋʋr ka le yit Askalõ ye. Yãmb fãa, nin-wogda yagensã, y na n kell n kɩɩsa y yĩngã n ta da-bʋre? Yãmb n zĩi n maandẽ: «Da-bʋre la Soaala sʋʋga na n vʋʋse, da-bʋre la a na n vʋʋs a wʋʋgẽ?» Soaala kõ-a-la noore, a na n vʋʋsa wãn wãna? Yaa Askalõ la mogra noorẽ, yaa be la a tog n ta. Ad Soaala-Wẽnde, dũni fãa Soaala, a Israyɛl Wẽnnaama koɛɛga, Moab poorẽ: Yell na n paka Nebo tẽnga: b zɛɛ-a-la zãnga; Kiriyatayim paama yãnde: b tõog-a lame, do-kãseng ninga sẽn tara pãnga, yãnd me n na n kʋ yẽ, a raooda fãa wooga zãnga. A ka leb n ya Moab zu-zẽkr bũmb ye! Esbõ tẽnga, b baoome n na n sãam a yelle: Ad-b sẽn yete: Aya! D kɩt t a menem zãnga, tɩ b ra le gom a yell abada! Foom me, Madmena, fo yell me na n sãamame, tɩ bala fo ka na n põs sʋʋg ye. Kɛlenga n yit Oronayim: Yaa yel-beedo, yaa wãab menga! A Moab yell sɛɛme, a kɛlenga n sãt n tat Soar. Sẽn põs-b kũuma zĩi ne nintãm. F rʋʋd Luyit tãmse, f sigd Oronayim, f wʋmda b sẽn gomd yel-beeda yelle. Aya, zoe-y yã, bao-y laafi! Zoe-y yã, wala bõn-wɛɛga sẽn zoet zĩ-pɛɛlẽ. Yaa sɩda, Moab, fo ra teega f tʋʋma la f arzɛkã, la ade b na n tõoga foom me! B tʋka f wẽnd a Kemos n dabd pa-weere tɩ f maan-kʋʋdba la f na-biisa yãagd-a. Tẽn-wãada saada tẽnsã a yeyn-ye, a ka na n long tẽng ba a ye. Longẽ bɩ kunkubrẽ, nin-vɩɩg ka le ket ye. Pʋs n yaa rẽ la Soaala togs yã. Segl-y yaoog a Moab yĩnga, t'a na n sɩd wãame a tẽnsa fãa na n lebga raboodo, nin-vɩɩg kõn le kell be ye. Sẽn maanda Soaala tʋʋma yood-yoodo, bɩ Wẽnd yãk a soab barka! Bɩ Wẽnd yãk a soab barka, ned ninga sẽn kɩta t'a sʋʋg kong zɩɩm! Al a yãadmẽ, Moab da vɩɩme tɩ dabeem kaẽ ye; b ra zɩ n tall-a n kẽng pa-weer ye, a ra zĩi ne laafi, wala rãam b sẽn bas t'a kũm a yam, t'a rabɩlla tisg zãnga. Rãama zɩ n teem yʋʋr ye, bũmb pa teem a noore, bũmb ka loog ne a yũ-nooga ye. Yaa rẽ yĩnga la m yãk wakato, Soaala-Wẽnd n gomda, tɩ rãama na n leeg yʋʋr a to pʋgẽ. Dã-rʋgda fãa na n lebga vɩɩdo, b na n pãb-b lame n wã. A Moab ka paam a wẽnd a Kemos nengẽ, a sẽn da gũud bũmb ninga ye. Yɩɩ wala a Israyɛl me sẽn ka paam fɩ Betɛl wẽn-naanda nengẽ, la a yaool n da teeg-a-la wʋsgo. Moab tẽng rãmba, yãmb na n yɩɩ wãna n yeele: «Tõnd ya sũ-keelem dãmba, zab-zabdb sẽn ka zoet bũmbu?» Ned ninga sẽn na n wã a Moab, kẽeda a tẽnsã ne zabr sʋʋga la a legenda a kom-bɩɩba n tees b kodgr zĩigẽ, wa b sẽn maand ne rũmsi. Yaa woto la Dĩm kãsenga gomda, bãmb yʋʋr la Wẽnde, dũni fãa Wẽnde. Moab sãoong kolgame, yel-beeda wata ne yãgbo. Yãmb fãa sẽn yaa a yagse, yãmb fãa sẽn mi-a neere, wa pʋʋs-y a Moab a zaamẽ wʋm-beedo. Sok-y n ges maana a wãna tɩ b wã tẽng ninga sẽn da tar pãng a narã, pãng sẽn da yãet pẽgr zĩig zãngã? Dibõ tẽng rãmba, sig-y y ziira goeel zugu; zĩnd tẽnga Dibõ, zĩnd tẽn-nabrẽ, tɩ bala sẽn wãa Moab, wata fo nengẽ, a na n wãa fo tãnsoben-dotã. Aroɛr dãmba, yaas-y sora noor n gũudẽ, sok-y sẽn zoet-bã, sok-y sẽn põs-bã n gese yaa bõe n maane? Yaa woto la b leokda: Yãnd tara a Moab, a basa raood zãnga! Waas-y yã! Kelem-y yã! Moon-y Arno kʋɩl-bɛɛga noore t'a Moab wãame. Soaala kao-la b bʋʋdo n paalg kunkubã la Olon tẽnse, n paas Yaas, Mefaat, n paas Dibõ, Nebo, Bɛt-Diblatayim, n paas Kiriyatayim, Bɛt-Gamul, Bɛt-Meõ, n paas Keriyot la Bosra. A tata Moab tẽnsa fãa, sẽn pẽ-ba, wala sẽn zãr-ba. A Moab pãng sɛɛme, a kang kaoogame. Boto la Soaala-Wẽnd gomda. Lub-y Moab tẽng rãmba, tɩ bala b maana zẽk-m-menga ne Soaala. La Wẽnd na kɩt tɩ b yũnug-b rãama tɩ b wa gãe n wʋbdẽ, tɩ neba fãa wa gũbg-ba n laadẽ. A Moab tẽeg tɩ yẽ n da laad a Israyɛl, n da get-a wa wagdre, n da ka gomd a yelle n ka gird a zug ye. Moab rãmba, bas-y tẽnsã, kẽng-y n tɩ zĩnd-y pĩisa zutu. Maan-y wala walle sẽn tʋɩt a tʋko, a gãndgda bog-zulungã n tʋɩ. Tõnd wʋma a Moab yelle, n wʋm a wilg-m-menga yelle, la a tɩtaama yelle, a sẽn geend a meng ne bũmb ninga, a sẽn gomd põt-põto, a sẽn tẽed tɩ yẽ n yɩɩd fãa. Mam me mi-la a wʋglem, Soaalã n gomde, a gomdame n paasd yɛla, a lʋɩɩsda a meng taoore, la rẽ fãa yaa zaalem. Dẽ n so tɩ m sã n tagsd a Moab yelle yaa kʋʋr yɩɩlle la m pʋta, m yãbda a neba yĩnga, m yãbda Kir-Erɛs dãmba! Mam kũmda foom, Sibma bugsuntungu pʋʋgo, mam kũmda foom n yɩɩd Yazɛr. Fo willa da tẽegame n zãag zĩiga, f ra tol n gãndga mogrã, n da tat Yazɛr. Sẽn wãada tẽnga wa n deega f biisa zãnga Sũ-noog sẽn naag ne bʋ-raasa sɛɛme, B tɩɩsa tẽngr yaa sɩɩ. Sĩmsa ka le yɛs ne rãam ye, ned ka ket n na n fẽd bugsuntunga biis ye, yɩɩl niyns sẽn da yɩɩnd tɩ tʋʋmda kẽnda, ned ba a ye ka le be n yɩɩn-b ye. Esbõ boondame tɩ b wa fãag-a, la Eleale rãmb wʋmda b kɛlenga. Yaas rãmb wʋmda b kɛlenga; bʋʋra yita Soar n tat Oronayim, n tat Eglat-Selisiya, tɩ Nimrim sẽn da gãe ne kooma lebg ko-yũud zĩisi. Soaala-Wẽnd n yeele: «Ned ninga sẽn wata ne kũuni tãmsa zutu n na n kõ wẽn-naande, bɩ sẽn wisda tɩdare bãmb taoore, m na kɩt t'a soab menem. Yaa rẽ yĩnga la m yãbd a Moab la m yãbd Kir-Erɛs. M wiisda wa wɩɩga tɩ b sẽn da paama fãa lebga zaalem. Ninsaalba wõrsa b zoobdo, n kõog b toeemse, b kɩɩsa b nusi, la b yera sũ-pa-noang futu. Moab bɛɛnda fãa zutu, la sõasg zĩisi fãa, yaa yãbr bala; dẽ wã yaa mam sẽn wã Moab, wala b sẽn wãad yʋʋr f sẽn ka le rate.» — Soaala gomde. Pʋd-y sũ-sãang yɩɩlle: «Kato, a Moab lʋɩ zãnga! A sẽn wẽnemd a kãar n tees Soaala ka lebg yãnde?» A Moab lebga laad bũmbu la dabeem bũmbu, a yags fãa yĩnga. Tɩ bala Soaala-Wẽnd gomda woto: «Bũmb wala sɩlga n laande, n tẽegd a pɩgs a Moab zugu. B reesa a tẽnsã fãa, tãnsoben-dota fãa, b wã-b lame. A Moab tãb-biisa sẽn ya gãndaadã, fãa zĩi ne yɩɩre wa pag sẽn kũmd rogem. B menesa a Moab b ka le sõt-a nin-vɩɩs sʋk ye, A tẽeme t'a yɩɩda Soaala-Wẽnde. Ad Soaala sẽn gomd y yĩnga, Moab rãmba, y pʋɩɩr la woto: Sũ-puur sẽn ka taare, bog-zulunga la wĩ ka tɛka. Sẽn data n põs sũ-puurã, na n lʋɩ bog-zulunga pʋga. A sẽn yet t'a yii bog-zulunga la wĩ wã sẽn wẽneg n loe-a. A Moab yella na n yɩɩ woto, m sã n wa yik ne-a. Soaala n gomd boto. Neb niynsi sẽn zoet-ba yɛɛme, n yaas Esbõ n na n soond be. La bugum yii Esbõ, bug-zɩlenga yii naab a Siyõ zakẽ bug-walem n loog n na n tɩ yõog nin-bãmba tẽnsa sẽn pid ne bʋʋrã; bugma yita kɩrenga n tees sʋka. Fo yell sãam yã, Moab! A Kemos neba loogda zãnga; B talla f kom-dibli la f kom-pugli n loog yembdo. La daar n wate, Soaala n gomde, A Moab yɛla na n tekame.» Koe-kãnga n baasd koeesã Soaala sẽn taas a Zeremi a Moab poorẽ. A Amon kamba poorẽ, Soaala gomda woto: «Sɩngame tɩ bõe tɩ wẽnd a Milkom wa so Gad tẽn-peelem? Sɩngame tɩ bõe tɩ Amonitsa wa so Israyɛl tẽnse? A Israyɛl konga kamb bɩ, kamb sẽn na n welg b ba raboog bɩ?» Sẽn ya woto wã, ad daar n wate, Soaala koɛɛga, tɩ mam na n kɩt tɩ b wʋm tãp bʋrga Amonitsa Raba pʋgẽ. A na n lebga sũ-sãang tãn-bila, n lebg raboog sẽn kẽesd rabeem. Yagsa tẽns mens na n dɩɩ bugum. Dẽ marsã, la Israyɛl na n deeg a soolma. Soaalã n yeele. Esbõ rãmba, kelem-y kʋʋre tɩ bala Ayi wãame! Raba kom-pugli, kũm-y yã! Yeelg-y sũ-pa-noang futu yõk-y kũmkũma, vɛɛs-y goabg la rɩtgo. Wẽn-naand a Milkom tʋk n dabda pa-weere, yẽ ne a maan-kʋʋdba la a na-komse. Raba, bi-pugl sẽn ya tõata fo da maanda wilg-m-menga ne f bãado, f ra teega f sẽn tigs n bĩngi. Woto la f ra gomd f sũurẽ: «Ãnda n na n saag n tak zabr ne maam?» Ade, mam na n kɩtame, yaa Soaala n gomde, yaa dũni fãa Wẽnd n gomde, mam na n kɩtame tɩ f yɛɛse; f yɛɛsga na n yii zĩig zãnga; b na dig-y-la fãa n tees taoore. Ned kõn zĩnd yãmb sʋka, sẽn na n tõog n tigim zoetba zĩ yɛng ye. La rẽ poore marsã m na gese n tek Amonitsa yelle. Soaala-Wẽnd n gomd boto. Soaala koɛɛg a Edom poorẽ. Dũni fãa Soaala gomda woto: Yam-vẽen-ned ka le ket Teman laa? Yam zulumsa rãmb yam kẽe yɛ? B basame tɩ b yama sɩlem kẽk laa? Dedã rãmba, leb-y poorẽ, zoe-y yã! Bao-y bogdo n soond neere, tɩ bala m wat n na n sãama a Ezayu yagense. Y wakata yaa n taame. Bugsuntunda tõsdba sã n wa y nengẽ, b ka na n bas sib gĩnd meng ye. La yʋng ninga wagda wã sẽn na n wa, dɩll b raab pids zãnga, bũmb kõn kell be ye. Tɩ bala yaa maam n na n deeg a Ezayu sẽn tara fãa, m na n bãnga a sẽn solgd a laoga zĩiga, a ka na n leb n tõog n solg bũmb ye, na n yɩɩ yell a Ezayu yĩnga. F yak kõn tõog n yeele: «Y sã n wa looge m na ges y kɩɩb-bi wã yelle, y pʋg-kõapa na tõog n teeg maam.» Ad Soaala gomd a to: «Kelg-y neere. Rã-toaaga sẽn da ka segl b rãmb yĩngã, bãmb n baas n yũ-a. La foo, Edom, fo ratame tɩ b ges foo wa ned sẽn ka maan yelle. Kõn yɩ boto bada. Fo me na n yũu rãama. Bala, mam meng kãabame, la sɩda wa m sẽn ya Wẽndã, Bosra na-tẽnga na n lebga yel-beed tẽnga, bũmb sẽn kẽesd rabeem; a na n lebga raboogo la a yella n na n wa f yamẽ, f sã n wa rat n kãab beedo. A yagsa tẽns me na n naagame n lebg rabood sẽn ka na n tõog n le yik bada.» Yaa woto la Soaala gom yã. Ad-y Soaala wilg-m-la woto: tɩ b tʋma ned t'a togs bu-zẽmbã: «Tigim-y taaba! Kẽng-y n tɩ zab-y ne Edom! Yik-y yã tɩ yaa tãpo! Ade, Edom, mam na n kɩtame tɩ fo lebg tẽn-bila tẽns fãa sʋka, neb fãa na n sãbsa foom. Fo n da yɛɛsd Adem biisi, n da tẽed tɩ fo n yɩɩd fãa, la rẽ wã, f ra belgda f meng bala. Ne f sẽn kẽed pĩis bogdẽ, ne f sẽn tɩ zao tãn-lug-lugã, ne f sẽn tɩ zaoolg f tʋka yĩngr wa sɩlg sẽn zaoolgd a rẽnna, m na tɩ sik-fo.» Soaala n gome. Edom na n lebga raboogo. Neb niyns fãa sẽn na n loog a tẽn-peelmẽ, a pɛleng na n yɩkame, yel-beed la b na n yãend n wiisi. Wala Sodom la Gomor sẽn yɩ a soaba, Edom ne a yagsa me na n yɩɩ boto. Tẽn-kãens me pʋgẽ ned kõn leb n zĩnd yɛs ye. Ade, m na n yɩɩ wa bõnyẽega, sẽn yit Zʋrdẽ kãgrẽ n tees rũms wãbneg-zĩiga, Yaa Soaala-Wẽnd n gomde, la vugr bala m na n sẽega fãa. Dẽ poore m na n ninga m yam sẽn dat a soab be. Ãnna n zem maam? Ãnna n tõe n bool maam bʋʋdo? Nin-naab a bõe n tõe n yaas mam taoore? Bãng-y Soaala-Wẽnd sẽn sede, a Edom sɩbgr yĩnga. Wẽnd sẽn segle Teman rãmb yĩnga. Bãng-y tɩ b na n looga ne-ba a yembr-yembre wala rũmsi. Bãng-y tɩ b tẽn-peelma meng n na n zãgs-ba, wala bũmb sẽn yaand sũuri. Bãmb lʋɩɩsa bʋrg yĩnga, tẽng rĩmame al n sãag n ta Rudum mogre. Ade, yaa wala sɩlga sẽn lug yĩngri n laannẽ, n tẽeg a pɩgsa Bosra zugu. Badaare, Edom tãb-biis sũuri na n pida ne yɩɩre wala pag sẽn kũmd dogem dẽnna. Koɛɛg a Damas poorẽ. Amat la Arpad tẽnse gãee ne sũ-sãanga tɩ b wʋma sẽn pa tõe n kelge. Yɩɩre n tar-ba tɩ b ka mi b sẽn na n maaneg ye; Damas rãmb basda raoodo b lɛɛgame n na n zoe, rabeem kãseng la b rigda; toog tara b yĩnga n wẽnnẽ wala paga sẽn kũmd dogem. Yaa wãna, tɩ b zoet n basd tẽnga tẽng yʋʋr sẽn yi a taab sʋka, tẽng sũur sẽn noom ne a menga? Tẽnga kom-bɩɩba na n lʋɩɩ b sõasg zĩigẽ, la a tãb-biisa na n kii baraare. Dũni fãa Wẽndã n gomd boto. Mam na n ninga Damas lalsa fãa bugum, la a na n dɩɩ Damas dĩm a Ben-Adad doogã. Koɛɛg Arabsa poorẽ. Yaa sẽn be-b Kedar la Asor, bãmb la Babilon dĩm a Nabikodonozor sẽn tõogã. Ad Soaala koɛɛg b poorẽ: Aya! Yik-y yã, yaang rãmba, kẽng-y n tɩ zab-y ne Kedar dãmba. Da kees-y bũmb zĩ-peen-daagẽ wã ye. B wʋk b pɛɛl roto la b rũmsã; b wʋk b pɛɛla la b lagda fãa! B deeg b yʋgma wã la b moone: «Yɛɛsgo, goabg la rɩtgo!» Asor rãmba, Zoe-y yã! Da yals-y ye! Solg-y yã, Asor dãmba, Soaala-Wẽnd n gomde, tɩ bala a Nabikodonozor, Babilon dĩma, bilgda a yamẽ n dat n tʋm yãmb tʋʋm beedo. Yik-y yã! Kẽng-y n tɩ zab-y ne tẽng sẽn vɩ ne laafi tɩ dabeem kaẽ ye, Soaala-Wẽnd n gomde, kẽng-y n tɩ tak zabre ne tẽng sẽn ka tar kʋɩlense, n vɩ kɛɛnga. B yʋgma, b na n yõg-b lame, la b rũmsa a taaba na n lebga b soolem. M na n sẽega yaang la taoore goabg la rɩtgo, nin-bãmba sẽn kõogd b yɛɛma. Sẽn lebẽ fãa, m na n sãam-b lame, Soaala-Wẽnd n gomde. Asor na n lebga we-yũus tẽnga, n lebg we-raoog sẽn kẽesd rabeem, ned kõn le zĩnd be ye; a na n lebga wala raboogo. Ad koɛɛga Soaala sẽn togs a Zeremi, Elamit rãmb poorẽ. Yɩɩ Zɩɩda naaba, a Sedesiyas, naama sɩngrẽ. Dũni fãa Wẽnda goma woto: «Ade mam na n kaooga Elam tãpo, t'a tãpa la a pãnga. M na n kɩtame tɩ sobgo yi kɩrems a naasã: yaanga, nin-taoore, goabga la rɩtgo, n wa sẽeg Elamitsa zĩis fãa; tẽng ka be n ka na n yãende b sẽn dig b rãmba n yiis Elam ye. Mam na n kɩtame tɩ Elamitsa digimdi b bɛɛb taoore, neb niyns sẽn dat n kʋ bãmba taoore. Yell kãsenga la m na n tak b zugu mam sũura na yikame, Soaalã n gomde, m na n kɩtame tɩ b pʋg-b ne sʋʋse n kʋ-b gilli. M na n yiisa Elam dĩma ne a kug-zĩidba n maneg n zaoolg m naam goeele.» Soaala-Wẽnd n gomd boto. La daar a ye, bãmb n togsde: m na n gesa Elam t'a yella teke. Gomd ninga Soaala-Wẽnd sẽn wilg bãngd a Zeremi t'a leok Babilon la Kalde rãmba. Moon-y yã tɩ tẽnsa fãa wʋme; wilg-y zĩis fãa; bao-y makre n wilg tɩ neb fãa bãnge, da solg-y bũmb ye; Moon-y woto: b tõoga Babilon; a wẽn-naandsa zĩi ne yãnde, n zĩ ne yɩɩre, yãnd na n kʋ-la a Bel. Dabeem kãseng kẽ-la a Marduk. Tɩ bala, neb n na n yi Goabga n wa a tẽngẽ, n wãa-a t'a lebg weoog sẽn kẽesd rabeem t'a lebg rabo-vɩɩdo tɩ rũng bɩ ninsaala ka le pɩʋʋgd be ye. Wakat kãng marsã, Soaalã n gomde, Israyɛl la Zɩɩda rãmba na n wẽnemda b naoore n lɛɛg n watẽ la b yãbda, n lɛɛg n wa bao maam b Wẽnde. B na n baoo Siõ sore; b na n wẽnemda b nense n tees be. Zood la b rat n yõg ne maam zood sẽn ka na n le sãame, zood sẽn ka na n zĩnd sɛɛbo. Mam neba da lebga piis sẽn menem Pe-kɩɩmba ra bas-b lame tɩ b menem, b ra bas-b lame tɩ b saad tãmsa zutu. Tãmsa la b ra tar rʋʋbo n wa yĩm b bãgra yelle. Bɛ ninga fãa sẽn seg-ba, ra tara b yõgb bala la b yetẽ: «Tall-ba! Bãmb n beeg b Soaala n zãag ne b tɩlgr roogo, n bas b yaab rãmba sẽn da teeg a soaba.» Soaala tãsd-b-la woto: Zoe-y n bas-y Babilon, yi-y Kalde rãmb tẽng n zoe! Zoe-y wala boeese sẽn lʋɩt bʋʋsa taoore. Ade: mam na n kɩtame tɩ tẽn-bɛda sũ taaba, n tɩ zab ne Babilon. B na n yii Goabga n seg taaba n tɩ zab ne-a, n tõog-a. B pɛɛma, ka tãood n yõsg ye: ya tãb-biig nug sẽn noom pɛɛma mesgre. Gãndaoog ka kẽnd zabre n lɛɛg n wa tɩ nug ka zãad ye. Babilon tẽnga rãmba, ad-y b na n zɛ-b lame zɛɛdba na n zɛɛ ne sũ-noogo. Woto la Soaala gomda. Aya! Modg-y ne kɩdengo, y tõe n nooga y sũuri, yãmb fãa, m soolma fãadba! Modg-y ne zoeese wa nag-sɛdg sẽn be bãoogẽ, Kelem-y yã wa wed-daado sẽn kelemde! Y zɩ tɩ y ba yiri zĩi ne yãnde, y zɩ tɩ yãnd wuka a zugu, y zɩ tɩ yẽ n pa poorẽ zãnga, y zɩ t'a lebga zĩ-peen-daaga! Yaa a sẽn yik Soaala sũur yĩnga, la a lebg we-raoogo, tɩ nin-vɩɩg zãag ne-a, tɩ sẽn pẽnega be rigd rabeem la a wiisdẽ, t'a nee sãoong ning sẽn sãama. Yãmb fãa sẽn dõos y tãbdo, wa-y n teedg-y ne Babilon, gũbg-y na-tẽngã. Tão-y y pɛɛma, da zoe-y y pɛɛm bõn ye, tɩ bala a beega Soaala-Wẽnde. Kɩt-y t'a wʋm a tãb-biisa kaasgo. A ges a gasdã sẽn lʋɩte, a lal-gũbrã sẽn sirgi la a reeg t'a konga pãnga. Yaa Soaala n dokd b sũuri. Yãmb me rok y sũuri ne Babilon Lebs-y na-tẽngã a sẽn maan a taaba. Bʋdb ra zĩndi, ka-kɛɛr ra zĩndi. Zabra yel-beeda yĩnga, bɩ ned kam fãa leb a buudẽ, ned kam fãa leb a tẽngẽ. Israyɛl da yaa pe-yãang sẽn da menem, pe-yãang bõnyẽes sẽn da rigdi. Sẽn yɩ-a pipi soaba n yĩig-a, yaa Asʋr dĩma. Yẽ poore yɩ-la a Nabikodonozor, Babilon dĩma, la dĩm kãnga pãba a kõabã n bõgse. Yaa rẽ yĩnga la dũni fãa Soaala, a Israyɛl Wẽnnaam gomd woto: «Mam na n yika ne Kalde dĩma, ne a tẽnga wala m sẽn maan ne Asʋr dĩma. M yaool n na n talla a Israyɛl n lebs-a wa rũnga, a wãbneg zĩigẽ; a na paam tɩ m dɩlga, Karmɛl la Bazã tãmsa zutu, n dɩlg-a Efrayim la Galaad tãmsa zutu la bũmb kõn paoog-a ye. Maam n yete, maam, Naaba-Wẽnde, tɩ b na n baoo a Israyɛl sẽn beeg ne bũmb ninga la b ka na n leb n yãe bũmb ye. B na n bao a Zɩɩda beegre, la b ka na n le yãend bũmb ye. M sẽn bas b rãmb vɩɩsa na n paama sugri. Kẽng-y ko-mensenda tẽngẽ, kẽng-y n tɩ zab-y ne-yẽ, kẽng-y n tɩ zab-y ne a Pekod! B kʋ-b fãa gilli, n da bas bũmb ye, Soaala gomde. Mam sẽn kõ foom noore, tɩ f maan bũmb ninga bɩ f maane. Tãp bʋʋr wulumda ne tẽnga, yel-beed bal n pid tẽngã! Maana a wãn-wãna? Babilon da wẽnda guugu, n tood n bõgsd dũni wã gilli; la ade, yẽ n kao gɩrse n dɩga. Ad-a sẽn wẽnd bũmb ning rũnna: zĩ-peen-daaga sẽn kẽesd rabeem. La rẽ yɩ-la a wãna? Ad yaa maam n gãneg-f bẽdgo Babilon, la fo basame tɩ b yõk-fo; fo ka bãng meng ye. Ad-f sẽn pag bi-bees roogo, tɩ yaa maam, Naaba-Wẽnd, la f beeg yã.» Soaala paka b zab-teed doogo, la b yiisa b sũ-puur zab-teedo. Babilon dãmb nif na n yãendame, b nif na n yãenda dũni fãa Soaala tʋʋma. Aya! Yi-y zĩis fãa n wa Babilon! B fõgs bao wã fãa, b tigs laogã gilli n yõog bugum. B sõng tɩ bũmb ra kees ye. Kʋ-y gãndaadã, tall-y b fãa n kẽng n tɩ koode! Bãmb wakat n ta, bɩ b me looge, tɩ Soaala me yika ne bãmba. Kelge, Siõ, ad yaa neb n põs Babilon la bãmb dãmb n wate, n na n wilg Soaala-Wẽnd sẽn dok b sũur ne fo bɛɛbã. B roka b sũur ne wẽnd dooga wãadba. Bool-y tãb-biisi, bool-y neb niyns fãa sẽn dõosd tãpo, tɩ b wa zab ne Babilon. Bɩ b wẽ b sika n gilg Babilon; a ra paam zĩig n zoe n põs ye. B lebs-a wẽngã a sẽn maana, a sẽn nams a taaba to-to, b nams yẽnda me boto. Rẽ n segd, t'a zẽka a menga Soaala-Wẽnd taoore, a Israyɛl Nin-Sõnga taoore. Kʋ-y kom-bɩɩbã tẽnga fãa pʋgẽ, sõng-y tɩ b tãb-biisã fãa ki badaare. — Soaala gomde. Ade, m yika ne foom, Babilon, wilg-m-meng soaba. Yaa dũni fãa Soaala n gomde. Ad fo wakat n ta tɩ m na n yik ne foo. Zẽk-m-meng soaba lakame n lʋɩ; ned ka be n na n sõng-a t'a yik ye. M na n ninga tẽnga bugum la bugma kõn kees bũmb ye. Soaala koɛɛga, a Israyɛl Wẽnda koɛɛg la woto: B namsa Israyɛl kamb wʋsgo, n nams Zɩɩda kamba me wʋsgo. Neb niyns sẽn wʋk-ba n loog pa-weerã pa rat tɩ b lɛɛg n wa ye. La bãmb Fãagda yaa maam, la maam me la pãng Soaba menga, maam la dũni fãa Wẽnde. Maam n na n zab b zĩigẽ, la m na n waa ne laafi tẽng zugu, Babilon bal n na n pa ne zũnd-zãnde. M na n yika zabr ne Babilon dãmba ne na-tẽnga rãmba, ne a na-biis la a mitba, yaa Soaala n gomde. M na n yika zabre ne zirẽ bagbã m na n menesa b yẽesma. M na yika ne a tãb-biisã n zãag b yama ne b zab-teeda zãabo. M na n yika zabre ne a wiidi n yik zabr ne a bilim-bilm, n yik zabr ne buud niyns sẽn sõngd-a, n kɩt tɩ b lebg rabɛɛmb wa pagba. M na n yika zabre ne a laogã, n kɩt tɩ b wa zɛ-ba n looge. M na n yika zabre ne kʋɩlsã n kʋɩɩs-b zãng-zãnga. Tɩ bala tẽnga pida ne wẽn-naandse la bãmb n menesd b neba yam, sẽn waoogd-b bãmba yam. Dẽ n so tɩ b tẽnga na n lebg we-yũusi, la kata zĩiga; na-neendo na n wa kẽe be. Babilon na n lebga vɩʋʋgo, ned kõn le zĩnd tẽn-kãng abada. M na n sãam-a-la zãnga wala Sodom ne Gomor la b yagse. Yaa Soaala n gomde. Ned kõn le tol n zĩnd be ye, ninsaal kõn le ti a roog be ye. Neb n yit nug goabg n watẽ, yaa tẽn-kãseng rãmba. Nanams sẽn tar pãnga n dɩk sor n watẽ la yaa al mooga sɛtmẽ la b yita. B tãb-biisa tara tãbdo la b yuumda b sʋʋse. Yaa neb sẽn ya nin-toose, neb sẽn ka tar sugr ye. B bʋʋra zema mogra rẽnna, mogra sẽn mi n wa yik a ko-wiisã. Yaa wiidi la b zao, la b tonga b zabr tongre, la b wat n na n zaba ne foo, Babilon. Babilon dĩma wʋma koɛɛgã t'a raood na n sɛ zãnga, tã na n digimd waoodo wala pag sẽn kũmd rogem. Ade, m na n yɩɩ wa bõnyẽega, sẽn yit Zʋrdẽ tʋgrẽ n wat rũms wãbneg zĩigẽ. Tao bala, bũmb fãa na menem. M na kẽes Babilon dĩm ning m sẽn tũusa soolmẽ. Ãnda n tõe n mak a meng ne maam, ãnda n na sok maam m sẽn maande? Tẽng-soaal a bõe n tõe n yals m taoore? Bɩ y kelg neere Soaala sẽn yals Babilon poorẽ, bɩ y bãng b sẽn yalse tẽnga yĩnga. Bãng-y tɩ b na n tall-b lame n looge n loog a yeyn-ye wa rũmsi. Bãng-y tɩ yaa b tẽnga menga n ka le rat n wʋm b yũugu. B sẽn wʋm tɩ b tõoga Babilon, tẽnsa miimame, la b wʋma kaasgo bu-zẽmba tẽnsa pʋsẽ. Woto yaa Soaala koɛɛg a to: Mam na n kɩtame tɩ sob-raoog kaooge n wa sãam Babilon ne a kẽedbã. Mam na n tʋma neba, la b na n wa sẽeg-a-la wa sobgo sẽn yelgd mo-pagdo la b zɛ a tẽngã. A zu-beeda raare, b na n gũbg-a lame n gilgi. Tãbda rãmb sɩng tãoobo. Sẽn tar-b kuta fut sɩng yeelgre, da bas-y tãb-bi-poala ye, zab-zabd ba a ye da põs ye. Sẽn paam-b sãmpogre na n paa Babilon, tɩ soya pid ne sẽn lʋɩ-b zabrẽ. Tɩ bala, tẽnga fãa pida ne yel-wẽna, tɩ bala b beega Soaala-Wẽnde, b beega a Israyɛl Nin-sõngã. Israyɛl la Zɩɩda kell n talla b sõangda, bãmb la dũni fãa Soaala. Zoe-y n yi Babilon, ned kam fãa bao a menga da bas-y tɩ b wa naag-y n kʋ ye. Ad-y marsã yaa Soaala raare, yaa b rok b sũur daare. Soaala lebsda Babilon a sẽn tog ne. Babilon da yaa sãnem wamde Soaala-Wẽnd nugẽ. Wamd-kãng rãama n da tɩgsd ãndũni rãmba, a rãama la b ra yũud n tuumnẽ. Vugr bala, wamda lʋɩɩme n wã: kũm-y Babilon! Bao-y kaam n kõ-a t'a bãn a nodre n boog a toogo. Daar bɩ a sãooge! Tõnd tɩbsa Babilon la a ka sãoog ye. Wa-y tɩ d loog n bas-a, ned kam fãa leb a tẽngẽ. Pɛt ning a sẽn na n yãenda yaa pɛt menga, tɩ yaa dũni wã la a beeg yã. Sã n ya sɩda, Soaala maan-d-la neere. D ta Siõ n togse tõnd Wẽnda sẽn maan d yĩnga. Soaala yẽsame n dɩgle: b na n sãama Babilon. Yaa Mɛd dãmbã n na n tʋm tʋʋnd kãnga. Yaa Soaala raare. B rokda b sũuri tɩ b sãama b ro-sõngã. Saas-y y pɛɛma neere, saas-y n pids y loko. Zẽk-y y tãp-kaoore tɩ b sɩng zabre ne Babilon lalse! Paas-y gũudba sõore, zĩig fãa paam a gũuda; zaoolg-y sẽn ne-b yɩɩga. Soaala na n pidsa b sẽn kãabe, n pids b sẽn yeel fãa Babilon poorẽ. Babilon, fo sẽn be ko-bɛd noorẽ la fo sẽn ya dakãagre, fo wakat taame, fo wẽnema pida zãnga. Dũni fãa Wẽnd n wẽend ne b menga: «Mam na n kɩtame, la rẽ yaa sɩda wa sẽn ya sɩd tɩ m ya Wẽndã, m na n kɩtame tɩ neb sẽn ya ka tɛka wa sʋya, wa kalwaare wa reeg f tẽngã n yãmbe. B na n teesa foom n tãs b zabr tãsga.» Soaala wilga b pãnga. B naama tẽngẽ la b wilga b tʋʋm-minim n yag dũniya, n wilg b yama zulum, n pids yĩngra ne a teedã. B sã n gom bala, la koom sẽn tigimd yĩngri, sawad-tagda yɛdgda yĩngri tɩ sa-tãsga wa ne sa-koom; sobga yita a sẽn da tigimẽ. Dẽ la ned kam yɛsa n ka mi a sẽn maande. La sẽn kẽ-b moog zãnga, yaa yõgsã sẽn dõog b wẽn-naandsã, b zĩime la b zut wuka ne yãnde; yaa belgem-belgem bala la b naan yã; sẽn vʋʋsda ne yõor ka ye. Yaa sobg ra-taase, yaa laad bũmbu. Dẽ fãa na n kãag n loogame, Soaala sẽn na n yik raare. A Zakoob Pʋɩɩrã ka ya wa bãmb ye, bãmb la dũni fãa Naanda, t'a Israyɛl yaa b sẽn bok n kõ b menga, b yʋʋra la Pãng soaba Wẽnde. Babilon, foom n yɩ m zãare fo yɩɩ m zab-teoogo. M talla foo n zab ne bu-zẽmbã, m talla foo n sik nanamse b zaoorẽ. M talla foo n pãb n kʋ wed-dʋʋdba ne b wiidi. Mam talla foo n to bilim-bilma la sẽn da be-b pʋsẽ. Maam n tall-fo n wẽ paga la raoa, nin-kẽema la yãaga, n tall-fo n wẽ bi-ribla la bi-pugla, maam n tall-fo n dig rũm-kɩɩmba ne b rũmsi n dig koaadba ne b nag-koodse, n dig kombɛɛmba ne b sõangdba. La ade, Soaala-Wẽnd n gomde, y na yãend marsã m sẽn na n lebs Babilon ne a kẽedbã wẽng ning b sẽn maan Siõ. N-ye! M yika ne foom Babilon, tẽn-wãada, sẽn wã dũni wã gilli, m gila m nugu la m zẽk-a lame n tees foo, Soaala n gomde; m na n tus-f lame n sik f pĩisa zugu. M na n kɩtame tɩ bug-kãseng zomb fo, bugum sẽn ka na n kees kugri, sẽn tõe n le rɩk n me roogo bɩ sẽn tõe n le paas a pãnga. Fo na n lebga we-raoog sẽn ka sakd gesgo, yaa Soaala n gomde. Zẽk-y tãp-kaoore tẽnga rãmba peeb-y bardo, bu-zẽmba tẽnsẽ, Yik-y fãa gilli n teedg ne Babilon. Bool-y tɩ b yi Ararat la Minni tɩ b yi Askenaz n wa sõnge. Yiis-y neb sẽn na n sa n bao tãb-biisi, yiis-y wiidi sẽn na n kẽ zabre; yiis-y-b ka tɛk wa kalwaare. Kɩt-y tɩ tẽnsa fãa tigim, tigim-y Mɛd dãmba nanamse, b kombɛɛmba ne b sõangdba, n paas b soolma rãmb fãa. Tẽnga rigimdame la a yɛɛsdame, a sã n ne fãa tɩ Soaala pidsda b kãabgo, n kɩt tɩ Babilon tẽn-peelem lebg we-raoogo sẽn kẽesd rabeem. Babilon gãndaada mens ka rat n zab ye, b baooda zĩis n na n wũundi. B ka le tar raood ba bilfu, lebga rabɛɛmb wa pagba. Dẽ me la kʋɩlensa pakr ka le ya toogo, dẽ me la bugma na n zomb rotã Kibɛ-kõatba reesda taaba b ninga tĩig n digd na-yiri, n na n tɩ wilg dĩma kibare; bɛɛba zoe n kẽe tẽnga zãnga. Soya fãa gɩdgame, tãnsoben-dota fãa yõoga bugum, dabeem kãsenga kẽe zab-zabd fãa. Dũni fãa Soaala koɛɛga, a Israyɛl Wẽnnaama koɛɛg la woto: «Babilon gãee ne zu-beedo. B kõog-a-la wa b sẽn kõogd zɛɛga n na n pãb alkam. Yaa tigsga wakat n zoe n ta.» Babilon dĩm a Nabikodonozor yũ-la m zɩɩma zãnga, a basa maam wala la-vɩʋʋgo, a vela maam wala rũng sẽn tar pãnga, a pidsa a pʋga ne m paoongo n yaool n wa bas-m kɛɛnga. Bɩ Babilon deeg a sɩbgre, a sẽn maan-m pãn-tõoga sɩbgre, yaa Siõ tẽnga rãmb n gomde. Bɩ Babilon yao t'a raaga m zɩɩm! Zerizalɛɛm n leokd rẽnna. Dẽ n so tɩ Soaala gomd woto ne Zerizalɛɛm Ade mam dɩkda fo yellã n dogl m zugu, la mam n na n ges n tug beem ne f bɛ wã. Mam na n kʋɩɩsa a kʋɩlgã, la m yẽd a ko-nini. M na kɩtame tɩ Babilon lebg raboogo a na n lebga we-yũus na-tẽnga, tẽnga na n lebga vɩʋʋgo, na n lebga yɛɛsgo la yel-beed tẽnga. Marsã wã Babilon dãmba wẽnda bõnyẽese sẽn yãbde, b kelemda wa bõn-nindi. M basdame tɩ b velma wa yiki tɩ m dɩlg-b sõmbo, m na yũnug-b-la rã-toose tɩ b lʋɩ n ka le yik ye. Dẽ yaa maam m leoke, maam, Naaba-Wẽnde. M na n kɩtame tɩ b tall-ba n kẽng dũms kʋʋb zĩigẽ wala pe-bi, pe-raado, la boeese. Yɩɩ wãn wãna t'a Sesak lʋɩ a bɛɛb nugẽ? Tẽnga yʋʋr yaool n da yi zĩig zãnga. Maana a wãn tɩ b wa tõog-a? Babilon lebga zĩ-peen-daaga; zĩ-peen-daag sẽn yɩkd pɛlenga nin-zẽmba tẽn-peelmẽ. Mogra koom wukame n kẽ Babilon, Ko-wiisa waa ne bʋ-raase n wa lim-a zãnga. A tẽns tekame n lebg bũmb sẽn pa sakd gesg ye, n lebg zĩ-koɛɛnga, n lebg weoogo tɩ ned ka be a pʋgẽ ye, ned ka le saagd n pɩʋʋgd be ye. Soaala wilgda woto: Maam n yik ne a Bel, Babilon wẽn-naandã. A sẽn dat n vel bũmb ningã, m na kɩt t'a lɛɛg n wʋk-a. Bu-zẽmba kõn le sũ taaba n waa a nengẽ ye. Babilon lal-gũbrã lʋɩɩme. Yãmba, m neba, yi-y tẽnga pʋgẽ! Ned kam fãa bao a meng fãagre, tɩ maam, Naaba-Wẽnd sũura yika wʋsgo. Da bas-y raood ye, da maan-y rabeem ne y sẽn wʋmda ye. Rõanna b gomda boto n yik vẽer n gom woto. B gomda pãn-tõog yelle, n gomd tɩ na-wẽng n dig a to, n deeg a zĩiga. Ade wakat n wate tɩ m na n yik ne Babilon wẽn-naandsã. Na n yɩɩ yɛɛsg kãseng tẽnga. Sẽn na n lʋɩ-b tẽnga pʋga na n paame n ka yãend yaoog ye. Wakat kãng la b na n wʋm kaasgo, kaasg sẽn na n wulumd yĩngr la tẽnga la yaa nug goabg rãmbã n wat n na n wã Babilon. Dẽ yaa Soaala n togse. Babilon yiisa neb ka tɛk yõore dũni wã pʋgẽ. Yẽ me wakata taame marsã t'a na n deeg sɩbgre, a sẽn kʋ Israyɛl kamba yĩnga. Yãmb sẽn põs sʋʋga, kul-y yã! Da yaas-y ye! Y sẽn ta zĩig ning fãa, tẽeg-y Soaala-Wẽnd yelle, la da yĩm-y Zerizalɛɛm yell ye. Yãnd da tara tõndo, tõnd sẽn da waa n wʋmd tʋya; yãnd da na n kʋʋ tõndo, sãamba sẽn waa n kẽ Soaala do-sõngã. Yaa rẽnd yĩnga, Soaala n gomde wakat n wate tɩ m na n yik ne Babilon wẽn-naandsã. Tẽnga pʋg, zĩis fãa, b na wʋm sẽn paam-b sãmpoaga waasgo. Babilon rat bɩ a rʋ yĩngri, a nong bɩ a tɩ yãk zĩig sẽn ka tõe n ta mam na n kõo noore tɩ tẽn-wãadba ta be. Soaala n gome. Kelg yã, bʋrg n yit Babilon; yaa yel-beed kaasgo n yit Babilon. Ad-y yaa Soaala-Wẽnd n wa n na n sãam Babilon. Bʋ-raasa na n wẽneg n sɛɛme. Bala bɛ wã tara kɛlenga a maanda bʋʋre wa mogre, a tãsda wa saaga. Sẽn wãada tẽnsã kolgda Babilon a na n zaba ne-a, a gãndaadã la a na n sui roogo a na n tõra b tãbdã, Soaala yaa Wẽnde sẽn dok b sũuri n lebsd ned kam fãa a tʋʋm wẽna. Bãmb meng n gomde. M na n yũnuga rãam: a kug-zĩidbã, a mitbã, a kombɛɛmbã, a tãnsoaben-dãmbã, a gãndaadã. B na n kẽe gõeem la b kõn nek ye. Yaa dĩm kãsenga n gomde, bãmb la dũni fãa Wẽnde. Bãmb meng n le paasd woto: Babilon lal-gũbra ne a sẽn yalma wãame n leb n wã; a kʋɩlen-wogda rɩɩ bugum. Ad-y neba mi n namsda b meng zaalem! Naonga yaa nams tɩ bugum wa loog ne bala! Ad noor ninga bãngd a Zeremi sẽn kõ a Seraya, a Neriya biiga, a Maseya yagenga, a sẽn wa n kẽng Babilon ne Zɩɩda dĩm a Sedesiyas. Wakat kãng tɩ dĩma sẽn dʋ a naam zaoor nan yaa kiis a naase. Wakat kãng me t'a Seraya da yaa yemsa sika naaba. A Zeremi da gʋlsa sebr zugu, yell niyns fãa sẽn da na n pak Babilon. Sebr kãng la sẽn karem ka wã. A Zeremi yeela a Seraya: «Fo sã n wa ta Babilon, f na n zẽka f koɛɛga la f maag f meng n karem gom kãensã fãa neere. La fo na n paasame: ‹Soaala, yãmb meng n yeele, tɩ tẽn-kãnga na n wãame la ninsaal kõn pa a pʋgẽ ye, rũng me kõn pa a pʋgẽ ye, t'a na n lebga sũ-sãang zĩ-peen-daaga, tɩ zamaana tong taaba.› Fo sã wa karem sebrã n sɛ, fo na n baoo kugri n loe sebrã n dɩk a n lob Efrat kʋɩlgẽ. F sã n wa lobd sebrã f na n yeela woto: ‹Wala sebra sẽn menem koomẽ wã, woto me la Babilon na n menem. A kõn tõog n põs yel-beed ning Soaala sẽn segl a yĩnga ye.› » A Zeremi baasa a goama woto: «Ad-y bu-zẽmba sẽn kẽesd b meng zĩig ningã, ad-y ka zĩig a to n zʋʋg pɛta la pɛt bala.» A Sedesiyas sẽn wa n dɩt Zɩɩda naam, t'a da tara yʋʋm pisi la a yembre. A rɩɩ naam yʋʋm piig la a yembre Zerizalɛɛm. A ma yʋʋr da boondame t'a Amutal, a Irmeya biiga, Libna tẽng neda. A naama ka yɩ sõmbo Soaala taoor ye, yɩɩ yood-yood wala a Zoakim naama. Yɛl niyns fãa sẽn maan Zerizalɛɛm la Zɩɩda tẽn-peelmẽ puuga Soaala sũuri tɩ b kong n zãag wʋsgo ne b buudã. A Sedesiyas zẽka a zug Babilon dĩm a Nabikodonozor taoore. T'a na n wa Zerizalɛɛm ne a tãb-biisa fãa. Tãb-biisa wẽ-la b sik Zerizalɛɛm noorẽ la b tuu bogdo n gũbg-a. Yɩ-la a Sedesiyas naama yʋʋmd a wɛ soaba, kiuug piig soaba, dasem piiga raare. Bɛɛba kell n gũbga tẽngã n ta a Sedesiyas naama piig la a ye yʋʋmde. Koma ra zabda wʋsgo, tẽnga pʋga. Rɩɩb ra ka le be n dɩlgd neba ye. Kiuug a naas soaba, la kiuugã dasem a wɛ raare, koma yik n wɩnga ne tẽnga; neb da ka leb n tar dɩɩb n dɩtẽ ye. B pooga lal-kãseng ninga sẽn gũbg tẽngã. Yʋng sẽn ta, Zɩɩda zab-zabdba zoeeme. Babilon dãmba sẽn da gũbg tẽngã, yii Zerizalɛɛm. B tũu kʋɩleng a ye sẽn da be lal-bɛd a yiiba sʋka, n pẽ dĩma zẽedã. B rɩka sor ning sẽn digd Zʋrdẽ bãg-faagã. Kalde rãmb zab-zabdba yik n pʋga a Sedesiyas la b paam-a-la Zeriko, la beene a tãb-biisa fãa sẽegame n bas-a. B yõka dĩm a Sedesiyas n tall-a n kẽng Ribla, Amat tẽnga, dĩm a Nabikodonozor nengẽ, t'a kɩt tɩ b kẽes-a bʋʋdo n paalg-a. A kooda a Sedesiyas kamba a nifẽ; a kooda Zɩɩda taoor dãmba fãa. Dẽ poore, Babilon dĩma leo dĩm a Sedesiyas nini, la a kɩtame tɩ b sẽb-a ne bãeense, n tɩ sui roogo. A Sedesiyas paa be n tãag a kũum. Yɩ-la a Nabikodonozor naama yʋʋmd piig la a wɛ soaba, kiuug a nu soaba piig raare, la a Nebuzaradã kẽ Zerizalɛɛm. A Nebuzaradã da yaa gũudba naaba. Babilon dĩma taoore a ra tõe n yãenda koɛɛg n leoke. A yõoga Soaala roogã, n yõog na-yiri la a ning Zerizalɛɛm dot fãa bugum, la rakãagba rot n yɩɩda. Kalde rãmb tãb-biis sẽn da be ne tãnsoaba, pãba lalsa sẽn da gũbg Zerizalɛɛm n wã. Tãnsoaba a Nebuzaradã tall n kẽnga yembdo neb niyns sẽn da pa-b tẽnga pʋgẽ; yaa naong rãmb kẽere, yaa sẽn zoe-ba n tɩ kẽ Babilon dĩma, yaa tʋʋm-mitba sẽn da keesã. Dẽ poore a Nebuzaradã sʋka tẽnga naong rãmb kẽere, n kell n bas-ba tɩ b na n kood pʋt la bugsuntundu. Kalde rãmba wãa wẽnd dooga lal-gils bɛda a yiibã sẽn yõg ne zũudã la sẽn da yɛs wẽnd dooga noorã. B talla bilim-bilma la zũud ko-sĩngã sẽn da rɩg sɩmandẽ wã, b talla zũudã fãa n kẽng Babilon. B wʋka sẽn da rõog ne zũud fãa n ya laok sẽn tar tʋʋmde, maanda kʋʋb wakato: laase, b sẽn da tar n ningd tompɛglem, kardo, sʋʋse, zɩ-mesdem laase la rãama laase. Gũudba naab leb n wʋka laase, wisd laase, zɩ-mesdem laase, tompɛglem laase, fitilse, yõg-la-yalemse, bũmb niyns fãa sẽn da maan ne sãnem bɩ ne wanzurfu, a wʋka fãa. Ad-y b ka tõog n geelg n bãng teeda fãa zɩslem ye, teed niyns dĩm a Salomo sẽn kɩt tɩ b rõog ne zũudu Soaala rooga yĩng ye. Ges-y lal-gils bɛda a yiibã, ko-sĩng kãsenga ne a lols piig la a yiibã, n paas bilim-bilma. Bãng-y tɩ lal-gilg-bedr a ye fãa woglem yaa kãntɩɩs piig la a nii, t'a mobg n sega ya kãntɩɩs piiga la a yiibu. Lal-gilsa pʋg ra yaa vɩʋʋgo la zũuda taglem ra baas n taa tẽnsʋk nug-bila woglem. B ra paasa lal-gilg fãa zug yalem la woglem ne zũudu. A zãndlem taa kãntɩɩs a nu la b mobg-a-la ne zũud gãmbre la tɩ-biis sẽn wẽnd pooloomse la sẽn dõog ne zũudu; lal-gils a yiiba fãa ra zema taaba. Faonga teed sẽn paasa me yaa bũmb a yembre. B yagla tɩ-biis sẽn wẽnd pooloomse, bãmb pis-wɛ la a yoobe tɩ b luun kɩremsã. Sã n naag ne sʋk rãmbã, yaa bãmb koabga. Gũudba naab yõka a Seraya, maan-kʋʋd kãsenga, n sui roogo, n paas a Sefaniya, maan-kʋʋd kãsem-pʋgdga, la digno-gũudba a tãabo. A kɩtame tɩ b yãk neda t'a get tãb-biisa yelle, n paas neb a yopoe sẽn da be rĩma zakẽ, la tãnsoab kãsenga sɛb gʋlsda; yẽ n da get tãb-biisa yãkre, n le paas a Zɩɩda neb pisoobe. Nin-bãmba fãa da bee Zerizalɛɛm. A Nebuzaradã, tall-b lame n kẽng Ribla, Babilon dĩma nengẽ. La Babilon dĩma kɩtame tɩ b kʋ-b fãa Ribla, Amat tẽn-peelmẽ. Yɩɩ boto t'a Zɩɩda wa zãag ne a tẽnga. Ad a Nabikodonozor sẽn tall b rãmb n kẽng yembda sõore: Yʋʋmd a yopoe soaba: Zɩɩda rãmba neb tus a tã la pisi la tãabo. A Nabikodonozor naam yʋʋmd piig la a nii soaba, neb kobs-nii la pis-tã la a yi, n yi Zerizalɛɛm. A naam yʋʋmd pisi la tãab soaba, a Nebuzaradã, gũudba tãnsoab talla Zɩɩda rãmb kobs-yopoe la pis-naas la a nu n kẽng yembdo. Fãa-fãa sẽn naag taaba, yaa neb tus a naas la kobs-yoobe. A Zoakim, Zɩɩda dĩma, kẽng yembdo tɩ yʋʋm pis-tã la yopoe, a Evil-Merodak, lebga Babilon dĩma. La ade kiuug piig la a yiib soaba, la kiuugã dasem pisi la nu raare, a Evil-Merodak sʋka a Zoakim n yiis-a roogo. B yẽsgo yɩɩ noogo ne taaba, a goma ne-a neer-neere, la a kõ-a-la naam sẽn yɩɩd nanams niynsi sẽn da be-b ne-yẽ Babilon. A Zoakim yeesa a yembd futu, la badaar tɛka, a da naagda ne dĩma n dɩtẽ. Beoog sẽn vẽeg fãa, dĩma ra geta a yelle tɩ bũmb da wa paoog-a ye, n ta a kũum. Kato! A zĩ-la a ye tẽng-ninga sẽn da pid ne nedgo. Tẽng-ninga yʋʋr sẽn da kut moogo. A lebga wa pʋg-kõore. Zaamẽ na-paga da rɩta a naam, tɩ tẽns ka tɛk kũud a taoore. Rũnna, yẽ ne yem-poak zem taaba! Yʋnga tatame tɩ ya yãbr bala. Yɛga mada ne nintãm. Ned pa le nong-a n na n wa bels-a ye. A zo-rãmba fãa zoe n bas-a lame. Bãmb n pʋs n lebg a bɛɛba. A Zɩɩda roog looga yembdo, a looga yembd ne yãnde. Bu-zẽmba sʋk la a na n vɩɩnde, la ka zĩ-yɛng la a na n paam n zĩnd ye. A tata zĩig ning n tẽed t'a põsame, mik be la b na n le bʋʋg-a, mik be la b na n le pʋg n yaal-a. Sor ning fãa sẽn digd Siõ pida ne kʋ-yãbdba. Tig-raas sɛɛ zãnga; Siõ kʋɩlens rʋʋgame, maan-kʋʋdba kũmdame, pʋg-sɛdba zĩi ne sũ-sãanga. Ad-y sɩd lebga toog ne bãmba. Marsã a bɛɛba zug n zẽkde, sẽn da kis-b yẽ wã vɩɩ ne laafi. Yaa Soaala n wa ne sɩbgre, a yɛl kɛga sẽn ka tɛk yĩnga. Bɛɛba tusda a kom-bɩɩba la yaa yembd la b rabd ne-ba. A Siõ zĩime tɩ b tar n lood pa-weere bũmb ning fãa sẽn da yaa a zu-zẽkre. A kug-zĩidba wẽnda yãgse: bãmb n ka yamdo n wãbdẽ, bãmb n ka na n põs tãoosa. Zerizalɛɛm bee nimbãaneg pʋgẽ dũnna n tẽegd a pĩnd arzɛka. A lʋɩ-la a bɛɛba nugẽ tɩ ned ka le be n na n sõng-a ye. A sẽn lebg zaalma, rẽ pidsa a bɛɛba ne sũ-noogo. Zerizalɛɛm beega beegr kãsenga, dẽ yĩng la a lebg bõn-dẽgdo. Sẽn da waoogd-b yẽnda wã fãa yam laka ne yẽnda. A sẽn paam yãnde, marsã lebga a bao a zĩiga, lebga a wẽnemd a neng kɛɛnga n yãb a yãb toogo. A fuuga kõda ne a rẽgdã; a ra ka ning a yamẽ t'a baasga ra tõe n yɩɩ woto ye. La ade, a zarbame tɩ looge. Ned sẽn na n bels-a le ka ye. Dẽ la a gomd ne Soaala n yetẽ: «Ges-y m nimbãanega Soaala, tɩ m bɛɛba tõog-m lame!» Bɛɛba wʋka a arzɛka fãa. Bũmb sẽn pa yɩ-a noogo: a yãenda bu-zẽmb ro-sõnga pʋga. Yãmb yaool n da gɩdga rẽ, Soaala. Siõ kamb basa raoodo n wẽed siri, la bũmbu la b baood n na n kõ b noore. B rɩka b arzɛka fãa n kɩse; bur la b rat n dɩ n paam pãnga. Soaala la b kota tɩ b wa ges-ba tɩ ned toog ka le be ne-b ye. Yãmb-fãa, so loaadba, yaa a Siõ n gomd woto, yãmb fãa zẽk-y y neng n gese tɩ y zɩ n yãend toogo sẽn zem tõnd rẽnna ye, Soaala sẽn tool tõnd a soaba, b sũ-puura raara ye. Soaala zĩnda yĩngri n tool bugum la bugma yõog-m la sõmbo. B ninga bẽdgo m sor zugu, m lʋɩɩ nimbãaneg pʋgẽ; m lebga ned b sẽn bas kɛɛnga, la rẽ n lebg m bãaga, tɩ m bẽed beoog sẽn vẽege. Soaala tigsa m yɛl kɛgã b sẽb-b-la wa raoogo d dɩk n palg m yubla, woto b sɛɛsa m pãnga fãa, n dɩk-m n bas ne m bɛɛba, la m ka le tõe n yals yĩngr ye. Soaala sãbsame la b basa kɛɛnga gãndaad niyns sẽn da be-b m sɛɛgẽ. Tãb-biis la b tigim n na n wa zab ne maam, n na n wa kʋ m kom-bɩɩba gilli. La sɩda, b wẽk-m-la wa sibi, maam a Siõ, Zɩɩda tẽn-peelmẽ, b wẽk-m-la wa bugsuntung biisi. Yaa rẽ yĩng la m kũmda tɩ m nintãm dʋʋgd wa koom. Sẽn tõe n belsa maam n le paas m vɩɩma pãngã, yẽ soab zãaga ne maam. M kamba ka na n le yɩ m kamb ye, tɩ bɛɛba pãng n yɩɩde. Siõ tuda a nus n baood sõngre la sõngr ka zĩig ba a ye. Soaala kõo noor a Israyɛl yagsã, tɩ b rɩ beem ne-a. B sã n wʋm Zerizalɛɛm yʋʋr bala la b sũur sẽn yaande. Soaala sẽn maand woto wã ad-y b bee bʋʋm tɩ maam n da yɩ tõata. Yãmb fãa sẽn yɛs ka, kelg-y neere! Ad-y m naonga yaa wʋsgo, tɩ m kom-pugli la m kom-dibli looga yembdo. Mam boola m zo-rãmba la bãmb fãa bas-m-la kɛɛnga. M maan-kʋʋdba la m sagendba baoo rɩɩb n konge la b sẽn kong pãnga b kii tẽnga pʋga. Soaala-Wẽnde, ad-y m pɛta la woto. Sẽn yõogd m sũura la woto. M baooda sẽn sɩng ne bũmb ninga tɩ m wa yik n tõdg yãmb woto. Woto, sor zugu, zabr sʋʋg looga ne m kamba. Zaka pʋg me ka são ye, yaa kũum ne kũum. Ges-y m sẽn zĩi n wẽed siri; la ned ka be n na n keng m sũur ye. B sẽn wʋm m yel-pakrã, m bɛɛba fãa noogda b sũuri la b yetame tɩ wã n tog ne-ma. Kɩt-y tɩ daar ning y sẽn yalsã wa tao, tɩ bãmb me lebg wa maam sẽn yaa a soab rũnna! Bas-y tɩ b tʋʋm beeda fãa puk y taoore. Sɩbg-y-ba wala y sẽn sɩbg m tʋʋm kɛgã. Sɩda m nintãm tara kiigri tɩ m sũura bẽedẽ. Kato! Soaala yika ne sũ-puuri n na n sãam a Siõ neerem, n na n sãam a Israyɛl ziiri n sãam tẽnga ne wẽnd doogã. Soaala yika ne sũ-puuri n yĩm b ziira sẽn da pukd zĩig ningã. Soaala muma b nini n loog vugr bala ne b buuda sẽn da tar fãa. B sũura yikame tɩ Zɩɩda tãnsoben-dot na n wã. Naama ne a na-rɩtbã b luba rẽ fãa tẽng n tabe. B sũ-puura pʋgẽ b menesa a Israyɛl ziira fãa. Bɛɛba taoore b ka wilg b nug pãng ye. Bug kãseng la b tugl a Zakoob pʋgẽ, la bugma ka rɩ n kees bũmb ye. B rʋʋsa b tãp wala bɛ sẽn maande la tãpa yãagame n gũudẽ. B tʋma tõnd bɛ tʋʋmde, n kʋ, n sãam tõnd sẽn da get n pẽgdã. B sũura fudgame n waag-do, n yõog ro-sõngã la Zerizalɛɛm. Soaala lebga wala a Israyɛl bɛyã sẽn vel a Israyɛl vugr bala, n menes tẽnga ne a ro-neebã; b wã-la a tãnsoben-dotã, n pids tẽnga rãmb gilli ne sũ-sãang la yɩɩre. B pãrga a Israyɛl zẽeda yãgre, b pãba b tigsga zĩig n sarem. Soaala kɩtame tɩ b yĩm Siõ pʋgẽ, kibs la vʋʋsg daare. B sũ-kãbra pʋgẽ neb n paam yãnde: yaa dĩma menga la maan-kʋʋdba. Maan-kugra lebga bõn-yũugu Soaala yĩnga. Wẽnd dooga lebga b sɩ-lakre. B basa na-yirã ne a lal-gũbrã bɛɛba nusẽ. Kɛleng n yit Soaala roogẽ la a sãta wala tigr daare. Soaala ra ninga b yamẽ tɩ b na n wãa Zerizalɛɛm lal-gũbrã. B tẽega wĩiri n na n pãb n sarme, Bũmb ka yõbg b nuga ye. Lal-faoogã la lalga menga, bũmb ka pãb n keese, fãa naaga taab n ta tẽnga. Tẽnga noor kʋɩlensa lʋɩɩme, kʋɩlensa pagdsa sʋʋga wa tẽngempiisim. Dĩma ne a kug-zĩidba, fãa lʋɩɩ bu-zẽmba nusẽ. Ned ka be n togsd Wẽnd sẽn dat ye; bãngdba mens ka le paamde tɩ Soaala gomd ne b ye. Siõ bi-pugla sagendba zĩi tẽnga, b fãa zĩi sɩɩ wa mugsi. Tompɛglem la b yug b zutu; yaa kʋʋr fut la b yeelg n zĩẽ; Zerizalɛɛm kom-pugli nens sura tẽnga. M nintãma raaga m nini, m zĩime tɩ m sũur kãbdẽ, fãagr saagr yi-la m yamẽ tɩ m nee yel-beed ninga sẽn lʋɩ m buuda zugu. Tẽnga pʋga, ko-yũud kʋʋda kom-peelse. Kamba sokda b ma rãmba: Yɛ la d na n yãend rɩɩb n dɩ? Bãmb n kongd pãnga n kiid b ma rãmb nusẽ. Zerizalɛɛm bi-pugla, m ka mi m sẽn na n yeel ye. Fo yella sɩd lebga toor zãnga. M ka ne m sẽn na n mak-f ne buud ning ye; fo zãr ne ned na tõog n bels-fo. Kato, siõ, f sẽn lʋɩ bok ning pʋgã ad-a yalma wa mogre. Tɩlgr ka ye! F bãngdba sẽn taas foom koees niynsã yɩɩ zirẽ la yɛl faado. B pa wilg foom f kongr ye; dẽ n dag n na n sãoogẽ f yĩnga. B sẽn taas foo koees niynsa yaa zirẽ la belgre. F lʋɩɩsa nooma so-loaadbã, dẽ la b kẽnd la b fɩɩnẽ, dẽ la b yĩgsda la sokdẽ: «Yaa foo la b sẽn boonde t'a neerem ka be to wã bɩ? Yaa foo la b boond yɛsa tɩ dũni wã fãa sũ-nooga bɩ?» Fo bɛɛba fãa baooda f noore; b yĩiga b yẽna n tees-fo. B fɩɩndame la b yetẽ: «D vel-a lame n ka yãee n takem ye. Daar ning d sẽn da gũuda yaa n taame, a beooga yaa n vẽegame.» Soaala pidsa b sẽn da kaoole, b pidsa b sẽn da yeele, b sẽn tʋlg al pĩnd-pĩnda taasame. B wã-f la zãng n pa kell ye. F sɩbgra nooga f bɛɛba sũuri, f bɛɛba wilg-m-menga tũu rẽ n paam pãnga. Siõ bi-pugla, tees Soaala n kelme tees n kelem ne f pãng fãa. Bas f nintãma t'a kiigi, a kiig wĩndg la yʋngo. Da vʋʋs ne yãbr ye, da kʋɩɩs f nintãma ye. Mi n yik n kelem wakat wakato, n yik n pids yʋnga ne f kaasgo. Zuk sẽn be f sũurẽ wã zãnga, Wẽnnaam f Soaala taoore. Zẽk f nus n yõk b sɛɛga tɩ f kom-bõonega paam n põse tɩ f ne b sẽn loogde, f nee b sẽn ki n dɩg soy wã zutu. Soaala, ges-y yã, ges-y neere; bãng-y sẽn ya ned ninga la y maan woto. Ges-y yel-beedo: pag sẽn tõe n lɛɛg n wãb a meng biiga, biig a sẽn doge la a sẽn da nonge! Ges-y b sẽn koot maan-kʋʋd la bãngda yãmb meng ro-sõnga pʋga. Kom-bõonego la nin-kẽemba lagem n dɩga vɩla soy wã zutu. Y sũ-kãbra raare, kom-pugli la kom-dibli kii kũ-miuugu. Y sɩd sãamame la y ka sãam zem-zem ye. Yãmb maana wa kibs n be, y boola m bɛɛba, m yagsa fãa. Y bool-b-la y sũ-puura raare, la mam ned ba a ye ka põs ye. Kamb niyns m sẽn da wub ne nonglem, bɛ wã kʋ-b-la fãa gilli. Far wʋm-m lame tɩ Soaala pãb-m-la sũ-to-pãbre. B lʋɩɩsa maam b taoore n modg-m tɩ m kẽne, la ka yɩ vẽenemẽ, yɩɩ likẽ. Maam la b yõkd pãbre beoog sẽn vẽege. M yĩnga fãa bugame, m kõaba fãa pãb n kaoome. Sũ-toog la pɛta n gũbg maam wa lalga. Lik kãseng pʋgẽ la b gãneg maam, wala b sẽn minim n gãnegd kũum. B meeme n gũbg-ma sẽn na n yɩ-la tɩ m yiib lebg toogo. Bãn-zɩsgo la b rɩk n balg-ma. M tara yãbr n kot sõngre, la b pa reegd m kosg ye. B peesa kug n yẽd m soya zãnga. Sor a to la m kong n dɩke. B yɩɩ wa rũn-toaaga, mam yĩnga, n yɩ wa bõnyẽeg sẽn lam tʋgre, n gũudẽ. B kɩtame tɩ m vɩɩma lebg toogo, m yĩnga ka le tar gãbe, m koɛɛga me ka le yit ye. Tãpa rʋʋsa m yĩnga, maam la pɛɛma tees n tãoodẽ. Bɛ wã yiisa a loka pɛɛma, la m lʋga la b tão n sãage. Neba fãa tara maam n laadẽ, beoog sẽn vẽeg fãa maam la b paoogda. B yũnug-m la bõn-tɩɩsenga. B pidsa maam ne sũ-toogo. B kɩtame tɩ m yẽna wer kuga, b tab-m-la tom-pʋlempʋkẽ. M vɩɩma zãaga ne laafi, sũ-noog lebga m sãana. Woto wã m yeelame tɩ m ka le tar beoog tẽeb ye, m ka le gũud bũmb Soaala nengẽ ye. M sã n tẽegd m pɛta, n tẽegd m sẽn ka tar sõsd-n-taagã, yaa wa zẽnem toaag la m venda. Rẽ la m tar tẽegr wakat fãa al tɩ m yam bondg m pʋgẽ. M sẽn dat n tẽeg bũmb ninga la woto, bũmb ning tẽegr sẽn kõt m saagr la woto: yaa Soaala nimbãan-zoeer sẽn ka be tɛkã, yaa b nonglem ne tõndã sẽn ka be sɛɛbã. Beoog sẽn vẽeg fãa pukda b nonglem, Soaala, ad-y y nonglma ka be sɛɛb ye! N-ye! M moondame tɩ Soaala la m arzɛka la rẽ yĩnga m teega bãmba! Soaala sõm bee ne sẽn teegd-b bãmba, ne sẽn baood-b bãmb ne b sũur fãa. Bas bʋʋre n gũ Soaala sõngre, tɩ rẽ n be neere. Sak n bas f yamleoog pʋgbo tɩ f nan paooda, tɩ rẽ n tõe n wa ne f yõodo. Bao zĩig n zĩnd sɩɩ, Soaala sã n wa n na n fɛɛs-fo. Sulg f meng zãng Soaala taoore n saagd b leokre. Tud f yɛgdga tɩ b wẽ-fo bas tɩ tʋʋda tʋʋ n yɛ. Sɩda Soaala pa naag ne neb niynsi sẽn daagd ninsaal n bas zãng ye. Ba b sã n sɩbgdẽ, b ket n zoeta nimbãanega, tɩ b nonglma labsame. Soaala pa ningd ninsaal yãnde b pa namsd ninsaal ne sɩbgre tɩ b sũur noomẽ ye. Y tẽedame tɩ Soaala pa ne bɩ? Yaa tẽnga neb zãng la y wool n pag roogo. Yaa zabre la y baood ne Yĩngr Soaala, y sã n get ninsaal wa bõn-yaalga. Y sã n maand kegre bʋʋd zĩigẽ, y tẽedame tɩ Soaala pa ne laa? Ãnda n gomd ne noor bala tɩ sẽn be zĩndi? Yaa Soaala! Ka Yĩngr Soaba noor gomd bala n yiisd yel-beed bɩ sũ-noog laa? Bõe poorẽ la ninsaal tõe n guglem ne Wẽnnaam? Bũmb zãnga a sã n ket n vɩ ne yõore t'a yel-wẽna yaool n ya ka tɛka? Bɩ d maneg n gese d soya la d lɛɛg n dɩk sor sẽn digd Soaala nengẽ. D zẽk d yam la d sũuri n tees Wẽnnaam n tees Yĩngr Soabã. Tõnd yɩɩ beegdba la tõatba rẽ n so tɩ y ra pa bas d taale. Yãmb kelga y sũ-puurã n digd tõnd la y kʋʋd tõnd tɩ sugr kaẽ ye. Yãmb baoo sawadg n lilli tɩ tõnd pʋʋsg ra tõog n ta-y ye. Dũni ninsaalba sʋka tõnd lebga sagdo tõnd n lebg tãmpʋʋre. Tõnd bɛɛba fãa pãsga b noya n kiigd tõnd beedo. Ad tõnd pʋɩɩr sẽn lebg a soaba: pɛlen-yɩka, rigbu, zɛɛbo la wãabo. M nina tara nintãm kiigri yel-beeda sẽn lʋɩ m buuda zug yĩnga. M nintãm tara rʋʋgre n ka yõkdẽ ye; pemsem ka le be m yĩng ye. M gũudame tɩ Soaala sulgi, b sulg n ges la b yãende, n yãend yel-beed ninga sẽn lʋɩt kom-pugli wã zutu. A gesgo yaa bõn-toog ne maam. Sẽn kis-b maam zaalma rigd-m lame n dat n yõk-m wa luiila. B pag-m-la vɩɩga bog-zulungẽ, n tol n bao kugri n maan linga. Kooma lima maam bõra, tɩ m yet tɩ m ki yã. M zĩnda bog-zulunga pʋga n bool yãmba. Y wʋma m sẽn yeel yãmbã: «Yoog y tʋba n kelg m siri la m boaala.» M kelmame n bool yã la y kolgame n yeel-ma: «Da zoe rabeem ye.» Soaala yãmb bʋʋme n sõng-ma, yãmb fãaga m yõore. Soaala yãenda neba sẽn maan m kegre, la b bʋ n sõng-m lame. Y yãenda b sẽn dok b sũur ne maam y yãenda b sẽn sed bũmb ning n na n sãam-ma. Soaala, y wʋma b tʋy wã la b sẽn da rat m maan bũmb ning ne maam. Y wʋma m zabd-n-taasa sẽn gomde, y nee sẽn be b yamẽ; b yikda ne maam beoog sẽn vẽege. Ges-y b sẽn maanda fãa, maam la b yɩɩnd n laadẽ. Soaala, maan-y ne bãmba wa b sẽn maan maama. Kidb-y y sũuri, n kãab b wẽnga. Pʋg-y-ba ne y sũ-puuri menes-y-ba saaga tẽngre. Bõe tɩ sãnema sẽn yɩlg menga ka le yãgd wa pĩnda? Bõe tɩ b yiis kug neeba n lob soya zutu? Maana a wãna tɩ Siõ kamba sẽn da zem sãnem menga, maana a wãn tɩ b get-b wa tãnd laase? We-yũusa meng nonga b kamba n kõt-b bĩisim tɩ b yẽsemdẽ. Mam bi-pugla bala n lebg pʋ-to-neda wala zĩ-pɛɛlẽ na-neoongo. Ko-yũud kɩtame tɩ bi-pɛɛlg zelemd tabend a ragsendaka. Kom-bɩɩba kota buri la b ka kõt-b ba sẽn paood ye. Sẽn da rɩt-b rɩ-nood pãsd n lʋɩta sor zugu. Sẽn da wub-b nanams zakẽ vɛɛsda tãmpʋʋr n baood rɩɩbo Mam buuda bi-pugl beegr yɩɩ wẽnga n yɩɩd Sodom dẽnna. Tẽng kãng wãa nif kamsg pʋgẽ, ka tũ ne naong ye. Pĩnda na-komsa da yaa yɩlma, laong peelem ka ta b rẽnd ye, b yĩn-gãonga ra peela wa bĩisim, b yĩnga ra moosa wa rulg-lɛlma, b zɩ-wĩisa ra rʋra yɩng, kẽeg-kẽega. La ad-b sẽn sob marsã wa bug-vũundu; ned seg-b sor zug marsã a kõn le bãng-b ye. B yĩnga gãong tabla b kõaba; b kʋɩɩ n weglma wa ra-peoko. Sẽn ki-b kũ-miuuga são sẽn ki-b koma! B são sẽn ki-b rɩɩb kaalem yĩnga! Ma rãmba ne b nonglma baas n dʋgda b kamb b toore. B kamb n lebg b rɩɩbo, m buuda bi-pugl namsga wakato. Soaala basa b sũur t'a fudgi, b bas-a lame t'a fudg n daag zãnga. B ninga Siõ bugum la a ka na n dɩ n kees bũmb ye. Dũni wã dĩm dãmb da pa tẽeda, talg ba a ye me ra pa tẽeda tɩ bɛ bɩ zab-zabd na tõog n tũ Zerizalɛɛm kʋɩlensã n kẽ a pʋgẽ ye. La rẽ fãa yaa bãngdba yɛl kɛga yĩnga, yaa maan-kʋʋdba tʋʋm beeda yĩnga, tɩ tẽnga pʋgẽ b raaga pʋ-peelem dãmb zɩɩm. B ra kẽnda tẽnga pʋgẽ wa zoeense, n kõd ne zɩɩm, tɩ b fut ra ka le tõe n sɩɩs ye. Woto b sã n kolgdẽ, b ra tãsd-b lame: «Loog-y n bao zĩiga, bõn-dẽgdã, loog-y la y ra sɩɩs-d ye!» B zoetame n ka mi b sẽn na n kẽẽ ye la bu-zẽmba sã n yãend-ba, b yetame: «B ra saag n kaoos tõnd sʋk ye!» Yaa Soaala meng n sẽeg-ba n ka rat tɩ b nin le yãend-b ye, la yaa neba sẽn pa le sake tɩ bãngd bɩ maan-kʋʋd le paam waoogrã. Tõnd yiiga d nin n da gũud sõngre, la kato! Sõngr ka wa ye. Tõnd da gũuda tẽng sẽn na n wa sõng-do, la tẽn-kãng rãmb ka wa ye. Tõnd bɛɛba ra gũusda d yiibu, n gɩt d soy la d tigsg zĩisi. Tõnd zamaana loogame, d meneng wakat taame. Sẽn digd-b tõnda tʋʋla, b tʋʋla wa yĩngr sɩlga. B riga tõnd tãms zutu, n gãneg b bẽdgo zĩ-pɛɛlẽ. Soaala-Wẽnd sẽn kõ a soab naam t'a lebg tõnd yõora gʋʋnda, tõnd sẽn da gomd a soab yell woto: «Yẽ maasem yĩnga d me yʋʋr na yi moogo, yẽ ne tõnd naaga taaba n kẽes bog-yɛng pʋga.» Noog f sũuri Edom tẽnga, noog f sũuri Us bi-pugla! La bãng tɩ wamda me na n ta-y lame, y me na n yũ n gãeemame n kẽn y zaala. Siõ bi-pugla, fo tʋʋm-beeda paama b sɩbgr zãnga la b kõn le tall-fo n loog yembd ye. Fo bãong marsã, Edom, la Soaala na n luki, fo n na n kolg n deeg f sɩbgre. Tẽeg-y yɛl niyns sẽn paam tõndã, Soaala, tags-y la y ges paoogr ning b sẽn paoog tõndã. Tõnd buud pʋɩɩr lebga sãamb soolem, d dota lebga sãamb soolem. Tõnd lebga kɩɩb-bi n ka tar ba ye. Tõnd ma rãmb lebga pʋg-kõapa. D bulsa koom meng raada ne ligdi, raad lebga f sõd ligd n kɩse. Zɩɩb la d bɛɛba palg d poore. D yɛɛ zãnga, la vʋʋsg kõn paam ye. D tuta d nus Ezipt la Asiri n bõsd sẽn na n pids d pʋga. Tõnd ba rãmba tʋma b tʋʋm kɛga n bas n looge, la tõnd n tʋk b wẽnema zɩɩbo. Yemse n lebg tõnd soaalba la ned ka n fãagd tõnd b nusẽ ye. Tõnd sã n baood dɩɩbo tõe n tũu ne d yõore, dẽnd d da zoe we-raooga sʋʋs ye. Yaa waa b los-d-la wʋng pʋga, tɩ bugma fʋkd d yĩnga gãongo, yaa woto la koma zab ne tõndo. B maanda pagb pãng Siõ, n yõgd kom-pugli Zɩɩda tẽnsẽ. B luula kug-zĩidba, nin-kẽems pa yãend waoogr ye. Ad-b sẽn dɩk neguus n tʋk kom-bɩɩba, tɩ kom-dibli tʋk raad n yõrdẽ. Zĩig ning b sẽn da sõsd n manegd tẽnga yelle, nin-kẽemsa ka le tigimd taab be ye. Kom-bɩɩba yĩma b kʋnd zĩiga. Sũ-noog sɛɛ zãng d sũurẽ. Kʋʋr yɩɩla n deeg d saooga zĩiga. Tõnd naama pugl fõkame n lʋɩ tẽnga, tõnd zãmba d Soaala tɩ pak-do. D sã n zi ne sũ-toogo, la d nina sã n moog ne yãbre, yaa Siõ tãnga sẽn lebg vɩʋʋgo, n lebg we-baas gõob zĩiga. Sã n ya ne yãmba, Soaala, y naama goeel vigla yʋʋm sẽn ka sɛɛb yĩnga. Boe tɩ y na n yĩm d yell zãnga? Y na n bas-d-la zãng bɩ? Wẽnemd-y tõnd sũurã n tees yãmba, Soaala, tɩ d sɩd lɛɛg n wa kẽ yãmba. Wa-y n kõo tõnd pĩnd zamaan noogã! Y na n sɩd bas-d-la zãng bɩ? Y sũura na n sɩd puuga ne tõnd woto fãa bɩ? M yʋʋma sẽn waa n na n pidẽ pis-tã, yʋʋmda kiuug a naas soaba la kiuuga rasem a nu raare, maam, a Ezekiyɛl, maan-kʋʋd a Buzi biiga, m da bee Kebar kʋɩlga noor ne pa-wetã. La ad-y sa-gãonga pilgame tɩ m paam Soaala likri. Kiuuga rasem a nu wã n da tõkd dĩm a Zoakim pa-weera yʋʋm a nu. Wakat kãng la Soaala-Wẽnd nuga tik maam. M zẽka m neng n gese: da yaa saag sobgo n zẽkd nug goabga ne sawad-kẽemde. Sawadga wulumda ne sa-yãgre. Vẽenem n da gilg sawadgã. Bugum n da yãng a tẽnsʋkã n pɩnd wa zũud sẽn yẽnegde. Mam yaool n yãee bũmb tẽnsʋka, bõn-vɩɩs a naase sẽn wẽnd ninsaalba. B fãa da tara nens a naase, la pɩgs a naase. B karsa ra yaa tɩrse, tɩ b nao wẽnd naaf na-bendo, n pɩnd wala zũud b sẽn duugi; Kanga n da yit b pɩgsa yẽokẽ; nug-pʋga ra yɛdg n teesa nensa la pɩgsa sẽn teesẽ. Pɩgs-zʋʋsa ra sɩɩsda taaba; nin-vɩɩsa ra teesa tɩrg n kẽnda n ka wẽnemdedẽ ye. Ned kam fãa ra tara nens a naase: ninsaal nenga, taoore, bõnyẽeg neng, rɩtgo; loalg neng, goabga; sɩlg neng, poorẽ. Pɩgs a yiibu n da yɛdge n tees yĩngri la b ra tɩ sɩɩsda taaba. Pɩgs a yiib n da lut b yĩngã. Ned kam fãa da teesa taoore n dabda. B da rabda b sẽn datẽ tɩ yĩnga pa wẽnemdedẽ ye. Nin-vɩɩsa sʋkã, b ra nee wa bug-saala. B ra nee wa bug-vɩlense, sẽn yãngd la b boogdẽ. Bugma ra tãoosda vẽenem, tɩ sa-yãgr ra yit a pʋgẽ. Nin-vɩɩs a naasã ra kẽndame la b watẽ; b zoeesa ra tʋʋla wa saag sʋʋga. Mam zẽka m nenga n gese la m yãee nin-vɩɩg fãa sɛɛgẽ gʋl sẽn sɩɩsd tẽnga. Gʋla ra pɩnda wala kug neer sẽn yãgd a toore. Gʋl a naasã fãa ra wẽnda taaba, tɩ yaa wala b kud-b lame tɩ ned kam fãa sog a to pʋgẽ. B ra tuta ween-vɩɩs a naasã n ka tol n wẽnemded b nao wã zut ye. Gʋla yalma ra labsame la b ra bolg n gilga ne bõn-pɩndem. Nin-vɩɩsa sã n kẽnda, gʋla kẽnda bãmb sɛɛgẽ; la b sã n n zẽkd yĩngri gʋla me naag n zẽkdame. Nin-vɩɩsa ra kẽnda b sẽn datẽ tɩ gʋla me naag bãmb n bilimdẽ. Nin-vɩɩsa raab la gʋla me ra tũuda. Woto nin-vɩɩsa sã n kẽnda, gʋla me tũud n kẽndame; b sã n yalse, tɩ bãmb me yalse, b sã zẽk yĩngri, tɩ bãmb me zẽke, tɩ b ra tũuda nin-vɩɩsa raabo. Bũmb wa roog sugri n da yɛdg bõn-vɩɩsa zutu, n yãgd wala wanzurfu. Sugra tẽngre, bõn-vɩɩsa ra tẽega b pɩgs a yi n tees taab tɩrga, n kees a yiibu n mobg b yĩngã. La nin-vɩɩsa sã n kẽnda, mam wʋmda b pɩgsa rãamde. A ra wẽnda mogr bʋrga, n wẽnd Pãng Naaba-Wẽnd dẽnna, n wẽnd tãp-sik-yãang bʋrga. Nin-vɩɩsa sã n da yalse, b manegd n põda b pɩgsã. Sugra zugẽ me bʋʋr n da sãte. B ra nee kug kẽeg me be sẽn da rɩg wa yaa zaoore la b pees n dɩgle, la kug kãng zugu bõn-vɩɩla sẽn wẽnd ninsaala n da zao. La mam yãeeme t'a soaba ra yãgda wa sãnem la yaa wa bugum n da gũbg-a. Woto a menga zãng da reegame n tãoosd vẽenem. Vẽenema sẽn da tão n gilga ra wẽnda saag gomtɩʋʋg sẽn mii n puk saag niib raare. Yaa Soaala-Wẽnnaam, yaa bãmb n da lik ne b ziiri. Mam yãendame, la mam lʋɩɩ m yãvabga la m wʋma ned sẽn gom ne-ma. Koɛɛga yeela maam: «Ninsaal biiga, yik yĩngri tɩ m na n goma ne foom.» Koɛɛga sẽn waa n gomd ne-ma, Wẽnd pãng n kẽe maam n kɩt tɩ m yals yĩngri la m kelgd sẽn da gomda ne maama. A yeel-m lame: «Ninsaal biiga, m tʋmda foom Israyɛl kamba nengẽ; b yaa tõatba, b yik n zaba ne maam. Wala b yaab rãmba, b zɩɩ n vʋʋs ne mam tõdgr ye. Ad nin-bãmba zuga yaa kɛgenga, b sũura kʋɩɩme la yaool n yaa bãmb nengẽ la m tʋmd-fo. Tɩ wilg-b tɩ yaa Soaala meng n gomde. Bãmb sẽn ya kɩɩsdb zãng kas, b kelgd tɩ b pa kelgd me, b na bãnge tɩ Wẽnnaam no-rɛɛs n be b sʋka. Sã n ya foom, Ezekiyɛl, da zoe-ba, da zoe b goama rabeem ye. B na n kɩɩsame tɩ f vɩɩma lebg wala b lob-f-la gõos la nams sʋka. Da zoe b goama rabeem ye; ra zoe-b tɩ b kʋɩɩsa b sũuri n yaa kɩɩsdb bala a yeyn-ye. Sõng tɩ m koeesa ta tõatba buudu. B nong bɩ a kelge, b nong bɩ b ra kelg ye. La foom, ninsaal biiga, kelge m sẽn na n yeel-fã, ra yɩ kɩɩsd wala bãmb ye. Yaag f noorã n deeg la f wãb bũmb ninga m sẽn na n kõ fooma.» Mam sẽn gese, nugu n zãad seb-pilimdi n teesd maam, a pilg-a-la mam taoore. B ra gʋlsa a nens a yiibã fãa. Bũmb a to ra ka be sebra pʋgẽ n zʋʋg yãbre, waasgo la sõngr kosg ye. Sẽn da gomda wã yeela maam: «Ninsaal biiga, bũmb ninga b sẽn tees foomã, wãb-a, wãb sebrã m sẽn tees fooma la f kẽng tɩ gom ne Israyɛl buudu.» Mam yaaga m noore, la b kɩtame tɩ m wãb sebrã, t'a le yeel maam: «Ninsaal biiga, rɩlg f f menga n tɩge ne sebrã m sẽn kõt fã.» M wãba sebrã la a ra yaa bʋgsgo wa sɩɩdo. Tɩ b le yeel maam: «Ninsaal biiga, kẽng a Israyɛl buudẽ wã n tɩ togs-b m goama. Yaa f buuda goama la f na n gome, ka gãgnens nengẽ la m tʋmd-f ye, yaa a Israyɛl buudẽ. Tõe tɩ m sã n da tʋm-f buud kʋʋng nengẽ, buud goam sẽn ya toore t'a wʋmb me ya toog ne-fo, tõe tɩ b baasẽ n kelg-fo. La sã n yaa a Israyɛl kambã, ad-b ka na n kelg-f ye, tɩ yaa maam la b pa rat n kelge. Israyɛl neba zʋg yaa zʋg yoogo, zu-kugr soab zʋgo. Ade, m na n kɩtame tɩ f me kʋɩɩs f sũura wa bãmba. Fo me yubla na n yɩɩ wa bãmb dẽnna, pa girda, pa gõmsde. M na n kõ-f-la keglem wa kut sẽn yũnugi, n kõ-f keglem sẽn yɩɩd pĩig rẽnna. Woto wã ra zoe rabeem ne b buuda sẽn ya kɩɩsdb buuda ye.» Sẽn da gomda wã yeela maam: «Ezekiyɛl, goam niyns fãa m sẽn na n togs-fã, bĩng-b f sũurẽ, kelg ne f tʋba fãa. Kẽng pa-weta nengẽ, f saam-biisa nengẽ, n tɩ gom ne ba. F na yeel-ba: ‹Ad Soaala-Wẽnd koɛɛga.› B nong bɩ b kelge, b nong bɩ b ra kelg ye.» Wẽnd Vʋʋsma zẽk-m-la yĩngri, la mam poorẽ, m wʋma bʋʋr kãsenga, m wʋma woto: «Soaala paam pẽgre, zĩig ning b sẽn puk b ziiri!» M wʋma nin-vɩɩsa pɩgsa sẽn da wẽed taaba, la gʋla me sẽn be b sɛɛgẽ wã bʋʋre. Ad-y bʋʋra sɩd yɩɩ kãseng-kãsenga. La Wẽnd Vʋʋsma sẽn da kẽ maama koomd-m lame, n dɩk-m n looge, tɩ m zĩ ne yɛɛsgo la yɩɩre. Mam taa Tel-Abib tẽnga, pa-weta nengẽ, pa-weta sẽn tɩ be Kebar kʋɩlga noora nengẽ. M paa b sʋka rasem a yopoe n ka mi m sẽn maande la m digda. Rasem a yopoe wã poore, Soaala-Wẽnd goma ne maam: «Ninsaal biiga, mam yalsa foom tɩ f lebg ned ninga sẽn na n yeel a Israyɛl t'a maan gũusgu. Fo n na n kelg m koɛɛga n deeg-a n taas Israyɛl. Wala m sã n dat n wilg yel-wẽn-maanda t'a rɩka sor n digd a kũum zĩigẽ tɩ fo ka sak n vẽneg-a t'a teem sore n paam n vɩɩnde, bãng tɩ yel-wẽnda soab na n ki-la a yel-wẽnda yĩnga la fo zug la m na n tʋk a kũuma taale. La fo sã n wilg nin-wẽnga la yẽe n ka tuub a wẽnema n zãag ne-a, a na ki a beegra yĩnga, la foo, f na fãag f yõore. D mak marsã tɩ nin-tɩrga n waa n bas zemsgo n kẽ wẽng maanego, dẽ na lebg yel-beed a yĩnga, a na ki. Fo sã n pa wilg-a t'a gũusi, a na n ki-la a yel-wẽnda yĩnga. M kõn le tẽeg a pĩnd yel-sõma ye la yaa fo zug la m na n tʋk a kũuma taale. La fo sã n wilg nin-tɩrga t'a ra maan wẽnga, t'a sɩd pa maane, a na n vɩɩndame tɩ bala fo n gɩdg-a, la foom, f na fãag f yõore.» Soaala-Wẽnd pãnga le koomd-m lame la b yeel-m lame: «Yik n ta bãoogẽ wã tɩ m gom ne-fo.» Tɩ mam yik n yi n ta bãoogẽ wã; la Soaala-Wẽnd le siga be ne b ziirã wa Kebar kʋɩlga noorã, tɩ mam lʋɩ yãvabga n kɩ m menga tẽnga. Soaala-Wẽnd pãnga le kẽe maam n kɩt tɩ m yik n yals yĩngri, la b goma ne maam. B yeel-m lame: «Lɛɛg n tɩ pag f meng f roogẽ. Ninsaal biiga, ade, b na n dɩka sẽbdse n sẽb-fo tɩ f pa le tõog n yi n kẽng neba sʋk ye. M na n kɩtame tɩ f zelemdã tabend f ragsendaka tɩ f lebg muka, woto fo kõn le tõog n sagl-b ye, tɩ bala b yaa tõatb buudu. La m sã n wa tar koɛɛga f sẽn na n deeg n taas-ba, m na wa n yaag f noorã tɩ f gome. F na gom ne-ba, n yeel-ba: ‹Soaala-Wẽnd n gomd ne-yã.› Kẽer na n sak n kelgame, kẽer me na n zãgsa kelgre tɩ buuda yaa bu-tõatga.» Soaala-Wẽnd paasa woto: «Ninsaal biiga, rɩk tãn-koeemde n dɩgl f taoore: sõog Zerizalɛɛm tẽngã a zugu. Mak wala bɛɛba kargame n gũbg-a n dat n lub-a; tu bogd n gilg-a, n me gũudb gasgo, n ning tãb-sika n gũbg-a kɛpi, yals b sẽn tar bũmb ning n tãad dotã n lubdẽ wã. Rɩk kut sẽn ya paklga n sele wala kut lalga, foom ne tẽngã sʋka. Ges tẽnga marsã wa a bɛɛb gũbg-a lame n sege, la yaa foo la bɛɛbã, la rẽ na yɩ makre Israyɛl kamba yĩnga. Gãande f nug goabga zugu la f sã n wa gãe woto, bãng tɩ f tʋka Israyɛl rĩunga yel-wẽnde f zugu la na n yɩɩ zɩɩb f yĩnga. M na n sõda raar n kõ-f tɩ f pa woto. Rasma sõor na n taa yʋʋma sõor. Yʋʋm niyns a Israyɛl rĩunga sẽn beege. Woto wã yaa rasem kobs-tã la pis-wɛ la f na zɩ a Israyɛl yel-wẽna taale. La f sã n wa sɛ rasem kobs-tã la pis-wɛ wã, f na wẽnemd n gãand f rɩtg nuga zugu la marsã yaa a Zɩɩda rĩunga yel-wẽndã taale la f na n zɩlg f menga, rasem pis-naase tõre. Yʋʋmd a ye beegr taale zɩta raar a ye. Dẽ poore f na wẽnemd n tees Zerizalɛɛm sẽn mak n dɩg f taoore t'a bɛɛba gũbg n segã; f na zẽk f kanga, bɩlgemde, n tees tẽngã, la f kãab-a m meng kãab-beedo. Ade, m na n maneg n za-f lame, woto f gãeeme la f kõn tõoge n lebg f nugu tɩ daarã sẽn sõda nan ka pids ye. Rɩk alkam pɛɛlga, alkam pugsgu, bɛnga la sũma la alkam kɛgenga. Kalem-b laok a ye pʋga n maan dɩɩbo. Dẽ n na n yɩ fo rɩɩbo rasem kobs-tã la pis-wɛ wã f sẽn na n gãand f nug-goabgã. Fo na n maga rɩ-kãng sutg a yi bala la rẽnda tog n seka f raar a ye fãa rɩɩbo. F tog n yũu kooma ne kẽgsgo; yaa koom wamde la f yũud daar a ye. Rɩɩbã f sẽn na n dɩ wã na n wẽnega alkam pugsgu miisdu; la f na n dõos-a-la ninsaal bĩn-koeems bugum zugu, Israyɛl kamba fãa nifẽ.» Soaala-Wẽnd paasame: «Yaa woto la Israyɛl kambã na n dɩ dɩ-rẽgdo, tẽng ninga m sẽn na n dig-b n tɩ kẽesa pʋgẽ.» Rẽ la mam yeel yã: «Ayo! Soaala-Wẽnde, m ka nin-dẽgd ye. Mam yãadmẽ tɛka n tãag marsã, mam zɩ n wãb rũn-kɩɩnga bɩ we-rũng sẽn yõke; n paas me nemd dẽgd buud zɩ n kẽ m noore ye.» Tɩ b na n leok-ma: «Be neere! M sakame tɩ f bas ninsaal bĩndã, la nag-bĩndu la f na n bao n segl rɩɩbã.» La Soaala meng n le paase: «Ninsaal biiga, ade, m na n menesa sẽn tõe n dɩk fãa n wẽ bur Zerizalɛɛm dãmb yĩnga. Zerizalɛɛm dãmb na fĩdsa b burã la b na n kẽgsa b kooma. Bala buri la koom na n paoogame, b fãa gill na n namsa al wʋsgo la b kõn põse, b yel-wẽna yĩnga.» Ninsaal biiga, rɩk sʋʋg sẽn dɩte, n tall-a wa barga n põng f zugu la f kõog f toɛɛnga. Mag f zoobda zɩslem la pʋɩ-b dʋr a tã. Rɩk rʋr a ye n yõog bugum tẽnga sʋka, b sã n wa wãa-a n sɛ. Rɩk rʋr a to wã n kʋʋs ne sʋʋgã n dʋʋg-ba n gilg tẽngã. Yãk rʋr a tãab soaba pʋgẽ n lob sobgo tɩ mam na pʋg-b ne m meng sʋʋga. La f na n yãka kõbdã sẽn kees bilfã n ning f fuuga loaabẽ. Bãmb la f na n yãkd n lobd bugmẽ. Bãmb n na n yãngd bugum ninga sẽn na n dɩ Israyɛl buuda gilli. Ad-m sẽn yete, maam y Soaala, yaa woto la m na n maan ne Zerizalɛɛm, tẽng ning m sẽn yals bu-zẽmba tẽnsa sʋkã. Zerizalɛɛm kẽedba tõdgame n ka reeg m sẽn kõ-b noy niynsã, n pʋg mam sẽn da gɩdg bũmb ningã. B pʋga wẽnga ne b sũuri n yɩɩg b yagsã, b wẽnema looga buud a taaba rẽnna. B ka reeg m noya, b tõdgame tɩ b kõn vɩɩnd wa m sẽn data ye. Rẽ n so tɩ maam, Naaba-Wẽnd gomd ne y woto: Yãmb n yɩ tõatba n yɩɩd tẽns niyns sẽn gũbg-b yãmba. Yãmb pa reeg m noya la y pa tũu m rog-n-mikã, n yaool n tũud tẽns a taabã sẽn gũbg yãmba rog-n-miki. Be neere! Soaala-Wẽnd n gomde, mam me zabda ne foom, Zerizalɛɛm, m na wɩnga ne f sɩbgre ninsaalba nifẽ. La m na n yika ne f kamba wala m sẽn zɩɩ n make, la m kõn le mak menga, tɩ y sɩd tʋmame tɩ nare. Yaa rẽ yĩnga la ba rãmba na n dɩ b kamba, tɩ kamb na dɩ b ba rãmba, tẽnga pʋga. M na n pidsa m sẽn kãabe, m na menes sẽn na n kell-bã, ween-vɩɩs a naasã. Dɩlla, maam, Naaba-Wẽnd, n yet yãmba tɩ y sɩd dẽgma m sõmblem zĩigã ne y manes yoodã, ne y wẽn-naands yoodã. Ad-y m na n menes-y lame tɩ sugr kaẽ ye. M ka na n bas-y ye. Bã-longdem bɩ kom n na n kʋ fo neba kẽere, tẽnga pʋga, tɩ sʋʋg kʋ kẽer lal-gũbra poore. M na sẽega ween-vɩɩs a naasã sẽn na n kell-bã la m na n pʋg-b-la ne m sʋʋga. M na n basa m sũura t'a fudgi n tʋm beed ne beedo. Woto m na rok m sũura ne-yã, la y na bãng tɩ maam, Naaba-Wẽnde, m gom ne-yã, m sẽn pa sak zãmb a woto buuda yĩnga. Tẽns niyns sẽn gũbg fooma la neb niyns fãa sẽn na n wa f tẽngẽ na yãend m sẽn kɩt t'a lebg bũmb ninga: raboog sẽn ka nenga. M na n pidsa m sẽn yalsã, m na n yika ne Zerizalɛɛm, n yik ne-a ne sũ-puur la zaba. A na n lebga a yagsa lado, a yagsa na n tʋʋs-a lame, tẽnga sãoong na n yɛɛs-b lame la bãmb me na tũ rẽ n maan gũusgu. Yaa Soaala-Wẽnd n gomde. M na n nams-y lame la m na n menes-y-la ne kom. Koma na n zab-y lame wala pɛɛm sẽn zẽne. M na n sãama y sẽn tigs n bĩngã tɩ y ki kom. M sẽn na n tool-y kom ninga la we-rũms niynsã na n kʋ-la y kamba. Bã-longdem, pãn-tõogo la zabr sʋʋga na n looga ne-yã. Yaa maam, Naaba-Wẽnde, n togs woto! Soaala-Wẽnd taasa maam koe-kãnga: «Ninsaal biiga, wẽnemde n tees Israyɛl tãmsã, la f gome ne a nebã. Bɩ b kelge! Ad maam, Naaba-Wẽnd, sẽn leokd sẽn be-b tãmsa zutu, kunkuba zutu, bogdẽ wã la bãadẽ wã: M na n taka zabre ne-yã, la m na n sãama y wẽn-faada waoogr zĩisi. B na sarma y maan-kugã, y wisda laase. Y wẽn-naandsa rota noore, yãmb wʋsg na n paa be. M na n yɛdga Israyɛl kamba sẽn ki wã b wẽn-naandsa taoore la m na n sẽega b kõaba n gilg b maan-kugã. Yãmb sẽn kẽed tẽns niynsa ka na n le yãend kẽedb ye, la b kõn le yãend ned wẽn-naandsa waoogr zĩigẽ ye. Y maan-kuga na n wãame n ka le tar tʋʋmd ye, y wẽn-naandsa, b na n wã-b lame, b na n menes-b lame, y wisda laase na n wãame, y sẽn naana fãa na n lebga tom. Yãmb sʋka wʋsg na n kiime. Woto la y bãngd tɩ maam la Soaala-Wẽnde. La m zabra sʋʋg na n keesa yãmb neb kẽere la bãmb la m na n sẽeg tẽn-zẽngẽ. B na tẽeg m yelle b pa-weera tẽngẽ. B na tẽeg tɩ m sẽn nams-b woto wã, yɩ-la b yama sẽn lak ne maama la b sẽn wẽnemd b nens n tees wẽn-naandsã. B sũur na n yaala ne b meng marsã b sẽn tʋm tʋʋm yooda yĩnga. Woto b na bãnge tɩ maam, Naaba-Wẽnd, da pa gomd vɩʋʋgẽ, m sẽn da waa n yeel-b tɩ b gũus tɩ yel-beed n na n lʋɩ b zutã.» Naaba-Wẽnd n gomd woto: «Vam-y y noore, n wilg y sũ-toogo, tib-y y nao la kaas-y n sãbs Israyɛl dãmba tʋʋm yoodã la b tʋʋm kɛgã. B bãng tɩ sʋʋg n na n menes-ba, bɩ kom, bɩ bã-longdem. Bã-longdem n na n kʋ sẽn be b yɩɩgã; sʋʋg n na n lub sẽn pẽ-bã; kom na n kʋ sẽn põs-bã, tẽnga wãab poore. M na n basame tɩ m sũura fudg n waag-ba. B yĩnsa na n sẽega tẽnga n naag ne b wẽn-naandsa, b maan-kuga sɛɛga, tãmsa la kunkuba zutu, tɩɩsa sẽn tob la sẽn gũma tẽngre, la zĩis niyns fãa b sẽn kʋʋd b wẽn-naandsa maando. Woto b fãa na bãng tɩ maam la Soaala-Wẽnde. M na n wilg-b-la m pãnga; m na n kɩtame tɩ b tẽngã, b sẽn kẽed zĩig ning fãa lebg raboogo, sɩngda zĩ-peen-daagã nug rɩtgo n ta Ribla, nug goabga. B fãa na bãng tɩ maam la Naaba-Wẽnde.» Wẽnd taasa maam koe-kãnga: «Ninsaal biiga, kelg maam, Naaba-Wẽnd, sẽn togsd Israyɛl buudu, Ad-f wãaba segl n sɛɛme, la tẽnga kɩreng ba a ye ka na n põs ye. Marsã y yell sɛɛme; m na n basa m sũura t'a fudgi n waag yã, m na n bʋ y bʋʋdo n sɩbg y tʋʋm yoodã. M pa na n ges a Israyɛl ne zoe-nif ye, m ka na n bas-a saal ye. M na n kɩtame t'a yao a tʋʋm dẽgdã a sẽn ket n maande. Woto la m na n kɩt tɩ y bãng tɩ maam la Soaala-Wẽnde. Ad-m sẽn le yete, maam, Naaba-Wẽnde: Yel-beed sẽn ka taare, n wate. Ad-y wakata taame, wakata taa n sɛɛme; m ne-a lame! Tẽnga rãmba, ya y wãaba yell la m gomda. Y sẽegra raar la m gomda. Bʋʋda raar kolgame. Sũ-nooga kaasg sẽn da kaasd tãmsa zutã, rabeem kaasgo n ledg a zĩiga. La marsã, kõn le kaoos tɩ m sũ-puura waag-y ye. M na n basame tɩ m sũura fudg n ta a tɛka. M na n kao-la y bʋʋdo n kɩt tɩ y yao n dol y tʋʋm yoodã. Mam nimbãan-zoeere kõn lʋɩ y zug ye, kõn paoog y ye. Y na n yao y tʋʋm yooda la y tʋʋm kɛga y sẽn ket n maandã. Woto y na bãng tɩ yaa maam, Naaba-Wẽnd, n sɩbgd-y. Ad daarã, ad-a sẽn wate: yãmb me la wã, yel-beeda me la wã. Pãn-tõog paasdame, wilg-m-menga paama pãnga. Pãn-tõog paama zĩiga, a rasaara zẽkame n tar pãbre. Bũmb ka na n kees ye. Y sõor na n boogame, y yẽesma na n loogame, y ziira na n sɛɛme. Wakata yẽrgame, daara kolgame; bɩ sẽn daada bũmb ra nams n kɩdem ye, la sẽn koosda me ra zoe bõn ye, tɩ bala m sũ-puura na n dɩɩ neba fãa gilli. Sẽn koos-a wã ka tõe n le reeg a sẽn koos ye, ba a sã n põse. Sẽn yet tɩ tẽnga gill na n wãame wã, na n sɩd yɩɩ boto. Nin-tɩrg sẽn ka le be sʋkã, sẽn na n põs-a me ka ye. Ba tõntõog peeb-ya, tɩ fãa gill segle n sɛ, ned ba a ye ka na n bob zabr ye, tɩ yaa ne buuda zãng la m sũura puug yã. Soya zutu, zabr sʋʋga; rota pʋsẽ, bã-longdem la kom. We-kɛɛnga yaa zabrẽ la b na n pa, tẽnga pʋga yaa kom la bãaga. Sẽn põs-ba na n zoe n dʋʋ tãmse wala watr-gũusdu, tɩ ned kam fãa tar waasgo, a beegr yĩnga. Nusa fãa na n lʋɩɩ vãbnega, tɩ rũma koosd taaba, B na yeelga sũ-pa-noang futu, ned kam fãa zĩ n yɩɩdame, yãnd sulga ned kam fãa neng tẽnga, ned kam fãa zug põngame. B na n loba b wanzurf sor zugu, la b sãnema na n lebga rẽgdo b yĩnga. Wanzurf bɩ sãnem kõn tõog n le fãag-ba, Soaala sũura sẽn na n puug raare. B ka na le paam n kõ noor ye, b ka na n le paam n da b sẽn dat ye, tɩ yaa wanzurfa la sãnema n wa ne b tudgri. B maana wilg-m-menga tɩ b ra tara laogo, wʋsg-wʋsgo. Be la b yãk n dõog wẽn-naandse, bõn-yaals sẽn ka sakd gesgo. Yaa rẽ yĩnga la Soaala yeel yã: m na n kɩt tɩ rẽ fãa yaal b sũuri. M na base tɩ sãamba wa fã b laogã, n bas tɩ nin-yaals sẽn ka mi bũmb waoogra tall fãa n loog wa b pʋɩɩre. M ka na n leok-b tɩ bũmbu b sã wa wɩɩbe n loog ne ro-sõnga sãnem ye. Tɩ sɩda nin-kʋʋdba n na n kẽ ro-sõnga pʋga n dẽgem-a. Maneg n kud bãeense, bi-beesa yĩnga, tɩ bala tẽngã pidame, a pida ne nin-kʋʋre a pida ne pãn-tõogo. M na kɩt tɩ bu-zẽmb sẽn yɩɩd b taab ne toolem wa reeg b zagsã. M na n sɛɛsa pãn-dãmbã wilg-m-meng la b tɩtaama, m na dẽgma b wẽn-naandsa waoogr zĩisi. Yɩɩr n wate, b na bao laafi la b kõn paam-a ye. Yel-beed ne yel-beedo n wate, kibar sẽn ka sakd kelgre n pʋgd a to. Yaa zaalem la b kot bãngda sẽn na n wa ne Wẽnd koɛɛga; maan-kʋʋd ka le tar zãmsgo n na n zãms ye, nin-kẽems ka le sagend ye. Kũum na n lʋɩɩ na-yiri, sũ-sãang na n dɩɩ rĩm-biiga, talsa zĩi ne rigbu. M na n sɩbga wala sẽn segde; bʋʋda me na n bʋʋ ne zemsgo. Woto b na bãng tɩ maam la Soaala-Wẽnde.» Pa-weera loogr yʋʋmd a yoob soaba, a kiuug a yoob soaba, kiuuga daar a nu soaba, maam da zĩ m yiri t'a Zɩɩda nin-kẽembã ra zĩ m taoore. Beelẽ, Soaala-Wẽnd nuga waa vugr bala n tik maam. M da getame la ade: bõn-vɩɩla sẽn wẽnd ninsaala, n lik-m. Sɛɛga tɛka n dabd tẽngrã ra yaa bugum; sɛɛga tɛka n dadb zugã ra yãnga ne vẽenem sẽn ya moomd yʋs. Bũmb n tẽeg wa nugu n kolemd mam zoobdã. Wẽnd pãnga zẽk-m-la yĩngri la m yãeeme tɩ b tall-m lame n taas Zerizalɛɛm. B taas-m-la tẽnga pʋgẽ, nug goabg noora sẽnẽ. Zĩ-kãng la b ra yals wẽn-naand a ye togsende. Bõn-kãng yãeeb ra yĩida Naaba-Wẽnd sũuri. A Israyɛl Wẽnnaama lik-m-la ne b ziiri wala b sẽn da maan bãoogẽ wã. B yeela maam: «Ezekiyɛl, zẽk f nini n ges nug goabga.» Tɩ mam zẽk m nin n ges nug goabga. Maan-kugr n da be nug goabga. Maan-kugra sẽn da be roog ninga noorẽ, b ra zaoolga Naaba-Wẽnd nif sẽn ka rat yãend a soabã. Dẽ la b yeel maam: «Ninsaal biiga, f ne b sẽn maan la? A Israyɛl rooga maanda wɩɩbdo sẽn na yɩlẽ tɩ m zãag ne m ro-sõngã. Ad-f na le yãee wɩɩbd a taaba sẽn zem woto.» B talla maam n dig yɩng sɩmannã. M mikame tɩ lalga pooga võore tɩ zãonga pʋg tonnẽ. Tɩ b yeel-ma: «Ninsaal biiga, yalg lalga võorã.» Tɩ mam yalg-a tɩ lebg noore. Tɩ b yeel maam: «Kẽ n ges wɩɩbd niyns bãmba sẽn maand ka!» Mam kẽe n gesame; da yaa gʋlb la b kar yã, n makd wiis buud fãa la rũms yoodo, n paas a Israyɛl sẽn waoogd wẽn-naands niynsa, bãmb n pid lalsã n karg n sege. La neb pisopoe, Israyɛl roogã nin-kẽemse, n da yɛs wẽn-naandsa taoore. A Safã biiga a Yazaniya da yɛsa bãmb sʋka. Ned kam fãa ra zãada wisdu laag a nugẽ. Wisda yũuga ra zẽkdame. M wʋma koe-kãnga: «Ninsaal biiga, fo nee Israyɛl rooga nin-kẽemb sẽn maand bũmb ning, likẽ wã, ned kam fãa a wẽn-naanda sẽn zaolgẽ la. Bãng tɩ yaa woto la b ra gomd ne taaba: ‹Soaala ka le rat n yãend-d ye, Soaala loog n basa d tẽngã.› » Koɛɛga le paasa woto: «F na yãend wɩɩbd a taab wʋsgo sẽn zem woto b sẽn le maande.» B talla maam n tees wẽnd dooga nug goabg noorã. Pagb n da zĩ be n yãbd a Tamuz. Tɩ b sok maam: «F neeme-la, ninsaal biiga? F na le yãend wɩɩbd a taab wẽnem sẽn yɩɩd wã n paase.» La b talla maam n kẽ pʋgẽ sɩmannã. Mik ro-sõnga noorẽ, zãonga la maan-kugra sʋka, neb sẽn ta pisi la a nu n da be be; b zãnkudgã ra teesa ro-sõngã tɩ b nenga tees yaanga. B ra wõgemdame n waoogd wĩntoogã. Tɩ Naaba-Wẽnd yeel maam: «F yãeeme-la, ninsaal biiga? Bãng tɩ wɩɩbda sẽn maand ka wã ka sek Zɩɩda tẽnga rãmb ye tɩ b na n pids-a ne pãn-tõogo n le sɩng m beegre la m sũur yikri. Taa maam marsã tɩ m me na n yik m sũuri. M kõn ges-b ne nimbãan-zoeer ye. B nong bɩ b kaas n kos m sõngre, m kõn kelg-b ye.» Rẽ poore m wʋma Soaala sẽn tãse: «Wa-y yã, yãmb fãa sẽn tog n sɩbg tẽngã. Ned kam fãa wa ne a sãoong teedo!» Rẽ la neb a yoob yi rigno-kãsengã, nug goabga sẽnẽ n wa, ãnkam fãa ne a wãab teedo a nugẽ. Bãmb sʋka ned a yembre n da yer fu pɛɛlga n sẽbg a sɛɛgẽ b sẽn tar bũmb ning fãa n gʋlsdẽ. B fãa kolgame la b yalsa zũuda maan-kugr sɛɛga. A Israyɛl Wẽnnaama sẽn da lik ne ziir malɛgsa zugẽ wã zẽkame n tees wẽnd dooga dignoore. La b boola ned ningã sẽn da yera fu pɛɛlgã n loe a sɛɛgẽ b sẽn tar bũmb ning fãa n gʋlsdẽ wã. B yeela nin-kãnga: «Saag Zerizalɛɛm, la f sẽn yãend ned ning fãa t'a kũmdẽ la a wiisdẽ, wɩɩbda fãa sẽn maand tẽngã pʋgẽ wã yĩnga, bɩ f bẽeg makre a rĩirẽ.» La mam wʋma a sẽn yeel neb a nu wã: «Pʋg-y nin-kãnga, tẽnga pʋga, n kʋ nebã. Nimbãan-zoeer da yõk-y ye; da bas-y ned ba a ye ye. Kʋ-y nin-kẽemba wala kom-bɩɩba la kom-pugli, la pagba wala kom-bõonego. Kʋ-y b fãa gilli. Da sɩɩs-y ned ning fãa sẽn tar-a makrã b rĩirẽ ye. Sɩng-y ka, m do-sõnga pʋga.» Rẽ la b sɩng kʋʋbo, la b sɩnga ne nin-kẽembã sẽn da yɛs wẽnd dooga taoorã. Soaala kõo noore tɩ b rẽgem doogã n pids a sɩmandã ne kũum la b yaool n teem zĩiga. La rẽ sẽn maane, b yiime n kẽ tẽngã n tar a wãabo. Maam a Ezekiyɛl da yɛsa m ye tɩ kʋʋba kʋʋda, tɩ m na n lʋɩ yãvabga la m kelemdẽ: «Wii! Soaala-Wẽnde, y sũura sẽn puug woto ne Zerizalɛɛma, yãmb datame n menes a Israyɛl kamba sẽn kella laa?» Tɩ b na n leok-ma: «A Israyɛl la a Zɩɩda rooga beegra labsa, a ka tar tɛk ye, tẽnga fãa pida ne zɩɩm, zemsg ka ye, tɩ b lagem n gomd woto: ‹Soaala toog ka le be ne tõnd ye, tɩ b loog n basa d tẽngã.› Bãng-y tɩ m kõn maan nimbãan-zoeer ye, m kõn bas ned ba a ye ye! M na rɩk b manesmã taale n zɩlg-ba.» Dẽ marsã la ned ninga sẽn da yeelga fu pɛɛlgã n sẽbg a sɛɛgẽ bũmb ning fãa b sẽn tar n gʋlsdẽ wã, nin-kãng waa n goma a tʋʋmna yelle. A wilga Soaala woto: «M tũ-la y raaba zãnga!» M zẽka m neng n gese, la malɛgsa sẽn da be zĩig ninga yĩngra ra tonda neere wa koobr gelle, n mams-mams wa naam zaoore. La Soaala-Wẽnd yeela sẽn da yera fu pɛɛlgã: «Tũ vɩʋʋga sẽn bas gilga malɛgsa tẽngr la kolg n yãk bug-saala, ne f nusi, la kẽng n tɩ fẽeg-b tẽnga pʋga.» La neda kolga m nifẽ n yãk bug-saalã. Neda sẽn waa n dabd n na n yãk bug-saalã tɩ malɛgsa ra bee wẽnd dooga nug rɩtgo la sawadg n kẽ n pid dooga noore. Soaala-Wẽnd ziirã, zẽkame n zʋʋg malɛgsã la a teesa wẽnd dooga noore. Sawadg n lɛɛg n pid wẽnd doogã, la wẽnd dooga taoor ra yãnga ne Wẽnd ziira vẽenem. Malɛgsa pɩgsa bʋʋra da sãtame n tat yɩnga wa Soaala-Wẽnd pãng soaba koɛɛga, b sã n gomda. Fu-pɛɛlga soab da yɛs n yega gʋlã, Soaala sẽn waa n na n yeel-a t'a kolg malɛgsã n yõng bug-saala, bug-toaalgẽ wã. Malɛk a ye tẽega a nug tẽngre n yãk bugma n pids fu-pɛɛlga soab nusi t'a tall n looge. Bũmb wala ninsaal nusi n da tond malɛgsa pɩgsẽ. Mam sẽn gese, m yãee gʋl a naase: gʋll a ye malɛk fãa sɛɛgẽ. Gʋla ra tãoosda vẽenem wa kug neeba sẽn tãoosdã. Gʋla ra wẽnda taaba la yaa waa b ra sog n kẽe taaba, tɩ ãnkam be a to tẽnsʋka. B ra tõe n kẽn n teesa ween-vɩɩs a naasã n ka tol n wẽnemd b zug ye. B ra bilimdame n tees nensa sẽn teesẽ n ka wẽnemd goabg bɩ rɩtg ye. La malɛgsa zãnga, b poore, b nusi, b pɩgsa, b gʋl a naasa fãa, ra tãoosda bug-pãrse. La mam wʋmame tɩ b boond gʋla yʋʋre tɩ Galgal, sɩlmande! Malɛk fãa da tara nens a naase: pipi neng ra yaa malɛk nenga; yiib soaba da yaa ninsaal nenga; tãab soaba ra yaa gɩgemd nenga, tɩ naas soaba ya sɩlg nenga. Malɛgsa zẽka yĩngri. Ra yaa malɛgs niyns m sẽn da yãend Kebar kʋɩlga noorã. Malɛgsa sã n da kẽnda, gʋla me kẽnda ne bãmba; b sã n yɛdg b pɩgsã n na n yɩk yĩngri, gʋla me naagd n zẽkame. B sã n yalsdẽ, bãmb me yalsdame, la b sã n yɩkdẽ bãmb me tũudame n yɩke, tɩ bala malɛgsa raab la gʋla me ra tũuda. Soaala-Wẽnd sẽn da likã zẽka ne b ziirã wẽnd dooga noore n tɩ sig malɛgsa zugu. Bãmb yɛdga b pɩgsã n yɩk mam nifẽ, bãmb ne b gʋlã, n looge. B tɩ yalsa yaang dignoorã, la a Israyɛl Wẽnnaama ziira vẽenem da yãnga b zugẽ. Kebar kʋɩlga noore, m da yãee malɛgs a woto tɩ Israyɛl Wẽnnaama ra zao b zugu. M bãngame tɩ yaa malɛgse. Ãnkam fãa ra tara nens a naase, pɩgs a naase la wala ninsaal nusi a pɩgsa yẽokẽ. B nensã ra wẽnda nens niyns m sẽn da yãend Kebar kʋɩlga noore. Ãnkam fãa ra teesa a taoore n kẽnda. Soaala pãng kolemda maam n kẽng wẽnd dooga yaang no-kãsengã. Neb pisi la a nu n da yɛs be; bãmb sʋka m yãenda a Yazaniya, a Azur biiga n paas a Pelatiya, a Benaya biiga. Bãmb la tẽnga taoor dãmba. Soaala-Wẽnd yeela maam: «Ezekiyɛl, ad yaa nin-bãmba n dat n tʋm tʋʋm yoodã la b yelgd sagl yoodã, Zerizalɛɛm pʋgẽ. B yetame: ‹Na kaoos tɩ b le me rot ka. Tẽnga yaa wa rʋko la tõnd la nemd n be a pʋgẽ.› Woto wã, Ezekiyɛl, gom bãngr goama n luk b bãongo.» Wẽnd pãnga kẽ-m lame la b yeel-m lame tɩ m gom woto. Ad Soaala leokre: «M mi-la y sẽn walemd taaba la m mii tagsg ning sẽn wat y yamẽ, Israyɛl kamba! Yãmb kʋʋ neb ka tɛka, tẽn-kãnga pʋgẽ, n kɩt tɩ soya fãa rɩg ne kũum. Rẽ n so tɩ maam, Naaba-Wẽnd, gomd ne-y woto. Tẽnga sɩd wẽnda rʋko la nemda yaa yãmb sẽn kʋ b rãmbã. Sã n ya yãmb mense, m na n dig-y lame n yiisi. Yãmb sẽn zoet zabr sʋʋgã, yaa zabr la b na n zab ne-yã. Yaa maam, Naaba-Wẽnd, n togsd rẽnna. M na yiis-y tẽngã n bas-y tɩ y lʋɩ sãamb nusẽ, la m kao y bʋʋdo n paalg yã. M na n tʋma zemsga sẽn dat tɩ m tʋm tʋʋm niynsã a Israyɛl tẽn-peelmẽ la y na n paa zabrẽ, la woto y na bãng tɩ maam la Soaala-Wẽnde. Tẽn-kãngã kõn yɩ yãmb rʋk ye, yãmb me kõn yɩ a pʋgẽ nemd ye. Yaool n yaa a Israyɛl soolma pʋgẽ la m na n kao y bʋʋdo n sɩbg yã. Woto y na bãnge tɩ maam la Soaala-Wẽnde, ned ninga yãmb sẽn pa reeg a soab noya la y pa lak ne a soab sẽn gɩdgã, n yaool n tũud buud niyns sẽn gũbg yãmba rog-n-mikã.» La maam, a Ezekiyɛl, sẽn waa n taasd gom kãensã, a Benaya biig a Pelatiya, Naaba-Wẽnd sẽn keese, wẽneg n bee kũum. M lʋɩ-la m yãvabga la m kelmame: «M ba-yee, y na n kʋʋ Israyɛl kamba fãa sẽn kelle, Soaala!» Soaala yeel-m lame: «Ninsaal biiga, bãng tɩ Zerizalɛɛm kẽedba sagenda Israyɛl kamba fãa sẽn be pa-weere, fo tẽngen-bi-taase, fo saam-biisi, la b yet-b lame: ‹Zãag-y ne Soaala-Wẽnd tẽngã tɩ ka yẽ bal la b rɩk n kõ tõnd ye.› Woto wã togs b sẽn tall b rãmb n kẽng pa-weerã, tɩ maam a Wẽnd n wilgd-ba: ‹M sẽeg-y-la tẽn-zẽnsẽ, tẽn-sãamsẽ la ne rẽ fãa m be-la y sʋka, wa m do-sõngẽ.› Bɩ f taas-ba maam, Naaba-Wẽnd, sẽn kãab-bã. Taas-b woto: ‹M na n yiis-y-la bu-zẽmba sʋka, n yiis-y tẽns niyns m sẽn da sẽeg yã, n le tall-y n wa kẽes Israyɛl. Y sã n leb be y na menes tʋʋm yooda la wẽn-naandsa waoogre. M na n kõ-la y fãa gilli sũur a ye; y yama me na n lebga yam paale. M na n teka y sũura sẽn kʋɩ wa kugrã tɩ m goama tõog n bʋd a pʋgẽ. Woto y na reeg m noya la y lak ne m sẽn gɩdgã la y na lebg m buudu tɩ m me lebg y Wẽnde, La sã n ya sẽn waoogd-b nin-naandsã, sẽn tũud-b b sũur daabo la b maand wɩɩbdo, m na sɩbg-b wala b beegra sẽn tog ne. Maam, Naaba-Wẽnd, wilgd-y-la woto.› » Malɛgsa yɛdga b pɩgsã tɩ gʋla me sɩng bilingu. Rẽ t'a Israyɛl Wẽnnaama ziira vẽenem da yãgda bãmb zugẽ. Dẽ poore Soaala sẽn da lik ne ziira zẽkame n tees tẽnga tẽnsʋka n tɩ yals tãng ning sẽn be Zerizalɛɛm yaanga zugu. Wẽnd pãnga koomda maam n tall-ma n kẽng Babilon tẽnga, pa-weta sʋka. Dẽ marsã la m ka le yãend bũmbu. Soaala sẽn kɩt tɩ mam yãend bũmb niynsa fãa, m dɩkame n togs pa-wetã. Soaala-Wẽnd goma ne maam: «Ninsaal biiga, ad fo sẽn vɩ ne b rãmba yaa tõatb buudu; b tara nini, gesg yĩnga, la b ka rat n yãe ye; n tar tʋba, wʋmb yĩnga, la b ka rat n wʋm ye, tɩ bala b yaa tõatba a yeyn-ye. La foom, ninsaal biiga, segl pa-weoog teedo la f segl f pa-weer loogr wĩntoogo, neba fãa nifẽ. Yi f sẽn be tẽng ningã n tɩ kẽ tẽng a to. Yi neb fãa nifẽ. Daar bɩ b bãng b kɩɩsga sẽn ta zĩig ninga. Bɩ f maneg f teedã wa pa-weoogo b nifẽ, wĩntoogo. La zaabre bɩ f yi b nifẽ, wala pa-wetã sẽn mii n yitã. B nifẽ bɩ f poog lalga võore n tũ be n yiis f teedã. Bɩ b yãend tɩ f palgda teedã f bãgdo n lood ne lika. F meng na n luda f nenga n ka mi f sẽn dabdẽ ye. Yaa woto la m yet tɩ f wilg Israyɛl kamba yell ning sẽn na n pak-ba.» Mam maana wala Soaala sẽn kõ maam noor ningã; wĩntoogo m sɩd manega m teedã wa pa-weoogo, la zaabre m meng pooga lalga võore. Neba yãend-m lame tɩ m lood likẽ tɩ m teed palg m bãoko. Vẽkembeoogo yibeoogo, Wẽnd goma ne maam: «Ninsaal biiga, m miime t'a Israyɛl roogã, tõatb buudã, sok-f lame tɩ bõe la f maand woto. Yeel-ba tɩ Soaala-Wẽnd ratame tɩ sẽn dɩta naam Zerizalɛɛm la Israyɛl kamba sẽn be tẽn-kãnga maan gũusgu. Togs-ba tɩ f maana woto n na n wilg-b yell ning sẽn na n pak-ba: b na n tall-b lame n loog pa-weere. Sẽn dɩta naama na n palga a teed a bãokẽ n yi ne yʋngo. B na n pooga lalga võore t'a tũ be n yi. A na n luda a neng n kẽnd n ka mi a sẽn dabdẽ ye. Maam Naaba-Wẽnde, maam n na n gãneg bẽdgo n yõk-a. M na n tall-a lame n kẽn Babilon dãmb tẽnga. A nif kõn yãend Babilon tẽngã, la yaa be la a na n ki. A poorẽ dãmba fãa, neb niyns sẽn gũud-b yẽ, a tãb-biisa fãa, m na n sẽeg-b-la zĩis fãa n zẽk zabr sʋʋg n pʋg-ba. M sã n wa sẽeg-b bu-zẽmb sʋka, n sẽeg-b tẽn-zẽnsẽ b na bãnge tɩ maam la Soaala. M yaool n na n basa neb kẽer tɩ b põs sʋʋga, la kom la bã-longdem. Nin-bãmb na togs b sẽn na n tɩ kẽ tẽns niynsã, a Israyɛl tʋʋm wẽna sẽn yɩ a soaba. Tẽn-bãmb dãmb me na bãnge tɩ maam la Soaala-Wẽnde.» Naaba-Wẽnd le paasame: «Ninsaal biiga, dɩ f rɩɩbo la f rigda, yũ f koom ne sãmbse la yɩɩre. F na yeel tẽnga gilli tɩ Soaala-Wẽnd n yete: ‹Zerizalɛɛm dãmba sẽn pa Israyɛl tẽn-peelmẽ na n dɩta b rɩɩbo la b yũud b kooma ne yɩɩre la sũ-beedo. Sɩda b tẽnga na n wãame tɩ tẽnga rãmb pids-a-la ne pãn-tõogo. Tẽnsã na n lebga vɩɩdo, pʋta na n lebga zĩ-pɛɛla la woto y na bãng vẽenega tɩ maam la Soaala-Wẽnde.› » Wẽnd gomda taa maam n yeele ma: «Ninsaal biiga, bõe tɩ b yelgd yelbũnd kãng Israyɛl tẽnga poorẽ: ‹Raara paasda raare tɩ bãngr gomd ba a ye yaool n ka pidsdẽ?› Be neere! Yeel-ba tɩ maam, Naaba-Wẽnd kõn le bas tɩ b wẽ yelbũnd kãnga ye. B sẽn na n wʋme yaa tɩ bãngdba sẽn togsa fãa pidsga wakat taame. Israyɛl zakẽ wã bãngr fãado la wilgr faad kõn le zĩnd ye. Yaa maam, Naaba-Wẽnd n gomde la m sẽn yeel taasda a wakato. Ad-y na n yɩ-la y nifẽ, tõatb buudu, la m na pids m sẽn togse. Maam n gomd boto, maam, Naaba-Wẽnde.» Wẽnd kell n talla woto: «Ninsaal biiga, ad Israyɛl rooga rãmb yetame tɩ fo sẽn yet tɩ f nee bũmb ning marsã wã kõn taase tɩ raar ka sõd n paas ye, tɩ la y sẽn togsd bãmb poorẽ wã yaa zamaan sẽn loog raar zãr yɛla. Woto wã yeel-ba tɩ maam, Naaba-Wẽnde, na n pidsa m sẽn togse la kõn le kaoos ye. Maam n yeele.» Soaala-Wẽnd goma ne maam woto: «Ninsaal biiga, neb niyns sẽn yet tɩ b yaa bãngdbã, Israyɛl tẽn-peelmẽ, la b gomd b meng bãngr goama, luk b fãa bãongo. Yeel-b tɩ b kelg mam goama. La ad maam, Naaba-Wẽnd sẽn togsde: yel-beed n na n lʋɩ yalem-daada zutu. B tũuda b meng yam n yãet b zirẽ-be-yãeebo. Israyɛl, ad-f bãngdba wẽnda raboodẽ we-yũusi. Bãngdba pa tɩ sõng n le yik lalga sẽn wã wã la b pa me lalga n na n lill Soaala sũ-puura raar zabra ye. B gomda likr b sẽn yãend b yamẽ yelle, la yaa zirẽ-beedo. B yetame: ‹Woto yaa Soaala koɛɛga› la maam, Naaba-Wẽnd, yaool ka tʋm-b ye. B bas n tẽedame tɩ m na n yeelame tɩ b nee yellã, la yaa zaalem, b yagda zirẽ n yaool n zĩ n gũudẽ tɩ m maan bũmb n kõ-b bʋʋm. La ayo, m yet-b lame: ‹Y sẽn gomd tɩ Soaala koɛɛgã,› yaa zirẽ bal la y yagda; y yetame tɩ yaa mam koɛɛg la y taasda, la m yaool n pa gom ne y ye. Ade, maam n yete, maam, Naaba-Wẽnde, y sẽn saad n yelgd y sẽn gãand n zãmse la y zirẽ-beedã, m na n yika ne-yã. M koɛɛga, maam, Naaba-Wẽnd koɛɛga la woto. M na n wilga m pãnga ne bangdb niyns sẽn saad n togsd b sẽn gãand n tagse la b yelgd b zirẽ-beedã. M ka na n le bas-ba m neba sʋk ye, b yʋʋr meng kõn gʋls Israyɛl buuda kamb sʋk ye la b kõn leb b tẽngẽ ye. Woto la b bãngd tɩ maam la Naaba-Wẽnde. Bala, b tudgda m nebã n gomd laafi yelle, tɩ laafi yaool n kaẽ ye. Mam buuda neb n met lalgã, tɩ bãmb tɛk ya goora fẽebo. Yeel sẽn fẽed-b goorã tɩ lalga na n lʋɩɩme. Sa-luk n na n wa ne sapɩlem, sob-raoog n na n fão-a. Lalga sã n lʋɩ, b na sok yãmb y goora fẽeb yõodo. Sɩd yaa woto la m togsd yãmba, maam a Naaba-Wẽnde: M sũura na n yikame la m na n kaoo sob-raoogo tɩ m sũ-fõorã wa ne sa-bɛda. M sũ-puura na n toola sapɩlem sẽn na n kao fãa a sor zugu. M na n sãama lalgã y sẽn bolã, n lub-a tẽnga, n buk sẽn da me n sut tẽngã, tɩ fãa tond yɩng marsã. Lalga na n lʋɩɩme n pãb yãmb n kʋ. Rẽ la y bãngd tɩ maam la Naaba-Wẽnde. M na n basa m sũura t'a fudg a raab tɛka n sãam lalga la neb niyns sẽn fẽeg-a goorã. B na yeel-y: ‹Lalga lʋɩɩme, sẽn da fẽed-a goora me loogame, bãngdba me loogame, bãngdb niyns sẽn da gomd Zerizalɛɛm poorẽ n yet tɩ na zemse, tɩ bũmb yaool n ka zemsd a to ye.› Woto la m wilgda, maam, Naaba-Wẽnde. La foom, Ezekiyɛl, wẽnemd n tees f buuda pagba sẽn saad n gomd b meng-b-toore bãngr goama la luk b fãa bãongo. Wilg-b tɩ yaa ne bãmba la maam, Naaba-Wẽnd, gomd woto: ‹Yel-beed na n lʋɩ-la y zugu. Pɛɛl la yãmb wʋgd n loet neba nug-sũgsẽ. Y wʋgda nin-bɛd la kom-bõones yĩnga, pɛɛl sẽn na n lud neng n paam tɩ vɩɩma lebg yãmb soolem. Bõe tɩ yãmb dat tɩ y meng vɩɩma pa y soolmẽ tɩ neb a taaba rẽnd yaool n lebgd yãmb soolem? Maam, Naaba-Wẽnd yeta yãmb pagbã tɩ y paoogda maam, m neba taoore, nug pʋgẽ alkam bɛɛla la bur gɩrse raab yĩnga. N paas me, y sẽn dõogd zirẽ n kõt m nebã sẽn tẽed yãmbã, y kʋʋda neb sẽn pa tog ne kũum, la y basd vɩɩse neb sẽn pa tog n vɩɩnde. Yaa rẽ me yĩnga la maam, Naaba-Wẽnd, na n yik ne-yã, y pɛɛla poorẽ, pɛɛla sẽn loet y taaba vɩɩma pãnga. M na n kẽes-b lame n lood-b kamsẽ, la m na fãag y sẽn yet tɩ y sẽba b rãmb vɩɩma. M na n kẽesa pɛɛlã sẽn vilnengã la m na fãag m buudã y nusẽ. Y kõn le soog-b ye la woto y na bãng tɩ maam la Soaala-Wẽnde. Yãmb zirẽ-beedã menesa nin-tɩrsa raoodo. Ka bãmb la m yaool n da rat n sɩbg ye. Woto me y pirsa nin-wẽnsã tɩ b kell n dɩk b so-wẽngã sẽn wat ne b kũum. Bãng-y tɩ y sẽn yet tɩ y neeme wã sɛɛme. Y kõn le saa n yelg zirẽ-beed ye. M na n fãaga m buudã y nusẽ. La rẽ me la y bãngd tɩ maam la Soaala.› » Daar n zĩndi tɩ Israyɛl nin-kẽemba kẽere wa maam a Ezekiyɛl nengẽ n na n sok-m bũmbu. La Wẽnd taasa maam b koe-kãnga: «Ninsaal biiga, nin-bãmba sẽn gãd b yamẽ, yaa b wẽn-naandsa bala. B pʋgd-b lame n ka mi tɩ rẽ n wat ne b yel-wẽnda ye. B ra tẽ tɩ mam na n basame tɩ b sok-m bũmb ye. Dɩlla wilg-ba maam, Naaba-Wẽnd sẽn leokd-b: ‹Israyɛl ned sã n lebg wẽn-naandsa yamba, a sã n bas tɩ sẽn lubd-a yel-wẽndẽ wã gãd-a, t'a baas n wat n na n sok bãngda, a bãng tɩ yaa mam meng m toore n na n leok-a. M na ges a sẽn pʋgd wẽn-naands niynsa sõor sẽn zem to-to. M leokra na n yɛɛsa sẽn da zãag b mens ne maam, b wẽnd-naandsa yĩnga.› To be neere! Yeel a Israyɛl roogã tɩ woto la Soaala gomd ne ba: ‹Teem-y zʋgo, bas-y wẽn-naandsa pʋgbo, gãneg-y y tʋʋm yoodã.› Israyɛl biig bɩ sãan sẽn zĩ Israyɛl tẽn-peelmẽ sã n sak n lebg a wẽn-naandsa yamba, a sã n bas tɩ sẽn lubd-a yel-wẽndẽ wã gãd-a t'a baas n wat n na n sok bãngda n bãng m leokre, yaa mam menga n na n leok-a m toore. M na zab ne nin-kãnga la b na gom a yelle la b na maan baobg a poorẽ; m na yiis-a buudẽ la rẽ me na paa y yamẽ tɩ maam la Naaba-Wẽnde. La bãngd sã n belg a meng n leok a menga toore, yɩta mam meng n daag-a. M pãnga la m na n wilg yẽ soaba la m na n menes-a-la m buud a Israyɛl sʋka. Bãngd a woto buudu la sẽn sok-a yẽ wã, b yiiba fãa tʋka b yel-wẽnda taale n tog ne sɩbgre. Woto a Israyɛl dooga kõn leb n zãag ne maam ye, a kõn le rẽgem a menga ne a yel-wẽna sẽn ka tɛka ye. B na n lebga m buudu, tɩ mam lebg b Wẽnde. Woto la m da tar n na n leok-ba, maam, Naaba-Wẽnde.» Wẽnd goma ne maam n yeel-ma: «Ninsaal biiga, d mak wala tẽng n beeg maam n bas maam. Ad-y m na n wilga tẽn-kãnga m pãnga, m na n menesa bura a sẽn da kees a meng yĩnga. M na sɩbg-a ne kom, m na menes tẽnga pʋga ninsaalb la rũmsi. Ba neb a tãabo wala a Nowe, a Daniyɛl la a Zoob, sã n da beẽ tẽng kãng pʋga, nin-bãmba a tãabã tũudma na n fãagẽ-la bãmb yõor bala. Ned a to kõn paas ye. Tõe meng tɩ m bas tɩ rũm-toos kẽ tẽngã. Tẽnga na n lebga we-raoogo, tɩ rũmsa na n kʋ neba fãa. Rũmsa rabeem yĩnga ned kõn saag n tag be ye. Ba nin-bãmba b tãaba ra beẽ tẽngẽ wã, bãmb b tãab bal n na n põsẽ. Soaala-Wẽnd n yeele. Tẽnga rãmb kõn tõog n fãag b meng kamb ye, la tẽnga na n lebga zĩ-peen-daaga. Ka rẽnd bɩ m wa ne zabre tẽnga pʋga, n bool tãnsoab a ye ne a tãb-biisi tɩ b wa zɛ tẽngã la b menes a nebã ne a rũmsã. Nin-bãmba b tãabã sã da beẽ tẽn-kãng pʋga, yaa bãmb bal n na n põsẽ. Wa m sẽn vɩ wã, maam, Naaba-Wẽnd n togsd rẽnna, b kõn tõog n fãag b meng kamb ye. Ka rẽnd bɩ m tʋm bã-longdem, n wilg m sũura sẽn puugã ne bãag sẽn na n kʋ tẽnga neb la a rũmsi. Ba a Nowe, a Daniyɛl ne a Zoob sã n da beẽ tẽn-kãng pʋga, b tũudma na n fãagẽ la bãmb yõor bala. Maam, Naaba-Wẽnde, Wẽnd vɩɩgã, n yete, b kõn tõog n fãag b meng kamb ye.» Soaala-Wẽnd yeel-m lame: «M sɩbga Zerizalɛɛm ne yel-beed a naase: zabre, kom, we-rũmsi la bã-longdem, sẽn na n yɩlẽ n menes a nebã la a rũmsã. Neb kẽer pam n põsame, pagb la rapa. B kɩtame tɩ b yi tẽnga pʋga. Ad-y bãmb na n bʋʋga yãmb pa-weere. Y sã n wa yãend b sẽn vɩ to-to, Y sã n wa yãend b tʋʋm wẽna, y na bãng tɩ sɩbgr ning m sẽn sɩbg Zerizalɛɛma da yaa bũmb sẽn segde. Y sũur na sig bilfu, tɩ y sã n wa yãend-ba y na bãnge tɩ m da tara bʋʋm m sɩbg-b wa m sẽn maana. Maam, Naaba-Wẽnd n yete.» Naaba-Wẽnd taasa maam b koɛɛga n yet-ma: «Ninsaal biiga, bõe n kɩt tɩ bugsuntung raoog na n yɩ sõmbo n yɩɩg googa raad a tãaba? B tõe n dɩka a raoog n pees bõn-kɛgenga, n pees baafo sẽn na n ka n yagl teed bɩ? Ad-a sẽn segd ne bũmb yaa b rɩka n lob n yãng bugum bug-toaalgẽ. A noya a yiibã sã n yõk bugum tɩ tẽnsʋka me sɩng rɩɩbo, tõe n le tall-a lame n maan bũmb bɩ? Bũmb sẽn da waa n nan ka sɩɩs-a, b ra ka tõe maan fɩ ne-a ye, marsã bugma sẽn yõog-a wã, n yɩɩda. Rẽ n so, tɩ maam, Naaba-Wẽnd, gomd woto: yaa bugmẽ la m nong n lobd bugsuntunga raoogo n yɩɩd googa tɩɩse. Woto me, yaa Zerizalɛɛm dãmb la m bugma rɩta. Yaa ne bãmb la m na n yiki. B tẽeme tɩ b põsa bugum la yaa bugum n na n dɩ-ba. Dẽ marsã la b bãngda tɩ maam la Naaba-Wẽnde. M na kɩt tɩ tẽn-kãnga lebg we-raoogo, a tũudma sẽn pa yɩ wa m sẽn datã. Yaa maam n yet rẽnna, maam, Naaba-Wẽnde.» Soaala-Wẽnd koɛɛga taa maam n yeel-ma: «Ninsaal biiga, kɩt tɩ Zerizalɛɛm bãng t'a tʋʋma ka sõma ye. Yeel-a tɩ maam, Naaba-Wẽnde, n wilgd-a: ‹Kanaã tẽnga la f saam-dãmb tẽnga. Be la f rog yã; f ba yɩɩ Amoritga tɩ f ma yɩ Ititga. F sẽn na n wa moog raare, b ka wãag f yũug ye, b ka so-f koom ye, b ka so-f ne yamsem ye, b ka pil-f fuug ye. Ned ba a ye ka tol zoe f nimbãanega, n zã-f wa sẽn segd ye. F sẽn paame yaa neba sãbsgo; b bas-f-la f zaal tomẽ. La mam looga f sɛɛgẽ n yãend-fo tɩ f tẽbd f zɩɩma pʋgẽ. La f sẽn wa n bee f zɩɩma pʋgẽ m yeel-f lame tɩ f vɩɩnde. M kɩtame tɩ f tão wa kɩmgo, tɩ f sɩd yik n bɩ n pids f sãdemdo, n pids f ne neerem. La fo ra yaa f zaala, n ka tar fuug ye. M sẽn loog f sɛɛgẽ, m mikame tɩ f ta-la f baoob wakato. M yɛdga m fuug noore n lud f yãnde; m yõga zood ne foo; m yeelame tɩ m kõn bas-f ye. Yɩɩ woto la f lebg m soolem. Yaa maam, Naaba-Wẽnd n gomd woto. M so-f-la koom, n pek f yĩnga zɩɩma, n sõog-f kaam sẽn tar yũ-noogo. M kõ-f-la fu neeba, fut sẽn maneg n kõoge, n paas gãnd neooda sẽn ya faase, n paas gĩs bãanes sẽbdga la fu neere menga. M par-f-la ne fan-teedo, n ning zũi f nusẽ, la kĩndfu f loorẽ. M soga bũmb f yõorẽ, n ning f tʋb-londo, la m fõgnega f zugã ne pugl neere. B ra fam-f lame ne sãnem la wanzurf, n yeelg foo ne gĩs-bãanes peen-neba sẽn maneg n kãde. Zom-bãanega la sɩɩdo n paas oliv kaam n da yaa f rɩɩbo. F neerma ra yãngd n paasdame, la f paam n lebga na-paga. F yʋʋra yii dũni wã pʋgẽ, f neerma yĩnga, tɩ bala a ra taa neerem tɛkẽ, tɩ m da zam-f-la ne fan-teedo. Dẽ yaa maam, Naaba-Wẽnd n togsde. La fo waa n bas n geta f neerma bala la f sẽn paam tɩ f yʋʋra yi wã, f lebga yoaada, n maan yoob ne sẽn waa fãa. F yãka zĩis kẽere n bao peen neeb n tʋɩ n gãande. La yell a woto ra zɩ n maane la kõn le paas ye. F wʋka sãnema la wanzurfa fan-teedã m sẽn kõ-fã, n kud wẽn-naands, f yoob yĩnga. F rɩka f futã sẽn maneg n kõogã n pil-ba la yaa m kaama ne wisdã, m sẽn kõ-fã yũug la b kok yã. M sẽn da kõ foom koodã, ne zom bãanegã, n paas kaama ne sɩɩdã, f rɩɩbã yĩnga, yaa rẽ la f rɩk n kõ-ba n na n maas b sũuri. Dẽ yaa maam, Naaba-Wẽnde n gomde. Fo tol n dɩka kom-dibli la kom-pugli f sẽn dog mam yĩnga, f rɩk-b lame n kõ f wẽn-naandsã. Yooba ra ka sek-f laa? F kooda m kom-dibli wã n lob bugmẽ fo wẽn-naandsa waoogre yĩnga. La f sẽn waa n yood f yoobã, f ka tol n tẽeg f pʋg-sademdẽ wã yell ye, f pa tẽeg f yãadmẽ wã yell ye, f pa tẽeg f sẽn waa n yaa f zaala wakato la f tẽbd f zɩɩma pʋgẽ ye. La kato! F tʋʋm wẽna ka tɛk f sẽn da zoe n tʋma n wa ne f bõne. Maam, Naaba-Wẽnd n yeele. Mik fo na n le paasame, n met n zẽkd f geera so-badsẽ. So-tiisẽ wã la f me f geere n dẽgemd f neerem, la f kõt f meng so-loaad fãa, n tʋm f yooba tʋʋma n bãge. Fo yoo wʋsgo ne Ezipt rãmba, f yagse sẽn be pãnga la f puuga m sũuri. Dẽ me la m wilg m pãnga n mong-f rɩɩbo, n bas-f ne f bɛɛba, ne Filisti rãmba, tɩ f yooba ra puuda bãmb me sũuri. Dẽ ka sek-f ye, tɩ f yo ne Asiri rãmba, n kell n pa tɩg ye. Tɩ f babs lɛɛbdba, Babilon dãmba, n kell n pa tɩg ye. Ad fo ka tar yõnofr ye, maam n yete, maam, Naaba-Wẽnde. F wẽnema yɩɩga pʋg-yoaad bɛda fãa rẽnna. F sẽn me f geerã la f maneg f zĩig so-palempaasẽ wã, f pa yaas n bao f yaood wa yoaadb a taab ye. F maana wa pʋg-yoodr sẽn bas a sɩda n baood sãamba. Pʋg-yoaadb a taaba fãa reegda b yaoodo. La foo, yaa foo n wa ne kũuni n kõ f roelle, fo n yao ra-sãmba tɩ b yi zĩig zãng n wa yo ne foo. Fo ka maan wa pʋg-yoaadb a taaba ye. Ned da ka baood-fo, ned da ka kõt-f ligd ye, yaa foo n da yaood. Yɛla ra lebga lɛbla. Be neere, pʋg-yoaada, kelg Soaala-Wẽnd gomde. Kelg m sẽn na n yeel-fo: f yooba wakatã, f yalsa f zaala n ning f meng yãnde, f wẽn-yaalsa taoore. Bãmb yĩnga f tol n daaga f kamb zɩɩm, n tol dɩk-ba n kʋ maoongo. Rẽ fãa yĩnga m na n tigsa ra-sãmba fo sẽn noog b rãmb sũuri, fo sẽn nong b rãmba wala fo sẽn kisg b rãmba fãa, tɩ b kaoog zabr ne-fo. M sã n paam tɩ b yi zĩig zãng n wa, m na yees f futa bãmb taoore, f na yals f zaal b taoore tɩ b get-f. Pʋg yoaadbã la sẽn daagd b zɩɩm sɩbgre la m na n sɩbg-fo. F yĩnga na n bola zɩɩm tɩ m na puuga m sũuri ne foo, tɩ m na n doka m sũuri. M na n bas-f-la f roellsa nusẽ. B na saa n sirg geer fãa f sẽn da me. B na n yeesa f futã, n loog ne f fan-teedã, la b bas-f f zaala. Rẽ poore m na n pirsa zãma wã tɩ b lob f kuga, n bees-f ne sʋʋse; b na n yõoga f rota bugum, b na n sɩbg-f lame wa b sẽn kao bʋʋdã n yet tɩ b sɩbg-f sɩbgr ningã, la na n yɩɩ pagb ka tɛk taoore; m na n kɩt tɩ f yooba yãend a tɛka, la f kõn le yao ned ligd ye. M na n basa m sũura t'a fudg n waag-fo la m sũ-kiira na sɛ, m sũura na bʋke, m sũura na sigi. La ade, fo sẽn ka tẽeg f yãadmẽ wakatã, tɩ f tʋʋmde yaa f na bao m noora balã, mam me na n kɩtame tɩ f manesma fãa taale lʋɩ f zugu.› Yaa maam, Soaala-Wẽnde, n yeele. Bãng tɩ f wẽn-naandsa waoogre waa n naaga ne tʋʋm yoodo, ne wɩɩbdo.» Soaala paasame: «Zerizalɛɛm, ad yelbũn-kɩta sẽn na n naan yelbũnd ning f poorẽ: ‹Ma zʋgo, biig zʋgo!› Ade, fo sɩd yaa f ma biiga, ma ning sẽn da kis a sɩda la a kambã! Fo kẽem dãmba kisga b sɩdba la b kamba. F ma ra yaa Ititga tɩ f ba ya Amoritga. F kẽem yaa Samari, yẽ n be nug goabg ne a tẽn-peelem. F yao wã yaa Sodom, yẽ n be ritgã ne a tẽn-peelem. Ka sek tɩ f rɩk bãmb manesema, la b tʋʋm yooda ye. Fo rẽnna n sɩd tɩ zʋʋg ne wẽnem. Maam, Naaba-Wẽnde, Vɩɩm Naaba, m yetame tɩ f yao, a Sodom, ne a tẽn-peelma ka tõog n tʋm tʋʋm wẽnse wa foo ne f tẽn-toosa ye. Ad-a Sodom f yao wã, yel-wẽna: a zẽk-m-mengã, a yão-beoogã, a ka mi zĩ n bʋʋd beoogã, a ka mi naong rãmb yaoogrã, a ka mi ka neng rãmb kollgã. B lebga zẽk-m-meng rãmba n tol n wɩɩb mam taoore. M ka tõe n sak rẽ ye la rẽ yĩng la m menes-b tẽng zugu, wala f sẽn mi. Sã n ya Samari, yẽ pa tol n maan fo yel-wẽna pʋɩ-sʋk ye. Fo maana wɩɩbd n bãge n yɩɩd yẽnda. F kẽema ne f yao wã, a Samari ne a Sodom, pa tar b toorẽ yelle, b sã n mak-b ne foom. Ad-f na n deega yãnda marsã. Fo kɩtame tɩ bãmb zug le rooge tɩ fo wẽnema yɩɩg bãmb dẽnna al zĩig sẽn zãre. Fo taoore bãmb ket n wẽnda nin-sõma. Taa foom marsã tɩ f na n deeg yãnde la paoore. Foo la sɩbgra tog ne, tɩ bãmb ya ka tar yell dãmba. M na manega tẽn-bãmba. M na manega Sodom ne a tẽn-toosã, n maneg Samari ne a tẽn-toosã. M na yaool marsã n wa ges fo me yelle n maneg-f wala bãmba. F yao wã la f kẽema sũur na maage f sẽn paam yãnda yĩnga. A Sodom, a Samari ne b tẽn-toosa na n le paama b pĩnd naare. Wat n yɩɩ boto me ne foo la f tẽn-toose. F sẽn waa n pẽgd f menga wakato, f ra paoogda Sodom. Dẽ tɩ b ra nan ka luk a bãong ye. Taa-foo marsã tɩ f reeg Edomitsa ne b tẽn-toosa tʋʋr la b paoore, tɩ f reeg Filisti rãmb tʋʋr la b paoore sẽn yit goabg la rɩtgo. Fo na n yao-la f tʋʋm dẽgdã la f wɩɩbdã. Maam, Naaba-Wẽnd, n yete. Ad maam, Naaba-Wẽnd, sẽn le yetẽ: ‹Fo pa tẽeg f sẽn da pʋlma n sãam zooda sẽn da yõgã. Dẽ me la kãab beedã f sẽn da pa tẽedã lʋɩ f zugu. Mam yẽ na n le tẽeg zood ninga m sẽn da yõg ne foom, rẽ tɩ f paoodã; m na n tedg-a lame t'a lebg zood sẽn kõn sãam abada. Sã n ya foom, f na le tẽeg f manesma tɩ yãnd yõk fo, f sã n le wa reegd sãando f kẽem dãmba f yaopa zagsẽ. M na n le rɩk-b lame n kõ foo wala f kamba, tõnd zooda yõod bala la b pa na n naag n dɩ. M na n le maneg n yõg zõoda ne foom, la woto f na bãng tɩ maam la Naaba-Wẽnde. Woto wã f na tẽeg f pĩnd vɩɩma tɩ yãnd yõk-fo. La yãnd yĩnga f kõn tõog n yaag f noore m sã n wa kõ f beegra fãa sugr ye.› Yaa Soaala gomde.» Naaba-Wẽnd koɛɛg taa maam: «Ninsaal biiga, bao yelbũndi n tão Israyɛl kamba. Kõ-b kibare, la wilg-ba tɩ yaa maam, Naaba-Wẽnd n tãood-b solemde. Ad solemdã. Sɩl-kẽenga, sɩlg ne pɩgs sẽn yalme, sɩlg sẽn labs waare, t'a kõbdã ya pẽrem-pẽrem, n wa Libã tẽnga, n sig tɩ kãseng a ye zug tẽnsʋka. Sɩlga kʋʋga will ning sẽn da luga n yɩɩd a taabã n tall n loog a tẽngẽ, toandb tẽnga, n wa tɩ bas-a lɛɛbdb tẽngẽ. A yaoolame n dɩk tẽn-kãng tɩɩg bulli n tɩ maneg zĩiga n bʋd-a, kʋɩl-kãseng noore. La bulla tobame n lebg bugsuntung buud sẽn wesd la yɛdgd tẽnga. Bugsuntunga wil ra tãoodame n teesd sɩlgã, la yẽ maasmẽ la a ra sut a yẽgna. Bugsuntunga wesame, a tãoo vãad, n tão wila. Bãng-y tɩ sɩl-kẽeng a to me n wa. A pɩgsa ra yaa bɛd-bɛda t'a kõbda ya zʋʋ. Bãng-y tɩ bugsuntunga wẽnemda tao-tao n tees sɩl-kãnga, n kos t'a zãgs-a koom, n zãgs a wila wala a yẽgna. Mik a sẽn tar tãoobo a waa n londga toaaga. B yaool n da sel-a-la kʋɩl-kãseng noore la a pʋʋga ra sakda koodo t'a ra togẽ n wese la a wom biisi, la a yɩ bugsuntung sõng menga. Sokre la maam, Naaba-Wẽnd, sokda: Na yɩ sɩda, bugsuntunga na tõog n wom biis n yɩɩge? Pipi sɩlga ka na n pãs a yẽgna, la a fãs a biisã la a kʋɩɩs a vã-miinim, la a võ a yẽgna tɩ pa tũ ne toogo, tɩ pa tũ ne neb kʋʋng sõngre bɩ? Bugsuntunga keta pʋʋg pʋga, yaa sɩda, la a kõn tõog n wom ye. Yaang sobgã sã n yiki, a kõn kʋɩ zãng sɩda? Ad-y zĩig ninga a sẽn da rat n yɛdgã la a na n wẽneg n kʋɩ.» Soaala-Wẽnd koɛɛga taa maam: «Sok nin-bãmba sẽn ya tõatbã n gese b ka wʋmd solemda võore. Ade, Babilon dĩma kẽ Zerizalɛɛm. A yõka Zerizalɛɛm dĩma ne a kug-zĩidba n tall n loog a tẽngẽ. A baoo rĩm-biig a ye n yõg zood ne-a, n modg-a t'a kãabe tɩ b zĩnen-taar na yɩ noogo. Rẽ t'a yõga tẽngã nin-bẽdã n zãage. A maana woto tɩ tẽnga rãmb pãng woog tɩ b ra wa tʋlg n zẽk b zug ye, n kell n yɩ sakdba. Ad-y nin-kãng yik n yeelame t'a kõn sak tɩ ned a to soog a tẽng ye. Woto a tʋma neb Ezipt tẽnga tɩ b tɩ bao wiidi la b bao tãb-biis wʋsgo sẽn na n wa sõng-a n zabe. Woto na tõoge? Ned ninga sẽn maana woto wã na tõoge n yiis a meng yellẽ? A sãama zoodã n geend t'a na tõoge? M wẽend ne m menga, Soaala-Wẽnd n yete: ‹Yaa naab ninga sẽn kõ a yẽ naamã tẽngẽ la a na n ki, yẽ sẽn ka pids a sẽn kãabã, la a sãam zooda. Yaa na-kãng tẽngẽ la a na n ki, yaa Babilon tẽn-peelma pʋgẽ la a na n ki. Ezipt dĩma ne a tãb-biisã, a tãb-biis ka tɛka, kõn tõoge n zab n fãag-a Babilon dĩma nugẽ ye. Babilon dĩma na n wa sama tãndo la a tuk bok n gilg Zerizalɛɛm la a na n paam n kʋʋ neb ka tɛka. Rĩm paalga sẽn pa sakã, n maan wa a toog ka wã, n ka pids a sẽn kãabã, a bãng t'a sãama a meng yelle.› Dɩlla ya woto la maam, Naaba-Wẽnde, Wẽnd vɩɩga gomda: ‹Israyɛl dĩma zãgsame t'a kõn pids a sẽn da kãab-m bũmb ninga ye. Bãng-y t'a na reeg a sɩbgre. M na n bẽd-a lame n yõk-a ne bẽdgo, m tall-a n kẽng Babilon tẽnga n tɩ sɩbg-a, a sẽn ka pids a kãabgã ne maama yĩnga. A tãb-biisã, a gãndaada fãa, sʋʋg n na n kʋ-ba la sẽn põs-ba, m na sẽeg-b zĩis fãa.› Woto la b bãngda, tɩ maam n gome, maam, Naaba-Wẽnde. Ad Soaala-Wẽnd koɛɛga: ‹M na n yãka tɩ-kãsenga zugẽ will poll a ye n sel-a m toore, tãn-lug-lug zugu. Israyɛl tãn-lug-lug a ye zug la m na n sel-a. A na n tobame n yɩ tɩ-kãsenga, n wom biisi, n lebg tɩ-neere. Luiili wã buuda toor-toore, na n wa ninga b tʋgdo a maasmẽ. La weooga tɩɩs fãa na bãnge tɩ maam la Soaala-Wẽnde, n tõe n lub tɩ-kẽenga la m kɩt tɩ tɩ-bil tobe, maam n tõe n kʋɩɩs tɩɩg me vãado, la m kɩt tɩ tɩ-koɛɛng tobe. Yaa maam, Naaba-Wẽnd, n gome la m na pids m sẽn yeele.› » Naaba-Wẽnd koɛɛgã taa maam n yetẽ: «Bõe yĩng la yãmb ket n wẽed yelbũnd kãnga Israyɛl soolma pʋgẽ: Ba rãmba wãba sib kãse tɩ kamb yẽn deeg n zãabdẽ. Ad-y maam, Naaba-Wẽnde, Vɩɩm Naaba, n wilgd-y tɩ b kõn le wẽ yelbũnd kãnga Israyɛl tẽng ye. Ade, yõor fãa yaa maam n so: ba rẽnna, biig rẽnna. Sẽn maana yel-wẽnde, yẽ bal yõore n yãkde. D dɩk makre: nin-kãnga yaa nin-tɩrga, n tũud sɩd la zemsgo. A ka rɩt maanda rɩɩb tãmsa zut ye; a toog ka be ne Israyɛl wẽn-naandsã, a bõn-dẽgdã ye; a ka baood a to paga, la a yõgda a menga a pag kiuug wakato. A kẽes tʋʋmde, a na yao; a kõn dɩk a to bũmb ye; ned sã n bobl-a bũmbu, a lebsda a soaba; kom sã n tar neda a kõt-a-la rɩɩbo, la a yeelgda sẽn kẽnd-a a bɩlgemde. A ka pengd ligdi n na n dok yõodo ne zãmb ye; a pʋs n ka rat kegre baa bilfu, n bʋʋd bʋʋd tɩrse; a togsda-sɩda. A reegda m noya la a gũusda a meng ne mam sẽn kisi, a tʋʋm yaa pʋ-peelem tʋʋma. Ade, maam a Naaba-Wẽnde, m yetame tɩ ned a woto buud sɩd yaa nin-tɩrga la a na vɩɩnde. D mak tɩ ned a woto buud roga bi-bɛɛga; a fãadame, a kʋʋdame, wẽng ka be a sẽn gɩdg a meng ye. A ka rɩk a ba nao, la a rʋʋda tãmsa zutu n dɩt maand dɩɩbo, bɩ n yõgd a to paga, bɩ n wẽt naong rãmba la a ka-neng rãmba, bɩ n zuud a taaba, n pa lebsd b sẽn bobl-a bũmb ning ye. A wɩɩbdame n kʋʋd wẽn-naandsa maando. A pengda ligdi n dokd yõod ne zãmbo. Ned a woto buud tog n vɩɩndame sɩda? M pa tẽed ye, t'a tʋma tʋʋm yoodo, a na n kiime la a kũuma taal lʋɩta a zugu. La d mak marsã tɩ ned a woto buud roga biiga. Biiga yãenda a ba wã sẽn tʋm tʋʋm dẽgdã la a pa saag n dɩk a ba nao ye. A ka rɩt tãmsa zutu, a toog ka ne Israyɛl wẽn-naandsã, a ka yõgd a to pag ye. A ka wẽgd a taaba, a ka reegd bobelle, a kõta kom sẽn tar a soaba a buri, a yeelgda sẽn ka tar-a fuugu. A yaa zemsg soaba, a ka pengd ligdi n dok yõod ne zãmb ye. A sakda m noya, n gɩdgda a meng ne m sẽn gɩdge. Ad-y nin-kãnga kõn ki a ba wã beegra yĩng ye. A na n vɩɩndame. Ad-y yaa a ba wã sẽn maan kegrã, n maan wagdem, la a ka maan neere m neba sʋka, ad-y yẽ n na ki, a toorẽ yel-wẽna yĩnga. Tɩ yãmb zĩ tẽngr n sokdẽ tɩ yaa bõe yĩng la ba wã yel-wẽnd ka rɩt biigã? Yaa biiga sẽn tũ sɩda la zemsgã, a reega m noya fãa n tũ-b zãnga; rẽ wã, a tog n vɩɩndame. Sẽn maan-a yel-wẽnde, yẽ soab bal n kiidi! Biig kõn deeg a ba yel-wẽnd taal a zug ye. La ba me kõn deeg biig yel-wẽnd taal a zugu ye. B na n pila nin-sõng a sõmblem fuugu, n yeelg nin-wẽng a wẽnem fuugu. Nin-wẽng sã n tuub yel-wẽn niyns fãa a sẽn maana, a sã n deegd m noya fãa la a tũud sɩd la zemsgo, a na n vɩɩndame, a kõn ki ye. B kõn leb n tẽeg a sẽn maan yel-wẽn niyns yell ye, a na vɩɩnde, a zemsg tʋʋma yĩnga. Mam yam la nin-wẽng kũum bɩ? Maam n yete, maam, Naaba-Wẽnde, m daaba yaa a bas a zʋg wẽngã la a paam n vɩɩnde. La nin-tɩrg sẽn bas burkĩndlem, n tʋm wẽnga, n dɩk nin-wẽng nao, yãmb tẽed t'a na vɩɩnd bi? M pa tẽed ye. B na yĩm tʋʋm sõma niyns a sẽn tʋma. A sẽn beege n kɩɩs noorã n maan yel-wẽndã, rẽ bal n na n wa ne a kũum. Tɩ yãmb yetẽ: ‹Ad Soaala manesma ka zems ye.› Israyɛl dãmba kelg-y wɛ. Yaa mam manesma n ka zems sɩda? Ka yãmb zʋgã n ya wẽng bi? Ad-y nin-tɩrg sã n bas zemsgo n maan yel-wẽnde tɩ rẽ wa ne a kũum, yaa yel-wẽndã a sẽn maana yĩng la a ki yã. La nin-vẽng sã n bas wẽng sore n tũ sɩda la zemsgo, yẽ togame n vɩɩnde. A sẽn tuub a yel-wẽna fãa a sẽn maana, ya tɩlɛ t'a vɩɩnde, a kõn ki ye. Dẽ la a Israyɛl roog rãmba zĩ tɩ Soaal manesmã n ka zemse. Israyɛl dãmba, yaa mam manesmã n ka zems sɩda? Ka yãmb zʋgã n ya wẽng bi? Israyɛl roog rãmba, yaa rẽ la m na n bʋ ned kam fãa n zems a manesem. Maam n togsd boto, maam, Naaba-Wẽnde. Teem-y zʋgo la y tuub y yel-wẽna fãa, modg-y tɩ yel-wẽnd ba a ye ra wa ne y kũum ye. Fugumd-y yel-wẽn niyns fãa y sẽn maana, la bao-y sũ-paalle la yam paalle. Bõe tɩ f rat kũum, Israyɛl roogo? Ned ba a ye kũum ka noogd m sũur ye. Zãag-y y meng ne wẽng la y vɩɩnde. Yaa maam a Wẽnd n togsd rẽnna.» Soaala yeela maam tɩ m pʋd yɩɩn-kãnga n yãb Israyɛl dĩm dãmbã: Yãmb ma wã yɩɩ bõnyẽ-yãanga; a yii gɩgem-neeba buudẽ. A ra gãee a kamba sʋka n kõt-b rɩɩbo. A wuba a biig a ye t'a wa lebg polle n lebg gɩgemd sẽn nong a menga n zãms-a a rɩɩb sɩɩgre, n tol n yõgd ninsaalba. Bu-zẽmba wʋmame tɩ b gomd a yelle tɩ wa bẽd-a n yõke la b sẽb-a lame n tees Ezipt. A ma wã yaasame n gũ n wa bas saagre t'a na n dɩk a biig a to n wub-a t'a lebg pãng a nare. A sɩd vɩɩnda ne bõnyẽesã n wa lebg gɩgemd sẽn nong a menga. Yẽ me zãmsa a rɩɩb sɩɩgre la a yõga ninsaalba. A tɩ wãa tẽns niyns sẽn tõe n zabe n fãag b mense la tẽns a taabã. Tẽnga rãmb da yɛɛsdame b sã n wʋm a kɛlenga. Bu-zẽmba yii zĩis ka tɛka n wa tak zabr ne-a. B gãnega b bẽdgo n gũbg-a la b paam n yõk-a lame. B ta-a-la ne bãn-kõse n tɩ kɩs Babilon dĩma. B pag-a-la roogo, b ra pa rat n le wʋm a yãbrã Israyɛl tãmsa zut ye. Yãmb ma wã ra wẽnda bugsuntungu bugsuntung sẽn sel koom noore. A ra zɩsga ne vãad la biisi a sẽn da paamd kooma wʋsg yĩnga. A toba a wil neeba la wil bãmb n lebg naam dasaba. Bugsuntunga tẽeme n kul yĩngri n wa tɩ zʋʋg tɩɩsã. B ra pẽgda a wila tãoobo, n da pẽgd b sõora sẽn labsã. Ade, b võog-a lame n võog-a ne sũ-puuri n gãneg tẽnga. Yaang sobga waa n kʋɩɩsa a biisã, la b fãa sʋʋgame. A wil neeba me kʋɩɩme tɩ bugum wa rɩ-ba. B tall-a lame n tɩ sel we-raoogẽ, weoog sẽn kʋɩ n ka yãet saag ye. Bugum yi-la a sɛɛgẽ n dɩ a wila la a biisã. Bugsuntunga ka le tar wil neere sẽn tõe n lebg naam dasaar ye. Bɩ d dɩk yɩɩn-kãnga n yɩɩl d bugsuntunga kʋʋre! Pa-weera kẽnd yʋʋmd a yopoe soaba, kiuug a nu soaba, kiuuga piig daare, a Israyɛl nin-kẽems kẽer wa m taoore n bõs Wẽnd vẽnegre. Soaala-Wẽnd goma ne maam woto: «Ezekiyɛl, togs Israyɛl kamba maam, Naaba-Wẽnd, sẽn yet tɩ f taas-ba: ‹Yãmb waa n sokame n na n bãng m daabo la ad maam, Naaba-Wẽnde, Vɩɩm Naaba sẽn leokde: m kõn bas-y tɩ y sok-m ye!› Foo, Ezekiyɛl, foo n na n kao b bʋʋdo, la ra zãgs b bʋʋda kaoob ye. Sõng tɩ b tẽeg b ba rãmba wɩɩbda zãnga. Taas-b koees niyns maam, Naaba-Wẽnd, sẽn leokdã: ‹M sẽn waa n yãk a Israyɛl, yɩɩ buuda fãa taoor la m wẽen yã. M lika m meng bãmb Ezipt tẽnga la m wẽename tɩ m na yɩɩ bãmb Soaal la b Wẽnnaam. Baraare, m zẽka m nug n wẽen tɩ b na yi Ezipt tẽnga n tɩ kẽ tẽng ning m sẽn da yãk n bĩng-ba; tẽng sẽn bund bĩisim la sɩɩdo, tẽng sẽn ya sõmb n yɩɩd tẽns a taaba. M yeel-b lame: zãag-y y meng ne bũmb niyns fãa gesg yamleoog sẽn tar yã. Da rẽgem-y y mens ne Ezipt wẽnd-naandsa ye, tɩ maam, Naaba-Wẽnd, la yãmb Wẽnde. La b yika zabre ne maam, n pa le tʋlg n kelg m ye. Ba a ye ka bas bũmb niyns yãeeb yamleoog sẽn da tar-a ye. B ka zãag b mens ne Ezipt wẽnd-naandsa ye, tɩ m da yet tɩ m na bas m sũura t'a fudg n waag-ba, tɩ m na bas m sũ-puura t'a rɩ-b Ezipt tẽng menga. La m gesa m yʋʋra sõmblem, n pa tʋlg tɩ b sãam-a bu-zẽmba sʋk ye. M da zoe n gomame tɩ bu-zẽmba wʋm, tɩ m na n yiis-b-la Ezipt tẽnga. Ya rẽ yĩng la m sẽn yiis-b Ezipt n tall-ba n kẽng zĩ-peen-daagẽ. M kõ-b-la m noya, m wilg-b-la sor ning b sẽn tog n tũ n paam n vɩɩnde wa m noya sẽn date. M tol n kõ-b-la vʋʋsg raare tɩ yɩ b kaseto, maam ne bãmb sʋka, tɩ b bãng tɩ maam n wat ne sõmblem. La a Israyɛl rooga yika ne maam zĩ-peen-daagẽ wã. B ka tũ m noya ye. B sãbs-b lame la bãmb deegre n yaool n da wat ne vɩɩm. B sãama m sũur wʋsgo n ka tũ vʋʋsga raar noya ye. M yeelame tɩ m na n basa m sũ-puurã t'a fudg n waag-ba, zĩ-peen-daagẽ wã tɩ b ki zãnga. La m gesa m yʋʋra sõmblem, m pa tʋlg t'a sãam bu-zẽmb sʋk ye tɩ b bãngame tɩ maam n yiis-b Ezipt tẽnga. Yɩɩd rẽ, m wa n kong n zẽka m nug we-raoogẽ wã n wẽen tɩ m kõn tall-ba n kẽes b tẽngẽ ye, tẽng ning m sẽn da bao b yĩngã, tẽng sẽn bund bĩisim la sɩɩdo, tẽng sẽn ya sõmb n yɩɩd a taab fãa. Bãng-y tɩ m sẽn wẽen woto wã yaa b sẽn zãgs tɩ b kõn deeg m noya, n zãgs n tũud soy niyns m sẽn gɩdge, n zãgs vʋʋsga raar noora reegre, b yama sẽn da kẽ b wẽn-naandsa yĩnga. La m zoe-la b nimbãanega n pa tʋlg n sãam-b ye la m sɩd ka menes-b zĩ-peen-daagẽ wã ye. M yeela b kamba zĩ-peen-daagẽ wã: Da tũ-y y ba rãmb nao ye. Da tũ-y b manesma ye, da rẽgem-y y mens ne b rẽgdã, ne b wẽn-naandsa ye. Maam, Naaba-Wẽnd, la yãmb Wẽnnaam! Tũ-y m noya, deeg-y dog-n-mik ning m sẽn kõ yã la y tũ-a. Deeg-y m kibs-ramba noya, tɩ b yɩ kaset, maam ne yãmb sʋka, n wilg tɩ maam, Naaba-Wẽnde, la yãmb Wẽnnaam. Kamba me yika ne maam, b pa reeg m noya ye, b pa tũ dog-n-mika ye, b pa tũ soy niyns sẽn wat ne vɩɩm ye, b raaga vʋʋsga raar noor n base la m me yeelame tɩ m na n bas m sũ-puurã t'a fudg n waag-b zĩ-peen-daagẽ. La m tar n leba poorẽ, m gesa m yʋʋra sõmblem n pa tʋlg n sãam m sẽn da yiis b rãmb Ezipt tẽng tɩ bu-zẽmba zĩi n getẽ wã ye. M le zẽka m nug zĩ-peen-daagẽ n wẽen tɩ m na n sẽeg-b-la bu-zẽn-dãmb sʋka. B ra ka tũ rog-n-mika ye, b ra zãgsa m noya n bas vʋʋsga raare n pʋgd b ba rãmba wẽn-naandse. B tol n tagsame tɩ m kõ-b-la noya sẽn pa sõmbe la rog-n-mikã sẽn pa kõt vɩɩm. M basame tɩ b rẽgem b mens ne kũun niyns b sẽn kõt b wẽn-naandsã, n bas b tɩ b kood b kom-rẽemsã fãa. La rẽ yɩɩ sẽn na n yɩlẽ tɩ b yama waa n laka ne b mense, la b bãng tɩ maam la Naaba-Wẽnde.› Yaa rẽnd yĩnga, la m yet-fo, Ezekiyɛl, taas a Israyɛl roogo, maam, Naaba-Wẽnd, koeesã. Y ba rãmba sẽn le beeg-m ne bũmb ninga, yaa b sẽn ka sak n pa m nonglma pʋgẽ. M da tall-b lame n taas tẽng ning m sẽn da kãab tɩ m na n kõ-b lame. Beelẽ b yãenda kunkuba zutu tɩɩs sẽn tar maasem tɩ b rʋ n sɩng b maanda kʋʋbo. B yika m sũuri ne b sẽn yiis kũun niyns n kõ wẽn-naandsã. B rɩgla maand sẽn tũnug ne b kũuni, ne tɩdare sẽn tar yũ-noogo n maagd sũuri, n paas rãam. Dẽ la m sok-ba: ‹Y kũud n na n tɩ rooga yɛ?› Tɩ b leoke tɩ kunkuba zutu. Dẽ la b ket n boond ne rũnna tɩ Bama, waoogr zĩisi. Sẽn ya woto wã, taas a Israyɛl doogã, maam, Naaba-Wẽnd, sẽn leok bũmb ning yell kãnga poorẽ. Yãmb yɩ-la a wãna n dɩk y yaab rãmb nao, n dẽgemd y mense ne b rẽgdã, ne b wẽn-naandsa waoogre n yaool n lakd n basd maam? Ba ne rũnna yãmb ket n pʋgda b wẽn-naandsã n dẽgemd y menga ne y kũuni, ne y kamb kʋʋbo. Yãmb yɩta a wãna, Israyɛl kamba, n tẽed tɩ m na bas tɩ y sok-ma? Yãmb ninga y memg yamẽ tɩ y tõeeme, wa bu-zẽmbã, n waoogd tɩɩse la kuga tɩ m sĩnda. Ad-y rẽ ka tõe ye! Maam la Naaba-Wẽnde, Vɩɩm Naaba, m na n tʋma m pãn-tʋʋma; m na n basa m sũura t'a fudg n waal yã tɩ m kell n tõog n dɩ naam y zutu. M na yiis-y-la bu-zẽmba sʋka, n yiis-y m sẽn da sẽeg-y zĩis niynsã. M na puuga m sũuri la m wilg m pãnga n tigs-y zĩ yɛnga. M na n tall-y lame n kẽng we-raoogẽ, n zãag-y ne buud a taaba la m na bool-y-la bʋʋdo. Wala m sẽn paalg y ba rãmba bʋʋdo Ezipt we-raoogẽ, woto m na paalg yãmb me. Yaa maam, Naaba-Wẽnd, n gomd boto. M na modg-y n kẽes m bãgrẽ, tɩ y tũ d sẽn sed ne taabã. M na n kẽe yãmb sʋka la m na n sʋkame n bas kɛɛnga sẽn zẽk b zut ne maam la sẽn tõdg-b maama. M na n yiis-b-la b sẽn be zĩig ning marsã wã la b kõn leb Israyɛl tẽng ye. La woto y na bãng tɩ maam la Naaba-Wẽnde. Ad beoog yella sẽn na n yɩ a soaba tɩ m wilgd-y, maam, Naaba-Wẽnde. Ned kam fãa tõe n pʋga a rẽgdo, a wẽn-naandse, la m wẽend tɩ wakat n wate, y na kelg-ma, y kõn le sãam m yʋʋr sẽn ya sõngã ne maandã la y wẽnd-naandsã pʋgb ye. Yaa m tãn-sõnga zugu, tãn-woka zugu la a Israyɛl na wa waoog-ma. Yaa be la m na n deeg-y ne sũ-noogo la m kos-y tɩ y wa ne y sẽn segl m yĩnga la sẽn ya sõng zãngã, y maanda ne b sẽn tũnugd bũmb ningã. M na reeg-y wa tɩdar yũ-noogo sẽn maagd sũuri, y sã n wa yi bu-zẽmba sʋka. Y sã n wa paam tɩ m bool-y n tigs zĩ-yɛnga. Woto neba na yãend m sẽn zãad-y to-to la b na bãng tɩ maam la Nin-Sõngo, yãmb Wẽnde. Yãmb me na bãng tɩ maam la Naaba-Wẽnde, m sã n wa taas yã a Israyɛl tẽn-peelmẽ, tẽng ning m sẽn da kãab y yaab rãmba. Beelẽ y na tags y vɩɩma sẽn yɩ a soab pĩnda. La y sã n tags bũmb ning sẽn da rẽgemd yãmbã, y sũura na yaale ne y menga, y tʋʋm wẽna yĩnga. La y na bãnge, Israyɛl roogo, tɩ maam la Naaba-Wẽnde, m sã n zoe m yʋʋr sãoongo n ka sɩbg-y wala y wẽnema sẽn da tog ne a soabã, wala y vɩɩm yookã sẽn da tog ne a sobã. Yaa woto la m da tar n na n wilg yã, maam, y Naaba-Wẽnde.» Naaba-Wẽnd yeel-m lame: «Wẽnemd f ritgo, ninsaal biiga, gom ne ritg rãmba, gom ne Negɛb tʋgrẽ dãmba. Yeel-b tɩ b kelg koɛɛgã maam, Naaba-Wẽnd, sẽn togsd googa poorẽ. M na n yõgna bugum sẽn na n dɩ tɩɩsa fãa, maas bɩ koeemse. Bũmb kõn tõog n kiis bug-kãng ye. A na n yii rɩtgo n ta goabga la a na n dɩɩ fãa. Ninsaal fãa na bãnge tɩ yaa maam Naaba-Wẽnd n ning bugma la ned kõn tõog n kiis-a ye.» La m yeelame: «Naaba-Wẽnde, ad-y b zoe n wɩta maam n yet tɩ m gomda ne yelbũna.» Tɩ Naaba-Wẽnd na n leoke: «Ezekiyɛl, tees f neng Zerizalɛɛm, gom wẽnd dooga poorẽ, gom Israyɛl tẽn-tõra poorẽ. Yeel-b tɩ maam, Naaba-Wẽnd, n yet woto: ‹M na n yika ne yãmba m na n wõoga m sʋʋga, n kʋ-y zãnga, nin-sõng la yel-maanda. Yaa nin-sõng la yel-maand menesg yĩnga la m sʋʋga wõog yã. A wõoga nin-vɩɩg fãa yĩnga, Goabga rãmba wala rɩtg rãmba yĩnga. Neba fãa na bãnge tɩ yaa maam, Naaba-Wẽnde, n wõog m sʋʋga. M kõn lebs-a a wʋʋgẽ ye.› La sã n ya foom, Ezekiyɛl, zõond ne sũ-sãanga, n waas b fãa taoore. La b sã n sok tɩ yaa bõe tɩ f waasdẽ, f na leoke: ‹Kibar n na n wa, la sũur fãa na n kiuusame, nug na n digame, tɩ yam bondge, tɩ rũmd sao kalwaare. La ade yella taa-d lame n sɛ. Soaala-Wẽnd n yete.› » Soaala-Wẽnd goma ne m woto: «Adem biiga, gom bãngr goama, taas ninsaalba maam, Naaba-Wẽnd, sẽn togsde. Ad sʋʋga, sʋʋg sẽn saas n le saase. A saasa vargr yĩnga, a saasame n yãgd wa saag sʋʋga; Maam n yet tɩ b saas-a tɩ ned wa rɩk-a n yulumnẽ. B saas-a lame t'a yãgda n na n ning-a nin-kʋʋd nugẽ. Kelme, wiisi, Adem biiga, tɩ b saas-a-la mam buuda yĩnga, a saasa Israyɛl dĩm-biisa yĩnga, tɩ bãmb me na n naagame n ki. Dẽ yĩnga, toomd f yãoogo, da tẽ põasg ye. Yella na n yɩɩ toogo, maam, Naaba-Wẽnd, n yete. Foom, Adem biiga, gom bãngr goama, pãb nug pogse, pãb n yɩlem naoor a yi, naoor a tã. Sʋʋga yaa tẽn-kũum sʋʋga, zãngoeoog sẽn lubd goabg la rɩtgo. A loogda ne ned kam fãa sũ-keelem sẽn yãend-a ka le mi a sẽn kẽedẽ ye. M dɩgl-a-la doog fãa noore, t'a rɩg n yãgd wa saag sʋʋga n gũud n na n kʋ bala. Kɛ rɩtgo, kɛ goabga, sʋ-rɩtga, kõs f sẽn teesẽ fãa! Maam me, m na n wẽe nug pogse, m yaa n doka m sũuri. Yaa maam n gomde, maam, Naaba-Wẽnde.» Naaba-Wẽnd gomame n yeel-ma: «Adem biiga, tuk soy a yiibu n kõ Babilon dĩma. Yaa soy bãmb la Babilon dĩma na n dɩke n wa ne a sʋʋgã. Soya yita tẽng a ye. Ning makre sor fãa sɩngrẽ n wilg a sẽn dabd tẽng ninga. Sor a ye na n talla Babilon tãb-biisã n tees Raba, Amonitsa tẽngẽ. Sora a to wã rigda Zerizalɛɛm, Zɩɩda tẽn-peelmẽ. Babilon dĩma na n taa soya sẽn welgd taaba zĩigẽ, n bug bãgre. A na n zugsa a loko, n sok wẽn-naandse, n sok rũmsa sãoore. Pĩim ninga sẽn na n sãam Zerizalɛɛma la a wõog ne a nug rɩtgo n tees Zerizalɛɛm la a tãsd a zabr tãsga. A yalsa zab-teedo, ra-bɛd sẽn tar n tãad lalse, n tedg-b ne tẽnga kʋɩlense la a sɩng tãnd sambo la a tuud bok n gilgd tẽngã. Zerizalɛɛm dãmb da tẽedame tɩ bagra yaa mams tɩ seg bala la bũmb kõn maane, tɩ Wẽnd wẽeneg lʋɩɩ sʋka. Dẽ la Babilon dĩma tẽegd-b tɩ b pa tũ Soaala-Wẽnd wa b sẽn da rat ye la rẽnd yĩnga b na n tall-b lame n kẽng yembdo. Yaa rẽnd yĩnga la maam, Naaba-Wẽnd, ye-y woto: ‹Y maaname tɩ m tar y yell tẽegre, wakat buud fãa, n tẽegd tɩ y zãgs-m-la vẽenega la y beeg-m-la ne tʋʋm wẽn ka tɛka. Y sẽn pa sak tɩ m yĩm y yellã, m na teel-y n taas y bɛɛba!› Sã n ya foom yẽ, Israyɛl dĩma, fo yaa nin-wẽnga la zãmb soaba. M yãka raare sẽn ya fo wẽnema sɛɛb raare. Ad-m sẽn yete maam, Naaba-Wẽnde: ‹B na deega sẽn wilgd tɩ f yaa rĩma, b na n fõka f pugla. Yɛla teemame. Sulg-m-meng rãmb la b na n zẽke la b sik pãng rãmba. Raboogo n paas raboogo, yaa rẽ la m na n wa ne Zerizalɛɛm. Tẽnga na n wãa zãnga la rẽnd ned a ye reng n wa. M na n kõo nin-kãng tõog t'a yik zabr ne-a.› » Soaala-Wẽnd paasame: «La foo, Ezekiyɛl, taas Amonitsa maam, Naaba-Wẽnd, sẽn leokd bãmb poorẽ, b sẽn paoogd a Israyɛl yĩnga. Yeel-ba: ‹Sʋʋg n be ka, sʋʋg sẽn tõe n lub yãmb mars-marsã bala. A saasa kɛɛb yĩnga, b saas-a lame t'a yãgd wa saag sʋʋga. Yãmb zĩime n teeg y zãmsdo, la y zirẽ-be-bagba la sʋʋga na n dogsa zutu, zãmb dãmba la tʋʋm-wẽna rãmb zutu. Sɩda, wakat taame tɩ b wẽnema sɛɛb raar na n yãke. Marsã lebs-y y sʋʋsã b wʋʋsẽ, tɩ yaa zĩig a to la m na n yik ne-yã. Yaa y sẽn yi zĩig ningã, yaa y sẽn dog tẽng ningã. M na n puuga m sũur ne-yã, la m na n waag-y-la ne m sũ-fõora bugum, n dɩk-y n bas nin-toos la a mi-wãab rãmb nusẽ. Y na lebg bugum pʋɩɩre, la y zɩɩma na raag n pʋk tẽngã. Dẽ poore ned ba a ye kõn le gom f yell ye. Dẽ me yaa maam, Naaba-Wẽnd, n leokde.› » Soaala-Wẽnd goma ne maam woto: «Ezekiyɛl, segl f menga tɩ yaa foo n na kao Zerizalɛɛm bʋʋdo, tẽng ning sẽn nong zɩɩm fõogra bʋʋdo. Modg t'a bãng t'a wɩɩbame. Taas-a maam, Naaba-Wẽnd, sẽn yete: ‹Fo basdame tɩ f tẽnga rãmba kʋʋd neba. Ad-b sẽn maand woto b segenda f wãabo. B rõogda yel-yaalse, wẽn-faado, n dẽgemd f tẽnga. Zɩɩma sẽn daaga taal la f tʋk f zugu, la wẽn-naandsa peesgo me rẽgma f tẽn-peelma. Fo meng n takde n pẽnegd f menga f wãaba raare. F wãaba raar sõd n dɩgame. Yaa rẽ la m bas tɩ f lebg tẽn-zẽnsa fãa laado, dũni wã fãa laado. Fo yʋʋra sãamame, bũmb ka le kẽnd tɩrg ye. Sẽn pẽ-ba wala sẽn zãr-ba na n laa foo. Ges Israyɛl, fo pʋgẽ, rĩm-biig fãa, zʋʋgda a tõogo, tɩ kũum kʋʋda. Israyɛl pʋgẽ, biig sãbsda a ba la a ma, n namsd sãana, n yũud kɩɩb la pʋg-kõor zɩɩm. M wẽnd doog ka paamd waoogr ye, vʋʋsg raar lebga wa da-zaan-daare. F pida ne munaafɩgs sẽn daagd b taab zɩɩm. F neba rʋʋda tãmsa zutu n dɩtẽ la b wɩɩbdẽ. Kẽer yooda ne b ba paga. Pag sẽn pa yɩlg meng yãeta pãn-tõogo. Kẽer yooda ne b taab pagba, kẽer doda b bi-pagba bɩ b yaop pagba. Fo nengẽ b reegda ligd n daagd zɩɩm, fo pengda ligdi n deegd roaglse, n deegd roaglg tɩ loogdẽ. F maanda f taab pãn-tõogo, n deegd b laogo. La maam, Naaba-Wẽnde, b yĩmda maam zãnga. Yaa woto la m sẽn ne. M na n gila m nugu n tees foo, Zerizalɛɛm, f ligd baoora yĩnga la f sẽn daagd zɩɩma yĩnga. M sok n gese: M sẽn na n yik ne yãmba raare, y na paam raood la sũ-keelem n yals m taoore? Maam, Naaba-Wẽnde, na pidsa m sẽn yeelã. M na sẽeg-y-la bu-zẽmb sʋka, n sẽeg-y sẽn ka y saam-biis sʋka, m paam tɩ y tʋʋm-dẽgda fãa sɛ. Y yʋʋra na n sãama buud a taaba sʋka, a kõn le yi ye. La rẽ la y reegda tɩ maam la Naaba-Wẽnde.› » Wẽnd gomame n wilg maam woto: «Adem biiga, ad mam nifẽ a Israyɛl buuda wẽnda kut sẽn ka yẽneg boaagẽ n ket n tar rẽgdo. A Israyɛl wẽnda kutu, zũudu, zũud wɩsbre, namdo sẽn ning boaagẽ n na n tõog n yɩlge. Yaa rẽ yĩnga la maam, Naaba-Wẽnd, gomd woto: ‹Yãmb fãa lebga wa kut sẽn ka yɩlge, woto m na n tigs-y-la Zerizalɛɛm. Wala b sẽn sagend boaagẽ, zũudu, kutu, namdo, zũud wɩsbre, n zug-b tɩ b yẽneg, wotome m na tigs-y m sũ-puura boaagẽ n yẽneg-y zãnga. M na n tigs-y-la Zerizalɛɛm n yõog-y ne m sũ-puura bugum, n yẽneg-y wa kutu. Wala b sẽn yẽnegd wanzurf boaagẽ, wotome m na yẽneg yãmb boaagẽ; la woto y na bãng tɩ yaa maam, Naaba-Wẽnde, n waag-y ne m sũ-puur bugum.› » Soaala-Wẽnd paasa woto: «Ninsaal biiga, yeel Israyɛl tẽnga rãmba tɩ b tẽnga wẽnda tẽng sẽn kong saaga, n kong sa-luka. M sũura na n puuga ne-ba n kʋɩɩs-b wa pʋʋg sẽn ka paamd saaga. Wala gɩgemde sẽn yãbda la a tõsd rũnga, tẽnga taoor dãmb kʋʋdame la b loogd ne b taab paoongo, la b paasd pʋg-kõap sõore. Maan-kʋʋdba tõdga m noya, n dẽgem m doogo. B ka bakd bõn-wẽng ne bõn-sõng ye; b ka wilgd bõn-dẽgd n bak ne sẽn ka rẽgd ye. B pa waoogd vʋʋsg raar ye. Woto wã ned ba a ye ka waoogd maam wala sẽn segd ye. Tẽnga taoor dãmba yũuda b neba zɩɩm wa rigd-n-yĩidsi. B kʋʋdame n na n paas b arzɛka. Tẽnga bãngdba solgda rẽ fãa n bas n gomd zirẽ-be-likri la b yet tɩ maam n yeel woto la woto tɩ maam, Naaba-Wẽnd yaool n pa yaag m noor ye. Tẽnga neb sẽn mi yaa pãn-tõogo la fãabo. B namsda naong rãmba la nug ka-zãad rãmba. Sãamba nengẽ yaa serg la f kõ-m zĩiga. Bãmb fãa sʋka m bao ned sẽn na n yik n me lal-gũbri bɩ ned sẽn na n yik n yals lalsa sẽn wurg zĩig ningã, n zab n sõng tẽnga rãmba la a gɩdg-m tɩ m da wãa-a ye, la m pa yãend ned ye. Dẽ la m sũura fudg n waag-ba, m basame tɩ sũ-puura bugum dɩ-b zãnga. M basa b wẽnema t'a lɛɛg lʋɩ b zugu. Maam, Naaba-Wẽnd, n togsd rẽnna.» Wẽnd goma ne m woto: «Ezekiyɛl, pagb a yiib n zĩndi, n ya ma a ye kamba. B ra ket n yaa pʋg-sɛdba la b lebga yoaadba Ezipt tẽnga. Be la b salem b yãoogo la b wẽbs b pʋg-sadem-bĩsa. Ad-b yʋy: kãsma la a Oola, yao wã, a Ooliba. Kãsma makda Samari, tɩ yao wã makd Zerizalɛɛm. M maana kãadem ne maam la b roga kom-dibli la kom-pugli n kõ-ma. A Oola maana yoodem ne a sẽn da yaa m pagã. A yo-la a yooba ne a roellse, Asʋr dãmba. Yaa tãb-biis sẽn yer n kẽnd wa saag-pag a Ninanina, n paas tẽnga kombɛɛmba, yaa kom-poala, ra-sãmb bɛɛlaa, la wed-dʋʋd mitba. A Oola yam waa n kẽe Asʋr nin-bɛdã, la a sẽn pʋg bãmbã, a pʋga b wẽn-naandsã gilli. A le sɩnga vɩɩm yoog ninga a sẽn da vɩ Ezipt tẽnga tɩ Ezipt rãmb sɩnga a gãaga la a bĩsa wẽbsgo t'a nan paooda. Yaa rẽ yĩng la m bas-a t'a lʋɩ Asʋr rãmba nugẽ, a ra-sãmba nugẽ. Bãmb bas-a-la a zaala, n loog ne a kom-dibli la a kom-pugli. B kodga yẽ menga ne sʋʋga. A yʋʋr yii pagba sʋka, a wa n lebga neba fãa kisgu. Pʋg-kãng yao, a Ooliba, nif rɩɩ dẽ fãa kaseto, la bãng-y tɩ yẽ n yɩɩg ne wẽnem a yooba pʋgẽ. Yẽ me yam waa n kẽe Asʋr kombɛɛmba, taoor dãmba, a tãb-biis sẽn da yer fu-neeba, n dʋʋd wiidi sõmb-sõmbo, kom-poala la ra-sãmba. Yẽ me basame t'a wẽnema sãam-a zãnga. M gesame la m bãngame tɩ neb a yiiba zʋg ra yaa a ye. Bãng-y t'a Ooliba yooba n wa n tɩ zʋʋg ne wẽnem. Daar a ye a yãee b sẽn gʋl miid-miidu, lalg zugu, raop sẽn wẽnd Babilon dãmba. B ra ninga sẽbds b sɛɛgẽ, n vil b zut ne zu-vindsi. Da yaa zab-zabdb sẽn nand b menga. Sɩd da wẽnda Babilon tẽng neba Kalde tẽn-peelmẽ la b rog yã. A Ooliba sẽn yãend gʋlba bala, a yam kẽ-b lame, t'a tʋm neb Kalde tẽnga. La Babilon dãmba babs-a lame n wa gãand ne-a n dẽgem-a. La a sẽn yaal ne bãmba n tɩge, a yam laka ne-ba, lebga beem menga. La yẽ me sẽn yɩ yoaad neba fãa nifẽ, n yals a zaal neba fãa taoorã, ma me sũura wa n yaanda ne-a wala a sẽn da yaal ne a kẽema. A yooba paasame, a yooba wẽnem wa n yɩɩga a pʋg-sademdẽ rẽnna, wa n yɩɩga Ezipt rẽnna. A yama ra waa n kẽe yoaadba sẽn mi yõgbo la sẽn tar pãng wala bõeense, wala wiidi. Gese, Ooliba, fo le sɩngame n maand wala f pʋg-sademdẽ f sẽn da basd tɩ Ezipt rãmba salemd f yãoog la b wẽbsd f bĩsa. Yaa rẽ me la m yet-fo, maam, Naaba-Wẽnde, tɩ m na n kɩtame tɩ f zo-rãmba yik ne-fo. Fo sẽn yɛ ne b marsã wã, m na kɩt tɩ b yi zĩig zãng n wa zab ne-fo. M na n boola Babilon dãmba, Kalde rãmba, Pekod, Soa la Koa rãmba, Asiri dãmba. M na n tigma kom-poala, ra-sãmba, kombɛɛmba la bʋ-kaoodba, zab-zabdba, neb sẽn dʋʋd wiidi sõmb-sõmbo. B na n wa taka zabr ne foo la b na n yii goabga sẽnẽ. B na n waa ne bilim-bilm, bɛd la bõonego, la tãb-biis ka tɛka. B tara gãndo la b fõgnega kut zug-peto la b na n gũbg-f lame. M na wilg-b-la fo sẽn maane la b na n bʋ-la f bʋʋdo wa sẽn zems ne bãmb me noya. M sũura sẽn puug ne foom yĩnga m na bas tɩ b maan-f pãnga. B na wõrga f yõor la f tʋba, n wa baas-f ne b sʋʋse. B na n looga ne f kom-dibli la f kom-pugli, la b na n yõoga sẽn keta bugum. B na yeesa f futu la b loog ne f fan-teedo. M na n sɛɛsa f yoobã la f saabã sẽn sɩng Ezipt tẽnga. F kõn le tʋlg ned ba a ye, f kõn le tẽeg Ezipt rãmba yell ye. Maam n yet-fo, maam, Naaba-Wẽnde, tɩ m na n bas-f-la f sẽn kis b rãmba nugẽ, sẽn yaand-b fo sũur marsã wã. B ka na n zã-f neer ye, b na n looga ne f tʋʋma yõodo. B na n basa foo zaala tɩ neba fãa get-f wala b sẽn maand ne pʋg-yoaada. Yaa f wẽnema la f yoobã, n na n wa ne rẽ. Fo yoo ne tẽn-zẽng rãmba la f waooga b wẽn-dẽgdã n dẽgem f menga. Fo vɩɩma wẽnega f kẽema rẽnna. A sẽn deeg sɩbgr ninga buudu n na n yɩ f rẽnna. Woto yaa Soaala-Wẽnd n yete: F na yũ tooga wamde f kẽema sẽn zoe n yũ wã. Yaa wam-yalengo, wam-pogbre! A sẽn labs yĩnga, a yũ zãng wata ne laado la yĩgsgu. Wamda na n tɩgs-f-la ne sũ-beedo, na n yũudame la f rigda n yũud la f waasd toogo, tɩ yaa f kẽema Samari wamde. F na yũ-a, f na yũ-a zãnga, n yaool n wa rũm-a n wã peese, t'a peesa sɩ f yãoogã. Maam n yete, maam, Naaba-Wẽnde! Sẽn ya woto wã, Wẽnd n gomde, f sẽn yĩm m yella yĩnga, f sẽn tud maam f kãare, tʋk f zugẽ f yooba ne a rẽgdã taale.» La Soaala-Wẽnd paasame: «Ninsaal biiga, segl bʋʋdo, a Oola la a Ooliba bʋʋdo. Ypk b tʋʋm wẽna. B zãmb-m-la ne b yoobã, b nug mooga ne zɩɩm. B rẽgma b meng ne wẽn-naandsa waoogre. B sẽn da rog kamb niyns m n kõ-ma, b yõog-b-la bugum tɩ bugma rɩ-b zãnga. Ad-b sẽn maan bũmb ning n paase tɩ m zabdẽ: b rẽgma m doogo n sãbs vʋʋsga raare. Bãng-y tɩ raar ninga b sẽn yõog b kamb bugum, baraar la b kẽ m doogẽ wã n dẽgem-a. B saaga woto fãa mam doogẽ. Yɩɩd rẽ menga, b sẽn bool b rãmb tɩ b yi yɩɩg n wa wã, sɩd wa-la b nengẽ. Tɩ b so koom, n ning kɩrʋ, n ning b muizãana, n gãand gãn-bʋgsg zugu, n dɩk tɩdarã la yũ-noog kaama m sẽn da kõ-bã, n dogl te-roagendg a ye zugu n wisd b menga. Sẽn wa-ba yɩɩ wʋsgo. Koɛɛg n da sãte, ya neb ka tɛka sẽn zɩ ne yɩɩr koɛɛga. Neb ka tɛka n da yi zĩ-peen-daagẽ n wa. B pida kamb a yiiba zũi, la naam pugl neeba la b fõgneg b zugu. M da yeta m menga: ges-y laado, yoob sẽn kʋʋl pag la bala, t'a ket n baood dapa! Rapa wata b nengẽ. B ra ket n pʋgda a Oola la a Ooliba, n le sãam n paas, pagb neerem sẽn sãam zãnga. Nin-tɩrs n na n kao pʋg bãmba bʋʋdo. B na n deega yoaadba la nin-kʋʋdba sɩbgre, tɩ sɩda b yoome la b nus mooga ne zɩɩm.» «Ad-m sẽn yet bũmb ninga maam, Naaba-Wẽnde: ‹Tigim-y nebã b sɛɛgẽ, n yɛɛs-ba, n fã-ba. Lab-y-b ne kuga, la b bees-b ne sʋʋga. Kʋ-y b kom-dibli la b kom-pugli la yõog-y b roto. Mam meng n na n sɛɛs b yoobã tẽnga pʋga. Woto pagb a taab yam na neke la b kõn dɩk tãop a yiiba nao ye. Bãmb n na n dɩ b tʋʋm yooda taale, bãmb n na n tʋk b wẽnema b zugẽ, bãmb sẽn waoog wẽn-naandsa yĩnga. Woto la y bãngda tɩ maam la Naaba-Wẽnde.› » Pa-weera kẽnd yʋʋmd a wɛ soaba, kiuug piig soaba, kiuuga piig daare, Naaba-Wẽnd goma ne m woto: «Ezekiyɛl, dɩk sebre n gʋls dũnna daarã a zugu, tɩ yaa rũnna raarã la Babilon dĩma na n gũbg Zerizalɛɛm. Gom ne m buudã sẽn ya tõatã, gom-a ne yelbũndi, la f wilg-a tɩ yaa maam, Naaba-Wẽnd, n kõ-f noor tɩ f gome. Segl rʋko, ning koom a pʋgẽ. Los nemdo, los nem-sõma, gere, la bãoko, pids rʋka ne kõb-sɩɩlem. Yãk pe-nobdsa nemdo, ning raad rʋka tẽngre. Sõng tɩ fãa kɛ sõma, tɩ kõaba fãa bɩ neere. Ad-m sẽn yete, maam, Naaba-Wẽnde: Kato nin-kʋʋdb tẽnga! Fo wẽnda rʋk sẽn kẽ piisem, t'a pekr lebg toogo. M na n yiisa f nebã a yeyn-ye tɩ tẽnga wa lebg vɩʋʋgo, f ka le ya m tẽn-nongr ye. Zɩɩma sẽn daagã ket n dɩga tẽnga pʋga. Zɩɩma raaga pĩig zugu, a pa raag tomẽ ye la ned me ka lob tom n bus-a ye. Mam me na n basa zɩɩma sẽn madg kugrã n ka bao tom n bus-a ye, m basd-a lame t'a yãng m sũuri, tɩ m sɩbg nebã n dok m sũuri. N-ye! Maam n yete, maam, Naaba-Wẽnde, tɩ nin-kʋʋdb tẽnga na n sega bʋk ne bʋko. Ade yaa bugum la m na n widgi na yɩɩ bug-kãsenga. Sam daado, ning bugum, rʋg nemdã, lebg-a n le rʋge, ning noosdo tɩ wʋme, los kõab-raada bugmẽ tɩ rɩ zãnga. Vaag rʋkã n bas vɩʋʋgo, dogl-a bug-saal zugu, t'a mooge, woto f na menes rẽgda fãa sẽn ket a pʋgẽ. Daare piisma na sʋʋge. Piisma waa ne tʋʋm toogo. Bugma ka na n tõog piisma naana ye, a ra kẽe rʋka wʋsg-wʋsgoo. Ad ka bũmb a to n dẽgem-fo n zʋʋg f yooba ye. M maana fãa n tẽed tɩ f na peke la f sẽn zãgs pekrã, m na kong n bas m sũura t'a fudgi n bas-a t'a fudg zãng n dɩ-fo. Maam n gome, maam, Naaba-Wẽnde, la m gomda na n pidsame. M kõn bas tɩ bũmb pa ye nimbãan-zoeer ka ye, sugr ka ye. Bʋʋda na n bʋʋme n tũ f tʋʋm yoodã. Maam, Naaba-Wẽnde, n togse!» Soaala-Wẽnd goma ne m woto: «Ezekiyɛl, vugr bala, m na n looga ne f yam sẽn kẽe a soabã, ne f pagã. La f kõn kelma a kʋʋre, f kõn yãbe, f nintãm kõn dʋʋg ye. Waas f sũurẽ bala, da yeelg kʋʋr fut ye, vil peend f zugu, wid f neoda, da teeg peend f lemd ye, da reeg rɩɩb f yags sẽn na n wa kõ-f ye.» Yibeoogo m sõsa ne zãma wã, la zaabr sẽn ta m paga kiime, la beoog sẽn vẽege m maana wala b sẽn da wilg-ma. Dẽ la zãma wã sok ma: «F kõn wilg tõnd f manesma võor bi?» Tɩ m yeel-ba: «Ad Soaala sẽn togs-m yãmb yĩnga: ‹Wilg a Israyɛl roogo, tɩ maam, Naaba-Wẽnd, n yete: M meng m toore n na n wã m do-sõngã, yãmb sẽn get ne zu-zẽkrã, y nin sẽn get ne yamleoogã, y yam sẽn loe a soaba. Y sẽn loog n bas y kom-dibli la y kom-pugli niynsã na n yɩɩ sʋʋg noor dɩɩbo. La yãmb me na n maana wa maam. Y pa na n teeg lemd ye, y pa na n dɩ kʋʋr dɩɩb ye. Da lood-y pɛɛla sẽn vil y zuta ye, da woob-y y neooda ye, da kelem-y ye, da yãb-y ye. Sẽn be yaa d faage, d tʋʋm yood waolgẽ, la d kũm taaba. A Ezekiyɛl sẽn maan bũmb ningã, yaa woto la yãmb me na n maane. La rẽ sã n wa taase y na reeg tɩ maam la Naaba-Wẽnde.› » Dẽn poore Soaala yeel-m lame: «Gese, Ezekiyɛl, m na n zãag-b-la ne ro-sõngã sẽn ya b soondg zĩiga, b nin yamleoog bũmbu, b zu-zẽkre la b saagre. M na n looga ne b kom-dibli la b kom-pugli. Yella sã n wa maane ned n na n põse n zoe n wa togs foom. Baraare f kõn le yɩ muk ye. F na n le tõog n gomame, f na n tõog n sõsa ne sẽn põs-a n wa ne kibarã. Fo sãoogra na n yɩɩ kaset b yĩnga, la b kõn le sãmb tɩ maam la Naaba-Wẽnd ye.» Soaala-Wẽnd goma ne maam n yeele: «Ezekiyɛl, taas Amonitsa tɩ m zabr n be ne-ba. Fo na n yeel-b lame tɩ b kelg maam, Naaba-Wẽnd, sẽn yet-ba. B sẽn waa n dẽgem m do-sõngã, n sãam Israyɛl tẽnga, n tall Zɩɩda rãmb n loog pa-weere, bãmb kaasa sũ-noogo. Woto wã m na n kɩtame tɩ yaang we-gõaadba wa soog y tẽnga. B na n ti-la b gãnda rot yãmb tẽn-peelmẽ. Bãmb n na n dɩ y tɩɩsa biisi, bãmb n na n yũ y tẽnga bĩisim. M na n kɩtame tɩ Raba, y na-tẽnga, lebg yʋgma bãgre, t'a Amon tẽn-peelma lebg piis wubri. Woto la y bãngd tɩ maam la Naaba-Wẽnde. Ad-m sẽn paasde, maam, Naaba-Wẽnde: ‹Fo wẽe nug pogs la f saoome, fo nooga f sũuri, yel-beeda sẽn lʋɩ a Israyɛl zug yĩnga. F pa ges m buuda ne waoogr ye, f maana beem ne-a. Mam me na n wilg-f-la m pãnga n bas-f bu-zẽmb nusẽ tɩ b loog ne f paoonga fãa. F buuda yʋʋr na n menema buud a taab sʋka, f ka na n le paam tẽng ye, m na n sɛɛs-f-la zãnga. Woto la f bãngd tɩ maam la Naaba-Wẽnde.› » Yaa woto la m gomda, maam, Naaba-Wẽnde: «A Moab n yeele tɩ Zɩɩda rãmba me yaa neb wa b taaba. Ade, m na wãa tẽns niyns fãa sẽn zao Moab tãmsa pennẽ, a tẽn-neeb wala a Bɛt-Yesimot, a Baal-Meõ la Kiriyatayim. B na n yɩɩ Yaang rãmba soolem, bãmb n paas Amon dãmba. Tẽnga na n lebga bãmb soolem al tɩ b ka le tẽeg a Amon yell meng bu-zẽmba sʋk ye. M na n sɩbg a Moab wa sẽn segde. Woto b na bãng tɩ maam la Soaala-Wẽnde.» Ad maam, Naaba-Wẽnd, sẽn leokde: «Edomitsa doka b sũur ne Zɩɩda la yaa rẽ la b beegrã. Maam na tẽega m nugu a Edom zugu, la m na n kʋ-la a neba la a rũmsa fãa; a na n lebga zĩ-peen-daaga, al Teman sɩngrẽ n ta Dedã, b tãb-biisa na n paa zabrẽ. M na n basa m buud a Israyɛl t'a rok m sũur ne Edomitsa n kõ-ma. Israyɛl na n maana ne-ba wala a sũ-fõora sẽn date, woto b na bãng tɩ b ka beegd maam zaalem ye. Yaa maam, Naaba-Wẽnd, n gomd boto.» Ad-m sẽn leokde, maam, Naaba-Wẽnde: «Filisti rãmba tuga beem ne maam. B yika ne tɩtaam n na n dok b sũuri ne b bɛ kʋdgo n sãam a yell zãnga. Boto wã yĩnga, mam yet-b lame, maam, Naaba-Wẽnde, tɩ m na n wilg-b-la m pãnga. M na n menesa neb niyns fãa sẽn yi Kaftor n wa kẽed mogra noore. M na n doka m sũuri, m na n sɩbg-b lame tɩ wʋm-ba. La woto b na bãng tɩ maam la Soaala.» Pa-weera kẽnd yʋʋmd piig la a yembr soaba, kiuuga pipi daare, Soaala-Wẽnd goma ne maam n yeel: «Ezekiyɛl, ad Tir dãmba laada Zerizalɛɛm dãmba n yetẽ: ‹N-faa, n-faa! B wãa tẽng ning sẽn da ya na-tẽn-kãsenga. Tõnd n na n deeg a zĩiga. D na n lebga arzɛk rãmb n yɩɩd pĩnda, tɩ Zerizalɛɛm wãame.› Dẽ yĩnga, ad-m sẽn yete, maam, Naaba-Wẽnde: ‹M na n yika ne foo, Tir tẽnga. M na n kɩtame tɩ neb wʋsgo wa zab ne-fo. B na n wa fão-f lame wa mogr ko-wiis. B na n wãa Tir lal-bɛdã, b na n tusa b do-lug-lugã n lubi, b na n pɩɩsa a toma n kees pĩig a nare. Sẽn na n keese yaa tẽng sẽn puk mogr sʋka, n zems zĩm-loabdba na yɛdg b zulumsi. Dẽ yaa maam, Naaba-Wẽnd n yete. Nin-zẽmb na n wa zɛɛ Tir, n paas tẽns sẽn pẽ ne-a n tong mogra noore. Woto y na bãng tɩ yaa maam la Naaba-Wẽnde.› Maam, Naaba-Wẽnd, n le yet woto: ‹M na n zaba ne foo, Tir. Ade, mam na n talla dĩm a yembre, sẽn yit goabga, a Nabikodonozor, Babilon dĩma, dĩm dãmba dĩma; a na n waa ne wiidi, ne bilim-bilm, ne wed-dʋʋdba, la tãb-biisi sẽn ka be tɛka. A Nabikodonozor na n zɛɛ tẽns niyns sẽn be mogra noore. Dẽ poore, tãb-biisa na n tuu bogdo la b sam tãndo n gilg-fo. Gãnd me la b na n sel n gilgi n kok f pɛɛma zãnga. A na n waa ne zab teedo, ra-bɛdã a sẽn tar n tãad dotã la a na n tus-f lalsã n lubi; a na n siiga f ro-lug-luga ne somse. Wĩida sõor na n yɩɩ wʋsgo; b wubsgu na n bui-f-la zãnga. Lalsa na n dĩmsa ne wed-dʋʋdba la bilim-bilma bʋʋre. Tãb-biisa na n tũ f dignoya n kẽ; b na n kẽe tẽnga naana-naana wala b sẽn tũud lal-wãoongo n kẽedẽ. B na n tũu f soya fãa n loog ne b wiidi, b na n kʋʋ fo neba ne sʋʋga, b na n tusa f lal-gilsã sẽn ya bɛd-bɛdã n lubi. B na n wʋka f arzɛgsã n sooge, b na n deesa fo bõn-koosma; b na n wãa f lalsã, fo ro-neebã, b na n wã-b lame, b na loba b kuga la b raada mogrẽ. M na n kɩtame tɩ b ra leb n wʋm f yɩɩla yɛs ye, b kõn le wʋm kʋnd dãamd ye. M sẽn na n kees-fo, yaa f zu-koeella bala, yaa f pĩiga bala, sẽn na n lebg zulums yɛdgr zĩiga, la b kõn leb n me-f n yik ye. Yaa maam, Naaba-Wẽnd, koɛɛg la woto.› Ad-m koɛɛg yɛs ne Tir dãmba: ‹Tẽnsa sẽn tedg kooma noor n zãagã na n sɩnga rigbu b sã n wa wʋm fo lʋɩɩse, n wʋm sẽn pogl b rãmb waasgo. Mogra noorẽ nanams fãa na n siga b naam goeel zugu, b na n piida b naama futu, b na yeesa b fu-neeba. Dabeem kãseng na n yõk-b lame; b na n zĩi tẽnga n tar digbu, fo lʋɩɩsa sẽn yɛɛs-b wʋsga yĩnga. B na yɩɩla sũ-sãang yɩɩla, fo poorẽ, la b na n yeel-f lame: Wao! Tẽng ninga yʋʋr sẽn da yi wʋsgã tɩ mogra pʋgẽ dãmba da tar a pãnga kasetã, tɩ neba fãa da yɛɛsd a naama, tẽn-kãng wãa zãnga! Marsã tẽns niyns sẽn be-b mogra noore zĩi ne yɩɩre, fo lʋɩɩsa poore. Sẽn tedg-b kooma noor n zãagã wʋma f wãab n tar digb bala.› N-ye! Maam n gomde, maam, Naaba-Wẽnde: ‹M na kɩt tɩ f lebg raboogo tɩ ned ka le be f pʋgẽ ye, m na kɩtame tɩ mogra koom fudg n dɩ-fo. Mam na n tus-f lame n lub tɩ f babs sẽn sig-b bʋg-tẽnga al tẽn-kʋdem-dãmb wẽndẽ. M na n kɩtame tɩ f sig ne pĩnd kɩɩmsã. F Kõn le tõog n wa bõn-vɩɩs sʋk, tẽng zug ka ye. F sẽn lebg a soaba na n yɛɛsa ãndũni rãmba, tɩ f na n wãa zãnga. B na n bao-la f zĩiga la ned kõn le yãend-a bada. Yaa woto la m gomda, maam, Naaba-Wẽnde.› » Soaala-Wẽnd goma ne maam: «Foom, Ezekiyɛl, pʋd yɩɩlle n yãb Tir. Yaa tẽng sẽn be mogra noorẽ la sẽn leebd ne mogra noorẽ dãmb a taaba. Taas-a m koɛɛga, maam, Naaba-Wẽnd, koɛɛga: ‹Tir, yaa foo n da pẽgd f menga, foo n da pẽgd f neerem! F toaaga tɩ bee mogra sʋka. B mee foo tɩ f wẽnd koom koglgo. Yaa Senir tɩ-wogda ra-pegdo la b rɩk n ka koglgã la Libã tɩ-wogdã la b kɛɛg yã n maan peen-loetgã. B rɩka Bazã daoog sẽn ya kɛgenga n pees paklse n tar n dugsd koglgã. Koglga ra-paadsã yaa Kitim ra-kegemse, bãmb zug la b ra samd teeda la laogã, la b maneg n tablga ne bõn-peesdi, ne bũmb sẽn pees ne wobd yẽna. Ezipt tẽng peend b sẽn manege n buki n da ya peend ninga sobga sẽn tusdi tɩ koglga kẽnd kooma zugã. B miime tɩ yaa foo n wate tɩ f nan ket yɩɩg menga. Peen-moaama la peen-mismiidu, Kitim tẽng pɛɛla n da lut teedã. Sidõ la Arvad neba n da ya fo ko-rugsdba. Tir ko-rugs-mitba n da wilgd sore tɩ koglga tũudĩ. Biblos tʋʋm-mitba n da manegd sẽn sãam fãa, koglga pʋgẽ. Koom-kogenda ne b neba sẽn da mi tolbã da yaasda f nengẽ n daad b teedo. Pɛrs, la Lud la Ypt dãmba da bee fo tãb-biisa sʋka, b da yagenda b gãndo la b zug-peto fo meng tãb-sikẽ, la fo yʋʋra ra tũu rẽ n zẽke. Arvad rãmba da naaga f tãb-biisã n gilgd lalga zugu tɩ Gamad rãmba gũusd bɛɛba ro-lug-luga zutu. B ra yagenda b gãndã lalsã la rẽ ra yaa bũmb sẽn sakd gesg waare. Tarsis rãmb da wata f nengẽ n daad teed buud fãa. B da raada f teedã ne wanzurfu, ne kutu, ne waasdo, ne namdo. Yavã, Tubal la Mesek da maanda leebgo ne foom, B da wata ne yemse la teed sẽn yõg ne zũudu n tekd ne fo sẽn da tõe n koos ne-ba. Rũms n da yit Bɛt-Togarma n wat fo nengẽ: wiidi sẽn tat teedo, wiidi sẽn mi zoeese, la bõn-weese. Dedã rãmba da leebda ne foom. Tẽns wʋsgo da yaa fo raadba. F ra leebda ne tẽn-zãorgẽ dãmba la b ra wata ne wob-yẽna la da-sĩdma. Edomitsa da raada teed wʋsgo la b da wata ne kug sẽn pɩnda, peen-miidu, pɛɛl sẽn gʋl tɩ sakd gesgo, gĩs sẽn ya neere, koomẽ zẽems buud la kug miid sẽn yãgd-b-toore. Zɩɩda la Israyɛl tẽnsa ra leebda ne foom, b da wata ne Minit alkam, ne ki, ne sɩɩdo, ne kaam, la tɩ-sũm sẽn tar yũ-noogo. Damas da yaa fo raada, a ra wat n daada teed buud toor-toore. B ra yaooda foo ne Elbõ rãam n paas Saar pe-kõbdo. Al Uzal tẽnga, Dã la Yavã, da wata ne kut sẽn kudi, ne tɩɩs pagd sẽn tar yũ-noogo, ne kãnkẽ-sɩɩdo. Dedã da wata ne fut sẽn tar n famd wiidi. Fo ra leebda ne Arabi la Kedar nanams fãa, b da yaooda ne pe-bi, pe-raado la bʋʋse. Saba la Ragma toandba da wata fo nengẽ. B da yaooda ne kaam sẽn tar yũ-nood wʋsgo, ne kug neeb buud toor-toore n paas sãnem. Arã, Kane, la Eden, Seba, Asʋr la Kilmad toandba da leebda ne foom. B da wata ne fu-neeba, ne fut sẽn ya mismiidu, ne fut sẽn gʋl tɩ ya neer wʋsgo, ne fu-gʋlem-gʋlem, ne wĩ sẽn tar pãnga. Tir, fo da tara koom-kogend sẽn wat ne f teedã, f kogenda da pida wʋsgo, wa sẽn tog ne mogr zug kogendo. Koom-kogenda rugsdba tall-f lame n ta ko-sʋka. Yaang sob-lebende n wa n sãam f kẽnde mogra sʋka. Fo arzɛkã, fo teedã, kogenda zɩɩbã neb niyns fãa sẽn da rugsd koglgã, neb niynsi sẽn be a pʋgẽ n manegd-a wã a sẽn mii n wa sãama, neb niyns sẽn get-b fo tolba yelle, zab-zabdba, la neb niyns fãa sẽn da be koglga pʋgã, bãmb fãa gilli paa koomẽ, tɩ f lisa mogra pʋga. B sẽn wʋm ko-rugsdba kɛlenga, mogra noorẽ dãmba digimdame. Wakat kãnga, sẽn da rugsda koglgo fãa yii n basa a koglgo b fãa siga tẽnga. B ra wiisda fo poorẽ, b ra waasda waas-toodo, n yugd b zut ne tom, n bilimd tompɛglmẽ. B põngda b zut fo yĩnga, b na n dɩka sũ-pa-noang fut n yeelge. Sũ-sãang pida b sũuri tɩ b na n wiis f yĩnga, tɩ b na n yãb yãb-toogo. B na yɩɩla sũ-sãang yɩɩla b na n kelma f kʋʋre. Tir, fo ra yaa tẽng sẽn ka tar a to ye, la ad fãa sẽn lebg sɩɩ, f tẽn-peelmẽ. F sã n da sik f kogendã, yaa neb ka tɛk n da wat n daadẽ. Fo arzɛka la fo teeda yĩnga fo kɩtame tɩ ãndũni wã nanams lebg arzɛgs rãmba, tɩ f arzɛka la f paoonga da yaa wʋsgo. Ade, marsã, ko-wiisa sãama foom, ko-zulunga sʋka la f lis yã. Fo zɩɩbã la f nebã, koom dɩɩ zãnga. Sẽn tedg-b mogra noora fãa yɛɛsa yɛɛsg menga. B dĩm dãmba rigdame, b fãa neng gãnemame. Tẽn-zẽnsa lɛɛbdba da rigda rabeem, fo tiig n lebga pɛlen-yɩk bũmb b yĩnga; fo yell sãama daar buud fãa yĩnga.› » Soaala-Wẽnd goma ne maam: «Ninsaal biiga, taas Tir dĩma Naaba-Wẽnd sẽn leokd-a bũmb ningã: ‹Fo n yik n gom ne wilg-m-menga n maand tɩ f yaa wẽnde. Wala wẽnde, m zao naam goeel la mogr ne mogre n gũbg goeelã. F yetame tɩ f zema wẽnde, mik fo yaa ninsaal bala, f ka tar wẽnd fɩ. Ade, fo tẽedame tɩ f tara yam n yɩɩd a Daniyɛl, tɩ bãngd ka be n zem foom ye, la f tõe n wʋma yel-solgdi wã fãa. Fo bãngre la f yam yĩnga, fo lebga arzɛk soaba, fo paama sãnem la wanzurf n bĩngi. Fo talla f minim kãsenga n paas f paoong wʋsgo, la fo maana wilg-m-menga, f arzɛka yĩnga. Woto wã, kelg m sẽn yet-fo, maam, Naaba-Wẽnde: Fo waa n tẽeme tɩ f yaa wẽnde, la rẽnd yĩnga, m na n kɩtame tɩ bu-zẽmb wa zab ne-fo. Yaa neb sẽn tar pãng wʋsgo. B na n wa sãama fo sẽn zĩnd n geelg wa yam pidung soab sẽn geendã. B na n sãbsa f ziirã. B na n tusa foom n lub f yaoogẽ, la f na n kii kũ-toogo, mogr sʋka. Fo na leb n yeel yɛs tɩ f yaa wẽnde, fo kʋʋdba taoore? Fo kʋʋdba nifẽ, fo yaa ned bala, fo ka wẽnd ye. Fo na ki nin-dẽgd dãmba kũum, tẽn-zẽng rãmb n na n kʋ-fo. Dẽ yaa maam, Naaba-Wẽnd, n yete.› » Soaala-Wẽnd le goma ne maam: «Ezekiyɛl, pʋd kũmkũm yɩɩla, Tir naab yĩnga. Fo na n yeel-a lame tɩ yaa maam, Naaba-Wẽnd, n ning goama f noorẽ. Yeel-a woto: ‹Fo da yaa ned sẽn pid ne sõmblem menga, f yam da waooga wʋsgo, fo neerem da ka be to ye. Fo ra vɩɩ Eden tẽnga, Wẽnd zẽed pʋga. F fuuga ra tisa ne kug neeb buud ka tɛka: kõod-miuugu, kõod-pespele, kẽeg-toenɛɛga, mosmoomde, wõnog kõbgo, peelgo, pɛɛlg fas, birba, mismiuugu. F gãngãada la f wɩɩsã ra bolga sãnem. Te-neeba la fan-teedo la b sɩd segl f yĩnga, f rogma raare. Mam da yalsa f yĩnga, malɛk gũuda sẽn da ya nin-daoogo. Fo ra bee m tãn-sõnga zugu tɩ f nao tagd kug sẽn yãgd-b-toore. Goaleng ka zĩnd f vɩɩmẽ, f naanega tɛka n tãag wakat ning f wẽnema sẽn waa n yaool n pukã. Fo tolba sẽn waa n paam pãng yĩnga, f lebga ned sẽn mi pãn-tõog la kalwẽdga. Yaa rẽ la m kɩt tɩ f lebg wa neb a taaba la m dig-fo n sik m tãnga zugu. Malɛk gũuda rig-f lame n zãag ne kuga sẽn da yãgd b toorã. F sẽn da paam n ta zĩig ninga kɩtame tɩ f wuk ne wilg-m-menga, f paoonga sẽn da ka paooda kɩtame tɩ f yama menem zãnga. Yaa rẽ yĩng la m gãnegd f tẽnga tɩ dĩm dãmb a taaba na n la-fo. Fo leebga pʋgẽ fo maana zãmbo la f wẽda f taaba. F waa n dẽgma m waoogra zĩiga, la yaa rẽ yĩng la m na n widg tẽnga pʋgẽ bugum ning sẽn na n dɩ-fã. Sẽn na n gesa foo fãa na yãenda m sẽn kɩt tɩ f lebg bug-rɩɩnda bala. Buud ning fãa sẽn mi foo la sẽn yãend f sẽn lebg a soaba na n yɛɛsa wʋsgo, fo na n lebga bũmb sẽn kẽesd rabeem, la m na n menes-f-la daar buud fãa yĩnga.› » Soaala-Wẽnd goma ne m woto: «Ninsaal biiga, kedg n tees Sidõ, la taas a nebã m sẽn yet tɩ b gũus ne yell ning sẽn na n paam-bã. Ad-m sẽn yet-ba, maam, Naaba-Wẽnde: ‹M na n yika ne foo, Sidõ, m na n wilg-f-la m pãnga ne tʋʋm bɛd niyns m sẽn na n tʋma. M sã n wa yik n na n sɩbg-b wala m sẽn kãabã, b fãa na bãng tɩ maam la Soaala, m na wilg-b tɩ maam la Nin-Sõngã. M na n loba bã-longdem tẽngã, soya fãa na n yɩɩ zɩɩm bala. Zabra na n yãnga zĩig fãa la f neb wʋsg na n lʋɩɩ tẽnga pʋga. Dẽ me la b fãa bãngd tɩ maam la Naaba-Wẽnde.› » Soaala-Wẽnd n yete: «A Israyɛl yak ba a ye kõn kell n tõog a yaoolg ye. B kõn le yɩ a yĩnga wa gõaaga n kõsdẽ la yorgdẽ ye. Woto b na bãng tɩ maam la Naaba-Wẽnde.» Ad Soaala-Wẽnd koɛɛga: «Mam na n tigma a Israyɛl kamba, b sẽn sẽege n be zĩig ning fãa. M na n sʋk-b lame la woto m na wilg tẽns a taabã tɩ maam la Nin-Sõngo. B na n vɩɩnda b tẽngẽ, tẽng ning m sẽn kõ a Zakoob. B na n zĩnda be ne laafi, b na n mee roto, la b sel bugsuntungu. B na n zĩnda ne laafi, tɩ m na n sɩbga a yak ning fãa sẽn na n paoog-a. Woto b na bãng tɩ maam la Naaba-Wẽnde.» Babilon pa-weera kẽnd yʋʋmd piig soaba, kiuug piig soaba, kiuuga piig la a yiib daare, Soaala-Wẽnd goma ne maam: «Ezekiyɛl, kedg n tees Ezipt dĩma la f pĩnd n togs-a yell ninga sẽn na n paam-a, yẽ ne Ezipt tẽng fãa gilli. Ad-m sẽn yete, maam, Naaba-Wẽnde: ‹M na n yika ne foo, Ezipt dĩma, fo wẽnda rũn-bãndã sẽn tẽeg a meng n gãe Nil pʋga. Fo yetame tɩ kʋɩl-kãnga yaa f soolem, a yaa f nug tʋʋmde. M na n ninga bãn-kõse f yɛgẽ, n kɩt tɩ Nil kʋɩl-zẽeda pɛ fo yĩnga pagda fãa. M na yiisa foom Nil koomẽ, foo ne kʋɩl-zẽedã sẽn pɛ f yĩnga pagdã. M na n loba yãmb zĩ-pɛɛlẽ. Fo na n paa zĩ-koɛɛngẽ. Fo kõn paam dɩkre, fo kõn paam mumb ye. M na n kɩtame tɩ f lebge we-rũmsi la yĩngri luiili rɩɩbo. La woto Ezipt neba fãa na bãnge tɩ maam la Naaba-Wẽnde. Sõngr ning a Israyɛl sẽn paam f nengẽ na n wẽnega ned sẽn baoode bũmb sẽn na n tar n tikdẽ tɩ b kõ-a rudumdi. Gese, rudumdi, foo la b wudg n gãnde tɩ fo wẽneg n kao b nusẽ, la fo sẽn kao f pogla b bãoko la bãok sẽn pogle b basa raoodo.› Yaa rẽ yĩnga la m gomda, maam, Naaba-Wẽnde: ‹Tãb-biis la m na n yiis tɩ b tak zabr ne foo la m na n menesa f neb la f rũmsi. Ezipt tẽng na n lebga zĩ-peen-daaga, na n lebga raboogo. Boto b na bãng tɩ maam la Soaala-Wẽnde. Fo sẽn yet tɩ Nil yaa fo n so wã, t'a yaa f nug tʋʋmna, d na ges sɩda sẽn beẽ. Bãng tɩ foo ne Nil dãmba fãa yell sãamame. M na n kɩtame tɩ Ezipt tẽnga lebg tẽn-wãoongo, sũ-sãang zĩiga, sẽn sɩng Migdol nug goabga, n ta Asuwã la Ezipt toaag, nug rɩtgo. Ned bɩ rũng naoor kõn leb n tag be ye. Yʋʋm pis-naas pʋgẽ, bõn-vɩɩg kõn le zĩnd be ye. M na n kɩtame tɩ Ezipt tẽnga lebg zĩ-peen-daaga, zĩ-peen-daasa sʋka; a tẽn-bɛda na n lebga raboodo wa b sẽn zɩ n yãend a taare. Dẽ na n maana yʋʋm pis-naase, la m na n modgame tɩ b sẽeg nin-zẽmb tẽnsẽ.› Ad-m sẽn paasde, maam, Naaba-Wẽnde: ‹Yʋʋm pis-naasa sã n wa pidi, m na sa Ezipt rãmba sẽn sẽeg zĩig ningã n tigs-ba. M na n sɛɛsa b nimbãanegã la m na n kõ-b-la sore tɩ b leb n wa b buuda tẽngẽ, Ezipt tẽn-zugẽ. B na n le vigla rĩung sẽn ka zem fɩ, rĩung sẽn ka tar pãng a taaba sʋka, rĩung sẽn ka le tõe n kẽes rĩung a to a soolmẽ, tɩ m na n wooga a neba sõor wʋsgo. Israyɛl kamba ka na n le sak n teeg Ezipt ye. A Israyɛl me kõn le maan wẽnga, n bas maam, Naaba-Wẽnd teegre, n teegd Ezipt ye. Woto me la b bãngd tɩ maam la Naaba-Wẽnde.› » Pa-weera kẽnd yʋʋmd pisi la a yopoe soaba, pipi kiuuga, kiuuga pipi daare, Soaala-Wẽnd goma ne maam: «Ned biiga, Babilon dĩm a Nabikodonozor yika ne pãng la raoodo n tɩ zab ne Tir. Tãb-biisa zuta fãa waa n wurame tɩ b bãgdã fãa meede. La zabra sẽn tak woto ne Tir ka zĩnd yõod a yĩnga, tɩ b gomd a zab-zabdba. Woto wã, ad maam, Naaba-Wẽnd, sẽn yete: ‹Maam n na n dɩk Ezipt n sagl Babilon dĩm a Nabikodonozor nugẽ. A na n wʋka b arzɛka fãa n kuli la a sãam tẽngã. A na n looga ne a arzɛka fãa. Dẽ n na n yɩ a zab-zabdba yaoodo. A sẽn ka zoe toogo ne a tʋʋma, mam dɩkda Ezipt tẽnga n ning Babilon dĩma nugẽ t'a soog-a, wala a yaoodo, tɩ yaa mam yĩng la a tãb-biisa tʋm yã.› Yaa maam, Naaba-Wẽnd n yet rẽnna. Badaare m na n kɩtame tɩ Israyɛl raooda le paase. La sã n ya foo, Ezekiyɛl, m na n kõ-f-la sore tɩ f gom ne-ba tɩ b bãng tɩ maam la Soaala.» Soaala-Wẽnd le goma ne maam: «Ezekiyɛl, gom bãngr goama, taas neba maam, Naaba-Wẽnd sẽn yet tɩ f taas-b koees niynsã: ‹Yãb-y tɩ yel-beed n wat y zugu! Ade, daara kolgdame, Naaba-Wẽnd daara zoe n taame tɩ m sũura na n fudgi. Badaare sawat na n zĩnda wʋsgo, sawat sẽn kẽesd rabeem. Na n yɩɩ baraare la m na n dok m sũur ne bu-zẽmbã. Sʋʋg na n varga Ezipt rãmba, la Kus rãmb na n diga rabeem. B na n kooda Ezipt rãmba gilli, n zɛ b laoga fãa, tɩ b tẽnga lebg raboogo. Kus, Ypt la Lud, Arabi tẽng ne Libi n paas Israyɛl kamb kẽere, fãa na n paa zabrẽ. Maam n yete, maam, Naaba-Wẽnde, tɩ al Migdol sẽn be nug goabga n tãag Asuwã sẽn be nug rɩtgo, Ezipt tẽng sõangdba na n paa zabrẽ. A sẽn da tar pãng m maand wilg-m-mengã, ad-a na n lʋɩɩme. Yaa maam, Naaba-Wẽnd, n togsd rẽnna. Tẽnga na n lebga zĩ-peen-daaga zĩ-peen-daasa sʋka. B sẽn da kẽed tẽns niynsa na n lebga raboodo. B na bãng tɩ maam la Naaba-Wẽnde daar ning m sẽn na n yõog Ezipt bugum n daag a kamba zɩɩm la m menes a sõangdba fãa gilli. Ezipt wãab daare, m na yiis neb ne koom-kogendo tɩ b tɩ wilg Kus rãmba tɩ b maan dabeem, la b na n sɩnga yɛɛsgo la rigbu. Ad-y daara kolgame!› Ad-m sẽn yete, maam, Naaba-Wẽnde: ‹M na n kɩtame tɩ Babilon dĩm, a Nabikodonozor, kʋ Ezipt zãma wã. Yẽ ne a neba, nin-toos menga, na n wãa tẽngã. B na n wõoga b sʋʋse n kʋ Ezipt tẽng rãmba, la tẽngã na n pida ne kũum bala. M na n kɩtame tɩ Nil kʋɩ, la m na n basa Ezipt rãmba nin-toos nugẽ. M na n kɩtame tɩ tẽn-zẽng neba wa sãam-a la b loog ne a laoga fãa. Dẽ yaa maam, Naaba-Wẽnd, n yete.› Ad-m sẽn paasde, maam, Naaba-Wẽnde: ‹M na n wãa Memfis wẽn-naandsa fãa ne b togsendo. Dĩm ba a ye kõn le rɩ naam Ezipt tẽng ye. M na n pidsa tẽnga ne rabeem. M na n wãa Patros, m na n yõoga Soã bugum, m na n pidsa m kãab-beeda ne No. Mam na kɩt tɩ wʋm Sin, Ezipt tãnsoben-doogã la m na n kʋʋ No zãma wã. M na n daaga Ezipt rãmb zɩɩm la m ning b tẽnga bugum. Sin tẽng rãmb na n yɛɛsame. No lalsa na n wurame tɩ koom dɩ tẽngã. On la Pi-Besɛt kom-bɩɩba na n paa zabrẽ, tɩ b tall sẽn ketã n loog yembdo. Tapanɛs tẽnga kõn le yãend wĩntooga vẽenem ye, Ezipt wãab raare, a kõn le tõog n yɩ a zu-zẽkre la a faong ye. Sawad sabelle n na n lud-a, la b na n talla a nebã n kẽng yembdo. M na pidsa kãab-beed ning m sẽn kãab Ezipt tẽnga la b na bãng tɩ maam la Naaba-Wẽnde.› » Yembda kẽnd yʋʋmd piig la a ye soaba, pipi kiuugã, a daar a yopoe soaba, Soaala-Wẽnd goma ne maam: «Ezekiyɛl, mam wooga Ezipt tẽng dĩma pãnga, m kaooga a kanga la ned ba a ye ka wa ne tɩɩm, bɩ pɛɛla, ned ba a ye ka vil a kanga t'a leb n paam pãnga n tõog n gãd sʋʋg ye. Yaa rẽ me la m leokda, maam, Naaba-Wẽnde: ‹M na n yika ne Ezipt dĩma. Kang ninga sẽn ket n tar-a pãngã na kaoogame n paase tɩ yɩ kams a yiiba fãa. A sʋʋga na n lʋɩ-la a nugẽ. M na n sẽega Ezipt tẽns a taab pʋgẽ, m na n sẽeg-a-la tẽn-zẽnsa pʋsẽ. Mam na n paasa Babilon dĩma pãnga, la m na n ninga m meng sʋʋg a nugẽ. Ezipt dĩma kamsa sẽn kao yĩnga, a na n wa yãbdame la a kiid a bɛ taoore. N-ye! Ezipt dĩma kamsa na n luunda woto, n ka tar pãng ye tɩ m yaool n na n paas Babilon dĩma rẽnna. M na n dɩka m meng sʋʋg n ning a nugẽ la a na n zẽk-a-la Ezipt dĩma zugu, la neba fãa na bãng tɩ maam la Naaba-Wẽnde. M na n sẽega Ezipt tẽns a taab pʋgẽ, m na n sẽeg-a-la tẽn-zẽnsa pʋsẽ. Dẽ la b bãngd tɩ maam la Naaba-Wẽnde.› » Yembda kẽnd yʋʋmd piig la a ye soaba, kiuug a tãab soaba, la kiuuga pipi daare, Soaala-Wẽnd goma ne maam: «Ninsaal biiga, ad-f sẽn na n yeel Ezipt dĩma la a soolma rãmba sẽn ka tɛkã: ‹M na n mak-f-la ne bõe, fo sẽn gãe ne pãngã? Fo wẽnda Libã kʋk buudu; fo tẽega f wila neere tɩ f maasem ya noogo. F tão-la f zugã, t'a kul sawatẽ. Tɩɩga ra bɩɩ ne saaga koom, koom sẽn da bund a tẽngre n da bɩɩs-a. Kooma ra tigimda a sɛɛgẽ, n lɛɛg n zoet n babsd pʋta tɩɩs a taaba. Kooma sẽn da sekd-a wã a tãoome n zʋʋg tɩɩs a taaba. Wila ra paam n tãoome la b ra waoogame. Luiili buud toor-toore da tʋɩta b tʋgdo a willẽ; tɩ we-rũmsi da wat a tẽngre, n dogd b kamba. Neb wʋsgo da wat n zĩ-la a maasmẽ. A da yaa tɩ-neere, n tar maasem, n tar zãndlem; a wila sẽn da sud zĩig ninga ra gala ne koom. Eden zẽeda pʋgẽ tɩɩg ba a ye ra ka be n wẽnd-a ye; tɩɩs niyns vãad sẽn ka kʋɩtã, zɩ n tão a wila buud ye. Vã tagda rãmb zɩ n bĩm wa yẽnd ye. M da sɩd kõ-a-la wil neeba; Eden, Wẽnnaam zẽeda, tɩɩsã da get-a lame la b kũmd sũuri.› Ad-m sẽn le gomda, maam, Naaba-Wẽnde: ‹Kʋka bɩɩme t'a zug tɩ be sawatẽ, t'a na n tũ rẽ n maan wilg-m-menga. Yaa rẽ la m dɩk-a n bas tẽng zug dĩm kãsenga nugẽ, t'a na n paoog-a wala a sẽn tog ne paoogr ningã. Bu-zẽn dãmba toolem sẽn yɩɩd buud a taab rẽnna, kɛɛg-a lame la b bas-a lame n looge. A wil bɛdã, a wil bõonega kaoome n dʋr tãnga zug la bãadẽ. Neb niyns sẽn da vɩ a maasmẽ wã zoe n loogame. Yĩngri luiili wã fãa dã zao-la a wil sẽn kʋʋse; we-rʋmsa fãa da waa n tabda a wilã. Maana woto tɩ tɩɩg ba a ye sẽn be koom noore, n tɩg koom, da le tõog n zẽk a wilã n ta sawato, tɩ rẽ wa ne a wilg-m-meng ye. Bala tɩɩsa wa ninsaalba, fãa gill yaa kũum n so, fãa gill na n gãanda tẽnga ne sẽn deng-b bʋg-tenga.› Ad-m sẽn yete, maam, Naaba-Wẽnde: ‹Kʋka sẽn sig bʋg-teng daare, mam kɩtame tɩ bũmb fãa kelem a kʋʋre; m paga tẽngr kʋɩlga koom, a ka le zoet ye, ko-nif ba a ye ka le bund ye. A kʋʋra yãbr yĩnga, m pidsa Libã tãmsa ne lika, la m kʋɩɩsa weta tɩɩs fãa. Mam sẽn kɩt tɩ tɩɩga lʋɩ, n kẽng n tɩ naag ne kɩɩmsã, bu-zẽna wʋma a lʋɩɩsã, n yɛɛse, n sɩng rigbu. Sẽn kɩdem-b sũ-noogo yaa bʋg-tẽng rãmba, yaa Eden tɩɩsã, tɩɩs sẽn tar neerem wʋsgo, tɩɩs sẽn tɩg-b koom n yɩɩd fãa, Libã tẽn-peelmẽ. Bãmb me busa tẽnga ne sẽn pa-b zabrẽ, bãmb n da sõngd-a, la b ra vɩ-la a maasmẽ, bu-zẽmba sʋka. Eden tɩɩg ba a ye ka kolg foo ne neerem la bedrem ye. B na n yaool n naaga foom bʋg-tẽnga, tɩ f gãe be ne nin-dẽgdo la sẽn pa-b zabrẽ. Woto n na n yɩ Ezipt dĩma ne a neba pʋɩɩre. Yaa maam, Naaba-Wẽnd, n yete.› » Pa-weera kẽnd yʋʋmd piig la a yiib soaba, kiuug piig la a yiibu soaba, kiuuga pipi daare, Soaala-Wẽnd goma ne maam: «Ezekiyɛl, maan kũmkũm yɩɩlle Ezipt dĩma yĩnga. Ad maam, Naaba-Wẽnd, sẽn yete: ‹Fo bee bu-zẽmba sʋka wa bõnyẽ-bila, la wakat kẽer me f manesma wẽnda wag-bãnda manesem; tɩ f be kʋɩlga naoorẽ n deemnẽ, tɩ f nao wã dẽgemd kooma, tɩ f bendgd kooma ne f ko-wiisi.› Kelg maam, Naaba-Wẽnd, sẽn yete: ‹M gũudame tɩ neba wa tigim zembala, tɩ m lob m zulungã n yaag-fo n dɩgl kʋɩlga noore. M na n basa foom yɩnga, m na n kɩtame tɩ yĩngr luiili wã fãa wa zõm f zugu, m na n kɩtame tɩ we-rũmsa fãa wa wãb foom. M na n ninga fo nemdã sẽn keesã la sẽn lebg yũugã tãms zutu, m na n ning-b-la bãg-faasẽ. Tẽnga na n yũ-la f zɩɩma; zɩɩma na mada tãmsã, n mad f sudsã. Fo sã n wa ki, m na n luda saaga, la m na n kɩtame tɩ ãds sobe, m na n luda wĩndga ne sawato, la kiuug ka na n le kõ a vẽenem ye. Fo yĩnga m na n kiisa yĩngr vẽenem fãa. Tẽnga gill na n paa likẽ. Yaa maam, Naaba-Wẽnde, n togsde. Buud wʋsgo fo sẽn ka mi menga sũur na sãame, f wãaba kibar sã n ta-ba. M sẽn na n kɩt tɩ f nams namsg ninga na n kẽesa neb wʋsgo rabeem kãsenga. B nanams pɛleng na n yɩka wʋsgo tɩ b digimdi, mam sã n wa dĩms m sʋʋga bãmb zutu. Fo lʋɩɩs daare, b na n diga rabeem, daara tõre, ned kam fãa zĩi n bʋʋda a yõore.