Tshamba yo kubahwa kwa Jesu Kristu, mwana wa Dhavhidha, mwana wa Abrahama. Abrahama wakabara Isaka, na Isaka wakabara Jakobe, na Jakobe wakabara Judha, no vanukuna vake. Na Judha wakabara Faresi na Zara ndi Tamari; na Faresi wakabara Esiromi; na Esiromi wakabara Aramu; na Aramu wakabara Aminadhabhi, na Aminadhabhi wakabara Nasoni; na Nasoni wakabara Saremona, na Saremona wakabara Bhowazi ndi Rahabhi; na Bhowazi wakabara Obhedhi ndi Rute; na Obhedhi wakabara Jesi; na Jesi wakabara Dhavhidha wayiva mambo; na Dhavhidha mambo wakabara Soromona ngo mukaji uwo wayiva wa Uriya; na Soromona wakabara Robhowami; na Robhowami wakabara Abhiya; na Abhiya wakabara Asafi; na Asafi wakabara Josafati; na Josafati wakabara Jorami; na Jorami wakabara Oziya; na Oziya wakabara Jotami; na Jotami wakabara Ahazi; na Ahazi wakabara Hezekiya; na Hezekiya wakabara Manasa; na Manasa wakabara Amoni; na Amoni wakabara Josiya; na Josiya wakabara Jekoniya no vanukuna vake, ngo mukuvo wokutohwa kuenda Bhabhurona. Ngosure kwokutohwa kuenda, Jekoniya wakabara Saratieri; na Saratieri wakabara Zorobhabheri; na Zorobhabheri wakabara Abhiyudhi; na Abhiyudhi wakabara Eriyakimi; na Eriyakimi wakabara Azori; na Azori wakabara Zadhoki; na Zadhoki wakabara Akimi; na Akimi wakabara Eriyudhi; na Eriyudhi wakabara Eriyazari; na Eriyazari wakabara Matani; na Matani wakabara Jakobe; na Jakobe wakabara Josefa mwamuna wa Mariya, uwo wakazobereka Jesu unozwi. Ndizvo rusinga hwese kubvira kuna kuguma kuna Dhavhidha uri mibarihwana iri gumi na murongomuna; kubvira kuna Dhavhidha kuguma kwokutohwa kuenda Bhabhurona iri mibarihwana iri gumi na murongomuna; no kubvira kwokutohwa kuenda Bhabhurona mbhera kuguma kuna Kristu iri mibarihwana iri gumi na murongomuna. Zvino kubahwa kwa Jesu Kristu kwayinga kwakadari: Apo Mariya mayi wake wayinga aemesehwa kuchadha na Josefa, vasati vasongana, iye wakavoneka uno mimba yo Mweya Wakachena. Na Josefa mwamuna wake ngokuti wayiva mundhu wakarurama, asikadi kuti amupsheruje, wayida kuti amurambe ngo kufishika. Kwakati acharangarija ndizvo, vonayi, ngirosi ya Mambo yakavoneka kwaari ngo kurota, yechiti: Josefa, iwewe mwana wa Dhavhidha, usatya kutora Mariya mukaji wako; ngokuti mimba iyo yaanayo iri yo Mweya Wakachena. Unozobereka mwana worume; newe unozodura zina rake 18 kuti Jesu; ngokuti ndiye unozoponesa vandhu vake kubva kuzvishaishi zvavo. Zvino izvi zvakaitika kuti zvizarisike izvo zvakavereketwa ndi Mambo kubudikija ngo muprofeti, echiti: Vonanyi, mbhandwe inozoyita mimba, ibereke mwana, navo vanozodura zina rake kuti Emanueri; izvo zvinoti kuti, Mwari unesu. Na Josefa amuka muhope wakayita kudari ngo kuvereketa kwo ngirosi ya Mambo, wakatora mukaji wake; naye aazivi kusongana naye mbhera wakazobereka mwana: Naye wakadura zina rake kuti Jesu. Kwakati apo Jesu abahwa mu Bheterehema ro Judhiya ngo mazuva a Herodhi mambo, vonanyi, kwakaviya vazivi vechibva kumabvazuva vakaguma Jerusarema, vechiti: Arikwapi uwo wakaberekwa uri Mambo wo vaJudha? Ngokuti takavona ndhondo yake tiri kumabvazuva, nesu taviya kuti timudire. Kwakati Herodhi mambo azwa, wakasvipa mwoyo no vo Jerusarema vese naye. Naapo aunganija pamwepo vapristi vakuru vese, no vatari vo vandhu wakavabvunjisa kuti: “Unozobahwa kwapi Kristu.” Navo vakati kwaari: Mu Bheterehema ro Judhiya; ngokuti kwakatahwa ngo muprofeti kudari: Iwewe Bheterehema, nyika ya Judha, auripi mudoko akadi mukati mwo vatongi vaJudha; ngokuti kwouri kunozobuda mutungamiriri, uwo ndiye unozoyita muhavisi wo vandhu vangu vaIsraeri. Naapo Herodhi adanija vazivi ngo kufishika, wakanasa kukwarisisa kwavari mukuvo wo yakavoneka ndhondo. Naye wakavatuma Bheterehema, akati: Endanyi munase kupshakisisa uwo mwana mudoko; kuti mwamuwana mundiviyire no izwi, kuti nenivo ndiende ndimudire. Navo, apo vazwa mambo, vakaenda, ngokudaro, ndhondo iyo yo vakavona vari kumabvazuva yakavatungamirira mbhera yakaguma pandau apo payiva no mwana mudoko. Naapo vavona ndhondo vakadakara ngo kudakara kukuru. Naapo vanghwina mu nyumba, vakavona mwana mudoko na Mariya mayi wake; navo vakawa pasi, vakamudira; kwakati vabewura pfuma yavo vakamupa zvipo mukore no no mure. Navo vechipangwa mu kurota kuti vasachahwirira ngo kuna Herodhi, vakaenda ngo njira imweni ku nyika yavo. Naapo vaenda, vonanyi, ngirosi ya Mambo yakavoneka kuna Josefa ngo kurota, yechiti: “Mukayi, utore mwana mudoko na mayi wake, utizire Egipite, ugare apo mbhera ndikubvunje, ngokuti Herodhi unozomupshaka mwana mudoko kumuuraya.” Naye wakamiruka, akatora mwana mudoko na mayi wake usiku, vakaenda Egipite. Naye wakagareyo mbhera kufa kwa Herodhi, kuti zvizarisike izvo zvakavereketwa ndi Mambo, kubudikija ngo muprofeti, echiti: “Ndakadanija mwana wangu kuti abude Egipite.” Naapo Herodhi wavona kuti wakaitihwa jee ngo vazivi, wakatseneka kakurutu, wakatuma akauraya vana vadoko vese vo rume vayinga vari mu Bheterehema no ndharaunda yaro yese, avo vayinga vaano makore maviri na vayiva pasi paao, kudari ngo mukuvo uwo waayinga wakanasa kubvunjisisa vazivi. Zvakazarisika izvo zvakavereketwa ndi Jeremiya muprofeti, echiti: Izwi rakazwika mu Rama kuchema no kutsumba kukuru, Rakeri echichemera vana vake, asikatendi kuembezehwa, ngokuti inga avachipo. Asi apo Herodhi afa, ngirosi ya Mambo yakavoneka mu kurota kuna Josefa ari mu Egipite, yechiti: Mukayi, utore mwana mudoko na mayi wake uende mu nyika yo Israeri; ngokuti avo vayipshaka kuuraya mwana mudoko vakafa. Naye wakamiruka, wakatora mwana mudoko na mayi wake, wakaviya mu nyika ya Israeri. Asi wazwa kuti Arkirausi wayiva mambo wo Judhiya pandau ya baba wake Herodhi, wakatya kuendeyo; echiziviswa mu kurota, wakaenda ku nyika yo Garire, wakaviya akagara mu guta rinozwi; kuti rizarisike izwi rakavereketwa ngo vaprofeti kuti: Unozozwi muNazaretha. Ngaao mazuva wakaviya Johani Mubhapatisi echichumaira mu bani mwo Judhiya, echiti: Tenderukanyi imwimwi; ngokuti Umambo hwo mu gore huri phedo. Ngokuti uwo ndiye waakavereketa ndiye Isaya muprofeti, echiti: Izwi rounodanijira mu bani, nasiriranyi njira ya Mambo, rungamisanyi makwanja ake. Uwu Johani wayiva no nguvo yo mamviri wo kamera, no njobo muchiunu chake; no kuha kwake kwayiva ndongwe no uchi hwo mushango. Kwakaviya kwaari vo Jerusarema, no vese vo Judhiya, no vo ndharaunda yese yo Jordhani, navo vakabhapatiswa ndiye mu murambo wo Jordhani vechipupura zvishaishi zvavo. Asi echivona vazhinji vo vafarisi, no vasadhusi, vechiviya kwoobhapatiswa, wakati kwavari: “Imwimwi mibarihwana wo mavhumbi, ndiyani wakamuzivisa kuti mutize ushungu hunoviya?” Ndizvo pangijiranyi michero inovonisa kutenderuka. Musarangarija mwechiti mukati mwenyu, tina Abrahama baba wedu; ngokuti ndinoti kwomuri, kuti Mwari uno simba ngaaya mapuwe kumusira vana kuna Abrahama. Nazvinopano bheura radihwa pa miji jo miti, ndizvo muti wese usikabereki michero yakanaka unotemehwa pasi, ukandihwe mu muriro. Inini ngozvirokwazvo ndinomubhapatisa ngo kumwa kuti mutenderuke, asi uwo unoviya sure kwangu uno simba kupinda inini, anditosisiri no kutwara magwada ake; uwu ndiye unozomubhapatisa ngo Mweya Wakachena no muriro. Uwo mbhade yake iri mu nyara yake, naye unozonasa kupshayira chimbuwa chake, no kuunganija koroni yake mu nyumbu, asi unozopisa makoto ngo muriro usikajimi. Naapo Jesu wakaviya Jordhani echibva Garire, kuna Johani, kwoobhapatiswa ndiye. Asi Johani wakada kumurambira, echiti: “Inini ndinosisira kuti ndibhapatiswe ndiwe, newe woviya kwendiri here?” Asi Jesu wakapingura, akati kwaari: “Wechitenda zvino; ngokuti ngokudaro kunodikana kuti tizarise kururama kwese.” Naapo wakamutendera. Naapo Jesu abhapatiswa, paripo wakabuda mu kumwa, ngokudaro gore rakabewuka, naye wakavona Mweya wa Mwari wechibzuka wakadari ngo njiva yechiviya panyezuru pake. Vonayi, izwi rechibva mu gore, rakati: “Uwu ndiye Mwana wangu unodikana, wo ndinonasa kudakara ndiye.” Naapo Jesu wakakweviwa ndi Mweya kuenda mu bani kuti aejwe ndi dhiyabhorosi. Naapo ayinga waera kuha mazuva makumi marongomuna, no usiku makumi marongomuna, ngosure kwo uku wakazwa njara. Mueji wakaviya kwaari, akati: Kuti iwewe uri Mwana wa Mwari bvunjayi aya mapuwe kuti ayite chimanda. Asi iye wakamupingura, akati: “Kwakatahwa kuti mundhu aazorarami ngo chimanda chega, asi ngo mazwi ese anobuda mu muromo wa Mwari.” Naapo dhiyabhorosi wakamutora kuenda naye ku dhoropa rakachena, wakamudira panyezuru po chachungu cho themperi, akati kwaari: “Kuti iwewe uri Mwana wa Mwari, jikandire pasi, ngokuti kwakatahwa, kuti, unozotumira ngirosi jake ngo ndava yako; najo jinozokubata ngo nyara jajo kuti nokuti ngouri mukuvo usazokhugunwa tshoka yako pa buwe.” Jesu wakati kwaari: “Kwakatahwazve, kuti Usazoeja Mambo Mwari wako.” Zve dhiyabhorosi wakamutora kuenda pa dundhu rakanyanya kureba, wakamupangijira umambo hwese hwo nyika, no uthende hwawo. Naye wakati kwaari: “Izvi zvese ndinozokupa, kudari wechizogwadama pasi no kundidira.” Naapo Jesu wakati kwaari: Ibva Sathani! Ngokuti kwakatahwa kuti: Unozodira Mambo Mwari wako, no kumushandira iye ega. Naapo dhiyabhorosi wakamusiya, vonayi, ngirosi jakaviya kwaari jikamushandira. Naapo azwa kuti Johani wakafungihwa mu guniya wakahwirirazve Garire. Naabva Nazaretha wakaenda koogara mu Kaperanaume, riri pa jombe, mu ndharaunda jo Zabhurona no Nafitari. Kuti rizarisike izwi iro rakavereketwa ndi Isaya muprofeti, echiti: “Nyika yo Zabhurona, no nyika yo Nafitari pa njira inoenda ku jombe; mwombera kwo Jordhani Garire ro vo majinja. Vandhu avo vayinga vakagara mu chidima vakavona kujeka kukuru; naavo vayinga vakagara mu nyika no mubvute ro kufa, kujeka kwakavabudira.” Kubvira ngo uwo mukuvo Jesu wakatanga kuchumayira, echiti: “Tenderukanyi imwimwi; ngokuti Umambo hwo mu gore huri phedo.” Echifamba phedo po jombe ro Garire, wakavona hama mbiri, ndi Simoni unozwi Pedru, na Andreu munukuna wake vechikandira juya ravo mu jombe; ngokuti vayiva vatandi. Wakati kwavari: “Viyanyi sure kwangu, inini ndinozomuita vatandi vo vandhu.” Paripo vakasiya majuya avo vakamutevera. Echibva apo wakavona hama jimweni mbiri, ndi Jakobe mwana wa Zebhedhi no munukuna wake Johani, vari mu ngarava pamwepo na baba wavo Zebhedhi, vechinasirira majuya avo; naye wakavadanija. Paripo vakasiya ngarava, na baba wavo, vakamutevera. Na Jesu wakafambafamba mu Garire mwese, echijijisa mu nyumba javo jo kudira, no kuchumayira ro Umambo no kurapa mbewu jese jokuhwara, no mbewu jese jo ndhenda mukati mwo vandhu. No mbirikira yake yakateketeswa mu nyika yese yo Siriya. Navo vakazisa kwaari vese vaihwara, avo vayinga no ndhenda jakaparajana, no vayinga no zvinovatsereketesa, naavo vayinga vano mabzoka, naavo vano mbhengera muzi, naavo vano nungura; naye wakavarapa. Yakamutevera mbungano huru yo vandhu yechibva Garire, no Dhekaporisi, no Jerusarema, no Judhiya no mwombera kwo Jordhani. Naye echivona mbungano zhinji, wakakwira pa dundhu, naapo agara pasi, vajiji vake vakaviya kwaari; wakashama muromo wake wakavajijisa, akati: “Vanomuchena varombo vo mweya, ngokuti ngo hwavo Umambo hwo mu gore. Vanomuchena avo vanotsumba ngokuti vanozoembezehwa. Vanomuchena vakapfava; ngokuti vanozogara ndhaka yo mu nyika. Vanomuchena avo vanozwa nyota no njara ngo kuda kururama, ngokuti vanozogutiswa. Vanomuchena avo vano nyasha ngokuti vanozoitihwa nyasha. Vanomuchena avo vano mwoyo wakachena ngokuti vanozovona Mwari. Vanomuchena vaiyanisi, ngokuti vanozodanwa vana va Mwari. Vanomuchena avo vanotambujwa ngo ndava yo kururama; ngokuti Umambo hwo mu gore ngo hwavo. Munomuchena apo mwootukwa, mwootambujwa, mwoorevehwa mazwi ese akashata okunyepa ngo ndava yangu. Dakaranyi, mwechidakara kukuru; ngokuti musharo wenyu mukuru mu gore; ngokuti ngokudaro vakatambuja vaprofeti avo vayiva pamberi penyu.” “Imwimwi muri munyu wo nyika, asi kuti munyu warasha kunaka kwawo, ungachazorungwa ngenyi? Sure kwo uku auchanakiri chiro, kwega kurashwa kunja, no kutsikwatsikwa ngo vandhu. Imwimwi muri kujeka kwo nyika, guta rakavakwa panyezuru po dundhu aringafishiki. No chibani avabasi vochidira pasi po chitundhu, asi paukwiriri pacho, nacho chinojekisa vese vari mu nyumba. Ngokudaro ngakujeke kujeka kwenyu pamberi po vandhu, kuti vavone mishando yenyu yakanaka, vayirikije Baba wenyu ari mu gore.” “Musarangarija kuti ndakaviya kwoparaja mupango nokuti zvo vaprofeti. Andizivi kuviya kuparaja, asi kuzvizajisa. Zvirokwazvo, ndinoti kwomuri, mbhera gore no nyika zvipinde chiro chidoko nokuti chidonhwe, chimwe achitongozopindi kubva mu mipango mbhera zvese zviyitike. Ndizvo pikija ndiyani unozogura chimwe chidoko choiyi mipango, echijijisa vandhu ngokudaro iye unozodanwa mudoko mu Umambo hwo mu gore. Asi iye unozozviyita no kuzvijijisa, iye unozodanwa mukuru mu Umambo hwo mu gore. Ngokuti ndinoti kwomuri, kuti, kudari kururama kwenyu kusikapindi kururama kwo vatari no kwo vafarisi, amutongozonghwini mu Umambo hwo mu gore.” “Mwakazwa zvakanangwa kwavari vokare, kuti, ‘Usazouraya’; no uwo unozouraya unozova no ndava yo kutongwa. Asi inini ndinoti kwomuri, Mundhu wese uwo anotsenekera munukuna wake unozova no ndava yo kutongwa; no uwo unozotuka munukuna wake, kuti; Mundhu usina shwiro; unozova no ndava yo kutongwa ngo vatongi, no uwo unozoti, iwewe benji, unozova no ndava yo kurashwa mu Gehena ro muriro. Ndizvo kudari woopa chipo chako paaltari, naapo wechicherecheja kuti munukuna wako uno khururu newe, siyai apo chipo chako pamberi po altari uende; utange kuiyana no munukuna wako, naapo unozoviya kwoopa chipo chako. Tenderana no mukorore wako ngokukasira, uchiri mu njira naye, kuti pikija ngouri mukuvo mukorore wako asazokupira kumutongi, no mutongi akupire kuno joni, newe ufungihwe mu guniya. Zvirokwazvo ndinoti kwomuri, autongozobudimwo mbhera waripa mare yo kupejisira.” Mwakazwa, kuti zvakanangwa, kuti: “Uchazoomba.” Asi inini ndinoti kwomuri pikija ndiyani unomuringira mwanakaji ngo kuemura, watoomba naye ngo mu mwoyo mwake. Asi kudari jiso rako ro kumuho rechikushaishisa, ribvite, urirashe kubva kwouri; ngokuti kwapinda kunaka kwouri kuti kufe chimwe cho ndhengo yo muviri wako, kuno kuti muviri wako wese ukandihwe mu Gehena. Kuti nyara yako yo kumuho yechikushaishisa, iteme uirashe kubva kwouri, ngokuti kwakapinda kunaka kwouri kuti chimwe cho ndhengo yo muviri wako chife kuno kuti muviri wako wese urashwe mu Gehena. “Kwakanangwa kuti: Uwo unoramba mukaji wake, ngaamupe tshamba yo kurambana. Asi inini ndinoti kwomuri, kuti iye unoramba mukaji wake usina ndava yo kuomba, unomuyitisa muombi, no uwo unomurovora uwo wakarambwa unoomba.” Zve, mwakazwa kuti kwakanangwa kwaavo vokare, kuti: Usazopika wechinyepa, asi unozoyita kuna Mambo mbhiko jako. Asi inini ndinoti kwomuri, musazopika nakamwe; pikija ngo mugore, ngokuti riri dendemaro ra Mwari; pikija ngo nyika, ngokuti iri chitambarariro cho tshoka jake; pikija ngo Jerusarema, ngokuti riri dhoropa ra Mambo mukuru. Usazopikazve ngo musoro wako, ngokuti aungakoni kuyita bvuji rimwe riyite imvi nokuti risvipe. Asi kuvereketa kwenyu ngakuite: Eya, eya, nokuti haiwa, haiwa; ngokuti zvese izvo zvinopinda izvi zvinobva kuno uwo wakashata. Mwakazwa kuti kwakanangwa, Jiso ngo jiso, no zino ngo zino. Asi inini ndinoti kwomuri, kuti usarwisana no ukwo kushata, asi iye unozokurova padama rako ro kumuho, wechipindurira kwaari rimwenizve. Kuti aripo unozokuitira ndava, no kutora nghanju yako, mupe kwaarizve no bhachi rako. No uwo unozokuvangirija kuenda naye kiromitha imwe, enda naye kiromitha mbiri Ipayi kwaari uwo unokumbira kwouri, no uwo unoda kukwereta kwouri, usamurambira. “ Mwakazwa kuti kwakanangwa, unozomuda muvakihwana wako unyenye mukorore wako. Asi inini ndinoti kwomuri: Idayi vakorore venyu, muvakumbirire avo vanomutambuja no kumuteverera; kuti muyite vana va baba wenyu ari mu gore; ngokuti iye unoyita kuti zuva rake ribude panyezuru po vakashata, no vakanaka, unonisa mvura panyezuru po vakarurama, no vasikazivi kururama. Ngokuti kudari mwechida avo vanomuda imwimwi, munozoashira musharo wenyi? Andizvopi here zvovanoita vashabisi? No kudari mwechichingamija hama jenyu jega munozopinda vamweni ngo kuitawani? Avayiti kudaro no vo majinja here? Ndizvo imwimwi itanyi vakaperera kudari ndi Baba wenyu vari mu gore vari vakaperera.” “Vonanyi kuti musayita kururama kwenyu pamberi po vandhu, kuti vamuvone; kuti mwechizodaro, amuzowani musharo kuna Baba wenyu vari mu gore. Ndizvo apo woopa zvipo zvako, usarija mbhayapaya pamberi pako, kudari ngo zvovanoita vajiitisi mu nyumba jo kudira, no mu makwanja, kuti vayirikijwe ngo vandhu. Zvirokwazvo, ndinoti kwomuri, vatoashira musharo wavo. Asi apo iwewe woopa zvipo zvako, usatendera kuti nyara yako yo kuboshwe izive chinoitwa ngo nyara yako yo kumuho, kuti zvipo zvako zvipuwe ngo kufishika, na Baba wako vanovona mukufishika vanozokupavo.” Naapo mwookumbira, musazodari ngo vajiitisi; ngokuti vanoda kukumbira vakayima mu nyumba jo kudira, no pambhararano po makwanja kuti vavoneke, ngo vandhu. Zvirokwazvo, zvirokwazvo ndinoti kwomuri, vatoashira musharo wavo. Asi iwewe, apo wookumbira, nghwina mu nyumba yako yo pakati, naapo wakonya musuvo, kumbirayi kuna Baba wako vari mukufishika, na Baba wako vanovona mukufishika vanozokupavo. Asi mukukumbira kwenyu musazohwirijira mazwi asina shwiro, kudari ngo zvovanoita vo majinja; ngokuti avo vanorangarija kuti vanozozwika ngo kuwanda kwo mazwi avo. Ndizvo musazodari ndivo; ngokuti Baba wenyu vanoziva izvo zvomunotama musati mwakumbira kwavari. Ndizvo kumbiranyi ngo njira iyi: “Baba wedu vari mu gore, ngarireremejwe zina renyu.” Umambo hwenyu ngahuviye. Kuda kwenyu ngakuitwe mu nyika kudari ngo mugore. Tipenyi ngeiri zuva kuha kwedu kunotamika nyamasi. Tiregererenyi ndava jedu, kudari itisu takaregerera avo vane ndava kwetiri. Musatinghwinisa mukuejwa, asi mutinunure kuno uwo wakashata. Ngokuti kudari imwimwi mwechiregerera vandhu zvishaishi zvavo, Baba wenyu vari mu gore vanozomuregereravo imwimwi. Asi kudari musikaregereri vandhu zvishaishi zvavo, na Baba wenyu avazomuregererivo imwimwi zvishaishi zvenyu. Zve mwoera kuha, musayita chisununu muhope jenyu kudari ngo vajiitisi; ngokuti vanoyita chisununu hope javo kuti vavoneke ngo vandhu kuti vanoera kuha. Zvirokwazvo, ndinoti kwomuri, vakatoashira musharo wavo. Asi iwewe, apo woera kuha, zoja musoro wako, ushambe muhope mwako; kuti usazovoneka ngo vandhu kuti uri kuera kuha, asi ndi Baba wako vari pakafishika; na Baba wako avo vanovona mukufishika, vanozokupavo. Musajiunganijira upfumi mu nyika, apo honye nokuti chipfundo zvinoshaishira, naapo mbavha jinopwanya jibe. Asi jiunganijirenyi upfumi mu gore, apo honye nokuti furuju zvisikashaishiri, naapo mbavha jisikapwanyi jibe. Ngokuti apo pano upfumi hwenyu, ndipozve panozova no mwoyo yenyu. Kujeka kwo muviri imajiso, ndizvo kudari majiso ako ari majiso kwawo, muviri wako wese unozogara mukujeka. Asi kuti majiso ako akashata, muviri wako wese unozozara ngo chidima. Ndizvo kudari kujeka kuri mukati mwako kuri chidima, kukuranyi kwechidima icho. Akuna mundhu ungakona kushandira majimambo maviri; ngokuti unozonyenya umwe, ade umweni, ngokuti unozoshoora umwe abatirire kwo umweni. Amungashandiri Mwari no upfumi. Ngo ndava yoichi ndinoti kwomuri, musadembatemba ngo maponero enyu kuti munozohenyi, nokuti munozomwenyi; nokuti ngo ndava yo muviri wenyu kuti munozosimirenyi. Kurarama akupindi kuha here? No muviri aupindi kusimira here? Ringiranyi shiri jo mu gore, ajikushi, ajikotori, nokuti kuunganija muzvitumba; kani Baba wenyu vari mu gore vanojipa zvokuha. Imwimwi amupindi kukura kuna ijo here? Ndiyani kwomuri ngo kudembatemba ungakwanisa kuengejera urebu hwake mbhimo imwe? Nemwi munodembatemba ngenyi ngo zvokufuka? Rangariranyi ngo maruva omushango kumera kwawo; aashandi, aarukizve. Asi inini ndinoti kwomuri, na Soromona mu uthende hwake hwese aazivi kusimijwa kudari ngo rimwe rawo. Ndizvo, kudari Mwari echisimija kudaro maushwa omushango, awo aripo nyamasi, mangwana anokandihwa muchoto, aazopindi here kukuru kumusimija, imwimwi muno kutenda kudodoko. Ndizvo musadembatemba, mwechiti, tinozohenyi? Nokuti, tinozomwenyi? Nokuti, tinozosimirenyi? Ngokuti vo majinja vanopshaka izvi zvese, ngokuti Baba wenyu vari mu gore vanoziva kuti munozvitama izvi zvese. Asi pshakanyi kutanga Umambo hwake no kururama kwake, no izvi zvese zvinozoengejehwa kwomuri. Ndizvo, musazodembera zuva ramangwana, ngokuti, zuva ramangwana unozojidembera. Kutambujika kwezuva kunokwana zuvero. “Musatonga, kuti musazotongwavo. Ngokuti ngo kutonga kwomunotonga ndikwo, munozotongwavo; ngo uwo mupimo wo munopima ndiwo, unozoezanisihwavo kwomuri. Unoringisirenyi chitsepejo chiri mujiso ro hama yako, asi auvonesesi danda riri mujiso mwako? Nokuti ungaita mavereketerenyi kuna hama yako, kuti: Regerayi, ndibvise chitsepejo chiri mujiso rako, usikavoni danda riri mujiso rako? Iwewe mujiitisi, tanga kubvisa danda riri mujiso rako; naapo unozonasa kukwanisa kubvisa chitsepejo chiri mujiso ro hama yako. Musapekeja izvo zvakachena kuno imbhwa, zve musakhandira usanga wenyu pamberi po nguruve, kuti jisazoutsikatsika pasi po tshoka jajo, jikunukuke jimurume.” “Kumbiranyi, munozopuwa, pshakanyi, munozowana; gugujiranyi munozobewurihwa. Ngokuti uwo unokumbira, unoashira; naye unopshaka unozowana; no kwaari unoguguja kunozobewurihwa. Ngokuti ndiyani mundhu, kwomuri, unoti mwana wake echimukumbira chimanda, amupe buwe? Nokuti echikumbira hove, amupe nyoka? Ndizvo kudari imwimwi mutori vakashata munoziva kupa zvipo zvakanaka kuvana venyu, kunozopinda kwakaitawani Baba wenyu vari mu gore kuvapa zvakanaka avo vanokumbira kwaari? Ndizvo izvo zvese zvomunoda kuti vandhu vayite kwomuri itanyivo kudaro kwavari; ngokuti ichi chiri kuzarisika kwomupango no zvo vaprofeti.” “Nghwinanyi ngo pa musuvo wakamanikana; ngokuti musuvo wakapambhama, no njira yakapfara inoenda mu kurashwa, navo vari vazhinji vanopinda ndiyo. Ngokuti musuvo wakamanikana, no njira yakadodoka inoenda mu kururama, navo vari vashomani vanoiwana.” Ngwariranyi vaprofeti vokunyepa, avo vanoviya kwomuri vakasimira vanonga mabvuta, asi ngomukati vari mathika anokara. Mwovaziva ngo michero yavo. Vandhu vangakhava here michero yo muvhini pa munanga, nokuti makuyu pa rukato? Ngokudaro miti yese yakanaka inobereka michero yakanaka; asi miti wakashata unobereka michero yakashata. Muti wese wakanaka aungakoni kubereka michero yakashata, no muti wakashata aungabereki michero yakanaka. Muti wese usikabereki michero yakanaka unotemehwa pasi ukandihwe pa muriro. Ndizvo munozovaziva ngo michero yavo. “Andivopi vese vanoti kwendiri; Mambo, Mambo vanozonghwina mu Umambo hwo mu gore, asi uwo unoyita kuda kwa Baba wangu vari mu gore. Vazhinji vanozoti kwendiri ngoiro zuva, Mambo, Mambo, Atizivi kuprofeta here ngo zina rako, na ngo zina rako atizivi kumbirimbija mabzoka, na ngo zina rako atizivi kuyita mishando yakawanda inosimba here? Naapo ndinozovabvunja, kuti, Andizivi no kumuziva; ibvanyi kwendiri imwimwi munoshanda zvakashata.” “Ndizvo pikija ndiyani unozwa mazwi angu, no kuayita, unoezaniswa no mundhu wakangwara, uwo wakavaka nyumba yake panyezuru po buwe. No mvura yakana no ndambi yakaviya, no bepo rakavhunguza, rakarova panyezuru poiyo nyumba, nayo aizivi kuwa, ngokuti yayinga yakavakwa pa buwe. Pikija ndiyani uwo unozwa aya mazwi angu, usikaayiti, unoezaniswa no mundhu uri benji, wakavaka nyumba yake pa musanga. No mvura yakana, no ndambi yakaviya, no bepo rakavhunguza, rakarova panyezuru poiyo nyumba; nayo yakawa, no kuwa kwaiyo kwakava kukurutu.” Kwakaitika apo Jesu apeja mazwi aya, mbungano yakashamiswa ngo kujijisa kwake. Ngokuti wakavajijisa kudari ngo uno simba, kusikazivi kudari ngo vatari vavo. Kwakati apo obzuka kubva pa dundhu, mbungano huru yakamutevera, vonayi mundhu, wayiva no mapere wakaviya kwaari wakamudira, echiti: “Mambo, kudari wechida ungandishambija.” Naye wakatambanuja nyara yake, akamupshasa, akati: “Ndinoda, chishambijwa.” Mukuvo wondhowo, mapere ake akashambijwa. Na Jesu wakati kwaari: “Ngwarayi kuti usazobvunja mundhu; asi enda, ujipangijire ku mupristi, no kupa chipo icho chaakavereketa Mosi, kuti chiite chapupu kwavari.” Kwakati anghwina mu Kaperanaume, kwakaviya kwaari nduna yo zana yechimukumbira, yechiti: “Mambo, muranda wangu wakavata mu nyumba echihwara ngo kuoma muviri, echihwajihwa kukuru.” Wakati kwoiri: “Ndinozoviya, ndimurape.” Asi nduna yo zana yakapingura ikati: “Mambo, andisisiri kuti iwewe unghwine pasi podenga rangu; asi nangayi ngo izwi rega, no muranda wangu unozorapika. Ngokuti ininivo ndiri mundhu unotongwa, ndina masocha ari pasi pangu; neni ndinoti ku uwu, enda, naye unoenda; no kuna umweni, viya, naye unoviya; no ku muranda wangu, itayi ichi; naye unochiita.” Naapo Jesu azwa ichi, wakashama, wakati kwavari vayimutevera: “Zvirokwazvo andizivi kumbovona kugonda kukuru kwakadari, haiwa pikija no ku vaIsraeri. Neni ndinoti kwomuri kuti vazhinji vanozoviya kubva kumabvazuva, no kumavirira, vanozogara pasi na Abrahama, na Isaka, na Jakobe mu Umambo hwo mu gore. Asi vana vo Umambo vanozokhandihwa mu chidima chiri kunja; kunozovapo kuchema, no kukwetsana kwo mazino.” Na Jesu wakati ku nduna yo zana: “Enda, ngakuitwe kwouri kudari ngo kutenda kwako.” No muranda wakaponeswa ngo iyo nguva. Naapo Jesu anghwina mu nyumba ya Pedru, wakavona vambiya vake vakavata vechihwara ngo kujiya muviri. Naye wakavapshasa ngo nyara yake, no muviri wakatondhora; navo vakamiruka vakamushandira. Kwoyita madekoni, vakaviisa kwaari vazhinji vayiva no mabzoka, naye wakambirimbija mweya iyo ngo izwi rake, wakarapa vese vaihwara; kuti kuzarisike ukwo kwakavereketwa ndi Isaya muprofeti, echiti: “Iye ambhwine wakatora ndhenda jedu, wakatwara kuhwara kwedu.” Zvino Jesu echivona mbungano huru yechimutendeneja, wakavapanga kuti vaambuke mwombera. Kwakaviya kwaari mutari, wakati kwaari: “Mujijisi, ndinozokutevera apo pounoenda.” Na Jesu wakati kwaari: “Muhwe jina maguru, no shiri jo mu gore jino zvisaki; asi Mwana wo Mundhu aana no po kutsamira musoro wake.” No umwe wo vajiji wakati kwaari: “Mambo kutanga nditendere kuti ndiende ndichire baba wangu.” Asi Jesu wakati kwaari: “Nditevere, uregere vakafa kuti vachire vakafa vavo.” Naanghwina mu ngarava, vajiji vake vakamutevera, vonayi, kwakabuda bepo guru mu jombe, ngokudaro ngarava yakadumaijwa ngo mavimbi; asi iye wayinga wakavata. Vakaviya kwaari, vakamumusa, vechiti: “Mambo, tiponese; tofa.” Naye wakati kwavari: “Munombotya ngenyi, imwimwi munokutenda kudodoko?” Naapo wakamiruka, akanyaraja bepo no jombe; kwakavepo kutura kukurutu. No vandhu vakashama, vechiti: “Mundhu uwu uri wakadini, kuti bepo no jombe zvinomupurukira?” Naapo waguma mwombera mu nyika yo vaGadhareni, kwakasongana naye vandhu vaviri vayiva no mabzoka vechibva mu makuva, vano ushungu hunotyisa, ngokudaro kwayinga kusina no mundhu waikhirira ngo iyo njira. Navo vakadanijira vakati: “Tinenyi newe, iwewe, Mwana wa Mwari? Waviya pano kutitambuja usati waguma mukuvo here?” Zvino kwayivapo mushambi wo nguruve zhinji jechihava pandharauko kubva kwavari. No mabzoka akamukumbira, akati: “Kudari wechitibudisa, titumeyi tinghwine mu mushambi wo nguruve.” Naye wakati kwaari: “Endayi!” Nao akabuda, akanghwina mu nguruve. Vonayi mushambi wese wakabzuka ngo pa gomokomo kuenda mu jombe, jakafa, mu kumwa. Avo vaihavisa vakatiza, vakaenda mu dhoropa vakaverenga zvese, izvi zvayinga zvakaitwa kuna avo vayiva no mabzoka. Vonayi, vo dhoropa rese vakabuda kwooshongana na Jesu. Kwakati vamuvona vakamuengerera kuti abve mu migano yavo. Echinghwina mu ngarava, wakaambuka mwombera, wakaguma ku guta rake. Vonanyi, vakazisa kwaari mundhu waihwara ngo ndhenda yo kuoma muviri, wakavata pa mubhedhi. Jesu avona kutenda kwavo, wakati kuna uwo wayiva no ndhenda yo kuoma muviri: “Mwana, shinga; zvishaishi zvako zvaregerehwa.” Vonayi, vamweni vakatikuti vo vatari vakati pakati pavo: “Mundhu uwu unotuka.” Na Jesu echiziva murangariro yavo, wakati: Munorangarijirenyi zvakashata mu mwoyo yenyu? Ngokuti ngochapi chinopinda kureruka, kunanga kuti: Zvishaishi zvako zvaregerehwa, nokuti kunanga kuti; “Miruka ufambe?” Asi kuti muzive kuti Mwana wo Mundhu uno simba mu nyika ro kuregerera zvishaishi, naapo wakati kuna uwo wayiva no ndhenda yo kuoma muviri, “Miruka, tora mubhedhi wako uende ku nyumba yako.” Naye wakamiruka, akaenda ku nyumba yake. Asi mbungano yazvivona, yakatya, yakakuja Mwari, uwo wayinga wakapa simba rakadari ku vandhu. Na Jesu echipinda mberi, wakavona mundhu unozwi Mateu, akagara pandau yo kushabisa shangu; naye wakati kwaari: “Nditevere.” Naye wakamiruka, akamutevera. Kwakaitika achatseama pano kuha mu nyumba ya Mateu, vashabisi no vashaishi vazhinji vakaviya vakagara pasi na Jesu no vajiji vake. Vafarisi vechivona, vakati kuno vajiji vake: “Ngenyi Mujijisi wenyu unoha no vashabisi no vashaishi?” Asi iye echizwa wakati: “Avo vakavanga avadi murapi asi avo vanohwara.” Asi endanyi mwoojija kuti zvinorevenyi izvi, “Ndinoda nyasha, haiwa kupuwa mubairo; ngokuti andizivi kuviya koodanija vakarurama, asi vashaishi.” Naapo kwakaguma kwaari vajiji va Johani, vechiti: “Isisu no vafarisi tinogara techiera kuha ngenyi, asi vajiji vako avaeri kuha?” Na Jesu wakati kwavari: Vo nyumba ya nyamurovohwa vangachumba here apo mukwambo achinavo? Asi mazuva anozoviya apo mukwambo unozobviswa kwavari, naapo vanozoera kuha. Apana mundhu unosonera chiremo chipsha pa nguvo yakasakara, ngokuti icho chinodihwa kuisonera, chinoparurisa kubva kweiri, no bovo rinozopinda kukura. Zve avadiri vhini ibza mu mbudu jakasakara; ngokuti mbudu jinozoputiswa, no vhini rinozodururika, no mbudu jinopera. Asi vanodira vhini ibza mu mbudu ipsha, nazvo zvese zvinozongwaririka. Achavereketa izvi kwavari, vonanyi, wakaviya mutongi wakatikuti, wakamudira, akati kwaari: “Mwana wangu wokaji watofa, asi chiviya udire nyara yako panyezuru pake, naye unozorarama.” Na Jesu wakamiruka, akaenda naye, no vajiji vake. Vonanyi, mwanakaji wayiva no ndhenda yo kubuda ngazi makore ari gumi na maviri, wakaviya ngosure kwake akapshasa mupendero wo nguvo yake. Ngokuti iye wakati mukati mwake: “Kudari ndingapshasa kwega nguvo yake, ndinozoponeswa.” Asi Jesu echikunukuka, wamuvona, wakati: “Mwana, shinga, kutenda kwako kwakuponesa.” No mwanakaji uwo wakaponeswa kubvira nguva iyo. Naapo Jesu aguma mu nyumba yo mutongi, wakavona variji vo munyere, no mbungano yechiita hohoho. Wakati: “Taraukanyi; ngokuti musikana uwu aazivi kufa akadi, asi wakavata.” Navo vakamuseka kwokumupsheruja. Naapo abudisa mbungano kunja, wakanghwina mukati, wakamubata ngo nyara; no musikana wakamiruka. No mbiri yacho yakateketeswa mu nyikemwo mwese. Na Jesu achapinda mberi kubva apo, mapofu maviri akamutevera, echidanijira, echiti: “Iwewe Mwana wa Dhavhidha, tiyitire nyasha.” Naanghwina mu nyumba, mapofu akaviya kwaari, na Jesu wakati kwaari: “Munotenda here kuti ndino simba rokuita ichi?” Akati: “Eya, Mambo.” Naapo wakapshasa majiso ao, akati: “Ngakuitike kwomuri kudari ngo kutenda kwenyu.” No majiso ao akapembenujwa; na Jesu wakaapanga, echiti: “Ngwaranyi kuti kusazozivikanwa ngo vandhu.” Asi vabvapo, vakateketesa mbiri yake mu nyikemwo mwese. Vachabuda kubvapo, vonanyi, kwakaziswa kwaari mbeveve yayiva no bzoka. Naapo bzoka rakambirimbijwa kubva kweiri, mbeveve yakavereketa. No mbungano yakashamiswa, yechiti: “Akuzivi kutongovoneka zvakadari mu Israeri. Asi vafarisi vakati: Iye unombirimbija mabzoka ndi mambo wo mabzoka.” Na Jesu wakafambafamba mu madhoropa ese, no mu maguta ese, echijijisa mu nyumba javo jo kudira, echichumaira vhangeri ro Umambo, echitambisa mbewu jese jo ndhenda no kuhwara kwese. Asi avona mbungano, wakavazwira urombo ngokuti vayidezwaira no kupepesheka kudari ngo mabvuta asina muhavisi. Naapo wakati ku vajiji vake: “Ngo gwinyiso kukotora kwakawanda asi vashandi vari vashomani. Ndizvo kumbiranyi kuna Mambo wo kukotora kuti atume vashandi mukukotora kwake.” Naapo wadanija kwaari vajiji vake vari gumi na vaviri, wakavapa simba panyezuru po mweya inosvina kuti vaimbirimbije, no kurapa ndhenda jese no kuhwara kwese. Aya ndiwo mazina o vapostori vari gumi na vaviri; uwo wokutanga ndi Simoni waizwi Pedru, na Andreu munukuna wake; na Jakobe mwana wa Zebhedhi, na Johani munukuna wake, na Firipi, na Bhartoromeu; Tomasi, na Mateu mushabisi; Jakobe mwana wa Arifeu, na Tadheu; na Simoni mukenani, na Judhasi Isikariyoti uwo wakamupira. Ava vari gumi na vaviri Jesu wakavatuma, akavapanga echiti: Musaenda mu njira yo vo majinja, musanghwina muguta pikija riri ro vaSamariya; asi motoenda ku mabvuta akarashika o nyumba yo Israeri. Endanyi mwechichumaira, mwechiti: Umambo hwo mu gore hwa phedo. Rapanyi vanohwara, musanyi vakafa, chenesanyi vanomapere, mbirimbijanyi mabzoka; mwakaashira ngo nyasha, mweshipavo ngo nyasha. Musatora mukore, nokuti sirivha, nokuti thusi muzvikwama zvenyu. Zve, nokuti muzava wo hwendo hwenyu, musina mabhachi maviri, nokuti magwada, nokuti ndonga; ngokuti mushandi unosisira kupuwa kuha kwake. Pikija ngomwapi mu dhoropa nokuti mu guta mwo munozonghwina, bvunjisanyi kuti ndiyani uri mukati mwaro unosisira; apo ndipo po munozogara mbhera mubvemwo. Mwoonghwina mu nyumba, ichingamijenyi. No kudari nyumba iyo yechisisira kunyarara kwenyu ngakuve panyezuru payo; asi kudari isikasisiri, kunyarara kwenyu ngakuhwirire kwomuri. Pikija ndiyani avo vasikazomuashiri, nokuti kupurutana mazwi enyu, pakubuda munyumbamwo, nokuti dhoropa iro, pumbhujanyi bukuta kubva pa tshoka jenyu. “Zvirokwazvo ndinoti kwomuri, kunozopinda kureruka kuno nyika yo Sodhoma no yo Gomora ngo zuva ro kutongwa, kuna dhoropa iro.” “Vonanyi, ndinomutuma kudari ngo mabvuta mukati mwo mathika. Ndizvo mwechingwara kudari ngo nyoka, mwakapfava kudari ngo njiva.” Asi ngwaranyi vandhu, ngokuti vanozomupira kubangano, navo vanozomurova mu nyumba javo jo kudira. Nemwi munozoziswa pamberi po vatongi, no po majimambo, ngo ndava yangu, kuyita chapupu kwavari no ku majinja. Asi apo voomupira musazodembatemba kuti munozovereketenyi nokuti kureva kudini; ngokuti kunozopuwa kwomuri ngo nguva iyo, chomunozovereketa. Ngokuti andimwipi munozovereketa, asi mweya wa Baba wenyu unozovereketa uri mukati mwenyu. No mukoma unozopira munukuna kuti afe, na ngokudaro baba mwana wavo, no vana vanozomukira vabari, nokuita kuti vaurawe. Nemwi munozonyenywa ndivo vese ngo ndava yo zina rangu. Asi uwo unozoshingirira mbhera kupera, unozoponeswa. Asi apo vanozomuteverera mu guta rimwe, mwechitizira kuno rimweni; ngokuti ngozvirokwazvo ndinoti kwomuri, amuzopeji kufamba madhoropa ese a Israeri, asati aviya Mwana wo Mundhu. aaripi panyezuru po mujijisi wake akadi, no muranda aaripi panyezuru pamambo wake. Kubvira kuno mujiji kuti adari ngo mujijisi wake, no muranda kuti kudari ndi mambo wake. Kuti kudari vakaduja mune wo nyumba kuti Bherizebhuri, vanozopinda kwakaitawani kuvaduja kudaro avo vari vo nyumba yake? “Ndizvo musavatya! Ngokuti apana chiro chakafishika chisikazopangijihwi; nokuti chakavigika chisikazoziviki. Icho chondinomubvunja mu chidima, chiteketesenyi mukujeka, no icho cho munozwa munjeve chichumairenyi muri panyezuru po chachungu cho nyumba. Musatya avo vanouraya muviri, asi vasina simba ro kuuraya mweya, asi ityanyi uwo uno simba ro kuparaja zvese mweya no muviri mu Gehena. Zvishiri zviviri azvitengeswi ngo kobiro here? No chimwe chazvo achizowi pasi pa mavhu chisikazivi kutendehwa ndi Baba wenyu. Asi no bvuji ro musoro yenyu rakaverengwa rese. Ndizvo musatya, muri vanopinda kudikana kuno zvishiri zvakawanda.” “Ndizvo wese uwo unozonditenda pamberi po vandhu, nayevo ndinozomutenda pamberi pa Baba wangu vari mu gore. Pikija ndiyani unozondiramba pamberi po vandhu, nayevo ndinozomuramba pamberi pa Baba wangu vari mu gore.” “Musarangarira kuti ndakaviya kuzisa kunyarara mu nyika; andizivi kuviya kuzisa kunyarara, asi shoti. Ngokuti ndakaviya kuparajanisa mundhu na baba wake, mwana wokaji na mayi wake, nyamwana na nyezvara wayo. No vakorore vo mundhu vanozoyita avo vari vo mbhuri yake. Iye unopinda kuda baba dangani mayi kuno inini, aazivi kundisisira. Naye unopinda kuda mwana o rume dangani mwana wokaji kuno inini, aazivi kundisisira. No uwo usikatori muchinjiko wake, atevere sure kwangu aazivi kundisisira. Iye unowana kurarama kwake unozokurasha; no uwo unozorasha kurarama kwake ngo ndava yangu unozokuwana.” “Iye unomuashira imwimwi unondiashira inini, no uwo unondiashira, unoashira uwo wakandituma. Iye unoashira muprofeti ngo zina ro muprofeti unozoashira musharo wo muprofeti; no uwo unoashira mundhu wakarurama ngo zina ro mundhu wakarurama unozoashira musharo wo mundhu wakarurama. No uwo unozopa kwo umwe wo vadoko ava tsani yo kumwa inotondhora yega, ngo zina ro mujiji zvirokwazvo ndinoti kwomuri, aatongozorashikihwi ngo musharo wake.” Kwakaitika apo Jesu apeja kupanga vajiji vake vari gumi na vaviri, wakamiruka kubvapo, wakaenda kwoojijisa no kuchumayira mu madhoropa avo. Zvino apo Johani azwa uri mu guniya mishando ya Kristu, wakatuma ngo vajiji vake. Navo vakati kwaari: “Ndiwe here uwo unoviya, nokuti tichagarira umweni?” Na Jesu wakapingura, akati kwavari: “Endanyi, mwobvunja Johani izvo zvomunozwa, no zvomwavona. Mapofu anovona, no zvirema zvinofamba, no vano mapere vanoshambijwa, no vano mandondo vanozwa, no vakafa vanomuswa, no varombo vano vhangeri rinochumaihwa kwavari. Unomuchena uwo asikapsheruki ndini.” Naapo vachienda, Jesu wakatanga kuvereketa ku mbungano ndiye Johani, wakati: Mwakaenda mu bani kwoovonenyi? Njanga yakazungunyiswa ngo bepo here? Asi mwakaenda kwoovonenyi? Mundhu wakasimijwa ngo machira akapfava here? Vonanyi, avo vanopfeka machira akapfara vari mu nyumba jo majimambo. Asi mwakaendeyo ngenyi? Kwovona muprofeti here? Eya, ndinoti kwomuri, no uwo unonyanya kupinda muprofeti. Uwu ndiye kwakatahwa ndiye, kuti: Vonanyi, ndinotuma mutumwa wangu pamberi po hope yako, uwo unozonasira njira yako pamberi pako. Zvirokwazvo, ndinoti kwomuri, pakati po avo vakaberekwa ngo vanakaji, akuzivi kutongobva mukuru kuna Johani Mubhapatisi. Asi iye uri mudoko mu Umambo hwo mu gore uri mukuru kwaari. Kubvira kumazuva a Johani Mubhapatisi mbhera nazvino Umambo hwo mu gore hunopambwa no vanoupamba vanohutora ngo kugebenga. Ngokuti vaprofeti vese, no mupango zvakaprofeta mbhera kuguma ka Johani. No kudari mwechitenda kuchiashira, Uwu ndiye Erija, uwo wakaemeswa kuviya. Uwo uno njeve jokuzwa ngaazwe. Asi ndouezanisa nenyi uwu mubarihwana? Wakadari ngo vana vanogara pandau yo musika, vechidanijira kuno shamwari javo, vechiti: “Takarija munyere kwomuri, nemwi amuzivi kutamba; takaita chiriro, nemwi amuzivi kuchema.” Ngokuti Johani wakaviya asikahi nokuti kumwa, navo vakati: Uno bzoka. Mwana wo Mundhu wakaviya echiha no kumwa, navo vakati: Vonanyi muhisi no mumwisi wo vhini, shamwari yo vashabisi no vashaishi! Asi kungwara kwakapembejwa ngo mishando yakwo. Naapo wakatanga kushora madhoropa umwo mwakatanga mwaitwa mishando mizhinji yake inosimba, ngokuti avazivi kutenderuka. “Ikhombo kwouri, Korazini! Ikhombo kwouri Bhetisaidha! Ngokuti kudari mishando inosimba yayinga yakayitwa mu Tire no Sidhoni, iyo yakayitwa mukati mwenyu, vayinga vakatotenderuka kare, vakasimira masaka, no mu marota. Ngokudaro, ndinoti kwouri, kunozopinda kureruka kuna Tire no Sidhoni ngo zuva ro kutongwa kuno kwomuri. Newe Kaperanaume unozokuriswa mu gore here? Unozoterejwa pasi ku; ngokuti kudari mishando inosimba yayinga yakayitwa mu Sodhoma, iyo yakayitwa mukati mwako, raidari riripo na nyamasi. Ngokudaro, ndinoti kwomuri kuti kunozopinda kureruka ku nyika yo Sodhoma ngo zuva ro kutongwa kuna iwewe.” Ngo uwo mukuvo Jesu wakapingura, akati: “Ndinokutenda, Baba, Mambo wo mu gore no wo nyika, ngokuti iwewe wakazvifisha izvi kuno vakangwara no vanokuziva, wakazvipangijira kuchiya. Eya Baba ngokuti chayiva chinodakajisa mukuvona kwako. Zviro zvese zvakapuwa kwendiri ndi Baba wangu. Akuna unoziva Mwana, ndi Baba ega; akunazve unoziva Baba, mwana ega, no uwo waanoda kumupangijira Mwana. Viyanyi kwendiri imwimwi mwese mwakaremba, no munoremehwa ngo mutwaro, neni ndinozomuzoroja. Toranyi kanga yangu panyezuru penyu, mujije kwendiri, ngokuti ndiri ndakapfava mu mwoyo, nemwi munozowana kuzorora kumweya yenyu. Ngokuti kanga yangu yakanaka, no mutwaro wangu unoreruka.” Ngo uwo mukuvo Jesu wakakhirira ngo mu minda yo koroni ngo zuva ro sabatha. No vajiji vake inga vano njara, vakatanga kupurura musoso wo koroni, no kuuha. Asi apo vafarisi vavona izvi, vakati kwaari: “Ringirayi, vajiji vako vanoyita icho chisikatendehwi ngo mipango kuti chiitwe ngo sabatha.” Asi wakati kwavari: “Amuzivi kujija here icho chaakaita Dhavhidha, apo wayinga no njara, naavo vayiva naye: Kuti wakanghwina mu nyumba ya Mwari, akaha zvimanda izvo zvaipangijirwa, zvayinga zvisikatendehwi kuti iye azvihe, nokuti avo vayiva naye, asi kwega vapristi? Zve amuzivi kujija here mu mipango kuti ngo zuva ro sabatha vapristi vari mu themperi vanogura sabatha vasina ndava? Asi ndinoti kwomuri kuti uri pano uwo unopinda themperi kukura. Asi kudari mwaiziva kuti zvinorevenyi kuti, ndinoda nyasha, haiwa kupuwa mudiro, ingamusikazivi kuvayitira ndava avo vasina. Ngokuti Mwana wo Mundhu uri Mambo no wo sabatha.” Naye echibvapo wakanghwina mu nyumba yavo yo kudira. Ringira, kwayivapo mundhu unonyara yake yakaonyana. Navo vakamubvunjisa, kuti: “Kunotendehwa here kurapa ngo zuva ro sabatha?” Kuti vamuparise ndava. Naye wakati kwavari: “Ndiyani mundhu kwomuri unobvuta rimwe, kuti iro rechizowira murindi ngo zuva ro sabatha, aazoribati here kuribudisa? Ndizvo mundhu unopinda bvuta kudikana kwakaitawani? Ndizvo kunotendehwa ngo mipango kuyita zvakanaka ngo zuva ro sabatha.” Naapo wakati kuno mundhu uwo: “Tambanuja nyara yako.” Naye wakayitambanuja, nayo yakarapwa kudari ngo imweni. No vafarisi vakabuda, vakayita bangano ndiye kuti vangamuita maurairenyi. Asi Jesu echiziva wakabvapo no mbungano huru yakamutevera, naye wakarapa vese. Wakavapanga kuti vasazoyita kuti azivikanwe; kuti rizarisike izwi rakavereketwa ndi Isaya muprofeti, echiti: “Ringiranyi muranda wo ndakatsanangura; mudikani wangu uwo mweya wangu unodakara ndiye; ndinozodira mweya wangu panyezuru pake, naye unozoteketesa kutonga ku majinja. Aazorwi, nokuti kudanijira, zve akuna unozozwa izwi rake mu makwanja. Aazovhuni njanga yakakopfama, no thonje rinopwititika aazorijimi, mbhera atume kutonga kwake kuti kunyise. Vomajinja vanozogonda kuno zina rake.” Naapo kwakaziswa kwaari umwe wayiva no mabzoka, uri bofu no umbeveve. Naye wakamurapa, ngokudaro mbeveve yakavereketa no kuvona. No vandhu vazhinji vese vakashamiswa, vakati, “Uwu andiyepi here Mwana wa Dhavhidha?” Asi vafarisi vazwa, vakati: “Uwu mundhu unombirimbija mabzoka, kwega unoambirimbija ndi Bherizebhuri, mambo wo mabzoka.” Na Jesu echiziva murangariro yavo, wakati kwavari: “Umambo hwese hunojiparaja hunozopera; no madhoropa ese nokuti ukama hunojiparaja auzoimi akadi.” No kudari Sathani echimbirimbija Sathani, iye wajiparaja; ndizvo umambo hwake hungazoita maimiroenyi? No kudari inini ndechimbirimbija mabzoka ndi Bherizebhuri, ndizvo vana venyu vanoambirimbija ndiyani? Ngo ndava yoichi vanozoyita vatongi venyu. Asi kuti inini ngo Mweya wa Mwari ndechimbirimbija mabzoka ndizvo Umambo hwa Mwari hwaviya kwomuri. Mundhu ungaita manghwinirenyi mu nyumba yo uwo uno simba, abe ndhumbi jake, asati asunga uwo uno simba? Naapo unozoba mu nyumba yake. Iye usipo neni unorwa neni; no uwo usikaunganiji neni unoparajanisa. Ndizvo ndinoti kwomuri: Kushaisha kwese, no zvituko zvese zvinoregerehwa ku vandhu, asi kutuka Mweya, akuzoregerehwi. No uwo unovereketa izwi ro kurwa no Mwana wo Mundhu, unozoregerehwa, asi iye unovereketa kurwa no Mweya Wakachena, aazoregerehwi, mu nyika muno, nokuti mu nyika inoviya. “Mwechiita kuti muti unake no michero yawo inake; nokuti muyite kuti muti ushate no michero yawo ishate. Ngokuti muti unozivikana ngo michero yawo.” Imwimwi mubarihwana wo mavhumbi, mungayita mavereketerenyi zvakanaka, muri vakashata? Ngokuti muromo unovereketa kubva kwezvakawanda zviri mu mwoyo. Mundhu wakanaka kubva kwo upfumi hwakanaka hwo mwoyo wake wakanaka unobudisa zvakanaka. No mundhu wakashata kubva kwo upfumi hwakashata unobudisa zvakashata. Asi inini ndinoti kwomuri, kuti, Mazwi ese asina shwiro anozovereketwa ngo vandhu, vanozobvunjisiswa ndiwo ngo zuva ro kutongwa. Ngokuti ngo mazwi ako unozopembejwa, na ngo mazwi ako unozopariswa ndava. Naapo vatari vakatikuti no vafarisi vakamupingura, vechiti: “Mujijisi, tinoda kuvona chivoniso chinoitwa ndiwe.” Asi iye wakapingura akati kwavari. “Mubarihwana uri wakashata no unoomba unopshaka chivoniso; asi akuna chivoniso chinozopuwa kwomuri, kwega chivoniso cha Jona muprofeti. Ngokuti kudari ndi Jona wayiva mazuva matatu no usiku hutatu mu ndani mwo hove huru, ngokudaro Mwana wo Mundhu unozogara mazuva matatu no usiku hutatu ari mu mwoyo mwo nyika. Vandhu vo Ninivha vanozomuka ngo zuva ro kutongwa pamwepo no uwu mubarihwana, no kuuparisa ndava, ngokuti ivo vakatenderuka ngo kuchumayira kwa Jona. Vonanyi, mukuru kuna Jona uri pano. Mambokaji wo Kubani unozomiruka ngo zuva ro kutongwa pamwepo no mubarihwana uwu, no kuuparisa ndava. Ngokuti iye wakabva ari ku magumo onyika kuviya kwoozwa ngo kungwara kwa Soromona. Vonanyi, mukuru kuna Soromona uri pano.” “Asi apo mweya wakashata wobuda ku mundhu, unofambafamba mundau jisina kumwa, wechipshaka kuzorora, usikakuwani. Naapo unoti, ndinozohwirireyo ku nyumba yangu iyo kwondakabva naapo waviya unoiwana isina chiro, yakapshaihwa, no kunemeswa. Naapo unoenda kootora mweya imweni minomwe, inoupinda ngo kushata, nayo inonghwina yechigaremo. No kupejisira kwouwo mundhu kunozopinda kushata kuno kugara kwo kutanga. Kunozodarovo no kuno uwu mubarihwana wakashata.” Apo achavereketa ku mbungano, ringira, mayi wake no vanukuna vake vaiyima ngokunja vechipshaka kuti vaverekete naye. No umweni wakatikuti wakati kwaari: “Ringirayi, mayi wako no vanukuna vako vanoyima kunja vechipshaka kuvereketa newe.” Asi iye wakapingura akati kuno uwo wakamubvunja: “Ndiyani mayi wangu? Ndiyanizve vanukuna vangu?” Naye wakatambanujira nyara yake kuno vajiji vake, akati: “Vonanyi, mayi wangu no vanukuna vangu! Ngokuti uwo unozoyita kuda kwa Baba wangu vari mu gore, ndiye uri munukuna wangu, no hanzvaji na mayi.” Ngo zuva iro Jesu wakabuda mu nyumba, akagara phedo no jombe. Kwakaungana kwaari mbungano huru, ndizvo wakanghwina mu ngarava wakagara; no mbungano yese yakayima ngo pambhiri. Naye wakavereketa kwavari zviro zvakawanda ngo miezaniso, wakati: “Ringiranyi kwakabuda mukushi kookusha. Kwakati mukukusha kwake mbewu jimweni jakawa mu njira, no shiri jakaviya jikajiha. No jimweni jakawira pa mapuwe apo pojayinga jisina mavhu mazhinji, najo jakamera ngo kukasira, ngokuti inga jisina mavhu mazhinji. Naapo zuva rakwira jakapiswa; na ngokuti inga jisina miji, jakazeketera. Jimweni jakawira pano minzwa; no minzwa yakamera yakajipshinya. No jimweni jakawira mu mavhu akanaka najo jakabereka tsangu, jimweni zana jimweni makumi matandhatu, no jimweni makumi matatu. Uwo uno njeve jokuzwa, ngaazwe.” No vajiji vakaviya kwaari vakati: “Unovereketa kwavari ngenyi ngo muezaniso?” Naye wakapingura, akati kwavari: “Ngokuti kunopuwa kwomuri kuziva zvakafishika zvo Umambo hwo mu gore, asi kwavari avo, akuzivi kupuwa. Ngokuti kwaari unacho unozopuwazve, naye unozova no zvakawanda. Asi uwo usina, naicho chaanacho chinozobviswa kwaari. Ngo iyi ndava ndinovereketa kwavari ngo miezaniso, ngokuti vechivona asi avavonesesi, vechizwa avazwi, zve avazwisisi. Kwavari kwakazarisika kuprofeta kwa Isaya, ukwo kunoti: ‘Ngokuzwa munozwa, nemwi musikazwisisi, mwechivona munovona, musikavonesesi. Ngokuti mwoyo yaava vandhu yakapata, no njeve javo jino majiviranjeve, no majiso avo akabvubvumara; kuti pamweni vangazovona ngo majiso avo, vazwe ngo njeve javo, no kuzwisisa ngo mwoyo yavo, vatenderuke, neni ndivaponese.’ Asi anomuchena majiso enyu, ngokuti anovona; no njeve jenyu, ngokuti jinozwa. Ngokuti zvirokwazvo ndinoti kwomuri, kuti, vaprofeti vazhinji no vandhu vakarurama vakadisisa kuvona zvomunovona imwimwi, navo avazivi kuzvivona, no kuzwa zvomunozwa navo avazivi kuzvizwa.” “Ndizvo zvino izwanyi muezaniso wo mukushi. Apo mundhu nokuti ngouri arizwa izwi ro Umambo, asikarikoni, naapo unoviya uwo wakashata unovhomora izvo zvakakushwa mu mwoyo mwake; uwu ndiye wakakushwa pa njira. No uwo wakakushwa pa mapuwe, uwu ndiye unorizwa izwi, na ngokukasira unoriashira ngokudakara. Asi aana miji mukati mwake, asi unogara mukuvo mudoko; asi apo kunoviya kutambujwa ngo ndava yo izwi, ngokukasira unopumbhuniswa. Iye wakakushwa mu minzwa uwu ndiye unorizwa izwi, asi kudembatemba ngo zvo nyika, no kuchengejehwa kwo upfumi kunojipa izwi, naro aribereki. Asi iye wakakushwa pa mavhu akanaka, uwu ndiye unorizwa izwi, naye unorikona, zve unobereka michero ngozvirokwazvo, vamweni zana, vamweni makumi matandhatu, vamweni makumi matatu.” Muezaniso umweni waakavereketa kwavari echiti: “Umambo hwo mu gore hunoezaniswa no mundhu wakakusha mbewu jakanaka mu munda wake. Asi apo vandhu vachavata, mukorore wake wakaviya wakakushavo senga mukati mwo mbewu yakanaka, wakaenda. Asi mbewu yoomera yechitumbuka, naapo senga rakavonekavo naro. Naapo varanda vo mune wo nyumba vakaviya, vakati kwaari: ‘Mambo, auzivi kukusha mbewu jakanaka mu munda wako here? Ndizvo senga rinobva kwapi?’ Asi iye wakati kwavari: ‘Mundhu uri mukorore wakayita ichi.’ Ndizvo varanda vakati kwaari: ‘Unoda here kuti tiende tiribvite?’ Asi wakati: Haiwa, ngokuti apo mwechibvita senga mungazobvita no koroni nayo. Zviregerenyi zvese zvikure pamwepo mbhera mukuvo wo kukotora; ngo mukuvo wo kukotora ndinozoti kuvacheki, kuti mwechiunganija senga kutanga, murisunge kuyita mutoro kuripisa; asi mwechiunganija koroni mu nyumbu yangu.” Muezaniso umweni waakavereketa kwavari, echiti: “Umambo hwo mu gore hunoezaniswa no mbhumba yo mustadhi, iyo yaakatora mundhu, akaisima mu munda wake. Iyo ngo gwinyiso iri doko kuno mbewu jese, asi apo yakura inopinda mapfiba ese kukura, inoyita muti, kuti shiri jo mu gore jinoviya, jimate mu matavi yawo.” Muezaniso umweni waakavereketa kwavari, echiti: “Umambo hwo mugore hunoezaniswa no mumera uwo waakatora mujimayi, akaudira mukati mwo mitani mitatu yo upfu mbhera hwese hwakakukumuka.” Izvi zvese Jesu wakazvivereketa kuna mbungano ngo miezaniso, naye aazivi kuzvivereketa kwavari na chimwe kusiri ngo muezaniso. Kuti kuzarisike izwi iro rakavereketwa ngo muprofeti, echiti: “Ndinozobewura muromo wangu kuvereketa miezaniso, ndinozovonisa zvakafishika kubvira pakusikwa kwo nyika.” Naapo wakaendesa mbungano, wakanghwina mu nyumba. No vajiji vake vakaviya kwaari, vakati: “Tidurujireyi muezaniso wo senga ro mu munda.” Naye wakapingura, akati kwavari: “Iye unokusha mbewu jakanaka uri Mwana wo Mundhu.” Munda inyika; mbewu jakanaka jiri vana vo umambo, senga riri vana vo uwo wakashata. Mukorore uwo wakarikusha ndi dhiyabhorosi. No kukotora kuri kupera kwo nyika, no vacheki jiri ngirosi. Ndizvo kudari ngo senga rinounganijwa pamwepo rechipiswa ngo muriro; kunozodarovo mukupera kwo nyika. Mwana wo Mundhu unozotuma ngirosi jake, najo jinozounganija kubva mu Umambo hwake zvese zvinopsheruja, naavo vese vanoyita zvinonyangaja; najo jinozovakhandira muchoto cho muriro, kunozovepo kurija mbhere no kukwetsana kwo mazino. Naapo vakarurama vanozojeka kudari ngo zuva mu Umambo hwa Baba avo. Uwo uno njeve ngaazwe. Zve Umambo hwo mu gore hunoezaniswa no upfumi hwakafishwa mu munda; uhwo hwaakawana mundhu akahufishazve, ngo kudakara kwake unoenda, unokutengesa zvese zvaanazvo, wotenga uwo munda. Zve Umambo hwo mu gore hunoezaniswa no mundhu uri mutengesi unopshaka mapuwe akanaka. Uwo apo avona buwe rimwe rinomutengo mukuru, wakaenda, wotengesa zvese zvayiva nazvo, wakaritenga. Zve Umambo hwo mu gore hunoezaniswa no juya rakakandihwa mu jombe, naro rakabata mufumbo wese wo hove. Naro apo razara vakarikwevera kunja, vakagara pasi, vakaunganija jakanaka mu njangaya, asi jakashata vakajirasha. Kunozodaro mukupera kwo nyika; ngirosi jinozobuda jiparajanise vakashata kubva mukati mwo vakarurama. Jivakandire muchoto cho muriro; kwoyiteyo kurija mbhere no kukwetsana kwo mazino. “Mwanasa kuzwa izvi zvese here?” Navo vakati kwaari, “Eya.” Wakati kwavari: “Ndizvo, mutari wese uwo wakajijiswa ngo zvo umambo hwo mu gore, wakadari ngo mundhu uri mune wo nyumba, uwo unobudisa kubva kwo upfumi hwake zviro zvipsha no zvokare.” Kwakaitika apo Jesu apeja iyi miezaniso, wakabvapo. Naapo wayinga waviya ku nyika yake, wakavajijisa mu nyumba yavo yo kudira, zvakayita kuti vashamiswe, vakati: “Kunobva kwapi kungwara uku kwo uwu mundhu, no iyi mishando yo simba? Uwu andiyepi here mwana wo muvezi? Mayi wake avadanijwi kuti ndi Mariya here? No vanukuna vake ndi Jakobe, na Josefa, na Simoni, na Judhasi here? No hanzvaji jake ajinesu jese here? Ndizvo zvinobva kwapi izvi zvese?” Navo vakakhugurika ndiye. Asi Jesu wakati kwavari: “Muprofeti aaregi kureremejwa kwega mu nyika mwake, no mu nyumba yake.” Naye aazivi kuyita apo mishando ino simba yakawanda ngo ndava yo kutama kutenda kwavo. Ngo uwo mukuvo Herodhi mutongi wakazwa mbiri ya Jesu. Naye wakati ku varanda vake: “Uwu ndi Johani Mubhapatisi; wamuka kwo vakafa. Ndizvo mishando iyi ino simba inoitwa ndiye.” Ngokuti Herodhi wayinga wakamubata Johani, akumusunga, akamunghwinisa mu guniya ngo ndava ya Herodhiasi mukaji wo munukuna wake Firipi. Ngokuti Johani wayinga akati kwaari: “Akutendehwi ngo mupango kwouri kuti umurovore.” Naapo wayida kumuuraya, wakatya mbungano, ngokuti vayiti kuti uri muprofeti. Asi apo zuva ro kuberekwa kwa Herodhi raguma, mwana wokaji wa Herodhiasi wakatamba pakati pavo, naye wakamudakajisa Herodhi. Ndizvo iye wakagondisa ngo kupika mbhiko kuti unozomupa pikija ichinyi chaaizokumbira. Naye achivangijihwa ndi mayi wake, wakati: “Ndipe pano mundiro musoro wa Johani Mubhapatisi.” Na mambo wakasvipa mwoyo; asi ngo ndava yo kupika kwake, na ngo ndava yaavo vayigara naye pakuha, wakapanga kuti upuwe kwaari. Naye wakatuma kuti Johani aguhwe musoro mu guniya. No musoro wakaziswa uri mundiro ukapuwa ku musikana, naye wakauviyisa kuna mayi wake. No vajiji vake vakaviya vakatora muviri wake, vakauviga, navo vakaenda vakamuzivisa Jesu. Zvino Jesu azwa izvi wakabvapo ngo ngarava kuenda ku ndau iri bani ari ega. Naapo mbungano yazwa ndizvo, yakamutevera ngo tshoka, yechibva ku madhoropa. Naye wakabuda wakavona mbungano huru, wakavazwira urombo, naye wakaponesa vaihwara vavo. Kwakati aamadekoni vajiji vake vakaviya kwaari, vechiti: “Pano pa bani, no mukuvo watopera zvino; ndizvo chienekesa mbungano kuti vaende mu maguta vajitengere zvokuha.” Asi Jesu wakati kwavari: “Avasisiri kuenda; vapenyi imwimwi zvokuha.” Navo vakati kwaari: “Pano tino zvimanda zvishanu zvega, no hove mbiri.” Naye wakati: “Zvizisenyi pano kwendiri.” Naye wakapanga mbungano kuti igare pasi pa mwenje, wakatora zvimanda izvo zvishanu, no hove mbiri, wakaringira mu gore, wakazvibonga, akazvigura, akapa kuno vajiji, no vajiji vakapa kuno mbungano. Navo vese vakaha vakaguta, navo vakabojera matshekeneswa ezvaihwarakatika, zvitengu zviri gumi na zviviri zvakazara. Navo vakaha vayiva vanoda kuyita zviuru zvishanu (5.000) zvo vanarume, kunja kwo vanakaji no vana. Paripo iye wakapanga vajiji vake kuti vanghwine mu ngarava, vatungamire kuambuka mwombera, achaenekesa mbungano. Naapo aendesa mbungano, wakakwira pa dundhu ari ega kookumbira. Kwoyita madekoni wayinga ari apo ega. Asi zvino ngarava inga yaandhambo no mutundhu, yechikandihwa apo naapo ngo mavimbi, ngokuti bepo rayita maringwa navo. Na ngo nguva yo kurinda yochirongomuna yo usiku iye wakaviya kwavari, echifamba panyezuru po jombe. Asi vajiji vechimuvona echifamba panyezuru po jombe vakatya, vechiti: Ijimujangara. Navo vakadanijira ngokutya. Asi paripo Jesu wakavereketa kwavari, echiti: “Shinganyi, ndini hangu, musatya.” Na Pedru wakamupingura, echiti: “Mambo, kuti uriwe nangayi kuti ndiviye kwouri panyezuru po kumwa.” Naye wakati: “Izayi!” Naapo Pedru abzuka kubva mu ngarava, wakafamba panyezuru po kumwa kuviya kuna Jesu. Asi echivona bepo rechiyita maringwa naye, wakatya; naye wakatanga kundondomera, wakadanijira, echiti: “Mambo ndiponese.” Asi paripo Jesu wakatambanuja nyara yake, wakamubata, wakati kwaari: “Iwewe uno kutenda kudodoko, wagononda ngenyi?” Kwakati apo vakwira mu ngarava, bepo rakatura. Naavo vayiva mu ngarava vakamudira, vakati: “Ngo zvirokwazvo iwewe uri Mwana wa Mwari.” Naapo vakaambuka mwombera vakaguma mu nyika yo Genesareta. Naapo vandhu vo munyikemwo vamuziva, vakatuma mu nyika mwese, vakazisa kwaari vese vayiva no ndhenda. Navo vakamupota kuti ava vatendehwe kwega kupshasa mupendero wo nguvo yake; naapo vese vakaupshasa vakaponeswa aembho. Zvino kwakaviya kuna Jesu vafarisi no vatari vechibva Jerusarema, vechiti: “Ngenyi vajiji vako vanogura chirovejeso cho vokare, ngokuti avashambi nyara javo apo vachiha chimanda.” Asi iye wakavapingura, akati kwavari: “Imwimwi nemwi munogura ngenyi mupango wa Mosi ngo chirovejeso chenyu?” Ngokuti Mwari wakati: Reremeja baba wako na mayi wako, no uwo unotuka baba nokuti mayi ngaafe ngo kufa. Asi imwimwi munoti, Iye unozoti kuna baba wake nokuti mayi wake, chiro chiri chakadini icho chemwaida kubesehwa ndicho ndini, chaachipo kuna Mwari, aadikanizve kureremeja baba wake nokuti mayi wake. Ndizvo ngokudaro munoita kuti izwi ra Mwari riyite risina shwiro ngo chirovejeso chenyu. Imwimwi vajiitisi, Isaya wakanasa kuprofeta ndimwi, echiti: “Vandhu ava vanondireremeja ngo miromo yavo, asi mwoyo yavo iri ndhambo kwendiri. Asi vanopera nguva kundidira, vechijijisa kuyita zvijijiso, mipango yo vandhu.” Naye echidanija pamwepo mbungano, wakati kwavari: “Izwanyi muzwisise; andichopi akadi chinonghwina mu muromo chinomusvipisa mundhu, asi icho chinobuda mu muromo, ndicho chinosvipisa mundhu.” Naapo vakaviya vajiji vake, vakati kwaari: “Auzivi here kuti vafarisi vasvipa mwoyo ngokuzwa izwi iri?” Asi iye wakapingura, akati: “Chisimwa chese chisikazivi kusimwa ndi Baba wangu vari mu gore, chinozobvitwa. Varegerenyi, vari mapofu, anokweva mapofu. No kudari bofu rechikweva bofu, ese anozowa mukati mwo rindi.” Na Pedru wakapingura wakati, kwaari: “Tidurujireyi muezaniso uwu.” Asi wakati: “Imwimwi nemwi amusati mwanasa kuziva kani? Amuzwisisi here icho chinonghwina ngo pa muromo chinoenda mu ndani chinorashwa mushango? Asi izvo zvinobuda ku muromo zvinobva mu mwoyo; izvi zvinomusvipisa mundhu. Ngokuti mu mwoyo munobva mirangariro yakashata, kuuraya, kuomba, kunyenya, umbavha, uchapupu hwo kunyepa, kutuka. Izvi ndizvo zviro zvinosvipisa mundhu; asi kuha ngo nyara jisikazivi kushambwa, akusvipisi mundhu akadi.” Naapo Jesu wakabvapo, wakaenda mu nyika yo Tire no yo Sidhoni. Vonanyi, jimayi ro Kenani rakabva ku ndau iyo, rakadanijira, rechiti: “Ndiyitire nyasha, Mambo, Mwana wa Dhavhidha; mwana wangu wokaji unotambujwa kukurutu ngo bzoka.” Asi iye aazivi kuripingura no izwi. No vajiji vake vakaviya kwaari, vakamupota, vechiti: “Muendesenyi, ngokuti unodanijira sure kwedu.” Asi wakapingura, wakati: “Ndakatumihwa kwega ku mabvuta akarashika o nyumba yo Israeri.” Asi uwo wakaviya, wakamudira, akati: “Mambo, ndidetsere.” Asi wakapingura, wakati: “Akuzivi kunaka kutora chimanda cho vana, no kuchikandira kuzvimbwa.” Asi uwo wakati: “Eya Mambo, ngokutizve zviimbhwa zvinoha kwezvinohwarakatika pa thafura ra mambo wazvo.” Naapo Jesu wakapingura, akati kweriri: “A! Jimayi, kutenda kwako kuri kukuru. Ngakuitike kwouri kudari ngo zvounoda. No mwana waro wokaji wakaponeswa kubvira ngo nguva iyo.” Na Jesu wakabvapo, wakaviya phedo po jombe ro Garire; wakakwira pa dundhu, wakagara apo. No mbungano huru yakaviya kwaari, inazvo zvirema, no mapofu, no mbeveve, no vakakhuvazika, no vamweni vazhinji, vakavadira pasi kutshoka jake, naye wakavarapa. Ngokudaro mbungano yakashamiswa apo yavona mbeveve jechivereketa, no vakakhuvazwa vechirapika, no zvirema zvechifamba, no mapofu echivona. Navo vakakuja Mwari wa Israeri. Naapo Jesu wakadanija vajiji vake kwaari, wakati: “Ndinozwa urombo ngo ndava yo mbungano, ngokuti yayinga ineni mazuva matatu vasina zvokuha; neni andidi kuvaendesa vasikazivi kuha, ngokuti vangazowa ngo njara mu njira.” No vajiji vake vakati kwaari: “Ngokwapi kwetingawana zvimanda zvakawanda mu bani muno zvinokwanisa kugutisa vandhu vazhinji vakadari?” Na Jesu wakati kwavari: “Muno zvimanda zvingana?” Navo vakati: “Zvinomwe, no zvihove zvishomani.” Naye wakapanga mbungano kuti igare pasi. Naye wakatora zvimandezvo zvinomwe no hove, wakazvibonga, wakazvigura, wakapa kuno vajiji, no vajiji vakazvipa kuno mbungano. Navo vakaha vese, vakaguta; navo vakabojera matshekeneswa akasara, zvitengu zvinomwe zvakazara. Naavo vakaha vayiva zviuru zvirongomuna (4.000) zvo vanarume, kunja kwovanakaji no vana. Naye wakaendesa mbungano, wakanghwina mu ngarava wakaviya ku migano yo Magadhana. Vafarisi no vasadhusi vakaviya vechimueja, vakakumbira kuti avapangijire chivoniso chinobva mu gore. Asi iye wakapingura, wakati kwavari: “Kwooyita madekoni munoti, kunja kunozoeja ushoni; ngokuti mu gore mwakapshuka. No mumangwanani munoti, kunozona nyamasi ngokuti mu gore mwakapshuka muno ruseto. Munoziva kujija hope yo mu gore, asi amukoni here kujija zvivoniso zvo mikuvo? Mubarihwana wakashata no unoomba unopshaka chivoniso, akuna chivoniso chinozopuwa kwouri, asi kwega chivoniso cha Jona.” Naye wakavasiya, akaenda. Naapo vajiji vake vaguma mwombera vayinga vakanganwa kutora zvimanda. Na Jesu wakati kwavari: “Vonanyi, mungware mumera wo vafarisi no wo vasadhusi.” Navo vakapangana pakati pavo, vakati: “Unodaro ngokuti atizivi kutora zvimanda.” Na Jesu echiziva izvo, wakati: “Munopangana ngenyi pakati penyu imwimwi munokutenda kudodoko, ngokuti amuna chimanda? Amuzivi nazvino here, nokuti kucherecheja ngo zvimanda zvishanu zvakapuwa vandhu vari zviuru zvishanu (5.000), no zvitengu zvingana zvo mwakabojera matshekeneswa? Zve, nokuti zvimanda zvinomwe zvakapuwa vandhu vayiva zviuru zvirongomuna (4.000), no zvitengu zvingana zvo mwakabojera matshekeneswa? Amuzivi kuzwisisa ngenyi kuti andizivi kuvereketa kwomuri ngo zvimanda, kuti mungware mumera wo vafarisi no wo vasadhusi?” Naapo vakanasa kuzwisisa kuti aasaivapanga kuti vangware ngo mumera wo zvimanda, asi kuti vangware kujijisa kwo vafarisi no kwo vasadhusi. Zvino Jesu naaguma mu nyika yo Khesariya yo Firipi, wakabvunjisa vajiji vake echiti: “Vandhu vanoti kuti inini Mwana wo Mundhu ndiyani?” Navo vakati: “Vamweni vanoti kuti uri Johani Mubhapatisi, no vamweni kuti uri Erija, no vamweni kuti uri Jeremiya, nokuti umwe wo vaprofeti.” Iye wakati kwavari: “Asi imwimwi munoti ndiri yani?” Simoni Pedru wakapingura, akati kwaari: “Iwewe uri Kristu, Mwana wa Mwari unopona.” Na Jesu wakapingura, akati kwaari, “Unomuchena iwewe Simoni, mwana wa Jona, ngokuti nyama no ngazi azvizivi kuvonisa ichi kwouri, asi Baba wangu vari mu gore. Neni ndinoti kwouri, kuti iwewe Pedru, na ngopanyezeru poiri buwe ndinozovaka chiara changu; no musuvo wo haidhesi auzochinyisi. Neni ndinokupa mugogo wo Umambo hwo mu gore; no icho cho unozosunga mu nyika chinozosungwa mu gore; no icho cho unozosunungura mu nyika chinozosununguhwa mu gore.” Naapo wakapanga vajiji vake kuti vasazobvunja mundhu naumwe kuti iye ndiye Kristu. Kubvira ngo uwo mukuvo Jesu wakatanga kupangijira ku vajiji vake kuti kunosisira kuti aende Jerusarema, atambujike ngo zvakawanda, ngo vakuru no vapristi vakuru, no vatari, aurawe, ngo zuva rochitatu amuswe. Naapo Pedru wakamutora kuenda pamutivi, wakatanga kumuvereketera, echiti: “Mwari ngaayite kuti chisaitika icho kwouri, Mambo: Ichi achizoitiki kwouri narini.” Asi iye wakakunukuka, wakati kuna Pedru: “Ibva kwendiri, Sathani! Uri chikhugunyiso kwendiri; ngokuti auzivi ngoizvo zva Mwari, asi ngoizvo zvo vandhu.” Naapo Jesu wakati ku vajiji vake: “Pikija ndiyani unoda kuviya sure kwangu, ngaajirambe atore muchinjiko wake anditevere.” Ngokuti iye unoda kuhwira kurarama kwake, unozokurasha; no uwo unozorasha kurarama kwake ngo ndava yangu, unozokuwana. Mundhu unozoviihwa ngenyi kudari achiwana nyika yese, no kurasha ndaramo yake? Nokuti mundhu unozopenyi kuti awane ndaramo yake? Ngokuti Mwana wo Mundhu anozoviya mu uthende hwa Baba wake pamwepo no ngirosi jake; naapo unozopa mundhu wese kudari ngo mishando yake. “Zvirokwazvo, ndinoti, kuti varipo vamweni venyu vanoyima pano, avo vasikazozwi kufa mbhera vavone Mwana wo Mundhu echiviya mu Umambo hwake.” Ngosure kwo mazuva matandhatu Jesu wakatora Pedru, na Jakobe, na Johani munukuna wake, akakwira navo panyezuru po dundhu rakareba, vari vega. Naye wakatsandujwa pamberi pavo, no hope yake yakajeka kudari ngo zuva, no zvokufuka zvake zvakachena kudari ngo kujeka. Ndipo kwakavoneka kwaari Mosi na Erija, vechivereketa naye. Na Pedru wakati kuna Jesu: “Mambo, kwakanaka kwetiri kuti tive pano. Kudari wechida, ndinozovaka pano zvitumba zvitatu, chimwe chako, chimweni cha Mosi, no chimweni cha Erija.” Apo achavereketa, vonanyi gore rinon'anikira rakavafukijira, ndizvo izwi rakabva mu gore, rechiti: “Uwu uri Mwana wangu, wo ndinoda, wo ndinonasa kudakara ndiye; Muzwenyi.” Naapo vajiji vazwa vakawa ngo hope javo, vakatya kukuru. Na Jesu wakaviya, akavapshasa, akati: “Mukanyi, musatya.” Naapo vamusa majiso avo, avazivi kuvona mundhu, kwega Jesu. Vachabzuka kubva panyezuru po dundhu, Jesu wakavapanga, echiti: “Musazobvunja mundhu naumwe ngo ndava yo chivoniso mbhera Mwana wo Mundhu amuke kwo vakafa.” No vajiji vake vakamubvunjisa, vechiti: “Ndizvo, ngenyi vatari vanoti kuti, kunosisira kuti Erija atange kuviya?” Naye wakapingura, echiti: “Ngo gwinyiso Erija unoviya amusijire zvese. Asi ndinoti kwomuri, Erija wakatoviya hake, navo avazivi kumuziva, asi vakayita kwaari zvese izvo zvovakada. Ngokudaro Mwana wo Mundhu naye unozotambujwa ndivo.” Naapo vajiji vakazwisisa kuti wakavereketa kwavari ndi Johani Mubhapatisi. Vaguma kuno mbungano kwakaviya kwaari mundhu, akamugwadamira pasi, echiti: “Mambo, muitirenyi nyasha mwana wangu. Ngokuti unonjwiti, unotambujika kukurutu; ngokuti kazhinji unowa pa muriro no kazhinjizve mu kumwa. Neni ndakamuzisa kuno vajiji vako, navo vakonehwa kumurapa.” Jesu wakapingura, akati: “A! Mubarihwana usikatendi no unopauka, ndinozogara nemwi mukuvo wakadini? Muziseyi pano kwendiri.” Na Jesu wakambirimbija iro bzoka; naro rakabuda kubva kwaari; no murumbwana wakarapwa kubvira nguva iyo. Naapo vajiji vakaviya kuna Jesu, ari ega, navo vakati: “Ngenyi isisu takonehwa kurimbirimbija?” Naye wakati kwavari: “Ngo ndava yo kugononda kwenyu, ngokuti ngozvirokwazvo ndinoti kwomuri, kuti, kudari munokutenda kudari ngo mbhumba yo mustadhi, mungazoti kuno iri dundhu, Ibva pano, uende apo; naro rinozobva apo; akuchina, chiro chisikazoitwi ndimwi. Iyi mbewu ayibudi kwega asi ngo kukumbira na ngokuera kuha.” Navo vaungana pamwepo mu Garire, Jesu wakati kwavari: “Mwana wo Mundhu unozopihwa mu nyara jo vandhu. Navo vanozomuuraya, na ngo zuva rechitatu unozomukazve.” Navo vakatambujika kukuru. Naapo vaguma mu Kaperanaume avo vayiashira shangu vakaviya kuna Pedru, vakati: “Mujijisi wenyu aashabi shangu here yo mare inozwi didrakama?” Wakati, “Eya.” Kwakati wanghwina mu nyumba Jesu wakatanga kuvereketa kwaari, echiti: “Unorangarijenyi Simoni? Majimambo onyika vanoashira kunani murimwa, nokuti shangu? Kuno vana vavo, nokuti kuvonyikanja?” Pedru wakati kwaari, “Kuvonyikanja.” Naapo Jesu wakati kwaari: “Ngokudaro vana vavo vari vakasununguhwa. Asi kuti tisazovapsheruja, endayi iwewe ku jombe, ukandire chivejo, utore hove iyo inotanga kubatwa; naapo wazaura muromo wayo, unozowana chigurwa cho mare chinozwi statera; icho unozochitora uchipe kwavari ngo ndava yangu no yako.” Panguva iyo vajiji vakaviya kuna Jesu, vakati: “Ndiyani uri mukuru mu Umambo hwo mu gore?” Na Jesu wakadanija kwaari mwana mudoko, wakamudira pakati pavo, akati: “Ngo zvirokwazvo ndinoti kwomuri, musikatenderuki, muyite kudari ngo mwana mudoko, amutongozonghwini mu Umambo hwo mu gore. Ndizvo iye unozojipfavisa kudari ngo uwu mwana mudoko, iye ndiye uri mukuru mu Umambo hwo mu gore. No uwo unozoashira umwe mwana mudoko wakadari ngo uwu ngo zina rangu, unondiashira inini.” “Asi pikija ndiyani unozoshaishisa umwe wo vadoko vakadari vanonditenda, kunopinda kumunakira iye kuti gwiyo risungihwe muhuro mwake, kuti akandihwe pakajikira jombe. Ikhombo ku nyika ngo ndava yo zvishaishi! Ngokuti kunosisira kuti zvishaishi zviviye; asi ikhombo kwaari mundhuwo wo zvinoviya ndiye! Kuti nyara yako, dangani tshoka yako inokushaishisa, itemeyi, uirashe kubva kwouri. Kunopinda kunaka kwouri unghwine mu kururama uri chirema, nokuti wechithobinya, kuno kuti unonyara mbiri dangani tshoka mbiri ukandihwe mu muriro usikaperi. No kudari jiso rako rinokushaishisa ribvite urirashe kubva kwouri. Kunopinda kukunakira kuti unghwine mu kururama uno jiso rimwe kuno kuti uno majiso maviri ukandihwe mu muriro wo Gehena.” “Ngwarayi kuti musazoshora umwe we ava vadoko. Ngokuti ndinoti kwomuri, mu denga ngirosi javo jinogara jichivona hope ya Baba wangu vari mu gore. Ngokuti Mwana wo Mundhu wakaviya kuponesa avo vakarashika. Munorangarijenyi? Kuti mundhu unozana ro mabvuta no rimwe rawo rarashika, aasiyi here ari makumi mapfumbamwe na mapfumbamwe, aende ku matundhu no kupshaka iro rakarashika? No kudari kwechiitika kuti akariwana, ngozvirokwazvo ndinoti kwomuri kuti unopinda kudakara ndiro kuno ari makumi mapfumbamwe na mapfumbamwe asikazivi kurashika. Ngokudaro andikwopi kuda kwa Baba wenyu vari mu gore kuti umwe weava vadoko arove.” “Zve kuti munukuna wako echizokushaishira, enda, umupangijire ndava yake pakati penyu muri mwega; kudari iye echizopurukira, wawana munukuna wako. Asi kuti esikazokupurukiri, tora umwe dangani vaviri, kuenda newe, kuti ngo miromo yo vaviri dangani yo vatatu vanoyita chapupu, mazwi ese angagwinyiswa. Asi kuti iye akazoramba kuvapurukira, bvunjayi vo chiara: Asi kudari akazoramba kupurutana vo chiara, ngaayite kwouri kudari ngo wo vo majinja, nokuti ngo mushabisi. Zvirokwazvo, ndinoti kwomuri, pikija ichinyi chomunozosunga mu nyika, chinozosungwavo mu gore; no icho chomunozosunungura mu nyika chinozosununguhwavo mu gore. Zve ndinoti kwomuri, kudari vaviri kwomuri vanozotenderana mu nyika ngo chiro chovanozokumbirira, chinozoitihwa kwavari ndi Baba wangu vari mu gore. Ngokuti apo vaviri nokuti vatatu vechiungana pamwepo ngo zina rangu, ndiripo pakati pavo.” Naapo Pedru wakaviya, echiti kwaari: “Mambo, munukuna wangu unozondishaishira kangana ndechimuregerera? Mbhera mikuvo minomwe here?” Jesu wakati kwaari: “Andinangi kwouri kuti, mbhera runomwe akadi; asi mbhera makumi manomwe akapetwa kanomwe.” Ndizvo Umambo hwo mu gore hunoezaniswa no mundhu uri mambo, uwo wayida kuverengeserana no varanda vake. Naapo atanga kuverenga, umwe wakaziswa kwaari unomagava wo matarenta ari gumi ro zviuru (10.000). Asi ngokuti iye wayinga asina chokuripira ndicho, mambo wake wakapanga kuti atengeswe no mukaji wake, no vana vake, nazvo zvese zvayiva nazvo, kuti gava riripwe. Ndizvo muranda uwo wakawa pasi, wakamunamata, echiti, “Ndisengerereyi, neni ndinozokuripira zvese.” Naapo mambo wo uwo muranda wakamuzwira, wakamusunungura, akamuregerera gava. Asi uwo muranda wakabuda, wakavona umwe wo varanda ari mudoni wake, uwo wayinga no gava naye ro zana (100) ro machereni, naye wakamubata ngo nyara, wakamujipa pahuro, echiti: “Ripa kwendiri gava rako.” Ndizvo muranda uwo uri mudoni wake wakawa pasi, wakamupota, echiti, “Ndisengerereyi, neni ndinozokuripira.” Asi aazivi kutenda. Kani wakaenda wakamunghwinisa mu guniya, mbhera aripe gava iro. Ndizvo varandadoni vake, no vavona icho chakaitika, vakasvipa mwoyo kakurutu, vakaviya, vakaverengera mambo wavo izvo zvakaitika. Naapo mambo wake wamudanija, wakati kwaari: “Iwewe muranda, wakashata, ndakakuregerera gava rese, apo wandipota: Auchaisisira iwewevo here kuti umuregerere muranda uwo uri mudoni wako, kudari ndini ndakakuregerera iwewe? Na mambo wake wakatseneka, wakamupira ku vashwinyisi mbhera aripe magava ese aayiva nawo kwaari. Ngokudaro Baba wangu vari mu gore vanozoyita kwomuri, kuti imwimwi musikaregereri munukuna wenyu ngo mumwoyo mwenyu.” Kwakaitika apo Jesu apeja kuvereketa aya mazwi, wakabuda mu Garire, wakaviya mu migano yo Judhiya, mwombera mwo Jordhani. Mbungano huru yakamutevera; naye wakavarapa apo. No vafarisi vakaviya kwaari, vechimueja, vechiti: “Kunotendehwa here ngo mipango kuti mundhu arambe mukaji wake ngo ndava iriyese?” Naye wakapingura akati: “Amuzivi kujija here kuti uwo wakavasika pakutanga, wakavasika mwanarume no mwanakaji. Akati; ‘Ngo ndava iyi mundhu unozosiya baba na mayi, unozobatana kumukaji wake; ndizvo avachayiti vaviri, asi nyama imwe.’ Ndizvo icho chaakasunganisa Mwari, mundhu asazosunungura.” Vakati kwaari: “Ndizvo ngenyi, Mosi wakapanga kupa tshamba yo kuparajana, no kumuramba?” Wakati kwavari: “Mosi ngo ndava yo kupata kwo mwoyo yenyu wakatendera kuti murambe vakaji venyu; asi kubvira mukutanga kwayinga kusikazivi kudaro. Asi inini ndinoti kwomuri, kuti, pikija ndiyani uwo unoramba mukaji wake isiri ndava yo kuomba, arovore umweni, unoomba.” Vajiji vakati kwaari: “Kuti yakadaro ndava yo mundhu no mukaji wake, akuzivi kunaka kurovora.” Asi wakati kwavari: “Vese avangaashiri izwi iri, asi kwega kwavari avo vakaripuwa. Ngokuti varipo vari ngomwa kubva mu ndani jo majimayi avo; varipozve mithenwa avo vakathenwa ngo vandhu, varipozve vakajiitisa ngomwa ngo ndava yo Umambo hwo mu gore. Iye uno simba ro kuriashira, ngaariashire.” Naapo vakazisa kwaari vana vadoko, kuti adire nyara jake panyezuru pavo, avakumbirire: Asi vajiji vakavarambisa. Asi Jesu wakati: “Tenderanyi vana vadoko kuti vaviye kwendiri, musavarambisa, ngokuti Umambo hwo mu gore ngo hwavakadaro.” Naye vakadira nyara jake panyezuru pavo, akabva apo. Vonanyi, umwe wakaviya kwaari, wakati: “Mujijisi, ichinyi icho chakanaka chondingaita kuti ndizowane kurarama kusikaperi?” Naye wakati kwaari: “Unondibvunjisa ngenyi ngo ndava yo chakanaka? Aripo umwe wakakana; asi kudari wechida kunghwina mu kurarama ngwarirayi mipango.” Wakati kwaari: “Mipango yenyi?” Na Jesu wakati: “Uchazouraya, Uchazoomba, Uchazoba, Uchazoita chapupu cho kunyepa, Reremeja baba wako na mayi, Unozoda muvakihwana wako kudari ngokujida iwewe.” Jaha iro rakati kwaari: “Ndakazvingwarira izvi zvese; chinyi chasara kuti ndiite?” Jesu wakati kweriri: “Kuti wechida kuyita wakaperera, endayi utengese izvo zvounazvo, upe kuvarombo, newe unozowana upfumi mu gore: Uviye unditevere.” Asi apo jaha razwa izwi iro rakaenda rechitambujika, ngokuti rayiva no upfumi hwakawanda. Naapo Jesu wakati ku vajiji vake: “Ngo zvirokwazvo ndinoti kwomuri, kuti zvinonesa kuno mukhupuki kuti anghwine mu Umambo hwo mu gore. Zve ndinoti kwomuri, kwakapinda kureruka kuti kamera ringhwine ngo pachibovo cho njingano, kuno kuti mukhupuki anghwine mu Umambo hwa Mwari.” Apo vajiji vakashamiswa kakurutu, vakati: “Kuti zvakadaro, ndiyani ungaponeswa?” Asi Jesu wakavaringira, akati kwavari: “Kuna vandhu ichi achitongoitiki; asi kuna Mwari zvese zvinoitika.” Naapo Pedru wakapingura, akati kwaari: “Ringira, isisu takasiya zvese, tikakutevera; ndizvo tinozowanenyi?” Na Jesu wakati kwavari: “Ngo zvirokwazvo ndinoti kwomuri, kuti imwimwi mwanditevera, ngo mukuvo wokusikwa kupsha, apo Mwana wo Mundhu oozogara panyezuru po dendemaro ro uthende hwake, imwimwivo munozogara panyezuru po madendemaro ari gumi na maviri, mwechitonga majinja ari gumi na maviri a Israeri.” No mundhu wese wakasiya nyumba, nokuti vanukuna, nokuti hanzvaji, nokuti baba, nokuti mayi, nokuti mukaji, nokuti vana, nokuti nyika, ngo ndava yo zina rangu, unozoashira zvakapetwa kuyita zana (100), naye unozogara ndhaka yo kurarama kusikaperi. Asi vazhinji avo vari vopamberi vanozoyita vo sure; naavo vari vo sure vanozoyita vopamberi. Ngokuti Umambo hwo mu gore hunoezaniswa no mundhu uri mune wo nyumba, uwo wakafumira mangwanani mavishi kootora vashandi vo munda wake wo mivhini. Naapo watenderana no vashandi mare imwe ngo zuva, wakavatuma ku munda wo mivhini. Naye wakabudazve kooda kuyita nguva yochitatu, wakavona vamweni vakayima pandau yo musika, vasikashandi. Wakati kwavari: Endanyivo mu munda wo mivhini, no icho chinomusisira ndinozomupa. Navo vakaenda. Zve wakabuda kooda kuyita nguva yochitandhatu, no yo chipfumbamwe, wakayitazve kudaro. Kooda kuyita nguva yo chigumi na imwe wakabuda, wakavona vamweni vakayima, wakati kwavari: Munoima pano ngenyi zuva rese musina chomunoshanda? Vakati kwaari: Ngokuti apana mundhu watitora. Wakati kwavari, endanyivo mu munda wo mivhini no icho chinomusisira munozoashira. Kwoyita madekoni mambo wo munda wo mivhini wakati kuno mungwariri wake: Danijayi vashandi, uvape musharo, utange ngo uwo wokugumisira mbhera kuguma kuno uwo wokutanga. Kwakati no vaviya avo vakatohwa ngo nguva yo chigumi na imwe vakaashira mare imwe. Kwakati avo vokutanga voviya vakarangarija kuti vangaengejehwa; navo ngokudaro vakaashira mundhu wese mare imwe. Naapo vaashira vakan'un'utira mune wo nyumba, vechiti: “Ava vokupejisira vashanda nguva imwe yega, newe wakayita kuti vaezane nesu, isisu takatwara mutwaro no kupisa kwezuva.” Asi iye wakapingura, akati kwo umwe wavo, shamwari andizivi kukuitira chakashata. Auzivi kutenderana neni here ngo mare imwe? Tora icho chiri chako uende. Ndinoda kumupavo uwu wokupejisira kudari ndiwe. Akutendehwi here kwendiri kuti ndiite icho chondinoda ngozviri zvangu? Nokuti jiso rako, rinothima ngokuti inini ndakanaka here? Ndizvo avo vo sure vanozoyita vo pamberi, no vo pamberi vanozoyita vo sure. Apo Jesu echikwira Jerusarema, wakatora vajiji vari gumi na vaviri, vari vega mu njira, naye wakati kwavari: “Vonanyi, tinokwira Jerusarema; no Mwana wo Mundhu unozopihwa ku vapristi vakuru no vatari, navo vanozogura kuti aurawe. Navo vanozomupira kuno vo majinja kuti aitihwe jee, no kumupshaputa, no kukohomehwa, na ngo zuva rochitatu unozomuka.” Naapo kwakaviya kwaari mayi wo vana va Zebhedhi, pamwepo no vana vake, akamudira, echikumbira kwaari chiro chakatikuti. Naye wakati kwaari: “Chinyi cho munoda?” Wakati kwaari: “Nangayi kuti ava vana vangu vaviri vagare umwe ngo kumuho kwako, no umweni ngo kuboshwe kwako mu Umambo hwako.” Asi Jesu wakapingura, akati: “Amuzivi icho chomunokumbira. Munokona here kumwa mukheyo wo ndinozomwa inini?” Vakati, kwaari: “Tinokona.” Iye wakati kwavari: “Ngo gwinyiso munozomwa mukheyo wangu; asi kugara ngo kumuho kwangu na ngo kuboshwe kwangu andikwopi kwangu akadi kupa, asi ngokwaavo vakanasirihwa ndi Baba wangu.” Naapo vari gumi vazwa, vakatsenekera hama mbiri ijo. Asi Jesu wakavadanija kwaari, akati: “Munoziva kuti vatongi vo majinja vanotonga panyezuru pavo, no vakuru vavo vanosimba panyezuru pavo. Asi akuzoiti kudaro pakati penyu; asi uwo unoda kuti ayite mukuru pakati penyu ngaayite mushandiri wenyu; no uwo unoda kuyita wokutanga pakati penyu ngaayite muranda wenyu. Kudari ngo Mwana wo Mundhu aazivi kuviya koshandihwa, asi kushandira no kupa kupona kwake kuyita muripo wo vazhinji.” Naapo vachibuda kubva mu Jeriko mbungano huru yakamutevera. Vonanyi, mapofu maviri akagara pa njira, apo akazwa kuti Jesu waikhirira, akadanijira, echiti: “Mambo, Mwana wa Dhavhidha, tiyitire nyasha.” No mbungano yaiakamisa kuti anyarare. Asi akapinda kudanijisa, echiti: “Mambo, Mwana wa Dhavhidha, tiyitire nyasha.” Na Jesu wakayima, wakaadanija, akati: “Munoda kuti ndimuitirenyi?” Akati kwaari: “Mambo, kuti majiso edu apembenujwe.” Ndizvo Jesu wakaazwira urombo, wakapshasa majiso ao; paripo majiso ao akapembenujwa, nao akamutevera. Naapo vakwedera phedo po Jerusarema, vaguma ku Bhetifaje, ku dundhu ro Maorivhe, Jesu wakatuma vaviri vo vajiji vake. Wakati kwavari: “Endanyi ku guta iro romwakaringirana naro, paripo munozovona mbongoro yakasungwa no tshiru pamwepo nayo. Jisunungurenyi, mujiviise kwendiri. Kuti aripo unozovereketa chiro kwomuri, munozoti, Mambo unojida, ngokukasira unozojitumira.” Ichi chakaitika kuti kuzarisike ukwo kwakavereketwa ngo muprofeti, echiti: “ Bvunjanyi mwana wokaji wo Zioni. Vonayi, Mambo wako unoviya kwouri, uri wakapfava, echigada panyezuru po mbongoro, no panyezuru po tshiru ro chipfuyo cho mitwaro.” No vajiji vakaenda, vakayita kudari ngozvaakavapanga Jesu. Navo vakazisa mbongoro no tshiru rayo, vakadira nguvo javo panyezuru pajo, vakamugajika panyezuru pajo. No mbungano zhinji yakaaja nguvo jayo mu njira; no vamweni vakatema matavi omiti, vakaaja mu njira. No mbungano yaifamba pamberi pake, no iyo yaitevera ngosure, yaidanijira, yechiti: “Hosana ku Mwana wa Dhavhidha! Unomuchena uwo unoviya ngo zina ra Mambo; Hosana mudenga-denga.” Naapo wanghwina mu Jerusarema, vo dhoropa rese vakashamiswa, vechiti: “Ndiyani uwu?” No mbungano yakati: “Uwu ndi Jesu, muprofeti unobva Nazaretha ro Garire.” Na Jesu wanghwina mu themperi, wakambirimbija avo vese vayitengesa, naavo vayitenga mu themperi, naye wakawisa mathafura eavo vayitenganisana mare, no zvigaro zvo avo vayitengesa njiva. Wakati kwavari: “Kwakatahwa kuti, nyumba yangu inozozwi inyumba yo kudira; asi imwimwi mwayita bakho ro mbavha.” No mapofu no zvirema zvakaviya kwaari mu themperi, naye wakavarapa. Asi apo vapristi vakuru no vatari vavona izvo zvinoshamisa zvaakayita, no vana vayidanijira mu themperi, vechiti: “Hosana ku Mwana wa Dhavhidha, vakatseneka.” Navo vakati kwaari: “Unozwa here icho cho vanovereketa ava? Na Jesu wakati kwavari: Eya amuzivi kutongojija here, kuti, kubva kumiromo yo ndumure no yo vanomwa unoashira kukujwa kwakaperera?” Naye wakavasiya, wakabuda mu dhoropa, wakaenda Bhetani; naye wakavata apo. Chomangwanani apo echihwirira ku dhoropa, wakazwa njara. Naapo avona mukuyu uri phedo po njira, wakaguma kwouri, wakauwana usina chiro, asi masakani ega, naye wakati kwouri: “Akuchazobahwi michero kwouri kunoti mbhera narini.” Paripo mukuyu wakazeketera. Kwakati vajiji vavona vakashamiswa, vechiti: “Mukuyu wazeketera ngokukasira ngenyi?” Jesu wakapingura, akati kwavari: “Ngo zvirokwazvo ndinoti kwomuri, kuti kudari munokutenda musikagonondi, amungazoiti icho chega chakaitwa kuno mukuyu, asi pikija mwechizoti kuno iri dundhu, ‘Ibva pano, ukandihwe mu jombe, chinozoitika.’ Nazvo zvese zvomunozokumbirira mu mikumbiro ngo kutenda, munozoashira.” Naapo wanghwina mu themperi, vapristi vakuru no vakuru vo vandhu vakaviya kwaari echijijisa, vakati: “Ngo simba rani rounoita izvi ndiro? Ndiyani wakakupa simbero?” Jesu wakapingura, wakati kwavari: “Inini ndinozomubvunjisavo chiro chimwe, kuti mukandipingura, ndinozomubvunjavo kuti ngo simba rani randinoita izvi ndiro. Rubhapatiso rwa Johani hwakabva kwapi? Hwakabva mu gore here, nokuti hwakabva ku vandhu?” Navo vakapangana pakati pavo, vechiti: “Kuti tikareva kuti hwakabva mu gore, unozoti kwetiri, ndizvo amuzivi kutenda ngenyi? Asi kuti tikareva kuti, hwakabva ku vandhu tinotya vandhu; ngokuti vese vanovona Johani inga muprofeti.” Navo vakapingura kuna Jesu, vakati: “Atizivi.” Naye wakati kwavari: “Ininivo andimubvunji kuti ndinoita izvi ngo simba rani.” “Asi munorangarijenyi? Mundhu wayiva no vana vaviri; naye wakaguma kuno wokutanga, akati, ‘Mwana endayi nyamasi ushande mu munda wo mivhini.’ Naye wakapingura, akati, ‘Andidi’, asi ngosure wakatenderuka, akaenda. Naye wakaviya kuno wochipiri, wakavereketa ndizvo-ndizvo. Iye wakapingura, akati, ‘Ndinoenda baba’, asi ngosure, aazivi kuenda. Ndiyani kwaavo vaviri wakayita kuda kwa baba wake?” Vakati: “Uwo wokutanga.” Jesu wakati kwavari: “Ngo zvirokwazvo ndinoti kwomuri kuti vashabisi no mambhombho vanomutangira kunghwina mu Umambo hwa Mwari. Ngokuti Johani wakaviya kwomuri mu njira yo kururama, nemwi amuzivi kumutenda; asi vashabisi no mambhombho vakamutenda. Nemwi apo mwavona izvo amuzivi kutenderuka ngosureni, kuti mugonde kwaari.” “Izwanyi muezaniso umweni: Kwayivapo mune wo nyumba wakatikuti, wakasima munda wo mivhini, wakaushoshera ngorusosa, wakacha po kukamurira vhini mukati mwawo, naye wakavaka shitumba akaupa kuti ungwarihwe ngo varimi, akaenda ku nyika imweni. Naapo nguva yo kuibva kwo michero yokwedera, wakatuma varanda vake ku varimi avo, kuti vaashire michero yake. No varimi avo vakatora varanda vake, vakarova umwe, vakauraya umweni, vakafura umweni ngo mapuwe. Wakatumazve varanda vamweni vakapinda kuwanda kuno avo vokutanga, navo vakayita kwavari ndizvo-ndizvo. Asi pakupejisira wakatuma kwavari mwana wake, echiti: Vanozomureremeja mwana wangu. Asi apo varimi vavona mwana uwo, vakati pachavo: Uwu ndiye unogara ndhaka; viyanyi ngatimuuraye, titore ndhaka yake. Navo vakamubata, vakamubudisa kunja kwo munda wo mivhini, vakamuuraya. Ndizvo apo mambo wo munda wo mivhini oviya, unozoitenyi kuna avo varimi? Wakati kwavari: Unozouraya ngo kuuraya kwakashata, naye unozopa munda uwo wo mivhini kuvarimi vamweni, avo vanozopa kwaari michero ngo mikuvo yayo.” Jesu wakati kwavari: “Amuzivi kutongojija here? Mumatahwa, kuti Buwe iro rakarambwa ngo vavaki, ndiro rakayita soro ro pakhona; ichi chakabva kuna Mambo, nacho chinoshamisa mukuvona kwedu? Ndizvo ndinoti kwomuri, kuti, Umambo hwa Mwari unozovhiswa kwomuri nahwo hunozopuwa kujinja iro rinobereka michero yahwo.” [Naye uwo unozowa panyezuru po buwe iri, unozoputika; asi uwo unozowihwa ndiro, rinozomukwiya kuyita bukuta.] Naapo vapristi vakuru no vafarisi vazwa miezaniso yake, vakaziva kuti unovereketa ndivo. Naapo vakapshaka kuti vamubate, vakatya mbungano ngokuti iyi yaimuvona inga muprofeti. Na Jesu wakavereketazve kwavari ngo miezaniso echiti: “Umambo hwo mu gore hunoezaniswa no mundhu uri mambo, wakaitira mwana wake dhiri ro muchadho. Naye wakatuma varanda vake kudanija avo vakakokwa ku dhiri ro muchadho, navo avazivi kuda kuviya. Wakatumazve varanda vamweni, echiti: ‘Bvunjanyi avo vakakokwa kuti, vonanyi, ndanasirira kuha kwangu; n'ombe jangu no jakanuna jangu jaurawa, nazvo zvese zvanasirihwa; viyanyi ku dhiri ro muchadho.’ Asi avo vakazvirerusa, vakaenda, umweni ku munda wake, no umweni kootengesa kwake. Naavo vakasara vakabata varanda vake, vakavarova, vakavauraya. Naapo mambo azwa izvi, wakatseneka, naye wakatuma hondo jake, akavauraya avo vaurayi, akapisa dhoropa ravo. Naapo wakati ku varanda vake: ‘Dhiri ro muchadho ranasirihwa, asi avo vakakokwa inga vasikasisiri. Ndizvo endanyi pambhararano jo njira, navo vese vomunozovona, mwechivakoka kuti vaviye ku dhiri ro muchadho.’ Naavo varanda vakabuda, vakaenda mu njira, vakaunganija vese avo vo vakandowana, vese vakashata no vakanaka; no dhiri ro muchadho rakazara ngo vaeni. Asi apo mambo naanghwina kuringira vaeni, wakavona mundhu wayinga asikazivi kusimira nguvo yo muchadho. Naye wakati kwaari: ‘Hama, wanghwina muno ngenyi, usina nguvo yo muchadho?’ Asi iye wakanyarara. Naapo mambo wakati ku varanda vake, musungenyi tshoka no nyara, mumukhandire mu chidima chiri kunja, kwoyiteyo kurija mbhere no kukwetsana kwo mazino. Ngokuti vazhinji vanodanijwa, asi vashomani vanotsananguhwa.” Ndizvo vafarisi vakaenda, vakayita bangano rokuti vamuteye mukuvereketa kwake. Navo vakatumira kwaari vajiji vavo pamwepo no vaHerodhiya, vechiti: “Mujijisi, tinoziva kuti iwewe uri wo gwinyiso, unojijisa njira ya Mwari ngo gwinyiso, autundhumaji mundhu; ngokuti auringisi hope yo mundhu. Ndizvo, tibvunjeyi, kuti iwewe unorangarijenyi? Kunotendehwa here kuti tiripe shangu kuna Khesari, nokuti tisaripa?” Asi Jesu echiziva kushata kwavo, wakati: “Munondieja ngenyi, imwimwi vajiitisi?” Nditatijenyi mare yo shangu. Navo vakazisa kwaari chiguhwa cho mare chinozwi dhenariyo. Naye wakati kwavari: “Ngowani uwu mutojaniso no aya matahwa?” Vakati: “Ngo zva Khesari.” Naapo wakati kwavari: “Ndizvo ipanyi kuna Khesari zva Khesari; no kuna Mwari izvo zviri zva Mwari.” Naapo vazwa, vakashamiswa, vakamusiya, vakaenda. Ngo zuva rondhoro, vasadhusi avo vanoti, kuti akuna kumuka kwo vakafa, vakaviya kwaari, vakamubvunjisa, vechiti: “Mujijisi, Mosi wakati, ‘kuti mundhu akafa asina vana, munukuna wake unozorovora mukaji wake kuti amusijire jinja ra nyavanji wake.’ Zvino kwayivapo nesu hama nomwe: No uwo wokutanga, apo warovora, wakafa asina vana, wakasiya mukaji wake kuno munukuna wake. Ngokudarozve no wochipiri, no wochitatu, mbhera kupejisira ngo wochinomwe. No pakugumisira kwavo vese mukaji wakazofavo. Ndizvo mukumuka kwo vakafa, unozoyita mukaji wani, kwavari vanomwe? Ngokuti vese vakamurovora.” Jesu wakapingura, akati kwavari: “Munokangaijwa ngo kutama kuziva matahwa, nokuti simba ra Mwari.” Ngokuti mukumuka kwo vakafa, avarovori, zve avarovohwi, asi vari vakadari ngo ngirosi jiri mu gore. Asi ngo ndava yo kumuka kwo vakafa, amuzivi kutongojija here, icho chakavereketwa kwomuri ndi Mwari, echiti: “ Inini ndiri Mwari wa Abrahama, na Mwari wa Isaka, na Mwari wa Jakobe? Mwari aari Mwari wo vakafa akadi, asi wo vanorarama.” Naapo mbungano yazwa izvi, yakashamiswa ngo kujijisa kwake. Asi apo vafarisi vazwa kuti wayinga anyararisa vasadhusi vakaungana pamwepo. Umwe wavo wayiva mujijisi wo mupango, wakamubvunjisa echimueja, echiti: “Mujijisi, ngowapi mupango mukuru mu Mipango?” Naye wakati kwaari: “Unozomuda Mambo Mwari wako ngo mwoyo wako wese, na ngo mweya wako wese, na ngo mirangariro yako yese. Ichi chiri mupango mukuru no wokutanga. No wochipiri wakadari ngo uwu, Unozomuda muvakihwana wako kudari ngokujida kwako iwewe. Kuno iyi mipango miviri ndipo pano chine ro mipango yese no zvo vaprofeti.” Vafarisi no vakaungana, Jesu wakavabvunjisa, echiti: “Munorangarijenyi ndi Kristu? I mwana wani?” Vakati kwaari: “Mwana wa Dhavhidha.” Wakati kwavari: “Ndizvo ngenyi Dhavhidha, uri mu mweya, unomudanija kuti Mambo, echiti, ‘Mambo wakati kuna Mambo wangu, Gara ngo kumuho kwangu, mbhera ndiite vakorore vako chitambarariro cho tshoka jako?’ Ndizvo, kuti Dhavhidha wakamudanija kuti Mambo, zvino uri mwana wake ngokudini?” Inga kusina mundhu waikona kumupingura no izwi, zve inga kusina mundhu kubvira ngo zuva iro waishinga kumubvunjisa mubvunjo. Naapo Jesu wakavereketa ku mbungano no ku vajiji vake, echiti: “Vatari no vafarisi vanogara pachigaro cha Mosi. Ndizvo zviro zvese zvo vanomupanga, zviitenyi muzvingwarire; asi musayita kudari ngo mishando yavo; ngokuti vanorovejesa kuvereketa vasikazviiti. Ngokuti vanosunga mitwaro inorema no kuidira pa mapfuji ovandhu, asi ivona vambhwine avatendi kuisukumija ngo chikunwe chavo. Asi mishando yavo vese vanoyita kuti vavoneke ngo vandhu; vanopambhamisa mafurakera avo, vechikurisa mipendero yo nguvo javo. Vanoda zvigaro zvo pamberi mu mishongano yo kuha, no zvigaro zvo pamberi mu nyumba jo kudira. No kuchungamijwa pandau jo musika, no kudanijwa ngo vandhu kuti, Rabhi. Asi imwimwi musatenda kudanijwa kuti Rabhi; ngokuti Mujijisi wenyu ndiumwe, neimwimwi mwese muri hama. Musadanija mundhu pikija wakadini mu nyika kuti, baba, ngokuti Baba wenyu ndiumwe, vari mu gore. Zve musadanijwa kuti vajijisi, ngokuti mujijisi wenyu ndiumwe; Kristu. Asi iye uri mukuru pakati penyu unozoyita muranda wenyu. Pikija ndiyani, unozojikurisa iye unozopfaviswa; no uwo unozojipfavisa unozokuriswa.” “Asi ikhombo kwomuri vatari no vafarisi, vajiitisi! Ngokuti munokonyera Umambo hwo mu gore ku vandhu; ngokuti imwimwi amunghwini, zve amutenderi avo vanoda kunghwina kuti vanghwine. Ikhombo kwomuri vatari no vafarisi, vajiitisi, ngokuti munopeja nyumba jo shirikaji, na ngo kujiitisa munoita mikumbiro yakareba, ndizvo munozoashira kutongwa kwakapinda kukura. Ikhombo kwomuri vatari no vafarisi, vajiitisi! Ngokuti munotenderera jombe no nyika kupshaka mujiji umwe, naapo watenderuka, munomuita kakapetwa kaviri kuyita mwana wo Gehena kupinda imwimwi. Ikhombo kwomuri imwimwi vatungamiriri vari mapofu, imwimwi munoti, pikija ndiyani unopika ngo themperi aana ndava; asi uwo unopika ngo mukore wo themperi, unondava! Imwimwi mapenji no mapofu, ngokuti ngochapi chakapinda kukura, mukore, nokuti themperi, iro rinochenesa mukore? Zve munoti, pikija ndiyani unopika ngo altari, aana ndava; asi pikija ndiyani unopika ngo chipo chiri panyezuru payo, uno ndava. Imwimwi mapofu; ngokuti ngochapi chakapinda kukura, chipo nokuti altari iyo inochenesa chipo? Ndizvo uwo unopika ngo altari, unopika ndiyo, na ngo zvese zviri panyezuru payo. No uwo unopika ngo themperi, unopika ndiro, no uwo unogara mukati mwaro. No uwo unopika ngo denga, unopika ngo dendemaro ra Mwari, no uwo unogara panyezuru paro. Ikhombo kwomuri vatari no vafarisi vajiitisi! Munopa chimwe chogumi cheminte no anise, no kumini, nemwi mwaregera kuyita zvakakura zvo mipango, kutonga kwakwo, no nyasha, no kugonda: Kwaisisira kuti muzviite izvi, musikazivi zvimweni zvisikazivi kuitwa. Imwimwi vatungamiriri mapofu, munoshuza mutunga mwomija kamera. Ikhombo kwomuri vatari no vafarisi vajiitisi, ngokuti munosuka kunja kwo mukheyo no kwo ndiro, asi mukati jakazara ngo kuba no ugebenga. Iwewe mufarisi uri bofu, sukayi kutanga mukati mwo mukheyo no mwo ndiro kuti kunja kwajo kusukikevo. Ikhombo kwomuri vatari no vafarisi, vajiitisi! Ngokuti mwakadari ngo makuva akacheneswa, ao ngo gwinyiso anovoneka akanaka ngokunja, asi ngomukati akazara ngo magodo ovakafa, no zvese zvino svina. Ngokudaro nemwi ngokunja munovoneka muri vakarurama kuno vandhu, asi ngomukati mwakazara ngo kujiitisa, no kushata. Ikhombo kwomuri vatari no vafarisi, vajiitisi! Ngokuti imwimwi munovaka makuva o vaprofeti, no kunemesa makuva o vakarurama. Nemwi munoti, kudari taivapo ngo mazuva o majibaba edu, tainga tisikazivi kutenderana navo mukuparaja ngazi yo vaprofeti. Ndizvo munojipupurira kuti imwimwi muri vana veavo vakauraya vaprofeti. Zarisanyi imwimwivo mupimo o majibaba enyu. Imwimwi nyoka, imwimwi mibarihwana wo mavhumbi, mungayita mapokonyokerenyi kubva kwo kutongwa kwo Gehena? Ndizvo, ringiranyi ndinotuma, kwomuri vaprofeti, no vakangwara, no vatari, no vamweni vavo munozovauraya, no kuvakohomera; no vamweni vavo munozovarova mu nyumba jenyu jo kudira, no kuvatambuja kubva ku dhoropa rimwe kuenda kuno rimweni, kuti panyezuru penyu iviye ngazi yese yo vakarurama yakaparajwa mu nyika, kubvira ku ngazi ya Abhera wakarurama, mbhera kuguma kungazi ya Zakariya mwana wa Bharakiya, uwo wo mwakauraya pakati po ruvanje no altari. Ngo zvirokwazvo ndinoti kwomuri kuti izvi zvese zvinozoitika kuno uwu mubarihwana.” “Jerusarema, Jerusarema, iwewe unouraya vaprofeti, wechivafura ngo mapuwe avo vanotumwa kwouri, kuwanda kwakadini kwemikuvo wo ndakada kuunganija vana vako pamwepo, kudari ngo mbhambo inounganija zvitiyo zvayo pasi po mapapiro ayo, nemwi amuzivi kutenda! Vonanyi, nyumba yenyu yasiyiwa kwomuri iri dongo. Ngokuti ndinoti kwomuri, amuchatongozondivoni mbhera munozoti: Unomuchena uwo unoviya ngo zina ra Mambo.” Jesu wakabuda mu themperi oenda; vajiji vake vakaviya kwaari kuti vamupangijire mavakihwo o themperi. Naye wakapingura, akati kwavari: “Amuvoni izvi zvese here? Ngo zvirokwazvo ndinoti kwomuri, arizosiiwi pano buwe panyezuru po buwe rimweni risikazowiswi pasi.” Achagara pa dundhu ro Maorivhe, vajiji vake vakaviya kwaari ari ega, vechiti: “Tibvunjeyi, izvi zvinozoitika rini? Zve ichinyi chinozoyita chivoniso cho kuviya kwako, no cho kugumisira kwo nyika?” Jesu wakapingura, wakati kwavari: “Ngwaranyi kuti musazopaukiswa ngo mundhu. Ngokuti vazhinji vanozoviya ngo zina rangu, vechiti: Inini ndiri Kristu, vanozorashikisa vazhinji. Nemwi munozozwa ngo imbi, no marehwa rehwa oimbi; ngwaranyi kuti musazotya; ngokuti kunosisira kuti izvi zvese zviyitike, asi magumo aasati aguma. Ngokuti jinja rinozomukirana no jinja, no umambo hunozomukirana no umambo; kunozovapo njara, ndhenda no kuzungunyika kwo nyika, kundau jakaparajana. Izvi zvese zviri zvo kuamba kwo matambujiko. Naapo vanozomupira mukutambujwa, navo vanozomuuraya; nemwi munozonyenywa ngo majinja ese ngo ndava yo zina rangu. Naapo vazhinji vanozopsherujwa, vanozopirana umwe no umweni, no kunyenyana. No vaprofeti vazhinji vokunyepa vanozovapo, navo vanozorashikisa vazhinji. Ngokuti kushaisha kunozowanda, rudo hwo vazhinji runozopora. Asi uwo unozoshingirira mbhera ku magumo unozoponeswa. No iri vhangeri ro Umambo rinozochumaihwa mu nyika jese kuyita chapupu ku majinja ese, naapo kupera kunozoguma.” “ Ndizvo apo mwozovona chinyangajo chokuparaja chaakavereketa ndicho Dhanyeri muprofeti, chechiema mundau yakachena, (uwo unojija ngaazwisise). Naapo avo vari mu Judhiya ngavatizire ku matundhu. Naye uri panyezuru po chachungu cho nyumba, asabzuka kutora zviro zviri mu nyumba yake; naye uri mu munda asahwirira sure kootora bhachi rake. Asi ikhombo kwavari avo vano mimba, naavo vano mwisa ngaao mazuva! Asi kumbiranyi kuti kutiza kwenyu kusazoitika ngo nguva yo shipepo, zve nokuti ngo zuva ro sabatha. Ngokuti kunozovepo kutambujika kukuru, ukwo kusikazivi kumboitika kwakadaro kubvira mukuamba kwo nyika mbhera kuguma zvino, zve, akuchatongozoitiki zvakadaro. No kudari mazuva ao asikazivi kufupiswa akuna no mundhu unozorarama; asi ngo ndava yo vakatsananguhwa, ao mazuva anozofupiswa. Ngo uwo mukuvo kuti aripo mundhu unozoti kwomuri: Vonanyi, Kristu aripano, nokuti, apo; musazozvitenda. Ngokuti vanozovapo vakristu vokunyepa, no vaprofeti vokunyepa, navo vanozoyita zvivoniso zvikuru, no mishamiso, kupaukisa, kudari zvechiitika, pikija naavo vakatsananguhwa. Vonanyi ndamungwaja zviri pamberi. Ndizvo kuti vechizoti kwomuri: Vonanyi, uri mu bani, musaendeyo. Vonanyi, uri mukati mwo nyumba; musazotenda. Ngokuti kudari ngo mbheni inobva kumabvazuva, inojekisa mbhera kuguma kumavirira; kunozodarovo no kuviya kwo Mwana wo Mundhu. Ngokuti apo pano muviri yakafa, ndipo po jinoungana ngwanga.” “ Ngokukasira ngosure kwo kutambujika kwo mazuva ao, zuva rinozoita chidima, no mweji auzojeki, no ndhondo jinozowa kubva mu gore, no simba rese ro mu gore rinozozungunyiswa. Naapo kunozovoneka chivoniso cho Mwana wo Mundhu mu gore, no majinja ese onyika anozochema, nao anozomuvona Mwana wo Mundhu echiviya panyezuru po makore o mu gore, unomasimba no uthende hukuru. Naye unozotuma ngirosi jake, ngokurijwa kukuru kwo mbhayapaya, najo jinozounganija vakatsananguhwa vake, kubva ku mbhepo murongomuna, kubva ku magumo amwe o mu gore, mbhera kuguma ku magumo amweni.” “Zvino jijanyi muezaniso ku muti wo mukuyu: Apo davi rawo riri vishi, rechivhikitira masakani, imwimwi munoziva kuti zhienja raaphedo. Ngokudaro imwimwivo, apo mwoovona izvi zvese munozoziva kuti uri phedo, pa musuvo. Ngo zvirokwazvo ndinoti kwomuri, kuti uwu mubarihwana auzopindi mbhera izvi zvese zviyitike. Gore no nyika zvinozopinda, asi mazwi angu aatongozopindi akadi.” “Asi ngo ndava yo zuva iro no nguva iyo akuna naumwe unoziva, pikija ngirosi jo mu gore, nokuti Mwana, kwega Baba. Ngokuti kudari ngo mazuva a Noa, kunozodarozve kuviya kwo Mwana wo Mundhu. Ngokuti kudari ngo mazuva ao pamberi po ndambi, vakaha, vechimwa no kurovora, no kurovoja, mbhera rakaguma zuva iro raakanghwina ndiro Noa mu ngarava. Navo avazivi kuziva mbhera ndambi yakaguma, yakavatora vese, kunozodarozve kuviya kwo Mwana wo Mundhu. Naapo vandhu vaviri vanozovapo mu munda, umwe unozotohwa, no umweni unozosiyiwa. Vanakaji vaviri vanozonga vechikwiya pa gwiyo, umwe unozotohwa no umweni unozosiyiwa. Ndizvo rindanyi; ngokuti amuzivi zuva raanozoviya Mambo wenyu. Asi zivanyi ichi, kuti kudari mune wo nyumba waiziva mukuvo woinoviya ndiwo mbavha, iye waizorinda, asikatendi kuti nyumba yake iphwanyiwe. Ndizvo itanyi vakanasirihwa; ngokuti ngo nguva yo musikakarakaji Mwana wo Mundhu unoviya.” “Ndizvo ndiyani uri muranda unogondeka no wakangwara, uwo Mambo wake wakamuemesa kuyita mutongi panyezuru po nyumba yake, kuti avape kuha kwavo ngo nguva kwayo? Unomuchena muranda uwo apo Mambo wake oviya unozomuwana echiita kudaro. Ngo zvirokwazvo ndinoti kwomuri, kuti unozomuemesa kuti ayite mutongi pamberi po izvo zvese zvaanazvo. Asi kuti uwo muranda wakashata unozoti mu mwoyo mwake. Mambo wangu unononoka kuviya; naye atange kurova varanda avo vari vadoni vake, ahe echimwa pamwepo no zvidhakwa; mambo wo uwo muranda unozoviya ngo zuva raasikaveteri na ngo nguva yaasikazivi; naye unozomutema kuyita zviguhwa, aemese kwaari chikovaniswa chake no vajiitisi, kwoyiteyo kurija mbhere no kukwetsana kwo mazino.” “Zvino Umambo hwo mu gore hunoezaniswa no mbhandwe jiri gumi, ijo jakatora zvibani zvajo, jakabuda kooshongana no mukwambo. Shanu javo jayiva mapenji, no shanu jayiva jakangwara. Ngokuti ijo jayiva mapenji jakatora zvibani zvajo, ajizivi kutora mafuta najo. Asi jakangwara jakatora mafuta mukati mwozvijiyo zvajo, pamwepo no zvibani zvajo. Apo mukwambo wainonoka, jakaozira jese jakavata. Asi pakati po usiku kwakadanijihwa, kuti: Vonanyi, mukwambo! Budanyi kooshongana naye. Naapo mbhandwe jese jakamiruka jakanasirira zvibani zvajo. No mapenji akati kuno jakangwara: ‘Tipenyivo mafuta enyu; ngokuti zvibani zvedu zvinojima.’ Asi jakangwara jakapingura, Azvingadaro ngokuti aazokwani isisu na imwimwi; asi endanyi kuna avo vanotengesa, mujitengere. Asi jechienda kootenga, mukwambo wakaguma; najo jainga jakanasirira jakanghwina naye mu muchadho, no ruvhi rwakakonywa. Ngosure kwazvo kwakagumavo mbhandwe jimweni, jechiti, Mambo, Mambo tibewurire. Asi iye wakapingura, echiti, Ngo zvirokwazvo, ndinoti kwomuri, anditongomuzivi. Ndizvo rindanyi imwimwi ngokuti amuzivi zuva dangani nguva.” Ngokuti kwakadari ngo mundhu wakatikuti echida kuenda ku nyika imweni, wakadanija varanda vake, wakapa kwavari upfumi hwake. No kuna umwe wakapa matarenta mashanu, no kwo umweni wakapa maviri, no kwo umweni rimwe; kuno umwe ngaumwe wavo wakavapa kudari ngokukona kwavo kushandisa, wakaenda hwendo hwake. Paripo uwo wakaashira matarenta mashanu wakaenda, akaaberekesa wakaviihwa ngo mashanu amweni. Ngokudarovo uwo wakaashira maviri, wakaviihwazve ngo maviri. Asi iye wakaashira rimwe, wakaenda, wakatsira mu mavhu wakafisha mare ya mambo wake. Ngosure kwo mukuvo wakareba mambo wo varanda avo wakaviya akaverengerana navo. No uwo wakaashira matarenta mashanu wakaviya, wakaviisa matarenta amweni ari mashanu, echiti, “Mambo, wakandipa matarenta ayiva mashanu, vona, ndakaviihwa ngo amweni matarenta mashanu.” Na mambo wake wakati kwaari: Wakashuma iwewe muranda wakanaka no unogondeka; wakagondeka pamberi po zvishomani, ndinozokuemesa pamberi po zvakawanda; nghwinayi mukudakara kwa mambo wako. Wakaviyavo uwo wakaashira matarenta maviri, akati: “Mambo, wakandipa matarenta maviri; vonayi, ndakaviihwa ngo matarenta amweni maviri.” Mambo wake wakati kwaari, “Wakashuma, muranda wakanaka no unogondeka; iwewe wakagondeka ngo zvishomani, ndinozokuemesa pamberi po zvakawanda: Nghwinayi mukudakara kwa mambo wako. Wakaviyavo uwo wakaashira tarenta rimwe, wakati, Mambo, ndakakuziva iwewe kuti uri mundhu wakapata mwoyo, unokotora po usikazivi kukusha, no kuunganija po usikazivi kuparajira. Neni ndakatya, ndakaenda, ndikafisha tarenta rako mu mavhu, vonayi, hero iro riri rako. Asi Mambo wake wakapingura, akati kwaari, Iwewe muranda wakashata no uno nungo! Waiziva kuti ndinokotora pondisikazivi kukusha, no kuunganija po ndisikazivi kuparajira. Ndizvo kwaisisira kuti udire mare yangu kwavari vo bhangi, kuti mukuviya kwangu ndaizoashirazve yangu no kuviihwa kwayo. Ndizvo toranyi kwaari tarenta, mupe kwaari unomaterenta ari gumi. Ngokuti kwaari unacho unozopuwa, naye unozova no zvakawanda; asi kwouwo usina eya no icho chaanacho chinozobviswa kwaari. Rashanyi muranda uwo usikabeseri chiro, mu chidima chiri kunja. Kunozoiteyo kurija mbhere no kukwetsana kwo mazino.” “Asi apo Mwana wo Mundhu oozoviya mu uthende hwake, no ngirosi jake naye, naapo unozogara panyezuru po dendemaro ro uthende hwake. No pamberi pake anozounganijwa majinja ese, naye unozoaparajanisa rimwe kuno rimweni kudari ngo muhavisi unoparajanisa mabvuta kuno mbuji. Naye unozodira mabvuta ngo kumuho kwake, asi mbuji ngo kuboshwe. Naapo Mambo unozoti kwavari vari ngo kumuho kwake, ‘Viyanyi imwimwi mwakadakajiswa ndi Baba wangu, mugare ndhaka yo Umambo hwakanasirihwa imwimwi kubvira pakusikwa kwo nyika.’ Ngokuti ndayinga ndina njara, nemwi mwakandipa zvokuha, ndayinga ndina nyota, nemwi mwakandipa cho kumwa, ndayinga ndiri mupfumba, nemwi mwakandiashira. Ndayinga ndiri mitu, nemwi mwakandisimija, ndaihwara nemwi mwakandifambira, ndayinga mu guniya nemwi mwakaviya kwendiri. Naapo vanozomupingura vakarurama, vechiti, Mambo, Takakuvona rini unonjara, tikakupa kuha? Nokuti unonyota tikakupa cho kumwa? Takakuvona rini uri mupfumba, tikakuashira? Nokuti uri mitu tikakusimija? Takakuvona rini wechihwara nokuti uri mu guniya, tikaviya kwouri? Na Mambo unozopingura, echiti kwavari, ngozvirokwazvo ndinoti kwomuri, kudari ngo zvomwakaita kuno umwe wo ava vadoko vanukuna vangu, mwakachiita kwendiri. Naapo unozoti kwavari vari ngo kuboshwe kwake: Ibvanyi kwendiri imwimwi mwakatukwa, kuenda mu muriro usikaperi uwo wakanasirihwa Sathani no ngirosi jake. Ngokuti ndayinga no njara, amuzivi kundipa chokuha. Ndayinga ndino nyota, amuzivi kundipa cho kumwa. Ndayinga ndiri mupfumba, amuzivi kundiashira, ndayinga ndiri mitu, amuzivi kundisimija. Ndaihwara, ndayiva mu guniya, amuzivi kundifambira. Naapozve avo navo vanozomupingura, vechiti: Mambo, takakuvona rini unonjara, nokuti unonyota, nokuti uri mupfumba, nokuti uri mitu, nokuti wechihwara, nokuti uri mu guniya, nesu atizivi kukushandira? Naapo iye unozovapingura, echiti: Ngo zvirokwazvo ndinoti kwomuri: Kudari ngo zvomusikazivi kuitira kuno umwe wo ava vadoko vanukuna vangu, amuzivi kuchiitira kwendiri. Naava vanozoenda mu kutambujwa kusikaperi, asi vakarurama mukupona kusikaperi.” Kwakaitika apo Jesu wayinga apeja ese mazwi aya, wakati ku vajiji vake: “Munoziva kuti ngosure kwo mazuva maviri Phasika rinozovapo, no Mwana wo Mundhu unozopihwa kuti akohomehwe.” Naapo vakaungana vapristi vakuru no vakuru vo vandhu, ku ngome yo mupristi mukuru, uwo wayidanijwa kuti Kaifasi. Navo vakayita bangano rokuti vamubate Jesu ngo urimbwi, vamuuraye. Asi vakati: “Haiwa ngo zuva ro mushongano wo kuha, kuti isazovapo hohoho pakati po vandhu.” Naapo Jesu uri mu Bhetani pa nyumba ya Simoni uwo wayiva no mapere, kwakaviya kwaari jimayi rayiva no chimujiyo cho aribhasitera cho mafuta anonuhira ano mutengo mukuru, naro rakaadurura mu musoro mwake, wakagara pakuha. Asi apo vajiji vake vavona, vakarurumwiswa, vechiti: “Kurashanyi uku? Ngokuti aya aizotengeswa ngo mutengo mukuru upuwe ku varombo.” Asi Jesu echiziva, wakati kwavari: “Munoritambujirenyi jimayi? Ngokuti naro rashanda mushando wakanaka kwendiri. Ngokuti munavo varombo nguva jese, asi inini amuneni akadi nguva jese. Ngokuti radurura mafuta anonuhira aya panyezuru po muviri wangu, rayita kunasirira muviri wangu kuvigwa. Ngo zvirokwazvo ndinoti kwomuri, pikija apo po rinozochumaihwa vhangeri mu nyika jese, ichivo cherayita jimayi iri chinozovereketwa ndicho kuyita chicherechejiso kweriri.” Naapo umwe wo gumi na vaviri unozwi Judhasi Isikariyoti wakaenda ku vapristi vakuru. Naye wakati kwavari: “Ichinyi chomunozondipa kuti ndikazomupa kwomuri?” Navo vakamuejanisira zviguhwa zvo sirivha zviri makumi matatu. Kubvira ngo uwo mukuvo iye wakapshaka nguva yokuti amupire. Zvino ngo zuva ro kutanga ro kuha zvimanda zvisina mumera, vajiji vakaviya kuna Jesu, vechiti: “Unoda kuti tinasirire kwapi po kuhira Phasika?” Naye wakati kwavari: “Endanyi mu guta kuno mundhu wakatikuti, mwechiti kwaari: Mujijisi unoti, nguva yangu yaaphedo; ndinozongwarira Phasika ku nyumba yako no vajiji vangu.” No vajiji vakayita kudari ngozvaakavapanga Jesu, navo vakanasirira Phasika. Zvino apo kwayita madekoni, wakagara pakuha no vajiji vari gumi na vaviri. Kwakati vachaha, wakati kwavari: Zvirokwazvo ndinoti kwomuri, umwe wenyu unozondipira. Navo vakatambujika kukuru, vakatanga kuvereketa kwaari, umwe ngaumwe, kuti: “Ndini here, Mambo?” Naye wakapingura, wakati: “Uwo unozoseva ngo nyara yake mundiro neni, ndiye unozondipira.” Mwana wo Mundhu unoenda kudari ngo zvakatahwa ndiye; asi ikhombo kuno uwo mundhu waanozopihwa ndiye Mwana wo Mundhu! Kwaizopinda kunaka kunouwo mundhu kudari asikazivi kubahwa. Na Judhasi uwo wakamupira wakapingura, akati: “Rabhi, ndini here?” Iye wakati kwaari: “Watozvinanga.” Vachaha, Jesu wakatora chimanda, wakachibonga, wakachigura, naye wakachipa kwavari echiti: “Toranyi muhe; ichi chiri muviri wangu.” Wakatora mukheyo, wakaubonga, wakapa kwavari, echiti: “Imwanyi mwese kwouri. Ngokuti iyi iri ngazi yangu yo chitenderano chipsha, inoparajihwa ngo ndava yo vazhinji kuyita kuregerehwa kwo zvishaishi. Asi ndinoti kwomuri, andichazomwi ngosure kwo uku ku michero yo muvhini mbhera zuva ro ndinozorimwazve ibza mu Umambo hwa Baba wangu.” Naapo vayinga vaemba nduyo vakabuda kuenda ku dundhu ro Maorivhe. Naapo Jesu wakati kwavari: Imwimwi mwese munozopsherujiswa ndini usiku huno; ngokuti kwakatahwa, kuti, ndinozorova muhavisi, no mabvuta omushambi anozoparajika. Asi ngosure kwo kumuka kwangu ndinozoenda pamberi penyu mu Garire. Asi Pedru wakapingura, akati kwaari: “Pikija vese vanozopsherujiswa ndiwe, inini anditongozopsheruki.” Jesu wakati kwaari: “Zvirokwazvo, ndinoti kwouri, kuti usiku huno, risati rarira jongwe iwewe unozondiramba katatu.” Pedru wakati kwaari: “Pikija ndechizofa newe, anditongozokurambi.” No vajiji vese vakavereketa kudaro. Naapo Jesu wakaviya navo pandau inozwi Getsemani, wakati ku vajiji vake: “Garanyi pano imwimwi ndinoendeyo kookumbira.” Naye wakatora navo Pedru no vana vaviri va Zebhedhi, naye wakatanga kusururika no kutambujika kukuru. Zvino, wakati kwavari: “Mweya wangu unotambujika kakurutu mbhera kufa; garanyi pano, murinde neni.” Naye wakaenda mberi padodoko, wakawa ngo hope yake, wakakumbira, echiti: “Baba wangu, kudari kungayitika, mukheyo uwu ngaubve kwendiri; asi haiwa kudari ngo kuda kwangu, asi kudari ngo kuda kwako.” Naye wakaviya kuno vajiji vake, wakavawana vakavata, wakati kuna Pedru: “Ndizvo mwakonehwa kurinda neni nguva imwe here? Rindanyi, mwechikumbira kuti musanghwina mukuejwa; mweya ngo gwinyiso unotenda, asi nyama aina simba.” Zve ngo kwochipiri wakaenda, echiti: “Baba wangu, kudari uwu usingakhiriri kunja kwokuti ndiumwe inini, kuda kwako ngakuyitike.” Wakaviyazve wakavawana vakavata, ngokuti majiso avo ayinga achiremehwa. Naye wakavasiazve, akaenda, wakakumbira ngo kwochitatu, echinanga mazwi ndiwo-ndiwo. Naapo wakaviya ku vajiji, wakati kwavari: “Vatanyi zvino, muzorore; vonanyi mukuvo waphedo, no Mwana wo Mundhu unozopihwa mu nyara jo vashaishi. Mukanyi, tiende; vonanyi, uri phedo uwo unondipira.” Achavereketa, vonayi, Judhasi umwe wo gumi na vaviri, wakaviya, nayo mbungano huru vano shoti, no ndonga, vechibva kuvapristi vakuru no vakuru vo vandhu. Zvino uwo wakamupira, wayinga wavapa chivoniso, echiti: “Uwo wo ndinozochungamija ngo muromo ndiye; mubatenyi.” Paripo wakaviya kuna Jesu, wakati: “Chungamijwai, Rabhi.” Naye wakamuchungamija ngo muromo. Jesu wakati kwaari: “Hama, ita icho cho wakafambira kuyita.” Naapo vakaviya vakamubata Jesu ngo nyara javo, vakamusunga. Naapo umwe wo avo vayiva na Jesu, wakatambanuja nyara yake akabvomora shoti yake, wakatema muranda wo mupristi mukuru, akagura njeve yake. Naapo Jesu wakati kwaari: “Hwirija shoti yako mundau mwayo; ngokuti avo vese vanotora shoti vanopera ngo shoti. Aurangariji here kuti ndingakumbira kuna Baba wangu, naye ungatuma zvinopano ngirosi jinopinda hondo jiri gumi na mbiri ngo kuwanda? Asi kuti zvakadaro matahwa angazoita mazarisikirenyi, kuti kunosisira kuti zviyitike kudaro?” Ngo nguva iyo Jesu wakati ku mbungano: “Mwabuda here muno shoti no ndonga kuti mundibate kudari ngo vanorwa no jongoni? Ndakagara nemwi mazuva ese ndechimujijisa mu themperi, nemwi amuzivi kundibata. Asi izvi zvese zvakaitika kuti kuzarisike izvo zvakatahwa ngo vaprofeti.” Naapo vajiji vake vese vakamusiya vakatiza. Naapo vayinga vamubata Jesu vakamukweva kuenda kuna Kaifasi mupristi mukuru, apo povayinga vakaungana vatari no vakuru. Asi Pedru wakamutevera uri ngo ndhambo, mbhera kuguma ku ngome yo mupristi mukuru, naye wakanghwina mukati, wakagara pasi no vajimbahwe kuvona magumo azvo. No vapristi vakuru no magurukota ese vakapshaka chapupu cho kunyepa kumuitira ndava Jesu kuti aurawe. Asi avazivi kuiwana; pikija zvizhinji zvapupu zvokunyepa zvakaviya, asi avazivi kuiwana. Pakugumisira kwakaviya zviviri zvapupu zvokunyepa, avo vakati: “Uwu wakati, ndinosimba ro kupwanya themperi ra Mwari, na ngo mazuva matatu ndinozorivakazve.” No mupristi mukuru wakamiruka, akati kwaari: “Aupinguri chiro here? Ichinyi chovanokupupurira ava kukuitira ndava?” Asi Jesu wakanyarara. No mupristi mukuru wakati kwaari: “Ndinokupikisa ndi Mwari unopona, kuti utibvunje uri Kristu here, Mwana wa Mwari?” Jesu wakati kwaari: “Watonanga; kani hai ndinoti kwomuri, ngosure kwo izvi munozomuvona Mwana wo Mundhu echigara pasi ngo kumuho kwo Unosimba, echiviya uri panyezuru po makore o mu gore.” Naapo mupristi mukuru wakamwesa zvokusimira zvake, echiti: “Wavereketa kutuka; tichada ngenyi zvimweni zvapupu? Vonanyi zvino mwazwa kutuka kwake. Munorangarijenyi imwimwi?” Navo vakapingura, vakati: “Unosisira kufa.” Naapo vakamupfirira muhope mwake, vakamupambhaja, vakamurova ngo ndonga. Vechiti: “Profeta kwetiri, iwewe Kristu, kuti ndiyani wakurova?” Na Pedru wayinga wakagara pasi kunja paruvanje: No musikana wakaviya kwaari echiti: “Iwewevo wayiva na Jesu wo Garire.” Asi iye wakapingura pamberi pavo vese echiti: “Andizivi chounovereketa.” Naapo wabuda kuenda mu berere musikana umwe wakamuvona, wakati kuna avo vayivapo: “Uwu naye wayiva na Jesu wo Nazaretha.” Zve wakaramba ngo kupika mbhiko, kuti: Andimuzivi mundhuwo. Ngosure kwo mukuvo mudoko vakaviya avo vaiema apo, navo vakati kuna Pedru: “Ngo gwinyiso iwewe newe uri umwe wavo, ngokuti kuvereketa kwako kunopangijira kudaro.” Naapo wakatanga kutuka no kupika, kuti: “Anditongomuzivi mundhuwo.” Paripo jongwe rakarira. Na Pedru wakacherecheja izwi ra Jesu, iro raakavereketa kuti: “Risati, rarira jongwe iwewe unozondiramba katatu.” Naye wakabuda kunja wakachema kakurutu. Kwaeja vapristi vakuru vese, no vakuru vo vandhu vakayita bangano ndi Jesu kuti vamuuraye. Naapo vayinga vamusunga, vakamukweva kuenda naye kuna Piratu mutongi. Naapo Judhasi, uwo wakamupira, naavona kuti Jesu wakaitihwa ndava, wakatenderuka, akaviisazve zviguhwa zvo sirivha zviri makumi matatu ku vapristi vakuru, no vakuru, echiti: “Ndakashaisha ngo kupira ngazi isina ndava.” Asi vakati: “Tinenyi nazvo itisu? Izvo ngo zvako.” Naye wakakandira zviguhwa zvo sirivha mu themperi, wakaenda, wakajikaka. No vapristi vakuru vakatora zviguhwa zvo sirivha, vakati: “Akutendehwi kuti tizvidire mubhokisi ro mare yo zvipo, kwechivoneka kuti zviri mutengo wo ngazi.” Vakayita bangano, vakatenga ndizvo munda wo muumbi, kuti vavigemwo vo nyikanja. Ndizvo uwo munda unodanijwa mbhera na nyamasi kuti: Munda wo Ngazi. Naapo kwakazarisika izwi iro rakavereketwa ndi Jeremiya muprofeti, echiti: “Navo vakatora zviguhwa zvo sirivha zviri makumi matatu, mutengo wo uwo wakatendehwana, ngo vamweni vo vana va Israeri navo vakazvipa kutenga munda wo muumbi, kudari ngo zvaakandiemesera Mambo.” Na Jesu wakayima pamberi po mutongi; no mutongi wakamubvunjisa, echiti: “Iwewe uri Mambo wo vaJudha here?” Jesu wakati: “Watozvinanga wega.” Naapo wakaitihwa ndava ngo vapristi vakuru no vakuru aazivi kupingura chiro. Zvino Piratu wakati kwaari: “Auzvizwi here izvo zvakawanda zvo vanokupupurira kukuitira ndava?” Naye aazivi kupingura no izwi, ngokudaro mutongi wakashamiswa kakurutu. Zvino kumushongano wo kuha uwo mutongi waindosunungurira kuno vandhu musungwa umwe, uwo wo vayida. Ngo uwo mukuvo vayiva no musungwa wayiva no mbirikira, waizwi ndi Bharabhasi. Ndizvo apo vakaungana pamwepo, Piratu wakati kwavari: “Munoda kuti ndimusunungurire yani kwomuri, Bharabhasi, nokuti Jesu unozwi Kristu?” Ngokuti iye waiziva kuti yayiva ndava yo ndurumwa yo vakamupira ndiyo. Apo agara pasi pa dendemaro ro kutonga, mukaji wake wakatumira kwaari echiti: “Usava no chiro chounoyita kuno uwo mundhu wakarurama; ngokuti ndatambujwa ngo zvakawanda nyamasi mu kurota ngo ndava yake.” Asi vapristi vakuru no vakuru vakaonga mbungano kuti ikumbire Bharabhasi, no kuuraya Jesu. Mutongi, wakapingura, akati kwaari: “Ndiyani pakati paavo vaviri wo munoda kuti ndimusunungurire?” Navo vakati: “Bharabhasi.” Piratu wakati kwavari: “Ndizvo ndinozoitenyi ndi Jesu, uwo unozwi Kristu?” Vese vakati: “Ngaakohomehwe.” Naye wakati: “Ngenyi? Kushata kwakadini kwaakayita?” Asi avo vakapinda kudanijira, kuti: “Ngaakohomehwe.” Naapo Piratu wavona kuti asayikona kubesera chiro, asi kwega kuti hohoho yayimuswa, wakatora kumwa, akashamba nyara jake pamberi po mbungano, echiti: “Inini andina ndava yo ngazi yo uwu mundhu: Jivonerenyi icho imwimwi.” No vandhu vese vakapingura, vakati: “Ngazi yake ngaive panyezuru pedu, no panyezuru po vana vedu.” Naapo wakavasunungurira Bharabhasi; naapo wayinga arova Jesu wakamupira kuti akohomehwe. Naapo masocha omutongi akatora Jesu kuenda naye mubanje ro kutongera, akaunganija kwaari chikwata chese cho masocha. Nao akamuvhurira, akamufukija nguvo yakapshuka. Naapo varuka junguja ro minzwa, vakaridira mu musoro mwake, no rutsanga mu nyara yake yo kumuho; navo vakagwadama pasi pamberi pake, vakamuyitira jee, vechiti: “Tinomuchungamija, Mambo wo vaJudha!” Navo vakumupfirira mata, vakatora njanga vakamurova musoro. Naapo vayinga vamuyitira jee, vakamuvhurira nguvo, vakamusimija zvokufuka zvake, navo vakamukweva koomukohomera. Naapo vabuda kunja, vakavona mundhu wo Kureni, zina rake raizwi Simoni; uwo wo vakavangijira kuti atware muchinjiko wake. Naapo vaguma ku ndau inozwi Gorogota, ukwo kunoti: Ndau yo Dendhenya, vakamupa vhini rakavhenganiswa no chanduru kuti arimwe; kwakati wariravira wakaramba kurimwa. Naapo vayinga vamukohomera, vakakovanisana zvokufuka zvake, voringijira hakata. Navo vakagara pasi, vechimurinda apo. Navo vakadira panyezuru po musoro wake mazwi ondava yake, yakatahwa kuti: “UWU NDI JESU, MAMBO WO VAJUDHA.” Naapo kwakakohomehwa naye majongoni maviri, rimwe ngo kumuho, no rimweni ngo kuboshwe. Navo vaipinda ngepo vaimutuka vechidungwaira musoro yavo, vechiti: “Iwewe unopwanya themperi, no kurivaka ngo mazuva matatu, jiponese; kudari uri Mwana wa Mwari bzukayi pa muchinjikopo.” Ngokudarovo vapristi vakuru vakamuyitira jee, pamwepo no vatari no vakuru, no vafarisi vechiti: “Iye wakaponesa vamweni, asi aangajiponesi. Kuti uri Mambo wa Israeri, ngaabzuke pasi zvino pa muchinjiko, nesu tinozomutenda. Iye wakagonda kuna Mwari, ngaachimununure zvino, kuti echimuda; ngokuti wakati: Inini ndiri Mwana wa Mwari.” No majongoni ao akakohomehwa naye akamutukavo zvimwezvo. Zvino kubvira nguva yochitandhatu chaivapo chidima mu nyika yese mbhera kuguma nguva yo chipfumbamwe. Kunonga nguva yo chipfumbamwe Jesu wakadanijira ngo izwi guru, echiti: “Eloi, Eloi, Lama Sabakatani?” Ukwo kunoti, “Mwari wangu, Mwari wangu, wandisiya ngenyi?” Vamweni avo vaiyima apo vazwa, vakati: “Uwu unodanija Erija.” Paripo umwe wavo wakagogoma wakatora shiponji, wochibija muvhini rinoshasha, wakaridira ngo pa rutsanga, wakamuashija kuti amwe. Asi vamweni vakati: “Muregerei, ngativone kuti Erija unoviya here kumuponesa.” Naapo Jesu wadanijirazve ngo izwi guru, wakafa. Vonanyi, jira ro themperi rakaparuka kuyita maviri, kubvira ngo nyezuru mbhera kuguma pasi; no nyika yakazungunyika, no mapuwe akapwanyika. No makuva akabewuhwa, no miviri mizhinji yo vakafa vakarurama vakamuswa. Navo vakabuda ku makuva ngosure kwo kumuka kwake, vakanghwina mu dhoropa rakachena, vakavoneka ngo vazhinji. Zvino apo nduna yo zana, naavo vayiva nayo, vachirinda Jesu, vavona kuzungunyika kwo nyika, no izvo zvakaitika, vakatya kukuru, vechiti: “Ngo gwinyiso, uwu wayiva Mwana wa Mwari.” Kwayivapo majimayi mazhinji vairingira vari ndhambo, avo vayinga vakamutevera Jesu kubva Garire, vechimushandira. Pakati pavo payivapo Mariya Magadhareni, na Mariya mayi wa Jakobe na Josefa, na mayi wo vana va Zebhedhi. Kwooyita madekoni kwakaviya mukhupuki wo Arimatiya zina rake raizwi Josefa, uwo naye wayiva mujiji wa Jesu: Uwo wakaenda kuna Piratu, wakapota kupuwa muviri wa Jesu. Naapo Piratu wakapanga kuti aupuwe. Naapo Josefa wayinga atora muviri uwo, wakaupukutira ngo jira rakachena. Naye wakaudira muiba ibza rayiva rake, iro rayinga raakacha pa buwe: Naye wakamburumbujira buwe guru pa musuvo wo guva, wakaenda. Kwayivapo Mariya Magadhareni na Mariya umweni vechigara ngo pamberi po guva. No chimangwanani ngosure kwo zuva ro kunasirira Phasika, vapristi vakuru, no vafarisi vakaungana kuna Piratu, vechiti: “Changamire, tinocherecheja kuti uwo muchengeji wakati, achapona, ngosure kwo mazuva matatu, ndinozomukazve. Ndizvo panga kuti guva rigwinyisiswe mbhera kuguma zuva rechitatu, kuti vachazoviya vajiji vake usiku, vamube, no kuzobvunja kuno vandhu kuti: Wakamuka kwo vakafa; ngokudaro kuchengeja kwo kugumisira kungapinda kushata kuno ukwo kwo kutanga.” Piratu wakati kwavari: “Imwimwi munavo varindi; endanyi mwechirigwinyisisa kudari ngo zvomunokona.” Ndizvo vakaenda, vakarigwinyisisa guva, vechinamira chinamiro pa buwe, varindi varipo navo. Ngosure kwo sabatha, mu mambakweja ngo zuva ro kutanga ro vhiki kwakaviya Mariya Magadhareni, no umweni Mariya koovona guva. Vonayi, kwayinga kuriyo kuzungunyika kukuru kwo nyika; ngokuti ngirosi ya Mambo yakabzuka kubva mu gore, yakaviya yakamburumbuja ikabvisa buwe, nayo yakagara panyezuru paro. Kuvoneka kwayo kwayinga kwakadari ngo mbheni, no nguvo jayo jayinga jakachena kudari ngo chando. Ngokuyitya varindi vakahuta, vakayita inga vakafa. No ngirosi yakati kumajimayi: “Musatya imwimwi; ngokuti ndinoziva kuti munopshaka Jesu uwo wakakohomehwa. Aaripi pano akadi; ngokuti wamuka, kudari ngo zvaakavereketa. Viyanyi muvone pandau paayinga akavata. Kasiranyi muende mubvunje vajiji vake, kuti, wamuka kwo vakafa, vonanyi unotungamira kuenda mu Garire.” Navo vakaenda ngokukasira vechibva pa guva, vechitya no kudakara kukuru; vakagogoma koozivisa vajiji vake. Vonayi, Jesu wakasongana navo, akati: “Ndinomuchungamija.” Navo vakaviya vakabata tshoka jake, vakamudira. Naapo Jesu wakati kwavari: “Musatya; endanyi mwoobvunja vanukuna vangu kuti vaende mu Garire, vanozondivona apo.” Zvino vachaenda, vonayi vamweni vo varindi vakaviya ku dhoropa, vakasumurira vapristi vakuru vese izvo zvakaitika. Naapo vakaungana pamwepo no vakuru, apo vayinga vapangana, vakapa mare yakawanda kumasocha, vechiti: “Nanganyi imwimwi kuti vajiji vake vakaviya no usiku vakamuba, takavata. No kudari izvi zvikazwika ngo mutongi, tinozomuvhikira nokuita kuti musava no ndava.” Navo vakaashira mare iyo, vakayita kudari ngo zvovakapangwa, no izwi iri rakaparajwa pakati po vaJudha mbhera na nyamasi. No vajiji vari gumi naumwe vakaenda mu Garire, ku dundhu iro raakavapanga Jesu. Naapo vamuvona vakamudira; asi vamweni vakagononda. Na Jesu wakaviya kwavari, wakavereketa, echiti: “Simba rese rakapuwa kwendiri mu gore, no mu nyika. Ndizvo, endanyi, mwechiita vajiji ku majinja ese, mwechivabhapatisa ngo zina ra Baba, noro Mwana, noro Mweya Wakachena. Mwechivajijisa kungwarira zviro zvese zvo ndakamupanga; vonanyi, ndinemwi mazuva ese mbhera kuguma kwo nyika.” Kutanga kwo vhangeri ra Jesu Kristu, Mwana wa Mwari. Kudari ngo zvakatahwa mu tshamba ya Isaya muprofeti: “Ringiranyi, ndinotuma mutumwa wangu pamberi po hope yako, uwo unozonasirira njira yako. Izwi ro unodanijira mu bani, kuti: Nasiriranyi njira ya Mambo, rungamisanyi makwanja ake.” Wakaviya Johani uwo waibhapatisa mu bani, echichumaira rubhapatiso rwo kwo kuregerehwa zvishaishi. Vakabuda kuenda kwaari vo nyika yese yo Judhiya, navo vese vo Jerusarema; navo vakabhapatiswa ndiye mu murambo wo Jordhani, vechitenda zvishaishi zvavo. Na Johani wayinga wakasimira nguvo jo mamviri wo kamera uno bhande ro dovo muchiunu chake, naye waiha ndongwe no uchi hwo mushango. Naye waichumaira, echiti: “Iye unoviya uri sure kwangu uno simba kupinda inini, andisisiri kuti ndikotame ndisunungure rusinga rwo magwada ake. Inini ndakamubhapatisa ngo kumwa; asi iye unozomubhapatisa ngo Mweya Wakachena.” Kwakaitika ngo mazuva ao, kuti Jesu wakabva Nazaretha ro Garire, akabhapatiswa ndi Johani mu Jordhani. Paripo naabuda kubva mu kumwa wakavona denga rakabewuka, no Mweya wakadari ngo njiva uchibzuka panyezuru pake. No izwi rechibva mu gore, rechiti: “Iwewe uri Mwana wangu unodikana, uwo wondinonasa kudakara ndiye.” Paripo Mweya wakamundundira mu bani. Wakagaremwo mu bani mazuva ari makumi marongomuna, echiejwa ndi Sathani, naye wayiva pamwepo no zvikara, no ngirosi jakamushandira. Ngosure kwo kusungwa kwa Johani, Jesu wakaviya mu Garire echichumaira vhangeri ra Mwari, echiti: “Nguva yaguma no Umambo hwa Mwari hwa phedo. Tenderukanyi mutende vhangeri.” Achipinda ngo mumbhiripiri mwo jombe ro Garire, wakavona Simoni no munukuna wake Andreu vechikandira juya mu jombe; ngokuti vayiva vatandi vo hove. Jesu wakati kwavari: “Nditeverenyi, neni ndinozomuita vatandi vo vandhu.” Paripo vakasiya majuya avo vakamutevera. Echienda mberi padoko wakavona Jakobe mwana wa Zebhedhi, na Johani munukuna wake, vayiva mungarava vechisonera majuya avo. Paripo wakavadanija. Vakasiya baba wavo Zebhedhi no varanda vari mungarava, navo vakamutevera. Vakafamba kuenda mu Kaperanaume; paripo ngo zuva ro sabatha wakanghwina mu nyumba yo kudira, wakajijisa. Vakashamiswa ngo kujijisa kwake; ngokuti wakavajijisa kudari ngo uno simba echikaiti kudari ngo vatari. Paripo wayivapo mundhu mu nyumba yo kudira wayiva no mweya yakashata; naye wakadanijira echiti: “Tinenyi isisu newe, iwewe Jesu wo Nazaretha? Waviya kwotiparaja here? Ndinokuziva kuti uriyani, uri Wakachena wa Mwari.” Jesu wakamuthusa, echiti: “Nyarara, buda kubva kwaari.” No mweya wakashata wakamusukumija, ukamima ngo izwi guru, ukabuda kubva kwaari. Navo vese vakashamiswa, kwokuti vakabvunjisana vechiti: “Ichinyi ichi? Kujijisa kupsha here? Ngo simba unopanga nokuti pikija mweya yakashata, nayo inomupurukira.” Paripo mbiri yake yakaparajika ku nyika jese jakatendeneja Garire. Naabuda kubva mu nyumba yo kudira, wakaenda ku nyumba ya Simoni na Andreu, na Jakobe, na Johani. Vambiya va Simoni vayinga vakavata vechihwara ngo kupisa muviri; paripo vakamubvunja ngo ndava yavo. Naye wakaviya kwavari wakavabata ngo nyara, wakavamusa; no kupisa muviri kwakapera, navo vakavashandira. Kwooita madekoni, zuva rabira vakazisa kwaari vese vaihwara, no vayinga no mabzoka. No vo dhoropa rese vakaungana pamusuvo. Naye wakaponesa vazhinji vaihwara ngo ndhenda jakaparajana, wakambirimbija mabzoka mazhinji; asikatenderi kuti mabzoka averekete, ngokuti ayimuziva. No mangwanani mavishi kuchakasvipa wakamuka, wakabuda, wakaenda ku bani, kwookumbira. Simoni naavo vayiva naye vakamutevera; vakamuvona, vakati kwaari: “Vese vanokupshaka.” Wakati kwavari: “Ngatiende ku ndau jimweni, kuti ndichumairezve iyo; ngokuti ngo zvondakaviira.” Wakafamba echichumaira mu nyumba javo jo kudira, mu Garire mwese, echimbirimbija mabzoka. Wakaviya kwaari mundhu wayiva no mapere, echimupota, echimugwadamira, echiti kwaari: “Kudari wechida ungandiponesa.” Naye wakamuzwira urombo, wakatambanuja nyara yake, wakamupshasa, wakati kwaari: “Ndinoda; poneswai.” Paripo mapere akabva kwaari, naye wakaponeswa. Wakamupangisisa, akamuendesa paripo, wakati kwaari: “Ngwarayi kuti uchazobvunja mundhu ngo izvi: Asi endayi kwojitatija kuno mupristi, upekeje ngo ndava yo kuponeswa kwako izvo zvaakaemesa Mosi, kuyita chapupu kwavari.” Asi iye wakabuda, wakatanga kuchumayira kakurutu no kuvereketa ngo izvi kwokuti Jesu inga echikakonizve kunghwina mu dhoropa pambhene, asi wayiva kunja mu bani; navo vakaviya kwaari kubva kumativi ese. Naapo ayinga wanghwinazve mu Kaperanaume, ngosure kwo mazuva akatikuti, kwakazika kuti ari mu nyumba. Vazhinji vakaungana pamwepo, kwokuti pakatamika no ndau pikija no pamusuvo, naye wakachumaira izwi kwavari. Navo vakaguma kwaari vaitwara mundhu waioma divi ro muviri akatwahwa ngo varongomuna. Vechikonehwa kukwedera kwaari ngo ndava yo mbungano, vakabweshura denga ngo paayivapo, naapo wakabewura, vakabzusa musengere panyezuru pawo payivata uwo waihwara ngo kuoma muviri. Jesu naavona kutenda kwavo, wakati kuno uwo waihwara ngo kuoma muviri: “Mwana, zvishaishi zvako zvaregerehwa.” Asi vayiapo vatari vakatikuti vakagara, vechijibvunjisa mu mwoyo yavo: Kuti, uwu unovereketa kudari ngenyi? Unotuka Mwari, ndiyani unokona kuregerera mundhu zvishaishi, asi Mwari ega? Paripo Jesu echiziva mu mweya mwake kuti vaijibvunjisa zvakadaro mukati mwavo, wakati kwavari: “Munojibvunjisa ngenyi izvi mu mwoyo mwenyu? Ichinyi chakapinda kureruka, kunanga kuno uwo unohwara ngo kuoma muviri kuti: Zvishaishi zvako zvaregerehwa; nokuti, kunanga kuti: Mukayi, utore mandhi ako, ufambe? Asi kuti muzive kuti Mwana wo Mundhu uno simba mu nyika ro kuregerera zvishaishi, wakati kuno uwo unohwara ngo kuoma muviri, ndinoti kwouri, Mukayi, utore mandhi ako uende ku nyumba yako.” Naye wakamuka, paripo akatora mandhi ake, akabuda kunja pamberi pavo vese; kwokuti, vese vakashamiswa kakurutu, vakamuirikija Mwari, vechiti: “Atito tavona zvakadari.” Naye wakabuda kuendazve ku jombe; mbungano yese yakaviya kwaari, naye wakaijijisa. Achipinda wakavona Revhi mwana wa Arifeu wakagara panoshabiswa, naye wakati kwaari: “Nditevere. Naye wakamuka, wakamutevera.” Kwakaitika kuti apo wakagara pakuha mu nyumba mwake, vashabisi no vashaishi vazhinji vakagara pasi na Jesu no vajiji vake; ngokuti vayiva vazhinji, naavo vaimutevera. Vatari no vafarisi novavona kuti waiha no vashaishi no vashabisi vakati kuno vajiji vake: “Ngenyi unoha no kumwa navo vashabisi no vashaishi?” Naapo Jesu azwa, wakati kwavari: “Asipi vakavanga vanoda murapi, asi avo vanohwara, andizivi kuviya kudanija vandhu vakarurama, asi vashaishi.” Vajiji va Johani no vafarisi vayinga vechiera kuha; navo vakaviya vakati kwaari: “Ngenyi vajiji va Johani no vafarisi vanoera kuha asi vajiji vako avaeri?” Jesu wakati kwavari: “Vana vanyamurovohwa vanoera here kuha mukwambo echinavo? Mukuvo wovanaye mukwambo avazoeri kuha. Asi mazuva anozoviya apo mukwambo unozobviswa kubva kwavari, naapo vanozoera kuha ngao mazuva. Apana mundhu unosonera chiremo chipsha panyezuru po nguvo yakasakara; kuti zvakadaro ichi chipsha chakasonehwa apo chinozomwesa jira rakasakara, rinozomweka kwakapinda kushata kunozoitika. Akuna mundhu unodira vhini ibza munyede jo vhini jakasakara; kuti zvakadaro, vhini rinoputisa nyede, no vhini rinozorashika, pamwepo no nyede; asi vhini ibza rinodihwa munyede ipsha.” Kwakaitika ngo zuva ro sabatha, apo echipinda ngo mu munda wo koroni kuti vajiji vake vakatanga kupurura musoso vechifamba. Vafarisi vakati kwaari: “Ringira, vanoyita ngenyi ngo zuva ro sabatha icho chisikatendehwi?” Wakati kwavari: “Amuzivi kutongojija here icho chaakaita Dhavhidha, apo waitama, wayiva no njara, iye naavo vayiva naye? Kuti wakanghwina mu nyumba ya Mwari ngo mazuva a Abhiyatari mupristi mukuru, wakaha zvimanda, izvo zvisikatendehwi kuhiwa, asi ngo vapristi vega, akazvipazve kwavari avo vayiva naye? Wakati kwavari: sabatha rakaitihwa mundhu, mundhu, aavazivi kuitihwa sabatha. Ndizvo Mwana wo Mundhu ndi mambo wo sabatha.” Wakanghwinazve mu nyumba yo kudira; kwayivapo mundhu wayiva no nyara yakaoma. Navo vakamuringisisa kuvona kuti angazomurapa here ngo zuva ro sabatha, kuti vamuparise ndava. Naye wakati kuno mundhu uwo wayiva no nyara yakaoma: “Mukayi, uime pakati.” Wakati kwavari: “Ichinyi chinotendehwa ngo sabatha, kuyita zvakanaka nokuti kuyita zvakashata? Kuponesa nokuti kuuraya?” Asi vakanyarara. Naapo ayinga avaringisisa ngo ushungu, echihwajihwa ngo kuchunga kwo mwoyo yavo, wakati ku mundhuwo: “Tambanuja nyara yako.” Naye wakatambanuja, no nyara yake yakarapika. Vafarisi vakabuda, paripo vakapangana no vo kwa Herodhi kuti vangamuita maurairenyi. Na Jesu wakabvapo no vajiji vake, wakaenda ku jombe, no mbungano huru yakabva Garire no yo Judhiya yakamutevera; no yo Jerusarema, no yo Idhumiya, no yo mwombera mwo Jordhani, no vanotendeneja Tire no Sidhoni, mbungano huru yechizwa ngo zviro zvikuru zvaakaita, yakazara kwaari. Naye wakabvunja ku vajiji vake, kuti vamupshakire ngarava doko ngo ndava yo mbungano, kuti isazomutsikinija, ngokuti wayinga wakarapa vazhinji; kwokuti vese avo vayiva no ndhenda vaindundana kuti vamupshase. No mweya ino svina apo yamuvona, yakawa pamberi pake, ikamima yechiti: “Iwewe uri Mwana wa Mwari.” Naye wakainyaraja kakurutu kuti isazoita kuti azivike. Wakakwira pa dundhu, wakadanija kwaari avo vaakasana, navo vakaviya kwaari. Wakaemesa vari gumi na vaviri kuti vagare naye, nokuti, avatume kuenda koochumaira. Wakavapa simba ro kumbirimbija mabzoka. Wakaduja Simoni kuti Pedru; wakaduja Jakobe mwana wa Zebhedhi na Johani munukuna wa Jakobe kuti Boanergesi, zvinonanga kuti: Vana vo mbheni. Andreu, na Firipi, na Bhartoromeu, na Mateu, na Tomasi, na Jakobe mwana wa Arifeu, na Tadheu, na Simoni muKenani, na Judhasi Isikariyoti, uwo wakamupira. Naye wakanghwina mu nyumba. No mbungano yakaunganazve kwokuti vakakonehwa no kuha zvimanda. Naapo hama jake jazwa jakabuda kuviya koomubata; ngokuti vakati: Unohahamuka. No vatari, avo vakabzuka kubva Jerusarema, vakati: “Uno Bheezebhuri, na ngo simba ro muzvare wo mabzoka unombirimbija mabzoka.” Naye wakavadanija, wakavereketa kwavari, ngo muezaniso wakati: “Sathani ungaita mambirimbijirenyi Sathani? No kudari umambo hwechijiparaja ngo kwahwo, uhwo umambo ahungakoni kuyima. No kudari ukama ukajiparaja ngokwawo, ukama uwo aungakoni kuyima. No kudari Sathani echijimukira, echijiparaja, aangakoni kuyima, asi unozopera. Asi apana mundhu angakona kunghwina mu nyumba yo uwo uno simba, no kuba mujiyo jake, kuti asikazivi kutanga kusunga uwo uno simba; naapo unozoparaja nyumba yake. Zvirokwazvo ndinoti kwomuri, kuti, zvishaishi zvese, no kutuka kwese kwovanozotuka ndikwo, zvinozoregerehwa ku vandhu. Asi pikija ndiyani unozotuka Mweya Wakachena, aazoregerehwi asi uno ndava yo chishaishi cho mbhera narini.” Ngokuti ivo vakati: “Uno mweya une svina.” Kwakaviya mayi wake no hama jake, vakayima ngo kunja, vakatumira kwaari kumudanija. No mbungano yayinga yakagara naye, yakati kwaari: “Vonayi mayi wako no vanukuna vako no hanzvaji jako vari kunja vanokupshaka.” Naye wakapingura kwavari, akati: “Ndiyani mayi wangu, no hama jangu?” Echiringira kuno avo vayinga vakamutendeneja, wakati: “Vonanyi mayi wangu no vanukuna vangu. Ngokuti ndiyani unozoyita kuda kwa Mwari uwo ndiye munukuna wangu, no hanzvaji yangu, na mayi wangu.” Wakatanga kujijisazve ari mumbhiripiri mwo jombe. No mbungano huru yakaungana kwaari, ngokudarokwo wakanghwina mu ngarava, wakagara mu jombe; mbungano yese yaiva mumbhiripiri phedo no jombe. Wakavajijisa zvakawanda ngo miezaniso, wakati kwavari mukujijisa kwake: “Purukiranyi; kwakabuda mukushi kookusha. Kwakaitika mukukusha kwake kuti jimweni mbewu jakawa panjira, no shiri jakaviya, jakajiha. No jimweni jakawa pandau ino mapuwe apo payinga pasina mavhu akawanda; paripo jakamera ngo kukasira, ngokuti inga pasina mavhu mazhinji. Kwakati zuva rakabuda jakapsha ngokuti inga jisina miji; jakaoma. No jimweni jakawa pakati po minzwa no minzwa yakakura, yakajipshinya, najo ajizivi kubereka michero. No jimweni jakawa pamavhu akanaka, jakabereka michero, jechikura, jechiwanda, jakabereka jimweni makumi matatu, jimweni makumi matandhatu, jimweni zana.” Naye wakati: “iye uno njeve jo kuzwa ngaazwe.” Naapo ari ega, no vajiji gumi na vaviri naavo vayiva naye vakamubvunjisa ngo ndava yo muezaniso. Wakati kwavari: “Kwakapuwa kwomuri, kuzwisisa zvakafishika zvo Umambo hwa Mwari, asi kwavari avo vari kunja zvese zvinoitwa ngo muezaniso, kuti, vechivona vangavona vasikavonesesi; vechizwa vangazwa, vasikazwisisi, kuti pamweni vangatenderuka, no kushaisha kuregerehwe kwavari.” Wakati kwavari: “Amuzivi uwu muezaniso here? Munozoyita mazivirenyi miezaniso yese? Mukushi unokusha izwi. Ava ndivo vakawa mu njira; apo izwi rakushwa naapo vazwa, paripo unoviya Sathani unobvisa izwi iro rakushwa mukati mwavo. Ava ngokudaro vakakushwa pa mapuwe; apo vazwa izwi, paripo vanoriashira ngo kudakara; navo avana miji mukati mwavo, asi vanovangirira nguva doko; asi apo kwaguma kutambujwa nokuti kuteverehwa ngo ndava yo izwi, paripo vanopsheruka. Naavo vakakushwa pakati po minzwa; ndivo vanozwa izwi, no kudembatemba kuri mu nyika, no kuchengejwa ngo upfumi, no kuemura kwo zviro zvimweni, zvechinghwina zvinopshinya izwi, naro aribereki michero. Naavo vakakushwa pa mavhu akanaka ndivo vanorizwa izwi, vanoriashira, vanobereka michero, vamweni makumi matatu, vamweni makumi matandhatu, no vamweni zana.” Naye wakati kwavari: “Chibani chinoziswa here kuti chidihwe pasi po chitengu, nokuti pasi po mubhedhi, chisikadihwi here paukwiriri hwacho? Ngokuti apana chiro chakafishika chisikazotatijwi pambene, apanazve chiro chakafindara chisikazobudiswi pa kujeka. Uwo uno njeve jo kuzwa ngaazwe.” Naye wakati kwavari: “Ngwariranyi izvo zvo munozwa. Ngo mupimo wo munopima ndiwo vamweni, munozopimwavo ndiwona, nawo unozoengejehwa kwomuri. Ngokuti kwaari unacho, kunozopuwa kwaari; no kwaari usina, no chaatori nacho chinozobviswa kwaari.” Naye wakati: “Umambo hwa Mwari hwakadari ngo mundhu unokusha mbewu mu mavhu; naye unovata no kumuka usiku no masikati, no mbewu jinomera jechikura, iye asikazivi njira yo jinomera ndiyo. Mavhu anojibudisira michero ngokwao, kutanga muningwi, kwotevera mutsonzoti, ngosure mbewu inoibva pa mutsonzoti. Naapo mbewu yaibva paripo unotuma vano sikeya, ngokuti kukotora kwaguma.” Wakati: “Tinozouezanisa nenyi Umambo hwa Mwari? Nokuti ngowapi muezaniso wo tingauezanisa ndiwo? Hwakadari ngo mbhumba yo mustadhi iyo apo yakushwa mu mavhu iri doko kupinda jese mbewu jakasimwa mu nyika; asi apo yakushwa inomera yoita huru kupinda mapfiba ese, inobudisa matavi makuru; kwokuti shiri jese jo mu gore jinovaka zvishaki zvajo pasi po mumvuri wayo.” Ngo miezaniso yakawanda kudaro wakavereketa izwi kwavari; kudari ngo zvo vaikona kuzwisisa. Aazivi kuvereketa kwavari pasina muezaniso; asi ari ega no vajiji vake, wakavadurujira zvese. Ngo iro zuva, apo kwayita madekonyi, wakati kwavari: “Ngatiambuke mwombera.” Vakasiya mbungano, vakaenda naye wakadaro naari mu ngarava. No ngarava jimweni jaivepo naye. Kwakaita bepo guru no mavimbi akadarika echinghwina mu ngarava, kwokuti inga woda kuzaja ngarava. Asi iye wayiva ngosure mu ngarava wakavata pa mutsamiro. Navo vakamumusa, vakati kwaari: “Mujijisi, aukanuki here kuti tinofa?” Naye wakamuka wakathusa bepo, wakati kuno jombe: “Nyarara kuti chowe.” No bepo rakanyarara, kwakavepo kunyarara kukuru. Wakati kwavari: “Munotya ngenyi? Amusati mwaano kugonda here?” Navo vakatya kakurutu, vakati umwe kuno umweni: “Ndizvo uwu ndiyani, kuti bepo no jombe zvinomupurukira?” Vakaguma mwombera mwo jombe mu nyika yo Magadhara. Apo naabuda kubva mu ngarava, paripo mundhu uno mweya wakashata wakasongana naye, echibva mu makuva. Uwo waigara mu makuva; kwayinga kusina mundhu waikona kumusunga pikija ngo magaragajero; ngokuti kazhinji wakambosungwa ngo magaragajero no matanda, no magaragajero ayinga akadajuhwa ndiye, no matanda akamboguhwa: Inga kusina mundhu waikona kumunyisa. Ngo nguva jese masikati no usiku waigara mu makuva no mu matundhu echirija mbhere echijicheka ngo mapuwe. Naye avona Jesu achirindhambo, wakagogoma kwaari, wakamudira; naye echimima ngo izwi guru, wakati: “Ndinenyi newe, Jesu Mwana wa Mwari Uri panyezuru po zvese? Ndinokuphikisa ndi Mwari kuti usanditambuja.” Ngokuti iye wayinga ati kwaari: “Buda, iwewe mweya wakashata kubva ku mundhuwo.” Jesu wakamubvunjisa kuti: “zina rako ndiyani?” Nawo wakapingura kwaari: “Ndini Hondo zina rangu, ngokuti tiri vakawanda.” Nawo wakamupota kakurutu kuti asazoiendesa kubva kuno iyo nyika. Zvino kwayivapo pa dundhu mushambi mukuru wo nguruve jechihava. Nayo yakamupota, yechiti: “Titumei munguruve kuti tinghwine kwojiri.” Naye wakaitendera. No mweya ino svina yakabuda ikanghwina munguruve, no mushambi wese wakagogoma kubzuka ngo pa gomokomo jo nghwina mu jombe, jinonga jayiva zviuru zviviri (2.000), najo jakamwa mahoto mu jombe. Vahavisi vajo vakatiza, vakazivisa mu dhoropa no mundharaunda, no vandhu vakaviya koovona kuti ichinyi chakaitika. Vakaviya kuna Jesu, vakamuvona uwo wayiva no mabzoka wakagara, naakasimira, waamundhu kwaye, uwo wayiva no hondo; navo vakatya. Naapo vakazvivona, vakapanangija izvo zvakaitika kwaari uwo wayiva no mabzoka, no ndava yo nguruve. Vakatanga kumupota kuti abve mu mutundhu wavo. Naapo echipakira mu ngarava, iye wayiva no mabzoka wakamupota kuti aende naye. Aazivi kumutendera, asi wakati kwaari: “Endayi kanyi kwako kuhama jako, uvabvunje kukura kwo zvaakakuitira Mambo, no njira yaakakuitira nyasha ndiyo.” Naye wakaenda, wakatanga kuchumayira mu Dhekapori kukura kwo zvaakamuitira Jesu, no vese vakashamiswa. Naapo Jesu aambukazve mwombera ngo ngarava, mbungano huru yakaungana kwaari; naye wayiva phedo no jombe. Kwakaguma apo umwe wo vatongi wo nyumba yo kudira, zina rake raizwi Jairosi, naamuvona wakajikandira patshoka jake, wakamupota kakurutu, echiti: “Mwana wangu mudoko wokaji waaphedo no kufa, ndinokupota kuti uviye, udire nyara jako panyezuru pake, kuti umuponese ararame.” Iye wakaenda naye. No mbungano huru yakamutevera, nayo yakamutsikinija. No jimayi raibuda ngazi makore ari gumi na maviri, raitambujika ngo njira jakawanda ngo n'anga zhinji, naro rakapeja zvese zvorayiva nazvo, asi arizivi kubesehwa ngo chiro, asi rakaenda mberi kuhwara. Iro rechizwa ngozvaakaita Jesu, rakaguma pakati po mbungano ngosure, naro rakapshasa nguvo yake. Ngokuti rakati: “Kudari ndikapshasa kwega nguvo jake ndinozorapika.” Paripo ngazi yaro yakayima kubuda; naro rakazwa mu muviri mwaro kuti rarapika ndhenda yaro. Paripo Jesu, echiziva mukati mwake simba rayinga rabuda kwaari, wakakunukukira kuno mbungano, akati: “Ndiyani wapshasa nguvo jangu?” Vajiji vake vakati kwaari: “Unovona kuti mbungano inokutsikinija, newe unoti; ndiyani wandipshasa?” Naye wakaringaringa kuti avone ndiyani uwo waita ichi. Asi jimayi rechitya no kutetemera, rechiziva icho chayinga chaitika kweriri rakaviya, rikawa pasi pamberi pake, naro rakamubvunja gwinyiso rese. Wakati kweriri: “Mwana kutenda kwako kwakuponesa; endayi ngo kunyarara, uite wakarapika ndhenda yako.” Echivereketa, vakaguma vaibva ku nyumba yo mutongi wo nyumba yo kudira, vechiti: “Mwana wako watofa, uchatomuneserenyi Mujijisi?” Asi Jesu azwa izwi iro raivereketwa, wakati: kuno mutongi wo nyumba yo kudira: “Usatya; ivai no gonda rega.” Naye aazivi kutendera mundhu naumwe amutevere kwega Pedru na Jakobe na Johani munukuna wa Jakobe. Naapo waguma mu nyumba yo mutongi wo nyumba yo kudira, wakavona birinyongo, no vaichema no kumima kakurutu. Naanghwina, wakati kwavari: “Munoita birinyongo no kuchema ngenyi? Mwana mudoko aazivi kufa akadi, asi wakavata.” Navo vakamuseka. Asi iye apo wakavabudisa vese, wakatora baba wo mwana na mayi, naavo vayiva naye vakanghwina pandau paiva no mwana. Naabata nyara yo mwana wakati kwaari: “Tarita Kumi:” Ukwo kunoti, chimusikana, ndinoti kwouri, Muka. Paripo chimusikana chakamuka, chakafamba; ngokuti inga chaano makore ari gumi na maviri. Paripo vakashamiswa kakurutu. Naye wakavapangisisa kuti zvisadozivika ngo mundhu naumwe. Naye wakavabvunja kuti vachipe zvokuha. Wakabuda kubvapo, wakaguma mu nyika yake; no vajiji vake vakamutevera. Naapo sabatha raguma wakatanga kujijisa mu nyumba yo kudira; no vazhinji vechimuzwa vakashamiswa, vakati: “Zvinobva kwapi izvi kuno mundhu uwu? Nokuti kungwara kwakadini kwakapuwa kuno mundhu uwu? No mishamiso yakakura yakadari inoitwa ngo nyara jake? Uwu andiyepi here mutsetsi? Mwana wa Mariya, hama ya Jakobe, na Jose, na Judha na Simoni? No hanzvaji jake ajiri pano nesu here?” Navo vakapsherujwa ndiye. Jesu wakati kwavari: “Muprofeti aaregi kureremejwa asi kwega mu nyika yake, no kuhama jake, no mu nyumba yake.” Naye aazivi kukona kuyita mishando ino simba apo, kwega wakadira nyara jake panyezuru po vandhu vashomani vaihwara, wakavarapa. Wakashamiswa ngokutama kutenda kwavo. Naye wakafambafamba mu maguta avo, echijijisa. Wakadanija kwaari vari gumi na vaviri, wakatanga kuvatuma vaviri-vaviri; naye wakavapa simba rokukurira mweya ino svina. Wakavapanga kuti vasazotora chiro, pahwendo hwavo, asi mudondoro wega; vasatora nokuti nyede, nokuti mare muzvikwama zvavo; asi kuti vasimire magwada vasazosimirazve mabhachi maviri. Wakati kwavari: “Nokuti mu nyumba iriyese yomunozonghwina, garanyi apo mbhera mubvepo. Pikija ngo yapi ndau yo musikazoashihwi, nokuti kupurukihwa mwoobvapo phumbujanyi bukuta pasi potshoka jenyu kuti riite chapupu ndivo.” Vakabuda, vakaenda; vakachumaira kuti vandhu vatenderuke. Vakambirimbija mabzoka mazhinji, vakazoja ngo mafuta vazhinji vaihwara, vakavarapa. Mambo Herodhi wakazvizwa; ngokuti zina ra Jesu inga rateketeswa wakati: “Johani Mubhapatisi wamuka kwo vakafa, ndizvo mishando iyi ino simba inoshandwa ndiye.” Asi vamweni vakati: Ndi Erija. No vamweni vakati: Muprofeti, nokuti umwe wo vaprofeti. Asi Herodhi azwa, wakati: “Ndi Johani uwo wondakagura musoro, wamukazve kwo vakafa.” Ngokuti uwu Herodhi wayinga wakatuma kumubata Johani, no kumusunga mu guniya, ngo ndava ya Herodhiasi mukaji wa Firipi munukuna wake; ngokuti iye wakamutora. Ngokuti Johani wayinga wakati kuna Herodhi: “Akutendehwi kwouri kuti utore mukaji wo munukuna wako.” Na Herodhiasi waimuzonda, wayiva no chidisiso chokumuuraya; asi wakakonehwa. Ngokuti Herodhi waimutya Johani, echiziva kuti wayiva mundhu wakarurama, wakacheneswa; wakamungwarira. Apo amuzwa, wakatambujika kakurutu; asi waimuzwa ngo kudakara. Kwaguma zuva rakanaka, apo Herodhi ngo zuva rokubahwa kwake wakaitira dhiri ndhunge jake, no nduna jake, no vakuru vo Garire; mwana wokaji wa Herodhiasi, wakanghwina wakatamba, wakamudakajisa Herodhi, naavo vaigara naye pakuha; na mambo wakati kuno musikana: “Kumbirai kwendiri pikija ichinyi chounoda, neni ndinozokupa.” Naye wakapika, kwaari, kuti, pikija ichinyi chounozokumbira kwendiri ndinozochipa kwouri, pikija bindikati ro umambo hwangu. Wakabuda, wakati kuna mayi wake: “Ndokumbirenyi?” Naye akati: “Musoro wa Johani Mubhapatisi.” Paripo wakanghwina kuna mambo ngo kukasira, wakakumbira, wakati ndinoda kuti undipe zvinopano mundiro musoro wa Johani Mubhapatisi. Na mambo wakasvipa mwoyo kakurutu, asi ngo ndava yo mbhiko jake, no ndava yo avo vaigara naye pakuha, aazivi kukona kumurambira. Paripo mambo wakatuma socha repfumo rake, akapanga kuti uziswe musoro wake; naro rakaenda rikagura musoro wake ari mu guniya, vakazisa musoro wake uri mundiro, wakapa musikana; no musikana wakaupa kuna mayi wake. Naapo vazwa vajiji vake, vakaviya, vakatora muviri wake, vakauviga mu guva. No vakaungana kuna Jesu, vakaverenga kwaari zvese zvovakaiita, no zvavayinga vajijisa. Naye wakati kwavari: “Viyanyi imwimwi muri mwega pandau iri yoga, mumbozorora padoko.” Ngokuti vazhinji vaiviya no kuenda, navo vayinga vasina no nguva yo kuha. Navo vakaenda, ngo ngarava ku ndau iri yoga, vari vega. No vandhu vakavavona vechienda, no vazhinji vakavaziva, vakagogoma ngo tshoka vechibva ku madhoropa ese, navo vakavatangira kuguma. Naabuda, wakavona mbungano huru, wakatambujika ngo ndava yayo, ngokuti yayinga yakadari ngo mabvuta asina muhavisi, naye wakatanga kuijijisa zviro zvizhinji. Apo zuva rooda kubira vajiji vake vakaviya kwaari vechiti: “Pano indau iri yoga no zuva roda kubira; vaenekesei kuti vaende mundharaunda no mumamuzi, vajitengere zvokuha.” Asi iye vakapingura, wakati kwavari: “Vapenyi imwimwi, zvokuha.” Navo vakati kwaari: “Tinozoenda here isisu tivatengere zvimanda zvemazana maviri (200) osirivha, tivape kuti vahe?” Asi iye wakati kwavari: “Muno zvimanda zvingana? Endanyi muvone.” Naapo vazviziva, vakati: “Zvishanu no hove mbiri.” Wakavapanga kuti vese vagare pasi ngo zvikwata-zvikwata panyezuru po mwenje muvishi. Navo vakagara pasi ngo zvikwata zvo mazana, no zvo makumi mashanu. Naatora zvimanda zvishanu no hove mbiri, wakaringira mu gore, wakazvibonga; wakagura zvimanda wakazvipa ku vajiji kuti vadire pamberi pavo; no hove mbiri wakajikovanisira vese. Navo vese vakaha; vakaguta. Vakabojera matshekeneswa akazara zvitengu gumi na zviviri, no zvo hove. Avo vakaha zvimanda vayinga vanarume vari zviuru zvishanu (5.000). Paripo wakavangirija vajiji vake kuti vapakire mu ngarava no kutungamira kuenda mwombera ku Bhetisaidha, iye ambhwine echieneka mbungano. Naapo avaeneka wakaenda, pa dundhu kwookumbira. Kwoita madekoni, ngarava yayinga iri pakati po jombe, naye wayiva ega pa nyika. Echivavona vechitambujika ngo kubvutha, ngokuti mbhepo yaita maringwa navo; kunonga murindo wo china wo usiku, iye wakaguma kwavari, echifamba ngo panyezuru po jombe. Wayida kuvapindirija. Asi avo vechimuvona echifamba ngo panyezuru po jombe vakakarakaja kuti rayiva jini, navo vakamima. Ngokuti vakamuvona vese, vakatyiswa, paripo iye wakavereketa kwavari, echiti: “Shinganyi ndini; musatya.” Naye wakapakira mu ngarava mwovaingaro; no mbhepo yakanyarara. Navo vakashamiswa kakurutu mukati mwavo, ngokuti avazivi kuzwisisa ngo ndava yo zvimanda, ngokuti mwoyo yavo inga yakakonjiswa. Apo vaambuka mwombera vakaguma ku nyika yo Genesareta, navo vakasungira ngarava mumbhiripiri. Naapo vabuda kubva mu ngarava, paripo vandhu veyo vakamuziva, navo vakagogoma vo ndharaunda yese, vakatanga kutwara ngo misengere avo vaihwara, kuvadira apo po vakazwa kuti ndipo paari. Pikija kwapi kwaainghwina mumamuzi, nokuti mu madhoropa, nokuti mundharaunda, vakavarajika vaihwara pa musika, vakamupota kuti vapshase pikija mupendero wo nguvo yake, navo vese vakamupshasa vakarapika. Vafarisi no vatari vakatikuti vakabva Jerusarema vakaungana kwaari. Vakavona kuti vamweni vo vajiji vake vaiha zvimanda ngo nyara jino svina, ukwo kunoti, jisikazivi kushambwa. Ngokuti vafarisi, no vajudha vese, avahi vasikazivi kunasa kushamba kakurutu nyara javo, ngo kuteveja chirovejeso cho vasharuka; naapo vobva ku musika, avahi kudari vasikazivi kushamba. No zvimweni zvirovejeso zvizhinji zviripo zvovakaashira kuzvingwarira, kudari ngo kusuka mukheyo, no mbende, no ndiro jo simbi no mubhedhi. Vafarisi no vatari vakamubvunjisa, kuti: “Vajiji vako avateveri ngenyi zvirovejeso zvo vasharuka, asi vanoha zvimanda ngo nyara jino svina?” Wakati kwavari: “Isaya wakanasa kuprofeta ndimwi, imwimwi vajiitisi, kudari ngo zvakatahwa, kuti: Ava vandhu vanondireremeja ngo miromo yavo, asi mwoyo yavo iri ndhambo neni. Asi vanopera nguva kundidira, vechijijisa zvirovejeso zvo vandhu kunonga zviri zvijijo kwazvo. Munoregera mipango ya Mwari mwobatirira zvirovejeso zvo vandhu.” Wakati kwavari: “Munoramba mipango ya Mwari kuti mubatirire zvirovejeso zvenyu.” Ngokuti Mosi wakati: “Reremeja baba wako na mayi wako; naye anotuka baba nokuti mayi ngaatongehwe kufa. Asi imwimwi munoti: Kudari mundhu echiti kuna baba wake nokuti kuna mayi wake, icho cho wayida kuviihwa ndicho kwendiri chiri Korbani, ukwo kunoti, chakapihwa kuna Mwari. Ngokudaro amuchamutenderi kuti aitire chiro kuna baba nokuti mayi. Ngokudaro munoita kuti izwi ra Mwari riite risina shwiro ngo ndava yo zvirovejeso zvenyu, zvo mwakaashijana no majibaba enyu. No zvimweni zvizhinji zvakadaro zvomunoita.” Wakadanijazve mbungano kwaari, wakati kwoiri: “Ndizwenyi imwimwi mwese, muzwisise. Apana chiro chinobva ngo kunja kwo mundhu chechinghwina mukati mwake chingamusvipisa, asi izvo zviro zvinobva mukati mwo mundhu, ndizvo zvinomusvipisa. Uwo uno njeve jo kuzwa ngaazwe.” Apo wanghwina mu nyumba kubva kuno mbungano, vajiji vake vakamubvunjisa ngo muezaniso uwu. Naye wakati kwavari: “Na imwimwivo amuzwisisi here? Amuvoni here kuti pikija chinyi chinobva ngo kunja chinonghwina mu mundhu achingakoni kumusvipisa; ngokuti achinghwini mu mwoyo mwake, asi mu ndani mwake, chechibudiswa mushango? Ngokudaro zvakacheneswa zvokuha zvese.” Wakati: “Icho chinobuda kubva ku mundhu, ndicho chinomusvipisa. Ngokuti mukati mu mwoyo yo vandhu kunobuda mikarakajo yakashata, kuhura, kuba, kuuraya, kuomba, umbata, unbvuja, kuchengeja, umbhombo, kuchochotora, kutuka, kujikuja, upenji. Zvese izvi zviro zvakashata zvinobuda kubva ngo mukati, ndizvo zvinosvipisa mundhu.” Wakamuka kubvapo, wakaenda kumigano yo Tire no Sidhoni. Wakanghwina mu nyumba, asayida kuti azivikanwe ngo mundhu; asi aazivi kukona kuti afishike. Paripo jimayi rayiva no mwana wo musikana waro mudoko wayiva no mweya wakashata; razwa ndiye, rakaguma rikawira patshoka jake. Zvino jimayi iro rayiva muGiriki, ngo kubahwa rayiva muSurofonikia. Naro rakamupota kuti ambirimbije bzoka kubva ku mwana wo musikana waro. Iye wakati kweriri: “Vana ngavagutiswe kutanga, ngokuti akusisiri kutora chimanda cho vana no kuchikandira kuzviimbhwa.” Asi rakapingura, rikati kwaari: “Eya Mambo; zviimbhwa zvinoha pasi po thafura matshekeneswa wo vana.” Wakati kweriri: “Ngo ndava yo izwi iri, enda bzoka rabuda kubva ku mwanasikana wako.” Rakaenda ku nyumba yaro, rakavona mwana wakarajikwa pa mubhedhi, no bzoka rayinga rabuda kubva kwaari. Jesu wakabudazve kubva kumigano yo Tire, wakapinda ngo Sidhoni mbhera kuguma ku jombe ro Garire, pakati po migano yo nyika yo Dhekapori. Vakazisa kwaari umwe wayiva no mandondo naarizve mbeveve; navo vakamupota kuti adire nyara jake panyezuru pake. Naamutora ari ega kubva pakati po mbungano, wakadira zvikunwe zvake munjeve jake, wakapfira mata, wakapshasa rurimi wake. Naaringira mu gore, wakafemeruka, wakati kwaari: “Efata,” ukwo kunoti: “Bewuka.” No njeve jake jakabewuhwa, no musungo wo rurimi wake wakasununguka, naye wakavereketa zvinozwika. Iye wakamupanga kuti vasazobvunja mundhu: Asi echinyanya kuvapanga vakanyanyisavo kuzviteketesa. Navo vakashamiswa kakurutu, vechiti: “Iye wakayita zvese kuti zvinake; anoita kuti vano mandondo vazwe, no mbeveve kuti jiverekete.” Ngaao mazuva apo kwayivapozve mbungano huru, yayinga isina cho kuha, iye wakadanija vajiji, wakati kwavari: “Ndino svipa mwoyo ngo ndava yo mbungano, ngokuti yakagara neni zvino aamazuva matatu, isina cho kuha. Kuti ndikavaendesa kumakanyi kwavo vasati vaha, vanozowa ngo njara mu njira; no vamweni vavo vakabva ndhambo.” No vajiji vake vakamupingura: “Mundhu ungazviwana kwapi zvimanda kuti agutise ava vandhu muno mushango?” Naye wakavabvunjisa, kuti: “Muno zvimanda zvingana?” Vakati: “zvinomwe.” Wakapanga mbungano kuti igare pasi. Wakatora zvimanda zvinomwe, wakazvibonga, wakazvigura, wakazvipa ku vajiji vake, kuti vazvidire pamberi pavo; navo vakazvidira ku mbungano. Navo vayiva no hove doko shomani; wakajibonga wakananga kuti jidihwevo pamberi pavo. Navo vakaha, vakaguta; navo vakabojera matshekeneswa ozvakasara akaita zvitengu zvinomwe. Avo vakaha vaikhwedera mutengo wo zviuru zvirongomuna (4.000); naye wakavaendesa. Paripo wakanghwina mu ngarava no vajiji vake, vakaguma mu nyika yo Dharamanuta. Vafarisi vakaviya apo, vakatanga kumubvunjisa, vechipshaka kwaari chivoniso chinobva mu gore, vechimueja. Naye wakafemeruka zvikuru mu mweya mwake, wakati: “Uwu mubarihwana unopshaka ngenyi chivoniso? Ngozvirokwazvo ndinoti kwomuri mubarihwana uwu auzopuwi chivoniso.” Wakavasiya, wakanghwinazve mu ngarava, wakaambuka mwombera. Vajiji vayinga vakanganwa kutora chimanda; vayinga no chimanda chimwe choga mu ngarava. Naye wakavapanga, echiti: “Ngwaranyi mumera wo vafarisi no mumera wa Herodhi.” Vakapangana pakati pavo, vechiti: Ngokuti atina chimanda, Jesu echiziva wakati kwavari: “Munopangana ngenyi ngokuti amuna chimanda? Amusati mwaziva nokuti kuzwisisa here? Mwoyo yenyu ichakandopata here? Muno majiso musikavoni here, muno njeve musikazwi here? Amucherecheji here? Naapo zvondakagurira vandhu vari zviuru zvishanu (5.000) zvimanda zvishanu, mwakabojera zvitengu zvingana zvakazara ngo matshekeneswa?” Vakati kwaari: “Gumi na zviviri.” “Naapo zvimanda zvinomwe zvakagurihwa ku vandhu vari zviuru zvirongomuna (4.000) mwakabojera zvitengu zvingana zvakazara ngo matshekeneswa?” Vakati kwaari: “Zvinomwe.” Naye wakati kwavari: “Amusati mwazwisisa here?” Vakaguma mu Bhetisaidha. Vakazisa kwaari bofu, navo vakamupota kuti aripshase. Naye wakaribata ngo nyara, wakaribudisa kunja kwo dhoropa; naapo apfira mata mumajiso aro, wakadira nyara jake panyezuru paro, wakaribvunjisa kuti: “Unovona chiro here?” Naro rakaringira rikati: “Ndinovona vandhu asi ndinovavona inga miti inofamba.” Wakadirazwe nyara jake panyezuru po majiso aro, naro rakaringisisa, rakapembenujwa, rikavona zviro zvese pambhene. Wakariendesa kanyi kwaro echiti: “Usanghwinazve mundharaunda.” Jesu no vajiji vake vakaenda vakanghwina mu maguta wo Khesariya Firipi. Vechiri mu njira wakabvunjisa vajiji vake, echiti kwavari: “Vandhu vanoti, inini ndiri yani?” Navo vakamubvunja, vechiti: “Johani Mubhapatisi, no vamweni vanoti, Erija, asi vamweni vanoti, uri umwe wo vaprofeti.” Naye wakavabvunjisa: “Imwimwi munoti ndiri yani?” Pedru wakapingura wakati kwaari: “Iwewe uri Kristu.” Naye wakavapangisisa kuti vachazobvunja mundhu ndiye. Wakatanga kuvajijisa kuti kunosisira kuti Mwana wo Mundhu atambujike ngo zvakawanda, no kurambwa ngo vakuru, no vapristi vakuru, no vatari, aurawe, ngosure kwo mazuva matatu amukezve. Wakavereketa izwi iri pambhene; Pedru wakamutora kuenda padivi; wakatanga kumuthusa. Asi iye, naatenderuka, avona vajiji vake, wakamurambisa Pedru, wakati: “Ibva uende sure kwangu, Sathani; ngokuti auzwisisi ngo zva Mwari, asi izvo zvo vandhu.” Naapo wadanijirazve kwaari mbungano pamwepo no vajiji vake wakati kwavari: Ndiyani unoda kuviya sure kwangu, ngaajirambe, atore muchinjiko wake anditevere. Ngokuti pikija ndiyani unoda kuponesa ndaramo yake unozorashikihwa ndiyo, no uwo unozorashikihwa ngo ndaramo yake ngo ndava yangu no yo vhangeri, unozoiponesa. Ngokuti mundhu unozoviihwa ngenyi, kudari echiviihwa ngo nyika yese, arashe ndaramo yake? Ngokuti mundhu unozopenyi kuti aviihwe ngo ndaramo yake? Ngokuti pikija ndiyani unozopsheruka ndini, no mazwi angu kuno uwu mubarihwana unoomba no unoshaisha, Mwana wo Mundhu unozopsherukavo ndiye apo oozoviya mu Muuthende hwa Baba wake, pamwepo no ngirosi jake jakachena. Wakati kwavari: “Ngozvirokwazvo ndinoti kwomuri, varipo vamweni veavo vanoyima pano, vasikazozwi kufa mbhera vavone Umambo hwa Mwari hwechiviya ngo simba.” Ngosure kwo mazuva matandhatu Jesu wakatora naye Pedru, na Jakobe, na Johani, wakakwira navo panyezuru po dundhu rakareba, vari vega, naye wakatsandujwa pamberi pavo. No zvokusimira zvake zvakan'anikira zvikachena kuti mbembe; kwokuti akuna musuki mu nyika ungaita kuti zvichene kudaro. Kwakavoneka kwavari Erija na Mosi, vechivereketa na Jesu. Na Pedru wakati kuna Jesu: “Rabhi, zvakanaka kuti tigare pano, ngatitoite zvitumba zvitatu; chimwe chako, chimwe cha Mosi, no chimweni cha Erija.” Ngokuti iye wayinga echikachazivi kuti ungavereketenyi; ngokuti vakakarukiswa ngo kutya. Kwakaviya gore rakavafukija; rakazwika izwi rechibva mu gore rechiti: “Uwu ndiye Mwana wangu unodikana; muzwenyi imwimwi.” Paripo no varingaringa avazivi kuvona mundhu, kwega Jesu navo. Vechibzuka kubva pa dundhu, wakavapangisisa kuti vasazobvunja mundhu izvo zvavayinga vavona, mbhera Mwana wo Mundhu azomukazve kubva kwo vakafa. Navo vakaringwarira izwi iro, vaibvunjisana pakati pavo kuti kunotinyi kumuka kwo vakafa. Vakamubvunjisa, vechiti: “Ngenyi vatari vanoti, kunosisira kuti Erija atange kuviya?” Wakati kwavari: “Ngozvirokwazvo Erija unotanga kuviya, amusijire zvese; na ngo njira yo zvakatahwa ndiye Mwana wo Mundhu kuti atambujike ngo zviro zvakawanda nokuti areruswe. Asi inini ndinoti kwomuri, kuti Erija wakatoviya, navo vakayita kwaari zvevakada, kudari ngo zvakatahwa ndiye.” Naapo vaguma kuna vajiji vakavona mbungano huru yakavaunganira, no vatari vechivabvunjisa. Paripo mbungano yese yakamuvona yakashamiswa kakurutu, yakagogoma kuviya kwaari, yakamuchungamija. Wakavabvunjisa, kuti: “Ichinyi chomunobvunjisa kwavari?” Umwe wo mbungano wakamupingura, wakati: “Mujijisi, ndazisa mwana wangu kwouri uno mweya wo umbeveve. Naapo womubata unomuwisira pasi; naye unobudisa mafuro, echikwetsana mazino, echiperezeka: Neni ndakavereketa kuno vajiji vako kuti vaumbirimbije, asi avazivi kukona.” Naye wakapingura, wakati kwavari: “A! Mubarihwana usikatendi ndinozogara nemwi nguva yakadini? Ndinozomusengerera mukuvo wakaitawani? Muzisenyi kwendiri.” Vakamuzisa kwaari; naamuvona, paripo mweya wakamusukumija kakurutu; naye wakawa pasi pa mavhu, wakaburukuta echibudisa mafuro. Wakabvunjisa baba wake, kuti: “Mukuvo wakadini wechiyita kudari kwaari?” Navo vakati: “Kubvira paudoko hwake. No mukuvo mizhinji wakamukhandira mu muriro no mu kumwa kuti umuuraye; asi kudari uno simba rokuyita chiro tiyitire nyasha, utibesere.” Jesu wakati kwaari: “Kudari wechitenda, zvese zviro zvingaitiwa kwaari unotenda.” Paripo baba vo mwana vakadanijira, vakati: “Ndinotenda; besera kutama kutenda kwangu.” Jesu naavona kuti mbungano yaigogoma kuviya pamwepo, wakathusa mweya wakashata, echiti kwouri: “Iwewe mweya wo umbeveve no wo mandondo, ndinokupanga kuti ubude kubva kwaari, usatongozonghwinazve kwaari.” Nawo wakamima, no kumusukumija kakurutu, wakabuda kubva kwaari; no mwana uwo wakayita kudari ngo watofa, kwokuti vazhinji vavo vakati: Watofa. Asi Jesu wakamubata ngo nyara, wakamumusa; naye wakamuka. Naapo wakanghwina mu nyumba, vajiji vake vakamubvunjisa vari vega, vechiti: “Isisu atizivi kukona ngenyi kuumbirimbija?” Wakati kwavari: “Uwu ruji arungabudi ngo chiro chimweni kwega ngo kukumbira.” Vakabvapo, vakakhirira ngo mu Garire; iye aazivi kuda kuti mundhu ariwese azvizive. Ngokuti waijijisa vajiji vake, echiti kwavari: “Mwana wo Mundhu unozopihwa mu nyara jo vandhu, navo vanozomuuraya, naapo aurawa, ngosure kwo mazuva matatu unozomuka.” Asi avazivi kuzwisisa izwi iro, vakatya no ku mubvunjisa. Vakaguma Kaperanaume, apo vaapanyumba wakavabvunjisa, kuti: “Ichinyi chomwaikanijana ndicho mu njira?” Navo vakanyarara ngokuti vayinga vechikanijana mu njira kuti ndiyani uri mukuru. Naapo vagara pasi, wakadanija kwaari vari gumi na vaviri, wakati kwavari: “Pikija ndiyani unoda kuyita wokutanga ngaaite chigumisihwa kwavari vese, no muranda wavo vese.” Naye wakatora mwana mudoko, akamuimisa pakati pavo; wakamutakura mu nyara jake, wakati kwavari: “Pikija ndiyani unozoashira umwe wo avo vadoko vakadari ngo zina rangu, unondiashira inini; no uwo unondiashira inini aandiashiri akadi asi uwo wakandituma.” Johani wakati kwaari: “Mujijisi, takavona umwe waimbirimbija mabzoka ngo zina rako; uwo inga asikateveri nesu, takamurambisa ngokuti inga asikateveri nesu.” Asi Jesu wakati: “Muchamurambisa; ngokuti akuna mundhu ungaita mushando mukuru ngo zina rangu, ungakonazve kuvereketa zvakashata ndini. Ngokuti uwo usikarwi nesu unotirwira isisu. Pikija ndiyani unozomupa mukheyo wo kumwa yo kumwa, ngo ndava yokuti muri va Kristu, ngo zvirokwazvo ndinoti kwomuri, kuti aazorashikihwi ngo muripo wake.” “Pikija ndiyani unozoshaishisa umwe wo ava vadoko vanonditenda, kunopinda kunaka kwaari kuti gwiyo guru risungihwe mumusipa mwake akhandihwe mu jombe. Kudari nyara yako yechikushaishisa, itemei; ngokuti kwakapinda kunaka kwouri kuti unghwine mukururama uri chirema, kuno kuti uno nyara mbiri unghwine mu Gehena, mu muriro usikajimi. Apo poisikafi honye yavo, no muriro aujimi. Kudari tshoka yako ikakushaishisa, itemei; ngokuti kwakapinda kunaka kwouri kuti unghwine mukururama wechithobinya, kuno kuti unotshoka mbiri ukandihwe mu Gehena. Apo poisikafi honye yavo, no muriro aujimi. Kudari jiso rako rechikushaishisa, ribvite: Ngokuti kwakapinda kunaka kwouri kuti unghwine mu Umambo hwa Mwari uno jiso rimwe, kuno kuti uno majiso maviri ukandihwe mu Gehena: Apo poisikafi honye yavo, no muriro aujimi. Ngokuti mundhu wese unozorungwa ngo muriro, no mudiro wese unozorungwa ngo munyu. Munyu wakanaka, asi kuti munyu warasha kunaka kwawo, unozorungwa ngenyi? Garanyi muno munyu mukati mwenyu, mugarisane zvakanaka umwe no umweni.” Wakabvapo, wakaenda ku nyika yo Judhiya mwombera mwo Jordhani. Mbungano yakaunganazve kwaari; kudari ngokuyita kwake, wakavajijisazve. Vafarisi vakaviya kwaari, vechimubvunjisa, kuti: “Kunotendehwa here kuti mwamuna arambe mukaji wake?” Vechimueja. Wakapingura, wakati kwavari: “Ichinyi chaakapanga Mosi kwomuri?” Navo vakati: “Mosi wakatenda kuti kutahwe tshamba yo kumuramba no kuparajana.” Asi Jesu wakati kwavari: “Ngo ndava yo kupata kwo mwoyo yenyu iye wakamutarira uwu mupango. Asi kubvira mukutanga kwo kusikwa, Mwari wakavasika mwanarume no mwanakaji. Ngo iyi ndava mwanarume unozosiya baba wake na mayi, abatirire kumukaji wake; navo vaviri vanozoita nyama imwe. Kwokuti avachaiti vaviri, asi nyama imwe. Ndizvo chaakasunganisa Mwari, mundhu usazosunungura.” Vaa mu nyumba vajiji vake vakamubvunjisazve ngo iyi ndava. Wakati kwavari: “Iye unoramba mukaji wake arovore umweni, unoomba echishaishira mukaji wake. Pikija mukaji naye akaramba mwamuna wake, arovohwe ngo umweni, iye unoomba.” Vayinga vechizisa vana vadoko kwaari kuti avapshase, asi vajiji vakavathusa. Asi Jesu echivona wakahwajihwa, wakati kwavari: “Tenderanyi vana vadoko vaviye kwendiri, musavarambija; ngokuti Umambo hwa Mwari ngo hwavakadari ngaava. Ngozvirokwazvo ndinoti kwomuri; iye usikaashiri Umambo hwa Mwari kudari ngo mwana mudoko aatongozonghwini kwohuri.” Naye wakavatakura, akavakomborera, echidira nyara jake panyezuru pavo. Naapo echitanga hwendo hwake, kwakagogoma umwe echiviya kwaari, wakamugwadamira, wakamubvunjisa, kuti: “Mujijisi wakanaka, chinyi chondingaita kuti, ndigare ndhaka yo kupona kusikaperi?” Jesu wakati kwaari: “Unondidanija ngenyi kuti, wakanaka? Akuna wakanaka, asi umwe ega, ndi Mwari. Unoiziva mipango, usauraya, usaomba, usaba, usaita uchapupu hwo kunyepa, usachengejera, reremeja baba wako na mayi wako.” Wakati kwaari: “Mujijisi, izvi zvese ndakazvingwarira kubvira muudoko hwangu.” Jesu echimuringira, wakamuda, wakati kwaari: “Chiro chimwe chinotamika kwouri: Endai, utengese zvese zvounazvo, upe varombo, newe unozova no pfuma mu gore; uviye, unditevere.” Iye wakatambujika ngo izwi iro, wakaenda echisvipa mwoyo, ngokuti wayiva no pfuma zhinji. Jesu aringaringa wakati ku vajiji vake: “A, kwakapinda kunesa kwavari avo vano upfumi kunghwina mu Umambo hwa Mwari!” Vajiji vakashamiswa ngo mazwi ake; asi Jesu wakavabvunjazve wakati kwavari: “Vana, kwakapinda kunesa kwavari avo vanogonda pfuma kunghwina mu umambo hwa Mwari! Kwakapinda kureruka kuti kamera ringhwine ngo pa bovo ro njingano kuno kuti mupfumi anghwine mu Umambo hwa Mwari.” Vakashamiswa zvikuru, vechiti pakati pavo: “Ndiyani ungaponeswa?” Na Jesu echivaringira, wakati: “Ku vandhu azvingaitiki, asi haiwa kuna Mwari, ngokuti zviro zvese zvinoitika kuna Mwari.” Pedru wakatanga kumubvunja kuti: “Vonayi, isisu takasiya zvese, tikakutevera.” Jesu wakati: “Ngozvirokwazvo ndinoti kwomuri; akuna mundhu wakasiya nyumba, nokuti vanukuna, nokuti hanzvaji, nokuti mayi, nokuti baba, nokuti vana, nokuti minda, ngo ndava yangu, no yo vhangeri, asikazoashiri zvakahwirijihwa kupetwa kuyita zana, zvino ngo nguva iyi, nyumba, no vanukuna, no hanzvaji, no majimayi, no vana, no minda, pamwepo no kuteverehwa; no ku nguva inozoviya, unozoashira kurarama kusikaperi. Asi vazhinji vokutanga vanozoita vokugumisira; naavo vokugumisira vanozoita vokutanga.” Vayiva mu njira vechikwira kuenda Jerusarema; na Jesu waitungamira pamberi pavo. Vakashamiswa, naavo vakamutevera vakatya. Naye wakatorazve vari gumi na vaviri, wakatanga kuvabvunja zvinozomugumira, echiti: “Vonanyi, tinokwira Jerusarema; no Mwana wo Mundhu unozopihwa ku vapristi vakuru no vatari; navo vanozomutongera rufu, vanozomupira kuno vo majinja; navo vanozomuitira jee, no kumupfirira, no kumurova, no kumuuraya; asi ngosure kwo mazuva matatu unozomukazve.” Jakobe na Johani vana va Zebhedhi vakakhwedera kwaari, vechiti kwaari: “Mujijisi, tinoda kuti, utiitire pikija, chinyi chotinozokumbira.” Wakati, kwavari: “Munoda kuti, ndimuitirenyi?” Navo vakati kwaari: “Titendere isisu kuti tigare umwe ngo kumuho kwako, no umweni ngo kuboshwe kwako mu uthende hwako.” Asi Jesu wakati kwavari: “Amuzivi chomunokumbira. Munokona here kumwa mukheyo wondinomwa? Nokuti, kubhapatiswa ngo rubhapatiso rwondinobhapatiswa ndirwo?” Navo vakati kwaari: “Tinokona.” Na Jesu wakati kwavari: “Mukheyo wondinomwa, munozoumwavo; no rubhapatiso rwendinozobhapatiswa ndirwo munozobhapatiswa ndirwo. Asi kugara ngo kumuho kwangu na ngo kuboshwe kwangu andinipi ndinopa, asi ngo kwaavo vakakunasirihwa.” Naapo vari gumi vazwa vakatanga kuhwajihwa ndi Jakobe na Johani. Naapo Jesu wakavadanija kwaari, wakati kwavari: “Munoziva kuti avo vakaemeswa kutonga vo majinja vano simba panyezuru pavo, no vakuru vavo vano simba panyezuru pavo; Asi azvizoiti kudaro kwomuri; asi pikija ndiyani uwo unoda kuyita mukuru kwomuri ngaaite mushandiri wenyu, no uwo unoda kujiita wokutanga pakati penyu ngaajiite muranda wavo vese. Ngokuti no Mwana wo Mundhu aazivi kuviya koshandihwa, asi koshandira, no kupa kupona kwake kuti kuite muripo wo vazhinji.” Vakaguma mu Jeriko. Naapo echibva mu Jeriko no vajiji vake, no mbungano huru, Bhartimeu, mwana wa Timeu, bofu, mupembhi, inga wakagara ngo pambhiri po njira. Naazwa kuti ndi Jesu wo Nazaretha, wakatanga kumima, echiti: “Jesu Mwana wa Dhavhidha ndiyitire nyasha.” Vazhinji vakamuthusa kuti anyarare; asi iye wakapindisisa kumima kukuru, echiti: “Mwana wa Dhavhidha, ndiyitire nyasha.” Naapo Jesu wakayima, wakati: “Mudanijenyi.” Vakadanija bofu, vechiti kweriri: “Chunga, mukayi, unokudanija.” Iro rechikhandira no jira raro rakamuka, rakaguma kuna Jesu. Jesu wakamubvunjisa, kuti: Chinyi chounoda kuti ndikuitire? No bofu rakati kwaari. Rabhoni, kuti ndivone. Jesu wakati kweriri: “Enda, kutenda kwako kwakuponesa.” Paripo rakavona rakamutevera mu njira. Apo vakwedera Jerusarema, ku Bhetifaje no ku Bhetani, pa dundhu ro Maorivhe, wakatuma vaviri vo vajiji vake, wakati kwavari: “Endanyi mu guta ro mwakaringirana naro; naapo muchinghwina kweriri munozovona tsiru ro mbongoro rakasungwa, iro risikazivi kumbogadhwa ngo mundhu; risunungurenyi muviye naro. Kudari mundhu echizoti kwomuri: Munoita ichi ngenyi? Munozoti, Mambo unorida; paripo unozorihwirijazve.” Navo vakaenda, vakavona tsiru ro mbongoro rakasungwa phedo po musuvo ngo kunja phedo no njira, navo vakarisunungura. Vamweni vakatikuti vo avo vaiyima apo vakati kwavari: “Munoitirenyi kusunungura tsiru ro mbongoro?” Vakapingura kwavari kudari ngo zvaakananga Jesu. Navo vakatendera. Vakazisa tsiru ro mbongoro kuna Jesu, vakakandira nguvo javo panyezuru paro; naye wakapakira panyezuru paro. No vazhinji vakaaja nguvo javo mu njira; no vamweni matavi ovakatema mushango. Avo vaifamba ngo pamberi, naavo vaitevera ngosure, vakadanijira, vechiti: “Hosana! Unomuchena uwo unoviya ngo zina ra Mambo! Unomuchena umambo uhwo hunoviya hwa Baba wedu Dhavhidha! Hosana mu denga-denga!” Jesu wakaguma mu Jerusarema, wonghwina mu themperi; naapo aringaringa wovona zviro zvese, zuva rabira wakabuda kuenda mu Bhetani pamwepo no vari gumi na vaviri. No cho mangwanani voobva Bhetani, iye wakazwa njara. Naavona mukuyu ngo ndhambo uno masakani, wakaguma kwouri, kuti pamweni ungawana michero kwouri. Naapo waguma kwouri, aazivi kuwana michero, kwega masakani; ngokuti inga isati yaanguva yo makuyu. Jesu wakati kuno mukuyu: “Apana no mundhu achazoha michero kubva kwouri mbhera narini.” No vajiji vake vakazvizwa. Vakaguma mu Jerusarema: Wakanghwina mu themperi wakatanga kumbirimbija avo vaitengesa no vaitenga mu themperi, naye wakavinduja mathafura eavo vaitenganisana mare, no zvigaro zvo avo vaitengesa njiva. Naye aazivi kutendera kuti na umwe atware mujiyo pikija yakadini mu themperi. Wakavajijisa, wakati kwavari: “Akuzivi kutahwa here kuti: Nyumba yangu inozozwi inyumba yo kudira yo majinja ese? Asi imwimwi mwaiyita bako ro majongoni.” Vapristi vakuru no vatari vakazvizwa, navo vakapshaka kuti vangamuita maurairenyi; ngokuti vaimutya, ngokuti mbungano yese yakashamiswa ngo kujijisa kwake. Naapo zuva rabira vakabuda kubva mu dhoropa. No cho mangwanani vechipinda, vakavona mukuyu wakaoma mbhera ku miji. Pedru echicherecheja wakati kwaari: “Rabhi, Vonayi, mukuyu wo wakatuka waoma.” Jesu wakapingura, wakati kwavari: “Gondanyi kuna Mwari. Ngozvirokwazvo ndinoti kwomuri pikija ndiyani unozoti kuno iri dundhu, bvitwa kubva pano, ukhandihwe mu jombe; usikagonondi mu mwoyo mwake, asi echitenda kuti icho chaanonanga chinozoitika, chinozoitika kwaari. Ndizvo ndinoti kwomuri, zvese zvomunokumbira, no zvo munokumbirira, tendanyi kuti mwaashira, munozova nazvo. Naapo mwayima mwechikumbira, regereranyi pikija ndiyani uno ndava kwomuri; kuti baba wenyu vari mu gore vamuregererevo zvishaishi zvenyu. Asi kudari musikaregereri, Baba wenyu vari mu gore avazomuregereri zvishaishi zvenyu.” Vakaviyazve Jerusarema; naapo echifamba mu themperi, vakaviya kwaari vapristi vakuru, no vatari, no vakuru vavo; navo vakati kwaari: “Unoita zviro izvi ngo simba rani? Ndiyani wakakupa iri simba rokuyita zviro izvi?” Jesu wakati kwavari: “Nenivo ndinozomubvunjisa mubvunjo umwe, kudari mwechizondipingura ndinozomubvunja kuti ngo simba rani rondinoita ndiro zviro izvi. Rubhapatiso hwa Johani ngo hwo mu gore here, nokuti ngo hwo vandhu? Ndipingurenyi.” Navo vakapangana pakati pavo, vechiti: “Kuti tikati; hwakabva mu gore; iye unozoti, Ndizvo amuzivi kumutenda ngenyi?” Asi tikati. Hwakabva ku vandhu, vaitya mbungano, ngokuti vese vaitenda kuti Johani wayiva muprofeti wo chokwadi. Navo vakapingura Jesu, vakati: “Atizvizivi.” Na Jesu wakati kwavari: “Neni andizomubvunji kuti isimba rani rendinoita ndiro zviro izvi.” Wakatanga kuvereketa kwavari ngo miezaniso, echiti: “Mundhu wakasima munda wo mivhini, wakaujivirira ngo rusosa, wakacha rindi ro kusvinira vhini, akavaka chitandara, wakaupa ku varimi, wakaenda ku nyika imweni. Ngo nguva yo kuibva kwo michero wakatuma muranda ku varimi kuti aashire michero yo muvhini kuno varimi. Navo vakamubata, vakamurova, vakamuhwirija asina chiro. Wakatumazve kwavari muranda umweni; no uwo naye vakamuremaja musoro wake, vakamupsheruja. Naye wakatuma umweni; no uwo vakamuuraya; no vamweni vazhinji ngokudaro, vakarova vamweni, no vamweni vakavauraya. Wakasara no umwe mwana unodikanwa; wakamutuma kwavari pakugumisira, echiti; vanozoreremeja mwana wangu. Asi avo