› Ad Soaala-Wẽnd sẽn paasde: ‹Babilon dĩma tãb-biis na n pʋg-f lame. Mam na n kɩtame tɩ tãb-biisi sẽn ya toos wʋsgo wa kʋ f neb ka tɛkã. Tãb-biisa na wãa Ezipt sẽn pid ne wilg-m-menga n pa kees ned ye. M na n kʋla a rũmsa fãa sẽn yelgd Nil kʋɩlga noore. Ninsaal bɩ rũng nao kõn leb n bendg a koom ye. Mam na bas Nil kooma tɩ tisgi; kʋɩlga na zoe wala kaam n ka tar bʋʋr ye. Yaa maam, Naaba-Wẽnd, n gomd boto. M na kɩtame tɩ Ezipt lebg zĩ-peen-daaga; b na n looga ne a laoga fãa, a neba fãa na n loogame. Woto la b bãngda tɩ maam la Naaba-Wẽnde.› Yaa sũ-sãang yɩɩl kãnga, la tẽnsa fãa pagb na n yɩɩle. B na yɩɩl-a-la Ezipt la a zãma wã yĩnga. Maam, Naaba-Wẽnd, n wilgd rẽnna.» Pa-weera kẽnd yʋʋmd piig la a yiib soaba, kiuug piig la a yiib soaba, kiuuga piig la a nu raare, Soaala goma ne maam: «Ninsaal biiga, yãb Ezipt zãma wã; bɩ f kũmkũma tus yẽnda la bu-zẽmba gilli tɩ b lʋɩ bog zulung ninga kɩɩmsa sẽn dabdẽ wã. Sok-y-b woto: ‹Yãmb yẽ tẽedame tɩ y na põs la? Loog-y n tɩ gãand-y ne bu-zẽmb a taaba sẽn pa zabrẽ.› Sɩda Ezipt rãmba na n kii zabrẽ. Bɩ sʋʋsa sẽn yiis b wʋʋgẽ wã kʋ Ezipt tãb-biisa fãa! Gãndaad menga, Ezipt zo-rãmba, n na n zĩnd bʋg-tẽngẽ n yeele: ‹Ad-y b watame, ad-y nin-dẽgda sẽn ki zabrẽ wã watame n na n gãand tõnd sʋka.› Ad-a Asʋr, ad-a tãb-biis fãa sẽn lʋɩ zabrẽ wã yaad sẽn gũbg a rẽnna. Bʋg-tẽng boka sẽn tɩ zulmẽ wã la b tu b yaado n gũbg b rĩma rẽnda. Zabr sʋʋg n kood b fãa gilli. Bãmb n yaool n da yɛɛsd ãndũni rãmba. Ad-a Elam, ad-a tãb-biis yaad sẽn gũbg a yaoogo; b fãa lʋɩɩme, fãa yaa sʋʋg n koode. Nin-dẽgd bãmba n da yɛɛsd ãndũni rãmba, la ad-b sẽn bus tẽnga. B naagame n sig bʋg-tẽng ne yãnde tɩ b kii wa neb a taaba. N-ye! Elam dĩma tʋɩ-la a gãaga, a tãb-biis sʋka. A tãb-biisa yaad gũbga a rẽnna. Nin-dẽgd bãmba fãa kii zabrẽ; bãmb n yaool n da yɛɛsd ãndũni rãmba la ad-b sẽn gãe marsã ne yãnde, ne neb sẽn ki zabrẽ wa bãmba. Ad Mezek, ad Tubal dĩm dãmba ne b tãb-biisã. B yaada gũbga ne b tãb-biisa rẽnna. Nin-dẽgd bãmba fãa lʋɩ zabrẽ. Bãmb n yaool n da yɛɛsd ãndũni rãmba. B ka naag ne gãndaad niyns sẽn lʋɩ b pĩnda ye, gãndaad niyns sẽn da yɛɛsd-b ãndũni rãmba, la sẽn sig bʋg-tẽng ne b zab-teedo, n dɩk b zug n kʋgl b sʋʋga, n dɩk b gãndo n pil b yĩnga ye. Yãmb me Ezipt rãmba, y me na n kiime la b na n mum-y-la ne nin-dẽgdo sẽn lʋɩ zabrẽ. Ad-a Edom, ad-a dĩm damba ne a na-biisi. Ne b raooda sẽn pa yɩ bilfã, b muma bãmb me wa sẽn pa-b zabrẽ. Bãmb me gãnega bʋg-tẽng ne nin-dẽgdã sẽn deng-b bãmba. Ad nug goabg dĩm dãmba, bãmb me bee ka ne Sidõ rãmba fãa sẽn gãe ne kɩɩmse. Yɩɩ gãndaad sẽn da yɛɛsd ãndũni rãmba, la marsã nin-dẽgd bãmba gãe ne yãnde ne sẽn ki-b zabrẽ wa bãmba. Bãmb me gãe ne yãnde. Ezipt dĩma na n yãenda a tãb-biisã la yẽ nengẽ wã na sãoog bilfu, tɩ yẽ naag-b lame n ki zabrẽ. Yaa maam, Naaba-Wẽnd n yet rẽnna. M basa Ezipt dĩma t'a yɛɛs ãndũni rãmba. Marsã, yẽ ne a tãb-biisa fãa na n naagame n mum ne nin-dẽgdo sẽn pa zabrẽ. Maam, Naaba-Wẽnd n gome.» Soaala-Wẽnd goma ne maam: «Ezekiyɛl, gom ne m buuda kamba. Tẽeg-b sẽm maand bũmb ninga, zabr sã n wa yik tẽngẽ. Tẽnga rãmb yãkda bãmb nin-yende t'a yɩ gũusda. A sã yãend tɩ bɛɛb wata, a peebda baorgo tɩ neb bãng tiiri. Sẽn wʋma baorga peebgo, n maan wa a toog ka be ye tɩ b yõk-a n kʋ, yẽ soab zɩɩm daagr taale be-la a meng zugu. A wʋma baorga peebgo, la a maana wa a ka wʋm ye. A zɩɩma daagre lʋɩta a zugu. A sã n da ka maanẽ wa a toog kaẽ, a põsdẽ lame. La b sẽn yãk a soab t'a gũusdẽ wã, sã n yãe tɩ bɛɛb wata, t'a yaool n ka peeb baorga tɩ neb bãng tiiri, sʋʋgã sã n wa kʋ bãmb nin-yende, ya gũusda yelle, yaa yẽ zug la taala lʋɩta. Foo, Ezekiyɛl, yaa foo la m yãk yã, tɩ f yɩ gũusda a Israyɛl yĩnga. Fo na n kelga m goama, fo na n taasa Israyɛl dãmb m sẽn yet tɩ b gũus ne bũmb ningã. Mam sã n dat tɩ yel-wẽn-maand bãng t'a rɩka a kũum sore tɩ fo pa yeel-a t'a tedg vɩɩm, nin-kãng na n ki-la a sẽn maan wẽnga yĩnga la yaa foo n na n dɩ a kũuma taale. Marsã fo sã n pĩnd n wilg nin-wẽngã, t'a bas a wẽnema, n tek a zʋgo, t'a pa sake, a na n ki-la a sẽn maan wẽnga yĩnga la taal ka gũusda zug ye, f fãaga f yõore.» «Foom, Ezekiyɛl, yeel a Israyɛl doogo: ‹Yãmb gomdame tɩ y tʋʋm-wẽna la y yel-wẽna tʋk-y-la zɩɩb sẽn na n kʋ yãmba la y ka mi y sẽn na n maan bũmb ning n põs ye.› Ad maam, Naaba-Wẽnd, Vɩɩm Naaba sẽn leokde: ‹Mam pa nong nin-wẽnsa kũum ye, mam sẽn date, yaa b teem zʋgo n paam n vɩɩnde. M kot-y lame, Israyɛl kamba, tɩ y bas wẽnem. Bõe yĩng la y na n tʋlg kũum?› Ninsaal biiga, yeel f buuda kamba: ‹Nin-tɩrg sã n yik n maand wẽnga, neer ning a sẽn maan pĩnda kõn sõng-a t'a põs yel-beed ninga sẽn gũud-a wã ye. La nin-wẽng sã n teem vɩɩm, a pĩnd yel-wẽnda ka na n le wa ne a kũum ye. La nin-sõng sã n sɩng wẽng maanego, ad-a kõn põse, a pĩnd vɩɩma yĩng ye. Mam sã n yeel nin-tɩrga t'a na n vɩɩndame, a ra tẽ t'a pĩnd sõmblema sekame t'a na n yik marsã n maan wẽng ye. M na n yĩma a tʋʋm sõma wã la a tʋʋm wẽnsa na n waa ne a kũum. La mam sã n yeel nin-wẽnga t'a toga ne kũum, t'a yik n bas a wẽnema n lebg nin-tɩrga, n lebg zemsg soaba, ad-a kõn ki ye. A sã n peng bũmb n deeg bobelle la a lebsa a sẽn deegã, bɩ a lebsa a wagdema bũmbu, a sã n ka le maand wẽnga la a reegd noy-niyns fãa sẽn kõt vɩɩm, sɩda a kõn ki ye, a na n vɩɩndame. B ka na n le tẽeg yel-wẽn-niynsi fãa a sẽn maana ye. A tũu noore la zemsg sẽn dat bũmb ninga, a na n vɩɩndame.› Fo buuda kamba yetame tɩ maam sẽn maanda yaa n looga toogo. M sok n gese sãnd ka bãmb n ka bʋʋm? Nin-tɩrga sã n bas neer maanego n maand wẽnga, a na ki rẽnd yĩnga. La nin-wẽnga sã n basd a wẽnem, n na n tũ noore la zemsgo sẽn dat a soabã, yẽ me na vɩɩnd rẽnd yĩnga. La yãmb yetame tɩ mam dẽnna n loog toogo, bãng-y tɩ m na n kaoo yãmb bʋʋdo n tũ ned kam fãa manesem.» Pa-weera kẽnd yʋʋmd piig la a ye soaba, kiuug piig soaba, kiuuga daar a nu soaba, nin-yende, sẽn põs Zerizalɛɛm wãaba raare, n waa n yeele: «Tẽnga lʋɩɩme!» Zaabre, a waoonga ket tɩ beoogo, Naaba-Wẽnd wilga maam b pãnga n kɩt tɩ m tõe n gome. Sẽn põsa wã sẽn ta m nengẽ, m da tõe n gomame, m da ka le ya muk ye. Soaala-Wẽnd goma ne maam: «Ninsaal biiga, yaa woto la neb niyns sẽn pa Israyɛl tẽn-wãanda pʋs gomda: ‹A Abraam yɩ-la a ye la yẽ n da so tẽn-kãnga gilli. Tõnd sẽn lebg ka tɛkã yaa vẽeneg t'a tog n yɩ-la d soolem.› Woto wã! Togs-ba, maam, Naaba-Wẽnd, sẽn leokd-ba: ‹Yãmb wãbda rũng sẽn ka kodg nemdo, yãmb zẽkda y nini n get wẽn-naandse, yãmb daagda zɩɩm, n yaool n zĩ be n gomd tɩ tẽnga yaa yãmb n so? Yãmb teega y sʋʋs bala, yãmb tʋmda tʋʋm yoodo, yamb dooda taaba pagba, n yaool n zĩ be n gomd tɩ tẽnga yaa yãmb n so?› Taas-b woto: ‹Ad maam, Naaba-Wẽnde, Vɩɩm Naaba, n wilgdi tɩ b na kʋʋ neb niyns sẽn pa-b raboodẽ wã, sẽn be-b wetẽ, wã we-rũms n na wãb bãmba; sẽn solg-b tãmsa zutã la tãmsa bogdẽ, bã-longdma n na n kʋ bãmba. M na n wãa tẽngã n kɩt t'a lebg zĩ-peen-daaga. A ra teega a pãng n maand wilg-m-menga. Israyɛl tãmsã kõn le yãend ned sẽn na n saag n dʋ be ye. M sã n wa tedg tẽnga neng zãnga t'a lebg we-raoogo n sɩbg tẽnga rãmb tʋʋm yoodã, b na bãng marsã tɩ maam la Naaba-Wẽnde.› La foom, ninsaal biiga, fo yems-taasã tara goam tẽnga lals seese la b rot kʋɩlens noore. B gomda fo poorẽ n yet taaba: ‹D kẽng n tɩ kelg Soaala-Wẽnd koɛɛga.› La woto m neba wata wʋsgo fo nengẽ, n na n kelg-fo. B kelgda f goama la b pa maand f sẽn yet ye. B maanda wa b sẽn date, n baood sẽn nafd bãmba. Ade, bãmb nengẽ fo wẽnda yʋʋma sẽn tar koe noogo la sẽn zodgd noogo. B kelgda f saglsã la b pa tũud ye. B bãng tɩ fo sẽn bilgda sã n wa pidsi, la kõn le kaoos ye, b na reeg tɩ bãngd n da be b sʋka.» Soaala-Wẽnd goma ne maam woto: «Ezekiyɛl, zab ne Israyɛl pe-kɩɩmbã la f taas-ba m sẽn yet tɩ b gũus ne bũmb ningã. Maam n yet-ba, maam, Naaba-Wẽnde: ‹Yell na pak yã, Israyɛl pe-kɩɩmba! Y geta y mens yelle. Yaool n yaa bãgrã la pe-kɩɩma tog n gese. Yãmb basda bãgra piisi. Y sẽn mi bal yaa y rɩlg y meng ne bĩisima la y yeelg kõbda futã la y kʋ pe-nobdsã n wãbe. Yãmb ka ges pe-waga yell ye, yãmb ka tɩbs bãad-dãmb la sẽn pogl-ba ye. Yãmb ka lek pesg ninga sẽn da bʋdgda ye, la y ka bao sẽn da menem-a wã ye. Yãmb ka zã-b neer ye, y maan-b-la pãn-tõogo. Woto, pe-kɩɩm sõng kaalem yĩnga, piisa sẽegame n lebg we-rũms rɩɩbo. Mam piisa kẽngame n tɩ menem tãms la kunkub zutu, mam piisa sẽega zĩis fãa tẽng zugu, la ned ka lob a toog ye, ned ba a ye ka sa n bao-b ye. Dẽ wã yĩnga, Israyɛl pe-kɩɩmba, kelg-y Soaala-Wẽnd gomde: Sɩd ne sɩda, maam, Naaba-Wẽnde, Vɩɩm Naaba, m yam ya n yii ne b sẽn basd m piisa ne fãadbã. Pe-kɩɩmb kaalem yĩnga, piisa lebga we-rũms rɩɩbo. M pe-kɩɩmba ka ges b yell ye. B basa piisa gesg n ges b meng yelle. Boto wã yĩnga, Israyɛl pe-kɩɩmba, kelg-y! Maam, Naaba-Wẽnde, m wilgd-y lame tɩ m na n yika ne-yã, la y ka na n le zã m piisa ye. Ka yãmb n na n le ges b yell ye, la y kõn le rɩ b yõod ye. M na deega y noorẽ m bãgra rũmsi, y kõn le rɩlg y mens ne b ye. Ad-m sẽn yete, maam a Naaba-Wẽnde: Marsã tɛka m meng m toore, n na n ges m piisa yelle. M meng n na n gũ-ba. M na modg n le tigim-ba wala pe-kɩɩm sẽn maande, a piisa sã n sẽege. M na n tɩ bao m rũmsã b sẽn tɩ sẽeg zĩig ning fãa, sa kãsenga niiba raare. M na yiis-b bu-zẽmb tẽnsẽ, b sẽn be zĩig ning fãa; m na tall-ba n wa tigim la m le tall-b n wa b tẽngẽ. M na tall-ba n dʋʋs Israyɛl tãmsã, a bãg-faasã, tẽnga sẽn sakd zĩigẽ fãa. M na n kɩtame tɩ b kẽes-b yam nood zĩigẽ. B wãbneg zĩig na n yɩɩ Israyɛl tãmsa zutu. Beelẽ b na n paama vʋʋsg la yamd nood zĩiga. Maam n na n yɩ b pe-kɩɩma. M na n fãag-b-la ne we-rũmsã. Yaa maam, Naaba-Wẽnd, n yeele. Pesg ninga sẽn meneme, m na bao-a n tall n wa; sẽn pogl-a, m na tɩbs-a; la sẽn bẽed-a, m na sãoog-a t'a paam pãnga. Sẽn nob-a tɩ looge, sẽn tar-a pãng tɩ looge, m na yiis-a. M na yɩ pe-kɩɩm ning tʋʋmde sẽn be yõodo.› Sã ya bãgrã, ad-m sẽn yete, maam, Naaba-Wẽnde: ‹Mam na n ges sẽn be piisa ne taab sʋka, sẽn be pe-raada la boeesa sʋka. M na bãng sẽn ya bũmb ning yĩnga la rũms kẽer ka rat n pa wãbneg zĩis sẽn ya sõmb n yɩɩd zĩis a taaba. M na bãng bõe yĩng la b tabd yamda sẽn ketã, tɩ ko-yɩlemda sẽn na n yũ wã pa tat b yam, tɩ b na n deng n bendga ne b nao? M na bãng yaa bõe la rũmsa bogr na n kong n wãbd yamda kẽer sẽn tabe la b yũud kooma b sẽn bendgã. Yaa rẽ me yĩnga la maam, Naaba-Wẽnd, yet-y woto: m na bʋ n ges sẽn ya bũmb ning n be rũm-waglsa la sẽn nob-ba sʋka. Sẽn nob-ba tusa ne b bãgdo la b lʋga, piis niyns sẽn ka tar-b pãngã. B tãad-b-la ne y yɩɩla n wa rig-b n yiis bãgrẽ. M wata b sõngre, tɩ b ra le bas-b ne we-rũms ye la m na n yalsa yãmb ne bãmb sʋka. M na n lʋɩɩsa m bãgra taoore, pe-kɩɩm yɛnga, sẽn na n bãng a gesgo. Na n yɩ-la m tʋʋm-tʋmd, a Daviid. Yẽ na n gesa bãgra rũms yelle la a na n yɩɩ pe-kɩɩm sõngo. Maam, Naaba-Wẽnde, m na yɩ bãmb Wẽnde la m tʋʋm-tʋmd a Daviid na yɩ b na-biiga. Yaa maam, Naaba-Wẽnd, n yet rẽnna. Mam na n kɩtame tɩ laafi zĩnd rũmsa bãgrẽ, n kɩt tɩ we-rũmsa menem tẽnga pʋgẽ. Woto rũmsa na zĩnd ne laafi, b wãbneg zĩisẽ, b na gũs ne laafi b bãgrẽ. M na n kõ-b-la sore tɩ b pa m tãn-sõnga sɛɛga. M na kɩt tɩ saag ni a wakato, n wa ne kũun toor-toore. Tɩɩsa na n womame, la tẽnga kood me na n bɩɩme, tɩ ned kam fãa zĩ tẽnga ne laafi. M na n kao bãeensã sẽn loe m buuda neb kẽere, m na n fãag-b-la b zu-soaben-dãmb nusẽ la woto la b bãngd tɩ maam la Wẽnde. Bu-zẽmba me kõn le wa yõg-ba tɩ b lebg b pʋɩɩr ye, we-rũmsa me kõn le wãb-b ye. B na n vɩɩnda ne laafi, tɩ bũmb ka leb n kẽes-b rabeem ye. M na n kõ-b-la pʋto sẽn ka be tar ne wombo, la kom kõn le nams tẽnga rãmb ye. Tẽns a taaba kõn le paoog-b ye. Woto b na bãng tɩ maam b Wẽndã, toog bee ne bãmba la a Israyɛl buuda la m buudu. Yaa maam, Naaba-Wẽnd, n yeele. N-ye, yãmba, m bãgra piisi, m geta y yelle tɩ maam la yãmb Wẽnde. Yaa mam menga, yaa Naaba-Wẽnd n togse.› » Soaala-Wẽnd goma woto: «Ezekiyɛl, kedg n tees Seyir la f pĩnd n togs woto a poorẽ. Yeel-b tɩ b kelg m sẽn yete, maam, Naaba-Wẽnde. M na n yika ne yãmba, M na n wilg-y-la m pãnga, Edom, m na n wã-f lame, la f na n lebga zĩ-peen-daaga. M na n wã-la f tẽn-bɛdã, f tẽnga gill na n lebga raboogo la f na bãng tɩ maam la Wẽnde. Fo zɩ n vʋʋs ne Israyɛl dãmba kisgu ye. M sẽn waa n tʋlg n sɛɛs b wẽnema n dɩk-ba n bas b bɛɛba nugẽ, fo varg-b la ne f sʋʋga. Dẽ yĩnga, sɩd ne sɩda, maam, Naaba-Wẽnde, Vɩɩm Naaba, n yete: ‹M na n daaga f zɩɩm la m yõog-f ne bugum tɩ zɩɩm ninga fo sẽn daagã n dat zɩɩm n lebse. Fo sẽn pa zoe f taab kũuma, fo me na n kiime. Mam na n kɩtame tɩ Seyir tãnga lebg zĩ-peen-daaga la m na n kʋ ned ning fãa sẽn na n pɩʋʋg be. M na n pidsa f tãmsa zut ne kũum. Zabra sʋʋg na n gãnega kũum f kunkuba zutu, f bãadẽ, la f tãmsa bogdẽ wã fãa. Yaa daar fãa yĩnga la f tẽnga na n lebg zĩ-peen-daaga, la ned kõn le kẽ f tẽngẽ ye. La woto f na bãng tɩ maam la Naaba-Wẽnde. Fo saag n yeelame: m na n pãb n sooga Israyɛl la Zɩɩda rĩundu, Soaala sẽn maan b yamleoog tẽnsã. Ade, maam, Naaba-Wẽnde, Vɩɩm Naaba, m na n zã-f lame wala fo sẽn zã bãmba la bãng tɩ f maan-b-la pãn-tõogo, f maana sũ-kiir ne-ba, f kisg-b lame. M na wilg-b mam sẽn yaa a soaba ne sɩbgr ning m sẽn na n sɩbg fooma. Rẽnda marsã la f bãngda tɩ maam, Naaba-Wẽnd, wʋma f tɩtaam goama, f sẽn waa n maanẽ tɩ Israyɛl tãmsa yaa foom n so-b, n maanẽ tɩ f wã-b lame la b lebga f soolem. Fo paooga maam al wʋsgo. M pa yĩm f tɩtaam goama ye.› Ad-m sẽn yete, maam, Naaba-Wẽnde: ‹M na n wã-f-la zãnga n pids f yagsa ne sũ-noogo. Fo nooga f sũuri ne m buud a Israyɛl wãabã. Fo me na n wãa wa yẽnda; f tãmsa gilli, f tẽn-peelma zãnga, fãa na n wãame. La woto la neba fãa bãngda tɩ maam la Naaba-Wẽnde.› » «La foom, Ezekiyɛl, pĩnd n gom a Israyɛl tãmsa poorẽ. Fo na n wilg-b lame tɩ b kelg maam, Naaba-Wẽnd, sẽn yet-ba: ‹Y bɛɛba pusga laado la b yeelame: a Israyɛl ne a tãmsa yaa tõnd n so!› Ad yaa rẽ yĩnga, Ezekiyɛl, la m yet tɩ f taas Israyɛl kamba woto: ‹M yãendame tɩ sẽn lebẽ fãa, b yika zabr ne y tãmsã. Wʋsg tʋlgame n soog-ba, la b sɩd waa n lʋɩ bu-zẽmb soolmẽ, la bu-zẽmba sɩnga laad la tʋʋre.› Dẽ yĩnga, gom ne b woto: ‹Israyɛl tãmse, kelg-y maam, Naaba-Wẽnde, sẽn kãabd bũmb ninga, y tãmse, y kunkuba, y kʋɩls sẽn zoet ne rãamde, y bãado, y raboodo, y tẽn-wãando. Yãmb yagsa pidsa yãmb ne naong la paoore. Sẽn ya woto wã, maam m yete, maam, Naaba-Wẽnde, tɩ m sũura puugame tɩ m yet a Israyɛl yagsã, maan gũusgu, bũmb zãnga a Edom, tɩ tẽn-bãmb yika ne kɩdengo, n yik ne tɩtaam, n deeg m tẽngã la b zɛɛ a rũmsi.› Woto yĩnga, Ezekiyɛl, taas a Israyɛl m koɛɛgã. Yeel tãmsã, kunkubã, kʋɩlsa sẽn zoet ne rãamdã la bãadã, tɩ maam, Naaba-Wẽnd, na n basa m sũura t'a fudgi. Yeel-ba: ‹Bu-zẽmba tʋʋsa yãmba, n paoog yãmba. Sã n ya maam, Naaba-Wẽnde, m zẽka m nugu la mam kãabdame tɩ tẽnsa sẽn gũbg yãmba, n tʋʋsd yãmbã, dẽ fãa na n leb-b lame. Badaare, Israyɛl tãmsa zutu tɩɩsa na n tãoo will la vãado, n wom biisi mam buud a Israyɛl yĩnga, la kõn le kaoos t'a kamba leb b tẽngẽ ye. Ade, m na n maana bũmb y yĩnga, m na n kɩtame tɩ b le ko tẽngã la b bʋd-a. M na n kɩtame tɩ neba me sõor paase, tɩ neb leb n wa kẽ tẽnsã. Tẽns niyns sẽn wã-ba na n le meeme. Ninsaalba la rũmsa sõor na n paasame. Y sõora pʋs n na n yɩɩ wʋsgo, y yagensa na n yɩɩ ka tɛka. Tẽnga na n le pida neb wa pĩnda, y arzɛka na n yɩɩga pĩnd dẽnna. Woto y na reeg tɩ maam la Naaba-Wẽnde. Mam na n kɩtame tɩ m buud a Israyɛl kamba kẽ tẽngã, n karg-a, n soog-a la a kamba kõn le yi n bas-a ye. Ad-m sẽn yete, maam, Naaba-Wẽnde: B yetame tɩ Israyɛl wẽnda bõn-ninda sẽn wãbd a meng kamba. To! Dũnna tɛka tẽnga kõn le wãb a kẽedb ye; a kõn le reeg neba kamba n bas-b ye. Dẽ yaa maam, Naaba-Wẽnd, n togsde. M na kɩt tɩ f ra le wʋm tẽns a taba tʋʋr la b laad ye. Y tẽnga kõn le bas t'a kamb ki ye. Maam n gomd boto, maam, Naaba-Wẽnde.› » Soaala-Wẽnd goma ne maan n yeele: «Ninsaal biiga, kelge: a Israyɛl kamba sẽn da waa n ket b tẽngẽ wã b tʋma tʋʋm yoodo n dẽgem tẽngã. B rẽgda looga pag sẽn nan ka pek rẽnna. B rẽgma tẽnga ne nin-kʋʋre la wẽn-naands waoogre. Yaa rẽ la mam sũur puug ne bãmb al wusgo. Mam sẽeg-b-la zĩis fãa, m sẽeg-b-la tẽn-zẽmbẽ. Dẽ la sɩbgr ning m sẽn sɩbg-ba, b tʋʋm yooda yĩnga. La b sẽn zĩnd tẽns niynsã, be me b sãama m yʋʋr sõngã, tɩ b ra gomd bãmb poorẽ n yetẽ: ‹Yaa Naaba-Wẽnd kamba la b yiis-b-la b tẽngẽ.› Woto wã Israyɛl sẽn tɩ kẽ bu-zẽmba tẽnsẽ, a maaname tɩ b paoog la b sãam m yʋʋre. Rẽ nams-m lame. M yet-f lame, Ezekiyɛl, tɩ f taas-ba m koɛɛg kãnga: ‹M sẽn na n maan bũmb ninga, Israyɛl kamba, ad-y ka y vɩɩm sõnga la mam get ye. M pa ratame bala tɩ b paoog m yʋʋr sõngã, bu-zẽmba tẽnsẽ, y sẽn sẽeg n be zĩis niynsã. Ne y sẽn paoog maam bãmb taoorã, m na wilg-ba, ne m sẽn na n maan y yĩngã, tɩ maam la Na-kãseng, Na-Sõngo, Naaba-Wẽnde. Yaa maam n gomda. M sã n wa yiis-y buud niynsi la tẽns niyns y sẽn be rũnna wã, m na n tigim-y lame n tall-y n tɩ lebs y tẽngẽ. M na n dɩka ko-yɩlgemde n waal yã, n pek wẽn-naandsa pʋgbã sẽn dẽgem yãmbã. M na n kõo yãmb sũ-paalga, la yam paalga, m na n yãka yãmb sũurã sẽn ya kugrã n ledg sũuri sẽn deegd saglgo. M na n pids-y-la ne m meng yam, y na lebg neb sẽn deegd gomde, sẽn deegd m noya la sẽn tũud m sẽn yalse. Yãmb na tõog n zĩnd tẽng ninga mam sẽn kõ y ba rãmba. Yãmb na n yɩɩ mam neba, la mam na n lebga yãmb Wẽnnaam. M na yiis-y y rẽgdẽ wã fãa; m na n kɩtame tɩ yãmb paam kood tɩ sek yã, la kom kõn leb n lʋɩ y tẽngẽ ye. M na n kɩtame tɩ tɩɩs wom biis wʋsg-wʋsgo, tɩ pʋtã fãa sake, la yãnd kõn le yõk-y bu-zẽmba taoore tɩ y zĩi ne kom ye. Dẽ me la y na n tẽeg y yel-wẽnã, la y tʋʋm dẽgdã yelle. Y na tẽeg rẽ tɩ y sũur yaale. Bãng-y tɩ ka yãmb yĩnga la m tʋmd m tʋʋma ye, yaa m yʋʋra kõn sãam la m tʋmda, Naaba-Wẽnd, n gomde. Bãng-y rẽ la y zoe yãnde, Israyɛl kamba.› Ad-m sẽn wilgdi, maam, Naaba-Wẽnde: ‹M sã n wa pek y yel-wẽna zãnga m na le pids y tẽnsa ne neba, tɩ sẽn da sirg fãa le maneg n me. B na n le sɩnga pʋ-weesa koobo; so-loaadba kõn le yãend pʋt sẽn ka ko ye.› B na n yeelame: ‹Tẽn-kãnga ra lebga zĩ-peen-daaga la ad-a sẽn lebg wa Eden zẽedo. Tẽns sẽn da wã, dot sẽn da tus n lubi, fãa le manegame n me n yals ro-bɛd sẽn tar pãnga, tɩ neb me be b pusẽ.› Tẽns niyns sẽn kell-b yãmb sɛɛgẽ wã na bãng tɩ maam, Naaba-Wẽnd, lebsdame n me raboodo la m kood pʋ-weese. Dẽ yaa mam koɛɛga la m na n pidsa m kãabgo. Yaa maam m gomde: ‹M na n le basa Israyɛl kamba tɩ b kos m sõngre, la m na n deega b kosgo la ma na n kɩtame tɩ b fɩɩg wa bãgr piisi. Kibs bɛda wakato, Zerizalɛɛm da pita ne maanda sẽn da na n kʋ wã rũmsi. B ra wata ne b zembala. Ade, neb niyns sẽn na n le wa kẽ y raboodã sõor na n ta boto. Dẽ me la neba fãa na n deeg tɩ maam la Naaba-Wẽnde.› » Soaala-Wẽnd nug tika maam, tɩ b pãnga tall maam n tɩ sik bãg-faag a yembrẽ. Bãg-faaga ra yaa yalenga, n da pid ne kõaba. Soaala kɩtame tɩ m kẽne n gilg kõabã, bãg-faagẽ wã. Kõaba ra yaa wʋsg-wʋsgo, la b da kʋɩ n pelga fas. Soaala waa n sok-m lame: «Ezekiyɛl, kõab-kãensa rãmb tõe n le vɩɩndame bi?» Tɩ mam leoke: «Soaala-Wẽnde, yaa yãmb n mi.» Tɩ b le yeele: «Gom ne kõabã, la fo na n yeel-b lame: ‹Kõab koeemse, kelg-y! Ad Soaala-Wẽnd sẽn taasd-y koɛɛg ninga: m na n le fʋʋsa y zugu la y naa n le vɩɩndame. Mam na n kõo yãmb gĩini, n le tablg yãmb nemdo, la yĩn-gãongo; m na n kõo yãmb vʋʋsem, la yãmb na n vɩɩndame. La boto y na bãng tɩ mam la Naaba-Wẽnde.› » Mam goma ne kõab koeemsã wa Soaala sẽn da kõ maam noorã. La ade, mam sẽn da wa n gomdã, bʋrg n wãge. Tẽnga digimdame, la kõaba ra kolgda taaba, sũgdug woo sũgdug. Mam gesame, la m yãenda gĩin la nemdo, la gãong sẽn lud-ba, vʋʋsem bal la b rag n nan ka vʋʋsde. Soaala yeela maam: «Ninsaal biiga, fo na n goma ne pemsem ning neba sẽn vʋʋsd a soabã n yeel-a: ‹Vɩɩm pemsem, ad Soaala-Wẽnd n kõt-f noor tɩ f yi ween-vɩɩs a naasã n wa wẽ kũuma tɩ b le vʋʋge.› » Mam maana wala b sẽn kõ maam noorã la vʋʋsem waa n wẽe kũuma la b paama vɩɩm n yik n yals yĩngri, b nao zutu. Yɩ tãb-biisi ne tãb-biisi. Soaala kell n paasame: «Fo ne-la, Ezekiyɛl, kõaba makda a Israyɛl. A Israyɛl neba yetame: ‹Tõnd wẽnda kõab sẽn kʋɩ, saagr buud fãa sɛ-la d nengẽ, d ka ne d sẽn tõe n le yɩ bũmb ning ye.› Yaa rẽ yĩnga la fo na n taas-ba maam, Naaba-Wẽnde, sẽn kãabd-b bũmb ningã: ‹M na n pagsa y yaadã n yiis yã, yãmba, m buuda neba, la m na n tɩ kẽes-y-la Israyɛl, y tẽn-peelmẽ. M sã n wa pags y yaadã n yiis yã, y na reeg tɩ maam la Naaba-Wẽnde. M sã n kɩt tɩ pemsem vʋʋsdga wẽ-y tɩ y le vɩɩnde, m sã n le kẽes-y y tẽn-peelmẽ, y na reeg tɩ maam la Soaala-Wẽnde, la m na n pidsa m sẽn kãabe. Yaa maam, Naaba-Wẽnd, n yeele.› » Soaala-Wẽnd goma ne maam: «La foom, Ezekiyɛl, dɩk ra-peoko n gʋls a zugu: ‹Zɩɩda ne Israyɛl pa-weto.› Dɩk ra-peok a to la f gʋls a zugu: ‹A Zozɛf, bɩ a Efrayim, la Israyɛl kẽedba.› Kolg ra-pegda taaba tɩ b yɩ wa bũmb a ye, f nugẽ. Fo buuda kamba na n kos-f lame tɩ f wilg-b rẽ võore. Fo na yeel-ba tɩ maam, Naaba-Wẽnd, yet-b-la woto: ‹M na n dɩka ra-peok ning sẽn gʋls a Zozɛf la Israyɛl pa-wetã, n tɩ yegl ra-peok ning sẽn gʋls Zɩɩda kẽedbã, la mam nugẽ b na n lebga rĩung a ye.› Foom a Ezekiyɛl, fo na n zãa ra-pegdã sẽn gʋlsã, f nugẽ, tɩ neba fãa ne-ba. F na taas-b maam, Naaba-Wẽnd, sẽn yet-ba: ‹Israyɛl dãmba, ad-m na n yiis-y-la y sẽn da be bu-zẽmb niyns sʋkã, la m na n tigim-y, n le tall-y n wa Zɩɩda. M na lagem-y ne taaba, la y na n lebga buud a ye, Israyɛl tãmsa zutu. Dĩm a ye n na n dɩ naam y zugu, y kõn le welg buud a yi la rĩund a yi bada. Y ka na n le rẽgem y mense ne wẽn-naandsa pʋgb ye. Y ka na n le tʋm tʋʋm yoodo, y ka na n le maan yel-wẽnd buug ye. M na zãag-y ne tõdgr buud fãa. M na n pek-y lame, y na n yɩɩ m buudu tɩ mam yɩ y Wẽnde. Mam biiga a Daviid n na n dɩ naam yãmb zugu, yẽnda a ye bala n na n yɩ y pe-kɩɩma. Y na reeg la y tũ m sẽn wilg-y bũmb ningã. Y na n zĩnda tẽng ning mam sẽn kõ m biig a Zakoob. Y ba rãmb sẽn zĩnd tẽng ning pʋgã la yãmb me na n zĩndi. Y na n zĩnda beene, daar fãa yĩnga, yãmba, y kamba la y yagense. Mam biiga a Daviid n na n yɩ yãmb dĩma, daar fãa. Mam na n kãab-y-la laafi daar fãa. M na n maneg n zĩndg-y-la y tẽngẽ n paas y neba sõore. M na n yalsa m wẽnd dooga yãmb sʋka, daar fãa yĩnga. Mam na n yɩɩ yãmb Wẽnnaam, yãmb na n yɩɩ mam neba. La buud a taaba na bãnge tɩ mam la Naaba-Wẽnde la m welga a Israyɛl toore. Yẽ n na n yɩ m sõgne, m wẽnd dooga sã wa yɛs y sʋka, daar fãa yĩnga.› » Naaba-Wẽnd goma ne maam n yeel-ma: «Ezekiyɛl, kedg f neng n ges a Gog. Yẽnda la Tubal la Mesɛk rãmb dĩma, Magog tẽn-peelmẽ. Yeel-a t'a maan gũusgu. Ad-m sẽn yet-a, maam, Naaba-Wẽnde: ‹M na n yika ne foo, Gog, Mesɛk la Tubal dãmb dĩma. M na po-la f yɛga n sog wĩiri n ta-f ne pãnga. M na n modg-f lame tɩ f yi f tẽngẽ, foo ne f tãb-biisa fãa. F wiida ne b fan-teedo, f wed-dʋʋdba ne b fan-teedo, me f tãb-biis ka tɛk sẽn zãad gãndo la sʋʋse. Pɛrs, Kus la Ypt tãb-biisa na n yii ne foo, n zãad b gãndo la b fõgneg b kut zug-peto. Gomɛr tẽng zab-zabdba, ne zab-zabdb sẽn yi nug goabg sẽnẽ, Bɛt-Togarma rãmb, na n waa ne foo. B na n yɩɩ ka tɛka; buud a taab sõor sẽn ka tɛk na n wa paas-f lame. Maneg n segl f meng neere, tɩ f lebga zãma kãseng tãnsoabã. Sã n maan yʋʋm a wãna, m na kõ-f noore tɩ f wã Israyɛl tẽnga. Dẽ wakatã tɩ sẽn põs-b zabr sʋʋgã paam n yii b sẽn da sẽeg tẽns niynsã n lɛɛg n wa tigim Israyɛl tãmsa zutu. Tãmsa sẽn da lebg vɩɩdo, yʋʋm wɛɛla, waa n le paama kẽedba. B ra vɩɩ ne laafi, tɩ b ra paam n zãaga ne buud a taaba. Gog, foo ne tãb-biisã, la f zo-rãmb ka tɛkã, na n boba zabre, y na n tiiga Israyɛl tẽnsã wa sob-kãsenga, y na n yɩɩ wala sawad kãsenga sẽn waa n lud b tẽnga vugri. Maam n yete, maam, Naaba-Wẽnde, tɩ wakat kãng sã n wa ta, tags wẽns wʋsgo n na n wa f yamẽ tɩ f na n yik n maan wa f sẽn tagsã. Fo meng n na n yik n sɩng zabre ne neb sẽn ka baood zabr ye, neb sẽn vɩ ne laafi la sẽn kẽed tẽns sẽn nan ka tar lal-gũbr ye, tẽns sẽn ka tar kʋɩlens ne sogds meng ye. F na n wa zɛɛme la f sãame, f na n wa zaba ne neb sẽn nan kẽ paalem-paalem tẽns sẽn da ya raboodo. Tẽnga neb yi pa-weere n lɛɛg n wa ne rũmsi la arzɛka la b vɩɩ dũni wã tẽnsʋka. Saba la Dedã nebã, Tarsis ne a tẽn-toosa toandba na n sok-f lame: Fo tãpa bobame n na wa zɛ la f sãam bi? F wat n na n deega wanzurf la sãnem bɩ? F wat n na n zɛɛme n paas f rũms sõor la f laog bɩ?› Dẽ yĩnga, Ezekiyɛl, gom n wilg sẽn wat beoogo. Wilg a Gog, maam, Naaba-Wẽnd, sẽn yete: ‹Wakat ning m buud a Israyɛl sẽn na n wa vɩ ne laafi, fo na n yika ne-a. Fo na n yi-la f tẽngẽ, nug goabg sẽnẽ, n wa ne tãb-biis sẽn yit ween-vɩɩs a naasã. Na n yɩɩ wed-dʋʋdb gilli, na n yɩɩ tãp sẽn tar pãnga. Fo na n sega mam nebã, a Israyɛl, fo na n yɩɩ wala sawadgo sẽn waa n lud m tẽngã. Kõn yɩ mars-marsã ye, la yaa foo, Gog, la m na tʋm tɩ f wa wẽ m tẽngã la f wilg bu-zẽmba tɩ maam la Na-Sõng a Wẽnde. Yaa rẽ la m na n wilg-ba ne tʋʋmd ning m sẽn kõ fooma.› Ad-m sẽn yet-fo, maam, Naaba-Wẽnde: ‹Yaa fo yell la m gom al daar zãra. M da waa n yeela Israyɛl bãngdba, mam tʋʋm-tʋmdbã, m da waa n yeel-b-la al daar sẽn vẽsge, tɩ b wilg tɩ m na n tʋma ned t'a wa zab ne-ba. La ade, Gog, badaare, m sũura na n puugame. Yaa maam, Naaba-Wẽnd, n yet rẽnna. Mam sũura sẽn puug wʋsga yĩnga, m wẽendame tɩ baraare, tẽnga na n miima miim bãnde, Israyɛl tẽn-peelmẽ. Wẽnd kãnga, mogra zĩma, yĩngri luiili, we-rũmsi, bõn-yood sẽn vuud tẽnga, ninsaalba, fãa na n diga rabeem m taoore. Tãmsa na n siigame, kunkuba na sudame, tẽnsa lals na n dʋʋga tẽnga. M na n yɛɛs-f-la yɛɛsg buud fãa. Yaa maam, Naaba-Wẽnd, n yet rẽnna. F tãb-biisa na n lɛɛg n kʋʋ taaba. Mam na n sɩbg-f-la ne bã-longdem la ne sʋʋga. Mam na n kɩtame tɩ sa-kãseng nag foo ne tãb-biisã la f zo-rãmb ka tɛkã saag sẽn naag ne sapɩlem ne bugum la kidbri. Woto m na wilg bu-zẽmba fãa tɩ maam la Pãng soaba la Nin-Sõngã. B na bãng tɩ maam la Soaala.› » Soaala-Wẽnd yeela maam: «Foo Ezekiyɛl, taas a Gog tɩ maam n yet-a t'a maan gũusgu. Ad-m sẽn yet-a, maam, Naaba-Wẽnde: ‹M na n yika ne foom, Gog, Mesek la Tubal dãmb dĩma. M na n kɩtame tɩ fo yi f tẽngẽ, n kɩt tɩ f yi al nug goabg yɩɩga n wa tak zabr Israyɛl tãmsã zutu. M na yaool marsã n wẽ f goabgã t'a bas f tãpa t'a lʋɩ. M na n kɩtame tɩ pɛɛma sẽn be f nug rɩtga lʋɩ n sẽege. Foo ne f tãb-biisã la f zo-rãmb ka tɛkã yãmb na n kii Israyɛl tãmsa zutu. M na n basame tɩ y lebg yɩbrendo la luiili la we-rũms rɩɩbo. Fo na n lʋɩɩ n paa tẽnga wala m sẽn togs-fo, maam, Naaba-Wẽnde. Mam na n widga bugum Magog tẽn-peelmẽ la mogra noorẽ tẽnsã sẽn da zĩ ne bãane. Woto la fãa na n bãng tɩ maam la Naaba-Wẽnde. M na n kɩtame tɩ mam buud a Israyɛl bãng tɩ m yaa nin-sõngo la m kõn le bas tɩ b paoog-a ye la buud a taaba na reeg tɩ maam la Soaala, a Israyɛl Nin-Sõngã. N-ye! Sẽn togsa na n pidsame, b pʋs n sɩnga pidsgu, m bʋʋda raar sẽn yãka kolgame. Maam, Naaba-Wẽnd n yete. Wakat kãnga, Israyɛl neba na n yi-la b tẽnsẽ. B na n widga bugum n yõog b bɛɛba zab-teedo. Yʋʋm a yopoe tõre, bugma kõn ki ye, t'a na n dɩɩ gãndo, bɛd la bõonego, tãbdo, pɛɛm, kãna, kãn-tãoodse. Neba ka na n le wɩɩg n tɩ kɛ raad weoogẽ bɩ tʋgrẽ ye; na n yɩ zab teeda la b na n tar n yõgend bugum. Bãmb n na n zɛ sẽn da zɛɛdb bãmbã la b fã sẽn da fãad b bãmba. Yaa maam, Naaba-Wẽnd, n togse.› Yɛla pidsgu raare, m na wilg b sẽn na n mum a Gog zĩig ning ka, Israyɛl tẽn-peelmẽ. Na n yɩɩ So-loaadba bãg-faagẽ, Yamsem Mogra yaanga. Yaooga na n kɩtame tɩ sora teem zĩ-kãnga, tɩ so-loadba bʋdg zĩ-kãnga. Yao kãng pugẽ la b na n mum a Gog ne a tãb-biisa fãa tɩ b na bool zĩ-kãng t'a Gog nedg ne nedg bãg-faaga, tɩ tusr lagem koabg bãg-faaga. Yaa kiis a yopoe tõre la Israyɛl dãmba na n tall zãma a woto fãa solgre la tẽnga rẽgda pekre. Tẽnga rãmb fãa n na n mum kũuma la rẽ na n lebga b zu-zẽkre, mam sẽn na n wa puk m ziira raare. Yaa maam, Naaba-Wẽnd n gomd boto. La kiis a yopoe wã sã n looge, b na n yãka neb kẽere tɩ b tʋʋmd lebg b saad tẽngã n mumd neb niyns sẽn nan ka paam-b mumbu, n ket n dɩg yɩnga. Neba na n saaga tẽnga tõre; ned sã n yãend ninsaal kõaba, a na n dʋʋga kug n gilg-ba tɩ laagdba bãng zĩig n wa wʋk-ba n tɩ mum a Gog bãg-faagẽ. Tẽng a ye meng la b na n pʋd Amona, neb kõn bãng n sõde. Na n talla woto tɩ tẽnga wa yɩlg zãnga.» Soaala-Wẽnd le yeel-m lame: «Ezekiyɛl, bool luiili wã la we-rũmsã la f yeel-ba: ‹Yi-y zĩig zãng n wa tɩ maoong la m dat n kʋ y yĩnga. Na n yɩɩ maoong kãsenga, Israyɛl tãmsa zutu. Y na paam nemd n wãbe, y na paam zɩɩm n yũ. Yãmb na n wãba tãb-bi-gãndaada nemdo; yãmb na n yũu tẽnga nanams kãsensa zɩɩm. Yaa bãmb la b kʋ maoong Bazã pe-raada zĩigẽ, Bazã pe-bi, boeese, la lol-nobds zĩigẽ. Yaa maoong kãng la m boond-y tɩ y wa. Nem-kaam na yidg y yam, zɩɩm na lub-y wala rã-toose. Mam dɩɩba roogẽ, y na n wãb n tɩge: wiidi, wed-dʋʋdba, gãndaado, tãb-biis toor-toore. Dẽ yaa maam, Naaba-Wẽnd, n yete.› M na n puka m ziira bu-zẽna nifẽ. B na yãend m pãnga sẽn tʋmd tʋʋmd ninga n pidsd m sẽn kãabe. Israyɛl buuda me na reeg baraar tɛka, tɩ maam la bãmb wẽnde. Tẽns a taaba me na n bãngame tɩ b talla Israyɛl kamba n loog pa-weere b sẽn beeg maama yĩnga. M daag-b lame n bas b bɛɛba nusẽ la zabr sʋʋg n kood-b zãnga. Mam sẽn daag-b n basã, m maana sẽn da tog ne bãmb tʋʋm wẽna, b tʋʋm dẽgda. La ade, ya woto marsã la m gomda, maam, Naaba-Wẽnde: ‹Marsã tɛka m na n kũma Israyɛl dãmba nimbãanega, m na n kũma a Zakoob nimbãanega. M na n teka b yellã la ned kam fãa na n modgame tɩ b ra le paoog m yʋʋr sõnga ye. B na yĩma b tʋʋm yooda sẽn zɩlg-b yãnd la paoor ningã. Woto me la b na n le paam n vɩɩnd b tẽngẽ ne laafi, tɩ ned ba a ye ka na n le yɛɛs-b ye. Mam sã n tɩ yiis-b b bɛɛba sʋka, m na tall-ba n wa b tẽngẽ. Na n tũu ne bãmb wilgri tɩ bu-zẽmb ka tɛka sẽn gũbg bãmba bãng tɩ maam la Na-Sõng a Wẽnde. Bãmb meng na reege tɩ maam la Soaala, bãmb Wẽnnaam, m sã n wa tigim-ba n ka tol n yĩm ned ba a ye a pa-weer tẽngẽ ye. M na n pʋdga a Israyɛl kambã m meng yam la m yam kõn le lak ne bãmb bada. Yaa maam, Naaba-Wẽnd, n gomd boto.› » Soaala nug pãng waa n zẽk-m lame n ta Zerizalɛɛm. Yɩɩ tõnd yembda yʋʋmd pisi la a nu soaba sẽn waa n sɩngdẽ, yʋʋmda pipi kiuuga rasem sẽn sõd piiga, Zerizalɛɛm wãab poore yʋʋm sẽn maan piig la a naase, a raara tã-tã wã. Naaba-Wẽnd lika b menga la m yamẽ, ne yĩngr vẽnegre, m yãeeme tɩ b talla maam n ta Israyɛl, n dʋʋs maam tãn-lug-lug a ye zugu. M yãee tãnga sigdga nug-rɩtgo, bũmb sẽn tonde wa tẽng ne a roto. Be la b tall-m n ta la m yãenda neda. Raoa neng ra pɩnda wa zũudu sẽn duugi. Nin-kãng ra zãada beren-dɩgr wĩir a nugẽ, n paas rasaar la yaa rasaar sẽn tar n magda. Raoã ra yɛsa tẽnga noore. Nin-kãng n yeel maam: «Ezekiyɛl, puk f nini la yoog f tʋba. Ges m sẽn na n wilg-f bũmb ninga neere. Yaa bõn-kãng gesg yĩnga la m tall-f n wa ka. F sã n yãend-a la f na n yaool marsã n wilg Israyɛl kambã f sẽn yãende.» Ad-m sẽn yãende: lalg n da gũbg wẽnd doogã. Raoã ra zãada a magdga. Magdga woglem yaa kãntɩɩs a yoobe. (Paasda nug yakemde tɩ marsã kãntɩɩga paam pĩnd soaba woglem.) Raoã maga lal-gũbrã taglem la a zãndlem. Fãa ra yaa kãntɩɩs a yoob-yoobe. A taa noor ning sẽn get yaangã, n dʋ a teedsã, n mage: kãntɩɩs a yoobe. Noor fãa maga kãntɩɩs a yoobe. Ro-bõonesa magame: b woglem dasaare, b yalem, dasaare. Ro-bil ne a to sʋka yaa kãntɩɩs a nu. A paama dasaare a sẽn mag noora sẽn kẽed dooga pʋgã. A sẽn mag noorẽ zãongã, a paama kãntɩɩs a nii. Lalse la ra me tagd-tagdo n yals noorẽ wã la a ye fãa taglem yaa kãntɩɩs a yiibu. Zãonga kʋɩlenga da ninga pʋgẽ. Yaang noorẽ ro-bõonesa ra tonga a tãab kɩreng a ye, a tãab kɩreng a to. B fãa ra zema taaba, b lals tagda me ra zema taaba. Raoã maga dignoora yalem: kãntɩɩs piiga, n mag noora menga: kãntɩɩs piig la a tãabo. Gɩdgre n da gɩdg ro-bil ne a to sʋka, da yaa kãntɩɩga. La ro-bõonega da tara kɩreng a ye kãntɩɩs a yoobe, kɩreng a to wã me kãntɩɩs a yoobe. Raoã maga noorã, a sɩngre n tãag a sɛɛbo: kãntɩɩs pisi. Rignoor fãa ra tota ne a to. A maga zãongã sẽn pʋgd ro-bõonesã: kãntɩɩs pisi. A ra tɩ yɛsa sʋka n tar a toorẽ lalse. Sor n da yit zãongã n digd pʋgẽ noorã. Sora maga kãntɩɩs pis-nu. B ra ninga peem-lees sẽn pɩgdg ne raado, ro-bõonesa, yɩng lalsã, lals niyns sẽn welg-b ro-bõonesa ne taabã, la taoor zãonga lalse. Peem-leesa ra yaa yalems pʋgẽ n yɩɩd yɩnga. B ra ning-b-la zãonga lalsã n gilgi. Koms vãad la b ra gʋl pugẽ lalsa zutu n paas b neerem. Raoã tall-m lame n ta pipi simandã. Kug la b ra maneg n gãnege n me roto n gilgi: dot pis-tã. B ra gãnega kugã, n gilg sɩmanda zãnga. Kuga ra gãnegame n tekd kʋɩlensa noore. Raoã maga vɩʋʋg ning sẽn be yɩng noorã n ta pʋgẽ zaka lalgã. A paama kãntɩɩs koabga. A maga boto me yaanga la nug goabga. Noor ning sẽn pakd nug goabg tɩ b tũud be n paamd pʋgẽ zakã, raoã maga yẽ me yalem la a woglem. Ro-bõones a yoobe n da tong be: a tãab kɩreng a ye, a tãab kɩreng a to, n paas zãongo la lalsa sẽn da me tagd-tagdã, la fãa maga wa sẽn da be pipi noorã: woglma yaa kãntɩɩs pis-nu, yalma yaa kãntɩɩs pisi la a nu. Zãongã, peem-leesã, komsã sẽn da gʋlã, da wẽnda yaang noorẽ dẽnna. F rʋʋda teeds a yopoe n paam n kẽ zãongã, f taoore. Noor n da be pipi zakã n tot ne nug goabg soabã tɩ b tõe n tũ be n kẽ pʋgẽ zakã; noor a to me n le be yaanga. Raoã maga vɩʋʋg ning sẽn be noor ne a to la a paama kãntɩɩs koabga. Dẽ poore raoã tall-m lame n kẽ pʋgẽ zakã. D tũu rɩtg noorã. A maga lalsa sẽn me tagd-tagdã, a zãongã, b yalem wala b woglma ra yaa wala pipi noora rẽnna. Noora ne a zãongã da tara peem-leese n gilgi. No-kãng me ra wẽnda a taaba: woglma yaa kãntɩɩs pis-nu, yalma kãntɩɩs pisi la a nu. B teedsa yaa a yopoe tɩ b rʋʋd bãmba n paam n kẽed zãongã. Pʋgẽ lalsa sẽn me tagd-tagdã ra nagsa ne koms vãado, goabg la rɩtgo. Pʋgẽ zaka ra tara noor sẽn tees nug rɩtgo. Raoã maga vɩʋʋg ning sẽn be noor ne a to la a paama kãntɩɩs koabga. Raoã tall-m lame tɩ d tũ nug rɩtg noorã n kẽ pʋgẽ zakã. A maga noor kãnga, la fãa ra yaa a ye ne noy a taabã. Ro-bõonesã, lalsa sẽn da welgd-b ne taabã, zãongã, fãa ra yaa a ye ne noya a taaba rẽnna. Noora ne zãongã ra ninga peem-leese sẽn ya yalemse n gilgi. Woglma yaa kãntɩɩs pis-nu, yalma yaa kãntɩɩs pisi la a nu. Zãonga ra ka a ye ye, b ra yaa wʋsgo n gilgi: woglem, kãntɩɩs pisi la a nu, yalem, kãntɩɩs a nu. Zãonga ra tota ne yɩng zakã. A lalsa sẽn me tagd-tagdã ra gʋla komse la a ra tara teeds a nii. Raoã tall-m lame tɩ m tũ yaang noorã n tɩ kẽ pʋgẽ zakã. A maga noorã la a yãeeme t'a yaa waa a taaba. A ro-bõonesã, lalsa sẽn da me tagd-tagdã, a zãongã, fãa ra yaa a ye ne noy a taaba rẽnna. B ra ninga no-kãng ne a zãongã peem-lees bɛda n gilgi. Woglma maga kãntɩɩs pis-nu, yalma kãntɩɩs pisi la a nu. A zãonga ra tota yɩng zakã. A lalsa sẽn da me tagd-tagdã ra gʋla komse poorẽ la taoore, la a teedsa yaa a nii. Raoã tall-m lame m wa nug goabg noorã. A magame la no-kãng me yaa wa a taaba. A wogma ra yaa kãntɩɩs pis-nu t'a yalma ya kãntɩɩs pisi la a nu la yẽ me ra tara ro-bõonese, lals sẽn me tagd-tagdo, zãongo la peem-lees n gilgi. Rooga ra tota yɩng zakã. Goabg la rɩtgo, b ninga koms vãad lalsa sẽn me tagd- tagda zugu. Teedsa yaa bãmb b nii. Roog a ye noor n da pakd goabg noorẽ zãongã pʋga. Yaa ro-kãng pʋga la b ra pekd yũ-noog maoonga rũmsi. Noor kãngẽ zãongã, te-roagens a yiibu n da be kɩreng a ye t'a yiib me be kɩreng a to. Yaa bãmb zutu la b ra koot maanda rũmsi: yũ-nood maand bɩ sugr kosgo, bɩ yel-wẽnd dolb maando. F sã n da tees nug goabg noorã f ra tõe n yãenda kɩreng fãa, te-roagens a yiibu. Te-roagensa zãng yaa bãmb b nii, bãmb zut la b ra koot rũmsã. Te-roagens a naasa sẽn ya yũ-noog maanda kʋʋb yĩnga ra mee ne kug sẽn peese. B voglma ya kãntɩɩg la pʋɩ-sʋka, b yalma: kãntɩɩg la pʋɩ-sʋka, b zãndlema: kãntɩɩga, la yaa bãmb zug la b da rɩgend sʋʋsa sẽn tar n koot maanda rũmsi, yũ-noog maando la maand a taaba. Bũmb yalem sẽn ta nug-pʋga la b ra ning n gilg te-roagensã. Te-roagensa zutu la b da rogeng maanda nemdo. Raoã tall-m lame n kẽes pʋgẽ zaka. Rot a yiib n da be be, a ye nug goabg noorã t'a meng neng teesd rɩtgo. A to wã ritg noorã t'a neng teesd nug goabga. A yeela maam tɩ roog ning sẽn get-a goabga ra yaa maan-kʋʋdba sẽn tʋmd-b wẽnd dooga tʋʋma rẽnna. Roog ning neng sẽn tees nug goabga yaa sẽn tʋmd-b maan-kugra rẽnna. A tol n paasame t'a Levi kamba sẽn yaa a Sadok yagens bala n da tõe n kẽ ro-sõnga pʋg n tʋm maan-kʋʋra tʋʋma. Raoã maga wẽnd dooga zaka; a woglem: kãntɩɩs koabga; a yalem: kãntɩɩs koabga. Kɩrẽng pa yɩɩd a to ye. Maan-kugr n da rɩg wẽnd dooga taoore. A tall-m lame n kẽes wẽnd dooga zãongẽ. A maga zãonga lals niyns sẽn me tagd-tagdã: kãntɩɩs a nu kɩreng a ye, kɩreng a to wã kãntɩɩs a nu. Kʋɩlenga yalem: kãntɩɩs a yoobe, a tãab kɩreng a ye, a tãab kɩreng a to. Zãong ning sẽn tũud n paam wẽnd dooga noorã woglem yaa kãntɩɩs pisi t'a yalem ya kãntɩɩs piig la a yiibu. Rʋʋda teeds piiga n yaool n kẽ. Lal-gils bɛd a yiibu n da be noorẽ, a ye goabga, a ye rɩtgo. Raoã tall-m lame n kẽ wẽnd dooga pʋgẽ ro-kãsengã la a maga lals niyns sẽn me tagd-tagdã. B yalma yaa kãntɩɩs a yoob-yoobe. Rooga noora yalem, kãntɩɩs piiga. Noora sẽn yãkã b keesa lalg woglem kãntɩɩs a nu goabga la kãntɩɩs a nu rɩtgo. A maga rooga woglem, kãntɩɩs pis-naase, a yalma kãntɩɩs pisi. Doog a to la d le kẽ, yaa taoor doogã. Kãntɩɩs a yi la lalsa sẽn me tagd-tagd noorẽ wã. Noora yalem yaa kãntɩɩs a yoobe. Nora sẽn yãk sʋkã, keesa kãntɩɩs a yopoe lalse, goabg la rɩtgo. Rooga meng woglem ne a yalem fãa zema taaba: kãntɩɩs pisi. La raoã yeel-m lame tɩ sõmblem pid sõmblem dooga la woto. Raoã maga wẽnd dooga pʋgẽ lalgã: a taglem yaa kãntɩɩs a yoobe. Kɩremsa ra ninga ro-bõonese. Do-bõonesa yalem: kãntɩɩs a naase la b ra me n gilga wẽnd doogã. Do-bãmb da roglma taaba a tãab-tãabo la b sõora zãng yaa pis-tã. Ro-bãmb da meeme n kẽes yɩng lalgã n yaool n pa me n sog ne wẽnd dooga lalg meng ye. Rota sẽn dogl taab zutã, ad-y yĩngr dãmba yalma ra paasame n yɩɩd tẽngr dãmba. B lalsa taglem bal n da boogde. Sẽn gilg wẽnd dooga fãa ra ya boto. Yaa rẽ me yĩnga la f sã n dʋ yĩngri dotã, f neeme tɩ vɩʋʋg ra beeme n yɩɩda. F sã n be tẽngr doogã f ra tõe n dʋʋ al yĩngr soaba bɩ n tek tẽnsʋk soabã. M yãeeme tɩ rota sẽn da me n gilg wẽnd dooga ra zẽka kãntɩɩs a yoobe. Ro-bãmb yɩng lalsã taglem ra yaa kãntɩɩs a nu. Vɩʋʋg ning sẽn kell ro-bãmb ne ro-bõones a taaba sʋka, da yaa kãntɩɩs pisi n gilgi. F ra tõe n tũu noya a yiibu n yi rota sẽn doglem taabã n ta vɩʋʋga sẽn bas sʋkã. Noor a ye ra bee goabga t'a ye be rɩtgo. Lalg ning sẽn da me n gilg n basd noya a yiiba ra yaa taoko; a taglma ra yaa kãntɩɩs a nu. Bũmb la b me nin-taoore n yegl wẽnd doogã. Yaa roogo woglem sẽn ta kãntɩɩs pis-wɛ, t'a yalem ya kãntɩɩs pisopoe, a lalsa taglem yaa kãntɩɩs a nu. Raoã sɩnga wẽnd dooga magbo. Woglma yaa kãntɩɩs koabga. Wẽnd dooga ne a zakã. Yalma me yaa boto. Wẽnd dooga yalem ne vɩʋʋga sẽn keesã ra yaa kãntɩɩs koabga. Raoã maga roog ning sẽn da me wẽnd dooga poor woglem. Sã n naag ne vɩʋʋga sẽn kees goabg la rɩtgã, woglma yaa kãntɩɩs koabga. Wẽnd dooga pʋgẽ do kãsengã, zãongã la zakã, noya, vɩʋʋga sẽn basã, peem-leesã, b tẽngrã n ta b mensã, da maneg n tablga ne ra-neeba. Wẽnd dooga yɩnga wala a pʋgẽ, al dignoorã n ta sõmblem pid sõmblem doogã, b ra gʋla b lalsã n paas b neerem. Yaa malɛgs la koms vãado la b ra ning yã. Komsa vãad ne malɛgsa ra lɩʋʋsda taaba. Malɛk fãa ra tara nens a yiibu. Neng a ye sẽn ya ninsaal nenga n wẽnemd n tees koanga vãoogo tɩ neng a to sẽn ya bõnyẽeg rẽnna tees vãoog a to. Yɩɩ woto zãnga n gilg wẽnd doogã. B ra ninga malɛgsa ne komsã al tẽngre n ta kʋɩlensa zãndlem. Do-kãsenga noor ra-lugsã da ka gils ye, b ra yaa nags-magse. Sõmblem pid sõmblema dooga taoore b da rɩgla bũmb wa maan-kugri. A kaa ne ra-pegdo, a zãndlema yaa kãntɩɩs a tãabo, a woglma a yiibu, a yalem a yiibu. A pẽgsã, a tẽngrã la a kɩremsã me yaa raado. La ad neda sẽn yeel-m: «Woto yaa te-roagendg sẽn dɩgl Wẽnd taoore.» Do-songa ne Sõmblem pid Sõmblem dooga ra pagda ne kʋɩlense. Kʋɩlensa ra pakda goabg la rɩtgo. Malɛgs la koms la b ra gʋl b zugu wala lalsã. Sã n ya f sẽn tat noor ning n yaool n kẽ ro-sõngã, a ra ka tar kʋɩleng ye, yaa lill sẽn ka ne raado la b da rɩgl yɩngã. Zãnd kãng kɩremse ra ninga peem-lees yalemse sẽn maneg raad n ka n pɩgle, la sẽn gʋl malɛgs la koms vãado. Dẽ poore raoã tall-m lame n ta sɩmandẽ wã, n le wa tall-m n tees rot niyns sẽn be nug goabgã n tot ne zĩ-vɩʋʋgã la roog ning sẽn be-a wẽnd dooga poorã. Ro-kãng woglma rɩkda wẽnd doog rẽnna n tar kãntɩɩs koabga. A yalem yaa kãntɩɩs pis-nu. A kɩreng a ye a ra yegda vɩʋʋga sẽn gũbg wẽnd doogã t'a yalma ta kãntɩɩs pisi wã. A kɩreng a to wã, a ra tata kuga sẽn maneg n gãneg sɩmandẽ wã la be la rota sɩng n dogend taab a tãab-tãabã. Do-bãmb taoore, pʋgẽ zakẽ wã, sor me la b ra bas yã. A yalem taa kãntɩɩs piiga t'a woglem ya kãntɩɩs koabga. Yaa nug goabg noora sore. Yĩngr dota yalem da paoodame. Yaa sẽn na yɩlẽ n paam vɩʋʋg n loogdẽ la b ra booga b yalem. La sora sẽn bas yĩngrã, sẽn bas tẽnsʋkã la sẽn bas tẽn-nabrã ka a ye ye. Bãng-y tɩ rota ra roglma taaba rũns a tãabo la ka lal bedre wa zãongẽ dẽnna n da zɩt b ye. Yĩngr dota yalem pa ta tẽnsʋka la tẽngr dãmba rẽnn ye. Lalg la b ra me rota poore t'a woglem yaa kãntɩɩs pis-nu. Sɩmandẽ dota woglem yaa kãntɩɩs pis-nu tɩ wẽnd dooga zak tar kãntɩɩs koabga. Tẽngr dota ra tara noore la yaa no-kãng la f ra tũud n paam n yi yɩnga, yaang sẽnẽ. No-kãng ra bee zaka lalg sɩngrẽ. Nug goabga, zaka lalg woglemẽ, wẽnd dooga taoore, b le mee rot a taaba. Bãmb da tota ne vɩʋʋga sẽn da basã la b tot roog ning sẽn be wẽnd dooga poorã. B le basa sor bãmb taoore. Do bãmb da wẽnda wa nug goabg rotã. B bedrema, b yasrã, b noya, b kõom la b yiib noya, fãa ra wẽnda taaba. Dota sẽn me nug rɩtga kʋɩlensa fãa ra wẽnda nug goabg rẽnna. Sora sɩngrẽ, noor n da base n tees lalga sẽn da lill wẽnd doogã. Tũuda yaang n paam n ta be. Raoã yeel-m lame: «Rota sẽn be goabg la rɩtgo, n be zaka pʋga yaa ro-sõma. Yaa be la maan-kʋʋdb niyns sẽn tõe n kẽ Soaala ro-sõnga pʋga kẽed n dɩt kũuna sẽn ya sõma n yɩɩd b taabã. Ro-bãmb welga toor Wẽnd yĩnga, tɩ b tar kũun sõma wã n wat be. Be la b wat ne kũuna, ne maand toor-toora rũmsi sẽn kʋʋd sugr kosg yĩngã. N paas me, maan-kʋʋdba sẽn kẽed be ne fut niynsã, b pa tõe n le yi yɩng ne fu kãens ye. B yeesd-b lame n bas be tɩ b lebga fu-sõma la fut a taab la b yeelgda n leb b saam-biisa sʋka.» Raoã sẽn mag wẽnd dooga pʋg n sɛ a yiis-m-la yɩnga. D tũu yaang sorã n yi n sɩng rigenpoora magbo. Magba maga ne dasaarã kãntɩɩs kobs-nu yaanga. A maga goabga me kãntɩɩs kobs-nu, n mag rɩtg kobs-nu, n mag nin-taoor kãntɩɩs kobs-nu. Yaa woto la a mag lal-gũbrã, a kɩrems a naasã. Woglem la yalem zema taaba: kãntɩɩs kobs-nu. Lalg n da welg vɩʋʋg ning sẽn ya Soaala rẽnna ne a taaba. Raoã tall-m lame n leb noor a ye, yaang noorã Wẽnd ziira puka yaanga n sɩgda. Bʋʋr n da yãagd-b wa ko-kẽeng rãamde, tɩ tẽnga reeg n yãgd ne Wẽnd vẽenem. M sẽn yãend bũmb ningã wẽnega m sẽn yãend tẽnga wãab wakato la Kebar kʋɩlga noorẽ. M wõgemdame n kɩ m neng tẽnga. Naaba-Wẽnd ziira tũu yaang noorã n kẽ wẽnd doogã. Wẽnd Pãnga tall-m lame n kẽes zak a yiib soaba pʋga la m mikame tɩ Naaba-Wẽnd ziirã ra pida wẽnd doogã. M wʋma ned sẽn zĩnd pʋge n gom ne-ma. M sẽn da pʋgd rao ninga yaool n da yɛsa m sɛɛgẽ. Ad Soaala sẽn yeel-ma: «Ninsaal biiga, ges zĩigã. Yaa ka la m dɩgl m zaoorã, ka la m sigb zĩiga. M na n waa a Israyɛl kamb sʋka la m na n zĩnda ne-ba, daar fãa yĩnga. A Israyɛl doogo, yẽ ne a dĩm dãmba kõn le rẽgem m yʋ-sõnga ye. B kõn le faool b menga ne b tʋʋm yooda ye, b kõn le mum b dĩm dãmba ka ye. Dĩm dãmba ninga b rot noy la b kʋɩlens ra-lugs n yegl mam dooga rẽnna. Yaa lalg bala n welgd b zaka ne mam dẽnna. B paooga m yʋ-sõngã ne b tʋʋm yoodo. Yaa rẽ n puug m sũuri tɩ m menes-ba. Dũnna tɛka b wɩɩbda kõn le wɩɩb m nifẽ ye la b dĩm dãmba yaad na zãag ne-ma la woto m na pa ne bãmb daar fãa. La foo, Ezekiyɛl, wilg a Israyɛl kamba, wẽnd doogã sẽn ya-la, wilg-b tɩ b tʋʋm wẽna yãnd yõk-ba. B ges b sẽn sõog wẽnd dooga toto. B tʋʋm wẽna yãnd sã n tar-ba, wilg b Wẽnd dooga meeb sẽn na n yɩ tot-to, wilg-b rota sẽn na n pʋɩ tot-to, wilg-b b sẽn na n tũud noy niyns n kẽedẽ la noy niyns b sẽn na n tũudẽ n yita. Wilg zãnga. Gʋls n wilgi, puk b yam tɩ b gɩdg b mens ne mam sẽn gɩdge, tɩ b tũ m sẽn yet tɩ b tũ bũmb ninga. Ad bũmb ning sẽn yals wa noor menga wẽnd dooga poorẽ: tãnga zug tẽnsʋk vɩʋʋga fãa yaa vɩʋ-sõngo.» Ad maan-kugra magbo: maga ne kãntɩɩg magdga. Bok ning sẽn tuk n gilg maan-kugra sɛɛgã: kãntɩɩg la b mag a yalem la a zulum. Boka kɩreng a ye ninga kogsre sẽn ta kãntɩɩg pʋɩ-sʋka. Ad maan-kugra zãndlem: tẽn-nabrã n ta a pipi zẽkrã: kãntɩɩga. Pipi zẽkrã n ta a yiib soaba: kãntɩɩga. Zẽkr a yiib soaba n ta yĩngri: kãntɩɩs a yiibu. Woglma zãng yaa kãntɩɩs a naase. Bugma tuglg zĩig ne tẽngã: kãntɩɩs a naase. Maan-kugra yĩngr kɩrems a naasa ra zẽkame n paase. Woto maan-kugra ra tara yɩdb a naase. Bug-toaalga yalem la a woglem ra zema taaba: kãntɩɩs piig la a yiibu. Zẽkr a yiib soaba tɛka, maan-kugra ra yalga kãntɩɩg n paase. Woto yalma la woglma lebga kãntɩɩs piig la a naase. Kogsr la b ra ning n gilg t'a zãndlema ya kãntɩɩg pʋɩ-sʋka. Kogsr kãng yalma taa kãntɩɩga la a ra wedga bok n gilgi. Teedsa sẽn na paam n dʋ a zuga ra ninga yaang kɩrenga. Wẽnd yeel-m lame: «Ezekiyɛl, kelg m sẽn yet-fo, maam, Naaba-Wẽnde. Woto la f na n maane maan-kugra sã n wa me tɩ b na n yõogd maanda rũms a zug la b raagd zɩɩma. Loalg la f na n kõ maan-kʋʋdba, a Levi kamba, a Sadok yagense; bãmb bal la m kõ sore tɩ b maan maan-kʋʋr tʋʋmd m waoogr yĩnga. Loalga na n maana maoong sugr kosg yĩnga. A zɩɩma rɩkdame n bol yɩdb a naasã, n bol maan-kugra sʋka la a noorã n gilgi. Woto la f na n yɩlg maan-kugrã la f rɩk-a n kõ Wẽnde. Loalga sẽn kʋ n kos sugrã, rɩkdame n tɩ yõog zĩig a ye sẽn yãk rẽnd yĩnga, wẽnd dooga yɩnga. Daar a yiib sobã, yaa boɛɛg sẽn ka tar bãnd la f kʋʋda. F kʋʋd-a-la yel-wẽna pekr yĩnga wala f sẽn maan ne loalgã. Sugr kosga maoonga poore, yaa loalg la pe-raoog sẽn ka tar bãnde la f wat ne. F talld-a lame n wa maam, Naaba-Wẽnd, taoore. Maan-kʋʋdba yugenda rũms a yiiba ne yamsem la b kʋʋd-b lame n yõog tɩ bugum dɩ-b zãnga. Dasem a yopoe pʋgẽ, beoog-beoog fãa b na n kʋʋ boɛɛg, yel-wẽnd pekr yĩnga n paas loalg la pe-raoog sẽn ka tar bãnde. Yaa woto la b na n yɩlg maan-kugrã, rasem a yopoe wã pʋgẽ, n zãag-a ne rẽgdo t'a lebg Wẽnd soolem, n yaool n sɩng maanda kʋʋb a zugu. Dasem a yopoe wã sã n looge, daar a nii soaba maan-kʋʋdba yaoondame marsã n kood maan-kugra zugu yũ-nood maand la maan dɩtse. Woto m na reeg y kosgo. Yaa maam, Naaba-Wẽnd, n gomd boto.» Raoã tall-m lame n yi yɩnga, yaang noorẽ. Noora ra pagame. Soaala yeel-m lame: «No-kãnga tog n pagame, b ra pak-a bada. Ned ba a ye, ra tũ be n loog ye tɩ yaa be la maam a Israyɛl Wẽnda tũ n kẽ. Dẽ yĩnga bɩ b pag-a. M sẽn kõ dĩma naama yĩnga, yẽ tõe n taa wẽnd dooga pʋga n dɩ Wẽnd taoore. La ade, yaa roog ninga sẽn da pẽ wẽnd doogã n yɩɩda noor la a na n tũud n kẽedẽ la a yita.» Raoã tall-m lame n ta goabg noorã, wẽnd dooga taoore. M yãeeme tɩ Wẽnd ziira ra pida roogã tɩ m na n kɩ m neng tẽnga. Soaala-Wẽnd yeel-m lame: «Maan gũusgu, Ezekiyɛl, ges neere, yoog f tʋba. Ad yaa noya sẽn get m dooga la m na n kõ-fo. Maan gũusg neere ne noy-niyns sẽn get a pʋgẽ kõom la yiibu. Yeel a Israyɛl kamba sẽn ya tõatbã maam, Naaba-Wẽnd, sẽn wilgd-ba. M yam yaa n yii ne y tʋʋm yooda buud toor-toorã, Israyɛl kamba. Wakat ning y sẽn wat ne m dɩɩba pʋɩɩre, maanda rũmsa kaam la b zɩɩma, y yikd n kẽesda m do-sõngẽ wã neb sẽn ka kẽ bãongo, la sẽn ka reegd m noor ye. Woto wã y rẽgemda m doogã. Y sãama m zooda ne y manes wẽnse. Tʋʋm niyns y sẽn da tog n tʋm m yĩng m do-sõnga pʋgã, y rɩka tʋʋm kãense n tãng ne sãamba. Woto bãmb n deeg y zĩiga. M yet-y lame, maam, Naaba-Wẽnde, tɩ sãan fãa sẽn ka kẽ bãongo la a ka reegd m noore, kõn le kẽ m do-sõngã, ba a zak sã n ti Israyɛl kamba sʋka. Sã n ya Levits niyns sẽn bas-b maam n naag Israyɛl kamb a taaba n maan wa b toog ka le be ne maama, n na n pʋg b rẽgdã, b wẽn-naandsã, ad bãmb na n dɩɩ b beegra taale. Ad tʋʋm niyns b sẽn tõe n tʋm m yĩnga. B tʋʋmd na n yɩɩ dooga noya gũubu la yɛl a taaba gesgo. B na n tõogame n kodg yũ-nood la maan-dɩtsa rũmsi. M buuda sẽn dat tɩ b wa sõng ne bũmb ning fãa bɩ b wa sõng-a. La b sẽn lʋɩɩs b toog a Israyɛl ne a wẽn-naandsa waoogr pʋgẽ, n tol n kʋɩɩb Israyɛl kambã, ad-m sẽn yet-ba, maam, Naaba-Wẽnde. M na n yika ne bãmba la b na rɩ b beegra taale. B ra le saag n deeg maan-kʋʋr naam ye, b ra saag n sɩɩs bõn sõma wã sẽn welg toor m yĩngã ye, la b ra kẽ sõmblem sẽn pid sõmblem dooga ye. Yaa woto la b na n yao b tʋʋm yooda sẽn ning-b yãndã. M sẽn kees-b yaa beoog-beoog fãa tʋʋm yaalsã. Levit niyns sẽn yaa a Sadok yagense, bãmb yẽ kell n tũu noy-niyns sẽn get do-sõngã, ba Israyɛl kamba sẽn wa n yik n bas maam, bãmb Wẽndã. Woto yĩnga yaa bãmb bala n tõe n wa kõ-m maanda kaam la zɩɩm. Yaa maam, Naaba-Wẽnd n yet rẽnna. Bãmb bal n na n kẽ m do-sõngẽ wã n kolg m dɩɩba zĩigẽ n tʋm b sõgen-tʋʋma. B na tũ m noya neere. B sã n kẽed zak a yiib soaba, bɩ b yeelg fut sẽn wʋg ne gĩs bãanese. B ra kẽ be bɩ wẽnd dooga pʋga ne fuug sẽn wʋg ne pe-kõbd ye. B fõgneg gĩ-bãanes pugli, la b mobg b sees ne peende. B kõn yeelg fuug sẽn na n kaoog b tʋʋlg ye. B sã n yit yɩnga n le tɩ kẽed zãma wã sʋka, b deng n yees b sẽn da yer fut niyns n tʋmd Wẽnd taoorã. Fu bãmb bĩngda do-bõonesa pʋga n yaool n yi ne fut a taaba la woto neb a taaba kõn sɩɩs b tʋʋmda fu-sõma wã ye. Maan-kʋʋdba zut ka põngd koeel ye, zoobda me ka basd tɩ kẽ wʋsg n loog ye. Maan-kʋʋd sã n na n kẽ wẽnd dooga pʋg raare, a ka yũud rãam ye. A pa tõe n yɩ kãadem ne pʋg-kõor bɩ ne pag b sẽn yiis ye. A yita ne Israyɛl buud bi-pugla bɩ paga maan-kʋʋd a to sẽn ki n base. Maan-kʋʋdbã n na wilg zãma wã bũmb ning fãa sẽn welg toore Wẽnd yĩnga la b wilg n bak bũmb sẽn ka rẽgemde la bũmb sẽn dẽgemde f sã n sɩɩs-a. Bãmb n kaood bʋʋdo la b na n kao-a-la wa m sẽn wilgi. B na n maana kibs rãmbã wala m sẽn wilgi la b na modg tɩ fãa tũ vʋʋsg raara noya. Maan-kʋʋd da kolg kũum n wa rẽgem a meng ye. A sẽn tõe n kolg sẽn lebg kũum yaa a ba, a ma, a bi-roaka, a ba bɩ a ma bi-ribla, a ba bɩ a ma bi-pugla, a sã n nan ka yi kãadem. Maan-kʋʋda sã n sɩɩsa bãmb nin-yende, a yɩlgda a menga, la a maanda rasem a yopoe n yaool n le sɩng tʋʋmde. La a sẽn na n le tag zak a yiib soaba daare, a na n maana maoong m sugr kosg yĩnga. Yaa maam, Naaba-Wẽnd, n yet rẽnna. Maan-kʋʋdba n na n tʋm m waoogr yĩnga. B ka na n deeg pʋɩɩr Israyɛl tẽng ye, tɩ maam n na n yɩ b pʋɩɩre. B soo kũun niyns sẽn tũnugd sugr kosg bɩ yɩlgr maando; bũmb ning fãa sẽn pʋlem Wẽnde t'a Israyɛl ka le tõe n dɩ a yõodo lebga bãmb soolem. B sẽn so yɛsa yaa rũms rẽemsã, kood rẽemsã sẽn lembd Wẽndã n paas b paoonga rʋr a ye piig zugã. Neba na n kõ-b-la b bur sõma wã tɩ m tũ rẽ n ning b zags barka. Luiila bɩ rũng buud fãa sẽn ki bɩ a to sẽn yõke, maan-kʋʋd ka sɩɩsd a neong ye.» Woto la Soaala Wẽnd gomda: «Y sã n wa yet tɩ y na n pʋɩɩ tẽngã n kõ buud kam fãa a pʋɩɩre, wa a zu-noog sẽn tʋʋg-a, y na n kõo Soaala b rẽnna. B soolma woglem na n yɩɩ kãntɩɩs tus pisi la a nu t'a yalem ya kãntɩɩs tus pisi. Vẽenem kãng welga toor bãmb yĩnga. Vẽenem kãng pʋgẽ b na n basa wẽnd dooga yĩnga, vɩʋʋg woglem la yalem sẽn ta kãntɩɩs kobs-nu. Vẽenem kãng kokdame n gilg ne toaag sẽn ta kãntɩɩs pis-nu. Kẽ-y Wẽnd soolmẽ wã n bẽeg vẽenem yalem sẽn ta kãntɩɩs tus piiga t'a woglem ya kãntɩɩs tus pisi la a nu. Be la b na n ning wẽnd doogã, sõmblem sẽn pid sõmblem zĩigã. Vẽenem kãng na n boolame tɩ pʋɩɩr sõngo. Be la maan-kʋʋdba sẽn kolgd Wẽnd n tʋmd b tʋʋmna na n me b roto la be me la wẽnd dooga na n paam a zĩiga. Vẽenema a to me woglem sẽn ta kãntɩɩs tus pisi la a nu t'a yalem yaa kãntɩɩs tus piiga n na n yɩ Levitsa soolem; bãmb n so tʋʋm niyns fãa sẽn tʋmd wẽnd doogẽ tɩ yaool n ka maan-kʋʋr tʋʋm ye. Be la bãmb me na n me n kẽ. Wẽnd vẽenema yegende b na n le bẽega vɩʋʋg woglem sẽn ta kãntɩɩs tus pisi la a nu t'a yalem ya kãntɩɩs tus a nu n me tẽngã. Israyɛl biig fãa tõe n wa kẽe be. Dĩma na n deega vẽenem Wẽnd vẽenema la tẽnga rãmb rẽnd sʋka. Nin-taoore, vẽenem kãng yalem na n tãaga Tẽnsʋk Mogre la yaanga a na n teka a Israyɛl tẽn-peelma toaaga. Sã n yaa a woglma yaa a Israyɛl buuda sags sẽn tong taaba woglem. Woto Israyɛl tẽn-peelmẽ dĩm dãmba tara b zĩiga. B kõn le maand Wẽnd neba pãn-tõog ye, b na bas vẽenema sẽn kellã a Israyɛl sagsa yĩnga.» Woto la Naaba-Wẽnd gomda: «Sekame marsã, Israyɛl dĩm-biisi. Y rẽnda yaa n looga toogo. Bas-y pãn-tõogo la nin-kʋʋre. Maan-y sẽn toge la sẽn zemse. M neba ra le nams ne y fãaba ye. Maam n kõt-y noore, maam, Naaba-Wẽnde. Ned kam fãa mag a te-koosem zɩslem ne bõn-magdi sẽn ya sõma. Y bõn-sĩin magdga, efa, yɩ sõmbo. Y bõn-koaag madga, bat, yɩ sõmbo. Bõn-magds a yiibã, efa la bat zema taaba. Bãmb piiga n pit bõn-sĩin magdg kãsengã, omer, la bõn-koaag magdg kãsengã, kor. Kor la omer me magame tɩ b zem taaba. Sã n ya zɩslma magbo, sikl yaa zera rãmb pisi. Sã n mag zera rãmb kobs-yoobe la pisi, f tara min a ye. Kũuna sẽn yãkd n kõt Soaala, ad-y y sẽn na n yãk-a to-to. Sã n ya alkam pɛɛlg bɩ alkam pugsgu, y pʋɩta y sẽn paama dʋr pisoobe n yãk dʋr a ye n kɩse. Sã n ya kaam lens koabg la y paam yã, yaa lengr a ye la y kɩta. Sã n ya rũmsã, yaa pe-yãang a ye bɩ bʋ-yãang a ye la y yãkd n kɩs bãmb kobs-yi zugu. Kaama, rãama bɩ zoma na n tũnuga yũ-noog bɩ yamleoog maoong bɩ maan-dɩtga, yel-wẽna sugr paoong yĩnga. Yaa maam, Naaba-Wẽnd, n kõt noor kãnga. Sẽn tog n deeg n kɩs rĩma, bɩ tẽnga biig fãa modg n paam n kɩs dĩm-biigã. Dĩma marsã n na n bãnge tɩ maanda tõog n kʋ: yũ-nooda maand sẽn tũnugd ne kaam la rãam, kibs bɛda raare, kiu-paala, vʋʋsg raare la tig-raase. Yaa dĩma n na n ges sugr kosg maandã, yũnood maandã, maan-dɩtsã la b sẽn tũnugd ne kũun niynsã, maanda sã n kʋʋd a Israyɛl dooga yĩnga.» Ad Naaba-Wẽnd sẽn le paase: «Pipi kiuuga pipi raare, loalg sẽn ka tar bãnde la y na n kʋ do-sõnga yɩlgr yĩnga. Maan-kʋʋda yãkda naafa zɩɩm n taag kʋɩlensa ra-lugã, maan-kugra kɩrems a naasã n paas pʋgẽ zaka kʋɩlens ra-lugã. Yaa boto la b na n le maan yɛsa kiuuga rasem a yopoe daar fãa neb niyns sẽn dẽgem b mense, tagsgo la gũusg kaalem yĩnga, la woto wẽnd dooga paamda yɩlgre. Kiuuga piig la a naas raare, sɩng-y pak kibsa. Yaa rasem a yopoe la kibsa na n kaoose la bura ka na n le ning bɩll ye. Kibsa pipi raare, dĩm-biiga na n kʋʋ loalga a meng yĩnga la buuda yĩnga n kos yel-wẽna sugri. Kibsa rasem a yopoe wã pʋgẽ, beoog sẽn vẽege yaa lols a yopoe la pe-raad a yopoe sẽn ka tar bãnde la dĩm-biiga na n kʋ yũ-noog maoongo. Beoog sẽn vẽeg fãa boɛɛg me la a na n kʋ sugr kosg yĩnga. Maoonga loalg bɩ pe-raoogo fãa na n tũnuga ne zom peoogo la kaam lengre.» Ad Naaba-Wẽnd sẽn le paase: «Kiuug a yopoe soaba, kiuuga piig la a nu raare, dĩm-biiga na n maana wala a sẽn maan paka wẽnde. Beoog sẽn vẽeg fãa, a na n maana sugr kosg maoong wa pakã. Yũ-noog maanda na n yɩɩ wa pakã, alkama la kaama kũuna na n yɩɩ wa pakã.» Ad Soaala-Wẽnd sẽn yete: «Zaka a yiib soaba noor sẽn tees yaanga tog n paga rasem a yoobã n yaool n pak vʋʋsga raare la kiu-paalã. Dĩm-biiga na n tũu pipi zaka noor n kẽ la a na n kẽeme n sãag roog ning sẽn be noorẽ wã. A na n yalsa kʋɩlenga sɛɛga tɩ maan-kʋʋdba baas b yũ-nooda maand la b maan-dɩtse. A na n wõgemda rooga noor la a lebe. Kʋɩlenga ka na n pag sã n ka zaabre ye. Yaa no-kãng me la zãma wã na n wa wõgemd m taoore vʋʋsg raare la kiuuga yiib raare. Dĩm-biiga na n wa kõ-m-la vʋʋsg raare, pe-bi a yoobe la pe-raoog sẽn ka tar bãnde yũ-noog maoong yĩnga. Pe-raooga tũnugda ne zom peoogo. Sã n yaa pe-bi wã, a kɩta wala a sẽn tagse. Zom peooga paasda kaam lengre. Kiuuga yiib raare, na n yɩɩ loalga, pe-bi a yoobe, la pe-raoogo, la fãa yaa rũms sẽn ka tar bãnde. Loalgã, pe-raoogã tũnugda zom peoogo. Sã n ya pe-bi wã, dim-biiga tũnugda a sẽn tagse. A na n paasa kaam lengre, zom fãa ne a rẽnda. Rĩm-biiga sẽn tũ noor ning n wa wã, no-kãng la a tũud n yi. A tũuda roog ning sẽn pẽ-a noorã. Tẽnga kamba sẽn wat m waoogre, maam, Naaba-Wẽnde, wala kibs bɛdã, tig-raasã, tog n bãnga neere tɩ sẽn tũ-b goabg noora lɛɛgd n yii rɩtgo, tɩ sẽn tũ-b rɩtga lɛɛg n yi goabga. F sẽn tũ noor ning n kẽ wã f ka tõe n le tũ no-kãng n yi ye. Yɩta noor ning sẽn tota yẽ wã. Dĩm-biiga watame la a yit ne neb a taabã, yiib wakato.» Naaba-Wẽnd le paasdame: «Kibs daare la lagemg-taab raare, kũuna sẽn na n tũnugã yaa naaf fãa zom peoogo, pe-raoog fãa zom peoogo. Sã n ya pe-bi wã, yaa wa b sẽn date. Zom peoog fãa togẽ-la ne kaam lengre. Dĩm-biiga sã n wat ne a yamleoog maoongo, yũ-noog maoong bɩ maan-dɩtga yaa yaang rignoorã la b tog n pak t'a kẽ. A maanda kʋʋda wa vʋʋsga raare, la a sã n looge b lebgd n paga kʋɩlengã. Beoog sẽn vẽeg fãa, yaa pe-bil sẽn ka tar bãnde la b na maan yũ-noog maoong Soaala yĩnga. Yaa yibeoog la maoonga kʋʋda. Yibeoog fãa b tũnugda zom wamde la kaam bilfu sẽn na n nag zoma. Dẽ yaa bũmb sẽn yals daar buud fãa yĩnga. Pe-bilã, zoma la kaama sẽn tũnugdã yaa bũmb sẽn tog n kõ Soaala yibeoog fãa n tãag dũni wã yikri.» Woto la Naaba-Wẽnd gomda: «Dĩm-biiga sã n kẽ a soolma pʋgẽ n yãk a vẽenema n kõ-a bi-roaka, biigã n na n soog-a wa a pʋɩɩre. Sã n yaa a sõgne la rĩm-biiga dɩka a vẽenema n kõ, sõgna n na n soog-a n tãag a sẽn paam n na n soog a meng raare. A sẽn so a meng raare, vẽenema lebda rĩm-biigã. Yaa dĩm-biiga kamb bal n tõe n dɩ a raboog pʋɩɩre. Dĩma ka tõe n fã zãma wã, n kẽ a soolma pʋgẽ n deeg bũmb a meng yĩng ye. Yaa a sẽn so pʋgẽ bal la a tõe n yãk n kõ a kamba, la woto b kõn tõog n dig ned ba a ye n yiis a soolmẽ ye.» Raoã tall-m lame n ta rot niyns sẽn me nug goabgã n kẽes-m maan-kʋʋdba ro-sõma wã pʋsẽ. A tɩ yãenda zĩiga, nin-taoor dota pʋsẽ. A yeel-m lame: «Yaa ka la sugr kosg la yel-wẽnd dolb maanda rũms na n dʋge. Na n yɩɩ woto me ne kũuna sẽn tũnugã, tɩ ka yɩ modgr ne maan-kʋʋdba tɩ b tall dɩ sõma wã n yi sɩmandẽ wã n pẽneg zãma wã ye.» Raoã tall-m lame n yi sɩmandẽ n kɩt tɩ d yeg a gõd a naasã. Gõdr fãa ne a zaka. Zag-bãmb da yaa bõonese, la fãa ra zema taaba. Woglma yaa kãntɩɩs pis-naase, tɩ yalma ya kãntɩɩs pis-tã. Zak fãa ra gũbga ne kug lalga, la b ra tedga bug-toaalse. Raoã yeel-m lame: «Ya bug-toaals kãensa zugu la maan-kʋʋdba rʋgd zãma wã sẽn wat ne rũms niyns n kʋʋd maandã.» Raoã tall-m lame n le wa wẽnd dooga noore. M yãenda koom sẽn bund n yit yaang noorã. Wẽnd dooga lʋgre ra teesa yaanga, kooma me boto. Kooma ra zoet n teesa wẽnd dooga rɩtgo, n yegd maan-kugra rɩtgo. Raoã kɩtame tɩ m tũ goabg noorã n yi wẽnd doogã la m gilgame n wa ta yaang noorã. Kooma ra yita no-kãng nug goabga. Neda zãagame n tees yaanga la a ra zãada wĩ-bãanega a nugẽ n magda. A maga kãntɩɩs tusri. A kɩtame tɩ m kẽ kooma la a ra tekda m nao-sũgsi. A sẽn le mag kãntɩɩs tusri a le kɩtame tɩ m kẽ kooma la a ra tata m dũma. T'a le mag kãntɩɩs tusri n yet tɩ m dʋʋge la kooma ra tata sɛɛga. A le maga kãntɩɩs tusri la lebga ko-fõtem sẽn ka tõe n dʋʋg ye. Kooma paasame, kʋɩlga lebga zulunga, kʋɩlga le ka tõe n dʋʋg sã n ka rugb ye. Tɩ neda na n sok-ma: «F gesa neere, Ezekiyɛl?» A tall-m lame tɩ d zãag bilfu n le tall-m n wa kʋɩlga noore. M sẽn lɛɛg n wa kʋɩlga noore, m yãendame tɩ tɩɩsa yaa wusgo, kʋɩlga goabg la rɩtgo. Raoã yeel-m lame: «Ko-kãnga rigda yaanga, Araba foole la a tũud n kẽed yamsem Mogrã la a sẽn kẽed Mogrã a kooma na n lebga sõma. Kooma sẽn ta zĩig ninga bõn vɩɩl fãa vɩɩm na n yãngame. Kʋɩl-zẽeda na n weka balbo tɩ kooma sẽn ta zĩig ning fãa, zĩ-kãng lebgda sõmbo tɩ vɩɩm sakd a pʋgẽ. Kʋɩl-zẽ-yẽedba na n tonga taab kʋɩlga noore. B na n yɛdga b zulumsi Engadi n ta En-Eglayim. Kʋɩl-zẽeda sẽn yõgda yaa buud toor-toore wa Tẽnsʋk Mogra zĩma. Sã n ya bãtã la ko-ralma, bãmb pa tek ye. Yamsem bal n pid-b zãnga. Kʋɩlga noore, goabg la rɩtgo tɩ-rits buud toɛ-toɛyã n na n yi. B vãada kõn tol n sʋʋg ye, b womb ka be wakat ye. Kiuug fãa wata ne a bɩ-paala, tɩ kooma yaa do-sõnga koom. Biisa womda rɩɩb yĩnga la vãada yaa tɩɩm.» Ad Soaala-Wẽnd sẽn yete: «Ad tẽn-peelma Israyɛl sags piig la a yiibã sẽn na n pʋɩ taaba. A Zozɛf pʋɩɩra na n yɩɩ wa sags a yiib rẽnna. Y fãa na n paama pʋɩɩre tɩ m wẽename n kãab y ba rãmba tẽn-kãnga, la a na n lebga y tẽnga. Ad tẽnga toose: Nug goabg yaa Mog kãsenga la a sɩngda, n tũud, Etlõ, Lebo-Amat, Sedad, Berota, Sibrayim sẽn be Damas, ne Amat la Asɛr-Tikõ rĩung tẽnsʋka, n kolg Awurã toaaga. Woto wã toaaga sɩngda Tẽnsʋk Mogrã n tat tẽng ning sẽn boond tɩ Asar-Ena. A na n teka Damas la Amat rĩundu. Woto la toaaga, nug goabga sẽnẽ. Yaang marsã, toaaga na n sɩnga Awurã ne Damas sʋka, a na n tũu Zʋrdẽ kʋɩlga, Galaad la Israyɛl sʋka la a na n taa Tamar, sẽn be Yamsem mogra noore. Nug rɩtgo, toaaga na n sɩnga Tamar n ta Kadɛs Meriba bãoogo. Dẽ poore a na n yega Ezipt kʋɩl-bɛɛgã n ta Tẽnsʋk Mogre. Woto la nug rɩtg toaaga. Nin-taoore yaa Tẽnsʋk Mogrã n na n yɩ toaaga, al nug rɩtgo n ta Lebo-Amat. Nin-taoor toaaga la rẽ. Pʋɩ-y tẽnga ne taaba, ne a Israyɛl sagsã. Y na n poeesame n pʋɩ la ra yĩm-y sãamba sẽn nok-b yãmba n dog kamb sẽn be ne yãmba ye. Da zẽng-y-b ne Israyɛl tẽnga kamba ye. B tog n paama b pʋɩɩr Israyɛl buuda sags sʋka. Yaa sẽn kẽed sak ninga la sãan na n paam a pʋɩɩre. Yaa maam a Naaba-Wẽnd n kõt no-kãnga.» Ad buuda sagsa ne b pʋɩɩre: «A Dã paama a pʋɩɩre. A toaaga sɩngda Nug goabg, yɩɩg-yɩɩga, al Etlõ n digd Lebo-Amat, Asar-Ena, n pẽneg Amat la Damas rĩungu; a na n tonga a toaag yaanga n ta Tẽnsʋk Mogra, nin-taoore. A Asɛr paama a pʋɩɩre. A yegda a Dã rẽnna yaang n tat nin-taoore. A Neftali paama a pʋɩɩre. A yegda a Asɛr rẽnna. A Manase paama a pʋɩɩre. A yegda a Neftali rẽnna. A Efrayim paama a pʋɩɩre. A yegda a Manase rẽnna. A Rubẽ paama a pʋɩɩre. A yegda a Efrayim rẽnna. A Zɩɩda paama a pʋɩɩre. A yegda a Rubẽ rẽnna. A Zɩɩda yegende, yaang toaagã n ta Tẽnsʋk Mogra, nin-taoore y na n basa vẽenem, yẽ ne sak ninga sẽn pʋgda sʋka, wẽnd dooga yĩnga. A yalem yaa kãntɩɩs tus pisi la a nu. Woglma yaa sags a taaba fãa rẽnna, yaanga n ta nin-taoore. Y sẽn na n toog vẽenem ning Soaala yĩnga woglem na n yɩɩ kãntɩɩs tus pisi la a nu la yalem na n yɩɩ kãntɩɩs tus pisi. Maan-kʋʋdbã n na n ti vẽenem kãng pʋgẽ. Yaang n ta nin-taoore yaa kãntɩɩs tus pisi la a nu; nug goabg n ta rɩtgo kãntɩɩs tus piiga, tɩ wẽnd dooga be tẽnsʋka. Sẽn na n soog-b zĩ-kãng yaa a Sadok kamb nins sẽn kell-bã n tʋmd Wẽnd tʋʋmda ne pʋ-peelem, sẽn ka naag-b Israyɛl kamba n wɩɩb b wɩɩbdã wala Levitsã. B vẽenema yãka Wẽnd pʋɩɩrẽ, Levitsa rẽnd yegende. Wala maan-kʋʋdba rẽnna, Levitsa pʋɩɩr woglem yaa kãntɩɩs tus pisi la a nu la yalem yaa kãntɩɩs tus piiga. Vẽenem kãng pʋgẽ bũmb ka be sẽn tõe n kẽes raag bɩ sẽn tõe n tek ye. Bũmb ka be sẽn tõe n lebg ned a to soolem ye, tɩ yaa Soaala pʋɩɩre. Vẽenem n na n kelle t'a yalem zems kãntɩɩs tus a nu, t'a woglem ya kãntɩɩs tus pisi la a nu. Yaa vẽenem kãng pʋga la neb a taaba na n ti b roto tɩ rũmsa me paam b wãbneg zĩiga. Tẽnga meta sʋka. Tẽnga me magb la woto: a woglem la a yalem yaa magb a ye: kãntɩɩs tus a naase la kobs-nu. Tẽnga kɩrems a naasã n gilgi, vɩʋʋg la b na n bok n base. A yalma yaa kãntɩɩs kobs-yi la pis-nu. Vẽenem a yi la b na n bas Wẽnd pʋɩɩra yegende, tẽnga yaanga la tẽnga nin-taoore. B woglem na n taa kãntɩɩs tus piiga. Vẽenem kãng la tẽnga rãmb pʋto. Neb niyns fãa sẽn tʋmd-b tẽnga pʋgẽ na n tõog n ko zĩ-kãnga, b sẽn ya sak ning fãa neba. Wa sẽn togsã, vɩʋʋga fãa sẽn bas Wẽnd yĩnga la tẽnga rãmb pʋta yĩnga, b woglem la b yalem ka yɩɩd to ye, yaa kãntɩɩs tus pisi la a nu. Rĩm-biiga me na n paama a pʋɩɩre. Na n yɩɩ sʋka. Wẽnd vẽenema ne tẽnga vẽenema sʋka; vẽenem kãng woglem la a yalem yaa kãntɩɩs tus pisi la a nu. Yaanga a toaag yaa tẽns niyns sẽn yãk toaag ne Zʋrdẽ kʋɩlgã, nin-taoore yaa tẽns niyns sẽn yãk toaag ne Tẽnsʋk Mogrã. Wẽnd pʋɩɩra la wẽnd dooga na n zĩnda tẽnga tẽnsʋk sẽn welg Wẽnd yĩngã. Levitsa vẽenem la rota sẽn tɩ zĩig ningã basda rĩma pʋɩɩr sʋka. Rĩm-biiga pʋɩɩr sẽn le be vẽenem ning sʋk yɛsa, yaa a Zɩɩda la a Bẽnzame tẽn-peelem. A Zɩɩda rẽnd bee nug goabga, t'a Bẽnzame rẽnd be nug rɩtgo. Ad buud niyns sẽn kell-bã ne b pʋɩɩre: a Bẽnzame paama a pʋɩɩre, a tẽeg n taa yaanga rãmba toaag n wat Tẽnsʋk Mogra, nin-taoore. A Simeõ paama a pʋɩɩre, a yegda a Bẽnzame rẽnna, a yaanga n ta a nin-taoore. A Isakar paama a pʋɩɩre. A yegda a Simeõ rẽnna. A Zabulõ paama a pʋɩɩre. A yegda a Gad rẽnna. A Gad paama a pʋɩɩre. A yegda a Zabulõ rẽnna. Nug rɩtgo a Gad toaaga tata Tamar, yaanga, n tat Meriba-Kades, n yegd Ezipt kʋɩl-bɛɛga, n tat Tẽnsʋk Mogrã. Yaa woto la y na n pʋɩ tẽngã n kõ sak fãa a rẽnna. Yaa maam a Naaba-Wẽnd n kõt-y noor kãnga. Ad Zerizalɛɛm tẽnga noya piig la a yiibã. Nug goabg lal-gũbra woglem taa kãntɩɩs tus a naas la kobs-nu n tar noya a tãabo. Noor fãa reegda a Israyɛl sak a ye yʋʋre: a Rubẽ, a Zɩɩda la a Levi noya. Yaanga, lal-gũbra yaa kãntɩɩs tus a naas la kobs-nu, n tar noya a tãabo: a Zozɛf, a Bẽnzame, a Dã noya. Nug rɩtgo, lal-gũbra yaa kãntɩɩs tus a naas la kobs-nu n tar noya a tãabo: a Simeõ, a Isakar, a Zabulõ noya. Nin-taoore, lal-gũbra yaa kãntɩɩs tus a naase la kobs-nu n tar noya a tãabo: a Gad, a Asɛr, a Neftali noya. Tẽnga sẽn mag n gilgã: kãntɩɩs tus piig la a nii. Rũnda tɛka ad tẽnga yʋʋr sẽn na n yɩ a soaba: ‹Soaala-Wẽnd zĩig la ka.› » Bũmb ninga sẽn be sebr kãnga pʋga: yaa koees niyns Soaala-Wẽnd sẽn taas a Oze, a Beeri biiga. Yɩ-la a Zowas biig a Zeroboam sẽn waa n ya Israyɛl dĩma. Sã n ya Zɩɩda dĩm dãmba, yɩ-la a Oziyas, a Zotam, a Aas la a Ezekiyas wakato. Ad Soaala-Wẽnd koeesa sɩngre, koees niyns a Oze sẽn deeg n taas-dã. Soaala-Wẽnd yeela a Oze: «Kẽng n bao pʋg-yoodr a ye, n maan f paga. A sẽn na n dog kamb niynsã kõn deeg f raboog pʋɩɩr ye. Tẽnga rãmb basa maam, b Soaala. B maana wa pʋg-yoaad sẽn bas a sɩda.» A Oze sɩd kẽng n tɩ kẽe ne a Gomɛr, a Diblayim bi-pugla. A Gomɛr rɩka pʋga n dog bi-ribla. Soaala-Wẽnd yeela a Oze: «Pʋd biiga tɩ Zizreyɛl, tɩ sã n yɩ bilfu m na rok m sũuri ne Zizreyɛl zɩɩma raagda. M na n kɩtame tɩ naam sɛ a Israyɛl roogẽ. Daar a ye, Zizreyɛl tẽn-nabrẽ wã, a Israyɛl tãb-biisa na n konga pãnga.» Paga le rɩka pʋga, n dog bi-pugla. Tɩ Naaba-Wẽnd yeele: «Pʋd-a t'a Lo-Ruama, a pʋg-beoogo, tɩ marsã tɛka mam yam laka ne Israyɛl buud neba fãa; m ka leb n nong-b ye. Yaa ne a Zɩɩda buuda la m yama na n kell n pa. Yaa maam b Wẽndã n na n fãag-ba. La m fãagrã ka na n tũ ne loko, ne sʋʋga, ne zabre, ne weefo, bɩ ne wed-dʋʋd ye.» Paga sika a Lo-Ruama, n leb n dɩk pʋga, n dog bi-ribla. Tɩ wẽnd leb n yeele: «Pʋd biiga t'a Lo-Ami, a Sãana, tɩ yãmb a Israyɛl kamba lebga m sãamba. M ka le yaa a Be-n-beẽ, yãmb yĩng ye.» Daar a ye, a Israyɛl kamba na n yɩɩ wa Mogr noorẽ bĩisri, b sõora na n lebga ka tɛka. Soaala kõn le yeel wa pĩnda tɩ b ka bãmb neb ye. B na n bool-b-la woto: «Wẽnnaam Vɩɩga kamba.» Sasa kãnga, Zɩɩda ne Israyɛl kamba na n le lagma taaba, b dĩma na n yɩ-la a ye. B tẽn-peelma me kõn le yɩ ned a to soolem ye. Wẽnd na taas a Zizreyɛl a da kãsenga raare! Maam, Naaba-Wẽnd n yet tɩ y wilg y saam-biisi, pagb la rapa tɩ bãmb la m buudu, la bãmb tẽngã la m na n bool tɩ m pʋg-rʋmde. Zab ne f ma, Israyɛl, yaa Naaba-Wẽnd n gomde, zab ne-a wʋsgo t'a ka le ya mam pag ye la mam me ka leb n yaa a sɩd ye. Yeel-a t'a pek a nenga la a yãoogo n yiis bũmb ning fãa sẽn wilgd t'a yaa pʋg-yoodre. Ka rẽ mam na sẽk a fuugu n bas-a zaala wala a rogem daare; a tẽn-peelma na lebg zĩ-peen-daaga la ko-yũud na kʋ-a, a meng tẽngẽ. M ka nong a kamba ye; b pʋɩɩr ka m nengẽ ye, tɩ b ma yaa yi-saada, la a ka zoet yãnd ye. La bãng-y t'a pʋgd n gomdame: «M na n pʋga m kamba poore, bãmb n na n kõ-m m dɩɩb la m koom, n kõ-m m sẽn na n yeelg la m sẽgne, n kõ-m m kaam la m dãam!» La ad m sẽn yete, maam, Naaba-Wẽnde, m na n gɩdga a sorã t'a ra le tõog n loog ye. A soya na n yãga ne gõose. Mam na n mee lalg n gũbg-a t'a ra le tõog n yi ye. A na mak a roell dãmba pʋgbo, la a kõn tõog ye. A na kõ-b sɛka la na vaale. Dẽ marsã la a na n yeel a menga: «M na n leba m sɩd kʋdga nengẽ, tɩ m sẽn da be ne-yẽ wã, m sũur da ya noog n yɩɩd marsã.» Ad-y paga ra yĩmame tɩ maam n da moenegd-a, n kõt-a koodo, rã-paalga la ka-neem. A yĩmame tɩ maam n da kõt-a wanzurf la sãnem t'a rõogd a Baal waoogr lagdo. Yaa rẽ me yĩnga la tigsga wakato a kõn paam kood ye, Bugsuntunga kõn tõs n kõg rãam n yũ ye, M na n deega m pe-kõbdo la m lamdo, la fuug sẽn na n lud yãnde kõn le wʋg ye. A doell dãmba taoore m na yees a futã n ning-a yãnde la ned kõn gɩdg-m ye. Sũ-noog raar kõn le zĩnd ye. B kõn le gom Wẽnd waoogra tẽnga gilgr yell ye. B kõn gom ki-paala, vʋʋsg raare la kibs a taab yell ye, fãa na n sɛɛme. M na n võ-la a bugsuntund la a kankamse. La bãmb poorẽ a ra gomdame: «Ad-y wã fãa yaa m yooba yõodo!» Yõoda na n lebga rũms rẽnda tɩ f pʋʋgã n na n lebg rũmsa wãbneg zĩiga. Maam, Naaba-Wẽnd, n yete: «Woto la a na yao a sẽn bas maam n pʋg a Baal ne a wẽn-taase. A ra pʋgda bãmb ne a kũuni. A ra ninga a fan-teedo, a tʋb-londo la a muizãana n babsd a roell dãmba. Mam yell bal la a ra yĩm yã. Soaala n gomde. Ade, m na n le bels-a lame n tall-a n leb we-raoogẽ, tɩ d sũur le tabend taaba, tɩ m yaool marsã n lebs-a a bugsuntundã; Akor bãooga sẽn kẽesd rabeem dũnna wã na n pidsa a sẽn gãe n saagd bũmb ninga fãa. A na n pʋg-m-la zĩ-kãnga wala a bi-bɩɩlmẽ, wala Ezipt yiiba wakato.» Maam, Naaba-Wẽnd, n paasde: «Badaare fo na n boola maam tɩ f sɩda. F kõn le bool maam tɩ f Baal, tɩ f zu-soab ye. M kõn sak tɩ Baal yʋʋr meng le yi f noorẽ ye. A wẽn-taasa yʋʋr meng kõn le pʋd ye. Badaare, m buuda yĩnga m na n yõga zood ne yir dũmsi, yĩngri luiili la tẽng bõn-vuudi wã fãa. Tãpo, sʋʋga, zab-teoog buud fãa kõn le yiis ye. M buuda na ya n paam n vʋʋs ne laafi. F na n lebga m paga daar buud fãa yĩnga. La m na yao m sẽn tog n yao bũmb ning fãa tɩ f lebg m paga. M na lɛɛg n pids-f ne pʋ-peelem, ne zemsgo, nonglem la sũ-bʋgsem. M na n paamame tɩ f ra le bas maam n pʋg ned a to ye la f na n bãngame tɩ maam la Naaba-Wẽnde. Badaare, maam, Naaba-Wẽnd, n yete, m na lebg Wẽnd sẽn sakde, b sã n bool-ma. Yĩngr sẽn kose, m na kõ-a t'a reeg n taas tẽnga. Tẽnga na kõ pʋtã b sẽn date. Woto tẽnga na wa ne alkam, n wa ne rã-paalga, n wa ne ka-neem. Fãa na n yɩɩ wala a Zizreyɛl, wala a Wẽnd mi bʋdb, sẽn date. M na n vigla a Zizreyɛl a tẽngẽ, a Pʋg-beoog na n lebga a Rʋmde. M na n yeela a Sãana: ‹Foo la m buudu,› tɩ yẽ na n leok-ma: ‹Yãmb la m Wẽnde.› » Naaba-Wẽnd yeela maam yɛsa: «Modg tɩ f yama kẽ pʋg kãnga sẽn tar doell la a vɩ yoob vɩɩma. Yõg zoodo la nong-a wala maam, Naaba-Wẽnd, sẽn nong a Israyɛl kamba ne b sẽn bas maam n pʋgd wẽn-naandsã la b pidsd b pʋga ne kũuna b sẽn kõt-bã, ne miisda sẽn dõosd ne bugsuntund biisã.» Mam maana wa Soaala sẽn yeelã, m sõda wakɩ koeems piig la a nu, la ki pet bɛd piig la a yiibu n tɩ kɩs la paga le wa-la m nengẽ. La m yaool n yeel-a lame: «Bas tɩ kaoos tɩ f be m zakẽ wã bala n pa yit ye, n ka yood ye. Fo na n basa rao fãa pẽnegre, la mam meng na n zãaga ne foo.» Na n yɩɩ woto tɩ bala Israyɛl kamba na n kaoosame n ka naaba, n ka dĩma, n ka maoongo n ka ra-luga, n ka bag-korgo la bag-kuga. Na n kaoosame tɩ b yaool n le lɛɛg n wa kẽ Soaala, n le wẽnemd b neng n tees b Wẽnd la b tees b dĩm a Daviid yagense. La wakat n wate tɩ b na n yik n baood Soaala ziira pẽnegre la b baood b kũun sõma. Naaba-Wẽnd na n yika bʋʋd ne tẽnga rãmba. Dɩlla Israyɛl kamba, kelg-y tɩ woto la b koɛɛga: «Sɩd pʋgb ka ye, nonglem ka ye, Wẽnd bãngr ka ye. B ka le get-m wa Wẽnd ye. Ned kãabda a to beedo, n zãmbd-a, n kʋd-a, n yood la a zuud. Nin-zẽmb waa n kẽe tẽngã n yãmbe. Kʋʋda taab rũnna n le kʋ beoogo. Rẽ n so tɩ war na n lʋɩ tẽngã. Neba fãa na n komsame. Yir rũmsi, la yĩngri luiili, al ba mogra zĩma, fãa tara menengo. La baasg fãa ka neba fãa n na n dɩ rẽ taal ye. Ka neba fãa n tog ne sãbsg ye. Zabra bee ne foo, maan-kʋʋd kãsenga! Maam, Naaba-Wẽnd, n gomd boto. Wĩntoogo, fo na n lʋɩɩme, la yʋngo yaa f sõsd-n-taaga, yaa bãngda n na n lake. F ma menga na n kiime. Mam buuda neb sãamdame, bãngre kaalem yĩnga, tɩ b ka mi mam sẽn yaa a soab ye. Fo meng ka tʋlg n zãms mam sẽn yaa a soab ye. Yaa rẽ me yĩng la m me ka le rat-fo, f kõn le yɩ m maan-kʋʋd ye. Fo basa m noorã, ma me na bas f kamba. Maan-kʋʋdba gill fãa zãaga ne sora sẽn da tuk n kõ-ba. B rɩka maam, ne m sẽn pid ne ziirã n tek ne wẽn-faoogo. B rɩlgda b mens ne kũun niyns m buud tõtra sẽn wat ne, n na n kos a yel-wẽna sugri. Dɩlla b sẽn dat bala, yaa m buuda kell n yɩ beegda, tɩ rɩɩba watẽ tɩ b rɩtẽ. La ka na n paoog ba a ye, buuda woo, maan-kʋʋdba woo, m na sɩbg b tʋʋm yoodã sẽn tog ne sɩbgr ninga. B na rɩ la b kõn tɩge, b na yo la b kõn dog kamb ye, tɩ b raaga maam m base, maam b Wẽnde, n na yo b yoobo. M buuda sɩnga zʋbsgo, n dat t'a bugsuntunda kõ-a rãam wʋsgo, la yaa wẽn-naande, wẽnd sẽn pees ne raado la a tɩ soke. Ra-giig yɩta wãn n wilg sẽn wat beoogo? Ad-y yaa yoob raab n wa b yamẽ n kẽes-b moogo. Yooba la b sẽn bas Naaba-Wẽnd n pʋg wẽn-naandsã. B rɩta maand dɩɩb tãms zutu. Kunkuba zut la maanda yũ-nooga rukda. B kẽeda tɩɩs maasmẽ, maasem sẽn noom-ba: wala kʋgse, kankalse, ãoose. Dẽ n wa ne b kom-pugli wã yoobo, n wa ne b bi-pagba wɩɩbgo. La ka y kom-pugli wã la m na n zab ne ye. Ka y bi-pagba sẽn bas b sɩdb rãmba n yood rap a taaba la m na n zab ne ye. Yaa yãmb la m na n sɩbge, tɩ yãmb n tall-ba n yi kɛɛnga, tɩ b naag n dɩt maand dɩɩbo ne sẽn yood-b wẽnd dota pʋsẽ; tɩ wala yelbũnda sẽn yete: yam kaalg menesda buud tõre. Woto wã, Israyɛl, fo saka yoobo. Bɩ a Zɩɩda vẽ ne rẽ. Da kẽng-y Gilgal b sẽn boond tɩ b tẽn-sõnga ye, da rʋ-y Betɛl sẽn ya bug-tẽnga ye. Da wẽen-y n yet tɩ ne Vɩɩm Naaba-Wẽnd ye! Israyɛl tõdga wa nag-yãanga sẽn ka tʋlg t'a yubla reeg raoog ning b sẽn sogd nag koodsa ye. Bõe marsã la a rat tɩ Soaala ges-a wa pe-bi sẽn tar n na n tɩ wãben zĩ yalemsẽ? Efrayim waoogda bõn-naandse, bas-y-ba, tɩ b baas b rɩ bɛdã, n yo b yoobã la b sak yãnd ning ra-taasa sẽn tʋk b zug n kẽndã. Sob-raoog na loog ne b fãa; b maamda yãnd n na n dɩ-ba. Maan-kʋʋdba, kelg-y yã, Israyɛl taoor dãmba, na-yir dãmba, maan-y gũusgu. Mispa tẽnga yãmb yɩɩ wa bẽdgo m buuda yĩnga, n yɩ wa zulung sẽn tẽeg Tabor tãnga zugu. Y yɩɩ loang sẽn zulum Kitim. La maam, Naaba-Wẽnde, m na sagl-y sagl-sõngo. Mam mi m sẽn na n maan bũmb ning ne a Efrayim, m sẽn na n maan bũmb ning ne a Israyɛl. Sɩda y tusa a Efrayim n tees yoobo, la yaa Israyɛl tõre la y rẽgem yã. A Israyɛl kamba sẽn maana kɩtame tɩ b ka tõe n lɛɛg n wa kẽ Naaba-Wẽnd ye. Yooba liba b yam tɩ b ka le mi Naaba-Wẽnd ye. Israyɛl zẽk-m-menga n sãamd-a. A Efrayim ne a Israyɛl yel-wẽna n kɩt tɩ b kẽnd n lagsd n lʋɩtẽ la yaa b yel-wẽnda n kand-ba n lubdẽ. A Zɩɩda meng naagame n lagsdẽ. B wat n baooda Soaala leokre ne b piisi la b niis maando, la b ka paamd leokr ye, tɩ Soaala zãaga ne bãmba. B zãmba Wẽnde, b roga tãmpĩ-bi; rẽ yĩnga, ka ne kiuugu, b tẽnga na n lebga raboogo. Peeb-y baorg Gibea tẽnga, peeb-y tõntõog Rama tẽnga. Wẽ-y no-bɩnga Bɛt-Avɛn tẽngẽ; la a Bẽnzame maan gũusg a poorẽ. Sɩbgre daare Efrayim na n lebga raboogo la m sẽn gomd woto a Israyɛl buuda sags poorẽ yaa sɩd menga. Zɩɩda nanamse yaa wa neb sẽn teemd b pʋt toaag kuga, la m sũura na fudg n waag-ba. Efrayim tara toogo, b maan-a-la pãnga, la yaa yẽ meng n bas sɩda n pʋg kuroto. A Efrayim yĩnga mam na n yɩɩ rasempʋɩɩga la m na n feo-la a Zɩɩda yẽna n bas-a lamboaama. A Efrayim reega a kongre. A Zɩɩda yãe-la a bãaga sẽn lebg bã-toogã. Woto a Efrayim tɩ yõka Asiri sɛɛga. A Zɩɩda kẽng n tɩ yẽsa ne dĩm kãsenga; yẽ me ka na n tõog n sõng-y ne bũmb ye. A kõ tõog n tɩp y nodr ye, Efrayim kamba. Yaa maam, Naaba-Wẽnde, n zabd ne yã wa bõnyẽega, yaa maam n kaoog zabre ne a Zɩɩda, wala rũn-toaaga. M sã n yõk bũmbu, n tar-a n looda, ned ka tõe n le reeg-a mam nugẽ ye. Ade, Naaba-Wẽnd meng n gomda: ‹M na n leba m doogẽ, n tãag a Efrayim kamba sẽn wat n deeg b kongre. B sẽn wat n lʋɩ yɩɩr pʋgẽ la b na n bao mam sẽn beẽ.› » Y gomda woto: «Wa-y tɩ d leb Wẽnd nengẽ. Sãmpogra yaa bãmb sãmpogre, la b na le sãoog-d lame; b sɩbg-d lame la b na n loe-la d noadã. B na n vʋʋg-d-la dasem a yiibu, dasem a tãab poore; b na n le yik-d lame. D na n le vɩɩnda bãmb taoore. D ning pãnga n bãng tɩ bãmb la Wẽnde. N-ye, d modg n bãng tɩ bãmb la Soaala! B waoonga pa tõe n vaal ye. Yaa wala sõore, a ka tõe n ka puk ye. B na n wa-la d nengẽ wala sẽoogo sẽn wat ne a saaga tɩ zĩ-lik paalele me wat ne a rẽnna n le bʋk tẽngã.» La bãng-y tɩ Soaala na n leokame: «Yaa bõe la m na n maan f yĩnga, Efrayim, bõe la m na n maan f yĩnga, Zɩɩda? Y sẽn nong maam ne nonglem ninga wẽnda yibeoog sawadgo, n ka zɛɛd wɩlgr ye, n wẽnd meenem n ka zɛɛd mesgr ye. Rẽ yĩnga la m zabd ne yã. M zabd-y-la ne bãngdba koeese, la m wilgd-y lame tɩ y babsda y kũum. M sẽn yals sɩbgr ninga na n puka vẽeneg wa sõore. M sẽn data yaa nonglem lʋɩ taoore n yɩɩd maanda kʋʋbo; la b bãng tɩ maam la Naaba-Wẽnde, la rẽ n yɩɩd rũmsa nemd sẽn kãbd bugmẽ. Sã n ya yãmba, bãngdba, y maana wa neb a taaba n ka pids y sẽn kãab ye, y zãmba maam. Galaad yaa bi-bees tẽnga, b kẽndame tɩ zɩɩm raagd n pʋgd b poore. Sikɛm sor zugu, maan-kʋʋdba solgdame n tek n kʋʋd neba wa so-gɩtba, la rẽ yaa yel-beedo. Israyɛl tẽn-peelmẽ, m yãenda yel-yoodo. A Efrayim yooba longa a Israyɛl tõre. La foom me, Zɩɩda, m na n kẽ-la m pʋʋgẽ n tigs m tigsga, tɩ m datame marsã n maneg m buuda yelle.» Soaala n gomd woto: «M da sɩng n na n yiis m buudã a nimbãaneg pʋgẽ, m sɩngame n na n sãooga a Israyɛl bãasã, la wakat kãng la m yãend a Efrayim yel-wẽna, n yãenda a Samari yel-yoodã. Ned kam fãa tudgda a sõsd-n-taaga, wagdb kẽeda roto, fãadb gɩta soya. La ned ba a ye yaool n ka tags ye tɩ mam, Naaba-Wẽnd, nee wẽngã b sẽn maanda ye. Ad b wẽnema sẽn na n lɛɛg n dɩ-ba. B sẽn maana fãa rɩga m taoore. B solgda b wẽnema n maand laad tɩ dĩma la a kug-zĩidba kelgdẽ. B fãa baooda b taab pagba. B wẽnda wʋng sẽn wɩnge tɩ looge, tɩ b pa le ningd daado, bura zom sẽn wẽ tɛka n gũud a wukri. Dĩma kibs daare, yaa kug-zĩidba n sɩngd yũubu. Rãama tʋmda a tʋʋmde tɩ ned fãa gomd yaare. Sẽn dat-b zɩɩma n daagã sũura kɛɛdame la a moogd wa sare. B gãnegda b sũura yʋng tõre la beoog sẽn wat n vẽegdẽ t'a widga wa bugum sẽn zom weoogo. B fãa sũur sẽn moog wa sare, ya kombɛɛmba la b kʋʋda. B dĩm dãmba kʋʋr kelemdame n pʋgd taaba. La ned ba a ye ka tẽegd n yõk Naaba-Wẽnd sɛɛg ye. A Efrayim wẽnda bu-zẽmbã. A wẽnda miisgu sẽn pa lebge n bɩ bogre. Sãambã n sɛt a pãnga t'a ka miẽ ye. A zoobda zoe n lobda peendo t a zɩ tiiri. A Israyɛl zẽk-m-menga n sãamd-a, a ka lɛɛgd n wat maam a Wẽnda nengẽ ye. Yɛla lʋɩ-la a zug toor-toore, la b pa bao m zĩig ye. Efrayim yaa yirga, a kota Ezipt sõngre n bas n yik n tees Asiri. A sẽn waa n dabd be wã la a pusg m tãooga. La m tãooga yõk-a-la wa luiila n sɩbg-a wala yella sẽn dog a zugã sẽn tog ne. A Efrayim kamb zug yaa beedo. B zoet n zãagda ne maam. Bũmb ning sẽn wa ne b wãaba la woto. B zẽka b zug ne maam. M sẽn waa n baood n na n fãag-ba la b yik ne b zirẽ-beedo. B sã n boond n kot sõngre, b ka boond ne pʋ-peelem ye. B basda b meng n lʋɩ n gãe n waasdẽ, b kɩɩsda b yĩnga ne barse n tẽed tɩ b pʋt na wom biisi, n yɩɩge, tɩ b bugsuntund na wom n yɩɩge. La woto wã yaa ne maam la b zabda. Mam da kenga b kanga, n da kõ-b pãnga, la wẽng bal la b tagsd-m poorẽ. B sẽn baood a soab zĩiga, ka maam ye. Ned ka tõe n teeg-b ye, b lebga tãp sẽn golme tɩ b ka le tõe n tão n yõk bũmb ye. B nanamsa na n paa tãpẽ tɩ b goama yaa tɩtaam goama, Ezipt rãmb sẽn na n wʋm n pusg laado. Rɩk-y baorgo n peebe, wẽ-y kũnga, ad-y yel-beed n n sigd Soaala tẽngẽ la a fõta wa wɩbga. Ad-y yaa Israyɛl kambã n ka pids d zooda sẽn da rat bũmb ningã. Yaa Soaala n gomde. B pa tũ m sẽn zãms-ba ye. Ba b sã n yet woto: ‹Tõnd yaa Israyɛl kamba, tõnd mii yãmba, Wẽnnaam,› basgo b zãgsa neer maanego. Dẽ me la bɛɛba rigd-ba. B yuga b dĩm dãmba la b pa sok-m n ges sã n taa m yam bɩ sã n pa ta ye. B kõta kug-zĩidb naam tɩ m ka mi tiir ye. B rɩka b wanzurf la b sãnem n dõog wẽn-naandse n yɛs ne bõne sẽn pid bõne. Samari rãmba, y rat neer bɩ y menes y sãnem nag-bilã. M sũura widga bugum. Wakat bʋg la m na n mik tɩ yell ka y zugu? Yãmb yẽ yita a Israyɛl buudẽ, la sãnem nag-bila ka tʋʋmd-mit bal n dõog-a-la? A ka wẽnd ye. Sãnem nag-bila na n yɩga peese. ‹Sẽn bʋta sobgo, silman-daad la a na n tigsi.› Tɩ yelbũnd a to le paasdẽ: ‹Kaaf sẽn ka zug kõn wer zom ye.› La a modg n paam zom me, yaa sãamb n so. Yɛla lima a Israyɛl. Ade marsã a bee bu-zẽmba sʋka wa rʋk sẽn wã n ka le be yõod ye. Yẽnna n yik a toore n dɩk Asiri sore. Burgumd sẽn pẽgd la a soog-m-menga. Efrayim ka mi rẽ n saad n daad roellse n ka le so a meng ye. B wʋkda b laogã n kõt bu-zẽmbã, la ne rẽ fãa wakat taame tɩ m na n tigim-ba. Ka na le kaoose tɩ na-biisa dĩma zɩlg-b zɩɩb ye. A Efrayim mee maan-kug zembala, la maan-kuga waa n paasa b wẽnem. Maan-kuga sɩd waa n paasa b wẽnem, d da ka tẽed rẽnd ye. M gʋls m noya tusri a Efrayim yĩnga, a na maan wa a toog ka ye. B sã n nong maanda kʋʋbo, yaa b sẽn nong bala n wãb nemdo, la rẽ ka noogd maam, Naaba-Wẽnd, sũur ye. M pa yĩmd b yel-wẽna ye, m sõdgda b beegrã. M na n lebs-b la Ezipt tẽnga. A Israyɛl yĩma a Naanda la a mee bɛɛndo sẽn be neere. A Zɩɩda me me-la a tẽn-beda zembala. M yaool n na n ninga tẽn-kãens fãa bugum, la bugma na rɩ ro-neeba fãa. Da noog f sũur ye, Israyɛl, da kɩdem wala nin-zẽmbã, tɩ f basa f Wẽnnaam n kẽ yoobo; fo sakame n deeg f yaoodo zɛɛsa fãa pʋsẽ. Zɛɛga ki wã la sĩm-bila kaama ka na n yɩ f soolem ye. Rã-paalgã f sẽn gũudã na n looga f taoor la f kõn lemb-a ye. A Efrayim ka na n pa Soaala tẽngẽ ye, a na n leba Ezipt la Asʋr, b na n dɩɩ rẽgd dɩɩbo. A Efrayim pa na n le raal dãam Soaala Wẽnd yĩng ye, b pa na n le kʋ maand Soaala sũur noogr yĩng ye. Ad-y b rɩɩba na n yɩɩ wa kʋʋr dɩɩbo. Ned ning fãa sẽn na n dɩ-a, na n lebga rẽgdo. B rɩɩb na n yɩɩ bãmb yĩng bala, a pa na n kẽ Wẽnd zakẽ ye. Wẽnd kibsa daare, b kibs kãsenga raare bõe la yãmb na n maane? Y sã n wa yi y tẽnga sẽn lebg raboogo, Ezipt na reeg yã la y yaad na n tuka Memfis tẽnga. Y sẽn bas y poorẽ wã, y laoga sẽn da bĩngd zĩig ninga, yõeens-tabdo n na n yi be, tɩ gõos pag y rotã. Soaala sẽn na n yik ne yãmb daara na n taame. Geelsa raar taame, la ka ling a Israyɛl ye. Y maandame tɩ bãngda yaa gãeenga, Wẽnd sẽn pʋdg a soab bãngrã yaa zʋbsa. Ade, y yel-wẽna sẽn ka tɛkã n wa ne rẽ, y sẽn ka tar sugr ne bãngdã n wa ne rẽ. Bãngd ning sẽn ka gõe a Efrayim yĩngã, Soaala bee ne yẽnda. La yaa yẽ yĩng la y tar y bẽta gãnegre, n gãnegd a naoor sẽn teesẽ fãa. Naaba-Wẽnd tẽngẽ, a Wẽnda tẽngẽ, yaa beem ne beem bal la a segda. Y yõga zood ne wẽnga wa pĩnd dãmba sẽn waa n be Gibea. Soaala tẽra y yel-yoodã, b na n sɩbga y yel-wẽna. M sega a Israyɛl wa bugsuntung we-raoogẽ, m yãenda y ba rãmba wa kankang rẽeng bi-moomde. Y ba rãmba sẽn ta Baal-Peor la b sẽn wẽneg n bas t'a Baal yamleoog kẽ-ba tɩ b naag yẽ n lebg Waoosa. A Efrayim ziirã na n yɩkame n loog wala luiin-sugri. Rogem ka na n le rog ye, kamb ka na n le wa moog ye, pag ka na n le rɩk pʋg meng ye. Ba b sã n tõog n gʋʋl kamba, mam na reeg b fãa n pa kees ba a ye. M sã n wẽnemd m kãar n tees-ba, yell ning sẽn na n pak-ba bɩ a pak-ba. M sẽn ne a Efrayim t'a yaa a soabã, a mamsa a kamba ne gʋg rũmsi. A legend-b lame n tees b kʋʋda. B toga ne sɩbgr waare, la sɩbgr bʋg la y na n sɩbg-ba, Soaala? Bɩ b pagba ra le tõog n dog ye, la b ra le tõog n yẽsem b kamb ye. Maam, Naaba-Wẽnd, n le yete: «Yaa Gilgal la b zãmba puk yã. Yaa be la m sɩng b kisgu. Dɩlla m na n dig-b lame n yiis m tẽngẽ, b wẽnnema yĩnga. M na n kʋʋga m nonglma. B taoor dãmba pʋs n yaa tõatb gilli. A Efrayim bãaga wʋm-a lame; a yẽgna kʋɩɩme, a kõn le wom biig ye. Ba b pagba sã n ket n dogdẽ, m na tees-ba, b sẽn nong wa fãa-fãa wã: bʋg-tẽng sore.» M Wẽnda ka le rat Efrayim dãmb ye, tɩ b pa kelg-b ye, la rẽ me la b na n lebg yɛɛbdba bu-zẽmba sʋka. A Israyɛl sẽn da yaa a soaba, bãng bugsuntung sẽn da sel zĩ-sõngẽ, n da womd biis wʋsgo. La a biisã sẽn tar paasgo la a maan-kuga me sõor sẽn tar paasgo; a tẽnga arzɛk sẽn tar paasgo, la a maan-kuga me sõor sẽn tar paasgo. A Israyɛl kamba yaa ninsaan-kazukma, sɩd ka be b pʋgẽ ye. B wẽnema la b na n tʋk marsã wa zɩɩbo. Soaala na n wã-la b maan-kugã. N-ye, b na n yeela marsã: ‹Ad-y tõnd sẽn ka tar dĩma yaa d sẽn ka reeg tɩ Soaala la d dĩma. D sẽn pʋs n be zĩig ning marsã wã, dĩm yõod la bʋgo, dĩm tõe bõe?› Dĩm dãmba sẽn tõe yaa goam pororor. Yaa pʋlem-vaalse, zood sẽn yõgd yaare, yaa pãn-tõogo. Zemsgo ka le ya bõn-sõng ye, a wẽnda mo-yoogo sẽn yi pʋʋg sẽn maneg n ko. Samari neba waoogda sãnem nag-bila sẽn be Bɛt-Avɛn, zirẽ-be-tẽngẽ. Samari nebã, ne a maan-kʋʋd yoodã kaasda sãnem nag-bilã. B pẽgda a ziir la yaa a baasgẽ la a rabda. Nag-bila meng na n tũu n looga Asiri. A na n lebga kũun sẽn na n dɩk n kõ dĩm kãsengã. Dẽ na n kẽesa a Efrayim yãnde, a Israyɛl na maan t'a sã n da bãngẽ, b zooda kõn tõogẽ ye. Samari wãame, a naab yaa wa rasaar sẽn dog koom zugu tɩ kooma maan ne-a wala a sẽn date. B wãa pʋʋsga zĩisi: rẽ la a Israyɛl wɩɩbdo, rẽ la a Israyɛl yel-wẽnde. Tuudu la gõos gũbga maan-kugã. Marsã la b tog n yeele: ‹Tãmse, sirg-y n bus-y-do; kunkuba sirg-y n bʋʋg-y-do.› Yella sẽn maan Gibea tɛka, a Israyɛl ka le bas yel-wẽnd ye, a ka tar n leb poorẽ ye. B bãng tɩ yaa Gibea la b beegra na n deeg a sɩbgre. M waame, maam, Naaba-Wẽnde, n na n sɩbg-ba. Buud kʋʋng neb na sũ taaba n sɩbg-a, a sẽn ka yɛɛd ne yel-wẽnda yĩngã. A Efrayim ra yaa nag-sadg sẽn yãe wubri, sẽn nong n tab ki zɛɛgẽ. M sẽn yãend a yubla sẽn nobe, m tʋlgame n sog-a wãk bɩ bũmb a to. M sedame t'a Zɩɩda na sog wãk n ko, t'a Israyɛl sog kaal-bʋkda. Ned tuuda zemsgo sẽbdo, n tigs nonglem koodo. Pesm-y zĩ-paala tɩ maam, Vɩɩm Naaba, baoob wakat taame la m na n waa ne m fãagre. Yaa wẽng la yãmb bʋd yã, yaa nin-kʋʋdb la y na tigim ka la ka. Yaa zãmb biisi la y zelemd na n lembe. Gese, Israyɛl, f ra teega f bilim-bilma zabr yĩnga, n teeg f tãb-biisa sõore. Yaa rẽ yĩnga la bʋʋr kãseng na n wulumd f tẽnsẽ, la f tãnsoben-dota fãa na n tus n lubame. B na n lebga wa Bɛt-Arbɛl dĩm a Salman sẽn wẽe-a raare, n naag kamb n kʋ ne b ma rãmba. Yaa woto la maam, Naaba-Wẽnd, na n maan ne-yã, Israyɛl kamba, y wẽnema yĩnga. Ad beooga sã n vẽeg tɩ zabra sɩnge, na n wẽneg n yɩɩ Israyɛl dĩma kʋʋbo.» Naaba-Wẽnd goma woto: «A Israyɛl sẽn wa n ya bi-bɩɩga, m sɩng n nong-a lame. Maam n yiis-a m toore, Ezipt tẽnga. Dẽ poore m mikame tɩ m sẽn tar-a boaala la a sẽn lakd ne maam n yɩɩd pĩnda. Mam buuda kʋʋda maand, a Baal ne a wẽn-taase yĩnga, la a yõogd tɩdare. Yaool n da yaa maam n zãms a Efrayim kẽna, m da rɩkd-a m nusẽ la a pa tẽeg tɩ maam n da get a yell ye. Mam da tat-a-la ne bʋgsem, ne nonglem. Wala ba sẽn maand ne a biiga, n zẽkd-a n na n mok a yɛgdga. M da sukda a rɩɩbã n kõt-a t'a rɩtẽ. A Israyɛl kõn le tag Ezipt ye; yaa Asiri n na n yɩ a dĩma. La rẽ yaa a sẽn zãgs t'a kõn le sak maama. Dẽ me yĩnga la zabr sʋʋg na n tʋm beedo a tẽnsa pʋgẽ. Lalsa na n lubame, fãa na n sarmame. A sẽn yõg zood yaarã n na n wa ne rẽnda. M buuda pa rat n bas a zãmba ye. M bool-a lame n dat n le maneg a yelle la yaa zaalem. M pa tẽed, Efrayim, tɩ f na saag n tags tɩ m tõe n bas-f lame ye. M pa tẽed tɩ m na sak n kisg foom ye, Israyɛl? M na n yɩɩ wãna n maan ne f tẽngã wala m sẽn maane ne Adma la Seboyim tẽnse? M maan boto gõeem kõn le sak-m ye, m sũur kõn le gãand ye. M pa na n bas tɩ m sũ-puurã maan a sẽn dat ye, m pa na n sãam a Efrayim ye, tɩ maam la Wẽnde, la m pa ninsaal ye; m bee fo sʋka wa nin-sõngo m pa wat n na n wilg m sũ-puur ye. Ges-y pa-weta sẽn tonge. B pʋgda b Soaala la Soaala boond-b-la ne koɛɛg sẽn vũud wa bõnyẽeg koɛɛg. Pa-weta tusda taab n watẽ, b rʋʋga mogrã n watẽ. Kẽer yita Ezipt wa yirs luin-sugri, tɩ kẽer yit Asiri wa wala. Yaa maam, Naaba-Wẽnd, n le tar-ba n wat b tẽngẽ. A Efrayim karga zirẽ-beed bal n gũbg maam. A Israyɛl karga belgre bala n gũbg maam. La a Zɩɩda yẽ ket n bee ne a Soaala, a ket n pʋgda Sõmblem Naaba-Wẽnde. A Efrayim leebda kaam ne Ezipt rãmba; a yõgda zood ne neb sẽn wẽnd sobgo. Yaa sobg sẽn tʋʋla n gãoogd yĩnga, yaa sobg a woto buud la a pʋgd beoog sẽn vẽege, n yõgd zood ne Asiri rãmba. A tara zirẽ yagbo la pãn-tõogo. Soaala tara bʋʋd ne a Zɩɩda. B na n yika zabre ne a Zakoob, a vɩɩma sẽn ka sõng yĩnga. B na n sɩbga a Zakoob wala sẽn segd ne a tʋʋma. A sẽn waa n nan ka rog menga a ra zoe n zãmbda a saam-biiga. A sẽn waa n yet t'a lebga rao n pid raoa, a zẽka a meng ne Soaala. A Zakoob maoo ne malɛk n tõog-a, malɛkã n kong n bõs-a t'a bas tɩ moora sɛ. Soaala seg-a-la Betɛl la be la Soaala gom ne-do. N yẽe! Naaba-Wẽnde, dũni fãa Soaalã, yeela a Zakoob: ‹Fo tog n lɛɛg n wa kẽe maam tɩ maam la f Wẽnde. Le yɩ ned sẽn nong a taaba, n nong zemsgo. Yaa maam la f tog n teeg, tɩ maam la f Wẽnde.› Gese, Efrayim, fo maanda wa Kanaã rãmba n zãad f nugẽ, bõn-magdi sẽn tudgd raadba, f nonga wagdem la zãmbo. Fo yetame: N-yẽe! M lebga arzɛk soaba. M nug zãadame. La bao n paas ka wẽng ye! La ade, maam, Naaba-Wẽnde, sẽn ya fo Wẽndã, al f sẽn waa n be Ezipt tẽnga, ade m na le kɩtame tɩ f vɩɩnd zãnd tẽngre, wala tõnd segba daare. Wakat kãnga m da gomda ne bãngdbã, b ra paamda likr buud toor-toore. Pʋs n yaa ne bãngdba la m ket n wilgd dũnna m sẽn na n tʋm bũmb ninga. Galaad rãmba yɩɩ bi-bees menga. Bũmb me ka kell b nengẽ ye. Gilgal do-sõngẽ wã yaa lols ka tɛk maand la b ra kʋʋda. Ne rẽ fãa ad b maan-kugã sẽn lebg kug saong rũnna, b pʋtẽ. A Zakoob ra zoe n diga Aram pʋ-weesẽ; pag yĩnga, a Israyɛl kẽesa a meng tʋʋmd toogo, pag yĩnga a gũu rũmsi. Tũu ne bãngda tɩ Soaala wa yiis a Israyɛl Ezipt tẽnga. Yaa bãngda la b yãk yã t'a na n yɩ b buuda gũuda. A Efrayim maana sõm-zɩtem ne Soaala, dẽ me la b na n tʋk b zugu b zẽk-m-menga taale. A Efrayim sã n da gomda, ned fãa da rigda rabeem. A ra lʋɩ-la a Israyɛl buuda sagsa taoore. La yel-kãseng la a rogl a zugu, tɩ yẽ n yik n waoog a Baal. Rẽ me n wa ne a kũum. La marsã a yagensã ket n be-la a tudgra pʋgẽ. Efrayim neba rõogda wẽn-naandse. B wanzurf la b rɩkd n yẽnege n kõ-a b sẽn dat bũmb ning fãa wẽnego. Yaa tʋʋmd-mit bal tʋʋmde la ne rẽ fãa b yetame: ‹D na n kʋʋ maand n kõ-a.› Yãmb sẽn getã, ninsaal na waoog nag-bi? Dẽ ka yelle? Yaa rẽ la b na n menem wa yibeoog sawadgo, wala meenem sẽ mesgd pĩnda, wala mo-paoko saag sobg sẽn zẽk n zãag ne zɛɛga, wala bug-zõos sẽn tũud peem-lɛɛg n yita. Bãnge, Israyɛl tɩ Ezipt yiib tɛka, maam la f Soaala-Wẽnde. F ka mi Wẽnd a to wa maam ye la pʋs n ka be me ye. Fãagd a to ka ye, sã n ka maam. Mam bãnga foo zĩ-pɛɛlẽ, ko-yũud tẽngẽ. M yɩ-la f pe-kɩɩma, m kõ-f lame tɩ f rɩ la f yũ n tɩge la f zẽka f zug ne maam, f yĩma m yelle, ko-yũud tẽngẽ. Dẽ me la m lebg wa bõnyẽega yãmb yĩnga, m lebga wa ãbga sẽn wũg sor noorẽ. M na n yɩɩ toaag ne yãmba wa gɩgem-padre sẽn ne tɩ b yõkd a biiga la m na n basa m barsa tɩ b tʋm b tʋʋmde. Baas na wa n wãb yã, we-rũmsa na bees yã. Israyɛl, m sãam-f-la zãnga; ãnda n na n le wa sõng-fo? Fo rĩma bʋl n bee yɛ, ka yẽ n da tog n wa fãag-f laa? Fo kãsem-dãmb bɛɛ, n na n sõng fo? Ka bãmb n tog n ges f yell laa? Yaa foo n da kose, Israyɛl, tɩ m kõ-f dĩma, la kãsem-dãmba. M sũur puugame tɩ m kõ-f dĩm dãmba, m sũur puugame tɩ m le reegd-ba. A Efrayim beegra fãa sõd n dɩgame. M tara a beegra kaseto la kaseta ka tõe n menem ye. A na n wʋma toogo wa pag sẽn kũmd dogem. A biiga na n yɩɩ bi-yalma. A rogma daar tatame t'a tõdg waoongo. Tog n yɩɩ pakr ne maam tɩ m fãag-b kũum soolmẽ, Kũum, f basa f zab-teeda yɛɛlẽ? Nimbãan-zoeer kõn zĩnd ye. A Efrayim be-la mo-pukẽ wã n paasd a paoongo. La sob-tʋʋlgo n yit zĩ-peen-daagẽ n watẽ. Yaa Soaala n tʋm-a. Koom kõn le bul ye. Arzɛk fãa, sẽn be yõod fãa na n loogame. Samari rãmb zẽka b zugu ne b Wẽnde, woto wã b tog n deega b beegra sɩbgre. B na n paa zabrẽ, b na n kʋ-la b kamba, b na n dadga pag fãa sẽn tʋte.» Lebg n wa, Israyɛl, lebg n wa f Soaala-Wẽnnaam nengẽ, tɩ f sã n lʋɩ, yaa fo yelle. Lebg-y n wa-y Israyɛl kamba, y Soaala nengẽ la yeel-y-b woto: «Yãmb bal n mi sugr kũuni. Reeg-y neere d sẽn pẽgd-y ne pẽgr ningã. A Asʋr ka tõe n fãag tõnd ye; d pa na n le zomb wiid n kẽng zabr ye. D wẽn-naandsa yaa d nug tʋʋmde la d pa na n le bool tɩ tõnd Wẽnnaam ye. Yãmb bala n mi kɩɩb kollgo.» Soaala gomda woto: «M na n sãooga a Israyɛl t'a ra le zãmb-m ye, m na n nong-a lame tɩ ka tũ ne toog ye. M zabr sɛɛme. M na yɩɩ wala meenem sẽn maagd yĩnga la Israyɛl na n ninga puudu wala lɩɩnga, a na n suda a yẽgna wa Libã tɩɩse. A na n bɩɩ ne keelem, n ya neer wala oliviye n yelgd a yũugu wa Libã googo. M neba na n lebg n wa zĩnda m maasmẽ. B na n ko-la b alkam. B bugsuntund na n woma biisi, b rãama noog na n zenga Libã rẽnna. Bõe n le be a Efrayim ne wẽn-naandsa sʋka? Mam deegda a kosgo la m geta a yelle. Mam yaa tɩɩg ninga sẽn sob n yɛs wakat fãa wã. Maam n kɩt tɩ f kooda womd biisi.» Ned sã n tar yam, a na wʋm a Oze goama. Ned sã n tar yam zulunga, a na wʋm b võore. Soaala-Wẽnd soya yaa tɩrse. Nin-tɩrsa tũud-b lame, nin-wẽnsa bal n kẽnd n lagsd n lʋɩtẽ. Naaba-Wẽnd taasa goam kãensã a Petuwɛl biig a Zowɛl. Nin-kẽemsã yoog-y y tʋba, Zɩɩda tẽnga rãmb fãa, kelg-y neere. Togs-y tɩ d bãng yaa yãmb zamaanẽ bɩ y saam-dãmb zamaanẽ la yell a woto zĩnd yã. Y sẽn ne bũmb ning rũnda wã, wilg-y koɛɛgã y kamba tɩ bãmb me reeg-a n taas b kamba, tɩ y yagensa reeg n taas y yagen-tʋbra-kẽese. Menemeeda sẽn dɩ n keese, sʋʋr n loogd ne. Sʋʋra sẽn keese, mogdr-zẽenga loog ne. Mogdr-zẽenga sẽn keese, sʋ-warengo. Sʋ-warenga sẽn keese, pãng-n-vũudri. Aya, rã-tɩgdba, gõeem ka ye, yik-y n yãbe. Yãmb fãa sẽn yũud rãam, tɩ noom-y, kelem-y wɛ, tɩ bugsuntund ka wom biis ye la rã-paalg kõn paam n yũ ye. Tãb-biis ka tɛk wa sʋʋre n waa n kẽ d tẽngã. B tʋʋla ne sãoongo, b ka tõe n sõd ye. B yɛga keglem, bõnyẽeg rẽnna. B yẽna sɩlem, bõnyẽ-yãang rẽnna. B sãamda d bugsuntundu, n vigsd d kankamse. B lagsda b pagdo n basd wil-pɛɛla. Kelem-y kʋʋre, wala pag sẽn yãbd a sɩda a sẽn kul paalem. Alkama la rãama ka le wat n kõt wẽnd doogẽ ye. Maan-kʋʋdba fãa zĩi ne sũ-sãanga tɩ Soaala ka le paamd waoogr ye. Pʋta ka le be bũmb ye, tẽnga meng tara fare. Kaaf ka le ket ye. Rãam sɛɛme, tɩ b pa gomd kaam ye. Koaadba ka le mi b sẽn beẽ ye. Bugsuntung koaadba basda raoodo. Alkam pɛɛlga, alkam pugsgu, kooda fãa gill sãamame. Bugsuntund kʋɩɩme, kankams wãkame, tɩɩg ning sẽn womda biis wa poaloangã, koanga, subdga la pʋta tɩɩg ba a ye ka ning biig ye; fãa zãgsa tobre. Sũ-noog buud ka le be ninsaal sũurẽ ye. Yeelg-y sũ-pa-noang futu la kelem-y yã, maan-kʋʋdba, maan-kugra sõgen-kamba. Yãmba, Soaala-Wẽnd sõgen-kamba, gãand-y wẽnd doogẽ n wiisi, n wilg y sũ-sãanga. Alkama la rãama ka le wat n kõt wẽnd doogẽ ye. Aya, moon-y no-loeer daare, moon-y tig-raaga, tigs-y nin-kẽemsã la buuda fãa tõnd Soaala-Wẽnda roogẽ tɩ y yõk sẽega. Way! Da-beed n wate, Soaala-Wẽnd sũ-puura raar n wate. Yaa sãoong raare la Soaala-Wẽnd pãng soaba yals yã. Ade, tõnd nif ka le yãet rɩɩb ye. Tõnd ka le yãet kɩdeng la sũ-noog tõnd wẽnd doogẽ ye. Kood paa b sẽbdẽ, b pa tõog n tus tãndagã n yi ye, fãa paa bogdẽ. Alkam ka yãe n tigs ye. Bao yaa vɩɩdo, zãna lʋɩɩme. Kelg-y rũmsa yãbre! Rũmsa saad n zoeta yaare n baood yamdo n kongdẽ. Piisa meng tara yaoolgo. Soaala-Wẽnde, m teesa yãmb n boonẽ. Bugum n dɩt pʋ-weesã. Bug-walma rɩɩ pʋta tɩɩs gilli. Al ba we-rũmsa mens wẽnemda b nens n teesd yãmba tɩ kʋɩlsa fãa kʋɩɩme. Bugma me ka kees yamd ye. Peeb-y tõntõodo Siõ tẽngẽ, wẽ-y kũnga tãn-sõngã zugu! Bɩ tẽnga neb sɩng rigbu tɩ Wẽnd daarã taame la bala, ka le zãr ye. Yaa zĩ-boog raare, sawad-sabl daare, wulgu raare. La ade, tãb-biis n wate, ka tɛk wa sʋʋre, toos wa bõn-nindi, n maand lik wa yʋng sẽn lʋɩt tãms zutu. B zɩ n yãend a taare la b kõn le yãend ye. Tãb-biisa wẽnda bugum sẽn widgi. Yaa bugum sẽn ka be sugri n ka basd bũmb a poorẽ ye. Bũmb ka tõe n põs-a ye. Bugma sẽn waa n nan ka widgi, tẽnga ra wẽnda Eden zẽedo, la a widgr poore, lebga zĩ-peen-daaga sẽn kẽesd rabeem. Tãb-biisa wẽnda wed-dʋʋdb sẽn zao wiid sẽn tar tĩiga. Yaa waa b yɩkda tãnga n tɩ tiimd tãng a to zugu. B bʋʋrã wẽnda bilim-bilm sẽn digd zabre, bɩ bugum sẽn zom moogo t'a pusdẽ. Yaa tãb-biis sẽn tar pãnga n tong b zabr tongre n watẽ. B sẽn poog zĩig ning fãa, yaa yɛɛsgo, neng sobdame. B zoeta wa gãndaado sẽn takd zabre; wa zab-mitba, b zoet n dʋʋda lalse. Ned kam fãa teesa a taoore, n ka bʋdgd goabg bɩ rɩtg ye. Ned ka tusd a to ye, ned kam fãa tũuda a sore. Pɛɛma fɩɩnda b sʋka n looda la tãb-biisa ka sẽegd taab ye. B zoet n kẽeda tẽngã n lolemd lalsã, n gãensd roto, n tũud rota vẽ n kẽed wa wagda. Tãb-biisa sẽn tong n watẽ wã la tẽnga sẽn dĩmi, tɩ saaga maan wa a na n lʋɩɩ tẽnga, tɩ wĩndg la kiuug na n kiis b bugum. Soaala-Wẽnd lʋɩ-la b tãb-biisã taoore tɩ b koɛɛg sãta! Tãb-biisa sẽn zabd bãmb zabra me yaa ka tɛka la b tara pãnga. Soaala-Wẽnd daar yaa daar sẽn yɛɛsde, la sẽn na n paam-ba n põsã ka ye. Maam, Naaba-Wẽnd, n gomd woto: «Y ket n tõe n lɛɛg n wa kẽe maam. Lɛɛg-y n wa-y yã ne y sũur fãa. Loe-y y noore, yãb-y la yõk-y m sɛɛga. Ka sek tɩ y kẽes y fut ye, yaa y sũurã n tog n tedge.» Lɛɛg-y n wa y Soaala, y Wẽnnaama, nengẽ, tɩ b tara nonglem la nimbãan-zoeere, b sũura ka yãgd fudgr ye. B ka tõt b lebs b zelemde, n bas n ka sɩbg ye. Tõe tɩ b bʋk b sũuri, n bas taale n sudg b kũun sõma. Dẽ marsã la y na n tõog n le wa kõ-b alkam la rãam. Peeb-y tõntõogo, Siõ tẽnga! Moon-y no-loeer daare, moon-y tig-raaga. Tigs-y zãma wã, bool-y tẽnga neba, tigs-y nin-kẽemsã, tigs-y kom-bɩɩba la kom-bõonega menga. Bɩ kãad paalsa yi b roogẽ. Bɩ maan-kʋʋdba, Wẽnd sõgen-kamba, wa ning nintãm wẽnd doogẽ, zãongã la maan-kugra sʋka. Bɩ b yeele: «Soaala-Wẽnde, zoe-y tõnd sẽn ya yãmb buuda neba nimbãanega. Ra bas-y y pʋɩɩrã ne yãnd ye, da bas-y tɩ bu-zẽmba wa laad tõnd n yetẽ: ‹Bãmba Wẽnda zĩi n maanda bõe?› » Soaala-Wẽnd nonga b tẽnga ne nonglem kãsenga la b zoeta b buuda nimbãanega. Wẽnd deegda b buuda kosgo n yetẽ: «Ade, m le kõt-y-la koodo, alkam, rãam la kaam. Y na n paamame tɩ sek yã. La y kõn le paam yãnd bu-zẽmba sʋk ye. Bɛ ninga sẽn yi-a nug goab n wa wã, m na rig-a. M na rig-a n zãage, m na tees-a zĩ-peen-daaga, m na tus a taoorẽ tãb-biisã n lub Yamsem Mogrẽ, n tus poorẽ dãmbã n lub Tẽnsʋk Mogrẽ. B na n põogame n bas yũug ned ba a ye sẽn ka rat t'a wẽ-a, la sẽn na n wulumd zĩig zãnga. Woto la m na n menes sẽn nams-b yãmb tɩ loogã. Bɩ tẽng ra le zoe rabeem ye, a kɩdem n lang ne sũ-noogo, tɩ Wẽnd tʋma tʋʋm kãsense. Da le zoe-y rabeem ye, rũmsi! Pʋ-weesa le tobda yamdo, tɩɩs le womda biisi, kankam la bugsuntund le zõnega ne biisi. Siõ kamba, kɩdem-y yã, lang-y Soaala y Wẽnnaama yĩnga! Tɩ y paama sẽoog saaga; b kõt-a-la yãmb t'a niid n zemsd wa pĩnda, b kɩtame tɩ koom le zoe, sapaolgo la sẽoogo, wa kʋdem wẽnnẽ. Lʋrsa na n le pida ne koodo, tɩ y rʋgda la y sĩmsa na n le pid n daal ne rãam la kaam.» N-ye! Maam, Naaba-Wẽnd, n yete: «M na n lebs-y-la menemeedã, sʋy wã la kalwaarã sẽn dɩ yʋʋmda pʋgẽ. Ad-y bãmb la tãb-biis niyns mam sẽn tʋm-b tɩ b wa zab ne yãmbã. Yãmb na n dɩɩme n tɩge, la y na waooga maam y Wẽnde, y Wẽnd ninga sẽn tʋma tʋʋm-bãna y yĩnga. La m buuda kõn le paam yãnd abada! Dẽ la y na n bãnge, Israyɛl kamba, tɩ m be-la y sʋka, tɩ maam la Soaala, yãmb Wẽnde la a to ka be ye. M neba kõn le paam yãnd abada!» Soaala paasa woto: «Dẽ poore ninsaal buud fãa na n paama m Vʋʋsma. Yãmb kom-dibli la y kom-pugli na n goma bãngr goama. Yãmb nin-kẽems na n paama zãmsdo tɩ y kom-bɩɩba paam likri. Baraare, f yaa yamba, paga, raoa, mam Vʋʋsma na n siga y fãa zutu. M na n waa ne yɛl sẽn yɩkd pɛlenga, yĩngr bɩ tẽng zug yɛla. Y na n yãenda zɩɩm, bugum, bug-zõos la sawato. Wĩntoog na n sobame, tɩ kiuuga moog wa zɩɩm, tɩ Soaala-Wẽnd daara nan ka ta ye. B daara na n yɩɩ daar sẽn wat ne rabeem kãsenga. Sẽn pʋʋs-b Wẽnd fãa na n paama fãagre. Zerizalɛɛm pʋga, Siõ tãnga zugu, kẽer na n paam n põsa yel-beedã, wala Soaala sẽn kãabe. Yaa b sẽn dat b rãmb ne vɩɩma la bãmba.» A Amos koeese. A Amos yaa Tekoa dao a ye sẽn da gʋʋnd rũmsi. Yaa vẽnegre la a paam a Israyɛl poorẽ, Zɩɩda dĩm a Oziyas wẽnnẽ. Sã n ya Israyɛl tẽn-peelmẽ yɩɩ dĩm a Zowas biiga, a Zeroboam wakatẽ, tẽnga miuung ket tɩ yʋʋm a yi. A Amos ra yetame: «Naaba-Wẽnd rãamd n yit Siõ, Naaba-Wẽnd koɛɛg n sãt Zerizalɛɛm. Rũmsa wãbneg zĩisẽ yaa sũ-sãanga, Karmɛl tãnga zugu yaa ware.» Ad Soaala-Wẽnd sẽn yete: «Damas tʋʋm beeda labsa la a ye n yɩɩd ne wẽnem: Damas rãmb rɩka b sẽn tar bũmb ning n leebdẽ la b bʋkd b pʋta kaalem, bũmb sẽn kud ne kutu, n leeb la b tab Galaad tẽng rãmba. Woto m kõn lebs m zelemd ye la m na sɩbg-b wa m sẽn da yeele. M na n tugla bugum dĩma Azayɛl zakẽ la a na n dɩ-la a Ben-Adad na-yirã. M na n kaoo Damas kʋɩlensã bãn-sogdse. Bikeyat-Avɛn, m na n sika tẽnga, dĩm ning sẽn zao-a rẽgda naama goeel zugu, la Bɛt-Eden, sũ-noog tẽngẽ, m na n sika sẽn zãad-a naama dasaarã. M na n wʋka Aram neba n kẽng yembdo al Kir tẽnga.» Soaala-Wẽnd n gomd woto. Ad Soaala-Wẽnd sẽn yete: «Gaza tʋʋm-beeda labsa la a ye n yɩɩd ne wẽnem: Gaza rãmb talla tẽns wʋsg neba n kẽng pa-weer Edom. M kõn lebs m zelemd ye, b na n deega b sɩbgre. M na n sika bugum Gaza la bugma na n dɩ-la a ro-neebã. M na n menesa Asdod dãmba, n menes Askalõ dĩma. M ka na n vʋʋs ne Ekrõ rãmba, m kõn kees nin-vɩɩg Filisti rãmba tẽngẽ ye.» Soaala n le gomd boto. Ad Soaala-Wẽnd sẽn yete: «Tir tʋʋm beeda labsa la a ye n yɩɩd a taab ne wẽnem: Tir dãmba kãsga zooda wĩir sẽn da loe bãmb ne b saam-biig a Israyɛl la b wʋka tẽns wʋsg neba n kẽng pa-weer Edom. M kõn lebs m zelemd ye, m na n sɩbg-b lame wa m sẽn da yalse. M na sik bugum Tir la bugma na n dɩ-la a ro-neebã.» Ad Soaala-Wẽnd sẽn yete. «Edom tʋʋm beeda labsa la a ye n yɩɩd ne wẽnem: Edom dãmb wõoga b sʋʋse n pʋg b saam-biig a Israyɛl, n kʋɩɩs b sũuri n dɩt beem ne-a, n baood a sãoong bala, beoog sẽn vẽege. M kõn lebs m zelemd ye; m na n sika bugum Tema la bugma na n dɩɩ Bosra ro-neebã.» Ad Soaala-Wẽnd sẽn yete: «Amon kamb tʋʋm beeda labsa la a ye n yɩɩd a taab ne wẽnem. B radga tʋtr-pʋse Galaad tẽnga sẽn na n yɩlẽ n paam n yalg b soolem. Woto wã m kõn lebs m zelemd ye. M na n yõoga Raba, b na-tẽngã, la bugma na n dɩ-la a ro-neebã. Na n yɩɩ zabr daare, tɩ zab-zabdba kaasd b kaasgo, tɩ saag sob-raoog fugda. B dĩma ne a dĩm-biisa na n wʋk n looga pa-weere.» Soaala-Wẽnd n gomd boto. Ad Soaala-Wẽnd sẽn yete: «Moab tʋʋm beeda labsa la a ye n yɩɩd ne wẽnem: Moab rãmb yõoga Edom dĩma kõab bugum n maan goore. Woto wã m kõn lebs m zelemd ye. M na n sika bugum Moab zugu t'a rɩ Keriyot ro-neebã. A Moab na n paame; na n yɩɩ zabr daare, tɩ zab-zabdba kaasdẽ, tɩ barda peebdẽ. M na n menesa b rĩma, m na n naaga na-komsã n kʋ.» Yaa Soaala-Wẽnd n gomd boto. Ad Soaala-Wẽnd sẽn yete: «Zɩɩda tʋʋm beeda labsa la a ye n yɩɩd ne wẽnem: Zɩɩda rãmb pa reeg m zãmsg ye, b pa reeg m noya ye, b basame tɩ wẽn-naandsa kẽes-b moogo, wala b yaab rãmba. Woto wã m kõn lebs m zelemd ye, m na n sika bugum a Zɩɩda zugu t'a rɩ Zerizalɛɛm ro-neebã.» Ad Soaala-Wẽnd sẽn yete: «Israyɛl tʋʋm beeda labsa. La m sẽn yet tɩ m na n sɩbg-a lame wã, m na sɩbg-a. Ad a tʋʋm beed niyns sẽn yɩɩd ne wẽnema: Israyɛl kamb koosda nin-tɩrse n baood ligdi; b koosda a ka-neng rãmba n na n yao b neooda sẽn da, tɩ ligd paooge. B nong n paooga naong rãmba. Bʋʋd zĩigẽ a kõn paam bʋʋm ye. Biig ne a ba dooda bi-pugla a ye tɩ m yʋʋr tũud rẽ n sãamnẽ. B sẽn gãe wẽnd dotẽ ne fut niynsã, yaa naong rãmba sẽn kɩs-b bobelle. B wẽn-naandsa roogẽ, b sẽn yũud rãam ningã, yaa b sẽn yõg n deese. La mam n yaool n da sõng yãmba n wã Amoritsã n kõ yãmba. Da yaa nin-daado, wogd wa gʋmse, kegemse wa pusga. M sãam-b-la zãnga. Maam n deng n yiis-y Ezipt tẽnga, n kogl-y yʋʋm pis-naas we-raoogẽ n tãag y sẽn waa n tõog Amoritsã. Dẽ sẽn looge, maam n tũus bãngdba y kamba sʋka la m boola yãmb kamb kẽere tɩ b pʋlem la b welg toor mam yĩnga. Ka yɩ boto sɩda, Israyɛl kamba? Maam, Naaba-Wẽnd, n sokde. Bõe marsã tɩ yãmb yũnugd rã-toose mam sẽn welg b rãmb toore n kõ m mengã, bõe tɩ y gɩdgd bãngdba tɩ b ra taas-y m koeese. Y sɩbgra la woto: m na beds-y-la tẽngã wala bilim-bilm gʋl sẽn bedsd moodo. Sẽn tar-b tĩig kõn tõog n zoe n paam soondg zĩig ye. Sẽn tar-b pãng kõn tõog n wilg b pãng ye. Gãndaoog kõn tõog n fãag a meng ye. Tãp soab kõn yals ye. Sẽn tõe-a zoees kõn põs ye. Wed-dʋʋd kõn fãag a yõor ye. Baraare, tãb-biisa gãndaoog na lob a zab-teedo n bas n wudgi.» Naaba-Wẽnd n yet rẽnna. Israyɛl kamba, buud ning Soaala-Wẽnd sẽn yiis Ezipt tẽnga, kelg-y gomd ning b sẽn togsd y poorẽ: «Buuda toor-toor sẽn be tẽnga zugã, yaa yãmb buuda la m yama kẽ yã. Yaa rẽnda me yĩng la m na n sok sẽn tũ ne bũmb ninga tɩ y wa beegd-m woto fãa.» Neb a yiib na naag taab n dɩk sore tɩ b ka reng n wʋm taab moore? Gɩgemd na ning rãamd weoogẽ t'a ka yãe a sẽn na n yõke? Gɩgemd pol na yiis a koɛɛg a gãagẽ t'a ka yõk bũmbu? Luiil na yõk a meng bẽdgẽ tɩ b ka bẽd-a ne bũmbu? Tãoog na fisg n ka yõk bũmbu? Tõntõog na peeb tẽng pʋgẽ tɩ neb pɛleng ka yɩkẽ? Yel-beed na maan tẽng pʋgẽ tɩ Soaala-Wẽnd zɩ tiiri? Sɩd sɩda, Soaala-Wẽnd ka maand bũmbu, tɩ b ka reng n wilg b raabã b bãngdbã sẽn ya b sõgen-kamba ye. Gɩgemd kelem yã, ãnna n ka na n digi? Soaala-Wẽnd gomyã, ãnna n ka na n deeg n togse? Togame tɩ Asdod na-zaka rota zugu, togame tɩ Ezipt na-zaka rota zugu bɩ b moon woto: «Tigs-y taab Samari tãms zutu la y ges bũmb ning fãa sẽn ka zemsa sẽn be tẽnga pʋga, n ges pãn-tõoga sẽn maand tẽnga pʋga.» Naaba-Wẽnd yetame: «Samari tẽng rãmb ka mi tʋʋmd sõng sẽn yaa a soab ye. B samda b zakẽ, b pãn-tõoga la b zɛɛba sẽn kõt-b bũmb ninga.» Yaa rẽ me yĩnga la Soaala-Wẽnd yeta: «Bɛ n na n wa kẽ tẽngã, a na n luba a lalsa sẽn me tagd-tagdã la a na n zɛɛ dĩma roogo.» Ad Soaala-Wẽnd sẽn yete: «Wala rũm-kɩɩma sẽn paame n fãag gɩgemd noorẽ, a rũng kars a yi bɩ tʋbre, wotome sẽn na kees Israyɛl kamba sẽn kẽed Samari wã wat n yɩ-la b goeel bɩ b gãag bʋgsg karga.» Kelg-y yã, la y wilg a Zakoob zakẽ dãmba, Soaala-Wẽnde, Pãng rãmba fãa Wẽnd, sẽn yeele. M sẽn waa n na n sɩbg Israyɛl a tʋʋm wẽna yĩnga, m na menesa Betɛl maan-kugã. B wẽn-naandsa maan-kuga na kaoo n lʋɩ tẽnga. Y rota buud toor-toorã, m na n wã-b lame, n wã zags niyns sẽn maneg ne fan-teedo wa wob yẽna, n wãa ro yalemsã. Yaa woto la Soaala gomda. Yãmba Samari pagba, sẽn nob wa Bazã nag-yãansã, kelg-y koɛɛg ning maam, Naaba-Wẽnd sẽn tar n na n taas yã. Yãmb sẽn fãad koms rãmba la y namsd naong rãmbã, la y yet y sɩdb rãmba: «Tall-y n wa-y tɩ d yũ,» ad-y Soaala n wẽend woto ne b sõmblema: «Sɩda, dasem n wate, b na n vuu yãmb a yeyn-ye, sẽn yɩ pipi soaba n wat yaoolem soaba, b na n vuu yãmb wa lɛoog sẽn yõk zĩifu. Y na fʋra lal-gũbra vẽya n yi tɩ ned kam fãa tees a taoore n tɩ pa nug goabg sẽnẽ.» Soaala-Wẽnd n gomd boto. Israyɛl kamba, modg-y ne Betɛl wẽnd dooga kõom n paam n zãag ne maam n paase. Ka rẽ bɩ y kẽnd Gilgal la y ket n zẽkd y zug ne maam. Y sẽn ta n vẽeg beoog bala bɩ y wa ne y maando, la ra-yɩten-daare bɩ y wa ne zom, rãam la kaam. Yõog-y bur sẽn ka wẽ ne rabɩlle maan-kugra zugu, y bark pʋʋsg maanda yĩnga. Moonega sẽn noom yãmbã, moon-y tɩ b bãnge, tɩ yaa y yamleoog kũuni la y tar n watẽ. Soaala n kot-y rẽnna. Ad-y y tẽnsa fãa pʋgẽ yaa maam n da zoe n wa ne kom. Bura ra paoogd-y-la y tẽnsa fãa pʋsẽ la y ka lebg n wa kẽ maam ye. Maam, Naaba-Wẽnd n yet rẽnna. M da zoe n mong-y-la sa-koom, ka-keer ket kɩɩs a tã; m kɩtame tɩ saag ni tẽn-kãnga la a bas tẽn-kãnga; tɩ pʋ-kãnga paam saaga, tɩ pʋ-kãnga kʋɩ, saag kaalem yĩnga. Tẽns a yi, tẽns a tã da latmame n ta tẽng a to n na paam koom yũ n lɛɛg n wa ne ko-yũudu la y ka lebg n wa kẽ maam ye. Maam, Naaba-Wẽnd n yet rẽnna. M tʋma y yĩnga wãango la gãnem, m kʋɩɩsa y bãto la y pʋto. M kẽesa zũnzũur y kankamse la y oliviye biisi, la y ka lebg n wa kẽ maam ye. Maam, Naaba-Wẽnd n yet rẽnna. Ezipt bã-longdem la m wẽnemd n tees yãmba, m basame tɩ sʋʋg loog ne y kom-bɩɩba tɩ y wiidi wã yõgb lebg naana, m basame tɩ y tãb-sika yũug kẽ yã, la y ka lebg n wa kẽ maam ye. Maam, Naaba-Wẽnd n yet rẽnna. M zũndga y yɛla y tẽnsẽ wa m sẽn zũndg pĩnda Sodom la Gomor. Y põsa wa ra-giig sẽn foog bugmẽ la yãmb ka lebg n wa kẽ maam ye. Maam, Naaba-Wẽnd, n yet rẽnna. Yaa rẽnda yĩnga, Israyɛl, la f na n yãend mam sẽn na n maan ne foo. Mam sẽn na n maan-f bũmb ningã, Israyɛl, segl f menga tɩ yaa maam f Wẽnnaama taoor la f na n yalse. Tẽeg tɩ yaa maam n naan tãmse la sobgo, maam n wilgd sẽn be ninsaal sũurẽ, maam n pukd sõore la m wat ne yʋngo. Mam sora tuka al yĩngr-yĩngri. Mam yʋʋr la Wẽnde, Naaba-Wẽnd Pãng soaba. Israyɛl, kelg gomdã m sẽn na n togse, yaa kʋʋr yɩɩlle la m pʋta, yɩɩll la m pʋt f yĩnga, Israyɛl! A Israyɛl lʋɩɩme, a kõn le yik ye, a Israyɛl gãee tẽnga la a meng tẽngẽ a kõn paam tɩ ned wa yik-a ye. Soaala koɛɛg la woto: «Tẽng ninga sẽn tõe n kẽes tãpo tãb-biis tusri tãb-biis koabg bal n na n kelle. Tẽng ninga sẽn tõe n kẽes tãpo tãb-biis koabga, tãb-biis piig bal n na n kelle a Israyɛl doogẽ.» Woto la Wẽnd gomd ne a Israyɛl: «Bao-y maam tɩ y na vɩɩnde. Sok-y-ma tɩ m leok yã. Ka Betɛl wẽnd doogẽ wã la y na n wa sok-m bũmb ye. Da kẽng-y Gilgal ye. Da tɩ gilg-y Beerseba rooga ye. M leokda Gilgal poorẽ t'a na n looga pa-weere. M leokda Betɛl poorẽ t'a na n lebga wẽnem tẽnga.» Zozɛf roogo, bao-y Soaala-Wẽnde, bao-y-ba tɩ y na vɩɩnde. Sã n ka boto b bugma na n yõog-y lame. Betɛl na n yõka bugum la ned kõn waa n kiis-a ye. Bʋʋda sẽn kaood marsã wã ka le tat ned ba a ye yam ye. Sẽn tar-b bʋʋma la b fabgd tẽnga. Yaa Soaala-Wẽnd n naan toadga, n maan susi, n maan yĩngr tãb-biiga. Bãmb n tedgd lika tɩ lebg vẽenem yibeoogo, bãmb n sobd daara tɩ yʋng watẽ. Bãmb n takd mogra koom n yɛdgd-a tẽng zugu. Ad-y bãmb yʋʋre la Soaala-Wẽnde. Naaba-Wẽnd saaga yãgdame n lubd nin-daoogo, b saaga sʋʋg wata ne tãnsoben-dooga wãabo. Bʋʋd zĩigẽ y sũura fõta ne sẽn baooda zemsgo. Y sẽn kis wa fãa-fãa yaa kaset soab sẽn togsd sɩda. Ade, yãmb sẽn namsd pãng-kaoolg soaba la y fãad a koodã, ade, zãmb rãmba, y sẽn pees kug n me rot niynsã, y kõn kẽ b pʋsẽ ye. Bugsuntundã y sẽn selã, y kõn yũ b rãam ye. Maam, Naaba-Wẽnde, n yete, ad-y m mi-la y tʋʋma fãa, m mii b wẽnema zãnga. Yãmb bɛ la ned ninga sẽn ka tʋk yell a zugu n ya nin-tɩrga. Yãmb deegda ligdi n kedbd bʋʋdo. Yãmb pa sakd tɩ b kõ naong soab bʋʋm ye. Zamaana lebga yel-beed zamaana. Marsã ned kam fãa mumda a noore. Bao-y sẽn be neere la y kisg wẽnga n tõog n vɩɩnde tɩ Naaba-Wẽnde, dũni fãa Wẽndã, zĩnd ne yã wa y sẽn yetã. Kisg-y wẽnga, nong-y neere, maan-y zemsg tʋʋma tɩ daar ninga Soaala-Wẽnd, Pãng rãmb Wẽnd, na zoe a Zozɛf bu-kellã nimbãanega. Soaala-Wẽnd, Pãng rãmb Wẽndã yeta woto: «Zĩis fãa na yɩ kɛleng woo kɛlenga! Wii, wii! Soya fãa zut b na n yeelame: ‹M ba woo! M ma woo!› B na n dooga koaada, n bool kʋ-yãbdba tɩ b wa yãb b yãbrã. Pʋtẽ wã, bugsuntundẽ wã na n yɩɩ kũnkũm, m sã n wa tũud bãmb sʋk n loogdẽ. Maam, Naaba-Wẽnde, n yete.» M yãbd neb niyns sẽn gũud Soaala raarã. Yaa bõe la raara na n wa kõ yã? Na yɩ sũ-noog sẽn ka naag ne sãmbs bɩ? Ayo, raara na n yɩɩ lik raare. Na n yɩɩ wa ned sẽn zoet gɩgemde n tɩ ling gɩgem-padre. Ned sẽn kẽed a zakẽ n tik a roog lalga tɩ waaf kɛ-a. Wẽnd daarã kõn yɩ lika, a na yɩ vẽenem sɩda? A na n yɩɩ lik tam, vẽenem kõn tol n zĩnd baraar ye. Mam kisa y tẽnsa gilgri, m pa rat n le yãend-y ye. Yaa Soaala n gomd boto. Y sẽn tigimd taab m waoogr yĩnga ka le tat m yam ye. Y sẽn wat n kõt maam y yũ-nood maandã, y kooda kũuna, ad-y m ka le rat-b ye; y rũm-kaama, y nag-bi nobdsã, lagem taab rɩɩbã, mam ka get-b ye. Serg-y ne y yɩɩlã, m da le wʋm y bɛɛla wẽeb ye. Sõng-y tɩ ned kam fãa paam a sẽn tog n paam tɩ zemsg na tãoos wa ko-bunem. Israyɛl, m sok n gese, yʋʋm pis-naas y sẽn zĩnd zĩ-pɛɛlẽ wã, yãmb kʋʋ maand n kõ maam bɩ? Y ra ka pʋgd wala y sẽn pʋgd dũnna a Sakut la a Kewã ye. Wẽn-bãmb yaa yãmb n yaool n dõoge. Bãng-y tɩ y na tʋk-ba n looge, m sã n wa dig-y n tees Damas tɩ y tɩ y tɩ pa yembd be. Soaala-Wẽnde, dũni fãa Soaala n yet boto. M yãbd yã, yãmb fãa sẽn teeg-b Siõ taoor dãmbã n gãe n ka bʋʋdẽ. M yãbd yã, yãmb fãa sẽn teeg Samari tãngã. M yãbd-y lame dũni wã na-tẽng a Israyɛl kẽedba, sẽn ya-b taoor dãmbã tɩ neba fãa bʋʋgd-y n gomda: «Ta-y Kalne n tɩ gese, y yi be bɩ y ta Amat, tẽn-kãsengã; y sã n yi be bɩ y sig Gat sẽn be Filisti rãmb tẽngẽ. Kẽng-y n ti ges tẽns sẽn pid tẽnse!» Ay! Y kẽng yã y na mik tɩ tẽn-bãmb pa são Siõ, b pa são Samari ye. B tẽnsa pa yalem n yɩɩd ye. Yãmb datame n tadg Naaba-Wẽnd daarã, n yaool n pidsd y zamaana ne pãn-tõogo? Y gãee gãas zutu sẽn maneg n pɛ ne wob yẽnna, n gãe loga, n dɩt pe-bi sẽn tũus wubrẽ la nag-bi sẽn tũus bãgrẽ. Y yɩɩnda ne y pãng fãa la ne bɛɛla. Y togsda a Daviid n wat ne yʋʋm te-paala. Y yũuda rãam wanzurf la-yalems pʋsẽ la y sõod y mens ne ka-noodo tɩ y sũur yaool n pa kiuusd ne yel-beed ning sẽn na n lʋɩ a Zozɛf buuda zuga ye. Rẽ n so marsã tɩ m na n wilg yã tɩ yãmb n na n yɩ pipi rãmba n loog pa-weere. Bãng-y yã, kʋɩɩm dãmba, tɩ kibs kõn le zĩnd y yĩng ye. Maam, dũni fãa Wẽndã, n yet woto: «M wẽenda ne m menga, t'a Israyɛl wilg-m-menga laka m yam, m yam laka ne a ro-neebã. M na n basa bɛɛba nugẽ bũmb ning fãa sẽn be Samari pʋgẽ, a Israyɛl na-tẽnga pʋgẽ.» Neb piig kõn kell vɩɩse zak a ye pʋgẽ ye. B na n modga sẽn ki-ba roagd a ye t'a sa roog-roogo n yiis kũuma. A sã n ta yaoolem dooga tɩ nin-vɩɩg ket be n sok-a: «Ned keta ne foo bɩ?» A na leok tɩ sɛɛme la a na le paase: «Bas bʋur tɩ ned sẽn tõe n yõk Wẽnd sɛɛg ka ket ye.» Yaa Soaala raab la woto tɩ ro-bedr lʋɩ la ro-bil me tãs mugnum. Weef zoeta pĩis zut bɩ? Bɩ b warda pĩisa ne nag-koodse? Yaa bõe marsã tɩ yãmb tek zemsg t'a lebg pĩ-zẽnem sẽn wat ne kũum, n tek bõn-sɩɩd t'a lebg toog lig-ligi? Yãmb noogda y sũur ne y sẽn tõog Lo-Debar tẽn-yaalgã. Y yetame: «Yaa d sẽn tar pãnga yĩnga la d tõog Karnayim sẽn ya pãng a narã.» Boto! Ad maam, Naaba-Wẽnd, dũni fãa Soaala, m na n yiisa tẽng a ye t'a nams yã, Israyɛl, al Lebo-Amat noorẽ n tɩ tãag Araba kʋɩlgã. Soaala-Wẽnd n yeele. Ad Wẽnnaam, m Soaala, sẽn kɩt tɩ mam yãende: Da yaa sʋy wekre, alkam sẽn ningd a yagens wakato, dĩma ka-kɛɛra poore. Sʋy wã da wãba tẽnga mood fãa gilli, tɩ mam yeele: «Y sugri, Soaala-Wẽnde, maan-y sugri. A Zakoob na n yɩɩ wãn n vɩɩnde? Ad a paood wɛ!» La Naaba-Wẽnd sigsa b sũuri, n yeele: «Sugra paamame!» Ad Wẽnnaam, m Soaala, sẽn kɩt tɩ m le yãende: Wẽnnaam, m Soaala da boola bugma bʋʋdo t'a sẽn da fẽbg mogrã, a ra baood n na n dɩɩ tẽngã me. Tɩ mam yeele: «Y sugri Soaala-Wẽnde, bas-y woto. A Zakoob na n yɩɩ wãn n vɩɩnde? Ad a paood wɛ.» La Naaba-Wẽnd sigsa b sũuri, n yeele: «Sugr paamame!» Ad Wẽnnaam, m Soaala, sẽn kɩt tɩ mam le yãende: Soaala meng da yɛsa lalg zugu n zãad metba namdo. Tɩ Naaba-Wẽnd sok maam: «Amos, yaa bõe la f ne?» Tɩ mam leoke: «Met-namdo ne a gĩsga!» Tɩ Soaala yeele: «M na n maka m nebã, Israyɛl kambã, n ges b sã n yaa tɩrse. B ka tɩrse bɩ m da le wa kõ-b sugri ye. M na n wã-la a Izaak yagensa pʋʋsg zĩisi, a Israyɛl wẽn-naandsa na n bõrame n dʋʋge, la m na n boba zabre ne a Zeroboam doogo.» A Amaziya, Betɛl maan-kʋʋda, tʋmame tɩ b tɩ yeel Israyɛl dĩm a Zeroboam, woto: «A Amos tʋl-f-la ne wẽnga, a tʋl n deega f naama Israyɛl tẽng ka. Ad-y tẽnga gill yam yi-la a goama. Ad a Amos sẽn yete: ‹Sʋʋg n na n kʋ a Zeroboam, la b na n kãaga a Israyɛl n loog yembdo zĩig sẽn zãrẽ.› » La a Amaziya yeela a Amos: «Menem ka, bãngda; ta a Zɩɩda tẽngẽ n tɩ n wilg f bãngrã, la f paamd f rɩɩbo n dɩtẽ. Sã n ya Betɛl ka, bas f bãngrã, tɩ yaa ka la dĩma wat n pʋʋsd Naaba-Wẽnde la neba fãa mii zĩ-kãnga tiiri.» A Amos leoka a Amaziya: «M da ka bãngda bɩ bãngdb karen-biig ye. M da yaa rũm-kɩɩma la m da kʋɩɩsda m kõnkʋɩɩg biisi n na n kõ m dũmsi. Yaa Soaala-Wẽnnaam n waa n bak maam ne m rũmsã n yeel-m tɩ m tɩ taas b koees b buud a Israyɛl. La ade, foom a Amaziya, fo n gɩdg-m tɩ m da wilg Wẽnd sẽn leok bũmb ning a Israyɛl poorẽ ye la m da por m goama, wa fo sẽn yetã, ne a Izaak yagens ye. Woto wã kelg neere Soaala koɛɛga. Koɛɛga la woto: ‹Fo paga na n kong n lebga pʋg-yoaad tẽnga pʋgẽ. Sʋʋg n na n kood f kom-dibli la f kom-pugli. B na n bẽesa f vẽenema n pʋɩ. Fo menga na n kii bu-zẽmb tẽngẽ, la a Israyɛl na n looga pa-weere.› » Ad Soaala-Wẽnd sẽn kɩt tɩ mam yãende: Da yaa peoog sẽn pid ne tɩɩs bi-moaama. La Soaala sok-m lame: «Amos, yaa bõe la f ne?» Tɩ mam leoke: «Peoog sẽn pid ne tɩɩs bi-moaama!» Dẽ la Naaba-Wẽnd yeel maam: «M nebã, a Israyɛl kamba, bɩɩme n sek b bob n looge. M kõn le bas b beegre n ka sɩbg-b ye. Maam n yete, maam, Naaba-Wẽnde, tɩ m sẽn na n yik ne b raare, bãng-y tɩ kʋ-yãbdba sẽn be dĩma zaakẽ wã na wiis b wiisgu. Kũum sẽn sam taab la b na n yãende, kũum sẽn dɩg zĩig zãng la b na n yãende. Sẽn lebẽ fãa, tẽnga na n yɩɩ sɩɩ.» Kelg-y yã, yãmb fãa sẽn namsd nimbãan-dãmba, la y menesd talsa tẽnga pʋgẽ, yaa yãmb n gomd woto: «Kiu-paalga na n looga da-bʋre, tɩ d koos d koodo? Vʋʋsg raara na n looga da-bʋre tɩ d pags d baoa?» Yãmb yaool n boogda y petã, y bõn-magdi wã magdame bala n dʋʋsd daaga. Ba kood ning sẽn kẽ bugdã y vaagd-a lame n koosdẽ. A ka-neng rãmba, naong rãmba sẽn da y neoodr n ka tõog n yao, lebgda y yem-daado. Ad-y yaa woto la Soaala wẽen yã: «Ne tẽng ninga sẽn yaa a Israyɛl zu-zẽkrã, m kõn yĩm y manesma abada.» Yaa rẽ yĩng la tẽnga na n miimi, t'a kamba fãa kelem kʋʋre. Tẽnga na n zẽka yĩngri n lɛɛg n lʋɩ, wa Ezipt kʋɩl-kãsenga sẽn maande. Badaare, Soaala n yeele: «M na kɩt tɩ wĩndg lʋɩ wĩnto-sʋka, m na kɩt tɩ lik zĩnd wĩnto-sʋka. M na kɩt tɩ y kibs rãmba lebg sũ-sãanga, tɩ y yɩɩla lebg kũmkũm. M na sẽgen-y sũ-pa-noang futu, la zuta fãa zoobd na kõoge. Na n yɩɩ wala ma-bi-yend kʋʋre. Daara na n kell n yɩɩ sũ-beedo ne sũ-beedo!» Daar n wate, Soaal Wẽnd n yeele, tɩ m na n tool kom, tẽn-kãnga rãmba. La ka bur kom la b na n yãb ye, ka ko-yũud la b na n yãb ye. Yaa m goama kom la ko-yũud n na n yõk-ba. B na n yii tẽnga nug goabg n tees nin-taoore, n yi nug rɩtgo n tees yaanga, n baood n na n kelg Soaala koɛɛga, la kato, a kõn lʋɩ b tʋbrẽ ye. Badaare kom-neeba, kom-pugli la kom-dibli na n kii ko-yũudu. Sẽn wẽend-b ne Samari yel-beedã, sẽn yet-ba: «Dã, ad m wẽenda ne fo wẽndã, m wẽenda ne Beerseba tõog la a pãnga,» bãmb fãa na n lʋɩɩme la b kõn le yik ye. Mam yãee Soaala sẽn yɛs maan-kugra zugu; b yeelame: «B tus sẽn dog lalsa sẽn ya gilsa zutã n siki, (d tus tẽnga pãn-dãmbã n siki) tɩ wẽnd dooga noora meng deeg n komse. M na n wãa b zutã fãa, la ned sã n kelle, a kõn põs ye, m na kɩt tɩ b koadg-a, ned ba a ye kõn tõog n zoe ye. Ba b modg n kẽ bʋg-tẽnga, m nug na tɩ tak-ba n yiisi; ba b dʋ sa-gãna m na sik-ba. Ba b sã n solg b mens Karmɛl tãng zugu, m na kẽng n tɩ bao-b n yõge. Ba b sã n zoe n kẽ mogr pʋga, be me m na kõ waafa noor t'a rũm-ba. La b bɛɛba sã n loog ne-b yembdo, m na kõ noor tɩ b kood-b be. M nif kõn zãag ne-ba la kõn yɩ b manegr yĩng ye, na n yɩ-la b sãoong yĩnga.» Naaba-Wẽnde, dũni fãa Soaala, dɩka b nug-bil b sɩɩs tẽngã la a sɩnga miuungu la tẽng zug rãmba fãa kelma kʋʋre. Tẽnga ra zẽkda yĩngri n le lɛɛg n lʋɩtẽ wa Ezipt kʋɩl-kãsenga sẽn maande. Soaala-Wẽnd ti-la b rota yĩngri, la sa-gãonga lɛɛg n tilga tẽnga. Soaala-Wẽnd boonda mogra koom tɩ b le wa rʋʋg n madg tẽngã. Soaala yʋʋr la a Beẽ-n-beẽ. Israyɛl kamba, maam, Naaba-Wẽnd, n sokde: «Yãmb tara yõod n yɩɩd Kus rãmba laa? Sã n ya maam n yiis yãmb Ezipt tẽnga, yaa maam n yiis Kaftor Filisti rãmba la m yiis Kir Siri rãmba. Y ka mi rẽ sɩda?» Ad-y maam, Naaba-Wẽnd, nif nee Israyɛl dĩm dãmba roogo la bãmb n beege. Dẽ la m yeel yã: «M na n yiis-a-la moogo. M ka mi m sã n na n menesa a Zakoob yagensa ye. Nanda yaa Israyɛl la m yet tɩ b go-a wala b sẽn good bõn-sĩin tɩ bũmb ba a ye ka lʋɩ tẽng ye. Yel-wẽnd maandba fãa sẽn be m neba sʋkã, yaa zabrẽ la b na n ki. Dɩlla sẽn na n loog-ba fãa, yaa sẽn yet-b bãngdã t'a menem la a ra wa ne yel-beed ninga a noora sẽn togsda ye. Baraare m na yika a Daviid pʋʋg rooga sẽn ta tẽngã. La maam, Naaba-Wẽnd, n yete, m na bɛ-la a sẽn wurg zĩig ningã, m na n yika a raboogã, m na n le maneg n yik-a-la wala a sẽn da ya a soab pĩndã. Dẽ marsã la Israyɛl na n le reeg Edom ne tẽns a taaba soolem sẽn deng n yɩ m rẽnna. Maam, Naaba-Wẽnd, n gome la m sẽn yeela na pidsi.» Soaala-Wẽnd le yetame: «Ad daar sẽn wate tɩ tigsgu sẽn tigs bɩ koob wẽneg n kooda, tɩ selb sẽn sele bɩ b wẽneg n wẽkd bugsuntung biisi. Woto rã-paalga na n zoe n siga kunkuba, n zoe n yʋgemd tãn-bi wã. M na n teema a Israyɛl nenga: tẽnsa sẽn wã wã na n le maneg n meeme tɩ neb me le kẽ b pʋgẽ. B na le sel la b le yũ b bugsuntund rãam. B na n koo b zẽedo la b rɩ b yõodo. M na n le kẽesa m nebã b tẽngẽ. Ned kõn le rig-b n yiis m sẽn kõ-b tẽng ningẽ wã ye. Yaa woto la m yals yã, maam, Naaba-Wẽnde, yãmb Wẽnnaam.» Woto yaa Naaba-Wẽnd sẽn wilg a Abdiyas; yaa koees niyns b sẽn kɩt t'a yiis Edom rĩunga poorẽ. Ned la Naaba-Wẽnd tʋm bu-zẽmbã. D wʋma nin-kãng sẽn gomd woto: «Yik-y tɩ d tak zabre ne Edom.» Edom, yaa Soaala n gomd ne-fo, m na kɩtame tɩ f lebg bilf buud a taaba sʋka, m na n kɩtame tɩ f reeg buud a taaba paoore. F zẽk-m-menga menes-f lame, pĩig sẽn lill-f yĩnga, la f sẽn zao ned sẽn ka tõe n taẽ, f yeta f sũurẽ: «Ãnda n na n sik-ma?» La ade, ba f tɩ zaoond yĩngr wa sɩlga, ba f tʋka tʋɩ ãdsa sʋka, m na tus-f n siki. Yaa maam, Naaba-Wẽnd, n gomde. Yaa wãna, Edom? Wagdb la yʋng fãadb wa-la f zakẽ, tɩ f zĩ sɩɩ! Ad-b na n looga ne b sẽn tõe fãa. Bugsuntung biis rɩgsdb sã n kẽ fo pʋʋgẽ, ka sib yiisdem bal la b na n bas ne-f laa? Ges b sẽn vɛɛsd foo, Ezayu roogo, ges f laogã sẽn da maneg n solgã sẽn yiis n dɩga! B diga foo, Ezayu, n gãndg toaaga; sẽn sõangd-b fooma belg-f lame bala! F zo-rãmba tudg-f lame bala! Zooda sẽn da yõg sõmb ne neb niynsã, bãmb n bẽt-f bẽdgo. B yetame tɩ f zuga lebgame. Badaare, Wẽnd n gomde, m kõn kees bũmb Edom pʋgẽ ye, m kõn kees bũmb a Ezayu tãnga zugu ye. M kõn kees nin-yẽseng ye. Tema tẽnga, ad f tãb-biisa na n diga rabeem kãsenga, b na n kʋ-la b fãa gilli. Tẽeg-y yã, Edom rãmba, tɩ y fãame la y kʋ-la y saam-biisi, a Zakoob yagensã. Y ka zoe yãnd ye la rẽ me la y na n menem gilli, beoog raare. Bɛɛba sẽn waa n tõog a Israyɛl tãb-biisã n kẽ a na-tẽngẽ wã, y ra zĩi n getame. Sãamba sẽn waa n pʋɩt taab Zerizalɛɛm laogã, y me maana wa bãmba. Fo ra pa togẽ n noog f sũuri yel-beeda sẽn lʋɩ f saam-biisa zuga raare, Zɩɩda tẽn-peelmẽ wã ye. Fo ra pa togẽ n noog f sũuri, b sẽn waa n kʋʋd-ba ye. Fo ra pa togẽ n purs-b beedo b sẽn waa n zĩ ne yɩɩra ye. F naoor da ka tog n tabgẽ m buuda na-tẽnga a wãaba raar ye. F nif ra ka togẽ n yãend a zu-beeda ye. F nug ra ka togẽ n sɩɩs a laogo, zɛɛba raar ye. Fo ra pa togẽ n yals so-tiisẽ n kʋ sẽn da zoet-ba bɩ n yõg-b n kɩs b bɛɛba, b zu-bʋka raar ye. Bãng-y marsã tɩ Soaala bʋʋd kãsenga raar taame. Woto wã fo sẽn maan ne f taabã, boto me la b na n maan ne foo. Fo sẽn da rat yel-beed ningã n na n lɛɛg n dɩ-fo. Sã n ya yãmba, Israyɛl kamba, yaa m tãn-sõnga zug la y zoe n yũ m sũ-puura rãama wamde. Buud a taaba me na n deega b rẽnna. B me na n yũ n gãeemame n yaool n menem zãnga. Woto Siõ na le lebg f soolem la yẽ tãnga zugu la sẽn põs-ba na n wa soonde. A Zakoob yagensa na n le sooga b tẽnga, b na n le fãsg-a-la a bɛɛba nugẽ. A Zakoob ne a Zozɛf kamba na n yɩɩ wa bugum; bugma na n dɩ-la Ezayu kamba wa moogo, n menes-b gilli, n ka na n kees nin-vɩɩg ye. La yaa maam, Naaba-Wẽnd, n togsd rẽnna. Nug rɩtgo, Zɩɩda nebã na n wẽe n deega Edom tẽnga, B na n deega Filisti rãmb tẽn-nabrã. B na n sooga a Samari, a Efrayim na-tẽngã, t'a Bẽnzame soog Galaad. A Israyɛl pa-weta sẽn da kẽed nug goabgã na n yika wa tãb-biisi n wẽ n deeg Fenisi n ta Sarepta. Sã n ya a Zɩɩda pa-wetã sẽn lɛɛg n wa kẽed Sefarad, bãmb na n sooga nug rɩtg tẽnsã. B na n maana raoodo n dʋ Siõ tãnga la b na n sooga Edom. La bãmb fãa dĩma la Soaala-Wẽnde. Wẽnd gomda ta-la a Zonas, a Amitayi biigã. B yeel-a la woto: «Aya, yik n ta Niniv, tẽn-kãsengẽ wã, n yeel nebã tɩ mam wʋma b wẽnema kibare.» A Zonas yikame n dɩk Taris sore, n na n zoe n põs Soaala-Wẽnde. A taa Zafa tẽnga la a paama koom-koglg sẽn digd Tarsis tẽnga, a yaoome n kẽ n naag neb a taaba, n na n ta Tarsis, n zãag ne Soaala-Wẽnde. La Soaala-Wẽnd kɩtame tɩ sobg kãseng yik mogra zugu. Kooma rãmba wʋsgo tɩ koglga rat n lisi. Rabeem yõka so-toagdba fãa; ned kam fãa kelmame n tees a wẽnde, la b lobd b teeda fãa mogrẽ, sẽn na n yɩ-la tɩ koom-koglga lebg faasga. Wakat kãnga t'a Zonas da siga tẽngr doogã n gãe n fõogd a gõeem. La koglgã soab kolg-a lame n yeel-a: «Yaa bõe la f maand ka, yaa bõe tɩ fo gõe? Yik n kelem f Wẽndã! F Wẽnda tõeeme n ges d yelle, tɩ d ka ki ye.» Koglga pʋgẽ dãmba waa n yeela taaba: «D poees n ges ãnd la yella soaba?» B bʋga b babgre, la yella lʋɩ-la a Zonas zugu. La b yeel-a lame: «Foo la yella soaba. Aya! Yɩɩ wãn-wãna, fo yii yɛ, fo tẽng yʋʋre, togs f buud yʋʋre.» T'a Zonas na n yeel-ba: «Mam yaa Ebre, n waoogd Naaba-Wẽnde, yĩngr Wẽndã, sẽn naan mogrã la tẽngã.» A togs-b-la a kibarã. La neba pɛleng yɩka al wʋsgo b sẽn bãng t'a ra zoet n na n põsa Soaala-Wẽndã, tɩ b sok-a: «Fo yɩɩ wãna n maan woto! Tõnd na n maana foom bõe n paam tɩ mogra sigi.» Sɩda kooma da fudgdame n paasdẽ. La a yeel-b lame: «Dɩk-y-ma m lob mogra pʋga t'a na sigi y yĩnga. Bala mam miime tɩ yaa mam yĩnga la sob-raoogã zabd ne yãmba.» Sẽn dugsd-b koglgã makame tɩ b na ta kʋl-koaka la ayo, kooma da fudgdame n paasdẽ. B yõka Naaba-Wẽnd sɛɛg n yetẽ: «Ad wɛ, Soaala-Wẽnde, bɩ y ra bas tɩ d ki ninsaan-kãnga yĩng ye. Bɩ y ra ning d taale ne pʋ-peen-ned zɩɩm ye, tɩ yaa yãmba, Soaala, n maand y yamleoogo.» Dẽ poore b tʋka a Zonas n los mogrẽ wã la ko-wiisa sigame. Soaala-Wẽnd dabeem kẽ-b-la wʋsgo tɩ b na n kʋ maando la b pʋlem pʋlem-bɛda. Soaala-Wẽnd kɩtame tɩ zĩm kãsenga vel a Zonas. A Zonas paa zĩifã pʋgẽ dasem a tãab para. A Zonas zĩnda zĩifã pʋgẽ n pʋʋs a zu-soaba Wẽnde: «Mam da zĩi ne fare n zẽk m koɛɛga n tees yãmba, la y leok-m lame; m zĩnda bʋg-tẽnga n yõk y sɛɛga la y wʋma m koɛɛga. Yãmb da loba maam ko-sʋka tɩ mogrã lim maam; ko-wiisa la ko-bɛɛla wẽ-m lame. Tɩ mam da zoe n gomda: ‹Soaala riga maam n zãag ne b menga m yaool n da nongẽ lame tɩ m nif le teegẽ b ro-sõngã.› Koom da zoe n dɩdga m kokoɛ tɩ m ka mi m sẽn tutẽ ye. Kʋl-mood da zoe n vila m zugu. M da sud n taa tãmsã yẽgnẽ, tɩ bʋg-tẽng kʋɩlensa lɛɛg n pag-ma, daar buud fãa yĩnga. La yãmba, m Soaala-Wẽnde, yãmb yiisa maam bog-zulungẽ y yiis-m-la vɩɩga. M sẽn waa n tẽed kũuma, wakat kãng la m tags y yelle, Soaala-Wẽnde tɩ m pʋʋsga ta yãmba, al y wẽnd do-sõngẽ wã. Sẽn tũud-b wẽn-naandse bãmb zãagda b meng ne fãagre. M na n pʋda m bark pʋʋsg yɩɩlle m na kʋ maoongo n waoog yã. M na n pidsa m pʋlengo. Sɩda, Soaala, yãmb n so fãagre.» Naaba-Wẽnd kɩtame tɩ zĩifã wʋk a Zonas mogra noorẽ. Soaala-Wẽnd gomda le ta-la a Zonas la b yeel-a lame: «Yik n kẽng Niniv tẽn-kãsengẽ n togs mam sẽn yeel fooma!» A Zonas sakame n yik marsã n kẽng Niniv. Tẽnga da yaa tẽn-kẽenga, sã n ya ne nao, dasma tãab la f gilgd a n segre. A pipi raarã a Zonas ra kẽndame la a moonẽ: «Keta dasem pis-naas bala tɩ Niniv rota wã.» Niniv neba tẽe Wẽnd gomdã. B yalsame tɩ b na n loe b noore la b nin-bɛda wala a ka-neng rãmba fãa yeelga sũ-pa-noang futu. Niniv dĩma sẽn wʋm gomdã, a siga a zaoorẽ, n yeeg a naam fuugu, n yeelg sũ-pa-noang fuug n tɩ zĩnd tompɛglmẽ. Dẽ poore dĩma kɩtame tɩ b moon tẽnga pʋga n yetẽ: «Dĩma ne a kug-zĩidba datame tɩ ninsaal bɩ rũng da rɩ la a ra yũ bũmb ye. Ninsaalba la rũmsa na n pila sũ-pa-noang futu. Ned kam fãa kos Wẽnd ne a sũuri la a bas tʋʋm wẽna la pãn-tõogo. Ãnda n mi Wẽnd sã n ka na n teeme, n le kʋ b sũuri, n sik b sũ-puurã tɩ d da ki?» Wẽnnaam sɩd yãeeme tɩ b sɩd maanda b sẽn tõe n na n bas b zʋg wẽnga. Rẽ yĩnga Soaala-Wẽnd basa b zugẽ yɛla taale n ka pids b sẽn da yeela ye. Sugra kũuna ka ta a Zonas yam ye t'a wuk ne sũ-puuri. A maana pʋʋsgo n yeel Soaala-Wẽnd woto: «Naaba-Wẽnde, yell a woto la m ra sãmbd m yamẽ rẽ tɩ m ket m ba yiri! Yaa rẽ yĩng la m da pĩnd n zoe n kẽng Tarsis; m da miime tɩ yãmb yaa Wẽnd sẽn tar nimbãan-zoeer la nonglem, n ka puugd y sũur tao tao ye, n lebsd y zelemd sẽn yiisi tɩ sɩbgra vaanẽ. Marsã, Soaala-Wẽnde, bɩ y yãk m yõore tɩ mam kũum são m belem.» Tɩ Soaala yeel-a: «Yaa bõe yĩng la fo puugd f sũur woto, fo bee bʋʋm bɩ?» A Zonas yaool n yii tẽngẽ wã n tɩ zĩi nin-taoore n get-a. A tii sẽgd roogo n kẽ n zĩnd. A ra gũuda tʋʋmd bʋgo la Soaala na n tʋm ne Niniv rãmba. Soaala-Wẽnd kɩtame tɩ tɩɩg sẽn tar woglem la maasem tão n yi sẽn na n yɩlẽ n kõ a Zonas maasem la b woog a sũ-sãangã. A Zonas paama rẽ n noog a sũur wʋsgo. La vẽkembeoogo yibeoogo Wẽnd kɩtame tɩ zũnzũur kẽ tɩɩga t'a kʋɩ. La sõor sẽn yeege, Wẽnd kɩtame tɩ yaang sob-tʋʋlg yiki; wĩntoog yõoga a Zonas zugu t'a ra na n sobgẽ. A Zonas le boola kũum n yetẽ: «Mam kũum n são m belem.» Naaba-Wẽnd soka a Zonas: «Fo sẽn puug f sũur, tɩɩga sẽn ki wã poorã, fo bee bʋʋm bɩ?» T a leoke: «N-ye! Mam sũur sɩd puugame; mam kũum bala n são.» Tɩ Wẽnd na n leoke: «Fo yãbda tɩ-kãnga kũuma, fo yaool n ka maan bũmb a yĩng ye, ka foo n kɩt t'a yi ye. A tãoo n yii yʋn-yende, a le kii yʋn-yende. Fo ratẽ lame tɩ m da zoẽ Niniv nimbãanega? Ad Niniv yaa tẽn-kãsenga, a kẽedba taa tus koabg la pisi! Neb be-la a pʋgẽ sẽn ka tar b toorẽ yelle n le paas rũms ka tɛka.» Ad koɛɛg ninga Soaala-Wẽnd sẽn kõ a Mise, Moresɛt neda, Zɩɩda nanamse a Zotam, a Aaz la a Ezekiyas wakatẽ. Likra pʋgẽ, Samari ne Zerizalɛɛm yɛla la a yãend yã. Tẽnsa fãa kelg-y yã! Tẽnga ne a bõn-naandsa fãa yok-y y tʋbre! Soaala-Wẽnd na n zĩnda b ro-sõngẽ wã n bool-y bʋʋdo. Sɩda b yita zĩ-sõng ning b sẽn beẽ wã, la b sigda pʋʋsga zĩisẽ. Soaala-Wẽnd watame tɩ tãmsa boogdẽ, wa bugum n yẽnegd siribdu. Soaala watame tɩ bãg-faasa pʋkdẽ, wa koom sẽn sigd kunkuba. B sẽn yi b zĩ-sõngẽ wã ya-la a Zakoob yagensa beegr yĩnga, yaa Israyɛl kamb sẽn bas bãmba yĩnga. Ãnda n tusd a Israyɛl t'a zẽkd a zugu? Yaa a na-tẽngã, yaa Samari. Ãnda n tusd a Zɩɩda a wẽn-naandsa waoogr zĩigẽ, yaa Zerizalɛɛm memga. Dẽ la Naaba-Wẽnd gomda: M na n kɩtame tɩ Samari lebg raboogo, lalsa na n tusame n lub zãng tɩ m wʋk a kugã n lob sudgẽ la Samari na n lebga wa bugsuntungu pʋʋgo sẽn maneg paalem. Mam na n sãama a wẽn-naandsã fãa, a laoga na n dɩɩ bugum, ned kõn le yãe b wẽn-naandsa ye. Samari arzɛka yii pʋg-yoaadb nengẽ la bãmb nengẽ la a na n lebe. Maam a Mise, m na n kaasame, m na n wiisame. M na n piida m neooda, la m pidg m futu, n kelem wa we-yũuga, m na yãba wa na-neoongo. Samari sẽn deeg sɩbgr ninga wʋm-a lame. Sɩbgra tol n sãag n ta-la a Zɩɩda, n ta Zerizalɛɛm, m buuda na-tẽnga. Ra taas-y kibar kãnga Gat tẽng ye. Be rãmb nintãm da rʋʋg ye. Bɛt-Leafra rãmb bilim tomẽ tɩ b rɩta kʋʋre. Loog-y pa-weere, Safir dãmba, loog-y bɩlgemde la ne yãnde. Sã n ya yãmba, Sãana rãmba, b ra le yãend-y yɩng ye. B yãbda kʋʋre Bɛt-Esɛl tẽnga, soondg zĩig ka kees be ye. Marot rãmba rigdame tɩ b ka mi b yell sẽn na n yɩɩ a soab ye. Soaala sẽn wat ne yel-beed ninga zoe n ta Zerizalɛɛm tẽng noore. Lakis rãmba, segl-y y wiidi n zoe tɩ y manesma wẽnda Israyɛl, y yɩɩ tõatbã, n pirs Zerizalɛɛm t'a zẽk a zugu. Woto wã y tog n welga ne Moresɛt-Gat rãmba. Sã n ya Akzib tẽng rãmba, ad-y b kõn sõng Israyɛl dĩma ne baa fɩ. Maresa tẽng rãmba, ad-y Soaala na n kẽes-y-la na-paalg a to soolmẽ. A Israyɛl nanamsa ne b ziirã na n kong n tɩ soonda Adulam tãnga bokẽ. Gʋs-y y zoobdo, põng-y y zugu, Zerizalɛɛm dãmba; bɩ y zuta kõog wa yɩbrgo rẽnna. Yãb-y y kom-nongdsã tɩ b na n looga pa-weer zĩ-zãorgẽ. Na pak neb niyns sẽn dat-b yel-beedã, la b gãe b gãagẽ n bilgd wẽnga. Zĩig ne a sɩng pʋkri, tɩ b sɩnga b sẽn sed n dɩglã b sã n tara rẽ pãnga. B sã n dat pʋʋgo b reegd-a lame. B sã n dat roogo, b reegd-a lame. B yõkda zak soaba ne a zak rãmba n dees b sẽn so. Yaa rẽ yĩnga la Soaala-Wẽnd gomd woto: «Ad yel-beed ning m sẽn na n sik zamaan kãnga rãmb yĩnga. Ned ba a ye ka na n tõog n põs ye; y zug na n sulgame, tɩ zamaan ning sẽn watã yaa yel-beed zamaan.» Yella raare, b na n sɩɩl n tʋʋsa yãmba, wala m sẽn zoe n neẽ. B na n yɩɩla sũ-sãang yɩɩla, la b na n yeelame: «B fãa tõnd laoga zãnga. B reega tõnd vẽenem, b rigda tõnd n deesd d pʋt n pʋɩt taaba. Yaa bõe yĩng la b reesd-d sẽn so?» Yãmb sʋka ned ba a ye sẽn na n paama bũmb Wẽnd pʋɩɩrẽ ka ye. Pʋɩɩra raare Soaala buuda kõn tẽeg y yell ye. A Mise wʋma b sẽn yete: «Yaa n vʋʋs ne f goama, tɩ f gomda gom yaalse la yaa wala f ka mi tɩ d kõn tɩlg yãnd abada. Ãnda n da tõe n tags woto, Zakoob roogo? Soaala-Wẽnd la sẽn ka mi yaams la. B ka minim n maand boto ye; sẽn kẽnd-b tɩrs yĩnga, b goama yaa nonglem goama.» Sã n ya ne yãmba Soaala gomda woto: Yãmb yik n dɩta beem ne m buudã. Sẽn tɩ zab-ba n lɛɛg n watẽ ne yẽesem, yãmb yekd-b lame n yeesd b fu-tagdo. Yãmb digda buuda pagba n yiisd-b b sẽn da nong n kẽed rot niynsã. Yãmb pa get b kamba ne waoor ning m sẽn yet tɩ b toga ne a soaba ye. Yik-y n loog-y! Vʋʋsg sɛɛme. Y sẽn bas maama yaa naong ne naong la y na n sege. Ad-y ned sã n yiki n togsd yãmb gom vɩɩdo la a wãagd koom, n yetẽ: «M na gom y yĩnga y sã n na n tɩgs-m ne rãam la rã-toos buud fãa.» Ad-y ned a woto la bãngd gãeeng ninga sẽn tog ne yãmbã. N-ye! Maam, Naaba-Wẽnd, n gomde: «M dat n tigma yãmb gilli, Zakoob yagense; mam dat n lagem-y-la taaba, Israyɛl bu-kelle. Mam na n tigim-y lame, wala piisi, b bãgr pʋgẽ la wala rũmsi, b wãbneg zĩigẽ. Y goama na wẽneg neb sẽn mi b nens goam marsã. Sẽn pakd-a sorã lʋɩɩ y taoore. Yãmb paama y menga. Y paka sor n looge. B dĩma lʋɩ-la b taoore, yaa Soaala b Wẽnnaama n yɩ bãmb sɩleto.» M gomda ne yãmba, Zakoob yagens sẽn dɩt naam. M gomda ne yãmba, buuda bʋ-kaoodba. «Yãmb sẽn be bũmb ning yĩnga, ya y ges tɩ bũmba fãa tũ noora sẽn wilgi. Yãmb yaool n nonga sẽn ya wẽnga n kis sẽn ya neere. Yãmb dɩta nebã n tãag b yĩn-gãongo, n tãag b kõaba.» Sɩda, b rɩta m buudã, a yĩn-gãongã, nem-bugã, kõabã, kõaba sɩɩlem. Fãa pasda wa nemd sẽn na n ning rʋkẽ. Woto me la b sã n yõk Soaala sɛɛga, Soaala ka leokd-b ye. B na n wẽnemda b nenga, b tʋʋm wẽna yĩnga. Ad Soaala-Wẽnd sẽn togsd bãngdba poore, bãngdb niyns sẽn tudgd m buudã: «Sã n kõ bãngdba yaood sẽn tagme, b yetame tɩ laafi na zĩndi. Sẽn ka kõt-b bũmb tɩ b ningd b noorẽ, b yetame tɩ laafi ka ye. Yaa rẽ yĩnga la yʋng wat yãmb yĩnga tɩ y ka na n le paam Wẽnd likr ye. Lik n na gũbg yãmba, wa zĩig sẽn sobge tɩ b ka le ne baa fɩ.» Woto, bãngdba fãa na n pɩla b nenga n lud b yãnde, tɩ Soaala-Wẽnd pa le leokd-b bũmb ye. Maam, a Mise, ket n pida ne pãnga, tɩ Soaala kõ-m-la b Vʋʋsem, woto m pida ne zemsg la raoodo n tõe n wilg a Israyɛl buudu la m wilg a Zakoob yagense, tɩ b zẽka b zug ne Soaala la b ka pʋg bãmb b ye bal ye. Kelg-y wɛ, Zakoob zak na-biisi, Israyɛl taoor dãmba, yãmb kisa sɩda la y golemd bũmb ning fãa sẽn ya tɩrga, yãmb meta Siõ ne zɩɩm, n met Zerizalɛɛm, Wẽnd tẽnga, ne pãn-tõogo. Yãmb soaalba deegda kũuni n yaool n kaood bʋʋdo. Maan-kʋʋdba deegda ligdi n yaool n na n zãms noorã. Bãngdba ka yaagd b noore n togs sẽn wat beoogo tɩ b ka reng n deeg ligd ye. Bãmb n maand tɩ b teega Wẽnde la b yetẽ: «Wẽnd ka be tõnd sʋk laa? Yel-beed yɩta a wãn n lʋɩ d zugu?» Yaa rẽ yĩnga, yãmb manes yooda yĩnga la Siõ na n lebg pʋʋgo, tɩ Zerizalɛɛm lebg raboogo, tɩ wẽnd dooga tãng lebg kãgre. Wakat n wate, tɩ wẽnd doogã tãnga na n lʋɩ tãmsã fãa taoore: a na n zẽkame t'a zãndlem yɩɩg tãmsã fãa. Neb ka tɛk n na n zoe n wa be. Buud ka tɛk na n waa be. B na yeele: «D dʋ Soaala-Wẽnd tãnga zugu, a Zakoob Wẽnnaama roogẽ, tɩ be Soaala na zams tõnd b soya tɩ d tũ-ba.» Bala, noya na n yii Siõ la Wẽnd gomdã na n taa tõnd Zerizalɛɛm. Soaala na n dɩɩ naam, buud ka tɛk zugu, la b na n yɩɩ tẽn-bɛd bʋ-kaooda, n yɩ tẽn-zãorgẽ dãmb bʋ-kaooda. B na n dɩka zabre sʋʋse n kud wãgse, la b kud goet ne kãna Tẽnsã kõn le wõ sʋʋse n zab taab ye, la b kõn le zãms zabr ye. La ned fãa na n pa-la a bugsuntung la a kankang tẽngre, tɩ ned ba a ye ka yɩk a to pɛleng ye. Dũni fãa Wẽnda noor gomd la woto. Bala buud fãa baood n na n nooga a wẽnd sũuri. Sã n ya tõndo, d vɩ-la d Soaala, tõnd Wẽnnaam, yĩnga, daar fãa la yʋʋm tõt sɛɛb yĩnga. Daar n wate, yaa Soaalã n gomde: «Mam na n tigma sẽn bẽedbã, n tigim mam sẽn nams b rãmba ne pa-weerã. M na tigma sẽn bẽedbã, n vʋʋg buuda gilli. M na tigma sẽn zĩnd-b pa-weerã tɩ buuda lebg buud sẽn tar pãnga tɩ maam, b Naaba-Wẽnd, vigl m naama goeel Siõ tãnga zugu, yʋʋm tõt sɛɛb yĩnga. La foom, Zerizalɛɛm sẽn zao f tãnga zug, f gũuba roog zugu, n get dũni wã, fo na n leb n paama f pĩnd naama. Foo n na n le yɩ rĩunga na-tẽnga.» Bõe tɩ y tar yãbre dũnna Zerizalɛɛm dãmba? Bõe tɩ tooga namsd yãmba wa pag sẽn kũmd rogem? Ya y sẽn ka le tar dĩma, n ka le tar sagendba bɩ? Yãb-y toog wa pag sẽn kũmd rogem. Na n yɩɩ modgre tɩ y yi tẽngã, n kẽ wetẽ, n tol n ta Babilon. Beelẽ y na n paama y menga. Soaala na n fãag-y-la y bɛɛba nusẽ. Marsã tẽns wʋsgo zoe n sũu taaba n na n zab ne yãmba. B yetame: «Wẽnd na kɩt tɩ Zerizalɛɛm yãe paoore, Wẽnd na kɩt tɩ d yãe a raboogo!» Ad-y b ka mi Wẽnd sẽn dat n maan a soab ye, la b ka mi b tagsg ye. B rat n tigma b nebã wa kood sẽn kalse, zɛɛga sẽn be zĩig ningã. Yiki! Pãb-y alkam, Zerizalɛɛm dãmba. M na n kõ-y-la pãnga sẽn zem naaf rẽnda, naaf ne yɩɩl sẽn ya kutu t'a nao-bend ya kut sẽn yũnugi. Yaa buud ka tɛk la y na n tab n bedse. La y sẽn na wʋk laog ning wala y tõogr yõodã, yaa maam la y na n kõ, maam, Naaba-Wẽnd, dũni fãa Soaala. Marsã Zerizalɛɛm dãmba, sẽn tigsd-b tãb-biisã, kɩɩs-y y yĩnga wa ned sẽn dɩt kʋʋre. Ad-y bɛɛba sɩnga d tẽnga gũbgri la b zoe n kuta ne b guugu a Israyɛl buuda naaba. La foom Bɛtelyɛɛm Efrata, yaa Soaala n gomde, fo yaa tẽn-bila a Zɩɩda soolma fãa pʋgẽ. Yaool n yaa fo pʋgẽ la sẽn na n dɩ-a a Israyɛl naama, mam zĩigẽ, na n doge. A ka zamaan-yaooga ned ye, ya kʋdem-wẽnnẽ neda. Rẽ n so tɩ Soaala-Wẽnd na n yĩm f yelle n tãag paga rogem wakato. Dẽ poore saam-biisa sẽn kell pa-weerã na n lɛɛg n wa Israyɛl kamb sʋka. La ned ninga sẽn na n wa rɩ naama na n lʋɩ-la a buuda taoore tɩ b kẽnd ne yẽesem la b kilsd b Soaala-Wẽnnaama pãng la b ziir. Bãmb na n vɩɩnda laafi ne b buud a Israyɛl, la al dũni wã tɛka, neba fãa na n bãngame tɩ b yaa nin-kãsenga. La Israyɛl pe-kɩɩma na n waa ne laafi a Israyɛl yĩnga. Asiri rãmba sã n wa rat n kẽ tõnd tẽngã, n kẽ d na-rota pʋsẽ, d na yiis nanams wʋsgo sẽn na n wa zab ne ba. Bãmb zab-teeda yĩnga, b na n tõoga Asiri, la Nemrod tẽnga. B na fãag tõnd ne Asiri rãmba b sã n wa gãndg toaagã n na n kẽ n sãamd d tẽngã. A Israyɛl bu-kellã na n zĩnda buud toɛ-toɛ sʋka wala meenem Soaala-Wẽnd sẽn tool n na n bʋk-ba, wala sa-ko-bɛɛla, sẽn madgd moogo la mooga ka teeg ninsaal pãnga, la a ka gũud ba fɩ ninsaal nengẽ. A Israyɛl bu-kellã na n zĩnda buud toɛ-toɛ sʋka wala bõnyẽega we-rũms sʋka, wala gɩgemd-pol sẽn piʋʋgd piis sʋka n fãood n lubdẽ, la a tat n tõsda tɩ ned ka tõe n taa n deeg ye. Israyɛl bu-kelle, wɩk f kanga, f bɛɛba zugu tɩ fãa meneme! Naaba-Wẽnd n gomde: «Daar n wate, tɩ m na n menes y wiidã la y bilim-bilma. M na n sarma f tẽn-bɛda fãa, f tãnsoben-dota fãa. M na n sãama f tɩtã, b kõn le yãend neb sẽn bʋgd ãds yãmb sʋk ye. M na n luba y wẽn-naandsa fãa, y kug-sendi wã fãa. Y kõn le waoog bũmb sẽn ya yãmb nug tʋʋmd ye. M na n vigsa y ra-luga fãa sẽn paamd y waoogrã, m na n wã-la y tẽnsã. M sũura na n puugame, m na n doka m sũur ne bu-zẽmba sẽn ka reeg m noore.» Kelg-y Soaala-Wẽnd sẽn yete: «Yiki, m buudu, yik n bool-m bʋʋd tãmsa taoore, gom tɩ tãn-bi wã wʋm f sẽn gomd n lebdẽ. Tãmsã fãa kelg-y maam, Naaba-Wẽnd, sẽn bʋʋd ne a buudu. Tẽnga sẽn vigl kẽnkẽ bũmb ning zug n yɛsẽ wã, fãa kelg tɩ m yika bʋʋd ne a Israyɛl.» Yaa woto la b sokd b buudã: «Bõe la m maan yã? M nams-y-la ne bõe? Leok-y-m wɛ? Yaa m sẽn yiis-y Ezipt tẽnga, n yiis-y yembdẽ n tʋm a Moyiiz, a Aarõ la a Miriyam tɩ b lʋɩ yãmb taoora bɩ bõe? M buudu, maan tẽegre! Moab dĩm a Balak sẽn waa n dat n tʋm beedã, tẽeg-y yã a Beor biig, a Balaam, sẽn yeel-a. Tẽeg-y tɩ m yãag-y-la al Sitim n tãag Gilgal tẽnga. Woto wã y tõog n yãenda kũun niyns m sẽn sudg-y, maam, y Soaala-Wẽnnaam.» Yaa kũun bʋgo la d tog n wa ne, d sã n wat n na n waoog Soaala, yĩngr Wẽnnaama? Tog n waa ne nag-bil maoongo, yʋʋmd yend nag-bil sẽn yõogd tɩ bugum dɩ zãnga? Piis bãgre na noog a sũur sɩda? Bɩ b na n deega ka-neem sẽn pid ne sĩn-bi? D tog n kõ-b-la d kom-dẽems n paam sugri d sẽn zẽkd d zug ne bãmba la d sẽn ka pʋg bãmb wala sẽn da segda bɩ? B wilg-f lame, Adem biiga, sẽn ya sõmbo, n wilg-f Soaala sẽn dat ne foo: ad ka bũmb a to n zʋʋg maan sẽn segde ne nonglem sẽn ka viigdi la f pʋg-b ne sulg-m-menga. Soaala gomda ne tẽnga rãmba n yet tɩ b na n fãaga sẽn sulgd-b meng bãmb taoore. Kelg-y yã, Zɩɩda rãmba sẽn tigim Zerizalɛɛm! M na tõog n sake tɩ nin-wẽnsa tigsd b rotẽ laog sẽn paam ne zãmbo. M na sak sẽn ya wẽng zãnga, tɩ b sẽn tar teed niyns n magda yɩ zãmb te-magdse? M na tõog n ges wala pʋ-peen neda, ned sẽn bobd korg sẽn pid ne zirẽ-be-magdse? Sẽn ya-b rakãagba n be tẽnga pʋga, ad-y b sẽn mi yaa maan pãn-tõogo la b yag la b tudg b taaba. M sɩnga y wẽedo la ya y wãab yĩnga, y yel-wẽna sẽn waooga yĩnga. Y na n dɩɩme la y kõn tɩg ye. Y na n waasa kom waasgo. Y na kẽgsame la kõn yɩ y noor dɩɩb ye. Y sẽn na n tõog n bĩng bũmb ning fãa, bɛɛba na n wa zabame n deeg-a. Y na n bʋdame la y kõn kẽeb ye. Y na wõda kaam ne oliv la y kõn tõog n zɛ y yĩng ne-a ye. Y na kõga rãam la y kõn tõog n yũ-a ye. Y tũuda so-wẽng ning dĩma Omri sẽn tuki. Yẽnda ne a biig a Akab zak rãmb n tũ so-kãnga. Yaa bãmb nao la y rɩk yã. Rẽ n so tɩ y na n yãend y tẽnga wãabo. M na n kɩtame tɩ yãmba, a kẽedbã, lebg y bɛɛb laado. Buuda fãa yãnde la y na n deeg n tʋke. Kato! Mam lebga wala ned sẽn wat tɩ-biis tõsbo b tõsba soansoaag poore; wala ned sẽn baood sib-gĩini sãbg sẽn kao poore. Bugsuntung biig la f da rata, kankamd la f da rata, fãa sɛɛme. Nin-sõma menema tẽngã. Nin-tɩrg ba a ye ka le be ye. B fãa baoodame n na n daag zɩɩm, beoog vẽegdame tɩ b gẽesd taaba. Sã n ya wẽng maanego, b nusa tõee rẽ neere. Naab tõe n maan-f-la neere la rẽnd a reng n wilg a me sẽn date. Bʋ-kaooda rengd n deega kũuni. Taoor soaba rengd n wilga a raab waglse. Sẽn são a taaba ket n wẽnda gõaaga. Sẽn pida ne zemsgo yaa gõ-tuugu. Bãngdba sẽn wilg raar ninga sẽn ta, y sɩbgra raara sẽn ta y yika ne ba. Dẽ me la b zĩ ne yãnd la pɛta. Ra tẽe-y yak sẽn togs ye, Da reeg-y y zoa sẽn dõogd ye. Da yaag-y y noore ba y meng pag taoor ye. Biig tʋʋsda a ba, bi-pugl tãoosda raoodo ne a ma, bi-paga sẽoosda a sɩd ma. Ned kam fãa bɛ yaa a zak rãmba. La sã n ya ne maam, mam geta Soaala-Wẽnde, m fãagr bee m Wẽnnaama nugẽ la yaa bãmb la m saagda, la yaa bãmb n na n deeg m kosgo. La yãmba, m buuda bɛɛba, da laa-y tõnd yel-beeda ye! D sã n lʋɩ me, d na le yiki. D sã n be likẽ me Soaala-Wẽnd la d vẽenem. M na sakame tɩ b puug b sũuri tɩ m beeg-b lame. M na sak n ta daar ning sẽn wate tɩ b na n yik n bʋ n sõng-ma. B na n le tall-ma n wa vẽenemẽ la m na pẽg b zemsga tʋʋma. Dẽ na n yɩɩ d bɛɛba nifẽ la yãnd na n yõk-ba, bãmb sẽn da sokd tõndo: «Y Wẽnnaama pʋs n maanda bõe?» Ad-y d nao wã na n taba bãmba wala b sẽn tabd sor zug begdo, la tõnd n na ges rẽ ne sũ-noogo. Daar n wate tɩ b na n le yik na-tẽnga lalse. Y lalga sẽn gũbg tẽnga na n lʋɩɩme, y toaaga na n yalgame. Baraare, y saam-biisa na lɛɛg n wa, b na lɛɛg n wa b tẽngẽ. Sɩngda Asiri n wat Ezipt, n sɩngd Nil n wat Efrat, n sɩngd mogra noor n wat tãn-wogdã. Dũni wã sẽn kellã na n tiig n lebga zĩ-peen-daaga tẽnga rãmb wẽnem yĩnga. Dɩk-y y rũn-kɩɩm dasaare, n legl y buuda neba, Soaala. B bee kɛɛnga, tɩ tɩɩs gũbg b pʋ-weese. Tall-y-b wa pĩnda, n taas Bazã la Galaad. Wala Ezipt tẽng yiib wakato, le maan-y tʋʋm bãna. Bu-zẽmba na yãende la ne b pãnga sẽn yaa a soabã, b na rɩ yãnd sẽn ya yãnde. B fãa na yɛɛse n lebg mugs la wʋmse. Wala wiisi la bõn-vuudri buud fãa b na n lelma tẽng tom; b na n yii b soondg zĩisẽ n wa yãmb taoore, pãng soaba Wẽnde, la yãmb taoore b na n saoo kalwaare. Wẽnd bʋgo n le zem yãmba, Soaala? Yãmb sakame tɩ b beeg yã, yãmb kõta y bu-kella beegre sugri. Ka wakat fãa la y sũura puugd ne tõnd ye, tɩ sẽn noom yãmbã yaa y wilg y nonglma ne tõndo. Zoe-y tõnd nimbãaneg yɛsa, da yaas-y n sõdg d yel-wẽna ye. Lob-y d yel-wẽna mogra pʋga. Wilg-y yã a Abraam la a Zakoob yagense, wilg-y tɩ y nonglma ka be sɛɛb ye; y sẽn kãab d yaab rãmb al pĩndã n ket n yɛse. Ad Wẽnd sẽn wilg bũmb ninga Elkos tẽng raoa, a Nawum, Niniv tẽng poorẽ. Soaala-Wẽnd pa gird n le gõms ye. B sɩbgda tõatba. B sũur sã n yiki, b yaa toaag tɩ looge. B rokda b sũur ne b bɛɛba tɩ sugr kaẽ ye. Wẽnd sũur ka yikd tao-tao ye, b pãnga labsa. B pa tudgd n ges sẽn beega soaba wa nin-sõng ye. Soaala sã n lukd b naoore yaa sobd n fugdi. Sawata yaa wubsgu, b nao wã sẽn zẽkde. B tãsda mogrã t'a kʋɩ, n tãs kʋɩlsã tɩ koom fẽbge. Bazã la Karmɛl yamda moogda wa sũtu, Libã puuda sʋʋgdame. Soaala sã n sɩɩs tãmsã b vigsda b zĩigẽ. Tãn-bi wã sutame. Tẽnga sẽn tar miungu la a sẽn tare. Ninsaalba me sẽn tar digb la b sẽn tare. Soaala-Wẽnd sũura sã n puugi, ãnda n le yɛs b taoore? B sũura puugr wẽnda weoogo, bugum sẽn zombe. Pĩisa meng na n pusame. Soaala-Wẽnd yaool n yaa nin-noanga, bãmb maasmẽ la d tog n pa, yel-beeda raare. B geta sẽn be-b bãmb maasmẽ wã yell neere, ba ko-wi-bɛda rãmbg raare. B saremda tẽnga lal-gũbra zãnga, la b tusda b bɛɛbã n kẽes likẽ. Zɩɩda rãmba, yaa bõe la y tagsd ne Soaala? Ka bãmb n menesd yãmb bɛɛba wa zaalem bɩ? Ad-y bɛɛba ka na n le tõog n maan yãmb bũmb ye. Bɛɛba wẽnda gõos sẽn tãood b wila n kẽed taaba. Bɛɛba sẽn wat n tɩg rãama n ka le mi gũusgã la bugum na n dɩ-ba wa mo-puka. Ned n yi fo tẽn-peelmẽ, Niniv, ne raab sẽn ya wẽnga; yaa ned sẽn dɩt beem ne Soaalã. Yaa woto la Soaala leokd Zɩɩda rãmba: «Ba y bɛɛba sõor ya ka tɛka tɩ b wɩɩd ne pãnga, b fãa na n loogame, ba a ye kõn kees ye. M kɩtame tɩ m zɩɩb kao y po-raoogo la m kõn le paas beoog ye. M na n sika y zɩɩbo, m na n kaoo y wiyã.» Yaa woto me la b leokd Niniv rãmba: «Ned kõn le zĩnd moogo n ya yãmb buuda ned ye, n boond yãmb buuda yʋʋr ye. M na n kẽ-la y wẽn-naandsa roogẽ n yiis sẽn kudi ne kutu la sẽn pees ne raoogo. M segenda y yaoogo tɩ mam nifẽ, y ka le be yõod ye.» Ade, Zɩɩda rãmba, ges-y ned sẽn sigd tãmsã ne kiba-noogo. A soaba gonda laafi yelle. Dɩlla Zɩɩda maan-f f kibs rãmba. Wa kõ Soaala f sẽn kãab bãmb bũmb ninga. Nin-wẽng n da tʋmd yãmb beedo la a kõn le paas ye. A pãnga ta-la a tɛka. Niniv, ad b wat n na n taka zabr ne foo. Bɩ tãb-biisa gũ b tãnsoben-doogã, b gũ soya, b segl zabre, b tigim b zab-teedo. Soaala-Wẽnd lebsda a Zakoob yagense b pĩnd laogo, n lebsd a Israyɛl a pĩnd ziir. A Israyɛl la Wẽnd bugsuntungã, zɛɛdba sẽn da zɛ n loogã. Bɛɛba tãb-biis gãong yaa miigu, tɩ futa me ya boto. B sã n bob zabre, b bilim-bilma zirda wa bugum, tɩ kãna zegsdẽ. Bilim-bilma yɛdg n pida soya, b zoet n gɩta zĩig zãnga, wa rũms sẽn yik gãeemdo. F sã n get-ba, bãng bug-vɩlense, bãng saag sʋʋg sẽn kẽnd to-to. Niniv dĩma tigsda a tãnsoaben-dãmba, la b lagsd n lʋɩtame. Zab-zabdba kaooga vugri n tees lal-gũbrã, n paam pẽk n soonde. Vugr bala b kaoo kʋɩlens niyns sẽn yegd kʋɩlgã. B kẽe dĩma zakẽ. B tʋka wẽn-poaka togsende n looge, tɩ pagba sẽn da get a yella na n wũus wa wala. B sũur sãamame tɩ b toosd b yãoogo. Niniv wẽnda ko-baoor sẽn wurg n daannẽ. B toond n boonda tãb-biisã sẽn zoetã la ba a ye ka yaasd ye. Lebga: zɛɛ-y ligdi, zɛɛ-y sãnem, zɛɛ-y tɩ ka sɛt ye, yaa yõod ne yõodo! Tɩ sɩd ya zɛɛbo, wãabo, sãoongo. Raood sɛɛme, kars saooda kalwaare, yaa nen-soabga. Tẽng ninga sẽn ya bõnyẽesa gãaga lebga bõe? Bõnyẽ-poala ra bee be n gũud b rɩɩbo. Bõnyẽ-raooga sã n da yit n na n bao a rɩɩbo, bũmb da ka saagd n pẽneg a kamba ye. Bõnyẽega ra yõgda a kamb yĩnga, a pag yĩnga. A gãagẽ rũms n same, a gãagẽ nemd pa sɛt ye. Dũni fãa Soaala n yete: «M na n yika ne foo, Niniv, m na n yõoga bilim-bilm niyns f sẽn tar n zabdẽ wã, f kom-bɩɩba na n paa zabrẽ. M na n sɛɛsa f fãabã, b kõn le wʋm fo sẽn tʋm b rãmba koɛɛg ye.» Yell ne tẽng ninga sẽn nonga zɩɩm daagre! Yell ne zirẽ-be-rãmb tẽnga! Yell ne wagdb tẽnga! Yell ne fãadb tẽnga! Kelg-y bʋʋre, yaa kaas sẽn kiigd bʋʋre. Kelg-y bʋʋre, yaa bilim-bilm nao rãamde! Kelg-y bʋʋre! Yaa wiidi nao bʋʋre. Wed-dʋʋdba kaooga zabre, sʋʋsa widgda b bugum, kãna yãgda wa saaga. Sẽn ki yaa zãma, kũuma vɩlmame n dɩg, naoor ka tõe n kẽne n ka lak kũum ye. Niniv, pʋg-yoaad bãnde, f neerma, f fan-teeda ra lubda neba. F da raada dũni rãmba ne f bagrã la f yoobã. Rẽ n so tɩ m na n yik ne foo, maam n yete, maam, Naaba-Wẽnde. M na n zẽka f fuug n tãag f nenga, tɩ bu-zẽmba fãa yãe f yãnde, tɩ f buuda fãa yãe f paoogre. M na n vu-f-la begdẽ n dẽgem-fo, n kams neba fãa tɩ b wa la-fo. Ned ninga fãa sẽn na n yãenda foo na n wẽnemda a neng, la a yeel: «Niniv la woto! A lebga raboogo. Ãnda n na n kũm a nimbãanega. Ãnda n na n wa maas a sũuri?» Niniv, fo yɩɩda Tɛɛb, Nil kʋɩlga sẽn da gũbgi t'a gũbgra meng neerem yɩɩd lal-gũbri, n kok-a zĩig zãnga bɩ? Yaa Nubi la Ezipt n da kõta laog ka tɛka. Ypt ne Libi rãmba n da sõngd-a, zabr sã n yiki. M sok n gese, ne rẽ fãa b ka tall a nebã n loog pa-weere, b ka fẽd a kom-bɩɩba so-tiisẽ? B pida b nanamsa ne bãeense, n dɩk-ba n pʋɩ sẽn tõog-b bãmba wala b zu-noog pʋɩɩre. Fo me wakat n ta, Niniv. Toog na wʋm-f tɩ looge. Fo me na n baoo zĩig n soonde. Fo tãnsoben-dota wẽnda kankam-rẽemse. Miimda kankangã tɩ fãa sʋʋge, tɩ sẽn dat-a fãa rɩtẽ. Ges f buuda neba, yaa rabɛɛmb wa pagb bala. F tẽnga kʋɩlens pakda b toore, tɩ bɛɛba kẽedẽ. Yaa bugum n dɩ kʋɩlensa sogdse. Bao-y koom n bĩng, zabra yĩnga, Niniv rãmba, zẽk-y lal-gũbrã. Kẽ-y tãnnaokẽ n tab tãndo; dɩk-y tãn-koɛɛm-wamde n wẽ tãn-koɛɛma. Bãng-y tɩ y na n kiime, y na n paa zabrẽ, bɩ y na n paa bugumẽ, bugum ninga sẽn na n dɩ y tẽngã. Y na n looga wa sʋʋr sẽn loogd ne kood vãado. Niniv rãmb da yaa wʋsgo wa kalwaare. Lɛɛbdb ra pida Niniv, b ra yaa wʋsgo wa ãds sẽn be yĩngri. B sõora yaa wa sʋʋr sẽn lʋɩ pʋtẽ, la fãa gill loogame. Sẽn da get-b tẽnga yelle da yaa wʋsg wa sʋʋre. Tʋʋma taoor dãmba wẽnda bõn-yɩgdi sẽn dʋʋgd tuuda zug, n soond yʋng waoodo, la sõor sã n yẽege, b yɩkdame la ned ka mi b sẽn kẽedẽ ye. Ned kõn tõog n togs ye. Asiri dĩma, f soaalba gãandame n ka na n le yik ye. Tãnsoaben-dãmba me boto. Buuda neba zoeeme n dʋ tãmse la ned ka be n na n le tigim-b ye. Yaa yel-beed n lʋɩ f zugu. Neb niyns fãa sẽn wʋm yell ning sẽn pak fooma wẽeda nug-pogse. Ãnda la f toolma la f wẽnema ka namse, naoor a yi, naoor a tã? Ad Wẽnd sẽn wilg bũmb ning bãngd a Abakuk. Soaala, m na m bool-y lame tɩ y wa sõng-ma n ta wakat bʋgo, tɩ y ket n pa kelgdẽ? M na n kell n kaasdame la m gomd pãn-tõoga yelle, tɩ y ka wat m fãagre? Bõe yĩnga la y bas tɩ m yãet yel-beedo, yaa bõe la y ne pãn-tõogã n sĩnda? M goabga, m dɩtgo, m sẽn lebẽ fãa yaa pãn-tõogo, yaa bʋʋdo la zaba. Woto la noor lebg zaalem, tɩ b ka le kaood bʋ-tɩrg ye. N-yẽe! Nin-wẽng yaanda nin-sõngo, zemsgo sor lebga so-buka. Ges-y bu-zẽmbã, yaa Naaba-Wẽnd n gomde, ges-y la y pɛleng yɩke, tɩ y yɛɛse. Yaa tʋʋmd la m na n tʋm tɩ y ket n vɩ. Yaa tʋʋm-bãnde, la ned sã n togse, y kõn deeg ye. N-yẽe! M na n waa ne Kalde rãmba, sũ-to-neba, neb zɩɩm sẽn tʋʋle, neb sẽn saad zĩis fãa, n zɛɛd b taab tẽnse! Buud kãnga pãng la a raood ka be to ye. A pãnga la a bʋʋm, a pãng la a zu-zẽkre. B wiidi tĩig yɩɩda ãbga, n yɩɩd digd-n-yĩidsa rẽnna. B wed-dʋʋdba yii yɩɩg n watẽ, b fõta wa sɩlg sẽn baood a rɩɩbo. Kalde rãmba pida ne pãn-tõogo la ad b sẽn wate. B pa lebd goabg bɩ rɩtg ye. B sẽn yõg tãb-biisa sõore: bãng bĩisri. Buud kãnga toog ka be ne naab ye. A laada tẽnga soaalba. Tãnsoben-dota ka yɛɛsd-b ye. A samda tãndo lalsa sɛɛga, n paam n kẽ. B loogda wa sob-raoogo, n teem zĩiga. Ad-y b geta b pãnga wa b wẽnde. Al yʋʋm sẽn zãre ka yãmb la Soaala Pãng soaba, mam Wẽnnaama, mam nin-sõngã sẽn ka kiida bi? Yãmb zĩndiga buud kãngã, t'a kao d bʋʋdo, Soaala, Pãng soaba, m soondg pĩiga. Yãmb nina yaa sõma wʋsgo ne y tõog n ges wẽnga, yãmb kõn sak n ges pãn-tõog ye. Bõe yĩng marsã tɩ y neẽ la y sĩnda, tɩ b tʋmd b tʋʋm yoodo? Bõe yĩnga la y sĩnda tɩ wẽn-kɩɩs na n vel nin-sõngo? Yãmb maanda ne ninsaalba wala y sẽn maand ne mogr zĩm, ne rũm-yaalsa y sẽn basd tɩ b rugd yaarã. Babilon rãmba yõgda neba wala b sẽn yõkd zĩif ne lɛooga n yiisd-b ne sũ-noogo kãsenga. B lɛɛgd n kʋʋda b zulumsa maando, n yõogd tɩdare b yĩnga. B yetame tɩ yaa bãmb maasem yĩng la b paamd b rɩ-bɛda la b rɩ-noodo. Woto wã y na kell n bas bɛɛ wã t'a wõod a sʋʋse la a tar neba kʋʋbo, tɩ vʋʋsg la nimbãan-zoeer ka beẽ? Mam na n yalsa yĩngri, m gaosg zugu, mam na n yalsa wa sẽn tog n gũ-a tẽngã sẽn zao a gaosga zugu, n bãng Soaala sẽn na n leok-m bũmb ninga, n bãng b sẽn na n bʋk m sũura ne koɛɛg ninga. Dẽ la Soaala leok maam n yetẽ: «Gʋls f sẽn ne bũmb ninga, gʋls-b walg zugu, gʋls bedre tɩ kareng yɩ naana. F sẽn ne wã na n wa-la a wakato, ba sã n wẽnd a na n kaoosame, a na n wa-la a wakato. Gũ ne saagre; yaa tɩlɛ t'a wa la pʋs n ka na n le kaoos ye. Ad-y pãn-tõog soab wuka ne nagre n ka mi sẽn segd ye. A ka mi tɩ sõmblem vɩɩm la nin-tɩrg vɩɩm ye.» Rãam sã n tar pãnga a tõe n zãmb-f lame la sẽn teeg-a a meng pãng ka paad a zĩigẽ ye. A sẽn mi yaa a yaag a noor wala bʋg-tẽnga, la wala kũum, bũmb pa sekd-a ye. A woonda buuda toor-toore n kẽesd a soolme, wolgda a ye rũnna n wolg a to beoogo. A sẽn ka mi bala yaa t'a sẽn yõk b rãmb n deeg b tẽngã na n wa pusga laad a poorẽ la woto la b na n wa yeele: «Bʋk ne bʋko! Pãn-tõog soaba! M ba wagdr samda a sẽn zu, la na n yɩɩ woto n ta da-bʋre a ka mi tɩ yaa sam n samd taab ye.» B na n wa yẽeg-f-la vugr bala, fo sẽn dɩ b rãmb samda na n waame n wa miim-f wa taanga n loog ne b laog naana naana. Yaa tẽns ka tɛk la f zɛ yã la yaa dũni wã zãng n na n wa zɛ-fo tɩ ninsaalb zɩɩm la f raagyã tɩ pãn-tõog la f maan tẽngã, Zerizalɛɛm ne a kẽedbã. Bʋk ne bʋko! Gomda m ba ro-meta! Wẽdgame n deeg f to zĩiga tɩ f rat n ti-la f roogã taaba sẽn ka tõe n taẽ ye n paam n põs ne a ka neng rãmba nus yõkre. Bãng tɩ woto wã yaa yãnde la f bao n na n kõ f zaka yaa neb ka tɛk yõor la f rat n gʋsge yaa f meng vɩɩm la f rat sãame. Lalsa kug na n naaga taab m kelme la yaa sug-raadã n na n yãb n soke. Bʋk ne bʋko! Gomda ne m ba tẽn-meta! Tẽnga meeb tʋɩɩsa zɩɩm zugu, yaa zɩ-raagd n met a tẽnga. Woto ka yit Wẽnd Pãng Soaba nengẽ sɩda, Adem biis tʋʋma yõodo bugum n mi nadgra fãa nadga zaalem. Wakat n wate tɩ tẽnga na n pidi ne Soaala ziira bãngre, n pid wa mogr sẽn pid ne koom. Bʋko ne bʋko! Gomda ne m ba Rã-yũuda! A yũnugda a tũud-n-taaga rãama kalemame t'a wa tõe n lub neda t'a wa tõe tɩ f fʋk f zãnde. Ad b sẽn na n tɩgs-f bũmb ning wakat kãnga, ka na n yɩ ziiri, na n yɩɩ yãnde, na yɩ-la f me yũ la f fʋk f zãnde. Soaala sũ-puura wamd n na n daag f zugu, la woto f yʋʋra kilsgu poore, f paoor meng-meng n na n pʋge. Pãn-tõog ning f sẽn maan Libã wã na n lɛɛg n wɩbga foo, we-rũms niyns sẽn tɩ soond be wã, fãa na n yõg n koodame, pãn-tõoga sẽn maan ne tẽnga la a nebã, pãn-tõoga sẽn maan be yĩnga, ninsaalba zɩɩma sẽn daag be yĩnga. Wẽn-naandsa yõod la bʋgo? Yaa kut bala la belgem-belgem. Yõaka belgdame tɩ bũmb la a teeg yã, la yaool n yaa bõn-muk la a rõog yã. Bʋk ne bʋko! Gomda ne m ba ra-pɛɛsa! Fo yeta ra-giiga: «Yik yĩngri,» ka rẽ bɩ f yet kugri sẽn ka tʋba: «Nek f gõeem la yik n togse tɩ bũmb la f wat n na n wilgi.» Bũmb togsend la d sɩd ne, yãgda ne sãnem la wanzurfu, la ka vʋʋsd wa nin-vɩɩg ye. Sã n ya Soaala, bãmb zĩ-la b ro-sõngẽ. B sẽn dat yaa tẽnga fãa bas bʋʋr bãmb taoore. Woto ya pʋʋsgo, bãngd a Abakuk pʋʋsgo. Pʋʋsga yaa sɛɛg yõkre. Soaala, Soaala, m wʋma y noora sẽn togsã, la rabeem bal n tar-ma, Soaala paam pẽgr yʋʋma sẽn tong taabã y tʋʋm sõma wã y sẽn tʋma yĩnga! Yʋʋma sẽn watã le berg-y y tʋʋm bãna tõnd ninsaalba nifẽ. Ba y sã n be bʋʋm n yikd y sũur ne-do, baasgo wilg-y tõnd y nimbãan-zoeere. Soaala-Wẽnd yii Tema n watẽ, Nin-sõnga yii Parã tãnga. Yĩngr pida ne b ziiri tɩ tẽnga pid ne b pẽgre. Soaala watame n yãgd ne vẽenem. Wĩnto-kãn a yiibu n tond b nugẽ, b pãnga la b mum b nugẽ. B lʋɩɩsda bã-longdem b taoore, tɩ yĩn-wɩngr pʋgd b poore. B yalsa b nao zugu la tẽnga la b magyã. B gesa Adem biisi tɩ b sɩng rigbu. Tẽn-kʋdem wẽnnẽ tãmsa vigsdame, tɩ tãn-bi wã kell n sut zãnga. Yaa so-kʋda la b le rɩke. Mam yãee Kusã rãmb roto la fãa lebga rabood n dɩga; Madiã tẽng rota sug zũndga zãnga. Soaala, yaa ne kʋɩlsã la yãmb sũura fõt bɩ? Yaa ne mogrã, la yãmb sũur puug bi? Yaa y sũurã n puugi tɩ y zomb sawatã wa wiidi, n zomb-b wa b soga bilim-bilm, tɩ y na n zab y raood zabre bɩ? Y zãada y tãpo, y nugẽ, y zãada y nugẽ wa kãna, y sẽn da kãab tɩ y na n toola beed ning fãa. Tẽnga me wurgame n tãoosd a koom wa pɛɛma. Tãmsã yãenda yãmba la ad-y b sɩnga rigbu. Mogra ningda a koɛɛga n tãoosd a ko-wiisa yĩngri. Wĩndga la kiuugã wʋmda y pɛɛma sẽn fɩɩnde, b yãeta saag-sʋʋsa sẽn yãgd goalma tɩ wĩndig ne kiuug na n pa b zĩigẽ. Soaala sũur puugame tɩ b saagd tẽngã la yaa bu-zẽmba nao la b tabda. Y yi-la y buuda fãagr yĩnga y yi-la y dĩma fãagr yĩnga. Y fõka nin-wẽnga roog sugri, y sarma a rota lals zãnga. Yãmb deesda bɛɛba zab-teedo n wẽneg n wurd b zutu. B ra fõt n kẽeda maam wa sɩlmande, b ra wat n na n yaam-m lame wala sẽn maand ne b sẽn tõog a soab fãa. Yãmb tuka sor mogr zug ne y wiidi, tɩ ko-wiisa zẽkdẽ la b sigd ne pãnga. Mam wʋma rãamdã tɩ rabeem yõk-ma bʋʋra kɩtame tɩ m no-gãnda rigda; zũnzũur n kẽ m kõabã, tɩ kam-wers sẽb m gĩina. Daara la m da yɛs sɩɩ n gũudẽ, m gũuda bɛɛba zu-beeda raare, n na bob zabre n fãag m menga. M sẽn ne nanda, m neeme tɩ kankang ka ningd puud ye, bugsuntund ka womd biis ye. Oliviye rãmb dõosg ka yõod ye, pʋt ka rɩlgd a koaad ye, wubr ka le tar pesg ye, nag-gãagẽ nag-bil meng ka ye. Ne rẽ fãa yaa Soaala la m sũ-noogo, yaa bãmb la m Fãagda. M Soaala yaa m Wẽnd la m pãnga. B kɩtame tɩ m karse lebg wala yĩsr rẽnna, la tãmsa zut la lolemd marsã. Yɩɩla naab yɩɩndame tɩ kʋnde, ruudg la bɛɛl wẽedẽ. Woto yaa koees niyns a Sofoni sẽn paam Soaala nengẽ a Amon biiga a Zoziyas sẽn waa n ya Zɩɩda dĩma. A Sofoni, yaa a Kusi biiga, t'a Kusi yaa a Gedaliya biiga, a Amariya yagenga, a Ezekiyas yagen-tʋbra-kẽega. Soaala-Wẽnd gomda woto: «N-yẽe! M na n menesa fãa tẽnga zugu. M na n menesa neba la rũmsi, m na n menesa yĩngr luiila la mogr zĩifu, m na n luba nin-wẽnse, la m na n yiisa ninsaalba tẽnga zugu.» Soaala n yeele. M na n zẽka m nugu n zab ne Zerizalɛɛm kẽedba fãa, ne Zɩɩda neba fãa. M na n yiisa Zɩɩda tẽn-peelmẽ bũmb ning fãa sẽn ket n wẽnd a Baal waoogre. M kõn le sak tɩ b tẽeg a maan-kʋʋdba meng yell ye. M na n zaba ne sẽn dʋʋd-b rot zutu n waoogd yĩngr ãdsã, n zab ne sẽn ka yɛs-b zĩ-yɛnga. Bãmb dãmb n wẽende tɩ yaa maam, Naaba-Wẽnd, la b pʋgda la b naag n pʋgd wẽn-naand a Milkom. M na n menesa sẽn zãagd-b ne maam, Naaba-Wẽnde, n pa kot m sõngre, n pa kot m vẽnegre. Bas-y bʋʋre Soaala-Wẽnd taoore, tɩ b sũ-puura raar kolgdame! N-yẽe! Soaala segla maoongo, la b zoe n yɩlga b sẽn bool b rãmba. Daara sẽn watã, maam, Naaba-Wẽnd, maoonga raarã, m na n sɩbga taoor dãmbã la rĩm-biisã ne neb niyns fãa sẽn yer bu-zẽn-futu, n tũud rog-n-mik paala. Maoonga raare, m na sɩbga neb niyns fãa sẽn kẽed-b wẽnd dooga yaare. M na sɩbga sẽn pidsd-b zu-soab zaka ne arzɛk b sẽn paam ne zãmbo la pãn-tõogo. Maam n le yete, maam, Naaba-Wẽnde, tɩ m maoonga raare, Zerizalɛɛm dãmb na wʋm kɛleng, Zĩma rignoorẽ. Kũmkũm na sãd Kẽedpaalgo la tãmsa na wulumd ne bʋ-raase. Kaas-y yã, Teoogẽ dãmba tɩ bala Kanaã neba fãa na n kiime, sẽn maand-b leobg fãa na n loogame. Baraare m na n widga fitila, m na n vɛɛsa Zerizalɛɛm m na n zaba ne neb niyns sẽn gãe ne bãane, wala rãam sẽn dɩgle t'a rabɩlla tisgi, la b yet b sũurẽ: Soaala pa tõe fɩ, b pa tõe wẽng bɩ neer ye! Bɩ b bãng tɩ b arzɛk na n lʋɩɩ fãadb nusẽ, tɩ b rot sẽege; b mee roto la b kõn kẽ ye, b sela bugsuntungu la b kõn yũ b rãam ye. Naaba-Wẽnd sũ-puura raar kolgame, a wata ne yãgbo. Daara na n yɩɩ kelem bag-bag raare, kelem n pa tẽed fãagr daare, kelem ba f ya gãndao-maasre. Na n yɩɩ sũ-puur daare, namsgo la rigb daare, lika la sawat sabla daare, wulgu, zĩ-boog daare. Badaare tãb-biisa na n peeba tõntõogo la b na n tãsa b zabr tãsga la b na n taka zabre ne tãnsoben-dotã la b gasda sẽn lug n kul yĩngrã. M na n kɩtame tɩ yel-beed paam nebã la b na n kẽna wala zoeense tɩ b beega, Soaala-Wẽnnaam. B zɩɩma na n daaga zĩig zãnga wala toma sẽn yɛdg tẽngã, tɩ sẽn ki-ba lob wala sagdo, tɩ b be be n põogdẽ. Soaala sũ-puura raare ka wanzurf bɩ sãnem n tõe n le fãag ned ye. Tẽnga fãa na n dɩɩ bugum, b sũ-fõora bugum, tɩ bala b na n waa ne yel-beedo, b na n menesa tẽnga kẽedba fãa gilli. Adem biisi, tags-y neere, zoe-y yãnde n teem y manesem. B sẽn na n sẽeg yãmb raar a ye wa mooda nan ka ta ye. Soaala-Wẽnd sũura sẽn na n fudg a bugum n waag-y daara nan ka ta ye. Wẽnemd-y n tees Soaala, yãmb fãa, tẽng zug nin-bõonese, sẽn deegd-b noya; bao-y zemsgo, sak-y sulg-m-menga: tõe tɩ y põse, Soaala sũ-puura raare. N-yẽe! Gaza, na n lebga we-raoogo, Askalõ na n lebga raboogo. Wĩnto-sʋka la b na n dig Asdod dãmba; Ekrõ rãmb na n digame n yiis b tẽngẽ. Yell na pak-y, yãmb fãa sẽn yi Kaftor n wa kẽed ka, n vɩ mogra noorẽ. Ad Soaala sẽn leokd-y poorẽ: Kanaã, Filisti rãmba tẽnga, m na n wã-f lame, m na yiisa f neba fãa. Mogra noorã na n lebga rũms kɩʋng zĩiga. Rũm-kɩɩmba na n mee wuba, b piis yĩnga. Mogrã noore na n yɩɩ a Zɩɩda bu-kellã soolem, b na n kɩɩma b rũmsa be, la zaabre, b na n tɩ gãanda Askalõ rota pʋga. Ade, Naaba-Wẽnde, b Wẽnnaama, na n lʋɩɩsa b toogo tɩ b yella manege. Naaba-Wẽnd n yete: «Mam wʋmame tɩ Moab la Amon kamba laadame la b paoogd m buudã. B tʋʋs-a lame la b kẽ n wedga a soolma n paas b rẽnda. Yaa rẽ yĩnga la m wẽend ne m menga, maam, dũni fãa Soaala, a Israyɛl Wẽnnaama, tɩ sɩd wa m sẽn vɩ wã, Moab ne Amon na n wãa zãnga wala Sodom la Gomor. B tẽn-peelma fãa na n lebga zĩ-peen-daaga, gõos zĩiga, tẽng yamsem sẽn sãame; mam bu-kellã n na n wa zɛ-ba, la b soog b tẽngã. Dẽ n na n yɩɩ b wilg-m-menga sɩbgre tɩ bala b paooga dũni fãa Soaala buudu; b tʋ-a lame la b reega a tẽnga bogre n sooge. Soaala-Wẽnd na n yɩɩ toaag ne bãmba. B na n menesa wẽn-naandsa gilli. La bu-zẽmba gilli, ned kam fãa a tẽngẽ, na n waooga Naaba-Wẽnde.» Soaala-Wẽnd n yete: «Yãmb me, Nubi rãmba, m zabra sʋʋga na n pogl-y lame tɩ y ki.» Soaala-Wẽnd na n yika ne yãmb me, nug goabg rãmba la b na n wãa Asiri. B na n waa ne Niniv lʋɩɩse. A pʋs n na n lebga zĩ-peen-daaga. Tẽnga vẽenema na n pida ne yir rũmsi la rũms a taaba. Lalsa sẽn me gils-gilsi n ka lʋɩ wã zutu, la viuug luiila la kos-ki na n soonde. F sã n kolg be yaa luiili bʋʋr bal la f wʋmda la f sẽn ne yaa raboogo. Sẽn ya raoog fãa kao n dɩgame. Yaa woto la a na n baase, tẽng ninga sẽn da pẽgd a mengã t'a kẽedba ra tẽed tɩ bũmb kõn maan-bã, n tẽed tɩ Niniv taar ka be moogã. Ade, a ka lʋɩ? A ka lebg rũms na-tẽnga? N-ye! Sẽn looda be pĩida a noor la a fɩɩnẽ. Yell na n paka Zerizalɛɛm, tẽn-tõata, n pak tẽng sẽn pid ne wẽnga la pãn-tõogo! A pa kelg Soaala boolla ye, a pa reeg saglga ye: a pa pelg a pʋg ne a Soaala, a pa teeg b sõngr ye. Tẽnga pʋgẽ, kug-zĩidba yaa gɩgma sẽn ningd b rãamde; bʋ-kaoodba yaa zaabr digd-n-yĩidsi sẽn pa rɩt n kell yibeoog no-soak ye. A bãngdba yaa yʋ-baoodba, zirẽ dãmba. A maan-kʋʋdba ka zãad te-sõma wã wa sẽn segd ye, b kɩɩsda Soaala noore. Soaala yaool n keta tẽnga pʋga. B raab la zemsga zĩndi tɩ wẽnga meneme. Beoog-beoog fãa b wilgda bõe n zemse, la bõe n ka zemse. Ne rẽ fãa nin-wẽnsa tara b tʋʋma sẽn wat ne b yãndã. Le yaa Naaba-Wẽnd n gomde: «M wãa bu-zẽmb wʋsgo; b ro lug-luga rʋʋgame, ned ka le kẽnd b soya zut ye, b tẽnsã sarmame, ned ka le be be ye. Mam da yetame: Zerizalɛɛm dãmba na yaa n zoe m nifu, b na yaa n deeg m saglgo; woto wã kõn yɩ pakr tɩ m wãa-a ye, kõn yɩ pakr tɩ m pids m sẽn yalsa ye. Kato! B ka zɛɛg ne bũmb a to sã n ka b tʋʋm wẽna. Rẽ yĩnga, gũ-y-ma, Soaala n gomde, gũ-y daar ninga m sẽn na n yik bʋʋd ne yã, tɩ bala m da yeelame tɩ m na n tigma bu-zẽmbã, n tigim rĩundu, n kiig m sũ-puurã b zutu, m bas tɩ m sũura widg a bugum n dɩ tẽnga zãnga.» Soaala-Wẽnd le paasdame: «N yẽe! M na tedga bu-zẽmbã. M na peka b noorã tɩ b pẽg-ma, maam, Naaba-Wẽnde. B na n naaga taaba n waoog-ma. Ba sẽn be-b Nubi kʋɩlsa rʋʋnde na n waa ne kũuni n pʋʋs ma.» Maam, Naaba-Wẽnd n gomde: «M waoonga raare, yãnd kõn le yõk-fo, m buudu, f yel-kɛga yĩnga la f sẽn beeg maama yĩng ye. M na n zãaga ne-fo f kamb niyns sẽn pid ne wilg-m-mengã. M na sɛɛsa wilg-m-men-tʋʋma m tãn-sõnga zugu. M na n keesa m menga fo kamb niyns sẽn ka mi zẽk-m-menga la sẽn ya naong rãmba, neb sẽn na n kos-m tɩ m sõng-ba. A Israyɛl bu-kellã kõn le maan sẽn ya kegr ye, b kõn le yag-m zirẽ ye, b zelemd kõn le tudg b taab ye. B na tõog n dɩ la b gũsi tɩ ned ba a ye ka yɛɛs-b ye.» Kelem sũ-noogo, Siõ, kaas sũ-noogo, Israyɛl! Noog f sũuri zãnga, Zerizalɛɛm! Soaala basa taale n lebs b kãab beedã. B kɩtame tɩ f bɛɛba kʋɩ tĩiga. Soaala, a Israyɛl Dĩma bee ne foo. B pãnga labsa, Zerizalɛɛm dãmb kõn le zoe yel-beed dabeem ye. Ad daar n wate, Zerizalɛɛm, la b na n yeelame: «Da zoe rabeem ye, Siõ tẽnga! Da bas raood ye! F Soaala-Wẽnnaam bee ne foo, b tara pãnga la b na sõng-f tɩ f maan raoodo. B sũura nooma ne foo, b nonglma waa n kõ-f-la vɩɩm paalga. F neba me kaasda sũ-noog f yĩnga, wa kibs daare.» Soaala-Wẽnd n paasde: «M na n menesa yel-beedo, m na n zãag-f-la ne f yãndã. Daar n wate tɩ m na n sɩbg neb niyns fãa sẽn maan-b yãmb pãngã. M na n tɩpa sẽn paam-b sãmpoagã, m na n le waa ne pa-wetã. Ãndũni rãmba ra sẽoosdame la b ra pursd yãmba, m na n teka rẽ fãa n kõ-y yʋ-sõngo la ziir. Wakat kãnga, yaa maam, Naaba-Wẽnd, n gomde, m na n tigs-y-la kaanẽ. M na n teka y pɛtã. M na kõ-y yʋ-noogo la ziir dũni rãmba sʋka.» Dĩm a Dariyus naam yʋʋmd a yiib soaba, kiuug a yoob soaba, kiuuga pipi daare, Soaala-Wẽnd goma ne bãngd a Aze. Soaala yeel-a lame t'a taas b koɛɛg a Zorobabɛl, a Sealtiyɛl biiga, Zɩɩda kombere, n paas maan-kʋʋd kãsenga a Zosadak biiga a Zozuwe: «Yaa woto la dũni fãa Soaala gomda: ‹Buud kãnga neba yetame tɩ wakat ninga b sẽn na n le maneg n me m dooga nan pa ta ye.› Ad maam, Naaba-Wẽnd, leokre: ‹Y sẽn getã, segdame tɩ yãmb kẽed zag-neeba, tɩ m dooga yaool n lʋɩ zãng n dɩg bɩ? Rẽ n so tɩ m yet tɩ y tags y sũur pʋgẽ n ges yɛla sẽn ya to-to. Yãmb bʋda wʋsgo la y pa tigs wʋsg ye. Y pa tar sẽn na rɩ n tɩge, y pa tar sẽn na yũ n noog y sũur ye. Y pa tar sẽn na yeelge n dig y waood zãng ye. Y sẽn tog n yao y tʋʋm-tʋmdba ne ligd ninga yaa waa y rɩk-a lame n sui kor-wurung pʋgẽ. Dẽ la maam, y Wẽndã, dũni fãa Soaala, yet tɩ y tags n ges y yɛla sẽn be zĩig ninga. Modg-y n dʋ y tãnga zugu n wa ne raado n le yik m doogã. Maam n wilgd-y, maam, Naaba-Wẽnd, tɩ ya ro-kãng pʋg la m na n deeg ne sũ-noogo, waoogr ning y sẽn tog n waoog-ma. Yãmb da gũuda tɩgre, la kood faagame; yãmb ninga y kood baoorẽ, tɩ m kẽes bugd y baoorẽ la yaa bõe yĩnga? Maam n sokde, maam, Naaba-Wẽnde, dũni fãa Soaala. Ad-y ka bũmb a to, yaa m dooga sẽn lʋɩ zãnga tɩ yãmb ned kam fãa bas-a n yaool n manegd a roog n ka vʋʋsdẽ ye. Yaa rẽ yĩng la saag mong a koom, tɩ tẽng me tõdg biis wombo. M waa ne ware y tẽnga pʋgẽ, y tãms zutu, y oliviye pʋtẽ, y alkam pʋtẽ, y bugsuntund pʋtẽ, y wãk sẽn kõrgd zĩig ning fãa. Yɩɩ naong ne ninsaalba, n yɩ naong ne rũmsi; y tʋma zaalem.› » A Zorobabɛl, a Sealtiyɛl biiga, n paas a Zozuwe, maan-kʋʋd kãsenga, a Zosadak biiga, n paas pa-wetã, fãa kelga Soaala-Wẽnd koɛɛga, bãngda Aze sẽn taas bãmbã. B kelg-a-la wa bũmb sẽn sɩd tog ne kelgre. Yɩɩ woto la bãngda Aze pids tʋʋmd ning a sẽn deeg Soaala nengẽ la buuda sakame n deege. Buuda sẽn sak kelgrã la Soaala leok a Aze woto: «M na zĩnd ne yãmba, maam n kãabd-y rẽ, maam, Naaba-Wẽnde, yãmb Soaala.» Soaala-Wẽnd pidsa ne raoodo Zɩɩda komber a Zorobabɛl, n paas maan-kʋʋd kãseng, a Zozuwe, la pa-weta fãa la b yikame n sɩng n na n le maneg n me Wẽnnaam, dũni fãa Soaala roogo. Meeba sɩnga yʋʋmd kãng bala, kiuug a yoob soaba pisi la a naas daare. A Dariyus naama yʋʋmd a yiib soaba, kiuug a yopoe soaba pisi la a ye raare, Soaala koɛɛg le taa bãngda Aze: «B kos-a lame t'a sok woto a Zorobabɛl, Zɩɩda kombere, a Sealtiyɛl biigã, maan-kʋʋd kãseng a Zozuwe, a Zosadak biiga la pa-wetã: ‹Yãmb sʋka ãnda n ket n tẽr pĩnd wẽnd dooga sẽn da tar ziir ningã? La yãmb sẽn get-a rũnna wã a yaa wãn-wãna? A ka lebg zaalem yãmb nifẽ sɩda? Yaa rẽ me la m yet-fo, Zorobabɛl, keng f sũuri! Keng f sũuri, Zozuwe, Zosadak biiga! Keng-y sũuri tẽnga rãmb fãa. Sɩng-y tʋʋma tɩ m bee ne yãmba, maam y Wẽnde, dũni fãa Soaalã. M tẽra m sẽn kãab-y bũmb ning m sẽn waa n yiis-y Ezipt tẽnga. M na n kell n paa yãmb sʋka, woto wã da zoe-y rabeem ye. Woto la m gomda, maam, Naaba-Wẽnde, dũni fãa Soaala, tɩ sã n yɩ bilfu, m na n miima yĩngr la tẽnga, mogre la tẽn-koɛɛngã. M na n leeba bu-zẽmba fãa lɛbla. B arzɛka fãa na n wa sama ka, la m yet-y lame tɩ wẽnd dooga na n le paama a pĩnd ziirã. Maam n so dũni wã fãa sãnem la wanzurf. Woto wã wẽnd do-paalla ziir na yɩɩg pipi soabã la yaa ro-kãng pʋga la m na n zĩnd n tool yãmb m laafi. Yaa maam n kãabd-y rẽ, maam, Naaba-Wẽnde, dũni fãa Soaalã.› » Dĩma a Dariyus naam yʋʋmd a yiib soaba, kiuug a wɛ soaba pisi la a naas daare, Soaala le goma ne bãngd a Aze. Woto la Naaba-Wẽnde, dũni fãa Soaala, goamda: «Kos maan-kʋʋdba tɩ b leoke yell kãnga poorẽ. Sok-ba n gese: ‹Ned sã n yondg a fuugẽ nemd sẽn ya maoong nemdo, la a fuuga sɩɩsa wa buri, rɩɩbo, rãam bɩ kaam, rɩɩb buuda fãa, rɩ-kãng me tõe n boolame tɩ rɩɩb sẽn welg toor Wẽnd yĩng bɩ?› » La maan-kʋʋdba leokame tɩ ka tõe ye. T'a Aze leb n yeele: «La ned sã n sɩɩs bõn-kɩɩnga, n wa sɩɩs rɩɩbo, rɩɩb kãng na n dẽgmame bɩ?» Maan-kʋʋdba leokame tɩ: N-yẽe! A Aze yeel-b lame: «Ad Soaala koɛɛga: ‹Ad-y yaa woto me ne tẽn-kãnga rãmb ne b tʋʋma. M sẽn getã, b sẽn wat ne bũmb ning fãa maan-kugra zugu, ad-y b wata ne rẽgdo.› » Soaala le yeelame: «Ges-y bũmb ninga sẽn na n maane marsã tɛka. Y sẽn waa n nan ka sɩng kuga rɩgsgo m dooga meeba yĩngã, bõe n da maande? Ned sã n da sok tɩ kooda sẽn dʋʋg n na n koosa yaa pet a wãn dẽnna, b yetame tɩ yaa pisi la yaool n yaa piig rẽnna. Sẽn tõsd-b bugsuntunga biis me ra maanda boto; b yetame tɩ b waa n kiiga pet pis-nu, mik yaa pisi bala. Ad-y yaa maam n wa ne kɩɩms kolkoodo, n wa ne gãnem la sapɩlem n sãam y koodã, la y pa lɛɛg n kẽ maam y Soaala ye. Maan-y gũusgu neere, ges-y yɛla sẽn na n yɩ marsã, dũnna raara tɛka. Rũnna raarã, dooga sɩngrã, yaa kiuug a wɛ soaba pisi la a naas daare. Ning-y rẽ y pʋtẽerẽ. Y neeme tɩ bũmb ka le ket baoorẽ ye, bugsuntundu, kankamse, tɩɩs niyns sẽn womd b biisa wa poaloangã, oliviye la tɩɩs a taaba ka wom fɩ. Bãng-y tɩ rũnna tɛka m na n sudga m kũuna y zugu.» Badaare, kiuuga pisi la a naas raare, Soaala le waa n kõ-la a Aze koɛɛga. B yeel-a lame t'a wilg woto Zɩɩda komber a Sealtiyɛl biig a Zorobabɛl: «Maam, Naaba-Wẽnde, dũni fãa Soaala, ad-y m na n miima yĩngri la tẽnga. M na n deega ãndũni rãmba fãa naam la m lub b dĩm dãmbã. M na n luba bilim-bilma ne b soaalba. Wiida na n kiime la wed-dʋʋdba na n kʋʋ taaba. Badaare, Zorobabɛl, m sõgne, m na n kõ-f-la tʋʋmde. Mam yĩnga fo na n lebga wa bũmb ning m sẽn tar n tikd m sɛba t'a kõt kaset tɩ b yii mam nengẽ; foo la n yãkda tɩ f na yɩ m na-yir-dao-a-ka-yelle. Yaa maam, dũni fãa Soaala n yeele!» Dĩma a Dariyus naam yʋʋmd a yiib soaba, kiuug a nii soaba, Soaala-Wẽnd goma ne a Zakari, a Berekia biiga la a Ido yagenga. B kõ-a-la noore t'a yeel Israyɛl kamba woto: «Maam, dũni fãa Soaala, sũur puuga al wʋsgo ne yãmb ba rãmba. Lɛɛg-y n wa kẽ-y Soaala, tɩ mam me na le bao y zĩiga. M kãabd-y-la rẽnna. Sõng-y n da wa yɩ wala y yaab rãmb ye. Pipi bãngdba da yeel-b lame: bas-y y so-wẽnse la y tʋʋm wẽnse. La bãmb ka wẽneg n ges maam, b ka kelg maam ye. Yãmb ba rãmba ka ket ye. Bãngdba me ka ket ye, y mii rẽnna. La ade, mam sẽn yeel bãngdbã, m sõgen-kamba, tɩ b togs bũmb ningã, ad-y ba rãmba waa n kong n deegame. B teema zʋgo. B reegame tɩ m tall-b lame wala m sẽn da wilg-ba la wala b vɩɩma la b tʋʋma sẽn da tog ne.» Dĩma a Dariyus naam yʋʋmd a yiib soaba, kiuug piig la a ye soaba, Sebat kiuugu, kiuuga pisi la a naas daare, Soaala-Wẽnd goma ne bãngd a Zakari, a Berekia biiga, la a Ido yagenga. Ad a Zakari sẽn yãende. M gãanda yʋngo n yãe rao sẽn zom wed-zẽega n yɛs tuud sʋka, bãg-faagẽ. Daoã poorẽ, wiidi a taaba n da yɛse, tɩ b kõbga ya zẽega, tãmpʋʋre la pɛɛlga. Tɩ m sok-a: «M zu-soaba, wed-bãmba makda bõe.» Malɛk ning sẽn da gomda ne maama leokame: «M na n wilg-f lame.» Raoã zĩnda tuuda sʋka n le paase: «Yaa Soaala-Wẽnd n tʋm-ba tɩ b saag moogo.» Wed-dʋʋdba wilga Soaala malɛka sẽn da yɛs tuudẽ wã bãmb sẽn yãende. B yeelame: «Tõnd saaga tẽnga n nan watẽ, la d yãendame tɩ tẽnga zĩi ne laafi la bãane.» Tɩ malɛka yeel woto: «Dũni fãa Soaala, yaa yʋʋm pisopoe marsã la y sũur puud ne Zerizalɛɛm la Zɩɩda tẽns a taaba. Y na n mong-b-la y nimbãan-zoeerã n ta da-bʋre?» La Naaba-Wẽnd kedg n leoka Malɛkã gom-noodo, goam sẽn maagd sũuri. Malɛkã sẽn da gomd ne maamã yeelame tɩ m wilg dũni fãa Soaala koe-kãnga: «Mam nonga Zerizalɛɛm la Siõ tãnga ne nonglem kãsenga. M sũura yaool n puuga wʋsgo ne bu-zẽmbã sẽn zĩ n ka yɛɛsd baa fɩ wã. M sũura dag n nan ka fudgd zãng ye la b waa ne yelle n paase. Rẽ yĩnga m yetame, maam, dũni fãa Soaala, tɩ m le wẽnemda m neng ne nimbãan-zoeere n tees Zerizalɛɛm. M na kɩt tɩ b le me wẽnd dooga be. M na kɩt tɩ b le tẽeg wĩir n mag n me. Yaa maam, dũni fãa Soaala n gomde.» Malɛka kos-m lame tɩ m le moon woto: «Ade, dũni fãa Soaala koɛɛga: ‹M tẽnsa nan ka tar sũ-noog zãng ye, yaa sɩda, la Soaala na n le wa bʋka Siõ sũuri, Zerizalɛɛm la b yama na n le wa kẽ.› » Mam sẽn zẽk m neng yĩngri m yãenda bũmb a to: yɩɩl a naase. Tɩ m yeel Malɛkã sẽn da gomd ne maamã: «Bõe yɩɩl la woto?» T'a leoke: «Yaa bu-zẽmb niyns yɩɩl sẽn tã Zɩɩda, Israyɛl ne Zerizalɛɛm dãmb n sẽeg dũniya.» La rẽ poore Soaala-Wẽnd wilg-m-la sẽeb a naase. Tɩ m soke: «Nin-bãmba wat n na maana bõe?» Tɩ b leoke: «B wat n na n yɛɛsame la b tus n lub bu-zẽmb niyns sẽn yik zabre ne Zɩɩda tẽnga, n sẽeg a neba, la b maand b sẽn dat marsã.» M sẽn le zẽk m nenga m yãee woto: Raoa sẽn zãad wĩiri a nugẽ n na n mage. Tɩ m sok-a: «Fo rabda yɛ?» T'a leoke: «M dabd n na n tɩ maga Zerizalɛɛm n bãng a yalem ne a woglem sẽn zem tɛka.» Malɛka sẽn da gomd ne maama, kolga malɛk a to sẽn da wat a segbo. A kõ-a-la no-kãnga: «Zoe n tɩ wilg da-sãngã, sẽn zãad-a wĩirã tɩ Zerizalɛɛm ka tog m me lals n gũbg ye, tɩ neba la rũmsa sẽn na n vɩɩnd a pʋgẽ wã na n yɩɩ ka tɛka.» Ad Soaala meng sẽn yete: «Mam meng n na n gũbg tẽnga wa bugum lalga la m na n puka m ziira be.» Maam, Naaba-Wẽnd, n gomd ne-yã: «Yãmb fãa m sẽn da sẽeg ween-vɩɩs a naasã, lɛɛg-y n zoe-y n wa-y yã! Bas-y nug goabg sẽnẽ rãmba la y wa! Zerizalɛɛm dãmb sẽn ya pa-wet Babilon, ning-y pãnga n zoe n wa!» Sɩda dũni fãa Soaala sẽn tʋm maama tɩ m wa taas-y b koe kãsenga, gomda woto ne buud niyns sẽn kẽes-b yãmb yemdo la b zɛ yãmbã: «Ned ning fãa sẽn le sɩɩsa yãmba, a soab bãng t'a sɩɩsa m fãa-fãa. Ade, m na n yika ne bu-zẽmbã. Bãmb sẽn kẽes b rãmb yemdã na zɛɛ bãmb me, wa b sẽn zɛ b taabã. Woto, yɛla sã n wa pidsi, y na bãnge tɩ yaa dũni fãa Soaala n tʋm maam.» Soaala le yetame: «Kɩdem n lange, Zerizalɛɛm, tɩ m wat n na n zĩnda yãmb sʋka. Badaare, buud kʋʋng na n kẽe maam, dũni fãa Soaala, n lebg m buudu la yaa yãmb sʋk la m na n zĩndi. Dẽ sã n wa beẽ, y na bãng tɩ sẽn tʋma maam yãmb nengẽ wã yaa dũni fãa Soaala. Soaala na n sooga a Zɩɩda wala b meng pʋɩɩre, b tẽn sõngẽ wã, la Zerizalɛɛm n na n yɩ b yamleoog tẽnga. Sẽn vʋʋsda ne yõor yɩ sɩɩ, tɩ vugr bala Soaala na n yi-la b ro-sõngẽ.» Soaala-Wẽnd kɩtame tɩ mam yãe a Zozuwe, maan-kʋʋd kãsengã; a ra yɛsa yĩngri, Soaala malɛka taoore. Sʋtãan waa n yaasa maan-kʋʋda rɩtgo n na n dõd-a. Soaala malɛka yeela Sʋtãana: «Bɩ Soaala-Wẽnd pag f noorã, Sʋtãana, bɩ b pag f noorã tɩ bãmb yam n kẽ Zerizalɛɛm! A Zozuwe ka wẽnd ra-giiga b sẽn foog bugmẽ sɩda?» A Zozuwe da yɛsa malɛka taoore, n yer fu-rẽgdo. Tɩ malɛka na n yeel a tũud-n-taasã tɩ b yees a futã. A yaoolame marsã n yeel a Zozuwe: «M pidga f beegrã la m na n le yeelg-f-la kibs futu.» A kõo noor tɩ b fõgneg pugl neere a Zozuwe zugu. Dɩlla, malɛka taoore b yeelga a Zozuwe fu-paala la b kõ-a-la pugla. La Soaala malɛka yaool n zẽk a koɛɛg n yeel a Zozuwe woto: «Ad dũni fãa Soaala sẽn pʋlemde: ‹F sã n deeg m noya, n tũ wa m sẽn datã, f na lebg m do-sõngã ne a zaka gũuda, la m na kẽes-f sẽn tʋmd-b mam tʋʋmda sʋka.› » «Kelg neere, Zozuwe, maan-kʋʋd kãsenga, yaa dũni fãa Soaala n gomde, kelg-y neere, yãmba, maan-kʋʋdba, a tũud-n-taase, yãmb fãa yaa fãagra sẽn wata makre. M na n waa ne sõgne b sẽn boond a soab tɩ Bullã. Ad kugr la m na n dɩgl a Zozuwe taoore. Kugra yaa a ye la bõn-pɩndi a yopoe n be a zugu. Kug kãng zugu m na n gʋlsa m gʋlsem la daar a ye bala, m na n yẽesa tẽn-kãnga rẽgdã. N-ye, maam n yet rẽnna, mam dũni fãa Soaalã! Badaare, Wẽnd n gomde, y na n boola taaba n sõse y sãbse, la y kankams tẽngre.» Malɛkã sẽn da gomd ne maama lebg n wa neka m yama wala b sẽn nekd ned a gõeemẽ. A soka maam: «Fo nee bõe?» Tɩ m leoke: «M nee sãnem bug-roagendga ne a kaam laaga, a zugẽ. Fitil dãmba yaa a yopoe. Fitil fãa laong da kẽeda kaama laagẽ. Bug-roagendga goabg la rɩtgo b ra yalsa oliviye.» M kedgame n sok malɛkã sẽn da gomda ne maamã: «M Zu-soaba, bõn-bãmba yaa bõe makre?» Malɛkã sẽn da gomda ne maamã leok-m lame: «Fo ka mi bõn-bãmba sẽn makd bũmb ninga?» Tɩ m yeele: «Ayo, m zu-soaba!» La malɛkã leok-m-la woto: Malɛka yeel-m lame tɩ m taas a Zorobabɛl gomd kãnga: «Dũni fãa Soaala yetame: ‹Ad ka na n tũ ne f yãoog pãnga bɩ ne f kang wɩkre la f na n tʋm f tʋʋmda ye, na n tũu ne maam, Naaba-Wẽnd maasem.› » A paasame: «Tãng meng ne a bedrema kõn yɩ bũmb sẽn na n wa ne gɩdgre a Zorobabɛl yĩng ye. A na sarm-a. A na n yiisa a pʋgẽ kugr ning sẽn na n dogl wẽnd dooga rĩira tẽnsʋka. Neba fãa na n yeelame: kug kãnga be neere, kug kãnga be neere!» Soaala-Wẽnd le taas-m-la koe-kãnga: «A Zorobabɛl nugu n sɩng wẽnd do-kãngã meebo la a na baas-a. La rẽ sã n wa yɩ, y na bãnge tɩ yaa maam, dũni fãa Soaala n tʋm maam yãmb nengẽ. «Fitils a yopoe wã makda Soaala nin a yopoe sẽn ne bũmb ning fãa sẽn maand tẽng zugã.» D ka tog n sãbs pipi tʋʋma n yet tɩ b yaa tʋʋm bõones ye. D noog d sũur wʋsgo tɩ d ne-la a Zorobabɛl sẽn le sɩng wẽnd dooga meebo.» Mam le sokame: «La oliviye tɩɩs a yiibã sẽn be fitilsa roagendga goabg la rɩtgã yaa bõe makre?» M le kell n pẽdg n sokame: «Oliviye tɩɩg wil a yiibã sẽn yegl sãnem dibli a yi sẽn ya yogdo tɩ kaam sẽn ya neer wa sãnem tũud be n duugdẽ wã, dẽ me yaa bõe makre?» T'a leok-ma: «Fo ka mi-laa?» Tɩ m leok tɩ ayo! Tɩ malɛka yeele: «B yaa neba a yiibã b sẽn welge n na n zɛ ne kaam tɩ b lebg dũni fãa Soaala sõgen-kamba.» M le zẽka m neng yĩngri la m yãee woto: sebre sẽn tõe n pil wa rebre n da laand yĩngri. Malɛkã sẽn da gomd ne maama yeelame: «Fo nee bõe?» Tɩ m leoke: «M nee sebr sẽn laande; a woglem yaa kãntɩɩs pisi, a yalem kãntɩɩs piiga.» Tɩ malɛka yeel maam: «Woto yaa kãab wẽnga sebre, kãabg sẽn na n lʋɩ tẽnga fãa zugu. Sebra neng a ye gʋlsame tɩ b na n diga wagdba fãa n yiis tẽngã. Neng a to wã zugu b gʋlsame tɩ b na n maana boto me ne neb niyns fãa sẽn ka pidsd b pʋlengo. Dũni fãa Soaala yetame tɩ yaa bãmb meng n kãabd kãab wẽngã. A na n lʋɩɩ wagdr fãa la pʋlen-vaal soab fãa zakẽ la mam yʋʋr yĩnga a na n paa be la fãa na sãame, dooga kuga wala a sugra da bɛda.» Malɛkã sẽn da gomd ne maama kolg n yeel-m lame: «Zẽk f nenga n gese yaa bõe n watã!» Tɩ m soke: «Yaa bõe?» T'a leoke: «Yaa peoogo sẽn pid ne tẽnga fãa yel-wẽna.» La peooga ling sẽn da ya namdã fõkame, la m yãenda pag sẽn zĩ a pʋgẽ. Tɩ Malɛkã yeele: «Yaa wẽnem naaba.» La malɛka tusa pagã n lebs peooga pʋga n yaool n lebs namda lingã n fõgneg a noorã. M sẽn zẽk m neng yĩngri m yãee pagba a yiibu. B ra yɩgda yĩngri. Sobg n da tusd-ba la b ra tara pɩgs sẽn wẽnd kʋl-pesg rẽnna. Bãmb n tʋk peoogã n loog yĩngri. Tɩ m sok malɛkã sẽn da gomd ne maamã, b sẽn tar-a n dabd zĩig ninga. T'a leok-ma: «B rabda Sinear tẽnga n na n tɩ me roog be a yĩnga, la b maneg zĩig be n dogl-a.» M le zẽka m neng yĩngri la ad m sẽn yãe: bilim-bilm a naase, n da yit tãms a yiib sʋka, la tãmsã da ya kutu. Wed-zẽese n da vuud pipi bilim-bilma; a yiib soaba wed-zɩlse a tãab soaba wed-peelse: la a naas soaba yaa wed-bolle. Tɩ m sok malɛkã sẽn da gomda ne maamã: «M zu-soaba, bilim-bilma ne b wiidã makda bõe?» Tɩ Malɛka leok-ma: «Yaa dũni wã sobd a naasã. B ra bee dũni wã fãa Soaala taoore la b zãagda ne b marsã.» Bilim-bilm ninga sẽn sog wed-zɩlsa teesa nug goabga. Wed-peelsa teesa nin-taoore. Wed-bola teesa nug rɩtgo. Wed zẽesa kolgame la b kosame n na n saag tẽngã. Soaala yeel-b lame: «Kẽng-y, saag-y tẽngã.» La b saaga tẽngã. Soaala boola maam n yeel-ma: «Ad sẽn dabd b nug goabgã na n tɩ sika mam Vʋʋsma beelẽ.» Soaala-Wẽnd goma ne maam n yeel-m woto: «Reeg sẽn be-b yembda tẽngẽ wã kũuni, a Eldayi, a Tobiya la a Yedaya sẽn tall n wa wã. La f kẽng a Sefaniya biiga, a Zosiya, yiri tɩ yaa be la sẽn yi-b Babilona waa n kẽ. F na n dɩka ligdã ne sãnema n maan naam pugla n fõgneg maan-kʋʋd kãsenga a Zosadak biiga, a Zozuwe. Dẽ poore bɩ f wilg-a: ‹Dũni fãa Soaala gomda woto: Ad-y ned n be ka n boond tɩ Bõn-Bulli. A sẽn taẽ fãa, a na bulame, la yẽnda n na n me m do-sõngã. N-ye! Yaa yẽ n na n le me wẽnd doogã, yaa yẽ n na n ning naam teedo. A na n zĩnda a goeela zugu n dɩ naam m buuda zugu. Maan-kʋʋd la b na n zĩndg n yegl-a. Bãmb b yiiba sʋka no-koeemd buud kõn zĩnd ye.› Naama pugl na n paa wẽnd doogẽ wã n tẽegd a Eldayi yelle, a Tobiya, a Yedaya la a Zosiya yelle. A Sefaniya biig a Zosiya sɩd yɩ kõt-zãng soaba.» Neba na n yii yɩɩga n wa me wẽnd doogã, tɩ rẽ la y na n bãnge tɩ yaa dũni fãa Soaala n tʋm maam yãmb nengẽ. Sẽn wilga fãa na n taasame, yãmb sã n sakd neere Wẽnnaam, y Soaala. Dĩm a Dariyus naam yʋʋmd a naas soaba, Kislewu kiuugu, kiuug a wɛ soaba, kiuuga daar a naas soaba, Soaala-Wẽnd gomd kãnga n taa a Zakari. Betɛl tẽng neba tʋma a Sarezɛr la a Regem-Melɛk la tẽnga rãmb neb kẽere tɩ b kẽng dũni fãa Soaala roogẽ wã n tɩ yõk sɛɛga, la b sok maan-kʋʋdba la bãngdba n ges sã n ket n yaa modgr ne bãmba tɩ b yãbe la b loe noor yʋʋmda kiuug a nu soaba wala b sẽn da sɩng n maandẽ? Dẽ la dũni fãa Soaala kõ-m noore tɩ m leok maan-kʋʋdba la tẽnga neba fãa: «Ade, yaa yʋʋm pisopoe rõanna la y loet noor la y yãbda, kiuug a nu soaba la kiuug a yopoe soaba, m sok n gese da yaa mam nonglem yĩnga la yãmb da maan boto bɩ? Y sã n dɩtẽ la y yũuda ka y meng sũur la y noogd laa?» Al pĩnd-pĩnda, bãngdba da zoe n taas-y-la m koeese. B kos-y lame tɩ y maan gũusgu ne yell a woto. Dẽ wakatã tɩ Zerizalɛɛm ne a tẽn-toosa da ket n vɩ ne laafi, tɩ tẽnga nug rɩtgo ne mogra noor ket n pid ne neba. Soaala-Wẽnd goma ne a Zakari n yeel-a: «Ad m sẽn da gomd n yet tɩ y maan gũusg ne bũmb ninga la woto: Kao-y bʋʋd ne sɩda la y vɩɩnd vɩɩm sẽn pid ne bʋgsem la nimbãan-zoeere, ãnkam fãa ne a saam-biiga. Da yɩɩ nin-toose ne pʋg-kõore, ne kɩɩba, ne sãana, la naong soab ye, la y da tags tags wẽnse y sũurẽ ne taab ye.» Neba ka tʋlg n kelg-m ye; b yĩgsa maam; b yẽda b tʋba sẽn na n yɩlẽ n da tõog n wʋm ye. B kʋɩɩsa b sũuri wa kugr ninga sẽn ka tar mak-n-taag ne keglma ye. B pa tʋlg n kelg dũni fãa Soaala sẽn zãms-ba ne tẽn-kʋdem wẽnnẽ bãngdba ye. Yaa rẽ me yĩng la Soaala puug b sũur wʋsgo. Soaala leok-b lame: «M sẽn waa n sagend-b tɩ b tũ m sẽn wilgã, b ka tʋlg n kelg-m ye, woto la mam me yeel tɩ m kõn leok-ba, b sẽn waa n yõkd m sɛɛga ye. M sẽeg-b lame, n kẽes tẽnsẽ b sẽn da ka mi; woto b basa b poorẽ, tẽng sẽn lebg vɩʋʋgo, tɩ ned ka le yit bɩ a kẽeda a pʋgẽ ye. Woto b basame tɩ tẽng sẽn da ya tẽn-nooga lebg zĩ-peen-daaga.» Dũni fãa Soaala taas-m-la koe-kãnga: «Maam, Naaba-Wẽnde, m nonga Zerizalɛɛm ne nonglem kãsenga, m nonglma ne a rʋʋga kʋɩlse. Yaa rẽ me yĩng la m yeta tɩ m lɛɛg n wa kẽ Zerizalɛɛm, m lɛɛg n wa kẽe Siõ. B na n boola Zerizalɛɛm tɩ tẽn-sõngo, n bool Siõ tɩ Wẽnd tãnga, tãn-sõngo. Ad Wẽnd noor gomde: nin-kẽemse, pʋg-yãanse, sẽn tikd-b rasaar fãa, na n leb n wa zĩnda Zerizalɛɛm. Tẽnga na n le pida ne kom-bõonego, kom-dibli la kom-pugli la b na n le sigla b reem Zerizalɛɛm soya zutu. Dẽ fãa wẽnda wa bũmb sẽn ka tõe n yɩ sɩda, ne Israyɛl bu-kella ye, la m tõeeme, maam, dũni fãa Soaala, tɩ sɩd yɩ boto. M kãabd-y lame, m na n fãaga m buuda neba sẽn be pa-weere, yaanga bɩ nin-taoore. M na n le tall-b lame n wa, tɩ b zĩnd Zerizalɛɛm tẽnsʋka. B na yɩɩ mam neba la mam me na n yɩɩ bãmb Wẽnnaam, tɩ m zã-b ne pʋ-peelem la zemsgo.» Ad dũni fãa Soaala sẽn yete: «Bɩ y keng y sũuri, yãmb fãa sẽn ket n wʋmd kãab mood niyns m sẽn da yeel bãngdba tɩ b taas yãmbã, b sẽn waa n le sɩng wẽnd dooga meebã. Pĩnda ned da ka le yaood ninsaalba la rũmsa tʋʋmd ye. Bɛɛba ra gɩdga yi ka n kẽ ka, tɩ rẽ wakatã tɩ m da basa neba tɩ b yũud taab zɩɩm. La marsã m ka na le maan ne bu-kellã wa m sẽn maan pĩnda ye. M na n waa ne laafi tẽng zugu. Bugsuntunda na n le woma biisi, tẽnga kood na n le sakame. Saaga na n le nii sõmbo; m na n kõ kũun kãens fãa m bu-kellã. Zɩɩda la Israyɛl, yãmb wẽnega buud niynsi Soaala-Wẽnd sẽn yãk b rãmb bark tẽng zugu. Ad m sẽn fãagd-y marsã la y na n lebga buud ning sẽn pid ne Wẽnd barka kaseto. Woto wã da zoe-y rabeem ye, keng-y y sũuri!» Dũni fãa Soaala yeta woto: «M sẽn da waa n yeel pĩnd tɩ m na n bas-y-la ne pɛta, y yaab rãmba sẽn da puug m sũura wakato, ad-y m da ka lebs m zelemd ye. Marsã m lebsda m zelemde, m tʋllame marsã n maan Zerizalɛɛm la a Zɩɩda neere. Da zoe-y rabeem ye! Ad yãmb sẽn tog n maan bũmb ninga: Togs-y taab sɩda, kao-y zemsg bʋʋdo, laafi bʋʋdo. Da tʋlg-y wẽng ne taab ye, da wẽen-y wẽen-faad ye, tɩ yɛl a woto buud la m kis wa fãa-fãa, maam, Naaba-Wẽnde.» Dũni fãa Soaala taas-m-la koe-kãnga: «M yet-y lame tɩ no-loeer niyns y sẽn maand kiuug a naas soaba, a nu soaba, a yopoe soaba, la piig soaba na n lebga a Zɩɩda yĩnga, kibs bɛd daare, sũ-noog daare. La y sẽn na n bao bũmb ning n yɩɩda yaa sɩda la laafi vɩɩm ne taaba.» Ad dũni fãa Soaala sẽn le paasde: «Bu-zẽmba la tẽns a taab neb ka tɛka na n le wa kẽe Zerizalɛɛm. Tẽng a ye neb na n yeela tẽng a to rãmba: ‹Wa-y yã, wa-y tɩ d tɩ pʋʋs dũni fãa Soaala, wa-y tɩ d pẽneg-ba.› B na n paamame tɩ b leoke: d na n tũ-y lame. N-ye! Neb kʋʋngo, tẽns sẽn tar pãng na n wa baoo maama Naaba-Wẽnde, Zerizalɛɛm, la b na n wa pʋʋs-m lame. Wakat kãnga, yaa maam, Naaba-Wẽnd, n yete, neb piig sẽn gomde goam toɛ-toɛ yã na n gãda Zʋɩf fuug noore n yeel-a: ‹Tõnd tʋl n wa zĩnda ne yãmb Zʋɩf rãmbã tɩ d wʋmame tɩ Wẽnnaam bee ne yãmba.› » Ad Soaala sẽn yet tɩ m wilgi. B koɛɛga tata Adrak la Damas tẽnga. Ka Israyɛl neba yell bala la Soaala get ye, b geta ninsaalba fãa yelle. B gomda ne Damas yaka, a Amat, n gomd ne Tir la Sidõ, tẽns sẽn pid ne yẽesem la nus tʋʋmd bãngre. Tir me-la a tãnsoben-doogo la a kẽesa a pʋgẽ, wanzurf la sãnem wala sor noor sẽn zam ne tãndo, wala soya sẽn pid ne tom. Soaala na n deega a laoga fãa, n tus a lal-gũbrã n lubi, n yõog tẽnga bugum. Askalõ na n yãeeme la rabeem na n yõk-a lame. Gaza me na n digame, n paas Ekrõ t'a sẽn da teeg a soaba lʋɩɩme. Dĩm kõn le zĩnd Gaza, la ned ba a ye kõn le zĩnd Askalõ ye. Bu-kalem-kalem na n zĩnda Asdod. La maam, Naaba-Wẽnd, na n kɩtame tɩ Filisti wilg-m-menga sɛ. M na n deega Filisti rãmb noorẽ rũng fãa sẽn pa kodg nemdo, rũng fãa sẽn kʋ maoong wẽn-naand yĩnga nemdo. Filisti rãmba bu-kell na n paamame tɩ m lebg bãmb Wẽnde wa m sẽn yaa a Zɩɩda Wẽnde. Ekrõ rãmb na n wa naaga m buudã wa Zebuze rãmba sẽn maane. M na n gilgd n geta m soolma la m na n zaba ne a bɛɛba. Ned kõn le kẽ a pʋgẽ ye, ned kõn le wa maan m buuda pãn-tõog ye. M get-a-la marsã ne nonglem. Kɩdem ne f pãng fãa, Zerizalɛɛm! Lang sũ-noogo, Siõ tẽnga! Ad f Dĩma sẽn wat f nengẽ. A yaa zemsg soaba la yẽ n yɩɩd ne pãnga. A yaa sulg-m-meng soaba, la a zomba bõanga; yaa bõn-bila, yaa bõn-yãang biiga la a zom yã. A na n yiisa zabra bilim-bilma Efrayim, a na n yiisa wed-daad Zerizalɛɛm, a na n kao tãbdo, a na n sika laafi bu-zẽmba tẽnsẽ. A soolem na n sɩnga mogr noorẽ n tɩ tãag mogr noore, a na n sɩnga Efrat kʋɩlga noorẽ n tɩ tãag tẽnga sɛtmẽ. Yaa maam, Naaba-Wẽnd, n gomd woto: «Tõnd zooda yĩnga, zood sẽn yõge tɩ maand zɩɩm kaset lʋɩ sʋka, zood kãng yĩnga, m na n yiisa y kamb niyns sẽn pag roogo la roog sẽn wẽnd ko-baoor sẽn ka tar koom. Yãmb fãa sẽn da pag roogo la sẽn da ket n zĩi n saagdẽ, leb-y y tẽngẽ tɩ b le maneg n yika a lal-gũbrã. M zoe n togsd-y-la marsã tɩ m na n dola y namsgã naoor a yiibu ne m kũuni. Zabr yĩnga m na n dɩka a Zɩɩda t'a yɩ m tãpo. M pĩim la a Efrayim; Siõ, m na n pirsa f kamba tɩ b tak zabre ne a Yavã kamba, la m nugẽ a Siõ na n lebga m sʋʋga tɩ m tʋm gãndalsem tʋʋma.» Soaala-Wẽnd na n le siga vugr bal b buudẽ. B pĩima na n tãoo wa sa-yãgbo. Bãmb meng n na n peeb tõntõogo, b na n waa ne nug-rɩtg sa-lugsã. Dũni fãa Soaala na n yɩ b gũuda. Yaa sapɩlem la b na n lobe la b sẽeg bɛɛbã. Sapɩlma na n daaga bɛɛba zɩɩm la zɩɩma na n zoe wa rãam; na n yɩɩ wa maanda zɩɩm sẽn pid zɩ-mesdem laase bɩ sẽn serd maan-kugra yɩdba. La badaare, Soaala-Wẽnd na n fãaga b buudu. B na n fãag-a-la wa rũm-kɩɩm sẽn fãagd a rũmsi. Neba na n wẽnega kug neeb sẽn tablg naam pugla, b na n yãga tẽnga rãmb nini. Tẽnga na pida ne neerem la sũ-noogo. Kom-dibli la kom-pugli na n nooga b sũuri ne alkam la bugsuntund rã-paalga. Kos-y Soaala-Wẽnd sa-koom; saaga yaa bãmb nug kũuni. Kos-y tɩ b na kɩt t'a ni wʋsgo tɩ ned kam fãa pʋʋg bĩm ne koodo. Y sokda y wẽn-naandsa saaga poorẽ la yaa zirẽ bal la b leokd-y. Bagba me ka tar pʋg ye, yaa b sẽn gãand n zãms la b wilgda, n togsd zirẽ-beedo, n kɩt tɩ neba tuumnẽ wa piisi sẽn ka tar pe-kɩɩma. M sũur puuga ne pe-kɩɩm sãamsã. B yetame tɩ b tõe n gesa m buuda yelle; dẽ me la m na n yik ne-ba. N-ye! Maam n yete, maam, dũni fãa Soaalã, yaa m meng m toore n na n ges m bãgra yelle, maam n na n ges a Zɩɩda yelle. M na n tall-a lame n kẽng zabre wa weef sẽn sõngd-m tɩ m maand raoodo. Yaa yẽ nengẽ la m na n yiis nanams buud toor-toore. B na yɩɩ kegems wa kug niyns sẽn tar n tʋɩɩsd roto, kẽnkẽ wa baaf ning b sẽn loet pɛɛl roog, dɩm-dɩm wa zabr tãpo. B fãa na n yɩɩ gãndaado, n tabd b bɛɛba wala b sẽn tagd tom sor zugu. B na n zabame tɩ maam, b Soaala, bee ne bãmba la sẽn zao-b wiidi na n yãee yãnde. M paasa a Zɩɩda pãnga, m na n fãaga a Israyɛl. M na n le talla a kambã n wa b tẽngẽ la m na n wilg-b-la m nonglem wala m zɩ n bas-b ye. M yaa Wẽnnaam, bãmb Soaala, la m na n deega b kosgo. Efrayim neba na n yɩɩ wa tãb-biisi sẽn tar pãnga la sẽn pid ne sũ-noogo wa neb sẽn tɩg rãam. B kamba na n yãee rẽ b me kɩdem, Soaala yĩnga, b na n pida ne sũ-noogo. M na n boola m buudã n le tigim-a; m yeelame tɩ m na n fãag-a lame. B na n le yɩɩ ka tɛk wa pĩnda. M sẽeg-b-la bu-zẽmb sʋka la b sẽn zãag n tɩ be zĩig ning fãa, b na tẽeg m yelle, b na rog kamb be la b na le lɛɛg n wa. M na n yiis-b-la Ezipt la Asʋr tẽnga, n tall-ba n wa tigs Galaad la Libã la vɩʋʋg ka na n sek-b ye. B na n dʋʋga mogrã ne rabeem la maam, b Soaala, m na sigs ko-wiisã. Nil kʋɩlg na n kʋɩɩme. Asʋr wilg-m-menga na n sɛɛme b na n deega Ezipt naam dasaare. M na n paasa m buuda pãnga. Wakat fãa a na n maana sẽn tat m yam. Yaa maam n togsd rẽ, maam, Naaba-Wẽnde. Pak f kʋɩlense, Libã, tɩ bugma rɩɩ f tɩ-bɛdã. Zõond-y n kelem, tɩɩs niyns vãad sẽn ka mi sʋʋgre, ad-y tɩ-kãsensa rʋʋgame. Kelem-y yã, Bazã tɩ-neebã, y googa sẽn da yɛs tɩ ned ka tõe n kẽ a pʋgẽ wã, ad-y fãa na n kɛɛme n dʋʋge. B wʋmda neb niyns sẽn gũud buuda wa piisa waasgo, b ziira wakat loogame. B wʋmda bõnyẽes yãbre. B ra sora b tʋg-tagdẽ Zʋrdẽ kʋɩlg noore la fãa na n yõogame. Daar a ye Soaala-Wẽnd kõ-m-la no-kãngã: «Kɩɩm rũms niyns sẽn sʋk maanda yĩnga. Sẽn daad-b piisa wẽnegdame n koot-ba b toore tɩ b sũur pa kiuusdẽ ye. Sẽn koosd-b piisa yetame: ‹D pʋʋs Wẽnd barka tɩ d lebga arzɛk rãmba.› Sɩda pe-kɩɩmba ka zoet b piisa nimbãaneg ye. Ade, maam n yete, maam, Naaba-Wẽnde, tɩ mam me kõn zoe tẽnga rãmb nimbãaneg ye. Mam na n basa ned kam fãa ne a yaka, la a rĩma. Dĩm dãmba na n wãa tẽngã la m kõn fãag ned ba a ye b nugẽ ye.» Maam n lebg lɛɛbdba piisa pe-kɩɩma, piis niyns b sẽn tar n wat kʋʋbã. M bao pe-kɩɩm dasab a yi, n pʋd dasaar a ye tɩ Zoodo, n pʋd a to wã t'a Lagengo. La m kẽnga piisa gũudem. Kiuug a ye bal pʋgẽ m diga b pe-kɩɩmb a tãabã. M waa n yɛɛ ne piisã tɩ bãmb me yam yi maam. Tɩ m yeele: «M kõn le gũ-y yɛs ye. Sẽn na n ki-a bɩ a ki; sẽn na n kodg a soab bɩ b kodg-a, sẽn na n menem-a bɩ a menem, tɩ b sẽn bas b rãmba dat bɩ b wãb taaba!» M yaool n dɩka dasaarã, a Zoodo, la m kao-a-la gɩrse n wilg tɩ m kao zood ninga m sẽn da yõg ne neba fãa wã. Zoodo kao badaar bala. Piisa raadba sẽn da get maama bãngame tɩ sɩd yaa Wẽnd n da gomd ne maam. M yeel-b lame: «Woto sã n nooma yãmba, bɩ y kõ-m yaoodo; y sã n ka sake, bɩ y base.» B sõda m yaoodo, yaa wakɩ koeems pis-tã. Soaala-Wẽnd yeel-m lame: «Bɩ f tall ligd sẽn zem woto waare n tɩ kɩs yõka t'a yẽneg-a.» M dɩka wakɩ koeems pis-tã wã n tɩ kɩs yõaka, Soaala wẽnd doogẽ. Dẽ poore, m dɩka dasaare a to wã, a Lagengo, la m kao-a-la gɩrse n wilgi tɩ saam-biira sɛɛme, Zɩɩda ne Israyɛl sʋka. Naab a Wẽnd le yeela maam: «Maan marsã wa rũm-kɩɩm yalma, tɩ bala mam menga n na n bao rũm-kɩɩma sẽn ka zugu n kõ tẽn-kãngã. Pesgo ning sẽn menema, a toog kõn zĩnd ne a ye; a kõn tɩp sẽn pogl-a ye; a kõn sõng pãng sẽn sɛɛ ye. La a na n wãba rũm-nobdi wã nemdo al n tol n võ b nao-bendo. Wẽnd na sãam rũm-kɩɩm-yalma, sẽn basd a rũmsi! Wẽnd na koms a rɩtg kanga la a rɩtg nifu, t'a rɩtg nug yɩ kɩɩnga la a rɩtg nif yɩ feoogo!» Soaala koɛɛg ne a Israyɛl. Soaala sẽn yɛdg saagã la b viglg tẽngã koɛɛga. Soaala sẽn kõ ninsaalb yama koɛɛga: «M na kɩtame tɩ Zerizalɛɛm wẽneg wamd sẽn pid ne m sũ-puura rãam. Tẽns niyns sẽn gũbg Zerizalɛɛma sã n yũ-a fãa, a na lub-ba. Na n yɩɩ boto me ne a Zɩɩda, bɛɛba sã n wa gũbg Zerizalɛɛm, a rãama na lub-ba. Badaare m na n kɩtame tɩ Zerizalɛɛm lebg kugri bu-zẽmba fãa sẽn na n tʋlg n zẽke. Neb niyns sẽn na n mak-b kugra zẽkre, ad-y b na n pogla b mense. Woto b na wa n lagem taab n tʋlg a zẽkre. La ad m sẽn yete, maam, Naaba-Wẽnde: ‹Badaare m na n kɩtame tɩ wiida pid ne rabeem, tɩ wed-dʋʋdba pid ne yɩɩre. M na n gũ-la a Zɩɩda la m na n kɩtame tɩ bu-zẽmba wiid lebg zoeense.› Woto la Zɩɩda nanams na n yeel b sũuri: ‹Zerizalɛɛm neba pãnga bee dũni fãa Soaala nengẽ.› Badaare m na n kɩtame tɩ Zɩɩda nanams wẽneg bugum sẽn zomb googo, bɩ bug-vɩleng sẽn ning alkam sẽn kals tẽngre. Goabg la rɩtgo, poorẽ la taoore, b na n sãama b yagsa fãa, tɩ bãmb menga yaool n ket n vɩ ne laafi b tẽngẽ.» Yaa Zɩɩda neba la Soaala na n deng n fãage, la woto a Daviid yagense la Zerizalɛɛm kẽedba, kõn saag n tags tɩ bãmb n yɩɩd Zɩɩda neb a taaba ye. Badaare Naaba-Wẽnd na n gũ sẽn kẽeda Zerizalɛɛm tẽngã; ned ninga sẽn kɩlla lʋɩɩsã bãmb sʋka, na n paama a Daviid meng pãngã, t'a Daviid yagensa na n lʋɩ bãmb taoor n kẽnd wa Wẽnde, n kẽnd wa Soaala malɛka. «Badaare, yaa Soaala-Wẽnd n gomda, m na lub bu-zẽmb niyns fãa sẽn na n zab ne Zerizalɛɛm, m na n wã-b-la gilli. M na n pidsa a Daviid yagense la Zerizalɛɛm kẽedba ne neer baoob yam la Wẽnd sɛɛg yõkr yam. B na n wẽnemd n gesa maam, ned a to wã yĩnga, kãnda sẽn kõs a soaba yĩnga, b na n yãba yẽ soaba wala b sẽn yãbd bi-yend sẽn ki, wala b sẽn yãbd bi-kẽeng kũum. Badaare Zerizalɛɛm na n pida ne wiisgu wala Adad-Rimõ wiisgu, Megido bãg-faagẽ. Buud toɛ-toɛ wã na n wiisa b tẽngẽ. A Daviid zaka na n wiisame, a Natã zaka na n wiisame, pagba toore, rapa me toore. A Levi zaka, a Simeyi zaka na n wiisame, pagba toore la rapa me toore. Buuda sagsa fãa na n wiisame, pagba toore, rapa me toore.» Badaare ko-bundum n na n pusg a Daviid neba yĩnga la sẽn kẽed-b Zerizalɛɛm yĩnga, sẽn na n yɩ-la tɩ b tõog n paam b yel-wẽna rẽgda pekre. Badaare, dũni fãa Soaala n gomde: «M na n yiisa wẽn-naandsa fãa, b kõn leb n tẽeg b yell ye. M na n yiisa neb niyns sẽn boond b mens tɩ bãngdba, la m na n menesa b yamẽ b wẽn-naandsa pʋgbo. Ned sã n ket yãmb sʋka n gomd bãngr goama, bɩ a ba-roaka ne a ma-roaka naag taab n yeel-a: ‹Fo kõn vɩɩnd ye, tɩ bala f yetame tɩ yaa Soaala yʋʋr yĩng la f goamda la yaa zirẽ bal la f togsda.› La a wat n yɛs n gomda a bãngra goama t'a ba-roaka la a ma-roaka na n kõs-a ne sʋʋga. Badaare yãnd na n kẽe bãngdbã b sẽn wat n gomd b sẽn yãendã. B kõn saag n le yeelg maan-kʋʋra fuug ye. B fãa na n yeelame marsã: ‹Ad m n ka bãngd ye, m yaa koaada, n dɩt m pʋt yõodo al m yãadmẽ.› La b sã n sok-a: ‹Yaa bõe sãmpoaga n be f yãoogẽ?› A na n yeelame: ‹M paam-b-la m zo-rãmb nengẽ.› » Yaa woto la dũni fãa Soaala gomda: «Sʋʋga, yik zabre ne m rũm-kɩɩma, yik n zab ne m sẽn yãk a soab t'a yɩ m sõangd sõngã, wẽ pe-kɩɩma tɩ piisa sẽeg zĩig zãnga, la ba pe-bõonesa kõn põs m meng nug ye.» Ad dũni fãa Soaala sẽn le gomda: «Tẽnga fãa pʋgẽ, neb a tãab zugu, neb a yiib n na n ki n kees a ye. M na n fɛɛsame la m na n yɩlga sẽn kell-bã. M na n ning-b-la wa b sẽn ningd sãnem la wanzurf bugmẽ tɩ b paam n yɩlge. B na yõk m sɛɛg marsã la m na reeg b kosgo. M na n boola bãmb tɩ m buudu, tɩ bãmb me yeele: ‹Soaala la d Wẽnnaam.› » Ad Wẽnd sũ-puura daar sẽn wate; badaare, Zerizalɛɛm kẽedba, b na n pʋɩ-la y laoga fãa. Sɩda Soaala na n tigma bu-zẽmbã tɩ b bob zabr ne Zerizalɛɛm. B na n pãba tẽngã n deege, b na n zɛɛ rotã, b na n yõga pagbã, b na n basa tẽnga pʋɩ-sʋka, n loog pa-weer ne pʋɩ-sʋka. Dẽ poore, Soaala-Wẽnd na n yii n zaba ne bu-zẽmba zabr menga. Badaare b nao wã na n yaasa tãng zugu, tãng ning sẽn be Zerizalɛɛm yaangã, Oliviye tãngã. Tãngã na n wesga sʋka, al yaanga n digd taoore, n bas bãg-faag sʋka. Bogr a ye na n sergame n leb goabga tɩ bogr a ye serg n leb rɩtgo. Zerizalɛɛm dãmba na n tũu bãg-faaga sẽn wedg sʋkã n paam n zoe n tɩ tãag Asal tẽnga. Y na n zoee wala y yaab rãmba sẽn maan Zɩɩda dĩm a Oziyas wẽnnẽ; y na n zoeeme, tẽnga sẽn na n miima yĩnga. Wakat kãng marsã la m Soaala-Wẽnd na n sigi tɩ nin-sõma fãa yãagd-ba. Badaare, wĩntoog vẽenem bɩ kiuug vẽenem ka le tar tʋʋmd ye, waood la wulg kõn le zĩnd ye. Daar n na n zĩndi, la Wẽnd bal n mi, zĩiga na n kell n yɩɩ vẽenega, b kõn bãng n welg wĩntoogo ne yʋng ye. Zaabr na n yɩɩ vẽenem. Badaare, ko-vɩɩg n na n pusg Zerizalɛɛm. Kooma pʋɩ-sʋk na n kẽnga yaang mogrã, yamsem mogre, tɩ pʋɩ-sʋka me kẽng nin-taoore mogrã, Tẽnsʋk Mogre. Kooma na n zoe tʋʋlg wakato wa sẽoogo. Wakat kãng la Soaala na n dɩ naam dũni fãa pʋgẽ. Bãmb bal la neba na n waoog wa b Wẽnde, ãndũni rãmb fãa na n gesa bãmb bala wala Wẽnde. Tãmsã fãa sẽn gũbg Zerizalɛɛm na n lebga pʋto, al Geba sẽn be nug goabga n tɩ tãag Rimõ sẽn be nug rɩtgo. Zerizalɛɛm na n zao yĩngri. Tẽnga sɩngda a Bẽnzame dignoorã n tɩ tãag pipi Gõdrã; n sɩng no-kʋdgã, a Ananeyɛl ro-lug-lugã, n tɩ tãag b sẽn kõgd naab rãama zĩiga. Neb na tõog n kẽ n vɩɩnd tẽnga pʋga. Wãab kõn le wã ye la ned kam fãa na n zĩnda ne laafi. B na n kẽe be; kãab-wẽng kõn le zĩnd ye, b na n kẽe Zerizalɛɛm ne laafi. Ad sɩbgr ning Soaala-Wẽnd sẽn na n kõ neb niynsi sẽn na n zab ne Zerizalɛɛm: b na n kɩtame tɩ b yĩng põoge tɩ b ket n yɛs b nao zutu, b nini na n põoga b bogdẽ, tɩ b zelemde põog b noorẽ. Wakat kãng la Soaala na n kɩt tɩ b rig rabeem kãsenga. Ned kam fãa na n yik n teega ne a yaka. Zɩɩda rãmb na n zabame n fãag Zerizalɛɛm. A na deega a yagsa laoga fãa. B na n wʋka sãnem, wanzurf la fut ka tɛka. Yel-beed ning sẽn na n pak ninsaalba na n paka rũmsã. Bɛɛba wiidi, b bõn-weese, b yʋgma la b bõeense, fãa na n kiime. Tẽns niynsi sẽn zab-b ne Zerizalɛɛm, neb niyns fãa sẽn põs-ba na n waa Zerizalɛɛm yʋʋmd-yʋʋmd fãa n wõgemd dũni fãa Soaala taoore n waoog-ba, la b maan Sẽgda kibsa. Buud ninga sẽn ka kẽnga Zerizalɛɛm n waoog dũni fãa Soaala, a bãng t'a kõn paam sa-koom ye. Ezipt buudã sã n ka kẽng Zerizalɛɛm n maan Sẽgda kibsa, a na n paam sɩbgr ning Wẽnd sẽn sɩbgd tẽns niynsi sẽn ka maand Sẽgda kibsã. Yaa woto la b na sɩbg tẽns niynsi sẽn ka na n kẽng b Zerizalɛɛm n tɩ maan Sẽgda kibsa. Wakat kãnga b na n gʋlsa wiidi wã loamba zutu: Soaala-Wẽnd soolem. Wẽnd dooga rʋgdã, rʋgd zaalsã, fãa na n lebga Wẽnd soolem wa zɩ-mesdma laase, sẽn dɩg maan-kugra taoore. La rʋgda fãa sẽn be Zerizalɛɛm la Zɩɩda na n lebga dũni fãa Soaala soolem. Neb niyns fãa sẽn dat-ba n kʋ maoongo na wa n dɩk-ba n dʋg b nemdo. Wakat kãng sã n wa ta, lɛɛbdba kõn le zĩnd dũni fãa Wẽnda roogẽ ye. Ad koɛɛg ning Soaala-Wẽnd sẽn taas a Israyɛl kamba ne a Malasi noore. Soaala-Wẽnd yeta b buudu: «M nong-y lame.» La sã n sok-ba: «Y nonglma kaset la bʋgo?» Soaala leodame: «A Ezayu da yaa a Zakoob saam-biiga, ne rẽ fãa m da nonga a Zakoob, n yaool n bas a Ezayu kɛɛnga. M looga ne bũmb ning fãa a kamba, Edomitsa, sẽn da tar b tãmsa zutã la b tẽnga lebga weoogo la we-yũus tẽnga. A Edom tõe n yeelame: ‹B sãama tõnd tẽnga la tõnd na n yika d raboodo.› Ad m sẽn leokd-ba, maam, Naaba-Wẽnde, dũni fãa Soaala: ‹B rat bɩ b me, m na le wã. B na n pʋda b tẽngã: Wẽng sẽn dɩt naam tẽnga, la buud ninga Soaala sũur sẽn puud ne a soab daar fãa wã.› Yãmba, Israyɛl kamba, y na n yãee rẽ fãa la y na n yeelame: ‹Soaala gãndgda Israyɛl tẽn-peelem n wilgd b pãnga.› » Maam, Naaba-Wẽnde, dũni fãa Soaala yeta maan-kʋʋdba woto: «Biig waoogda a ba, tɩ yem-daoog zoet a zu-soab nifu. La sã n yaa maam, m ka naag n ya y ba la y zu-soab bɩ? Bõe tɩ y pa waoogd-m la y pa zoet m nifu? Y toog ka be ne maam ye la y bee tẽngre n sokdẽ: ‹D sãbs-y-la wãn-wãna?› Ade, yãmb wata ne rɩ-yoodo m maan-kugra zugu. La yãmb yetame: ‹Tõnd paoog-y-la wãn-wãna?› Ade, yaa y nifã sẽn sãag m maan-kugrã. Y sẽn mii n talld rũng sẽn ya zoanga, woabga, bãada n na n kʋ maoong n kõ-ma, y tẽedame tɩ rẽ zemsame bɩ? Sã n ya tẽnga naaba la y kõ rũng a woto buudu, y tẽed t'a sũur na yɩ noogo? Y tẽed t'a na kõ-y y sẽn date? Yaa maam n sokde, maam, Naaba-Wẽnd, dũni fãa Soaalã. La marsã mak-y n na n kos m bũmbu, maam, Naaba-Wẽnde, n kos-m tɩ m zoe m buuda nimbãanega, y tẽed tɩ m na kelge la m reeg y kosgo, tɩ y tʋʋm wẽnsa yaool n dɩg m taoore? M pa tẽed ye! M tẽed tɩ yãmb nin-yend sã n pag wẽnd dooga kʋɩlens n são. Woto y kõn le tɩ yõgen bugma zaalem m maan-kugra zug ye. M pa get-y ne sũ-noog ye, la y sẽn wat ne kũuna ka noogd m sũur ba bilfu. Mam n yet rẽnna, maam, Naaba-Wẽnde, dũni fãa Soaala. Sẽn sɩng dũni wã yaanga n wat taoore, neb sẽn ya buud toor-toore mi-la m pãnga. Zĩig zãnga b wata ne kũun sẽn tog ne ma. Zĩig zãnga b yõogda tɩdare m waoogr yĩnga. Bala m yʋʋra yaa kãsenga tẽnsã fãa yĩnga. Yaa maam n yet rẽnna, maam, dũni fãa Soaalã. La yãmba, yãmb paoogd-m lame la y tagsdẽ tɩ Soaala maan-kugri ka tog ne waoogr ye, la y tõe n waa ne kũun niyns fãa y sẽn date. Y tol yetame: ‹Yaa zɩɩb yoodo la b zɩlgd tõndo.› Y sẽn tar m paoogr la y sẽn tar paoogre, maam m toore, dũni fãa Soaalã. Y kõt-m-la rũms sẽn ya wagdem dũmsi, bɩ rũms sẽn ya wobse, bɩ rũms sẽn bẽede. M yɩta a wãn n deeg maand a woto buudu. Leok-y tɩ m kelge. Yell na pak zãmb rãmba sẽn tar dũms sõma b wubrẽ n yaool n tũusd dũms yoodo n na kʋ maoongo. Yell na pak yẽ soaba, tɩ m yaa dĩm kãsenga la bu-zẽmba fãa zoeta maam, Naaba-Wẽnde, dũni fãa Soaalã, m pãnga sẽn waoog yĩnga.» La marsã, ad Naaba-Wẽnde, dũni fãa Soaala sẽn yet maan-kʋʋdba tɩ b gũus ne bũmb ninga: «Kelg-y-ma la modg-y tɩ m paam waoogr ning sẽn tog ne-ma. Ka rẽ mam na n teka y zu-noogã m sẽn kãabã t'a lebg zu-beedo. M na n maana boto tɩ yãmb n yet tɩ y pa ne m sẽn yet tɩ y gũus ne bũmb ningã sẽn sɩd sek gũusg ye. M zoe n zẽkda m koɛɛg ne yãmb yagensã. Sã n ya yãmb menga yaa rũmsa bĩndu la m na n lob y nenga, rũms niyns y sẽn kʋʋd y kibs rãmba wakato. Y fãa na n naagame n tɩ yõog bugum. Y na bãng tɩ yaa maam, Naaba-Wẽnde, dũni fãa Soaala n kõ no-kãnga, tɩ m datame tɩ m zooda ne a Levi la a Levi yagensa ra sãam ye. D zooda yĩnga m kõ-b-la vɩɩm la arzɛka, m zãms-b-la m waoogre, b reega m noore la b riga rabeem m taoore. Sɩd zãmsg ra be-la b noorẽ, la zãmb da ka be b sũuri ye; b ra kẽnda ne maam, pʋ-peelem la zemsgo pʋgẽ; b ra yiisda neb wʋsg wẽng pʋgẽ. Maan-kʋʋd tʋʋmd yaa a zãmbs neba tɩ b bãng Soaalã. Yaa yẽ la b na n wa sok n bãng yaa so-bʋgo la noora rat tɩ b tũ tɩ yẽ la dũni fãa Soaala no-rɛɛsa. La yãmba, maan-kʋʋdba, yãmb bʋdga sore. Y zãmsga kɩtame tɩ neb wʋsg kẽ moogo. Y sãama d zoodã, maam n yete, maam, dũni fãa Soaalã. La mam na n tusa neba tɩ b sãbs yã la b paoog yã tɩ y ka maand m daab ye la y ka yals y sɩd zĩigẽ daar fãa ye.» D fãa ka tar ba a ye laa? Ka Wẽnd a ye n naan-do? Yaa bõe marsã tɩ d zãmbd taaba n sãamd zood ninga Wẽnd sẽn yõg ne d yaab rãmbã? Zɩɩda rooga neb tʋma ne zãmbo. Yel-wẽnd kãseng la a maan Zerizalɛɛm la Israyɛl tẽn-peelmẽ. Zɩɩda neba pa waoog wẽnd dooga, b zĩ-nongrã, wa b sẽn da tog n waoog-a ye. Woto b kẽe ne pagba sẽn pʋgd wẽn-naandse la wẽn-sãamse. Ned ninga fãa sẽn maand woto, bɩ Wẽnd yiis a roagdb la a kamba a Zakoob buudẽ, ba a sã n yaa maan-kʋʋda. Ad bũmb a to me y sẽn maande: y pʋkda Wẽnd maan-kugrã ne nintãm, y tara kelemse la yãbre, tɩ Soaala ka le gete la b ka le reegd y kũuna ye. La y sokdame tɩ yaa bõe yĩng la b pa le rat y kũuni. Ade, yaa y sẽn da kãab bãmb taoore tɩ y kõn bas y bi-bɩɩlmẽ pag ye. Pʋg kãng n yɩ y pak-n-taaga, yãmb n da bao-a, yãmb n le bas-a. Soaala kɩtame tɩ foo ne f paga lebg bũmb a ye y yĩngẽ la y yamẽ. La y sẽn lebg nin-yendã, bõe la y raabo sã n ka Wẽnd kõ-y kamba? Woto wã, gũus-y la y ra bas y sẽn kẽ kãadem ne pag ning y bi-bɩɩlma wakat ye. M kisa pag yiisgu, m kisa pãn-tõogo. Yaa maam n yet rẽnna, maam, a Israyɛl Wẽnde la dũni fãa Soaala. Bɩ ned kam fãa maan gũusgu la a pids a sẽn kãabe. Y namsda Soaala-Wẽnd ne y goama; la y ka mi ye, n tol n zĩ n sokdẽ: «D namsd-b-la wãn-wãna?» Ade, yaa y sẽn yete: «Soaala nif nee sẽn maand-a wẽnga la b sĩnda.» Ka rẽ bɩ y zĩ n sokdẽ: «Wẽnd ning sẽn nonga zemsga bee yɛɛnẽ?» Yaa woto la dũni fãa Soaala leokda: «Ade, m tʋmda neda, t'a tuk sore m taoore. Soaala y sẽn baood a soaba, na n waa vugr bala n kẽe a roogẽ. Tʋʋm-tʋmd ning y sẽn gũud a soaba watame n na n moon tɩ m na n yõga zood ne yãmba. Ad a sẽn wate!» B waoonga raare ãnda n na n pa vɩɩga, ãnda n na n tõog n yalse? B na n yɩɩ wa bugum sẽn yɩlgd kutu, wala safãnd sẽn pekde. B na n zĩndame n menes sẽn ya rẽgd buud fãa. Wala b sẽn yɩlgd sãnem la wanzurf, b na n peka a Levi yagensã tɩ b tõog marsã n wat ne b kũuni wala sẽn toge. Woto, Zɩɩda la Zerizalɛɛm kũuna na ta Wẽnd yam wa pĩnda. Wala yʋʋm niyns sẽn loogã. Dũni fãa Soaala gomda woto: «M na n wa zĩnda y sʋka n kao-y bʋʋdo. M sẽn na n bool bʋʋda pipi, yaa sẽn tʋmd-b bag-tʋʋma, sẽn yoaad-ba, sẽn ka pidsd b pʋlengo, sẽn ka yaood b tʋʋm-tʋmdba, sẽn namsd b pʋg-kõap la kɩɩb-bi la sãamba, neb niyns fãa sẽn vɩ wa b toog ka be ne maama.» Maam, Naaba-Wẽnd, n gomde, m pa teemd ye tɩ yãmb yaool n wilgd beoog sẽn vẽege tɩ y yaa a Zakoob yagen-wẽnse. Yãmb me maana wala y yaab rãmbã, y ka tũud sor ning m sẽn wilga ye, y ka reegd m noya ye. Lɛɛg-y n wa kẽ maam tɩ mam me kõn bas-y ye, maam n yet rẽnda, maam, dũni fãa Soaala. La m wʋmda y sẽn gomde: «D maanda a wãn n le kẽ Soaala?» M leokd-y lame: «Y sẽn getã, segdame tɩ b tudg Wẽnde? La yãmba, yãmb yẽ tudgda maam. Y tudgd-m-la ne bõe? Yaa ne y kood lemse, la ne y kũuna. Ad-y kãab wẽng n na n dɩ yã tɩ yaa tẽnga gilli, tɩ yaa yãmb zãng fãa n zãmbd maam.» Dũni fãa Soaala gomda woto: «Bɩ y tall n wa teeda bĩngr doogẽ y sẽn tog n kɩsa fãa, tɩ m zaka pid ne rɩɩbo. Maan-y boto n fɛɛs-ma la y na yãend tɩ m pak y yĩnga yĩngr sa-kooma la bark buud fãa na rʋʋg y zugu zembala. Y yĩnga m na tãs sʋya tɩ b ra sãam y kooda ye, tɩ b ra sãam y bugsuntunda womb ye, maam n kãabd-y rẽnna. Bu-zẽmba fãa na bool yãmb tɩ zu-noog rãmba, tɩ vɩɩm noog na n saka y tẽngẽ wã. Dẽ yaa maam, dũni fãa Soaala n gomde.» Naaba-Wẽnd yeelame: «Y gomda goam põaas m poorẽ. La yamb sokdame: ‹D yeelame tɩ bõe n beeg yãmba?› Ad-y y sẽn yete: ‹Wẽnd tũudem yaa zaalem. Tõnd deega b noya, d saka no-loeer la sũ-sãang n datẽ tɩ dũni fãa Soaala tẽeg d yelle, la d ka paam fɩ. D neeme marsã tɩ sẽn zĩ-b ne sũ-noogo, yaa neb niyns toog sẽn ka be ne Wẽnde; sẽn ka bʋʋd-b beoog fare, yaa sẽn tʋmd-b wẽnga. Bãmb pursda raood ne Wẽnde, la bũmb ka maand-b bada.› » Sẽn zoet-b Wẽndã me zĩnda ne taaba. Soaala-Wẽnd yoka b tʋbre, la b wʋmame. Bãmb taoore b gʋlsa tẽegr sebr pʋgẽ neb niyns sẽn zoet-b Wẽnnaama la sẽn teeg-b bãmba yʋy. Dũni fãa Soaala yaoolame marsã n yeele: «M sẽn na n wilg m pãnga raare, m na n gesa nin-bãmba wala m neba. Bãmb n na n yɩ m buudu. M na n yɩ nin-bʋgsg ne bãmba, wala ba sẽn yaa a soab ne a biig sẽn sakd-a. Wakat kãng y na bãng bũmb ning sẽn bak zemsg soab ne nin-wẽnga, n bakd sẽn pʋgd-b Wẽnde la sẽn bas-b Wẽnde.» Maam n yete, maam dũni fãa Soaala, tɩ raar n wate la m sũura na n widga bug-kãsenga. Baraare gom-beeda rãmba la yel-wẽn-maandba na n dɩɩ bugum wa moodo. Bũmb kõn dɩ n kees ye, baa fɩ. Neb niyns fãa sẽn sulg-b meng mam taoorã, ad m sẽn kãabd-b: «M sẽn na n wa ne pãng ning n fãag m neba raarã na n puka wa wĩndg sẽn wat ne fãagre. Y na n paama y meng la y na n yɩga sũ-noogo wa nag-bi sẽn yit-b loɛɛgẽ. Daar ninga m sẽn na wilg m pãngã, y na n fẽda nin-wẽnsã wala sor zug begdo. Maam m yete, maam dũni fãa Soaala.» Tẽeg-y yã a Moyiiz, m sõgna, sẽn zãms yãmb bũmb ningã. Reeg-y la y tũ m sẽn wilg noy-niyns Orɛb tãnga zugu m buud a Israyɛl yĩnga. Dũni fãa Soaala paasa woto: «Ade, m na n tʋma bãngda a Eli tɩ Wẽnd daarã sẽn ya ra-kãsenga, la a kẽesd rabeem nan ka ta ye. A na n wẽnega ba rãmba sũya n tees b kamba, la kamb sũya n tees b ba rãmba, woto kõn yɩ modgre tɩ m wa sãam tẽnga ye.» A Zezi Krista, a Daviid biiga, a Abraam biiga roog sebre. A Abraam n doga Izaak. A Izaak n doga Zakoob, a Zakoob n doga Zɩɩda ne a yaopa, a Zɩɩda n dog a Fares ne a Zara, tɩ b ma yaa Tamar, a Fares n dog a Esrom, a Esrom n dog a Aram, a Aram n doga Aminadab, a Aminadab n dog a Naason, a Naason n dog a Salmon, a Salmon n dog a Booz, a ma la a Raab, a Booz n dog a Zobɛɛd, a ma la a Rut, a Zobɛɛd n dog a Zese, a Zese n dog dĩm a Daviid. A Daviid n dog a Salomo, a ma a Uri paga, a Salomo n dog a Roboam, a Roboam n dog a Abia, a Abia n dog a Asa, a Asa n dog a Zozafat, a Zozafat n dog a Zoram, a Zoram n dog a Oziyas, a Oziyas n dog a Zoatam, a Zoatam n dog a Akaz, a Akaz n dog a Ezekiyas, A Ezekiyas n dog a Manase, a Manase n dog a Amon, a Amon n dog a Zoziyas, a Zoziyas n dog a Zekoniyas ne a yaopa. Bãmb wakatẽ la b vʋk Israyɛl kamb n kẽng Babilon. Babilon yembd poore, a Zekoniyas n dog a Salatiyɛl, a Salatiyɛl n dog a Zorobabɛl, a Zorobabel n dog a Abiud, a Abiud n dog a Eliakim, a Eliakim n dog a Azor, a Azor n dog a Sadok, a Sadok n dog a Akim, a Akim n dog a Eliyud, a Eliud n doga Eleazar, a Eleazar n dog a Matan, a Matan n dog a Zakoob, a Zakoob n dog a Zozɛf, a Maryam sɩda la a Maryam n dog a Zezi, sẽn boond tɩ Krista. Dẽnna yaab rãmba ne b rot sõta woto: a Abraam n taa Daviid, yaa rot piig la a naase. A Daviid n ta Babilon yembdo, yaa rot piig la a naase. Babilon yembdo n ta Krista yaa rot piig la a naase. A Zezi Krista dogma kibar la woto: a ma, a Maryam, da ya a Zozɛf pʋg-bila. La a Maryam sẽn waa n nan ka kul a Zozɛf, a mikame, tɩ ne a Vʋʋsem Sõng raabo, a lebga zɩsgo. A sɩda, a Zozɛf, sẽn da ya nin-tɩrgã, pa tʋlg n gom tɩ yi yɩng ye a tʋlgame bal n soos n bas a Maryam. La rẽ sẽn waa n be a yamẽ, la a sẽn yãe Soaala malɛk a zãmsdẽ, sẽn yeel-a: «Zozɛf, Daviid biiga, da zoe rabeem n deeg f pʋg-bila, a Maryam, f zakẽ ye, tɩ biig ning sẽn sig a pʋgẽ wã yita a Vʋʋsem Sõng nengẽ. Bi-ribl la a na n doge la f na n pʋda a yʋʋr a Zezi: tɩ yaa yẽ n na n sɩd yiis a buuda neba yel-wẽnd pʋgẽ.» La yella yɩɩ woto, n taas Soaala sẽn da togs ne bãngdba noore: Pa-kul na n dɩka pʋga n dog biiga, la b na n pʋda a biigã tɩ Emmanwɛl, dat n yeelame tɩ Wẽnd bee d sʋka. A Zozɛf sẽn neke, a maana wala malɛka sẽn wilgi, a peega a paga, a zakẽ, la a tol n doga a biigã tɩ b pa bãng taab ye; la a Zozɛf pʋda biiga yʋʋr a Zezi. A Zezi doga Bɛtelyɛɛm, Zɩɩde tẽnga, dĩm a Erod naamẽ, la ade, neb sẽn bʋgd ãds yii yaanga n wa Zerizalɛɛm n sok woto: «Zʋɩf rãmb dĩma sẽn dog paalma bee yɛ? Tõnd yãenda b ãdg sẽn puki tɩ d wa n na n waoog-ba.» B sẽn wʋm dẽ, dĩm a Erod ne Zerizalɛɛm tõre yɛɛsame. Dĩma tigma maan-kʋʋdba kãsem dãmba ne sẽn karem-ba n sikã la a sok-b lame n bãng Wẽnd Nedã sẽn na n dog zĩig ninga. «Yaa Bɛtelyɛɛm, Zɩɩde tẽnga, tɩ bãngda gʋlsame: Zɩɩda tẽn-peelmẽ Bɛtelyɛɛm, ka foo la tẽn-bil Zɩɩda ye, tɩ dĩm ning sẽn na n gũ m buuda Israyɛl, na n yila f pʋgẽ.» A Erod soos n boola ãdsa bagbã n na n bãng wakat bʋg taki la ãdga puk-ba, la a tees-b la Bɛtelyɛɛm sore n yetẽ: «Kẽng-y n tɩ sok-y biiga yelle, la y sã n bãng vẽenega, bɩ y lɛɛg n wa togs-ma tɩ m me kẽng n tɩ waoog-a.» Ãdsa bagba sẽn paam dĩma koɛɛga, b rɩka sore; b le yãee ãdgã t'a kẽnd b taoore la a waa n tɩ yalsa sus biiga sẽn da be zĩig ningã. B sẽn yãe ãdgã b sũur yɩɩ noog wʋsgo. B kẽe roogã n yãend biiga ne b ma, a Maryam, la b wõgemdame n waoog-ba; b pagsa b kogendo n yiis b kũuni n kõ-ba: sãnem, tɩdare, ne tɩ-kaam sẽn tar yũ-noogo. Dẽ poore b bãnga b zãmsdẽ tɩ b ka tõe n leb n tũ a Erod nengẽ ye, la b bao sor a to n leb b tẽngẽ. Bãmb loogr poore, Soaala malɛk lika a Zozɛf a gũeemẽ n yeel-a: «Yik n dɩk biiga ne a ma n zoe n kẽng Ezipt tẽnga la f pa be n ta wakat ning m sẽn na n wilg fu; a Erod na n baoo biigã n kʋ.» A Zozɛf yika ne yʋngo n dɩk biiga ne a ma n zoe n kẽng Ezipt tẽnga, la a paa be n tãag a Erod kaalem. Woto la Soaala koɛɛg tõog n taase: M boola m biiga Ezipt tẽnga. A Erod sẽn mik tɩ bagba belg-a lame, a sũur puuga al wʋsgo, dẽ la a tʋm tɩ b kẽng Bɛtelyɛɛm la Bɛtelyɛɛm weoogo n kʋ kamb niyns fãa yʋʋm sẽn pa yɩɩd a yiibu, wala neba sẽn da mak n wilgã. La woto yɩɩ bãngd a Zeremi koɛɛg taasgo: Kɛleng n kelem Rama yãbr la waasgo n waas be: ya a Rasɛl n yãbd a kamba la a tõt belegre tɩ b le ka ket ye. La a Erod kũum poore, Soaala malɛk lika a Zozɛf a gõeemẽ, Ezipt tẽnga, n yeel-a: «Yik n dɩk biiga ne a ma n leb Israyɛl tẽnga tɩ sẽn da baood-b biigã n na n kʋ wã fãa kiime.» A Zozɛf yikame n dɩk biiga ne a ma n leb Israyɛl tẽnga. A sẽn wʋm t'a Arkelawus n dɩt naam Zɩɩda tẽn-peelmẽ, a ba, a Erod, zĩigẽ, a Zozɛf zoe rabeem ne be lebre, la a sẽn paam koɛɛg a zãmsdẽ, a zãagame n tees Galile baobgo, a waa n kẽe tẽng a ye sẽn boond tɩ Nazarɛt. Woto me la bãngda koɛɛg tõog n taase: B na n bool-a lame tɩ Nazarɛt daoa. Rao n da kõt soobo, a yʋʋr a Zã; a waa n bee Zɩɩda weoogẽ n karemd neba n yetẽ: «Tuub-y y yel-wẽna tɩ Wẽnd Rĩung kolgame.» Ad-y yaa yẽ yell la bãngd a Izai da gomda: Sẽn moond-a weoogẽ wã koɛɛg la woto: segl-y Soaala sor, kɩt-y tɩ b so-bugsa lebg tɩrse. A Zã ra yera fuug sẽn wʋg ne yʋgem kõbdo la a ra sẽga gãndo. A rɩɩb da yaa sʋya la weoog sɩɩdo. Zerizalɛɛm ne Zɩɩda la Zʋrdẽ baobga rãmb fãa gill da kẽnda a nengẽ. B ra togsda b yel-wẽna n deegd soobo, Zʋrdẽ koomẽ. A Zã sẽn yãend Farizẽ la Saduseẽ rãmba tɩ b wat wʋsgo n na n deeg soobo, a yeel-b lame: «Wag-bi buudu, ãnda n wilg yãmb tɩ y zoe n põs Wẽnd beem sẽn wat y zutu? Bɩ y tʋm tʋʋm sõma n wilg tɩ y teema zʋgo, la y ra saag n yeel y sũurẽ: ‹Tõnd yaa a Abraam kamb ye.› M yet-y lame tɩ kuga sẽn dɩgã, Wẽnd tõe n yiisa a Abraam kamb b pʋsẽ. Lar zoe n dɩga tɩɩga sɛɛga; tɩɩg ninga fãa sẽn pa womda bi-sõma, b na n kɛɛg-a lame n yõog bugum. Mam yẽ kõt-y la soob koomẽ y zʋg tekr yĩnga la mam sẽn deng a soab taoorã yɩɩda maam; paam n lodg a neodr gĩs menga looga maam; yẽ na n soo yãmb ne a Vʋʋsem Sõng la bugum. A zãada kaorg a nugẽ n na n yelg a kood zɛɛgẽ; ka-bɛɛla na n suii baoorẽ, la fɩɩba na n yõoga bugum ning sẽn ka kiida pʋgẽ.» A Zezi yii Galile n wa Zʋrdẽ kʋɩlga, a Zã nengẽ, n na n deeg soobo. A Zã ra pa rat n sak ye, n yetẽ: «Yaa maam n tog n deeg soob yãmb nengẽ, tɩ yãmb baas n wat mam nengẽ!» A Zezi leok-a lame: «Bas tɩ m maan woto nanda tɩ yaa woto la d tog maan tɩ fãa zemse.» T'a Zã yaool n na n sak. A Zezi sẽn deeg soob n yit koomẽ, la saaga pilg a gãongo, la b yãee a Vʋʋsem Sõng sẽn sigd a Zezi zugu wa walle, la koɛɛg me n sãd yĩngri: «Ada yaa mam bi-nongre, mam yam kẽe-a la zãnga!» A Vʋʋsem Sõng talla a Zezi n kẽ we-raoogẽ tɩ Sʋtãan kʋɩɩb-ba. B maana rasem pisnaase la yʋnd pisnaase n ka rɩ, n ka yũ ye. Dẽ la kʋɩɩbda kolg n yeele: «Fo sã n ya Wẽnd Biiga bɩ f kɩt tɩ kug kãensa lebg buri.» A Zezi leok-a lame: «B gʋlsame: Ninsaal ka rɩlgd a meng ne bur bal ye, yaa ne koɛɛg ning fãa sẽn yit Wẽnnaam noorẽ.» La Sʋtãan tall-b lame n kẽ Zerizalɛɛm n dʋʋs-b wẽnd dooga zugu, n yeel-ba: «Fo sã n ya Wẽnd Biiga bɩ f yɩk n tiimd tẽnga, tɩ b gʋlsame: B na n kõ-la b malɛgsa noore tɩ b põk foom b nugẽ tɩ f naoor da sɩɩs kugr ye.» A Zezi leok-a Sʋtaana: «B le gʋlsame: Da kʋɩɩb Wẽnnaam, f Soaala ye.» Sʋtãan tall-b lame n dʋ tãn wok zugu n wilg-b dũni wã ne a zɩɩri, n yeel-ba: «M na n kõ-f la woto fãa, f sã n wõgemd m taoore n waoog maam.» Dẽ la a Zezi yeel-a: «Looge, Sʋtãana! Tɩ b gʋlsame: Wẽnnaam, f Soaala, bal taoore la f na n wõgemd Bãmb bal la f na n waooge.» Sʋtãan bas-b lame n looge tɩ malɛgsa kolg n na n ges b yelle. A Zezi sẽn wʋm tɩ b yõka a Zã, b leba Galile. B yii Nazarɛt tẽnga n wa kẽed Kafarnaom, Tiberiyad mogr noore, Zabulõ la Neftali satmẽ. Woto la bãngda Izayi toagsga taasyã: Zabulõ tẽnga, Neftali tẽnga, mogr sorẽ dãmba, Zʋrdẽ rʋʋnd dãmba, Galile bu-zẽmb rãmba! Baad-y likẽ dãmba yãee vẽenem kãsenga, vẽenem n bui lik la kũum sẽn da reeg tẽns niyns n yãmbã. A Zezi sɩnga marsã n karemd neba n yetẽ: «Teem-y zʋgo tɩ Arzãn Rĩung kolgame.» A Zezi waa n looda Galile mogra noore, n yãe ned ne a yao: a Simo, b sẽn boond a soab t'a Piyɛr, ne a Andre, a ba-biiga; b ra lobda b zulumsi tɩ b da yaa zĩm yõgdba. B yeel-b lame: «Pʋg-y maam tɩ m na sõng-y tɩ y paam ninsaalba.» La bãmb wẽneg n basa b zulumsa be n pʋg a Zezi. B sẽn ta taoore, b le yãee ned a to ne a yao, a Zak la a Zã, a Zebede kamba, tɩ b be koglg pʋgẽ ne b ba, n manegd b zulumsi; b bool-b lame. Bãmb me basa b ba la b zulumsi n pʋg a Zezi. A Zezi ra saada Galile tẽnse n maand karengo pʋʋsg rotẽ, n wilgd Wẽnd Rĩung Kibar noogã, la b sãoogd bãas la pa-keem buud fãa. B yʋʋr yiime n ta Siri zamaana; tẽng fãa ra wata ne b nimbãan dãmba la b bãad dãmb buud toɛ toɛyã, wala sẽn yikd-b kisenkiiri, zut sẽn lebg rãmba, nao sẽn ki rãmba. B ra wata ne-ba t'a Zezi sãoog ba. Sɩd yɩɩ zãma kãseng n sɩng b pʋgbo; neb sẽn yit Galile la Tẽns piig sẽn tot taaba, n yit Zerizalɛɛm la Zɩɩda la Zʋrdẽ rʋʋnde. A Zezi sẽn yãe zãma wã, b rʋʋ tãnga zugu. B zĩndame tɩ b karen-biisa na n kolg-ba. A Zezi kõ-b la koɛɛga n yetẽ: «Sũ-noog rãmba la sẽn teeg-b Wẽnd bala tɩ Wẽnnaam Rĩunga yaa bãmb soolem. Sũ-noog rãmba la nin-bʋgse tɩ tẽnga na n yɩɩ bãmb soolem. Sũ-noog rãmba la sũ-beed sẽn tar b rãmba, tɩ b na n paama belgda. Sũ-noog rãmb la sẽn yãbd-b sõmblem kom la ko-yũudu, tɩ b na n tɩgame. Sũ-noog rãmb la sẽn zoet-b b taab nimbãanega, tɩ b na n zoee bãmb me nimbãanega. Sũ-noog rãmb la pʋ-peelem dãmba tɩ b na n yãee Wẽnnaam. Sũ-noog rãmb la sẽn mi-b sugri, tɩ b na n boola bãmb tɩ Wẽnd kamba. Sũ-noog rãmba la sẽn sakd-b namsgo b tʋʋm sõma yĩnga, tɩ Wẽnd Rĩunga yaa bãmb soolem. Yãmb la sũ-noog rãmba b sã n wa tʋʋsd-y la b namsd-y la b rõt-y rõadg buud fãa mam tũudma yĩnga. Noog-y y sũuri la y kɩdem tɩ y pʋɩɩr na n yɩɩ kãseng arzãna. Ad-y yɩɩ boto la bãngdba nams pĩnda. Yãmb yaa mooga yamsem. Yamsem sã n sãbge, bõe n tõe n le wa ne a noosem? A ka le be yõod ye la a sẽn tog yaa b lob-a yɩnga tɩ neb tabe. Yãmb yaa dũni vẽenem; tẽng sẽn zao tãng zug ka tõe n solg a meng ye. Fitil ka widigdi n dɩk koglg n lill-a ye, b ningd-a la zĩig ninga a sẽn na n tõog n kõ zaka rãmb vẽenem. Woto me yãmb vẽenema tog n yãga y taab nini tɩ b yãe y tʋʋm sõma n tõog n pẽg y Ba sẽn be arzãna. Da ning-y y yamẽ tɩ m waame n na n sɛɛs Noora ne bãngdbã sẽn wilga ye; m waame n na n maneg n baase. Sɩd-sɩda m yet-y lame tɩ gomde, gomd pɛdg meng kõn zĩnd Wẽnnaam noora pʋgẽ n pa taase tɩ saaga la tẽnga ket n be b zĩigẽ ye. Dɩlla ned ning fãa sẽn na n tõdg-a, ba noor sẽn ya bilfu, Wẽnnaam noya sʋka la a wilg a taab tɩ b tõdg wa yẽnda, b na ges yẽ soab me wa nin-bila, Wẽnd Rĩunga pʋgẽ. Ned ninga sẽn na n deeg-ba la a zãms a taab tɩ b maan wa yẽ, b na ges yẽ soab wa nin-kãsenga Wẽnnaam Rĩunga pʋgẽ. M yet-y lame, tɩ y sõmblem sã n pa yɩɩd sẽn karen-ba-n-sikã la Farizẽ rãmba rẽnna, y kõn kẽ Arzãn ye. Y wʋmame tɩ b yeela pĩnd dãmba: da kʋ ned ye, la sẽn kʋ-a a to bɩ b kẽes-a bʋʋdo; la mam yet-y lame tɩ ned ning fãa sẽn na n puuga sũuri ne a to, dẽ seka bʋʋd kẽesgo. La ned sã n yeel a to tɩ yalma, dẽ sekda a wa bʋʋd-bɛda rãmb taoore. La a sã n yeel-a tɩ pʋlum-sãamda, yẽ soab paalgda a meng bugum bʋʋdo. Dɩlla fo sã n wa ne f kũuni maanda zĩigẽ, n tẽeg tɩ bũmb n be foo ne f to sʋka, bɩ f bas f kũuna maanda zĩigẽ la f lɛɛg tɩ y tɩ zems taaba tɩ f na yaool n wa kõ f kũuna. Fo sã n seg f zabd-n-taaga, bɩ f ning pãng tɩ y zems taaba sora zugu, sã n ka rẽ a wat n bool-f la bʋʋdo tɩ bʋʋda soab paalg-f ne gũudã, tɩ gũuda yõk fo n pag roogo. Sɩd-sɩda, mam yet-f lame tɩ f kõn tõog n yi roogã, samd pɛdg meng sã n ket f zug ye. Yãmb wʋmame tɩ b yeelame: Da ro f to pag ye. La mam yet-y lame: Ned ninga sẽn gesa a to pag ne raabo, a soab zoe n yoo ne-a a sũurẽ. F rɩtg nif sã n kʋɩɩbd-fo, bɩ f kɩdg-a n lob yɩɩga; fo yĩnga wilg a ye bõne, são yĩnga tõr sẽn na n lob bugmẽ. F nug rɩtg sã n kʋɩɩbd-fo, bɩ f kʋʋg-a n lob yɩɩga; fo yĩnga wilg a ye bõne, são yĩnga tõr sẽn na n lʋɩ bugmẽ. B yeelame yɛsa: Ned ninga sẽn yiisa pag tog n kõ-a-la a rigb sebre. Mam yet-y lame tɩ sã n ka pagã n bao ned a to, ned ninga sẽn yiis-a wã wilgd-a-la yoob sore. Ned ninga me sẽn na n dɩk pʋg kãnga, yaa yoob la a maanda. Yãmb le wʋma b sẽn yeel pĩnd dãmbã: Da sãam f pʋlong ye, la pids kãabg ning fãa f sẽn kãab Soaalã. Mam yet-y lame: da wẽen ba bilfu, da wẽen ne yĩngr tɩ yaa Wẽnd zaoore. Da wẽen ne tẽnga tɩ yaa Wẽnd nao palgr zĩiga. Da wẽen ne Zerizalɛɛm tɩ yaa Na-kãseng tẽnga. Da wẽen ne f zugu tɩ f ka tõe tɩ f zoobg a ye pelg bɩ sob ye. Y sã n tog n leok tɩ N-yẽe! Bɩ y leok tɩ N-yẽe! Sã n tog n leok tɩ Ayoo! Bɩ yɩ Ayoo! Sẽn zʋʋg rẽ yita yam-beeda soab nengẽ. Yãmb wʋmame tɩ b yeelame: Nif n dond nifu, yẽnd n dond yẽnde. Mam yet-y lame tɩ y ra rok y sũur ne y bɛ ye. Ned sã n wẽ f rɩtg yɛgdg pɛka bɩ f wẽneg f goabgã n tees-a; a sã n dat n kẽes-f bʋʋdo n deeg f fu woko, bɩ f paas-a f fu taoko. Ned sã n modg-f tɩ f yãag-a naoyakem tusr bala, bɩ f yãag-a naoyakem tus a yiibu. Ned sã n kos foo bɩ f kõ-a; a sã n dat n peng bɩ f ra zãgs ye. Yãmb wʋmame tɩ b yeela pĩnda: Nong f zoa la f kisg f bɛyã. Mam yet-y lame: nong-y y bɛɛba la pʋʋs-y sẽn namsd-b yãmba yĩnga. Woto yãmb na n yɩɩ Ba ning sẽn be-a arzãna kamba, tɩ b basda b wĩndg t'a pukd nin-sõma la nin-wẽnse, la b basda b saaga t'a niid nin-sõma la nin-wẽns yĩnga. Yãmb sã n nong sẽn nong-b yãmb bala, bõe rolb la y na n le gũ yɛsa? Sẽn deesd-b fadga ka maan dẽ sɩda? Yãmb sã n pʋʋsd y saam-biisa bala, bõe la toogo, bu-zẽmba ka maand boto sɩda? Yãmb me modg n yɩ sõma wa y yĩngr Ba wã sẽn ya sõmb zãngã. Gũus-y n da maan y tʋʋm sõma neb a taaba taoore nagr yĩng bal ye. Ka rẽ y kõn paam dolbo y Ba sẽn be arzãna nengẽ ye. Fo sã n na n yols ned nimbãanega bɩ f ra yi n moon yɩnga wa ninsaan-kazukem kẽere sẽn maand pʋʋsg rotẽ la sotiisẽ n baood neb pẽgr ye, tɩ m togsd-y la vẽenega, bãmb dãmb zoe n paama b rolbo. Fo sã n dat n yols ned nimbãanega bɩ f ra sak tɩ f goabg bãng f rɩtg sẽn maand bũmb ning ye. Woto ned kõn bãng fo sẽn maan-a ye la f Ba Sõng sẽn ne likẽ wã na rol-fo. Y sã pʋʋsdẽ bɩ y ra maan wa zãmb rãmba sẽn maanda ye; bãmb sã n na n pʋʋse, b baooda zĩig ning neb wʋsg sẽn tõe n yãend-ba, pʋʋsg roto la sobadse. M yet-y lame tɩ b zoe n paama b rolbo. Fo sã n pʋʋsdẽ bɩ f kẽ f roogẽ n lɛɛg n pag f kʋɩlenga la f pʋʋs f Ba, lillẽ, tɩ f Ba sẽn ne likẽ wã na rol-fo. Y pʋʋsg pʋgẽ bɩ y ra baam wala bu-zẽmba ye; b tẽedame tɩ b sã n gomd n pa yɛɛdẽ la Wẽnd kelgd b pʋʋsgo. Da maan-y wa bãmb bada, tɩ y Ba zoe n mii y sẽn tar bũmb ning tʋʋmde tɩ y nan ka yaag y noor ye. Dẽ yĩngã pʋʋs-y woto: ‹Tõnd Ba sẽn be arzãnẽ, y yʋʋr paam pẽgre, tɩ y Rĩung yalse, tɩ b maan y yam tẽng zug, wẽnd b sẽn maand arzãna. Kõ-y tõnd dũnna d beoog-beoog fãa rɩɩbo. Kõ-y tõnd d yel-wẽna sugri wẽnd d sẽn kõt d taab sugri, la y ra bas tɩ d lʋɩ kʋɩɩbg pʋgẽ ye la y fãgd-d wẽnem soaba nugẽ.› N-ye! Yãmb sã n kõ y taab sugri, y Ba sẽn be arzãna me na kõ yãmb sugri. La yãmb sã n pa kõ y taab sugri, y Ba wã me kõn bas-y taal ye. Y sã n loet y noor bɩ y ra gãnem y neng wa zãmb rãmba sẽn maanda ye; b takda b nenga tɩ neba tõog n yãe tɩ b sɩd maanda no-loeere. M yet-y lame tɩ b zoe n paama b rolbo. Fo sã n loet f noore bɩ f zɛ f zug kaam la f pek f nenga, woto ned kõn bãng tɩ f loee noore sã n ka f Ba wã bal sẽn yɛs lillẽ wã, la bãmb sẽn ne likẽ wã na rol-fo. Tẽng zug ka, bɩ y ra tigs arzɛk ye tɩ bugd la zũnzũur dɩtame, tɩ wagdb pood roto n zuuda. Tigs-y y arzɛka arzãnẽ, tɩ be, bugd la zũnzũur ka n dɩtẽ ye la wagdb me ka pood n zuud ye. F arzɛk sẽn be zĩig ninga, be me la f sũura na n zĩndi. Nif la yĩnga fitila. Fo nif sã n ya sõmbo, fo yĩnga fãa bee vẽenemẽ. La f nif sã n sãame, f yĩnga zãng bee likẽ. Fo vẽenem sã n lebg lika, fo lik yɩta a wãna? Ned ka tõe n maan zu-soaben-dãmb a yiib raab ye, f na kisga a ye, n nong a ye, f na n basa a ye n tũ a ye. Yãmb me ka tõe n pʋg Wẽnnaam la y pʋg Ligd ye. Yaa rẽ yĩng la m yet-y: da bʋ-y y vɩɩma poorẽ, n sokd-y y sẽn na n dɩ bũmb ning ye; la y ra bʋ y yĩnga poorẽ n sokd-y y sẽn na n yeelg fuug ning ye. Vɩɩma ka yɩɩd dɩɩbo la yĩnga ka são fuugu? Ges-y luiili sẽn yɩgd yĩngri: b ka bʋte, b ka kẽebde, b ka suiid baoorẽ ye, la y Ba sẽn be arzãna dɩlgd-b lame. Yãmb pa yɩɩd bãmb sɩda? Yãmb sʋka ãnda n tõe n zĩnd n bʋ n paas a vɩɩma woglem kãntɩɩg a ye? La fut poorẽ, bõe yĩng la y na n bʋ? Ges-y pʋt puudu: ges-y b sẽn yit toto, b pa namsde, b ka wĩid lamdo. La m yet-y lame t'a Salomo ne a zɩɩra sẽn yɩ a soaba, ka tõog n paam fu neer wa bãmb dẽnda buud n yeelg ye. Wẽnd sã n yeelgd pʋt mood woto, bũmb sẽn be rũnna n na n yɩ bugum dɩɩb beoogo, b kõn maan tɩ yɩɩg boto yãmb yĩnga, tẽeb kɩdg rãmba? Da bʋ-y n yetẽ: d na n dɩɩ bõe la d na n yũu bõe la d na n yeelga bõe ye, tɩ bu-zẽmbã n zĩi n bʋʋd boto. Yãmb Ba sẽn be yĩngrã miime tɩ y tara rẽ fãa tʋʋmde. Deng-y n bao-y arzãn Rĩungã ne a sõmblem tɩ sẽn keta fãa b na kõ-y rẽ wa lɛnga. Da sũk-y beoog poorẽ tɩ beoog na baoo a rẽnna. Daar fãa ne a zɩɩbo, sekd-a lame. Da kao-y y taab bʋʋdo tɩ b kõn kao y me bʋʋd ye. Y sẽn kaood y taab bʋʋda toto, boto me la b na n kao yãmb bʋʋdo. Makr ning y sẽn makd n kõt y taaba, makr kãng me n yɩt yãmb dẽnna. Bõe tɩ f get mooga sẽn be f to nifẽ? Fo yaool n ka ne ra-giiga sẽn be f nifẽ ye. Fo na n yɩɩ wãna n yeel f to: ‹Yaas tɩ m yiis moogo f nifẽ,› tɩ ra-giig yaool n be f rẽnnẽ? Zãmb soaba, deng n yiis ra-giiga f nifẽ tɩ f na tõog marsã n yãe moogã n yãk f to nifẽ. Da rɩk-y maand nemd n kõ baag ye, da rɩk-y kĩndfu n lob kurkuy taoor ye: b wat n tab-a lame n yaool n lɛɛg n kẽ yãmba, n na n wãb yãmb. Kos-y tɩ b na kõ-y, bao-y tɩ y na yãe. Kabs-y tɩ b na pak tɩ y kẽ. Sẽn kota n paamde, sẽn baooda n yãete, sẽn kabsda la b pakda. Yãmb sʋka ãnd n be t'a biig sã n kos-a buri bɩ a kõ-a kugri? Ka rɩll bɩ a kos-a kʋɩl-zẽoogo t'a kõ-a waafo? Dɩlla yãmb ne y wẽnema, y sã n mii y kamb bõn-sõma kũuni, bãng-y tɩ Ba Sõng na maan neere n yɩɩd ne neb niyns sẽn bõsd-b bãmba. Yãmb sẽn dat tɩ y taab maan bũmb ninga y yĩnga, bɩ y maan boto ne y taaba: dẽ n be Noora sebrẽ la bãngdba me rẽnnẽ. Tũ-y so sẽka n kẽ. Menesg sor tuka yalenga, tɩ wʋsg rɩkd-a. Vɩɩma sor tuka sẽka la a tãagda kʋɩleng sẽn pa yalem t'a yãetb sõor ya bilfri bala. Gũus-y ne zirẽ-be-bãngdba. B sã n be yãmb sʋka, bãng-y piis sẽn ka tar b toorẽ yell ye, mik yaa digd-n-yĩid-toose. B tʋʋma n na n wilg yãmba b sẽn ya bũmb ninga. Sib na wob gõaag zugu? La kankam na tõs kãgrẽ? Ade, tɩ-sõng faa womda bi-sõma la tɩ-wẽng fãa womda bi-wẽnse. Tɩ-sõng pa tõe n wom bi-wẽns ye la tɩ-wẽng me ka tõe n wom bi-sõng ye. Tɩɩg ninga fãa sẽn ka womda bi-sõma, b kɛɛgd-a lame n yõog bugum. Dɩlla b tʋʋmẽ wã la y na n bãng-b n bake. Ka sẽn boond-a maam: ‹Soaala, Soaala,› n kẽed arzãn ye, yaa sẽn maand-a m Ba sẽn be arzãna yamleoogo. Wʋsg wat n yeela maam daar a ye: ‹Soaala, Soaala, tũu ne yãmb maasem tɩ d paam n wilg sẽn na n yaool n wa, la d dig sʋtãamba, la d maan bõn-bãna.› La m kõn zoe b nif n leok-b ye: ‹Mam zɩ n bãng yãmb ye, yi-y m taoore, tʋʋm yood dãmba!› Ned ninga sẽn na n kelg goam niyns m sẽn togs mars marsã la a maand boto, m tõe n mak-a la ne sɩlem soaba sẽn me a roog kugr kegemd zugu. Saag niime, koom fõdame, sob-raoog yikame tɩ b fãa tãag-a la a pa lʋɩ ye, b sẽn me-a kugra zug yĩnga. Ned ning me sẽn wʋmd-a mam koɛɛga la a pa maand wa m sẽn datã, b tõe n maka yẽ soab ne gãeenga sẽn me a roog bĩsr zugu. Saag niime, koom waa ne pãnga, sob-raoog yikame tɩ b tãag-a la a lʋɩɩme la a wãab ka yɩ bilfr ye!» A Zezi sẽn gom n sɛ, la zãma wã sẽn wẽ siri b karenga poorẽ; sɩda a Zezi pa gomd wa sẽn karen-ba-n-sika ye, b gomda wa naab sẽn gomd ne a soolem dãmba. A Zezi siga tãngã tɩ neb wʋsg sɩng b pʋgbo. Yĩng soab a ye n waa n wõgemd b taoore n yeel-ba: «Yãmb sã n dat waa, m Soaala, y tõe n sãoog-m lame.» B tẽega b nus n sɩɩs-a n yetẽ: «Sãoog tɩ m nonga rẽ.» Wakat kãng bala a yĩnga yɩlgame. T'a Zezi na n yeel-a: «Sõng n da gom tɩ neb wʋm ye, kẽng tɩ maan-kʋʋda yãend-fo la f kɩs kũun ning a Moyiiz sẽn yet tɩ b kɩs a soaba tɩ yɩ f sãoogr kaseto.» B sẽn kẽ Kafarnaom tẽnga la tãnsoab a ye sẽn bʋʋg-ba n na n kos-b bũmbu. A yeelame: «Soaala, m dakõor n gãe yiri, a nus la a nao kiime la a namsda wʋsgo.» A Zezi yeel-a lame: «M na kẽng n tɩ sãoog-a!» Tãnsoaba leokame: «Soaala, m zema bõe tɩ y na n kẽ m zakẽ? Yeel-y gomd a ye bala tɩ m dakõora na sãooge. Ade, maam ne m sẽn pa na-kãsengã, m soo tãb-biisi, m sã n yeel a ye: kẽnge! A kẽngdame, m sã n yeel a to: wa! A watame; m sã n yeel m dakõorã: maan woto! A maandame.» A Zezi wʋma gomdã la kẽ-la b sũurẽ tɩ b yeel b poorẽ dãmba: «Mam yeta yãmba, m pa yãend tẽeb a woto buud Israyɛl kamb sʋk ye. Wʋsg na n yii yaanga la taoore n wa paam tɩgra roog n kẽ ne a Abraam, a Izaak la a Zakoob arzãn Rĩung pʋgẽ, tɩ Rĩunga kamb mens na n yaool n pa yɩnga, likẽ, n yãbd tɩ b yẽn kẽrsdẽ.» B yaool n yeela tãnsoabã: «Dɩk f sore, la Wẽnd na kõ foom f sẽn tẽede.» Wakat kãng bala dakõora paama laafi. A Zezi sẽn kẽ a Piyɛr zakẽ, a mikame tɩ yẽ reem-poak gãeeme n pa keemẽ. B sɩɩsa reem-poaka nug la a sãoogame la a yikame n segl-ba. Zĩig sẽn waa n sobge, b talla neb wʋsgo n wa b taoore; sʋtãamba n da be b pʋsẽ; b yiisa gomd bala n dig sʋtãamba, la bãad dãmb sãoogame. La yɩɩ woto la bãngd a Izayi gomda taasyã: A rɩka tõnd komslem, tõnd bãase n tʋk a menga. A Zezi mikame tɩ sẽn pʋgd-b bãmbã da yaa wʋsgo tɩ b na n kõ noor tɩ b rʋʋg kʋɩlgã. Sɛb-mit a ye kolg-b lame n leok-ba: «Soaala, y sẽn dabd zĩig ning fãa m na tũ-y lame.» T'a Zezi yeel-a: «Waas tara b roto, tɩ yĩngr luiili tar b tʋgdo; Ned Biiga bala n ka tar gãag zĩiga.» B karen-biig a ye n waa n yeele: «Soaala, m kota sor n deng n tɩ solg m ba.» La a Zezi leok-a lame: «Tũ maam la f bas kɩɩmsa ti b mum taaba.» Dẽ poore b kẽe koom koglg ne b karen-biisi. Ko-wiis rãmba bɛd-bɛda tɩ koglga rat n lisi. Dẽ t'a Zezi gõeeme. Karen-biisa kolgame n nek a Zezi n yeel-ba: «Soaala, wa-y tɩ d na n kiime!» A Zezi leok-b lame: «Bõe yĩng la y zoet dabeem, tẽeb bilf rãmba?» B sẽn yiki, b tãsa mogrã ne sobgã la bũmb fãa lebga sɩɩ. Neba pɛleng yɩkame tɩ b yeele: «Nin-kãnga la a bõe tɩ sobd la mogr meng deegd a noore?» A Zezi sẽn dʋʋg mogrã n ta Gadar tẽnga la neb a yiibu, sẽn tar Sʋtãan b pʋsẽ, yi yaadẽ n seg-ba. B ra yaa nin-toose al wʋsgo, al tɩ ned ba a ye ra pa le saagd n tũ sor ning sẽn yegd-a be wã ye. B sɩnga moonego: «Wẽnd Biiga baooda bõe ne-do? A wat n na n zoe n nams-d lame tɩ wakat nan ka yao?» Sẽn vẽsg be bilfu, kurkuy wʋsgo n da wãbd yamdo. Sʋtãamba yeela a Zezi: «D kotame tɩ f sã n dig-d ka n yiis bɩ d tɩ kẽ kurkuya!» B yeel-b lame tɩ b kẽnge la b yiime n tɩ kẽ rũmsã tɩ b kaoog vugr bala n sig n kẽ mogrã tɩ kooma rɩ-b gilli. Rũm-kɩɩmba ninga tĩiga n ta n togs tẽnga rãmba rũmsa sãoongo la neb a yiiba sãoogre. Tẽnga tõr yiime n na n seg a Zezi; b sẽn yãend-ba, b kos-b lame tɩ b yi b tẽngẽ. B kẽe koom koglg yɛsa n dʋʋg kʋɩlgã n leb b tẽngẽ. B talla põor n wa b taoore. Põora da gãe a gãag zugu. A Zezi sẽn yãend neba tẽebã, b yeela põorã: «Da le bʋ ye, m biiga, tɩ f paama f yel-wẽna sugri.» Sɛb-mitba kẽer yeela b sũurẽ: «Yãoã yaa wẽn-tʋʋsa.» A Zezi sẽn mi b sũur tagsgã leoka woto: «Bõe yĩng la y bilgd wẽng y sũurẽ? Gomd bʋg togsg la naana n yɩɩda: f paama f yel-wẽna sugri, bɩ: yik n kẽne? Sẽn na n yɩlẽ tɩ y bãng tɩ Ned Biiga tara tõog n kõ yel-wẽnd sugr, tẽng zug ka, ade, põore, m yet-f lame: tik n yik, dɩk f gãaga, leb f yiri!» Põora yikame n dɩk a gãaga n leb a zakẽ. La rẽ kẽesa rabeem kãsenga neb niyns sẽn yãend-ba sũurẽ, la b pẽga Wẽnnaam b sẽn kõ ninsaalb tõog a woto buudu. A Zezi waa n yiime n loogdẽ, n yãe ned sẽn zĩ fadg reesg zĩigẽ, n boond tɩ Matiye. A Zezi yeel-a lame: «Tũ maam!» La a yik n tũ-b lame. B sẽn ta a zakẽ n sɩng rɩɩbo la fadg rɛɛsdb ne yel-wẽn-maandb wʋsg sẽn waa n naag a Zezi ne b karen-biisã. La rog-n-mika tũudba, Farizẽ rãmba, sẽn yãend rẽndã, b yeela karen-biisã: «Yaa wãn tɩ yãmb karen-saamba dɩt ne fadg rɛɛsdb la yel-wẽn-maandba?» Mik a Zezi meng ra wʋmame tɩ b na n yeele: «Ka sẽn tar-b laafi n baood tɩɩm soab zĩig ye, yaa sẽn bẽed-ba. Kẽng-y n tɩ zãms-y gomd kãnga võore: nimbãan-zoeer la m nong n yɩɩd maoongo. Ka nin-sõma wã la m waa n na n boole, yaa yel-wẽn-maandbã.» Dẽ poore a Zã karen-biisa kolg-b lame n sok-ba: «Bõe yĩng la tõnd ne Farizẽ rãmba loet noore tɩ yãmb karen-biisa pa loetẽ?» T'a Zezi na n leok-ba: «Pʋg sɩd zo-rãmb tõe n gãnema b nens wa ku-biisi tɩ pʋg-sɩda ket b sʋk bɩ? Wakat ning n wat n zĩndi tɩ b na n loog ne pʋg-sɩdã, wakat kãng la b na n loe b noore.» Ned ka rɩkd peen-paalg sẽn ka wẽ koasla n sũk fu-kʋɩdg ye. Peen-paalga na n zɩsga fuugã t'a le kẽeg n paase. Woto me waoog sẽn kʋdg ka rɩkd n sui dã-paalg ye. Ning tɩ pusgi, tɩ rãam daage, tɩ waoog yɩ bõne. Wao-paalg la b suiid dã-paalga, woto bõne ka ye. B sẽn da ket n gomd la nin-naab a ye sẽn kolge n wõgemd b taoore n yeel-ba: «Ad-y m bi-pugl n ki mars-mars noogã, wa-y n tik-a ne y nugu t'a na vʋʋge.» La a Zezi yikame n tũ-a, bãmb ne b karen-biisã. Pag a ye sẽn da bẽed mende al yʋʋm piig la a yiibu, kolga b poorẽ n sɩɩs b fuuga noore. A ra gomda a sũurẽ: «M sã n sɩɩs b fuugã, m na n paama laafi.» A Zezi sẽn wẽneg b poorẽ b yãend-a lame n yeel-a: «Teeg maam, m biiga, tɩ f tẽeb fãag-f lame.» La wakat kãng bala paga wẽneg n paama laafi. B sẽn ta nin-naaba zakẽ, b yãee neb sẽn peeb-d wɩɩse la neb wʋsg sẽn gũmi, tɩ zak wulumdi. A Zezi yeel-b lame: «Yi-y tɩ bi-pugla nan ka ki ye, a gõeeme bala. Neba da laad-b lame.» La b sẽn yiis neba yɩnga, a Zezi kẽeme n gãd bi-pugla nugu, t'a yik. La kibara sãaga tẽnga fãa. A Zezi sẽn yik tɩ b loogda, la zoeens a yiib sẽn sɩng pʋgbo la b moonẽ: «Daviid biiga, zoe-y d nimbãanega!» B sẽn ta yiri, la zoeensã sẽn kolg-ba tɩ b na n sok-ba: «Yãmb tẽedame tɩ m tõe rẽnna?» Tɩ b leoke: «N-yẽe, Soaala!» Tɩ b na n sɩɩs b nina la b yetẽ: «Bɩ yɩ wa y sẽn tẽede!» B nina pukame. T'a Zezi na n leok-b pãr pãre: «Maan-y gũusgu, tɩ ned da bãng ye!» Zoeensa sẽn yi, pa kaoos ye, b sɩnga b yʋʋra yelegr beelẽ baobgã. Bãmb sẽn looge, ka kaoos ye, tɩ b tall ned a ye n wa la Sʋtãan-muk n da be a pʋgẽ. B sẽn dig Sʋtãana la neda sẽn sɩng goama. Zãma wã pɛleng yɩkame tɩ b yetẽ: «Ned zɩ n yãe woto taar Israyɛl tẽng ye.» Farizẽ rãmba yẽ ra yetame: «Ad-y yaa ne Sʋtãamba naab pãnga la a rigd sʋtãamba.» A Zezi ra kẽeda tẽn-bɛd la tẽn-bõonese, n maand karengo pʋʋsg rotẽ, n togsd Rĩunga kibar noogã la b sãoogd bãag la pa-keem buud fãa. A Zezi gesa zãma wã n wẽ siri tɩ b ra yɛɛ zãnga, tɩ b nensa surẽ wa piis sẽn pa tar pe-kɩɩma. Dẽ la b yeel b karen-biisi: «Kooda sẽn ta kɛɛba labsa, la kɛɛdba sõor paooda. Kos-y pʋʋga soaba t'a tʋm ka-kɛɛdba a pʋʋgẽ.» B boola b Tʋʋm-tʋmdb piig la a yiibã la b kõ-b-la tõog tɩ b rig Sʋtãamba la b sãoog bãag la pa-keem buud fãa. Tʋʋm-tʋmdb piig la a yiibã yʋy la woto: pipi yaa a Simo, b sẽn boond a soab tɩ Piyɛr; yẽ poore, a yao, a Andre, n paas a Zak ne a yao, a Zã, bãmb ba la a Zebede; le yaa a Filip, a Bartelemi, a Toma, a Matiye, yẽ da reegda fadgo; le paasa a Zak, a Alfe biiga ne a Taade, n paas a Simo a to: yẽ la m sũur bee ne buuda bɛ fãa; n baasd ne a Zɩɩda, Iskariyot tẽng neda; yẽ n sõng a Zezi bɛɛba tɩ b paam-ba n yõke. Bãmb piig la a yiibã la a Zezi yeel tɩ b saag n ges tẽnsã, n sagl-b woto: «Da tũ-y bu-zẽmba sor ye, la ra kẽ-y Samari rãmb tẽngẽ ye. Pʋg-y Israyɛl kamba sẽn kẽ-b weoog wa piisã. Sor zug bɩ y moon tɩ Wẽnd Rĩung kolgame. Sãoog-y bãad dãmba, vʋʋg-y kũum, tõog-y yĩng bãase, dig-y Sʋtãamba. B kõo yãmb zaalem, bɩ yãmb me kõ zaalem. Da bao-y sãnem bɩ wanzurf ye, da sui-y bõonego y gɩfẽ ye. Da bob-y korgo n kẽnd ye, da zɩ-y fut a yiib ye, da widi neooda ye, da zã-y dasaar ye. Tʋʋm-tʋmd toga ne yaoodo. Y sã n kẽ tẽn-bil bɩ tẽn-kãsenga, bɩ y kos tɩ b wilg-y nin-sõng zaka tɩ y yõg gãag-sobend be, n ta y loogr daare. Y sã n wa kẽed zaka pʋga bɩ y kãab-a laafi, la a sã n sɩd tog ne-a, y laafi na sig a pʋgẽ, la y laafi kõn sig-a, a sã n pa tog ne-a ye. Ned sã n mong-y gãag-sobendo, a sã n zãgs y koɛɛg kelgre, bɩ y yi a zakẽ, bɩ a tẽngẽ, la y fugumd y neooda tom. La m yet-y lame tɩ bʋʋda raare, Sodom la Gomor nimbãanega kõn zeng tẽn-kãng rẽnd ye. Ad-y m tʋmd-y-la wa pe-yãans digd-n-yĩids sʋka, bɩ y sɩlem yɩ waaf sɩlem, la y yɩ neb sẽn ka tar b toorẽ yelle wa walle. Maan-y gũusgu ne ninsaalba; b na n kẽes-y-la bʋʋdo bʋ-kaood bɛda taoore, b na n pãb-y la ne kaase, b pʋʋsg rotẽ. Mam yĩnga, b na n vu-y lame n kẽng dĩm dãmb la kombɛɛmba taoore, tɩ m datame tɩ y yɩ m kaset dãmba, bãmb la bu-zẽmba taoore. La b sã n wa yõg-y bɩ y ra nams y menga n bao y sẽn na n leok to-to, bɩ y sẽn na n togs bũmb ning ye; y sẽn na n togs bũmb ningã, y na bãng-a wakat kãng bala, tɩ ka yãmb n na n gome, yaa y Ba wã Vʋʋsem n na n gom y zĩigẽ. Ned na n kɩsa a ba-biiga, tɩ b kʋ, tɩ ba na n kɩs a meng bi-roaka, tɩ kamb na n yik ne b ba rãmba, n kʋ-ba. B fãa na n kisga yãmb, mam yĩnga, la ned ninga sẽn na n kell n modga a yõor tɛka, yẽ soab n na n paam fãagre. B sã n digd yãmb tẽn kãngã, bɩ y zoe n kẽ tẽng a to, b sã n pʋg-y be, bɩ y zoe n kẽ tẽng a to; la m yet-y lame tɩ y kõn saag Israyɛl tẽnsã n sɛ, tɩ Ned Biiga nan ka wa ye. Karen-biig pa yɩɩd a karen-saamb ye, la rakõor pa yɩɩd a zu-soab ye. Karen-biig sã n Wẽnd a karen-saamba, tɩ dakõor wẽnd a zu-soaba, sekame. B sẽn bool zak soab t'a Beelzebul, bõe la b ka n a n yeel a zaka rãmb poorẽ? Da zoe-y neba ye. Sẽn solg na n pukame la sẽn lud fãa na n lakame. M sẽn togs yãmb bũmb ning fãa likẽ, bɩ y yi n moon yɩnga, la m sẽn walem-y bũmb ning y tʋbrẽ bɩ y rʋ roog zugu n pãr-a. Da zoe-y lɛ-lɛ sẽn tõe n kʋ-b yĩngã n yaool n pa tõe n kʋ sɩɩga ye. Zoe-y bala, ned ning sẽn tõe n lub bugmẽ sɩɩga la yĩngã. Yirsa yiib yɩɩda tãma sɩda? La yirg ba a ye ka lʋɩt tẽnga tɩ y Ba zɩ tiir ye. Dɩlla yɩta a wãn ne yãmba. Ad-y y zoobda fãa, Wẽnd tara b sõore! Da bʋ-y ye, tɩ yãmb sãoo luin-sugri. Ned ninga sẽn na n yeel-a neb taoore t'a kẽeda maam, m Ba sẽn be arzãna taoore, mam me na yeel tɩ m kẽeda a soaba. Ned ninga sẽn na n yeel-a neb taoore t'a ka mi maam, mam me na yeele, m Ba sẽn be arzãna taoore, tɩ m ka mi-a ye. Da tẽ-y tɩ m talla laafi n wa tẽng zug ye, ka laafi la m tall n wa, yaa zabr sʋʋga. M waame n na n zablg ned ne a ba, bi-pugl ne a ma, pag ne a bi-paga. Fo bɛɛba na n yii f buudẽ. Sẽn nong-a a ba bɩ a ma n yɩɩd maam, ka tog ne maam ye; sẽn nong-a a bi-ribl bɩ a bi-pugl n yɩɩd maam, yẽ soab ka tog ne maam ye. Sẽn ka rɩkd-a a pika n pʋg maam, ka tog ne maam ye. Sẽn baood-a a yõore na n menes-a lame; la sẽn menesa a yõor mam yĩnga, na n le paam-a lame. Sẽn deegd-a yãmb sãando, yaa maam la a reegda; sẽn deegd-a maam sãando deegda ned ning sẽn tʋm-a maam. Ned ninga sẽn maand-a bãngd sãando a sẽn ya bãngda yĩnga, yẽ soab na n paama bãngd dolbo. Ned ning sẽn maand-a nin-sõng sãando a sẽn ya nin-sõnga yĩnga, yẽ soab na n paama nin-sõng dolbo. Ned ninga sẽn na n kõ m kom-bãmba nin-yend ko-maasg wamde, a sẽn ya m karen-biiga yĩnga, m yet-y lame t'a kõn kong a rolb ye.» A Zezi sẽn waa n sagl b Tʋʋm-tʋmdb piig la a yiibã n sɛ, b yiime n kẽ tẽnsã n le sɩng zãmsgo. Mik a Zã zĩnda bi-bees roogẽ n wʋm Wẽnd Neda tʋʋma yelle. A yiisa a karen-biis tɩ b tɩ sok a Zezi: «Yãmb la sẽn tog n waa soaba bɩ d tog n gũ-la a to?» A Zezi leok-b lame: «Tɩ togs-y y karen-saamb a Zã y sẽn wʋme la y sẽn yãe bũmb ninga: Zoeens neeme, wobs kẽndame, wãoob sãoogdame, wʋms wʋmdame, sẽn ki-b vʋʋgdame, la b togsda Koe-noogã naong rãmba; zu-noog soaba la sẽn ka lakd-a maam wa sor zug kugri n lʋɩ.» A Zã sẽn tʋm b rãmba sẽn lɛɛg n kuiisẽ la a Zezi sẽn leok woto a Zã poorẽ: «Bõe la y tɩ yãe weoogẽ, tɩ-pol sobg sẽn lengde? Bõe la y tɩ yãend sẽ? Ned sẽn yer faong fuugu bɩ? Ad-y sẽn yer-b faong futa vɩɩ nanams zagsẽ. Bõe la y tɩ yãend sẽ, y tɩ yãee bãngda? N-ye! La m yet-y lame: yɩɩda bãngda. Ad-y yaa yẽ poorẽ la b gʋlsyã: M na n yiisa ned n ning m taoore t'a maneg sor ning m sẽn na n tũ wã. Sɩd-sɩda, m yet-y lame tɩ pagba kamb sʋka, ned ka yɩɩd a Zã, rao ning sẽn kõta sooba ye, la ne rẽ fãa sẽn ya-a yao zʋʋg Arzãn Rĩunga pʋgẽ, yɩɩd-a lame. A Zã sẽn sɩng sooba tɛka n dabd marsã, Arzãn Rĩunga waa ne wɩsg-m-menga, lebga sẽn tara pãng tus n kẽ. Sebr sõng la bãngdba talla wilgri, n tãag a Zã. La sã n yaa a Zã, m ka mi y sã na n deega m goama, ad-y yẽ la Eli ning sẽn na n lɛɛg n wa wã. Sẽn tar-a tʋbr bɩ a wʋm! Bõe la m na n yãe n mak zamaan kãnga? A wẽnda yãas sẽn kõ taab sɛk tẽnga tẽnsʋka, n na n gom taab beedo, n yetẽ: ‹Tõnd peeba wɩɩse, tɩ y zãgs saooga, tɩ tõnd kelem kʋʋre, tɩ y zãgs y yãoog toosgo!› A Zã sɩd waame n pa rɩtẽ la a pa yũud ye, tɩ b yet tɩ Sʋtãan n be a pʋgẽ. Ned Biiga waame, n dɩtẽ la a yũuda, tɩ b yet tɩ b baad dɩ-rɩta la rã-yũuda, tɩ b baad fadg rɛɛsdba la yel-wẽn-maandba zoa. La b tʋʋm sõma wã waa n kõo kaseto tɩ Yam Pidunga soab bee ne-ba. Dẽ poore b yika zabre ne tẽns niyns sẽn yãend-b bõn-bãna n yɩɩd tẽns a taaba n yaool n ka tek b zʋgã. Yel-beed ne foo, Korozein tẽnga! Yel-beed ne foo, Bɛtsayid tẽnga! Wẽnd makr niyns sẽn maan yãmb pʋgẽ sã n da maanẽ Tir la Sidõ, yaa daar zãr la be rãmba yeelgẽ sũ-pa-noang futu la b bilmẽ b mens tompɛglemẽ, n teemẽ zʋgo. Yaa rẽ yĩng la m yet-y: bʋʋda raare, Tir ne Sidõ sɩbgr kõn ta y rẽnd ye. La foo, Kafarnaom, fo tẽedame tɩ f na n lugame n tãag saaga? Ade, bʋg-tẽng la f na n sirg n lʋɩ. Bãng tɩ bõn-bãn-niyns sẽn maan f pʋgẽ sã n da maanẽ Sodom tẽnga, a ket n yɛsẽ la rũnna. Yaa rẽ yĩng la m yet-fo: bʋʋda raare, a Sodom sɩbgr kõn ta f rẽnd ye.» A Zezi waa n zẽka b koɛɛg n gom woto: «M Ba, yĩngr la tẽng Soaala, m pʋʋsd-y la barka y sẽn solg woto sɩlem dãmba la yam dãmba n yaool n togs nin-bõonese. N-ye! Woto n sɩd yɩ y raabo, m Ba sõngo! M sẽn tar fãa yaa m Ba n kõ-ma. Ned ka mi Biiga sã n ka Ba, la ned me ka mi Ba sã n ka Biigã, bɩ ned ninga sẽn paam-a Biiga wilgri. Wa-y m nengẽ, yãmb fãa sẽn tar-b pɛta la sẽn zɩt-b zɩɩb n yõrdẽ, tɩ m na yols y fãa. Tʋk-y m zɩɩbã la lebg-y m karen-biisi, tɩ m yaa ned sẽn ka mi sũ-toog la zẽk-m-menga, la y sɩɩga zu-loees na paam yolsgo. Bãng-y tɩ m sẽn na n tʋk-y zɩɩb ninga yaa faasga la tʋʋsga bʋgsa.» Sibr daar a ye, a Zezi waa n loogda kood sẽn bɩ sʋka. Kom da tara b karen-biisã tɩ b kũus ka-zut n tẽg n wãbe. Farizẽ rãmb yãeeme n yeel-ba: «Yãmb karen-biisa maanda sẽn kis vʋʋsg daare!» T'a Zezi na n yeel-ba: «Dɩlla yãmb pa karen a Daviid sẽn maan bũmb ninga, kom sẽn waa n yõk-a, yẽnda ne a tũud-n-taase? Ad-y b kẽe wẽnd doogẽ n dɩ buri niyns sẽn da rɩk n kõ Wẽndã. Yẽ ne a tũud-n-taasa yaool n da pa tõe n dɩ bur kãens ye, tɩ maan-kʋʋdba bal n da tar sor n dɩ-ba. Bũmb a to, y pa karem Noora sebrẽ tɩ vʋʋsga daare maan-kʋʋdba tʋmda wẽnd doogẽ tɩ ka yel-wẽnd bɩ? M yet-y lame: sẽn yɛs-a yãmb taoorã yɩɩda wẽnd doogã. Yãmb sã n dag n wʋme gomd kãnga võore: m nonga nimbãan-zoeere n yɩɩd maoongo, y kõn sak n ningẽ taale neb sẽn ka maan yel-wẽnd ye. Bãng-y tɩ Ned Biigã n so vʋʋsga daare.» B sẽn looge, pʋʋsga roogẽ la b tɩ kẽ. Zemsg neere, nug kɩɩng a ye soab n da be be la Farizẽ rãmba soka a Zezi: «Bãad tõe n sãooga vʋʋsga daar bɩ?» B soka woto n na n kẽes a Zezi yellẽ. Dẽ la a Zezi leok-ba: «Yãmb sʋka, ãnd n tar pe-yãang a ye tãa, t'a lʋɩ bokẽ vʋʋsga daare t'a zãgs a tɩ gãd-a n yiisi? Y mi tɩ ninsaal yɩɩda pesg al zĩig sẽn zãre. Dẽnna bõn-sõng maaneg ka kis vʋʋsga daar ye.» Dẽ poore b yeela koamsã: «Tẽeg f nug.» A tẽega a nugu, nuga vʋʋgame n ya kɛgeng wala a yembrã. Farizẽ rãmba yiime la b yẽsa ne taaba b sẽn na n maanega n paam a Zezi n kʋ. B sẽn bãng rẽ, a Zezi yiime. Wʋsg tũ-b lame. B sãooga koms rãmba fãa la b yeel-b lame tɩ b ra gom tɩ ned wʋm ye. Woto taasa bãngda Izayi gomde: Ad ned ning m sẽn yãk m tʋʋmda yĩnga. Yaa m zoa nongre, m yam kẽe-a la zãnga. M na n sika m Vʋʋsem a zugu, t'a wilg bu-zẽmba sõmblem la sɩd sore. A kõn yɩ zab baooda la bʋrg soab ye. Ned kõn wʋm a koɛɛg sotiisẽ ye. Tipol sẽn kaooge, a kõn kũk-a n baas ye fitil laong sẽn ket n nukd bug-zõose, a kõn kiis-a n baas ye al n wa tõog tɩ sɩd la sõmblem reeg zĩig zãng n yãmbe. Yẽnda la dʋni rãmba fãa na n maan b teegda. Sʋtãan n da kẽ neda t'a soaba ya zoanga la muka la b tall-a lame n wa a Zezi taoore la bãmb sãoog-a lame t'a gomd la a neẽ. Zãma wã yɛɛsame n yetẽ: «Nin kãnga kaa Daviid biigã?» Farizẽ rãmba wʋmame n leoke: «A sã n digd sʋtãamba, yaa ne Sʋtãamba naab, a Beelzebul, pãnga.» A Zezi sẽn mi b pʋga yeel-b lame: «Rĩung buud fãa sẽn welg sagse, rĩung kãng baooda a wãabo. Tẽng a ye rãmba bɩ zak a ye rãmb sã n welg taaba, tẽng kãng bɩ zak kãng ka tõe n yals ye. Sʋtãan sã n digd a sʋtãan taaga, a welga a yiibu, a naam na n yɩɩ wãn n vigli? Sã n yaa ne a Beelzebul pãng la mam digd Sʋtãamba, yãmb neba rigd-b la ne ãnda rẽnna? Dɩlla bãmb n na n kao y bʋʋdo. La sã n ya ne a Vʋʋsem Sõng pãng la m digd sʋtãamba, bɩ y bãng tɩ Wẽnd Rĩunga taa yãmba. Bũmba to yɛsa: ned yɩta a wãn n kẽ gãndaoog zakẽ n zɛ a teedo, a sã n ka reng n yõk-a n sẽbe? Sẽbdame n yaool n zɛ teedo. Sẽn ka-a mam zoa, yaa mam bɛyã, sẽn ka suiid-a mam sẽn suiidẽ, sẽegdame. Yaa rẽ la m yeta: ninsaalba na n paam b yel-wẽnd la wẽn-tʋʋr buud fãa sugri la a Vʋʋsem Sõng tʋʋda kõn paam sugr ye. Sẽn tʋʋs-a Ned Biiga na paam sugri, la sẽn tʋʋs-a Vʋʋsem Sõngo kõn paam sugr dũni kãnga la dũni ninga sẽn pʋgda ye. Tɩ-sõngo womda bi-sõma. Tɩ-yoog biis me na yɩ yoodo. Tɩɩg biig n wilgd a sã n yaa sõng bɩ yoogo. Wag-bi buudu, y goama yɩta a wãn n yɩ sõma tɩ y mens ya wẽnse? Sẽn pid sũuri n wat noorẽ! Nin-sõng yiisda bõn-sõma tɩ bõn-sõma la a bĩng a baoorẽ, la nin-wẽng sẽn bĩng bõn-wẽnsã, yiisda bõn-wẽnse. M yet-y lame, gomd yaalg buud fãa ned sẽn na n yiis a noorẽ, b na sok-a bʋʋda raare. Yaa f sẽn yiis f noorẽ n na n yiis foo bʋʋdẽ bɩ n na n paalg-fo.» Noor sebra mitba la Farizẽ rãmb kẽere yeel-b lame: «Soaala, d tʋllame tɩ y maan bõn-bãnd tɩ d yãende.» B leok-b lame: «Zãmb la yoob zamaan kamba rata wẽnd makre la b ka na n paam wẽnd makr a to ye; a Zonas makra bal la m na n kõ-ba. Wala a Zonas sẽn pa mogra Bõn-nind pʋg rasem a tã la yʋnd a tã, wotome Ned Biiga na n paa tẽng pʋgẽ rasem a tã la yʋnd a tãabo. Bʋʋda raare, Niniv rãmb na n yika ne rũnna zamaana rãmba la b na n mong-b-la bʋʋm, tɩ bãmb sẽn wʋm a Zonas koɛɛga, b sɩbga b mense; sẽn yɛs-a ka wã yɩɩda a Zonas. Bʋʋda raare, tẽn-zãorgẽ Dĩmpoaka na n yika ne rũnna zamaana rãmba la a na n mong-b-la bʋʋm tɩ yẽ yii al Mooga sɛtmẽ n wa kelg gom-minim naab, a Salomo, la sẽn be-a ka wã yɩɩda a Salomo! Sʋtãan dẽgd sã n yi n bas a sẽn da kẽ a soaba, a gõoda weoogo n baood vʋʋsg zĩiga n ka yãetẽ ye. A yeta a sũurẽ: m na n leba m zĩ-kʋdgẽ. A watame n mik t'a yaa vɩʋʋgo, mik tɩ b maneg pɩɩs-a lame, tɩ bũmb fãa be a zĩigẽ. T'a na n lɛɛg n wa ne a sʋtãan taas a yopoe sẽn yɩɩd yẽ ne wẽnem, tɩ b wa kẽ-a. Bãng-y tɩ nin-kãng yell lebgda wẽng n yɩɩg pĩnda. Dũnna zamaan yooka yell na n yɩɩ boto.» A Zezi ra ket n sõsda ne zãma wã la b ma ne b saam-biisa waa n bee yɩng n dat n gom ne-ba. [ Ned a ye n wilgi: y ba la y ma n be dignoorẽ la b rat n leok-y la bũmbu.] A Zezi yeela sẽn waa n togsa wã: «Ãnda la mam ma, la m saam-biisi?» La b zẽka b nug n tees b karen-biisã, n yetẽ: «Ad m ma la m saam-biisi. Ned ninga sẽn maand-a m Ba sẽn be arzãna yam, yẽ yaa saam-biiga, la tão, la ma, m yĩnga.» A Zezi yii yiri n kẽng mogra noore n tɩ zĩi. Neb wʋsg sɩnga bãmb gũbgri tɩ b kong n kẽ n zĩnd koglg pʋga, tɩ zãma wã be kʋɩlga noore. B goma bũmb wʋsg yell ne-ba la ra yaa ne yelbũna. Ad-b sẽn da yete: «Bʋt n yi n na n bʋde, la a sẽn waa n bʋtẽ, bõn-buuda kẽer lʋɩɩ sor noor la luiili waa n dɩgs-b-la zãnga n dɩ. Kẽer lʋɩɩ kug zĩigẽ, n ka paam n bus neer ye; la b sẽn ka paam n bus neerã b pa kaoos yiib ye. La wĩntoog sẽn puki, a waolga yõog-b lame. La b sẽn ka tar yẽgen yĩnga, b kʋɩɩme. Kẽer me lʋɩɩ gõosẽ la gõosa tobame n wulumd-ba n kʋ. Kẽer lʋɩɩ zĩ-sõngẽ n wom biisi, kẽer koabg-koabga, kẽer pisoobsoobe, kẽer pistã-tã. Sẽn tar-a tʋbr bɩ a wʋm!» Karen-biisa kolgame n sok-ba: «Bõe yĩng la y gomd ne yelbũna?» Tɩ b leoke: «Sã n ya yãmba, yãmb paamame n bãng Wẽnd Rĩungã yel-soalma la neb a taaba ka paam dẽ ye. Sẽn zoe n tar-a, b na n kõ-a lame n paas a paoongo, la sẽn ka tar-a wʋsgo, a sẽn tar-a zãng la b na n deege. Yaa rẽ yĩng la m gomd ne neb a taaba ne yelbũna: tɩ b neeme la yaa waa b pa ne ye; b wʋmdame la yaa waa b pa wʋmde, wa ka kẽed b yamẽ ye. Bãmb me taasa bãngda Izayi koɛɛga: Y na n kelgame la y kõn wʋm fɩ, y na n gesame la y kõn yãe fɩ. B yam lebga lika; b paga b tʋba la b nini tɩ b pa rat tɩ b nin yãe, tɩ b tʋbr wʋm, tɩ b yam deeg tɩ b teem tɩ m kõ b laafi ye. Yãmb yẽ, yãmb yaa zu-noog rãmba tɩ y tara nin sẽn ne la tʋb sẽn wʋmde. Sɩd-sɩda, m yet-y lame tɩ bãngdb wʋsgo la nin-sõma tʋlgame n yãe y sẽn yãete, la b ka paam ye, n wʋm y sẽn wʋmde la b ka paam dẽ ye! Bɩ yãmb kelg bʋta yelbũndã. Ned sã n kelg Wẽnd Rĩunga gomde n ka wʋm a võore, wẽnema naab kẽeda a sũurẽ n vaag a sẽn wʋm-a n looge. Yẽ soab makr la sor noorẽ bõn-buudã. Bõn-buud ninga sẽn lʋɩ-a kuglaagẽ makda ned ninga sẽn wʋm-a koɛɛgã n deeg-a tao tao ne sũ-noogo. La a sẽn ya ned sẽn ka tar yẽgna, ned sẽn ka tar a meng võorã, toog sã n wa bɩ b sã n namsd-a, Gomda yĩnga, tao tao t'a pãs n lʋɩɩme. Bõn-buud ninga sẽn lʋɩ-a gõosẽ makda ned ninga sẽn wʋmd-a Koɛɛgã la a bas tɩ dũni zu-loeese la arzɛk tʋlsem wulumd-a t'a ka tõe n wom biis ye. Bõn-buud ninga sẽn lʋɩ-a zĩ-sõngẽ makda ned ning sẽn wʋm-a Koɛɛgã a tʋbrẽ la a yamẽ; yẽ soab womda biisi, yẽ soab n womd koabg-koabga, pisoobsoobe, pistã-tã.» B le wẽe yelbũnd a to: «Arzãn Rĩunga wẽnda ned sẽn bʋd bõn-buud sõng a pʋʋgẽ. La neb sẽn waa n kẽ gõeem, a bɛ yiime n tɩ fẽeg bõn-buud yoogo n bas n looge. Kooda sẽn waa n tob vãado la b wek biisi la b sẽn yẽnd bõn-buud yoog me. Woto rakõapa tɩ yeela pʋʋga soaba: ‹Zu-soaba, ka bõn-buud sõng la y bʋd y pʋʋgẽ laa? Tũu ne bõe tɩ bõn-buud yoog me wa beẽ?› Pʋʋga soab leok-b lame: ‹Yaa bɛ nina n maan dẽ.› Tɩ rakõapa le sok: ‹Y ka rat tɩ d kẽng n tɩ võ ba?› Pʋʋga soab yeelame: ‹Ayoo! Bõn-buud yoogo võob wakato y wat n tudg n võo kood sõnga me. Bas-y tɩ b bɩ n ta ka-kɛɛrã la ka-kɛɛra wakato m na yeel kɛɛdba: deng n tigs-y kood yoogã n kals n yõog bugmẽ. Dẽ poor marsã y na kẽeb buud sõngã n sui m baoẽ.› » B le paasa yelbũnd a to: «Arzãn Rĩunga wẽnda tɩɩg a ye biisi, seneve tɩɩga, b sẽn dɩk n bʋd pʋʋgẽ. Tɩɩsa biis sʋka seneve rẽnd n paood n yɩɩda la a sã n yi, yẽ n zʋʋgd zẽed tɩɩs a taaba la a wat n tol n lebga bedre tɩ luiili wat n soond a wilẽ.» B le wẽe yelbũndi: «Arzãn Rĩunga wẽnda rabɩll pag sẽn dɩk n ning zom moena a tã pʋgẽ tɩ fãa wuki.» A Zezi goma woto ne yelbũna. B pʋs n dag n ka gomda tɩ ka ne yelbũn ye. Yaa woto la bãngda gomd tõog n taase: «M na n yaaga m noor n wẽ yelbũna, m na n puka yɛla sẽn solg al dũni sɩngrẽ.» B basa nebã n leb yiri. B karen-biisa kolgame n kose: «Wilg-y tõnd vẽenega bõn-buud yooga yelbũnda võore.» B yeel-b lame: «Sẽn bʋt-a bõn-buud sõnga yaa Ned Biigã. Pʋʋga yaa dũni wã. Bõn-buud sõnga yaa Rĩunga kẽedba. Bõn-buud yooga la sẽn kẽed-b nin-wẽngã. Bɛyã sẽn bʋd bõn-buud yooga yaa Sʋtãana. Ka-kɛɛra yaa dũni sɛɛbo. Ka-kɛɛdba yaa malɛgse. Wala b sẽn kɛɛd nadẽnse n yõogd bugma, dʋni wã sɛɛb me na n yɩɩ boto. Ned Biiga na n tʋma malɛgs tɩ b kẽ b Rĩunga pʋgẽ n wʋk ye-lwẽna la yel-wẽn-maandba fãa n lob bug-toaagẽ tɩ b be be n yãbd, tɩ b yẽn kɛɛd taaba. Wẽnd kãng la nin-sõma wã na n yãg wa wĩntoogo, b Ba Rĩunga pʋgẽ. Bɩ sẽn tar-a tʋbr fãa wʋm! Arzãn Rĩunga wẽnda arzɛk sẽn bus pʋʋgẽ tɩ ned wa buk-a. A le lɛɛg n bus-a lame la a kula ne sũ-noogo n tɩ koos a sẽn tar fãa n dɩk n da pʋʋgã. Arzãn Rĩung wẽnda toanda sẽn baood muizãan neba. A waa n yãenda a ye sẽn ya sõmb wʋsgo t'a kẽng n tɩ koos a sẽn tar fãa n paam n da-a. Arzãn Rĩunga sẽn wẽnd a soab yɛsa: yaa zulunga, b sẽn lob mogrẽ n yaasd zĩm buud fãa. Zulunga sã n pidi, kʋɩl-zẽ-yẽedba yiisd-a-la kʋɩlga noore n tũus kʋɩl-zẽed niyns sẽn ya-b sõma n ning b yaasẽ la b lob sẽn ka-b sõmbã. Dũni saab daar na n yɩɩ woto: malɛk rãmba na n waame n welg nin-wẽns la nin-sõma. B na n loba nin-wẽnsa bug-toaagẽ, yãbr la yẽn kẽrsgo zĩigẽ.» «Y wʋma fãa?» «N-yẽe!» Tɩ b na n paas: «Sɛb-mit fãa sẽn na n lebg-a Arzãn Rĩunga karen-biiga, wẽnda dakãagr sẽn tõe n yiis a arzɛk pʋgẽ, bõn-paal la bõn-kʋda.» A Zezi wẽ b yelbũna n sɛ, n yi, n kẽng b ba-yiri n tɩ kẽ pʋʋsga roogẽ n zãmsd neba. B goama ra yɩkda neba pɛlense. B ra yetame: «Yɛ la a paam bãngr la tõog a woto? Ka yẽ la ra-wãada biig laa? Ka yẽ ma la a Maryam, t'a Zak, a Zozɛf, a Simo la a Zɩɩd yaa a saam-biis laa? A saam-bi-pogsa ka ket n be d sʋk laa? Yɛ la a paam woto fãa?» B ra yɛɛsdame. La a Zezi yeel-b lame: «Bãngd ka yãet paoore sã n ka a tẽngẽ la a zakẽ ye.» B pa sak n maan wẽnd makr wʋsg be ye, neba tẽeba sẽn da paood yĩnga. Komber, a Erod, waa n wʋmdame tɩ b tar a Zezi yʋʋra pẽgre t'a yeel a sõsd-n-taase: «Ad-y yaa Zã ning sẽn da kõt-a soobã; a vʋʋga kɩɩms sʋka, la rẽ n so la a maand wẽnd makr dãmba.» Sɩd me, a Erod n da kɩt tɩ b yõk a Zã n balg bãnga, n pag roogo. Yɩ-la a Erodiad, a Filip paga, poorẽ, t'a Erod n da rɩk a yao, a Filip, paga t'a Zã yet tɩ rẽ pa segd ye. A Erod tʋlgame meng n kʋ a Zã la a zoe neba nifu, tɩ b ra geta a Zã wa bãngda. A Erod waa n tẽega a rogem daare n maan kibsa. A Erodiad bi-pugl waa n saoo neere neba fãa nifẽ n noog a Erod sũuri al wʋsgo. Dẽ la a kãab bi-pugla t'a sẽn na n kos bũmb ning fãa a na paame. A ma saglg yĩnga, biiga yeelame: «Kõ-y maam mars marsã bala, laag pʋgẽ, a Zã zugu.» A Erod sũur sãama wʋsgo la a sẽn da kãab neba taoor yĩnga, a yeelame tɩ b maan biiga sẽn datã la a tʋmame tɩ b kẽng bi-bees roogẽ, n tɩ fiuug a Zã zugu. B sɩd talla a Zã zuga ne laag n wa kõ bi-puglã t'a reeg n kõ a ma. A Zã karen-biisã n waa n dɩk a Zã yĩngã n tɩ mum, n lɛɛg n wa wilg a Zezi. A Zezi wʋma a Zã kaalem, n kẽ koglg, n vẽsge, n tees weoogo. Neba bãnga rẽ n yi b tẽnsẽ ne nao n bʋʋg-ba. A Zezi sẽn yet tɩ b yit koglgã, b yãee neb ka tɛka, tɩ b nimbãaneg na n yõk-ba. La b sãooga bãad dãmba fãa. Zĩig sẽn sobge b karen-biis kolg-b lame n yeele: «Ade, ka yaa weoogo la lebga zĩ-sobdo. Bas-y neba tɩ b le b tẽnsa pʋgẽ n tɩ ra rɩɩb n dɩ.» Dẽ la a Zezi leok-ba: «Ka modgre tɩ b leb tẽng pʋgẽ ye, y mens y toore bao rɩɩbã n kõ-ba.» Karen-biisa me leokame: «Bur a nu la kʋɩl-zẽed a yiib bala la d tara.» T'a Zezi yeel-ba: «Tall-y n wa-y yã.» B kɩtame tɩ b zĩndig nebã, moodẽ, n dɩk bur a nu wã la kʋɩl-zẽed a yiibã n zẽk b neng yĩngri, n pʋʋs bark pʋʋsgo, n wes burã n dɩk n kɩs karen-biisã tɩ b pʋɩ zãma wã. B fãa rɩɩme n tɩge. B wʋka burã neba sẽn dɩ n kellã la pet piig la a yiibu la b pids yã. Bãng-y tɩ rɩtba sõor da taa tus a nu, pagba la kom-bõonega toog sẽn ka ye. Dẽ poore b modga b karen-biisã tɩ b kẽ koglg n deng taoore, tɩ b meng yaas n kuls nebã. B sẽn waa n kuls nebã n sɛ, a Zezi rʋʋ tãnga zugu, kɛɛnga, n na n pʋʋse; yʋng waa n paam-b-la be. Dẽ tɩ karem-biisa koglgã da paam n taa ko-sʋka tɩ ko-wiis lengd-a, tɩ sobg wẽed lebende. Beoog sẽn waa n kolg vẽegre, a Zezi kẽna kooma zugu n babs-ba. B sẽn yãend t'a Zezi kẽnd kooma zugu, rabeem yõka karen-biisã; b tẽeme tɩ yaa kɩɩma, n na n sɩng kɛlenga. A Zezi yeel-b lame: «Bas-y yam-yoaaga, yaa mam menga, da zoe-y rabeem ye!» T'a Piyɛr na n leoke: «Soaala sã n ya yãmba, bɩ y kõ-m noor tɩ m kẽn kooma zug n seg-y.» A Zezi yeel-a lame: «Wa!» T'a Piyɛr yi koglgã n sɩng kẽnd kooma zugu n babsd a Zezi. La sobga sẽn da vũud wʋsg yĩnga rabeem yõk-a lame t'a sɩng lisbu, n na n kelem: «Soaala, fãag-y-ma.» A Zezi wẽneg n tuda b nugu n gãd-a, n yeel-a: «Tẽeb kɩdg soaba, f yam yooda bõe yĩnga?» B sẽn kẽ koglga pʋga la sobga sẽn yõke. Sẽn da be-b koglga pʋg fãa wõgemda b taoore n yetẽ: «Sɩd-sɩda yãmb yaa Wẽnnaam Biiga.» B rʋʋga mogrã n sig Zenezarɛt. Be rãmba sẽn bãng tɩ yaa a Zezi, b saag n togsa b yagsa fãa. B talla b bãad dãmb fãa n wa b nengẽ. B ra kotame tɩ b bas tɩ b sɩɩs b fuuga noor bala. Sẽn sɩɩs-b fuuga fãa sãoogame. Zerizalɛɛm Farizẽ rãmbã la sẽn karen-ba-n-sikã kolga a Zezi n sok-ba: «Bõe yĩng la yãmb karen-biisa sãamd yaab rãmba dog-n-miki? Bãmb pa rengd n pek b nus n yaool n sɩng rɩɩb ye.» Dẽ la a Zezi leok-ba: «Bõe tɩ yãmb me tõdgd Wẽnnaam noor ne y rog-n-miki? Ade, Wẽnd yeelame: ‹Waoog f ba la f ma, la ned ninga sẽn kãabd a ba bɩ a ma wẽnga, bɩ b kʋ a soaba.› Yãmb nengẽ lebga ned ning fãa sẽn na n yeel a ba bɩ a ma: ‹Ade, bũmb ning m sẽn da tog n dɩk n sõng foo wã, m dɩkd-a lame n kõt Wẽnde.› Woto ba la ma zãab taal wẽneg n doka y zugu. Y pa ne tɩ yãmb dog-n-mik kãng kɩtame tɩ Wẽnd gomd lebg zaalem? Pʋlik rãmba! A Izayi n bãng y yelle a sẽn waa n togse: ‹Nin bãmba waoogda maam ne noore, la b sũur zãra ne maam. M geta b waoogr wa zaalem; la zãmsg ning b sẽn zãmsd neb a taaba yaa ninsaal dẽnd bala.› » B kɩtame tɩ neba kolge tɩ b yeele: «Kelg-y la y wʋm neere! Ka sẽn kẽed ninsaal noorẽ, n dẽgemd ninsaal ye, yaa sẽn yit a noorẽ.» Dẽ la karen-biisa kolg n yeel-ba: «Yãmb miime tɩ y sẽn gom woto wã, Farizẽ rãmba yeelame tɩ y gomda gom-yood bɩ?» Tɩ b yeele: «Tɩɩg ning m yĩngr Ba wã sẽn ka sele, na n võogame. Bas-y-ba tɩ yaa zoeens sẽn tat b zoen-taase! La bãng-y tɩ zoang sã n tat a zon-taaga, b fãa na n naaga taab bokẽ.» A Piyɛr goma woto: «Wilg-y tõnd y yelbũnda võore.» T'a Zezi yeele: «Yãmb yama ket n ka puk ba bilfu la? Y ka mi tɩ sẽn kẽed noorẽ tata pʋgẽ n sãag n yi we-kɛɛng bɩ? Sẽn yit noorẽ yita sũurẽ la sẽn yit sũurẽ n dẽgemd ninsaala. Yaa sũurẽ la tʋls wẽns yita, n paas nin-kʋʋr, yoobo, yoob nonglem, wagdem, kaset-zirẽ, taab yʋʋr sãoongo. Yaa yell kãens n dẽgemd ninsaala. La ka pek nus n yaool n sɩng rɩɩbo, ka tõe n dẽgem ninsaal ye.» A Zezi sẽn yi be, b kẽnga Tir la Sidõ baobgo. La ade, Kanaã pag n da yi a tẽngẽ n wa yɛs n moonẽ: «Zoe-y m nimbãaneg wɛ, Soaala, Daviid biiga! Ad-y Sʋtãan n tar m biiga n yaannẽ.» A Zezi pa leok-a tɩ bũmb ye. Karen-biisa yẽ kolgame n yeel-ba: «Deeg-y yã a kosg t'a wekda d tʋba.» T'a Zezi leoke: «B tʋma maam Israyɛl pe-yãansa yĩng bala.» Dẽ tɩ paga taame n wõgemd b taoore n yetẽ: «Soaala, wa-y n sõng-y-ma!» Tɩ b leok-a: «Pa tog tɩ b rɩk zaka kamb dɩɩbo n kõ ba-bi ye.» Paga zĩnda tẽngr n yeele: «Yaa sɩda, la baasg fãa ba-bi tõe n dɩgsa zeremsã b zu-soaba sẽn basd tɩ rʋʋgd tẽngã.» T'a Zezi na n yeel marsã: «Paga, f tẽeb labsa, bɩ yɩ wa f sẽn date.» La wakat kãng bala a bi-pugla paama laafi. A Zezi yii be n leb Galile mogr noore. B rʋʋ tãng zug n zĩndi. Neb wʋsg babs-b lame ne wobse, ne zoeense, ne mugs la koms rãmb buud a taaba, n dɩgl-ba a Zezi taoore la a Zezi sãoog-b lame. Neba wẽe siri b sẽn wʋm tɩ mugs gomda la b ne koms rãmba sẽn paam pãnga, tɩ wobs kẽnd tɩrga tɩ zoeens neẽ la neba pẽga Israyɛl Wẽnnaam. A Zezi boola b karen-biisã n yeel-ba: «Nin-bãmba nimbãaneg tar-m lame, yaa rasem a tãab rũnna la b ka serg mam taoore la b pa tar sẽn na n dɩ ye. M pa rat n kuls-b ne kom ye; kẽer wat n lʋɩɩ sorẽ.» Tɩ karen-biisa na n yeele: «La we-raoogẽ ka, d yãeta bur yɛ n kõ zãma a woto t'a rɩ n tɩge?» La b sokame: «Bur a wãn la y tara?» Tɩ b leok tɩ yaa bur a yopoe la kʋɩl-zẽ-bõoneg bilf bala. A Zezi kõo neba noor tɩ b zĩnd tẽnga. B rɩka bur a yopoe wã la kʋɩl-zẽedã, n maan pʋʋsgo, n wes-ba, n dɩk n kɩs tɩ b pʋɩ nebã. B fãa rɩɩme n tɩge la b wʋka gɩrsa sẽn kellã n pid pet a yopoe. Bãng-y tɩ sẽn dɩ-ba yɩɩ tus a naase, pagb la kamb toog sẽn ka ye. A Zezi kulsa nebã n yaool n kẽ koom koglg n wa Magadan tẽnga. Farizẽ la Saduseẽ rãmba sẽn da rat n bẽd-ba n yõk, kolgame n yeel a Zezi tɩ b sõng-b ne Wẽnd makre sẽn yit yĩngri. A Zezi leok-b lame: «Zĩ-sobdo yãmb yetame: saag ka ye tɩ wĩntoog yaa moomd yʋdʋd. Yibeoogo, yãmb yetame: yĩngr lobda sabla, dɩlla saag na n nii rũnna. Woto, tẽng zug yɛlã, yãmb mi-b lame la y tara b võore, zamaan paalga yɛl bala la y pa tar b võore! Nin-yaals la yoaadb buudu, y rata makre la ya a Zonas makra bala la m na n kõ yãmba.» La b loogame n bas-ba. B sẽn dʋʋg kʋɩlgã, karen-biisa yãeeme tɩ b ka zɩ bur ye. A Zezi sẽn yaool n yeel-bã: «Ypk-y y nini la y gũus ne Farizẽ la Saduseẽ rãmba rabɩlle,» b tẽe b yamẽ tɩ yaa b sẽn ka zɩ burã yĩnga. A Zezi bãnga b tagsgo n yeel-ba: «Tẽeb kɩdg rãmba, bõe la y tagsd tɩ yaa y sẽn ka zɩ burã? Y ket n nan pa wʋmde? Y pa tẽr bur a nu wã sẽn dɩlg neb tus a nu, la y pa tẽr peta sõore b girsã sẽn pids laa? Y pa le tẽr bur a yopoe wã sẽn dɩlg neb tus a naase la y pa tẽr peta sõore b kɛla sẽn pids laa? Yaa a wãna tɩ y ka ne tɩ ka bur yelle la m dat n gome? Gũus-y, wala m sẽn leokd yãmbã, ne Farizẽ la Saduseẽ rãmba rabɩlle.» B yaoolame marsã n wʋm tɩ b yeel-b lame tɩ b gũus ne Farizẽ la Saduseẽ rãmba zãmsgo, ka yet tɩ b gũus ne rabɩll sẽn tar n wẽed bura ye. B sẽn ta komber a Filip tẽng sẽn boond tɩ Sezare, a Zezi soka b karen-biisã: «Neba yeta me tɩ Ned Biiga yaa ãnna?» Tɩ b yeele: «Kẽer nengẽ b ya a Zã ning sẽn da kõta soobã, kẽer nengẽ b yaa Eli, kẽer nengẽ b yaa Zeremi bɩ bãngdba nin-yende.» T'a Zezi paas: «La sã n ya yãmba, y yetame tɩ maam la a bõe?» A Piyɛr leokame: «Yãmb la Wẽnd Nedã, Wẽnnaam vɩɩga Biigã.» T'a Zezi na n yeel-a: «Fo yaa zu-noog soaba, Simo, Zonas biiga, tɩ f bãngrã, ka ninsaal nengẽ la f paam-a ye, yaa m Ba sẽn be arzãna nengẽ. La ade, m yet-f lame tɩ f yaa Kugri la kug kãng zug la m na n me m Tigungu, la kũuma ne a pãngã kõn maan daood a taoor ye. M na n kõ-f la arzãn Rĩung kʋɩlem-biisi. Fo sẽn na n loe bũmb ning fãa tẽng zug, bõn-kãng me na n loe arzãnẽ. Fo sẽn na n lodg bũmb ning fãa tẽng zugu, bõn-kãng me na n lodga arzãnẽ.» B yaool n sagla b karen-biisã tɩ b ra wilg ned ba a ye tɩ bãmb la Krista ye. Badaare tɛka a Zezi sɩngame n wilg b tũud-n-taasã tɩ wat n yɩɩ tɩlɛ ne bãmba tɩ b kẽng Zerizalɛɛm, n yãe toogo wʋsgo, nin-kẽemsã, maan-kʋʋdba kãsem dãmba la Sẽn karen-ba-n-sikã nengẽ, tɩlɛ tɩ b ki menga la b vʋʋg dasm a tãab daare. A Piyɛr veoog-b lame, n zabd ne-ba, n yetẽ: «Wẽnd na laas-y ne rẽ fãa, Soaala, ayoo, dẽ kõn tõog ye!» A Zezi wẽnegame n yeel a Piyɛr: «Leb poorẽ, Sʋtãana! Fo lebga m lakr kugri, fo tagsga yaa ninsaal dẽnna, ka Wẽnnaam tagsg ye.» Dẽ poore b yeela b karen-biisã: «Sẽn data n pʋg maam, bɩ a ra bao a meng ye, a tʋk a pik n tũ maam. Ned ninga sẽn dat-a n ligl a yõore na n kiime la sẽn na n ki-a mam yĩnga na n vɩɩndame. Dũni wã soogre manegda ned wãn wãna, f vɩɩm sã n tũ rẽ n sãam? Bõe la ned tõe n tek ne a vɩɩm? Bãng-y tɩ Ned Biiga na n lɛɛg n waa ne a Ba zɩɩri n lebs ned kam fãa a vɩɩm sẽn tog ne. La m yet-y lame tɩ yãmb sʋka, kẽer beeme n ka na n wʋm kũum yũugu tɩ b pa reng n yãend Ned Biiga tɩ b wat ne b Rĩunga ye.» Dasem a yoob sẽn maane, a Zezi peega a Piyɛr, a Zak, la a yao, a Zã, bãmb b naasa bala; b zãaga ne zãma wã, tãn-wok zugu. La a Zezi tedga bãmb nifẽ: b nenga ra yãgda wa wĩntoogo, tɩ b fut pɩnda. La a Moyiiz ne a Eli waa n sõsda ne-ba. A Piyɛr zẽka a koɛɛg n yeele: «Soaala, tõnd sẽn be ka wã yaa-d-la noogo, y sã n data m na ti rot a tãabo, n kõ yãmb a yembre, a Moiz a ye, a Eli me a ye.» A Piyɛr pa yãee n gom n sɛ la sawad-pɛɛlg sẽn waa n bui-ba, tɩ koɛɛg zĩnd sawadga pʋga n moone: «Nin-kãnga yaa m Bi-nongre, m yam kẽ-b la zãnga, kelg-y-ba.» Karen-biisa sẽn wʋm goama la b sẽn lʋɩ b yãnvabga n digd dabeem. A Zezi kolgame n sɩɩs-ba n yeel-ba: «Yik-y la y bas rabeem!» Karen-biisa puka b nini, b pa le yãend neda to n paas a Zezi ye. B sẽn waa n sigd tẽn-nabrẽ, a Zezi kõ-b-la noor kãngã: «Da gom-y likr kãnga yelle tɩ Ned Biiga nan pa vʋʋg ye.» Karen-biisa sok-b lame: «Bõe marsã la sẽn karen-ba-n-sikã yet t'a Eli n na n deng wa?» Tɩ b yeele: «N-ye, a Eli na n deng n wa, n wa lebs bũmb fãa a zĩigẽ. La m yet-y lame, a Eli zoe n waame la neba pa bãng tɩ yaa yẽ ye, n zã-a wa b sẽn date. Dẽ n so tɩ Ned Biiga me na n yãe toogo.» Karen-biisa wʋmame marsã tɩ yaa Zã ning sẽn da kõta sooba yell la b gom yã. B sẽn leb zãma wã sʋka la nin-yend sẽn kolg n yĩgimd b taoore n yeel-ba: «Soaala, zoe-y m biiga nimbãanega t'a bẽeda kisenkiiri la yaa toogo. Naoor wʋsgo, a lʋɩta bugmẽ, n lʋɩt koomẽ. M tall-a lame n wa y karen-biisa nengẽ la b pa tõog t'a sãoog ye.» T'a Zezi yeel: «Wẽn-kɩɩsdb la nin-yaals buudu, m na n paa ne yãmb n ta wakat bʋgo? Tall-y bãadã n wa ka!» A Zezi tãsa Sʋtãana la a yiime n bas biigã tɩ laafi wẽneg n wa. Karen-biisa kolga a Zezi la nebã sẽn waa n looge, b sok-b lame tɩ yaa bõe yĩng la bãmb pa tõog n dig Sʋtãana n yiisi. Tɩ b na n leoke: «Ya y tẽebã sẽn ya bilfra yĩnga; sɩd-sɩda m yet-y lame tɩ yãmb tẽeba bedrem sã n ta seneve biiga, y na yeel tãnga sẽn tõndã: ‹Luk ka n ta ka.› A na luk a zĩigẽ la bũmb ba a ye kõn yɩ toog ne y ye. [ Sʋtãamb a woto buud ka tõe n dig n yiis tɩ pʋʋsg la no-loeer ka naag ye.]» Daar a ye, a Zezi ne b karen-biisa ra bee Galile t'a Zezi yeel-ba: «Ned Biiga na n lʋɩɩ ninsaalb nusẽ, la b na n kʋ-b lame la dasm a tãab daare b na n vʋʋgame.» La rẽ sãama karen-biisa sũur wʋsgo. B taa Kafarnaom tɩ sẽn deesda wẽnd dooga ligd kolg a Piyɛr n sok-a: «Yãmb karen-saamba yẽ pa yaood wẽnd dooga yaood la?» T'a leoke: «A yaoodame sẽ!» B sẽn ta yiri, a Zezi yɩɩ tao n yeel a Piyɛr: «Fo yetame tɩ wãna, Simo? Tẽnsa nanams reegda ligda bɩ fadgã ãnd dãmb nengẽ: b kambã n yaood bɩ yaa neb a taabã?» B leokame tɩ ka b zaka rãmb nengẽ la b reegd ligd ye. T'a Zezi yeel: «Dɩlla zaka kamb pa yaood ye. Baasg zãnga, m sẽn pa rat tɩ b yeel tɩ m pa maand wa neb a taaba, kẽng kʋɩlgẽ n tɩ lob f loɛɛga; gãd pipi zĩifã f sẽn na n yõkã, yaag a noorã tɩ f na yãe ligdi maam ne foom yaood yĩnga, tɩ f kɩs fadg a soaba.» Karen-biisa waa n kolga a Zezi n sok-ba: «Arzãn Rĩunga pʋgẽ, ãnda n lʋɩt a taab taoore?» B boola bi-bilfu n yals-a sʋka n yeele: «Sɩd-sɩda, y sã n ka põd n lebg yãase, y kõn tõog n kẽ Arzãn Rĩunga pʋg ye. Sẽn na n lʋɩ-a a taab taoor Arzãn Rĩunga pʋgẽ, yaa sẽn na n lebg-a bi-bilfu wa ad-a. Ned ninga sẽn na n ges bi-bilf wa bi-kãnga yelle mam yĩnga, yaa mam meng yell la a ges yã. Ned ninga me sẽn na n kɩt tɩ kom-bõonesã maan wẽnga, ad-y sãoo ne a soaba, tɩ b bao kugri wa neguug kugri, bõeensa sẽn gilgd ne kugr ning n werd zoma, n loe nin-kãng yubla, n tus-a n lub mogrẽ, tɩ kooma rɩ-a. M yãbd dũni rãmba, b sẽn kʋɩɩbd taab yĩnga! M mi tɩ kʋɩɩbg ka tõe n ka zĩnd ye la m yãbd ned ninga sẽn ya-a kʋɩɩbda. F nug bɩ naoor sã n lubd foo yell pʋgẽ, bɩ f fiuug-a n lob yɩɩga; fo sã n ya nug fiungu bɩ kar fiungu n paam vɩɩm, são b sẽn na n lob-f ne nus a yi bɩ ne nao a yi, bugum sẽn ka kiid pʋgẽ. Sã n yaa f nif n lubd foom yel-wẽnd pʋgẽ, kɩdg-a n lob yɩɩga, tɩ f sã n ya ni-feoogo n kẽ vɩɩm zĩigẽ, são f sẽn na n lʋɩ ne f nin a yiibu bugum sẽn ka kiid pʋgẽ. Da sak-y n paoog bi-bilfu ba a ye tɩ m yet-y lame tɩ arzãnẽ, b malɛk rãmb yɛsa wakat buud fãa, m Ba wã taoore. [ Ned Biiga waa n fãaga sẽn da menem-ba.] Yãmb yamẽ, ned na n maana a wãna, a sã n tar pe-yãans koabga t'a ye wa menem? A kõn bas piswɛ la a wɛ wã tãnga zugu la a saa n gẽes sẽn menem-a wã sɩda? A sã n yãend-a, m yet-y lame t'a sũur na tos kaam a poorẽ n yɩɩd piswɛ wã sẽn ka menem-ba. Woto me, y Ba ninga sẽn be arzãnẽ ka rat tɩ kom-bãmba nin-yend menem ye. F to sã n beege, babs-a, la yẽnda, a ye, taoore, wilg-a a kongre. A sã n kelg foom, f manega a yelle. A sã n ka reege, bɩ f bao nin-yend bɩ neb a yiibu n paase tɩ yella kʋʋb paam neb a yiib bɩ neb a tãab kaseto. A sã n zãgs b kelgre bɩ f togs Tigungu. A sã n zãgs Tigungu kelgre, bɩ f ges-a marsã wa bu-zẽnd la fadg rɛɛsda. Sɩdem sɩdem, y sẽn loe bũmb ning fãa tẽng zug, bõn-kãng loee yĩngri me. Y sẽn lok bũmb ning fãa tẽng zug, loka yĩngri me. M le togsd-y lame tɩ sɩd-sɩda, neb a yiibu, yãmb sʋka, sẽn na n naag taaba, tẽng zugu ka, n kos bũmb ning fãa, m Ba sẽn be arzãna na kõ-ba. Neb a yiib bɩ a tãab sã n tigim taaba, mam yĩnga, mam meng bee b sʋka.» A Piyɛr kolgame n yeel a Zezi: «M to sã n beeg-ma, naoor a wãn la ya tɩlɛ tɩ kõ-a sugri? M na yaa n ta naoor a yopoe bɩ?» T'a Zezi na n leoke: «M pa yet tɩ naoor a yopoe bal ye, yaa naoor pisopoe la a yopoe. Ad-y Arzãn Rĩung wẽnda dĩm sẽn tʋlg t'a sõgen-kamb wa, t'a pʋg a arzɛk nao. Gɛɛlga sẽn sɩnge, b waa ne ned a ye sẽn tar dĩma samde, la samda yaa sãnem gil sẽn ta neb tus piig zɩɩbo. A sẽn da ka tar n na n yao yĩnga, dĩma yeelame tɩ b koos yẽ ne a pag la a kamba la a sẽn tar fãa, tɩ samda tõog n yao. Sõgna wa-la a zu-soaba taoore n vabende, n yeel-a: ‹Bas-y tɩ yɩ bilf tɩ m na bao n yao fãa.› A zu-soaba zoe-la a nimbãanega n bas-a, n tol kiis a samda zãnga. Nin-kãng yiime n seg a tũud-n-taag a ye sẽn da tar samde; Yẽ samda zemsa neb koab zɩɩbo. A soga a kokoɛ wã n wẽoogdẽ, n na n sãr-a la a yetẽ: ‹Wa ne f sẽn tog n kõ maama gilli.› T'a tũud-n-taaga me yĩgimd a taoore n yeel-a: ‹Bas tɩ yɩ bilfu, tɩ m na bao n yao.› A zãgsame n kɩt tɩ b kẽes-a roogo, n gũud t'a yao samda zãnga. Dẽ la tũud-n-taas a taaba sũur sãam wʋsgo tɩ b tɩ togs b zu-soaba rao kãng manesma. Tɩ zu-soaba na n bool-a n yeel-a: ‹Sõgen yoogo, fo sẽn da tog n yao bũmb ningã, m basa fãa taale, f sẽn kosa yĩnga. Mam sẽn zoe fo nimbãanega, fo me ra tõee lame n zoe f tũud-n-taaga nimbãanega.› Zu-soaba sũur puuga wʋsgo la a kɩtame tɩ b yõk-a n kɩs kambõe naaba tɩ b nams-a tɩ samda wa yao zãnga. Yaa woto la m Ba sẽn be arzãna na n maan ne yã, yãmb me sã n ka kõt y taab sugri ne pʋ-peelem.» B sẽn kõ b koeesa Galile rãmb n sɛ, a Zezi yii be n dʋʋg Zʋrdẽ kʋɩlga n kẽ Zɩɩda soolmẽ, Neb wʋsg pʋg-b lame la b sãoog-b la beenẽ. Farizẽ rãmb kolgame n sok-ba la b sokra ra yaa bẽdgo: «Ned tõeeme n yiis a pag yaar bɩ?» Tɩ b leoke: «Dɩlla yãmb pa karem tɩ sɩngrẽ Wẽnnaam naana rao ne paga la b yeelame: ‹Raoã tog n basa a ba la a ma n zĩnd ne a paga la b yiiba tog n lebga bõn-yɛnga?› B pa leb n ya yĩns a yiib ye, b yaa yĩng a ye. Bãng-y tɩ Wẽnd sẽn lagem bũmb ningã, ninsaal ka tog n welg-a ye.» Farizẽ rãmba le sokame: «Yaa bõe yĩng marsã la a Moyiiz kõ noor tɩ b sã n na n yiis paga bɩ b kɩs-a a yiisg sebre?» T'a Zezi yeele: «Yaa y tʋb-pa-wʋmdma yĩnga la a Moiz kõ-y sor tɩ y yiis y pagba; la baad-y da ka boto sɩngrẽ ye. Yaa rẽ yĩng la m yet yãmba, tɩ sã n ka b mikame tɩ b zĩnd-n-taara yaa kisgu, rao ning sẽn dig a paga, n lɛɛg n dɩk a to, maanda yoob bala.» Karen-biisa yeel-b lame: «Rao ne pag yell sã n ya a woto, dẽnd f sẽn ka kẽed kãadem n são!» Tɩ b leoke: «Ka neb fãa n wʋmd dẽ ye, yaa Wẽnd sẽn kõ b rãmb bala. Neb kẽer beeme n pa tõe n kẽ kãadem ye, tɩ b roga boto; kẽer beeme n pa tõe n kẽ kãadem tɩ Zamaana rãmb n wa ne gɩdgr kãnga; kẽer beeme n pa tõe n kẽ kãadem ye la yaa bãmb n tʋlg rẽ ne b yamleoogo, Arzãn Rĩunga yĩnga. Sẽn tõe-a n wʋm, bɩ a wʋm!» Kom-bõoneg la b tall n wa a Zezi taoore tɩ b ning-b barka; b tẽega b nus b zutu n pʋʋs b yĩnga. Karen-biisa da rigda kambã. Dẽ la a Zezi yeel-ba: «Bas-y kom-bõonegã tɩ b wa m nengẽ la y da rig-b ye tɩ yaa sẽn wẽnd-b bãmb bala n na n soog Arzãn Rĩungã.» B tẽega b nus b zutu n yaool n le rɩk b sore. Ade, ned n kolg a Zezi n sok-ba: «Karen-saamba, bõn-sõng bʋg la m na n maane, n paam vɩɩm sẽn kõn sɛ?» T'a Zezi yeel-a: «Bõe yĩng la f sokd maam bõn-sõng poorẽ? Nin-yend bal la sõngo. F sã n dat n kẽ vɩɩmẽ, deeg Wẽnnaam noyã.» T'a na n yeele: «Noy bʋse?» T'a Zezi leoke: «Da kʋ ye, da yo ye, da zu ye, da maan kaset-zirẽ ye, waoog f ba la f ma, n paas yɛsa: nong f to n wẽnd f menga.» Tɩ bi-bɩɩga na n yeele: «Mam deega rẽ fãa al m yãadmẽ. Bõe n ket marsã?» T'a Zezi yeele: «Fo sã n dat n yɩ sõng zãnga, bɩ f kẽng n tɩ koos f sẽn tar fãa n pʋɩ naong rãmba tɩ f na paam dolb arzãnẽ, la wa pʋg maam.» A sẽn wʋm dẽ, rasãnga looga ne sũ-sãanga t'a ra yaa rakãagre. A Zezi yaool n yeela b karen-biisã: «Sɩd-sɩda m yet-y lame tɩ arzãn kõom na yɩ toog ne arzɛk soaba. N-yẽe, m le togsd-y lame n paas tɩ yʋgemd sẽn na n tũ supĩim yõorẽ n looge yaa naana n yɩɩd arzɛk soaba sẽn na n kẽ Wẽnd Rĩunga pugẽ.» Karen-biisa yɛɛsame, n yetẽ: «Sã n ya woto ãnda n na n põse?» T'a Zezi ges-ba n yeel-ba: «Dẽ wẽnda toog ne ninsaala la Wẽnnaam nengẽ, bũmb pa toog ye.» A Piyɛr goma woto: «Tõnd basa fãa n pʋg yãmba, bõe n na n yɩ tõnd dolbo?» T'a Zezi yeele: «Sɩd-sɩda m yeta yãmb fãa sẽn pʋg maama, tɩ dũni tekr wakato, Ned Biiga sẽn wat n zĩnd a zɩɩr goeela zugu, yãmb me na zĩnd n yegl-ba, goeels piig la a yiib zutu, n kao Israyɛl sags piig la a yiiba bʋʋdo. Ned ninga fãa sẽn na n bas a yiri, a yaopa, a tãopa, a ba, a ma, a kamba bɩ a pʋto, mam yĩnga, a na paam sẽn yɩɩd rẽnna, a na paam vɩɩm sẽn ka tar sɛɛbo. Pipi rãmba wʋsg na n lebga poorẽ dãmba tɩ yaoolem dãmb wʋsg lebg pipi rãmba. Arzãn Rĩunga wẽnda koaag soaba sẽn sãd beoogo n bao tʋʋm-tʋmdba sẽn na n fãs a bugsuntung sõng biisi. Tɩɩsa soab yẽsa ne tʋʋm-tʋmdba t'a na n yao-b la waki koɛɛnga, raar a ye, n yaool n yeel-b marsã tɩ b kẽng tʋʋmna. Sõor sẽn zẽke, a yãee neb a taaba sẽn zĩ zaalem tẽnga sʋka, t'a yeel-ba: ‹Yãmb me kẽng tʋʋmna tɩ m na yao-y wa sẽn segde.› B kẽngame. A le yii wĩnto-sʋka la zĩig sẽn maage n sed ne neb a taab me. Wĩndg sẽn waa n kɩlle, a le yiime n tɩ yãe neb tɩ b zĩ, t'a yeel-ba: ‹Bõe yĩng tɩ y zĩ al beooga sẽn vẽegã n ka tʋm fɩ?› B leoka woto: ‹Ned ba a ye ka rɩk tõnd tʋʋmd ye.› Tɩ tʋʋmda soab na n yeele: ‹Bɩ y me kẽng m tʋʋmna.› Tʋʋmda sẽn sigi, bugsuntunga soab yeela sẽn gesa tʋʋmna: ‹Bool tʋʋm-tʋmdbã n kõ ned kam fãa a yaood, la sɩng ne yaoolem dãmbã n wat tõd-beoogẽ dãmbã.› Sẽn yaool-b waoongã kolgame n deeg b wakɩr koɛɛnga. Sẽn waa n ta pipi rãmbã, b tẽeme tɩ b na n paamame n yɩɩg b taaba, mik yaa koɛɛng a ye la bãmb me na n deege. Dẽ la b reeg b wakirã la b guglumd ne tɩɩsa soaba: ‹Sẽn yaool n wa-ba tʋma wakat a ye bala la b paama wa tõnd sẽn sɩng yibeoogo, n nams tʋʋlgo.› Tɩ bugsuntunga soab na n yeel bãmb nin-yende: ‹M zoa, m ka maan f zãmb ba bilfu; tõnd da seda wakɩ-koɛɛng daar a ye. Deeg f wakirã n looge. Maam n dat la m kõ sẽn yaool-b waoongã wala foom; fo yetame tɩ m ka tõe n maan m sẽn dat ne m sẽn so bɩ? Mam sẽn ya sõngã n wa ne fo sũ-kiiri bɩ?› Ad-y yaa woto la pipi rãmba na n lebg poorẽ dãmba, tɩ poorẽ dãmba lebg pipi rãmba.» Waa n yɩɩ tɩlɛ t'a Zezi leb Zerizalɛɛm tɩ b na peeg Tʋʋm-tʋmdba bala; la sor zugu b yeel-b lame: «Tõnd dabda Zerizalɛɛm; b na n yõka Ned Biigã n kõ Maan-kʋʋdba kãsem dãmba la Noora sebr Mitba; bãmb na n kao-la b bʋʋdo n yeel tɩ b toga ne kũum. B na n bas-b-la ne bu-zẽmbã, tɩ bu-zẽmba na n yaal ba, n pãb-b ne kaase, n ka-b pika. La b kũum dasm a tãab rare, b na n vʋʋgame.» A Zebede kamba ma waa a Zezi taoore n wõgemd n na n kos bũmbu. A Zezi sok-a lame: «Yaa bõe la f rata?» A yeelame: «Ad-m kamb a yiibã, sõng-y t'a ye zĩnd y rɩtgo, a ye y goabga, y Rĩunga pʋgẽ.» Dẽ la a Zezi leok-a: «Yãmb ka mi y sẽn kot bũmb ning ye. Wamd ning mam sẽn na n tuglã, yãmb tõe n tugl-a lame bɩ?» B leokame: «N-yẽe! D tõeeme.» T'a Zezi me na n paase: «Dɩlla y na yũ mam sẽn na n yũ bũmb ningã la kella a ye zĩnd m dɩtgo, a ye zĩnd m goabga, dẽ ka be me maam ye, tũuda m Ba sẽn kãab b rãmba.» Tʋʋm-tʋmdb piiga kelga goama la b sũur puuga ne a Zebede kamb a yiibã. A Zezi kosame tɩ b fãa kolge la b kõ-b-la koɛɛga: «Y miime tɩ bu-zẽmba nanams nongame n soog b nebã la b wẽoog-b kẽnkẽ. Pa tog n yɩ boto yãmb nengẽ ye. Sẽn dat-a naam yãmb sʋka bɩ a yɩ yãmb sõgne. Sẽn dat-a n yɩ pipi soab yãmb sʋka, bɩ a lebg yãmb yamba. Dẽ n so tɩ Ned Biiga ka wa n na n dɩ naam, a waame n na n yɩ sõgne la a rɩk a vɩɩm n kõ neb wʋsgo, n fãag-ba.» A Zezi waa n yita Zeriko tɩ neb wʋsg pʋgd-ba. La ade, zoeens a yiib n da zĩ sora noore; b sẽn bãng tɩ yaa a Zezi n loogdã, b mooname: «Soaala, Daviid biiga, zoe-y d nimbãanega!» Neba tãs-b lame tɩ b bas bʋʋre, tɩ bãmb na n nadg pãng n paas: «Soaala, Daviid biiga, zoe-y d nimbãanega!» A Zezi yaasame; b bool-b lame n yeel: «Bõe la y rat tɩ m maan y yĩnga?» Tɩ b yeele: «Soaala, kɩt-y tɩ d nina puki.» B nimbãanega yõka a Zezi tɩ b rɩk b nug n sɩɩs b nina. Nina puka zĩ kãng bala tɩ b na n sɩng a Zezi pʋgbo. B sẽn waa n kolg Zerizalɛɛm n ta Bɛtfaze la bala, Oliviye tãnga zug, a Zezi tʋma neb a yiibu. B yeel-b lame: «Kẽng-y tẽnga sẽn tondã, tɩ y na yãe bõang b sẽn loe t'a biig yɛs a sɛɛgẽ; lok-y ba la y tall-b n wa kõ-ma. B sã n sok-y bɩ y yeele tɩ yaa Soaala n tar b tʋʋmde, tɩ b na bas tɩ y loog ne-ba.» B maana woto n na n taas bãngda koɛɛga: «Yeel-y Siõ bi-pugla, ad-f dĩm sẽn wat f nengẽ, a sẽn ka baood faongã, a zomba bõanyãanga, a zomba zɩɩb-zɩt biiga.» Sẽn tʋm b rãmba kẽngame. B tɩ waa ne bõangã ne a biigã, wala Soaala sẽn togs-bã. Karen-biisa rɩka b fut n palg bõeensã t'a Zezi zomb. Neb wʋsg sɩngame n yɛdg b fut sora zugu, tɩ kẽer kɛɛd tɩɩs wila n tʋɩt sorã. Sẽn da be-b a Zezi taoor la b poorẽ da naaga taab n moonẽ: «A Daviid biiga paam pẽgre, kilill! Wẽnd sẽn tʋm a soaba paam pẽgre, b pẽgr kul sa-gãndo! Kilill!» B sẽn poog Zerizalɛɛm la tẽnga sẽn wulumd ne bʋʋre tɩ ned kam fãa sokdẽ: «Yaa ãnda?» Tɩ zãma wã na n leoke: «Yaa bãngd a Zezi, Galile Nazarɛt Zezi.» A Zezi kẽe wẽnd doogẽ n dig sẽn da be-b be n koosdẽ la b raadẽ. B tusa sẽn da tekd-b ligda te-roagensã n lubi, n lub sẽn da koosd-b wala goeelse. B yeelame: «B gʋlsa me: mam dooga na n boolame tɩ pʋʋsg roogo, la yãmb dɩk-a lame n maand fãadb roogo.» Zoeens la wobs me waa n bʋʋg-b la wẽnd dooga pʋga la b sãoog-b lame. Maan-kʋʋdba kãsem dãmba la Sɛb-mitba yãee bõn-bãna la b wʋma kom-bõonegã sẽn moonde: «A Daviid biiga paam pẽgre!» B sũur puuga wʋsgo. B yeela a Zezi: «Y wʋmda kom-bãmba sẽn togsd bũmb ningã?» B leokame: «M wʋmda neere, la bas-y tɩ m soke, yãmb nan ka karem sẽn gʋlsa ye: ‹Pẽgr neerem yita kom-bõoneg la sẽn yẽsemd-b bĩisim noorẽ?› » La a Zezi bas-b lame n kẽng Betani n tɩ gãand. Yibeoog pĩnda b yii Betani n lebd Zerizalɛɛm, tɩ kom tar-b. Tɩ b yãend kankang sora noore n bʋdg n ges-a, n mik tɩ yaa vãad bal la a yɛs ne. B yeela kankangã: «Fo kõn le wom biig bada.» Zĩig pʋgẽ bala, kankanga wẽneg n kʋɩɩme. Dẽ yɛɛsa karen-biisã tɩ b sok tɩ maana a wãn tɩ kankanga wẽneg n kʋɩ vugr bala? A Zezi yeel-b lame: «Sɩd-sɩda m yet-y lame tɩ y sã n tar tẽeb sẽn ka mi sãmbg ba bilfu, ka mam sẽn maan kankanga bal la y na n tõog n maan ye; ba y sã n yeel tãngã sẽn tondã: ‹Yɩk n lʋɩ koomẽ wã›, na n yɩɩ boto. Bũmb ning fãa y sẽn na n kos ne tẽeb kãsenga, y na n paam-a lame.» A Zezi kẽe Wẽnd doogẽ n zãmsd nebã tɩ maan-kʋʋdba la tẽnga nin-kẽemb babs-b be n yeel-ba: «Sor bʋg la y paamyã n maand y sẽn maandã? Ãnda n kõ yãmb sorã?» A Zezi leok-b lame: «Yaas-y tɩ m me sok-y bũmbu, bũmb a ye bala, la y sã n leok maam, mam me na wilg-y m sẽn paam sorã zĩig ninga n maand m sẽn maandã: A Zã sooba yita yɛ? Wẽnnaam nengẽ bɩ ninsaalb nengẽ? Tɩ b na n yeel b sũurẽ: ‹Tõnd sã n leok t'a yita Wẽnnaam nengẽ, b na n sokame tɩ yaa bõe yĩng marsã la tõnd pa tẽ a Zã. D sã n leok t'a yita ninsaal nengẽ, zãma wã beem na rɩ-do, tɩ neba fãa geta a Zã wa bãngda.› Dẽ la b kong n yeel a Zezi tɩ b pa mi ye.» A Zezi leok-b lame: «Mam me kõn togs yãmba m sẽn paam ned ning sor ye.» «Togs-y maam yãmb me sẽn tagsde: ned n da tar a kamb a yiibu. A yeela pipi soaba: ‹M biiga, kẽng rũnna n tɩ tʋm m pʋʋgẽ.› T'a leoke: ‹M pa rabd ye.› La sẽn yɩ bilfu, a mikame tɩ ka neere, n tuubi, la a kẽnga pʋʋgẽ wã. Ba wã goma ne a yiib soaba, tɩ yẽ leok: ‹M dabdame, m zu-soaba› n yaool n pa kẽng ye. Bãmb b yiiba sʋka, ãnda n maan a ba raabo?» Tɩ b leoke tɩ yaa pipi biigã. A Zezi yeel-b lame: «Yaa sɩd la m sẽn togsdã: fadg rɛɛsdba la pʋg-yoaadb na n lʋɩɩ y taoor Wẽnnaam Rĩunga pʋgẽ. Ade, a Zã waa yãmb sʋk ne sõmblem la y pa tẽe-a ye, tɩ fadga rɛɛsdb la pʋg-yoaadb yaool n tẽe-a. Bãmb manes-sõnga ka kẽes tuubg bilfr menga y sũurẽ tɩ y sak n tẽ ye. Kelg-y yelbũnd a to. Ned n da tar a pʋʋgo n sel bugsuntung sõngo, n wẽ yãgr n gũbg tɩɩsã, n maneg zĩig ning b sẽn na n wẽkd tɩɩsa biis tɩ lebg rãam, n ning gũudb ro-lug-lug a ye sʋka, n bao neb n gũnug pʋʋgã n bas n tog sore. Tɩɩsa biis sẽn waa n kolg tõsbo, tɩɩsa soab tʋma a rakõapa tɩ b wa reeg biis n wa. Sẽn get-b pʋʋga yõka rakõor a ye n pãbe, n kodg a ye, n lab a ye ne kuga. Pʋʋga soab le tʋm a zak kamb a taaba; b sõor yɩɩga pipi rãmbã, la b maana ne bãmb wa b sẽn maan ne pipi rãmbã. A kong n tʋma a meng biiga n yet a sũurẽ: ‹B na waoog m bigã.› Mik bãmb sẽn yãe pʋʋga soab biiga, b yeelame: ‹Yẽ n na n soog a ba raboogo, dɩlla wa-y tɩ d kʋ-a n soog a paoongo.› B yõka biigã n lob-a yãgra poore n kʋ-a. Pʋʋga soab sã n wa, a na n maana a wãn ne gũudbã?» Tɩ b leoke: «A na kɩt tɩ b ki kũ-toogo la a na bao neb a taab n gũnug a pʋʋgã, neb sẽn na n wa ne a pʋɩɩre, wakat fãa sẽn ta.» A Zezi yeel-b lame: «Yãmb zɩ n karem sebr sõng pʋgẽ: ‹Kugr ning metba sẽn bas kɛɛngã, kug kãng n lebg rooga sũuri. Dẽ yaa Wẽnnaam tʋʋmde, la d neeme t'a toga ne pẽgre.› M yet-y lame tɩ Wẽnd Rĩunga tʋʋmde, b na n deeg-a-la y nugẽ n kõ neb a taaba sẽn na n sõng t'a wom biisi. [ B sẽn gom kugr ninga yellã, f lʋɩɩ a zugu, f bũmb na kao, a lʋɩɩ f zugu bũmb na bedse.]» Maan-kʋʋdba la Farizẽ rãmba sẽn wʋm goama, b bãngame tɩ yaa bãmb poorẽ la b togs boto. B ra baood n na n yõk-b lame la b ra zoeta zãma wã, tɩ neba ra geta a Zezi wa bãngda. A Zezi le sɩnga b yelbũna wẽebo: «Arzãn Rĩung wẽnda dĩm a ye sẽn maan kibsa, a biig yikãadem yĩnga. A yiisa sõgen-kamba tɩ b saa n bool neb tɩ b wa yikãadma la b sẽn bool b rãmba pa tʋlg waoong ye. A tʋma kamb a taab yɛsa la a goma ne b woto: ‹Yeel-y m sẽn bool b rãmbã: Ade, kibsa rɩɩb seglame: lolse la dũm-wubdsa koodame, bũmb fãa beeme, wa-y yikãadma!› B sẽn bool b rãmba maana wa b toog ka ye. Kẽer kẽng a b pʋtẽ, tɩ kẽer kẽng leebgo. Kẽer yõga sõgen-kambã n nams-ba, n kʋ-ba. Dĩma sũur puugame t'a yiis tãb-biisi tɩ b kʋ bãmb me la b yõog b tẽnga. A yaool n yeela sõgen-kambã: ‹Dɩɩba segl n sɛɛme, la m sẽn bool b rãmba yɩɩ nin-yoodo. Kẽng-y sotiisẽ, n kãas y sẽn yãe b rãmb fãa tɩ b wa kibsã.› Sõgen-kamba yiime, n wool b sẽn paam b rãmb fãa sor zugu, nin-sõma la nin-wẽnse, n pids roogã. Dɩma kẽe rɩɩba roogẽ n na n ges nebã la a mika ned a ye sẽn pa yeelg a sẽn tog n yeelg fuug ninga ye. A yeel-a lame: ‹M zoa, bõe tɩ fo wa ka n ka yer f sẽn tog n yeelge?› La yẽ pa tõog n leok tɩ bũmb ye. Dẽ la dĩma yeel a sõgen-kamba: ‹Za-y nin-kãnga nao la a nus n lob-a yɩnga, likẽ, yãbr la yẽn kẽrsg zĩigẽ.› Yaa kʋʋnga zãng la b boonda la bilfr bala n na n paam n kẽ b sẽn tũus b rãmba sʋka.» Farizẽ rãmba seda ne taaba n na bẽd a Zezi n yõk ne b meng noor gomde. B yiisa b karen-biis kẽere, n paas a Erod kẽedba kẽere, ne sokr kãnga: «Soaala, d miime tɩ y zãmsg yaa akɩka la y ka wilgd Wẽnnaam sor ne zoe-nif ye. Y ka bak nin-bedr ne nin-bil ye, dẽ la d kot tɩ y leok-do: togame bɩ ka toge tɩ d yao Rom naaba yaoodo?» A Zezi sẽn mi b wẽnema leok-b lame: «Zãmb rãmba yaa bõe la y bẽt-m bẽdgo? Wilg-y maam yaooda ligdi!» B kɩs-b la wakɩr koɛɛng a yembre. T'a Zezi na n sok-ba: «Ãnd neng la ãnd yʋʋre la b bẽeg wakɩra zugu?» Tɩ b leoke: «Yaa Rom naaba dẽnna!» Dɩlla, kɩs-y Rom naaba, y sẽn tog n kɩs-ba, la y kɩs Wẽnd me b sẽn tog ne. A Zezi leokra ling-b lame tɩ b na n bas ba n looge. Yaa badaare la Saduseẽ rãmba, neb niyns sẽn gãd-b tɩ kũum ka tõe n vʋʋgã, kolg a Zezi n gom ne-b woto: «Soaala, a Moyiiz yeela woto: ‹Ned sã n ki n ka bas biiga, bɩ yaoã rɩk a kẽema pag n dog biig n kõ a kẽema.› Ade, tõnd zamaanẽ wã neb a yopoe n zĩndi n da ya ba-biisi. Pipi soaba yii kãadem ne paga la a kiime n pa rog biig ye, n bas paga ne a ba-biig a yiib soabã. Yɩɩ woto ne yiib soabã, la tãab soabã n wa ta a yopoe soabã. Bãmb fãa loogr poore, paga waa n kiime. Vʋʋgra raare, paga paada ne bʋgo, b fãa yɩla a sɩdb rãmb la?» A Zezi leok-b lame: «Yãmb bee tudgr pʋgẽ tɩ y ka mi Wẽnnaam pãnga la y ka reeg sẽn gʋls sebr sõng pʋg ye. Bãng-y tɩ vʋʋgr poore rao pa le rɩkd paga, la pag ka le kuiis rao ye, b vɩɩ wa malɛk rãmba sẽn vɩ toto arzãnẽ. La yĩnsa vʋʋgr poorẽ, y pa karem gomd ning Wẽnd sẽn kõ-y wã la? B yeelame: ‹Maam la a Abraam Wẽnnaam, a Izaak Wẽnnaam, a Zakoob Wẽnnaam?› B pa kiid n pa vʋʋgdẽ rãmb Wẽnnaam ye, b yaa sẽn vɩ-b Wẽnnaam.» A Zezi zãmsga pãng yɛɛsa sẽn wʋm-bã. B sẽn wʋm t'a Zezi kʋɩdga Saduseẽ rãmba, Farizẽ rãmba me sũu taaba n wa. B nin-yend soka a Zezi la sokra yɩɩ no-baoor meng-menga: «Soaala, bʋg la no-kãsenga Wẽnnaam noya sʋka?» T'a Zezi yeel-a: «Yaa nong Wẽnnaam, f Soaala, ne f sũur fãa, ne f sɩɩg fãa, nef yam fãa. Yẽ la no-kãsenga la pipi soaba. Sẽn pʋgda yẽ wẽnd-a lame, yaa nong f to wala f menga, Noora la bãngdba sẽn togsa waa n soga noy bãmba b yiibã pʋgẽ.» A Zezi sẽn mik tɩ Farizẽ rãmba ra tigma taab wʋsgã, bãmb me sok-b lame: «Yamb yetame tɩ bõe, Wẽnd Nedã poorẽ? B yaa ãnda biiga?» Tɩ b leoke: «A Daviid biiga.» Dẽ la a Zezi yeel yã: «Sɩngame tɩ bõe marsã t'a Daviid sẽn gomd ne a Vʋʋsem Sõng vẽnegr baas n boond-b tɩ Soaala: ‹Zu-soaba yeela m Soaala, zĩnd m dɩtgo tɩ m wa zõneg f bɛɛba fãa f taoore tɩ f teeg-b ne f nao?› A Daviid sã n boond-b t'a Soaala, bãmb na n yɩ-la a wãn yɛsa n le yaa a Daviid biiga?» Ned ba a ye ka tõog n leok-b tɩ bũmb ye. Badaar tɛk me, b pa le saag n bao b noor ye. A Zezi yeela zãma wã la b karen-biisã: «Noora Mitba la Farizẽ rãmba reega a Moyiiz karen-boko. Dɩlla b sẽn yet bũmb ninga bɩ y reeg la y maan boto, b menga manesma bala la y ka tog n tũ. B yetame tɩ woto n toge la b ka maand ye. B loeta zɩɩb bɛd n zɩlgd b taab bãgdo, la b menga nug-bil ka sɩɩsd-b ye. B sẽn maand bũmb ninga fãa yaa sẽn na yɩlẽ tɩ neba yãend-b bala. Yaa woto la b loet b rĩir bɩ b kamse sɛb gãna, la basd b futa zerd wogd-wogdo. B baooda pipi zĩiga, rɩɩb rotẽ la pʋʋsg rotẽ. B nongame tɩ neb waoog-b kʋʋng sʋka, b nongame tɩ b bool-b tɩ karen-saamba. Yãmb da saag n bas tɩ b bool-y tɩ karen-saamb ye, tɩ yãmb karen-saamb ya a ye bala la y fãa yaa ba-biisi. Da bool-y ned ba a ye tɩ y ba tẽng zugu, tɩ y ba ya a ye tãa la yaa Ba ninga sẽn be-b arzãna. Da saag-y n bas tɩ b bool-y tɩ zu-soab ye, tɩ yãmb tara zu-soab a ye tãa: yaa Krista. Sẽn yɩɩd-a a taab yãmb sʋka na n yɩla a taab sõgne. Sẽn zẽkd-a a menga, b na n sik-a lame. Sẽn sulgd-a a menga, b na n zẽk-a lame. Yell na pak yãmba, Sɛb-mitba la Farizẽ, zãmb rãmba, tɩ y pagda arzãn Rĩung neba taab yĩnga; yãmb n pa kẽede la y pa na n bas sẽn dat-ba me tɩ b kẽ ye. [ Yell na pak yãmba, Noora sebr mitba la yãmba, Farizẽ rãmba! Yãmb n pʋʋsde n ka yɛɛdẽ ye n yaool n sɛɛsd pʋg-kõap paoongo. Dẽ me la y sɩbgr na n zʋʋg y taab rẽnna.] Yell na pak yãmba, Sɛb-mitba la Farizẽ, zãmb rãmba, tɩ y rʋʋgda kʋɩlse la y saagda moog tõre n na n bao karen-biiga, la y sã n wa paam-a, y kɩtdame t'a tog ne bugum n yɩɩd yãmb naoor a yi. Yell na pak yãmba, so-wilgdb sẽn ya zoeense, tɩ y yetame tɩ f sã n wẽen ne wẽnd doogo, ka ye, la f sã n wẽen ne wẽnd dooga sãnem, yaa moodgr tɩ f pids f pʋlemde. Yam koees rãmba la zoeense, bõe n yɩɩde: sãnema bɩ wẽnd doogã sẽn kɩt tɩ sãnema lebg Wẽnd bũmbã? Yãmb yetame yɛsa tɩ f sã n wẽen ne maan-kugri, ka ye, la f sã n wẽen ne maoongã sẽn dɩg a zugã, lebga pakre tɩ f pids f pʋlemde. Zoeense, bõe n yɩɩde, maoongã bɩ maan-kugrã sẽn kɩt tɩ bũmb ning sẽn waa a zugu bɩ a lebg Wẽnd kũuna? Fo sã n wẽen ne maan-kugrã, fo wẽena ne bũmb ning fãa sẽn dog a zugu. Fo sã n wẽen ne wẽnd doogo, fo wẽena ne doogã la ne Wẽnd menga sẽn be a pʋgẽ. Fo sã n wẽen ne yĩngri, f wẽena ne Wẽnnaam zaoorã la ne Wẽnnaam meng sẽn zao a zugu. Yell na pak yãmba, Sɛb-mitba la Farizẽ, zãmb rãmba, yãmb sakd n kɩta dʋr a ye piig zugu, y zẽ-vãad la y zẽ-biis sẽn tar yũ-noodo n yaool n basd Noora sẽn wilg bũmb niyns wa pakre n yɩɩdã, wala zemsgo, nimbãan-zoeere la pʋ-peelem. Dẽ n segdẽ pipi tɩ sẽn keta yaool n wa paasẽ. Zoeens sẽn dat n wilg sore, ad-y y venda sẽn zem yʋgʋmde n yaool n yoogd zõaag n lobda. Yell na pak yãmba, Sɛb-mitba la Farizẽ, zãmb rãmba, yãmb nedgda wamd la lengr poore, t'a pʋg yaool n pid ne wagdem la yão-beed dẽgdo. Zoeense, deng-y n pek-y wamda la lengra pʋga, n yaool n tõog n pẽg a poora neerem. Yell na pak yãmba, Sɛb-mitba la Farizẽ, zãmb rãmba, yãmb wẽnda yaad sẽn fẽ goore, yɩnga b yaa neere, la pʋgẽ wã b pida ne kõab la yũugu buud fãa. Yãmb me yaa boto: yɩnga, neb nifẽ, yãmb wẽnda nin-tɩrse, la pʋgẽ, yãmb pida ne zãmbo la rẽgdo. Yell na pak yãmba, Sɛb-mitba la Farizẽ, zãmb rãmba, yãmb meta bãngdba yaado la y manegd nin-sõma wã rẽnna, n yetẽ: ‹Tõnd sã n da vɩɩnẽ d yaab rãmba wakato, d kõn naagẽ bãmb n daag bãngdba zɩɩm ye.› La woto wã, y meng y toore n togs tɩ y yaa sẽn kʋ-b bãngdba yagense. Aya! Modg-y n yɩɩg y saam-dãmba ne wẽnem! Wiisi la wag-bi buudu, yãmb yɩta a wãn n põs bugum sɩbgre? Yaa rẽ yĩng la m sẽn tʋmd y nengẽ bãngdba, sɩlem dãmba la sɛb-mitba; yãmb na n kʋʋ kẽere, n ka kẽer pika, n pãb kẽer pʋʋsg rotẽ, n dig-b tɩ b kẽ tẽng a ye tɩ y ta be n yis-ba. La woto y na rɩ zɩɩm ning fãa sẽn daag tẽng taale, sẽn sɩng a ka-yell-soab a Abɛl zɩɩm, n ta a Zakari, a Baraki biigã, y sẽn kʋ wẽnd doogẽ, maan-kugra taoore. Sɩd-sɩda, m yet-y lame, y zamaana na rɩ zɩ kãng fãa taale! Zerizalɛɛm, Zerizalɛɛm sẽn kʋʋd bãngdba la f labd ne kuga b sẽn tʋm a soab fãa f nengẽ, m tʋlga naoor yaka n tigs f kamba wa noaag sẽn põgend a kamba, la kamba pa sak ye. Ad-y y roogã na n lebga ro vɩʋʋgo. M yet-y lame tɩ y kõn le yãend-m yɛsa n tãag y sẽn na n moon daare: ‹Wẽnd sẽn tʋm a soaba paam pẽgre!› » A Zezi sẽn yi wẽnd doogẽ wã n looda, la b karen-biisa sẽn kolg n yeel-b tɩ b ges wẽnd dooga sẽn me to-to. T'a Zezi leoke: «Y ka gesa rẽ fãa neer la? Sɩd-sɩda m yet-y lame tɩ kugr kõn pa kugra to zug ye, fãa na n sirgame.» B sẽn waa n zĩ Oliviye tãnga zugu, a Zezi karen-biisa bal kolg-b lame n le sok-ba: «Soaala, d kotame tɩ y togs-do sẽn ya wakat ning la rẽ fãa na n yɩ la bũmb ning bũmb ning sẽn na n wilg y waoongo la dũni wã sɛɛbo.» T'a Zezi na n yeel-ba: «Maan-y gũusgu tɩ b ra wa tudg-y ye. Wʋsg na n zuka mam yʋʋre n wa yeelyã: ‹Mam la Wẽnd Nedã,› tɩ wʋsg na n tudg n tẽ. Y na wʋm tɩ b gomd zabr yelle, zabr rãamde na lʋɩ y tʋbrẽ, la ra bas-y tɩ b bondg y yam ye. Dẽ fãa na n sɩd zĩndame la nan ka rẽ la dũni sɛɛb ye. Tẽns na n yika zabr ne taaba, tɩ rĩung wulumd ne rĩung; kom na n lʋɩɩ ka la a lʋɩ ka, tẽng na n miimame, la rẽ fãa nan yaa dogma waasg sɩngr bala. B na n yõga yãmb n namse, n yõg-y n kʋ. Mam yĩnga dũni wã ninsaalb fãa na n kisg-y lame. Wakat kãng la wʋsg na n lʋɩ. Wʋsg na n zãmba taaba la b na n dɩɩ beem ne taaba. Zirẽ bãngdba na n yɩɩ ka tɛka n tudg neb wʋsgo. Yel-wẽna sẽn paasd n dabd yĩnga, taab nonglem na n wooga wʋsg sũurẽ. La sẽn na n modg-a n ka tol n lʋɩ, yẽ soab na põse. Wẽnd Rĩunga Koe-noogã na n moana dũni fãa pʋgẽ, ninsaalb fãa yĩnga. Dẽ poor bala la dũni wã na n sɛ. Y sã n wa ne Yel-yoog ninga a Daniyɛl sẽn goma t'a be wẽnd dooga pʋga (sẽn karemda ning pãng ne wʋmbo), bɩ Zɩɩde rãmb zoe n dʋ tãmse; sẽn be-a roog zugu bɩ a ra sig a roogẽ n nog a teed ye; sẽn be-a pʋʋgẽ me ra lɛɛg n wa bao a fuug ye! Yell na pak pagb niyns sẽn tʋt-b, bɩ sẽn tar b kamba sẽn ket bĩsrẽ wakat kãnga. Pʋʋs-y tɩ y zoees da seg waood bɩ vʋʋsg daar ye. Yel-beed ninga sẽn na n wa, wakat kãngã, wẽnem na n yɩɩga yel-beed niyns fã sẽn wa-b al dũni sɩngre n ta rũnna la b kõn le yãend a taar ye. B sã n da ka boogẽ dasem kãens sõore, ned ba a ye kõn põsẽ ye, la nin-sõma wã yĩnga, daara sõor na n boogame. Ned sã n yeel yãmba: ‹Ade, Krista bee ka,› bɩ: ‹Ade, b bee ka sẽnẽ,› bɩ y ra tẽ ye. Zirẽ-be-krist rãmba la zirẽ-be-bãngdba na n yikame n maan makre la bõn-bãn wʋsgo sẽn na n tudgẽ nin-sõma wã mense, dẽ sã n da tõẽ. Ade, m wilg-y la woto tɩ y bãng tiiri. Dɩlla b sã n yeelyã: ‹Ned Biiga bee weoogẽ bɩ y ra kẽng ye.› B sã n yeele: ‹B soonda ka,› bɩ y ra tẽ fɩ. Wala saag bugum sẽn yãngd yaanga n wẽneg n ta taoore, Ned Biiga waoong na n yɩɩ boto. Ad-y kɩɩng rɩgr kõn solg yibreg ye. Yel-beed kãens poore, wĩntoog na n sobame, kiuug ka na n le kõ vẽenem ye, ãds na n dʋʋgame, bũmb fãa na n yogsa a zĩigẽ yĩngri. Wakat kãng la Ned Biiga makr na n puk yĩngri tɩ Adem biig fãa tood a yãoogo. B na yãend Ned Biiga tɩ b zao sawato n sigd ne pãng la zɩɩr kãsenga. B na n yiisa b malɛk rãmba ne tõntõog sẽn kũmd wʋsgo tɩ b tigim dũni wã taoor la a yaang nin-sõma zãnga. Kelg-y kankang yelbũndi. A sã n tãood wil poala la a tobd vã-miinim, y miime tɩ tʋʋlg kolgame. Woto-me y sã n yãe yell kãensa fãa bɩ y bãng tɩ Ned Biiga wata a naam dɩɩbo. M yet-y lame tɩ zamaan kãnga kamb kõn loog tɩ m sẽn wilga fãa ka taas ye. Yĩngr la tẽng na n loogame, la mam sẽn togsa na n yalsame. Dũni sɛɛb daare la a wakato ned ba a ye ka mi ye, sã n ka Ba: ned ka mi, malɛk ka mi, Ned Biiga ka mi. Sẽn zĩnd a Nowe wakatã n na n wilg-d Ned Biiga waoong sẽn na n yɩɩ a soaba. Sa-kẽenga sẽn waa n dag n nan ka ni wã, b ra rɩtame la b yũuda, tɩ rap rɩgsd pagba, tɩ pagb kuiis rapa. Yɩɩ woto n tãag a Nowe sẽn kẽ koom koglg kẽenga raare. Neba ra pa tẽed tɩ bũmb na maan ye, n tãag sa kẽengã sẽn wa n loog ne b fãa gilli. Ned Biiga waoong me na n yɩɩ boto. Rap a yiib na n kooda pʋʋgẽ, tɩ b yãk a ye n bas a ye; pagb a yiib na n werda neerẽ, tɩ b yãk a ye n bas a ye. Maan-y gũusgu tɩ y ka mi y Zu-soaba waoong raar ye. Tags-y neer tɩ zak soab sã n da miẽ sẽn ya wakat ning la wagdr na n waẽ yʋngo, a kõn gũsẽ ye, a kõn basẽ tɩ b poog a roog ye. Yãmb me, bob-y n dõbẽ tɩ yaa wakat ning yãmb sẽn pa tẽedã la Ned Biiga na n wa. M ba bõe la sõgen sõngo la yẽesenga, t'a zu-soaba rɩk a zak n gũnug-a, t'a kõt zaka rãmb rɩɩbo, wakat sẽn ta? Zu-noog soab la sõgen kãnga, a zu-soaba sã n yi sor n wa mik t'a maanda boto. Sɩda m yet-y lame t'a na gũnug-a a paoong fãa. La Sõgna sã n ya sõgen yoogo, n yeel a sũurẽ: ‹M zu-soaba kaoosda waoongo›, t'a na n yik n pãbd a taaba, n na n dɩtẽ la a tɩgd rãam ne rã-yũudba, yaa daar ning la wakat ning a sẽn pa tẽedã la a zu-soaba na n wa; a na yiis-a, a na tɩ naag-a ne zãmb rãmba; be yaa yãbre la yẽn kẽrsg zĩiga. Arzãn Rĩung na n wẽnega pʋg-sɛdb piig sẽn yi ne b fitils n na n tɩ seg yikãad paalga. Bãmb sʋka, pʋg-sɛdb a nu n ya yalemse, t'a nu ya yẽesense. Yalemsa dɩka b fitils la b pa tẽeg n sui kaam n zɩ ye. Yẽesensã dɩka b fitils la b tẽeg n zɩɩ kaam, la-bõones pʋga. Pʋg-sɩd sẽn kaoos waoongo, b fãa sɩnga suusgu, n wa baas ne gõeem. Yʋn-sʋka, b wʋmame tɩ b moonda: ‹Ad pʋg-sɩda, yik-y tɩ d seg-a.› Pʋg-sɛdba fãa nekame tɩ ned kam fãa na n yõgen a fitila. Yalemsa yeela yẽesensã: ‹Sõng-y-d ne kaam tɩ d fitilsa kiidame!› Tɩ bãmb na n leok-ba: ‹Kaama ka tõe n sek tõnd ne yãmb ye, kẽng-y raagẽ n tɩ ra.› Bãmb me sẽn kẽng raabo la pʋg-sɩda sẽn ta, tɩ sẽn tar-b kaama naag n kẽ kibsa roogẽ, tɩ kʋɩleng wẽneg n page. Yalemsa lɛɛg n waame n yetẽ: ‹Soaala, soaala, pak-y tɩ d kẽ!› T'a na n zĩnd pʋgẽ n leoke: ‹Mam ka mi yãmb ye.› Sõng-y n da gũs ye tɩ y ka mi raare la wakat ye. Yaa wala ned sẽn togd sore n bool a rakõapa n dɩk a laog n gũnug-ba. A kɩsa a ye, sãnem gil a nu, a to wã a yiibu, a tãab soaba a ye: ned kam fãa ne a dabaar sẽn tõe to-to la a loogame. La ka yãee n kaoos ye, sẽn deeg-a sãnem gil a nu wã tɩ leebame n dok a nu. Sẽn deeg-a a yiibã maana rabaare a me roka a yiibu. Sẽn deeg-a a ye wã tɩ tuka boko n bus zu-soaba ligdi. Sẽn waa n kaoose, zu-soaba lɛɛg n waame la b zĩndame n maan b geelse. Sẽn dag n deeg-a a nu wã n dogl a nu wã kolg n yeelame: ‹M zu-soaba, yãmb da basa ne maam sãnem gil a nu la ade, m paama a nu n paase.› Tɩ zu-soaba na n leok-a: ‹Yaa neere, sõgen sõng la ka mi kʋɩɩm soaba, fo sẽn ka maan kʋɩɩm ne sẽn pa zem bũmbã, bũmb wʋsgo la m na n gũnug-fu; wa naag f zu-soabã n kɩdme.› Sãnem gila yiiba soab n pʋge la a yeelame: ‹M zu-soaba, y da basa ne-m sãnem gil a yiibu, la ade, m paama a yiib n paas.› Zu-soaba leok-a lame: ‹Yaa neere, sõgen sõng la ka mi kʋɩɩm soaba, fo sẽn pa maan kʋɩɩm ne sẽn pa zem bũmbã, bũmb wʋsg la m na n gũnug-fu; wa naag f zu-soabã n kɩdme.› Sẽn deeg-a a ye wã me waame n yeel: ‹M zu-soaba, m paam n bãnga yãmb neere wala ned sẽn baood ne a sũuri; yãmb kẽebda y sẽn pa bʋdẽ, la y wʋkda y sẽn pa yedgẽ. Dẽ n kɩt tɩ m zoe rabeem n dɩk y sãnema n bus tẽnga, la ade, deeg-y y soolem.› Dẽn la zu-soaba leok yã: ‹Nin-yoogo la kʋɩɩm daolgo, fo ra mii tɩ m kẽebda m sẽn pa bʋdẽ, la m wʋkda m sẽn pa yɛdgẽ, bõe yĩng la f pa rɩk m ligdã n bas ligd tɛkd nengẽ, woto m sẽn waẽ wã, m deegdẽ la m dẽnd zugu tɩ roaglg le paas. Deeg-y nin-kãnga sãnem gilgã n kõ sẽn tar-a piiga soaba. Sẽn tar-a, b kõt-a lame t'a pʋɩɩr fɩɩge, la sẽn ka tar-a wʋsgo, b na reeg bilfrã a sẽn tarã. La yõk-y bõn-yaalgã n lob yɩnga, likẽ, yãbr la yẽn kẽrsg zĩigẽ.› Ned Biiga wat n siga ne zɩɩr kãsenga, t'a malɛk rãmb yãagd-a. Wakat kãng la b na n zĩnd b naama zaoor zugu. Ninsaalb fãa na n tigma b taoore tɩ b welg-ba wa rũm-kɩɩm sẽn bakd pe-yãans ne boeese. B na n ninga pe-yaansa rɩtgo, n ning boeesã b goabga. Dĩma na n yeela sẽn beb rɩtgã: ‹Wa-y wɛ, m Ba sẽn bark b rãmba, n deeg pʋɩɩr b Rĩunga pʋgẽ, Rĩung ning b sẽn segl y yĩng al dũni sɩngrẽ. Ade, kom yõka maam la y rɩlg-m lame, ko-yũud yõk-m lame la y kõ-m lame tɩ m yũ; m yɩɩ sãana la y maan-m la sãando. M yɩɩ m zaala la y kõ-m la fuugu, m yɩɩ bãada la y waa n pʋʋs-m la tarem; b kẽes-m la roogo la y wa n ges-m lame.› Wakat kãnga nin-sõma na n leok-b lame: ‹Soaala, da-bʋr la tõnd mik tɩ kom tar yãmba tɩ d kõ-y rɩɩbo, tɩ ko-yũud tar-y, tɩ d kõ-y koom, tɩ y ya sãana tɩ d maan-y sãando, tɩ ya y zaala tɩ d yeelg-y fuugu, bãad bɩ bi-bees roogẽ neda tɩ d wa ges yãmba?› La dĩma na n yeelame: ‹Sɩd-sɩda m yet-y lame tɩ y bãng tɩ y sẽn maan dẽ ne m yaopa fãa yao zʋʋga, yaa mam meng la y maan yã.› Dẽ poore b na n yeela b goabg rãmbã: ‹Zãag-y ne maam, ka bark rãmba, n lʋɩ bugum sẽn ka kiid abada pʋgẽ, b sẽn segl Sʋtãana la a tũud-n-taas yĩnga. Ade, kom yõka maam la y pa kõ-m tɩ m dɩ ye, ko-yũud yõk-m lame la y pa kõ-m tɩ m yũ ye, m yɩɩ sãana la y pa maan-m sãand ye, m yɩɩ m zaala la y pa kõ-m fuug ye, m yika pa-keem, la b pag-m la roogo la y pa lɩk n ges-m ye.› Dẽ la b me na n sok-ba: ‹Soaala, wakat bʋgo la y tall kom la ko-yũudu, la y yɩ sãan, la y zĩnd y zaal, la y yik pa-keem bɩ b kẽes-y la roogo, tɩ tõnd pa tol n sõng yãmba?› B na n leok-b lame: ‹Sɩd-sɩda m yet-y lame tɩ y sẽn pa maan bũmb ning fãa ne mam yaopa yao zʋʋg ba a ye, yaa mam meng la y mong yã.› La bãmb na n kẽnga namsg sẽn ka sɛt zĩigẽ tɩ nin-sõma wã kẽng vɩɩm sẽn ka sɛɛb zĩigẽ.» A Zezi sẽn gom woto n sɛ la b sẽn yeel b karen-biisã: «Y miime tɩ pak keta rasem a yiibu, la b na n yõka Ned Biiga n kɩs tɩ b ka-b pika.» Maan-kʋʋdba kãsem dãmba la tẽnga nin-kẽemba tigma taaba maan-kʋʋd kãseng a Kaif zakẽ. B yẽsa ne taaba sɩlem ning b sẽn na n sɩlem n paam n yõk a Zezi n kʋ. B yalsa woto: «Ka tog tɩ yɩ kibsa pʋgẽ ye tɩ tẽnga na n wa naag n wulumdame.» A Zezi da bee Betani, wãoor a Simo zakẽ. La pag n kolg-b ne a yubla, kug peesem yubl neere; yaa kaam sẽn tar yũ-noog wʋsgo la sẽn koosd toogo n da be a pʋgẽ. Paga sudga kaama a Zezi zug. Wakat kãng tɩ b ra rɩtame. Karen-biisa yãee rẽ n puug b sũuri n yetẽ: «Yaa bõe tɩ b sãamd bõn-sõng a woto? B ra tõe n koosa kaama n paam ligd wʋsgo n kõ naong rãmba.» A Zezi wʋmame n yeel-ba: «Bõe tɩ y maan mo-beed ne pʋg kãngã? Yaa tʋʋmd sõng la a tʋm mam yĩnga. Y na kell n yãe naong rãmb y sʋka la mam ka na n kell n pa y sʋk ye. Paga sẽn daag yũ-noogã m zugã, yaa mam mumb la a sɩɩl n wilgi. Sɩd-sɩda m yet-y lame tɩ zĩig ning fãa kibar kãnga sẽn na n taẽ, dũni wã fãa pʋgẽ, b na tẽeg n gom n pẽg paga sẽn maam marsã wã.» Yaa wakat kãng la Tʋʋm-tʋmdb piig la a yiiba nin-yend sẽn boond t'a Zɩɩda, Iskariyot tẽng neda, kẽng maan-kʋʋdba kãsem-dãmb nengẽ n tɩ yeel-ba: «Bõe la y na n kõ-m tɩ m yõk-ba n kõ yãmba?» B kõ-a-la wakɩ koeems pistã. Dẽ tɛka a sɩng n baooda a sẽn na n bẽd bũmb ning n yõk-b n kɩse. Bur sẽn ka le ningd bɩlla pipi raare, la karen-biisa waa n sok a Zezi: «Y ratame tɩ d segl pak rɩɩb yɛɛlẽ?» B leokame: «Kẽng-y tẽnga pʋgẽ, a Zagl nengẽ n yeel-a: ‹Zagla, Soaala tɩ d wilg-fu: Mam wakat taame, la yaa fo zakẽ la m na dɩ pak rɩɩbo ne m karen-biisã.› » Karen-biisa kẽngame n maan wa a Zezi sẽn yeele la b segla pakã. Zaabr taame tɩ b kẽ ne b Tʋʋm-tʋmdbã n na n dɩ. Rɩɩba wakato b yeelame: «Sɩd la m togsda, yãmb nin-yend n na n yõk maam n kõ m bɛɛba.» Sũ-sãang bondga b Tʋʋm-tʋmdba yam tɩ b na n sok, a yeyn-ye: «Soaala, na n yɩɩ maam bɩ?» Tɩ b leoke: «Sẽn naagd-a maam n tʋmd laagẽ wã, yaa yẽ n na n zãmb-ma! Ned Biiga lebre na n yɩɩ wa b sẽn gʋlse la yell na pak ned ning sẽn na n zãmba wã. A sẽn ka waẽ moogo n sãoẽ a yĩnga!» Sẽn waa n ta a Zɩɩda, ned ning sẽn na n yõk-b n kɩs bɛɛbã, yẽ me sokame: «Wat n yɩɩ maam bɩ, Soaala?» La a Zezi leok-a lame: «Fo togs n sɛɛme.» B sẽn waa n dɩtẽ, a Zezi rɩka buri, n pʋʋs bark pʋʋsgo, n wes burã n kõ b Tʋʋm-tʋmdbã n yetẽ: «Deeg-y n dɩɩ-y, woto yaa mam yĩnga.» Dẽ poore yaa laog neer la b rɩk yã la b sẽn pʋʋs barka, b kɩs-a-la b Tʋʋm-tʋmdbã n yetẽ: «Yũ-y, yãmb fãa, tɩ woto yaa m zooda zɩɩm, zood sẽn yõg ne zɩɩma m sẽn daag neb fãa yĩnga, b yel-wẽna sugr yĩnga. La sɩd wa m sẽn yetã, m kõn leb n yũ bugsuntung sõng biis rãam n tãag raar ning m sẽn lebd n wa yũ a rã-paalgã ne yãmba, m Ba Rĩunga pʋgẽ.» B sẽn yɩɩl n sɛ, b rɩka Oliviye tãng sore. A Zezi yeel-b lame: «Yʋnga bala m na n yɩɩ kugr ninga y fãa sẽn na n lak n lʋɩ. B gʋlsame: ‹M na n wẽe pe-kɩɩma la piisa fãa na n sẽegame.› La m vʋʋgr poore, m na reng-y Galile tẽnga.» A Piyɛr yeelame: «Ba b fãa gill sã n na n lak yãmb wa kugr n lʋɩ, kõn yɩ maam ye.» T'a Zezi na n leok-a: «Sɩd wa m sẽn yetã, yʋnga bala, no-raoog sẽn wat n nan ka kelem dẽ tɩ f yeela naoor a tã tɩ f ka mi maam ye.» T'a Piyɛr na n leoke: «Ba m na naag yãmb n ki, m kõn yeel tɩ m ka mi-y ye.» Taaba fãa me yeela boto. B waa n taa zĩig a ye sẽn boond tɩ Zɛtsemani t'a Zezi yeel b karen-biisã: «Yaas-y ka tɩ m ta taoor n pʋʋs.» B boola a Piyɛr la a Zebede kamb a yiibã. Wakat kãnga sũ-sãang la yĩnsirg yõk-b lame, tɩ b yeele: «Sũ-sãang n na n kʋ-ma, yaas-y ka n pak-ma.» B sẽn zãag bilfu, b lʋɩɩ b yãnvabga n sɩng pʋʋsg woto: «M Ba, sã n tõe, bɩ y kɩt tɩ tooga zãag ne maam. La ade, ka mam daab n so taoor ye, yaa yãmb dẽnna.» B sẽn leb b karen-biisa nengẽ, b mikame tɩ b gõe, tɩ b yeel a Piyɛr: «Woto yãmb pa tõog n pak maam wakat yɛng menga? Bas-y gõeem la y pʋʋs n da lʋɩ ye tɩ ninsaal sũur data la a pãng paooda.» B le zãagame yɛsa n na n pʋʋse: «M Ba, tooga sã n ka tõe n zãag tɩ m pa yũ-a bɩ yɩ wa y sẽn date.» B le lɛɛg n waame n le mik tɩ karen-biisa gõe: b nina ra zɩsga ne gõeem. B bas-b lame n le zãag n na n pʋʋs, naoor a tãab soaba, wala b sẽn da zoe n pʋʋse. Dẽ poore b lɛɛgame n wa yeel-ba: «Y tõe n gũsame marsã, n vʋʋse. Ned Biiga sẽn na n lʋɩ yel-wẽn-maandba nusẽ wakat taame. Yik-y tɩ d looge tɩ sẽn na n kɩta tɩ b yõk maama waame bala!» A Zezi ka paam n gom n sɛ ye, t'a Zɩɩda, Tʋʋm-tʋmdb piig la a yiiba nin-yende, wẽneg n poog ne neb ka tɛka sẽn zãad sʋʋs la rasaba; yaa maan-kʋʋdba kãsem-dãmb la tẽnga nin-kẽembã n da yiis-b. Zãmbda ra kõ-b-la makr kãngã: «M sẽn na n mobg a soab wala m zoa wã, yaa yẽnda, yõk-y yẽe.» A sɩd kolga a Zezi n yetẽ: «Soaala, m pʋʋsda!» La a mobg-b lame, t'a Zezi yeel-a: «M zoa, maan f tʋʋmde.» Tɩ neba na n kolg marsã n yõk-ba. A Zezi tũud-n-taasa nin-yend taka a sʋʋg n wõog, la a kɛɛ maan-kʋʋd kãsma sõgen a ye tʋbre n fiuug. T'a Zezi na n yeel-a: «Lebs f sʋʋga a wʋʋgẽ tɩ sẽn zãada sʋʋg fãa, sʋʋg n kʋʋd-a. F tẽedame tɩ m ka tõe n yõk m Ba sɛɛga, tɩ b ko maam mars-marsã bala, malɛk rãmb sẽn taẽ tus kobs-yopoe la a yi? La sẽn gʋls tɩ kall tɩ yɩ boto wã maandẽ-la a wãn n taase?» B lɛɛg n goma ne zãma wã: «Mam yaa so-gɩt laa, tɩ y yi ne sʋʋs la rasaba n na n yõk ma? Beoog sẽn vẽeg fãa m da zĩi wẽnd doogẽ n zãmsd-y la y ka yõk-m ye. Yɩɩ woto tɩ sẽn gʋls Sebr pʋgẽ tõog n pidsi.» Wakat kãnga karen-biisa fãa bas-b lame n zoe. Sẽn yõk-ba a Zezi wã tall-b lame n kẽng maan-kʋʋd kãseng a Kayif nengẽ; be, Sɛb-mitba la nin-kẽembã waa n tigma taaba. A Piyɛr da pʋgda yɩɩg-yɩɩga n wa ta maan-kʋʋd kãsenga yiri; a tol n kẽe pʋgẽ n zĩnd ne sõgen-kambã n na n ges yella sẽn na n baas to-to. Bãng-y tɩ maan-kʋʋdba kãsem-dãmb ne bʋʋda rãmba da baooda rõadga n na n dõd a Zezi n paam n kʋ-ba la ra ka naana ye. Sẽn wa-ba yaool n yɩɩ wʋsgo. Baasgo neb a yiibu n ta n togs woto: «Nin-kãnga yeelame: ‹M tõeeme n wã wẽnd doogã n lebs n me-a ra-yɩten-daare.