varimi vakati pakati pavo: Uwu ndiye unogara ndhaka; viyanyi, ngatimuuraye, no ndhaka inozoita yedu. Vakamubata, vakamuuraya, vakamukhandira kunja kwo munda wo muvhini. Mambo wo munda wo mivhini unozoitenyi? Unozoviya, auraye varimi avo, unozopa munda wo mivhini kuno vamweni. Amuzivi kujija here aya matahwa, kuti: Buwe iro rakarambwa ngo vavaki, iri ndiro rakaitwa soro ro pakhona; ichi chakabva kuna Jehovha, chinoshamisa mukuvona kwo majiso edu.” Navo vakapshaka kuti vamubate; asi vakatya mbungano; ngokuti vakaziva kuti waivereketa muezaniso uwo ndivo; vakamusiya, vakaenda. Vakatuma kwaari vamweni vo vafarisi, no vaHerodhi, kuti vamuparise ndava mukuvereketa kwake. Vaguma, vakati kwaari: “Mujijisi, tinoziva kuti iwewe uri wo gwinyiso, auringiri ukuru hwo mundhu, ngokuti auringiri hope yo mundhu, asi ngo gwinyiso unojijisa njira ya Mwari. Kunotendehwa here kuripa mare yo shangu kuna Khesari, nokuti tisaripa? Tinozomupa here nokuti tisamupa?” Asi iye echiziva kujiitisa kwavo, wakati kwavari: “Munondiejerenyi? Zisanyi kwendiri chiguhwa cho mare chinozwi dhenariyo, kuti ndichivone.” Vakachizisa. Naye wakati kwavari: “Uwu muezaniso no uku kutahwa ngo kwaani?” Navo vakati kwaari: “Ngozva Khesari.” Jesu wakati kwavari: “Ipanyi Khesari izvo zva Khesari, no kuna Mwari izvo zva Mwari.” Navo vakashamiswa kakurutu ndiye. Vakaviya kwaari vasadhusi, avo vanoti kuti akuna kumuka kwo vakafa; navo vakamubvunjisa vechiti: “Mujijisi, Mosi wakatitarira kuti; kudari nyavanji wo mundhu akafa, wosiya mukaji, asina mwana, kuti munukuna wake ngaamurovore, amusijire jinja ranyavanji wake. Paiva no hama nomwe, yokutanga yakarovora mukaji asi yakafa isikazivi kusiya jinja; no yo chipiri yakamurovora, nayo yakafa isikazivi kusiya jinja; no yochitatu ngo kudarovo. Pa vanomwe vese vakafa, vechikazivi kusiya jinja. Ngosure kwavo vese mukaji wakazofavo. Mukumuka kwo vakafa, apo voozomuka, unozoyita mukaji wani kwavari? Ngokuti vanomwe vakamurovora.” Jesu wakati kwavari: “Andikwopi kupauka kwenyu here, ngokuti amuzivi zvakatahwa no kutizve simba ra Mwari? Ngokuti apo voomuka kubva kwo vakafa, avazorovori nokuti kurovojwa, asi vanozodari ngo ngirosi jiri mu gore. Asi ngo ndava yo vakafa, kuti vanomuka, amuzivi kujija here mu tshamba ya Mosi, pandau inovereketa ngo pfiba, kuti Mwari wakavereketa kwaari, echiti: Inini ndiri Mwari wa Abrahama, na Mwari wa Isaka, na Mwari wa Jakobe? Iye asipi Mwari wo vakafa akadi, asi ngo wo vanopona; munopauka kakurutu.” Kwakaguma umwe wo vatari, wakavazwa vechibvunjisana pamwepo, naye echiziva kuti wakanasa kupingura kwavari, wakamubvunjisa, akati: “Ngowapi mupango wokutanga kwoiri yese?” Jesu wakapingura kuti: “Wokutanga unoti: Izwai, A, Israeri; Jehovha Mwari wedu ndi Mwari umwe; newe unozomuda Mambo Mwari wako ngo mwoyo wako wese, ngo mweya wako wese, ngokuziva kwako kwese, ngo simba rako rese. No wochipiri ngo uwu, Unozomuda muvakihwana wako kudari ngo kujida kwako iwewe akuna mupango wakapinda kukura kuno iyi.” No mutari wakati kwaari: “Wanasa kuvereketa Mujijisi, wavereketa gwinyiso kuti uripo Mwari umwe, akuna umwenizve ngo kunja kwake; no kumuda ngo mwoyo wese, ngo kuziva kwese, ngo simba rese, no kumuda muvakihwana wako kudari ngo kujida kwako iwewe kunopinda kakurutu midiro yo kupisa no mibairo yese.” Naapo Jesu avona kuti wapingura ngo kuziva, wakati kwaari: “Iwewe auripi ndhambo akadi kuno Umambo hwa Mwari.” Sure kwo izvi apana waishinga kumubvunjisazve chiro. Jesu echijijisa mu themperi wakati: “Vatari vanonanga ngenyi kuti Kristu uri mwana wa Dhavhidha? Dhavhidha wambhwine ari mu mweya Wakachena wakati, Jehovha wakati kuna Mambo wangu, Gara ngo kumuho kwangu, mbhera ndiite vakorore vako chitambarariro cho tshoka jako. Dhavhidha wambhwine unomudanija kuti Mambo, ndizvo uri mwana wake ngo njirenyi?” No uzhinji hwo vandhu vakamuzwa ngo kudakara. Mukujijisa kwake wakati: “Ngwaranyi vatari, avo vanodisisa kufamba vakasimira nguvo jakareba, no kuchungamijwa mundau jo musika, no zvigaro zvo pamberi mu nyumba jo kudira, no ndau jo pamberi mu madhiri. Avo vanochakata nyumba jo shirikaji, vechirebesa kukumbira ngo chakwenye vanozoashira kurashwa kwakanyanyisa kukura.” Wakagara pasi phedo po bhokisi ro zvipo, wakaringisisa mapiro ombungano mare mubhokisi ro zvipo; no vazhinji vayiva no pfuma vakadiremwo yakawanda. Kwakaguma shirikaji yaiva murombo yakadira apo zviguhwa zviviri zvo mare, izvo zvinoita mupeni umwe. Wakadanija kwaari vajiji vake, wakati kwavari: “Ngozvirokwazvo ndinoti kwomuri, iyi shirikaji iri murombo yapa kupinda avo vese vapa mubhokisi ro zvipo. Ngokuti avo vese vapa ngo uwandu hwo pfuma yavo; asi iyo mukutama kwayo yapa zvese zvoyaiva nazvo, eya, zvese zvoinopona ndizvo.” Echibuda kubva mu themperi umwe wo vajiji vake wakati kwaari: “Mujijisi, ringirayi kuseja kwo mapuwe aya, no kuseja kwo nyumba jakadari!” Jesu wakati kwaari: “Unovona here iji nyumba jakakura? Akuzosari buwe rimwe panyezuru pobuwe rimweni risikazowiswi pasi.” Naagara pa dundhu ro Maorivhe wakayita maringwa no themperi, Pedru na Jakobe na Johani na Andreu vakamubvunjisa vari vega, vakati: “Tibvunjei kuti izvi zvinozoitika rini? Nokuti ngochapi chivoniso chinotatija kuti izvi zviro zvoda kuitika?” Jesu wakatanga kuvabvunja, echiti: “Ngwaranyi kuti musazopaukiswa ngo mundhu pikija ndiyani.” Ngokuti vazhinji vanozoviya ngo zina rangu, vechiti: “Ndini Kristu; navo vanozopaukisa vazhinji. Naapo mwoozwa ngo imbi no marehwarehwa oimbi, musazokakaseka; izvi zvinosisira kuti zviyitike; asi magumo aasati aguma. Ngokuti jinja rinozomukirana no jinja, no umambo hunozomukirana no umambo; kunozovapo kuzungunyika kwo nyika ku ndau jakaparajana; kunozovapo njara. Izvi zviri zvokutanga kwo matambujiko. Asi jingwarirenyi imwimwi pachenyu ngokuti vanozomupira mubangano, nemwi munozorohwa mu nyumba jo kudira javo; munozoima pamberi po vatongi no majimambo ngo ndava yangu, kuyita chapupu kwavari. No vhangeri rinozochumaihwa kutanga ku majinja ese: Naapo vanozomukweva, vechimupira mukutongwa, musazodembatemba ngo pamberi kuti munozovereketenyi, ngokuti kunozopuwa kwomuri ngo nguva iyo icho chomunozovereketa; ngokuti andimwipi munozovereketa, asi ndi Mweya Wakachena. Nyavanji vanozopira munukuna kuti aurawe, na baba unozopira mwana; no vana vanozomukira vabari, nokuyita kuti vaurawe. Nemwi munozonyenywa ndivo vese ngo ndava yo zina rangu; asi iye unozoshingirira mbhera ku magumo unozoponeswa.” “Naapo mwoozovona chinyangajo chinoparaja chechiyima apo pochisikasisiri (uwo unojija ngaazwisise) avo vari mu Judhiya ngavatizire ku matundhu. No uwo uri panyezuru po nyumba asazobzuka, nokuti kunghwina kutora chiro pikija chirichese mu nyumba mwake. No uwo uri mu munda asazohwirira sure kootora jira rake. Asi ikhombo kwavari vano mimba, naavo vanomwisa ngaao mazuva! Nemwi kumbiranyi kuti zvisazoita ngo mukuvo wo shipepo. Ngokuti ngaao mazuva kunozovapo kutambujika kukuru, ukwo kusikazivi kumbovapo kwakadaro kubvira kwo kutanga kwo kusikwa, kwaakasika Mwari, mbhera zvino, akuchatongozoitikizve kwakadaro. Kudari Mambo asikazivi kufupisa mazuva ao, akusaizova no nyama ingaponeswa; asi ngo ndava yaavo vakatsananguhwa ao mazuva anozofupiswa. Naapo kudari aripo mundhu unozoti kwomuri: Vonanyi, Kristu uri pano, nokuti, ringiranyi, uri apo! Musazozvitenda. Ngokuti vanozovapo vakristu vokunyepa, no vaprofeti vokunyepa, navo vanozoita zvivoniso no zvishamiso, kupaukisa vakatsananguhwa kudari zvichikwanisika. Asi ngwaranyi; vonanyi, ndamubvunja zvese ngo pamberi.” “ Asi ngaao mazuva, ngosure kwo kutambujika ukwo, zuva rinozoita chidima, no mweji auzojeki, no ndhondo jinozowa kubva mu gore, no simba rese ro mu denga rinozozungunyiswa. Naapo vanozovona Mwana wo Mundhu echiviya mu makore uno simba guru no uthende. Naapo unozotuma ngirosi jake, unozounganija vakatsananguhwa vake kubva ku marutivi marongomuna, kubvira ku magumo onyika mbhera kuguma ku magumo odenga.” “Jijanyi muezaniso wo mukuyu: Apo davi rawo ro vhikitira robudisa masakani aro, munoziva kuti chirimo chaa phedo. Nemwivo ngokudaro, apo mwoovona izvi zvechiitika, munozoziva kuti iye ari phedo, eya pa misuvo. Ngozvirokwazvo ndinoti kwomuri, kuti, uwu mubarihwana auzopindi izvi zvese zvisati zvaitika. Denga no nyika zvinozopinda, asi mazwi angu aatongozopindi.” “Asi ngo ndava yo zuva iro no nguva iyo, apana no umwe unozviziva, pikija ngirosi jo mu gore, asi ndi Baba ega. Ngwaranyi, murinde, ngokuti imwimwi amuzivi nguva iyo. Kwakadari ngo mundhu echida kufamba kuenda ku nyika imweni, iye wakasiya nyumba yake, wakapa varanda vake simba, kuna umwe na umwe mushando wake, wakapangazve murindi wo pamusuvo kuti arinde. Ndizvo rindanyi; ngokuti imwimwi amuzivi kuti muno wo nyumba unoguma rini, dangani zuva rabira nokuti pakati po usiku, nokuti ngo kurira kwo jongwe, nokuti mangwanani. Kuti pamweni echiguma ngo kukasira iye amuwane mwakavata. No icho chondinonanga kwomuri, ndinochinanga kwavari vese: Rindanyi.” Kwayinga kwasara mazuva maviri kuti zuva ro Phasika no mushongano wo kuha zvimanda zvisina mumera rigume. No vapristi vakuru no vatari vakapshaka kuti vangamuita mabatirenyi ngo urimbwi, vamuuraye; ngokuti vakati: “Haiwa ngo pakati po mushongano wo kuha, ngokuti pamweni kungazoita bope pakati po vandhu.” Apo achiri mu Bhetani mu nyumba ya Simoni wayiva no mapere, naakagara panokuha, jimayi rayiva no chimujiyo cho aribhastera cho mafuta onardhi anodhura kakurutu; rakachiphwanya, roadururira mu musoro mwake. Asi kwayivapo vamweni vakatikuti vakachamwa pakati pavo, vechiti: “Kwaitihwenyi uku kurashwa kwo mafuta? Ngokuti aya mafuta aizotengeswa ngo madhenariyo anoita mazana matatu (300), apuwe varombo.” Vakarin'un'utira. Asi Jesu wakati: “Riregerenyi; munoritambujirenyi? Raita mushando wakanaka kwendiri. Ngokuti munavo varombo nguva jese, naapo mwechida mungayita zvakanaka kwavari; asi inini andizovi nemwi nguva jese. Raita icho cheraikona; razoja muviri wangu usati wachihwa. Ngozvirokwazvo ndinoti kwomuri, nokuti ngepari apo porinozochumihwa vhangeri mu nyika jese no ichi choraita iri jimayi chinozoteketeswa kuyita chicherechejiso kweriri.” Judhasi Isikariyoti umwe wevari gumi na vaviri, wakaenda ku vapristi vakuru, kuti amupire kwavari. Navo, apo vazwa vakadakara, vakagondisa kumupa mare. Naye wakapshaka nguva kwayo yokuti amupire. Ngo zuva rokutanga rokuha zvimanda zvisina mumera, apo vechibaira Phasika, vajiji vake vakati kwaari: “Unoda kuti tiende kwapi kwoonasirira kuti uhe Phasika?” Naye wakatuma vaviri vo vajiji vake, wakati kwavari: Endanyi mu dhoropa, unozosongana nemwi mwanarume wakatwara mbende yo kumwa; muteverenyi; naapo paanozonghwina munozoti kumune wo nyumba: Mujijisi unoti: “Ririkwapi berere rangu ro vaeni, apo pondinozoha Phasika no vajiji vangu? Naye ambwine unozomutatijira berere guru ro muturika rakanasirihwa ndizvo zvese; naapo munozotinasirira.” No vajiji avo vakabuda kuenda, vakaguma ku dhoropa, vakavona kudari ngozvaakananga kwavari, navo vakanasirira Phasika. Kwakati kwooyita madekoni wakaguma nevanegumi na vaviri. No vakagara pa thafura vechiha, Jesu wakati: “Ngozvirokwazvo ndinoti kwomuri kuti umwe wenyu unozondipira, uwo anoha neni.” Navo vakatanga kutambujika, vechiti kwaari umwe nga umwe kuti: “Ndini here?” Wakati kwavari: Ndiumwe wo vari gumi na vaviri, uwo anoseva neni mundiro. Ngokuti Mwana wo Mundhu unoenda kudari ngo zvozvakatahwa ndiye, asi ikhombo kwaari mundhuwo Mwana wo Mundhu waanozopihwa ndiye! Kwayiva kwakanaka kwaari mundhuwo kuti kudari asakabahwa. Vachiha wakatora chimanda, wakabonga; wakachigura, akavapa, akati: “Toranyi, ichi muhe chiri muviri wangu.” Wakatora mukheyo naapo abonga, wakaupa kwavari, navo vakamwa vese ndiwo. Naye wakati kwavari: “Iyi iri ngazi yangu yo chitenderano chipsha, iyo inoparajwa ngo ndava yo vazhinji. Ngozvirokwazvo ndinoti kwomuri, kuti, andichazomwi michero yo mivhini mbhera kuzuva iro rondinozomwa ibza mu Umambo hwa Mwari.” Naapo vaimba nduyo vakabuda kuenda ku dundhu ro Maorivhe. Jesu wakati kwavari: Mwese munozopsheruka, ngokuti kwakatahwa, kuti: “Ndinozorova muhavisi, no mabvuta anozoparajika. Asi ngosure kwo kumuswa kwangu ndinozoenda pamberi penyu mu Garire.” Asi Pedru wakati kwaari: “Pikija vese vechizopsheruka, asi haiwa inini.” Jesu wakati kwaari: “Ngozvirokwazvo ndinoti kwouri, kuti: Iwewe nyamasi, ngo usiku uhwu jongwe risati rarira kaviri, unozondiramba katatu.” Asi iye wakavereketa ngo simba guru, echiti: “Pikija ndechizofa newe, andizokurambi akadi.” Navo vese vakadarovo. Vakaguma ku ndau inozwi Getsemani, naye wakati ku vajiji vake: “Garanyi pano apo ndichakumbira.” Wakatora naye Pedru na Jakobe na Johani, wakatanga kukaruka no kutambujika kakurutu. Wakati kwavari: “Mweya wangu unotambujika kakurutu mbhera mukufa; garanyi pano, murinde.” Naye wakaenda mberi kadodoko, akawa pasi pamavhu, akakumbira kuti kudari zvingaitika kuti nguva iyi ipinde kubva kwaari. Wakati: “Abha, Baba, zvese zvinoitika kwouri; bvisa uwu mukheyo kubva kwendiri, asi kusaita kuda kwangu, asi kuda kwako.” Wakaviya, akavawana vakavata, wakati kuna Pedru: “Simoni, wavata here? Inga usikakoni here kuti urinde nguva imwe neni? Rindanyi mukumbire, kuti musanghwina mukuejwa; ngo gwinyiso mweya unotenda asi nyama aina simba.” Wakahwirirazve, akakumbira, echivereketa mazwi ndiwo-ndiwo. Naaviyazve wakawana vakavata, ngokuti majiso avo inga echirema, navo avazivi kuziva chokumupingura. Wakaviya ngo kwo chitatu, akati kwavari: “Chivatanyi zvino, muzorore. Zvakwana; nguva yaguma, vonanyi; Mwana wo Mundhu unopihwa mu nyara jo vashaishi. Mukanyi, tiende: Vonanyi uwo unondipira waa phedo.” Paripo, achivereketa, Judhasi wakaguma, umwe wo vari gumi na vaviri, ano mbungano naye, ine shoti no nduku, vechibva ku vapristi vakuru no vatari no vakuru. Zvino iye wayinga akavapa chitatijiro echiti: “Uwo wondinozochungamija ngo muromo, ndiye. Mubatenyi mumukweve ngo kungwaririka.” Naapo waguma, paripo wakaviya kwaari, akati: “Rabhi”, naye wakamuchungamija ngo muromo. Navo vakamubata ngo nyara javo vakamutora. Asi umwe wakatikuti wo avo vaiyima apo wakavhomora shoti yake, wakatema muranda wo mupristi mukuru akagura njeve yake. Jesu wakapingura, akati kwavari: “Mwabuda kundibata here kudari ngo vanoambana no jongoni, muno shoti no nduku? Ndayinga ndinemwi mazuva ese mu themperi ndechijijisa, nemwi amuzivi kundibata; asi ichi chinoitika kuti zvakatahwa zvizarisike.” Navo vese vakamusiya, vakatiza. Jaha rakatikuti rakamutevera, rayiva no jira ro kuchena rakariti kupekupe pa muviri waro, rayiva mutitini: Navo vakaribata; asi iro rakasiya jira ro kuchena, rikatiza mitu. Navo vakamukweva Jesu kuenda naye ku mupristi mukuru, Kwakaungana pamwepo vapristi vakuru vese, no vakuru no vatari. Pedru inga echimutevera ari ngo ndhambo, mbhera wakaguma mukati muruvanje mo mupristi mukuru; naye wakagara no vangwariri kukota muriro. Zvino vapristi vakuru no madhodha ese vakapshaka chapupu ndi Jesu kuti vamuuraye; avazivi kuchiwana. Ngokuti vazhinji vakavereketa chapupu cho kunyepa ndiye, no uchapupu hwavo ahuzivi kutenderana. Kwakamuka vamweni vakatikuti, vakayita chapupu cho kunyepa ndiye, vechiti: Takamuzwa echiti: Ndinozophwanya iri themperi rakavakiwa ngo nyara, na ngo mazuva matatu ndinozovaka rimweni risikavakwi ngo nyara jo vandhu. Pikija ngokudaro uchapupu hwavo ahuzivi kutenderana. No mupristi mukuru wakayima pakati pavo, wakamubvunjisa Jesu, echiti: “Aupinguri chiro here? Chinyi ichi cho vanopupura ava ndiwe?” Asi iye wakanyarara, aazivi kupingura chiro. Mupristi mukuru wakamubvunjisazve echiti kwaari: “Iwewe uri Kristu here, Mwana wa Mwari wo Uwo Unomuchena?” Jesu wakati: “Ndiri iye; nemwi munozovona Mwana wo Mundhu wakagara ngo kumuho kwo Unosimba, echiviya mu makore wo mu gore.” No mupristi mukuru wakamwesa machira ake, echiti: “Tichatamirenyi zvapupu? Mwazwa kutuka kwake; munoti kudini?” Navo vese vakagura kuti unosisira kufa. Vamweni vakatanga kumupfirira mata, no kufukija hope yake, no kumupambhaja, no kunanga kwaari, kuti: Profeta. No ndhumwa jakamuashira ngo kumupambhaja ngo nyara. Naapo Pedru ari ngo pasi paruvanje, kwakaviya kwaari umwe wevasikana vo mupristi mukuru; naye echivona Pedru echikota muriro wakamuringira, wakati: “Iwewe newe wayiva na Jesu wo Nazaretha.” Asi iye wakakanija, echiti: “Andizivi, andizwisisi kuti unonangenyi.” Naye wakabuda kuenda kuruvanje pamusuvo, no jongwe rakarira. No musikana uwo wakamuvona, wakatangazve kuvereketa kuna avo vayimapo: “Uwu uri umwe wavo.” Asi iye wakakanijazve. Ngosure kwo chimukuvo avo vayimapo vakatizve kuna Pedru: “Ngo gwinyiso iwewe uri umwe wavo, ngokuti uri mu Garire.” Asi iye wakatanga kutuka no kupika, echiti: “Andimuzivi uwu mundhu wo munovereketa ndiye.” Paripo ngo kukasira jongwe rakarira ngo kwo chipiri. Na Pedru wakacherecheja izwi raakavereketa Jesu kwaari, rokuti: Jongwe risati rarira kaviri unozondikanija katatu. Naapo akarakaja ngo izvo, wakachema. Paripo ngo cho mangwanani vapristi vakuru pamwepo no vakuru no vatari, no makota ese, vakapangana, vakamusunga Jesu, vakamutora, vakamupira kuna Piratu. Piratu wakamubvunjisa, echiti: “Iwewe uri mambo wo vajudha here?” Asi iye wakapingura, akati kwaari: “Watonanga.” No vapristi vakuru vakamuitira ndava jakawanda. Piratu wakamubvunjisazve, echiti: “Aupinguri chiro here? Ringira kuwanda kwo ndava jovanokuitira.” Asi Jesu aazivi kuzopingurazve; kwokuti Piratu wakashamiswa. Zvino ku mushongano wo kuha waindovasunungurira musungwa umwe uwo wo vaizokumbira. Pakati po vasungwa paiva no umwe waizwi Bharabhasi uwo wakasungwa pamwepo naavo vayinga vakamukira, avo mukumukira kwavo vakauraya mundhu. No mbungano yechikwireyo, yakatanga kukumbira kuti avaitire kudari ngo chirovejeso chake kwavari. Piratu wakapingura kwavari, echiti: “Munoda here kuti ndimusunungurire mambo wo vajudha?” Ngokuti wakaziva kuti vapristi vakuru vayinga vamupira ngo ndava yo ndurumwa. Asi vapristi vakuru vakakurumijira mbungano kuti avasunungurire Bharabhasi. Piratu wakapingurazve, akati kwavari: “Ndizvo ndinozoitenyi kwaari uwo womunoti, ndi Mambo wo vajudha?” Navo vakamimazve, vechiti: “Mukohomere.” Piratu wakati kwavari: “Ngenyi? Ichinyi chakashata chaakaita?” Asi vakamima zvikuru, vechiti: “Mukohomere.” Na Piratu echida kudakajisa mbungano wakavasunungurira Bharabhasi, wakavapa Jesu, ambomurova, kuti akohomehwe. Masocha, akamukweva kuenda mukati mwo dare, umwo muri mu ngome; akakoka pamwepo chikwata chese cho masocha. Nao akamusimija jira rakapshuka, akapomba junguja ro minzwa, akaridira musoro mwake; akatanga kumuchungamija, echiti: “Changamire, Mambo wo vajudha!” Akamurova musoro ngo njanga, akamupfirira mata, akagwadama ngo makokobvi ao, akamudira. Naapo vamuyitira jee, vakakhumura kwaari jira rakapshuka, vakamusimija zvokusimira zvake. Navo vakamukweva kuenda naye kunja kwoomukohomera. Navo vakavangijira umwe waipinda ngaapo Simoni wo Kureni, echibva mundharaunda, baba wa Arixandreu na Rufu, kuti atware muchinjiko wake. Vakamutora kuenda naye ku ndau inozwi Gorogota, iyo inozwi ngo kukumuchwa, ndau yo Dendhenya. Navo vakamupa vhini rakavhengwa no mure, asi iye aazivi kuriashira. Vakamukohomera, vakapaurirana zvokusimira zvake pakati pavo, vechiringijira hakata kuvona kuti umwe ngaumwe ungatorenyi. Kwayiva nguva yochitatu, yo vakamukohomera. No tshamba yo ndava yake yakatahwa panyezuru, kuti: “MAMBO WO VAJUDHA.” Pamwepo naye kwakakohomehwa majongoni maviri, rimwe ngo kumuho, no rimweni ngo kuboshwe kwake. No matahwa akazarisika awo anoti: Wakaverengwa pamwepo no vapauki. Naavo vaipinda ngaapo vaimutuka, vechidungwaira musoro yavo, vechiti: “Ehee! Iwewe unoparaja themperi no kurivaka ngo mazuva matatu, jiponese, ubzuke kubva pa muchinjiko.” Vakadarovo vapristi vakuru vechimuitira jee pakati pavo, no vatari, vechiti: “Wakaponesa vamweni, aangakoni kujiponesa. Ngaabzuke kubva pa muchinjiko, Kristu Mambo wa Israeri kuti tivone, titende.” Naavo vakakohomehwa naye vakamutukavo. Kubvira ngo nguva yo chitandhatu kwayivapo chidima mu nyika yese, mbhera nguva yo chipfumbamwe. Ngo nguva yo chipfumbamwe, Jesu wakadanijira ngo izwi guru, echiti: “Eloi, Eloi lama sabakatani?” Ukwo kunoti ngo kukumuchwa, Mwari wangu, Mwari wangu, wandisiya ngenyi? Vamweni vakatikuti veavo vayimapo vechimuzwa, vakati: “Vonanyi, unodanija Erija.” Umwe wakagogoma, wakazaja shiponji ngo vhini inoshasha, wakaidira panyezuru po njanga, wakamupa kuti amwe, echiti: “Regeranyi, tivone kuti Erija unoviya here koomubzusa.” Jesu wakadanijira ngo izwi guru, wakafa. No jira ro mu themperi rakaparuka ngo pakati, kubvira ngo panyezuru mbhera pasi. Apo nduna yo zana iyo yayima ngo phedo pake, yavona kuti wafa ngo kudaro yakati: “Ngo gwinyiso uwu wayiva Mwana wa Mwari.” Zve kwayivapo majimayi, vairingira vari ngo ndhambo, pakati pavo vayivapo Mariya Magadhareni, na Mariya mayi wa Jakobe mudoko, na Jose, na Sarome. Avo vakamutevera achiri mu Garire, vechimushandira; no majimayi amweni akawanda, ao vakakwira naye Jerusarema. Naapo kwooyita madekoni, ngokuti kwayiva kunasirira, ukwo kunoti, rayiva zuva rinotangira sabatha, Kwakaviya Josefa wo Arimatiya, gota raireremejwa, uwo naye ngokwake waigarira Umambo hwa Mwari, wakanghwina kuna Piratu ngo kushinga, wakakumbira kupuwa muviri wa Jesu. Piratu wakashamiswa kuti wayinga wafa, wakadanija kwaari nduna yo zana, wakaibvunjisa kuti watofa here? Naapo azwa ngo nduna yo zana kuti wafa, wakapa muviri wake kuna Josefa. Naye wakatenga jira ro kuchena, wakamubzusa pasi, wakamupukutira mujira ro kuchena wakamurajika mu guva rakatsetswa pa buwe; wakamburumbuja buwe pamusuvo wo guva. Na Mariya Magadhareni na Mariya mayi wa Jose vakavona apo paakarajikwa. Naapo sabatha rapinda, Mariya Magadhareni, na Mariya mayi wa Jakobe na Sarome, vakatenga mafuta okunuhira, kuti vaende vamuzoje. Mangwanani mavishi ngo zuva ro kutanga ro vhiki vakaguma ku guva zuva roobuda. Navo vaiti pakati pavo: “Ndiyani unozotimburumbujira buwe pamusuvo wo guva?” Navo varingira kuti pebvu vakavona kuti buwe rayinga ramburumbujwa; ngokuti rayinga rakakurisisa. Naapo vanghwina mu guva, vakavona murumbwana wakagara ngo kumuho, wakasimira nguvo yakachena, navo vakashamiswa. Naye wakati kwavari: “Musashamiswa, munomupshaka Jesu mu Nazaretha uwo wakakohomehwa. Wamuka, amuna muno; ringiranyi po vakamurajika! Asi endanyi mubvunje vajiji vake na Pedru, kuti; Anotanga kuenda pamberi penyu mu Garire, kudari ngozvaakavereketa kwomuri.” Navo vakabuda, vakatiza kubva pa guva; ngokuti vakagumihwa ngokuhuta no kushamiswa; navo avazivi kubvunja chiro ku mundhu ngokuti vaitya. Zvino apo wamuka mangwanani mavishi ngo zuva rokutanga ro vhiki, wakavoneka kutanga kuna Mariya Magadhareni, uwo wakabviswa mabzoka manomwe. Aye wakaenda, wakabvunja avo vayinga vanaye, vaichumba no kuchema. Navo vazwa kuti unopona, nokuti wayinga wavoneka ndiye, avazivi kutenda. Ngosure kwo izvi wakavoneka kuna vaviri vavo, uno chiyimo chimweni, vechifamba kuenda kundharaunda. Navo vakaenda, vakabvunja kuna vamweni, asi navozve avazivi kutenda. Ngosure wakavoneka kuna vane vari gumi na umwe wakagara pakuha; naye wakavavereketera ngokutama kutenda kwavo, no kupata kwo mwoyo yavo, ngokuti avazivi kutenda avo vayinga vamuvona ngosure wamuka kubva kwo vakafa. Naye wakati kwavari: “Endanyi mu nyika jese, muchumaire vhangeri kuna zvisikwa zvese. Iye unonditenda, wobhapatiswa, unozoponeswa; asi uwo usikatendi unozorashwa. No iyi mivoniso inozova navo vanotenda: Ngo zina rangu vanozombirimbija mabzoka, vanozovereketa ngo ndimi ipsha; vanozobata nyoka, pikija vechizomwa chinouraya, achitongozovaremaji; vanozodira nyara panyezuru po vanohwara navo vanozotambiswa.” Naapo Mambo Jesu, ngosure kokuvereketa navo, wakaashihwa mu gore, wakagara ngo kumuho wa Mwari. Navo vakaenda, vakachumaira ku ndau jese, Mambo echishanda pamwepo navo, echigwinyisa izwi ngo mivoniso yaiva navo. Ngokuti vazhinji vakaeja kurongeja tshamba ngo ndava yo izvo zvakaitika pakati pedu, kudari ngo zvotakapuwa ngaavo, kubvira mukutanga vayiva zvapupu zvo majiso, no vashandi vo izwi, kwakandinakira ininivo, apo ndayinga ndakaronda ngo kwakaperera zviro zvese kubvira mukutanga, kuti nditare kwouri ngo kutevererana, iwewe Tiyofiro mundhu kwaye; kuti uzive gwinyiso ro mazwi ao owakajijiswa. Kwayivapo ngo mazuva a Herodhi mambo wo Judhiya, mupristi wakatikuti, waizwi ndi Zakariya, wo chikwata cha Abhiya, no mukaji wake wayiva mwana wo vhumbo ra Aroni, no zina rake raizwi Erizabhetha. Navo vese vayiva vakarurama pamberi pa Mwari, vechingwarira mipango no zviemeso zvese zva Jehovha, vasina ndava. Navo inga vasina mwana, ngokuti Erizabhetha wayiva chumba, navo vayinga vaa harahwa. Kwakaitika apo echiita mushando wo upristi pamberi pa Mwari ngo kuteverera kwo chikwata chake, kudari ngo chirovejeso cho upristi, chikwata chake chayiva cho kunghwina mu themperi ra Jehovha, no kupisa mutombo uno gwema rakanaka. No mbungano yese yo vandhu yaikumbira ngo kunja ngo nguva yo kupisa mutombo uno gwema rakanaka. Kwakavoneka kwaari ngirosi ya Jehovha, yakayima ngo kumuho wo altari ro kupisira mutombo uno gwema rakanaka. Zakariya wakakakaseka ngo kuivona no kutya kwakamugumira. Asi ngirosi yakati kwaari: “Usatya, Zakariya: Ngokuti kukumbira kwako kwakazwika, no mukaji, wako Erizabhetha unozobereka mwana, newe unozodura zina rake, kuti; Johani. Newe unozodakara no kudakajihwa, no vazhinji vanozodakara ngo kubahwa kwake. Ngokuti iye unozoyita mukuru mukuvona kwa Jehovha, naye aazomwi vhini nokuti zvinorejeresa, naye unozozajwa ngo Mweya Wakachena, eya kubvira mu ndani ya mayi wake. Naye unozotenderujira vazhinji vo vana va Israeri kuna Jehovha Mwari wavo. Naye unozofamba pamberi po hope yake ngo mweya no simba ra Erija, kutenderujira mwoyo yo majibaba kune vana, no vasikapurukiri kuti vafambe mukungwara kwo vakarurama; kunasirira vandhu kuti vayite vakanasirihwa Jehovha.” Na Zakariya wakati kuna ngirosi: Ndinozoziva ngenyi ichi? Ngokuti ndaaharahwa, no mukaji wangu waaharahwa yo makore mazhinji. No ngirosi yakamupingura yechiti kwaari: “Ndiri Gabhurieri, uwo unoyima pamberi pa Mwari, neni ndatumwa kuti ndiverekete kwouri, no kukuzisira aya masoko akanaka. Vonayi, unozoyita mbeveve usikakoni kuvereketa mbhera rigume zuva iro ro zvinozoitika izvi, ngokuti auzivi kugonda mazwi angu, ao anozoitika ngo nguva yao.” No vandhu vaimugarira Zakariya vakashama ngo kunonoka kwake mu themperi. Naapo abuda inga asikakoni kuvereketa kwavari; navo vakaziva kuti iye wayinga avona chivoniso ari mu themperi. Naye wakavereketa kwavari ngo nyara, wogara ari mbeveve. Kwakaitika mazuva okushandira kwake apera, wakaenda kanyi kwake. Ngosure kwo mazuva ao mukaji wake Erizabhetha wakayita mimba; naye wakajifisha mweji mushanu, echiti: “Zvakadaro Jehovha wakayita ichi kwendiri ngo mazuva ao aakandiringira ndiwo, kuti abvise nyowa jangu pakati po vandhu.” Zvino ngo mweji wo chitandhatu ngirosi Gabhurieri yakatumwa kubva kuna Mwari kuenda ku dhoropa ro Garire, raizwi Nazaretha, mbhandwe yayinga yakaemesehwa mundhu zina rake ndi Josefa, wo vhumbo ra Dhavhidha; no zina ro mbhandwe iyo raizwi ndi Mariya. Nayo yakanghwina kwaari, ikati: “Dakarai, iwewe wawana nyasha, Jehovha unewe.” Asi iye wakakakaseka kukuru ngo kuvereketa kwayo, wakarangarija kuti kuchungamija uku kunorevenyi. No ngirosi yakati kwaari: “Usatya Mariya, ngokuti iwewe wawana nyasha kuna Mwari. Vonayi, unozova no mimba, newe unozobereka mwana, unozodura zina rake kuti Jesu. Naye unozoyita mukuru, unozozwi Mwana wo Uwo Uri panyezuru po zvese; na Jehovha Mwari unozomupa dendemaro ra baba wake Dhavhidha. Naye unozotonga nyumba ya Jakobe kunoti mbhera narini no umambo hwake ahutongozovi no magumo.” Mariya wakati kuno ngirosi: “Ichi chingaita maitirenyi ndisikazivi kusongana no mwanarume?” Ngirosi yakapingura, ikati kwaari: “Mweya Wakachena unozoviya panyezuru pako, no simba ro Uwo Uri panyezuru po zvese rinozofukijira panyezuru pako, ndizvo uwo unozoberekwa unozozwi Wakachena, Mwana wa Mwari. Vonayi, Erizabhetha hama yako, ina mimba yo mwana apo waaharahwa, no uwu waamweji wo chitandhatu kwaari, iye waizwi kuti uri chumba. Ngokuti kuna Mwari apana chinokonereka.” Na Mariya wakati: “Vonayi, murandakaji wa Jehovha; ngakuitike kwendiri kudari ngo izwi rako.” No ngirosi yakabva kwaari. Na Mariya wakamuka ngaao mazuva, wakaenda ngokukasira ku nyika yo zvimatundhu, ku guta rakatikuti ro Judhiya. Naye wakanghwina mu nyumba ya Zakariya, wakachungamija Erizabhetha. Kwakaitika apo Erizabhetha azwa kuchungamija kwa Mariya, mwana wakanyanduka mu ndani mwake; na Erizabhetha wakazajwa ngo Mweya Wakachena. Naye wakadanijira ngo izwi guru, echiti: “Unomuchena iwewe pakati po vanakaji; unomuchenazve uwo unozoberekwa mu ndani mwako. Chaitika ngenyi ichi kwendiri, kuti mayi wa Mambo wangu aviye kwendiri? Ngokuti, vonayi, apo izwi ro kuchungamija kwako razwika munjeve jangu, mwana wakanyanduka mu ndani mwangu ngo kudakara. Unomuchena uwo unotenda, ngokuti kunozovapo kuitika kwo izvo zvakavereketwa kwaari zvechibva kuna Mambo.” Mariya wakati: “Mweya wangu unokurisa Jehovha; no Mweya wangu unodakara kukuru kuna Mwari Muponesi wangu. Ngokuti, iye wakaringira hudodoko hwo murandakaji wake. Ngokuti, ringira, kubvira zvino yese mibarihwana, inozondiverenga kuti ndino muchena. Ngokuti uwo uno simba wakayita zvikuru kwendiri, no zina rake riri rakachena. No kukungurira kwake kuri panyezuru pavo vanomutya, kubvira ku mubarihwana kuenda ku mubarihwana. Iye wakapangijira simba rake ngo mukono wake; wakaparaja avo vanojikuja ngo kurangarija kwo mwoyo yavo. Wakabzusa pasi vano simba kubva pa madendemaro avo, akakurisa avo vari pasi, wakagutisa avo vano njara ngo zvakanaka; wakaendesa maguruja asina chiro. Iye wakadetsera muranda wake Israeri, kuti acherecheje kukungurira kwake, kudari ngo zvaakavereketa kuna majibaba edu, kuna Abrahama no kujinja rake nokuti mbhera narini.” Na Mariya wakagara naye kunonga mweji mutatu, naye wakahwirira kanyi kwake. Zvino mukuvo wa Erizabhetha wakaguma wokuti abare, naye wakabara mwana wo rume. No vavakihwana vake no hama jake vakazwa kuti Jehovha wayinga wakurisa nyasha jake kwaari; navo vakadakara pamwepo naye. Kwakaitika ngo zuva ro chisere kuti vakaviya kuzocheka mwana; navo vaida kumudura zina kuti ndi Zakariya, kudari ngo zina ra baba wake. Na mayi wake vakapingura vakati: “Haiwa; asi unozoduhwa kuti Johani.” Navo vakati kwaari: “Apana umwe wo hama jenyu wakamboduhwa ngo zina iri.” Navo vakabvunjisa kuna baba wake ngo zvivoniso vazwe kuti ungada kuti aduhwe kudini. Naye wakakumbira tshamba yo kutarirepo, wakatara kuti, zina rake ndi Johani. Navo vese vakashamiswa. Paripo muromo wake wakabewuhwa, no rurimi rwake hwakasunungurwa, naye wakavereketa echikuja Mwari. No kutya kwakagumira paavo vese vaigara phedo pavo: No masoko oizvi akatokoteswa mu nyika yese yo zvimatundhu zvo Judhiya. Navo vese vakazvizwa vakazvingwarira mu mwoyo yavo, vechiti: “Uwu unozoyita mwana wakadini?” Ngokuti nyara ya Jehovha yayiva naye. Na baba wake Zakariya wakazariswa ngo Mweya Wakachena, naye wakaprofeta, echiti: “Unomuchena Jehovha Mwari wa Israeri, ngokuti iye wakafambira no kuripira vandhu vake. Naye wakatimusira runyanga rwo ruponeso kwetiri, mu nyumba yo muranda wake Dhavhidha. (Kudari ngo zvaakavereketa ngo muromo wo vaprofeti, vakacheneswa vake vokare). Kuponeswa kubva ku vakorore vedu, no kubva ku nyara jo avo vese vanotinyenya. Kupangijira nyasha kuno majibaba edu, no kucherecheja chitenderano chake chakachena; mbhiko iyo yaakapika kuna baba wedu Abrahama, yokuti isisu, techinunurihwa kubva mu nyara yo vakorore vedu, timushandire tisina chokutya, mukucheneswa no mukururama pamberi pake, ese mazuva okurarama kwedu. Eya na iwewe mwana unozozwi uri muprofeti wo Uwo Uri panyezuru po zvese; ngokuti iwewe unozofamba pamberi po hope ya Jehovha kunasirira njira jake; kupa ku vandhu vake kuziva kwo ruponeso, ngo kuregerehwa kwo zvishaishi zvavo. Ngo ndava yo upfavi hwo nyasha ja Mwari wedu, ngo ndava yajo kueja kwo zuva kunobva mu gore kunozotifambira. Kujeka panyezuru paavo vanogara muchidima no mubvute ro kufa; kutungamirira tshoka jedu mu njira yo kunyarara.” No mwana wakakura, wakagwinyiswa mu mweya, wayiva mu bani mbhera ro guma zuva ro kupangijihwa kwake kuna va Israeri. Kwakaitika ngaao mazuva, wakabuda mupango wechibva kuna Khesari Agustu wokuti nyika yese itarihwe mazina. No uku kutarihwa kwayiva kwo kutanga kwakaitika apo Kureniyo ari mutongi wo Siriya. Navo vese vakaenda kwootarihwa, mundhu wese ku dhoropa raakabarihwa. Na Josefavo wakakwira echibva Garire mu dhoropa ro Nazaretha, kuenda Judhiya, ku dhoropa ra Dhavhidha raizwi Bheterehema, ngokuti iye wayiva wo mbhuri yo vhumbo ra Dhavhidha; kuti atarihwe pamwepo na Mariya uwo wayiva mukaji wake, iye wayinga wakurihwa ngo mimba. Kwakaitika vachiri apo, kuti mazuva akapera okuti abare. Naye wakabara dangwe rake ro rume; naye wakamupukutira ngo jira, wakamurajika muchijiyo cho n'ombe, ngokuti inga kusina ndau yavo mu nyumba yo vaeni. Kwayivapo vahavisi munyikeyo, vaigara mushango, vechingwarira mushambi wavo usiku. No ngirosi ya Jehovha yakayima phedo pavo, no uthende hwa Jehovha hwakajeka kuvatendeneja; navo vakatya kakurutu. No ngirosi yakati kwavari: “Musatya, ngokuti vonanyi ndinomuzisira masoko akanaka, anodakajisa kakurutu, ao ari ovandhu vese. Ngokuti mwabarihwa nyamasi muguta ra Dhavhidha Muponesi ndi Kristu Mambo. No ichi chinozoita chivoniso kwomuri, kuti: Munozovona ruchiya rwakapukutihwa ngo jira rwakarajikwa muchijiyo cho n'ombe.” Paripo yaivapo no ngirosi mbungano huru yo hondo yo mu gore, yechikuja Mwari, yechiti: “Ngaakujwe Mwari mu denga-denga, no kunyarara mu nyika pakati po vandhu, avo vaanonasa kudakara ndivo.” Kwakaitika apo ngirosi jaenda mu gore kubva kwavari, vahavisi vakati umwe kwo umweni: “Ngatiende zvino Bheterehema, toovona ichi chaitika, chaazivisa Mambo kwetiri.” Navo vakaviya ngo kukasira, vakavavona vese Mariya na Josefa no ruchiya rwakarajikwa muchijiyo cho n'ombe. Kwakati vauvona vakazivisa masoko ao akavereketwa kwavari ngo ndava yo mwana uwu. Navo vese vakazwa vakashamiswa ngo izvo zvovakabvunjwa ngo vahavisi. Asi Mariya wakangwarira izvi zvese, echizvichengetesa mu mwoyo mwake. No vahavisi vakahwirira, vechikurisa no kukuja Mwari ngo izvo zvese zvovakazwa, no zvovakavona, kudari ngo zvakavereketwa kwavari. Naapo mazuva masere apera okuti achekwe, vakamudura zina rake kuti Jesu, iro rakaduhwa ngo ngirosi isati yavapo mimba yake. Kwakati apera mazuva okucheneswa kwavo, kudari ngo mupango wa Mosi, vakakwira naye Jerusarema kuti vamupire kuna Jehovha, (kudari ngo zvakatahwa mu mipango ya Jehovha, kuti: Vana vorume vese vari matangwe vanozozwi vakachena kuna Jehovha). No kupa mudiro kudari ngo zvakanangwa mu mipango ya Jehovha, wo magovora maviri, nokuti mapwipwi maviri onjiva. Vonanyi, kwayivapo mundhu mu Jerusarema zina rake raizwi ndi Simiyoni, no mundhu uwu wayiva wakarurama, no waidira Mwari, echigarira kuembezehwa kwa Israeri; no Mweya Wakachena vayiva panyezuru pake. Nakwo kwakapangijihwa kwaari ngo Mweya Wakachena, kuti, aatongozofi asati avona Kristu wa Jehovha. Echikweviwa ngo Mweya wakaviya mu themperi; naapo vabari vakamuzisa mwana Jesu, kuti vayite kwaari kudari ngo chirovejeso cho mupango, naye wakamutakura mu mukono yake, wakakuja Mwari, echiti: “Mambo, zvino tendera kuti muranda wako aende ngo kunyarara, kudari ngo izwi rako, ngokuti majiso angu avona ruponeso rwako. Uhwo hwo wakanasirira pamberi po hope yo vandhu vese; kujeka ukwo kunopangijira ku majinja, kuri uthendezve hwo vandhu vako Israeri.” Baba wake na mayi wake vakashamiswa ngo izvo zvakavereketwa ngo ndava yake. Na Simiyoni wakavadakajisa, wakati kuna mayi wake Mariya: “Vonayi, mwana uwu wakaemesehwa kuwa no kumukazve kwo vazhinji mu Israeri; no kuyitazve chivoniso chinorambwa. (Eya no shoti inozobaya mweya wako); kuti murangarijo yo mwoyo mizhinji ivoniswe.” Kwayivapozve Ana muprofeti wokaji mwana wa Fanueri wo jinja ra Aseri, wayinga waaharahwa, iye wayinga akagara no mwamuna makore ari manomwe sure kwo husikana hwake. Naye wayiva shirikaji makore ari makumi masere na marongomuna, iye aazivi kutongobuda kubva mu themperi, echidira, no kuera kuha, no kukumbira usiku no masikati. Naye echiviya ngo nguva iyo wakabonga Mwari, wakavereketa ndiye kwavari vese vaigarira kuripihwa kwo Jerusarema. Naapo vayinga vaita zvese zviro kudari ngo mipango ya Jehovha vakahwirira Garire ku dhoropa ravo Nazaretha. No mwana wakakura, wakagwinya, uno ungwaru, no nyasha ja Mwari jaiva panyezuru pake. No vabari vake vakagara vechindoenda makore no makore Jerusarema ku mushongano wo kuha wo Phasika. Kwakati iye aano makore ari gumi na maviri, vakakwira kudari ngo chirovejeso cho kuenda ku mushongano wo kuha. Naapo vapeja mazuva awo voopetuka, murumbwana Jesu wakasara sure mu Jerusarema; no vabari vake avazivi kuzviziva. Asi vechirangarija kuti uri mukati mwo mbungano, vakafamba mumango wo zuva rimwe; navo vakamupshaka mukati mwo hama javo no shamwari javo, naapo vasikamuwani, vakahwirira Jerusarema, vechimupshaka. Kwakaitika ngosure kwo mazuva matatu, vakamuwana ari mu themperi, akagara mukati mwemakurukota, echivazwa, no kuvabvunjisazve. Navo vese vakamuzwa vakashamiswa ngokuziva kwake, na ngo kupingura kwake. Kwakati vamuvona vakashamiswa: na mayi wake vakati kwaari: “Mwana watiitira chakadari ngenyi? Vonayi, baba wako neni takakupshaka tichisururika.” Naye wakati kwavari: “Mwaindipshaka ngenyi? Amuchaiziva here kuti kunosisira kuti ndiite zva baba wangu?” Navo avazivi kuzwisisa izwi iro raakavereketa kwavari. Naye wakabzuka navo, wakaguma Nazaretha, wakavapurukira; na mayi wake vakangwarira mazwi aya mu mwoyo mwavo. Na Jesu wakakura muungwaru, na ngo muviri, no mukudikanwa ndi Mwari no vandhu. Zvino ngo gore ro chigumi na mashanu ro kutonga kwa Tibheri Khesari, Pontio Piratu ari mutongi wo Judhiya na Herodhi ari mutungamiriri wo Garire, no munukuna wake Firipi ari mutungamiriri wo nyika yo Ituriya no yo Trakoniti, na Rusanio ari mutungamiriri wo Abhireni. Anasi na Kaifasi vari vapristi vakuru. Izwi ra Mwari rakazwika kuna Johani mwana wa Zakariya, ari mu bani. Naye wakaviya ku nyika yese inotendeneja Jordhani, echichumaira rubhapatiso rwo kutenderuka kwo kuregererwa kwo zvishaishi; kudari ngo zvakatahwa mu tshamba yo mazwi a Isaya muprofeti, kuti: “Izwi ro unodanijira mu bani, kuti: Nasiriranyi njira ya Mambo, rungamisanyi makwanja ake. Mapani ese anozozajwa, no matundhu ese no zvimatundhu zvinozobzuswa pasi; no zvakapeyama zvinorungamiswa, no njira jakaita marindi jinozonasirihwa; no vandhu vese vanozovona ruponeso rwa Mwari.” Ndizvo wakati ku vandhu avo vazhinji vakabuda kuviya kuzobhapatiswa ndiye: “Imwimwi mibarihwana yo mavhumbi, ndiyani wakamuzivisa kuti mutize ushungu hunoviya? Ndizvo baranyi michero inosisira kutenderuka, musatanga kukarakaja mukati mwenyu, kuti: Tina Abrahama baba wedu; ngokuti ndinoti kwomuri, kuti Mwari uno simba kumusira vana kuna Abrahama ngaaya mapuwe. Nazvino bheura ratodihwa pa muji jo miti; ndizvo miti yese isikabereki michero yakanaka inotemehwa pasi, no kukandihwa mu muriro.” No mbungano yakamubvunjisa, yechiti: “Ndizvo tinozoitenyi?” Naye wakapingura, akati kwavari: “Iye uno mabhachi maviri, ngaape uwo usina; no uwo uno zvokuha ngaaitevo kudaro.” No vashabisi vakaviyavo kuti vabhapatiswe, vakati kwaari: “Mujijisi isisuvo tinozoitenyi?” Wakati kwavari: “Musashabisa zviro kupinda izvo zvakaemesehwa kwomuri.” Masocha nawo akamubvunjisavo, akati: “Nesuvo tinozoitenyi?” Naye wakati kwavari: “Musazotorera mundhu chiro ngo simba, musazonyepejera, asi mwechikwaniswa ngo misharo yenyu.” Kwakati vandhu vachagarira, no vese vairangarira mu mwoyo mwavo ndi Johani, kuti pamweni iye wayiva Kristu; Johani wakapingura echiti kwavari vese: “Inini ngo zvirokwazvo ndinomubhapatisa ngo kumwa; asi unoviya uwo unondipinda ngo simba, uwo wondisikasisihwi no kusunungura rusinga wo magwada ake, unozomubhapatisa ngo Mweya Wakachena, no muriro. Uwo uno ruchero hwake mu nyara yake, kuti anase kupshaira chimbuwa chake, no kuunganija koroni mu nyumbu yake, asi unozoapisa ngo muriro usikajimi.” Wakachumaira ngo zviro zvimweni zvakawanda ku vandhu, echivapanga; asi Herodhi mutungamiriri arambijwa ndiye ngo ndava ya Herodhiasi mukaji wo munukuna wake, na ngo ndava yo zvese zvakashata zvaainga akaita Herodhi. Wakanyengejera ichi panyezuru pazvo zvese kuti wakamunghwinisa Johani mu guniya. Kwakaitika apo vandhu vese vakabhapatiswa na Jesu wakabhapatiswavo, achakumbira, denga rakabewuhwa, no Mweya Wakachena, uno muemo wakadari ngo njiva, wakabzuka panyezuru pake, no izwi, rakazwika rechibva mu gore rechiti: “Iwewe uri Mwana wangu, unodikana; wondinonasa kudakara ndiwe.” Jesu wakaamba kujijisa ano makore anonga makumi matatu, ari mwana wa Josefa, mukuvona kwo vandhu, uwo wayiva mwana wa Heri, mwana wa Matati, mwana wa Revhi mwana wa Mereki, mwana wa Jana, mwana wa Josefa, mwana wa Matatiasi, mwana wa Amosi, mwana wa Nahumi, mwana wa Esiri, mwana wa Nagai, mwana wa Mati, mwana wa Matatiasi, mwana wa Semeini, mwana wa Joseki, mwana wa Jodha, mwana wa Johanani, mwana wa Adhi, mwana wa Kosami, mwana wa Saratieri, mwana wa Narai, mwana wa Mereki, mwana wa Adhi, mwana wa Kosami, mwana wa Erimadhami, mwana wa Eri. Mwana wa Jesu, mwana wa Eriezeri, mwana Jorimi, mwana wa Matati, mwana wa Revhi, mwana wa Simeoni, mwana wa Judha, mwana wa Josefa, mwana wa Jonani, mwana wa Eriakimu. Mwana wa Merea, mwana wa Mena, mwana wa Matata, mwana wa Natani, mwana wa Dhavhidha, mwana wa Jesi, mwana wa Obhedhi, mwana wa Bhoazi, mwana wa Sarimoni, mwana wa Nasoni, mwana wa Aminadhabhi, mwana wa Arinini, mwana wa Esroni, mwana wa Faresi, mwana wa Judha, mwana wa Jakobe, mwana wa Isaka, mwana wa Abrahama, mwana wa Tera, mwana wa Nahori, mwana wa Serugi, mwana wa Ragao, mwana wa Fareki, mwana wa Hebheri, mwana wa Sara, mwana wa Kenani, mwana wa Arifakisadhi, mwana wa Shemi, mwana wa Noa, mwana wa Rameki, mwana wa Matusara, mwana wa Enoki, mwana wa Jaredhi, mwana wa Maharaeri, mwana wa Kenani. Mwana wa Enosi, mwana wa Seti, mwana wa Adhamu, mwana wa Mwari. Na Jesu azajwa ndi Mweya Wakachena, wakahwirira kubva Jordhani wakakwehwa ndi Mweya kuenda ku ndau iri. Wakapeja mazuva ari makumi marongomuna echiejwa ndi dhiyabhorosi, naye aazivi kuha chiro ngaao mazuva; kwakati apera, wakava no njara. Dhiyabhorosi wakati kwaari: “Kudari uri Mwana wa Mwari, nangai kuti buwe iri riite chimanda.” Jesu wakapingura, wakati: “Kwakatahwa kuti: Mundhu aazorarami ngo chimanda chega.” Na dhiyabhorosi wakamukwija pa dundhu, akamutatija umambo hwese hwo nyika ngo mukuvo mudoko. Na dhiyabhorosi wakati kwaari: “Ndinozopa kwouri iri simba rese, no uthende hwazvo, ngokuti rakapuwa kwendiri, pikija ndiyani wendinoda ndinozomupa. Ndizvo kudari iwewe wechizondidira, zvese zvinozoita zvako.” Na Jesu wakapingura, akati kwaari: “Kwakatahwa kuti, unozodira Jehovha Mwari wako, umudire iye ega.” Naye wakamukwevera Jerusarema, wakamudira panyezuru po chachungu cho themperi, wakati kwaari: “Kudari uri Mwana wa Mwari, jikandire pasi kubva pano; ngokuti kwakatahwa kuti: Iye unozopanga ngirosi jake ngo ndava yako, kuti jikungwarire, no mu nyara jajo jinozokuhaka, kuti ngouri mukuvo usakhugunywa tshoka yako pa buwe.” Na Jesu wakapingura, akati kwaari: “Kwakatahwa kuti: Usazoeja Mambo Mwari wako.” Naapo dhiyabhorosi ayinga apeja zviejo zvese, wakabva kwaari mbhera mukuvo umweni. Jesu wakahwirira Garire ari mu simba ro Mweya. No mbiri yakateketeswa ngo ndava yake mu nyika jese jinotendeneja. Naye wakajijisa mu nyumba javo jo kudira, echikujwa ngo vandhu vese. Naye wakaviya Nazaretha, apo paakakurira, no kudari ngo chirovejeso chake wakanghwina mu nyumba yo kudira ngo zuva ro sabatha, wakayima kujija. Kwakapuwa kwaari bhuku ra muprofeti Isaya. Naye wakabewura bhuku, wakavona apo pakatahwa, kuti: “Mweya wa Jehovha uri panyezuru pangu, ngokuti iye wakandizoja kuchumayira Vhangeri ku varombo; wakandituma kuteketesa kusununguhwa kwo vakasungwa, no kupenyesa majiso emapofu. Kusunungura avo vakachikirihwa, kuteketesa gore rinoashirika ra Jehovha.” Naye wakaripeta bhuku, wakarihwirija kuno mutungamiriri, wakagara pasi. No majiso eavo vese vayiva mu nyumba yo kudira akamuringira. Naye wakatanga kuvereketa kwavari, kuti: “Nyamasi aya matahwa azajisika munjeve jenyu.” Vese vakamupupurira zvakanaka, vakashama ngo mazwi onyasha akabva ku muromo wake, navo vakati: “Uwu andiyepi here mwana wa Josefa?” Naye wakati kwavari: “Ngozvirokwazvo munozoti kwendiri ngo aya mazwi akangwara, kuti: N'anga, jiponese iwewe. Izvo zvetakazwa kuti wazviita mu Kaperanaume chizviita panozve mu nyika yako.” Wakati: “Ngozvirokwazvo ndinoti kwomuri akuna muprofeti unoashirika mu nyika yake. Asi ngo zvirokwazvo ndinoti kwomuri, vayiva vazhinji vayiva shirikaji mu Israeri ngo mazuva a Erija, apo denga rakakonywa makore ari matatu no mweji mitandhatu, kwakaita, njara huru panyezuru po nyika yese. Asi Erija aazivi kutumwa kwo umwe wavo, asi kwega Sarepta, mu nyika yo Sidhoni, kune jimayi rayiva shirikaji. Vaivapo vazhinji vayiva no mapere mu Israeri ngo mukuvo wa Erisha muprofeti, kwayinga kusina na umwe wavo wakarapwa asi Namani ega musiriya.” Navo vakazara vese ngo ushungu vayiva mu nyumba yo kudira, apo vakazwa izvi zviro. Navo vakamuka vakamubudisa kunja kwo dhoropa, vakamukwevera nyezuru kwo dundhu apo payinga pakavakiwa dhoropa ravo, kuti vamukandire pasi. Asi iye wakafamba ngo pakati pavo wakaenda. Naye wakabzuka Kaperanaume dhoropa ro Garire, wayivajijisa ngo mazuva wo sabatha. Navo vakashamiswa ngo kujijisa kwake; ngokuti mazwi ake ayiva no simba. Mu nyumba yo kudira kwayivapo mundhu uno mweya wo bzoka uno mweya wakashata, naye wakamima ngo izwi guru, wakati: “Iya! Tinenyi isisu newe, iwewe Jesu wo Nazaretha? Waviya here kutiuraya? Ndinokuziva kuti uriyani, uri Wakachena wa Mwari.” Asi Jesu wakauthusa, wakati: “Nyarara, ubude kubva kwaari.” Kwakati bzoka rakamukandira pasi, pakati pavo, rakabuda kwaari, risikazivi kumuremaja. Vakashamiswa vese, navo vakavereketa umweni no umweni, vechiti: “Izwi iri rinorevenyi? Ngokuti unopanga mweya ine svina ngo simba no kukona, nayo inobuda.” Kwakateketeswa mbiri ndiye mu nyika jese jakatendeneja. Naye wakamuka wakabuda mu nyumba yo kudira, wakanghwina mu nyumba ya Simoni. Vambiya va Simoni vayiva no ndhenda yo kujiya muviri zvikuru; navo vakamupota ngo ndava yavo. Naye wakayima ngo pamberi pavo, wakanyaraja ndhenda, no ndhenda yo kujiya muviri yakavasiya, paripo vakamuka, vakavashandira. Kwakati zuva roobira avo vese vayiva no vanohwara ngo ndhenda jakaparajana, vakavazisa kwaari, naye wakadira nyara jake panyezuru pavo, wakavarapa. No mabzoka, akabudavo kubva kuvazhinji, echimima, echiti: “Iwewe uri Kristu Mwana wa Mwari.” Iye echianyaraja aazivi kutenda kuti averekete, ngokuti iwo aimuziva kuti uri Kristu. Kwakati kwaeja iye wakabuda, akaenda ku ndau iri bani; no mbungano yo vandhu yakamupshaka, ikaviya kwaari, yechida kumubatirija kuti asabva kwavari, asi wakati kwavari: “Kunosisira kuti ndichumaire vhangeri ro Umambo hwa Mwari mu madhoropa amweni nao, ngokuti icho ndicho cho ndakaviyira.” Naye waichumaira mu nyumba jo kudira jo Garire. Kwakaitika apo mbungano yaichikinijana kuzwa mazwi a Mwari, iye vaiyima pa gandhwa ro Genesareta. Naye wakavona ngarava mbiri jaiyima pa gandhwa, asi vatandi vayinga vabuda kwejiri, vechisuka majuya avo. Naye echinghwina kuno imwe yo ngarava, yaiva ya Simoni, wakamukumbira kuti aindundire pakati padodoko kubva kumbhiripiri. Naye wakagara pasi wakajijisa mbungano ari mu ngarava. Kwakati wapeja kuvereketa, wakati kuna Simoni: “Ndundira kwakajika muwisire majuya enyu kwoobata hove.” Simoni wakapingura, akati: “Mujijisi, takashanda usiku hwese, tisikazivi kubata chiro; asi ngo izwi rako ndinozowisira juya.” Naapo vaita kudaro, vakatendeneja hove zhinji, no juya ravo rakatanga kuparuka. Navo vakayita chivoniso chokudanija kuno shamwari javo jayiva mu ngarava imweni, kuti jiviye jivabesere. Navo vakaviya, vakazaja ngarava jese mbiri, kwokuti jakadondondomera. Asi Simoni Pedru avona wakawa pa tshoka ja Jesu, echiti: “Ibva kwendiri, ngokuti ndiri mundhu uri mushaishi, Mambowe.” Ngokuti iye wakashamiswa navo vese vayiva naye, ngokubatwa kwo hove jo vayinga vabata; zve inga zvakadaro kuno Jakobe na Johani, vana va Zebhedhi avo vayiva shamwari ja Simoni. Na Jesu wakati kuna Simoni: “Usatya, kubvira zvino unozobata vandhu.” Naapo vazisa ngarava javo mumbhiripiri, vakasiya zvese, vakamutevera. Kwakaitika, apo ari kurimwe ro madhoropa, vonanyi, wayivapo mundhu wayinga uno mapere mu muviri wake wese: Naapo avona Jesu, wakawa pasi ngo hope yake, akamupota, echiti: “Mambo kudari wechida, ungandiponesa.” Naye wakatambanuja nyara yake, wakamupshasa, akati: “Ndinoda; wechiponeswa.” Paripo mapere akapera. Naye wakamupanga kuti asazobvunja no mundhu; asi wakati: “Enda, ujipangijire ku mupristi, upe mubairo ngo ndava yo kuponeswa kwako kudari ngo zvaakapanga Mosi, kuyita chapupu kwavari.” Asi mbiri yakavangirira kuteketeswa ndiye; no mbungano huru yakaungana pamwepo kuzwa no kuponeswa ndhenda javo. Asi iye wakajipaura kuenda ku bani, kwookumbira. Kwakaitika ngo rimwe ro mazuva ao, echijijisa, vayivapo vafarisi no magurukota emipango vechigara apo, avo vayinga vakaviya kubva kundharaunda jese jo Garire, no yo Judhiya, no Jerusarema. No simba ra Jehovha rokurapa rayiva naye. Vonanyi, vandhu vakazisa mundhu waihwara ngo ndhenda yo kuoma muviri, ari panyezuru po musengere; navo vakapshaka kuti vamunghwinise mukati no kumurajika pamberi pa Jesu. Vasikavoni njira yo kumunghwinisa ndiyo mukati, ngo ndava yo mbungano, vakakwira panyezuru po denga ro nyumba, vakamubzusa ngo pa bovo ari pa musengere, ngo pakati pamberi pa Jesu. Iye echivona kugonda kwavo, wakati: “Mwanarume, zvishaishi zvako zvaregerehwa kwouri.” Vatari no vafarisi vakatanga kupangana, vechiti: “Ndiyani uwu unovereketa zvituko? Ndiyani ungakona kuregerera zvishaishi, kwega Mwari?” Asi Jesu echindoziva kurangarija kwavo, wakapingura, wakati kwavari: “Munobvunjana ngenyi mu mwoyo yenyu? Chinyi chinopinda kureruka, kunanga kuti: Zvishaishi zvako zvaregerehwa kwouri, nokuti kunanga kuti; mukayi ufambe? Asi kuti muzive kuti Mwana wo Mundhu uno simba mu nyika ro kuregerera zvishaishi.” (Wakati kuno uwo wayiva no ndhenda yo kuoma muviri), ndinoti kwouri: “Mukayi, utore musengere wako, uende ku nyumba yako.” Paripo wakamuka pamberi pavo, wakatora icho chaayinga akavata panyezuru pacho, akaenda ku nyumba yake, echikuja Mwari. Navo vese vakashamiswa, vakakuja Mwari, vakazara ngokutya, vechiti: “Tavona zvinoshamisa nyamasi.” Ngosure kwo izvi wakabvapo, wakavona mushabisi zina rake ndi Revhi akagara pandau yo kushabisa, shangu wakati kwaari: “Nditevere.” Naye wakasiya zvese, wakamuka wakamutevera. Na Revhi wakamuitira dhiri guru mu nyumba yake, kwayivapo vazhinji vo vashabisi no vamweni avo vaigara navo pakuha. Vafarisi no vatari vavo vakan'un'utira vajiji vake vechiti: “Munoha no kumwa ngenyi no vashabisi no vashaishi?” Jesu wakapingura, wakati kwavari: “Avo vakavanga avadi n'anga, asi avo vanohwara. Andizivi kuviya kudanija vakarurama akadi, asi vashaishi kuti vatenderuke.” Navo vakati kwaari: “Vajiji va Johani vanoera kuha kazhinji, vechikumbira; ngokudarozve navo vo vafarisi; asi vako vanoha no kumwazve.” Jesu wakati kwavari: “Mungakona here kuyita kuti vo nyumba yanyamurovohwa vaere kuha apo mukwambo echinavo? Asi mazuva anozoviya apo mukwambo wabviswa kwavari, naapo vanozoera kuha ngaao mazuva.” Zve wakavereketa muezaniso kwavari, echiti: “Akuna mundhu ungacheka chiremo kujira ibza kuchitungira panguvo yasakara; echiita kudaro unozoshaishira nguvo ipsha, chiremo chipsha achizotojani no nguvo yakasakara. Apana mundhuzve unodira vhini ibza mukati mwo nyede jakasakara; echiita kudaro vhini ibza rinozoputisa nyede, no vhini rinozorashika, no nyede inozochakatika. Asi vhini ibza rinodihwa mukati mwo nyede ipsha. Zve apana mundhu wakambomwa vhini rokare, paripo oemura ibza: Ngokuti, unoti, rokare rakapinda kunaka.” Kwakaitika ngo zuva ro sabatha echifamba ngo mukati mwo minda yo koroni, vajiji vake vakavhuna musoso yo koroni, vechiipukutira pa nyara javo vakaha. Asi vamweni vo Vafarisi vakati: “Munoita ngenyi icho chisikatendehwi mu mipango kuitwa ngo zuva ro sabatha?” Jesu wakapingura, akati kwavari: “Amusati mwatongojija here icho chakaitwa ndi Dhavhidha, apo wayiva no njara, iye naavo vayiva naye? Kunghwina kwaakaita mu nyumba ya Mwari, wakatora, akaha zvimanda zvakapihwa, wakapazve kuna avo vayiva naye, izvo zvisikatendehwi mu mipango kuti zvihiwe, kwega ngo vaprofeti?” Wakati kwavari: “Mwana wo Mundhu uri Mambo no wo sabatha.” Kwakaitika ngo zuva rimwenizve ro sabatha, kuti iye wainghwina mu nyumba yo kudira, kwoojijisa; kwayivapo mundhu uwo wayiva no nyara yo kumuho yakaoma. Vatari no vafarisi vakamuringisisa, kuti vavone kuti unozomurapa here ngo zuva ro sabatha; kuti vavone chokumuparisa ndava ndicho. Asi iye waiziva mikarakajo yavo, wakati kuno mundhu uwo wayiva no nyara yakaoma: “Mukayi, uyime ngo pakati.” Naye wakamuka, wakayima ngo pakati. Asi Jesu wakati kwavari: “Ndinomubvunjisa, kuti kunotendehwa here ngo zuva ro sabatha kuyita zvakanaka, nokuti kuyita zvakashata? Kuponesa ndaramo, nokuti kuiuraya?” Naye wakavaringisisa vese, wakati kuno uwo: “Tambanuja nyara yako.” Naye wakayita kudaro, no nyara yake yakarapika. Asi avo vakazara ngo ushungu, vakapangana umwe no umweni chovangayita kuna Jesu. Kwakaitika ngaao mazuva kuti wakakwira pa dundhu kwookumbira; naye wakakumbira usiku hwese kuna Mwari. Naapo kwaeja, wakadanija vajiji vake, naye wakasana kubva pakati pavo vari gumi na vaviri, avo vaakadurazve kuti vapostori: Simoni uwo waakadura kuti Pedru, na Andreu munukuna wake, na Jakobe na Johani, na Firipi na Bhatoromeu, na Mateu, na Tomasi, na Jakobe mwana wa Arifeu, na Simoni uwo waizwi Muzeroti. Na Judhasi mwana wa Jakobe, na Judhasi Isikariyoti, uwo wakapira Mambo. Naye wakabzuka navo, wakayima pandau yakati chechetere, no vajiji vake vazhinji, no mbungano huru yo vandhu, vakabva Judhiya kwese, no Jerusarema, no ndharaunda jese jo ku jombe ro Tire, no ro Sidhoni, avo vakaviya kwo muzwa, no kurapwa ndhenda javo; naavo vaitambujwa ngo mweya yakashata vakarapwa. No mbungano yese yakaeja kumupshasa; ngokuti simba raibva kwaari, rechirapa vese. Naye wakamusa majiso ake kuringira vajiji vake, wakati: “Munomuchena imwimwi muri varombo, ngokuti Umambo hwa Mwari ngo hwenyu. Munomuchena imwimwi munozwa njara zvino, ngokuti munozogutiswa. Munomuchena imwimwi munochema zvino ngokuti munozoseka. Munomuchena imwimwi apo vandhu vanozomunyenya, no kuparajana nemwi no kumumbirimbija, no kushora zina renyu kudari inga rakashata, ngo ndava yo Mwana wo Mundhu. Dakaranyi ngo iro zuva, mwechinyanduka ngo kudakara; ngokuti ringiranyi, musharo wenyu mukuru mu gore, ngokuti majibaba avo vakayita kudarovo kuna vaprofeti. Asi ikhombo kwomuri imwimwi vapfumi! Ngokuti mwatoashira musharo wenyu. Ikhombo kwomuri munogutiswa zvino ngokuti munozozwa njara. Ikhombo kwomuri imwimwi munoseka zvino, ngokuti munozochumba no kuchema. Ikhombo kwomuri apo vandhu vese voovereketa zvakanaka ndimwi! Ngokuti majibaba avo vakavereketa kudaro kuna vaprofeti vokunyepa.” “Asi inini ndinoti kwomuri imwimwi munondizwa: Idanyi vakorore venyu, muite zvakanaka kwavari avo vanomunyenya. Dakajisanyi avo vanomutuka, muvakumbirire avo vanomutambuja. No kwaari unokurova padama muphindurire rimwenizve; no kwaari uwo unokutorera bhachi rako, mupe hembe yakozve. Ipai kwavari vese vanokumbira kwouri, no kwaari uwo unotora chiro chako, usachiteverazve. No kudari ngo zvomunoda kuti vandhu vamuitire, itanyivo kwavari zvakadaro. No kudari mwechivada avo vanomuda, munenyi cho mungazobongwa ndicho? Ngokuti no vashaishi vanovada avo vanovadavo. No kudari mwechiitira zvakanaka kwavari avo vanomuitira zvakanaka, munenyi chomungazobongwa ndicho? Ngokuti no vashaishi vanondoitavo zvakadaro. No kudari mwechishongesa avo vomunogonda kuzoashirazve kwavari, munenyi chomunozobongwa ndicho? Ngokuti no vashaishi vanoshongeswa ngo vashaishi kuti vazoashirevo zvakadaro kubva kwavari. Asi vadenyivo vakorore venyu, muvaitire zvakanaka, mwechivashongesa musikaveteri, no musharo wenyu unozoyita mukuru, nemwi munozoyita vana vo Uwo Uri panyezuru po zvese; ngokuti iye uno nyasha kwavari vasikabongi, no kwavari vakashata. Itanyi vano nyasha, kudari ndi Baba wenyu vano nyasha.” “Musatonga: Nemwi amuzotongwi; musaparisa ndava, nemwi amuzopariswi ndava, regereranyi, nemwi munozoregerehwa. Ipanyi, nakwo kunozopuwa kwomurizve, mupimo wakanaka, wakachindihwa, wakazunguzihwa, no kufashaikira, unozopuwa kwomuri: Ngokuti ngo uwo mupimo wo munozopima ndiwo, unozopimihwavo kwomuri.” Naye wakavereketa muezaniso kwavari, echiti: “Bofu ringatungamirira bofu here? Avazowi vese murindi here? Mujiji aari panyezuru po Mujijisi wake akadi, asi mujiji wese waperera unozodari ngo Mujijisi wake. Unoringisirenyi chitsepejo chiri mu jiso ro hama yako, asi usikarangariji ngo danda riri mu jiso rako? Ngokuti unganangisa kudini kuno hama yako kuti: Hama, tenda kuti ndibvise chitsepejo chiri mu jiso rako, apo iwewe wambhwine usikavoni danda riri mu jiso rako wambhwine? Iwewe mujiitisi, tanga kubvisa danda riri mu jiso rako, naapo unozokona kuvona pambhene kubvisa chitsepejo chiri mu jiso ro hama yako.” “Ngokuti akuna muti wakanaka ungabereka michero yakashata; nokutizve muti wakashata aungabereki michero yakanaka. Ngokuti muti wese unozivika ngo michero yawo. Ngokuti vandhu avakavi makuyu kubva pa miti yo minzwa, nokuti parukato avakavi michero yo muvhini, mundhu wakanaka kubva kwo upfumi hwakanaka hwo mu mwoyo mwake unobudisa icho chakanaka; no mundhu wakashata kubva kwo upfumi hwakashata hwo mwoyo wake unobudisa icho chakashata kubva kuno zvakawanda zviri mu mwoyo.” “Munondidanija ngenyi kuti, Mambo, Mambo, musikayiti izvo zvondinonanga? Mundhu wese unoviya kwendiri, echizwa mazwi angu, echiayita ndinozomutatija uwo waanotojana naye. Unodari ngo mundhu wakavaka nyumba, uwo wakacha, wakajikisa, wakadira tsikiro pa buwe; kwakati, ndambi yakwira, yakarova nyumba iyo, inga isina simba ro kuchukunusa; ngokuti inga yakanasa kuvakwa. Asi iye unozwa, asikayiti, unodari ngo mundhu wakavaka nyumba panyezuru po mavhu isina tsikiro; iyo ndambi yakarova kwoiri, paripo yakawa; no kuphwanyika kwo iyo nyumba inga kwakakura.” Kwakati apeja mazwi ake ese mukuzwa kwo vandhu, wakanghwina mu Kaperanaume. No muranda wo nduna yo zana yakatikuti, waaidisisa, waihwara, ari phedo po kufa. Kwakati yazwa ndi Jesu, yakatuma kwaari vakuru vo vajudha yechikumbira kuti aviye aponese muranda wayo. Naavo apo vakaguma kuna Jesu, vakamupota kakurutu, vechiti: “Iyo inosisira kuti uyiitire ichi. Ngokuti inoda jinja redu, nayo yakativakira nyumba yo kudira yedu.” Na Jesu wakaenda navo, naapo waaphedo po nyumba, nduna yo zana yakatuma hama jayo kwaari, yechiti kwaari: “Mambo, usajinesa, ngokuti andisisiri kuti iwewe unghwine pasi po denga rangu. Ndizvo andizivi kurangarija kuti ndinosisira ndambhwine kuviya kwouri, asi nangai ngo izwi, no muranda wangu unozoponeswa. Ngokuti na ininivo ndiri mundhu wakaemeswa pasi po simba, ndine masocha pasi pangu: Neni ndinoti kuno iri, endayi, naro rinoenda; nokuno rimweni, viyai, naro rinoviya; no kuno muranda wangu, itai ichi, naye unochiyita.” Naapo Jesu azwa ichi wakashamiswa ndiyo, naye wakakunukukira kuno mbungano yaimutevera, wakati kwoiri: “Ndinoti kwomuri, andizivi kutongombovona kugonda kukuru kwakadaro, pikija mu Israeri.” Naavo vakatumwa, vakahwirira ku nyumba, vakavona muranda wapona. Kwakaitika ngosure kwo izvo, wakaenda ku dhoropa rinozwi Naeni; no vajiji vake vakaenda naye, no mbungano huru. Kwakaitika apo echikwedera pamusuvo wo dhoropa, vonanyi kwaibudiswa mundhu wakafa kubva mu dhoropa, uwo wayiva ari mwana umwe ega wa mayi wake, vayiva shirikaji; no vandhu vazhinji vo dhoropa vayiva naye. Naapo Mambo naamuvona, wakamuzwira kutambujika, wakati kwaari: “Usachema.” Naye wakakwedera, akapshasa mandhi; no vatwari vakayima, wakati: “Jaha, ndinoti kwouri, mukayi.” No uwo wayinga wafa, wakamuka akagara, wakatanga kuvereketa, naye wakamupa kuna mayi wake. No kutya kwakavagumira vese, navo vakairikija Mwari, vechiti: “Muprofeti mukuru watumbujuka pakati pedu. Zve, kuti Mwari wakafambira vandhu vake.” No mbiri iyi yakateketeswa ngo ndava yake, mu Judhiya mwese, no mu nyika jese jaitendeneja. Na Johani wakaziviswa izvi zvese ngo vajiji vake. Na Johani echidanija kwaari vajiji vake vaviri, wakavatuma kuna Mambo, echiti: “Ndiwe here uwo unoviya, nokuti ticharindira umweni?” Naapo vanarume avo vaguma kwaari, vakati: “Johani Mubhapatisi wakatituma kwouri, echiti: Ndiwe here unoviya, nokuti ticharindira umweni?” Ngo nguva iyo wakarapa vazhinji vaihwara, no ndhenda, no mweya yakashata; no vazhinji vayiva vari mapofu, wakavapembenuja. Iye wakapingura, wakati kwavari: “Endanyi, mubvunje Johani zvomwavona, no zvomwazwa; mapofu anopembenujwa, zvirema zvinofamba, vano mapere vanosambiswa, vano mandondo vozwa, no vakafa vanomuswa, no varombo vano masoko akanaka anochumaihwa kwavari. Naye unomuchena usikakhugunywi ndini.” Apo ndhumwa ja Johani jainga jaenda, wakatanga kuvereketa kuno mbungano ndiye Johani, echiti: “Mwakabuda kuenda ku bani kwoovonenyi? Runjanga rwakazungunyiswa ngo bepo here? Asi mwakabuda kuenda kwoovonenyi? Mundhu wakasimira machira akapfava here? Vonanyi avo vanosimira zvipani, vakagarisika, vanogara mu ngome. Asi mwakabuda kuenda kwoovonenyi? Muprofeti here? Eya, ndinoti kwomuri, no uwo unonyanya kupinda muprofeti. Uwu ndiye wo kwakatahwa ndiye, kwechiti: Vonanyi, ndinozotuma ndhumwa yangu pamberi po hope yako, iyo ndiyo inozonasirira njira yako pamberi pako. Ndinoti kwomuri, mukati mwaavo vakaberekwa ngo vanakaji, akuna mukuru kupinda Johani. Asi iye uri mudoko mu Umambo hwa Mwari uri mukuru kupinda iye.” Vandhu vese apo vazwa, no vashabisi navo vakatenda kururama kwa Mwari, ngo kubhapatiswa ngo rubhapatiso rwa Johani. Asi vafarisi no magweta vakajirambira zano ra Mwari, vakaramba kubhapatiswa ndiye. “Ndizvo ndovaezanisa nenyi vandhu vo mubarihwana uwu, vanotojaniswa nenyi? Vanotojaniswa no vana vanogara pandau yo musika, vechidanijana, vechiti: Takarija munyere kwomuri, nemwi amuzivi kutamba; takarija mbhere, nemwi amuzivi kuchema. Ngokuti Johani Mubhapatisi wakaviya asikahi chimanda, nokuti kumwa vhini, nemwi munoti. Uno bzoka. Mwana wo Mundhu wakaviya echiha, no kumwa; nemwi munoti, vonanyi mundhu uno makoro no mumwisi wo vhini, shamwari yo vashabisi, no yo vashaishi! No kungwara kunopembejwa ngo vana vakwo vese.” Umwe wo vafarisi wakada kuti ahe naye. Naye wakanghwina mu nyumba yo uwo mufarisi, akacheama pano kuha. Vonanyi, mujimayi wakatikuti, wayiva mu dhoropa, ari mushaishi; naapo aziva kuti waigara pano kuha mu nyumba yo mufarisi, wakaviyisa chitandha cho aribhastera ro mafuta okunuhira, naye echiyima ngosure kwo kutshoka jake, echichema, wakatanga kunyakatisa tshoka jake ngo musoji yake, akajipukuta ngo bvuji ro musoro mwake, akachungamija tshoka jake ngo muromo akajizoja ngo mafuta okunuhira. Asi mufarisi uwo wakamukoka, echivona, wakati mukati mwake: “Uwu mundhu kudari wayiva muprofeti inga aziva kuti uriyani, nokuti mujimayi uwu wakadini unomupshasa, ngokuti iye uri mushaishi.” Na Jesu echipingura, wakati kwaari: “Simoni, ndinacho chokuvereketa newe.” Naye wakati: “Mujijisi chiverekete.” “Kwayivapo mushongesi wakatikuti wakashongesa vandhu vaviri: Umwe wavo wakamushongesa madhenariyo ari mazana mashanu (500), no umweni madhenariyo ari mashanu. Kwakati vasina chokuripa ndicho, iye wakavaregerera vese. Ndizvo ndiyani kwavari unozopindisisa kumuda?” Simoni wakapingura, akati: “Dangani uwo wakaregerehwa zvakapinda kuwanda.” Wakati kwaari: “Wanasa kutonga.” Echikunukukira kuno mujimayi wakati kuna Simoni: “Unomuvona here uwu mujimayi? Inini ndanghwina mu nyumba yako, auzivi kundipa kumwa yo kusuka tshoka jangu; asi iye wanyakatisa tshoka jangu ngo musoji yake, akajipukuta ngo bvuji rake. Iwewe auzivi kundichungamija ngo muromo, asi iye kubvira mukuvo wondanghwina ndiwo, aazivi kurega kuchungamija tshoka jangu ngo muromo. Iwewe auzivi kuzoja musoro wangu ngo mafuta, asi iye wazoja tshoka jangu ngo mafuta okunuhira. Ndizvo ndinoti kwouri, zvishaishi zvake zviri zvakawanda zvaregerehwa kwaari; ngokuti iye wada kakurutu; asi kwaari waregerehwa zvishomani, iye unondodavo zvishomani.” Naye wakati kwaari: “Zvishaishi zvako zvaregerehwa kwouri.” Navo vaitseama naye panokuha vakatanga kuvereketa mukati mwavo: “Ndiyani uwu unokona kuregerera zvishaishi?” Naye wakati kuno mujimayi: “Kugonda kwako kwakuponesa, Enda ngo kunyarara.” Kwakaitika kuti, ngosure kwo izvo, wakafamba mukati mwo madhoropa, no maguta, echichumaira no kupangijira masoko akanaka oUmambo hwa Mwari, no vari gumi na vaviri vayiva naye, no vanakaji vakatikuti, avo vayinga vakaponeswa mweya yakashata, no ndhenda, Mariya uwo waizwi Magadhareni, uwo wakabviswa mabzoka manomwe. Na Jowana mukaji wa Chuza mungwariri wa Herodhi, na Suzana, no vazhinji vamweni avo vayimushandira ngo zviro zvavo. Apo mbungano yaungana pamwepo no vandhu vayinga vakabuda kuviya kwaari, kubva ku madhoropa ese, iye wakavereketa ngo muezaniso, echiti: “Mukushi wakabuda kookusha mbewu jake, naapo achakusha mbewu jimweni jakawira pa njira, najo jakachikwachikwa ngo tshoka, no shiri jo mu gore jakajiha. No jimweni jakawira pa mapuwe, paripo jakamera jakazeketera, ngokuti inga jisina mwando. Jimweni jakawira mukati mwo minzwa, no minzwa yakakura pamwepo najo, yakajipshinya. Jimweni jakawira mu mavhu akanaka, jakakura, jakabereka mbhumba jiri zana rakapetwa.” Achavereketa izvi wakadanijira, echiti: “Uwo uno njeve jo kuzwa, ngaazwe.” No vajiji vake vakamubvunjisa, kuti: “Muezaniso uwo wayida kurevenyi?” Wakati kwavari: “Kwakapuwa kwomuri kuziva zvakafishika zvo Umambo hwa Mwari, asi kuno vamweni, kuti vazwe ngo muezaniso, kuti pikija vechivona, avavonesesi, vechizwa avazwisisi.” “Zvino muezaniso ndiwo uwu: Mbeu riri izwi ra Mwari. Naapo vari pambhiri po njira, ndivo avo vakazwa; unoviya dhiyabhorosi, no kubvisa izwi mu mwoyo yavo, kuti vasazotenda, no kuponeswa. Naavo vari pa mapuwe, ndivo avo vambozwa izwi, vanoriashira ngo kudakara, navo avana muji, vanotenda mukuvo mudoko, na ngo nguva yo kuejwa vanokhugunywa. No ijo jakawira pakati po minzwa, ndivo avo vanozwa, vachienda mberi vanopshinywa ngo kudembatemba, na ngo upfumi, na ngo zvidakajiso zvo ndaramo ino, vasikabereki michero kwayo. No ijo jakawira mu mavhu akanaka, ndivo avo vanozwa izwi ngo mwoyo usina kuchengeja, no wakanaka vanoringwarira, vanobereka michero ngo kusengerera.” “ Akuna mundhu apo wabasa chivheneko wochidumaija ngo chimujiyo, nokuti kuchidira pasi po mubhedhi. Asi unochidhira panyezuru po chigajikiro cho chivheneko, kuti avo vanonghwina vavone kujeka. Ngokudaro akuna chiro chakafishika chisikazovoniswi, no chakadumaijwa chisikazozivikanwi, chisikazoviyi mukujeka. Ndizvo ngwaranyi ngo kuzwa kwo munoita, ngokuti pikija no uwo unacho, kunozonyengejehwa kwaari, asi iye usina kunozobviswa kwaari, no icho chaanorangarija kuti unacho.” Kwakaviya kwaari mayi wake, no vanukuna vake, navo avazivi kukwanisa kuguma kwaari, ngo ndava yo mbungano. Wakabvunjwa, kuti, mayi wako, no vanukuna vako vakayima ngo kunja, vanoda kukuvona. Asi iye wakapingura kwavari, akati: “Mayi wangu no vanukuna vangu ndivo avo vanorizwa izwi ra Mwari, no kuriyita.” Zvino kwakaitika ngo rimwe raao mazuva kuti wakanghwina mu ngarava no vajiji vake; naye wakati kwavari: “Ngatiambuke mwombera kwo gandhwa.” Ndizvo vakaenda. Asi vechienda iye wakabatwa ngo hope; kwakabzuka muvhumo wo bepo panyezuru po gandhwa; nayo yayinga yozara ngo kumwa, navo vayiva mungozi. Navo vakaviya kwaari, vakamumusa, vechiti: “Mujijisi, Mujijisi, tofa.” Naye wakamuka akanyaraja bepo no mavimbi okumwa; nao akatura, kwakavepo kunyarara. Naye wakati kwavari: “Kugonda kwenyu kuri kwapi?” Navo vakatya no kushamiswa, vechiti umwe kwo umweni: “Uwu ungaita yani, unopanga bepo no kumwa, nazvo zvinomupurukira.” Navo vakaguma ku nyika yo vaGerasene, iyo yakaita maringwa no Garire. Kwakati aambuka mu ngarava, wakasongana naye mundhu wakatikuti, echibva mu dhoropa, uno mabzoka; no mukuvo wakareba aazivi kusimira nguvo, naye inga asikagari mu nyumba, asi mu makuva. Naapo avona Jesu wakamima, akawa pasi pamberi pake, akati ngo izwi guru: “Ndinenyi newe, Jesu, iwewe Mwana wa Mwari Uri panyezuru po zvese. Ndinokupota, usanditambuja.” Ngokuti iye inga apanga mweya wakashata kuti ubude mumundhu. Ngokuti kazhinji waimubata; naye waingwarihwa ngo varindi, akasungwa ngo magaragajero, no matanda; asi waidajura zvisungo izvo, echikwehwa kuenda ku bani ngo mabzoka. Na Jesu wakamubvunjisa, akati: “Zina rako uriyani?” Naye wakati, “Ndiri Hondo.” Ngokuti mabzoka akawanda ayinga akanghwina mukati mwake. Nao akamupota kuti asazoapanga kuti aende murindi. Zvino kwayivapo mushambi wo nguruve jakawanda jechihava panyezuru po dundhu: Nao akamupota kuti aatendere kuti anghwine kwojiri. Naye wakaatendera. No mabzoka akabuda kubva kuno mundhu akanghwina munguruve, no mushambi uwo wakagogoma kubzuka ngo pa gomokomo kunghwina mu gandhwa, najo jakandondomera jikafa. Naavo vaijihusha vavona chakaitika vakatiza, vakateketesa zvakaitika mu dhoropa no mu ndharaunda. Navo vakabuda kuenda kwoovona zvakaitika; vakaviya kuna Jesu, vakamuvona mundhuwo waakabvisa mabzoka akagara, wakasimira, atimbunda, patshoka ja Jesu; navo vakatya. Naavo vakazvivona vakavabvunja ngo njira yaakaponeswa ndiyo uwo wayinga uno mabzoka. No vandhu vese vondharaunda yo nyika yo vaGerasene vakamukumbira kuti abve kwavari; ngokuti vese vakagumihwa ngokutya kukurutu. Naye wakanghwina mu ngarava akahwirira. Asi mundhu uwo wakabviswa mabzoka, wakamukumbira kuti aende naye; asi iye wakamuendesa echiti: “Hwirira ku nyumba yako, upupure ngo kukura kwo izvo zvaakakuitira Mwari.” Naye wakafamba echiteketesa mu dhoropa rese kukura kwo izvo zvaakaita Jesu kwaari. Naapo Jesu waviyazve, mbungano yakamuashira ngo kudakara; ngokuti vese inga vakamugarira. Vonanyi, kwakaviya, mundhu zina rake raizwi ndi Jairosi, naye wayiva mukuru wo nyumba yo kudira; naye wakawa patshoka ja Jesu, wakamupota kuti aviye ku nyumba yake; ngokuti wayiva no mwana wo kaji umwe ega, wayinga ano makore anonga gumi no maviri, naye wayiva woda kufa. Asi echienda mbungano yakamutsikinija. No jimayi raibuda ngazi makore ari gumi no maviri, iro rayinga rapeja zvese zvoraipona ndizvo ngo man'anga, pasina waikona kurirapa. Iro rakaviya ngosure kwake, rakapshasa mupendero wo nguvo yake: Paripo ndhenda yo kubuda ngazi yakakhauka. Na Jesu wakati: “Ndiyani uwo wandipshasa?” Naapo vese vakanija, Pedru naavo vayiva navo, vakati: “Mujijisi mbungano inokutsikinija, no kukupshinya.” Asi Jesu wakati: “Uripo wandipshasa, ngokuti ndinozwa kuti simba rangu rabuda kwendiri.” Naapo jimayi ravona kuti arizivi kufishika, rakaviya richitetemera, rakawa pasi pamberi pake, rikapanga zvese pamberi po vandhu vese kuti ramupshasa ngo ndava yenyi, nokuti raponeswa chiriporipo. Iye wakati kweriri: “Mwana, kugonda kwako kwakuponesa; enda ngo kunyarara.” Achavereketa, kwakaviya umwe echibva ku nyumba yo mukuru wo nyumba yo kudira, echiti: “Mwana wako wo kaji watofa; usachamunesa Mujijisi.” Asi Jesu echizwa, wakapingura kwaari, echiti: “Usatya; kwega tenda, naye unozoponeswa.” Kwakati aguma ku nyumba, aazivi kutendera kuti mundhu anghwine naye, kwega Pedru na Johani na Jakobe, na baba wo musikana, na mayi wake. Navo vese vaimuchema vechimutsumba; asi wakati: “Musachema; ngokuti aazivi kufa, asi wakavata.” Navo vakamuseka kwokumusvororeja, vechivona kuti watofa. Asi iye naamubata ngo nyara wakadanijira, echiti: “Musikana muka.” No mweya wake wakaviyazve, naye wakamuka, chiriporipo. Iye wakapanga kuti apuwe chokuha. No vabari vake vakashamiswa, asi wakavapanga kuti vachazobvunja mundhu icho chayinga chaitwa. Naye wakadanija pamwepo vari gumi na vaviri, akavapa simba ro kukurira mabzoka ese, no kurapa ndhenda. Naye wakavatuma kuenda kwoochumaira Umambo hwa Mwari, no kurapa vanohwara. Wakati kwavari: “Musatora chiro cho hwendo hwenyu, haiwa ndonga, nokuti nyede, nokuti chimanda, nokuti mare; zve, musava no mabhachi maviri. Pikija ngoyani nyumba yo munozonghwina, garanyimwo, mbhera mubvepo. Naavo vasikazomuashiri, mwoobva mu dhoropa iro, munozophumbuja bukuta pasi po tshoka jenyu kuitira chapupu kuvaitira ndava.” Navo vakaenda, vakapupura mu maguta ese, vechichumaira vhangeri, no kurapa ku ndau jese. Zvino apo Herodhi mutungamiriri naaziva zvese zvayinga zvaitika, wakakakaseka, ngokuti vamweni vainanga kuti Johani wayinga wamuka kubva kwo vakafa; no vamweni vaiti kuti, Erija wakavoneka; no vamwenizve vaiti kuti, mumwe wo vaprofeti vokare wakamukazve. Na Herodhi wakati: “Johani ndakamugura musoro, asi uwu ndiyani, uwo wondinozwa ndiye zviro zvakadari.” Naye wakapshaka kuti amuvone. Vapetuka, vapostori vakamuverengera zvese izvo zvakaitika. Naye wakavatora, akajipaura kuenda vari vega ku dhoropa raizwi Bhetisaidha. Mbungano yaziva yakamutevera, naye wakavaashira ngo kudakara, wakavereketa kwavari ngo Umambo hwa Mwari naavo vaitama kurapwa wakavarapa. Naapo zuva rotanga kubira; no varigumi na vaviri vakaviya, vakati kwaari: “Wechiparaja mbungano kuti yiende mu maguta no mundharaunda inotendeneja, vavatemwo, no kuwana zvokuha, ngokuti pano tiri pa bani.” Asi iye wakati kwavari: “Vapenyi imwimwi zvokuha.” Vakati: “Atina zvimweni kwega zvimanda zvishanu no hove mbiri; dangani kuti tiende tivatengere zvokuha ava vandhu vese.” Ngokuti vayiva vanonga vari zviuru zvishanu (5.000) zvo vanarume. Naye wakati ku vajiji vake: “Vagarisenyi pasi ngo zvikwata, zvo makumi mashanu.” Navo vakayita kudaro, vakavagarisa pasi vese. Naye echitora zvimanda zvishanu, no hove mbiri, wakaringira mu gore, akazvibonga, akazvigura; wakazvipa ku vajiji kuti vazvidire pamberi po mbungano. Navo vakaha, vakaguta vese; navo vakaunganija izvo zvakasara zvo matshekeneswa, zvitengu zviri gumi na zviviri. Kwakaitika kuti echikumbira ari ega, vajiji vake vayiva naye, naye wakavabvunjisa, kuti: “Mbungano inoti kuti inini ndiri yani?” Navo vakapingura, vakati: “Johani Mubhapatisi, asi vamweni vanoti, Uri Erija; asi vamweni vanoti, Uri umwe wo vaprofeti vokare wamukazve.” Asi wakati kwavari: “Imwimwi munoti inini ndiri yani?” Na Pedru echipingura, wakati: “Iwewe uri Kristu wa Mwari.” Asi wakavabvunja no kuvapanga kuti vasazobvunja mundhu naumwe izvi. Echiti: “Kunodikana kuti Mwana wo Mundhu atambujike ngo zvakawanda, arambwe ngo vakuru, no vapristi vakuru, no vatari, aurawe, na ngo zuva ro chitatu amuswe.” Naye wakati kwavari vese: “Kudari uripo mundhu unoda kuviya sure kwangu, ngaajirambe, atore muchinjiko wake zuva ngo zuva anditevere. Ngokuti pikija ndiyani ungada kungwarira kurarama kwake, unozorashikihwa ndikwo; asi pikija ndiyani unorasha kurarama kwake ngo ndava yangu, ndiye unozokuponesa. Ngokuti unodetsehwa ngenyi mundhu kudari echizoviyihwa ngo nyika yese, ajirashe, nokuti ajinyaje kupona kwake. Ngokuti iye unozoyita nyowa ndini, na ngo mazwi angu, Mwana wo Mundhu unozoyita nyowa ndiye, apo oviya mu uthende hwake, no hwa Baba, no hwo ngirosi jakachena. Asi ndinomubvunja ngo gwinyiso, kuti varipo vakatikuti veavo vanoyima pano, avo vasikazoraviri kufa, mbhera vavone Umambo hwa Mwari.” Nakwo kwakaitika, anonga mazuva masere ngosure kwo kuvereketa izvi, kuti wakatora naye Pedru, na Johani, na Jakobe, wakakwira pa dundhu kwookumbira. Echikumbira, kuvoneka kwo hope yake kwakasandujwa, no zvokusimira zvake zvakachena zvechin'anikira. Vonanyi kwakavereketa naye vandhu vaviri, ndi Mosi na Erija; avo vakavoneka vari mu uthende, vakavereketa ngo ndava yo kuenda kwake mukufa, ukwo kwaaizoita mu Jerusarema. Zvino Pedru naavo vayiva naye vayinga vabatwa ngo hope: Asi apo vamuka, vakavona uthende hwake, no vandhu vaviri avo vakayima naye. Kwakaitika, apo vaparajana naye, Pedru wakati kuna Jesu: “Mujijisi, kwakanaka kwetiri kuti tigare pano; ngativake zvitumba zvitatu; chimwe chako, chimweni cha Mosi, no chimweni cha Erija.” Asikazivi chaaivereketa. Kwakati echivereketa izvi, gore rakaviya, rikavafukijira; navo vakatya apo vakambonywa ngo gore. No izwi rakabuda rechibva mu gore, rechiti: “Uwu uri Mwana wangu, uwo wakasananguhwa; mupurukirenyi.” Naapo izwi rapinda Jesu wakaenda ari ega. Navo vakanyarara, avazivi kutongobvunja mundhu ngo mazuva ao chimwe cho izvo zvovakavona. No cho mangwanani, apo vabzuka kubva ku dundhu, kwakaitika kuti mbungano huru yakasongana naye. Vonanyi, mundhu wakatikuti echibva mukati mwembungano wakadanijira echiti: “Mujijisi, ndinokupota kuti uringire mwana wangu, ngokuti ndiye ega wondinaye. Vonanyi, mweya unomubata; paripo ngo kukasira orija mbhere; nawo unomubvununguja kwokuti abudise mafuro, unotora nguva yakareba, unomukuvaja kakurutu. Neni ndapota vajiji vako kuti vaumbirimbije, navo vaukonehwa.” Jesu wakapingura, akati: “A, mubarihwana usikatendi no unopauka, ndinozogara nemwi mukuvo wakaitawani, ndechindo musengerera? Zisai pano mwana wako.” Kwakati achaviya bzoka rakamuwisa pasi, rikamubvununguja kakurutu. Asi Jesu wakauthusa mweya wakashasa, akamurapa murumbwana akamupazve kuna baba wake. Navo vese vakashamiswa ngo ukuru hwa Mwari. Kwakati vese vachashamiswa ngo izvo zvaakaita, wakati ku vajiji vake: “Mazwi aya ngaagare munjeve jenyu; ngokuti Mwana wo Mundhu unozopihwa mu nyara jo vandhu.” Asi avazivi kuzwisisa izwi iro, rakafishika kwavari, kuti vasazoriziva; navo vakatya kumubvunjisa ngo iro izwi. Kwakamuka hasha pakati pavo kuti ndiyani wavo unozoyita mukuru. Asi apo Jesu wavona murangarijo yo mwoyo yavo, wakatora mwana mudoko, wakamugajika parutivi rwake. Wakati kwavari: “Iye unoashira mwana uwu mudoko ngo zina rangu unondiashira inini; no uwo unondiashira inini unoashira uwo wakandituma; ngokuti iye uri mudoko mukati mwenyu mwese, ndiye uri mukuru.” Na Johani wakapingura, akati: “Mujijisi, tamuvona umwe echimbirimbija mabzoka ngo zina rako; nesu takamurambisa, ngokuti aazivi kutevera nesu.” Asi Jesu wakati kwaari: “Musazomurambisa, ngokuti iye usikaambani nemwi, unomurwira imwimwi.” Apo mazuva okwedera okuti aashihwe mu gore, wakaringira hope yake kuenda Jerusarema. Naye wakatuma ndhumwa pamberi po hope yake, navo vanghwina mu guta ro vaSamariya, kuti vamunasirire. Asi avazivi kumuashira, ngokuti hope yake yairingira kuenda Jerusarema. Naapo vajiji vake Jakobe na Johani vavona ichi, vakati: “Mambo, unoda kuti tinange kuti muriro ubzuke kubva mu gore, uvapeje?” Asi wakakunukuka, akavarambisa. Navo vakaenda ku guta rimweni. Vachafamba mu njira, mundhu wakatikuti wakati kwaari: “Ndinozokutevera pikija kwapi kwounoenda.” Na Jesu wakati kwaari: “Muhwe jino marindi, no shiri jo mu gore jino zvisaki; asi Mwana wo Mundhu aana no po kutsamira musoro wake.” Naye wakati kuno umweni: “Nditevere iwewe.” Asi iye wakati: “Mambo, tenda kuti ndiende kutanga ndimbochira baba wangu.” Asi wakati kwaari: “Siya vakafa vachire vakafa vavo; asi enda iwewe uteketese Umambo hwa Mwari.” No umwenizve wakati: “Ndinozokutevera Mambo, asi kutanga tenda kuti ndiende ndivaeneke vo nyumba yangu.” Asi Jesu wakati kwaari: “Akuna mundhu, ungadira nyara yake kubata baja ro n'ombe, echiringira sure, ungasisira Umambo hwa Mwari.” Ngosure kwo izvi Mambo wakaendesa vamweni vari makumi manomwe na vaviri, naye wakavatuma vaviri-vaviri pamberi pake ku madhoropa ese no ku ndau jese, apo paaida kuguma ambhwine. Naye wakati kwavari: “Mushando wo kukotora wakakura, asi vashandi vashomani; ndizvo mweshikumbira kuna mambo wo kukotora kuti atume vashandi mukukotora kwake. Endanyi, vonanyi ndinomutuma muri vakadari ngo zvimabvuta mukati mwo mathika. Musatora chikhwama, nokuti nyede, nokuti magwada: Musachungamija mundhu mu njira. Nyumba iriyese yo munozonghwina, kutanga mwechiti; kunyarara ngakuve kune iyi nyumba. Kuti aripo mwana wo kunyarara, kunyarara kwenyu kunozova panyezuru pake: Asi kuti asipo, kunyarara kwenyu kunozohwirira kwomuri. Garanyi munyumbemwo mwechiha no kumwa izvo zvovanomupa; ngokuti mushandi unosisira mupochereso wake. Musati umwu mwanghwina umwu mwanghwina. Dhoropa ririrese romunozonghwina, navo vakamuashira, ihanyi izvo zvovanodira pamberi penyu. Rapanyi vanohwara varimwo, munozoti kwavari, kuti: Umambo hwa Mwari hwakwedera kwomuri. Asi mu dhoropa umwo mwomunozonghwina, navo vasikamuashiri, budanyi muende mu makwanja aro, mwechiti. Eya, no bukuta ro dhoropa renyu, iro rinonamirira kutshoka jenyu, tinoripumbhujira kwomuri; asi zivanyi ichi, kuti Umambo hwa Mwari hwakwedera. Ndinoti kwomuri, kunozopinda kurerukira Sodhoma ngo iro zuva kuno iro dhoropa.” “Ikhombo kwouri, Korazini! Ikhombo kwouri Bhetisaidha! Ngokuti kudari mishando yo simba iyo yakayitwa kwomuri, yayinga yakayitwa mu Tire no Sidhoni, vaizonga vakatenderuka karetu, vechigara mu marota vakasimira masako. Kani hai, kunozopinda kurerukira Tire no Sidhoni ngo zuva ro kutongwa kuno imwimwi. Iwewe Kaperanaume, unozokuriswa here mu gore? Iwewe unozobzuswa pasi muhayidhesi. Iye unopurukira kwomuri, unopurukira inini; naye unomuramba unondiramba inini. No uwo unondiramba inini unoramba uwo wakandituma.” No vari makumi manomwe na vaviri vakapetuka ngo kudakara, vechiti: “Mambo, no mabzoka aitipfavira ngo zina rako.” Wakati kwavari: “Ndakamuvona Sathani echiwa kubva mu gore, wakadari ngo mbheni. Vonanyi ndakamupa simba ro kutsika nyoka, no zvinyavada, no panyezuru po simba rese ro mukorore: Akuna no chiro na chimwe chinozomushaishira. Zvakanyadaro, musadakara ngo ichi, kuti mweya inomupfavira; asi dakaranyi ngokuti mazina enyu akatahwa mu gore.” Ngo nguva iyo iye wakadakara mu Mweya Wakachena, akati: “Ndinokubonga Baba, Mambo wo mu gore no nyika, kuti wakafisha izvi kuno vakangwara, no vanoziva, ukazvipangijira kuno vana vadoko; eya Baba ngokuti mwakazvivona izvi zvakanaka mukuvona kwenyu. Zvese zvakapuwa kwendiri ndi Baba wangu. Akuna naumwe unoziva Mwana kuti uri yani, kwega Baba; nokuti Baba kuti uri yani, kwega Mwana, no uwozve waanoda Mwana kuti amupangijire kwaari Baba.” Naye wakakunukukira kuno vajiji vake, ngo kufishika wakati: “Anomuchena majiso ao anovona zvomunovona imwimwi. Ngokuti ndinoti kwomuri, kuti vaprofeti vazhinji no majimambo vayiva no chidisiso chokuvona zvomunovona, navo avazivi kuzvivona; zve, no kuzwa zvomunozwa, navo avazivi kuzvizwa.” Vonanyi rakatikuti, rakamuka, richimueja, rikati: “Mujijisi, chinyi chondinozoita kuti ndigare ndhaka yo kupona kusikaperi?” Iye wakati kwaari: “Chinyi chakatahwa mu mipango? Unojijenyi?” Naro rechipingura, rakati: “Unozomuda Mambo Mwari wako ngo mwoyo wako wese, na ngo mweya wako wese, na ngo simba rako rese, na ngo kurangarira kwako kwese; no muvakihwana wako kudari ngo kujida kwako.” Naye wakati kwaari: “Wanasa kupingura, ita kudaro newe unozorarama.” Asi iro rechida kujipembeja, rakati kuna Jesu: “Ndiyani uri muvakihwana wangu?” Jesu wakapingura, akati: “Mundhu wakatikuti waibzuka echibva Jerusarema kuenda Jeriko; naye wakasongana no majongoni ao akamukhumura zvokufuka zvake, akamurova, akaenda, omusiya oda kufa. Kwakaitika kuti mupristi wakatikuti waibzuka ngo njira iyo, naamuvona wakapinda ngo divi rimweni. Ngokudarozve muRevhi, apo aguma naamuvona, wakapinda, ngo divi rimweni. Asi muSamariya wakatikuti, echifamba hwendo, wakaguma apo paayiva, naapo amuvona, wakamuzwira urombo. Wakaviya kwaari, akapomba mavonje ake, echidurura mafuta no vhini; naye wakamugajika pa chipfuyo chake, wakamuzisa ku nyumba yo vaeni, wakamungwarira. No kwaeja wakabudisa madhenariyo maviri, wakaapa kuno muno wo nyumba, akati, mungwarirei; no icho chounozonyengejera kuripa, inini apo ndoviyazve ndinozokuripira. Ngowapi kwaavo vatatu, kurangarija kwako, wakayita muvakihwana kwaari uwo wakawira pakati po majongoni?” Naro rakati: “Uwo wakamuitira nyasha.” Na Jesu wakati kwaari: “Enda, uite kudaro newe.” Hino vechifamba muhwendo hwavo, vakaguma ku guta rakatikuti; no mujimayi unozwi Marita wakamuashira mu muzi mwavo. Naye wayiva no munukuna waizwi ndi Mariya, iye wakagara patshoka ja Mambo, echizwa mazwi ake. Asi Marita wakaneseka ngo mishando yakawanda; naye wakaviya kwaari, akati: “Mambo, amuna ndava nazvo here kuti munukuna wangu wandisiya kushanda, ndiri ndega? Ndizvo mubvunjenyi kuti andidetsere.” Asi Mambo wakapingura, akati kwaari: “Marita, Marita, unodembatemba, no kuneseka ngo zviro zvakawanda. Asi chiro chimwe chinosisira: Ngokuti Mariya wasanangura rupande uhwo hwakanaka, rusikazobviswi kwaari.” Kwakaitika echikumbira ku ndau yakatikuti, apo apeja, umwe wo wajiji vake vakati kwaari: “Mambo, tijijise kukumbira, kudari ndi Johani naye wakajijisa vajiji vake.” Iye wakati kwavari: “Apo mwookumbira, mwoti: Baba Ngarireremejwe zina renyu. Umambo hwenyu ngahuviye. Kuda kwenyu ngakuitwe mu nyika Kudari ngo mu gore. Tipenyi zuva ngo zuva kuha kwedu. Tiregererenyi zvishaishi zvedu; ngokuti isisuvo tinoregerera vese avo vano ndava kwetiri. Musatinghwinisa mukuejwa asi mutinunure kuno uwo wakashata.” Naye wakati kwavari: “Ndiyani kwomuri uno shamwari, kudari waenda kwoiri pakati po usiku, echiti kwaari, shamwari, ndishongejevo zvimanda zvitatu, ngokuti shamwari yangu yaguma kwendiri yechibva muhwendo hwayo, neni andina chokuipa; naye kudari apingura, ari mukati, echiti: Usandinesa; musuvo wakonywa zvino no vana vangu vaaneni pa mubhedhi; andingakoni kumuka kuti ndikupe. Ndinoti kwomuri, kuti, pikija asikazomuki amupe ngokuti uri shamwari yake, asi ngo ndava yo kuvangirira kwake unozomuka, amupe zvese zvaanotama. Ndizvo ndinoti kwomuri, kumbiranyi, kunozopuwa kwomuri; pshakanyi, nemwi munozowana; gugujiranyi nakwo kunozobewurihwa kwomuri. Ngokuti mundhu wese unokumbira unoashira, no uwo unopshaka unozowana; no uwo unoguguja kunozobewurihwa kwaari. Ndiyani pakati penyu ari baba, apo mwana wake echikumbira chimanda, unozomupa buwe? Nokuti echikumbira hove paugaro pokumupa hove amupe nyoka here? Nokuti kudari echikumbira zanda, unozomupa chinyavada here? Ndizvo kudari imwimwi mutori vakashata mwechiziva kupa vana venyu zvipo zvakanaka, Baba wenyu vari mu gore unozopinda kwakaitawani kupa Mweya Wakachena kwaavo vanokumbira kwaari?” Iye waimbirimbija bzoka, rayiva mbeveve, kwakaitika bzoka rabuda, mbeveve yakavereketa. No mbungano yakashamiswa. Asi vamweni vavo vakatikuti, vakati: “Iye unombirimbija mabzoka ndi Bheezebhuri muzvare wo mabzoka; no vamweni, vechimueja vakapshaka kwaari chivoniso chinobva mu gore.” Asi iye echiziva mirangariro yavo, wakati kwavari: “Umambo hwese hunojiparaja mukati mwahwo, hunoparara; no nyumba inojiparaja inowa pasi. No kudari Sathani echijimukira ngokwake, umambo hwake hungaita maimirenyi? Ngokuti munoti kuti inini ndinombirimbija mabzoka ndi Bheezebhuri. Kudari inini ndechimbirimbija mabzoka ndi Bheezebhuri, vana venyu vanoambirimbija ndiyani? Ndizvo ivo vanozoyita vatongi venyu. Asi kuti inini ndechimbirimbija mabzoka ngo simba ra Mwari, ngokudaro Umambo hwa Mwari hwaviya kwomuri. Apo uwo uno simba uno zvokurwa ndizvo unongwarira nyumba yake, no mujiyo yake