› » Maan-kʋʋd kãsenga yikame n yeel a Zezi: «Fo ka leokd tɩ bũmbu, bõe la b yet tɩ foo n maane?» T'a Zezi sĩnd b noore. Maan-kʋʋd kãsenga yeel-b lame: «M kot-f lame tɩ f togs-do sã n yaa foom la Krista, Wẽnnaam Biigã.» A Zezi leok-a lame: «F togs n sɛɛme, la m yet-y lame tɩ y na n yãee Ned Biiga t'a zĩ Wẽnnaam pãng soab rɩtgo, n zao sawadgo n sigd tẽnga.» Maan-kʋʋd kãsenga kẽesa a fut n yetẽ: «A tʋʋsa Wẽnde, d le baooda kaset dãmb n na n maan bõe? Yãmb sẽ n ka wʋme, a tʋʋsa Wẽnde. Y yetame tɩ bõe?» B naaga taab n leoke: «A toga ne kũum.» B sɩngame n tʋbsd b neng kolkoodo la b pãbd-b pegse; kẽer da soosd n pãbd-b lame la b yetẽ: «Bãng wɛ, Wẽnd Nedã, ãnda n wẽ foom?» A Piyɛr da zĩi zakẽ tɩ yem-poak a ye kolg n sok-a: «Foo, fo ra ka be ne Galile Zezi wã?» A Piyɛr kɩɩsa neba fãa taoore n yetẽ: «Ad mam ka mi fo sẽn dat n yeel tɩ bũmb ning ye.» A Piyɛr sẽn serge n lebd dignoorẽ, la yem-poak a to sẽn yãe-a n yeel neb a taaba: «Ad-y nin-kãnga ra bee ne a Zezi, Nazarɛt Raoã.» La a Piyɛr le kɩɩsame la a wẽnnẽ: «Mam pa mi nin-kãnga ye.» Sẽn yɩ bilfu, zaka noor dãmb kolga a Piyɛr n yeel-a: «Kɩɩsg ka ye, fo ra tũud-a lame, fo goama bal n lukd f bãongo.» T'a Piyɛr tar kɩɩsgo la wẽenego: «Mam ka mi nin-kãnga ye.» La no-raoog wẽneg n kelmame. A Piyɛr tẽega Krista sẽn da yeelã: «Noaag ne a na n kelem tɩ f yeela naoor a tã tɩ f ka mi maam ye.» La a yiime la a kiigd nintãm. Beoog sẽn vẽege, maan-kʋʋdba la nin-kẽemba le tigma taaba la yaa b yẽsgã na baas ne a Zezi kũum bala. B sẽba a Zezi n tall-ba n tɩ bas ne a Pilat tɩ yẽ n da ya kombere. Zãmb soab a Zɩɩda sẽn bãng tɩ b paalga a Zezi bʋʋdo, a zaba ne a menga n tall sãnem wakɩ pistã wã n wa lebs maan-kʋʋdba la tẽnga nin-kẽembã, n yetẽ: «Ade, m kongame n kɩt tɩ b na n daag ned sẽn ka tar a toorẽ yell zɩɩm.» La b yeel-a lame: «Dẽ ka pak tõnd ye, foo n na bãnge.» T'a na n lob ligda wẽnd doogẽ la a yi n tɩ luul. B sẽn wʋk ligdã, la maan-kʋʋdba sẽn yeele: «Ligd kãnga ka tõe n yɩ wẽnd doog ligd ye, t'a yaa zɩɩm ligdi.» B yẽsa ne taaba la b rɩka ligdã n da yagda pʋʋgo n na n mumd sãamba. Yaa rẽnd me yĩnga la al ba rũnna b ket n boonda pʋʋgã tɩ «Zɩɩm pʋʋgo.» Woto taasa bãngda Zeremi gomde: B rɩka wakɩ pistã wã, Israyɛl kamb sẽn da saag sẽn zʋʋga saagrã la b raa yagd pʋʋgo, wala m Soaala sẽn wilg-ma. B talla a Zezi n ta kombera taoore tɩ yẽ na n sok-ba: «Yaa foo la Zʋɩf rãmba dĩma bɩ?» T'a Zezi na n leok-a: «Fo togsame.» Maan-kʋʋdba kãsẽm-dãmb la nin-kẽemba ra rõt-b lame tɩ b sĩnda. Dẽ la a Pilat le sok-ba: «Fo ka wʋmd b sẽn togsd f poorẽ laa?» La a Zezi ka leok-a tɩ bũmb ye, al t'a Pilat yɛɛs wʋsgo. Yʋʋmd-yʋʋmd fãa, kibsa yĩnga, a Pilat da mii n yiisda bi-bɛɛg a ye roogo, la yaa tẽnga rãmb sẽn kos tɩ b yiis a soaba. Mik bi-be-maasr a ye n dag n be roogẽ yʋʋmd kãnga t'a yʋʋr boond tɩ Barabas. Dẽ la a Pilat sok zãma wã: «Bʋg la y rat tɩ m yiis roog n base, a Barabas bɩ a Zezi, b sẽn boond a soab tɩ Krista?» A yaool n mii neere tɩ yaa sũ-kiir yĩng bala la b yõk a Zezi. A Pilat paga tʋmame tɩ b wa yeel-a bʋʋda zĩigẽ: «Da lʋɩɩs f toog yell kãnga pʋgẽ ye tɩ yaa nin-tɩrga; yʋngẽ m zãmsa a poorẽ la ka yɩ-m noog ye.» Maan-kʋʋdba kãsẽm-dãmb la tẽnga nin-kẽemba sagla zãma wã tɩ b kos a Barabas la b kɩt tɩ b kʋ a Zezi. Dẽ la Kombera sok-ba: «Ãnda la y rat tɩ m base?» B leokame t'a Barabas. A Pilat yeel-b lame: «La a Zezi, b sẽn boond a soab tɩ Krista, m maanda yẽ soab bõe?» Tɩ b fãa leoke: «Ka-y yẽe pika!» T'a Pilat me leok ba: «Bõe la a maanyã tɩ ya wẽnga?» La b naaga taab n moon tɩ yɩɩd pĩnda: «Ka-y yẽe pika.» A Pilat sẽn mik t'a makda zaalem la bʋʋra bal n wulumd n dabda, a rɩka koom n nudg a nus neba fãa nifẽ la a yetẽ: «M yiisa m toog zɩ kãnga raagrẽ, yãmb n na bãnge.» B le naaga taab n yeele: «Bɩ a zɩɩma taal pa d zug la d kamba zugu.» A Pilat kong n basa a Barabas; a kɩtame tɩ b pãb a Zezi la a kõo neba sore tɩ b ka-b pika. A Pilat tãb-biisa talla a Zezi n kẽ bʋʋdba sikẽ la neb sẽn ta kobs-yoob gũbg-b lame. B yeega b fuugã n yeelg-b fu miuugu, n gõd gõos gʋle n teeg b zugu; n bao kãnkãr n ning b nugẽ, (wa naam dasaare) n yĩgimd b taoor marsã n laad ba: «Y zĩig be neere, Zʋɩf rãmb dĩma!» B ra tʋbsda b nenga kolkoodo la b mii n deeg kãnkãrã n va b zugu. B sẽn waa n yaal-ba n tɩge, b yeega fu-miuugã n yeelg-b b meng fuugu, la b tall-b lame n na n tɩ ka pika. B sẽn waa n dabda, b sega Sirɛn ned a ye, a yʋʋr a Simo, la b modg-a lame t'a sõng a Zezi n zɩ b pika. B sẽn ta Golgota (zu wang tãnga) b kalma rãam ne rũng yam n kõ-b tɩ b yũ. La b sẽn lembe, b pa tʋlg n yũ ye. B sẽn ka a Zezi n sɛ, b pʋɩɩ taab b futu, ned kam ne a zu-noog sẽn tʋʋg-a soaba. B ra zĩi woto marsã n gũudẽ. B ra gʋlsa bũmb n yagl a Zezi zugẽ, n na n wilg sẽn ya bũmb ning n wa ne b kʋʋbo; ra gʋlsa woto: «Wã la a Zezi, Zʋɩf rãmb dĩma.» Naaga so-gɩtba a yiib me n ka, a yembre b rɩtgo, a yembre b goabga. Neba ra loogda pika tẽngre n yĩgsdĩ la b tʋʋsd-b. B ra yetame: «Sẽn tõe-a n wã wẽnd doogã la a lebs n me-a ra-yɩten-daar soaba, fãag f menga, f sã n ya Wẽnnaam Biiga la f sig pika zugu.» Maan-kʋʋdba kãsem-dãmb me ra laad-b lame; b me naaga Sɛb-mitba la tẽnga nin-kẽemba n yetẽ: «A fãaga a taaba n yaool n ka tõe n fãag a meng ye. A yaa Israyɛl Dĩma: bɩ a sig pika marsã tɩ d na tẽe-a! A yet t'a teega Wẽnd la, Wẽnd sã n geta yelle, bɩ b fãag-a. Ka yẽ meng n yeele: ‹Mam yaa Wẽnd Biiga!› » So-gɩtba sẽn da ka pika me ra naagame n tʋʋsd ba. Wĩnto-sʋk n ta zafare, zĩiga lebga lika. Zafare, a Zezi tãsa ne pãnga: «Eli, Eli! Lema Sabaktani.» La rẽ rat n yeelame: M Wẽnnaam, m Wẽnnaam! Bõe yĩng la y bas-ma? Neb kẽer sẽn zĩnd be n wʋm b goama ra yetame: «Nin-kãnga boondaa Eli!» Dẽ la nin-yend wudg n dɩk bũmb sẽn fõogd koom n los rã miisg pʋgẽ, n yaag n loe tãnwĩiga n kõ-b tɩ b yũ. La neb a taaba yeel-a lame: «Yaas tɩ d ges a Eli na wa n fãag-a sɩda!» A Zezi le tãsame la b kiime. Wẽnd dooga peend kãsenga kẽega yĩngr n ta tẽnga. Tẽnga miimame, pĩis tãsa mugnum, yaad pagsame la nin-sõma wʋsg sẽn da ki yĩns vʋʋgame. A Zezi vʋʋgr poore nin-bãmb kẽe Tẽn-sõnga pʋga la neb wʋsg yãend-b lame. Sã n ya tãnsoaba la neb niyns sẽn da be-b pika sɛɛga n gũud a Zezi wã, b sẽn yãend tẽnga miuungu la yɛl a taaba, b pɛlens yɩkame tɩ b yeele: «Ad-y nin-kãnga sɩd da yaa Wẽnd Biiga.» Pagb wʋsg ra yɛsa yɩɩga n getẽ. Yaa pagb niyns sẽn da pʋgd-b al Galile tẽnga la b ra get b yelle, wala Magdala Mari, n paas a Mari a Zak la Zozɛf ma, n paas a Zebede kamba ma. Zĩ-sobd noorẽ, Arimati arzɛk soab a ye sẽn boond tɩ Zozɛf la sẽn da tũud a Zezi, kẽnga a Pilat nengẽ n tɩ kos a Zezi yĩngã. La a Pilat yeelame tɩ b kɩs-a. A Zozɛf reega kũuma n sẽb ne peen-paalga, la a mum-a-la a meng yaoogẽ, a sẽn nan tuk paalem kugsẽoogẽ. A baoo kug bedre n pag yaooga noor la a kuli. Sã n yaa Magdala Mari la Mari a to wã bãmb waa yaoogẽ wã n da zĩi n get-a. Vẽkembeoogo, dat n yeelame tɩ paka seglg sẽn baase, maan-kʋʋdba kãsem dãmba la Farizẽ rãmba sũu taab n wa a Pilat nengẽ n yeel-a: «Dĩma, d tẽegame tɩ zirẽ-be-neda sẽn waa n ket n vɩ, a yeelame: ‹M kũum dasm a tãab poore, m na n vʋʋgame.› Dɩlla kɩt-y tɩ b gũ yaooga dasm a tã, sã n ka rẽ, a karen-biisa wat n soos n dɩka a yĩnga n yaool n yeel neba t'a vʋʋgame, la ziri kãng wẽnem na n yɩɩga pipi soabã.» A Pilat yeel-b lame: «Ad tãb-biisi, tɩ yals-y-ba tɩ b gũ wa y sẽn datã.» Tao-tao bala b kẽngame n tɩ ges yaoogã, n ning makre a linga zugu la b yals gũudba n gilg. Sibra raar sẽn looge t'a vẽkembeoog sõor nan pukdẽ, Magdala Mari ne Mari a to wã waame n na ges yaoogã. La ade, tẽnga miima wʋsgo la Soaala malɛk sigame n wa lak kugrã n maneg n zĩ a zugu. Malɛka ra yãgda wa saag sʋʋga la a fuuga ra yaa pɛɛlg wa sapɩlem. Sẽn da gũud-b yaoogã yãend-a lame n yɛɛse n lebg wa kũum. Malɛka yeela pagbã: «Yãmb yẽ, ra maan-y rabeem ye, m miime tɩ yaa Zezi ning sẽn ka pika la y baooda; b ka le ket ka ye, b vʋʋgame, wala b sẽn da yeele. Waa-y n ges-y b sẽn da gãneg-b zĩig ninga. La kẽng-y tao n tɩ yeel b karen-biisã: ad-y b vʋʋgame la b na n deng-y la Galile tẽnga, la yaa be la y na n yãend-ba. M sẽn da tar n na n wilg-y la woto.» Pagba basa yaooga tao-tao tɩ b sũur sidgd ne sũ-noogo tɩ b zoe n tɩ togs karen-biisã. A Zezi sega pagbã, n yeel-ba: «Y yɛɛl ba!» Tɩ pagba na n kolg n wõgemd n mobg b nao. A Zezi yeel-b lame: «Da zoe-y rabeem ye la yeel-y m yaopã tɩ b rɩk Galile sore tɩ yaa be la b na n yãend-ma.» Pagba sẽn looge, yaooga gũudb kẽer kẽ tẽnga pʋga n togs maan-kʋʋdba bũmb ning fãa sẽn maane. Dẽ la b tigim taaba, bãmb ne tẽnga nin-kẽemba la b sẽn yẽs n sɛ, b kõo tãb-biisa ligd wʋsgo, la b yeel-b lame: «Y na n togsa woto: ‹A Zezi karen-biisã soos n waa ne yʋngo, tõnd sẽn waa n gõe, n zuk ba.› Kombera sã n bãnge d na kabs-a t'a ra maan-y bũmb ye.» Tãb-biisa reega ligdã la b maana wala b sẽn wilg-bã, b yelga kibar kãnga Zʋɩf rãmba sʋka n tãag rũnna. Tʋʋm-tʋmdb piig la a ye wã kẽnga Galile, a Zezi sẽn da yeel tɩ b seg taab tãng ninga zugu. B sẽn yãend-ba, b wõgemda b taoore, kẽer me yaool n da ket n sãmbdame. A Zezi kolgame n yeel-ba: «M paama tõog buud fãa yĩngr la tẽng zugu. Kẽng-y, kɩt-y tɩ mooga ninsaalb buud fãa lebg m karen-biisi, n kõt-b soobo: Ba la Biiga la Vʋʋsem Sõng yʋʋr yĩnga, la y zãms-b tɩ b reeg bũmb ning fãa m sẽn wilg-y. Ade m na n paa ne yãmb, daar fãa, n ta dũni sɛɛbo.» A Zezi Krista, Wẽnd Biiga, Koe-nooga sɩngre. Yaa woto n be bãngd a Izayi sebrẽ: «Ade, m tʋmda m no-rɛɛs f taoore t'a segl f sore. Yẽ Koɛɛg n sãt weoogẽ wã n yetẽ: ‹Maneg-y Soaala sore, sõng-y t'a so-bugsa lebg tɩrse.› » Rao ning sẽn da kõta soobo n boond t'a Zã, ra bee weoogẽ, n moond tɩ yel-wẽna tõe n paama sugri ne tuubgu. Zɩɩda tẽns rãmb fãa, n paas Zerizalɛɛm dãmba da zoetame n kẽnd a Zã nengẽ n deegd soobo, Zʋrdẽ kʋɩlga pʋga, la b togsd b yel-wẽna. A Zã ra pila yʋgʋmd gãongo. Sʋya la weoog sɩɩd n da yaa a rɩɩbo. A zãmsga pʋgẽ, a ra yeta nebã: «Ned n be mam poorẽ n watẽ la a soab pãng yɩɩda maam. M pa tog meng n yĩgimd a taoore n lok a neoodr gĩsg ye. Mam kõta yãmb soob ne koom la bãmb na n kõo yamb soob ne a Vʋʋsem Sõngo.» A Zezi waa n yii Nazarɛt, Galile soolmẽ, n wa reeg soob Zʋrdẽ kʋɩlga, a Zã nengẽ. A Zezi sẽn deeg soobã n wẽneg n yit koomẽ, la a Zã sẽn yãend saag sẽn pake t'a Vʋʋsem Sõng sigd b zugu wa walle. La koɛɛg n zĩnd yĩngr n yeele: «Fo yaa mam Bi-nongre, m yam kẽ-f la zãnga.» A Zezi sẽn deeg soob n sɛ, a Vʋʋsem Sõng kɩtame tɩ b kẽng we-raoogẽ. B paa be rasem pisnaase tɩ Sʋtãan kʋɩɩb-ba. B ra bee we-rũms sʋka, la yaa malɛk rãmb n da get b yelle. B yõka a Zã n kẽes roogo la wakat kãng la a Zezi wa Galile n sɩng Wẽnd Koe-nooga moonego. B ra yetame: «Wakat taame, Wẽnd Rĩunga kolgame, tuub-y y yel-wẽna, tẽ-y Koe-noogã.» A Zezi ra yegda Galile mogrã, la b yãee a Simo ne a yao, a Andre tɩ b lobd zulung koomẽ. Bãmb tʋʋmd da yaa zĩm yõgbo. A Zezi yeel-b lame: «Bɩ y bas la y wa tũ maam; mam na n kɩtame tɩ y bao neb n kõ-ma.» Tao-tao bala, b basa b zulumsi n pʋg a Zezi. B sẽn ta taoor bilfu, b yãee a Zebede kamba, a Zak ne a yao, a Zã. Bãmb da manegda b zulumsi koglg pʋga. A Zezi boola bãmb me, tao bala bãmb me basa b ba, a Zebede, ne sẽn da sõngd-b bãmbã, la b tũ-la a Zezi. A Zezi ne b karen-biisã kẽe Kafarnaom tẽnga. La vʋʋsg daar sẽn ta, a Zezi kẽe pʋʋsg roogẽ n zãmsd neba. B zãmsga ra yɩkda neb pɛlense tɩ b ra zãmsda wa ned sẽn tar a toorẽ tõogo, b ra ka zãmsd wa sẽn da karem-ba-n-sika ye. Rao a ye la Sʋtãamb ra kẽ yã t'a ra be pʋʋsga roogẽ n moonẽ la a yetẽ: «Nazarɛt Zezi, yaa bõe la y rat ne-do? Y wa-la d menesg bɩ? Ad tõnd mi-la y sẽn yaa a soaba: Wẽnd Nedã.» A Zezi zaba ne-ba, n yetẽ: «Bas-y bʋʋre la y yi nin-kãnga pʋgẽ.» Sʋtãamba kɩtame tɩ raoã yĩng rigimd wʋsgo. La rẽ poore b kelmame n yaool n yi. Neba fãa pɛlens yɩkame, al tɩ b sokd taaba: «Woto rat n yeelame tɩ bõe? Yẽ n zãmsd neb zãms paala, la wa nin-naaba; yẽ n le kõt Sʋtãamb noor tɩ b sɩd tũudẽ!» La a Zezi yʋʋr yii zĩis fãa, tao-tao bala, Galile tẽns pʋsẽ. A Zezi yii pʋʋsga roogẽ n wẽneg n kẽ a Simo la a Andre zakẽ ne a Zak la a Zã. Dẽ t'a Simo reem-poaka yĩns da wɩngame t'a gãe roogẽ; tao bala b goma a Zezi bãada yelle. A Zezi kolgame n gãd bãada nugu n kɩt t'a yiki. Paga yĩn-wɩngra wẽneg n sɛɛme t'a yik n na n bao rɩɩbo n kõ-ba. Zaabre, wĩndga sẽn waa n lʋɩ, b talla bãad dãmb wʋsgo n paas Sʋtãamba sẽn da be b rãmb pʋsẽ n wa a Zezi nengẽ. Yaa tẽnga tõr la bala n da tigim zaka noore. B sãooga bãad-dãmb sẽn da bẽed bãas buud toor toore la b riga Sʋtãamb wʋsgo. B ra ka basd Sʋtãamba tɩ b gom b yell ye tɩ Sʋtãamba ra mii b sẽn ya-la. Tõd-beoog pĩnda, zĩig sẽn waa n ket n ya pʋlum-pʋlum, a Zezi yikame n kẽng weoogẽ la b ra bee be n pʋʋsdẽ. A Simo la karen-biis a taaba yikame n babs-ba. B yãend-b lame n yeel-ba: «Ad-y neba fãa baooda yãmba.» A Zezi leok-b lame: «Bɩ d teem zĩiga, d kẽ tẽn-toosã, tɩ m tõog n zãms be me rãmba, tɩ yaa rẽ yĩng la m yi m sẽn da beẽ wã.» A Zezi saaga Galile tẽnsa fãa n karemd nebã b pʋʋsg rotẽ la b yiisd Sʋtãamba. Wãoor a yembre n waa a Zezi nengẽ n wõgemd b taoore n yetẽ: «Yãmb sã n data y tõe n kõo maam laafi.» A Zezi zoela a nimbãanega n tẽeg b nugu n sɩɩs-a n yetẽ: «Mam datame, bɩ f paam laafi!» Tao bala a wãooda sãoogame t'a yĩng lebg neer yɩlemde. A Zezi tãsa wãoora t'a looge. B ra yet-a lame: «Gũus n da gom ne ned ba a ye f sãoogra yell ye la kẽng n tɩ wilg f meng maan-kʋʋda la f kõ kũn ning a Moyiiz sẽn wilg tɩ b kɩse tɩ rẽ yɩ f laafi wã paoong kaseto.» Wãoora sẽn yi bala, a sɩngame n moone n togsd kibarã. Woto a Zezi ra pa le tõe n kẽ tẽng pʋgẽ, n da paad weoogẽ. Neba baas n yi zĩis fãa n babs ba. A Zezi waa n leba Kafarnaom. Pa yãee n kaoos tɩ neba bãng tɩ b lɛɛg n waa b yiri ye. Neba sũume n wa, tɩ vɩʋʋg ra ka le be ba bilf ye. Dignoora fãa ra pida ne neba, tɩ b kõt-b Koe-noogã. Neb a naas põka põor a ye n wa. La neba sẽn da ya wʋsgo, t'a Zezi kolgr ya toogo, b kɩbga võor doga zugu n tũnug be n sik põora ne a gãagã a Zezi taoore. A Zezi sẽn yãe neba tẽebã, b yeela bãadã: «M biiga, f yel-wẽna paama sugri.» Mik Mitb kẽer n da be neba sʋka la bãmb ra sokda b mense: «Yaa bõe tɩ nin-kãnga gomd woto? A mamsa a meng ne Wẽnde! Sã n pa Wẽnnaam bala, ãnda n tõe n kõ yel-wẽnd sugri?» A Zezi bãnga b sẽn da tagsd bũmb ninga b yamẽ la b sok-b lame: «Yaa bõe la yãmb tagsd woto y sũurẽ? Yelsem bʋg la naana n yɩɩda, m sẽn na n yeel põorã: f paama f yel-wẽna sugri bɩ mam sẽn na n yeele: yik n dɩk f gãag n kuli? Ade, sẽn na n yɩlẽ tɩ y bãng marsã tɩ Ned Biiga tara tõogo, tẽng zugu, n kõ yel-wẽna sugri, põore, m kõt f la noore: yik n dɩk f gãaga n kul f yiri.» Põora wẽneg n yikame n dɩk a gãag n tũud neba fãa taoore n yita. Neba fãa pɛlens yikame tɩ b ra pẽgd Wẽnd la b yetẽ: «Tõnd nan ka yãend yell kãnga to ye.» A Zezi yiime yɛsa n le kẽng mogra noore; neba kaoogame n wa b nengẽ tɩ b zãmsd-b. B waa n loodame n yãend ned a ye, a Alfe biiga, sẽn boond t'a Levi. A Levi da zĩi yaood deesg zĩigẽ la a Zezi yeel-a lame: «Yik n wa tũ maam!» T'a Levi sɩd yik n na n pʋg a Zezi. A Zezi ne b karen-biisã la Farizẽ rãmb wʋsg da naaga taaba, a Levi zakẽ, n dɩtẽ. Yaa zãma kãseng n da pʋgd a Zezi. Mitba la Farizẽ rãmba sẽn yãe t'a Zezi rɩta ne yel-wẽn-maandba la fadga rɛɛsdba, b yeela a Zezi tũud-n-taasã: «Bõe la woto? Bõe tɩ yãmb zu-soaba naagd yel-wẽn-maandb la sẽn deesd-b fadgã n dɩtẽ?» A Zezi wʋma b goama n leok ba: «Ka sẽn be-b laafi n tar tɩɩm soab tʋʋmd ye, yaa sẽn bẽed-ba. M pa wa tẽng zug nin-sõma boolg yĩng ye, m waame n na n bool yel-wẽn-maandba.» A Zã tũud-n-taasa la Farizẽ rãmba ra loeta b noore; rẽ la b sok a Zezi: «Yaa bõe yĩng la a Zã tũud-n-taasa la Farizẽ rãmb loet b noor tɩ yãmb tũud-n-taasa yaool n pa loetẽ?» A Zezi leok-b lame: «Pʋg-sɩda tũud-n-taas tõeeme, n loe b noor tɩ pʋg-sɩda ket n be b sʋk bɩ? Pʋg-sɩda sã n ket b sʋka, b ka tõe n loe b noor ye. B sẽn wat n bak pʋg-sɩda ne bãmb daare, la b na n loe b noore. Ned pa rɩkd peen-paalga sẽn ka wẽ koasla n sũk fu-kʋdg ye. Peend paalga na n yõbame n tak kʋdgã t'a pãrg n paase. Ned pa suiid rã-paalg wao-kʋdg pʋg ye, rãama na n pusga waoogã tɩ lebg bõne. Woto yĩnga rã-paalg suiida wao-paalsẽ.» Daar a yembre a Zezi ra tũuda pʋt sʋk n looda. B karen-biisa kẽndame la b foosd ka-zutã n na n bas sore. Farizẽ rãmba sẽn yãend rẽnna b yeela a Zezi: «Gese, bõe yĩng tɩ b maand bũmb sẽn kis, vʋʋsg daare?» A Zezi leok-b lame: «Yãmb nan pa karem sebr sõng pʋgẽ a Daviid ne a tũud-n-taas sẽn maam bũmb ninga, yella sẽn waa n pak ba tɩ koma tar-b bɩ? A pa kẽ wẽnd doogẽ, maan-kʋʋd, a Abiatar, wẽnnẽ, n dɩk wẽnd dooga bur n wãb bɩ? A ra yaool n miime tɩ yaa maan-kʋʋdba bala n da tõe n wãb bur kãense. A pa saag n kõ a tũud-n-taasa tɩ b rɩ bɩ?» B ra yet-b lame: «Wẽnnaam naana sibr daar ninsaalb yĩnga. B pa naan ninsaal sibr daar yĩng ye. Ned Biiga soo ra kãng me.» Vʋʋsg daar a to, a Zezi le kẽe pʋʋsg roogẽ. Nug-kɩɩng soab a ye n da be be la neba fãa ra gũusdame n na n ges a Zezi sã n na n sãoog-a-la vʋʋsga raare, n paam yell n dogl b zugu. A Zezi yeela nug-kɩɩngã: «Yik n wa sʋk ka.» Dẽ poore b soka nebã: «Maan neer vʋʋsg daar pa são wẽng maaneg bɩ? Vɩɩm kũun vʋʋsg daar n são bɩ yõor yãkre n são?» Ned ba a ye pa leok-b tɩ bũmb ye. A Zezi karg n ges-b lame tɩ b sũur kɛɛd ne-ba, b sẽn pa tar nimbãan-zoeer ba bilfã la b yeela raoã: «Tẽeg f nugã!» Tɩ raoã sɩd tẽege la a nuga wẽneg n sãoogame. B sẽn yi, tao-tao bala, Farizẽ rãmba yẽsa ne a Erod kẽedbã n baood b sẽn na n yãend dabaar ninga n sãam a Zezi yelle. A Zezi yii ne b karen-biisã n tees mogra sẽne; zãma kãseng n da yi Galile la Zɩɩda soolmẽ n tũ-ba. Neb wʋsg me sẽn da wʋm a Zezi bõn-bãna kibare da yita tẽns wʋsg n wat b nengẽ, wala Idume tẽnse, Zʋrdẽ kʋɩlg rʋʋnde, Tir la Sidõ. A Zezi yeela b karen-biisã tɩ b bao koglg bil a yembre n pẽneg yam-yam bãmb meng yĩnga, tɩ neba ra pẽdgd-b lame tɩ looge. A Zezi ra sãooga bãad-dãmb wʋsgo, dẽ yĩnga bãad-dãmba fãa ra pẽdgdame n dat n sɩɩs-ba. Sʋtãamba sẽn da be b rãmb pʋsẽ da kolgda a Zezi n wõgemdẽ la b moonẽ: «Yãmb yaa Wẽnnaam Biiga!» La a Zezi ra tãsd-b lame tɩ b sĩndi la b ra moon b yʋʋra woto ye. Dẽ poore a Zezi dʋʋ tãng a ye. B sẽn da rat neb kẽere, b bool-b lame la b waame. Bãmb piig la a yiib la b tũusyã tɩ b na yɩ b Tũud-n-taase n tʋm b tʋʋmde: Koe-nooga moonego. B kõ-b-la tõog tɩ b rig Sʋtãamba. Piig la a yiiba sẽn yãkã yʋy la woto: a Simo, b pʋda yẽ yʋʋr a Piyɛr, Kugri, n paas a Zebede kamba: a Zak ne a yao a Zã. B kõo bãmb yʋ-kãnga: Bonarzes (sa-tãs kamba) Le paasa a Andre, a Filip, a Bartelemi, a Matiye, a Toma, a Alfe biig a Zak, a Tade, a Simo, yẽ la a ka yogd ne buuda bɛ, la a Zɩɩda, Iskariyot tẽng neda, a Zezi zãmbdã. A Zezi lɛɛg n waa yiri la zãma kãseng tũ-b lame yɛsa, al tɩ b ra pa tar zĩig n na n zĩnd n dɩ ye. A Zezi doagdba sẽn wʋm dẽ, b kẽngame n na n tɩ yõk-ba tɩ b ra yetame: «Ad-a zuga lebgame.» Mitb n yi Zerizalɛɛm n wa n yetẽ: «Yaa Sʋtãan a Beelzebul n be nin-kãnga pʋga, la yaa ne Sʋtãamba naab pãnga, la a yiisd Sʋtãamba.» A Zezi wẽe yelbũndi n yetẽ: «Sʋtãan na n yɩ wãn n dig Sʋtãana? Rĩung a ye neb sã n wẽneg n zabd ne taaba, rĩung kãng na n yɩɩ wãn n ka wã zãnga? Yir a ye neb sã n wẽneg n zabd ne taaba, yi kãng kõn wã sɩda? Sʋtãan sã n zabd ne a menga, a sã n welg ne a menga, a pa tõe n yals yĩngr yɛs ye. Yẽ yell sɛɛme. M yeta yãmba tɩ ned ka tõe n kẽ nin-daoog zakẽ n wʋk a teed t'a pa reng n yõk-a n sẽb ye. Sɩd-sɩda m yeta yãmba tɩ Adem biisa yel-wẽna la b wẽn-tʋʋra na paam sugri, ba b sõora sẽn zem bũmb ninga. La ned ninga sẽn na n tʋʋs-a Vʋʋsem Sõngo, yẽ soab kõn paam sugr abada. Yel-wẽnda na n paa ne-a, raar fãa.» Yaa Farizẽ rãmba sẽn da yet tɩ Sʋtãan n be a Zezi pʋgẽ yĩngã la b gom woto. A Zezi ma la b buuda neb waa n yaasa yɩnga n tʋm tɩ b bool a Zezi n kõ-ba. Neb wʋsg da zĩ-la a Zezi sɛɛgẽ, wakat kãnga. B yeela a Zezi: «Ad-y y ma la y saam-biisi, rap la pagba n be yɩnga n baood-y.» A Zezi leokame: «Mam ma la ãndã, m saam-biis la ãnd dãmba?» La a Zezi gesa neb niyns sẽn da be-b bãmb sɛɛgẽ n yeele: «Ad-m ma, ad-m saam-biisi. Ned ninga fãa sẽn maand-a Wẽnnaam yam, yẽ soab la m yao, m tão la m ma.» A Zezi da leb n sɩnga neba zãmsgo mogra noore. Neb wʋsg ra tigma taab b sɛɛgẽ. La neba sẽn da ya wʋsg yĩnga, b kongame n kẽ koglg a ye pʋga, n ta ko sʋka. Nebã n pa tẽnga, mogra noore. A Zezi zãms-b la bũmb wʋsg ne yelbũna. B zãmsg pʋgẽ b ra yetame: «Kelg-y yelbũndi. Ned a ye n da yii n na n bʋd a pʋʋgo. A sẽn waa n bʋtẽ, bõn-buud kẽer dʋʋga sora noore la luiili wẽneg n dɩgs-b la zãnga. Kẽer lʋɩɩ zẽgdg zugu, la bʋgsem sẽn da ka be wʋsg yĩnga, b yika tao-tao. Wĩndg sẽn waa n wɩnge, bãmb wẽneg n kiime, tɩ b ra ka kɩ yẽgen wʋsg ye. Kẽer lʋɩɩ gõos sʋka la gõos wulumd-b lame n kʋ tɩ b pa paam n wom biis ye. Kẽer lʋɩɩ zĩ-sõngẽ la bãmb yikame n wom biis wʋsgo, kẽer pistã-tã, kẽer pisoobsoobe, kẽer koabg-koabga.» A Zezi da yetame: «Ned ninga sẽn tar-a tʋba n na kelg bɩ a yoog a tʋb n kelge.» A Zezi waa n bee kɛɛnga tɩ b sõsd-n-taasa ne Tʋʋm-tʋmdb piig la a yiibã na n sok-b b yelbũna poorẽ. Dẽ la b ra yet woto: «Sã n ya yãmba, yãmb paamame tɩ b wilg-y Wẽnd Rĩunga yɛla. Sã n ya ne sẽn be-b yɩngã, yaa ne yelbũn la b gomd ne bãmba, sẽn na n yɩla tɩ b sã n get neere me bɩ b ra yãe ye; b sã n kelgd neer me bɩ b ra wʋm ye, ka rẽ, raar a ye b wat n teemame n paam sugri.» A Zezi yeela bãmba: «Yãmb sɩd ka wʋmd yelbũnd kãnga võore? La sã n ya woto, yãmb na n maana a wãn n wʋm a taaba võore? Bʋta sẽn bʋtã, yaa Wẽnd Gomdã. Sẽn be-b Gomda sẽn bʋd sor ninga noorã, la sẽn wʋm-b Gomdã tɩ Sʋtãan wẽneg n yiis-a b sũurẽ. Zĩ kʋɩgdgẽ dãmba yaa neb niyns sẽn wʋm-b Gomdã n deeg-a tao-tao ne sũ-noogo. La b meng sẽn ka kɩ yẽgna, yaa wakat yɛng bala la b ya rapa. La b sã n seg toog bɩ namsgo, Koe-nooga yĩnga, b kongda raoodo n pãs n lʋɩ. Gõosẽ dãmbã, yaa neb niyns sẽn wʋm Gomdã n yaool n bas tɩ dũni zu-loeese, arzɛgs tʋlsem, tʋls wẽns buud fãa, wulumd-ba, tɩ Gomda sẽn bʋda pa tõe n wom biis ye. Sẽn lʋɩb zĩ-sõngẽ, makda sẽn kelgd-b la b reegd Gomdã n paam n womd biisi, pistã-tã, pisoobsoobe, koabg-koabga.» B ra leb n yet-b lame: «Fitil yõgendame n lud ne koglg bɩ n solg gãag tẽngr bɩ? Ka roagendga zuug la b ningd-a? Bũmb ka be sẽn solg likẽ, tɩ b ka na n wa ne a vẽenemẽ ye. Sẽn sogl fãa tara a pukr daare. Sẽn tar-a tʋb fãa n na n kelge, bɩ a kelg.» A Zezi ra yet-b lame yɛsa: «Gũus-y ne y sẽn wʋmde! Yãmb sẽn na n dɩk makr ninga n mak n kõ y taaba, yãmb me rẽn na n maka boto la pʋs n na yɩɩg rẽnd me. Sẽn zoe n tar-a wã la b na n kõo n paase. Sẽn ka tar-a wã, bilfra a sẽn tarã la b na deege.» A Zezi ra yet-b lame yɛsa: «Wẽnd Rĩunga wẽnda bõn-buud ned sẽn bʋd a pʋʋgẽ. A gõeeme bɩ a neeme, yaa wĩntoog bɩ yaa yʋngo, bõn-buuda bundame n yi a toore t'a ka miẽ ye. Tẽnga meng n wat ne a yõodo: pipi yaa vãado, a yiib soaba yaa ka-zugu, la rẽ poore yaa biisi. La kood sã n bɩ n sɛ, yaa kɛɛbo tɩ kooda bɩɩme.» A Zezi le yeelame: «Mam na n maka Wẽnd Rĩunga ne bõe? M na n wẽe yelbũnd bʋgo n mak-a tɩ y wʋme? Wẽnnaam Rĩunga wẽnda seneve tɩɩg biiga, a bʋdb wakato, a yaa bilfr wʋsgo bõn-buud a taab fãa sʋka. La b sã n bʋd-a t'a yi n sɛ, a lebgda tɩ kãsenga al n tão wil bɛda tɩ yĩngr luiili wat n vʋʋsd a maasmẽ.» Yaa ne yelbũn wʋsg woto la a Zezi ra gomd ne nebã n zãmsd-ba b sẽn tõe n wʋm bũmb ninga. La a Zezi ra ka gomd ne bãmb tɩ ka ne yelbũn ye la b sã n da yaool n be ne b karen-biisa bala, b ra wilgda bãmb yelbũna võore. Baraare, zĩig sẽn waa n sobgdẽ, a Zezi yeela b tũud-n-taasã: «Wa-y tɩ d dʋʋg mogrã.» B basa nebã la b talla a Zezi ne koglg ning b sẽn da be a soab pʋgẽ wã n dʋʋge. Koom kogend a taab me yãag-b lame. Wakat kãng la sob-kãseng yik yã al tɩ ko-wiisa da rãmbd wʋsgo n buiid koglgã t'a rat n pidi. A Zezi menga ra bee poorẽ n kʋgl b zug zu-kʋka n gõe; karen-biisa nek-b lame n yeel-ba: «Soaala, yãmb pa ne tõnd sẽn na n ki wã la, n maand wa y toog ka be?» A Zezi sẽn neke, b zaba ne sobgã la b kõo mogra noor n yetẽ: «Yɩ sɩɩ la f bas bʋrga!» Sobga yõka vugr bala tɩ mogra zãng lebg sɩɩ. A Zezi yaool n yeela b karen-biisã: «Yaa bõe yĩng la y zoet dabeem woto? Yaa bõe tɩ y pa tar tẽebo?» Dabeem kãseng yõka bãmb fãa tɩ b ra yet taaba: «Nin-kãnga yaa Ãnda tɩ sobg la mogr deegd b noore?» A Zezi sẽn ta mogra rʋʋnde, Gadar tẽnga. B sẽn sig koom kogenda bala, la ned a ye sẽn yi yaadẽ n zoet n segd-ba. Yaa Sʋtãan n da be nin-kãng pʋgẽ. A ra gãee yaad pʋsẽ la neba ra ka ne bõn-zaadg ning b sẽn na n tall n zaa-a ye, ba ya bãeense. Naoor wʋsgo b yõk-a lame n balg, n sẽb-a ne bãeense t'a kao bãeensã ne rabõangã; ned ba a ye ra ka tõe-a ye. Wakat fãa, yʋng la wĩntoogo, a ra bee yaadẽ bɩ tãmsa zut n wiisdẽ la a bogd a meng ne kuga. A sẽn yãe a Zezi tɩ b be yɩɩg n watẽ, a zoe n seg-b lame, n wõgemd b taoore n moon wʋsgo: «Y rat-m la ne bõe, Zezi, yĩngr Wẽnda Biiga? M kot-y la ne Wẽnde, tɩ y ra maan-m bũmb ye!» La rẽ yaa a Zezi sẽn da yeel-a: «Sʋtãan yoogo, yi nin-kãnga pʋgẽ.» A Zezi sok-a lame: «Fo yʋʋr la a bõe?» T'a leoke: «M yʋʋr la a Kʋʋma, tɩ sɩda, d sõor yaa wʋsgo.» Sʋtãan yõka sɛɛga tɩ b ra rig-a n yiis tẽnga pʋgẽ ye. Kurkuy wʋsgo n da be tãng a yembr zug be, n wãbd yamdo. Sʋtãana kosa a Zezi: «Bɩ y bas do tɩ d kẽ kurkuya pʋsẽ.» A Zezi kõ-b la sore, la b sẽn paam dẽ, b yiime n tɩ kẽ kurkuya tɩ b kaoog n zoet n sigd tãngã n digd mogrã. Rũmsa sõor da taa tus a yiibu la b fãa lʋɩɩ mogrẽ tɩ kooma rɩ-ba. Rũm-kɩɩmba zoee tao-tao n tɩ togs kibara tẽnga pʋga la tẽn-kɩremsa fãa. Tẽnga rãmb zoeeme n wa ges yellã sẽn yɩ to-to. B sẽn ta, b yãenda Sʋtãana sẽn da kẽ-a soabã t'a zĩ a Zezi sɛɛgẽ n yer fuug la a gomd neere. B yãend-a lame tɩ rabeem kẽ-ba tɩ yaa sʋtãamb wʋsgo n sɩd da be nin-kãng pʋgẽ. Neb niyns sẽn zĩnd-b be n yãend yella sɩngre, togsa b taaba bũmb ning fãa sẽn maane ne raoã la ne kurkuya. Tɩ b naag taab n kos a Zezi tɩ b yi b tẽngẽ. A Zezi sẽn yet tɩ b kẽed koglgã, la ned ninga sẽn paam-a sãoogra kos sor n na n tũ-ba. A Zezi pa sak ye; b yeel-a lame: «Kul f yiri, f buud neb sʋka, la togs bãmb kibarã; gom ne-ba, nimbãan-zoeer tʋʋm niyns Soaala sẽn sak n maan f yĩnga.» Raoã sɩd kulame la a saaga Tẽns piiga sẽn tot taabã n moond a Zezi sẽn maan bũmb ning ne yẽnda. Neba fãa pẽgame. A Zezi rʋʋga kʋɩlgã ne koglgã la zãma kãseng waa n gũma be. Yaa wakat kãng la pʋʋsg roog a ye naab sẽn boond t'a Zayir pɩʋʋg be. A sẽn yãend a Zezi, a wõgemda b taoore n kot-b ne pẽdgre: «M bi-pugl n be yiri n ka laafi ye, la a pãnga sɛɛ fãa, m kotame tɩ y wa tẽeg y nug a zugu t'a paam laafi la a ra ki ye.» T'a Zezi sɩd na n tũ n kuli. Neb wʋsg kaoogame n pʋgd a Zezi n tol n lagsd b nao. Pag a ye n da bẽed mende, al yʋʋm piig la a yiibu. Pʋg-kãnga namsa wʋsgo tɩt rãmba buud toor-toor nusẽ. A sãama ligd wʋsgo la a ka paam laafi ye. A bãaga da paasdame n dabda. A sẽn wʋm tɩ b gomd a Zezi yelle, a soos n pʋga poorẽ n kẽ neba sʋka, n sɩɩs a Zezi fuugu. A ra tagsda a sũurẽ: «M sã n paam n sɩɩs a fuuga bala, m na n paama laafi.» Vugr bala zɩɩma yõkame tɩ paga bãng t'a sãoogame. Tao-tao bala, a Zezi me bãngame tɩ pãng n yi b nengẽ n sãoog neda. B wẽnegame n sok sẽn da pʋgd-b bãmbã: «Yaa ãnda n sɩɩs m fuugã?» Tɩ b karen-biisa na n leoke: «Neb pẽdgd yãmb woto tɩ y le sokd tɩ ãnda n sɩɩs yãmba?» A Zezi ra ket n geta b sɛɛgẽ, n baood ned ninga sẽn sɩɩs-a bãmbã. Paga sẽn mi tiirã, rabeem yõk-a lame t'a rigda. A kolgame n wõgemd a Zezi taoore n togs a pʋga. A Zezi yeel-a lame: «M biiga, fo tẽeba fãag-f lame. Kẽng ne laafi, f bãaga sẽn da yaand fooma na n kell n sãooga zãnga.» A Zezi ra ket n gomda ne pagã, la neb n yi naaba yiri n wa togs naaba: «Fo biiga konga pãnga, ra nams Soaala zaalem ye!» A Zezi sẽn wʋm b goama leoka naabã: «Da zoe rabeem ye, fo ye n tẽ bala.» B gɩdga neba tɩ b ra le pʋg-b ye, sã n ka a Piyɛr la a Zak ne Zã bala. B rɩka naaba yir sore; b sẽn ta yiri b yãee neb wʋsg sẽn yãbd la b kaasdẽ. A Zezi kẽeme n sok nebã: «Yaa bõe tɩ y yãbda la y maand bʋʋr woto? Biiga ka ki ye, a gõeeme bala.» Tɩ neba na n la a Zezi. A Zezi rig-b la zãnga, n peeg biiga ba ne a ma la b karen-biisã n kẽ bãada roogẽ. B gãda biiga nug n yeel-a: «Talita koum!» Dat n yeelame: «Bi-pugla, m yet-f lame, yiki!» Tao bala bi-pugla yikame n kẽnda. A ra tara yʋʋm piig la a yiibu. Dabeem kẽe nebã wʋsgo. A Zezi kõo noor tɩ b modg tɩ yella ra yi kɛɛng ye. B paasame tɩ b bao rɩɩb n kõ biiga t'a rɩ. A Zezi yii be n kẽng Nazarɛt, b ba-yiri. Karen-biisa me tũume. Vʋʋsg daare b kẽe pʋʋsg roogẽ n na n zãms neb karengo. Neb wʋsg wʋma b goama la b pɛleng yɩkame tɩ b yetẽ: «B zãmsa woto fãa yɛ? Ya ãnna kõ-b yam la tõog kãngã tɩ b maand bõn-bãna? Ka bãmb la ra-wãada laa? Ka bãmb la a Maryam biiga laa? Ka a Zak, a Zoze, a Simo, a Zɩɩd saam-biig la bãmb laa. B saam-bi-pogsã ka vɩ ne tõnd bɩ?» B poorẽ da yaa no-koeemde. A Zezi ra yet-b lame bala: «Bãngd buud fãa ka tõe n paam waoogr a tẽngẽ ye, a pa tõe n paam waoogr a tẽnga kamba nengẽ la a zakẽ ye.» Beelẽ a Zezi ra ka maan wẽnd-makr dãmb wa zĩis kẽer ye. B tẽega b nus koms-rãmb kẽer zug bala, n kõ-b laafi. A Zezi meng ra ka wʋmd neba sẽn pa tẽeda võor ye. Rẽ poore a Zezi sɩnga tẽn-kɩremsa saabo, neba zãmsg yĩnga. A Zezi boola b Tʋʋm-tʋmdb piig la a yiibã la b tʋm-b la a yiib-yiibu; b ra kõ-b la tõogo tɩ b yiis sʋtãamba neb pʋsẽ. B kõ-b la noore tɩ b sã n dabd b tʋʋmna bɩ b ra zɩ bũmb sã n ka rasaar bala. B yeel-b lame tɩ ra zɩ sor dɩɩbo, bɩ korgo, bɩ ligd b gɩfẽ ye. B yeel-b lame tɩ b wid gãndalsa, la b ra yeelg fut a yiib ye. B ra yet-b lame yɛsa: «Yãmb sẽn na n ta zĩig ning fãa bɩ y kẽ zak a yembre la y pa be n ta y loogre. Yãmb sẽn ta zĩig ninga tɩ b pa reeg yãmb la b pa sak n kelg yãmb zãmsgo, bɩ y yi n bas tẽn-kãnga. La y sã n yita bɩ y pĩng y nao tom, n ning tẽnga rãmb taale.» Tʋʋm-tʋmdba kẽngame n zãms nebã tɩ b tuub b yel-wẽna. B riga sʋtãamb wʋsgo la b zɛɛ bãad-dãmb wʋsg ne kaam n sãoog-ba. Dĩm a Erod wʋma a Zezi kibare, tɩ b yʋʋra ra yii wʋsgo. B ra yetame: «Zã ning sẽn da sooda neba kooma vʋʋga kɩɩms sʋka la yaa rẽnd yĩnga la a wẽn-makr dãmba ka be sõor ye.» Neb kẽer da yetame: «Yaa a Eli» tɩ neb kẽer me yetẽ: «A yaa bãngda wa bãngdba a taabã.» A Erod me ra wʋmda b yelle la yẽ ra yetame: «Yaa Zã ning m sẽn fiuug a soab zugã, n vʋʋg kɩɩms sʋka!» Sɩd me a Erod n da kɩt tɩ b yõk a Zã, n sẽb-a, n kẽes-a roogo. A Erod da rɩka, a yao paga, a yao, a Filip, paga, a Erodiad, n maan a paga. A Zã me ra yeta a Erod: «Pa segd tɩ yãmb dɩk y yao paga n maan y pag ye.» A Erodiad sũur da puuda ne a Zã, al t'a da rat a kũum, la a ra pa tõe n kʋ-a ye, t'a Erod meng ra zoeta a Zã, a sẽn da ya nin-tɩrga la nin-sõngã, la a ra pa rat tɩ ned maan-a bũmb ye. A Zã goama bal n wa n kɩt t'a le ka mi a sẽn na n maanega. Baasg fãa, a ra ket n kelgda a Zã ne sũ-noogo. Waa n sega daar a ye, t'a Erod maand a rogem daar tẽegr kibsa. A ra boola nanams bɛda, tãnsoabẽn-dãmb la Galile soolem nanamse. Dẽ la a Erodiad bi-pugla kẽ rɩɩba roogẽ n sao, al t'a Erod ne sẽn da rɩt-ba fãa sũur yɩ noogo t'a na n yeel bi-puglã: «Bɩ f kos maam f sẽn dat bũmb ning fãa, tɩ m na kõ-fo.» A tol n paasame ne wẽenego: «Fo sẽn na n kos maam bũmb ninga fãa, ba yaa m rĩunga pʋɩ-sʋka, f na n paamame.» Bi-pugla yiime n zoe n tɩ sok a ma: «M ma, m na n kosa naab bõe?» A ma wã leokame: «Kos a Zã zugu.» Bi-pugla zoe lomb-lombe, n wa naaba nengẽ n wilg a kosgã: «M kotame tɩ y ning a Zã zugã laag pʋgẽ n kõ maam mars-marsã bala.» Naaba sũur sãama al wʋsgo, la a wẽenega yĩnga, n paas neba me yĩnga, a pa tõog n zãgs ye. Tao bala, a kõo tãb-biisa noor tɩ b fiuug a Zã zug n wa. Tãb-biisa kẽnga bi-beesa roogẽ n tɩ fiuug a Zã zug n ning laagẽ, n wa kɩs bi-puglã. La bi-pugla talla zugã n tɩ kɩs a ma. A Zã tũud-n-taas sẽn wʋm woto, b waa n dɩka a yĩngã n solg yaoogẽ. Karen-biisa yii b sorã n le wa bãmb sɛɛgẽ. B togsa b sẽn maan bũmb ninga, la b sẽn zãms bũmb ninga. La a Zezi yeel-b lame: «Bɩ d tũ taab n zãag zĩig bilfu n paam n vʋʋse.» Neba ra pɩʋʋmda taab zĩ kãng al wʋsgo, tɩ b ra ka tõe n paam vɩʋʋg n dɩ meng ye. Bãmb ne b Tʋʋm-tʋmdbã bal kẽe koom koglgo, n dʋʋg n ta neb sẽn da ka be zĩig ninga. Neba yãee b sẽn dʋʋg mogrã n digd weoogẽ wã, la b sẽn da zoe m mi b sẽn dabdẽ, wʋsg yii tẽnsa fãa pʋsẽ ne nao bala, n deng bãmb be. A Zezi sẽn ta rʋʋnde, b yãee neb wʋsg sẽn da tigim taab beene. B sẽn yãe nebã, b zoe b nimbãanega. B ra wẽnda piis sẽn ka tar pe-kɩɩm ye. La b sɩngame n zãms-ba n kaoose. Karen-biisa sẽn mik tɩ zĩiga ra zʋʋgame, b kẽng n tɩ wilg a Zezi: «Ka, tõnd bee weoogẽ, la zĩig me zʋʋgame. Bɩ y bas neba tɩ b kẽng pʋtẽ la tẽnsa pʋsẽ n da rɩɩb n dɩ.» Dẽ la b leok ba: «Bɩ yãmb mens bao rɩɩbo n kõ-b wɛ!» Tɩ karen-biisa yeele: «Na yaa n yɩ pakr tɩ d yiis wakɩ koeems sẽn ta kobsi n da bur n kõ-b tɩ b rɩ?» La a Zezi wẽneg n sok-b lame: «Yaa bur a wãna la y tara, tɩ sõd-y n gese.» Karen-biisa sẽn tɩ gese, b waa n togsame tɩ yaa bur a nu la kʋɩl-zẽed a yiib n kete. A Zezi kõ-b la noore tɩ b welg rɩt-n-taasa bal bale, mo maasa zugu. La bãmb kɩtame tɩ neba zĩnd sak saka, koabg koabga, pisnu-nu. A Zezi deega bur a nu wã la kʋɩl-zẽed a yiibã, la b zẽka b neng yĩngr n maan bark pʋʋsgo n yaool n wes burã n kõ Tʋʋm-tʋmdbã tɩ b pʋɩ nebã. B pʋɩ neba zĩm a yiiba me. Neba fãa paamame n dɩ n tɩge. Karen-biisa wʋka bura girse la kʋɩl-zẽedã sẽn kellã n pid pet piig la a yiibu. Sẽn da rɩba fãa sõor taa tus a nu. Neba sẽn dɩ n sɛ bala, a Zezi modga b Tʋʋm-tʋmdbã tɩ b kẽ koom koglga pʋga n deng bãmb rʋʋnde, Bɛtsayid sẽnẽ. Bãmb meng paame n na n yõdg n kuls nebã. B sẽn kuls nebã n sɛ, b kẽnga tãng a yembr zugu n tɩ pʋʋse. Zĩig waa n sobgame, la koglga me ra zoe n taa mogra sʋka, tɩ bãmb b ye bal ket b zĩigẽ. B sẽn yãe tɩ sobg ra segda Tʋʋm-tʋmdba tɩ b namsd wʋsg ne koglga rʋgsgu, tõd-beoog pĩnda, b yikame n kẽn kooma zug n babs-ba. B maana wala b da rat n loog-b lame. La bãmb sẽn yãe ned sẽn kẽnd koom zug woto, b yeela taaba: «Ad-y yaa kɩɩma!» B ra maanda bʋrga tɩ bãmb fãa sẽn yãe woto, rabeem yõk-b lame. A Zezi goma ne bãmba n yetẽ: «Keng-y y pelse, tɩ yaa maam; da zoe-y rabeem ye.» La a Zezi meng kẽe b koglga pʋga. Wakat kãng bala sobga yõka vugr n lebg sɩɩ. Rabeem kãsenga da ket n bee ned kam fãa sũurẽ. Bãmb da pa wʋm bura fɩɩr võor ye, da ket n yaa wa b bee likẽ. B sẽn dʋʋg mogrã, b tɩ kolga Zenezarɛt n yaase. B sẽn yi koglga pʋg n sɛ, neba bãnga tao-tao bal tɩ yaa a Zezi. Neba zoe n saaga tẽnga fãa n tʋk bãad-dãmb ne b gãase n wa a Zezi nengẽ. B sẽn da be zĩig ning fãa, neba ra watame. B sẽn da wʋm t'a Zezi bee zĩig ninga fãa, a Zezi sẽn ta tẽng ning fãa, tẽn-bõonego, tẽn-bɛda la tẽn-kɩremse, fãa ra tigimda b bãad-dãmba, tẽnga sɛk zĩigẽ, la b ra kota a Zezi tɩ b sak tɩ bãad-dãmb sɩɩs b fuuga zerd bala. La neb niins fãa sẽn da paam-ba n sɩɩs a Zezi fuuga ra sãoogdame. Farizẽ rãmba ne Mitba yii Zerizalɛɛm n tigim taab n wa a Zezi nengẽ. B yãe e Zezi karen-biisa kẽer sẽn da rɩt ne rẽgdo, dat n yeelame: ne nus sẽn ka peke. Farizẽ la Zʋɩf rãmba fãa da pa rɩt rɩɩbo n pa reng n pek b nus n tãag kãntɩɩs ye. Dẽ yaa b rog-n-mik. B sã n da yi raagẽ n wa b soodame n yaool n dɩ. B ra tara yɛl a taab wʋsgo, b rog-n-mika pʋgẽ, wala wama ne yʋya nedegre, yõg-laasa pekre. Yaa rẽ la Farizẽ ne mitba sok a Zezi: «Bõe yĩng tɩ yãmb karen-biisã pa rɩt wala rog-n-mika sẽn date? Yaa bõe yĩnga tɩ b rɩt ne nus rẽgdo?» A Zezi leok-b lame: «Zãmb rãmba, a Izayi n bãng n gom y yelle n gʋls woto: ‹Nin-bãmba waoogda maam ne noor bala, b sũya zãra ne maam. B waoogr pa waoogd-m ye. B zãmsga tekda ninsaal sẽn mi bala.› Yãmb basa Wẽnnaam noya n tũud neb rog-n-miki.» A Zezi ra yet-b lame yɛsa: «Sɩd-sɩda yãmb kɩtame tɩ yãmb dog-n-mik reeg Wẽnnaam noya zĩiga. A Moyiiz da yeelame: ‹Waoog f ba la f ma la ned ning sẽn sãbsda a ba la a ma, a soab toga ne kũum.› Yãmb nengẽ y gomdame: ‹Ned sã n yeel a ba bɩ a ma: ad-m sẽn da tõe n dɩk bũmb ning fãa n sõng foo lebga Wẽnd dẽnna›, yãmb pa le sakd t'a sõng a ba bɩ a ma ye. Woto wã, yãmb dog-n-mika kɩtame tɩ Wẽnnaam goama lebg zaalem la yãmb maanda bũmb wʋsgo sẽn wẽnd boto.» Dẽ poore, a Zezi le boola neba yɛsa n yeel-ba: «Yãmb fãa, bɩ y kelg mam sẽn na n togs-y bũmb ninga neere. Bũmb ka be yɩnga sẽn tõe n kẽ ned pʋgẽ n dẽgem-a ye. Yaa f mengẽ la rẽgda yita n dẽgemd-f. [ Ned ninga sẽn tar-a tʋb n tõe n wʋm bɩ a wʋm!»] B sẽn waa n bas nebã n kẽ roogẽ, b karen-biisa sok-b lame n na n bãng b gomda võore. A Zezi leok-b lame: «Yãmb me yam ket n paooda woto laa? Yãmb ka mi tɩ bũmb ning fãa sẽn zĩnd yɩnga n kẽ ninsaal pʋgẽ ka tõe n dẽgem-a bɩ? Baad-y bõn-kãng ka kẽed a sũurẽ ye. Bõn-kãng kẽeda a pʋgẽ n yaool n le yi a sã n kẽng we-kɛɛnga.» Woto me la b wilg yã tɩ fãa tõe n yɩɩ rɩɩbo. A Zezi yeelame yɛsa: «Ya bũmb ning sẽn yit ninsaal sũurẽ, yaa bõn-kãng n dẽgemd-a. Yaa ninsaal pʋgẽ, yaa a sũurẽ la tʋlg f to ne wẽng yita, n paas yoobo, wagdem, nin-kʋʋre, to pag baoobo, arzɛk wʋsg baoobo, pu-toogo, zãmbo, reem yoodo, sũ-kiiri, to yʋ sãoongo, nagre, yẽs-põasa. Bõn-wẽens kãensã yita ninsaal sũurẽ la yaa bãmb n dẽgemd-a.» A Zezi yii b sẽn da be zĩig ningã n kẽng Tir tẽnga. B kẽe yir a ye; b ra ka rat tɩ neba bãng ye la b ka tõog n solg b meng ye. B sẽn ta bala, la pag a ye sẽn wʋm b yelle n zoe n wa wõgemd b taoore. Paga bi-pugla la Sʋtãan da kẽ n yãmbe. Pʋg-kãng ra yaa bu-zẽna, Sirofenisi rãmb neda. A kosa a Zezi tɩ b yiis Sʋtãana sẽn da kẽ a bi-puglã. A Zezi ra yet-a lame: «Bas tɩ kamba reng n dɩ n tɩge, tɩ pa segd tɩ b rɩk kamb dɩɩbo n kõ ba-bi ye.» Paga leok-b lame: «Rẽ yaa sɩda, Soaala, la yaa sɩd me tɩ ba-bi wã tõe n dɩgsa dɩ-zeremsã kamba sẽn basd tɩ rʋʋgd tẽngã.» A Zezi yeel-a lame: «Fo gomd kãnga yĩnga bɩ f kẽng tɩ Sʋtãana yiime n bas f biigã.» La paga yikame n kuli, la sɩda, a tɩ mikame tɩ Sʋtãana yiime n bas a bi-pugla t'a gãe a gãag zugu. Wẽnd kãnga, a Zezi yii Tir tẽnga n tũud Sidõ soolme, n tees Galile Mogrã, n digd Tẽns piiga sẽn tot taabã. La b sẽn waa n loogdẽ, neb n tall bãad a ye sẽn ya muk la wʋnga n wa b taoore. B kos-b lame tɩ b tẽeg b nug a zugu n sãoog-a. A Zezi taka bãadã n yi kɛɛnga la b rɩka b nus-bi n tʋm a tʋbẽ la b sɩɩs a zelemdã ne kolkoodo. B naka b neng yĩngri n wẽ siri n yetẽ: «Efata» dat n yeelame: tʋba, pak-y. La vugr bala a tʋba yoogame la a zelemd lakame t'a gomd neere. A Zezi wilg-b lame tɩ b ra gom ne ned ye; la a Zezi sẽn da kos-b bũmb ningã, bãmb pa tõog b noor ye; b da wãgda a Zezi yʋʋr n yɩɩd pĩnda. Neba pɛlens ra yɩgda wʋsgo tɩ b yetẽ: «B sẽn maan fãa yaa sõma: b kɩtame tɩ wʋms wʋmnẽ, tɩ mugs gomda.» Wakat kãnga neb kʋʋng da leb n tigma taab a Zezi sɛɛgẽ. La b sẽn da ka tar dɩɩb sẽn na n dɩ yĩnga, a Zezi boola b tũud-n-taase, n yeel-ba: «Mam zoeta bãndurba nimbãanega. Yãmb ne tɩ yaa rasma a tã rũnna la b be ne maam, la b pa tar dɩɩb n na n dɩ ye. Mam sã n kuls-b woto tɩ b pa rɩ, wʋsg na n paa sorẽ. Bãmb kẽer yii al zĩig sẽn zãrẽ.» B karen-biisa leokame: «D na n yãee bur yɛ tɩ sek nin-bãmba, we-raoogẽ ka?» A Zezi sok-b lame: «Yãmb tara bur dãmb a wãna?» Tɩ b leoke: «Yaa a yopoe.» A Zezi kɩtame tɩ neba fãa zĩnd tẽnga; dẽ marsã la b reeg bur a yopoe wã n pʋʋs bark pʋʋsgo n yaool n wes n kɩs b karen-biisã tɩ b pʋɩ nebã, la b maana boto. Kʋɩl-zẽ-bõoneg bilf me n da kete. B ninga rẽ me barka n yet tɩ b pʋɩ nebã. Neba fãa dɩɩme n tɩge la b sẽn wʋk girsã b pidsa pet a yopoe. Neba sõor da taa tus a naase; la a Zezi yaoolame marsã n kuls-ba. Dẽ poore, a Zezi ne b karen-biisa le kẽe koglgo n dʋʋg mogrã n kẽng Dalmanuta tẽnga. Farizẽ rãmb waame n wẽ no-koeemd ne a Zezi, la b da kota bãmba bõn-bãn sẽn yit yĩngri n na n ges b sã n sɩd tõeme. A Zezi wẽe siri n yetẽ: «Bõe yĩng la nin-bãmba kot wẽnd makre? Sɩd-sɩda m yeta yãmba tɩ m pa na n maan wẽnd makr zamaan kãnga neba yĩng ye.» A Zezi yikame n bas-ba la b le kẽe koglg yɛsa, n dig rʋʋnde. Karen-biisã ra yĩmame n pa zɩ bur ye. Da yaa bur a yembr tãa n da be b nengẽ, koglga pʋga. A Zezi yaool n da sagend-b la woto: «Ypk-y y nini la y gũus ne Farizẽ la a Erod kẽedba rabɩlle.» Tɩ bãmb na n lɛɛg n leok taaba: «Daare yaa d sẽn ka zɩ burã la b gomd woto.» A Zezi bãngame n yeel-ba: «Yaa bõe tɩ yãmb tagsd tɩ m gomda y sẽn pa zɩ burã? Yãmb ket n pa wʋmd laa? Y pa wʋmd m goama võore? Yãmb sũya bee zond pʋgẽ. Yãmb tara nini la y ka ne ye, y tara tʋba la y ka wʋmd ye. Yãmb pa le tẽr laa? Mam sẽn wes bur a nu n kõ neb tus a nu wã, y wʋka gɩrsa pet a wãna?» Tɩ b leok tɩ yɩɩ piig la a yiibu. «Mam sẽn waa n wes bur a yopoe n kõ tus a naasã, yɩɩ pet a wãna la y wʋk gɩrsã?» Tɩ b leoke: «A yopoe.» Tɩ b na n yeel-b marsã: «Y yam ket n nan pa vẽnege?» A Zezi ne b karen-biisa taa Bɛtsayid. Beene b talla zoang n wa a Zezi nengẽ la b kos-b lame tɩ b sɩɩs-a ne b nugu. A Zezi gãda zoanga nugu n tak-a n yi kɛɛnga la b taaga a nina ne kolkoodo. Dẽ poore b tẽega b nus zoanga zugu, n sok-a a sã n nee bũmbu. Zoanga sẽn da sɩng yãeeba, yeelame: «Mam nee neba, mam nee sẽn kẽnda, la wẽnda wa tɩɩse.» A Zezi le sɩɩsa zoanga nini ne b nusi la rẽ poore, a yãee vẽenega la a sɩngame n paam laafi. A ra yãeta bũmba fãa vẽenega la a ra nee yɩɩg me. A Zezi kʋls-a lame n yetẽ: «Da wɩɩg n kẽ tẽnga pʋgẽ meng ye.» Dẽ poore a Zezi ne b karen-biisa rɩka Sezare sore, komber a Filip soolmẽ. A Zezi sok-b la sokr kãnga: «Neba yetame tɩ mam yaa ãnna?» Karen-biisa leok-b lame: «B yetame tɩ yaa Zã ning sẽn da kõta soobã; kẽer me yetame tɩ yãmb yaa a Eli, kẽer tɩ yãmb yaa bãngdba nin-yende.» «La yãmba, yãmb yetame tɩ mam yaa ãnna?» A Piyɛr leok-b lame: «Yãmb yaa Krista, Fãagdã.» La a Zezi kõ-b la noore tɩ b ra sak n gom ne ned bãmb yell ye. A Zezi sɩnga b karen-biisa zãmsgo n yeel-b tɩ yaa pakre tɩ Ned Biiga nams wʋsgo; tɩ nin-kẽemba, maan-kʋʋdba kãsẽm dãmba la Sɛb-mitba na n yi-la b poorẽ, n bas tɩ b kʋ-ba, la yaa tɩlɛ tɩ b vʋʋg b kũuma rasma tãab raare. A Zezi wilga bãmb yell kãnga vẽenega neba fãa sʋka. A Piyɛr boola a Zezi n yi kɛɛnga la a sɩngame n zabd ne-ba, n yet tɩ b ra gom woto ye. A Zezi kedgame n ges b karen-biisã la b zaba ne a Piyɛr: «Kẽng n leb poorẽ, Sʋtãana. Fo tagsgo ka Wẽnnaam tagsg ye, fo tagsda wala ninsaal bala.» B kɩtame tɩ zãma wã ne b karen-biisa kolge tɩ b yeele: «Ned ning fãa sẽn dat-a n tũ maam, bɩ a soab sãbs a menga la a rɩk a pika n pʋg maam. Ned ning sẽn dat-a n fãag a yõore, na m menes-a lame, la sẽn na n menes-a a yõore, maam la Koe-nooga nonglem yĩnga, na n fãag-a lame. Ba ned sã n da tõeẽ n soog dũni wã gilli, rẽnda nafdẽ-la yẽnda wãn-wãna, a sɩɩga yell sã n sãam? Bõe la ned na n dɩk n tek ne a sɩɩgã? Ned ning fãa sẽn zoe-a yãnd ne mam tũudem la m zãmsgo, dũni nin-wẽnsa taoore, Ned Biiga me kõn saag n yeel tɩ b mii yẽ soaba, b sã n wa lɛɛg n wa ne b Ba ziiri tɩ b malɛgs sõma yãagd-b.» A Zezi ra gomda woto ne nebã: «Sɩd-sɩda mam yeta yãmba, yãmb neb kẽer pa na n ki tɩ b pa yãend Wẽnd Rĩunga sẽn wat ne pãng la ziir ye.» Dasem a yoob dẽ poore, a Zezi peega a Piyɛr, a Zak ne a Zã, n yi kɛɛnga, tãn-lug-lug a ye zugu. A Zezi tedga zãng fas bãmb taoore. B futa ra pɩndame la tẽng zug ka, pɛgd-mit zɩ n tõog tɩ fuug paam bãmb dẽnda peelem ye. A Eli ne a Moyiiz likame n gomd ne a Zezi. T'a Piyɛr na n zẽk a koɛɛg n gom ne a Zezi: «Karen-saamba, tõnd sẽn be ka wã, d sũur yaa noogo. Tõnd na n tii zãn a tãabo: a ye yãmb yĩnga, a yembre, a Moyiiz yĩnga, a yembre, a Eli me yĩnga.» Yẽ ra goma woto t'a ra ka mi a sẽn na n yeel bũmb ning ye. Rabeem yõk-b la wʋsgo. Sawadg a yembr maasem luda bãmba. La Koɛɛg yii sawadgẽ wã n yetẽ: «Bãmb yaa mam Bi-nongre, bɩ y kelg-ba.» B wẽnesame n ges la b pa le yãend ned a to n paas a Zezi ye. B sẽn waa n sigd tãngã, a Zezi kõ-b la noore tɩ b ra sak n togs b taabã b sẽn yãend bũmb ninga ye, al tɩ Ned Biiga wa vʋʋg kɩɩms sʋka. Karen-biisa reega saglgã, n baas n sokd b mense: «Vʋʋg kɩɩms sʋka» sẽn dat n yeel tɩ bũmb ninga. B waa n soka a Zezi woto: «Bõe yĩng la sɛb-mitba yet t'a Eli n na n deng n wa?» T'a Zezi leok-ba: «Sɩda, a Eli n dengd taoore n lebs bũmb fãa a sõmb zĩigẽ. Maana a wãn tɩ b gʋls marsã Ned Biiga poorẽ tɩ b na n namsame la b na n paama paoogr wʋsgo? Mam yeta yãmba t'a Eli zoe n waame, la wala sẽn da gʋlse, neba maana b sẽn dat bũmb ning fãa, ne-a,» B sẽn leb karen-biis a taaba nengẽ, b yãee zãma kãseng sẽn da tigmi. Sɛb-mitba me ra bee sʋka tɩ ya sogsgo ne sogsgo. Neba yãenda a Zesi tɩ zĩiga wulumd tɩ ned kam fãa zoet n kolgdẽ n na n pʋʋs-ba. A Zezi sok-b lame: «Yaa bõe koees la y ra leokd taaba?» Ned a yembre zĩnda sʋka n yeele: «Karen-saamba, mam talla m biig n wa y nengẽ, la yaa Sʋtãan n be a pʋgẽ n kɩt t'a lebg muka. Sʋtãana yõkd-a-la a sẽn paamẽ fãa, n lubd-a tẽnga, t'a tãntãmpuuda yita. A kẽrsda a yẽna la a yĩnga fãa tirdame. Mam kosa yãmb karen-biisã la b pa tõog n sãoog-a ye.» A Zezi leokame: «Kɩɩsdb buudu, m na n paa ne yãmba n ta da-bʋre? M na n tõoga m sũur ne yãmb, n ta da-bʋre? Bɩ y tall y bãadã n wa!» B talla bãadã n wa a Zezi taoore. La Sutãana sẽn yãend a Zezi la a sẽn kɩt tɩ biiga yĩnga vɩgda. Biiga waa n tol n lʋɩɩ tẽnga, n gãe n bilimdẽ la a lasd tãntãmpuudu. A Zezi soka biiga ba: «Yaa sẽn ta yʋʋm a wãna la a ya woto?» Tɩ ba wã na n yeele: «Yaa al a yãadme. Naoor wʋsgo Sʋtãana lubd-a-la bugmẽ bɩ koomẽ n dat n kʋ-a. Yãmb sã n tõe bɩ y zoe d nimbãanega la y sõng-do.» T'a Zezi na n leoke: «Bõe tɩ f yet: sã n tõe? Ned ninga sẽn tẽeda, a sẽn dat fãa pitame.» Tao-tao bala biiga ba mooname: «Mam tẽedame la bɩ y sõng-ma tɩ m tẽeba paoodame.» A Zezi sẽn yãe tɩ neba zoet n watame b tãsa Sʋtãana: «Sʋtãan muk la wʋnga, m kõt-f la noor tɩ f yi bi-kãnga pʋgẽ la f ra leb n kẽ-a yɛs ye.» Biiga ra tara kaasgo t'a yĩnga wils vɩgd ne pãnga tɩ Sʋtãana na n loog n bas-a t'a gãe wa kũum la neba sɩd da gomda woto: «A kiime!» La a Zezi gãda biiga nug n yik-a yĩngri. A Zezi kẽe zakẽ tɩ b karen-biisa na n kolg n sok-ba: «Yaa bõe yĩng tɩ tõnd yẽ pa tõog n yiis Sʋtãana?» T'a Zezi leoke: «Sã n pa ne pʋʋsg bala, Sʋtãan kãnga buud ka tõe n dig ye.» A Zezi yii yirã n pãrgd Galile la b ra pa rat tɩ neba bãng ye. Dẽ tɩ b ra tara b karen-biisa zãmsgo la b ra yet-b lame: «Neb na n yõka Ned Biiga la b na n kʋ-a lame. La b sã n kʋ-a, dasma a tãab poore, a na n vʋʋgame.» B ra pa wʋmd b gomda võor ye. La sokr dabeem da tar-b lame. B taa Kafarnaom, la b sẽn kẽ zakẽ, a Zezi soka b karen-biisã: «Yaa bõe no-koeemde la y da wẽed sora zugu?» Tɩ b fãa sĩnda, tɩ sor zugu b da wẽeda no-koeemde ne taaba n na n bãng bãmb taoor soaba la ãnda. Dẽ la a Zezi zĩnd yã n bool b Tʋʋm-tʋmdb piig la a yiibã n yeel-ba: «Ned sã n dat n yɩ pipi soaba bɩ a pa a taab fãa poorẽ n yɩ a taab fãa sõgne.» Dẽ poore b gãda biig a ye n tak-a n yaas sʋka, n mobg-a la b yetẽ: «Ned ninga sẽn na n sak n deeg bi-bilf a woto mam yʋʋr yĩnga, yaa mam meng la a reeg yã. La ned ning sẽn na n deega maam, pa maam la a soab reegr ye, yaa sẽn tʋm-a maama.» A Zã yeela a Zezi: «Karen-saamba, tõnd yãee ned a ye sẽn digd Sʋtãamba, yãmb yʋʋr yĩnga, la a sẽn pa tũud tõndã, tõnd da rat n dig-a lame.» A Zezi leokame: «Bɩ y ra rig a soab ye tɩ ned pa tõe n maan wẽnd makr mam yʋʋr yĩnga n le wẽneg n gom wẽng mam poorẽ ye. Ned ninga fãa sẽn ka-a tõnd bɛ, yaa tõnd zoa. Ned ning sẽn na n kõ-a yãmb koom ne wamde tɩ y yũ y sẽn kẽed Krista yĩnga, sɩda, mam yeta yãmba tɩ yẽ soab kõn kong a rolb ye. La ned ning sẽn na n sãam-a bi-bilf a yembr bal sẽn tar tẽeb sɩɩga, ad-y sãoo ne yẽ soaba, b sã n dɩk bõeensã sẽn bilgd kugr ning n werd zoma n loe a yubla n tus-a n lub mogr pʋga. Fo nug sã n kɩt tɩ f lʋɩ yel-wẽnd pʋgẽ bɩ f fiuug-a tɩ fo sẽn na n kẽ vɩɩm sẽn kõn sɛ pʋgẽ ne nug yende, rẽ sãoo fo sẽn na n kẽ bugum sẽn ka kiid pʋgẽ ne f nus a yiibã. [ Be zũnzũur ka kiidi, be bugum me ka kiid ye.] Fo naoor sã n kɩt tɩ f lʋɩ yel-wẽnd pʋgẽ bɩ f kʋʋg naoorã, tɩ fo sã n kẽ vɩɩm sẽn kõn sɛ pʋgẽ ne nao yende, sãoo fo sẽn na n lʋɩ bugmẽ ne f naoa yiibu. [ Be zũnzũur ka kiidi, be bugum me ka kiid ye.] Fo nif sã n kɩt tɩ f lʋɩ yel-wẽnd pʋgẽ bɩ f kɩdg f nifã. Fo sã n kẽ Wẽnd Rĩung pʋgẽ ne nifr a ye, sãoo fo sẽn na n kẽ ne f nin a yiibã bug-toaagẽ. Beenẽ zũnzũur pa kiidi, la yaa wakat fãa la bugma me wita. Bugma na n kẽe nemsã wala yamsem. Yamsem yaa bõn sõngo, la a sã n sãbge, yaa bõe n na n le wa ne a noosem? Tall-y yamsem y pʋsẽ la y vɩɩma ne taab yɩ laafi vɩɩm.» A Zezi sẽn yi be, b waa Zɩɩda soolmẽ, Zʋrdẽ kʋɩlga rʋʋnde. Be me, zãma tigma b sɛɛgẽ. A Zezi le sɩngame n zãmsd nebã wa rasem kam. Farizẽ rãmba kolgame n sok a Zezi: «Rao tara sor n yiis a pag bɩ?» Bãmb da sokda a Zezi pʋto-sokre n dat n fɛɛs-ba. A Zezi leok-b-la woto: «A Moyiiz kõo yãmb no-bʋg yell kãnga poorẽ?» Tɩ b yeele: «A Moyiiz kõo sore tɩ b gʋls kãadma welgr sebre la b yaool n yiis pagã.» A Zezi leok-b lame: «Yaa y sũura sẽn kɩʋʋlma, la a Moyiiz gʋls no-kãng y yĩnga. Dũni sɩngrẽ, Wẽnd n zĩndig rao la paga. Yaa rẽ yĩng la rao na n bas a ba la a ma n zĩnd ne a paga, la raoã ne pagã na n lebga yĩng a ye. Woto yĩnga, Wẽnnaam sẽn lagem bũmb ninga, pa tog tɩ ninsaal welg-a ye.» A Zezi sẽn waa n le kẽ zakẽ, karen-biisa sok-b-la yell kãnga poorẽ. A Zezi leok b lame: «Ned ning sẽn yiisd-a a paga n le kẽ ne pag a to, yaa yoob la a maanda. Sã n ya pag n yi n bas a sɩda n tɩ rɩk rao a to, yaa yoob bal la a maanda.» Neb wʋsg waa ne b kom-bõonego a Zezi nengẽ n kot-ba tɩ b sak n sɩɩs-ba. La karen-biisa zaba ne-ba. A Zezi sẽn yãe woto, b sũur puugame tɩ b yeele: «Bas-y kom-bõonegã tɩ b wa mam nengẽ la y ra rig-b ye. Yaa neb niyns sẽn wẽnd-b bãmba n na n soog Wẽnd Rĩungã. Sɩd-sɩda, mam yeta yãmba tɩ ned ninga fãa sẽn ka reegd-a Wẽnd Rĩunga wala bi-bilfu, a soab kõn kẽ a pʋgẽ ye.» Dẽ poore, a Zezi mobga kambã, n tik ned kam fãa zug ne b nugu, n ning-b barka. A Zezi sẽn dɩk sore, la rao a yembre sẽn zoe n seg-ba n wõgemd b taoore, n sokdẽ: «Karen-saamb sõngo, mam na n maana a wãn n paam vɩɩm sẽn kõn sɛ?» A Zezi yeel-a lame: «Yaa bõe yĩng la fo boond maam tɩ karen-saamb sõngo? Sã n pa Wẽnnaam b ye bala, ned ka be n ya sõng ye. Fo mii Wẽnnaam noya la: da kʋ ned ye, da yo ye, da zu ye, da kõ kaset ziri ye, da wẽg f to ye, waoog f ba la f ma.» La daoã leokame: «M zu-soaba, mam sɩng n maanda rẽ al m yãadmẽ.» A Zezi ges-a-la ne nonglem, n yeel-a: «Bũmb a ye bala n paoog foo marsã: fo sẽn tar bũmb ning fãa, bɩ f rɩk n koos n kõ naong rãmba tɩ f na paam arzɛk arzãnẽ. Dẽ poore, bɩ f wa tũ maam.» La raoã sẽn wʋm woto, a sũur sãamame t'a gãnem a neng n looge t'a ra tara laog wʋsgo. A Zezi gesa sẽn da be-b bãmb sɛɛgẽ wã la b yeela b karen-biisã: «Wẽnnaam Rĩung pugẽ kõom na n yɩɩ toogo ne neb niyns fãa sẽn tar-b arzɛka!» Gomda yɩka karen-biisa pɛlenga t'a Zezi na n le yeel-ba, n paase: «M kamba, ad-y Wẽnnaam Rĩunga pugẽ kõom na n yɩɩ toogo ne arzɛk rãmba! Yʋgemd sẽn na n tũ supĩim yõore n loog yaa naana n yɩɩd arzɛk soab sẽn na n kẽ Wẽnnaam Rĩungã pugẽ.» Tɩ bãmb na n le yɛɛs n paas la b yet taaba: «Sã n ya woto, ãnda n na n paam fãagre?» A Zezi ges-b-la pem, n yeel-ba: «Yaa toog ne ninsaalba, la ka toog ne Wẽnd ye tɩ bãmb tõee fãa.» A Piyɛr yeela a Zezi: «Ges-y, tõnd basa bũmba fãa n tũ yãmba.» A Zezi leokame: «Sɩd-sɩda, mam yeta yãmba, tɩ ned ning fãa sẽn sak-a n bas a yiri, a yaopa, a tãopa, a ma la a ba, a kamba bɩ a pʋto, mam yĩnga la Koe-nooga yĩnga, yẽ soab na n paama naoor koabga, marsã menga, doto, yaopa, tãopa, ma rãmba, kamba la pʋto. Namsg yẽ na naage, la zamaan ning sẽn pʋgdã, na n yɩɩ vɩɩm sẽn kõn sɛ. Wʋsgo sẽn da ya pipi rãmba na n lebga poorẽ dãmba tɩ poorẽ dãmb na n lebg pipi rãmba.» B ra rɩka sor n dabd Zerizalɛɛm. A Zezi meng ra lʋɩɩ bãmb taoore la b fãa ra kẽnda ne pɛlen-yɩka, b fãa ra pʋgda ne yɛɛsgo. A Zezi baka Piig la a yiibã la b sɩngame n wilgd-b yɛl niyns sẽn na n paam bãmb menga: «Ade, tõnd dabda Zerizalɛɛm la b na n yõka Ned Biigã n kɩs maan-kʋʋdba nanamse la Sɛb-mitba; bãmb n na n kao b kũum bʋʋdo, n bas-b bu-zẽmba nusẽ, tɩ b na n yaal-ba, n sẽnes b neng kolkoodo, n pãb-b ne kaase, n kʋ-ba, la dasma a tãab poore, b na n vʋʋgame.» A Zebede kamba, a Zak la a Zã, kolga a Zezi n yeel-ba: «Karen-saamba, d kotame tɩ y kõ-d d sẽn na n kos-y bũmb ningã.» T'a Zezi yeel-ba: «Yaa bõe la y rat tɩ m maan y yĩnga!» B leokame: «Y zɩɩra zĩigẽ, bɩ y sõng tɩ d nin-yend zĩnd y rɩtgo, t'a to wã zĩnd y goabga.» A Zezi yeel-b lame: «Yãmb pa mi y sẽn kot bũmb ning ye. Yãmb tõe n yũu wamd ning b sẽn na n tugl-ma la y so koom ning b sẽn na n so-ma?» B leok-b lame: «Tõnd tõeeme.» La a Zezi yeel-b lame: «Mam sẽn na n yũ wamd ningã yãmb me na yũ-a. Mam sẽn na n so soob ninga, yãmb me na so. La sã n kella mam goabg la rɩtg zĩigã, mam pa tõe n kõ yãmb rẽ ye. Zĩ-kãens yaa b sẽn segl b rãmb yĩnga.» Tʋʋm-tʋmdb piiga sẽn wʋm a Zak la a Zã goama b sũur puuga ne-ba. A Zezi boola bãmb fãa n yeel-ba: «Yãmb miime tɩ bu-zẽmba nanams rɩta naam b soolma rãmb zutu la b nin-bɛda maand-b la pãnga. Pa na n yɩ boto ne yãmb ye, ayoo! Yãmb sʋka, ned sã n dat n lebg nin-kãsenga, bɩ a reng n yɩ yãmb sõgne. La ned ninga sẽn dat-a n yɩ pipi soaba, yãmb sʋka, bɩ a soab reng n yɩ yãmb fãa yamba. Ned Biiga meng ka wa tẽng zugu n dat tɩ neb maana a yam ye; a waame n na n maan neb a taab yam, la a kõ a meng vɩɩm neb wʋsg fãagr yĩnga.» B taa Zeriko. La bãmb sẽn waa n yit be ne b karen-biisã la zãma kãsengã, a Bartime, a Time biiga, sẽn ya zoanga, ra zĩi sora noor n bõsdẽ. A sẽn wʋm tɩ b gomd tɩ yaa Nazarɛt Zezi, a mooname: «Zezi, Daviid biiga, zoe-y mam nimbãanega.» Neb wʋsg da zabda ne-a, n yet t'a sĩnd a noore. La yẽ da moondame n yɩɩd pĩnda: «Daviid biiga, zoe-y mam nimbãanega.» A Zezi yaasame n yeel: «Bool-y zoangã!» Tɩ b bool-a n yeel-a: «Keng f pɛlga, yik tɩ b boond-f lame.» La zoanga loba a fuug n wudg n ta a Zezi taoore. A Zezi sok-a lame: «Fo ratame tɩ m maan-f bõe?» Tɩ zoanga yeele: «Karen-saamba, sõng-y tɩ m nina puki!» La a Zezi yeel-a lame: «Bɩ f kẽng tɩ f tẽeb fãag-f lame.» La tao-tao bala, a nina pukame, t'a ra tũud a Zezi. B sẽn waa n kolg Zerizalɛɛm, Bɛtfaze la Betani sẽn ta la bala, Oliviye tãnga pennẽ, a Zezi tʋma b karen-biis a yiibu. B yeel-b lame: «Bɩ y kẽng tẽng ning sẽn tond y taoorã; y sã n ta, y na n yãe bõn-bil sẽn loe; ned ba a ye nan pa zomb-a ye. Bɩ y lok-a n wa ne. Ned sã n yeel yã: ‹Yaa bõe la y maand woto?› bɩ y yeel: ‹Yaa Soaala n tar a tʋʋmde, la a na bas-y tɩ y wa ne a.› » B kẽngame la b yãee bõn-bil sẽn loe, yir sɛɛgẽ la sor noore, la b lok-a lame. Neb niyns sẽn da pẽ-ba sok-b lame: «Yaa bõe yĩng la y lokd bõn-bilã?» Karen-biisa leokame wala a Zezi sẽn togs bãmbã la neba bas-b lame tɩ b looge. B talla bõangã n wa a Zezi nengẽ, b palga bõangã b futu, t'a Zezi yaool n zomb-a. Neb wʋsg yɛdga b fut sora zugu la kẽer me kɛɛ vãad, pʋtẽ, n gãneg sorã. Neb niyns sẽn da lʋɩ-b a Zezi taoore la sẽn da pʋgd-b poorẽ, fãa ra moondame: «Kilill! Sẽn wata Soaala yʋʋr yĩnga paam barka! D kils naam sẽn wate, d kils d ba a Daviid Naama! Kilill, Yĩngr soaba paam pẽgre!» A Zezi kẽe Zerizalɛɛm, wẽnd dooga pʋga, b gesa bũmb ning fãa sẽn da be wẽnd doogẽ wã, la zĩig sẽn da zoe n sɩng sobgr yĩnga, b yii ne b Tʋʋm-tʋmdb piig la a yiibã n dɩk Betani sore. Beoog sẽn vẽege, t'a Zezi yit Betani, tɩ kom tar-ba, b yãee kankang a yembr yɩɩg ne vãado; b kolgame n na n ges b kõn yãend kankam a zugu. B sẽn ta, b pa yãend bũmb sã n pa vãad bala. Da pa kankam wakat ye. A Zezi goma ne kankangã: «Dũnna tɛka ned ba a ye kõn le rɩ fo biig ye.» La b Tʋʋm-tʋmdba ra kelgdame. A Zezi sẽn yi Betani n ta Zerizalɛɛm, b le kẽe wẽnd doogẽ wã, la b sɩngame n digd neb niyns sẽn da be-b be n koosdẽ bɩ n daad teedo. B rɩg-b-la fãa n yiis yɩnga. B tusa ligd tɛkdba teedo n lubi, la b luba wal-koaasdba me goeelse. La b ra pa sakd tɩ b tʋk bũmb n tũ wẽnd doogẽ wã n loog ye. B ra zãmsda nebã n yet-b woto: «B pa gʋls tɩ dooga yaa pʋʋsg roog Adem biis fãa yĩng bɩ? La yãmb dɩka mam doogo n maand wagdb solgr zĩiga.» B rɩka b goama n taas maan-kʋʋdba nanamse la Sɛb-mitba la bãmb ra baooda b sẽn na n maan bũmb ning n sãam a Zezi yelle. Bãmb da zoeta a Zezi tɩ neba ra pẽgda b zãmsgo. Zaabr sẽn waa n ta, a Zezi yii tẽngã. Yibeoogo b le rɩka b zaamẽ sorã la b mikame tɩ kankanga kʋɩɩ yĩngr n tãag tẽnga. A Piyɛr tẽega a Zezi goama n yeel-ba: «Soaala, yãmb sẽn kãab kankanga wẽngã, ad-a kiime!» A Zezi leokame: «Bɩ y tẽ Wẽnnaam. Sɩd la m sẽn yet yãmbã: ned ning sẽn na n yeel-a tãn-kãnga: ‹Yɩk n tɩ lʋɩ mogra pʋga,› sãmbg sã n ka be a sũurẽ, a sã n tar tẽebo, t'a sẽn yeela na n taasame, sɩd yita boto a yĩnga. Yaa rẽ yĩng la mam yet yãmba tɩ y sẽn na n pʋʋs n kos bũmb ning fãa, bɩ y tẽ tɩ y zoe n paam-a lame, la na n yɩɩ boto. Yãmb sã n yɛs yĩngr n pʋʋsdẽ tɩ bũmb be yãmb ne y to sʋka, bɩ y kõ sugri tɩ woto, yãmb Ba ning sẽn bɛ-a arzãna me na kõ-y sugri. [ Y sã n ka bas taale, y Ba sẽn be arzãna me kõn bas taal ye.]» A Zezi ne b karen-biisa le waa Zerizalɛɛm la b sẽn waa n kẽnd wẽnd dooga pʋga, maan-kʋʋdba la Sɛb-mitba ne karen-saam-dãmba waame n yeel-ba: «Yãmb sẽn maand bũmb niynsã, ãnda n kõ y sore?» B leok-b lame: «Ma me na reng n sok yãmb bũmb a yembre bala, la yãmb sã n leok-ma, m na yaool n togs m tõoga sẽn yit zĩig ninga. Leok-y-ma, a Zã sooba poorẽ, ra yita Yĩngri Soaba nengẽ bɩ a ra yita ninsaal nengẽ?» La ad-b sẽn da tagsd b yamẽ: «Tõnd sã n yet t'a Zã sooba yita Wẽnnaam nengẽ, a na n wẽneg n leok-d lame: ‹Bõe yĩng tɩ yãmb pa tẽ a Zã?› La d kõn saag me n yeel t'a yita ninsaal nengẽ ye.» B ra zoeta zãma wã. Neba fãa da tẽedame t'a Zã sɩd yaa bãngda. Woto wã, b kong n yeela a Zezi: «Tõnd ka mi ye.» T'a Zezi me na n yeel-ba: «Ma me kõn wilg yãmba m tõoga sẽn yit zĩig ning ye.» A Zezi sɩngame n gomd nebã ne yelbũna: «Ned a ye n da sel a bugsuntun-sõngo, n wẽ yãgr n gũbg-a, n me gũudb roogo, n maaneg tɩ-biisa wẽkr zĩiga. Dẽ poore a gũnug-a la neba n bas n tog sore. Bõn-bɩʋʋng sẽn waa n ta, yẽ tʋma a rakõor a ye gũudba nengẽ t'a tɩ reeg a pʋɩɩr n wa kõ-a. Neba yõka rakõorã n pãb-a, n yaool n dig-a t'a kul zaalem. A tʋma rakõor a to yɛs b nengẽ. B wẽe yẽ zugu, n yaal-a wʋsgo. A le tʋma rakõor a tãab soaba, la b kʋʋ yẽnda. Dẽ poore, b namsa rakõap wʋsgo la b kʋʋ kẽere. Pʋʋga soab meng bi-yend bala n da kete, la a tʋma bi-kãng n yetẽ: B na yaa n deeg m meng biigã ne waoogre wɛ! Gũudba yeela taaba: Yaa yẽ la bi-kẽengã, yẽ n na n soog a ba laoga fãa. Wa-y tɩ d kʋ-a, tɩ sã n ya woto, tõnd na soog a laogã. B sɩd kʋ-a lame la b lob-a la yɩnga, yãgra poore. Pʋʋga soab na n maana a wãn ne nin-kãensã? A na n waame la a na n kʋʋ gũudbã la a bao neb a taab n gũnug a pʋʋgã. Yãmb pa karem kibar kãnga sebr sõng pʋgẽ sɩda? Tãn-metba sẽn zãgs kugr ningã, yaa yẽ n lebg rooga kug ma. Yaa Soaala n tʋlg t'a lebg boto, a lebga pẽgr bũmb tõnd nifẽ.» Maan-kʋʋdba la Sɛb-mitba ra baoodame n na n yõk a Zezi la b ra zoeta zãma wã rabeem. B ra mii neer tɩ yaa bãmb yĩng la a Zezi wẽ yelbũnd kãnga. La b basa a Zezi n looge. B tʋma Farizẽ rãmb la a Erod kẽedba tɩ b maan dabaare n yõk a Zezi b goam pʋgẽ. Bãmb waa a Zezi nengẽ n sok-ba: «Zu-soaba, tõnd miime tɩ yãmb yaa sɩd soaba. Yãmb pa zoet ned nifu la y togs sɩd ye. Yãmb pa get ned neng la y yaool n kao bʋʋd ye. Yaa ne sɩd la yãmb zãmsd Wẽnnaam sore. La d dat n sok-y lame: Segdame tɩ tõnd yao yõor yaoodã bɩ pa segde? Yaa modgr ne tõnd bɩ pa modgre?» A Zezi sẽn bãng b zãmbã, yeel-b lame: «Yaa bõe tɩ y rat n zãmb maam? Tall-y wakɩr a yembre n wa ka tɩ m gese.» B sɩd tall n waame. La a Zezi yeel-b lame: «Yaa ãnda nenga la ãnda yʋʋre la b gʋls a zugu?» Tɩ b leoke: «Yaa Rom naab dẽnna!» T'a Zezi na n yeel-ba: «Bɩ y kɩs Rom naab a sẽn so la y kõ Wẽnd me b rẽnna.» La leokr kãng yɩka b fãa pɛlense. Saduseẽ rãmb me waa a Zezi nengẽ, bãmb da yetame tɩ kũum ka tõee n vʋʋg ye. Bãmb n sok a Zezi: «Soaala, a Moyiiz ra kõo tõnd noor kãnga: ‹Ned yao bɩ a kẽem sã n ki n bas pag sẽn pa rog biiga, pakr ne kẽema bɩ ne yao wã tɩ b rɩk pʋg-kõorã n dog biig n kõ sẽn ki-a wã.› La ade, neb a yopoe n da ya ba-biisi la ma-biisi. Kẽema yii kãadem ne paga, la a kiime n bas pagã n ka paam biig ye. Kãsem-pʋgdgã rɩka pagã la yẽ me kiime n pa tol n paam biig ne-a ye. A tãab soaba la sẽn pʋg-ba fãa kẽe kãadem ne pagã; bãmb ned ba a ye ka paam biig ne-a ye. Bãmb fãa kũum poore la paga meng yaool n ki. Vʋʋgr wakato, bãmb fãa sã n vʋʋge, yaa ãnda n na n soog pagã? Yẽ yɩɩ bãmb b yopoe wã fãa pag la.» La a Zezi leok-b lame: «Bũmb a to ka wa ne y tudgri n zʋʋg y sẽn ka mi Sebr sõng la Wẽnnaam pãnga ye. Vʋʋgr wakato, neb sã n vʋʋg n sɛ, b pa le baood pag bɩ sɩd yɛs ye, b vɩɩ wa malɛk rãmb sẽn vɩ arzãnẽ. La sã n ya kũum vʋʋgr poorẽ, yãmb pa karem a Moyiiz sebr pʋgẽ, Wẽnnaam sẽn gom ne a Moyiiz tʋgr pʋga n yetẽ: ‹Maam la a Abraam Wẽnnaam, a Izaak Wẽnnaam, a Zakoob Wẽnnaam bɩ?› Woto wã b pa kɩɩms Wẽnnaam ye, b yaa nin-vɩɩs Wẽnnaam. Dɩlla yãmb tudga wʋsgo.» Sɛb-mit a yembre sẽn wʋm Saduseẽ rãmba sokre, la a Zezi leokr sẽn yɩ neer yĩnga, yẽ me kolga a Zezi n sok sokr kãngã: «Wẽnnaam noya sʋka, yaa bʋg la pipi soaba?» A Zezi leok-a lame: «Pipi soab la woto: ‹Israyɛl, kelg Soaala sẽn ya tõnd Wẽnnaam, bãmb b ye bala la Wẽnde. Nong f Wẽnnaam, f Soaala ne f sũur fãa, ne f sɩɩg fãa la ne f pãng fãa.› Noor a yiib soaba la woto: ‹Nong f to n wẽnd f menga.› Wẽnnaam noor a to ka be n yɩɩd bãmb b yiiba ye.» Sɛb-mita yeelame: «Yãmb sẽn togsã yaa sɩda, Wẽnnaam yaa b yembr bala la sẽn yɩɩda bãmb ka ye. Ned sã n nong bãmb ne a sũur fãa, ne a yam fãa, ne a pãng fãa, la a sã n nong a to wala a menga, rẽ yɩɩda maanda fãa gilli.» A Zezi sẽn yãe t'a leokra zemsame yĩnga, b yeel-a lame: «Fo pa zãr ne Wẽnd Rĩung ye.» Ned ba a ye pa le saag n sok bãmb yɛs ye. A Zezi ra ket n zãmsda neba wẽnd doogẽ la b zẽka b koɛɛg n yeele: «Yaa bõe yĩng tɩ Sɛb-mitba yet tɩ Krista yaa a Daviid biiga? A Daviid meng ra pa yeel ne a Vʋʋsem Sõng Vẽenem: ‹Zu-soaba yeela m Soaala: Zĩnd mam dɩtgo al tɩ tol ta m sẽn na n kɩte tɩ f tab f bɛɛba ne f nao.› A Daviid meng sã n boond bãmb t'a Soaala, b na yɩɩ wãna n le ya yẽ biig yɛsa?» Neb wʋsgo da kelgda b goama ne sũ-noogo. A Zezi zãmsga pʋgẽ, b ra yeta nebã: «Bɩ y gũus ne Sɛb-mitbã. Bãmb nonga b na yeelg fu-wogd wẽnd doogẽ, b nongame tɩ neb pʋʋs-b soy zutu, b baooda waoogr zĩis wẽnd dotẽ la rɩɩb rotẽ. B sɛta pʋg-kõap arzɛka. B nongame n pʋʋs pʋʋs wogdo. Bãmb sɩbgr n na n yɩ toog n yɩɩda.» A Zezi da zĩime tɩ b neng tees ligda ningr zĩiga la b ra geta neb wʋsgo sẽn da ningd ligd zĩ kãnga. Arzɛk rãmba ra kõta wʋsgo. Pʋg-kõor a yembr sẽn da ya naong soab waame la yẽ me ninga ligdi sẽn zems ne a paoongo. A Zezi boola b Tʋʋm-tʋmdba n yeel-ba: «Sɩd-sɩda mam yeta yãmba tɩ pʋg-kõor kãnga ninga ligd wʋsgo n yɩɩd sẽn ning-ba fãa. Bãmb fãa sẽn ningã, yaa b sẽn pa tar ligd ning tʋʋmde la b ning yã la pʋg kãnga sẽn ya naong soaba, yẽ ninga a sẽn da tar fãa, a sẽn teeg bũmb ning n na n vɩɩnde.» A Zezi sẽn yi wẽnd doogẽ wã la karen-biig a ye sẽn yeel-ba: «Soaala, ges-y rooga kugã la a meebã.» A Zezi yeel-a lame: «Fo geta wẽnd dooga meeb sẽn ya neer wʋsga laa? Ad kugr ba a ye ka na n kell a to zug ye, bãmb fãa na n viigame!» A Zezi sẽn ta Oliviye Tĩngla zugu, b zĩndame tɩ b neng get wẽnd doogã. Wakat kãnga a Piyɛr ne a Zak n paas a Zã ne a Andre sẽn mik tɩ ned a to ka be ne bãmba, b yeela a Zezi: «Bɩ y togs tõnd yell kãnga sẽn na n taas wakat ninga la bũmb ning sẽn na deng n maan dũni sɛɛb wakato.» A Zezi leoka b karen-biisã: «Bɩ y gũus tɩ b ra tudg yãmb ye. Neb wʋsg na n waa mam yʋʋr yĩnga n yetẽ: ‹Yaa maam la Krista,› la b na tudga neb wʋsgo. Yãmb sã n wʋm tɩ b gomd zabr yelle, bɩ y sã n wʋma zabr rãamde, bɩ y ra zoe rabeem ye. Rẽ fãa na n deng waame la nan ka dũni sɛɛb ye. Buud a yembr neba na n maana zabre ne bu-zẽnd dãmba, soolem a ye rãmba na n yika zabr ne soolm a to neba. Zĩis kẽere tẽnga na miimame; kom na n zĩnda wakat kãnga, bɩ y bãng tɩ rogma waasg n sɩnge. Gũus-y y mense. B na yõka yãmb n kẽng bʋ-kaoodba nengẽ; b na n pãba yãmb ne kaase karen-dot pʋsẽ; b na n talla yãmb n kẽng tẽnga nanams la dĩm dãmb taoore, la b na n kẽes-y la bʋʋdo, y sẽn tũud maama poorẽ. La yaa modgr tɩ Koe-nooga reng n moon zĩis fãa tɩ neba wʋm-a. B sã n wa yõg yãmba n kẽng bʋ-kaoodb taoore, bɩ y ra bʋ y sẽn na n leok bũmb ninga poorẽ ye. Bũmb ning sẽn na n wa yãmb yamẽ wakat kãnga, yaa bõn-kãng la y na n leoke. Pa yãmb mens n na n gom wakat kãng ye, yaa a Vʋʋsem Sõng n na n gom yãmb zĩigẽ. Ned na n yõka a ba-biig n kɩs tɩ b kʋ, tɩ ba na n kɩs a biiga, tɩ kamb na n kɩs b ba rãmba tɩ b kʋ. Mam yĩnga, neb fãa na n kisga yãmba. La ned ning sẽn na n tall a tẽeb kẽnkẽ n ta namsga tɛka, yẽ soab na n fãaga a menga. Yãmb sã n yãend yel-yooga sẽn wat ne Sũ-sãang kãsenga zĩig ninga a sẽn pa tog n zĩndĩ, ned ninga sẽn karemd-a bɩ a wʋme. Neb niyns sẽn be-b Zɩɩde tẽns pʋsẽ wakat kãnga, bɩ b zoe n dʋ tãmsã. Sẽn zao-a gaosg zug wakat kãng bɩ a soab ra sig ye, a ra kẽ a roogẽ n dɩk bũmb ye. Ned ninga sẽn be-a pʋʋgẽ wakat kãng bɩ a ra le wa yir n bao fuug ye. Yell na pak tʋtr-pʋs la sẽn yẽsemd-b kamb wakat kãnga. Bɩ y pʋʋs tɩ yell kãnga ra seg waood wẽnd ye. Da kãens toolem na n yɩɩga toolem buud fãa. Al dũni sɩngre n ta marsã, b nan pa yãend a taar ye la b kõn le yãend me ye. Wẽnnaam sã n da pa woogẽ dasem kãens sõore, ned ba a ye kõn tõogẽ n põs ye. La nin-sõma yĩnga, Wẽnnaam sẽn tũus b rãmba yĩnga, b sõora woogame. Ned sã n yeel yãmb wakat kãnga: ‹Ad Krista bee ka; wa-y tɩ b bee kaalẽ,› bɩ y ra tẽ a soab goam ye. Zirẽ-be-neba, zirẽ-be-bãngdba na n zĩnda wʋsg wakat kãnga. B na n maana bõn-bãna la makr dãmb wʋsgo n tudg nin-sõma wã menga sã n da tõeẽ. Sã n ya yãmba, gũus-y y mense, tɩ m deng n wilga yãmb dẽ fãa tɩ nan ket n zãr. Dasem kãense, sũ-beed kãsenga sã n wa looge, wĩntoog bugum na n kiime, kiuug kõn le kõ vẽenem yɛs ye. Ãds na n vigsame n dʋʋge, la yĩngr pãensa fãa na menemame. Wakat kãnga b na yãe Ned Biiga sẽn zom sawadgo n wat ne pãng la zɩɩr kãsenga. B na n yaoolame marsã n tʋm b malɛgse tɩ b saag zĩis fãa n tigim b nin-sõma sẽn be ween-vɩɩs a naasã, tẽnga la saaga sẽn singd zĩig ninga n tãag b sɛtmẽ. Bɩ y rɩk kankang makre. Yãmb sã n mik t'a tãood wil poala la a tobd vãado, y miime tɩ tʋʋlg wẽnd kolgame. Woto-me yãmb sã n wa yãe mam sẽn gom bũmb niynsa fãa taasgo, bɩ y bãng tɩ wakat taame. Sɩd-sɩda m yeta yãmba: dũni kãnga neb kõn loog zãnga tɩ mam sẽn togsa ka taas ye. Yĩngr la tẽng na n loogame la mam goama kõn loog ye. Sã n yaa daara taki wã, ned ba a ye ka mi ye. Malɛk rãmb sẽn be yĩngr ka mi ye. Ned Biiga me ka mi daar kãng ye. Yaa Ba n mi bala. Gũus-y wakat fãa la y ra bao vʋʋsg ye tɩ yãmb ka mi wakat kãng taab daar ye. Yaa wa ned sẽn togd sore n bas a yir gũudem ne a sõgen-kamba. A kõo bãmb tõogo tɩ b yõdg n ges bũmba fãa la b kõo ned kam fãa a tʋʋmde a sẽn na n yõdg n maan. A yeela dig noora gũuda t'a yõdg n gũ neere. Yãmb me, gũus-y tɩ y pa mi yir soab waoong wakat ye. A na n waa yʋn-sʋka, tõd-beoogo, no-raoog kɛlenga, bɩ yibeoogo, y ka mi ye. A sẽn na n wa wakat ning fãa, sõng-y t'a ra mik tɩ y gõeeme ye. M sẽn gomdã yaa yãmb fãa la m gomd ne: gũus-y.» Da keta rasma a yiib bala tɩ bur sẽn pa le ningd bɩlle la Pak kibs ta. Maan-kʋʋdba kãsem dãmba la Sɛb-mitba fãa baoo b sẽn na n maan toto n yõk a Zezi n kɩt tɩ b kʋ-ba. B ra yeta taaba: «D da saag rẽ Kibsa raare tɩ tẽnga tõe n wa wulumda me.» A Zezi da bee Betani, wãoor a yembre sẽn boond t'a Simo zakẽ, n dɩtẽ. Pag a ye waa zakẽ be ne kug peesem yʋbl pɛɛlga. Yʋbla ra pida ne yũ-noog ka-neem sẽn daad toogo. Paga wãaga yʋblã n daag kaama a Zezi zugu. Rẽ puuga neb wʋsg sũuri tɩ b ra gomd ne taaba n yetẽ: «Yaa bõe yĩng tɩ b sãamd yũ-noog kaam a woto? B ra tõe n koosa kaama n paam wakɩ koeems kobs-tã n dɩk n kõ naong rãmba.» B ra pa gomd noog ne paga ye. A Zezi yeel-b lame: «Bas-y paga laafi. Yaa bõe yĩng la y sãamd y sũuri? A tʋma tʋʋmd sõngo mam yĩnga. Naong rãmb na n kell n zĩnda yãmb sʋk daar fãa. Y sẽn dat wakat ning fãa, y na tõog n sõng-ba. La sã n ya maam, mam pa na n zĩnd ne yãmb daar fãa ye. Pʋg kãnga maana a sẽn da tõe n maan bũmb ninga. A sẽn zɛ mam yĩnga ne kaama, a zoe n beoolame n segl m mumbu. Sɩd-sɩda mam yeta yãmb tɩ dũni wã fãa pʋgẽ, b sẽn na n togs Kibar nooga zĩig ning fãa, b na gom pʋg kãnga sẽn maana me yelle.» Dẽ poore, piig la a yiiba nin-yend sẽn boond tɩ Zɩɩda, Iskariyot tẽng neda, kẽngame n tɩ yẽs ne maan-kʋʋdba nanamse n yet t'a na yõk a Zezi n kõ-ba. B sẽn wʋm woto, b sũur yɩɩ noog wʋsgo tɩ b kãab-a ligdi. A Zɩɩda ra baooda marsã, wakat ning a sẽn na n yõk a Zezi. Bura sẽn pa le ningd bɩlla sɩngr daare, pe-bila kʋʋb daare, karen-biisa soka a Zezi: «Yãmb datame tɩ d segl pak rɩɩb yɛɛlẽ?» A Zezi tʋma bãmb neb a yiibu: «Kẽng-y tẽnga pʋgẽ tɩ y na seg rao a ye sẽn zɩt yʋʋre ne koom. Bɩ y pʋg-a n kẽ a sẽn na n kẽ zĩig ningã la beene, y na yeel zaka soaba: ‹Soaala n tʋm tõndo tɩ d wa sok yãmba n ges yaa do-bʋgo la b na n paam n dɩ pak rɩɩbo ne b karen-biisã?› A na n wilg-y-la do-kãsenga sẽn dog a to zugu la sẽn be neere. Do-kãng pʋg zoe n manegame n sɛ. Segl-y paka rɩɩb be.» Sẽn tʋm b rãmba yii n loogame la b yãee fãa w-a a Zezi sẽn pĩn n togsã la b segla paka rɩɩbo. Zaabr sẽn ta, a Zezi waa ne b Tʋʋm-tʋmdb piig la a yiibã. B sẽn waa n dɩtẽ, a Zezi yeel-b lame: «Ade m yeta yãmba tɩ yãmb nin-yend n na n zãmb maam. Yẽ soab rɩta ne maam marsã.» Bãmb fãa ra zĩi ne sũ-sãanga la ned kam fãa ra sokdame: «Soaala, yaa maam bɩ?» A Zezi yeel-b lame: «Yaa yãmb piig la a yiibã nin-yende, yaa ned sẽn naaga maam n tʋmd a nug laagẽ. Ned Biiga sɩd na n looga wa b sẽn da pĩnd n gʋls a poorẽ, la yell na pak Ned Biiga zãmbdã. Nin-kãng sã n da pa rogẽ n são.» B sẽn waa n dɩtẽ, a Zezi rɩka bur n ning-a barka n wes n pʋɩ b karen-biisã n yetẽ: «Deeg-y tɩ woto yaa mam yĩnga.» B rɩka laog neere ne rãam n pʋʋs bark pʋʋsgo n yaool n dɩk n kõ-ba. Ned kam fãa reegame n yũ. A Zezi yaool n yeel-b lame: «Woto yaa m zooda zɩɩm, Zooda sẽn yõg ne zɩɩma m sẽn daag neb fãa yĩnga. Sɩd-sɩda mam yeta yãmba tɩ m kõn leb n yũ bugsuntung sõng biis rãam n tol n ta raar ning m sẽn na n leb n wa yũ a rã paalga Wẽnd Rĩunga pʋga.» B sẽn yɩɩl bark yɩɩl n sɛ, b yiime n dɩk Oliviye tãng sore. A Zezi waa n yeel-b lame: «Yãmb fãa na n basa raood ne mam pʋgbo tɩ b gʋlsame: M na pãba pe-kɩɩma la pe-yãansa na n sẽegame. La m sã n wa vʋʋge, m na reng yãmb Galile.» T'a Piyɛr na n leok-ba: «Ba m taaba fãa sã n na kɩɩs tɩ b ka mi yãmba, kõn yɩ maam ye.» A Zezi yeel-a lame: «Sɩd la m sẽn yet fooma: yʋnga bala no-raoog kõn kelem naoor a yiibu tɩ foom, a Piyɛr, pa kɩɩs naoor a tã tɩ f ka mi-m ye.» La a Piyɛr le yeela ne pãnga n yɩɩd pĩnda: «Ba m na naag yãmba n ki, m kõn yeel abada tɩ m ka mi yãmb ye.» La karen-biis a taaba me yeela wa a Piyɛr. B taa zĩig a ye sẽn boond tɩ Zɛtsemani la beene a Zezi yeela b karen-biisã: «Zĩnd-y ka tɩ m zãag n pʋʋs la m wa.» B peega a Piyɛr, a Zak ne a Zã n zãag bilfu. Wakat kãnga sũ-sãang la yɩɩr yõk-b lame. Dẽ la b yeel b karen-biisã: «Sũ-sãang n tar maam la sũ-sãanga seka m kũum. Bɩ y zĩnd ka la y ra gũs ye.» B zãaga bilfu n lʋɩ tẽng n sɩng pʋʋsgo, n kotẽ tɩ namsga wakata zãag ne-ba, sã n tõe. B ra pʋʋsda woto: «M Ba, bũmb ka be n ya toog ne yãmb ye. Y sã n dat bɩ y zãag namsg kãnga ne maam, la baasg fãa, bɩ y maan y sẽn dat la y ra tũ mam daab ye.» Dẽ poore b le waa b karen-biisa nengẽ la b mikame tɩ b gõe. A Zezi neka a Piyɛr n yeel-a: «Piyɛr, fo gõeeme laa? Fo ka tõe f meng wakat a ye pʋgẽ bal n ka gũsi? Bas-y gõeem la y pʋʋse n da wa lʋɩ kʋɩɩbg pʋgẽ ye. Ninsaal wɩɩda pãng a raabẽ, la yĩngẽ wã, a pãng paooda.» B leba b pʋʋsga zĩigẽ la b pʋʋsame n le togs pĩnd goama. B sẽn le lɛɛg n wa karen-biisa nengẽ, b le mikame tɩ b ket n gõe. Gõeem da tar-b la wʋsgo la b ra ka mi b sẽn leokd bũmb ning ye. A Zezi le waa b nengẽ naoor a tãab soaba la b yeel-b lame: «Y sã n dat bɩ y gũs marsã la y vʋʋse tɩ fãa sɛɛme. Wakata taame; yaa marsã la b na n yõk Ned Biiga n kɩs yel-wẽn-maandba. Aya! Yik-y tɩ d loog tɩ sẽn na n zãmba Ned Biiga kolgame.» A Zezi da ket n gomdame t'a Zɩɩda wẽneg n ta ne neb ka tɛk sẽn zãad sʋʋs la rasaba. Yaa tẽnga kãsem dãmba la maan-kʋʋdba nanamse n da tʋm-ba. Zãmbda ra pĩnd n kõ-b la makre: «Mam sẽn na n mobg ned ningã, yaa yẽ, bɩ y yõk-a la y tall-a ne gũusgu.» A Zɩɩda sẽn ta bala, a wẽneg n kolga a Zezi n yetẽ: «Soaala, m pʋʋsda yãmba.» La a mobg-b lame. La neba yõka a Zezi. Ned a yembr sẽn da be a Zezi sɛɛgẽ wõoga a sʋʋga n kɛ maan-kʋʋd kãsenga sõgen tʋbre n fiuugi. La a Zezi goma ne nebã n yetẽ: «Yãmb waa ne sʋʋse n na n yõk maam, wala mam yaa so-gɩta. Daar fãa mam da bee wẽnd doogẽ n zãmsd neba, la yãmb pa yõk maam wakat kãng ye. Dẽ fãa yaa sẽn na yɩla tɩ bãngdba gʋlsg tõog n taase.» Wakat kãnga karen-biisa fãa basa a Zezi n zoe. Bi-bɩɩg a yembr n da pʋgd a Zezi. Yaa fu-goabg bal la a ra pil yã. Tãb-biisa sẽn yõk-a, a fãagame n zoe a bɩlgemde, n bas fu-goabga bãmb nusẽ. B talla a Zezi n kẽng maan-kʋʋd kãseng yiri. Maan-kʋʋdba nanamse, tẽnga kãsem-dãmb la Sɛb-mitba fãa ra tigma be. A Piyɛr pʋg-b la yɩɩga n wa tol n kẽ kãsma zakẽ n tɩ zĩ ne tãb-biisã n woot bugum. Maan-kʋʋdba nanamse la tẽnga kãsem dãmba ra baooda yell sẽn na n dogl a Zezi zugu n yaool n tõog n kao b kũum bʋʋdo, la b ra pa yãet fɩ. Kaset-zirẽ dãmb wʋsg waa be, la b toagsga ra pa segd taab ye. Neb kẽer yikame n yagd zirẽ n yetẽ: «Tõnd wʋma a sẽn yeele: mam na n wãa wẽnd do-kãnga, neb nus sẽn me, la dasma a tãab pʋgẽ bala m na lebs n me a to sẽn pa na n yɩ ninsaal nug tʋʋmd ye.» Yell kãnga poorẽ me b yelsma da pa zemsd taab ye. Dẽ la maan-kʋʋd kãsenga yik a toore neba sʋka n sok a Zezi: «Y pa leokd tɩ bũmb laa? Yaa bõe kaset la b kõt yãmb poorẽ woto?» A Zezi sĩnda b noore n pa leok tɩ bũmb ye. Maan-kʋʋd kãsenga yeela a Zezi: «Yaa foom la Wẽnnaam sẽn tʋm a soba bɩ?» A Zezi leokame: «N-yẽe! Yaa mam menga. La yãmb na yãend Ned Biiga t'a zĩ Wẽnnaam pãng soab rɩtgo, la a yit sawat zug n watẽ.» Dẽ la maan-kʋʋd kãsenga kẽes a fut n yetẽ: «Tõnd tara kaset dãmb tʋʋmd yɛs bi? Yamb wʋma a sẽn tʋʋs Wẽnnaam yʋʋre, yãmb tagsdame tɩ bõe?» La b fãa yeelame t'a toga ne kũum. Neb kẽer sɩngame n tʋbsd a Zezi neng ne kolkoodo. B pila b neng ne pɛɛla n pãbd-b pegse n yetẽ: «Bɩ f bãng sẽn ya ned ninga n wẽ fooma!» Naab ka loog ka rãmba pãb-b la wʋsgo. A Piyɛr sẽn waa n be zakẽ wã, maan-kʋʋd kãseng zakẽ, bi-pugl n wa be. A yãenda a Piyɛr sẽn da zĩi n woot bugma, a gesa a neng n yetẽ: «Fo me ra bee ne a Zezi, Nazarɛt nedã.» A Piyɛr kɩɩsame n yetẽ: «Mam pa mi-a ye. Mam pa wʋmd fo sẽn dat n yeel tɩ bũmb ning ye.» A Piyɛr yiime n leb zãongẽ, la wakat kãnga no-raoog kelmame. Bi-pugla sẽn paam n ges neere, a yeela neb niyns sẽn da be-b be wã: «Ad-a sɩd yaa bãmb neda.» La a Piyɛr le kɩɩsame. Sẽn yɩ bilfu rẽ poore, sẽn da be-b be wã fãa yeela a Piyɛr: «Sã n ya sɩda, fo yaa bãmb neda, fo yaa Galile neda.» La a Piyɛr sɩngame n kãabd a meng la wẽene: «Mam ka mi ned ning yãmb sẽn gomd a soab yella ye.» La wakat kãng bala no-raoog kelma naoor a yiib soaba. A Piyɛr tẽega a Zezi sẽn da yeel yẽnd gomd ninga: «No-raoog kõn kelem naoor a yiibu tɩ fo pa kɩɩs maam naoor a tãab ye.» La a sɩnga yãbre. Beoog sẽn waa n vẽege, maan-kʋʋdb nanamse, tẽnga kãsem dãmba, Sɛb-mitba la bʋ-kaoodba tigma taaba n na n ges b sẽn na n maan bũmb ninga. B kɩtame tɩ b sẽb a Zezi ne wĩyã n tall-ba n kẽng a Pilat nengẽ. A Pilat soka a Zezi: «Yaa foom la Zʋɩf rãmba dĩma bɩ?» T'a Zezi leoke: «Yãmb meng yeelame.» Maan-kʋʋdba nanams rõda a Zezi ne rõadg buud fãa. A Pilat soka a Zezi yɛsa: «Fo pa leokd tɩ bũmb laa? Ges b sẽn dõt foo ne rõadg ning wɛ!» La a Zezi kell n pa leok tɩ bũmb ye, al t'a Pilat pɛleng ra yɩgda. Zʋɩf rãmba sã n da mii n maand kibs kãseng fãa, a Pilat da mii n yiisda roogo bi-bɛɛg ninga neba sẽn da kot-a t'a yiisi. Zemsame tɩ wakat kãnga neb wʋsg tigma taab n kos a Pilat t'a yiis bi-bɛɛg a yembre, waa a sẽn mii n maand yʋʋmd fãa. Bi-bɛɛg a yembre n da be bi-beesa roogẽ, t'a yʋʋr boond tɩ Barabas. Yẽ n da naag a tũud-n-taas n kʋ ned, zabr sẽn yik tẽnga pʋgẽ. A Pilat sok-b lame: «Yãmb datame tɩ m yiis Zʋɩf rãmba dĩm n kõ-y bɩ?» A Pilat meng ra miime tɩ yaa sũ-kiir yĩnga la maan-kʋʋdba nanams ra yõk a Zezi n wa yẽ nengẽ. Maan-kʋʋdba nanams sagla neba tɩ b kos a Barabas yiisgu. A Pilat soka neba yɛsa: «La mam maanda bõe ne yãmb sẽn boond a soab tɩ Zʋɩf rãmb dĩma?» La neba mooname yɛsa: «Bɩ y ka-a pika.» A Pilat sok-b lame: «A maana bõe sẽn ya wẽnga?» Zʋɩf rãmba mooname n yɩɩd pĩnda: «Bɩ y ka-a pika.» A Pilat sẽn da rat n noog neba sũur yĩnga, a yiisa a Barabas n kõ-ba, dẽ poore, a kɩtame tɩ b pãb a Zezi ne kaase la a kõ-b la sor tɩ b ka-b pika. Tãb-biisa talla a Zezi n kẽ zaka yaanga la b boola tãb-biisa fãa sẽn da beb be tɩ b wa tigim. Dẽ poore, b yeelga a Zezi fu-miuugu la b kãama gõos gʋlle n teeg a Zezi zugu. B ra pʋʋsd-b lame n yetẽ: «M pʋʋsda yãmb, Zʋɩf rãmba dĩma.» B ra pãbda a Zezi zug ne tãnwĩiga la b sẽnesd b neng ne kolkoodo. B ra wõgemda b taoore n pʋʋsd-ba. B sẽn wa n yaal a Zezi n tɩge b yeega fu-miuugã n le pil-b b meng fuugu. Dẽ poore, b talla a Zezi n na n tɩ ka-b pika. Sor zugu, b sega rao a yembre sẽn yi a weoogẽ n kuiisẽ, a yʋʋr la a Simo. A da yaa Sirɛn neda, a Aleksãndr la a Rufus baaba. B modg-a lame t'a reeg a Zezi pikã n zɩ. B talla a Zezi n kẽng zĩig a yembr sẽn boond tɩ Golgota. Dat n yeelame tɩ zu-waanga. B kõ-la a Zezi rãam sẽn pul tɩdare la b pa sak n yũ ye. B ka a Zezi pika, la b rɩka b futã n pʋɩ taaba. B poeesame n na n bãng fuug fãa soaal sẽn na n yɩ a soaba. B sẽn waa n ka a Zezi n sɛ, dẽ tɩ yaa wĩnto-sʋka la b da gʋlsame n wilg b sẽn lʋɩɩs bũmb ning taoore n na n kʋ a Zezi: «Zezi, Zʋɩf rãmba dĩma.» B ra kaa wagda a yiibu n naag ne a Zezi, a yembre a Zezi rɩtgo, a yembre b goabga. [ Yaa woto la sẽn gʋls Sebra pʋgẽ tõog n taase: b sõd-a la nin-wẽens sʋka.] Sẽn da loogdeb be wã fãa ra tʋʋsda a Zezi la b gird b zutu n yetẽ: «Aya! Fo sẽn tõe n wã wẽnd doogã n le me-a rasem a tãab pʋgẽ wã, aya! Sig pika marsã n fãag f menga.» Maan-kʋʋdba nanamse, Sɛb-mitba ra laada ne taaba n yetẽ: «A fãaga a taaba la a pa tõe n fãag a meng ye. Wẽnnaam Tʋʋm-tʋmda la Israyɛl dãmba dĩma, sig pika zug marsã tɩ d yãend n yaool n tẽ.» Ba b sẽn da naag neb niyns n ka pika ne a Zezi wã, bãmb me ra laad-b lame. Wakat a yoob soab sẽn ta, lik bui tẽnga zãnga, al tɩ ta zaabre. Zafare, a Zezi moona ne koɛɛg kãsenga: «Eloi, Eloi, lema sabaktani?» (Eli, Eli, yaa bõe yĩng tɩ y basd maam?) Neb kẽer sẽn da pẽ wʋma a Zezi goama la b yeela taaba: «Ad-a boonda a Eli.» La ned a yembr wudgame n dɩk bũmb sẽn fõogd koom n los rã-miisgẽ n sel-a tãnwĩig n kõ a Zezi tɩ b yu. B ra yetame: «Bas woto tɩ d gese a Eli na waa n sik-a.» La a Zezi zẽka b koɛɛg n moon ne pãnga la b kii wakat kãnga. Wakat kãng bala, wẽnd doog peen-kãsenga kẽegame, al yĩngri n ta tẽnga. Tãnsoab n da yɛs pika tẽngre. A sẽn yãe t'a Zezi kiime a yeelame: «Sɩd-sɩda nin-kãnga ra yaa Wẽnnaam Biiga.» Pagb kẽer da yɛsa yɩga n getẽ. A Mari Madelɛn, a Mari, a Zak la a Zozɛf ma, n paas a Zebede kamba ma, ra bee bãmb sʋka. A Zezi sẽn waa n be Galile, yaa bãmb n da tũud-b la b ra sõngd-b. Pʋs n yɩɩ pagb wʋsgo n da tũ ba n wa Zerizalɛɛm. Zĩiga da zoe n sobgame, la sẽn da ya vʋʋsg ket tɩ beoog seglg yĩnga, Arimati ned a yembre sẽn boond t'a Zozɛf, da yaa nin-kãsenga bʋʋdba sʋka. Yẽ ra gũuda Wẽnd Rĩunga waoongo la yẽ n keng a sũuri n kẽng a Pilat nengẽ n tɩ kos a Zezi yĩnga. A Pilat pɛleng yɩka a sẽn wʋm t'a Zezi zoee n kiime t'a bool tãnsoabã n sok-a n bãng kũuma sẽn yɩ sasa ninga. A sẽn paam tãnsoaba leokre, a kɩsa kũuma a Zozɛf. A Zozɛf raa peende la a sika a Zezi yĩnga n vil-a ne peende n yaool n gãneg-a yaoog sẽn tuk pĩigẽ. Dẽ poore, a bilga kug bedre n pag yaooga noore. A Mari Madelɛn la a Mari, a Zozɛf ma, da geta b sẽn gãnegd a Zezi zĩig ningã. Sibri daar sẽn looge, a Mari Madelɛn la a Mari, a Zak ma, n paas a Salome, daa yũ-noog kaam n na n tɩ zɛ a Zezi yĩnga. Ata daar yibeoogo, wĩndg sẽn puk paalem, b waa yaoogẽ wã. Bãmb da gomda ne taaba: «Yaa ãnna n na n bilg yaooga kugr n kõ-do?» La b sẽn doog b nenga b yãeeme tɩ kugra billgame n dɩg kɛɛnga. Kugra ra bɛdma al wʋsgo. B kẽe yaoogẽ wã la b yãee bi-bɩɩg sẽn da zĩ rɩtgo n yer fu pɛɛlga la rabeem kãseng yõk-b lame. Daoa yeel-b lame: «Da zoe-y rabeem ye! Yãmb baooda a Zezi, Nazarɛt nedã b sẽn da ka pika, b vʋʋgame, b ka le be ka yɛs ye, ad-b sẽn da gãneg bãmb zĩig ninga. La bɩ y kẽng n tɩ wilg b tũud-n-taasã la a Piyɛr n yɩɩda, tɩ b na n denga bãmb Galile, la yaa beene la y na n yãend-ba, wa b meng sẽn pĩnd n wilgi.» B sẽn yi yaoogẽ wã, b zoeeme n zãag. Bãmb fãa ra rigdame, la b ra pa le so b meng yɛs ye. Dabeem sẽn da tar-b yĩnga, b pa sak n gom ne ned ba a ye. [ A Zezi vʋʋga ata raar yibeoogo la b reng n lika a Mari Madelɛn. Yaa yẽ pʋgẽ la a Zezi ra yiis Sʋtãamb a yopoe. A kẽngame n tɩ togs kibarã a Zezi tũud-n-taasã. Bãmb fãa sũr da sãamame al tɩ b ra ket n yãbda. Bãmb sẽn wʋm t'a Zezi vʋʋgame la a Mari Madelɛn yãend-b lame, b pa sak n tẽ ye. Dẽ poore, yaa bãmb neb a yiibu la a Zezi lik sor zugu ne yĩng sẽn da ka le wẽnd pind dẽnda; nin-bãmb da rabda b weoogẽ. Bãmb lɛɛg n wa togsa kibarã b taaba la b pa sak n tẽ bãmb me ye. Dẽn zugẽ yɩɩ Tʋʋm-tʋmb piig la a yembrã la a Zezi likyã. Bãmb da zĩi n dɩta wakat kãnga. A Zezi sãbsa bãmb me b sũ-keelma yĩnga la b sẽn pa sak n tẽ wã yĩnga. Bãmb pa tẽ neb niyns sẽn da yãend-b a Zezi sẽn yi kɩɩms sʋk ye. A Zezi yeela b Tʋʋm-tʋmdbã: «Bɩ y kẽng dũni fãa pʋgẽ n zãms neb Kibar noogã. Ned ninga sẽn na n saka n tẽ, la sẽn na n saka n deeg soobo, yẽ soab na n paama fãagre. La ned ning sẽn na n zãgsa tẽebo, yẽ soab na palga a menga. Ad sẽn na n tẽbã sẽn na n maam bõn-bãn niynsi: mam yʋʋr yĩnga, b na n diga sʋtãamba. B na n goma bu-zẽmb goama. Bãmb na n yõga wiis ne b nusi, la b sã n wa yũ zẽnem me, a kõn maan-b bũmb ye. B sã n sɩɩs bãad-dãmb ne b nusi, b na n paama laafi.» A Zezi sẽn waa n gom ne bãmb n sɛ, b yɩkame n dʋ yĩngri. B zĩi Wẽnnaam dɩtgo. La Tʋʋm-tʋmdba saaga zĩis fãa n zãms Kibar noogã, la Soaala ra sõngd-b lame, la b da maanda wẽnd makr dãmba n paasdẽ.] Ad-y yɛl niyns fãa sẽn maan tõnd sʋka, neb wʋsg n yik n na n gʋls ba, n gʋls-b tɩ tũ wala pipi Koe-nooga moandb sẽn yãend ne b nini. Bãmb nao la m pʋgyã, n le vɛɛs yɛla fãa, al b sɩngrẽ n na n gʋls-b fo yĩnga, m nin-sõngo Teofil. La woto wã f na bãng tɩ f sẽn paam zãmsgo ninga ka naag ne zirẽ lɛ-lɛ. Zɩɩde naab a Erod zamaanẽ, maan-kʋʋd a ye n da be, a Abia sakẽ, n boond t'a Zakari, t'a pag sẽn boond t'a Elizabɛt yaa Aarõ yagenga. Bãmb b yiiba da yaa nin-sõma Wẽnnaam taoore n da tũud Soaala noya la b raaba fãa, tɩ wɩdg ka ye. B ra pa tar biig ye, t'a Elizabɛt ra yaa pɩg-kiiri; la bãmb b yiiba fãa ra kʋʋlame. Sẽn waa n beẽ, maan-kʋʋra tʋʋmd gilgame n ta a Zakari saka. B poeesa wala b sẽn mii n maandẽ, la lʋɩɩ yẽ zug, t'a kẽ Sõmblem Naab meng roogẽ n yõog wisdu. Wisda yõogr wakato, zãma wã paa yɩnga n pʋsdẽ. La Soaala malɛka lika a Zakari, wisda maan-kugra rɩtgo. A Zakari sẽn yãe-a, a yɛɛsame la rabeem yõk-a lame. Tɩ malɛka yeel-a: «Ra zoe rabeem ye, Zakari, tɩ f pʋʋsg reegame, fo pag na n doga biig n kõ-fo la f na n pʋda a yʋʋr a Zã. A rogma na n pidsa fo menga la neb wʋsgo ne sũ-noog la na yɩ kɩdengo. A Zã na n yɩɩ nin-kãseng Soaala taoore; a kõn yũ rãam la toos ye. A na n pida ne a Vʋʋsem Sõngo t'a ket a ma pʋgẽ. A na n talla Israyɛl kamb wʋsgo tɩ b lɛɛg n wa kẽ Soaala, bãmb Wẽnnaam. A na n lʋɩɩ Soaala taoore ne a Eli yam la a pãnga; a na wẽnemda ba rãmb la kamba sũur n tees taaba. A na n kõo kɩɩsdba nin-sõma wã yam sõngo, la woto a na n segl buud sõngo n kõ Soaalã.» A Zakari yeela malɛkã: «Bõe n na n sõng-m tɩ m bãng rẽnna? M yaa nin-kẽema, m pag me kʋʋlame.» La malɛka leok-a lame: «Mam la a Gabriyɛl sẽn yɛs Wẽnnaam taoore, la b tʋm-m lame tɩ m wa gom ne foo la m togs-f koe-noog kãnga. La ade, fo na n lebga muka, fo kõn le tõog n gome, n tol n tãag yɛl kãensa fãa taasg raare, fo sẽn pa tẽ m goama yĩnga, la b yaool n na n pidsame, b raara sã n ta.» La neba fãa yaool n da gũuda a Zakari, tɩ b pɛlens yɩgda a sẽn kaoosd wẽnd doogẽ wã. A sẽn waa n yi, a makame t'a na n gom ne nebã, n konge. Dẽ la b bãng t'a paama likr wẽnd doogẽ. Yẽ menga ra kong n bilgda ne nugu, la a kell n yɩɩ muka. A Zakari sẽn maan a tʋʋmna n pids a raare, a leba a yiri. Sẽn yɩ bilf rẽ poore, a paga, a Elizabɛt, dɩka pʋga; a solga a meng kiis a nu. La yẽ meng n waa n gomda: «Ad-y Soaala yaa n maana bũmb m yĩnga. Yaa n ta-la b raabo tɩ b rok m yãnd ninsaalb sʋka!» Kiis a yoob sẽn sõd dẽ poore, Wẽnnaam tʋma malɛk a Gabriyɛl Galile tẽng a ye sẽn boond tɩ Nazarɛt, bi-pugl a yembr nengẽ, b sẽn da kõ sɩd sẽn boond t'a Zozɛf n yaa a Daviid buud neda. Bi-pugla yʋʋr da boondame tɩ Maryam. La malɛka sẽn kẽ a nengẽ, a yeelame: «M pʋʋsda yãmba, pid ne kũun soaba! Soaala bee ne yãmba, yãmb paama barka, pagba fãa sʋka.» La a Maryam sẽn wʋm gomdã, a yɛɛsame; a ra bilgdame n baood pʋʋsg a woto võore. Malɛka yeelame: «Da zoe-y rabeem ye, Maryam, yãmb paama bark Wẽnnaam taoore. Ade, yãmb na n dɩka pʋga, yãmb na n doga bi-ribla la y na pʋda a yʋʋr a Zezi. Bãmb na n yɩɩ nin-kãsenga, la b na n bool-b lame tɩ yĩngr soab Biiga. Wẽnnaam na n kõ bãmba b saamba, a Daviid, zaoore, la b na n dɩ naam a Zakoob zakẽ daar fãa la b naam kõn zĩnd sɛɛb ye.» A Maryam soka malɛkã: «Dẽ na n yɩ-la a wãna, tɩ m ka mi rao ye?» Malɛka leokame: «A Vʋʋsem Sõng na n siga yãmb zugu la yĩngr soab pãng na n bui yãmba. Dẽ n so tɩ sõmblem biiga yãmb sẽn na n dogã, b na n bool-b lame tɩ yĩngr soab Biiga. Bɩ y gese! Yãmb doagda, a Elizabɛt, dɩka pʋga n na n dog biig a kʋʋlem pʋgẽ, lebga kiuusa yoob marsã, b sẽn da ket n boond-a tɩ pʋg-kiiri; tɩ bũmb ka be sẽn yɩɩd Wẽnnaam nug ye.» La a Maryam yeelame: «Mam yaa Soaala yem-poaka, bɩ kell n yɩ ne maam wala yãmb sẽ yeelã.» La malɛka bas-a lame n looge. A Mariyam waa n yika ne yãgbo n tees tẽng a yembre, Zɩɩda tãmsẽ. A tɩ kẽe a Zakari yiri n pʋʋs a Elizabɛt. A Elizabɛt sẽn wʋm a Maryam pʋʋsma, biiga sẽn da be a pʋgẽ wã yĩng sidgame. La a Elizabɛt pida ne a Vʋʋsem Sõngo, t'a zẽk a koɛɛg n moonẽ: «Fo paama barka, pagba fãa sʋka, la f pʋgẽ biiga me paama barka. Mam bee yɛ, tɩ m Soaala ma wat m nengẽ? Ade, fo pʋʋsma sẽn lʋɩ m tʋbrẽ la m biiga yĩng sẽn sidgi, sũ-noog keelem yĩnga. Foom la zu-noog soaba, tɩ fo tẽeme tɩ gomna b sẽn leok foom, Soaala yʋʋr yĩnga, na n taasame.» La a Maryam yeelame: «Mam sɩɩga pẽgda m Soaal, la m sũur kɩdemda sũ-noogo, Wẽnnaam m Fãagda yĩnga. Bãmb gesa b biiga paoodlem. Ad marsã tɛka ninsaal buud fãa na n boola maam tɩ zu-noog soaba. Tɩ Pãng soab maana yɛl kãsens mam yĩnga, la b yʋʋr yaa sõngo. Dũni sẽn yet t'a yaa dũniya, b nimbãan-zoeer bee sẽn zoet-b bãmb zutu. B wilga b kang pãnga. B riga wakr dãmba n sẽege. B sika pãens rãmb b zaoorẽ, b zẽka talse. Kom sẽn tar b rãmba, b tɩgs-b la ne kũuni, tɩ arzɛk rãmb yaool kul zaalem. B kogla b biig, a Israyɛl; tɩ b tẽega b nimbãan-zoeerã n na n pids zamaan woo zamaana b sẽn da kãab d saam-dãmba, a Abraam ne a kamba!» A Maryam zĩnda ne a Elizabɛt sẽn zems kiis a tã n yaool n kul a yiri. A Elizabɛt dogem taame; a roga bi-ribla. A yags la a buud dãmb wʋmame tɩ Soaala zoe-la a nimbãanega, tɩ b lagem ne-a, n kɩdemnẽ. Dasem a nii daare, b kẽesa bi-pɛɛlga bãongo. B pʋd-a la a ba yʋʋre: Zakari. T'a ma yeele: «Ayoo! A Zã la b na n bool-a.» Tɩ b yeel-a: «Fo buudẽ wã, ned ka be sẽn pʋd yʋ-kãng ye.» La b bilsa ne nus n sok biiga ba a sẽn dat tɩ b pʋd biiga yʋʋr ninga. A Zakari kosa walga n gʋls woto: «A yʋʋr la a Zã.» La b fãa pɛleng yɩkame. Wakat kãng bala, a Zakari yaaga a noor t'a zelemd lak t'a na n gom n pẽg Wẽnnaam. Dabeem yõka a yagsa fãa. A Zɩɩda soolma fãa tɛka, neba sõasg ra yaa yell kãnga. La neb niyns fãa sẽn wʋm-ba, yella kɛ-la b sũurẽ tɩ b ra yetẽ: «Bi-kãnga na n wa yɩɩ bõe?» Sɩd me Wẽnnaam nug ra tika biiga zugu. La biiga ba, a Zakari, ra pida ne a Vʋʋsem Sõngo, t'a gom bãngr goama n yeele: «Soaala, Israyɛl Wẽnnaam, paam pẽgre, tɩ b waa n gesa b buudu n fãag-a. Tõnd yĩnga b yiisa Fãagda, Pãng soaba, b biiga Daviid zakẽ. Wala b sẽn da pĩnd n togs ne tẽn-kʋdem wẽnnẽ bãngdb sõma noore, yaa Fãagd sẽn na fãag tõndo d bɛɛba la sẽn kis-b tõnda nusẽ. Yɩɩ woto la b maan b nimbãan-zoeere ne d yaab rãmba. B tẽega b bark zoodã, b tẽega kãabg ningã, b sẽn da kãab d ba, a Abraam. B kãabame tɩ b na zãag-d ne d bɛɛba, n zãag-d ne rabeem buud fãa, tɩ d tõog n waoog-ba, ne sõmblem la pʋ-peelem, bãmb maasmẽ, la d vɩɩma tõre. La foom, bi-pɛɛlga b na bool foom tɩ Yĩngr soab no-rɛɛsa, tɩ foom n na n lʋɩ Soaala taoore n segl b soya; n kɩt tɩ buuda bãng t'a na n paama fãagre ne a yel-wẽna yẽesgo, tõnd Wẽnda sũuri pida ne nimbãan-zoeer bala, b nimbãan-zoeer yĩnga, b yĩngr Ãdga na puki la a vẽneg sẽn zĩ-b likẽ sẽn zĩ-b kũum maasmẽ tɩ b nao wa paam n dɩk laafi so-tɩrga.» Biiga ra bɩtame t'a yam da paasdẽ. A zĩnda weoogẽ n tãag daar ning a sẽn vẽneg a meng a Israyɛl kamba. Wẽnd kãnga, dĩma, a Ogust, yiisa sebre tɩ b sõd dũniya neba fãa. Sõadg kãng n yɩ pipi sõadg la b maana-a-la a Kirinus, Siri kombera zamaanẽ. Ned kam fãa ra lebda a tẽngẽ tɩ b sõd-a be. A Zozɛf me yika Nazarɛt, Galile tẽnga, n kẽng Zɩɩda tẽng a ye sẽn boond tɩ Bɛtelyɛɛm, t'a ra ya a Daviid buuda neda. La be la a tɩ sõde, yẽ ne a paga, a Maryam, sẽn da tʋte. B sẽn waa n be Bɛtelyɛɛm, a Maryam dogem daar taame. A doga a sãdem-biiga, n vil-a ne pɛɛla, n gãneg-a b sẽn kẽesd rũmsa zĩig ning n kõt b rɩɩbo, tɩ b ka paam weer sãamba dotẽ ye. Pe-kɩɩmb n da be tẽnga noor n gũd b rũmsi ne yʋngo, Soaala malɛk wa n pẽneg-b lame tɩ Soaala zɩɩra vẽenem bui-ba la rabeem kãseng yõk-b lame. Malɛka yeel-b lame: «Da zoe-y rabeem ye tɩ yaa Kibar noog la m tara, yãmb la buuda fãa yĩnga: dũnna, a Daviid tẽngẽ, Fãagda doga yãmb yĩnga; bãmb la Wẽnd Nedã la Soaalã. Yaa ne makr kãnga la y na n bãng-ba: y na n yãee bi-pɛɛlg t'a gãe b sẽn kẽesd rũmsa zĩig ning n kõt-b rɩɩbã.» Vugr bala yĩngr tãb-biisa ka tɛka wa n naaga malɛkã tɩ b pẽgd Wẽnd woto: «Wẽnnaam paam pẽgr yĩngri la b yamleooga sẽn kẽ b rãmba paam laafi tẽng zugu!» Malɛk rãmba bas-b lame n leb yĩngri tɩ pe-kɩɩmba yeel taaba: «Bɩ d ta Bɛtelyɛɛm n ges bũmb ning sẽn maane tɩ Soaala wilg tõndã.» B kẽnga tao n tɩ mik a Maryam ne a Zozɛf la bi-pɛɛlg t'a gãe b sẽn kẽesd rũmsa zĩig ning n kõt-b rɩɩbã. Pe-kɩɩmba yãenda ne b nifu, tɩ bãmb me na n sɩng n togs marsã, malɛka sẽn da zoe n wilg bãmb biiga poorẽ. Ned ning fãa sẽn kelg-a, ra zĩi ne pɛlen-yɩka. A Maryam ra bĩngda yɛl bãmb a sũurẽ, n bʋgsd-ba a yamẽ. Pe-kɩɩmba lebgame n kilsdẽ la b pẽgd Wẽnnaam b sẽn yãend la b sẽn wʋm yĩnga. Fãa sɩd yɩɩ wala b sẽn da togs-bã. A rogem dasm a nii yĩnga, b kẽesa biiga bãongo, n pʋd biiga t'a Zezi, yʋʋr ninga malɛka sẽn pind n pʋde tɩ b ma nan ka tʋd b pʋgã. B sẽn waa n segl b mens n taas daar ning Noora sẽn yalsã, b talla biigã n kẽng Zerizalɛɛm n tɩ rɩk-b n kõ Wẽnde, tɩ woto n be Soaala Noora sebrẽ: Bi-ribl fãa sẽn doge n yaa a ma pipi biiga, b rɩkd-a lame n kõ Soaala tɩ b sooge, la wala Soaala Noor sẽn le rat yɛsa, yaa malwal a yiibu bɩ wal a yiibu la b kɩs tɩ b kʋ maoongo. La ade, dao a ye n da be Zerizalɛɛm n boond t'a Simeõ. A ra yaa nin-tɩrga, nin-sõngo; a da gũuda Israyɛl yolsgo la a Vʋʋsem Sõng ra bee ne-a. A Vʋʋsem Sõng ra vẽneg-a lame t'a bãng t'a kõn ki t'a ka reng n yãe Krista, Wẽnd Neda ye. A Vʋʋsem Sõng kɩtame t'a kẽng wẽnd doogẽ. La biig a Zezi ba rãmb sẽn tall-b wakat ninga n wa pids noorã, a reeg-b la a nusẽ la a pẽga Wẽnnaam n yetẽ: «Soaala, wala y sẽn wilg y yambã, y tõeeme marsã n kõ-a sor t'a loog ne laafi; tɩ m nini yãe-la y fãagre, y sẽn seglg ninsaalb buud fãa yĩnga. A yaa vẽenem n vẽnegd bu-zẽmbã, a yaa yãmb buud, a Israyɛl, zu-zẽkre.» Biiga ma ne a ba pɛleng yika b sẽn da gomd b yell woto wã yĩnga. A Simeõ ning-b la barka la a yeela a Maryam, biiga ma: «Ade, bi-kãnga waa ne neb wʋsgo sãoong la neb wʋsg manegre, Israyɛl pʋgẽ. A na n yɩɩ wa bõn-bãnde n wa ne no-koeemde. La yãmb menga, yaa sʋʋga n na n kõs yãmb sũuri n kɩt tɩ y tũ rẽ n bãng sẽn be neb wʋsg rẽnnẽ.» Bãngd poak a ye me n da be be, a An, a Fanuwɛl biiga, a Azɛr buudẽ; a ra kʋʋla wʋsgo; a sẽn yi kãadem a pʋg-sademnẽ, a zĩnda ne a sɩda yʋʋm a yopoe bala, la a kell n paa pʋg-kõto t'a yʋʋm wa ta pisnii la a naase; a ra pa viigd wẽnd doogẽ ye; a ra waoogda Wẽnnaam yʋng la wĩntoogo, ne no-loeere la pʋʋsgo. A An me waa wakat kãng bala n pẽgd Wẽnnaam la a gomd biiga yelle ne neb niyns fãa sẽn da gũud-b Zerizalɛɛm fãagre. B sẽn maan fãa n sɛ wala Soaala noor sẽn date, b leba b tẽngẽ, Nazarɛt, Galile soolem. La Biiga ra bɩtame, t'a pãng paasdẽ, la a ra tara yẽesem, la Wẽnnaam yam da kẽe-a lame. Yʋʋmd-yʋʋmd fãa, b ba ne b ma da kẽnda Zerizalɛɛm, pak kibsa yĩnga. Biiga yʋʋm sẽn waa n ta piig la a yi, b kẽnga Zerizalɛɛm, wala b sẽn yib n maand kibs kãng wẽnde. Tigra rasem sẽn looge tɩ b lɛɛg n kuiisẽ, biiga paa Zerizalɛɛm tɩ b ba la b ma ka bãng ye. Bãmb sẽn da tẽed tɩ b bee ne so-toagdb a taaba, b kẽna daar a ye kẽnde n yaool n na n sɩng baoobo, b roagdba la b mitba sʋka la b ka yãend-b ye tɩ b leb Zerizalɛɛm n tar b baoobo. Sẽn maam dasem a tã, b yaool n tɩ yãend-b la wẽnd doogẽ tɩ b zĩ karen-saam-dãmb sʋka n kelgd-b la b sokd-b. La sẽn wʋm-b bãmba fãa da yɛɛsdame, b yẽesma la b leoba yĩnga. B ba ne b ma sẽn waa n yãend-ba, b pɛleng yɩkame. B ma yeel-b lame: «M biiga, yaa bõe yĩng la fo maan tõnd woto? Gese! Ad-f ba ne maam, tõnd da saad n baooda foo ne sũ-sãanga.» La b leokame: «Bõe yĩng la y baood maam? Yãmb da ka mi tɩ yaa pakr tɩ m tʋm m ba tʋʋmd laa?» La b sẽn gom woto wã, ba rãmba pa wʋm a võor ye. La a Zezi yik n tũ-b lame n kul Nazarɛt la b ra sakda b noore. B ma ra bĩngda yɛla fãa a sũurẽ. La biiga ra bɩtame tɩ b yam la sõmblem da paasdẽ, Wẽnnaam la ninsaalb nifẽ. A Tiber sẽn deeg Rom naam tɩ yʋʋm piig la a nu, t'a Põs Pilat so Zɩɩde, t'a Erod ya Galile naaba, t'a yao, a Filip, ya Iture la Trakonitid kombere, t'a Lizanias ya Abilɛn naaba, maan-kʋʋr kãsẽm-dãmb a An la a Kaif zamaanẽ, a Zakari biig a Zã, wʋma Wẽnnaam koɛɛg weoogẽ. Dẽ la a wa Zɩɩde baobga fãa n moon sũur tekr soobo, yel-wẽna sugr paoong yĩnga, wala b sẽn gʋls bãngd a Izayi sebrẽ: «Sẽn moond-a weoogẽ wã koɛɛg la woto: segl-y Soaala sore, maneg-y b soya n demse! Tãn-long fãa sĩdi! Sarem-y tãmsa la kunkuba fãa! Rems-y so-golomse! So-rʋda legb saalse! Tɩ woto ninsaal fãa na yãend Wẽnnaam fãagre.» A Zã ra yeta zãma wã sẽn da wat a nengẽ t'a so-bã: «Wag-bi buudu, ãnna n wilg yãmb tɩ y zoe n põs sũ-puur ning sẽn watã? Wom-y biis sẽn be yõodo, sũ-tekr biisi la y ra saag n yeele: ‹D ba la a Abraam ye.› Mam yeta yãmba tɩ Wẽnnaam tõe tɩ kugã sẽn digã, dog kamb n kõ a Abraam. Marsã lar zoe n dɩga tɩɩs yẽgnẽ, tɩɩg ning sẽn pa womd-a bi-sõma fãa, b kɛɛgd-a lame n lob bugmẽ.» Zãma wã ra sokd-a lame: «D na n maana bõe?» T'a leok-ba: «Sẽn tara fu-yord a yi bɩ a kõ sẽn pa tar-a, la sẽn tar-a sẽn na n dɩ bɩ yẽ me kõ sẽn pa tar-a!» Sẽn deesd-b yõor yaood me waame t'a so-ba. B me sokame: «Karen-saamba, d na n maana bõe?» T'a leok: «Da reeg-y bũmb n dogl b sẽn kõ noor tɩ y reeg ye.» Tãb-biisa me sok-a lame: «La tõnd yẽ, d maan bõe?» T'a yeel-ba: «Bɩ y ra maan ned ba a ye pãng ye, da luk-y ned bãong zaalem ye, la y ra tʋlg bũmb n zʋʋg y yaood ye.» Zãma wã ra gũuda Fãagdã. Dẽ la ned kam fãa ra yet, a pʋgẽ: sãnd kaa a Zã la Wẽnd Nedã? Dẽ la a Zã leok-b fãa: «Mam sooda yãmb koom; la ned n wate, tɩ b pãng yɩɩd maam; mam pa zem bũmb n na n lok b gãndalsa gĩs ye. Bãmb na n so-y la ne Vʋʋsem Sõngo la bugum. B zãada kaorg b nugẽ, la b na n pɩɩga b zɛɛga n wʋk biisã n sui baoorẽ, la b yõog fɩɩba bugum sẽn ka kiid pʋgẽ.» A Zã ra togsda neba Koe-noogã la a wɩngd b sũuri ne saglgo buud toor toore. A Zã ra yika zabre ne naab a Erod. Zabra yɩ-la a Erodiad poorẽ. A Erodiad da yaa a Erod yao, a Filip, paga. Zabra yɩ-la a Erod tʋʋm wẽns a taaba me poorẽ. Dẽ kɩtame t'a Erod paas bõn-wẽng a to: a kɩtame tɩ b paga Zã roogo. A Zã waa n soo nebã n sɛ, t'a Zezi meng tol n deeg soobo. A Zezi sẽn waa n ket n pʋʋsdẽ la arzãn sẽn pake, tɩ Vʋʋsem Sõng sig b zug ne bũmb wẽnego, ne wall wẽnego. Koɛɛg n yi yĩngr n yetẽ: «Fo yaa mam bi-nongre, mam n dog foo rũnna bala.» A Zezi yʋʋm da zemsa pistã, b sẽn waa n sɩng b tʋʋmde. Sã n ya neba sẽn tẽedã, b ba yɩla a Zozɛf, a Eli biiga, a Matat biiga, a Levi biiga, a Melki biiga, a Zamayi biiga, a Zozɛf biiga, a Matatiyas biiga, a Amos biiga; a Nawum biiga, a Esli biiga, a Nagayi biiga, a Maat biiga, a Matatiyas biiga, a Semeyin biiga, a Zozɛf biiga, a Zoda biiga, a Zoanan biiga, a Resa biiga, a Zorobabɛl biiga, a Salatiyɛl biiga, a Neri biiga, a Melki biiga, a Addi biiga, a Kosam biiga, a Elmadam biiga, a Ɛr biiga, a Zezi biiga, a Eliezɛr biiga, a Zorim biiga, a Matat biiga, a Levi biiga, a Simeõ biiga, a Zɩɩda biiga, a Zozɛf biiga, a Zonam biiga, a Eliakim biiga, a Melea biiga, a Menna biiga, a Matata biiga, a Natam biiga, a Daviid biiga, a Zese biiga, a Zobɛɛd biiga, a Booz biiga, a Sala biiga, a Naason biiga, a Aminadab biiga, a Admin biiga, a Arni biiga, a Esrom biiga, a Farɛs biiga, a Zɩɩda biiga, a Zakoob biiga, a Izaak biiga, a Abraam biiga, a Tara biiga, a Nakor biiga, a Seruk biiga, a Ragawu biiga, a Falɛk biiga, a Ebɛr biiga, a Sala biiga, a Kayinam biiga, a Arpaksad biiga, a Sem biiga, a Nowe biiga, a Lamɛk biiga, a Matusala biiga, a Enok biiga, a Zarɛt biiga, a Maleleyɛl biiga, a Kayinam biiga, a Enos biiga, a Sɛt biiga, a Adem biiga, Wẽnnaam biiga. A Zezi ra pida ne Vʋʋsem Sõngo. B yii Zʋrdẽ kʋɩlgã n lɛɛg n wa. A Vʋʋsem Sõng waa n le kẽes-b la we-raoogẽ wã; b maana rasem pisnaas be la Sʋtãan kʋɩɩb-b lame. Dasem kãense, b pa rɩ fɩ; la dẽ me la kom waa n yõk-ba. Ad Sʋtãana sẽn leok-ba: «Yãmb sã n ya Wẽnnaam Biiga, bɩ y yeel kugr kãnga t'a lebg buri.» La a Zezi leok-a lame: «B gʋlsame: ‹Ka bur bal n dɩlgd ninsaal vɩɩm ye.› » La Sʋtãan sẽn dʋʋs-b yĩngri bilfu, a wilg-b la vugr bala dũni wã rĩund zãnga, n yeel-ba: «M na kõ-f tẽn-bãmba fãa ne b pãng la b zɩɩri tɩ b yaa m soolem, la m kõt-b la m sẽn dat a soaba. Fo sã n wõgemd n waoog maam, f na soog-b zãnga.» A Zezi leok-a lame: «B gʋlsame: ‹Pʋʋs Soaala, f Wẽnnaam, la f waoog bãmb bala.› » Sʋtãana le tɩ rʋʋs-b la Zerizalɛɛm wẽnd dooga zugu, zĩig ninga sẽn lug n yɩɩd a taabã, n yeel-ba: «Fo sã n ya Wẽnnaam Biiga, bɩ f yɩk ka n tiimd tẽnga, tɩ b gʋlsame: ‹Wẽnnaam na n kõo malɛk rãmb noore n yeel-b tɩ b gũ fo.› Woto me n le paase: ‹B na n kok-f-la b nusẽ, tɩ f naoor da wa lak kugr ye.› » A Zezi leok-a lame: «B yeelame: ‹Da fɛɛs Soaala, f Wẽnnaam ye.› » Sʋtãana sẽn kʋɩɩb-b n sɛ, a bas-b lame n looge n gũud a zu-noog raar a to. A Vʋʋsem Sõng pãng taasa a Zezi Galile tẽnga; beelẽ b yʋʋr yii zĩig zãnga. B ra karemda neba pʋʋsg rotẽ la neba fãa ra pẽgd-b lame. B kẽnga Nazarɛt, b sẽn wub tẽng ninga; vʋʋsg daare, b kẽe pʋʋsg roogẽ wala b sẽn da yib n maanẽ; b yikame n na n karem, tɩ b kɩs-b bãngda, a Izayi sebre. B sẽn lak sebrã, sega sẽn gʋls woto: «Wẽnd Vʋʋsem bee m zugu, tɩ b zɛɛ maam ne kaam sõngo, tɩ m tɩ togs naong rãmba Koe-noogo; b tʋm-m lame tɩ m moone n wilg yemse tɩ b tɩlga ne yembdo, la zoeense, tɩ b paama nini, la b sẽn tar b rãmb toogã tɩ b leb b zagsẽ ne laafi, la b moon tɩ Soaala bark yʋʋmd vẽkame.» Dẽ poore b paga sebrã n lebs karen-saamba la b zĩndame. Dooga neba fãa ra tees n geta bãmba. Tɩ b na n sɩng goama, n yeele: «Sebr sõng gomdã yãmb sẽn wʋm mars-marsã taasa rũnna.» La b fãa ra kõta kaseto la b pẽgd goama sẽn da yit b noorẽ. B ra yetame: «Ka yẽ la a Zozɛf biiga wɛɛ?» A Zezi yeel-b lame: «Mam mi tɩ yãmb na wẽ-m yelbũn kãnga: ‹Tɩɩm soaba, reng n sãoog f menga. Wẽnd makr dãmba fãa sẽn maan Kafarnaom tɩ d wʋmnẽ wã, bɩ f maan-b ka me, fo ba-yiri.› » B tol n le paasame: «Sɩda, mam n togsd-y: bãngd buuda fãa zɩɩ n paam waoogr a ba-yir ye. Yaa sɩda la m sẽn togsd yãmbã, pʋg-kõapa ra waooga Israyɛl tẽnga, a Eli zamaanẽ, saag sẽn waa n pa tol n ni yʋʋm a tã la kiis a yoobe, b yaool n pa tʋm a Eli ned ba a ye nengẽ sã n pa pʋg-kõor a ye sẽn da be Sarepta, Sidõ soolmẽ. Wãooba me ra waooga Israyɛl tẽnga, bãngd a Elize wẽnnẽ, la baasgo bãmb ned ba a ye ka paam tɩ b sãoog-a, sã n ka Siri neda, a Naama bala.» Pʋʋsga roogẽ, b fãa sũur puuga al wʋsgo, b sẽn wʋm boto. B yikame n tus-ba tɩ b yi b tẽngẽ; b tẽnga da tii tãng zugu. Woto b tall-b lame n ta tãnga rĩ-sɩlengẽ n na n tus-ba n lub vɩʋʋgẽ. La a Zezi pɩʋʋga bãmb sʋk n looge. A Zezi kẽnga Kafarnaom, Galile soolmẽ, la b ra karemda nebã vʋʋsg daare. B karenga yɩka neba pɛlenga, tɩ b ra gomda wa ned sẽn tar naam la tõogo. Dao a ye n da be pʋʋsga roogẽ n tar Sʋtãan a pʋgẽ, a kelma ne pãnga: «Ey! Y bõe toog n be ne tõndo. Mam mii yãmb sẽn yaa a soaba: Wẽnnaam Nin-sõngo!» A Zezi tãs-a lame: «Sĩnd f noore, yi la f bas daoã!» La Sʋtãana tusa raoã n lub neba sʋka, n bas-a n yi la bũmb pa maan-a ye. Dabeem yõka neba fãa tɩ b ra tar ne taaba: «Yɛ ned n gomd woto? A kõta sʋtãan-yood noor ne tõog la pãnga la b yitame.» A Zezi yʋʋra sɩd yii zĩig zãnga. A Zezi yii pʋʋsga roogẽ n kẽng a Simo yiri. A Simo reem-poaka yĩns ra wɩnga bas-base la b yõka a Zezi sɛɛga tɩ b sõng-a. A Zezi zõondame n tãs yĩn-wɩngrã la a sigame. Paga yika zĩig pʋgẽ n segend-b. Wĩndg sẽn kẽ, b talla bãad-dãmb ka tɛka n wa a Zezi nengẽ. B tẽega b nus bãmb ned kam fãa zugu n sãoog-ba. Sʋtãamba ra yita neb wʋsg pʋsẽ n kelemdẽ la b moonẽ: «Yãmb yaa Wẽnnaam Biiga.» La a Zezi ra tãsd-b lame. B ra pa sakd tɩ b gome, tɩ sʋtãamba ra miime tɩ b yaa Wẽnd Nedã. Zĩig sẽn yẽege, b yii n kõsa weoogo. Zãma wã saame n bao-ba, n wa yãend-ba, n da rat n gõog-ba tɩ b ra loog n bas-b ye. La a Zezi yeel-b lame: «Yaa modgr tɩ m tɩ togs tẽns a taaba me, Wẽnd Rĩung Koe-noogã, tɩ b tʋm-m la rẽnd yĩnga.» B ra zãmsda neba Galile pʋʋsg rotẽ. Daar a ye, Zãma wã ra pẽdgda a Zezi, Zenezarɛt mogra noor, n na n kelg Wẽnnaam gomde. La mogra noore, b yãenda koom-kogend bõones a yiibu. Kʋɩl-zẽ-yẽedba da yi n pegda b zulumsi. A Zezi kẽe koglg a ye, a Simo rẽnna, n kos tɩ b zãag mogra noor bilfu la b zĩnda koglga pʋg n zãmsd nebã. B sẽn gom n sɛ, b yeela a Simo: «Ta-y ko-sʋka n lob y zulumsã n yẽ zĩma.» T'a Simo leoke: «Karen-saamba, tõnd namsa yʋnga tõre n pa yõk bũmb ye la y sẽn yeela yĩnga, m na lob zulumsã.» La b sẽn lobe, b yõga kʋɩl-zẽed wʋsgo al tɩ zulumsa ra pãrsdẽ. B kamsa b tũud-n-taase sẽn da be koglg a to pʋga, tɩ b wa sõng-ba. B waame la b vaagame n pids kogend a yiibã tɩ b rat n lisi. La a Simo sẽn yãe rẽ, a wõgemda a Zezi taoore n yeel-ba: «Zãag-y ne maam, Soaala, tɩ m yaa yel-wẽn-maanda.» Rabeem kãseng yõk-a lame, yẽ ne a tũud-n-taase, kʋɩl-zẽeda sẽn yõg wʋsga yĩnga. Rabeem me kẽ-la a Zak la a Zã, a Zebede kamb a yiibã, sẽn da tʋmd ne a Simo. T'a Zezi na n yeel a Simo: «Da zoe rabeem ye tɩ marsã tɛka, yaa neb la f na n paame n kõ-ma.» B lɛɛg n waa ne kogendã mogra noore la b basa fãa n tũ a Zezi. A Zezi waa n bee tẽng a yembre tɩ rao a ye sẽn da bẽed wãoodo yãend-ba, n wõgemd b taoore n fõgna a neng tẽnga, n pʋʋs-ba: «Soaala, yãmb sã n data, y tõe n sãoog-m lame.» A Zezi tẽega b nug n sɩɩs-a n yeele: «Mam datame, sãooge!» La zĩig pʋgẽ bala, a wãooda sãoogame. Tɩ b na n kõ-a noore t'a ra togs ned ba a ye la b le paasame: «Kẽng n tɩ wilg f meng maan-kʋʋda la f sẽn sãooga yĩnga, kɩs kũuni, wala a Moyiiz noor sẽn date tɩ yɩ kaset b yĩnga.» A Zezi yʋʋr da yit n paasdame tɩ zãma wã sɩng n tigimd ka tɛka, n na n kelg-ba la b paam b bãas sãoogre. Bãmb da nong n paa weoogẽ n pʋʋsdẽ. A Zezi ra karemda neba daar a ye, tɩ Farizẽ la noora karen-saam-dãmb da lagem n zĩ be; b ra yii Zɩɩde la Galile la Zerizalɛɛm tẽn-toose. Soaala pãng ra bee ne a Zezi tɩ b sãoogd nebã. La ade neb n da zɩt b põor ne a gãaga, n baood n na n sik-a bãmb taoore. La b sẽn da ka mi b sẽn na n tũ zĩig ning n kẽ ne bãadã, zãma wã yĩnga, b rʋʋ bɛoongã n kɩbg võore n sik-a ne a gãagã, a Zezi taoore. A Zezi yãenda b tẽebo n yeel: «Daoa, fo paama f yel-wẽna sugri.» Farizẽ rãmba ne Sɛb-mitba tagsa b sũurẽ: «Yãoo yaa ãnna n mamesd a meng ne Wẽnde? Anna n tõe n kõ yel-wẽnd sugri, sã n ka Wẽnnaam b ye?» A Zezi bãnga b sũur tagsgo la b yeel-b lame: «Yaa bõe tagsgo la yãmb tagsda y sũur pʋgẽ? Yelsem bʋg la naana: fo paama f yel-wẽnd sugri, bɩ: yik n kẽne? Sẽn na n yɩlẽ tɩ y bãng tɩ Ned Biiga tara tõog tẽng zugu, n kõ yel-wẽnd sugri, põore, maam n kõt f noore: yiki! Tʋk f gãag n kul f yiri!» La Zĩig pʋgẽ bala, a yika bãmb nifẽ, n tʋk a gãag n kuiis a yiri la a pẽgd Wẽnnaam. Neba fãa pɛleng yɩkame tɩ b ra pẽgd Wẽnnaam; rabeem da tar-b lame tɩ b yetẽ: «Dũnna tõnd yãee yel-soalma.» Dẽ poore a Zezi yiime la b yãee rao a yembre sẽn boond t'a Levi, t'a zĩ a tʋʋmd zĩigẽ, fadg reesg tʋʋmde, tɩ b yeel-a: «Tũ maam!» A Levi basa fãa n yik n tũ-ba. A Levi maana kibs kãseng a yiri, n segl dɩɩbo. Sẽn deesd-b yõor yaoodã yɩɩ wʋsgo la neb a taab me waa n paasame, tɩ b ra zĩi n dɩtẽ. Farizẽ rãmba la Sɛb-mitba guglumame la b yeela a Zezi karen-biisã: «Yaa bõe yĩng la yãmb lagemd sẽn deesd-b yõor yaoodã la yel-wẽn-maandbã n dɩtẽ la y yũuda?» T'a Zezi na n leok-ba: «Sẽn zĩ-a ne laafi ka tar tɩɩm soab tʋʋmd ye, yaa sẽn pa keem-bã n tar a tʋʋmde. Mam ka wa nin-sõma boolg ye, yaa yel-wẽn-maandba la m wa n na n bool tɩ b tuub b yel-wẽna.» Nim-bãmb n lɛɛg n yeel a Zezi: «A Zã karen-biisa loeta b noor naoor wʋsgo. Farizẽ rãmba karen-biis me maanda boto. Yãmb karen-biisa bala n nong n dɩtẽ la b yũuda.» T'a Zezi leok-ba: «Pʋg-sɩd zo-rãmb tõe n loee noore tɩ pʋg-sɩd nan ket ne bãmb bɩ? Daar n wate. B sẽn loog ne pʋg-sɩdã raare, b na loe noore.» B wẽ-b la yelbũnd a ye: «Fu-paalg kõ kẽeg n lisg fu-kʋɩds ye, peen-paalg la kʋɩds pa zemsd taab ye. Ned me kõn sui rã-noodo, ko-wao kʋtẽ ye, tɩ rãama na n pusa ko-waoosã n daage la ko-waoosa na n yɩɩ bõne. B suiida rã-noodo ko-wao paalẽ. Ned pa yũud rãam sẽn kũmi n dat rã nood ye. B tol n wẽe yelbũnd kãnga: rã kũmdi la noogo.» Vʋʋsg daar a ye, a Zezi ra pɩʋʋgda pʋto tɩ karen-biisa ra tẽgd kasãna n wãbdẽ. Farizẽ rãmb kẽer yeel-b lame: «Yaa bõe la yãmb maand y sẽn pa tar sor n maan vʋʋsg daare?» A Zezi leok-b lame: «Yãmb pa karem a Daviid sẽn maan bũmb ninga, kom sẽn waa n yõk-a, yẽ ne a tũud-n-taasa la? A ka kẽ wẽnd doogẽ n yãk bur b sẽn da kõ Wẽnnaam, n dɩ bɩ? A pa tol n kõ a poorẽ dãmb tɩ bãmb me rɩ bɩ? Yaool n yaa maan-kʋʋdba bal n tõe n dɩ bur kãnga.» La b yeelame: «Ned Biig n so al ba vʋʋsg daare.» Vʋʋsg raar a to, b kẽe pʋʋsg roogẽ n da karemd neba la rao a ye n da be be t'a rɩtg nug ya kɩɩnga. Sɛb-mitba ne Farizẽ rãmba da gũusda a Zezi, n na n gese b sã n na n sãooga bãada, vʋʋsg daare tɩ b paam n ning-b taale. A Zezi da mii b tagsgo, dẽ la b yeel nug-kɩɩngã: «Yik n yaas sʋka.» Tɩ raoã yik n yaase, la a Zezi yeelame: «Mam sokda yãmba: vʋʋsg daare, d tara sor n maan neer bɩ d tara sor n maan wẽnga? D tara sore n fãag ned bɩ d tara sor n bas-a t'a ki?» B yaas n gesa b fãa gilli n yaool n yeel raoã: «Tẽeg f nugu!» Tɩ raoã tẽeg a nug la a nuga vʋʋgame. Neba sũur puuga al vʋsgo tɩ b ra yẽsd ne taaba n na n bãng b sẽn na n maan a Zezi bũmb ninga. Wa n segame tɩ sasa kãnga a Zezi da rʋʋ tãng zug n na n pʋʋse. La yʋnga tõre yii pʋʋsg bala. Zĩig sẽn yẽege b boola b karen-biisã n tũus bãmb sʋka neb piig la a yi, n bool-b tɩ b Tʋʋm-tʋmdba. Yɩla a Simo, b sẽn pʋd a soab t'a Piyɛr (kugri) la a ba-biig a Andre, n paas a Zak, a Zã, a Filip, a Bartelemi; a Matiye, a Toma; a Alfe biig a Zak; a Simo, yẽ la m sũur be ne buuda bɛ; a Zak biig a Zɩɩd; a Zɩɩda, Iskariyot tẽng dao, sẽn yɩ a zãmb soabã. B sẽn sigd tãngã, b tees n yaasa a lʋgrẽ; karen-biisi la zãma ka tɛk n da tigim be; b ra yii Zɩɩde la Zerizalɛɛm, ne Tir la Sidõ sẽn be mogr noore. Bãmb fãa ra waame n na n kelg-ba la b paam b bãas sãoogre; Sʋtãan yood sẽn da tar b rãmb n namsdẽ wã fãa da paamda yolsgo. Zãma wã ra baood n sɩɩsa bãmba tɩ pãng n da yit b nengẽ n sãoogd bãmb fãa. A Zezi zẽka b neng n ges b karen-biisã n yeele: «Sũ-noog rãmba la yãmba, naong rãmba, tɩ yãmb n so Arzãn Rĩungu. Sũ-noog rãmb la yãmba, sẽn kũmd-b kom dũnna wã, tɩ yãmb n na n tɩge. Sũ-noog rãmb la yãmba, sẽn yãbd-b rũnna, tɩ yãmb n na n la n kaase. Yãmb la sũ-noog rãmba neb sã n wa kis yã, Ned Biiga yĩnga, la b yiisd yãmb buudẽ, la b tar y tʋʋre la b sãbsd y yʋʋrã wa a yaa yʋ-beoogo. Wakat kãng bɩ y noog y sũuri la y kɩdem tɩ yãmb dolb na n yɩɩ wʋsg arzãnẽ. Yɩɩ woto la yaab rãmba da kis bãngdbã. Yãmb la zu-bʋk rãmba, arzɛk rãmba, tɩ yãmb zoe n tara sẽn na noog y sũuri. Yãmb la zu-bʋk rãmba sẽn tɩgd-b rũnna wã tɩ yãmb la kom na n yõk beoogo. Zu-bʋk rãmba la yãmb sẽn mi laad rũnna wã, tɩ yãmb n na n kelem kʋʋre la y yãb yãb-toogo. Yãmb la zu-bʋk rãmba neb sã n gomd y yelle n pẽgd yã. Ad-y yɩɩ woto la yaab rãmba maan ne zirẽ bãngdba. Yãmb fãa sẽn kelgd maama, m yet-y lame: Nong-y y bɛɛba; sẽn tugd-b beem ne yãmbã, bɩ y maan-b yel sõmde. Sẽn kãabd-b yãmb wẽnga bɩ y kãab-b kãab-noogo la y pʋʋs n kõ sẽn sãamd-b yãmb yʋʋrã. Ned wẽ f yɛgdg a ye pɛka bɩ f wẽnemd f yɛdg a to wã n tees-a. Ned yẽeg fo n deeg f fu-taoko, da mong-a f fu-wok ye. Sẽn bõs-a foom, kõ-a; sẽn dɩka fo bũmbu bɩ f ra sok-a n deeg ye. Yãmb sẽn dat tɩ ned maan yãmb bũmb ningã, maan-y boto ne y taaba. Yãmb sã n nong sẽn nong-b yãmba bala, yell sõng la bʋgo? Yel-wẽn-maandba me maanda boto. La sã n ya sẽn maand-b yãmb neer bala la y maand neere, yell sõnga la bʋgo? Yel-wẽn-maandba me maanda boto. Yãmb sã n penge, n mi tɩ y sẽn peng b rãmba na n wa lebs-y lame, yell sõnga la bʋgo? Yel-wẽn-maandba me pengda b taaba n na n wa reeg b sẽn kɩsa zugu. Sã n ya yãmba, nong-y yãmb bɛɛba, maan-y yel-sõma la y peng n da saag bũmb ye tɩ woto yãmb dolbo wat n yɩɩ wʋsgo la yãmb yɩta Yĩngr Ba wã kamba tɩ bãmb maanda yel-sõm-zɩtb la nin-wẽns neere. Dẽ yĩnga yɩ-y nimbãan-zoetba, wala Ba wã sẽn ya nimbãan-zoetã. Da kao-y ned bʋʋd ye, tɩ b kõn kao yãmb me bʋʋd ye. Da ning-y ned taale tɩ b kõn ning yãmb me taal ye. Kõ-y sugri tɩ b na kõ yãmb me sugri. Kõ-y tɩ b na kõ yãmb me. Y na n kolemda y fuug tɩ b kiig-y wamd pidungu, wamd sẽn yegs yegse n pĩ tɩ baas n sẽegdẽ. Yãmb sẽn dɩk wamd ning n mak n kõ y taabã, wamd kãng la b rɩkd n mak n kõ yãmb me.» A Zezi wẽ-b la yelbũna: «Zoang sã n tat a zon-taaga b yiiba fãa kõn tɩ far n lʋɩ longẽ sɩda? Karen-biig ka yɩɩd a karen-saamb ye, karen-biig karm n siki, a yɩta waa a karen-saamba. Bõe yĩng tɩ fo ne moog sẽn sor f saam-biiga nifu, n yaool n pa ne ra-bed kẽemdã sẽn sel f nifẽ? Fo yɩta a wãn n yeel f saam-biiga: yaas tɩ m lɩk mooga sẽn sorg f nifu? Zirẽ-be-neda! Deng n feoog da-bed kẽenga sẽn sel fo nifẽ wã tɩ f na paam nini n lɩk mooga sẽn sorg f saam-biiga nifã. Tɩ sõng zɩ n wom bi-wẽns ye la tɩ wẽng me zɩ n wom bi-sõma ye! Tɩɩg fãa bãngda a biisẽ; kankam kõn fãs gõosẽ ye, la sib ka tõsd kãgrẽ ye. Nin-sõng sẽn pid sõmblem kẽeda a sũurẽ n yiis yel-sõma, tɩ nin-wẽng sẽn pid wẽnem kẽed a sũurẽ n yiisd sẽn pa sõmbe. F sũur sẽn pid ne bũmb ninga la f noor tar n gomda. Yaa bõe tɩ y boond-m tɩ y zu-soaba la y yaool n pa maand m sẽn togsd yãmba? Sẽn wat-a mam nengẽ, sẽn kelgd-a mam goama la a tũud-ba, yaas-y tɩ m togs a sẽn wẽnd a soaba. Yaa wa ned sẽn met roogo; a tuudame n yẽeg bog zulunga n sɩng rooga pĩig zugu. Sakoom wa yã, a zoee ne pãnga n wẽ roogã la a pa tõog n dĩms-a ye t'a meeb yaa sõmbo. Sẽn kelgd-a la a pa tũudẽ, yaa wa ned sẽn me roog tẽn-nabrẽ, bĩisri zugu, koom kaoogame n zoe n wẽ-a ne pãnga, vugr bala doog sirgame la yɩɩ sirgr kãsenga.» B sẽn togs neba b koeesã, a Zezi yikame n kẽng Kafarnaom. Tãb-biis koabg tãnsoab n da tar a yem-daoogo la a ra nong-a-la wʋsgo. Yem-daooga yika pa-keem n dat n ki. A sẽn wʋm a Zezi yelle, tãnsoaba tʋma Zʋɩf rãmb nin-kẽems b nengẽ n dat tɩ b kudg kãntɩɩga tɩ b wa sãoog a nedã. B sẽn ta a Zezi nengẽ, b kos-b la ne b sũur fãa n yetẽ: «Togame tɩ y maan bũmb a yĩnga, t'a nonga tõnd buudu la a tol n me d pʋʋsg roogã n kõ-do.» La a Zezi tũ-b lame la b sẽn waa n kolg yiri, tãnsoaba tʋma a zo-rãmba tɩ b wa yeel-ba: «M zu-soaba, ra nams-y y meng woto ye, tɩ ka tog tɩ y wa kẽ m zakẽ ye. M tagsame tɩ m paooda ne m wa m toore n seg yãmba. Yeel-y gomd a ye bala la m yamba na n sãoogame. Mam menga tara zu-soaben-dãmba la m soo tãb-biisi. M yeel bãmb nin-yende: Kẽnge, a kẽndame. M yeel a to: Wa! A watame. M yeel m yambã: Maan woto! A maandame.» A Zezi sẽn wʋm woto, b pẽga tãnsoaba la b wẽnega b poorẽ n yeel zãma wã sẽn da pʋgdã: «Sɩda m yeta yãmba, al ba Israyɛl pʋgẽ, mam nan pa yãe tẽeb kãseng a woto ye.» Sẽn tʋm b rãmba sẽn ta zakẽ b mikame tɩ yamba bee laafi. Dẽn sẽn looge, a Zezi waa n dabda tẽng a ye sẽn boond tɩ Nayim, tɩ b karen-biisa la zãma kãseng ra pʋgd-ba. B sẽn ta tẽnga noore, segame tɩ b tʋka biig sẽn ki n dabd mumbu; biiga ra yaa a ma-bi-yende la ma wã da yaa pʋg-kõore; tẽnga neb wʋsg da yãagd-a lame. Soaala sẽn yãe pagã, b kũma a nimbãanega la b yeel-a lame: «Da yãb ye!» La b kolg n sɩɩsa kũuma; tɩ sẽn tʋk-ba yaase la a Zezi yeelame: «Biiga m kõt-f la noore, yiki!» Kũuma yikame n sɩng goama t'a Zezi lebs-a a ma. Dabeem kãseng yõka nebã tɩ b fãa pẽgd Wẽnnaam n yetẽ: «Bãngd kãseng lika tõnd sʋka la Wẽnnaam waa n gesa b buudu.» Pẽgra taa Zɩɩde soolmẽ la tẽn-kɩremsa fãa n sãage. A Zã karen-biisa tɩ wilg-a-la rẽ fãa. Dẽnd la a Zã bool a karen-biis a yiibu n tʋʋm-ba tɩ b tɩ sok a Zezi: «Yaa yãmb la b sẽn da gũud a soab waoongã bɩ yaa ned a to?» B sẽn ta a Zezi nengẽ, karen-biisa yeelame: «A Zã n tʋm tõndo tɩ d wa soke: yãmb la neba sẽn da gũud a soab waoongã bɩ yaa ned a to?» Wakat kãng t'a Zezi ra sãoogda bãad-dãmb wʋsgo la koms rãmba, la zĩn dãmba la b pukd zoeens nini. B yeelame: «Kẽng-y n tɩ togs a Zã y sẽn yãe la y sẽn wʋme: zoeens le paamda nini, wobs kẽndame, wãoob sãoogdame, kũum vʋʋgdame la b togsda naong rãmba Koe-noogã. Zu-noog soaba la sẽn ka na n lak-a maam wa bɛooga n lʋɩ.» A Zã sẽn tʋm b rãmba sẽn looge, a Zezi yeela zãma wã: «Bõe la yãmb kẽng n tɩ maag y meng n ges weoogẽ? Tãnwĩig sobg sẽn lengd bɩ? Yaa bõe la yãmb kẽng n tɩ gese? Ned sẽn yer fʋ-neeb bi? Sẽn yer-b fʋ-neeba la sẽn yãet-b naare bee nanams zagsẽ. Yaa bõe la yãmb tɩ gese? Bãngd bɩ? N-yẽe! Maam n yeele, la yɩɩda bãngda. Yaa yẽ soab yelle la b sẽn gʋlse: Mam tʋmda n tʋʋm-tʋmda t'a reng taoore n segl f soya. Mam yeta yãmba tɩ pagba kamb fãa sʋka sẽn yɩɩd a Zã ka ye. La ade, sẽn yaa yao-zʋʋg Wẽnd Rĩungẽ wã yɩɩd-a lame. Zãma wã la fadga rɛɛsdba sẽn kelg a Zã koɛɛga n sak t'a ko-b soobã, bãmb manesma tũu Wẽnd sẽn date. Farizẽ la noor karen-saam-dãmba sẽn zãgs a soobã, ad-y b kɩtame tɩ Wẽnnaam sẽn da tʋlg bũmb ninga vaale. Mam makda zamaan kãnga kambã ne ãndãmba? B wẽnda kamb sẽn zĩ raagẽ n zabd taaba: ‹Tõnd peeba wɩɩse la yãmb pa sao warb ye, d pʋda kʋʋr yɩɩla la yãmb pa kũm ye.› A Zã waame n zãgs t'a kõn dɩ rɩɩbo la a kõn yu rãam ye tɩ yãmb yet t'a zug ka ye. Ned Biiga waame n dɩtẽ la a yũuda tɩ yãmb yet t'a yaa yão-be-neda la rã-yũuda, sẽn deesd-b fadgã la yel-wẽn-maandba zoa. La Wẽnd kamb naaga taab gilli n kõ kaseto tɩ tʋʋma tũu Wẽnd yam zulunga sẽn yalse.» Farizẽ n bool a Zezi tɩ b wa rɩ ne yẽnda, t'a Zezi kẽ a zakẽ tɩ b sɩng rɩɩbo. La ade pag a ye n da ya tẽnga pʋg-yoaada; a bãngame t'a Zezi rɩta Farizẽ wã yiri, t'a wa ne a yubl sẽn pid ne yũ-noog kaam, a yalsa poorẽ, a Zezi nao wã sẽn tẽesẽ. A ra yãbdame, n madgd a Zezi nao ne a nintãm, n yẽesd-b ne a zoobdo la a zɛɛd-b ne kaama. Farizẽ ninga sẽn bool a Zezi wã sẽn yãend rẽ, yeela a sũurẽ: «Yãoo sã n da yaẽ-la bãngda, paga sẽn sɩɩs-a wã, a na bãngẽ tɩ yaa yel-wẽn-maanda.» La a Zezi leok-a lame: «Simo, m dat n togsa yãmb koɛɛga.» T'a yeele: «Karen-saamba, togs-y.» Neb a yiibu n da tar ned a ye samde: pipi soaba yaa sãnem gil a nu, a to wã wakɩ koeems pisnu bala. B sẽn da pa tar n yaood b samda yĩnga, a bas-b la b yiiba fãa taale. Anna n na n nong-a n yɩɩda? A Simo leokame: «M tẽedame tɩ yaa ned ninga samd sẽn yɩɩd a to wã t'a bas taalã.» A Zezi yeel-b lame: «Yãmb togsa sɩda.» B wẽnega b poorẽ n ges pagã n yeel a Simo: «Yãmb yãee pagã? Mam kẽe yãmb zakẽ la y pa kõn-m koom tɩ m waas m nao ye la yẽ zãgsa m nao ne a nintãm n yẽes-b ne a zoobdo. Yãmb ka mok m yɛgd ye, la yẽ sẽn kẽ tɛka a mogsda m nao n ka basdẽ ye. Yãmb ka sõog m zug kaam ye la paga zɛɛ m nao ne yũ-noog kaam. Yaa rẽ yĩng la m yet yãmba t'a paama a yel-wẽna sẽn ya wʋsga sugri, a nonglem sẽn yɩ wʋsga yĩnga. B sẽn bas a soab bõn-bilfr taale, yẽ soab nonglma zemsame bala.» B yeela pagã: «Fo paama f yel-wẽna sugri.» Sẽn da rɩt-b ne bãmba yeela b sũuri: «Yãoo yaa ãnna, n kõt ba yel-wẽnd sugri?» La a Zezi yeela pagã: «Fo tẽeba fãag-f lame, kẽng ne laafi.» Dẽ poore a Zezi da saada tẽn-bɛd la tẽn-bõonego n gomd Wẽnd Rĩung yelle la b moond b Koe-noogo. Tʋʋm-tʋmdb piig la a yiibã n da tũud-ba, n paas pagb kẽere. Yaa sʋtãan dẽgd la b ra yiis b pʋsẽ, bɩ yaa b bãas la b ra sãoog yã, wala a Mari b sẽn da boond a soab t'a Madelɛn; Sʋtãamb a yopoe la b yiis a pʋgẽ, wala a Zan, a Erod ligd naab a Kuza paga, la pagb a taab wʋsgo sẽn da sõngd-b ne b paoongo. Neb kʋʋng tigma taaba n waa a Zezi nengẽ tɩ b na n tão-b yelbũndi: «Bʋt a ye n yi n na n tɩ bʋd a pʋʋgo. A sẽn waa n fẽedã a bõn-buudã, bɛɛl kẽer lʋɩɩ sor zugu; neb tab-b lame, yĩngr luiili rɩ-b lame. Kẽer lʋɩɩ zĩ-kʋɩgdgẽ, b sẽn yi, b wẽneg n kiime, tɩ b ra pa tar bʋgsem ye. Kẽer lʋɩɩ gõosẽ la b sẽn yi gõosa sʋkã, gõosa wulumd-b lame tɩ b ki. Kẽer lʋɩɩ zi sakdgẽ, bãmb yiime n wom biisi, a ye fãa koabg koabga.» A Zezi sẽn yeel woto, b mooname: «Sẽn tar-a tʋb n tõe n wʋm bɩ a wʋm!» Tʋʋm-tʋmdba sok-b la yelbũnda võore, tɩ b leok-ba: «B kõo yãmb tɩ y bãng Wẽnd Rĩunga yɛl-solgdi la sã n ya neb a taabã, yaa ne yelbũna la b gomd ne bãmba, sẽn na yɩlẽ ‹tɩ b sã n getẽ bɩ b ra neẽ ye, tɩ b sã n kelgdẽ bɩ b ra wʋm võor ye.› Ad yelbũnda võore: bõn-buuda yaa Wẽnnaam Gomde. Sẽn lʋɩ-b sora zugu makda sẽn kelg-ba tɩ Sʋtãan yaool n wa yiis Gomdã b sũurẽ, tɩ b ra wa tẽ n fãag b mens ye. Sẽn lʋɩ-b zĩ-kʋɩgdgẽ wã makda sẽn kelg-b Wẽnnaam Gomdã n deeg-a ne sũ-noogo la b pa kɩ yẽgen ye, b tẽeda wakat yɛng bala; kʋɩbg sã n wa, b basda raoodo. Sẽn lʋɩ-b gõos sʋka makda sẽn kelg-b Gomdã, la sora zugu, zu-loees buud fãa, arzɛka la dũni wã bõn-nooda tʋlsem wulumd-b lame tɩ b ka tõe n bɩ n taas ye. Sẽn lʋɩ-b zĩ-sakdgẽ wã makda sẽn kelg-b Gomdã ne yẽesem la sũ-tɩrga, la b reeg-a ne sũ-keelem t'a womd biisi. Ned kõn yõgen fitila n dɩk rʋk n fõgen-a bɩ n dɩgl-a a gãag tẽngr ye; a dogend-a-la a zĩigẽ, tɩ sẽn kẽed-b fãa yãe a vẽenem. Sẽn lill ka be sẽn ka na n puk ye, sẽn solg ka be sẽn ka na n wa por yɩng ye. Dẽnd yĩnga, bɩ y modg ne kelegre, tɩ sẽn tar-a, b na n paas-a lame la sẽn pa tara b na n deega a sẽn tẽed t'a tara bũmb ningã.» A Zezi ma ne b saam-biis waame, la b ka tõog n ta b nengẽ, zãma wã yĩnga. Tɩ b wa yeel-ba: «Y ma la y saam-biis n be yɩnga n baood yãmba.» Tɩ b leoke: «Mam ma, mam saam-biisi, yaa neb niynsi sẽn kelgd-b Wẽnnaam Gomde la b reegd-a.» Daar a ye a Zezi kẽe koom koglgo ne b karen-biisi. B yeel-b lame: «Wa-y tɩ d kẽng mogra rʋʋnde.» La b looga ko-sʋka. B sẽn waa n dabda, a Zezi gũsame. Mik sob-raoog kaooga mogra zugu, tɩ koglga kẽed koom, tɩ rabeem beẽ. La karen-biisa kolga a Zezi n nek-ba n yetẽ: «Karen-saamba, Karen-saamba, d na n ki wɛ!» B nekame, n tãs sobga la ko-wiisã tɩ b yõke, tɩ fãa lebg sɩɩ. Tɩ b na n yaool n yeel-ba: «Yãmb tẽeba bɛɛ?» Dabeem kãseng yõk-b lame tɩ b pɛleng yɩk; la b ra yeta taaba: «Bãmb yaa ãnna n kõt al ba sobg la mogr noor tɩ b sakdẽ?» B taa Gadar dãmb tẽnga sẽn tot ne Galile. A Zezi sẽn yi koglga pʋga, tẽnga rao a yembre n wa n seg-ba. Sʋtãamb wʋsgo n da be nin-kãng pʋgẽ. Al daar zãra a ra pa le yeelgd fuug ye, a ra ka gãe yir ye, dẽnd yaadẽ. A sẽn yãe a Zezi la a sẽn kelme, n wõgemd b taoore n zẽk a koɛɛg n moon woto: «Bõe n be maam ne yãmb sʋka, Zezi, Wẽnnaam Yĩngr soab Biiga? Y sugri la y ra nams-m ye!» Dẽ t'a Zezi ra kõta Sʋtãan dẽgda noore t'a yi la a bas raoã. Sɩda, yaa naoor yaka la a ra yõk daoã, tɩ b mii n sẽb-a n gãneg ne wĩ la bãeense, la a kaooda fãa. Sʋtaana ra kẽesd-a la weoogo. A Zezi sok-a lame: «Fo yʋʋr la a bõe?» T'a leok: «Kʋʋma» tɩ yaa Sʋtãamb wʋsgo n da kẽ raoã pʋgẽ. Sʋtãamba yõka a Zezi sɛɛg tɩ b ra yiis ba n lebs-b bog zulungẽ wã ye. Kurkuy ka tɛk n da wãbd yamdo tãnga zugu; Sʋtãamba kosa a Zezi sore n na n yi n kẽ kurkuya; tɩ b kõ-b sore. Sʋtãamba basa raoã n yi n kẽ kurkuya la kurkuya zãnga siga tãnga n wudg n tɩ lʋɩ mogra pʋga, n pa koomẽ. Sẽn da gũud-b kurkuya sẽn yãe yellã, b zoe n tɩ togsa tẽnga pʋgẽ la tẽn-kɩremsã. Neba yiime n wa ges yella sẽn maana. B taa a Zezi nengẽ n mik Sʋtãamba sẽn yi n bas rao ninga t'a zĩ a Zezi taoor ne laafi n yeer fuug la a mi a nenga. La rabeem yõk-b lame. Sẽn yãend-b yellã togsa raoã sẽn paam a menga toto. Gadar tẽng rãmb fãa sũu taaba n kos a Zezi tɩ b loog n yi b tẽngẽ. Rabeem kãseng da tar-b lame. A Zezi kẽe koom koglgo n lebe b sẽn yiẽ. Sʋtãamba sẽn yi n bas rao ninga yõka a Zezi sɛɛg n na n pa ne bãmba; a Zezi kʋls-a lame n yete: «Leb f yiri la f tɩ togs Wẽnnaam sẽn maan bũmb ning ne foo.» Daoã kẽngame n tɩ moon tẽnga fãa a Zezi sẽn maan bũmb ning a yĩnga. A Zezi lɛɛg n waame. Neb kʋʋng reeg-b lame tɩ b ra gũud-b lame la ade, rao a ye n wa. A ra boondame t'a Zayir, n ya pʋʋsg roog naaba. A wõgemda a Zezi taoore n yõk b sɛɛga tɩ b wa kẽe a zakẽ. A ra tara a bi-pugl yende sẽn zems yʋʋm piig la a yi. Biiga ra yaa bãada la bãaga ra lebga toogo. A Zezi rɩka a zaka sore, tɩ neba sɩng b pẽdgre. Pag a ye me n da bẽed mende, yʋʋm piig la a yiibu; ned ba a ye ka tõog n sãoog-a ye. A kolga poorẽ n sɩɩs a Zezi fuug zerdo. Zĩig pʋgẽ bala a zɩɩma yõkame. La a Zezi sokame: «Anna n sɩɩs maam?» La ned ba a ye pa saag n yeel tɩ yaa yẽ ye. T'a Piyɛr leok-ba: «Karen-saamba, zãma wã n sũ taaba n dɩdgd yãmba.» T'a Zezi yeele: «Ned n sɩɩs maam, tɩ m bãngame tɩ pãng n yi m nengẽ.» Paga sẽn mik t'a yella pukame, a waame n digda, n wõgemd a Zezi taoore la a togsame tɩ neb fãa wʋm a sẽn sɩɩs-ba võore, la a sẽn wẽneg n sãoog zĩig pʋgẽ balã. A Zezi yeel-a lame: «M biiga, fo tẽeb fãag-f lame, kẽng ne laafi.» B sẽn da ket n gomda la ned yi naaba yiri n wa yeele: «Y biiga kiime, da le nams-y karen-saamb ye.» La a Zezi ra wʋmame tɩ b na n yeel pʋʋsga roog naaba: «Da maan-y rabeem ye, yãmb ye n tẽ bala, biiga na n tɩlgame.» B sẽn ta yiri, b pa sak tɩ ned ba a ye tũ bãmb n kẽ sã n kaa a Piyɛr la a Zã, la a Zak, n paas bi-pugla ba la a ma. B fãa ra yãbdame la b tood b yãoogo, kũuma yĩnga. T'a Zezi yeele: «Da yãb-y ye, biiga pa ki ye, a gõeeme.» Neba ra laada a Zezi tɩ bãmb yẽ ra miime t'a kiime. A Zezi yõka biiga nugu, n zẽk b koɛɛg n yeele: «Biiga yiki!» Biiga vɩɩm le waame; vugr bala a yikame. A Zezi yeelame tɩ b kõ-a rɩɩbo. Bi-pugla ba ne a ma yɛɛsame; a Zezi sagl-b lame tɩ b ra togs ned ba a ye yella sẽn maana ye. A Zezi boola b Tʋʋm-tʋmdb piig la a yiibã n kõ-b pãng la tõogo tɩ b rig sʋtãamba la b sãoog bãad-dãmba fãa. B tʋm-b lame tɩ b sa n moon Wẽnd Rĩungã la b yols bãad-dãmba. B yeel-b lame: «Da zɩ-y bũmb sor zug yĩng ye. Da zɩ-y dasaare bɩ korgo la rɩɩbo bɩ ligd ye. Ned ba a ye ra zɩ fu-yord a yiib ye. Y sẽn kẽ yir ninga bɩ y kell n pa be n tãag y loogre. B sẽn pa reeg yãmb zĩig ning fãa, y sã n yit b tẽngẽ bɩ y pĩng y gãndalsa tom tɩ rẽ n yɩ zood kaoob kaseto la taal ningri.» Tʋʋm-tʋʋmdba kẽngame, b saaga tẽnsa fãa n moon Koe-noogã la b sãoogd bãad-dãmb zĩis fãa. A Erod wʋma a Zezi sẽn maan fãa la a ra ka mi a sẽn na n tags bũmb ning ye tɩ kẽer da gomdame: «Yaa a Zã n vʋʋg kɩɩms sʋka.» Kẽere: «A Eli n le wa.» Kẽere: «Tẽn-kʋdem-wẽnnẽ bãngd a ye n vʋʋge.» La a Erod da yetame: «Sã n ya a Zã, mam n kɩt tɩ b fiuug a zugu. B sẽn gomd rao ning yelle tɩ m wʋmnẽ wã marsã, yẽ la ãnna?» Dẽ la a ra baood n na n yãend a Zezi. Tʋʋm-tʋmdba sẽn lɛɛg n wa, b togsa a Zezi bãmb sẽn maan fãa. A Zezi peeg-b lame n yi kɛɛnga; b teesa tẽng sẽn boond tɩ Bɛtsayid. Zãma wã bãngame la b rɩka b nao. A Zezi sakame n gom ne-ba, Wẽnd Rĩunga yelle; b sãooga sẽn da tʋl-b laafi wã fãa. Wĩndg sẽn waa n dat n kẽ, piig la a yiibã kolg n yeela a Zezi: «Kuls-y neba tɩ b leb Bɛtsayid la pʋtẽ wã n bao gãag zĩiga la b paam dɩɩb n dɩ tɩ d sẽn be ka wã yaa weoogo.» A Zezi yeel-b lame: «Yãmb meng n tog n kõ-b rɩɩb tɩ b rɩ.» Dẽ la b leok yã: «Bur a nu la kʋɩl-zẽed a yiib bal la d tara. Woto wã d na n kẽnga tẽnga pʋgẽ d toore n tɩ ra rɩɩb n wa, tɩ ka rẽ zãma wã labsa.» Daopa sẽn da be be sõor da tõe n taa tus a nu. B yeela b karen-biisã: «Zĩndg-y neba pisnu-nu.» B reega noore, n kɩt tɩ neba zĩndi. A Zezi reega bur a nu wã ne kʋɩl-zẽed a yiibã n zẽk b neng n tees yĩngri n pʋʋs bark pʋʋsgo. B yaoolame n wes burã n kõ b karen-biisã tɩ b pʋɩ zãma wã. B fãa rɩɩme n tɩge n tol zɩ pet piig la a yi, n kuli, pet sẽn pid ne bura girs sẽn kellã. A Zezi ra yii kɛɛng, raar a ye, n pʋʋsdẽ. B karen-biisa bal n da be ne ba. B sok-b lame: «Zãma wã yetame tɩ maam la a bõe?» Tɩ b leoke: «Kẽer yetame t'a Zã, kẽer t'a Eli. Kẽer tɩ tẽn-kʋdem-wẽnnẽ bãngd a ye sẽn vʋʋge.» T'a Zezi yeel-ba: «La yãmb yẽ, yãmb yetame tɩ m yaa ãnna.» A Piyɛr n leoke: «Krista, Wẽnd Nedã!» A Zezi kõ-b la noore tɩ b ra saag n togs ned ye. B yeelame: «Yaa pakr ne Ned Biiga tɩ b nams wʋsgo, tɩ nin-kẽemba, maan-kʋʋdba kãsem-dãmb la sɛb-mitba yiis-b buudẽ la b kʋ-ba; la b na n vʋʋga dasem a tãab daare.» B yaool n yeela b fãa: «Ned sã n dat n dɩk mam nao, bɩ a bas a meng yamleoogo la a tʋk a pika, beoog sẽn vẽeg fãa, n tũ maam. Sɩd me sẽn tʋll-a n fãag a meng vɩɩm na n menes-a lame la sẽn menesd-a a meng vɩɩm mam yĩnga, na n fãag-a lame. Bõe yõod la ned rokda a sã n paam dũni wã zãng fãa n sooge, n yaool n kẽ moogo la a sãam a meng yelle? Sẽn yeela tɩ maam ne m goama yãnd tar-a lame, Ned Biig me na yeel yẽ soaba t'a yãnd tar-b lame, b sã n lɛɛg n wa ne zɩɩri, ne b Ba la malɛgs sõma pẽgre. Sɩd ne sɩda, mam yeta yãmba tɩ kẽer n be ka n ka na n wʋm kũum yũugu tɩ b pa reng n yãe Wẽnd Rĩunga ye.» Dẽ loogr poore, sẽn maan dasm a nii, a Zezi peega a Piyɛr la a Zak, la a Zã. B tɩ rʋʋ tãng n pʋʋsdẽ. Pʋʋsga wakato, a Zezi neng tedgame. B futa lebga peelse n pɩnda. Ade, neb a yiibu n da sõsd ne bãmba: da yaa a Moyiiz la a Eli n lik ne zɩɩri. B da gomda b kũuma sẽn na n yɩ a soab Zerizalɛɛm. Dẽ t'a Piyɛr ne a tũud-n-taasa ra zuka gõeem tɩ gõeema ra tar-b la wʋsgo. B sẽn neke b yãenda a Zezi zɩɩrã ne rapa yiibã sẽn da be-b ne bãmbã. Nin-bãmb sẽn waa n loogdẽ, a Piyɛr yeelame: «Karen-saamba, tõnd sẽn be ka wã, d sũur yaa noogo. D tilg zãn a tãabo, a ye yãmb yĩnga, a to a Moyiiz yĩnga, a tãab soaba a Eli yĩnga.» A ra ka tar a goama nao ye. La a sẽn waa n gomdã, sawadg n waa n lud bãmba tɩ lebg likã, tɩ b yɛɛsdẽ. La koɛɛg n yi sawadga pʋgẽ n yetẽ: «Bãmb yaa mam Bi-nongre, kelg-y-ba!» B wʋma koɛɛgã la dẽ pore b mikame t'a Zezi lebga b yembre. Karen-biisa me tõoga b noore wakat kãng n pa togs ned ba a ye b sẽn yãend bũmb ninga ye. Vẽkembeoogo, b sẽn sig tãngã la zãma wã sẽn pooge. Ade, dao a ye n zĩnd zãma wã sʋka n kelme: «Karen-saamba, m yõkd-y-la sɛɛga, ges-y m biiga yelle tɩ yaa m bi-yende. Sʋtãan a ye n mii n yõk-a t'a tar kɛlenga. Wakat ninga sʋtãana lubd-a la tẽnga t'a yĩnga vɩgda, t'a noor lasd tãntãnpuudu; a pa yit n bas-a naana ye. A rengd n sɛɛsa a pãnga zãnga. Mam kosa y karen-biisa tɩ b rig-a la b pa tõog ye.» A Zezi yeelame: «Kɩɩsdb la bi-bees buudu, mam na n kaoosa ne yãmb la m tõog m sũurã n ta da-bʋre? Tall f biigã n wa ka.» Biiga sẽn wa n kolgdẽ, sʋtãana lub-a-la tẽnga t'a gãe n vigd ne pãnga. A Zezi tãsa sʋtãan dẽgda, n sãoog biigã n lebs-a a ba. B fãa yãenda Wẽnnaam pãngã tɩ b pɛleng yɩke. Ned kam sẽn da pẽgd a Zezi sẽn maana yĩnga, bãmb yeela b karen-biisi: «Yok-y y tʋbre n kelg m goama: B na n yõka Ned Biiga n ning ninsaalb nusẽ.» La karen-biisa pa wʋmd gomda sẽn lebdẽ ye, t'a Zezi pa tʋlg tɩ yɩ vẽenega tɩ b wʋma võor ye; la soka Zezi b gomda võor da yaa rabeem ne-ba. B yika no-koeemd ne taaba n na n bãng, bãmb sʋka, ãnna n yɩɩd a taaba. A Zezi sẽn da mi b sũur tagsgo, b zĩndga bi-bilf b sɛɛgẽ n yeel-ba: «Sẽn deeg-a bi-bilfã reega mam menga, sẽn deeg-a maam deega sẽn tʋmeb maama. La sẽn yaa yao-zʋʋg yãmb sʋka yẽ n yɩɩd a taaba.» A Zã yeelame: «Karen-saamba, tõnd yãee dao a yembre sẽn digd sʋtãan yãmb yʋʋr yĩnga la tõnd gɩdg-a lame t'a pa lagem ne tõnd n tũud yãmb ye.» A Zezi yeel-b lame: «Bɩ y ra rig-a ye! Sẽn pa zabd-a ne yãmba bee yãmb poorẽ.» B daara sẽn waa n kolge tɩ b na n yi dũni kãnga, a Zezi kenga b pɛlga n dɩk Zerizalɛɛm sore. Neb la b tʋm tɩ b reng taoore. B rɩka sore la b tɩ kẽe Samari tẽng a ye n na segl b waoongo. B sẽn ta, be rãmb pa reeg-b neer ye, tɩ b yãeeme tɩ yaa Zerizalɛɛm la b da rabda. A Zak ne a Zã sẽn yãend woto b yeelame: «Yãmb datame tɩ d kõ noor tɩ saag bugum sig n yõog bãmba bɩ?» A Zezi wẽneg n ges-lame m sãbs-ba. La b yiime n kẽ tẽng a to. B sẽn waa n be sorẽ, ned n yeel bãmba: «Mam na n tũu yãmba, y sẽn na n kẽng tẽng ning fãa.» A Zezi leoka yẽ soaba: «Waas tara b bogdo tɩ yĩngr luiili tar b tʋgdo. Ned Biiga yẽ pa tar zĩig n gãnegd b zug ye.» B yeela ned a to: «Tũ maam!» T'a soab leoke: «Kõ-y maam sore tɩ m deng n tɩ mum m ba.» La a Zezi yeel-a lame: «Bas kɩɩmsa tɩ b mum taaba; la foom, kẽng n tɩ moon Wẽnd Rĩungu.» Ned a to me n yeel-ba: «M na n pʋga yãmba, Soaala, la bɩ y kõ sore tɩ m deng n tɩ pʋʋs m neba wẽnd na taas la m yaool n wa.» T'a Zezi leok-a: «Ned sã n gãd wãka n zõond n na n ko, n wẽneg n ges a poorẽ, a soab ka tog ne Wẽnd Rĩung ye.» Dẽ poore Soaala le tũusa karen-biis pisopoe la a yiibu n tʋm ba tɩ b reng bãmb taoore, b yiib-yiibu, zĩis fãa la tẽns niyns fãa bãmb meng sẽn dag n na n kẽngẽ. B ra yet-b lame: «Ka-kɛɛra waooga la ka-kɛɛdba sõor paoodame. Pʋʋs-y Tigsga Naaba tɩ b yiis tʋʋm-tʋmdba ka-kɛɛra yĩnga. Kẽng-y! La ade, m tʋmda yãmb wa pe-bi digd-n-yĩids sʋka. Da zɩ-y korg bɩ waoog ye, bɩ neodr ye la y ra yaas n pʋʋs ned sor zugu ye. Yãmb sẽn kẽed zak ninga, reng-y n yeel-y: ‹Laafi sig yi-kãnga!› Laafi biig sã n be a pʋgẽ, yãmb laafi na sig a zugu, sã n pa rẽ, a lebda yãmba. Bɩ y kell n pa yir kãnga n dɩtẽ la y yũud b sẽn kõt-y bũmb ning fãa, tɩ tʋʋm-tʋmd toga ne yaoodo. Bɩ y ra sa yir woo yir ye. Yãmb sẽn kẽ tẽng ning fãa tɩ b reeg yã, bɩ y rɩ la y yũ b sẽn na n tẽgen y taoore. Sãoog-y tẽnga bãad-dãmba la y yeel nebã: ‹Wẽnd Rĩung pẽe yãmba.› La yãmb sẽn kẽ tẽng ninga tɩ b pa reeg yã, kẽng-y b sɛk zĩigẽ la y yeele: ‹Al ba yãmb tẽnga tom sẽn tabend tõnd nao, tõnd pĩmsd-a lame n bas ne yãmba, la baasg fãa bãng-y tɩ Wẽnnaam Rĩung kolgame.› M yeta yãmb tɩ bʋʋda raare, Sodom sɩbgr toolem kõn zeng tẽn kãng rẽnn ye. Na pak foom Korozein! Na pak foom Bɛtsayid! Tɩ wẽnd makr dãmb sẽn maan yãmb sʋka sã n da maanẽ Tir la Sidõ, b ra pĩn n yeelgẽ sũ-pa-noang futu la b bilmẽ tompɛglem n kos sugri al daar zãra. Dẽ yĩnga, bʋʋd kaoob daare, Tir la Sidõ rãmb sɩbgr toolem kõn kolg yãmb dẽn ye. La foom, Kafarnaom, fo zẽkd f meng n tãag saag me, b na n sika foom al n tɩ tãag bʋg-tẽnga. Sẽn kelgd-a yãmb kelgda maam; sẽn zãgs-a yãmb zãgsa maam; sẽn zãgs-a maam, zãgsa sẽn tʋm-a maama.» Karen-biis pisopoe la a yi wã lebg n waa ne sũ-noog n yeele: «Soaala, al ba sʋtãamba reegda tõnd noore, yãmb yʋʋr yĩnga.» A Zezi yeel-b lame: «Mam da nee sʋtãan sẽn da yit yĩngri n lʋɩt wa saag sʋʋga. Ade, mam kõo yãmb tõog, tɩ y tab wiis la namse la bɛyã ne a pãnga fãa kõn tõog n maan y bũmb ye. La baasgo bɩ y ra noog y sũuri sʋtãamba sẽn deegd y noor yĩng ye, noog-y sũuri yãmb yʋy wã sẽn gʋls arzãnẽ yĩnga.» Wakat kãnga Wẽnd Vʋʋsem kɩtame tɩ b yeele: «Mam pẽgd-y lame, Ba, yĩngr la tẽng Soaala, yãmb sẽn solg yell bãmba, yam dãmda la yẽesem dãmba, n yaool n wilg-b kom-bõonego. N-yẽe! M Ba, woto la yãmb tʋlgre ne y nimbãan-zoeerã. M Ba rɩka bũmb fãa n kõ maam, ned ba a ye ka mi m Ba sẽn yaa a soaba, sã n ka Biigã, la Biiga sẽn sak n wilg a soaba.» La b wẽneg n gesa b karen-biisã n yeel-ba, bãmb ne taab bala: «Sũ-noog rãmba la nin sẽn yãet yãmb sẽn yãete! Mam yeta yãmba: bãngdba la nanamse tʋlg n yãee yãmb sẽn yãetã, la b pa yãe ye, la b wʋm yãmb sẽn wʋmd bũmb ningã, la b pa wʋm ye.» La ade, noor karen-saamb a yembre n yik n na n bẽd-ba, n sok-ba: «Karen-saamba, bõe la m tog n maan n paam vɩɩm sẽn kõn sɛ?» T'a Zezi leok-a: «Noor sebre pʋgẽ b gʋlsa bõe? Bõe la y karemda?» T'a leoke: «Nong Soaala, f Wẽnnaam ne f sũur fãa, ne f pɛlg fãa, ne f pãng fãa la ne f yam fãa, la f nong f to n wẽnd f menga.» A Zezi yeelame: «Yãmb leoka neere! Maan-y woto tɩ y na paam Vɩɩm.» Karen-saamba sẽn da rat n kõ a meng bʋʋm, a soka a Zezi: «La m to yaa ãnna sẽ?» T'a Zezi leok-a: «Ned n da yi Zerizalɛɛm n dabd Zeriko n tees n lʋɩ fãadb nusẽ tɩ b rees a teeda fãa n pogl-a, n bas-a t'a rat n ki. Maan-kʋʋd a ye n waa n tũud so kãnga n yãend-a la a bas-a lame n looge maan-kʋʋd sõangd a ye n waa n yãend-a, n bas-a n looge. La Samari dao a yembre n da togd sore n wa lood be. A sẽn yãend-a, a zoe-la a nimbãanega, la a kolgame n dɩk rãam ne kaam n pek a noadã, n vil ne pɛɛla, n zombg-a a meng bõanga, n tall n kẽng a gãag soab yiri, n tɩbs-a. Vẽkembeoogo, a yãka wakɩ koeems a yiibu n kõ a gãag soaba n yeele: ‹Tɩbs-y neda neere, la y sẽn na n sãam ligd ning n paase, m sã n lɛɛg n wa, m na lebs yãmba.› Bãmb b tãaba sʋka, sã n ya ne yãmba, ãnda n ges raoã sẽn lʋɩ fãadba nusẽ wala a to?» Tɩ karen-saamba leok: «Yaa sẽn zoe-a raoã nimbãanega sẽ.» T'a Zezi yeel-a: «Bɩ y kẽnge, la yãmb me maan boto.» A Zezi sẽn dɩk sor ne b karen-biisi, b tɩ kẽe tẽng-a ye tɩ pag a ye sẽn boond t'a Mart reeg-b sãando, a yiri. A Mart da tara yao sẽn boond t'a Mari, la yao wã ra zĩi Soaala taoore n kelgd b goama. A Mart da yãgda ne rɩɩba seglgo la ragend tʋʋm a taaba; a waa n yaasa a Zezi taoore n yeele: «M yao wã sẽn bas maam tɩ m segend m yembrã ka pak yãmb ye? Soaala, yeel-y m tão wã t'a yik n wa sõng-m wɛ!» Soaala leok-a lame: «Mart, Mart, fo maanda yɩɩre, la fo sũkda bũmb wʋsg poorẽ, la yaool n yaa bũmb a ye bala n pake. A Mari sẽn yãk pʋɩɩr ningã n são, la b kõn deeg n bas-a ye.» Daar a ye, a Zezi da bee zĩig a ye n pʋʋsdẽ. B sẽn pʋʋs n sɛ, b karen-biig a yembr yeel-b lame: «Soaala, zãms-y tõnd pʋʋsgo wala a Zã sẽn zãms a karen-biisi.» A Zezi yeelame: «Yãmb sã n pʋʋsdẽ, yeel-y woto: ‹Ba, y yʋʋr yi ne pẽgre, y naam wa. Kõ-y tõnd beoog sẽn vẽeg fãa, d daara rɩɩbo. Kõ-y tõnd d yel-wẽna sugri, tɩ tõnd me kõta sẽn beeg-b tõnda fãa sugri la y ra bas tɩ kʋɩɩbg yõk-d ye.› » B le yeel-b lame: «Yãmb sʋka, ned sã n tar-a zoa t'a bʋʋg-a yʋn-sʋk n yeel-a: ‹M zoa, peng-m bur a tã, tɩ m zoa a to n yi sor n wa, tɩ m ka tar bũmb n na n kõ-a ye.› Tɩ yãoo soaba zĩnd roogẽ n leoke: ‹Bas-m laafi tɩ m doog pagame, maam ne kamba kẽe gãaga, ad-m ka tõe n yik n bao n kõ-f ye.› Mam yeta yãmba, t'a zoa wã sã n pa yik n kõ-a, b zooda yĩng me, pẽdgra yĩnga, a na yik n kõ-a wala a sẽn dat tɛka. La mam yeta yãmba: kos-y tɩ b na n kõ-y lame, bao-y tɩ y na n yãeeme; kabs-y tɩ b na pak tɩ y kẽ. Sɩd me, sẽn bõsd-a paamdame, sẽn baood-a yãetame la sẽn kabsd-a, b pakd n kõ-a lame. Yãmb sʋka, roagd a bõe n be t'a biig kos-a kʋɩl-zẽoogo, t'a bas kʋɩl-zẽegã n kõt-a waafo? Bɩ a kos-a la gelle, t'a kõ-a nanga? Dẽ yĩnga, yãmb ne y wẽnema fãa, yãmb sã n mii n kõt y kamb bõn sõma, yãmb zɩ tɩ yãmb Ba wã sẽn be yĩngri, bãmb na n kõo sẽn bõsd-b bãmbã a Vʋʋsem Sõngo!» A Zezi ra yiisda Sʋtãan sẽn da kẽ neda t'a lebg muka. Sʋtãana sẽn yi, muka gomame, tɩ neb pɛleng yɩke. La neb kẽer yeelame: «Ad-y yaa ne sʋtãamb naab a Beelzebul pãnga la a yiisd sʋtãamba.» La kẽer me da rat n bãnga b pãnga, n kos-b bõn-bãnd a ye sẽn yit yĩngri. A Zezi sẽn da mi b tagsgo, b yeel-b lame: «Rĩung a ye rãmb sã n welg n maan beem ne taaba, b wãada b rĩungã t'a rot lʋɩ n bʋʋg taaba. Sʋtãana sã n welg la a maand beem ne a soolem dãmba, a rĩung na n le zĩnda wãna? Yãmb sẽn yet tɩ yaa ne a Beelzebul pãnga la m yiisd sʋtãamba, la mam sã n digd sʋtãamba ne a Beelzebul pãnga, yãmb digd-b la ne ãnd pãng marsã? Woto yĩnga, yãmb meng n kaood y bʋʋdo. La mam sã n digd sʋtãamba ne Wẽnnaam nug pãnga, dẽnna Wẽnd Rĩunga sɩd waa yãmb sʋka. Gãndaoog bob a zab teed n gũud a zaka, a sẽn tar fãa, bũmb kõn maan ye. Gãndaoog a to sã n wa, n yõk-a n lubi, a pidgda a zab teedã a sẽn teeg b rãmbã, n wʋk a laog fãa n pʋɩ. Sẽn pa tũuda maam, zabda ne maam, sẽn pa sõngd n tigme, a soab sẽegdame. Sʋtãan dẽgd sã n yi ned pʋgẽ, a gõoda zĩ-peen-daagẽ n baood vʋʋsgo n kongdẽ. Dẽ la a wat n yeele: ‹M leb roog ninga mam sẽn yii wã.› A sã n le wa kẽe, a mikdame tɩ b pɩɩsa sagda n maneg-a neere; t'a kẽng n le tɩ wa ne sʋtãamb a yopoe wẽnem sẽn yɩɩd yẽnda, tɩ b fãa kẽ be n maag b meng n zĩndi tɩ nin-kãng yell sãam n yɩɩd pĩnda.» A Zezi sẽn gom woto, la pag a ye sẽn zĩnd bãndurba sʋka n zẽk a koɛɛg n yeele: «Sũ-noog soaba la pag ning sẽn tʋda y pʋga tɩ y yẽsem a bĩisim!» La a Zezi leokame: «Yeel-y tɩ sũ-noog rãmba n yɩɩda la sẽn kelgd-b Wẽnnaam gomde la b reegd-a.» Zãma wã ra yaa wʋsgo tɩ wa lebg pẽdgre t'a Zezi na n yeele: «Zamaan kãnga yaa zamaan yoogo; a bolgda wẽnd makre la a kõn paam makr a to n zʋʋg a Zonas rẽnda ye. Wala a Zonas sẽn yɩ makre Niniv rãmb yĩnga, woto me Ned Biigã na n yɩɩ makre zamaan kãnga yĩnga. Bʋʋda raare, dĩm-poaka sẽn yi tẽn-zãorgẽ wã na n yik n bʋʋ zamaan kãnga bʋʋdo n mong-a bʋʋm, tɩ yẽ yii al dũni wã sɛtmẽ, n wa kelg yam soab a Salomo goama; la sẽn yɩɩda a Salomo n be ka. Bʋʋda raare, Niniv rãmb na n yikame n bʋ zamaan kãng bʋʋdo la b na n mong-a la bʋʋm tɩ b sẽn wʋm a Zonas saglgo, b tuuba b yel-wẽna; la ade: sẽn be-a ka wã yɩɩda a Zonas. Ned kõn yõgen fitila n solg-a bɩ n fõgen-a rʋk ye; a dogend-a-la roagendga zugu tɩ sẽn kẽedba fãa yãe vẽenem. Fo nif la a f yĩng fitila, fo nif sã n ya sõmbo fo yĩnga fãa tara vẽenem; a sã n pa sõmbe, fo yĩnga zãng fãa zĩi ne lika. Ges f sẽn tar vẽenem ninga sã n ka lebg lika! Ad-f yĩnga fãa sã n tara vẽenem t'a wilg ba a ye ka be likẽ, a zãng faa na n yɩɩ vẽenem wala f fitil sẽn vẽnegd-f ne a vẽenem.» A Zezi sẽn da waa n gomdã, Farizẽ a yembre n waa n kos tɩ b wa rɩ a yiiri. Tɩ b kẽ n sɩng rɩɩbo. Farizẽ wã yãee ne pɛlen-yɩka tɩ b pa reng n nudg b nus n yaool n sɩng rɩɩb ye. La Soaala yeel-a lame: «M nong rẽ! Yãmb Farizẽ rãmba nedgda laag la wamd poore tɩ y menga yaool n pid ne wagdem la wẽnem. Gãeemse! Sẽn naana poore, ka bãmb n naan pʋg la? Dɩk-y y sũura sẽn gãd bũmb ningã n maan wẽn-kosgo tɩ sẽn keta fãa na yɩ yɩlgemde y yĩnga. La na pak yãmba, Farizẽ rãmba! Yãmb yãkda y zẽ-vãadã la y zẽ-biisa sẽn tar yũ-noogã n kõtẽ, dʋr a ye piig zugu, n yaool n yãk y toog ne pʋ-peelem la Wẽnnaam nonglem: y tog n pidsẽ la boto, la woto me ra ka togẽ n pa sãoog ye. La na pak yãmba, Farizẽ rãmba! Tɩ pʋʋsg rotẽ yãmb nong n zĩnda taoore, waoor zĩigẽ, y nonga pʋʋs-bɛda kʋʋng zĩigẽ, sɛk zĩigẽ. Na pak yãmba, Farizẽ rãmba! Tɩ yãmb wẽnda yaad sẽn sarem tɩ neb tabd n pa mii ye!» Noor karen-saamb a ye leokame: «Yãmb sẽn gom woto wã, y sãbsda tõnd me.» La a Zezi leokame: «Na pak yãmb me, Noor karen-saam-dãmba! Tɩ yãmb tʋkda ninsaalba, zɩɩb b sẽn pa tõe n tʋke, tɩ yãmb menga nug-bil yaool n pa sɩɩsd bũmb ye. Na pak yãmba! Tɩ y manegd n meta bãngdba yaado la yaool n yaa y yaab rãmb n kʋ bãngdbã. Dẽnd yĩnga yãmb ne bãmb yaa kaset yɛnga: Bãmb n sɩd kʋ, tɩ yãmb, b kamba, tẽeda tɩ y roka b yãnde, n manegd bãngdba yaado! Yaa woto la yell kõ-ling-m Wẽnda beool n yeele: M na n tʋm-b la bãngdba la tʋʋm-tʋmdba, b na n kʋʋ kẽere, n dig kẽere, sẽn na n yɩ-la tɩ b wa sok zamaan kãnga kamba, bãngdba faa zɩɩm sẽn daag al dũni sɩngre, sẽn sɩng ne a Abɛl zɩɩm n tãag a Zakari, b sẽn kʋ a soaba maan-kugr la Wẽnd doog sʋka. Sɩd wa m sẽn yetã, zamaan kãnga na rɩ zɩ-kãng fãa taale! Na pak yãmba, Noor karen-saam-dãmba! Yãmb looga ne bãngra roog kʋɩlen-bila, yãmb meng n pa kẽede la y yaool n digda sẽn dat-ba me kõom.» A Zezi sẽn yi be, Sɛb-mita la Farizẽ rãmba sɩng n dat-b la ne wẽnga la b pẽdgd bãmb ne sokr dãmb wʋsgo, bũmb wʋsg poorẽ. B ra gãnegd-b-la bẽdgo, n dat tɩ b meng noor yiis gomd sẽn na n paalg-ba. Wakat kãnga, zãma ka tɛk tigmame n gũbg a Zezi n tabd taaba, tɩ b na n sɩng n yeel b karen-biisã: «Gũus-y y meng ne Farizẽ rãmb rabɩlle, ne b zãmbã. Sẽn lud ka be tɩ b ka na n wa puk-a ye. Sẽn solg me ka be tɩ b ka na n wa bãng-a ye. Dẽ n so tɩ yãmb sẽn togs bũmb ning fãa yʋngo, b na wʋm-a wĩnto-sʋka, la y sẽn kẽed roog n walm bũmb ning tʋbrẽ, b na rʋ bɛoongo n moon-a. Mam yeta yãmba, m zo-rãmba, da zoe-y sẽn kʋʋd-b yĩnga n yaool n pa tõe n paas bũmb a to ye. Yaas-y tɩ m wilg yãmba, y sẽn tog n zoe a soaba. Zoe-y sẽn kʋʋda la a leb n tõe n kẽes yãmb bugmẽ. N-yẽe! Mam yeta yãmba, yẽ soab la y tog n zoe. Yirs a nu ka koosd tãm a yiib wɛɛ? Ne rẽ fãa Wẽnnaam pa yĩmd bãmb ba a ye yell ye. Al ba yãmb zug zobdo, b sõd-b-la zãnga. Bɩ y ra maan rabeem ye, yãmb bee yõod n yɩɩd yirs ka tɛka. M yeta yãmba, sẽn yeel-a ninsaalb taoore t'a mii maam, Ned Biiga me na yeel Wẽnnaam malɛk rãmb taoore, tɩ b mii yẽ soaba. La sẽn kɩɩsda neb taoore t'a ka mi maam, mam me na kɩɩs Wẽnnaam malɛk rãmb taoore tɩ m ka mi-a ye. Sẽn gom-a Ned Biiga wẽnga, b na n kõ-a sugri; la sẽn tʋʋs-a a Vʋʋsem Sõng kõn tol n paam sugri ye! B sã n wa vuud yãmb n kẽnd pʋʋsg rotẽ, bʋʋdba la tẽng soaalba taoore, bɩ y ra bʋ y sẽn na n gom to-to, la y sẽn na n yãe dabaar ning n fãag y meng ye. A Vʋʋsem Sõng n na n wilg yãmb wakat kãng bala y sẽn tog n yeele.» Ned n zĩnd zãma wã sʋka n yeel a Zezi: «Karen-saamba, yeel-y m ba-biiga t'a pʋɩ d ba sẽn bas laog ningã, n kõ-m m dẽnna.» Tɩ b na n leok-a: «Daoa! Ãnda n kõ-m sore tɩ m bʋ yãmb bʋʋdo la m pʋɩ yãmb laogo?» B le yeela zãma wã: «Gũus-y y meng neere ne y raab waglã, tɩ f tar wʋsg me, ned vɩɩm ka tũud f sẽn tar paoong ninga ye.» B tãoo yelbũndi: «Dakãagr a ye n da be ta pʋt sak kood sõma. A ra tagsda a sũurẽ: ‹M na n maana wãna? M ka tar zĩig n na n bĩng m kooda ye.› T'a yeel a menga: ‹Ad-m sẽn na n maan bũmb ninga: m wãada bao kʋda fãa n lebs n me bɛd-bɛda, m wʋkda m kooda fãa la m paoonga fãa n bĩng be, n yaool n yeel m menga: M zoa, fo paama paoong wʋsgo n bĩng yʋʋm kʋʋm yĩnga, vʋʋse, rɩ la f yũ la f kɩdme.› La Wẽnnaam yeel-a lame: ‹Yalma, yʋnga bala, b na n deega f yõore la fo sẽn bĩngã ãnna n na n sooge?› Yɩta a woto ne sẽn wʋkd-a arzɛk n bĩngd a meng yĩnga, n yaool n pa bĩngd Wẽnnaam yĩng ye.» A Zezi yaool n yeela b karen-biisi: «Bɩ y ra bʋ y vɩɩm poorẽ, n sokdẽ tɩ bõe la y na n dɩ, la yĩnga poorẽ, tɩ bõe fuug la y na n yeelg ye. Vɩɩm yɩda rɩɩbo tɩ yĩnga yɩɩd fuugu. Ges-y gãabdo: b ka bʋte, b ka tigsdi, b ka tar pilgu, b ka tar baoore, la Wẽnd dɩlgd-b lame. Y são luiili al wʋsgo! Ãnna n tõe, yãmb sʋka, n bʋ n paas a vɩɩm woglem kãntɩɩg a ye? Yãmb sã n pa tõe sẽn paoode, ya bõe tɩ y maand yɩɩre ne sẽn ketã? Ges-y puud sẽn bɩt toto; b pa wĩida, b pa wʋgd sʋndo la m yeta yãmb t'a Salomo meng ne a ziira fãa pa yeelg fu-neer wala puug ye. Wẽnnaam sã n yeelgd woto, moog sẽn be pʋtẽ dũnna tɩ b na n yõog wʋngẽ beoogo, yãmb zɩ tɩ yãmb yĩnga b na maan tɩ yɩɩg boto, tẽeb kɩdg rãmba? La yãmba, bɩ y ra bao bõe la y na n dɩ, bõe la y na n yũ, la y ra maan yɩɩr zaalem ye. Yaa dũniya bu-zẽmba n bolgd dẽ. Yãmb Ba wã mi tɩ yãmb tara rẽ fãa tʋʋmde. Bɩ y reng n bao Wẽnnaam Rĩung ne a sõmblem, tɩ sẽn ketã, b na kõ yãmb n paas. Da zoe-y rabeem ye, wubr pa zemb bũmbu, tɩ nooma y Ba tɩ b kõ yãmb b Rĩungu. Koos-y yãmb sẽn tar fãa n dɩk n maan wẽn-kosgo; bao-y kordo sẽn pa tõe n kʋdg ye la arzɛk sẽn pa tõe n sɛ n bĩng arzãnẽ, tɩ beene, wagdb ka tõe n kolg ye, mogd ka be n tõe n mok ye. Yãmb laoga sẽn be zĩig ninga, y sũura me na n zĩnda be. Rɩk-y sẽbdse n sẽbg-y y sɛɛga, la yõgen-y fitil dãmba n zã y nusẽ. La yãmba, yɩ-y sõgen-kamba sẽn gũud b zu-soaba, n gũud t'a yi pʋg-reem n wa; a sã n wa wẽed nug poaka bɩ b wẽneg n pak t'a kẽ. Sũ-noog rãmb la sõgen-kamb kãense, b zu-soab sã n wa mik tɩ b gũud a waoongo. Sɩd-sida, m yeta yãmba tɩ yẽ meng na n sẽgna fuugu, n zĩndg-b rɩɩb roogẽ, n tall dɩɩbã a toore n wa kõ-ba. A waa yʋn-sʋka, a waa tõd-beoogo n mik tɩ b segl n gũud-a, sõgen-kamb kãens yell manegame. Bãng-y neere, tɩ yir soab miẽ wagdr waoong wakato, a kõn mum a nin ye la a kõn bas tɩ b wa poog a roog ye. Yãmb me, segl-y y mens n gũudẽ, tɩ Ned Biiga na n waa wakat ning y sẽn pa tagsd b waoong ye.» A Piyɛr sok-b lame: «Soaala y wẽe yelbũna tõnd yĩng bɩ neb fãa yĩnga?» Tɩ Soaala leok-a: «Yaa ãnd la arzɛk gũuda, pʋ-peelem soaba, yam soaba t'a zu-soab na n gũnug-a a rakõapa t'a kõt-b moende wakat ninga sẽn zemse? Sũ-noog soaba, la sõgen-kãnga, a zu-soaba sãn n wa mik-a t'a maan boto! Sɩd-sɩda mam yeta yãmba t'a na n gũnug-a-la a paoonga fãa. La sõgna sã n yeel a sũurẽ: ‹M zu-soab kaoosda waoongo› t'a na n sɩng n pãbd zaka rãmba: dapa la pagba, n dɩtẽ la a yũud rãam n tɩgda, sõgen-kãng zu-soaba na n waa daar ning a sẽn pa gũud-a la wakat ning a sẽn pa mi; a zu-soaba na yẽeg-a, n dig-a n yiis, n kɩt t'a rɩ pɛt ne yel-wẽn-maandba. Sõgna sẽn da mi a zu-soab waoong raare n yaool pa segl ba fɩ, n pa maan wa a zu-soaba sẽn datã, a na n paama pãbr wʋsgo. La sẽn pa bãnga a zu-soab raabo la a tʋm sẽn tog ne sɩbgre, a na paam pãbr bilfu bala. B sẽn kõ a soab wʋsgo b na soka bũmb wʋsgo la b sẽn bobl a soab bũmb wʋsgo b na sok yẽnd a soabã n yɩɩge. Mam waa n loba bugum tẽng zugu, la bõe la m tʋlla. M nongẽ lame t'a zoe n widgẽ. Soob a ye n be tɩ ya modgr tɩ m so la m zʋʋda ali, n gũud soob kãng raare! Y tẽedame tɩ m waa n kõo laafi tẽnga laa? Ayoo! Maam n yeele: m sẽn kõ yaa welg taaba. Marsã tɛka, neb a nu be zak a ye, b na welg taaba. A tãab welgda ne a yiibu, t'a yiib welg ne tãabã. Ba na n welga ne a biiga, tɩ biig welg ne a ba; ma na n welga ne a bi-pugla, tɩ bi-pugl welg ne a ma; pag ne a bi-paga, bi-pag ne a sɩd ma.» A Zezi le yeela zãma wã: «Yãmb sã n yãe sawadg nin-taoore, tao-tao bala y yetame tɩ saag wata la yɩta boto. Yãmb yãe tɩ sobg kaood goabga, y yetame: zĩiga na n yɩɩ tʋʋlgo la yɩta boto. Zãmb dãmba, yãmb mii tẽng la saag neng n bak, bõe n maan tɩ yãmb ka bãng zamaan kãnga yẽ n bake? Bõe tɩ yãmb ka bãng n bak y toore sẽn ya tɩrga? Fo rabd naab nengẽ ne f bʋʋd-n-taaga, sor zugu, pĩn n tẽbe n põse; ka rẽ a vuuda foom n ta bʋʋda soab taoore, tɩ bʋʋda soab yõk foom n kɩs balgda, tɩ balgda pag f roogo. M yeta foom tɩ f kõn yi be, tɩ f ka yao samda zãnga, al ba tãmbr meng kõn pa ye.» Sega neb sẽn wa n togs yell ning sẽn pak Galile neb kẽere, a Pilat sẽn kɩt tɩ b zɩɩm kalm ne b maand dẽnna. T'a Zezi na n leok ba: «Yãmb tẽedame tɩ Galile nin-bãmba ra yaa yel-wẽn-maandb n yɩɩd b taaba bɩ? Ayoo! Mam yeta yãmba tɩ y sã n pa tuub y yel-wẽna, y fãa kida boto. La neb piig la a nii Siloe gaosga sẽn lʋɩ n bʋʋg n kʋ wã, yãmb tẽedame tɩ b beeg n yɩɩda Zerizalɛɛm neba fãa bɩ? Ayoo! Mam yeta yãmba tɩ y sã n pa tuub y yel-wẽna y fãa kiida kũum a woto buudu.» A Zezi wẽ-b la yelbũnd kãnga: «Ned n da sel kankang a pʋʋgẽ. A kẽngame n na n tɩ fãs a biis n pa yãe ye. T'a yeel pʋʋga koaada: ‹Yaa yʋʋm a tã marsã la m wat n baood kankanga biisi n pa yãetẽ ye. Bɩ f kɛɛg-a! Bõe yĩng t'a yãmbd zĩig zaalem?› Koaada leok-a lame: ‹Bas-y rõandã yɛs n gese, tɩ m tũ bok n gilg n gãneg birga. Daare a me na yaa n wom biisi; a pa wom marsã, y na kɛɛg-a.› » A Zezi ra karemda zãma wã pʋʋsg roogẽ, vʋʋsg daare. Ade, pag a ye n da be be n tar Sʋtãan a pʋgẽ, al yʋʋm piig la a nii. Sʋtãana ra koms-a lame t'a bũndg n ka tõe n doog a meng ba bilfu. A Zezi sẽn yãend-a, b bool-a lame n yeele: «Fo tɩlga ne f bãagã.» La b tẽega b nus a zugu. Zĩig pʋgẽ bala paga dooga a menga, n yaas n pẽgd Wẽnde. Pʋʋsga roog naab sũur puugame, a Zezi sẽn sãoog paga vʋʋsg daar yĩnga; t'a na n yeel zãma wã: «Dasem a yoob n be yãmb sẽn tog n tʋm, dẽn yĩnga wa-y dasem kãense tɩ b sãoog yã, la y ra wa sibr daar ye.» Tɩ Soaala leok-a: «Zãmb rãmba, yãmb ned kam fãa ka lokd a bõang bɩ a naf vʋʋsg daar n tɩ yũnug bɩ? Sʋtãana sẽn za pagã, a Abraam biigã, al yʋʋm piig la a nii, maana a wãna tɩ m pa tõe n zaag a gadr vʋʋsg daare?» B sẽn gom woto, yãnd yõka sẽn da wẽed-b no-koeemdã, la zãma wã yẽ sũur da nooma al wʋsgo, Wẽnd makr dãmb sẽn da maanda yĩnga. B le yeelame: «Wẽnd Rĩung wẽnda bõe, la m na n mak-a-la ne bõe? A wẽnda seneve tɩɩg biiga ned sẽn dɩk n bʋd a zẽedẽ, t'a yi n lebg tɩɩga tɩ yĩngr luiili soond a wilẽ.» B le yeelame: «M makda Wẽnd Rĩung ne bõe yɛsa? A wẽnda rabɩlle pag sẽn dɩk n nag zom moen a tã, t'a wuk zoma gilli.» A Zezi da pɩʋʋgda tẽn-bɛd la tẽn-bõonego n karemd neba la b rabd Zerizalɛɛm. Ned n sok a Zezi: «Sẽn na n fãag-bã, b sõor na n yɩɩ bilf bala?» Tɩ b leok-a: «Nadg-y pãnga n tũ digno-sẽka n kẽ. Tɩ maam n yet yãmba, neb wʋsg wat n makda b na kẽ la b kõn kẽ ye. Yir soab kẽ n sɛ n pag kʋɩlenga tɩ yãmb ket yɩnga n wẽed kʋɩlenga n tarẽ: ‹Soaala! Pak-y tɩ d kẽ!› A leokda yãmba: ‹M ka mi yãmb sẽn yitẽ ye!› Tɩ yãmb na n yaool n yeele: ‹Tõnd dɩɩme la d yũ ne yãmb wɛ! Yãmb karma neba d soy zutu.› T'a leok yãmba: ‹Mam yeta yãmba tɩ m pa mi y sẽn yitẽ ye. Kẽng-y n menem-y la y bas maam, yãmb fãa, sẽn tʋmd-b tʋʋm kɛga.› Na n lebga yãbr la yẽn wãbre, y sã n wa yãe a Abraam, la a Izaak, la a Zakoob la bãngdba fãa tɩ b zĩ Wẽnd Rĩungẽ tɩ b yaool n tus yãmb n yiis yɩnga. Neb na n yii yaang la taoore, goabg la rɩtgo, la b na n zĩnd n dɩɩ Wẽnd Rĩungẽ wã. La ade, sẽn ya-b poorẽ dãmba, kẽer na n lebga taoor dãmba, tɩ sẽn ya-b taoor dãmba, kẽer lebg poorẽ dãmba.» Wakat kãng bala, Farizẽ rãmb kẽer waa n yeel-b lame: «Yik-y n kẽng-y zĩig a to t'a Erod dat n kʋʋ yãmba.» B leok-b lame: «Tɩ yeel-y m Ba sɩlem soaba Waaga, ade, maam yiisda sʋtãamba la m sãoogd bãad-dãmb dũna la beoogo la da-yɩten-daara tɩ m sɛɛme. La ya m sẽn na n kell n kẽnd Zerizalɛɛm dũnna, beoog la ra-yɩta, tɩ bãngd ka tog n ki kɛɛnga tɩ pa Zerizalɛɛm ye. Zerizalɛɛm, Zerizalɛɛm! Kato! Foom n kʋʋd bãngdba! B sẽn tʋm b rãmb f nengẽ, fo labd-b la ne kuga. Naoor a wãna, la m tʋlgre n tigim f kamba wala no-yãang sẽn põgend a kamba a pɩgsẽ? La yãmb pa sak ye! Ges-y! B na n basa yãmb ne ro-vɩʋʋdo la mam yeta yãmba, y kõn le yãe maam, al tɩ tol n ta daar ning y sẽn wat n yeel-ma: ‹Sẽn wat-b Soaala yʋʋr yĩnga paam pẽgre!› » A Zezi kẽe Farizẽ rãmb kãsem a ye yiri vʋʋsg daare, n na n dɩ, la Farizẽ rãmba ra gũusd-b lame. La ade, kapʋg soab n da yɛs bãmb taoore. A Zezi leok-b la koɛɛga, b yeela karen-saam-dãmbã la Farizẽ rãmbã: «Vʋʋsg daare, tõe n sãooga bãad bɩ pa tõe?» Tɩ b fãa sĩnd b noore; t'a Zezi yõk bãada nug n sãoog-a, n kuls-a. B yaool n yeela Farizẽ rãmbã: «Yãmb sʋka ãnda biig bɩ a naaf n lʋɩt bulgẽ t'a pa na n yiis-a tao tɩ yaa vʋʋsg daare?» La b pa tõog n leok-b tɩ bũmb ye. A Zezi ra yãeeme tɩ b sẽn bool b rãmba tɩ b wa rɩ wã ra tũusda waoogr zĩisi, la b wẽ-b-la yelbũndi: «Ned sã n bool-f tɩ f wa pʋg-reem kibsa, da bao waoogr zĩig n gãand ye, daare a boola ned a to sẽn yɩɩd foom, la sẽn bool-a yãmb y yiibã na n wa yeela foo: ‹Yik ka tɩ m ba Zagl gãande.› Tɩ fo yik marsã n tɩ gãand poorẽ ne yãnde. Ned sã n bool foo rɩɩbo, tɩ gãand poorẽ zĩiga tɩ sẽn bool-a fooma sã n wa bɩ a yeel-fo: ‹M zoa! Wa-y taoor ka wɛ!› La woto na yɩ zu-zẽkr fo yĩnga. Tɩ sẽn zẽkd-a a menga, b na n sulg-a lame la sẽn sikd-a a menga b na n zẽk-a lame.» A Zezi yeela sẽn bool-a bãmb rɩɩbã: «Yãmb sã n mii n segl dɩɩb wĩndg bɩ yʋngo, bɩ y ra bool y zo-rãmba bɩ y ba-biisi, bɩ y roagdba bɩ y yags sẽn ya rakãagb ye tɩ b na n wa boola yãmb n lebse, tɩ rẽnna yɩɩ y rolbo. Yãmb sã n segl dɩɩbo, bool-y naong rãmba, wobse, kar-kegdo, zoeense. Woto yãmb sũur yita noogo tɩ b pa tar n na n lebs yãmb ye la y na paam dolbo nin-sõma vʋʋgr daare.» Sẽn da rɩt-b be wã ned a ye sẽn wʋm goama, yeela a Zezi: «Sũ-noog soaba la sẽn na n dɩ-a rɩɩb Wẽnd Rĩung wã!» La a Zezi leokame: «Dao a yembre n maan kibs kãsenga n segl dɩɩbo la a wilga neb wʋsg tɩ b wa, a raare. Kibsa raare, a tʋma a sõgne t'a yi n yeel sẽn bool b rãmba tɩ b wa rɩ tɩ fãa segl n sɛɛme. B fãa maana no-yend n kabs tɩ b ka na n tõog n wa ye. Pipi soaba yeelame: ‹M daa pʋʋgo, yaa pakr tɩ m tɩ ges; m kotame tɩ y kabs y zu-soaba n kõ-ma.› T'a to yeele: ‹M daa yikay piiga tɩ m dabda n na n tɩ mag b pãng n gese; m kotame tɩ f kabs f zu-soaba n kõ-ma.› T'a to yeele: ‹Mam peega pag marsã, dẽn n so tɩ m pa tõe n wa.› Sõgna sẽn kuli, a tɩ togsa a zu-soaba b fãa leokre. Yira soab sũur puugame t'a yeel a sõgne: ‹Yi tao n kẽng neba sɛk zĩigẽ la soy zutu, tall naong rãmba, wobse, zoeens la kar-kegdo n wa ne b ka.› Tɩ sõgna le wa yeele: ‹M zu-soaba, yãmb sẽn kõ noor ninga, d maana me la weer ketame.› Tɩ zu-soaba yeel a sõgne: ‹Kẽng so-raadẽ la so-bugsẽ, n wool neba tɩ b wa kẽ tɩ m doog pidi. Man yeta yãmba, tɩ b sẽn deng n bool b rãmba fãa ned ba a ye kõn lemb mam dɩɩba ye.› » Zãma kãsenga n da tũud a Zezi tɩ b wẽneg b poorẽ n yeel-ba: «Ned sã n wat mam nengẽ, a sã n pa kis a ba, n pa kis a ma, a paga, a kamba, a ba-biisi, la a tãopa la al ba a meng vɩɩm, a pa tõe n yɩ m karen-biig ye. La sẽn pa zɩt a pika n tũud m nao, pa tõe n yɩ m karen-biig ye. Ãnna n be yãmb sʋka, n dat n me a gaosgo n pa na n deng n zĩndi, n geelg a sẽn na n sãam ligd ninga la a ges a tara sẽn na n sek rooga meebo, t'a na n wa sɩng-a, n yaool n pa tõog n me-a n baase tɩ neb wa yãe n tar-a a laado: ‹Ad daoã sɩnga meebo la pãng paoogame t'a pa baas ye.› Bɩ yɛ naaba n bob tãpo n na n tɩ kaoog zabre ne naab a to, n pa na n deng n zĩnd n maag a menga n tagse a sã n tõe n maana raood ne tãb-biis tus piigã, tɩ naaba to wã yaool n segd-a ne tãb-biis tus pisi? A sã n mi t'a ka tõe, naab a to wã nan ket yɩɩga, a na tʋm ned t'a yõk sɛɛga n yẽs laafi yẽsgo. Woto me, yãmb sʋka ned ninga sẽn pa rat-a n bas a sẽn tar fãa, a ka tõe n yɩ mam tũud-n-taag ye. Yamsem yaa bõn-sõngo. La a sã n sãbge, bõe n na n le wa ne a noosem? A sẽn ka tog ne pʋʋgo t'a ka tõe n yɩ birga, a tɛk yaa lobr bala. Sẽn tara tʋb n dat n wʋm bɩ a wʋm.» Sẽn deegd-b yõor yaood la yel-wẽn-maandba fãa ra kolga a Zezi n na n kelg-ba. Farizẽ rãmba ne Sɛb-mitba da guglumdame n yetẽ: «Yãoo reegda yel-wẽn-maandba la a rɩta ne bãmba.» Yaa rẽ yĩnga la b wẽ-b yelbũndi: «Anna n be yãmb sʋka n tar pe-yãans koabga t'a ye meneme, t'a pa na n bas piswɛ la a wɛ wã weoogẽ n tɩ bao sẽn menem-a wã al n wa yãend-a? A sã n wa yãend-a, a rɩkd-a lame n palg a bãoko n kɩdemnẽ: la a sã n ta yiri, a boonda a zo-rãmb la a yagse n yeel ba: ‹Lagem-y maam n kɩdme tɩ m pe-yãanga sẽn da menem, m le yãend-a lame.› Woto me mam n yet yãmba, yel-wẽn-maand a ye tuubgu yĩnga, yɩta sũ-noog arzãnẽ n yɩɩd nin-sõma pis wɛ la a wɛ sẽn pa tar tuubg tʋʋmde. Bɩ yɛ paga, n tar a tãm-dãmb piiga t'a ye wa menem t'a pa na n yõgen fitila n pɩɩg a roogo n gẽes neere, al n wa yãend-a? A sã n yãee-a, a boonda a zo-rãmb la a yags pogse n yeel-ba: ‹Lagem-y maam n kɩdem tɩ m le yãee m tãmbrã sẽn da menem.› Woto-me, maam n yet yãmba: yel-wẽn-maand a yembre sẽn maan sɩbgre yĩnga, yɩta sũ-noogo Wẽnnaam malɛk rãmb sʋka.» B le yeelame: «Dao a ye n da tar a kamb a yi. Tɩ yaoã yeel a ba: ‹M ba, bɩ y pʋɩ y paoongã n kõ maam m dẽnna›; la ba wã weela a paoongã n kõ-ba. Sẽn yɩ bilf dẽ poore, yaoã wʋka a sẽn da tar fãa n tog sore, n kẽng tẽn-zãorgẽ, la bee a sãama a laoga fãa ne tʋʋm yoodo. A sẽn dɩ fãa tɩ sɛ, kom kãseng n lʋɩ tẽngã al t'a na n sɩng n yãe naongo. T'a kẽng n tɩ nok tẽnga nin-yende, t'a soaba tʋma a pʋtẽ t'a tɩ gũud a kurkuya. A ra tʋllẽ lame n dɩ tɩ-biisa kurkuyã sẽn da rɩtã, a me pids a pʋga, la ned ba a ye ra pa kõt-a ye. T'a na n bao yam n kõ a menga la a yeel a sũurẽ: ‹Dakõap a wãn n tʋmd m ba nengẽ tɩ rɩɩb sekd-b n keldẽ tɩ mam yẽ be ka n kiid kom! M na n yikame n kẽng m ba nengẽ, la m na n tɩ yeel-b lame: M ba, m beega Wẽnde la m beega yãmba. M pa le tog tɩ y bool-m tɩ y biig ye; bɩ y reeg-ma n tall-m wala y tʋʋm-tʋmd a yembre.› La a yikame n dabd a ba nengẽ. A sẽn waa n ket yɩɩga, a ba yãend-a lame, la a weoog kẽe-a lame; la a wudgame n tɩ yõk a biigã n mobg-a, n mok-a. Tɩ biiga yeel-a: ‹M ba, m ba, m beega Wẽnde la m beega yãmba; m pa le tog tɩ y bool-m tɩ y biig ye.› La ba wã yeela a sõgen-kamba: ‹Bɩ y kẽng tao n tɩ wa ne fuug ninga sẽn yaa neer n yɩɩd fãa n wa yeelg-a la y kõ-a nug-bĩng t'a pid a nug-bila la neooda t'a widi. Wa-y ne nag-bil nobdga tɩ d kʋ. D segl rɩɩbo n maan kibsa. Ade, m biiga ra kiime la a le vʋʋgame; a ra menemame la d le yãee-a lame.› Tɩ b na n sɩng n dɩ b rɩɩbo. Dẽ tɩ bi-kãsenga ra bee pʋʋgẽ; a sẽn lɛɛg n wa kolg yiri, a wʋma yɩɩla la reem rãmde. T'a bool sõgen a ye n sok-a: ‹Yaa bõe?› Tɩ sõgna yeele: ‹Yãmb yao wã leb n waame la y ba sẽn le paam n yãend-a ne laafi b kɩtame tɩ b kʋ nag-bi-nobdga.› La kẽema sũur puugame t'a zãgs t'a kõn kẽ zakẽ ye, t'a ba wã yii n yõk a sɛɛga. A leoka a ba: ‹Yaa al yʋʋm zãra la mam tʋmd y tʋʋma; mam nan pa tol n kɩɩs yãmb noor ye la y nan pa kõ maam bull a ye abada tɩ m deeg n maan kibs ne m zo-rãmb ye. La yãmb biig a to wã sẽn tɩ rɩ yãmb paoongã n sɛ, n lɛɛg n wa, yãmb kʋʋ nag-bi-nobdgã a yĩnga.› Tɩ ba wã yeele: ‹Foom, m biiga, fo bee ne maam daar fãa wɛ! La mam sẽn tar fãa, foo n so wɛ! La ra segdẽ lame tɩ d maan kibs la d kɩdem tɩ f yaoã ra kiime la a vʋʋgame, a ra menemame, la d le yãee-a lame!› » A Zezi le yeela b karen-biisi: «Arzɛk soab a ye n da tar arzɛk gũuda tɩ b wa luk a bãongo a zu-soaba nengẽ t'a rɩta a paoongã. T'a bool-a n yeele: ‹Fo maana bõe tɩ b gomd f yelle tɩ m wʋmnẽ? Bɩ f geelg m paoonga fãa tɩ m bãng f sẽn maan bũmb ninga, tɩ rũnna tɛka fo kõn le gũ m paoong yɛs ye.› Tɩ arzɛk gũuda yeel a sũurẽ: ‹Mam na n maana a wãn marsã, m zu-soaba sẽn yiisd maam tʋʋmdã? Koob bɩ? M ka tar gãb n kood ye. Bõsg bɩ? A yãnd tara maam. Be neere, mam mi m sẽn na n manega, tɩ b sã n wa yiis maam tʋʋmdã bɩ neb reeg maam b zagsẽ.› A boola sẽn da tar-b zu-soaba sama, a yembr yembre, n sok pipi soabã: ‹M zu-soaba samd bʋg la fo tara?› T'a leok: ‹Kaam dʋgd koabga.› T'a yeel-a: ‹Rɩk f sebre n zĩnd tao-tao n gʋls pisnu.› N le yeel a to: ‹La foo, fo tara bõe samde?› T'a leoke: ‹Ki pet koabga.› T'a yeel-a: ‹Rɩk f sebre n gʋls pisnii.› Zu-soaba pẽga arzɛk gũudã ne a wagdma fãa, a sẽn maan dabaara yĩnga. Tɩ zamaana kamb tara yẽesem b vɩɩmẽ, n yɩɩd vẽenem kamba. La mam yeta yãmba: rɩk-y y arzɛk yoogã n bao yel-sõmd ne nebã t'a sã n wa yõsg y nugẽ bɩ b reeg yãmb vɩɩm sẽn ka sɛɛb rotẽ wã. Sẽn maand-a pʋ-peelem ne sẽn paoode, a soab na n maana pʋ-peelem ne sẽn waooge; la sẽn maanda zãmb ne sẽn paoode, a soab maanda zãmb me ne sẽn waooge. Ãnda n ne y sẽn zãad tẽng zug bobellã tɩ yõod kaẽ wã, la a le saag n bobend yãmb sẽn be yõodo? Y ka bãng tẽng zug yõoda zãabo, yĩngr dẽnna la zãng zãnga. Dakõor ba a ye ka tõe n maan zu-soaben-dãmb a yiib yam ye; a yam yita ne a ye, n kẽed a to. A yam kẽeda a ye t'a sãbsd a to. Yãmb pa tõe n kẽ Wẽnnaam la m ba Naaba Ligd ye.» Farizẽ rãmba sẽn da nong ligdã ra kelgda rẽ fãa, la b laad a Zezi. Tɩ b yeel-ba: «Yãmb baood n na n yɩɩ nin-sõma neb nifẽ la Wẽnnaam nee y sũuri; tɩ sẽn be bark ninsaalb nifẽ, yaa wɩɩbdo Wẽnnaam taoore. A Zã sẽn waa n nan ka sɩng a tʋʋmna, Noora la Bãngdba sẽn da togsã n da yɛse. A Zã tɛka, b moona Wẽnd Rĩunga la lebga ned kam fãa nadg pãnga n wẽdg n kẽ. Yĩngr la tẽng sẽn loogd yaa naana n yɩɩd Noora gomd bil a ye sẽn na n lʋɩ vɩʋʋgẽ. Sẽn yiisd-a a paga n kẽed ne pag a to, maanda yoobo, la sẽn dɩkda pag a sɩd sẽn bas me maanda yoobo. Arzɛk soab n da be n yeelgd nufa la beren-dɩgr gĩs bãanes fu peelse, n dɩt a rɩ nood la a yãet naare. Naong soab a ye sẽn boond t'a Lazar n da gãe a sɩmannẽ; a Lazar yĩnga fãa ra yaa noada. A ra tʋlla rɩ-zeremsa arzɛk soaba sẽn basd tɩ rʋʋgd tẽnga n dɩ n yiis a kom, la ned ba a ye ra pa kõt-a ye; baasa meng ra wat n lelemda a noada. Naong soaba kiime tɩ malɛk rãmb dɩk-a n kẽng a Abraam nengẽ. Arzɛk soaba me kiime tɩ b mum-a. Arzɛk soaba waa n tara namsg wʋsg bʋg-tẽnga la a sẽn zẽk a nenga, a yãenda a Abraam yɩɩga la a Lazar ra be-la b naoẽ. Arzɛk soaba kelmame: ‹M ba, Abraam, zoe-y m nimbãanega la y tʋm a Lazar t'a tẽk a nug-bil koom n wa tosg m zelemdã tɩ bugma zabda wʋsgo.› A Abraam leokame: ‹M biiga, tẽeg tɩ f vɩɩm wẽnde, fo yãee naare la a Lazar yãee pɛt bala; marsã yẽ n paam yolsg kaane tɩ fo yẽ tar toogo. La rẽ pʋgẽ me, bog zulung n be yãmb ne tõnd sʋka, tɩ d sã n dat n yi ka n kẽng yãmb nengẽ, ka tõe ye, la ka tõe n yi yãmb nengẽ me n wa ka ye.› La arzɛk soaba yeelame: ‹M ba, Abraam, m yõkd-y sɛɛga tɩ y tʋm a Lazar m ba zakẽ tɩ m tara ba-b-biis a nu; a tɩ kõ bãmb kaseto tɩ b me ra wa namsga zĩigẽ ye.› La a Abraam leokame: ‹B tara a Moyiiz la bãngdba, bɩ b kelg-ba.› T'a yeele: ‹Ayoo! M ba, Abraam, sã n ya ned n yi kɩɩms sʋka n bʋʋg-ba n togse, b na maan sɩbgre.› T'a Abraam yeel-a: ‹Bada! B sẽn pa kelg a Moyiiz ne bãngdbã, ned vʋʋg kɩɩms sʋk me b kõn deeg ye.› » A Zezi yeela b karen-biisi: «Bũmb sẽn tõe n lub ned yel-wẽnd pʋgẽ kõn kong abada la na pak ned ninga sẽn wata ne bõn-kãnga. B sẽn dɩkd neer kugri n pid a soab kokore, n tak-a, n tus n lub mogrẽ, dẽ são a sẽn wat ne bi-bilf a ye kʋɩɩbgo. Bɩ y gũus y menga! F saam-biig sã n beeg bɩ f sagl-a, la a sã n tuubame bɩ f kõ-a sugri. La a beeg-f tɩ ta naoor a yopoe daar a ye, n lɛɛg n wa fo nengẽ naoor a yopoe n yeele: ‹Mam tuubdame,› fo kõt-a la sugri.» Tʋʋm-tʋmdba yeela Soaalã: «Paas-y tõnd tẽebo.» Tɩ Soaala na n yeele: «Yãmb da tarẽ tẽeb sẽn zemẽ seneve biiga, yãmb yetẽ la mugnugã: ‹Vik n tɩ sel mogra pʋga!› A na reegẽ yãmb noore. Yãmb sʋka, ãnd n tar-a a dakõore sẽn kood pʋʋg, bɩ sẽn gũud rũmsi t'a sã n lɛɛg n wa bɩ b yeel-a: ‹Wa zĩnd tao n dɩ?› A ka na n yeel-a sɩda: ‹Segl dɩɩb n kõ-ma tɩ m dɩ la m yũ tɩ f me na yaool n dɩ la f yũ?› A na pʋʋs a rakõora bark sɩda t'a reega a noor n maan a tʋʋmde? M ka tẽed ye. Woto me yãmb sã n maand b sẽn kõ-y noor tɩ y maan bũmb ningã bɩ y yeele: ka tõnd la zu-soaba teegr ye, zu-soaba ka rɩt tõnd yõod ye. D maana d sẽn tog n maan bala.» A Zezi ra togda sore. Yaa Zerizalɛɛm la b da rabda la b tũu Samari la Galile sʋka. B sẽn waa n kẽed tẽng a yembre, wãoob piig n wa n seg-ba, n yas yɩɩga, n zẽk b koɛɛg n kelme: «Zezi! Karen-saamba! Zoe-y d nimbãanega!» La a Zezi yãenda b nimbãanega n na yeel-ba: «Kẽng-y n tɩ wilg y mens maan-kʋʋdba.» La b sẽn wa n dabda, b tek n sãoogame. La bãmb nin-yend sẽn mik t'a paama laafi, lebg n waame, n zẽk a koɛɛg n pẽgd Wẽnnaam. A wõgemda a Zezi taoor n pʋʋs-b barka; yẽ yaool n da yaa Samari neda. La a Zezi yeelame: «Ka bãmb piigã n paam laafi bɩ? A wɛ wã yẽ bɛɛ? Yɩɩ nin-yenda bal n lebg n wa pʋʋs Wẽnnaam barka?» B yaool n yeela raoã: «Yik n kẽng, fo tẽeb fãag-f lame.» Farizẽ rãmb sẽn sok a Zezi n na n bãng Wẽnd Rĩungã wata ra-bʋre, b leok-b lame: «Wẽnd Rĩungã ka wat boto, tɩ neb nin neẽ ye. B kõn yeele: ‹A bee ka, bɩ a bee ka-sẽnẽ.› Ges-y, Wẽnd Rĩung zoe n be-la y sʋka.» B yeela b karen-biisi: «Daar n wate, tɩ yãmb na n tʋlg n yãe Ned Biiga zamaana daar a ye bala, la y kõn yãend ye. B wat n yeela yãmba: ‹B bee ka,› ‹B bee ka-sẽne,› ra kẽng-y, ra zoe-y n kẽng-y ye. Tɩ sɩda, wala saag sẽn tãoosd a bugum yaanga n wẽneg n yãg taoore, na n yɩɩ boto ne Ned Biigã, b likra raare. Yaa modgre tɩ b reng n nams wʋsgo, tɩ zamaan kãnga kamba yiis b buudẽ. Sẽn maan a Nowe wẽnnẽ n na n le maan Ned Biiga waoong wakato. Neb da rɩta b rɩɩbo la b yũuda, tɩ rapa peegd pagba, tɩ pagba rɩkd sɩdba tɩ tol n ta a Nowe sẽn kẽ a koglga pʋgẽ daare, la sa-kẽenga koom waame n dɩ-b zãng fãa. Na n yɩɩ wala a Lot wẽnnẽ. Neba ra rɩta rɩɩbo la b yũuda la b raadẽ la b send tɩɩse la b metẽ, la a Lot sẽn yi Sodom daare, saag nii bugum la kidibri tɩ rɩ-b zãng fãa. Ned Biiga me likr daare na n yɩɩ boto. Badaare, sẽn be-a a gaosg zugu t'a teed be roogẽ bɩ a ra sig n wʋk-b ye, la sẽn be-b pʋʋgẽ me ra leb b poorẽ ye. Tẽeg-y pag a Lot yelle. Sẽn na n bao-a a yõor fãagre, na n menes-a lame; la sẽn menesd-a a yõore, na le pam-a. Mam yeta yãmba, ba daar yʋngo neb a yiib na n naaga taab gãag a ye, tɩ b yãk a ye n bas a ye. Pagb a yiib kẽeda neere, tɩ b yãk a ye n bas a ye. [ Neb a yiib kẽngda pʋʋgẽ, tɩ b yãk a ye n bas a ye.]» Karen-biisa yeela a Zezi: «Na n yɩ yɛ, Soaala?» Tɩ b leoke: «Dɩgre sẽn be zĩig ninga, yibrendã tigimda be.» A Zezi wẽ-b-la yelbũndi n na n wilg tɩ yaa d sẽn na n pʋʋs daar fãa la d ra yɛ ne pʋʋsg ye: «Bʋʋd soab n da be tẽnga pʋgẽ n pa zoet Wẽnde, n pa mi ned waoogr ye. Pʋg-kõor a ye me n da be n wat a nengẽ daar fãa ne a koɛɛg: ‹Bɩ y bʋ maam ne m bʋʋd-n-taaga bʋʋd tɩrga n kõ-m bʋʋm.› A zãgsame tɩ kaoos la a yaool n wa yeela a sũurẽ: ‹Ba m pa zoet Wẽnd, tɩ m toog ka be ne neb me, baasg zãnga, pʋg-kõorã sẽn yaand maama yĩnga, m na bʋ a bʋʋdã n kõ-a bʋʋm t'a ra le wa pẽdgd maam woto daar fãa ye.› » Soaala le yeelame: «Wʋm-y bʋʋda soaba ne a wẽnema sẽn yeele. La nin-sõma wã sẽn kelemd wĩndg la yʋngã, y pa tẽed tɩ kaoosd me, Wẽnnaam kõn pa n ka rok b nin-sõma wã sũuri. M yet-y lame tɩ Wẽnd na rok-b sũuri. La Ned Biiga sã n wa tẽng zugu, b na n pʋd n yãee tẽeb bɩ?» A Zezi le wẽe yelbũnd a ye, neb kẽer sẽn da belgd b mense, n tẽed tɩ b yaa nin-sõma, n paoogd b taaba yĩnga: «Neb a yiibu n kẽ wẽnd doogẽ n na n pʋʋse: a ye da yaa Farizẽ, t'a ye ya fadg rɛɛsda. Farizẽ wã da yɛsa yĩngri n pʋʋsd woto a sũur pʋgẽ: ‹Wẽnnaam, mam pʋʋsda yãmb barka mam sẽn ka wẽnd neb a taab yĩnga, tɩ bãmb yaa yel-wẽn-maandba, wãgda, yoaadba; la m pʋʋsda m sẽn pa wẽnd sẽn deesd-b fadga me. Mam loeta m noor naoor a yiib dasma a yopoe-poe; mam weenda m paoong fãa piig piiga, n dokd a ye piig zug n kõt Wẽnde.› La faodg rɛɛsda da yɛsa yɩɩga n pa saagd n zẽnk a neng meng n tees yĩngr ye, la a ra wẽeda a yãoog n yetẽ: ‹Zoe-y m nimbãanega, tɩ m yaa yel-wẽn-maanda.› Mam yeta yãmba tɩ yãoo paamda sõmblem n kul a yiri la ka a to wã yẽ ye, tɩ sẽn zẽkda a menga b na n sik-a lame, la sẽn sikd-a a menga b na zẽk-a lame.» Neb n tall b kom-bõonego n waa a Zezi nengẽ tɩ b sɩɩs-ba. La b karen-biisa sẽn yãe woto, b ra zabda ne-ba. T'a Zezi kɩt tɩ kamba kolg la b yeelame: «Bas-y kom-bõonegã tɩ b wa maam nengẽ la y ra rig-b ye tɩ sẽn wẽnd b bãmba n so Wẽnd Rĩungu. Sɩd-sɩda mam yeta yãmba: Sẽn pa reegd-a Wẽnd Rĩungã wala bi-bilfu, yẽ soab kõn kẽ a pʋgẽ ye.» Rakãagr a ye soka a Zezi woto: «Karen-saamb sõngo, bõe la m na n maan sẽ n paam vɩɩm sẽn kõn sɛ?» T'a Zezi yeel-a: «Bõe yĩng tɩ y boond maam tɩ karen-saamb sõngo? Wẽnnaam b ye tãa la sõngo. Yãmb mii noya: ‹Da yo ye, da kʋ ye, da maan kaset zirẽ ye, waoog f ba la f ma.› » T'a yeel: «Mam deega noya fãa al m yãadmẽ.» A Zezi sẽn wʋm dẽnna, b yeel-a lame: «Bũmb a ye n paoog yamba: koos-y yãmb sẽn tar fãa n dɩk n pʋɩ naong rãmba tɩ y na paam arzɛk arzãna la y yaool n wa tũ maam.» Rakãagra sẽn wʋm woto, a sũur sãamame, t'a ra tara arzɛgs wʋsgo. La a Zezi sẽn yãe t'a sũur sãamdã, b yeelame: «Ad-y Wẽnd Rĩungẽ wã kõom toama ne sẽn tar-b arzɛka! Yʋgemd sẽn kẽed n sãag supĩim yõorẽ yaa naana n yɩɩd arzɛk soab sẽn kẽed Wẽnd Rĩungẽ.» Sẽn da kelgd-b bãmba leokame: «Sã n ya woto, ãnna n na tɩlge?» T'a Zezi leok: «Sẽn yɩɩd ninsaal pãng faasa ne Wẽnnaam.» A Piyɛr yeelame: «Ade tõnd basa d sẽn tar fãa n tũ yãmba.» T'a Zezi leok-a: «Sɩda, mam yetame tɩ ned kõn bas a yiri, a paga, a ba-biisi, a ba la a ma, a kamba, Wẽnd Rĩunga yĩnga, n ka paam sẽn yɩɩd rẽ al wʋsgo, zamaan kãnga pʋgẽ ye, la zamaan ning sẽn watã, yaa vɩɩm sẽn ka sɛɛbo.» A Zezi peega b Tʋʋm-tʋmdb piig la a yiibã n yi kɛɛnga la b yeel-b lame: «Ade, tõnd dabda Zerizalɛɛm, la bãngdba sẽn gʋls bũmb ninga fãa Ned Biiga poorẽ na n taasame, b na n yõk-b lame n kɩs bu-zẽmba tɩ b yaal ba, n pãb-b ne kaase, n tʋbs b neng ne kolkoodo, la b sã n wa pãb-b ne kaase, b na n kʋ-b lame la b na n vʋʋga dasma a tãab daare.» La Tʋʋm-tʋmdba pa tol n wʋm dẽ võor ba bilfu; gomd kãnga da yaa gom-binem bãmb yĩnga, tɩ b pa wʋmd a võor ye. A Zezi kolga Zeriko la ade, zoang n da zĩ sor kɩrenga n bõsdẽ. A wʋma zãma wã sẽn looda rãamde, t'a sok tɩ yaa bõe? Tɩ b yeel-a tɩ yaa Nazarɛt Zezi n loogde. T'a kelme: «Zezi, Daviid biiga, zoe-y m nimbãanega!» Sẽn da lʋɩ-b taoor n kẽndã da tãsd-a lame m yet t'a sĩndi tɩ yẽ me ra tãsd n yɩɩda: «Zezi, Daviid biiga, zoe-y m nimbãanega!» A Zezi yaasame n kõ noor tɩ b tall-a n wa. La zoanga sẽn kolge, b sok-a lame: «Fo ratame tɩ m maan-f bõe?» T'a leoke: «Soaala, sõng-y tɩ m yãe!» T'a Zezi yeel-a: «Bɩ f yãe, fo tẽeb fãag-f lame.» Wakat kãng bala, a nina pukame la a ra tũuda a Zezi n pẽgd Wẽnnaam. Zãma wã sẽn yãe rẽ, bãmb me kilsa Wẽnnaam yʋʋre. A Zezi kẽe Zeriko la b pɩʋʋg-a lame bala. La ade, b sega dao a yembre. Raoã boondame t'a Zase. A ra yaa sẽn deesd-b yõor yaooda naaba la rakãagre. A ra baood n na n yãe-la a Zezi n bãng-ba la zãma wã yĩnga a ra ka tõe n yãend-b ye t'a ra yaa ra-koɛɛga. A wudg n denga taoore n tɩ rʋ kũsga, n na n tõog n yãend-ba, tɩ b ra na n looga zĩ kãnga. La a Zezi sẽn ta a sẽn da beẽ wã, b zẽka b neng n yeel-a: «Zase! Sig-y tao-tao tɩ rũnna mam sigda yãmb yiri.» A Zase siga ne yãgbo n tɩ reeg b sãando ne sũ-noogo. Bɛɛba sẽn yãe woto, b ra tara guglungu n yetẽ: «Yaa yel-wẽn-maand yiri la bãmb tɩ yõg gãag-sobendo.» La a Zase yalsa yĩngr Soaala taoor n yeel-ba: «Dũnna tɛka, Soaala, m kõta naong rãmba m paoonga pʋɩ-sʋka la m sã n yẽega ned n deeg bũmbu, m na lebs a soaba naoor a naase.» La a Zezi yeelame: «Dũnna, fãagr siga yi-kãnga, t'a soaba me yaa Abraam biiga. Ned Biiga waame n na n bolg la a fãag sẽn meneme.» Neba ra ket n kelgd-b lame tɩ b le paas yelbũndi, tɩ b ra pẽnega Zerizalɛɛm la neba ra tẽedame tɩ Wẽnd Rĩunga na n wẽneg n puka wakat kãnga. Dẽ la b yeel-ba: «Na-biig a ye n da rabd tẽng sẽn zãrẽ n na n tɩ reeg naam la a lebg n wa. A boola a sõgen-kamb piiga n kõ-b sãnem gil piiga n yeel ba: ‹Bɩ y yõdg n mao tɩ bũmb roglge, tɩ m kẽng la m wa.› Ad-y naaba soolma rãmb ra kis-a-la waare. B tʋma neb n pʋgl, tɩ b tɩ yeele: ‹Tõnd ka rat tɩ yãoo dɩ naam n soogd-d ye.› A sẽn tɩ paam naam n lebg n wa, a tʋmame tɩ b bool sõgen-kambã n bãng ned kam fãa sẽn paam n doglg tɛka. Pipi soaba waame, la a yeelame: ‹M naaba, y sãnem gilga roka gil piiga.› T'a yeel-a: ‹Be neere! M sõgen sõngo, fo sẽn kell n maan pʋ-peelem ne bũmb bilf woto, deeg naam n zã tẽns piiga.› T'a yiib soaba wa ta n yeele: ‹M naaba, y sãnem gilga roka gil a nu.› T'a yeel-a: ‹Fo me reeg naam n zã tẽns a nu.› B nin-yend n waa n yeele: ‹Ad-y y sãnem gilgã, m loe-a-la ne peende n bĩng; tɩ mam da zoeta yãmba; tɩ yãmb yaa nin-toaaga; yãmb deegda y sẽn pa boble, la y rat n kẽeba y sẽn pa bʋdẽ.› La naaba leok-a lame: ‹Yaa ne f meng goam bala la m na bʋ f bʋʋdo, sõgen yoogo! Fo ra miime tɩ m yaa nin-toaaga, n deegd m sẽn pa boble la m kẽebd m sẽn pa bʋdẽ, la maana a wãna tɩ fo pa tɩ bobl m ligdã n kõ-ma? M lebgre m da kõn deegẽ m ligdã ne a roaglga?› La Naaba yeela sẽn da be-b be wã: ‹Bɩ y reeg a sãnema n kɩs sẽn tara piigã.› Tɩ b yeel-a: ‹Naaba, a zoe n tara piig wɛ!› T'a yeel: ‹Man yeta yãmba: sẽn tar-a, b kõt-a lame n paase la sẽn pa tar-a, b reegda a bilfrã a sẽn tarã. Sã n ya neb niyns sẽn da pa nong-b tɩ mam yɩ b naabã, bɩ y tall-ba n wa kood mam nifẽ ka.› » A Zezi sẽn gom woto n sɛ, b lʋɩɩ neba taoore n tees Zerizalɛɛm. B sẽn kolg Betani, tãng ning b sẽn boond tɩ Oliviye tãnga, a Zezi tʋma b karen-biis a yiibu: «Kẽng-y tẽnga sẽn tond y taoorã; y sã n ta be y na yãe tɩ b loee bõan-bil ned sẽn nan pa zombe; bɩ y lok-a n wa ne. Ned sã n sok yãmba: ‹Yaa bõe yĩng la y lokd-a› bɩ y leok a soab tɩ yaa Soaala n tar a tʋʋmde.» B sẽn kẽnge, b yãenda fãa wala b sẽn da togs-bã. B sẽn yet tɩ b na n lok bõan-bilã la b rãmb sẽn sok-ba: «Bõe yĩng la yãmb lokd bõan-bilã?» Tɩ b yeele: «Soaala n tar a tʋʋmde.» La b talla bõangã n wa kõ a Zezi. B palga b fut bõanga poore n kɩt t'a Zezi zombe. Neba ra yɛdgda b fut sora zugu tɩ bõanga tabd n lood. B sẽn waa n kolg Oliviye tãnga pende, b karen-biisa ka tɛkã, kɩdmame n sɩng n zẽkd b koɛɛg n pẽgd Wẽnnaam wẽnd makr dãmb fãa b sẽn yãenda yĩnga. B ra yetame: «Sẽn wat-a soabã, Dĩma sẽn wat Soaala yʋʋr yĩnga paam barka! Wẽnd laafi pid ne yĩngr dãmba yĩngr-yĩngr dãmb pid ne ziiri!» Farizẽ rãmb kẽer zĩnda zãma wã sʋka n yeele: «Karen-saamba, kɩt-y tɩ y karen-biisa sĩndi!» Tɩ b leoke: «M yeta yãmba, bãmb sĩnd yã, kugã n deegde!» A Zezi sẽn waa n kolg Zerizalɛɛm n yãend tẽngã, b yãb-a lame: «Fo sã n da tõogẽ la rũnna raarã n deegẽ koɛɛga sẽn ya laafi koɛɛgã! La ayoo fo keta likẽ. Daar n wate, tɩ f bɛɛba na n tũ bogdo n gilg-fu n sege, n pag-f zĩig zãnga, n wã foo, n lub f rota sara, n kʋ f kamba fãa la b kõn bas kugr t'a rogl a to zugu, f tẽn-peelem pugẽ ye. La rẽ yaa f sẽn pa bãng f sẽn paam gesga raarã!» A Zezi kẽe wẽnd doogẽ la b riga sẽn da be-b be n koosdẽ. B ra yet-b lame: «B gʋlsame: mam doog yaa pʋʋsg roogo tɩ yãmb dɩk-a n maan fãadba solgr zĩigã.» Beoog sẽn vẽeg fãa a Zezi ra karemda neba wẽnd doogẽ. Maan-kʋʋdba kãsem dãmba ne Sɛb-mitba la tẽnga karen-saam-dãmb ra baood n na kʋ-b lame. B yaool n da pa mi b sẽn na n maanega, t'a Zezi goama ra noogda neba sũuri tɩ b ra pa yɛɛd ne b kelgr ye. Daar a ye, a Zezi ra karemda neb wẽnd doogẽ n moond Koe-noogã tɩ maan-kʋʋdba kãsem dãmba la Sɛb-mitba la nin-kẽembã wa yeel-b wakat kãnga: «Bɩ y togs-do, tũu ne ãnda noore, la ãnda n kõ yãmb sor tɩ y maan y sẽn maandã?» T'a Zezi leoke: «Mam me sokd-y la bũmb a ye, bɩ y leok ma: A Zã sooba yii Yĩngr Soaba nengẽ bɩ ninsaalb nengẽ?» La b tagsa woto b sũurẽ: «Tõnd sã n yeel t'a yii Yĩngri Soaba nengẽ, a na n leokd-d lame tɩ bõe yĩng la d pa tẽ a Zã. D sã n yeel me t'a yii ninsaalb nengẽ, neba na n laba tõnd ne kuga tɩ b fãa sɩd da tẽedame t'a Zã yaa bãngda.» Woto b leokame tɩ b ka mi a Zã sooba sẽn yitẽ ye. T'a Zezi yeel-ba: «Mam me kõn togs yãmba sẽn tũ ne ned ninga noor tɩ m maand m sẽn maanda ye.» A Zezi yaool n wẽ-b la yelbũndi: «Dao a ye n sel a bugsuntung sõngo n bao koaadba n sar pʋʋgã la a bas n tog sore. Sora ra na n kaoosa bilfu t'a yaool n lɛɛge. Bugsuntunga womame n ta wobre, t'a tʋm a rakõore t'a tɩ reeg a keoore n wa kõ-a. Koaadba pãba rakõorã, n kuls-a zaalem. A le tʋma rakõor a ye, tɩ b pãb-a, n yaal-a, n kuls-a zaalem. Tɩ daoã le tʋm dakõor a to, tɩ b pogl yẽ me, n dig-a. Pʋʋga soab yeelame: ‹M maanda a wãna? M na n tʋma m bi-nongre tɩ daare b na reeg-a ne waoogre.› La koaadba sẽn yãee-a, b yẽsa ne taab n yeele: ‹Yãoo n na n wa reeg a ba wã paoongo, aya! D kʋ-a t'a paoonga lebg d rẽnna.› Tɩ b sɩd lob-a yãgra poore n kʋ-a. Marsã pʋʋga soab na n wa maan-b la bõe? A na wa, a na kʋ koaadba fãa la a rɩka pʋʋgã n gũnug neb a taaba.» Neba sẽn wʋm gomdã b yeelame: «Wẽnd na laas d ne yell kãnga!» A Zezi gẽen-b lame n sok-ba: «Sebr sõng gomd kãnga võor la bõe: ‹Tãn-metba sẽn daag kugr ning n basã, yẽ n lebg kug ma?› Ned ning fãa sẽn lʋɩ kug kãng zugu a na pogl a menga, la kugra sẽn na n lʋɩ n bʋʋg a soaba me, a na fẽdg-a.» Maan-kʋʋdba kãsem-dãmba la Sɛb-mitba da rat n yõk-b la wakat kãnga bala tɩ b ra miime tɩ yaa bãmb yĩng la a Zezi wẽ yelbũndã la b ra zoeta nebã. Lebga b gũus a Zezi marsã; tɩ b na n tʋm sũdum dãmba, sẽn belg tɩ b yaa nin-tɩrse, mik b baoodame n na n yõk a Zezi b goamẽ, n tɩ kɩs tẽnga soaalba la Komberã. Nin-bãmb n soke: «Karen-saamba, tõnd miime tɩ yãmb gomdame la y zãmsd ne pʋ-peelem bala, la y pa zoet ned ba a ye nif ye, y wilgda Wẽnnaam sor ne sɩd bala. D tara sor n yao Rom dĩma yõora yaood bɩ d pa tar sore?» A Zezi sẽn da mi b zãmbã leok-b lame: «Wilg-y maam wakɩ-koɛɛng a ye: ãnda nin-naande la ãnda yʋʋre la b gʋl a zugu?» Tɩ b yeele: «Rom naaba.» T'a Zezi na n yeel-ba: «Bɩ y lebs Rom naab a sẽn so, la y lebs Wẽnnaam, bãmb me sẽn so.» B ka tõog n yõk a Zezi b gomd ba a ye pʋgẽ la a Zezi leokra yɛɛs-b lame tɩ b sĩnd b noore. Sẽn yet-b tɩ kũum ka vʋʋgda neb kẽere, Saduseẽ rãmba, kolgame n sok woto: «Karen-saamba, ad-a Moyiiz sẽn kõ tõnd noor ninga: Ned sa n tar paga n wa ki n ka rog kamba, bɩ a ba-biiga deeg pagã n dog kamb a yĩnga. La ade, ba-biis a yopoe n zĩndi, tɩ kẽema tall paga n ki, t'a pa rog biig ye. Tɩ yiib soaba, la tãab soaba deeg pʋg-kõorã. Yɩɩ boto ne bãmb b yopoe wã fãa: b kiime n pa tol n dog kamb ye. Paga me waa n maana kaalem. Kũum vʋʋgr daare, paga na n yɩɩ ãnda paga: a zĩnda ne a yopoe wã fãa la?» A Zezi leok-b lame: «Zamaan kãnga kamba kẽeda ne pagba tɩ pagba rɩkd sɩdb rãmba. Neb niynsi Wẽnd sẽn gese wa b tog n paam n lebga zamaan paalga kamba la b vʋʋg-b kɩɩms sʋka, bãmb pa rɩkd paga, bãmb pa kuiis rao ye. Bãmb pa le tõe n ki ye tɩ b yaa wala malɛk rãmba la b lebga Wẽnnaam kamba b sẽn ya vʋʋgr kambã yĩnga. Kũum na vʋʋgã, yaa a Moyiiz n zãms rẽnna, Wẽnnaam sẽn lik-a tʋgrẽ wã wakato, a sẽn bool Soaala t'a Abraam Wẽnnaam, a Izaak Wẽnnaam la a Zakoob Wẽnnaam. Wẽnnaam ka kɩɩms Wẽnnaam ye, b yaa sẽn tar-b vɩɩm Wẽnnaam, tɩ b fãa vɩ bãmb taoore.» Sɛb-mitb kẽer yeelame: «Karen-saamba, yãmb leoka neere!» Ned me da pa le saag n sok-b bũmb ye. A Zezi yeel-b lame: «D yɩta a wãn n yeel tɩ Krista yaa a Daviid biiga? Ad-y yaa a Daviid meng n yeel a yɩɩla sebr pʋgẽ: ‹Zu-soaba yeela m Soaala: zĩnd-m dɩtgo tɩ m kɩt tɩ f bɛɛba zõr f taoore tɩ f palg f nao.› A Daviid boonda bãmb t'a Soaala, Krista sã n ya a Daviid Soaala, b yɩta a wãn n le ya a biiga?» B leoka b karen-biisa tɩ neba fãa kelgdẽ: «Bɩ y gũus y meng ne Sɛb-mitbã; b nongame n kẽnd ne fu-wogdo n baood neb waoogr sor zugu; b nonga taoore, pʋʋsg rotẽ; b nonga sʋka dɩɩb zĩigẽ. B rɩta pʋg-kõap paoongo, b nong n maana pʋʋs-wogdo: bãmb na n paama sɩbgr sẽn ya toogo.» A Zezi rooga b nenga la b yãee arzɛk rãmba sẽn da lobd ligdi wẽnd doog koglgẽ. B yãee pʋg-kõor me sẽn ya naong soaba t'a ningd bõones a yiibu. Tɩ b yeele: «Mam yeta yãmba tɩ sɩd-sɩda pʋg-kõora sẽn kɩs bũmb ninga ne a naongã yɩɩda bãmba fãa. Taaba yãka b sẽn pa tõe n dɩ n sɛ pʋgẽ n kɩse, paga kɩsa a fãa-fãa, a rɩɩb ligdi zãnga.» Neb kẽer da waa n gomda wẽnd dooga yelle tɩ b me-a-la ne kug-neeba, la b maneg-a-la ne te-sõma. A Zezi yeelame: «Daar n wate, tɩ yãmb sẽn ne wã, bũmb kõn kelle, kugr kõn dogl a to zug tɩ b pa tus-a n lub ye.» B sok-b lame: «Karen-saamba, rẽ na n taasa ra-bʋre? Bõe makr n na n wilg yell bãmba taasgo?» A Zezi leokame: «Gũus-y tɩ b ra wa tudg yãmb ye. Wʋsg na n dɩka m yʋʋre n wa yeele: ‹Maam la Krista!› ‹La wakata taame›; bɩ y ra tũ-b ye. Yãmb sã n wʋm tɩ b gomd zabr yelle la tẽng zũndugr yelle, bɩ y ra yɛɛs ye, tɩ yaa pakre tɩ rẽnd deng n zĩndi, la kõn wẽneg n yɩ dũni sɛɛb ye.» B le paasame: «Buud a ye n na n yik zabr ne buud a to, tɩ soolma a ye yik zabr ne soolma a to. Tẽnga na n miima miim-bãna, na n yɩɩ kom la bãas zĩig-zĩiga, tɩ yel-bãn sẽn wat ne pɛlen-yɩk la wẽnd makr dãmba maan saag zugu. La rẽ tɩ b reng n yõga yãmba, n nams yãmba, n wool yãmb n kẽng pʋʋsg rotẽ la bi-bees rotẽ, b na n ninga yãmb nanamsã la kombɛɛmba nusẽ, mam yʋʋr yĩnga. Yaa woto la y na n paam n kõ kaseto. Ning-y woto y yamẽ: da tags-y bõe la y leokda n yiis y meng yellẽ wã ye. Mam na n kõo yãmb noor la yam tɩ y bɛɛba no-koɛɛma wẽneg n sɛ. Bãng-y tɩ yaa y roagdba, y ba-biisi, y buuda neb, y zo-rãmba, n na n zãmb yãmba; b na n kʋʋ neb wʋsg yãmb sʋka. Neb fãa na n kisga yãmba mam yĩnga. Yãmb zoobg a yembr meng yaool n kõn menem yãmb zugẽ ye. Yaa y sũ-tõogã n na n wa ne y sɩɩsa fãagre! Yãmb sã n wa yãe tãb-biis kʋʋngo tɩ b yẽt Zerizalɛɛm, bãng-y t'a wãaba kolgame. Wakat kãnga, sẽn be-a Zɩɩde bɩ a zoe n tees tãmsa sẽnẽ. Sẽn be-b Zerizalɛɛm bɩ b yi n zãage, sẽn be-b weoogẽ ra lɛɛg n wa a pʋgẽ ye. Rasem kãens na n yɩɩ ra-beedo, yel-beeda sẽn gʋlsa fãa taasg raare. Na wʋm pagb niyns sẽn tʋte la sẽn yẽsemd b kamb wakat kãnga! Tẽnga na n wʋma pɛta, b na n dɩɩ beem ne buud kãnga. B na n kooda kẽer ne sʋʋse, b na n talla kẽer n kẽng yembdo, n sẽeg-b dũni wã fãa pʋgẽ tɩ Zerizalɛɛm lebg bu-zẽmba tẽnga n tãag b sẽn kõ-b yʋʋm niynsã sõor pidsgu. Yel-bãn na n zĩnda wĩntoogẽ, kiuugẽ ne ãdsa pʋgẽ; tẽng zugu, ninsaal fãa na n zĩi ne yɩɩre, n yɛɛsd mogrã la ko-wiisa rãamde. Yɛl niyns fãa sẽn na n lʋɩ nin-vɩɩsa tẽnsẽ na n yɛɛsa Adem biis fãa tɩ b kong pãnga tɩ sɩda saag zug bõn-zɩsda fãa na n vigsa b zĩigẽ. Dẽ marsã la b yãet Ned Biiga tɩ b zao sawadgo n wat ne pãng la ziir kãsenga. La yell kãens fãa sã n wa sɩngd taasgo bɩ y zẽk y zut n ges tɩ yãmb fãagr kolgame.» B wẽ-b-la yelbũndi: «Ges-y kankang la tɩɩs a taaba fãa. B sã n bilgd tobre, yãmb sã n ges bala y miime tɩ tʋʋlg kolgame. Woto me yãmb sa n wa yãend yɛl kãensa fãa taasgo, bãng-y tɩ Wẽnd Rĩung kolgda. Mam yeta yãmb, sɩd-sɩda, tɩ zamaan kãnga neba kõn looge tɩ yell bãmba fãa nan pa maan ye. Yĩngr la tẽng na n loogame, la mam goama kõn loog ye. Gũus-y y menga tɩ yão-beoogo, dã-yũur, yɩɩre la dũni wã zu-loeese da wa zɩsg yãmb sũuri tɩ Daara wa tiig yãmba, wa zulung ye; tɩ sɩda a na n lʋɩ sẽn be-b dũni wã fãa zugu. Dẽn yĩnga, gũus-y la pʋʋs-y, n paam pãnga n põs yel-beed ninga sẽn wate la y tɩ yaas yĩngri, Ned Biiga taoore.» Wĩntoogo, a Zezi ra zãmsda neba wẽnd doogẽ la yʋngo, b yit n kẽnda Oliviye tãnga zugu. Yibeoog pĩnda zãma wa ra le bʋʋgd-b la wẽnd doogẽ n kelgd b goama. Bur sẽn pa lobd bɩll kibsa, b sẽn boond tɩ paka, ra kolgame. Maan-kʋʋdba kãsem-dãmb ne Sɛb-mitba ra baooda b sẽn na n maan dabaar ning n kʋ a Zezi, tɩ b ra zoeta nebã. Mik Sʋtãan kẽe a Zɩɩda sũurẽ. Zɩɩda kãng la b sẽn boond tɩ Iskariyot tẽng daoã, la a ra yaa piig la a yiiba nin-yende. Yẽ n kẽng n tɩ yẽs ne maan-kʋʋdba kãsem-dãmba la wẽnd-do-gũudba nanamse, a sẽn na n maan seem ninga n yõk a Zezi n kɩs bãmba. B sũur yɩɩ noog wʋsgo tɩ b sed ne taaba tɩ b na kõ-a ligdi. A Zɩɩda sakame n da baood wakat ning bal a sẽn na n tõog n yõk-ba n kɩse tɩ zãma wã ka bãng ye. Bur sẽn pa lobd bɩlla raare, pak maoonga kʋʋb raar, taame. A Zezi tʋma a Piyɛr ne a Zã. B yeel-b lame: «Kẽng-y n tɩ segl-y pak kibsa tɩ d pam n dɩ a rɩɩbo.» Dẽn la b sok-ba: «Yãmb datame tɩ d segl yɛ?» Tɩ b leoke: «Ade, yãmb sã n kẽ tẽngã, y na n sega rao a ye sẽn zɩt koom ne yʋʋre, tũu-y raoã n tɩ kẽ a sẽn kẽed zak ningã. Y na n yeela yira soaba: ‹Soaala n sokd yãmba: doog bɛɛ tɩ m wa rɩ pak ne m karen-biisi?› La a na n wilga do-kãsenga sẽn dog a to zugu tɩ zu-kʋgsa zoe n maneg n tʋɩ n dɩgle; yaa be la y na n segl pak rɩɩbo.» B kẽngame, b yãee bũmba fãa wala b sẽn da yeele, la b segla pak. Wakat sẽn ta, a Zezi tɩ zĩndame n na n dɩ; b Tʋʋm-tʋmdba me zĩnda ne bãmba. B yeelame: «Mam tʋlga ne tʋlsem kãsenga n dɩ pak kãnga ne yãmba la m yaool n namse, tɩ mam yeta yãmba tɩ m kõn le rɩ pak a to n tãag Wẽnd Rĩungẽ soaba rɩɩb ye.» B reega rãama laoko n pʋʋs barka n yeele: «Deeg-y woto n pʋɩ taaba. Tɩ mam yeta yãmba: marsã tɛka, mam kõn le yũ bugsuntung sõnga biis rãam al n tol n ta Wẽnd Rĩunga waoongo.» B rɩka buri la b sẽn pʋʋs bark n sɛ, b kaoog-a lame n kõ b Tʋʋm-tʋmdbã n yeel: [«Wã yaa m yĩng m sẽn kõ yãmba, maan-y woto n tẽegd mam yelle.» B sẽn dɩ n sɛ, b maana boto me ne yõg-laagã n yeele: «Zood paalga yõgb yĩnga, ad laag ne m zɩɩm sẽn daag y yĩnga.] La ade, sẽn yõkda maam n na n kɩsã, a tʋmda a nug laagẽ ne maam. Ned Biiga na n looga wala b sẽn gʋls n dɩglã. La na pak rao ninga sẽn na n yõka bãmb n kɩsã.» La karen-biisa sɩnga taab sogsgo: bãmb sʋka ãnna n na maan yell kãngã? No-koeemd me n yik bãmb ne taab sʋka tɩ ãnda la kãsma la taoor saoba? A Zezi yeel-b lame: «Bu-zẽmba nanams rɩta naam b neba zutu la b ratame tɩ b neba bool-b tɩ b Yel-sõm-dãmba. Sã n ya yãmba ka tog n yɩ boto ye. Ad-y kãsma n tog n lebg yao-zʋʋga, tɩ sẽn dɩta naama lebg sõgne. Ãnda n pʋd n ya kãsma? Sẽn zĩ-a n dɩtẽ wã bɩ sẽn kɩt-a rɩɩbã? Ka sẽn zĩ-a n dɩtẽ wã laa? La ad maam, m bee yãmb sʋka wala sõgne! Yãmb la sẽn kell n zĩnd-b ne maam dar fãa m namsga pʋgẽ wã. Wala m Ba sẽn tar zĩig y yĩng b Rĩunga pʋgẽ, mam me tara zĩig y yĩnga. Yãmb na n naag maam n dɩ la y yũ m Rĩungẽ wã, la naam goeels la y na n zaoonde n kao Israyɛl sags piig la a yiiba bʋʋdo. Simo, Simo, Sʋtãana kosa yãmba n na n bal wala ki. La mam pʋʋsa f yĩnga tɩ f tẽeb ra koms ye la f tẽeba sã n n lɛɛg n wa a zĩigẽ, bɩ f keng f saam-biisa pɛlga.» A Piyɛr yeelame: «Soaala mam saka a naag yãmb bi-bees roogẽ la m ki ne yãmba.» T'a Zezi yeel-a: «Piyɛr, mam yeta foom tɩ no-raoog kõn kelem dũnna tɩ fo pa reng n kɩɩs naoor a tãab tɩ fo ka mi maam ye.» B le yeela b karen-biisã: «Mam sẽn waa n tʋm yãmba, tɩ y yi n pa zɩ korgo, waoog bɩ neoodre, bũmb paooga yãmb bɩ?» Tɩ b leok: «Bũmb ka paoog-d ye.» Tɩ b yeel-ba: «Marsã yẽ, sẽn tar-a korg bɩ a zɩ, sẽn tar-a waoog me boto la sẽn ka tar-a ligdi, bɩ a koos a fuug n da sʋʋga. Tɩ mam yeta yãmba, yaa modgre tɩ b sẽn gʋls mam poorẽ wã taase. La sẽn gʋlsa la woto: ‹B sõd-a lame n ning bi-bees sʋka.› la sɩda, bũmb ning sẽn togs mam poorẽ wã fãa na n pidsa zãnga. Wakat kãnga Tʋʋm-tʋmdba yeel-b lame: Soaala, ad sʋʋs a yiibu.» Tɩ b leok-ba: «Woto sekame.» B sẽn yi, a Zezi kẽnga Oliviye tãnga zugu, wala b sẽn mii n maand dasem kam; b karen-biisa tũ-b lame. B sẽn ta zĩ kãnga b yeelame: «Pʋʋs-y n da lʋɩ kʋɩɩbg pʋgẽ ye.» La b zãaga ne bãmba sẽn zems wala b sẽn lobgd kugri, la b yĩgimd n pʋʋsa woto: «M Ba, y sã n data, zãag-y maam ne wamd kãnga sẽn pid ne toogã la yãmb daabã n so taoore n yɩɩd mam dẽnna.» [ Wakat kãnga malɛk n yi arzãnẽ n lik ba n keng b raoodo. Kũum maasma bui-b lame tɩ b le wɩngd ne pʋʋsgo n yɩɩd pĩnda. B tʋʋlga kaooga wa zɩ-pɛla n dʋʋgd tẽnga.] B sẽn pʋʋse, b lɛɛg n tɩ bʋʋga b Tʋʋm-tʋmdba n tɩ mik tɩ b gõe, sũ-sãang keelem yĩnga. Tɩ b leok-ba: «Yaa wãna tɩ yãmb gõe! Yik-y la pʋʋs-y n da lʋɩ kʋɩɩbg pʋgẽ ye.» A Zezi sẽn da ket n gomda, neb kʋʋng waame la b sẽn boonda soab tɩ Zɩɩda, Tʋʋm-tʋmdb piig la a yiiba nin-yende, n da lʋɩ b taoore; a kolgame t'a na n mobg a Zezi. La a Zezi yeel-a lame: «Zɩɩda, foo n na n mobgd Ned Biiga n zãmb-b wɛ?» Sẽn da be-b ne a Zezi yãenda yell ninga sẽn na n maana. B yeelame: «Soaala, d kɛɛd-b la ne sʋʋg bɩ?» La nin-yend kɛ maan-kʋʋd kãsma sõgne n kẽbg a rɩtg tʋbre. La a Zezi gomame m yeele: «Bas-y boto.» La b sɩɩsa raoã tʋbre n sãoog-a. La b kedg n yeela maan-kʋʋdba kãsem-dãmba la wẽnd doog gũudba nanamse sẽn da wa bãmb yõkrã: «Yãmb waa ne sʋʋs la rasaba wala y babsda wagdre. La mam da yaool n bee ne yãmb beoog sẽn vẽeg fãa la y pa tol n sɩɩs-m ye la marsã yaa y wakato la lik naaba tõogr daare.» B sẽn yõk a Zezi b tall-b lame n kẽng maan-kʋʋd kãsma yiri. A Piyɛr da pʋgda yɩɩga. B tugla bugum zaka tẽnsʋka la b zĩndame t'a Piyɛr taa n zĩnd ne bãmba. La yem-poak a ye sẽn yãee-a t'a zĩ n woot bugma, a ges-a la ges toogo n yeele: «Dao kãnga me ra tũud-a lame.» T'a Piyɛr kɩɩs woto: «Paga, ad mam ka mi-a ye!» Sẽn yɩ bilf dẽ poore, ned a to n le yãee a Piyɛr n yeele: «Fo me yaa bãmba nin-yende.» T'a Piyɛr yeele: «Daoa, ka sɩd ye.» Sẽn kaoos na ta wakat a ye, ned n le wa n togsdẽ n dɩdgdẽ: «Sɩd menga, a zĩnda ne Raoã, a yaa Galile neda.» T'a Piyɛr leoke: «Foo waa! Mam ka m mi fo sẽn dat n yeel tɩ bũmb ning ye.» A sẽn da ket n gomda, no-raoog wẽneg n kelmame. Soaala wẽnega b poorẽ la b gesa a Piyɛr. A Piyɛr tẽega Soaala sẽn da yeel-a: «No-raoog kõn kelem dũnna tɩ f pa reng n kɩɩs naoor a tã tɩ f ka mi maam ye!» A Piyɛr yii yɩnga la a yãba yãb-toogo. Sẽn da gãd-b a Zezi wã ra laad-b lame, n pãbd-ba. B da luta b neng ne peende n sokd-ba: «Bãng ãnd n wẽ foo!» La b ra tʋʋda a Zezi tʋʋr buud fãa. Zĩig sẽn yẽege, tẽng nin-kẽemba, maan-kʋʋdba, kãsem-dãmba la Sɛb-mitba tigma taaba n kɩt tɩ b tall a Zezi n wa bʋʋd zĩigẽ. B yeelame: «Sã n ya foo la Krista, bɩ f togs-do!» A Zezi leok-b lame: «Mam togs yãmb me, yãmb kõn tẽ ye la m sok-y bũmb me y kõn leok-m ye. Marsã tɛka Ned Biiga na n zĩnda Wẽnd-Pãng-Soaba rɩtgo.» Tɩ b fãa yeele: «Dẽn yĩnga, fo yaa Wẽnnaam Biiga?» La b leokame: «Yãmb yeelame, maam la bãmba.» Tɩ b na n yeele: «Tõnd le tara kaset dãmb tʋʋmd bɩ, d meng wʋma a noor goama.» Bãmb fãa yikame n tall a Zezi n taa a Pilat taoore. La b sɩnga a Zezi rõadga: «Tõnd linga yãoo t'a rãmbd tẽngã n yet tɩ b tõdg noore, tɩ b ra yao Rom naaba yaood ye, la b baad tɩ yẽ meng la Krista-Dĩma.» A Pilat soka a Zezi: «Fo yaa Zʋɩf rãmb dĩma?» T'a Zezi leoke: «Foo n yeele.» A Pilat yeela maan-kʋʋdba kãsem-dãmb la zãma wã: «Mam pa ne nin kãnga sẽn beeg ne yell ning ye.» La bãmb da tara dɩdgre: «A rãmbda neba ne a karengã, tɩ b ra sak noor ye; la karengã maana Zɩɩde tõre, la sɩnga Galile n yaool n ta ka.» A Pilat sẽn wʋm dẽnna, a sokame tɩ daoã yaa Galile ned laa? La a sẽn bãng tɩ b yaa Erod soolem neda, a tʋm-b-la a Erod nengẽ tɩ yẽ me ra bee Zerizalɛɛm wakat kãnga. La a Erod sẽn yãe a Zezi, a sũur yɩɩ noog al wʋsgo, t'a ra tʋlla b yãeebo al daar zãra; a ra wʋma b yelle, la a ra tẽedame tɩ b na maan bõn-bãnd a ye t'a yãe. A sok-b-la bũmb wʋsgo la a Zezi pa leok ye. Maan-kʋʋdba la Seb-mitba ra bee be n dõt-b ne b pãng tɛka. La a Erod naaga tãb-biisã n paoog a Zezi, n yaal-ba, n yeelg-b naam fuug sẽn ya neer wʋsgo la a lebs-b-la a Pilat. Badaar tɛka, a Pilat ne a Erod sẽn da ya beema, lebga zoodo. A Pilat tigma maan-kʋʋdba kãsem-dãmba, ne gũudba nanamse la zãma wã n yeel-ba: «Yãmb talla nedã n wa kɩs maam n yeel t'a zẽkda neb zutu. Ade, mam sok-a la y nifẽ ka, la m pa yãe y sẽn ningda taal ne bũmb ningã, a sẽn sɩd maan ye. A Erod me pa yãe ye, tɩ b lebs-a t'a wa mam nengẽ. Nedã ka maan bũmb sẽn tog ne kũum ye. La sẽn ya woto wã, maan na n sɩbg-a lame n yaool n bas-a.» [ Pak kibs fãa a Pilat da yiisda nin-yend bi-beesa roogẽ.] La neba fãa lagma taab n kelem: «Bɩ f kʋ nin-kãnga la f yiis a Barabas n kõ-do.» B ra kẽesa a Barabas bi-bees roogẽ a sẽn kaoog zabr tẽng pʋgẽ la a sẽn kʋ ned yĩnga. A Pilat sẽn da rat n bas a Zezi wã le goma ne zãma wã. B fãa da kelemdame: «Ka-a pika! Ka-a pika!» T'a Pilat sok-ba, naoor a tãab soaba: «A maana bõe sẽn ya wẽnga? Mam yẽ pa yãe a sẽn maan yell ninga tɩ sek kũum ye. Dẽn yĩnga mam na n sɩbg-a lame n yaool n bas-a.» B ra wɩngda ne bʋʋre n kotẽ tɩ b ka a Zezi pika. Bʋʋra sɩd da yãngdame n paasdẽ. A Pilat kaoo bʋʋdã tɩ yɩ wala bãmb sẽn datã. A yiisa ned ning sẽn da rãmba tẽnga, n tol n kʋ ned tɩ b kẽes-a bi-bees roogã, a yiisa yẽndã roogo wala b sẽn da kote, n yaool n bas a Zezi tɩ b maan b sẽn date ne bãmba. B sẽn waa n tar a Zezi n dabda, b yõka Sirɛn daoa a yembre, a Simo, sẽn da kẽng weoogo n lɛɛg n watẽ la b zɩlg-a-la pika zɩɩbo, t'a Zezi be taoore t'a pʋgd poorẽ. Zãma kãseng meng n da tũudi. Pagb me n da naage n tar wiisgu la b pĩisd b yãoogo. A Zezi wẽneg n yeel-b lame: «Zerizalɛɛm pagba, da yãb-y maam ye, yãb-y y menga la yãb-y y kamba! Ade, daar n wate tɩ b na n yeele: Zu-noog rãmba la pig-kiiri la sẽn pa rog-ba, la sẽn pa yẽsem-b kamba! Wakat kanga, b na n yeela tãmse: bɩ y lʋɩ n bʋʋg-do! La b yeel kunkuba bɩ y sirg n bus-du! B sẽn maan da-maasr woto, na n yɩla a wãna ne ra-koeenga?» B talla bi-bees a yiib me n na tɩ lagem a Zezi n kʋ. B sẽn ta zĩig ning sẽn boond tɩ zu-wanga, b kaa a Zezi pika; b kaa bi-bees a yiiba me, a yembre, b rɩtgo, a yembre, b goabga. A Zezi yeelame: «M Ba, kõ-y b sugri tɩ b ka mi b sẽn maand ye.» Tãb-biisa rɩka a Zezi futã n poees n pʋɩ taaba. Zãma wã ra yɛsa be n getẽ. Tẽnga kãsem-dãmba ra laad-b lame n yetẽ: «A fãaga a taaba, bɩ a fãag a menga, a sã n ya Krista, Wẽnd sẽn tũus a soaba.» Tãb-biisa me ra laad-b lame; b kolgame n kõ-b rã-miisga la b maandẽ: «Fo sã n ya Zʋɩf rãmb dĩma bɩ f fãag f meng f toore!» Walg a ye n da be b zugẽ tɩ b ra gʋls woto: «Yãoo yaa Zʋɩf rãmb dĩma.» Bi-bɛɛg a ye sẽn da luund pika, da tara a Zezi tʋʋr n yetẽ: «Fo ka Krista laa? Fãag f menga, la f fãag-do!» Tɩ bi-bɛɛg a to wã zab-a n yeele: «Fo me ka zoet Wẽnd laa? Ges tɩ f paama sɩbgr wa bãmba. Sã n ya tõndo, zemsame, tɩ d paama sɩbgr ninga sẽn tog ne d yel-manesem; la bãmba, b pa tar b toorẽ yell ye.» La a yeelame: «Zezi, tẽeg-y m yelle, yãmb sã n lɛɛg n wa n na n dɩ y naama.» A Zezi leok-a lame: «Sɩd-sɩda, mam yeta foom, rũnda bala, fo na n zĩnda arzãnẽ ne maam.» Da zemsa wĩnto-sʋka, la zĩig fãa lebga lik tẽng zugu, n tãag zafare. Wẽnd dooga peen-lillã kẽega a tẽnsʋka. A Zezi moona ne b koɛɛg pãnga: «M Ba, m lebsda m vɩɩsma yãmba.» B sẽn yeel woto, b kiime. Tãnsoaba yãe yɛla fãa sẽn maana, a pẽga Wẽnnaam la a yeelame: «No-koeemd ka ye, raoã da yaa nin-sõngo!» Kʋʋnga me sẽn da tigim n na n gesã, yãenda yella sẽn baas to-to, tɩ b na n lɛɛg la b tood b yãoogo. La a Zezi zo-rãmbã, la pagb niyns sẽn yãag-b al Galile, bãmb fãa ra yɛsa yɩɩg n getẽ. Tẽng kãsem-dãmba sʋka, dao a ye n da be n boond t'a Zozɛf. A ra yaa nin-sõngo, nin-tɩrga, a ra pa lob a toog bʋʋda kaoobẽ, la a taaba manesmẽ ye; a ba yir da yaa Arimati, Zʋɩf rãmba tẽng a yembre, la a ra gũuda Wẽnd Rĩung waoongo. A bʋʋga a Pilat n tɩ kos a Zezi yĩnga. A sik-b la pika zugu n pil-b ne peende, n tɩ gãneg-b yaoog a ye sẽn kɩbg pĩigẽ tɩ b ra nan pa mum ned a pʋgẽ ye. Da yaa pak kibsa seglgo daare, sibr sẽn nan sɩngde. Pagb niyns sẽn yi Galile n wa ne a Zezi wã, yãaga a Zozɛf n tɩ bãng yaooga zĩiga, la b sẽn mum a Zezi to-to, la b lɛɛg n tɩ segla yũ-nooda kaam la tɩdarã. La Sibra daare, bãmb vʋʋsame wala noora sẽn date. At daar yibeoog pĩnda, pagba kẽnga yaoogẽ wã ne tɩdarã la yũ-noodã b sẽn da seglã. B taa n mikame tɩ b ra bilga kugrã n zãag ne yaooga noore. B kẽeme la b ka yãe Soaala Zezi yĩnga ye. B ra ka mi b sẽn na n tags bũmb ninga yell kãng poorẽ ye. La ade, dap a yiibu sẽn yer fut sẽn pɩnd waa n yaasa bãmb taoore. Pagba yɛɛsame n kõs b neng tẽnga. La rapa yeel-b lame: «Bõe yĩng la y baood kɩɩms sʋka sẽn kẽnda ne vɩɩma? B ka le be ka ye! B vʋʋgame! Tẽeg-y b sẽn da yeel bũmb ninga tɩ b nan ket Galile: ‹Yaa pakre tɩ b yõk Ned Biiga n kɩs yel-wẽn-maandba tɩ b ka-b pika, tɩ b vʋʋg dasma a tãab daare.› » La Wakat kãnga pagba sɩd tẽega a Zezi goama. Pagba yii yaoogẽ n lɛɛg n tɩ togs rẽ fãa (Tʋʋm-tʋmdb) piig la a ye wã la neb a taaba. Da yaa Magdala Mari, a Zan, a Mari, a Zak ma wã. Pagb a taaba sẽn da tũud bãmba, bãmb me togsa Tʋʋm-tʋmdba boto. La b pa tẽ b goama n yet tɩ b zʋbsdame. A Pɩyɛr yikame n wudg n kẽng yaoogẽ wã la a sẽn tɩ zõond n gese, a yãee pɛɛla bal sẽn da rɩge. La a lɛɛg n kula yiri, n yɛɛsd wʋsgo ne bũmb ninga sẽn maana. Badaare me, karen-biis a yi n da rabd tẽng a ye sẽn boond tɩ Emmayus; tẽnga ra zemsa wakata yiib kẽnd ne Zerizalɛɛm. Yaa bũmb ning fãa sẽn maam pẽem-pẽema la b ra gomd ne taaba. La bãmb sẽn da wa n yẽsdẽ la b wẽed no-koɛɛma ne taaba, a Zezi kolgame n kẽnd ne bãmba. La yɩɩ wa b ra luda b nina tɩ b ka tõe n bãng-b ye. A Zezi yeel-b lame: «Yãmb kẽndame la y yẽsd bõe yell ne taaba?» Tɩ b na n yaas ne sũ-sãanga. La bãmb nin-yend sẽn boond t'a Kleopas, leok-b lame: «Yãmb y ye bala n be Zerizalɛɛm n zɩ bũmb ning sẽn maan dasem kãensã?» T'a Zezi yeel-a: «Bõe yelle?» Tɩ b yeel-ba: «Nazarɛt Zezi wã yelle. Bãmb sẽn yɩ bãngda, pãng soaba b goamẽ la b tʋʋmnẽ, Wẽnnaam la neba fãa taoore. Tɩ maan-kʋʋdba kãsẽm dãmba la nanamsã yõk ba n kɩs tɩ b kao b kũum bʋʋdo n paalg-ba, n ka-b pika. Tõnd da tẽedame tɩ bãmb n da na n fãagẽ Israyɛl, la ade, yaa dasma a tã rũnna, la yell bãmba maan yã. Yaa sɩda, pagb kẽer sẽn be tõnd sʋka n waa n yɛɛs tõnd al wʋsgo; b yeelame tɩ b kẽnga yaoogẽ wã tõd-beoogo, n pa tɩ yãe-b ye, tɩ b lɛɛg n wa yeel tɩ malɛk rãmba m n lik bãmba, n togs tɩ b vɩɩme. Tɩ tõnd neb kẽer kẽng yaoogẽ wã n tɩ yãe bũmba fãa wala pagba sẽn togsã, la b mengã, b sɩd pa yãe-b ye.» T'a Zezi na n yeel-ba: «Yam kɩds rãmba, y sũura maaga zãnga tɩ y pa tẽed bãngdba sẽn yeel ye. Da ka pakr tɩ Krista nams woto n yaool n kẽ b pẽgr pʋgẽ bɩ?» La b sɩnga ne a Moyiiz n saag bãngdba fãa n vẽnegd bũmb ning fãa sẽn gʋls bãmb poorẽ. B sẽn waa n kolg tẽng ning b sẽn da rabdã, a Zezi maana wa b rat n yõsg n taa taoore. La neb a yiiba pẽdg-b lame n yetẽ: «Bɩ y kell n pa ne tõndo tɩ lebga zaabre la wĩndg rat n kẽeme!» A Zezi kẽeme n zĩnd ne bãmba. La b sẽn da zĩi n dɩt ne bãmba, b rɩka buri n pʋʋs bark pʋʋsgo, n kaoog n kõ-ba. Dẽ marsã la b nin yaool n puki tɩ b na n bãng ba; la a Zezi menema b nifẽ. Tɩ b yeel taaba: «Tõnd sũura ra tʋʋla wa bugum b sẽn waa n sõsd ne tõnd sor zugu la b wilgd tõnd sebr sõnga võore.» Wakat kãng bala b yikame n leb Zerizalɛɛm la b tɩ mika piig la a ye wã, ne b tũud-n-taase, sẽn tigim taaba, la sẽn yeel-ba: «Sãmbg ka ye, Soaala vʋʋgame; b lika b meng a Simo!» Karen-biisa me wẽneg n togs-b la bũmb ning sẽn maan sor zugu ne bãmb b yiibã la b sẽn yɩlẽ n bãng a Zezi, bura kaoogr wakato. Bãmb sẽn da gomd woto ne taaba, a Zezi meng waa bãmb sʋka la b yeel-b lame: «Laafi zĩnd ne yãmba!» La b yɛɛsame tɩ rabeem kãseng yõk-ba tɩ b ra tẽedame tɩ yaa kɩɩma la b sẽn ne wã. A Zezi yeel-b lame «Yaa bõe tɩ yãmb yɛɛsdẽ la yaa bõe tagsgo n wat yãmb sũurẽ? Ges-y mam nus la m nao. Sɩd yaa maam! Bɩ y sɩɩs-m n ges; kɩɩm pa tar nemd la koaba wala yãmb sẽn ne tɩ m tara ye.» La b sẽn yeel woto b wilga b nus la b nao. B sẽn da ket n pa tẽed, sũ-noog keelem yĩnga, la b ket n yɛs ne pɛlen-yɩka, a Zezi yeel-b lame: «Yãmb tara bũmb ka sẽn na n dɩ bɩ?» B kɩs b la zĩm sẽedgo la sɩ-vaka tɩ b reeg n dɩ bãmb taoore. T'a Zezi yaool n yeel-ba: «Yaa woto la mam sẽn da togs yãmb, m sẽn da waa n ket ne yãmba, da yaa modgre, tɩ b pids sẽn gʋls bũmb ning fãa mam poorẽ, a Moyiiz noora sebrẽ, bãngdba sɛbẽ la yɩɩla sebrẽ.» Dẽ poore a Zezi vẽnega b yam tɩ b wʋm sebr sõng võore. La b yeel-b lame: «B gʋlsa woto tɩ Krista na n namsame la b vʋʋg kɩɩms sʋka dasem a tã daare. Gʋlsame yɛsa tɩ tuubg ning sẽn wat-a ne yel-wẽna sugrã, bɩ b moon-a bãmb yʋʋr yĩnga ãndunĩ rãmba tẽnsẽ la sɩngda Zerizalɛɛm. Yãmb tara rẽ fãa kaseto. La ade, mam na n tʋma yãmba m Ba sẽn kãab yamb a soabã. La yãmba, kell-y n yaas-y tẽnga pʋga al tɩ b wa sudg-y yĩngri pãnga.» A Zezi peeg-b lame n tees Betani sẽne la b zẽka b nus n ning-b barka. La b sẽn waa n ningd-b barkã, b bas-b lame n dʋ yĩngri. Bãmb wõgemdame n waoog-ba la b leba Zerizalɛɛm ne sũ-noog kãsenga, la wakat buud fãa b ra bee wẽnd doogẽ wã n pẽgd Wẽnde. Sɩngr wẽnnẽ, Gomd da pĩnd n beeme; la Gomda ra bee ne Wẽnnaam; la Gomda ra yaa Wẽnnaam. Al sɩngr wẽnnẽ, b ra bee ne Wẽnnaam. Bũmb fãa gilli yaa bãmb n naane, la bõn-naand ba a ye ka be tɩ ka bãmb n naan ye. Vɩɩma ra bee bãmb pʋgẽ, la vɩɩm kãng ra yaa ninsaalb vẽenem. La vẽenem yãga lik sʋka, la likẽ dãmba pa reeg vẽenema ye. Dao a yembre n zĩndi, Wẽnnaam sẽn da tʋme, t'a yʋʋr boond t'a Zã. Yẽ waame n na n kõ kaseto, n na n kõ vẽenem kaseto, tɩ neb fãa tõog n tẽ a kaset yĩnga. Yẽ da ka vẽenema meng ye, yẽ waame n na n kõ vẽenem kaseto. Gomdã n da ya Vẽenem meng menga, sẽn vẽnegd ninsaal fãa sẽn dog tẽn zugu. Bãmb da bee dũniya pʋgẽ, bãmb n pʋs n naan dũniya la dũni wã ka bãng-b ye. Bãmb waa b soolem pʋgẽ, la b neba ka reeg-b ye. Neb niyns fãa sẽn deeg-b bãmba, neb niyns fãa sẽn tẽ-b bãmb yʋʋre, b kõ-b-la tõogo tɩ b lebg Wẽnnaam kamba. Sã n ya bãmb menga, b rogame tɩ ka tũ ne zɩɩm, bɩ ne yĩng pãnga, bɩ ne ninsaal tʋlsem ye, tɩ yaa Wẽnd n dog bãmba. La Gomda lebga neda, la b waa n zĩnda tõnd sʋka, la d yãenda b ziirã, ziir ninga Ba sẽn kõ b Bi-yende sẽn pid ne sõmblem la sɩda. A Zã kõo bãmb kaseto, n yetẽ: «Yaa bãmb yell la m gom yã: ‹Sẽn wat-b mam poorẽ wã, ad-b sẽn lʋɩ m taoore tɩ b renga maam n beẽ.› » N-ye! Yaa bãmb pidungẽ wã, la tõnd fãa me paam kũun woo kũuni. Yaa a Moyiiz n kõ Noorã, la sõmblem la sɩda yita a Zezi Krista nengẽ. Ned ba a ye nan pa yãe Wẽnnaam ye, la b Bi-yenda bala, sẽn be ne bãmba, yãee bãmb n kɩt tɩ neb bãng-ba. Ad-a Zã kasetã sẽn yɩ a soaba, Zʋɩf rãmba sẽn waa n tʋm maan-kʋʋdba ne b sõangdba tɩ b tɩ sok-a: «Yãmb yaa ãnna?» A Zã togsame, a pa zãgs leokr ye, a togs-b lame: «Mam ka Krista ye.» Tɩ b sok-a: «Yãmb la a bõe? Yãmb la a Eli bɩ?» T'a yeele: «Mam ka a Eli ye.» «Yãmb yaa bãngd bɩ?» T'a leok tɩ ayoo! Tɩ b le sok-a: «Yãmb la ãnna, tɩ d paam n leok sẽn tʋm-b tõnda? Yãmb yeta me tɩ y meng la a bõe?» T'a Leoke: «Mam yaa sẽn moond-a weoogẽ wã koɛɛga: ‹Maneg-y Soaala sore,› t'a yɩ tɩrga wala bãngda Izayi sẽn yeele.» B sẽn da tʋm b rãmba ra yaa Farizẽ rãmba. La b leb n sokame: «Fo sã n ka Krista, n ka a Eli, n ka bãngd me, yaa bõe yĩnga la fo sood neba?» La a Zã leokame: «Sã n ya maam, mam soda neb koomẽ, la ned a ye n be yãmb sʋka, tɩ yãmb ka mi-b ye, yaa bãmb n na n wa mam poorẽ, la mam pa tog n lok b gãndalsa gĩs ye.» La yell-kãensa fãa maana Betani, Zʋrdẽ kʋɩlg rʋʋnde, a Zã sẽn da be zĩig ning n sood nebã. Vẽkembeoogo, a Zã yãe a Zezi sẽn da wat a nengẽ la a yeelame: «Ad Wẽnnaam Pe-bilã, ad sẽn yẽesda dũni yel-wẽnde. Yaa bãmb yelle la m gom yã m sẽn yeele: ‹Ned a yembre n pʋgd m poorẽ, la a yɩɩda maam, tɩ b renga maam.› La mam da ka mi-b ye la yaa sẽn na yɩlẽ tɩ b bãng-b Israyɛl tẽn-peelmẽ, la mam wa yã, n sood neb koomẽ.» A Zã kaseta yɩɩ woto: «Mam yãee a Vʋʋsem Sõng sẽn zĩnd yĩngr n sigd wa walle, n wa yaas b zugu. La mam da ka mi-b ye, la sẽn tʋm b maam tɩ m wa so neb koomẽ wã ra yeel-m lame: ‹Fo sẽn na n yãend a Vʋʋsem Sõng sẽn sig n yaas ned ninga zugu, yaa yẽ soab n sood neba ne a Vʋʋsem sõngo.› La mam yãeeme, la m kõta kaseto, tɩ bãmb la Wẽnnaam Biiga.» Vẽkẽmbeoog yɛsa, a Zã le waa a zaamẽ zĩigã ne a karen-biis a yiibu. La a sẽn yãee a Zezi sẽn looda, a yeelame: «Ad Wẽnnaam Pe-bila.» La Karen-biis a yiiba wʋma a goama, la b tũ-la a Zezi. La a Zezi wẽnega b poorẽ n yãe tɩ b pʋgd-ba tɩ b sok-ba: «Yãmb baooda bõe?» Tɩ b leoke: «Rabbi, karen-saamba, yãmb yiir bee yɛ?» Tɩ b yeel-ba: «Wa-y n ges-y.» La b kẽngame, la b yãee Zezi sẽn da be zĩig ninga la b paa ne a Zezi badaare, la dẽ tɩ zĩig zoe n maagame. Neb a yiib n da wʋm a Zã goama n pʋg a Zezi. Bãmb nin-yend la a Andre, a Simo ba-biiga. Yẽ n reng n seg a Simo n yeel-a: «Tõnd yãee Krista, Wẽnd Nedã.» La a tall-a lame n kẽng a Zezi nengẽ; la a Zezi ges-a lame n yeel-a: «Foom la a Simo, a Zonas biiga, b na bool-f-la a Kefas» — dat n yeelame tɩ Kugri. Vẽkembeoogo, a Zezi sẽn yet tɩ b rabda Galile, b sega a Filip n yeel-a: «Tũ maam!» A ra yaa Bɛtsayid neda, a Andre la a Piyɛr tẽnga neda. La a Filip sega a Natanayɛl n yeel-a: «A Moyiiz sẽn gom a soab yell Noora sebrẽ tɩ bãngdba me togsã, tõnd yãend-b lame: ya a Zezi, Nazarɛt Zozɛf biiga.» La a Natanayɛl leokame: «Kari! Sẽn be bark tõe n yii Nazarɛt bɩ?» T'a Filip yeele: «Bɩ f wa ges!» La a Zezi sẽn yãee a Natanayɛl t'a wat b nengẽ, b goma a yell woto: «Ad Israyɛl biig menga sẽn ka tar zãmb ye.» T'a Natanayɛl yeel: «Yãmb bãnga maam yɛ?» T'a Zezi leoke: «A Filip sẽn da waa n nan ka bool fooma, fo sẽn da wa n be kankanga tẽngrã, mam yãee foom.» T'a Natanayɛl yeele: «Karen-saamba, yãmb yaa Wẽnnaam Biiga, yãmb yaa Israyɛl Dĩma.» La a Zezi leokame: «Yaa mam sẽn yeel tɩ m yãe-f-la kankanga tẽngre la fo tẽeda, la fo na yãe sẽn yɩɩd boto.» La b paasame: «Sɩd-sɩda, mam yeta yãmb tɩ y na n yãee yĩngr sẽn pake tɩ Wẽnnaam malɛk rãmba dʋʋd la b sigd Ned Biiga zugu.» La dasma a tãab dẽ poore, yikãadem n zĩnd Kana, Galile tẽnga, la a Zezi ma da bee be. La b boola a Zezi ne b karen-biisã tɩ b wa kibsã. La rãam waa n paoogame t'a Zezi ma yeel-ba: «B ka le tar dãam ye!» T'a Zezi leoke: «Paga, tɩ f yet tɩ m maan bõe? Ad-m wakat nan pa ta ye.» La b ma yeela rakõapã: «Bɩ y maan b sẽn na n yeel-y tɩ y maan fãa.» La kug sĩms a yoobe n da tẽg beenẽ, tɩ Zʋɩf zakẽ, koom sẽn na n waas ka tog n kong ye. Sĩng fãa da reegda ko-yʋy a yiib bɩ a tãabo. A Zezi yeela rakõapã: «Pids-y sĩmsa ne koom.» La b pids-b lame n sãdge. T'a Zezi yeel-ba: «Bɩ y toog marsã n tɩ kɩs sẽn geta rɩɩba yelle.» La b tallame n tɩ kɩs-a. La yẽ soaba sẽn lemb kooma sẽn lebg rãama — a da ka mi rã-kãng sẽn yitẽ ye, la dakõapa sẽn toog kooma, da miime — a boola pʋg-sɩdã, n yeel-a: «Ned kam fãa rengd n waa ne rãam sẽn noome tɩ neba sã n yũ n tɩge, bɩ a yaool n wa ne rã-faasgã, la yãmb yẽ kell n yiisa sẽn noome, n ta marsã!» Dẽ yɩ-la a Zezi pipi wẽnd makre, b sẽn maan Kana, Galile tẽnga. Bãmb puka b zɩɩre la b karen-biisa fãa tẽ-b lame. Dẽn poore, b siga Kafarnaom ne b ma, ne b saam-biisi, ne b karen-biisi la b tɩ zĩnda be dasma a wãn bala. Zʋɩf rãmba pak ra kolgame t'a Zezi kẽng Zerizalɛɛm. La b yãee wẽnd doogẽ wã neb sẽn da be be n koosd lolse, piisi ne wala la b zĩi n tekd ligdi. La b rɩka wĩ n maan kaase n dig bãmb fãa ne b niis la b piis n yiis wẽnd doogẽ. La b sẽega ligd tɛkdba ligdi, n tus b teedã n lubi. La b yeela sẽn da koosd-b wala: «Yiis-y fãa ka, la y ra rɩk m Ba roogã n maan teed koosg roog ye.» La karen-biisa tẽega sẽn gʋlsã: «Yãmb dooga nonglem na n dɩ-m la zãnga.» Zʋɩf rãmba yeel-b lame: «Yãmb sẽn maan woto wã, bõe n wilgd tõnd tɩ y tara rẽ tõogo?» T'a Zezi leok-ba: «Wã-y wẽnd do kãnga la dasma a tãab pʋgẽ, m na me-a n yalse.» Tɩ Zʋɩf rãmba leok-ba: «Yaa yʋʋm pis naas la a yoob pʋgẽ la b me wẽnd do-kãnga tɩ yãmb tõe n me-a n yals dasma a tãab pʋgẽ?» Mik a Zezi da gomda b menga yĩng sẽn ya wẽnd dooga yelle. Woto me la b sẽn waa n vʋʋg kɩɩms sʋka, b karen-biisa tẽegame tɩ b ra yeel-b la rẽ la b tẽe sebr sõng la gomdã b sẽn da togsã. A Zezi paa Zerizalɛɛm pak kibsa yĩnga. Neb wʋsg tẽ b yʋʋre, b sẽn yãe wẽnd makr dãmb b sẽn maana. A Zezi yẽ da ka teeg neba woto ye, tɩ b ra mii bãmb fãa sẽn ya-la, b ra ka baood ninsaal kaseto, tɩ bãmb meng ra mii sẽn be ninsaal pʋgẽ. Ned n da be n boond t'a Nikodɛm; a yʋʋr ra yii Zʋɩf rãmba sʋka la a ra yaa Farizẽ. A wa-la a Zezi nengẽ ne yʋngo, n yeel-ba: «Karen-saamba, tõnd miime tɩ Wẽnd n tʋm yãmb d nengẽ tɩ y wa zãms-do. Sɩda ned ba a ye ka tõe n maan wẽnd makr niyns yãmb sẽn maandã, Wẽnnaam sã n ka be ne a soab ye.» La a Zezi leokame: «Sɩd-sɩda, mam yeta yãmba tɩ ned sã n pa le rog yĩngr dogma, a pa tõe n yãend Wẽnd Rĩung ye.» La a Nikodɛm yeelame: «Sẽn lebga nin-kẽema na n le roga wãn wãna? A tõe n le kẽe a ma pʋgẽ n le rog bɩ?» La a Zezi leokame: «Sɩd-sɩda, mam yeta yãmba, tɩ ned sã n ka rog ne koom la ne Vʋʋsem, a ka tõe n kẽ Wẽnd Rĩung pʋgẽ ye. Yĩng sẽn dogde, yaa yĩnga, la Vʋʋsem sẽn dog a soab me tara bãmb wẽnego. Bɩ y ra yɛɛse, m sã n yeel-y tɩ yaa modgre tɩ y le roge, yĩngr dogma. Sobg fõta a sẽn date, fo wʋmda a sẽn vũudi la f ka mi a sẽn yitẽ la a sẽn dabd zĩig ning ye. Yaa boto ne a Vʋʋsem sẽn dog a soaba.» La a Nikodɛm leok-b lame: «Dẽ yɩta a wãna?» A Zezi yeelame: «Yãmb yaa Israyɛl karen-saamba, n yaool n ka wʋmd rẽnna? Sɩd-sɩda, mam yeta yãmba, tɩ tõnd gomda d sẽn mi, la d sẽn yãe bũmb ningã kaset la d kõta. La yãmb ka reegd d kaseta ye. Yãmb sã n pa tẽed-ma, mam sã n togsd yãmb tẽng zug yelle, y yɩta a wãn n tẽ-ma, m sã n wa togsd yãmb yĩngr yelle? La ned ba a ye ka rʋ arzãna, sã n ka sẽn zĩnda arzãna n sigi: Ned Biigã. Wala a Moyiiz sẽn zẽk waafa weoogẽ wã, woto me yaa modgre tɩ b zẽk Ned Biigã, sẽn na yɩlẽ tɩ sẽn tẽ-a bãmba, bɩ a tũ bãmb n paam vɩɩm sẽn kõn sɛ. Wẽnnaam sẽn nong dũniya al wʋsg yĩnga, b kõ b Bi-yende, sẽn na n yɩlẽ tɩ sẽn tẽed-b bãmba da menem ye, la b paam vɩɩm sẽn kõn sɛ. Wẽnnaam pa tʋm b Biiga dũniya tɩ b wa kao dũi bʋʋd ye, b tʋm-b lame tɩ dũni paam fãagre, bãmb maasem yĩnga. Sẽn tẽed-a bãmba, b ka bʋʋd yẽ soab bʋʋd ye; la sẽn pa tẽed-a bãmba, a bʋʋd zoe n bʋʋme, t'a pa sak n tẽ Wẽnnaam Bi-yend yʋʋr ye. La bũmb ninga sẽn wata ne bʋʋda la woto: Vẽenem waa dũni pʋgẽ, la ninsaalb yam kẽe lika n yɩɩd vẽenem tɩ b tʋʋma ra yaa yoodo. Ned ning fãa sẽn maand wẽnga, kisa vẽenem la a pa wat vẽenemẽ ye t'a tʋʋma wẽnem na n wa puki. La ned ninga manesem sẽn tũud sɩda, yẽ soab wata vẽenemẽ, tɩ b bãng vẽenega, t'a tʋʋma tʋma Wẽnd maasmẽ.» Dẽ poore a Zezi kẽnga Zɩɩde ne b karen-biisã la b zĩnda be ne bãmba n kõt neb soobo. A Zã me ra sooda neba Aeno, Salim baobgo, tɩ kooma ra yaa wʋsg beene tɩ neb wʋsg ra watẽ t'a sood-ba. La rẽ wẽnd tɩ b ra nan pa kẽes a Zã roog ye. La a Zã karen-biisa yika no-koeemd ne Zʋɩf a ye, sooba poorẽ. La b wa a Zã nengẽ n yeel-a: «Karen-saamba, dao ninga sẽn da be-b ne yãmb Zʋrdẽ kʋɩlg rʋʋnde tɩ yãmb kõ a soab kasetã, ad-y yẽ me kõta soob marsã tɩ neb fãa zoet n dabd a nengẽ.» La a Zã leokame: «Ned ka tõe n paam bũmb, tɩ pa yĩngr soabã n kõ-a ye. Yãmb meng yaa m kaset tɩ m da yeelame: ‹Mam pa Krista ye, la b tʋma maam tɩ m deng bãmb taoore.› Sẽn so-a pagã, yẽ la pʋg-sɩda; la pʋg-sɩd zoa sã n yɛs n kelgdẽ, noogda a sũuri a sẽn wʋmd pʋg-sɩda koɛɛgã. Mam sũ-noog la boto, la m sũ-noog pida zãnga. Yaa modgre tɩ bãmb zẽke tɩ mam leb poorẽ. Sẽn yit-a yĩngri zʋʋga fãa; la sẽn yit-a tẽng zugu yaa tẽng zug neda, la a gomda tẽng zug yɛl bala. Sẽn yit-a yĩngri, yaa yẽ me sẽn yãe la a sẽn wʋm bũmb ninga kaseto la a kõta, la ned ba a ye pa reegd a kaset ye. La sẽn deegd-a kaseto, yẽ me maanda kaset n paas tɩ Wẽnnaam yaa sɩda. Wẽnnaam sẽn tʋm a soaba, togsda Wẽnnaam goama, la Wẽnnaam pa kõt yẽ soab a Vʋʋsem Sõng bilf bal ye. Ba nonga Biiga, la b basa bũmb fãa bãmb nugẽ. Sẽn tẽed-a Biiga tara vɩɩm sẽn kõn sɛ, la sẽn pa tẽed-a Biiga, a kõn paam vɩɩm ye, yaa Wẽnnaam sũ-puur bala n paad ne-a.» Farizẽ rãmba wʋmame t'a Zezi paamda karen-biisi la b sooda neb wʋsgo n yɩɩd a Zã, — yaool n da ka a Zezi meng n da sood nebã, yaa b karen-biisã. — A Zezi sẽn bãng rẽ, b yi Zɩɩde n leb Galile. La da yaa modgre tɩ b pɩʋʋg Samari. B waa n taa Samari tẽng a ye sẽn boond tɩ Sikar; yaa be la a Zakoob da kõo a biig a Zozɛf pʋʋgo. Bulg me la a Zakoob ra tuk be. A Zezi ra kẽn n yɛɛ fãa; b waa n zaoonda bulga kogre. Ra yaa wĩnto-sʋka. Samari pag a ye n wa n na n toog koom. A Zezi yeel-a lame: «Toog koom n kõ-m tɩ m yũ.» Dẽ tɩ b karen-biisa ra kẽnga tẽng pʋgẽ n na n tɩ ra rɩɩbo. La Samari paga sok-b lame: «Yaa wãna tɩ yãmb sẽn ya Zʋɩfã kot maam koom, maam ne m ya Samari pagã?» (Sɩd me Zʋɩf rãmba la Samari rãmba da ka sõsd ne taab ye.) La a Zezi leok-a lame: «Fo sã n da miẽ Wẽnd kũuni, la f miẽ sẽn yet-a fooma: Kõ-m koom tɩ m yũ, fo meng n na n kosẽ, la yaa ko vɩɩg la a na n kõẽ foo.» Tɩ paga yeele: «M zu-soaba! Yãmb pa tar bũmb sẽn na n toog kooma, la bulga zulmame, woto wã yãmb na n yãee ko-vɩɩga yɛɛnẽ? Yãmb yɩɩda d ba a Zakoob sẽn kõ tõnd bul kãnga, tɩ bãmb meng ne b kamb la b rũmsa yũ a kooma laa?» La a Zezi leokame: «Sẽn yũud-a ko kãnga, ko-yũud na le yõk-a. La sẽn yũud-a koom ninga mam sẽn na n kõ-a wã, ko-yũud kõn le yõk-a abada; la koom ninga mam sẽn na n kõ-a wã na n bula a pʋgẽ n tãoos vɩɩm sẽn kõn sɛ koom.» La paga yeelame: «Soaala, kõ-y maam ko kãnga tɩ ko-yũud da le yõk ma, tɩ m da le wat n toogd koom ka ye.» Tɩ b na n yeel-a: «Kẽng n tɩ bool f sɩda la f lɛɛg n wa.» La paga leokame: «Mam ka tar sɩd ye.» T'a Zezi yeel-a: «Fo bee bʋʋm n yet tɩ f ka tar sɩd ye. Tɩ fo paama sɩdb a nu, la fo sẽn be ne a soab marsã wã, ka f sɩd ye; woto wã fo togsa sɩda.» La paga yeelame: «Soaala, mam miime marsã tɩ yãmb yaa bãngda. Tõnd yaab rãmb waooga Wẽnnaam tãn-kãnga zugu, la yãmb yetame tɩ yaa Zerizalɛɛm bala la zĩig ninga b sẽn tõe n waoog Wẽnnaam.» La a Zezi yeelame: «Paga, bɩ f tẽ maam, ad sã n yɩ bilfu kõn le yɩ tãn-kãnga zugu bɩ Zerizalɛɛm, la y na n waoog Ba ye. Yãmb waoogda y sẽn pa mi. Tõnd waoogda d sẽn mi, tɩ fãagr yita Zʋɩf rãmba nengẽ. La sã n yɩ bilfu — la zoe n taame — sẽn waoogd-b Wẽnd sɩdem-sɩdem, na n waooga Ba b yamẽ la ne pʋ-peelem, tɩ yaa waoogr a woto buudu la Ba rata. Wẽnnaam yaa yam bala, Dẽn yĩnga sẽn waoogd-b bãmbã, bɩ b waoog-ba b yamẽ, ne pʋ-peelem.» La paga yeel-b lame: «Mam miime tɩ Wẽnd Nedã, b sẽn boond a soab tɩ Krista, sã n wa, b na n zãms-d-la bũmba fãa.» La a Zezi yeelame: «Mam meng sẽn gomd ne fooma, yaa maam la bãmb bala.» Karen-biisa me lɛɛg n waame, la b pɛleng yɩkame t'a Zezi ra gomda ne paga; la ned ba a ye yaool n pa saag n sok-ba: «Bõe la y baooda?» bɩ «Bõe la y leokd pagã?» Paga basa a yʋʋrã n zoe n kẽng tẽng pʋgẽ n tɩ yeel tẽnga rãmba: «Wa-y n ges rao sẽn wilg maam m yel-manesem fãa, sãnd ka bãmb la Krista?» La tẽnga rãmb sɩd yiime n tees b sẽn da be zĩig ningã. Karen-biisa yaool n da yet-b lame: «Karen-saamba, bɩ y rɩ!» Tɩ b yeel-ba: «Yãmb ka mi rɩɩb ning m sẽn na n dɩ wã ye!» La Karen-biisa soka taaba: «Ned n tall rɩɩb n wa kõ-b bɩ?» T'a Zezi yeel-ba: «Mam rɩɩbo, la m maan sẽn tʋma maama yamleoogo la m baas b tʋʋmda zãnga. Ka yãmb n yete: ‹Keta kiis a naase tɩ ka-kɛɛr ta?› La mam yeta yãmba: zẽk-y y neng n ges pʋto, b pelgame n ta kɛɛbo. La sẽn tigsd-a zoe n paamda a yaood, la a tigsda vɩɩm sẽn kõn sɛ yĩnga, la woto bʋta la tigsda naagda taab n kɩdemnẽ. Sã n ya yãmba, yaa yelbũnd kãnga la sɩda: sẽn bʋta wã toore, sẽn tigsda wã me toore. Mam tʋma yãmb tɩ y tigsi y sẽn pa tʋm n namsẽ. Neb a taab n yãee yaamse tɩ yãmb dokd b namsga yõodo.» Tẽnga pʋgẽ, neb wʋsgo tẽeme, paga gomd kãnga yĩnga: «A togsa maam m sẽn maan fãa.» La Samari neba sẽn wa b nengẽ wã kos-b lame tɩ b zĩnd ne bãmba; tɩ b na n pa be dasma a yi. La sẽn tẽ-ba, a Zezi gomdã yĩng, yɩɩ wʋsgo. B ra pus n yeta pagã: «Ka le ya f goama yĩng la tõnd tẽed ye tɩ tõnd meng d toore wʋma bãmba la d bãnga vẽenega tɩ bãmb la dũni Fãagda.» Dasem a yiib kãens sẽn looge, a Zezi yii Samari n kẽng Galile. Bãmb meng n da yeele tɩ bãngd zɩ n paam pẽgr a tẽngẽ ye. Baasgo b sẽn ta Galile, Galile rãmb deeg-b lame la rẽ yaa b sẽn yãend a Zezi sẽn maan fãa Zerizalɛɛm kibsa wakato, tɩ bãmb me ra waa kibsã. B leba Kana, b sẽn tek kooma t'a lebg rãama zĩig ningã. Nin-naab a ye biiga n da bẽede, Kafarnaom tẽnga. Nin-naaba sẽn wʋm t'a Zezi yii Zɩɩde n wa Galile, a bʋʋg-b lame n kos-b tɩ b wa sãoog a biigã tɩ bãaga ra lebga toogo. La a Zezi yeelame: «Yãmb sã n pʋs n pa yãe bõn-bãna, la wẽnd makre y kõn tẽ bada!» La nin-naaba leok-b lame: «Wa-y bala tɩ m biiga nan ka loog ye.» A Zezi yeel-a lame: «Kul tɩ f biiga vɩɩme.» A tẽe a Zezi goama la a rɩka sor n kuiisẽ. A sẽn waa n sigd Kafarnaom, a tees n sega a sõgen-kamba la bãmb togs-a lame t'a biiga ket n vɩɩme. La a sẽn sok-b tɩ yaa wakat bʋg la a sãoog yã, b leok-a lame tɩ yaa zaame, wakat a yopoe soaba la a yĩn-wɩngra sig yã. Biiga ba tẽegame tɩ yaa wakat kãng la a Zezi yeel-a t'a biiga vɩɩme, la yẽ ne a zak rãmb fãa tẽe Soaalã. Woto la wẽnd makr a yiib soaba a Zezi sẽn maane b sẽn yi Zɩɩde n lebd Galile. Dẽ poore, Zʋɩf rãmb kibs a ye n zĩnd Zerizalɛɛm t'a Zezi kẽng. Bull a ye n be Zerizalɛɛm, n pẽ piisa dignoor, n bond ne Zʋɩf rãmb goam tɩ Bɛtzata, tɩ zãn a nu gũbg-a. La bãad-dãmb kʋʋngo: zoeense, wobse, põya, n da gãe zãna tẽngre n gũud kooma rãmbgo, tɩ Soaala malɛk a ye n da miẽ n sigd wakat-wakat, bulla pʋga, n dãmbd kooma la ned ninga sẽn da reng-a n kẽ, kooma rãmbg poore, ra paamd-a laafi zãnga, ba a bãaga sẽn da ya a soaba. Dao a yembr n da lʋɩ bãaga al yʋʋm pistã la a nii. La a Zezi sẽn yãe t'a gãe la b ra mi t'a yika bãaga al daar zãra, b yeel-a lame: «Fo rat n sãoogame bɩ?» Tɩ raoã leoke: «Soaala m pa tar ned sẽn na n kẽes maam bullẽ wã kooma rãmbg wakat ye, mam sã n yet tɩ m na n kẽ fãa, ned a to n dengd maam.» T'a Zezi yeel-a: «Yik la f rɩk f gãagã n kẽne.» La bãada wẽneg n sãoogame, n yik n dɩk a gãaga n kẽnda. Yaool n da yaa vʋʋsg daare. La Zʋɩf rãmba yeela raoã sẽn da paam laafi wã: «Dũnna yaa vʋʋsg daare, fo ka tõe n tʋk f gãag ye.» La daoã leok-b lame: «Ned ninga sẽn sãooga maama yeel-m lame: ‹Yik n dɩk f gãag n kẽne.› » Tɩ b sok-a: «Sẽn yeel-a foo tɩ f yik n dɩk f gãagã n kulã, a soab la ãnna?» La sẽn paam-a laafi wã ra ka mi sẽn ya a soab ye, t'a Zezi ra soos n yi neb kʋnga sẽn da be be wã sʋka n looge. A Zezi yaool n wa yãe-a-la wẽnd doogẽ n yeel-a: «Ad-f sẽn paam laafi marsã, gũs n da le maan yel-wẽnde tɩ yell wa pak foo n yɩɩg pĩnd ye.» La daoa zoe n tɩ togsa Zʋɩf rãmba tɩ ya a Zezi n sãoog-a. Yaa rẽnd yĩnga la Zʋɩf rãmba da zabd ne a Zezi tɩ b maana woto vʋʋsg daare. La a Zezi yeel-b lame: «M Ba ket n tʋmda al ne marsã, tɩ mam me tʋmnẽ.» La rẽ yĩnga Zʋɩf rãmba ra tʋlla wʋsgo n kʋ-ba, tɩ ka vʋʋsga daar noor bal la b ra tõdgda, b ra paasame tɩ Wẽnd la bãmb Ba menga, n zengd b meng ne Wẽnde. La a Zezi yeel-b lame: «Sɩd-sɩda, mam yeta yãmb: Biiga ka tõe n maan bũmb b toor ye, sã n ka b yãenda b Ba tɩ b maanda. Ba sẽn maan bũmb ningã, bõn-kãng la bãmb me maanda. Ba nonga Biiga, la b wilgda Biiga b sẽn maand fãa, la b na n wilg-b-la tʋʋm sẽn yɩɩd woto menga al tɩ y pɛleng na n yɩke. Wala Ba sẽn vʋʋgd kɩɩmse n leb n kõt-b vɩɩm, woto me Biiga kõta vɩɩm b sẽn dat a soaba Ba meng ka bʋʋd ned ba a ye bʋʋd ye, b basa bʋʋd fãa ne Biiga, sẽn na yɩlẽ tɩ ned fãa waoog Biiga, wala b sẽn waoogd Ba. Sẽn ka waoogd-a Biiga, ka waoogd Ba sẽn tʋm Biiga ye. Sɩd-sɩda, mam yeta yãmb tɩ sẽn kelgd-a mam goama, la a tẽed sẽn tʋma maama, yẽ soab tara vɩɩm sẽn kõn sɛ la b kõn bʋ a soab bʋʋd ye; yẽ soab yii kũumẽ n kẽ vɩɩm pʋgẽ. Sɩd-sɩda, mam yeta yãmba: wakat kolgame, — la wakat zoe n taame — tɩ sẽn ki-ba na n wʋm Wẽnnaam Biiga koɛɛga, la sẽn na n wʋm-b koɛɛga fãa na n vɩɩndame. Wala Ba sẽn tar vɩɩm b nengẽ, b kɩtame tɩ Biigã me tar vɩɩm b nengẽ la b kõ-b-la tõog tɩ b kao bʋʋdo b sẽn ya Ned Biiga yĩnga. Bɩ y pɛleng ra yɩk ye, tɩ wakat na n taame tɩ sẽn be-b yaadẽ na n wʋm b koɛɛga la b na n vʋʋgame: sẽn maan-b neere na n vʋʋga vɩɩm vʋʋgre tɩ sẽn maan-b wẽnga vʋʋg bʋʋd yĩnga. Mam ka tõe n maan bũmb m toor ye, m kaooda bʋʋdã wala m Ba sẽn wilg-m, la m bʋʋda tɩrga tɩ ka m daab la m tũuda, m tũuda sẽn tʋm-b maama raabo. Sã n ya maam n kõt m meng kaseto, m kaset ka kaset ye. Yaa ned a to n kõt-m kaseto, la m miime tɩ kaset kãng yaa sɩda. Yãmb tʋma neb a Zã nengẽ, la yẽ kõo kaset sɩda. Ka yet tɩ yaa ninsaal kaset la m teegr ye; m sã n gomd woto, yaa yãmb fãagr yĩnga. A Zã da yaa fitil sẽn yõgen t'a bugum wita, la yãmb tʋlg n kɩdma a vẽenemẽ wakat yɛng. La mam yẽ tara kaset sẽn yɩɩd a Zã rẽnna: yaa tʋʋm niyns m Ba sẽn kõ-m tɩ m tʋm n taasã, yaa tʋʋm niyns m sẽn tʋmna menga n kõt-m kaset tɩ yaa m Ba n tʋmd-m. M Ba sẽn tʋm maama yaa bãmb n kõt-m kaseto la yãmb nan pa wʋm b koɛɛga, y nan ka yãe m Ba neng ye, la b goama ka paad ne yãmb daar fãa ye, la rẽ yaa y sẽn ka tẽed b sẽn tʋm a soabã. Yãmb karemda Sebr sõng ne gũusgu, tɩ y tẽdame tɩ yaa sebr sõng n na n kõ-y vɩɩm sẽn kõn sɛ, la yaool yaa sebr sõng n kõt-m kaseto, la bõe tɩ y ka rat n wa m nengẽ, n paam vɩɩm! Mam ka reegd pẽgr sẽn yit ninsaalb nengẽ ye. Mam mii-y lame: m miime tɩ Wẽnnaam nonglem ka be y pʋgẽ ye. Mam yaool n wata m Ba yʋʋr yĩnga la y pa reegd-m ye. Ned a to sã n yaool n wa a meng yʋʋr yĩnga, y reegd-a lame. La yãmb na n yɩɩ wãna n tẽ, y sã n baood y pẽgr y taab nengẽ n yaool n pa baood pẽgr ninga sẽn yita Wẽnd yenda nengẽ balã? Da tẽ-y tɩ m na n ning-y la taale, m Ba taoor ye. Sẽn ningd-a yãmb taale, ya a Moyiiz, yãmb sẽn teeg a soabã. Yãmb sã n da tẽedẽ-la a Moyiiz, y tẽedẽ-la mam me, tɩ yaa mam yelle la a Moyiiz gʋls yã. La yãmb sã n pa tẽ a sẽn gʋls bũmb ningã, y yɩta a wãna n tẽ m goma?» A Zezi yaool n dʋʋga Galile mogr sẽn boond tɩ Tiberiyad me. Zãma kãseng ra tũud-b lame, tɩ b ra yãeta wẽnd makr dãmba b sẽn da maande bãad-dãmba yĩngã. A Zezi dʋʋ tãngã n zĩnd ne b karen-biisã. Dẽ wẽnd tɩ pak sẽn ya Zʋɩf rãmb kibsã yaoome. La a Zezi sẽn zẽk b neng n mik tɩ neb wʋsg wʋsg wata b nengẽ, b yeela a Filip: «D na n daa bur yɛ n kõ bãmba tɩ b rɩ?» B da sokd-a-la woto n na n ges a sẽn na n yeele, tɩ bãmb meng ra mii b sẽn na n maanega. A Filip leokame: «Ba ligda ta koeems kobsi, a bur kõn sek ned kam fãa paam pɛdg meng ye.» La b karen-biig a ye, a Andre, a Simo ba-biiga, yeel-b lame: «Biig a ye n be ka n tar bur a nu sẽn wẽ ne zom pugsgu n paas kʋɩl-zẽeda yiibu, la dẽ zema bõe zãma woto fãa yĩnga?» La a Zezi yeelame: «Bɩ y zĩndg nebã.» Mood n da be beenẽ wʋsgo la neba zĩndame, bãmb na ta tus a nu. A Zezi yaool n deega burã n pʋʋs Wẽnnaam bark n pʋɩ rɩtbã; b kõ-b-la zĩma me boto, wala b sẽn da rat tɛka. La b sẽn waa n dɩ n tɩge, a Zezi yeela b karen-biisã: «Wʋk-y gɩrsa fãa sẽn kellã tɩ bũmb da menem ye.» La neba sẽn dɩ bur a nu wã n keesã, bura gɩrs pida pet piig la yiibu. La nin-bãmba sẽn yãend a Zezi sẽn maan wẽnd makrã, b yeelame: «Sɩd yaa Bãmb la bãngd ninga sẽn na n waa dũni wã.» La a Zezi sẽn bãng tɩ b ra na n yõk-b lame n modg tɩ b yɩ b dĩma, b zoe n kẽnga tãnga zug, bãmb b yembre. Zĩiga sẽn maage, b karen-biisa kẽnga mogra noore, la b kẽe koom-koglgo n dʋʋg mogrã n tees Kafarnaom. Zĩiga waa n sobgame, t'a Zezi ket n pa ta b nengẽ ye. Sob kãsenga n da yiki tɩ mogra me rãmbe. Karen-biisa rugsa koglgã n kaoos n yaool n yãe a Zezi tɩ b kẽnd kooma zug n kolgd bãmba, tɩ b yɛɛse. La b yeel-b lame: «Yaa maam, da zoe-y rabeem ye.» La karen-biisa sẽn yet tɩ b na n kẽes-b koglga pʋga, vugr bala b taa b sẽn da rabdẽ wã. Vẽkembeoogo, zãma wã paa kʋɩlga rʋʋnde la yaa b sẽn da yãe tɩ koom koglg a ye bala n da zĩnd be la a Zezi ra pa kẽ n naag b karen-biisa ye, yaa b karen-biisa bala n da looge. Koom-kogend a taab me yii Tiberiyad: da pẽe zĩig ninga neba sẽn da paam burã n dɩ wã; neba sẽn yãe t'a Zezi ra ka be be tɩ b karen-biisa me ra ka be be, b kẽe koom-kogendã n leb Kafarnaom n babs a Zezi. La b sẽn yãend-b, mogra rʋʋnde, b yeel-b lame: «Karen-saamba, y waa ka da-bʋre?» La a Zezi leok-b lame: «Sɩd-sɩda mam yeta yãmba, tɩ y sẽn baood maama, ka y sẽn yãe wẽnd makr dãmba yĩng ye, yaa y sẽn paam burã n dɩ n tɩgã. Da tʋm-y n bao rɩɩb ning sẽn sãamda wã ye, tʋm yã n bao rɩɩb ninga sẽn paada, n kõt vɩɩm sẽn kõn sɛ; la Ned Biiga sẽn na n wa kõ-a yãmb a soaba, tɩ yaa bãmb la Wẽnnaam Ba mak ne b makre.» La b sok-b lame: «Bõe la d na n maane n tʋm Wẽnnaam tʋʋma?» T'a Zezi leok-ba: «Tʋʋmd ning Ba sẽn date, yaa tɩ y tẽ bãmb sẽn tʋm a soabã.» Tɩ b yeele: «Wẽnd makr bʋgo la y na n maan tɩ d yãend n tẽ yãmba? Tʋʋmd bʋgo la y tʋmda? Tõnd ba rãmb rɩɩ yĩngr dɩɩba weoogẽ, wala b sẽn gʋlse: ‹B kõ-b la rɩɩb sẽn yi arzãn tɩ b rɩ.› » T'a Zezi yeel-ba: «Sɩd-sɩda mam yeta yãmba, tɩ ka a Moyiiz n tõe n kõ yãmb dɩɩb sẽn yi arzãn ye; yaa m Ba n kõt-y dɩɩb kãnga, arzãn bur menga; tɩ bur ninga Wẽnnaam sẽn kõtã, yaa sẽn yit-a arzãna, la yẽ n kõt dũni wa vɩɩm.» Tɩ b yeele: «Soaala, kõ-y tõnd bur kãnga daar fãa.» T'a Zezi leok: «Yaa maam la bur sẽn kõt vɩɩm. Sẽn wat-a mam nengẽ, kom kõn yõk a soab abada ye; la sẽn tẽed-a maam, ko-yũud kõn yõk a soab abada ye. La mam zoe n yeel-y lame: y ne-m lame, la y pa tẽed-m ye. Ba sẽn kõ-m ned ninga fãa na n wa-la m nengẽ, la sẽn wat-a m nengẽ, m kõn dig a soab n yiis abada; tɩ mam pa yi arzãn n wa, m yam maaneg yĩng ye, m waa n na n maana sẽn tʋm-b maama yam. La sẽn tʋm-b maama yamleoogo, yaa tɩ m da menes-b sẽn kõ maam b rãmba ned ba a ye, la m vʋʋg-b dũni sɛɛb daare. Yaa m Ba sẽn tʋma maama raabo, tɩ ned ning fãa sẽn yãenda Biiga la a tẽ bãmba bɩ a paam vɩɩm sẽn kõn sɛ, la m vʋʋg-a dũni sɛɛb raare.» Zʋɩf rãmba sɩnga guglengu, la rẽ yaa b sẽn da yeelã: «Maam la rɩɩb sẽn yi arzãna.» B ra yetame: «Ka yẽ la a Zezi, a Zozɛf biiga la? D ka mi a ba la a ma bɩ? A yɩta wãn n yeele: ‹Mam yii arzãna?› » Dẽ la a Zezi yeel-ba: «Da guglem-y ye. Ned ba a ye ka tõe n wa mam nengẽ m Ba sẽn tʋma maama sã n ka tak-a n kõ-m ye, la m na n vʋʋg a soab yaoolem daare. B gʋlsa bãngdba sɛba pʋgẽ: Bãmb fãa na n paama zãmsgo Wẽnnaam nengẽ. Ned ninga fãa sẽn wʋma m Ba koɛɛga, la a reeg b zãmsgo, wata mam nengẽ. Pa yet tɩ ned yãenda Ba ye, sã n ka sẽn yi-a bãmb nengẽ wã, yẽ soab bala n yãend Ba. Sɩd-sɩda mam yeta yãmba tɩ sẽn tẽeda tar-a vɩɩm sẽn kõn sɛ. Mam la bur sẽn kõt vɩɩm. Dɩɩb sẽn da yit yĩngr la y ba rãmba dɩ we-raoogẽ la b kiime; Ma bura yita arzãnẽ, la f sã n dɩ-a fãa, f kõn ki ye. Maam la bur vɩɩga sẽn yi arzãna. Sẽn dɩta bur kãnga, a soab na n vɩɩnda daar fãa. La m paasdame tɩ bur ning m sẽn na n kõ a soabã, yaa m yĩngã nemdo, dũni rãmb vɩɩm yĩnga.» Dẽ me la Zʋɩf rãmba yik no-koeemd ne taaba n yetẽ: «Nin-kãnga yɩta a wãn n kõ tõnd a yĩng nemd tɩ d wãbe?» T'a Zezi yeel-ba: «Sɩd-sɩdsa mam yeta yãmba, tɩ y sã n pa wãb Ned Biiga yĩng nemdo, la y sã n pa yũ b zɩɩm, y kõn tall vɩɩm y pʋgẽ ye. Sẽn dɩt-a mam yĩnga nemdo, la sẽn yũud-a m zɩɩm, yẽ soab tara vɩɩm sẽn kõn sɛ, la m na n vʋʋga a soab dũni sɛɛb daare. Mam nemd sɩd yaa bõn-dɩtga la m zɩɩm yaa bõn-yũudga. Sẽn wãbd-a mam nemdo la sẽn yũud-a mam zɩɩm, yẽ soab paada ne maam tɩ mam me paad ne a soaba. Wala m Ba sẽn vɩ wã sẽn tʋm maama, tɩ mam me vɩ b maasem yĩnga, woto me sẽn dɩ-ta maam, a me na vɩɩnde m maasem yĩnga, Ad-y bur ning sẽn yi arzãna; la a pa wẽnd y yaab rãmb sẽn dɩ a soaba, n baas n ki wã ye; sẽn dɩta bur kãnga na n vɩɩnda daar fãa.» Yaa woto la a Zezi gom yã n zãms neba b pʋʋsg roogẽ Kafarnaom tẽnga. La b karen-biis wʋsg sẽn wʋm b goama, b yeelame: «Gomd kãnga yaa toogo, ãnda n tõe n kelg woto?» La a Zezi sẽn bãng b yamẽ tɩ karen-biisa meng ra guglemda yell kãng poorẽ, b yeel-b lame: «Woto yɩkda yãmb pɛleng wɛ? La yãmb sã n wa yãe Ned Biiga tɩ b rʋʋd yĩngri n na n leb b sẽn da beẽ pĩndã? Dẽ n na n yɩ pɛlen-yɩk menga. Yaa sɩɩga la vɩɩma yẽgre, yĩnga ka yõod ye. Goama m sẽn togs yãmbã yila m nengẽ la bãmb n kõt vɩɩm. La neb kẽer n be yãmb sʋk n pa tẽed ye.» A Zezi da pĩnd mi al sɩngrẽ, ãnna rãmb n ka tẽed bãmba la ãnna n na n zãmb bãmbã. B yeelame: «Yaa woto la mam wilg yãmb tɩ ned ka wat m nengẽ sã n ka m Ba sẽn kõ a soab ye.» Wakat kãng tɛka, karen-biis wʋsg leba b poorẽ n pa le tũud bãmb ye. A Zezi soka piig la a yiibã: «Yãmb me rat n basa maam bɩ?» T'a Simo-Piyɛr leok ba: «Tõnd na n kẽnga ãnna nengẽ? Yãmb bal n tar vɩɩm sẽn kõn sɛ goama. La tõnd tẽedame la d bãngame tɩ yãmb la Wẽnd Nedã.» T'a Zezi yeel-ba: «Ka maam n tũus yãmb piig la a yiiba bɩ? La ned a ye yãmb sʋka n ya Sʋtãana.» B da gomda a Zɩɩda, Iskariyot dao a Simo biiga yelle, tɩ bãmb piig la yiiba sʋka yẽ n da na n zãmb-ba. Dẽ poore, a Zezi sɩng n saagda Galile. B da pa rat n dig Zɩɩde tɩ Zʋɩf rãmba da baood-b lame n na n kʋ. Zʋɩf rãmb kibs ning sẽn boond tɩ Sẽgd kibsa ra kolgdame. La b saam-biisa yeel-b lame: «Bɩ y yik n kẽng Zɩɩde tɩ beelẽ me bɩ karen-biisa paam n yãend y sẽn maandã, tɩ ned ka tʋmd ne soosgo, a sã dat tɩ neb bãng-a ye. Yãmb sẽn maand bõn-bãna, bɩ y wilg y meng dũni rãmba.» A Zezi saam-biisa mens ra pa tẽed-b ye. Dẽ la a Zezi yeel-ba: «Mam wakat nan pa ta ye la yãmb yẽ wakat yɛsa daar fãa. Dũni rãmba ka tõe n kisg yãmb ye; maam yẽ, dũni wã kis-m lame tɩ m kõta kaset t'a tʋʋma ka sõmb ye. Bɩ y kẽng kibsã, mam yẽ pa rabd-a ye, tɩ mam wakat nan pa ta ye.» La a Zezi sẽn yeel woto, b kell n paa Galile. La b saam-biisa sẽn waa n loog kibsã, b me kẽngame, la b pa kẽng tɩ neb bãng ye, yɩɩ wala soosgo. Zʋɩf rãmba ra baood-b la kibsa wakat n yetẽ: «A bee yɛ?» La zãma wã ra gomda b yell wʋsgo. Bãmb dãmb yetẽ: «Yaa nin-sõngo.» Tɩ bãmb dãmb me yetẽ: «Ka sɩd ye, a belgda neb bala.» La ned ba a ye da pa sakd n pelg a pʋga n gomb b yelle, tɩ b ra zoeta Zʋɩf rãmba. La Sẽgd kibsa da zoe n ta-la a pʋɩ-sʋka t'a Zezi wa wẽnd doogẽ n na n sɩng neba zãmsgo. Zʋɩf rãmb pɛlens yɩkame tɩ b yeele: «A yɩɩ wãn n mi Sebr sõngo la a yaool n pa zãmse?» T'a Zezi na n yeel-ba: «Mam zãmsgã ka mam dẽnd ye, yaa sẽn tʋm-b maama rẽnda. Ned sã n dat n maan sẽn tʋma maama yamleoogo, a bãngda m karenga sã n yita Wẽnnaam nengẽ bɩ m sã n gomda m meng yelle. Sẽn gomd-a a meng yelle, baooda a meng pẽgre; Ned ninga sẽn baood sẽn tʋma yẽ wã pẽgre, yẽ la sɩd soaba la zãmb ka bɛ a pʋgẽ ye. Ka a Moyiiz n kõ yãmb noor sebr bɩ? La bõe yĩng la yãmb ned ba a ye ka tũudi? Yaa bõe yĩng la y baood n na n kʋ-ma?» La neba leok-b lame: «Yãmb yika gãeemdo, ãnna n baood n na n kʋ yã?» T'a Zezi yeel-ba: «Mam maana tʋʋmd a ye bala tɩ yãmb yɛɛsdẽ. A Moyiiz kõo yãmb noor tɩ y kẽ bãongo — la yaool n ka a Moyiiz meng n sɩng-a ye, yaa d yaab rãmbã — la vʋʋsg daare, yãmb kẽesda ned bãongo. Ned sã n kẽed bãong vʋʋsg daare tɩ yaa a Moyiiz noor a ye la a ka rat n bas n ka tũ, yaa bõe yĩng la y zabd ne maam la y puugd-y sũur ne maam? Yĩnga tõr laafi vʋʋsg daar ka yɩɩd wilg a ye bal laafi? Da bʋ-y nif sẽn ne bal bʋʋd ye, bʋ-y sɩd bʋʋdo.» Zerizalɛɛm neba yeelame: «Ka rao kãnga la b sẽn baood n na n kʋ wã bɩ? Ad-a sẽn gomd yɩng tɩ neb fãa wʋmnẽ, la ned ba a ye ka yet tɩ bũmbu ye. Sãnd tẽnga kãsem-dãmb ka yik n tẽed marsã tɩ yẽ sɩd yaa Krista? Tõnd yẽ mii nin-kãnga sẽn yitẽ. Sã n yaẽ Krista, ad-y sã n yaa bãmb n waẽ, ned ba a ye kõn bãng b sẽn yitẽ ye.» Dẽ me la a Zezi sẽn da zãmbsd neba wẽnd doogẽ yik n moone: «Yãmb mii maam, la y mii m sẽn yitẽ; mam yaool pa wa m toor ye, la sẽn tʋma maama yaa sɩd soaba, la yãmb ka mi-b ye. Mam mii-b lame tɩ mam yii bãmb nengẽ, la yaa bãmb n tʋm maam.» Zãma wã da baoodame n na n yõk a Zezi la ned ba a ye ka sɩɩs-b ye tɩ b wakata da nan ka ta ye. La zãma wã sʋka, wʋsg tẽ-b lame la bãmb n da yetã: «Krista sã n wa b na maan bõn-bãn n yɩɩg nin kãnga bɩ?» Farizẽ rãmba wʋma neba sẽn da togsd a Zezi poorẽ tɩ b na n tʋm wẽnd dooga gũudba tɩ b tɩ yõk-ba. La a Zezi yeel-b lame: «M na n le zĩnda ne yãmb tɩ yɩ bilfu, la m yaool n leb sẽn tʋm-b maama nengẽ. Y na n wa baooda maam la y kõn yãe-m ye; la m sẽn na n zĩndẽ wã, yãmb ka tõe n wa be ye.» Tɩ Zʋɩf rãmba sogsd taaba: «Yaa yɛ la a na n kẽng tɩ d ka na tõog n yãend-a? A na n babsa Zʋɩf niyns sẽn be-b pa-weera laa? Bɩ a na n kẽng n tɩ karma bu-zẽmbã? Gomd ning b sẽn leoke: ‹Y na n wa baood-m lame la y kõn yãend-ma, la m sẽn be zĩig ningã, y pa tõe n ta be wã,› gomd kãnga rat n yeelame tɩ bõe?» Tigra baasg raare, sẽn ya kibs kãseng n yɩɩda, a Zezi yaasa yĩngr n zẽk b koɛɛga n moone: «Ko-yuud sẽn tara soab fãa, bɩ a wa mam nengẽ la sẽn tẽed-a maam, bɩ a wa la a yũ. Wala sẽn be sebr sõng pʋgẽ: Ko-bundum na n pusga a pʋgẽ n zoe wa kʋɩlse.» B ra gomda a Vʋʋsem Sõng yelle b sẽn na n kõ sẽn tẽ-b bãmbã. A Vʋʋsem Sõng rag n nan ka sig ye, t'a Zezi ra nan ka ta b pẽgra zĩigẽ ye. Zãma wã sʋka, kẽer sẽn wʋm a Zezi goama, b leokame: «Bãmb la bãngdã.» Tɩ kẽer me yeetẽ: «Yaa bãmb la Krista.» Tɩ kẽer me sokdẽ: «La dẽ yĩnga Krista na n yii Galile la? Sebr sõng ka yeel tɩ Krista na n yi a Daviid buudẽ la b na n yii Bɛtelyɛɛm tẽn-bulli, a Daviid tẽngẽ?» Woto neba ra welga taab a Zezi poorẽ. Kẽer da rat n yõk-b lame, la ned ba a ye nug ka sɩɩs-b ye. Wẽnd dooga gũudba lebg n waa maan-kʋʋdba nanams la Farizẽ rãmba nengẽ tɩ b sok-ba: «Yaa bõe yĩng la yãmb pa yõk-a n wa?» Tɩ gũudba leoke: «Ned ba a ye zɩ n gom wa nin-kãnga ye.» Tɩ Farizẽ rãmba yeel-ba: «Yãmb me basame t'a lebg y zut laa? Kãsem-dãmba bɩ Farizẽ rãmba sʋka ned bee sẽn tẽ-a yẽnda sɩda? Ad-y zãma wã sẽn ka mi Noora sebrã, ka bark ye!» La bãmb ned a yembre, a Nikodɛm, dao ninga sẽn da wa a Zezi nengẽ ne yʋngã, yeelame: «Tõnd noora kõt-d la sor tɩ d paalg ned bʋʋdo tɩ d pa reng n kelg a soab koɛɛg n bãng a sẽn maan bɩ?» Tɩ b leok-a: «Yãmb me yaa Galile ned laa? Bɩ y maag-y meng n vɛɛse, ad-y bãngd ka yit Galile ye.» [ Dẽ poore ned kam fãa leba a yiri. Sã n ya a Zezi, b kẽnga Oliviye tãnga zugu. Yibeoog pĩnda, b leba wẽnd doogẽ la zãma wã ra wata b nengẽ tɩ b na n zĩnd n karem-ba. La Farizẽ rãmba la Sɛb-mitba talla pag a yembr n wa; b ra ling-a-la yoobẽ, la b yals-a la sʋka, n yeel a Zezi: «Karen-saamba, b linga pʋg kãnga yoobẽ. La noora sebrẽ, a Moyiiz yeelame tɩ b lab pagb a woto buud ne kug n kʋ, la yãmba, y yetame tɩ bõe?» B ra sokd-b la woto n na fɛɛs-ba, n paam bũmb n dogl b zugu. La a Zezi zõondame n gʋlsd tẽng ne b nug-bila. La b sẽn da ket n sokd-bã, b doogame n yeele: «Yãmb sʋka sẽn nan pa maana yel-wẽnde, bɩ a soab deng n lobg paga kugri!» La b le zõondame n le gʋlsdẽ. La neba sẽn wʋm gomdã, b foosa a yembr yembre n kẽ wɩrem, la nin-kẽembã n denge; b basa bãmb ne paga bala b sẽn da yɛs zĩig ningã. La b sẽn doog n yãend pagã a ye bala, b sok-a lame: «Paga, sẽn da ningd-b foo taala bɛɛ? Ned ba a ye ka kao f bʋʋdo n paalg-f laa?» Tɩ paga yeele: «Ned ba a ye, Soaala!» T'a Zezi yeele: «Dɩlla ma me kõn paalg-f ye. Loog la f da le paas beoog ye.»] A Zezi le yeel-b lame: «Maam la dũni vẽenem, sẽn tũud-a maam ka kẽnd likẽ ye, la a na n paama vẽenem sẽn kõt vɩɩm.» Woto la Farizẽ rãmb yeel-b: «Yãmb n kõt y meng kaseto, yãmb kaset yaa zaalem.» La a Zezi leok-b lame: «Ne m sẽn kõt m meng kaseto, m kaset yaa sɩda, tɩ mam mii m sẽn yiẽ, la m sẽn dabdẽ la yãmb ka mi m sẽn yiẽ la m sẽn dabdẽ ye. Y kaooda bʋʋdo wala ninsaalba, mam ka kaood ned bʋʋd ye; m sã n wa kaood bʋʋdo, mam bʋʋda tũuda sɩda, tɩ mam ka m yembre ye, d yaa d yiibu: maam ne sẽn tʋm-a maama. B yaool n gʋlsa yãmb noor sebrẽ tɩ neb a yiib kaset yaa sɩda. Maam n ya m meng kaseto, la m Ba sẽn tʋm-b maama, bãmb me kõta kaset m yĩnga.» Dẽ la b sok-ba: «Yãmb Ba bee yɛ?» Tɩ b leoke: «Yãmb ka mi maam la y ka mi m Ba me ye; yãmb sã n da miẽ-la maam y na bãngẽ m Ba me.» A Zezi goma woto ligda bĩngr zĩigẽ. Ad-y b ra karemda neba wẽnd doogẽ la ned ba a ye pa sɩɩs b ye tɩ b wakat da nan pa ta ye. La a Zezi le yeel-b lame: «M na n loogame tɩ y yõdg n baood-m, la yãmb na ki ne y yel-wẽnde. Mam sẽn dabdẽ wã, y ka tõe wa be ye.» Dẽ la Zʋɩf rãmba ra yet taaba: «A rat n kʋ-la a meng laa, n tõe yeele: ‹Mam sẽn dabdẽ wã yãmb ka tõe n wa be?› » La a Zezi yeel-b lame: «Yãmb yita tẽngre, la mam yita yĩngri. Yãmb yaa dũni kãnga neba; la mam ka dũni kãnga ned ye. Ya rẽ la m sẽn yeel yãmbã tɩ y na n kii ne y yel-wẽndã. Tɩ yãmb sã n pa tẽeda tɩ maam la sẽn bɛɛ-a soabã, yãmb na n kii ne y yel-wẽna.» Dẽ la b ra yeta Zezi: «Foom la ãnna?» T'a Zezi leoke: «M sẽn togs tɩ m ya a soaba al sɩngrẽ wã la m sẽn ket n gãdã. Mam tara yɛl wʋsgo y poorẽ n na n togse, la m kao y bʋʋdo, tɩ sẽn tʋm-a maama, yaa sɩd soaba, la yaa mam sẽn wʋm bãmb nengẽ wã la mam togsd dũni rãmba.» Zʋɩf rãmba ka wʋm tɩ yaa b Ba yelle la b ra gomd ne b ye. Dẽ la a Zezi yeelyã: «Y sã n wa zẽk Ned Biiga, wakat kãng la y na n bãng tɩ maam la sẽn bɛɛ-a soabã, la m ka maand bũmb m toor ye, yaa m Ba sẽn zãms maama, la m togsda, la sẽn tʋm-b maama bee ne maam, b ka bas maam m yembr ye, tɩ m maanda sẽn tat b yam dar fãa.» Ad-y b sẽn gom woto wã neb wʋsg tẽe bãmba. A Zezi ra yeta Zʋɩf rãmba sẽn tẽe-b bãmbã: «Yãmb sã n kell n tall m goama, yãmb lebga m karen-biisi. La y na n bãnga sɩda, la sɩda na n kɩtame tɩ yãmb lebg burkĩmbi.» Tɩ b leok-ba: «Tõnd ya a Abraam kamba, tõnd nan pa yɩ ned ba a ye yem-daad ye, yaa bõe yĩnga la yãmb yet tɩ d na n lebga burkĩmbi?» Dẽ la a Zezi yeel-ba: «Sɩd-sɩda m yeta yãmba, tɩ sẽn maand-a yel-wẽnde, yaa yem-daoogo. Yem-daoog ka paad zakẽ daar fãa ye la zak biig paada zakẽ daar fãa. Dɩlla Biiga sã n yiis yãmb yemdo, y naa n sɩd lebga burkĩmbi. Mam miime tɩ y yaa a Abraam kamba, la yãmb yaool n baood n na n kʋʋ maam, tɩ mam goama pa kẽed-y ye. M togsda m sẽn yãend bũmb ning m Ba nengẽ, la yãmb maanda y sẽn wʋm y ba nengẽ.» Tɩ b na n leoke: «Tõnd ba yaa Abraam.» T'a Zezi yeel-ba: «Yãmb sã n yaa Abraam kamba bɩ y tʋm a Abraam tʋʋma. Yãmb yaool n baooda marsã n na n kʋ maam, m yaool n yaa ned sẽn togs yãmb sɩda, sɩd ninga mam sẽn wʋm Wẽnnaam nengẽ. A Abraam ka maan woto ye! Dɩlla yaa y ba a to tʋʋm la y tʋmda.» Tɩ b yeele: «Tõnd ka yoob kamb ye, tõnd Ba yaa a ye bala: Wẽnnaam.» T'a Zezi na n leok-ba: «Wẽnnaam sã n da yaẽ yãmb ba, y nongẽ la maam me, tɩ yaa Wẽnd nengẽ la m yii n wa; m pa wat m toore, yaa bãmb n tʋm maam. Bõe tɩ m gomd tɩ y ka mi tɩ yaa maam n gomda? Ka y sẽn pa tõe n deeg m gomda laa? Yãmb yita Sʋtãan nengẽ, yẽ la y ba, la yaa y ba wã raab la y rat n maane. Sʋtãan yɩɩ nin-kʋʋd al sɩngrẽ, a ka pa sɩd pʋgẽ ye, tɩ sɩd pa tol n be a nengẽ ye: a sã n togsd a zirẽ-beedã, yaa sẽn be a sũurẽ la a yiisda, t'a yaa zirẽ-be-ned la zirẽ-beed ba. Mam sẽn togsd sɩda yĩnga, yãmb ka tẽed maam ye. La yãmb sʋka, ãnna n tõe n kʋɩdg-m tɩ m maana yel-wẽnde? La m sã n yet sɩda, yaa bõe yĩng la y pa tẽed-ma? Sẽn kĩ-a ne Wẽnd, wʋmda Wẽnnaam goama, la yãmb sã n ka wʋmd m goama, yaa y sẽn ka kẽed Wẽndã.» Dẽ la Zʋɩf rãmba leok-b: «Tõnd ka be bʋʋm n yet tɩ fo yaa Samari neda la Sʋtãan be-la f pʋgẽ?» T'a Zezi leok-ba: «Sʋtãan ka be m pʋgẽ ye, mam waoogda m Ba, la yãmb baood n na n paoog-m lame. Mam yẽ ka baood m meng pẽgr ye; nina n be n baood-a la a kaood bʋʋdo. Sɩd-sɩda mam yeta yãmb, tɩ sẽn deegd-a mam goama n ning a pʋtẽerẽ, yẽ soab kõn ki abada.» Tɩ Zʋɩf rãmb leok: «Marsã tõnd miime tɩ Sʋtãan sɩd be f pʋgẽ. A Abraam kiime, bãngdba me kiime tɩ fo yetẽ: ‹Sẽn deegd-a m goama, a kõn ki abada.› Fo geendame tɩ f yɩɩda d ba a Abraam la bãngdbã sẽn ki wã laa? Fo geendame tɩ f yaa ãnna?» La a Zezi leok-b lame: «Mam sã n pẽgd m menga, mam pẽgr ka pẽgr ye; la yaa m Ba n pẽgd maam, yãmb yetame: ‹Bãmb la tõnd Wẽnnaam.› Yãmb yaool n ka mi-b ye; la mam yẽ mi-b lame; la m sã n da yetẽ tɩ m ka mi-ba, m naan n yɩẽ wala yãmba: zirẽ-be-neda. Mam mi-b lame la mam deegda b goama. Yãmb ba a Abraam kɩdma sũ-noogo, a sẽn tags ta na yãend m daara yĩnga. A yãeeme, t'a sũur yɩ noogo.» Tɩ Zʋɩf rãmba yeele: «Fo yʋʋm nan ka ta pisnu menga la fo yãenda a Abraam!» T'a Zezi yeel-ba: «Sɩd-sɩda mam yeta yãmba, t'a Abraam sẽn da waa n nan ka beẽ, dẽ tɩ mam beeme.» B sẽn wʋm woto, b wʋka kuga n na n lab-ba, t'a Zezi lill b meng n yi wẽnd doogẽ. A Zezi da waa n kẽndame, n yãe dao a yembre sẽn dog ne zondo. Karen-biisã n soke: «Karen-saamba, ãnna n maan yel-wẽnde t'a rog ne zondo? Ya a meng bɩ ya a ba rãmba?» T'a Zezi leok: «Ka yẽ, ka a roagdba n maan yel-wẽnd ye, la yaa sẽn na yɩlẽ tɩ Wẽnnaam puk b pãng ne yẽnda. Yaa pakr ne maam tɩ m tʋm sẽn tʋm-b maama tʋʋmde, tɩ wĩndg nan ketẽ, tɩ yʋng n wate, la yʋngo ned ka le tõe n tʋm ye. M sã n ket dũni pʋgẽ, m yaa dũni wã vẽenem.» La b sẽn yeel woto, b tʋbsa kolkoodo n bui tãndo n taag zoanga nini, n yeel-a: «Kẽng Siloe bullẽ wã n tɩ widg f nengã» — Siloe dat n yeelame: b sẽn tʋm a soaba. — La zoanga kẽngame, a tɩ widga a nenga, la a sẽn waa n lɛɛg n watẽ a ra yãeta neere. La a yagse ne a mitẽns sẽn da mi n yãet-a t'a bõsdẽ, yeelame: «Ka yãoo n da zĩ n bõsdẽ wã bɩ?» Tɩ kẽer yeele: «Ad-y yaa yẽ!» Tɩ kẽer yeele: «Ayɛy! Yaa a wẽnego.» La a Rog-ne-zond ra yetame: «Yaa maam bala!» Tɩ b sok-a: «Fo nina yɩɩ wãna n puki?» T'a leoke: «Dao ning sẽn boond t'a Zezi wã n bui tãndo n taag m nini n yeel-m tɩ m tɩ widg m neng Siloe bullẽ, tɩ mam kẽng n tɩ widg m nenga la m nin pukame.» Tɩ b sok-a: «B bee yɛ?» T'a leoke: «M ka mi ye.» La b talla rog-ne-zondã n tɩ wilg Farizẽ rãmba. Da yɩɩ vʋʋsg daare la a Zezi bui tãndã n taag daoã nini. La Farizẽ rãmb sok-a lame t'a yɩɩ wãna n paam nini. T'a leok-ba: «B taaga m nina ne tãndo la m tɩ widga m nenga, la m nin pukame.» Tɩ Farizẽ rãmb kẽer yeele: «Nin-kãnga ka Wẽnnaam ned ye t'a ka reegd vʋʋsg daar noor ye.» Tɩ kẽer me yeele: «La yel-wẽn-maand na n yɩɩ wãna n maan bõn-bãn woto!» Tɩ b ra tar no-koeemde ne taaba. B le soka zoangã: «La foom yẽ, fo yetame tɩ bõe, raoã poorẽ la a sẽn puk f nina poorẽ?» T'a leoke: «Yaa bãngda!» La Zʋɩf rãmba ra ka sak n deeg tɩ raoã yɩɩ zoanga la a nin pukame, tɩ b ka reng n bool a ba ne a ma ye. B soka ba rãmba: «Ada yaa yãmb biig ning y sẽn yet t'a roga ne zonda bɩ? Yɩɩ wãn t'a ne marsã?» Ba wã ne ma wã leokame: «Tõnd yẽ miime t'a yaa tõnd biiga la a roga ne zondo, la yɩɩ wãn t'a ne marsã, tõnd ka tõe n bãng rẽ ye, sok yã a menga, a ka le ya yãag ye, a na togs a toore.» Ba wã ne ma wã leoka woto, Zʋɩf rãmba rabeem yĩnga tɩ b ra yẽsa ne taab tɩ ned ninga sẽn yeela t'a Zezi yaa Krista, bɩ b yiis a soab pʋʋsg roogẽ. Yaa rẽ yĩnga la ba wã la ma wã yeel t'a ka le ya yãag ye la b sok a menga. La b le boola raoã sẽn yɩ-a zoanga n yeel-a: «Aya, bɩ b f pẽg Wẽnnaam! Tõnd yẽ miime tɩ rao ning sẽn sãooga fooma yaa yel-wẽn-dmaanda.» Zoanga leok-b lame: «A sã n ya yel-wẽn-maanda, mam ka tõe n bãng rẽ ye. Mam mii bũmb a ye bala: m da yaa zoanga la marsã m neeme.» Tɩ b sok-a: «La a maana foom bõe, la a yɩɩ wãn n puk f nini?» T'a leok-ba: «Mam zoe n togsa yãmb, la y pa reeg ye, yaa bõe la yãmb dat n kelg n paase? Yãmb me rat n lebga a karen-biis laa?» La b tʋ-a lame n yeel-a: «Foo la a karen-biiga, tõnd yẽ yaa a Moyiiz karen-biisi. Tõnd miime tɩ Wẽnnaam goma ne a Moyiiz, la yãoo, tõnd ka mi a sẽn yitẽ ye.» Tɩ daoã leok-ba: «Ad-y woto yaa pɛlen-yɩk wɛ! Yãmb ka mi a sẽn yitẽ la a yaool n puka m nini. D miime tɩ Wẽnnaam ka kelgd yel-wẽn-maand ye la ned sã n waoogd Wẽnnaam la a maand b yam, Wẽnnaam kelgda yẽ soaba. Abada ne abadabila, d nan pa wʋm tɩ ned puk rog-ne-zond nin ye. Nin kãnga sã n da pa yitẽ Wẽnnaam nengẽ a kõn tõog n maan ba fɩ.» La b leok-a lame: «Fo roga yel-wẽnd pʋgẽ zãnga la f sẽn dat n karem tõnda!» La b rig-a lame. La a Zezi wʋmame tɩ b rig-a lame la b sẽn waa n seg-a, b yeel-a lame: «Fo tẽeda Ned Biiga bɩ?» T'a leoke: «Bãmb la ãnna, tɩ m tẽ-ba, Soaala?» T'a Zezi yeele: «Fo neb lame, ad sẽn gomd-a ne fooma, yaa bãmba.» T'a na n yeele: «Mam tẽedame, Soaala!» La a wõgemda b taoore. T'a Zezi na n yeele: «Mam waa dũni kãnga pʋgẽ, n na n welg m welgre. M waame tɩ sẽn pa ne-ba nin puki la sẽn ne-bã lebg zoeense.» Tɩ Farizẽ rãmb kẽer sẽn da be ne bãmb wʋm b goama n yeele: «Tõnd me yaa zoeens bɩ?» T'a Zezi leok-ba: «Yãmb sã n da yaẽ zoeense, taal da ka na n zĩnd y zug ye; la yãmb sẽn yet tɩ y neeme wã, y yel-wẽnda keta. Sɩd-sɩda mam yeta yãmba, sẽn pa tũud-a noor n kẽ piisa bãgr la sẽn gãndgd-a zĩig a to n kẽ, a soab yaa wagdre la fãada. Sẽn tũud-a bãgra noor n kẽ, yẽ la pe-yãansa pe-kɩɩma, Bãgra gũuda pakda noore la piisa kelgda pe-kɩɩma koɛɛga la a boonda pe-yãang fãa ne a yʋʋre la a yiisd-b la yɩnga. A sã n yiis piisã, a lʋɩta b taoore, la piisa pʋgda yẽ tɩ b mi-la a koɛɛga. La b kõn sak n tũ sãan ye, b zoet n bas-a lame, tɩ b ka mi sãan koɛɛg ye.» Yaa yelbũnd kãnga la a Zezi wẽ bãmba, la bãmb pa wʋm b gomda võor ye. T'a Zezi na n le yeel-ba: «Sɩd-sɩda, mam yeta yãmba, yaa maam la bãgr noore. Sẽn deng-b maama fãa yaa wagdba la fãadba; dẽ me la pe-yãansa ka kelg-ba. Maam la bãgr noore, sẽn tũud-a maam n kẽ, a na n paama fãagre; a na n kẽedame la a yita, n paamd yamdo. Wagdr yẽ watame bala n na n zu, n na n kodg la a kʋ. La mam yẽ waame n na n kõ vɩɩm la m kõ-a tɩ gale. Maam la pe-kɩɩm sõngo, pe-kɩɩm sõng rɩkda a meng vɩɩm n kõ a pe-yãanse. La sẽn ka-a pe-kɩɩma, tɩ b yaood-a t'a kɩɩmd piisã la a yaool n ka piisa soaala, yẽ sã n yãe digd-n-yĩid t'a wata, a zoetame n bas pe-yãansã tɩ we-rũnga yõgd-b la a sẽegd-b. Yaa ligda yĩng la a kɩɩmd piisã la a toog ka be ne pe-yãansa ye. La maam la Pe-kɩɩm sõngo, mam mii m pe-yãanse, tɩ bãmb me mi maam, wa m Ba sẽn mi maam tɩ m me mi m Ba, la m kõta m meng vɩɩm pe-yãansa yĩnga. La m tara pe-yãans a taaba sẽn nan ka kẽ m bãgra pʋgẽ ye, la m tog n yɩɩ bãmb me pe-kɩɩma; bãmb me tog n wʋma m koɛɛga, la woto bãgr na yɩ a ye, tɩ pe-kɩɩma me yɩ a ye. La m Ba sẽn nong-ma, yaa m sẽn kõt m vɩɩma n na n le wa reeg-a. Ka ned n yãkd m yõor ye, yaa mam meng m toore n kõt-a. M tõe n kõ m vɩɩm la m tõe n le reeg-a lame; la m paama rẽ m Ba nengẽ.» Gom kãensa, poorẽ no-koeemd n yik Zʋɩf rãmba sʋk yɛsa. Kẽer da yetame: «Sʋtãan n be a pʋgẽ, bɩ a yika gãeemdo. Yaa bõe tɩ yãmb kelgd-a?» Tɩ kẽer me yeele: «Goam kãensa ka ned sẽn tar Sʋtãan a pʋgẽ goam ye. Dẽ yĩnga sʋtãan tõe n puka ned nin laa?» B ra maanda Zerizalɛɛm wẽnd dooga bark tẽegr kibsa. Da yaa waood wẽnde. T'a Zezi ra kẽnd wẽnd doogẽ, a Salomo zãongẽ wã. Zʋɩf rãmba waa n gũbg-b lame n sok ba: «Fo na n basa tõnd ne yam yoaag n ta da-bʋre? Fo sã n ya Krista bɩ f togs-d vẽenega.» T'a Zezi leok-ba: «Mam pĩnd n togsa yãmb la y pa reegd ye. Tʋʋma m sẽn maan m Ba yʋʋr yĩnga, bãmb kõta maam kaseto. La yãmb ka tẽed ye, tɩ yãmb ka mam pe-yãans ye. M pe-yãansa wʋmda m koɛɛga, mam mi-b lame la b tũuda maam. Mam kõt-b la vɩɩm sẽn kõn sɛ la b kõn ki abada la ned me kõn tõog n fãag-b mam nugẽ ye. Ba sẽn kõ maam bãmba n yɩɩd fãa. Ned ka tõe n fãag fɩ Ba nugẽ ye. Maam ne m Ba, tõnd yaa a ye.» La Zʋɩf rãmba noga kuga n na n lab a Zezi. T'a Zezi yeel-ba: «M Ba maasem yĩnga, m maana yel-sõma wʋsg yãmb nifẽ, yel-sõmd bʋg yĩng la y rat n lab-ma?» Tɩ Zʋɩf rãmb yeele: «Ka yel-sõmd yĩng la d rat n lab-f ye, yaa f sẽn tʋʋsd Wẽnnaam yʋʋra yĩnga, tɩ fo sẽn ya ninsaala, fo yetame tɩ f yaa Wẽnde.» T'a Zezi leok-ba: «B ka gʋls woto yãmb noor sebra pʋgẽ bɩ: ‹M yeelame: yãmb yaa wẽnnaam dãmba.› Noor sebra sã n boond tɩ wẽnnaam dãmba, Wẽnd sẽn taas-b rãmb b koɛɛga — la sebr sõng pa tõe n kɩɩs la — Ba sẽn taag a soab kaam n tʋm dũni pʋgẽ, yãmb yetame: ‹Fo tʋʋsda Wẽnnaam yʋʋre,› la rẽ yaa m sẽn yeela bala: ‹M yaa Wẽnnaam Biiga!› Mam sã n pa tʋmd m Ba tʋʋma, bɩ y ra tẽ-m ye. La mam sã n tʋmd-ba, yãmb sã n pa rat n tẽ maam me bɩ y tẽ m tʋʋma tɩ woto la y na n yaa n bãng tɩ Ba bee m pʋgẽ, tɩ mam me be m Ba pʋgẽ.» La Zʋɩf rãmba le yik n baoodame n na n yõk-ba la a Zezi fãaga b nusẽ. A Zezi leb n kẽnga Zʋrdẽ rʋʋnde, zĩig ninga a Zã sẽn da sɩng n kõt neb soobã, la b yalsa be. La neb wʋsg ra wata b nengẽ n yetẽ: «A Zã ka maan wẽnd makr ba a ye. La a sẽn togs bũmb ning rao kãnga poorẽ wã yaa sɩd zãnga.» Neb wʋsg tẽe bãmb zĩ kãnga. Daoa a yembre n da ka laafi n boond t'a Lazar, n be Betani, a Mari ne a kẽema Mart sẽn da kẽed tẽng ningã. Yaa Mari ning sẽn da sõoga a Zezi nao ne kaama, n yẽes-b ne a zoobdo, yaa yẽ kẽem a Lazar n da ka laafi wã. Bãada tãop a yiibã tʋmame tɩ b tɩ yeele: «Soaala, yãmb sẽn nong a soaba ka laafi ye.» A Zezi sẽn wʋm kibarã, b yeelame: «Bã-kãnga kõn yɩ a yõor bãag ye; a na n waa ne Wẽnnaam pẽgre, a na n waa ne Wẽnd Biiga pẽgre.» Bãng-y t'a Zezi ra nonga a Mart ne a yao, a Mari, la a Lazar. La ne b sẽn wʋm t'a ka laafi wã, b kell n paa b sẽn da beẽ wã tɩ ta rasma a yi. Dẽ poor marsã, b yeela b karen-biisã: «Yik-y tɩ d leb Zɩɩde.» Tɩ karen-biisa leoke: «Karen-saamba, ade daar nan ka zãra Zʋɩf rãmba ra baooda yãmb n na n lob ne kug tɩ yãmb lebd be!» T'a Zezi leok-ba: «Wĩndg ka so wakat piig la a yiib wɛ? Ned sã n kẽnd wĩndga a kõn lak bũmb ye, t'a nee dũniya vẽenem, yaa sẽn kẽnd-a yʋngo n lagsde t'a ka tar vẽenem ye.» B sẽn gom woto, b yeelame: «D zoa a Lazar gõeeme la d na n tɩ nek-a lame.» Tɩ karen-biisa yeele: «A sã n gõeeme, dẽnd a na n paama laafi.» A Zezi da gomda kũum yelle la bãmb da tagsdame tɩ b ra gomda gõeem bal yelle. T'a Zezi yeel-b vẽenega: «A Lazar kiime; la yãmb yĩnga m sũur yaa noogo, m sẽn pa zĩnd be wã tɩ yãmb na n paamame n tẽ. Yik-y tɩ d kẽng a nengẽ.» La a Toma sẽn boond t'a Didim yeela a taaba: «Bɩ d yik n kẽng n tɩ naag bãmb n ki!» La a Zezi sẽn ta, b mikame t'a Lazar da bee yaoogẽ al dasem a naase. Betani ra pẽe ne Zerizalɛɛm n zems wakat pʋɩ-sʋk kẽnde. Zʋɩf rãmb wʋsg ra waame n na n pʋʋs a Mart ne a Mari toogo, b kẽema sẽn maan kaalem yĩnga. La a Mart sẽn wʋm t'a Zezi wata, a zoe n tɩ seg-b lame, t'a Mari kell n pa roogẽ. La a Mart yeela a Zezi: «Soaala, yãmb da zĩnnẽ ka m kẽema ka na n kiẽ ye. La marsã menga m miime tɩ yãmb sẽn na n kos Wẽnnaam bũmb ning fãa b na n kõ-y lame.» T'a Zezi leok-a: «Y kẽema na n vʋʋgame.» T'a Mart leoke: «Mam miime t'a na n vʋʋga yĩns vʋgr wakato, dũni sɛɛb raare.» T'a Zezi yeele: «Yaa maam la vʋʋgre. Sẽn tẽed-a maam, ba a ki yã, a na n vɩɩndame. La sẽn vɩ-a, la a tẽed maam, a soab kõn ki abada. Fo tẽeda rẽnna bɩ?» T'a Mart leoke: «N-yẽe! Soaala, mam tẽedame, tɩ yãmb la Krista Wẽnd Biiga sẽn wa dũni kãnga.» La a sẽn gom woto a tɩ boola a yao, a Mari, n soos n yeel-a: «Karen-saamb waame la b boond-f lame.» A Mari sẽn wʋme, a wẽneg n yika tao n kẽng b nengẽ. La a Zezi da nan pa ta tẽnga pʋgẽ ye, b ra ket n bee zĩig ninga a Mart sẽn tɩ seg-bã. Zʋɩf rãmba sẽn da be-b zakẽ n belgd a Mari wã, sẽn yãe t'a yii tao, b pʋg-a lame, n tẽed t'a rabda yaoogẽ n na n tɩ kũm be. La a Mari sẽn ta a Zezi sẽn da be zĩig ningã, a wõgemda b taoore n yeel-ba: «Soaala, yãmb da zĩnnẽ ka, m kẽema ka na n kiẽ ye!» La a Zezi sẽn yãend t'a yãbda, tɩ Zʋɩf rãmb sẽn da pʋgd-b yẽ wã me yãbdã, b yam bondgame, la b digimdame. B sokame: «Y ning-a-la yɛ?» Tɩ b leok-ba: «Soaala, wa-y n ges-y!» La a Zezi yãbame. Tɩ Zʋɩf rãmba yeele: «Ges-y! Ad-b ra nong-a lame koe!» La bãmb sʋkã kẽer yeelame: «La bãmb sẽn puk sẽn doga ne zonda nina, b ra ka tõee tɩ rao kãnga ra ki laa?» A Zezi le rigimdame yɛsa la b kẽnga yaoogẽ wã; dag n yaa tãn-boko tɩ kugr da pag a noorã. La a Zezi yeelame: «Lak-y kugrã.» A Mart, sẽn ki-a wã tão, yeelame: «Ay! Soaala, a zoe n bee yũugu, tɩ yaa dasma naas rũnna la a sẽn be ka wã.» T'a Zezi yeel-a: «Mam pa wilg foom tɩ f sã n tẽeda, fo na n yãee bũmb sẽn na n wa ne Wẽnnaam pẽgr bɩ?» La b laka kugrã, la a Zezi zẽka b neng n tees yĩngr n yeele: «M Ba, mam pʋʋsda yãmb barka, yãmb sẽn deeg m kosg yĩnga. Mam yẽ da miime tɩ yãmb deegda m kosg daar fãa, la yaa sẽn gũbg-b maama yĩnga la m yeel woto tɩ b tẽ tɩ yaa yãmb n tʋm maam.» La b sẽn gom woto, b moona ne koe-kãsenga: «Lazar, loog n yi yɩnga!» La vugr bala, kũuma yiime la a nao wã ne a nusã ra ket n vila ne pɛɛla la kãsenga ra ket n pila a neng t'a Zezi yeele: «Bɩ y lood n bas-a t'a kẽne.» La Zʋɩf rãmba sẽn da wa-b a Mari ne a Mart nengẽ, n yãe wẽnd makr kãnga, a Zezi sẽn maana, wʋsg tẽe bãmba. La kẽer kẽng n tɩ togsa Farizẽ rãmba a Zezi sẽn maan fãa. La maan-kʋʋdba nanamse ne Farizẽ rãmba tigma kãsem-dãmba tɩ b na n yẽs ne taaba n sãam a Zezi yelle. B yeelame: «Tõnd pʋs m maanda bõe? Daoã maanda wẽnd makr dãmb wʋsgo. Tõnd sã n bas-a t'a ket n maand woto, neb fãa na n tẽe-a lame, tɩ Rom rãmb wa wã d tẽnga, n menes d buudu.» La bãmb sʋka ned a ye sẽn boond t'a Kaif, n da ya maan-kʋʋd kãseng yʋʋmd kãnga; yẽ n yik n yeel-ba: «Yãmb sɩd ka be yam ye, yãmb ka tagsd tɩ nin-yend sẽn na n ki neb fãa yĩnga, tɩ buuda fãa da menem, dẽ n na n sãoog d yĩnga?» La a Kaif sẽn gom woto wã, a ka gom a menga toor ye. A sẽn da ya maan-kʋʋd kãseng yʋʋmd kãnga, a leoka bãngr koɛɛga, t'a Zezi na n kii buuda yĩnga, la ka buuda yĩng bal ye, yaa sẽn na yɩlẽ me tɩ Wẽnnaam kamba sẽn sẽegã le tigim taaba, n yɩ buud a ye. La badaar tɛka kãsem-dãmba tagsa b sẽn na n maanega n paam n kʋ a Zezi. Da yaa rẽ me yĩng la a Zezi ra pa le kẽnd Zʋɩf rãmb sʋka tɩ b neẽ ye la b kẽnga zĩig a ye sẽn pẽ ne weoogo, n kẽ tẽng sẽn boond tɩ Efrayim la b zĩnda beene ne b karen-biisã. La rẽ tɩ paka, Zʋɩf rãmba kibsã, ra kolgame; la tẽn kãng neb wʋsg kẽnga Zerizalɛɛm n na n tɩ segl b mense, la b ra baooda a Zezi la b ra bee wẽnd doogẽ n sõsd ne taaba n yetẽ: «Yãmb tagsda bõe, ad-y b kõn wa kibsa bada!» Maan-kʋʋdba nanamse la Farizẽ rãmb ra kõo noor tɩ ned ning fãa sẽn na n bãng b sẽn be zĩig ninga, bɩ a togs tɩ b tɩ yõk-ba. Pak kibs sẽn waa n ket t'a yoobe, a Zezi kẽnga Betani, tẽng ning a Lazar sẽn da ki n leb n paam vʋʋgrã. La be b segla dɩɩb bãmb yĩnga. A Mart n da kɩt rɩɩbã. A Lazar da bee sẽn da rɩtb ne a Zezi wã. A Mari rɩka yubl sẽn pid ne yũ-noog kaam meng menga, la sẽn daad toogo n wa zɛ a Zezi nao la a yẽesd-b ne a zoobdo; rooga wulumda ne kaama yũugu. B karen-biig a yembre, sẽn da na n zãmba bãmbã, a Zɩɩda, Iskariyot daoa, yeelame: «Bõe yĩng tɩ b ka koos kaama wakɩ koeems kobs-tã n dɩk n pʋɩ naong rãmba?» A sẽn gom woto wã ka yet t'a toog bee ne naong rãmb ye, yaa a sẽn da ya wagdrã. Ad-y yẽ n da zãad ligda korgo n da zuud ligda sẽn da suiid a pʋgẽ. A Zezi yeel-a lame: «Bas paga laafi t'a beoola m mumbu, ne yũ-noog kaam. Naong rãmb na n kell n zĩnda yãmb sʋk daar fãa la m kõn pa y sʋk daar fãa ye.» Zãma wã bãngame t'a Zezi bee Betani tɩ b kẽng be, la ra ka a Zezi yĩng bal ye, b kẽng n na n tɩ gesa a Lazar sẽn paam tɩ b vʋʋg-a kɩɩms sʋka. Maan-kʋʋdba nanams yẽsa ne taaba n na n kʋ a Lazar menga. Sɩda, yẽ yĩnga Zʋɩf rãmba wʋsg da kẽeda a Zezi. Beoog sẽn vẽege neb wʋsg waa kibsã la b sẽn wʋm t'a Zezi me wata Zerizalɛɛm, b bao kãas vãado n yi n tɩ seg-ba la b kaasdẽ: «Kilill! Sẽn wata Soaala yʋʋr yĩnga, Israyɛl dĩma, paam pẽgre!» A Zezi paama bõan-bila n zomb wala b sẽn gʋlse: Siõ bi-pugla, da zoe rabeem ye, ad-f dĩma sẽn wate, b zomba bõan-bila. Karen-biisa kaoos n wʋma yell kãng võore, yaa a Zezi sẽn waa n paam pẽgre la b yaool n tẽeg tɩ rẽ fãa da pĩnd n gʋlsa bãmb poorẽ, la yaa rẽ fãa n pidsi. Zãma ninga sẽn zĩnda ne a Zezi b sẽn waa n bool a Lazar t'a yi kɩɩms sʋka, zãma kãng n da wɩngd ne kilsgu. Yaa rẽ me yĩng la Zerizalɛɛm dãmba yi b segbo; b ra paam n wʋmame t'a Zezi n maan wẽnd makrã. Farizẽ rãmba yẽ ra yeta taab woto: «Yãmb meng ka ne tɩ y pa tõog fɩ, ad neba fãa sẽn zoet n pʋgd yẽnda.» Ad-y sẽn mii n wat-b Zerizalɛɛm n na n waoog Wẽnnaama, bu-zẽnd dãmba, Grɛk rãmba, mii n bee sʋka. Bãmb yẽne n waa a Filip nengẽ. A Filip yaa Galile Bɛtsayid daoa, la yẽ sɛɛg la b waa n yõke, n yetẽ: «D kẽema, tõnd tʋll n yãenda a Zezi.» T'a Filip togs a Andre tɩ bãmb b yiibu tɩ taas koɛɛgã. Ad-a Zezi sẽn leoke: «Wakat taame tɩ Ned Biiga na n paam pẽgre. Sɩd-sɩda mam yeta yãmba, tɩ ka-beel sã n pa bus tẽnga t'a ki fãa, a paada a yembre la a sã n ki a rogda biis wʋsgo. Sẽn nong-a a vɩɩm na n menes-a lame, la sẽn kis-a a vɩɩm dũni kãnga pʋgẽ, a na paam-a, vɩɩm sẽn kõn sɛ yĩnga. Sẽn dat-a n yɩ m sõgne, bɩ a tũ maam; la mam sẽn be zĩig ning fãa, mam sõgna me na n zĩnda be. La m Ba na waoog-a. M yam bondgame marsã, la m na n yeelame tɩ bõe? M Ba, fãag-y maam ne wakat kãnga. La yaool n yaa tʋʋmd ning sẽn na n tʋm wakat kãnga la m wa moogo. M Ba, kɩt-y tɩ y yʋʋr paam pẽgre!» La koɛɛg n yi yĩngri n yeele: «Mam pẽg-b lame la b na n le kell n paama pẽgre!» Zãma wã sẽn da be be n wʋm koɛɛgã yeelame: «Yaa saag n kelme!» Tɩ kẽer yeele: «Yaa malɛk n gom ne bãmba!» T'a Zezi yeel: «Ka mam yĩng la koɛɛga sẽn tãsa ye, yaa yãmb yĩnga. Yaa marsã la dũniya bʋʋd na n bʋ; yaa marsã la b na n tus dũni wã Naab n lubi. La maam, b sã n wa zẽk-m yĩngri, mam na n taka bũmb fãa n kolg m menga.» Woto la b wilg b sẽn na ki kũum ninga. Zãma wã leok-b lame: «Tõnd zãmsa noora sebrẽ tɩ Krista na n paa daar fãa. Yãmb yɩta a wãn n yeele: ‹Yaa tɩlɛ tɩ b zẽk Ned Biiga yĩngri,› Ned Biiga yaa ãnna?» T'a Zezi leok-ba: «Vẽenem nan ket n bee yãmb sʋka, la a kõn kaoos ye, la Vẽenema sẽn nan ketã bɩ y kẽne, tɩ lik ra wa rɩ-y ye tɩ sẽn kẽnda likẽ, ka mi a sẽn dabdẽ ye. La vẽenema sẽn nan ket y yĩngã, bɩ y tẽ vẽenema, n wa yɩ vẽenem kamba.» Yaa woto la a Zezi gom yã, la b looga, bãmb sʋka, tɩ ned pa yãend-b ne a nif ye. Ne b sẽn da maan wẽnd makr dãmb wʋsgo tɩ b yãe wã, Zʋɩf rãmba kell n pa tẽ a Zezi ye. Dẽ me la bãngda Izayi gomda taasyã: Soaala, ãnna n tẽ d goama? La ãnna n yãend Soaala sẽn wilg b pãnga? B pʋs n da ka tõe n tẽ ye t'a Izayi ra yeelame: B pẽsa b nini, b kɩtame tɩ b sũur dɩglem, sẽn na yɩlẽ tɩ b nin da yãe ye, la b yam da nek ye, woto b kõn tek b zʋgo la m kõn sãaog-b ye. A Izayi togsa woto t'a reng n yãee Soaala ne b ziiri la yaa bãmb yell la a gomda. Baasgo, ba taoor dãmba sʋka, wʋsgo tẽ-b lame. Ad-y yaa Farizẽ rãmba yĩng bala, la b ra ka togsd sẽn be b sũurẽ, n maand rabeem tɩ b na n wa yiis b pʋʋsga roogẽ. B ra nonga ninsaalb pẽgre n yɩɩd Wẽnnaam dẽnna. A Zezi zẽka koɛɛg n yeele: «Sẽn tẽed-a maam fãa, ka maam la a tẽed ye, yaa sẽn tʋm-b maama. La sẽn yãet-a maam, yãeta sẽn tʋm-a maama. M yaa vẽenem n wa dũni pʋgẽ tɩ sẽn tẽeda maam da pa likẽ ye. Sẽn kelgd-a m goama n yaool n pa reegd-b, m ka kaood a soab bʋʋd ye tɩ m ka wa n na n kao dũni bʋʋd ye, m waa dũni fãagre. Sẽn zãgsd-a maam, la a pa reegd m goama, yẽ soab tara a bʋ-kaooda: yaa gomdã m sẽn togsã, gom kãng bala n na kao a bʋʋdo yaoolem daare. Mam ka gom m toorẽ n gomd ye; yaa sẽn tʋm-b maama, yaa Ba meng n kõ m noorã m sẽn na n togsã la m sẽn na n kɩt tɩ neba bãngã. La mam miime tɩ b noora reegr wata ne vɩɩm sẽn kõn sɛ. Woto m sẽn togsd bũmb ningã, yaa wala m Ba sẽn togs-m la m togsda.» Pak kibsa da nan ka ta ye, la a Zezi sẽn da mi tɩ b wakat yaoome, tɩ b na n yi dũni kãnga n leb b Ba nengẽ, ad-y b sẽn da nong b kamba sẽn be dũniya, b pidsa b nonglma kaset zãnga. Rɩɩb la b da rɩta. Dẽ tɩ Sʋtãana da zoe n ninga Iskariyot Simo biig a Zɩɩda yamẽ, t'a zãmb-ba. Dẽ t'a Zezi ra zoe n miime tɩ b Ba ninga bũmb fãa b nugẽ, la b sẽn yi Wẽnnaam nengẽ wã, be la b na n lebe. Dẽ me yĩng la b yiki n yeeg b fuugu n dɩk peend n sẽgen b sɛɛga, n pʋdg koom ne laaga n sɩng n waasd b karen-biisa nao, la b yẽesd-b ne peend ning b sẽn da sẽbgã. La b sẽn ta a Simo-Piyɛr la yẽ sẽn yeel-b: «Soaala, yãmb n na n waas mam naoo?» T'a Zezi leok: «Mam sẽn maand bũmb ning marsã wã, fo ka wʋmda võore la f na waa n wʋm.» T'a Piyɛr yeel: «Yãmb kõn waas m nao abada!» La a Zezi leokame: «M sã n pa waas f nao, fo kõn paam f pʋɩɩr m nengẽ ye.» T'a Piyɛr yeele: «Bɩ y ra waas m nao bal ye, pek-y m nusã la m zuga me.» T'a Zezi na n yeel-a: «Sẽn so-a koom ka le rat bũmb a to sa n ka a nao waasgo tɩ yĩnga yɩlga zãnga. Yãmb yaa yɩlma la ka y fãa ye.» Bãmb da mii ned ninga sẽn na n zãmba bãmbã, yaa rẽ yĩng la yeel yã: ka yãmb fãa n ya yɩlm ye. La b sẽn waas karen-biisa nao n sɛ, b leb n yeelga b fuugu n le gãand dɩɩba zĩigẽ la ad-b sẽn paase: «M sẽn maan bũmb ningã, y wʋmda a võor bɩ? Yãmb boond-m lame tɩ karen-saamba la Zu-soaba, la y bee bʋʋm, m sɩd yaa boto. La mam sã n waasd yãmb nao, mam sẽn ya karen-saamb la zu-soaba, yãmb me na waas y taab nao. M kõo y la yam sõngo, wala mam sẽn maan ne yãmbã, maan-y boto ne y taaba. Sɩd-sɩda m yet-y lame tɩ sõgen ka yɩɩd a zu-soab ye, la tʋʋm-tʋmd me ka yɩɩd sẽn tʋma yẽ wã ye. Yãmb sã n mi rẽnna, yãmb la zu-noog rãmba y sã n maand boto. Ka y fãa yell la m sẽn gomda ye, mam mii m sẽn tũus b rãmba, la yaa sẽn na yɩlẽ tɩ sẽn be Sebr sõnga pʋgẽ taase: ‹Sẽn dɩt-a ne maam, yẽ n zẽk a nao-kãsen-kãare n na n tão-ma.› Mam pĩnd n togsd-y lame tɩ nan pa ta ye, tɩ sã n wa ta bɩ y tẽ tɩ m yaa sẽn vɩ a soabã. Sɩd-sɩda mam yeta yãmba: ‹Sẽn deegd-a mam sẽn na n tʋm a soaba, yaa maam la a reegda, la sẽn deeg-a maam, deegda sẽn tʋm-b maama.› » La a Zezi sẽn yeel woto, b yam bondgame, la b goma vẽenega: «Sɩd-sɩda m yeta yãmb tɩ yãmb nin-yend n na n yõk-m n kɩse.» La b tʋʋm-tʋmdba ra geta taab n ka mi b sẽn gomd a soab yell ye. Karen-biig a ye n da gãe n dell a Zezi yãoog. A Zezi da nonga yẽ soabã. T'a Simo-Piyɛr na n kams-a n sok yaa ãnda yell la b gomda. La karen-biig ning sẽn da rella yãoogã sokame: «Soaala, yaa ãnna?» T'a Zezi leok-a: «M sẽn na suk bur võr zẽedẽ n kõ a soabã, yaa yẽnda.» La b sẽn suk bur võra zẽedo, b kõ-la a Zɩɩda, Iskariyot Simo biigã. La a sẽn deeg võrã, Sʋtãan kẽe a Zɩɩda pʋgẽ; a Zezi yeelame: «Fo sẽn sed bũmb ningã, bɩ f maan-a tao tao.» La sẽn da rɩt-bã ned ba a ye ka bãng sẽn ya bũmb ning yĩnga la a Zezi gom woto ne a ye. Kẽer da tẽedame t'a Zɩɩda sẽn da zãad ligda korg yĩnga, a Zezi tʋlg n yeel-a lame: «Da d sẽn tar bũmb ninga tʋʋmd kibsa yĩnga, bɩ maan wẽn kosgo ne naong rãmba.» A Zɩɩda sẽn deeg burã, a yik n yiime; ra zoe n lebga yʋngo. A Zɩɩda sẽn yi la a Zezi yeel yã: «Marsã Ned Biiga paama pẽgre la Wẽnd me paama pẽgr bãmb nengẽ. La Wẽnnaam sã n paam pẽgr bãmb nengẽ, bãmb me na n paama pẽgr Wẽnnaam nengẽ la b pẽgra wakat ka na n kaoos n ta ye.» M kom-nongdse, m ket n bee ne yãmba, la kõn kaoos ye. Yãmb me na n wa baooda maam, la wala m sẽn yeel Zʋɩf rãmba: mam sẽn dabdẽ wã, y ka tõe n wa be wã, m leokda yãmb me boto marsã. M kõt-y la no-paalga: «Nong-y taaba; wala m sẽn nong yãmbã, yãmb me nong y taaba. Neba fãa na n bãngame tɩ y yaa m karen-biisi: y sã n tar nonglem ne taaba.» La a Simo-Piyɛr yeelame: «Soaala, yaa yɛ la yãmb dabda?» T'a Zezi leok: «M sẽn dabdẽ wã, fo nan ka tõe n tũ-m be ye, la yɩ bilfu f na waa n tũ-ma.» T'a Simo-Piyɛr yeel: «Yaa bõe yĩng la m ka tõe n tũ-y marsã? Mam na n kõ m meng vɩɩm yãmb yĩnga.» T'a Zezi leok-a: «Fo na n kõo f meng vɩɩm mam yĩnga? Sɩd-sɩda mam yeta foom: noaag kõn kelem tɩ f ka reng n yeel naoor a tã tɩ f ka mi-m ye. Bɩ y ra sãam-y sũur ye! Yãmb tẽeda Wẽnnaam, bɩ y tẽ maam me. Dot wʋsgo n be m Ba zakẽ, sã n da kaẽ boto m naan n togsẽ yã; m dabd n na tɩ segla zĩig n bĩng yã. La m sã n kẽng n tɩ segl zĩigã, m na le wa peeg-y n looge, tɩ mam sẽn be zĩig ninga bɩ y me zĩnd be. La m sẽn dabdẽ wã, y mi-la a sore.» La a Toma yeelame: «Soaala, tõnd ka mi y sẽn dabdẽ wɛ! D na n yɩɩ wãn n bãng sore?» T'a Zezi yeel-a: «Maam la sore, la sɩda, la vɩɩm. Ned ka tat m Ba nengẽ tɩ ka mam maasem yĩng ye. Yãmb sã n da bãngẽ maam, y naan n bãngẽ m Ba me, la yãmb pʋs n mi-b lame, la y yãee-b lame.» T'a Filip yeel-ba: «Soaala, wilg-y tõnd y Ba tɩ rẽ sekd-d lame.» T'a Zezi leok: «Mam bee ne yãmb al daar zãra, Filip, tɩ yãmb ket n pa mi maam? Sẽn yãenda maam, yãenda m Ba. Fo na n yɩɩ wãn n yeele: ‹Wilg-y tõnd y Ba?› Fo ka tẽed tɩ m bee m Ba pʋgẽ tɩ m Ba me be m pʋgẽ laa? Goam niyns m sẽn gom ne yãmba, m ka gom-ba m meng m toor ye. M ba sẽn be m pʋgẽ wã, n maand b tʋʋma. Tẽe-y-ma! Mam bee m Ba pʋgẽ tɩ m Ba be m pʋgẽ. Ba y ka na n tẽ bũmb a to yĩng me bɩ y tẽ m tʋʋma yĩnga. Sɩd-sɩda mam yeta yãmba tɩ sẽn tẽed-a maam, a me na n maana tʋʋm niyns m sẽn maandã, la a pʋd n na maana sẽn yɩɩd rẽnna tɩ m dabda m Ba nengẽ. La yãmb sẽn na n kos m Ba bũmb ning fãa m yʋʋr yĩnga, m na maane, tɩ m Ba paam pẽgr b Biig maasmẽ. Yãmb sã n kos-m bũmb m yʋʋr yĩnga, m na maane. Yãmb sã n nong maam y na reeg m noya. La m na n kosa m Ba, la b na tʋm yãmb Sõangd a to t'a wa pa ne yãmb daar fãa. Bãmb la sɩd soaba, Vʋʋsem Sõngo, dũni sẽn ka tõe n deeg a soabã, tɩ dũni ka ne-b la a ka mi-b ye. Yãmb yẽ mi-b lame tɩ b bee ne yãmba. Mam kõn bas yãmb kɩɩbd ye, m na n wala y nengẽ. Keta bilfu, la dũni rãmb kõn le yãend-m ye. La yãmb yẽ na bãng tɩ m vɩɩme, la yãmb me na vɩɩnde. Sã n wa beẽ, yãmb na bãng tɩ mam bee m Ba pʋgẽ tɩ yãmb bee m pʋgẽ, tɩ mam me bee y pʋgẽ. Sẽn mi-a mam noya la a reegd-b, yaa yẽ soab n nong maam, la sẽn nong-a maam, m Ba me na n nonga yẽ soaba, la mam me na n nong-a lame, la m na n puka m meng ne yẽ.» A Zɩɩda, (ka Iskariyot daoã ye,) yeel-b lame: «Maan a wãna tɩ yãmb na n puk y meng ne tõndo n ka na n puk y meng ne dũni rãmba?» T'a Zezi yeel-a: «Ned sã n nong maam, a na deega m goama, la m Ba na n nong-a lame la d na n waa a soab nengẽ, d na n tii roog a soab nengẽ. La sẽn pa nong-a maam ka reegd m goam ye, la goama y sẽn wʋmda ka m dẽnd ye, yaa m Ba sẽn tʋm maama rẽnna. M togs-y la rẽ fãa tɩ m ket n be ne yãmba. La Sõangdã, a Vʋʋsem Sõngo, Ba sẽn na n tʋm a soab m yʋʋr yĩnga, bãmb na n zãmsa yãmb bũmb fãa, la b na n le tẽeg-y la m sẽn togs-y bũmb ning fãa. Mam basd-y la m laafi, m kõt-y la m laafi la m laafi wã ka wẽnd dũni wã sẽn kõt a soaba ye. Bɩ y sũur da sãam la y ra zoe rabeem ye. Y wʋma m sẽn yeel-y: m dabdame la m na n le waa y nengẽ, y sã n nong maam, y na noog y sũuri, m sẽn dabd m Ba wã nengẽ tɩ m Ba yɩɩd m la me. La m pĩnd n togsd-y la rẽ marsã tɩ y bãng tiiri tɩ nan pa ta ye tɩ sã n wa ta bɩ y tẽ. La Marsã tɛka m kõn le sõs ne yãmb n kaoos ye tɩ dũni kãnga naab watame; yẽ ka so bũmb m nengẽ ye, la yaa sẽn na yɩlẽ tɩ dũni rãmb bãng tɩ m nonga m Ba la m maanda b sẽn yet tɩ m maan a soaba. Aya! Yik-y tɩ d loog ka! Maam la bugsuntun-sõng menga tɩ m Ba yaa a rõaasa. Will ning sẽn pa womd biisi, b na n kɛɛg-a lame, la sẽn womd-a biisi b na maneg-a n kʋʋs t'a wom n yɩɩge. Yãmb zoe n yaa sõma, goama mam sẽn togs yãmba yĩnga. Bɩ y kell n pa ne maam, tɩ mam me pa ne yã. Wala will sẽn pa tõe n wom biisa toore, a sã n pa lagem ne tɩɩgã, woto me ne yãmba, yãmb me sã n pa lagem ne maam. Maam la bugsuntun-sõngã tɩɩga, yãmb la wila. Sẽn paad-a ne maam, tɩ mam me paad ne a soaba, yẽ womda biis wʋsgo, la y sã n ka lagem ne maam, y ka tõe n wom biis ye. Sẽn ka paad-a ne maam, b lobd-a la yɩng wala, kɛɛdo la a na n kʋɩɩme, la b wʋkd-a lame n lob bugmẽ tɩ bugum dɩ. Yãmb sã n pa ne maam, la m goama me sã n pa y pʋgẽ, kos-y yãmb sẽn dat bũmb ning fãa, tɩ y na n paamame. Y sã n womd biis wʋsgo la y lebg m karen-biisi, dẽ na wa ne m Ba pẽgre. Wala m Ba sẽn nong maama, mam me nong-y lame. Bɩ y kell n pa m nonglma pʋgẽ. Yãmb sã n sakd m noya, y na n kell n paa m nonglma pʋgẽ, wala m sẽn sak m Ba noya n paa b nonglma pʋgẽ. M togsd-y la rẽ faa, tɩ m sũ-nooga wa lebg y rẽnna, la y sũ-nooga wa pid zãnga. M noora la woto: nong-y taaba, wala m sẽn nong yãmbã. Ned nonglem ka pit n yɩɩg woto ye: kõ f vɩɩm f zo-rãmb yĩnga. Yãmb yaa m zo-rãmba, y sã n maan bũmb ning fãa m sẽn yeel yãmbã. Mam ka le boond-y tɩ m sõgen-kamb ye, tɩ sõgen ka mi a zu-soab sẽn maand ye; m boond-y lame tɩ m zo-rãmba, tɩ m sẽn wʋm bũmb ning fãa m Ba nengẽ, m togs-y lame. Ka yãmb n tũus maam ye, maam n tũus yãmb, n tʋm-y tɩ y kẽng la y wom biisi la y biis ra tol n sɛ ye la woto y sẽn na n kos m Ba bũmb ning fãa, m yʋʋr yĩnga, bɩ b kõ-a yãmba. M sẽn kõt yãmb noor ninga la woto: nong-y taaba. Dũni wã sã n kis yã, bãng-y t'a reng n kisga maam. Yãmb sã n da yaẽ la dũni soolem, dũni na n nongẽ la a sẽn so, la yãmb sẽn ka kẽed dũniya tɩ yaa maam n yiis yãmb dũniya, yaa rẽ me yĩng la dũni kis yã. Tẽeg-y gomd ning m sẽn yeelã: Sõgen ka yɩɩd a Zu-soab ye. B sẽn nams maama, b na n namsa yãmb me; la b sã n deega mam goama, b na reeg yãmb me rẽnna. Yaa mam yĩng la b kis yãmb la b maand beem ne yãmba, la rẽ yaa b sẽn ka mi sẽn tʋm-b maama. M sã n da ka waẽ la m sã n da pa gomẽ ne-ba, taal kaẽ b zug ye, marsã b yel-wẽnda ka be padõng ye. Sẽn kisa maam kisa m Ba. M sã n da ka maan b nifẽ tʋʋma ned ba a ye sẽn pa maana, yel-wẽnd kaẽ b zug ye. La marsã ne b sẽn yãend tʋʋm kãensã, b baas n kisa maam, la b kisa m Ba. Yaa sẽn na yɩlẽ tɩ gomd ning sẽn gʋls b noor sebrẽ wã pidsi: ‹B kisg-m la zaalem.› La Sõangda sã n wa, Sõangd ning m sẽn na n zĩnd m Ba nengẽ n tʋm yãmbã, Sɩd soab a Vʋʋsem Sõng sẽn yit Ba nengẽ wã, bãmb na n yɩɩ m kaset soaba. La yãmb me na n yɩɩ m kaset dãmba, tɩ y bee ne maam al sɩngrẽ. Mam togs-y la rẽ fãa, tɩ y tẽeb da wa sãam ye. B na yiisa yãmb pʋʋsg rotẽ. La yɩɩd rẽ, wakat n wate tɩ sẽn na n kʋ-a yãmba na n tẽ t'a maana Wẽnnaam waoogr tʋʋmde. B na n maana yãmb boto, tɩ b ka bãng m Ba la maam ye. La m togs-y la rẽnna, tɩ b wakata sã n ta bɩ y tẽeg tɩ m pĩnd n togs-y lame. M ka togs-y rẽ al sɩngrẽ ye, tɩ m da bee ne yãmba. La marsã m kuiisa sẽn tʋm-b maama nengẽ, la yãmb ned ba a ye pa sokd-ma: ‹Y rabda yɛ?› La m sẽn wilg-y dẽ wã, la y sũur pid ne sũ-sãanga. Yaool n yaa sɩd la m togsd-y: m kulb bee yõod ne yã; tɩ m sã n pa kuli, Sõangdã kõn wa y nengẽ ye, la m sã n kuli, m na tʋm-b tɩ b wa. A Vʋʋsem sõng waoong raare, b na puka yel-wẽnd sẽn yɩ bũmb ninga n puk sõmblem sẽn yɩ bũmb ninga, n puk bʋʋm sẽn yɛs zĩig ninga. Yel-wẽnd sẽn yɩ bũmb ninga: yaa tɩ b pa tẽ maam ye sõmblem sẽn yɛs zĩig ninga: tɩ m dabda Sõmblem Ba wã nengẽ la y ka na n le yãend maam ye. N puk bʋʋm sẽn be zĩig ninga: tɩ dũni wã naab bʋʋd kaoome la b mong-a la bʋʋm. M ket n tara koees wʋsgo n na n togsyã, la y nan ka tõe n deeg-b nand ye. La Sɩd soab a Vʋʋsem Sõng sã n wa, bãmb na n zãms-y la sɩd zãnga; b kõn gom b toor goam ye, b na n togs-y la b sẽn wʋme, b na n wilg-y la sẽn na n yaool wa fãa. Bãmb n na n pẽg maam, tɩ bũmb ning b sẽn na n wilg yãmb fãa, b na n deeg-a la mam nengẽ. M Ba sẽn tar fãa yaa maam n so. Yaa rẽ yĩng la m yeel-y tɩ b na n deega mam nengẽ n togs yãmba. Keta bilf bala tɩ y ka na n le yãend maam ye la yɩ bilfu y na le yãend-ma.» La karen-biisa sogsa taaba: «Gomdã b sẽn leok tõndã võor la bõe: ‹Sã n yɩ bilfu, y kõn le yãe-m ye, la sã n yɩ bilfũ y na le yãend-ma,› bɩ: ‹M kuiisa m Ba nengẽ?› B ra yetame: ‹Sã n yɩ bilfu, Bilfa võor yaa bõe?› Tõnd pa wʋmd b sẽn dat n yeel bũmb ning ye.» La a Zezi bãngame tɩ b da rat n sok-b lame, dẽ la b yeel-ba: «Yãmb sogsda taab m gomda võore: Sã n yɩ bilfu y kõn le yãe-m ye la sã n yɩ bilfu y na le yãe-ma. Sɩd-sɩda, m yeta yãmba tɩ y na n yãbame la y na n waasame la dũni na n kɩdmame, la yãmb sũur na n sãamame. Yãmb sũ-sãanga yaool n na n tedg n lebga sũ-noogo. Pag sã n kũmd dogem, a tara sũ-sãanga, t'a wakat taame, la a sã n dog a biig n sɛ, a pa le tẽegd a namsga yɛs ye, t'a sũur yaa noogo, ninsaal sẽn dog dũni pʋgẽ wã yĩnga. Ad yãmb me sẽn zĩ marsã ne sũ-sãanga, la m na n le yãend-y lame, la y sũur na yɩ noogo, la ned ba a ye kõn tõog n sãam y sũ-nooga ye. La badaare, y kõn le sok-m bũmb ye. Sɩd-sɩda mam yeta yãmba tɩ y sẽn na n kos m Ba bũmb ning fãa, m yʋʋr yĩnga, b na kõ yã. Al n ta marsã y nan pa kos bũmb m yʋʋr yĩng ye; kos-y tɩ y na n paamame, tɩ y sũ-noog pid zãnga. M togs-y la rẽ ne yelbũna la sã n yɩ bilfu m kõn le wẽ-y yelbũn ye, m na wilg-y m Ba yell vẽenega. Badaare, y na kos m yʋʋr yĩnga la m ka yet tɩ m na n yõka Ba sɛɛg y yĩng ye, tɩ Ba menga nonga yãmba, y sẽn nong maama yĩnga la y sẽn tẽ tɩ m yii Wẽnnaam nengẽ wã yĩnga. M yii m Ba nengẽ n wa dũniya, la marsã m yita dũniya n kuiis m Ba nengẽ.» Karen-biisa yeel-b lame: «Ad marsã yãmb gomda vẽenega, pa le ya ne yelbũn ye! Marsã d bãngame tɩ yãmb mii bũmb fãa, la y pa le tar ned sokr tʋʋmde ye, dẽ la d tẽed tɩ yãmb yii Wẽnnaam nengẽ.» T'a Zezi yeel-ba: «Marsã yãmb tẽedame? La wakat n na n ta, la a zoe n taame, yãmb fãa na n sẽegame, ned kam fãa a sẽn teesẽ, n bas maam m yembre. La mam ka m yembr ye, tɩ Ba bee ne maam. Mam togsa yãmb dẽnna tɩ y paam laafi mam nengẽ. Dũni pʋgẽ y na n yãee toogo, la da bas-y raood ye! Mam tõoga dũniya.» A Zezi sẽn gom woto, b rooga b neng n ges yĩngri n yeele: «Ba, wakat taame: pẽg-y Biiga tɩ y Biiga me pẽg yãmba! Y kõo Biiga tõog Adem biig fãa zugu. Bɩ neb niyns fãa yãmb sẽn dɩk n kõ y Biigã, paam vɩɩm sẽn kõn sɛ! La vɩɩm sẽn kõn sɛ wã, yaa b bãng yãmba, Wẽnd meng sẽn ka to, la b bãng y sẽn tʋm a soaba, a Zezi Krista. Mam pẽga yãmb tẽng zugu; m tʋm n baasa tʋʋmd ning y sẽn da kõ-ma. Marsã, Ba, pẽg-y maam ne pẽgr ninga m sẽn da tar y nengẽ tɩ dũni nan ka naana. Yãmb sẽn welg b rãmba dũni wã pʋgẽ n kõ maama, m wilga bãmb y yʋʋre. Yãmb n da so-ba, la y rɩk-b lame n kõ maam la b reega y gomde. Marsã b bãnga me tɩ m sẽn paama fãa yita yãmb nengẽ. Goama y sẽn taas maama, mam me taas-b lame la b reegame, la b bãngame tɩ m yila y nengẽ, la b tẽeme tɩ yãmb n tʋm maam. Yaa bãmb yĩng la m pʋʋsda, m ka pʋsd dũni wã yĩng ye. M pʋʋsda y sẽn welg b rãmb n kõ maama yĩnga. B yaa yãmb soolem, Mam sẽn so fãa, yãmb n so. La yãmb me sẽn so, maam n so. La sɩda m paama pẽgr b nengẽ. Marsã m ka le be dũni pʋgẽ ye la bãmb yẽ be a pʋgẽ, tɩ mam yaool n wat y nengẽ. Ba sõngo, bɩ y yõdg n gũ-ba, yʋʋr ning y sẽn kõ-ma maasem yĩnga, tɩ b kell n yɩ a ye wa tõndo sẽn yaa a ye wã. M sẽn da waa n be ne-ba, m gũ-b la yʋʋra yãmb sẽn kõ-ma maasmẽ la bãmb sʋka ned ba a ye ka menem sã n ka bi-menemdgã, sẽn na n yɩlẽ tɩ sẽn gʋlsa pidsi. Marsã m wata y nengẽ la m togsa woto tɩ m ket dũniya tɩ sẽn be-b dũni wã sũur wa pid ne m sũ-nooga zãnga. M kõ-b la yãmb koɛɛga la dũni kisg-b lame tɩ b ka dũni kamb ye, wala m me sẽn ka dũni biiga. M pa kot yãmb tɩ y yiis-b dũniya, m kot-y lame bal tɩ y fãag-b ne Wẽnga. Bãmb ka dũni kamba wala m me sẽn ka dũni biiga. Bɩ y gomda tus-ba n kẽes y sõmblema pʋga tɩ yãmb gomda yaa sɩda. Wala y sẽn tʋm maam dũni pʋgẽ mam me tʋmda bãmb dũni pʋgẽ. Yaa bãmb yĩng la m dɩk m menga n bas Wẽnd nusẽ n dat tɩ bãmb me wa rɩk b meng zãng n kɩs Sɩdã. Mam ka pʋʋsd yãmb b yĩng bal ye, m pʋʋsda sẽn na n tẽ-b maama bãmb me kaseta yĩnga. M pʋʋsdame tɩ b fãa wa yɩ bũmb a ye. M Ba, wala yãmb sẽn be m pʋgẽ tɩ mam me bee y pʋgẽ, bɩ bãmb me pa d pʋsẽ, tɩ dũniya wa tẽ tɩ yãmb n tʋm maam. La yãmb sẽn kõ-m pẽgr ningã m kõ-a la bãmba, sẽn na yɩlẽ tɩ b yɩ bũmb a ye wala tõnd sẽn ya a ye wã. Woto mam bee bãmb pʋgẽ, tɩ yãmb me bee mam pʋgẽ tɩ lagmen-taara pids zãnga, tɩ dũni wã bãng tɩ yãmb n tʋm maam la yãmb nonga bãmb me, wala y sẽn nong maama. Ba, yãmb sẽn kõ maam b rãmbã, m datame tɩ mam sẽn beẽ wã, bɩ bãmb me zĩnd ne maam, n paam n yãend m pẽgre, pẽgr ning y sẽn kõ maama, tɩ y ra nonga maam al tɩ dũni nan pa naan ye. Zemsgo soab, Ba, dũniya ka bãng-y ye, la mam yẽ bãng-y lame la m karen-biisa reegame tɩ yãmb n tʋm maam. Mam wilg-b la y yʋʋre, la m na le wilg-ba, n paase la woto b na paam b pʋsẽ, wala mam sẽn tar m pʋgẽ, nonglem ning y sẽn nong maama.» B sẽn pʋʋs n sɛ, a Zezi yii ne b Tʋʋm-tʋmdba, n dʋʋg Sedrõ kʋɩlga, la zẽed n da be be tɩ b tɩ kẽe a pʋgẽ. Karen-biisa me tũume. A Zɩɩda — ned ninga sẽn na n zãmba bãmba — ra mii zĩiga, t'a Zezi ra kẽnda be naoor wʋsgo ne b karen-biisã. A Zɩɩda da lʋɩɩ tãb-biisa la wẽnd do-gũudba taoore; maan-kʋʋdba nanamse la Farizẽ rãmba n da yiis-b; la b waa ne fitil dãmba la bug vɩlense, la zab teedo. La a Zezi sẽn da mi bũmb ning fãa sẽn na n maana, b yik n seg-b lame n yeel-ba: «Yãmb baooda ãnna?» Tɩ b leok-ba: «A Zezi, Nazarɛt raoã.» T'a Zezi yeele: «Yaa maam!» Zãmbd a Zɩɩda da bee b sʋka. La a Zezi sẽn yeele: «Yaa maam!» B fãa tara poorẽ n lʋɩ tẽnga. Tɩ b le sok yɛsa: «Y baooda ãnna?» Tɩ b le yeele: «A Zezi, Nazarɛt nedã!» T'a Zezi leok: «M yeel-y lame tɩ yaa maam; la sã n ya maam la y baooda, bɩ y bas bãmba tɩ b looge.» B goma woto n na n taas b sẽn da pĩnd n yeele: «Y sẽn kõ maam b rãmbã, m ka bas ba a ye t'a menem ye.» A Simo-Piyɛr da tara sʋʋga, t'a wõog-a n kɛ maan-kʋʋd kãseng sõgen a ye n kẽbga rɩtg tʋbre, la sõgna yʋʋr da yaa Malkus. T'a Zezi yeel a Piyɛr: «Leb n sui sʋʋgã a wʋʋgẽ; m Ba sẽn tugl maam wamd ningã, m ka na n yũ-a bɩ?» Tãb-biisa, bʋʋda naaba la ro-gũudba yõka a Zezi n sẽbe, n deng n tall-ba n kẽng a An nengẽ t'a da yaa Kaif rɛɛmba. La yaa a Kaif n da so kãsengo yʋʋmd kãnga. Yaa a Kaif n da sagl Zʋɩf rãmba tɩ sãoome tɩ ned a ye ki b fãa zĩigẽ. A Simo-Piyɛr da pʋgda a Zezi ne tʋʋm-tʋmd a to. Maan-kʋʋd kãsengã da mii yẽ soabã. Yẽ soaba kẽe ne a Zezi maan-kʋʋd kãsenga zakẽ. La a Piyɛr da yɛsa yɩnga, zaka noore la maan-kʋʋd kãsenga sẽn da mi a soaba, yii yɩng n yẽs ne zak-noor-gũud poaka t'a bas t'a Piyɛr kẽ. La zak-noor-gũud poakã yeela a Piyɛr: «Fo ka raoã karen-biig a ye sɩda?» T'a yeele: «Ayoo!» Sõgen-kamba ne gũudba ra tugla bugum n wootẽ tɩ da yaa waoodo, t'a Piyɛr zĩ ne-ba, n woot bugma. Maan-kʋʋd kãseng soka a Zezi b karen-biisa yelle, la b karenga yelle. La a Zezi leokame: «M goma ne dũni rãmb vẽenemẽ tɩ b wʋm, daar fãa m zãmsa nebã pʋsg rotẽ la wẽnd doogẽ, Zʋɩf rãmb sẽn tigimd taab zĩig ningã, m ka soos n gom fɩ. Yaa bõe yĩng la y sokd-ma? Sok-y neb niyns sẽn kelg-b maama, m sẽn gom bũmb ning yelle ne-ba. Ade, bãmb mii m sẽn yeel bũmb ninga.» La a Zezi sẽn yeel woto, sõgen a ye sẽn da be be wẽ-b la pɛk n yetẽ: «Yaa woto la f leokd maan-kʋʋd kãsenga?» T'a Zezi yeel-a: «M sã n pa gom neere, bɩ f wilg bõe n ka zems m goama pʋgẽ, la m sã n goma neere, yaa bõe tɩ f wẽed ma?» A An kell n basa Zezi ne b wĩyã n tʋm-b maan-kʋʋd kãsenga a Kaif nengẽ. A Simo-Piyɛr da ket n zĩi n woota bugma tɩ neb yeel-a: «Fo ka a karen-biig sɩda?» T'a kɩɩs n yetẽ: «Ayoo!» Maan-kʋʋd kãseng sõgen a ye, a Piyɛr sẽn kẽbg a soab tʋbra doagda, yeela a Piyɛr: «M ka yãend-f ne a zẽedẽ wã sɩda?» T'a Piyɛr kɩɩse, tɩ no-raoog wẽneg n kelem. La b yi a Kaif nengẽ ne a Zezi, n tall-ba n kẽng bʋʋda zĩigẽ; da yaa tõd-beoogo la b pa sak n kẽ bʋʋda zĩigẽ, tɩ b na n wa rẽgem n pa tõog n dɩ paka rɩɩb ye. T'a Pilat yi yɩng n sok-ba: «Yãmb ningda rao kãnga taale ne bõe?» Tɩ b leoke: «Ad-a sã n da kaẽ bi-bɛɛga, d ka na n yõkẽ yã n wa kɩs yãmb ye.» T'a Pilat yeel-ba: «Bɩ yãmb meng tall-a y toore n tɩ bʋ-a wa y noya sẽn date.» Tɩ Zʋɩf rãmb leok: «D ka tar sor n kʋ ned ye.» Da yaa sẽn na n pids gomd ning b sẽn da yiisi n na wilg b sẽn na n ki kũum ninga. La a Pilat le kẽe doogẽ, bʋʋda zĩigẽ n bool a Zezi n sok-ba: «Yaa foom la Zʋɩf rãmba dĩm bɩ?» T'a Zezi kedg n sok-a: «Fo gomda woto f toor bɩ yaa ned n gom m yelle?» T'a Pilat yeele: «M yaa Zʋɩf bɩ? Yaa f buuda neb ne maan-kʋʋdb nanamse n yõk-f n wa kɩs-ma, fo maama bõe?» La a Zezi leokame: «Mam naama ka dũni kãnga rẽnn ye, m naama da yaẽ-la dũni kãnga rẽnna m neba na n yɩɩsẽ-la tãpo n sõng-ma tɩ m da lʋɩ Zʋɩf rãmb nugẽ ye, la m naam ka dũni kãnga rẽnn ye.» T'a Pilat na n leoke: «Dẽ yĩnga fo yaa dĩma?» T'a Zezi yeel: «Fo togsame, mam yaa dĩma, mam dogame, la mam waa dũni kãnga pʋgẽ bũmb a ye yĩng bala: n na n kõ sɩd kaseto. Sẽn ya-a sɩd soaba, yẽ kelgda m koɛɛga.» T'a Pilat yeel-ba: «Sɩd la bõe?» La a sẽn gom woto, a lebg n kẽnga Zʋɩf rãmb nengẽ n tosg-ba: «Mam ka yãend a sẽn maan yell ning sẽn sek a paalgr ye. La lebga wala minung ne yãmb tɩ pak kibs yĩnga bɩ m yiis bi-bɛɛg a ye roogo n kõ-yãmba, yãmb datame tɩ m yiis Zʋɩf rãmb dĩma n kõ-y bi?» La b fãa leokame: «Ayoo! Da yiis yẽ roog ye, yiis a Barabas.» A Barabas da yaa so-gɩta. A Pilat reega a Zezi n kɩt tɩ b pãb-b ne kaase. Tãb-biisa pãnema gõos n maan naam pugla b yĩnga, n dɩk n fõgen b zugu la b yeelg-b la fu miuugu. B ra kolgd-b lame n yetẽ: «Zʋɩf rãmb dĩma, d pʋʋsda yãmba!» La b ra pãbd-b la pegse. A Pilat yii yɩng n yeel nebã: «M na n tall-a lame n wa yɩnga, yãmb taoore, tɩ y bãng tɩ m ka yãend bũmb sẽn na n wa ne a bʋʋd paalgr ye.» La a Zezi yii yɩnga ne gõosa pugla b sẽn fõgna la ne fu miuugã b sẽn pilã, t'a Pilat yeele: «Ad-y y raoã!» La maan-kʋʋdba nanamse ne tãb-biisa sẽn yãend-ba, b kelmame: «Ka-y yẽe pika, ka-y yẽe pika!» T'a Pilat yeel-ba: «Bɩ yãmb meng y toor deeg-a n ka pika, mam ka yãend a sẽn maan yell ning ye.» Tɩ Zʋɩf rãmb leok: «Tõnd tara d noya, la sẽn zems ne tõnd noya, a toga ne kũum t'a mamsa a meng ne Wẽnd Biiga.» La a Pilat sẽn wʋm gomdã, dabeem yõk-a lame n yɩɩd pĩnda, t'a le kẽ bʋʋd doogẽ n sok a Zezi: «Fo yita yɛ?» La a Zezi pa leok tɩ bũmb ye. T'a Pilat yeel-ba: «Maam la f zãgsd leokre? Fo ka mi tɩ m tõe n ka-f la pika, wala m sẽn tõe n bas-f laa?» T'a Zezi leok-a: «Fo ra kõn tõogẽ n maan maam bũmbu, tõog sã n da ka yiẽ yĩngr tɩ fo paamẽ ye, yaa rẽnd yĩng la sẽn ning-a maam fo nugẽ wã yel-wẽnd yɩɩd fo rẽnna.» La wakat kãnga tɛka, a Pilat da baood n na n basa a Zezi. Zʋɩf rãmbã n da kelemde: «Fo bas yãoo, f kõn maan wa f yaa Rom naab zoa ye. Ned ning fãa sẽn yet t'a yaa dĩma, a soab bagemd n yii Rom naab soolmẽ.» A Pilat sẽn wʋm woto, a talla a Zezi n yɩ yɩnga, bʋʋda zĩigẽ, zĩig ning sẽn maneg n gãneg ne kug peesem, n boond ne Zʋɩf rãmb goam tɩ gabata. Da yaa pak seglgo daare, sẽn zems wĩnto-sʋka, la a yeela Zʋɩf rãmba: «Ad yãmb dĩma!» Tɩ b fãa kelem: «B kʋ-a, b kʋ-a, b ka-a pika!» T'a Pilat yeel-ba: «M ka yãmb dĩma pika?» Tɩ maan-kʋʋdba nanams yeel: «Tõnd ka tar dĩma to tɩ ka Rom naab ye.» La a Pilat basa a Zezi ne Zʋɩf rãmba. Pik la b ra tog n ka a Zezi. B sɩd tall-b lame n looge. A Zezi yiime, n zɩt b pika n dʋ zu-wang tãnga, la Zʋɩf rãmba boond-a lame tɩ Golgota. B maga bi-bees a yi n ka pika, a ye a Zezi rɩtgo, a to, b goabga, t'a Zezi be sʋka. A Pilat da gʋlsa woto walg zugu n yagl pikã: «Zezi, Nazarɛt daoa, Zʋɩf rãmb dĩma.» Zʋɩf rãmba tõog n karma sẽn gʋlsã tɩ pika ra pa zãar ne tẽnga ye. Da gʋlsa ne buuda tãab goama: Zʋɩf rãmba, Grɛk rãmba la Latẽ rãmba. Maan-kʋʋdba nanams yeela a Pilat: «Da gʋls: ‹Zʋɩf rãmb dĩm ye,› gʋls tɩ yẽ n yeele t'a yaa Zʋɩf rãmb dĩma.» La a Pilat yeelame: «M sẽn gʋlsã, m gʋlsame.» Tãb-biis niyns sẽn ka a Zezi pikã wʋka b futã n pʋɩ sags a naase, tɩ tãb-biig fãa paam a ye; b rɩka fu-yorga me. Da ka fuug sẽn tar sẽnesem ye. B wʋg-a la mumdi, sɩngre n ta baasgo. La b yeela taaba: «Wa-y tɩ d da kẽes fu-kãnga ye, d poees n bao a soaala.» La rẽ yaa sẽn na yɩlẽ tɩ Sebr sõng gomda taase: B pʋɩɩ taab m futu, b poeesame n bãng m fu-yorga soaala. Yaa woto la tãb-biisa maan yã. A Zezi pika sɛɛga, b ma n da yɛs be ne b ma-bila, ne a Mari, a Klopas paga, ne a Mari Madelɛn. A Zezi sẽn yãend b ma, n yãend karen-biig ning b sẽn da nong a soaba tɩ b yeg taaba, b yeela b ma: «Paga, ad-y y biiga.» B yeela karen-biigã: «Ad-f ma.» Wakat kãng tɛka karen-biiga reeg-b la a meng yiri. Dẽ poore, a Zezi sẽn da mi tɩ sẽn maana fãa yaa sẽn na yɩlẽ tɩ sẽn be Sebr sõng pʋgẽ taas zãngã, b yeelame: «Ko-yũud n tar maam!» Yʋʋr n da tẽg be n pid ne rã miisga tɩ tãb-biisa los needgo a pʋgẽ, n yaag n sel daoogo, n tugla Zezi. La a Zezi sẽn fõog rã miisgã, b yeelame: «Fãa pidsame!» La b kɩlla b zug la b kiime. La sẽn da ya pak seglg daar yĩnga, tɩ b ra pa rat tɩ kũuma pa pika zugu, vʋʋsg daare, tɩ baraar da zoe n yaa kibs kãsenga, Zʋɩf rãmba tɩ kosa a Pilat sore n na kao sẽn ka-b pika karse la b sik-ba. Tãb-biisa waa n kao wagdba a yiiba karse. La b sẽn taa a Zezi b mikame tɩ b kiime. Woto b ka kao b kars ye. Tãb-biig a ye wedga a Zezi lʋgra ne kãnde tɩ zɩɩm la koom naag n yi. Yaa sẽn yãend-a ne a nifã n kõt kaseto la d miime t'a kaset yaa sɩda, a meng miime t'a yeta sɩda, sẽn na n yɩlẽ tɩ yãmb me paam n tẽ. Dẽ me maaname tɩ Sebr sõng goam kãensa taase: Bɩ b kõbr ba a ye da kaoog ye. Zĩig a to me gʋlsa woto: B na ges b sẽn wedg a soab lʋgrã. Arimati dao a ye, a Zozɛf, da yaa a Zezi karen-biiga, la ra yaa ne soosgo, Zʋɩf rãmba rabeem yĩnga. Yẽ tɩ kosa a Pilat sor n na n tall b yĩngã n loog. A Pilat kõo sore, tɩ b sɩd wa rɩk yĩngã. Dao ninga me sẽn waa a Zezi nengẽ ne yʋngã, a Nikodɛm, kalma kaam buud a yi sẽn tar yũ-noogo la sẽn pit yʋʋre, n wa yaoogẽ wã. B rɩka a Zezi yĩngã n zɛ ne tɩdarã n vil ne pɛɛla n tũ Zʋɩf rãmba laagd sẽn mumd kũum to-to. Zẽed n da be b sẽn ka a Zezi zĩig ningã la yao-paalg la b ra tuk be n nan ka mum ned a pʋgẽ ye. Yao-kang pʋg la b mum a Zezi t'a ra pẽeme la pak kibsa seglg ra zoe n sɩngame. Ata daar yibeoogo pĩnda, zĩig sẽn da nan pa yẽege, a Mari Madelɛn kẽnga yaoogẽ wã la a yãeeme tɩ yaooga kugr lakame. A zoe n babsa a Simo-Piyɛr ne Tʋʋm-tʋmd ninga a Zezi sẽn da nong a soabã, n yeel-ba: «B yiisa Soaala yaoogẽ la d ka mi b sẽn tɩ gãneg-b zĩig ning ye.» A Piyɛr yii ne karen-bi kãnga n wa yaoogẽ wã. B yiiba naaga taab n wudg, la a Zezi sẽn nong a soaba wudg n looga a Piyɛr, n deng n ta yaoogẽ wã. A sẽn zõond n like, a yãee pɛɛla sẽn dɩg la a pa kẽ ye. A Simo-Piyɛr ra pʋgdame, la yẽ taa n kẽeme; a yãenda pɛɛlã sẽn dɩg, la peend ning sẽn da vil a Zezi zuga da bee toore, a ra kʋʋme n dɩg toore. Dẽ marsã la Tʋʋm-tʋmd ninga sẽn denga taabã yaool n kẽ; a yãeeme la a tẽeme. B ra nan pa mi, tɩ wala sẽn gʋls Sebr sõng pʋgẽ, da yaa modgr t'a Zezi vʋʋg kɩɩms sʋk ye. Karen-biis a yiiba yaoolame marsã n leb yiri. A Mari Madelɛn da pẽnega yaoogã n yɛs yɩng n yãbda, la a waa n lɩka yaoogẽ wã, n yãend malɛk rãmb a yiib sẽn yer fu peelse n zĩi, a ye, zuga zĩigẽ, a to, nao wã sẽn da teesẽ. Malɛgsa yeela a Mari: «Paga, yaa bõe yĩng la y yãbda?» T'a leok ba: «B rɩka m Soaala yĩnga la m ka mi b sẽn tɩ gãneg-b zĩig ning ye.» A sẽn yeel woto, a kedga a poorẽ n yãe t'a Zezi yɛs yĩngri; a ra ka mi tɩ yaa bãmb ye. A Zezi n yeel-a: «Paga, yaa bõe tɩ f yãbda?» A Madelɛn yõkame tɩ yaa zẽeda soaba, n yeele: «M zu-soaba, sã n ya yãmb n dɩk-ba bɩ y wilg-ma y sẽn gãneg-b zĩig ninga tɩ m tɩ rɩk-ba.» La a Zezi yeel-a lame: «Madelɛn!» T'a kedg n yeel-ba: «Rabonni», dat n yeelame tɩ karẽn-saamba. T'a Zezi yeel-a: «Da sɩɩs-m ye, tɩ m nan ka rʋ m Ba nengẽ ye, la kẽng n tɩ yeel m yaopã tɩ m daba m Ba la yãmb me Ba nengẽ, m Wẽnnaam la yãmb me Wẽnnaam nengẽ.» A Mari Madelɛn kẽngame n tɩ togs Tʋʋm-tʋmdba t'a yãenda Soaalã la bãmb meng n yeel tɩ b wa togs-ba. Badaar zĩ-sobdo, karen-biisa ra tigma taab doog a ye pʋga; b ra paga kʋɩlensa, Zʋɩf rãmba rabeem yĩnga la a Zezi kẽ n yalsa b sʋka n yeel-ba: «Laafi zĩnd ne yãmba!» La b sẽn yeel woto b wilg-b la b nus la b lʋgre la karen-biisa sũur yɩɩ noogo b sẽn yãend Soaalã. A Zezi yeel-b lame: «Laafi zĩnd ne yã! Wala m Ba sẽn tʋm maama, ma me tʋmda yãmba.» La b sẽn gom woto, b fʋʋsa b zut n yetẽ: «Deeg-y Vʋʋsem Sõngo, y sẽn na kõ neb niyns b yel-wẽna sugri, b na n paama sugri, la y sẽn na n mong b rãmb sugri, b na n konga sugri.» La b sẽn boond a soab t'a Didim, a Toma, piig la a yiiba nin-yend, da pa zĩnd ne a taaba a Zezi likra wakat ye. La karen-biis a taaba yeel-a lame: «Tõnd yãenda Soaalã!» T'a yeele: «M sã n pa yãend b nusẽ, kaadsa bogdo, n pa tʋm m nug-bila kaadsa bogdẽ, n pa tʋm m nug b lʋgrẽ, m kõn tẽ ye.» Dasem a nii dẽ poore, karen-biisa ra le tigma taab dooga pʋga, t'a Toma be b sʋka. A Zezi waame tɩ kʋɩlensa pag yã la b yaasa b sʋk n yeel-ba: «Laafi zĩnd ne yãmba!» B yaool n yeela a Toma: «Tʋm f nug-bil ka, ges m nusã, rɩk f nug n tʋm m lʋgrẽ wã, bɩ f tẽ la f ra le kɩɩs ye.» La a Toma leokame: «M Soaala la m Wẽnnaam!» T'a Zezi yeel-a: «Ya f sẽn yãend-ma la f tẽeda. Ad sũ-noog rãmb la sẽn tẽ-b tɩ b nin ka yãend ye.» A Zezi le maana b Tʋʋm-tʋmdba taoore wẽnd makr dãmb a taaba sẽn pa gʋls ka ye. La b sẽn gʋls-b rãmb fãa ka wã, b gʋls b lame tɩ y tẽ t'a Zezi yaa Krista, Wẽnnaam Biiga, tɩ y sã n tẽ-ba y na paam vɩɩm bãmb maasem yĩnga. A Zezi le lika b karen-biisã Tiberiyad mogr noore la ade, b likra yɩɩ woto: A Simo ne a Toma, b sẽn boond a soab tɩ Didim, n paas a Natanayɛl, Galile Kana tẽng neda, la a Zebede kamba n paas karen-biis a yiibu, n da be ne taaba. A Simo-Piyɛr waa n yeel-b lame: «M na n tɩ yẽe zĩma.» A taaba yeelame: «D me na n tũume!» B tɩ kẽe koglg n yẽ la b pa yõk bũmb yʋng kãng ye. Zĩig sẽn yẽege, a Zezi waa n yaasa mogra noor tɩ karen-biisa ka miẽ ye. La a Zezi yeel-b lame: «Kambã, y ka tar sẽn na rɩ laa?» Tɩ b leoke: «Ayoo!» Tɩ b yeel-ba: «Lob-y zulunga koglga rɩtgo tɩ y na paame.» B loba zulungã n da pa le tõe n vuug-a ye, zĩma sẽn ya wʋsg yĩnga. T'a Zezi sẽn da nong karen-biig ninga yeel a Piyɛr: «Ad yaa Soaala!» La a Simo-Piyɛr sẽn wʋme: «Yaa Soaala,» yeelga a fuug n sẽbg a sẽbdg t'a ra yaa a zaala la a tiimda koomẽ. Karen-biis a taabã n wa ne koglgã n vuud zulunga ne zĩma, la b da pa zãr ne tẽn-koɛɛnga ye, ra zemsa kãntɩɩs kobsi bala. B sẽn sig tẽnga, b yãee bug-saala ne bugum tɩ zĩm da rog b zugu, n paas buri. A Zezi yeel-b lame: «Yãk-y zĩma y sẽn yõgã n wa ne.» T'a Simo na n kẽ koglgã n yiis zulunga koɛɛngẽ. Koglga ra pida ne zĩm bɛd sẽn ta koabg la pisnu la a tãabo. La ne zĩma sõor sẽn yɩ wʋsgã, zulunga ka pãrg ye. A Zezi yeel-b lame: «Bɩ y wa rɩ.» Karen-biig ba a ye pa saag n soke: «Yãmb la ãnna?» B ra bãngame tɩ yaa Soaalã. A Zezi kolg n dɩka burã n pʋɩ ba, n paas zĩma. Woto n tõkd naoora tã a Zezi sẽn lik b karen-biisã b vʋʋgra poore. B sẽn dɩɩ n sɛ, a Zezi yeela a Simo-Piyɛr: «Simo, Zã biiga, fo nonga maam n yɩɩd bãmba bɩ?» T'a Piyɛr leoke: «N-yẽe! Soaala, yãmb mi tɩ m nonga yãmba.» T'a Zezi yeel: «Kɩɩm m pe-bi!» T'a Zezi le sok, naoor a yiib soaba: «Simo, Zã biiga, f nonga maam bɩ?» T'a Piyɛr leok: «N-yẽe! Soaala, yãmb mi tɩ m nong-y lame.» T'a Zezi yeel-a: «Kɩɩm m pe-yãanse!» Tɩ b le sok-a, naoor a tãab soaba: «Simo, Zã biiga, fo nonga maam bɩ?» La a Piyɛr sũur sãamame, a Zezi sẽn sok yẽ, naoor a tãab marsã: «Fo nonga maam bɩ?» La a yeelame: «Soaala, yãmb mii bũmb fãa la y mi tɩ m nong-y lame sẽ.» T'a Zezi yeel-a: «Kɩɩm m pe-yãanse! Sɩd-sɩda m yeta foom tɩ f sẽn da waa n ya bi-bɩɩga, fo ra sẽbgda f sɛɛg f toore la f kẽnd f sẽn date, la f sã n wa kʋʋle, fo na n zẽka f nus tɩ ned a to sẽbg-fo n tall-fo n kẽng f sẽn pa ratẽ.» B yeela woto n na n wilg a Piyɛr a sẽn na n pẽg Wẽnnaam ne kũum ninga. La rẽ poore b paasame: «Tũ maam!» A Piyɛr wẽnega a poorẽ n yãe a Zezi sẽn nong a soaba t'a pʋgda. Yaa karem-bi-kãng n dell a Zezi yãoog, dɩɩba wakat, la yẽ n soke: «Soaala, ãn n na n zãmb yãmba?» A Piyɛr sẽn yãend-a, a soka a Zezi: «Soaala, la ada-soaba yell na n yɩɩ wãna?» T'a Zezi leok-a: «M sã n dat t'a kell n pa n ta m waoongo, bõe n pak foom? Fo yee n tũ maam!» La kibar n sãag karen-biisa sʋka tɩ karen-bi-kãng yẽ kõn ki ye. A Zezi yaool n da pa yeel a Piyɛr: «A kõn ki ye,» b ra yeelame bala: «M sã n dat t'a pa n tãag m waoongo.» Ad-y yaa karen-bi kãng n kõt yell kãensa fãa kaseto, yẽ n gʋls-ba la tõnd miime t'a kaset yaa sɩda. Bũmb wʋsg a Zezi sẽn maan n kete, tɩ b sã n da gʋlsẽ-ba, a yembr-yembre, m pa tẽed tɩ dũni wã na zĩnd weere n deeg sɛba sẽn na n gʋlsa fãa ye. Teofil, mam pipi sebra pʋgẽ, m wilga Soaal a Zezi sẽn maan la b sẽn zãms, al b tʋʋmna sɩngrẽ, n ta raar ning b sẽn baas b koeesã ne b sẽn da yãk-b rãmb n maan b Tʋʋm-tʋmdba ne a Vʋʋsem Sõng vẽnegre, n yaool n dʋ arzãna. Yaa bãmb la b lik naoor yaka, b kũuma poore, n kõ kaseto tɩ b ket n vɩɩme. Sɩda rasem pisnaas pʋgẽ b ra mii n lika b meng bãmba n zãmsd-b Arzãn Rĩunga yelle. B sẽn waa n dɩt ne taab, daar a ye, b kõ-b la noore tɩ b ra zãag ne Zerizalɛɛm ye; b yaas be n gũ Ba sẽn da kãabe tɩ bãmb meng b toor deeg n togs ne b noore: «A Zã sooba yɩɩ koom soobo, la sã n ya yãmba, yɩ bilfu, y na n soo ne a Vʋʋsem Sõngo.» B ra tigma taaba la Tʋʋm-tʋmdba ra sokda a Zezi: «Soaala yaa marsã meng la y na n le vigl naama Israyɛl tẽng bɩ?» Tɩ b leoke: «Ka pakr tɩ y bãng yaa sasa bʋgo la yaa wakat bʋgo la Ba yals rẽ ne b toorẽ daab ye. Yaa pãng la y na n paame, a Vʋʋsem Sõng pãngã n na n sig yãmba. Y na yɩɩ m kaset dãmba Zerizalɛɛm, Zɩɩde, la Samari, n tãag dũni wã tɛka.» La a Zezi sẽn gom woto b zẽka yĩngri, bãmb nifẽ la sawadg n waa n lill-ba. Karen-biisa sẽn waa n yɛs woto n nak b nens n tees yĩngr t'a Zezi looda, neb a yiibu sẽn yer peelse, waa n yalsa b sɛɛgẽ. B yeel-b lame: «Galile neba, bõe tɩ y yɛs woto n get yĩngri? Zezi ninga sẽn looga woto n bas yãmbã, Zezi ninga y sẽn yãend tɩ kuiis yĩngrã, ad-y b na n lɛɛg n waa boto.» Tʋʋm-tʋmba siga Oliviye tãng n leb Zerizalɛɛm. Tẽnga ka zãr ye, pa loog kẽnd sẽn tõe n kẽn vʋʋsg daar ye. Karen-biisa sẽn leb tẽnga pʋga, b rʋ-la b yĩngr doogã b sẽn nong n paad a soab pʋgẽ wã. Da yaa a Piyɛr, a Zã, a Zak, a Andre, a Filip, ne a Toma, a Bartelemi ne a Matiye, a Alfe biig, a Zak, n paas a Simo: M zabr bee ne buuda bɛɛba la a Zak biiga Zɩɩd. B fãa ra nonga pʋʋsgã ne nonglem yɛnga, bãmb ne pagb kẽere, wala a Maryam, a Zezi ma la b saam-biisi. Daar a ye tẽedba ra tigma taaba; b ra taa koabg la pisi t'a Piyɛr na n yik n yeel-ba: «Bũmb n da gʋls Sebr sõng pʋgẽ n da ka tõe n ka pids ye. Yaa a Vʋʋsem Sõng sẽn da gom ne a Daviid noorã a Zɩɩda poorẽ, Zɩɩda ning sẽn lʋɩ a Zezi bɛɛba taoore tɩ b paam n yõk-ba. A Zɩɩda ra yaa tõnd nin-yende. Yẽ me ra reega Tʋʋmda pʋɩɩr wala tõnd. La a sẽn deeg a yel-beeda yaoodo, yaa pʋʋg la a ra yã. A sẽn yi yĩngr n lʋɩ, t'a zug reng tẽnga, a yĩnga kao-la a sʋka, t'a yãad yʋlem tomẽ. Zerizalɛɛm dãmb fãa bãnga yellã la rẽ me la b pʋd pʋʋgã: Akeldama, dat n yeelame tɩ zɩɩm pʋʋgo. La ad sẽn gʋls Yɩɩla sebr pʋgẽ: ‹Bɩ a zak lebg vɩʋʋgo, bɩ ned da le saag n kẽ a pʋgẽ ye.› La zĩiga to me gʋlsame: ‹Bɩ ned a to reeg a zĩiga.› Dẽ wã togame tɩ neb niyns sẽn pʋg-b tõndo, Soaala sẽn waa n be ne-dã, al a Zã soob wakato, n ta raar ning b sẽn yi d sʋka, togame tɩ bãmb dãmba nin-yend wa paas tõnd n yɩ b vʋʋgra kaset kõata.» Neb a yiib la b tall n wa: a Zozɛf, b sẽn pʋd a soab tɩ Barsabas la a Matiyas, tɩ b na n pʋʋs woto: «Soaala, yãmb sẽn mi ninsaal fãa sũurã, wilg-y tõndo, neb a yiiba sʋka, yãmb sẽn dat tɩ ned ninga reeg Koe-nooga tʋʋmde n tʋm, a Zɩɩda zĩigẽ, zĩig ning a sẽn bas n kẽng a sẽn miẽ wã.» Zu-noog la zu-beed bũmb la b rigl tɩ b yake, la zu-nooga lʋɩ-la a Matiyas, la yẽ la b reeg Tʋʋm-tʋmdba sʋka. Pentekot raar sẽn ta, dat yeelame tɩ paka loogre, a rasem pisnu poore, b fãa ra tigma zĩ yɛnga. La vugr bala bʋʋr wa sob raoog sẽn fõt bʋʋre n yi yĩngri n wa. B sẽn da be roog ninga wulumda ne bʋʋrã. B yãee wa zɛlma sẽn wit bugum, sẽn waa n sig ned kam fãa zugu. B fãa pida ne a Vʋʋsem Sõngo n sɩng n gomd bu-zẽn goama wala a Vʋʋsem Sõng sẽn da yet tɩ gome. Zerizalɛɛm yaool n da pida ne neb sẽn nong Wẽnd waoogre. B ra yita saaga tẽngr ween-vɩɩs a naasã. Bʋʋra sẽn maan yĩnga, zãma wã wudg n fãooga taaba. Ned kam fãa yaool n da wʋmdame tɩ b sẽn gomdã ya a meng buuda goama. B Pɛleng yɩkame tɩ b ra sogsd taaba: «Sẽn gomd-ba fãa ka Galile neb laa? Maana a wãn marsã la tõnd ned kam fãa sẽn wʋmd a buuda goama? Ad Part la Mɛd dãmba, ad Elamit, Mezopotami, Zɩɩde la Kapados rãmba, Põ la Azi rãmba, Frizi la Pãnfili la Libi kɩreng a ye sẽn tot ne Sirɛn, noakens sẽn yit Rom, Zʋɩf rãmba ne b kẽed-paalse, Krɛt la Arabi rãmba. D sẽn yit zĩig ning fãa, d wʋmdame tɩ b pẽgd Wẽnnaam tʋʋm-bãna ne d buuda goama!» B pɛleng yɩkame, tɩ b yɛs ne yɩɩre n sogsd taaba: «Wã rat n yeelame tɩ bõe?» Kẽer me ra laad-b lame n yetẽ: «Yaa rã toos n tar ba.» A Piyɛr yik n yalsa yĩngri, yẽ ne Piig la a ye wã, la a zẽka a koɛɛg n yeele: «Zɩɩde rãmba la yãmb fãa sẽn kẽed Zerizalɛɛm, kelg-y m goama la y wʋm neere. Ad-y ka rãam n tar nin-bãmba, wala yãmb sẽn tẽeda ye tɩ nan yaa yibeoogo, tɩ sõora nan ka paam n zẽk ye. Yaa bãngda sẽn yeelã n taase: ‹Bũmb n na n zĩnd yaoolem daarã — Soaala n gomde — m na n sika m Vʋʋsem Adem biis fãa zutu. Y kom-dibli la y kom-pugli na n yiisa bãngr goama. Y kom-bɩɩba na n yãee bõn-bãna tɩ y nin-kẽems zãms-zams bãna. M na sika m Vʋʋsma m neba zutu, rap wala pagba. M na n yiisa bõn-bãn yĩngri, saag zugu la wẽnd makr dãmb tẽng zugu, saaga tẽngre Wĩntoog na n lebga yʋngo, tɩ kiuug moog wa zɩɩm tɩ Soaala raarã, b ra-kãsenga yaool n wa. La ned ninga fãa sẽn na n kẽ bãmb na n paama fãagre.› Israyɛl kamba, kelg-y woto: Ad-y yaa Nazarɛt Zezi wã la Wẽnd kõ kaset tɩ bãmb be-la b poorẽ, ne wẽnd makr dãmba la bõn-bãna b sẽn maan y nifẽ tɩ y fãa miẽ. Ad-y yaa bãmb la yãmb zãmb yã. Rẽ yaool n ka ling Wẽnd yam zulunga ye, tɩ b ra nee rẽ al zamaan woko. Nazarɛt Zezi wã la yãmb yõk n kɩs nin-wẽnse tɩ b ka-b pik zugu n kʋ. La Wẽnd vʋʋg-b lame, la b tɩlga Kɩɩmkulg yɛɛsgo. Kɩɩmkulg pʋs n da miime t'a ka tõe n paalg-a a soolmẽ ye; tɩ bãngda Daviid da zoe n goma woto: ‹M da nee Soaala sẽn n kẽnd m taoor wakat fãa; b yegda m dɩtgo tɩ m da latem ye; dẽ me la m noog m sũuri tɩ laad wa n noorẽ tɩ m yĩnga tõr gãe ne saagre, saagr tɩ y kõn bas m sɩɩga t'a pa ne kɩɩms ye, la y kõn bas y nin-sõnga t'a bãng yaoogẽ põogr ye. Y wilg-m la vɩɩm sore la m sã n be ne yãmba m kɩdemda sũ-noogo.› M saam-biisi, ad-y d tõe n togs-y la vẽenega, d yaab a Daviid kiime, tɩ b solg-a yaoogẽ, t'a yaooga ket n be ne rũnna. A Daviid sẽn da ya bãngda, n mi tɩ Wẽnd meng n da kãab-a ne wẽenego, t'a yageng a ye n na n dʋ a naama zaoore, a beool n bãnga Krista vʋʋgre, tɩ sɩda Krista ka pa Kɩɩmkulgu, la b yĩnga ka bãng yaoog põogr ye. Zezi kãnga, Wẽnd sɩd vʋʋg-b lame, la d fãa gill tara rẽ kaseto. Marsã yaa Wẽnnaam Ba rɩtg la b zĩ ne pẽgre. La Ba kõ-b la a Vʋʋsem Sõngo, b sẽn da kãabe. Dẽ me la y nif la y tʋbr tar kaset dũnna. Sã n ya a Daviid, yẽ pa rʋ arzãn ye. Ãnd yell marsã la a gomda: ‹Zu-soaba yeela m Soaalã: zĩnd m dɩtgo n gũ raar ning m sẽn na n gãneg f bɛɛbã, tɩ f teeg-b n zĩẽ.› Bɩ Israyɛl rooga tõr bãng vẽenega, tɩ Zezi ninga Wẽnd sẽn kɩt t'a lebg Soaala la Krista, yaa yãmb sẽn ka a soab pikã.» Yɩɩ wa bũmb n kõs sẽn kelg-ba sũuri, tɩ b yeel a Piyɛr ne Tʋʋm-tʋmdbã: «Yaa bõe la d tog n maane, d saam-biisi?» A Piyɛr leok-b lame: «Tuub-y y manesma la ned kam fãa reeg soob a Zezi yʋʋr yĩnga, n paam a yel-wẽna sugri, la rẽ poore y na paam a Vʋʋsem Sõngo. Yaa yãmb yĩng la kãabga kãabyã, yãmb ne y kamba n paas bu-zẽmbã, wala Soaala sẽn dat n bool-b tɛka.» Ne goam buud ka tɛka, a Piyɛr da kõta kaseto la a sagend woto: «Fãag-y y meng ne zamaan yookã.» Neba me kelga a goama n sak n deeg soobo. A Piyɛr sẽn paam tẽedba baraare, taa tus a tãabo. B ra ka viigd ne Tʋʋm-tʋmdba kareng kelgr ye, ne taab sõngre, ne b paoonga lagengo, ne Bura pʋɩɩbo, la ne pʋʋsg ye. Neba fãa ra zĩi ne rabeem tɩ yaa bõn-bãna la wẽnd makr dãmb ka tɛka la Tʋʋm-tʋmdba ra maanda. Tẽedba da rɩkda b sẽn tar fãa n fãoogd taaba. B ra koosda b pʋto la b teed a taaba n pʋɩt ligdã. Ned kam fãa ra paamda wala a zu-loɛɛga yolsg sẽn dat tɛka. Beoog sẽn vẽeg fãa b ra kẽnda wẽnd doogẽ. B zagsẽ wã la b da rɩt lagem taab rɩɩbã la ra yaa sũ-noog ne sũ-noogo tɩ zoenif ka n gɩdgd sɩd pukri ye. B ra tara Wẽnd pẽgre la neba taaba me ra waoogd-b lame. Beoog sẽn vẽeg fãa, Wẽnd sẽn fãag b rãmba da wat n paasda Tiginga sõore. A Piyɛr ne a Zã waa n dabda wẽnd doogẽ zafar pʋʋsg yĩnga. Mik põor la b mii n tar n wat n gãnegd beoog sẽn vẽeg fãa wẽnd dooga noorẽ, noor ning sẽn boond tɩ No-neerã. Woto a tõe n bõsa sẽn kẽed-b wẽnd doogã. A Piyɛr ne a Zã sẽn ta n na n kẽ la põora sẽn sɩng-b bõsgo. T'a Piyɛr ne a Zã na n ges-a n yeele: «Ges tõndo.» A sɩd nooda a nin n get-b la a tẽed bũmbu. A Piyɛr yeel-a lame: «Ad-m ka tar wanzurf la sãnem ye, la m na n kõ-f-la m sẽn tare: a Zezi Krista, Nazarɛt daoã yʋʋr yĩnga, m kõt-f la noore tɩ f yik n kẽne.» A sẽn gãd-a ne a rɩtgo, a zẽk-a lame. Koamsa karga ne a nao-sũkã soga taaba. Vugr bala a yalsa yĩngri n sɩng kẽnde, n tol n tũ n kẽ wẽnd doogẽ. A Kẽndame la a mii n yɩk n tiimde la a pẽgd Wẽnnaam. Neba fãa yãenda a sẽn kẽnd la a pẽgd Wẽnde. Neba fãa bãngame tɩ yaa yẽ n da bõsd wẽnd dooga No-neerẽ wã. Yella yɛɛs-b lame n kẽes-b rabeem kãsenga. Sẽn paam-a laafi wã ra pa le sergd n basa Piyɛr la a Zã ye. Neba kaoogame n waa ne pɛlen-yɩka, a Salomon zãongẽ wã. A Piyɛr sẽn yãend-ba, a kõ-b la koɛɛga: «Israyɛl kamba, bõe tɩ y ka na n gãneg y yam. Bõe tɩ y tar-d gesgo wa yaa ne d meng pãnga, wa yaa ne d pʋʋsga pãnga la d tõog tɩ raoã kẽnd yĩngri? Yaa Abraam, a Izaak la a Zakoob Wẽnnaam n pẽg b Biig a Zezi, rao ning y sẽn yõk n kɩsã. Yãmb yeelame tɩ y ka mi-a, a Pilat taoore. A Pilat yaool n da rat n bas-a lame. Yɩɩ yãmb n dõd Nin-sõngo, ned sẽn ka tara a toorẽ yelle. Yãmb n kos tɩ b bas a Barabas, nin-kʋʋdã, n pa kʋ ye. N yaool n yet tɩ b kʋ Vɩɩma Naaba. Bãmb la Wẽnd vʋʋg kɩɩms sʋka la d tara rẽ kaseto. Ad-y yaa bãmb yʋʋra tẽebo, yaa bãmb yʋʋra pãng yĩnga la koams ning y sẽn ne la y sẽn mi wã, le paam pãnga n yɛs y taoor ne laafi. La m miime, m saam-biisi, tɩ y sẽn maan woto wã, yãmb wala y buuda kãsem-dãmba, yɩɩ yĩdgu. Sã n ya Wẽnde, bãmb yẽ ra beool n wilga ne bãngdba fãa gill noore tɩ b Nin-sõnga na n namsame. La sẽn da gom n dɩgla la b pids yã. Dɩlla maan-y tuubgu, teem-y zʋgo, n paam y yel-wẽna yẽesgo. Sã n ya woto Soaala na n waa ne pems maasg y yĩnga b sã n wa tʋm a Zezi, Fãagd ning b sẽn da kãab yãmb al daar woko. Nananda a Zezi Krista tog n paa arzãn n gũud wakatã wakat ninga bũmb fãa sẽn na n leb a zĩigẽ tɩ bãngdb sõma gomd a yell al daar zãrã. A Moyiiz n deng n yeele woto: Yãmb saam-biisa sʋka Soaala Wẽnnaam na n yiisa bãngd a ye sẽn wẽnd maam. A sẽn na n togs-y bũmb ning fãa y na kelge. Ned ninga fãa sẽn na n zãgs a kelgre bɩ b yiis-a buudẽ. A Moyiiz poore yɩɩ a Samwɛl, la sẽn pʋg-b yẽnna, n gom dasem niyns d sen vɩ dũnna wã yelle. Ya yãmb la bãngdba kamba la zooda kamba, zood ning Wẽnd sẽn yõg ne d yaabrãmbã b sẽn waa n yeel a Abraam: Fo yagensa maasmẽ la Ãdem biig fãa na n paam m barka. Pipi yaa yãmb yĩng la Wẽnd tũus yã la b vʋʋg b Sõgna t'a wa sik bark yãmb ned kam fãa zugu a sã n mik tɩ ned kam fãa zãaga ne a wẽnema.» B ra ket n gomda ne zãma wã la ade, Maan-kʋʋdba, wẽnd do-gũuba kãsma la Saduseẽ rãmba poogame. B sũur pa yɩ noogo b sẽn da karemd nebã n gomd a Zezi yelle, n gomd b sẽn vʋʋg kɩɩms sʋkã yelle. B yõk-b lame n sui roogo n gũud vẽkembeoogo. Zĩiga ra zoe n sobgame. Sẽn sak-b tẽeba me yɩɩ wʋsg baraare, neb na ta tus a nu, rapa bala. Vẽkembeoogo buuda kãsem-dãmba, nin-kẽemsã, karen-saam-dãmba sẽn be-b Zerizalɛɛma, fãa tigma taaba. Ad-a An, maan-kʋʋd kãsenga, a Kaif, a Zã ne a Aleksãndr, la maan-kʋʋdba kãsem-dãmba neba. B boola Tʋʋm-tʋmdba bʋʋdo n sɩng b sokre: «Yãmba, yãmb paama sor yɛ la ãnd n tʋm yãmba?» T'a Piyɛr sẽn pid ne Vʋʋsem Sõng na n yeele: «Buuda nanamse la nin-kẽemse, yaa yel-sõmd la d maan ne koamsã la rũnna, yãmb bool-d la bʋʋdo, tɩ d wa togs d sẽn maan bũmb ning t'a paam laafi. Bɩ yãmb fãa la Israyɛl tõra bãnge: Yaa Nazarɛt Zezi wã yʋʋr yĩnga. Yaa yãmb sẽn ka a soab pika tɩ Wẽnd vʋʋg kɩɩms sʋkã. Yaa yẽ la yẽ a ye tãa yʋʋr yĩnga la koams kãnga paam laafi n yɛs y taoore. Yaa yẽnda la kugr ninga yãmb tãn-metba sẽn bas kɛɛngã, la yẽ n lebg rooga kug ma. Saaga tẽngr ka, d pa tar yʋʋr a to sẽn tõe n fãag-d ye.» B sẽn yãend t'a Piyɛr ne a Zã gomda wa neb sẽn minim goama, n yaool n ka karem n siki, n yaool n pa vẽen ne rog-n-mika zãngã, bʋʋda rãmb pɛleng yɩkame. B sɩd deegame tɩ b ra tũuda a Zezi. B ra naag n nee sẽn paam-a laafi wã t'a yɛs b sɛɛgẽ, woto b ra ka tar sẽn na paas ye. B kɩtame tɩ Tʋʋm-tʋmdba zãag ne bʋʋdbã, tɩ b paam n yẽs ne taaba. B ra yetame: «Bõe la d na n maan nin-bãmba? Yaa vẽeneg ne Zerizalɛɛm tõre tɩ b maana wẽnd makre la d ka tõe n ka reeg ye. D sẽn pa rat tɩ yella le yelg n paas zãma wã sʋka, d na n mooga d nin n gɩdg-ba tɩ b ra le pʋd ned ba a ye taoore, a Zezi yʋʋra ye.» B boola Tʋʋm-tʋmdba tɩ b lɛɛg n wa, la b yeel-b lame tɩ b ra le gome, tɩ b ra le zãms ba fɩ a Zezi yʋʋr yĩng ye. Dẽ me la a Piyɛr la a Zã leok-ba: «Yãmb n na n ges la y togs do sã n ya sõmbo Wẽnnaam nifẽ tɩ d deeg yãmb noore n yaool n tõdg bãmb dẽnna? Sã n ya tõndo, tõnd yẽ ka tõe n ka moon d sẽn yãend la d sẽn wʋm ye.» Bʋʋda rãmb kong n le mooga b nin ne-ba, la b bas-b lame tɩ b ra ka mi sɩbgr ning b sẽn na n sɩbg-b ye. B ra zoeta rabeem tɩ zãma wã ra pẽgda Wẽnd, bãada sãoogr yĩnga. Bãada sẽn sãoogã yʋʋm da pida pisnaas n dogl. B sẽn pam b mense a Piyɛr ne a Zã leba b tũud-n-taasa nengẽ la b togs-b la maan-kʋʋdba la nin-kẽemsa sẽn gɩdg-b bũmb ninga. B fãa sẽn wʋm dẽ, b naaga taab vugr bala n yeele: «Yãmb n naan yĩngr la tẽnga la mogr ne a pʋgẽ teedo, Soaala. Yaa yãmb n yeel ne a Vʋʋsem Sõng vẽnegre la ne a Daviid noore, yãmb sõgne la tõnd yaaba: ‹Bõe tɩ bu-zẽmba wukd ne tɩtaam bõe tɩ b zĩi n geend b geel yaalse? Dũni wã dĩm dãmba sũu taaba, tɩ b kombɛɛmba tigim taaba n na n tak zabre ne b Soaala, ne Wẽnd sẽn tʋm a soabã?› B sɩd tigma taab tẽn kãnga pʋgẽ n na n zab ne y Sõgna a Zezi, yãmb sẽn tʋm a soabã. Ada Erod, a Põs Pilat, ad bu-zẽmba ne a Israyɛl, b sũu taaba n na n pids yãmb pãnga la y yam pidunga sẽn da sede al zamaan woko. Sẽn lebg woto marsã, Soaala, tɩ b rat tõnd ne wẽngã, la sẽn na n yɩlẽ tɩ y yemsa paam daoodo n moon y Koe-noogã, bɩ y wilg y pãnga, y Sõgna Zezi yʋʋr yĩnga, ne bãad-dãmb sãoogre, ne wẽnd makr dãmba la bõn-bãna.» B pʋʋsga wakato, b sẽn da be roog ninga miimame. Fãa gill pida ne a Vʋʋsem Sõngo tɩ b tar Wẽnd Koe-nooga moonego ne sũ-keelem. Ne b sõora sẽn da lebg zembalã, tẽedba ra yaa yam a ye la sũur a ye. Ned da ka tar bũmb n yet tɩ yaa rẽnd ye. Bũmb fãa ra yaa b fãa soolem. Yaa ne tʋʋm bãna la Tʋʋm-tʋmdba ra kõt a Zezi vʋʋgra kaseto. Neba sũur da nooma ne-ba. Bũmb da ka paoogd ned ba a ye. Sẽn da tar-b pʋto la teed a taaba da koosd-b lame n wat ne ligdã n dɩgend Tʋʋm-tʋmdba taoore. Dẽn marsã la b ra tõe n kõ ned kam fãa wala a zu-loɛɛga yolsg sẽn dat tɛka. Sɩnga ne a Zozɛf; yẽnda la b sẽn pʋd t'a Barnabe, a mi sagl n gãneg sũuri; a yaa Levi buud neda la a ra yita Sɩpr tẽnga. A ra tara pʋʋgo, a koos-a lame n tall ligdã n wa kɩs Tʋʋm-tʋmdbã. A Anani me ne a pag, a Safir, waa n koosa b pʋʋgo. A Anani seda ne a paga n yãk ligdã n yaool n tall sẽn keesã n wa kɩs Tʋʋm-tʋmdbã. Dẽ la a Piyɛr yeel-a: «Anani, bõe yĩng la f sak tɩ Sʋtãan kẽ f sũurẽ tɩ f wedg pʋʋga ligdi n na n tudg Wẽnd Vʋʋsem? F Pʋʋga sẽn da waa n ket f soolmẽ, da yaa pakr tɩ f koos-a bɩ? La f sẽn koos-a wã, ka foo n so a ligdã n tõe n maan f sẽn dat ne-a bɩ? Maana a wãna tɩ soos n kell n yet tɩ kɩsa zãnga waa f yamẽ? Ad ka ninsaalb la f yag zirẽ ye, yaa Wẽnd menga.» A Anani sẽn wʋm gomdã, a lʋɩɩme n kell n ki. Rabeem kãseng me yõka sẽn wʋm-b kibarã. Kom-bɩɩb n wa n pil-a fuugu n dɩk-a n tɩ mum. Wakat a tãabo sẽn looge, a paga sẽn da ka mi tɩ yell n maana me waame, la a sẽn kẽ, a Piyɛr yeel-a lame: «Yɩɩ woto tɛk la y sẽn koos y pʋʋga bɩ?» Tɩ yẽ leoke: «N-ye! Yɩɩ boto.» T'a Piyɛr na n yeel-a: «Yãmb yɩɩ wãn n sed ne taaba, n na n belg a Vʋʋsem Sõngo? Ade, sẽn yɛs-b rignoorẽ wã yaa sẽn tɩ mum-f sɩdã, la fo me la b waa n na n dɩke.» Nif kamsg pʋgẽ, a Anani lʋɩ-la a Piyɛr taoore n be kũum. Kom-bɩɩba sẽn kẽ wã mikame t'a kiime tɩ b tall-a n loog n tɩ mum-a n yegl a sɩda. Rabeem kãseng yõka Tigingã zãnga la sẽn wʋm-b kibara fãa. Zãma wã sʋka, yaa bõn-bãna la wẽnd makr dãmb ka tɛka la Tʋʋm-tʋmdba ra maanda. B ra zemsa taab n paad a Salomo zãongẽ wã. Ned ba a ye ra ka saagd n yi kɛɛnga n wa lagem ne-b ye. Zãma wã da tara b pẽgr bala. Tẽedba sõor da tara paasgo, pagb la rapa, al tɩ b ra wat n dɩgend bãad-dãmba ne b gãas, gãas paal wala kʋda, soya zutu, tɩ ba na yɩ nin-yend, bɩ a Piyɛr maasma bui-a a sã n wa looda. Zãma wã ra yita Zerizalɛɛm tẽn-toosa meng n wat ne b bãad-dãmba la Sʋtãan yood sẽn kẽ b rãmba la b fãa ra paamda laafi. Sega maan-kʋʋd kãsenga waoongo, yẽ ne a poorẽ dãmba la Saduseẽ rãmba. Fãa sũur da pida ne beem bala, tɩ b na n yõg Tʋʋm-tʋmdba n sui bi-bees roogẽ. La Soaala malɛk waa yʋngo n pags bi-beesa roog kʋɩlemse tɩ b yi t'a yeel-ba: «Dig-y wẽnd doogẽ wã n tɩ wilg zãma wã bũmb ning fãa sẽn get fãagra yelle.» Tʋʋm-tʋmdba reega malɛka noore la b tõda beoog n kẽ wẽnd doogẽ wã, n sɩng zãmsgo. Maan-kʋʋd kãsenga waa ne a poorẽ dãmba, n bool bʋ-kaoodba bʋʋda zĩigẽ, ne Israyɛl buuda nin-kẽemse la b yeelame tɩ b tɩ yiis Tʋʋm-tʋmdba bi-beesa roogo n tall n wa. Sẽn kẽng-ba n na tɩ yiis-b bi-beesa roogã ka tɩ yãend-b ye tɩ b lɛɛg n wa yeele: «D tɩ mikame tɩ bi-beesa roog kʋɩlens paga neere, d yãenda gũud fãa a zĩigẽ. La d sẽn pake d pa yãend b sẽn yõk b rãmba pugẽ ye; ned ba a ye.» B sẽn wʋm woto, gũudba naaba la maan-kʋʋd kãsenga yɛɛsame la b fãa ra baooda yella võore. Wakat kãng la ned waa n yeel-ba: «Yãmb sẽn da kẽes b rãmb roogã, ad-y b bee wẽnd doogẽ n karemd nebã.» Tɩ gũudba kãsma ne a neba na n leb wẽnd doogẽ wã, n tɩ wa ne-ba. B ka maan b pãng ye; b ra zoeta zãma wã, b ra zoeta b na n wa lab-b ne kuga. B sẽn wa, b kẽes-b la bʋ-kaoodb bɛda bʋʋdo tɩ Maan-kʋʋd kãsenga na n sok-ba: «Tõnd da ka yeel yãmb tɩ y ra saag n pʋd Neda yʋʋr laa. Yaool n yaa zãms kãng la y yelg n pid Zerizalɛɛm tõre! Yãmb datame tɩ d dɩ a zɩɩma taal bɩ bõe?» Ta Piyɛr na n leoke ne a taabã: «Yaa Wẽnd noora la d tog n sake n yɩɩd ninsaal dẽnna. D yaab rãmba Wẽnnaam n vʋʋg Zesi ninga y sẽn da ka pik n kʋ wã. Zezi kãng la b zĩndg b rɩtgo n kɩt t'a lebg Dĩm la Fãagda, sẽn na n yɩlẽ t'a Israyɛl paam, bãmb maasmẽ, a yel-wẽna tuubgu la b sugri. Tõnd tara yell kãens fãa kaseto, tõnd ne a Vʋʋsem Sõngo, b sẽn kõt sẽn kẽed-b bãmbã.» B ra kelgda a Piyɛr goama tɩ b sũur fõta, tɩ b kaool b kũum. Dẽ la Farizẽ a ye sẽn boond tɩ Gamaliyɛl yik bʋʋda zĩigẽ. Da yaa Noora karen-saamba, neba fãa sẽn da waoogde. A kosame tɩ b zãag ne Tʋʋm-tʋmdba bilfu, la a yeela bʋ-kaoodbã: «Israyɛl buudu, gũus-y y sẽn dat n maan bũmb ning ne nin-bãmba wã. Bãng-y tɩ raar sẽn vẽsg bilfu a Tewudas yikame n yet tɩ yẽ yaa raoa, tɩ neb na ta kobs-naas yik n pʋg-a. B kʋ-a lame t'a poorẽ dãmba sẽege, la bũmb ka kell ye. Yẽ poore, sõadga wakato, yaa Galile rao a Zɩɩda, n paam tɩ neb sũ a poorẽ. Yẽ me kiime tɩ sẽn da pʋgd-b yẽnda wã sẽege. Dũnna wã, m yet-y lame, bas-y nin-bãmba, da lʋɩɩs-y y toog ye. B goama wala b tʋʋma sã n yit ninsaal nengẽ, b na n menema b toore. La sã n sɩd yaa Wẽnd nengẽ la b yita, y kõn tõog n sãam fɩ. Woto wã da saag-y n wa lebg Wẽnd bɛɛb ye.» Fãa reega a saglgo. B le talla Tʋʋm-tʋmdbã n wa sʋka. B pãb-b la ne kaase, n yeel tɩ b ra saag n pʋd a Zezi yʋʋr ye la b bas-b lame. B yii bʋʋda zĩigẽ la b ra kɩdemda sũ-noogo b sẽn paam paoogre a Zezi Yʋʋr yĩnga. Beoog sẽn vẽeg fãa, wẽnd doogẽ wã bɩ b zagsẽ, b ra ka vʋʋsd ne a Zezi Krista Koe-nooga mooneg ye. Tẽedba sõor sẽn da tar paasg yĩnga, wakat n zĩndi tɩ sẽn gomd-b grɛka guglem ne Ebre rãmbã. B ra yetame tɩ beoog-beoog pʋɩɩra wakato, b wẽgda bãmb pʋg-kõapa. Dẽ me la Tʋʋm-tʋmdba tigim karen-biisa zãnga n yeel-ba: «Ka segd tɩ tõnd bas Koe-nooga moonego n ges rɩɩba pʋɩɩr ye. Ges-y yãmb sʋka n yãk neb a yopoe sẽn tar yʋ-noogo, tɩ Wẽnd me pids-b ne a Vʋʋsem Sõng vẽenem, tɩ d kõ-b tʋʋmd kãnga.» Sã n ya tõndo, tõnd tʋʋmd na n yii pʋʋsgo la Koe-nooga moonego. Koɛɛga taa neba fãa yam tɩ b na n yãk a Etiyɛn ned sẽn pid ne tẽeb la ne Wẽnd Vʋʋsem, n paas a Filip, a Prokor, a Nikanor, a Timon, a Parmenas la a Nikola, Zʋɩf kẽed paalg sẽn yit Antiyos B tall-b lame n wa Tʋʋm-tʋmdba taoore tɩ bãmb pʋʋse la b tẽeg b nus b zutu. Wẽnd Gomda ra paamda moonego. Karen-biisa sõor da paasda wʋsg Zerizalɛɛm la maan-kʋʋdba wʋsg mens da sak n lebga tẽedba. A Etiyɛn sẽn da pid ne sõmblem la pãnga, ra bee b sʋk n maand wẽnd makr dãmba la bõn-bãna. La neb n waa n yiki n na n wẽ no-koɛɛm ne a Etiyɛn. Yaa pʋʋsg roog a ye rãmba sẽn yɩ yem-daad Rom la sẽn paam b mens n lɛɛg n wa. Le paasa Sirɛn neba, ne Aleksãndri, Silisi la Azi rãmba. B ra pa tõe n lub a Etiyɛn ye. A tara yam vẽenem sẽn pa paoode la a Vʋʋsem Sõng da gomda ne a noore. B kong n bao ligd n kõ neb tɩ b wa yeele: «D wʋmame t'a gomd n tʋʋsd a Moyiiz la a tʋʋsd Wẽnde.» B rãmba Zãma wã, nin-kẽemsã la Noora karen-saam-dãmbã. B soos n yõk-a lame n wa bʋʋda zĩigẽ. Be me b waa ne kaset ziri dãmba sẽn yeele: «Nin-kãnga ka vʋʋsd ne wẽnd dooga la Noora sãbsg ye. D wʋma a noorẽ tɩ Nazarɛt Zezi wã na n wãa wẽnd do-kãnga la a teem a Moyiiz rog-n-mikã.» Sẽn da be-b bʋʋda zĩigẽ fãa da geta a Etiyɛn laa ra wẽnda malɛka. Maan-kʋʋd kãsenga sokame: «Sẽn togsa yaa boto bɩ?» T'a Etiyɛn leoke: «M ba rãmba, m saam-biisi, Wẽnd ninga sẽn tog ne pẽgrã lika d yaaba a Abraam, a sẽn da waa n ket Mezopotami. A ra nan ka ti a zak Arã tẽng ye. La ad-b sẽn yeel-a: Bas f ba-yiri la f buuda neba la kẽng tẽng ning m sẽn na n wilg-fu. A Abraam yii Kalde tẽnga n wa kẽ Arã. Yaa a ba wã kũum poore la Wẽnd yiis-a be n tɩ kẽes-a y sẽn be tẽng ninga marsã wã. A pa reeg vẽenem tẽn-kãnga, ba sẽn zems nao-pʋg yalem. A paama Wẽnd kãabgo bala, tɩ yẽ n na n soog tẽngã, la yẽnda yagense, yẽnda loogr poore; la rẽ t'a rag n nan ka rog biig ye. Yaa woto la Wẽnd gom yã: ‹A buuda na n paa tẽn-zẽngẽ, b na n kẽes-a-la yembdo la yʋʋm kobs naas tõre, a na n yãee toogo. La Buud ninga sẽn na n kẽes-b yembdã, maam n na n kao a bʋʋdo, maam, Naaba-Wẽnde. Dẽn poore, m na n yiis-b la be n wa kẽes ka la ka la m na n waoog-ma.