inozongwaririka. Asi apo umweni unomupinda ngo simba unoviya panyezuru pake, amunyise, unozobvuka kwaari zvokurwa ndizvo zvake, izvo zvaaigonda ndizvo, unokovanisira zvakapokonyohwa zvake. Iye usipo neni unorwa neni; no uwo usikaunganiji neni unoparaja.” “Apo mweya unesvina wabuda ku mundhu, unofamba ndau jisina kumwa, wechipshaka kuzorora; usikakuwani, unoti ndohwirira ku nyumba yangu apo po ndakabva. Naapo woviyazve, unoivona yakapshaihwa, no kurongwa. Naapo unoenda, wotorazve mweya imweni minomwe, iyo inopinda kushata kuno uwo wo kutanga, nayo inonghwinemwo, no kugara umwo; no kupejisira kwo chiyimo chake mundhuwo chinopinda kushata kuno cho kutanga.” Kwakaitika echivereketa izvi jimayi rakatikuti rayiva pakati po mbungano rakadanijira, rikati kwaari: “Inomuchena iyo ndani yakakubereka, no mazamu ao owakamwa.” Asi iye wakati: “Eya, kakurutu vanomuchena avo vanorizwa izwi ra Mwari, vechiringwarira.” Kwakati mbungano yechiungana pamwepo kwaari, iye wakatanga kuvereketa kuti: “Uwu mubarihwana uri mubarihwana wakashata; unopshaka chivoniso; asi akuna chivoniso chinozopuwa kwouri, chivoniso cha Jona chega. Ngokuti kudari ndi Jona wakayita chivoniso ku vaNinivha, ngokudarozve Mwana wo Mundhu unozoyita chivoniso kuno uwu mubarihwana. Mambokaji wo nyika yo Kubani unozomuka pamwepo no vandhu vo mubarihwana uwu, ngo zuva ro kutongwa, naye unozovaparisa ndava; ngokuti iye wakabva ku magumo wo nyika, kuenda kwoozwa kungwara kwa Soromona; vonanyi, mukuru kuna Saromona uri pano. Vandhu vo Ninivha vanozoima ngo zuva ro kutongwa pamwepo no uwu mubarihwana, navo vanozouparisa ndava; ngokuti ivo vakatenderuka ngo kuchumayira kwa Jona; vonanyi, Mukuru kuna Jona uri pano.” “ Akuna mundhu apo unobwakija chibani, ochidira pandau yakachitirika, nokuti pasi po chitengu, asi pachigajikiro pacho, kuti avo vanonghwina vavone kujeka. Chivheneko cho muviri ijiso rako, apo jiso rako rakanaka, muviri wako wese nawo unozara ngo kujeka; asi kuti rakashata, muviri wako wese unozara ngo chidima. Ndizvo ngwarayi kuti kujeka ukwo kuri mukati mwako akuri chidima akadi. Ndizvo kudari muviri wako wese wakazara ngo kujeka, pasina divi rine chidima, muviri wese unozozarisa ngo kujeka, kudari ngo apo chivheneko chinonasa kujekisa, chinokujekisa.” Echivereketa, mufarisi wakatikuti wakamukoka kuti ahe naye; naye wakanghwina, akacheama po kuhira. Kwakati, apo mufarisi avona, wakashamiswa kuti iye aazivi kushamba asati aha. Na Mambo wakati kwaari: “Zvino imwimwi, vafarisi munosuka kunja kwo tsani no kwo ndiro; asi mukati mwenyu mwakazara ngo umbavha no kushata. Imwimwi mapenji, iye wakayita zvo kunja, aazivi kuyitazve zvo mukati here? Asi ipanyi zviri mukati kuyita zvipo, zvese zvinozochena kwomuri. Asi ikhombo kwomuri vafarisi! Ngokuti munopa chogumi cho mindi no rue no murivo yese asi munorerusa kutonga kwakwo, no rudo rwa Mwari! Asi kwaisisira kuti muite izvi, musikaregeri zvimweni. Ikhombo kwomuri vafarisi! Ngokuti munoda zvigaro zvo pamberi mu nyumba jo kudira, no kuchungamijwa pandau jo musika. Ikhombo kwomuri! Ngokuti mwakadari ngo makuva asikavoneki, no vandhu vanofamba panyezuru pawo vasikazivi.” No gweta rakatikuti rakapingura, rechiti kwaari: “Mujijisi, wechivereketa kudari unotitukavo nesu.” Naye wakati: “Ikhombo kwomuri nemwi magweta. Ngokuti munothikisa vandhu mitwaro inorema kuitwara, nemwi mwambhwine musikaipshasi ngo chikunwe cho zvikunwe zvenyu. Ikhombo kwomuri! Ngokuti munovaka makuva ovaprofeti, no majibaba enyu akavauraya. Ndizvo muri zvapupu no vanotenderana no mishando yo majibaba enyu: Ngokuti ivo vakavauraya, nemwi munovaka makuva avo. Ndizvozve, kungwara kwa Mwari kwakati, ndinozotuma kwavari vaprofeti no vapostori; vamweni vavo vanozovauraya, vechivatambuja no kuvateverera; kuti ngazi yo vaprofeti vese yakaparajwa kubvira kwo kusikwa kwo nyika ibvunjisiswe kuno uwu mubarihwana; kubvira kungazi ya Abhera, mbhera kuguma kungazi ya Zakariya uwo wakaurawa pakati po altari no themperi; eya ndinoti kwomuri, inozobvunjisiswa kuno uwu mubarihwana. Ikhombo kwomuri magweta! Ngokuti imwimwi mwakabvisa mugogo wo kuziva amuzivi kunghwina imwimwi mwambhwine, naavo vainghwina mwakavarambisa.” Kwakati echibva apo, vatari no vafarisi vakatanga kumuvangijira kakurutu, no kumuchenekera kuti averekete zviro zvakawanda; vechimuteya, kuti vamubate ngo chiro chinobva ku muromo wake. Ngo uwo mukuvo apo vandhu vasikaverengeki vaungana pamwepo, kwokuti vaichikana, wakatanga kuvereketa kuno vajiji vake, kuti: “Ngwariranyi mumera wo vafarisi, uwo uri kujiitisa. Ngokuti akuna chiro chakadumaijwa chisikazovoneki; no chakafishwazve, chisikazoziviki. Ndizvo icho chomwakavereketa muchidima chinozozwika mukujeka; no icho chomwakabvunjana munjeve mukati mwo makamera wo pakati, chinozoteketeswa panyezuru po chachungu cho nyumba.” “Neni ndinoti kwomuri shamwari jangu: Musatya avo vanouraya muviri, ngosure kwo uku vasina chovangayita. Asi ndinomuzivisa ngo uwo wo munozotya: Mutyenyi uwo ngosure kwo kuuraya uno simba rokurasha mu Gehena; eya, ndinoti kwomuri mutyenyi uwo. Zvishiri zvishanu azvitengeswi ngo makobiro maviri here? No chimwe chazvo achizokanganiki pamberi pa Mwari. Asi no bvuji ro musoro mwenyu rakaverengwa rese. Musatya; imwimwi munopinda kudikana kuno zvishiri zvizhinji.” “Neni ndinoti kwomuri, pikija ndiyani unozonditenda pamberi po vandhu, nayevo Mwana wo Mundhu unozomutenda pamberi po ngirosi ja Mwari. Asi iye unozondiramba pamberi po vandhu, ndinozomuramba pamberi po ngirosi ja Mwari. No mundhu wese unozovereketa izwi rakashata ngo Mwana wo Mundhu, rinozoregerehwa kwaari, asi kwaari uwo unotuka Mweya Wakachena akuzoregerehwi kwaari. Naapo voomuzisa mu nyumba jo kudira, no pamberi po vatongi, no pamberi po vano masimba, musazodembatemba ngo njira yo munozopingura ndiyo, nokuti munozopingura ngo mazwi akadini, nokuti munozovereketenyi. Ngokuti Mweya Wakachena unozomujijisa ngo iyo nguva icho chinosisira kuti muverekete.” No umwe wakatikuti wo mbungano wakati, kwaari: “Mujijisi, bvunjai hama yangu kuti tikovane ndhaka.” Asi iye wakati kwaari: “Mwanarumewe, ndiyani wandiemesa kuti ndiite mutongi nokuti mukovanisiri pakati penyu?” Naye wakati kwavari: “Ngwaranyi mwechijitarausa kubva kwo kuemura kwese; ngokuti kurarama kwo mundhu akubvi kwo kuwanda kwo upfumi hwaanahwo.” Wakavabvunja muezaniso, akati: “Munda wo guruja rakatikuti wakaivha zvakawanda. Naro rakakarangarija mukati mwaro, rechiti: Ndinozoitenyi? Ngokuti andina ndau yo kudira mbewu jangu? Naro rakati, ndinozodari: Ndopwanyira pasi nyumbu jangu, ndivake jinopinda kukura; naapo ndinozodira mbewu jangu jese no upfumi hwangu. Neni ndinozoti kuno mweya wangu, uno upfumi wakawanda wakaunganijihwa kukwanisa makore mazhinji; garisikai, wechiha, wechimwa, wechidakara. Asi Mwari wakati kwaari. Iwe benji, ngo uhwu usiku mweya wako unozodanijwa kwouri. No izvo zvowajiunganijira zvinozoita zvani? Zvakadaro naye uwo unojiunganijira upfumi, asi asiri mupfumi pamberi pa Mwari.” Wakati kuno vajiji vake: “Ngo iyi ndava ndinoti kwomuri, musadembatemba ngo ndava yo kurarama kwenyu, kuti, munozohenyi? Nokuti ngo ndava yo muviri wenyu, kuti munozofukenyi? Ngokuti mweya unopinda kuha, no muviri unopinda zvokufuka. Rangarijanyi ngo magunguhwe, kuti aakushi aaunganiji; aana nokuti nyumbu; na Mwari unoapakurira; imwimwi munopinda kwakaitawani kudikana kuno shiri? Ndiyani kwomuri ngo kudembatemba ungarebesa chiyimo chake ngo kubiti rimwe? Ndizvo kudari imwimwi musina simba ro kuyita icho chidodoko, munodembatemba ngenyi ngo zvimweni? Rangarijanyi ngo maruva, kumera kwaanoita; aashandi, zve, aaruki; asi inini ndinoti kwomuri, kuti, na Saromona mu uthende hwake hwese aazivi kumbosimira kudari ngo rimwe rawo. Asi kudari Mwari echisimija kudaro mwenje wo mushango, uwo uripo nyamasi, na mangwana unokandihwa muchoto, iye unozopinda kwakaitawani kumusimija, imwimwi muno kutenda kudodoko? Musapshaka zvokuha no zvokumwa, zve musan'un'uta. Ngokuti majinja ese onyika anozvipshaka izvi zvese; asi Baba wenyu vanoziva kuti munozvida izvi zviro. Asi, pshakanyi umambo hwake, no izvi zvinozonyengejehwa kwomuri. Musatya, imwimwi mushambi mudoko, ngokuti chiri chidisiso cha Baba wenyu kuti vamupe Umambo. Tengesanyi zvomunazvo, mukovere vanotama; mujiitire zvikwama zvisikasakari, upfumi mu gore husikaperi, apo mbavha poisikakhwederi, nokuti honye poisikaparaji. Ngokuti apo pohuri upfumi hwenyu, apo ndipo pano mwoyo yenyu.” “Zviunu zvenyu ngazvisungiswe, no zvivheneko zvenyu ngazvijeke; nemwi muite kudari ngo vandhu vanomurindira mambo wavo, apo oobva ku dhiri ro muchadho; kuti apo ooviya, no kuguguja, vamubewurire paripo. Vanomuchena avo varanda apo mambo ooviya unozovawana vechirinda! Ngozvirokwazvo ndinoti kwomuri, kuti unozojisimija, no kuyita kuti vagare pasi po kuha, naye unozoviya, no kuvashandira. Kudari echizoviya ngo murindo wo chipiri, nokuti wo chitatu, andovawana vakadaro, vanomuchena avo varanda. Asi zivanyi ichi, kuti kudari mune wo nyumba inga aziva nguva iyo yaizoviya ndiyo mbavha, waizorinda, usikatendi kuti nyumba yake iphwanyiwe. Ndizvo imwimwi itanyi vakanasirihwa; ngokuti Mwana wo Mundhu unoviya ngo nguva yo musikarangariji.” Pedru wakati: “Mambo unovereketa muezaniso uwu kwetiri here, nokuti kwavari vese?” Mambo wakati: “Hino ndiyani muranda unogondeka no wakangwara, uwo mambo wake unozomuemesa panyezuru po nyumba yake, kuti avape kuha kwavo ngo mukuvo kwawo? Unomuchena uwo muranda apo mambo wake ooviya unozomuwana echiita kudaro. Ngozvirokwazvo ndinoti kwomuri, unozomuemesa panyezuru po zviro zvese zvaanazvo. Asi kudari uwo muranda echizoti mu mwoyo mwake: Mambo wangu unononoka kuviya, otanga kurova varanda rume no varanda kaji; ahe amwe, arejere; mambo wo muranda uwo unozoviya ngo zuva raasikamugariri, na ngo nguva yaasikazivi naye unozomugura kuyita zvigurwa zviviri, amuemesere chikovaniswa chake pamwepo no vasikatendi. No uwo muranda waiziva chiri kuda kwa mambo wake, asikazivi kunasirira, nokuti kuyita kudari ngo kuda kwake, unozosvaputwa ngo mushakwe muzhinji. Asi uwo asaiziva, oita izvo zvinosisira kuti arohwe, unozosvaputwa ngo mushakwe mushomani. No kwaari uwo wakapuwa zvakawanda unozobvunjiswa zvakawanda. No kwaari uwo wovakapa zvakawanda, vanozomubvunjisa zvakawanda.” Ndakaviya kukandira muriro panyezuru po nyika; neni ndinozodenyi kuti muriro watobwaka nazvinopano. Asi ndino rubhapatiso rwo kubhapatiswa ndirwo, ndinotambujwa kwakaitawani mbhera rozoitika! Munopinimija here kuti ndakaviya kopa kunyarara mu nyika? Ndinomubvunja kuti, haiwa; asi kuparajana. Ngokuti kubvira zvino vanozovapo vashanu mu nyumba imweyo vari vakaparajana, vatatu vakapesana no vaviri, vaviri vakapesana no vatatu. Baba vanozopesana no mwana, no mwana unozopesana na baba, na mayi vanozopesana no mwana wokaji, no mwana wokaji unozopesana na mayi, na mazvarira vanozopesana no nyamwana yake, no nyamwana inozopesana na mazvarira wake. Zve wakati kuno mbungano: “Apo mwoovona gore rechibva ngo kumavirira, paripo munoti: Kunoda kuna mvura; nakwo kunoitika kudaro. Naapo mwoovona bepo rechivhuvhuta kubva ngo kakusi, munoti, kunozopisa; nakwo kunozoitika kudaro. Imwimwi vajiyitisi munokona kujija hope yo nyika, no yo mu denga, kunoitika ngenyi kuti amukoni kujijisa ngo nguva iyi? Amukoni ngenyi ngokwenyu kuparajanisa icho chakanaka? Ngokuti uchienda no mukorore wako pamberi po mutongi, uchiri mu njira ejai kuti usununguhwe ndiye; kuti pamweni uwo akupire ku mutongi, no mutongi akupire kuno phurisa, no phurisa rikunghwinise mu guniya. Ndinoti kwomuri kuti autongozobudimwo usati waripa sendi ro kupejisira.” Zvino vayivapo ngo uwo mukuvo, vamweni vakatikuti vakamubvunja ngo vaGarire, avo ngazi yavo Piratu wayinga akaivhenganija no midiro yavo. Naye wakapingura, akati kwavari: “Munorangarija here kuti avo vaGarire vayiva vashaishi kupinda vamweni vese vaGarire, ngokuti ivo vakava no dambujiko rakadaro? Ndinomubvunja kuti, haiwa; asi ngo kunja kwokuti mutenderuke imwimwi, munozoperavo mwese ngokudaro. Nokuti avo vari gumi no vasere avo vakawihwa panyezuru pavo ngo rusvingo hwayiva mu Siroma, ukavauraya, munorangarija here kuti vayiva vano ndava kupinda vandhu vese vanogara mu Jerusarema? Ndinomubvunja kuti, haiwa, asi ngo kunja kwokuti mutenderuke imwimwi, munozopera mwese ngokudaro.” Wakavereketa uwu muezaniso: “Mundhu wakatikuti wayiva no mukuyu wakasimwa mu munda wake wo mivhini; naye wakaviya echipshaka michero kwouri, asi aazivi kuwana chiro. Wakati ku murimi wo mivhini: Vonayi, makore aya matatu ndakaviya ndichipshaka michero kuno uwu mukuyu, ndisikaiwani. Utemerei pasi; unopamba ngenyi munda? No uwo wakapingura, akati kwaari: Mambo, chimboregera nyamwakazve ndiphande pasi pawo kuutendeneja, ndidire ndimo; no kudari ukazobereka michero ngosure kwo izvi, zvakanaka; asi kudari usikazobereki, unozoutemera pasi.” Naye waijijisa kuimwe yo nyumba jo kudira ngo sabatha. Vonayi mujimayi wayiva no mweya wo kuhwara makore ari gumi na masere, wayinga no nunda, asikakoni no padodoko kujitova. Naapo Jesu amuvona, wakamudanija, akati kwaari: Mujimayi wasununguhwa kubva kwo kuhwara kwako. Naye wakadira nyara jake panyezuru pake, paripo iye wakatoveka, akakuja Mwari. No mukuru wo nyumba yo kudira, wakashamiswa ngokuti Jesu wayinga aponesa ngo zuva ro sabatha, wakati, kuno mbungano: “Aripo mazuva matandhatu ao kunosisira kuti vandhu vashande ndiwo; ndizvo ngaao viyanyi muponeswe, haiwa ngo zuva ro sabatha.” Asi Mambo wakapingura, akati: “Imwimwi vajiitisi umwe ngaumwe wenyu aasununguri here ngo zuva ro sabatha n'ombe yake nokuti mbongoro yake kubva muchibaya, aitore kuenda nayo kwoimwisa kumwa? Akudikani here kuti uwu mujimayi ari mwana wa Abrahama, uwo waakasunga Sathani, vonayi, makore aya ari gumi na masere, asununguhwe kubva kwo kusungwa uku ngo zuva ro sabatha?” Naapo ayinga avereketa izvi, vakorore vake vakapsherujwa, no mbungano yese yakadakara ngo ndava yo izvo zvese zvinokuriswa zvakaitwa ndiye. Ndizvo wakati: “Umambo hwa Mwari hwakadari ngenyi, ndohuezanisa nenyi? Hunonga mbhumba yo mustadhi, iyo yaakatora mundhu, akaikandira mu munda mwake; nayo yakamera, yakaita pfiba; no shiri jo mu denga jakagara mu matavi aro.” Wakatizve: “Ndohuezanisa nenyi Umambo hwa Mwari? Wakadari ngo mumera uwo waakatora mujimayi, akaufisha mukati mwo mitani mitatu yo upfu mbhera hwakafemeswa hwese.” Naye wakafamba ngo mu madhoropa no mu maguta, echijijisa, echifamba kuenda Jerusarema. No umwe wakatikuti wakati kwaari: “Mambo, vari vashomani here vanozoponeswa?” Naye wakati kwavari: “Shingiriranyi kupinda ngo pa chimana chakamanikana, ngokuti ndinoti kwomuri, kuti, vazhinji vanozopshaka kupinda, navo avazokoni. Apo watomuka mune wo nyumba no kukonya musuvo, nemwi mwotanga kuenda kunja, no kuguguja pa musuvo, mwechiti, Mambo, tibewurire; naye unozopingura, echiti kwomuri: Andimuzivi, kuti munobva kwapi. Naapo munozotanga kunanga kuti: Takaha no kumwa mukuvona kwako, newe wakajijisa mu makwanja edu. Naye unozoti: Ndinomubvunja, andimuzivi kuti munobva kwapi; ibvanyi kwendiri, imwimwi mwese vashandi vo zvakashata. Apo panozova no chiriro no kukwesana kwo mazino, apo mwozovona Abrahama, na Isaka na Jakobe no vaprofeti vese mu Umambo hwa Mwari, neimwimwi mwambhwine mwarashwa kunja. Vanobva kumabvazuva no kumavirira, no kanjikazi no kakusi, navo vanozogara pa thafura mu Umambo hwa Mwari. Vonanyi varipo vo sure vanozoita vo pamberi, varipo vo pamberi vanozoita vo sure.” Ngo nguva iyo vakaviya vamweni vakatikuti vo vafarisi, vechiti kwaari: “Budai uende kubva pano; ngokuti Herodhi unoda kukuuraya.” Naye wakati kwavari: “Endanyi mwechiti kuno uwo muhwe, vonanyi, ndinozombirimbija mabzoka ndichirapa nyamasi no mangwana, na ngo zuva ro chitatu ndinozopeja. Asi kunodikana kuti ndifambe njira yangu nyamasi no mangwana, no zuva rinotevera, ngokuti akungaitiki kuti muprofeti afire kunja kwo Jerusarema. A Jerusarema, Jerusarema, iwewe unouraya vaprofeti, mwechivafura ngo mapuwe avo vanotumwa kwouri, kungana kwendaida kuunganija vana vako pamwepo kudari ngo mbhambho inounganija zvitiyo zvayo pasi po mapapiro ayo, nemwi amuzivi kutenda! Vonanyi nyumba yenyu yakasiiwa kuyita dongo. Neni ndinoti kwomuri, amuchazondivoni mbhera munozoti: Unomuchena uwo unoviya ngo zina ra Mambo.” Kwakaitika apo wanghwina mu nyumba yo umwe wo vakuru vo vafarisi, ngo zuva ro sabatha kooha chimanda, vaimuringisisa. Vonanyi, kwayivapo pamberi pake mundhu wakatikuti wayiva no ndhundhu. Na Jesu, wakavereketa kuno magweta no vafarisi, echiti: “Kunotendehwa here ngo mipango kurapa ngo zuva ro sabatha, nokuti akutendehwi?” Asi ivo vakanyarara. Naye wakamutora akamurapa, wakamuregera kuti aende. Naye wakati kwavari: “Ndiyani kwomuri uno mwana nokuti n'ombe yake yawa mu mwimbo, asikazoibudisi ngokukasira ngo zuva ro sabatha?” Navo vakakonehwa kumupingurazve ngo izvi. Naye wakavereketa muezaniso kwavari avo vakakokwa, apo avona kuti vatsanangura zvigaro zvo pamberi, echiti kwavari: “Apo ukakokwa nokuti ngouri mundhu ku dhiri ro muchadho, usazogara pasi pa ndau yo pamberi; kuti pamweni mundhu uri mukuru kuno iwewe wakokwavo ndiye, no uwo wakakukoka iwewe naye, unozoviya echiti kwouri: Mukayi uwu agare pano; naapo unozotanga kupsheruka koogara ndau yo sure. Asi apo ukakokwa enda ugare pandau yo sure, naapo uwo wakakukoka oviya, ungazoti kwouri: Shamwari, enda pandau yo pamberi; naapo unozokuriswa mukuvona kwavo vese vanogara newe pokuha. Ngokuti iye unojikurisa unozopfaviswa, no uwo unojipfavisa unozokuriswa.” Wakati kuno uwozve wakamukoka: “Apo wonasirira kuha kwo masikati, nokuti kwo madekoni, usazodanija shamwari jako, nokuti vakoma vako, nokuti hama jako nokuti maguruja ari vavakihwana vako; kuti pamweni vanozokukokavo, nakwo kuite kuhwirijihwa kwouri. Asi apo wonasirira kuha iwewe, koka varombo, vakakhuvazika, zvirema no mapofu; newe unozodakajiswa; ngokuti avo avana chokuhwirijira kwouri; ngokuti iwewe unozohwirijihwa mukumuka kwo vakarurama.” Naapo umwe wo avo vaigara naye pokuha, azwa izvi, wakati kwaari: “Unomuchena uwo unozoha chimanda mu Umambo hwa Mwari.” Asi iye wakati kwaari: “Mundhu wakatikuti wakanasira kuha kwo madekoni kwakawanda, wakakoka vazhinji. Naye wakatuma varanda vake ngo mukuvo wo kuha kwo madekoni koobvunja vakakokwa, kuti, chiviyanyi; ngokuti zviro zvese zvanasirihwa zvino. Navo vese vakatanga kukumbira kuregerehwa ngo mwoyo umwe. Uwo wo kutanga wakati kwaari; ndakatenga munda, nakwo kunodikana kuti ndiende kwouvona: Ndapota ngandiregerehwe. No umweni wakati: Ndakatenga n'ombe jo kanga shanu, neni ndinoendeyo kwoojieja; ndapota kwouri ngandiregerehwe. No umweni wakati: Ndakarovora mukaji, ndizvo andingakoni kuviyeyo. No muranda uwo wakaviya, akamuzivisa mambo wake izvi. Naapo mune wo nyumba wakacheneka wakati ku muranda wake, enda ngokukasira mu makwanja no mu njira jo mu dhoropa, uvaviyise pano varombo, no vakakuvazika, no mapofu, no zvirema. No muranda wakati: Mambo, icho chowapanga chaitwa, asi uchiriyo ugaro. Na mambo wakati kuno muranda wake, buda uende mu njira no mu zvimakwanja, uvaonge kuti vanghwine, kuti nyumba yangu izare. Ngokuti ndinoti kwomuri, kuti apana no mundhu kwaavo vakakokwa unozoravira kuha kwangu, kwo madekoni.” Zvino yaifamba naye mbungano huru; naye wakakunukuka, akati kwoiri: “Kuti aripo mundhu unoda kuviya sure kwangu, asikanyenyi baba na mayi wake, mukaji wake, vana vake, vakoma vake, no hanzvaji, eya, no kururama kwakezve aangaiti mujiji wangu. Iye usikatwari muchinjiko wake, no kuviya sure kwangu, aangaiti mujiji wangu. Ngokuti ndiyani kwomuri echida kuvaka rusvingo, usikatangi kugara pasi averenge mare yawo, kuti unayo here yo kuupeja? Kuti pamweni wopeja kudira majiro, asikakoni kuupeja, avo vese vanouvona vatange kumuitira jee, vechiti: Uwu mundhu wakatanga kuvaka, asikazivi kukona kuupeja. Nokuti ndiyani mambo uwo echienda kwoosongana na mambo umweni, mukurwa, asikatangi kugara pasi apangane kuti dangani uno simba here uno vandhu vari gumi ro zviuru (10.000) kusongana no uwo unoviya korwa naye uno makumi maviri wo zviuru (20.000) zvo vandhu? Nokuti umweni achiri ndhambo, atume masamukuru, koobvunjisa chaanoda chokuti vaiyane. Ndizvo pikija ndiyani kwomuri usikasiyi zvese zvaanazvo aangakoni kuyita mujiji wangu akadi. Munyu wakanaka, asi kuti munyu warasha kunaka kwawo, ucharungwa ngenyi? Auchadetseri chiro kuudira mu munda, nokuti kuyita mwarira; vandhu vanourasha kunja. Iye uno njeve jo kuzwa ngaazwe.” Zvino vashabisi no vashaishi vaikhwedera kwaari kumuzwa. No vafarisi no vatari vese vain'un'uta, vechiti: “Mundhu uwu unoashira vashaishi no kuha navo.” Naye wakavereketa kwavari uwu muezaniso, echiti: “Ndiyani mundhu kwomuri kudari uno zana ro mabvuta, no rimwe rawo rarashika, aasiyi here makumi mapfumbamwe no mapfumbamwe mushango, aende kwoopshaka iro rakarashika, mbhera ariwane? Naapo ariwana unoripingata pamapfuji ake, ngo kudakara. Naapo aguma kanyi, unodanija pamwepo shamwari jake no vavakihwana vake, echiti kwavari: Dakaranyi neni, ngokuti ndariwana bvuta rangu iro rayinga rakarashika. Ndinoti kwomuri; ngokudaro kunozovapo kudakara mu gore ngo ndava yo umwe mushaishi watenderuka, kupinda kudakara ngovari makumi mapfumbamwe no vapfumbamwe vari vakarurama, vasikatami kutenderuka.” “Nokuti ndiyani mujimayi uno madrakama ari gumi, kuti akarasha rimwe rawo, avheneki ruvhenu here, apshaire nyumba no kunasa kupshakisisa mbhera ariwane? Naapo ariwana unodanija pamwepo shamwari jake no vavakihwana vake, echiti: Dakaranyi neni, ngokuti ndariwana drakama iro rendakarasha. Ngokudaro ndinoti kwomuri, kuripo kudakara pamberi po ngirosi ja Mwari ngo ndava yo umwe mushaishi wakatenderuka.” Naye wakati: “Mundhu wakatikuti wayiva no vana vaviri. No mudoko wavo wakati kuna baba wake: Baba, chindikovanisirei ndhaka yechikovaniswa chendakaemesehwa. Naye wakakovanisira kwavari upfumi wake. Ngosure kwo mazuva mashomani mwana mudoko wakaunganija zvese pamwepo, akaenda ku nyika iri ndhambo; naye wakaparaja apo upfumi hwake hwese ngo kupona kwo kushaisha. Naapo ayinga apeja zvese, yakaguma njara huru mu nyikemwo, naye wakatanga kutama. Naye wakaenda akajipira kuno mundhu wo nyika iyo; naye wakamutuma kuenda kumunda wake kwoohavisa nguruve. Naye wayida kugutisa ndani yake ngo mateko aihiwa ngo nguruve, apana mundhu waimupa. Naapo wanasa kuziva pachake, wakati: Kuwanda kwakaitawani kwo varanda va baba wangu vano chimanda chinokwana, no cho kusiya, neni ndiri kufa ngo njara. Ndomuka ndiende kuna baba wangu, ndinozoti kwavari, baba ndashaisha pamberi po mu denga no pamberi penyu. Neni andichasisiri kudanijwa kuti ndiri mwana wenyu: Chindiitenyi kuti ndidari ngo umwe wo varanda venyu. Naye wakamuka, akaviya kuna baba wake. Asi ayinga achiri ndhambo, baba wake vakamuvona, vakamuzwira unyasha, navo vakagogoma, vakamukumbatira ngo mumusipa, vakamuchungamija ngo muromo. No mwana wakati kwaari: Baba ndakashaisha pamberi po mu denga no pamberi penyu, andichasisiri kudanijwa kuti ndiri mwana wenyu. Asi baba wake vakati kuno varanda vavo: Viyisanyi ngo kukasira nguvo yakapindisisa kunaka, mumusimije; mudire mbhete muchikunwe chake, no magwada mutshoka jake, viyisanyi buru rakanuna, muriuraye, ngatihe, tidakare. Ngokuti uwu mwana wangu inga wafa, zvino unoponazve; wakamborashika, zvino wawanika. Navo vakatanga kudakara. Zvino mwana wake wo dangwe wayinga ari mu munda; kwakati echiviya echikhwedera ku nyumba wakazwa kurija no kutamba. Naye echidanija kwaari umwe wo varanda, wakamubvunjisa kuti izvi zvichinyi? Naye wakati kwaari: Munukuna wako waviya; na baba wako vamuuraira buru rakanuna, ngokuti vamuashira achangwaririka no kupona. Asi iye wakatseneka, akaramba kunghwinemwo. Na baba wake vakabuda kunja, vakamusembezera. Asi iye wakapingura, akati kuna baba wake: Vonanyi, makore aya mazhinji ndakakushandira, neni andizivi kutongogura chimwe cho mipango yako, asi auzivi kundipa chimbuji chimwe kuti ndidakare no shamwari jangu. Asi waviya uwu mwana wako uwo wakapeja upfumi hwako pamwepo no mambhombho, iwewe wamuuraira buru rakanuna. Asi iye wakati kwaari: Mwana undori neni nguva jese, no izvo zvendinazvo zvindori zvako. Asi kwaisisira kuti tidakare no kudakarisisa, ngokuti uwu munukuna wako wayiva akafa, naye unoponazve; wayiva akarashika, na zvino watowanika.” Wakatizve ku vajiji vake: “Kwayivapo mundhu wakatikuti wayiva mukhupuki, uwo wayiva no mungwariri; naye wakaitihwa ndava yokuti waiparaja upfumi hwake. Naye wakamudanija, akati kwaari; chinyi ichi chendinozwa ndiwe? Wechiverenga mushando wo ungwariri wako; ngokuti iwewe auchaitizve mungwariri. No mungwariri wakati mukati mwake: Ndodini, ngokuti mambo wangu wabvisa kwendiri mushando wo ungwariri hwangu? Andina simba ro kurima; ndina nyowa jo kupembha. Ndinoziva chendinozoita, kuti, apo ndambirimbijwa kubva mu mushando wo ungwariri hwangu, vanozondiashira mu nyumba javo. Naye echidanija kwaari vese vayiva no zvikwereti kuna mambo wake umwe ngaumwe, wakati kuno uwo wo kutanga: Uno zvikwereti zvingana kuno mambo wangu? Iye wakati: Zana (100) ro mabiya omafuta. Naye wakati kwaari: Tora tshamba yako ukasire kugara pasi utare kuti makumi mashanu. Naapo wakatizve kuno umweni: Iwewe uno zvikwereti zvingana? Naye wakati: Zana (100) ro zvitengu zvo koroni. Naye yakati kwaari: Tora tshamba yako utare kuti makumi masere. Na mambo wake wakamukuja mungwariri wakashata ngokuti wayinga wayita ngo kungwara, ngokuti vandhu voiyi nyika vonopinda kungwara kundanga javo kuno vandhu vo kujeka. Neni ndinoti kwomuri: Jiyitirenyi shamwari ngo upfumi husikazivi kururama, kuti apo wapera, vangazomuashira muugaro husingaperi. Iye unogondeka ngo zvidodoko unozogondekazve ngo zvakawanda; no uwo usikazivi kururama ngo zvidodoko uri usikazivi kururamazve ngo zvakawanda. Ndizvo kuti musikazivi kuyita vanogondeka ngo upfumi husikazivi kururama, ndiyani unozomugonda ngo upfumi hwo gwinyiso? No kudari musikazivi kuyita vanogondeka ngo izvo zvayiva zvo vamweni, ndiyani unozopa kwomuri izvo zviri zvenyu? Apana muranda ungakona kushandira majimambo maviri; ngokuti unozonyenya umwe ade umweni, nokuti unozobatirira kwo umwe, ashore umweni, amungakoni kushandira Mwari, no upfumi.” Vafarisi, avo vaida mare, vakazwa izvi zvese; navo vakamuseka. Naye wakati kwavari: “Imwimwi muri avo vanojipembeja pamberi po vandhu, asi Mwari unoziva mu mwoyo mwenyu. Ngokuti icho chinoreremejwa pakati po vandhu, chiri chinonyangaja pamberi pa Mwari. Mipango no vaprofeti zvaindovapo mbhera kuguma kwa Johani; kubvira ngo uwo mukuvo Umambo hwa Mwari hunochumaihwa, no mundhu wese unonghwinemwo ngo simba. Asi kunopinda kureruka kuti denga no nyika zvipinde, kuno kuti chidondhwe chimwe cho mipango chikorere kuitika.” “ Pikija ndiyani unoramba mukaji wake, arovore umweni, iye unoomba; no uwo unomurovora uwo wakarambwa kubva kumwamuna wake, unoomba.” “Kwayivapo mundhu wakatikuti, wayiva mukhupuki, naye waisimira machira akapshukuruka, no akachena, echindoha zvakanaka mazuva ese. Kwayivapozve mupembhi waizwi ndi Razaro waidihwa pamusuvo po mukhupuki, akazara ngo zvironda, naye wayida kuha matshekeneswa aiwa kubva pa thafura po mukhupuki; eya no imbhwa jaiviya jechimunakata zvironda zvake. Kwakatika kuti mupembhi wakafa, akatwahwa ngo ngirosi kuenda kuditi ra Abrahama; no mukhupuki wakafavo wakavigwa. Ari mu Haidhesi wakamusa majiso ake, echitambujwa, akavona Abrahama ari kuretu, na Razaro ari paditi pake. Naye wakadanijira, akati: Baba Abrahama, ndiyitire nyasha, utume Razaro kuti abije ku magumo echikunwe chake mu kumwa, atondhoje rurimi rwangu; ngokuti ndiri mukuhwajihwa mu murazvu uwu. Asi Abrahama wakati: Mwana, cherecheja kuti iwewe ngo nguva yo kupona kwako wakaashira zviro zvako zvakanaka, na Razaro ngokudaro wakaashira zviro zvakashata. Asi zvino iye unoembezehwa, newe uri mukuhwajihwa. No panyezuru po izvi zvese riripo rindi guru rakadihwa pakati pedu neimwimwi, kuti avo vanoda kubva kuno kuviya kwomuri, avangakoni, zve akuna angaambuka kubva kwomuri kuviya kwetiri. Naye wakati: Ndizvo, ndinomupota baba kuti umutume ku nyumba ya baba wangu, ngokuti ndine vanukuna vashanu; kuti iye apupure kwavari, kuti ivozve vachazoviya ku ndau iyi yo kutambujwa. Asi Abrahama wakati: Vanaye Mosi no vaprofeti, ngavavapurukire. Asi iye wakati: Haiwa, baba Abrahama, asi kudari umwe echienda kwavari echibva kwo vakafa, vanozotenderuka. Asi iye wakati kwaari: Kudari vasikapurukiri Mosi no vaprofeti, avatongozozwi pikija umwe amuka kubva kwo vakafa.” Naye wakati ku vajiji vake: “Akungaitiki kuti zvikhugunyiso zvisazoviya; asi ikhombo kwaari uwo wezvinoviya ndiye! Kuri nani kwaari kuti gwiyo ro kukwiya risungihwe muhuro mwake, naye akandihwe mu jombe, kuno kuti akhugunyise umwe wo ava vadoko. Jingwarirenyi. Kudari munukuna wako echikushaishira, murambisei; kuti iye echitenderuka, muregererei. No kudari iye echikushaishira kanomwe ngo zuva, akakumbira kwouri kanomwe, echiti: Ndinotenderuka, newe unozomuregerera.” No vapostori vakati kuna Mambo: “Wanja kugonda kwedu.” Na Mambo wakati: “Kudari mwayiva no kugonda kwakadari ngo mbhumba yo mustadhi, mwaizonanga kuno uwu muti wo sukamore, kuti: Bvitwa, ujimikwe mu jombe; nawo waizomupurukira. Asi ndiyani kwomuri, uno muranda echirima mu munda, nokuti echihavisa mabvuta, ungazoti kwaari: Apo ooviya echibva mu munda, viya zvino pano, ugare panokuha? Aazoti here kwaari: Ndinasirirei chokuti ndihe, ujisimije, undishandire, mbhera ndoha, no kumwa, ngosure kwo uku wozohavo no kumwavo iwewe. Unobonga here uwo muranda ngokuti wakayita izvo zvaakapangwa kuyita? Ngokudaro imwimwi nemwivo apo mwazopeja kuyita zvese izvo zvomwakapangwa, mwechiti: Tiri varanda vasikadetseri chiro; takaita izvo zvaisisira kuti tizviite.” Kwakaitika apo vechienda Jerusarema, kuti iye wakapinda ngo pakati po Samariya no Garire. Kwakati echinghwina mu guta rakatikuti, vakasongana naye vandhu vari gumi vayiva no mapere, vakayima vari ngo ndhambo. Navo vakamusa izwi ravo, vechiti: “Jesu Mujijisi, tiyitire nyasha.” Kwakati apo avavona, wakati kwavari: “Endanyi mujipangijire ku vapristi.” Kwakaitika vechienda, vakaponeswa. No umwe wavo apo avona kuti waponeswa, wakahwirira, echikuja Mwari ngo izwi guru. Naye wakawa ngo hope patshoka jake, echimubonga; iye wayiva muSamariya. Naapo Jesu wakati: “Avazivi kuponeswa vari gumi here? Asi vari kwapi vapfumbamwe? Apana wakavoneka here echipetuka kwookuja Mwari, asi ega uwu mupara? Wakati kwaari: Mukayi, uende; kugonda kwako kwakuponesa.” Kwakati echibvunjiswa ngo vafarisi kuti Umambo hwa Mwari unozoviya rini, wakavapingura, akati: “Umambo hwa Mwari ahuviyi ngo kuvoneka. Avazotizve, vonanyi, pano, nokuti apo! Ngokuti vonanyi, Umambo hwa Mwari huri mukati mwenyu.” Naye wakati ku vajiji: “Mazuva anozoviya omunozodisisa kuti muvone rimwe ro mazuva o Mwana wo Mundhu, nemwi amuzorivoni. Navo vanozoti kwomuri: Vonanyi, apo! Nokuti vonanyi, pano! Musazoendeyo, nokuti kuvatevera. Ngokuti kudari ngo mbheni inorazva yechibva kudivi rimweni ro mu denga, inojekisa kuguma kudivi rimweni ro pasi po mu denga, no kuviya kwo Mwana wo Mundhu kunozodaro ngo zuva rake. Asi kutanga kunodikana kuti atambujwe ngo zvakawanda, no kurambwa ngo uwu mubarihwana. No kudari ngozvakaitika ngo mazuva a Noa, kunozodarozve ngo mazuva o Mwana wo Mundhu. Vakaha, vakamwa, vakarovora, vakarovojwa, mbhera rozoguma zuva raakanghwina ndiro Noa mu ngarava, no ndambi yakaviya, ikapeja vese. Kudarizve ngozvakaitika ngo mazuva a Roti; vakaha, vakamwa, vakatenga, vakatengesa, vakasima, vakavaka; asi ngo zuva raakabuda ndiro Roti kubva mu Sodhoma, kwakanaya muriro no sorufa zvechibva mu gore, zvikavapeja vese. Kunozodarovo ngo zuva raanozopangijihwa Mwana wo Mundhu. Ngo zuva iro uwo uri panyezuru po nyumba, no mujiyo jake jiri mukati mwo nyumba, asazobzuka kuti ajitore, no uwo uri mu munda asapetuka. Cherechejanyi mukaji wa Roti. Uwo unozopshaka kuviyihwa ngo kururama kwake, unozokurasha, asi uwo unorasha kururama kwake iye unozokungwarira. Ndinoti kwomuri, ngo uhwo usiku vaviri vanozovapo pa mubhedhi umwewo; umwe unozotohwa, no umweni unozosiyiwa. Vanozovapo vanakaji vaviri vechikwiya pamwepo; umwe unozotohwa umweni unozosiyiwa. Naapo vandhu vaviri vanozovapo mu munda, umwe unozotohwa, no umweni unozosiyiwa. ” Navo vakapingura, vakati kwaari: “Kwapi, Mambo?” Naye wakati kwavari: “Apo pano muviri wakafa, ndipo panozoungana ngwanga.” Wakavereketa muezaniso kwavari echiti, kunodikana kuti vandogara vechikumbira, vasazoremba. Wakati: “Kwayivapo mu dhoropa mutongi wakatikuti, uwo asaimutya Mwari, asikareremeji no mundhu. Kwayivapo shirikaji mu dhoropa iro; nayo yakagara yechiviya kwaari, yechiti: Nditongerei ndava yangu kuno mukorore wangu. Mutongi aazivi kutenda mukuvo wakareba: Asi ngosure kwo uku wakati mukati mwake, pikija inini ndisikamutyi Mwari, nokuti kureremeja mundhu; asi ngokuti shirikaji iyi inondinesa, ndinozoitongera kuti isazondinesazve ngokundogara yechiviya. Na Mambo wakati: Izwanyi chakanangwa ngo mutongi usikazivi kururama. Mwari aazotongi ngo kururama here kuno vakatsananguhwa vake, avo vanochema kwaari masikati no usiku, naye unozononoka kuvabesera here mukuvo wakareba? Ndinoti kwomuri, kuti unozovatongera ngo kukasira. Pikija zvakadaro apo Mwana wo Mundhu ooviya, unozovona kugonda mu nyika here?” Wakavereketa uwu muezaniso kuno vakatikuti, avo vakajigonda kuti vari vakarurama, vechishora vamweni. “Vandhu vaviri vakakwira mu themperi kwookumbira; no umweni wavo wayiva mufarisi, no umweni wayiva mushabisi. Mufarisi wakayima, akakumbira kudari pachake, akati: Mwari, ndinokubonga kuti andizivi kudari ngo vandhu vamweni, vanoba, vasikazivi kururama, vanoomba, kudari ngo uwu mushabisi. Ndinoera kuha kaviri ngo vhiki; ndinopa chogumi cho zviro zvese zvondinazvo. Asi mushabisi echiyima ngo ndhambo aazivi kutenda no kumusa majiso ake kuringira mu gore, asi wakarova diti rake, echiti: Mwari, ndikungurirei inini mushaishi! Ndinoti kwomuri: Uwu mundhu wakabzuka kuenda ku nyumba yake echipembejwa kuno uwo umweni: Ngokuti mundhu wese unojikurisa unozopfaviswa; asi iye unojipfavisa unozokuriswa.” Navo vaiviisa kwaari chiya javo, kuti ajipshase; asi apo vajiji vavona, vakavarambisa. Asi Jesu wakavadanija kwaari, echiti: “Tenderanyi vana vadoko kuti vaviye kwendiri, musavarambisa; ngokuti Umambo hwa Mwari ngo hwavakadari. Ngozvirokwazvo ndinoti kwomuri; uwo usikahuashiri Umambo hwa Mwari kudari ngo mwana mudoko aatongozonghwinimwo.” No mutongi wakatikuti wakamubvunjisa, akati: “Mujijisi wakanaka, ndinozoitenyi kuti ndigare ndhaka yo kururama kusikaperi?” Jesu wakati kwaari: “Unondidanija ngenyi kuti ndiri wakanaka? Akuna naumwe wakanaka, asi umwe ega, Mwari. Unoziva mipango: Usazoomba, Usazouraya, Usazoba, Usazoita chapupu cho kunyepa, Reremeja baba wako na mayi wako.” Iye wakati: “Izvi zvese ndakazvingwarira kubvira muudoko hwangu mbhera zvino.” Apo Jesu azwa ichi, wakati kwaari: “Kwasara chiro chimwe: Tengesa zvese zvounazvo upe ku varombo, newe unozova no upfumi mu gore; uviye, unditevere.” Asi apo azwa wakasururika kakurutu; ngokuti wayiva mupfumi mukuru. Na Jesu echimuringira wakati: “A, kunonesa zvikuru kuno avo vano upfumi kuti vanghwine mu Umambo hwa Mwari! Ngokuti kunopinda kureruka kuno kamera kuti ringhwine ngo pabovo ro njingano, kuno kuti mukhupuki anghwine mu Umambo hwa Mwari.” Asi avo vakazwa izvi, vakati: “Ndizvo ndiyani ungazoponeswa?” Asi iye wakati: “Izvo zvisikaitiki ku vandhu, kuna Mwari zvinoitika.” Na Pedru wakati: “Vonayi, isisu takasiya zvese, tikakutevera.” Naye wakati kwavari: “Ngozvirokwazvo ndinoti kwomuri: Akuna mundhu wakasiya nyumba, nokuti mukaji, nokuti hama, nokuti vabari, nokuti vana, ngo ndava yo Umambo hwa Mwari, usikazoashiri ngo uwo mukuvo zvakawanda zvakahwirijihwa, no ku nyika inoviya unozoashira kupona kusikaperi.” Naye wakatora vari gumi na vaviri, wakati kwavari: “Vonanyi, tinokwira kuenda Jerusarema, nazvo zvakatahwa ngo vaprofeti ngo ndava yo Mwana wo Mundhu zvinozoitika. Ngokuti unozopihwa kuno vo majinja, naye unozoitihwa jee, no kutambujwa, no kupfirihwa mata; navo vanozomuuraya; na ngo zuva ro chitatu unozomukazve.” Navo avazivi kuzwisisa no chimwe cho izvi, no izwi iri inga rakafishika kwavari, navo avazivi kuzwisisa izvo zvakavereketwa. Kwakaitika echikwedera Jeriko, bofu rakatikuti rakagara pa njira rechipembha. Rechizwa mbungano yechipinda, rakabvunjisa kuti: “Chinyi?” Navo vakarizivisa kuti Jesu wo Nazaretha arikupinda. Naro rakadanijira, rikati: “Jesu, iwewe Mwana wa Dhavhidha, ndiyitire nyasha.” Naapo vaifamba ngo pamberi vakarirambisa kuti rinyarare; asi rakapinda kudanijira kakurutu, rechiti: “Iwewe Mwana wa Dhavhidha, ndiyitire nyasha.” Na Jesu wakayima akapanga kuti riziswe kwaari; naapo rakakwedera wakaribvunjisa kuti: “Unoda kuti ndikuitirenyi?” Naro rakati: “Mambo, kuti ndivone.” Jesu wakati kweriri: “Chivona; kugonda kwako kwakuponesa.” Paripo iro rakavona, rakamutevera, rechikuja Mwari, no mbungano yechizvivona, yakairikija Mwari. Naye wakanghwina, echipinda ngo mu Jeriko. Vonanyi, mundhu zina rake raizwi ndi Zakeu; iye wayiva mukuru wo vashabisi, wayiva mukhupuki. Naye wakapshaka kuda kumuvona Jesu kuti uri wakadini; asi wayinga asikakoni ngo ndava yo mbungano, ngokuti iye wayiva mufupi. Naye wakagogoma kuenda mberi, wakakwira mumuti unozwi sukamore kuti amuvone, ngokuti iye waipinda ngo iyo njira. Kwakati Jesu aguma apo, wakaringira nyezuru, akati kwaari: “Zakeu, kasira kubzuka; ngokuti kunodikana kuti ndigare mu nyumba yako.” Naye wakakasira, kubzuka, wakamuashira ngo kudakara. Naapo vavona icho vakan'un'uta vese, vechiti: “Wanghwina koogara no mundhu uri mushaishi.” Na Zakeu wakayima, akati, kuna Mambo: “Vonayi Mambo, ndinopa bindikati ro upfumi hwangu ku varombo; no kudari ndakatora chiro ku mundhu ngo urimbwi, ndinomuhwirijira karongomuna.” Jesu wakati kwaari: “Nyamasi ruponeso rwaguma kuno iyi nyumba, ngokuti iye uri mwana wa Abrahama. Ngokuti Mwana wo Mundhu wakaviya kupshaka no kuponesa izvo zvakarashika.” Kwakati vachazwa izvi, wakaenda mberi kuvereketa muezaniso, ngokuti wayiva phedo no Jerusarema, ngokutizve ivo vaigarira kuti Umambo hwa Mwari waizovoneka ngo kukasira. Ndizvo wakati: “Mundhu mukuru wakatikuti, wakaenda ku nyika yayiva ndhambo, kuti ajiashirire umambo, no kuviyazve. Naye wakadanija varanda vake vari gumi, akavapa gumi ro mbondo, wakati kwavari, barisanyi mbhera ndiviye. Asi vandhu vo nyika yake vakamunyenya, vakatuma vatumwa sure kwake, vechiti: Atidi kuti mundhu uwu atonge panyezuru pedu. Kwakaitika apo wooviyazve, naashira umambo, wakapanga kuti avo varanda vaayinga akapa mare, vadanijwe kwaari, kuti azive zvo vakaviyihwa ngo kuibarisa. Uwo wokutanga wakaviya pamberi pake, akati: Mambo mbondo yako yakaviyihwa ngo jimweni mbondo jiri gumi. Naye wakati kwaari: Wakanasa iwewe muranda wakanaka; ngokuti wakagondeka ngo zvishomani, wechitonga panyezuru po madhoropa ari gumi. No wo chipiri wakaviya, akati: Mambo mbondo yako yakaviyihwa ngo mbondo shanu. Naye wakati kwaarizve: Wechitonga panyezuru po madhoropa mashanu. No umweni wakaviya, akati: Mambo, mbondo yako, iyo yondakangwarira mudhuku: Ngokuti ndakakutya, ngokuti uri mundhu usikakwanisiki: Unobojera icho chousikazivi kudira pasi, newe unocheka icho chousikazivi kusima. Wakati kwaari: Ngo zvinobuda kubva ku muromo wako ndinozokutonga, iwewe muranda wakashata. Iwewe waitoziva kuti ndiri mundhu usikakwanisiki, ndechibojera icho chendisikazivi kudira pasi, no kucheka cho ndisikazivi kukusha; ndizvo wakaregera ngenyi kupa mare yangu kwavari mubhangi, neni mukuviya kwangu ndaizoiwana iyo no kuviyihwa kwayo. Naye wakati kuna avo vaiyima phedo: Mutorerenyi, kubva kwaari iyo mbondo mupe kwaari uwo uno gumi ro mbondo. Navo vakati kwaari: Mambo uwo uno gumi ro mbondo. Ndinoti kwomuri, kuno mundhu wese unacho unozopuwa, no kwaari usina, no icho chaanacho chinozobviswa kubva kwaari. Asi avo vakorore vangu, vayinga vasikatendi kuti nditonge panyezuru pavo, vavisenyi pano muvauraye pamberi pangu.” Naapo avereketa izvi wakatungamira pamberi pavo, kukwira Jerusarema. Kwakaitika apo wakwedera ku Bhetifaje, no Bhetani, ngo pa dundhu rinozwi ro Maorivhe, wakatumira mberi vaviri vo vajiji vake, echiti: “Endanyi mberi mu guta iro romwakaringirana naro; umwo mwoonghwinemwo munozovona tsiru ro mbongoro rakasungwa, iro risikazivi kumbogadhwa ngo mundhu: Risunungurenyi, muviye naro; kudari aripo unozomubvunjisa, kuti: Munorisunungurirenyi? Munozonanga kuti: Mambo unorida.” Naapo vakatumwa vakaenda vakavona kudari ngo zvaakavereketa kwavari. Kwakati, vacharisunungura tsiru, veno varo vakati kwavari: “Munorisunungurirenyi tsiru?” Navo vakati: “Mambo unorida.” Navo vakarizisa kuna Jesu: Navo vakadira nguvo javo panyezuru po tsiru, vakakwija Jesu panyezuru paro. Echifamba, vakaaja nguvo javo mu njira. Naapo echikwedera pa muterero po dundhu ro Maorivhe, mbungano yese yo vajiji yakatanga kudakara, no kukuja Mwari ngo izwi guru, ngo ndava yo mishando yese ino simba yo vayinga vavona. Vechiti: “Unomuchena Mambo uwo unoviya ngo zina ra Jehovha! Kunyarara mu gore, no uthende mu denga-denga.” Vamweni vo vafarisi vayinga mukati mwo mbungano, vakati kwaari: “Mujijisi rambisa vajiji vako.” Naye wakapingura, akati kwavari: “Ndinoti kwomuri kuti, kudari ava vanganyarara, mapuwe anozodanijira.” Naapo wokwedera phedo po dhoropa, echivona, wakarichemera, echiti: “Kudari waiziva ngo zuva iri, izvo zviro zvingakupa kunyarara kwako! Asi zvino zvakafishika ku majiso ako. Ngokuti mazuva anozokugumira, apo vakorore vako vanozokusosera, kukutendeneja ngo rusosa, akukonyere mukati, kumativi ese, anozokupwanyira pasi, no vana vako vari mukati mwako; navo avazosiyi mukati kwako no buwe rimwe rakagajikwa panyezuru po rimweni; ngokuti iwewe auzivi kuziva mukuvo wo kufambihwa kwako.” Naye wakanghwina mu themperi, wakatanga kuvambirimbijira kunja avo vaitengesa, echiti kwavari: “Kwakatahwa kuti; nyumba yangu inozozwi nyumba yo kudira; asi imwimwi mwaiyita bako ro mbavha.” Naye wayivajijisa mazuva no mazuva mu themperi. Asi vapristi vakuru no vatari no vakuru vo vandhu vakapshaka kumuuraya. Asi avazivi kuwana chiro chovangayita; ngokuti vandhu vese vakabatirira kwaari, vechimupurukira. Kwakaitika ngo rimwe raao mazuva echijijisa vandhu mu themperi, echichumaira vhangeri, kwakaguma kwaari vapristi vakuru, no vatari no vakuru; vakavereketa vechiti kwaari: “Tibvunjei kuti unoita izvi ngo simba rani? Nokuti ndiyani wakakupa iri simba?” Naye wakapingura, akati kwavari: “Ininivo ndinomubvunjisa mubvunjo umwe; nemwi mundibvunje: Rubhapatiso rwa Johani rwakabva mu gore here, nokuti rwakabva ku vandhu?” Navo vakapangana pakati pavo, vechiti: “Kuti tikati, rwakabva mu gore, iye unozoti, amuzivi kumutenda ngenyi? Asi tikati: Rwakabva ku vandhu, vandhu vese vanozotifura ngo mapuwe; ngokuti vanotenda kuti Johani wayiva muprofeti.” Navo vakapingura, kuti avazivi kuziva kuti rwakabva kwapi. Jesu wakati kwavari: “Nenivo andimubvunji kuti ndinoita izvi ngo simba rani.” Naye wakatanga kuvereketa ku vandhu muezaniso uwu: “Mundhu wakambosima munda wo mivhini, akaupa ku varimi, akaenda ku nyika imweni kwoogareyo mukuvo wakareba. Yaanguva, wakatuma muranda kuna avo varimi, kuti vamupe imweni yo michero yo munda wo mivhini asi varimi vakamurova, vakamuhwirija kuti aende asina chiro. Naye wakatumazve muranda umweni; no uwozve vakamurova, vakamupsheruja vakamuhwirija kuti aende asina chiro. Wakatumazve wochitatu; nayevo vakamukhuvaza, vakamurasha kunja. Na Mambo wo munda wo mivhini wakati: Ndinozoitenyi? Ndinozotuma mwana wangu unodikana; dangani vanozomureremeja. Asi apo varimi vamuvona, vakapangana umwe no umweni, vechiti, uwu ndiye unogara ndhaka: Ngatimuuraye; kuti ndhaka iyite yedu. Vakamurasha kunja kwo munda wo mivhini, vakamuuraya. Ndizvo mambo wo munda wo mivhini unozoitenyi kwavari? Iye unozoviya avauraye avo varimi, unozopa munda wo mivhini kuno vamweni.” Kwakati vechizwa izvi, vakati: “Kusazoitika kudaro.” Asi iye wakavaringira, akati: “Ndizvo chinyi ichi chakatahwa, chinoti, buwe iro rakarambwa ngo vavaki, ndiro rakaita musoro wo pakhona? Mundhu wese uwo unowira panyezuru pobuwe iro unozopwanyika; asi iye kwaari werinozowira panyezuru pake, rinozomukwiya kuyita bukuta.” No vatari no vapristi vakuru vakapshaka kuda kumubata ngo nguva iyo, asi vakatya vandhu; ngokuti vakazwisisa kuti wakavereketa uwo muezaniso ndivo. Navo vakamurinda vakatuma vadongoreri, kuti vajiyite vari vandhu vakarurama, kwokuti vamuteye ngo mazwi ake, kuti vazomupire kuna simba ro mutongi wo umambo, navo vakamubvunjisa vakati: “Mujijisi, tinoziva kuti iwewe unonasa kuvereketa no kujijisa, aukheti mundhu, asi ngo zvirokwazvo unojijisa njira ya Mwari. Kunotendehwa here kwetiri kuti tipe shangu kuna Khesari, nokuti akutendehwi?” Asi iye echiziva urimbwi hwavo, wakati kwavari: “Ndipangijirenyi chigurwa cho mare chinozwi dhenariyo; rino muezaniso wo hope no matahwa ani?” Navo vakati: “Ngozva Khesari.” Naye wakati kwavari: “Ndizvo ipanyi kuna Khesari izvo zviri zva Khesari, no kuna Mwari izvo zviri zva Mwari.” Navo vakakonehwa kumuteya ngo mazwi okuvereketa kwake pamberi po vandhu; navo vechishamiswa ngo kupingura kwake, vakanyarara. Kwakaguma kwaari vamweni vakatikuti vo vasadhusi, avo vanoti, akuna kumuswa kwo vakafa; navo vakamubvunjisa, vechiti: “Mujijisi, Mosi wakatitarira echiti, kuti mukoma wo mundhu afa, uno mukaji asina mwana, munukuna wake unozotora mukaji wake, abarire vana mukoma wake. Ndizvo vayinga varipo vakoma vanomwe; uwo wo dangwe wakarovora mukaji, wakafa asina vana; no uwo wochipiri wakamurovora. No wochitatu wakamurovora; ngokudaro vese vanomwe avazivi kusiya vana, vakafa. Ngosure kwo izvi mukaji naye wakafa. Ndizvo mukumuka kwo vakafa, unozoyita mukaji wani kwavari? Ngokuti avo vanomwe vakamurovora vese.” Jesu wakati kwavari: “Vandhu vo mu nyika muno vanorovora, vanorovojwa; asi avo vanoverengwa kuti vanosisira nyika iyo, no kumuka kubva kwo vakafa, avarovori, avarovojizve. Ngokuti avachazofizve, ngokuti vanozodari ngo ngirosi; vaa vana va Mwari, vaa vana vokumuka kwo vakafa. Asi kuti vakafa vanozomuswa, Mosi wambhwine wakapangijira kudaro pandau inovereketa ngo ndava yo pfiba, apo akadanija Jehovha kuti: Uri Mwari wa Abrahama, no wa Isaka, no wa Jakobe. Zvino andiyepi Mwari wo vakafa, asi Mwari wo vanopona; ngokuti vese vanoraramira kwaari.” Vamweni vo vatari, vechipingura, vakati: “Mujijisi, wanasa kuvereketa.” Ngokuti avazivi kushingazve kumubvunjisa mubvunjo. Iye wakati kwavari: “Vanonanga ngenyi kuti Kristu uri mwana wa Dhavhidha? Ngokuti Dhavhidha wambhwine mu tshamba yo Nduyo wakananga kuti: Mambo wakati kuna Mambo wangu, garai ngo kumuho kwangu, mbhera ndiite vakorore vako chitambarariro cho tshoka jako. Ndizvo Dhavhidha unomudanija kuti: Mambo, uri mwana wake ngokuyita kudini?” Wakati ku vajiji vake mukuzwa kwo vandhu vese: “Ngwariranyi vatari avo vanodisisa kufamba vakasimira nguvo jakareba, vanoda kuchungamijwa pandau jo musika, no zvigaro zvo pamberi mu nyumba jo kudira, no ndau jo pamberi mu mishongano yo kuha; avo vanoparaja nyumba jo shirikaji, ngo kujiitisa vanokumbira mukuvo wakareba; ava vanozoashira kurashwa kwakanyanyisisa.” Wakaringira, akavona maguruja echikhandira zvipo zvavo mundau yo zvipo. Naye wakavona shirikaji yakatikuti yayiva murombo yechikhandiremwo zvimare zviviri zvaizwi marepta. Naye wakati: “Ngozvirokwazvo ndinoti kwomuri, kuti iyi shirikaji iri murombo yakhandiremwo mare yakapinda kuwanda kune yavo vese. Ngokuti avo vese vakhandiremwo muzvipo maunguhwa epfuma yavo: Asi iyo kubva kwo kutama kwayo yakhandiremwo zvese zvoinopona ndizvo.” Kwakati vamweni vachavereketa ngo themperi kuti rakanemeswa ngo mapuwe akawanda, no zvipo, iye wakati: “Ngo ndava yo izvi zvomunovona, mazuva anozoviya apo arizosiyiwi buwe rimwe rakaturikwa panyezuru po rimweni, risikazowiswi pasi.” Navo vakamubvunjisa, vechiti: “Mujijisi, izvi zvinozoitika rini? Chinyi chiri chivoniso apo zvooda kuitika?” Wakati: “Ngwaranyi kuti musazopaukiswa; ngokuti vazhinji vanozoviya ngo zina rangu, vechiti: Inini ndiriye; nokutizve, mukuvo wakwedera; musavatevera. Naapo mwoozwa ngokurwa, no kumukirana, musazotyiswa. Ngokuti kunosisira kuti izvi zviyitike kutanga, asi magumo aaripi zvinopano akadi.” Naapo wakati kwavari: “Jinja rinozomukira jinja, no umambo unozomukira umambo, kunozovapo kuzungunyika kukuru kwo nyika, no ku ndau jakaparajana, njara no ndhenda; no zvinotyisa kakurutu, no zvivoniso zvakakura zvinobva mu gore. Asi izvi zvese zvisati zvaitika, vanozomubata, navo vanozomutambuja, vechimupira mu nyumba jo kudira, no mu maguniya, vechimuendesa pamberi po majimambo no po vatongi ngo ndava yo zina rangu. Kugumisira kwazvo kunozoita uchapupu kwomuri. Ndizvo nasiriranyi mu mwoyo yenyu, kuti musazodembatemba ngo pamberi kuti chinyi chomunozopingura. Ngokuti ndinozomupa muromo no kungwara ukwo kwo vasikazokoni vakorore venyu kurwisana nakwo nokuti kupingurazve. Asi munozopihwa ngo vabari, no vakoma, no hama, no shamwari; navo vanozoita kuti vamweni vandhu vaurawe. Nemwi munozonyenywa ndivo vese ngo ndava yo zina rangu. No bvuji rimwe ro musoro yenyu arizorashiki. Mukusengerera kwenyu munozoponesa ndaramo jenyu.” “Asi apo mwoovona Jerusarema rechitendenejwa ngo hondo, mwotoziva kuti kuparajwa kwaro kwaaphedo. Naapo vari mu Judhiya ngavatizire ku matundhu, naavo vari mukati mwaro ngavabudemwo; naavo vari mundharaunda vasazonghwinemwo. Ngokuti ao ari mazuva okutambujwa, kuti zvese izvo zvakatahwa zvizarisike. Ikhombo kwavari vano mimba, naavo vanomwisa ngaao mazuva! Ngokuti kunozovapo kutambujika kukurutu panyezuru po nyika, no ushungu panyezuru po vandhu ava. Navo vanozowa ngo kupinja kwo shoti, vanozokweviwa kuyita hloko kuenda ku majinja ese, no Jerusarema rinozotsikwatsikwa pasi ngo vo majinja, mbhera nguva yo vo majinja izarisike.” “No zvivoniso zvinozoitika pa zuva, no pa mweji, no pa ndhondho; no panyezuru po nyika kunozovapo kurembejeka mukukangaijwa ngo ndava yo kutindhira kwo jombe, no mavimbi. No vandhu vanozozirika ngo kutya, ngo kuringira izvo zvinozoguma mu nyika: Ngokuti simba ro mu gore rinozozungunyiswa. Naapo vanozovona Mwana wo Mundhu echiviya mu makore ano simba no uthende hukuru. Asi apo izvi zvootanga kuitika, ringiranyi mu gore, mumuse musoro yenyu; ngokuti kuripihwa kwenyu kunokwedera.” Naye wakavereketa muezaniso kwavari, echiti: “Ringiranyi mukuyu, no miti yese. Kuti yoobvikitira, munoivona, nemwi munoziva mwambhwine kuti zienja zvino raaphedo. Ngokudaro nemwi apo mwoovona izvi zvechiitika, zivanyi kuti Umambo hwa Mwari hwaaphedo. Ngozvirokwazvo ndinoti kwomuri, kuti, uwu mubarihwana auzopindi akadi zvisati zvaitika izvi zvese. Gore no nyika zvinozopinda, asi mazwi angu aatongozopindi akadi.” “Asi mwechijingwarira imwimwi kuti pamweni mwoyo yenyu ingazozvimbihwa ngo kuhisa, no kurejera, no kudembatemba ngo zvo kupona uku, no zuva iro rimugumire ngo kukasira kudari ngo chirimbana. Ngokuti ngokudaro rinozogumira vese avo vanogara panyezuru po nyika yese. Asi rindanyi ngo nguva jese, mwechipota ngo nguva jese, kuti mukone kupokonyoka kubva kune izvi zvese zvinozoitika, no kuyima pamberi po Mwana wo Mundhu.” Masikati ese waijijisa mu themperi, asi usiku waibuda kuenda koovata ku dundhu ro Maorivhe. No vandhu vese vaifumira kuviya kwaari mu themperi, koomuzwa. Zvino mushongano wo kuha zvimanda zvisina mumera wakakwedera, unozwi Phasika. No vapristi vakuru no vatari vakapshaka kuti vangayita maitirenyi kuti vamuuraye; ngokuti vaitya vandhu. Na Sathani wakanghwina kuna Judhasi uwo waizwi Isikariyoti, ari umwe wo vari gumi na vaviri. Wakabuda kuenda kwoosongana no vapristi vakuru no makota, kuti waizomuita mapirenyi kwavari. Navo vakadakara, vakayita chitenderano kuti vamupe mare. Ndizvo wakatenda, akapshaka mukuvo wokumupira kwavari, pasina mbungano. No zuva ro zvimanda zvisina mumera rakaguma, iro raibaihwa bvuta ro Phasika. Naye wakatuma Pedru na Johani, echiti: “Endanyi mutinasirire Phasika, kuti tirihe.” Navo vakati kwaari: “Unoda kuti tirinasirire kwapi?” Naye wakati kwavari: “Vonanyi, apo mwoonghwina mu dhoropa, unozosongana nemwi mwanarume wakatwara chijuvi cho kumwa; muteverenyi ku nyumba yaanonghwina. Nemwi munozoti kumune wo nyumba, Mujijisi unoti kwouri: Riri kwapi kamera ro vaeni, apo pondinozoha Phasika no vajiji vangu? Naye unozomupangijira kamera guru ro muturika, rine mujiyo jaro: Tinasirirenyi apo.” Navo vakaenda, vakavona kudari ngo zvaakananga kwavari: Navo vakanasirira Phasika. Naapo nguva yaguma wakagara pasi no vapostori. Naye wakati, kwavari: “Ngo kudisisa ndaida kuha iri Phasika nemwi ndisati ndatambujika; ngokuti ndinoti kwomuri: Andichazorihizve, mbhera rizarisike mu Umambo hwa Mwari.” Naye wakatora tsani, naapo abonga, wakati: “Toranyi ichi, mukovanisirane pakati penyu. Ngokuti ndinoti kwomuri, andichazomwi ku michero yo muvhini mbhera hugume Umambo hwa Mwari.” Naapo wakatora chimanda, achibonga, wakachigura, akachipa kwavari, akati: “Ichi chiri muviri wangu, unopihwa ngo ndava yenyu; itanyi ichi kundicherecheja inini.” No tsani ngokudaro; ngosure kwokuha, echiti: “Tsani iyi iri chitenderano chipsha mungazi yangu, iyo inoparajwa ngo ndava yenyu. Asi vonanyi, nyara yo uwo unondipira ineni pa thafura. Ngokuti ngo zvirokwazvo Mwana wo Mundhu unoenda kudari ngo izvo zvaakaemesehwa; asi ikhombo kuno uwo mundhu waanozopihwa ndiye!” Navo vakatanga kubvunjisana pakati pavo kuti ndiyani kwavari waizoita ichi chiro. Kwakabudazve hasha pakati pavo, yokuti ndiyani kwavari unozoyita mukuru. Asi iye wakati kwavari: “Majimambo omajinja anotonga panyezuru pavo, navo vano simba panyezuru pavo vanodanijwa kuti vari vadetseri. Asi imwimwi amuzodaro akadi; asi iye uri mukuru pakati penyu ngaadari ngo mudoko, no uwo uri mutongi ngaadari ngo unoshandira. Ngokuti ndiyani mukuru, uwo unogara pa thafura, nokuti uwo unoshandira? Andiye here uwo unogara pa thafura? Asi inini ndiri pakati penyu ndinonga uwo unoshandira. Asi imwimwi muri avo vanogara neni mukuejwa kwangu. Neni ndinomuemesera umambo kudari ndi Baba wangu vakandiemesera inini, kuti muhe mwechimwa pa thafura rangu, mu umambo hwangu; nemwi munogara pa madendemaro, mwechitonga majinja ari gumi na maviri a Israeri.” “Simoni, Simoni, ringira Sathani wakatendehwa kuti akupuwe, kuti akupepete kudari ngo koroni. Asi inini ndakakukumbirira kuti kugonda kwako kusarembejeka; newe apo watenderukazve, ugwinyise hama jako.” Naye wakati kwaari: “Mambo ndakanasirihwa kutoenda newe mu guniya, no mu kufa.” Naye wakati: “Ndinokubvunja iwewe Pedru, jongwe arizoriri nyamasi, usati waramba katatu kuti aundizivi.” Naye wakati kwavari: “Apo zvandakamutuma musina chikhwama, no nyede, no magwada, mwakatama chiro here?” Navo vakati: “Atina chetakatama.” Naye wakati: “Asi zvino uwo uno chikhwama, ngaachitore, no uno nyede ngokudaro; no uwo usina ngaatengese bhachi rake atenge shoti. Ngokuti ndinoti kwomuri, kuti aya matahwa kunodikana kuti azarisike ndini, kuti: Naye wakaverengwa pamwepo no vapauki. Ngokuti izvo zvakanangwa ngo ndava yangu zvinozoitika.” Navo vakati: “Mambo, vonayi, shoti mbiri jiri pano.” Naye wakati kwavari: “Zvakwana.” Naye wakabuda kunja, wakaenda kudari ngo chirovejeso chake ku dundhu ro Maorivhe; no vajiji vakamutevera. Naapo aguma pandau iyo, wakati kwavari: “Kumbiranyi, kuti musanghwina mukuejwa.” Naye wakasiyana navo ndharauko inonga yo kukhandira buwe; wakagwadama ngo makokobvi, akakumbira, echiti: “Baba, kudari wechida, bvisai tsani iyi kwendiri; asi, kusaita kuda kwangu, asi kuda kwako ngakuitike.” Yakavoneka kwaari ngirosi yechibva mu gore, yechimugwinyisa. Ari mukuhwajihwa kukuru, wakagwinyisira kukumbira, no ziya rake rayiva rakadari ngo madondhwe makuru ongazi echidondhera pa mavhu. Naapo amuka kubva mumukumbiro wake, wakaviya kuno vajiji vake, akavawana vakavata hope ngo ndava yo kusvipa mwoyo. Naye wakati kwavari: “Munovatirenyi? Mukanyi, mukumbire, kuti musazonghwina mukuejwa.” Kwakati achavereketa, yakaviya, mbungano, no uwo waizwi Judhasi, umwe wo vari gumi na vaviri, echivatungamirira; naye wakakwedera kuna Jesu kuti amupshonzve. Asi Jesu wakati kwaari: “Judhasi, wopira here Mwana wo Mundhu ngo kumupshonzva?” Naapo avo vaimutendeneja vavona icho chakaitika, vakati: “Mambo, tobaya here ngo shoti?” No umwe wavo wakatikuti wakatema muranda wo mupristi mukuru, akagura njeve yake yo kumuho. Asi Jesu wakapingura, akati: “Regeranyi zvakwana!” Naye wakapshasa njeve yake, akamurapa. Jesu wakati kuno vapristi vakuru no makota o themperi, no vakuru avo vakaviya kurwisana naye: “Mwabuda ngenyi kuviya munonga munorwa no mbavha, muno shoti no ndonga? Apo ndichinemwi mazuva no mazuva mu themperi, amuzivi kutambanuja nyara jenyu kurwa neni, asi iyi iri nguva yenyu, no yo simba ro chidima.” Navo vakamusunga, vakamukweva kuenda naye, mu nyumba yo mupristi mukuru. Asi Pedru wakatevera ari ngo ndhambo. Naapo vabasa muriro mukati mwo ruvanje, vogara pasi pamwepo, Pedru wakagara pasi pakati pavo. No musikana wakatikuti, echimuvona akagara mukujeka kwo muriro, echimuringisisa, wakati: “Mundhu uwu naye wayiva naye.” Asi iye wakaramba, echiti: “Musikanewe andimuzivi.” Ngosure kwo mukuvo mudoko, umweni wakamuvona, akati: “Iwewe newe uri umwe wavo.” Asi Pedru wakati: “Mwanarumewe, andiri wavo akadi.” Ngosure kwo mukuvo, wayida kuyita nguva imwe, umwenizve wakagwinyisa kunanga, echiti: “Ngozvirokwazvo uwu wayiva naye, ngokuti uri mu Garire.” Asi Pedru wakati: “Mwanarumewe andizvizivi zvo unovereketa.” Paripo Pedru achavereketa, jongwe rakarira. Na Mambo wakakunukuka, amuringira Pedru, na Pedru wakacherecheja izwi ra Mambo, kuti wakati kwaari: “Jongwe risati rarira nyamasi unozondiramba katatu.” Naye wakabuda kunja, akachema kakurutu. No vanarume avo vakamusunga Jesu vakamuitira jee, vakamurova. Vakamufukijira majiso, vakamubvunjisa vechiti: “Profeta; ndiyani uwo wakurova?” Vakavereketa zviro zvimweni zvakawanda ndiye vechimutuka. Naapo kwaeja, vakaunganija pamwepo vakuru vo vandhu, no vapristi vakuru, no vatari; navo vakamukweva kuenda naye kubangano ravo, vechiti: “Kuti uri Kristu, tibvunjei.” Asi iye wakati kwavari: “Kudari ndikamubvunja, amutendi; pikija ndikamubvunjisa, imwimwi amuzondipinguri. Asi kubvira zvino Mwana wo Mundhu unozogara ngo kumuho kwo simba ra Mwari.” Navo vese vakati: “Ndizvo iwewe uri Mwana wa Mwari here?” Naye wakati kwavari: “Imwimwi mwatonanga kuti ndiriye.” Navo vakati: “Tichatama chapupu chimweni ngenyi? Ngokuti isisu tambhwine tazwa ngo muromo wake.” No mbungano yese yavo yakamuka, yakamuendesa pamberi pa Piratu. Navo vakatanga kumuitira ndava, vechiti: “Takamuvona uwu mundhu echipaukisa jinja redu, echirambisa kuti kusaripwa shangu kuna Khesari, echinanga kuti iye wambhwine uri Kristu, Mambo.” Na Piratu wakamubvunjisa, echiti: “Iwewe uri Mambo wo vajudha here?” Iye wakapingura, akati: “Watonanga iwewe.” Na Piratu wakati ku vapristi vakuru no mbungano: “Andivoni ndava ku mundhu uwu.” Asi vakapinda kuvangirira, vechiti: “Unovherusa vandhu, echijijisa mu Judhiya mwese, kutanga ngo mu Garire mbhera kuguma kuno.” Asi Piratu azwa izvi, wakabvunjisa kuti; “mundhu uwu wayiva mu Garire here?” Naapo waziva kuti wayiva wo umambo hwa Herodhi, wakamutumira kuna Herodhi, uwo naye wayiva mu Jerusarema ngaao mazuva. Naapo Herodhi amuvona Jesu wakadakara kakurutu, ngokuti iye wayiva no chidisiso chokuti amuvone kubvira mukuvo wakareba, ngokuti iye wayinga azwa ndiye; naye wayida kuvona chivoniso chinoitwa ndiye. Naye wakamubvunjisa ngo mazwi akawanda; asi aazivi kupingura chiro na chimwe. No vapristi vakuru no vatari vakayima vechivangirira kumuitira ndava. Na Herodhi pamwepo no masocha ake vakamupsheruja, vakamuitira jee, vakamusimija nguvo inon'anikira, wakamutumirazve kuna Piratu. Herodhi na Piratu vakaiyaniswa ngo zuva iro; ngokuti ngo pasure vaiitirana ukorore pakati pavo. Piratu wakadanija pamwepo vapristi vakuru, no vatongi, no vandhu. Wakati kwavari: “Imwimwi mwaviyisa uwu mundhu kwendiri kudari ngo unopaukisa vandhu; vonanyi, inini ndakamubvujisisa pamberi penyu, andizivi kuwana ndava kuno mundhu uwu kwo izvo zvomunomuitira ndava ndizvo. Pikija Herodhiwo: Ngokuti iye wamuhwirijazve kwetiri; vonanyi, akuna chiro chakaitwa ndiye chinosisira kuti afe. Ndizvo ndinozomurova, ndimusunungure.” Zvino kwaisisira kuti asunungure kwavari mubhanditi umwe kumushongano wo kuha. Asi vakadanijira vese pamwepo: “Bvisai uwu mundhu, utisunungurire Bharabhasi.” Uwo wakafungihwa mu guniya ngo ndava yo kumukira umambo kwaakaita mu dhoropa, na ngo ndava yo kuuraya. Piratu wakavereketazve kwavari, echida kumusunungura Jesu; asi vakadanijira, vechiti: “Mukohomerei, mukohomerei.” Naye wakati kwavari ngo kwo chitatu: “Ngenyi? Wakashaishenyi mundhu uwu? Andizivi kuvona kwaari ndava inosisira kuti afe; ndizvo ndinozomurova ndimusunungure.” Asi paripo vakavangirira ngo mazwi makuru, vechikumbira kuti akohomehwe. No mazwi avo akanyisa. Na Piratu wakagura kuti izvo zvo vakakumbira zviyitike. Naye wakavasunungurira uwo wayinga akafungihwa mu guniya ngo ndava yo kumukira no kuuraya, uwo wo vakakumbira; asi wakavapa Jesu kuti vayite kuda kwavo ndiye. Naapo vechimukweva kuenda naye, vakabata mundhu waizwi ndi Simoni wo Kureni, echibva mundharaunda, vakamutwarisa muchinjiko kuti autware ngosure kwa Jesu. Yakamutevera mbungano huru yo vandhu, no vanakaji avo vaimuchema no kumutsumba. Asi Jesu echikunukukira kwavari, wakati: “Vana vo kaji vo Jerusarema, musandichemera inini, asi jichemerenyi imwimwi no vana venyu. Ngokuti, vonanyi, mazuva achazoviya evanozoti, jinomuchena ngomwa, no ndani jisikazivi kumbobereka, no mazamu asikazivi kumwisa. Naapo vanozotanga kubvunja ku matundhu, kuti: Tiwirenyi panyezuru pedu, no kuzvimatundhu, kuti: Tidumaijenyi. Ngokuti kudari vanoyita izvi kumiti muvishi, chinyi chinozoitwa kuno wakaoma?” Zve vaviri vamweni majongoni vakakweviwa naye koourawa. Naapo vaguma pandau inozwi, Dendhenya, vakamukohomera apo, no vashaishi avo, umwe ngo kumuho, no umweni ngo kuboshwe. Jesu wakati: “Baba, varegererei; ngokuti avachizivi chovanoita.” Navo vechikovanisirana nguvo jake pakati pavo, vakaringijira hakata. No vandhu vakayima, vechiringira. No vatongi navo vakamuitira jee, vechiti: “Iye wakaponesa vamweni; ngaajiponese, kuti uwu ari Kristu wa Mwari, wakasananguhwa wake.” No masocha nawo akamuitira jee, vechiviya kwaari, no kumupa vhini inoshasha, vechiti: “Kuti iwewe uri Mambo wo vajudha jiponese.” Zve kwayivapo matahwa ngo panyezuru pake, aiti: “UWU NDI MAMBO WO VAJUDHA.” Umwe wo vashaishi avo vakakohomehwa naye, wakamutuka, echiti: “Handiwe here Kristu? Chijiponesa iwewe na isisu.” Asi umweni wakapingura echimurambisa, akati: “Aumutyi here Mwari, wechivona kuti uri mukurashwa kumweko naye? Na isisu ngo zvirokwazvo tinosisira kurashwa; ngokuti tinoashira chinosisira zviito zvedu: Asi uwu mundhu aazivi kuyita chakashata.” Naye wakati: “Jesu ndicherechejevo, apo woonghwina mu Umambo hwako.” Naye wakati kwaari: “Ngozvirokwazvo ndinoti kwouri, kuti; nyamasi unozovapo neni mu Paradhaisi.” Zvino kwayiva kunonga nguva yo chitandhatu, no chidima chakafukija nyika yese mbhera kuguma nguva yo chifumbhamwe. No kujeka kwo zuva kwakapera; no jira ro mu themperi rakaparuka ngo pakati. Naapo Jesu wadanijirazve ngo izwi guru, wakati: “Baba, ndinopa mweya wangu mu nyara jako.” Naapo wakavereketa kudaro, mweya wake wakabuda. Apo nduna yo zana yavona izvo zvakaitika, yakamukuja Mwari, yechiti: “Ngozvirokwazvo uwu mundhu wayiva wakarurama.” No mbungano yese iyo yakaungana pamwepo kuvona izvi, apo yavona zvakaitika, vakahwirira vechirova maditi avo. Naavo vese vaizivana naye, no majimayi ao akamutevera echibva Garire vakayima vari ndhambo, vechivona izvi zvese. Kwayivapo, mundhu waizwi ndi Josefa, wayiva umwe wo vatongi, mundhu wakanaka, no wakarurama. (Iye inga asikazivi kutenderana no bangano rokuyita kwavo), wayiva mundhu wo Arimatiya, dhoropa ro vajudha, waindovetera Umambo hwa Mwari. Mundhu uwu wakaenda kuna Piratu, akakumbira muviri wa Jesu. Naye wakaubzusa pasi, akaupukutira ngo jira ro kuchena, akauviga mu guva rakachiwa pa buwe, umwo musikazivi kumbovigwa no mundhu. Naro rayiva zuva rokunasirira Phasika, no sabatha rakakwedera. No majimayi ao ayinga akabva naye Garire, akatevera ngosure, vakavona guva, no kuvigwa kwo muviri wake. Navo vakahwirira, vakanasirira mitombo ino gwema, no maka. Vakazorora ngo zuva ro sabatha kudari ngo zvinoreva mupango. Asi ngo zuva rokutanga ro vhiki, mangwanani mavishi kwoeja, vakaenda ku guva, no mitombo ino gwema yo vayinga vakanasirira. Navo vakavona buwe ramburumbujwa kubva pa guva. No vanghwina mukati avazivi kuwana muviri wa Mambo Jesu. Kwakaitika vachakangaijwa ndizvo, vonanyi, vanarume vaviri vakayima phedo pavo, vakasimira zvinon'anikira: Navo vechitya, vakasikisira pasi hope javo pa mavhu, vanarume vakati: “Munopshaka ngenyi unopona pakati po vakafa? Iye aaripi muno, asi wamuka. Cherechejanyi chaakavereketa, echiti: Kuti kunodikana kuti Mwana wo Mundhu apihwe mu nyara jo vandhu vakashata, akohomehwe, ngo zuva ro chitatu amuke.” Navo vakacherecheja mazwi ake, vechihwirira kubva ku guva, vakazivisa izvi zvese kuno vari gumi naumwe, no kuno vamweni vese. Zvino ava vayiva Mariya Magadhareni, na Jowana, na Mariya mayi wa Jakobe; pamwepo no majimayi amweni, vakazivisa izvi kuno vapostori. No mazwi aya akavoneka kwavari ari asina shwiro; navo avazivi kuatenda. Pedru wakamuka, akagogoma kuenda ku guva; wakaguma akakotama no kuringira mukati, wakavona machira akachena ari oga; naye wakaenda kanyi kwake, echishamiswa ngo icho chakaitika. Vonanyi, vaviri vavo vaifamba ngo iro zuva kuenda ku guta rinozwi Emausi, raida kuyita makiromitha gumi na rimwe kubva Jerusarema. Navo vaivereketa umwe kuno umweni ngo zviro zvese zvakaitika. Kwakati vachavereketa, vechibvunjisana, Jesu ambhwine wakakwedera kwavari, akafamba navo. Asi majiso avo akaitiswa buma, kuti vasamuziva. Wakati kwavari: “Ngo renyi soko iri ro munovereketa umwe kwo umweni mwechifamba?” Vakayima vano hope jakasururika. Umwe wavo unozwi Kreopasi wakapingura, akati kwaari: “Unogara uri wega here mu Jerusarema usikazivi izvo zvakaitikemwo ngaaya mazuva?” Naye wakati kwavari: “Zviro zvenyi?” Vakati kwaari: “Izvo zva Jesu wo Nazaretha, uwo wayiva muprofeti, uno simba ngo zviito no mazwi pamberi pa Mwari no pamberi po vandhu vese; no njira yo vakamupira ndiyo vapristi vakuru, no vatongi vedu, no kugura kuti aurawe, no kumukohomera. Asi isisu taigonda kuti ndiye waizoripira Israeri. Eya ngo panyezuru po izvi zvese, nyamasi ratova zuva ro chitatu kubvira ku nguva yo zvakaitika izvi. Zve majimayi amweni wo chiunga chedu akatishamisa, akafumira kuenda ku guva. Kwakati, vasikavoni muviri wake, vakaviya vechiti: Vavona chivoniso cho ngirosi, ijo jakati kuti unopona. No vamweni vakatikuti veavo vayiva nesu, vakaendavo ku guva, vakavona kudari ngo zvovakananga majimayi; asi iye avazivi kumuvona.” Iye wakati kwavari: “A! Mapenji, no vanononoka ngo mwoyo kutenda izvo zvese zvakavereketwa ngo vaprofeti! Kwayinga kusikasisiri here kuti Kristu atambujwe ngo izvi zvese, no kunghwina mu uthende hwake?” Naye, echibva ngo zva Mosi, no zvo vaprofeti vese, wakapangijira kwavari mumatahwa ese, izvo zvakatahwa ngo ndava yake. Navo vakakwedera ku guta apo po vayienda, iye wakayita kudari ngo unopinda kuenda mberi. Navo vakamukoka, vechiti: “Gara nesu, ngokuti aamadekoni, no zuva roda kubira.” Naye wakanghwina koogara navo. Kwakati apo atseama navo pakuha, wakatora chimanda, akachibonga, akachigura, akapa kwavari. No majiso avo akapembenuka, navo vakamuziva. Naye wakangarangara kubva mukuvona kwavo. Navo vakati umwe kuno umweni: “Mwoyo yedu aizivi kupisa here mukati mwedu, apo achavereketa kwetiri mu njira, no kupangijira kwetiri zvakatahwa?” Navo vakamuka ngo nguva iyo vakahwirira Jerusarema, vakawana vari gumi naumwe vakaungana pamwepo, no vamweni vayiva navo, vechiti: “Mambo wamuka ngo zvirokwazvo, naye wakavoneka kuna Simoni!” Navo vakaverenga izvo zvakaitika vari mu njira, no kuzivikana kwaakaita ndivo ngo kugura chimanda. Naapo vechiverenga izvi zvese, Jesu wambhwine wakayima pakati pavo, akati kwavari: “Kunyarara ngakuve kwomuri.” Asi avo vakakhazamuka, vakatya kakurutu, vakarangarira kuti vavona mujimu. Naye wakati kwavari: “Munotambujika ngenyi? Inovapo ngenyi mubvunjo pakati penyu? Vonanyi nyara jangu, no tshoka jangu, kuti ndini ndambhwine. Ndibatenyi muvone; ngokuti mujimu auna nyama no magodo kudari ngo zvomunovona kuti inini ndinazvo.” Naapo avereketa kudaro, wakavapangijira nyara jake no tshoka jake. Kwakati vachagononda ngo ndava yo kudakara vechishamiswa, wakati kwavari: “Munazvo here zvokuha?” Navo vakamupa chiguhwa cho hove chakakochwa. Naye wakachitora, akachiha pamberi pavo. Naye wakati kwavari: “Aya ndiwo mazwi endakavereketa kwomuri ndichinemwi, kuti kunosisira kuti zvese zvizarisike, izvo zvakatahwa mu mipango ya Mosi, no zvo vaprofeti no zvo Nduyo, ndini.” Naapo wakajekisira murangarijo yavo kuti vazwisise matahwa. Naye wakati kwavari: “Kwakatahwa kudari, kuti Kristu unozotambujwa, no kumukazve kubva kwo vakafa ngo zuva ro chitatu; nokutizve kutenderuka no kuregerehwa kwo zvishaishi kuchumaihwe ngo zina rake kune majinja ese, kutanga mu Jerusarema. Nemwi muri zvapupu zvo izvi zvese. Vonanyi, ndinotuma chigondiso cha Baba wangu panyezuru penyu; asi garanyi mu dhoropa mbhera musimijwe ngo simba rinobva mu gore.” Naye wakavatungamirira kuenda mbhera vakayita maringwa no Bhetani. Naye wakamusa nyara jake, wakavadakajisa. Kwakaitika apo achavadakajisa, wakasiyana navo, wakakwira kuenda mu gore. Navo vakamudira, vakahwirira kuenda Jerusarema ngo kudakara kukuru. Navo vakavangirira kugara mu themperi, vechikuja Mwari. Pakutanga wayivapo Izwi, no Izwi wayiva na Mwari, no Izwi wayiva Mwari. Uwu wayivapo pakutanga na Mwari. Zviro zvese zvakasikwa ndiye; na ngo kunja kwake inga pasina chiro chakasikwa kwo izvo zvakasikwa. Kwayivapo kupona kwaari, no kupona kwayiva kujeka kwo vandhu. No kujeka kunojeka muchidima; no chidima achizivi kukunyisa. Kwakaviya mundhu, wakatumwa ndi Mwari, zina rake rayiva Johani. Uwo wakaviya kuyita chapupu, kuti apupure ngo kujeka, kuti vandhu vese vatende ndiye. Iye wayinga asiriye kujeka ukwo akadi, asi wakatumwa kuti apupure ngo kujeka ukwo. Kujeka ukwo kwayiva kujeka kwo chokwadi, ukwo kunojekisa vandhu vese vanobahwa mu nyika. Uwu wayiva mu nyika, no nyika yakasikwa ndiye, no nyika aizivi kumuziva. Wakaviya kwo zvake, no vake avazivi kumuashira. Asi kwavari vese vakamuashira, wakavapa simba rokuti vayite vana va Mwari, kwavari avo vanotenda zina rake: Avo vasikazivi kubahwa ngo ngazi, pikija ngo kuemura kwo nyama, pikija ngo kuemura kwo mundhu asi wakabahwa ndi Mwari. No izwi rakaitwa muviri, wakagara pakati pedu, nesu takaringira uthende hwake, uthende huri hwo uwo wakabahwa ega ndi Baba, wakazara ngo nyasha no gwinyiso. Johani wakayita chapupu ndiye, wakadanijira, echiti: “Uwu ndiye wo ndakavereketa ndiye, kuti: Uwo unoviya sure kwangu, waindovapo pa mberi pangu, ngokuti waindovapo ndisati ndavepo. Ngokuti, isisu tese takaashira kwo zvakawanda zvake, no nyasha ngo nyasha. Ngokuti mipango yakapuwa kubudikija ndi Mosi, asi nyasha no gwinyiso zvakavapo ndiye Jesu Kristu. Akuna naumwe wakambovona Mwari; Mwana ega, uwo wakabahwa ega, iye unogara paditi pa Baba, ndiye wakamupangijira.” No ichi ndicho chapupu cha Johani, apo vajudha vakatuma kwaari vapristi no vaRevhi kubva Jerusarema, kumubvunjisa kuti: Uriyani iwewe? Naye wakatenda, aazivi kukanija; wakatenda, echiti: Inini andiripi Kristu akadi. Navo vakamubvunjisa: Ndizvo uriyani? Uri Erija here? Naye wakapingura: “Andiripi iye akadi. Uri uwo muprofeti here?” Naye wakapingura: “Haiwa.” Ndizvo vakati kwaari: “Uriyani? Kuti tiwane chokupingura avo vakatituma. Unoti kudini iwewe pachako?” Wakati: “Ndiri izwi rounodanijira mubani, kuti: Rungamisanyi njira ya Mambo, kudari ngo zvaakavereketa Isaya muprofeti.” Naavo vakatumwa vayiva vo vafarisi. Navo vakamubvunjisa, vakati kwaari: “Ndizvo unobhapatisirenyi kudari usiri iye Kristu, nokuti Erija, nokuti uwo muprofeti?” Johani wakavapingura echiti: “Inini ndinobhapatisa ngo kumwa; asi pakati penyu panoyima uwo womusikazivi, ndiye uwo unoviya sure kwangu, wakasanwa, uwo wendisikasisiri inini kuti ndisunungure rusinga rwo magwada ake.” Izvi zvakaitika mu Bhetani mwombera kwo Jordhani, apo paaibhapatisa Johani. No zuva rinotevera avona Jesu echiviya kwaari, wakati: “Ringiranyi Chibvuta cha Mwari chinobvisa kushaisha kwo nyika! Uwu ndiye wo ndakavereketa ndiye, kuti: Sure kwangu kunozoviya mundhu uwo uri mukuru kupinda inini, ngokuti wayivapo ndisati ndavepo. Neni inga ndisikamuzivi, asi kwega kuti unozopangijihwa ku vaIsraeri, saka ngo ndava iyi ndakaviya ndechibhapatisa ngo kumwa.” Na Johani wakayita chapupu, echiti: “Ndakavona Mweya uchibzuka kubva mu denga wakadari ngo njiva, ukagara panyezuru pake. Neni inga ndisikamuzivi; asi iye wakandituma kuti ndibhapatise ngo kumwa, iye wakati kwendiri, uwo wounozovona Mweya uchibzuka no kugara panyezuru pake, uwo ndiye unozobhapatisa ndi Mweya Wakachena. Neni ndakovona, ndakapupura kuti uwu ndiye Mwana wa Mwari.” No zuva rinotevera Johani ayinga wakayima no vaviri vo vajiji vake. Naapo amuvona Jesu echifamba, wakati: “Ringiranyi Chibvuta cha Mwari!” Vajiji avo vaviri vakamuzwa echivereketa, vakamutevera Jesu. Jesu wakakunukuka akavavona vechimutevera, akati kwavari: “Munopshakenyi?” Vakati kwaari: “Rabhi (ukwo kunoti ngo kukumuchwa, Mujijisi) unogara kwapi?” Wakati kwavari: “Viyanyi muvone.” Ndizvo vakaviya vakavona apo paaigara; navo vakagara naye ngo zuva iro: Ngokuti yaida kuyita nguva yo chigumi. Umwe wo vaviri avo vakamuzwa Johani echivereketa, womutevera, wayiva Andreu munukuna wa Simoni Pedru. Iye wakatanga kupshaka hama wake Simoni, akati kwaari: “Tamuvona Mesiya” (ukwo kunoti ngo kukumuchwa, Kristu). Naye wakamuzisa kuna Jesu. Naapo Jesu amuringira wakati: “Iwewe uri Simoni mwana wa Jona; unozodanijwa kuti Khefasi” (ukwo kunoti ngo kukumuchwa, Pedru ). No zuva raitevera wakada kuenda Garire, akavona Firipi; na Jesu wakati kwaari: “Nditevere.” Zvino Firipi waibva, dhoropa ro vayigara Andreu na Pedru. Firipi wakapshaka Natanaeri, akati kwaari: “Tamuvona uwo waakatara ndiye Mosi mu mipango no vaprofeti, Jesu wo Nazaretha, mwana wa Josefa.” Natanaeri wakati kwaari: “Kungabvavo here chiro chakanaka mu Nazaretha?” Firipi wakati kwaari: “Viya, uvone.” Jesu wakavona Natanaeri echiviya kwaari, akati ndiye: “Ringirai mu Israeri uwo ngo gwinyiso usina kuchengeja mukati mwake!” Natanaeri wakati kwaari: “Wandiita mazivirenyi?” Jesu wakapingura, akati kwaari: “Ngo pamberi Firipi asati akudanija uri pasi po mukuyu, ndakakuvona.” Natanaeri wakapingura, akati: “Rabhi, Iwewe uri Mwana wa Mwari, uri Mambo wo Israeri.” Jesu wakapingura, akati kwaari: “Ngokuti ndati kwouri, kuti: Ndakakuvona uri pasi po mukuyu, unotenda here? Unozovona zviro zvikuru kupinda izvi.” Wakati kwaari: “Zvirokwazvo, zvirokwazvo, ndinoti kwouri, Munozovona denga rakabewuka, no ngirosi ja Mwari jechikwira no kubzuka panyezuru po Mwana wo Mundhu.” Na ngo zuva ro chitatu kwayivapo muchadho mu Kana ro Garire, na mayi wa Jesu wayivapo. Na Jesu wakakokwavo no vajiji vake kumuchadho. Naapo vhini rapera, mayi wa Jesu vakati kwaari: “Avachina vhini.” Na Jesu wakati kwaari: “Chinenyi ichi kwendiri no kwouri, mayi? Nguva yangu aisati yaguma.” Mayi wake vakati kuvashandi: “Pikija chinyi chaanonanga kwomuri, itanyi.” Zvino kwayivapo mabiya wo mapuwe matandhatu okumwa kudari ngo muitiro wo vajudha wokushamba, rimwe nga rimwe rainghwina majuvi maviri nokuti matatu. Jesu wakati kwavari: “Zajanyi mabiya ao ngo kumwa.” Navo vakaazaja kuti tumbhwi. Naye wakati kwavari: “Cheranyi zvino muende naro kuno mutungamiriri wo muchadho.” Navo vakaenda naro. Apo mutungamiriri wo muchadho waravira kumwa iyo yakapindujwa kuyita vhini, asikazivi kuti rabva kwapi (asi vashandi avo vakachera kumwa vaiziva); mutungamiriri wo muchadho wakadanija mukwambo. Naye wakati kwaari: “Mundhu wese unobudisa kutanga vhini yakanaka; naapo vandhu vamwa kakurutu unobudisa iro risikazivi kunasa kunaka: Asi iwewe wakangwarira vhini rakanasa kunaka mbhera zvino.” Uwu ndiwo mushamiso wo kutanga waakayita Jesu mu Kana ro Garire, wakapangijira pambhene uthende hwake, no vajiji vake vakatenda kwaari. Ngosure kwo izvi wakabzuka kuenda Kaperanaume, iye na mayi wake, no vanukuna vake, no vajiji vake; navo vakagara apo mazuva asikazivi kuwanda. No Phasika ro vajudha rayiva phedo, na Jesu wakakwira Jerusarema. Naye wakavona mu themperi avo vaitengesa n'ombe no mabvuta no njiva, no vaitenganisana mare vechigara. Naapo ayinga wakayita chipembere cho mapote, wakambirimbija vese kubva mu themperi, zvese mabvuta no n'ombe; wakadurura pasi mare yo vaitenganisana, wakawisa mathafura avo; naye wakati kuno avo vaitengesa njiva: “Bvisanyi izvi zviro kubva pano; musaita nyumba ya Baba wangu nyumba yo kutengesera.” No vajiji vake vakacherecheja kuti, kwakatahwa kuti: “Kuvangirira ngo ndava yo nyumba yako kunozondipeja.” Ndizvo vajudha vakamupingura, vakati kwaari: “Muvoniso wenyi woungaita kutivonisa kuti uno simba rokuita zviro izvi?” Jesu wakapingura, akati kwavari: “Phwanyani iri themperi, na ngo mazuva matatu ndinozorivakazve.” Ndizvo vajudha vakati: “Themperi iri rakavakwa ngo makore ari makumi marongomuna na matandhatu, newe ungarivaka here ngo mazuva matatu?” Asi iye wakavereketa ngo ndava yo themperi ro muviri wake. Ndizvo apo amuswa kubva kwo vakafa, vajiji vake vakacherecheja kuti wayinga wakavereketa ngo ichi, navo vakatenda zvakatahwa, no izwi iro raakavereketa Jesu. Zvino apo ayiva mu Jerusarema mu Phasika, mukuha, vazhinji vakatenda zina rake, vechivona mishamiso yake yaakaita. Asi Jesu aazivi kujipira kwavari, ngokuti iye waiziva vandhu vese. Zve inga asikatami kuti mundhu naumwe apupurire kwaari ngo ndava yo mundhu; ngokuti iye waiziva pachake izvo zviri mukati mwo mundhu. Zvino kwayivapo mundhu wo vafarisi, zina rake ndi Nikodhemusi, mutongi wo vajudha: Uwu wakaviya kwaari usiku wakati kwaari: “Rabhi, tinoziva kuti iwewe uri mujijisi wakabva kuna Mwari; ngokuti akuna naumwe uno simba rokuita mishamiso yo unoyita kwega kuti Mwari anaye.” Jesu wakapingura, akati kwaari: “Zvirokwazvo, zvirokwazvo, ndinoti kwouri, kudari mundhu asakabahwa ngo kwo mu denga, aangahuvoni Umambo hwa Mwari.” Nikodhemusi wakati kwaari: “Mundhu ungaita mabarihwenyi apo aamusharuka? Angakona here kuti anghwine ngo kwo chipiri mu ndani ya mayi wake, abahwe?” Jesu wakapingura akati: “Zvirokwazvo, zvirokwazvo, ndinoti kwouri, kudari mundhu asikabahwi ngo kumwa na ngo Mweya, aana simba ro kunghwina mu Umambo hwa Mwari. Ukwo kunobahwa ngo kwo nyama kuri nyama; no ukwo kunobahwa ngo kwo Mweya kuri Mweya. Usashama ngokuti ndati kwouri, kunodikana kuti ubahwe ngo kwo mu denga. Dutu rinovhuvhuta po rinoda, newe unozwa chaungu charo, asi auzivi po rinobva, no po rinoenda: Zvakadaro no kwavari vese vanobahwa ngo kwo Mweya.” Nikodhemusi wakapingura, akati kwaari: “Izvi zviro zvingayita maitirenyi?” Jesu wakapingura akati kwaari: “Iwewe uri mujijisi wo Israeri no izvi auzvizivi here? Zvirokwazvo, zvirokwazvo, ndinoti kwouri, tinovereketa chotinoziva, nesu tinopupura ngo icho chotakavona; nemwi amuashiri uchapupu hwedu. Kudari ndakamubvunja zviro zvo mu nyika, nemwi musikazvitendi, hino munozoita matenderenyi kudari ndechimubvunja ngo zviro zvo mu denga? Akuna naumwe wakambokwira mu denga, kwega uwo wakabzuka kubva mu denga, eya Mwana wo Mundhu, uri mu denga. Nokudari ndi Mosi wakakwija nyoka mushango, ngokudaro kunosisira kuti Mwana wo Mundhu akwijwe; kuti pikija ndiyani unomutenda awane kupona kusikaperi. Ngokuti Mwari wakaida nyika kudari, wakapa Mwana wake wakabahwa ari ega, kuti vese vanomutenda vasafa, asi vawane kupona kusikaperi. Ngokuti Mwari aazivi kutuma Mwana wake mu nyika kuti atonge nyika; asi kuti nyika iponeswe ndiye. Uwo unotenda kwaari aatongwi: Asi uwo usikatendi watotongwa nazvino, ngokuti aazivi kutenda zina ro uwo wakabahwa ari ega Mwana wa Mwari. Uku ndikwo kutongwa, kuti kujeka kwakaguma mu nyika, no vandhu vakada chidima kupinda kujeka, ngokuti mishando yavo vayinga yakashata. Ngokuti pikija ndiyani unoyita zvakashata unonyenya kujeka, naye, aaviyi mukujeka, ngokuti mishando yake inozorambijwa. Asi uwo unoyita zvinogwinyiso unoviya mukujeka, kuti mishando yake ingavonekeswa kuti yakaitwa ngokuda kwa Mwari.” Ngosure kwo izvi Jesu wakaviya no vajiji vake mu nyika yo Judhiya; naye wakagara apo navo, echibhapatisa. Na Johani wakabhapatisa mu Ayinoni phedo po Sareni, ngokuti yayivapo kumwa yakawanda; vakaviya vakabhapatiswa. Ngokuti Johani inga asati wanghwiniswa mu guniya. Naapo kwakavapo kukanijana pakati po vajiji va Johani no mujudha ngo ndava yokucheneswa. Navo vakaviya kuna Johani vakati kwaari: “Rabhi, uwo wayiva newe mwombera mwo Jordhani, uwo wo wakayita chapupu ndiye, ringira, iye unobhapatisa no vese vanoenda kwaari.” Johani wakapingura, akati: “Mundhu aana simba ro kuashira chiro nokuti chakadini kuti asikazivi kuchipuwa kubva mu denga. Imwimwi pachenyu mwakayita chapupu ndini kuti ndakati: Andiriye akadi Kristu, asi kuti ndakatumwa pamberi pake. Iye uno nyamurovohwa ndiye mukwambo; asi shamwari yo mukwambo inoima yechimuzwa, inodakara ngo ndava yo izwi ro mukwambo. Ndizvo uku kudakara kwangu kwazarisika. Kunosisira kuti iye akuriswe, asi kuti inini ndidodoke. Uwo unoviya echibva mu denga ari panyezuru po zvese; uwo unobva mu nyika ngo wo nyika, naye unovereketa zvo mu nyika: Uwo unobva mu denga uri panyezuru po zvese. Naye unopupura ngo izvo zvaakavona no zvaakazwa; akuna mundhu unoashira chapupu chake. Uwo wakaashira uchapupu hwake, wakagwinyisisa kuti Mwari uri gwinyiso. Ngokuti uwo waakatuma Mwari unovereketa mazwi a Mwari; ngokuti iye aapi kwaari Mweya ngo kuezanisa. Baba vanoda Mwana, navo vakatumira zvese mu nyara jake. Iye unotenda Mwana watova no kupona kusikaperi, no uwo usikatendi mwana, aazovoni kupona, asi ushungu hwa Mwari hunondogara panyezuru pake.” Ndizvo apo Mambo aziva kuti vafarisi vayinga vazwa kuti Jesu wayita no kubhapatisa vajiji vakawanda kupinda Johani. (Asi Jesu pachake aazivi kubhapatisa, asi vajiji vake vaibhapatisa). Wakabva Judhiya, wakaviyazve mu Garire. Kwaisisira kuti apinde ngo mu Samariya. Ndizvo wakaguma ku guta ro vaSamariya rinozwi Sukari, phedo no munda uwo waakapa Jakobe kuno mwana wake Josefa. Zvino mwimbo wa Jakobe wayivapo. Ndizvo Jesu wayinga aremba ngo hwendo wake wakagara apo pa mwimbo: yaida kuyita nguva yo chitandhatu. Kwakaguma apo jimayi ro Samariya kwoochera kumwa. Jesu wakati kweriri: “Ndipe kumwa ndimwe.” Ngokuti vajiji vake inga vaenda ku guta kwootenga zvokuha. Jimayi ro Samariya rakati kwaari: “Chinyi kuti iwewe, uri muJudha ukumbire kumwa yokumwa kwendiri inini, jimayi ro Samariya?” (Ngokuti vajudha avaiyani no vaSamariya.) Jesu wakapingura, akati kweriri: “Kudari waiziva iwewe, chipo cha Mwari, nokuti ndiyani uwo unokumbira kwouri, kuti: Ndipe ndimwe, iwewe waizokumbira kwaari, naye waizokupa kumwa yo kupona.” Jimayi rakati kwaari: “Mambo, auna chimujiyo chokuchera ndicho, no mwimbo wakajika: Ndizvo kumwa yo kupona unoiwana kwapi? Uri mukuru here kuna baba wedu Jakobe, uwo wakatipa uwu mwimbo, naye wakamwa kwouri, no vana vake, no mushambi yake?” Jesu wakapingura wakati kweriri: “Pikija ndiyani unomwa kuno iyi kumwa, unozozwazve nyota. Asi uwu unomwa kuno kumwa iyo yo ndinozomupa inini, aachazozwizve nyota mbhera narini, asi kumwa iyo yo ndinomupa inozoita mwimbo wo kumwa mukati mwake, wechivherukira kupona kusikaperi.” Jimayi rakati kwaari: “Mambo ndipe kumwa iyo, kuti ndisazoviyazve pano kwoochera.” Wakati kweriri: “Enda, woodanija mwamuna wako, muviye pano.” Jimayi rakapingura rikati: “Andina mwamuna.” Jesu wakati kweriri: “Wanasa kunanga kuti, andina mwamuna; ngokuti waimbova no vamuna vashanu, no uwo woutori naye zvino asipi mwamuna wako: Ngo icho wavereketa gwinyiso.” Jimayi rakati kwaari: “Mambo, ndinovona kuti uri muprofeti. Majibaba edu akadira kuna iri dundhu, na imwimwi munoti, kuti mu Jerusarema ndiyo ndau inosisira kudiriremwo.” Jesu wakati kweriri: “Jimayi, tenda ichi, kuti nguva inoviya apo amuzodiri Baba kuno iri dundhu pikija mu Jerusarema. Imwimwi munodira chomusikazivi; isisu tinodira chotinoziva: Ngokuti ruponeso runobva ku vajudha. Ngokuti nguva inoviya, nazvino yaapano, apo vadiri vo gwinyiso vanozodira Baba mu Mweya no mugwinyiso: Ngokuti Baba vanopshaka vakadaro kumudira. Mwari ndi Mweya, naavo vanomudira kunosisira kuti vamudire mu Mweya no mugwinyiso.” Jimayi rakati kwaari: “Ndinoziva kuti Mesiya unoviya, uwo unozwi Kristu: Naapo aviya unozotibvunja zviro zvese.” Jesu wakati kweriri: “Ndini unovereketa newe.” Ngo nguva iyi vajiji vake vakaviya, navo vakashamiswa ngokuti waivereketa no jimayi; pikija zvakadaro akuna wakati kwaari kuti unopshakenyi? Nokuti, unovereketa naro ngenyi? Ndizvo jimayi rakasiya juvi raro, rakahwirira ku guta, rikati kuvanarume: “Viyanyi muvone mundhu uwo wandibvunja zvese zvondakaita; uwu andiyepi here Kristu?” Vakabuda kubva muguta, vachiviya kwaari. Ngo nguva iyo vajiji vake vakamukumbira, vechiti: “Rabhi, iha.” Asi wakati kwavari: “Inini ndinakwo kuha kwo musikazivi imwimwi.” Ndizvo vajiji vakati umwe kwo umweni: “Uripo here mundhu wamuzisira chokuha?” Jesu wakati kwavari: “Kuha kwangu ngokwokuti ndiite kuda kwo uwo wakandituma, no kupeja mushando wake.” Amunangi here kuti kwasara mweji murongomuna naapo kwooguma kukotora? Ringiranyi ndinoti kwomuri, musanyi majiso enyu, muringire muminda, ngokuti yachena nazvino yosisira kukotohwa. No uwo unokotora unoashira mu pochero, no unounganija michero yo kupona kusikaperi. Kuti iye unosima naye unokotora vadakare pamwepo. Ngokudari mazwi akangwara aya ano gwinyiso okuti: Umwe unokusha, no umweni unokotora Ndakamutuma kuti mukotore izvo zvo musikazivi kushandira: Vandhu vamweni vakashanda na imwimwi mwakanghwina mumushando wavo. No vandhu vazhinji vo guta ro vaSamariya vakamutenda ngo ndava yo izwi ro jimayi, rerakapupura, kuti: Wandibvunja zvese zvo ndakaita. Ndizvo apo vaSamariya vayinga vaguma kwaari, vakamukumbira kuti agare navo: Naye wakagara apo mazuva maviri. No vazhinji vamweni vakamutenda ngo ndava yo izwi rake: Navo vakati, kuno jimayi: “Zvino tinotenda, haiwa ngo ndava yokuvereketa kwako, ngokuti tamuzwa tega, nesu tinoziva kuti uwu ngo chakwadi uri Muponesi wo nyika.” Ngosure kwo mazuva maviri wakabva apo, akaenda mu Garire. Ngokuti Jesu pachake wakapupura kuti muprofeti aareremejwi mu nyika yake. Ndizvo apo aguma mu Garire, vaGarire vakamuashira, ngokuti vese vayinga vakavona zvese zvaakaita mu Jerusarema pamushongano wo kuha: Ngokuti ava navo vakaenda kumusongano wo kuha. Ndizvo Jesu wakaviyazve mu Kana ro Garire, apo paakaphinduja kumwa kuyita vhini. Kwaiapo nduna yakatikuti yayiva no mwana wayo waihwara mu Kaperanaume. Naapo yazwa kuti Jesu wayinga abva Judhiya, aguma mu Garire, yakaguma kwaari, yakamupota kuti abzuke aponese mwana wayo, ngokuti wayinga woda kufa. Jesu wakati kwoiri: “Kuti musikavoni mivoniso no mishamiso amuzotendi.” Nduna yakati kwaari: “Mambo, bzuka mwana wangu asati wafa.” Jesu wakati kwoiri: “Enda, mwana wako wapona.” Mundhuwo