› B waa n yõg zoodo. La zood kãng kaset la bãong kẽesgo. Yɩɩ woto la a Abraam kẽes a biig a Izaak bãongo, a rog tɩ rasem a nii. A Izaak me maana boto ne a Zakoob, t'a Zakoob maan boto ne a kamb piig la a yiibã. Yaab rãmba maana sũ-kiir ne a Zozɛf n koos-a, tɩ b tall-a n loog Ezipt tẽnga. La Wẽnd da pʋgda a poore. Beelẽ b yiis-a la a zu-loees fãa pʋgẽ n kõ-a bark la yam pidungu, Ezipt naaba zakẽ. Ezipt naaba kõ-a la kãsengo Ezipt tẽnga la a meng zakẽ. Kom kãsenga la fare n yaool n wa lʋɩ Ezipt la Kanaã. Rɩɩb ra ka bee n dɩtẽ ye. Yaab rãmb sẽn wʋm tɩ bũmb ket n tõe n paama Ezipt, a Zakoob tʋm-b-la be: dẽ yɩɩ pipi kẽnde. B kẽnd a yiib soabã la a Zozɛf lik a menga a kẽem-dãmba la rẽ me la Ezipt naaba bãng a sẽn yitẽ. A Zozɛf tʋmame tɩ b tɩ wa ne a ba, a Zakoob, la a ba wã zaka rãmba; b zãng ra yaa pisopoe la a nu. A Zakoob tʋga Ezipt, n tol n tɩ pa be, yẽnda ne d yaab rãmbã. B yĩnsã la b tall n wa Sikɛm, yaoog ning a Abraam sẽn daa a Emmor kamba nengẽ; a Emmor la a Sikɛm ba. Wẽnd sẽn da wẽen ne b meng n kãab a Abraam bũmb ninga pidsg ra kolgdame. Buuda waa n fɩɩga zembal Ezipt tẽnga. Dĩm paalg me n waa n dɩt Ezipt tẽng naam la yẽ ka bãng a Zozɛf ye. Dĩm kãnga yãenda rabaar buud toor-toore n nams d yaab rãmba. Yẽ n tol n kɩt tɩ b fãsd kambã b ma nusẽ n basd-b tɩ b kiidẽ. Wẽnd kãng la a Moyiiz wa moogo, la Wẽnd meng pẽga a neerma. Kiisa tã la a paa a ba zakẽ. La b sẽn waa n kong n lob-a, yɩɩ Ezipt naaba bi-pugl n dɩk-a, n wub-a waa a meng biiga. Yɩɩ woto la b wub a Moyiiz, n weka yama wa Ezipt biiga la a yɩɩ ned sẽn pid zãnga a goamẽ la a tʋʋmẽ. A yʋʋm sẽn waa n digd pisnaase, a kõ-la a meng yam n na n gilg n ges a saam-biisã, Israyɛl kambã. A sẽn yãend tɩ b namsd bãmb nin-yende, a kʋʋ Ezipt raoã sẽn da namsd-a wã. A ra tẽedame t'a buuda rãmb na bãng tɩ yaa Wẽnd n tʋm-a t'a wa fãag-ba. B ka wʋm dẽ ye. Woto wã beoog a to sẽn vẽege, a yãenda neb a yiib sẽn zabd taab t'a yet t'a na n paas-ba, n yeel-ba: ‹M zo-rãmba, yamb yaa saam-biisi, bõe tɩ y namsd taaba?› Sẽn tara pãnga lebsa a Moyiiz kɛɛnga n yetẽ: ‹Ãnd yeel-f tɩ f soog-do la f kao d bʋʋdo? Sãnd f ka rat n kʋ maam wala f sẽn kʋ Ezipt biiga zaamẽ wã?› A Moyiiz kong n zoeeme n dig Madiã tẽnga. Bee, a roga kamb a yiibu. Yʋʋm pisnaas dẽ poore, Sinayi tãnga zugu, we-raoogẽ, malɛk n lik-a kãgrẽ la yaa kãgr sẽn wit bugum. A Moyiiz da ka tar yell kãnga võor ye. La a sẽn da kolgd n na n paam n yãend neere, la a sẽn wʋm Soaala koɛɛga: ‹Maam la f yaab rãmba Wẽnde, a Abraam, a Izaak la a Zakoob Wẽnde.› T'a Moyiiz yɛs n digda, n pa le saagd gesg ye. Tɩ Soaala na n yeel-a: ‹Piid f neooda wã, tɩ f sẽn yɛs zĩig ninga yaa zĩ-sõngo. M yãenda m neba sẽn zĩ ne sũ-sãang ning Ezipt tẽnga. M wʋma b waasgo tɩ m wa n na n fãag-ba. Wa tɩ m tʋm-f Ezipt tẽnga.› Moyiiz ning b sẽn zãgs Ezipt tẽnga, b sẽn waa n sok-a: ‹Ãnda n yeel-f tɩ f yɩ d kãsma la d bʋ-kaooda?› Moyiiz kãng la Wẽnd kõ-ba, wala b naaba, b fãagda; la rẽ la malɛka lik kãgrẽ wã n togs-a. Ya a Moyiiz n yiis-b Ezipt. La tũu ne bõn-bãna la yɛl-soalma a sẽn maan Ezipt tẽnga la Mog Miuugẽ; we-raoogẽ wã yɩɩ yʋʋm pisnaase. Moyiiz kãng n yeel a Israyɛl kambã: ‹Wẽnd na n gesa y saam-biisa sʋka n yiis bãngd a ye wala maam n kõ yãmba.› B sẽn waa n ti b sika we-raoogẽ, yẽ n da be zĩis a yiibu: yẽ n da be Sinayi tãnga zugu n kelgd malɛka sẽn da gomd ne-a, yẽ n da be ne d ba rãmbã, b sikẽ. Yẽ n deeg Vɩɩma koees n taas-do. Nin-kãng noor la d yaab rãmba tõdg tɩ b kõn deeg ye. N yɩɩd rẽ menga, b yeelame tɩ b pa rat-a ye, tɩ b yama le gõdg n teesd Ezipt tẽnga, tɩ b na n yeel a Aarõ: ‹Naan wẽnd dãmba n kõ-do tɩ d lʋɩɩs d taoore tɩ d ka mi yell ning sẽn paam a Moyiiz, rao ninga sẽn yiisa tõnd Ezipt tẽnga ye.› B yika wẽnd kãnga n maan nag-bila; b kʋʋ maoong n waoog b bõn-naande, b maana sũ-noog kibsa, b nus sẽn yaga soaba yĩnga. Wẽnd me zabame n bas-ba. B sẽn teeg b rãmb marsã lebga yĩngr ãdse, wala sẽn gʋls bãngdba sebr pʋgẽ: ‹Maanda buud toɛ-toɛ wã sʋka, maoong bʋg la y kʋʋ m yĩnga, yʋʋm pisnaas pʋgẽ, we-raoogẽ wã, Israyɛl kamba? Y yaool n tii roog n kõ a Molok. Y yaga bõn-yood n togs y wẽn-faoogo, y wẽnd a Refa, ãdga; y yag-a lame n na n waoog-a; la rẽ me yĩng la m na n tall-y n kẽng yembd Babilon yaanga.› We-raoogẽ, d yaab rãmba ra tii roogo tɩ zooda kaset bĩngd a pʋgẽ. Rooga ra tii wala Wẽnd sẽn da gom n wilg a Moyiiz, n yet t'a modg tɩ wẽneg a sẽn yãend a soabã. La d yaab rãmba waa n baasa rooga ne a teedã n tall ba, a Zozuwe zamaanẽ, n tɩ kẽ tẽns niyns Wẽnd sẽn dig b soaalba tɩ b yii n bas vɩɩdã. Yɩɩ woto n tãag a Daviid. Wẽnd yam sẽn da kẽe-a yĩnga, a Daviid kosa sore n na n me Roog a to a Zakoob Wẽnda yĩnga. Yɩla a Salomo n me roogã. D yaool n miime tɩ yĩngr Soaala ka kẽed doog neb nus sẽn me ye. Bãngd a ye n sɩd yeele: ‹Saaga la m naam zaoore. Tẽnga yaa m nao palgr zĩiga. Dẽn la Soaala sokda: ro bʋg la y na n me m yĩnga? Zĩ-bʋg n na n yɩ m vʋʋsg zĩiga? Ka mam nug tʋʋmd la rẽ fãa laa?› Yubl sẽn ka gõmsd dãmba, tʋb kɩd la sũ-rẽgd dãmba, wakat fãa y zãgsda a Vʋʋsem Sõngo! Y ba rãmba sẽn yɩ bũmb ninga, yãmb me boto! Bãngd a bõe la y ba rãmba ka namse? B kʋʋ sẽn wilgb fãa tɩ Nin-sõnga na n waame. La ka yɩɩd dasma a wãna, Nin-sõnga yẽnẽ la y sẽn zãmbe n yõk n kʋ wã. Noorã y sẽn paam ne malɛk rãmb wilgrã, y ka reeg-a ye.» Neba sẽn wʋm woto b sũura fõda wʋsgo ne a Etiyɛn al tɩ b yẽna ra kẽrsdẽ. A Etiyɛn sẽn da pid ne Vʋʋsem Sõngo dooga a neng yĩngri la Wẽnd lik-a la ne b ziiri, t'a Zezi yɛs yingri, b rɩtgo. A yeelame: «Ad-y m nee saag sẽn pake tɩ Ned Biiga yɛs yĩngri Wẽnnaam dɩtgo.» B kaasame, n yẽd b tʋba, la wala nin-yende, b kẽe a Etiyɛn. B tus-a lame n yi tẽngã la b sɩnga a labr ne kuga. Kaset zirẽ dãmba da yeesa b futã n dɩgl bi-bɩɩg a ye naoẽ, a Sol naoẽ. B sẽn waa n labd a Etiyɛn a ra pʋʋsda woto: «Soaala Zezi, reeg-y m sɩɩgã.» A sẽn yigimdi a kelmame: «Soaala, da ning-y-b taal m kũuma yĩng ye.» La a sẽn gom woto a kiime. Sã n ya a Sol, yẽ ra tagsdame t'a Etiyɛn kʋʋba zemsame. Baraar bala b yikame n na n sãam Zerizalɛɛm Tigengã sãoong wẽnga. Sã n ka Tʋʋm-tʋmdba bala, tẽedba fãa zoeeme n sẽeg Zɩɩde la Samari weto. Nin-sõma n waa n dɩk a Etiyɛn n tɩ mum la b kelem a kʋʋre. A Sol da tara Tigenga wãabo; a ra kẽeda zak woo zaka, n yiisd pagb la rapa n suiid doogo. Tẽedba sẽn da sẽegã ra saada tẽng-tẽnga n moon Koe-noogã. Woto a Filip sẽn da tɩ kẽ Samari tẽnga ra moonda Krista beelẽ. Zãma wã ra pʋgda lame n deegd a zãmsgo. B fãa ra wʋmdame tɩ b gomd la b yãet ne b nini, yel-bãna a sẽn da maande. Sʋtãan yooda ra yit n basda neb wʋsgo. B ra yitame la b kaasdẽ. Wobs la koms-rãmb wʋsg me paama laafi. Tẽnga rãmb sũ-noog yɩɩ wʋsgo. Ned n yaool n da reng a Filip beelẽ. Yaa a Simo. A ra maanda yel-bãna n yɩkd neb pɛlense. A ra geta a meng wa nin-kãsenga. Dẽ me la neba fãa, bɛd la bõonego, ra pʋgd-a. B ra yetame: «Nin-kãnga pãnga yaa Wẽnd pãn-kẽoongo.» B ra pʋgd-a lame tɩ yaa al daar zãr la a ra yɩkd b pɛlens ne a yel-bãna. Neba sẽn waa n tẽ Wẽnd Rĩunga la a Zezi Krista Koe-noogã, a Filip sẽn waa n wilg-bã, b sakame tɩ b kõ-b soobo, pagb la rapa. A Simo menga waa n tẽeme n deeg soobo, n da ka le rat n serg n bas a Filip ye t'a ra nee yel-bãna la wẽnd makr dãmba sẽn da maand a nifẽ. Tʋʋm-tʋmdba sẽn da ket Zerizalɛɛm wʋmame tɩ Samari rãmb saka tẽebo tɩ b tʋm a Piyɛr la a Zã beelẽ. B kẽe Samari rãmb tẽnga la b pʋʋsa b yĩnga, n kos a Vʋʋsem Sõng t'a sig bãmba, tɩ bãmb ned ba a ye ra nan ka paam-b ye. Yaa Soaala Zezi yʋʋr yĩng la da reeg soob nanda. A Piyɛr la a Zã ra tẽegda b nus b zutu tɩ b paamd a Vʋʋsem Sõngo. A Simo sẽn yãende t'a Piyɛr la a Zã tẽegda b nus t'a Vʋʋsem Sõng sigda, a bao ligdi n kõ-ba. A yeelame: «Kõ-y maam me y pãngã tɩ m nusa sẽn na n tẽeg ned ning fãa zugu bɩ a me reeg a Vʋʋsem sõngo.» T'a Piyɛr na n yeel-a: «Wẽnd na sãam foo ne f ligdã, f sẽn tẽed tɩ Wẽnd kũun tõe n daa ne ligdã! Wẽnd nifẽ, f sũura ka tɩrg ye la yõod kõn zĩnd f yĩnga, rũnna wala beoog ye. Sẽn be, yaa f tuub f geel yaalgã la f pʋʋs Wẽnde. Daare f na paam a sugri. F sũura pida ne tɩɩsem tɩ f yĩnga za ne wẽnem gadre.» La a Simo yeelame: «Bɩ yãmb meng yõk Soaala sɛɛg m yĩnga, tɩ y sẽn gomd yel-beed ninga ra wa pak-m ye.» A Piyɛr la a Zã kõ-la b kaseto, n moon Soaala Koe-noogã. B le rɩka Zerizalɛɛm sore, n karemd Samari tẽns rãmba, la b kẽnda. Soaala malɛk yeela a Filip: «Yik n tũ goabg sorã n yek sor ninga sẽn yit Zerizalɛɛm n dabd Gaza. Neb ka waoog so-kãng zug ye.» A Filip yikame n tɩ yek sorã. La ade, Etiopi ned n da kẽng Zerizalɛɛm n lɛɛg n kuiisẽ. Da yaa Etiopi dĩm-poaka sõgen kãsenga, a kamb naaba la a laoga fãa gũuda. A ra lɛɛg kuiisame, n zao bilim-bilm n karemd a Izayi sebre. Wẽnd Vʋʋsem yeela a Filip: «Aya! Wudg tao n paam bilim-bilma.» A Filip wudgame n ta, la yaa bãngd a Izayi sebr kareng la a ra wʋmda. Dẽ la a sok Etiopi raoã: «Fo wʋmda f sẽn karemda võor bɩ?» T'a yeele: «M na n yɩɩ wãn n bãnge ned sã n ka sõng-ma?» A kosa a Filip t'a rʋ n yegl-a. A sẽn da karem n ta zĩig ninga la woto: «Yaa wala pe-yãanga la b tall-a n kẽng kʋʋbo; a yaa sɩɩ wala pe-bila sẽn yɛs a kõbda wõrsd taoore a kõ yaag a noor ye, a sẽn faool a meng yĩnga, b mong-a-la bʋʋm, a buuda nebã, ãnda n na n gom b yelle? B yiisa a vɩɩm nin-vɩɩs sʋka.» Etiopi neda yeela a Filip: «Yaa ãnda yell la bãngd kãnga gomda, yaa meng yelle bɩ yaa ned a to yelle?» A Filip sɩnga ne Sebr sõng sẽn tʋɩɩs bũmb ningã n wilg-a a Zezi Koe-noogã. B sẽn tar kẽnde b waa n taa bãka tɩ raoã yeele: «Ad koom! Bõe marsã n gɩdgd m soobo?» [ A Filip yeel-a lame: «Fo sã n tẽed ne f sũur fãa, gɩdgr ka ye!» Tɩ yẽ yeele: «M tẽedame t'a Zezi yaa Wẽnnaam Biiga.»] A yalsa bilm bilma. B yiiba fãa kẽe koomẽ, a Filip ne raoã, la a Filip kõ-a-la soobo. B sẽn yi koomẽ wã Wẽnd Vʋʋsem looga ne a Filip. Etiopi neda ka le yãend-a ye, n kel n dɩk a sor ne sũ-noogo. Yaa Azot tẽng la b le wa yãend a Filip. A ra kẽnda a kẽnde n moon Koe-noogã a sẽn ta tẽng ning fãa, n wa tãag Sezare. A Sol yẽ sẽn da mi, yaa kẽes tẽedba rabeem la a kʋ-b bala. Dẽ la a tɩ yãend maan-kʋʋd kãsengã n kos-a sɛb sẽn na n pʋɩ Damas pʋʋsg rotẽ n wilg tɩ b sã n yãend So-paalga tũudba, bɩ b yõg-ba n sẽb bãeense n tall n wa Zerizalɛɛm. A sɩd dɩka sore n kolgd Damas; la vugr bala vẽenem tãoo yĩngr n bu-a. A lʋɩɩ tẽnga la a wʋma koɛɛg sẽn yeel-a: «Sol, Sol, bõe yĩng la f namsd ma?» T'a soke: «Yãmb la ãnda, Soaala?» Koɛɛga yeela woto: «Yaa maam a Zezi la f sẽn namsdã. La yiki! Kẽ tẽnga pʋgẽ tɩ be b na wilg-f f sẽn na n maanega.» A tũud-n-taasa ra yɛsame, dabeema ra kɩtame tɩ b lebg mugsi; b ra wʋmda goama yẽ, la b ra ka ne ned ye. A Sol sẽn yiki, n puk a nini, a ra ka ne fɩ. B kong n tak-a la ne nug n kẽes Damas. Maana rasem a tãabo t'a ka ne fɩ, n ka rɩtẽ la a ka yũud fɩ. Karen-biig a ye n da be Damas n boond t'a Anani. Soaala waa n lika b meng yẽnda n yeel-a: «Anani!» Tɩ yẽ sake: «Soaala, m bee ka.» Tɩ Soaala lɛɛg n yeel-a: «Kẽnge, rɩk sor ning sẽn pʋd tɩ Tɩrgã, n sok a Zɩɩda zaka. Beelẽ f na sok Tars rao a Sol yelle. Nin-kãng pʋʋsdame marsã, la nin-kãng nee ned sẽn boond tɩ Anani. A nee a Anani sẽn kẽed n na n tẽeg a nus a zug t'a nina le puki.» A Anani leokame: «Soaala, m wʋma neb ka tɛk sẽn gom nin-kãnga yelle. Neba fãa togsda wẽng ning a sẽn maan ne Zerizalɛɛm tẽedbã. A sẽn wa kaalẽ wã menga, a waa ne Maan-kʋʋd kãsensa noore n na n sog bãeense neb niyns fãa sẽn pʋt y yʋʋre.» Soaala me yeel-a lame: «Kẽng m sẽn tʋm-f zĩig ningã tɩ nedã, maam n yãk-a ne yamleoogo, t'a moon m yʋʋra bu-zẽmbã, dĩm dãmba la a Israyɛl buudu. Mam meng m toore n na n wilg-a a sẽn na n nams bũmb ning fãa, mam yʋʋra yĩnga.» A Anani sak n loogame, a kẽe zakẽ, a tẽega a nus a Sol zug n yeel-a: «Sol, Sol, m saam-biiga, sẽn tʋm-a maama, yaa nin kãng n lik foo f sora zugu la a tʋm-m lame tɩ m wa puk f nini la f reeg a Vʋʋsem Sõngo.» Zĩig pʋgẽ bala yɩɩ wa pagdo n yi a nina n dʋʋg tẽnga. A nina wẽneg n pukame la a reega soobo. A sẽn paam dɩɩbo, a rɩɩme n le paam pãnga. A Sol maana dasem a wãn ne Damas karen-biisã. A sɩngame n wilgd pʋʋsg rotẽ t'a Zezi yaa Wẽnnaam Biiga. Sẽn da kelgdba fãa ra yɛsa ne pɛlen-yɩka la b maanẽ: «Ka rao kãnga n da yik Zerizalɛɛm n maan beem ne sẽn da pʋt-b Nin-kãnga Yʋʋra laa? La a sẽn wa ka wã, a ka wa bal n na n yõg-b n tɩ kɩs maan-kʋʋdba kãsem-dãmb wɛɛ?» Ad a Sol da paamda pãnga beoog sẽn vẽeg fãa n gomd n lubd Damas Zʋɩf rãmbã, n wilgd-b vẽenega t'a Zezi sɩd yaa Krista. Yʋʋm sẽn maan a wãna, Zʋɩf rãmba seda ne taaba n na n kʋ a Sol. A Sol bãngame tɩ bũmb la b rat n maane, tɩ b ra tol n ninga gũudba tẽnga noor kʋɩlensẽ, tɩ b be be wĩndg la yʋngo, sẽn na yɩlẽ n paam-a n kʋ. Woto wã, yʋng a ye, karen-biisa seda ne taaba n sagl-a peoog pʋga n sik-a lalg poore. A Sol sẽn ta Zerizalɛɛm, a makame n na n fãoog a meng ne karen-biis a taabã la b fãa ra zoeta rabeem; b ra pa tẽed t'a sɩd kẽe Krista ye. A Barnabe n kong n peeg-a, n tall-a n ta Tʋʋm-tʋmdba nengẽ la a wilg-b bũmb ning sẽn maan Damas sor zugu: a yãenda Soaala la Soaala goma ne-a. A wilg-b-la a Sol sẽn moon, ne sũ-keelem ninga a Zezi Krista yʋʋr Damas tẽnga. Dẽ marsã la b ra tũud taab n yit la b watẽ, Zerizalɛɛm pʋgẽ, la b kõt Soaala kaseto tɩ rabeem kaẽ ye. A Sol da sõsda ne Zʋɩf niyns sẽn gomd-b grɛkã, tɩ b wẽed no-koɛɛm ne taaba. La b fãa ra soos n baooda a kũum. Karen-biisa sẽn bãng rẽ b tall-a lame m leb Sezare, n wa tɩ yi be n dig Tars tẽnga. Sã n ya Zɩɩde, Galile la Samari, bãmb da tara laafi. Tigenga ra kɩɩda yẽgna. B ra zoeta Wẽnde. A Vʋʋsem Sõng sõngr yĩnga, b ra pida ne sũ-noogo. A Piyɛr da kẽeda tẽnsa fãa; a waa n taa nin-sõma wã nengẽ Lida. A yãenda ned be sẽn boond tɩ Ene, la yaa yʋʋm a nii la a gãe a gãag zugu: a ra lebga põore. A Piyɛr yeel-a lame: «Ene, a Zezi Krista n kõt-f laafi. Yik la f maneg f gãaga f toore.» A wẽneg n yikame. Lida neba fãa la sẽn be-b Saron bãooga, yãend-a lame la b tẽe Soaala. Zope karen-biisa sʋka pag a ye n da boond tɩ Tabita, tɩ Grɛk rãmb boond tɩ Dorkas (Yãka). A sẽn da sẽbg kall ningã yaa maan tʋʋm sõma la a yols naong rãmb nimbãanega. A waa n lʋɩɩ pakeem n wẽneg n maan kaalem. B sẽn so-a koom b rʋʋ yĩngr doogã n gãneg-a. Lida ne Zope tẽns ra ka zãr taab ye, woto b sẽn bãng t'a Piyɛr bee Zope, karen-biisa tʋma neb a yiibu sẽn tɩ yeel-a: «Wa d nengẽ la ra kaoos ye.» A Piyɛr yik n tũ-b lame n loog. A sẽn ta, a dʋʋ yĩngri doogã. Pʋg-kõapa sẽn da tigim be wã gũbg-a lame n wilgd-a fut buud toor toore a Dorkas sẽn da wʋgda, a sẽn da waa n ket b sʋka. A Piyɛr kɩtame tɩ b fãa yi la a yĩgimdame n pʋʋse. A waa n wẽnemd n gesa pagã n yeel-a: «Tabita, yiki!» A puka a nini, n yãend a Piyɛr, n yik n zĩndi. A Piyɛr gãda a nug n yik-a yĩngri. Yaa nin-vɩɩga la a Piyɛr bool nin-sõma wã la pʋg-kõapã n wilgi. Zope tõr wʋma kibarã, tɩ wʋsg na n kẽ Soaalã. A Piyɛr kaoosa bilf Zope, zapa a ye yiri, zapa yʋʋr la a Simo. Ned n da be Sezare n boond tɩ Kornɛy. A ra yaa tãb-biis koabg taoor soaba, la Kornɛy tãnsoben-dooga neb da yita Itali. Yaa ned sẽn da mi Wẽnd waoogre: ne a sẽn ya bu-zẽna, yẽ ne a zak rãmb fãa da gãda Zʋɩf rãmba tẽebo. A ra kõta Zʋɩf rãmba kũun bɛda. A ra ka vʋsd ne pʋʋsg ye. A waa n paama likri. Daar a ye, zafare, a yãenda ne a nif menga, Wẽnd malɛk sẽn kẽ a zakẽ n bool-a: «Kornɛy!» A sẽn ges-a, a yɛɛsame. A sokame: «Yaa bõe, Soaala?» Malɛka leokame: «Ad-f pʋʋsgã la f wẽn-kosgã yel-sõmda yɛsa Wẽnd taoore, tɩ Wẽnd tẽr f yelle. Dɩlla marsã bala tʋm neb Zope tɩ b tɩ wa ne a Simo, b sẽn boonda soab t'a Piyɛr. A yõga zap a ye gãag-sobendo. Zapa me yʋʋr yaa Simo la a yira bee mogra noore.» Malɛk ning sẽn da gomda wã sẽn looge, la a Kornɛy sẽn bool a rakõap a yiibu n paas tãb-biig a ye sẽn kẽ Wẽnde la a sẽn da yãk n gũnug a menga. A sẽn wilg-ba b sẽn da tog n bãnge, a tʋm-b la Zope. Vẽkembeoogo b taame. Zemsa wĩnto-suka, zemsa a Piyɛr sẽn dʋ rooga zug n na n pʋʋse. Kom waa n yõk-a lame t'a rat bũmb n ning a noorẽ. B sẽn waa n segend dɩɩbã, a yama fʋsga a yĩngã. A yãenda saaga sẽn pake tɩ peen kãseng sẽn loe a noy a naas sigd tẽng wa zãnega. Zãnega ra pida ne rũms sẽn tar nao a naase la bõn-vuudi la yĩngr luiili. La koɛɛg n wẽneg n yeel-a: «Aya! Piyɛr, kʋ n wãbe.» T'a Piyɛr yeele: «Ayo! Soaala, bũmb sẽn ya rẽgdo, t'a sɩɩsg meng kisa, zɩɩ n kẽ m noorẽ ye.» Koɛɛga le yeel-a lame, naoor a yiib soaba: «Wẽnd sẽn yɩlg bũmb ningã bɩ f ra saag n bool tɩ rẽgd ye.» Yella maana woto naoor a tãabo. Dẽ poore, fãa leba a zĩigẽ, yĩngri. A Piyɛr ra ket n yɛsa ne yɩɩre la a sokd a menga a sẽn yãenda võore. Wakat kãng la a Kornɛy sẽn tʋm b rãmba poog dignoorẽ. B reng n sokame n bãng a Simo zaka, n bãng rao ning sẽn boond t'a Piyɛr sã n sɩd siga be. Dẽ t'a Piyɛr ra ket n baooda likra võore la a Vʋʋsem Sõng yeel-a lame: «Ad neb n baood-fo. Yiki, sig n tũ-ba n looge tao-tao tɩ yaa maam n tʋm-ba.» A Piyɛr sigame n sok nebã: «Bõe n wa ne y ka?» Tɩ b na n leok: «Yaa Tãnsoab a Kornɛy, yaa nin-sõng sẽn sak Wẽnd tẽebo tɩ Zʋɩf rãmba pẽgd-a, yaa yẽ n paam tɩ malɛk sõng wilg-a t'a bool-f tɩ f waa a nengẽ la a kelg koees niyns f sẽn na n kõ-a.» T'a Piyɛr na n bas-b tɩ b kẽ la a maan-b gãag-sobendo. Beoog sẽn vẽege, b naaga taab n dɩk sore; Zope saam-biis kẽer yãag-b lame. Da-yɩten-daar la a ta Sezare. A Kornɛy ra tigsa a buudu la a zo-rãmba n gũud-a. A Piyɛr sẽn kolg zaka noor la a Kornɛy sẽn yi n seg-a n wõgemd a taoore. A Piyɛr doog-a lame n yetẽ: «Yik tɩ mam me yaa ned wa foom.» B sɩnga sõasg la b kẽedẽ. Yaa zãma n da tigim zaka pʋga. A Piyɛr yeel-b lame: «Wala y sẽn mi wã, maan zood ne bu-zẽn la f kẽe a zakẽ, yaa kisgu ne Zʋɩf. La ade, Wẽnd Wilg-m-la sẽn ka yɩɩd rasem a wãn bala tɩ m ka tog n bool ninsaal ba a ye tɩ rẽgdo, bɩ n yeel t'a sɩɩsg kisame ye. Yaa rẽnd me yĩnga la y sẽn bool-ma m pa yaas n tadg ye. M kot-y lame tɩ y togs-ma: yaa bõe yĩng la y bool-ma?» A Kornɛy leokame: «Yaa rasem a tãab rũnna la m da be m zakẽ n pʋʋsd zafar pʋʋsgo la ned n waa n yals m taoore ne fut peelem sẽn tʋʋsd nini. Raoã yeel-m lame: ‹Kornɛy, f pʋʋsga reegame, Wẽnd tẽega f wẽn-kosga yel-sõmde. Tʋm neb Zope tɩ b wa ne a Simo sẽn boond tɩ Piyɛr. A bee zap a Simo zakẽ, zak sẽn be mogra noore.› M wẽneg n kɩtame tɩ b babs-fo, la f sẽn wa wã f maana neere. Ad-d fãa sẽn yɛs f taoore n dat n wʋm Wẽnd sẽn kõ-f noor ningã.» A Piyɛr yeelame: «M neeme tɩ Wẽnd ka welg ninsaal ne a to ye. Fo buuda sẽn yaa soaba, f sã n zoet Wẽnde la f maand sẽn zemse, b pʋgda f poore. Yaa Israyɛl kamba la b gom ne, n gom laafi ning Dũni zãng Soaala, a Zezi Krista, sẽn wa ne a soabã. Y tẽra bũmb ning sẽn maan Zɩɩde ween-vɩʋʋgẽ. Y tẽra Nazarɛt Zezi wã yelle. Y tẽra b sɩngr Galile, a Zã sooba poore. Y tẽra Wẽnd sẽn pids-b ne a Vʋʋsem Sõngo la b pãnga. Y tẽra me tɩ Wẽnd sẽn da be ne-bã, b sẽn pɩʋʋg zĩig ning fãa b maana neere la b sãooga Sʋtãan sẽn da kẽ b rãmb fãa. Sã n ya tõndo, d yɩɩ b vɩɩma kaset dãmba, Zʋɩf rãmb tẽngẽ la Zerizalɛɛm. Yaa bãmb la b saag n ka pika zugu n kʋ. La Wẽnd vʋʋg-b la rasem a tãab daare tɩ b na lik b menga. Ka neba fãa la b lik b meng ye, yɩɩ Wẽnd sẽn beool n yãk b rãmba. Yɩɩ tõnd sẽn dɩ la d yũ ne bãmba, b vʋʋgra poore. Bãmb n kõ tõnd noor tɩ d moon la d wilg tɩ bãmb la Wẽnd yals yã tɩ b na n kao sẽn vɩ-ba la sẽn ki-ba bʋʋdo. Yaa bãmb yelle la bãngdba fãa gomda n yet tɩ sẽn tẽed-a bãmb fãa na paam a yel-wẽna yẽesgo bãmb yʋʋr yĩnga.» A Piyɛr ra ket n gomdame la a Vʋʋsem Sõng siga sẽn da kelgd-ba fãa. Zʋɩf rãmba sẽn da tũ a Piyɛr n wa wã yɛɛsame tɩ b yãendame t'a Vʋʋsem Sõng me siga bu-zẽmbã. B ra wʋmdame tɩ b wɩlemd bu-zẽn goama n pẽgd Wẽnnaam. Dẽ la a Piyɛr yeel yã: «D tõeeme n mong soobo, neb sẽn paam a Vʋʋsem Sõng wala tõnd bɩ?» La a kõo noor tɩ b so-ba, a Zezi Krista yʋʋr yĩnga. B kosa a Piyɛr t'a pa ne-ba dasem a wãn yɛsa. Tʋʋm-tʋmdba ne Zerizalɛɛm saam-biisa waa n wʋmame tɩ bu-zẽmba me reega Wẽnd gomde. Woto a Piyɛr sẽn ta Zerizalɛɛm, Zʋɩf rãmba yika ne-a: «Bõe yĩng la f saag n kẽ bu-zẽmb zagsẽ la f zĩnd n dɩ ne-ba?» T'a Piyɛr na n dɩk yella nao n wilg-ba: «Ad-y m da bee Zope n pʋʋsdẽ, tɩ m yama wa fʋsg m yĩngã; m paama likri. Bũmb n da yit yĩngri sigd m taoore: peen kãseng sẽn loe wa zãnega. M nina yõka gesgo n ka kamsdẽ ye la m yãenda tẽng zug rũms sẽn tar nao a naase, we-rũmsi, bõn-vuudi la yĩngr luiili. La m wẽneg n wʋma koɛɛga: ‹Aya! Piyɛr, kʋ n wãbe.› La m leokame: ‹Ayo! Soaala, bõn dẽgd la bũmb sɩɩsg sẽn kis zɩɩ n kẽ m noorẽ ye.› Koɛɛga zĩnda yĩngri n le yeel-ma: ‹Da saag n ges wa rẽgdo Wẽnd sẽn yɩlg ye.› Bũmba maana woto naoor a tãabo n yaool n wa leb yĩngri. Zemsa neb a tãab sẽn wa. B waa n yalsa tõnd sẽn da beẽ la Sezare ned n da tʋm-ba. A Vʋʋsem Sõng wilg-m lame tɩ m da maan sãmbg ye la m tũ-ba. M saam-biis a yoobã sẽn zĩ wã me tũu maam la d kẽe zapa yiri. Yẽ me togsa tõndo malɛka sẽn lik-a n yeel-a: ‹Tʋm Zope tɩ b wa ne a Simo, b sẽn boonda soab t'a Piyɛr. Yẽnda n na n kõ foo koɛɛg sẽn na n fãag foo ne f zakã.› M sẽn sɩng bal tɩ m na n gome la a Vʋʋsem Sõng sẽn sig bãmba, wala b sẽn sig tõnd sɩngrẽ wã. Wakat kãng la m tẽeg Soaala gomde: A Zã kõo soob ne koom, la sã n ya yãmba y na n soo ne a Vʋʋsem Sõngo. Wẽnd sã n kõ bãmb wala b sẽn kõ tõnd sẽn tẽ Soaal a Zezi Krista, maam la a bõe n na n gɩdg Wẽnde.» Gom kãensa maaga b sũuri la b pẽga Wẽnd n yetẽ: «Wẽnd kõo bu-zẽmba me tuubg ning sẽn wat ne vɩɩma.» Neb niyns sẽn da sẽeg-b, a Etiyɛn namsga wakato, sãag n taa Fenisi, Sɩpr la Antiyos; la yaa Zʋɩf rãmba bal la ra moond Koe-noogã. Sɩpr la Sirɛn tẽng rãmb n yaool n zĩnd bãmb sʋka. B sẽn ta Antiyos b sak n goma ne bu-zẽmbã n moon Soaal a Zezi Krista Koe-noogã. Wẽnd da pʋgda b poor ne b pãnga. Woto sẽn sak-b tẽeb n lebg Soaala karen-biis yɩɩ ka tɛka. Rẽ lʋɩɩ Zerizalɛɛm dãmba tʋbrẽ tɩ b tʋm a Barnabe Antiyos. Yẽ me waame; a yãenda Wẽnd kũuna sẽn yɩ a soaba; a sũur yɩɩ noogo la a sẽn mi saglg yĩnga a kõ-b-la pãnga tɩ b da le bak ne Soaala ye. A Barnabe ra yaa nin-sõngo n pid ne tẽebo la ne a Vʋʋsem Sõngo. Sɩd yɩɩ neb ka tɛk n wa n kẽ Soaalã. A Barnabe babsa a Sol Tars tẽnga. A sẽn yãend-a, a peeg-a lame n wa Antiyos. B paa ne taab yʋʋmd tõre ne Antiyos Tigenga rãmba. Yɩɩ neb ka tɛk yam la b vẽneg yã. Yɩɩ Antiyos la b sɩng n boond karen-biisa tɩ «kristneba». Bãngdba n waa n yi Zerizalɛɛm n wa Antiyos. B nin-yend sẽn boond tɩ Agabus yika ne a Vʋʋsem Sõng vẽnegre n moon tɩ kom kãsenga n na n lʋɩ tẽnga tõre. Kom kãng la sẽn zĩnd a Klod zamaanẽ. Karen-biisa yalsame tɩ ned kam fãa na n maana a sẽn tõe n tool sõngre Zɩɩde saam-biisã. B sakame n tool nin-kẽemsa bũmbu la a Barnabe ne a Sol n na n tall-a n taas. Yaa rẽ sasa la a Erod yõg Tigenga neb kẽere n namse. A kɩtame tɩ b kʋ ne sʋʋga a Zã kẽema, a Zak. Rẽ taa Zʋɩf rãmba yam t'a na n kɩt tɩ b yõk a Piyɛr me. Sega bur sẽn pa lobd bɩlle wakato, t'a na n kong n sui-a roogo n gũud Paka poore n na kẽes-a bʋʋdo, buuda gill taoore. A Piyɛr sẽn kẽ roogo la Tigenga me sẽn yõk pʋʋsg a yĩnga n ka vʋʋsdẽ ye. Ra zoe n lebga yʋngo, ra keta beooga vẽeg tɩ b kẽes a Piyɛr bʋʋdo. A ra paam n gõee tãb-biis a yiib sʋka la bãng n da sog-a ne tãb-biig fãa. B ra ninga gũudb me rooga noore. Soaala malɛk siga vugr bala tɩ bi-beesa roog na n yãng ne vẽenem. Malɛka tika a Piyɛr lʋgre t'a yiki. A yeel-a lame: «Yik yĩngr tao!» Bãeensa foosa a nusẽ n dʋʋg tẽnga. Malɛka yeelame: «Sẽbg f sẽbdga la ning f gãndalsa.» T'a Piyɛr maan boto. Malɛka le paasame: «Rɩk f fu taokã n palg f bãoko la f pʋg maam.» A Piyɛr yiime n pʋgd-a. A ka mi tɩ yella yaa sɩd ye. A bas n tẽedame t'a zãmsdame. B yõsga pipi gũudba zĩiga, n le yõsg a yiib soaba, n wa ta tẽnga noor kut kʋɩlenga sẽn paka toore tɩ bãmb looge. B kẽname n tɩ yek sor a to la malɛka wẽneg n bas-a lame. Dẽ marsã la a yama leb a zĩigẽ t'a yeele: «Marsã la m ne vẽenega tɩ Soaala tʋma b malɛk t'a wa fãag-ma a Erod nusẽ la a fãag-m ne Zʋɩf rãmba sẽn da gũud bũmb ningã.» A Piyɛr bãnga a sẽn be zĩig ninga t'a na n tees a Mari zaka. Pʋg kãng ya a Zã ma la a Zã me le boondame tɩ Mark. Neb wʋsgo n da tigim zakã, n da pʋʋsdẽ. A Piyɛr sẽn vẽ kʋɩlengã la zak bi-pugl a ye, sẽn boond tɩ Rodɛ, waa n na n ges sẽn yaa soaba, n wʋm a Piyɛr koɛɛg, n kɩdem sũ-noogo n yĩm kʋɩlenga pakre, n wudg n leb pʋgẽ n na n wilg tɩ ya a Piyɛr n be dignoorẽ. Pʋgẽ dãmba yeel-a lame: «Ad-f zuga lebgame.» La yẽ ra wẽendame tɩ yaa sɩda. Tɩ b le paase: «Ad yaa Malɛka!» A Piyɛr ra ket n tara kʋɩlenga kogsgo. B sẽn waa n pake b sɩd mikame tɩ yaa yẽnna tɩ rabeem na n kẽ-ba. A Piyɛr kams-b la ne nug tɩ b bas bʋʋre; a wilg-b la Soaala sẽn yiis-a rooga toto la a paasame: «Tɩ wilg yã a Zak la saam-biisã.» A sẽn yi, a kẽnga zĩig a to. Zĩig sẽn yẽege, tãb-biisa nengẽ wulumdame: a Piyɛr kẽe yɛ? A kẽe yɛ? A Erod sẽn tʋm tɩ b wa ne-a, b pa yãend-a ye. A kɩtame tɩ b sogs gũudbã, a kɩtame tɩ b kʋ ba. A Erod yii Zɩɩde n leb Sezare la a paa be. A Erod ne Tir la Sidõ rãmba ra ka zemsd taab ba bilfu. B waa n tɩ yõka sõgen kãseng, a Blastus, sɛɛga t'a tall-ba n taas dĩma taoore tɩ b yẽs laafi yẽsgo. B tẽnsa sõngr da yita dĩma nẽngẽ. Daara sẽn ta, a Erod yeelga a naam futu. A rʋʋ bũmb sẽn zẽke n yɛs n gomda. Zãma wã sɩnga kaasgo: «Ad-y ka ninsaal n gomd ye, yaa wẽnde!» Zĩig pʋgẽ bala, Soaala malɛk wẽe-a lame t'a ka gom n pẽg Wẽnd ye. Zãnzũy n wẽneg m kẽe a nemsã t'a ki. Wẽnd gomda ra paamda moonego tɩ tẽedba me sõor tar paasgo. A Barnabe ne a Sol pidsa b tʋʋmna Zerizalɛɛm. B lɛɛg n waa Antiyos ne a Zã, b sẽn boonda soab me tɩ Mark. Bãngdba la karen-saam-dãmba n da be Antiyos Tigenga pʋga. Ad-a Barnabe, a Simeõ, sẽn boond tɩ Sablga, ad Sirɛn Lusiyus, ad-a Manaɛn, kombera, a Erod, deem-n-taaga n paas a Sol. Daar a ye b waa n naaga taab n pʋʋsdẽ la b loet b noore t'a Vʋʋsem Sõng yeele: «Welg yã a Barnabe ne a Sol toore tɩ tʋʋmd la m na n kõ-ba.» Pʋʋsga la no-loeera sẽn sɛ b tẽega b nus b zutu tɩ b yik n loog b tʋʋmde. B sɩnga tʋʋmd ning b sẽn deeg a Vʋʋsem Sõng nengẽ. Dɩlla b yii Zerizalɛɛm n tees Selewusi, n yi be n kẽ koom koglg n dig Sɩpr. B taa Salamin n sɩng Koe-nooga moonego Zʋɩf rãmb pʋʋsg rotẽ. A Zã n da pʋgd n sõngd-ba. B saaga Sɩpr n ta Pafos, la be b sega yel-bãn soaba, Zʋɩf sẽn ya zirẽ-be-bãngda, n boond tɩ Bar Zezi. A ra yaa sõsd-n-taar ne Komber a Serziyus Pawulus, ned sẽn pid ne sɩlem. Kombera kɩtame tɩ b bool a Barnabe ne a Sol t'a da rat n wʋma Soaala Koɛɛg. Yel-bãn soab, a Elimas, da ningda gɩdgre, t'a ra pa rat kombera ne tẽeb ye. Rẽ marsã la a Sol — b boond-a lame yɛs t'a Pol — yik ne a Vʋʋsem Sõng pãnga n gẽen-a, n yeel-a: «Nin-yoog sẽn pid ne zãmb la wẽnem buud fãa, Sʋtãan biiga, zemsg buud fãa bɛyã, wakat bʋg la f na vʋʋs ne Wẽnd so-tɩrsa kedbgo? Soaala na n zɩsga b nug f zug marsã. F na n lebga zoanga, la rasem a wãn pʋgẽ f kõn le yãend wĩntoog vẽenem ye.» La zĩig pʋgẽ bala fãa lebga yʋng la lik a yĩnga t'a ra wẽnesed goabg la rɩtgo n baood tata. Kombera sẽn yãe woto, a saka tẽebo la sɩda Soaala Zãmsga yɩka a pɛlenga. Pafos tẽnga, a Pol ne a tũud-n-taasa le kẽe koom koglg n ta Perze sẽn be Pãnfili tẽn-peelmẽ. Zĩ kãng la a Zã bas-ba n leb Zerizalɛɛm. Tʋʋm-tʋmdba yẽ kell n sãaga Perze n ta Antiyos a to sẽn be Pisidi. Vʋʋsga raare b kẽe pʋʋsga roogo n zĩndi. Noora la bãngdba sebr kareng poore, pʋʋsga roog nanams tʋmame tɩ b yeel-ba: «Saam-biisi, y sã n tar Koɛɛg n na n kõ zãma wã n le paas a raoodo bɩ y leoke.» A Pol yikame n kabs ne a nug la a yeelame: «Israyɛl kamba la yãmb fãa sẽn pʋgd Wẽnde, m kotame tɩ y kelg-ma. Tõnd sẽn be buud ninga tẽngẽ wã Wẽnde, a Israyɛl Wẽnd, n tũus d yaab rãmbã la bãmb n kɩt t'a neba sõor fɩɩg zembala Ezipt tẽnga, b pa-weer tẽnga. Bãmb n yiis-b tẽn kãng ne b kang pãnga. Bãmb n zã-b yʋʋm pisnaas we-raoogẽ. Bãmb n sɛɛs buud a yopoe Kanaã, n deeg b soolma n kõ-ba. Bãmb meng b toore n ges b yell yʋʋm kobs-naase la pisnu. Dẽ poore b kõ-b la Bʋ-kaoodba n tãag bãngd a Samwɛl. Ba rãmba waa n yikame n kos dĩma, tɩ Wẽnd na n kõ-b a Sis biig, a Sol, a Bẽzame buudẽ, la a soog-b la yʋʋm pisnaase. Wẽnd waa n lebsa yẽ kɛɛnga n kõ-b dĩm a Daviid; la ad-b sẽn yeel a Daviid poorẽ: ‹M yãenda a Zese biig a Daviid tɩ m yam kẽe-a. Yẽnda n na n pids m daaba fãa.› Ya yẽnda buudẽ la Wẽnd pids b kãabgã n yiis a Zezi wala a Israyɛl Fãagda. A Zã n lʋɩ taoore n segl b waoongo, n wilg a Israyɛl buud tɩ soob n be n ya sũur tekr soobo. A Zã sẽn waa n na n looge, a ra yetame: ‹Yãmb sẽn tẽed tɩ m yaa ned ningã, ad-y ka maam la yẽ soab ye. B na n waa mam poorẽ la m ka tog n yɩ b sõgen meng ye.› M saam-biisi, a Abraam yagense, la yãmb fãa sẽn be ka la y pʋgda Wẽnde, yaa yãmb fãa yĩng la Fãagr Koɛɛga moon yã. Zerizalɛɛm taoor dãmba pidsa ne yĩdgu, bãngr koees niyns d sẽn karemd sibr daar fãa. Ne b sẽn pa yãend b nengẽ bũmb sẽn sek b bʋʋd paalgre, b baas n kosa a Pilat t'a kʋ-ba. B sẽn taas bũmb ning fãa sẽn gʋls b poorẽ, b sika b yĩnga n mum yaoogẽ. Wẽnd vʋʋg-b lame. La rasem sõor sẽn ka paood pʋgẽ b lika neb niyns sẽn yi-b ne bãmb Galile n wa Zerizalɛɛm la nin-bãmb la buuda fãa kaset rãmb marsã. Tõnd kõt-y-la Koe-noogo. Tõnd yet-y lame tɩ Wẽnd sẽn kãab bũmb ning d yaab rãmbã, b pids-a-la tõnd ned kamb fãa yĩnga, n vʋʋg a Zezi. B kãab-b-la tõnd woto Yɩɩla sebrẽ: Fo yaa mam biiga, rũnda la m dog foo. D sẽn gãd bũmb ning n mi tɩ Wẽnd vʋʋg-b la kɩɩms sʋka, tɩ b na n tɩlg põogre, yaa b sẽn da yeelã: m na n pidsa kãab-sõma niyns m sẽn da kãab a Daviid wala bũmb sẽn ka tõe n vaale. Yaa rẽ me yĩng la b le yet zĩig a to: F kõn bas f nin-sõngã t'a bãng põogr ye. D miime t'a sẽn baas tʋʋmd ning Wẽnd sẽn wilg-a, a Daviid kiime tɩ b mum-a la a bãnga põogre. Wẽnd sẽn vʋʋg a soaba yẽ tɩlga põogre. Dɩlla, m saam-biisi, bãng-y tɩ yaa yẽ soab yʋʋr yĩnga la b moond yel-wẽn yẽesgo. Sõmblem ning a Moyiiz Noora sẽn ka tõog n kõ yãmb a soabã, ned ning fãa sẽn tẽeda bãmb paamd-a lame. Gũus-y tɩ bãngdba sẽn yeela ra wa taas ye: ‹Gesyã, ka mi to pẽgr dãmba. Yɛɛs-y n menem! Bũmb la m na n maan yãmb sʋka m na n maan-a lame ti y ket n vɩ, la ned sã n da yiẽ kɛɛnga n wa togs yã, y kõn deegẽ ye.› » Pʋʋsga sẽn sɛ, b kosa a Pol la a Barnabe tɩ b le wa rɩk b rũnna koɛɛgã sibr ning sẽn pʋgdã. Tigsga sɩnga sẽegre la Zʋɩf rãmb wʋsgo ne Kẽed paalse tũ-la a Pol ne a Barnabe. Bãmb me ra sõsda ne-ba n kot-b tɩ b ra bas tɩ Wẽnd kũuna lʋɩ vɩʋʋgẽ ye. Vʋʋsg raar ninga sẽn pʋgã, yɩɩ tẽnga zãng la bala n waa n na n kelg Wẽnd Gomdã. Zʋɩf rãmba me sẽn yãend rẽnna b yika sũ-kiiri n leood a Pol la b naagd ne wẽn-tʋʋre. Dẽ me la a Pol ne a Barnabe keng b sũuri n yeel-ba: «Yaa yãmb la d da togẽ pipi n moon Koe-noogã. La yãmb sẽn pa sakã, la y pa kẽes y mens vɩɩm sẽn kõn sɛ kamba sʋka, ade, tõnd na n wẽnemda d neng n tees bu-zẽmbã. No-kãng me la d paam Wẽnd nengẽ: ‹M yals-f la wa bu-zẽmba vẽenem, m yeel-f lame tɩ f taas fãagra Koe-noog dũni wã sɛtmẽ.› » Bu-zẽmba sẽn wʋm dẽ, b sũur yɩɩ noogo tɩ b na n pẽg Koe-noogã. Sẽn paam-b Wẽnd zelemd noogã, vɩɩm sẽn ka be sɛɛb kãabgã, faa saka tẽebo. Woto la Soaala koɛɛg me paam n moon Pisidi tẽn-peelmẽ. Zʋɩf rãmba maana sũdum ne nin-bɛda pagba sẽn da waoogd Wẽnde la ne tẽnga taoor dãmba tɩ b na n yik beem ne a Pol la a Barnabe, n dig-ba n yiis b tẽngẽ. Bãmb me pĩmsa b nao wã tom la b teesa Ikoniyom. Karen-biisa yẽ ra pida ne sũ-noogo la ne a Vʋʋsem Sõngo. B sẽn ta Ikoniyom, b le kẽe Zʋɩf rãmba pʋʋsg roogẽ la b sẽn gom goam niynsa kɩtame tɩ bu-zẽmba, wala Zʋɩf rãmba, sak tẽebo. Zʋɩf rãmb kẽer me zãgsa tẽebo n tus b taab tɩ b yik n maand beem ne saam-biisã. A Pol ne a Barnabe kong n kaoosa beelẽ. B sũur da kegmame tɩ Soaala ra yãagda Koe-nooga moonego rãmba ne wẽnd makr dãmba la yel-bãna b sẽn da maande. Tẽnga waa n welga sags a yiibu: bãmb dãmb kẽed Zʋɩf rãmbã tɩ bãmb dãmb kẽed Tʋʋm-tʋmdbã. Zʋɩf rãmba ra yikame, bãmb ne b taoor dãmba n baood n na n nams Tʋʋm-tʋmdba la b lab-b ne kuga. B bãngame n tɩ soond Likaoni tẽnsẽ: Listr, Derbe la b tẽn-toose. Be me b sɩnga Koe-nooga moonego. Listr tẽnga b yãee ned sẽn zĩ n ka tõe n yals a nao zug ye. A sẽn dog tɛka a zɩɩ n kẽn ye. A kelga a Pol karengo. A Pol me ges-a lame la a sẽn mik t'a tẽeba sekame, a zẽka a koɛɛg n yeel-a: «Yik n yaas tɩrga f nao zugu!» A sɩd yika vugr n sɩng kẽnde. B sẽn yãenda Pol sẽn maana, neba kelma ne Likaoni tẽng rãmb goama: «Ad-y wẽnd dãmb n dɩk ninsaal wẽneg n sig d sʋka!» B ra boonda a Barnabe t'a Zewus, n boond a Pol t'a Ermɛs, yẽ sẽn da so goama yĩnga. Tẽnga noore, b ra mee roog b wẽnd a Zewus yĩnga la a Zewus maan-kʋʋdba waa ne lolse. B ra zoe n kãama puud n pid lolsã la yaa maoong kʋʋb la b ra naag zãma wã n segendẽ. A Pol ne a Barnabe sẽn bãng rẽnna, b kẽesa b futu la b wudg n kẽe zãma wã sʋka la b kaasdẽ: «D Zo-rãmba, yaa bõe la y maand woto? Tõnd me yaa ninsaalb wa yãmba. D waame bala n na n kos-y tɩ y bas y wẽn-yaalsa pʋgbo la y wẽnemd y nenga n tees Wẽnd vɩɩgã, sẽn naana yĩngr la tẽnga, mogra ne a pʋgẽ teed fãa. Zamaan niyns sẽn looge Wẽnd basa buud kam fãa t'a tũ a sore; b yaool ka kong b zãab sõnga kaset ye tɩ b zĩnda yĩngr n tool-b saase, n kõ-b sigr sõngo, n tɩgs-b ne koodo la b pids b sũur ne sũ-noogo.» Gom bãmba pa tõog wʋsgo n lak b yama ne maoonga kʋʋb ye. Zʋɩf rãmb n yaool n yi Antiyos la Ikoniyom n wa la zãma wã kelg-b lame. Woto wã b laba a Pol ne kuga n vu-a n yiis tẽngã, n tẽed t'a kiime. Karen-biisa waa n gũbg-a lame n getẽ la a tik n yikame n kẽ tẽnga pʋga. Vẽkembeoogo a looga Derbe tẽng ne a Barnabe. B sẽn moon Koe-nooga beelẽ n paam karen-biis zembala, b lɛɛg n tuda Listr, Ikoniyom la Antiyos. B ra kengda karen-biisa sũuri n sagend-b tɩ b kell n gãd b tẽebã la a ra yet-b lame: «Wẽnd Rĩunga pʋgẽ pa kẽede tɩ f pa reng n yãe toog ye.» B kõo Tigeng fãa a kãsem-dãmba. La b maana pʋʋsg sẽn naag ne no-loeere, n yaool n dɩk-ba n gũnug ne Soaala b sẽn teeg a soabã. B sãaga Pisidi n ta Pãnfili, b moona Koe-nooga Perze n yi be n dig Atali, n le tɩ yi be n kẽ koom koglg n tees Antiyos, b pipi tẽnga. Saam-biisa ra yãagd-b la ne Wẽnd bark pʋʋsgo b tʋʋm sõma wã yĩnga. B sẽn ta Antiyos b boola Tigengã n wilg Wẽnd sẽn sõng-b tɩ b maan bũmb ning fãa, n wilg tẽeba sor sẽn pak bu-zẽmba yĩnga. B kaoosa beelẽ ne karen-biisã. Neb kẽer n da yi Zɩɩde n wa zãmsd saam-biisã woto: «Y sã n ka kẽ bãong wala a Moyiiz Noora sẽn date, fãagr nan ka ye.» Bʋʋr la no-koeemd yika bãmb ne a Pol la a Barnabe sʋka. B waa n yeelame tɩ b na n tʋma a Barnabe ne bãmb neb kẽer tɩ b leb Zerizalɛɛm, Tʋʋm-tʋmdba nengẽ tɩ b welg yellã. Tigenga sõng-b la ne sor zug rɩɩbo tɩ b na n pãrg Fenisi la Samari, la b togsd bu-zẽmba sẽn lebg tẽedba tɩ rẽ noogd saam-biisa sũur al wʋsgo. B sẽn ta Zerizalɛɛm, Tigengã, Tʋʋm-tʋmdba la nin-kẽemsã, reeg-b la neere la bãmb me togsa b sẽn maan bũmb ning ne Wẽnd sõngre. Farizẽ rãmba neb kẽer da saka tẽebo. Bãmb n yik n yeele tɩ rẽnd b yeel bu-zẽmba tɩ b kẽ bãongo la b reeg a Moyiiz Noorã. Tʋʋm-tʋmdba la nin-kẽemsã tigma taab n ges yellã. B wẽe no-koeemde n kaoos la a Piyɛr wa n yikame n yeele: «Y miime, m saam-biisi, tɩ sɩngrẽ wã maam la Wẽnd yãk yã. B yãk-m lame tɩ bu-zẽmba wʋm m noorẽ Koe-noogã la b tẽ. Wẽnd sẽn ne ninsaal sũuri kõo kaset tɩ b ka bas-b kɛɛng ye: b sika a Vʋʋsem Sõngo b zugu wala b sẽn sig tõndã. B ka welg-b ne tõnd ye, n pek-b ne tẽeb kũuni. Yaa bõe tɩ y rat n fɛɛs Wẽnde, bõe tɩ y rat n zɩlg karen-biisã zɩɩbo, d yaab rãmb la tõnd mens sẽn ka tõog n tʋke? Ad-y yaa Krista maasmẽ la tõndo, wala bãmba, tẽed fãagre.» Zãma wã yɩɩ sɩɩ. B le kelga a Barnabe ne a Pol sẽn maan wẽnd makr la yel-bãn niynsi ne Wẽnd sõngre, bu-zẽmba sʋka. B sẽn gom n sɛ la a Zak sẽn yik n yeele: «Kelg-y ma, m saam-biisi; a Simeõ wilg-y lame Wẽnd sẽn tʋlg al sɩngrẽ n sʋk buud sẽn na yɩ b rẽnna. ‹La rẽ me n be bãngdba sebrẽ: M na n lɛɛg n waame m na n yika a Daviid ro-wãoongo m na n yika a raboogo; sẽn lʋɩ wã na n le yalsa yĩngri, woto la sẽn ket-ba na n bao Soaalã, la na n yɩɩ boto me ne bu-zẽmb niyns m sẽn welg toore: yaa Soaala n yeele, bãmb n yals rẽ al zamaan woko.› Yaa rẽnd me yĩnga la ma me tagsda tɩ b ra nams bu-zẽmb niyns sẽn lebg tẽedbã ye. B kos-b bala tɩ b vẽ ne maanda bũmbu, ne yoobo, ne gɩf la zɩɩm. Rẽ wã yaa vẽeneg ne ba tɩ yaa al daar zãra la a Moyiiz Noora tar karen-saamb tẽng fãa pʋgẽ t'a karemd-a noora pʋʋsg rotẽ, sibr daar fãa.» Tʋʋm-tʋmdba, nin-kẽemsã la Tigenga gill zemsa taaba n yãk bãmb neb kẽere n tum-b Antiyos ne a Pol la a Barnabe. Yɩ-la a Zɩɩd, b sẽn boond t'a Barsabas la a Silas, neb sẽn da ya sʋk neba. Ad sebr ning b sẽn ning b nugẽ: «Tʋʋm-tʋmdba la nin-kẽemsã, yãmb saam-biisi, n toond pʋʋsem saam-biis niyns sẽn be-b Antiyos, Siri la Silisi, bu-zẽmba tẽn-peelmẽ. D wʋmame tɩ neb n yi ka n wa y nengẽ la tõnd yaool n ka tʋm-b ye, la b waa n gomame n yɛɛs yã la b kalem yɛlã y yamẽ. Dẽ me la d zĩnd ne taaba n zems taaba n tũus neba n tʋm-b yãmb nengẽ ne d zo-rãmb a Barnabe la a Pol, neb sẽn dɩk b vɩɩm zãnga n kõ Soaala Zezi Krista. D tʋm-y-la a Zɩɩd la a Silas la b na togs-y ne noore sẽn be sebra pʋga. Tõnd naaga a Vʋʋsem Sõng n yalse tɩ d ka na n zɩlg-y zɩɩb a to n zʋʋg sẽn pak bala tɩ y vẽ ne maand nemdo, ne zɩɩm, ne gɩfo la ne yoobo. Modg-y n gũus-y ne rẽ. Wẽnd na taas!» B sẽn pʋʋs taaba n sɛ, sẽn tʋm b rãmba looga Antiyos. B sẽn ta bal la b sẽn tigim tẽedbã n kɩs-b sebrã. B reeg-a lame n karem la b sũur yɩɩ noog t'a waa n kenga b raoodo. A Zɩɩd ne a Silas ra yaa bãngdba, bãmb me goma ne saam-biisã n kaoos n le keng b sũya. Dasem sẽn maan a wãna, saam-biisa lebs-b la sẽn tʋm-ba nengẽ ne laafi toaala. [ A Silas yẽ zãgsame t'a kõn loog ye.] Sã n ya a Pol ne a Barnabe, bãmb me paa Antiyos. B ra naaga neb wʋsgo n zãmsdẽ la b moon kiba-noogã, Soaala Koe-noogã. Sẽn yɩ bilf dẽ poore, a Pol yeela a Barnabe: «D leb n kaag saam-biisã tẽns niyns d sẽn zoe n moon Soaala koɛɛgã n ges b tũudma sẽn be zĩig ninga.» A Barnabe da ratame t'a Zã, b sẽn boond a soab t'a Mark, tũ-ba. A Pol da pa rat t'a tũ ye, tɩ Pãnfili, a ra lɛɛg n bas-b lame la a ka naag bãmb n tʋm ye. Waa n lebga zabre, tɩ b na n kong n welg taaba. A Barnabe ne a Mark kẽe koglg n tees Sɩpr. A Pol me looga ne a Silas la b saam-biisa rengame n yõk Soaala sɛɛg b yĩnga. A Pol pɩʋʋga Siri la Silisi, n maneg n zĩndig Tigengu. Dẽ poore a taa Derbe la Listr. Karen-biig a ye n da be be n boond t'a Timote. A ma yaa Zʋɩf poak sẽn sak tẽebo la a ba yaa Grɛk. Listr la Ikoniyom saam-biisa ra gomda a yell ne pẽgre. Dẽ me la a Pol yeel t'a na n lebga a tũud-n-taaga la a kẽes-a-la bãongo tɩ Zʋɩf rãmb da bee be la b ra miime t'a Timote ba yaa bu-zẽna. B sẽn ta tẽng ning fãa b ra wilgda Tʋʋm-tʋmdba la nin-kẽemsa sebrã n sagennẽ tɩ b modg n tũ. Tigeng fãa pʋgẽ tẽeba ra kɩɩda yẽgna la tẽedba sõor da paasda beoog sẽn vẽege. B saaga Frizi tẽn-peelem la Galat rãmb tẽnga. B ka paam a Vʋʋsem Sõng sore n moon Koe-nooga Azi tẽng ye. B waa n taa Mizi sɛtmẽ, n tʋlg n kẽ Bitini la a Vʋʋsem Sõng ka pak sor ye. Woto wã b pɩʋʋga Mizi n lɛɛg n sig Troas. Yʋng sẽn ta, a Pol zãmsame. A yãenda Masedoan ned a ye, t'a yɛs yĩngr n kot-a: «Tũ Masedoan, wa fãag-do!» Likra poore, d tʋlgame n ta Masedoan, tɩ d da kõ-la d mens yam tɩ Wẽnd n boond tõndo Koe-nooga yĩnga. D sẽn kẽ koglg Troas d teesa Samotras. Vẽkembeoogo d teesa Neyapolis, d yii be n dig Filip tẽnga. Yaa tẽn kãseng Masedoan tẽnsa fãa sʋka la Rom dãmb n da waa n kẽed-a. D maana rasem a wãn tẽn kãng pʋgẽ, la vʋʋsg daare d yii tẽnga kɛɛnga; kʋɩlg n da be be, la yaa kʋɩlga noor la b ra yãk pʋʋsg zĩiga. D zĩndame la d yãenda koɛɛg n kõ pagba sẽn da tigma. Bãmb nin-yend n da kelgd neere: a yʋʋra la a Lidi, a ra koosda monom Tiyatir pʋgẽ, a ra waoogda Wẽnde; Wẽnd kõ-a-la vẽenegre la a Pol karengã kɛla a sũurẽ. Yẽ ne a zak rãmb sẽn deeg soobo, a kos-d la woto: «Y sã n get-m wa Soaala neda, bɩ y wa zĩnd m zakẽ,» la yɩɩ wala modgre. D waa n dabda pʋʋsg daar a yembre, n seg yem-pog-bil a ye sẽn da bʋgd bagre. A bãgra ra kõta a zu-soaben-dãmba ligd wʋsgo. A Sɩngame n pʋgd tõnd ne a Pol la a gomda: «Nin-bãmba yaa Yĩngr Wẽnda tʋʋm-tʋmdba, yaa fãagra sor la b wilgd-y.» A pʋg-d la woto rasem a wãna. A Pol waa n yɛɛme n wẽneg n yeele: «A Zezi Krista yʋʋr yĩnga, m kõt-f la noore, Sʋtãana, tɩ f yi la f bas pagã.» La a sɩd wẽneg n yiime n bas-a. A zu-soaben-dãmba sẽn mik tɩ b rɩɩba sor menemame, b tɩ yõka a Pol la a Silas n tall-ba n taas tẽnga rãmb sɛk zĩigẽ, bʋ-kaoodb taoore. B yeela tẽnga taoor dãmba: «Nin-bãmba waa n dãmbda tẽngã, yaa Zʋɩf rãmba. B wata ne noe tõnd Rom dãmba sẽn ka tõe n deeg la d tũ ye.» Neba yika ne-ba. Taoor dãmba kɩtame tɩ b yees b futã la b pãb-b-la ne kaase. B Pãb-b la sõmbo n yaool n kẽes-b roogo. B kosa ro-gũudã t'a maan a ni. Ro-gũuda me sẽn wʋm dẽ, a kẽes-b la pʋgẽ doogã n loe b nao wã ne rabõanga. Yʋn-sʋka, a Pol ne a Silas ra pʋʋsdame la b pẽgd Wẽnd ne yɩɩla. Tẽnga waa n yika vugr bal n tar miuungu tɩ ya wa rooga na n lukame. Kʋɩlensa fãa pagsa vugri tɩ bãeensa sẽn da sog bi-beesa foos n dʋʋg. Ro-gũuda nekame n yãe tɩ kʋɩlensa pagsame t'a wõog a sʋʋga n na n kʋ a menga t'a ra tẽedame tɩ bi-beesa fãa loogame. A Pol tãs-a lame: «Da pogl f meng ye tɩ tõnd fãa keta ka.» Ro-gũuda kosame tɩ b widg bugum t'a zoetẽ la a rigda n tɩ wõgemd a Pol ne a Silas taoore. A yiis-b la roogo la a yeel-b lame: «Soaala, yaa bõe la m tog n maan n fãag m sɩɩga?» B leok-a lame: «Tẽ Soaal a Zezi tɩ foo ne f zaka na paam fãagre.» B wilg-a-la Soaala Koe-noogã, yẽ ne a zak rãmba. Yɩɩ zĩig pʋgẽ bala la ne yʋngo la a peeg-ba n tɩ peks b noadã la yẽ ne a zaka rãmb fãa deega soobo. A tall-b lame n kẽes a zakẽ, n bao rɩɩb n kõ-ba la a naaga a zak rãmb n kɩdem sũ-noogo, b sẽn lebg tẽedba yĩnga. Zĩig sẽn yẽege, tẽnga taoor dãmb tʋma rapoy-bi tɩ b wa yeel ro-gũuda: «Yiis-y nin-bãmba roogo.» Ro-gũuda me taasa a Pol b goama: «Tẽnga taoor dãmb tʋmame tɩ b wa yeel tɩ b bas-y tɩ y looge. Dẽnd yĩnga yi-y n loog-y.» Dẽ me la a Pol yeel Dapoy-bi wã: «B kɩtame tɩ b pãb tõnd neba fãa taoore, tõnd ne d sẽn ya Rom tẽngen-bi-taase; b kẽesa tõnd bi-bees roogẽ. La marsã b ratame n soos n yiis-du! Bada! B mens wa b toore n yiis-du.» Dapoy-bi wã taasa tẽnga taoor dãmb b goama. B sẽn wʋm t'a Pol ne a Silas yaa tẽngen-bi-taar ne Rom dãmba, b yɛɛsame. Tẽnga taoor dãmb n sɩd wa b toore n kos-b tɩ b maan yãgbo la b yi tẽngã. B sẽn yi roogo a Pol ne a Silas leba a Lidi zakẽ. B le sega saam-biisa be n le keng b tẽeb n yaool n loog. B kẽe Amfipolis n sãag Apoloni n ta Tesalonik. Beelẽ Zʋɩf rãmba ra tara b pʋʋsg roogo. La wala a sẽn maand dasem kam, yaa beelẽ la a Pol tɩ yãend-ba. Vʋʋsga raar tong taaba a tã b sẽn gãneg b sõasgã sebr sõng zugu. A Pol ra gomda ne-ba n wilgd-b tɩ Krista ra tog n namsame la b vʋʋg kɩɩms sʋka, la a ra yetame: «Krista la a Zezi, m sẽn moond a soabã.» Bãmb sʋka neb kẽer paamame n yi b likẽ n lebg tũud-n-taar ne a Pol la a Silas. La tõe n paas a Zʋɩf rãmb kẽed-paalse la bu-zẽmba la nin-bɛd pagb ka tɛka. Zʋɩf rãmba yika sũ-kiiri, n kẽ raagẽ wã n wool nin-yaalse sẽn gũm taaba n tar bʋʋr tẽnga pʋga. B ta a Zason yiri n baood a Pol la a Silas n na kẽes-b bʋʋd tẽnga soaalba taoore. B ka yãend-b be ye la b kora a Zason la saam-biis kẽer n ta kombɛɛmba nengẽ la b kaasdẽ: «Nin-bãmba n leebd ãndũni rãmba zutu, la ad-b sẽn ta ka me. La ad-a Zason sẽn deeg-b a zakẽ. Nin-bãmba tõdgda Rom naaba noore, n moonẽ tɩ dĩm a to n be: a Zezi.» B bʋʋra yɛɛsa zãma wã la kombɛɛmbã. B yeela a Zason la neb a taabã tɩ b wa ne ligdi tɩ b yaool n bas-ba. Zĩig sẽn sobge, saam-biisa kɩtame t'a Pol ne a Silas loog Bere tẽnga. B sẽn ta be b tɩ kẽe Zʋɩf rãmba pʋʋsg roogẽ. Bãmb da tara zʋg sõngo n yɩɩd Tesalonik rãmbã. B reega Koɛɛga tao-tao. Beoog sẽn vẽeg fãa b ra karemda Sebr Sõngo n get bõe n ka zems a Pol dãmb toagsgẽ. Bãmb wʋsg saka tẽebo, la bu-zẽmba sʋka, nin-bɛd pagba, la rap me. Tesalonik Zʋɩf rãmba sẽn wʋm t'a Pol moona Bere tẽnga Wẽnd koɛɛgã b le waa n dãmba nebã. Dẽ la Saam-biisa me kɩt t'a Pol yi n tees mogrã. A Silas la a Timote yaool n paa be. Sẽn da yãagd-ba a Pol yãag-a lame n ta Atɛn n yaool n lɛɛg ne a Pol koɛɛg, a Silas la a Timote yĩnga: tɩ b bʋʋg-a be tao tao. A Pol ra gũuda a Silas la a Timote Atɛn la a sũura ra kɛɛda wa bugum, a sẽn mik tɩ tẽnga pida ne wẽn-naandse. Woto a sõasga ra welga sags a yiibu. A Ra sõsda pʋʋsga roogẽ ne Zʋɩf rãmba la sẽn da tũud-b Wẽnde; n sõsd tẽnga rãmb sɛka zĩigẽ ne sẽn wat-b be. Neb sẽn da karem n sik meng n da mii n wat a nengẽ, wala bãng sẽn noom f yĩnga rãmba, la kũum dabeem ka tar-m dãmba. Bãmb kẽer da sokdame: «Luiin-bag kãnga yetame tɩ bõe?» Tɩ kẽer me yetẽ: «Ad-y yaa bu-zẽnd wẽnd dãmb sor la a wilgda.» La rẽ me yaa b sẽn da wʋmd Zezi yʋʋre la kũum vʋʋgre. B talla a Pol n zãag bilfu n sokd-a: «D tõeeme n bãng f zãms paalsa bɩ? Fo sẽn leokd tõnd koees niynsa yaa koe-sãamse, dẽ la d dat n wʋm b võore.» Atɛn tẽng rãmba la sãamba sẽn waa n nok-bã sɩd da ka tar tʋʋmd a to n zʋʋg kibar paalg yelgre bɩ kelgr ye. A Pol yik n yalsa yĩngr bãmb sʋka n yeele: «Atɛn dãmba, m neeme tɩ y yaa neb sẽn mi wẽnd waoogre n yɩɩd buuda taaba. M saagame n gilg y tẽngã, la m gesa neere y sẽn me y wẽnd dãmba yĩnga. M tol n yãenda maan-kugri b sẽn gʋls a zug woto: ‹D sẽn ka mi wẽnd ninga rẽnna›. Ad-y yaa yãmb sẽn waoogd n yaool n ka mi a soaba la mam wat n na n wilg yãmba. Wẽnd ning sẽn naana dũnia la bũmb ning fãa sẽn be a pʋgẽ, yĩngr la tẽng Soaala, ad-y b ka kẽed ninsaal sẽn me rot niynsa ye. Ka ninsaal nug n na n yiis bũmb n kõ-ba, wala bũmb n paoog-b tɩ b rat ye, tɩ yaa bãmb n kõt vɩɩm, vʋʋsem la paoong fãa. B tʋlgame tɩ ninsaalba fãa sẽn be tẽng zugã yɩ yẽgr a ye wila. B yalsa bũmb fãa a zĩigẽ, n yals bũmb fãa a toaaga la a wakato. La b raaba yaa b fãa bao la b paam Wẽnd belem kaseto, wala b sẽn tõe, ba sã n na yɩɩ wala ne bablgo, tɩ Wẽnd pa zãr ne tõndo, b pa zãr ne ned kam fãa ye. Sɩda yaa bãmb maasmẽ la d vɩ la d kẽnda la d yaa d sẽn yalã. Pʋs n yaa woto la yãmb neb kẽer yeel yã: ‹D yaa buud a ye ne Bãmba.› Tõnd ne Wẽnd sã n ya buud a ye, d ka tog n mams-ba wala sãnem, wanzurfu bɩ kugr, ninsaal minim la a bãngr sẽn yag ye. Wẽnd basa sẽn looga taale, bãngr kaoolga taale, n yik marsã n na n wilg ninsaalba, b sẽn ya zĩig ning fãa neba, tɩ b teem zʋgo. B bãng tɩ b yãka raare n na n kao ne zemsgo ninsaalba fãa bʋʋdo. B yãka bʋ-kaoodã, la kaset ning b sẽn kõt tɩ bãmb n yãk yẽ soabã, yaa b sẽn vʋʋg-a kɩɩms sʋkã.» Atɛn dãmba sẽn wʋm t'a Pol gomd sẽn ki vʋʋgr yellã, kẽer pusga laado. Kẽer me yeelame: «D na kelg gomd kãnga nindaare.» Boto me la a Pol paam n yi b sʋka. Neb kẽer lebga b tũud-n-taase la b saka tẽebo. A Denis zĩnda b sʋka. Pag a ye me n zĩnd be n boond tɩ Damaris. Neba taab me n paase. Dẽ sẽn looge, a Pol zãaga ne Atɛn n dig Korẽnt. A yãenda Zʋɩf a ye be sẽn boond tɩ Akilas, yaa Põ tẽn-peelmẽ neda la a nan waa paalem, yẽnda ne a pag a Prisil. Itali la b yii n wa Korẽnt tɩ dĩm a Klod da kõo Zʋɩf rãmba noore tɩ b yi Rom. A Pol lebga zood ne bãmba, b nug tʋʋmd sẽn da ya tʋʋm yɛnga. Yaa bãmb la a tɩ noke tɩ b naag taab n tʋmnẽ. Yaa pɛɛl sẽn tar n tiid doto la b ra wʋgda. Sibr daar fãa a Pol da maanda kareng pʋʋsga roogẽ n na n vẽneg Zʋɩf rãmba la bu-zẽmba. A Silas ne a Timote sẽn yi Masedoan n wa tɛka, a Pol tʋʋmda lebga moon Koe-noogã n wilg Zʋɩf rãmbã t'a Zezi la Wẽnd sẽn tʋm a soabã. A sẽn mik tɩ b pa rat n kelge la b gomd n tʋʋsda Wẽnde, a Pol fugumda a fut b taoore n yetẽ: «Y kɩɩsga sẽn wãad yãmba taal pa ne yã. Sã n ya maam, taal ka m zug ye la marsã tɛka yaa bu-zẽmba la m na n babse.» A Pol yii be n dig a Zustus yiri; nin-kãng ra pʋʋsda Wẽnde la a zaka ra yega ne pʋʋsga roogo. Pʋʋsga roog naab ra boondame tɩ Krispus. Yẽnd me saka tẽebo. Korẽnt neba pʋs n yɩɩ wʋsgo sẽn sak tẽeb la b reeg soobo. Yʋng a ye Soaala lika a Pol n yeel-a: «Da zoe rabeem ye, da vʋʋs ne Koɛɛga mooneg ye, da sĩnd ye. M bee ne foo la ned kõn sɩɩs-fo n maan-f wẽng ye, kaalẽ m tẽeda neb wʋsgo m Tigenga yĩnga.» A Pol paa Korẽnt yʋʋmd la kiis a yoobe, n tar Koɛɛga mooneg bala. A Galiõ sẽn waa n ya Akayi kombere, Zʋɩf rãmba yika wa nin-yɛnga n na n maan zabr ne a Pol. B kẽes-a la bʋʋdo, n yetẽ: «Nin-kãnga sagenda neba tɩ b waoog Wẽnd ne waoogr sẽn pa tũud Noorã.» A Pol sɩngame t'a na n gome la a Galiõ leoka Zʋɩf rãmbã: «M na n kelgẽ-la y koɛɛgã sã da yaẽ la ned bũmb la a sãam yã, bɩ sã n da yaẽ la yel-yood la a maanyã, tɩ rẽ segdame. La sã n kella no-koɛɛm goam biis poorẽ, bɩ yʋy poorẽ, bɩ y meng Noora poorẽ, yãmb n na bãnge, mam yẽ kõn lʋɩɩs m toog ye.» A Yiis-b-la bʋʋda zĩigẽ. B fãa yii n gãda a Sostɛn, pʋʋsga roog naaba, la b sɩnga a pãbr, bʋʋda zak noor bala, t'a Galiõ sɩd sĩnd waa toog ka ye. A Pol kell n paa rasem a wãn Korẽnt la a waa n basa a saam-biisã n kẽ koglgo, n tees Siri. A Prisil ne a Akilas yãag-a lame. A Pol ra põnga a zug Sẽnkre tɩ pʋleng la a ra pʋlm yã. B waa n siga Efɛɛz. Beelẽ a welga ne a tũud-n-taasã. A sẽn tɩ kẽ pʋʋsg roogẽ a sõsa ne Zʋɩf rãmba. Bãmb kos-a lame t'a ra yãg loogr ye, t'a ka sak ye. B sẽn waa n pʋʋsd Wẽnd na taas la a yeel-b: «M na n lɛɛg n wala y nengẽ, Wẽnd sã n data.» A yii Efɛɛz. A Sẽn sig Sezare, a tɩ pʋʋsa Tigengã n yaool n tees Antiyos. A maana rasem a wãn beelẽ n le yi n dɩk a sor n digd Galat la Frizi rãmb tẽnga, n kengd karen-biisa tẽebo. Zʋɩf a ye sẽn boond tɩ Apolos, n yit Aleksãndri baobgo, waa Efɛɛz. Yaa ned sẽn da mi goama la ned sẽn da vẽen ne Sebr sõngo. A ra paam n zãmsa sor ning sẽn boond tɩ Soaala sorã la a ra pelga a sũuri n moonẽ la a gomd a Zezi yell tɩ tũud tɩrga, la yaool n ya a Zã soobã la a so yã. A yika pʋʋsga roogẽ n gomd t'a sũur pa kiuusdẽ ye. A Prisil la a Akilas kelga a goama la b peeg-a lame n tɩ vẽneg-a Sora zãnga. A Apolos da rat n kẽnga Akayi, tɩ saam-biisa yeel-a t'a maan dẽ, a maan neere, la b gʋlsa karen-biisa tɩ b reeg-a neere. Sɩda a sẽn ta be, ne Wẽnd sõngre, tẽedba rɩ-la a yõod zembala. A ra leoodame n lubd Zʋɩf rãmbã, neba fãa nifẽ, n wilgd ne Sebr sõngo t'a Zezi la Wẽnd sẽn tʋm a soabã. A Apolos sẽn waa n be Korẽnt, dẽ t'a Pol saaga tẽns niyns sẽn zao tãmsa zutu n sig Efɛɛz. A mika karen-biis kẽere. A yeel-b lame: «Yãmb sẽn sak tẽebã wakato, y paama a Vʋʋsem Sõng bɩ?» Tɩ b leoke: «Tõnd nan ka wʋm meng tɩ b gomd t'a Vʋʋsem Sõng beeme ye.» T'a Pol le sok-ba: «Yãmb sẽn deeg soob ninga la bʋgo?» Tɩ b yeele: «A Zã soobo.» Dẽ la a Pol yeel yã: «Yaa sũur tekr soob la a Zã ra kõta la a yet zãma wã tɩ b tẽ ned ninga sẽn na n wa yẽnda poorẽ wã: a Zezi.» B sẽn wʋm dẽ b reega soob Soaal a Zezi yʋʋr yĩnga. A Pol sẽn tẽeg a nus b zutu la a Vʋʋsem Sõng sẽn sig-ba tɩ b sɩng n wɩlemd bu-zẽn goam la b gomd bãngr goama. B ra yaa bãmb piig la a yiibu. A Pol tɩ kẽe pʋʋsga roogẽ la kiis a tã sẽn pʋg taaba a ra gomda ne raoodo. A Sõasga ra yaa Arzãn Rĩunga yelle n dat tɩ kẽ b sũurẽ. Kẽer n zĩnd be n da pa reegd saglg ye tɩ b sũura ra kɩʋʋlmame. Bãmb dãmb n da sãbsd Wẽnd sorã, neba fãa taoore. A welga ne bãmb dãmba. A sʋka karen-biisã. Beoog-beoog fãa a ra maand-b la kareng a Tiranos karen-doogẽ. Kell n talla boto yʋʋm a yi la rẽ me la Azi rãmba, Zʋɩf bɩ bu-zẽmba tõog n wʋm Soaala Koɛɛgã. Wẽnd kõ-la a Pol pãng t'a maand wẽnd makr dãmb sẽn da yɩkd pɛlense. Sã n dɩk peend buud fãa sẽn sɩɩs a Pol n lɛɛg n sɩɩs bãad-dãmba, b bãasa wẽnegd n sãoogame, bɩ Sʋtãamba yit n loogame. La ade, Zʋɩf rãmb kẽer me n da saad n sãoogd neba. Bãmb me makame n pʋd Soaala Zezi yʋʋr n na n sãoog Sʋtãan sẽn da kẽ b rãmba. B ra yetame: «M kot-y lame tɩ y yi, Zezi ninga yʋʋr yĩnga, Zezi ning a Pol sẽn gomd a soab yellã!» Da yaa a Seva kamb a yopoe n da maand woto la a Seva meng ra yaa Zʋɩf rãmb maan-kʋʋd kãsenga. Sʋtãan a ye lɛɛg n yeel-b lame: «Sã n ya a Zezi, mam mii bãmba, Sã n ya a Pol, mam mii yẽ me. La yãmba, yãmb la a bõe rãmba?» La Sʋtãana yiime n wudg n kẽ bãmba, n lubd-ba, a yembr-yembre, n pogend-ba tɩ b na n zoe n yi yɩnga, b bɩlma, la ne sãmpoaga. Efɛɛz rãmb fãa, Zʋɩf bɩ bu-zẽmb wʋma yellã. Rabeem yõka b fãa, la Soaala Zezi yʋʋr paama pẽgre. Sẽn sak-b tẽeba waa zembala n deeg b kongre la b wilg bãmb me sẽn da maande. Sẽn da zãms-b rabaar buud toor toore n tʋmnẽ n yɩkd neba pɛlensã, waa ne b rabaara sɛba la b yõog-b la neba fãa taoore. B geela b sɛba yõodo. Seka neb tus pis nu daar a ye tʋʋmd yaoodo. Ad-y Soaala Koe-nooga ra paamda moonego la a ra kɩɩda yẽgen sẽn tar pãnga. Dẽ loogr poore a Pol ninga a yamẽ t'a na n le tũu Masedoan la Akayi n leb Zerizalɛɛm. A ra yetame: «M sã n ta be na yɩ tɩlɛ tɩ m ta Rom me.» A tʋma Masedoan a sõangdba a yiibu, a Timote la a Erast; yẽ meng yaool n paa rasem a wãn Azi tẽn-peelmẽ. Wakat kãnga, Sora poorẽ, tẽnga wa n dãmbame. Ned a ye n da ya yõaka n boond tɩ Demetriyus. A ra yõgda ne wanzurfu a Artemis wẽnd doto. Woto a ra sõngda tẽnga rãmb wʋsgo ne nug tʋʋmde. A tigsa yẽ sẽn kõ b rãmb tʋʋmna la neba a taab sẽn ya yõgs wa yẽnda n yeel-ba: «M zo-rãmba, tõnd sẽn vɩ tɩ d vɩɩma sakdẽ wã, y miime tɩ rẽ bela d tʋʋmnẽ wã. La ade, wala y sẽn ne la y sẽn wʋmde Azi tẽn-peelma tõre, a Pol ne a saglsã woola neb ka tɛk a poorẽ sẽn maand tɩ wẽnd sẽn dõog ne nug, ka tõe n yɩ wẽnd ye. Woto tõeeme tɩ b pa le ges tõnd tʋʋmna wa bũmb sẽn be võor ye, tõeeme tɩ b wa ges tõnd wẽnd poaka Artemis meng rooga wa zaalem, la rẽ fãa wat n baasa ne paoore, wẽnd ning Azi la dũni wã tõr sẽn waoogda paoore.» Neba sẽn wʋm dẽ, b sũur puuga wʋsgo tɩ b tar kaasgo: «A Artemis, Efɛɛz rãmba wẽnda, yaa wẽn kãsenga!» Waa n lebga tẽnga tõr n wulumdi. Fãa kaoogame n digd reema zĩigẽ al tɩ Masedoan rãmba, a Pol so-toaka neba, a Gayus ne a Aristark, kong n pʋg-ba. A Pol da ratame n tɩ yãend buudã la karen-biisa ka sak ye. Azi rãmb neb kẽer sẽn da ya a zo-rãmba, kos-a lame t'a ra koos a yõor ye, la a ra tag reema zĩigẽ ye. Bãmb dãmb da yetame tɩ wãnda, tɩ bãmb dãmb yet tɩ woto. Tẽnga taoor dãmb mens ra ka mi b tigsga võor ye. Zʋɩf rãmba da ratame t'a Aleksãndr yɩ b norɛɛsa, n yiisa sʋka. A kabsa ne nug n na n gome ne nebã. La b sẽn bãng tɩ yaa Zʋɩf, b fãa lagma taab n kelemd wa nin-yende, na ta wakat a yiib pʋgẽ: «A Artemis, Efɛɛz rãmb wẽn poaka, yaa wẽn kãsenga!» Bʋʋda taoor soab waa n tõogame tɩ b bas bʋʋre t'a yeele: «Efɛɛz rãmba, ãnda be dũni wã pʋga n ka mi tɩ tẽn kãnga n gũud wẽn kãsenga Artemis doogã la a menga nin-naand sẽn yi yĩngr n sigã? No-koeemd sẽn ka be rẽ poorẽ wã, y tog n zĩnda sɩɩ n da wa maan kegr ye. Yãmb sẽn tall-b rãmb n wa ka wã, b ka tʋʋs yãmb wẽndã, b ka paooga ye. A Demetriyus ne a tʋmd-n-taaga sã n tar koɛɛg ne ba, bʋʋd daar beeme, bʋ-kaoodb beeme, b bool-b badaare. Koɛɛg a to sã n beẽ n dat welgre, d tigsga sẽn tar raarã, d na ges rẽnna. Bũmb ning sẽn maan dũnna wã tõeeme tɩ b yeel tɩ yaa tõnd n dãmbd tẽngã, tɩ d meng yaool n ka tar rũnna gũm taaba võor ye.» A sẽn leok woto n sɛ, b fãa sẽegame. Bʋʋra sẽn yõke, a Pol boola karen-biisã, n sagl-ba, n pʋʋs-b wẽnd na taas la a looga Masedoan. A Pɩʋʋga tẽngã n kengd tẽedbã la a rigd Grɛs Tẽn-peelmẽ. Kiis a tãab la b maan be. Segame t'a sẽn waa n dat n kẽ koglg n dig Siri la a Pol sẽn wʋm tɩ Zʋɩf rãmba gãnega bẽdg a yĩnga. Dẽ me la a yeel t'a na n gõdg n leba Masedoan. A tũud-n-taas yi-la a Sopatros, a Pirus biiga, Bere tẽng neda; n paas a Aristark ne a Sekundus, Tesalonik rãmba; n paas a Gayus, Doberɛs neda, n paas a Timote la a Tisik, la a Trofim, Azi rãmba. Bãmb denga taoore n tɩ gũ-d Troas. Tõnd mens kẽe koglg n yi komber a Filip tẽnga. Bur ka lobd bɩlla poore, rasem a nu pʋgẽ, d tɩ paam-b la Troas la bee d paa rasem a yopoe. Sibr daar zaabre, d da tigma taab bura kaoob yĩnga. A Pol sẽn da rat n loog vẽkẽmbeooga ra sõsda ne-ba. A gomame n tãag yʋn-sʋka. B ra widga fitils rãmb wʋsgo yĩngr doog ning d sẽn da tigma. Bi-bɩɩg a ye sẽn boond tɩ Eutik da zĩi rooga võorẽ. Gõeem sẽn ya gõeem meng wa n lub-a lame, dẽ t'a Pol ket n maanda a karengo. Gõeema yĩnga a yii rooga roglem-roglem a tãab soaba n lʋɩ tẽnga. B sẽn zẽk-a, b mikame tɩ yaa kũum. A Pol sigame n zõond n ges-a, n dɩk-a a nusẽ la a yeelame: «Tõog-y y mense t'a nan pa ki ye.» A leba yĩngri n tɩ kao burã n dɩ; a Gomame tɩ zĩig wa yẽege. Dẽ marsã la a yaool n dɩk a sore. B talla bi-bɩɩga vɩɩga n tɩ kẽes a zakẽ la zaka rãmb sũ-noog ka yɩ bilfr ye. Tõnd denga taoore. D teesa d koglga Asos tɩ be la d da tog n dɩk a Pol n kẽes koglga pʋga wala a meng sẽn da kaoole. A sẽn paam tõnd Asos d kẽes-a la koglga pʋga n dig Mitilɛn. D sẽn yi be d taa Kio vẽkembeoogo. Da-yɩten-daare d looga Samos n tek n yaas Trogiliõ la raar ninga sẽn pʋga wã beoog vẽk-d la Milɛt. A Pol da yeelame t'a ka na n yeg kooma noore n pẽneg Efɛɛz t'a wat n dat n bʋdgame n ta Azi, tɩ kẽnda tadge. A ra yãgdame n dat n kẽ Zerizalɛɛm, Wẽnd sã n sake, Tigsga kibs raare. A Pol zĩnda Milɛt n tʋm tɩ b bool Efɛɛz Tigenga nin-kẽemsã. B sẽn ta, a yeel-b lame: «Yãmb fãa miime, al pipi raarã, m naoor sẽn tag Azi tẽng tɛka, m manesem ne yãmb sẽn yɩ a soaba. M tʋma Soaala tʋʋma ne yam sulgri, ne nintãm, ne namsg ning Zʋɩf rãmba sẽn nams maam ne b no-baoorã. Y mii tɩ m baoo sẽn wat ne yõod yãmb yĩnga. M pa tar n leb poorẽ n mong-y y sẽn da tog n wʋmb bũmb ninga bɩ y sẽn da tog n zãms bũmb ninga, y zagsẽ bɩ y sɛk zĩisẽ ye. D kosa Zʋɩf rãmbã wala bu-zẽmbã, tɩ b teem zʋg Wẽnd taoore la b tẽ Soaal a Zezi Krista. Marsã yaa Wẽnd Vʋʋsem n tusd maam tɩ m dabd Zerizalɛɛm la m ka mi yell ning sẽn na n pak-m be ye. M sẽn yaool n wʋm Wẽnd nengẽ n ta marsã yaa tɩ m sẽn ta tẽng ning fãa yaa naong la pɛt bal n gũud maam. Sã n ya ne maam, m yaool n ka get m vɩɩma wa bũmb sẽn tar yõod ye. Sẽn pak maam yaa m vɩɩma, yaa m tʋʋmda baas neere, tʋʋmd ning Soaala Zezi sẽn kõ-ma. La b tʋʋmna yaa m yɩ Wẽnd kũun kãsenga kaset soaba, b Koe-nooga moanda. Marsã, ad-m sẽn mi bũmb ninga: y kõn le yãend m neng ye; yãmb fãa yaool n yãend-m la y sʋka tɩ m moond Wẽnnaam Rĩunga Koe-noogo. Yaa rẽ yĩng la m tõe n togs, y fãa gill taoore: m zug roka ne yãmb ned kam fãa vɩɩm sãoong taale. M sɩd mao ne bũmb fãa; m wilg-y-la Wẽnd sẽn dat tɩ yɛla fãa pids to-to. Bɩ yãmb mens maan gũusgu la y gũ Wẽnd bãgr ning a Vʋʋsem Sõng sẽn gũnug yãmbã. Kɩɩm-y bãgr ning paoong sẽn tũ ne Biiga zɩɩma raagre. M sẽn mi yaa tɩ m loogra poore digd-n-yĩidsi sẽn ya toose, ka na n bas bãgra ye. M miime tɩ m loogr poore, neb n na n yik yãmb sʋka, n gom n tudug karen-biisã tɩ b yi tõnd poorẽ n tɩ kẽ bãmba. Dẽ la m kot-y tɩ y maan gũusgu la y tẽeg tɩ yʋʋm a tãab tõre, wĩndg la yʋngo m yõka yãbre n wilg ned kam fãa a kongre. Marsã m gũnugda yãmb ne Wẽnd la ne b Gomda kũuni: Gomd sẽn tõe tɩ rooga me n yalse, la a tõe tɩ Wẽnd sẽn welg b rãmb toora rɩ b yõodo. M ka tʋlg yãmb ned ba a ye wanzurf bɩ a sãnem, bɩ a fuug ye. Ad-y yaa m nus bãmba m kõ-m tɩ m yiis m meng la m tũud-n-taasa kom. M kõ-y la kaset toor-toore, tɩ d tog n saka toogo n tõog n yols d taaba nimbãanega la m yeel-y lame tɩ y tẽeg Soaala meng sẽn yeele: sẽn kõt-a sũ-noog yɩɩda sẽn deegd-a.» A sẽn gom woto, a yĩgimdame n pʋʋs ne nin-kẽemsã. B fãa ninga nintãm la b gãda a Pol n tara yubla mogsgo. La bũmb sẽn sãam b sũur wʋsgo, yaa Pol sẽn yeel-ba: y kõn le yãend m neng ye. Bãmb n yãag-a n tãag kooma koglgo. D sẽn paam n fãagd d meng nin-kẽemsa nusẽ, d teesa Kos tɩrga. Vẽkembeoogo d taa Rod la Patara. Be d paama koom koglg sẽn dabd Fenisi. D kẽeme n looge. D yãenda Sɩpr yɩɩga tɩ d bas-a d goabga, n tees Siri la yaa Tir la d sig yã. Koglga ra tog n yalsa be n sik a zɩɩbo. D mika karen-biis beelẽ la rasem a yopoe la d paa Tir. A Vʋʋsem Sõng vẽnega karen-biisa tɩ b yeel a Pol t'a ra kẽng Zerizalɛɛm ye. Loogra sẽn ta d baas n loogame. B fãa ra yãagd-d lame, pagb la kamb fãa. D sẽn yi tẽngã d fãa yĩgimda mogra noor n pʋʋse. D sẽn pʋʋs taaba, d kẽe koglgã. Bãmb me leba b tẽngẽ. D sẽn yi Tir d baasa d kẽndã Ptolemayis. D pʋʋsa beelẽ saam-biisã la d paa ne b raar a ye. Vẽkembeoogo d yiime n dig Sezare. D siga a Filip zakẽ; a ra moonda Koɛɛga be la a ra yaa Sõangdb a yopoe wã nin-yende. A ra tara kom-pugli a naas sẽn nan pa kul sɩdb ye la sẽn da gomd bãngr goama. D paa be rasem a wãna la bãngd sẽn boond tɩ Agabus yii Zɩɩde n wa. A bʋʋga tõnd a Filip zakẽ la a rɩka a Pol sẽbdgã n kɩt tɩ b loe a karse la a nusi la a gomda: «Ad-a Vʋʋsem Sõng sẽn wilgdi: Rao ninga sẽn soa sẽbdg kãnga bãng tɩ Zʋɩf rãmba na n sẽb-a la woto Zerizalɛɛm n bas-a bu-zẽmba nusẽ.» D sẽn wʋm dẽ, d naaga ne tẽnga rãmb n bõs a Pol t'a ra keng Zerizalɛɛm ye. La ad-a sẽn leok-do: «Yaa bõe tɩ y yãbd n sãamd m sũuri? Ad-y Soaal a Zezi yʋʋr yĩnga m sakda kũum Zerizalɛɛm tɩ b pa gomda bas tɩ b sẽb-m ye.» D sẽn mik tɩ d gomda vɩʋʋgẽ d basame n kong n yetẽ: «Bɩ Wẽnd maan b sẽn date.» Dẽ poore, d sẽn waa n segl n sɛ, d dʋ Zerizalɛɛm. Sezare karen-biis n yãag-do. B tɩ kẽes-d la a Mnason zakẽ, Sɩpr daoa la al sɩngrẽ karen-biiga. D sẽn ta Zerizalɛɛm la saam-biisa sẽn deeg-d ne sũ-noogo. Daar ning sẽn pʋgã, a Pol tũ-d lame n kẽng a Zak yiri tɩ yaa be la nin-kẽemsa tigim taaba. D sẽn pʋʋs taab n sɛ, a Pol sɩngame n wilgd bal-bale a tʋʋmda sẽn yɩ a soab ne Wẽnd sõngr bu-zẽmba sʋka. B sẽn wʋme b pẽga Wẽnde. B yeelame: «Gese, m saam-biiga, yaa Zʋɩf rãmb tus ka tɛka n lebg karen-biisi n yaool n da yaa a Moyiiz Noora tũudb akɩka. La b wʋmame tɩ b gomd tɩ sã n ya fo nengẽ wã, fo tusda Zʋɩf rãmba sẽn vɩb ne bu-zẽmbã tɩ b lak ne a Moyiiz, n sagend-b tɩ b ra le kẽes b kamb bãongo la b ra le tũ rog-n-mika ye. Bõe la d na maane? Yaa vẽnega tɩ zãma na n sũu taab n wa. F waoonga ka tõe n ling b ye. Maan d sẽn na n yeel-fã: Neb a naase n pʋlme n be ka. Tall-ba n looge, tɩ naag-ba n yɩlg f menga la sõng-b ne ligd ning b sẽn na n kɩs n paam b zuta põngre. Woto neba fãa na bãng tɩ b sẽn leok bũmb ning f poorẽ wã, ka sɩd ye, b na bãng tɩ fo me vɩɩma yaa ned sẽn tũud Noora vɩɩm. Sã n ya bu-zẽmba sẽn sak-b tẽebã, d taas-b-la sẽn be nin-kẽemsa sebr pʋga: vẽ-y ne maand nemd, ne zɩɩm, ne gɩfo, ne yoobo.» Vẽkembeoogo, a Pol sɩd looga ne neb a naasã n na n naag bãmb n yɩlge. A kẽe wẽnd doogẽ wã n wilg sẽn ya daar ning la yɩlgra na n baase tɩ b tall b kũuna n wa. Rasem a yopoe yɩlgra ra sɛɛme la bala. Zʋɩf rãmb sẽn yit Azi n yaool n wa yãend-a wẽnd doogẽ wã, n dãmb nebã tɩ b yõk-a, la b kaasdẽ: «Israyɛl kamba waa-y tao, ad-y yaa nin-kãnga n saad n wilgd neba zĩig zãnga tɩ b ra tũ a Moyiiz noorã, la a saad n gomd beedo wẽnd do-kãnga poorẽ.» Ad-y b ra reng n yãenda a Pol ne Efɛɛz rao, a Trofim, tɩ b tũud taaba tẽnga pʋga. Dẽ la b ra tagsd t'a peeg-a lame n kẽ wẽnd doogẽ wã. Tẽnga fãa rãmbame tɩ neba zoet zĩig zãng n watẽ. B gãda a Pol n tall-a n yiis wẽnd doogẽ wã, n lɛɛg n pag kʋɩlemsã. B ra baoodame n na n kʋ-a, la tãb-biis kobs-yoob tãnsoaba waa n wʋma me tɩ b moonẽ: «Zerizalɛɛm zũndga zãnga.» Tãnsoab kãsenga yiisa tãb-biisi la tãnsoab-bi tɩ b na n kẽ zãma wã. Neba sẽn yãend tãb-biisa ne b tãnsoaben-dãmbã ka le saag n wẽ a Pol ye. Tãnsoaben-dãmba kãsma kolgame n gãd a Pol n kɩt tɩ b sẽb-a ne bãeens a yiibu n yaool n sok-a a sẽn ya a soaba la a sẽn maan bũmb ninga. La neba leoob ra ka tũud taab ye, kẽer t'a maana wãnda, kẽer t'a maana woto. Bʋʋra yĩnga tãnsoaba ka tõog n wʋm gomd tirg ye t'a yet tɩ b kẽes a Pol tãnsoben-dooga pʋga. Sẽn ta rʋʋba zĩigẽ, b kong n põka a Pol, neba tusga yĩnga. Neba ra pʋgda zembala, n maanẽ: «Bɩ b kʋ-a.» B sẽn ta n na n kẽes-a roogã la a Pol sẽn yeel tãnsoabã: «Y tõe n kõ-m la sor tɩ m leok koɛɛg bɩ?» T'a lɛɛg n sok-a: «Fo gomda grɛk laa? Dẽnd ka foo la Ezipt rao ning sẽn woole, daar nan ka zãre, so-gɩtb na ta tus a naas n kẽ we-raoogẽ wã wɛ?» T'a Pol yeele: «Maam la a Pol, m yaa Zʋɩf, m doga Tars, Silisi tẽn-peelmẽ. M sẽn ya tẽng ning tẽnga biiga yʋʋr yiime. M kot-f lame tɩ f kõ-m sor tɩ m gome.» A sẽn paam sore, a Pol yalsa teedsa zug, n zẽk a nug n kabs zãma wã. A kõ-b la koɛɛg ne Ebre rãmb goama: «M Saam-biisi la m ba rãmba m kot-y la sor marsã n wĩnig m bʋʋma sẽn yɛs zĩig ninga.» B sẽn wʋm tɩ yaa ne Ebre rãmb goam la a leokd bãmbã, bʋʋra wooga zãnga, t'a sɩnge: «M yaa Zʋɩf. M doga Tars, Silisi tẽn-peelmẽ; m yaool wuba tẽn-kãnga la ya a Gamaliyɛl n zãms maam neere d yaab rãmba noora reegre la mam me ra pida ne Wẽnd nonglem wa yãmb sẽn pid rũnna wã. M namsa so-paalga tũudba n tol n yãk yõore. M kɩtame tɩ b balg bãeense la b kẽes roogo pagb la rapa. Rũnda maan-kʋʋd kãsengã la nin-kẽemsa fãa tara rẽ kaseto. M pʋs n da tɩ reega sɛb bãmb nengẽ Damas saam-biisa yĩnga tɩ m da rabd n na n tɩ sẽb So-palga rãmb n tall-b n wa Zerizalɛɛm tɩ b nams-ba. M da rɩka sore n kolgd Damas, la vugr bala, wĩnto-sʋka, vẽenem kãseng n tãoos yĩngri n bui maam. M lʋɩɩ tẽnga la m wʋma koɛɛg sẽn da yet ma: ‹Sol, Sol, bõe yĩng la f namsd maam?› M leokame: ‹Yãmb yaa ãnda, Soaala?› Dẽ la b leok ma: ‹Yaa maam, Nazarɛt Zezi wã, la f sẽn namsdã.› Sẽn da tũud-b maama yãenda vẽenema, la b ka wʋm sẽn da gomda ne maama soab koɛɛg ye. M le sokame: ‹Bõe la m tog n maane, Soaala?› La Soaala yeel-m lame: ‹Yiki! Kẽ Damas. Beelẽ b na wilg-f f sẽn tog n maan bũmb ninga.› La vẽenema sẽn kiis m nini tɩ m da ka le neẽ wã, m tũud-n-taasa nus la m gãd yã n kẽ Damas. Ned n da be Damas n boond tɩ Anani. A ra tũuda Wẽnd wala noora sẽn date la tẽnga Zʋɩf rãmb da pẽgd-a lame. Yẽnda n waa n yãend maam, la d sẽn pẽneg taaba, a yeel-m lame: ‹Sol, m saam-biiga, bɩ f nina puki.› La wakat kãng bala m tõog n yãend-a lame. La ad-a sẽn yeele: ‹D yaab rãmba Wẽnnaam yãka foom n na n wilg foom b raabo, n wilg foom b Nin-sõngã tɩ f wʋm b koɛɛgã f toore. Fo tog n yɩ-la b kaset soab dũni wã rãmb fãa taoore, f sẽn wʋm la f sẽn yãenda kaset soaba. Bõe la d le gũud yɛsa? Aya! Reeg soobo, tẽ b Yʋʋrã tɩ f yel-wẽna fãa yẽese.› M sẽn lɛɛg n wa Zerizalɛɛm, daar a yembre, m sẽn waa n be wẽnd doogẽ n pʋʋsdẽ, m yama fʋsga m yĩngã. M yãenda Soaala, la ad-b sẽn yeel-ma: ‹Maan yãgbo, yi Zerizalɛɛm tao-tao, tɩ kaset ning f sẽn na n kõ maam beelẽ wã, b pa na n deeg-a ye.› Mam leok-b lame: ‹Soaala, b yaool n mii neere tɩ m da saadame n yõgd n kẽesd doogo la m pãbd ne kaase sẽn da kẽed-b yãmbã. B sẽn wa n daagd y kaset soaba, a Etiyɛn, zɩɩm, yɩla m nifẽ, a kʋʋba ra tata m yam la maam la a kʋʋdba ra gũnug b futu.› Tɩ Soaala na n yeel-m marsã: ‹Looge; yaa yɩɩga, yaa bu-zẽmba nengẽ la m na n tʋm-fo.› » B ra tara a Pol kelegre la a sẽn waa n pʋd bu-zẽmbã yʋʋre, b fãa sɩnga kaasgo: «Kʋ-y ned a woto buudu! A pa tog n vɩɩnd ye.» Da yaa pãrbo, tɩ kẽer lobd b futu, tɩ kẽer fẽed tom yĩngri. Tãnsoaba kɩtame tɩ b kẽes a Pol tãnsoben-dooga pʋga n pãb-a ne kaase, n paam n bãng a sẽn maan bũmb ning tɩ neba kaasd woto a zugu. B sẽn waa n sẽba Pol ne gãn tagdo n na n pãb-a la a sẽn yeel tãnsoab bilã: «Yãmb tara sore n pãb ne kaase Rom tẽnga biiga, n pa reng bʋ a bʋʋdo?» Tãnsoab bila sẽn wʋm dẽ, a tɩ yãenda a naabã n wilg-a woto: «Bõe la f na n maanẽ? Nin-kãnga yaa Rom tẽnga biiga.» Tãnsoaba waa n soka a Pol: «Togs-ma, fo sɩd yaa Rom tẽnga biiga?» T'a Pol leok tɩ: N-yẽe! Tɩ tãnsoaba yeele: «M yiisa ligd wʋsgo n na n paam n lebg Rom tẽnga biiga.» T'a Pol leok-a: «Sã n ya maam, m doga ne.» Tao bala sẽn da na n pãb-bã tarame n leb poorẽ. Tãnsoaba meng ra maanda rabeem, a sẽn ne tɩ yaa Rom tẽnga biiga la a ra kɩt tɩ b balg ne yãndo. Beoog sẽn vẽege, tãnsoaba tʋlg n bãnga bõe taale taki la Zʋɩf rãmba tʋk a Pol zugu. A kɩtame tɩ b lood a bãeensã la a yeel maan-kʋʋdba kãsem-dãmba la bʋ-kaoodbã, tɩ b tigim. A waa ne a Pol marsã tɩ b na n kao-a bʋʋdo. A Pol gesa bʋ-kaoodba pem n wa yeel-ba: «M saam-biisi m pelga m pʋg m tũ Wẽnde n tãag rũnna.» Maan-kʋʋd kãsenga, a Anani, wẽneg n yeela sẽn naag-b yẽnda n kaood bʋʋdã tɩ b va a Pol noore. Dẽ me la a Pol yeel-a: «Yaa Wẽnd meng n na n va foo, ninsaan-kazukma! F zaoo bʋʋda zĩigẽ n na n bʋ-m wala Noora sẽn date, n yaool n yet tɩ b pãb ma tɩ Noora yaool n ka kõt foo so-kãng ye.» Bʋ-kaoodb a taaba yeel-a lame: «Foo n saag n tʋʋsd Wẽnd maan-kʋʋd kãsenga.» T'a Pol na n leok-ba: «M da ka mi tɩ yaa maan-kʋʋd kãseng a ye. M mii sẽn gʋls sebr sõngẽ: da saag n kãab beedo, f buuda kãsem ye.» A Pol da miime tɩ bʋ-kaoodba welga sags a yiibu: ad Farizẽ rãmba, ad Saduseẽ rãmba. Dẽ la a tãs bʋʋda rãmba: «M saam-biisi, mam yaa Farizẽ, la Farizẽ biiga. Yaa tõnd sẽn saagd bũmb ningã, yĩnsa vʋʋgre, yaa rẽnd yĩng la b kẽes maam bʋʋdo.» A ka yãee n gom n baase la zabr sẽn yik Farizẽ la Saduseẽ rãmba sʋka la neba welga taab sags a yiibu. Saduseẽ rãmba sɩd yetame tɩ yĩns ka vʋʋgde, tɩ malɛk ka be, tɩ sɩɩg ka be. Sã n ya Farizẽ rãmba bãmb tẽeda rẽ faa. Dɩlla bʋʋda wulumda ne bʋʋre. Sɛb gʋlsdb kẽer da yaa Farizẽ rãmba. Bãmb n yik n tãs ne pãnga: «Tõnd ka ne nin-kãnga kongr ye. Tõe tɩ sɩɩg bɩ malɛk n gom ne a.» Zabra wa n wɩngdame n paasdẽ, tãnsoaba zoe-la b na n wa taa a Pol n tõse, t'a kɩt tɩ tãb-biisa sig n wa yiis a Pol sʋka, n tall-a n leb tãnsoben-dooga pʋga. Zĩig sẽn sobge, Soaala bʋʋga a Pol be n yeel-a: «Keng f sũuri! Wala f sẽn yɩ m kaset soab Zerizalɛɛm f togame n yɩ m kaset soab Rom tẽng me.» Beoog sẽn vẽege, Zʋɩf rãmba le yẽsa ne taaba la b kãaba b meng beedo tɩ rɩɩb bɩ koom kõn kẽ b noorẽ tɩ b pa reng n kʋ a Pol ye. La sẽn gom-b woto wã ra yɩɩda neb pis naase. Bãmb n tɩ yeel maan-kʋʋdba kãsem-dãmba la nin-kẽemsã: «Tõnd kãaba d meng beedo tɩ bũmb kõn kẽ d noorẽ tɩ d pa reng kʋ a Pol ye. Sẽn ket marsã yaa yãmb ne bʋ-kaoodba zems taaba la y wilg tãnsoabã t'a tog n waa ne a Pol tɩ y maneg n ges a yella neere. Sã n ya tõndo d mi d sẽn na n maanega n kʋ-a t'a nan ka ta y sʋk ye.» Biig n yaool n wʋm bẽdgã. Bi-kãng yaa a Pol tão biiga, la yẽ n babs a Pol n wɩdg-a. A Pol me boola tãnsoab bil a ye n yeel-a woto: «Tall bi kãnga n taas y naaba t'a tara bũmb n na n togs-a.» Tãnsoab bila tall-a lame n taas naabã n yetẽ: «B sẽn kẽes a soab roogã, a Pol, n bool maam n kos tɩ m tall bi-kãnga n wa y nengẽ tɩ bũmb la a rat n wilg yã.» Tãnsoaba gãda biiga nug n yi kɛɛnga n sok-a: «Yaa bõe la f rat n togse?» T'a leoke: «Zʋɩf rãmba sedame n na n kos-f tɩ b tall a Pol beoogo n wa bʋʋda zĩigẽ tɩ b rat n maneg n baoo yella nao. Da tẽ-b ye. Ad bãmb na ta pisnaase n gũusd-a n na n yõke. B kãaba b meng beedo tɩ b kõn dɩ la b kõn yũ bũmb tɩ b pa reng n kʋ a Pol ye. Fãa sẽn gũud marsã, yaa fo ye n sake.» Tãnsoaba basa biiga t'a looge; a yeel-a lame bala: «Da togs ned ba a ye tɩ f wɩdg-m la bũmb ye.» Naaba boola tãnsoaben-dãmb a yiibu n yeel-ba: «Segl-y n dɩk sor yʋnga bala, neba sẽn wat n kẽed gõeem, yãmb ne tãb-biis kobsi, wed-dʋʋdb pisopoe la kãna rãmb kobsi. Wa-y ne wiidi me, n zombg a Pol, n tall-a ne bãane n taas naab a Feligs.» Woto la a ninga sebrẽ: «A Klod Liziyas n pʋʋsd na-kãseng a Feligs! Zʋɩf rãmba yõka nin-kãnga n da rat n kʋ-a, la mam taa ne m tãb-biisi n fãag-a, m sẽn wʋm t'a yaa Rom tẽnga biiga. M tʋlg n bãnga b sẽn dõt-a ne bũmb ninga n kos tɩ buuda bʋ a bʋʋdo. M yãeeme tɩ yaa b Noora No-koɛɛm la b lʋɩɩs taoore la bũmb ka be sẽn sek a sẽbr meng tɩ b pa gomd a kʋʋb ye. M waa n wʋmame tɩ b yẽsa ne taab n baood a kũum. Dẽ me la m tʋm-a yãmb nengẽ n yaool n wilga rõatba tɩ b sã n tar bũmb n na n dogl a zugu, bɩ yɩ yãmb taoore.» Tãb-biisa reega noore n tall a Pol ne yʋngo n kẽng Antipatris. Vẽkembeoogo b basa a Pol ne wiidi wã rãmba n lɛɛg n wa b tãnsoben-doogẽ. Wiidi wã rãmb sẽn ta Sezare, b kɩsa sebra naabã la b wilg-a-la a Pol. Naaba me karma sebrã la a sokame n bãng a Pol sẽn yit baobg ninga. La a sẽn bãng tɩ yaa Silisi la a yita, a yeel-a lame: «M na bool-f bʋʋdo, f bʋʋd-n-taasa me sã n wa.» A kɩtame tɩ b pag a Pol a Erod sikẽ. Rasem a nu soaba, maan-kʋʋd Kãseng a Anani waa ne nin-kẽems kẽere n paas bʋʋd mita, a Tertulus. Bãmb n wa naaba taoore n na n boola Pol bʋʋdo. A Pol sẽn wa, a Tertulus goma woto n na wilg a Pol a zugẽ yelle: «Fo maasem yĩnga, nin-sõngo Feligs, d zamaana gãee ne laafi zãnga la fo sẽn wa ne f no-paalã, fo manega d tẽnga maneg sõngo tɩ d kokd dẽ, d zãng gilli, la zĩis fãa, ne bark pʋʋsgo. D sẽn pa rat-f ne yaamsã, m kotame tɩ f kelg d bilf bala ne d sẽn mi-f ne sũ-bʋgsem ningã. Tõnd gesa a Pol n tɩge, a yaa sabaabo. A sẽn ta zĩig ning fãa dũni wã Zʋɩf rãmba ka le tar laafi ye. A yaa Zʋɩf rãmb sull a ye taoor soaba, Nazarɛt daoã sẽn yals sull ningã. A makame meng n na n dẽgem tõnd wẽnd doogã, tɩ tõnd yõk-a. Tõnd tʋlgame n kao bʋʋdo wala d noora sẽn yalse, [ la a Liziyas waa n fãag-a la d nusẽ ne pãnga, la a yeela tõnd, a bʋʋd-n-taasã, tɩ d wa yãmb taoore,] la a meng tõee n wilgame tɩ d sẽn leok bũmb ninga yaa sɩda.» Zʋɩf rãmba gõmsame n wilg t'a leoka sɩda. A Pol paama naaba sore n na n gome la a yeelame: «Ade, kaoosame marsã, Feligs, y sẽn zao y naama zaoorẽ tõnd zamaanẽ; dẽ me la m sũur ya kɛgenga, sẽn ya yãmb taoor la m na n gom n yiis m meng yellẽ wã. Y tõe n dɩɩ kaseto tɩ m sẽn wa Zerizalɛɛm, Wẽnd waoogra yĩng nan ka loog rasem piig ye. Ned ba a ye kõn tõog n yeele t'a yãend-m la wẽnd doogẽ, bɩ pʋʋsg roogẽ, bɩ tẽnga pʋga tɩ m wẽed no-koeemd bɩ m dãmbda tẽnga ye. B sẽn yet tɩ m maana bũmb ningã, b pa tara kaset ye. M sẽn tar n na n togs-y la woto: B sẽn boond a soab tɩ So-paalã ka bũmb a to n zʋʋg Wẽnd tũudem sor ye. Yaa woto la m waoogd m yaab rãmb Wẽndã, la m gãda sẽn be Noora pʋga la bãngdba sɛba pʋgẽ. Mam saagda wa bãmb fãa sẽn saagdã tɩ nin-sõma la nin-wẽns na n vʋʋgame. Yaa rẽnd yĩng la m maood wakat buud fãa n na n yɩ ned sẽn ka tar rẽko, Wẽnd la ninsaalb taoore. Maana yʋʋma tɩ m yaool n na n lɛɛg n wa Zerizalɛɛm n kɩs saam-biisã sẽn lob buuda yĩnga la m waoog Wẽnd ne m kũuni. Yaa woto la b yãend-m wẽnd doogẽ. M wa n yɩlga m menga la tus taab ka zĩndi, bʋʋr ka zĩndi. Yaẽ la Zʋɩf rãmb kẽer sẽn yi Azi, sãooẽ lame. Bãmb n da togẽ n bool m bʋʋdo yãmb taoore, b sã n da tarẽ la bũmb n na n dogl m zugu. Sã n yaa m sẽn yɛs b rãmb taoorã, b kolg n togs b sẽn yãend-m ne yell ninga bãmb meng bʋʋd kãsenga roogẽ. M ka ne bũmb n zʋʋg m sẽn moon b taoore tɩ yaa m sẽn gomd kũum vʋʋgra yelle la b bʋʋd-m dũnna.» A Feligs ra mii So-paala yɛla neere, dẽ la a kʋʋg koɛɛga n yetẽ: «Tãnsoab a Liziyas sã n wa d na baas bʋʋdã.» A yeela tãnsoaba t'a kell n bas a Pol roogo, la a ra yɩ toaag ne a ye, a bas a buuda neb tɩ b sõangd-a. Sẽn maan dasem a wãna, a Feligs lɛɛg n waa ne a pag a Drusil. Da yaa Zʋɩf poaka. A kɩtame t'a Pol wa la a kelga a sẽn gomd a Zezi Krista tẽeba yell toto. A Feligs sẽn mik t'a gomda sõmblem yelle, tõog-m-meng yelle, yaoolem bʋʋda yelle, a yɛɛsame la a yeel-a lame: «F tõe n leba f roogẽ dũnna, la m sẽn paam daar ninga m na le bool fo.» A ra tẽedame t'a Pol na n kõ-a la ligdi; la bool a Pol t'a wa tɩ b sõsa waa n lebga pẽdgem-pẽdgem. A Pol dooga waa n looga yʋʋm a yiibã ta ra ket be. A Feligs bas-a-la roogo n na n noog Zʋɩf rãmba sũuri. A Porsiyus Festus n waa n led a zĩiga. A Festus sẽn ta Sezare tɩ rabitẽ, a yii n tuda Zerizalɛɛm. A sẽn ta la maan-kʋʋdba kãsem-dãmba la tẽnga nin-bɛdã sẽn yeel tɩ b boonda a Pol bʋʋdo yẽnda taoore. B sẽn wilg b raabã, b kos-a lame wala bũmb sẽn na n yãng b zooda ne taaba, t'a sõng t'a Pol lɛɛg n wa Zerizalɛɛm. Ra yaa bẽdgo la b gãneg yã n na n paam-a n kʋ sorẽ. A Festus leok-b lame t'a Pol tog n paa Sezare la yaa be la yẽ meng lebd mars-marsã. A paasame: «Neb niyns sẽn tõe n kao bʋʋdo n be yãmb sʋka, wa tɩ d loog. B sã n yet tɩ yell be a zugu, b na bool-a bʋʋd Sezare.» A Festus maana dasem a nii bɩ piig bala n yaool n leb Sezare. A sẽn vẽeg beoogo, a kẽe bʋʋda zĩigẽ la a kɩtame tɩ b bool a Pol. A sẽn wa, Zʋɩf niyns sẽn yi-b Zerizalɛɛma gũbg-a lame n dogend a zugu, yɛl sẽn waooge la sẽn ya tagdo, b mens sẽn ka tar kaset t'a sɩd maaname ye. A Pol da kɩɩsdame n yetẽ: «M ka ne m sẽn tõdg Zʋɩf rãmba noor ne bũmb ning ye, m ka paoog wẽnd doogã, m ka paoog Rom naaba ye.» A Festus tʋlgame n noog Zʋɩf rãmba sũuri n leok a Pol woto: «Fo ratame n leb Zerizalɛɛm tɩ b kao rẽ fãa bʋʋd mam taoor bɩ?» T'a Pol yeele: «Yaa Rom naaba bʋʋd la b na n bʋ maam; dẽn yĩnga yaa ka, pa Zerizalɛɛm ye. M ka maan bũmb sẽn wa ne Zʋɩf rãmba bõne, la y meng mii rẽ neere. M sã n sɩd kongame, m sã n maana bũmb sẽn tog ne kũum, m saka kũum. La nin-bãmba sẽn togsda sã n ka sɩda, ned ka be sẽn tõe n dɩk maam n bas b nugẽ ye. Bɩ m bʋʋda yɩ Rom naab taoore!» A Festus yãenda a sagendbã n yaool n yeel a Pol: «Ka Rom naab taoor la f rat tɩ b bʋ-f laa? Bʋʋda na yɩ Rom.» Sẽn maan dasem a wãna, dĩma Agripa waa Sezare ne a paga, a Berenis, la a tɩ pʋʋsa a Festus. A Festus sẽn paam tɩ dĩma kaoosd Sezare, a goma ne-a, a Pol yell woto: «Ned la a Festus bas bi-bees roogẽ ka. M sẽn waa n be Zerizalɛɛm, maan-kʋʋdba kãsem-dãmb la nin-kẽemsã wilg-m lame t'a beegame la b kota a bʋʋd paalgre. M wilg-b lame tɩ Rom dãmb ka minim n basd ned a bɛɛb nusẽ tɩ b ka reng n bool-a bʋʋdo, a bʋʋd-n-taasa taoore t'a gom n paam n yiis a meng yellẽ ye. B tũu maam n wa ka, la m pa kaoos ye, vẽkẽmbeoog bala, m kẽ-la m bʋʋd doogẽ la m kɩtame ti b wa ne a Pol. A sẽn ta a bʋʋd-n-taasa taoore, b pa saag n dogl a zugu, yell sẽn ya bedre wa ned fãa sẽn da tõe n tags ye. B sẽn da tar ne a Pol yaa kɩɩs taaba b Wẽnda tũudem poorẽ, la sẽn yɩɩda, yaa nin-yend sẽn ki poorẽ t'a Pol wẽend t'a ket n vɩɩme, ya a Zezi poorẽ, M da ka mi m sẽn na n maan yell a woto poorẽ ye. Dẽ la m wilg-a t'a leb Zerizalɛɛm tɩ bʋʋda tɩ kao be. A Pol kosame t'a bʋʋda kao Rom na kãsenga taoore, dẽ la m yeel tɩ m na n kell n bas-a la roogo n ta wakat ning m sẽn na n taas-a Rom naaba.» A Agripa yeela a Festus: «M me nongẽ lame n kelg nin-kãnga.» T'a yeele: «Beoogo f na kelg-a.» Vẽkembeoogo a Agripa ne a paga ninga b fan teedo n wa bʋʋda roogẽ. Tãnsoaben-dãmba la tẽnga taoor dãmba tũume. A Festus kɩtame tɩ b wa ne a Pol, la a yeelame: «Dĩma Agripa la yãmb fãa sẽn naag tõnd n zĩ ka, woto la rao ning Zʋɩf rãmba sẽn waa n kos-m ne bʋ-raase, Zerizalɛɛm wala kaalẽ menga, tɩ m da bas-a t'a vɩɩnd ne yõor ye. Sã n ya maam sẽn gesã, m pa ne a sẽn maan bũmb ning tɩ sek a kʋʋb ye. La yẽ meng sẽn yeel tɩ b kao a bʋʋdã Rom tẽnga, m sakame n na n tʋm-a be. M ka tar yell tik n na n gʋls Rom naab a poorẽ ye. Yaa rẽn yĩng la m wa ne a yãmb taoore, dĩma Agripa. A sẽn na n leok bũmb ning ka wã m na paam dẽ n gʋlse. M ka rat n maan yalemdo n tʋm al Rom tẽnga, ned sẽn kẽ roogo, n pa naag n togs a sẽn maan bũmb ning tɩ ya wẽng ye.» A Agripa yeela a Pol: «Fo tara sor n gom n yiis f meng yellẽ.» A Pol sẽn kabs nebã ne a nugu a sɩngame: «M yetame tɩ m zug yaa noogo, dĩma Agripa, m sẽn paam n na n dok m zugẽ yella yãmb taoore. M zu-noogã, yaa y sẽn mi Zʋɩf rãmba rog-n-mik la b no-koɛɛma. Dẽ me la m kot tɩ y bʋk y sũuri n kelg-ma. Zʋɩf rãmba fãa tara m vɩɩma buka, m sẽn dog tɛk n tãag rũnna. B mii m vɩɩm sẽn yɩ a soab Zerizalɛɛm, m buuda sʋka. B sẽn mi-m al daar zãrã, b tõeeme n kõ kaseto tɩ m vɩɩma yɩɩ Farizẽ vɩɩm, neb sẽn tũud Wẽnd ne b sũur zãnga. B sẽn bool-m bʋʋd dũnna mengã, yaa m sẽn saagd tɩ Wẽnd na n pidsa b sẽn pʋlem d yaab rãmba. Pʋlem noog kãng pidsgu la buuda sags piig la a yiiba sɩd gũud, wĩndg la yʋngo. Dɩlla ya m saagra yĩnga, dĩma Agripa, la Zʋɩf rãmba bool-m bʋʋdo. Bõe la yãmb neb kẽer yet tɩ b kõn deeg bada tɩ Wẽnd na n vʋʋga kɩɩmsã? M da waa n yeelame tɩ m na n maana m sẽn tõe n zab ne Nazarɛt dao, a Zezi, sora rãmba. La sɩd yaa rẽ la m maan Zerizalɛɛm la mam meng m tore kẽesa nin-sõma wʋsg roogo, la yaa maan-kʋʋdba kãsem-dãmb n da kõ-m sore. B sẽn waa n kʋʋd-ba m da kõta kaseto tɩ m saka b kʋʋbo. Naoor wʋsgo yaa pʋʋsga rotẽ la m da kẽeda, n na n modg-b ne kalwaas tɩ b tʋʋs Wẽnde, la m sũura sẽn yik yĩnga, m mii n babs-b la tẽn-zãorgẽ fãa. Yaa woto la m paam maan-kʋʋdba kãsem-dãmb sɛba la b noore n kẽng Damas. Sor zugu, wĩnto-sʋka, m dĩm sõngo, m yãenda vẽenem sẽn yɩɩd wĩntoog rẽnna sẽn yi yĩngri n wa bui maam ne m tũud-n-taasã. D fãa gill lʋɩɩ tẽnga la m wʋma koɛɛg sẽn leok-m ne Ebre: ‹Sol, Sol, yaa bõe tɩ f namsd maam? Da zãgs n bao toog n paas toog ye.› Tɩ mam leoke: ‹Yãmb yaa ãnda, m Soaala?› La Soaala yeelame: ‹Yaa maam a Zezi la f sẽn namsdã. La yik n yals yĩngri. M sẽn lik-fa võor la woto: m datame tɩ f yɩ m sõgne la f kõ f sẽn yãend-m dũnna la f sẽn na n yãend-m beooga kaseto. La yaa rẽnd me yĩnga la m na n fãag-f ne f buudã la ne bu-zẽmbã, m sẽn tʋmd foom b rãmb nengẽ. M tʋmd-f lame tɩ f tɩ puk b nini, tɩ b yi b likẽ n wa vẽenemẽ; n yi Sʋtãan soolmẽ n kẽ Wẽnd dẽnnẽ, la b paam, b sẽn na n sak n tẽ maama yĩnga, b yel-wẽna sugri la nin-sõma wã pʋɩɩre.› Sẽn yɩ woto wã, dĩma Agripa, m pa kɩɩs m sẽn wʋm ne yĩngr likra ye. M pa zãgs ye: yaa Damas woo, yaa Zerizalɛɛm woo, yaa Zɩɩde bɩ bu-zẽmba tẽng woo, m mooname tɩ d tog n tedga zʋgo, n lɛɛg n kẽ d Wẽnde la d tʋm zʋg tekr tʋʋma. Yaa rẽnd yĩng la Zʋɩf rãmba yõk-m wẽnd doogẽ n baood n na n kʋ-m. Wẽnd sẽn sõng-m yĩnga, m talla Koɛɛga moonego n tãag rũnna, nin-bɛd wala nin-bõones taoore. M pa tẽed tɩ m paasa bõn-zɛreng meng sẽn ka be a Moyiiz la bãngdba sebrẽ ye. Sɛba yeta woto: Krista na n namsame. Bãmb n na n vʋʋg pipi kɩɩms sʋka la bãmb Koɛɛgã n na n wa ne vẽenem a Israyɛl la bu-zẽmba yĩnga.» A Pol taa zĩ kãngã t'a Festus zẽk a koɛɛg n yeele: «Pol, fo yika gãeemdo, f bãngr pidunga lebga f zugu.» T'a Pol na n leoke: «Ad-y m pa gãeemd ye, nin-songa Festus, m goama yaa ned sẽn so a menga la sẽn baood sɩd goama. La m sẽn gomd ne rĩm ninga tɩ m sũur pa kiuusdẽ wã zoe n mii yɛla fãa; bũmb ka be a sẽn ka vẽen ne ye, yaa vẽenemẽ la yɛla maan yã, ka maan pẽkẽ la likẽ ye! Yãmb tẽeda bãngdba bɩ, dĩma Agripa? La m neeme tɩ y tẽedame.» Dẽ la dĩma Agripa leok a Pol: «Kellẽ la bilf bala tɩ f kɩt tɩ b gesẽ maam wa Kristneda!» T'a Pol yeele: «Kella bilf bɩ wʋsgo, Wẽnd na sõng dĩma Agripa la yãmb fãa sẽn kelgb maam dũnna wã, tɩ y wa lebg m sẽn yaa soabã, m bãeensa toog sẽn yãke.» Dĩma yikame t'a Festus ne a Berenis la sẽn da zĩ-ba fãa me yiki. B waa n yitame la b goamda: «Nin-kãnga ka maan bũmb sẽn tog tɩ b balga bɩ n kʋ-a ye.» Dẽ la a Agripa yeel a Festus: «D da tõe n basẽ la nin-kãnga a sã n da ka kosẽ t'a bʋʋda kaoẽ Rom naaba taoore.» Itali loogr raar sẽn yãke, b basa a Pol ne bi-bees kẽere, tãnsoab a ye nugẽ. Tãnsoaba ra boondame t'a Zuliyus, tɩ b tãnsoben-dooga boond tɩ Ogusta. D kẽe koglg sẽn yi Adramisiom, n looge. Koglga da rabda Azi sẽnẽ. Masedoan dao a ye sẽn da kẽed Tesalonik n da naag tõndo. Vẽkembeoogo d taa Sidõ t'a Zuliyus maan wa ninsaal sẽn mi a to waoogre n bas a Pol t'a sig n kaag a zo-rãmbã la a reeg b sõngre. D sẽn yi be, d yega Sɩpr, sobga sẽn da wẽed lebend yĩnga. D sẽn kẽn n loog Silisi la Pãnfili, dasem piig la a nu raare, d taa Mir sẽn be Lisi baobgo. Tãnsoaba paama Aleksãndri koglg sẽn digd Itali la a kẽesd-d-la a pʋgẽ. Maana rasem a wãna, kẽnda ra ka fɩɩd ye la tũu toogo tɩ d ta Knid. Sobga sẽn da ya lebend yĩnga d kong n yega Krɛt n tees Salmone. D sẽn paam n yõsg be d ta zĩig a ye koom koglg sẽn tõe n tɩlg sobgo. Zĩ-kãng boondame tɩ Soondg zĩ-neeba la a ra pẽe ne Lasayia tẽnga. Waa n kaoosa bilfu la kooma zug kẽnd waa n lebga rabeem. Sugr kosg no-loeera meng da zoe n lokame. A Pol da rat n wilga rẽnna n gom woto: «M zo-rãmba, m neeme tɩ mogra rʋʋgr marsã tõe n waa ne sãoongo la bõne: koglga bõne, a zɩɩba bõne la tõnd mens bõne.» Tãnsoaba ra kelgda koglga soaba la koglga rugsda n yɩɩd a Pol. Koglga me tõog n paa a sẽn yɛs zĩig ninga yaa toogo, tɩ sobga yikda waood wẽnde. Woto wã b yeelame tɩ b na n makame n ta Fenigs n soond waooda be. Fenigs bee Krɛt tẽn-peelmẽ la kogenda soondg zĩig gõdg n teesa nin-taoore. Sob-bil n waa n yik n fʋʋsd nug rɩtgo tɩ b tags tɩ b raaba tõe n pidsame. Woto b sɩnga kẽnde n yegd Krɛt tẽnga. La ade, ka yãee n kaoose, nug goabg sob-raoog sẽn boond ti «Erakilõ» wẽneg n yikame. Sobga fãaga koglgã a soaalba nusẽ tɩ d na n kong n tũ a raabo. Tẽmbil sẽn puk koomẽ n boond tɩ Koda wa n wooga sobga pãnga tɩ d na n tõog n yiis koglg bilã. D sẽn yiis koglg bila d maana d sẽn tõe fãa. D sẽba koglga sʋk ne wĩ la d loe ra-peg-yaleng a poorẽ n sõngd-a t'a ra lis ye, tɩ d da zoeta a na n wa tɩ pa Sirt sẽnẽ. Kẽnda yẽ lebga sobg sẽn teesẽ. Beoog sẽn vẽege, d yãeeme tɩ sobga ket n yaa wʋsgo tɩ d sɩng teeda woogre. Dasem sẽn maan a tãabo, koglga rãmb mens b toor n yogs wĩ wã la pɛɛlã. Maana rasem a wãn tɩ b pa yãend wĩntoog la ãdg vẽenem ye. Sobga ra ket n fʋʋsda ne pãnga tɩ d yɛɛsdẽ la d pa le tẽed põasg ye. D sẽn da paam n dɩ meng ra vẽsgame dẽ la a Pol yik n yaas b sʋka n yeele: «Y ra tog n kelg-m lame, m zo-rãmba, n da yiẽ Krɛt ye. Sãong la bõne kõn n zĩnnẽ ye. La ba sẽn na n yɩ a soaba, m kotame tɩ y ra maan dabeem ye, tɩ yãmb ned ba a ye vɩɩm kõn tõsg ye, koglga bal n na n yɩ bõne. Yʋngẽ bala Wẽnd ning m sẽn kẽ la m sẽn waoogd a soaba malɛk lika maam la a yeel-m lame: ‹Da maan dabeem ye, Pol, ya tɩlɛ tɩ f bʋʋda kao Rom naaba taoore la fo yĩnga m basda ne vɩɩm sẽn be-b koglga pʋg ne fooma.› Dɩlla, m zo-rãmba, keng-y y sũuri! M saagdame tɩ Wẽnd na n maana wala b sẽn togs-ma. La tɩɩm ka be tɩ d ka pa tẽng a ye sẽn puk koomẽ ye.» Wã n da tõkd d dasem piig la a naase, d sẽn be Adriatik mogra zug n lengdẽ. Yʋn-sʋka, ko-rugsdba bãngame tɩ d kolga tẽn koɛɛnga. B sẽn mak kooma zulum b mikame tɩ yaa kãntɩɩs koabga; b sẽn ta taoor bilfu n le make, b paama kãntɩɩs pisopoe la a nu. B zoe rabeem tɩ d na n wa teem sore n tɩ kẽ pĩisã, tɩ b lob ra-peg-yalens a naase, poorẽ, la b kot ne b sũur fãa, tɩ sõora puki. Ko-rugsdba ra baoodame n na n zoe n loog. Dẽ la b ra baood n na n sik koglg bila koomẽ la b ra yagdame tɩ baood n na n gãda taoor da-peg-yalemsa tɩ koglga rɩk so-yɛnga la a ra le kẽn yaar ye. A Pol yeela tãnsoabã la tãb-biisã: «Bãmba sã n ka pa koglga pʋga, y kõn põs ye.» Woto wã tãb-biisa kʋʋsa koglg bila wĩ n bas-a t'a loog. B ra gũuda sõora yẽegre la a Pol da sagend-b lame tɩ b bao rɩɩbo. A ra yetame: «Yaa rasem piig la a naas rũnna la y zĩi n gũudẽ, n pa rɩtẽ ye. M sagend-y lame tɩ y bao rɩɩb n dɩ, tɩ ka rẽ y kõn põs ye. M le togsd-y lame yɛsa, yãmb sʋka, ned ba a ye zug zoobg kõn menem ye.» A Pol sẽn gom woto, a rɩka buri, n pẽg Wẽnd b fãa taoore, n kaoog burã n sɩng wãbre. Raood le kẽe nebã tɩ b fãa bao rɩɩb n dɩ. Tõnd neb kobsi la pisopoe la a yoob n da be koglga pʋga. Rɩɩba sẽn paam n dɩ, b bao koglga na lebg faasga n yiisd koodã n lobd koomẽ. Zĩig sẽn yẽege, ko-rugsdba ra ka mi b sẽn beẽ ye. B ra nee mogra sẽn wõg n kẽ la sẽn gãneg bĩsri tɩ d da rat n tus koglgã n taas be, sã n tõe. B looda ra-peg-yalemsã n bas koomẽ. B yolsa koglga wẽnemdega wĩ; b rʋʋsa taoor peend bilfã tɩ sobga tõog n tus koglgã n kolg kooma noorẽ, bĩsrã sẽn samẽ wã. B taa zĩig a ye la b suda bĩisrẽ tɩ koglga wa gimb zãnga, a poorẽ, tɩ ko-wiisa pãb a taoorã n wesge. Tãb-biisa sedame n na n kʋ bi-beesã tɩ b ra wa rug kooma n loog ye. Tãnsoaba da rat n basa a Pol ne yõore, woto wã, a pa sak ye. Yẽ meng n kõ noor tɩ sẽn mi-b koom deng n looge n paam tẽn-koɛɛnga. Sẽn ka mi-b kooma marsã na yi ne ra-pegdo bɩ ne bũmb ning fãa sẽn yi koglga pʋga. La yɩɩ woto la b fãa paam n ta tẽn-koɛɛnga tɩ bũmb ka maan-b ye. D sẽn paam n põsa la d yaool n bãng tɩ tẽnga boondame tɩ Malt. Tẽnga rãmb gesa d yell neere. Saag sẽn ni la sẽn ya waood yĩnga, b yõgna bugum la bugma waolgẽ la b reeg-do. A Pol waa n wolga ribli n na n lob n yãng bugma. Bugma waolg yiisa põeere sẽn vil a Pol nug n wẽneg n be a kɛɛbẽ. Tẽnga rãmb sẽn yãend waafã a nugẽ, b yeela taaba: «Yaa vẽnega, nin-kãnga yaa nin-kʋʋda; a paam n põsa mogra koom mars-marsã, tɩ Wẽnd ket n data vɩɩm n na n dok b sũuri.» La a Pol mesga põeera bugmẽ. Bũmb ka tol n maan a Pol ye. Neba yẽ ra tẽedame t'a nuga na n fɩɩgame t'a lʋɩ n kell n be kũum. B sẽn gũ n kaoos tɩ bũmb ka maan-a wã, b teema goama n yet tɩ nin-kãnga yaa wẽnde. Tẽnga kãsem da boondame tɩ Ypbliyus. A da tara pʋʋgo. Nin-kãng n deeg tõnd n kõ-d doog da-yɩten-daare. Segame t'a Ypbliyus ba ra gãee ne weoogo la ne sãb-noodre. A Pol tɩ pʋʋs-a la tarem, n yõk Wẽnd sɛɛg a yĩnga, a tẽega a nus a zugu, n sãoog-a zãnga. Dẽ yĩng la tẽnga bãad-dãmb a taaba me wayã, la bãmb me sãoogame. D paama waoogr buud fãa tẽnga rãmb nengẽ la d loogra sẽn waa n ta, b sõng-d la ne sor dɩɩbo. Sẽn maan kiuus a tãabo, d paamame n kẽ koglg a to, sẽn yit Aleksãndri, la koglga gũudb yaa wẽnd-bi, a Kastor la a Polugs. D sẽn ta Sirakuz, d paa be da-yɩten-daare. D yii be n yegd kʋɩl kogrã n ta Reziom. Daar ninga sẽn pʋgã, sobg fʋʋsa nug rɩtgo; woto, d da-yɩten-daare, d taa Ypzol. D yãenda saam-biis be. La d zug yɩɩ noog tɩ d pa ne b rasem a yopoe. D sẽn yi be d kẽe Rom. Beelẽ saam-biisa sẽn wʋm d waoongo, b waa n seg-d la a Apiyus raaga, zĩig ning sẽn pʋd tɩ Rã-rot-a-tã. A Pol sẽn yãend-ba, a pʋʋsa Wẽnd bark wʋsgo la a sũur le kengame. Tõnd sẽn ta Rom, a Pol paama sore n na n zĩnd a sẽn datẽ, tãb-biig ning sẽn be ne a wã yee n da zãag ye. Sẽn maan dasem a tãabo a Pol kosa Zʋɩf rãmba tɩ b seg taaba. B sẽn tigim taaba, a yeelame: «B yõk-m la Zerizalɛɛm n kɩs Rom dãmba tɩ m yaool n da ka beeg buudu la m ka tõdg d yaab rãmba dog-n-mik ye. Rom dãmba sẽn sok n tɩge, b da rat n bas-m lame, tɩ b pa yãend bũmb sẽn sek m kʋʋb ye. Zʋɩf rãmba yeelame tɩ rẽ ka tõe ye, dẽ la mam me gãd tɩ m bʋʋda kõn kao zĩig a to tɩ ka Rom naaba taoor ye. La rẽ ka rat n yeel tɩ m ningda m saam-biisa taal ye. Ya rẽ yĩng la m tʋlg n seg-y la m taas-y m koɛɛga; bãng-y tɩ yaa Israyɛl sẽn saagd bũmb ninga poorẽ la m sog ne yãndo, n yɛsẽ.» Zʋɩf rãmba leoka a Pol: «Sã n ya tõndo d ka paam Zɩɩde rãmb sebre la saam-biisa me sẽn yi be n wa wã ka leok bũmb f poorẽ sẽn ya wẽng ye. D datame tɩ fo meng togs-d sẽn be f sũurẽ tɩ sã n ya So-paalã, yaa zĩig zãng la b kɩɩsda.» B kõo taab raare n wa wʋsgo a Pol sikẽ wã. A goma ne ba Wẽnd Rĩunga yelle la a togsa bũmb ning fãa sẽn gʋls a Zezi poorẽ, a Moyiiz Noora sebrẽ la bãngdba me rẽnnẽ. La yɩɩ raara zãnga, yibeoog n ta zaabre. Kẽer deega a goama, kẽer me zãgsame. B ra waa n sẽegdame la b tar b no-koɛɛma t'a Pol leok-b woto: «Yaa sɩd bala la a Vʋʋsem Sõng sẽn togs y yaab rãmba ne bãngda Izayi noore: ‹Tɩ yãend buudã la f yeel-a: Y nong bɩ y kelge, y kõn wʋm fɩ y nong bɩ y gese, y kõn yãend fɩ. Buud kãnga yama sobame, b tʋb pagame, b nin mumame, la yaa sẽn na yɩlẽ tɩ b nin da yãend ye la b tʋb da wʋm ye la b yam da vẽneg ye, la b ra teem zʋg ye. B ra tẽ tɩ b bãaga na sãoog koe!› Bɩ y bãng tɩ fãagrã yaa bu-zẽmba la Wẽnd tool yã. Bãmb yẽ sẽ na kelge.» [ A Pol sẽn gom n sɛ, Zʋɩf rãmba me loogame la b tar no-koɛɛm ne taaba.] Yaa yʋʋm a yi para la a Pol paa a sẽn sig zak ningã. A ra sõsda ne neb niyns fãa sẽn da wat-b a nengẽ. A ra gomda Wẽnd Rĩunga yelle la Soaala Zezi Krista yelle. A ra gomda a yam la a ka yãend gɩdgr ye. Maam, a Pol, n pʋʋsde; maam la Krist a Zezi sõgne, bãmb Tʋʋm-tʋmda, Wẽnd sẽn bool la b welg toore Koe-nooga mooneg yĩnga. Koe-noog kãnga la sẽn da kãab al-pĩnd pĩnd ne bãngdba noor tɩ be Sebr sõng pʋgẽ. Kãabga kãaba b Biiga poorẽ, biig ning sẽn yit a Daviid buudẽ sã n ya ne tẽng zug rogma, n yaool n ya Wẽnd bi-roaka, rogm a to wã pʋgẽ, tɩ Sõmblem Vʋʋsma puk rẽ ne kaset sẽn tar pãnga, ne b vʋʋgr kɩɩms sʋka, bãmb la a Zezi Krista tõnd Soaalã. Tũu ne bãmba tɩ d paam n lebg b tʋʋm-tʋmdã n na n moon la d bao b yʋʋra pẽgre, n wilg tɩ tẽeba yaa bũmb sẽn pake, la d taas-a bu-zẽmba fãa, la d taas-a yãmba, tɩ y me paama a Zezi Krista boolle. Bɩ Wẽnd kom-nongdsã sẽn be Rom tẽnga, Wẽnd sẽn welg b rãmb sõmblem welgrã paam kũun buud fãa la laafi, d Ba a Wẽnd la d Soaala Zezi Krista maasem yĩnga. M na n deng n kudga Krista a Zezi kãntɩɩga tɩ b pʋʋs Wẽnd bark y yĩnga tɩ mooga tõr kilsda y tẽebo. M sẽn waoogd Wẽnd ning m yamẽ la m moond b Biiga Koe-noogã, bãmb meng n ya m kaseto, tɩ m tẽegda y yelle wakat buud fãa, la m kota m pʋʋsg pʋʋgẽ, n wa paam vɩʋʋg n ta y nengẽ, bãmb sã n data. M rata ne m sũur fãa n yãend yã n paam n kõ-y ye Wẽnd kũun bilfu tɩ y tẽeba sĩdi, la sẽn yɩɩda, m datame n le paas m daood yãmb nengẽ la yãmb sɛɛgẽ tɩ d fãa paam n gãda tẽeb a ye, yãmb wala maam. M saam-biisi, m ka rat n solg yã tɩ yaa naoor yak la m tʋlg n wa y sʋka — la gɩdgr n zĩnd n ta marsã, — m saagdame tɩ yãmb me nengẽ m na paam bũmb sẽn be yõodo wala m sẽn paam bu-zẽmb a taaba nengẽ. M tog n tʋma Grɛk rãmb yĩnga wa wetẽ dãmba yĩnga, zolg yĩng wa mit yĩnga. Dẽ me yĩng la m data, Rom dãmba, n wa taas yãmb me Koe-noogã. Yãnd ka tar-m ne Wẽnd Koe-nooga ye, a yaa Wẽnd pãnga n fãagd ned ning fãa sẽn tar-a tẽebo, Zʋɩf pipi tɩ sẽn ka a Zʋɩf yaool n pʋgda. Koe-nooga kɩtdame tɩ tẽeb tũud tẽeb n pukd Wẽnd sõmblem wala sẽn gʋlse: Tẽeb n na n dɩlg nin-sõng vɩɩm. Wẽnnaam beema sẽn sigd a soab zugu, yaa wẽn-kɩɩsa, sẽn nong-a wẽnga la sẽn baood-a zãmb loɛɛg n loe sɩda. Wẽnnaam beelma kaset yaa vẽeneg ne-ba. Wẽnd ka solg-b fɩ. Bũmb ning sẽn be Wẽnd nengẽ n solg al dũni sɩngrẽ, ninsaal tõe n yãend-a la ne a yam tɩ Wẽnd tʋʋma n pukd b pãnga la b wẽndlem, al tɩ f sã n yeel marsã tɩ f ka ne, yaa fo yelle. Ad-y yaa b sẽn bãng Wẽnd sẽn ya a soaba la b ka pẽg-bã, la b ka pʋʋs-b barka wala sẽn segdã, ad-y yaa rẽ la b yam kɩdga sob zãnga. B sẽn yeel tɩ b baooda bãngr zulunga yaa gãeemd la b paam yã. Woto b rɩka Wẽnnaam ne b zɩɩrã la b sõmblema sẽn ka tɛkã, m mams-b ne bõn-yaals wẽnego, n tol n kõ Wẽnd sẽn ka kiidã ninsaal, luiila, rũnga, bɩ bõn-vuudr yĩn-kidgã. Yaa rẽ yĩng la Wẽnnaam bas-b ne b sũura raab yaalse tɩ b lʋɩ yoob pʋgẽ n yaal b toorẽ yĩnga zãnga. Wẽnnaam bas-b lame tɩ yaa bãmb n deng n bas Wẽnde, n dɩk Wẽnnaam sɩda n tek ne zirẽ-beedo, n lɛɛg n kẽ bõn-naands n waoog-ba, n yaool n bas Naanda sẽn tog ne pẽgr wakat buud fãa. (Ami!) Dẽ n so tɩ Wẽnnaam bas-ba ne b minim wẽnse, al tɩ b pagba tek vɩɩm ning b sẽn da segdẽ n vɩɩnde, n sak sẽn kisi. B rapa me basa sẽn ka kis bãmb ne b pagbã, n na n tʋlg taab ne raab kãsenga, n sak wɩɩbd ne taaba la b reega b tudgr kãng yaoodo, yaood sẽn da ka tõe n ka yao ye. B sẽn pa modg n tall Wẽnd bãngr akɩka, wala bũmb sẽn be yõodo, Wẽnnaam bas-b lame ne yam kɩdga tɩ b maan sẽn ka segd. B sũur sẽn pid ne bũmb ningã, yaa wẽnem buud fãa, fɩglem, raab wagla, pu-toogo; b sẽn mi yaa sũ-kiiri, taab yõor yãkre, zaba, zãmbo, taab bẽdgo; b nonga b taab yʋʋr sãoongo, taab wɩdga. Bãmb la Wẽnd bɛɛba, mo-be-neba, zẽk-m-meng rãmba, wʋglem dãmba, sɩlem wẽns rãmba, kõn-sak-b-ba rãmba, yam kaoolg rãmba, kõn-togs-m-pʋg rãmba, ka mi nimbãan-zoeer dãmba, ka mi sugr dãmba. Ne b sẽn mi tɩ Wẽnd yeelame tɩ wẽng a woto buud maandb toga ne kũum, b ka baas n maandẽ bal ye, b le be tẽngre n pẽgd sẽn maand-b wẽnga menga. F sẽn ya a soaba, f na n konga bʋʋm f sã n dat n bʋ f taaba. Fo sã n baood n na n ning f to taale, yaa f meng la f na n paalg, tɩ foo ne yẽ soab manesem yaa a ye. D miime tɩ Wẽnd sã n kẽesd yell a woto rãmb bʋʋdo, b tũuda b sɩdã n bʋʋdẽ. Dɩlla fo sã n maand wa f taaba n yaool n zĩ n kaood b bʋʋdo, fo tẽedame tɩ Wẽnnaam na bʋ foo n bas-f taal bɩ? Da maan wa f sãbsda Wẽnnaam ne b sõmblema sẽn ka be tɛkã, ne b tõog-m-mengã, ne b kõt-yaara ye; ad-b sõmblema ratame tɩ f ning pãng n teem zʋgo. F sã n kʋɩɩs f sũuri, f sã n zãgs tuubgu, Wẽnnaam beem la f samd f zugu, la b beema na n puka b bʋ tirsa kaoob raare, raar ning b sẽn na n kõ ned kam fãa a tʋʋmda keoore. Na n yɩɩ vɩɩm sẽn kõn sɛ la b na n kõ neb niyns sẽn modg-b ne neer maanego, n baood pẽgre, waoogre, vɩɩm sẽn ka tar goalenga. Neb niyns sẽn ya-b tõatba, sẽn kɩɩsd-b sɩda, n yaool n sakd wẽnga, Wẽnd sũ-puura na n dɩɩ bãmb dãmba, b na n paama Wẽnd zabre. Ned ning fãa sẽn maand-a wẽnga, a pʋɩɩr na n yɩɩ pɛta la yɩɩre, Zʋɩf pipi, tɩ sẽn ka-a Zʋɩf yaool n pʋgd. La sẽn maand-a neere, ziir la pẽgr n yɩt a pʋɩɩre, Zʋɩf pipi tɩ sẽn ka-a Zʋɩf yaool n pʋgd. Wẽnd ka yɛs n get fo sẽn ya buud ninga ned ye. Ade, neb niyns fãa sẽn maan-b yel-wẽnde, b na n dɩ-la b yel-wẽnda taale, ba b sã n ka Zʋɩf. Neb niyns sẽn mi-b a Moyiiz Noorã n maan wẽnga, bãmb dãmb bʋʋd na n yɩɩ wala a Moyiiz Noora sẽn yalse. Ka sẽn mi-b noora la nin-sõma, Wẽnnaam taoor ye, yaa sẽn maand-b noora sẽn wilgã. Bu-zẽmba sẽn ka mi-b Noorã n yaool n maand wala Noora sẽn datã, b bãng tɩ wakat kãnga b manes sõngã n lebg bãmb noore, wakat kãnga b wilgdame tɩ noor n be n gʋls b sũurẽ la rẽ n so tɩ ned kam fãa wʋmd koɛɛg a pʋgẽ, la koɛɛg sẽn leokd d taab tʋʋma poorẽ, b sã n toga ne sãbsgo bɩ ne pẽgre. Ad-y yaa sẽn maand-b Noora sẽn data bʋʋdo la Wẽnd na n tũ a Zezi Krista n bʋ sẽn solg fãa ninsaalb sũurẽ, wala m Koe-nooga sẽn wilgdã. Fo sã n zẽkd f menga, f sẽn ya Zʋɩf yĩnga, fo sã n yet tɩ f yaa Wẽnd Noora biiga, tɩ Wẽnd la fo zu-zẽkre, tɩ f mii b raabo, tɩ yaa sẽn be yõod la f mi la f pʋgda, tɩ f mii sor ning f sẽn tog n dɩke, tɩ f nin pukame, al tɩ f tõe n wilg zoeens sore, tɩ f tõe n lebg sẽn kẽnd-b likẽ vẽenem, n lebg zɩtba bãngre, n lebg sẽn ka mib neng karen-saamba, f sã n paam tɩ Wẽnnaam Noora tuk sɩd la bãngr sor n kõ-fo, m na sok-f n gese, yaa bõe yĩng la f mi f taab zãmsgo n yaool n ka tõe n zãms f menga? Bõe tɩ f zãmsd tɩ wagdem kisame la f zuuda? Ti yoob kisame, la f yooda? Bõe tɩ wẽn-naandsa yaand f sũuri tɩ f baas n kẽed b rotẽ n zɛɛdẽ? Foo tɩ Wẽnnaam Noora bãngr la f zu-zẽkre, bãng marsã tɩ f sã n pa reegd-a, yaa Wẽnnaam meng la f paoogda. La sɩd me wala sẽn gʋlse: Yaa yãmb yĩng la Wẽnnaam yʋʋra tar sãoong bu-zẽmba nengẽ n dabda. Bãong kõom bee yõodo fo sã n deegd Wẽnnaam noore; fo sã n kẽ bãong la f ka reegd Wẽnnaam noore, foo ne sẽn ka kẽ-a bãong zem taaba. Sẽn ka kẽ-a bãong sã n deegd Wẽnnaam noorã, a ka zem sẽn kẽ-a bãong sɩda? Ne a sẽn ka kẽ bãongã, yaa yẽ n na n kao fo bʋʋdo; yẽ sẽn deegd Wẽnnaam noorã n na n bʋ foo, fo sẽn ya bãnkoanga la f mi Wẽnd noore la f baas n tõdgd-a. Sẽn yaa Zʋɩf akɩk ka sẽn yaa Zʋɩf neb nifẽ bal ye, la bãong akɩk ka yĩnga sẽn kẽed a soaba ye. Zʋɩf akɩk yaa Zʋɩf a sũurẽ la sẽn kẽed-a bãong akɩk yaa sẽn kẽed-a a sũurẽ. Sẽn be sũuri wã n yɩɩd sẽn gʋls sebrẽ. Ad-y yẽ soaba pẽgre ka na n yi ninsaal nengẽ, a na n yii Wẽnd nengẽ. Yaa bõe pʋgẽ la Zʋɩf yɩɩd neb a taaba la bãong kõom yõod be-la a yɛ? Ad-y yaa bũmb wʋsg pʋgẽ. Pipi, yaa Zʋɩf rãmba la Wẽnnaam kõ b koeese. Kẽer yɩɩ tõatba, la rẽ maana bõe? Wẽnd zooda tũu rẽ n sãam bɩ? Ka boto ye! Wala sẽn gʋlse, yaa tɩlɛ tɩ Wẽnd pa b sɩd zĩigẽ tɩ ninsaal pa a zirẽ-beedẽ; la rẽ me la lebg pakre tɩ f gom n yiis f meng yellẽ la f gom n yiis f meng bʋʋdẽ. Tõnd wẽnema sã n pukd Wẽnd sõmblem, koe bʋg la d le tara? D na tõog n le yeel tɩ Wẽnd ka maan neere b sã n bas tɩ b sũ-puura yõog-do? Ad-y yaa ninsaal zʋbsgo la m na n zʋbse. B sã n ka tõe n puug b sũuri, b na n yɩɩ wãn n wilg dũni wã a bʋʋm la a kongre? La mam zirẽ-beed sã n kɩt tɩ m bãng n paase tɩ Wẽnnaam yaa sɩd soaba, tɩ Wẽnnaam pẽgr tũ rẽ n lebg wʋsgo, m sok n gese ned le tara sor n ges maam wa yel-wẽn-maand bɩ? La woto wã, wala rõatb kẽer sẽn gomd tɩ yii tõnd noorẽ wã, d kõn maan wẽng tɩ neer wa tũ rẽ n zĩndi? M mi tɩ rõadg a woto buud yẽ toga ne sɩbgre! Bõe la m na n yeele, tɩ tond Zʋɩf rãmbã n são bɩ? Lɛ-lɛ! Wala m sẽn zoe n wilgã, Zʋɩf ne sẽn ka-a Zʋɩf naaga taab n ya yel-wẽnd yemse. Tẽeg-y b sẽn gʋlse: «Nin-sõng ka ye, ba a ye. Yam soab ka ye, sẽn baood-a Wẽnnaam ka ye, ba a ye. B fãa gill bʋdga sore, b fãa gill wegmame. Sẽn maand-a neer ka ye, ayo! Ba a ye. B kokor yaa wa yaoog sẽn ka tar limdi, b zelemd wʋgda zãmb sʋndo. Wag-toaag zẽnem n bee b noorẽ B noor yiisda gom-miisg la kãab beedo. B nao tʋʋla ne wudg n daag zɩɩm. B sor yaa sãoong la far sore. B ka bãng yĩin-maasma sor n dɩk ye. B nin zɩ n kabs Wẽnnaam dabeem yĩng ye.» Ade, tõnd yaool n miime tɩ yaa Wẽnnaam sẽn kõ b rãmb noore la noora modgda; la b maana woto tɩ ned ba a ye ra tõog n yaag a noor ye, tɩ b paalg ninsaalba fãa b bʋʋdẽ. Wẽnnaam taoore ned ba a ye ka na n tõog n kõ a meng bʋʋm b noya deegr poorẽ ye, tɩ Noor sẽn tõe ne bũmb ning yaa wa ne yel-wẽnd bãngr bala. Dũnna-rũnna, ne noora sẽn teke, Wẽnnaam sõmblema ket n yaa vẽenega wala Noora la bãngdba zamaanẽ. Neb niyns fãa sẽn tẽed-ba a Zezi Krista yãeta sõmblem kãnga — tɩ bũmb ba a ye ka teem bãmb nengẽ ye — b fãa beega Wẽnde tɩ Wẽnd sẽn pid ne ziira zãag ne-ba. La b sã n le paam b yell manegre tũu ne Wẽnd yamleoog la Krista maoonga yõodo. Wẽnd yãk-b lame tɩ b lebg, ne b meng zɩɩm, sugr bũmb, tẽedba yĩnga; la rẽ yaa b sẽn dat n wilg b sõmblem la b bas yel-wẽn niyns sẽn maan pĩnda taale, Wẽnd sũ-maasma wakato; la b sẽn dat n wilg rũnna tɩ b ket n zĩ b sõmblema zugu, yaa sẽn tẽed-ba a Zezi yelle la b manegda. Sã n ya woto, fo tara sor n zẽk f meng bɩ? Ayoo, sor ka ye! La bõe tɩ sor kaẽ? Be f tʋʋmẽ wã bɩ? Ayoo! Yaa f manegrã sẽn ya tẽeba bũmbã. Sɩda d tagsdame tɩ ninsaal manegr yita a tẽebẽ. Ka tũud a sẽn deegd noora ye. Ka rẽ d yetẽ lame tɩ Wẽnd yaa Zʋɩf rãmb bal Wẽnnaam. Sɩda, d tagsdame tɩ tẽeb fãagda neda tɩ ka tũ ne Noora reegr ye. Ka rẽ d na kong n yeel tɩ Wẽnnaam ka bu-zẽmba Wẽnnaam ye, b yaa Zʋɩf rãmb Wẽnnaam bala. La d miime tɩ Wẽnd yaa bu-zẽmba me Wẽnde, tɩ b yaa Wẽnd a ye tãa. B fãagda ned ning fãa sẽn tar-a tẽebo, sẽn kẽ-a bãongo wala sẽn ka kẽ-a bãongo. Dɩlla tẽeb yãkda Noora bark bɩ? Ayoo! A kõt-a lame. D na n yeelame tɩ bõe d yaaba Abraam poorẽ? Sã n yaa Abraam tʋʋm sõma yĩng la a lebg nin-sõngo, a zug tõe n zẽkame, Wẽnnaam nengẽ wã la m ka mi. Sebr sõng yetame tɩ bõe? A Abraam tẽe Wẽnnaam la rẽ n wa ne a yell manegre. Ned sã n tʋm tɩ b kõ a yaoodo, ka kũun la b kõ a ye, yaa bũmb sẽn ya tɩlɛ ne-a. La ned sã n ka teeg a tʋʋma n yaool n teeg ned ninga sẽn tõe tɩ nin-wẽng yell manegã, d yetame tɩ yaa tẽebã n sɩd maneg a yelle. Pʋsẽ yaa rẽ yĩng la a Daviid boond tɩ zu-noog soaba ned ning Wẽnd sẽn maneg a soab yelle tɩ ka tũ ne a tʋʋm manesem: Zu-noog rãmba la sẽn paam b beegre sugri la b yel-wẽna ludbu. Zu-noog soaba la Wẽnd sẽn bas a soab taal zãnga. B sẽn gomd zu-noog ningã, b gomd-a-la sẽn kẽ-b bãong yĩng bala bɩ yaa sẽn ka kẽ-b bãong me yĩnga? Sɩda d yetame t'a Abraam tẽebã n wa ne a yell manegre. Manega wakat bʋgo, a sẽn waa n nan ka kẽ bãong bɩ a bãong kõom poore? Ka a sẽn lebg zũng poor ye, ya a sẽn waa n nan ka kẽ bãongo. A bãonga lebga wa kaseto t'a sẽn waa n nan ka kẽ bãongo, a ra zoe n tara tẽeb ning sẽn manegda ned yellã. Dẽ n so t'a na n lebg buud a yiib ba. A yaa ba pipi, sẽn na n tẽ-ba n yaool n ka kẽ bãonga yĩnga, tɩ tẽeb n maneg bãmb dãmb yelle, la a leb n yaa ba sẽn kẽ-b bãong yĩnga; b kẽe bãongo n yaool n ka get rẽ wa bũmb sẽn seke, n na n dɩk a Abraam tẽeba sore, tẽeb ning a sẽn da tare t'a nan ka kẽ bãongã. Sɩda, a Abraam sẽn paam tɩ Wẽnd pids kãabg ning b sẽn da kãab-a, n yeel tɩ dũni wã na n yɩɩ yẽnda bɩ a kamb soolem, bãng-y tɩ ka tũ ne noor deegr ye. Tũu ne tẽeb yel-sõmde. Sẽn paam-b pʋɩɩrã sã n da yaẽ la sẽn deeg-b noore, tẽeb yaẽ la zaalem la kãabga me yaẽ la belegre. Noor yõod ya f tõdg-a tɩ Wẽnd puug b sũur ne fo; noor sã n kaẽ, tõdgr me ka ye; Yaa rẽ la m yet tɩ tõnd zu-noogã, yaa tẽeb n wat ne-a, tɩ tẽeb la kũun akɩka la yaa tẽeb yĩng la Wẽnd pids b kãabg ne a Abraam yagens buud fãa: ka sẽn tũud-b noorã bala, yaa sẽn tar-b d fãa ba a Abraam tẽebo, tɩ woto la b gʋls yã: M kɩtame tɩ f lebg neb ka tɛk saamba — tẽeb saamba — t'a tẽe Wẽnd ning sẽn tõe vʋʋg sẽn ki, la a tõe tɩ sẽn ka be, zĩndi. A Abraam saaga a sẽn kõn saage, n tẽ Wẽnde; woto la a lebg neb ka tɛk saamba wala b sẽn yeele: F yagens na n yɩɩ ka tɛka. A Abraam gesa ne tẽeb sẽn ka tõe n kɩlle a yĩnga kʋʋlem (a yʋʋma da zoe n pida koabga) n ges a Sara me kʋʋlem. A sẽn ne Wẽnd kãabga yĩnga, a ka zoe rabeem ye, a tẽeb kõ-a-la pãnga t'a pẽg Wẽnde, n mii tɩ Wẽnd sã n pʋlme b tõogd n pidsa b pʋlengo. Yaa rẽ yĩng la a paam t'a yell manege. La Sebr sõng sã n yet tɩ ya a Abraam tẽebã n maneg a yelle, ka yet tɩ yɩɩ yẽnda a yembr bal ye; goma tõnd me yelle, tɩ tẽeb n sɩd maneg d yelle, tõnd sẽn tẽed Wẽnd sẽn vʋʋg a soab kɩɩms sʋka, tõnd Soaala Zezi Krista. B ki-la d yel-wẽna yĩnga la b vʋʋga d yell manegr yĩnga. Tẽeba sẽn maneg d yell yĩnga, d zĩi ne laafi Wẽnnaam taoore, la rẽ tũu ne tõnd Soaala Zezi Krista maasem. Bãmb kɩtame tɩ d tũ tẽebo n paam kũun ning d sẽn zĩ ne a soabã; yaa kũun sẽn waoogd tõndo, t'a ka bũmb a to n zʋʋg Wẽnd ziira pʋɩɩr saagr ye. Bõe la m na n paase? Ad-y d fara meng le yaa d zu-zẽkre tɩ d miime tɩ far yalsda ned yam zĩ yɛnga. Ned sã n yals a meng zĩ yɛnga, a rɩkda tʋʋm sõma minugu la minim n tʋm neerã n wat ne saagre. La sẽn saagd-a ka tõe n lʋɩ vɩʋʋgẽ ye tɩ Wẽnnaam kɩtame tɩ Vʋʋsem sõng ning d sẽn paama daagd Wẽnd nonglma tõnd sũurẽ. Yaa tõnd sẽn dag n ka tõe n le maan fɩ wã wakato la Krista yãk b raare n ki wẽn-kɩɩsdba yĩnga. — Daare ned tõe n sak n kii sẽn ka tar-a a toorẽ yelle yĩnga, n ki nin-sõng yĩnga, daare, rẽ tõeeme. — Kaset ning d sẽn tare n mi tɩ Wẽnd nonga tõndã, yaa Krista sẽn ki d yĩnga tɩ d yaool n da ket n ya yel-wẽn-maandbã. D miime tɩ marsã la d na n põs zabre d sẽn paam tɩ b raag b zɩɩm tɩ d yell tũ rẽ n maneg zãngã. Beem sẽn waa n ket tõnd ne Wẽnd sʋka, Wẽnd Biiga kii tõnd yĩnga n kɩt tɩ d lebg Wẽnd zo-rãmba, tõnd sẽn lebg zood ne Wẽnda marsã d miime tɩ Wẽnd Biiga vɩɩm na tõog tɩ d yell le maneg n yɩɩg. La ka rẽnd bal ye, bũmb n le kɩt tɩ d kɩdemd Wẽnnaam taoore, yaa Krista sẽn sõng tɩ d zoe n be manegr pʋgẽ dũnna-rũnna. Ad-y yaa nin-yend n wa ne yel-wẽnd dũni pʋgẽ, tɩ yel-wẽnd me wa ne kũum, tɩ kũum me lebg neb fãa bũmbu tɩ yel-wẽnd me lebga neb fãa yel-wẽnde. Wẽnnaam sẽn da waa n nan ka kõ b noora wakato, yel-wẽnd da bee dũni pʋgẽ, la wakat kãnga, Wẽnnaam noora sẽn da ka moon yĩnga, b ra basa yel-wẽnd taale. Baasgo a Adem n ta a Moyiiz, kũum da rɩkdame, la sẽn pa beeg-ba a Adem beegr da kiidame; baad-y pipi Adema yaa Adem ninga sẽn pʋgda wã makre. Kũun sẽn kõt to-to, la beegr sẽn beegd to-to ka a ye ye. Nin-yend beegr waa ne neb ka tɛk kũum, bãng-y tɩ Wẽnd kũuna b sẽn ning Krista b yembra nugẽ, kũun kãnga b sudg-a la zembala, ne yamleoogo, neb ka tɛk zutu. Wẽnd kũuna sẽn wa ne bũmb ninga la nin-yend beegra sẽn wa ne a soaba me ka wẽnd taab ye. Yel-wẽnd a ye poore bʋʋd n bʋ la yɩɩ paalgr bʋʋdo la Wẽnd bas taala yɩɩ yel-wẽn ka tɛk bas taale. Nin-yend yel-wẽnd waa ne kũum dũni pʋgẽ la kũum lebga naaba, nin-kãng manesem yĩnga, bãng-y tɩ sẽn paam-b nin-yend kũuni, tõnd Soaal a Zezi Krista manegrã, bãmb dãmb n na n yãmb moogo. Nin-yend yel-wẽnd waa ne neb gill sɩbgre, tɩ nin-yend sugr kosg wa ne vɩɩm neb fãa yĩnga. Nin-yend tõdgr kɩtame tɩ neb ka tɛk tũ rẽ n lebg yel-wẽn-maandba, ad-y nin-yend sakr n na n maneg neb ka tɛk yelle. Sã n ya Noorã, yẽ waame tɩ yel-wẽnd tũ yẽ n wek balbo la a sẽn wek balb zĩig ninga, be la Wẽnd kũuna me yɩ ka tɛka. Tũu ne yel-wẽnde tɩ kũum lebg naab dũni pʋgẽ la Wẽnd maag Krista sugri, b kõt yaara yĩnga, sõmblem zamaan na n yalsa vɩɩm sẽn kõn sɛ yĩnga. M na n yeelame tɩ bõe? Tɩ d kell n pa yel-wẽnd pʋgẽ tɩ Wẽnnaam nimbãan-zoeerã tõog n yɩ wʋsgo d yĩnga? Ayoo! Tõnd sã n lebg bõn-kɩɩms yel-wẽnd yĩnga, d na n yɩɩ wãn n le vɩɩnd a pʋgẽ? Bɩ yãmb ka mi tɩ tõnd sẽn so Krist a Zezi soobã, yɩla b kũuma pʋgẽ la b lis tõndo? Tõnd sẽn deeg soobã, tõnd naaga ne bãmba n mum yaoogẽ, sẽn na n yɩlẽ tɩ Krista sẽn vʋʋg kɩɩms sʋka, Ba Pãng soaba maasem yĩnga, bɩ tõnd me paam n vɩɩnd vɩɩm paalga. D sã n lebga bũmb a ye ne Krista, d kũuma sẽn wẽneg bãmb rẽnna, bɩ d bãng tɩ d na kell n wẽneg bãmba me ne vʋʋgr sẽn wẽnd bãmb dẽnna. D bãng tɩ b naaga tõnd yĩn-kʋdrã n ka pik ne Krista, sẽn na n yɩlẽ n woog a wẽnema pãnga tɩ d da le yɩ yel-wẽnd yems ye. Sẽn ki-a ka le ya yel-wẽnd yem-daoog ye. La tõnd sã n naag Krista n ki, d tẽedame tɩ d naaga bãmb n vɩ. Krista sẽn vʋʋgã, b ka tõe n le ki yɛs ye, kũum ka leb n tar b gaab yɛs ye. B kũuma yɩɩ yel-wẽnd na menem zãng kũum; b vɩɩma yaa vɩɩnd ne Wẽnnaam vɩɩm. Dɩlla yãmb me ges y meng marsã wa neb sẽn ka le kĩ ne yel-wẽnde, la y vɩɩnd Wẽnnaam kamb vɩɩm tõnd Soaala Zezi Krista maasmẽ. Da sak-y tɩ yel-wẽnd le rɩ naam y yĩn-kiidga zug ye; da le sak yã a tʋls wẽnsa ye. Da sak-y tɩ y yĩnga wils lebg yel-wẽnd zab-teed ye. Dɩk-y y mens n kõ Wẽnd tɩ y yaa bõn-kɩɩms sẽn lebg nin-vɩɩse. Dɩk-y y yĩnga wils n kẽ Wẽnd tãpẽ n zab sõmblem zabre. Yel-wẽnd ka tog n le rɩ naam y zug ye tɩ y yii Noor zamaanẽ n kẽ sõmblem dẽnnẽ. D na n maana bõe d sẽn paam tɩ b yiis-d Noor soolmẽ n kẽes-d sõmblem zamaanẽ, d tõe n le maana wẽng bɩ? Lɛ-lɛ! Y ka mi tɩ y sã n bas tɩ ned kẽes y yembd pʋgẽ, y sɩd lebga yẽ yem-daoogo? Y sã n lebg wẽng yem-daado, y kũum la y bao yã, y sã n tũud Wẽnnaam, y manegr la y paam yã. Wẽnd paam barka tɩ y sẽn da ya yel-wẽnd yembs pĩnda, y sakame n deeg zãmsg ninga b sẽn zãms yã, n yi yel-wẽnd soolmẽ n kẽ sõmblem zamaanẽ. Y yama sẽn pa waoog yĩnga m na n dɩka ninsaal makre. Wala y sẽn dɩk y yĩnga pĩnd n kẽes yel-wẽnd yembdẽ t'a yaal zãnga, woto-me bɩ y rɩk y meng rũnna n kõ neere n lebg sõma. Yãmb sẽn waa n ya yel-wẽnd yem-daado, neer maaneg ra ka pak-y ye. La m na n sok-y lame n gese, y paama bõe y tʋʋm kãensa pʋgẽ sã n ka y sẽn zĩ rũnna tɩ b yãnd tar-y wã? B ka tar yõod n zʋʋg kũum ye. Rũnna y sẽn paam n yi yel-wẽnd yembdẽ n kẽ Wẽnnaam, bãng-y tɩ y womda sõmblem biisi la rẽ n na n kẽes-y vɩɩm sẽn kõn sɛ pʋgẽ. Yel-wẽnd sẽn wat ne bũmb ninga yaa kũum bala; la Wẽnnaam kũuna sẽn wat ne a soaba, yaa vɩɩm sẽn kõn sɛ, tõnd Soaala Zezi Krista maasmẽ. M sok n gese, m saam-biisi, la yaa waa m gomda ne neb sẽn mi noor sẽn ya a soab taki, m sok-y n gese, y ka mi tɩ yaa ned sẽn ket n vɩ la noor modgd sɩda? Yaa a sɩd sẽn ket n vɩ noor la pʋg-kãad reegda; a sɩda sã n ki, a noor ka le modgd-a yɛs ye; yaa sɩda sẽn ket n vɩ wakato t'a bas-a n kul dao a to la b na n bool-a tɩ kãad sãamda. A sɩd sã n ki, a yi-la a sɩd soolmẽ; dɩlla a sɩd kũum poore a sã n kul dao a to a ka sãamd kãadem ye. Dẽ la m na n yeelyã, m saam-biisi, tɩ yãmb me sẽn naag Krista n ki wã y yii noora soolmẽ; tõnd bee ned a to soolmẽ: yaa sẽn vʋʋg-a kɩɩms sʋka soab soolmẽ la d be, la d na n woma bi-sõma n kõ Wẽnnaam. Sɩda, d sẽn da waa n ket n vɩ d pĩnd vɩɩma, noora sõnga d yĩnga wilsi la d zʋg wẽnga tɩ d wom biis sẽn tak kũum n kõ-do. Marsã noor ka le modgd tõnd ye, tõnd lebga noora bõn-kɩɩmse, n yi yembd buud faa pʋgẽ; d basa no kʋdra sẽn da gʋls bũmb ninga n pʋgd Wẽnd ne zʋg paalga. Noor yaa wẽnga? M kõn yeel dẽ lɛlɛ, la sã n ya sɩda, yaa noor n kɩt tɩ d bãng yel-wẽnde. M tʋlla woto kõn waẽ m sũurẽ, noor sã n dag n ka yeelẽ lɛ-lɛ: da tʋlg ye! Noora sẽn yet tɩ woto la woto kisame wã yĩnga, yel-wẽnd tũu rẽ n kẽes tʋlsem ka tɛk m sũurẽ. Noor sã n da kaẽ, yel-wẽnd me kaẽ ye. Pĩnda noora sẽn waa n dag n nan ka kõ, m da yaa bõn-vɩɩga; noora waoong poore, yel-wẽnd n lebg bõn-vɩɩga, tɩ mam põd n lebg bõn-kɩɩnga. Ade, noora sẽn da kõ maam vɩɩm yĩnga, a waa ne mam kũum. Yel-wẽnd dɩka noora sẽn da kis bũmb ningã n belg maam n paam n kʋ-ma. D sã n ges neere d mikdame tɩ noor yaa bõn-sõngo; m tõe n paasame t'a yaa bõn-neere, bũmb sẽn toge. La bõn-sõng tõe n tiig n lebga kũum mam yĩng bɩ? Ayoo! Ka tõe ye. Ad-y yaa yel-wẽnd n tʋm dẽnna; sẽn na n yɩlẽ t'a wẽnema puk zãnga, yel-wẽnd dɩka bõn-sõng n kʋ maam. Yel-wẽnd tũu noor n wilg maam a wẽnema pãnga. Sã n ya sɩda, sẽn tar-a yam la b kõt noore; mam yaool n tara yĩng sẽn lebg yel-wẽnd yem-daago. M ka mi m sẽn maanda võor ye, m sẽn data ka rẽ la m maand ye, m sẽn pa rata la m maanda. La m sã n maand m sẽn pa rata, m naaga Noorã n kõt kaseto t'a yaa sõmbo. M sã n maan m sẽn pa rate, tʋʋmda ka le ya mam tʋʋmd yɛs ye, a yaa yel-wẽnd sẽn ti a roog mam pʋgẽ tʋʋmde. M neeme tɩ bõn-sõng ba a ye ka be m nengẽ ye, ka be m yĩngẽ ye; neer tʋlsem ka toog ne maam ye, yaa maaneg n ya toog ne-ma, dẽ n so tɩ m pa maand neere, m sẽn date, n yaool n maand wẽng m sẽn pa rate. La m sã n maand m sẽn pa rate, dẽ ka le ya mam tʋʋmd ye, a yaa yel-wẽnd sẽn ti a roog mam pʋgẽ tʋʋmde. Dɩlla noor n be m yĩnga tɩ m sã n dat fãa n maan neere, maan wẽngã n yɛs m taoore. M sũura pʋgẽ Wẽnnaam noora noom-m-la al wʋsgo; la m yĩnga wilsẽ, noora to n yɛse; la no-kãng yika zabre ne m sɩɩgã la a za-m la ne bãeense, yel-wẽnde sẽn be m yingẽ bãeense. M yãbda m menga! Ãnd n na n fãag maam ne m yĩnga sẽn dat m kũuma? Wẽnd paam pẽgr d Soaala Zezi Krista maasem yĩnga. Ad-y yaa maam bala n ne m yamẽ tɩ m tog n tũ Wẽnd sẽn yalse, n yaool n sakd m yĩngẽ wã, yel-wẽnd sẽn yalse. Bãng-y tɩ sẽn be-b ne a Zezi marsã wã ka le zoet bʋʋd paalgr ye. A Vʋʋsem Sõng noora n kõt vɩɩm a Zezi maasmẽ, la yẽ n fãag foom ne noor ninga sẽn wata ne yel-wẽnd la kũum. Wẽnd pidsa a Moyiiz Noora sẽn da ka tõe bũmb ningã, ninsaal komslma sẽn mong-a bũmb ningã, n tõog yel-wẽnde ne ninsaal yĩnga. Ad-y b tʋma b meng Biiga sẽn wa ne yĩng sẽn wẽnd tõnd dẽnna n yaool n tar pãng n menesd yel-wẽnde. Wẽnd maana rẽnna, tɩ d tõog n deeg Noorã, tõnd sẽn ka le vɩ wala d yĩnga sẽn datã, n vɩ wala a Vʋʋsem Sõng sẽn datã. Sɩda neb niyns fãa sẽn tũud-b yĩnga raab baooda sẽn noom b yĩngã la neb niyns sẽn tũud-ba a Vʋʋsem Sõng raab baooda sẽn noom a Vʋʋsem Sõngo. Bãng-y tɩ sẽn baood-a a yĩnga sẽn datã, baooda a kũum la sẽn baooda a Vʋʋsem Sõng sẽn datã, baooda a vɩɩm la laafi. Yĩnga sẽn data baoob sẽn pak b rãmbã, lebgda Wẽnnaam bɛɛba, n pa rat n le reeg Wẽnnaam noor ye; b pʋs n ka tõe meng ye. Yaa rẽ me yĩng la b ka tõe n ta Wẽnnaam yam ye. Yãmb ka le ya neb sẽn tũud b yĩnga yamleoog ye, y pʋgda a Vʋʋsem Sõngo sẽn date, tɩ Wẽnd meng kõ yãmb a Vʋʋsem Sõngo. Sẽn ka tar-a Krista Vʋʋsma, Krista ka so yẽ soab ye. La Krista sã n be ne yãmba, ba yel-wẽnd sã n da kɩt tɩ y yĩnga tog n ki, Vʋʋsma na n kõ-y-la vɩɩm, Wẽnd sẽn maneg d yell ne bãmba yĩnga. Wẽnd Vʋʋsem ninga sẽn vʋʋga a Zezi Krista kɩɩms sʋka, sã n be ne yãmbã, ad-y b sẽn vʋʋga a Zezi Krista kɩɩms sʋka, b na kõ y yĩn-kiidgã vɩɩm, b Vʋʋsma sẽn be ne yãmba yĩnga. M saam-biisi, pakr sã n beẽ me, kõn yɩ pakr bada tɩ d vɩɩnd wala d yĩnga sẽn data ye. Yãmb sã n vɩ wala y yĩnga sẽn date, y na n kiime. La y sẽn paam Vʋʋsem ninga sã n kɩt tɩ y lak ne yĩnga raabo, y na n vɩɩndame. Wẽnnaam Vʋʋsma sẽn be ne b rãmb fãa lebga Wẽnnaam kamba. Vʋʋsem ning y sẽn paama ka bũmb sẽn kɩt tɩ y lebg yem-daado n zĩ ne rabeem ye; y lebga Wẽnd zak kamba al n tõe n bool Wẽnd Aba, dat n yeelame tɩ Ba. A Vʋʋsem Sõng meng naaga tõnd n kõt kaset tɩ d lebga Wẽnnaam kamba. La d sẽn ya Wẽnnaam kamba, d na paam pʋɩɩr ning b sẽn pʋlem b kamba; d na naag Krista n paam pʋɩɩr kãnga; d sẽn naag bãmb n namsã, d na naag bãmba n paam pẽgre. M tagsdame tɩ zamaan kãnga namsgo ne rolb ninga sẽn na n yɩ tõnd dẽnd beoog raarã ka tõe n mak taab ye. Bõn-naandsa fãa zĩ n gũuda ne yãgbo, Wẽnd kamba pẽgr sẽn na n puk raare. Ninsaal tʋls yaalsã sã n tiig n kẽes bõn-naandsa fãa yembd pʋgẽ, d bãng tɩ ka tũ ne bãmb daab ye, tũu ne ninsaalb tʋʋmde la bãmb me saagdame tɩ b yembdã sɛɛb bee raare, tɩ b yĩnga komsg sɛɛb bee raare, la b gũuda b sẽn na n paam soog-m-menga ne ziir ning Wẽnd sẽn kõt b kamba. D mii vẽenega tɩ al n ta marsã bõn-naandsa fãa waasda rogem waasgo; la ka bãmb bal ye, yaa tõnd me sẽn zoe n paam lɛng ninga a Vʋʋsem Sõng sẽn lemb tõndã; yaa tõnd fãa n naag n waasd d sũurẽ, n gũud d yĩnga fãagre. Tõnd fãagra yaa bũmb d sẽn tõe n saag. La fo sã n ne f sẽn saagda soaba, dẽ ka le ya saagr ye. Fo na n yɩɩ wãn n ne bũmb la f le yet tɩ f saagda a yãeebo? Saagr yaa fo sẽn ka ne bũmb ninga tɩ f kʋmb f yam n tar a gẽegre. A Vʋʋsem sõng me wata d sõngre, tɩ d ka mi d sẽn na n kos bũmb ning taki tɩ d pʋʋsg yɩ neer ye, la ad-y yĩnsir tara a Vʋʋsem Sõngo tɩ b yõkd sɛɛg d yĩnga la b wiisd wiis toogo. Bũmb-kõ-solg-m Wẽndã mi a Vʋʋsem Sõng sẽn dat d yĩnga la bãmb me sẽn yõkd sɛɛg Wẽnd kom-nongdsa yĩnga, zemsa ne Wẽnd meng raabo. D miime tɩ Wẽnd sẽn nong b rãmbã, Wẽnd sẽn welg b rãmb toorã ne b raabo, b sõngda bãmb tɩ b yɛla fãa welg neere. B sẽn welg b rãmb toor al pĩnd-pĩnda, b tʋlgame tɩ b rɩk b Biiga wẽnego la Biiga na n lebga kãsem sẽn tar yaop ka tɛka. B sẽn pʋlem b rãmb neera la b bool yã. B sẽn bool b rãmba yell la b maneg yã, b sẽn maneg b rãmb yell la b pids ne ziiri. Bõe la m na n le paas yɛsa? Wẽnd meng sẽn yaa d sõangdã d zabd-n-taag na n yɩɩ ãnna? Wẽnnaam ka zoe b Biiga nimbãaneg ye, b sakame t'a ki d yĩnga; b Biiga yĩnga, bõe la b ka na n kõ-d marsã? Wẽnd sẽn welg b rãmb toorã, ãnda n tõe n le kẽes-b bʋʋdo? Yaa Wẽnd n manegd ninsaal yelle. Woto wã tõe n le yɩ-la a Zezi Krista sẽn ki tõnd yĩnga, n vʋʋge la b zĩ b Ba rɩtg n pʋʋsd d yĩnga tõe n le yɩɩ bãmb n na n kẽes tõnd bʋʋd bɩ? Bõe n na n yiis tõnd a Zezi Krista nonglem pʋgẽ? Far bɩ, sũ-beed bɩ, namsg bɩ, kom la naong bɩ, bũmb sẽn tõe n yak yõor bɩ, sʋʋg bɩ? Kõn le yɩ wa d sẽn karemd Sebr sõng pʋgẽ ye: Yaa yãmb yĩng la b tar tõnd n koot wa piisi wakat buud fãa, beoog sẽn vẽege. Baad-y t'a Zezi nonglem yĩnga, tõnd n maand daoodo. N-ye! M sũur kegmame tɩ bũmb ba a ye ka le tõe n zãag d ne Wẽnnaam nonglma, a Zezi Krista sẽn wa ne a soaba ye. Kõn yɩ kũum bɩ vɩɩm ye, kõn yɩ malɛk bɩ dũni soaal ye, kõn yɩ rũnna bɩ beoog bũmb ye, kõn yɩ sẽn be sa-gãnẽ bɩ sẽn sud tẽng ye, kõn yɩ naand buud ba a ye. Ne Krista m togsda sɩda, m ka yagd ziri ye, — a Vʋʋsem Sõng meng kaset la m tar m sũurẽ — m togsdame tɩ sũ-sãang la toog n tar maam n namsd wakat buud fãa. M tʋllẽ lame tɩ Wẽnnaam yãk m barka, m tʋllẽ lame n welg ne Krista, dẽ sã n tõe n nafẽ m saam-biisã, sẽn ya-b bũmb a ye ne maam rogmẽ wã, sẽn ya-b Israyɛl kamba, Wẽnd kom-wubdsi, Wẽnd Ziira vẽenem sẽn bui b rãmba, Wẽnd sẽn yõg zood ne b rãmba, Wẽnd sẽn kõ b rãmb b noy, Wẽnd sẽn wilg b rãmb waoogr ning b sẽn dat ninsaalb nengẽ, Wẽnd sẽn kãab b rãmb noogo, Wẽnd sẽn kãab b rãmb yaab sõma, yaab niyns sẽn dog Krista, sã n ya tẽng zug rogma, la Krista yɩɩda bũmb fãa, tɩ b yaa Wẽnd n tog ne pẽgr sẽn kõn sɛ. Ami! Ka rat n yeel tɩ Wẽnd kãabga lʋɩɩ vɩʋʋgẽ ye. Y mens miime bala tɩ ka a Israyɛl kamba fãa la a Israyɛl ye. Yaa wala y sẽn mi t'a Abraam yagensã fãa kaa Abraam sẽn dog a toor ye. Na n tũu ne a Izaak tɩ yagens kẽer na n ges foo wa b sɩgre, dẽ rat n yeelame tɩ ka yĩnga sẽn dogd la Wẽnnaam kamb bal ye, kãabga kamb me yaa Wẽnd kamba. Kãabga kãaba woto: Vẽer woto sasa, m na lɛɛg n wa, la a Sara na n doga biiga. Ad bũmba to sẽn ya vẽenega n yɩɩda: a Rebeka waa n dɩka pʋga, d ba a ye maasmẽ, d ba a Izaak maasmẽ. La a sẽn waa n nan ka rog a kinkirsã, tɩ kinkirsã me nan ka mi wẽng la neere, sẽn na n yɩlẽ tɩ b bãng tɩ Wẽnd boolg tũuda ne Wẽnd raabo, la a ka tũud ninsaal tʋʋma, a Izaak wʋma b sẽn yeele: «Kãsma na n yɩɩ yao wã sõgne;» la sɩda woto n be sebrẽ: «M nonga a Zakoob la m kisga a Ezayu.» M yeelame tɩ bõe? Tɩ Wẽnd maanda sẽn ka zemsde? Ka boto ye. B yeela a Moyiiz: «M zoeta m sẽn zoet a soab nimbãanega, m kũmda m sẽn kũmd a soaba.» Ka sẽn nong-a, ka sẽn zoet-a n pʋgd Wẽnd pʋlengo n paamd-a ye, ya Wẽnd sẽn zoe a soab nimbãanega n paamd-a. Ad sebra sẽn yet Ezipt naaba: M kõ-f la naama ne m daabo n na n tũ foo n wilg nebã m pãnga tɩ m yʋʋr paam pẽgr dũni fãa pʋgẽ. Sɩda Wẽnd zoeta b sẽn dat a soab nimbãanega la b kidibda b sẽn dat a soab sũuri. Fo na n yeel-m lame: «Yaa bõe la a le zĩi n sãbsdẽ yɛsa? Ãnda n tõe n kɩɩs Wẽnnaam daabo?» Ninsaal biiga, foo la a bõe n na n wẽ no-koeemd ne Wẽnde? Ninsaal sẽn naan bũmb ninga na yik n yeel-a: «Bõe yĩng tɩ f naan m woto?» Yagda ka tõe n dɩk yagd yɛnga n yag laok sẽn tar neerem n zems bala bɩ laok sẽn be neer wʋsg sɩda? Ad-y yaa Wẽnd sẽn tʋlg n wilg tɩ ba b sũur puuda, b tara pãnga n tõe n yõk b menga ne lagd kẽer sẽn da yikd b sũuri n tog ne wãabo, n yaool n ka wã-b ye. Ad-y yaa b sẽn dat n wilg b ziira la b pãnga, la lagd kẽer paam tɩ b kũm-b nimbãanegã n segl-b al pĩnda tɩ b ya ziir lagdo, lagd sẽn yag b pẽgr yĩnga. La yaa woto la b maan ne tõnd, n sʋk-do Zʋɩf rãmba la bu-zẽmba sʋka. Yaa woto la b gomd a Oze sebrẽ: «Sẽn da ka m buud neba la m na bool tɩ m buudu, la pʋg-beooga la m na n bool tɩ rʋmde, b sẽn deng n wʋm zĩig ning tɩ b ka Wẽnnaam neba, zĩ kãng la b na n bool-b tɩ Wẽnnaam vɩɩga kamba.» A Izayi yeela a Israyɛl poorẽ: «Ba a Israyɛl kamba sõor sã n da taẽ la bĩisri sẽn be mogr noore, ad-y yaa b sẽn kees b rãmba bala n na n fãage, tɩ tao tao la vugr bala Wẽnnaam na n pidsa b kãabga tẽng zugu.» Wala a Izayi sẽn pĩnd n yeele: «Tãnsoab a Wẽnd sã n da ka keesẽ buudu, tõnd lebgẽ la wala Sodom la Gomor.» M na n kʋʋ m koɛɛga wãn wãna? Ade, Bu-zẽmba sẽn da ka baood sõmblem paam-a lame la yaa tẽeb sẽn wat ne sõmblem ningã. A Israyɛl sẽn da tũud noorã n tẽed ta na kõ-a sõmblem, a raaba ka pids ye. La yɩɩ bõe yĩnga? T'a basa a tẽeba teegre n teeg a tʋʋma. La woto b laka b lʋɩɩs kugri, wala sẽn gʋlse: «Lakr kugr la m vigl Siõ pʋgẽ, m bẽd-y la ne pĩiga sẽn lubd neba, Siõ pʋgẽ; la ned ning sẽn yaool n dell-a pĩ-kãng kõn paam yãnd ye.» M sẽn dat bũmb ning ne m sũur fãa la m sẽn pʋʋsd bũmb ning yĩnga, yaa m saam-biisa maan b sɩɩg fãagre. M tõe n kõo kaset tɩ b ka tũud Wẽnnaam ne reem ye; bũmb sẽn be bala, yaa b yama n nan ka vẽneg tɩ seke. B sẽn ka mi Wẽnd sõmblem sẽn ya a soaba, b ka bao-a ye, b bas-a lame n na n bao b toorẽ dẽnna. B ka bãng tɩ Wẽnnaam kõ b noya tɩ b tall ninsaal n tãag Krista sẽn ya tẽed fãa manegd ye. A Moyiiz gʋlsa noya sẽn wat ne manegr ninga poorẽ n yeel tɩ ninsaal sã n tũ-ba, b tõe n kõ-a la vɩɩm. Tẽeb sen wat ne manegr ninga poorẽ, ad-a sẽn gʋlse: «Da yeel f sũurẽ: ãnda n tõe n dʋ yĩngri,» n dʋ yĩngr n sik Krista? Bɩ ãnda n tõe n sig bʋg-tẽnga n yiis Krista kɩɩms sʋka. Bõe la a pʋs n yeele? A yeelame: «Koɛɛga pẽ-f lame, a be f noorẽ, a be f sũurẽ,» yaa tõnd sẽn moond tẽeb ninga koɛɛga. Sɩda, fo fãag n sɛɛme, f noor sã n togs t'a Zezi la Soaala tɩ f sũur deeg tɩ Wẽnd vʋʋg-b la kɩɩms sʋka. Fo sẽn tẽed f sũurẽ n wat ne f manegre, la f noor toagsg wata ne f fãagre. Ka sebr sõng n togsd tɩ ned ning fãa sẽn tẽed-a kõn paam yãnd bɩ? Ad-y yaa rẽ yĩng la bũmb ka welg Grɛk ne Zʋɩf ye: b yiiba fãa tara Soaal a ye bala la Soaala kelgda neb niyns fãa sẽn yõkd b sɛɛga. D karma sebr sõng pʋgẽ tɩ ned ninga sẽn na n yõka Soaala sɛɛga na n kẽe fãagr pʋgẽ. B na n yɩɩ wãn n yõk Soaala sɛɛga tẽeb sã n ka reng n beẽ, la tẽeb na n yɩɩ wãn n zĩndi wʋmb sã n ka reng taoore, la b na n yɩɩ wãn n wʋm, koɛɛgã sã n ka reng n moone, la koɛɛg na n yii yɛ sã n ka sẽn tʋm a soaba nengẽ, wala sebr sõng sẽn togsde: «Ad-y b sẽn tʋm b rãmb tɩ b saa n togs Koe-noogã, ad-b nao be neere.» Da tẽ-y tɩ neba fãa n deeg Koe-nooga ye, t'a Izayi n yeele: «Ãnda n deeg d sẽn togs bũmb ningã?» Sɩd yaa wilgri n dengd taoore tɩ tẽeb yaool n wa la wilgra yita Krista gomnẽ. Bas-y tɩ m sok n gese, y tẽedame tɩ koɛɛga la b pa wʋme? Mooga tõr wʋma b rãamde la b gomda taa mooga yaanga. Bas-y tɩ m le sok n gese, y tẽedame t'a Israyɛl ka wʋm bɩ? Bãng-y t'a Moyiiz reng n togsame: «M na n kɩtame tɩ buud sẽn ka bu-sõng yamleoog yõk yã; m na kɩt tɩ y wa sãbs buud a ye, a sẽn ka bãng yam yĩnga.» A Izayi saag n le paasame: «Sẽn da ka baood-b maam, yãend-m lame, m lika m meng sẽn da ka sokd-b mam yelle.» Ad-a sẽn leok a Israyɛl poorẽ: «M tuda m nug beoog sẽn wẽege, m tud-a la tõatba la tʋb-pa-wʋmdba.» Dɩlla m sok n gese: Wẽnnaam yi-la b neba poorẽ bɩ? Ka boto ye. Mam meng ka Israyɛl ned laa, m ka a Abraam yageng laa, m ka rog a Bẽzamẽ buudẽ laa? Wẽnd ka tõe n yeel tɩ b yii buud ning b sẽn welg toor al pĩnda poorẽ ye. Bɩ y yĩma sẽn gʋls a Eli poorẽ, a sẽn waa n gomd woto ne Wẽnnaam n baood n na n paalg Israyɛl kamba: «Soaala, ad-y b kʋ-la y bãngdba, n sarm y maan-kuga; maam m ye n põse, tɩ b baas n dat n yãk m yõore!» Yaa bõe la Wẽnd leok-a? «M keesa m yĩnga neb tus a yopoe sẽn ka yĩgimd a Baal taoor ye.» Woto-me kell n kees rũnna la Wẽnd n welg-a toore ne b yamleoogo. La sã n yet ne b yamleoogo, ka yet tɩ tũu ne ninsaal tʋʋmd ye, ka rẽ b kõn gom yamleoog yell ye. D na n kʋʋga d koɛɛga wãn wãna? A Israyɛl sẽn bao bũmb ningã, a ka paam-a ne a toorẽ tʋʋm ye, tɩ Wẽnd sẽn welg b rãmb toora yaool n paam-a. Sẽn ket-bã, b basa b sũura tɩ kidbi; wala sẽn be sebr sõng pʋga: «Wẽnd kõ-b-la yam sẽn suusdi la nin sẽn ka ne, la tʋb sẽn ka wʋmde, n tãag rũnna.» A Daviid me ra yeela woto: «Kɩt-y tɩ b rɩɩb zĩig lebg b bẽdgo, n lebg b wĩir, n lebg kugr b sẽn na n lak n lʋɩ, tɩ rẽ yɩ b rolbo! Bɩ b nin kẽ kõaada tɩ b ra le tõog n yãe ye, kɩt-y tɩ b po-raoog zõond n ka le roog ye!» M le sok n gese: y tẽedame tɩ Zʋɩf rãmba lakame n na n lʋɩ lʋɩɩs meng bɩ? Ayoo! B lakr waa ne bu-zẽmba fãagre tɩ sũ-kiir na tũ rẽ n yõk-ba. B lakra sã n wa ne dũni manegre, la b sõora woogr sã n wa ne bu-zẽmba nafre, b zãng gill sã n lɛɛg n wa, yita wãna? Yaa ne yãmba, bu-zẽmba, la m togsda, m yaa yãmb tʋʋm-tʋmda, la m maanda m tʋʋmda neere, la rẽ yaa m sẽn dat tɩ m saam-biisa yãende n yik sũ-kiiri tɩ m paam n fãag kẽere. Wẽnd sẽn bas b rãmb kɛɛnga sã n wa ne dũni manegre, b sã n le bool-b sʋka na n yɩɩ bõe sã n ka kɩɩms vʋʋgre? Kood dẽeng zom sẽn yãk n kõ Wẽnd sã n ket n ya sõmbo, bura zãng na n yɩɩ sõngo. Tɩɩga yẽgend sã n ya sõngo, wila me yɩta sõmbo. Tɩ-sõnga wil sã n kʋʋse, tɩ fo sẽn ya tɩ zaal willã paam n sel b zugu n vʋʋg n paam sɩɩlem sõng n yũ, da wa nand f meng n yɩɩd wil sõnga meng ye. Bɩ f sã n pẽgd f menga, da yĩm tɩ ka foo n zãad yẽgendã, yaa yẽgenda n zãad foo. Fo na n yeelame: «B kɛɛ wila tɩ mam tõog n sel b zĩigẽ.» Yaa sɩda, yaa b sẽn ka tar tẽeba yĩng la b kʋʋs-ba, la yaa fo tẽeba yĩng la f keta. Ne rẽ fãa da maan wilg-m-meng ye, maan dabeem n yɩɩda. Wẽnd sã n kɩt tɩ b kʋʋs wil sẽn da be b zĩisẽ, fo me gũus tɩ b tõeeme n ka bas-f ye. Bãng Wẽnd toolem la b nimbãan-zoeere. B yɩɩ toaag sẽn lʋɩ-ba yĩnga, n ya nimbãan-zoet ne foo, f sã n kell n pa b nonglma pʋgẽ; ka rẽ fo me yaa will sẽn na n kʋʋg. Sẽn bas b rãmb kɛɛnga sã n yi b kɩɩsg pʋgẽ, b me na paam n le sel tɩɩg a to zug: Wẽnd tara pãng tɩ seka le sel b yɛsa. Ade, b sã n kɛɛg foo tɩ zaalg zugu, la bee n da ya f zĩiga, n tɩ sel foo tɩɩg sẽn tũus zugu, la yaool n ka be la f zĩigã, fo zɩ tɩ b na lebs tɩ-sõnga wil n sel b zĩigẽ! Bũmb n ket n nan ka puk d yĩnga la m pa rat n solg-y ye, m saam-biisi, tɩ y ra wa yet tɩ y sẽn mi wã sek-y lame ye; Israyɛl bogr kidba a sũuri al tɩ bu-zẽmba fãa wa sak tẽebo, t'a zãng-zãnga yaool n paam n põse, wala sẽn gʋlse: «Fãagda na n yii Siõ, a na n peka a Zakoob rẽgda fãa. La m sã n pek b yel-wẽna n sɛ, yaa zood la m na n yõg ne-ba.» Zʋɩf rãmba sã n kɩɩs Koe-noogã n lebg Wẽnd bɛɛba, tɩ yãmb yell tũ rẽ n manege, ad-y Wẽnd boollã yĩnga, la b ba rãmb yĩnga, b ket n yaa Wẽnd zo-rãmba. Wẽnd ka kõt n le reeg ye, Wẽnd ka boond n le yeel tɩ vẽ ye. Yãmb n yɩ wẽn-kɩɩsdb pĩnda tɩ Wẽnd yik rũnna n maan-y nimbãan-zoeere, Zʋɩf rãmba tõdgr yĩnga. Bãng-y tɩ yaa rẽnd me yĩnga la Zʋɩf rãmb me yik n lebg tõatba, n na n paam rũnna Wẽnd nimbãan-zoeerã. Wẽnd kẽesa ninsaalb buud fãa kɩɩsg pʋgẽ sẽn na n yɩlẽ n wilg b fãa b nimbãan-zoeere. Wẽnnaam, y arzɛka geels toɛ yã, y minim la y bãngr zulma! Ad-y ned ka tõe n bãng y sẽn pʋɩt y yɛla toto ye, ned ka tar y soy wã buk ye! Ãnda n zoe n tõog n bãng Soaala tagsgo, ãnda n paam n yɩ b sagenda? Ãnda n yɩ pipi n paam n kõ Wẽnde tɩ bãmb na n yaool n bao n lebse? Fãa yita bãmb nengẽ, bãmb n maan fãa, fãa yaa b soolem. Bɩ b paam pẽgre sẽn ka be sɛɛbo. Amina! Wẽnd sẽn ya nimbãan-zoeta yĩnga, m saam-biisi, m kota ned kam fãa t'a rɩka meng n kõ Wẽnde n lebg maoong vɩɩga, maoong sõmbo, maoong sẽn tat b yam: woto la y na n waoog Wẽnnaam ne waoogr akɩka. Da wẽneg-y zamaana rãmb ye; modg-y n paam yam paale n tedg zãnga n tõog n bãng Wẽnnaam daabo, n bãng sẽn ya neere, sẽn ya sõmbo, sẽn ka tar goaleng ba bilfu. M togsd-y la a yeyn-ye la y fãa gilli, ne Wẽnd sẽn maan-m nimbãan-zoeer ningã: ned ba a ye ra sak n pẽga meng tɩ loog ye. Ned kam fãa pa a zĩigẽ n zems tẽebã a sẽn paam Wẽnd nengẽ. Tõnd ne d tar yĩng a ye wã, d yĩnga wils yaa kʋʋngo, la wilg fãa le tara a tʋʋmde. Woto-me, tõnd ne d ya kʋʋngã, d naaga Krista n ya yĩng a ye; ned kam fãa yaa waa a to wilga. Yaa kũun toɛ-toɛ la d paam Wẽnd nengẽ, dɩlla bɩ d modg tɩ sã n ya bãngr kũun la d paam yã bɩ d tʋm bãngr tʋʋmde wala d tẽeba sẽn tõe tɛka. Sã n ya taab sõngre, bɩ d wɩng ne sõngre; sã n ya taab zãmsgo, bɩ d zãms-ba; sã n ya taab saglgo, bɩ d sagl. Sẽn kõt-a kõ n da geel ye; sẽn deeg-a kãsengo maan moadg, sẽn kũmda a taab nimbãaneg yõgem a noore. Modg-y tɩ belgr da zĩnd taab nonglma pʋgẽ ye, kisg-y wẽnga la tabend-y sẽn ya neer mepi! Modg-y n nong taab wa ba-biisi la ned kam fãa ning a to sʋka. Yɩ-y neb sẽn tʋmd n ka vʋʋsdẽ ye, neb sũur sẽn kɛɛd ne Soaala tũumde. Y sũ-nooga yi y saagra pʋgẽ, y namsga wa ne y raoodo; y pʋʋsga ra yãk wakat ye, nin-sõma wã yell gesg yɩ y tʋʋmd pakre, la sãamba fãa paam y gãag-sobendo. Sẽn namsd-b yãmbã, kos-y tɩ Wẽnd bark sig b zugu; yeel-y tɩ Wẽnd na manege, da yeel-y tɩ Wẽnd na sãam ye. Kɩdm-y sũ-noog ne ned ninga sẽn tar-a sũ-noogo; kiig-y nintãm ne sẽn yãbda. Bʋk-y y sũur ne neba fãa gilli, kisg-y zẽk-m-menga; bao-y sulg-m-meng rãmba; da yeel-y tɩ y bãngra sekame ye. Da maan-y wẽng n dol wẽng ye; bao-y neb fãa sẽn get wa bõn-sõng bala. Modg-y wa y sẽn tõe tɛka tɩ y zĩnd-n-taar yɩ noog ne ned kam fãa. Da kõ-y y meng bʋʋm ye, bas yã, m kom-sõma, tɩ b rɩ beem ne-yã, tɩ gʋlsa woto: Yaa maam n na n kao bʋʋdo, yaa maam n na n kõ rolbo. N yɩɩd rẽ, f bɛ sã n yãbd kom bɩ f kõ-a t'a rɩ, ko-yũud sã n tar-a bɩ f kõ-a t'a yũ. F maan dẽ, yaa yãnd la f ningd-a. Da bas tɩ wẽng tõog-f ye, la ning pãng n tõog wẽnga ne neer maanego. Ned kam fãa sak taoor dãmbã. Ned ka so a to, Wẽnd sã n ka kõ a soab tõog ye. Tõog buud fãa yita Wẽnnaam nengẽ. Ned ning fãa sẽn ka reegd a soaal noor, tõdgda Wẽnd noore la tõat fãa baooda a meng paalgre. Ad-y d sã n maand neere, d ka tog n zoe bʋ-kaoodba ye; sẽn zoet-a bʋ-kaood yaa sẽn maanda wẽnga; fo sã n ka rat n dig rabeem sẽn so-b fooma taoore, bɩ f maan neere n paam b pẽgre. Wẽnd datame tɩ ned sã n so a to bɩ a sõng-a ne neer maanego; f sã n maand wẽnga bɩ f maan dabeem; bãng tɩ sʋʋga sẽn be soaalba nugẽ ka zaalem yĩng ye; sʋʋga yaa sõng Wẽnd n kao bʋʋdo, n sɩbg bɛɛgd buud fãa. Ad-y noora ka reegd sɩbgr dabeem yĩng bala, reegd-a lame tɩ y sũurẽ wã, koɛɛg n zoe n leokd boto. M sok n gese, y sẽn yaood yõor yaoodã, ka y sẽn ne tɩ segdame sɩda? Rẽ me la Wẽnd yãk neb tʋʋmd kãng yĩnga. Kɩs-y ned kam fãa a sẽn sokd-y bũmb ninga: yõora yaood, sã n ya rẽ la a sokda, raag ligdi, sã n ya raag ligdi; zoe-y y sẽn tog n zoe a soaba, waoog-y y sẽn tog n waoog a soaba. Da rɩɩ-y ned ba a ye samde sã n ka nong taab samdã. Sẽn nong-a a to pidsa noora zãnga. Noor ning sẽn yet tɩ f ra yo ye, ra kʋ ye, da zu ye, da tʋlg f to bũmbu, la sẽn ket-ba fãa, kʋmsame n lebg woto: nong f to n wẽnd f menga. Sẽn nonga a to ka maand-a kegr ye. Taab nonglem pidsda noɛ a taaba fãa gilli. Y mii tõnd sẽn vɩ zamaan ning pʋgẽ. Ad-y gõeema nekr taame, fãagra pẽneg-d la marsã n yɩɩd d sẽn paam tẽeba wakato. Zĩig zʋʋgame. Beoog yaoome. D bas d likẽ tʋʋma la d yi vẽenemẽ ne d zab teedo. D tall d meng ne waoogr wa sẽn segd wĩndga. D da yɩ rɩ-rɩtb la kokoraad ye. D bas yoob la yaoolg buud fãa. D bas zab la sũ-kiiri. D yeelg Soaal a Zezi Krista wa fuugu la d da tags d yĩngã yelle n baood n na n pids a tʋls yooda ye. Da bas-y ned kɛɛnga, a tẽeb sẽn pa sɩd yĩng ye la gãneg-y y no-koɛɛma. Kẽer beeme n yet tɩ rɩɩb ka be bãmb sẽn kis ye, tɩ kẽer bee n yet tɩ bãmb a ka pãng rãmbã dɩta vãad bala. Sẽn dɩt-a ra sãbs sẽn ka rɩt-a ye. Sẽn ka rɩt-a me ra sãbs sẽn dɩt-a ye, tɩ Wẽnd ka reega a soab wẽng ye. Foom la a bõe tɩ f to sõgen sẽn maand pak-fo? A yɛs yĩngri bɩ a gãe tẽnga, dẽ paka a zu-soab bala. A pʋs n na n yalsa yĩngri tɩ Soaala pãng seka a yĩngr yalsgo. Yõaa soab pẽgda daar a ye n yɩɩd a to, yõaa soab nengẽ daar fãa zema a to, ned kam fãa maan wa a sũur koɛɛga sẽn yet t'a gãd bũmb ninga. Ned ninga sẽn welgd-a raar ne a to welgd-a-la Soaala yĩnga. Ned ninga sẽn dɩt-a, dɩta Soaala yĩnga n pẽgd Wẽnde. La ned ninga sẽn ka rɩt-a, yaa Soaala yĩng la a basd rɩɩbo la a pẽgda Wẽnde. Tõnd sʋka, ned ka be sẽn vɩ-a a meng yĩng ye la ned me ka be sẽn kiid-a a meng yĩng ye. D sã n vɩ d vɩɩ Soaala yĩnga, d sã n kiidẽ, d kiida Soaala yĩnga. D vɩ bɩ d kiida, Soaala n so-do. Krista kiime n le vʋʋge, n na n lebg sẽn ki-b la sẽn vɩ-b Soaala. Foo la a bõe n na n bʋ f to, foo la a bõe n na n sãbs f to? Wẽnd bal n na n kao d fãa bʋʋdo wala sẽn gʋlse: M wẽenda (yaa Soaala meng n gomde) tɩ rũmd buud fãa na n yĩgimda m taoore la zelemd buud fãa na n pẽg-m lame. Dat n yeelame tɩ bũmb ning sẽn ya d zugẽ yelle, yaa tõnd ned kam fãa n na n togs-a Wẽnde, d toore. D vẽ d taab bʋʋdo. D bãng bal tɩ d ka tõe n dɩgl bũmb d to taoore t'a wa lak n lʋɩ ye. M miime, la Soaala taoore m sũur pa kiuusd ye, m miime tɩ rɩɩb ka be n kis a meng yĩng ye, a kisa sẽn yet-a tɩ kisame wã yĩnga. Ade, fo sã n sãamd f to sũur dɩɩb poorẽ, fo ka le maand taab nonglem sẽn dat ye; da sak-y tɩ y sẽn gomd rɩɩb ninga yellã wa ne a kũum ye, tɩ Krista zoe n kila a yĩnga. Da bas-y tɩ b wa sãbs y zu-nooga sẽn kõ-y ye. Wẽnd Rĩunga ka rɩɩb la rãam yell ye, a yaa sõmblem, laafi ne sũ-noog sẽn paamd a Vʋʋsem Sõng nengẽ. Ned ninga sẽn baooda Krista woto, yẽ soab noogd-a Wẽnd sũuri la a paamda ninsaalb pẽgre. Woto wã bɩ d pʋg bũmb ning sẽn kõt laafi la sẽn paasd daoodo. Da saag n sãam Wẽnnaam tʋʋmd dɩɩb poorẽ ye. Dɩɩb ka be n ya yoog a meng yĩng ye, a sã ya yoogo yaa wala rɩ-rɩta tũu rɩɩbã n kʋɩɩb a taaba. Sẽn be neere, yaa bas nemdo, rãam la bũmb fãa sẽn wat ne f taab lʋɩɩse, sẽn komsd f taaba pãnga. Sõng n tall f tẽebã f sũurẽ la Wẽnd taoore. Pẽg-y ned ninga sẽn dengda n ges a tõeeme bɩ a ka tõe n yaool n sɩng bũmb maanego. La yell na pak ned ninga sẽn ges-a rɩɩbo wa ka rɩɩb a sẽn tõe n dɩ n baas n dɩt-a; wakat kãnga a ka rɩ ne pʋ-peelem ye, la bũmb ning fãa sẽn ka maan ne pʋ-peelem yaa yel-wẽnde. Yaa pakre ne tõnd a pãng rãmbã tɩ d sõng sẽn ka tar b tõnd pãngã; yaa pakr ne-do tɩ d bas d yamleoog maanego. Ned kam fãa modg n noog a to sũuri tɩ rẽ la neere la rẽ n paasd a raoodo. Krista ka pʋg sẽn noom-b ye, tɩ yaa woto la b gʋlsyã: «Sẽn tʋʋs-b yãmba long n tʋʋsa maam.» Sɩda, bũmb ning fãa sẽn zoe n gʋlse, b gʋlsa la tõnd vẽnegr yĩnga. Sebr sõng paasda tõnd daoodo la a maagda d sũuri la rẽ kɩtame tɩ d zĩ ne saagre. Tõe-m-meng soab Wẽndã la sẽn mi a ninsaal nintãm yẽesgã na sõng yãmb tɩ y sũk nonglem sũkr y taab yĩnga wa Krista sẽn maan d yĩnga. Woto y na tõog n pẽg Wẽnnaam, tõnd Soaal a Zezi Krista Ba, ne sũur a ye la noor a ye. Ning-y pãng n koll taab wala Krista sẽn koll-y, Wẽnnaam pẽgr yĩnga. M le yet-y lame, tɩ sẽn na n yɩlẽ tɩ Wẽnd pids b sẽn kãab d yaab rãmba, Krista gesa sẽn kẽ-b bãong yelle, al tɩ bu-zẽmba pẽgd b nimbãan-zoeere wala sẽn gʋls sebr pʋgẽ: «M na n pẽg-y la bu-zẽmba sʋka la m na n kilsa y yʋʋre.» D le karemda zĩig a to: «Bu-zẽmba, naag-y m neba n kɩdme.» Zĩig a to yɛsa: «Bu-zẽmba, pẽg-y Soaala la maan-y kibs b yĩnga.» T'a Izayi na n paas woto: «A na n waame, a Zese biiga na n waame n kẽes bu-zẽmba a soolmẽ la b fãa na n dɩka b yɛlã n bas ne bãmba.» D sẽn teeg Wẽnd ninga na pids yãmba, y tẽeba yĩnga, ne sũ-noog la laafi. Wẽnd na kɩt tɩ y saagra pids zãnga ne a Vʋʋsem Sõng pãnga. M mii vẽenega, m saam-biisi, tɩ y sũur pida ne raab sõma la y yam pida ne bãngre al tɩ y tõe n sagl y taaba. Baasgo m sã n gʋls yã al tɩ zĩis kẽer bɩ y tõe n yɛɛse, bãng-y tɩ yaa m sẽn dat n le nek y pʋtẽerã. M dat n le tẽeg y lame tɩ Wẽnd yeel-m lame tɩ m yɩ wa maan-kʋʋd bu-zẽmba sʋka, Wẽnd Koe-nooga maan-kʋʋda, n kɩt tɩ bu-zẽmba lebg kũuni, kũuni a Vʋʋsem Sõng sẽn maneg tɩ tat Wẽnd yam. Wẽnnaam sora tʋʋmd poorẽ, m tõe n zẽka m zugu, Krista maasem yĩnga. M kõn saag n gom bũmb a to yelle sã n ka Krista sẽn sõng-m tɩ m kẽes bu-zẽmba, tẽeba sor pʋgẽ, ne m goam la m tʋʋmde, ne wẽnd makr dãmba la bõn-bãna, ne a Vʋʋsem Sõng pãnga. Bãng-y tɩ bãmb maasem yĩnga, m saaga Zerizalɛɛm la Illiri zãnga, n moon Krista Koe-noogã. La ade, m maana gũusgu; m sẽn kẽ tẽns niynsi, yaa zĩig ning b sẽn dag n nan ka pʋd Krista yʋʋr tɩ m da pa rat n me zĩig ning neda to sẽn dag n zoe n sɩng meeb ye. M tʋlg n maana wa sẽn gʋls Sebr sõng pʋgẽ: B sẽn dag n zɩ n gom a soab yell ne b rãmbã na n yãend-a lame; neb niyns sẽn dag n zɩ n wʋm tɩ b gomd a yellã yam na n vẽnegame. Ad-y yaa m tʋʋma n kɩt tɩ m nan ka tõog n ta y nengẽ ye. La marsã m tẽedame tɩ m na yaa n tõoge. M sẽn dat n wa y sʋka raar yaa n vẽsgame; la kaalẽ, rũna-rũna, m ka le tar tʋʋmd ye. M tẽedame tɩ m na tũ y nengẽ m sã n wa rabd Ispaniya. Sɩda, m saagdame tɩ d na yãend taaba n dɩ sõs ne taaba sũ-noogo, la m na paam y sõngre n tõog n ta Ispaniya. Marsã m dabda Zerizalɛɛm n na n tɩ sõng m saam-biisã. Masedoan la Akayi rãmb n tẽega b naonga yelle. B sõnga Zerizalɛɛm dãmb ne yamleoogo, yaa sɩda, la mam yamẽ wã, b maana sẽn ya tɩlɛ ne-ba. Zerizalɛɛm sõnga bu-zẽmbã ne Soaala kũuni la yaa rẽ yĩng la m yet tɩ togame tɩ bu-zẽmba lebs-ba ne bãmb mens sẽn tar b nugẽ. Dɩlla yell kãnga sã n welg n sɛ, m sã n ta m toor n kɩs ligdã, m na tũ yãmb tẽnga n yaool n ta Ispaniya. Bãng-y tɩ m sã n poog y tẽngã, yaa Krista kũun buud fãa la m na n zã n wa kõ yã. M saam-biisi, bũmb la m na n kos-y tõnd Soaal a Zezi Krista yĩnga la a Vʋʋsem Sõng nonglem yĩnga. M na n kos-y lame tɩ y sã n modgd n pʋʋsd m yĩnga, bɩ y pʋʋs tɩ m põs wẽn-kɩɩsdba sẽn ket Zɩɩde tẽnga la m tõog n ta Zerizalɛɛm ne m kũuna n noog saam-biisa sũur be. Woto m na lɛɛg n wa y sʋk ne sũ-noogo la m vʋʋs ne laafi, Wẽnd maasem yĩnga. Laafi Naaba-Wẽnd zĩnd ne yã. Ami! M kotame tɩ y sõng m tão nongr a Febe; a bee Sẽnkre, n ya be Tigeng sõangd poaka. Krista yĩnga, reeg-y pʋg kãnga sãando wala sẽn segd ne nin-sõma. A sẽn tar bũmb ning fãa tʋʋmd tɩ y tõe n sõng-a bɩ y sõng-a ne. Bãng-y t'a kolla neere Krist neb wʋsgo, la mam menga. M Pʋʋs-y sõnga maam Krista tʋʋmda pʋgẽ, a Priska ne a Akilas. B baoome n na n fãag maam la kellẽ la bilf bal tɩ b fiuus b zutu. Ka maam m ye n pʋʋsd bark ye, Tigeng ning fãa sẽn vigl bu-zẽmba sʋka me naaga maam n pʋʋsdẽ. Pʋʋs-y neb niyns fãa sẽn tigimd bãmb zakẽ. Pʋʋs-y m zoa a Epenɛt: yẽ n yɩ pipi kũun Azi zamaana sẽn paam n kõ Krista. Pʋʋs-y pag a Mari, sẽn sak yaams wʋsgo yãmb yĩnga. Pʋʋs-y m saam-biis a Andronikus la a Zuniyas, sẽn naag-b maam bi-bees roogẽ, Ad-y yaa Krista tʋʋm-tʋmdb kãsense sẽn deng maam meng n kẽ Krista. Pʋʋs-y m sẽn nong a soab Krista maasmẽ, a Ampliyatus. Pʋʋs-y m sõangda, Krista tʋʋmda pʋgẽ, a Urbẽ la y naag m zoa a Stakis. Pʋʋs-y rao ning kaset sẽn ya vẽeneg t'a kẽe Krista, rao a Apɛll. Taas-y m pʋʋsgo a Aristobul zaka rãmb fãa. Pʋʋs-y m doagda, a Erodiyõ, n paas a Narsis zak rãmba sẽn kẽ-b Krista. Pʋʋs-y sẽn sak-b yaams wusgo Soaala yĩnga, a Trifɛn la a Trifoz. Pʋʋs-y m tão sõng a Persis: pʋg kãnga me saka yaams wʋsgo, Krista yĩnga. Pʋʋs-y Soaala zoa meng a Rufus, ne a ma wã sẽn ya mam me ma wã. Pʋʋs-y nin-bãmba: a Asẽnkrit, a Flegõ, a Ermɛs, a Patrobas, a Ermas la saam-biisa sẽn be-b ne bãmba. Pʋʋs-y nin-bãmba me: a Filolog ne a Zuli, a Nere ne a tão, a Olimpas la Krist neb niyns fãa sẽn be-b ne bãmba. Ned kam fãa pʋʋs a to ne pʋʋs sõngo. Krista a Zezi Tigenga neb fãa toond-y pʋʋsem. M saam-biisi, m kot-y lame tɩ y maan gũusgu ne neb niyns sẽn wat-b ne welg taaba la ne zãmsg sẽn ya toor ne yãmb sẽn paam a soabã. Neba woto buud ka pʋgd Krista ye, b pʋga la b pʋgda. B noor gomda noogo n belgdẽ la b tuut yam sẽn nan ka puk tɩ sek rãmbã. D wʋmdame tɩ b gomd zĩis fãa tɩ y yaa neb sẽn tũud neere la rẽ noogda m sũuri: m datame tɩ y yɩ sɩlem dãmba ne neer maanego la ka yõod dãmba ne wẽng pʋgbo. Laafi Wẽnda na kõ y nao pãnga tɩ y tab Sʋtãan n bedse. Wẽnd na kɩt tɩ Krista sik b kũuna y zutu. M sõangd a Timote n toond-y pʋʋsem; n paas m doagdba a Lusiyus, a Zazõ la a Sozipatros. Maam a Tersiyus, sẽn gʋlsa sebrã n pʋʋsd-y ne Soaala pʋʋsem. A Gayus n toond-y pʋʋsem: yaa maam ne Tigenga fãa gãag-soaba. A Erast n pʋʋsde: yẽ la tẽnga fãa arzɛka gũuda; d yao a Kuwartus me toond-y pʋʋsem. [ Tõnd Soaal a Zezi Krista yel-sõmda pa ne y fãa gilli. Amina!] Bɩ Wẽnd soog pẽgre tɩ bãmb n tõe n paas y tẽeba pãnga. La rẽnd me la m wilg yã ne a Zesi Krista Koe-nooga moonego. Koe-nooga puka bũmb sẽn da solge, bũmb sẽn da solg yʋʋm ka tɛka. Rũnna la ka sɩng kõn zĩnd sɛɛb Wẽnda lak b Sebr sõngo n wilg b sẽn da sede; la b maana boto tɩ Adem biis paam tẽeba so-tɩrg n dɩke. A Zezi Krista maasem yĩnga, bɩ bãngr pid bãngr soab Wẽnda paam pẽgr yʋʋm tõt sɛɛbo! Amina! Maam, a Pol, Wẽnd sẽn bool a soab ne b raab t'a wa lebg a Zezi Krista Tʋʋm-tʋmdba, maam ne m saam-biig a Sostɛn, tõnd n pʋʋsd Wẽnd Tigungu sẽn vigl Korẽnt. Tõnd n le pʋʋsd sẽn paamba a Zezi Krista sõmblem, sõmblem ning b sẽn kõt neb niyns fãa sẽn sẽeg b mooga tõre n waoogd bãmb sẽn ya tõnd Soaala la bãmb me Soaala. Bɩ Wẽnnaam d Ba la d Soaal a Zezi Krista bark la laafi sig y zutu! Krista a Zezi pidsa yãmb ne Wẽnd kũuni tɩ m ka vʋʋsd ne bark pʋʋsg ye. Yaa wakat buud fãa la m pʋʋsd Wẽnd bark y yĩnga tɩ b tũnuga a Zezi Krista n kõ-y kũuni. Sɩda bãmb maasem yĩnga, y paama kũun buud fãa: goam wɩlengo la bãngr kũuni. La rẽ tũu y sẽn gãd kẽnkẽ Krista sẽn kõ-y kaset ningã. Yaa rẽ me yĩng la y zĩ n gũud d Soaal a Zezi Krista Ypkri tɩ bũmb ba a ye ka na n paoog yã. Bãmb n na n sõng-y ne raoodo n tãag raarã, Krista a Zezi Waoonga rarã tɩ b ra yãe kegr buud y nengẽ ye. Wẽnd ning sẽn bool-b yãmb tɩ y wa rɩ b Biiga la tõnd Soaal a Zezi Krista yõodo, kõn pa n ka pids b kãabg ye. M pẽdgd-y lame, m saam-biisi, tõnd Soaal a Zezi Krista yʋʋr yĩnga, tɩ y zems y moora ne taaba tɩ welgr da kẽ y sʋk ye. Sog-y taaba n vɩɩnd yam yɛnga, la tagsg yɛnga. Ade, ya a Kloe zaka rãmb n togs maam tɩ yãmb sʋka lebga zaba, m saam-biisi. M wʋmda ned kam fãa sẽn gomd ka la ka: «Mam bee a Kefas poorẽ.» «Mam bee a Apolos poorẽ.» «Mam bee Krista poorẽ.» Krista welga sags kʋʋng laa? Yaa a Pol n ki pik zug yãmb yĩng laa? Bɩ yaa Pol yʋʋr yĩng la b so yãmba? M pʋʋsda Wẽnd bark m sẽn ka kõ yãmb ned ba a ye soobã, sã n ka a Krispus la a Gayus. Wotoone, ned ba a ye, yãmb sʋka, ka tõe n yeel t'a reega soob m yʋʋr yĩng ye. M tẽegame tɩ m sẽn le kõ soobo, yaa Stefanas ne a zak rãmba la sã n ka bãmb bala m ka le ne ned a to ye. Krista pa tʋm maam tɩ m wa so neb ye, b yeel-m lame tɩ m moon Koe-noogo, la m bas ninsaal goam minim sẽn tũud soy niynsã, n pa tõe n puk ninsaalba yam tɩ wʋm Krista kũum pika zug võorã. Moon n wilg tɩ tõnd fãagr yĩnga, Krista kii pik zugu, wẽnda gãeemdo, sẽn ka na n paam-b fãagra yĩnga. Sẽn paam-b fãagra yĩnga, tõnd fãa yĩnga, a yaa Wẽnd pãng kilsgu. Yaa rẽ la b gʋlsyã: «M na n wãa sɩlma rãmb sɩlem, la yam dãmba yam, m na n bas-b-la kɛɛnga.» Yam pidung soab bɛɛ, sẽn gãe ne bãngr soab bɛɛ, zamaana gom minim soab bɛɛ? Wẽnd pa kɩt tɩ zamaana Sɩlma lebg gãeemdo? Zamaana ne a sɩlma sẽn ka tõog n bãng Wẽnd ne Wẽnd yam pidungã, yɩɩ ne goama, pika goam sẽn wẽnd gãeemdã, la Wẽnd tʋlg n fãag tẽedbã. Ade, Zʋɩf rãmb bolgda wẽnd makre tɩ bu-zẽmba bolgd bãngr zulunga. Sã n ya tõndo, yaa Krista sẽn ka pika la d moonda; la Zʋɩf rãmba yĩnga, pika yaa wa kugr sẽn be sor zugu n lubd kẽndba, n ya wa gãeemdo bu-zẽmba yamẽ. La Wẽnd sẽn bool b rãmba nengẽ, Zʋɩf bɩ bu-zẽna, yaa Krista la b moonda, Krista sẽn ya Wẽnd pãnga la Wẽnd yam pidungã. Sẽn wẽnd gãeemd Wẽnd nengẽ yaa sɩlem sẽn lubd ninsaal sɩlem, sẽn wẽnd ka yõod Wẽnd nengẽ pãng yɩɩda ninsaala dẽnna. Dẽnd yĩnga, m saam-biisi, tẽeg-y tɩ y paama Wẽnd boolgo. Zamaana pʋga, sɩlem dãmb paooda, pãn-dãmb paooda, sẽn paam-b n ya ned zãng paooda. Wẽnd yãka zamaana yam-kaoolg wa fãa-fãa n na n ning sɩlem dãmb yãnde; Wẽnd yãka zamaana koms rãmb wa fãa-fãa n na n lub pãng rãmba. Ned ning sẽn be zamaana tɩ b ka pẽgd a ba, n ka pẽgd a ma, ned sẽn tog ne sãbsgo bala, nin-kãng la Wẽnd yãk yã; Wẽnd tũusa zaalem n na n menes sẽn be. La woto ned kõn zĩndi n tõe n tãoos raood Wẽnd taoor ye. Bãmb maasem yĩng la d kẽ Krista a Zezi la bãmb n lebg tõnd yĩnga, sɩlem sẽn yit Wẽnd nengẽ, n manegd d yelle ne Wẽnde, n kõt d sõmblem, la b fãagd tõndo. Yɩɩ woto la sẽn gʋlsa pids yã: «Sẽn baood-a pẽgr bɩ a bao-a Wẽnd nengẽ.» M sẽn wa y nengẽ, m saam-biisi, m pa wa n na puk sẽn solg Wẽnd nengẽ ye, m pa wa ne goam minim, m pa wa ne sɩlem baaf ye. Ayo! M pa tʋlg n bãng bũmb a to yãmb sʋka, sã n ka a Zezi Krista la Zezi Krista ning sẽn kaa pikã. M meng wa-la y nengẽ wa koamsa, wa rabɛɛma, wa ned sẽn digda. M goama la m moonegã ka yɩ sɩlem dãmba rẽnd sẽn vẽnegd yam ye. A yɩɩ a Vʋʋsem Sõng kaseto la b pãnga, la rẽ yaa sẽn na n yɩlẽ tɩ y tẽeba da rel ninsaal sɩlem, a rel Wẽnd la b pãnga. Tõnd sẽn wʋm-b neerã, tõnd me goama yaa sɩlem la d sɩlma ka zamaana rẽnda, ka zamaana na-biisa rẽnd ye, tɩ fãa na n loogame. D sẽn gomd a soab yellã, yaa Wẽnd bãngr pidungã, yaa bũmb sẽn yɩɩd-do, bũmb sẽn solg ninsaalba, yaa Wẽnd sẽn tũ a soaba n kãab tõnd ziiri tɩ dũni wã nan ka naana. La tẽng zug pãn-dãmba zɩ n paam a taare — sɩda, a sã n da yɩẽ la b pʋɩɩre, b kõn kaẽ pika zugu Ziira soab meng ye — la wala sẽn gʋls Sebr pʋgẽ, tõnd togsda ninsaal nif sẽn zɩɩ n yãende, t'a tʋbr zɩ n wʋme, t'a sũur nan ka reege, Wẽnd sẽn segl sẽn nong-b bãmba fãa yĩnga. Yaa tõnd la Wẽnd tũ a Vʋʋsem Sõng vẽnegre n wilgi, la sɩda, a Vʋʋsem Sõng vɛɛsda fãa n tãag sẽn zulem Wẽnnẽ. Ãnd n be ninsaalb sʋka n mi ninsaal yalẽ tɩ ka tũ ne yam ninga ninsaal sẽn tarã? Wot-ome ned ka mi sẽn solg Wẽnd nengẽ sã n ka Wẽnd Vʋʋsem. Ka zamaana rãmb yam la d paam ye, yaa Wẽnd Vʋʋsem. La rẽ me yĩng la d tõe n sõdg kũun niyns fãa Soaala sẽn kõ tõndo. La d sã n gomd b yelle, ka ne goam biis d sẽn zãms ninsaal nengẽ ye, yaa ne Wẽnd Vʋʋsem tɩ bãmb n tar yĩngr goam biisi n na n puk yĩngr yɛla. Ned ning sẽn tara tẽng zug yama ka reegd sẽn yita Vʋʋsem Sõng nengẽ ye: dẽ zʋʋga a yam t'a ka tõe n deeg ye. Bũmba sẽn yɩɩd ninsaal yama, dẽnd a paam Wẽnd dẽnna n tõog n bãng b sẽn yala. Sẽn tar-a yam sẽn zʋʋg tẽng zug rẽnna, tõe n goma bũmb fãa yelle tɩ b pa yãend kegr ye. Ãnda n bãng Wẽnd tagsg n na n sagl-ba? Tõnd yẽ tar-a lame, tõnd tara a Zezi tagsgã. Sã n ya ne maam, m ka tõog n gom ne yã wa neb sẽn tar yam sẽn zʋʋg tẽng zug rẽnna ye, m goma ne yãmb wa neb sẽn tar tẽng zug yama bala, m goma ne-y, wa Krista kom peelse. Yaa bĩisim la m kõ-y pĩnd tɩ y yũ, ka rɩ taok ye tɩ y ra nan ka tõe n deeg sẽn tagem ye. La ne marsã menga y ket n ka tõe n deeg-a ye, tɩ y yama ket n yaa tẽng zug rẽnna. Sũ-kiir la zab sẽn kẽ y sʋka, ka y zʋga sẽn ket n yaa ninsaal zʋga laa? Y manesma fãa ka ket n ya ninsaal dẽnd laa? Y nin-yend sã n gomda: «Mam bela a Pol poorẽ,» tɩ ned a to yetẽ: «Mam yẽ bee a Apolos poorẽ,» ka ninsaalb manesem la y tũuda? A Apolos yaa bõe, a Pol me yaa bõe? Ka neb sẽn sõng yãmb tɩ y paam tẽeba laa? La ned kam fãa pa tʋm wa Wẽnd sẽn kõ-a pãnga laa? Tɩɩga la mam sel yã, t'a Apolos zãgs-a koom la ka yɩ Wẽnd n kõ-a bɩʋʋng laa? Woto sẽn send-a wã ka fɩ, sẽn zãgsd-a wã ka fɩ, sẽn ya-a bũmbu, yaa sẽn kõta bɩʋʋngã: Wẽnnaam. Sẽn send-a la sẽn zãgsd-a koom yõod zema taaba; ned kam fãa reegda a rolbo, wala a tʋʋmda sẽn yɩ a soaba. Tõnd la sẽn sõngd-b Wẽnd n tʋmnẽ, yãmb la Wẽnd pʋʋgo, yãmb la b roogo b sẽn me. M tũu Wẽnd sẽn kõ-m kũun ningã n sɩng roogã wa tãm-met-mita. Ned a to n na n wa me n paase, la yaa pakr tɩ ned kam fãa maan gũusg ne a sẽn met to-to. Sã n ya rooga sɩngre, d ka tõe n sɩnga ne Kugr a to tɩ ka sẽn zoe n dɩgl a soaba, a Zezi Krista. Kug kãng zug marsã ned sã n wa rogl sãnem, bɩ wanzurfu, bɩ kug nɛɛba, bɩ raado, bɩ kãnkẽ bɩ moodo, a soab tʋʋmda na puki; Raara-raare a na vẽnege: Bugum n na n vẽneg yɛlã, bugum n na n wilg ned kam fãa tʋʋmd sõmblem. Sẽn dogl bũmb ninga sã n ka rɩ bugum, tʋʋm-tʋmda reegda rolbo; Bugum sã n dɩ, rolb me sɛ yã. Tʋʋmda soab na põse la na yɩ wala a tũu bugmẽ n looge. Y ka mi tɩ y yaa Wẽnnaam doogo, t'a Vʋʋsem Sõng be y pʋsẽ laa? Sẽn wãad-a Wẽnd doogo, Wẽnd me na n wãa a soaba; Wẽnnaam dooga yaa bõn-sõngo la yaool n yaa yãmb la ro-kãnga. Bɩ ned da belg a meng ye! Ned sã n be yãmb sʋka n tẽed t'a yaa sɩlem soaba wa zamaana sẽn dat sɩlem ninga, bɩ a lebg gãeenga t'a na paam sɩlem. Wẽnd nifẽ, zamaana sɩlem yaa gãeemdo; dẽ me yĩng la b gʋls woto Sebra pʋga: «Yaa bãmb n leebd sɩlem dãmba n lubd b sɩlmẽ.» Ad sẽn le gʋls zĩig a to: «Wẽnd mii sɩlem dãmba tagsgo la b neeme tɩ yaa yaoolgo.» Dẽn yĩngã, ned da bao a pẽgr ninsaalb nengẽ ye, tɩ bũmba fãa yãmb n so, a Pol woo, a Apolos, a Kefas, zamaana, vɩɩm bɩ kũum, dũnna bɩ beoogo, fãa yãmb n so; la Krista n so yãmba, tɩ Wẽnd me so Krista. Togame tɩ neba ges-do wa Krista tʋʋm-tʋmdba la Wẽnd laog ning sẽn solga wã pʋɩtba. La bõe sẽ la b kot pʋɩta sã ka a ra zãmb a zu-soaba. Sã n ya maam, m toog ka ne yãmb bʋʋdo bɩ ne ninsaal a to rẽnd ye; yɩɩd rẽ, m ka kaood m meng bʋʋd ye. Yaa sɩda, m pa maan yelle n zĩi n bʋʋd ne m meng ye la ka rẽ n ya kaset tɩ m yell manega ne Wẽnd ye. M kaset soab yaa Soaala bala. Woto wã, da yãg-y ne bʋʋd ye. Bas-y tɩ Soaala wa. Bãmb n na n vẽneg lika zãnga la b puk bũmb ning fãa ninsaal sẽn sed a sũurẽ. Wakat kãng la ned kam fãa na n deeg Wẽnnaam nengẽ, pẽgr ning a sẽn tog ne. M saam-biisi, yaa yãmb yĩng la m dɩk maam ne a Apolos makre; m tʋlgame tɩ y ges tõndo n wʋm yelbũnd kãnga võore: Makr sẽn ya mak faoogo la sẽn ka yiis Sebr sõng pʋgẽ. M dɩka maam ne a Apolos makrã tɩ y ra wa wuk ne nagre n kẽ nin-yend n bas a to ye. Ãnda n tõe n welg foo ne f taaba? Bõe la f tar tɩ b ka kõ-fo? La sã n ya ned n kõ foo, bõe yĩng tɩ f pẽgd f meng wa ka ned n kõ foo? Yãmb yaa neb sẽn zoe n tɩge, sẽn zoe n lebg arzɛk rãmba; y zoe n lebga dĩm dãmb tɩ ka tũ ne tõnd tʋʋmde. D zug kõn yɩẽ noogo y sã sɩd lebgẽ la rĩm dãmba, tɩ d naag-y n dɩtẽ naam? La sã n ya ne mam tagsgo, tõnd, Krista Tʋʋm-tʋmdbã, tõnd n zãr ne naam; b zĩndga tõnd poorẽ zĩigã, wa b sẽn paalg b rãmb kũum bʋʋdo; tõnd n lebg bɛɛb laad dũniya zĩig zãnga, malɛk rãmb la ninsaalb nifẽ. Tõnd lebga wa gãeemse, Krista yĩnga, tɩ yãmb ket n zĩ ne y yẽesem, Krista maasmẽ. Tõnd koms n dɩgame tɩ yãmb wɩɩd ne pãnga. Yãmb gãee ne waoore tɩ sãbsgo ya tõnd pʋɩɩre. Ba rũnda menga, d tara kom la ko-yũudu la d zĩi d bɩlgemde; ned pa get d yelle la d sẽega mooga zãnga. D sɛla d pãng ne d nus tʋʋma. B sẽn tar-d tʋʋre, tõnd tara pẽgre, b sẽn tar-d namsgo, tõnd sakdame; b sẽn wɩt-do, tõnd bas n mi-la d taab nintãm yẽesgo. Tõnd lebga wa dũni wã tãmpʋʋre, wala dũni sagdo n tãag marsã. M ka gʋlsd woto n dat n ning y yãnd ye, m datame bal n sagl yã tɩ m nong-y la wʋsgo. Ba y ya karen-biis sẽn tar neb ka tɛk sẽn get y yelle, Krista tũudma pʋgẽ, bãng-y tɩ y ka tar ba rãmb kʋʋng ye. Yaa maam bal n dog-y Krista buudẽ ne Koe-nooga moonego. Dẽ la m kot-y tɩ y wẽneg maam. La yaa rẽ me yĩng la m tʋm a Timote y nengẽ: a yaa m bi-nongre la a pelga a pʋg ne Krista tũudem. A na tẽeg-y m sẽn yals bũmb ninga Krista tũudma poorẽ, la m sẽn zãmsd Tigeng kamba fãa. Kẽer tẽeme tɩ m ka na n wa y nengẽ n yik n tãoosd daoodo. Yaool n ka na n le kaoos tɩ m ta y nengẽ, Wẽnd sã n sake. Wakat kãng la m bãngd b tɩtaama sã n yita b pãngẽ bɩ sã n teka noor goam bala. Wẽnd Rĩunga ka goam bala, a naaga ne Wẽnd pãng tʋʋma. Bõe la y nonga? M wa y nengẽ ne sãbse bɩ m wa ne nonglem la sũ-maasem? D wʋmdame tɩ yoob goam bal n gomd yãmb sʋka la yoob buud meng sẽn ka yãet bu-zẽmba nengẽ; b gomdame tɩ yãmb nin-yend n tol n vɩ ne a ba paga. Bõe tɩ y ket n wukd ne tɩtaam? Bõe tɩ y ka kelem kʋʋre la y kɩtẽ tɩ b yiis y sʋka, tʋʋm dẽgd a woto soaba? Ade, m ka be y sʋk ne m yĩnga ye; m bee ne m yam la m zoe n kaoo yell a woto soab bʋʋdo wa m beẽ la y sʋka ne m yĩngã. Togame tɩ Soaala Zezi yʋʋr yĩnga yãmb ne maam, tɩ m bee y sʋk ne m yama, ba sã n ka ne m yĩngã, togame tɩ d naag taab ne d Soaala Zezi pãnga, n bas nin-kãnga ne Sʋtãan t'a sãam a yĩngã, t'a sɩɩga wa paam fãagre, Soaala raare. Y zẽk-m-menga ka be zĩig ye! Y ka mi tɩ rabɩll bilfr bal tõeeme tɩ zoma fãa wuki? Menes-y y rabɩll kʋdgã n lebg zom paalga, n tõog n yɩ bur sẽn ka lob bɩlle. Bãng-y tɩ Krista, tõnd Pak, kʋʋme. Bɩ d kɩdem kibsa sũ-noogo la ra yɩ ne bur sẽn lob bɩll kʋdgã, ra yɩ ne d wẽnema la d pʋ-tooga rabɩlle, d kɩdem ne bur sẽn lob pʋ-peelem la sõmblem rabɩlle. M sẽn yeel-y m sebra pʋgẽ tɩ y ra maan zĩnd-n-taar ne yoaadba, ad-y m da ka gomd dũni wã yoaadba ye, m ka naagd raab waglã la fãadba ye, m ka naagd sẽn pʋʋsdb wẽn-faad ye. Sã n yaẽ la boto, yaẽ la tɩlɛ tɩ y fãa yiẽ dũniya. M yeel-y lame bal tɩ y ra saag n maan zĩnd-n-taare ne ned sẽn yet t'a yaa yãmb saam-biiga a tẽeba pʋgẽ, n yaool n ya yoaada, yão-be-neda, wẽn-faad waoogda, n nong a taab paoogre, n woond arzɛgs n samdẽ. M yeelame menga tɩ y ra sak tɩ ned a woto yɩ y rɩt-n-taag ye. Sẽn ka lagem-b tõnd ne tẽebo n yaa d saam-biisã, m yɩta wãn n kaood bãmb bʋʋdo? Ka sẽn be-b Tigenga pʋg bʋʋd la y bʋʋd laa? Yɩng rãmbã, Wẽnd n kaood bãmb bʋʋdo. Wẽng ning sẽn be yãmb sʋka la y tog n menese. Zabr sã n yik yãmb ne taab sʋka, bõe tɩ y boond taab bʋʋd bu-zẽmba taoore, n ka na n kẽng Wẽnd kamba taoore? Bɩ y yĩmame tɩ yaa bãmb n na n kao dũni wã bʋʋdo? La sã n ya yãmb n na n kao dũni bʋʋdo, bõe tɩ y maand wa y ka tõe n bʋ yell faadã? Y ka mi tɩ ba malɛgsã, tõnd n na n bʋ-b laa? Tɩ b pa gomd vɩɩm kãnga yɛlã! Y sã n tar no-koɛɛm ne taab tẽng zug yɛla poorẽ, bõe yɩng la y paasdba na n yɩ Tigengu sẽn ka pẽgd b rãmba? Ad-y m zoe n ningd-y la yãnde m sã n sok ned sã n ka be y sʋka n tar yẽesem n tõe n welg y yɛla, tɩ y tat y saam-biis n dabd bʋʋd bu-zẽmba taoore! Sɩd me, y sẽn tar bʋʋd ne taaba zoe n yaa y kongr kaseto. Y sẽn sakd n deeg kegr ka são? Y sẽn basd tɩ b fã-y ka são? La ayɛy! Ka woto la y maand ye; yãmb n lɛɛg n maand y taab kɛga la y fãad-ba, la yaool n yaa y saam-biisi! Y zɩ tɩ sẽn maand-b kɛg ka tar pʋɩɩr Wẽnd Rĩung pʋgẽ laa? Da belg-y y meng ye: yoaadba, sẽn waoogd-b bõn-naandse, dataase, sẽn nong-b wẽnga, sẽn maand-b wɩɩbdo, wagdba, dat-wʋsg-rãmba, dã-yũud bɛda, sẽn paoogd-b taaba, fãadba, bãmb ned ba a ye kõn paam Arzãn Rĩung ye. La ka y zãng me, yãmb wʋsg ra yaa boto. Marsã y pekame, y tara sõmblem, y paama fãagre, Soaal a Zezi Krista la d Wẽnnaama Vʋʋsem pãng yĩnga. Neb kẽer n gomda: «M tõe n maana m sẽn dat fãa.» La m na leoke tɩ ka m sẽn tõe n maan fãa n ya yõod ne m ye. M tõe n maana fãa la m kõn saag n lebg m manesem yem-daoog ye. Dɩɩb bee pʋg yĩnga, tɩ pʋg me be rɩɩb yĩnga la Wẽnd n na n sɛɛs b yiiba fãa. Yĩnga ka be yoob yĩng ye; yĩnga yaa Soaalã n so, la yĩnga me rɩta Soaala yõodo. Wẽnd sẽn vʋʋg Krista na n vʋʋga tõnd me ne b pãngã. Y zɩ tɩ y yĩnsa yaa Krista yĩnga wilsi? La maanda a wãna tɩ Krista yĩnga n wa lebg woto n ka bak ne pʋg-yoodr yĩnga? Dẽ ka tõe ye. Y zɩ tɩ ned ning sẽn lagemd ne pʋg-yoodre lebgda yĩng a ye ne a? Woto la gʋls yã: B yiiba na n lebga yĩng a ye. Sã n ya sẽn lagma ne Krista, yẽ soab me lebga yam a ye ne Bãmba. Zoe-y yoobo! Yɛl a taaba ninsaal sẽn maand pa sog ne a yĩng ye la ned ninga sẽn maanda yoob maanda wẽng ne a yĩnga. Sãnd y miime tɩ y yĩnga yaa a Vʋʋsem Sõng roogo? B bee ne yãmb la Wẽnd n kõ-b yãmba. Y zɩ tɩ y ka so y menga? Ad-y yaa ligd la b kɩs n deeg yã! Modg-y tɩ y yĩnga pẽg Wẽnde. Sebr ning y sẽn gʋlsã la m na n ges marsã. La y yeta y sebra pʋgẽ tɩ yaa sõmbo rao ne pag sã n zãr taaba. La sẽn na n yɩlẽ tɩ y põs ne yɛl kɛga, bɩ rao tar paga, tɩ pag me tar sɩda. Rao sak a paga tɩ paga me sak a sɩda. Paga ka so a yĩng ye, yaa sɩdã n so. Botome raoa ka so a yĩnga, yaa pagã n so. Da zãgs-y taab ye, sã n ka y seda rẽ, n na n maan pʋʋsgo. La rẽnd poore, bɩ y pa ne taaba tɩ Sʋtãan da wa bẽd y ka tõe y mensã, n kʋɩɩb-y ye. M sẽn gom marsa wã yaa yãmb sẽn tõe bũmb ningã, la ka pakr ye. M tʋllẽ lame tɩ y fãa yɩẽ wa maam; la m miime tɩ ned kam fãa paamda Wẽnd nengẽ kũun sẽn tog ne-a: yãoo soab wã, yãoo soab woto. Neb niyns sẽn ka kẽ-b kãadem la pʋg-kõapa, m yet-b lame tɩ b sã n pa wa maam, yaa neere. La b sã n ka tõe b mense, bɩ b kẽ kãadem tɩ rẽ n são bugum sẽn dɩt-b. Sã n ya kãadbã, ad noore, la ka mam noore ye, yaa Soaala rẽnna: bɩ pag ra welg ne a sɩd ye, -la-la welgr sã n kẽ sʋka, a ra le rɩk sɩda; ka rẽnn bɩ a leb a sɩd kʋdga nengẽ tɩ b le zems taaba. — Daoã me da yiis a pag ye. Yɛla taab n kete, la ka Soaala n gomd ye, yaa maam: saam-biig sã n tar paga sẽn nan ka tar tẽebo la sẽn sak n na n zĩnd ne-a, bɩ a ra yiis-a ye. Pag me sã n tara sɩda sẽn nan ka tar tẽebo la sẽn sakd n na n zĩnd ne-a, a ra bas-a ye. Sɩda sẽn nan ka paam tẽebã sõmblem na n yi-la a paga nengẽ. Botome pag ning sẽn nan ka paam-a tẽebã sõmblem na n yi-la a sɩda nengẽ. Sã n da kaẽ boto, y kamba yaẽ la kom-dẽgdo la Wẽnd bark yaool n sig-b lame. Ned ninga sẽn ka paam-a tẽebã sã n dat n loog bɩ a looge: sã n ya woto saam-biiga sẽn tẽedã yi-la a loɛɛgẽ. Wẽnd bool-y lame tɩ y vɩɩnd laafi vɩɩm. Paga, f mi-la f na fãag f sɩda? Sɩda, f mi-la f na fãag f paga? Sẽn paase, yaa ned kam fãa kell n vɩɩnd wa Wẽnd boolla sẽn mik-a zĩig ninga. Yaa woto la m zãmsd saam-biisa fãa Tigeng pʋgẽ. Wẽnd boolla mik-f lame tɩ f ya zũnga, pa zũnga; boolla mik-f lame tɩ f ka kẽ bãongo, bas bãong kõom. Kẽe bãong yaa zaalem, ka kẽ bãong me yaa zaalem; sẽn pak yaa Wẽnnaam noya reegre. Bɩ ned kam fãa pa Wẽnd boolla sẽn tuk-a zĩig ninga. Boolga wakat tɩ f ra yaa yamba, bɩ rẽ ra lebg f zu-loɛɛg ye. F sã n tõe n lebg burkĩnd me bɩ f bao n dɩ f yembda yõodo. Ned ninga sẽn da yaa yamb a boolg wakata bãng t'a lebga Soaala burkĩna La sẽn da yaa burkĩna a boolga wakat lebga Krista yamba. La sɩda, b raa yãmba! Da leb-y ninsaalb yembdẽ ye. Bɩ ned kam fãa pa Wẽnd taoore wala Wẽnd boolla sẽn tuk-a. Sã n ya kom-pugli sẽn nan ka kẽb kãadma poorẽ, m ka paam Soaala noor ye, m togsda m sẽn tagsde, wala Soaala nimbãan-zoeer sẽn sig a soaba t'a goam sek kelgre la reegre. M tagsdame tɩ ned sã n pa wa m sẽn wilgã n sãoẽ, d sã n get d rũnna-rũnna pɛtã. F kẽe kãadem ne paga, da bao welgr ye. F ka kẽ kãadem ne-a, ra bao kãadem ye. La f sã n baood kãadem bɩ f ra tẽ tɩ f maana wẽng ye. La bi-pugl me sã n kẽ kãadem, a ka maand yel-wẽnd ye. Ya b sẽn na n yãe toog b yĩngẽ wã la m datẽ tɩ b tɩlgẽ dẽ. Maam n yet yã, m saam-biisi: wakata ka zɛɛd ye. Sẽn tar-b pagb vɩɩnd wala b sã n da ka tarẽ ye. Sẽn daagd-b nintãm wala b ka yãbd ye; sẽn langd-b sũ-noogo wala b ka kɩdemd ye; sẽn maand-b leebgo wa b pa tar fɩ ye; sẽn dɩt-b zamaana yõodo wala b pa rɩt-a meng ye, tɩ y mi tɩ zamaana neng ka na n zɛ teoong ye. M datẽ lame tɩ y zãrẽ ne yɩɩr buud fãa. Rao ning sẽn ka kẽ kãadem yaa Soaala yɛl la a lʋɩɩsd taoore, n gẽesd a sẽn na n yɩlẽ n ta b yam. Sẽn kẽ-a kãadem sẽn lʋɩɩsd taoore yaa dũni wã yɛla, yaa a sẽn na n yɩlẽ n ta a pag yam, la ad-a sẽn pʋɩ a yiibu. Pag sẽn ka tar sɩda, la pa-kuli, bãmb me lʋɩɩsda Soaala taoore; b naag n baooda b yĩnga la b sɩɩga sõmblem. Sẽn kul-a sɩd lʋɩɩsda rũnda vɩɩma taoore, n baood n na n noog a sɩd sũuri. M gomda woto y sõngr yĩnga, ka bẽdg la m gãnegd-y ye, m datame tɩ y yama zẽk n tees sẽn ya neere la a tabend Soaala n ka pʋɩ zĩis a yiib ye. Fo maanda wa f sẽn date, kãadem goam sãn zoe n gomame tɩ foo ne bi-pugla nan ket n paoodẽ la f neeme marsã tɩ kãadma sã pa yi na yɩɩ toog ne foo, Fo tõe n kẽe kãadem la f ka maand yel-wẽnd ye. La ned sũur sã n gãd kẽnkẽ, tɩ moadg ka lʋɩ sʋka, t'a sed ne yamleoogo t'a kõn yi kãadem ne biig ning a sẽn da pʋlem a menga, a maanda neere. Dɩlla sẽn kẽeda kãadem ne bi-pugl ning a sẽn da pʋlem a menga, maanda neere, la sẽn ka kẽeda kãadma n maand neer n yɩɩda. Pag bãng t'a sɩd sã n ket n vɩ a ka tõe n welg ne a ye. A sɩda sã n kaẽ la a tõe n kẽ ne a sẽn dat a soaba, la yɩta Soaala maasmẽ bala. La sã n ya mam sẽn tagsde, a vɩɩm na yɩ-a noog n yɩɩda, a sã n pa wa a sẽn ya-lã. M me tẽedame tɩ m sẽn leok woto wã yaa ne Wẽnd Vʋʋsma vẽnegre. Sɩda, sã n ya maanda sẽn kʋʋd wẽn-naandsa yĩnga, d fãa yetame tɩ d miime; m deegame. La ade, bãngr wata ne wilg-m-menga. To nonglem bal n zẽkd ninsaala. Ned sã n yet t'a mii bũmbu, a bãng tɩ baasgo, ka waa a sẽn teeda zãng ye. Sẽn nong-a Wẽnnaam, Wẽnnaam me mii yẽ soaba. Dẽ wã, sã ya rũmsa nemd wãbre, rũms niyns sẽn kʋʋd bõn-naandsa yĩngã, d miime tɩ wẽn-naand yaa zaalem, dũni pʋgẽ, la Wẽnnaam b ye tãa la Wẽnde. Ba bũmb sã n be yĩngri bɩ tẽng zugu tɩ b get-b wa wẽnde -la sɩda wʋsg beeme n boond tɩ wẽnd dãmba, n boond tɩ dũni soaalba — tõnd nengẽ Wẽnd yaa b ye tãa, yaa Wẽnd Ba, bũmb fãa sẽn yit a soab nenge la d sẽn vɩ a soab yĩnga, la d Soaala me yaa a ye, a Zezi Krista, bãmb nengẽ la bũmb fãa yita la bãmb yĩng la tõnd be. Ka neba fãa n tar bãngr ye. Ade, kẽer sẽn bas wẽn-naandsa pʋgb nan ka zãag ye; la woto b wãbda maanda nemdã n tẽrẽ tɩ rũmsa kʋʋ wẽn-naands yĩnga la b sɩɩga rẽgemdame, b sẽn nan ka wɩsga yĩnga. Ka rɩɩb n tõe tɩ d kolg Wẽnd n paas ye. D ka rɩ, bũmb pa woogde, d rɩ yã, bũmb ka paasde. Y sã n kõ y meng tɩ y tõeeme bɩ y pa tõe n dɩ, gũus-y bal tɩ y sẽn yalsã da wa ne koms rãmb lʋɩɩs ye. Wala ned sã n yãend foo, foom a bãng-n-tɩgame soab, tɩ f rɩt wẽn-naands taoore, b waoogr zĩigẽ, nin-kãng sẽn nan ket n ya koamsã, a tẽebẽ wã, a ka na n tags t'a me tõe n wãba maand nemdo? La woto wã, yaa fo bãngrã n lub koamsã yel-wẽndẽ. La yẽ me yaa f saam-biiga, la Krista ki-la a yĩnga. Y saam-biisa sã n ket n ya koms rãmb b tẽebẽ tɩ yãmb manesma lub-b wẽng pʋgẽ, ad-y yaa Krista meng la y beg yã. Woto wã m sã n ne tɩ rɩɩb na n luba m saam-biiga, m na bas nemd kãng zãng-zãnga, n da wa lub m saam-biiga ye. Maam n pa so m meng bɩ bõe? Maam n pa Soaala tʋʋm-tʋmd bɩ bõe? Maam n pa yãend Soaal a Zezi bɩ bõe? M tʋʋmdã sẽn paam yõod Soaala nengẽ wã, ka yãmb laa? M sã n ka tʋʋm-tʋmd neb a taab yĩnga, ne yãmb sẽ, m yaa tʋʋm-tʋmda, tɩ Soaala sã n baood m tʋʋmda kaseto, yaa yãmb la b ne yã. M sẽn tar n na n leok sẽn dõt-b maama la woto: d ka tar sor n dɩ la d yũ bɩ? Sõangd poaka sẽn ya tẽeda n ka tar sor n yãag-do wala b sẽn yãagd tʋʋm-tʋmdb a taaba, Soaala saam-biisã, la a Kefas bɩ? Bɩ yaa maam ne a Barnabe bal n ka tar sore n vʋʋs ne tʋʋmde? Yaa ãnd n kẽed tãpo n le rɩt a meng ligdi? Ãnda n send tɩɩga tɩ b rigd a biis rɩɩbo? Ãnda n kɩɩmd rũmsi n ka rɩt b bĩisim? La woto yaa ninsaalb n gomd bala, bɩ Noora me paasa bũmbu? Yaa a Moyiiz Noora sebrẽ la b gʋls yã: «Naaf sã n tʋmd zɛɛgẽ bɩ f ra loe a noor ne yʋk ye.» La Wẽnd toog bee ne niisi? Ka tõnd yĩng la a gomd sɩda? N-ye! Yaa tõnd yĩng la b gʋls yɛsa: Sẽn kood-a pʋʋg tẽeda bũmbu, tɩ sẽn pãbd-a ki zɛɛgẽ me tẽed a keoore. D sã n bʋd yĩngr kũuna y sũurẽ, bõe n ka zemse d sã n tigsd sẽn wom y pʋtẽ? Neb sã n beẽ n tar sor n dɩ y yõodo, ka tõnd n yɩɩde? D yaool n ka sak n maan boto ye. D sẽn mi yaa d sak toog buud fãa, tɩ d pa rat n kẽes gɩdgr Krista Koe-nooga moonegẽ ye. Y zɩ tɩ wẽnd doogã n kõt a tʋʋm-tʋmdbã b rɩɩbo, tɩ maan-kugrã kõt a maan-kʋʋdba b rɩɩbo? Woto-me, Soaala sẽn kõ b rãmb noor tɩ b moone Koe-noogã rɩta Koe-nooga sẽn kõt-b bala. M yaool n ka rɩ b sẽn da segd n kõ-ma ye. La m ka gʋlsd-y wa m datame n paam n dɩ-y ye. Ayɛy! M sẽn kiid n são. Dẽ la m zu-zẽkre la ned kõn deeg-a n bas m zaalem ye. Koe-nooga mooneg ne maam ka m zu-zẽkr bal ye, a yaa tʋʋm pakre n loe m zugu. N ye! Yell bela m zug, m sã n ka moon Koe-noogã! Sã n yaẽ la maam la tʋʋmda zu-raoogo soaba m togẽ la ne rolbo; m sã n ka tar dolbã, dẽnd yaa zɩɩb la neda to zɩlg-ma. Bõe n na n yɩ m dolbo? M tɛka yaa m paam n moon Koe-noogã tɩ ka tũ ne rolb ye, n ka reeg Koe-nooga sẽn tõe n kõ-m bũmb ning ye. Ade, yãmb ned ba a ye ka ra maam waa a yamb ye la m sakame n lebg neba fãa yem-daoogo, sẽn na n yɩlẽ n wa paam bãmb ka tɛka. M lebga Zʋɩf ne Zʋɩf rãmba, n na n paam Zʋɩf rãmba; m lebga Noora tũuda ne sẽn tũudb Noorã — la Noora tũub yaool n da ka le pak-m ye — n na n paam sẽn tũud-b Noora rãmba. M lebga no-kɩɩsa ne Noora tõatba — m yaool n pa ned sẽn yiis a meng Wẽnd Noora tũudmẽ ye, tɩ m deegda Krista Noore — n na n paam sẽn ka tũud-b Noora rãmba. M lebga koamsa ne koms rãmba n na n paam koms rãmba. M lebga neb fãa bũmbu, n na n fãag-ba, ba sã n ka b zãnga. M maana rẽ fãa Koe-nooga yĩnga tɩ m me bũmb zĩnd sʋka. Yãmb ka mi tɩ wags taaba zĩigẽ, zoetba fãa zoetame la yaa nin-yend bala n yɩt pipi? Yãmb me mao n lʋɩ taoore n wa paam dolbo. Sẽn wagsd-b taaba tuuba bõn-nood wʋsgo la b tõee rẽnna. La yaool n yaa rolb sɛtga la b baooda. Sã n ya tõndo yaa rolb sẽn kõn sɛ. Yaa woto la m wudgda, m pa zoet n tuumnẽ ye, m nug ka vaad vɩʋʋg ye. M dɩdgda m yĩngã, m talld-a-la toogo tɩ m zoeta m na n moon m taab Koe-noogã n yaool n wa rõb vɩʋʋgẽ. Ad-y m pa rata, m saam-biisi, tɩ y yĩm tɩ sawadgo n bui d yaab rãmba fãa la b fãa rʋʋga mogr a ye. Wẽnd maag a Moyiiz, b reega soob sawadg tẽngr la Mogr pʋga. B fãa rɩlga b mens ne yĩngr dɩɩb yɛnga. B fãa yũu yĩngr bõn-yũudl a ye; yaa yĩngr pĩig koom la b ra yũuda la pĩiga ra yãagda bãmba la pĩ kãng ra yaa Krista. La ne rẽ fãa sẽn ta-b Wẽnnaam yam sõor yɩɩ bilfu; la rẽ me la b kõaba sẽeg we-raoogẽ wã. Yɛla reng n maana woto n na n nek d yam, tɩ da bas tɩ yamleed wẽnsã wa pid d sũur wa bãmb dẽnd ye. Da waoog-y bõn-naands wa bãmb kẽer sẽn maane tɩ b kibara gʋls woto: «Zãma wã zĩndame n dɩ la a yũ, la a yikame n na n deem a reem.» Da sak-y yoob wala bãmb kẽer sẽn sake, tɩ bãmb tus pisi la a tã na n ki daar a ye wã ye. Da kʋɩɩb-y Soaala wa bãmb kẽer sẽn kʋɩɩb-ba tɩ wiis kɛ-b n kʋ wã ye. Da guglem-y wala bãmb neb kẽer sẽn maane tɩ Tẽn-kũuma na n loog ne b fãa gilla ye. Dẽ fãa maaname n na n nek d yam la rẽ fãa gʋlsa tõnd zãmsg yĩnga, tõnd sẽn pẽneg dũni wã sɛɛbã. Dẽn yĩnga, sẽn yɛsa yĩngr n pẽgd a menga gũus n da wa lʋɩ ye. Y nan pa seg kʋɩɩbgo sẽn zʋʋg ninsaal pãng ye. Wẽnd yɛsa b sɩd zĩigẽ la b kõn sak tɩ y paam kʋɩɩbg sẽn yɩɩd y pãng ye; kʋɩɩbg sã n wa, b na kõ-y dabaare tɩ y rig-a n zãage, b na kõ-y pãng tɩ y maan daoodo. M kom-sõma, zãag-y y meng ne wẽn-naandsa waoogre. M gomda ne yã wa neb sẽn tar yam. Wʋm-y m sẽn dat n togsã. Laok ning d sẽn deeg la d pʋʋsd barkã ka Krista zɩɩm la d pʋɩt taab la? Burã d sẽn kaoodã, ka Krista yĩng la d lagem n dɩtẽ laa? Wala bura sẽn yaa a ye wã, tõnd me ne d ya kʋʋma d yaa yĩng a ye tɩ d fãa rɩta bur yɛng kãnga. Tẽeg-y d yaab a Israyɛl rooga kibare. Neb niyns sẽn da rɩt-b maandã, ka maan-kugra yõod la b da rɩt bɩ? La rẽ rat n yeelame tɩ bõe? Tɩ maanda nemd bee yõodo? Tɩ maanda sẽn waoogd a soaba n tar yõodo? Ka Sʋtãan yĩng la maanda kʋʋd laa, b ka kʋʋd bũmb sẽn ka Wẽnd yĩng laa? M yaool n pa rat tɩ y lagem ne sʋtãamb ye. Yãmb pa tõe n yũ Soaala bõn-yũudem la y naag n yũ Sʋtãan dẽn ye, y ka tõe n dɩ Soaala rɩɩb la y le naag n dɩ Sʋtãan dẽn ye. D dat n yika Soaala sũur bɩ d dat n maan-b la pãnga? Neb n gomd woto: «M tõee fãa.» La d ka tẽed tɩ fãa yaa yõod ye. «M tõee fãa» la m pa tẽed tɩ fãa n wat ne manegr ye. Bɩ ned ba a ye da bao sẽn manegd a meng ye; a bao sẽn manegd a taaba. Wãb-y nemd ning fãa sẽn da koos-roogẽ, n da yɛs n sokd y sũurẽ sẽn ya bũmb ning nemd ye, tɩ tẽnga ne a pʋgẽ teed fãa yaa Soaalã n so. Bu-zẽnd sã n bool yãmb a zakẽ tɩ y sak n kẽnge, bɩ y rɩ a sẽn kõ-y bũmb ning fãa la y ra yɛs n sokd y menga: y tõeeme bɩ y pa tõe n dɩ ye. Ned sã n yeel yã: «Ad-y nemda yaa maoong nemdo» bɩ y vẽ ne a wãbre, sẽn togsa yãmba yĩnga la a sũura koɛɛg sẽn leokd tɩ pa tõe n wãba yĩnga. M sẽn gomd sũur koɛɛgã, m ka gomd yãmb dẽn ye, yaa to wã rẽnda; la sɩda, ned a to sũur koɛɛg yɩta a wãn n leok m yĩnga, m pa so m meng laa? M sã n dɩt bũmb la m pẽgd Wẽnde, b na yɩɩ wãn n zab ma m sã n pẽgd m Soaala m sẽn paam dɩɩb yĩnga? Woto wã, y rɩta, y yũuda, bɩ yaa bũmb a to la y maanda, bɩ fãa yɩ Wẽnnaam pẽgr yĩnga. Gũus-y tɩ y manesem da wa ne ned lʋɩɩse, Zʋɩf rãmb sʋka, bɩ bu-zẽmba, bɩ Tigung kamb sʋk ye. Sã n ya maam, m baood n na n zemsa ne y fãa gill, bũmba fãa pʋgẽ; m ka baood sẽn nafd m menga ye, yaa kʋʋnga nafr la m baooda n dat tɩ b fãa paam fãagre. Yɩ-y mam togs-n-taase wa m meng sẽn ya Krista togs-n-taaga. M pẽgd-y la y sẽn tẽeg m yell bũmba fãa pʋgẽ la y reeg m noya fãa wala m sẽn wilg-y. M datame tɩ y bãng tɩ rao tara zu-soaba, yaa Krista; la pag me zu-soab la raoa, tɩ Krista Zu-soaba ya Wẽnnaam. Dao sã n fõgen bũmb a zug n na n pʋʋs Wẽnd bɩ n na n togs b goama, a paoogda a zu-soaba. La sã n ya pag n pʋʋsde bɩ a togsda Wẽnd goama t'a zug ka teeg bũmbu, yẽ me paoogda a zu-soaba. Yaa wala a sã n da põnga a zuga koeelle. Pag sã n ka rat n teeg a zug peende bɩ a põng zuga zãnga. La a sã n get wa yãnd ne-a, a zoobd sẽn põng bɩ sẽn wõrse, bɩ a teeg peende. Rao ka tog n teeg a zug bũmb ye, tɩ rao yaa Wẽnnaam ne b ziira wẽnego; sã n ya paga, yẽ la raoã ziiri. Sɩd me, ka pag n deng taoore tɩ rao vɩɩma yi a nengẽ ye, yaa rao n denge. Ka raoã la b naan n kõ pag ye, yaa paga la b naan n kõ raoa. Yaa rẽ yĩnga, la malɛk rãmba waoogr yĩnga, pag zug tog n teeg bũmb sẽn wilgd t'a ka so a meng ye. Soaala nengẽ pag yell ka gomd n zẽng rao ye, rao yell me pa gomd n zẽng pag ye. Sã n ya ne rao la Wẽnd naan paga, yaa pag me n dogd daoa la b yiiba fãa yita Wẽnd nengẽ. Yãmb me ges wɛ! Segdame sɩd tɩ pag pʋʋs Wẽnd n ka lud a zugu? Ninsaalb nifẽ, rao ne zoob wogd ka yãnd bɩ? La yaool n ka rẽ la pag zu-zẽkr bɩ? Wẽnd kõ-a la zoob wogd tɩ yɩ wala a zug peende. Pʋs n seka woto, gomd n pa sɛtẽ soab sã n be y sʋka bɩ a bãng tɩ tõnd ka minim dẽ, la Wẽnd Tigenga me ka minim dẽ ye. La m sẽn dat tɩ y maan gũusgã, m kõn solg-y tɩ m ka pẽgd y lagmen-taarã sẽn wat ne y bõne n yɩɩd a sẽn wat ne y yõodã ye. M sẽn wʋm la woto, tɩ y sã n tigime y wẽnegd n welga taaba, la m tẽedame tɩ rẽ yaa sɩd bilfu. Pʋs n segdame tɩ welegr zĩndi, segdame tɩ b tõog n bak sẽn sĩdb ne neera maanego, n bak-b ne neb a taaba. Y sẽn mii n tigim taabã ka le ya Soaala rɩɩba yĩng ye. Rɩɩba sã n na n sɩnge, ned kam fãa yiisda a sẽn wa ne; woto kẽer yãbda kom, tɩ kẽer yũud n gãeemdẽ. Y ka tar zagse n na n dɩ la y yũ be laa? Bɩ yaa Tigengã la y sãbsda n dat n ning sẽn ka tar-ba yãnde? M na n yeel-y lame tɩ bõe? M pẽg yã? Dẽ wã yẽ m kõn saag n pẽg-y ye. Sã n ya maam, ad-m sẽn paam Soaala nengẽ la yaa rẽ la m wilgd-y: yʋng ning b sẽn zãmb Soaal a Zezi wã, b rɩka buri, la b sẽn pʋʋs bark n sɛ, b wesa burã n yeele: «Wã yaa mam yĩnga m sẽn kõ yãmba; maan-y woto n tẽeg m yelle.» Dẽ poore, yaa yõg-laaga la b rɩk yã n yeele: «Wã yaa zood paalg sẽn yõg m zɩɩmẽ laaga; y sẽn na n tugla raar ning fãa bɩ y tẽeg m yelle.» Ade, wakat ning fãa y sẽn dɩt bur kãngã la y yũud la-kãnga, yaa Krista kũum la y moonda la na n yɩɩ woto n tãag b waoongo. Dẽ yĩnga, sẽn ka tog n dɩ-ɛ burã la a rɩtẽ, sẽn ka tog n yũ Soaala laaga la a yũud-a, yaa Soaala yĩnga taale, yaa Soaala zɩɩma taale la a rɩta, la a yũuda. Bɩ ned kam fãa deng n tɩg a menga la a yaool n dɩ burã, la a yaool n yũ rãama. Ned ning fãa sẽn dɩt-a bɩ sẽn yũud-a yaare, ya a meng bõne la a rɩta, ya a meng bõne la a yũuda. Ad-y yaa rẽn yĩng la bãad-dãmb ne koms rãmb ya wʋsg y sʋka, tɩ wʋsg meng tol n maand yõore. La tõnd sã n deng n tɩg d pʋga, d paalgr bʋʋd kõn kao ye. Soaala nug sã n wa zɩsgd d zugu yaa d paam n tek tɩ b ra wa naag ne zamaana rãmb n paalg ye. Dɩlla, m saam-biisi, y sã n mii n tigim taaba n na n dɩ Soaala rɩɩbo bɩ y maag y yĩng n gũ taaba; sẽn data n dɩ n yiis a kom, tʋg n dɩ yiri n da wa bao yelle n kõ saam-biisa ye. Sẽn ketã, d na yãend taaba m sã n wa. Sã n ya yĩngr kũna poorẽ, m saam-biisi, m pa rat tɩ y maan wa y ka mi ye. Y sẽn waa n nan ka kẽ Soaalã, y mi tɩ yaa y wẽn-mugsã yamleoog n da tar-y n lengdẽ. Marsa wã ad-m sẽn tõe n togs yã: Ned ka bee n paam a Vʋʋsem Sõng kũuna la a le tõog n yeel tɩ «Wẽn na sãam a Zezi ye.» Ned me ka tõe n yeel t'a «Zezi la Soaala» t'a Vʋʋsem Sõng ka vẽneg-a ye. Yaa sɩda, a Vʋʋsem Sõng kũuna yaa toor-toore la yaa zĩ-yɛng la b yita. Pʋɩɩba yaa toor-toore la Pʋɩta ya Soaal yɛnga, tʋʋma yaa toɛ-toɛ la yaa Wẽnnaam b ye bal n tʋmd fãa d fãa pʋsẽ. Yaa buuda zãng yĩnga la a Vʋʋsem Sõng pʋɩt b kũuna. A Vʋʋsem Sõng kõta nin-yend t'a tõog n zulg gomde; n kõt a to t'a wegs n togs gomde; nin-yend paamda tẽebo ne a Vʋʋsem Sõng pãnga, t'a to paamd bãas sãoogr kũuni Vʋʋsem Sõng yɛnga nengẽ. Nin-yend paamda wẽnd makr dãmb kũuni, t'a to paamd beoog bãngr kũuni; nin-yend paamda a taab pʋg bãngre, t'a to ya goam buud toɛ-toɛ wɩlengo, t'a to ya b võor togsgo. La rẽ fãa yaa Vʋʋsma a ye tʋʋmde, bãmb n pʋɩt b yam, ned fãa ne a rẽnna. Wala ninsaal yĩnga sẽn yaa a yembr tãa n yaool n tar wils wʋsgo, tɩ wilsa ne b sẽn ya kʋʋma maand yĩng a ye tãa, woto-me Krista nengẽ. Dẽ me la tõnd paam soob Vʋʋsma a ye pʋgẽ n lebg yĩng a ye, d ya Zʋɩf bɩ bu-zẽna, yamb bɩ burkĩna; Vʋʋsma a ye tãa la b yũnug tõndo. Yĩnga ka wilg a ye ye, b yaa kʋʋma. Naoor sã n da yetẽ: «Ka maam la nugu; dẽ yĩnga m ka naag ne yĩnga ye,» dẽ na kɩt t'a sɩd ka naag ne yĩngã? La tʋbr sã n yetẽ: «M ka nif ye; dẽnd m ka yĩnga wilg ye,» dẽ na kɩt t'a sɩd kaẽ yĩnga wilga? Yĩnga fãa sã n dag n yaẽ nifu, tʋbra yaẽ la bʋgo? Fãa sã n dag n yaẽ la tʋbr bala, bõe n yɩtẽ yõore? Wẽnd n sel wilsã yĩngẽ, wala b sẽn tʋlge. Yĩnga tõr sã n dag n yaẽ la wilg a ye, yĩnga wẽndẽ la bõe? La ade, wilsa yaa kʋʋma, tɩ yĩnga yaool n yaa a ye. Nif ka tõe n yeel nugu: «Ad-m ka tar f tʋʋmd ye.» Zug me ka tõe n yeel nao: «Ad-y m ka tar y tʋʋmd ye.» Yɩɩd rẽ, b sẽn get wils niyns wa bõn-mɛdsã, bãmb me tara b tʋʋmde, Wils niyns sẽn wẽnd-b pa togẽ ne waoogrã, bãmb la tõnd waoogd n yɩɩda; wils niyns gesg sẽn ya yãndã, bãmb la tõnd koagend n yɩɩda. Sẽn sakd-b gesgã, bãmb ka le tar waoogr tʋʋmd ye. Wẽnd n sigl yĩnga woto, tɩ wilg ning sẽn ka wẽnd b na waoog-a wã paamd waoogr n paase. Woto yĩnga wils zãaga taab ne welegre, tɩ wilg kam fãa be-la a to yĩng zãng-zãnga. Toog n tar wilg a ye, wilsa fãa naagda yẽ n tar toogo; wilg a ye paama waoogre, yaa b fãa sũ-noogo. Sã n ya yãmba, yãmb yaa Krista yĩnga la ned kam fãa yaa wilg n be a zĩigẽ. Wẽnd sẽn yãk b rãmb Tigenga yĩnga, pipi yaa tʋʋm-tʋmdba, a yiib soaba, bãngdba, a tãab soaba, karen-saam-dãmba. B kõo kẽer tõog tɩ b maand bõn-bãna, kẽer yaa sãoogre, kẽer yaa naong rãmb yaoogre, kẽer kʋʋnga zãabo, kẽer goam buud toɛ-toɛ wɩlengo. M sok n gese, yaa b fãa la tʋʋm-tʋmdb bɩ? B fãa la bãngdba? B fãa la karen-saam-dãmba? B fãa gill n maand wẽnd makr dãmba? B fãa gill n tõe n sãoog bãase? B fãa gill n tõe n wɩlem bu-zẽnd goama? B fãa gill n tõe n yɩ bu-zẽnd no-rɛɛsa? Bao-y kũun niyns sẽn ya-b sõmb n yɩɩdã. La bas-y tɩ m wilg-y sẽn be neer n yɩɩd wa fãa-fãa. Ba mam wɩlemd ninsaalb buud fãa goama, n paas malɛgsa rẽnna, m sã n pa tar nonglem, m yaa wa lombr sẽn wẽde, bɩ waaga sẽn kãglemde. Ba mam tar beoog yɛl bãngre, la m mi sẽn solg fãa, ba m yama vẽen ne bũmb fãa, ba m tẽeb pid zãnga tɩ sek a vigs tãmsã b zĩisẽ, m sã n ka tar nonglem kũuni, mam yaa zaalem. Ba mam dɩkẽ m paoong fãa n sõng naong rãmba; ba mam sakẽ tɩ b los m yĩnga bugmẽ, m ka tar nonglem, m kõn yãend dẽ yõod ye. Nonglem yaa maag-m-menga, nonglem yaa to sõngre, nonglem ka mi sũ-kiir ye, a ka wakr bɩ tɩtaam ye. Nonglem ka tʋmd beed ye, a ka mi zoe-bõne, a ka mi sũ-puuri, a ka tẽegd beegr ye. A ka kɩdemd a to bõne; a sũur nooma a puk sɩda. A ka ningd ned ba a ye taal ye; a tẽeda fãa, a saagda fãa, a sakda fãa. Nonglem bal n ka be sɛɛbo. Bãngr na n loogame, goam wɩleng na n loogame, yam vẽenem na n loogame. D yam vẽenem pʋs n yaa sãoogo, d bãngr me yaa sãoogo, ka pid ye. Sãooga fãa na n pida raar a ye, vẽenem la bãngr pidunga raare. M sẽn waa n ya yãaga, m da gomda wa yãaga, m da tagsda wa yãaga; m sẽn lebg bi-kãsenga, m basa yãadre. Tõnd sẽn ne bũmb ning marsa wã yaa wa ne nin-gɛtga; m sẽn mi marsa wã yaa bõn-wɛdga bala la m na yaool n wa bãnga zãnga, wala b sẽn mi maama. Marsã bũmb a tãab n be: tẽebo, saagre la nonglem la sẽn yɩɩd yaa nonglem. Bao-y nonglem la bao-y Wẽnd kũun a taaba me, sẽn yɩɩda bãngr kũuni. Sẽn wɩlemda goam pa gomd ne ninsaalb ye, a gomda ne Wẽnde. Ned pa wʋmd a goama võor ye, a gomda goam bãna a yamẽ. Ned ning sẽn yaool n togsda bãngr goam, gomda ne ninsaalba n manegd b yɛla, n sagendẽ la a yolsdẽ. Ned ninga sẽn gomda goam zẽna, ya a meng yell manegre; sẽn gomda bãngr goam manegda a saam-biisa sẽn tigma. M datame tɩ y wɩlem bu-zẽn goama la m nongame n yɩɩda tɩ y gom bãngr goama; sẽn gomda bãngr goam yɩɩda sẽn wɩlemda bu-zẽn goama. Bu-zẽn goama soab sã n ka pa poorẽ, yaa a sã n paam n togsa a goama võore, n tõe n naf kʋʋnga sẽn tigm a sɛɛgẽ. Ges-y yã, m saam-biisi, mam sã n wa yãmb sʋk n gomd goam zẽna la m goama ka vẽnegd y yam, la b ka paasd y bãngre, la b ka zãmsd-y fɩ, dẽ nafda yãmb bɩ? Yaa boto ne yʋʋmba wɩɩg bɩ pɛndga: b rãamda sã n pa sãta, m yɩta a wãn n bãng yɩɩn bʋg la b pebd bɩ b wẽeda? Tõntõoga sã n peebd zabr yĩnga, t'a peebga pa sãta, ãnda n na n bob a zab-teedo? Yãmb me, y zelemd sã n ka gomd n fasgdẽ, ãnda n wʋmd y sẽn yet bũmb ninga? Y gomda vɩʋʋgẽ. D ka tar dũni wã goam buud toɛ-toɛ yã sõor ye la b tara võor ne b rãmba. M sã n pa wʋmd ned goama, m yaa bu-zẽnd ne yẽnda; yẽ me sã n pa wʋmd m goama, a yaa bu-zẽnd ne maam. Y sẽn baood Wẽnd kũuna, bao-y-b wʋsgo n tõog n naf sẽn be-b ne yãmbã. Woto wã sẽn wɩlemda bu-zẽn goam pʋʋs Soaala n paam b võor n wilgi. M sã n pʋʋsd ne bu-zẽn goama, m maanda pʋʋsgo la a võora la m ka tara. M na n maana wãna? M na n maana pʋʋsgo la m na n bao-la a võore. M bark pʋʋsga yɩɩl na n yɩɩ yɩɩlle m sẽn wʋmd a võore. Sã n ka boto, fo sẽn pẽgd Wẽnd ne bu-zẽn goama, sẽn ka paam-a kũun ning fo sẽn paama yɩta a wãn n deeg tɩ Wẽnd na paam pẽgre, a sã n ka mi fo sẽn gomd n lebdẽ. F bark pʋʋsga yaa sõmb wʋsgo, yaa sɩda, la a yɩta a wãn naf yẽnda? Wẽnd paam bark b sẽn kɩt tɩ m wɩlemd goam n yɩɩd y fãa! La m gesame tɩ d sã n tigim taab pʋʋsg yĩnga, m sẽn na n yiis goam a nu m sẽn tar b võore, n tõog n zãms m taaba n são m sẽn na n yiis bu-zẽn goam biis tus piiga sẽn pa zãmsd fɩ. M saam-biisi da yɩɩ-y wa kom-bõonese n ka mi sẽn segd tɩ y maan ye. Y sã n ya kom-kɩds n ka mi wẽnga, m saka rẽ; la sã n ya sẽn segd tɩ y maana pʋgẽ, paam-y nin-bɛd yam. B gʋlsa Noor sebr pʋga: «Yaa ne bu-zẽmb la ne bu-zẽn dãmb noor la m na n gom ne nin-bãmba la ne rẽ fãa b kõn kelg-m ye. — Soaala n yete —» Dẽn yĩnga bu-zẽn goama ka nafd tẽedba ye, a yaa yõod ne sẽn nan ka paam-b tẽebo; bãngr me kũun pa bu-zẽmba yĩnga, a yaa tẽedba yĩnga wala Tẽedba sã n tigim, tɩ fãa gomd bu-zẽnd goama, tɩ seg sãan waoongo bɩ sega sẽn ka tar-a tẽeb waoongo, b kõn yeel tɩ yãmb zʋbsdame? La sã n ya bãngr goam la y fãa gomda tɩ seg kẽed paalga bɩ bu-zẽn waoongo, ad-y b na naag taab n wilg-a sẽn be la sẽn segde; b na puk sẽn solg a sũurẽ al t'a wa kɩ a neng tẽng n waoog Wẽnnaam la a moon tɩ b sɩd be-la y sʋka. M saam-biisi, d na n baasa d saglga wãna? Y sã n tigim taaba ned kam fãa tõe n waa ne a yɩɩle, bɩ a zãmsgo, bɩ yell sãang pukri, bɩ goam zẽna, bɩ gomd zẽnd võor pukri. La rẽ fãa tog n waa ne sɩɩga nafre. Bu-zẽn goam la b wɩlemda? Bɩ b yɩ b yiib bɩ b tãabo, la ra loog rẽ ye, la yɩ bal-bale, la ned zĩnd sʋka n wilgd b goama võore. Sẽn na n wilg võora soab sã n ka beẽ bɩ b sĩndi; bɩ ned kam fãa gom ne a meng la Wẽnde. Bãngdba ta b yiib bɩ b tãabo n gomda tɩ sẽn ket-ba kelgdẽ la b pẽgda. Ned a to sã n yik n na n gom a bãngr goama, bɩ pipi soaba bas-a t'a gome. Y fãa gill tõee, bal-bal, n yiis y bãngre n zãms la y wɩng y taab tẽebo. Bãngdba ka yiisd b bãngra zond-yaar ye; Wẽnd yaa laafi Wẽnnaam, b ka zũnd-zãnd Wẽnd ye. Wẽnd kamba sẽn tigimd taab zĩig ninga, bɩ pagba ra yaag b noor ye. B ka tar sor n gom ye; bãmb sẽn tõe yaa sakr bala, la Noorã n dat rẽ. B sã n dat n sok n bãng bũmbu, b gũ yir n sok b sɩdb rãmba. Ka tog tɩ pag gom kʋʋng sʋk ye. Yaa yãmb nengẽ la Wẽnd gomda yi bɩ? Bɩ yaa yãmb y ye bal n paam-a? Ned sã n beẽ n tagsdẽ t'a yaa bãngda, t'a paama a Vʋʋsem sõng vẽnegre, bɩ a reng n bãng tɩ m sẽn gʋls yãmb bũmb ningã yaa Wẽnd noore. Sẽn pʋs n ka rat-a n bãng bɩ a ra bãng ye. Woto wã, m saam-biisi, bao-y n paam bãngr kũuni, la y ra gɩdg bu-zẽn goam wɩleng me ye. La modg-y tɩ bũmba fãa maan wa sẽn segde la ra yɩ yaar ye. M le tẽegda yãmba, m saam-biisi, Koe-noogã m sẽn moon yãmbã; y reeg-a lame la y ket n tar-a-la sõmbo. Yẽ n na n fãag yã, y sã n kell n tall-a neere wala m sẽn wilg-a yãmbã, ka rẽ y tẽeba wat n yɩɩ zaalem. Yaa mam meng sẽn da reng n wʋm la m togs yã, tɩ Krista kii d yel-wẽna yĩnga, wa Sebr sõng sẽn togse, tɩ b solg-b yaoogẽ, la rasem a tãab raare, b vʋʋgame, wala sẽn le gʋls yɛsa; tɩ b lika b meng a Kefas la piig la a yiibã; dẽ poore yaa saam-biis sẽn ta kobs-nu la b lik yã — bãmb wʋsg keta ne yõore, kẽer bal n ki — tɩ b lika a Zak la tʋʋm-tʋmdba fãa. Dẽ poor marsã la b yaool n lik maam me, maam b bõn-mɛdga. Sɩda, maam la tʋʋm-tʋmdba fãa yao-zʋʋga; m da pa tog meng ne tʋʋm-tʋmd yʋʋr ye, tɩ m namsa Wẽnd Tigengu. La Wẽnd bark kɩtame tɩ m ya m sẽn ya-lã la b barkã ka pa n ka wom a biis ye. M ka tõe n ka ges m meng wa tʋʋm-tʋmd ye, tɩ m tʋmame n yɩɩg b fãa; la yaool n ka maam n tʋm ye, yɩ Wẽnd kũuna b sẽn kõ-ma n tʋm b tʋʋmde. Yaa bãmb woo, yaa maam woo, yaa woto la d moonda. La yaa rẽ me la y reeg yã. La sã n moond tɩ Krista vʋʋga kɩɩms sʋka, maana a wãn tɩ yãmb neb kẽer yik n yet tɩ kũum ka vʋʋgde? Kɩɩms sã n pa vʋʋgdẽ, dẽn Krista me ka vʋʋg ye. La Krista sã n ka vʋʋge, tõnd zãmsga yaa zaalem la yãmb me tẽeba zãng lebga zaalem. La tõnd n lebg Wẽnd kaset zirẽ-dãmba, d sã n wẽennẽ tɩ b vʋʋga Krista, tɩ b yaool n ka vʋʋg-ba, sã n ya sɩd tɩ kũum ka vʋʋgd ye. Kɩɩmsa sã n ka vʋʋgde, dẽn Krista me ka vʋʋg ye. La Krista sã n ka vʋʋge, y tẽeba yaa zaalem; y ka yi yel-wẽndẽ ye, la sẽn ki-b Krista yĩngã, bãmb me yell sɛɛme. Sã n ya tẽng zug vɩɩma yĩng bal la d del Krista, tõnd la dũni wã fãa zu-bʋk rãmba. La ayoo! Krista vʋʋga kɩɩms sʋka, la bãmb n deng kɩɩmsa fãa. Wala kũuma sẽn tũ nin-yend n wa dũni wã, kɩɩmsa vʋʋgra me na n tũu ne nin-yend maasem. Wala d fãa sẽn tũud a Adem n bãng kũuma, woto me d fãa tũuda Krista n le vɩɩnde, ned kam fãa ne a wakato: Krista n so taoore, tɩ bãmb la Bi-rẽenga. Bãmb poor marsã neb niyns sẽn ket n be bãmb soolmẽ, b waoonga raare. Dẽ poore bũmb fãa na n yãe-la a baasgo la yaa Wẽnnaam Ba la Krista na n lebs b naama, b sẽn wat n lub na-rɩtba, la soaalba la pãn-dãmb buud fãa. Y mi tɩ yaa tɩlɛ tɩ Krista rɩ naam n tãag wakat ning b naoã sẽn wat n palg b bɛɛba zãnga. B yaoolem na-rɩta b sẽn na n lubi, yaa Kũum. Yẽ lubr poore b sɩd na n paamame tɩ bũmb fãa yaa b soolem. Bãng-y tɩ sã n gʋls tɩ bũmb fãa sura b taoore, ka naag ne ned ninga sẽn sulg bũmb fãa b taoora ye. La bũmb fãa sã n wa lebg bãmb soolem n sɛ, dẽ marsã la Wẽnd Biiga me na n lebg bũmb-fãa-Soaala-soolem, la woto la Wẽnd na n lebg fãa-fãa ned kam yĩnga. Sã n dag n kaẽ boto, bõe la neb niyns sẽn sood-b kɩɩmsa yʋʋr yĩnga na n paamẽ? Kɩɩmsa sã n ka na n vʋʋg lɛ-lɛ, bõe tɩ b sood kɩɩms yĩnga? Bõe me yĩng la tõnd meng ka na n baoẽ yĩn-maasem n zãag d mens ne yɛl tooda sẽn lʋɩt d zug wakat buud fãa? M bee kũum nugẽ beoog sẽn vẽeg fãa la rẽ yaa sɩda, m saam-biisi, sɩd wa y sẽn ya m zu-zẽkre d Soaala Zezi Krista taoore. Sã n da yaẽ la ninsaal geels la m geel yã n zab ne Efɛɛz rãmba, b wẽn-naandsa poorẽ, m yõoda la bʋgo? Sẽn ki-ba sã n ka na n vʋʋge, bɩ d rɩ la d yũ tɩ beoogo d na n kiime. Da belg-y y mens ye: Tũud-n-ta wẽnse n wat ne vɩɩma sãoongo. M kos tɩ y wɩsg y meng tɩ rẽ n toge la y zãag y meng ne wẽnga. Wʋsg bee yãmb sʋka n ket n ka mi Wẽnd, la rẽ ka yãnd sɩda? La f sã n soke: Sẽn ki-ba na n vʋʋga wãn wãna? Yĩin bʋgo la b na n le wa ne? Ges wɛ, yalma, fo meng sẽn bʋtã ka lebgd bõn-vɩɩla t'a ka reng n ki ye. Fo sẽn bʋta ka bũmb la f võogd n sel ye, yaa bõn-beelle, ka-beelle, bɩ bũmb a to. Wẽnd n kõt yako wala b sẽn date, bõn-buud fãa ne a rẽnna. Yĩnsa fãa ka a yembr ye: ninsaal yĩng toore, rũng yĩng toore, luiil rẽnd toore, kʋɩl-zẽoog me rẽnd toore. Saag zug tara a bõn-yood, tɩ saag tẽngr me tar a rẽnna. Yĩngr teeda yãgbo ne tẽng zug rẽnna ka a ye ye. Wĩntoog yãgb toore, kiuug me rẽnd toore, ãdsa me rẽnd toore. Ãdg a ye meng peelem bakda ne ãdg a to rẽnna. Yĩnsa vʋʋgr me na n yɩɩ boto. Yaa bõn-põosg la b bʋta la yaa sẽn ka tõe n le põog n vʋʋgde. Yaa bũmb sẽn ka tar waoor la b bʋta, la bũmb sẽn pid ne ziir n na n vʋʋge; faoor la b bʋta, la pãng n na n vʋʋge; tẽng zug bũmb la b bʋta, la yĩngr dẽn n na n yi. Yĩng sẽn tõe n deeg tẽng zug vɩɩma sã n beẽ, yĩng sẽn tõe n deeg yĩngr vɩɩma me beemẽ. Yaa rẽ la b gʋlsyã: Pipi Adma naaname t'a ya vɩɩm deegda, Adma a yiib soaba yaa vɩɩma kõata. Ka sẽn kõt-a vɩɩma la pipi ye, sẽn deeg-a vɩɩma n deng taoore tɩ yẽ yaool n pʋge. Pipi soaba yaa tẽng tom, tɩ tẽng tomẽ la a yita; a yiib soaba yita yĩngri. Tẽng zug raoã sẽn yɩ a soaba, a kamb me boto, yĩngr daoã sẽn yɩ a soaba, a neba me boto. Wala d sẽn wẽneg tẽng zug soabã, lebga pakre tɩ d wẽneg yĩngr soaba me. Maam n yet-y, m saam-biisi, ka yĩn-kãnga sẽn ya neong la zɩɩma n na n kẽ Wẽnd Rĩungẽ ye, ka bõn-põosgã n na dɩ sẽn zɩ a põogra faad ye. M na n wilga yãmb koɛɛg sẽn yɩɩd ninsaal bãngre: Kũuma, ad-y ka d fãa n na n ki ye; la d fãa yẽ sẽ, d na n tedgame. Vugr bala, nif kamsg pʋgẽ, baorga sã n tãse, la sɩda baorg n na n peebe, kɩɩmsa fãa na n vʋʋgame n ka le bãng põogr lɛ-lɛ, la tõnd me, tõnd me na n tedgame. Bala yaa tɩ-lɛ tɩ yĩn-kãnga sẽn ya bõn-põosgã tɩlg põogr zãnga la yĩn-kiidga tɩlg ne kũum zãnga. Dɩlla mam yĩn-kãnga sẽn na n põogã sã n wa tɩlg põogr zãnga, la m yĩn-kãnga sẽn na n ki wã sã n wa tɩlg kũum zãnga, dẽ marsã la sebr sõng gomda na n taase: «Pãn-tõog tʋʋmd n tʋʋme n loog ne kũum zãnga. Kũum, fo sẽn tʋm daood la bɛɛ? Kũum, fo zab-teed bɛɛ?» Mik kũum zab-teed yaa yel-wẽnde la Noorã n kõt yel-wẽnda pãngã. La Wẽnd paam bark tɩ bãmb n kɩt tɩ d lub yel-wẽnde, d Soaala Zezi Krista maasem yĩnga. Dɩlla, m saam-biisi, modg-y tɩ y raooda ra woog ye la y rabs Soaala tʋʋmna taoore n miẽ t'a kõn yɩ zaalem ye. Sã n ya ligda lobr nin-sõma sõngr yĩnga bɩ y tũ noor ning m sẽn kõ tẽedba fãa sẽn be Galasi. Dasem a yopoe-poe wã pipi daare bɩ ned kam fãa kẽgs n bĩng ligd a nengẽ la y ra gũ tɩ m wa tɩ y yaool n sɩng n tigs ye. M sã n ta, m na gʋls sebr tɩ yãmb sẽn tũus neb niynsa tall y kũuna n ta Zerizalɛɛm; la sã n wẽnda m meng na kẽnge, d na tũ taaba. M na ta y tẽngẽ, m sã n wa pɩʋʋg Masedoan; na n yɩɩ pɩʋʋgr bala. Tõeeme me tɩ m yals y sʋk n kaoose, tõeeme n yɩ sẽooga tõre la m sẽn na n kẽng zĩig ning fãa, y na yãag-ma. M yaool n ka rat tɩ d yãend taab yĩngr-yĩngr bal ye, m geenda m na kaoos y sʋka, Soaala sã n sake. La sẽn ya a soab fãa, m na n paa Efɛɛz n ta Zãna kibsa, tʋʋmda roog paka kẽoong n gũud-ma la bɛɛba me ka paood ye. A Timote sã n wa, sõng-y tɩ bũmb da yɛɛs-a y sʋk ye, tɩ yẽ me tʋmda Soaala tʋʋmd wala maam. Ned ba a ye da paoog-a ye; sõng-y yã t'a leb mam nengẽ ne laafi. D gũud-a lame, maam ne saam-biisa fãa. Sã n yaa d saam-biig a Apolos, m wɩnga ne a t'a tũ saam-biisã n wa ges yã la a zãgsa fas; a yeelame t'a ka tõe marsa ye la a sã n wa paam sẽka, a na wa. Maan-y gũusgu, tall-y y tẽeba kẽnkẽ, maan-y raoodo. Sõng-y tɩ bũmb fãa tũ ne taab nonglem, y sʋka. Ad-m koɛɛg a to, m saam-biisi: yãmb mi tɩ yaa a Stefanas ne a zak rãmb n yɩ Akayi pipi kristneb la bãmb n sõng d saam-biisa fãa gilli. Bɩ y waoog neb a woto buudu la neb niyns fãa sẽn tʋmd-b la b namsd wa bãmba. M sũur nooma a Stefanas, a Fortunatus la a Akayikus sẽn waa n ges-ma; b reega yãmb zĩig mam sɛɛgẽ, la b maasa m sũuri wala b sẽn maas yãmb me rẽnna; dẽ me yĩng la m yet tɩ y waoog neb a woto buudu. Azi saam-biisa Tigeng n pʋʋsde; a Akila la a Priska tɩ b pʋʋs-y neere ne Soaala pʋʋsem, bãmb ne neb niyns fãa sẽn tigemd-b b zakẽ. D saam-biisa fãa tɩ b pʋʋs yã; pʋʋs-y taab neer n kõ-ma! Maam a Pol n gʋlsd-y, ad-m meng nug tikri. Sẽn ka nong-a Soaala fãa bɩ Wẽnd me lak ne yẽ soaba! Maran ata! Soaala, wa-y yã! Soaala Zezi barka sig yãmba! M nong-y la ne Krista a Zezi meng nonglem. Maam, a Pol, a Zezi Krista Tʋʋm-tʋmd ne Wẽnd daabo, maam ne m saam-biig a Timote, tõnd n pʋʋsd Wẽnd Tigenga sẽn be Korẽnt la d saam-bi sõma wã fãa sẽn be Akayi tẽn-tõre. Bɩ Wẽnnaam tõnd Ba la d Soaal a Zezi Krista sik y fãa zutu b bark la b laafi! Bɩ Wẽnd la d Soaal a Zezi Krista Ba, nimbãan-zoeer Ba, toog buud fãa yoalsdã, paam barka! Bãmb n maasd tõnd sũuri d namsga pʋgẽ, la b meng sẽn maasd d sũurã, bãmb n sõngd tõndo tɩ d me maasd d taab sũuri, b sẽn zĩ ne toog ning fãa. Wala Krista namsga sẽn lebg yõod ka tɛk tõnd yĩnga, boto me, ne Krista maasem, d sũ-noog lebga zembala. D sã n namsdẽ, yaa yãmb sũur bʋkr yĩnga la y fãagre. D sũura sã n bʋke, yãmb me rẽnda na bʋke tɩ y sak wakat fãa, namsg niyns tõnd me sẽn namsde. La saagr bee wʋsgo tɩ y sẽn naag tõnd n namsã, y na naag n kɩdem sũ-noog ne do. M saam-biisi, m ka rat n soolg-y ye: pɛt ning d sẽn paam Azi tẽng nams-d-la wʋsgo al tɩ d da pa tẽed tɩ yõor kõn yãk ye. Sɩda tõnd meng d toore n sak tɩ b paalg tõnd d kũum bʋʋdo la woto d bãngame tɩ d ka tog n teeg d meng ye. Yaa Wẽnd la d tog n teeg tɩ bãmb n vʋʋgd sẽn ki. Yaa bãmb n zãag tõnd ne kũum a woto buud dũnna, n na n le zãag-d beoogo. Yãmb meng na sõngd ne y pʋʋsgo, woto yel-sõmda sẽn ya kʋʋng yel-sõmdã na tak neb ka tɛka tɩ b wa pʋʋs bark d yĩnga. Bũmb n ya tõnd zu-zẽkre la yaa d sẽn pelg d pʋg n zã d meng zamaana pʋgẽ la yãmb sʋka ne sõmblem la sɩda sẽn ya Wẽnd kũuni. Ad-y rẽ ka tũ ne ninsaal sɩlem ye, a tũu ne Wẽnd sõngre. Bũmb ka be tõnd sɛba pʋgẽ n zʋʋg yãmb sẽn karemd la y wʋmd bũmb ninga ye. M tẽed tɩ y na wʋm fãa — tɩ m neeme tɩ y zoe n wʋma bilfu — m tẽed tɩ m na yɩ y zu-zẽkre wala yãmb me sẽn na n yɩ m zu-zẽkre Soaal a Zezi Krista raare. Yaa m sũura sẽn da kegem woto la m da rat n deng n tũ y nengẽ n le paas y sũ-noogo. M sã da yiẽ yãmb nengẽ m na n digẽ la Masedoan, n tɩ yi be n le wa y nengẽ, tɩ y yaoolẽ marsã n taas-m Zɩɩde. M mii, m tagsame tɩ seke ne m kẽna sẽn sigl woto wã? M mii, m ka kelg m sũura sẽn ya ninsaal sũuri n mi N-yẽe rũnna n yik beoog n mi Ayoo? Wala Wẽnd sẽn yɛs b sɩd zĩigẽ, tõnd goama ne yãmb ka naag n yɩ N-yẽe la Ayoo ye. Maam, a Silvẽ la a Timote sẽn moon yãmb Wẽnnaam Biig a Zezi Krista, nin-kãng me pa naag n yɩ N-yẽe la Ayoo ye. Bãmb nengẽ yɩɩ N-yẽe bala. Wẽnd sẽn kãaba fãa, bãmb n gõms ne b zugu tɩ yaool n yɩ, la yaa bãmb maasem yĩnga la b sã n yet tɩ Wẽnd paam pẽgre bɩ tõnd tõe n leok tɩ: Ami! Wẽnd n vigl yãmb ne maam Krista maasmẽ la b taag tõnd ne b ka-sõngo. Bãmb n ning b bãnd tõnd dĩirẽ la b pids tõnd sũuri ne a Vʋʋsem Sõng kũuni. Wẽnd naag-m lame n ya kaseto tɩ yaa m sẽn pa rat gãgs ne yãmbã la m pa wa Korẽnt. Ka yet tɩ d da ratẽ lame n dems y tẽeba ye. Ayoo! Y sũ-noog la d baooda; d miime tɩ sã n ya y tẽeba, y wɩk n yɛsa y nao zutu. Maam bal n yeel m sũurẽ tɩ m pa na n leb y nengẽ y sũ-sãanga pʋgẽ ye. Sã n ya maam n sãamd yãmb sũuri wilg-y m sẽn na n paam sũ-nooga zĩig ninga sã n ka m sẽn sãam b rãmb sũurã nengẽ? M sã n gʋls-y y sẽn mi wã, yaa m sẽn pa rat tɩ m waoonga yɩ sũ-sãang ne neb niyns sẽn da tog n pids-m ne sũ-noogo; m mii vẽenega tɩ m sũ-noog yaa yãmb me rẽnda. Sɩda, yaa ne yam-yoodre, ne sũ-weoogre, n paas nintãm la m gʋls yãmba la m da pa maan dẽ n na n sãam y sũur ye; yɩla y bãng nonglem kãseng ning sẽn be m sũurẽ y yĩnga. Sã n ya ne ned ninga sẽn waa ne beegrã, ad-y ka maam bal la a beegr ye — la m kõn paas tɩ yɩɩg woto ye — a beega yãmb me. Nin-kãng sẽn paam kʋʋnga sɩbgrã, sekame. B sẽn pʋs n na n kõ-a sugr la raoodo n são, sã n ka rẽ a sũ-sãanga wat n loogame. M kot-y lame tɩ y maan zood ne a n yɩɩge. M gʋlsd-y la seb kãngã n na n dɩ kaseto, n na n bãng y sakra sẽn ta zĩig ninga. Y sẽn kõ a soab sugrã, mam me kõn mong-a ye; la m sã n kõ-a sugr wala a ra tara m sugr tʋʋmde, yaa yãmb nonglem yĩnga la Krista sẽn be d sʋkã yĩnga. D da bas tɩ Sʋtãan belg-do tɩ d mi a geelsa fãa. M taa Troas n moon Krista Koe-noogã. M mikame tɩ Soaala paka kʋɩlensa yalengo n kõ-m be, baasg fãa m sũura pa tol n gãand laafi tɩ m pa yãend m saam-biig a Tit ye. M pʋʋs-b lame n le wẽnemd n dɩk Masedoan tẽng sor. Wẽnd paam barka! Bãmb tũnuga Krista n peeg tõnd tɩ d pʋgd d Tãnsoab sẽn tõog a bɛɛba la d yelgd zĩig zãnga bãmb bãngrã yũ-noogo. Wẽnd nifẽ, tõnd sɩd yaa Krista yũ-noogo, sẽn paam b fãagra sʋka wa sẽn na n kong-bã. Bogr a ye yĩnga yũuga yaa kũum yũugu n wat ne kũum. Bogra to wã yĩnga, yũuga yaa vɩɩm yũugu n wat ne vɩɩm. La ãnda n tõe tʋʋmd a woto? Tõnd ka ya wa neb wʋsgo sẽn pund koom n paasd Wẽnd gomda ye, ayoo! D yaa neb sẽn pelg b sũuri, n gomd ne Krista sɩda, Wẽnd taoore, wa neb sẽn deeg b tʋʋmda Wẽnd nengẽ. La d le sɩngdame n lʋɩɩsd d meng taoor bɩ bõe? Sãnd ka wẽnd yaa pakre ne-do, wa sẽn ya pakr ne neb kẽere, tɩ d yiis d tʋʋm-sõnga kaset sɛb n wilg yã, bɩ d deeg d tʋʋm-sõnga kaset sɛb yãmb meng nengẽ? D tʋʋm-sõnga kaset sebr yaa yãmb mense, yaa sebr sẽn gʋls y sũurẽ, sebr ned fãa sẽn zãad la a karemnẽ. Vẽeneg fas, yãmb yaa Krista sebre b sẽn kõ-do. Ka sebr sẽn gʋls wa sɛb a taaba ne gʋlsg ko-sablg ye, gʋlsa ne Wẽnd Vɩɩga Vʋʋsem; pa gʋls kug peesem zug ye, yaa yĩn-gãongẽ, yaa sũurẽ. D sũura sẽn ya kɛgeng woto Wẽnd taoorã, yaa Krista yĩnga. Tõnd meng ka tõe n yeel tɩ bũmb tol n beeme n yit tõnd nengẽ ye, ayoo! D tõog buud fãa yita Wẽnnaam nengẽ. Wẽnd n kɩt tɩ d lebg b Zood paalga tʋʋm-tʋmda. Zooda yaool n ka zood ning sẽn tar-a a kaset sebr zuga ye, zooda yõga ne Wẽnd Vʋʋsem. Sebra waa ne kũum tɩ Vʋʋsma wat ne vɩɩm. Zood ning sẽn tar-a a kaset kug peesem zug la sẽn waa ne kũuma, paamame t'a siginda yãend pẽgr kãsenga al tɩ Israyɛl kamba da pa tõe n ges a Moyiiz nenga sẽn da yãgd ne ziir ninga ye. A ziira yaool n da yaa bũmb sẽn ka na n kaoos n sɛ ye. Zood ning sẽn yõg ne Wẽnd Vʋʋsma, zood kãng Siginda ziir kõn yɩɩg sɩda? Tʋʋmd ning sẽn baas-a ne ninsaalb paalgrã sã n kõ a tʋʋm-tʋmda ziiri, sẽn tũ a soab wilgri tɩ zemsg zamaana yalsã, nin-kãng soab pẽgr kõn yɩɩg sɩda? Ayoo! D kõn yals n mak b ziira ne taab ye tɩ pipi ziira pʋs n ka yɩ zɩɩr meng ye. Bũmb sẽn ka na n kaoos n loog sã n puk ne ziiri, bũmb ning sẽn pa loogdã ziira kõn yɩɩg sɩda? D sẽn paam saagr a woto fãa kɩtame tɩ d zĩi n ka bʋʋd fɩ. D ka ya wa a Moyiiz sẽn da kong n bao peend n lud a nengã, n zoet tɩ Israyɛl kamb na n wa yãend sẽn ka tõe n ka sɛ wã sɛɛbo. A Israyɛl kamba yama kell n paa lika. Al n tãag rũnda menga, f sã n karemd zood kʋdga sebre, f neeme tɩ peenda ket n ludame. A pa lak ye, tɩ Krista bal n lakd peend kãnga. N-ye! Sẽn ta ne rũnna, a Moyiiz sebra kareng wakato, yaa wa peend la b gãnegd b sũurẽ. Ya f sã n kẽ Soaala bal la peenda lakda. Soaala la Vʋʋsem: tʋʋmd a ye; la Soaala Vʋʋsem sẽn be zĩig ninga, be la burkĩndlem be. Tõnd fãa sẽn doog d neng t'a tʋʋsd Soaala pẽgrã wa nin-gɛtgã, tõnd lebga b wẽnego la d wẽnega pãng tara paasgo n dabda, ne Soaala Vʋʋsma. Woto wã, tõnd sẽn paam tʋʋmd kãng ne Wẽnnaam nimbãan-zoeere sẽn maneg tõndo, tõnd ka mi tadgr ye. D basda yãnd la zoe-nif buud fãa, n zoet zãmbo la zirẽ-beedo, Wẽnnaam Koɛɛgã mooneg pʋgẽ. D sẽn baood bala, yaa sɩda puki tɩ ned ning fãa sẽn yaa pʋ-peen-neda bãmb taoore bɩ a pẽg tõndo. D sẽn moond Koɛɛg ninga sã n ket n ka vẽenega, yaa ne neb niyns sẽn kẽed-b moogã la a ka vẽenega. Yaa pʋ-to-nebã: zamaana soaal sẽn sob b rãmb yama tɩ b pa ne Krista Koe-nooga sẽn yãgd ne ziir ningã. D zãmsga pʋgẽ, ka tõnd menga yell la d goamd ye. Yaa Krista a Zezi sẽn ya Soaala la d wilgd yãmba; tõnd yẽ yaa yãmb sõgen-kamba, a Zezi yĩnga. Wẽnd ning sẽn kõ noore, tɩ vẽenem pusg lik pʋga, yaa bãmb vẽenem n pusg tõnd sũya tɩ d tõe n wilg neb a taaba, Wẽnnaam pẽgr d sẽn yãend t'a yãgd ne Krista nenga. D zɩta yõod a woto fãa ne d yĩn-koamsã, d yĩn-tãndã. Dẽ me n kɩt tɩ d mi vẽenega tɩ tõnd pãnga yita Wẽnnaam nengẽ, a ka tõnd meng pãng ye. B tara tõnd n tabd zĩis fãa la d nan ka beds ye. D zĩime n tar saagre la d yam nan ka lak ne d meng ye. B tara d yaoolgo la Wẽnd nan ka yi d poorẽ ye. B lub-d la tẽnga la b nan ka yiis-d moog ye. Sẽn na n yɩlẽ t'a Zezi vɩɩma puk tõnd me yĩngẽ, tõnd me sakda zĩis fãa la wakat fãa a Zezi kũuma namsgo. D nan pa ki ye, yaa sɩda, la yaa wakat fãa la b namsd tõnd a Zezi yĩnga la namsga seka a na kʋ-do. Yaa woto me la a Zezi vɩɩma pukd vẽenega tõnd yĩn-kiidgẽ. Tõnd nengẽ kũuma tʋmda a tʋʋmde la yãmb nengẽ yaa vɩɩm n tʋmd a tʋʋmde. Tõnd tara yam ning tẽeb sẽn kõt a soaba wala sẽn gʋlse: «M tẽeme, la yaa rẽnd yĩng la m gom yã.» Tõnd me tẽedame la yaa rẽnd yĩng la d gomda, n miẽ tɩ sẽn vʋʋga Soaal a Zezi wã na n vʋʋga tõnd me ne bãmba la b yals tõnd ne yãmba b sɛɛgẽ. La rẽ fãa yaa yãmb yĩnga, tɩ wʋsg gale ne Wẽnd kũuni, tɩ bark pʋʋsga gale neb wʋsg nengẽ, Wẽnd pẽgr yĩnga. Yaa rẽnd me yĩng la d raooda ka boogd ye. Ayoo! Yĩnga pãng sã n tar boogre n dabda, d sɩɩga rẽnd tara paasg beoog-beoog fãa. Daar a wãn namsg segenda tõnd yĩnga, pẽgr sẽn kõn sɛ, pẽgr sẽn zʋʋg saagre. D sẽn saagd n yɩɩdã, ka nif sẽn tõe n yãend ye. Nif sẽn ne ka zɛɛd sɛɛb ye. Nif sẽn pa ne wã n ka sɛt lɛ-lɛ. Tõnd sẽn mi, yaa tɩ zãnd ning tõnd sẽn be a soab tẽngrã, tẽng zug ka, sã n wa sirgi, doog a to n be arzãna, Wẽnnaam sẽn segl d yĩnga; roog sẽn kõn sirg abada, sẽn ka ninsaalb nug tʋʋmde la sẽn zao yĩngri. D zĩi ne nintãm tẽng zug rooga pʋga n dat ne d sũur fãa tɩ yĩngr dooga me n dogl a zugu. La rẽ yaa d sã n dat tɩ b wa mik tɩ d ka zĩ d zaala, d yera fuugu. D zĩi d tẽng zug rooga pʋga n tar waasgo la yɩɩre; yaa rẽ me la d dat fuuga yeelgre n yɩɩd a yeegre; d datame n yeelg fuug a yiib soabã n bʋʋg pipi soabã, tɩ vɩɩma rɩ sẽn tõe n ki a soabã. Yaa Wẽnd meng n togl tõnd so-kãnga tɩ bãmb meng n lembd tõnd a Vʋʋsem Sõng kũuni. D sũur kegma, ba d sã n mi tɩ kaoos yɩnga ne yĩng ning d sẽn zĩ ne a soaba zãagda tõnd ne Soaalã. D kẽnda ne tẽebo, ka ne d nina vẽenem ye. Tõnd sũur kegmame tɩ d datẽ meng n bas d yĩn-kãnga n tɩ yegl Soaala. Dẽ n so tɩ d vɩ ne d yĩngã bɩ d yeeg-a lame n base, d sẽn baood la Wẽnd daab maaneg bala. D sẽn ya a soab fãa, d na n yaasa d kãre bʋʋda raare tɩ ned kam fãa reeg a tʋʋm keoore, tʋʋmd ninga a sẽn tʋme, a sẽn da waa n ket ne a yĩnga, a tʋʋm sõng wala a tʋʋm wẽnga. D sẽn zoet tɩ d Soaala waoogr na n wa pa sãoog yĩnga, d modgdame tɩ ninsaalba reegd d saglgo. Sã n ya ne Wẽnde, d miime tɩ d yɛsa d kãr bãmb taoore la d tẽedame tɩ d sũura me rɩga pɛɛlg fas bãmb taoore. Ka lʋɩɩs d meng taoorã la d rat n le sɩng ye, d wilgd-y lame bala bũmb ning sẽn be d nengẽ tɩ y zug tõe n zẽk ne tõndo la woto y na lub sẽn ka baood b meng pẽgre ne sẽn solg sũurẽ, n baood-a ne sẽn puk yɩnga. Sɩda d sã n gomame waa d yika gãeemdo, yaa Wẽnd yĩnga; d sã n gomd tɩ tũudẽ, yaa yãmb yĩnga. A Zezi Krista nonglem rɩdgd-d lame tɩ d tags tɩ nin-yend sã n ki neb fãa yĩngã, fãa n naag n ki. B sẽn ki fãa gill yĩngã, yaa sẽn na n yɩlẽ tɩ sẽn vɩ-ba da le vɩɩnd d mens yĩng ye, b vɩɩnd sẽn ki-a la sẽn vʋʋg-a b fãa yĩnga. Woto wã d ka le ne ned ba a ye ne ninsaal nif ye. Ba sã n da yaa ne d nin la d da bãng Krista, ka boto marsã la d le get-b ye. Ned sã n kẽ Krista a lebga nin-paalle, nin-kʋdga menemame tɩ paalla led a zĩiga. La fãa yita Wẽnd nengẽ, bãmb tũu Krista maasem n maneg tõnd yell ne bãmba la b kõ-d la maneg taab yell ne tʋʋmd ning d sẽn deeg b nengẽ wã. Yaa Wẽnd meng n da tũ Krista n wẽnemd dũniya neng n le tees b menga; b basa ninsaal beegr taale la b kõ tõnd zelemd sẽn na n gom n maneg d taab yelle. Tõnd tʋʋmd yaa d deeg Krista zĩiga. Yaa wa Wẽnd sagenda ne tõnd noore. Yaa rẽ la d kot-y, Krista yĩnga, tɩ y maneg y yell ne Wẽnde. Ned ning sẽn ka maana yel-wẽndã, yẽ soab basame tɩ b tʋk-a yel-wẽnd zɩɩb, sẽn na n yɩlẽ bala tɩ Wẽnd tũ a maasem n pids tõnd ne b sõmblem. Tõnd sẽn ya Wẽnd tʋʋm-tʋmdba, tõnd wɩngda ne yãmba tɩ y da sãam Wẽnnaam kũuna b sẽn kõ yãmba ye. Yaa bãmb meng n yete: «Barka daare mam deega f kosgo, fãagra raare, mam sõnga foom.» Barka raar la rũnna, fãagra raar la rũnna. Woto tõnd ka rata tɩ d manesem rɩgl kugr tɩ ned lak n lʋɩ tɩ b wa sãbs tõnd tʋʋmda ye. D sẽn pa rat tɩ b sãbs-dã, d modgda d manesem fãa pʋgẽ, n wilg tɩ d yaa Soaala tʋʋm-tʋmdba. D modgdame n sak lengr daar fãa, n sak sũ-beedo la yɩɩre, n sak pãbre, n sak roog kõom, n nams zab-kaoodb nusẽ, n sak yaamse, n bas gõeem, n bas rɩɩbo; d modgda ne pʋ-peelem, ne bãngr baoobo, ne sũ-tõogo, ne taab sʋk ningri, ne yam sõng baoobo, ne taab nonglem akɩka, ne sɩd togsgo, ne Wẽnd pãng bõsgo; d modgda ne sõmblem zab-teed baoobo, zab-teed sẽn zãad n digd bɛɛba, zab-teed sẽn zãad n ligind bɛɛba. D sakda waoor wala paoore, yʋ-sõng wala yʋ-beedo. B rõt-d la zirẽ-beedo tɩ d yaool n togsd sɩda, b get-d la wa neb sẽn ka yʋʋre, tɩ d yʋʋr yaool n sãt zĩig zãnga, wa neb kũum sẽn yãk raare tɩ d vɩɩma wɩɩd ne pãnga; wa neb sẽn tog ne kaase la d yaool n ka kiid ye; wa neb sẽn zĩ ne sũ-sãamse, tɩ d noor yõgemd daar fãa; wa naong rãmba tɩ wʋsg yaool n tũud tõnd n lebgd arzɛk rãmba; wa nug sẽn ka zãad rãmba, tɩ d yaool n tar fãa. D ka gom-y ne zoe-nif ye, Korẽnt dãmba, d laka d sũur zãng n wilg yã. D sũurẽ wã weer be y yĩnga, ya y meng sũurẽ la weer paoogda. Lebs-y tõnd d yel-sõmde; m gomda ne yãmb wala m kamba, m kot-y lame tɩ y pak y sũura yalengo. Da lagem-y ne bu-zẽmbã n dɩk so-yɛng ye. Bõe n be sẽn baood-a sõmblem la sẽn baooda wẽng sʋka, vẽenem ne lik sʋka? Sɛdg bʋg buud n tõe n sede Krista ne a Beliar sʋka? Sẽn tẽed-a la sẽn ka tẽed-a lagemda taab bõe yĩnga? Wẽnd dooga maanda a wãn n wa lebg wẽn-naandsa rẽnna? Tõnd yẽne la Wẽnd vɩɩga roogo tɩ b meng n yeele: «M na n ti-la m doog bãmb sʋka la m na n zĩnd n paka bãmba. M na yɩ b Wẽnd tɩ bãmb yɩ m neba.» Dɩlla welg-y mens ne nin-bãmba, bas-y-b kɛɛnga. Da sɩɩs-y bõn-dẽgd buud ye tɩ m zaka noor na pak y yĩnga. M na yɩ Ba y yĩnga tɩ y me yɩ m kom-dibli la m kom-pugli — Pãng-Soaba-Wẽnd n yeele. Tõnd sẽn paam kãab nood a woto fãa, m kom-sõma, d sõng tɩ d yĩnga la d yama lak ne rẽgd buud fãa, d zoe Wẽnnaam la d baas d tʋʋmna, d sõmblem baoob tʋʋmna. Pak-y y sũurã d yĩnga. Ned ba a ye ka rɩ bõne d nengẽ ye. Ned ba a ye ka lebg naongo, tõnd ka rɩ ned ba a ye paoong ye. M pa gomd woto n dat n ning y taal ye. M zoe n togs-y lame tɩ y vɩ bɩ y ki yã, y paada tõnd nonglem pʋgẽ. D sũur kegma ne yã la d zug zẽka wʋsgo; y maasa d sũuri al tɩ ba ne d sen tar toogã, m sũ-nooga ket n pida zãnga. D taa Masedoan la pems maasg ka wẽ d yĩnga ye. D yãee lengre zĩig zãnga. Yɩnga yɩɩ maoore tɩ pʋgẽ ya rabeem. Wẽnd sẽn maasd nimbãan-dãmb sũuri, n maag tõnd dẽnna ne a Tit waoongo. Ka a waoonga bal ye, yaa yẽ me sẽn leok t'a yãenda sũ-noog y sʋka. A wilg-d lame tɩ y gũud-d la ne y sũur fãa; a wilg-d lame tɩ y sũur sãama y sẽn ka yãend tõndã; a wilga y sẽn da rat neer ning fãa ne tõndo, la woto wã mam nengẽ yɩɩ sũ-noog ne sũ-noogo. Sɩda m sebrã sã n sãam y sũuri me, ad-y rẽ pa sek mam lɛɛg n zab ne m meng marsa ye; tõe tɩ m zaba ne m menga a wakatẽ tɩ m mi tɩ sebrã kõ-y la sũ-sãanga, ba sũ-sãanga sã n ka kaoose. La marsã m sũur noomame. Ka y sũ-sãangã n wa ne mam sũ-nooga ye, yaa m sẽn yãe t'a waa ne y tuubgu. Yãmb sũ-sãangã yaa Wẽnd sẽn dat a soaba buudu; tõnd ka maan bũmbu n wa ne-a ye. Sũ-sãang wa Wẽnd sẽn dat a soaba buudu wata ne tuubgu n manegd yelle la woto wã a ka bõn-wẽng ye. Yaa sũ-sãang wa zamaana rãmb sẽn mi a soabã n wat ne kũum. Ad-y y sũ-sãang sẽn naag ne tuubgã tʋma tʋʋm-sõma y sũurẽ. Ad-y y sẽn yãgd marsã n na n bao yella sore, — bõe la m gomd woto? — Ad-y y sẽn pa rat n dɩ a taale, n sãbsda wẽnem, ad-y y sẽn zoet rabeem ne a maanego; ad-y y sẽn tʋl m yãabo, ad-y y sẽn tʋl neere, ad-y y sẽn gẽesd sɩbg-sõngo. Y wilga sõmb-sõmbo tɩ yell kãnga pʋgẽ y ka lʋɩɩs y toog ye. Dɩlla m sã n gʋls-y sebre, ad-y ka bɛɛgda, ad-y ka b sẽn beeg a soaba me yĩng ye. Yaa sẽn na n yɩlẽ bala tɩ y nonglem kãsenga ne tõnd puk Wẽnd taoore. Yaa rẽ n maas d sũuri. La sũ-noog sẽn yɩɩd rẽ n waa n paase: ya a Tit sũ-noogã, t'a yama gãanda y fãa poorẽ. M sã n saag, yẽ taoore, n pẽg m meng bifu yãmb poorẽ, dẽn ka bũmb sẽn wat ne m yãnd ye. M sẽn minim n togs sɩd bũmb fãa poorẽ, m sẽn togs bũmb ning a Tit poorẽ wã me yɩɩ sɩda. La woto a nonglem ne yãmb le paasame t'a tẽega y fãa sakr sẽn yɩ a soaba, a tẽega y sẽn deeg-a ne rigbu la sulg-m-menga. M sũur nooma m sẽn tõe n teeg-y bũmb fãa pʋgẽ. M saam-biisi, d wilgd-y la kũun ning Wẽnd sẽn kõ Masedoan Tigengu. Ne b namsga sẽn yɩ ka tɛka, b kɛ-la b sũ-noog kãsenga la b naonga sẽn yɩ naong menga pʋga n yiis b kõo-n-da-kees kũuni. M kõta kaset tɩ b kõo ne yamleoogo wala b pãng sẽn tõe la sẽn yɩɩg b pãng menga. Bãmb meng n kos tõnd ne dɩdgre tɩ bas-ba tɩ b naag n sõng nin-sõma wã. B kõome tɩ yɩɩg d sẽn da tẽeda tɩ yaa b mens la b reng n dɩk n kõ Wẽnde, la tõnd me, Wẽnd poore, ne Wẽnd sõngre. Dẽ n kɩt tɩ d kos a Tit t'a sõnge, tɩ kũm-taab-nimbãanega tʋʋmde a sẽn sɩng yãmb sʋka, baas neere. Y sẽn wɩngd sõma ne bũmb faa wã: ne tẽebo, ne goam, ne bãngre, ne tʋʋmde, ne nonglem, wa tõnd sẽn wilg yãmb a soabã, bɩ y wɩng woto me ne taab sõngre. Ka noor la m kõt-y ye, m datame bal tɩ y sẽn wɩngd ne taab sõngrã wilg tɩ y sɩd tara taab nonglem akɩka. Yãmb mii neere Soaal a Zezi Krista ne b kõt yaarã. B sẽn da ya arzɛk soaba b lebga naong soab tõnd yĩnga la woto b naonga lɛɛg n pidsa tõnd ne arzɛka. Dɩlla yaa saglg bala la m kõt yãmba la wã n tog ne yã tɩ yãmb n deng neba fãa rɩẽ, n tags tʋʋmd kãng yelle la y sɩng-a. Baas-y tʋʋmda marsã wala y sẽn da rat ne sũur ningã la ne pãng ningã. Fo sũura raab sã n pidi, f sẽn wat ne bũmb ning fãa yɩta bõn-sõngo tɩ ka fo sẽn ka tara la b na n ges ye, yaa fo sẽn tarã. Pa yet tɩ y kõ y taab la y zĩnd ne naong ye; neera la ned fãa paoong zeng a to rẽnna. Yãmb paoonga n dɩlgd bãmb naong rũnna, la raar a to tõe tɩ b me paoong wa lek yãmb sãoogo. Woto la zem-taab zĩndida. Yaa woto la b gʋlsyã: Sẽn deeg-a wʋsgo ka paam tɩ yõsg ye, la sẽn deeg-a bilf me ka yãe tɩ paoog-a ye. Wẽnnaam paam barka, bãmb sẽn yãnga a Tit nonglem ne yãmba! A saka m boolle. A sũura nonglem sẽn kɛɛd n yɩɩd pĩnda, a kõ-la a meng yam n na n wa y nengẽ. D yãka d saam-biig a ye t'a yãag-a; kristneba fãa pẽgda nin-kãng sẽn tʋm tʋʋmd ninga Koe-nooga yĩnga; la ka rẽ bal ye, yaa kristneba fãa n yãk-a t'a yãag tõnd d so-toaka pʋgẽ, n naag n yãend y vaag-n-kõ zãnga sẽn wat ne Soaala pẽgr ninga la a naag n yãend tɩ yɛla me tũu wa d sẽn date. D maana woto tɩ d ka rat tɩ ned wɩd tõnd ligd kãnga sẽn labsa poorẽ ye: sɩd lebga zɩɩb meng la b tʋk-do. Ka Wẽnd taoor bal la d baood tɩ d yɛla tũ sor ye, yaa ninsaalba me taoore. D saam-biig a to la d paas bãmb b yiibã; d yãenda naoor yaka la bũmb wʋsg pʋgẽ tɩ nin-kãng tara tʋʋmda sũuri; so kãngã, a le wɩsg a meng n yɩɩda, a pʋg sẽn peel ne-y yĩnga. Sã n ya a Tit, yẽ yaa mam tũud-n-taaga la m sõangd yãmb sʋka; sã n ya saam-biis a taabã, yaa Tigengã, Krista zu-zẽkrã, n yãk-ba. Wilg-y-ba, tẽedba fãa taoore, y nonglma sẽn ta zĩig ninga la sẽn tũ ne bũmb ning tɩ d tar zu-zẽkre y fãa gill poorẽ. M pa na n nams n gʋls yãmb saam-biisa sõngra poorẽ ye. M miime tɩ yaa ne y sũur fãa la y baood nin-sõma wã sõngre la m goma y yelle ne Masedoan dãmb n pẽg yãmba; m togsame tɩ yaa al dɩẽ woko la Akayi tẽng segl n sɛ. Yãmb modgra kõo neb wʋsg sũ-keelem. M na n deng n tʋma m saam-biisã tɩ mam sẽn pẽg yãmba da wa yɩ zirẽ-beedo la b mik tɩ yãmb segl n sɛɛme wa mam sẽn yeelã. Ka rẽ Masedoan dãmba sã n tũ maam n wa ling yãmba, m sẽn tãoosd raooda na n lebga yãnde; na yɩ yãmb dẽnd n yɩɩda. Dẽ la m tʋlg yã tɩ d saam-biisa reng taoore tɩ y segl y sẽn dat n kɩs bũmb ningã tɩ beed ka naag ye, la b yãend tɩ y kõta ne y sũuri. Gese, kʋɩɩm sã n zoe bʋdb toogo, a na n tigsa ka-faado la ned ning sẽn bʋta ne sũuri yaa bark buud fãa la a tigsda. Bɩ yãmb ned kam fãa tũ a sũur yalem n kõ a sẽn tare la a ra maan wala a ka kõt ne yamleoog ye, wala yaa moadeg ye. Sẽn kõt-a ne yamleoog la Wẽnnaam nonga. Bũmb zãnga Wẽnd meng tõeeme n pids yãmb ne sõm buud fãa, al tɩ y tar wakat fãa, la bũmb fãa pʋgẽ sẽn sek y vɩɩma n tol n kell, tɩ yãmb me rɩk rẽ n maan yel-sõmde. Yaa woto la b gʋls yã: «Zĩis fãa b maanda sõm bala, b kõo naong rãmba, b sõmblem kõn sɛ abada.» Wẽnd sẽn kõt ka-koaad ka buud sẽn na n bʋde, la bur sẽn na n dɩ, b na kõ yãmb a yiiba fãa, la y sõmblema na n woma biis zembala. Y arzɛka sã n paase, y na tũ rẽ n lebg kõt yaar dãmba, la tõnd me na tũ y kõt yaarã n sõng tɩ neba fãa wɩng ne Wẽnd bark pʋʋsg kãsenga. Ka nin-sõma wã bal nimbãaneg la y kũmd ne kũun-sõng a woto ye, kũuna le wata ne Wẽnd bark pʋʋsg neb ka tɛk nengẽ. Kũuna wilgd-b-la yãmb sẽn ya neb niynsi la b pẽgda Wẽnnaam b sẽn bãng tɩ yãmb sɩd tũuda Krista Koe-noogã. B pẽgd-y lame yɛsa tɩ y sẽn kõt n pa keesdẽ wã, pukda y zood ne nin-sõma wã la ne tõnd me. B sã n pʋʋsd yãmb yĩnga, lebga b me wilg b nonglem ne yãmba, b sẽn yãend bark ning Wẽnd sẽn sudg yãmbã. Wẽnnaam paam barka tɩ b kõ-d la kũuni sẽn yɩɩd noor toagsg! N-ye! Sẽn kot-a yãmbã, Krista sẽn bʋgs la b ya nin-noang yĩngã, yaa mam meng a Pol, rao ninga sẽn ka tar võore a sã n be yãmb sʋka, t'a sã n yaool n zãr bɩ a ya nin-toaaga, maam n kot-y: sõng-y tɩ m sã n wa bɩ m da yik zʋg toaag ning m sẽn dat yik ne neb kẽera ye. Bãmb dãmb tẽedame tɩ m manesma tũuda ninsaalb rẽnna. Tõnd vɩɩ dũni wã pʋga, yaa sɩda, la tõnd ka zabd ne dũni rãmba zab-teed ye. N-ye! Tõnd zab-teeda ka zamaana rãmb dẽnd ye, Wẽnd n kõ-b tõndo, b meng yĩnga, la d tõe n tusa tãnsoben-doog buud fãa n lubi. Sẽn maand-b wa b ka mi Wẽndã, tõnd n lubd bãmb dãmba sɩlem la b tɩtaam, tõnd n gõdgd yam buud fãa n loe ne Krista tẽebo. Yãmb tũudma sã n lebg neer zãnga, d na yik n zab la d sɩbg kɩɩsd fãa. Ade, ned sã n beẽ n tẽed tɩ Krista n so-a, a bãng rũnna la beoog tɩ Krista n so yẽnda, la Krista n so tõnd me. Yãmb sõmblem paasg yĩnga, ka y bõna yĩng ye, d paama tõog Soaala nengẽ la d sã n pẽgd d meng tɩ loog, yãnd ka tar m ye. M ka rat n maan wa m baood n na n fʋʋsa yãmb ne m sɛba ye. B yetame tɩ m sɛba pʋga m yaa gãndaoogo la nin-toaaga la m sã n yɛs y taoore m ka tar yaoko la m ka mi goam ye. Bãng-y nere tɩ d sẽn be yɩɩg n ya a soab ne d goama, d sã n pẽnege, yaa d tʋʋma n na n wilg tɩ d ka teem ye. M pa kɩɩs tɩ m kõn saag n zeng m meng bɩ m mak m meng ne neb kẽer ye. Bãmb dãmb sẽn baood yaa b lʋɩ b taab taoore. B sẽn pa rʋʋsd ned a to n ta b sẽn yals b meng zĩig ningã, b yaa yalemse. Tõnd yẽ kõn saag n pẽg d meng tɩ loog ye. Tõnd tũuda sor ning Wẽnd sẽn wilg tõnd tɩ d dɩk n ta yãmbã. D ka na n tũ sor a to wala sor ning d sẽn dɩka ka taas tõnd yãmb nengẽ ye. D taame menga ne Krista Koe-noogo. Tõnd pa na n pẽg d meng tɩ loog ne d taab tʋʋm ye la d saagdame tɩ y tẽeba sẽn yẽrgd n dabd taoorã, d na waa n lebg y zu-zẽkre wa sẽn yɩ zĩisa taabã. D na n gãndga yãmb tẽngã n moon Koe-nooga zĩis a taaba, la kõn le yɩ ned a to toaagẽ, la kõn le yɩ ne neb a taab sẽn tʋʋm n dɩglẽ, la d na n pẽgd d meng ye. Ned sã n baood a pẽgre, bɩ a bao-a Soaala nengẽ. Ad-y ka ned ning sẽn pẽgd a meng n ya nin-kãseng ye, yaa Soaala sẽn pẽgd a soaba. Y sã n tõe n sak tɩ m maan wa gãeeng bɩ y sak waare! Mam sẽn nong yãmb ne sũ-kiir ningã, yaa ne Wẽnd meng nonglem; m dɩka yãmb n kõ sɩd a ye; m peega yãmb wa pug-bĩngri n tɩ kɩs Krista. La rabeem tar-m lame, m zoeta y na n wa maan wa a Awa sẽn sak waafa sɩlem goama, tɩ y sũya wa rẽgem, tɩ y sãam y pʋ-peelem ne Krista. M neeme tɩ ned ninga fãa sẽn wa-a yãmb nengẽ t'a na n wilga yãmb Zezi a to, sẽn ka tõnd sẽn wilg a soabã, bɩ a gom Vʋʋsem Sõng a to sẽn ka yãmb sẽn zoe n paam a soabã, bɩ a moon koɛɛg a to sẽn ka Krista rẽnna, yãmb deegda yẽ soab neere. Mik m pa tagsd tɩ nin-bãmb sẽn tẽed tɩ b yɩɩda tʋʋm-tʋmdb a taabã, m pa tẽed tɩ b sãoo maam ye. Ba mam sã n ka goam-goamda, ne bãngr yẽ sẽ, m ka paood ye; d wilg-y la y nifẽ, ne bũmb wʋsgo sẽn yɩ vẽenese. Dɩlla m kongra bee yɛ? Mam sẽn moon yãmb Koe-noogã n pa tol n bao yõoda bɩ bõe? Bɩ mam sẽn sak n yaal m menga n na n zẽk yãmbã? Yaa saam-biis a taab paoong la m deeg n dɩlg m menga, n tõog n sõng yãmba. M sẽn ta y nengẽ tɩ bũmb paoog-ma m ka lebg yãmb ned ba a ye zɩɩb ye, yaa Masedoan saam-biisi n yaoog-m. M pa tʋlg, ba vugr menga, n kos yãmb sãando la m kõn saag abada. Sɩd wa Krista sẽn ya m kasetã, m zug kõn sulg Akayi tẽn-tõre, yell kãnga poorẽ ye. La rẽ ya m sẽn pa nong yãmba bɩ? Ayoo! Wẽnd mi tɩ ka boto ye. M na kell n maan boto tɩ neb niyns sẽn baood-b n na n kõ b meng bʋʋm, n gomd tɩ b maana wa tõndã, bɩ b ra tõog n paam bʋʋm ye. Nin-bãmb ka tʋʋm-tʋmdb akɩk ye, yaa rɩ baoodb sẽn belg tɩ b yaa Krista tʋʋm-tʋmdba. La rẽ ka tog n yɛɛs-d ye tɩ Sʋtãan meng mi n wẽnda malɛk ne a vẽenem. Dɩlla Sʋtãana neba sã n yet tɩ yaa Wẽnd sõmblema la b pʋgda, bɩ d da yɛɛs ye. D bãng bala tɩ b kũuma na n wẽnega b vɩɩma: bõn-wẽnga. M le yet-y lame, da mams-y maam wa gãeeng ye; la rẽ sã n noom-y bɩ y bas tɩ m sɩd yɩ gãeenga n tõog n maan wakr bilfu. M sẽn na n togsã, m ka na n togs-a ne Soaala yam ye, na n yɩɩ wa ne gãeemdo, tɩ m tara m sẽn na n pẽg m menga. Neb wʋsg nagda ne zamaana yɛla. M me na maan wa bãmba. Y moor nooma ne gãeemse la yãmb n yaool n get y mens wa neb sẽn tar b vɩɩma buka. Yãmb sakdame tɩ b kẽesd-y yembdo, tɩ b rɩt yãmba, tɩ b fãad yãmba, tɩ b tar yãmb toogo, tɩ b tʋʋd yãmb, tɩ b laand-y pegse. M togsda rẽ ne yãnde; d sɩd basa d meng yog-yoge. M me na n goma wa gãeenga la m yeel tɩ b sẽn lʋɩɩsd bũmb ning taoorã, ma me toe rẽnna. B yet tɩ yaa Ebre rãmb buudu, maam me; tɩ b yaa Israyɛl kamba, maam me; tɩ b yaa Abraam yagense, maam me; tɩ b yaa Krista Tʋʋm-tʋmdba, mam na gom wa gãeenga: maam n yɩɩd bãmba; m sẽn kẽ bi-bees roogẽ sõor yɩɩd-b lame, b sẽn pãb-m sõor yɩɩd-b lame; yɩɩ naoor yak la kellẽ bilf bal tɩ m kiẽ. M sẽn deeg Zʋɩf rãmba nengẽ kaas pistã la a wɛ — a ye bal n ka pisnaase — yaa naoor a nu. Sãbsa yaa naoor a tãabo; vugr la b lab-m ne kuga; d koglg sẽn paa koomẽ yaa naoor a tã; m tol n paa kooma zug wĩndg la yʋng tõre. Sor zug yaams yɩɩ ka tɛka; ad kʋɩlsa gɩdgre, ad so-gɩtba, ad saam-biisi, ad bu-zẽmba, ad tẽng pugẽ yel-pakre, ad we-raoog rẽnna, mogr dẽnna, ad buuda neb zãmbo, m kõn gom m tʋʋmde, m namsgo, gõeem kaalem, kom la ko-yũud yelle, kom-gãaga, fut sẽn na n yiis waood kaalem. D kõn gom sẽn keta ye: m sẽn zĩ ne yɩɩr ning beoog-beoog fãa, Tigenga yɛl sẽn loe m zug yĩnga. Ãnda la pãn-kaoolg soaba, tɩ m pa naag-a n ya koamsa? Ãnda n lʋɩte t'a lʋɩɩsa ka yõog-m wala bugum? M sẽn tõe n zẽk m meng ne bũmb ning yaa m komsma. Tõnd Soaala Zezi Krista Ba a Wẽnde — sẽn so bark yʋʋm tong taab n ka mi sɛɛbã — bãmb miime tɩ m pa yagd ye. Damas tẽng naaba, a Aretas, kɩtame tɩ tãb-biisa gũbg tẽngã n baood n na n yõk-ma. La yɩɩ peoog pʋga la b sagl maam n tũnug roog võore n sik-m lal-gũbra poore la woto la m tõog n põs-a. Ka yaa zẽk-m-meng la y baood laa? (Rẽ yaool n pa segd ye) la bas-y tɩ m togs-y bũmb ning fãa Wẽnd sẽn wilg maam la m sẽn yãende. M mii kristneda, yʋʋm piig la a naas rũnna (yaa ne a yĩnga, mam pa mi ye, Wẽnd n mi) b tall-a lame n dʋʋs arzãna. La nin-kãnga sẽn dʋʋs arzãna, yaa ne a yĩnga, mam pa tõe n bãng ye, Wẽnd n mi. Beene, yẽ soaba wʋma goama ninsaal sẽn ka tõe n le rɩk n togs ne ninsaal noor ye. Nin-kãng yĩnga, mam da tõeeme n zẽk m menga, la sã n ya maam, m komsma bal la m na n lʋɩɩs taoore. Mam sã n da tʋlgẽ n zẽk m meng dẽ yĩng me, kõn yɩẽ gãeemd ye, tɩ yaẽ la sɩda, la m kõn wɩɩg ye, ka rẽ neba wat n sãmbame tɩ m sõmblema yɩɩda bãmb sẽn ne wã, bɩ b sẽn wʋmdã. Sẽn na n yɩlẽ tɩ m zu-nooga ra wa ne m nagre, m paama namsg sẽn wẽnd moog n sorg m yĩngã, wẽnd Sʋtãan n gõod n laand-m pegse — tɩ m da maan nagr ye! Al naoor a tãabo mam yõka Soaala sɛɛga tɩ b fãag maam, tɩ b leok maam: «Base, m sõngr kõn paoog f ye, m pãnga na keng f komsem.» Woto wã yaa ne sũ-noog kãseng la m lʋɩɩsd m komsma taoore tɩ Krista pãnga tõog n sig m zugu. Yaa rẽ me yĩng la m pid ne sũ-noogo m sẽn sak Krista yĩnga, komsma, paoogrã, naongã, namsgã, yɩɩrã. La m sẽn waa n lebg koams zãnga la m lebg pãng soaba. Y sẽn maana m ka lebg gãeenga! Yãmb n da togẽ n pẽg maam. Ne m sẽn ka fɩ wã, m ka ne yãmb sẽn boond b rãmb tɩ tʋʋm-tʋmdb bɛda sẽn yɩɩd-m ne bũmb ning ye. Ad bũmb ning sẽn maand kaset tɩ f yaa tʋʋm-tʋmd tɩ neb fãa miẽ: sũ-tõog namsg pʋgẽ, wẽnd makr dãmba, yel-soalma, bõn-bãna. Yaa bõe la tẽns a taaba Tigeng paamyã tɩ yãmb ka paame sã n ka mam meng sẽn pa reeg y bũmbã? La rẽ sã n ya zãmbo bɩ y kõ-m sugri. M le segendame n na n wa yãmb nengẽ la woto n tõkd m naoor a tãab soaba la m kõn bõs y sãando, tɩ mam sẽn data, pa yãmb paoong ye, ya y mense. Yaa kamb n tigsd b ba rãmb yĩnga, bɩ yaa ba rãmb n tigsd b kamb yĩnga? Sã n ya maam, m na n sɛ m pãng fãa yãmb sɩɩs yĩnga; yaa m nonglma sẽn paasdã n boogd yãmb dẽnd ne maam? Beneere, nina na n yeelame tɩ mam pa rɩ yãmb ye, yaa sɩda, la m belg n dɩɩme tɩ m sɩlma yaa sɩlem baafo. Yaa ne m tʋʋm-tʋmda bõe la m belg yãmb n dɩ? A Tit la m modgr t'a wa, yẽ ne m saam-biig y sẽn mi neere. Dɩlla yaa Tit n belg yãmb bɩ? Tõnd d yiiba zʋgo n ka yɩ zʋg yɛng sɩda? D ka rɩk taab nao sɩda? Al daar zãar menga yãmb da tõeeme n yõke tɩ tõnd dat n kõ-la d meng bʋʋm, yãmb taoore, baa fɩ! Tõnd gomda Wẽnnaam la Krista taoore la rẽ fãa yaa yãmb sõngr yĩnga, m kom nongedse. M zoeta m na n wa tũ yãmb nengẽ n ka mik tɩ y yaa wa m sẽn datã, bɩ yãmb me mik tɩ m ka ya wa y sẽn data ye. M zoeta m wa mik tɩ ket n yaa zaba, sũ-kiiri, zoe-bõne, beem, wɩdga, gom yaalse, no-rɩkre, kalem-kalem bala. M zoeta m na n wa y sʋka, tɩ Wẽnd ning-m yãnde, yãmb poorẽ, tɩ m wa kiigd nintãm, tɩ yell maandeb kʋdã kẽer ka sak n tuub b tʋʋm wẽna ye: b yoobã la b yell yooda taaba ye. Woto n tõkd naoora tã marsã m sẽn wat y nengẽ. Koɛɛg buud faa ratame tɩ b welg-a ne kaset dãmb a yiib bɩ a tãabo. M zoe n togsa yell mandeb kʋdã la sẽn wẽnd b bãmbã, la m le wilgd-b la rũnna yɛsa, tɩ m nan ket yɩɩga, wala m sẽn wilg-b m waoonga yiib soaba wakato: m sã n wa marsã sugr ka ye. Yãmb dat n bãnga sã n yaa sɩd tɩ Krista gomda ne m noore? Bãmb yẽ la sẽn ka põnegd-y wã la, bãmb wata yãmb sʋk ne pãng la! Yaa sɩda, b saka komslem, tɩ b ka-b pika la ne Wẽnd pãnga b ket n vɩɩme. Tõnd me boto. Tõnd me komsame, la Wẽnd ne b pãngã na kõ-d vɩɩm, d tʋʋmda pʋgẽ. Kẽe-y y meng sũurẽ, bao-y n gese y sã n tara tẽebo. Sok-y y mense, y ka ne tɩ Krista be y pʋsẽ. Wẽnd na kɩt tɩ y menga sokr ra wa ne y bãon-lukr ye. Wala m sẽn tẽedã, y kõn yãend tɩ d bãong lukr ye. Tõnd pʋʋsda Wẽnd tɩ y ra maan wẽng ye. Tõnd pa rat n maan waa d yɩɩda d taab toog wakat ye, d datame n maan neere, ba neera sã n na n waa ne toogo. Tõnd ka tar pãng n kɩɩs sɩd ye, d pãnga la d sõng sɩd bala. D komsma sẽn ya a soab fãa, d bee sũ-noog pʋgẽ, d sã n ne tɩ yãmb wɩɩda pãnga. D sẽn kot bũmb ning d pʋʋsg pʋgẽ, yaa yãmb lebg sõma. Yaa woto la m gʋls-y tɩ m ket yɩɩga tɩ d sã n wa pẽneg taaba bɩ d bas toolem ne yã; Soaal kõo tõnd pãng kãng manegr yĩnga, ka sãoong yĩng ye. Dẽn yĩnga, m saam-biisi, noog-y y sũuri, bao-y sõmblem bala, sõng-taaba bala; yɩɩ-y sũ-yɛnga, vɩɩnd-y laafi ne taaba, la Wẽnd sẽn ya nonglem la laafi Naaba na zĩnd ne yã! Pʋʋs-y taab neere. Saam-biisa fãa tɩ d pʋʋs y zãnga. Soaala Zezi Krista barka, Wẽnnaam Ba nonglem la a Vʋʋsem Sõng zoodo lagem y ne taaba. Ami! Maam a Pol, sẽn lebga Soaala tʋʋm-tʋmda tɩ pa tũ ne ninsaal pãnga bɩ a sõngre: tũu ne Krista a Zezi meng pãnga la ne Ba a Wẽnd sẽn vʋʋg-b kɩɩms sʋka. Maam la saam-biisa sẽn be-b ne maama, tõnd n pʋʋsd Wẽnnaam Tigenga kamb fãa sẽn be Galasi. Wẽnd na sudg-y b kũuna, n zĩndig-y ne laafi, d Ba a Wẽnd la d Soaal a Zezi Krista maasmẽ, bãmb n kɩs b meng d yel-wẽna yĩnga, bãmb n kɩt tɩ d tɩlg dũnna zamaan wẽngã, wala d Ba a Wẽnd sẽn tʋlge. B soog pẽgr yʋʋm sẽn kõn sɛ. Ami! M yɛɛsa y sẽn yɩ tao-tao, n bas Wẽnd sẽn bool-y ne Krista sõngre, n na n deeg koe-noog a to, wa Koe-nooga ya a yiibu; yaool n yaa neb bal n kẽ yãmb sʋka n baood n na n kẽes sãmbse y yamẽ, la b tedg Krista Koe-noogã. Ade, tõnd meng bɩ malɛk sẽn yi yĩngri sã n saag n kõ yãmb koɛɛg sẽn ka tõnd sẽn zoe n wilg yãmb a soabã, bɩ Wẽnd yãk a soab barka! Tõnd n yeele la rũnda menga tõnd n le togsde: ned ninga fãa sẽn saag-a n kõ yãmb koɛɛg sẽn ka yãmb sẽn zoe n paam a soabã, bɩ Wẽnd yãk a soab barka! Togs sɩd sãn beẽ, yaa ninsaal yõod bɩ yaa Wẽnd dẽnna la mam baood marsã? Yaa ninsaal yamleoog la m tũuda? M sã n ket n baood n na n noog ninsaalb sũuri m ka le tõe n yɩ Krista sõgen ye. Bãng-y, m saam-biisi, tɩ m sẽn kõ yãmb Koe-noog ningã ka tek ninsaal bãngra zulum sẽn tekẽ ye. Ka ninsaal nengẽ la m deeg-a, ka ninsaal nengẽ la m zãms-a ye, ya a Zezi Krista meng n wilg-a maam. Mam miime tɩ yãmb bãnga m vɩɩma sẽn yɩ a soab Zʋɩf rãmba sʋka, m sẽn waa n namsd Wẽnd Tigengu ne m pãng fãa, la m da sãamd-a sãang wẽnga, y wʋma m sẽn da tũud m yaab rãmb sorã ne sũur ningã al tɩ sã n ya zĩ kãng bɩ m lʋɩt m dogd-n-taasa fãa taoore. Ned ninga sẽn welga maam toor tɩ m nan ket m ma pʋgẽ la a bool-m ne a raabo, yẽ soab n wilg maam b Biiga, n yet tɩ m wilg-a bu-zẽmbã. M ka le yaas n sok m doagdb la m buudu, m ka kẽng Zerizalɛɛm n babs sẽn deng-b maam n ya Soaala Tʋʋm-tʋmdbã, ayoo! Yaa Arabi la m tees yã, n le lɛɛg n wa Damas. Yʋʋm a tãab dẽ poor marsã la m kẽng Zerizalɛɛm n tɩ ges a Kefas la m zĩnda ne-a dasem piig la a nu; m pa yãend Tʋʋm-tʋmdb a taaba sã n ka Krista saam-biig a Zak ye. M wẽend ne Wẽnd tɩ m sẽn gʋls y woto wã, m ka yagd ziri ye. Dẽ poor la m kẽng Siri la Silisi, la rẽ tɩ Zɩɩde Tigenga kamb ra ka mi-m ye; b ra wʋmdame bal tɩ b gomd tɩ bãmb pĩnd bɛyã yikame marsã n moond tẽeb ning yẽ meng sẽn da rat n sãama, la b ra pẽgda Wẽnd m poorẽ. Yʋʋm piig la a naas dẽ poore, mam le rʋʋ Zerizalɛɛm ne a Barnabe la m tũud-n-taag a Tit. Tũu ne Wẽnd wilgri, la m sẽn wa be wã, m togs-b la Koe-noog ning m sẽn moond bu-zẽmbã — la yɩɩ maam ne kãsem-dãmba bala n zĩnd ne taaba — tɩ m zoe rabeem m tʋʋmda na n wa ka tũ sore. M da tara tũud-n-taag sẽn ya Grɛk, a Tit, la b ka modg-a t'a kẽ bãong ye. Neb kẽer bala n belg tɩ b yaa d saam-biisi n soos n kẽ sʋka n na n bãng tõnd sẽn lood d wĩ niyns n na n tũ Krista; bãmb dãmba ra baood n na n kẽes-d la b yembdo. Tõnd pa sak n tũ b raabo, ba vugr menga, zoe-nif yĩng ye, tɩ d tʋlg n taasa yãmb Koe-noogã ne a sɩda zãnga. Sã n kella sẽn mamsd-b mens ne nin-bɛdã — b sẽn yaa a soab taki dẽ ka pak m ye, tɩ Wẽnd ka welgd ninsaal ne a to ye — bãmb me pa yãend sãoog sẽn na n lek m Koe-nooga pʋgẽ ye. B bãngame menga tɩ yaa Wẽnd n yãk maam tɩ m moon Koe-nooga nin-zẽmbã wala b sẽn yãk a Piyɛr Zʋɩf rãmb yĩnga. Sẽn kõ-a a Piyɛr tõog Zʋɩf rãmba yĩngã, yẽ soab bala n kõ-m tõog kãnga bu-zẽmba yĩnga. Sẽn waa n lebg vẽeneg ne-ba, tɩ Wẽnd bark la m paam yã, a Zak, a Kefas la a Zã, kãsem-dãmba la tẽn-kuga, bãmb me tuda b nug n maan zood ne maam la a Barnabe, la b wilg-d lame tɩ bãmb n na n ges Zʋɩf rãmba yelle tɩ tõnd ges bu-zẽmbã yelle. D da tog n tẽega naong rãmba yelle; la rẽ me la m maan ne m sũur fãa. A Kefas waa n pɩʋʋga Antiyos la m sãbsa a manesem neba fãa taoore, la yẽ n da kong bʋʋm. Sɩd me, a Zak tũud-n-taasa sẽn waa n nan ka pooge, a Kefas ra rɩta ne bu-zẽmba. Bãmb waoonga poore, la a sẽn soos n leb kɛɛnga, sẽn kẽ-b bãonga rabeem yĩnga. Zʋɩf rãmb a taaba me togs-a lame, al t'a Barnabe meng naag-ba n solge. M sẽn mik tɩ b pa tũud sɩd sor ning Koe-nooga sẽn wa ne a soabã, m yeela a Kefas, neba fãa taoore: «Fo yaa Zʋɩf, n sak n bas Zʋɩf rãmba dog-n-mik n vɩ wala bu-zẽna, bõe tɩ fo rat n modg bu-zẽmbã tɩ b vɩɩnd wa Zʋɩf rãmba?» Sã n ya tõndo, d doga Zʋɩf rãmb buudẽ, woto d ka kĩ ne bu-zẽmba sẽn ya yel-wẽn-maandba ye; la baasgo d miime tɩ ninsaal pa teeg noya reegre n na n paam a yell manegr ne Wẽnd ye; ya a Zezi Krista tẽeb n wat ne rẽ. Yaa rẽ la tõnd me tẽ Krista, a Zezi, n na n paam d yell manegre, d pa teeg noya reegre, tɩ ned pa paamd a yell manegre ne noya reegr ye. Dɩlla sã n ya Krista nengẽ la tõnd baood sõmblem la d ket n zĩ ne d yel-wẽna wala neb a taaba, Krista tʋʋmd ka lebg yel-wẽnd yaoogr marsã, la rẽ na yɩ sɩda? Wala m sã n le maneg n me mam sẽn tus n lubi, ka maam n kõ kaset marsã tɩ m tus-n-lubã n yɩ wẽnga la m le lɛɛg n metẽ. Sã n ya noora poorẽ, m lebga bõn-kɩɩng a yĩnga, sẽn na n yɩlẽ n tõog n vɩɩnd Wẽnd yĩnga. M naaga Krista n ka pika zugu. Pa le ya mam meng n vɩ ye, yaa Krista n vɩ mam pʋgẽ, m sã n vɩ ne m yĩnga marsã, m tɛk yaa m tẽ Wẽnnaam Biiga sẽn nong maam, n dɩk b meng n kõ maama. M pa kɩtd tɩ Wẽnd kũuna lebg zaalem ye; la sã n ya ne noor deegr la yell manegda, dɩlla Krista ki zaalem yĩnga. Galat rãmb sẽn ka tar yam, ãnd n lebg y zutu. B wilga yãmb neere, Krista sẽn lebg bũmb ning pika zugu. Sokr bala a ye la m na n sok yãmba: Yaa yãmb sẽn sak noora yĩng la y paam Wẽnd Vʋʋsem, bɩ yaa y sẽn tẽ Koe-nooga? Yama paoog-y la sẽn ta woto fãa tɩ yãmb sɩng ne Wẽnd Vʋʋsem n na n baas ne y toorẽ pãnga? Na n yɩɩ zaalem yĩng la y reeg kũuna woto fãa? Ad-y rẽ fãa na n sɩd yɩɩ zaalem bala! Sẽn kõt-a yãmb a Vʋʋsem Sõng la a tʋmd tʋʋm bãna yãmb sʋka, a maanda rẽ y sẽn sakd noora yĩnga, bɩ yaa y sẽn deeg Koe-noogã? Y mi t'a Abraam tẽe Wẽnde tɩ Wẽnd maaneg a yelle. Bɩ y bãng tɩ neb niyns sẽn teeg-b tẽeb, yaa bãmb la a Abraam kamba. Sebr sõng sẽn pĩnd n mi tɩ Wẽnd na n tũu tẽeb n fãag bu-zẽmbã, b pĩnd n togsa a Abraam kiba-noog kãngã: «Yaa fo maasmẽ la Adem biis na n paam barka.» Dẽ n kɩt tɩ neb niyns fãa sẽn teeg-b tẽebo na n tũu tẽeba ba, a Abraam, n paam barka. Neb niyns fãa sẽn yet-b tɩ yaa Noora bal la b tũuda, yaa kãab wẽng la b kãab bãmba, tɩ b gʋlsa woto: «Wẽnd na sãam ned ning fãa sẽn ka modga n deeg la a tũ sẽn gʋls fãa sebr sõng pʋgẽ.» — Ad-y yaa vẽenega tɩ noora tũudem ka tõe n maneg ned yelle tɩ nin-sõng teeg-a a tẽebo n na n vɩɩnde. Ka tẽebẽ wã la Noora yit ye la paka ninsaal t'a reeg sẽn be a pʋgẽ wã fãa n yaool n paam vɩɩm. Krista sakame tɩ Noora kãab wẽnga leb bãmba, n kõ-d tɩlgre. Bãmb meng sak n yɩɩ ka bark soaba d fãa yĩnga; tɩ b gʋlsa woto: «Ka bark soab la sẽn yagla pika.» La yɩɩ woto la a Abraam kãab nooga leb bu-zẽmbã; d sẽn paam tẽebã, d paama b sẽn da kãab tõnd a soabã: a Vʋʋsem Sõngo. M saam-biisi, m na n kõ-y la ninsaal makre: Raboog welgr sebr sã n gʋls n sɛ, b pa le tõe n yẽes bũmb ye, b pa le tõe n paas bũmb ye, ba gʋlsga sẽn yaa ninsaal n gʋlsã. Ad-y yaa Abraam ne a buudu la kãabga kãab yã. Sebr sõng pa yeel: a Abraam ne a buud kamb ye, wala yaa kʋʋng yell la b da rat n gom ye; goma nin-yend yelle, buuda nin-yende: Krista. M sẽn dat n wilg-y bũmb ninga la woto: Wẽnd da yalsa kãabga yɛl fãa b zĩigẽ, woto noora sẽn wa yʋʋm kobs-naas la pistã kãabga poore, a ka tõe n woog a pãnga t'a lebg fãoog ye. Sã n tũuda ne raboog welgr noy la ku-biig dɩt faado, yaa noor la tũuda, pa tũud kãabga ye. Mik a Abraam barka ka yi zĩig a to tɩ ka Wẽnd kãabga pʋgẽ ye. Noora bee bõe yĩnga? A wa n paasame bala n na n wilg tɩ ninsaal mii kɩɩsgo. Noora ra kõome n gũud a Abraam yagenga waoongo tɩ yaa yẽnda la kãabga kãabyã. Noora yalsa ne malɛk rãmb toagsg la ne nin-yend sẽn lʋɩ sʋka. Sã n ya kãabgã, Wẽnd yɩla b ye n kãabe, ned a to ka lʋɩ sʋk ye. Noya sãama Wẽnnaam kãabg bɩ bõe? Abada! Tõnd sã n da paamẽ la noor sẽn tõe n kõ vɩɩm la d tõogdẽ n yeel tɩ noor deegr n wat ne manegre. Sebr sõng paalga bũmba fãa yel-wẽnd soolmẽ, sẽn na yɩlẽ t'a Zezi Krista tẽedbã dɩ kãabga yõodo. Tẽeb sẽn da waa n kaẽ, yaa wa b da rɩka tõnd n gũnug ne noya n gẽegd tẽebã waoongo. Dẽ la Noor yɩ karen-saamba n tãag Krista sẽn waa n kɩt tɩ tẽeba wa ne yell manegrã. La tẽeb sẽn wa, tõnd ka le baood karen-saamb yɛs ye. Yãmb fãa sẽn kẽ Krista a Zezi wã, y lebga Wẽnnaam kamba. Yãmb fãa sɩd tũu Krista n so soobo la y yeelg bãmb wa fuugu. Tɩ m yaa Zʋɩf bɩ Grɛk, yamba bɩ burkĩna, pag bɩ raoa: rẽ ka le be ye; yãmb fãa lebga bũmb a ye a Zezi Krista pʋgẽ. Y sẽn tabend Krista bala, yãmb lebga a Abraam yagense, yãmb bal n so kãabgã. M gomda võor la woto: ku-bi-kẽeng sã n ket n ya yãaga, ad-y ne a sẽn so a ba laoga fãa, bũmb ka welg-a nanda ne yamb ye. A tara gũuda la koagenda, n tãag a ba sẽn yals wakat ningã. Tõnd me, d sẽn da waa n ya yãase d da yaa yem-daado, zamaana pãn-dãmba yem-daado. La wakat sẽn waa n ta, Wẽnd tʋma b Biiga sẽn yɩ pag biiga la noora rɛɛgda, sẽn na n yɩlẽ n tõog n fãag noora yemse, la a kɩt tɩ d lebg Wẽnd kom-wubdsi. La kaset ning y sẽn tare n mi tɩ y lebga Wẽnd kamba, yaa Wẽnd sẽn ning yãmb sũurẽ bãmb Biiga Vʋʋsem sẽn tãsde: Aba! (M Ba!) Woto fo ka le ya yem-daoog ye, f yaa zak biiga, la f sẽn lebg Wẽnd biiga, f lebga Wẽnd yõod dɩta. Pĩnda, y sẽn waa n nan ka mi Wẽnnaama, yaa bõn-yaals sẽn ka wẽnde la yãmb da nok yã wala y wẽnde. Marsã, yãmb sẽn bãng-ba, yɩɩd rẽ, bãmb sẽn bãng yãmbã, yãmb na n maana a wãn n leb y bõn-yaalsa nengẽ n tɩ soond bãmb wala pĩndã? Yãmb ket n sõta dasma, kiisi, zĩ likri ne yʋʋma! Ad-y y maandame tɩ m zoet-m na n wa nams zaalem bal y yĩnga. M saam-biisi, m yõkda y sɛɛga, modg-y n wẽneg maam tɩ m maoome n na n wẽneg yãmba. Da tẽ-y tɩ y beeg-m lame ye. Y mi tɩ bãag n wa ne m ka tɩ m paam n sɩng Koe-nooga mooneg y sʋka. La ne m bãaga sẽn kɩt tɩ m lebg y zɩɩbo, y pa paoog-m ye, y pa sãbs-m ye; y kell n deega maam wala Wẽnd malɛka, wala Krista a Zezi menga. Yãmb zoe n yĩma y sẽn da kilsd maam ne sũ-noog ninga laa? M meng tõe n kõo kaseto tɩ wakat kãnga, y sã n da tõee lame, y na kɩɩdẽ y nin-bɛɛl n kõ-ma. La marsã m sẽn togs yãmb sɩda la m lebg y bɛya? Neb kẽer zooda ne yãmb ka segd ye. B ratame bal n welg yãmb ne maam tɩ yãmb tabend bãmba. Tʋlg-y neer maanego tɩ yaa sõmbo, la togame tɩ yɩ daar fãa, la ra yɩ m sẽn pẽ yãmba wakat bal ye. M kom-bõonego, m sẽn le rogd ne waasgo, ad-y na n kell n yɩɩ boto n tãag y sẽn wat n dɩk Krista wẽnego. M da paam n pẽẽ yãmba m na modgẽ tɩ d wʋm taaba tɩ marsã wã m ka mi m sẽn na m gom to-to ne y ye. Aya! Yãmb sẽn yet tɩ y yaa Noora tũudbã, y tẽra sẽn togs noora sebrẽ bɩ? Ad-y gʋlsame t'a Abraam doga kamb a yiibu: a ye yaa yem-poak biiga t'a to wã ya tom pag biiga. Pʋg rɩkra biig doga wa kamb a taaba; tom paga biig rogma tũu ne kãabgo. Ad-y yaa yelbũndi: pagb a yiiba makda zood buud a yiibu. Pipi zooda yõga Sinayi tãng zugu; zood kãng kamb yaa yem-daado, la b ma la a Agar. (Sinayi tãnga bee Arabi soolmẽ) Yẽ makda dũnna Zerizalɛɛma, yẽ me yaa yem-poaka la a kamba me yaa yemse. Zerizalɛɛm a to wã, sẽn yita Wẽnnaam nengẽ soaba, yẽ la tom paga la yẽ la tõnd ma. Yaa woto la b gʋlsyã: «Bɩ f kɩdem, pʋg-kiiri sẽn pa rogde, kils sõmbo la f lang ne sũ-noogo fo sẽn zɩ n bãng rogem toogo; ad pʋg-beooga kamba sõor yɩɩda rʋmda rẽnna.» M saam-biisi, bɩ y baad tɩ yãmb la zooda kamba wala a Izaak. Biig ninga sẽn doga wa kamb a taabã da namsda biig ning rogem sẽn tũ ne kãabgã. Boto me n ket n maand marsã. Yaa bõe la Sebr sõng togsda? «Bɩ f rig yem-poaka ne a biigã tɩ yem-poaka biig ka tog n naag tom paga biiga, a ba raboogẽ ye.» Bɩ d bãnge, m saam-biisi, tɩ tõnd ka yem-poaka kamba, d yaa tom paga kamba. Krista fãaga tõnd tɩ d kell n vɩɩnd ne d burkĩndlem; dɩlla bɩ d da bas raood ye la d da leb d pĩnd yemdẽ ye. Maam a Pol n togsede: ad-y yãmb sã n sak bãong kẽesgo, Krista lebga zaalem yãmb yĩnga. Maam n le togsde: ned ninga fãa sẽn sak-a bãong kõom, lebga modgr ne yẽ soab ta tũ noya fãa gill kɛpi! Yãmb sẽn baood y yell manegr ne noor deegre, bãng-y tɩ yãmb welga ne Krista, la y konga b bark zãnga. Sã n ya tõndo, yaa Wẽnd Vʋʋsem n kɩt tɩ d gũud tɩ tẽeb wa ne kũun niyns d sẽn saagde, d yella sẽn manegã. Sɩd me, a Zezi Krista nengẽ ka be m kẽe bãong bɩ m ka kẽ bãong ye, yaa tẽeba bal n pake: tẽeb sẽn tʋmd nonglem tʋʋma. Yãmb wudgra da paam n sɩnga neere, bõe n woogd y tĩiga marsã sɩda reegre pʋgẽ? Gɛɛlg a woto pa yit sẽn boond-a yãmba nengẽ ye. Rabɩll bilf bala n wukd zom nagdem. Mam yẽ tẽedame tɩ yãmb sã n be ne Soaala, yãmb kõn tags bũmb a to ye, la ned ninga sẽn na n kɩt tɩ y maan sãmb-sãmbe, yẽ soab kõn põs Wẽnd bʋʋd ye, a sẽn ya a soab fãa. Sã n ya maam, m saam-biisi, n ket n wɩngd-y tɩ y kẽ bãongo, bõe yĩng la b namsd-m yɛsa? Pika ne a pɛlen-yɩkã ka sɛ? Sẽn kẽesd-b yãmb rabeema kõn fiuus b yĩnga wils fãa gilli! Sã n ya yãmba, m saam-biisi ad-y b ratame tɩ y yɩ burkĩmbi, gũus-y bala tɩ y burkĩndlema da wa lebg yĩnga maan a sẽn dat ye. Y burkĩndlema waa ne to nonglem, n kɩt tɩ ned kam fãa sõngd a to. Noya fãa pidsa noor a ye pʋgẽ: «Nong f to n wẽnd f menga.» Yãmb sã n yĩid taab marsã la y wãbd taab wa baase, bɩ y gũus tɩ yaa y wãab n sɩnge. Bɩ y sak tɩ Wẽnd Vʋʋsem gãd yãmba tɩ y na bas y yĩnga raaba pʋgbo. Yãmb mi tɩ yĩnga maanda sũ-kiir ne Wẽnd Vʋʋsem tɩ Wẽnd Vʋʋsem me maand boto ne yĩngã; bãmb b yiiba zabda taaba; ya rẽ yĩng la yãmb pa tõe n tʋm y yam ye. Sã n ya Wẽnd Vʋʋsem n kẽ yãmba, yãmb pa le tar noor tʋʋmd ye. Yĩnga sẽn womd biis niynsã, y mi-b-la fãa: ad pagb yõgbo, yoobo, rataado, wẽn-yaals pʋgbo, tɩt rɩɩbo, kisgu, mo-beedo, sũ-kiiri, sũ-puuri, zaba, zems-taab-kaalem, welegre, to paoong tʋlsem, rɩt-n-pa yɛɛdẽ, yũud-n-pa-roogdẽ la yɛl a taab sẽn wẽnd rẽ — la m togsdame wa m sẽn zoe n togsã tɩ yel-maandb a woto buud ka paamd Wẽnd Rĩunga pʋɩɩr ye. Ad Vʋʋsem sõng sẽn womd biis niynsi: to nonglem, sũ-noogo, laafi, sũ-tõogo, taab sõngre, kõt yaare, taab teegre, sũ-bʋgsem, tõog-m-menga. Noor ka be n gɩdg bõn-sõma a woto ye. Neb niyns fãa sẽn lebg-b Krista a Zezi soolem, bãmb dãmb rɩka b zʋg wẽngã n ka pik zugu ne a tʋls wẽnsa fãa. A Vʋʋsem Sõng sẽn ya tõnd vɩɩma, bɩ b sõng d me tɩ d tʋm. D da bao yʋ-yaals ne wags taab ye, la d da maan sũ-ki-yaals ye. M saam-biisi, yãmb sʋka nin-yend sã n tudgi, y sẽn tũud Wẽnd Vʋʋsma, bɩ y maag y yĩng n sõng-a. Fo meng maan gũusgu tɩ kʋɩɩbg tõeeme n wa lub foom me. Sõng-y taab n zɩ y vɩɩma zu-loeese tɩ woto la y na n deeg Krista noore. Ned sã n tẽed t'a yaa bũmbu, mik a ka fɩ, yẽ soab belgda a menga. Ned kam fãa ges a sẽn vɩ to-to, a ges a tʋʋma n bao a zu-zẽkre be, a ra zẽka meng ne a taab tʋʋm ye. Ad-y ned kam fãa tog n tʋka a zɩɩbo. Bɩ karen-biig modg n sõng sẽn zãmsa yẽ karengã ne a paoong fãa. Da belg-y y mens ye; ad-y ned ka laad Wẽnd ye. Ninsaal sẽn bʋd bũmb ning la a tigsda. F sã n bʋd sẽn tog ne yĩngã, yaa yĩnga põosgo la f na n tigsi. Fo sã n bʋd sẽn tog ne a Vʋʋsem Sõngo, yaa vɩɩm sẽn kõn sɛ la f tigsda. Wa-y tɩ d da bas raood ne neer baoob ye, tɩ tigsg na n wala a wakato, tõnd sã n kell n maan daoodo. Dẽnd yĩnga, d sẽn tõe wakat ning fãa, bɩ d maan neer ne neba fãa gilli, bũmb zãnga ne d saam-biisã, sẽn tar d tẽebã. Ges-y bẽes bɛd niyns m nuga sẽn bẽes yãmb yĩnga. Sẽn wɩngd-b yãmb tɩ y kẽ bãongã, yaa zamaan yõod baoodba. Bãmb dãmb dat n põsa namsg ning Krista pika sẽn wat ne a soabã. Sẽn kẽ-b bãonga fãa deegda noya sɩda? B ratame bala tɩ yãmb kẽ bãongo tɩ rẽ lebg wa b yẽesem bũmbu. Mam yẽ sẽ, Wẽnd na laas-m tɩ m bao m meng pẽgre sã n ka ne Soaal a Zezi Krista pika: pik kãng n kɩt tɩ m get dũniya wa bũmb sẽn yaglg pik zugu tɩ dũniya me get maam boto. Ad-y ka m-kẽe-bãong bɩ m ka kẽ bãong n be yõod ye, bũmb ning sẽn pake, yaa d lebg nin-paalse. La neb niyns sẽn na n maan-b boto, bɩ Wẽnd laafi la b sõm sig bãmba la a sig Israyɛl paalga kamb fãa. Marsã tɛka bɩ ned da le bao yelle n kõ-m ye! Mam yĩnga fẽrga ne a Zezi nodãando. M saam-biisi, Wẽnd na pids yãmba ne tõnd Soaal a Zezi Krista nimbãan-zoeerã! Ami! Maam a Pol, a Zezi Krista Tʋʋm-tʋmd ne Wẽnd daabo, maam n pʋʋsd nin-sõma la Krista tẽedbã. Bɩ Wẽnnaam, tõnd Ba la d Soaal a Zezi Krista sudg yãmb b laafi kũuni! Bɩ Wẽnnaam la d Soaal a Zezi Krista Ba paam pẽgre! Bãmb zĩnda yĩngr n sudg tõnd kũun buud fãa, ne Krista. Tũu ne Krista tɩ b tũus tõnd al tɩ dũni nan ka sɩnge, n na n kɩt tɩ d lebg sõma n zãr ne rẽgd buud fãa, bãmb taoore la bãmb nonglma pʋgẽ. Bãmb n pĩnd n yals menga tɩ Krista maasem yĩnga, tõnd na n lebga bãmb kom-wubdsi. Woto la b tʋlg ne b yamleoogo, la rẽnd me la kũun ning d sẽn paam b Bi-nongra nengẽ ya bũmb sẽn tog ne pẽgr kãsenga. Yaa Bi-kãng sẽn daag b zɩɩma nengẽ la d yãet tɩlgre, la d paamd d yel-wẽna yẽesgo, tɩ b nimbãan-zoeerã ka be tɛk ye. Wẽnd sudga tõnd b kũuna, b pʋɩɩ tõnd b yam zulungã la b yam pidungã Bãmb meng n wilg tõnd b sũura raabo, n wilg b nonglma sẽn da sede, la sẽn da solg al daar zãra n gũud tɩ wakata sã n ta bɩ b lek bũmb fãa, yĩngr la tẽng zug, n tees b Naab yɛngã, a Zezi Krista. Tũu ne Krista tɩ sẽn so-a la a zãad bũmb fãa wa a sẽn datã, welg tõnd toore, n bak tõnd al zamaan woko, tɩ d na n lebg neb niyns sẽn pĩnd n paam b teegda; la rẽ toga ne pẽgr kãsenga. Yaa bãmb me maasmẽ la yãmb wʋm fãagra Koe-noogo la y reeg-a n paam tɩ b sẽn kãab Vʋʋsem ninga mak-y ne b meng makre. Yaa Vʋʋsem Sõng kãng la d pʋɩɩra reng-n-lembga, n gũud wakat ning Wẽnd sẽn na n fãag neb niyns sẽn lebg b bãmb soolem, tɩ rẽ me segd ne pẽgr kãsenga. M sẽn bãng y sẽn tẽed Krista toto la y nonglem ne nin-sõma wã fãa mam pa vʋʋs ne bark kãntɩɩs kudbu la y yell tẽegr m pʋʋsg wakat ye. Bɩ Soaal a Zezi Krista Wẽnnaama, Ba sẽn tar ziir sẽn kõn sɛ wã, bɩ bãmb kõ-y yam zulunga, la b puk yɛla fãa sẽn solg b nengẽ tɩ y tɩg b zãnga. Wẽnd na puk y yama tɩ y bãng saagr ning y sẽn tõe n saage ne bãmb boollã; tɩ y bãng pʋɩɩr ning b sẽn bĩng b nin-sõma, la y yãend bãmb pãn-kẽengã sẽn puk tõnd tẽedba yĩnga, Krista pʋgẽ, Krist ning b sẽn vʋʋg kɩɩms sʋka la b zĩndig yĩngri, b Ba rɩtgo, al tɩ b zʋʋg bũmb ning fãa sẽn tar naam, n tar pãnga, n tar ziiri, bũmb ning fãa sẽn tar yʋʋre, n be marsã zamaana bɩ n na n zĩnd beoog rẽnda. B sulga bũmb fãa bãmb taoore, b zẽk-b la yĩngri tɩ b zʋʋg bũmb fãa n ya Tigengu zugu, tɩ Tigenga la b yĩngã la b pids-a la ne b kũuna zãnga. Y ra lebga kũum, y beegre la y yel-wẽna yĩnga, Y vɩɩnda bãmb pʋgẽ pĩnda tɩ y ra tũuda zamaana yam wẽnga soaba la a soaala, sẽn ket n tʋmda a tʋʋma ne tõatbã. Yaa tõnd fãa bal n pʋs n yɩ woto; d da tũuda d zʋg wẽnga, n tũud d yĩnga yamleoog la d tʋls wẽnse n tol n wa lebg beem zãng ne Wẽnde, wa ninsaalb a taaba fãa. Wẽnnaam nimbãan-zoeera ka be sɛɛb ye tɩ b nonglem ne tõnd yaa nonglem kãsenga. Yaa rẽnd yĩng la d yel-wẽna sẽn da kɩt tɩ d fãa lebg kũumã, b baas n naaga tõnd ne Krista n vʋʋg-do, n wilg tɩ d fãagra tũu ne Wẽnd yel-sõmd bala. B naagd-d la ne Krista n vʋʋge la b zĩndiga tõnd ne Krista arzãna. B tʋlgame n wilg zamaana sẽn watã tõnd ne Krist a Zezi nonglma sẽn pid ne kũun tagd niynsi. Tũu ne Wẽnd yamleoogo la y sẽn paam fãagrã, ne tẽeba kũuni. Fãagra ka yit yãmb nengẽ ye, a yaa Wẽnd kũuni. Ka ned tʋʋmd me n wat ne a ye, tɩ ned ka tõe n paam pẽgr a meng nengẽ ye. Tõnd yaa Wẽnd nug bũmbu, b naana tõnd a Zezi Krista maasmẽ, b naana tõnd tʋʋm yĩnga, tʋʋm-sõma niyns b sẽn segl al pĩnd-pĩnda n bĩng-du tɩ d wa tʋma. Bu-zẽmba, tẽeg-y tɩ pĩnda yaa yãmb la b ra boond tɩ ka kẽ-bãong rãmba — la sɩd da yaa boto. Sẽn da boond-b yãmb woto wã me ra teega barga n boond b mens tɩ bãnkomse. Tẽeg-y tɩ wakat kãnga yãmb da vɩɩ woto, n pa tar Wẽnd Nedã, n pa tar sor n na n kẽ a Israyɛl kamb sʋka, n pa mi Wẽnd zoodo, n pa tar Wẽnd pʋlem noodo, n pa tar kãabga saagre, n ka tar Wẽnd meng dũni kãnga pʋgẽ! La yãmb sẽn da be zĩ-zãorgẽ pĩnda, marsã Krista taka yãmb n kolg b meng ne b zɩɩm pãnga. Ad-y yaa bãmb bal n kõt tõnd laafi, bãmb n kɩt tɩ buud a yiiba fãoog taab buud a ye. Bãmb n menes bũmb ning sẽn da welgd-ba. Bãmb yĩngã n yẽes beema, n yãk Noorã ne a moadgã fãa. Bãmb yĩngẽ la buud a yiiba sog taaba n lebg Nin-paale n lebg nin-yɛnga, la b zĩ laafi ne taaba. Bãmb n sõng-b tɩ b lɛɛg n wa kẽ Wẽnde, n paam n lebg Yĩng a ye, ne pika pãnga; ad-y yaa bãmb meng b toore n sɛɛs beema. Dẽ poor la b waa n moon laafi, n moon-a yãmb sẽn da zãr-ba yĩnga, n moon-a neb niyns sẽn da pẽ-ba yĩnga. Bãmb pãng yĩng la d yiiba fãa paam Vʋʋsma a ye n tõe n kolg d Ba naana. Sẽn ya woto wã, yãmb pa le ya bu-zẽmb bɩ sãamb ye, y paama tẽngen-bi-taar ne nin-sõma, y lebga Wẽnnaam zak kamba. Yãmb yaa bũmb b sẽn me la b mee yãmb bãngdba la tʋʋm-tumdba zugu. Rooga kuga ma yaa a Zezi Krista meng b toore. Yaa bãmb zugu la rooga tõr lugl yã n tar dʋʋbo n na n wa lebg Ro-sõngo, Soaala maasmẽ. Yaa yãmb me la b rɩk n naag n me Roogã t'a na n lebg wẽnd doog, Vʋʋsma maasmẽ. Ad maam a Pol, b sẽn sui a soab roog ne Krista raab yãmb bu-zẽmba yĩnga, ad-m sẽn tõe n togse. Y paam n bãngame tɩ yaa maam la Wẽnd bobl b kũuna yãmb yĩnga, b wilg-m lame tɩ m mi vẽenega bũmb ning sẽn da solge tɩ m paam n togs-y bilf marsã wã. Y sã n karem sebrã y na bãng yam vẽnegre ning m sẽn paame, n mi sẽn da solg Krista pʋgẽ. B sũura raab ra solga ninsaalb kamb pĩnda n yaool n puk marsã nanda, ne Vʋʋsma vẽnegre, Tʋʋm-tʋmdb sõma wã la bãngdba nifẽ. Marsã tɛka bu-zẽmba naagda tõnd n dɩt Wẽnnaam yõodo: tɩ b lebga Yĩn-yɛnga la b paama kãabg yɛnga, b sẽn kẽ Krista a Zezi ne Koe-nooga deegre. Yaa maam n lebg Koe-nooga moanda ne Wẽnd bark b sẽn sudg maam ne bãmb pãnga. Sɩda yaa maam, yao-zʋʋga, Krista nin-sõma wãa fãa sʋka, yaa maam la b yãk yã tɩ m wilg bu-zẽmba Krista yõod ka tɛka, la m puk vẽenemẽ zãnga bũmb fãa Naanda a Wẽnd sẽn da solge al zamaan woko n ta marsã. Woto, arzãn kãsem-dãmb la pãn-dãmb na tũ Tigengu n bãng Wẽnnaam sẽn tʋm ne yam la bãngr pidung ninga. B na bãng Wẽnd sẽn tʋlg n pids b sũura sẽn da sede al zamaan woko ne Krista a Zezi, tõnd Soaala. Ad-y yaa rẽ n kõt tõnd daoodo tɩ d tõe n kolg Wẽnd n ka rigd rabeem ye, ne tẽeb ning d sẽn deeg Krista nengẽ. Woto me la m yõkd y sɛɛga: da sak-y n bas raoodo, namsgã m sẽn namsd yãmb yĩnga ye, tɩ bala b na n waa ne yamb zu-zẽkre. Yaa rẽ yĩng la n na n yĩgimd m Ba taoore, tɩ bũmb ning fãa sẽn vɩ tẽng zug bɩ yĩngr Ba la bãmba. Mam kota bãmb sẽn tar kũun sẽn tog ne pẽgr kãsengã tɩ b keng y sũya ne bãmb meng Vʋʋsem, la y nonglma kɩ yẽgna tɩ d pʋgẽ neda paam pãnga; tɩ ne y tẽebã, bɩ Krista ti b nonglem doog y sũurẽ. Woto y na paam pãnga, n naag nin-sõma n bãng Krista nonglem ka tɛkã: a woglem, a yalem, a zãndlem la a zulem. Y na bãng tɩ Krista nonglem zʋʋga ninsaal bãngre. La yaa y bãngrã sẽn wat n pid zãnga la a na n kẽes yãmb Wẽnd pidunga tẽnsʋka. Bɩ ned ninga sẽn tʋmda tʋʋma d pʋsẽ la a tar pãng n tõe n le maan tɩ yɩɩg rẽnda, n tõe n kõ tõnd tɩ zʋʋg d sẽn tõe n kos bɩ d sẽn tõe n saage, bɩ nin-kãng soog pẽgre, Tigeng pʋgẽ la Krista a Zezi nengẽ, tɩ daara la yʋʋma tong taab n tõt sɛɛbo! Ami! Yaa b sẽn balg a soab roogẽ, Soaala yĩngã, n yõkd y sɛɛga, tɩ y mao n vɩɩnde wa sẽn boola yãmba sẽn date, ne yam-sulgr la sũ-bʋgsem, n paas sũ-maasem; d vɩɩma ne taab yɩ sũ-tõog la nonglem vɩɩm. Bas-y tɩ Vʋʋsem yɛnga lagem-y n loe ne b laafi loɛtg tɩ y lebg bõn-yɛnga. Ad-y Yĩnga yaa a ye la Vʋʋsma me yaa a ye, d fãa yaa Wẽnd booll yɛnga n zĩ ne saagr yɛnga. Soaala yaa a ye, tẽebã a ye, soobã a ye. Wẽnd yaa b ye, n ya fãa Ba, n yɩɩd fãa, n vɩ la b tʋmd fãa yĩnga. Ned kam fãa yaool n paama a pʋɩɩr Wẽnnaam nengẽ, n zems ne Krista raabo. Yaa rẽ yĩng la b yeta: «B sẽn dʋ arzãna b dʋʋ ne b yemse, b sudga ninsaalb kamb fãa kũuni.» «Sẽn dʋ a soaba» la ãnna tɩ ka sẽn denga n sig bʋg-tẽnga? Sẽn siga wã bala n leb n dʋ n zʋʋg saaga n na n kɩt tɩ fãa lebg pidungu. Bãmb yɛsa n kɩt tɩ neb kẽer lebg tʋʋm-tʋmdba, kẽer bãngdba, kẽer Koe-nooga moandb, kẽer pe-kɩɩmba la karen-saamb dãmba. Woto la b kõ nin-sõng fãa a tʋʋmde sẽn na n yɩlẽ tɩ Tigengã, Krista Yĩnga, tõog n me. Tʋʋm kãnga ne a na n baase tɩ tõnd fãa lebga bũmb a yembre ne tẽebo la ne Wẽnd Biiga bãngre la d lebg Rao sẽn pid rao, sẽn bɩ zãnga, n lebg Krista zãnga. Woto tõnd kõn maan wa yãase la d kõn bas d yam t'a lengd yaar ye. D kõn bas tɩ zãms paal sobg rɩk-d n tees a sẽn teesẽ tɩ d tũud ninsaalb zirẽ-beedo la b zãmb tʋʋma b sẽn tʋmd n dat n tudg tõnda ye. D na n tũu sɩda la nonglem n vɩɩnde; lebga d yaoka tar paasgo ne bũmb fãa tɩ d kẽn n tees Zu-raooga soaba, a Zezi Krista. Yaa bãmb Yĩngẽ la wilsa fãa kẽ taaba, n sog taab kɛpi ne zɩ wĩisi sẽn kõt wilg fãa a rɩɩbo t'a tõe n tʋm a tʋʋmde tɩ yaoka paasdẽ, tɩ bũmb fãa sũg kẽnkẽ nonglem pʋgẽ. M le yeta yãmba la m le yõkda y sɛɛga, Soaala yĩnga, tɩ y bas zʋg ning sẽn ya bu-zẽmba zʋgo; bas-y b zirẽ-be-tagsgo; yaa woto la b zĩ lib-tuu n lebg Wẽnnaam vɩɩma sãamba, tɩ bãngr kaoolg yĩnga b basa b sũur tɩ kidibi. Wẽng la neer bãngr yama sẽn kẽke, lebga yoobo la b tʋʋmde, al tɩ b rɩk b meng zãnga n kõ tʋʋm yoodã, a yeyn-ye. Ka woto la b zãms yãmb Krista ye, sã n yaa sɩd tɩ b wilga yãmb Krista ne kareng sõngo, kareng sẽn tʋʋd sɩd ning sẽn be a Zezi nengẽ. B Pa zãms yãmb sɩda, tɩ yaa modgre tɩ y bas y pĩnd vɩɩma la y yeeg y zʋg kʋdgã sẽn tar y sãoong n dabdã ne a tʋls waglã, la y teem y tagsgã t'a wẽneg yĩngr dãmb dẽnna? B pa yeel-y tɩ y yeelg wala y fuugu Nim-paalã, Wẽnd sẽn naan ne b zemsgo, ne b sõmblem la b sɩda? Dẽ yĩng bɩ y bas zirẽ-beedo: ned kam fãa gom sɩda ne a to. Ned kam fãa ka a to wilg laa? Yãmb sũur tõeeme n wa puugi, yãmb yee n da maan wẽnga. Da sak-y tɩ wĩndg lʋɩ tɩ y sũur ket n kãbd ne taab ye. Da yõk-y y meng n kõ Sʋtãan ye. Sẽn da zuuda bɩ a bas wagdem, a bao a nug tʋʋmde, a me tõog n maan neere n sõng a taaba sẽn tar naongo! Da sak-y tɩ y noor yiis gom-beed ye; bɩ y gomd sõng sẽn dat-b sõngre, la a maneg sẽn kelgd-ba yelle. Da kõ-y Wẽnd Vʋʋsem sũ-sãang ye; bãmb makre la y zɩta n gũud b Fãagra raare. Mo-beedo, sũuri, sũ-toogo, gãgse, la tʋya, n paas wẽnem buud fãa, dẽ fãa tog n zãaga ne yãmba. Vɩɩnd-y ne sũ-bʋgsem la nimbãan-zoeer ne taaba, la nong-y n kõ taab sugri, wa Wẽnd sẽn kõ yãmb sugri, Krista yĩnga. N-ye! Mao-y n wẽneg Wẽnde wala b kom-nongdse. Tũ-y nonglem sora wa Krista; bãmb tõogame n nong yãmba al n sak n dɩk b vɩɩm n kõ Wẽnd wa yũ-noog maoongo. Sã n kella yoob ne a tʋʋm yooda buud fãa, n paas zoe-bõne, bɩ rẽ ra tol n pʋd yãmb sʋk ye: b basg bala n segd ne nin-sõma. Gom-yoodo, gom-lɛbla, raab yoodo, dẽ me ka tog ye. Sõng-y bal tɩ bark pʋʋsg sãde. Kelg-y neere: yoaada, nin-dẽgdo, raab wagl soaba, — a geta a meng wa wẽnde — bãmb dãmb ka tar pʋɩɩr Wẽnd la Krista Rĩunga pʋg ye. Da sak-y tɩ ned wa belg yãmb ne no-noom goam ye, yaa tʋʋm yood a woto buud n takd Wẽnd beem, wẽn-kɩɩsdba zutu. Da naag-y bãmb zĩig ba a ye! Pinda yãmb da yaa lik kamba, dũnna yãmb lebga vẽenem kamba, Soaala maasmẽ, bɩ y kell n vɩɩnd wa vẽenem kamba. Vẽenem tʋʋma yaa sũ-bʋgsem, zemsgo la sɩda, Bãng-y sẽn noom Soaalã. Da naag-y n tʋm lik tʋʋm yooda ye, ad-y yõod ka ye. Luk-y tʋʋm yooda rãmb bãongo. Sɩda, b sẽn solgde n tʋmd likẽ wã toagsg meng yaa yãnde, Luk-y b bãongo tɩ b yɛla wa vẽenemẽ. B sã n wa vẽenemẽ wã marsã la b wẽnema na n puki. Yaa rẽ la b yeta: «Sẽn gõe soaba yiki, yik la f bas kɩɩmse tɩ Krista Vẽenem yãg f yĩnga.» Dɩlla maan-y gũusgu ne y tʋʋma, b ra yɩ yalem tʋʋm ye, b yɩ nin-vẽen-dãmb tʋʋma, neb sẽn na n tõog n dɩ b rũnna vɩɩm yõodo, tɩ y mi tɩ zamaana yaa toogo. Dẽ yĩnga da maan-y gãeemd ye; bao-y n bãng Wẽnnaam sẽn dat tɩ y tʋm toto. Gũus-y ne rã-tɩgre: yaa tʋʋm yood la-a wat ne. Bao-y y sõmblema pidsgu ne Wẽnd Vʋʋsem. Naag-y taaba n zodg yɩɩla n balem Wẽnde, n kils-ba, n pʋʋs b barka. Yɩɩl-y y sũur pʋgẽ n pẽgd Wẽnnaam. Zĩis fãa la wakat fãa pʋʋs-y Wẽnnaam Ba barka, Soaala Zezi Krista yʋʋr yĩnga. Zoe-y Krista la y sak taaba. Bɩ pagba sak b sɩdb rãmba wala b sẽn sakd Soaala. Sɩda yaa paga zu-soaba wala Krista sẽn ya Tigenga zu-soaba tɩ bãmb la Yĩnga fãagda. Tigeng sakda Krista; dɩlla pagba me tog n saka b sɩdba bũmb fãa pʋgẽ. Sɩdb rãmba, nong-y y pagba wa Krista sẽn nong Tigengu; b kõ-la b vɩɩma Tigenga yĩnga, sẽn na n yɩlẽ t'a paam sõmblem; la yaa koom sẽn sood tɩ Koɛɛg naag n moonẽ n wat ne sõmblem kãnga. B tʋlgame tɩ Tigenga yaas bãmb taoore, n pɩnd ne neerem, n yãgd ne sõmblem, n zãr ne rẽgdo, bɩ kʋʋlem, bɩ bũmb a to sẽn wẽnd rẽnna. Yaa woto me la sɩdb rãmba tog n nong b pagba wa b meng yĩnga; sẽn nong-a a paga nonga a menga. Ned ba a ye zɩ n kisg a meng yĩng ye. Ned kam fãa dɩlgd-a lame la a tar-a neere. La yaa woto la Krista maand ne Tigengu. Tõnd ka bãmb yinga wils laa? Ad sẽn gʋlse: «Yaa rẽ yĩng la rao na n bas a ba la a ma n pa ne a paga la b yiiba na n lebga yĩng a yembre.» Ad-y yaa yell kãseng sẽn da solg la b pukyã: M yetame tɩ yaa Krista ne b Tigenga vɩɩm sẽn ya a soaba la b pukyã. Dɩlla bɩ yãmb ned kam fãa nong a paga wa a menga la pag me waoog a sɩda. Kamba sak-y y ba rãmba, Soaala yĩnga; dẽ n toge. Waoog f ba la f ma la noor sẽn naag n yiis ne pulem-noogo pipi la no-kãnga. Waoog f ba la f ma tɩ f na paam sũ-noogo la f yõor na yɩ wok tẽng zugu. La yãmba, ba rãmba, da yɩ-y toog tɩ loog ne y kamba ye; gʋʋl-y b neere ne sɩbgr bɩ saglg sẽn tũud Soaala raabo. Yemse, sak-y tẽng zug zu-soaben-dãmba, ne rabeem la rigbu, sak-y b ne pʋ-peelem, wa y sẽn sakd Krista bala. Sakra ra yɩ m dat n nooga ninsaal sũur sakr ye, n ka yamleoog ye; sakra yɩ wala y yaa Krista yem-daado, sẽn pidsd Wẽnnaam daab ne b sũur faa. Bɩ y zɛɛg n tʋm Soaala yĩnga la ra yɩ ninsaalb yĩng ye. La y gãneg y yam tɩ Soaala na n dola ned kam fãa tʋʋm-sõma: f ya yamba bɩ burkĩna. Yãmba, zu-soaben-dãmba, yãmb me maan boto ne y yemse, bas-y b rabeem kẽesgo la tags-y tɩ yãmb ne bãmb zu-soaba ya a ye, yaa sẽn be-a arzãna, la zu-soab kãng pa bakd ned ne a to ye. D na n kʋmsa d goama woto: lebg-y neb sẽn tar pãnga Soaala sɛɛgẽ, neb sẽn wɩɩd ne Wẽnd pãnga. Rɩk-y Wẽnnaam zab teedo n bobe, n tõog n teedg ne Sʋtãana. Yãmb mens miime tɩ tõnd zabra ka ne ninsaalb sẽn tar yĩng la zɩɩm wa tõnd ye, yaa ne bugum yir la lik kãsem-dãmba la pãn-dãmba, yaa ne malɛgs wẽns sẽn saad yĩngri. Yaa rẽnd yĩng la y tog n bob Wẽnd zab-teedo n maan y sẽn tõe fãa n da kong pãnga, ra-beeda wakat ye. Yals-y yĩngri, rɩk-y sɩda tɩ yẽ yɩ yãmb sẽbdga, la pʋ-peelem n pil y yãoogo; y neooda wã marsã yɩ y sẽn yãgd n na n moon Koe-noogã ne sũur ningã. Tall-y y tẽebo, gãd-y y tẽeba kẽnkẽ, wa gãongo, n ligind Sʋtãan pɛɛma tɩ b yaa bugum pɛɛma. Sẽn kell yaa bõe: yaa Wẽnnaam gomdã tɩ y na n fõgen-a wa y fãagr zug peoogo, la y zãad-a wa a Vʋʋsem Sõng sʋʋga. Wɩng-y ne pʋʋsgo la Wẽnd sɛɛg yõkre; pʋʋs-y wakat buud fãa ne Vʋʋsem Sõngo, sõng-y n da vʋʋs wakat ba a ye; pʋʋs-y nin-sõma wã fãa yĩnga. Tẽeg-y mam me yelle y pʋʋsg pʋgẽ tɩ m tõog n yaag m noore n gome la m moon Koe-nooga ne raoodo n puk sẽn solge. Ba b za maam ne bãeense n gãnege, Koɛɛga mooneg la m tʋʋmde. Kos-y tɩ m paam daoodo n moon wa sẽn segde. Mam datame tɩ yãmb me bãng m tʋʋmda sẽn ta zĩig ninga la mam me sẽn lebg a soaba; a Tisik na wilg-y rẽ fãa; yaa m saambi-nongre la yẽ la m sõangd wakat buud fãa Soaala tʋʋmda pʋgẽ. Maam bal n tʋm-a yãmb nengẽ t'a kõ yãmb d kibare la a keng y sũya. Bɩ Wẽnnaam Ba la d Soaala Zezi Krista kõ d saam-biisa fãa laafi, n paas tẽebo la nonglem! Wẽnd bark sig neb niyns fãa sẽn nong-b tõnd Soaala Zezi Krista, vɩɩm sẽn kõn sɛ yĩnga! Maam a Pol ne a Timote, Krista Zezi sõgen-kamba, tõnd n pʋʋsd nin-sõma wã fãa, Soaala Zezi Krista tũudba, sẽn zĩ Filip vẽenemẽ, ne b kãsem-dãmba la b sõangdba. Bɩ d fãa Ba a Wẽnde la d Soaal a Zezi Krista kõ yãmb laafi la barka! Mam pʋʋsda m Wẽnda bark wakat buud fãa, m sã n tẽeg y yelle. La yaa m sũ-noogo tɩ m pʋʋsd y fãa gill yĩnga n ka vʋʋsdẽ ye, tɩ m ket n tẽra yãmb me tʋʋmdã sẽn yɩ a soaba Koe-nooga moonegẽ, a sɩngrẽ n ta rũnna. Mam pʋs n miime tɩ sẽn sɩnga tʋʋmd sõnga ne yãmbã, yẽ soab bal n na n kell n dabs a baasgo tɩ ta Krista a Zezi daare. Segdame tɩ m tags woto y fãa gill poorẽ tɩ m sũura kɛla y fãa zãnga; la rẽ yaa y fãa sẽn naag maam n kok Wẽnd kũuna, m bãeensa balgr wakato, Koe-nooga mooneg sɩngrẽ, bɩ a sẽn waa n kɩɩd a yẽgna wakato. N-ye! Wẽnd bal n mi tɩ m nong-y la waare ne Krista meng nonglem! Ad-m sẽn ket n kot Wẽmde: tɩ y nonglma tar yãngr n dabda n wa fudg n daag bãngr menga, la sɩlem sõngo, tɩ woto y na bao sẽn ya neer n yɩɩda la y tall y mens ne pʋ-peelem n gũud Soaala raare. Woto-me la y paamd n dɩ yõod ka tɛka ne Krista a Zezi meng sõmblem, la rẽ pʋgẽ la Wẽnd tog ne waoogre la b tog ne pẽgre! M saam-biisi, m datame tɩ y bãng tɩ m yella kɩtame tɩ Koe-nooga moonego le wɩng n paase. Sɩd me, gũudba fãa sikẽ la zĩig zãnga, b bãngame tɩ yaa Krista yĩnga la b balg maam. D saam-biisa wʋsg paamame tɩ b sũy lebg kegemse ne Soaala, b sẽn yãend m balgrã, tɩ b bas rabeem n na n le wɩng ne raoodo n moon Koe-noogã n yɩɩd pĩnda. Neb kẽere, yaa sɩda, tʋmda ne wags taab yam wẽnga; kẽer yẽ moonda Krista ne sũ tɩrga. Bãmb dãmb tũuda Wẽnd nonglem sẽn be b sũurẽ n mi neer tɩ mam nengẽ wã Koe-nooga mooneg bal la m tʋʋm pakre. Pipi rãmba yẽ sẽ, b moonda Krista ne no-rɩkr bala; bãmb pa tar pʋ-peelem ye. B tẽedame tɩ b sẽn maand woto b na zɩsg m bãeensã n paase. La bõe n sãame? Yaa ne yam wẽnga bɩ ne pʋ-peelem, b yee n moon Krista; la m kɩdemdame la m na kell n kɩdem dẽ yĩnga. M miime tɩ rẽ n na n fãag maam, yãmb pʋʋsg yĩnga la Krista Vʋʋsem Vẽnegrã m sẽn na n paama yĩnga. Woto-me la m saagr menga: m kõn yãe yãnde, m sũur na kell n yɩ kẽnkẽ, tɩ marsa la wakat fãa, Krista na paam pẽgre m yĩngẽ, m vɩ bɩ m kida. Mam nengẽ wã, Krista bal la vɩɩm la ki bãmb yĩng yaa yõodo. La ade, vɩɩnd ne yĩnga sã n na n kõ maam pãnga tɩ m tʋm tʋʋmd sẽn be yõodo, mam pa le mi mam sẽn na n yãk ye. M yɛsa sʋka n wẽnesdẽ: maam n dat n loog n tɩ bʋʋg Krista, la m neeme tɩ rẽ n sãoẽ wʋsgo; maam n dat n pa ne m yĩngã, tɩ rẽ n wẽnd y yell na maneg tao-tao n yɩɩda. La ade, m gãdame tɩ m na n paame la m zĩnd y fãa sɛɛgẽ n paas y bãngre la sũ-noog y tẽeba pʋgẽ. La wotoone lɛɛg n wa y sʋka, la zĩnd yãmb sɛɛgẽ, na le zẽk y zug n paas, Krista a Zezi taoore. Sõng-y tɩ y manesem tũ Krista Koe-nooga bala, tɩ m waoonga raare bɩ m sã n ka tõog n wa me, bɩ m wʋm tɩ yãmb ket n yɛsa y nao zutu la y yaa yam yɛnga la sũ-yɛnga n tʋmd Koe-nooga yĩnga. Y pa yɛɛsd y bɛɛba ba bilfu, woto la b bãngd vẽenega tɩ yaa b sãoongo n sɩnge, la yãmb tɩlgre waame, la Wẽnd bala n tõe rẽnna. Bãmb n maan-y neere tɩ y paam n tẽed Krista la b le maan y neere tɩ y sakd namsg bãmb yĩnga. Woto la yãmb me takd zab-sõng ninga sẽn yɩ m dẽnna, la y sẽn ne tɩ m ket n tar a soab rũnna wã. M yõkda y sɛɛga la m kot-y lame ne Krista bool toogã, ne b nonglem sẽn ka be sãmb-sãmbã, ne Vʋʋsem Sõng lagmen-taarã, sẽn ya zood la nimbãan-zoeerã, m kotame tɩ y pids m sũ-nooga zãnga n zems y tagsga ne taaba: n ya sũ-yɛnga, raab yɛnga, yam yɛnga. Da sak-y welgr lɛ-lɛ, da sak-y tɩtaam ye: ned kam bao yam-sulgri la a tagse t'a taab são yẽ menga. Da bao-y y meng yõod ye, ned kam fãa tags a to rẽnna. Tall-y y lagmen-taara pʋgẽ zʋg ning sẽn ya Krista a Zezi rẽnna. Bãmb sẽn zem Wẽnnaam, b ka tags tɩ b tog n gãda ne zoe-bõne, bũmb ning sẽn kɩt tɩ b zem bãmba ye. B basa b meng yõodã n lebg wa yamba; n wẽneg ninsaal bala, n na n vɩɩnd ninsaal vɩɩm, n tol n sulg b menga n yɩɩge al n sak kũum n na n deeg noore, al n sak kũum pik zugu! Ya rẽ yĩng la Wẽnd zẽk-ba n pʋd-b yʋʋr sẽn zʋʋg yʋy a taaba fãa. Woto b sã n pʋd a Zezi yʋʋra bala bũmb fãa sẽn be yĩngri, sẽn be tẽng zugu, sẽn be bʋg-tẽnga, b fãa tara yĩgimdg bala, la zelemd fãa moondame t'a Zezi yaa Soaala, Wẽnnaam Ba pẽgr yĩnga. Woto wã, m kom-sõma, mao-y n tʋm y fãagra tʋʋmde ne m sẽn bãng-y ne sakr ningã. Sakr kãng n tog n yɩ y rẽnna, m sẽn be y sɛɛgẽ wakato, wala marsã, m sẽn zãr ne yãmbã. Mao-y ne rabeem la rigbu n maan y sɩɩg fãagre. Sɩd me, Wẽnd n be ne yã n sõngd-y ne tʋʋmda raab la b zaoolgd yãmb tʋmda zugu n pidsd b meng nimbãan-zoeera sẽn da sede. Yãmb me, maan-y bũmba fãa ne yamleoogo la y vẽ yẽgengo la kɩɩsgo. Woto ned kõn yãend bũmb n dogl y zug ye la y na n lebg neb sẽn ya pʋ-peelem dãmba. Y na yɩ Wẽnnaam kom-sõma sẽn vɩ zamaan kãnga wala vẽenem sẽn vẽnegd neb fãa, n kõt b Koe-nooga sẽn wat ne vɩɩm. Woto la y segend y mense n na n yɩ mam zu-zẽkre, Krista raarã; tɩ m zoeesa la m tʋʋlgã ka yɩ zaalem ye. La sɩd me, m sã n tog n daag m zɩɩma menga wa maoong bũmbu, yãmb tẽeba yĩnga, m sũur yaa noogo la m naagda yãmb n kɩdemne, wala yãmb me sẽn tog n maan sũ-noogo la y naag-m n kɩdem. M tẽedame tɩ Soaala Zezi Krista sã n sõnge, m kõn kaoos n tʋm a Timote y nengẽ, tɩ m paam yãmb kibare, tɩ m sũura yaa n gãande. Sɩda, m pa tar ned a to sẽn tõe n ges yãmb yell neere la ne pʋ-peelem wa yẽ ye. Wʋsg sẽn ne yaa b meng yõod bala, b pa baood Krista a Zezi rẽnd ye. Yẽ wilga a sẽn ya a soaba, a tʋma ne maam Koe-nooga tʋʋmde wa biig bal sẽn be ne a ba. Yẽ la m dat n tʋm y nengẽ, m sã n wa bãng m yɛla sẽn na n yɩ a soaba. M pʋs n saagda wʋsgo ne Soaala maasem tɩ m meng na wa m toore. M tagsdame tɩ togame tɩ m lebs yãmb a Epafrodit; saam-bi kãng me sõnga maam n tʋm la a namse la yaa yãmb n da tʋm-a t'a wa koll-ma, m naonga pʋgẽ. A rata y fãa yãabo, n ka le tõe n zĩnd sɩɩ ye, y sẽn wʋm t'a lʋɩɩ bãaga tɛka. Sɩd me bãag n yõk-a la kellẽ la bilf t'a maanẽ yõore; Wẽnd n zoe a nimbãanega, la ka yẽnd bal ye, yɩɩ maam me la b kũm yã, n pa sak tɩ m sũ-sãamsa tong taab ye. Dẽ yĩnga m tʋmd-a la tao tao yãmb nengẽ tɩ y mens yãend-a la y sũur lebg noogo; la woto-me n woogd m sũ-sãanga. Deeg-y ned a woto buudu ne sũ-noogo, Soaala yʋʋr yĩnga, la y waoog-a. Yaa Krista tʋʋmd yĩnga la a ra na n kiẽ; a ra na n kiẽ lame n sõng maam ne sõngre yãmb mens sẽn da ka tõe ye. M saam-biisi, noog-y y sũur Soaala yĩnga; m kõn yɛ ne yãmb saglg kãng abada! Rẽ n pʋs n são. Gũus-y ne nin-wẽnse, ne baasã, ne tʋʋm-tʋmdb yoodã, ne zirẽ-be-zũnsã. Zũns bal la tõndo tɩ tõnd waoogra n tũud Wẽnd Vʋʋsem sẽn date. La tõnd basa kʋdemdã teegre n na n teeg Krista a Zezi bala. Mam yaool n da tõe n teegẽ la kʋdemdã; ned sã n beẽ n teeg rẽnna, m tẽed tɩ maam n ket n yɩɩda. M dog tɩ rasem a nii, b kẽes-m la bãongo; maam la Israyɛl biiga, a Bẽzame yagenga, Ebre bil memga, maam la Farizẽ sã n ya ne Noora tũudem. Sã n ya yik n zab ne buuda bɛɛbã, m namsa So-paala rãmba; sã n ya ne sõmblem ning Noor tũudem sẽn kõt a soabã, m pa tar m toorẽ yell ye. La m sẽn da pid ne yõod niynsa fãa, m gesa rẽ wa bõne, Krista yĩnga. Yɩɩd rẽ, m geta bũmb fãa marsã wa zaalem t'a Zezi Krista, m Soaala, bãngr n lʋɩ taoore. Bãmb yĩnga m saka sẽn keta fãa menesgo, m geta fãa wa tãmpʋʋr sagdo tɩ woto la m tõogd n paam Krista. M datame n menes m sõmblema, sõmblem ning Noora reegr sẽn kõt a soabã, n lagem Krista ne sõmblem ning bãmb tẽeba sẽn kõt a soabã, sõmblem ning sẽn yita Wẽnd nengẽ la sẽn tobd tẽeba yẽgrẽ. M datame n bãng Soaala, n bãng b vʋʋgra pãnga, n bãng naag bãmb n namsa yõodo, n wẽneg bãmb b kũumẽ, tɩ sã n tõe bɩ m naag n vʋʋg. M pa yet tɩ m yãee m sora tɛka, m ka yet tɩ m sõmblem sekame ye, ayoo! M ningda tĩiga n dat n wa paam Krista n yõke wa Krista Zezi sẽn paam maam n yõkã. M saam-biisi, ad-y m ka na n belg m meng wa m zoe n paama Krista n sog ye. Woto bal la m yeta: m yĩma m sẽn zoe n kẽna, m teesa m sẽn dabdẽ wã tɩrga, ne m pãng fãa, n zoet n pʋgd kũun ning Wẽnd sẽn boond-d tɩ d wa reege, al yĩngri, Krista a Zezi nengẽ. Tõnd fãa sẽn paam n bɩɩs d yama, yaa woto la d tog n tagse. Bũmb sã n beẽ tɩ y tagsd toor a poorẽ, Wẽnd n wat n vẽneg yã. Sẽn ya zĩig ning fãa la d zoe n kẽn n ta, d da golem d sora ye. Togs-y mam vɩɩma; m saam-biisi, togs-y sẽn be-b yãmb sʋka n vɩ wa maama. Kẽer n be, b sõora labsa, la m togs-y la rẽ naoor yaka, la m le togsd-y la rũnna ne nintãm, b vɩɩ wala Krista pika bɛɛba. Bãmb dãmb kõn baas neer ye; yaa b pʋgã n lebg bãmb wẽnde la b pa zoet rẽ yãnd ye; la b yãnda la b zu-zẽkre: b sẽn pẽgd bala yaa tẽng zug yɛla. Sã n ya tõndo, arzãn la d tẽnga: be bala la d gũud wala d Fãagda, Soaal a Zezi Krista. Bãmb n na n tedg tõnd nimbãan yĩngã t'a lebg ziir yĩnga wa bãmb dẽnna, tɩ b tara pãnga n tõe tɩ bũmb fãa tũ b raabo. Woto wã, m saam-bi-nongdse, m kom-sõma, m sũ-noog la m dolbo, gãd-y Soaala kẽnkẽ, m kom-nongdse. Mam kota a Evodi la m wɩngda ne a Sẽntikɛ, tɩ b wʋm taab moore, Soaala yʋʋr yĩnga. La foom me Sizig, m tũud-n-taag menga, bɩ f mao n sõng-ba; ad pʋg-kãensa sõnga maam wʋsgo ne Koe-nooga tʋʋmde, bãmb ne a Klema la m sõangdb a taaba: bãmb yʋya gʋlsa vɩɩm sebra pʋgẽ. M saam-biisi, noog-y y sũur wakat fãa, Soaala maasem la b pãng yĩnga. N-yẽe! Maam n le yet yã: noog-y y sũuri! Yɩ-y nin-bʋgse ne neba fãa gilli. Soaala waoong yaoome. Da bʋ-y bũmb ba a ye yĩng ye. Zu-loɛɛg sã n beẽ, bɩ y wɩng ne pʋʋsgo, n wɩng ne Wẽnd sɛɛg yõkr sẽn naag ne bark pʋʋsgo, la zu-loeesa wilgri. La Wẽnd na zĩndg yãmb fãa b laafi pʋgẽ, laafi ninga sẽn zʋʋg tõnd sẽn tõe n mamsã, laafi kãng n na n maas yãmb sũuri la y yam, Krista a Zezi pʋgẽ. Ade, m saam-biisi, bũmb ning sẽn pak yãmb marsã tɩ y tog n lʋɩɩs y toogo, yaa bũmb ning fãa sẽn ya sɩda, n waoogd neda, n ka tar goalenga, n ka be rẽgdo, n be yamleoogo, n tog ne pẽgre, n wat ne minim sõma, n wat ne ninsaal pẽgre. Mam sẽn zãms yãmb bũmb ninga ne m goama la m vɩɩm, yaa rẽ la yãmb tog n deege la y tũ; woto Wẽnd sẽn ya laafi kõata na zĩnd ne-yã. M kɩdma sũ-noog ne Soaala, m sẽn yãe tɩ y le nekd la y yalgd y pʋtẽer m yĩnga. M miime tɩ yãmb zɩ n yĩm m yell ye; sẽk sẽn na paam n wilga bal n mii n paoog yã. M me pa gomd woto tɩ yaa bũmb n paoog-m ye, m zãmsa m sẽn na maane tɩ bũmb sek-m wakat buud fãa. M saka a mong m menga wala m sẽn sak a rɩ n tɩge. Wakat fãa la ne yɛl wʋsgo m zãmsa kom la pʋg pidungu, tɩgr la fare. Mam tõe fãa ne ned ning sẽn kõta maam pãngã. Baasg zãnga, yãmb maana neere y sẽn waa n zoe m nimbãanegã. Yãmb mens miime, Filip neba, tɩ Koe-nooga mooneg sɩngrẽ, m sẽn waa n yi Masedoan, Tigeng ba a ye pa tol n sõng maam ne ligd buudu sã n ka yãmb bal tãa. Yãmb bal n tẽeg m yelle, m sẽn ta Tesalonik, n tol n tʋm bũmb naoor a yiibu, m sõngr yĩnga. Pa kũun la mam baood ye. M sẽn baood yaa yãmb dolb yee n dogend n paasdẽ. Marsã m tara sẽn sek n zʋʋg menga; sɩda marsã, m galame, a Epafrodit sẽn wa ne yãmb kũuna tɛka; kũun kãng yaa wa yũ-noogo la maoong sõng Wẽnnaam sẽn deegde la b yet tɩ ta-la b yam. Wẽnd na tũ Krista a Zezi maasem n kõ yãmb me tɩ gale, tɩ b pãng labsa la sẽn be b nugẽ ka paood ye. Bãmb bal la d Ba, bɩ b paam pẽgre marsã la daar fãa! Ami! Pʋʋs-y nin-sõma wã fãa Krista yʋʋr yĩnga. M sẽn be ne saam-biis niynsa fãa tɩ b pʋʋs-y neere! Nin-sõma wã fãa tɩ b pʋʋs-yãmb, bũmb zãnga Rom naaba nebã. Soaala Zezi Krista bark sig yãmba! Maam a Pol, Krista tʋʋm-tʋmd ne Wẽnd raabo, n paas m saam-biig a Timote tõnd n pʋʋsd Kolos nin-sõma, d saam-biisa sẽn kẽ-b Krista. Bɩ d Wẽnnaam d Ba sudg-y bark la laafi! Tõnd pa viigd abada ne Wẽnnaam la d Soaal a Zezi Krista Ba wã bark pʋʋsg ye. D pa viigd ne yãmb tẽegr d pʋʋsg pʋgẽ ye. La rẽ yaa d sẽn bãng tɛk tɩ yãmb sɩd gãda a Zezi Krista ne tẽebo la y wilga y nonglem ne nin-sõma wã fãa, n paas d sẽn bãng tɩ y sũur pida ne b sẽn bĩng yãmb arzãnẽ wã saagre. Y sẽn saagd bũmb ningã, b wilg-a-la yãmb pĩnda ne Sɩda Koɛɛgã, ne Sɩda Koe-noogã. Koe-noog kãng taa yãmba wala a sẽn ta dũnia tõre la a tara a biis wom n dabda; yaa woto la a maand yãmb sʋk me, yãmb sẽn wʋm la y bãng tɛka Wẽnnaam kũuna sẽn ya a soaba. Yaa a Epafras, tõnd tũud-n-ta-nongre la d sõangda, n zãms-a yãmba; a sɩd deega tõnd zĩiga n taas yãmb neere Koɛɛga zãnga wa Krista tʋʋm-tʋmda. Yaa yẽ n wilg tõnd a Vʋʋsem Sõng nonglem ning sẽn wit y sũurẽ tõnd yĩngã. Yaa woto yĩng la tõnd me, d sẽn wʋm dẽ tɛka, d ka viigd ne pʋʋsg yãmb yĩng ye, la d kota Wẽnnaam tɩ b tall yãmba tɩ y yam wa vẽneg zãnga ne bãmb menga raabo; b sõng-y ne wʋmbo la ne bãngr sẽn yit yĩngri. Woto la y tõogd n vɩɩnd vɩɩm sẽn tog ne Soaala la sẽn tat b yam zãnga; woto la y na n tõog n maan tʋʋm sõma buud ka tɛka la y bɩɩs y bãngrã ne Soaalã. Ad-y Wẽnd ziira tẽegre na n kõ-y la pan-kẽengo, a na n kõ-y-la raoodo la sũ-keelem. Yãmb na pʋʋs Ba wã barka tɩ bãmb meng n segle n na kõ yãmb nin-sõma wã pʋɩɩre, b vẽenem zĩigẽ. Yaa bãmb n yiis tõnd Lik naab soolmẽ n kẽes tõnd bãmb Bi-nongra Rĩungẽ, yaa bãmb nengẽ la d paamd tɩlgre la d beegra sugri. Bãmb la Wẽnd wẽnego, ninsaal nif sẽn ka tõe n teeg a soaba wẽnego. Bãmb la bũmb fãa-fãa Kãsma. Tũu ne bãmba tɩ Wẽnd naan bũmb fãa sẽn be-b yĩngri, sẽn be-b tẽng zugu, sẽn toe n yãend la sẽn pa tõe n yãende yĩngr Na-rɩtba, Soaalba, Na-komse, Pãn-dãmba, fãa yii bãmb nugẽ, fãa bee bãmb yĩnga. Bãmb meng n deng fãa n beẽ, la bãmb n ket n zãad bũmb fãa. B Yĩngã sẽn boond tɩ Tigengã, bãmb la a Zugu: Bũmba fãa tʋɩɩsa ne bãmba, Bãmb n yɩ pipi n vʋʋg kɩɩmsa sʋka, (da togẽ lame tɩ b soog kãseng bũmb fãa pʋgẽ) tɩ Wẽnd tʋlgame tɩ b lek bũmb fãa sãoogo B tũu bãmb maasem n le maneg bũmb fãa yelle, sẽn be tẽng zug wala sẽn be yĩngri, n sik laafi ne b zĩma b sẽn daag pika zugu. Ba yãmb mense, pĩnda yãmb me ra yaa bu-zẽmba la Wẽnd bɛɛba, ne yãmb tags wẽnse la y tʋʋm wẽna; ad yãmb me sẽn paam tɩ b le maneg y yelle ne b yĩng sẽn bãng kũum pik zugu, sẽn na n yɩlẽ tɩ y tõog n yals b taoore wa nin-sõma la neb sẽn pa tar b toorẽ yelle. Lebga yãmb kell n gãd y tẽeba la y yals y mens kẽnkẽ n da bas tɩ b loog ne y sẽn saagd bũmb ninga ye, tɩ bõn kãng la b sẽn kãab yãmb a soab ne Koe-noogã. Koe-noog kãng la yãmb sẽn wʋma; Koe-noog kãng waa ninsaalb buud fãa sẽn be saaga tẽngr yĩnga, la maam a Pol n lebga moaanda. Marsã menga mam kɩdemda sũ-noogo ne namsg niyns mam sẽn yãe yãmb yĩnga, la ne mam yĩnga namsgo mam pidsda Krista sẽn nams bũmb ning fãa b Tigeng yĩnga, tɩ Tigenga yaa b meng yĩnga. Ade, mam lebga Tigenga tʋʋm-tʋmda la Wẽnd n kõ maam tʋʋm kãnga tɩ b ratame tɩ Koɛɛga ta yãmba. Yell kãnga ra solga yʋʋm kʋʋma la rot kõn-bãng-n-sõd neba; marsã bal la b puk-a b nin-sõma. Wẽnd tʋlgame tɩ b bãng sẽn da solgã sẽn puk ne ziir ning bu-zẽmba yĩnga. Yell solgra la Krista sẽn zĩ ne yãmbã; bãmb nengẽ la d saagd pẽgre. Krista kãng la d moanda n segend ne yam la d wilgd neba fãa tɩ b lebg sõma zãnga bãmb maasmẽ. Yaa m sẽn dat tɩ rẽ pidsã, la m sak yaamse la m sak maoore la maoora yĩnga, b kɩtame tɩ m wɩɩd ne pãn-kẽengo. Sɩd me m datame tɩ y bãng zab-bãnd ning m sẽn tog n zab y yĩnga, n zab Laodise rãmb yĩnga, n zab sẽn ket-ba fãa yĩnga, neb sẽn zɩ n teeg-m ne b nifu. M maoodame n na n keng b sũya la m fãoog-b ne taab nonglem pʋgẽ tɩ b yama wa tõog n vẽneg zãnga ne yɛl niyns sẽn solg Wẽnd nengẽ. Yaa bãmb nengẽ la solg yã yam pidungu la bãngr zulungu ne b yõod ka tɛkã. M gomda woto tɩ m pa rat tɩ ned wa belg yãmb ne goam faad ye. M yĩnga n zãar ne yãmba, m yama bee ne yãmba la m nee ne sũ-noogo y sẽn sigl y yɛla ne yam ninga la y tẽebã ne Krista keglem sẽn ya to-to. Soaal a Zezi Krista ning b sẽn wilg yãmb a soab taki wã, ad-y yaa bãmb maasmẽ la y tog n kẽne. Sud-y y yẽgna n ta bãmba, bas-y tɩ b me-y wa roog bãmb zugu, la rẽ tɩ y rella tẽeb ning b sẽn zãms yãmb a soabã, tɩ y bark pʋʋsg pid n daanẽ. Gũus-y tɩ ned da yik yãmb sʋka n belg yãmb n da, wala yemse, ne a sɩlem pidung ye; b bãngra yaa kʋdem-dãmb la dũnia rãmb bãngre, a ka Krista rẽnd ye. Bãmb n pid ne wẽndlema fãa pidungu la yãmb me tũu bãmb n lis pidung kãng pʋgẽ. Bãmb bal la yĩngr dĩm dãmb dĩma la pãn-dãmba fãa Kãsma: Yaa bãmb yĩng la yãmb lebg zũnsi la ka ninsaalba bãong la b kẽes yãmb ye, tɩ yaa y yĩn-gãonga fãa la y yeeg yã. Sẽn kẽe-a Krista bãong kẽe woto: y sẽn tũ bãmb n mum yaoogẽ ne soobo, y tũu bãmb me n vʋʋge tɩ yãmb tẽe Wẽnd pãnga sẽn vʋʋg-b kɩɩms sʋka. Yãmb sẽn da ya kũum y yel-wẽna la y sẽn ka kẽ bãonga yĩnga, Wẽnnaam n kɩt tɩ yãmb le vʋʋge n vɩ ne Krista. Bãmb n bas d yel-wẽna taale. B pa tũ Noora sẽn da rat a soaba ye, b rɩka tõnd samd yooga sebre n ka pika n sãam-a zãnga. B yeesa yĩngr Na-komsã la Pãn-dãmbã futu n bas b bɩlma ãndũni rãmb taoore, n kẽnd ned sẽn tõog a bɛɛb kẽnde, tɩ bɛɛb tong b poorẽ. Da sak-y tɩ ned wɩd yãmb bõn-dɩtl bɩ bõn-yũudr poorẽ ye, yʋʋmd-yʋʋmd kibsa, kiu paale, bɩ sibr daar poorẽ ye. Dẽ fãa yaa bũmb sẽn wat beoog sulunsuku, la bũmba meng tãa la Krista Yĩnga. Bɩ ned da sak n bas tɩ b fãag Krista a nugi ye; a ra bas tɩ b wilg-a Wẽnd tũudem so yaalse la malɛgs rãmb waoogr ye. Yẽ soab sẽn lʋɩɩsd taoore yaa sẽn yãend ne a nif bala. Ad-y yaa wilg-m-meng n kɩt t'a wuk n zĩ ne ninsaal bãngr bala. Yẽ soab pa lagem Krista, tɩ Krista yaool n ya Zugu n kɩtdẽ tɩ yĩnga wilsa lagem n sũg taab ne gĩini n paamd dɩɩb la pãnga, n paam n dɩkd yaok ningã Wẽnd sẽn dat a soab ne-a. Yãmb tũu Krista n ki n bas zamaana yɛla, bõe yĩng la yãmb le loet y zugu ne yell kãensã wa yãmb ket n yaa zamaana soolem? Bõe tɩ b yetẽ: «Da rɩke, da lembe, da sɩɩse», dẽ fãa gomda yɛl sẽn sɛt b meng b toore, dẽ me bal la ninsaalb noy la b zãmsgo. Noy a woto wẽnda yam bũmbu tɩ yaa wa b geta ninsaal sẽn tog n sulg a meng n pʋg Soaalã, la a zã a yĩnga toogo, mik fɩ! Yĩnga ket n tãoosda raoodo, bũmb pa boogd ye. Yãmb sẽn tũ Krista n vʋʋge, yaa yĩngr la yãmb tog n doog y nenga, zĩig ning Krista sẽn zĩ Wẽnnaam dɩtgo. Yaa yĩngr yɛla la yãmb tog n bao la y bas tẽng zug rẽnna. Sɩda, yãmb kiime la yãmb vɩɩma solga Wẽnnaam nengẽ marsã ne Krista. La Krista sã n wa puki, bãmb sẽn ya yãmb vɩɩma, wakat kãnga yãmb me na tũ bãmb n puk ne pẽgr sẽn kõn sɛ. Dẽ yĩnga sɩbg-y y yĩnga wilsi. Ad-y yaa yoobo, tʋʋm dẽgdo, tʋls wẽnse, arzɛk tʋlsem, wala yẽ n deeg wẽnd zĩiga: yaa bãmb n takd Wẽnd beem tõatba zugu. Y vɩɩma ra yaa woto pĩnda, y sẽn da waa n be bãmb sʋka. Dẽnd yĩnga, zãag-y mens marsã ne rẽ fãa. Sũ-puuri, sũ-toogo, zãmbo, beem tugbu, gom yoodo ka tõe n le yi y noorẽ ye. Da le yag-y taab zirẽ ye. Y yeega nin-kʋdrã ne a tʋʋma n base, n lɛɛg n yeelg nin-paallã. Y rɩka bãngr sɩd sore tɩ woto la y wẽnego ne yãmb Naanda na n le tõog n puk yɛsã. Ade, m yaa Grɛk, bɩ Zʋɩf, zũng bɩ sẽn ka kẽ-a bãongo, weoogẽ neda, bu-zẽna, yamba bɩ burkĩna, ka rẽ n le be yɛs ye. Yaa Krista bal n be n ya fãa la b be fãa yĩnga. Dɩlla yãmb sẽn ya Wẽnnaam yam nebã, b nin-sõma la b kom-nongdsã, bɩ y mao n yɩ nimbãan-zoetba, neb sẽn nong taaba, yam-sulgr dãmba, sũ-bʋgsem dãmba, sũ-maasem dãmba: ned kam fãa tõog a sũur ne a to, tɩ sã n ya zabr me, bɩ y kõ sugri; wala Soaala sẽn kõ yãmb sugrã, yãmb me maan boto. Bũmb zãnga tall-y nonglem: yẽ bal la sõmblem yẽgre. Woto wã bɩ Krista laafi kẽe y sũya tɩ yaa rẽnd yĩng la b bool-y n na fãoog-y taab Yĩng a ye. La vɩɩnd-y Wẽnnaam bark pʋʋsg pʋgẽ. La Wẽnd na kɩt tɩ Krista Koɛɛg kẽ yamb sũya sõmb-sõmbo. Wɩng-y n zãmsdẽ ne yam zulungã la y sagend taaba. Wẽnd yĩnga pʋd-y yɩɩle ne y sũur fãa n pʋʋs barka. Pʋd-y yɩɩl n balem Wẽnde, yɩɩla y sẽn zoe n yɩɩnnẽ bɩ y sẽn naand y toore. Wẽnd na kɩt tɩ y sẽn na n gome, bɩ y sẽn na n maan fãa yɩ Soaala Zezi yʋʋr yĩnga tɩ yãmb bark pʋʋsga tũ bãmba n ta Wẽnnaam Ba. Pagba, deeg-y y sɩdb rãmb noore tɩ rẽ n tog Soaala nengẽ! Sɩdb rãmba nong-y y pagba la y ra maan zʋg ne b ye. Kamba, sak-y y ba rãmb noya, dẽ bal n be neer Soaala nifẽ. Ba rãmba, da lak-y y kamb sɩɩg ye ka rẽ b wat n basa raoodo. Yemse, sak-y neere yãmb zu-soaben-dãmba sẽn beb tẽng zugu, la ra yɩ zoe-nif sakre n na n noog ninsaal sũur ye, sak-y b ne pʋ-peelem, ne Zu-soaba rabeem bala. Y tʋʋmd sẽn ya a soab fãa, tʋm-y ne y sũuri n miẽ tɩ yaa Soaala yĩng la y tʋmda, pa ninsaal yĩng ye. Bãng-y tɩ Soaala na n dola yãmba tɩ y lebg b yõoda rɩtba. Yaa Krista d Soaala yĩng la y tʋmda. Sẽn maanda zãmb na paam a zãmb rolbo, tɩ Wẽnd ka mi bok-n-maneg ye. Zu-soaben-dãmba, da mong-y y yemse bũmb ning sẽn segd la sẽn tog ne b vɩɩm sõng ye: ad-y yãmb me tara Zu-soaba sẽn be arzãna. Da viig-y ne pʋʋsg ye, da vʋʋs-y ne bark pʋʋsg ye! Bũmb zãnga, pʋʋs-y tõnd yĩnga. Pʋʋs-y tɩ Wẽnnaam kell n tuk pʋ-yalengo n kõ-do tɩ d moon b Koe-noogã n puk sẽn da solg Krista nengẽ. Yaa Krista yĩnga la mam zĩ marsã ne bãeense. Kos-y b tɩ m tõog n gom b yelle wala m sẽn tog gome. Bãng-y neb a taaba me tallg neere. Marsã zamaana zĩnd yõod y yĩnga. Bɩ y noor da tol n pʋdg beed ye. Leok-y bũmb fãa a leokr sã n ta la leok-y wala sẽn toge. Sã n ya mam kibare, a Tisik na togs-y: a yaa tõnd saam-bi-nongre, m sõangda la m tũud-n-ta-sõngo Soaala tʋʋmnẽ. Dẽ n so tɩ m tʋm-a y nengẽ t'a wa kõ-y mam kibare la a keng y sũya. Mam naaga ned a to n tʋme: a Onezim, yãmb nin-yende la tõnd me saam-bi-nongre; bãmb n na n wilg y bũmb ning sẽn maan ka. A Aristark sẽn be roog ne maam, tɩ b pʋʋs-y faã; a Mark me, a Barnabe pʋɩgdenga, n pʋʋsde: yẽ poorẽ la d da togs yãmb woto: a sã n wa y nengẽ, bɩ y reeg-a neere. A Zezi, b sẽn boond a sob yɛs t'a Zustus, n pʋʋsde. Zʋɩf rãmb sʋka, yaa bãmb bal n tʋm Wẽnd Rĩunga tʋʋmde ne maam la b yolsa m sũuri. Yãmb tẽngen-bi-taag a Epafras n pʋʋsde; sɩda Krista a Zezi tʋʋm-tʋmd kãnga maooda ne pʋʋsgo n kotẽ tɩ y kell n yɩ neb sẽn kɩ yẽgna, nin-sõma sẽn sak Wẽnd sẽn dat fãa b yĩnga. Sɩda, mam meng n kõt kaseto t'a namsda wʋsg yãmb yĩnga, n namsd Laodise la Yerapolis tẽns rãmb yĩnga. Tõnd tɩpd-nongr a Luk ne a Demas, n pʋʋsd-y. Pʋʋs-y d saam-biisa fãa sẽn be Laodise. Taas-y d pʋʋsgo a Nimfas la Tigenga kamb sẽn segd taab a zakẽ. Y sã n karem seb kãnga n sɛ bɩ y tool-a Laodise tɩ bãmb me karem, la yãmb me reeg bãmb sebrã, y me karem. Yeel-y woto a Arkip: «Maan gũusg ne tʋʋmd ninga Soaala sẽn kõ-f tɩ f tʋma la wɩng t'a yɩ neere.» Wã yaa mam menga, maam a Pol nug pʋʋsem. Tẽeg-y tɩ yaa bãeens la m balg n zĩẽ. Wẽnd nimbãan-zoeerã sig y fãa! A Pol ne a Silvẽ la a Timote n pʋʋsd Tesalonik Tigeng sẽn vɩ Wẽnd Ba la Soaala Zezi Krista maasmẽ. Bɩ Wẽnd pids-b ne b kũuna la b laafi! Yaa wakat fãa la d pʋʋsd Wẽnd bark y yĩnga la d tẽegd y yelle. Sɩda, Wẽnd la d Ba taoore, d tẽegdame tɩ y paama Soaal a Zezi Krista nengẽ tẽeba tʋʋmd yamleoogo, n paas nonglem sẽn vɩ, la saagr sẽn ka mi maagre. M saam-biisi la Wẽnd zo-rãmba, d miime tɩ Wẽnd n sɩd tũus yãmba n bak toore. La woto, ka tũ ne goam bala la Koe-nooga paam n ta yãmb ye, naaga ne bũmb sẽn paas y raoodo, ne a Vʋʋsem Sõng tʋʋm-bãna sẽn ka be sõore. Yãmb mi d sẽn maan bũmb ning yãmb sʋka, y sõngr yĩnga. Yaa ne zʋg sẽn wẽnd tõnd zʋgo la Soaala me zʋgo la yãmb deeg Koe-noogã. Ba y naong sã n yɩ wʋsgo, a Vʋʋsem Sõng kell n pids-y la ne sũ-noogo. Yaa rẽ me yĩng la yãmb nao wã rɩkr yamleoog yõk Masedoan la Akayi tẽedba. Soaala Gomda sẽn sɩng moonego yãmb tẽnga ka tek Masedoan la Akayi bal ye. Wẽnd sẽn kõ yãmb tẽeb ninga saaga ziig zãnga ne neerem, al tɩ d ka tar sẽn na n yeel n paas ye. Y tẽnga rãmb togsda tõnd waoong beelẽ sẽn yɩ a soaba. B togsda yãmb sẽn kẽ Wẽnd to-to; yãmb sẽn bas wẽn faadã n na n kẽ Wẽnd vɩɩga la Wẽnd menga. Y kẽe bãmba n gũud b Biiga waoong raare, b Biig ning b sẽn vʋʋg kɩɩms sʋka, b Biig a Zezi Krista sẽn na n fãag-a tõndo, tɩ b sũura sẽn na n fudg raar yãkame. Yãmb miime, m saam-biisi, tɩ d sẽn wa y nengẽ wã pa yɩ zaalem ye. Y bãngame, m saam-biisi, tɩ d deng n namsa Filip tẽnga la d yãee tʋʋre, la Soaala Wẽnd sõng-d lame tɩ ne fara sẽn yɩ far tɛka, d tõog n moona b Koe-noogã ne raoodo. D sẽn waa n segend yãmbã, d zãaga d meng ne tudugri, ne kalem-kalem la zãmbo. Yɩɩ woto tɩ Wẽnd deng n fɛɛsa tõndo, n yaool n kõ-d Koe-nooga tʋʋmde. Dẽ me la d pa baood n na n noog ninsaal sũuri, d baooda sẽn noom Wẽnde, la bãmb bal n ne sẽn be ninsaal sũurẽ. Tõnd zɩ n bao pẽg-faado n pẽg-y ye, d ka gom n yeg n bõs-y bũmb ye. D Wẽnda tara rẽ kaseto. D pa gom n bao ninsaal pẽgr ye, yãmb nengẽ bɩ zĩig a to ye. D yaool yaa Krista tʋʋm-tʋmda n da tõe n tũ rẽnna n yɩ zɩɩbo y yĩnga. La ade, d sakame n yɩ nin-kom-kom yãmb sʋka. D wẽnega ma sẽn dɩlgd a kamba n pa rat tɩ bũmb paoog-b ye. Tõnd nonglma ne yãmb yɩɩ boto la nonglma keelem yĩnga d tʋlgẽ lame n naagẽ ne Koe-noogã n kõ yãmb d meng vɩɩm. M saam-biisi, y ket n tẽra d tʋʋma ne d yaamsã. D sẽn waa n moon Koe-noogã, d naagame n tʋm yʋng wala wĩntoogo sẽn na n yɩlẽ tɩ d dɩlgr da wa lebg yãmb nin-yend zɩɩb ye. Y naaga Wẽnd n ya m kaseto tɩ ne tẽedba d manesema yɩɩ sõmbo n yɩ tɩrga, n zãr ne wɩdga. Y miime, yãmb ned kam fãa, tɩ wala ba sẽn maand ne a kamba d sagl-y lame, d kenga y pelse, d kos-y la Wẽnd yĩnga tɩ y vɩɩnd vɩɩm sẽn tat b yam, tɩ bãmb n boond yãmba b naama la b pẽgra zĩigẽ. Sã n ya ne tõndo, d ka vʋʋsd ne Wẽnd bark pʋʋsg ye. D sẽn taas-y Wẽnd gomd ningã y reeg-a lame; la y pa reeg-a wa ninsaal gomde, y reeg-a la wa Wẽnd dẽnd akɩka. La rẽ me la Gomda wom a biis yãmb tẽedba sũurẽ. Y modgame, m saam-biisi tɩ y tũudma ya sõmbo; a yaa sõng wa Wẽnd sẽn vigl Tigeng niynsi a Zezi Krista maasmẽ, Zɩɩde tẽnse. Wala Zɩɩde rãmb sẽn yãe naong Zʋɩf rãmba nengẽ, boto la y saam-biisa me nams yãmba. Ad-y neb niyns sẽn kʋ-b Soaal a Zezi la bãngdbã, yaa bãmb n le nams tõndo. Bãng-y tɩ b zãra ne Wẽnd zoodo la b rɩta Adem biis fãa beem. Bãmb kɩtame tɩ d ka le tõe n moon Koe-noogã bu-zẽmba tɩ b paam n fãag b sɩɩs ye. B lekda b wẽnema sãoogo tɩ Wẽnd sũ-puura me na n baas n dɩ-ba. Ade, m saam-biisi, sẽn seg tɩ d zãag taab bilfu — m gomda d nensa sẽn zãag taabã, m pa gomd sũura ye — d waa n yik n yãgdame n dat tɩ d nensa le togl taaba tao-tao. Dẽ la d sed n na n wa y nengẽ. Sã n ya maam a Pol, dẽn yɩɩ naoor yaka. Yaa Nin-wẽngã n ning gɩdgre. Sã n ka yãmba, bõe n na n yɩ d saagra pidsgu, d sũ-nooga baasgo, d faonga teedo, d sẽn wat n yɛs Soaal a Zezi Krista taoore b Waoonga raare? Yãmb bal la d zu-zẽkre la d sũ-noogo! Tooga sẽn waa n tar-d wʋsgo, d kaoolame tɩ d na n pa-la d ye Atɛn Na-tẽnga, n yaool marsã n tʋm y nengẽ ned sẽn na n kɩt tɩ y tẽeba kɩ yẽgna la a yẽege, n tʋm a Timote, d saam-biiga la d sõangda ne Krista Koɛɛga moonego. Tẽeba sã n kenge, ned ba a ye kõn sake tɩ namsga wa ne a lʋɩɩs ye tɩ y mi tɩ namsgo la d pʋɩɩre. D sẽn waa n be ne taabã, d ka wilg-y tɩ y na yãend toogo. Dẽn n be tɩ y fãa neẽ. Dɩlla yɛla sẽn waa n yɩɩd-ma, m tʋma a Timote t'a wa rɩ y tẽeba kaseto. M sẽn zoet yaa Kʋɩɩbda na n wa kʋɩɩb yãmb tɩ tʋʋmda wa mud zãnga. A Timote yii yãmb nengẽ n nan wa paalem la kibar ning a sẽn kõ tõnd y tẽeba la y nong taaba poorẽ, yaa kibar noogo. A yeelame tɩ y ket n tẽra d yelle, n pẽgda. A yeelame tɩ yãmb me baooda tõnd yãeebo, wa tõnd sẽn baood n yãend yãmbã. Ad-y y tẽeba kõo tõnd daoodo d yɩɩre la d namsga pʋgẽ. Marsã vɩɩm le kẽ-la d yĩngẽ, d sẽn bãng tɩ y ka lak ne Soaala bada. Sũ-noog la d paam y nengẽ n kɩdemd Soaala taoore la d yɩta a wãn n pʋʋs bark tɩ seke? Ad-m sẽn kot-y ne pẽdegre, wĩntoog la yʋngo: b sõng tɩ d le yãend y nenga la b sõng tɩ d lek bũmb ning sẽn paoog y tẽebã. Bɩ Wẽnnaam menga, tond Ba la Soaal a Zezi Krista maneg d sor tɩ d ta y nengẽ. Bɩ Soaala bɩɩs la b paas y nonglma pãnga, nonglem ning y sẽn nong taaba la y nong Adem biis fãa wã. B sõng t'a wẽneg nonglem ning tõnd sẽn nong yãmbã. Bɩ b pids-y ne raoodo tɩ y sõmblema yɩ sõmblem akɩk Wẽnd Ba taoore, daar ning d Soaal a Zezi Krista sẽn na n lɛɛg n wa tɩ b nin-sõma wã yãagd-b. D kot-y lame la d bõsd-y-la Soaal a Zezi Krista yʋʋr yĩnga tɩ y sẽn deeg d saglgo, bɩ y vɩɩnd vɩɩm ninga sẽn tat Wẽnnaam yam. Y pʋs n zoe sɩnga vɩɩm kãnga, la bɩ y modg n paase. Soaal a Zezi Krista sẽn kɩt tɩ tõnd taas-y bũmb ninga fãa y mi-a la neere. Ad-y Wẽnd daaba la woto: bao-y sõmblem la y veoog y meng ne yoobo. Ned kam fãa bãng n zã a meng yĩnga, n zã-a ne pʋ-peelem la gũusgu. Ned da sak t'a yĩnga raab tõog-a wa a sẽn tõe bu-zẽmba sẽn ka mi-b Wẽnda ye. D yĩnga zãab poorẽ bɩ ned ba a ye ra saag n yeel tɩ yẽ n tar bãngre n wa tudg a taab ye. Yɛl kãensa n wat ne Wẽnd sɩbg n dok b sũuri, la d zoe n gom-y la rẽ yelle. Y zoe n paama d kaseto. Soaala ka rat tõnd ne rẽgd ye, b bool-d lame tɩ d yɩ sõma. Woto wã, sẽn pa reega tɩ Wẽnd dat-a-la ne sõmblem, n gir a zugu, ka ninsaal la a kɩɩsd ye, a kɩɩsda Wẽnde la yaa Wẽnd meng n yaool n kõ yãmb a Vʋʋsem Sõngo. M pa tẽed tɩ yaa pakre tɩ m le kõ-y sebr taab nonglma poorẽ ye; Wẽnd meng b toore n zãms-a yãmba, tɩ y reeg-a neere. Boto la y sɩd maand ne saam-biisa fãa sẽn be Masedoan. D kot-y lame bala tɩ y le modg n paase. Y na n gesa wala yaa y zu-zẽkre y sã n tar sũ-maasem, n nong y tʋʋm pakre, n nong nus tʋʋma, wala sẽn wilg yãmbã. Ad-y yaa woto la y vɩɩma na n yɩ neb sẽn waoogd b mens vɩɩm, yĩngr dãmba nifẽ, la y kõn gũ tɩ neb a taab wa rɩlg-y ye. M saam-biisi, d pa rat n bas-y likẽ sẽn ki-ba poorẽ ye. Ka tog tɩ y sãam y sũuri wala neb sẽn ka tar saagr ye. D sẽn tẽed t'a Zezi Krista kiime n le vʋʋge, bɩ d deeg tɩ sẽn ki-ba ne bãmb tẽebo, Wẽnnaam na n peega bãmb fãa. Krista vẽnegra la d pamyã n na n togs-y woto: tõnd sẽn nan ket n vɩ-b tẽng zug, Krista Waoonga raare, ka tõnd n na n deng sẽn ki-bã n seg-b ye. Yaa Soaala meng n na n yi yĩngri n sigi, malɛka koɛɛg sã n tãse tɩ tõntõoga peebe. Krista maasem yĩnga, yaa sẽn ki-bã n na n deng vʋʋgre. Dẽn poor marsã, tõnd sẽn ket n vɩ-bã n na n lagem pipi rãmbã, tɩ sawadg zẽk-d yĩngri, tɩ d tɩ seg Soaala la d pa wakat buud fãa ne Bãmba. Bɩ y keng taab pɛlg ne rẽ tẽegre. Sã n ya Krista Waoonga sasa la a wakato, ka pakre tɩ d le gʋls-y sebr ye. Y mens mii vẽenega tɩ Soaala Waoonga na n yɩɩ yʋn sʋka, wala wagdr waoongo. Neba sẽn wat n gomda: Laafi wa yã! Dabeem sɛ yã! Yaa wakat kãng la yel-beeda na n lʋɩ vugr bala b zugu. Toogo wa pag sẽn kũmd dogem toogo, n na n tiig-ba, la põasg ka ye. Sã n ya yãmba, m saam-biisi, ka likẽ la y zĩ yã n na n bas tɩ raara wa tiig-y wa wagdr ye. Y fãa yaa yɩng neba, y fãa yaa vẽenem kamba, d pa yʋng la likẽ dãmb ye. Bɩ d da bas tɩ gõeem tõog-do wa neb a taaba ye, d da gũs ye, d zãag d mens ne yão-beedo. Yaa yʋng la gõeema rãmb nong n gũsi la yʋng me la rã-tɩgdba yũud n gãeemnẽ. Tõnd sẽn ya vẽenem dãmba bɩ d minim n yõk d mense. Bɩ d tẽebã la d nonglem yɩ d kut fu-yorgo, tɩ fãagra saagr yɩ d kut zug peoogo. Ka namsga zĩigẽ la Wẽnd boond tõnd n na n kẽes ye, b boond-d-la fãagra zĩigẽ. A Zezi Krista kii tõnd yĩnga, la bãmb maasem yĩnga, b ratame tɩ d vɩɩma, rũnna wala beoog soaba, wa sog ne bãmba. Dẽ me yĩng la y tog n kell n kẽne wa y sẽn sɩngã, n kõt taab raoodo la togs-n-taar sõngo. D kot-y lame, d saam-biisi, tɩ y waoog neb niyns sẽn be-b yãmb sʋka n gãd Krista tʋʋmna zugu, n ya kãsem-dãmba la yãmb sagendba. Nong-y-b zãnga ne nonglem kãsenga, b tʋʋmda yĩnga. Zĩnd-y laafi ne taaba. D kot-y lame, d saam-biisi, tɩ y legl sẽn ka tar-b vɩɩm sõnga la y keng sẽn tar-b rabeem sũya. Kogl-y sẽn pa tar-b pãnga. Wilg-y b fãa gilli tɩ y yaa tõog-m-meng rãmba. Ned da tug beem n lebs beem ye. Tʋlg-y neer ne taaba la ne neba fãa gilli. Yɩɩ neb sẽn pid ne sũ-noog wakat buud fãa. Da viig-y ne pʋʋsg ye. Y yɛla sẽn be zĩig ning fãa bɩ y ket n tar bark pʋʋsgo tɩ yaa Wẽnd la Krista a Zezi n dat rẽ fãa, y yĩnga. Da zãgs-y y mens ne a Vʋʋsem Sõng kũuna ye. Da yeel-y tɩ bãngr kũun ka yõod ye. Tũus-y sẽn ya sõmbo n gãd rẽnna. Zãag-y y meng ne wẽng buud fãa. Bɩ laafi Wẽnda pids-y zãnga ne sõmblem. Bɩ bũmb da zĩnd y nengẽ, y sɩɩgẽ bɩ y yĩngẽ, n ka tog ne Soaal a Zezi Krista, b Waoonga raar ye. Sẽn boola tõndã ka mi a pʋlem n ka pids ye. Dẽnd yĩngã d na n paama b kũuna zãnga. Pʋʋs-y tõnd me yĩnga, m saam-biisi. Pʋʋs-y d saam-biisa fãa ne pʋ-peelem pʋʋsem. M kot-y-la Soaala yʋʋr yĩnga, tɩ y karem seb kãnga d saam-biisa fãa. Bɩ Soaal a Zezi Krista bark pa ne yãmba! A Pol ne a Silvẽ la a Timote n pʋʋsd Tesalonik Tigeng sẽn vɩ Wẽnd la Soaal a Zezi Krista maasmẽ, Bɩ Wẽnd Ba la Soaal a Zezi Krista pids-y ne b kũuna la b laafi! Yaa wakat buud fãa la d tog n pʋʋs Wẽnnaam bark y yĩnga, m saam-biisi, tɩ y tẽeba kẽnda taoore la y nonglem ne taab me tara paasgo. D zug zẽkda y poorẽ, Wẽnd Tigenga pʋgẽ. D zug zẽkame tɩ y tẽeba ka tol n maage ne y naong la y pɛta sẽn yɩ ka tɛkã. Woto wã Wẽnd bʋʋd tɩrga zoe n kaoome la b yetame tɩ y toga ne Wẽnd Rĩungu, y me sẽn sak n namsa yĩnga. Wẽnd sẽn bʋʋd tɩrga ratame tɩ pɛt ning yãmb sẽn paama leb b rãmba, tɩ yĩn-maasem led toog ning y sẽn deegã. A Zezi Waoonga raare, raar ning b sẽn na n puk yĩngri, tɩ malɛk rãmba yegd-ba, n balemd b naam. Na n yɩɩ bug-witem sʋka la b na rok b sũuri ne sẽn ka mi-b Wẽndã la sẽn pa reeg-b Soaal a Zezi Koe-noogã. Bãmb dãmb n na n deeg sɩbgr sẽn ka be sɛɛbo, b na n zãaga ne Soaala nenga la b ziira yãeebo. Wakat kãng la Soaala na n deeg pẽgr b nin-sõma wã nengẽ, wakat kãng la sẽn tẽ-b bãmba na n kils-ba — la na n yɩɩ boto ne yãmb baraare. Tɩ yãmb tẽ-la d kaseto. Tẽegra woto buud sẽn be d yamẽ wã, yaa wakat buud fãa la d yõkd Wẽnd sɛɛg y yĩnga. D kota Wẽnnaam sẽn bool yãmbã, tɩ y yɩ neb sẽn tõe n sak b boolgo; d kotame tɩ bãmb pãng bɩɩs y yamẽ raood sõng buud fãa y sẽn tare, neer maaneg la tẽeba tʋʋmd yĩnga. Yaa woto la Soaal a Zezi Krista yʋʋr na n paam pẽgre, b nengẽ la b Ba wã nengẽ. Sã n yaa y sẽn wʋmd tɩ b gomd Soaal a Zezi Krista Waoong raare, la b gomd tɩ d fãa na n wa tigma bãmb taoore, m kot-y lame tɩ y ra bas tɩ b bondg y yama tao tao ye. M kotane, m saam-biisi, tɩ y ra yɛɛs ye. Tʋʋm kẽer na tʋmame tɩ wẽnda b tʋm-b-la ne a Vʋʋsem Sõng pãnga. Goam la y na n wʋme, bɩ sɛb kẽer sẽn wẽnd b yii tõnd nengẽ la y na n karem. La b yetame tɩ Soaala Waoong raar taame, bɩ y ra yɛɛs ye. Da bas-y tɩ ned tudg-y ba bilf ye. Bũmb n na n deng n zĩndi tɩ Soaala raar yaool n pʋge: wẽn-kɩɩsg n na n deng taoore, sẽn ka mi-a Wẽnd waoogrã, menesg biiga n na n deng n puk a menga. Nin-kãng n yikd zabre ne bũmb ning fãa sẽn boond tɩ wẽnde n deegd ninsaalba waoogre, la a tol n tɩ zĩndg a meng wẽnd doogẽ la a yet tɩ yẽ la Wẽnde menga. M sẽn waa n be ne yãmbã m wilg-y la rẽnna, la m tẽed tɩ y ket n tẽrame. Y mii bũmb ninga sẽn nan gɩdg a nanda t'a zĩi n gũud a pukra raare. Ad-y rũnna menga Wẽn-kɩɩsa zoe n sɩnga a tʋʋmde. Bãng-y tɩ sora sã n pak raare, sẽn gɩdg-a wã sã n bas a sor daare, a na n lika a menga. La bãng-y tɩ baraare me la Soaala na n wa ne pãnga n menes-a ne b noor pemsem. Wẽn-kɩɩsa na n waa ne Sʋtãamba pãnga. A na n maana bõn-bãna n yɩk neb pɛlense, n belg-ba. Wẽn-kɩɩsa na n kalma bõn-wẽns sẽn wẽnd bõn-sõma, n paam n kẽes moog zãnga sẽn zãgsb Wẽnd nonglma la b sɩda — la nonglma ne sɩda bal n da tõe n fãag bãmba. Sẽn zãgs-b nonglma la sɩda Wẽnd lob-b la zondo la woto b tẽeda zirẽ-beedo. Ad yaa woto la Wẽnd kao bʋʋdo la b sɩbg kɩɩsda, sẽn zãgsa sɩda n na n sak wẽngã. M saam-biisi, Wẽnd kom-nongdse, yaa tɩlɛ ne-do, tɩ d pʋʋs Wẽnd barka wakat buud fãa y yĩnga. Wẽnd welga yãmb al sɩngrẽ n pids-y ne a Vʋʋsem Sõng sẽn kõt sõmblem la a kõt Wẽnd sɩda reegr pãnga. Wẽnd sɩd bool-y-la ne b Koe-noogã n na n kẽes-y Soaala Zezi Krista ziira pʋgẽ. Woto wã, m saam-biisi, da bas-y raood ye. Tall-y zãms sõma niyns d sẽn taas yãmba la y sẽn wʋm d noorẽ bɩ y sẽn karem d sɛba pʋsẽ. Bɩ tõnd Soaal a Zezi Krista menga la Wẽnd Ba sẽn wilg tɩ b nonga tõndo kõ tõnd kũuni sẽn na n maag d sũur daar fãa la saagr sẽn ka na n yɩ fãoog ye. Bɩ bãmb meng maas y sũuri la b kõ-y raoodo, tɩ y goam la y tʋʋma yɩ sõma. M Saam-biisi, pʋʋs-y tɩ Wẽnd gomda kẽne n ta zĩig zãnga la b reeg-a ne waoogre wala sẽn ya to-to yãmb zamaanẽ. Kos-y tɩ b fãag-do ne nin-wẽnsã la sẽn kẽ-b moogã tɩ y mi tɩ ka neba fãa n tar tẽeba ye. Wẽnd sẽn ka mi belgrã na sõng-y n ligl y bɛyã. Soaala yĩnga d pʋg peela ne yã; tõnd sẽn wilg-y bũmb ningã, d neeme tɩ y sẽn sɩng n gãd-a, y ket n tar-a lame. Bɩ Soaala tees y sũura Wẽnde, tɩ Wẽnd pids-a ne nonglem la b sõng-y tɩ y ra serg n bas Krista ye. Ad-d sẽn kõt-y noor ning Soaala Zezi Krista yʋʋr yĩnga: bɩ ned kam fãa zãag a menga ne saam-biig fãa sẽn ka vɩ wala d sẽn wilg yãmbã. Y vɩɩma tog n togsa tõnd dẽnna la y mi tɩ d ka vɩ yaar ye. D sẽn dɩtã, d pa modg ned ba a ye t'a kõ-d ye. Yʋngo, wĩntoogo, d pa vʋʋs ne tʋʋmd ye. D saka yaamse, tɩ d pa rat n yɩ zɩɩb yãmb ned ba a ye yĩng ye. D da tõeeme n ka maan wala d sẽn maana ye, la d tʋlgame n kõ-y togsen-taar sõngo. D sẽn da waa n be ne taaba m da yeel-y la woto: sẽn ka rat-a tʋʋmde bɩ a ra tʋlg rɩɩb ye. D wʋmame tɩ neb n be yãmb sʋka n ka vɩ tɩrg ye, n ka tʋmd ba bilf ye, n yaool n lʋɩɩsd b toog bũmb fãa pʋgẽ. D kota bãmb dãmb ne dɩdgre, Soaal a Zezi Krista yĩnga tɩ b maag b meng n tʋm n wa tõog n dɩ b sẽn bao n paame. M saam-biisi, da vʋʋs-y ne neer maaneg ye. Ned sã n ka tũud sebr kãnga sẽn datã, bɩ y welg-a toore, bɩ y ra saag n le tũ-a ye. Modg-y bala n da ges-a wala y bɛ ye; a paam y saglgo wa y saam-biis a taaba. Bɩ laafi Soaala meng b toore kõ yãmb b laafi wã wakat buud fãa la zĩis fãa. Soaala zĩnd ne yãmba! Yaa maam a Pol n pʋʋsde la yaa m meng sebre. Y mii bũmb ning sẽn welgd m sɛbã ne neba taab rẽnna. Y ne tɩ sɩd yaa m gʋlsem. Bɩ Soaal a Zezi Krista bark sig y fãa gilli! Maam a Pol sẽn lebg a Zezi Krista Tʋʋm-tʋmd ne Wẽnnaam d Fãagda noore, la Krista a Zezi, d Teegda, raabo, maam n pʋʋsd a Timote, m bi-roak menga, tẽeba pʋgẽ. Bɩ Wẽnd Ba la Soaal a Zezi Krista sudg foom b nimbãan-zoeere kũuni la b laafi! M sẽn waa n dabd Masedoan, m kos-f lame tɩ f pa Efɛɛz la f sõng tɩ neb kẽer bas b zãms paala, la b lak b mens ne solem vɩʋʋdo, ne saam-dãmb dot sõt-n-ka-sɛtẽ, sẽn wat ne no-koɛɛma n yɩɩd b sẽn pukd Wẽnd sẽn yals bũmb ning ne tẽeb kũuni. M da kos-f la rẽ tɩ m datẽ lame tɩ taab nonglma yɩ pʋ-peelem bũmbu, n ka naag ne zãmbo bɩ tẽeb sẽn kedb ye. Neb kẽer ka sak rẽ n kẽ moogo, tɩ b goama lebg goam vɩʋʋdo; b tẽedame tɩ b yaa Noora karen-saamb bɛda mik b ka tar b goama sore, la b ka mi sẽn ya zabr ning tãnsobend la b reegr ye. Sɩda, d miime, Noora yaa sõmbo d sã n dat-a ne a sẽn wat ne bũmb ningã, tɩ y mi tɩ b pa yiis-a nin-sõng yĩng ye: yaa tʋb-pa-wʋmda, tõata, sẽn ka pʋʋsda Wẽnde, yel-maanda, wẽn-tʋʋsa, wẽnd bɛyã, ba la ma kʋʋda, nin-kʋʋda, yoaada, ra-taad-noanga, yembs koaasa, tẽn-wãada, zirẽ-be-neda, pʋlen-sãamda la sẽn tʋmda tʋʋm niyns fãa zãmsg sõnga sẽn gɩdgde. La zãmsg sõngã yaa Koe-noogã Wẽnd sẽn bobl maam a soabã, Wẽnd ning sẽn pida ne ziiri la a ya sũ-noog buud fãa yẽgrã. M pʋʋsda sẽn ko-a maam pãnga: a Zezi Krista, tõnd Soaalã. B tagsame tɩ m na tõog bãmb tʋʋmnã la yaa rẽnd yĩng la b bool maam, maam ne m yɩ wẽn-kɩɩs pĩnda, maam ne m nams m taaba la m yaal-ba. B kõ-m la sugri, tɩ m da ka mi ye, tɩ m da ket n yaa tẽeba sãana. Yaa tẽeb la nonglem ning sẽn pid Krista a Zezi la b sudg maam n daale. Gomd sẽn ya sɩda tɩ b tog n deeg-a zãng la woto: Krista a Zezi waa dũnia n na n fãag yel-wẽn-maandba la maam, maam la pipi. La m sã n paam tɩ Krista zoe m nimbãanega, yaa sẽn na n yɩla tɩ Krista reng ne maam n puk b sũ-maasem zãnga la b kɩt tɩ m lebg makre neb niyns sẽn na n tẽ-b bãmb n paam vɩɩm sẽn kõn sɛ wã yĩnga. Bɩ zamaan fãa Dĩma, kõn-luk-m-zĩigẽ soaba Wẽnde, nif sẽn ka tõe n teege, sẽn ka be taare, bɩ b paam pẽgre la ziir sẽn kõn sɛ, tɩ yʋʋm tong taab n tõt sɛɛbo. Ami! Ad-m sẽn yet tɩ f gũus ne bũmb ninga, m biiga Timote, la zĩ kanga m zemsa ne bãngra goama sẽn da yiis f poorẽ al daar zãra, tɩ f tog n maan tẽegre la f zab zab-sõngã, ne tẽeb la f pʋ-peelma; ad yaa rẽ n paoog neb kẽere, la b tẽeba looga wa koom sẽn lood ne a sẽn vele. Ada Imene, ada Aleksãndr. M kong n bas-b-la ne Sʋtãan tɩ b bãng yam la b ra le saag n tʋʋs Wẽnd ye. M data ne m sũur fãa tɩ y modg ne kosgo, ne sɛɛg yõkre, ne bark pʋʋsgo Adem biis fãa yĩnga, dĩm dãmba, taoor dãmb fãa yĩnga; woto la d vɩɩma yɩt laafi vɩɩm, vɩɩm sẽn be yamleoogo la a tar waoore. Dẽ me n be yõodo la a tat Wẽnnaam, d Fãagda, yam. B raaba la ninsaal paam tɩlgre la sɩd bãngre. Wẽnd yaa b ye. Ninsaalba me ne Wẽnd sʋka, yaa Wɛɛmb a ye n be: Krista a Zezi, Wẽnd Nedã. La bãmb n yao yel-wẽna samde d fãa zĩigẽ. Kaset kãng la sẽn yalse, a wakatẽ, la maam n lebg a moanda la a tʋʋm-tʋmda — sɩd la m gomda, m ka yagd zirẽ ye — maam la nin-zẽmba karen-saamba n kõt-b tẽebã ne a sɩdã. Woto wã m datame tɩ rapa pʋʋs zĩis fãa, n zẽkd b nus yĩngri, wa neb sẽn mi Wẽnd waoogre, wa neb sẽn ka mi sũ-puur la mo-beedo. Pagba me zã b mens neere; b faongã zãag ne wilg-m-meng la tɩtaam, b vẽ ne gɛma, ne sãnem, ne muizãan, ne fut sẽn daad toogo. B faong yɩɩ b tʋʋm sõma tɩ rẽ n tog ne pagb sẽn tũud Wẽnde. Karẽng wakato, pagba tog n sĩnda b noore la b sak n deeg b sẽn wilgd-b bũmb ninga. M pa sak tɩ pag zãms raoa, m pa sak t'a rɩ naam a zug ye. A zĩnd sɩɩ! Ad-y yaa a Adem la b reng n naan t'a Awa yaool n pʋge. Kaa Adem n sak kʋɩɩbg ye, yaa pagã n sake la taala lʋɩ-la a zugu. Bũmb ning sẽn na n fãag-a yaa kamb dogem la rẽ me yaa a sã n sulg a meng n mao ne tẽebo, ne taab nonglem, ne sõmblem baoobo. Ad bũmb sẽn le ya sɩda: ned ning sẽn dat-a n tʋm kãsem-soab tʋʋmde, yaa tʋʋmd sõng la a rata. Kãsem-soab me ra maan bũmb sẽn na n wa ne a wɩdg ye; a yɩ ned sẽn kẽ kãadem vugr bala, ned sẽn ka mi yão-beedo, n mi gũusgu, n ka mi ned paoogr ye, n mi zemsgo, n mi gãag-sobendo, n tõe n zãms a taaba. A ra yɩ rã-yũuda bɩ mo-be-neda, a yɩ nin-noanga, nin-bʋgsgo, ned sẽn ka baood zaba, ned yam sẽn lak ne ligdi. A yɩ ned sẽn mi a zak tallgo, t'a kamb sakd-a neere la ne waoogre. Ned sã n beẽ n ka tõe n zã a meng zaka, yẽ soab yɩta a wãn n ges Wẽnd Tigeng yelle? Da yɩ ned sẽn nan kẽ Krista paalem ye; ka rẽ a watẽ maana zẽk-m-menga la tɩtaam, a me pa yellẽ wa Sʋtãana. Togame tɩ neb a taaba, sẽn nan ka naagb ne tõndã, kõ kaset sõng a poorẽ, n wilg tɩ yel-beed ka a zugu, t'a ra wa lʋɩ kʋɩɩbda bẽdgẽ ye. Kãsem-dãmba sõangdb me tog n yɩɩ nin-tɩrse, neb sẽn yɛs b sɩd zugu, n gũusd b meng ne rãam, la b zoet yãnd ne bao yõod tɩ looge. B tall ne pʋ-peelem b tẽebã ne a yel tagdã. Bɩ b reng n bãng b zʋgo; yell sã n ka b zug marsã bɩ b yaool n kõ-b tʋʋmna. Sõangdb pogsa me boto: b yɩ nin-tɩrse, n ka mi b taab wɩdse, n ka mi yão-beedo, n maand fãa wa b sẽn wilg-b. Sõangdba sẽn ya-b rapa yɩta neb sẽn kẽ kãadem vugr bala, n mi b kamba la b zak zãabo. Sẽn mi-b tʋʋmda neere paamda waoogre neb sʋka la b sẽn tẽed Krista a Zezi ne tẽeb ninga kɩɩda yẽgna. M gʋlsd-f la woto la sã n yɩ bilfu m na babs-fo. Sã n mik tɩ m kaoosda, bɩ f modg n zã f meng neer Wẽnd zakẽ — m dat n yeelame tɩ Wẽnd vɩɩga Tigengẽ — yẽ la sɩda fãa sog yã, yẽ n tʋk sɩda a zugu. Sã n ya sɩda, tõnd tẽeba pida ne yel-soalma: ad Wẽnd Biig sẽn dogd ne ninsaal yĩnga; ad Wẽnd Vʋʋsem sẽn wat ne b sõmblem kaseto; ad malɛk rãmb sẽn gũbg-ba, ad bu-zẽmb sẽn paam b kibare; ad ninsaalb buud fãa sẽn tẽed-ba; ad-b sẽn dʋʋd yĩngr ne ziiri. Wẽnd Vʋʋsem togsa vẽenega tɩ yaoolem wakatã neb kẽer na n basa b tẽebo n kẽ zirẽ-be-rãmba la b reeg b zãmsgo, sẽn ya Sʋtãan rẽnna. B basame tɩ neb tudg-ba, la nin-bãmb dãmb sũur duuga ne kud moomde, tɩ lebg makr sẽn kõt kaset vẽenega tɩ b yaa zirẽ-be-rãmba, ninsaan-kazukma. Nin-bãmb gɩdgda yikãadem kõom, n gɩdgd bũmb kẽer dɩɩbo. Wẽnd n yaool n da kõ sẽn tẽed-b bãmbã, sẽn bãng-b sɩdã, tɩ b reeg n dɩ la b pẽg Bãmba. Wẽnd sẽn naan fãa bee neere la rɩɩb ba a ye ka kisi, f sã n dɩt-a ne Wẽnd bark pʋʋsgo. Wẽnd Gomdã la pʋʋsgã sẽn pʋʋs a zugã kɩtdame t'a sɩd lebg bõn-sõngo. F sã n tõog n wilg saam-biisa woto fãa, f na lebg Krista a Zezi sõgen sõngo, sẽn dɩlg f meng ne tẽeba sẽn dat tɩ f gãd bũmb ningã, la ne zãms-sõma niyns f sẽn tũ n ta marsã wã. Sã n ya zamaana soalma, pʋg-yãan-kʋd zʋbsgã, bas rẽ tɩ looge. Ad Wẽnd waoogrã n tog zãmsgo. Yĩnga tʋʋma bee yõodo la yõoda ka loog nug ye. Sã n ya Wẽnd waoogrã, yẽ n manegd fãa, yẽ n wat ne rũnna la beoog vɩɩma pʋlem noogo. Dẽ yaa bũmb sẽn ya sɩda tɩ d tog n deege. Tõnd sã n namsdẽ, tõnd sã n bob zabre, yaa d saagr sẽn be Wẽnd vɩɩga nengẽ, sẽn fãaga ninsaalba, sẽn fãaga tẽedbã n yɩɩda. Woto la f tog n wilg la f zãmse. Ned da paoog-f tɩ f yaa yãag ye. Kõ tẽedba fãa togs-n-taar sõngo, ne f goama, ne f vɩɩm, ne f nonglem, ne f tẽebo la ne f pʋ-peelem. Wɩng ne sebra karengo, ne saglgo, ne zãmsgo tɩ m watẽ. Da bas yĩngr kũuna t'a maag ye. Yaa kũun ning f sẽn paame, bãngr sẽn waa n lʋɩ sʋka tɩ kãsem-dãmba me lagem taaba n dɩk b nus n tik f zugã. Gãd rẽ wala f sũur bũmbu n wɩsg zãnga tɩ f taab fãa me yãend f sõmblema paasgo. Maan gũusg ne f vɩɩm la f zãmsgo; da sak yaams ye. Ad yaa woto la f na n fãag f menga la f fãag sẽn kelgd-b fooma. Da saag n tãs nin-kẽem ye, maag f yĩng n sagl-a wala f ba menga; ges kom-bɩɩba wala f yaopa, pʋg-yãans wala f ma rãmba; pelg f pʋg ne pʋg-sɛdba wala f tãopa. Waoog pʋg-kõapa sẽn ka tar-b teegda. B sã n tar kamb bɩ yagense, b zãms-b b roagdba waoogre, la b sõm dolbo. Dẽ n noom Wẽnde. Pʋg-kõor menga, sẽn vɩ-a a ye tãa, basa yɛla fãa ne Wẽnde; wĩntoog la yʋngo bɩ a ra viig ne Wẽnd pʋʋsgo la b yell tẽegr ye. Pʋg-kõor ning sẽn ka tagsd bũmb a to tɩ ka a yĩnga sũ-noog bala, a bãng t'a zoe n kiime, ba a sã n ket n wẽnda bõn-vɩɩga. Tẽeg n togs-b rẽ fãa tɩ b ra wa yãend yell n dogl b zug ye. Ned sã n ka get a buud yelle, n ka get sẽn vɩ-b ne yẽnda yelle, yẽ soab sãama a tẽebo la bu-zẽnd n são-a. Pag ning sẽn tõe n paam tɩ b gʋls a yʋʋr pʋg-kõap sʋka, yaa sẽn taa yʋʋm pisoobe, la sẽn kẽ-a kãadem vugr bala. A reng n kõ a vɩɩm sõnga kaseto n gʋʋl a kamb neere, n mi sãando, n mi nin-sõma reegre, n kũmd sẽn zĩ-b ne sũ-sãanga, n wilg t'a tõe n yolsa pakr buud fã. Da yãg n deeg pʋg-kõap niyns sẽn nan ka kʋʋl-ba ye. Bãng tɩ raab sẽn zãr ne Krista rẽnda tõe n wala b sũurẽ tɩ b yik marsã tɩ yaa kãadma bal la b baooda, la woto taal la b tʋkd b zugu tɩ b lak n basa b pipi pʋlengo. N paas me, b tʋʋma sẽn ka waoogã, wat n lebga rot saab bala. Saab yẽnẽ yee n yaẽ la sa-vɩʋʋdo, ayoo! Saadame n tar goama; gomda sẽn ka pak-ba, gomda yaare. M sẽn nonge: yaa sẽn nan pa kʋʋl-ba fãa le kẽ kãadem, n dog kamba, n ges b zaka tɩ bɛɛba ra wa yãe bũmb n gom wẽng Tigeng poorẽ ye. D mii pʋg-kõap kẽer sẽn tudg sor n kẽ Sʋtãan tãpo. Tẽed-poak sã n tar pʋg-kõap a buudẽ bɩ a ges b yelle tɩ b ra wa lebg zɩɩb ne Tigeng ye. Woto me la Tigeng tõogd n sõng sẽn ka tar-b teegda. Kãsem-dãmba sẽn maand b tʋʋmda nere, toga ne rolb pidungu, bũmb zãnga, sẽn namsd-b ne goam la karengo. Sebr sõng gʋlsame tɩ naaf sẽn tʋmd zɛɛgẽ noor pa loet ne yʋk ye, tɩ tʋʋm-tʋmd toga ne a yaoodo. B sã n dogl bũmb b zut bɩ f ra reeg tɩ yaa sɩda, kaset dãmb sã n ka ta a yi bɩ a tãab ye. Kãsem-dãmba me sã n kong bɩ f togs b vẽenega, neb fãa taoore, tɩ sẽn ket-ba me maan dabeem. M yet-f lame, Wẽnd taoore, Krista a Zezi la malɛgsa taoore, tɩ f tũ m sẽn wilg fooma n da welg ned ne a to, n da nong ned n yɩɩd a to ye. Da yãg ne ned ba a ye zug tikr ye; da sak n naag f to a yel-wẽnnẽ ye. Tall f pʋ-peelem. Bas ko-zaalga bal yũubu. Yũ rãam bilfu, f pʋ zabrã la f laafi wã sẽn pa waooga yĩnga. Neb n be tɩ b yel-wẽna pukd b toore tɩ ka tũ ne vɛɛsg ye; kẽer me rẽnd kõn puk sã n ka b vɛɛs-b lame n tɩg ye. Tʋʋm-sõma wã me pukda b mense; ba d sẽn ka ne b rãmb marsã wã ka tõe n pa n ka puk ye. Neb niyns sẽn ket n ya-b yemse tog n gesa b zu-soaben-dãmb wa neb sẽn tog ne waoogr zãnga, woto Wẽnd yʋʋr la Wẽnd gomd kõn paam tʋʋr ye. Yembs niyns zu-soaben-dãmb sẽn ya tẽedba da wa yik n paoog-ba, saam-biira sẽn be sʋka yĩng ye. B modg ne sakr n yɩɩda, b sẽn ya tẽedba la Wẽnd zo-rãmb yĩnga. Ad-f sẽn tog n wilg la f sagl tɩ b tũ bũmb ninga. Ned sã n zãmsd bũmb a to, n basd Soaal a Zezi Krista goam sõma wã, n basd zãmsg ning sẽn sõngd tõnd tɩ d Wẽnnaama waoogr kẽnd taoor n paasdẽ wã, yẽ soab yaa zoang sẽn wuk ne nagre, zɩt sẽn pid ne sogs faado la no-koɛɛm yaalse. Rẽ n wat ne sũ-kiiri, yõs-taaba, tʋy, tags wẽnse, zabd-n-pa-sɛtẽ, tɩ yẽ soaba yam sobame, a ka tar sɩd ye la a tẽedame tɩ Wẽnd waoogra yaa bao yõodo dũni kãnga pʋgẽ. Wẽnd tũudem sɩd bee yõodo ne ned ning sẽn tagsd t'a sẽn tar-a sek-a lame. Ka bũmb la tõnd zã n wa dũni ye, ka bũmb la d na n zã n leb ye. Woto wã, d sã n tar n dɩtẽ la d tar n yeelgdẽ bɩ d yet tɩ sek-d lame. Neb niyns sẽn dat-ba n zam paoong ne paoongo, bãmb dãmb lʋɩɩ Sʋtãan kʋɩɩbgẽ, Sʋtãan bẽdgẽ; b sũur wulumda ne tʋls wẽns ka tɛka sẽn lebgd zutu, n pogendẽ, n wãad la b menesd ninsaal zãnga. Bãasa fãa yẽgr yaa arzɛk tʋlsem; yaa kẽer sẽn bas tɩ bã-kãng yõk-ba la b bʋdg n zãag ne b tẽebo la b bas tɩ yell tood sẽn ka tõe n sõd wurg b sũuri. Sã n ya foom, Wẽnd neda, zãag f meng ne rẽ fãa. Bao sõmblem, bao Wẽnde, bao tẽebo, nonglem, raoodo la sũ-bʋgsem. Zab tẽeb zab-sõngã, mao n paam vɩɩm sẽn kõn sɛ tɩ yaa rẽ yĩng la Wẽnd bool-fo la rẽ me yĩng la f pʋlem f pʋleng sõngo, kaset dãmb wʋsg taoore. Maam n kot-fo, Wẽnd ning sẽn kõta bũmb fãa vɩɩma taoore, Krista a Zezi taoore, Krist ninga a Põs Pilat sẽn dɩ a soab kaseta taoore, tɩ f reeg noy-kãensa ne pʋ-peelem la yam sõngo n gũud Soaala Zezi Krista pukri, a Raara sã n wa ta; la sẽn na n taas-a Raarã yaa sũ-noog buud fãa yẽgrã, d Soaal yɛngã, dĩm dãmb Dĩma la soaalba fãa Soaalã; bãmb bal n ka sɩngr la b ka be sɛɛbo; bãmb n yals b meng vẽenem sẽn ka tõe n kolg zĩigẽ, ninsaal nif sẽn zɩ n teeg la a sẽn kõn teege bada. B paam ziiri la pãnga, marsã la daar fãa. Ami! Sagl dũnna arzɛka rãmba tɩ b vẽ ne tɩtaam buud fãa la b ra teeg b arzɛka t'a pa zɛɛd sɛɛb ye. B teeg Wẽnd tɩ bãmb kõt-d-la fãa tɩ gale, tɩ d sũur tõe n yɩ noogo. B maan neere; b tʋʋm-sõma yɩ zembala, b kõ ne yamleoogo, b sak n pʋɩ ne b taaba. Woto la b na n tigs arzɛk sẽn ya zɩsgo n wa tõog n paam vɩɩm menga. M biig a Timote, zã Wẽnd bobellã neere. Vẽ ne goam vɩʋʋdo la sẽn ka be barka, vẽ no-koɛɛma ne bãngr yooda rãmba. Yaa b sẽn kelg bãmb dãmba la kẽer bʋdg b tẽeba pʋgẽ. Wẽnd barka sig y fãa! Maam a Pol sẽn lebga a Zezi Krista Tʋʋm-tʋmda ne Wẽnd daabo la sẽn paam vɩɩm ninga sẽn be a Zezi Krista nengẽ wã pʋlemd noogo, maam n pʋʋsd m bi-nongr a Timote. Bɩ Wẽnnaam d Ba la d Soaal a Zezi Krista nimbãan-zoeere la b laafi kũun sig f zugu. M pʋʋsda m Wẽnda barka, Wẽnd ning m sẽn tũud wala m saam-dãmba, ne pʋ-peelem zãnga. M pʋʋsd-b la barka wakat ning fãa m sẽn tẽegd f yelle, m pʋʋsg pʋgẽ, yʋngo wala wĩntoogo. Ad-m tẽega f nintãma n dat ne m sũur fãa n le yãend-fo la m kɩdem sũ-noogo. M sẽn tar bũmb ning bilgri, yaa f tẽebã sẽn ka keoosdã, tẽeb sẽn deng n kɩ yẽgend f yaab poak a Lois la f ma a Eunis sũurẽ, tẽeb sẽn ket n wit f meng sũurẽ, tɩ m tar a kaseto. Yaa rẽ yĩng la m kot-f tɩ f le tẽeg bark ninga Wẽnnaam sẽn ning f sũurẽ ne mam meng nug tikri, tɩ f mi tɩ ka rabeem la Wẽnd kẽes d sũurẽ ye, b kõo tõnd b Vʋʋsem sẽn ya pãnga la nonglem la tõog-m-menga. Da zoe yãnde ne kaset ninga fo sẽn tog n kõ d Soaala ye; da zoe yãnd ne kaset ning f sẽn tog n kõ maam me sẽn pag roog a ye; sak bal n deeg toog ne maam, Koe-nooga yĩnga. Ad Wẽnd n sõng tõnd ne b pãnga, bãmb sẽn fãag tõndo n bool tõnd booll sõngo, tɩ ka tũ ne tõnd tʋʋm-sõma, n tũ ne b yamleoog la b nimbãan-zoeer bala. Bãmb n kõ tõnd b kũuna ne a Zezi Krista tɩ dũni nan ka sɩng ye. Kũun kãng puka zãnga ne tõnd Fãagd a Zezi Krista waoongo: bãmb n koms kũum zãnga la b kɩt tɩ vɩɩm la vʋʋgr vẽenem bui tõnd ne Koe-noogã. Maam la Koe-no-kãng wilgda, a zãmsda la a moanda. Yaa rẽ yĩng la m le be namsg pʋgẽ tɩ yãnd pa tar-m ye, tɩ mam mii ned ning m sẽn dell m tẽebã la m miime tɩ yẽ soab tõeeme tɩ m zã bobellã n ta b Raarã. Tũ n da bʋdg lɛ-lɛ goam sõma niyns f sẽn wʋm m nengẽ, tũ-b ne tẽebo la Krista a Zezi nonglem. Tall tẽeba bobelle ne Wẽnd Vʋʋsem Sõng ning sẽn ti a roog d pʋgẽ wã pãnga. Wala fo meng sẽn mi, Azi neba fãa lak n basa maam; a Fizɛl ne a Ermozɛn be-la b sʋka. Bɩ Wẽnd bãgb b kũuna a Onezifor ne a zaka, tɩ bãmb n waa n sõng maam naoor wʋsgo la b pa zoe m bãeensa yãnd ye. A sẽn ta Rom tẽnga a bao ne a sũurẽ n paam n yãend-ma. Bɩ Wẽnd kɩt t'a me rɩ b nimbãan-zoeer yõodo, Soaala nengẽ, b waoonga raare. Fo meng mii neere sõngr ning a sẽn yaoog maam Efɛɛz tẽnga. Foom, m bi-sõngo, keng f sũur ne Krista a Zezi nimbãan-zoeere: fo sẽn bãng bũmb ning mam poorẽ ne kaset dãmb wʋsg toagsga, bɩ f bao nin-sõma n wilg-ba, tɩ bãmb me wa tõog n zãms b taaba. Wala a Zezi Krista tãb-bi-sõngo, fo me reeg namsg ning b sẽn bok n kõ fooma. Tãp weoogo, tãb-biig yĩmda a zak yɛla, a sã n dat n noog a tãnsoab sũuri. Wags-taab zĩigẽ, ned kõn paam n lʋɩ taoore, a sã n ka reeg reema siglg noy neer ye. Ka-koaad ning sẽn modg-a ne koobo, yẽ soab n tog pipi n deeg a kood biisi. Wʋm m goama sẽn dat n yeel bũmb ninga. M pʋs n mi tɩ Soaala na wilg foom b võore. Tẽeg a Zezi Krista yelle; ad-y bãmb la a Daviid yagenga sẽn vʋʋg kɩɩms sʋkã wala m Koe-nooga sẽn wilgdã. Ad yaa Koe-noog kãng yĩng bala la neb namsd maam n tol n balg maam wa bi-bɛɛga. La ned yaool n ka be n tõe n balg Wẽnd gomda ye. Yaa rẽ yĩng la m sak fãa, Wẽnd kamba yĩnga, tɩ bãmb me wa paam tɩlgr ning sẽn be Krista a Zezi nengẽ, bãmb me wa paam vɩɩm sẽn kõn sɛ. Gomd sẽn ya sɩd menga la gom kãnga: «Tõnd sã n tũ bãmb n ki, d na n tũu bãmb n vʋʋge. Tõnd sã n naag bãmba n maan raoodo, d naagda bãmb n dɩ naam; d sã n yeel tɩ d ka mi-ba, bãmb me na yeel tɩ b ka mi tõnd ye. Tõnd sã n ka yɛs d sɩd zĩigẽ me, bãmb yɛsa b sɩd zĩigẽ: b pa tõe n kɩɩs b meng ye.» Tẽeg-b rẽ fãa la wilg-b ne f kaset soaba Wẽnde tɩ b tog n basa b no-koɛɛm yaalsã sẽn ka be yõodo, sã n ka b kẽes kelgdba moogo bala. Mao n yɩ ned sẽn be yam Wẽnd taoore, n yɩ tʋʋm-tʋmd sẽn ka zoet-a a tʋʋmda yãnd ye la yɩ sɩd Koe-nooga moanda sẽn ka mi yaams ye. Sã n kella no-noom goam la gom yoodã, zoe b rãmba. B tɛk yaa b tuut neba tɩ b wẽnema paasd n dabda. B goama rɩta neb wa solenkẽega. Yaa bãmb dãmb la a Imene la a Filɛt, b tudgame n zãag ne sɩda, n saad n yagd zirẽ tɩ yĩns vʋʋgr taa n logame la woto yaa neb wʋsg tẽeb la b leebd lɛbla. Kug niyns Wẽnd meeba sẽn tʋɩɩs b rãmb zugã ka bõn-wãadem ye la fãa yɛsa ne bãmb gomda pãnga. Ad-y Wẽnd mi-la b neba la b raab la woto: «Sẽn pʋta bãmb yʋʋr fãa zãag ne wẽnga.» Zak kãseng fãa pʋgẽ, ka sãnem la wanzurf laas bal n be ye, laas kẽer yaa leense, tɩ kẽer ya tãnd laase, kẽer bee waoor tʋʋm yĩng bala, kẽer yaa tʋʋm-yaals yĩnga. Dɩlla ned sã n vẽ ne tʋʋm-wẽns niyns m sẽn gomdã, a na yɩ wa waoor laaga, n ya sõngo, n tog ne Soaala, n tõe n dɩk n tʋm tʋʋm-sõma buud fãa. Zãag f meng ne kom-bɩɩba minim wẽnsã; bao zemsgo, tẽebo, nonglem, laafi; naag f pʋʋsgo ne neb niyns sẽn pʋʋsd-b Soaala ne pʋ-peelem. Sã n kella sogs toodo