wakagonda izwi raakavereketa kwaari Jesu, naye wakaenda. Kwakati achabzuka, varanda vake vakashongana naye, vechiti: “Mwana wako wapona.” Ndizvo wakabvunjisa nguva iyo yaakatanga kuyita nane ndiyo. Navo vakati kwaari: “Zuro ngo nguva yochinomwe kujiya muviri kwakapera.” Ndizvo baba vakaziva kuti ndiyo nguva yaakavereketa Jesu kwaari kuti, mwana wako wapona: Naye wakatenda, no nyumba yake yese. Uwu ndiwozve mushamiso wochipiri waakayita Jesu, apo aguma Garire abva Judhiya. Sure kwo izvi kwayivapo mushongano wo kuha wo vajudha, na Jesu wakakwira Jerusarema. Zvino riripo mu Jerusarema gandhwa ngo pachimana cho mabvuta, rinodanijwa ngo chi Hebheru kuti Bhetisaidha, rino maberere mashanu. Mukati mwawo mwayivata vazhinji vaihwara, vayiva mapofu, zvirema no vakaoma muviri, vechigarira kuvhunduhwa kwo kumwa. Ngokuti ngo mukuvo wakatikuti, ngirosi yaibzuka mugandwa no kuvhundura kumwa: Ndizvo pikija ndiyani waitanga kunghwinemwo apo kumwa yavhunduhwa waiponeswa pikija wayiva no ndhenda yakaitawani. Kwayivapo mundhu wakatikuti wayiva no ndhenda yake makore makumi matatu na masere. Naapo Jesu amuvona akavata, echiziva kuti inga anazvo mukuvo wakareba, wakati kwaari: “Unoda kutambiswa here?” No uwo waihwara wakapingura kwaari, echiti: “Mambo, andina mundhu wokundibzusa mugandwa apo kumwa yo vhunduhwa; asi mukuenda kwangu, umweni unobzuka kunditangira.” Jesu wakati kwaari: “Muka, utore mandhi ako ufambe.” Paripo mundhuwo wakaponeswa wakatora mandhi ake akafamba. Ngo zuva iro rayiva sabatha. Ndizvo vajudha vakati kwaari uwo wakaponeswa: Riri zuva ro sabatha, akutendehwi kwouri kuti utware mandhi ako: Asi iye wakapingura, kuti: “Uwo wakayita kuti ndipone ndiye wakati kwendiri: Tora mandhi ako ufambe.” Vakamubvunjisa vechiti: “Ndiyani mundhu uwo wakati kwouri: Tora mandhi ako, ufambe?” Asi uwo wakaponeswa aazivi kuziva kuti ndiyani: Ngokuti Jesu inga waenda ngokuti mbungano huru yayivapo pandau iyo. Ngosure kwo izvi Jesu wakamuvona ari mu themperi, naye wakati kwaari: “Ringira, wakaponeswa, usachazoshaishazve, kuti chiro chakapinda kushata kuno icho chisazokugumira.” Naapo mundhu wakaenda, wakananga ku vajudha kuti ndi Jesu wakamuponesa. Ngo ndava iyo vajudha vakamutambuja Jesu, ngokuti wakayita izvi ngo zuva ro sabatha. Asi iye wakavapingura: “Baba wangu vanondoshanda mbhera nazvino, neni ndinoshanda.” Ndizvo vajudha vakapindisisa kupshaka kumuuraya, ngokuti iye aazivi kugura sabatha kwega asi wakananga kuti Mwari wayiva Baba wake pachake, echijiita unoezana na Mwari. Ndizvo Jesu wakapingura, akati kwavari: “Zvirokwazvo, zvirokwazvo, ndinoti kwomuri, Mwana aana simba ro kuyita chiro ngo kwake, asi chaanovona Baba echiita: Ngokuti izvo zvaanoita Baba, Mwana unoitavo ngokudaro. Ngokuti Baba vanomuda Mwana, vanomupangijira zvese zvovanoita pachavo: Vanozomupangijira mishando mikuru kuno iyi, kuti mushamiswe. Ngokuti kudari ndi Baba vanomusa avo vakafa, no kuyita kuti vararame, ngokudarozve Mwana unoraramisa avo vaanoda. Ngokuti Baba avatongi mundhu naumwe, asi vakapa kutonga kwese kuno Mwana; kuti vese vareremeje Mwana kudari ngo zvo vanoreremeja Baba. Uwo usikareremeji Mwana, aamureremejizve Baba uwo wakamutuma. Zvirokwazvo, zvirokwazvo, ndinoti kwomuri, kuti iye unozwa izwi rangu, atende uwo wakandituma, waanakwo kupona kusikaperi, aachazopindi mukutongwa, asi wadarika kubva mukufa, kunghwina mukupona. Zvirokwazvo, zvirokwazvo, ndinoti kwomuri, kuti nguva inoviya, nazvino yaapano, apo vakafa vanozorizwa izwi ro Mwana wa Mwari, naavo vanorizwa vanozopona. Ngokuti kudari ndi Baba uno kupona mukati mwake, ngo kudarovo wakapa Mwana kuti waano kupona mukati mwake. Naye wakapa kwaari simba ro kugura ndava, ngokuti iye uri Mwana wo Mundhu. Musashama ngo ichi, ngokuti nguva inozoviya apo vese vari mu maiba vanozorizwa izwi rake. Navo vanozobudemwo, avo vakayita zvakanaka mukumuka kwo kupona, naavo vakarovejera kuyita zvakashata mukumuka kwo kutongwa.” “Andina simba rokuita chiro ngo kwangu; kudari ngo zvondinozwa ngokudaro ndinotonga, no kutonga kwangu kuri kwakarurama, ngokuti andipshaki kuda kwangu, asi kuda kwo uwo wakandituma. Kudari ndechijipupurira, uchapupu hwangu ahuna gwinyiso. Uripo umwe unoyita uchapupu ndini, neni ndinoziva kuti uchapupu hwaanopupura ndini huno gwinyiso. Imwimwi mwakatuma kuna Johani, naye wakayita uchapupu kuno zviro zvogwinyiso. Asi inini andiashiri uchapupu hunobva ku mundhu asi ndinovereketa izvi kuti muponeswe. Iye wayiva chibani chinobwaka chinojekisa, nemwi mwakatenda kuti mudakare kwo nguva doko mukujeka kwake. Asi inini ndino uchapupu unopinda kugwinya kuno hwa Johani: Ngokuti mishando iyo yaakandipa Baba kuti ndiipeje, ndiyo mishando yendinoita, inopupura ndini, kuti Baba vakandituma. Na Baba uwo wakandituma, wakayita chapupu ndini. Amuzivi kutongozwa izwi rake nakamwe, nokuti kutongovona muemo wake. Nemwi amuna mazwi ake anogara mukati mwenyu, ngokuti amuzivi kutenda uwo waakatuma. Pshakisisanyi matahwa, ngokuti mukati mwazvo munorangarija kuti munokupona kusikaperi, no izvi, ndizvo zvinopupura ndini. Nemwi amutendi kuviya kwendiri, kuti muwane kupona. Andiashiri kukujwa kunobva ku vandhu. Asi ndinomuziva kuti amuna rudo rwa Mwari mukati mwenyu. Inini ndakaviya ngo zina ra Baba wangu nemwi amuzivi kundiashira: Kudari umweni achizoviya ngo zina rake pachake, iye munozomuashira. Mungaita matenderenyi imwimwi munoashira kukujwa kubva kuno umweni no umweni, musikapshaki kukujwa ukwo kunobva kuna Mwari ega? Musarangarija kuti inini ndinozomuitira ndava kuna Baba: Uripo umwe unozomuitira ndava, ndi Mosi, uwo womunogonda. Ngokuti kudari mwakatenda Mosi inga mwakatendavo na inini: Ngokuti iye wakatara ndini. Asi kuti musikatendi zvakatahwa zvake, mungazoita matenderenyi mazwi angu?” Ngosure kwo izvi Jesu wakaambuka mwombera mwo bahari ro Garire, riri ro Tibheriyasi. No mbungano huru yakamutevera, ngokuti inga yavona mishamiso yaakaita kwavari vaihwara. Na Jesu wakakwira mudundhu, umwo wogara pasi no vajiji vake. Zvino Phasika, mushongano wo kuha wo vajudha, rakakwedera. Ndizvo Jesu amusa majiso ake, avona kuti mbungano huru inga yechiviya kwaari, wakati kuna Firipi: “Tinozotenga kwapi zvimanda kuti ava vahe?” Asi wakavereketa izvi kumueja; ngokuti iye waiziva chaanozoita. Firipi wakapingura echiti: “Zvimanda zvo mazana maviri (200) o mare azvivakwani kuti umwe ngaumwe atore chidodoko.” Umwe wo vajiji vake, Andreu munukuna wa Simoni Pedru wakati kwaari: “Uri pano murumbwana uno zvimanda zvo bare zvishanu no zvihove zviviri, kani izvi zvingabeserenyi ku vandhu vazhinji vakadari?” Jesu wakati: “Garisanyi vandhu pasi.” Kwayivapo pandau iyo mwenje wakawanda. Ndizvo vanarume vakagara pasi, vaida kuyita zviuru zvishanu (5.000) ngo kuwanda. Ndizvo Jesu wakatora zvimanda; naapo abonga, wakakovanisa kuna vayinga vakagara pasi; no zvihove ngokudaro kudari ngo kuda kwavo. Naapo vaguta wakati kuvajiji vake: “Unganijanyi matshekeneswa asara, kuti kusarashwa chiro.” Ndizvo vakaunganija, vakazaja zvitengu zviri gumi nazviviri ngo matshekeneswa ozvimanda zvebare zvishanu akasara kuna avo vayinga vakaha. Ndizvo vandhu avo vavona uwu mushamiso waakayita, vakati: “Zvirokwazvo uwu ndiye muprofeti uwo unoviya mu nyika.” Ndizvo apo Jesu echiziva kuti voda kuviya vamupire ngo simba kuti vamuite Mambo, wakataraukazve kuenda ku dundhu ari ega. Kwakati zuva rabira vajiji vake vakabzuka kubahari; Vakakwira mungarava vakaambuka bahari kuenda Kaperanaume. Kwayinga kwasvipa, na Jesu wayinga asati aguma kwavari. No mavimbi o bahari akakwira ngo ndava yo dutu guru raivhuvhuta. Naapo vayinga vavhutha makiromitha mashanu nokuti matandhatu vakavona Jesu echifamba panyezuru po kumwa echikwedera ku ngarava, navo vakatya. Asi wakati kwavari: “Ndini hangu, musatya.” Ndizvo vakamuashira mungarava, paripo ngarava yakaguma ku nyika kwavaienda. No cho mangwanani apo mbungano iyo yayinga yakayima mwombera mwo bahari, yakavona kuti inga pasina ngarava imweni, yega imwe iyo yo vayinga vanghwina kwoiri vajiji vake, nokuti Jesu aazivi kukwira pamwepo no vajiji vake mu ngarava, asi kuti vajiji vake vayinga vaenda vari vega. Kwakaviya ngarava jimweni jakabva Tibheriyasi jakaguma phedo po ndau apo po vakaha zvimanda ngo sure Mambo azvibonga. Ndizvo apo mbungano yavona kuti Jesu aachaingepo, nokuti vajiji vake, yakakwiravo mungarava yakaviya mu Kaperanaume yechimupshaka Jesu. Naapo vayinga yamuvona mwombera mwo bahari, yakati kwaari: “Rabhi, waguma pano rini?” Jesu wakapingura, akati: “Zvirokwazvo, zvirokwazvo, ndinoti kwomuri, amundipshaki ngokuti mwakavona mishamiso asi ngokuti mwakaha zvimanda mukaguta. Musashandira kuha ukwo kunopera, asi kuha ukwo kunogara mbhera narini kwaanozomupa Mwana wo Mundhu, ngokuti panyezuru pake Baba Mwari wakadira chivoniso chake.” Naapo vakati kwaari: “Tingaitenyi kuti tishande mishando ya Mwari?” Jesu wakapingura, akati kwavari: “Uwu ndiwo mushando wa Mwari kuti mutende uwo waakatuma.” Navo vakati kwaari: “Unoita muvonisonyi kuti tiwane titende kwouri? Unoshandenyi? Majibaba edu akaha mana mushango, kudari kuti ngo zvo zvakatahwa, wakavapa chimanda chakabva mu denga kuti vahe.” Ndizvo Jesu wakati kwavari: “Zvirokwazvo, zvirokwazvo, ndinoti kwomuri, andiyepi Mosi akadi wakamupa chimanda chakabva mu denga, asi Baba wangu ndiye unomupa chimanda cho gwinyiso chinobva mu denga. Ngokuti chimanda cha Mwari chiri uwo wakabva mu denga, unopa kupona kunyika.” Ndizvo vakati kwaari: “Mambo, tipei ngo nguva jese ichi chimanda.” Jesu wakati kwavari: “Inini ndiri chimanda cho kupona, iye unoviya kwendiri aatongozwi njara, no uwo unotenda kwendiri aatongozwi nyota. Asi ndakati kwomuri kuti mwakandivona, asi amuzivi kunditenda. Vese avo vaanondipa Baba vanozoviya kwendiri, no uwo unoviya kwendiri andizomurashi akadi. Ngokuti andizivi kubzuka kubva mu denga kuti ndiite kuda kwangu asi kuda kwo uwo wakandituma. Uku ndikwo kuda kwo wakandituma, kuti vese vaakandipa andizorashikihwi naumwe kwavari, asi kuti ndivamuse ngo zuva rokupera. Ngokuti uku ndikwo kuda kwa Baba wangu, kuti mundhu wese unoringira Mwana no kutenda kwaari unova no kupona kusikaperi, neni ndinozomumusa ngo zuva rokupera.” Ndizvo vajudha vakan'un'uta ndiye, ngokuti wakati: “Inini ndiri chimanda chinobva mu denga.” Navo vakati: “Uwu andiyepi here mwana wa Josefa, baba wake na mayi wake vetinoziva? Zvino unoyita mavereketerenyi, kuti: Ndakabva mu denga?” Jesu wakapingura akati kwavari: Musan'un'uta mukati mwenyu. Akuna naumwe uno simba ro kuviya kwendiri, kudari Baba wakandituma asakamukweva, neni ndinomumusa ngo zuva rokupera. Kwakatahwa ngo vaprofeti, kuti: “Vese vanozojijiswa ndi Mwari. Ndizvo mundhu wese wakazwa, echijija, ndi Baba, unoviya kwendiri. Andikwopi kuti uripo wakamuvona Baba, kwega iye wakabva kuna Mwari, ndiye wakamuvona Baba. Zvirokwazvo, zvirokwazvo, ndinoti kwomuri, iye unotenda waano kupona kusikaperi. Inini ndiri chimanda cho kupona. Majibaba enyu akaha mana mushango, vakafa. Ichi ndicho chimanda chinobva mu denga kuti pikija ndiyani kwomuri unochiha aachafi. Inini ndiri chimanda cho kupona chakabva mu denga, pikija ndiyani unochiha ichi chimanda unozorarama kusikaperi: No chimanda chondinozopa chiri nyama yangu, yo ndinozopa kuti iyite kupona kwo nyika.” Ndizvo vajudha vakaitirana hasha pakati pavo, vechiti: “Mundhu uwu ungatiyita mapirenyi nyama yake kuti tihe?” Ndizvo Jesu wakati kwavari: “Zvirokwazvo, zvirokwazvo, ndinoti kwomuri, kudari musikahi nyama yo Mwana wo Mundhu, musikamwi ngazi yake amuna kupona mukati mwenyu. Iye unoha nyama yangu, amwe ngazi yangu, waano kupona kusikaperi, neni ndinozomumusa ngo zuva rokupera. Ngokuti nyama yangu iri kuha kwo gwinyiso, no ngazi yangu iri kumwa kwo gwinyiso. Iye unoha nyama yangu, amwe ngazi yangu, unogara mukati mwangu, neni ndinogara mukati mwake. Kudari ndi Baba vanopona vakandituma, neni ndinopona ndi Baba, ngokudaro, iye unondiha, ndiye unozopona ndini. Ichi ndicho chimanda chakabzuka kubva mu denga chisikazivi kudari ngo chakaha majibaba enyu, vakafa: Iye unoha chimanda ichi unozopona mbhera narini.” Wakavereketa izvi echivajijisa izvi ari mu nyumba yo kudira mu Kaperanaume. Ndizvo vazhinji vo vajiji vake apo vazwa vakati: “Iri izwi igukutu; ndiyani unokona kurizwa?” Asi Jesu echiziva mukati mwake kuti vajiji vake vakamun'un'utira ngoizvo, wakati kwavari: “Ichi chinomukhugunyisa here? Mungadini kudari mwechivona Mwana wo Mundhu echikwira apo paayiva pakutanga? Ndi mweya unopa kupona, nyama ayinyuri chiro: Mazwi endakavereketa kwo muri ari mweya no kurarama. Asi varipo vamweni pakati penyu vasikatendi.” Ngokuti kubvira pakutanga, Jesu waindoziva kuti ngo vapi avo vasikatendi, nokuti ndiyani unozomupira. Naye wakati: “Ngo iyi ndava ndakavereketa kwomuri, ndechiti: Apana uno simba ro kuviya kwendiri kuti asikazivi kuripuwa ndi Baba.” Kubvira ngo uwo mukuvo vazhinji vo vajiji vake vakahwirira sure, avazivi kuchazofamba naye. Ndizvo Jesu wakati kuna vari gumi na vaviri: “Munoda kuendavo here?” Simoni Pedru wakapingura: “Mambo, tingaenda kunani? Mazwi okupona kusikaperi ari kwouri. Nesu takatenda, tinoziva kuti iwewe uri Wakachena wa Mwari.” Jesu wakapingura akati: “Andizivi kumutshanangura here muri gumi no vaviri? No umwe wenyu uri dhiyabhorosi?” Asi wakavereketa ndi Judhasi Isikariyoti, mwana wa Simoni, ngokuti ndiye waizomupira, ari umwe wo vari gumi no vaviri. Ngosure kwo izvo Jesu wakafamba mu Garire, ngokuti inga asikachadi kufamba mu Judhiya, ngokuti vajudha vaipshaka kumuuraya. Zvino mushongano wo kuha kwo vajudha, mushongano wo kugara mumichacha, wayiva phedo. Ndizvo vanukuna vake vakati kwaari: “Ibva pano uende mu Judhiya, kuti vajiji vako vavonezve mishando yako younoita. Ngokuti akuna mundhu unoyita chiro ngo kufishika, echipshaka kuti azivikane pambhene. Kudari wechiyita izvi zviro jipangijire kuna vese vo mu nyika.” Ngokuti vanukuna vake inga vasati vatenda kwaari. Ndizvo Jesu wakati kwavari: “Nguva yangu aisati yaguma akadi, asi nguva yenyu yakandonaka mukuvo wese. Nyika aingamunyenyi akadi, asi inondinyenya inini ngokuti ndinopupura ndiyo, kuti mishando yayo yakashata. Kwiranyi imwimwi kumushongano uwu wo kuha; inini andikwiriyo zvino kumushango uwu wo kuha, nguva yangu aisati yaguma.” Apo avereketa izvi kwavari wakagara mu Garire. Asi apo vanukuna vake vayinga vakwira ku mushongano wo kuha, wakakwiravo, haiwa pambhene, asi ngo kufishika. Ndizvo vajudha vakamupshaka mu mushongano wo kuha, vakati: “Umbori kwapi?” Kwayivapo kun'un'uta kukurutu pakati po mbungano ngo ndava yake. Vamweni vakati: Uri mundhu kwaye: Asi vamweni vakati: “Haiwa asi unopaukisa mbungano.” Asi apana mundhu wakavereketa ndiye pambhene ngo ndava yo kutya vajudha. Asi apo mushongano wo kuha waapakati, Jesu wakakwira mu themperi wakajijisa. Ndizvo vajudha vakashama vechiti: “Uwu unoyita mazivirenyi matahwa, asikazivi kujija?” Ndizvo Jesu wakavapingura, akati: “Kujijisa kwangu asipi kwangu akadi, asi ngo kwo uwo wakandituma; pikija ndiyani unoda kuyita kuda kwake, unozoziva ngo ndava yo chijijiso, kuti chinobva kuna Mwari here nokuti ndinojivereketera. Iye unojivereketera unopshaka kuirikijwa kwake, asi iye unopshaka kuirikija uwo wakandituma, ndiye uri wo gwinyiso, apana kusikarurami mukati mwake. Mosi aazivi kumupa here mipango, asi apana pakati penyu unongwarira mipango. Munopshakirenyi kundiuraya?” Mbungano yakapingura: “Uno bzoka; ndiyani unopshaka kukuuraya?” Jesu wakapingura akati kwavari: “Ndakaita mushando umwe, nemwi mwese mwakashamiswa. Ngo iyi ndava Mosi wakamupa kuti muchekwe (asi akuzivi kubva kuna Mosi akadi, asi kwakabva ku majibaba), nemwi ngo zuva ro sabatha munocheka mundhu. Kudari mundhu echiashira kuchekwa ngo zuva ro sabatha, kuti mupango wa Mosi usaguhwa, hino munondichenekera ngenyi ngokuti ndakaponesa mundhu ngo sabatha? Musatonga ngo kuvoneka kwo kunja, asi tonganyi kutonga kwakarurama.” Ndizvo vamweni vakatikuti vo Jerusarema vakati: “Uwu andiyepi here uwo wo vanopshaka kuuraya? Ringiranyi unovereketa pambhene, navo avavereketi chiro kwaari. Vatongi avazivi here ngo chokwadi kuti uwu ndi Kristu? Asi uwu tinomuziva paanobva; asi apo Kristu oozoviya apana naumwe unozoziva kuti unobva kwapi.” Ndizvo Jesu wakadanijira ari mu themperi echijijisa wakati: “Munondiziva, munozivazve pondinobva, neni andizivi kuviya ngo kwangu, asi uwo wakandituma uno gwinyiso, nemwi amumuzivi. Asi inini ndinomuziva; ngokuti ndinobva kwaari, naye wakandituma.” Ndizvo vakapshaka kumubata, asi apana naumwe wakadira nyara panyezuru pake, ngokuti nguva yake inga isati yaguma. No vazhinji no mbungano vakatenda kwaari, vakati: “Apo Kristu oviya unozokona here kuyita mishando inopinda iyi yakaitwa ngo uwu mundhu?” vakazwa kuti mbungano yain'unu'ta ngo izvi zviro ndiye; no vapristi vakuru no vafarisi vakatuma vangwariri kuti vamubate. Ndizvo Jesu wakati: “Inguva doko ndichinemwi, neni ndinozoenda kwo uwo wakandituma. Munozondipshaka, asi amuzondiwani: No pendiri, amuna simba ro kugumapo.” Ndizvo vajudha vakavereketa pakati pavo, vechiti: “Unozoenda kwapi kwotisikazomuwani isisu? Unozoenda here kuno vakaparajika pakati po vaGiriki, no kuvajijisa vaGiriki? Rinonangenyi izwi iri raanovereketa, kuti, Munozondipshaka, asi amuzondiwani, nependiri amuna simba ro kugumapo?” Ngo zuva ro kupejisira, zuva guru ro mushongano wo kuha, Jesu wakamuka, wakadanijira, echiti: “Pikija ndiyani uno nyota ngaaviye kwendiri, amwe. Iye unotenda kwendiri, kudari ngo kunanga kwo matahwa, murambo jo kupona jinozopopoma kubva mu ndani mwake:” Asi wakavereketa izvi ngo ndava yo Mweya wo vanozoashira avo vanotenda kwaari: Ngokuti Mweya wayinga usati wapuwa, ngokuti Jesu inga asati wairikijwa. Ndizvo vamweni vo mbungano, apo vazwa aya mazwi, vakati: “Ngochakwadi uwu ndiye Muprofeti.” Vamweni vakati: “Uwu ndiye Kristu.” Asi vamweni vakati: “Kristu ungabva Garire here? Matahwa aanangi here kuti Kristu unobva kujinja ra Dhavhidha, nokubva Bhetherehema, muguta apo paaigara Dhavhidha?” Ndizvo kwayivapo kuparajana pakati po mbungano ngo ndava yake. Vamweni pakati pavo vakada kuti vamubate, asi apana wakadira nyara panyezuru pake. Ndizvo vangwariri vakaviya ku vapristi vakuru no vafarisi, navo vakati kwavari: “Mwarega kuviya naye ngenyi?” No vangwariri vakapingura: “Narini, akuna mundhu wakambovereketa kudari ngo uwu mundhu.” Ndizvo vafarisi vakavapingura: “Nemwivo mwachengejehwa here? Uripo here wo vatongi nokuti wo vafarisi wakamutenda? Asi iyi mbungano isikazivi mipango yakatukwa.” Nikodhemusi ari umwe wavo (uwo wakaguma kwaari pakutanga), wakati kwavari: “Mipango yedu inorasa here mundhu, tisati tamuzwa, nokuziva chaanoyita?” Vakamupingura, vakati kwaari: “Newe auri wo Garire here? Pshakisisa uvone, ngokuti akuna muprofeti unobva Garire.” No mundhu wese wakaparara kuenda ku nyumba yake. Asi Jesu wakaenda kudundhu ro Maorivhe. Mangwanani mavishi wakaviyazve mu themperi, no vandhu vese vakaviya kwaari, naye wakagara pasi, akavajijisa. Vatari no vafarisi vakazisa kwaari jimayi rakabatwa rechiomba, naapo vayinga varigajika pakati, vakati kwaari: “Mujijisi, iri jimayi rakabatwa mukuomba, rechiomba yambo. Zvino Mosi wakatipanga mumipango kuti vakadaro vafuhwe ngo mapuwe: Asi iwewe unoti kudini?” Izvi vakazvivereketa vechimueja, kuti vawane chokumuparisa ndava ndicho. Asi Jesu wakakotama pasi, wakatara ngo chikunwe pamavhu. Asi apo vavangirira kumubvunjisisa, wakajirungamisa, akati kwavari: “Iye usina kushaisha pakati penyu, ngaatange kukandira buwe kumufura.” Wakakotamazve pasi, wakatara pamavhu. Navo vazwa vechiyitihwa ndava ngo murangarijo yavo, vakabuda umwe ngaumwe, kubvira kuvasharuka mbhera kuvadoko: Na Jesu wakasara ari ega no jimayi rakagara pakati. Naapo Jesu ayinga ajiruramisa, wakavona jimayi rega akati kweriri: “Jimayi, vari kwapi avo vakakuitira ndava? Apana here wakakurasha?” Rakati: “Akuna, Mambo.” Jesu wakati kweriri: “Neni andikurashi. Enda, usachazoshaishazve.” Ndizvo Jesu wakavereketazve kwavari, echiti: “Inini ndiri kujeka kwo nyika; uwo unonditevera, aazofambi muchidima, asi unozova mukujeka kwo kupona.” Ndizvo vafarisi vakati kwaari: “Unojipupurira; uchapupu hwako ahuna gwinyiso.” Jesu wakapingura akati kwavari: “Pikija ndechijipupurira uchapupu hwangu huno gwinyiso, ngokuti ndinoziva pondakabva, no pondinoenda: Asi imwimwi amuzivi pondakabva, no pondinoenda. Imwimwi munotonga ngo kwenyama, inini anditongi mundhu. Pikija ndechinyatonga, kutonga kwangu kuno gwinyiso, ngokuti andiri ndega akadi, asi inini ndiri pamwepo na Baba vakandituma. Kwakatahwa mumipango yenyu kuti uchapupu hwo vandhu vaviri huno gwinyiso. Inini ndiri iye unojipupurira, na Baba vakandituma ivo vanopupura ndini.” Ndizvo vakati kwaari: “Vari kwapi Baba wako?” Jesu wakapingura, akati: “Imwimwi amundizivi, nokuti Baba wangu; kudari mwaindiziva, mwaizozivazve Baba wangu.” Jesu wakavereketa aya mazwi muugaro hwozvipo, echijijisa ari mu themperi: Apana wakamubata ngokuti nguva yake yayinga isati yaguma. Ndizvo wakatizve kwavari: “Inini ndinoenda, nemwi munozondipshaka nemwi munozofira muzvishaishi zvenyu: No pondinoenda amuna simba ro kuviya apo.” Ndizvo vajudha vakati: “Unojiuraya here? Ngokuti unoti: Pondinoenda, imwimwi amuna simba ro kuviya apo.” Wakati kwavari: “Imwimwi muri vo pasi inini ndinobva mu denga; imwimwi muri vo nyika iyi, asi inini andiripi wo nyika iyi akadi.” Ndizvo ndakati kwomuri kuti: Munozofira muzvishaishi zvenyu, ngokuti kudari musikatendi kuti ndiri iye. Ndizvo vakati kwaari: “Uriyani iwewe?” Jesu wakati kwavari: “Ndiri uwo wo ndakamubvunja mukutanga. Ndino zvakawanda zvo kuvereketa ndimwi no kutonga, asi iye wakandituma uri gwinyiso; neni ndinovereketa ku nyika izvo zvondakazwa kubva kwaari.” Avazivi kuziva kuti waivereketa kwavari ndi Baba. Ndizvo Jesu wakati kwavari: “Apo mwazomukwija Mwana wo Mundhu, naapo munozoziva kuti inini ndiri iye, nokuti andiyiti chiro ndenga, asi kudari ngo zvondakajijiswa ndi Baba, izvi ndizvo zvondakavereketa. No uwo wakandituma undori neni: Aazivi kundisiya ndega, ngokuti ndinoita mukuvo wese izvi zvinomudakaja.” Achavereketa, vazhinji vakatenda kwaari. Ndizvo Jesu wakati kuna avo vajudha vakatenda kwaari: “Kudari mwechigara mumazwi angu ngo gwinyiso muri vajiji vangu. Nemwi munozoziva gwinyiso no gwinyiso rinozomusunungura.” Vakapingura: “Isisu tiri mubarihwana ya Abrahama, atizivi kumboitwa varanda ngo mundhu naumwe; unodaro ngenyi kuti munozosununguhwa?” Jesu wakapingura: “Zvirokwazvo, ndinoti kwomuri, kuti, pikija ndiyani unoyita kushaisha, uri muranda wo kushaisha. No muranda aagari mu nyumba mbhera narini, asi Mwana unogaremwo mbhera narini. Ndizvo kudari Mwana echizomusunungura, munozosununguhwa aembho. Ndinoziva kuti imwimwi muri mubarihwana wa Abrahama: Asi munopshaka kundiuraya, ngokuti izwi rangu arina ndau mukati mwenyu. Inini ndinovereketa izvo zvondakavona kuna Baba wangu, nemwivo munoyita zvo mwakazwa kuna baba wenyu.” Vakamupingura, vakati kwaari: “Baba wedu ndi Abrahama.” Jesu wakati kwavari: “Kudari mwayiva vana va Abrahama, mwaizoyita mishando ya Abrahama. Asi zvino munopshaka kundiuraya ndiri mundhu wakavereketa gwinyiso kwomuri, iro rondakazwa kuna Baba wangu: Abrahama aazivi kuyita zvakadari. Imwimwi munoyita mishando ya baba wenyu.” Vakati kwaari: “Isisu atizivi kubahwa ngo kuomba, tina Baba umwe ndi Mwari.” Jesu wakati kwavari: “Kudari Mwari wayiva Baba wenyu, mwaizondida; ngokuti ndakabuda ndechibva kuna Mwari, ngokuti andizivi kuviya ngo kwangu, asi iye wakandituma. Amuzwisisi ngenyi kuvereketa kwangu? Ngokuti amuna simba ro kuzwisisa izwi rangu. Imwimwi muri va baba wenyu dhiyabhorosi, no kuemura kwa baba wenyu munoda kukuyita. Uwo wayiva muurayi kubvira pakutanga, naye aazivi kuema mugwinyiso, ngokuti gwinyiso amuna mukati mwake, apo echivereketa manyepo, unojivereketera, ngokuti iye uri munyepi na baba wo manyepo. Asi ngokuti inini ndinovereketa gwinyiso amunditendi. Ndiyani kwomuri ungandivonisa ndava yo ndakashaisha? Kudari ndechivereketa gwinyiso amunditendi ngenyi? Iye uri wa Mwari unozwa mazwi a Mwari; ngo iyi ndava imwimwi amundizwi, ngokuti amuri va Mwari akadi.” Vajudha vakamupingura, vakati kwaari: “Atinasi kunanga here kuti uri muSamariya, newe uno bzoka?” Jesu wakapingura: “Inini andina bzoka, asi ndinoreremeja Baba wangu, nemwi amundireremeji. Asi andipshaki kuirikijwa kwangu, uripo umwe unopshaka, no unotonga. Zvirokwazvo, zvirokwazvo, ndinoti kwomuri, pikija ndiyani unongwarira mazwi angu, aatongozovoni kufa.” Vajudha vakati kwaari: “Zvino tinoziva kuti uno bzoka, Abrahama wakafa, no vaprofeti; newe unoti. Pikija ndiyani unongwarira mazwi angu, aatongozovoni kufa. Iwewe uri mukuru here kuna baba wedu Abrahama, vakafa, no vaprofeti vakafa; unojiyita iyani?” Jesu wakapingura: “Kudari ndechijiirikija, kuirikijwa kwangu kuri kusina shwiro: Ndi Baba wangu anondiirikija, vomunoti ndivo kuti vari Mwari wenyu: Nemwi amuzivi kuvaziva, asi inini ndinovaziva, nokudari ndechiti: Andivazivi, ndingayita munyepi kudari ndimwi; asi ndinovaziva, ndinongwarira mazwi avo. Abrahama baba wenyu wakadakara ngo kurivona zuva rangu; naye wakarivona, wakadakara.” Ndizvo vajudha vakati kwaari: “Ausati waano makore ari makumi mashanu, newe wakavona Abrahama here?” Jesu wakati, kwavari: “Zvirokwazvo, zvirokwazvo, ndinoti kwomuri, Abrahama asati abahwa, ndaindovapo.” Ndizvo vakatora mapuwe kuti vamufure, asi Jesu wakangarangaka, akabuda kubva mu themperi. Kwakati achipinda wakavona mundhu wayiva bofu kubvira mukubahwa kwake. No vajiji vake vakamubvunjisa vechiti: “Mujijisi, ndiyani wakashaisha, uwu mundhu nokuti vabari vake, kuti abahwe ari bofu?” Jesu wakapingura, akati: “Uwu mundhu aazivi kushaisha nokuti vabari vake, asi kwokuti mishando ya Mwari ivoniswe ndiye. Kunosisira kuti tishande mishando yo uwo wakandituma achiri masikati, ngokuti usiku hunoviya apo apana ungazokona kushanda. Apo ndichindori mu nyika, ndiri kujeka kwo nyika.” Apo ayinga avereketa izvi, wakapfira pa mabvu, wakakanya matope ngo mata, wakazoja majiso aro ngo dope. Wakati kweriri: Enda, ushambe mugandwa ro Siroma (ngo kukhumuchwa kunoti, Wakatumwa). Ndizvo wakaenda, akashamba, wakaviya ovona. Ndizvo avo vakavakirana naye, naavo vaimuvona kare, kuti wayiva mupembhi, vakati: “Uwu andiyepi here uwo waigara echipembha?” Vamweni vakati: “Ndiye.” Vamweni vakati. “Haiwa asi unotojana naye.” Asi iye wakati: Ndini. Ndizvo vakati kwaari: “Majiso ako akaita mapembenujihwenyi?” Wakati: “Mundhu unozwi ndi Jesu wakakanya matope, akazoja majiso angu, akati kwendiri: Enda Siroma, ushambe: Ndizvo ndakaenda, ndikashamba, ndikavona.” Navo vakati kwaari: “Uri kwapi?” Iye wakati: “Andizivi.” Ndizvo vakamuzisa ku vafarisi uwo wayiva bofu. Rayiva sabatha ngo zuva iro Jesu wakakanya matope akapembenuja majiso aro. Ndizvo vafarisi vakahwirijira kumubvunjisazve, kuti, wakayita mapembenujihwenyi. Asi wakati kwavari: “Iye wakadira matope pa majiso angu, neni ndakashamba, zvino ndinovona.” Ndizvo vamweni vo vafarisi vakati: “Uwu mundhu aabvi kuna Mwari akadi, ngokuti aangwariri sabatha.” Vamweni vakati: “Mundhu uri mushaishi ungaita maitirenyi iyi mishamiso?” Kwakavapo kuparajana mukati mwavo. Ndizvo vakatizve kuno bofu: “Unoti kudini ndiye iwewe, ngo ndava yokuti wakapembenuja majiso ako?” Naye wakati: “Uri muprofeti.” Ndizvo vajudha avazivi kutenda kuti ndiye wayiva uri bofu, nokuti wakapembenujwa, mbhera vakadanija vabari vo wakapembenujwa. Navo vakavabvunjisa, vechiti: “Uwu uri mwana wenyu here, womunoti, kuti wakabahwa ari bofu? Ndizvo zvino unoyita mavonerenyi?” Ndizvo vabari vake vakapingura vakati: “Chotinoziva ngo chokuti uwu uri mwana wedu, nokuti wakabahwa ari bofu: Hino kuti unoyita mavonerenyi atizivi, nokuti ndiyani wakamupembenuja majiso ake, atizivi: Mubvunjisenyi, wabva mundanga, unozojivereketera pachake.” Vabari vake vakavereketa izvi ngokuti vaitya vajudha ngokuti vajudha inga vakatenderana kuti pikija ndiyani unozomutenda kuti iye uri Kristu, unozombirimbijwa kubva mu nyumba yo kudira. Ngo iyi ndava vabari vake vakati: “Wabva mundanga, mubvunjisenyi.” Ndizvo vakamudanija ngo kwo chipiri uwo wayiva bofu, vakati kwaari: “Irikija Mwari iwewe, isisu tinoziva kuti uwu mundhu uri mushaishi.” Ndizvo iye wakapingura: “Pikija uri mushaishi nokuti asiri, andizivi; asi chiro chimwe chega chendinoziva, ngo chokuti inini ndayiva bofu, zvino ndinovona.” Ndizvo vakati kwaari: “Wakaitenyi kwouri? Wakaita mapembenujirenyi majiso ako?” Iye wakapingura: “Ndakamubvunja, asi amuzivi kutenda; munoda kuchayita mazwirenyi? Nemwivo munoda kuyita vajiji vake?” Ivo vakamutuka, vechiti: “Iwewe uri mujiji wake, asi isisu tiri vajiji va Mosi. Tinoziva kuti Mwari wakavereketa kuna Mosi, asi uwu mundhu, atizivi paanobva.” Mundhu uwu wakapingura, akati kwavari: “Ichishamiso kuti amuzivi paanobva, asi wakapembenuja majiso angu? Tinoziva kuti Mwari aazwi vashaishi: Asi pikija ndiyani unomureremeja, nokuita kuda kwake, iye unomuzwa. Kubvira mukutanga akuzivi kumbozwika kuti mundhu wakambopembenuja majiso o wakabahwa ari bofu. Kudari uwu mundhu asiri unobva kuna Mwari, aangavi naro simba rokuita chiro.” Vakamupingura vakati kwaari: “Iwewe wakabahwa aembho mukushaisha, newe unotijijisa here?” Vakamumbirimbija kunja. Jesu wakazwa kuti vayinga vamumbirimbija kunja, amuvona, wakati: “Unotenda here Mwana wa Mwari?” Naye wakapingura akati: “Uriyani, Mambo, kuti nditende kwaari?” Jesu wakati kwaari: “Wamuvona, ndiyezve unovereketa newe.” Wakati: “Mambo ndinotenda.” Naye wakamudira. Na Jesu wakati: “Ndakaviyira kutonga mu nyika muno, kwokuti vasikavoni vavone, no vanovona vaitwe mapofu.” No vamweni vo vafarisi, avo vayiva naye vakazwa izvi, vakati kwaari: “Nesuvo tiri mapofu here?” Jesu wakati kwavari: “Kudari mwayiva mapofu, amusaizova no kushaisha, asi zvino munoti: Tinovona, ndizvo kushaisha kwenyu kunondogara.” “Zvirokwazvo, zvirokwazvo, ndinoti kwomuri: Uwo usikapindi ngo pamusuvo muphandu ro mabvuta, asi echikwira ngo imweni njira, iye uri mbavha no jongoni. Asi uwo unopinda ngo pamusuvo ndiye uri muhavisi wo mabvuta. Kwaari murindi unomubewurira, no mabvuta anozwa izwi rake, unodanija mabvuta ngo mazina ao, aabudise. Naapo aabudisa ake, unoatungamirira, no mabvuta anomutevera, ngokuti anoriziva izwi rake: Asi aazoteveri mupara, asi anozomutiza, ngokuti aazivi izwi ro mupara.” Jesu wakavereketa muezaniso uwu kwavari; asi avazivi kuzwisisa izvo zvaakavereketa kwavari. Ndizvo wakavereketazve kwavari: “Zvirokwazvo, zvirokwazvo, ndinoti kwomuri; Inini ndiri musuvo wo mabvuta. Vese vakatanga pamberi pangu vari mbavha no majongoni: Asi mabvuta aazivi kuvazwa. Inini ndiri musuvo: Pikija ndiyani unopinda ndini unozoponeswa unozonghwina, unozobuda, awane kuha. Mbavha inoviya kwega kuba, no kuuraya, no kuparaja: Inini ndakaviya kuti vawane kupona, vakuwane kakurutu. Inini ndiri muhavisi wakanaka; muhavisi wakanaka unodira pasi kupona kwake ngo ndava yo mabvuta. Asi iye unoshanda kuti awane muthuso, asipi muhavisi akadi, uwo mabvuta asipi ake akadi, unovona thika rechiviya, unoasiya mabvuta, unotiza, no thika rinoabvuka no kuaparaja. Unotiza ngokuti uri unoshandira muthuso, aana ndava no mabvuta. Inini ndiri muhavisi wakanaka, neni ndinoaziva angu, no anguvo anondiziva, kudari ngo zvaanondiziva Baba, zvakadaro nenivo ndinovaziva Baba, neni ndinodira pasi kupona kwangu ngo ndava yo mabvuta. Ndinao amweni mabvuta, asiri o iri phandu, naozve kunosisira kuti ndiazise, nao anozozwa izwi rangu, nao anozoita phandu rimwero ro muhavisi umwewo. Ngo iyi ndava Baba vanondiziva, ngokuti ndinodira pasi kupona kwangu, kuti ndikutorezve. Apana mundhu unokutora kubva kwendiri, asi ndinokudira pasi ngo kwangu. Ndino simba ro kukudira pasi, ndino simba ro kukutorazve. Uwu mupango ndakaupuwa ndi Baba wangu.” Kwayivapo kuparajana pakati po vajudha ngo ndava yo mazwi aya. No vazhinji vavo vakati: “Uno bzoka, unopenga; munomupurukirirenyi?” Vamweni vakati: “Aya mazwi andiopi anovereketwa ngo unofukwa ngo bzoka: bzoka ringapembenuja majiso obofu here?” Ngo uwo mukuvo kwayivapo mushongano wo kupira themperi mu Jerusarema, kwayiva chipepo. Na Jesu wakafamba mu themperi, mu berere ra Saromona. Ndizvo vajudha vakamuunganira, vakati kwaari: “Unotiyita gariremwo mbhera rini? Kuti uri Kristu, tibvunje pambhene.” Jesu wakavapingura: “Ndakamubvunja, nemwi amutendi: Mishando yo ndinoita ngo zina ra Baba wangu, inopupura ndini. Kani, imwimwi amutendi ngokuti amuri vo mabvuta angu akadi. Mabvuta angu anozwa izwi rangu, neni ndinoaziva, nao anonditevera. Ndinoapa kupona kusikaperi, nao aazofi narini, zve akuna unoabvuka kubva munyara yangu. Baba wangu uwo wakandipa awo, uri mukuru kwavari vese, apana naumwe uno simba rokuabvuka kubva munyara ya Baba wangu. Inini na Baba tiri umwe.” Vajudha vakabojerazve mapuwe kuti vamufure. Jesu wakavapingura: “Ndakamuvonisa mishando mizhinji yakanaka inobva kuna Baba; ngo wapi kwo iyo mishando, womunondifura ngo mapuwe?” Vajudha vakapingura: “Atikufuri ngo ndava yo mushando wakanaka, asi ngo ndava yo kutuka, na ngokuti iwewe uri mundhu unojiyita Mwari.” Jesu wakavapingura: “Akuzivi kutahwa here mumipango yenyu kuti: Ndakati muri zvimwari? Kudari akavadanija kuti zvimwari, avo kwarakaguma izwi ra Mwari, (no matahwa aangadarikwi), munovereketa ngenyi ndiye, uwo waakaemesa Baba no kumutuma mu nyika, kuti: Unotuka Mwari, ngokuti ndakananga kuti: Inini ndiri Mwana wa Mwari? Kudari ndisikaiti mishando ya Baba wangu, musanditenda: Asi kuti ndechiyita, pikija musikatendi kwendiri, tendanyi mishando yendinoita, kuti muzive muzwisise kuti Baba vari mukati mwangu, neni ndiri mukati mwa Baba.” Ndizvo vakapshakazve kumubata: Asi iye wakapokonyoka kubva munyara javo. Naye wakaendazve mwombera mwo Jordhani ku ndau iyo yaakabhapatisa Johani kutanga; wakagara apo. No vazhinji vakaviya kwaari vakati: “Johani aazivi kuyita mishamiso, asi zvese zvaakavereketa Johani ngo ndava yo uwu zviri gwinyiso.” Vazhinji vakamutenda apo. Zvino mundhu wakatikuti waihwara, waizwi Razaro wo Bhetani guta ra Mariya na yaya wake Marita. Mariya wayiva uwo wakazoja Mambo ngo mafuta, akapukuta tsaka jake ngo bvuji rake, ndiye wayiva no hama yake Razaro waihwara. Ndizvo hanzvaji jake jakatumira kwaari jechiti: “Mambo, vonayi, uwo wounoda ari kuhwara.” Asi apo Jesu azwa, wakati: “Uku kuhwara akuri kwokuti afe akadi, asi kuri kwo kukurisa Mwari, kuti Mwana wa Mwari airikijwe ndikwo.” Zvino Jesu wakamuda Marita, no munukuna wake, na Razaro. Ndizvo apo azwa kuti waihwara, wakagara mazuva maviri pa ndau payivapo. Ngosure kwo izvi wakati kuvajiji vake: “Ngatihwirire Judhiya.” Vajiji vakati kwaari: “Mujijisi, vajudha vaitopshaka kukufura ngo mapuwe, wohwirireyozve here?” Jesu wakapingura, akati: “Akuna here nguva jiri gumi na mbiri ngo zuva? Kudari mundhu echifamba masikati aakhugunywi, ngokuti unovona kujeka kwo mu nyika muno. Asi kudari mundhu echifamba usiku unokhugunywa, ngokuti aana kujeka mukati mwake.” Wakavereketa izvi; naapo wakati kwavari: “Razaro shamwari yedu wavata; asi inini ndinoenda kuti ndimumuse.” Ndizvo vajiji vake vakati kwaari: “Mambo, kudari akavata, unozoita nane.” Asi Jesu waivereketa ngo kufa kwake: Asi ivo vaikarakaja kuti waivereketa ngo kuzorora mukuvata. Ndizvo Jesu wakati kwavari pambhene: “Razaro wafa. Neni ndinodakara ngo ndava yenyu kuti inga ndisipo, kuti imwimwi mutende, asi ngatiende kwaari.” Ndizvo Tomasi uwo unozwi, Munyambiri, wakati kuvajiji shamwari jake: “Nesu ngatiendevo, kuti tife naye.” Naapo Jesu aguma wakavona kuti zvino inga aano mazuva marongomuna ari mu guva. Zvino Bhetani rayiva phedo po Jerusarema, kwaida kuyita makiromitha matatu: No vazhinji vo vajudha inga vaguma kuna Marita na Mariya, kuti vavaembezere ngo ndava yo hama yavo. Ndizvo Marita, apo azwa kuti Jesu ari kuviya, wakaenda kwooshongana naye: Asi Mariya wakasara akagara mu nyumba. Ndizvo Marita wakati kuna Jesu: “Mambo, kudari wayinga uri pano, hama yangu inga isikazivi kufa. Nazvino ndinoziva kuti icho chounozokumbira kuna Mwari, Mwari unozokupa.” Jesu wakati kwaari: “Mukoma wako unozomukazve.” Marita wakati kwaari: “Ndinoziva kuti unozomuka mukumuka kwo zuva ro kupera.” Jesu wakati kwaari: “Inini ndiri kumuka no kupona; iye unonditenda pikija afa, unozoponazve. No uwo unorarama, echinditenda aatongozofi mbhera narini. Unotenda ichi here?” Wakati kwaari: “Eya Mambo; inini ndakatenda kuti iwewe uri Kristu, Mwana wa Mwari, uwo unoviya mu nyika.” Wavereketa izvi wakaenda, akadanija munukuna wake ngo kufishika, akati: “Mujijisi waapano, unokudanija.” Naye azwa, wakakasira kumuka akaenda kwaari. Zvino Jesu wayinga asati waguma ku guta, asi wayiva achiri apo paakasongana na Marita. Ndizvo vajudha avo vayiva naye mu nyumba vachimuembezera, vavona kuti Mariya wamuka ngo kukasira akabuda, vakamutevera, vechikarakaja kuti unoenda kuiba kwoochemapo. Apo Mariya aguma payiva na Jesu, amuvona wakawa pasi patshoka jake, akati kwaari: “Mambo, kudari wayinga pano, hama yangu inga isikazivi kufa.” Ndizvo Jesu amuvona echichema, no vajudha vechichema, avo vakaviya naye, wakayita mahwema mumweya mwake, wakatambujika. Wakati: “Mwakamurajika kwapi?” Vakati kwaari: “Mambo, viya, uvone.” Jesu wakachema musoji. Ndizvo vajudha vakati: “Ringiranyi, kumudisisa kwake!” Asi vamweni vavo vakati: “Uwu mundhu wakapembenuja majiso owayiva ari bofu, inga asina simba here rokuita kuti mundhu uwu asafa?” Ndizvo Jesu echichemazve mukati mwake wakaguma ku guva: Rayiva bako, no buwe inga rakaridumaija. Jesu wakati: “Bvisanyi buwe.” Marita hanzvaji yo uwo wakafa wakati kwaari: “Mambo, zvino wotonuha, ngokuti waano mazuva marongomuna afa.” Jesu wakati kwaari: “Andizivi kukubvunja here, kuti, kudari wechitenda, ungazovona uthende hwa Mwari?” Ndizvo vakabvisa buwe. Na Jesu wakamiruja majiso ake mu denga, akati: “Baba, ndinokutenda ngokuti wandizwa. Neni ndinoziva kuti unondizwa ngo nguva jese: Asi ngo ndava yo mbungano yakayima phedo ndavereketa kudaro, kuti itende kuti ndiwe wakandituma.” Naapo avereketa izvi wakadanijira ngo izwi guru: “Razaro, buda.” Uwo wayinga akafa wakabuda, akasungwa tshoka no nyara ngo machira okuvigwa nao, no hope yake yakasungwa nayo ngo jira doko. Jesu wakati kwavari: “Musunungurenyi, mumuregere aende.” Ndizvo vazhinji vo vajudha avo vakaviya kuna Mariya, vechivona izvo zvaakaita, vakamutenda: Asi vamweni vavo vakaenda ku vafarisi, vakavabvunja zvaayinga ayita Jesu. Ndizvo vapristi vakuru no vafarisi vakaungana pamwepo kuyita bangano, vakati: “Tinozoitenyi? Ngokuti mundhu uwu unoyita mishamiso yakawanda. Kudari techimuregera vandhu vese vanozotenda kwaari, no vaRoma vanozoviya vatibvukire zvese ndau yedu no jinja redu.” Asi umwe wavo Khaifasi, ari mupristi mukuru ngo gorero, wakati kwavari: “Amuzivi chiro nachimwe. Nokuti kukarakaja kuti kunosisira kuti mundhu umwe afe ngo ndava yo vandhu, kwokuti jinja rese risapera.” Asi izvi aazivi kujivereketera, asi ngokuti wayiva ari mupristi mukuru ngo gorero, wakaprofeta kuti Jesu unozofira jinjero. Asi haiwa kufira jinjero kwega, asi kuti aunganijevo pamwepo vana va Mwari avo vakaparajika ku nyika yese, kuti vayite umwe. Ndizvo kubvira ngo zuva iro vakayita bangano pamwepo rokuti vamuuraye. Ndizvo Jesu aazivi kuchafambazve pambhene pakati po vajudha, asi kubva apo wakaenda ku nyika iri phedo no bani, ku dhoropa rinozwi Efraimu, naapo wakagara no vajiji vake. No Phasika ro vajudha rayiva phedo, vazhinji vakakwira Jerusarema, vechibva mundharaunda, Phasika risati raguma, kwokuti vajichenese. Ndizvo vakamupshaka Jesu, vechibvunjisa vakayima mu themperi, vechiti: “Munoti kudini? Kuti aazoviyi here kumushongano wo kuha?” Ndizvo vapristi vakuru no vafarisi vayinga vakayita mupango kuti pikija ndiyani unoziva paari, ngaanange kuti vamubate. Ndizvo mazuva matandhatu Phasika risati raguma, Jesu wakaguma Bhetani, apo payiva na Razaro, uwo waakamusa kwo vakafa. Ndizvo vakamuitira kuha apo, na Marita wakavapakurira, asi Razaro wayiva umwe wo avo vaitseyama naye pa kuha. Naapo Mariya wakatora mafuta okuzora anoda kukwana litha onardhi aidhura, wakazoja tshoka ja Jesu, akapukuta tshoka jake ngo bvuji rake. No nyumba yakazara ngo gwema ro mafuta. Asi Judhasi Isikariyoti, umwe wo vajiji vake, uwo waizomupira, wakati: “Kwaregehwa ngenyi kutengesa mafuta aya ngo pondo jiri gumi na shanu, jipuwe varombo?” Izvi wakazvivereketa kusiri kuvada varombo, asi ngokuti wayiva mbavha, waingwarira nyede, naye waitora zvaidihwemwo. Ndizvo Jesu wakati: “Muregerenyi, ngaangwaririre mbhera zuva ro kuvigwa kwangu. Ngokuti varombo munavo nguva jese, asi amuneni akadi nguva jese.” Ndizvo vazhinji vo mbungano yo vajudha vakaziva kuti wayivapo, navo vakaviya haiwa kwokuti vavone Jesu kwega, asi kuti vavone Razaro, uwo waakamusa kubva kwo vakafa. Asi vapristi vakuru vakapangana kuti vauraye na Razarowo; ngokuti ngo ndava yake vazhinji vo vajudha vakaenda vakatenda kuna Jesu. No zuva rayitevera mbungano huru, iyo yakaviya kumushongano wo kuha, apo yazwa kuti Jesu woviya. Yakatora matavi emichindu, yakabuda kwooshongana naye, vakadanijira, vechiti: “Hosana, unomuchena uwo unoviya ngo zina ra Mambo, uri Mambo wo Israeri.” Na Jesu awana mbongoro ipsha, wakagadha panyezuru payo, kudari ngo zvakatahwa: “ Usatya, iwewe mwana wo kaji wo Zioni” Ringira, mambo wako unoviya, akagadha panyezuru po tshiru ro mbongoro. Vajiji vake avazivi kuzwisisa izvi pakutanga, asi Jesu airikijwa, vakazocherecheja, kuti izvi zvayinga zvakatahwa ndiye, nokuti vakamuitira izvi. No mbungano iyo yayiva naye apo paakadanija Razaro kubva mu guva akamumusa kwo vakafa, yakayita chapupu. Ngo iyi ndava mbungano yakaenda kwooshongana nayezve ngokuti yayinga yazwa kuti wakayita uwu mushamiso. Ndizvo vafarisi vakavereketa pakati pavo, kuti: “Ringiranyi, amungaiti chiro: Vonanyi nyika yese inomutevera.” Kwayivapo vaGiriki vakatikuti pakati po avo vakakwira kwoodira kumushongano wo kuha: Ndizvo ava vakaguma kuna Firipi, uwo wayiva wo Bhetisaidha ro Garire, vakakumbira kwaari, vechiti: “Changamire, tinoda kuvona Jesu.” Firipi wakaviya, akabvunja Andreu; Andreu na Firipi vakamubvunja Jesu. Na Jesu wakapingura, echiti: “Nguva yaguma kuti Mwana wo Mundhu airikijwe. Zvirokwazvo, zvirokwazvo, ndinoti kwomuri; kudari mbhumba yo koroni isikawi mu mavhu no kufa, inogara iri yega, asi kuti ikafa, inobereka michero jakawanda. Iye unoda kupona kwake, unozokurasha; asi iye unokunyenya kupona kwake mu nyika muno, unozokungwarira kupona kusikaperi. Kudari mundhu echindishandira ngaanditevere; no pendiri naye muranda wangu unozovapovo: Kuti mundhu echindishandira, iye unozoreremejwa ndi Baba.” “Zvino mweya wangu unoneseka; neni ndinozoti kudini? Baba ndiponese kubva kuna nguva iyi. Asi ngo iyi ndava ndakaviira nguva iyi Baba kujai zina rako.” Nguva iyo rakaviya izwi rechibva mu denga rechiti: “Ndakarikuja, neni ndinozorikujazve.” No mbungano vayinga yakaima apo, yairizwa, yakati: “Kwatindhira.” Vamweni vakati: “Ingirosi yavereketa naye.” Jesu wakapingura, akati: “Iri izwi arizivi kuguma ngo ndava yangu, asi ngo ndava jenyu. Zvino kwaguma kutongwa kwo nyika iyi; zvino muzvare wo nyika iyi unozorashwa kunja. Neni kudari ndechitakuhwa panyika, ndinozokweva vese vandhu kwendiri.” Wakavereketa izvi echipangijira njira yo kufa kwaaizofa ndikwo. Ndizvo mbungano yakamupingura: “Takazwa mumipango kuti Kristu, unozogara mbhera narini, hino unoyita mavereketerenyi kuti Mwana wo Mundhu unodikana kuti atakuhwe? Ndiyani uwu Mwana wo Mundhu?” Jesu wakati kwavari: Inguva doko kujeka kuchiripo pakati penyu. Fambanyi muchino kujeka kuti chidima chisamubata: No uwo unofamba muchidima aatongozivi paanoenda. Muchino kujeka, tendanyi kujeka, kuti muite vana vo kujeka. Jesu wakavereketa izvi, akabva apo akajifisha kubva kwavari. Pikija wayinga wayita mishamiso mizhinji pamberi pavo, asi avazivi kumutenda, kwokuti izwi ra Isaya muprofeti rizarisike, iro rinoti: “Mambo, ndiyani wakatenda izwi redu, no mukono wa Jehovha wapangijihwa kunani?” Ngo ndava yo izvi inga vasina simba ro kutenda, ngokuti Isaya unotizve: Iye wakapofumaja majiso avo, wakaomesa mwoyo yavo, kuti vasazovona ngo majiso avo, vasaziva ngo mwoyo yavo, vatenderuke, ndivarape. Izvi Isaya wakazvivereketa apo avona uthende hwake, akavereketa ndiye. Asi pakati po majimambo vazhinji vakamutenda, asi ngo ndava yo vafarisi avazivi kumutenda ngo muromo, kuti vasambirimbijwa kubva mu nyumba jo kudira: Ngokuti vaipinda kuda kuirikijwa ngo vandhu kuno kuirikijwa ndi Mwari. Jesu wakadanijira, akati: “Iye unonditenda, aatendi inini akadi, asi unotenda kwaari wakandituma. No uwo unondivona, unovona uwo wakandituma. Inini ndakaviya ndiri kujeka mu nyika, kuti pikija ndiyani unotenda kwendiri aachagari muchidima. Pikija ndiyani unozwa mazwi angu, asikaatendi, andimutongi inini; ngokuti andizivi kuviya kwootonga nyika asi kooponesa nyika. Uwo unondiramba asikaashiri mazwi angu, unaye unomutonga: Izwi iro ro ndakavereketa, ndiro rinozomutonga ngo zuva rokupera. Ngokuti andizivi kujivereketera pachangu; asi Baba uwo wakandituma iye wakandipanga chondinonanga, no chondinozovereketa. Neni ndinoziva kuti mupango wake uri kupona kusikaperi: Ndizvo izvo zvondakavereketa, ndinozvivereketa kudari ngo zvondakabvunjwa ndi Baba.” Zvino kusati kwaguma kuha kwo Phasika, Jesu echiziva kuti nguva yake yaguma kuti abve mu nyika muno, aende kuna Baba, avada vake avo vari mu nyika, wakavada mbhera mukupera. Vachiha, Dhiabhorosi inga atonghwina mu mwoyo mwa Judhasi Isikariyoti mwana wa Simoni kuti amupire. Echiziva kuti Baba ayinga amupa zvese munyara jake, nokuti wakabva kuna Mwari, nokuti unoenda kuna Mwari; wakamuka kubva pokuha wakakhumura zvokusimira zvake wakatora jira ro kupukuta ndiro, akasungira muchiunu chake. Naapo wakadurura kumwa mundiro, akatanga kusuka tshoka jo vajiji no kujipukuta ngo jira rayinga akasungira. Ndizvo wakaguma pana Simoni Pedru, uwo wakati kwaari: “Mambo iwewe unosuka tshoka jangu here?” Jesu wakapingura, akati kwaari: “Icho chendinoita autochizivi zvino, unozochiziva ngosure kwo izvi.” Pedru wakati kwaari: “Aungasuki tshoka jangu narini.” Jesu wakapingura: “Kudari ndisikakusuki, tshoka auna ugaro neni.” Simoni Pedru wakati kwaari: “Mambo kusachayita tshoka jangu jega asi najo nyara jangu no musoro wangu.” Jesu wakati kwaari: “Uwo wasukwa aachatami chiro chimweni kwega kusuka tshoka jake, asi wacheneswa aembho: Nemwi muri vacheneswa, asi haiwa mwese.” Wakamuziva uwo waizomupira, ndizvo wakati: Amuzivi kucheneswa mwese. Ndizvo apo ayinga asuka tshoka javo, no kutora zvokusimira zvake no kugara pasizve, wakati kwavari: “Munoziva here chendamuitira? Munondidanija kuti: Mujijisi nokuti Mambo, nemwi munonasa kunanga, ngokuti ndiri iye. Ndizvo kudari inini Mambo no Mujijisi ndasuka tshoka jenyu nemwivo kunodikana kuti musukane tshoka jenyu: Ngokuti ndamupa chivonero kuti nemwi muite kudari ngo zvondinoita kwomuri. Zvirokwazvo, zvirokwazvo ndinoti kwomuri: Muranda aatongopindi mambo wake, zve no wakatumwa aatongopindi uwo wakamutuma. Kudari mwechiziva izvi munomuchena kudari mwechizviyita. Andivereketi ndimwi mwese akadi; ndinovaziva avo vo ndakatshanangura: Asi kuti matahwa azarisike, anoti: Uwo unoha chimanda changu wakandimusira chisisinindo chake kurwisana neni. Kubvira zvino ndinomubvunja zvisati zvaitika, kuti apo zvaitika kuti mutende kuti ndiri iye. Zvirokwazvo, zvirokwazvo ndinoti kwomuri: Iye unoashira uwo wo ndinotuma, unoashira inini; no uwo unondiashira unoashira uwo wakandituma.” Apo Jesu ayinga avereketa izvi wakatambujika mumweya mwake, wakapupura akati: “Zvirokwazvo, zvirokwazvo ndinoti kwomuri, kuti umwe kwomuri unozondipira.” Vajiji vakaringirana vasikazivi kuti unovereketa ndiyani. Wayivapo umwe wo vajiji vake wayinga akacheama pa diti ra Jesu waidiwa ndi Jesu. Ndizvo Simoni Pedru wakamukopera kuti abvunjise kwaari, kuti ndiyani waanovereketa ndiye. Ndizvo uwo wakacheama pa diti ra Jesu wakati kwaari: “Mambo, ndiyani?” Ndizvo Jesu wakapingura: “Ndiye uwo wondinozoseva musuva ndimupe.” Naapo aseva musuva wakaupa Judhasi Isikariyoti mwana wa Simoni. Na ngosure kwo musuva Sathani wakanghwina kwaari. Ndizvo Jesu wakati kwaari: “Icho chounoita chiite ngo kukasira.” Kwayiva kusina mundhu pakuha wakaziva singwisingwi yo zvaakavereketa kwavari: Ngokuti Judhasi wayiva wo chikhwama, vamweni vaipinimija kuti Jesu wakati kwaari: Tenga zvotinotama mu Phasika; nokuti ape chiro ku varombo. Ndizvo apo aashira musuva paripo wakabuda kuenda: Inga hwa usiku. Ndizvo, apo abuda, Jesu wakati: “Zvino Mwana wo Mundhu unoirikijwa, na Mwari unoirikijwa mukati mwake: Kudari Mwari echizoirikijwa mukati mwake, Mwari unozomuirikijazve mukati mwake pachake, naye unozomuirikija ngo kukasira. Vana vadoko, inguva doko ndichinemwi: Munozondipshaka, no kudari ngo zvo ndakavereketa ku vajudha, kuti, pondinoenda, amuna simba ro kuviyapo, nazvino ndinonanga kudaro kwomuri. Mupango mupsha ndinomupa kuti mudane. Kudari ndini ndakamuda ngokudaro, imwimwivo mudane. Ngo ichi vese vanoziva kuti imwimwi muri vajiji vangu, kudari muno rudo umwe kwo umweni.” Simoni Pedru wakati kwaari: “Mambo, unoenda kwapi?” Jesu wakapingura: “Pondinoenda, auna simba rokunditevera zvino, asi unozotevera sure kwo izvi.” Pedru wakati kwaari: “Mambo, andina simba rokukutevera zvino ngenyi? Ndinozofa ngo ndava jako.” Jesu wakapingura: “Unozofa ngo ndava jangu here? Zvirokwazvo, zvirokwazvo, ndinoti kwouri, jongwe arizoriri usati wandiramba katatu.” “Mwoyo yenyu isatambujika; tendanyi kuna Mwari, mutendevo kwendiri. Mu nyumba mwa Baba wangu huriyo ugaro hwakawanda: Kudari zvisakadaro, inga ndakamubvunja; ngokuti ndinoenda kwoomunasirira ugaro. Kudari ndechienda kwoomunasirira ugaro, ndinozoviyazve, no kumuashira ndambhwine, kuti pondiri, nemwi mungazovapovo. No pondinoenda munoiziva njira.” Tomasi wakati kwaari: “Mambo, atizivi pounoenda; no njira tingaiziva ngenyi?” Jesu wakati kwaari: “Inini ndiri njira, no gwinyiso, no kupona; akuna unoviya kuna Baba, asikaviyi ndini. Kudari mwaindiziva inga mwakamuziva Baba wanguvo. Kubvira pano munomuziva, nemwi mwakamuvona.” Firipi wakati kwaari: “Mambo, tipangijire Baba, nesu tikwaniswe.” Jesu wakati kwaari: “Ndakagara nemwi mukuvo wakareba, asi ausati wandiziva here, Firipi? Iye wakandivona inini wakavona na Baba: Unonanga ngenyi kuti, Tipangijire Baba? Autendi here, kuti inini ndiri mukati mwa Baba, na Baba vari mukati mwangu? Mazwi ondinovereketa kwomuri, andijivereketeri: Asi Baba vanogara mukati mwangu ndivo vanoyita mishando yavo. Tendanyi inini kuti ndiri mukati mwa Baba, na Baba vari mukati mwangu, asi kuti musikatendi kudaro, tendanyi inini ngo ndava yo mishando yambhwine. Zvirokwazvo, zvirokwazvo, ndinoti kwomuri: Uwo unonditenda; mishando yo ndinoita, unozoyitavo, no mishando mukuru kuno iyi unozoyita, ngokuti inini ndinoenda kuna Baba. Pikija chinyi chomunozokumbira ngo zina rangu, ndinozochiyita, kuti Baba airikijwe ngo Mwana. Kudari mwanyazokumbirenyi kwendiri ngo zina rangu, inini ndinozochiyita.” “Kudari mwechindida, munozongwarira mipango yangu. Neni ndinozokumbira kuna Baba naye unozomupa umweni Muembezeri kuti agare nemwi kusikaperi. Mweya wo gwinyiso, uwo aungaashihwi ngo nyika; ngokuti aiuvoni, aiuzivizve: Asi imwimwi munouziva, ngokuti unogara nemwi, unozogara mukati mwenyu. Andizomusiyi muri ndherera, ndinozoviya kwomuri. Kuchino nguva doko no nyika aichandivoni, asi imwimwi munondivona, ngokuti inini ndinopona nemwivo munozopona. Ngo iro zuva munozoziva kuti inini ndiri mukati mwa Baba wangu, na imwimwi muri mukati mwangu, neni ndiri mukati mwenyu. Uwo uno mipango yangu, echiingwarira, uwo ndiye unondida; no uwo unondida unodiwa ndi Baba wangu, neni ndinozomuda, ndijivonise kwaari.” Judhasi (asiriye Isikariyoti), wakati kwaari: “Mambo, zvinoita ngenyi kuti unozojivonisa kwetiri, usikajivonisi ku nyika?” Jesu wakapingura, akati kwaari: “Pikija ndiyani unondida unozongwarira mazwi angu, na Baba wangu vanozomuda, nesu tinozoviya kwaari, tiite ugaro hwedu pamwepo naye. Uwo usikandidi, aangwariri mazwi angu; no izwi ro munozwa asiri rangu akadi, asi ngo ra Baba wangu avo vakandituma. Izvi ndakamubvunja ndichakagara nemwi. Asi Muembezeri, Mweya Wakachena, uwo waanozotuma Baba ngo zina rangu, iye unozomujijisa zviro zvese amucherechejise zvese zvo ndakamubvunja. Kunyarara ndinokusiya kwomuri, kunyarara kwangu ndinomupa: Andimupi kudari ngo kupa kwo nyika. Mwoyo yenyu isatambujika, isakarukazve. Mwazwa kuti ndati kwomuri, ndinoenda, neni ndinozoviyazve kwomuri. Kudari mwayindida mwaizodakara ngokuti ndinoenda kuna Baba, ngokuti Baba vari mukuru kwondiri. Zvino ndakamubvunja zvisati zvaitika, kuti apo zvazoitika mutende. Ngosure kwoizvi andichazovereketi kakurutu nemwi; ngokuti muzvare wo nyika iyi unoviya, naye aana chiro mukati mwangu. Asi kuti nyika izive kuti ndinomuda Baba, nokudari ndi Baba wakandipa mupango ngokudaro ndinoita. Mukanyi ngatibve pano.” “Inini ndiri muvhini wo chakwadi, na Baba wangu murimi. Matavi ese ari mukati mwangu, asikabereki michero, unoabvisa, nao ese anobereka michero unoatongora kuti abare michero yakapinda kuwanda. Imwimwi muri vakatocheneswa ngo izwi rondakavereketa kwomuri. Garanyi mukati mwangu, neni mukati mwenyu. Kudari ngo davi risina simba rokubereka michero rega, risikagari mukati mwo muvhini, zvakadaro nemwi kudari musikagari mukati mwangu. Inini ndiri muvhini, imwimwi muri matavi: Uwo unogara mukati mwangu, neni mukati mwake, ndiye unobereka michero yakawanda, ngokuti ngo kunja kwangu imwimwi amungakoni kuyita chiro. Pikija ndiyani usikagari mukati mwangu, unorashwa kudari ngo davi, rinozooma, navo vanoaunganija vaakhandire mu muriro, nao anopsha. Kudari mwechigara mukati mwangu, no mazwi angu anogara mukati mwenyu nemwi munozokumbira icho cho munoda, nacho chinozoitwa kwomuri. Ngo ichi Baba wangu vanoirikijwa, kuti mubare michero yakawanda, ngokudaro munozoita vajiji vangu. Kudari ndi Baba vakandida, zvakadaro neni ndakamudavo: Garanyi murudo rwangu. Kudari mwechingwarira mipango yangu, munozogara murudo rwangu; kudari ndini ndakangwarira mipango ya Baba wangu, no kugara murudo rwake. Ndakavereketa izvi kwomuri kuti kudakara kwangu kugare kwomuri, nokuti kudakara kwenyu kuzarisike. Uwu ndiwo mupango wangu, kuti mudane, kudari ndini ndakamuda. Akuna mundhu uno rudo rukuru kuno urwu, kuti mundhu afe ngo ndava yo shamwari jake. Imwimwi muri shamwari jangu kudari mwechyita izvo zvo ndinomupanga. Andichamudaniji kuti muri varanda, ngokuti muranda aazivi chinoitwa ndi Mambo wake, asi ndakamudanija kuti muri shamwari: Ngokuti zvese zvo ndakazwa kuna Baba wangu, ndakazvizivisa kwomuri. Imwimwi amuzivi kunditshanangura, asi ndakamutshanangura inini, ndikamuemesa kuti muende, mubare michero, nokuti michero yenyu igare: Kuti pikija chinyi chomunozokumbira kuna Baba ngo zina rangu, vachipe kwomuri. Izvi ndinomupanga kuti mudane.” “Kudari nyika yechimunyenya, munoziva kuti yakatanga kundinyenya inini. Kudari mwayiva vo mu nyika, nyika yaizoda vayo: Asi ngokuti amuri vo mu nyika akadi, asi ngokuti ndakamutshanangura kubva mu nyika, ndizvo nyika inomunyenya. Karakajanyi izwi iro ro ndakavereketa kwomuri, kuti: Muranda aatongopindi mambo wake. Kudari vakanditeverera inini, vanozomutevereravo: Kudari vakangwarira izwi rangu, vanozongwarira no renyuvo. Asi zvese izvi vanozomuitira ngo ndava yo zina rangu, ngokuti avamuzivi uwo wakandituma. Kudari ndisikazivi kuviya ndikavereketa kwavari, avasaizova no kushaisha: Asi zvino avachina chokuregerehwa ndicho ngokushaisha kwavo. Uwo unondinyenya, unonyenyavo Baba wangu. Kudari ndisikazivi kuyita pakati pavo mishando iyo isikazivi kumboitwa ngo umweni, vangadari vasina kushaisha; asi zvino vakavona vakanyenya tese inini na Baba wangu. Asi kuti izwi rizarisike iro rakatahwa mumipango yavo, rokuti: Vakandinyenya, pasina ndava. Asi apo aguma Muembezeri, uwo wondinozotuma kwomuri echibva kuna Baba, Mweya wo gwinyiso, unobva kuna Baba, iye unozopupura ndini. Nemwizve munozopupura, ngokuti mwayiva neni kubvira mukutanga.” Ndakavereketa izvi kwomuri kuti musazokhugunyiswa. Vanozomumbirimbija kubva mu nyumba javo jo kudira: Eya, nguva inoviya apo mundhu wese, unozomuuraya, unozopinimija kuti uri kushandira Mwari. Navo vanozoyita izvi ngokuti avazivi kumuziva Baba, nokuti inini. “Asi ndakamubvunja izvi, kuti, apo yaguma nguva yazvo, mucherecheje kuti ndakamubvunja ndizvo.” “Asi andizivi kumubvunja izvi kubvira po kutanga, ngokuti ndayinga ndichinemwi. Asi zvino ndinoenda kuno uwo wakandituma; akuna naumwe wenyu unondibvunjisa, kuti: Unoenda, kwapi? Asi ngokuti ndakavereketa izvi kwomuri, mwoyo yenyu yazara ngo kusururika. Asi ndinomubvunja gwinyiso; kuti zvakamunakira kuti ndiende: Ngokuti kudari ndisikaendi, Muembezeri aazoviyi kwomuri, asi kudari ndikaenda, ndinozomutuma kwomuri. Naye apo aviya unozotendisa nyika ngo ndava yo kushaisha, na ngo kururama, na ngo kutonga. Ngo ndava yo kushaisha ngokuti avanditendi; ngo ndava yo kururama ndinoenda kuna Baba, nemwi amusazondivoni; ngo ndava yo kutonga ngokuti muzvare wo nyika ino wakatongwa. Ndichina zvizhinji zvo kumubvunja, asi amusati mwaano simba ro kuzwisisa zvino. Asi apo, Mweya wo gwinyiso waviya, unozomutungamirira mu gwinyiso rese: Ngokuti aazojivereketeri, asi zvaanozwa, ndizvo zvaanozovereketa, naye unozomupangijira zvinozoviya. Uwo unozondiirikija, ngokuti unozoashira zvo kwangu, no kuzvizivisa kwomuri. Zvese zvaanazvo Baba ngo zvangu, ndizvo ndakati kuti: Unozoashira zvokwangu; no kuzvipangijira kwomuri.” “Inguva doko nemwi amuchazondivoni, no nguva dokozve nemwi munozondivona.” Vamweni vo vajiji vake vakavereketa pachavo, vechiti: “Chinyi ichi chaanovereketa kwetiri, kuti: Inguva doko nemwi amuchazondivoni, no nguva dokozve nemwi munozondivona, echitizve: Ngokuti ndinoenda kuna Baba?” Ndizvo vakati: “Chinyi ichi chaanovereketa kuti, inguva doko? Atizivi kuti unonangenyi?” Jesu wakaziva kuti vaida kumubvunjisa, naye wakati kwavari: “Munobvunjisana here pakati penyu, ngo icho chondananga, kuti, inguva doko nemwi amuchazondivoni, na ngo nguva dokozve, nemwi munozondivona? Zvirokwazvo, zvirokwazvo, ndinoti kwomuri, kuti munozochema no kurija mbhere, asi nyika inozodakara: Imwimwi munozotambujika, asi kutambujika kwenyu kunozotshandujwa kuyita kudakara. Jimayi rooda kubereka rinotambujika, ngokuti nguva yaro yaguma; asi rabereka mwana, arichakarakaji ngo kuhwajihwa, ngo ndava yo kudakara kuti mundhu wabahwa mu nyika. Nemwi munozotshumba zvino, asi ndinozomuvonazve no mwoyo yenyu inozodakara, no kudakara kwenyu akuna mundhu unokubvisa kubva kwomuri. Ngo iro zuva amuzondibvunjisi chiro. Zvirokwazvo, zvirokwazvo, ndinoti kwomuri, pikija chinyi chomunozokumbira kuna Baba ngo zina rangu unozochipa kwomuri. Mbhera zvino amuzivi kukumbira chiro ngo zina rangu: Kumbiranyi nemwi munozoashira kuti kudakara kwenyu kuzarisike.” “Ndakavereketa izvi kwomuri ngo miezaniso, asi nguva inoviya apo andichazovereketi kwomuri ngo miezaniso, asi ndinozomupangijira pambhene ndi Baba. Ngo iro zuva munozokumbira ngo zina rangu, neni andinangi kwomuri kuti, ndinozomukumbirira kuna Baba; ngokuti Baba pachavo vanomuda, ngokuti imwimwi mwakandida, nemwi mwakatenda kuti ndakabva kuna Mwari. Ndakabva kuna Baba, ndakaguma mu nyika; zve, ndinosiya nyika, ndiende kuna Baba.” Vajiji vake vakati kwaari: “Ringira zvino wovereketa pambhene, auchavereketi ngo miezaniso. Zvino tinoziva kuti munoziva zvese, autami kuti mundhu naumwe akubvunjise: Ngo ichi tinotenda kuti iwewe wakabva kuna Mwari.” Jesu wakavapingura, echiti: “Zvino munotenda here? Ringiranyi, nguva inoviya, eya yatoguma, kuti munozoparajwa uwo no uwo kuno zvake, no kundisiya ndega, asi andiri ndega akadi: Ngokuti Baba uneni. Izvi ndakamuvhunja kuti kwendiri muwane kunyarara. Munyika munozova no nyatwa: Asi shinganyi mwoyo, ndainyisa nyika.” Jesu wakavereketa izvi, wakamusa majiso ake mu denga, akati: “Baba, nguva yaguma; irikija Mwana wako, kuti Mwana wako akuirikije: Kudari ngo zvo wakamupa simba panyezuru po nyama yese, kwokuti vese vo wakamupa, iye avape kupona kusikaperi. Uku ndikwo kupona kusikaperi, kuti vakuzive iwewe, Mwari wega wo gwinyiso, na Jesu Kristu uwo wo wakatuma. Ndakakuirikija mu nyika: Ndakapeja mushando wo wakandipa kuti ndiuite. Nazvino, iwewe Baba, ndiirikije pachako ngo kuirikijwa ukwo kwo ndayiva nakwo newe, ngo pamberi nyika isati yasikwa. Ndakapangijira zina rako kuna avo vandhu vo wakandipa kubva mu nyika: Vayiva vako, newe wakavapa kwendiri, navo vakangwarira izwi rako. Zvino vanoziva kuti zvese zvo wakandipa zvakabva kwouri: Ngokuti mazwi owakandipa ndakaapavo kwavari, navo vakaashira, vakaziva ngo gwinyiso kuti ndakabva kwouri, vakatenda kuti iwewe wakandituma. Ndinovakumbirira; andikumbiriri nyika, asi avo vo wakandipa, ngokuti, vari vako. No zvese zvangu ngo zvako, no zvako ngo zvangu; neni ndinoirikijwa ndivo. Andichimwo akadi mu nyika, asi ava vachiri mu nyika, neni ndoviya kwouri. Baba vakachena, vangwarire ngo zina rako, avo vo wakandipa; kuti vayite umwe kudari tisu. Apo ndichinavo ndakavangwarira muzina rako, avo vo wakandipa; ndakavarinda, akuna naumwe wavo wakarashika, kwega mwana wo kurashwa, kuti matahwa azarisike. Asi zvino ndinoviya kwomuri, no izvi ndinovereketa mu nyika kuti kudakara kwangu kuzarisike mukati mwavo. Ndakapa kwavari izwi rako, no nyika yakavanyenya, ngokuti avari vo nyika akadi; kudari ndini andiri wo nyika akadi. Andikumbiri kuti muvabvise kubva mu nyika, asi kuti muvangwarire kubva kuno uwo wakashata. Avari vo nyika akadi, kudari ndini andiri wo nyika. Vachenese ngo gwinyiso: Izwi rako riri gwinyiso. Kudari ngo zvo wakandituma mu nyika, ngokudaro nenivo ndinovatuma mu nyika. Ngo ndava yavo ndinojichenesa, kuti navo vacheneswevo ngo gwinyiso. Andivakumbiriri ava vega, asi naavo vanozotenda kwendiri ngo izwi ravo. Kuti vese vayite umwe, kudari ndiwe Baba uri mukati mwangu, neni ndiri mukati mwako, kuti navo vagare mukati mwedu, kuti nyika itende kuti iwewe wakandituma. No uthende, hwo wakandipa, ndakaupavo kwavari; kuti vayite umwe kudari tisu tiri umwe. Inini mukati mwavo, newe mukati mwangu, kuti vayitwe vakaperera vari umwe: Kuti nyika izive kuti iwewe wakandituma, nokuti unovada kudari ngo zvo unondida inini. Baba, vo wakandipa ndinoda kuti vavepo pendiri kuti varingire uthende hwangu, uhwo hwo wakandipa inini; ngokuti wakandida nyika isati yasikwa. Baba vakarurama, nyika, aizivi kukuziva asi inini ndinokuziva; na ava vakaziva kuti iwewe wakandituma: Neni ndakazivisa zina rako, neni ndinozorizivisa, kuti rudo urwo rwo wakandida ndirwo ugare mukati mwavo, neni mukati mwavo.” Apo wayinga avereketa izvi, wakabuda no vajiji vake akaambuka mwombera mwo mukova wo Kedroni, apo payiva no munda, iye wakanghwina mukati mwao no vajiji vake. Na Judhasi uwo wakamupira, waiziva ugarohwo ngokuti Jesu waiunganemwo kazhinji no vajiji vake. Ndizvo, Judhasi aashira chikwata, no vatungamiriri kubva ku vapristi vakuru no vafarisi, vakagumapo, vano zvivheneko, no masasi no zvokurwa ndizvo. Ndizvo Jesu echiziva kuti zvese zvinozomugumira, wakabudira kwavari, akati kwavari: “Munopshaka iyani?” Vakamupingura: “Jesu wo Nazaretha.” Wakati kwavari: “Ndini.” Na Judhasi uwo wakamupira, wayinga akaima navo. Ndizvo apo avabvunja kuti: Ndini, vakayita pfundamutete, vakawa pasi. Ndizvo wakavabvunjisazve, akati: “Munopshaka iyani?” Navo vakati: “Jesu wo Nazaretha.” Jesu wakavapingura: “Ndamubvunja kuti, ndini: Ndizvo kuti mwechipshaka inini regeranyi, ava vaende.” Kuti izwi rizarisike, iro rinoti: Avo vo wakandipa andizivi kurashikihwa naumwe wavo. Ndizvo Simoni Pedru inga ano shoti, wakaizaura, wakatema muranda wo mupristi mukuru, akagura njeve yake yo kumuho: Zina ro muranda uwo rayiva Marikusi. Ndizvo Jesu wakati kuna Pedru: “Hwirija shoti yako muchikhwama chako: Mukheyo waakandipa Baba, andizoumwi here?” Ndizvo chikwata no nduna no vatungamiriri vo vajudha vakabata Jesu, vakamusunga, navo vakamuzisa kutanga kuna Anasi: Ngokuti iye wayiva vatezvara va Khaifasi, uwo wayiva mupristi mukuru ngo gorero. Zvino Khaifasi ndiye wakavangwaja vajudha kuti kwaidikana kuti mundhu umwe afire vandhu. Asi Pedru wakamutevera Jesu, no mujiji umweni. Zvino uwo mujiji waizivikanwa ku mupristi mukuru, naye wakanghwina na Jesu muruvanje wo mupristi mukuru. Asi Pedru wakayima pa musuvo kunja. Ndizvo mujiji umweni uwo waizivikanwa ku mupristi mukuru wakabuda kunja akavereketa kuno uwo waingwarira musuvo, akanghwinisa Pedru. Ndizvo musikana uwo waingwarira musuvo, wakati kuna Pedru: “Newe auri umwe here wo vajiji vo uwu mundhu?” Wakati: “Andiriye akadi.” No varanda no vatungamiriri vakayima apo vakabasa muriro wo masimbe; ngokuti kwaitondhora: Vaikota, na Pedru wakayima navo echikota. Ndizvo mupristi wakamubvunjisa Jesu ngo ndava yo vajiji vake, na ngo kujijisa kwake. Jesu wakamupingura: “Inini ndakavereketa pa mbhene ku vandhu vo nyika: Nguva jese ndaijijisa mu nyumba jo kudira, no mu themperi apo paiungana vese vajudha, andizivi kuvereketa chiro ngo kufishika. Unondibvunjisirenyi? Bvunjisai avo vakandizwa, chendakavereketa kwavari: Ringira, avo vanoziva chendakavereketa inini.” Naapo ayinga avereketa izvi, umwe wo vatungamiriri vayinga vakayima apo wakamurova Jesu ngo pama echiti: “Unopingura mupristi mukuru kudaro here?” Jesu wakamupingura: “Kudari ndavereketa zvakashata, pupura ngo zvakashatezvo; asi kudari zvakanaka, unondiroverenyi?” Ndizvo Anasi wakamutumira akasungwa kuna Khaifasi mupristi mukuru. Na Simoni Pedru wakayima echikota. Ndizvo vakati kwaari: “Newe auri umwe here wo vajiji vake?” Iye wakavapingura, akati: “Andiriyepi.” Umwe wo varanda wo mupristi mukuru wayiva hama yo uwo waakatema njeve Pedru, wakati: “Andizivi kukuvona unaye mumunda here?” Ndizvo wakakanijazve, paripo jongwe rakarira. Ndizvo vakamukweva Jesu kubva kuna Khaifasi vachienda naye ku nyumba yo kutongera: Inga achiri mangwanani; ivo pachavo avazivi kunghwina mu nyumba yo kutongera, kuti vasazosvipiswa, kwokuti vahe Phasika. Ndizvo Piratu wakabudira kwavari, akati: “Ndava ngoyenyi yo munoitira uwu mundhu?” Vakapingura, kwaari: “Kudari uwu mundhu asayita zvakashata, inga tisikazivi kumupira kwouri.” Ndizvo Piratu vakati kwavari: “Mutorenyi imwimwi mumutonge kudari ngo mipango yenyu.” Vajudha vakati kwaari: “Akutendehwi kuti isisu tiuraye mundhu nokuti ngowapi.” Kwokuti rizarisike izwi iro raakavereketa Jesu echipangijira kuti injiranyi yaizofa ndiyo. Ndizvo Piratu wakanghwinazve mu nyumba yo kutongera, akadanija Jesu, akati kwaari: “Iwewe uri Mambo wo vajudha here?” Jesu wakapingura: “Unojivereketera izvi here nokuti vamweni vakazvinanga kwouri ndini?” Piratu wakapingura: “Inini ndiri mujudha here?” Jinja rako no vapristi vakuru vakakupira kwendiri: “Ichinyi chowakamboita?” Jesu wakapingura: “Umambo hwangu auri hwo mu nyika muno akadi: Kudari umambo hwangu hwayiva hwo mu nyika muno, varanda vangu inga vakandirwira kuti ndisapihwa ku vajudha: Asi zvino umambo hwangu ahuri hwo muno akadi.” Ndizvo Piratu wakati kwaari: “Ndizvo uri Mambo here?” Jesu wakapingura: “Iwewe unonanga kuti ndiri Mambo: Ngo iyi ndava ndakabahwa; na ngo iyi ndava ndakaviya mu nyika, kwokuti ndipupurire gwinyiso: Pikija ndiyani uri wo gwinyiso unozwa izwi rangu.” Piratu wakati kwaari: “Gwinyiso ichinyi?” Avereketa izvi, wakabudirazve ku vajudha, akati kwavari: “Andivoni ndava kwaari.” Asi imwimwi muno chirovejeso chokuti ndisunungure umwe kwomuri ngo Phasika: “Ndizvo munoda here kuti ndisunungure kwomuri Mambo wo vajudha?” Ndizvo vakamima, vechiti: “Haiwa uwu, asi Bharabhasi.” Zvino Bharabhasi wayiva jongoni. Ndizvo apo Piratu wakamutora Jesu, akamuchaya. No masocha akaruka junguja ro minzwa, akaridira panyezuru po musoro wake akamusimija nguvo yakapshuka. Akaviya kwaari akati: “Changamire, Mambo wo vajudha!” Nao akamurova ngo pama. Na Piratu wakabudazve, akati kwavari: “Ringiranyi, ndinomubudisa kwomuri kuti muzive kuti andiwani ndava kwaari.” Ndizvo Jesu wakabuda, akasimijwa junguja ro minzwa, no nguvo yakapshuka. Piratu wakati, kwavari: “Ringiranyi uwu mundhu!” Ndizvo apo vapristi vakuru, no vatungamiriri vamuvona, vakamima, vechiti: “Mukohomere, mukohomere.” Piratu wakati kwavari: “Mutorenyi imwimwi mumukohomere; ngokuti, andiwani ndava kwaari.” Vajudha vakamupingura: “Tino mupango; ngo mupango uwu kunosisira kuti afe, ngokuti iye wakajiita Mwana wa Mwari.” Ndizvo Piratu azwa izwi iri wakapinda kutya. Wakanghwinazve mu nyumba yo kutongera, akati kuna Jesu: “Unobva kwapi?” Asi Jesu aazivi kumupingura. Ndizvo Piratu wakati kwaari: “Aundipinguri here? Auzivi here kuti ndino simba rokukusunungura, neni ndino simba rokukukohomera?” Jesu wakamupingura: “Aungavi no simba panyezuru pangu kuti usikazivi kuripuwa rechibva mu denga: Ndizvo uwo wakandipira kwouri uno kushaisha kwakapinda kukura.” Ngosure kwo izvi, Piratu wakapshaka kuti ungamusunungura: Asi vajudha vakadanijira, vechiti: “Kuti ukamusunungura uwu auri shamwari ya Khesari akadi: Pikija ndiyani unojiita Mambo unovereketa kumukira Khesari.” Apo Piratu azwa aya mazwi wakamubudisa Jesu kunja, wakagara pachigaro cho kutongera ndava, pandau inozwi Yakagangatwa Mapuwe, asi ngo kwo Chihebheru inozwi Gabatha. Kwayiva nguva yo kunasirira Phasika yoda kuyita nguva yo chitandhatu; naye wakati kuna vajudha: “Ringiranyi mambo wenyu!” Ndizvo vakadanijira: “Mubvisei, mubvisei, mumukohomere.” Piratu wakati kwavari: “Ndokohomera here mambo wenyu?” Vapristi vakuru vakapingura: “Isisu atina mambo, ega Khesari.” Ndizvo iye wakamupira kwavari kuti akohomehwe. Navo vakamutora Jesu. Naye wakabuda echitwara muchinjiko kuenda ku ndau inozwi Dendhenya, iyo inodanijwa ngo kwo Chihebheru, Gorogota. Apo ndipo po vakamukohomera, pamwepo no vamweni vaviri umwe ngo ino, no umweni ngo iyo, na Jesu ngo pakati. Na Piratu wakatarazve matahwa akadira panyezuru po muchinjiko; uku ndikwo kutahwa kwawo, JESU WO NAZARETHA, MAMBO WO VAJUDHA. Ndizvo matahwa aya akajijwa ngo vazhinji vo vajudha; ngokuti ndau iyo yaakakohomehwa Jesu yayiva phedo no dhoropa: Nao inga akatahwa ngo Chihebheru, ngo Chiroma, no Chigiriki. Ndizvo vapristi vakuru no vajudha vakati kuna Piratu: “Usatara kuti, Mambo wo vajudha, asi kuti iye wakati: Ndiri mambo wo vajudha.” Piratu wakapingura, kuti: “Chondatara, ndatara.” Ndizvo masocha ayinga akohomera Jesu, akatora zvokusimira zvake, akazviparura kuyita matimbu marongomuna kusocha rimwe ngarimwe dimbu raro; nghanju yakezve vayinga isina musono, asi inga yakarukwa ngo kureba kubvira ngo nyezuru kwayo mbhera urebu hwayo hwese. Ndizvo akavereketesana pakati pavo, echiti: “Tisaparura, asi ngatiringijire hakata tivone kuti inoita yani.” Kuti matahwa azarisike, anoti: “Vakakovanisana zvokusimira zvangu pakati pavo, no nghanju yangu yakaringijihwa hakata.” Ndizvo masocha akaita izvi. Asi inga kwakayima apo phedo po muchinjiko wa Jesu mayi wake, na yaya wa mayi wake, na Mariya mukaji wa Kropasi, na Mariya Magadhareni. Ndizvo Jesu avona mayi wake no mujiji uwo waaida vakayima phedopo, wakati kuna mayi wake: “Jimayi vona mwana wako.” Ndizvo wakati kuna mujiji uwo: “Vona mayi wako.” Kubvira ngo nguva iyo uwo mujiji wakavatora kuti vagare kanyi kwake. Sure kwo izvi Jesu echiziva kuti zviro zvese zvayinga zvapera kuti matahwa azarisike, wakati: “Ndapera ngo nyota.” Ndizvo chayivapo chimujiyo chakazara ngo vhini, raishasha, navo vakadira shiponji chakazara ngo vhini raishasha pa, vakaridira pa muromo wake. Ndizvo apo Jesu aashira vhini raishasha wakati: “Zvapera.” Wakakotamisa musoro wake, wakafa. Ndizvo vajudha, ngokuti rayiva zuva ro kunasirira Phasika, kwokuti miviri isagara iri pa muchinjiko ngo zuva ro sabatha ngokuti iro zuva ro sabatha rayiva zuva guru, vakakumbira kuna Piratu kuti mirenje yavo iguhwe, nokuti vabviswepo. Ndizvo masocha akaviya, akagura mirenje yo wokutanga, no yo umweni, avo vakakohomehwa naye. Asi apo aguma paayiva Jesu, akavona kuti inga wafa, aazivi kugura mirenje yake, asi umwe wo masocha, wakabaya rutivi rwake ngo mukhondo, paripo kwakabuda ngazi no kumwa. No uwo wakazvivona wakayita chapupu, no uchapupu hwake huno gwinyiso, no uwo unoziva kuti unovereketa gwinyiso, kwokuti imwimwi mutende. Ngokuti izvi zvakaitika kuti matahwa azarisike, anoti: “Godo narimwe rake arizoguhwi.” No matahwa amwenizve anoti: “Vanozomuringira, uwo wo vakabaya.” Ngosure kwo izvi Josefa wo Arimatiya, ari mujiji wa Jesu asi ngo kufishika ngo kutya vajudha wakakumbira kuna Piratu kuti ungabvisa muviri wa Jesu: Na Piratu wakamutendera, ndizvo wakaviya akabvisa muviri wake. Na Nikodhemusi wakaviyavo, uwo wakaviya kwaari pakutanga usiku, echizisa mutombo wakayita muvhengo wo mure no mutengo hwawo hwayiva mapaundi ari zana (100). Ndizvo vakatora muviri wa Jesu, vakaupukutira ngo jira rakachena pamwepo no mutombo wo maka, kudari ngo chirovejeso cho vajudha cho kuviga. Zvino kwayivapo munda pandau iyo yaakakohomehwa, no mumunda umwo mwayiva no guva ibza risikazivi kumbovigwemwo mundhu. Ndizvo vakaviga umwo Jesu ngokuti rayiva zuva rokunasirira ro vajudha; ngokuti guva rayiva phedopo. Zvino ngo zuva rokutanga ro vhiki ngosure kwo sabatha wakaenda Mariya Magadhareni mangwanani kuchakasvipa kuiba, wakavona buwe rakamburumbujwa kubva pa guva. Ndizvo wakagogoma wakaguma kuna Simoni Pedru no kuno mujiji umweni uwo waaida Jesu, akati kwavari: “Vakabvisa Mambo kubva mu guva, nesu atizivi po vakamurajika.” Ndizvo Pedru wakabuda no umweni mujiji vakaenda ku guva. Zvino vakagogoma vari pamwepo: Mujiji umwenivo wakapindirija Pedru, naye wakatanga kuguma ku guva. Echikotama pasi, wakaringira mukati, akavona machira akachena ari pasi, asi aazivi kunghwinemwo. Ndizvo Simoni Pedru wakagumavo, echimutevera, iye wakanghwina mu guva, akavona machira akachena akarajikwa. No dhuku iro rayinga rakasungwa musoro mwake risikazivi kurajikwa pamwepo no machira akachena, asi inga rakapetwa riri rega pandau imweni. Ndizvo wakanghwinemwo mujiji umweni, uwo wakatanga kuguma pa guva, naye wakavona, akatenda. Ngokuti inga vasati vaziva matahwa kuti kwaisisira kuti amuke kubva kwo vakafa. Ndizvo vajiji avo vakaenda kanyi kwavo. Asi Mariya wakayima kunja kwo guva echichema; achachema, wakakotama, akaringira mu guva. Naye wakavona ngirosi mbiri jakasimira zvakachena, jakagara imwe ngo kumusoro, no imweni ngo kutshoka, apo po wayinga wakarajikwa muviri wa Jesu. Najo jakati kwaari: “Jimayi, unochemenyi?” Wakati kwejiri: “Ngokuti vabvisa Mambo wangu, neni andizivi po vakamurajika.” Apo avereketa izvi wakakunukukira sure, wakamuvona Jesu, akaima, aazivi kumuziva kuti ndi Jesu. Jesu wakati kwaari: “Jimayi, unochemenyi? Unopshaka yani?” Iye echipinimija kuti wayiva murimi wakati kwaari: “Mambo kudari wakamubvisa kubva pano, ndibvunjei po wakamurajika, neni ndimutore.” Jesu wakati kwaari: “Mariya.” Naye wakakunukuka, akati kwaari, ngo rurimi hwo Chihebheru: “Rabhoni” (ukwo kunoti, Mujijisi)! Jesu wakati kwaari: “Usandipshasa, ngokuti andisati ndakwira kuna Baba; asi enda kuno vanukuna vangu, wooti kwavari: Ndinokwira kuna Baba wangu, na Baba wenyu no kuna Mwari wangu, na Mwari wenyu.” Mariya Magadhareni wakaviya akabvunja vajiji, kuti: “Ndavona Mambo” nokuti wakavereketa izvi kwaari. Kwakati ngo zuvero, madekoni zuva rokutanga ro vhiki ngosure kwo sabatha, musuvo yakakonyiwa umwo mwayiva no vajiji ngo ndava yo kutya vajudha, Jesu wakaviya akaima pakati pavo, akati kwavari: “Kunyarara ngakuve kwomuri.” Avereketa izvi, wakavatatija nyara jake, no rutivi rwake. Naapo vajiji vakadakara apo vavona Mambo. Jesu wakatizve kwavari: “Kunyarara ngakuve kwomuri: Kudari ngo zvaakandituma Baba, ngokudaro ndinomutumavo.” Avereketa izvi wakavafemera, akati kwavari: “Ashiranyi imwimwi Mweya Wakachena. Pikija vese vomunozoregerera zvishaishi zvavo zvinozoregerehwa kwavari, no pikija ndiyani vomusikazoregereri avazorekerehwi.” Asi Tomasi, umwe wo gumi na vaviri, uwo unozwi Munyambiri, wayinga asiri navo apo Jesu wakaviya. Ndizvo vajiji vamweni vakati kwaari: “Tamuvona Mambo.” Asi iye wakati kwavari: “Kuti ndisikazivi kuvona munyara jake mbanga jo zvipikiri, ndipfekemwo chikunwe changu mu mbanga jo zvipikiri, ndipfeke nyara yangu parutivi hwake, andizotendi.” Ngosure kwo mazuva masere, vajiji vayivazve mukati, na Tomasi wayiva navo: Jesu wakaviya, musuvo inga yakakonywa, wakayima pakati pavo, wakati: “Kunyarara ngakuve kwomuri.” Ndizvo wakati kuna Tomasi: “Dirai chikunwe chako uvone nyara jangu, utambanuje nyara yako uipfeke pa rutivi rwangu, usaita usikatendi, asi unotenda.” Tomasi wakapingura, akati kwaari: “Mambo wangu, Mwari wangu.” Jesu wakati, kwaari: “Ngokuti wandivona, wazotenda; vanomuchena avo vanotenda vasikazivi kuvona.” Ndizvo Jesu wakayita mivoniso imweni mizhinji, mukuvona kwo vajiji vake, isikazivi kutahwa mutshamba iyi: Asi iyi yakatahwa kuti imwimwi mutende kuti Jesu uri Kristu, Mwana wa Mwari, nokuti ngo kutenda muve no kupona ngo zina rake. Ngosure kwo izvi Jesu wakajivonisazve kuvajiji vake, vari pa jombe ro Tibheriyasi; naye wakajivonisa ngo njira iyi. Vayiva vari pamwepo Simoni Pedru, na Tomasi, unozwi Munyambiri, na Natanaeri, uwo waibva Kana ro Garire, no vana va Zebhedhi, no vamweni vaviri vo vajiji vake. Simoni Pedru wakati kwavari: “Ndinoenda kwootanda hove.” Vakati kwaari: “Nesu tinoendavo newe.” Vakaenda vakakwira mu ngarava, ngo uhwo usiku avazivi kubata chiro. Asi apo kwooita mambakweja, Jesu wakayima pambhiripiri; asi vajiji avazivi kuziva kuti ndi Jesu. Ndizvo Jesu wakati kwavari: “Vana munacho here chokuha?” Vakamupingura: “Haiwa.” Wakati kwavari: “Khandiranyi juya ngo kurutivi hwo kumuho hwo ngarava, nemwi munozowana.” Ndizvo vakarikandira kudaro, inga vasina simba ro kurikweva ngo ndava yo kuwanda kwo hove. Ndizvo mujiji uwo waaida Jesu wakati kuna Pedru “ndi Mambo.” Ndizvo Simoni Pedru apo azwa kuti ndi Mambo, wakasimira jira rake, ngokuti wayiva mitu wakajikandira mujombe: Asi vajiji vamweni, vakaviya vari mu ngarava, ngokuti vayiva vasiri ndhambo no nyika, asi kwaida kuyita zana ro mamitha (100), vechikweva juya rina hove. Ndizvo apo vaguma pa mbhiripiri vakavona muriro wo masimbe, no hove yakadihwa panyezuru po muriro, no chimanda. Jesu wakati kwavari: “Visanyi jimweni jo hove jomwabata zvino.” Simoni Pedru wakakwiremwo akakweva juya pa mbhiripiri, rakazara ngo hove huru jayivemwo jiri zana no makumi mashanu na ndhatu (153): Pikija jayiva zhinji kudaro, juya arizivi kuparuka. Jesu wakati kwavari: “Viyanyi muhe.” Apana no umwe wo vajiji waishinga kumubvunjisa, kuti Uriyani? Vachiziva kuti ndi Mambo. Jesu wakaviya, akatora chimanda, akavapa, no hove ngokudaro. Zvino iyi vayinga yaanguva yechitatu yaakajivonisa Jesu kuvajiji ngosure kwo kumuka kwake kwo vakafa. Ndizvo apo vayinga vaha Jesu wakati kuna Simoni Pedru: “Simoni mwana wa Johani unondida here kupinda ava?” Wakati kwaari: “Eya, Mambo, unoziva kuti ndinokuda.” Wakati kwaari: “Havisa vana vo mabvuta angu.” Wakati kwaarizve ngo kwo chipiri: “Simoni, mwana wa Johani, unondida here?” Wakati kwaari: “Eya, Mambo, unoziva kuti ndinokuda,” wakati kwaari: “Ngwarira mabvuta angu.” Wakati kwaari ngo kwo chitatu: “Simoni, mwana wa Johani, unondida here?” Pedru wakasvipa mwoyo ngokuti wakati kwaari ngo kwo chitatu: “Unondida here?” Naye wakati kwaari: “Mambo, iwewe unoziva zvese, unoziva kuti ndinokuda.” Jesu wakati kwaari: “Havisa mabvuta angu. Zvirokwazvo, zvirokwazvo, ndinoti kwouri, apo uchiri mupsha, waijisimija, wechifamba kuenda po waida, asi apo wazova musharuka, unozotambanuja nyara jako, no umweni unozokusimija, no kukuendesa, pousikadi.” Wakavereketa izvi echipangijira kuti injira yakaitawani yaizofa ndiyo kuti airikije Mwari. Apo avereketa izvi, wakati kwaari: “Nditevere.” Ndizvo Pedru echikunukukira sure, wakavona mujiji uwo waaida Jesu, echimutevera, wiya wayinga akatsheyama paditi rake mukuha kwo madekoni, uwozve wakati: “Mambo, ndiyani unozokupira?” Pedru echimuvona, wakati kuna Jesu: “Uwu kere, unozoitenyi?” Jesu wakati kwaari: “Kudari ndechida kuti agare mbhera ndiviye, unenyi nazvo iwewe? Nditevere.” Ndizvo iri izwi rakabudira mukati mwevakoma, rokuti uwu mujiji aazofi: Asi Jesu aazivi kuzvinanga kwaari, kuti aazofi, asi kuti: Kudari ndechida kuti agare mbhera ndiviye, unenyi nazvo iwewe? Uwu ndiye mujiji uwo unopupura ngo izvi zviro, no wakatara izvi: Nesu tinoziva kuti uchapupu hwake ngo hwo gwinyiso. Zviripo zvimweni zvizhinji zvaakaita Jesu, kudari zvakatahwa chimwe nga chimwe chazvo, ndinoti pamweni no nyika pachayo aichaizokwana ngo tshamba jingatahwa. Ndakatara bhuku ro kutanga, A Tiofiro, yo izvo zvese zvaakatanga Jesu kuyita no kujijisa, mbhera kuguma kuzuva iro raakaashihwa mu denga, ngosure ayinga apanga ndi Mweya Wakachena vapostori vaayinga akatsanangura. Kwavarizve iye wakajipangijira uri unopona ngosure kwo kutambujika kwake, ngo zvinovonekesa gwinyiso zvakawanda, echivoneka kwavari mazuva ari makumi marongomuna, echivereketa ngo ndava yo Umambo hwa Mwari. Echiungana pamwepo navo, wakavapanga kuti vasazobva mu Jerusarema, asi kuti vagarire icho chakagondiswa ndi Baba, icho chomwakazwa ndini: “Ngokuti ngo gwinyiso Johani wakabhapatisa mu kumwa, asi imwimwi munozobhapatiswa ndi Mweya Wakachena ngosure kwo mazuva mashomani.” Ndizvo avo, apo vayinga vaungana, vakamubvunjisa, vechiti: “Mambo, ngo uwu mukuvo unozohwirija here umambo ku Israeri?” Iye wakati kwavari: “Akuri kwenyu akadi kuziva mukuvo nokuti nguva, izvo zvaakangwaririra Baba pasi po simba rake ambhwine. Asi munozoashira simba apo Mweya Wakachena waguma panyezuru penyu, nemwi munozoita zvapupu zvangu mu Jerusarema, no mu Judhiya mwese, no mu Samariya, no kumagumo onyika.” Naapo ayinga avereketa izvi, vacharingira, iye wakatohwa kuenda mu denga; no gore rakamuashira kumufisha kubva mukuvona kwavo. Kwakati vacharingisisa mu denga, echikwira, vonayi, vanarume vaviri vakayima phedo pavo, vane zvokusimira zvinon'anikira. Avozve vakati kwavari: “Vamuna vo Garire, munoima ngenyi mwechiringira mu denga? Uwu Jesu waashihwa kubva kwomuri kuenda mu denga, unozoviyazve kudari ngo zvo mwakamuvona echienda mu denga.” Ndizvo vopetuka kuenda Jerusarema, kubva ku dundhu ro Maorivhe, riri phedo no Jerusarema, muhambo wo zuva ro sabatha. Naapo vayinga vanghwinemwo, vakakwira ku kamera ro muturika, apo po vayigara vese; vana Pedru, na Jakobe, na Johani, na Andreu, na Firipi, na Tomasi, na Bhartoromeu, na Mateu, na Jakobe mwana wa Arifeu, na Simoni, na Judhasi mwana wa Jakobe. Ava vese vakavangirira kukumbira ngo chisungo chimwe, pamwepo no majimayi, Mariya mayi wa Jesu, no vanukuna vake. Na ngaao mazuva Pedru wakayima pakati po vatendi, no uwandu hwo vandhu avo pamwepo hwayiva hunonga huri zana no makumi maviri (120), akati: “Vanarume, vatendi, kunodikana kuti chizarisike icho chakatahwa chakavereketwa kare ndi Mweya Wakachena ngo muromo wa Dhavhidha ngo ndava ya Judhasi, uwo wayita mutungamiri wo avo vakamubata Jesu. Ngokuti iye wakaverengwa pamwepo nesu, akaashira chikovanisihwa chake cho uwu mushando. (Zvino uwu mundhu wakatenga munda ngo muthuso wo kunyangaja kwake; naye echiwa ngo tsukupinya wakaputika ndani, no maura ake ese akabuda. Nakwo kwakazivikanwa kuvagari vese vo Jerusarema; kwokuti munda uwo wakadujwa ngo rurimi hwavo kuti, Akeredhama, ukwo kunoti, munda wo ngazi). Ngokuti kwakatahwa mu tshamba yo Nduyo: Ugaro hwake ngahuite shango, mundhu asagara mukati mwahwo. No mushando wo utungamiriri hwake ngautohwe ngo umweni. Ndizvo kwaavo vanarume vakagara nesu ngo mukuvo wese waakanghwina no kubuda Jesu pakati pedu, kubvira kwo rubhapatiso rwa Johani, mbhera kuguma kuzuva iro raakaashihwa mu denga kubva kwetiri, kunosisira kuti umwe atsananguhwe kuti ayite chapupu nesu cho kumuka kwake kubva kwo vakafa.” Navo vakaimisa vaviri, Josefa waizwi Bharsabhasi uwo mutupo wake waizwi Justu, na Matiasi. Vakakumbira vakati: “Iwewe Mambo, unoziva mwoyo yo vandhu vese, pangijira kwaavo vaviri uwo wo wakatsanangura, kuti iye aashire rupande rwo uwu mushando, no upostori, hwaakapauka Judhasi kubva kwouri, kuti aende kuugaro hwake.” Navo vakaringija hakata javo; no hakata jakabata Matiasi; naye wakaverengwa pamwepo no vapostori vari gumi naumwe. Kwakati raguma zuva ro Pentekosti vayiva vese pamwepo paugaro humwehwo. Paripo rakaguma kubva mu denga bope rakadari ngo kuvhuvhutha kwo dutu rine simba, naro rakazarisa nyumba yese apo po vayigara. Kwakavoneka kwavari ndimi, jakadari ngo muriro, jakajiparajanisa pakati pavo; jikagara panyezuru pavo vese. Navo vese vakazariswa ndi Mweya Wakachena, vakatanga kuvereketa ngo ndimi jimweni, kudari ngo zvaakapa Mweya kwavari kuti vaverekete. Zvino vayigara mu Jerusarema vaJudha, vandhu vanodira, vakabva ku majinja ese ari pasi po mu denga. Naapo iri bope rayinga razwika, mbungano yakaungana, navo vakashamiswa ngokuti mundhu wese wakavazwa vechivereketa ngo rurimi rwake. Navo vese vakashamiswa no kukangaijwa, vechiti: “Vonanyi, avo vese vanovereketa avari vagarire here?” Nesu tese tinoyita mazwirenyi mundhu wese echivereketa ngo rurimi rwedu, rwetakabarwa narwo. Vapartiya, no vaMede, no vaEramu, no vagari vo Mesopotamiya, no vo Judhiya, no vaKapadhosiya, mu Pontu, no mu Aziya, jese Frigiya, no Pamfriya, no Egipite, no marupande o Ribhiya anotendeneja Kureni, no zvigarandimo zve Roma, vese vaJudha no vo majinja vanotenda chijudha. Vakrete, no vaArabhiya, tinovazwa vechivereketa ngo ndimi jedu ngoukuru hwa Mwari. Navo vese vakashamiswa no kukangaijwa, vechiti umwe kuno umweni: “Chinorevenyi ichi?” Asi vamweni vechiita jee, vakati: “Vazara ngo vhini ibza.” Asi Pedru echiyima pamwepo no vari gumi naumwe, wakatandhamusa izwi rake, echivereketa kwavari echiti: “Vanarume vo Judhiya, nemwi mwese munogara mu Jerusarema, ichi ngachizivikane kwomuri, mupurutane mazwi angu. Ngokuti ava avazivi kuraja kudari ngo zvo munorangarira; kwechivoneka kuti uchiri mukuvo wo nguva yochitatu wo zuva. Asi ichi ndicho chakavereketwa ngo muprofeti Joweri: Mwari unoti, kunozoitika ngo mazuva okupejisira kuti ndinozodurura Mweya wangu panyezuru po vandhu vese; no vana venyu vo rume no vo kaji vanozoprofeta, no majaha enyu anozovona zvivoniso, no harahwa jenyu jinozorota hope. Eya, no panyezuru po varanda vangu vo vanarume, no panyezuru po varandakaji vangu ndinozodurura ngaao mazuva Mweya wangu, navo vanozoprofeta. Neni ndinozopangijira zvishamiso mu denga, no zvivoniso mu nyika, ngazi no muriro, no kupwititika kwo usi. Zuva rinozotsandujwa kuyita chidima, no mweji kuyita ngazi, risati raguma zuva guru, no rine mbiri ra Mambo. Kunozoitika kuti pikija ndiyani unozokumbira ngo zina ra Mambo unozoponeswa. Imwimwi vanarume vaIsraeri izwanyi mazwi aya: Jesu wo Nazaretha, mundhu wakapangijihwa kwomuri ndi Mwari ngo mishando inosimba no mishamiso, no zvivoniso, zvaakayita Mwari ndiye pakati penyu, kudari ngo zvomunoziva mwambhwine. Iye wakapihwa ngo kuemeswa kwo bangano na ngo kuziva kwa Mwari, imwimwi ngo nyara jo vandhu vakashata mwakamukohomera no kumuuraya. Iye Mwari wakamumusa, amusunungura kuhwajihwa kwo kufa; ngokuti akusaitongoitika kuti asungwe ndikwo. Ngokuti Dhavhidha wakavereketa ndiye, kuti: ‘Ndakamuvona Mambo ngo nguva jese, andori pamberi po hope yangu; ngokuti iye uri ngo kumuho kwangu kuti ndisazotshukunuswa.’ Ndizvo mwoyo wangu wakadakara, no rurimi rwangu rwakadakajwa; no nyama yangu inozogara mukugonda. Ngokuti iwewe auzoregeri mweya wangu uri mu Haidhesi, zve, auzotenderi Wakachena wako kuti avore. Iwewe wakandizivisa njira jo kupona, unozondizarisa ngo kudakajwa kwehope yako. Vanarume, vakoma, ndingavereketa ngo kurerukihwa ngo ndava ya baba mukuru Dhavhidha, ngokuti iye wakafa, akavigwa, no guva rake riri kwetiri mbhera nyamasi. Ndizvo, ngokuti wayiva muprofeti, echiziva kuti Mwari wakapika kwaari ngo mbhiko, yokuti ku mubarihwana wo chiunu chake ngo kwenyama unozoemesa umwe kuti agare pa dendemaro rake; iye echivona ichi, wakavereketa ngo kumuka kwa Kristu kwo vakafa, kuti Mweya wake auzivi kuregehwa uri mu Haidhesi, zve, nyama yake aizivi kutongovora. Uwu Jesu, Mwari wakamumusa kwo vakafa, nesu tese tiri zvapupu zvakwo. Ndizvo iye echikuriswa ngo kumuho wa Mwari, aashira chigondiso cho Mweya Wakachena kubva kuna Baba, wakadurura ichi cho munovona, no cho munozwa. Ngokuti Dhavhidha aazivi kukwira mu denga; asi wakati, Jehovha wakati kuna Mambo wangu: Gara ngo kumuho kwangu, mbhera ndiite vakorore vako chitambarariro cho tshoka jako. Ndizvo ngavazive vo nyumba yese ya Israeri kuti Mwari wakamuita Mambo na Kristuzve uwo Jesu wo mwakakohomera.” Naapo vazwa, vakabaiwa mu mwoyo yavo, navo vakati kuna Pedru no kuna vapostori vamweni: “Vanarume, vakoma, tinozoitenyi?” Na Pedru wakati kwavari: “Tenderukanyi, umwe ngaumwe wenyu, mubhapatiswe mwese ngo zina ra Jesu Kristu, ngo ndava yo kuregerehwa kwo zvishaishi zvenyu, nemwi munozoashira chipuwo cho Mweya Wakachena. Ngokuti chigondiso chakagondiswa kwomuri, no kuvana venyu, no kwavari vese vari ndhambo, vese avo vanozodanijwa ndi Mambo Mwari wedu.” Na ngo mazwi amweni akawanda iye wakapupura no kuvapanga, echiti: “Jiponesenyi ngokwenyu kubva kuno uwu mubarihwana wakashongoroka.” Ndizvo avo vakaashira mazwi ake ngo kudakara, vakabhapatiswa, na ngo zuva rimwero kwakanyengejehwa kwavari vandhu vanoda kukwana zviuru zvitatu (3.000). Navo vakavangirira kungwarira zvijijiso zvo vapostori, no kuiyana, mukugura chimanda, no mukukumbira. No mundhu wese wakagumihwa ngo kutya, no mishando yakawanda no zvivoniso zvakaitwa ngo vapostori. Navo vese vakatenda vayiva pamwepo, no zviro zvavo vakazviita muhengo pamwepo; navo vakatengesa upfumi hwavo, no mujiyo javo, vakazvikovanisira kwavari vese kudari ngo kutama kwo mundhu. Navo zuva ngo zuva vakagara pamwepo ngo chisungo chimwe mu themperi, vechigura chimanda kumakanyi avo, vakaha ngo kudakara na ngo mwoyo wo kuzwana, vechikuja Mwari, vechidikanwa ngo vandhu vese. Na Mambo wakanyengejera kwavari zuva ngo zuva avo vayiponeswa. Zvino Pedru na Johani vayikwira ku themperi ngo nguva yo kukumbira, kunoti, nguva yochipfumbamwe. No mundhu wakatikuti wayiva chirema kubvira mundani ya mayi wake, waitwahwa, uwo wo vaidira zuva ngo zuva pa musuvo wo themperi, unozwi, Wakanaka, kuti apembhe kwaavo vainghwina mu themperi. Iye avona Pedru na Johani vooda kunghwina mu themperi wakapembha. Asi Pedru, echimuringisisa, na Johani, wakati: “Ringira kwetiri.” Naye wakavaringira, echigarira kuti unozopuwa chiro ndivo. Asi Pedru wakati: “Sirivha no mukore, andina; asi icho chendinacho ndinokupa, ngo zina ra Jesu Kristu wo Nazaretha, muka ufambe.” Naye wakamubata ngo nyara yo kumuho, akamumiruja; paripo tshoka jake no magodo o majiso o tshoka jake zvakagwinyiswa, naye echinyanduka wakayima, wakatanga kufamba; wakanghwina navo mu themperi, echifamba, echinyanduka, echikuja Mwari. No vandhu vese vakamuvona, echifamba, echikuja Mwari: Navo vakaziva kuti ndiye uwo wayigara echipembha mare pa musuvo wo themperi unozwi, Wakanaka. Vakashamiswa no kukangaijwa ngo izvo zvayinga zvakaitika kwaari. Iye achabata Pedru na Johani, vandhu vese vakagogoma kuungana kwavari vari mu berere ra Saromona, vechishamiswa kakurutu. Naapo Pedru echivona, wakapingura kuna vandhu: “Imwimwi vanarume vaIsraeri, munoshamiswa ngenyi ngoichi? Nokuti kutiringisisa ingatei isimba redu, nokuti unaku hwedu zvayita kuti afambe? Mwari wa Abrahama, no wa Isaka, no wa Jakobe, no wo majibaba edu, wakakuja muranda wake Jesu, uwo wo mwakapira imwimwi, mukamuramba pamberi po hope ya Piratu, apo iye ayinga ada kumusunungura. Asi imwimwi mwakaramba uwo Wakachena, Wakarurama, mukakumbira kuti muurayi apuwe kwomuri. Mwakauraya Muzvare wokupona; uwo waakamusa Mwari kwo vakafa; isisu tiri zvapupu ndikwo. Ngo kugonda zina rake, uwu mundhu wo munovona no wo munoziva, kubudikija ngo kugonda muna Jesu kwayita kuti agwinye kudari pamberi penyu mwese. Nazvino vakoma, ndinoziva kuti mwakazviita ngo kusikazivi, kudari ngo zvavakaitavo vatongi venyu. Asi izvo zvaakapangijira Mwari ngo pamberi ngo muromo wo vaprofeti vese, kuti Kristu wake unozotambujika, iye wakazvizarisa kudaro. Ndizvo tenderukanyi imwimwi mukunukuke kuti zvishaishi zvenyu zvitshukutijwe kuti ngokudaro kungaviya nguva jokumusihwa jinobva pamberi pa Mambo. Zve, kuti atume Kristu Jesu uwo wakaemesehwa kwomuri. Kunosisira kuti uwo aashihwe mu denga mbhera kuguma mikuvo yo kumusijihwa kwo zviro zvese, yaakavereketa ndiyo Mwari ngo miromo yo vaprofeti vake vakacheneswa kubvira pakutanga. Ngokuti Mosi ngo gwinyiso wakati: ‘Jehovha Mwari unozomubudisira muprofeti unobva pakati po hama jenyu, wakadari ndini; nemwi munozomupurutana kuzviro zvese zvaanozovereketa kwomuri. Kunozoitika kuti mundhu wese usikazopurutani kuno uwo muprofeti, unozourawa aembho kubva pakati po vandhu.’ Eya, no vaprofeti vese kubvira kuna Samueri navo vese vakatevera, vese vakavereketa, avo navo vakavereketa ngaaya mazuva. Imwimwi muri vana vo vaprofeti, no vo chitenderano chaakaita Mwari no majibaba enyu, echiti kuna Abrahama, no ku rusinga rwako mbhuri jese jo mu nyika jinozodakajiswa. Kwomuri kutanga Mwari wakaemesa Muranda wake, akamutuma kuti amudakajise, ngo kutenderuja umwe ngaumwe wenyu kubva mu zvishaishi zvenyu.” Vachavereketa kuna vandhu, vapristi no nduna yo themperi, no vasadhusi, vakaviya kwavari, vechitambujika kakurutu ngokuti vaijijisa vandhu, no kuteketesa ndi Jesu kumuka kwo vakafa. Navo vakavabata, vakavafungira mu guniya mbhera zuva raitevera; ngokuti inga aamadekoni. Asi vazhinji vakazwa izwi vakatenda; no uwandu hwo vandhu hwaida kuguma zviuru zvishanu (5.000). Kwakaitika ngo zuva raitevera, kuti vatongi, no vakuru no vatari, vakaungana mu Jerusarema, na Anasi mupristi mukuru, na Kaiafasi, na Johani, na Arixandreu, naavo vese vayiva vo mbhuri yo mupristi mukuru. Naapo vayinga vavaemesa pakati pavo, vakavabvunjisa, kuti: “Ngo simba rani ro mwayita ichi chiro?” Naapo Pedru, azariswa ndi Mweya Wakachena, wakati kwavari: “Imwimwi vatongi vo vandhu, no vakuru, kudari isisu tinobvunjiswa nyamasi ngo ndava yo mushando wakanaka wakaitwa kuno mundhu wakaremara, kuti waponeswa ngo njira yakaitawani; ngakuzivikanwe kwomuri mwese, no ku vandhu vese vaIsraeri, kuti ngo zina ra Jesu Kristu wo Nazaretha, wo mwakakohomera, uwo waakamusa Mwari kwo vakafa, eya, ndiye uwu mundhu unoyima pamberi penyu wakagwinya. Ndiye uri buwe rakarambwa ndimwi vavaki, uwo wakayita musoro wo pakhona. Akunazve kuponeswa ngo umweni, ngokuti akuna zina rimweni pasi po mudenga rakapuwa kuna vandhu rokuti tingaponeswa ndiro.” Zvino apo vavona kushinga kwa Pedru na Johani, vavona kuti vayiva vandhu vasikazivi kujija, vasina chevanoziva, vakashama, navo vakaziva kuti vayiva na Jesu. Vechivona mundhu wakaponeswa echiyima navo, avasaikona kukanija. Asi apo vayinga vavapanga kuti vabve pakati po makota, vakapangana pakati pavo, vechiti: “Tinozoitenyi kuna ava vandhu? Ngokuti kwakavoneka pambhene kuna vese vanogara mu Jerusarema kuti ngo gwinyiso mushamiso uno mbiri wakaitwa ndivo; nesu atikoni kuuramba. Asi kusachazowandiswa pakati po vandhu, ngativakohomejise kuti vasazovereketazve ngo zina ro uwu kuno mundhu pikija ngouri.” Navo vakavadanija, vakavapangisisa kuti vasazovereketa nokuti kujijisa ngo zina ra Jesu. Asi Pedru na Johani vechipingura, vakati kwavari: “Kuti kwakanaka mukuvona kwa Mwari kupurutana kwomuri kuno kupurutana kuna Mwari, guranyi imwimwi. Ngokuti atikoni kurega kuvereketa izvo zviro zvotakavona no zvatakazwa.” Ndizvo apo vayinga vavakohomejisazve, vakavaregera kuti vaende, vasikawani ndava yokuti vavatambuje ndiyo, ngo ndava yo vandhu, ngokuti vandhu vese vaikuja Mwari ngo icho chakaitwa. Ngokuti mundhu uwo wayiva no makore anopinda makumi marongomuna okubahwa kwake, uwo chivoniso ichi cho kuponeswa chakaitwa kwaari. Varegehwa kuti vaende, vakaviya kuno vandhu vavo, vakavaverengera zvese izvo zvovakananga kwavari vapristi vakuru no vakuru. Navo, apo vayinga vazwa, vakamusa izwi ravo kuna Mwari ngo chisungo chimwe, vakati: “A Mambo, iwewe ndiwe wakasika denga no nyika, no jombe, no zvese zviri mukati mwazvo; iwewe wakavereketa ndi Mweya Wakachena ngo muromo wo muranda wako, baba wedu Dhavhidha, kuti: Majinja anoita ushungu ngenyi, no vandhu vanotanda zvisina shwiro? Majimambo onyika akajironga mukurwa, no vatongi vakaungana, kumukira Jehovha, no kumukira Kristu wake. Ngokuti ngo gwinyiso vakaungana mu dhoropa iri kumukira Muranda wako Wakachena Jesu, uwo wo wakazoja, vese Herodhi na Pontio Piratu no majinja no vandhu vese vaIsraeri, kuyita izvo zvakaemeswa ngo pamberi ngo nyara yako na ngo kupanga kwako kuti zviyitike. Nazvino, Jehovha, ringira kukohomejisa kwavo, upe ku varanda vako kuti vaverekete izwi rako ngo kushinga, kukurutu, ngo kutambanuja nyara yako kuponesa; kuti zvivoniso no mishamiso zviyitike ngo zina ro Muranda wako Wakachena Jesu.” Naapo vayinga vakumbira, ndau yakazungunyiswa apo povayinga vakaungana; navo vese vakazariswa ndi Mweya Wakachena, vakavereketa izwi ra Mwari ngo kushinga. No mbungano yese yo avo vakatenda vayiva no mwoyo umwe, akuna naumwe wavo wainanga kuti zviro zvaaiva nazvo zvayiva zvake; asi zvese zvayiva zvavo vese. Na ngo simba guru vapostori vakayita chapupu cho kumuka kwa Mambo Jesu kwo vakafa; no nyasha huru yayiva panyezuru pavo vese. Ngokuti inga pasina naumwe pakati pavo waitama; ngokuti avo vayiva no minda nokuti nyumba, vakazvitengesa, vakazisa mitengo yo izvo zvakatengeswa, vakadira pa tshoka jo vapostori; nazvo zvakakovanisihwa kuna umwe ngaumwe kudari ngo kutama kwo mundhu. Na Josefa, uwo wakadujwa ngo vapostori kuti, Bharnabha, kunoti ngo kukumuchwa, Mwana wo kuembezehwa, muRevhi, mundhu wo Kupro ngoujinja, ano munda, wakautengesa, naye wakazisa mare, akaidira pa tshoka jo vapostori. Asi mundhu wakatikuti, zina rake wayiva Ananiya, no mukaji wake Safira, wakatengesa munda. Wakasara no rupande rwo mutengo, no mukaji wake echiziva naye, azisa rupande rwakatikuti, wakaudira pa tshoka jo vapostori. Asi Pedru wakati: “Ananiya, Sathani wazarisa ngenyi mwoyo wako kuti unyepe kuna Mweya Wakachena no kusara no rupande rwo mutengo wo munda. Ngo nguva uchiripo wayinga usiri wako here? Ngosure kwokutengeswa kwawo, ausayinga uri pasi po simba rako here? Wakatanda ngenyi ichi mu mwoyo mwako? Auzivi kunyepera kuno mundhu, asi kuna Mwari.” Na Ananiya echizwa aya mazwi, wakawa pasi, wakafa; no kutya kwakakura kwakagumira avo vese vakazvizwa. No majaha akamuka, akamupukutira, akamutwara kuenda kunja koomuviga. Kwakaitika ngosure kwo mukuvo unoda kuyita nguva ndhatu, kuti mukaji wake naye, asikatongozivi icho chakaitika, wakanghwinemwo. Na Pedru wakati kwaari: “Ndibvunjeyi kuti mwakatengesa munda here ngo mare yakadari?” Naye wakati: “Eya, ngo mare yakadaro.” Asi Pedru wakati kwaari: “Mwakatenderana ngenyi kueja Mweya wa Mambo? Vonayi, tshoka jaavo vaviga mwamuna wako jiri pa musuvo, navo vanozokutwara kuenda kunja.” Paripo iye wakawa pasi pa tshoka jake, akafa: No majaha awo akanghwina akamuvona afa, akamubudisa kunja akamuviga payiva no mwamuna wake. No kutya kwakakura kwakagumira vese vo chiara, no panyezuru po avo vese vakazwa izvi. No zvivoniso no zvishamiso zvakawanda zvakaitwa ngo nyara jo vapostori pakati po vandhu; navo vayivapo vese ngo chisungo chimwe mu berere ra Soromona. Asi akuna wo vamweni waishinga kuti anghwinire mukati mwavo, asi vandhu vakavakurisa; no vatendi vakanyanya kuengejehwa kuna Mambo, vazhinji, vese vanarume no vanakaji. Kwokuti vakabudisa mu makwanja avo vaihwara, vakavarajika pa mandhi no mu misengere, kuti apo Pedru echipinda, bvute rake rifukije vamweni vavo. Zve, kwakaviya vandhu vazhinji vechibva ku madhoropa ayitendeneja Jerusarema, vechizisa vandhu vaihwara, naavo vaitambujwa ngo mweya ine svina; navo vese vakatambiswa. Asi kwakamiruka mupristi mukuru, navo vese vayiva naye, vari vechikwata cho vasadhusi, navo vakazara ngo ndurumwa, vakabata vapostori, vakavafungira mu guniya ro vandhu vese. Asi ngirosi ya Mambo yakabewura misuvo yo guniya usiku, ikavabudisa kunja, yakati: “Endanyi, muime mu themperi mwechivereketa ku vandhu mazwi ese okupona uku.” Vachazwa izvi, vakanghwina mu themperi mangwanani mavishi, vakajijisa. Asi mupristi mukuru wakaviya naavo vayiva naye, akadanija pamwepo magurukota ese, no vakuru vese vo vandhu vaIsraeri, vakatuma ku guniya kuti vavazise. Asi vangwariri avo vakatumwa avazivi kuvawana mu guniya; navo vakapetuka vakavabvunja, vechiti: “Nyumba yo guniya taiwana yakakonywa aembho, no vangwariri vechiima pamberi po musuvo. Asi apo tabewura, atizivi kuwana mundhu mukati.” Zvino apo mukuru wo themperi, no vapristi vakuru vazwa mazwi aya, vakakangaijwa kakurutu ndivo, kuti ichi chingazoita makurirenyi. Kwakaviya mundhu akavabvunja, echiti: “Vonanyi, vandhu vomwakanghwinisa mu guniya vanoyima mu themperi vachijijisa vandhu.” Naapo mukuru pamwepo no masocha, vakaenda, vakavazisa vasikavavangijiri, ngokuti vaitya vandhu, kuti pamweni vangafuhwa ngo mapuwe. Naapo vayinga vavazisa, vakavadira pamberi po magurukota. No mupristi mukuru wakavabvunjisa echiti: “Takamupangisisa no kumupanga kuti musazojijisa ngoiri zina, vonanyi, mwazaja Jerusarema ngo rujijiso rwenyu, nemwi munoda kuviisa panyezuru pedu ngazi yo mundhu uwu.” Asi Pedru no vapostori vechipingura, vakati: “Kunodikana kuti tipurutane kuna Mwari kuno kupurutana ku vandhu. Mwari wo majibaba edu wakamusa Jesu uwo wo mwakauraya, ngokumuturika pa muti. Iye Mwari wakamumiruja ngo kumuho kwake kuti ayite Muzvare no Muponesi, kuti ape kutenderuka ku vaIsraeri, no kuregerehwa zvishaishi. Nesu tiri zvapupu zvaaya mazwi; no Mweya Wakachena nawo, uwo waakapa Mwari kwavari vanomupurutana.” Asi ivo vazwa izvi, vakabaiwa, vakapangana kuvauraya. Asi kwakamuka mundhu pakati po makota, mufarisi zina rake ndi Gamarieri, gorokota ro mupango, uwo waireremejwa ngo vandhu vese, naye wakapanga kuti avo vanarume vambobviswe kunja ngo mukuvo mudoko. Wakati kwavari: “Imwimwi vanarume vaIsraeri, jingwarirenyi ngoicho cho munoda kuyita ngo ndava yo ava vandhu. Ngokuti ngo mazuva okare, umwe unozwi Teudhasi wakamuka, echiti iye wayiva mukuru. Vamuna vakatikuti vanoda kuyita mazana marongomuna (400) vakatevera kwaari: Uwo wakaurawa, naavo vese vakaongwa ndiye vakaparajwa, vakapera. Ngosure kwake wakamuka Judhasi mu Garire ngo mazuva o ndhariro, wakakweva vandhu vamweni kuti vamutevere; iye wakafa; naavo vese vakaongwa ndiye vakapera. Nazvino ndinoti kwomuri, taraukanyi kuna ava vandhu, muvaregere; ngokuti iri zano, no uwu mushando kuti zviri zvo vandhu, zvinozoparajwa. Asi kuti zviri zva Mwari, amuna simba ro kuvanyisa; ngokuti pamweni munozovoneka muri vanorwisana na Mwari.” Navo vese vakatenderana naye; naapo vadanija vapostori kwavari, vakavarova, vakavapangisisa kuti vasazovereketa ngo zina ra Jesu, vakavaregera. Ndizvo vakabva pamberi po makota, vechidakara kuti vakaverengwa vari vanosisira kuitihwa zvinopsheruja ngo ndava yo zina rake. No mazuva ese mu themperi, no mumakanyi, avazivi, kuregera kujijisa no kuchumayira ndi Jesu kuti uri Kristu. Kwakati ngaao mazuva, apo vajiji vaiwandiswa, kwakabuda kuvhuruvhuta kwo vagiriki kuno vahebheru, ngo ndava, yokuti shirikaji javo jakanyimwa mukukovanisihwa kwo zuva ngo zuva. No vari gumi na vaviri vakadanija kwavari chiunga cho vajiji, vakati: “Akusisiri kuti isisu tisiye izwi ra Mwari, tishande pa thafura. Ndizvo hama, pshakanyi vanarume vanomwe kubva pakati penyu, vari vanogondeka, vakazara ndi Mweya, na ngo kungwara, vatingaimisa panyezuru po uwu mushando. Asi isisu tinozovangirira mukukumbira, no mu mushando wo izwi.” No izwi iro rakadakajisa chiunga chese navo vakatsanangura Stefano, mundhu wakazara ngo kugonda, na ngo Mweya Wakachena, na Firipi, na Prokoro, na Nikanoro, na Timona, na Pemena, na Nikoro wo Antiyoki waiya wakatenderukira kuchijudha. Avo vakavadira pamberi po vapostori, naapo vayinga vakumbira, vakadira nyara javo panyezuru pavo. No izwi ra Mwari rakawanjiswa; chiunga cho vajiji chakawanjiswa kakurutu mu Jerusarema; no vazhinji vo vapristi vakateveja mukutenda. Na Stefano azara ngo nyasha no simba, wakayita mishamiso mikuru, no zvivoniso pakati po vandhu. Asi kwakamuka vamweni vakatikuti vo nyumba yo kudira vanozwi vandhu Vakasununguka, no vo vaKureni, no vo vaArixandriya, no voavo vanobva Kirikiya, no vo Aziya, vechiita hasha na Stefano. Navo avazivi kukona kuemesejana no kungwara no Mweya zvaakavereketa ndizvo. Naapo vakaveruja vandhu vechiti: “Takamuzwa echivereketa mazwi okutuka Mosi na Mwari.” Navo vakamusa vandhu, no vakuru no vatari, vakamubudira, vakamubata, vakamuzisa kuno bangano. Vakaemesa zvapupu zvokunyepa, izvo zvakati: “Mundhu uwu aatongoregi kuvereketa mazwi okutuka iyi ndau yakachena, no mupango. Ngokuti takamuzwa echinanga kuti Uwu Jesu wo Nazaretha unozoparaja ndau iyi, no kuphinduja zvirovejeso zvaakapa Mosi kwetiri.” Naavo vese vayigara mubangano, vechimuringisisa, vakavona hope yake kuti yayiva inonga hope yo ngirosi. No mupristi mukuru wakati, Izvi zvino gwinyiso here? Naye wakati: “Vanarume, vakoma, no majibaba, purutanayi, Mwari wo uthende wakavoneka kuna baba wedu Abrahama, apo wayigara mu Mesopotamiya, asati agara mu Harani, wakati kwaari, buda ku nyika yako, no kubva ku hama jako, uende ku nyika yo ndinozokupangijira.” Naapo iye wakabuda kubva ku nyika yo vaKaradhiya, wakagara mu Harani: No kubvapo, ngosure kwo kufa kwa baba wake, Mwari wakamuthuthisa kuti aviye ku nyika iyi yo munogara zvino imwimwi. Naye aazivi kumupa ndhaka mukati mwayo, haiwa, no inokwana kutsikwa ngo tshoka, asi wakamugondisa kuti unozoipa kwaari kuti iyite ndhaka, no jinja rake rinozova sure kwake, apo ayinga asati abara mwana. Na Mwari wakavereketa kudari, kuti mibarihwana wake unozoyita vandhu vapara mu nyika imweni, zve, kuti vanozoitwa hloko ndivo, vechivabata ngo njira yakashata mbhera kupeja makore ari mazana marongomuna (400). No jinja iro rovanozoitwa hloko ndiro, ndinozoritonga, wakananga Mwari; ngosure kwo izvo vanozobuda, vandidire kuiyi ndau. Naye wakamupa chitenderano cho kuchekwa, ndizvo iye abara Isaka, wakamucheka ngo zuva rochisere; na Isaka wakabara Jakobe, na Jakobe wakabara majibaba mukuru vari gumi na vaviri. No majibaba mukuru, vakayita ndurumwa ndi Josefa, vakamutengesa kuti aende Egipite. Na Mwari wayindova naye, naye wakamununurira kubva ku matambujiko ake ese, wakamupa nyasha no kungwara pamberi pa Faro mambo wo Egipite, naye wakamuemesera kuti ayite mutongi panyezuru po Egipite, no nyumba yake yese. Zvino njara yakaviya panyezuru po nyika yese yo Egipite, no Kenani, no kutambujika kukurutu. No majibaba edu avazivi kuwana zvokuha. Asi apo Jakobe ayinga azwa kuti kwayivapo koroni mu Egipite, wakatuma ngo nguva yokutanga majibaba edu. Na ngo mukuvo wochipiri, Josefa wakajitatija ku hama jake, no hama ja Josefa jakaziviswa kuna Faro. Na Josefa atuma, akadanija kuviya kwaari baba wake Jakobe, no hama jake jese, vandhu vayiva makumi manomwe na vashanu. Ndizvo Jakobe wakabzuka kuenda Egipite, naye wakafa, iye no majibaba edu; navo vakatwahwa kuenda Shekemi, vakavigwa muiba raakatenga Abrahama kuno vana va Amoni mu Shekemi, ngo mutengo wo mare yo sirivha. Apo wokwedera mukuvo wo chigondiso, chaakapika Mwari kuna Abrahama, vandhu vakawandiswa nokuita vazhinji mu Egipite, mbhera kwakavapo mambo umweni mu Egipite, uwo wayinga asikazivi kumuziva Josefa. Uwu ayita urimbwi kujinja redu, wakabata majibaba edu ngo njira yakashata, ngo kurasha kunja chiya javo, kuti jisazopona. Ngo nguva iyo Mosi wakaberekwa, naye wayiva wakanaka kakurutu kuna Mwari; wakarehwa mweji mitatu mu nyumba ya baba wake. Naapo adihwa kunja, mukunda wa Faro wakamuboja, akamurera kuti ayite mwana wake. Na Mosi wakajijiswa ungwaru wese hwo vaEgipite; wayiva no simba mu mazwi ake no mu mishando yake. Naapo ayinga aano makore anonga makumi marongomuna o usharuka, kwakanghwina mu mwoyo mwake kuti afambire hama jake, vana vaIsraeri. Echivona umwe wavo echishaishihwa, wakamurwira uwo waitsikirihwa akauraya muEgipite. Asi wakapinimija kuti hama jake jaizwisisa kuti Mwari wayivaponesa ngo nyara yake; asi avazivi kuzwisisa. Na ngo zuva raitevera, wakavoneka kwavari, vechiambana, naye wakavereketa kwavari kuti vaiyane, echiti, Vamuna, muri vakoma; munoshaishirana ngenyi? Asi iye waishaishira muvakihwana wake wakamusukumija, echiti: Ndiyani wakakuemesa kuyita mambo no mutongi panyezuru pedu? Unoda kundiuraya here kudari ngo zvowakauraya muEgipite zuro? Na Mosi wakatiza ngo kuzwa izwi iro, akayita chigarandimo mu nyika yo Midhiyani, apo paakabara vana vaviri. Naapo makore ari makumi marongomuna apera, ngirosi yakavoneka kwaari uri mu bani ro dundhu ro Sinayi, iri mu murazvu wo muriro mu pfiba. Naapo Mosi echivona, wakashama ngo chivoniso; achakwedera kuringira kwakazwika kwaari izwi ra Jehovha rechiti: “Inini ndiri Mwari wo majibaba ako, Mwari wa Abrahama, na Mwari wa Isaka, na Mwari wa Jakobe.” Na Mosi wakahuta, asikashingi kuringira. Na Jehovha wakati kwaari: Sunungura magwada kubva kutshoka jako: Ngokuti ndau iyo pounoima iri mavhu akachena. Ngo gwinyiso ndakavona kutambujwa kwo vandhu vangu vari mu Egipite, ndakazwa kugomera kwavo, ndabzuka kuti ndivanunure: Zvino, viya, ndinozokutuma Egipite. Uwu Mosi wo vakaramba, vechiti: Ndiyani wakuita mambo no mutongi? Iye Mwari wakamutuma kuti ayite mambo no musununguri, kubudikija ngo nyara yo ngirosi yakavoneka mu pfiba. Uwu mundhu wakavatungamirira kubuda, echiita mishamiso no zvivoniso mu nyika yo Egipite, no mu Jombe Rakapshuka, no mu bani, kwemakore ari makumi marongomuna. Uwu ndiye Mosi uwo wakati kuna vana vo Israeri, Mwari unozomumusira muprofeti kubva ku hama jenyu, wakadari ndini. Uwu ndiye wayiva mu mbungano mu bani no ngirosi yakavereketa kwaari mu dundhu ro Sinayi, no kuna majibaba edu; uwo wakaashira mazwi okupona kuti aape kwetiri. Kwaari majibaba edu aazivi kupurutana, asi vakamusukumija kubva kwavari, vakakunukujira mwoyo yavo kuti vahwirire Egipite; vechiti kuna Aroni: “Tiitire zvimwari zvinozotitungamirira; ngokuti uwu Mosi wakatibudisa kubva ku nyika yo Egipite, atizivi chakaitika kwaari.” Navo vakaumba kan'ombe ngaawo mazuva, vakazisa mudiro kuno uwo muezaniso, vakadakara ngo mushando wo nyara javo. Asi Mwari wakavafuratira, akavapira kuti vadire hondo jo mu denga; kudari ngo zvakatahwa mu tshamba yo vaprofeti: “Mwakapira kwendiri here mbhuka jakaurawa no midiro kwemakore makumi marongomuna muri mu bani, imwimwi vo nyumba ya Israeri?” Nemwi mwakatora tende ra Moreki, no ndhondo yo chimwari Refani, miezaniso yo mwakaita kuti muidire: Neni ndinozomuthuthisa kuenda mberi kwo Bhabhurona. Majibaba edu vayiva no tende ro chapupu vari mu bani, kudari ngo zvaakaemesa uwo wakavereketa kuna Mosi, kuti ariyite kudari ngo chivonero chaakavona. Iro rakaashihwa ngo majibaba edu vakanghwina naro na Joshua, apo vakanghwina kugara ndhaka yo vo majinja, aakambirimbija Mwari kubva pamberi po hope jo majibaba edu, mbhera kuguma kumazuva a Dhavhidha. Uwo wakawana nyasha pamberi pa Mwari, akadisisa kuti amupshakire ugaro Mwari wa Jakobe. Asi Soromona wakazomuvakira nyumba. Asi Uri panyezuru pozvese aagari muugaro hwakaitwa ngo nyara; kudari ngo zvaakavereketa muprofeti: Denga riri dendemaro rangu, no nyika iri chitambarariro cho tshoka jangu: Unozondivakira nyumba yakadini, unonanga Jehovha, nokuti ngoiyapi ndau yo kuzorora kwangu? Nyara jangu ajizivi kuyita izvi zvese here? Imwimwi mune misipa yakakukutara, no vano mwoyo no njeve zvisikazivi kuchekwa, munondogara mwechirwisana no Mweya Wakachena: Kudari ngo zvo vakayita majibaba enyu, ngokudaro munoyita imwimwi. Ngowapi wo vaprofeti usikazivi kutambujwa ngo majibaba enyu? Navo vakauraya avo vaprofeti vakapangijira ngo pamberi ngo kuviya kwo Uwo Wakarurama; uwo, zvino imwimwi mwakamupira no kumuuraya; imwimwi mwakaashira mipango ngo ngirosi, musikazi kuingwarira. Naapo vechizwa izvi vakabaiwa mu mwoyo, navo vakamukwetsera mazino. Asi iye azariswa ngo Mweya Wakachena, akaringira mu denga, wakavona uthende hwa Mwari, na Jesu echiyima ngo kumuho kwa Mwari. Akati: “Vonanyi, ndinovona mu denga mwakabewuhwa, no Mwana wo Mundhu echiyima ngo kumuho kwa Mwari.” Asi vakadanijira ngo izwi guru, vakajiva njeve javo, vakamuhonokera ngo chisungo chimwe. Navo vakamurasha kunja kwo dhoropa, vakamufura ngo mapuwe. No zvapupu zvakatura zvokufuka zvazvo pa tshoka jo jaha raizwi Sauri. Navo vakafura Stefano ngo mapuwe, iye wakakumbira kuna Mambo, echiti: “Mambo Jesu, ashira mweya wangu.” Naye wakagwadama pasi, akadanijira ngo izwi guru: “Mambo, usavayitira ndava ngouku kushaisha.” Naapo avereketa izvi, wakafa. Na Sauri wayiva mu bangano ro kuurawa kwa Stefano. Kwakabuda ngoiro zuva kuteverehwa kukurutu kwo kurwisana no chiara chayiva mu Jerusarema; navo vese vakaparajikira mu nyika yo Judhiya no yo Samariya, kwakasara vapostori vega. No vandhu vaidira Mwari vakaviga Stefano, vakamuchema kakurutu. Asi Sauri wakaparaja chiara, echinghwina mu nyumba jese, no kubata ngo simba vese vanarume no vanakaji, no kuvafungira mu guniya. Ndizvo avo vakaparajika vakaenda ndau jese vechichumaira izwi. Na Firipi wakabzuka ku dhoropa ro Samariya, wakachumaira kwavari ndi Jesu Kristu. No vandhu vazhinji vakapurukira ngo chisungo chimwe kuno izvo zvakavereketwa ndi Firipi, apo vazwa, vavona zvivoniso zvaakayita. Ngokuti kwakabuda mweya ine svina kubva ku vazhinji vayiva nayo, yechidanijira ngo izwi guru; no vazhinji vayiva vakaoma muviri, no zvirema vakaponeswa. Kwakavepo kudakara kukurutu mu dhoropa iro. Asi kwayivapo mundhu wakatikuti, zina rake raizwi ndi Simoni, uwo ngo pamberi waikamba mu dhoropa iro, echishamisa jinja ro vaSamariya, echiteketesa kuti iye wayiva mukuru. Vakamupurukira vese kubvira ku vadoko mbhera ku vakuru, vechiti: “Uwu mundhu uri simba guru ra Mwari.” Navo vakamupurukira ngokuti kubvira mukuvo wakareba iye wayinga avashamisa ngo kukamba kwake. Asi apo vatenda Firipi echichumaira ngo ndava yo Umambo hwa Mwari, no zina ra Jesu Kristu, vakabhapatiswa vese vanarume no vanakaji. Na Simoni naye wakatenda; abhapatiswa wakavangirira kugara na Firipi; echivona zvivoniso no mishamiso mikuru yechiitwa, wakashamiswa. Naapo vapostori vayiva mu Jerusarema vazwa kuti vaSamariya inga vaashira izwi ra Mwari, vakatuma kwavari Pedru na Johani. Avo, apo vabzukeyo, vakavakumbirira kuti vaashire Mweya Wakachena; ngokuti inga usati wabzuka panyezuru po umwe wavo, kwega vayinga vabhapatiswa ngo zina ra Mambo Jesu. Naapo vakadira nyara javo panyezuru pavo, vakaashira Mweya Wakachena. Zvino apo Simoni avona kuti Mweya Wakachena wakapuwa ngo kudihwa kwo nyara jo vapostori, iye wakada kuvapa mare, echiti: “Ndipenyivo iro simba kuti kwaari wo ndinozodira nyara yangu panyezuru pake, unozoashira Mweya Wakachena.” Asi Pedru wakati kwaari: “Mare yako ngaipere pamwepo newe, ngokuti wapinimija kuti chipuwo cha Mwari chingatengwa ngo mare. Iwewe auna rupande nokuti chikovaniswa kuiyi ndava; ngokuti mwoyo wako auzivi kururama pamberi pa Mwari. Ndizvo tenderuka ubve kwokushaisha kwako, ukumbire kuna Mambo kuti pamweni kungaregerehwa kwouri kupinimija kwo mwoyo wako. Ngokuti ndinovona kuti uri muchanduru chinovava, no mukusungwa kwo kushaisha.” Na Simoni wakapingura, akati: “Ndikumbirirenyi kuna Mambo, kuti chisazondigumira nachimwe cho izvo zvomwavereketa.” Ndizvo apo vayinga vayita chapupu, no kuvereketa izwi ra Mambo, vakapetuka Jerusarema, vechichumaira vhangeri mu mizi mizhinji yo vaSamariya. Asi ngirosi ya Mambo yakavereketa kuna Firipi, yechiti: “Miruka, uende kubaniyo ngo njira inobzuka kubva Jerusarema kuenda Gaza. Ndau iri bani.” Naye wakamiruka, akaenda, vonayi mundhu wo Etiopiya, muthenwa, mukuru pasi pa Khendese Mambokaji wo Etiopiya, waingwarira upfumi hwake hwese, wayinga akaviya Jerusarema koodira; iye waipetuka, akagara mungoro yake, naye waijija tshamba yo muprofeti Isaya. No Mweya wakati kuna Firipi: “Kwedera ushongane no ngoro iyo.” Na Firipi wakagogoma kuenda kwaari wakamuzwa echijija tshamba ya Isaya muprofeti, wakati: “Unozwisisa here icho cho unojija?” Naye wakati: “Ndingayita mazwisisirenyi pasina umwe ungandijijisa?” Naye wakamupota Firipi kuti akwire, agare naye. No ndima yo matahwa yaijija yayiva iyi: “Iye wakakweviwa kudari ngo bvuta koourawa nokudari ngo mwana wo bvuta anonyarara pamberi pounoigunda, ngokudaro aazivi kubewura muromo wake.” Mukupsherujwa kwake kutongwa kwake kwakabviswa, ndiyani unozoverenga mibarihwana yake? Ngokuti kupona kwake kwakabviswa mu nyika. No muthenwa wakapingura kuna Firipi, akati: “Ndinokupota, muprofeti unovereketa izvi ndiyani, ndiye ambhwine here, nokuti unovereketa ngo umweni?” Na Firipi wakabewura muromo wake wakatanga kubvira mu matahwa awo, wakachumaira kwaari ndi Jesu. Vachafamba mu njira, vakaguma kundau yakatikuti ino kumwa; no muthenwa wakati: “Vonayi, kumwa iri pano; chinyi chinondirambisa kuti ndisabhapatiswa?” (Naye wakapingura, akati: “Kudari wechitenda ngo mwoyo wako wese, kunotendehwa.” Naye wakapingura echiti: Ndinotenda kuti Jesu Kristu uri Mwana wa Mwari. ) Naye wakapanga kuti ngoro ieme, navo vaviri vakabzuka mu kumwa, Firipi no muthenwa, naye wakamubhapatisa. Naapo vabuda kubva mu kumwa, Mweya wa Mambo wakamubvisa Firipi; no muthenwa aazivi kuchamuvona, ngokuti iye wakaenda mu njira yake echidakara. Asi Firipi wakavoneka ari mu Azota; echiparura, wakachumaira vhangeri mu madhoropa ese mbhera wakaguma Khesariya. Asi Sauri echifemurika ngo ushungu wokuda kuuraya vajiji va Mambo, wakaenda ku mupristi mukuru, akakumbira kwaari tshamba yo kuenda mu Dhamaseku, mu nyumba jo kudira, kuti kudari echivona vayiva vo Njira iyi, pikija vanarume nokuti vanakaji, waizovaviisa vakasungwa ku Jerusarema. Achafamba, wakakwedera mu Dhamaseku. Paripo kwakaviya kumutendeneja kujeka kwechibva mu denga. Naye wakawa pasi pa mavhu, wakazwa izwi rechiti kwaari: “Sauri, Sauri, unonditambujirenyi?” Naye wakati: “Uriyani, Mambo?” No uwo wakati: “Ndiri Jesu wo unotambuja; [kunonesa kwouri kudarika pa machocho anopinja.” Asi iye echihuta, no kushama, wakati: “Mambo, unoda kuti ndiitenyi?” Na Mambo wakati kwaari:] “Miruka, unghwine mu dhoropa, nakwo kunozobvunjwa kwouri icho chinosisira kuti uite.” No vanarume vaifamba naye vakayima vasikavereketi, vechizwa izwi, asi avasaivona mundhu. Na Sauri wakamiruka, naapo abewura majiso ake, aazivi kuvona chiro; navo vakamubata ngo nyara, vakamuendesa mu Dhamaseku, naye wakayita mazuva matatu asikavoni, asikazivi kuha nokuti kumwa. Zvino kwayivapo mujiji wakatikuti mu Dhamaseku, zina rake raizwi ndi Ananiya na Mambo wakati kwaari ngo chivoniso: “Ananiya!” Naye wakati: “Ndiri pano Mambo.” Na Mambo wakati kwaari: “Miruka, uende mu njira inozwi Yakarurama, ubvunjise mu nyumba ya Judhasi mundhu unozwi ndi Sauri wo Tarsu; ngokuti, ringira, iye unokumbira; naye wavona muchivoniso mundhu zina rake ndi Ananiya, echinghwina, no kudira nyara jake panyezuru pake, kuti aashire kuvona kwake.” Asi Ananiya wakapingura, echiti: “Mambo, ndakazwa ngo vazhinji ngo ndava yo mundhu uwu ngo kuwanda kwo izvo zvakashata zvaakayita kuno vakacheneswa vako mu Jerusarema. Napano unaro simba raakapuwa ngo vapristi vakuru kuti asunge avo vese vanokumbira ngo zina rako.” Asi Mambo wakati kwaari: “Endayi, ngokuti uwu uri ndiro yakatsananguhwa ndini kuti atware zina rangu kuno vo majinja, no majimambo, no kuvana vaIsraeri. Ngokuti ndinozomupangijira uwandu hwaanozotambujwa ngo ndava yo zina rangu.” Na Ananiya wakaenda, akanghwina mu nyumba; echidira nyara jake panyezuru pake, akati: “Mukoma Sauri, Mambo, ndiye Jesu, uwo wakavoneka kwouri mu njira yo wakaviya ndiyo, wakandituma kuti uvone, uzariswe ndi Mweya Wakachena.” Paripo akawa kubva kumajiso ake akadari ngo magwamba, naye wakavona akamuka, akabhapatiswa. Wakaashira kuha, akagwinyiswa. Sauri wakagareyo mazuva akatikuti no vajiji vayiva mu Dhamaseku. Paripo mu nyumba jo kudira wakateketesa Jesu kuti uri Mwana wa Mwari. Naavo vese vakamuzwa vakashama, vechiti: “Uwu andiyepi here wakauraya mu Jerusarema avo vaikumbira ngo zina iro? Naye wakaviya pano kuti atore vakasungwa pamberi po vapristi vakuru?” Asi Sauri simba rake rakavangirira kukura, akavakangaija vaJudha vayigara mu Dhamaseku, echikohomejisa kuti uwu Jesu uri Kristu. Ngosure kwo mazuva mazhinji, vaJudha vakayita bangano rokumuuraya. Asi zano ravo rakazivikanwa kuna Sauri. Navo vakarinda misuvo masikati no usiku kuti vamuuraye; asi vajiji vake vakamutora usiku, vakamubzusa ngo parukumbati, uri mu dendere. Naapo ayinga aguma Jerusarema, wakaeja kuti ayite umwe wo vajiji, navo vese vakamutya vasikatendi kuti wayiva mujiji. Asi Bharnabha wakamutora akamuviisa kuna vapostori, akadurujira kwavari mavonere aakayita Mambo mu njira, no njira yaakavereketa ndiyo kwaari, no njira yayinga akachumaira ngo kushinga mu Dhamaseku ngo zina ra Jesu. Naye wayiva navo echinghwina no kubuda mu Jerusarema. Wakachumaira ngo kushinga ngo zina ra Mambo. Wakavereketa echikanijana no vagiriki. Asi avo vakatanda mazano okuda kumuuraya. Asi apo vakoma vazviziva, vakamubzusa kuenda Khesariya, vakamutumira Tarsu. Ndizvo zviara zvese zvayiva mu Judhiya, no mu Garire, no Samariya, zvakawana kunyarara, zvakavakiwa, nazvo zvechifamba ngo kumutya Mambo, no mukuembezehwa ndi Mweya Wakachena, zvakawandiswa. Kwakaitika kuti Pedru echiparura ndau jese wakabzuka kuno vakacheneswa vayigara Ridha. Naapo wakavona mundhu wakatikuti zina rake raizwi ndi Aniya, uwo wayinga akavata pa mubhedhi wake makore masere, ngokuti wayiva no ndhenda yo kuoma muviri. Pedru wakati kwaari: “Aniya, Jesu Kristu unokuponesa; miruka, unasirire mubhedhi wako.” Paripo iye wakamuka. Naavo vese vayigara mu Ridha, no mu Sharoni, vakamuvona, vakatenderuka kuna Mambo. Zvino kwayivapo mu Jopa mujiji wakatikuti, zina rake raizwi Tabhita, ukwo kunoti ngo kukumuchwa, Dhorika. Iri jimayi inga rina mishando yakanaka, no kukovera zvorakaita. Kwakaitika ngaao mazuva, kuti rakahwara, rikafa; naapo vayinga varishambija, vakaridira mukamera ro muturika. Ngokuti Ridha rayiva phedo poJopa, vajiji vechizwa kuti Pedru wayiva umwo, vakatuma vanarume vaviri kwaari, vechimupota, kuti Usanonoka kuviya kwetiri. Na Pedru wakamiruka, akaenda navo. Naapo ayinga aguma vakamuviisa mukamera ro muturika; jakaima phedo pake jese shirikaji, jechichema, jechipangijira nghanju no zvokufuka zvaainga akayita Dhorika, achiripo navo. Asi Pedru avabudisa vese, wakagwadama, akakumbira, Akunukuka kuno muviri wakafa, wakati: “Tabhita, muka.” Naye wakabewura majiso ake, avona Pedru, wakamuka, akagara. Naye amubata ngo nyara yake wakamumusa; adanija vakacheneswa no shirikaji wakamutura kwavari echipona. Nakwo kwakazivikanwa mukati mwo Jopa rese; no vazhinji vakamutenda Mambo. Kwakaitika kuti iye wakagara mazuva mazhinji mu Jopa, no mundhu unozwi Simoni, musukuti. Kwayivapo mundhu wakatikuti mu Khesariya, zina rake raizwi Kornorio, nduna yo chikwata cho masocha chaizwi cho Itariya. Waiya mundhu unodira, no unomutya Mwari pamwepo no vo nyumba yake yese, wakakovera kakurutu ku vandhu, no kugara echikumbira kuna Mwari. Iye wakavona ngo chivoniso pambhene kunonga nguva yo chipfumbamwe yo zuva, ngirosi ya Mwari yechinghwina kwaari, yechiti kwaari: “Kornorio!” Asi iye aringisisa kwoiri, echitya, wakati: “Chinyi, Mambo?” Nayo yakati kwaari: “Mikumbiro yako no kukovera kwako zvakakwira kuyita chicherechejiso pamberi pa Mwari. Nazvino tuma ku Jopa vanarume, uviise mundhu unozwi Simoni, uwo unozwi Pedru. Iye unogara no mundhu unozwi Simoni musukuti, nyumba yake iri phedo po jombe (iye unozokubvunja icho chinosisira kuti uite).” Apo ngirosi yakavereketa kwaari yayinga yaenda, wakadanija vaviri vo varanda, vo nyumba yake, no socha raidira raavo vayigara vechimushandira; naapo ayinga adurujira kwavari zvese, wakavatuma kuenda Jopa. Zvino ngo zuva raitevera avo vachafamba, vechikwedera ku dhoropa, Pedru wakakwira panyezuru po nyumba kookumbira, kunonga nguva yochitandhatu. Wakazwa njara, echidisisa kuti ahe; asi vachanasirira, wakabatwa mu mweya; naye wakavona denga rakabewuka, no ndiro yakatikuti yechibzuka inonga jira rakapetwa rechibzuswa pa nyika ngo makhona aro marongomuna. Mukati mwaro mwayiva no mbewu jese jo zvinyama zvino mirenje murongomuna, no zvese zvinogwezva zvo mu nyika, no shiri jo mu denga. No izwi rakazwika kwaari, rechiti: “Miruka, Pedru uraya, uhe.” Asi Pedru wakati: “Haiwa, Mambo, ngokuti andizivi kutongoha chiro chisina shwiro no chakasvipiswa.” No izwi rakazwika kwaari, ngo kwochipiri, rechiti: “Icho chaakachenesa Mwari, usati achina shwiro.” Ichi chakaitika mukuvo mitatu, no ndiro yakaashirwazve mu denga. Nazvino Pedru achakangaijwa mukati mwake kuti chinorevenyi chivoniso icho chaayinga avona, vonayi, avo vanarume vakatumwa ndi Kornorio, vayinga vechibvunjisa nyumba ya Simoni, vakayima pa musuvo. Navo vakadanijira, vakabvunjisa kuti Simoni unozwi Pedru unogara apo here. Na Pedru achapinimija ngo chivoniso, Mweya wakati kwaari: “Vonayi, vanarume vatatu vanokupshaka. Asi miruka ubzuke uende navo, usikagonondi; ngokuti ndini ndakavatuma.” Pedru wakabzuka kuna vanarume avo, akati: “Vonanyi, ndini uwo wo munopshaka, ndizvo ndava ngoyenyi yamwafambira?” Navo vakati: “Kornorio, nduna yo zana, mundhu wakarurama, no unomutya Mwari, uno mbiri yakanaka kujinja rese ro vaJudha, wakapangwa ngo ngirosi yakachena kukutumira kuti uviye ku nyumba yake, no kuzwa mazwi anobva kwouri.” Ndizvo iye avadanija kunghwina mukati, akavapa po kuvata. Ngo zuva raitevera, wakamuka, akaenda navo, no hama jimweni jo Jopa jakaendavo naye. Ngo zuva raitevera vakanghwina mu Khesariya. Na Kornorio wayivagarira, wayinga adanija pamwepo no hama jake no shamwari jake jinodikana. Kwakaitika apo Pedru anghwina Kornorio, wakashongana naye, akawa pa tshoka jake, akamudira. Asi Pedru wakamumiruja echiti: “Miruka nenivo ndiri mundhu.” Achavereketa naye, wakanghwina mukati, akavona vazhinji vakaungana. Wakati kwavari: “Imwimwi mwambhwine munoziva kuti chiri chiro chisikatendehwi ngo mupango kuti mundhu uri mujudha ashonganiswe nokuti aviye kuno mundhu uri wo jinja rimweni, asi Mwari wakandipangijira kuti ndisazonanga kuti mundhu chiro chisina shwiro, nokuti uno svina.” Ndizvozve ndaviya apo ndakadanijwa ndisikarambi. Ndizvo ndinobvunjisa mwakandidanijirenyi? Na Kornorio wakati: Aamazuva marongomuna akapinda mbhera nguva iyi, ndaingwarira nguva yo kukumbira yo chipfumbamwe mu nyumba yangu; vonayi, mundhu wakayima pamberi pangu uno zvokufuka zvinojeka, naye wakati: Kornorio, mikumbiro yako yakazwika, no kukovera kwako kwakacherechejwa pamberi pa Mwari. Ndizvo tuma ku Jopa, udanije Simoni, uwo unozwi Pedru; unogara mu nyumba ya Simoni musukuti, phedo po jombe. Ndizvo paripo ndakatumira kwouri, newe ngo kuviya wanasa; ndizvo zvino tiri pano tese pamberi pa Mwari kuzwa zvese zvakapangwa kwouri ndi Mwari. Na Pedru ashama muromo wake, wakati: Ngo gwinyiso ndinovona kuti Mwari andiyepi mutsananguri wo vandhu, asi ku majinja ese, uwo unomutya, nokuita zvakarurama, unoashirika kwaari. Izwi iro raakatuma kuno vana vaIsraeri, echichumaira masoko akanaka okunyarara ndi Jesu Kristu (iye uri Mambo wavo vese). Iro izwi imwimwi mwambhwine munoriziva, rakateketeswa mu nyika, kubvira ngo mu Garire ngosure kwo rubhapatiso rwaakachumaira Johani. Ngo njira yaakamuzoja ndiyo Mwari Jesu wo Nazaretha ndi Mweya Wakachena, na ngo simba. Uwo waifamba echiita zvakanaka, echiponesa avo vese vaitambujwa ndi dhiyabhorosi; ngokuti Mwari wayiva naye. Nesu tiri zvapupu zvo izvo zvese zvaakayita kwese mu nyika yo vaJudha, no mu Jerusarema; uwozve wo vakauraya, ngo kumuturika pa muti. Uwu Mwari wakamumusa ngo zuva rechitatu, akamupa simba kuti avoneke. Asi haiwa kuvoneka ngo vandhu vese, asi kuno zvapupu, izvo zvakatsanangurwa ngo pamberi ndi Mwari, no kwetiri isisu, takaha no kumwa naye ngosure kwo kumuka kwake kwo vakafa. Iye wakatipanga kuchumayira ku vandhu, no kupupura kuti uwu ndiye wakaemeswa ndi Mwari kuyita Mutongi wo vanozwa no wo vakafa. Kwaari vaprofeti vese vanoyita chapupu ndiye, kuti ngo zina rake, mundhu wese unotenda kwaari unoregerehwa zvishaishi. Apo Pedru achavereketa aya mazwi, Mweya Wakachena wakabzuka panyezuru pavo vese vakazwa izwi. Naavo vatendi vo vakachekwa avo vakaviya na Pedru, vakashamiswa ngokuti chipo cho Mweya Wakachena chakadururihwavo panyezuru po vo majinja. Ngokuti vakavazwa vechivereketa ngo ndimi jimweni, no kukurisa Mwari. Naapo Pedru wakapingura: “Pane ungarambisa kumwa here kuti ava vasabhapatiswa, avo vakaashira Mweya Wakachena kudari ndisu?” Naye wakapanga kuti vabhapatiswe ngo zina ra Jesu Kristu. Vorovomupota kuti agare apo mazuva akatikuti. Zvino vapostori no hama jaigara mu Judhiya, vakazwa kuti majinja nao ayinga aashira izwi ra Mwari. Naapo Pedru ayinga akwira Jerusarema, avo vovakachekwa vakayita hasha naye, vechiti: “Iwewe wakanghwina kuna vandhu vasikazivi kuchekwa, wakaha navo.” Asi Pedru wakatanga kuvabvunja zvese ngo kutevererana kwazvo, echiti: “Ndaiva ndiri mu dhoropa ro Jopa ndechikumbira; ndakabatwa mu mweya, ndakavona chivoniso cho ndiro yakatikuti inonga jira rakapetwa, yechibzuswa ngo makhona marongomuna kubva mu denga; nayo yakaviya kwendiri.” Apo ndairingisisa, ndakapinimija, ndikavona zvinyama zvo mu nyika zvino mirenje mirongomuna, no zvikara zvo mushango, no zvinogwezva, no shiri jo mu denga. Ndakazwa izwi rechiti kwendiri, Miruka Pedru, uuraye, uhe. Asi ndakati, Haiwa, Mambo; ngokuti apana chiro chisina shwiro nokuti chikasvipiswa chakambonghwina mumuromo mwangu. Asi izwi rakapingura kwochipiri rechibva mu denga, rechiti: Chaakachenesa Mwari, usati chiro chisina shwiro. No izvi zvakaitika katatu, nazvo zvese zvakakwijwazve mu denga. Vonanyi, paripo vanarume vatatu vayinga vakayima pamberi po nyumba yo taigara, avo vayinga vatumwa kwendiri vechibva Khesariya. No Mweya wakandibvunja kuti ndiende navo, ndisina mutsananguro. Naava vakoma vatandhatu vakaendavo neni, nesu takanghwina mu nyumba yo mundhuwo. Naye wakaerenguja kwetiri ngo njira yayinga avona ngirosi yechiima mu nyumba mwake, yechiti: Tuma ku Jopa, uviise Simoni uwo unozwi Pedru; iye unozovereketa kwouri mazwi ounozoponeswa ndiwo, iwewe no vo nyumba yako vese. Naapo ndichatanga kuvereketa, Mweya Wakachena wakabzuka panyezuru pavo, kudari ngo zvowakabzuka panyezuru pedu pakutanga. Neni ndakacherecheja izwi ra Mambo raakavereketa, kuti: “Johani, ngo gwinyiso wakabhapatisa ngo kumwa, asi imwimwi munozobhapatisa ndi Mweya Wakachena.” Ndizvo, kudari Mwari akavapa chipuwo chimwecho icho chaakapavo kwetiri, apo takatenda kuna Mambo Jesu Kristu, inini ndayinga ndiriani kuti ndingarwisana na Mwari? Naapo vazwa izvi, vakanyarara, vakakurisa Mwari, vechiti: “Ndizvo, Mwari wakapavo kuno vo majinja kutenderuka kuti vapone.” Ndizvo avo vakaparajikira kundau jese ngo ndava yo kutambujwa ukwo kwakaitika ngo ndava ya Stefano, vakafamba mbhera kuguma Fenike, no Kupro, no Antiyoki, vasikavereketi izwi kuvamweni, asi kwega ku vaJudha. Asi vayivapo vamweni vayiva vanarume vo Kupro, no vo Kureni, avo vayinga vaguma mu Antiyoki, vakachumaira ku vagiriki navo, vechichumaira ndi Mambo Jesu. No nyara ya Mambo yayiva navo, no vazhinji vakatenda, vakatenderukira kuna Mambo. No mbiri yavo yakazwika munjeve jo chiara chayiva mu Jerusarema. Navo vakatuma Bharnabha kuenda Antiyoki. Uwo apo ayinga aguma, no kuwana nyasha ja Mwari wakadakara; wakavapanga vese kuti vabatirire kuna Mwari ngo mwoyo unogwinyisira. Ngokuti wayiva mundhu wakanaka, akazara ndi Mweya Wakachena na ngo kugonda; no vandhu vazhinji vakaengejehwa kuna Mambo. Bharnabha wakaenda Tarsu koopshaka Sauri. Naapo amuvona, wakamuviisa Antiyoki. Kwakaitika kuti vakapeja gore rese vakaungana pamwepo no chiara, vakajijisa vandhu vazhinji; no vajiji vakatanga kudujwa kuti “vakristu” mu Antiyoki. Ngo mazuva ao vakabzuka Antiyoki vaprofeti vechibva Jerusarema. Kwakaitika umwe wavo zina rake raizwi ndi Agabhu, akavapangijira ndi Mweya kuti njara huru inozogumira nyika yese; iyo yakaitika ngo mazuva a Kraudhiyo. No vajiji vakatenderana, mundhu wese kudari ngo zvaaikona, kuti atumire zvingabesera hama jaigara mu Judhiya. Navo vakayita kudaro, vakazvituma kuno vakuru ngo nyara ja Bharnabha na Sauri. Zvino ngo uwo mukuvo Herodhi mambo wakatambanuja nyara jake kutambuja vamweni vo chiara. Naye wakauraya Jakobe mukoma wa Johani ngo shoti. Avona kuti izvo zvakadakajisa vaJudha, wakaenda mberi kubatavo Pedru. Ao ayiva mazuva ochimanda chisina mumera. Naapo iye amubata, wakamunghwinisa mu guniya, akamupira kuzvikwata zvirongomuna, zvino masocha marongomuna, kuti amurinde; echipinimija kumubudisa kuno vandhu ngosure kwo Phasika. Ndizvo Pedru wakangwarihwa mu guniya, asi chiara chakavangirira kumukumbirira kuna Mwari. Asi apo Herodhi ayinga oda kumubudisa, ngo usiku uhwo Pedru ayinga akavata pakati pomasocha maviri, akasungwa ngo magaragajero maviri; no varindi vayiva pa musuvo vechingwarira guniya. Vonayi, ngirosi ya Mambo yakayima phedo pake, no kujeka kwakajeka mukamera ro guniya; nayo yakarova Pedru ngo parutivi, ikamumusa, yechiti: “Kasira kumiruka.” No magaragajero akasununguka kubva munyara jake. No ngirosi yakati kwaari: “Jisimije usunge magwada ako”, naye wakayita kudaro. Yakati kwaari: “Pfeka chokufuka chako, unditevere.” Naye wakabuda kunja wakaitevera; aazivi kuziva kuti chayiva no gwinyiso chakaitwa ngo ngirosi, asi wakapinimija kuti wakavona chivoniso. Naapo vapinda varindi vokutanga no vochipiri, vakaguma pa musuvo wo simbi wo kunghwina ndiwo mu dhoropa; nawo wakajibewukira kwavari wega; vakabuda, vakafamba ngo njira imwe; paripo ngirosi yakamusiya. Naapo Pedru apembenuka, wakati: “Zvino ndinoziva kuti ngo gwinyiso Mambo wakatuma ngirosi yake, akandinunurira kunyara ya Herodhi, no kubva mukugarira kwese kwo vandhu vo vaJudha.” Naapo ayinga apinimija ngo icho, wakaguma ku nyumba ya Mariya, mayi wa Johani, waizwi Marku; apo pavayinga vakaungana vazhinji; vechikumbira. Asi aguguja pa musuvo, musikana zina rake raizwi ndi Rodha, wakaviya kopurukira. Asi apo aziva izwi ra Pedru, aazivi kubewura musuvo ngo kudakara, asi wakagogoma kunghwina, akavabvunja kuti Pedru wakayima pa musuvo. Asi vakati kwaari: “Unopenga!” Asi iye wakavangirira kugwinyisa kuti ndizvo. Asi vakati: “Ingirosi yake.” Asi Pedru wakavangirira kuguguja: Navo vabewura, vakamuvona, vakashamiswa. Asi iye wakayita chivoniso ngo nyara kuti vanyarare, wakadurujira kwavari njira yaakamubudisa ndiyo Mambo mu guniya. Wakati: “Zivisanyi izvi kuna Jakobe nokuno hama.” Wakabvapo, akaenda kundau imweni. Zvino kwaeja, kwayivapo bope guru mukati mwo masocha, kuti chinyi chayinga chaitika kuna Pedru. Naapo Herodhi amupshaka, asikazivi kumuwana, wakabvunjisisa varindi, akapanga kuti vaurawe. Na Pedru wakabzuka kubva Judhiya, akaenda Khesariya, akagareyo. Zvino Herodhi waitsenekera kakurutu avo vo Tire, no vo Sidhoni: Navo vakaviya kwaari ngo chisungo chimwe, kwakati vaiyana na Brastu, nduna yo kamera ra mambo vakakumbira kuti vaiyaniswe, ngokuti nyika yavo yaiwana zvokuha kubva ku nyika ya Mambo. Na ngo zuva rakaemeswa, Herodhi wakajisimija zvokufuka zvo umambo, akagara pa dendemaro, wakavereketa kwavari. No vandhu vakadanijira, vechiti: “Iri izwi ra Mwari, haiwa ro mundhu.” Paripo ngirosi ya Mambo yakamurova, ngokuti aazivi kukuja Mwari: Naye wakahiwa ngo honye, akafa. Asi izwi ra Mwari rakakura, no kuwanjiswa. Bharnabha na Sauri vakahwirira kubva Jerusarema, apo vayinga vapeja mushando wavo, vechitora navo Johani waizwi Marku. Zvino kwayivapo mu chiara chayiva mu Antiyoki, vaprofeti no vajijisi, vari Bharnabha, na Simoni uwo waizwi ndi Nigeri, na Rukio, muKurene na Manaene uwo wakakura pamwepo na Herodhi Sadundhu, na Sauri. Vachashandira Mambo, vechiera kuha, Mweya Wakachena wakati: “Parajanisayi kwendiri Bharnabha na Sauri kuti vayite mushando wendakavadanijira.” Apo vayinga vaera kuha, no kukumbira, vadira nyara javo panyezuru pavo, vakavaendesa. Ndizvo avo vatumwa ndi Mweya Wakachena, vakabzuka kuenda Serukiya, no kubvapo vakahluza kuenda Kupro. Naapo vayinga vaguma Saremi, vakateketesa izwi ra Mwari mu nyumba jo kudira jo vaJudha; vayiva na Johani mubeseri wavo. Naapo vayinga vaparura chirundu mbhera kuguma Phafo, vakavona muringiji muprofeti wokunyepa, muJudha, zina rake raizwi ndi Bar-Jesu; uwo wayigara pamwepo no mutongi mukuru waizwi ndi Sergio Pauri, wayiva mundhu unoungwaru. Iye adanija kwaari Bharnabha na Sauri, echidisisa kuti azwe izwi ra Mwari. Asi muringiji Eruma, (ngokuti ndikwo kukumuchwa kwo zina rake) wakarwisana navo, echida kupaukisa mutongi mukuru kubva mukugonda. Asi Sauri ndiyezve unozwi Pauri, azariswa ndi Mweya Wakachena, wakamuringisisa. Akati: “Au! Iwewe wakazara ngo kuchengeja, no urimbwi hwese, iwewe mwana wa dhiyabhorosi, iwewe mukorore wo kururama kwese, autongoregi here kupaukisa njira jakarurama ja Mambo? Zvino, vonayi, nyara ya Mambo iri panyezuru pako, newe unozoyita bofu, usikavoni zuva kwomukuvo wakatikuti.” Paripo kwakaguma kwaari chisikusiku, no chidima; echifambafamba, wakapshaka wo kumutungamirira. Apo mutongi mukuru avona icho chakaitika, wakatenda, echishamiswa ngo zvijijiso zva Mambo. Zvino Pauri no vadoni vake vakahluza kubva Pafo, vakaguma Perga riri mu Pamfriya. Na Johani wakabva kwavari, akapetuka Jerusarema. Asi vechifamba kubva Perga, vakaguma Antiyoki ro Pisidhiya, vakanghwina mu nyumba yo kudira ngo zuva ro sabatha, vakagara pasi. Ngosure kwo kujijwa kwo Mupango no zvo vaprofeti, vakuru vo nyumba yo kudira vakatuma kwavari, vechiti: “Hama, kudari mune izwi mukati mwenyu ro kupanga vandhu, rivereketenyi.” Na Pauri amuka akavanyaraja ngo nyara, akati: “Vanarume, vaIsraeri, naimwimwi munomutya Mwari, purukiranyi. Mwari wo vandhu ava vaIsraeri wakatsanangura majibaba edu, wakakurisa vandhu apo vayiva zvigarandimo mu nyika yo Egipite, na ngo mukono uno simba wakavabudisa mukati mwayo. No mukuvo unoda kuyita makore ari makumi marongomuna wakasengerera zviito zvavo vari mu bani. Naapo ayinga aparaja majinja manomwe aigara mu nyika yo Kenani, wakavakovanisira nyika yavo kuyita ndhaka. Ngosure kwo izvi kunonga makore ari mazana marongomuna, no makumi mashanu (450), wakavapa vatongi mbhera kuguma kuna Samueri muprofeti. Ngosure kwo izvi vakakumbira mambo na Mwari wakavapa Sauri mwana wa Kishi, mundhu wayiva wo jinja ra Benjamini, kupeja makore ari makumi marongomuna. Naapo ayinga amubvisa, wakavamusira Dhavhidha kuti ayite mambo wavo; kwaarizve wakayita chapupu, echiti: ‘Ndakavona Dhavhidha mwana wa Jesi kuti uri mundhu unoda zvinodiwa ngo mwoyo wangu, iye unozoyita kuda kwangu kwese.’ Ngo mibarihwana wo mundhu uwu, Mwari, kudari ngo chigondiso chake, wakazisa kuno vaIsraeri Muponesi, Jesu; asati aviya Jesu, Johani wayiva achumaira, ngo rubhapatiso rwo kutenderuka ku vandhu vese vaIsraeri. Naapo Johani ayinga echipejisa mushando wake, wakati: ‘Munopinimija kuti ndiriani inini? Andiriye akadi. Asi vonanyi, unoviya sure kwangu uwo wendisikasisiri inini no kusunungura magwada otshoka jake.’ Vamuna, hama, vana vo jinja ra Abrahama, naavo vari pakati penyu vanomutya Mwari, izwi iri ro ruponeso rakatumwa kwetiri. Ngokuti avo vanogara mu Jerusarema, no vatongi vavo, avazivi kumuziva, nokuti kuzwisisa mazwi ovaprofeti, awo anojijwa masabatha ese, vakaazajisa ngo kumuitira ndava. Pikija avazivi kuvona ndava kwaari yokuti afe, vakakumbira kuna Piratu kuti aurawe. Naapo vayinga vazarisa zvese zvakatahwa ngo ndava yake, vakamubzusa kubva pa muti, vakamuviga muiba. Asi Mwari wakamumusa kwo vakafa. Naye wakavoneka mazuva mazhinji kwavari vakakwira naye kubva Garire kuenda Jerusarema, avo zvino vari zvapupu zvake kuno vandhu. Nesu tinoteketesa kwomuri masoko akanaka echigondiso icho chakaitwa ku majibaba, kuti Mwari, wakachizajisa ichi kwetiri vana vavo, ngo kumumusa Jesu; kudarizve ngo zvakatahwa munduyo yochipiri, kuti: ‘Iwewe uri Mwana wangu, nyamasi ndakubara.’ Na ngokuti wakamumusa kwo vakafa, zvino aachahwiriri mukuvora, wakavereketa kudari, ndinozomupa zvifumiso zvakachena zvinogondeka zva Dhavhidha. No munduyo imweni unoti: ‘Auzotenderi wakachena wako kuti avore.’ Ngokuti Dhavhidha, ngosure ayinga ashandira ndanga jake ngo kupanga kwa Mwari, wakavata, naye wakavigwa kuna majibaba ake, akavora. Asi iye waakamusa Mwari aazivi kuvora. Ndizvo ngakuzivikanwe kwomuri hama, kuti ndiye uwu kunoteketeswa kwomuri kuregerehwa kwo zvishaishi. Ndiye vese vanotenda vanopembejwa kubva kuzviro zvese zvo mwayinga musikapembejwi ngo mipango ya Mosi. Ndizvo ngwaranyi kuti zvisazomugumira izvo zvakavereketwa ngo vaprofeti: Vonanyi, imwimwi vashori, mushame, mupere; ngokuti ndinoshanda mushando mumazuva enyu, mushando wo musikazotendi pikija mundhu amubvunja ndiwo.” Navo vechibuda mu nyumba yo kudira, vakamupota kuti aya mazwi avereketwe kwavari ngo sabatha raitevera. Zvino apo mushongano wo kudira wapera, vazhinji vo vaJudha, no vovanodira vo majinja vakatenderukira muchijudha vakatevera Pauri na Bharnabha. Ivo vechivereketa kwavari, vakavaonga kuti vavangirire kugara munyasha ja Mwari. Ngo sabatha raitevera kunonga vandhu vese vo dhoropa vakaungana kuzwa izwi ra Mwari. Asi apo vaJudha vayinga vavona mbungano, vakazara ngo ndurumwa, vakakanija zvakavereketwa ndi Pauri, vechituka. Asi Pauri na Bharnabha vakavereketa ngo kushinga, vechiti: “Kwaisisira kuti izwi ra Mwari ritange kuvereketwa kwomuri. Kwechivoneka kuti munoriramba kuti ribve kwomuri, mwechijiverenga kuti amusisihwi nokupona kusikaperi, vonanyi, tinokunukukira kuenda kuno vo majinja. Ngokuti Mambo wakatipanga kudaro, echiti: Ndakakuemesa kuti uite kujeka kuno vo majinja kuti uite wokuponesa mbhera kumagumo onyika.” Naapo vo majinja vazwa izvi, vakadakara, vakakurisa izwi ra Mwari. Naavo vese vakaemeserwa kupona kusikaperi, vakatenda. No izwi ra Mambo rakaparajihwa mu nyikemwo mwese. Asi vaJudha vakaveruja vanakaji vaidira vaireremejeka, no vakuru vo dhoropa, vakamusira matambujiko Pauri na Bharnabha, vakavambirimbija kubva ku migano yavo. Asi ivo vakapumbhuja bukuta pa tshoka javo kuvaitira ndava, vakaguma Ikoniyo. No vajiji vakazara ngo kudakara, na ngo Mweya Wakachena. Kwakaitika vari mu Ikoniyo, vakanghwina vari vaviri mu nyumba yo kudira yo vaJudha, vakavereketa kwokuti vazhinji vese vaJudha no vagiriki vakatenda. Asi vaJudha vasikatendi vakaveruja mweya wo vo majinja kurwisana naavo vakoma. Ndizvo vakagara apo mukuvo wakareba, vechivereketa ngo kushinga ndi Mambo, iye wakayita chapupu kuno izwi ro nyasha jake, echitenda kuti zvivoniso no zvishamiso zviitwe ngo nyara javo. Asi uwandu hwo vandhu vo dhoropa vakaparajana; rupande rwavo rwakaima no vaJudha, no rupande rumweni rwakaima no vapostori. Naapo vakavamukira vese vo majinja, no vo vaJudha, no vatongi vavo, kuti vavaitire zvakashata, no kuvafura ngo mapuwe, vechiziva, vakatizira kuenda ku madhoropa o Rikoniya, ari Ristriya no Dherbhe, no ku ndharaunda jawo. Naapo vakachumaira vhangeri. Kwayiva mu Ristriya mundhu wakatikuti wayiva chigwadara mutshoka jake, uri chirema kubvira mundani ya mayi wake, aazivi kumbofamba. Uwo wakamuzwa Pauri echivereketa, iye amuringisisa, avona kuti wayiva no kutenda kuti aponeswe, wakati, ngo izwi guru: “Ema ngo tshoka jako.” Naye wakanyanduka, akafamba. Naapo mbungano yavona izvo zvakaitwa ndi Pauri yakadanijira yechiti, ngo rurimi rwo Chirikoniya: “Zvimwari zvakabzuka kwetiri, zvino muemo wo vandhu.” Navo vakaduja Bharnabha kuti, Jupiteri, na Pauri, kuti ndi Mekuri, ngokuti iye wayiva muvereketi mukuru. No mupristi wa Jupiteri uwo themperi rake rayiva pamberi po dhoropa, wakazisa n'ombe no maruva pa musuvo, wayida kuyita mubairo kwavari, pamwepo no mbungano. Asi apo vapostori Bharnabha na Pauri vayinga vazwa, vakamwesa zvokusimira zvavo, vakagogoma kuenda pakati po mbungano, vechidanijira vechiti: “Vanarume, munoita izvi ngenyi? Isisuvo tiri vandhu kudari ndimwi, tinozisa kwomuri masoko akanaka kuti mutenderuke kubva kuno izvi zvisina shwiro, kuviya kuna Mwari unopona, uwo wakarura denga, no nyika, no jombe, no izvo zvese zviri mukati mwazvo. Uwo ngomikuvo yo majinja akapinda wakaatendera ese kuti afambe ngo njira jao. Asi aazivi kusiya asina uchapupu pachake, echiita zvakanaka, echimupa mvura inonaya kubva mu denga, no kukotora zvokuha zvakawanda, echizarisa mwoyo yenyu ngo zvokuha, no kudakara.” Pikija vakavereketa izvi, zvakavanesera kurambisa mbungano kuti isazopira mudiro kwavari. Asi kwakaguma apo vaJudha vechibva Antiyoki no Ikoniyo, navo vakaonga mbungano, vakafura Pauri ngo mapuwe, vakamukweva kumubudisa kunja kwo dhoropa, vechipinimija kuti wafa. Asi vajiji vaungana kumutendeneja, wakamuka, akanghwina mu dhoropa; no chimangwanani wakaenda na Bharnabha Dherbhe. Naapo vayinga vachumaira vhangeri mu dhoropa iro, vakayita vajiji vazhinji, vakapetuka Ristriya no Ikoniyo no Antiyoki, vechigwinyisa mweya wo vajiji, vechivapota kuti vavangirire kugara mukutenda, nokuti kunosisira kuti tinghwine mu Umambo hwa Mwari ngo kupotya matambujiko akawanda. Naapo vayinga vagaja vakuru muzviara zvese, vakakumbira ngokuera kuha, vakavapira kuna Mambo wo vayinga vakatenda kwaari. Navo vakaparura mu Pisidhiya, vakaguma Pamfriya. Naapo vayinga vavereketa izwi mu Perga, vakabzuka kuenda Atariya; no kubva apo vakahluza kuenda Antiyoki, apo po vakapirwa munyasha ja Mwari, kuyita mushando uwo wo vayinga vapeja. Naapo vayinga vaguma, vakaunganija chiara pamwepo, vakashumira zvese zvaakayita Mwari ndivo, no njira yaakabewurira ndiyo vo majinja musuvo wo kugonda. Navo vakagara apo no vajiji mukuvo wakareba. Vandhu vakatikuti vakabzuka vechibva Judhiya, vakajijisa vakoma, vechiti: “Ngo kunja kwokuti muchekwe, kudari ngo chirovejeso cha Mosi, amungaponeswi.” Naapo Pauri na Bharnabha vaitirana hasha no kubvunjisana navo, vakoma vakasana Pauri na Bharnabha, no vamweni vakatikuti kuti vakwire Jerusarema kuna vapostori no vakuru ngoiyi ndava. Naava vechitumwa ngo chiara, vakafamba ngo mu Fenike no mu Samariya, vechiparajira kutenderuka kwo vo majinja, navo vakayita kuti vakoma vese vadakare kakurutu, naapo vaguma Jerusarema, vakaashihwa ngo chiara no vapostori no vakuru, navo vakaverenga zvese zvayinga ayita Mwari ndivo. Asi vakamiruka vamweni vo rusinga rwo vafarisi, avo vakatenda, vechiti: “Kunosisira kuti vachekwe, no kupangwa kuti vangwarire Mipango ya Mosi.” Vapostori no vakuru vakaungana kuti vajijisane ngoiyi ndava. Kwakaitika vachapshakisisa kakurutu, Pedru wakamuka, akati kwavari: “Hama, munoziva kuti kubvira mazuva okutanga Mwari wakatsanangura pakati penyu kuti ngo kubudikija ngo muromo wangu vo majinja vazwe vhangeri, vatende. Mwari uwo unoziva mwoyo, wakayita chapupu ndivo, ngo kuvapa Mweya Wakachena kudari ngo zvaakayita kwetiri; naye aazivi kuyita mupauko pakati pedu navo, echichenesa mwoyo yavo ngo kugonda. Ndizvo zvino, munoeja ngenyi Mwari, ngo kudira kanga mu musipa mwo vajiji, yo vasikazivi kukona kutwara majibaba edu nokuti isisu. Asi tinotenda kuti tinoponeswa ngo nyasha ja Mambo Jesu kudari ndivo.” No mbungano yese yakanyarara, yakapurutana kuna Bharnabha na Pauri vechiverenga zvivoniso no mishamiso zvaakayita Mwari ndivo pakati po vo majinja. Ngosure vakanyarara, Jakobe wakapingura, echiti: Vanarume, hama, mwechindizwanyi. Simoni wadurujira njira yaakatanga kufambira Mwari ndiyo kuno vo majinja, kutora kwaari vandhu vozina rake. No mazwi ovaprofeti anotenderana no izvi; kudari ngo zvakatahwa. “Ngosure kwo izvi ndinozohwirira, ndinozovakisazve ugaro hwa Dhavhidha hwakapwanyika, neni ndinozovakisazve matongo ahwo, ndinozohuimisa. Kuti vakasara vo vandhu avo vamupshake Jehovha Mambo, no vo majinja ese, avo vanodanijwa ngo zina rangu, unonanga Jehovha uwo unoyita izvi zvese. Zvinozivikanwa kuna Mwari, mishando yake yese kubvira mukutanga kwo nyika.” Ndizvo kugura kwangu kuri kuti tisazotambuja avo vo majinja vanotenderukira kuna Mwari; asi kuti tivatarire kuti varege kusvipiswa ngo zvemiezaniso yo kudira, no kuomba, no kubva kuno zvinojipwa no ngazi. Ngokuti kubvira kumibarihwana yokare, Mosi unavo ku madhoropa ese vanomuchumaira, echijijwa mu nyumba jo kudira masabatha ese. Naapo kwakavoneka kwakanaka kuno vapostori no vakuru pamwepo no chiara chese, kuti vatsanangure vanarume kubva pakati pavo kuti vavatume kuenda Antiyoki, pamwepo na Pauri na Bharnabha, vayiva Judhasi unozwi Bharsabhasi, na Sirasi; avo vayiva vakuru pakati po vakoma: Vakatara tshamba vechiti: “Vapostori no vakoma vakuru, kuno vakoma vo majinja vari mu Antiyoki, no mu Samariya, no vari mu Kirikiya, tinomuchungamija: Ngokuti takazwa kuti vamweni vakabva kwetiri vakamutambuja ngo mazwi, vechipaukisa mweya yenyu, kwavari atizivi kuvapa mupango; kwakavoneka kwetiri kwakanaka, apo taungana ngo chisungo chimwe, kuti titsanangure vanarume no kuvatuma kwomuri pamwepo no vanodikana vedu, Bharnabha na Pauri. Vandhu avo vakadira kupona kwavo mungozi ngo ndava yo zina ra Mambo wedu Jesu Kristu. Ndizvo tatuma Judhasi na Sirasi, ivo vanozomubvunjazve ngo muromo. Ngokuti kwakavoneka kwakanaka ku Mweya Wakachena no kwetiri kuti tisazomuthikisa mutwaro kupinda izvo zviro zvinosisira; kuti muregere izvo zvinobaihwa miezaniso, no ngazi, no zvinojipwa, no kuomba; nokudari mwechijingwarira kubva kuno izvi, kunozonaka kwomuri. Chisaranyi mwese.” Ndizvo ava vatendehwa kuti vaende, vakabzuka Antiyoki, naapo vayinga vaunganija mbungano pamwepo, vakavapa iyo tshamba. Naapo vayinga vaijija, vakadakara ngo kuembezera kwaiyo. Judhasi na Sirasi vambhwine vayiva vaprofeti, vakaembezera vakoma ngo mazwi mazhinji, no kuvagwinyisa. Ngosure vayinga vagara apo kamukuvo, vakatendehwa ngo vakoma kuti vaende ngo kunyarara kuno avo vakavatuma. (Asi kwakanakira Sirasi kugara apo). Asi Pauri na Bharnabha vakagara mu Antiyoki, vachijijisa no kuchumayira izwi ra Mambo, no vamwenivo vazhinji. Ngosure kwo mazuva akatikuti, Pauri wakati kuna Bharnabha: “Ngatihwirire zvino, tifambire vatendi mu madhoropa ese etakachumaira izwi ra Mambo, tivone kugara kwovanoita.” Asi Bharnabha wayida kutoravo navo Johani, waizwi Marku. Asi Pauri wakakarakaja kuti akuzivi kunaka kutora navo uwo wakajipaura kubva kwavari vari mu Pamfriya asikazivi kuenda navo ku mushando. Jakavapo hasha huru, kwokuti vakaparajana umwe kuno umweni, na Bharnabha wakatora Marku kuenda naye, akahluza kuenda Kupro. Asi Pauri wakatsanangura Sirasi, akaenda, akapihwa kunyasha ja Mambo ngo vatendi, naye wakaparura mu Siriya no mu Kirikiya, echigwinyisa zviara. Naye wakaguma Dherbhe, no Ristriya; vonanyi, kwakavapo mujiji wakatikuti, zina rake raizwi ndi Timoti, mwana wo mujimayi wayiva mujudha, wayiva mutendi, asi baba wake vayiva mugiriki. Iye wakaitihwa mbiri yakanaka ngo vatendi vayigara mu Ristriya no Ikoniyo. Iye Pauri wayida kuti aende naye; naye wakamutora, akamucheka ngo ndava yo vaJudha vayigara mundau ijo: Ngokuti vese vaiziva kuti baba wake vayiva mugiriki. Vachafamba mu madhoropa vakapa kwavari mipango iyo yakaemeswa ngo vapostori no vakuru vayiva mu Jerusarema, kuti vaingwarire. Ndizvo zviara zvakagwinyiswa mukutenda, zvakavangirira kuwandiswa mazuva ese. Navo vafamba ngo pakati po nyika yo Frigiya, no yo Garatiya, vayinga varambiswa ndi Mweya Wakachena kuvereketa izwi mu Aziya. Naapo vayinga vaguma kuyita maringwa no mu Misiya, vakaeja kuenda Bhitiniya, no Mweya wa Jesu auzivi kuvatendera. Navo vakapinda Misiya, vakabzuka kuenda Trowadha. No chivoniso chakavoneka usiku kuna Pauri; kwayivapo mundhu wo Makedhoniya echiyima, echivapota, echiti: “Ambukanyi kuviya Makedhoniya, mutibesere.” Naapo iye ayinga avona chivoniso, paripo takaeja kuda kuenda Makedhoniya, techigura kuti Mwari wakatidanija kuti tichumaire vhangeri kwavari. Ndizvo techibva Trowadha, takaruramisa kuhluza kuenda Samotreki, na ngo zuva raitevera, takaenda Neapori. No kubvapo takaenda mu Firipu, iro riri dhoropa ro Makedhoniya, raitongwa ngo vaRoma. Nesu taiva mu dhoropa iro techigara mazuva akatikuti. Na ngo zuva ro sabatha, takabuda kuenda kunja kwo musuvo wayiva pambhiri po murambo, apo po taipinimija kuti payiva no ndau yo vairovejera kukumbirirapo; takagara pasi tikavereketa kuno majimayi ayinga aungana. No mujimayi wakatikuti zina rake raizwi Ridhiya, mutengesi wo machira akapshukuruka, wo dhoropa ro Tiatira, uwo waidira Mwari, wakatizwa. Uwo Mambo wakabewura mwoyo wake kuti apurutane izvo zviro zvakavereketwa ndi Pauri. Kwakati abhapatiswa no vo nyumba yake, wakapota kwetiri, echiti: “Kudari mwandiverenga kuti ndiri unogondeka kuna Mambo, viyanyi munghwine mu nyumba mwangu, mugaremwo.” Naye wakationga. Kwakaitika, tichaenda kundau yo kukumbira, musikana wakatikuti, wayiva no mweya wo kufembera, waizisa mare yakawanda kuno veno vake ngo kufembera, wakashongana nesu. Iye atevera sure kwa Pauri nesu, wakadanijira, echiti: “Ava vandhu vari varanda va Mwari Uri panyezuru po zvese, avo vanoteketesa kwomuri njira yo ruponeso.” Wakayita izvi mazuva mazhinji. Asi Pauri, echitambujwa kakurutu mu mweya mwake, wakakunukuka, akati kuno mweya uwo: “Ndinokupanga ngo zina ra Jesu Kristu kuti ubude kwaari.” Nawo wakabuda ngo nguva iyo. Asi apo majimambo ake aziva kuti magondero okuwana mare avo ayinga apera, vakabata Pauri na Sirasi, vakavakweva kuenda navo pandau yo musika pamberi po vatongi. Naapo vavaviisa kuna majimambo, vakati: “Ava vandhu vari vaJudha vanotambuja dhoropa redu. Vanoteketesa zvirovejeso zvisikatendehwi kuti tizviashire, nokuti kuzvingwarira, tiri vaRoma.” No mbungano yakavamukira yese; no majimambo akavamwesera zvokufuka zvavo, no kupanga kuti varohwe ngo ndonga. Naapo vayinga vavarova kazhinji, vakavakonyera mu guniya, vechikohomejisa mungwariri wo mabhanditi kuvangwarira ngo kugwinyisisa. Iye akohomejiswa kudaro, wakavakonyera mu guniya riri ngo mukati wakasunga tshoka javo ngo matanda. Kunonga paapakati po usiku Pauri na Sirasi vaikumbira no kuemba kukuja Mwari, no mabhanditi aivaporutana. Paripo kwakaitika kuzungunyika kukurutu kwo nyika, kwokuti majiro o nyumba yo guniya akatsukunuswa; paripo misuvo yese yakabewurwa; no zvisungo zvo mundhu wese zvakasununguhwa. No mungwariri wo mabhanditi, amuswa muhope, echivona misuvo yo guniya yabewuka, wakabvomora shoti yake, inga oda kujiuraya, echipinimija kuti mabhanditi ayinga atiza. Asi Pauri echidanijira ngo izwi guru, akati: “Usajishaishira, ngokuti tese tiri muno.” Asi iye akumbira zvivheneko, wakanghwina ngo kunyanduka, echihuta ngo kutya, wakawira pamberi pa Pauri na Sirasi. Wakavabudisa kunja, akati: “Majimambo, kunosisira kuti ndiitenyi kuti ndiponeswe?” Navo vakati: “Tenda Mambo Jesu, newe unozoponeswa, iwewe no vo nyumba yako.” Navo vakavereketa kwaari izwi ra Mwari no kwavari vese vayiva mu nyumba mwake. Wakavatora, ngo nguva iyo yo usiku, akashamba muzvimbiri yavo. Wakabhapatiswa paripo, iye no vake vese. Naye wakavanghwinisa mu nyumba mwake, akavanasirira zvokuha pa thafura, akadakara kakurutu, no vo nyumba yake yese, vayinga vatenda Mwari. Asi apo kwaeja, majimambo akatuma mapurisa, vechiti: “Varegeyi avo vandhu kuti vaende.” No mungwariri wo mabhanditi wakananga mazwi aya kuna Pauri, okuti: “Majimambo atuma izwi rokutendera kuti muende; ndizvo zvino, budanyi, muende ngo kunyarara.” Asi Pauri wakati kwavari: “Vakatirova pamberi po vandhu vese, tiri vasikazivi kutongwa ndava, tiri vandhu vari vaRoma, navo vakatikonyera mu guniya; zvino votibudisa ngo kufishika here? Haiwa! Ngo gwinyiso, asi ngavaviye vatibudise vambhwine.” Mapurisa akaverenga aya mazwi kuno majimambo, navo vakatya apo vazwa kuti vayiva vaRoma, vakaviya, vakapota kwavari, naavo vavabudisa kunja, vakakumbira kwavari kuti vabve mu dhoropa iro. Naapo vayinga vabuda mu guniya, vakanghwina mu nyumba ya Ridhiya; naapo vavona vakoma, vakavagwinyisa, vakabvapo. Zvino vaparura Amufipori na Aporoniya, vakaguma Tesaronika, apo payiva no nyumba yo kudira yo vaJudha. Na Pauri, kudari ngomuitiro wake, wakanghwina kwavari, na ngo masabatha matatu wakapangana navo ngo matahwa. Echidurujira no kugwinyisisa kunanga kuti kwaisisira kuti Kristu atambujwe no kumukazve kwo vakafa, nokuti, Uwu Jesu wo ndinochumaira kwomuri, uri Kristu. No vamweni vavo vakaongwa, vakaiyana na Pauri na Sirasi; zve, no mbungano huru yo vagiriki vaidira, no vazhinji vo majimayi aireremejeka. Asi vaJudha, vayiva no ndurumwa, vakatora vandhu vakashata vari vapepesheki, navo vechiunganija mbungano, vakayita kuti dhoropa rive no hohoho; navo vakarwisa nyumba ya Jasoni, vakaeja kuvabudisa kuno vandhu. Naapo vasikazivi kuvawana, vakakweva Jasoni no hama jakatikuti pamberi po vatongi vo dhoropa, vechidanijira, vechiti: “Ava vanoshaishira nyika, vatoguma pano. Avo Jasoni wakavaashira, navo vese vanoyita zvinopesana no zviemeso zva Khesari, vechinanga kuti uripo mambo umweni ndi Jesu.” No mbungano no vatongi vo dhoropa vakakaruka apo vazwa izvi. Naapo vayinga vatora chibatiso kubva kuna Jasoni, nokune vamweni, vakavatendera kuti vaende. Paripo vatendi vakatuma Pauri na Sirasi usiku kuti vaende Bhereya: Avo apo vagumeyo vakanghwina mu nyumba yo kudira yo vaJudha. Zvino ava vayinga vakapinda kururama kuno vo Tesaronika kwokuti vakaashira izwi ngo kutendera kwese kwo mupinimijo, vechipshakisisa matahwa mazuva ese kuvona kuti izvi zvakadaro here. Ndizvo vazhinji vakatenda, no majimaizve aireremejeka o vagiriki, no vanarume vazhinji. Asi apo vaJudha vo Tesaronika vayinga vaziva kuti izwi ra Mwari rakateketeswa ndi Pauri mu Bhereya, vakagumapovo vechiveruja no kutambuja mbungano. Paripo vatendi vakatumira Pauri kuti aende ku jombe: Asi Sirasi na Timoti vakavangirira kugara apo. Asi avo vakaperekeja Pauri vakamugumisa Atena: Naapo vakapangwa kuti vadanije Sirasi na Timoti kuti vaviye kwaari ngokukasira, vakaenda. Zvino Pauri achavagarira mu Atena, mweya wake wakatambujika zvikuru, echivona dhoropa rakazara ngo miezaniso yo kudira. Ndizvo wakaphikisana no vaJudha naavo vaidira mu nyumba yo kudira, no mundau yo musika mazuva ese wakapangana naavo vakashongana naye apo. No vamweni vakatikuti vo vaEpikurio no vaStoiko, vaida ungwaru, vakashongana naye. No vamweni vakati: “Uwu muvereketi wo zvisina shwiro unoti kudini?” Vamweni vakati: “Unonga muteketesi wo zvimwari zvo nyikanja, ngokuti iye wakachumaira kwavari ndi Jesu, no kumuka kwo vakafa.” Navo vakamubata, vakamuzisa pamberi po Ariyopagu, vechiti: “Tingaziva here kuti uku kujijisa kupsha kunovereketwa ndiwe kunonangenyi? Ngokuti unozisa zviro zvisikazwiki kunjeve jedu: Ndizvo tinoda kuziva kuti izvi zvinoti kudini.” Zvino vese vo Atena no vo nyikanja vayiva zvigarandimo apo avazivi kupejera mukuvo wavo kuzviro zvimweni, asi kwega kunanga nokuti, kuzwa chiro chipsha. Na Pauri wakayima pakati po Ariyopagu, wakati: “Imwimwi vanarume vo Atena, ngo zviro zvese ndinovona kuti munonyanya kudira. Ngokuti ndichapinda, ndechiringira zvo munodira, ndavonazve altari rine aya matahwa: ‘KUNA MWARI USIKAZIVIKANWI,’ ndizvo uwo wo munodira musikamuzivi, uwu ndiye wo ndinoteketesa kwomuri. Mwari uwo wakarura nyika nazvo zvese zviri mukati mwayo, iye uri Mambo wo mu denga no wo nyika, aagari mu mathemperi akavakwa ngo nyara; zve aashandihwi ngo nyara jo vandhu, kudari ngo unotama chiro, kwechivoneka kuti iye unovapa vese kupona, no kufema, no zviro zvese; naye wakayita majinja ese o vandhu kubva kuna umwe, kuti vagare panyezuru po hope yo nyika, wakaemesera nguva javo no migano yo kugara kwavo. Kuti vapshake Mwari, kuti pamweni vambarambasire, vamuwane. Pikija asiri ndhambo akadi kubva pana umwe ngaumwe wedu; ngokuti kwaari tinopona, no kufamba, tino undhu hwedu, kudari ngo zvo vakavereketazve vamweni vakatikuti no vatari venyu vo nduyo: Ngokuti isisu tiri mibarihwana yake. Ndizvo tiri mibarihwana ya Mwari, akudikani kuti tipinimije kuti uMwari hunonga hwakadari ngomukore, nokuti sirivha, nokuti buwe rakachechwa ngo nghwazi no mazano o vandhu. Ngo mikuvo yo kusikaziva uku, Mwari aazivi kuringisisa; asi zvino unopangisisa vandhu kuti vese kundau jese, vatenderuke. Kwechivoneka kuti wakaemesa zuva raanozotonga ndiro nyika ngo kururama ngo uwo mundhu waakagaja; uwo waakagwinyisa ku vandhu vese ngo kumumusa kwo vakafa.” Asi vazwa ngo kumuka kwo vakafa, vamweni vakayita jee; asi vamweni vakati: “Tinozokuzwazve ngoiyi ndava.” Ngokudaro Pauri wakabuda kubva pakati pavo. Asi vandhu vamweni vakanamatira kwaari, vakatenda: Pakati pavozve Dhionusi muAriopagu, no mujimayi zina rake raizwi ndi Dhamarisi no vamweni navo. Sure kwo izvi wakabva Atena wakaguma Korinte. Naye wakavona mundhu muJudha zina rake raizwi ndi Akwira, wayiva mundhu wo Pontu ngo kubahwa, echibva ngo uwo mukuvo Itariya, pamwepo no mukaji wake Prisira, ngokuti Kraudhiyo wayinga apanga kuti vaJudha vese vabve mu Roma: Naye wakaenda kwavari; ngokuti iye wayiva no mushando wakatojana, wakagara navo, vakashanda; ngokuti mushando wavo wayiva wo kuruka matende. Naye wakaphikisana navo mu nyumba yo kudira mazuva ese o sabatha, akaonga vese vaJudha no vagiriki. Asi apo Sirasi na Timoti vayinga vaviya vechibzuka kubva Makedhoniya, Pauri avangirijwa ngo izwi, wakapupura ku vaJudha kuti Jesu uri Kristu. Kwakati vakanija no kutuka, iye wakapumbhuja zvokusimira zvake, akati kwavari: “Ngazi yenyu ngaive panyezuru po musoro yenyu; ndakachena inini, kubvira zvino ndinozoenda kuvomajinja.” Naye wakabvapo, akanghwina mu nyumba yo mundhu wakatikuti zina rake raizwi ndi Titosi Justu, uwo waidira Mwari, nyumba yake yayiva phedo po nyumba yo kudira. Na Krispu, mukuru wo nyumba yo kudira wakatenda Mambo, no vo nyumba yake yese; no vazhinji vo vaKorinte, vechizwa, vakatenda, vakabhapatiswa. Mambo wakati kuna Pauri ngo chivoniso usiku: “Usatya, asi vereketa, usanyarara. Ngokuti ndinewe, akuna mundhu unozokumukira kukuremaja: Ngokuti ndine vandhu vakawanda mu dhoropa iri.” Naye wakagara apo gore no mweji mitandhatu, echijijisa izwi ra Mwari pakati pavo. Asi apo Gariyo wayiva mutongi wo Akaiya, vaJudha vakamukira Pauri ngo chisungo chimwe, vakaenda naye pamberi po chigaro cho kutonga. Vechiti: “Uwu mundhu unoonga vandhu kudira Mwari ngo njira inosiyana no Mipango.” Apo Pauri wayida kubewura muromo wake kuvereketa, Gariyo wakati ku vaJudha: “Kudari ngo gwinyiso yayiva ndava yo kushata, nokuti yo kumukira, imwimwi vaJudha, kungava pambhene kuti ndimusengerere. Asi kudari iri ndava yo mubvunjo, yo mazwi no yo mazina, no yo mipango yenyu, jivonerenyi kuno izvo imwimwi; andidi kuyita mutongi wo ndava jakadaro.” Naye wakavambirimbija kubva kuchigaro cho kutonga. Navo vese vakabata Sositeni, mukuru wo nyumba yo kudira, vakamurova pamberi po chigaro cho kutonga. Na Gariyo aazivi kuwana ndava na chimwe cho izvo. Naapo Pauri ayinga agara apo mazuva mazhinji ngosure kwo izvi, wakaeneka vatendi, akahluza kubva apo kuenda Siriya, vanaye Prisira na Akwira, uwo ayinga apahwa musoro wake uri mu Kenekriya; ngokuti wayinga akapika mbhiko. Asi wakaguma Efesu, wakavasiya apo; asi iye ambhwine wakanghwina mu nyumba yo kudira, akaphikisana no vaJudha. Naapo vakakumbira kuti agare navo mukuvo wakapinda kureba, aazivi kutenda; asi wakavaeneka, echiti: “Ndinozoviyazve kwomuri, kudari Mwari echitenda.” Wakahluza kubva Efesu. Naapo ayinga aguma Khesariya, wakakwira kuenda koochungamija chiara, akabzuka kuenda Antiyoki. Agara mukuvo apo, wakabveyo, akaparura nyika yo Garatiya, no Frigiya ngo kutevererana, echigwinyisa vajiji vese. Zvino mujudha zina rake raizwi Aporo, muArixandriya ngo kubahwa, mundhu wakajijiswa, wakaviya Efesu; naye wayiva nghwazi mu Matahwa. Uwu wayinga akajijiswa njira ya Mambo; echipisa mu mweya, wakanasa kuvereketa no kujijisa ngo ndava ya Jesu, echiziva ngo rubhapatiso rwa Johani rwega. Naye wakatanga kuvereketa ngo kushinga mu nyumba yo kudira, asi apo Prisira na Akwira vamuzwa, vakamutora kwavari, vakamupangijira njira ya Mwari ngo kupinda kuziva. Naapo, iye wayida kupinda kuenda Akaya, vatendi vakamushingisa, vakatara kuno vajiji kuti vamuashire. Naapo ayinga aguma, wakabesera kakurutu avo vakatenda ngo nyasha. Ngokuti wakanasa kunyisa vaJudha pambhene, echivonisa ngo matahwa kuti Jesu uri Kristu. Kwakaitika apo Aporo uri mu Korinte, Pauri ayinga apeja kuparura nyika jakakwira, wakaguma Efesu, akavona vajiji vakatikuti; naye wakati kwavari: “Mwakaashira Mweya Wakachena here apo pomwakatenda?” Navo vakati kwaari: “Haiwa, atizivi no kutongozwa kuti uripo Mweya Wakachena.” Naye wakati: “Mwakabhapatiswa ngo rubhapatiso rwenyi?” Navo vakati: “Ngo rubhapatiso rwa Johani.” Pauri wakati: “Johani wakabhapatisa ngo rubhapatiso rwo kutenderuka, echinanga kuna vandhu kuti vatende uwo waizoviya sure kwake, kunangira Jesu.” Naapo vazwa izvi, vakabhapatiswa ngo zina ra Mambo Jesu. Naapo Pauri adira nyara jake panyezuru pavo; Mweya Wakachena wakaviya panyezuru pavo, navo vakavereketa ngo ndimi, vakaprofeta. Ndizvo vese vayiva vanonga vanarume vari gumi na vaviri. Naye wakanghwina mu nyumba yo kudira, wakavereketa ngo kushinga ngo mukuvo wo mweji mitatu, echiphikisana navo no kuvaonga ngo ndava yo zvo Umambo hwa Mwari. Asi apo vamweni vakaomesa mwoyo, no kuramba kutenda, vechivereketa zvakashata ngeiyo Njira, pamberi po vandhu vazhinji, wakabva kwavari, akaparajanisa vajiji, echipangana zuva ngo zuva muchikora cha Tiranu. No izvi zvakavangirira kuitwa mukuvo wo makore maviri; kwokuti avo vese vayigara mu Aziya vakazwa izwi ra Mambo, vese vaJudha no vagiriki. Na Mwari wakayita mishamiso yo simba ngo nyara ja Pauri. Kwokuti kubva kumuviri wake kwakatohwa madhuku nokuti machira, kuenda nazvo kuno avo vaihwara, no ndhenda javayiva najo jakabva kwavari, no mweya yakashata yakabuda kwavari. Asi vamweni vakatikuti vo vaJudha vayiva vapepesheki, vari n'anga vakaeja kudanija panyezuru peavo vayiva no mweya yakashata zina ra Mambo Jesu, vechiti: “Ndinokupikisa ndi Jesu uwo unochumaihwa ndi Pauri.” Vayiva vana vanomwe vo umwe waizwi ndi Sikevha, mujudha, uri mupristi mukuru, avo vakayita izvi. No mweya wakashata wakapingura, ukati kwavari: “Jesu ndinomuziva, na Pauri ndinomuziva; asi imwimwi muri yani?” No mundhu wayiva no mweya wakashata wakavanyandukira, akavanyisa vese, avakurira, kwokuti vakatiza kubva munyumbemwo vari mutitinini, vakaremajwa. No izvi zvakazivikanwa kuna vese vaJudha no vagiriki vayigara mu Efesu, no kutya kwakavagumira vese. No zina ra Mambo Jesu rakakuriswa. Vazhinji vavo vakagonda, vakaviya vechitenda, no kupangijira zviito zvavo. No vazhinji veavo vaishandisa zvo masaramuso, vakazisa mabhuku avo pamwepo, vakaapisa mukuvona kwavo vese, navo vakaverenga mutengo wao, vakavona kuti wayiva makumi mashanu o zviuru (50.000) o zviguhwa zvo sirivha. Ngo njira iyi izwi ra Mambo rakakura ngo simba, rakanyisa. Nazvino ngosure kwokupera kwo izvi, Pauri wakaemesa mu mweya mwake kuti ngosure kwokuti afamba Makedhoniya, no mu Akaya, aende Jerusarema, echiti: Ngosure kwokuti ndagumeyo, kunosisira kuti ndivone Roma naro. Naapo ayinga atuma vaviri veavo vaimudetsera kuti vaende Makedhoniya, ndi Timoti na Erastu, iye ambhwine wakagara mukuvo mu Aziya. Ngo uwo mukuvo kwakamuswa bope guru ngo ndava yo iyo Njira. Ngokuti mundhu wakatikuti waizwi Dhemetriyo, mupfuri wo sirivha, waipfura miezaniso yo sirivha ya Dhiana, wakapfumisa vapfuri ngo mare yakawanda. Avo, iye wakavaunganija pamwepo no vashandi vo mushando umwewo, akati: Vanarume, munoziva kuti ngo uwu mushando tinopfumiswa ndiwo. Nemwi munovona no kuziva kuti uwu Pauri wakaonga no kutenderuja vandhu vazhinji, haiwa mu Efesu mwega, asi mu nyika yese yo Aziya, echiti, kuti akuna zvimwari zvakaitwa ngo nyara. No ngozi iripo andiopi yega yokuti uwu mushando wedu ushoohwe; asi kuti themperi ro chimwari chikuru Dhiana riverengwe kuti arina shwiro, nokuti ukuru hwake huparajwe, uwo unodihwa ndivo vese mu Aziya no mu nyika jese. Apo vazwa izvi vakazara ngo ushungu, vakadanijira, vechiti: “Uri mukuru Dhiana wa vaEfesu.” No dhoropa rakazara ngo hohoho; navo vakagogoma ngo chisungo chimwe kunghwina mundau yo kutambira, vayinga vabata Gaiyo na Aristaku, vayiva vanarume vo Makedhoniya, avo vaiperekeja Pauri muhwendo hwake. Naapo Pauri echida kunghwina kuno vandhu avo, vajiji avazivi kumutendera. No vamweni vakatikuti vo nduna jo Aziya vayiva shamwari jake, vakatuma kwaari, vakamupota kuti aregere kunghwina mundau yo kutambira. Ndizvo vamweni vakadanijira chiro chimwe, no vamweni chimweni; no mbungano yakakangaijwa, uzhinji hwavo avazivi kuziva chovakaunganira. Navo vakabudisira mberi Arixandreu kubva pakati pochiunga, vaJudha vechimusukumijira mberi, na Arixandreu wakakopera ngo nyara, echida kujirwira kuno vandhu. Asi apo vaziva kuti uri mujudha, vese ngo izwi rimwe vakadanijira kwo mukuvo wayida kuyita nguva mbiri: “Uri mukuru ndi Dhiana wo vaEfesu.” Apo mutari wo dhoropa anyararisa chiunga, wakati: “Imwimwi vanarume vo Efesu, uri pari mundhu usikazivi kuti dhoropa ro Efesu riri mungwariri wo themperi ra Dhiana mukuru, no muezaniso wakawa kubva kuna Jupiteri? Ndizvo kwechivoneka kuti izvi azvingarambiki, kunodikana kuti munyarare, musikaiti chiro musati mwapinimija. Ngokuti imwimwi mwazisa pano ava vanarume, vasiri majongoni o mathemperi, nokuti vatuki vo chimwari chedu. Ndizvo kudari Dhemetriyo no vapfuri vanaye, kudari vane ndava kuno mundhu nokuti ngouri, aripo mazuva o kuvereketa ndava, aripo no masamukuru. Ngavamangarirane umwe no umweni. Asi kudari munopshaka ngo ndava yo chiro chimweni, chinozoguhwa ngo makota akaemeswa. Ngokuti ngo gwinyiso tine ngozi yo kuitihwa ndava, ngo ndava yo bope raitwa nyamasi, apana shwiro yotingapa kupembeja bope iri.” Naapo ayinga avereketa kudaro, wakaparaja chiunga. Ngosure bope ranyarara, Pauri wakadanija vajiji, no kuvapanga, wakavaeneka, wakabvapo kuenda Makedhoniya. Naapo afamba ndau ijo, echivapangisisa ngo mazwi mazhinji, wakaguma Giriki. Naapo apeja mweji mitatu arimwo, no vaJudha vayinga vamutandira zano, apo achada kuhluza kuenda Siriya, wakajiemesera kuti unozohwirira echifamba ngo mu Makedhoniya. Vakamuperekeja kuguma Aziya, vayiva Sapatro wo Bhereya mwana wa Puro na Aristaku, na Sekundo vo Tesaronika, na Gaiyo wo Dherbhe, na Timoti; na Tikiku na Trofimu vo Aziya. Asi avo vakatungamira mberi, vakatigarira mu Trowa. Nesu takahluza kubva Firipi ngosure kwo mazuva o chimanda chisina mumera, takaguma kwavari mu Trowa ngosure kwo mazuva mashanu; takagara apo mazuva manomwe. Na ngo zuva ro kutanga ro vhiki, apo taungana kugura chimanda, Pauri wakavereketa kwavari, echida kubvapo ngo zuva raitevera; wakarebesa kuvereketa kwake mbhera pakati po usiku. Zvayivapo zvivheneko zvakawanda mukamera ro muturika apo potakaungana. Jaha rakatikuti raizwi ndi Utiku rayiva rakagara pa fasitera, rakanyiswa ngo hope jo majikirira; na Pauri acharebesa kuvereketa kwake, iro rechinyiswa ngo hope jaro, rakawa kubva kumuturika wochitatu, navo vakarimusa, rafa. Na Pauri wakabzuka, akakotama panyezuru pake, akamufungatira, akati: “Musaita joweyowe; ngokuti uchapona.” Naapo akwira mu muturika, wakagura chimanda, akaha, no kuvereketa navo mukuvo wakareba, mbhera kwakaeja, ngokudaro wakabvapo. Navo vakazisa jaha rechizwa, vakaembezehwa kakurutu. Asi isisu, takatanga kuenda ngo ngarava, takahluza kuenda Asoni, apo techigarira kuashira Pauri; ngokuti iye wayinga agura kudaro, achida pachake kufamba ngo tshoka. Naapo iye ashongana nesu mu Asoni, takamuashira, tikaguma Miturani. Techihluza kubvapo ngo zuva raitevera, takaguma kundau inoita maringwa no Kiyo, no zuva raitevera, takaguma Samo; na ngo zuva raitevera, takaguma Miretu. Ngokuti Pauri wakagura kuhluza kudarika Efesu, kuti asazogara mukuvo mu Aziya; ngokuti waikasira, kuti kudari kungaitika ungazovapo Jerusarema ngo zuva ro Pentekosti. No kubva Miretu wakatumira Efesu, akadanija kwaari vakuru vo chiara. Naapo vaguma kwaari, wakati kwavari: Imwimwi mwambhwine munoziva kuti kubvira ngo zuva ro kutanga ro ndakanghwina mu Aziya, kugara kwendakaita nemwi mukuvo wese, ndechishandira Mambo ngo kupfava kwese kwo mupinimijo, na ngo musoji, na ngo kuejwa ukwo kwakandigumira ngo ndava yo kutandira mazano kwa vaJudha. Nokuti no njira yo ndisikazivi kuregera kuteketesa kwomuri chiro chinomubesera, ndechimujijisa pambhene, no kubva ku nyumba kuenda ku nyumba imweni, ndechiyita chapupu kwavari vese vaJudha no vagiriki kutenderuka kuna Mwari, no kugonda kuna Mambo wedu Jesu Kristu. Nazvino ringiranyi, ndechisungwa mu mweya, ndinoenda Jerusarema, ndisikazivi izvo zvinondigumira apo. Kwega kuti Mweya Wakachena unopupura mu madhoropa ese kuti zvisungo no matambujiko zvinondigarira. Asi andiverengi kupona kwangu inga chiro chinodikana kwendiri, kuti ndipeje muhambo wangu, no mushando wo ndakaashira kuna Mambo Jesu kupupura vhangeri ro nyasha ja Mwari. Nazvino, vonanyi, ndinoziva kuti imwimwi mwese mwendakahambira mukati mwenyu ndechichumaira Umambo hwa Mwari, amuchazovonizve hope yangu. Ndizvo ndinopupura kwomuri ngo iri zuva kuti ndakachena kuno ngazi yenyu yese. Ngokuti andizivi kuregera kumubvunja kwese kupanga kwa Mwari. Jingwarirenyi no mushambi wese wo mwakaemesehwa panyezuru pawo ndi Mweya Wakachena, kuti muyite vavonisi vawo, kuti muhushe chiara cha Mwari chaakatenga ngo ngazi yake ambhwine. Ndinoziva kuti ngosure kwokubva kwangu, mathika akashata anozonghwina pakati penyu, asikaitiri nyasha mushambi; no pakati penyu mwambhwine, panozobuda vandhu, vechivereketa zvinopaukisa kukweva vajiji kuti vavatevere. Ndizvo rindanyi mwechicherecheja kuti ngo mukuvo wo makore matatu andizivi kuregera kupanga vese usiku no masikati, ndechichema musoji. Nazvino ndinomupira kuna Mambo, no kuizwi ro nyasha jake, iro rine simba ro kumuvaka, no kumupa ndhaka mukati mwavo vese vakacheneswa. Andizivi kutongoemura sirivha, nokuti mukore, nokuti zvokufuka zvo mundhu. Imwimwi mwambhwine munoziva kuti iji nyara jakashandira izvo zvo ndaitama, no zvo avo vayiva neni. Ngo zviro zvese ndakamupa chivonero, kuti ngo kushanda kudaro kunosisira kuti mubesere avo vasina simba, no kucherecheja mazwi a Mambo Jesu, kuti wakati ambhwine: “Kunopinda kudakajisa kupa, kuno kuashira.” Naapo avereketa kudaro wakagwadama pasi, akakumbira navo vese. Navo vese vakachema musoji, vakakumbatira pamusipa wa Pauri, vakamuchungamija ngo muromo, vechitambujika kakurutu ngo izwi raakavereketa, rokuti avachazombovonizve hope yake. Vakamuperekeja kuenda ku ngarava. Kwakaitika apo taparajana navo, takahluza ngo kururamisa kuenda Khose, na ngo zuva raitevera takaguma Rodhe, no kubvapo takaguma Patara. Tavona ngarava yaiambuka kuenda Fenike, takanghwinemwo, takahluza. Naapo tavona Kupro, takarisiya ngo kuboshwe, takahluza kuenda Siriya, tikaguma Tire; ngokuti apo ngarava yaiambuswa mitwaro yayo. Techivona vajiji, takagara apo mazuva manomwe. Ava vakati kuna Pauri ndi Mweya Wakachena kuti asazokwira kuenda Jerusarema. Kwakaitika apo tapeja ao mazuva, takabvapo, tikaenda hwendo hwedu; navo vese pamwepo no vanakaji vavo no vana, vakatiperekeja, mbhera takabuda mu dhoropa; techigwadama pambhiripiri po jombe, takakumbira. Naapo taenekana takanghwina mu ngarava, asi ivo vakahwirira kanyi. Naapo tapeja kuhluza kubva Tire, takaguma Toremaidha, nesu takachungamija vatendi, takagara navo zuva rimwe. Na ngo zuva raitevera takabvapo, takaguma Khesariya: Techinghwina mu nyumba ya Firipi muvhangeri, uwo wayiva umwe wo vari vanomwe, takagara naye. Zvino uwu mundhu wayiva no vasikana varongomuna, mbhandwe, avo vaiprofeta. Tichagara apo mazuva mazhinji, kwakabzuka muprofeti waibva Judhiya, unozwi Agabhu. Echiviya kwetiri, atora bhande ra Pauri, wakajisunga tshoka jake, no nyara, akati: Unonanga izvi Mweya Wakachena: Nokudaro vaJudha vari mu Jerusarema vanozosunga mune wo bhande iri, vanozomupira mu nyara jo vo majinja. Apo tazwa izvi, tese, isisu naavo voiyo ndau, takamupota kuti asakwira Jerusarema. Naapo Pauri wakapingura, akati: “Munoitenyi mwechichema no kutambuja mwoyo wangu? Ngokuti ndakanasirira haiwa kusungwa kwega, asi no kufira zina ra Mambo Jesu mu Jerusarema.” Naapo asikazivi kutenda kuongwa, takanyarara, techiti: “Kuda kwa Mambo ngakuitike.” Ngosure kwo aya mazuva, takatora ndhumbi jedu, takakwira kuenda Jerusarema. Vakaendavo nesu vo vajiji vo Khesariya, vechiviya no mundhu unozwi Nasoni wo Kupro mujiji wayiva wokutanga wotaizogara mu nyumba mwake. Naapo taguma Jerusarema, vatendi vakatiashira ngo kudakara. Na ngo zuva raitevera Pauri wakanghwina nesu kuna Jakobe; no vandhu vese vayivapo. Naapo tavachungamija, iye wakaverenguja ngo kutevererana izvo zvaakayita Mwari pakati po vo majinja, ngo kushanda kwake. Naavo apo vazvizwa vakakurisa Mwari; vakati kwaari: “Unovona hama, kuwanda kwo zviuru zvo avo vakatenda mukati mwo vaJudha; navo vese vanobatisisa Mipango.” Navo vakaziviswa kuti iwewe unojijisa vaJudha vese vari mukati mwo majinja kuti varege zva Mosi, wechivabvunja kuti vasacheka vana vavo, nokuti vasangwarirazve zvirovejeso zvo mipango. Ndizvo toitenyi? Ngo gwinyiso vanozozwa kuti iwewe waviya. Ndizvo ita izvi zvo tinozokubvunja: Tine vandhu varongomuna pano vakapika mbhiko; tora ava ujichenese navo, uripire zvese zvavo, kuti vapare musoro yavo: Navo vese vanozoziva kuti akuna gwinyiso kuno izvo zvese zvo vakadurujihwa ndizvo ndiwe. Asi kuti iwewe pachako unonasa kufamba, wechingwarira Mipango. “Asi ngo ndava yo avo vo majinja vakatenda, takatara, techigura kuti vajingwarire kurega zvinobaihwa miezaniso yo kudira, no ngazi, no izvo zvinojipwa, no kuomba.” Naapo Pauri wakatora vanarume avo, ngo zuva raitevera, akajichenesa pamwepo navo, akanghwina mu themperi, echipangijira kuzarisika kwo mazuva okucheneswa mbhera mudiro wakapihwa ngo ndava yaumwe ngaumwe wavo. Naapo mazuva manomwe oda kupera, vaJudha vakabva Aziya, apo vamuvona uri mu themperi vakaveruja mbungano yese, vakamubata, vechidanijira: “Vandhu vaIsraeri, beseranyi; uwu ndiye mundhu unojijisa vandhu vese kundau jese kurwisana no vandhu, no Mipango, no iyi ndau; no kupinda izvi wakazisa vagiriki navo mu themperi, akasvipisa iyi ndau yakachena.” Ngokuti vayinga vakavona Trofimu mu Efesu anaye mu dhoropa, vakapinimija kuti Pauri wakamunghwinisa mu themperi. No dhoropa rese rakaverujwa, no vandhu vakagogoma kuungana pamwepo; navo vakabata Pauri, vakamukwevera kunja kwo themperi paripo misuvo yakakonywa. Vachapshaka kuda kumuuraya, masoko akaguma ku nduna huru yo chikwata cho masocha, kuti Jerusarema rese rayiva no hohoho. Paripo uwo wakatora masocha no nduna jo mazana, akagogoma kubzuka kwavari; naavo apo vavona nduna huru no masocha, vakaregera kurova Pauri. Naapo nduna huru yakakwedera, ikamubata, yakapanga kuti asungwe ngo maketani maviri; yakamubvunjisa kuti iye wayiva yani, no icho chaayinga ayita. No vamweni vakadanijira chiro chimwe, no vamweni chimweni, mukati mwo mbungano; naapo akorera kuziva gwinyiso ngo ndava yo hohoho, wakapanga kuti aziswe mujimbahwe. Apo aguma pa matandhijo, zvakaitika kuti wakatwahwa ngo majoni ngo ndava yo kuambana kwo mbungano. Ngokuti uwandu hwo vandhu hwakatevera ngosure, vechidanijira: “Muuraenyi!” Apo vooda kuzisa Pauri mujimbahwe, wakati kuno nduna huru: “Ndingatendehwa here kuvereketa chiro kwouri?” Naye wakati kwaari: “Unoziva chiGiriki here?” Andiwepi here muEgipite, uwo ngo mazuva akapera wakamusa vandhu kumukira, akavakweva kuenda navo mu bani, vanarume vari zviuru zvirongomuna (4.000) vayiva zvigebenga? Asi Pauri wakati: Ndiri mujudha, wo Tarsu ro Kirikiya, wakabahwa mu dhoropa riri guru; neni ndinokupota, kuti unditendere ndiverekete ku vandhu. Naapo amutendera, Pauri echiyima pa matandhijo wakakopera ngo nyara kuno vandhu; naapo kwayivapo kunyarara kukurutu, iye wakavereketa kwavari ngo rurimi rwo chiHebheru, echiti: “Hama no majibaba! Izwanyi zvino kujirwira kwondinoita kwomuri.” Naapo vazwa kuti waivereketa kwavari ngo rurimi rwo chiHebheru, vakapinda kunyarara; naye wakati: “Ndiri muJudha, ndakabahwa mu Tarsu ro Kirikiya, asi ndakakura pano mu dhoropa iri, pa tshoka ja Gamarieri, ndakajijiswa kudari ngo zvirovejeso zvo mipango yo majibaba edu, ndechishingirira kuna Mwari, kudari ngo zvomunoita imwimwi na nyamasi.” Neni ndakatambuja vo iyi Njira mbhera vafe, ndechivasunga no kuvanghwinisa mu guniya vese vanarume no vanakaji. Kudari ngo zvaanondiitira chapupu mupristi mukuru, navo vese vari vakuru. Ndakaashira kubva kwavari tshamba yo kuenda kuna vatendi, ndakaenda mu Dhamaseku, kuti vayivapo ndivaviise Jerusarema, vakasungwa, kuti vatambujwe. Kwakaitika kuti ndichafamba hwendo hwangu, ndechikwedera mu Dhamaseku, kwooda kuyita masikati, paripo kwakajeka kwechibva mu denga kujeka kukuru kwechinditendeneja. Neni ndakawa pasi, ndakazwa izwi rechiti kwendiri: “Sauri, Sauri, unonditambujirenyi?” Ndakapingura: “Uriyani, Mambo?” Naye wakati kwendiri: “Ndiri Jesu wo Nazaretha, uwo wounotambuja.” Naavo vayiva neni ngo gwinyiso vakavona kujeka, asi avazivi kuzwa izwi ro uwo wakavereketa kwendiri. Ndakati: “Ndinozoitenyi, Mambo?” Na Mambo wakati kwendiri: Miruka, uende mu Dhamaseku; naapo unozobvunjwa zvese zvo waemesehwa kuti uite. Naapo ndisikakoni kuvona ngo ndava yo uthende wo kujeka ukwo, ndechikweviwa ngo nyara ngaavo vayiva neni, ndakaguma mu Dhamaseku. No umwe ndi Ananiya, uri mundhu wakarurama kudari ngo kuverengwa kwo mipango, uno mbiri yakanaka mukati mwa vaJudha vese vayigara apo. Uwu wakaviya kwendiri, echiyima phedo pangu, wakati kwendiri, Mukoma Sauri, ashira kuvona kwako. Ngoiyo nguva ndakamuringira. Naye wakati: Mwari wo majibaba edu wakaemesa kuti uzive kuda kwake, no kuvona Uwo wakarurama, no kuzwa izwi rinobva kumuromo wake. Ngokuti iwewe unozoyita chapupu ku vandhu vese, cho izvo zvo wakavona, no zvowakazwa. Nazvino unogarirenyi? Miruka, ubhapatiswe, usukwe kubva mu zvishaishi zvako, wechikumbira ngo zina rake. “Kwakaitika kuti apo ndapetuka Jerusarema, ndechikumbira mu themperi, ndakabatwa mu mweya. Ndakamuvona echiti kwendiri: ‘Kasira, ubude kubva mu Jerusarema, ngokuti avazoashiri chapupu chako ndini.’ Neni ndakati, Mambo, ivo vambhwine vanoziva kuti ndakavakonyera mu guniya no kuvarova mu nyumba jese jo kudira, avo vakatenda kwouri. Naapo ngazi ya Stefano chapupu chako yakaparajwa, ininivo ndaivapo, ndechitendera, no kungwarira zvokufuka zvo avo vakamuuraya. Naye wakati kwendiri: Enda; ngokuti ndinozokutuma kuenda ndhambo kubva pano kuno vo majinja.” Navo vakamupurukira mbhera azovereketa izwi iri, vakadanijira ngo izwi ravo, vakati: “Bvisai mundhu wakadaro pa nyika; ngokuti akusisiri kuti apone.” Vachadanijira, no kukhumura zvokufuka zvavo, vechimburujira bukuta mu denga, nduna huru yakapanga kuti anghwiniswe mujimbahwe, echinanga kuti abvunjisiswe ngo kurohwa. Kuti azive ndava ngoyenyi yo vakadanijira kudaro ndiye. Naapo vamusunga ngo rusinga, Pauri wakati kuno nduna yo zana yayima phedo: Kunotendehwa here kwomuri ngo mipango kuti murove mundhu uri muRoma, asikazivi kunyiswa ngo ndava? Naapo nduna yo zana yazwa, yakaenda kuno nduna huru, yakamubvunja, yechiti: “Unoda kuitenyi ngokuti uwu uri mundhu muRoma.” No nduna huru yakaviya, ikati kwaari: “Ndibvunjei, uri muRoma here?” Naye wakati: Eya. No nduna huru yakapingura, ikati: “Ndakatenga ubahwi uhwu wo kuva muRoma ngo mutengo mukuru.” Na Pauri wakati: “Asi inini ndakabahwa ndakadaro.” Naapo vakada kumubvunjisisa vakabva kwaari ngokukasira. No nduna huru nayo yakatya, apo yaziva kuti wayiva muRoma, ngokuti yayinga yamusunga. Asi ngo zuva raitevera, echida kuziva gwinyiso roicho chaakaitihwa ndava ngo vaJudha, wakamusunungura, akapanga vapristi vakuru no bangano rese kuti vaungane, wakabzusa Pauri akamudira pamberi pavo. Na Pauri echiringisisa bangano, wakati: “Vamuna, vakoma ndakapona ndisina ndava mu mwoyo pamberi pa Mwari mbhera kuguma zuva iri.” No mupristi mukuru Ananiya wakapanga avo vaiyima phedo pake kumurova muromo. Naapo Pauri wakati kwavari: “Mwari unozokurova iwewe biravira rakachena; unogara here kunditonga ngo mipango, no kupanga kuti ndirohwe ngo njira inopesana no Mipango?” Naapo vaiyima phedo vakati: “Unotuka mupristi mukuru wa Mwari here?” Na Pauri wakati: “Ndisaiziva, hama, kuti uri mupristi mukuru; ngokuti kwakatahwa, kuti: Usazovereketa zvakashata ngo mutongi wo vandhu vako.” Asi apo Pauri ayinga avona kuti rupande rwavo rumwe rwaiya vasadhusi no rumweni rwaiya vafarisi, wakadanijira mumbungano: “Vakoma, ndiri mufarisi, mwana wo vafarisi. Ngo ndava yo kugonda kumuka kwo vakafa, ndinotongwa.” Naapo adaro, yakamuswa hasha pakati po vaFarisi no vasadhusi; no chiunga chakaparajana. Ngokuti vasadhusi vanoti, kuti, akuna kumuka kwo vakafa, zve akuna ngirosi, nokuti mweya; asi vafarisi vanotenda izvo zvese. Naapo kwakamuka hohoho huru; vamweni vo vatari, vaitenderana no vafarisi, vakamiruka, vakatukana, vechiti: Atiwani kushata kuno uwu mundhu, zvinenyi, kudari mweya wakavereketa kwaari, nokuti ngirosi? Naapo kwamuswa hasha huru, mujimbahwe mukuru, echitya kuti Pauri unozopfajuhwa ndivo wakapanga masocha kuti abzuke amubvuke ngo simba kubva kwavari no kumujimbahwe. Asi ngo usiku hwaitevera, Mambo wakayima phedo pake, akati: “Wechishinga; ngokuti kudari ngo zvowakaita chapupu ndini mu Jerusarema, ngokudaro kunosisira kuti uite chapupu mu Roma.” Kwakati kwoeja, vaJudha vakaungana, vakajisunga ngo mbhiko yokuti, avazohi nokuti kumwa mbhera vamuuraye Pauri. Naavo vakatanda iri zano vayiva vanopinda makumi marongomuna. Navo vakaviya kuno vapristi vakuru no vakuru, vechiti: “Tajisunga ngo mbhiko huru yokuti, atizoraviri chiro mbhera tamuuraya Pauri. Ndizvo zvino imwimwi pamwepo no bangano, bvunjanyi mujimbahwe mukuru kuti amubzuse kwomuri kunonga munoda kunasa kupshakisisa ndava yake. Nesu apo okwedera tanasirira kumuuraya.” Asi mwana wo hanzaji ya Pauri wakazwa ngo ndava yo kumuvandira kwavo, naye wakaviya, akanghwina mujimbahwe, akazivisa Pauri. Na Pauri wakadanija kwaari, imwe yo nduna jo zana, akati: “Enda no iri jaha kuno mujimbahwe mukuru; ngokuti rinaro chiro cho kumubvunja.” Ndizvo yakaenda naro kuno mujimbahwe mukuru, yakati: “Pauri mubhanditi wandidanija kwaari, akakumbira kuti ndizise iri jaha kwouri rinacho cho kuvereketa kwouri.” No mujimbahwe mukuru wakamubata ngo nyara, akaenda naye akaribvunjisa ngo kufishika, kuti: Chinyi chounoda kundibvunja? Naro rakati: “Vajudha vatenderana kookumbira kuti ubzuse Pauri mangwanani kuno bangano, kunonga vanoda kupshakisisa chiro ndiye. Ndizvo usazotenda kwavari; ngokuti vanozomuvandira vanarume vanopinda makumi marongomuna, avo vajisunga ngo mbhiko yokuti avazohi nokuti kumwa mbhera vamuuraye. Nazvino vanasirira, vechiringira chigondiso chinobva kwouri.” Ndizvo mujimbahwe mukuru wakatendera kuti jaha riende, echiripangisira kuti: “Usazobvunja mundhu kuti wazivisa ichi kwendiri.” Naye wakadanijira kwaari nduna mbiri jozana, akati: “Nasiriranyi masocha ari mazana maviri (200), no vanogadha mahachi vari makumi manomwe, no vane mikhondo vari mazana maviri (200), okuenda Khesariya ngo nguva yochitatu yo usiku. Munasirire zvifuyo kuti mugadhise Pauri panyezuru pazvo, mumugumise wakangwaririka kuna Ferikisi mutongi.” Naye wakatara tshamba kudari: “Kraudhiyo Rusiya unomuchingamija imwimwi mambo wakanasa kunaka Ferikisi. Uwu mundhu wakabatwa ngo vaJudha, wayinga ooda kuurawa ndivo, apo ndakaguma kwavari no masocha ndikamuponesa, inga ndazwa kuti uri mu Roma. Ngokuti ndaida kuti ndizive ndava yo vakamuyitira, ndamubzusa kuenda naye kubangano ravo: Uwo ndakamuvona kuti, wakaitihwa ndava yo mibvunjo yo mipango yavo, asi inga asina ndava yakaitirwa kwaari inosisira kuti aurawe, nokuti asungwe. Naapo kwakapangijihwa kwendiri kuti kunotandiwa zano ro kurwa no uwu mundhu, paripo ndakamutuma kwomuri, ndechipangirazve avo vakamuyitira ndava kuti vaverekete kurwisana naye pamberi pako.” Ndizvo masocha, kudari ngo zvaakapangijihwa, akatora Pauri akamuzisa usiku Antipatri. Asi ngo zuva raitevera akasiya vanogadha mahachi kuti vaende naye, akahwirira jimbahwe. Naavo vaguma Khesariya, vakapa tshamba kuno mutongi, vakadira Pauri pamberi pake. Naapo waijija, wakabvunjisa kuti wayiva wo nyika iri; naapo aziva kuti wayiva wo Kirikiya, wakati ndinozozwa ndava yako, apo vaguma avo vanokumangarira. Wakapanga kuti angwarihwe mujimbahwe mwa Herodhi. Ngosure kwo mazuva mashanu, Ananiya mupristi mukuru wakabzuka pamwepo no vakuru vakatikuti, no umweni wayiva muvereketi, waizwi ndi Teturu, navo vakaverengera mutongi kuitira ndava Pauri. Naapo adanijwa, Teturu wakatanga kumuitira ndava, echiti: “Kwechivoneka kuti tinodakara mukunyarara kukurutu ndiwe, no zvakashata zvinonasirihwa kuno iri jinja ngo nyasha jako. Tinozviashira ngo njira jese no kundau jese, Ferikisi wakanasa kunaka, ngo kubonga kukurutu. Asi kuti ndisakupejera nguva, ndinokupota kuti undizwe ngo nyasha jako mazwi mashomani. Ngokuti takamuvona uwu mundhu kuti wayiva munyajiri no muambi wo kumukira pakati po vaJudha vese vo nyika jese, no mutungamiriri wo chikwata cho vaNazareta. Uwozve wakaeja kusvipisa themperi, takamusunga: [Takada kumutonga kudari ngo mipango yedu. Asi mujimbahwe mukuru Rusiya wakaviya akamubvuka ngo simba guru kunyara jedu]. Echipanga avo vanomuitira ndava kuti vaviye kwouri; ngokumubvunjisisa wambhwine, unozokona kuziva izvi zvese zvotinomuitira ndava ndizvo. ” No vaJudha vakapindirira kumuitira ndava, vechigwinyisisa kunanga kuti, izvi zvakadaro. Naapo mutongi ayita chivoniso kwavari kuti averekete, Pauri wakapingura kudari: “Ngokuti ndinoziva kuti iwewe wayiva mutongi wo jinja iri makore mazhinji, ndizvo ndinodakara ngo kujirwira. Ungaziva kuti akuzivi kupinda mazuva ari gumi na maviri kubvira ngo nguva yo ndakakwira Jerusarema koodira. Zve, avazivi kundivona mu themperi ndechiitirana hasha no mundhu nokuti ngouri, nokuti ndechiveruja mbungano, pikija mu nyumba jo kudira, nokuti mu dhoropa. Zve, avangakoni kupangijira gwinyiso ro izvo zvo vanondiitira ndava ndizvo ngo nguva ino. Asi izvi ndinotenda kwouri, kuti kudari ngo Njira yo vanoduja kuti kupaukisa, ngokudaro ndinoshandira Mwari wo majibaba edu, ndichitenda zvese zviri zvo mipango, no izvo zvakatahwa mu tshamba jo vaprofeti. Ndino kugonda kuna Mwari, ukwo kwovanoveteravo ava, kuti kunozovapo kumuka kwo vakafa, kwo vese vakarurama no kwo vasikazivi kururama. Ngo iyi ndava ndinoeja pachangu kugara ndino mwoyo usina ndava kuna Mwari, no kuna vandhu nguva jese. Zvino sure kwo makore akawanda, ndakaviya koopa zvikovero no zvipo kuno vo jinja rangu. Mukuita izvi vakandivona ndakacheneswa, ndiri mu themperi, pasina no mbungano nokuti hohohozve. Asi kwayivapo vaJudha vakatikuti vakabva Aziya, avo kwaidikana kuti vave pano pamberi pako, no kundiitira ndava, kudari vane ndava kwendiri. Nokuti ava vanarume vari pano ngavanange kushata kwovakavona kwendiri, ngoiyo nguva yo ndakaima pamberi po bangano, kwega izwi rimwe rondakadanijira ndakaima pakati pavo, rokunanga ngo kumuka kwo vakafa, ndiro ro ndinoitihwa ndava nyamasi pamberi pako.” Asi Ferikisi, echiziva kakurutu ngo ndava yo Njira iyi, wakavabvunja kuti vaimire, echiti: “Apo Rusiya mujimbahwe mukuru obzuka, ndinozokwarisisa ndava yenyu.” Naye wakapanga nduna yo zana kuti iye angwarihwe akasununguka, nokuti kusarambiswa shamwari jake kuti jimushandire. Asi ngosure kwo mazuva akatikuti, Ferikisi wakaviya na Drusira mukaji wake, wayiva muJudha, naye wakadanija Pauri, akamuzwa ngo rutendo ruri kuna Kristu Jesu. Naapo aipangijira ngokururama, no kujibata, no kutongwa kunozoviya, Ferikisi wakahuta, akapingura: “Enda hako zvino, apo ndazowana mukuvo kwawo, ndinozokudanijazve.” Iye wayiva no gondazve rokuti unozopuwa mare ndi Pauri. Ndizvozve wakamudanija mukuvo mizhinji echipangana naye. Asi apo makore maviri apera, Ferikisi wakachindwa ndi Pikio Festu; na Ferikisi echida kudiwa ngo vaJudha, wakasiya akandosungwa. Ndizvo Festu aguma munyikeyo, ngosure kwo mazuva matatu wakakwira Jerusarema, echibva Khesariya. No vapristi vakuru no vakuru vo vaJudha vakamuverengera ndava ya Pauri, vakapota kwaari, vechimukumbira kuti avadakajise ngokuyita kuti Pauri, amutumire kuviya Jerusarema; kuti vamuuraye mu njira ngo kufishika. Asi Festu wakapingura kuti Pauri angwarihwe mu Khesariya, nokuti iye wayida kukasira kuendeyo. Wakati: Ndizvo ngavabzuke neni avo vane simba pakati penyu, nokudari iripo ndava kuno uwo mundhu, ngavamumangarire. Naapo ayinga agara pakati pavo mazuva asikapindi masere nokuti ari gumi, iye wakabzuka kuenda Khesariya; na ngo zuva raitevera, wakagara pachigaro cho kutonga ndava, akapanga kuti Pauri aviyiswe. Naapo aviya, vaJudha avo vakabzuka vechibva Jerusarema vakayima vechimutendeneja, vechimuitira ndava jakawanda, no zvakashata, jovasaikona kupangijira pambhene. Naapo Pauri mukujirwira kwake, wakati: “Andizivi kushaisha kugura mipango yo vaJudha, nokuti ku themperi, nokuti kuna Khesari.” Asi Festu, echida kudiwa ngo vaJudha, wakapingura Pauri, akati: “Unotenda here kukwira Jerusarema, utongwe ngo iji ndava pamberi pangu?” Asi Pauri wakati: “Ndinoima pachigaro cho kutonga cha Khesari, apo panosisira kuti nditongwe: Andizivi kuyita chiro chakashata ku vaJudha, kudari ngo zvo unonasa kuziva iwewe. Ndizvo kudari ndiri unoyita zvakashata, ndakaita chinosisira kuti ndife, andirambi kufa akadi; asi kudari pasina gwinyiso kuno izvo zvo vanondiitira ndava ndizvo ava, apana mundhu ungandipira kwavari. Ndinopota kuti ndava yangu ikwijwe kuna Khesari.” Naapo Festu ayinga apangana no bangano, wakapingura kuti: “Iwewe wapota kuti ndava yako ikwijwe kuna Khesari. Unozoenda kuna Khesari.” Zvino ngosure kwo mazuva akatikuti, mambo Agripa na Benike vakaguma Khesariya, vakachungamija Festu. Navo vachagara apo mazuva mazhinji, Festu wakaverenga ndava ya Pauri pamberi pa mambo, echiti: “Uri pano mundhu wakatikuti wakasiiwa ari wakasungwa ndi Ferikisi. Ndiye, apo ndayiva mu Jerusarema vapristi no vakuru vo vaJudha vakandiverengera ndava, vechikumbira kuti atongwe. Kwavari ndakapingura kuti andichopi chirovejeso cho vaRoma kuti vapire mundhu nokuti ngouri kuti atambujwe, asati avonana hope kuhope no uwo unomumangarira, awane mukuvo wo kujirwira ngo ndava yaanoitihwa. Ndizvo apo vaungana pano, andizivi kunonoka, asi ngo zuva raitevera ndakagara pasi pachigaro cho kutonga ndava, ndakapanga kuti uwo mundhu aviyiswe. Ngo ndava yake, vaimumangarira vaiyima, avazivi kuitira ndava yo zvakashata yo ndakakarira. Asi vakamuyitira ndava yo mibvunjo ngo ndava yo kudira kwavo, na ngo ndava yo umwe Jesu, wakafa, waakagwinyisisa Pauri kuti unopona. Ndechikangaijwa ngo njira yo kubvunjisa ngo izvo zviro, ndakamubvunjisa kuti ungatenda kuenda Jerusarema, atongwe apo ngo ndava iji. Asi apo Pauri akumbira kuti angwarihwe mbhera ndava iguhwe ndi mambo mukuru, ndakapanga kuti angwarihwe mbhera ndimutume kuna Khesari.” Na Agripa wakati kuna Festu: “Inini ndingada kuti ndimuzwe mundhuwo pachangu.” Iye wakati: “Mangwana unozomuzwa.” Ndizvo ngo zuva raitevera apo Agripa aviya na Benike, no uthende hukuru, vanghwina kundau yo kupurutana ndava, pamwepo no vajimbahwe vakuru, no vakuru vo dhoropa, ngo kupanga kwa Festu, Pauri wakanghwiniswa umwo. Na Festu wakati: “Mambo Agripa, no vandhu vese vari pano nesu, munovona mundhu uwu, uwo wo vakaitira ndava mbungano yese yo vaJudha, vese vo mu Jerusarema, no vo pano, vechidanijira kuti aasisiri kuti aponezve. Asi inini ndakavona kuti aazivi kuyita chiro chinosisira kuti aurawe; na ngokuti iye ambhwine wakakumbira kuti ndava yake ikwijwe kuna mambo mukuru, ndakaemesa kumutumireyo. Asi andina chiro chino gwinyiso cho kutara kuna mambo wangu. Ndizvo ndakamuzisa pamberi penyu, kakurutu pamberi pako mambo Agripa, kuti ngosure kwokupshakisira ndingatozowana cho kutara. Ngokuti kwendiri kunovoneka chiri chiro chisina shwiro, mukutuma musungwa, kusikapangijihwi ndava jaanomangarihwa ndijo.” Na Agripa wakati kuna Pauri, “unotendehwa kujivereketera.” Naapo Pauri wakatambanuja nyara yake, akajirwira: “Ndinopinimija kuti ndinomuchena ngokuti ndinozojipingurira pamberi pako ngo iri zuva, ngo ndava yazvo zvese zvo ndinomangarihwa ngo vaJudha. Kakurutu ngokuti unonasa kuziva zvirovejeso no mibvunjo yese iri mukati mwo vaJudha. Ndizvo ndinomupota kuti undizwe ngo kusengerera. Njira yo kupona kwangu kubvira muupsha hwangu ukwo kunobvira mukutanga kwayiva pakati po avo vo jinja rangu mu Jerusarema, vaJudha vese vanoiziva. Vaindiziva kubvira mukutanga, kudari vaitenda kupupurira, kuti ngo njira yakapindisisa kurungama yo kudira kwedu, ndakapona ndiri mufarisi. Nazvino ndinoima pano kutongwa ngo ndava yo gonda ro chigondiso icho chakaitwa kuna majibaba edu ndi Mwari. Kuno icho chigondiso majinja edu ari gumi na maviri, echigwinyisisa kushandira Mwari usiku no masikati anogonda kuchiashira. Ngo ndava yo ichi chigondiso ndinoitihwa ndava ngo vaJudha, mambowe! Kunoverengwa ngenyi ndimwi kuti chiro chisikatendeki kuna Mwari kuti Mwari amuse vakafa? Inini ngo gwinyiso ndakapinimija mukati mwangu kuti kunosisira kuti ndiite zvakawanda zvinorwisana no zina ra Jesu wo Nazaretha. Ndakaita izvi mu Jerusarema; ndakapakija vazhinji vo vakacheneswa mu guniya, ndechipuwa simba kubva kuna mupristi mukuru, naapo vaiurawa, ndakatenderavo kurwijana navo. Ndechivatambuja kazhinji mu nyumba jo kudira, ndakaeja kuyita kuti vatuke Mwari; ndine ushungu hukuru kwavari ndakavatambuja mbhera kuguma ku madhoropa omajinja amweni. Ndichaiita izvi, ndechifamba kuenda mu Dhamaseku, ndine simba no kutumwa ngo vapristi vakuru, ngo mukuvo wo masikati, mambowe, ndakavona ndiri mu njira kwakabva kujeka kwo mu denga, kupinda kwo zuva, kwechijeka kunditendeneja naavo vaifamba neni. Naapo takawa tese pasi, ndakazwa izwi rechiti ngo chiHebheru, Sauri, Sauri, unonditambujirenyi? Kunonesa kwouri kudarika pamachocho anopinza. Neni ndakati: Uriyani Mambo? Na Mambo wakati, Ndiri Jesu wounotambuja. Asi miruka, uime ngo tshoka jako; ngokuti ndavoneka kwouri ngo iyi ndava, kuti ndikuemese kuti uite mushandi no mupupuri kuno izvo zvowavona, nokune izvo zvo ndinozovoneka kwouri ndizvo; ndechikununurira kubva kuno vandhu vese, no kubva kuno vo majinja, avo vo ndinokutumira kwavari, kubewura majiso avo, no kuvatenderuja kuti vabve muchidima, vanghwine mukujeka, no kubva ku simba ra Sathani kuviya kuna Mwari, kuti vaashire kuregerehwa kwo zvishaishi, kuti vagare ndhaka mukati mwo avo vakacheneswa, ngo kugonda kwendiri. Ndizvo mambowe, Agripa, andizivi kuramba kupurutana chivoniso cho mu denga: Asi ndakatanga kupangijira kwavari vese vo Dhamaseku no mu Jerusarema, no mu nyika mwese mwo Judhiya, nokune vo majinjazve kuti vatenderuke, vakunukukire kuna Mwari, vechiita mishando inosisira vakatenderuka. Ngo iyi ndava vaJudha vakandibata ndiri mu themperi, vakaeja kundiuraya. Ndizvo ndechivona kubesehwa kunobva kuna Mwari, ndichakaima na nyamasi, ndechipupura kwavari vese vadoko no vakuru, ndisikanangi chiro chimweni ngokunja kwo izvo zvovakananga vaprofeti na Mosi kuti zvinozoviya. Kuti kunosisira kuti Kristu atambujike, nokuti ayite mutanguro wo kumuka kwo vakafa, kuti achumairezve kujeka ku vandhu vedu nokune vo majinja.” Achajirwira kudaro; Festu wakadanijira ngo izwi guru: “Pauri, unopenga; kujija kwako kukuru kunokupengesa.” Asi Pauri wakati: “Andipengi akadi, Festu unoreremejeka, asi ndinovereketa mazwi ano gwinyiso no njero. Ngokuti mambo unoziva ngo ndava yo izvi uwozve pamberi pake ndinovereka ngo kusununguka: Ngokuti ndinoongwa kuti akuna chimwe cho izvi chakafishika kwaari; ngokuti izvi azvizivi kuitika pakachitirika. Mambo Agripa, unotenda here matahwa wo vaprofeti? Ndinoziva kuti unozvitenda.” Na Agripa wakati kuna Pauri: Ngokuonga kudodoko unozondiita muKristu. Na Pauri wakati: “Ndingada pamberi pa Mwari kuti, ngokadodoko pikija ngokazhinji, andiwepi wega, asi avo vese vanondizwa nyamasi vanoyita vakadari ndini, ngokunja kwo izvi zvisungo.” Naapo mambo wakamiruka, no mutongi, na Benike, naavo vaayigara navo. Naapo vayinga vatorana kuyita chinyangore, vakapangana umwe kuno umweni, vechiti: “Mundhu uwu aazivi kuyita chiro chinosisira kuti aurawe, nokuti asungwe.” Na Agripa wakati kuna Festu: “Mundhu uwu kudari ayinga asikazivi kukumbira kuti ndava yake ikwijwe kuna Khesari, inga asununguhwa.” Naapo kwakaemeswa kuti tihluze kuenda Itariya, vakapira Pauri no vasungwa vamweni vakatikuti kunduna yo zana yaizwi ndi Jurio wo hondo ya Agustu. Techinghwina mu ngarava ya Adramitiyo, yaida kuhluza kuenda kundau jiri kumbhiri kwo jombe ro Aziya, takahluza, Aristaku mu Makedhoniya wakabva Tesaronika, wayiva nesu. Ngo zuva raitevera takaguma Sidhoni; na Jurio wakamubata Pauri zvakanaka, wakamutendera kuti aende kuno shamwari jake, kuti ambopeperehwa. Techihluza kubvapo, takaparura ngo pakachitirika po Kupro, ngokuti dutu raita maringwa nesu. Apo tainga tahluza kuambuka jombe riri phedo no Kirikiya, no Pamfriya, takaguma Mara, rayiva dhoropa ro Rukiya. Naapo nduna yo zana yakavona ngarava yo Arixandriya, yaihluza kuenda Itariya; nayo yakatinghwinisemwo. Naapo tainga tahluza padoko-padoko mazuva mazhinji, tikaguma tatambujika apo pakaita maringwa no Kinidho, dutu risikatitenderi kugumeyo, takahluza kuenda pakachitirika po Krete, apo pakaita maringwa na Saramoni. Ngokutambujika takahluza phedo po mbhiri yayo, tikaguma kundau yaidanijwa, Maambukiro Akanaka; phedo pawo payiva no dhoropa ro Rasiya. Naapo mukuvo wakareba wapera, no kufamba ngo mu kumwa kwayinga kwaano ngozi zvino, ngokuti mukuvo wo mushongano wo kuera kuha inga wapinda, Pauri wakangwaja, akati kwavari: Vanarume, ndinovona kuti muhambo wo kuhluza uku unozoitwa ngo kushaishihwa no kurashikihwa ngo zvakawanda, andizvopi zvega zvo mitwaro no ngarava, asi no kupona kwedu. Asi nduna yo zana yakapindisisa kupurutana kuno uwo wayiva mukuru no mune wo ngarava kupinda izvo zvakavereketwa ndi Pauri. Ngokutizve maambukiro ayinga asikazivi kukura kwokuti kungagahwa apo kupeja nguva yo shipepo; uzhinji hwavo vakapangana kuhluza kubvapo, kuti vagume ngo njira nokuti ngeiri ku Fenike, no kugara apo nguva yo shipepo; ndau iyo iri maambukiro wo Krete, inoringira kumavirira zuva a njikazi, no kumavirira zuva a kusi. Apo dutu ro kakusi rakavhuvhuta padoko-padoko, avo vechikarira kuti vakavona chevaida, vakamiruja thanga, vakahluza kuteverera Krete, phedo no mumbhiripiri. Asi ngosure kwo mukuvo mudoko mbhepo huru yechibva pharamande ya njikazi, yakatigumira, inozwi Urakuroni. Naapo ngarava yakabatwa, isina simba ro kuenda mberi kunobva dutu, takarega, tikatindhwa ndiro. Techihluza kuenda pachirundu chidoko pakachitirika chinozwi Kraudha, takakona ngo kutambujika kusunga ngarava doko. Apo vapeja kuikwija, vakashandisa zvinobesera, vechisunga ngarava ngopasi; navo vechitya kuti vanozokandihwa pamvungu yo Siratisi, vakabzusa machira okuhluza, ngokudaro takatindhwa. Techifamba kukurutu ngo muvhumo na ngo zuva raitevera vakatanga kurasha mitwaro mu jombe; ngo zuva rechitatu vakatanga kurasha mijiyo jo ngarava ngo nyara javo. Naapo zuva nokuti ndhondo azvizivi kujeka kwo mazuva mazhinji, no mubvumo mukuru wayiva panyezuru pedu, gonda rese rokuti tinozopona rakapera. Naapo vayinga varega kuha mukuvo wakareba, Pauri wakayima pakati pavo, akati: “Vanarume kwaipinda kunaka kudari mwakapurutana kwendiri, musikazivi kuhluza kubva Krete, musaizowana kutambujika uku, no kurashikihwa. Zvino ndinomupanga kuti mushinge; ngokuti akuna mundhu unozofa pakati penyu, asi kwega kwengarava. Ngokuti kwakaima phedo pangu usiku huno ngirosi ya Mwari, wo ndiri wake, no wo ndinoshandira, yechiti: ‘Usatya Pauri, kunosisira kuti uime pamberi pa Kesari; vonayi Mwari wakakupavo vese avo vanohluza newe.’ Ndizvo, vanarume, shinganyi; ngokuti ndinogonda Mwari kuti kunozoitika kudari ngo zvaakavereketa kwendiri. Asi, kunosisira kuti tikandihwe pa chirundu chakatikuti.” Asi apo usiku hwo chigumi na hurongomuna hwaguma, tichandotindhwa apo naapo mujombe ro Adriya, kwoita pakati po usiku vashandi vo ngarava vakakarakaja kuti vaikwedera phedo po nyika yakatikuti. Navo vakapima kujika kwo kumwa, vakavona kuti ayiva mamitha makumi marongomuna. Ngosure kwo kuhluza ndharauko doko, vakapimazve, vakavona kuti ayiva mamitha makumi matatu. Vechitya kuti pamweni tingazorovehwa kumbhiri kundau ine mapuwe, vakarikha nanga murongomuna, kubvira ngosure kwo ngarava, vakadisisa kuti kueje. Apo vashandi vongarava vachapshaka kutiza kubva mu ngarava, vakabzusa ngarava doko mujombe, vechiita kudari ngo vanokhandira nanga kubvira ngo mberi kwo ngarava. Pauri wakati kuno nduna yo zana no kumasocha: “Kunja kwokuti ava vagare mu ngarava, amungaponi.” Naapo masocha akacheka mapote o ngarava doko, akairegera kuti iwe. Naapo kwaeja, Pauri, wakavapota kuti vese vahe, echiti: “Zuva iri raarochigumi na marongomuna romunogara mwechirega kuha, musina cho mwakatongoha. Ndizvo ndinomupota, kuti muhe; ngokuti uku kuri kungwaririka kwenyu; ngokuti akuna no rubvuji runozotsakatika kubva mumusoro wo umwe wenyu.” Naapo ayinga avereketa izvi, wakatora chimanda, akachibonga kuna Mwari pamberi pavo vese: Naye wakachigura, wakatanga kuha. Naapo vakashingiswa vese, vakatoravo kuha. Nesu tese taiva mu ngarava taiva vandhu vayiva mazana maviri no makumi manomwe na vatandhatu (276). Apo vayinga vaguta, vakarerusa ngarava, vechirasha koroni mujombe. Naapo kwaeja, avazivi kuziva iyo nyika. Asi vakavona manghwiniro akatikuti ano mbhiri ine mvungu, vakapangana kuti vangakona here kuhluza ngarava kuidira panyezuru payo. Vakacheka mapote onanga vakajisiya mujombe, ngo uwo mukuvo vechisunungura mapote aisunga shikiro cho ngarava vechikwija machira okuhluza omberi kuno dutu vakaaringisisa kumbhiri. Asi vechiguma pandau panoshongana majombe maviri, vakaimisa ngarava pa mvungu; no mberi kwo ngarava kwakaimiswa, kwakagara kusikatsukunuswi, asi rutivi rwayo rwesure rwakatanga kuphwanywa ngo mavimbi. No kupangana kwo masocha kwayiva kwokuuraya vasungwa, kuti vamweni vavo vasazoshambira kubuda no kupokonyoka. Asi nduna yo zana, yechidisisa kuponesa Pauri, yakavapinga kubva kwo kukarakaja kwavo; yakavapanga kuti avo vaikona kushambira vajikandire mujombe, vagume ku nyika. No vakasara, vamweni panyezuru po mapuranga, nokuti panyezuru po zvigurwa zvo ngarava. Ndizvo zvakaitika kuti vese vakapokonyokera ku nyika vakangwaririka. Naapo taphujunyuka, takaziva kuti chirundu chaizwi Merita. No vagari vakatiitira nyasha huru, ngokuti vakabasa muriro, vakatiashira tese, ngo ndava yo mvura yaina, na ngo ndava yo kutondhora. Asi apo Pauri ayinga aunganija huni, akajidira pa muriro, vhumbi rakabuda ngo ndava yo kupisa, rikaruma panyara yake. Kwakati vagari vavona chikara chakaruma panyara yake, vakati umwe kuno umweni: “Ngo gwinyiso uwu mundhu uri muurayi, iye pikija akaphujunyuka kubva mujombe, kani kururama akumutenderi kuti apone.” Asi iye wakazuzira chikara pa muriro, asikazivi kuremajwa. Asi ivo vaikarakaja kuti unozozvimba, nokuti pamweni kuwa pasi ngokukasira, echifa; asi apo varindira kudaro mukuvo wakareba, vasikazivi kuvona chiro chakashata chechimugumira, vakakunukuja kupinimija kwavo, vakati, iye uri chimwari. Zvino phedo pandau iyo payiva no minda ya mambo mukuru wo chirundu, zina rake raizwi Paubhurio; uwo wakatiashira akanasa kutingwarira mazuva matatu. Kwakaitika baba wa Paubhurio vayiva vakavata vane mbhepo no nyoka jo kubudisa; kwavari Pauri wakanghwinemwo, akakumbira, echidira nyara jake panyezuru pavo, akavarapa. Naapo izvi zvaitika, vamweni navo vayiva no ndhenda pa chirundu, vakaviya vakarapwa. Avozve vakatireremeja ngo kureremeja kukuru; tohluza, vakakwija mu ngarava izvo zvotaitama. Ngosure kwo mweji mitatu takahluza tiri mu ngarava yo kwa Arixandriya, iyo yayinga yakagara pachirundu mukuvo wo shipepo chese, chivoniso chaiyo chaizwi chimwari Manyambiri. Techiguma Sirakusi takagara apo mazuva matatu. Tabva apo takaita kupoterera, takaguma Regio; ngosure kwo zuva rimwe dutu raibva ngo kakusi rakavhuvhuta, na ngo zuva rochipiri takaguma Potiyori. Apo tavona vatendi, takaongwa kugara navo mazuva manomwe. Ngokudaro takaguma Roma. Kubvira apo, vakoma vazwa ngo ndava yedu, vakaviya kutiashira, mbhera kuguma ku Musika wa Apiwu, no ku Hodhera Ndhatu. Apo Pauri avavona wakabonga Mwari, akashingiswa. Naapo tanghwina mu Roma, nduna yo zana yakapira vasungwa kuno nduna yo chikwata cho masocha, asi Pauri wakatendehwa kugara ari ega, no socha raimungwarira. Kwakaitika kuti ngosure kwo mazuva matatu, iye wakadanija pamwepo avo vayiva vakuru vo vaJudha. Naapo vayinga vaungana wakati kwavari: “Inini hama, pikija andizivi kuyita chiro chakashata kuno vandhu nokuti chirovejeso cho majibaba edu, asi ndakapihwa ndiri musungwa munyara jo vaRoma kubva Jerusarema. Avo, apo vayinga vandibvunjisisa, vakada kundisunungura, ngokuti payinga pasina ndava yokuti ndiurawe. Asi apo vaJudha vavereketa vechikanija, ndakanyumwa kuti ndikwije ndava yangu kuna Khesari: Haiwa kuti ndayiva no ndava yo kumangarira jinja rangu ndiyo. Ndizvo ngoiyi ndava ndakamudanija kuti ndimuvone no kuvereketa nemwi; ngokuti ngo ndava yo gonda ra Israeri ndinosungwa ngo ketani iri.” Navo vakati kwaari: “Atizivi kuashira tshamba jakabva Judhiya, ngo ndava yako, akunazve umwe wo vakoma wakaviya pano kuverenga, nokuti kuvereketa chiro chakashata ndiwe. Asi tinodisisa kuzwa ndiwe izvo zvounopinimija: Ngokuti ngo ndava yo chiunga ichi, kunozivikanwa kwetiri kuti kundau jese chinovereketwa zvakashata ndicho.” Naapo vayinga vamuemesera zuva, vakaviya kwaari vakawanda pandau yaaigara; wakavaverengujira, echipupura ngo Umambo hwa Mwari, echivaonga ndiye Jesu, kubvira mipango yese ya Mosi no zve vaprofeti, kubvira mangwanani mbhera madeikoni. No vamweni vakatenda izvo zvakavereketwa, no vamweni avazivi kuzvitenda. Ndizvo avazivi kutenderana pachavo, vakabvapo, ngosure Pauri ayinga avereketa izwi rimwe, kuti: “Mweya Wakachena wakanasa kuvereketa ndi Isaya muprofeti, kuno majibaba enyu, echiti: ‘Enda kuno ava vandhu, wechiti; ngokuzwa munozwa, musikazozwisisi, no kuvona munozovona, musikazovonesesi. Ngokuti mwoyo yo ava vandhu yakakonza, no njeve javo ajizwisisi, no majiso avo vakaabvubvumarisa; dangani vangavona ngo majiso avo, vazwe ngo njeve javo, no kuzwisisa ngo mwoyo yavo, vatenderuke neni ndivaponese.’ Ndizvo ngakuzivikanwe kwomuri kuti urwu ruponeso rwa Mwari runotumihwa ku majinja; navo vanozozwavo.” (Naapo ayinga avereketa mazwi aya, vaJudha vakaenda, vechiitirana hasha huru). Naye wakagara makore maviri ese ari mu nyumba yake yairipira ngo mare, echiashira avo vese vainghwinemwo, echichumaira Umambo hwa Mwari no kujijisa ngo zva Mambo Jesu Kristu ngo kushinga kwese, pasina naumwe waimurambisa. Pauri, muranda wa Jesu Kristu, wakadanijwa kuti ayite mupostori, wakaparajanisihwa vhangeri ra Mwari, iro raakagondisa kare ngo vaprofeti vake ngo Matahwa Akachena, ngo ndava yo Mwana wake, wakabahwa ari wo ruji rwa Dhavhidha ngo kwenyama, akapangijihwa ngo kugwinyisisa kuti uri Mwana wa Mwari kudari ngo Mweya Wakachena, ngo kumuka kwavakafa, eya, Jesu Kristu Mambo wedu, ndiye takaashira nyasha no upostori, ngo kupurutana kwo kugonda mukati mwo majinja ese ngo ndava yo zina rake, mukati mwaao imwimwivo mwakadanijwa kuyita va Jesu Kristu. Kwaavo vese vari mu Roma, vanodikana ndi Mwari, mwakadanijwa kuyita vakacheneswa: Nyasha kwomuri, no kunyarara kunobva kuna Mwari Baba wedu na Mambo Jesu Kristu. Kutanga, ndinobonga Mwari wangu, ndiye Jesu Kristu ngo ndava yenyu mwese, kuti kugonda kwenyu kunovereketwa ndikwo mu nyika jese. Ngokuti Mwari uri chapupu changu, wo ndinoshandira mu mweya wangu muvhangeri ro Mwana wake, kuti andiregi kumucherecheja ngo nguva jese mumikumbiro yangu, ndechikumbira ngo nguva jese kuti pikija zvakadini, zvino, ndingapfumiswa ngo kuda kwa Mwari kuti ndiviye kwomuri. Ngokuti ndine chisuwo chokuti ndimuvone, kuti ndingakovanisirana nemwi chipuwo cho mweya, kuti mugwinyiswe. Kunanga kuti inini naimwimwi tingaembezehwa tese ngo kugonda kwo umweni, kwese kwenyu no kwangu. Ndinoda kuti muzive, hama, kuti kazhinji ndakaemesa kuti ndiviye kwomuri, (asi ndakaphingwa mbhera zvino), kuti ndive no michero pakati penyu, kudari ngo zve ndinayozve ku majinja amweni. Ndine gava kwavari vese vagiriki no vasikatendi, kwavari vese vakangwara no vasikazivi kungwara. Ndizvo kudari ngo zvo ndinokona, ndakasisira kuteketesa vhangeri kwomurizve muri mu Roma. Ngokuti andina nyowa ngo vhangeri; ngokuti riri simba ra Mwari ro ruponeso kwavari vese vanotenda, kutanga ku vaJudha, no ku vagiriki navo. Ngokuti ndiro kunopangijihwa kururama kwa Mwari kubva kwo kugonda kuenda mukugonda; kudari ngo zvakatahwa: “Asi wakarurama unozopona ngo kugonda.” Ngokuti ushungu hwa Mwari hunopangijihwa hwechibva mu denga kurwa nazvo zvese zvisikasisirani na Mwari, na ngo kusikarurami kwo vandhu, vanotsikirira gwinyiso ngo kusikarurama. Ngokuti izvo zvinozivikanwa ndi Mwari zvinovoneka mukati mwavo. Ngokuti Mwari wakajipangijira kwavari. Ngokuti zviro zvake zvisikavoneki, kubvira mukusikwa kwo nyika, zvinonasa kuvoneka, zvechizivikana kudari ngo zviro zvakasikwa, kunoti, simba rake ro mbhera narini, no Umwari hwake; kuti ngokudaro vayite vasina cho kutenda ndava. Ngokuti, vechimuziva Mwari, avazivi kumukurisa kudari ngo zvayiva Mwari, zve, avazivi kumubonga, asi vakayita vasina shwiro mu mipinimijo yavo, no mwoyo yavo isina kungwara yakayita chidima. Vechijiitisa kuti vari vakangwara, vakayita mapenji, vakatenganisa uthende hwa Mwari husikavori kuti vaashire muemo wo muezaniso wo mundhu unovora, no wo shiri, no wo zvinyama zvino mirenje mirongomuna, no wo zvinogwezva. Ndizvo Mwari wakavaregera mukuemura kwo mwoyo yavo, kuti vayite vane svina, kuti vajishaishire miviri yavo. Ngokuti vakatenganisa gwinyiso ra Mwari kuashira manyepo, vakadira no kushandira icho chakasikwa paugaro po Musiki, uwo unomuchena mbhera narini. Ameni! Ngo iyi ndava Mwari vakavaregera kuti vave no kuemura kunopsheruja. Ngokuti no vakaji vavo vakapinduja chibarihwe chavo kuyita icho chinopesana no chibarihwe chavo, ngokudaro vanarume navo vechiregera chibarihwe no vanakaji, vakapsha mukuemura kwavo umwe kuno umweni, vanarume vechiita no vanarume izvo zvisikasisiri, vechiashira mukati mwavo ukwo kuthuswa kunosisira kupauka kwavo. Nokudari ngo zvevasikazivi kutenda kuti vaana Mwari mukuziva kwavo, Mwari wakavaregera kuti vave no kupinimija kunonyangaja, kuti vayite izvo zviro zvisikasisiri. Vechizajwa ngo kusikarurami kwese, no kuomba, no kushata, no kuemura, no khururu; vakazajwa ngo ndurumwa, no kuuraya, no hasha, no kuchengeja, no kushatisisa, no kushora. No kuchonyongora, no kumunyenya Mwari, no kudada, no kujikuja, no kuganza, no kutanda zvakashata, no kusikapurutana vabari, vasikazwisisi, vaguri vo zvitenderano, vasina rudo kuno hama, vasina nyasha; avo vechiziva chiemeso cha Mwari, chokuti avo vanoyita zvakadaro vanosisira kufa, avateveri kuyita izvi zvega, asi vanotenderazve naavo vanogara vechizviita. Ndizvo auchayiti usina ndava, mundhuwe unotonga; ngokuti ngoicho cho unotonga umweni ndicho, unojiitira ndava ndicho; ngokuti iwewe unotonga unondoita zviro ndizvo-ndizvo. Nesu tinoziva kuti ngo gwinyiso kutonga kwa Mwari kunorwisana naavo vanoyita zvakadaro. Unopinimija kudari here, iwe mundhu, unotonga avo vanoyita zvakadaro, newe wechiyita zvakadaro, kuti iwewe unozopokonyoka here mukutongwa kwa Mwari? Nokuti unoshora here upfumi hwo nyasha jake, no kushingirira, no kusengerera, usikazivi kuti nyasha ja Mwari jinokukweverera kuti utenderuke? Asi kudari ngokukonja, no kusikatenderuki kwo mwoyo wako, unojiunganijira ushungu pa zuva ro ushungu, no ro kupangijira kutonga kwakarurama kwa Mwari; uwo unozohwirijira ku mundhu wese kudari ngo mushando wake; kwavari vanosengerera kuyita zvakanaka kupshaka uthende no kureremejwa no kusikavori, unozovapa kupona kusikaperi; asi kwavari vane hasha, vasikapurukiri gwinyiso, asi vanopurukira zvisikazivi kururama, kunozovapo ushungu no kutseneka, no kutambujika, no kuhwajihwa, panyezuru po mundhu wese unoyita zvakashata, kutanga ku vaJudha, no ku vagiriki navo; asi uthende no kureremejwa no kunyarara kunozova kuno mundhu wese unoshanda zvakanaka, kutanga ku vaJudha, no ku vagiriki navo. Ngokuti kuna Mwari akuna kutsananguhwa kwo mundhu. Ngokuti avo vese vakashaisha vasina mupango, vanozofa vasina mupango; naavo vakashaisha vari pasi po mupango, vanozotongwa ngo mupango; ngokuti sandivo vanozwa mupango vanozopembejwa pamberi pa Mwari, asi vayiti vo mipango vanozopembejwa; ngokuti apo vo majinja vasina Mipango vanojiitira Mipango, ava vasina Mipango vane Mipango pachavo; ngokuti vanopangijira mushando wo Mupango wakatahwa mu mwoyo yavo, mwoyo yavo inoita chapupu nawo, no mipinimijo yavo umwe no umweni unovaitira ndava, nokuti inovapembeja; ngoiro zuva raanozotonga ndiro Mwari zvakafishika zvo vandhu, ndiye Jesu Kristu, kudari ngo vhangeri rangu. Asi kudari iwewe wechijidanija pachako kuti uri mujudha, wechigonda mupango, no kuganza ndi Mwari, wechiziva kuda kwake, wechieja izvo zvakanaka, wechijijiswa mupango, newe unonasa kuziva pachako kuti uri mutungamiriri wo mapofu, no kujeka kwaavo vari muchidima, no mupangijiri wo mapenji, mujijisi weavo vana vadoko mukuziva, uri uno chiyimo cho kuziva no cho gwinyiso mu Mupango; ndizvo iwewe unojijisa vamweni, aujijijisi here? Iwewe unochumaira kuti mundhu asazoba unoba here iwewe? Iwewe unoti, kuti mundhu asazoomba, unoomba here iwewe? Iwewe unonyenya miezaniso inodihwa, unoba here zvakacheneswa mu mathemperi? Iwewe unojiganzisa ngo Mipango, ngokugura kwako Mipango, unoyita here kuti Mwari asareremejwa? Ngokuti zina ra Mwari rinotukwa pakati po vo majinja ngo ndava yenyu, kudari ngo zvakatahwa. Ngokuti ngo gwinyiso kuchekwa kunobesera kudari uri muiti wo mupango; asi kudari uri muguri wo mupango, kuchekwa kwako kunoita inga usikazivi kuchekwa. Ndizvo kudari avo vasikazivi kuchekwa vechingwarira zviemeso zvo mipango, kusikachekwi kwavo akuzoverengwi here kuti kuchekwa? Ndizvo kudari avo vasikazivi kuchekwa kuri chibarihwe, kudari kwechizarisa mupango, akuzokutongi iwewe here, uno zina no kuchekwa, asi unogura mupango? Ngokuti andiyepi mujudha akadi uwo uri wakadaro ngokunja; andikwopi kuchekwa, ukwo kuri kwo kunja kwo muviri. Asi uri mujudha uri wakadaro ngo mukati; no kuchekwa kuri ukwo kwo mu mwoyo, mu mweya, andikwopi kwo zina; kukujwa kwake andikwopi kuri kwo vandhu, asi kuri kwa Mwari. Ndizvo mujudha unenyi chaanopinda vamweni ndicho? Nokuti kuchekwa kunobeserenyi? Kakurutu ngo njira jese, kutanga ndivo vaJudha vakapuwa mazwi a Mwari. Kunenyi kudari vamweni vavo vasikazivi kutenda? Kusikatendi kwavo kunozoita here kuti kugondeka kwa Mwari kuite kusina shwiro? Chisazoitika kudaro! Eya, Mwari ngaavoneke ari gwinyiso, pikija vandhu vese vari vanyepi; kudari ngo zvakatahwa, kuti: “Iwewe upembejwe ngo mazwi ako, no kunyisa mukutongwa kwako.” Asi kudari kusikarurami kwedu kunopangijira kururama kwa Mwari, tinozoitenyi? Mwari uri usikazivi kururama here, uwo unohwirijira ngo ushungu? (Ndinovereketa kudari ngo mundhu). Chisazoitika kudaro! Ngokuti kudari zvakadaro Mwari ungazoita matongerenyi nyika? Asi kudari gwinyiso ra Mwari rechiwanjiswa ngokunyepa kwangu, kuyita kumukuja, ngenyi ndichatongwa kunonga ndiri mushaishi? Eya, nesu atinangi ngenyi (kudari ngokureviwa kwedu, nokudari ngo zvo vanonanga vamweni ndisu kuti tinoti), ngatiite zvakashata kuti kunaka kuviye? Avo kurashwa kwavo kunovasisira. Ndizvo chinyi? Isisu tiri mundau yakapinda kushata kuna avo here? Haiwa, akuzivi kudaro; ngokuti ngo pamberi tambovaitira ndava vese vaJudha no vagiriki kuti vese vari pasi po kushaisha; kudari ngo zvakatahwa, kuti: “Apana wakarurama, haiwa akuna naumwe. Akuna naumwe unozwisisa, akuna no unopshaka Mwari. Vese vakapauka, vese pamwepo vakayita vasina shwiro; apana naumwe unoyita zvakanaka, haiwa akuna naumwe. Mikuro yavo iiba rakabewuka; ngo rurimi rwavo vanochengeja; mbanda yo nyoka iri pasi po miromo yavo. Miromo yavo yakazara ngo kutuka no kuvava. Tshoka javo jinofambisa kuenda kooparaja ngazi; kuparajwa no kutambujika zviri mu njira javo; no njira yo kunyarara avazivi kuiziva. Akuna kumutya Mwari pamberi po majiso avo.” Zvino tinoziva kuti pikija ngochiri chinonangwa ngo mipango, chinovereketwa kwavari vari pasi po mipango; kuti miromo yavo yese inyarajwe, no nyika yese iviye mukutonga kwa Mwari. Ngokuti ngo mishando yo mipango akuna mundhu ungapembejwa pamberi pake; ngokuti ngo mipango kushaisha kunozivikanwa. Asi zvino kwakapangijihwa kururama kwa Mwari ngo kunja kwo mipango, kwechiitihwa chapupu ngo mipango na ngo zvo vaprofeti. Ukwo kunoti, kururama kwa Mwari kuri ngo kugonda Jesu Kristu kwavari vese vanotenda: Ngokuti akuna muparajaniso. Ngokuti vese vakashaisha, avazivi kunghwina ku uthende hwa Mwari; vechipembejwa pasina muripo ngo nyasha jake ngo kuripirwa kuri kuna Jesu Kristu. Uwo waakaemesa Mwari kuyita muripo, ngo kugonda, mu ngazi yake, kuti kupangijihwe kururama kwake, ngo kuregerehwa kwo zvishaishi zvakaitwa ngo pamberi, ngo kusengerera kwa Mwari. Kupangijira kururama kwake ngo uwu mukuvo; kuti iye pachake ayite wakarurama, no mupembeji wo uwo unotenda kuna Jesu. Ndizvo kuri kwapi kuganza? Kwakakonyehwa kunja. Ngowapi mupango? Ngo wo mishando here? Haiwa! Asi ngo mupango wo kugonda. Ngokuti tinotenda kuti mundhu unopembejwa ngo kugonda haiwa ngo mishando yo mipango. Zve, Mwari uri Mwari wo vaJudha vega here? Andiyepivo Mwari wo vo majinja here? Eya uri wo vo majinja naye. Kwechivoneka kuti Mwari ndiumwe, naye unozopembeja vakachekwa ngo kugonda, no vasikazivi kuchekwa ngo kugonda. Ndizvo tinoregera Mipango ngo kugonda here? Kusazoitika kudaro! Asi tinogwinyisisa mipango. Ndizvo tinozonangenyi ndi Abrahama baba wedu vokwenyama? Kuti wakavonenyi? Ngokuti kudari Abrahama wakapembejwa ngo mishando, unacho cho kuganza ndicho, asi haiwa pamberi pa Mwari. Ngokuti matahwa anonangenyi? Abrahama wakatenda Mwari, kwakaverengwa kwaari kuti kuri kururama. Zvino kwaari unoshanda, musharo wake auverengwi kuti iri nyasha, asi kuti gava. Asi kwaari usikashandi, asi iye unogonda kuno uwo unopembeja vashaishi, kugonda kwake kunoverengehwa kwaari kuti kuri kururama. Kudari ndi Dhavhidha wakananga ngo chidakajiso kuno mundhu uwo waakaverengera Mwari kururama ngo kunja kwo mishando, echiti: Vanomuchena avo vane zvinyangajo zvavo zvaregerehwa, no zvishaishi zvavo zvafishwa, unomuchena mundhuwo waasikaverengi Mambo kuti uno kushaisha. Ndizvo chidakajiso ichi chiri kuna vakachekwa vega here nokuti kuno vasikazivi kuchekwa navo? Ngokuti tinoti, kuna Abrahama kugonda kwake kwakaverengehwa kwaari kuti kuri kururama. Ndizvo kwakaita maverengehwenyi kwaari? Zvakaitika achekwa here, nokuti asati achekwa? Haiwa, achekwa, asi apo asati achekwa. Naye wakaashira chivoniso cho kuchekwa, chiri chitatijo cho kururama kwo kugonda ukwo kwayiva anakwo asati achekwa? Kuti ayite Baba wo avo vese vanotenda, pikija vasiri muchiyimo cho kuchekwa, kuti kururama kuverengehwe kwavari navo. Zve kuti ayite Baba vo vakachekwa kwavari, andivo vo vakachekwa vega, asi wo avozve vanofamba muzvitsiko zvo kugonda kwavaiva anakwo Baba wedu Abrahama, apo ayinga asati achekwa. Ngokuti chigondiso chokuti unozogara ndhaka yo nyika achizivi kuitwa kuna Abrahama nokuti kuno vana vake ngo mipango akadi, asi chakaitwa ngo kururama kwo kugonda. Ngokuti kudari avo vari vo mipango vari vanogara ndhaka, kugonda kwaitwa kusina shwiro, no chigondiso chinoyita chisina shwiro. Ngokuti Mipango inoshanda kupara ushungu; asi apo pasina Mipango, akuna kupauka. Ndizvo kuri kwo kugonda, kuti kuitwe kupuwa ngo nyasha; ngo ndava yokuti chigondiso icho chigwinyiswe kumibarihwana yese, haiwa kwavari vega vari vo Mipango, asi no kwavari vari vo kugonda kwa Abrahama, uri Baba wedu tese. Kudari ngo zvakatahwa: “Ndakakuita Baba wo majinja akawanda pamberi pa Mwari, uwo waakatenda; unomusa vakafa, echidanija izvo zvisipo, kunonga zviripo.” Pasina kugonda, wakatenda anokugonda ngoiyi ndava, yokuti ayite Baba wo majinja akawanda, kudari ngoicho chakavereketwa chokuti vana vako vanozodaro. Asikazivi kurembejeka mukugonda, iye aazivi kupinimija ngo muviri wake unonga wafa, ano makore anoda kuyita zana (100) nokuti ngo kufa kwo ndani ya Sara. Iye aazivi kudengwaira ngo chigondiso cha Mwari ngo kugononda, asi wakagwinyiswa kugonda, echikuja Mwari, echigwinyisa kugonda kuti icho chaakagondisa, uno simbazve ro kuchiita. Ndizvo kwakaverengwazve kwaari kuti kuri kururama. Zvino akuzivi kutahwa ngo ndava yake ega, kuti kwakaverengehwa kwaari kudaro. Asi ngo ndava yeduvo, kwetiri kunoverengehwa kudaro, isisu tinotenda kuno uwo wakamusa Jesu Mambo wedu kuno vakafa, uwo wakapihwa ngo ndava yo zvishaishi zvedu, echimuswazve kuyita kupembejwa kwedu. Ndizvo techipembejwa ngo kugonda, tino kunyarara kuna Mwari ndiye Mambo wedu Jesu Kristu. Ndiye tinonghwiniswa ngo kugonda kuno iyi nyasha yo tinoima mukati mwayo; nesu tinodakarazve mukugonda ngokuva no uthende hwa Mwari. Andizvopi zvega, asi tinodakarazve mu matambujiko edu; techiziva kuti kutambujika kunobara kusengerera; no kusengerera kunobara kurovejera; no kurovejera kunobara kugonda; no kugonda akupsheruji, ngokuti rudo rwa Mwari rwakaduruhwa kakurutu mu mwoyo mwedu ndi Mweya Wakachena wakapuwa kwetiri. Ngokuti apo tainga tisina simba, Kristu wakatifira isisu vashaishi ngo mukuvo wakaemeswa. Ngokuti zvinonesa kuti mundhu afire mundhu wakarurama. Asi pamweni vamweni vangashinga kufira mundhu wakanaka. Asi Mwari wakatatija rudo rwake kwetiri, kuti apo tichiri vashaishi, Kristu wakatifira. Kakurutu zvino, techipembejwa ngo ngazi yake tinozoponeswa ndiye kubva ku ushungu. Ngokuti, kudari taiva vakorore, takaiyaniswa kuna Mwari ngo kufa kwo Mwana wake, kakurutu tiri vakaiyaniswa tinozoponeswa ngo ndaramo yake. Andizvopi zvega, asi tinozodakarazve kuna Mwari ndiye Mambo wedu Jesu Kristu, ndiye takaashira kuiyaniswa. Ndizvo kudari ngo zvokwakanghwina kushaisha mu nyika ngo mundhu umwe; no kufazve kwakanghwina ngo kushaisha, ngokudaro kufa kwakagumira vandhu vese, ngokuti vese vakashaisha; ngokuti mipango jisati jaavapo kushaisha kwaiapo mu nyika, asi kushaisha akuverengwi apo pasina mipango. Pikija zvakanyadaro, kufa kwakatonga kubvira kuna Adhamu mbhera kuguma kuna Mosi, no kwavari vasikazivi kushaisha ngo njira yaakapauka ndiyo Adhamu, uwo wayiva muezaniso wo uwo wayinga echizoviya. Asi chipuwo cho nyasha achizivi kuezaniswa no kupauka. Ngokuti kudari vazhinji vakafa ngo kupauka kwo mundhu umwe, kakurutu nyasha ya Mwari no chipuwo cho nyasha cho mundhu umwe, ndi Jesu Kristu chakawanjiswa kuno vazhinji. Asi chipuwo achizivi kuezanisihwa uwo wakashaisha. Ngokuti kutongwa kwakaguma ngoumwe kuri kurashwa, asi chipuwo cho nyasha chinoyita kuti zvipaukiso zvakawanda zvipembejwe. Ngokuti kudari ngo kushaisha kwo mundhu, kufa kwakatonga ngo ndava yo umwe; kakurutu avo vanoashira kuwanda kwo nyasha no chipuwo cho kururama vanozotonga mukururama ndiumwe Jesu Kristu. Ndizvo kudari ngo kurashwa kwakagumira vandhu vese ngo kupauka kwo umwe, ngokudaro ngo kuyita kwo mundhu umwe wakarurama chipo cho nyasha chakagumira vandhu vese kuyita kupembejwa kwo kupona. Ngokuti kudari ngo vazhinji vakaitwa vashaishi ngo kusikapurutana kwo mundhu umwe, ngokudaro vanozoitwa vakarurama ngo kupurutana kwo mundhu umwe. No Mupango jakanghwina kwokuti kushaisha kuwande; asi apo kushaisha kwawanzwa, nyasha yakapinda kakurutu kuwanjwa; kuti kudari kushaisha kwakatonga mukufa, ngokudaro nyasha ingatonga ngo kururama kuenda mukupona kusikaperi ndiye Jesu Kristu Mambo wedu. Ndizvo tinonangenyi? Tondogara mukushaisha here kuti nyasha jiwandiswe? Haiwa! Isisu tiri vakafa kwo kushaisha, tingachayita maponerenyi mukati mwazvo? Nokuti amuzivi here kuti isisu tiri vakabhapatiswa kuna Kristu Jesu, takabhapatisirwa mukufa kwake? Ndizvo takavigwa pamwepo naye ngo kubhapatiswa mukufa. Kuti kudari ndi Kristu wakamuswa kwo vakafa ngo uthende hwa Baba, ngokudaro isisuvo tifambe mukupona kupsha. Ngokuti kudari takabatanijwa pamwepo naye mumuezaniso wo kufa kwake, zve, tinozoezana naye mukumuka kwake. Techiziva ichi, kuti mundhu wedu wokare wakakohomehwa pamwepo naye, kuti muviri wo kushaisha upere, kwokuti isisu tisachazoita varanda vokushaisha. Ngokuti iye wafa unopembejwa kwo kushaisha. Asi kudari takafa pamwepo na Kristu, tinogonda kuti tinozoponazve naye; techiziva kuti Kristu apo amuswa kwo vakafa, aachatongofizve; rufu aruchazotongi panyezuru pake. Ngokuti ngo kufa kwaakafa ndikwo wakafa kwokushaisha kamwe; asi kupona kwaanopona, unopona kuna Mwari. Ndizvo ngokudaro mwechijiverenga nemwi kuti muri vakafa kwo kushaisha, asi kuti muri vanopona kuna Mwari ndiye Kristu Jesu. Ndizvo musatendera kuti kushaisha kutonge muviri yenyu inofa, kuti mupurutane kuemura kwayo. Zve, musapa zvo miviri yenyu kuno kushaisha, kuyita mijiyo inoshandiswa kuyita zvisikazivi kururama; asi jipirenyi kuna Mwari kudari ndivo vakapona kubva kwo vakafa, no zvo miviri yenyu kuti zviite zvo kushanda zvo kururama kuna Mwari. Ngokuti kushaisha akuzotongi panyezuru penyu akadi: Ngokuti imwimwi amuri pasi po mipango, asi pasi po nyasha. Ndizvo chinyi? Tinozoshaisha here, ngokuti atiri pasi po mipango, asi pasi po nyasha? Haiwa zvisazodaro! Amuzivi here, kuti kuno uwo wo munojikova kwaari kuyita varanda kupurutana, muri varanda vake uwo wo munopurutana; pikija wo kushaisha kuyita kufa, nokuti vokupurutana kuyita kururama? Asi ngaabongwe Mwari kuti pikija mwaiya varanda vokushaisha, mwakapurukira ngo mwoyo kuno muemo wo kujijiswa ukwo kwakapiwa kwomuri. Mwechisununguhwa kubva kwo kushaisha, mwakaita varanda vo kururama. Ndinovereketa kudari ngo chirovejeso cho vandhu ngo ndava yo kutama simba kwo nyama yenyu: Ngokuti kudari ngo zvo mwakazvipira zvomuviri yenyu kuyita varanda vokusikasukiki no vokushaisha kuti muyite zvakashata; ngokudaro zvino piranyi ndhengo jo muviri yenyu kuyita varanda vo kururama kuyita vakacheneswa. Ngokuti apo mwayiva varanda vo kushaisha, mwayiva mwakasununguhwa kubva kwo kururama. Mwayiva no michero yakaitawani ngo uwo mukuvo kuno izvo zvo munopsheruka ndizvo zvino? Ngokuti kupejisira kwo izvo zviro kuri kufa. Asi zvino mwasununguhwa kubva mukushaisha, mwayita varanda kuna Mwari, mune michero yenyu inoita kuti mucheneswe, no kupejisira kwayo kuri kupona kusikaperi. Ngokuti musharo wo kushaisha uri kufa; asi chipuwo cho nyasha ya Mwari chiri kupona kusikaperi ndiye Jesu Kristu Mambo wedu. Nokuti amuzivi here, hama, (ngokuti ndinovereketa kuno avo vonoziva Mipango), kuti Mipango inotonga panyezuru pomundhu mukuvo wese waachararama? Ngokuti mwanakaji uno mwamuna unosungwa ngo mupango kuno mwamuna wake achararama; asi kuti mwamuna wake afa, unosununguhwa kubva ku mupango wo mwamuna wake. Ndizvo kudari apo mwamuna wake achararama, echinamatira kuno umweni, unozozwi uri muombi; asi kudari mwamuna wake afa, iye unosununguhwa kubva ku mupango, ndizvo aayiti muombi pikija anamatira kuno mwamuna umweni. Ndizvo hama jangu, imwimwizve mwakaitwa vakafa kumipango ngo muviri wa Kristu; kuti muitwe vo umweni, kunoti, kuno uwo wakamuswa kwo vakafa, kuti tibereke michero kuna Mwari. Ngokuti apo taiva mu nyama, kuemura kwo zvishaishi kwayiva ngo ndava yo mipango, kwakashanda mundhengo jo muviri wedu, kukabudisa michero inobara rufu. Asi zvino isisu takasununguhwa ku mupango, tatofa kuno izvo zvo takasungwa ndizvo; kwokuti zvino tinoshandira ngo mweya mupsha tisikashandiri ngo maitiro wokare wokubatisisa kuno izwi ro mipango. Ndizvo tinozonangenyi? Mipango iri kushaisha here? Haiwa! Kani inga ndisikazivi kushaisha, kwega ngo mipango, ngokuti inga ndisikazivi kuemura, kudari mipango isikazivi kuti: Usazoemura. Asi kushaisha kwechivona njira, kwakashanda mukati mwangu ngo mipango mbewu jese jo kuemura; ngokuti ngo kunja kwo mutemo kushaisha kwakafa. Neni ndaipona ngo kunja kwo mutemo karetu, asi apo kwakaguma mipango kushaisha kwakamuswa, neni ndakafa. No mupango uwo wakagajwa uri kupona, uwu ndakavona kuti uri wo kufa. Ngokuti kushaisha kwechivona njira kubudikija ngo mupango kwakandichengeja, na ngokubudikija ndiyo kwakandiuraya. Ndizvo Mutemo uri wakachena, no mipango yakachena, yakarurama no yakanaka. Ndizvo izvo zviri zvakanaka zvakayita here rufu kwendiri? Haiwa! Asi kushaisha kuti kuvoneke kuti kuri kushaisha, ngo kushanda rufu kwendiri? Kubudikija ngoicho chakanaka; kwokuti kushaisha kubudikija ngo mipango kuite kwakanyanyisisa kushata. Ngokuti tinoziva kuti Mipango iri yo Mweya; asi inini ndiri wo nyama, ndakatengeswa pasi po kushaisha. Ngokuti chendinoita andichizivi; ngokuti andiiti chendinoda; asi icho chendinonyenya ndicho chendinoita. Asi kudari ndinoita chendisikadi, ngokudaro ndinotendera kuti mutemo uri wakanaka. Ndizvo zvino andinipi ndinoita kudaro, asi kuri kushaisha kunogara mukati mwangu. Ngokuti ndinoziva kuti mukati mwangu, kunanga kuti mu nyama yangu, akugari no chiro chakanaka; ngokuti kwendiri kuripo kuda, asi kuyita chakanaka amuna akadi. Ngokuti kunaka kwo ndinoda kuyita, andiiti, asi kushata kwo ndisikadi, ndikwo kwo ndinoita. Asi kudari ndechiyita chendisikadi, andinipi ndinochiita, asi kushaisha kunogara mukati mwangu. Ndizvo ndinowana mutemo wokuti apo ndoda kuyita zvakanaka, kushata kundoripo pendiri. Ngokuti ndinodakara mu mitemo ya Mwari ngo mundhu uri mukati mwangu. Asi ndinowana mupango umweni uri mundhengo jangu, wechiambana no mupango wo mupinimijo wangu, wechindidira muuranda pasi po mupango wo kushaisha uri mu ndhengo jangu. A, ndiri mundhu unotambujika: Ndiyani unozondinunurira kubva kuno uwu muviri wo kufa? Ndinobonga Mwari ndiye Jesu Kristu Mambo wedu ndizvo inini pachangu ngo mipinimijo wangu ndinoshandira Mipango ya Mwari; asi ngonyama ndinoshandira mupango wo kushaisha. Ndizvo akuchina kuitihwa ndava kwavari vari kuna Kristu Jesu, vasikafambi ngo zvo nyama, asi ngo zvo Mweya. Ngokuti mupango wo Mweya wokupona kuna Kristu wakandisunungura kuno mupango wo kushaisha no wo kufa. Ngokuti izvo zvo yakakorera Mipango kuyita, ngo ndava yo kutama simba kwo nyama, Mwari echituma Mwana wake ari mu muemo wo nyama ino kushaisha, na ngo ndava yo kushaisha iye wakarasha kushaisha kuri nyama; kuti kururama kwo mupango kuzarisike mukati mwedu, kwetiri tisikafambi ngo zvo nyama, asi ngo zvo Mweya. Ngokuti avo vari vo nyama, vanomupinimijo wokuda zviro zvo nyama. Asi avo vari vo Mweya, vanomupinimijo wokuda zviro zvo Mweya. Ngokuti kuva no mupinimijo wo zvo nyama kuri kufa, asi kuva no mupinimijo wo zvo Mweya kuri kupona no kunyarara. Ngokuti mupinimijo wo zvo nyama kuri kuambana na Mwari; ngokuti aupfaviri mupango wa Mwari, zve, ngo gwinyiso aungazvipfaviri; asi avo vari vo nyama avangamudakajisi Mwari. Asi imwimwi amuchiri vo nyamapi, asi mwaa vo Mweya, kudari Mweya wa Mwari wechigara mukati mwenyu. Asi pikija ndiyani usina Mweya wa Kristu, uwu aasiri wake akadi. Asi kudari Kristu ari mukati mwenyu muviri uri wakafa ngo ndava yo kushaisha, asi Mweya unopona ngo ndava yo kururama. Asi kudari Mweya wo uwo wakamusa Jesu kwo vakafa wechigara mukati mwenyu, iye wakamusa Kristu Jesu kwo vakafa, unozoraramisazve miviri yenyu inofa ngo Mweya wake unogara mukati mwenyu. Ndizvo hama, tine zvikwereti, haiwa ku nyama, kuti tipone ngo zvo nyama, ngokuti kudari mwechipona ngo zvo nyama munozofa; asi kudari ndi Mweya mwechiuraya zviito zvo muviri, munozopona. Ngokuti vese vanotungamirihwa ndi Mweya wa Mwari vari vana va Mwari. Ngokuti amuzivi kuashirazve Mweya wo uranda kuti mutye, asi mwakaashira Mweya wo kurehwa, ndiwo tinodanijira kuti: “Abha, Baba!” Ngokuti Mweya wambhwine unoitira chapupu pamwepo no mweya wedu kuti isisu tiri vana va Mwari. Kudari tiri vana, tiri avozve vanogara ndhaka; vanogara ndhaka ya Mwari, naavo vanogara ndhaka pamwepo na Kristu, kudari techitambujwa pamwepo naye, kwokuti tikujwe pamwepo naye. Ngokuti tinoverenga kuti matambujiko o mukuvo uno aasisiri kuezaniswa no uthende uhwo hunozopangijihwa kwetiri. Ngokuti ngokuemurira kakurutu zvakasikwa zvinogarira kupangijihwa kwo vana va Mwari. Ngokuti zvakasikwa zvakapfaviswa kuno zvisina shwiro, kusiri kuda kwazvo, asi ngo ndava yo uwo wakayita kuti zvipfaviswe, mukugonda uku kuti zvakasikwa pachazvo zvinosununguhwa kubva muuranda wo kuvora kunghwina mukusununguka kwo uthende wo vana va Mwari. Ngokuti tinoziva kuti zvakasikwa zvese zvinondogomera pamwepo mukuhwajihwa kudari ngo kubara mbhera nazvino. Andizvopi zvega, asi isisuvo, tine mitanguro yo Mweya, nesuvo pachedu tinogomera mukati mwedu, techigarira kurehwa, kunanga, kusununguhwa kwo miviri yedu. Ngokuti takaponeswa ngo kugonda. Asi kugonda ukwo kunovoneka akusiri kugonda akadi. Ngokuti ndiyani unogonda icho chaanovona? Asi kudari tine gonda ro icho cho tisikavoni, naapo tinozochigarira ngo kusengerera. Ngokudarozve Mweya unobesera kurembejeka kwedu; ngokuti atizivi njira inosisira kuti tikumbire ndiyo, asi Mweya wambhwine unotiitira samukuru ngo kugomera kusikabviri kunanga. No uwo unoringisisa mwoyo unoziva chiri kuda kwo Mweya, ngokuti unoyita samukuru ngo ndava yo vakacheneswa kudari ngo kuda kwa Mwari. Nesu tinoziva kuti zvese zvinoshanda pamwepo kuyita zvakanaka kwavari vanomuda Mwari, kwavari vakadanijwa kudari ngo kuemesa kwake. Ngokuti avo vaakaziva kare, wakavaemesa kare kuti vatojaniswe no muemo wo Mwana wake, kuti iye ayite wo dangwe mukati mwo vanukuna vakawanda. Naavo vaakaemesera kare, wakavadanijazve; naavo vaakadanija, wakavapembejazve; naavo vaakapembeja, wakavairikijazve. Ndizvo tinozopingurenyi kuno izvi? Kudari Mwari echitirwira, ndiyani unozorwisana nesu? Iye usikazivi kutirambira no Mwana wake, asi wakamupa ngo ndava yedu tese, inozoita njira yakaitawani kukura yaanozotipa pamwepo naye ngo nyasha zviro zvese? Ndiyani unozoitira ndava vakatsananguhwa va Mwari? Ndi Mwari unopembeja here? Ndiyani unozoitira ndava? Ndi Jesu Kristu here, wakafa, eya, wakamuswa kwo vakafa, uri ngo kumuho kwa Mwari, uwozve uri samukuru wedu? Ndiyani unozotiparajanisa no rudo rwa Kristu? Kutambujika here, nokuti kurwajihwa, nokuti kutambujwa, nokuti njara, nokuti kutama zvokusimira, nokuti ngozi, nokuti shoti? Eya, kudari ngo zvakatahwa: “Ngo ndava yako tinourawa zuva rese; tinoverengwa tiri vakadari ngo mabvuta akaemesehwa kuurawa.” Haiwa, ku izvi zvese tiri vanopinda vanyisi ndiye wakatida. Ngokuti ndinoongwa kuti zvese, kufa, nokuti kupona, nokuti ngirosi, nokuti umambo, nokuti zviri pano, nokuti zvinoviya, nokuti zvino simba, nokuti urebu, nokuti kujika, nokuti chiro chimweni chakasikwa, achingakoni kutiparajanisa no rudo rwa Mwari ruri kuna Kristu Jesu Mambo wedu. Ndinovereketa gwinyiso ndi Kristu, andinyepi, mwoyo wangu unondiitira chapupu mu Mweya Wakachena, kuti ndinokusururiswa kukurutu no kuhwajihwa kusina magumo mu mwoyo mwangu. Ngokuti ndingada kuti inini pachangu ndirashwe kubva kuna Kristu, ngo ndava yo hama jangu, ijo jiri hama jo jinja rangu ngo kubahwa. Kwavari vaIsraeri; wakavaita vana vake, no uthende, no zvitenderano, no kupuwa mupango, no kudira, no zvigondiso; ndivo majibaba mukuru avo, kubudikija ndivo Kristu wakabahwa ngo kwenyama, uwo uri panyezuru po zvese, Mwari ngaairikijwe kunoti mbhera narini. Ameni! Asi azvinangi kuti izwi ra Mwari rakakorera. Ngokuti andivopi vaIsraeri vese akadi avo vakabva kuna Israeri; haiwa, ngokuti vari mubarihwana hwa Abrahama, izvo azvinangi kuti vari vana vake akadi; asi, mubarihwana wako unozodujwa kubva kuna Isaka. Ukwo kunoti, andivopi vana vakabahwa ngo kwenyama vari vana va Mwari; asi vana vari vo chigondiso ndivo vanoverengwa kuti vari mibarihwana wake. Ngokuti iri ndiro izwi ro chigondiso: “Ngouyu mukuvo ndinozoviya, na Sara unozova no mwana.” Ichi andichopi chega chakadaro; asi Rabheka naye, apo ayinga ano mimba ngo umwe, ndi Isaka baba edu. Ngokuti vana vasati vaberekwa, nokuti vasati vayita chakanaka nokuti chakashata, kuti zano ra Mwari ngo kutsananguhwa rigwinyiswe, haiwa ngo mishando, asi ngo uwo unodanija, kwakanangwa kwaari, kuti: “Mukuru unozoshandira mudoko.” Kudari ngo zvakatahwa: “Jakobe ndakamuda, asi Isau ndakamunyenya.” Ndizvo tinozoti kudini? Kuripo kusikarurami here kuna Mwari? Kusaitika kudaro! Ngokuti iye wakati kuna Mosi: “Ndinozomuitira nyasha wo ndinoda kumuitira nyasha, no kukungurira wo ndinoda kukungurira.” Ndizvo azviri ngo kuda kwo mundhu nokuti ngo kuyita kwo mundhu asi ngo nyasha ja Mwari. Ngokuti matahwa anoti kuna Faro: Ngo iyi ndava ndakakuemesa, kuti ndivonise ndiwe simba rangu, nokuti zina rangu riteketeswe mu nyika jese. Ndizvo unoitira nyasha avo vaanoda kuvaitira nyasha, naavo vaanoda unovaita kuti vakonje. Ndizvo unozoti kwendiri: “Uchaitira ndava ngenyi? Ngokuti ndiyani wakarwa no chiri kuda kwake?” Haiwa, asi uriyani mundhuwe, unokanijana na Mwari? Chiro chakaumbwa chingananga here kuno uwo wakachiumba, kuti, wakandiumba kudari ngenyi? Zve, muumbi aana simba here panyezuru po dongo kwo mburumbwa rimwero kuumba chijio chimwe chinoreremejeka no chimweni chisikareremejeki? Kungavanenyi kudari Mwari echida kupangijira ushungu hwake, no kuzivisa simba rake, akashingirira ngo kusengerera kakurutu kuno ndiro jo ushungu jakaemesehwa kuparajwa. Zve kuti azivise upfumi hwo uthende hwake kuno ndiro jo nyasha, ijo jakanasirihwa ngo pamberi kuano uthende. Kunoti isisu tiri, avo vaakadanijazve, haiwa vanobva ku vaJudha vega, asi no kwavozve vanobva ku majinja. Kudari ngo zvaakavereketazve mu tshamba ya Hoziya: “Ndinozovadanija kuti vari vandhu vangu, avo vasaiva vandhu vangu akadi; no kumudanija kuti uri unodikana, uwo wayinga asiri unodikana.” Kunozoitika kuti pandau paakananga kwavari, kuti: “Amuri vandhu vangupi, apo vanozodanijwa kuti vari vana va Mwari unopona.” Na Isaya wakadanijira ngo vaIsraeri, kuti: Pikija uwandu hwo vana vaIsraeri hwechinyazodari ngomusanga wo mujombe, vakasara avo vanozoponeswa. Ngokuti Jehovha unozozajisa izwi rake mu nyika echiripejisa no kurifupisa. Nokudari ngo zvaakavereketa Isaya karetu: Kudari kuti Jehovha wehondo asikazivi kutisiira mubarihwana, tainga takadari ngo Sodhoma, nokudari ngo Gomora. Ndizvo tinozonangenyi? Kuti vo majinja avo vasikazivi kutevera kururama, vakawana kururama, eya, kuno uwo kururama kuri kubudikija ngo kugonda; asi Israeri echitevera mupango wo kururama aazivi kuwana mupango uwo. Ngenyi? Ngokuti avazivi kukupshaka ngo kugonda, asi kudari ngo mishando. Vakakhugunwa pa buwe ro kukhugunyisa; kudari ngo zvakatahwa: “Ringirai, ndinorajika mu Zioni buwe ro kukhugunya, ruware runovaita kuti vawe; no uwo unotenda kwaari aazopsherujwi.” Hama, chidisiso cho mwoyo wangu, no kukumbira kwangu kuna Mwari ngo ndava yo vaIsraeri chiri kuti vaponeswe. Ngokuti ndinovaitira chapupu kuti vanotsamwirira kuna Mwari, asi vanoyita ngo kusikaziva. Ngokuti ivo vasikazivi kururama kwa Mwari, vechipshaka kugwinyisa kururama kwavo, avazivi kujipfavisa mukururama kwa Mwari. Ngokuti Kristu uri magumisiro emipango kuyita kururama kuno mundhu wese unotenda. Ngokuti Mosi unotara kuti: “Mundhu unoyita kururama kwo mipango, unozopona ndiyo.” Asi kururama ukwo kunobva mukugonda kunanga kuti: Usavereketa mu mwoyo mwako kuti, ndiyani unozokwira mu denga (ukwo kunoti, kubzusa Kristu)? Nokuti, ndiyani unozobzuka mukujika, (ukwo kunoti, kumukwija Kristu kubva kwo vakafa)? Asi zvinonangenyi? Izwi riri phedo pako, riri mumuromo mwako, no mu mwoyo mwako: Ukwo kunoti, izwi ro kugonda ro tinochumaira. Ngokuti kudari wechipupura Mambo Jesu ngo muromo wako, no kutenda mu mwoyo mwako kuti Mwari wakamumusa kwo vakafa, unozoponeswa. Ngokuti mundhu unotenda ngo mwoyo kuano kururama; na ngo muromo unopupura kuano kuponeswa. Ngokuti matahwa anoti, iye unomutenda aazopsherujwi akadi. Ngokuti akuna muparajaniso pakati po mujudha no mugiriki; ngokuti Mambo ndiye umwewo uri Mambo wavo vese, unoupfumi wo kupa kwavari vese vanokumbira kwaari. Ngokuti pikija ndiyani unokumbira ngo zina ra Mambo unozoponeswa. Ndizvo vangazoita makumbirirenyi kwaari uwo wo vasikazivi kutenda? Zve, vangazoita matenderenyi kwaari uwo wo vasikazivi kuzwa ndiye? Zve, vangazoita mazwirenyi kusina muchumairi? Vangazoita machumairirenyi kuti vasikazivi kutumwa? Kudari ngo zvakatahwa: “Manakirenyi akayita tshoka javo vanoteketesa vhangeri ro kunyarara, avo vanoteketesa masoko ozviro zvakanaka.” Asi vese avazivi kupurutana ku vhangeri. Ngokuti Isaya unoti: “Jehovha, ndiyani wakatenda chumairo redu?” Ndizvo kugonda kunoviya ngo kuzwa no kuzwa kuri ngo mazwi a Kristu. Asi ndinoti, avazivi kuzwa here? Eya ngo gwinyiso, ngokuti izwi ravo rakabuda kuenda ku nyika jese, no mazwi avo akaguma kumagumo onyika. Asi ndinoti, vaIsraeri avazivi kuziva here? Kutanga Mosi unoti: “Ndinozomusira ndurumwa ngaavo vasiri jinja akadi, ngo jinja risina kuziva ndinozomutsenekesa.” Na Isaya unoshinga kakurutu, unoti: “Ndakavoneka kwavari vasikazivi kundipshaka; ndakapangijihwa kwavari vasikazivi kubvunjisa ndini.” Asi ku vaIsraeri unoti: Zuva rese ndakatambanujira nyara jangu kuno vandhu vasikapurutani, no vanokanija. Ndizvo ndinoti, Mwari wakarasha vandhu vake here? Haiwa! Ngokuti ininivo ndiri muIsraeri, wo mibarihwana wa Abrahama, wo jinja ra Benjamini. Mwari aazivi kurasha vandhu vake vaakatsanangura pakutanga. Nokuti amuzivi here icho chaanonanga matahwa ndi Erija? Ngo njira yaakapota ndiyo kuna Mwari kuitira vaIsraeri ndava, echiti: “ Mambo, vakauraya vaprofeti vako, vakapwanyira pasi maaltari ako; neni ndini ndega ndasara, navo vachapshaka kundiuraya.” Asi mupinguro wa Mwari unoti kudini kwaari? Ndakajisiira zviuru zvinomwe (7.000) zvo vandhu vasikazivi kugwadama ngo makokobvi avo kuna Bhaari. Ndizvo ngokudaro ngo mukuvo uno, varipo vakasara kudari ngo kutsananguhwa ngo nyasha jake. Asi kudari kuri kwo nyasha, akuchiri kwo mishando akadi: Zvakadaro nyasha ajichaiti nyasha. Ndizvo chinyi? Icho chaakapshaka Israeri aazivi kuchiwana; asi vakatsananguhwa vakachivona, no vamweni vakakonjiswa. Kudari ngo zvakatahwa: “Mwari wakavapa mweya wo kukangaijwa, wakavapa majiso okuti vasavona, no njeve jokuti vasazwa, mbhera kuguma kune iri zuva.” Dhavhidha unoti: “Thafura ravo ngariite murau, no chirimbana, no chikhugunyiso, no chiunzijiro kwavari.” Majiso avo ngaaitiswe chisiku, kuti vasavona, uvakotamise misana yavo nguva jese. Ndizvo ndinoti, vakakhugunywa here kuti vawe? Haiwa! Asi ngokuwa kwavo ruponeso rwakaviya kuno vo majinja, kuvamusira ndurumwa. Zvino, kudari kuwa kwavo kuri upfumi hwo vo nyika, no kurashikihwa kwavo kuri upfumi hwo majinja; kuzara kwavo kunozopinda kwakaitawani? Asi ndinovereketa kwomuri muri vo majinja, kwechivoneka kuti ndiri mupostori kuno vo majinja, ndinokurisa mushando wangu. Kuti pamweni ndingayita kuti ndimusire ndurumwa vandhu vangu, no kuponesa vamweni vavo. Ngokuti kudari kurashwa kwavo kuri kuiyaniswa kwo nyika, kuashirwa kwavo kunozoita kwakadini, akuiti kumuswa here kwo vakafa? Nokudari mutanguro wo hlama uri wakachena, makanywa ari akachenavo; nokudari muji uri wakachena, matavi ari akachenavo. Asi kudari matavi amweni akagurwa, newe, uri muorivhe wo mushango, wakabatanijwa mukati mwawo, ukaashira nawo kunaka kwo muorivhe; usaganzira matavi; asi kudari wechiganza, andiwepi unotwara miji, asi miji jinotwara iwewe. Ndizvo iwewe unozoti, matavi akagurwa kuti inini ndibatanijwe. Zvakanaka; akagurwa ngo ndava yo kugononda kwawo, newe unoyima ngo kugonda. Usajikuja mumupinimijo wako, asi itya. Ngokuti kudari Mwari asikazivi kuregera matavi epo, zve, aazokuregeri newe. Ndizvo ringira nyasha no ushungu hwa Mwari: Kwavari vakawa, kwakapangijihwa ushungu; asi kwouri kwakapangijihwa nyasha ja Mwari, kudari wechizovangirira kugara munyasha jake. Usikadaro, ungazotemwa newe. Navo, kudari vasikagari mukugononda kwavo, vanozobatanijwa; ngokuti Mwari uno simba ro kuvabatanijazve. Ngokuti kudari iwewe watemwa kubva ku muorivhe wo mushango ngo chibarihwe, newe wakabatanijwa, ngo njira yakaparajana no chibarihwe, mukati mwo muorivhe wakanaka: Kunozopinda kwakaitawani awo ari epo, kuti abatanijwe ku muorivhe wao? Ngokuti andidi, hama, kuti muyite vasikazivi ngoichi chakafishika, kuti musajiita vakangwara mu mipinimijo yenyu, kuti vaIsraeri vakagumihwa ngo kutindivara kwo mwoyo, mbhera kugume kuzarisika kwo nguva yo vo majinja. Ndizvo vaIsraeri vese vanozoponeswa kudari ngo zvakatahwa: “Kunozobuda Mununuri mu Zioni; iye unozobvisa kushata kuna Jakobe. No ichi chiri chitenderano changu kwavari, apo ndozobvisa zvishaishi zvavo.” Ngo ndava yo vhangeri, vari vakorore ngo ndava yenyu; asi ngo ndava yo kutsananguhwa, vari vanodikana ngo ndava yo majibaba. Ngokuti zvipo no kudanijwa ndi Mwari zviri zvisikakunukuki. Ngokuti kudari ndimwi ngo mikuvo yakapinda mwaiya vasikapurutani kuna Mwari, asi zvino mwakawana nyasha ngo kusikapurutani kwavo, ngokudaro avo navo zvino vari vasikapurutani, kuti ngo nyasha ijo jakapangijihwa kwomuri, avo navo vangawana nyasha zvino. Ngokuti Mwari wakavakonyera vese mukusikapurutana, kuti avaitire nyasha vese. A, kujika kwazvo, zvese upfumi no ungwaru no kuziva kwa Mwari zvitongero zvake azvingapshakisiswi, no njira jake ajingakonwi kurondwa. Ngokuti ndiyani wakaziva mupinimijo wa Mambo? Nokuti ndiyani wakayita mupangi wake? Nokuti ndiyani wakamukovera kutanga, nakwo kunozohwirijihwazve kwaari? Ngokuti zviro zvese zvinobva kwaari, zviripozve ndiye, zviri zvake, kwaari ngakuapo uthende husikaperi. Ameni! Ndizvo ndinomupota, hama, ngo nyasha ja Mwari, kuti mupire muviri yenyu kuti iite mudiro unopona, wakachena unoashirika kuna Mwari, uri mushando wenyu wo kudira unoshwiro. Zve, musateveja zvo iyi nyika, asi mwechitsandujwa ngo kumusihwa kwo mupinimijo wenyu, kuti mueje kuyita icho chiri kuda kwa Mwari, chiri chakanaka, no chinoashirika, no chakaperera. Ngokuti ndinonanga ngo nyasha jakapuwa kwendiri, kuno mundhu wese uri pakati penyu, kuti asajikuja ngo kupinimija kupinda ukwo kunosisira; asi kuti ajipinimijire ngo kungwara, kudari ngo zvaakapa Mwari kuno mundhu wese chipimo cho kutenda. Ngokuti kudari ngo zvotinajo ndhengo jakawanda jo muviri umwe, ndhengo jese ajina mushando umwewo akadi. Ngokudaro isisu tiri vazhinji tiri muviri umwe kuna Kristu, umwe ngaumwe tiri ndhengo imwe kuno umweni. Saka kwechivoneka kuti tine zvipuwo zvakaparajana, kudari ngo nyasha jakapuwa kwetiri, kudari chiri cho kuprofeta, ngatiprofete kudari ngokukura kwo kugonda kwedu. Nokuti kudari chiri cho kushandira, ngatijipire mukushandira; nokuti iye unojijisa, ngaajipire mukujijisa; nokuti iye unopanga, ngaajipire mukupanga: Iye unokovera, ngaayite ngo kusikanyimi; iye unotonga ngaatonge ngo kungwara; iye unoitira nyasha ngaayite ngo kudakarira. Rudo ngaruite rusina kujiitisa. Nyenyanyi izvo zvakashata; namatiranyi kuno izvo zvakanaka. Disananyi umwe kuno umweni ngo rudo rukuru; mureremejane umwe kuno umweni; mukushanda musaita nungo: Itanyi vanopisa muMweya; mwechishandira Mambo. Itanyi vanodakara mukugonda; musengerere mu matambujiko; mwechivangirira mukukumbira; koveranyi no vakacheneswa zvovanotama; itanyi vanoashira vapfumba. Vadakajisenyi vanomutambuja; vadakajisenyi, musavatuka. Dakaranyi navo vanodakara; mwechichema naavo vanochema. Muve no mupinimijo umwewo umwe kuno umweni. Musapshaka zvino mbirikira, asi mwechifambisana pamwepo no vakapfava; musajiita vakangwara mu mipinimijo yenyu. Musahwirijira ku mundhu kushata, ngo ndava yo kuitihwa zvakashata. Pshakanyi izvo zvinoreremejeka mukuvona kwo vandhu vese. Kudari kungaitika, zvomunokona, garanyi mukunyarara no vandhu vese. Musajihwirijira pachenyu, vanodikana, asi taraukiranyi ushungu hwa Mwari; ngokuti kwakatahwa kuti: Kuhwirijira kuri kwangu; inini ndinozohwirijira, unonanga Jehovha. Asi kudari mukorore wako unonjara, mupeyi zvokuha; kudari uno nyota, mupeyi zvokumwa; ngokuti ngokuyita kudaro unozounganija masimbe anopisa o muriro panyezuru po musoro wake. Musanyiswa ngo kushata, asi nyisanyi kushata ngo kunaka. Mundhu wese ngaapfavire majimambo anotonga panyezuru pake; ngokuti akuna umambo usikazivi kugajwa ndi Mwari; naao aripo akagajwa ndi Mwari. Ndizvo iye unoemesejana na mambo, unorwisana no chiyimo cha Mwari: Naavo vanorwisana vanozotongwa. Ngokuti vatongi avatyisi kwavari vanoyita mishando yakanaka, asi kwevanoita yakashata. Unoda here kuyita usikatyi mambo? Ita zvakanaka newe unozokujwa ndiye. Ngokuti iye uri mushandiri wa Mwari kwouri unokuitira zvakanaka. Asi kudari wechiyita zvakashata, ityai; ngokuti iye aateri kutwara shoti pasina chiro: Ngokuti uri mushandiri wa Mwari muhwirijiri wo ushungu kuno uwo unoyita zvakashata. Ndizvo kunosisira kuti mupfavire, haiwa ngo ndava yo kutambujwa kwega, asi ngo mumwoyo. Ngo iyi ndava mworipazve shangu; ngokuti avo vari vashandiri va Mwari vanogara vechiita izvi. Ipanyi kwavari vese izvo zvinovasisira: Shangu kwavari vo shangu, murimwa kwavo vo murimwa; mwechitya vanotyiwa; reremejanyi avo vanosisira kureremejwa. Musava no gava ro chiro ku mundhu, kwega kuti mudane umwe no umweni, ngokuti iye unomuda muvakihwana wake wakazarisa Mipango. Ngokuti izvi zvinoti: Usazoomba, usazouraya, usazoba, usazoemura, nokudari uripo umweni mupango unoverengwa no izwi iri, rokuti, unozomuda muvakihwana wako kudari ngozvounojida iwewe. Rudo arushandi zvakashata kuno muvakihwana. Ndizvo rudo ruri kuzarisa Mipango. Nemwi munoziva mukuvo kuti zvino yaanguva yokuti mumuke muhope; ngokuti zvino ruponeso rwedu rwaaphedo kwetiri kuno mukuvo wo takatenda. Usiku woda kupera, kueja kwaphedo; ndizvo ngatirashe mishando yo chidima, ngatipfeke zvokurwa ndizvo, zviri zvokujeka. Ngatifambe ngo njira inosisira, kudari ngo masikati; tisikafambi ngo kuhisa no kuraja, tisikafambi ngo kushanja, nokuti ngo kuemura, tisikafambi ngo hasha no ndurumwa. Asi mupfeke Mambo Jesu Kristu, musikapinimiji ngo zvo nyama kuyita kuemura kwayo. Asi ashiranyi uwo wakarembejeka mukugonda, asi musikaphikisani naye ngo ndava yo mupinimijo. Ngokuti umwe unogonda kuti ungaha zviro zvese, asi iye wakarembejeka unoha mirivo yo masakani. Iye unoha, asashora usikahi; naye usikahi asatonga unoha; ngokuti Mwari wakamuashira. Uriyani iwewe unotonga muranda wo umweni? Kuna mambo wake uri wakayima, nokuti kuwa, asi unozoyima, ngokuti Mwari unosimba rokuita kuti ayime. Umweni mundhu unoreremeja zuva rimwe kupinda rimweni; umweni naye unoreremeja ngo kutojana. Mundhu wese ngaanase kuziva mumupinimijo wake. Iye unongwarira zuva, unongwaririra kuna Mambo, no uwo usikangwariri zuva, aaringwariri no kuna Mambo. No uwo unoha, unohira kuna Mambo; ngokuti unobonga Mwari; no uwo usikahi, aahiri kuna Mambo, unobonga kuna Mambo. Ngokuti apana umwe wedu unojiponera ega, apanazve unojifira ega. Ngokuti kudari techipona, tinoponera kuna Mambo, nokuti kudari techifa, tinofira kuna Mambo. Ndizvo pikija techipona, nokuti techinyafa, tindori va Mambo. Ngokuti ngoiyi ndava Kristu wakafa, akaponazve, kuti ayite Mambo wavo vese, vakafa no vanopona. Asi iwewe unotonga ngenyi munukuna wako? Newe unoshorazve ngenyi munukuna wako? Ngokuti isisu tese tinozoima pamberi pachigaro cho kutonga cha Mwari. Ngokuti kwakatahwa, kuti kudari ngo zvendinopona, unonanga Mambo, kwendiri makokobvi ese anozondigwadamira, no ndimi jese jinozotenda kuna Mwari. Ndizvo isisu tese tinozojipingurira kuna Mwari. Ndizvo tisachatonga umwe kuno umweni, asi tongayi ichi kakurutu, kuti asazoapo mundhu unodira chikhugunyiso mu njira yo munukuna wake, nokuti kuyita kuti awe. Ndinoziva, ndinoongwa ndi Mambo Jesu, kuti akuna chiro chinojisvipisa pachacho. Kwega kuno uwo unoverengwa kuti chiro chiri chinosvipisa, kwaari chiri chakasvipiswa. Ngokuti kudari munukuna wako echisururiswa ngo ndava yo kuha kwako, ngokudaro auchafambi ngo rudo. Usamuuraya ngokuha kwako uwo waakafira Kristu. Ndizvo musatendera kuti kunaka kwenyu kutukwe. Ngokuti Umambo hwa Mwari andihwopi hwo kuha nokuti kumwa, asi huri hwo kururama, no kunyarara, no kudakara mu Mweya Wakachena. Ngokuti iye unoshandira Kristu ngo kuyita izvi unonasa kudakaja Mwari, unoashirikazve kuno vandhu. Ndizvo ngatitevere izvo zviro zvinoiyanisa, no izvo zvetingavakisana ndizvo umwe no umweni. Musaparaja mushando wa Mwari ngo ndava yo zvokuha. Ngo gwinyiso zvese zviri zvakacheneswa; pikija zvakanyadaro zviri zvakashata kuno uwo mundhu unozviha echikhugunyisa vamweni. Kwakanaka kurega kuha nyama nokurega kumwa vhini, nokuti kurega chiro chimweni chaanokhugunyiswa ndicho munukuna wako. Kugonda kwounakwo ngakuve kwouri pamberi pa Mwari. Unomuchena usikajitongi ngoicho chiro chaanotendera. Asi uwo unogononda unoitihwa ndava kudari echiha, ngokuti aahi ngo kugonda; ngokuti icho chisiri cho kugonda chiri kushaisha. Zvino isisu tiri vakagwinya, kunosisira kuti titware kurembejeka kwevasina simba, haiwa kuti tijidakajise. Umwe ngaumwe wenyu ngaadakajise muvakihwana wake, ngoicho chakanaka, chinovaka. Ngokuti Kristu naye aazivi kujidakajisa; asi kudari ngo zvakatahwa: “Kutuka kweavo vakakutuka iwewe, kwakawira panyezuru pangu.” Ngokuti izvo zvese zvakatahwa karetu zvakatahwa kuti isisu tijije, kuti tive no kugonda ngo kusengerera na ngo kuembezehwa kwo matahwa. Zvino Mwari wo kusengerera no wo kuembezera ngaamupe kuti muyite mupinimijo umwewo umwe kuno umweni, kudari ngo zvinoda Kristu Jesu. Kwokuti muri pamwepo ngo muromo umwe mukuje Mwari na Baba wa Mambo wedu Jesu Kristu. Ndizvo ashirananyi umwe no umweni, kudarizve ndi Kristu wakamuashira imwimwi kuti Mwari akujwe. Ngokuti ndinoti Kristu wakaitwa mushandiri wo kuchekwa ngo ndava yo gwinyiso ra Mwari, kuti agwinyisise zvigondiso zvakaitwa ku majibaba, nokuti majinja airikije Mwari ngo ndava yo nyasha jake; kudari ngo zvakatahwa: “Ngo iyi ndava ndinozokukuja mukati mwo vo majinja, ndiembe ngo zina rako. Zve, unoti, Dakaranyi imwimwi vo majinja pamwepo no vandhu vake.” Zve, kujanyi Jehovha, imwimwi mwese vo majinja. Vandhu vese ngavamukuje. Zve, Isaya unoti: “Unozovapo miji wa Jese, no uwo unozomiruka kutonga panyezuru po vo majinja; vo majinja vanozogondera kwaari.” Zvino Mwari wo gondero ngaamuzarise ngo kudakara kwese no kunyarara, mukutenda, kuti muwanjwe mukugonda, ngo simba ro Mweya Wakachena. Neni pachanguzve, ndinoongwa ndimwi, hama jangu, kuti imwimwi mwambhwine mwakazara ngo kunaka, mwakazara ngo kuziva kwese, munokonazve kupangana umwe no umweni. Asi ndinotara kwomuri ngo kupinda kushinga ngo zviro zvimweni, kwo kumucherechejisazve, ngo ndava yo nyasha jakapuwa kwendiri ndi Mwari. Kuti ndiite mushandiri wa Kristu Jesu kuno vo majinja, ndechishanda kupa vhangeri ra Mwari, kuti mudiro unopihwa ngo vo majinja ungaita unoashirika, wakacheneswa ndi Mweya Wakachena. Ndizvo ndinakwo kukujwa kwangu kuna Kristu Jesu ngo zviro zva Mwari. Ngokuti andizoshingi kuvereketa ngo zviro zvimweni, kwega ngo izvo zvaakashanda Kristu kubudikija ndini, kuitira kuti vo majinja vapurukire, ngo izwi na ngo mushando. Ngo simba ro zvivoniso na ngo mishamiso, ngo simba ro Mweya wa Mwari. Kuti kubvira ngo Jerusarema, no kundharaunda jaro mbhera kuguma Iririko, ndakapeja kuchumayira vhangeri ra Kristu; eya, ngokudaro ndakaeja kuchumayira vhangeri pandau jisaizivikana zina ra Kristu, kuti ndisazovaka panyezuru po tsikiro ro umweni mundhu; asi kudari ngo zvakatahwa, kuti: “Avo vasikazivi kuziviswa masoko ndiye vanozovona, naavo vasikazivi kuzwa, vanozozwisisa.” Ndizvozve ndakaphingwa kazhinji kuti ndisaviya kwomuri. Asi zvino, andisina ndau yo kushanda kuno iji nyika, ndinodisisa ngaaya makore akawanda kuti ndiviye kwomuri, ngo nguva yo ndinozoenda Spaniya, ndinoviya kwomuri; ngokuti ndinogonda kuti ndinozomuvona muhwendo hwangu, no kuperekejwa ndimwi kuendeyo, kuti pakutanga ndingakwaniswa ngo kuvonana nemwi. Asi zvino ndinoenda Jerusarema, kooshandira vakacheneswa. Ngokuti zvakavadakajisa avo vo Makedhoniya, no vo Akaya, kupa zvipo kuno varombo vari pakati po vakacheneswa mu Jerusarema. Eya, ukwo kwakavadakajisa, ivo vane gava kwavarizve. Ngokuti kudari vo majinja vakakovanisirana navo zvifumiso zvavo zvo Mweya, ivo vane gava kwavarizve ro kuvashandira ngo zviro zvo vanotama zvo pa muviri. Ndizvo apo ndapeja kuyita izvi, no kugwinyisisa kwavari michero iyi, ndinozoendiswa mberi kuenda Spaniya ndimwi. Neni ndinoziva kuti apo ndooviya kwomuri, ndinozoviya ngo kufumiswa kwakazara kwo vhangeri ra Kristu. Zvino ndapota kwomuri, hama, ndiye Mambo wedu Jesu Kristu, na ngo rudo rwo Mweya, kuti mutambujike pamwepo neni mu mikumbiro yenyu kuna Mwari ngo ndava yangu. Kuti ndinunurihwe kubva kwo vasikapurutani vari mu Judhiya, nokuti mushando wangu wo zvipo zvo ndinazvo kuno vo Jerusarema, zviashirike ku vakacheneswa. Kuti ndiviye kwomuri mukudakara, kudari kuri kuda kwa Mwari, ndizorore pamwepo nemwi. Zvino Mwari wo kunyarara ngaagare nemwi mwese. Ameni! Ndinokohomejisisa kwomuri Febe ndiyo hanzvaji yedu iri mushandiri wo chiara chiri mu Kenkeriya; kuti mumuashire kuna Mambo, ngo njira inosisira vakacheneswa, nokuti mu mubesere ngo izvo zvese zvaanotama kubesehwa ndizvo ndimwi; ngokuti iye ambhwine wakayita mubeseri wo vazhinji, no weininiwo. Tambisanyi Prisira na Akwira, vadoni vangu mukushandira Kristu, avo ngo ndava yo ndaramo yangu vakarajika pasi misipa yavo; kwavari andinipi ndega ndinovabonga, asi zviara zvese zvo vo majinja. Tambisanyizve vo chiara chiri mu nyumba yavo. Tambisanyi Epineto mudikani wangu, uri mutendi wokutanga kuna Kristu mu Aziya. Tambisanyi Mariya, uwo wakamushandira kakurutu. Tambisanyi Anduroniko na Juniya, hama jangu, no vadoni vangu muubhanditi, avo vane mbirikira mukati mwo vapostori, vayiva kuna Kristu kutangira inini. Tambisanyi Ampriata mudikani wangu kuna Mambo. Tambisanyi Ubhani mudoni wedu mukushandira Kristu, na Staku mudikani wangu. Tambisanyi Aperesi unotendwa kuna Kristu. Tambisanyi avo vari vo mbhuri ya Aristobhuro. Tambisanyi Herodhioni, hama yangu. Tambisanyi avo vo mbhuri ya Nakiso, vari kuna Mambo. Tambisanyi Trufena na Trufosa, avo vanoshandira kuna Mambo. Tambisanyi Persidha mudikani, wakashandira Mambo kakurutu. Tambisanyi Rufo, wakatsanangurwa ndi Mambo, na mayi wake, no vanguvo. Tambisanyi Asukrita, na Frigonta, na Hermesi, na Patroba, na Hermasi, no hama yavo. Tambisanyi Firorogo, na Juriya, na Neriya hanzvaji yake, na Orimpa, no vakacheneswa vese vaanogara navo. Chingamijananyi umwe no umweni ngo muromo ngo njira yakachena. Zvese zviara zva Kristu zvinomutambisa. Zvino ndapota kwomuri, hama, ngwariranyi avo vanomusa kuparajana, no zvinokhugunisa, zvakapesana no izvo zvo mwakajijiswa, mubve kwavari. Ngokuti avo vari vakadaro avashandiri Mambo wedu Jesu Kristu, asi vanoshandira ndani yavo; na ngo kuvereketa kwavo kwakaserera kwakanaka, vanochengeja mwoyo yo avo vari vasina ndava. Ngokuti kupurutana