la sogs yaalsã, zoe-ba, fo meng mi tɩ rẽ n kaood zaba. Mik Soaala tʋʋm-tʋmd ka tog n yɩ zab kaood ye, a tog n deega neb fãa ne sũ-maasem, a bãngr seka a zãms a taaba; Wẽnd sã n fɛɛsd-a, a ka basd raood ye. Yaa ne sũ-maasem la a na n leok tõatba tɩ daare Wẽnd wat n tedga b zʋgo, n vẽneg b yam tɩ b yãe sɩda, tɩ b wĩ wã loode, tɩ Sʋtãan n loe-b ne a wĩ, tɩ b tũud a raabo. Bɩ f bãng tɩ yaoolem wakata na n yɩɩ toogo wʋsgo. Ninsaalba na n lebga beed dãmba, dat wʋsg rãmba, tɩtaam dãmba, wilg-m-meng rãmba, tẽn-kãn-neba, n pa le mi b roagd waoogr ye, n pa le mi sõm ye, n pa waoogd Wẽnd ye. B sũur na n lebga weoglgo, n pa le kũmd b taab nimbãaneg ye, b na n lebga rõatba, yoaadba, sũ-pu-neba, neer bɛɛba, bãon-lukdba, zirẽ-be-neba, nong-wukr-dãmba, pẽgd noogo n yɩɩd Wẽnd dãmba. B kẽnda yɩnga wa neb sẽn nong Wẽnd waoogre, mik pʋgẽ wã b pa gãd a yẽgra ye. Nin-bãmb me, zoe-ba! Neb a taab me n be n saad roto n lebd pʋg-yirsa sẽn pid ne yel-wẽna zutu, pagb sẽn lebg b tʋls wẽnsa yemse; bãmb n tar sɩg-sɩge n dat zãmsg daar fãa la b kõn paam n bãng sɩda abada. Nin-bãmb wẽnda a Zannɛs la a Zãmbrɛs sẽn yik pĩnda n kɩɩs a Moyiiz; bãmb me kɩɩsa sɩda n lebg neb sẽn tar yam wẽnga la sẽn bʋdg zãnga, b tẽeb pʋgẽ. La ka na n zãag ziig ye; neba fãa na n bãnga b gãeemdã wala pĩnd neb a yiiba gãeemda me sẽn puk fãa nifẽ wã. Sã n ya foom, fo tũ-m lame n sa n zãms nebã, f bãnga m sẽn tʋme, la m sẽn da sed n na n tʋm bũmb ninga, f bãnga m tẽebo, m sũ-maasem, m nonglem, m sũ-keelem, b sẽn waa n pʋgd n namsd-m Antiyos tẽnga la Ikoniyom, la Listr; bõe la m pa namse? La wakat fãa Soaala fãag-m lame. Neb niyns fãa sẽn dat-ba n vɩɩnd Wẽnnaam vɩɩm ne Krista a Zezi, bãmb dãmb ka tõe n ka nams ye. Sã n ya ne nin-wẽns la zirẽ-be-rãmba, b tʋʋm-wẽna sẽn tar paasgo la b sẽn tar paasgo n dabda; bãmb n tudgi, bãmb n le rat n tudg b taaba. Sã n ya foom, gãd f sẽn zãms bũmb ningã, n mi tɩ rẽ bal la sɩdã. Fo mii f sẽn tũ karen-saam-dãmb niynsi n paam bãngr kãnga. Yaa al f yãadmẽ la f sɩng n mi sebr sõngo; dẽ n kõ foo yam sõngo sẽn wat ne a Zezi Krista tẽeb la f fãagre. Sebr sõnga zãng yii Wẽnnaam nengẽ la a yõod ya a sõng fo tɩ f zãmse, tɩ f gom n lubi, tɩ f rems sẽn golme la f wilg sẽn be neere. Yaa woto la Wẽnnaam ned paamd sẽn sek a zãnga n tõe tʋʋmd sõng buud fãa. Mam yõkda f sɛɛga, zoe Wẽnnaam la f zoe Krista a Zezi sẽn na n wa kao sẽn vɩ-ba la sẽn ki-ba bʋʋdo, sẽn na n le wa la b dɩ b naama: moon Wẽnnaam Koɛɛga, togs la f le togse, noom-b tɩ ka noom-b; ning pãnga n kɩɩse, n tãse; modg n sagl ne maag-m-menga la ne zãmsg tɩrg raab bala. Wakat n wate tɩ neba ka na n le reeg zãmsg sõnga ye; b na n tũla b tʋls wẽnsã; b tʋba sẽn kɩrd tɩ b pa tõe n zĩnd sɩɩ wã, b na n baoo karen-saam-dãmb ka tɛka, neb sẽn gomd b sẽn dat tɩ b gom bũmb ningã, n yaool n lak zãng ne sɩda, n kelgd solem-vɩɩdo. Sã n ya foom, maan gũusgu ne bũmb fãa, sak namsgo, moon Koe-noogã, modg tɩ yɩ sõmb zãnga. Sã n ya maam, m lebga bũmb b sẽn zoe n dɩk n kɩrg maoong zugu la mam loogra wakat zoe n taame. Mam zaba zab-sõngã n baase, m zoeesa ta-la a tɛka, m gãda m tẽebo. La marsã, pugl ning sẽn ya sõmblem kasetã zoe n wʋga m yĩnga. Keta bʋʋda kao bala tɩ Soaala sẽn ya bʋ-tɩrg soaba rɩk-a n fõgen maam; la ka maam bal n na n paam-a ye, yaa neb niyns fãa sẽn na n gũ b waoonga ne nonglem. Ning pãng n wa m nengẽ tao! A Demas basa maam, dũnna vɩɩma yõod pʋgb yĩnga. A leba Tesalonik, t'a tũud-n-taaga Kresãs leb Galasi, t'a Tit kẽng Dalmasi. A Luk bal n be ne maam. Peeg a Mark me n wa tɩ yẽ bal n tõe n yaoog maam m tʋʋmda pʋgẽ. Mam tʋma a Tisik Efɛɛz. F sã n watẽ bɩ f zɩ m fu-goabgã m sen bas Troas, a Karpos zakẽ, ne m sɛbã, bũmb zãnga sɛb niyns sẽn gʋls-b gãnd zugã. Yõaka a Aleksãndr maana maam wẽng menga; Soaala na rol-a n zems a tʋʋma. Fo me gũus ne nin-kãnga tɩ yẽ n yɩ d bɛ menga, n kɩɩs d zãmsgo. Mam sẽn waa n na n gom n fãag m meng pipi bʋʋda zĩigẽ, ned ba a ye ka sõng maam ye. B fãa basa maam. Wẽnd da ning b taal ye. Soaala bal n sõng maam la b pidsa maam ne raoodo tɩ mam tõog n zẽk m koɛɛga n moon Fãagda Waoongo tɩ bu-zẽmba fãa wʋm; la Wẽnd meng n deeg-m gɩgemd noorẽ. Soaala n na n kɩt tɩ m põs geel wẽns buud fãa, n fãag maam la b yãag maam n ta b Arzãn Rĩungẽ. B paam pẽgr yʋʋm sẽn kõn sɛ. Ami! Pʋʋs a Priska la a Akilas la a Onezifor ne a zak fãa. A Erast paa Korẽnt; mam basa a Trofim sẽn pa keem Milɛ tẽnga. Ning pãng n wa tɩ waooda nan ka sɩng ye. A Ewubul tɩ m pʋʋs-fo, n paas a Ypdẽns, a Lẽ, a Klodiya la d saam-biisa fãa. Soaala zĩnd ne fo! Wẽnd bark sig yãmb fãa! Maam a Pol n pʋʋsde. M yaa Wẽnd sõgne; m kẽe a Zezi Krista tʋʋmde n na n sõng tɩ Wẽnd sẽn welg b rãmb toorã paam tẽebo. B paam n bãng sɩda n lebg wẽn-pẽgdba. B paam vɩɩm sẽn kõn sɛ saagre me. Vɩɩm kãng la Wẽnd sẽn ka mi zirẽ-beeda ra kãab tõnd al tɩ dũni nan ka naan ye. B wakata sẽn ta, b pidsa b kãabgã ne b Koe-nooga moonego la maam la b kõ noor tɩ m maan tʋʋm-kãnga. Dɩlla yaa maam a Pol n pʋʋsd a Tit, m bi-roak meng d fãa tẽeba pʋgẽ. Bɩ Wẽnd Ba nimbãan-zoeere la b laafi tũ Krista a Zezi, tõnd Fãagdã, n sig f zugu! Mam sã n bas foo Krɛt tẽnga yaa sẽn na n yɩla tɩ f yõdg n sigl Tigenga n baase la f ning kãsem-dãmb tẽng-tẽnga wa m sẽn wilgi. Kãsem-dãmba togame n yɩ neb sẽn ka tar yell b zugu; sã n ya kãadma, b kẽe-a la vugr bala la b kamb yaa tẽedba; b pa tõe n dõd-b ne wẽng ye, la b mii sakre. A sẽn ya Wẽnd zag-gũuda, kãsem-soab tog n yɩɩ nin-tɩrga; a ka mi porbo, a ka mi zẽk-m-menga, a ka mi sũ-puuri, a ka rã-yũuda, a ka baood zaba, a ka baood arzɛk ne zãmb ye. A mii gãag-sobendo, a nong n maana neere, a ka mi pir-pir ye, a mii zemsgo, a yaa wẽn-pʋʋsa, a tõe-la a menga. A modgdame tɩ bũmb ra keoos a zãmsga pʋgẽ ye, a zãmsga tũudame. A tog n tõogame n sagl sagl tɩrse, n tõog n ning kɩɩsdba yãnde. Neb wʋsg n be, la bãnkomsa sʋk la b be n yɩɩda, n ya tõatba, gom-faad-dãmba, la no-noom-dãmba. Da bas-b tɩ b gom ye. Yaa neb sẽn wãad b taab roto, n togsd sẽn pa sõmbe n na n paam n dɩ bala. Woto la b bãngd meng a ye togsd b poorẽ: «Krɛt tẽng rãmba, zirẽ-be-neb wakat buud fãa, ninsaan-yoodo, dɩt-n-pa-tʋmnẽ-dãmba.» B bãngda toagsg yaa sɩda. Dẽnd yĩnga, togs-y bãmb vẽenega tɩ b ra bʋdg n bas tẽeb sɩdã. B lak n bas Zʋɩf rãmba ne b soalma, n lak n bas sẽn wẽnemd-b kãar n tees sɩdã. F ya pʋ-peen-neda, f yɛla fãa tũuda pʋ-peelem sore; f sã n ya nin-dẽgdo la f pa tar tẽebo, bõn-sõng me kõn zĩnd f yĩng ye. B yama la b pʋga zãng sobame. B yetame tɩ b yaa neb sẽn mi Wẽnde, la bãmb meng n lɛɛg n kɩɩsd-b ne b vɩɩm: ad-y b yaa nin-yoodo, tõatba, neb sẽn ka tõe n maan bõn-sõng ba bilfu. Sã n ya foo, modg tɩ f zãmsg tũ Zãms-sõngã. Bɩ nin-kẽemba yɩ neb sẽn tõe b mense, neb sẽn tog ne pẽgre, maag-m-meng rãmba, n tar tẽeb sẽn kɩ yẽgna, n nong b taaba, n ka yɛɛd ne neer pʋgb ye. Pʋg-yãansa me boto. B manesem yɩ pʋg-sõma manesem, b ra wɩd b taab ye, b ra yɩ rã-yũudba, b yɩ sagl-sõng rãmba. Woto la b tõogd n zãms pʋg-bõonegã tɩ b nong b sɩdb rãmba la b kamba, n vẽ ne yaare, ne yoodem, n mi b zak tallgo, n ka mi gãgs ye la b reegd b sɩdb rãmb noy; woto Wẽnnaam gomda kõn paam sãbsgo ned ba a ye nengẽ ye. Sagl kom-bɩɩba neere tɩ b gũus ne yirgu buud fãa. Fo meng nengẽ la b na n yãend vɩɩm sõng sor n dɩke, tɩ f zãmsg tũuda sɩda, tɩ f waoogda f menga, tɩ f gomda ne gũusgu, tɩ bũmb ka keoosd f vɩɩmẽ ye; yaa woto la bɛɛba zĩ ne yãnde, n ka tõe n gom beed f poorẽ ye. Bɩ yemsa sak b zu-soaben-dãmb bũmb fãa pʋgẽ. B bao n noog b sũuri, b ra kɩɩs b gomd ye. B ra soos n zãmb-b ye, bũmb da woog b nonglem ne b ye. Woto b na yɩ neb niyns sẽn deegd Wẽnnaam d Fãagda gomdã. Wẽnd nimbãan-zoeerã sẽn fãagd Adem biisa fãa puka zãnga. A kɩtame tɩ d bãng tɩ d tog n basa bũmb ning fãa sẽn ka wat ne Wẽnd waoogre, n bas zamaana tʋls wẽnsã, n vɩɩnd marsã ne gũusgu, ne sõmblem, ne Wẽnd pẽgre. D tog n gũu ne saagre, zu-noog wakat ninga d Wẽnnaam la d Fãagd a Zezi Krista, sẽn na n sig ne b pãng la ziiri. Yaa bãmb n kõ b meng n fãag-do, n kɩt tɩ d tɩlg ne wẽng buud fãa, la b segl buud sõng n kõ b menga, buud sẽn wɩsg a menga n baood neere. Yaa woto la f tog n gome, n sagle, n togs sɩda wa f sẽn tõe fãa. Bɩ ned da sãbs-f ye. Tẽeg b fãa gilli tɩ b togame n sak tẽnga taoor dãmba la kãsem-dãmba, n deeg b goama, n sak n tʋm tʋʋmd sõng buud fãa. B ra beeg ned ye, b bas zaba, b yɩ neb sẽn baood n na n noog b taab sũuri, b bʋk b sũuri ne neb fãa. Ade, pĩnda tõnd me yɩɩ yalemse, kɩɩsdba; tõnd me ra bʋdgame; tʋls yood la sũ-nood yood n da balg tõndo tɩ d da vɩ ne yam wẽnga, ne sũ-kiiri, ne taab sãbsgo la taab kisgu. Wakat n puki, yaa Wẽnnaam d Fãagda wakato, yaa b sũ-bʋgsem la b nimbãan-zoeer ne ninsaalb wakato. B ka ges tʋʋm-sõma niyns d sẽn tʋma ye, yaa b nimbãan-zoeera bal n tus ba tɩ b na n fãag-do. Tũu ne koom soobo la rogem paalga ne a Vʋʋsem Sõngo pãnga. B sudga tõnd Vʋʋsem kãnga n mabge, tõnd Fãagd a Zezi Krista pãng yĩnga. Woto d sen paam tɩlgr ne bãmb kũuni, d na n tũu bãmb n dɩ Wẽnd yõodo, vɩɩm sẽn ka tar sɛɛb pʋgẽ. Gomda yaa sɩd menga tɩ m dat wa fãa-fãa tɩ f bas sãmbse la f togs ne pãnga tɩ sẽn tẽed-b Wẽnda fãa wɩng ne neer maanego. Dẽ la sõmbo, dẽ n be yõod ninsaalb yĩnga. Sã n kella vɛɛs yaalse, rogma sẽn tong zĩig ninga, Noora poorẽ zaba la no-koɛɛma, zoe-ba. B pa manegd fɩ, b pa wat ne yõod ye. Ned sã n ya welgda, yãend-a tɩ ta naoor a yiibu, n wilg-a t'a maan gũusgu; dẽ poore lak ne ned a woto buudu. Fo mi tɩ ned a woto buud bʋdga zãnga, n lebg yel-wẽn-maanda, n tʋk a meng taal a zugu. M sã n wa tʋm f nengẽ a Artemas bɩ a Tisik, bãng tɩ f togame n wa bʋʋg-m Nikopolis tẽnga: yaa be la m na n zĩnd waooda wẽnde. Pĩnd n ges bʋ-kaooda Zenas la a Apolos so-toaka yell neere, tɩ bũmb da wa paoog-b ye. Tõnd neba me tog n wɩnga ne tʋʋm-sõma n paam n yiis b meng yell pakdem; b kõn zĩ woto tɩ b vɩɩm ka yõod ye. Sẽn be-b ne maama fãa tɩ b pʋʋs-fo. Pʋʋs d saam-biisa sẽn nong-b tõnd, tẽeba pʋgẽ. Bɩ Wẽnd barka sig yãmb fãa! Maam a Pol sẽn be roogẽ Krista yĩnga, ne m saam-biig a Timote n pʋʋsd d zoa la d sõangd a Filemo, d tão sõnga Afia, d ba-biig la d tʋmd-n-taaga a Arkip la Tigenga kamb fãa sẽn segd taab a zakẽ. Wẽnnaam d Ba la Soaala Zezi Krista sik y fãa zutu b bark la b laafi! M tara Soaala bark pʋsgo f yĩnga la m tẽegda f yell m pʋʋsg pʋgẽ. M wʋmdame tɩ b tar-f pẽgre. Yaa Krista a Zezi bɩ nin-sõma wã poorẽ, b pẽgda f nonglem la f tẽebo. Wẽnd na kɩt tɩ f tẽeba yals foo sõng-taab-tʋʋmda zugu. Wẽnd na kɩt t'a vẽneg f yam zãnga tɩ f yãend bõn sõng ning fãa d sẽn tõe n maan Krista yĩnga. La sɩda m paama sũ-noog kãsenga la m sũura gãandame, m sẽn wʋm f nonglma ne f taaba kibare; b yeel-m lame, m saam-biiga, tɩ f maasa nin-sõma wã sũuri. Dẽ n so tɩ ne m sẽn tõe n soond Krista maasmẽ n gom-f vẽenega la m wilg-fu f sẽn tog n maane, m baas n tʋlgame n lʋɩɩs nonglma taoore la m kos foom m kosgo. Sẽn na n goma wã, ya a Pol, yaa nin-kẽem a Pol, ya b sẽn balg a soab bãeens marsã, Krista a Zezi yĩngã. M kosga yaa m biiga yĩnga, biig ning m sẽn dog m bãeensa roogẽ, t'a reeg yʋʋr a Be yõodo (Onezim). Nin-kãng tʋʋmd ka naf-f pĩnd ye la marsã a na zĩnd yõodo, foo wala mam yĩnga. M lebsd-a la f nengẽ la ad-a lebga m sũur neda. M da nongẽ lame t'a pa m sɛɛgẽ n tʋm fo ziigẽ, m bãeensa roogẽ, tɩ f mi tɩ Koe-nooga yĩnga b balg-m lame. La ad-m pa tʋlg n maan fɩ tɩ f zɩ tiir ye, tɩ m pa rat tɩ yel-sõmda tũ ne moadg ye; m datame t'a yɩ yamleoog bũmbu. Tõeeme marsã t'a Onezim sẽn da zãag ne foom bilfr bala bɩ a lebg f soolem yʋʋm tõt sɛɛbo. La kõn le yɩ wala f yem-daoog ye, a lebga f babi-nongre. A sẽn lebg mam bi-nongr mengã, zamaana rãmb nifẽ, wa Krista nifẽ, fo nengẽ wã na yɩɩg boto. Bɩ f ges bũmb ning sẽn be tõnd d yiiba sʋka la f reeg-a wa mam menga. Tõe t'a ra beeg-f lame bɩ a ra looga ne f bũmbu, bɩ f bas tɩ rẽ paka maam marsã. Maam a Pol meng n lʋɩɩsd m toogo, n gʋlsd-f woto ne m nugu: maam n na n yao. La rẽ yaa m sẽn pa rat n gom samd ning f sẽn tog n yao-ma; yaa fo menga la f tog n dɩk n yao maam. M saam-biiga, Soaala yĩng bɩ f ra zãgs m kosg ye; maag m sũur Krista yĩnga. M gʋlsd-f la ne saagr kãsenga tɩ f mii noor deegre; m tara kaset meng tɩ f tõe n kõome tɩ yɩɩd m sẽn kot fooma. M sẽn paasd yaa f segl m gãag roogo, tɩ ne yãmb pʋʋsgo, m na n leba y nengẽ. A Epafras tɩ m pʋʋs-fo: m sẽn kẽ roog Krista a Zezi yĩngã, yẽ la m sõsd-n-taaga. Sẽn sõngd-b maama tɩ m pʋʋs-fo: a Mark, a Aristark, a Demas ne a Luk. Soaala a Zezi Krista bark zĩnd ne-fo! Pĩnda Wẽnnaam yãka bãngdba n gom ne tõnd yaab rãmbã naoor yaka la ne goam buud toɛ-toɛ yã, dũnna-rũnna, yaoolem wakatã, yaa ne bãmb Biiga la b gom ne tõndo. Yaa Bi-kãng la b yãkre t'a yaa b yõod dɩta la yaa ne yẽ pãng la yʋʋma tong taaba n ka tõe n sõde. Bi-kãng n waa n puk b ziirã tɩ nin-kãng yaa b menga wẽnego, la b zãada dũnia ne b Gomda pãnga. Bãmb n yẽes yel-wẽnd buud fãa, n dʋ yĩngri n zʋʋg saaga, n tɩ zĩ Wẽnd sẽn pid ne ziira rɩtgo. B zʋʋga malɛgsa fãa tɩ malɛgsa ka paam yʋʋr sẽn tõe n mak ne yʋʋr ning b sẽn pʋd bãmba ye. Yaa malɛk bʋgo la Wẽnnaam tõog n yeele: «Fo yaa mam Biiga; maam n dog-f rũnna bala?» La ad-b sẽn le paase: «Mam na n yɩla a Ba, t'a yɩ m Biiga.» B sẽn wa n dɩk b Bi-kẽengã n na n kõ dũnia, b yeelame yɛsa: «Bɩ Wẽnd malɛgsa wõgemd b taoore!» Sã n yaool n ya ne malɛgsa la b gomda, b yeta woto: B kɩtame tɩ b malɛgsã wẽnd sobgo, n kɩt tɩ b sõgen-kamba wẽnd bugum sẽn tʋʋl ne rɩɩbo. Sã n ya ne b Biigã b gomda woto: «Wẽnde, yãmb naama zaoor kõn vik abada; bɩ b yetame: y naama rasaar yaa zemsg-na-zĩnd dasaare. Y nonga sõmblem, n zãgs Wẽnd paoogre, yaa rẽ yĩnga la Wẽnnaam y Wẽndã, welg-y toore n bao yũ-noog kaam n zɛyã.» B yetame yɛsa: «Sɩngrẽ wã yaa yãmba, Soaala, n lugl tẽngã la y nug n yɛdg saagã. La rẽ fãa na n loogame n menem, yãmb bala n na n kelle tɩ sẽn keta na n kʋdg wa fuugu. Sẽn ketã na n kʋʋ n dɩgla wala fu-yorgo, n kʋ wala peende la b na n teemame. Yãmb bal n ka na n teem abada, y yʋʋm kõn ta b tɛk abada.» Yaa malɛk a bõe la b tõog n yeele: «Zĩnd m dɩtgo tɩ m wa gãneg f bɛɛba f taoore tɩ f tab-b n zĩẽ?» D sok n gese, b fãa ka yam dãmb sẽn deeg sõgen-kamb tʋʋmd bal laa? Ka sẽn na n paam-b fãagra yĩng la b tʋmd laa? Woto wã d tog n gãdame la d maand gũsgu ne zãmsg ning tõnd sẽn wʋma n da wa kẽ tudgr pʋgẽ ye. Malɛgsa sẽn deeg gomd ning n wilgã sã n ya gom-sɩdem al t'a kɩɩsgo bɩ a tõdgr paamd sɩbgr sẽn tog ne-a, tõnd maanda a wãn marsã n põse d sã n ka kelg neere koɛɛg ninga sẽn wata ne fãagr mengã? Fãagr kãng la Soaala waa n moone, tɩ sẽn wʋm-ba fãa wa ne b kaseto. Wẽnnaam naaga b kasetã ne yel-bãna la tʋʋm bãna, ne wẽnd makr buud toɛ-toɛ yã. A Vʋʋsem Sõng me waa ne vẽnegr kũuni la b pʋɩ-a-la wala b sẽn date. Tõnd sẽn gomd beoog zamaan ning yellã, ka malɛgs la Wẽnd dɩk-a n kõ tɩ b soog ye. Gʋlsa woto zĩig a ye: Ninsaal yaa bõe tɩ yãmb tẽegd a yelle? Bɩ: ninsaal biig zema bõe tɩ yãmb get-a ne waoogre? Wakat n zĩndi tɩ yãmb sik ninsaal malɛk rãmb taoore; la yãmb n le wa kõ-a ziir la naam pugla, yãmb kõ-a la bũmb fãa soolem. La b sẽn kõ-a bũmb fãa soolma, bõe n kelle t'a pa so? Tõnd yẽ nan ka ne zãnga t'a soo bũmb fãa ye. Baasgo d neeme tɩ wakat ning b sẽn waa n sik a Zezi bilfu malɛk rãmb taoorã, wakat kãng la tõnd yãet-b ne ziir la pẽgr kãsenga, b sẽn sak kũuma yĩnga. Ne Wẽnd sõngre, b sɩd saka kũuma ne a tɩɩsma, ninsaalb buud fãa yĩnga. Yaa Wẽnd n naan bũmb fãa tɩ bũmb fãa me be b yĩngã, la bãmb datame n kẽes b ziira pʋgẽ b kamb ka tɛkã. Ad-y da togame tɩ b paam ned sẽn na n sak ne a namsgo n tedg kambã zãnga la a kẽes-b fãagra sorẽ. Ad-y sẽn kõta sõmbem la sẽn deegd-b sõmblema yaa rogem ne taaba, yaa rẽ la a tõe n bool-b tɩ saam-biisi tɩ yãnd pa tar-a ye. Ad-a sẽn yeele: «M na n wilga y Yʋʋrã m saam-biisã, m na n yɩɩlame n pẽg-y m buuda neba fãa sʋka.» B le paasa zĩig a to me: «Bãmb la m teegr zãng-zãnga.» N le paase: «Ad-ma, maam ne kamb niyns Wẽnd sẽn kõ-ma.» Dɩlla ba-biisa sẽn ya neong la zɩɩm yɛngã ra togame tɩ sẽn wa-a ne fãagra me yɩ wa bãmba. B lebga boto n na n lub ne b kũuma ned ninga sẽn waa ne kũum dũnia: Sʋtãana, la b fãag neb niyns sẽn da zĩ b yõor tɛka, ne kũum dabeem wala yem-daado. Sɩda ka malɛk rãmb la b waa n na n sõnge, yaa Abraam yagense. Dɩlla me la yɩ modgre t'a wẽneg a saam-biisã ne bũmb fãa, n wa yals bãmb ne Wẽnd sʋka wa maan-kʋʋd kãsenga la nimbãan-zoeta, n paam n yẽes buuda yel-wẽna. Yẽ meng sẽn bãng namsg toolem, a tõeeme n sõng neb niyns me sẽn tar-b pɛta. Dɩlla m saam-biisi, Krista nin-sõma, yãmb me sẽn paam n wʋm yĩngr boolle, maneg-y n ges tõnd tẽebã tʋʋm-tʋmda la maan-kʋʋd kãsenga: a Zezi. B reega sẽn kõ-a bãmb tʋʋmda noor zãnga wala a Moyiiz ne a zak rãmba. B pʋd n yeelame t'a toga ne pẽgr sẽn yɩɩd a Moyiiz rẽnna wala ro-met sẽn tog ne pẽgr n yɩɩd rooga menga. Roog fãa yaa ned n me-a la sẽn me-a bũmb fãa wã yaa Wẽnde. Sã n ya sɩda, a Moyiiz ne a rooga zãnga tũu Wẽnd daabo, a yɩɩ sõgne sẽn togs b sẽn yeel-a t'a togse. Krista yɩɩ zak soab Biiga, n so zaka. La zaka la tõndo; la rẽ yaa d sã n yiis rabeem d sũurẽ n lɛɛg n pids-a ne saagra sũ-noogo. Yaa rẽnd yĩnga la wala a Vʋʋsem Sõng sẽn yete: «Dũnna, y sã n wʋm b koɛɛgã, bɩ y ra kidb y sũuri wala sẽn maan sɩlakra raare, fɛɛsga raare, we-raoogẽ wã ye. Yãmb yaab rãmb fɛɛsame n na n bãng m pʋga. B yaool n da yãenda tʋʋm niyns fãa m sẽn tʋm, yʋʋm pis naas tõrã. Dẽ me la m puug m sũuri ne bãmb, wakat kãnga n yeele: Daar fãa b sũur bʋdgda moogo, b pa yãend m sorã n dɩk ye. M puuga m sũuri n yet tɩ m na bas-ba n ges b sẽn na n maan bũmb ninga n kẽ m vʋʋsga zĩigẽ.» M saam-biisi, gũus-y tɩ ned da wa zĩnd yãmb sʋka t'a sũur pid ne pʋ-toogo, la wẽn-kɩɩsgo sẽn sek a wa lak zãnga ne Vɩɩm naab a Wẽnd ye. Sagl-y taab beoog-beoog fãa tɩ sẽn nan ket n boond tɩ rũnna wã nan ya d dẽnna, woto ned ba a ye kõn bas tɩ wẽng tʋlsem wa kidb a sũur ye. Ad-y tõnd naagda Krista n dɩt b yõodo, sã n yaa sɩda tɩ tõnd gãda kẽnkẽ n ka na n tol n bas d pipi teegrã t'a sãam ba bilfu. B sẽn yeel woto: dũnna, y sã n wʋm b koɛɛg bɩ y ra kidb y sũuri wala pĩnd sɩlakra raarã, m sok n gese, yaa nin-bʋse n wʋm koɛɛgã n baas n yɩ sɩlakr dãmba? B fãa gill ka yɩ neb sẽn yi Ezipt tẽng ne a Moyiiz pãng wɛɛ? Yaa ne ãnd dãmb la Wẽnd sũur puugr yʋʋm pisnaas pʋgẽ fãa? Ka yɩ neb niyns sẽn tʋm b wẽnga tɩ weooga rɩ b fãa gilla bɩ? Ãnd dãmb la b kãab wẽnga, n yet tɩ b kõn paam vʋʋsga tẽng n kẽ? Ka sẽn kɩɩs-ba wɛɛ? D sɩd yãeeme tɩ b sẽn pa tõog n ta wã, yɩɩ b sẽn bas raooda yĩnga. Wẽnd sẽn pʋlem tõnd vʋʋsgã, tɩ b kãabga ket n yɛsẽ wã, d maan dabeem, tɩ yãmb nin-yend na n wa yet tɩ b basa yẽ kɛɛnga. Koe-noog sẽn wẽnd bãmb dãmb sẽn paama la tõnd me paam yã. La bãmb dẽnna ka naf-ba tɩ b ka paam tẽeb tɩ sek ye. Tõnd yẽ sẽn tar tẽebã, tõnd yẽ na n kẽe vʋʋsga pugẽ, vʋʋsg ning b sẽn gom a soab yell woto: M wẽena ne sũ-puuri tɩ m na bas n ges b sẽn na n maanega n wa paam n kẽ m vʋʋsga pʋgẽ. Tẽeba sẽn wat ne vʋʋsg ninga yaa toore ne b sẽn vʋʋs a soab sɩngrẽ, dũni wã sẽn naan n sɛ wakatã. Daar a yopoe soaba vʋʋsga yell goma woto: Wẽnd vʋʋsa rasem a yopoe daarã ne b tʋʋma. Bõe yĩng marsã la b ket n gomd kaalẽ: M na ges b sẽn na n maanega n kẽ m vʋʋsga pugẽ? Ad-y b sã n yeel tɩ neb n yɩ pipi n wʋm vʋʋsga kãab noogo n yaool n pa kẽ a pugẽ, la rẽ wã yaa b sẽn yɩ tõatbã, baasgo Wẽnd yalsame tɩ neb kẽer yẽ na kẽ. Yaa rẽ me yĩng la Wẽnd leb n kõ raare: rũnna raare, n na n togs-do, ne a Daviid noore, a me wakato, wala sẽn togs al pĩndã: dũnna, yãmb sã n wʋm b koɛɛga bɩ y ra kidb-y y sũur ye. La sɩda, a Zozuwe sã n da tõogẽ n kẽes a Israyɛl kamba vʋʋsga pʋgẽ b kõn le gomẽ daar a to yell ye. Woto wã vʋʋsg daare, daar a yopoe soab vʋʋsgo, n kees n bĩng Wẽnd buudu. Zozuwe ninga sẽn kẽ-a vʋʋsga zĩigẽ wã, yẽ me vʋʋsda ne a tʋʋma, wala Wẽnd sẽn vʋʋs ne b rẽnna. Woto wã bɩ tõnd me maan yãgbo n kẽ vʋʋsg kãng zĩigẽ, la ned ba a ye da rɩk kɩɩsga sore n wa yɩ tõat ye. Wẽnnaam Gomda sɩd yaa bõn-vɩɩga, n tar pãnga, n dɩt n yɩɩd sʋʋg buud fãa sẽn saas noy a yiibu; a sã n kõse, a kẽeda zulunga n sãagd n tat ninsaal yalẽ, n tat yĩnga sũgdsi la kõaba sɩɩlem, la a pukd ninsaal tagsgo la a pʋg zãnga. Bũmb ka be n solg ne yẽ, fãa yaa bɩlgemde la kãre ne Ned ninga sẽn na n sok-a tõnd d vɩɩma yelle. Woto wã tõnd sẽn paam maan-kʋʋd kãseng sẽn dʋ yĩngri n zʋʋg saaga, a Zezi, Wẽnnaam Biiga, bɩ d tall d tẽeb dɩm-dɩm. D sẽn paam a soabã ka maan-kʋʋd kãseng sẽn ka tar gãbe n na n yols d naongã, yaa ned sẽn bãng kʋɩɩbg bũmb fãa pʋgẽ, wa tõnd fãa, la a ka maan yel-wẽnd ye. Bɩ d kolg ne sũur sẽn ka kiuusdi b bark zaoorã, n deeg b nimbãan-zoeer la d paam sõngr sẽn segd ne-do. Maan-kʋʋd kãseng fãa tũusda ninsaalb sʋka t'a sõng ninsaalba n maneg b yɛla ne Wẽnnaam; a maan wẽn-kosgo la a kʋ maando b yel-wẽna yĩnga. Woto la a tõe n kũm sẽn ka mi-ba la sẽn tudg-ba, tɩ yẽ me yaa koamsa. A sẽn ya koamsa yĩnga a togame n kʋ maand a meng yel-wẽna sugr kosg yĩnga, wa a sẽn maand buuda yĩnga. Tʋʋmd a woto buudu, ka ninsaal n kõt-a a meng ye, yaa Wẽnd n boonde wala b sẽn maan ne a Aarõ. Woto me, ka Krista n kõ b meng naam n na n lebg maan-kʋʋd kãseng ye. B sẽn deeg naama a soab nengẽ wã n yeel bãmba: «Fo yaa mam Biiga, rũnna la m dog foo.» Zĩig a to me b le yeelame: «Fo yaa maan-kʋʋda, la fo maan-kʋʋra kõn sɛ abada, a wẽnda a Melkisedɛk rẽnna.» Yaa Krista n yiki, b tẽng zugu vɩɩma wakato, n kelem ne pãnga la b yiis nintãm, n kos sugri la b yõk sẽn tõe n fãag-b ne kũuma soab sɛɛga; b sulg-m-menga yĩnga, b pʋʋsga reegame. Woto, ne b sẽn ya Wẽnd Biigã, b zãmsa sakre ne b sẽn namsã. B sẽn paam n pid sõmblem ne sõmblem, b lebga neb niyns fãa sẽn sakd b bãmba tɩlgr sẽn kõn sãam abada yẽgre. Yaa Wẽnnaam meng n pʋd-b tɩ maan-kʋʋd kãsenga sẽn dɩt maan-kʋʋr naam sẽn wẽnd a Melkisedɛk rẽnna. Yell kãnga poorẽ, tõnd na gom n yɛ; a toagsg meng ka naana ba bilfu tɩ y lebga maasg ne wʋmbo. Sɩd me, kaoosg maaname al tɩ yaa n sek y bãng n togs y taab marsã, la ad-y sẽn ket n zĩẽ tɩ b sõng-y ne Wẽnd zãmsga sɩngre, n tol n wa lebg wa kom-peelse sẽn dat bĩisim, n pa rat rɩ-tagd ye. Sɩda, biig sẽn nan yẽsemd tõe n bãnga koɛɛg sẽn ya sõmblem koɛɛg bɩ? A ket n yaa bi-bilf nanda. Sã n ya rɩ-tagdã, bãmb la nin-kãseng rɩɩbo. Nin-kãsenga me la yam sẽn wɩsg a soaba t'a minim n bakd neer ne wẽnga. Yaa rẽ yĩng la d basd zãms bõonesã, Krista bãngra sẽn sɩngd ne b rãmbã, n zẽkd d wilgrã n taasd a neerma zĩigẽ. D kõn tar poorẽ n leb n gom bũmb kẽer yelle, wa tʋʋm sẽn ka naag ne tẽeb n tʋme, wa tʋʋm kãens tuubgu, wa Wẽnnaam tẽebo, d wa soobo, nus tikri, yĩns vʋʋgre, yaoolem bʋʋdo. Ad-d sẽn na n maane, Wẽnd sã n sake. Yaa toog ne neb niyns fãa sẽn paam-b Wẽnd vẽenema, sẽn lemb-b yĩngr kũuna, sẽn deeg-ba a Vʋʋsem Sõngo, sẽn bʋgsd-b Wẽnd gomd noogã b yamẽ, sẽn wɩɩd-b ne zamaan ning sẽn wat beooga pãngã, n baas n lʋɩ wã, yaa toog ne-ba tɩ b le lebg nin paalse ne tuubgu, tɩ bãmb meng b toore n leb n kaad Wẽnd Biiga pika la b kamsd d bɛɛba tɩ b le wa yaal-ba la b tʋ-ba. Pʋʋg ninga sẽn paame tɩ sa-koom madg-a naoor wʋsgo t'a wom biisi wa a koadba sẽn date, pʋ-kãng paama Wẽnd barka. Pʋʋga sã n yit gõose la yõeestabdo, b get-a-la wa pʋʋg sẽn ka yõodo, sẽn ka barka la b sẽn na n wa kong n yõog bugum. Sã n ya yãmba, m kom-nongdse, ba m sẽn gom woto wã, m miime tɩ yãmb yalsa y mens zĩ sõngẽ, zĩig ning Fãagra sẽn na n yɩ naana ne yã. Wẽnd pa mi zãmb ye. B yɩta a wãn n yĩm yãmb manesem la sõngr ning yãmb sẽn yaoog la y ket n yaoogd nin-sõma, bãmb yʋʋr yĩngã? Tõnd sẽn datã, yaa yãmb ned kam fãa wɩng n paase ne tʋʋmd kãnga tɩ y saagra tar yãagre n dabda n wa tãag a tɛka. Woto yãmb kõn maan kʋɩɩng ye, y na wẽneg neb niyns sẽn dɩt-b kãabga yõodo ne b tẽeb la b sũ-maasem. Sɩda, Wẽnnaam sẽn waa n na n kãab a Abraam b kãab-noogã, b kong n wẽena ne b menga tɩ ned da ka be sẽn yɩɩd bãmba tɩ b nan wẽen ne yẽ soab ye, b yeelame: «Sɩd ne sɩda, m na n ning-f la barka n sudgi, la m na n yalga f buuda zembala.» Yaa woto la a Abraam sẽn gãd a tẽeb n pa viigã paam kãabga pidsgu. Yaa ne sẽn yɩɩd-a la ninsaal wẽenda. Wẽeneg sã n lʋɩ ninsaal ne a to sʋka, no-koeemd sɛɛme. Yaa woto la Wẽnd tʋlg n wilg sẽn dɩt-b bãmb kãabga yõodo, tɩ b raaba pa teem ye, n wẽen b wẽenego. Ne bũmb a yiibã sẽn ka tõe n ka pidsã: kãabgã la wẽenegã, Wẽnd wilgame tɩ b yɛsa b sɩd zĩigẽ, tɩ tõnd sor bãmba n na n paam daoodo n saag sõmb-sõmbo, d sẽn tõe n saag bũmb ningã. Saagr kãng yĩnga, yaa wa tõnd sɩɩga kɩɩ baare, baar sẽn ka kẽnkẽ n ka tõe n võoge, baar sẽn sãag n ka peen-lillã sẽn yag zĩig ningã. A Zezi n deng pipi n kẽ peen-lilla poore, tɩ b lebga yʋʋm sẽn kõn sɛ yĩnga, maan-kʋʋd kãsenga, wala a Melkisedɛk. Melkisedɛk yẽne yɩɩ Salɛm dĩma la Yĩngr Wẽnnaama maan-kʋʋd; yẽ n tɩ seg a Abraam a sẽn waa n zab n tõog dĩm dãmba n lebda tẽngẽ, la yẽ n ning-a barka, t'a Abraam me sak n kẽ a paoongẽ n yãk a paoonga rʋr a ye piig fãa zugu, n kõ-a; a Melkisedɛk yʋʋra meng rat n yeelame tɩ Zemsg dĩma; yẽ me n le yaa Salem dĩma, dat n yeelame tɩ laafi dĩma. Yẽnda ba yʋʋr ka pʋde, a ma yʋʋr ka pʋde, a yaab rãmb yʋʋr ka pʋde; b pa tar a yʋʋm sõore, b ka mi a rogem yʋʋmde, b ka mi a vɩɩma sẽn baas wakat ning ye; a wẽnda Wẽnd Biiga; Melkisedɛk kãng yaa maan-kʋʋd yʋʋm tõt sɛɛb yĩnga. Ges-y wa nin-kãsenga ned ning a Abraam, buud kãsma, sẽn kõ a soaba a zu-noog pʋɩɩre, pʋɩɩr sẽn be yõodo. Sɩda a Levi buud kamba sẽn lebgd maan-kʋʋdba tara tõogo n deeg bũmb neb a taaba nengẽ, dat n yeelame tɩ b saam-biis nengẽ, a Abraam yagense, wa bãmb mense. Kaalẽ wã yaa ned sẽn da pa kĩ ne a Abraam n deeg pʋɩɩr a nengẽ, la a ning-a-la barka; yaool n da yaa yẽ zugu la Wẽnd kãab nooga sig yã. La yãmb zɩ tɩ yaa kãsma n ningd yao barka? Sẽn paase, ad-y yaa neb sẽn kiidi n deesd pʋɩɩr a ye piig zugã, la ka wã, b gomda ned sẽn vɩ daar fãa yelle. La bũmb zãnga yaa waa a Levi menga, sẽn deesd-a pʋɩɩr a ye piig zugã, yaa wa yẽ n soola Abraam n kɩs a rẽnna; tɩ yẽ sẽn ya yagenga, a da bee a yaab kãseng saagrẽ, wakat ning a Melkisedɛk sẽn seg a yaaba: a Abraam. Buuda sẽn tũud Noor ninga gʋlsa a Levi sebrẽ; dɩll a Levi sẽn paam maan-kʋʋr ninga sã n da tõe n kõ sõmblem pidungu, yaa bõe yĩng tɩ b le baood maan-kʋʋr a to sẽn wẽnd a Melkisedɛk rẽnna, n ka na n baoẽ maan-kʋʋr sẽn yaa Aarõ rẽnna? Ade, maan-kʋʋra sã n tedge, a noy wã me naagdame n tedge. Sɩda, b sẽn gomd ned ning yellã yita sak a to sẽn ka a Levi dẽn ye, la sak kãng ned ba a ye zɩ n tʋm maan-kʋʋr tʋʋmd ye. Tõnd fãa miime tɩ tõnd Soaala yita a Zɩɩda sakẽ la a Moyiiz sã n gomd maan-kʋʋdba yelle a zɩ n pʋd sak kãng yʋʋr ye. Bũmb ning sẽn le vẽnegd tõnd n paasdẽ yaa b sẽn yeel t'a Melkisedɛk zĩigẽ, maan-kʋʋd a to n wa n wẽnd yẽnda. La yẽ soaba sẽn lebg maan-kʋʋda, ka tũ wa ninsaal noor sẽn da yals ye, tũu ne vɩɩma ka be sɛɛba soaba pãnga. Ad-b sẽn yeele: Fo reega maan-kʋʋr naam sẽn ka be sɛɛbo wala a Melkisedɛk rẽnna. Yɩɩ woto la b menes pĩnd Noorã, a pãng la a yõod sẽn paoodã. Sɩda Noora ka tõog n taas bũmb ba a ye a neerem zĩigẽ ye. Paam n kolg Wẽnd n yɩɩd pĩnda saagr ka tũ-a n wa ye. Tũu ne wẽeneg la maan-kʋʋr naam paalga yalsyã. Maan-kʋʋdb a taaba reegda b tʋʋmde tɩ Wẽnd wẽeneg ka lʋɩ sʋk ye; Krista naama kõo ne wẽenego. Sẽn kõ-a maan-kʋʋrã n yeele: «Soaala meng n wẽene la b kõn lebs b zelemd ye: fo lebga maan-kʋʋd yʋʋm tõt sɛɛb yĩnga.» La rẽ me n kɩt tɩ zood ning a Zezi sẽn wa ne a soaba yõod yɩɩda. N paasme, maan-kʋʋdba taaba sõor da yaa wʋsgo, tɩ kũum n da loogd ne-ba, tɩ b pa kaoosdẽ ye. Sã n ya Krista, bãmb sẽn ya vɩɩm sẽn kõn sɛ naaba, b maan-kʋʋra naam me kõn sɛ abada. Rẽ me yĩng la b tõe n fãag zãng-zãnga, sẽn tũud-b bãmba n kolgd Wẽnnaam, tɩ bãmb vɩɩ wakat fãa n tõe n yõk sɛɛga, b yĩnga. Sɩda, yaa maan-kʋʋd kãsma woto la d da tog n paamẽ: nin-sõngo, ned sẽn ka tar a toorẽ yelle, wẽng sẽn pa pẽneg a soab lɛ-lɛ la sẽn welg marsã tɛka ne yel-wẽn-maandba, tɩ b zʋʋga saasã, n zao yĩngri. Ka pakr ne yẽnda, wa maan-kʋʋdb a taaba, tɩ beoog sẽn vẽege, bɩ b reng n kʋ maand b meng yĩnga n yaool n kʋ buuda yĩng ye; b maana dẽ fãa vugr la tɛka ne b menga maoongo. Noora sẽn da waa n ket n yɛsẽ, yaa koms-rãmba la b ra yãkd n kõt maan-kʋʋr naam; la wẽenega sẽn wẽene n pʋgl Noorã, yaa Biiga sẽn pid ne sõmblem n lebg maan-kʋʋd yʋʋm tõt sɛɛb yĩnga. D goama fãa yẽgre yaa d tara maan-kʋʋd kãsenga sẽn zĩ yĩngri, naama goeela rɩtgo. Bãmb n maan b tʋʋmde pʋʋsga zĩigẽ, zãnda tẽngre; zãn-kãng ka ninsaal n ti ye, yaa Soaala sẽn ti a soaba menga. Maan-kʋʋd kãseng fãa tʋʋmde ya a kõ kũuni la a kʋ maando; woto wã yaa pakr ne-a t'a paam bũmb n kɩse. D sã n togs sɩda, a Zezi sã n da yaẽ la tẽng zug neda, b kõon n yɩẽ maan kʋʋd me wee, tɩ tẽnga zoe n tara a maan-kʋʋdba sẽn kõt kũuni wala noora sẽn date. Bãmb dãmb tʋʋmna yaa yĩngr soaba rẽnna wẽnego la a sulunsuku. Yaa rẽ la a Moyiiz bãngyã, a sẽn waa n na n ti Sɛka zãnde, tɩ Wẽnd waa n yeel-a lame: «Gese la f maan fãa tɩ tũ m sẽn wilg foo tãnga zugã.» Marsã Krista paama tʋʋmde sẽn ya sõmbo n yɩɩda tɩ bãmb n yals sʋka tɩ b yõg zoodo la zood kãng tũu ne kãabdo sẽn yɩ sõmb n yɩɩda. Pipi zooda sã n da yɩẽ la zood sẽn ka keoose, b kõn le yõgẽ zood a to n leda zĩig ye. Sɩda Wẽnd sãbsa Israyɛl kamb n yeele: «Ad-y daar n wate — Soaala n yeele — tɩ m na n yõg zood paalga ne a Israyɛl roogo la a Zɩɩda roogo; la kõn yɩ wala zood ninga m sẽn yõg pĩnda ne y yaab rãmba, m sẽn waa n gãd-ba n yiis Ezipt tẽnga ye; bãmb mens n ka pa m zooda pʋga tɩ mam me bas-ba: yaa Soaala n yeele. La ad zood ninga m sẽn na n yõg ne a Israyɛl: Dasem kãens poore, — Soaalã n yeele — m na n ninga mam noya b yamẽ, mam na n gʋls-b-la b sũurẽ, mam na n yɩ bãmb Wẽnnaam tɩ bãmb yɩ mam neba. Ned ba a ye kõn yik rẽ poore, tɩ yẽ n na n zãms-ba a tẽngen-bi-taaga bɩ a ma-biiga, n yetẽ: ‹Bãng Soaala,› tɩ b fãa na n bãnga maam, kom-kɩdsã, n tãag nin-bɛdã. M na n kõ-la b beegra sugri, la m kõn le tẽeg b yel-wẽna yɛs ye.» B sẽn yeele tɩ Zood paalgã, b kɩtame tɩ pipi soaba kʋdg zãnga; la bõn-kʋdgo, bũmb sẽn pid yʋʋma kolga loogre. Pipi zooda me ra tara a noy sẽn sigl Wẽnd waoogr yĩnga n paas a pʋʋsg roogo sẽn ya tẽng zug rẽnna. B ra tii zãnde n kẽe n pas-a pʋs ne peen-lilli. Pipi pʋga da reegda Fitil kãsenga, ne te-roagendga, tɩ bark bur dɩg a zugu, tɩ b ra boond zĩ kãng tɩ sõmblem zĩiga. Peen-lill a yiib soaba poor zĩiga ra boondame marsã tɩ Sõmblem pid sõmblem zĩiga. Maan-kugr n da be be n ya sãnem tɩ b yõogd wisdã a zugu. Sẽn le paas, yaa Zood kasetã Koglgo; yẽ me tablga sãnem la sãnem yubl n da be yẽ me pʋgẽ ne rɩɩb ninga sẽn da yit yĩngri n dʋʋgd tẽnga n boond tɩ maan; sẽn le paas yaa a Aarõ dasaar sẽn tob vãoogo. D da yĩm walsa yiibã tɩ bãmb zug n gʋls zooda siglgu. Zood kaseta koglga limda zugu, malɛgs n da yɛdg b pɩgsa n maand maasem n kõt zĩig ning b sẽn da kʋʋd maand yel-wẽna sugr kosg yĩnga. La vẽ-y tɩ d da yaas n sõdg rẽ fãa a yeyn-ye kaalẽ ye. Ya woto la bũmba fãa siglyã la maan-kʋʋdba kẽeda pipi zãnda, wakat fãa, n maand b waoogr tʋʋmde. Sã n ya zãnd a yiib soabã, yaa maan-kʋʋd kãsma a ye tãa n kẽed be la rẽ me yaa vugr yʋʋmde la a zãada zɩɩm a sẽn na n daag buudã la a meng beegr sugr kosg yĩnga. A Vʋʋsem Sõng wilgd-d la ne rẽ tɩ wẽnd doog a to wã kõn pake tɩ pipi zãndã ket a zĩigẽ ye. Dẽ yaa makre, marsã zamaana yĩnga: kũuna b sẽn da kõtã la maandã b sẽn da kʋʋdã da ka tõe n paas sẽn waoogda Wẽnda sõmblem ye. Yaa noy sẽn get yĩnga yɩlgre, rɩɩb bɩ bõn-yũudri yelle, noy sẽn get koom waasg yelle, noy sẽn ya tɩlɛ tɩ b tũ n gũud b tekre. Sã n ya Krista, bãmb waame wa Zooda zamaana Maan-kʋʋd kãsenga, dẽ la b kẽ roog sẽn ya kãsenga la sẽn ya sõmb n yɩɩda, roog sẽn ka ninsaal nug n me, roog sẽn ka tẽng zug bũmb meng ye. B kẽe ro kãng pʋga. B pa kẽ ne boees la lols zɩɩm ye, b kẽe ne b meng zɩɩm la woto b tõogame tɩ d tɩlg tɩlgr sẽn kõn sãam abada. Sɩda, b sã n tõe n dɩk boees la lols zɩɩm, n paas nag-sɛdg tompɛglem n mes neb sẽn dẽgme tɩ b paam b yĩnga pekre, y pa tẽed tɩ Krista sẽn tũ a Vʋʋsem Sõngo menga n dɩk b meng sẽn ka tol n dẽgma n kõ Wẽnde, y pa tẽed tɩ b zɩɩma na pek d sũurã ne a tʋʋm dẽgda fãa tɩ d me tõog n waoog vɩɩm Naaba? Yaa rẽ me la Krista lʋɩ sʋka tɩ zood paalga tõog n yõge, la b kiime n na n yao samde: beegr ning sẽn beeg pipi zooda wakatã saamde; b kiime tɩ Wẽnd sẽn bool b rãmba tõog n dɩ vɩɩm sẽn kõn sɛ pʋgẽ b sẽn kaab-b yõod ningã. B sã n gomd raboog welgr yelle, yaa tɩlɛ tɩ b gom tɩ kũum n deng taoore. Raboog welgr sebr ka be võore, kũum sã ka ki ye, sebra soab sã n ket n vɩ b ka tõe n yãg n tũ sẽn gʋls sebra zuga ye. Dẽ n kɩt tɩ pipi zooda meng ka tõog n yõg tɩ zɩɩm ka reng n daag ye. A Moyiiz sẽn wilg nebã Noora sẽn yet tɩ b reeg bũmb ninga fãa, n sɛ, a rɩka lol-bõonese la boees zɩɩm, a rɩka koom, n dɩk pe-kõbd sẽn ya moomde la tɩɩg sẽn tar yũ-noog vão killi, n mes Noora sẽn da gʋls bũmb ning zuga menga la a mes zãma wã. A yeel-b lame: «Zɩɩm kãnga yaa yãmb ne Wẽnd zooda kaset zɩɩm!» Dẽ poore yaa zãnda menga ne pʋʋsga teed fãa la a mes ne zɩɩm. Dẽ pʋgẽ me, wa Noora sebr sẽn wilgdi, bũmb fãa la bala pekda ne zɩɩm, tɩ sugr kũun naagda ne zɩɩm daagre. Dẽ n so tɩ wala arzãn yɛla sulunsugdu la b makre sẽn da tog n pek boto ne maand zɩɩm, woto me ne arzãn bũmba menga, la yaa ne maand sẽn tar pãng n yɩɩd tẽng zug maandã. Krista sẽn be zĩig ninga ka ro-zaal sẽn me tẽng zug ye, a ka yĩngr dooga meng mamseg ye, yaa arzãn meng la b kẽ yã n na n yals Wẽnd taoor marsã n yõk sɛɛg n kõ-do. B pa tɩ kõ b meng naoor yak wa pĩnd maan-kʋʋd kãsenga sẽn da maand yʋʋmd yʋʋmd fãa n kẽed pʋʋsga roogẽ ne zɩɩm sẽn ka a meng zɩɩma ye. Ka rẽ yaẽ la naoor yak la b namsẽ, dũnia sẽn sɩng tɛka. La d neeme tɩ yaa marsã, yaoolem wakatã la vugr bala, la Krista lik yã n na n yẽes yel-wẽnd zãnga ne b maoong yɛngã. Ninsaal kiida vugr bala t'a bʋʋd kao. Wotome la Krista sẽn kõ b meng vugr bala n na n dol neb wʋsg yel-wẽna, na n le lɛɛg n waame, la kõn le yɩ yel-wẽnd yĩng ye, na n yɩla b wa fãag sẽn gũud-b bãmb waoongã. Noora sẽn dat n kõ-d bũmb ninga yaa sẽn nan wat beooga sulunsugdu la b mamsega, ka bũmba meng ye; woto Noora ka tõe ba bilfu, tɩ sẽn baood-ba n na n pẽneg Wẽndã lebg sõma ne maand sẽn wẽnd taab daar fãa la sẽn ya pakre tɩ b kʋ rõanna n le kʋ vẽere. Ka rẽ, sõmblema sã n da paamdẽ la vugri la tɛka, maan-kʋʋdba na vʋʋsẽ al daar zãra ne maand a woto buud kʋʋbo tɩ b mens ra ka na le neẽ b kongra sẽn yɛs zĩig ning ye. Mik maand kãens kʋʋb ra tẽegd-b la yʋʋmd yʋʋmd fãa tɩ b yaa yel-wẽn-maandba. Ka lolsa la boeesa zɩɩm n tõe n yẽes yel-wẽn ye. Yaa rẽ yĩnga la Krista yeel yã, b sẽn waa n kẽed dũnia: «Yãmb pa tʋlg maoong bɩ yamleoog kũun ye, la y yaool n kõ-m la yĩnga. Maandã sẽn yõogd tɩ bugum dɩ zãnga, maand sẽn kʋʋd yel-wẽna yĩnga, ba a ye yamleoog pa yõk-y ye; yaa rẽ la m yeel yã: ‹Ade! M watame, tɩ yaa mam yell la b gomd sebra pʋgẽ, m watame n na n maan yãmb yam, m Wẽnnaam!› » B sɩngame n yeele: maando la yamleoog kũuni, maand sẽn yõog bugmẽ, maand sẽn kʋʋd yel-wẽna yĩnga, yãmb tõdg-b lame, y pa reeg-b ye — mik maand kãens la Noora ra yals yã, — dẽ yĩng la b yeel yã: Ade! M watame n na n maan yãmb yam. Dɩlla b waa ne zamaan paalga n na n sãam pĩnd soabã. La yaa ne raab kãng pãng la tõnd paam sõmblem ne Krista a Zezi yĩnga maoong b sẽn kʋ vugri la tɛka. Maan-kʋʋd tɛka yaa beoog sẽn vẽege bɩ a yɛs ne pʋʋsgo la a tar maand kʋʋbo, maand sẽn yaool n ka tõe n yẽes yel-wẽnd ba a ye. Sã n ya Krista, b sẽn maan maoong yɛng yel-wẽna yĩnga, ad-b sẽn zĩ b Ba rɩtgo daar fãa marsã, n gũud tɩ bɛɛba gãneg b taoore tɩ b palgd b nao n zĩi. Ne maoon yɛng bala yaa sõmblem sẽn pid zãnga la sẽn kõn sãam abada la b paam n kõ-b sẽn maneg b rãmb yellã. Mik yaa rẽ me la a Vʋʋsem Sõng kõt kaseto b meng b toore, b sẽn waa n yeele: «Ad zood ninga mam sẽn na n yõg ne bãmba dẽ loogr poore, la woto la Soaala gom yã: Mam na n ninga mam noya b sũurẽ, mam na n gʋls-b la bãmb pʋtẽerẽ, mam kõn le tẽeg b beegre bɩ b yel-wẽna abada.» La yel-wẽn niyns sẽn zoe n paam-b sugrã, b ka le kʋʋd maand b yĩng ye. Dɩlla m saam-biisi, marsã d bãng neere tɩ d tõe n taa arzãn pʋʋsg roogẽ ne a Zezi zɩɩm pãnga, tɩ b tuka sor n kõ-do, so paale la vɩɩm sor sẽn sãag peen-lillã, — la peen-lilla yaa bãmb yĩnga makre. D sẽn paam maan-kʋʋd kãsenga woto, Wẽnd sẽn dɩk n gũnug b roogo, bɩ d kolg ne pʋ-peelem, ne sũur sẽn pid ne tẽebo la sẽn nedeg zãnga ne pʋ-toog buud fãa la ne yĩng sẽn pek ne ko-sõngo; d tabend d sẽn teeg a soaba neere. Sẽn pʋlm-a tõndã yaa sɩd soaba; d tẽeg taab yelle, la d yãng d nonglem ne taaba la d wɩng ne tʋʋm-sõma. Bɩ y da vaal y lageng wala neb kẽere sẽn nong n maana ye; yãmb wee n kengd taab sũya, bũmb zãnga y sẽn ne tɩ Soaala waoong raar kolgame. La sã n ya tõnd n sak tudgr ne yamleoogo la d yaool n da bãnga sɩda, ad-y maoong a to ka le be yel-wẽnd yĩng koe! Bũmb ning sẽn be n ya yel-beed kãsenga, yaa bʋʋda kaoobo. Ad-y yaa bugum sẽn ka mi sugri, n na n dɩ wẽn-kɩɩsdbã. Ned sã n da tõdg a Moyiiz Noore sugr da ka be yẽ soab yĩng ye; kaset dãmb a yiib bɩ a tãab sã n da be bala, b kʋʋda yẽ soaba. La yãmb ka tagsd tɩ yaa sɩbgr sẽn ya toog n yɩɩd la b na n sɩbg sẽn tabd-b ne b nao, Wẽnd Biigã, n sɩbg sẽn ges-b wa bõn-yaalga, zooda zɩɩm sẽn kõ-b sõmblema, n sɩbg sẽn paoog-b a Vʋʋsem Sõngo, Wẽnd kũuna Kõatã? Tõnd mii sẽn yeel-a: «Maam n so rok-m-sũuri, maam n so sɩbgre.» La zĩig a to yɛsa: «Soaala meng n na n kao b neba bʋʋdo.» Yel-beed kãseng meng la b sẽn bas ninsaal Wẽnd nusẽ, Vɩɩm Naaba nusẽ! Bɩ y tẽeg marsã pipi raarã yãmb sẽn paam y yam vẽnegre ne tẽebo, yɩɩ namsg wʋsgo la yãmb da sak yã. Wakat kẽere yɩɩ yãmb meng la b yaal yã la b yãk y zak neb fãa nifẽ; wakat kẽere yɩɩ neb a taab la b maan woto tɩ yãmb kũm bãmb dãmba. Sɩda, yãmb kũma sẽn da be-b bi-bees roogo la y sõng-b lame; yãmb sakame tɩ b maan y pãnga n deeg y paoong fãa; y ra miime tɩ b bĩnga yãmb arzɛk sẽn yɩɩd rẽ la sẽn kõn menem abada. Dẽ yĩngã da bas-y y tẽeba teegr ye t'a dolb na n yɩɩ kãsenga, a na n dola y naongã. Yaa sũ-keelem la y tog n maane tɩ y sã n tũud Wẽnnaam yam, y na tõog n paam b sẽn kãab yãmbã. Keta bilfr bala, keta sẽn ka zem bũmbu, tɩ sẽn wat a soaba na n wa la kõn kaoos ye. Mam nin-sõng tog n dɩla a tẽeb yõodo; la a sã n tar n leb poorẽ, mam yam na lak ne-a. Sã n ya tõndo, tõnd ka neb sẽn lebd poorẽ n na n sãam d yelle, tõnd yaa neb sẽn teeg tẽebo n na n fãag d sɩɩga. Tẽeb n kɩtd tɩ d saagd bõn-sõma paoongo la a kõt kaset tɩ bũmb n be n zʋʋg nif sẽn ne bala. Tõnd yaab rãmba tẽebo n yɩ b vɩɩm sõnga kaseto. Yaa tẽeb n wilgd tõndo tɩ dũni wã sigla ne Wẽnnaam gomde. Woto me la d mi tɩ d sẽn ne bũmb ningã yita d sẽn ka tõe n yãend a soaba nengẽ. Yaa a tẽeba yĩnga la a Abɛl kõ Wẽnd maoong sẽn tar yõodo n yɩɩd a Kaẽ rẽnna. Rẽ me yĩng la Wẽnd puk a sõmblem; Wẽnd meng n kõ kaseto t'a kũuna yɩɩ kũun sõma. Leb n yaa tẽeba yĩnga la a ki yã t'a koɛɛg ket n sãta. Yaa a tẽeba yĩnga la a Enok paam tɩ b yiis-a dũnia t'a pa bãng kũum ye; a waa n menema woto, tɩ Wẽnnaam n loog ne-a. A sẽn da waa n nan ka looge, a paama kaset t'a vɩɩma taa Wẽnnaam yam. Ninsaal yaool n pa tõe n ta Wẽnnaam yam a sã n ka tar tẽeb ye. Ned ninga sẽn kolgda Wẽnnaam tog n deng n deegame tɩ b beeme. Bãmb n dond ned ning fãa sẽn baooda bãmba. Yaa a tẽeba yĩnga la a Nowe paam Wẽnd vẽnegre n yãend a sẽn da pa tõe n yãende tɩ rabeem sõng yõk-a t'a yik n sɩng koglga kaabo n paam n fãag a zak rãmba; a tẽebã n kɩt t'a zãag a meng ne zamaana la a rɩɩ tẽeb sẽn wat ne sõmblem ninga yõodo. Yaa a tẽeba yĩnga la a Abraam wʋm Wẽnnaam koɛɛg ninga sẽn yeel-a t'a yik n tees tẽng ning b sẽn kãab-a, t'a sɩd yik n dabd a sẽn pa miẽ ye. Yaa tẽeb n kɩt t'a wa zĩnd kãabga tẽngẽ wala tẽn-zẽna, zãn tẽngr bala, yẽ ne a Izaak la a Zakoob sẽn naag b yẽ n dɩ kãabga yõodo. A Abraam ra gũuda tẽng a to, Wẽnd sẽn sõoge la b me b toore. Yaa a tẽeba yĩnga la a Sara meng ne a kʋʋlma tõog n dɩk pʋga; a reegame tɩ sẽn kãab-a yẽnd biigã yaa sɩd soaba. Yaa woto la nin-yend sẽn da kʋʋle n ta a yõor menga tõog n dog kamb la yagens kõn-bãng-n sõde, wa saag zug ãdse bɩ mogr noorẽ bĩisri. Yaa ne b tẽebo la d yaab rãmba fãa gãnd yã tɩ b nif pa yãend kãabga tẽng ye. B yaool n yãend-a la yɩɩga n bɛɛl-a la b maannẽ tɩ tẽng zug ka b ra yaa sãamba la so-toagdba. Neb sẽn gom a woto wilga vẽenega tɩ yaa b ba-yir la b saad n baoodẽ. La sã n da yaẽ la ba-yir ning b sẽn basã la b ra bolgda, b paama vɩʋʋg tɩ sek a lebẽ be. B sẽn baood ba-yir ningã yaa ba-yir a to sẽn noom n yɩɩda: arzãn ba-yirã. Ya rẽ yĩng la Wẽnd pa zoe yãnde n pʋd b meng tɩ bãmb Wẽnnaam, la sɩda bãmb meng n segl tẽng kãng n bĩng-ba. Wẽnnaam sẽn wa n tʋlg n bãng a Abraam pʋga, a Abraam tẽeba kɩtame t'a yõk a biig a Izaak, a bi-yende, n na n kʋ maoongo; yaool n da yaa bi-kãng zugu la kãabga fãa da yɛsa. Yaa yẽnda poorẽ la b ra yeel yã: Yaa ne a Izaak la fo na n dog buudu. Mik a Abraam tagsame tɩ Wẽnnaam pãnga tõeeme n vʋʋg kũum; la yaa rẽ me yĩng la Wẽnd le lebs-a a biiga la yell kãng me lɛɛg n yaa zãmsgo d yĩnga. Yaa a tẽeba yĩnga la a Izaak ninga a Zakoob la a Ezayu barka, bark sẽn na n kɩt tɩ b poorẽ yɩ yalengo. Yaa a tẽeba yĩnga la a Zakoob sẽn waa n na n looge, a ninga a Zozɛf kamb a yiiba barka; dẽ t'a wõgame n tikd a rasaarã. Yaa a tẽeba yĩnga la a Zozɛf me sẽn waa n na n ki, a goma Israyɛl kamb Ezipt yiib yelle n wilg a sẽn dat tɩ b wa maan bũmb ning ne a kõabã. Yaa b tẽeba yĩnga la a Moyiiz rogem wakato, a ba rãmb solg-a kiis a tãabo, b sẽn yãe t'a yaa bi-neere; b pa zoe naaba noor tõdgr ye. Yaa a tẽeba yĩnga la a Moyiiz kos yã, a sẽn waa n lebg bi-kãsenga, tɩ b ra bool-a tɩ Ezipt naaba yageng ye; a tagsame t'a sẽn naagd Wẽnnaam buudã n nams n são a sẽn na n bao yel-wẽnd ne a sũ-noogã sẽn pa zɛɛdã. A tagsame tɩ sak namsgo Wẽnd Nedã yĩng bee yõodo n yɩɩd Ezipt tẽnga laog buud fãa; sɩda a nina ra zoe n ne-la a rolbo. Tẽeb n kɩt t'a yi Ezipt tẽnga tɩ naaba sũ-puur dabeem da ka tar-a ye; a maana sũ-keelem wala a ra nee ned ning sẽn ka tõe n yãend ne nina. Tẽeb n kɩt t'a maan pak kibsa la a bol zagsa ne zɩɩm tɩ malɛk ning sẽn wata ne tẽn-kũuma ra sɩɩs a Israyɛl kom dẽemsa ye. Tẽeb n kɩt t'a Israyɛl kamb dʋʋg Mog-Miuugu wala b kẽnda tẽn koeeng zugu, tɩ kooma yaool n dɩ Ezipt neba sẽn mak-a rʋʋgre. B tẽeba yĩng la Israyɛl kamba sẽn kẽne n gilg Zeriko dasem a yopoe, n lub a lalsã ne b bedrema fãa. Tẽeb n fãag pʋg-yoodr a Raab; b pa naag-a ne kɩɩsdbã n kʋ ye, t'a reega lɩɩsdba sãando, laafi sãando. M na n le paasa bõe? Sẽk bee m sẽn na n togs a Zedeõ kibare, n paas a Barak, a Sãmsõ, a Zefte, a Daviid ne a Samwɛl la bãngdbã? Yaa b tẽeba yĩnga la b yalg b rĩungu ne nanamsa taab rẽnda. B tẽeba yĩng la b kao bʋ-tɩrse, la b paam Wẽnnaam sẽn kãab-ba fãa pidsgu; b tõog n paga bõnyẽes noore, n sɛɛs bugum pãnga, n põs sʋ-rɩts noore; b ra yaa koms-rãmba la b lebga neb sẽn wɩɩd pãnga; b maana raood zabr zĩigẽ, b riga bu-zẽmba sẽn da wat n na n soog b tẽnga. B vʋʋga kamba n lebs b ma rãmba. Bãmb neb kẽer sakame tɩ b nams-ba, la b zãgs fãagre, n wa tõog n paam vʋʋgre sẽn be yõod n yɩɩda. Neb a taab sakame tɩ b yaal-ba, n bug b yĩinsa ne kaase, n balg-b bãeense, n kẽes-b roogo. B laba kẽer ne kuga, n bees kẽer ne sʋʋs sẽn kɩ yẽna, n kood kẽere; b yeelga pe-gãndo la bʋ-gãndo; b kẽnga ka, n leb ka, tɩ naong tar ba, tɩ toog tar ba, tɩ pɛt tar ba. Zamaana ra pa tog ne b ye tɩ b na n gilim weoogẽ, tãms zutu, tãms pẽgsẽ la tẽng bogdẽ. Bãmb fãa paama pẽgre, b tẽeba yĩnga; b fãa yaool n pa rɩ kãabga yõod ye, tɩ Wẽnd ra bĩnga tõnd zu-noog pʋɩɩr sẽn yɩɩde la b ra pa tog n ta sõmblema zĩigẽ tɩ tõnd ket poorẽ ye. Tõnd sẽn zĩ marsã ne kaset dãmb kʋʋngo sẽn gũbg tõndo, ad-y d tog n sika zɩɩb ning fãa d sẽn tʋke la d lood yel-wẽnd gãda fãa la d wudg n da yalse, n ta b sẽn wilg tõnda tɛka. D doog d neng n ges d tẽeba kõata la a bɩɩsda: a Zezi; b tõdga laafi n yãk pika namsgo la b tʋk-a lame n ka zoe a yãnd ye, la yaa rẽ la b sẽn zĩ marsã Wẽnnaam zaoora rɩtgo. Tags-y namsg niyns fãa Krista sẽn paam yel-wẽn-maandba la kɩɩsdba nengẽ; woto yãmb me sɩɩs kõn bas raoodo n lʋɩ ye. Ad-y sẽn ta marsã y nan ka teedg ne yel-wẽnde tɩ sek y zɩɩm daagr ye. Yãmb yĩma Wẽnnaam sẽn sagend yãmb wala b kamba: «M biiga, ra tõdg Soaala sɩbgr ye; la b sã n wilgd foom f kongre, bɩ f ra bas raood ye. Ned sã n nong Soaalã, Soaala sɩbgd-a lame; b sɩbgda biig ning fãa b sẽn nonge.» Y sã n namsdẽ, yaa sẽn na yɩlẽ tɩ y tedg zʋgo; Wẽnd maanda woto ne yãmba wa ba sẽn maand ne a biiga. La bi-bʋg la a ba ka sɩbgde? B sã n ka sɩbg yãmb wala b sẽn sɩbgd neba fãa, dɩlla yãmb yaa tãmpĩiba, y ka b kamb ye. Tõnd paama neb sẽn sagl tõndo: yaa sẽn dog-b tõndã, la tõnd da kelgd-b la ne waoogre. Bõe yĩng marsã la d ka na n sulg d meng d yĩngr Ba wã taoore n paam vɩɩm? Pipi ba rãmba sagla tõnd bilf bala la wala b sẽn da tagsde. D Ba a to wã sagend-d lame n dat-d ne neere, n dat tɩ d paam sõmblem. Sɩda sɩbgr buud fãa yaa toog a wakato, n ka kõt sũ-noog ye, la sã n kaoos bilfu, dẽ poore, a sikda sẽn deeg-a wã sũurẽ laafi la sõmblem. Dẽ yĩnga vʋʋg-y y nusa sẽn ki wã la y rũma sẽn komsã, rems-y y soya goalma, soy niyns y sẽn tũuda goalma, la woto woabg kõn pogl n paas ye, a na paam sãoogre. Bɩ y bao laafi ne neba fãa la sõmblem tɩ yẽ sã n ka be, ned pa tõe n yãe Soaala ye. Gũus-y tɩ ned ba a ye ra kong Wẽnd sõngr ye; gũus-y tɩ yẽgend toaaga ra wa tob yãmb sʋk n wa ne sãoongo sẽn na n mad buuda zãng ye. Gũus-y tɩ b ra yãend y sʋka yoaada bɩ neb sẽn ka pẽgd Wẽnd kũuna ye, wala a Ezayu sẽn dɩk a kãsengo n tek ne rɩ-yaalga. Y bãngame tɩ rẽ poor marsã, a sẽn waa n kos a ba t'a ning-a barka, a ka paam ye, a ka tõog t'a ba yam tedge, ne a sẽn yõk sɛɛga ne nintãm. Ad-y ka bũmb sẽn tar yaoko la yãmb paam n kolg ye. Yaa bug-witem, zĩ boogo, lika, sob-raoodo, tõntõod bʋ-raase, koees sẽn sãte. Sẽn wʋm-b bʋʋrã ka le tulg n kelg koɛɛgã n paas ye. B ra ka tõe n deeg sẽn togs woto wã ye: «Sẽn sɩɩs-a tãnga bɩ b lab-a ne kuga, ba a ya rũnga.» A Moyiiz sẽn yãend bũmb sẽn yɩkd pɛlenga a woto fãa yeelame: «M yɛsa ne yɛɛsgo la rigbu.» Sã n ya yãmba, yaa Siõ tãng la yãmb kolg yã, yaa Wẽnd vɩɩga tẽn nongre, yĩngr Zerizalɛɛm; yãmb kolga malɛk rãmb kõn-bãng-n-sõde, yãmb kẽla b tig-raag menga; yãmb kolga neb niyns sẽn deng-b fãa n paam b yʋy gʋlsgo arzãna la y kolga Wẽnnaam, dũni bʋ-kaooda, y kolga nin-sõma sɩɩs sẽn pelg-b zãnga, la y kolga a Zezi, d Wɛɛmba, sẽn wat ne zood paalga, ne b zɩɩm sẽn tar pekr pãnga, zɩɩm ne a koɛɛg sẽn sãt n yɩɩd a Abɛl dẽnna. Dɩlla gũus-y n da wa zãgs sẽn gomda ne yãmbã kelegre ye. Y mi tɩ neb niyns sẽn ka kelg a Moyiiz sẽn da gomda ne bãmb tẽng zugã sã n ka põs sɩbgre, tõnd n yɩs kõn põse, tõnd sã n pa kelg sẽn gomda ne tõnd yĩngrã. Ned ning koɛɛg sẽn tãs pĩndã tɩ tẽnga miima, yẽ soab n pʋlem tõndo n yet-do: «Bãng-y yɛsa tɩ ka tẽnga bala la m na n vik ye, yaa saaga meng marsã.» La sẽn yeel tɩ na n le yɩɩ woto yɛsa, wilgame, tɩ bũmb niyns sẽn zoe n vigsã, na n teemame, tɩ b yaa bõn-naandse; sẽn na n kellã yaa bũmb niyns sẽn pa tõe n tedgã. Woto wã tõnd sẽn lebg Rĩung sẽn kõn lʋɩ abada soaalba, bɩ d kell n tall Wẽnd kũuna neere n tõog n waoog-b ne waoogr sẽn tat b yam, n waoog-b ne waoogr ning sẽn tog ne Wẽnde la a wat ne gũusgu. Tõnd Wẽnda yaa bugum sẽn dɩt n ka kẽesd bũmb ye. Kell-y n nong-y taaba wa ba-biisi! Da yĩm-y gãag-sobend ye tɩ yẽ n kɩt tɩ neb kẽer maan malɛk rãmb sãando n ka bãng ye. Tẽeg-y sẽn be-b bi-bees roogẽ wala y me naagame n pag ne bãmba; tẽeg-y sẽn tar-b tooga yelle wala y me tara yĩnga. Bɩ yikãadem paam waoogre y fãa gill nengẽ; bɩ y gãasa ra tol n dẽgem ye. Wẽnd n na n bʋ yoaadba la rataasã. Vẽ-y ne m paoong kõn lʋɩ m to nugẽ; ges-y y sẽn tare wa bũmb sẽn seke tɩ Wẽnd meng n yeele: «M kõn daag foom n bas abada!» Woto tõnd tõe n yeela ne sũur sẽn pa kiuusdi: «Soaala la m sõangda, bõe rabeem yɛsa, Adem biig tõe n maan-m la bõe?» Tẽeg-y neb niyns sẽn ya-b taoor dãmba yelle, tɩ bãmb n kɩt tɩ y wʋm Wẽnnaam koɛɛga; ges-y b sẽn baas baas-neer ninga la togs-y b tẽebo. A Zezi Krista bala n yɛse, zaamẽ, rũnna la beoog woko! B kõn tedg abada! Da sak-y tɩ b wa tudg yã ne zãmsd sẽn ya toore la d sẽn ka mi tiir ye. Yĩngr kũuna sẽn na n keng d sũuri n são d sẽn na n keng-a ne rɩɩb niyns kẽer sẽn dɩ tɩ yõod yaool n pa zĩndã. Tõnd tara maan-kugri, la sẽn da tʋmd-b maan-kʋʋr tʋʋmd pĩnd zãnda tẽngrã, ka tar sor n dɩ bũmb sẽn kʋ maan-kugr kãng zug ye. Ad-y maan-kʋʋd kãsenga sã n da kood rũmsã, yaa b zɩɩma bal la a talda n kẽ pʋgẽ n kos yel-wẽna sugri; nemda meng ra yõogda bugum we-kɛɛnga. Dẽ me la a Zezi sẽn da rat n kõ ninsaalb sõmblem ne b meng zɩɩm, bãmb me namsa we-kɛɛnga. Dɩlla d sã n dat n bʋʋg ba bɩ d yi we-kɛɛnga la d sak n deeg yãnd wa bãmba. Tõnd ka tar doog tẽng zug ka n na n kaoos a pʋgẽ ye; yaa beoog tẽn-noogã la d baooda. Bɩ d tũ bãmba n kõ Wẽnnaam wakat fãa pẽgr maoongo, dat n yeelame tɩ d noor kils b yʋʋre. Da yĩm-y taab sõngre la y paoonga lageng ye; tɩ yaa rẽ bala la maoong sẽn noom Wẽnnaam sũuri. Sak-y yãmb kãsem-dãmba la y reeg b goama, ad-y yaa bãmb n gũud y sɩɩsã n miẽ tɩ Wẽnd na n wa sok-b lame. Woto wã, b maan b tʋʋmda ne sũ-noogo la ra yɩ ne sũ-sãang ye, tɩ rẽ ka nafd yãmb ye. Pʋʋs-y tõnd yĩng me tɩ d me tẽedame tɩ d yaa pʋ-peen neba la d me maooda wakat fãa ne vɩɩm sõng baoobo. M pʋs n kot-y lame tɩ y maneg n wɩng ne pʋʋsgo n paam tɩ m le wa y sʋk tao-tao. Bɩ Wẽnd sẽn ya laafi kõata, bãmb sẽn vʋʋg kɩɩms sʋka d Soaala Zezi Krista, n kɩt tɩ b lebg pe-yãansa pe-kɩɩm kãsenga, ne b zɩɩm b sẽn daag n tõog n yõg zood sẽn kõn sãam abada, bɩ Wẽnd meng kõ yãmb sũuri tɩ y sak bãmb yam la y wɩng ne tʋʋm-sõma buud fãa, tʋʋm sẽn womd bi-sõma, sẽn noom bãmba, a Zezi Krista pãng la b maasem yĩnga; bãmb paam pẽgr sẽn kõn sɛ, marsã la daar fãa. Ami! M saam-biisi, maam n yõkd-y sɛɛga, tɩ y reeg sagl kãensa neere; m gʋls-y la koɛɛg-koɛɛga. Bɩ y bãng tɩ b yiisa d saam-biig a Timote roogo; a sã n paam n ta ka pĩnda, d na tũ taab n wa ges yãmb. Pʋʋs-y kãsem dãmba la nin-sõma wã fãa. Rom dãmb tɩ b pʋʋs yãmba! Wẽnd bark sig yãmb fãa. Ami! Maam a Zak, Wẽnd la d Soaal a Zezi Krista sõgne, n pʋʋsd buuda sags piig la a yiiba kamba sẽn sẽeg Pa-weere! M saam-biisi, ges-y wa sũ-noogo meng-menga, namsg ka tɛka sẽn lʋɩt y zugu. Wala y sẽn mi, y tẽeba sã n pidi la y yɛs y zĩ-yɛnga. Sẽn yɛs-a a zĩ-yɛng me tʋmda tʋʋmd sõngo, la yaa woto la y sõmblema na n pid zãnga, bũmb kõn pa sãoogo, bũmb kõn keoos ye. Yãmb nin-yend sã n pa tar yam zulunga bɩ a pʋʋs n kos Wẽnd t'a na paame. — Wẽnd kõtame tɩ gale la ne yamleoogo. Bɩ a modg n kos ne tẽebo, n ka sãmbdẽ ye; sẽn sãmbda wẽnda mogr koom, sobg sẽn zẽkd la a rãmbdẽ. Ned a woto buud da tẽ t'a na n paama bũmb Soaala nengẽ ye, t'a raaba teemdame, a soy wã yaa kʋʋma. Saam-biiga sẽn yaa naong soab kɩdem t'a zug na n zẽkame; arzɛk soaba me gũ a zug sulugri t'a na n looga wa mo-puugu. Wĩndg puka ne a waolgo n kʋɩɩs moogo t'a puug sʋʋge, t'a neerma wẽneg n sãam. Boto me la arzɛk soab raab wagla na n sãam-a. Zu-noog soaba la sẽn tõoga kʋɩɩbgo! A sã n tõog kʋɩɩbgo n puk a sõmblem, a paamda vɩɩm dolb ning Wẽnnaam sẽn kãab sẽn nong-b bãmba. Kʋɩɩbg wakato bɩ ned ba a ye ra saag n yeele: yaa Wẽnd n kʋɩɩbd maam. Wẽnd pa baood wẽnga, Wẽnd pa kʋɩɩbd ned ye. Yaa ned kam fãa raab wẽng n takd-a, n belgd-a. Raab wẽnga sã n dɩk pʋga, yaa yel-wẽnd la a roagda, la yel-wẽnd sã n kũmd dogem, yaa kũum la a roagda. Da kẽ-y moog ye, m neb sõma! Kũun ning fãa sẽn be yõodo, kũun sẽn pid kũun fãa yita yĩngri soaba nengẽ; a yita d Ba ning sẽn pida ne vẽenema nengẽ. Bãmb pa mi teengo, bãmb pa mi tekre ba bilfu. B tʋlg n doga tõnd ne b sɩd gomde, b tʋlgame tɩ d yɩ wa bõn-naandsa fãa bõn-dẽenga. Ade, m saam-biisi, m sẽn nong wa fãa-fãa: bɩ ned kaam fãa modg n yɩ tʋʋlg ne kelgre la maasg ne leokre la sũ-fõore. Ned sẽn basd a sũur tɩ fudgdẽ, ka maand Wẽnd sẽn dat ye. Dẽ yĩnga zãag-y meng ne rẽgd buud fãa, ne wẽng buud fãa sẽn kell y sũurẽ, la sak-y n deeg Wẽnd Gomdã sẽn bʋd y sũurẽ n tõe n fãag y sɩɩse. Tũ-y Gomda sẽn yet tɩ y maan a soaba. Da yɩɩ-y kelgdb bala n wa belg y mens ye! Sẽn kelgd-a Gomdã n yaool n pa tũudĩ, wẽnda ned sẽn get a neng nin-gɛtgẽ. A sẽn ges n loog la a sẽn wẽneg n yĩm a sẽn ya a soaba. Ned ninga sẽn gãda la a tabend Noor ninga sẽn wata ne burkĩndlem menga, a sã n pa yĩmd-a, a sã n yik n tũud-a zãng-zãnga, yẽ soab na n yãee sũ-noogo. Ned sã n tẽed t'a yaa Wẽnd tũud akɩka n yaool n ka loet a zelemde, a belgda a menga, la a tũudma pa tũudem ye. Wẽnnaam d Ba wã tũudem akɩka la woto: kɩɩb bɩ la pʋg-kõap yell gesgo, la b zu-loees yolsgo n paas zãag-m-meng ne zamaana rẽgd buud fãa. M saam-biisi, ad-y bak ned ne a to ka le tõe n zĩndi, d sã n tẽed Soaal a Zezi Krista ne pẽgr kãseng ning b sẽn paam a soaba ye. D mak wala yãmb tigma taaba tɩ ned wa ta ne sãnem nug-bĩng a nugẽ la a yer karfo, tɩ naong soab me wẽneg n wa ne fu-kʋɩdse, tɩ yãmb wudg n seg fu-neeba soaba, n yeel-a: «Yãmb wa zaoond ka, waoora zĩigẽ» n yaool n yeel naong saoba: «F rat bɩf yals yĩngri, f rat bɩ f zĩnd tẽng ka.» Ka yãmb marsã n bakd ned ne a to la y tũud y tags-goalma? Kelg-y, m saam-biisi m sẽn nong ne m sũur fãa, ka Wẽnd n tʋlg tɩ dũni wã sẽn boond tɩ naong rãmba lebg arzɛk rãmb b tẽebẽ la b lebg Arzãn Rĩunga yõod dɩtba wala Wẽnd sẽn kãab b zo-rãmba laa? Sã n ya yãmba, yãmb pa nand naong rãmb ye! Mik-y yaa arzɛk rãmbã n namsd yãmba. Bãmb n vuud yãmb n digd bʋʋd zĩigẽ. Bãmb n sãamd yʋ-sõng ning b sẽn pʋd yãmbã; Bãng-y tɩ y sã n deegd noor ning b sẽn kõ yãmbã, tɩ Sebr sõng boond tɩ no-kãsenga: «Nong f to wala f menga, y maanda neere.» La y sã n be tẽngre n bakd ned ne a to, y maanda yel-wẽnde, la y na n dɩɩ taale, tɩ y tõdgda Noorã. Ned sã n deeg Noora zãng la bala, bũmb bilfr bal la a bas yã, ad-y yaa Noora zãng taal la a rɩ yã tɩ b na n sok-a. Bãng-y tɩ yaa sẽn yeela: «Da rɩk f to pagã,» yẽ soab n yeele: «Da kʋ ned ye.» Fo sã n zãgs yoobo, n yaool n kʋʋda, f baas n yaa Noora tõata. Gom-y la vɩɩnd-y wa ned sẽn ya burkĩna. F ka zoet f to nimbãanega, b kõn zoe fo me nimbãanega n kao f bʋʋd ye; sẽn tara nimbãan-zoeere, b pa le kẽesd yẽ soab bʋʋd ye. M saam-biisi, nin kãnga goama bee võor bi: «Ad-y m tara tẽebo,» n yaool n ka tʋʋm sõma neda; tẽeba a ye tõe n fãag-a lame bi? Wala f saam-biiga, dao bɩ pag sã n zĩ a kãre, n ka tar fɩ n ningd a noorẽ, tɩ yãmb nin-yend wa yeel-a: «Kul ne laafi, bao bugum n woode, rɩ n pid f pʋga» a sã n ka sõng a yĩnga ne a sẽn tar bũmb ninga tʋʋmna, a goama tara nao bi? Tẽeba nengẽ me yaa boto. Tʋʋm-sõma sã n ka naage tẽeba yaa tẽeb kɩɩnga. Yaa woto la d tog n gome: «Daoa, fo tara tẽebo tɩ mam ya tʋʋm-sõma neda, wilg maam f tẽeba sẽn ka naag ne tʋʋm-sõma wã, ti sã n ya maam yaa m tʋʋm-sõma wã n pukd m tẽebo. Fo tẽedame tɩ Wẽnnaam yaa b ye bala? F tẽeb yaa sõmbo, la bãng tɩ Sʋtãamba me tẽeda boto n baas n zĩ ne rigbu. Yam-kaoolg soaba, f ratame n bãng tɩ tẽeb sẽn ka naag ne tʋʋm sõma yaa tẽeb faoogo?» A Abraam, d fãa yaabã paamame t'a yell maneg ne bõe? Yaa a sẽn sak n dɩk a biig a Izaak n na n maan maoong n kõ Wẽnnaama. Dɩlla a Abraam tẽeba ra naaga ne tʋʋm sõma la bãmb n kɩt t'a lebg sõng zãnga. Yaa woto me la Sebr sõng gomda pid yã: a Abraam tẽe Wẽnnaam tɩ Wẽnd maneg a yelle, tɩ b na n bool-a tɩ Wẽnd zoa. Y ne-la, yaa ne tʋʋm sõma la ninsaal paamd a yell manegre, ka ne tẽeb bal ye. La pu-yoodr a Raab me, yaa tʋʋm-sõma n wa ne a yell manegre: a reega b sẽn tʋʋm b rãmbã la sõng-b-la ne sor a to tɩ b tũ n paam n põse. Yaa wala yĩnga sẽn lebgd kũum sɩɩga sã n yi n bas-a. Yaa boto me ne tẽebo, tʋʋm-sõma sã n ka naage, yaa bõn-kɩɩnga. Bɩ yãmb sʋka, sẽn dat-b n lebg karen-saam-dãmba sõor da yɩ wʋsg tɩ loog ye. Karen-saamba sẽn na n wa ne bũmb ning yaa paas d bʋʋda toolem bala. D da yĩm tɩ d fãa gill beegdame ye. Ned sã n pa gomd n yõsda, yẽ la nin sõngo, yẽ soab tõe-la a yĩnga zãnga. D sã n ningd salbr wiidi noore yaa sẽn na n yɩlẽ tɩ b mensa sak n tũ b sẽn datẽ. Yaa boto me ne koom kogendã: b bedrema sẽn zem to-to, sobg ning sẽn tusd-ba sẽn ya to-to, yaa ne bũmb sẽn ya mɛdg bala la b soaalba tõe tɩ b kẽn tɩrga. Zelemd me yaa bõn-mɛdga la a tõee yel-bɛda. Ya bugum sẽn paoode n yaool n tõe tɩ weooga fãa dɩ bõaga. Zelemd yaa tõnd yĩnga wilga la a me yaa bugum n pid ne wẽnem. A rẽgemda tõnd yĩngã, a rɩta d vɩɩma zãnga la a moka a bugma bugum yiri. Ninsaal ne a zelemda tõogame, la a ket n tõeeme n maan a sẽn dat ne we-rũmsi, bõn-yɩgdi, bõn-vuudi, koomẽ rũmsi. Ya zelemd bal la ninsaal ka tõoge; a ka mi vʋʋs ne sãoong ye la a pida ne zẽnem sẽn ka mi sugr ye. D sã n tar-a n pẽgd d Soaala la d Ba, d tar-a lame n tʋʋsd ninsaal sẽn tar Wẽnnaam wẽnego. Zelemda naagame n yiisd pʋlem nood la kãab-wẽnse. Yaool n ka tog n yɩ boto ye, m saam-biisi. Bõe ko-bunnem n naag n tãoosd zĩig a ye, ko-sõng la ko-beedo? Kankang tõe n woma kɛgl bi: bugsuntung tõe n woma kankam bi? Yaa wa mogra ko-menesendã sẽn ka tõe n yɩ ko-noogã. Ãnda n be yãmb sʋkã n yet t'a mi-la a menga la a mii gũusgu? A sẽn yet t'a vɩɩma yaa sõmbã, a wilg tʋʋm niyns a sẽn tʋme tɩ b kõt a tõog-m-menga la a sũ-bʋgsma kaseto. A sũura sã n wɩka ne sũ-kiiri la zab-taasem bɩ a gũus n da wa sak wakre la zirẽ-beed ye. Fo sã n yagd zirẽ n na n kõ f meng bʋʋm, bãng tɩ yam kãng ka yit yĩngri soaba nengẽ ye, a yaa tẽng zug yam, a yaa rũng bɩ Sʋtãan dẽnna; Sũ-kiir la zab-taasem kedbda yɛla la b wata ne yel-wẽnde. Fo sã n tar Yĩngr Soaba sẽn dat-f ne zʋg ningã, bɩf bao sɩd la laafi, sak n bas beegr taale, sak n yiis n kõ, sak n nong nimbãan-zoeere ne a tʋʋm sõma, sak n pʋɩ tɩ ned kam fãa reeg a rẽnna, sak vẽenem la f kisg lika. Sẽn baood-a laafi soab pʋʋgẽ la b send sõmblem tɩɩga t'a womd biis b yĩnga. Y sẽn be ne taab tɩ ya zab la mo-beedã, dẽ yita yɛ? Ka y zʋg wẽnga sẽn gudgd pʋgẽ wã laa? Yãmb baoodame n yaool n ka paamnẽ ye, tɩ y yik n kʋʋda. Y neeme n data n ka soogd fɩ tɩ lebgd zaba la gãgs ne taaba. Bãng-y tɩ y sẽn pa tarã, yaa y sẽn pa kotã. Y sẽn kot bũmb ning n pa paamnẽ wã, yaa y sẽn pa mi kosgã. Sẽn nafd y yĩnga bal la y kota. Long rõaag, long sɩɩg kamba, yãmb pa mi tɩ zamaana nonglem yaa beem ne Wẽnd laa? Sẽn data n yɩ zamaana zoa lebgda Wẽnd bɛyã. Y tẽedame tɩ yaa zaalem la Sebra yet woto: Wẽnd data ne raab kãsenga zʋg-sõng ning b sẽn pʋdg tõndã? Yaa sẽn be yõod n yɩɩdã la b nong n kõtẽ, dẽ la Sebr sõng togdsda: «Wẽnd mongda b kũuna wilg-m-meng rãmba n yaool n kõta sulg-m-meng rãmba.» Woto wã, sak-y Wẽnde la y tõdg Sʋtãana, t'a na zoe n menem. Kolg-y Wẽnd tɩ bãmb me na yẽrg n kolg yãmba. Pek-y y nusi, yel-wẽn-maandba, pek-y y sũya, ka yɛs-b zĩ yɛng rãmba! Ges-y y bʋkã, kelem-y kʋʋre, kɩt-y tɩ y laad lebg kũmkũm, tɩ nintãm deeg sũ-noog zĩiga. Sulg-y mens Soaala taoore tɩ bãmb na roog yãmba. Da wɩdi-y taab ye, m saam-biisi. Ned ninga sẽn wɩt-a a to, la a tagsd a soab wẽnga, yẽ soab wɩta Noorã la a tagsd Noora ne wẽnga. La fo sã n tasgd tɩ Noora yaa wẽnga, fo ka le ya Noora tũuda, fo lebga Noora sãbsda. Ned ninga sẽn yiisa Noorã, yẽ soab n na kao bʋʋd Noora poorẽ. Yẽ soab n tõe n yiis bɩ a paalg bʋʋdo. Ka tõnd n na n kao taab bʋʋd ye. Yãmb la m tat marsã, arzɛk rãmba. Y yetame: «Dũnna bɩ beoogo d na n taa Bõnd tẽnga, d na n zĩnda be yʋʋmda tõre, d na n maana leobgo n paam ligdi.» Yãmb yaool n ka mi y vɩɩma sẽn na yɩ a soab beoog ye. Yãmb yaa waolg sẽn dukd yĩngr bilf bala n pa na n zɛ loogr ye. Yãmb kisa y yeelẽ: «Wẽnd sã n sõnge d na vɩɩnde, d na maan woto la woto.» La ade y basa rẽ goama n zĩi n tãoosd daoodo! Kato, wakr a woto buud fãa yaa wẽnga! Ned ninga sẽn mi a neer maanego n ka maandẽ, a soab maanda yel-wẽnde. Rakãagba, m le wata yãmba! Sɩng-y wiisgu la kũm-y tɩ yell n na n pak yã. Y arzɛka põogame; y futã, zũnzuy wã zurb-b lame. Y sãnema la y wanzurfa zoe n kẽe tẽngempiisem: ka tẽngempiisma n na n gom n sõng yãmb ye. Yẽ n na n wa rɩ y nemsã. Ad-y yaa bugum ra-giis la y tigsd n gũud beoog raara yĩnga. Kelg-y rãamde: neb la yãmb dɩk yã tɩb wa tigs y koodo la y maana zãmbo n pa yao-b ye; ad-y yaa bãmb n kelemde la b kɛlenga sãag n lʋɩ Pãng Soaba tʋbrẽ. «M yĩnga kõn yãe toogo, a na tɩg faongo» n yɩ yãmb vɩɩma tẽng zugu la y sɩd rɩ-la y pãngẽ, n nob wa rũng sẽn nobe, n gũud koos naaba. Y sakame meng n paalg nin-sõng bʋʋdo la y kʋ-a lame t'a ka be pãng ye. M saam-biisi, tõog-y meng n ta Soaala waoongo; Ges-y ka-koaada, a gũuda a tʋʋmda yõodo, n tẽed tɩ sa-koom na rʋʋg sig-noy n ta sẽooga tɛka. Yãmb me yɩ tõog-m-meng rãmba la keng-y y sũya tɩ Soaala Waoong taame. Da guglem-y ne taab ye, woto b kõn tags-y ne wẽng ye. M saam-biisi, togs-y bãngdbã la ges-y-ba wa neb sẽn sak toogo, neb sẽn maan sũ-keelem Wẽnd yĩnga. Ade tõnd meng pẽgda neb niyns sẽn ka basd-b sũ-keelem. Y pa wʋm a Zoob sũ-keelma kibare, y pa bãng Soaala sẽn da rat n puk bũmb ninga? Soaala yaa nimbãan-zoeta, Soaala kũmda b neba. M saam-biisi, da wɩng-y ne wẽeneg ye. Da wẽen-y ne saaga, bɩ ne tẽnga bɩ ne bũmb a to ye. Y sã n tog n leok tɩ N-yẽe bɩ y yet tɩ N-yẽe! Sã n ya Ayoo, bɩ y yet tɩ Ayoo! Woto b kõn kẽes-y bʋʋd ye. Ned sã n namsd yãmb sʋka bɩ a soab pʋʋse. Ned sã n kɩdemnẽ bɩ a pʋd yɩɩle. Ned sã n pa keeme, bɩ a kɩt tɩ b bool Tigeng nin-kẽemsã tɩ b yals a zug n pʋʋs a yĩnga la b zɛɛ kaam, Soaala yʋʋr yĩnga. Pʋʋsga sẽn maan ne tẽebã na n fãaga bãadã. Soaala na kɩt t'a tɩlge; a sã n maana yel-wẽnde, a na paam sugri. Wilg-y taab y beegre fãa. Pʋʋs-y n kõ taaba tɩ y fãa paam sãoogre. Nin-sõng sã n yõk sɛɛga, wa a sẽn tõe tɛka, a tara pãnga. A Eli da yaa ninsaal wa tõndo la a pʋʋsa ne tẽebo tɩ saag ra ni ye. La saaga ka tol n tosg tẽnga yʋʋm a tã la kiis a yoob ye. A sẽn leb n pʋʋse, sa-koom dʋʋgame la tẽnga woma a biisi. Ned sã n bʋdge n bas sɩd sore tɩ neda to le tall-a n wa, yẽ soab bãnge t'a fãaga a sɩɩga kũum nugẽ la a na paam a yel-wẽn ka tɛk sugri. Maam a Piyɛr, a Zezi Krista tʋʋm-tʋmda, n pʋʋsd Wẽnd kom-nongds sẽn vɩ-b wa sãamba la pa-weto: Põ, Galasi, Kapados, Azi la Bitini tẽnse. Yaa Wẽnd Ba sẽn mi fãa wã n tũus yãmb al daar woko, t'a Vʋʋsem Sõng pids-y ne b kũuni, tɩ y na n pʋg a Zezi Krista la y sak tɩ b mes-y ne b meng zɩɩm. Bɩ Wẽnd nimbãan-zoeere la b laafi sig y zug zembala! Soaala Zezi Krista Ba paam pẽgre! B nimbãan-zoeer n waooge tɩ b le kõ-d vɩm paalga, ne a Zezi Krista sẽn vʋʋg kɩɩms sʋka. Bãmb yĩng la y vɩ la y saagdẽ, tɩ y na paam n dɩ b yõod sẽn kõn sɛ, sẽn kõn wooge menga, b sẽn bĩng yãmb b arzãnẽ. Ad-y y tẽeba yĩnga, Wẽnd ne b pãnga segla y yĩnga fãagr sẽn na n puk a meng a toore yaoolem daarã. Dẽ n kɩt tɩ yãmb kɩdemd sũ-noog marsã, ba y mi tɩ togame tɩ y kell n namse. Y miime tɩ Wẽnd sã n mak yãmb ne namsgo, y tẽeba sẽn be yõodo n yɩɩd sãnem sẽn kalem dẽgdo tɩ b losda boaagẽ, y tẽeba na wa ne yãmb pẽgre la y zu-zẽkre Krista a Zezi waoong raare. Bãmb la yãmb zɩ n yãe la y yaool n nongẽ, bãmb la y nif nan ka teege la y tẽeba kɩtame tɩ y zoe n kɩdemd y pẽgra sũ-noogo la y langdẽ. Y miime tɩ y kõn kong y sẽn tẽedã: y sɩɩsa fãagrã ye. Fãagr kãng poorẽ, bãngdba yõka vɛɛsgo la baoobo, bãngdb niyns sẽn gom Wẽnd sẽn bĩng-y kũun ninga yelle. B baoome n na n bãng yaa wakat bʋgo la bõe taki la Krista Vʋʋsma b sẽn paama ra zoe n neẽ, bãmb sẽn waa n gomd Krista namsgã la pẽgr ning sẽn na n pʋgã. Bãngdba bãngame tɩ ra ka bãmb yĩng la b ra gomd ye, b ra gomda yãmb yĩnga. Sɩd yaa ne yãmb la sẽn moond-b Koe-nooga gomda. B gomd-y-la ne a Vʋʋsem Sõng b sẽn zĩnd yĩngr n tool yãmbã; b gomdame al t'a yamleoog tar malɛgsa menga. Dɩlla, nek-y y yam la yõk-y y mense. Maan-y saagre ne kũun ning sẽn na n sig y zutu ne Krista a Zezi Waoongo. Wa kamb sẽn mi sakre, lak-y y yam ne pĩnd tʋls wẽns sẽn da be y sũurẽ, y sẽn waa n da ket likĩ. La wala sẽn bool-a yãmbã sẽn ya Sõmblem naaba, y me yɩ sõma, y manesem fãa pʋgẽ, tɩ yaa woto la b gʋlsyã: Yɩ-y sõma tɩ mam menga yaa sõngo. Yãmb sã n boond tɩ y Ba, Wẽnd ninga sẽn ka bakd-a ninsaal ne a to, sẽn get-a ned kam fãa yel-manesem n na n kao bʋʋdo, bɩ y tall y meng ne rabeem, vɩɩm kãnga pʋgẽ t'a yaa pa-weer vɩɩm. Bãng-y tɩ ka ne bõn-sãamdem, sãnem bɩ wanzurfu, la y paam n tɩlg vɩɩm yaalg ning y yaab rãmba sẽn kõ yãmba ye. Yɩɩ ne zɩɩm sẽn tar yõodo, wa pe-bil sẽn ka tara toorẽ yelle, sẽn ka tar bãnd ba bilfu zɩɩm: yɩɩ ne a Zezi Krista zɩɩm. Wẽnd n welg-b toore tɩ dũni nan ka naan ye, n yaool n puk-b marsã yãmb yĩnga. Yaa ne Krista pãnga la yãmb tẽed Wẽnd sẽn vʋʋg b kɩɩms sʋka n kõ-b pẽgre; woto y tẽeb la y saagr bee Wẽnnaam b ye nugẽ bala. Yãmb sẽn deeg sɩdã, yaa yãmb sɩɩs n paam sõmblem tɩ y na n nong taaba wala ba-biis bala; dɩlla bɩ y ra vʋʋs ye la nong-y taaba ne pʋ-peelem zãnga. Sẽn le roga yãmbã ka ninsaal yĩng sẽn mi kũuma ye, yaa Wẽnd ne b gomd pãnga: bãmb n ka mi kũum, bãmb n tar vɩɩm sẽn kõn sɛ. Ad-y yĩng neong yaa wa moogo: a neerma yaa wa puugu; moog kʋɩtame t'a puuda me sʋʋgdẽ. Sã n ya Wẽnd Gomde, a bee daar fãa. Wẽnd Gomda la Koe-noog ning b sẽn taas yãmbã. Woob-y pʋ-toog buud fãa ne zirẽ-beedo, zãmbo, sũ-kiiri, la tẽn-kãnem. Tʋlg-y Wẽnd Gomdã wala kom-peelse sẽn tʋl bĩs-naare sẽn ka pul koom; yẽ n tõe n bɩɩs y yaoko tɩ y tʋm y fãagra tʋʋma. La rẽ me yaa y sã n deng n lemba Soaala kũuna n mi tɩ bãmb n noom n yɩɩd fãa. Bɩ y yẽrg n kolg bãmba tɩ bãmb la kugr vɩɩga ninsaalb sẽn daag n bas kɛɛnga tɩ Wẽnd yaool n yãk-a wa kugr sẽn tar neerem. Yãmb me, yɩɩ-y wa kug vɩɩse la sak-y tɩ b rɩk yãmb n me Wẽnnaam doogo, tɩ b sɩng maan-kʋʋr sõng tʋʋmd a pʋgẽ n kõt Wẽnd maand sẽn ka tẽng zug rẽnna, la sẽn tat b yam, a Zezi Krista maasem yĩnga. Ad-b sẽn gʋlse: Yaa Siõ tãng zug la m vigĩnd kuga ma, kugr m sẽn tũusi, kugr sẽn be neere la ned ninga fãa sẽn na n teeg kugr kãnga kõn yãe yãnd ye. Yãmb tẽedba yĩnga a na wa ne y pẽgre; sã ya kɩɩsdbã, b bãng tɩ kugr ninga metba sẽn bas kɛɛngã, yẽ n lebg kuga ma, a lebga lakr kugri, lak-n-lʋɩ pĩiga. Kɩɩsdba lakd-a lame tɩ b pa tẽ Gomda ye, la lakra la bãmb me pʋɩɩre. La yãmba, yãmb yaa buud Wẽnd sẽn welg tore, buud sẽn paam maan-kʋʋr naam, buud sõngo Wẽnd sẽn tũus n na n kils Ned ninga sẽn yisa yãmb likĩ n kẽes-y vẽenem sẽn ka taar pʋgẽ. Y buuda da ka buud ye la ad-y y sen lebg Wẽnd buud sõng marsã! Yãmb da ka paamd tɩ b kũm y nimbãaneg ye la ad-b sẽn zoe y nimbãanega marsã. M sẽn nong b rãmb wa fãa fãa, maam n yõkd y sɛɛga, y sẽn ya sãamba la so-toagdba yĩnga, tɩ y zãag y mens ne y yĩnga tʋls wẽns sẽn sogd maoor ne y sɩɩgã. Tall-y y mens neer bu-zẽmba sʋka tɩ ba b sã n wɩt yãmb wa nin-wẽnse, bɩ b yãend y tʋʋm-sõma. Rẽ n na n sõng ba tɩ b wa pẽg Wẽnnaam b waoonga raare. Soaala yĩnga bɩ y sak tẽng zug naama ne a siglsã: sak-y dĩma sẽn ya fãa soaala, sak-y b kombɛɛmba; b tʋʋmd yaa b sɩbg sẽn maand-b wẽnga la b pẽg sẽn maand-b neere. Ad-y yaa Wẽnd n dat tɩ y maan neer woto, n pag gãeemsa la zɩtba noore. Woto wã tʋm-y burkĩndlem tʋʋma. Da lʋɩɩs-y burkĩndlema taoore n dɩk menesg sor ye, yɩɩ-y Wẽnd tũudb bala. Waoog-y neb fãa, nong-y y saam-biisi, zoe-y Wẽnde, la waoog-y dĩma. Yãmba, zak kamba, sak-y y zu-soaben-dãmb ne rabeem menga, b tar bʋgsem, b yaa naana bɩ toose. Ad-y yaa Wẽnd kũun la f paamyã, f sã n sak Wẽnd waoogr yĩnga n nams f sẽn ka tog n namse. Bõe n sek pẽgre, f sã deeg toog sẽn ya f beegr sɩbgre? Sã n yaa y tʋʋm sõma yĩnga la y sakd namsgo, ad-y rẽ n be yõod Wẽnnaam nengẽ. Mik b bool yãmb tɩ y wa namse; Krista me namsa y yĩnga n kõ y togs-n-taar n dat tɩ y pʋg bãmba. La bãmb yaool n zɩ n maan wẽng ye — zirẽ-beed zɩ n yi b noorẽ abada. B tʋʋs-b lame la b ka tʋʋs n lebs ye, b yãee toogo la b basa rẽ fãa ne ned ninga sẽn kaooda bʋʋd sɩda. Pika zugu b meng tʋka d yel-wẽna, sẽn na n yɩlẽ tɩ tõnd me wa lebg bõn-kɩɩmse ne yel-wẽnd maanego la bõn-vɩɩse ne sõmblem baoobo. Bãmb sãmpogrã n wa ne yãmb sãoogre. Yãmb da yaa wa pe-yãans sẽn kẽ weoogo la marsã y le leba y pe-kɩɩma la y sɩɩsa gũud nengẽ. Yãmb me, pagba, sak-y y sɩdb-rãmba. Sɩdb-rãmba kẽer pa rat n deeg Koe-nooga ye la b pagba vɩɩm sõngã n na n tak-ba tɩ pa tũ ne b noor gomd ye. Rẽ yaa b sã n ne tɩ y zãaga y mense ne yoob n tog ne waoogre. Bɩ y faongã ra yɩ faong sẽn ne yɩng ye, faong sẽn baood ne zoobd pãnengo, sãnem teedo la fʋ-neeb ye. Faongã tog n yɩɩ pʋgẽ faongo: yaa sũur sẽn ka sak wẽnga, n tar bʋgsem, n ka mi fudgr ye. Dẽ n be neer Wẽnd nifẽ. Ya woto la pĩnd pʋg-sõma wã sẽn da tẽed-b Wẽndã ra baood b faong la b sakd b sɩdb-rãmba. Woto la a Sara ra sakd a Abraam la a boond-a t'a zu-soaba. Yãmb me lebga yẽ kamba yãmb sã n baood neere n zĩ wɩsa n pa yɛɛsd bũmb ba a ye. Sã n ya yãmba, sɩdb rãmba, zĩnd-y ne y pagba ne wʋm taab yam, wa ne zĩnd-n-taaga sẽn ka tar pãng wʋsg ye. Kõ y pagã a waoogr pʋɩɩre, wa neb sẽn naag taab n dɩt beoog vɩɩma yõodo. Woto bũmb kõn sãam yãmb pʋʋsg ye. M sẽn kot bũmb zãnga, yaa y fãa yɩ yam yɛnga, ne taab kũmbu, ne taab nonglem, ne taab nimbãan-zoeere la ne yam-sulgri, n ka lebsd wẽnga, n ka lebsd tʋʋr lɛ-lɛ. Yãmb yee n kãab noogo la y ra kãab beed ye, tɩ b welg-y la toore, sẽn na n yɩlẽ tɩ y wa rɩ pʋlemd nooga yõodo. Sɩd me ned ninga sẽn baooda a yõore la a rat vɩɩm noogo, bɩ a paam-a, a yõk a zelemde la a vẽ ne goam wẽna la zirẽ-beedo. A zãaga meng ne wẽnga la a maan neere, n bao laafi la a wɩng n wa paam-a. Soaala neng togla nin-sõma la b tʋb kelgda b pʋʋsgo. Soaala nini yaool n gẽenda sẽn maand-b wẽnga. Yell bʋg n tõe n pak yãmba, yãmb sã n baood neer ne y sũur fãa? Ad-y y zug yaa noogo y sã n pʋs n namsdẽ y sõmblema na paas yĩnga; dɩlla da zoe-y rabeem ye la y ra bas tɩ sũur kiuus ye. Y sẽn tog n maane, yaa waoogd Soaala, Wẽnd Nedã, y sũurẽ la rẽ tɩ y bob n yɛsame n na leok sẽn na n soka yãmbã: bõe saagr la y zĩi n saagdẽ? Leok-y ne sũ-bʋgsem la waoog taab yam, wa neb sẽn mi tɩ b sũur ka kiuusd ye. Woto b sẽn wɩt yãmb bũmb ning poorẽ wã na n lɛɛg n pids ne yãnde neb niyns fãa sẽn sãbsd y vɩɩm sõngã, Krista tũudma pʋgẽ. Maan neer tɩ b nams fo, Wẽnd sã n data, n são maan wẽnga n paam yĩn-maasem. Krista meng kii vugri, yel-wẽna yĩnga. Sẽn ka tar-a yelle kii yell maandb yĩnga, sẽn na n yɩlẽ n tall-do n taas Wẽnde. B yĩngẽ wã la b lebg-bõn kɩɩnga, b sɩɩgẽ wã b kell n yɩɩ bõn vɩɩga. B sɩɩgã n tol n taas Koe-noogã neb niyns sẽn da pag roogo. Bãmb dãmb n zãgs tẽeb pĩnda, Wẽnd sũ-maasma wakato, a Nowe sẽn waa n kaad a koglga wakato, tɩ yaa koglg kãng pʋga la neb sẽn paoode, neb a nii bala, paam n dʋʋg kooma n põse. Dẽ me n makd sooba sẽn fãagd yãmb me marsã. Ka yĩnga rẽgd la a pekd ye, a kɩtame tɩ ned kam fãa rɩk a menga n ko Wẽnd ne pʋ-peelem, A Zezi Krista sẽn vʋʋga yĩnga. Bãmb n dʋ arzãna n zĩ b Ba rɩtgo la rẽ tɩ b reng n tõoga yĩngr Sõgen-kambã, yĩngr Kãsem-dãmbã, la Pãn-dãmba fãa. Dɩlla Krista sẽn yãend toog woto, b yĩngẽ, bɩ tagsg kãnga wa kõ-y raoodo. Ned ninga sẽn yãenda toog a yĩngẽ, yẽ soab laka a meng ne yel-wẽnde; n na n vɩɩnd tẽng zug vɩɩma marsã, wala Wẽnd sẽn date; ka na n le yɩ wa zʋg wẽnga sẽn dat ye. Y sẽn yik pĩnd n tũ bu-zẽmba raabã, ka sek-y sɩda? Yãmb saka b yoobo, b yel-yoodo, b rã-tɩgre, b rɩ-bɛda, b yũud n pa roogdẽ, b bõn-naands waoog yoodo. Ad-y yãmb sẽn pa le naag bãmba n dʋʋg kʋɩl ning sẽn na n dɩ-bã, b pa wʋmd a võor ye. Dẽ la b yik n tar yãmb paoogre marsã. Mik rẽ fãa na n waa Bʋ-kaood yɛnga taoore, sẽn vɩ-b la sẽn ki-b Bʋ-kaoodã. Ad-y yaa rẽnd yĩnga la kɩɩm-kulga meng paam tɩ b moon Koe-noogã, woto ninsaalb sẽn paalg b rãmb bʋʋd tẽng zugã tõog n paama yĩngr vɩɩma Wẽnd nengẽ. Ad-y Dũni wã yikr kolgame; bɩ y yɩ neb sẽn tar gũusgu la y yõk y menga n tõog n pʋʋse. Bũmb zãnga tall-y taab nonglem tɩ nonglem luta yel-wẽna. Maan-y taab gãag-sobẽndo sẽn ka naag ne yẽgeng ye. Bɩ ned kam fãa yik n sõnga taaba wala a sẽn paam tɛka, wala y lebga Wẽnd kũun ka tɛka pʋɩtb-a. Ned sã n gomd bɩ a gom wa Wẽnd sẽn gomde. A sã n deeg taab sõngr tʋʋmde, a sõng wala Wẽnd n kõta noore. Woto bũmb fãa pʋgẽ Wẽnd na paam pẽgre, Krista a Zezi maasmẽ. Bãmb n so naam la ziir sẽn ka sɩng la sẽn kõn zĩnd sɛɛbo. Ami! M kom-sõma, da yɛɛs-y bugum ninga sẽn wulumd yãmb sʋka wa bõn-lingdem ye tɩ yaa Wẽnd n dat n fɛɛs yãmba. Y sã n naag Krista n namsdẽ bɩ y noog y sũuri tɩ b ziira pukr daare y na naag n lang la y kɩdem sũ-noogo. Sã n ya Krista yʋʋr yĩng la b yaand yãmba, yãmb zug yaa noogo. Ad-y yaa Wẽnd Vʋʋsem ne b zɩiri, Wẽnd Vʋʋsem n sig yãmba. Bɩ yãmb ned ba a ye ra wa namse, a sẽn ya nin-kʋʋd, bɩ wagdr, bɩ tẽn-wãad, bɩ tẽn-kãn neda yĩng lɛ-lɛ! A sã n namsdẽ bɩ yɩ a sẽn tũud Krista yĩnga; a ra zoe yãnd ye la a pẽg Wẽnd tɩ b Yʋʋr n lebg yẽ me rẽnna. Ad-y wakata taame tɩ bʋʋda na n sɩnge ne Wẽnnaam meng zaka neba; la sã n ya ne tõnd la bʋʋda na n sɩnge, sẽn tõdg b Wẽnnaam Koɛɛga reegrã, bãmb dãmb baasg na n yɩɩ wãna? Nin-sõng paam n põs sã n ka naana, nin-wẽng la yel-wẽn-maand na n kẽe yɛ? Dẽn yĩnga bɩ Wẽnd sẽn tʋlg b rãmb ne namsgo dɩk b mens n bas ne b Naanda la Sɩd Soaba la b wɩng ne neer maanego. Ad-m koɛɛg marsã ne karen-saam-dãmba, sẽn be tõnd sʋka; mam meng yaa kãsem-soab wa bãmba la m yɩɩ Krista namsga fãa kaset soaba dẽ la m mi tɩ m na n paama bãmb pẽgre, a pukra raare. M kotame tɩ y yɩ bãgr ninga Wẽnd sẽn gũnug yãmba pe-kɩɩmba. Gu-y piisã la ra yɩ rok-m-zug tʋʋmd ye, a yɩ yamleoog tʋʋmde wa Wẽnd sẽn date. Da yɩ rolb yooda yĩng ye, a yɩ taab sõngr yamleoog bala. Da bao-y n dɩ naam neb zug ye. Bao-y bala n yɩ taoor dãmba sẽn wilgd piisa so-sõngo. Wotoone, Pe-kɩɩm sõma naaba pukr daare y na reeg y pẽgr sẽn kõn sɛ pugla. Woto me yãmba, kom-bɩɩba, reeg-y kãsem-dãmba goama; yɩ-y sulg-m-meng rãmba y taab taoore. Ad-y Wẽnd mongda wilg-m-meng rãmba n kõt yam-sulgr dãmba. Dɩlla bɩ y sulg y mens Wẽnnaam taoore tɩ b tõog n zẽk yãmba, b raara sã n ta. Bas-y y zu-loeesa fãa ne bãmba tɩ bãmb meng n na n ges y yelle. Yɩ-y neb sẽn tõe b mense la maan-y gũusgu tɩ yãmb bɛyã, Sʋtãana, gilgdame n yãbd wa gɩgemde n baood a sẽn na n dɩ a soaba. Tõdg-y Sʋtãana zãnga la y tall y tẽeb kẽnkẽ, n mi tɩ yaa namsg a woto buudu bala la saam-biisa namsd zĩig zãnga. Y sã n paam n nams bilfu, ad-y Wẽnd sẽn ya kũuna fãa kõatã la bãmb n bool yãmb tɩ y wa rɩ vɩɩm sẽn kõn sɛ yõodo ne Krista a Zezi, Bãmb meng b toore n na n le yals yãmb y nao zutu la b kõ-y keelem la pãnga tɩ b mak y mimsg n konge. B soog pãng la ziir daar fãa. Ami! M kɩtame t'a Silvẽ gʋls-y sebr bil kãngã. Yẽ la m get wala m saam-biiga sẽn ka tol n bak ne m ye. M sagend-y lame la m wilgd-y lame tɩ kũun ning y sẽn paama, yẽ la Wẽnd kũun menga la tall-y kũun a woto buud neere. Babilon Tigenga Wẽnd sẽn tũusi wala b sẽn tũus yãmbã tɩ b pʋʋs yãmba. Pʋʋs-y taab ne saam-biis sẽn nong taab pʋʋsgo. Laafi zĩnd ne y fãa sẽn vɩ Krista maasmẽ! A Zezi Krista sõgne la b tʋʋm-tʋmda, maam a Simo Piyɛr, n pʋʋsde. M pʋʋsda neb niyns fãa sẽn paam-b tɩ d Wẽnnaam la d Fãagd a Zezi Krista ko-b tẽeb sẽn be yõodo wala tõnd dẽnna. Soaal a Zezi Krista bãngrã sudg-y bark la laafi zembala. Wẽnd ne b pãnga kõo tõnd vɩɩnd-ne-bãmb la waoog-bãmb yamleoogo. B puka tõndo Ned ninga sẽn boola tõndo ne b pãng la b ziiri. B kãaba tõnd kãab noodo la kãab bɛda: b kãab-d la b wẽndlema pʋɩɩre. La woto wã b zãaga tõnd ne dũni wã rẽgd la a tʋls wẽnse. Rẽ me yĩng la y tog n modge tɩ y tẽeba naag ne vɩɩm sõngo, tɩ vɩɩm sõng naag ne bãngre, tɩ bãngr naag ne tõog-m-menga, tɩ tõog-m-meng naag ne beoog beoog fãa modgre, tɩ modgra naag ne Wẽnd waoogre, tɩ Wẽnd waoogr naag ne saam-biis nonglem, tɩ saam-biis nonglem naag ne Adem biig fãa nonglem. Ade, dẽ fãa sã n beẽ, dẽ fãa sã n pida zãnga, y kõn zĩi n pa tʋmnẽ ye, n pa womd biisi sẽn ya tõnd Soaala a Zezi Krista bãngra ye. Ned ning sẽn ka paama kũun kãensa lebgda zoanga, ned sẽn pa ne yɩɩga; sẽn yĩmd t'a paama a pĩnd dẽgda pekre. Bɩ y le wɩng n paase, m saam-biisi, n kɩ yẽgna Wẽnd sẽn bool-y la b welg-y toora maasmẽ. Sã n ya woto rabeem ka be ne y raar a ye ye lʋɩɩs ye. Yaa woto la b na n pids b kũuna zãnga n kẽes yãmb d Soaala la d Fãagd a Zezi Krista rĩung sẽn ka be sɛɛba pʋgẽ. Yaa rẽ yĩng la m na n kell n tẽeg-y yell kãnga daar fãa, ba m sã n mi tɩ y ka yĩmi. Modg-y n vigl y mens sɩd kãnga pʋgẽ. Mam tẽedame tɩ m sẽn nan ket m tẽng zug zãnda maasmẽ, segdame tɩ m sõng-y ne yell kãnga tẽegre tɩ y ra wa suus ye. Soaal a Zezi Krista n zoe n wilg-m tɩ m mii tɩ loog n bas m zãnda wakat yaoome. Woto wã mam me na n wɩngame, tɩ m loogr poore, bɩ yell kãensa kell n pa y pʋtẽerẽ. Sɩd me, tõnd sẽn wilg yãmb bũmb ninga fãa, Soaal a Zezi Krista sẽn na n wa ne pãng ningã, ad-y ka solem-bãna bɩ yelbũna la d tão-y ye, yaa d sẽn deng n yãend bãmb meng ziirã ne d nifu. Yaa Wẽnnaam Ba n kõ-b naam la waoogre. Bãmb n yiis b pãng la b naam gomd kãnga: «Ad-y yaa mam Bi-nongre, ad-y m yam kẽe-a la zãnga.» Koe kãngã, d wʋm-a lame; a ra yita yĩngri d sẽn waa n be ne bãmba tãnga zugu. Pʋs n yaa rẽ yĩnga la d gãd bãngdba goma sõmb-sõmbo. Y maanda neere, y sã n mams-b wala fitil bugum sẽn wɩt zĩ-sobdo n gũud beoog vẽegre la tõd-beoog ãdg pukri. Reng-y n bãng-y tɩ bãngr gomd sẽn be sebrẽ, ninsaal ka bee n tõe, a menga toore, n wilg-a võor ye. Bãngr gomd ka yit ninsaal sũurẽ ye; sẽn gom b rãmba goma Wẽnd zĩigẽ la ne a Vʋʋsem Sõng vẽnegre. Neb n zĩndi buuda pʋga n yɩ zirẽ-be-bãngdba; la yãmb me sʋka zirẽ-be-neb n na n yik n yet tɩ b yaa karen-saam-dãmba; bãmb n na n wa ne welg yoodo; b na n basa Soaala sẽn fãag-bã la woto b ka na n kaoos n wã b mens ye. Neb wʋsg na n kẽ-b lame n bʋdg moogo la b na n kɩtame tɩ sɩda sor sãame. B sẽn dat tɩ b poorẽ yɩ yalengo, b na n yiisa goam noodo n belg yãmba, la bãng-y tɩ b bʋʋd zoe n kaoome la b wãab beoog zoe n vẽegame. Wẽnd ka bas malɛgsa taale b yel-wẽnda poor ye. B pagb la namsg zĩigẽ la lik bog-zulungẽ tɩ b zĩ be n gũud Bʋʋda raare. B ka bas tẽn-kʋdem wẽnnẽ dãmba taale, sã n ka neba nii, a Nowe sẽn paase, t'a Nowe n da wilgd-b tɩ b bas wẽnga. B kɩtame tɩ sa-kẽeng ni n sãam yel-maandba fãa. B tʋlg n zãmsa yel-maandbã sẽn na n pʋga me, woto b kɩtame tɩ Sodom la Gomor tẽns rɩ bugum n sarem zãnga. B fãaga nin-sõng a Lot t'a sũur da sãamda ne yoaadba manes wẽna; — nin-sõnga Lot ra namsdame t'a sẽn da be bãmb sʋka, a ra neeme la a wʋmd b sẽn maand beoog beoog fãa — Wẽnd maana boto n wilg tɩ b tõe n yolsa nin-sõma namsg buud fãa pʋgẽ n yaool n kees nin-wẽnsa n na n sɩbg-b Bʋʋda raare. Sẽn na n paam-b sɩbgr n yɩɩda, yaa sẽn zĩb ne yoob tʋls wẽnse, sẽn tũud-b yĩnga raabo n sãbsd Ziira Naaba. Nin-wẽnsa tara wʋglem la tɩtaam; b pa zoet b na tʋʋs yĩngr dãmb mens ye. Malɛgsa ne b sẽn yɩɩd-b ne pãng la tõogã, yaool n pa saagd n kãneg la b luk nin-bãmb bãong Soaala taoor ye. Ad-y karen-saamb yooda wẽnda rũms sẽn ka tar yam tɩ b tɛk yaa yõk n kodg bala. Yaa bãmb n tʋʋsd-b sẽn ka mi la b me na n baasa baasg a woto buudu. B wẽnema n wat ne b sɩbg wẽnga. Bãmb dãmb yaa m bao m sũ-noog tɩ wĩndg keta. Bãmb n dẽgem n sãam zãnga; b sũ-noog la b belg yãmba, n naagd yãmb n dɩt noodo. B gesgo, bãng pʋg-yoodr gesgo; b sẽn pa tɩgd wẽngã, b kẽesda wẽng yamleoog sẽn pa tar-b pãnga sũurẽ; Wẽnd sẽn yãk b barkã, raab wagl bal n pid-ba! B basa so tirg n kẽ weoog n menem wala a Balaam, a Bosor biiga, zãmb ligd yamleoog sẽn yõke. Rẽ me n wa ne a kʋɩdgre, tɩ rũng sẽn ya mugtãa n yaag a noor n gom wa ninsaala n kiis bãngd kãng gãeemdo. B sɩd yaa wa bul-kẽoodo, wa sob raoog sawadgo; b zĩig pida ne lik la lik bala. Gom faad la b mi. Ne b tʋls wẽns la b yoob tʋʋma, b takda sẽn nan ka paam-b n zãag ne b pipi tudgrã. B kãabda b taab soog-m-menga, la b mens balgame n zĩi ne wẽng yembdo. La sɩda bũmb sã n yɩɩd f ne pãnga, fo lebga bõn kãng yamba. Neb sã n zoe n zãag ne zamaana rẽgdo, b sẽn bãng Soaala la Fãagd a Zezi Krista yĩnga la b lɛɛg n le lʋɩt a pʋgẽ, tɩ wẽnga le tõog-ba, ka bãmb yell n sãam n yɩɩd pĩnd sɩda? B sã n da ka bãngẽ sõmblema sore n são b sẽn bãng la b baas n kɩɩs b sẽn taas-b no-sõng ningã. Yaa woto la b yella lebg sɩda wa yelbũn kãnga: bãaga lɛɛg n vela a meng wʋbdo; bɩ wa b sẽn togs yɛsa: Kurkur yãanga, ka yãe n pek koom n lebd a begdẽ. Yãmb ne la, m kom-sõma, ka wã la sebr a yiib soaba m sẽn gʋls yã? La yiiba fãa pʋgẽ, m maoome n yalg y pʋtẽer la m kõ-y bãngr sõngo. Tẽeg-y bãngdb sõma sẽn wilgi la noor ning Tʋʋm-tʋmdba sẽn kõ yãmba, tɩ yaa d Soaala la d Fãagda meng noore. Bɩ y bãng tɩ yaoolem wakatã neb sẽn nong b taab laado, neb sẽn mi b tab yaalgo n na n tũ b zʋg wẽngã n la yãmba. B na n saadame n maanẽ: «Ye! Soaala sẽn kãab tɩ b na n lɛɛg n waame wã bɛɛ? Yaab rãmba sẽn ki raar zãra, la fãa ket n yaa wa dũni wã sɩngrẽ.» Ad-y b maanda wala b ka mi tɩ wakat n zĩndi tɩ Wẽnd gome tɩ saaga la tẽnga zĩndi; tɩ Wẽnd gome tɩ tẽnga sẽn da lis koomẽ wa n nug n yi; tɩ Wẽnd gome tɩ koom dɩ wakat kãng dũniya. Ad-y rũnna saagã la rũnna tẽngã, Wẽnd Gomd yɛnga bas-b la kɛɛnga, b bas-b-la bugum yĩnga, Bʋʋda raare la nin-wẽnsa wãab raare. La bũmb n be, m kom-sõma tɩ y ka tog n yĩm ye: Soaala nengẽ daar a ye zema tusri la yʋʋm tusri me ka yɩɩd daar a ye ye. Ad-y Soaala ka tadg b kãabga pidsgu, wala neb kẽer sẽn wɩt-ba n yet tɩ b pa yãgda ye. Yaa sũ-maasem la b maand ne yãmba, tɩ b sẽn datã ka ned ba a ye menengo, yaa b fãa paam vɩʋʋg n tuub b yel-wẽna. Soaala daar yaool n na n tĩiga wa wagdre. Badaare yĩngr teeda fãa na n bõra zãnga, bõn-witi wã fãa na n yẽnegame la tẽnga ne a teeda fãa na n dɩɩ bugum kasi. Bũmba fãa sẽn na n sʋʋgã, y zɩ marsã tɩ y tʋʋmd yaa vɩɩm sõngo la pʋʋsgo. Yaa y segl n gũudĩ la y rabsd Soaala raare; baraare, saaga ne a bõn-yoodã na n wulumda ne bugum n sʋʋge, tɩ bõn-witsa fãa yẽneg n dʋʋge. Ad-y yaa sa paalle la tẽn paalle la tõnd gũuda, wala b meng sẽn kãabe, la sõmblem n na n ti roog b pʋgẽ. Woto wã, m kom-sõma, wɩng-y marsã ne y sũur fãa n yɩ sõma, la y rok yell buud fãa y zug tɩ b wa mik tɩ y sũur pida ne laafi. Tags-y tɩ Soaala sũ-maasma ne yãmb yaa y sõngr yĩnga, wala d sam-biiga Pol me sẽn gʋls n togs-y ne yam ning Wẽnd sẽn kõ-a. A sɩd wilgda rẽ ne sɛb niyns fãa a sẽn gʋls yãmbã. Zĩis kẽer meng wʋmb yaa toog tɩ zɩtba la yam yaals rãmb dat n lebg-b tulumdi — wa b sẽn nong n maan ne Sebr sõngo — la rẽ yaa b meng bõne la b baooda. Sã n ya yãmba, m kom-sõma, y sẽn mi tiirã, bɩ y maan gũsgu. Da bas-y tɩ nin-yood wa tudg-y la b koms y pãng ye. Yãmb wee n tar bɩʋʋng bal ne sõmblem la ne Krista a Zezi, d Soaala la d Fãagda bãngre. B pʋs n soog pẽgre, marsã n digd wakat sẽn kõn zĩnd sɛɛbo. Amina! Yaa Gomd ning sẽn wata ne vɩɩma yell la d gʋlsd-y. Gomd kãng la sẽn dag n be-a al dũni sɩngrẽ, tõnd tʋbr wʋma b yelle, tɩ d nif yãend-ba, d paam n ges-b lame n tɩge, d nus sɩɩs-b lame, — Vɩɩma sɩd pukame, tɩ d yãend-a la d kõt kaseto; Vɩɩm kãng ka be sɛɛb ye, tɩ d wat n na n wilg-a yãmba, a ra sɩng n bee ne Ba n yaool n wa lik a meng tõndo — d sẽn yãend la d sẽn wʋme la d wilgd yãmba, tɩ yãmb me wa lagem ne tõndo. Tõnd sẽn lagem ne b rãmbã, yaa Wẽnnaam Ba la b Biig a Zezi Krista. Yaa rẽ la d gʋlsd-y tɩ y sũ-nooga pid zãnga. Ad-d sẽn wʋm b nengẽ n wat n na n wilg yã: Wẽnd yaa vẽenem, lik ka be b nengẽ ye. Tõnd sã n kẽnd likẽ, n yaool n yet tɩ d lagma ne bãmba, d yagda zirẽ, d pa togsd sɩd ye. La sã n yaa vẽenemẽ la tõnd kẽnda, b meng sẽn be vẽenemẽ wã, bãmb n lagemd tõnd ne taaba, la b Biiga Zezi zɩɩma n pekd tõnd yel-wẽnd buud fãa. Tõnd sã n yeele: «D ka tar yel-wẽnd ye», d belgda d mense, sɩd ka be d pʋgẽ ye. Tõnd sã n wilg d yel-wẽna, bãmb sẽn pidsd b kãabgo la b ya zemsg soaba, bãmb na n kõo d yel-wẽna sugri la b pek-do ne rẽgd buud fãa. Tõnd sã n yeele: «D ka tar yel-wẽnd ye», tõnd kɩtdame tɩ b lebg zirẽ-be-neda la b Gomda ka na n pa ne d ye. M kom-bõonego, m gʋlsd-y la woto tɩ y zãag ne yel-wẽnde. La ned sã n wa maan yel-wẽnde, bɩ a tẽeg tɩ d tara Wɛɛmba d Ba sɛɛgẽ: nin-sõng a Zezi Krista. Yaa b maoongã n dond d yel-wẽna samde, la ka tõnd dẽnna bal ye, yaa dũni wã fãa yel-wẽna. Ad bũmb ning sẽn wilgd tõndo tɩ d mi-b lame: b noya reegre. Ned ninga sẽn yeela: «M mi-b lame» n yaool n ka reegd b noya, yẽ soab yaa zirẽ-be-neda, la a soab ka tar sɩd a pʋgẽ ye. Ned ninga sẽn deegda b Gomdã, yaa yẽ soab pʋgẽ la Wẽnd nonglma paam n pid zãnga. Yaa rẽ n na n kɩt tɩ d bãng tɩ d lagma ne Bãmba. Ned ninga sẽn yet t'a lagma ne bãmba, yẽ soab tog n vɩɩnda bãmb meng vɩɩm. M kom-nongdse, ka no-paalle la m kõt-y ye, yaa no-kʋdgo, no-kãng la y paam al sɩngrẽ. No-kãng yaa koɛɛg ning y sẽn wʋma. La m baas n le paasdame tɩ yaa no-paalle la m kõt yãmba, — la rẽ yaa sɩd ne yãmba, la ne Krista — tɩ lik wɩlgdame tɩ vẽenema meng zoe n yãgda. Sẽn gomd-a t'a bee vẽenemẽ n yaool n ket n kis a saam-biiga, ket n bee likẽ. Sẽn nong-a a saam-biig paada vẽenemẽ la bũmb ka bee n na n tus-a n lub ye. Sẽn kis-a a saam-biig bee likẽ, a kẽnda likẽ, a ka mi a sẽn dabdẽ ye tɩ lika kiisa a nina. Yaa yãmb la m gʋlsda, m kamba, tɩ y paama y yel-wẽna sugr, bãmb yʋʋr yĩnga. M gʋlsd-y lame, ba rãmba, tɩ y paam n bãnga sẽn be-a al sɩngrẽ. M gʋlsd-y lame, kom-bɩɩba, tɩ y tõoga wẽnema naaba. M gʋlsd-y lame, kom-bõonego, tɩ y mii Ba. M gʋls-y lame, ba rãmba, tɩ y mii sẽn be-a al sɩngrẽ. M gʋls-y lame, kom-bɩɩba, tɩ y tara pãnga, tɩ Wẽnd Gomda be-la y pʋgẽ, la yãmb tõoga Wẽnema naaba. Da nong-y dũnia bɩ sẽn be a pʋgẽ ye. Ned sã n nong dũnia, a ka le nong Ba ye. Sẽn be dũnia pʋga, — sẽn noom yĩngã, nina sẽn ne n tʋlla, arzɛk ne a sẽn dogd a soaba: wilg-m-menga — rẽ fãa ka yit Ba wã nengẽ ye, b yita zamaana pʋga. Zamaana yaool n loogdame, ne a tʋls wẽnsã, la ned ninga sẽn maanda Wẽnnaam yam, yẽ soab paada daar fãa. M kom-bõonego, yaoolem wakata taame, y wʋmame tɩ Krista bɛ n na n wa, ad-y yaa bãmb wʋsg meng n zoe n wa, la rẽ n wilgd tɩ yaoolem wakata taame. Bɛɛba yii tõnd sʋk waare, la b ka tõnd neb ye. B sã n dag n yaẽ tõnd neba, b naan n paẽ ne tõndo. Da tog n wa vẽnegame tɩ b ra pa tõnd neb ye. Sã n ya yãmba, yãmb paamame tɩ Wẽnd Neda taag y kaam la y lebga neb sẽn pid ne bãngre. M gʋls-y lame, la ka wala y ka mi sɩd ye, ya y sẽn mi-a wã yĩnga, yaa y sẽn mi tɩ zirẽ-beed ka yit sɩd pʋgẽ wã. Zirẽ-be-neda la ãndã, sã n ka sẽn kɩɩsda t'a Zezi la Wẽnd Nedã? Ad-y Krista bɛ la yẽ soaba! A kɩɩsda Ba la Biiga. Sẽn ka mi-a Biiga fãa ka Ba wã ned ye. Sẽn tẽed-a Biigã yẽ soab bee ne Ba. Sã n ya yãmba, modg-y tɩ y sẽn wʋm bũmb ning sɩngrẽ wã ra yi yãmb pʋtẽerẽ ye. Zãmsg ning y sẽn paam sɩngrẽ wã sã n pa-y y pʋtẽerẽ, yãmb me na lagem ne Biig la Ba. B sẽn kãab yãmb bũmb ninga la woto: vɩɩm sẽn kõn sɛ. Yaa rẽ me la m tʋlg n gʋlsyã sẽn dat-b n tudg yãmbã poorẽ. Sã n ya yãmba, y ket n taaga Wẽnd Neda kaam la y pa le tar zãmsg tʋʋmd ye. La b meng sẽn zãmsd yãmb bũmb fãa wã n dat sɩda la b kis zirẽ-beedã, pa-y ne-ba, wa b sẽn wilgã. N ye! M kom-bõonego, pa-y ne bãmba woto b sã n wa lik b menga d kõn sãmb ye la yãnd kõn yõk-do, wala d paam n zãaga ne bãmba b Waoonga raar ye. Y sã n deeg tɩ b yaa sõngo, bɩ y bãng tɩ ned ning fãa sẽn baood sõmblem yita bãmb nengẽ. Ges-y Ba sẽn wilg nonglem ning ne tõnd al tɩ d tõe n bool tɩ Wẽnnaam kamba, la d sɩd yaa Wẽnnaam kamba! Zamaana rãmb sã n ka mi tõndo, yaa b sẽn ka reng n bãng Krista. M kom-nongdse, tõnd zoe n yaa Wẽnnaam kamba, yaa sẽn pʋgda bal la b nan ka wilg-du. D miime bala tɩ b Waoonga raare, d na n wẽnega bãmba, tɩ d na n yãend-b lame wa b sẽn ya-la. Ned ning fãa sẽn teega bãmba, lebgda yɩlgemd wa Krista sẽn ya yɩlgemdã. Sẽn maand-a yel-wẽnd maanda sẽn kisi, tɩ yaa maan sẽn kis la yel-wẽnde. Y yaool n wʋmame tɩ b sẽn wa dũnia b waame n na n yẽes yel-wẽnde la bãmb meng ka maan yel-wẽnd ye. Sẽn paada ne bãmb ka maand yel-wẽnd ye. Sẽn maanda yel-wẽnd ka yãend-b ye la a ka mi-b ye. M kom-bõonego, da bas-y tɩ ned tudg-y ye. Sẽn maand-a neer yaa nin-sõngo wa Krista sẽn ya nin-sõngo. Sẽn maand-a yel-wẽnde kẽe Sʋtãana tɩ Sʋtãan yaa yel-maand al sɩngrẽ. Yaa Sʋtãana tʋʋm yooda menesg yĩnga la Wẽnd Biiga wa yã. Wẽnd sẽn dog a soab ka maand yel-wẽnde, tɩ yẽ soab tara b zʋgo; woto wã a ka tõe n maan wẽnga, Wẽnd sẽn dog-a wã yĩnga. Ad bũmb ning sẽn bakd Wẽnnaam kamba la Sʋtãan kamba: sẽn ka maanda neere ka Wẽnd biig ye, wala sẽn kis-a a saam-biig me sẽn ka Wẽnd Biigã. Ad koɛɛg ning y sẽn wʋm sɩngrẽ: d tog n nonga taaba. D da saag n wẽneg a Kayẽ sẽn kẽ Wẽnema soab tãpẽ n kodg a yao wã ye. La a kodg-a la bõe yĩnga? Yaa a meng tʋʋm sẽn da ya tʋʋm yoodo, t'a yao wã rẽnd ya sõma. Da yɛɛs-y ye, m saam-biisi, zamaana rãmb sã n kis-y ye. Tõnd yẽ miime tɩ d yii kũumẽ n kẽ vɩɩmẽ, la rẽ yaa d sã n nong d saam-biisã. Sẽn ka nong-a a saam-biig fãa yaa nin-kʋʋda; la y mi tɩ nin-kʋʋd ba a ye ka tar vɩɩm sẽn kõn sɛ ye. Ad bũmb ning sẽn puk b nonglem: Bãmb dɩka b vɩɩm n kõ tõndo, la woto tõnd me tog n kõ d vɩɩm d saam-biisa yĩnga. Ned sã n tar tẽng zug arzɛka n ne a saam-biig zu-loɛɛga la a maand wa a ka ne, Wẽnd nonglma yɩta a wãn n pa ne yẽ soaba? M kom-bõonego, d nonglma ra yɩ bʋʋre la gom nood ye, nonglma yɩ sɩda, a tũ ne tʋʋmde. Yaa rẽ n na wilg tɩ d bee sɩd pʋgẽ tɩ d sũur me gãe ne laafi, ba d sũura sã da ratẽ lame n ning-d taale, tɩ Wẽnd yɩɩd-a lame, la b mii fãa. M kom-nongdse, d sũur koɛɛg sã n ka ningd-d taale d zĩi ne sũ-keelem Wẽnd taoore. D sẽn kos b bũmb ning fãa d paamd-a la bãmb nengẽ, d sẽn deegd b noe wã, la d maand sẽn tat b yama yĩnga. B noora la woto: d tẽ b Biig a Zezi Krista yʋʋr yĩnga, la d nong taaba wala b sẽn zoe n togsã. Sẽn deegda noor paada ne Wẽnd tɩ Wẽnd me paad ne a soaba; ad bũmb ning sẽn wilgd tõnd tɩ b bee ne do: yaa b Vʋʋsma b sẽn kõ tõndã. M kom-nongdse, maan-y gũusgu ne neb kẽere, bãng-y b yama sã n sɩd yaa Vʋʋsem Sõng rẽnna, la tẽeg-y tɩ zirẽ-be-bãngdb ka tɛk n wa moogo. Ad bũmb ning sẽn wilgd b bãngra sã n yita Wẽnd nengẽ: yaa reeg t'a Zezi Krista waa tẽng zugu ne ninsaal yĩnga. Ned ning fãa sẽn kɩɩsd a Zezi, yẽ soab ka yit Wẽnnaam nengẽ ye; yẽ soab tara Krista bɛ wã yam. Yãmb wʋma b sẽn yeele tɩ bɛ wã na n waame, ade, marsã a zoe bee dũniya. Yãmba kom-bõonego, yãmb yaa Wẽnnaam kamba, la yãmb n maan raoodo ne bɛɛbã. Yãmb sẽn tũuda soabã yɩɩda sẽn be-a dũni wã pʋgã. Krista bɛɛba la zamaana rãmba; yaa rẽ me yĩng la b gomd wa zamaana rãmba tɩ zamaana rãmb kelgd-b. Tõnd yẽ yaa Wẽnd soolem. Sẽn mi Wẽnd kelgda tõndo; sẽn ka mi Wẽnd ka kelgd tõnd ye; la wotome la d bakd sɩda ne zirẽ-beedo. M kom-nongdse d nong taaba, tɩ nonglem yita Wẽnd nengẽ la ned ning fãa sẽn tar nonglem, yaa Wẽnd biiga, la a mii Wẽnde. Sẽn ka tara nonglem ka bãng Wẽnd ye, tɩ Wẽnd yaa nonglem. Ad Wẽnd sẽn puk b nonglma toto ne tõndo: Wẽnd tʋma b Bi-yenda tẽng zugu sẽn na n yɩla tɩ d paam vɩɩm bãmb nengẽ. B nonglma sẽn tũ sor ninga la woto: ka tõnd n deng Wẽnnaam nonglem ye, bãmb n deng tõnd nonglem n tʋm b Biiga tõnd sʋka tɩ b wa ki d yel-wẽna yẽesg yĩnga. M kom-nongdse, Wẽnd sã n nong tõnda woto segdame tɩ tõnd me nong taaba. Ned nif zɩ n yãend Wẽnd ye. Tõnd sã n nong taaba Wẽnd bee ne do, b nonglma pida zãng ne tõndo. Bũmb ning sẽn wilgd tɩ Wẽnd bee ne do tɩ tõnd me be ne bãmba: yaa b sẽn sudg tõnd b Vʋʋsem. Sã n ya tõndo, d yãendame la d kõta kaseto tɩ Ba tʋma b Biiga, wala dũniya Fãagda. Ned ning sẽn tẽed tɩ Krista yaa Wẽnnaam Biiga, Wẽnd bee ne yẽ soaba la yẽ soab me bee ne Wẽnde. Sã n ya tõndo, tõnd bãnga Wẽnd nonglma ne tõndo la d tẽeme. Wẽnd yaa nonglem. Sẽn pida ne nonglem paada ne Wẽnd tɩ Wẽnd me paad ne yẽ soaba. Nonglem pidsda a tʋʋmd zãng d pʋgẽ a sã n tõog tɩ d pa yɛɛsd Bʋʋda raare. A Zezi sẽn pa yɛɛsd bũmbã, tõnd me yaa boto dũni kãnga pʋga. Nonglem ka naagd ne rabeem ye, nonglem sẽn pid zãagda rabeem buud fãa; sɩbgr la f yãeta n digd rabeem; dɩlla sẽn digda rabeem, ka tar nonglem pidung ye. Sã n ya tõndo, d nong bãmba, tɩ bãmb n yɩ pipi n nong tõndo. Ned sã n yeele: «M nonga Wẽnde» n yaool n kis a to, yẽ soab yagda ziri. Ade, f sã n ka nong f saam-biig f sẽn ne ne f nini, f yɩta wãn n nong Wẽnnaam f nif sẽn ka tõe n yãende. D sẽn paam noor ning b nengẽ wã la woto: Sẽn nonga Wẽnd bɩ a nonga saam-biiga. Ned ning sẽn tẽeda t'a Zezi yaa Krista yẽ soab dɩta rogem ne Wẽnde. La f sã n nong ned ba f nonga a sẽn dog biig ninga. D bãngdame tɩ d nonga Wẽnnaam kamba d sã n nong Wẽnd menga n deegd b noore. Wẽnd nonglma yaa bãmb noya reegre la noy wã ka zɩs ye, tɩ Wẽnd sẽn dog a soab tõoga dũnia la ad-d sẽn tõog dũnia ne bũmb ningã, yaa d tẽebã. Ãnda la sẽn tõoga dũniya, sã n ka sẽn tẽeda t'a Zezi Krista yaa Wẽnd Biiga? Ya a Zezi Krista n wa ne koom la zɩɩm, la ka ne koom bal ye, yaa ne koom la zɩɩm. A Vʋʋsem Sõng n kõt kaseto, la Vʋʋsem Sõng kaset yaa sɩda. Woto, kaseta rãmb yaa b tãabo: a Vʋʋsem Sõngo n paas koom la zɩɩm, la b kaseta ka kɩɩsd taab ye. D sã n deegd ninsaalb kaseto, Wẽnd dẽnd n yɩɩde. La yaool n yaa Wẽnd kaseta la d paam b Biiga poorẽ. Ned ninga sẽn tẽed Wẽnd Biiga yẽ soab reegda kaset kãnga. Sẽn ka tẽed-a Wẽnde, geta bãmb wa zirẽ-be-neda, b pa tẽ kaset ning b sẽn kõ b Biiga ye. La kaset kãng la woto: Wẽnd kõo tõnd vɩɩm sẽn kõn sɛ la vɩɩm kãng be b Biiga nengẽ. Sẽn tara Wẽnd Biiga tara vɩɩm; sẽn ka tara Wẽnd Biiga ka tar vɩɩm ye. Yaa yãmb sẽn tẽed Wẽnd Biiga yʋʋrã la m gʋls woto, tɩ y bãng tɩ y paama vɩɩm sẽn kõn sɛ. D sũur kegma ne Wẽnde n mi tɩ d sã n kos b bũmbu wala b sẽn date, b kelgd-d lame. D sã n mi tɩ Wẽnd kelgda, d kosg bud fãa, d miime tɩ d na paam d sẽn kos b bũmb ningã. Ned sã n yãend a saam-biig t'a maand yel-wẽnde sẽn ka wat ne a kũum, a pʋʋse la Wẽnd na kõ saam-bi-kãng vɩɩm. Ka gomd neb niyns yel-wẽnd sẽn wat ne b kũuma ye, tɩ yel-wẽnd n be n wat ne kũum la ka yell kãng yĩng la m yet tɩ b tog n pʋsame ye. Maan sẽn kis fãa yaa yel-wẽnde la yɛl kẽer n be n wat ne kũum. D miime tɩ Wẽnd sẽn dog a soab fãa ka maand yel-wẽnd ye, tɩ Wẽnd Biig gũuda yẽ soaba la woto Wẽnema soab ka tar a gaab ye. D miime tɩ Wẽnd n so tõndo, tɩ dũni wã tõr yaool n gãe Wẽnema soab soolmẽ. D miime tɩ Wẽnd Biiga waame la b kõ-d la yam tɩ d tõog n bãng Sɩd soaba. Tõnd lagma ne Sɩdã soaba, ne b Biig a Zezi Krista. Bãmb la Wẽnd, Sɩd soabã, bãmb la vɩɩm sẽn ka be sɛɛbo. M kamba, da saag-y n waoog wẽn-naandsa ye. Yaa maam, nin-kẽema, n pʋʋsd Tigengu, m Pʋg sõngã, ne a kambã m sẽn nong ne nonglem menga, la ka maam bala n pʋʋsde, yaa neb niyns fãa sẽn bãng-b sɩdã. Sɩd kãng yẽne pʋgẽ la d be la d na n kell n pa, n tãag vɩɩm sẽn ka be sɛɛbo. D datame tɩ y kell n pid ne sõmblem, ne nimbãan-zoeere la laafi ning sẽn yit Wẽnnaam Ba nengẽ la a yit a Zezi Krista nengẽ, bãmb Biig, sẽn tar sɩda la nonglem. M sũur yɩɩ noogo wʋsgo m sẽn yãend f kamb kẽer sẽn tũud sɩd wa Wẽnd Ba sẽn kõ-d noor ningã. La marsã Pʋg sõngo, ad ka no paalg la m kõt-f ye, ayoo! Yaa noor ning d sẽn paam al sɩngrẽ, yaa nong taab noorã. D nonglem ne Wẽnd yaa d deeg b noya. La y sẽn paam noor ning al sɩngrẽ wã yaa y vɩɩnd ne taaba, nonglem pʋgẽ. Neb n yik zembala n tuut-b taaba n kɩɩsd t'a Zezi Krista lebga Neda: bãmb la Sʋtãana, bãmb la a Zezi Bɛ wã. Bɩ y gũus tɩ y tʋʋma ra lebg tʋʋm faad ye, mao-y n dɩ b yõod pidingu. Ned ning fãa sẽn yet t'a mii zãnga n yaool n basd a Zezi Krista zãmsgã, yẽ soab ka be ne Wẽnnaam ye. Sẽn gãda Krista zãmsgã n be ne Wẽnnaam Ba la b Biiga. Ned sã n wat y nengẽ, n ka tar a Zezi zãmsgã, bɩ y ra reeg a soab y yir ye, da pʋʋs ned a woto buud ye. Sẽn pʋʋs-a naag-a la a tʋʋm wẽngẽ. M da rat n togs-y la koees wʋsgo la m pa tʋlg tɩ yɩ ne sebr ye tɩ m saagda m na paam n wa y nengẽ; m sã n wa, m na paam n togs-y rẽ fãa ne noore, tɩ d sũ-nooga pid zãnga. Tigengã, f Tão sõnga kamb tɩ b pʋʋs-fo. Yaa maam, nin-kẽema, n pʋsd a Gayus m sẽn nong ne nonglem menga. M kotame, m zoa sõngo, tɩ Wẽnd kõ-f laafi zãnga, f yĩng la f sɩɩg laafi. Kristneb n wa ka la b kõo f kaseto tɩ f vɩɩma tũuda tɩrga, m gomda a sẽn ka lak ne sõmblem la sɩd sorã, ad-m sũur yɩɩ noog al wʋsgo. Ade, bũmb ka be n noogd m sũuri n yɩɩd m sẽn wʋmd tɩ m kamba tũuda sɩda sora ye. M zoa nongre, f sɩd rɩka f meng zãng n kõ kristnebã ba b sã n ya bu-zẽmba. B fãa pẽga f nonglma Tigenga taoore. Fo me na maan neere n sõng-b ne b so-toaka rɩɩbo wala Wẽnd sẽn date. Yaa Krista yʋʋr yĩng bala la b rɩk sore n pa sak n deeg bũmb bu-zẽmba nengẽ ye. D tog n deega neba woto buudu tɩ woto la d naagd-b n tʋm sɩda wilgr tʋʋmde. M da paam n gʋlsa sebr n kõ Tigengã. La a Diotrefɛs, ned sẽn pid ne tɩtaam la a baood n na n yɩ taoor soaba, pa sak n deeg-d ye. Woto wã, m sã n ta be m na tẽeg a sẽn maan fãa, n paas gom-beed niyns fãa a sẽn yelg tõnd poorẽ. Rẽ pa sek-a ye, t'a zãgs t'a meng kõn deeg saam-biisa sãando, la a gɩdgd sẽn dat-b n deeg-bã, n tol n yiisd-b Tigengu pʋgẽ. M bi-nongre, da togs sẽn maand-a wẽng ye, togs sẽn maand-a neere. Sẽn maanda neer bee Wẽnd maasmẽ. Sẽn maanda wẽng ka mi Wẽnd ye. A Demetriyus poorẽ neba fãa kõta kaset sõngo; Sɩd soaba meng naag n kõta kaseto. Mam meng kõta kaseto la fo mi tɩ m kaset yaa sɩda. M da rat n togs-f la koees wʋsgo, la m pa tʋlg tɩ yɩ ne ribl bẽesgo, ribl ne gʋlsg sabl ye. M saagdame tɩ m kõn kaoos n yãend-f ye; woto d na paam n sõs ne taaba. Laafi zĩnd ne fo! F zo-rãmba fãa tɩ b pʋʋs-fo; fo me pʋʋs d zo-rãmbã n kõ-do; pʋʋs-ba a yeyn-ye, ned kam fãa ne a yʋʋre. Maam a Zɩɩd, Krista a Zezi sõgne, a Zak saam-biiga, n pʋʋsd Wẽnd Ba sẽn nong b rãmbã, n bool-b la b bĩng-b toore Krista yĩnga. Bɩ y paam zembala, Wẽnd nimbãan-zoeere, b laafi la b nonglem! M kom-nongdse, m da tʋlla wʋsgo n gʋls yãmb bũmb a ye poorẽ, d fãa sẽn paam fãagra poorẽ. Waa n lebga pakre ne-ma tɩ m gʋlse n segl-y tɩ y zab tẽeba yĩnga, tẽeb ning nin-sõma wã sẽn deege la sẽn ka bõn-tɛɛmdgã. Neb n soos n kẽ sʋka la bãmb dãmb poorẽ la b ra tog n yeel al daar zãra: Ad neb sẽn ka mi Wẽnd waoogre n teemd tõnd Wẽnda yel-sõmde t'a lebgd yoobo la b basd kɛɛnga d Zu-soab la d Soaala, a Zezi Krista. M dat n tẽeg-y lame, yãmb sẽn mi yɛla fãa zãngã, tɩ Soaala sẽn fãag b neba n yiis-b Ezipt tẽnga, b lɛɛg n kʋʋ kɩɩsdbã. Sã n ya ne malɛgs niyns sẽn bas-b tɩ b naama fãage, tɩ b kong n dig-ba n yiis b sẽn da beẽ, b bao zĩig n balg-b bãeens sẽn ka tõe n kao. B balg-b la likẽ n gũud bʋ kãsenga raare. Sã n ya malɛgs niyns sẽn bas-b tɩ b reeg b kãsengo tɩ b ka pa b naama zugu, b bĩnga bãmb bʋʋda ra-kãsenga yĩnga la b sẽb-b lame tɩ b be likẽ, wakat buud fãa. Yaa yoob so-yɛng la Sodom la Gomor dãmba me rɩk yã, b me maan wɩɩbdo la b sɩbg-b lame, neb a taaba zãmsg yĩnga, ne bugum sẽn ka kiid lɛ-lɛ. La ade, wala b yika gãeemdo, bãmb me rẽgemda b yĩnsi la b sãbsd yĩngr soaalba, yĩngr na-rɩtba. Malɛk kãsm a Mikayɛl sẽn yik zabr ne Sʋtãan tɩ b maand no-koeemde a Moyiiz yĩnga poorẽ, a ka saag a paoogr ye. A yeelame bala: «M basd-f la ne Wẽnde!» Bãmb yẽ paoogda-b sẽn ka mi, la b sẽn mi bũmb ningã b mi-a-la ne ninsaal yam bala, wala rũng sẽn mi, la rẽ ka wat ne bũmb a to tɩ ka b menesg ye. La yell bee zirẽ-be-mitba zugu; b rɩka a Kaẽ sorã n kẽ moogo; b tudga a Balaam tudgrã, ligd daab yĩnga; b ki-la b tõdgr pʋgẽ wala a Kore. B kɩtdame tɩ y sã n dat n lagem taab n dɩ bɩ ka baasd neer ye. B rɩta noogo tɩ yãnd ka tar-b ye, n pit b pʋse. Ad-y b lebga sawat faad sobg sẽn tar n looda. B lebga tɩɩs sẽn wom n sɛ, n ki b wilẽ la b kʋɩ b yẽgnẽ, n võ n dɩga. Ad-y b yɛsa ne yãnde tɩ b na lɛɛg wʋb wa mogr pʋg sẽn dãmbe t'a wʋbd a ko-puudu. B wẽnda yĩngr ãds sẽn kẽnd yaare la sẽn lebg lik soolem yʋʋm tõt sɛɛb yĩnga. Yaa bãmb fãa poorẽ la a Enok, d yaab a yopoe soab a Adem poorẽ, leok bãngr leokre: «Soaala waa ne b nin-sõma, zãma kõn bãng n sõde, tɩ b na paalg nin-wẽnsa fãa b tʋʋm-wẽna yĩnga la b sẽn gom tɩtaam goama yĩnga.» Yaa bãmb n tar gom-bi, n tar guglengu, n tũud b yĩnga yamleoogo, n gomd wilg-m-meng goama la b belgd neb n na n paam n dɩ. Sã n ya yãmba, m kom-nongdse, tẽeg-y Soaal a Zezi Krista tʋʋm-tʋmdba sẽn wilg bũmb ningã. B ra yet-y la woto: «Dũni wã sɛɛb wakato neb n na n zĩndi n mi b taab laado la b pʋgd b minim-wẽnse.» Bãmb dãmb n wat ne welgre. B basa b yam sõnga pʋgbo n vɩ wa rũmsi. Sã n ya yãmba, m kom-nongdse, keng-y taab pelse ne y tẽeb sõngo la a Vʋʋsem Sõng sɛɛg yõkre. Pa-y Wẽnd nonglem pʋgẽ n paam n dɩ Soaal a Zezi Krista nimbãan-zoeer yõodo yʋʋm sẽn ka be sɛɛb yĩnga. Neb niyns sẽn ket-b n zĩi n sãmbdẽ wã, sõng-y tɩ b tẽeba lebg kẽnkẽ. Fãag-y sẽn lʋɩ-b bugmẽ; kũm-y sẽn ket-bã nimbãanega; maan-y rabeem ne-ba, la y ra sɩɩs fuug b sẽn yeelg meng ye. Wẽnd yɛngã sẽn tõe n zãag yãmb ne lʋɩɩs buud faa la a tõe n yals yãmb b ziira taoore, tɩ rabeem sɛ, tɩ sũ-noog pid zãnga, d Wẽnd la d Fãagda, paam pẽgre, naam, pãnga la tõogo, a Zezi Krista maasem yĩnga, tɩ yʋʋma tong taaba n tõnt sɛɛbo. Amina! Ad Krista a Zezi sẽn puk yɛl niyns sẽn da solg b nengẽ: Wẽnd n yeel-b tɩ b wilg b kambã bũmb ning waoonga sẽn zoe n seglã; b sõgna Zã nengẽ, la bãmb meng tʋm b Malɛka; la sɩd yaa Wẽnd Koɛɛga ne Krista meng kaseto la a Zã paam yã ne a sẽn yãend bũmb ninga fãa. Sũ-noog soab la ned ninga sẽn karm-a bɩ sẽn kelg-a goama sẽn ya bãngr goama la a bĩng-ba a sũurẽ; ad-y Soaala Waoong yaoome. Maam a Zã n pʋʋsd Azi Tigengu sẽn sẽeg tẽns a yopoe wã. Bɩ y paam bark la laafi, Pĩnd ne Rũnda la Beoog soaba maasem yĩnga; malɛgs a yopoe, sẽn yeg-b zaoorã maasem yĩnga, la a Zezi Krista maasem yĩnga; bãmb la kaset sɩd soaba, a Adem buud bi-kẽeng la dũni dĩm dãmb Dĩma: bãmb n nong-do, la b waas d yel-wẽna rẽgdo ne bãmb meng zɩɩm. Bãmb n kɩt tɩ tõnd lebg maan-kʋʋdb buudu, b Wẽnnaam la b Ba yĩnga; bãmb bal n tar ziir la naam, marsã la daar fãa. Ami! Ad-b sẽn wat sawadg zugu tɩ ned kam fãa na n yãend-ba, ba neb niyns sẽn kõs-b ne kãndã; Adem biis fãa na n kaasa b poorẽ. N-ye! Sɩd ne sɩda! Ad Soaala Wẽnnaam sẽn yeele: «Yaa maam la Sɩngre la Baasgo!» Maam la Zaamẽ, Rũnna la Beoog Soaba: bũmb fãa Soaala! Maam a Zã, yãmb saam-biiga, sẽn naaga yãmb n nams a Zezi yĩnga, n nams b Rĩunga yĩnga, n ka bas raood ne bãmb pʋgbã, ad-y m da bee tẽng a ye sẽn puk mogr sʋka, la sẽn boond tɩ Patmos, Wẽnnaam Gomdã la Krista kaset yĩnga. La mam yama fʋsga mam yĩnga daar a ye, Soaala raare, la m wʋma koɛɛg sẽn tãs m poorẽ wala tõntõogo: «Fo sẽn ne bũmb ningã bɩ f gʋls-a sebr pʋgẽ n tool Tigenga tẽns a yopoe wã: Efɛɛz, Smirn, Pergam, Tiyatir, Sard, Filadelfi la Laodise.» La mam sẽn wẽneg m poorẽ tɩ m na n bãng koɛɛga sẽn yitẽ, mam yãee fitils a yopoe sẽn bolg sãnem, b ra gũbga Ned Biiga sẽn yer fu-woko, tɩ sãnem sẽbdg be b sɛɛgẽ. Ned Biiga zug ra yaa pɛɛlga wa pe-kõbdo bɩ lamdo. B nina da zirda wa bugum. B naoã da pɩnda wa zũudu sẽn yẽneg boaagẽ, la b koɛɛga ra sãta wa ko-wi kẽems rãamde. B rɩtg nug ra zãada ãds a yopoe, la sʋ-sɩleng sẽn dɩt a noya a yiiba fãa n da be b noorẽ. B nenga ra yãgda wa wĩntoogo sẽn yãgd wĩnto-sʋka. La mam sẽn yãe woto, mam lʋɩɩ vãna, bãmb taoore, wala m kiime; la b tika maam ne b rɩtg nugu la b yeelame: «Da zoe rabeem ye, yaa maam, Pipi soaba la Yaoolem soaba, Vɩɩm soaba. M da kiime la ad-m sẽn le vɩ vɩɩm sẽn kõn sɛ; maam n tar Kũum loko la m zãad bʋg-tẽng kʋɩlen-bila. Bɩ f gʋls fo sẽn ne rũnna wã la fo sẽn na n yaool n yãend nindaare. Sã n ya ãds a yopoe wã fo sẽn yãe m dɩtg nugẽ, ne sãnem fitils a yopoe wã, ad-b võore: ãds a yopoe wã yaa m Tigenga sẽn sẽeg tẽns a yopoe wã Malɛgse, la sãnem fitils a yopoe wã makda Tigenga tẽns a yopoe wã. Gʋls Efɛɛz Tigeng Malɛka woto: ‹Ad sẽn zãad-a ãds a yopoe a rɩtg nugẽ la sẽn kẽnd-a sãnem fitils a yopoe wã sʋka koɛɛga. Mam mii fo manesem fãa, f namsgo la f raoodo; m miime tɩ f ka pẽnegd nin-wẽns ye, f fɛɛsa neb niyns sẽn yet tɩ b yaa Soaala tʋʋm-tʋmdba la f bãngame tɩ b yaa zirẽ-be-rãmba. F sũ-tõog me la sẽn ka paoode, tɩ m ne tɩ f kell n saka namsgo mam yʋʋr yĩnga. La bũmb n be tɩ m sũur ka noom ne foom, yaa f sẽn maage ne f pĩnd nonglma. Aya! Le tẽeg f sẽn da zao zĩig ning pĩndã; maan tuubgu, la f le rɩk f pĩnd sorã, ka rẽ m na n waame la m sã n mikame tɩ tekr ka be f sũurẽ, m na n luka f sãnem fitila n teem zĩiga. Bũmb a ye pʋgẽ la m nand foo, yaa f yam sẽn lak ne a Nikola neba tʋʋm-wẽna wala m me yam sẽn lak ne-bã. Sẽn tar-a tʋb bɩ a kelg Wẽnd Vʋʋsem sẽn gomd ne Tigengu. Sẽn tõog-b fãa, m na kɩt tɩ b rɩ vɩɩm tɩɩga biisi, tɩɩg ning sẽn sel Wẽnd zẽedẽ.› Gʋls Smirn Tigengu Malɛka woto: ‹Ad Pipi la Yaoolem soaba koɛɛg, sẽn da ki-a n le vʋʋg-a soab koɛɛga. Mam mii fo namsga fãa la fo naongã — mik fo yaool n gãe ne laogo — la neb niyns sẽn boond b mens tɩ Zʋɩf rãmbã — Sʋtãan sɛk roog rãmbã — ad-m mii b sẽn wɩt-f ne wɩds niynsi. Da zoe toog ning sẽn nan ket poorẽ wã ye; Sʋtãan zoe n gomda a na sui yãmb neb kẽer doto, n kʋɩɩb yãmba la a mak yãmb pãng dasem piiga. Fo yee n tall f tẽeba neere n ta f kũum tɩ m na kõ-f vɩɩm dolbo. Sẽn tar-a tʋb bɩ a kelg Wẽnd Vʋʋsem koɛɛga ne Tigengu. Sẽn tõog-b fãa kõn le zoe kũum a yiib soaba dabeem ye.› Gʋls Pergam Tigengu Malɛka woto: ‹Ad sẽn zãad-a sʋ-bɛɛga a noorẽ wã goama: Mam miime, fo sẽn ti f roog zĩig ninga: yaa Sʋtãan soolmẽ, la fo nanda mam yʋʋre, fo pa zãgs m tẽeb ye, ba wakat ning b sẽn waa n kʋ yãmb tẽngẽ, Sʋtãan soolmẽ, m nin-sõng la m kaset soab a Antipas. Bũmb sẽn be tɩ m zabd ne foom, yaa tɩ fo nengẽ neb n be n kẽ a Balaam: ned ning sẽn sagl a Balak t'a belg Israyɛl kamb tɩ b wãb maand nemdo la b sak yoobo. Neb me n be fo nengẽ sẽn deeg a Nikola neba zãmsgo. Aya! Ning pãng n tuubi ka rẽ mam kõn kaoos la m wa fo nengẽ n tak zabr ne sʋʋg ning sẽn be m noorẽ wã. Sẽn tara tʋb bɩ a kelg Wẽnd Vʋʋsem koɛɛga ne Tigengu. Sẽn tõog-b fãa m na n kõ-b la yĩngr dɩɩb sẽn solge; la m na kõ-b kug peele sẽn gʋls yʋ paalle ned a to sẽn ka sakde, b sã n boole, sã ka b sẽn pʋd a soabã.› Gʋls Tiyatir Tigengu Malɛka woto: ‹Ad nin sẽn zird wa bugma, t'a naoã pɩnd wa zũud sẽn dʋʋg soaba goama, ad Wẽnd Biiga goama: Mam mii fo manesem, f nonglem, f tẽebo, f sẽn tar sũur ninga ne tʋʋmde, f sũ-tõog f vɩɩma pʋgẽ, f tʋʋm sõma sẽn tar paasgo n dabda. La m sẽn tar yell ninga ne foom yaa f sẽn bas paga, a Zezabel, t'a yagd zirẽ n yet t'a yaa bãngd poaka n kʋɩɩbd mam nebã tɩ b bʋdg m sore n wãbd maand nemdo. Mam yaool n kõ-a-la wakato t'a maan tuubgu la a tõdgame t'a kõn bas a yooba ye. Woto ya a namsg gãag zug la m na n gãneg-a la m na n sɩbga sẽn yood-b ne-a wã tɩ sek-ba, b sã n ka tuub b manesma. Mam na n kʋ-la a kamba fãa; woto Tigeng fãa na bãnge tɩ mam mii ninsaal pʋga la a sũuri la m na n yaoo ned kam fãa n zems a tʋʋma. Sã n kella yãmb sẽn be Tiyatir, la y zãgsa wẽnga, la y tõdga b sẽn boond tɩ Sʋtãan zãmsg zulungã, mam meng n yet tɩ m kõn zɩlg-y zɩɩb a to. Yãmb wee gãd y sẽn deeg neerã n gũud m waoongo. Sẽn tõog-ba la b kell n tʋma mam tʋʋmna n ta a tɛka, m na n kõ-b tõog ning m sẽn paam m Ba nengẽ, b na rɩ naam Bu-zẽmba fãa zutu. B na n legl-b lame ne kut rasaare la b na n bõgs-b lame wa b sẽn bõgsd tãnd laase. Ya woto la mam menga paam tõogo m Ba nengẽ. Maam n na n ning b nugẽ Tõd-beoog Ãdga. Sẽn tara tʋba bɩ a kelg Wẽnd Vʋʋsem koɛɛga ne Tigengu.› Gʋls Sard Tigengu Malɛka woto: ‹Ad sẽn so-a Malɛgs a yopoe la a zãad ãds a yopoe wã koɛɛga: Mam mii fo manesem; fo kẽnda wa bõn-vɩɩga mik fo kiime. Nek tao! La f yẽeg f gĩina sẽn nan ka ki zãnga; sɩda m ka ne tɩ fo vɩɩma bee yõod wʋsg mam Wẽnnaam nifẽ ye. Aya! Tẽeg fo sẽn da reeg gomda ne pʋ-peelem ninga, gãd-a neere, maan sɩbgre. Mik fo sã n ka gũusi mam na n siga wa wagdre wakat ning fo sẽn pa tẽeda, m na n ling-f lame. Bala, Sard pʋgẽ, yãmb neb kẽere n be tɩ b fut ka rẽgem ye; bãmb bal n yãagd maam ne fu peelse la rẽ n tog ne-ba. Sẽn maand-b raoodo, yaa fu-pɛɛlg la m na n yeelg-ba la b yʋʋr kõn yẽes abada Vɩɩm sebrẽ wã ye, m na wilg tɩ m mi-b lame, m Ba ne b malɛgsa taoore. Sẽn tara tʋba bɩ a kelg Wẽnd Vʋʋsem koɛɛga ne b Tigengu!› Gʋls Filadelfi Tigengu Malɛka woto: ‹Ad Sõmblem Naaba, Sɩd soaba, sẽn zãada a Daviid kʋɩlen-bila t'a sã n pak bɩ ned ka be n pagdẽ, la a sã n page bɩ ned ka bee n pakdẽ, goama. Mam mii fo manesem: m paka noor fo yĩnga tɩ ned ka be n pagd-a ye, la m mi tɩ ba fo pãng paooda, fo reega m koɛɛga la fo pa kɩɩs-m ye. Mam na n modga sẽn kẽed-b Sʋtãana sɛk roogo — yaa zirẽ-be-rãmba sẽn boond b mens tɩ Zʋɩf rãmba — n-ye! M na n modg-b lame tɩ b wa wõgemd fo taoore la b bãng tɩ m nonga foo. Dɩlla fo sẽn deeg mam noorã f namsg pʋgẽ, mam me na n fãag-f la ne yɩɩr ninga dũnia sẽn na n paame, Adem biisa fãa fɛɛsga wakato. M lebgra yaoome; gãd f sẽn tar-a neere tɩ ned da wa zuk f rolb ye. Sẽn tõog-ba, m na n lugl-b wa roog ra-nif kẽengo, m Wẽnnaama roogẽ; b kõn luk abada. M na n gʋlsa m Wẽnda yʋʋr b zugu la b bark tẽnga yʋʋre: Zerizalɛɛm paalga sẽn yit arzãna, m Wẽnnaam nengẽ, n paas Yʋ paall ning m sẽn tarã. Sẽn tar-a tʋba bɩ a kelg Wẽnd Vʋʋsem koɛɛg ne Tigengu!› Gʋls Laodise Tigengu Malɛka woto: ‹Ad Krista, Kaset sɩda la Wẽnd bõn-naandsa fãa Kãsma sẽn gomde. Mam mii fo manesem: fo ka maasga, fo ka tʋʋlga; fo kõn yɩẽ tʋʋlg bɩ maasga! La woto wã, fo sẽn ya zalzalã, n ka tʋʋlga, n ka maasga, mam na n wʋba foo m noorẽ. Fo zĩi n geendame la f gomda: Mam yaa dakãagre, m paama laog wʋsgo, bũmb ka paoog-m ye; fo ka ne tɩ yaa foom bala la nimbãan neda, neba taaba sẽn tog n kũmi; fo ka ne tɩ f yaa naong soaba, zoanga la ned sẽn zĩ a kãre. Bɩ f reeg mam saglsã: wa m nengẽ n da sãnem sẽn yɩlge ne bugum, n lebg rakãagre; ra fu-peelse n yeelge n lud f yãnde, la f ra nin tɩɩm n ning f nini n paam n yãe vẽenega. Mam sagenda m sẽn nong b rãmba la m sɩbgd-b lame. Aya! Nang pãng bilfu, maan tuubgu. Ad-m sẽn yɛs dignoorẽ n kabsdẽ; ned ninga sẽn wʋma mam koɛɛga la a pak a roog noore, m na n kẽeme, m na n dɩɩ ne yẽ soaba, la yẽ ne maam na n sõsa ne taaba. Sẽn tõog-ba, m na kõ-b la weere tɩ b zĩnd ne maam, m zaoorẽ, wala mam me sẽn tõoge, la m paam n zĩnd m Ba zaoorẽ wã ne bãmba. Sẽn tar-a tʋba bɩ a kelg Wẽnd Vʋʋsem koɛɛg ne Tigengu!› » Dẽ poore m sẽn yãe la woto. Noor n pak saag zugu la koɛɛg ning sẽn tãs wa baorgo tɩ mam wʋma, yeela maam: Dʋ yĩngr ka tɩ m wilg-f bũmb ning sẽn wate! Wakat kãnga yɩɩ wa m yama fʋsga m yĩngã la ade, zaoor n da lugl saag zugu la Ned n da zao a zugu. Sẽn da zĩ-a zaoorẽ wã ra tãoosda vẽenem wa kug peesem kẽer sẽn tãoosde vẽenem n ya kẽeg lima la moomd yʋdʋd; saag gomtɩʋʋg n tão gũbri n gilg zaoorã la a ra yaa kẽeg toenɛɛga. Zaoora meng ra gũbga ne goeels pisi la a naase tɩ Nin-kẽems pisi la a naas da zĩ-b zutu ne fut sẽn ya wogd la peelse; Nin-kẽemsa zut ra fõga sãnem pugli. Zaoora meng ra tãoosda sa-yagdo ne koees la sa-tãse; fitils rãmb a yopoe n da yõgne, zaoora taoore: bãmb la Wẽnnaam malɛgs a yopoe wã. Zaoora taoor ra gãnega wa mogre sẽn yãgda la a pɩn wa kugr sẽn saas sõmb-sõmbo; Bõn-vɩɩs a naase n da gũbg zaoorã tɩ b mensa ya nin bala a yeyn-ye, poorẽ la taoore. Pipi Bõn-vɩɩga ra wẽnda gɩgemde; Bõn-vɩɩg a yiib soaba da wẽnda loalga, a tãab soaba ra tara neng sẽn wẽnd ninsaal dẽnna, la a naas soaba da yaa sɩlga sẽn laand yĩngri. La Bõn-vɩɩs a naasa fãa ra tara pɩgs a yoobe la b yĩnga da yaa nin bala zĩig zãnga, poorẽ la taoore; b da moondame, wĩntoog la yʋngo, n ka yalsdẽ ye: «Yãmb la Sõmblem, yãmb la Sõmblem, yãmb la Sõmblem! Bũmb fãa Soaala. Yãmb la Pĩnda, Rũnna la Beoog Soaba.» La wakat ning fãa Bõn-vɩɩsa sẽn pẽg la b waoog, la b pʋʋs Ned ninga sẽn zĩ-a zaoorẽ wã n vɩ a vɩɩm sẽn kõn sɛ wã, Nin-kẽems pisi la a naasa me da wõgemdeda a taoore n waoogd ka sɩng kõn zĩnd sɛɛbo Soabã la b ra lobda b sãnem pugli wã zaoora taoore n yetẽ: «D Soaala la d Wẽnnaam, yãmb toga ne pẽgre la ne waoogre la ne ziiri, tɩ yãmb n naan dũniya la yaa ne yãmb pãnga la bũmb sẽn da ka be zĩnd yã.» M yãeeme tɩ sẽn da zĩ-a zaoora zug ra zãada a rɩtg nugẽ sebr sẽn pili la sebra ra gʋlsa a nens a yiiba fãa la soagds a yopoe n da sog-a. M yãee Malɛk sẽn wɩɩd pãnga sẽn moon ne koe kãsenga: «Ãnda n na n tõog n lak sebrã, n soka soagdsã?» La ned ba a ye ra ka be, saag zugu, tẽng zug bɩ bʋg-tẽnga, sẽn tõe n lak sebrã la a karm-a ye. La m kiiga nintãm tɩ b pa yãend ned sẽn da segd n lak sebrã la a karm-a ye. Nin-kẽemsa nin-yend yeela maam: «Da yãb ye; ad-a Zɩɩda buudẽ gɩgemdã, a Daviid yagengã, tõeeme; yẽ n na n pilg sebrã la a sok a soagdsã a yopoe wã fãa.» Zaoora yegende, Bõn-vɩɩs a naasã la Nin-kẽemba sʋka, m yãee Pe-bil sẽn yɛse tɩ yaa wa b kodg-a lame la a ra tara yɩɩl a yopoe la nin a yopoe; bãmb la Wẽnd tõogã, b yama sẽn tʋmd b tʋʋmda tẽng zugu, zĩis fãa wã. Pe-bila kolga sẽn da zĩ-a zaoora n deeg sebrã a sẽn da zãad, a rɩtg nugẽ. A sẽn deege la Bõn-vɩɩs a naasa sẽn wõgemd Pe-bila taoore; Nin-kẽems pisi la a naasa me wõgemdame, ned kam fãa ne a pɛndga, ne a sãnem laag sẽn nukd tɩdare bug-zõose: tẽedba pʋʋsg makre. B pʋda yɩɩn paalle: «Yãmb sɩd togame, n deeg sebrã la y sogs a soagdsã tɩ yãmb la b kodg yã, la yaa ne yãmb zɩɩm la y reeg ninsaalba n lebs-b Wẽnnaam, bãmb ne b buud toɛ-toɛ yã, ne b goam, ne b rog-n-mik, ne b soolem. Yãmb kɩtame tɩ b lebg d Wẽnnaama yĩnga, maan-kʋʋr nanams buudu, maan-kʋʋr naam sẽn dɩt tẽng zugu.» M da ket n getame la ade, m wʋma rãamd kãsenga; Malɛk rãmb zãma n da gũbg zaoorã ne Bõn-vɩɩsã la Nin-kẽemsã. B sõora yaa tus kẽema belem tus kẽema n paam n zage. La b ra moonda ne koe kãsenga: «Pe-bila sẽn kodgã n tog ne tõogo, ne Wẽndlem, ne bãngr pidungu, ne naam, ne waoogre, ne ziiri, ne pẽgre.» Bõn-naand buud fãa sẽn be saag zugu, bɩ tẽnga, bɩ bʋg-tẽnga, bɩ mogrẽ, dũniya tõre, m wʋma b fãa sẽn moonde: «Sẽn zĩ-a a zaoorẽ wã la Pe-bila, paam pẽgre, waoogre, naam la ziiri yʋʋm sẽn kõn sɛ!» Bõn-vɩɩs a naasa ra leokdame: «Ami!» Tɩ Nin-kẽemsa na n wõgemd tẽng n waooge. M yaool n yãee Pe-bila t'a sokd pipi soagdga; tɩ pipi Bõn-vɩɩga koɛɛg na n tãs wa saaga: «Wa-y!» M gesame la m yãee wed bolle; wedʋʋda ra zãada tãpo; b kõ-a-la naam pugla n le yet t'a yi n tɩ maan daoodo. Pe-bila le soka soagdg a yiib soaba tɩ m wʋm Bõn-vɩɩg a yiib soaba kɛlenga: «Wa-y!» Yɩɩ wed moomd menga n puki; wed-dʋʋda paama sore n na n menes laafi tẽng zugu, n bas tɩ ninsaalb kood taaba; b kõ-a-la zãngoogo. Pe-bila sẽn sok soagdg a tãab soaba, mam wʋma Bõn-vɩɩg a tãab soaba sẽn kelme: «Wa-y!» La m yãee wed sablg sẽn yi t'a wed-dʋʋda zãad bũmb sẽn tar m magd zɩslem; la m wʋma koɛɛg sẽn tãse, Bõn-vɩɩs a naasa sʋka, la a mooname: «Zom pɛɛlg wũmbl yaa wakɩ koɛɛnga, zom pugsg wũmbl a tãab yaa wakɩ koɛɛnga; sã n kella kaama la rãama, da paas-y bũmb ye.» Pe-bila sẽn sok soagdg a naas soaba, m wʋma Bõn-vɩɩg a naas soaba sẽn kelme: «Wa-y!» Ade, weef ning sẽn yi-a wã yaa kẽeg-toenoɛɛga tɩ wed-dʋʋda yʋʋr boond tɩ Kũum; la bʋg-tẽnga n da yãagd-a. B kõ-a-la tõogo t'a soog tẽnga boag a naasa bogr a ye, la a kʋ neba ne sʋʋga, ne kom, ne bã-longdem, ne we-rũmsi. Pe-bila soka soagdg a nu soaba tɩ m tool n yãe b sẽn da kʋ b rãmba sɩɩse, sẽn da ki-b Wẽnnaam Gomda yĩnga la b kaseta yĩnga. La bãmb me sɩnga kɛlenga ne b pãng fãa: «D Soaala, Sõmblem la Sɩd soaba, yãmb na n gũu wakat bʋgo n yaool n kao y bʋ-sɩdã la y rok y sũur ne tẽng zug rãmba sẽn daag d zɩɩma?» Dẽ la b kõ ned kam fãa fu-wok pɛɛlga la b yeel-b tɩ b gãneg b yam bilf nanda tɩ b tũud-n-taasã la b ma-bi-taasã sẽn tʋm-b wa bãmba la sẽn tog n kood wa bãmba sõor lebg ka tɛka. Mam leb n gesame: Pe-bila sẽn waa n sok soagdg a yoob soaba, tẽnga miima ne pãnga la wĩntoog sobgame n lebg wa vũundu, tɩ kiuug moog zãng wa zɩɩm. Ãdsa fãa rʋʋga tẽnga wa sɩlmand sẽn wẽnend kankang wila n sʋʋgd a bi-kãse; saaga pilga wa seb-vãoogo n menem, tãmsa ne tẽns niyns sẽn puk-b mogrẽ wã fãa vigsa b zĩisẽ. Tẽng zug nanamse la nin-bɛdã ne tãnsoaben-dãmbã la rakãagba, la pãng rãmba, b fãa bala: yamb bɩ burkĩna, b zoeeme n soond tãmsã la pĩisã bogdẽ. B ra yeta tãmsã la pĩisã: «Sirg-y n solg-y tõndo tɩ d põs sẽn Zao-a a zaoorẽ wã la d tɩlg Pe-bila beem.» Dũnna la Wẽnd sũ-puur da-kãsenga, la ãnna n na n yalse? Dẽ poore mam yãee malɛgs a naase sẽn yɛs tẽnga kɩrems a naasã; b ra gãda tẽnga sob-raad a naasã tɩ b ra fʋʋs tẽng bɩ mogre, bɩ tɩɩg meng ye. Mam yãee malɛk a to sẽn lik Yaanga. Yẽ n wat n na n ning Vɩɩm naaba kamba makre; a kelmame n yeel malɛgs niyns sẽn da paam-b sore n na n dãmb tẽnga la mogrã: «Da yãg-y nanda n dãmb tẽnga la mogre bɩ tɩɩse tɩ tõnd ka reng n ning makre d Wẽnda kamba fãa rĩirẽ ye.» M bãnga neb niyns fãa sẽn paam-b makra sõore: tus koabg la pis naase la a naase a Israyɛl kambẽ. A Zɩɩda roogẽ: tus piig la a yiib n paame; a Rubẽ roogẽ: tus piig la a yi; a Gad roogẽ: tus piig la a yi; a Asɛr roogẽ: tus piig la a yi; a Neftali roogẽ: tus piig la a yi; a Manase roogẽ: tus piig la a yi; a Simeõ roogẽ: tus piig la a yi; a Levi roogẽ: tus piig la a yi; a Isakar roogẽ: tus piig la a yi; a Zabulõ roogẽ: tus piig la a yi; a Zozɛf roogẽ: tus piig la a yi; a Bẽzame roogẽ: tus piig la a yi n paame. Dẽ poore m yãee zãma kõn bãng n sõde, tẽns toɛ-toɛ rãmba, buud toɛ-toɛ, rog-n-mik toɛ-toɛ, goam biis toɛ-toɛ; m yãend-b lame tɩ b yɛs yĩngri, zaoora taoore la Pe-bila taoore, n yer fu-wogd peelse la b zãad kãase la b moon ne koe kãsenga: «Tõnd Wẽnnaam sẽn zao b zaoorẽ la Pe-bila soog waoogre!» Malɛgsa fãa sẽn da gũbg zaoorã ne Nin-kẽemsã la Bõn-vɩɩs a naasã, b fãa wõgemd n waooga Wẽnnaam, b ra maandame: «Sɩda tõnd Wẽnda toga ne pẽgre ne ziiri, b pida ne yam, b toga ne bark pʋʋsgo, ne waoogre, ne naam, ne tõogo tɩ yʋʋma tong taab koabg koabga n tõt sɛɛbo. Ami!» Nin-kẽem a yembr yaool n sok-m lame: «Nin-bãmba sẽn yer fu wogd peelsã, fo mi b sẽn ya b rãmba, la b sẽn yitẽ?» Tɩ mam leoke: «M Naa, yãmb n mi wɛ!» T'a yeele: «Yaa neb niyns sẽn tɩlg-b pɛt kãsenga; b pegsa b futu la b los-b la Pe-bila zɩɩmẽ tɩ b pelge. Yaa rẽ yĩng la b yɛs Wẽnnaam zaoora taoore, n tʋmd b tʋʋma wĩndg la yʋngo, b roogẽ. Sẽn zao-a zaoorã na n kẽes-b-la a zãnd maasmẽ. La bada! B kõn le nams kom bɩ ko-yũud ye, wĩndg bɩ pems tʋʋlg ye, tɩ Pe-bila sẽn yɛs tẽnsʋka, zaoora taoore, yẽ n na n yɩ b Pe-kɩɩma la b taas b vɩɩm ko-bundem zĩigẽ, la Wẽnnaam na n yẽesa b nintãma fãa.» Pe-bila sẽn sok soagdg a yopoe soaba la fãa sẽn yɩ sɩɩ saag zugu n kaoose, n ta wakat pʋɩ-sʋka. M yaool n yãee malɛgs a yopoe wã sẽn yɛs-b Wẽnnaam taoorã la b kõ-b-la bard a yopoe. Malɛk a to yaool n yaasa zaoora taoore ne sãnem kaorgo la b kõ-a-la tɩdar wʋsgo t'a naag ne nin-sõma wã pʋʋsgo n dɩgl sãnem maan-kugra zug, zaoora taoore; la woto tɩdara bug-zõos ruka malɛka nugẽ n dʋ yĩngri, Wẽnnaam taoore, n naag ne Nin-sõma wã pʋʋsgo. Malɛka leb n dɩka kaorgã n pids-a ne maan-kugra bugum; a fẽega bugma tẽnga la yɩɩ sa-tãs la bʋrga, ne sa-yãgdo la bũmb fãa miimame. Malɛgs a yopoe ne bard a yopoe tɩ seglame n na n peebe. Pipi baorga peebame. Yɩɩ sapɩlem ne bugum sẽn kalem ne zɩɩm n dʋʋg tẽng zugu la dũniya bogr a tãab soaba, tɩɩsa fãa bogr a tãab soaba, mo-maasa bogr a tãab soaba, fãa gill rɩɩ bugum. Malɛk a yiib soaba peeba a baorgo. La bõn-kẽemde sẽn zem tãnga n wit wa bugum, yii yĩngri n lʋɩ mogrẽ la mogr a bogr a tãab soab lebga zɩɩm. Mogra pʋgẽ bõn-vɩɩsa bogr a tãab soab kiime; koom kogenda bogr a tãab soab bõra koomẽ. Malɛk a tãab soaba peebame. La ãd bedre sẽn dɩt wa bug-vɩlenga yii yĩngri n lʋɩ kʋɩlsa bogr a tãab soaba la ko-bundsa pʋga. Ãdga yʋʋr la a «Tɩɩsem»; kooma bogr a tãab sob lebga tɩɩsga la neb wʋsg sẽn yũ kooma sẽn lebg toog liga kiime. Malɛk a naas soaba peebame. Tɩ yell na n paam Wĩntoogo, kiuug la ãdsa bogr a tãab soaba. Wĩndga, kiuug la ãdsa vẽenem bogr a tãab soab n wooge; daara konga a vẽenema bogr a tãab soaba. Vẽenem ning sẽn mii n kees yʋngã, yẽ me bogr a tãab soabã n wooge. La mam sẽn da ket n getẽ m wʋma sɩlg sẽn lug yĩngr-yĩngr sẽn kelem ne pãnga: «Bʋko, bʋk wɛɛ, bʋk bal ne dũni wã bõn-vɩɩse, bard a tãaba sã n wa tãse, bard niyns malɛgs a tãabã sẽn ket n zãad b nusẽ wã sã n wa tãse!» Malɛk a nu soaba peebame. La mam yãee ãdg a yembre sẽn yi yĩngri n lʋɩ tẽnga la b kõ-a-la bul-zulunga kʋɩlen-bila. A sẽn pak kʋɩlengã, bug-zõos n yi, wala wʋng kẽeng sẽn widg rẽnna — la a sobga wĩndga la zĩiga fãa. Bug-zõosa pʋgẽ, sʋy n yɩke n lʋɩ dũniya zãnga; la b kõ-b-la zẽnem wala tẽng zug namsa rẽnna. B kõ-b-la noor tɩ b bas pʋt la moog buud fãa, la tɩɩs buud fãa la b rɩ neb niyns bala sẽn da ka tar b Wẽnd makrã b rĩirẽ. B da ka tar sor n kʋ neb ye, yaa b nams-b bal kiis a nu tõre; la b rũmba zabr da yaa wa nang rẽnna. Dasem kãense, neb wʋsg na n baoo kũum n konge, b na n tʋlga kũum la kũum na n zoe n bas-b lame. Mik fo sã n ges sʋya, b wẽnda wiidi sẽn bob zabre, b zuta fõga sãnem pugli tɩ b nens ya wa ninsaal nenga. B zoobda yaa wa pagb rẽnna, tɩ b yẽna ya gɩgemd yẽna. B da rɩka kut n pil b yãoogo la b pɩgsa rãamd da fõta wa bilim-bilm ka tɛk b sẽn sog wiidi n dabd zabre. B zʋya nee wa nang zʋʋre, n tar kõse; yaa kiis a nu la b paam sore n na n nams ninsaalba. B ra tara b naaba, yẽ la bul-zulunga dĩma, a yʋʋr ne Ebre rãmb goam la a Wãabo, a Abadõ, tɩ Grɛk rãmb boond-a tɩ Wãab naaba, a Apolliõ. Bʋk a yembre ka looge t'a yiib nan pʋgda. Malɛk a yoob soaba peebame. La m wʋma koɛɛga; a yii sãnem maan-kugra sẽn vigl Wẽnd taoora kɩrems a naasã; la Koɛɛga yeela malɛk a yoob soaba sẽn zãad baorgo: «Lood Malɛgs a naasã b sẽn da loe Efrat kʋɩl kãsengẽ wã n base.» La b basa malɛgs a naasã sẽn da yɛs n gũud wakatã, daarã, kiuugã la yʋʋmdã n na n kʋ ninsaalba fãa bogr a tãab soabã. B tãb-biisa da yaa wed-dʋʋdb tus kẽems kobsi: woto la b sõorã b sẽn togs-ma. Ad-y yaa woto la m yãend wed-dʋʋdba ne b wiidi wã: wed-dʋʋdba ra teega b yãoog ne kut sẽn wit bug-kẽega la bug-kõodre. Wed-bãmb zuta ra yaa wa bõnyẽeg rẽnna tɩ b noor pursd bugum, bug-zõose la kidbri. Bugma, bug-zõosã la kidbrã wiida sẽn da pursd b noorẽ, kʋʋ ninsaalba bogr a tãab soaba zãnga. Wed bãmb wẽnem da bee b noorẽ la b zʋʋrẽ me; zʋya ra baasda ne wiis zutu la rẽ la b ra tar n wɩɩbd ninsaalba. Ne rẽ fãa neb niyns sẽn põs-b tẽn-kũuma ka lak ne b yel-wẽna ba bilfu. B ka vẽ ne b sʋtãamba waoogre, bõn-yood niyns sen naan ne sãnem, wanzurf, kugri, bɩ raoogo, bõn-yood sẽn ka nini, n ka tʋba n ka nao. B ka vẽ ba bilfu ne b nin-kʋʋre, ne b tɩto, ne b yoobo la ne b wagdma ye. Dẽ poore mam yãee malɛk a to sẽn tar pãng sẽn sigi; a menga zãng pila sawadgo, tɩ saag gomtɩʋʋg tão gũbri, a zugẽ, t'a nenga ya wa wĩntoog, t'a karsa wit bugum. A da zãada a nugẽ, seb bil sẽn lake la rẽ t'a rɩtg naoor teega mogre, t'a goabg naoor teeg tẽn-koɛɛnga. A kelma ne koe yaanga wa bõnyẽega. La rẽ poore sa-tãs a yopoe n gom b goama. B sẽn gom n sɛ la m sẽn sɩng n na n gʋls, la koɛɛg n yi yĩngri n yeel-ma: «Bĩng sa-tãs a yopoe wã goama f yamẽ bala la f ra gʋls-b ye.» La m sẽn da yãend malɛk ninga t'a teeg mogra la tẽngã n yɛsẽ wã zẽka a rɩtg n tees yĩngri, la a wẽena ne Vɩɩm sẽn kõn sɛ Naaba, sẽn naana yĩngr ne a teeda fãa, sẽn naana tẽnga ne a teeda fãa, sẽn naana mogr ne a pʋgẽ teeda fãa, a wẽename n yeele: «Wakat taame! Raar ning b sẽn na n wʋm malɛk a yopoe soabã, a baorga peebg raare, ba raare la Wẽnnaam yɛla fãa na n puk zãnga, wala b bãngdba, b sõgen-kamba, sẽn togs Koe-noog ningã.» Dẽ poore, koɛɛg ning sẽn yi a yĩngr tɩ m wʋma le goma ne m yɛsa: «Kẽng n tɩ reeg seb bila malɛka sẽn zãad a nugẽ, malɛk ning sẽn teega mogra la tẽngã.» La m kẽngame, n kos malɛka t'a kõ-m sebrã la a yeela maam: «Deeg la f vele; a na n pidsa f pʋga ne tɩɩsem la f noorẽ, a naa n yɩɩ noog wa sɩɩdo.» La m deega seb bilã malɛka nugẽ la m vel-a lame; m noorẽ a ra yaa wa sɩɩdo, la m sẽn vel n sɛ, a taa m pʋgẽ n lebg toogo. B le yeel-m lame: «Fo tog n le goma bãngr gom-beedo ne ninsaalb buud ka tɛka, ne tẽns ka tɛka, tɩ b zɛlma ya toore, tɩ b nanams me ya toore.» Dẽ poore b kõ-m la moogo, mo-sĩdimdi wa ribla la b yeel-m lame: «Yik n tɩ mag Wẽnd doogã ne a maan-kugrã la bãng wẽn-pʋʋsdba fãa sẽn be a pʋgẽ sõore; da mag yɩnga ye, tɩ rẽ basa ne bu-zẽmba la yaa kiis pis naase la a yiibu tõre la b na n saag Tẽn-Sõngã. M na n kõ-la m kaset dãmb a yiibã noore tɩ b yeelg sũ-pa-noang futu n gom bãngr goam dasem tusr la kobsi la pisoob pʋgẽ.» Bãmb makre la oliviye tɩɩs a yiib la fitils a yiiba sẽn be dũni Soaala taoore. Ned sã n baood nin-bãmba namsgo, bugum n na n yi b noorẽ n dɩ b bɛɛbã. N-ye! Sẽn baood-a b namsg, yaa woto la yẽ soab na n ki. B sã n yi n na n tʋm b tʋʋmna, b kõ-b la sore tɩ b pag saaga tɩ koom da tosg ye; b tara pãng me n tõe tɩ koom lebg zɩɩm la b tõe n bẽnega tẽnga tõrẽ ne yel-beed tusri, b sẽn dat wakat ning fãa. La b sã n wa baas b wilgrã, bõn-ninda sẽn yi-a bul-zulungẽ wã n na n tak zabre ne-ba, n tõog-ba la a kʋ-ba. B na n daaga b yĩnsã n bas yɩng woto dasem a tãabo la pʋɩ-sʋka, Tẽn-kãsenga pʋga, Sodom bɩ Ezipt, wala neb kẽer sẽn bɩnd n boondẽ, zĩig ning b sẽn ka b Soaala pika; b na n daaga b yĩnsã n bas ninsaalb ka tɛka, nin-zẽmba, gãgnense, la tẽn-zãorgẽ dãmb nini, dasem a tã la pʋɩ-sʋka, la b ka tar sor n dɩk-ba n tɩ mum ye. Adem biis fãa kɩdemdame la b pʋʋsd taab zu-noogo, n pʋʋsd taab ne kũuni, tɩ bãngdba a yiibã ra nams b la wʋsgo. La dasem a tã la pʋɩ-sʋka sẽn looge, Wẽnnaam le kõo b bãngdba vɩɩm tɩ b le tik n yiki, tɩ sẽn get-ba yɛs marsã ne rabeem kãsenga. La m wʋma koɛɛg kãseng sẽn yi yĩngri n bool-ba: «Dʋ-y yĩngr ka!» La b dʋʋ yĩngr ne sawadgo, tɩ b bɛɛba yɛs n getẽ. La wakat kãnga tẽnga miima ne pãnga la na-tẽnga bogr piig soaba bõrame n lʋɩ, la rẽ waa ne neb tus a yopoe kaalem. Rabeem yõka sẽn põs-ba fãa tɩ b na n pʋʋs yĩngr Soaala barka. Bʋk a yiib soaba ka looge, keta a tãab soaba! Malɛk a yopoe soaba peebame. Yĩngri, yɩɩ koees n tãs woto: «Tõnd Soaala ne b Krista n so dũniya, b na n dɩɩ naam tɩ yʋʋma tong taab n tõt sɛɛbo!» Nin-kẽems pisi la a naasã sẽn zĩ-b Wẽnnaam taoorã yika b goeelsa zutu la b wõgemdame n waoog Wẽnnaam woto: «Tõnd pʋʋsda yãmb barka, Soaala-Wẽnnaam, bũmb fãa Naanda, yãmba, Zaamẽ la Rũnna la Beoog soaba, yãmb waa ne y pãn-kẽoongã n deeg y soolem zãnga n na n dɩ y naam. Nin-zẽmba da yika ne sũ-puuri la yãmb me waa ne y rẽnna n taas sẽn kiba bʋʋda wakato, la y taas y rolba wakato y bãngdba, y sõgen-kamba yĩnga, y tʋʋm-tʋmdba, y nin-sõma yĩnga, neb niyns fãa, nin-bɛd la nin-bi sẽn waoogd-b yãmb yʋʋra yĩnga, la y taas y sɩbgra wakato tẽn-wãadba yĩnga.» Wẽnd dooga noor yaool n paka yĩngri tɩ b na n yãend b zooda kaseto a pʋgẽ; la yɩɩ sa-yãgdo ne koeese ne sa-tãse, ne tẽng miuungu, ne sapɩlem sẽn dʋʋgd barar. Yell bãnd kãsenga n puk yĩngri: pag sẽn yɛse tɩ wĩndga vẽenem buiid-a, t'a naoor tabg kiuugu, t'a zug teeg ãds piig la a yiibu. A ra tʋtame n tol n kũmd rogum. Dẽ poore yell bãnd a to n puk yĩngri: Wag-bãnde, moomde zãnga, ne zut a yopoe la yɩɩl piiga, tɩ zug fãa fõgen naam pugla. A zʋʋra kãaga yĩngr ãdsa bogr a tãab tõre n dʋʋg tẽnga; a waa n yalsa paga sẽn kũmd dogma taoore n gũud t'a rog a biigã t'a rɩk n vele. Paga roga bi-ribla la bi-kãng n na n dɩ naam bu-zẽmba zutu la a naama rasaar yaa kutu. Biiga pɩsgame n ta Wẽnnaam nengẽ, zaoora taoore, tɩ paga zoe n dig weoogo n tɩ soond zĩig ning Wẽnnaam sẽn da segl a yĩnga la b rɩlg-a-la be dasem tusri la kobsi la pisoobe. Dẽ marsã la zabr kaoog yĩngri: a Mikayɛl ne a malɛgs yika zabre ne Wag-bãndã tɩ yẽ me yi ne a malɛgse, la bãmb n kong pãnga tɩ b rig-ba n yiis arzãna. B teeba Wag-bãndã, wag kʋdrã, sẽn boond tɩ Sʋtãana, bɩ bɛyã, dũni belgda, b teeb-a B teeba Wag-bãndã, Wag-kʋdrã lame n fabg tẽnga, yẽ ne a malɛgsa fãa. M wʋma koɛɛg sẽn tãs yĩngri: «Marsã tɛka tõnd Wẽndã n so tõogo, naam la ziiri, la b Krista zaoo bũmb fãa zugu, tɩ tõnd saam-biisa rõatã, sẽn da rõta bãmb Wẽnd taoor, wĩntoog la yʋngo, b lub-a-la tẽnga. Bãmb tõog-a-la ne Pe-bila zɩɩma, ne b noor kaseto, n pa ges b vɩɩma wa bũmb la b sak kũum ye. Dɩlla kɩdm-y sũ-noogo, yãmba, yĩngr kamba. Yãb-y, tẽnga la mogre, tɩ Sʋtãan siga yãmba la a sũura puudame, a sẽn mi t'a raara sõdame.» La a sẽn mik tɩ b lub-a la tẽnga, Wag-bãndã yikame n na n bʋʋg pagã, bi-ribla ma wã. Paga paama Sɩl-kãseng pɩgs a yiibu n yɩk n tud weoogo n paam n ta zĩig ning a sẽn na soond Wag-bãndã la a paam tɩ b rɩlg-a yʋʋmde n le paas yʋʋm a yi la pʋɩ-sʋka. Waafa yaool n sẽnesa a kolkoodo tɩ lebg kʋɩlga n pʋgd pagã n na n dɩ-a. Tẽnga fãaga pagã: a yaaga a noor n vel kʋɩlgã sẽn yi waafa noorẽ. Waafa lɛɛgame t'a sũur kãbd ne pagã, t'a kong n na n tɩ maan zabre ne a kamb a taabã, kamb niyns sẽn da reeg-b Wẽnnaam noya la b paam a Zezi kasetã. A waa n yalsa mogra noore. La m yãenda Rũng sẽn puk koomẽ ne zut a yopoe la yɩɩl piiga; yɩɩl piiga da fõga naam pugli piiga la zut a yopoe wã ra gʋla zab yʋy sẽn tʋʋsd Wẽnde. Rũnga ra wẽnda ãbga, t'a nao wẽnd tãntur nao, t'a noor wẽnd gɩgemd noore; Wag-bãnda kõ-a-la a pãnga la a naama zaoore, n kõ-a rĩung sẽn tar yalem. Rũnga zug a ye ra nee wa a poglame n sek a kũum, la a poglgã sẽn da sek a kʋʋma wẽneg n sãoogame; dẽ la ãndũni rãmba yik n pʋgd-a ne pɛlen-yɩka. B wõgemdame n waoog Wag-bãndã a sẽn dɩk a naama n kõ Rũngã, la b wõgemda Rũnga me taoore n yetẽ: «Ãnda n zem Rũngã la ãnd n tõe n tak zabr ne-a?» Rũnga paamame n na n gom tɩtaam goama la a tʋʋs Wẽnde; a paamame n na n tʋm a tʋʋmde kiis pis naas la a yiibu. T'a sɩd na n sɩng n tʋʋs Wẽnde, n tʋʋs b yʋʋre la b roogo la sẽn be-b arzãna fãa. Rũnga paamame n na n maan beem ne nin-sõma la a tõog-ba; a paama tõog ninsaalb fãa zugu, tẽns toɛ-toɛ rãmba, tɩ b goam la b rog-n-mik ya toɛ-toɛ yã. Ada sẽn na n paam waoogr neb niyns nengẽ: yaa sẽn wa-b moogo n yaool n ka paam, dũni sɩngra wakato, tɩ b yʋʋr gʋls vɩɩm sebra pʋgẽ, Pe-bil ning b sẽn kodgã vɩɩma sebr pʋgẽ. Sẽn tar-a tʋb bɩ a kelg! B balg bãnga sẽn toga ne bãnga! B kʋ ne sʋʋga sẽn toga n kʋ ne sʋʋga! Woto wã, nin-sõma wã maanda sũ-keelem la b zĩ ne saagre. Ad-y m yãee Rũng a to sẽn yi tẽngã ne yɩɩl a yiibu wa Pe-bila dẽnna t'a koɛɛg ya wa Wag-bãnda koɛɛg. A reega a tʋʋmna pipi Rũnga nengẽ, la a saa n vigla a naama zaoor zĩig zãnga n kɩt tɩ dũnia tõre ne a neba ka tɛkã waoog pipi Rũngã, rũng ning zug a ye sẽn pogle n wẽneg n sãoogã. A maana tʋʋm bãna sẽn yɩkd pɛlense; a tol n kɩtame tɩ saag bugum sig tẽnga neb fãa nifẽ. La a sẽn kẽ pipi Rũngã, rẽ tudga tẽnga rãmba n ning b yamẽ tɩ b maan nin-naande, Rũng ning sʋʋga sẽn pogle tɩ nodra wẽneg n maaga soab nin-naande, n tar n waoogdẽ. B kõ-a-la tõogo t'a kɩt tɩ Rũnga nin-naand lebg wa bõn-vɩɩg menga n gomda, la a modg tɩ b kʋ neb niyns fãa sẽn na n zãgs a waoogre. A na n kɩtame tɩ rĩm biis wa talse, rakãagb la naong rãmba, yamba la burkĩna, wa reeg a makrã b nug-rɩtg bɩ b rĩir zugu. Ned ba a ye kõn le paam sore n kẽ raagẽ n da rɩɩbo bɩ a koos bũmbu, b sã n ka reng n mak-a ne Rũnga yʋʋr menga bɩ ne Rũnga sõadg yʋʋre. Yaa sõdba zĩigẽ la geel mitba na n yõs taaba: Yʋʋra yaa rao yʋʋre, yʋʋra yaa 666, kobs-yoob la pisoob la a yoobe. La ad-m sẽn leb n yãe: Pe-bil sẽn yɛs Siõ tãnga zugu ne a neb tus koabg la pis naas la a naase n tar b rĩirẽ a yʋʋre la a Ba wã me yʋʋre. La m wʋma rãamde sẽn yi yĩngri wala kʋɩl kãseng rãamde, bɩ wala sob-raoog sẽn fõta; m tagsa pɛnds wẽedb sẽn zĩ n wẽed b pɛndga. B yɩɩnda yɩɩn paalle, Zaoora taoore ne Bõn-vɩɩs a naasã la Nin-kẽemsã; ned da ka tõe n zãms yɩɩlã sã n ka bãmb tus koabg la pis naas la a naasã sẽn põs tẽnga velbo. Bãmb dãmb zɩ n lagem ne pagb ye, yaa zɩ n lagem pagb zãnga; bãmb n pʋgd Pe-bila a sẽn tʋgdẽ fãa; ninsaalba sʋka, bãmb la Wẽnd la Pe-bila kood-rẽems. Zirẽ-beed zɩ n yi b noorẽ ye; b yaa zɩ yell dãmba. Mam yãee malɛk a ye sẽn yɩgd yĩngri. Yaa koɛɛg sẽn ya noogo n na n kell n yɩ noogo la a wat n na n wilg tẽng zug rãmba, ned kam fãa ne a buudu, ne a goam, ne a tẽnga. A ra moonda ne koe-kãsenga: «Zoe-y Wẽnde, la pẽg-y ba; ad-y bʋʋda wakat taame; waoog-y sẽn naana yĩngr la tẽnga ne mogre la ko bundem fãa.» Malɛk a to, malɛk a yiib soaba, n pʋg-a, a me tar kɛlenga: «A lʋɩɩme yee! Na-tẽnga sẽn boond tɩ Babilon Kãsengã! Yẽ bal n belg ninsaalb buud fãa n yũnug-b ne Wẽnd sɩbgr dãam.» Malɛk a to, a tãab soaba, n le pʋg-a; a me kelma ne koe-kãsenga: «Ned ning fãa sẽn na n waoog-a Rũnga ne a nin-naandã la a reeg-a makre a rĩirẽ bɩ a nugẽ, yẽ soab na yũ Wẽnd sũ-puura rãam, rãam sẽn ka pul koom n tẽg ne b sũ-puura wamde. Yaa ne bugum la kidbri la b na n nams-a, Malɛgs sõma la Pe-bila nifẽ. La ad-b namsga bug-zõos sẽn dukd yĩngri yʋʋm sẽn kõn sɛ. Sɩda, sugr kõn zĩndi, wĩndg bɩ yʋngo, ne neb niyns sẽn waoog-b Rũngã ne a nin-naandã, la b reeg a yʋʋra makrã.» La rẽ me yĩng la nin-sõma wã maand sũ-keelem, neb niyns sẽn deeg-b Wẽnnaam noya la b tar a Zezi tẽebã. M wʋma koɛɛg sẽn zĩnd yĩngr n yeel-ma: «Gʋlse: Sũ-noog rãmba la sẽn kiid-b ne Soaala barka. N-ye! Marsã tɛka — ya a Vʋʋsem Sõng n gomde — bɩ b vʋʋse ne b zaamẽ yaamse tɩ b tʋʋm sõma yãagd-b lame.» La ad-m sẽn le yãe: Sawad-pɛɛlg n puki tɩ m ne wa ninsaal Biiga sẽn zao a zugu, b fõgna naam pugla n zãad goeoog b nugẽ, goeoog sẽn dɩte. Malɛk a to yii wẽnd doogẽ la a tool n tãsa ne pãnga sẽn da zĩ a sawadgẽ wã n yeel-a: «Lob f goeoogã la f wʋre tɩ tigsig taame, dũniya kood bɩɩme.» Sẽn da zi-a sawadgẽ wã loba a goeoog dũniya la dũniya kood tigsame. Malɛk a to n le yi wẽnd dooga yĩngri, a me zãad goeoog sẽn dɩte. Malɛk a to me n yi maan-kugrã zugu: yẽ la maan-kugra bugma gũuda, la a tool n tãsa sẽn da zãada goeoogã, n yeel-a: «Lob f goeoogã la f tigs tẽnga bugsuntung sõng biisi tɩ bɩɩme.» Malɛka loba a goeoog dũni wã pʋga la a tigsa bugsuntung biisi la a rʋʋga fãa Wẽnnaam sũ-puura koglgẽ, koglg kẽengo. La b yii ne-a, tẽnga kɛɛnga, n tɩ wẽk a biisa koom; la yɩɩ zɩɩm n daage n zẽk n tat weoof zãndlem, la yaa madgr meng la a madg zĩigã. M leb n yãee yel-bãnd yĩngri. Yaa yel kãsenga sẽn yɩkd pɛlenga: Malɛgs a yopoe n zãad tẽn-kũum a yopoe; bãmb n na n baas Wẽnnaam sũ-puura tʋʋmde. M yãenda mogr sẽn pɩnd wa nin-gɛtga tɩ bug-witem zomb-a; n paas neb niyns sẽn tõog-b Rũngã, n tõdg a nin-naanda waoogre, n bãnga yʋ-sõtra võore, tɩ b yɛs yĩngr, mogra yegende. B yɛs n wãagda ruuds la b yɩɩn Wẽnd sõgen a Moyiiz yɩɩn noogo la Pe-bila me rẽnna: «Yãmb tʋʋma labsa la b bee neere, Wẽnnaam, bũmb fãa Soaala; y sẽn tũud soy niynsa yaa tɩrse, Adem biis Rĩma! Ãnd n be, Soaala, n ka rigd-a la a tõt yãmb yʋʋra pẽgre? Yãmb bal n tar Sõmblem, yãmb bal n pid ne Sõmblem; la bu-zẽmba fãa na n wa wõgemda yãmb taoore, tɩ y yikame n dok y sũur la y sɩbg-ba, tɩ b neẽ.» Dẽ poore m le gesame, la ade: Yĩngri wẽnd doogã, sɛka zãnda lakame, la be la tẽn-kũum a yopoe Malɛgs a yopoe wã yi yã; b ra yera beren-dɩgr gĩ-bãanes fu-neeba la sãnem sẽbdse n da be b sɛɛgẽ. Bõn-vɩɩs a naasa nin-yend kõo malɛgs a yopoe wã sãnem laase. Laasa ra pida ne Vɩɩm sẽn ka be sɛɛba soab sũ-puuri. Wẽnd dooga wulumda ne bug-zõose: yaa Wẽnd ziira ne b pãnga kaseto. La woto ned ka le tõog n kẽ rooga pʋga, tɩ Malɛgs a yopoe wã ka reng n sɛɛs b tẽn-kũum a yopoe wã zãng ye. M wʋma koɛɛg sẽn tãs wẽnd dooga pʋga n yeel Malɛgs a yopoe wã: «Aya! Saag-y tẽngã n daal Wẽnnaam sũ-puura sẽn pid y laasã.» Pipi malɛka tɩ ralga a rẽnna tẽng zug la neb niyns sẽn deeg-b Rũnga makre la b wõgemda nin-naanda taoore bẽe nod-tãoodi toose. A yiib soaba tɩ ralga a rẽnna mogra zugu: yɩɩ zɩɩm — wa ned la b kodg yã — la mogra bõn-vɩɩl fãa kiime. A tãab soaba ralga a rẽnna kʋɩlsa la ko-bundsa fãa zugu tɩ fãa lebg zɩɩm. M wʋma malɛk ning sẽn da gũud kooma sẽn yeele: «Yãmb yãee neere, Zaamẽ la Rũnna soaba, Sõmblem naaba, y sɩd bãnga sɩbgr sẽn toge. B daaga nin-sõma la bãngdba zɩɩm, dẽ me la yãmb yũnug-b zɩɩm, la rẽ n segde.» Koees n zĩnd maan-kugra tẽngr n deese: «Sɩda Soaala-Wẽnnaam, bũmb fãa Naanda, yãmb sɩbgr tũuda sɩda la zemsgo!» Malɛk a naas soaba ralga a rẽnna wĩntoog zugu la wĩntooga bugum paama tõogo n na n dɩ ninsaalba. La waoolg sẽn ka bilfu n sɩd yõog ninsaalbã. Ne rẽ fãa b zãgsa b yel-wẽna tuubgu la Wẽnd pẽgre, n na n tʋʋs-ba, b sẽn tõe n yiis tẽn-kũum a woto buud yĩngã. A nu soaba ralga a rẽnna Rũnga zaoor zugu la a soolma fãa lebga lik tam t'a neba noor vam ne sũ-toogo. La ninsaalba zãgsa b bas b tʋʋm wẽna n le yik ne yĩngr Wẽnda tʋʋre, b namsgã la nod-tãoodra yĩnga. A yoob soaba ralga a rẽnna kʋɩl kãseng sẽn boond tɩ Efrat zugu. A kʋɩɩ zãnga n bas sor tɩ Yaang nanams tũud n loaada. Dẽ poore, m yãee sẽn yit Wag-bãnda noorẽ, Rũnga noorẽ la zirẽ-be-bãngda noorẽ, sʋtãan dẽgd a tãabo, sẽn wẽnd loms buudu; — la sɩd me yaa sʋtãamba sẽn tõe tʋʋm-bãna, n yi n na n saag n tigs dũniya tõr dĩm dãmba. Yaa tigs-ba n wa tõog n zab ne bũmb fãa Soaala, b ra-kãsenga raare. (Ad-m sẽn wat wa wagdre: sũ-noog soab la sẽn gũusd m waoongo, n kell n yeelg fuugu, n ka kẽnda kãre tɩ b yãet a yãnd ye.) B kɩtame tɩ dĩm dãmba tigim taab Megido tãnga, zĩig ninga sẽn boond tɩ Armagedõ ne Ebre rãmb goama. Malɛk a yopoe soaba fẽega a rẽnna yĩngri la koɛɛg n zĩnd wẽnd doogẽ wã n tãse: «Sɛyã!» La yɩɩ sa-yãgdo la sa-tãse, la tẽng miuung kãsenga; sɩda ninsaalb sẽn wa tẽng zug tɛka, b zɩ n yãend a taar ye! Na-tẽng kãsenga wãa boag a tã; bu-zẽmba tẽns rʋʋga zãnga; la Babilon, na-tẽn-kãsengã, Wẽnd tẽega a yelle n yũnug-a ne b sũ-puura rã-toose. Tẽns niyns fãa sẽn puk-b mogra zug menemame, la tãmsa fãa sirgame. Sapɩlem bɛd-bɛd sẽn zem yɩga, yii yĩngri n lab ninsaalba; tɩ ninsaalb na n tʋʋs Wẽnnaam, sapɩlma sẽn lebg tẽn-kũuma yĩnga, tɩ sɩda, a waa ne tẽn-kũum kãsenga. Malɛgs a yopoe wã sẽn tar sãnem laasa sʋka nin-yend n yeel maam: «Wa tɩ m wilg-f pʋg yoodr kãsenga, pag ning sẽn zĩ kʋɩl kãsenga noore, wa tɩ m wilg foom a bʋʋda sẽn yɩ a soaba. Yaa ne yẽnda la dũni dĩm dãmba yo yã, a tɩgsa dũnia neba ne a rãam, a yooba.» Malɛka tall-m lame n kẽng weoogẽ — yɩla m sɩɩgã — la be, m yãee pag sẽn zomb Rũn-moomde, t'a yĩnga zãng gʋls zab yʋya, n tar zut a yopoe la yɩɩl piiga. Paga da yera murfu la nufa, n yãgd sãnem yãgbo n yãgd lʋlʋʋgo la muizãan neeb yãgbo; a ra zãada a nugẽ sãnem laaga sẽn da pid ne a yooba rẽgdo la a tʋʋm-wẽna waoosa. A yʋʋr da gʋlsa a rĩirẽ, yʋ bãnde: «Babilon, na-tẽng kãsenga, dũnia pʋg-yoaad wẽna fãa fãa ma.» La mam nifẽ, paga ra tɩgsda a meng ne zɩɩm, ne nin-sõma wã zɩɩm, ne sẽn ki-ba a Zezi yĩnga zɩɩm. M sẽn yãend woto, m yɛɛsa wʋsgo. Tɩ Malɛka na n yeel-ma: «Bõe yĩng tɩ fo yɛɛsd woto? Bas tɩ m wilg-f pʋg kãnga sẽn ya a soab taki, la m wilg-f Rũngã a sẽn zombã, Rũnga sẽn tar zut a yopoe la yɩɩl piigã, sẽn ya a soaba. Rũn kãng ra beeme la marsã a ka ye; a na n yii bul-zulungẽ wã la na n yɩ-la a bõne; neb niyns faa sẽn ka paam tɩ b gʋls b yʋy al dũni sɩngrẽ, vɩɩm sebra pʋgẽ, bãmb fãa pɛlens na n yɩka Rũngã poorẽ, a sẽn da beẽ, n wa kaẽ, n na n le wa pukã. Yaa marsã la yam dãmb la sɩlem dãmb na n paam taaba! Zut a yopoe wã yaa tãn-bi a yopoe tɩ paga zao b zugu. Leb n yaa dĩm dãmb a yopoe la a makda; a nu zoe n loogame, t'a yembr be marsã, t'a to nan watẽ. A sã n wa, a na n kaoosa bilfu bala. Sã n kella Rũnga sẽn da be la a ka marsã, yẽ n tõkd a nii, n yaool n ya a yopoe wã nin-yende; baad-y a rigda a yõor yãkre. Yɩɩl piiga yaa dĩm dãmb piiga; b nan ka paam naam ye la b na n wa naaga Rũngã n dɩ naam wakat a ye bala. B fãa gesame tɩ segdame tɩ b lebs Rũngã b naama la b tõogo. B na n taka zabre ne Pe-bila la Pe-bila n na n tõoge t'a yaa soaalba Soaala la dĩm dãmba Dĩma, ye ne a poorẽ dãmba, Wẽnd sẽn bool b rãmba, Wẽnd sẽn tũus b rãmba, Wẽnd tẽedba.» Malɛka le paasame: «Kʋɩl kãseng ning Pʋg-yoodrã sẽn zĩ a soab noorã makda Adem biisa ne b zãma, tɩ b tẽns ya toor-toore, tɩ b goam ya toor-toor e. Yɩɩl piigã ne Rũngã menga na n dɩɩ beem ne Pʋg-yoodrã, b na n yeesa a futu, n fʋk-a a zãnde, n dɩ a nemdã la b yõog-a bugum. Soaala meng n ning dĩm dãmba yamẽ tɩ b pids bãmb a Wẽnd daabo la b sed ne taaba n lebs b naama fãa Rũnga nugẽ n tãag Wẽnd gomda pidsg raare. Paga la tẽn-kãsengã sẽn dɩt naam dũni dĩm dãmba zutã.» Dẽ poore m yãee Malɛk a to sẽn yi yĩngr n sigd ne pãn-kãsenga; a vẽenema bui tẽnga tõre. A kelma ne a pãng fãa: «A wãame! Babilon na-tẽn-kãsenga wãame! A lebga sʋtãamb doogo, yam yood dãmb soondg zĩiga, lʋɩɩn-dẽgd la lʋɩɩn-yood buud fãa tʋɩ-la b tʋgd a pʋgẽ. Ninsaalb buud fãa waame t'a tɩgs-b ne a rãama, a yoobã. Dũniya rãmb gãanda ne-a; dũniya tẽnse ne b dĩm dãmb yoo ne-a, la yaa a arzɛka sẽn labsã la a fẽeg dũniya toandba fãa.» M wʋma koɛɛg a to sẽn zĩnd yĩngri n yeele: «Yii-y tẽn-kãnga pʋgẽ, m neba, n da wa reeg a yel-wẽna taale t'a sɩbgra me lʋɩ y zug ye. A tʋʋm beeda samame n tãag saaga; Wẽnnaam le tẽega a yel-wẽna. Bɩ y sɩbg-a waa a sẽn sɩbg a taaba, bɩ y lebs-a a tʋʋm wẽna naoor a yiibu. Kalem-y naoor a yiibu rẽgd ning a sẽn da pidsd a wamdã n lebs-a! Kɩt-y t'a sɩbgra zeng a nagrã la a tɩtaama. Ka yẽ n gomd ne a meng woto: ‹Ad-ma! M ka rĩm-poak bɩ? M yaa pʋg-kõor laa? M kõn yãb kʋʋr abada.› Yaa rẽ yĩng la raar a ye bala yel-beed na n yẽeg-a: kũum, nintãm la kom, tɩ bugum yet tɩ b bas n kõ yẽ. A bãng tɩ Soaala Wẽnd sẽn kao a bʋʋdã sɩd yaa Pãng soaba.» B na n wiisame, b na n kũmame, dũniya dĩm dãmb sẽn naag-b yẽ n vɩɩnd faong la yoob vɩɩma, b sã n wa yãend a bugma bug-zõose. B na n tara yɩɩg n get a sɩbgra ne rabeem la b maanẽ: «Kato, kato, Babilon, tẽn-kãseng a woto, na-tẽng a woto! Babilon sẽn ka tar mak-n-taaga! Wakat yɛng bala tɩ fo bʋʋd zoe n kao!» Tɩ dũniya toandba na n sɩng wiisgu la kũmbu tɩ ned ka le be n daad b koom kogend teed ye. Bõe n da ka be b kogendẽ: ad sãnem, wanzurfu, lʋlʋʋgo, muizãan neeba, peen-neeba, peen-gʋnem, murfu la nufa, ra-nɛɛb buud toor-toore. Ad wob-yẽn sẽn maneg n peese, ad raad sẽn tar keglem la neerem, n paas yõg-teed buud fãa, kutu la zũudu, n paas kug sẽn yãgd wa nin-gɛtse. Ad zẽed noosd toor toore, ad yũ-noodo la ka-noodo buud toor toore, ad tɩdare. Ad rãam la ka-rɩtem, zom pɛɛlga, zom pugsgu, koodo. Ad niigi, piisi, wiidi ne b bilim-bɩlm. Ad yem-daad la ninsaalb sẽn lebg bõn-koosem. Fo sẽn da geend yõod ninga, fãa menemame n bas foom; f faongã, ne f ziira, fãa sɛɛ sõmpi! Ad toandba sẽn da maand leebg ne foo n dɩt-b rɩɩbã, fo sɩbgra na n kẽes-b la rabeem tɩ b tar yɩɩg n yãbd nintãm la b wiisdẽ: «Kato, kato! Tẽn-kãseng a woto fãa sẽn yer futu sẽn wʋg ne gɩ-bãanese, n yer murfu la nufa, n nags ne sãnem la lʋlʋʋgo la muizãan neeba! Ad wakat a ye bal n sek faonga woto fãa sãango!» Koom kogenda gɛtba, neb niyns fãa sẽn togd soɛ koom zugu, sẽn dɩt-b mogra yõodo, fãa da yɛsa yɩɩga n get bugma bug-zõosã la b maanẽ: «Bõe n da zem tẽn-kãseng kãngã?» B ra yugda b zut tom, la b yãbda la b wiisd n yetẽ: «Kato, kato! Tẽn-kãseng a woto fãa! Yẽ faong n da rɩlgd mogra zug kogenda soaalba, ges-y wakat a ye bal sẽn wa ne a wãabo!» Arzãn dãmb fãa, kɩdm-y sũ-noogo, nin-sõma, tʋʋm-tʋmdba, bãngdba, bɩ y la n kaase tɩ Wẽnnaam sẽn paalg-a bʋʋdã yaa yãmb la b kõ bʋʋm. Malɛk a ye n yaool n tebg ne a pãn-kẽengo kugri sẽn zem neere, n lob-a mogrẽ n yetẽ: «Yaa woto, vugr bala la b na n lobg Babilon, tẽn-kãsengã, la ned nif kõn le yãend-a. Fo nengẽ b kõn le wʋm ruudsã ne yʋʋmbã, wɩ-pɛɛbdba la tõntõoda abada. Tʋʋm-tʋmd ba a ye kõn le tag f pʋgẽ t'a rabda tʋʋmd ye; neer rãamde kõn le wʋm f pʋgẽ ye; fitil vẽenem kõn le yãend f pʋgẽ abada; b kõn le wʋm kãad paal sẽn gomd ne pʋg paal abada! Toandba da yaa dũniya dĩm dãmba la fo manesma n kẽes b gill moogo.» La yaa fo tẽn-peelmẽ la b raag zɩɩm, bãngdba, nin-sõma la b sẽn kood b rãmb fãa tẽng zuga zɩɩm. La rẽ poore m wʋma rãamde wa zãma kãseng rãamde sẽn yi yĩngri la sẽn maamde: «Alleluia! Tõnd Wẽnnaama reeg waoogre, pẽgre la naam! B bʋʋd tũuda sɩda la zemsgo; b bʋʋ Pʋg-yoodr kãsenga sẽn da sãamd dũniya ne a yoob tʋʋma la b roka b sũuri t'a raaga b sõgen-kamba zɩɩm.» La b fãa le reegame: «Alleluia! N-ye, a bug-zõos ruk yʋʋm kõn zĩnd sɛɛbo!» Wakat kãng la Nin-kẽems pisi la a naasã la Bõn-vɩɩs a naasã wõgemd tẽnga n waoog Wẽnnaam sẽn zĩ b zaoorẽ n yeele: «Ami! Alleluia!» Koɛɛg n zĩnd zaoorẽ wã n yeele: «Pẽg-y tõnd Wẽnnaam, yãmb fãa sẽn nong-ba la sẽn zoet-b bãmba, talse la na-biisi!» La m wʋma zãma kãseng rãamde, rãamd wa kʋɩl-kãseng sẽn fõt bɩ saag sẽn tãsd ne pãnga; b ra maandame: «Alleluia! Soaala bũmb fãa Naanda sɩnga a naam dɩɩbo. Bɩ d lang sũ-noogo la d pẽg Wẽnnaam tɩ yaa Pe-bila, Wẽnd Biiga, kãadem la pʋg paala ninga a fan teedo; yaa gĩ-bãaneg fu-pɛɛlg fadadad la b kõ-a t'a yeelge; gĩ-bãanega makda nin-sõma yel-sõma.» Koɛɛgã n yeel maam: «Gʋls woto: Sũ-noog rãmb la b sẽn bool b rãmba Pe-bila, Wẽnd Biiga, yikãadem. La a le paasame: Wẽnd gom-kãensa yaa sɩda.» M wõgemdame n me na n waoog sẽn gomda soabã la a yeela maam: «Ayo, vẽ! Ad mam me yaa Wẽnd yamb wa foo la m wẽnda fo saam-biisa fãa sẽn tar-b a Zezi kaseto. Yaa Wẽnnaam la fo tog n waooge.» Tõog tɩ Krista kaseta pid bala n tog n be bãngd yamẽ. M yãeeme tɩ yĩngr pakame la wed-boll n yi, la wed-dʋʋda yʋʋr da pʋda woto: «Ra-Teem-Dĩma» la a «Sɩdyɛsa»; a kaooda bʋʋdo la a maanda zabre ne a sẽn tog n zab ne b rãmba. A nina zirda wa bugum. Naam pugli n lagem n fõg a zugã la b gʋlsa a yʋʋre, yẽnda a ye bal sẽn mi. Fuug ning a sẽn yerã losa zɩɩm la ad wed-dʋʋda yʋʋre: Wẽnd Gomde. Yĩngr tãb-biisa ka tɛk ra pʋgd-a lame, n zao wed kaala la b yer gĩ-bãanes futu sẽn ya wogd la sẽn ya peels fadadad; sʋʋg sẽn dɩte la a ra rũm a noorẽ la yẽ la a na n tall n kɛ bu-zẽmbã; yaa ne naam dasaar sẽn ya kutu la a na n legl bu-zẽmbã; leb n yaa yẽ n na n kẽ koglgã n fẽd bugsuntunga biisi la a yoog Wẽnnaam, bũmb fãa Soaala, sũ-puura rãam, b sũ-puur sẽn dɩt wa bugma rãam. Yʋʋr n gʋls a fuuga zugu la a gera zugu: dĩm dãmba Dĩma, la soaalba fãa Soaala. Dẽ poore m yãee malɛk a yembre sẽn teeg Wĩntoogo n yɛsẽ; a tãsame n yeel luiili wã fãa sẽn yɩgd yĩngrã: «Wa-y, kõ-y taab sɛk Wẽnd kibs kãseng rɩɩba zĩigẽ. Yaa dĩm dãmb nemdo la y na n vele, n paas tãnsoaben-dãmb nemdo, gãndaad nemdo, wiidi ne b wed-dʋʋdb nemdo, yem-daad la burkĩn-bi, tals la na-biisi nemdo!» La m wẽneg n yãee Rũnga ne dũniya dĩm dãmb la b tãb-biisi sẽn tigimd taaba n na n tak zabre ne Wed-dʋʋdã la a poorẽ dãmba. Yaa Rũnga ne a zirẽ-be-bãngda la b yõk yã; zirẽ-be-bãngd kãng n da kẽ Rũnga tãpẽ la a maand bõn-bãna n tudgd neb niyns sẽn deeg-b Rũnga makre la b waoogd a nin-naandã. B losa bãmb b yiib fãa vɩɩse bugmẽ, kidbri bugum sẽn da yɛdg wa kʋɩlga. Sẽn ket-ba fãa, yaa Wed-dʋʋda sʋʋg n kood-b: sʋʋg ning sẽn da be malɛka noorẽ wã. Ad-y luiili wã tɩga b nemdo. Dẽ poore m yãee, yĩngri, malɛk a yembre sẽn sigd la a zãad Bul-zulunga kʋɩlen-bila ne bãn-soagdg sẽn ya bedre; A luba Wag-bãndã, Wag-kʋdrã, Sãamdã, Sʋtãan mengã, la a balg-a la bãng yʋʋm tusr yĩnga. A lob-a-la Bul zulungẽ wã n page n tol n sog bãeensã la a ning makre; la woto Rũnga kõn le tõog n bels ninsaalba, yʋʋm tusr sã n ka loog ye; dẽ poore b na yaool n bas-a wakat fĩifu. M yãenda neb sẽn wa n zaoond goeels zutu tɩ b kõ-b bʋʋda kaoobo. M yãenda neb sẽn le vʋʋge n na n dɩ naam ne Krista yʋʋm tusri: yaa b sẽn fiuus b rãmb zut a Zezi kaset yĩnga la Wẽnd Gomda yĩnga, yaa sẽn zãgs-b Rũnga waoogre, n zãgs a nin-naanda waoogre, n zãgs tɩ b kõn deeg a makrã b rĩrẽ bɩ b nugẽ. Bãmb n yɩ pipi n vʋʋge. Kɩɩms a taaba kõn tõog n vʋʋge, tɩ yʋʋm tusra ka pids ye. Sũ-noog la bark soaba la sẽn paam-a pipi vʋʋgrã; kũum a yiib soaba ka le tar bãmb gaab ye; bãmb n na n yɩ Wẽnd la Krista maan-kʋʋdba n dɩ naam ne bãmba, yʋʋm tusri. Yʋʋm tusra sã n looge Sʋtãan na n le paama a menga, a na n yiime n le sɩng ninsaalb belgre dũniya kɩrms a naasã: Gog la Magog; a na n tigsa a zabr yĩnga tãb-biis ka tɛka, wa bĩisr sẽn be mogr noore. B yii b tẽnga tõre n wa gũbg nin-sõma wã sika, bark tẽngã. La bãng-y tɩ bugum yi yĩngri n dɩ-b zãnga. B loba Sʋtãana, kʋɩɩbdã, kidbra bugmẽ t'a tɩ naag ne Rũngã ne a zirẽ-be-bãngda n nams be wĩntoog la yʋngo n poog zamaan ne zamaan ka tɛka. Dẽ poore mam yãee naam zaoor sẽn ya pɛɛlga la kãsenga; a soaba ra zao a zugu. Yĩngr la tẽnga yõbga a taoore n menem zãnga. M yãee kɩɩmsa fãa, bɛd la bõonese, sẽn yɛs zaoora taoore; b talla sɛb n wa lagse, b waa ne vɩɩm sebrã me, la kɩɩmsa bʋʋd kaoome, ned kam fãa ne a sẽn maane, wa sẽn da be sɛba pʋga. Mogra me yiisa kɩɩmsa sẽn da gãe a pʋgẽ; kũum la bʋg-tẽnga me yiisa b rẽnna la ned kam fãa bʋʋd kaoome, ned kam fãa ne a yɛla. B yaool n tusa kũum la bʋg-tẽng n lub kidbra bugmẽ sẽn tond wa kʋɩlgã. Kʋɩl kãng bugma la kũum a yiib soaba. Ned ning fãa yʋʋr sẽn ka gʋls vɩɩma sebrẽ, yẽ soab lobda bug-kãng pʋga. Dẽ poore m yãee sa-paalle la tẽn-paalga, tɩ pipi saaga la pipi tẽnga da menemame la mogra ra fẽbgame. M yãee bark tẽnga, m yãee Zerizalɛɛm paalga sẽn yit arzãna, Wẽnnaam nengẽ, n sigda; a ra manega a meng neere wa pʋg-paal sẽn manegd a menga a sɩd yĩnga. M wʋma koɛɛg sẽn yi zaoorẽ wã n moone: «Ad Wẽnd zak sẽn ti ninsaalb sʋka; Wẽnd waa n mee bãmb sʋka, tɩ b na n lebg Wẽnd kamba tɩ Wẽnd-be-ne-ba na n legb bãmb Wẽnde. B na n yẽesa nintãm buud fãa la b kõn le wʋm kũum yelle ye; yãbre bɩ kɛlenga, bɩ sũ-sãang me kõn le zĩnd ye tɩ dũni kʋdga menema zãnga.» La sẽn da zĩ-a zaoorẽ wã gomame: «Ade, m le sigla dũni paalle!» A le yeelame: «Gʋls tɩ Gom-kãnga yaa sɩda la sɩd menga!» A le paasame: «N-ye! Maam la A la O, Sɩngre, la Baasgo, Tʋɩɩsgo la Kʋʋbo; ko-yũud sẽn tara soab bɩ a wa tɩ m na kõ-a vɩɩm kooma t'a yũ zaalem. Sẽn maan-a raood fãa pʋɩɩr na n yɩɩ woto; M na yɩla a Wẽnnaam tɩ yẽ yɩ m biiga! Sã n kella rabɛɛmbã, zãmb dãmb la nin-yoodã, nin-kʋʋdba la yoaadba, bagba la sẽn waoogd-b naande, zirẽ-be-rãmba, bãmb dãmb pʋɩɩr bee bugma kʋɩlgẽ, kʋɩlg ning sẽn kɛɛd ne kidbr bugum, la rẽ la kũum a yiib soaba.» Malɛgs a yopoe wã sẽn da zãad-b tẽn-kũum a yopoe wã nin-yend wẽneg n yeela maam: «Wa tɩ m wilg-f Pe-bila, Wẽnd Biiga, sẽn kẽed kãadem ne a soaba, m wilg fu b pʋg-paala.» A kɩtame tɩ mam dʋ ne m yam tãn lug-lug a yembr zugu t'a wilg-m bark tẽnga, Zerizalɛɛm sẽn yit yĩngri, Wẽnnaam nengẽ, n sigda. A waa ne Wẽnnaam meng pẽgre, al t'a yãgbã da yɩɩd kug-neeba buud fãa yãgbo. A da gũbga ne lal-gũbri sẽn zãnde, n tar rɩgnoy piig la a yiib sẽn gũnug malɛgs piig la a yiibu, la sẽn da gʋls yʋya, a Israyɛl dot piig la a yiiba yʋya. Yaang yaa noy a tãabo; goabg noy a tãabo; rɩtg noy a tãabo; nin-taoor yaa noy a tãabo. Lal-gũbra meeb sɩnga ne kug ma rãmb piig la a yiibu, sẽn gʋls Pe-bila Tʋʋm-tʋmdba piig la a yiiba yʋya. Sẽn da gomda ne maama ra zãada sãnem rasaar magdga n na n mag tẽngã ne a noya la a lalgã. Tẽnga sõoga tɩrga, a ka maka, a ka goalenga, t'a woglma ne a yalma zem taaba. A maga tẽnga lal-gũbrã ne dasaarã la yɩɩ magb tɛka; malɛka sẽn zãad magdg ninga ne ninsaal dẽnd da ya a ye. — Lal-gũbra meng ra mee ne kug sẽn yãgd b toore, n ya kõaada, la tẽnga tõr mee ne sãnem yulli sẽn pɩnd wa nin-gɛtga. Lal-gũbra mee rũnug rũnuga la rũnug fãa kug yaa toore. Pipi rũnuga kug yaa kõada, a yiib soaba togsda salsang kõbgo; a tãab soaba yaa miuug sẽn lʋʋs kẽega; a naas soaba: kẽeg toenɛɛga. A nu soba: sɩɩga; a yoob soaba: miuug yʋdʋd; a yopoe soaba: rõodo; a nii soaba: kẽeg sẽn lʋʋs sabla; a wɛ soaba: kõodr sẽn liʋʋs moomde; piig soaba: kẽeg pespele; piig la a ye soaba: miuug sẽn lʋʋs sabla; piig la a yiib soaba: mismiuugu. Rignoy piig la a yiibã da pagda ne kug sẽn saase n pɩnd wa muizãanfo, noor fãa ne a rẽnda. Tẽnga sõasg zĩig da yaa sãnem yull bala, neer wa nin-gɛtga. M ka yãend Wẽnd doog be ye; Soaala-Wẽnnaam pãng soaba meng n da yaa b roogo, bãmb ne Pe-bilã. Tẽnga ra pa tar wĩntoog ne kiuug vẽenem tʋʋmd ye tɩ Wẽnnaam pẽgra vẽenem n da buiid-a, la Wẽnd Pe-bila n da ya a bugum. A vẽenema n na n wilg bu-zẽmba sore la dũniya dĩm dãmb na n waa ne b arzɛka. Noya na n paka wakat fãa tɩ beelẽ yʋng ka ye. Be la ninsaalb fãa na n wa ne b laogo la b naam teedo. Bõn-dẽgd kõn tõog n kẽ be abada; d kõn gom sẽn tʋmd-b tʋʋm wẽna la tʋʋm beeda ye; neb nins yʋy sẽn gʋls Pe-bila vɩɩm sebra pʋgẽ bala n na n kẽ be. Dẽ poore malɛka wilga maam vɩɩm kʋɩlga; a yaa pɛɛlg wa nin-gɛtga la a ra bunda Wẽnd la Pe-bila zaoora tẽngre. Yaa tɩɩs sẽn kõt vɩɩm la b ra sel tẽnga tẽnsʋka, kʋɩlga foole; tɩɩsa ra womda naoor piig la a yiibu; kiuug fãa pʋgẽ b ra womdame; b vãada ra tõe n sãooga bu-zẽmbã. Kãab-wẽng kõn le kãab be ye; Wẽnd ne Pe-bila zaoor na n lugla tẽnga sʋka tɩ b kamba wat be n waoogd-b. Kamba nif na n teega Wẽnde; Wẽnd yʋʋr na n gʋlsa b rĩirẽ. Lik kõn le zĩndi; b ka le tar wĩntoog bɩ fitl vẽenem tʋʋmd ye; Soaala Wẽnd vẽenema n na n bui-ba la b na n dɩɩ naam sẽn kõn sɛ. Malɛka yeela maam: «Gomd bãmba yaa sɩd menga; yaa Soaala-Wẽnd menga, yaa bãngdba sẽn deegd-b bãngrã a soab nengẽ wã, bãmb n tʋm tɩ b wa wilg b yemsã bũmb ning sẽn yao waoongo. Ade, m waoong yaoome; sũ-noog soab la sẽn deeg-a bãngra goama sẽn gʋls seb kãnga pʋga.» Maam a Zã n da ne la m da wʋmd woto fãa; la m sẽn deeg dẽ fãa n sɛ, m wõgemda malɛka sẽn wilga maam woto fãa wã taoore tɩ m na n waoog-a, la a yeel-m lame: «Ayoo! Gũus tɩ mam me yaa Wẽnd yamba wa foo la bãngdbã, f ma-bi-taasã; m yaa wa neb niyns sẽn deeg-b sebr kãnga goama. Yaa Wẽnnaam bal n tog ne waoogre.» La a le paasame: «Da solg bãngra goam sẽn be sebr kãnga pʋgẽ wã ye, sɩd ne sɩda, wakat yaoome! Yel-wẽn maand nong bɩ a tʋm wẽnga la nin-dẽgd nong bɩ a pa ne a rẽgdo; nin-tɩrg yee n wɩng ne a pʋ-peelem tɩ nin-sõng me mao ne a sõmblem. Ade, m lebgr wakat yaoome, la m wata ne ned kam fãa yaoodo la yaooda zemsda ned kam fãa ne a tʋʋmde. Maam la A la O, maam la Pipi soaba la Yaoolem soaba, Tʋɩɩsgo la Kʋʋbo. Sũ-noog rãmb la sẽn pegs-b futu; bãmb n na n soog vɩɩm tɩɩgã, bãmb n tũud dignoya n kẽed bark tẽnga. Yãmb fãa gilli, ba-raado, tɩt rãmba, yoaadba, nin-kʋʋdba, sẽn waoogd-b naande, neb niyns sẽn dat-b wẽnga, pa-y yɩnga! Maam a Zezi n tʋm m malɛk t'a wa togs bũmb ning sẽn wat beoog Tigenga yĩnga; m ya a Daviid yagenga, yibeoog ãdg pɛɛlga.» Wẽnd Vʋʋsem la pʋg-paala yeta me: «Wa!» Sẽn tar-a tʋb n kelgdẽ me yetame: «Wa!» Bɩ ko-yũud sẽn tar a soab fãa kolge; sẽn dat-a n deeg vɩɩm kooma n yũ, a wa reeg-a zaalem, n ka yiis lagf ye. Maam n yete: ned ning sẽn kelga bãngr goama sẽn be seb kãnga pʋga la a saagame n paas bũmb be, bɩ Wẽnd tʋka zugu, yel-beeda fãa sẽn gʋls a pʋgẽ. Sẽn saag-a me n yiis bũmb be, bɩ Wẽnd me yiis bũmb a pʋɩɩrẽ, vɩɩm tɩɩga la bark tẽnga sẽn kõt bũmb ning tɩ b gomd sebr kanga pʋga. Sẽn kɩt-a tɩ goam kãensa fãa tar kaset sɩdã n yeele: «Sɩda, m waoong yaoome!» N-ye! Soaal a Zezi, wa-y wɛ! Soaal a Zezi barka sig y fãa gilli. Ami!