kwenyu kwakazwika kuno vandhu vese. Ndizvo ndinodakara ndimwi: Asi ndinoda kuti mungware kuno izvo zvakanaka, zve, musina ndava kuno izvo zvakashata. Mwari wo kunyarara unozochangaja Sathani pasi po tshoka jenyu ngokukasira. Nyasha ja Mambo wedu Jesu Kristu ngajive nemwi. Ameni! Timoti, mudoni wangu mukushanda, unomutambisa; na Rukiyo, na Jasoni, na Sosipatro hama jangu. Inini Tetiyo uwo unotara tshamba iyi, ndinomutambisa kuna Mambo. Gaiyo unondiashira, no vo chiara vese, unomutambisa, Erastu mungwariri wo upfumi hwe dhoropa, unomutambisa, zve, no hama Kwato unomutambisa. Nyasha ja Mambo wedu Jesu Kristu, ngajigare nemwi mwese. Ameni! Zvino kwaari unosimba ro kugwinyisa kudari ngo vhangeri rangu no kuchumaihwa kwa Jesu Kristu, kudari ngo kupangijihwa kwe chakafishika chakangwaririhwa mukunyarara kubvira mukutanga kwo kusikwa kwo nyika, asi zvino chapangijirwa, ngo matahwa ovaprofeti, kudari ngo mupango wa Mwari wo mbhera narini, chinoziviswa kuno vo majinja ese kuyita kuti apurutane ngo kugonda; kuna Mwari ega unokuziva, ndiye Jesu Kristu, kwaari ngakuvapo uthende kunoti mbhera narini. Ameni! Pauri, wakadanijwa kuti ayite mupostori wa Jesu Kristu ngo kuda kwa Mwari, na Sositeni hama yedu, ku chiara cha Mwari chiri mu Korinte, kwavari vakacheneswa kuna Kristu Jesu, vakadanijwa kuti vayite vakacheneswa, pamwepo naavo vese vanokumbira ngo zina ra Mambo wedu Jesu Kristu, kundau jese, uri Mambo wavo no wedu. Nyasha ngajive kwomuri no kunyarara kunobva kuna Mwari Baba wedu na Mambo Jesu Kristu. Ndinobonga Mwari wangu ngo nguva jese ndimwi; ngo ndava yo nyasha ja Mwari jakapuwa kwomuri ndi Kristu Jesu. Ngokuti ngo zviro zvese mwakapfumiswa ndiye mukuvereketa kwese no mukuziva kwese. Kudari ngo uchapupu hwa Kristu hwakagwinyiswa mukati mwenyu; kuti musatama chipuwo nachimwe; mwechigarira kupangijihwa kwa Mambo wedu Jesu Kristu; uwozve unozomugwinyisa mbhera kumagumo, kuti muyite vasina kuitihwa ndava ngo zuva ra Mambo wedu Jesu Kristu. Mwari unogondeka, uwo wo mwakadanijwa ndiye mukuiyana no Mwana wake Jesu Kristu Mambo wedu. Zvino ndinomupota, hama, ngo zina ra Mambo wedu Jesu Kristu, kuti mwese muverekete chiro chimwecho, zve, kuti usavapo muparajano pakati penyu; asi kuti muyite vakasungwa pamwepo mumupinimijo umwewo, no mukugura kumweko. Ngokuti kwakaziviswa kwendiri, hama jangu, ngaavo vari vo mbhuri ya Kroa, kuti jiripo hasha pakati penyu. Zvino izvi ndizvo zvondinonanga, kuti umwe ngaumwe wenyu unoti, “Inini ndiri wa Pauri”, no umweni unoti, “ndiri wa Aporo,” no umweni unoti, “Inini ndiri wa Khefasi”; no umweni unoti “Inini ndiri wa Kristu.” Kristu wakaparajaniswa here? Pauri wakakohomehwa here ngo ndava yenyu, nokuti mwakabhapatiswa here ngo zina ra Pauri? Ndinobonga Mwari kuti andizivi kubhapatisa naumwe wenyu, kwega Krispu, na Gaiyo; kuti kusavapo naumwe ungazoti, kuti, mwakabhapatiswa ngo zina rangu. Zve, ndakabhapatisa vo mbhuri ya Stefano; ngokunja kwavo andikarakaji kuti ndakabhapatisa umweni. Ngokuti Kristu aazivi kunditumira kuti ndibhapatise, asi kuti ndichumaire vhangeri: Haiwa ngo kungwara kwo mazwi, kuti ngokudaro muchinjiko wa Kristu ungazoita usina shwiro. Ngokuti izwi ro muchinjiko riri upenji kwavari vanopera; asi kwetiri tinoponeswa, riri simba ra Mwari. Ngokuti kwakatahwa kuti: Ndinozoparaja ungwaru hwo vakangwara, no kuziva kwo vanoziva ndinozokurasa. Uri kwapi wakangwara? Uri kwapi mutari? Uri kwapi mupshakisisi wo zvo iyi nguva? Mwari aazivi kuzviita upenji here zvo ungwaru hweiyi nyika? Ngokuti kwechivoneka kuti nyika, ngo kungwara kwa Mwari, aizivi kuziva Mwari ngo ungwaru hwayo, kwakamudakajisa Mwari, ngo upenji hwo kuchumayira kuponesa avo vanotenda. Kwechivoneka kuti vaJudha vanokumbira chivoniso, no vagiriki vanopshaka ungwaru. Asi isisu tinochumaira Kristu wakakohomehwa, kuno vaJudha chiri chikhugunyiso, no kuno vo majinja chiri upenji. Asi kwavari vakadanijwa, vese vaJudha no vagiriki, Kristu uri simba ra Mwari, no ungwaru hwa Mwari. Ngokuti upenji hwa Mwari hwakapinda kungwara kuno vandhu; no kurembejeka kwa Mwari kwapinda kugwinya kuna vandhu. Ngokuti ringiranyi kudanijwa kwenyu, hama, kuti akuna vazhinji vari vakangwara ngo kwenyama, akuna vazhinji vane simba, akuna vazhinji vanoreremejwa vanodanijwa. Asi Mwari wakatsanangura zviro zvo upenji zvo nyika, kuti apsheruje avo vari vakangwara, zve, Mwari wakatsanangura zviro zvakarembejeka zvo nyika kuti apsheruje zvino simba; na Mwari wakatsanangura zviri pasi no zvinoshohwa mu nyika, pikija no zviro zvisipo, kuyita kuti zviripo zviite zvisina shwiro. Kuti kusazovapo nyama inojikuja pamberi pa Mwari. Asi imwimwi muri kuna Kristu Jesu, ndiye uwo wakaitwa kwetiri ungwaru hunobva kuna Mwari, no kururama, no kucheneswa, no kuripirwa: Kuti kudari ngo zvakatahwa, Iye unoganza, ngaaganze ndi Jehovha. Neni, hama, apo ndaviya kwomuri, andizivi kuviya ngo kukona kuvereketa, nokuti ngo kungwara, ndechiteketesa kwomuri uchapupu hwa Mwari. Ngokuti ndakajiemesera kuti andizozivi chiro pakati penyu, kwega Jesu Kristu, uwo wakakohomehwa. Neni ndayiva nemwi ndiri wakarembejeka, ndechitya, ndechihuta kakurutu. No mazwi angu no kuchumayira kwangu kwayinga kusiri mazwi o kuonga o ungwaru wo vandhu, asi ayiva mukupangijihwa kwo Mweya, no kwo simba. Kuti kugonda kwenyu kusazocheyama muungwaru hwo vandhu, asi musimba ra Mwari. Kani tinovereketa ungwaru pakati peavo vakaperera, asi ungwaru husiri hweiyi nyika, nokuti hwo vatongi veiyi nyika, avo vanopera; asi tinovereketa ungwaru hwa Mwari, hwakafishika, uhwo ungwaru hwainga hwakafishwa, uhwo Mwari wakahugaja ngo pamberi nyika isati yasikwa, kuti huite uthende hwedu. Uhwu kusina vatongi veiyi nyika vakahuziva; ngokuti kudari vayinga vakahuziva, inga vasakakohomera Mambo wo uthende. Asi kudari ngo zvakatahwa: “Izvo zvisikazivi kuvoneka ngo jiso, nokuti kuzwika ngo njeve aizivi kuzvizwa, zvisikazivikanwi mu mwoyo mwo vandhu, izvo zviro zvaakanasirira Mwari kwavari vanomuda.” Asi kwetiri Mwari wakajipangijira ndi Mweya: Ngokuti Mweya unopshakisisa zvese, eya, zvakajika zva Mwari. Ngokuti ndiyani pakati po vandhu unoziva zvo mundhu, kwega mweya wo mundhu uri mukati mwake? Ngokudarozve akuna unoziva zviro zva Mwari, kwega Mweya wa Mwari. Asi atizivi kuashira mweya wo nyika, asi Mweya unobva kuna Mwari; kuti tizive izvo zviri zvakapuwa kwetiri ngo nyasha ndi Mwari. Izvo zviro zvotinovereketa ndizvozve, haiwa ngo mazwi akajijiswa ngo ungwaru hwo vandhu, asi ngaao anojijiswa ndi Mweya; techiezanisa zvo Mweya ndi Mweya. Asi mundhu wo nyama aashiri zviro zvo Mweya wa Mwari; ngokuti zviri upenji kwaari; naye aakoni kuziva, ngokuti zvinovoniswa ndi Mweya. Asi uwo uri wo Mweya, unopshakisisa zviro zvese, asi iye ambhwine aatongwi ngo mundhu. Ngokuti ndiyani wakaziva mupinimijo wa Jehovha kuti amupange? Asi isisu tinawo mupinimijo wa Kristu. Neni hama, inga ndisikakoni kuvereketa kwomuri kudari ndivo vo Mweya, asi kudari ndivo vo nyama, kudari ndivo vari chiya kuna Kristu. Ndakamupa mukaka, haiwa kuha kwakagwinya, ngokuti inga musati mwakona: Haiwa, pikija nazvino, amusati mwakona. Ngokuti muchiri vo nyama; ngokuti kwechivoneka kuti kuripo pakati penyu ndurumwa no hasha, amurivopi here vo nyama, mwechifamba ngo muitiro wo vandhu? Ngokuti apo umwe unoti, “Inini ndiri wa Pauri”, no umweni unoti, “Inini ndiri wa Aporo”; amurivopi vo nyama here? Ndizvo Aporo uriyani? Na Pauri uriyani? Varanda vo mwakatenda ndivo; umwe ngaumwe kudari ngozvaakapuwa ndi Mambo. Inini ndakasima, na Aporo wakadirijira, asi Mwari wakameresa. Ndizvo andiyepi unosima uri chiro, nokuti unodirijira; asi ndi Mwari unomeresa. Zvino uwo unosima, no uwo unodirijira, vari umwe; asi umwe na umwe unoashira musharo wake, kudari ngo mushando wake. Ngokuti tiri vashandi pamwepo na Mwari; imwimwi muri munda wakarimwa wa Mwari, muri nyumba ya Mwari. Kudari ngo nyasha ja Mwari jakapuwa kwendiri, kudari ngo muvaki unobheja no wakangwara ndakadira tshikiro; asi umweni unovaka panyezuru paro. Kani umwe ngaumwe ngaangwarire njira yaanovaka ndiyo panyezuru paro. Ngokuti tshikiro rimweni akuna mundhu ungadira, kwega iro rakadihwa riri Kristu Jesu. Asi kudari mundhu echivaka panyezuru peiro tshikiro, ngo mukore, sirivha, mapuwe ano mutengo mukuru, no mimbiti, mwenje, mahlanga. Mushando wo mundhu wese unozopangijihwa; ngokuti zuva iro rinozopangijira, ngokuti unozovoniswa ngo muriro, no muriro wambhwine unozoeja mushando wo mundhu wese kuti uri wakadini. Asi kudari mushando wo mundhu nokuti ngouri wechizogara waakavaka panyezuru paro, iye unozoashira musharo. Kudari mushando wo mundhu nokuti ngouri wechizopiswa, iye unozorashikihwa: Asi iye ambhwine unozoponeswa; asi kudari ngokupfocha muriro. Amuzivi here kuti imwimwi muri themperi ra Mwari, nokuti Mweya wa Mwari, unogara mukati mwenyu? Kudari mundhu nokuti ngouri echipwanya themperi ra Mwari, iye Mwari unozomupwanyavo; ngokuti themperi ra Mwari riri rakachena; ndimwi themperi iro. Mundhu asajichengeja, kudari mundhu echipinimija kuti uri wakangwara pakati penyu, ngo ungwaru hweiyi nguva, ngaayite uri benji, kuti ayite wakangwara. Ngokuti ungwaru hweiyi nyika huri upenji kuna Mwari. Ngokuti kwakatahwa kuti: “Iye unobata vakangwara muurimbwi hwavo.” Zve, kuti: “Jehovha unozoziva mikarakajo yo vakangwara kuti iri isina shwiro.” Ndizvo mundhu asaganza ngo vandhu. Ngokuti zviro zvese ngozvenyu; pikija Pauri, nokuti Aporo, nokuti Khefasi, pikija nyika, nokuti kupona, nokuti kufa, nokuti zviro zviripo, nokuti zviro zvichazoviya, zvese ngo zvenyu; nemwi muri va Kristu, na Kristu uri wa Mwari. Mundhu ngaativerenge kuti tiri vashandi va Kristu, no vangwariri vo zvakafishika zva Mwari. Kune izvi kunopshakiwa kuno vangwariri kuti mundhu awanike ari unogondeka. Asi kwendiri chiri chiro chidoko kuti nditongwe ndimwi, nokuti ngo kutonga kwo mundhu; eya, andijitongi. Ngokuti andizivi chiro chinondiitira ndava pachangu; asi andipembejwi ngoichi; asi uwo unonditonga ndi Mambo. Ndizvo musatonga chiro ngo pamberi nguva isati yaguma, mbhera Mambo aviye, uwo unozoviisa mukujeka zviro zvakafishika zvo chidima, naye unozopangijira mipinimijo yo mwoyo; naapo mundhu wese unozova no kukujwa kwake kunobva kuna Mwari. Zvino, hama, ndakaezanisa muezaniso uwu kwendiri no kuna Aporo ngo ndava yenyu; kuti kwetiri mujije kuti musazopinimija kupinda izvo zvakatahwa; kuti kusazovapo umwe wenyu unojitundhumaja kurwisanisa umwe no umweni. Ngokuti ndiyani wakakuita kuti uparajane? Unenyi chousikazivi kuashira? Asi kuti wakachiashira, unoganza ngenyi, kudari ngousikazivi kuchiashira? Zvino mwaguta! Zvino mwaganya! Mwakatonga musiri nesu akadi! Eya, ndingada kuti mutonge kuti isisuvo titonge nemwi! Ngokuti tinopinimija kuti Mwari wakatiemesa isisu vapostori tiri vokugumisira kwavari vese, kudari ngo vandhu vakaemesehwa kuurawa; ngokuti tinoitwa vokuringihwa kuno nyika, no kungirosi, no kune vandhu. Tiri mapenji ngo ndava ya Kristu, asi imwimwi muri vakangwara kuna Kristu; isisu tiri vakarembejeka, asi imwimwi muri vakagwinya; imwimwi munakwo kureremejwa, asi isisu atireremejwi. Mbhera kuguma kuno nguva iyi tine njara, no nyota, tiri mititinini, tinopambhajwa, tiri vapepesheki. Tinoshanda techishanda ngo nyara jedu; apo techitukwa, tinodakajisa; apo tinotambujwa tinoshingirira; apo techireviwa, tinopota; tinoitwa vakadari ngo duru ro nyika, tiri svina yo vese, mbhera nazvino. Anditari izvi zviro kumupsheruja, asi kuti ndimupange kudari ngo zvomuri vana vanodikana. Ngokuti pikija mungava no vajijisi vari gumi ro zviuru (10.000) kuna Kristu, kani amuna majibaba akawanda. Ngokuti kuna Kristu Jesu ndakamubara ngo vhangeri. Ndizvo ndinomupota, itanyi vanondiejerera. Ngo iyi ndava ndakatumira kwomuri Timoti, uri mwana wangu unodikana no unogondeka kuna Mambo, iye unozomueujira njira jangu jiri kuna Kristu, kudari ngo zvo ndinojijisa kundau jese muzviara zvese. Zvino vamweni venyu vanojikuja inga kuti andiviyi kwomuri. Asi ndinozoviya kwomuri ngo kukasira, kudari Mambo echitenda; neni ndinozoziva haiwa ngo izwi raavo vanojikuja, asi ngo simba ravo. Ngokuti Umambo hwa Mwari andihwopi hwo izwi, asi hwo simba. Munodenyi? Ndinozoviya kwomuri ngo ndonga here, nokuti ngo rudo, na ngo mweya wakapfava? Kunozwika kuti kuripo kuomba pakati penyu, no kuomba kwakadaro apana pakati po vo majinja, kuti umwe wenyu atore mukaji wa baba ake. Nemwi munojikuja, paugaro hwo kutsumba, kuti uwo wakayita uku kushata abviswe pakati penyu. Ngokuti inini ngo gwinyiso pikija ndisipo ngo muviri, asi ndiripo ngo mweya, nazvino ndatomutonga, kudari ngo uripo, uwo wakayita icho chiro. Ngo zina ra Mambo wedu Jesu, apo imwimwi mwaungana pamwepo, muno mweya wangu, ngo simba ra Mambo wedu Jesu, kuti mupire uwo wakadaro kuna Sathani kuti aparajwe nyama, kuti mweya uponeswe ngo zuva ra Mambo Jesu. Kujiganzisa kwenyu akuzivi kunaka. Amuzivi here kuti zvimumera zvishomanani zvinofemisa hlama yese? Bvisanyi mumera wokare, kuti muyite hlama ipsha, kudari ngo zvo muri vasina mumera. Ngokuti Kristuzve uri Phasika redu wakabaihwa kuyita mudiro. Ndizvo ngatingwarire mushongano wo kuha, haiwa ngo mumera wokare, nokuti ngo mumera wo khururu, no wo kushata, asi ngo chimanda chisina mumera, cho kugondeka, no cho gwinyiso. Ndakatara kwomuri mu tshamba yangu kuti musazwana no vanoomba. Izvi azvinangi vanoomba vo nyika iyi, nokuti vanoemura, nokuti vanonyima, nokuti vanodira miezaniso; ngokuti mukadaro kunosisira kuti mubve mu nyika. Asi zvino ndinotara kwomuri kuti musazwana no mundhu unozwi uri mutendi, kudari ari muombi, nokuti muemuri, nokuti mudiri wo miezaniso, nokuti mutuki, nokuti chiraja, nokuti mupambi; no mundhu wakadaro, haiwa, musaha naye. Ngokuti ndinenyi kuti nditonge avo vari vo kunja? Amutongi here avo vo mukati? Asi avo vokunja Mwari unozovatonga. Budisanyi mundhuwo wakashata kuti abve pakati penyu. Uripo here uno ndava kuno umweni, unoshinga kuenda koomangarira pamberi po vasikazivi kururama, asikaendi pamberi po vakacheneswa? Zve, amuzivi here kuti vakacheneswa vanozotonga nyika? Nokudari nyika inozotongwa ndimwi, amusisi here kutonga ndava jakatshonga? Amuzivi here kuti tinozotonga ngirosi? Kunozopinda kwakaitawani muzviro zvokupona uku? Ndizvo kudari mune ndava jokugura jo kupona uku, munovayimisa ngenyi kutonga, vari vasikareremejeki mu chiara? Ndinovereketa izvi kuti ndimupsheruje. Chiri gwinyiso here kuti apana naumwe mundhu wakangwara pakati penyu, ungakona kugura ndava pakati po hama jake? Asi mutendi unomangarira hama yake, eya, no pamberi povasikatendi? Ndizvo ngo gwinyiso iripo ndava pakati penyu, kuti munomangarirana umwe no umweni, amutendi ngenyi kushaishihwa? Amutendi ngenyi kubihwa? Asi imwimwi munoshaisha mwambhwine, no kubirana, no kuna avo vari hama jenyu. Zve, amuzivi here kuti vasikazivi kururama avazogari ndhaka yo Umambo hwa Mwari? Musachengejehwa, akuna vapombori, nokuti vanodira miezaniso, nokuti vaombi, nokuti vanoshaisha, nokuti vanoomba no vanarumedoni. Nokuti mbavha, nokuti vaemuri, nokuti varaji, nokuti vatuki, nokuti vanyimi, avatongozogari ndhaka yo Umambo hwa Mwari. No vamweni venyu vayiva vakadaro. Asi mwakasukwa, no kucheneswa, no kupembejwa, ngo zina ra Mambo Jesu Kristu, na ngo Mweya wa Mwari wedu. Zvese zvinotendehwa kwendiri, asi andizvopi zvese zvinondinakira. Zvese zvinotendehwa kwendiri, asi andizonyiswi ngo simba ro chimwe chazvo. Kuha kuri kwendani, no ndani iri yo kuha. Asi Mwari unozoyita kuti zvese zviite zvisina shwiro. Zvino muviri auri wo kuomba akadi, asi uri wa Mambo; na Mambo uri wo muviri. Na Mwari wakamumusa Mambo, unozotimusavo ngo simba rake. Amuzivi here kuti miviri yenyu iri ndhengo ja Kristu? Ndizvo ndinozotora here ndhengo ja Kristu ndijiite ndhengo jo mbhombo? Kusazodaro! Zve, amuzivi here uwo unokumbatirana no mbhombo, uri muviri umwe nayo? Ngokuti wakati: Vaviri vanozoyita nyama imwe. Asi iye wasunganijwa na Mambo uri mweya umwewo naye. Tizanyi kuomba, chishaishi chese chaanoyita mundhu chiri ngo kunja kwo muviri; asi iye unoomba unoshaishira muviri wake. Zve, amuzivi here kuti muviri wenyu uri themperi ro Mweya Wakachena, uri mukati mwenyu wo mwakapuwa ndi Mwari? Nemwi amuchiri venyu akadi. Ngokuti imwimwi mwakatengwa ngo mutengo mukuru. Ndizvo kujanyi Mwari mumiviri yenyu. Asi ngo ndava yo izvo zvo mwakatara ndizvo kwendiri: Chiri chakanaka kuno mundhu kuti asapshasa mwanakaji. Asi, ngo ndava yo kuomba, mundhu wese ngaave no mukaji wake, no mwanakaji wese ngaave no mwamuna wake. Mwamuna ngaape kumukaji izvo zvinomusisira: Ngokudaro mukaji ngaape kuno mwamuna. Mukaji aana simba ro kutonga panyezuru po muviri wake, asi mwamuna. Ngokudarozve mwamuna aana simba ro kutonga panyezuru po muviri wake, asi mukaji. Musanyimana, kwega kuri ngo kutenderana kwo nguva, kuti mujipire mukukumbira, mworomwozo kumbatirana, kuti Sathani asamueja ngo ndava yo kutama simba ro kujibata. Asi ndinonanga izvi ngo kumutendera, haiwa ngo kumupanga. Asi ndingada kuti vanarume vese vadari ndini. Asi mundhu wese uno chipuwo chake chakaparajana chinobva kuna Mwari, umwe cho mbewu iyi no umweni cho mbewu iyo. Asi ndinoti kwavari vasikazivi kurovora, nokuno vari shirikaji, zvakanaka kwavari kudari vechigara kudari ndini. Asi kuti vasina simba ro kujibata, ngavarovore, ngokuti kwakapinda kunaka kurovora kuno kupsha ngo kuemura. Asi kwavari vakarovora, ndinovapanga, asi andinipi, asi ndi Mambo, kuti: Mukaji asaparajana no mwamuna wake. (Asi kudari iye echiparajana naye, ngaagare asikazivi kuchadha, nokuti ngaaiyaniswe no mwamuna wake); zve, kuti mwamuna asazoramba mukaji wake. Asi kuvamweni ndinonanga inini, haiwa Mambo akadi: Kudari aripo mutendi, uno mukaji usikatendi, no mukaji uwo echitenda kugara naye, asazomuramba. No mukaji uno mwamuna usikatendi, no mwamuna echitenda kugara naye, asazomuramba. Ngokuti mwamuna usikatendi unocheneswa ngo mukaji, no mukaji usikatendi unocheneswa ngo mwamuna. Kudari zvisikazivi kudaro, vana venyu inga vasikazivi kucheneswa, asi zvino vari vakacheneswa. Asi kudari usikatendi echienda, ngaaende: Mutendi anyari wo mwamuna nokuti wo mukaji aazivi kusungwa mundava jakadaro; asi Mwari wakatidanija mukunyarara. Ngokuti unoziva ngenyi, iwewe mukaji, kuti unozoponesa mwamuna wako? Nokuti unoziva ngenyi, iwewe mwamuna, kuti unozoponesa mukaji wako? Kwega kudari ngo zvaakakovanisira Mambo kuno mundhu wese, kudari ngo zvaakadanija Mwari umwe ngaumwe, ngaafambe kudaro. Ndizvo ndinopanga kuzviara zvese. Uripo here mundhu wakadanijwa akachekwa? Asazoita usikazivi kuchekwa? Uripo here wakadanijwa asikazivi kuchekwa? Asachekwa. Kuchekwa kuri kusina shwiro, no kusikachekwi kuri kusina shwiro, kwega kungwarira Mipango ya Mwari. Mundhu wese ngaagare mukudanijwa kwaakadanijwa ndikwo. Wakadanijwa here uri hloko? Usakanuka ndizvo. Asi kudari ungasununguka, tsanangura icho. Ngokuti uwo wakadanijwa kuna Mambo, ari hloko uri wakasununguhwa wa Mambo; ngokudaro uwo wakadanijwa ari wakasununguka, uri hloko ya Kristu. Imwimwi mwakatengwa ngo mutengo mukuru; musayita hloko jo vandhu. Hama, mundhu wese mukudanijwa kwaakadanijwa ndikwo, ngaagare na Mwari aripo. Zvino ngo ndava yo mbhandwe, andina mupango wa Mambo. Asi ndinonanga kutonga kwangu, kudari ngo uwo wakaitihwa nyasha ndi Mambo kuyita unogondeka. Ndizvo ndinopinimija kuti ichi chiri chakanaka ngo ndava yo kutambujika kuripo, kuti, kwakanaka kuno mwamuna kuti agare wakadaro. Wakasungwa here kuno mukaji? Usapshaka kusununguka. Wakasununguhwa here kubva kumukaji? Usapshaka mukaji. Asi kudari warovora auzivi kushaisha; nokudari mbhandwe yarovohwa, aizivi kushaisha. Asi vakadaro vanozova no kutambujika mu muviri, asi inini ndinomupungurira. Asi ndinonanga ichi, hama, nguva iri doko, kuti kubvira zvino, vese avo vane vakaji vayite kudari ngo vasina; naavo vanochema, kuti vayite kudari ngo vasikachemi; naavo vanodakara, vayite kudari ngo vasikadakari; naavo vanotenga, vayite kudari ngo vasikazivi kuganya. Navo vanoshandisa zvo mu nyika, vayite vasikanyanyi kuzvishandisa, ngokuti muemo wo nyika ino unopinda. Asi ndingada kuti imwimwi muyite vasina zvo kudembatemba. Iye usikazivi kurovora unobatika ngo zviro zva Mambo, ngo njira yaangamudakajisa ndiyo Mambo. Asi uwo wakarovora, unobatika ngo zviro zvo mu nyika, ngo njira yaangamudakajisa ndiyo mukaji wake. Kuripozve kuparajana pakati po uwo warovohwa no mbhandwe. Uwo usikazivi kurovohwa, unobatika ngo zviro zva Mambo, kuti ayite wakacheneswa zvese muviri no mweya asi uwo wakarovohwa unobatika ngo zviro zvo nyika ngo njira yaangadakajisa ndiyo mwamuna wake. No izvi ndinonanga kwomuri kuti mubesehwe; haiwa, kuti nditeye murau panyezuru penyu, asi kuti zviitwe zvinosisira, kuti mubatirire kuna Mambo musikakangaijwi. Asi kudari aripo mundhu unopinimija kuti unoyita zvisikasisiri kuno mbhandwe yake, yabva mundanga, nokudari kwechisisira kudaro, ngaayite chaanoda; aashaishi; ngavarovoraniswe. Asi iye unoyima akagwinya mu mwoyo mwake, asina chinomuvangirija, asi uno simba panyezuru pokuda kwake, naye wakajiemesera mu mwoyo mwake kuti unozongwarira mbhandwe yake, unoyita zvakanaka. Ndizvo uwo unopira mbhandwe yake kuti irovohwe unoyita zvakanaka; no uwo usikaipi kuti irovohwe, unoyita zvakapinda kunaka. Mukaji unosungwa ngo mipango nguva yese yaanopona mwamuna wake, asi kuti afa, wasununguka kuti arovohwe ngo waanoda; kwega ngo njira ya Mambo. Asi unopinda kudakara kudari echindogara wakadaro, uku ndikwo kupinimija kwangu; neni ndinopinimija kuti ndino Mweya wa Mwari. Zvino ngo ndava yo zviro zvinobaihwa miezaniso yo kudira; tinoziva kuti tese tinakwo kuziva. Kuziva kunopara kujikuja, asi rudo runovaka. Kudari mundhu nokuti ngouri echipinimija kuti unoziva chiro, iye asati aziva kudari ngo zvinodikana kuti azive. Asi kudari aripo mundhu unoda Mwari, uwo unozivikana ndiye. Ndizvo ngo ndava yo kuha izvo zvinobaihwa miezaniso, tinoziva kuti akuna muezaniso mu nyika uno shwiro. Nokuti akuna Mwari umweni, kwega umwe. Pikija zvinyaripo zvinodanijwa kuti zvimwari, pikija mu denga, nokuti mu nyika; kudari ngo zvezviripo zvimwari zvizhinji, no majimambo mazhinji. Asi kwetiri uripo Mwari umwe, ndi Baba, ndiye zviro zvese zviripo, nesu tiripo kwaari; na Mambo umwe ndi Jesu Kristu, ngo ndava yake zviro zvese zviripo, nesu kubudikija ndiye tiripo. Asi uku kuziva akuri ku vandhu vese akadi, asi vamweni vechirovejera mbhera zvino kuno miezaniso wo kudira, vanoha kunonga chiri chiro chinobaihwa kuno muezaniso wo kudira; no mipinimijo yavo isina simba inosvipiswa. Asi kuha akuzoiti kuti titendwe ndi Mwari; pikija techiregera kuha, atiiti vakapinda kushata, pikija techiha, atiiti vakapinda kunaka. Asi ngwarai kuti pikija ngeiri njira, uku kusununguka kwenyu kusaita chikhugunyiso kwavari vasina simba. Ngokuti kudari mundhu echizokuvona iwewe unokuziva, wechigara pano kuha mu themperi ro muezaniso wo kudira, auzoshingiswi here mupinimijo wake, usina simba, kuha zviro zvakabaihwa miezaniso yo kudira? Ngokuti ngo kuziva kwako iye usina simba unofa, hama iyo yaakafira Kristu ngo ndava yake. Ngokudaro apo po unoshaishira hama, no kuremaja mipinimijo yavo apo isina simba, unoshaishira Kristu. Ndizvo kudari chokuha chechiita kuti hama yangu ikhugunyiswe, andizohi nyama mbhera narini, kuti ndisazoita kuti hama yangu ikhugunyiswe. Andiripi wakasununguka here? Andiripi mupostori here? Andizivi kumuvona Jesu Mambo wedu here? Imwimwi amuri mushando wangu kuna Mambo here? Kudari ndisiri mupostori kuvamweni, kani kwomuri ndiriye; ngokuti imwimwi muri chinamiro cho upostori hwangu kuna Mambo. Uku ndikwo kujirwira kwangu kwavari vanonditonga: Anditendehwi here kuti ndihe no kumwa? Anditendehwi here kufamba muhwendo hwedu tino mukaji uri mutendi, kudarivo ngo vamweni vo vapostori, no hama ja Mambo, na Khefasi? Nokuti inini ndega na Bharnabha, atitendehwi here kurega kushanda? Ndiyani ari musocha unoshanda mushando wo usocha ngo mare yake? Ndiyani unosima munda wo mivhini, asikahi michero yawo? Ndiyani unohusha muhlambi, asikahi mukaka wawo? Ndinovereketa izvi here ngo chirovejeso cho vandhu, nokuti Mipango ainangivo kudaro here? Ngokuti kwakatahwa mumipango ya Mosi, kuti: “Usazofungira muromo wo n'ombe apo inopura mbeu,” in'ombe here, yaanopinimija ndiyo Mwari? Nokuti aavereketi ngo ndava yedu tega here? Eya, chakatahwa ngo ndava yedu: Ngokuti uwo unorima, kunodikana kuti arime anokugonda, no uwo unopura, kudikana kuti apure anogonda ro kuashira. Kudari isisu takakusha kwomuri zviro zvo Mweya, indava huru here kudari techizokotora zviro zvenyu zvo nyika? Kudari vamweni vano uku kutendehwa panyezuru penyu, kunozopinda kwakaitawani kwetiri isisu? Kani atizivi kushandisa uku kutendehwa; asi tinosengerera zviro zvese kuti tisazophinga vhangeri ra Kristu. Amuzivi here kuti avo vanoshanda kuno zvakacheneswa, vanoha kwezviro zvo mu themperi? Naavo vanoshandira maaltari, vane zvikovaniswa zvavo zvo altari? Ngokudaro Mambo wakapanga kuti avo vanochumaira vhangeri, vapone ngo zvo vhangeri. Asi inini andizivi kushandira chimwe cho izvi zviro; neni anditari izvi kuti zviitwe kudaro kwendiri: Ngokuti kurinane kuti ndife, kuno kuti mundhu ayite kuti kuganza kwangu kuitwe kusina shwiro! Ngokuti kudari ndechichumaira vhangeri, andina chiro cho kuganza ndicho; ngokuti ndamanikijwa; ngokuti ikhombo kwendiri kudari ndisikachumairi vhangeri. Ngokuti kudari ndechiyita ichi ngo kuda kwangu, ndinovona musharo; asi kudari ndechichiita ngo kusiri kuda kwangu, ndino ungwariri hunogondwa kwendiri. Ndizvo musharo wangu ngowenyi? Kuti, apo ndechichumaira vhangeri, ndiite kuti vhangeri riite risina mutengo. Kuti ndisashandisa kwese kutendehwa kwangu kwo vhangeri. Ngokuti pikija ndayiva ndiri wakasununguka kuno vandhu vese, ndakajidira pasi mukusungwa kwavari vese, kuti ndiviyihwe ngo vakapinda kuwanda. No kuna vaJudha, ndakaita kudari ngo mujudha, kuti ndiviyihwe ngo vaJudha; kwavari vari pasi po mipango, ndakaita kudari ngouri pasi po mipango, ndisiri pasi po mipango pachangu, kuti ndiviyihwe ngaavo vari pasi po mipango. Kwavari vasina mipango ndakaita kudari ndivo vasina mipango, ndisiri usina mipango kuna Mwari, asi pasi po mipango kuna Kristu, kuti ndiviyihwe ngaavo vasina mipango. Kwavari vakarembejeka, ndakaita unorembejeka, kuti ndiviyihwe ngaavo vakarembejeka: Ndakaita zviro zvese ku vandhu vese, kuti ngo njira jese ndiponese vamweni. Neni ndinoita izvo zvese ngo ndava yo vhangeri, kuti ndiwanevo chikovaniswa changu kweriri. Amuzivi here kuti avo vanogogomera mujaho, vanogogoma vese, asi ndiumwe unoashira muthuso? Ngokudaro gogomanyi imwimwi kuti muashire. No mundhu wese unoyita gikiti mumitambo, unojibata ngo njira jese. Zvino avo vanoyita kudaro kuti vaashire junguja rinovora: Asi isisu tinoashira risikavori. Ndizvo inini ndinogogoma haiwa ngo kusikazivi kwakadaro: Ndinoambana, haiwa kudari ngo unorova dutu: Asi ndinorova muviri wangu, ndechiudira muuranda: Kuti kusazoitika nokuti ngeiri njira, apo ngosure ndachumaira kuno vamweni, inini pachangu ndiite unorashwa. Andidi hama, kuti muyite vasikazivi kuti majibaba edu ese aiva pasi po gore, navo vese vakaambuka jombe; navo vakabhapatiswa kuna Mosi mugore no mujombe; Navo vese vakaha kuha kumwekwo kwo Mweya; navo vese vakamwa kumwa kumwekwo kwo Mweya. Ngokuti vakamwa kuno buwe iro ro Mweya rakavatevera; no buwe iro rayiva riri Kristu. Asi Mwari aazivi kunasa kudakajiswa ngo vazhinji vavo; ngokuti vakapejwa mu bani. Zvino izvi zvinoita zvivonero zvedu kuti isisu tisazoemura zvakashata, kudari ngo zvovakaemura avo. Musazoita vanodira miezaniso, kudari ngo vamweni vavo; kudari ngo zvakatahwa, kuti: “Vandhu vakagara pasi kuha, no kumwa, vakamirukazve kutamba.” Zve, tisazoangarara kudari ngo zvovakaita vamweni vavo, vakaurawa ngo zuva rimwe vari zviuru makumi maviri na zvitatu (23.000). Zve, tisazomueja Mambo, kudari ngo zvovakamueja vamweni vavo, navo vakapejwa ngo nyoka. Zve, musazon'un'uta kudari ngo zvovakan'un'uta vamweni vavo, navo vakapejwa ngo muurayi. Asi izvi zviro zvakaitwa kwavari kuyita zvivonero; nazvo zvakatahwa kuti zvitingwaje, isisu tagumihwa ngo kupera kwo nyika. Ndizvo iye unokarakaja kuti unoyima, ngaangwarijire kuti asazowa. Akuna kuejwa kwakamugumira, kwega ukwo kwakagumira vandhu vamweni. Asi Mwari unogondeka, uwo usikatendi kuti muejwe kupinda simba ro munaro; asi pakuejwa unozonasirirazve njira yo kupokonyoka ndiyo, kuti mungava no simba ro kukutwara. Ndizvo, vanodikana vangu, tizanyi kudira miezaniso. Ndinovereketa kudari kuno vakangwara; zwisisanyi zvo ndinonanga. Mukheyo wo kubonga, wo tinobonga ndiwo, andiwopi here kuiyana mu ngazi ya Kristu? No chimanda cho tinogura andichopi here cho kuiyana mumuviri wa Kristu? Kwechivoneka kuti isisu tinyari vazhinji, tiri chimanda chimwe, tiri muviri umwe. Ngokuti isisu tese tinoha pamwepo chimanda chimwe. Ringiranyi vaIsraeri vari vo nyama; avo vanoha midiro yo mibairo, avana kuiyana here no altari? Ndizvo ndinozoti kudini? Ndinozonanga here kuti chiro chakabaihwa miezaniso yo kudira chine shwiro? Asi ndinonanga kuti izvo zviro zvo vanobaira vo majinja, vanozvibaira kuno mabzoka, haiwa kuna Mwari; neni andidi kuti muiyane no mabzoka. Amungamwi kuno mukheyo wa Mambo, no kumukheyo wo mabzoka. Amungahi kutafura ra Mambo no kutafura ro mabzoka. Nokuti tinomusa ndurumwa ya Mambo here? Tine simba kupinda rake here? Zviro zvese zvinotendehwa; asi andizvopi zviro zvese zvinobesera. Zviro zvese zvinotendehwa; asi andizvopi zvese zvinovaka. Kusazovapo mundhu unozvipshakira zvake, asi zvo umweni. Izvo zvinotengiswa mu musika, zvihenyi, musikabvunjisi mubvunjo ngo ndava yo mipinimijo. Ngokuti nyika ngo ya Jehovha, nazvo zvese zvirimwo. Kudari umwe wo avo vasikatendi echimukoka kuha, nemwi mwechida kuenda, izvo zvinodihwa pamberi penyu zvihenyi, musikabvunjisi mubvunjo ngo ndava yo mupinimijo. Asi kudari aripo mundhu unozoti kwomuri, ichi chakabaihwa kuno miezaniso yo kudira, musachiha, ngo ndava yo uwo wachipangijira na ngo ndava yo mupinimijo. Andinangi ngo ndava yo mupinimijo wako, asi ngo ndava yo mupinimijo wake. Ngokuti kusununguka kwangu kunotongwa ngenyi ngo mupinimijo wo umweni? Kudari ndechizviashira ngokutenda, ngenyi ndechitukwa ngo ndava yo izvo zvo ndinobonga ndizvo? Ndizvo pikija mwechiha nokuti mwechimwa, pikija chinyi cho munoyita, itanyi zvese kumuirikija Mwari. Musaita vanokhugunyisa pikija ku vaJudha, nokuti vagiriki, nokuti ku chiara cha Mwari. Kudari ndinivo ndinodakajisa vandhu vese ngo zviro zvese, ndisikapshaki kuviyihwa kwangu, asi kuviyihwa kwo vazhinji, kuti vaponeswe. Itanyi vanondiejerera, kudari ndinivo ndiri muejereri wa Kristu. Zvino ndinomuirikija ngokuti munondicherecheja ngo zviro zvese, no kubatirira kuzviemeso kudari ngo zvondakazvipira kwomuri. Asi ndinoda kuti muzive kuti musoro wo mundhu wese ndi Kristu no mwamuna ndiye musoro wo mukaji; na Mwari ndiye musoro wa Kristu. Pikija ndiyani mwamuna unokumbira nokuti kuprofeta uno musoro wakafukijwa, aareremeji musoro wake. Asi mwanakaji wese unokumbira nokuti kuprofeta uno musoro wake usikazivi kufukijwa, aareremeji musoro wake, ngokuti kudari zvakadaro, kunotojana kunonga ari wakapahwa. Ngokuti kudari mwanakaji asikazivi kufukijwa, ngaagundwe; asi kudari chiri chinopsheruja ku mwanakaji kuti agundwe, nokuti kupahwa, ngaafukijire. Ngokuti ngo gwinyiso akudikani kuti mwamuna afukijihwe musoro wake, kwechivoneka kuti iye uri muezaniso no uthende hwa Mwari: Asi mukaji uri uthende hwo mwamuna. Ngokuti mwamuna aazivi kubva ku mwanakaji; asi mwanakaji wakabva kuno mwamuna. Ngokuti mwamuna aazivi kusikihwa mukaji, asi mukaji wakasikihwa mwamuna. Ngo iyi ndava kunodikana kuti mwanakaji ave no chitatijo cho simba panyezuru po musoro wake ngo ndava yo ngirosi. Kani mwanakaji aaripi ngokunja kwo mwamunapi, nokuti mwamuna aari ngokunja kwo mwanakaji kuna Mambo. Ngokuti kudari ngo mwanakaji wakabva kuno mwamuna, ngokudaro mwamuna vakabva kuno mwanakaji; asi zviro zvese zvakabva kuna Mwari. Jigurirenyi mwambhwine; chiri chinosisira here kuti mwanakaji akumbire kuna Mwari asikazivi kufukijwa? Amujijiswi here ngo chibarihwe chenyu, kuti, kudari mwamuna ano bvuji rakareba, rinomupsheruja? Asi kudari mwanakaji ano bvuji rakareba, riri uthende kwaari: Ngokuti bvuji rake rakapiwa kwaari kumufukija. Asi kuti aripo mundhu unovoneka, uno hasha, atina muitiro wakadaro, zve, no zviara zva Mwari azvinawo. Asi ndechimupa uku kupanga, andimuirikiji akadi, kuti munoungana pamwepo musikaunganiri zvakapinda kunaka, asi munounganira zvakapinda kushata. Ngokuti kutanga kwazvo zvese, apo mwoungana mu chiara, ndinozwa kuti kuripo kuparajana pakati penyu; neni ndinotenda zvimweni zvazvo. Ngokuti kunodikana kuti kuvapo kuparajana pakati penyu, kuti avo vanotenda pakati penyu vavoneke. Ndizvo apo mwoungana pamwepo, azvingaitiki kuti muhe kuha kwa Mambo. Ngokuti mukuha kwenyu, mundhu wese unojitorera ngo pamberi kuha kwake; no umweni unonjara, no umweni waraja. Chinyi! Amuna here nyumba jokuhira no jokumwira? Nokuti munoshora here chiara cha Mwari, no kuvapsheruja vasina? Ndinozoti kudini kwomuri? Ndinozomuirikija ngo ichi here? Andimuirikiji. Ngokuti ndakaashira kuna Mambo, icho chendakapavo kwomuri, kuti Mambo Jesu ngo usiku uhwo hwakatengiswa ndihwo, wakatora chimanda; naapo ayinga abonga, wakachigura, akati: “Ichi chiri muviri wangu, unoguhwa ngo ndava yenyu; itanyi ichi kundicherecheja.” Ngokudarozve wakatora mukheyo ngosure kwokuha, echiti: “Mukheyo uwu uri chitenderano chipsha mu ngazi yangu; itanyi ichi nguva jese jo munomwa kwouri, kundicherecheja.” Ngokuti nguva jese jomunoha ichi chimanda, no kumwa ku uwu mukheyo, munoteketesa kufa kwa Mambo mbhera aviye. Ndizvo, pikija ndiyani unoha chimanda nokuti kumwa kumukheyo wa Mambo ngo njira isikasisiri, unozova no ndava yo muviri no yo ngazi ya Mambo. Asi mundhu ngaajiringire pachake, adaro ngaahe kuno icho chimanda, no kumwa kuno uwo mukheyo. Ngokuti uwo unoha nokuti kumwa, unohira nokuti kumwira kutongwa kwaari ambhwine, asikavonesesi muviri wa Mambo. Ngo iyi ndava vazhinji pakati penyu vakarembejeka, no kuhwara, no vazhinji vakavata. Asi kudari isisu tainga takajiringira pachedu, inga tisikatongwi. Asi apo tinotongwa, kupangihwa ndi Mambo, kuti tisazoita vanorashwa pamwepo no vo nyika. Ndizvo, hama jangu, apo mwoungana kuti muhe imirananyi. Kudari aripo uno njara, ngaahe kanyi; kuti kuungana kwenyu kusazoita kwokuti mutongwe. No zvimweni ndinozozvirongeja ndikazoviyeyo. Zvino ngo ndava yo zvipuwo zvo Mweya, hama, andidi kuti muyite vasikazivi. Munoziva kuti apo muchiri vasikadiri Mwari, mwaikweviwa kuenda kuno iyo miezaniso isikavereketi, pikija mwaikweviwa ngo njira yakadini. Ndizvo ndinomuzivisa kuti akuna mundhu, echivereketa ndi Mweya wa Mwari, ungananga kuti Jesu uri wakatukwa; zve, akuna mundhu ungananga kuti, Jesu uri Mambo kwega ndi Mweya Wakachena. Zvino zviripo zvipuwo zvakaparajana, asi Mweya ndiumwe. Kuripozve kuparajana kwo kushandira, asi Mambo ndiumwewo. Kuripozve kuparajana kwo mishando, asi Mwari umwe, uwo unoshandisa zviro zvese kwavari vese. Asi kuno mundhu wese kunopuwa kupangijihwa kwo Mweya, kuti apfumiswe ndiwo. Ngokuti kuno umwe kunopuwa ndi Mweya izwi ro ungwaru; no kuno umweni kunopuwa izwi ro kuziva, ndi Mweya umwewo: Kuno umweni kunopuwa kugonda, mu Mweya umwewo; no kuno umweni kunopuwa zvipuwo zvo kurapa, mu Mweya umwewo. Kuno umweni kunopuwa kuyita mishando ino simba; no kuno umweni kunopuwa kuprofeta; no kuno umweni kunopuwa kuzwisisa Mweya; kuno umweni kunopuwa kuvereketa ngo ndimi jakaparajana; no kuno umweni kunopuwa kukumucha ndimi: Asi izvi zvese zvinoshandwa ndi Mweya umwewo; unokovanisira kuno mundhu umwe ngaumwe, kudari ngo kuda kwake. Ngokuti kudari ngo muviri uri umwe, uno marupande akawanda, no marupande ese o muviri akanyawanda, ari muviri umwe; wakandodarovo Kristu. Ngokuti isisu tese takabhapatiswa muMweya umwe kuyita muviri umwe, tinyari vaJudha, nokuti vagiriki, tinyari vakasungwa, nokuti takasununguka, nesu tese takaitwa kuti timwe ku Mweya umwewo. Ngokuti muviri andiwopi rupande rumwe, asi uri marupande mazhinji. Kudari tshoka yechiti, ngokuti andiripi nyara, andiri wo muviri akadi, ndizvo airi ndhengo yo muviri here? Nokudari njeve yechiti ngokuti andiripi jiso, andiri wo muviripi; ndizvo aichiri yo muviri here? Kudari muviri wese wayiva jiso, kuzwa kungava kwapi? Kudari wese wayiva kuzwa, kunuhwa kungava kwapi? Asi zvino Mwari wakaemesa marupande umwe ngaumwe ao mumuviri, kudari ngo kuda kwake. Nokudari ese aiva rupande rumwe, ungava kwapi muviri? Asi zvino aripo marupande mazhinji, asi muviri umwe. No jiso aringanangi kuno nyara, kuti: Andikutami iwewe: Nokutizve soro aringanangi kuno rutshoka, kuti, Andikutami iwewe. Haiwa, kakurutu, kuna ao marupande o muviri anoverengwa anonga ari akarembejeka, anodikanwa. Naao marupande o muviri etinopinimija ndiwo kuti aanyanyi kureremejwa, ndiwo etinoreremeja kakurutu; no marupande edu asikanasi kuringirika ndiwo anokuringirika akapinda kunaka; asi marupande edu anoringirika aatami kureremejwa: Asi Mwari wakaronga pamwepo zvo muviri, echipa kureremejwa kukurutu kuno urwo rupande rwaikutama. Kuti kusazovapo kuparajana mumuviri; asi kuti marupande ese angwarirane rumwe kuno rumweni Nokudari rupande rumwe rechitambujika, marupande ese anotambujika narwo; nokuti kudari rupande rumwe rwechireremejwa marupande ese anodakara narwo. Zvino imwimwi muri muviri wa Kristu, uwo no uwo muri marupande awo. Na Mwari wakaemesa vamweni mu chiara, vokutanga vapostori, vochipiri vaprofeti, vochitatu vajijisi, ngosure vayiti vo mishamiso, ngosure zvipuwo zvokurapa, no vabeseri, no vatungamiriri, no ndimi jakaparajana. Vese vari vapostori here? Vese vari vaprofeti here? Vese vari vajijisi here? Vese vari vayiti vo mishamiso here? Vese vano zvokurapa here? Vese vanovereketa ngo ndimi jakaparajana here? Vese vanokomucha here? Asi itanyi vanodisisa zvipuwo zvakapinda kukura. Asi ndinomupangijira njira yakapinda kunaka. Pikija ndikanyavereketa ngo ndimi jo vandhu, no jo ngirosi, asi ndisina rudo, ndiri thusi rinoita bope, nokuti ngoma yo simbi inorira. Nokudari ndinokuprofeta, ndikaziva zvakafishika zvese, no kuziva kwese; nokudari ndinokugonda kwese, kunokwana kubvisa matundhu, asi ndisina rudo, andiripi chiro akadi. Pikija ndikapa ndhumbi jangu jese kukovera varombo, nokuti ndikapa muviri kupiswa, asi ndisina rudo azvindibeseri chiro. Rudo runosengerera mukuvo wakareba, rudo rune nyasha; rudo aruna ndurumwa; rudo arujiganzisi, rudo arujitundhumaji, aruiti zvisikasisiri, arujipshakiri zvarwo, arutseneswi, aruvereketi zvakashata. Arudakari ngo zvisikazivi kururama, asi runodakara ngo zvo gwinyiso. Runodumaija zviro zvese, runotenda zvese, runogondera zvese, runoshingirira zvese. Rudo arukoreri; asi kunyaripo kuprofeta kunozoita kusina shwiro; kunyaripo kuvereketa ngo ndimi, jinozonyarara; kunyaripo kuziva kunozoita kusina shwiro. Ngokuti tinoziva zvimweni, nesu tinoprofeta zvimweni. Asi apo zvaguma zvakaperera, naapo izvo zvisikazivi kuperera zvinozopera. Apo ndichiri mwana mudoko, ndakavereketa kudari ngo mwana mudoko, ndakaziva kudari ngo mwana mudoko, ndakapinimija kudari ngo mwana mudoko; apo ndaa mundhu wakura, ndarasha zvo uhwana. Ngokuti zvino tinovona ngo muchibuko mumauma, asi ngo nguva iyo tinozovona hope kuhope. Zvino ndinoziva zvimweni, asi ngo nguva iyo ndinozonasa kuziva kudari ngo zvo ndakazivikanwa. Asi zvino zvinogara kugonda, no kutenda, no rudo, izvi zvitatu; asi chikuru chazvo chiri rudo. Teveranyi rudo, asi disisanyi kakurutu zvipuwo zvo Mweya, asi kakurutu kuti muprofete. Ngokuti uwo unovereketa ngo ndimi jimweni, aavereketi kuno vandhu, asi kuna Mwari; ngokuti apana mundhu unomuzwa; asi Mweya unovereketa zvakafishika. Asi uwo unoprofeta unovereketa ku vandhu zvinovaka, no zvinoembezera, no zvinonyaraja. Uwo unovereketa ngo rurimi unojivaka; asi uwo unoprofeta unovaka chiara. Zvino ndingada kuti imwimwi mwese muverekete ngo ndimi, asi kupinda icho, kuti muprofete; ngokuti uwo unoprofeta, uri mukuru kuno uwo unovereketa ngo ndimi, asi kunja kuti akumuche, kuti chiara chivakiwe. Asi zvino, hama kudari ndechiviya kwomuri, ndechivereketa ngo ndimi ndinozomubesera ngenyi, kunja kwokuti ndiverekete kwomuri ngo njira inopangijira, nokuti yo kuziva, nokuti yo kuprofeta, nokuti yo kujijisa? Pikija zviro zvisina kupona, zvinorira, pikija iri nyere, nokuti chidyangari, kudari zvisikaparajani mukurira kwazvo, kungaitwa mazivirwenyi kurira kwazvo? Ngokuti kudari mbhayapaya ikarira kusikazivikanwi, ndiyani unozojinasirira kuenda kuimbi? Ndizvo nemwivo, kudari mwechivereketa ngo ndimi izvo zvisikanasi kuzwisisika, zvinozozivikisa kudini izvo zvinovereketwa? Ngokuti ngokudaro munozovereketa kuno dutu. Kuripo pamweni mbewu jakawanda jo maungira mu nyika, nao akuna mbewu yao isikanangi chiro. Ndizvo kudari ndisikazivi biningijo ro izwi, ndinozoita munyikanja kwaari unovereketa, no uwo unovereketa unozoyita munyikanja kwendiri. Ngokudaro nemwivo, kwechivoneka kuti munodisisa kuva no zvipuwo zvo Mweya, pshakanyi kuti muwanjwe mukuvaka chiara. Ndizvo uwo unovereketa ngo rurimi rumweni, ngaakumbire kuti akumuche. Ngokuti kudari ndechikumbira ngo rurimi rumweni, mweya wangu unokumbira, asi kuzwisisa kwangu akukonekani. Ndizvo ndinozoitenyi? Ndinozokumbira ndi Mweya, ndechikumbira ngokuzwisisazve: Ndinozoemba ndi Mweya, ndechiemba ngokuzwisisazve. Kudari zvisikazivi kudaro, kudari wechibonga ndi Mweya, uwo usikazivi kujija ungazoita manangirenyi, kuti, Ameni, apo wobonga, kwechivoneka kuti iye aazivi chounonanga? Ngokuti ngo gwinyiso iwewe unonasa kubonga, asi umweni aazivi kuvakiwa. Ndinobonga Mwari, ngokuti ndinovereketa ngo ndimi jimweni kupinda imwimwi mwese. Asi mu chiara ndingada kuti ndiverekete mazwi mashanu ngo kuzwisisa kwangu, kuti ndijijise vamweni navo, kuno kuti ndiverekete mazwi ari gumi ro zviuru (10.000) ngo rurimi rusikazivikanwi. Hama, musayita vana vokuzwisisa; asi muzvakashata itanyi vana, mukuzwisisa itanyi vabva mundanga. Kwakatahwa mu mipango, kuti: “Ngo vandhu vo ndimi jimweni ngo miromo yo vonyikanja ndinovereketa kuno ava vandhu; pikija vakadaro, avazondizwi, unonanga Jehovha.” Ndizvo ndimi jiri chivoniso, haiwa kwavari vanotenda, asi kwavari vasikatendi: Asi kuprofeta kuri chivoniso haiwa kwavari vasikatendi, asi kwavari vanotenda. Ndizvo, kudari chiara chese chaungana pamwepo, navo vese vechivereketa ngo ndimi jimweni, kukanghwinemo vandhu vasikazivi kujija, nokuti vasikatendi, vakadaro avazonangi here kuti muri vanopenga? Asi kudari vese vechiprofeta, ozonghwinemwo umwe usikatendi, nokuti usikazivi kujija, iye unorambijwa ndivo vese, unotongwa ndivo vese. Zvakafishika zvo mwoyo wake zvinopangijihwa; ndizvo ngokudaro unozowa pasi ngo hope yake no kudira Mwari, echinanga kuti Mwari uri pakati penyu ngo gwinyiso. Ndizvo chinyi hama? Apo mwoungana pamwepo, umwe ngaumwe ano nduyo ano chijijiso, ano chakapangijihwa, no rurimi rumweni, no kukumucha. Zviro zvese ngazviitwe zvinovaka. Kudari aripo mundhu nokuti ngouri unovereketa ngo ndimi imweni, ngavayite vaviri, nokuti vasikapindi vatatu, ngavayite ngo kutevererana, no umweni ngaakumuche. Asi kudari pasina unokumucha, ngaanyarare mu chiara ngaajivereketere ega, no kuna Mwari. No vaprofeti ngavaverekete vaviri nokuti vatatu no vamweni ngavazwisise. Asi kudari chiro chechipangijihwa kuno umweni, unogara apo, wokutanga ngaanyarare. Ngokuti imwimwi mwese mungaprofeta ngokutevererana, kuti vese vajije, nokuti vese vaembezehwe. No mweya yo vaprofeti inopfavira vaprofeti. Ngokuti Mwari andiyepi wo hohoho, asi wo kunyarara; kudari ngo zvezvakadaro kuzviara zvese zvo vakacheneswa. Vanakaji ngavanyarare mu chiara. Ngokuti akutendehwi kwavari kuti vaverekete, asi ngavapfavire kudari ngo zvinonangwa ngo mipango. Nokudari vechida kuziva chiro, ngavabvunjise kuvamuna vavo vaakanyi. Ngokuti zvinopsheruja kuti mwanakaji averekete mu chiara. Chinyi? Izwi ra Mwari rakatanga kubuda kubva kwomuri here? Nokuti rakagumira imwimwi mwega here? Kudari aripo mundhu unopinimija ngo kwake kuti uri muprofeti nokuti uri wo mweya, ngaazvitende izvo zvendinotara kwomuri, kuti zviri mipango ya Mambo. Asi kudari aripo mundhu usikazivi, ngaagare asikazivi. Ndizvo, hama jangu, emuranyi kuti muprofete, musarambija kuvereketa ngo ndimi. Asi zvese ngazviitwe ngo njira inosisira, na ngo kutevererana. Zvino ndinozivisa kwomuri, hama, vhangeri iro ro ndakachumaira, kwomuri, ro mwakaashiravo, ro munoima mukati mwaro. Iro ro munoponeswa ndiro; ngo mazwi ao endakachumaira kwomuri, kudari mwechiabatisisa, kunja kwokuti mwakatenda kusina shwiro. Ngokuti ndakapa kwomuri kutanga, icho chendakaashiravo inini, ngo njira yaakafira ndiyo Kristu zvishaishi zvedu, kudari ngo zvakatahwa; nokuti iye wakavigwa; zve, wakamuswa ngo zuva rochitatu, kudari ngo zvakatahwa, nokuti wakavoneka kuna Khefasi; na ngosure wakavoneka kuno vari gumi na vaviri. Na ngosure wakavoneka kuno hama jinopinda mazana mashanu (500) vari pamwepo, vazhinji vavo vachiripo mbhera nazvino, asi vamweni vavo vakafa. Na ngosure wakavoneka kuna Jakobe; na ngosure wakavoneka kuvapostori vese; pakupejisira, wakavonekavo kwendiri, kudari ngo uwo wakabahwa nguva isati yaguma. Ngokuti inini ndiri mudoko wo vapostori, andisisiri kudanijwa kuti ndiri mupostori, ngokuti ndakatambuja chiara cha Mwari. Asi ngo nyasha ja Mwari ndiri mundhu wakadari zvino, no nyasha jake jakapuwa kwendiri, ajizivi kuvoneka zvisina shwiro; asi ndakashanda kakurutu kupinda vese: Asi andinipi, asi inyasha ja Mwari jayiva neni. Ndizvo pikija ndini nokuti ndivo, ndiyo njira yo tinochumaira ndiyo, no njira yo mwakatenda ndiyo. Zvino kudari Kristu unochumaihwa kuti wakamuka kwo vakafa, kunonangwa ngenyi ngo vamweni pakati penyu, kuti akuna kumuka kwo vakafa? Asi kudari kusina kumuka kwo vakafa, na Kristu aazivi kumuswavo: Nokudari Kristu asikazivi kumuswa, kuchumayira kwedu akuna shwiro, no kugonda kwenyu akuna shwiro. Eya, na isisu tavoneka tiri zvapupu zvokunyepa ndi Mwari; ngokuti takapupura zva Mwari kuti wakamumusa Kristu, uwo waasikazivi kumumusa, kudari vakafa vasikamuswi. Ngokuti kudari vakafa avamuswi, na Kristu aazivi kumuswa: Nokudari Kristu asikazivi kumuswa, kugonda kwenyu akuna shwiro; kuti zvakadaro muchirimwo mu zvishaishi zvenyu. Kuti zvakadaro, avozve vakafa vechitenda kuna Kristu, vakarova. Kudari mukupona uku kwega tino kugonda kuna Kristu, tiri varombo kupinda vandhu vese. Asi zvino Kristu wakamuswa kwo vakafa, wakayita mutanguro wo avo vakavata. Kuti kufa kwakaguma ngo mundhu, kumukazve kwo vakafa kwakaguma ngo mundhu. Ngokuti kudari ngo zvovanofa vese ndi Adhamu, ngokudarozve kuna Kristu vanozoraramiswa. Asi umwe ngaumwe ngourongwa hwake: Kristu uri mutanguro; na ngosure avo vari va Kristu mukuviya kwake. Naapo kunoviya magumo, paanozopa umambo kuna Mwari, uri Baba; apo oparaja kutonga kwese no umambo hwese, no simba rese. Ngokuti kunosisira kuti iye atonge mbhera adire mapandu ese pasi po tshoka jake. Bandu rokugumisira rinozoparajwa riri kufa. “Ngokuti iye wakapfavisa zvese pasi po tshoka jake.” Asi apo kunonangwa kuti: Zvese zvakapfaviswa, zviri pambhene kuti azvinangi kuti iye wakapfaviswa, uwo wakapfavisa zvese kwaari. Naapo zviro zvese zvakapfaviswa kwaari naapo Mwana ambhwine unozopfavira uwo wakapfavisa zvese kwaari, kuti Mwari ayite zvese kwavari vese. Nokuti kudari zvakadaro, vanozoitenyi avo vakabhapatisihwa mukufa. Kudari vakafa vasikamuswi, ndizvo vanobhapatisihwenyi mukufa? Isisuvo tinogara munyatwa ngenyi nguva yese? Ndinomupota, hama ngo kudakara kwangu kwendinakwo ndimwi, ndiye Kristu Jesu Mambo wedu, kuti ndinofa zuva ngo zuva. Kudari inini, ngo chirovejeso cho vandhu ndakaambana no zvikara mu Efesu, kunondibeserenyi kudari vakafa vasikamuswi? Ngatitohe techimwa, ngokuti mangwana tinofa. Musachengejehwa: Kuiyana no vakashata kunoshaishira maitiro akanaka. Mukanyi muyite zvakarurama, murege zvakashata; ngokuti vamweni avana kuziva ndi Mwari: Ndinovereketa izvi kumupsheruja. Asi umweni, unozoti: Vakafa vanoyita mamusihwenyi? Vanozoviya no muviri wakadini. Iwewe benji, izvo zvo unokusha, azvingameri zvikarega kufa: No icho cho unokusha, aukushi uwo muviri unozovapo, asi tsangu yega, pamweni yo koroni, nokuti yo mbewu imweni. Asi Mwari unopa muviri unomuemo wakadari ngo kuda kwake, no kumbeu imwe ngaimwe unopa muviri wayo. Nyama yese aizivi kuyita nyama yo mbewu imweyo: Asi iriyo mbewu imwe yo nyama yo vandhu, no mbewu imweni yo nyama yo zvinyama, no mbewu imweni yo nyama yo shiri, no mbewu imweni yo nyama yo hove. Iriyozve miviri yo mu denga, no miviri yo mu nyika; asi uthende hweiyo yo mu denga ngo hwo mbewu imweni, no uthende hweiyo yo mu nyika ngo hwo mbewu imweni. Huriyo uthende humweni hwo zuva, huriyo uthende humweni hwo mweji, huriyo uthende humweni hwo ndhondo; ngokuti ndhondo imwe inosiyana no ndhondo imweni uthende hwayo. Kwakadarozve no kumuka kwo vakafa. Muviri unokushwa mukuvora, unomuswa usina kuvora. Unokushwa mukutama kureremejwa; unomuswa muuthende. Unokushwa mukurembejeka; unomuswa unosimba. Unokushwa uri muviri wo nyama, unomuswa waa muviri wo mweya. Kudari uripo muviri wo nyama, uripozve muviri wo mweya. Kwakatahwazve: Mundhu wokutanga Adhamu wakaitwa mweya unopona, Adhamu wokugumisira wakaitwa ari mweya unopa kupona. Asi uwo wokutanga andiwopi wo mweya, asi wo nyama; na ngosure kwaivapo wo mweya. Mundhu wokutanga wakaitwa ngo mavhu, uri mavhu: Mundhu wochipiri wakabva mu denga. Avo vari vo mavhu vakadari ngo uwo wo mavhu: Naavo vari vo mu denga, vari vakadari ngo uwo wo mu denga. Nesu, kudari ngo zvotaiva mumuemo wo uwo wo mavhu, zve, tinozova no muemo wo uwo wo mu denga. Zvino ndinonanga izvi hama, kuti nyama no ngazi azvingagari ndhaka yo Umambo hwa Mwari; zve, no zvinovora azvingagari ndhaka yo zvisikavori. Ringiranyi, ndinomubvunja chakafishika; atizovati tese, asi tinozotsandujwa tese, ngo nguva doko yo kunjopira kwo jiso, ngo nguva yo kurijwa kwo mbhayapaya yokugumisira; ngokuti mbhayapaya inozorira, no vakafa vanozomuswa vasikavori, nesu tinozotsandujwa. Ngokuti kunosisira kuti uwu unovora upfeke usikachazovori, no uwu unofa, kunosisira kuti upfeke usikachazofi. Asi apo uwu unovora wazopfeka usikachazovori, no uwo unofa wazopfeka usikachazofi, naapo rinozozarisika izwi rakatahwa, kuti: “Kufa kwamijwa ngo kunyisa. Iwewe rufu, kunyisa kwako kuri kwapi? Iwewe rufu chisomo chako chiri kwapi?” Chisomo cho kufa chiri kushaisha; no simba ro kushaisha riri mupango. Asi ngaabongwe Mwari, unotipa kunyisa ndiye Mambo wedu Jesu Kristu. Ndizvo hama, jangu jinodikana, itanyi vanogwinya, vasikatsukunuswi, ngo nguva jese, mwechitsamwirira mu mishando ya Mambo ngokuti munoziva kuti mishando yenyu airi isina shwiro kuna Mambo. Zvino ngo ndava yo kuunganijira munikero wokupa vakacheneswa, kudari ngo zvo ndakapanga vo zviara zvo Garatiya, itanyivo kudaro nemwi. Ngo zuva ro kutanga ro vhiki, umwe ngaumwe wenyu ngaajiisire ngokwake mu mangwaririro, kudari ngo zvaakamupfumisa Mwari, kuti kusazovapo kuunganija apo ndagumeyo. Naapo ndaguma, avo vomunozotsanangura, ndinozovatuma no tshamba kuti vatware zvipo zvenyu kuenda Jerusarema. Nokudari kwechisisira kuti ndiendevo, vanozoenda neni. Asi ndinozoviya kwomuri ngosure ndafamba ngo mu Makedhoniya; ngokuti ndinozofamba ngo mu Makedhoniya; asi ndinozogara nemwi, no kupeja nguva yo shipepo ndiripo, kuti imwimwi mundiperekeje muhwendo hwangu pikija kwapi kwondinozoenda. Ngokuti andidi kumuvona zvino ndechipinda; ngokuti ndinoda kuti ndigare mukuvo nemwi, kudari Mambo echitenda. Asi ndinozogara mu Efesu mbhera rigume zuva ro Pentekosti; ngokuti ruvhi rwakabewurihwa kwendiri, kuti ndiite mushando mukuru no wakagwinya, varipozve vakorore vazhinji. Zvino kudari Timoti echiviya kwomuri, vonanyi kuti agare pakati penyu asikatyi; ngokuti iye unoshanda mushando wa Mambo, kudari ngo zvendinoita inini. Ndizvo kusazovapo mundhu unomushora, asi mumuendese mberi muhwendo hwake mukunyarara, kuti aviye kwendiri: ngokuti ndinomurindira kuti unozoviya pamwepo no hama. Asi ngo ndava ya Aporo hama yedu, ndakapota kakurutu kwaari kuti avieyo kwomuri pamwepo no hama jimweni, asi kwayinga kusiri kuda kwake kuti avieyo zvinopano: Asi unozoviya apo awana mukuvo. Rindanyi, gwinyanyi kuema mukugonda, itanyi vakashinga, muyite vakagwinya. Zvese zvomunoita, ngazviitwe ngo rudo. Zvino ndinomupota, hama, (munoziva vo mbhuri ya Stefano, kuti vari mitanguro yo Akaya, nokuti ivo vakajiemesera kushandira vakacheneswa), kuti nemwivo mupfavire vakadaro, no kuno mundhu wese unobesera mumushando, echiremehwa. Neni ndinodakara ngo kuviya kwa Stefano na Fortunatu, na Akaiko: Ngokuti izvo zvakasarira kwomuri, ivo vakazvizajisa kwendiri. Ngokuti vakazoroja mweya wangu no wenyuzve: Ndizvo tendanyi vakadaro. Zviara zviri mu Aziya zvinomutambisa. Akwira na Prisira vanomutambisa kakurutu kuna Mambo pamwepo no chiara chiri mu nyumba yavo. Vatendi vese vanomutambisa. Chungamijananyi ngo muromo ngo kuchena. Kutambisa kwangu inini Pauri ngo nyara yangu yambhwine. Kudari aripo mundhu pikija ngouri usikamudi Mambo, ngaayite unotukwa. Mambo unoviya. Nyasha ja Mambo Jesu Kristu ngajive nemwi. Rudo rwangu ngarugare nemwi mwese ndiye Jesu Kristu, Ameni! Pauri, mupostori wa Kristu Jesu ngokuda kwa Mwari, na Timoti hama yedu, kune chiara cha Mwari chiri mu Korinte, pamwepo no vakacheneswa vese vari mu nyika yese yo Akaya. Nyasha ngajive kwomuri, no kunyarara kunobva kuna Mwari Baba wedu na Mambo Jesu Kristu. Ngaabongwe Mwari Baba wa Mambo wedu Jesu Kristu, Baba wo nyasha, uri Mwari wo kuembezera kwese. Uwo unotiembezera mukutambujika kwedu kwese, kuti isisuvo tikone kuembezera avo vari mukutambujika pikija kwakaitawani ngo ukwo kuembezehwa kwo tinoembezehwa ndikwo ndi Mwari. Kudari ngo kutambujika kwa Kristu kunowanjwa kwetiri, ngokudaro kuembezehwa kwedu kunowanjwavo ndi Kristu. Asi pikija techitambujika kuri kuembezehwa no kuponeswa kwenyu; pikija techiembezehwa kuri kuembezehwa kwenyu, kunoshanda mukushingirira no kusengerera kwaao matambujiko etinotambujikavo ndiwo. No gonda redu ndimwi rakagwinya; techiziva izvi, kuti kudari ngo zvo munoashira matambujiko, ngokudaro munozoashira kuembezehwa. Ngokuti atidi, hama, kuti muite vasikazivi ngo kutambujika kwedu kwakatigumira tiri mu Aziya, kuti takachikihwa pasi kakurutu kupinda simba redu, kwokuti no gonda rese rokuti tinozopona rakapera. Eya, isisu pachedu taiva no ndava yo kufa mukati mwedu, kuti tisajigonda pachedu, asi kuti tigonde kuna Mwari unomusa vakafa; uwo wakatinunura mukufa kwakakura kudaro, unozotinunura; kwaari tinogonda kuti uchazotinunura. Imwimwivo mwechibesera pamwepo nesu ngo ndava yedu ngo mukumbiro yenyu; kuti ngo ndava yo chipo chakapuwa kwetiri ngo vazhinji, chingabongwa ngo vazhinji ngo ndava yedu. Ngokuti uku ndikwo kukuja kwedu, kuri chapupuzve mu mipinimijo yedu, kuti takajibata mu nyika mukucheneswa no mugwinyiso ra Mwari, kakurutu takaita kudaro kwomuri, kusiri ungwaru hwenyama akadi asi ngo nyasha ja Mwari. Ngokuti atitari zvimweni, kwega zvomunoziva no kuzvitendazve, neni ndinogonda kuti munozozvitenda mbhera kumagumo. Kudari ngo zvo mwakatendazve ngo zvimweni, kuti isisu tiri kukuja kwenyu kudari ndimwizve muri kukuja kwedu, ngo zuva ra Mambo wedu Jesu. No mukugonda uku ndaipinimija kuti nditange kuviya kwomuri, kuti muwane chidakajiso chochipiri; no kupinda, ngo kwomuri kuenda Makedhoniya, kubvazve Makedhoniya ndipetuke kwomuri, no kuendeswa mberi ndimwi muhwendo hwangu kuenda Judhiya. Ndizvo apo ndaipinimija kudaro, ndakapangijira kurerusa here? Ngokuti izvo zviro zvondinoemesa kuti ndiite, ndinozozviemesa here ngo kwo nyama, kuti kungavapo kwendiri kunanga kuti, eya, eya, nokuti haiwa, haiwa? Asi kudari ndi Mwari unogondeka, izwi redu kwomuri andiropi rokuti, eya, na haiwa. Ngokuti Mwana wa Mwari, Jesu Kristu, wakachumaihwa pakati penyu tisu, inini na Sirivhana na Timoti, wayinga asiri wokuti, eya nokuti haiwa, asi wayiva eya. Pikija zvigondiso zvakayita mawandirenyi, zvigondiso zva Mwari kwaari zviri, eya; ndizvozve ndiye uripo kuti: Ameni, kuyita kukujwa kwa Mwari ndisu. Zvino uwo unotigwinyisa pamwepo nemwi kuna Kristu, no uwo wakatizoja, ndi Mwari. Uwozve wakatidira chinamiro, akatipazve chibatiso cho mweya mumwoyo mwedu. Asi ndinodanija Mwari kuti aite chapupu kumwoyo wangu, kuti ngo ndava yo kumusengerera andizivi kuviya Korinte. Haiwa, kuti tive no kutonga panyezuru po kugonda kwenyu, asi kuti tiri vabeseri vo kudakara kwenyu; ngokuti munoima ngo kugonda. Asi ndakajiemesera ichi pachangu, kuti andizoviyizve kwomuri ndakasururika. Ngokuti kudari ndakamusururisa imwimwi, ndizvo ndiyani ungazondidakarisa, kwega uwo wakasururiswa ndini? Neni ndakatara ichi kwomuri, kuti ndoogumeyo ndingava no kusururika ngaavo vendinosisira kudakara ndivo, ndechigonda kwomuri mwese kuti kudakara kwangu kuri kudakara kwenyu mwese. Ngokuti ngo kutambujika kukurutu no kuhwajihwa kwo mwoyo ndakatara kwomuri, ndine misoji mizhinji; haiwa kuti musururike, asi kuti muzive rudo rukuru rwondinawo kwomuri. Asi kudari aripo pikija ndiyani wakasururiswa, iye aazivi kusururisa inini, asi kwega rupande, kuti ndisazonyanya kutsikirira pasi kumuthikisa ndava mwese. Kutambuja kwo vandhu vazhinji kunokwana kumundhu wakadaro. Kunopesana no icho, kwaidikana kuti imwimwi mumuregerere, no kumuembezera, kwokuti ngo njira pikija ngoyapi mundhu wakadaro asazomijwa ngo kutambujika kwakapinda kukura. Ndizvo ndinomupota kuti mupangijire kwaari rudo rwenyu. Ngo iyi ndava ndakatara kwomuri kuti ndimueje ndimuzive, kuti munopurutana here ngo zviro zvese. Asi kuno uwo wo munoregerera chiro nenivo ndinomuregerera. Ngokuti icho chondakaregerera, kudari ndakaregerera chiro, ndakachiregerera ngo ndava yenyu mukuvona kwa Kristu; kuti Sathani asazovona chokutinyisa ndicho: Ngokuti atiri vasikazivi mazano ake. Zvino apo ndaguma Trowa koochumaira vhangeri ra Kristu, naapo musuvo wabewurihwa kwendiri ndi Mambo. Inga ndisina kuzorora mu mweya wangu, ngokuti andizivi kumuvona Titosi munukuna wangu. Asi ndechivaeneka, ndakaenda Makedhoniya. Asi ngaabongwe Mwari unoita kuti tinyise ngo nguva jese ndiye Kristu, unovonisazve ndisu gwema rokuziva kwake kundau jese. Ngokuti isisu tiri gwema rakanaka ra Kristu kuna Mwari, kwavari vanoponeswa, no kwavari vanorashika; kune avo tiri gwema ro kufa kuenda mukufa; no kune vamweni tiri gwema ro kupona kuenda mukupona. Ndiyani unokwanisa izvi? Ngokuti isisu atizivi kudari ngo vazhinji, vanoshaishira izwi ra Mwari; asi tiri avo vari vo gwinyiso, tiri avo, vari va Mwari, mukuvona kwa Mwari tinovereketa ndiye Kristu. Tinotangazve kujiganzisa pachedu here? Nokuti tinotama here kudari ngo zvo vanotama vamweni, tshamba jo kutendwa jinotarihwa kwomuri, nokuti jinobva kwomuri? Imwimwi muri tshamba yedu yakatahwa mumwoyo mwedu, inozivikanwa no kujijwa ngo vandhu vese; munopangijira kuti muri tshamba ya Kristu, yakashandwa ndisu, isikazivi kutahwa ngo inki, asi, ndi Mweya wa Mwari unopona; isikazi kutahwa pamarusamba emapuwe, asi pamarusamba omwoyo yo nyama. Nesu tinakwo kugonda kwakadaro ndi Kristu kuna Mwari: Andikwopi kuti isisu tinokwanisa pachedu kuti tiverenge ngo chiro kuti chinobva kwetiri, asi kukwanisa kwedu kunobva kuna Mwari, uwozve wakatiita vanokwanisa tiri vashandiri vo chitenderano chipsha; andichopi cho kubatirira kumazwi, asi cho Mweya: Ngokuti kubatirira izwi kunouraya, asi Mweya unopa kupona. Asi kudari ukwo kuri kufa, kwakatahwa no kutsetswa pa mapuwe, kwakaviya no uthende, kwokuti vana vaIsraeri avasaikona kuringisisa hope ya Mosi ngo ndava yo kun'anikira kwayo; uhwo uthende hwaipinda; kunozopinda kwakaitawani kushandira kuri kwo Mweya kuva no uthende? Ngokuti kudari kushandira kwo kurashwa kwayiva no uthende, kushandira kwo kururama kunopinda kwakaitawani? Ngokuti ngo gwinyiso icho chakaitwa no uthende, inga chisina uthende ngo iyi njira, ngo ndava yo uthende hwakapindisisa. Ngokuti kudari icho chaipinda chaiva no uthende, kakurutu icho chinogara chino uthende. Ndizvo techiva no kugonda kwakadaro, tinovereketa ngo kushinga kakurutu, atizivi kudari ndi Mosi, uwo wakafukijira hope yake ngo jira, kuti vana vaIsraeri vasazoringisisa magumo echaipinda. Asi mipinimijo yavo yakakonjiswa; ngokuti mbhera nyamasi apo Chitenderano cho Karetu naapo chechijijwa jira iro rindoripo risikazivi kubviswa, iro jira rakabviswa ndi Kristu. Asi mbhera nyamasi, apo matahwa a Mosi echijijwa, jira iro rindoripo panyezuru po mwoyo yavo. Asi kudari mundhu echizokunukukira kuna Mambo, jira iro rinozobviswa. Zvino Mambo uri Mweya: Naapo pano Mweya wa Mambo, kuripo kusununguka. Asi isisu tine hope jisikazivi kufukijwa, techipangijira uthende hwa Mambo, kudari ngo chibuko, tinotsandujwa kubva kuuthende humweni kuenda kuuthende humweni, kudari ngo zvinobva kuna Mambo ndi Mweya. Ngo iyi ndava, kwechivoneka kuti tinawo uwu mushando, kudari ngo zvotakaitihwa nyasha, atiperi simba. Asi takarasha zviro zvakafishika zvinopsheruja, tisikafambi ngo urimbwi, nokuti kubata izwi ra Mwari ngo kuchengeja; asi ngo kupangijira gwinyiso, tinojiganzisa kune mupinimijo yo mundhu wese mukuvona kwa Mwari. Asi kudari vhangeri redu rakafishika, rakafishika kwavari vakarashika. Kwavari mwari wo iyi nyika wakapofumaja mipinimijo yo vasikatendi, kuti kujeka kwo vhangeri ro uthende hwa Kristu, uwo uri muezaniso wa Mwari, kusazojeka panyezuru pavo. Ngokuti atijichumairi pachedu akadi, asi tinochumaira Kristu Jesu, kuti ndi Mambo, nesu tiri varanda venyu ngo ndava ya Jesu. Ngokuti Mwari wakati, kujeka kunozojeka kwechibva muchidima, ndiye wakajeka mumwoyo mwedu, kuti atipe kujeka kwokuziva uthende hwa Mwari muhope ya Jesu Kristu. Asi tino uhwu upfumi muzvijio zve dongo, kuti ukuru hukurutu hwo iro simba huite hwa Mwari, husaita hunobva kwetiri; tinomanikwa kumarutivi ese, asi atinyiswi; tinokangaijwa, asi atiperi simba. Tinoterevehwa, asi atisiiwi, tinotakihwa pasi, asi atiurawi. Nguva jese tinotwara mu miviri yedu kufa kwa Jesu, kuti kupona kwa Jesu kupangijihwezve mu miviri yedu. Ngokuti isisu tinopona, tinogara techipirwa mukufa ngo ndava ya Jesu, kuti kupona kwa Jesu kupangijihwe mu miviri yedu inofa. Ndizvo ngokudaro kufa kunoshanda kwetiri, asi kupona kuri kwomuri. Asi techiva nawo Mweya umwewo wo kugonda, kudari ngo zvakatahwa, kuti, ndakatenda, ndizvo ndakavereketa; nesuvo tinotenda, ndizvo tinovereketa; techiziva kuti uwo wakamusa Mambo Jesu, unozotimusavo naye unozotitatija pamwepo nemwi. Ngokuti zviro zvese zviri ngo ndava yenyu, kuti nyasha jechiwanjiswa ngo vazhinji, jiite kuti kutenda kuwanjiswe, kuti Mwari airikijwe. Ndizvo atiperi simba; asi pikija mundhu wedu wo kunja echipera, asi mundhu wedu uri ngo mukati unondoitwa mupsha zuva ngo zuva. Ngokuti kutambujika kwedu kunoreruka, kuri kwo nguva doko, kunotinasirira uthende hwakakura kakurutu, no hunogara mbhera narini; apo tisikaringiri zviro zvinovoneka asi kuizvo zvisikavoneki; ngokuti zviro zvinovoneka zvinogara nguva fupi, asi zviro zvisikavoneki zvinogara mbhera narini. Ngokuti tinoziva kuti kudari apo yapwanyika nyumba yedu yo mu nyika muno, iri muchacha, asi tinayo nyumba inobva kuna Mwari, isikazivi kuvakwa ngo nyara, yo mbhera narini, iri mu gore. Ngokuti ngo gwinyiso tiri mune uwu muchacha, tinogomera, techidisisa kufukijwa ngo nyumba yedu inobva mu gore. Kudari kungaitika kuti techisimijwa kudaro tisazovoneka tiri mutitinini. Ngokuti ngo gwinyiso isisu tiri mumuchacha uwu, tinogomera, techiremehwa; andikwopi kwokuti tikhumuhwe, asi, kuti tisimijwe, kuti ukwo kunofa kunyiswe ngo kupona. Zvino uwo wakatiitira chiro chakadaro ndi Mwari, wakatipa chibatiso cho Mweya. Ndizvo techigara techishinga, techiziva kuti tichapona ngo muviri uwu, atiponi akadi kuna Mambo. Ngokuti tinofamba ngo kugonda, haiwa ngo kuvona; ndizvo ndinoti, tinokushinga, nesu tinotenda kusia muviri wedu tiite vaakanyi na Mambo. Ngo iyi ndava tine chidisiso chedu chokuti tinyari pakanyi nokuti tisipo, tiite vanoashirika kwaari. Ngokuti isisu tese tinozovoneka pamberi po chigaro cho kutonga cha Kristu; kuti umwe ngaumwe aashire izvo zvaakaita mu muviri, kudari ngozvaakaita, pikija zvakanaka nokuti zvakashata. Ndizvo techiziva kutyisa kwa Mambo, tinoonga vandhu, asi tiri vari pambhene kuna Mwari; neni ndinogondazve kuti tiri pambhene mu mipinimijo yenyu. Atinangizve kutendwa kwedu kwomuri, asi tinovereketa kuti timupe nguva yo kuganza ndisu, kuti muwane zvo kupingura kuna avo vanoganza ngo zvinovoneka, haiwa ngo zvo mwoyo. Ngokuti tinyari vanopenga, zviri kuna Mwari, nokuti tinyari takanyarara, zviri ngo ndava yenyu. Ngokuti rudo rwa Kristu runotionga; ngokuti tinogura kudari; kuti umwe wakafira vese, ndizvo vese vakatofa; naye wakafira vese kwokuti vanopona vasachajiponera, asi kuti vaponere kuno uwo wakafa ngo ndava yavo, akamukazve. Ndizvo isisu kubvira zvino atichazivi mundhu naumwe ngo kwo nyama; pikija takamuziva Kristu ngo kwo nyama, asi zvino atichamuzivi ngo kwakadaro. Ndizvo kudari mundhu ari kuna Kristu, uri chisikwa chipsha: Zviro zvokutanga zvapinda, vonanyi zvaitwa zvipsha. Asi zviro zvese, zvakabva kuna Mwari, uwo wakatiiyanisa kwaari ndiye Kristu, naye wakapa kwetiri mushando wokuiyanisa; ukwo kuri kuti, Mwari wayiva kuna Kristu, echiiyanisa nyika kwaari, asikaverengeri kwavari zvipauka zvavo, naye wakapa kwetiri izwi ro kuiyanisa. Ndizvo tiri vaimiriri ngo ndava ya Kristu, kunonga Mwari wainyengerera vandhu ndisu. Tinomupota ngo ndava ya Kristu, itanyi vanoiyaniswa kuna Mwari. Iye wakamuita kushaisha ngo ndava yedu. Uwo wayinga asikazivi kuziva kushaisha, kuti isisu tiite kururama kwa Mwari ndiye. Nesu techishanda pamwepo naye, tinomupota kuti musaashira nyasha ja Mwari kusina shwiro, ngokuti iye unoti: Ndakakuzwa ngo nguva inoashirika, na ngo zuva rokuponeswa ndakakubesera; vonanyi zvino inguva inoashirika; vonanyi zvino riri zuva rokuponeswa. Tisikaiti ndava yo kukhugunyisa nokuti chiri chakadini, kuti kushandira kwedu kusazoshohwa. Asi ngo zviro zvese tiite vanotendwa kudari ngo zvinosisira vashandi va Mwari, mukusengerera kukurutu, mukutambujika, mukutama, mukusururika, mukurohwa, mukufungihwa muguniya, muhohoho, mukushanda, no kurinda, no mukuera kuha; mukucheneswa, mukuziva, mukusengerera, mukuitirwa nyasha, mu Mweya Wakachena, ngo rudo rusikajiitisi, ngo izwi ro gwinyiso, ngo simba ra Mwari; ngo zvokurwa ndizvo zvo kururama ngo kumuho no kuboshwe. Mukukujwa nokuti mukusikakujwa, mukureviwa no mumbiri yakanaka; kunonga tiri vachengeji, asi tiri vo gwinyiso; kunonga tiri vasikazivikani, asi tiri vanonasa kuzivikanwa; kunonga tiri vanofa, asi vonanyi tinopona; kunonga tinotambujwa asi atiurawi; kunonga tinosvipa mwoyo asi tinogara techidakara; kunonga tiri varombo, asi tiri tinopfumisa vazhinji, kunonga tisina chetinacho, asi tinazvo zvese. Muromo wedu wakabewuhwa kwomuri, imwimwi vaKorinte, mwoyo yedu yakuriswa. Amumanikijwi ndisu, asi munojimanikija murudo rwenyu. Zvino ngokuhwirijira kwakatojana, ndinovereketa kunonga kuna vana vangu, itanyi vanokuriswavo. Musaita vanosungirwa ngo kusikasisirani pamwepo no vasikatendi. Ngokuti kuri kwapi kuzwana kwo kururama no kushata? Nokuti kuri kwapi kuiyana kwo kujeka no chidima? Nokuti kuri kwapi kutenderana kwa Kristu na Bheriari? Nokuti mutendi uno chikovaniswa chenyi no usikatendi? Kuri kwapi kutenderana kwo themperi ra Mwari no miezaniso yo kudira? Ngokuti isisu tiri themperi ra Mwari, kudari ngo zvaakavereketa Mwari: “Ndinozogara mukati mwavo, ndifambe mukati mwavo; neni ndinozoita Mwari wavo, navo vanozoita vandhu vangu. Ndizvo, budanyi pakati pavo, muite vakaparajana, Mambo unoti, musapshasa chiro chinosvipisa; neni ndinozomuashira; neni ndinozoita Baba wenyu, nemwi munozoyita vana vangu vorume no vokaji, unonanga Jehovha Unosimbarese.” Ndizvo vanodikana, kudari ngozvotinazvo izvi zvigondiso, ngatijichenese kubva kwo zvinosvipisa zvese zvo nyama no zvo Mweya, techiperera mukucheneswa mukutya Mwari. Tiashirenyi ngo rudo; atizivi kushaishira mundhu, atizivi kusvipisa mundhu, atizivi kupunya mundhu. Andinangi izvi kumuitira ndava; ngokuti ndakananga kare kuti muri vo pa mwoyo yedu, kuti tife pamwepo no kupona pamwepo. Kuvereketa kwangu kwomuri kuri kwo kushinga kukurutu, no kuganza kwangu ndimwi kukuru: Ndinozara ngo kuembezehwa, ndinodakara kakurutu mukutambujika kwedu kwese. Ngokuti taguma Makedhoniya, nyama yedu aizivi kuva no kuzorora, asi takatambujwa kumativi ese; ngo kunja kwaiveyo kuambana, ngo mukati kwaiveyo kutya. Asi uwo unoembezera vakasvipa mwoyo, ndi Mwari, iye wakatiembezera ngokuguma kwa Titosi; haiwa ngokuguma kwake kwega, asizve ngo kuembezehwa kwaakaembezehwa ndikwo ndimwi, achitiverengera ngo chisuwo chenyu, no kudemba kwenyu, no kushingirira kwenyu ngo ndava yangu ndizvo ndakapindisisa kudakara. Ngokuti pikija ndakamusururisa ngo tshamba yangu, andithimwi-thimwi ndizvo pikija ndakathimwa-thimwa ndizvo ngokuti ndinovona kuti iyo tshamba yakamusururisa, asi kwega kwo mukuvo mufupi. Zvino ndinodakara, haiwa ngokuti mwakasururiswa, asi kuti mwakasururiswa kwokuti mutenderuke; ngokuti mwakasururiswa ngo ndava ya Mwari, kuti musarashikirwa ngo chiro ndisu. Ngokuti kusururika kunobva kuna Mwari kunovisa kutenderuka kwo kuponeswa, kuri kutenderuka kusina kusururika; asi kusururika kwo mu nyika kunopara kufa. Ngokuti vonanyi ichi chiro kuti imwimwi mwakasururiswa ngo njira ya Mwari! Kwakashandwa kutsamwirira kwakaitawani kukura mukati mwenyu? Eya no kujirwira, no kunengwa, no kutya, no chisuwo, no kushingirira, no kuhwirijira! Ngo zviro zvese mwakajipangijira kuti muri vasina ndava kune izvi. Ndizvo pikija ndakatara kwomuri, andizivi kutara ngo ndava yo uwo wakayita kushata ukwo, nokuti ngo ndava yo uwo wakashaishihwa, asi kuti kutsamwirira kwenyu ngo ndava yedu kupangijihwe kwomuri pamberi pa Mwari. Ndizvo takaembezehwa. No mukuembezehwa kwedu takadakara kukurutu aembho ngo ndava yo kudakara kwa Titosi, ngokuti mweya wake wakagwinyiswa ndimwi mwese. Ngokuti kudari chaivapo chiro chondakaganza kwaari ndimwi, andizivi kupsheruka; asi kudari ngo zvotakavereketa zviro zvese kwomuri ngo gwinyiso, kwakadarozve no kuganza kwedu, kwendakaita pamberi pa Titosi, kwakavoneka kuti kune gwinyiso. No rudo rwake rwo mwoyo unopinda kuwanjwa kwomuri, apo okarakaja ngo kupurutana kwenyu mwese, kuti mwakamuashira ngo kutya na ngo kuhuta. Ndinodakara kuti ngo zviro zvese ndinogonda ndimwi. Ndizvozve, hama, tinomuzivisa ngo nyasha ja Mwari jakapuwa kuzviara zviri mu Makedhoniya; kuti, mukuejwa kukuru kwo kutambujika, no uwandu hwokudakara kwavo, no kujika kwo urombo hwavo, zvakawandisa upfumi hwo kupa kwavo. Ngokuti ndinoita chapupu ndivo, kuti kudari ngo zvovaikona, eya, no kupinda zvovaikona, vakapa ngo kuda kwavo. Vechitipota ngo kunyengerera kukuru, kuti tiashire ichi chipo no ukama mukushandira vakacheneswa. Navo vakayita ichi, chisiripi chotaigarira, asi kutanga vakajipira ngo kwavo kuna Mambo, no kwetirizve ngokuda kwa Mwari. Ngokudaro kudari ngo zvotakakumbira Titosi, kuti iye kudari ngo zvayinga aamba, ngokudaro apejisevo kwomuri iji nyasha. Ndizvo kudari ngo zvo munowandisa kune zviro zvese, mukugonda, no mukuvereketa, mukuziva, no mukutsamwirira kwese, ngo rudo rwenyu kwetiri, ringiranyi kuti muwanjezve kune iji nyasha. Andivereketi ngo kumupanga, asi ngo kutsamwirira kwevamweni kuti ndieje gwinyiso ro rudo rwenyuzve. Ngokuti imwimwi munoziva nyasha ja Mambo wedu Jesu Kristu, kuti pikija iye wayiva mupfumi, asi ngo ndava yenyu wakayita murombo, kuti imwimwi ngo urombo hwake muite vapfumi. Kune izvi ndinonanga mavonero angu; ngokuti izvi zvakamunakira imwimwi, mwakatangira vamweni mwokoha, musikateveji kuyita kwega, asi kuva no kuda kwokuyita. Asi zvino pejisanyizve kuzviita; kuti kudari ngo zvo kwayivapo kuda kwokuyita pejisanyizve po munokona ndipo, Ngokuti kudari kuripo kuda kwokuyita, kuri kunoashirika kudari ngo zvaanazvo mundhu, haiwa kudari ngo zvaasina. Ngokuti andinangi izvi kuti vamweni varerukihwe, nemwi mwechitambujika; asi ngo kuezanisa; kuti kuwandihwa kwenyu ngo nguva iyi kukwanise kutama kwavo, kuti kuwanda kwavozve kukwanise kutama kwenyu; kuti kuvapo kuezanisana. Kudari ngo zvakatahwa: “Iye wakaunganija zvakawanda aazivi kusara no chiro; no uwo wakaunganija zvishomani aazivi kutama chiro.” Asi ngaabongwe Mwari uwo wakadira mu mwoyo mwa Titosi ukwo kutsamwirira ndimwi. Ngokuti ngo gwinyiso iye wakazwa kupota kwedu; asi iye ambhwine, echichungirira kakurutu, wakabuda kuenda kwomuri ngokuda kwake. Nesu takatuma pamwepo nayo hama iyo yaitendwa kuzviara zvese; andizvopi zvega, asi uri uwo wakaemeswazve ngo zviara kuti afambe nesu ngo ndava yo ichi chipo chinoshandwa ndisu, kuyita kuti Mambo airikijwe, no kupangijira kutendera kwedu. Techingwarijira kuti mundhu asatiitira ndava ngo uwandu hunoshandwa ndisu; ngokuti tinongwarijira kuti zviite zvinoreremejeka, haiwa kwega mukuvona kwa Mambo, asi no mukuvona kwo vandhuzve. Nesu takatuma pamwepo navo hama yedu, yotakaeja nguva zhinji tikavona kuti inochungirira ngo zviro zvizhinji, asi zvino iri inopindisisa kuchungirira, ngo ndava yo gonda guru roinaro kwomuri. Kudari aripo unobvunjisa ndi Titosi, uri mubeseri wangu no mudoni wangu mumushando unoitwa kwomuri; nokuti vechibvunjisa ngo ndava yo hama jedu, jiri ndhumwa jo chiara, no jo uthende hwa Kristu. Ndizvo pangijiranyi kwavari chivoniso cho rudo rwenyu, no cho kuganza kwedu ndimwi, mukuvona kwo zviara. Ngokuti azvisisiri kuti nditare kwomuri ngo ndava yo kukovera vakacheneswa; ngokuti ndinoziva kutendera kwenyu, kwondinoganza ndikwo ndimwi, kwavari vo Makedhoniya, kwokuti vo Akaya vakapeja kunasirira mwokoha; no kuchungirira kwenyu kwakamusa vazhinji vavo. Asi ndakatuma hama, kuti kuganza kwedu ndimwi kusazoita kusina shwiro ngo iyi ndava; kuti muite vakanasirira kudari ngo zvondakananga, kuti kusazoitika, nokuti ngeiri njira, kudari vechiviya neni vamweni vo Makedhoniya, vamuwane musikazivi kunasirira, isisu (ndisikanangi imwimwi), tipsherujwe ngo kugonda uku. Ndizvo ndaipinimija kuti kwaisisira kunyengerera hama kuti jitange pamberi kuviya kwomuri, vanasirire kutanga zvakawanda zvenyu zvo mwakagondisa ngo pamberi, kuti izvo zvinasirihwe kuti zviite chidakajiso, andikwopi kwo kuemura. Asi ndinonanga izvi: Iye unokusha zvishoma unozokotorazve zvishoma; no uwo unokusha zvakawanda, unozokotorazve zvakawandisisa. Mundhu wese ngaaite kudari ngo zvaakaemesera mumwoyo mwake; haiwa ngo ushungu, nokuti ngo kuvangirijwa, ngokuti Mwari unoda unopa ngo kudakarira. Na Mwari une simba ro kumuwanjira zvipo zvese; kwokuti imwimwi mwechikwaniswa ngo zviro zvese ngo nguva jese, muwanje kuyita mishando yese yakanaka, kudari ngo zvakatahwa: (Iye wakakovera, wakapa varombo; kururama kwake kunozogara mbhera narini ). Iye unopa mukushi mbewu, no chimanda chokuha, iye unozomupa no kuwanja mbewu jenyu jo kukusha, no kuwanja michero yo kururama kwenyu; kuti imwimwi mwechipfumiswa ngo zviro zvese, mupe ngo kusununguka kwese, no kushanda kubudikija ndisu kuti Mwari abongwe. Ngokuti uku kukovaniswa kwo mushando uwu, akupeji kutama kwese kwo vakacheneswa, asi kunowandisazve kubonga kuzhinji kuna Mwari. Kwechivoneka kuti ngo kuejwa kwenyu ngo uwu mushando, ivo vanoirikija Mwari ngo ndava yo kupurutana kwo kutenda kwenyu vhangeri ra Kristu na ngo ndava yo kuwanda kwo zvipo zvenyu kwavari, no kuna vese. Apo ivo vambhwine, ngo kumukumbirira, vano chisuwo ngo ndava yo nyasha huru ja Mwari jiri mukati mwenyu. Ngaabongwe Mwari ngo chipo chake chisikabviri kunangwa. Zvino inini Pauri pachangu, ndinomupota ngo kusengerera na ngo kupfava kwa Kristu, inini ndiri pakati penyu ndakapfava, asi ndinokushinga kwomuri ndisipo; eya, ndinomupota, kuti ndiripo ndisazopangijira kushinga kwo kurwisana ndikwo no vamweni, avo vanotikarakajira kunonga tinofamba ngo zvo nyama. Ngokuti pikija techifamba mumuviri, atirwi akadi kudari ngo kwo nyama. Ngokuti zvokurwa ndizvo zvedu azviri zvo nyama akadi, asi zvino simba pamberi pa Mwari ro kupwanya ndau jakagwinya jo hondo. Kupwanya mikarakajo no zviro zvese zvinojikurisa kurwisana no kuziva kwa Mwari, no kuviisa mipinimijo yese muuranda hwo kupurutana Kristu. Takanasirira kukhauwisa kusikapurutana kwese, apo kupurutana kwenyu kwazarisika. Imwimwi munoringira zviro zviri pamberi po hope jenyu, kudari aripo mundhu unojigonda kuti uri wa Kristu, ngaarangarire ichizve mukati mwake, kuti, kudari ndiye uri wa Kristu, nesu takadarovo. Kudari ndingaganza ngo zvakatikuti ngo simba redu, ro takapuwa ndi Mambo, rokumuvaka ndiro, haiwa rokumurasha, andizopsherujwi akadi, kuti ndisaita inga ndinomutyisijira ngo tshamba jangu. Ngokuti vanoti, tshamba jake jine masoko makuru, jine simba, asi mukuvoneka kwo muviri uri wakarembejeka, no kuvereketa kwake akuna shwiro. Mundhu wakadaro ngaarangarire ichi, kuti kudari ngozvotakananga mutshamba jedu ngo izwi, tisipo, ndizvo zvotinozoita tiripo. Ngokuti atizivi kushinga kujijisa vamweni vanojiganzisa, asi avo pachavo vechijiezanisa ngokwavo nokujitojanisa umwe no umweni; vari vasikazwisisi. Asi isisu atizoganzi kupinda chotiri ndicho, asi kudari ngochiezaniso cho mushando waakakovanisa Mwari kwetiri, kuyita chiezaniso cho kuguma no kwomuri; ngokuti atinyanyi kujitambanuja, inga atizivi kuguma kwomuri, ngokuti tisu takatanga kuguma kwomuri no vhangeri ra Kristu; atiganzi kupinda chotiri ndicho, izvo zvinoti, atiganzi ngo mushando wo vandhu vamweni; asi tinogonda kuti kudari kutenda kwenyu kwechikura, isisu tinozokujwa zvakapinda kukura mukati mwenyu, ngokuteveja mupango wo takapuwa. Kuti tichumaire vhangeri kundau jiri ngo mberi kwenyu, tisikaganzi ngo mushando yo umweni yakanasirihwa kwetiri, Asi iye unoganza, ngaaganze kuna Mambo. Ngokuti andiyepi unojiganzisa unotendwa, asi waanoganzisa Mambo. Kudari mwechindisengerera kadodoko muupenji hwangu! Asi ngo gwinyiso munondisengerera. Ngokuti ndine ndurumwa ndimwi, ngo ndurumwa ya Mwari; ngokuti ndakamubvunjiririra kumwamuna umweni, kuti ndimutatijire kuna Kristu kudari ngo mbhandwe ichakazara. Asi ndinotya kuti ngo njira pikija ngoiri, kudari ngo nyoka yakachengejera Evha ngo urimbwi hwayo, ngokudaro mipinimijo yenyu ingazoshaishihwa kubva kune chakareruka no kucheneswa zviri kuna Kristu. Ngokuti kudari umweni echiviya echichumaira Jesu, wetisikazivi kuchumayira isisu, nokuti kudari mwechiashira mweya wakapaukana, wo musikazivi kumboashira, nokuti kuashira vhangeri rimweni, romusikazivi kumboashira, izvo zvakadaro munganasa kuzvitendera. Ngokuti ndinorangarira kuti na ngo chidodoko, andiri mudokopi nokune vapostori vakuru. Pikija andisainasa kuvereketa, asi andiri wakadaropi mukuziva; haiwa, ngo zviro zvese takazvipangijira kwomuri pakati po vandhu vese. Ndakashaisha here ngo kujipfavisa, kuti imwimwi mukuriswe, ngokuti ndakachumaira kwomuri vhangeri ra Mwari, ndisikapuwi musharo? Ndakazvitorera zviara zvimweni, ndechitora musharo ndizvo kuti ndishandire imwimwi; naapo ndinemwi, ndechitama, andizivi kuyita mutwaro kuno mundhu, ngokuti apo hama javiya jechibva Makedhoniya, jakandipa zvese zvondaitama; na ngo zviro ndakangwarira kuti ndisazoita mutwaro kwomuri neni ndinozojingwarira kudaro. Kudari ngo gwinyiso ra Kristu riri kwendiri apana mundhu unozondipinga ngo kuganza uku mu nyika jo Akaya. Ndava ngo yenyi? Ngokuti andimudi here? Mwari unoziva. Asi icho chendinoita, ndinozochiyita kuti nditamise ndava kwavari vanopshaka ndava, kuti kune izvo zvo vanoganza ndizvo, vavoneke vakadari ndisu. Ngokuti vandhu vakadaro vari vapostori vokunyepa, no vashandi vo kuchengejera, vechijitsanduja kuyita vanonga vapostori va Kristu. Andichopi chiri chinoshamisa; ngokuti Sathani pachake unojitsanduja kuyita anonga ari ngirosi yo kujeka. Ndizvo andizvopi zviro zvikuru kudari vashandi vakezve vechijitsanduja kuyita vanonga vari vashandi vo kururama: Magumo avo anozodari ngo mishando yavo. Ndinotizve, kusazovapo mundhu unopinimija kuti inini ndiri benji; asi kudari mwechipinimija kudaro, ndiashirenyi kudari ngo benji kuti ndiganze padodoko. Izvo zvondinovereketa, andizvivereketeri kudari ndi Mambo, asi ngo zvo upenji mukugonda uku kwo kuganza kwangu. Kwechivoneka kuti vazhinji vanoganza ngo zvo nyama ndinozoganzavo inini. Ngokuti munosengerera mapenji ngo kudakara, imwimwi mwakangwara. Ngokuti munosengerera mundhu kudari iye echimuyita varanda, kudari echimupamba, kudari echimutora kuyita hloko, kudari echijikurisa, kudari echimupambhaja mu hope. Ndinovereketa ngo njira yo kushora, inga taiva vakarembejeka, asi pikija ngeiri njira yaanozoshinga ndiyo mundhu, ndinovereketa ngo upenji, ndinoshingavo. Vari vaHebheru here? Nenivo, vari vaIsraeri here? Nenivo, vari vo ruji hwa Abrahama here? Nenivo. Vari vashandi vaKristu here? (Ndinovereketa kudari ngo unopenga), inini ndinovapinda; mumushando ndakapinda kakurutu, mukungwiniswa muguniya ndakavapinda kakurutu, mukurohwa ngo ndonga kakurutu ndakavapinda, mungozi mikuvo mizhinji. Ndakachaiwa ngo vajudha kashanu ngo zvipembere zviri makumi marongomuna kwechiregehwa chimwe. Ndakarohwa katatu ngo ndonga, ndakafuhwa ngo mapuwe kamwe, ndakapwanyikihwa ngo ngarava katatu, usiku humwe no zuva rimwe ndaiva mu jombe; ndaiva muhwendo kazhinji, mungozi jo mumurambo, mungozi jo majongoni, mungozi jo vojinja rangu, mungozi jo vo majinja, mungozi jo mu madhoropa, ngozi jo mubani, mungozi jo mujombe, mungozi jo pakati po hama jo kunyepa; mukushanda no mukuhwajihwa, mukurinda kazhinji, mukupera ngo njara, no nyota, mukuera kuha kazhinji, mukutondhorehwa, no mumutitinini. Ngo kunja kwo izvi zvinondigumira zvo kunja chiripo chinondimanikija zuva ngo zuva chiri kukakasekera zviara zvese. Ndiyani wakarembejeka neni andiri kurembejeka naye? Ndiyani unokugunyiswa neni ndisikasvipi mwoyo? Kudari kwechisisira kuti ndiganze, ndinozoganza ngo izvo zvo kurembejeka kwangu. Mwari Baba wa Mambo Jesu, unotendwa mbhera narini, unoziva kuti andinyepi. Mu Dhamaseku nduna yaitonga pasi pa Aretasi mambo, yakarinda dhoropa ro vaDhamaseku kuda kundisunga, neni ndakabzuswa ngo pa fasitera po biravira ndiri mudendere, ndakapokonyoka kubva munyara jake. Kunosisira kuti ndiganze, pikija akusisi; asi ndakaguma mukuvereketa ngo zvivoniso na ngo zvakapangijirwa zva Mambo. Ndaiziva mundhu wayiva kuna Kristu makore ari gumi na marongomuna apinda, (pikija wayiva mumuviri, andizivi; pikija wayiva ngokunja kwo kuva no muviri andizivi; ndi Mwari unoziva), uwo mundhu wakakwijwa mbhera kuguma mu gore rochitatu. Neni ndaiziva uwo mundhu pikija wayiva no muviri, nokuti wayiva ngo kunja kwo kuva no muviri, andizivi; ndi Mwari unoziva. Ngo njira yaakakwijwa ndiyo kuenda muparadhesi, naye wakazwa mazwi asikabviri kuvereketwa, asikatendehwi mundhu kuti aaverekete. Ngo ndava yo wakadaro ndinozoganza; asi ngo ndava yangu andizoganzi, kwega kuganza ngo kurembejeka kwangu. Ngokuti pikija ndechida kuganza andizoiti benji; ngokuti ndaizovereketa gwinyiso; asi ndinovereketa kuyita kudaro, kuti kusazovapo mundhu ungapinimija ndini, kupinda mavonero aanondiita, nokuti kupinda mazwire aanoita ndini. Na ngo ndava yo kukura kwo izvo zvakapangijirwa, kwendiri, kuti ndisanyanya kutundhumajwa kupinda mutengo, kwakapuwa kwendiri muzwa mumuviri, uri ndhumwa ya Sathani, kuti andipambhaje, kuti ndisazotundhumajwa kupinda mutengo. Ngo ndava yo ichi, ndakapota Mambo katatu, kuti ubviswe kwendiri. Naye wakati kwendiri: “Nyasha jangu jinokwana kwouri. Ngokuti simba rangu rakaperera mukurembejeka.” Ndizvo ndinozopinda kudakara mukurembejeka kwangu, kuti simba ra Kristu rigare panyezuru pangu. Ndizvo ndinodakara mukurembejeka, mukuremajwa, mukutamikihwa, mukutambujwa, mumatambujiko, ngo ndava ya Kristu; ngokuti apo ndiri wakarembejeka apo ndiri une simba. Ndava benji; Imwimwi mwakandivangijira kuti ndidaro; ngokuti kwaisisa kuti nditendwe ndimwi, ngokuti andiri mudokopi ngo chiro na chimwe kune vapostori vakuru, pikija andiri chiropi. Ngo gwinyiso zvivoniso zvo upostori zvakaitwa pakati penyu mukusengerera kwese, ngo zvivoniso no mishamiso no mishando ine simba. Ngokuti chinyi chemwakapindwa ndicho kuyita vari pasi kune zviara zvimweni, kwega kuti pachangu andizivi kuyita mutwaro kwomuri? Ndiregererenyi uku kusikarurami. Ringiranyi, inguva yochitatu yondanasirira kuti ndiviye kwomuri; neni andizoiti mutwaro kwomuri; ngokuti andipshaki zvenyu, asi ndinopshaka imwimwi; ngokuti akudikani kuti vana vaunganijire vabari, asi kuti vabari vaunganijire vana. Neni ndingazopejera zvese zvangu ngo kudakara, no kupejwazve ngo ndava yo mweya yenyu, kudari ndechimuda kakurutu, kunopinda kudodoka kudiwa kwangu ndimwi here? Asi pikija zvakanyadaro, inini pachangu andizivi kuyita mutwaro kwomuri; asi ndechiva wakangwara, ndakamubata ngo urimbwi. Ndakaviihwa here ndimwi ngo umwe wo avo vondakatuma kwomuri? Ndakapota Titosi, ndikatuma pamwepo naye hama: Titosi une chaakaviihwa ndicho here kwomuri? Atizivi kufamba here ngo mweya unotojana? Atizivi kufamba here muzvitsiko zvakatojana? Munopinimija here kuti nguva iyi yese tinojipembeja kwomuri? Mukuvona kwa Mwari tinovereketa ndi Kristu. Asi zviro zvese, vanodikana, zviri zvokuvakiwa kwenyu. Ngokuti ndinotya, kuti pikija ngeiri njira, apo ndoviyeyo, ndingazomuvona musiri avo vondingada kuti muve vakadaro, neni pachangu ndivoneke kwomuri ndiri wo musikadi kuti ndiite wakadaro; pikija ngeiri njira kungazovapo hasha, no ndurumwa, no ushungu, no kusikazwana, no kurevana, no makuhwa, no kujikuja, no hohoho; kuti apo ndogumeyozve, Mwari wangu azondipfavisa pamberi penyu, neni ndingazotsumba ngo ndava yo vazhinji vakashaisha ngo pamberi, vasikazivi kutenderuka kubva kwo kusikasukiki no kuangarara, no kupsheruka kwo vakayita. Iyi inguva yochitatu yo ndinoviya kwomuri. Ngo miromo yo zvapupu zviviri nokuti zvitatu mazwi ese anozogwinyiswa. Ndakamubvunja kutanga, zvino ndomubvunjazve, kudari ngo zvondaivapo ngo mukuvo wo chipiri, ndizvo zvino ndisipo, ndinonanga kwavari vakamboshaisha no kuno vamweni vese, kuti ndoviyeyozve, andizovakunguriri; kwechivoneka kuti munopshaka chivoniso cha Kristu unovereketa kwendiri, iye usiri wakarembejeka kwomuri, asi une simba mukati mwenyu. Ngokuti pikija wakakohomehwa pa muchinjiko ngo ndava yo kurembejeka, asi unopona ngo simba ra Mwari. Ngokuti nesuvo tiri vakarembejeka kwaari, asi tinozopona naye ngo simba ra Mwari kwomuri. Jiejenyi imwimwi, kuvona kuti muri mukutenda here; jivonisenyi pachenyu. Amuzivi here pachenyu, kuti Kristu uri mukati mwenyu? Kudari musiri vakarashwa. Asi ndinogonda kuti imwimwi munoziva kuti isisu atiri vakarashwa akadi. Zvino tinokumbira kuna Mwari kuti musaita zvakashata; andikwopi kuti isisu tivoneke tiri vanotendwa, asi kuti muite zvinoreremejeka, pikija isisu tinoverengwa tiri vanorashwa. Ngokuti apana chotingaita chinorwisana no gwinyiso, asi zvinoimirirana no gwinyiso. Ngokuti tinodakara apo isisu tiri vakarembejeka nemwi mwakagwinya. Zve, tinokumbirira ichi kuti muite vakaperera. Ngo iyi ndava ndinotara kwomuri izvi zviro ndisipo, kuti ndavapo ndisazofemeruka, kudari ngo simba rondakapuwa ndi Mambo ro kuvaka, risiri ro kupwanya. Pakupejisira, hama, chisaranyi. Itanyi vakaperera; embejerwanyi; itanyi vano mupinimijo umwewo; mugare mukunyarara: Na Mwari wo rudo no wo kunyarara unozova nemwi. Chungamijananyi ngo muromo ngo kucheneswa. Vese vakacheneswa vanomutambisa. Nyasha ja Mambo Jesu Kristu, no rudo rwa Mwari, no kuiyana kwo Mweya Wakachena ngazvigare nemwi mwese. Pauri, mupostori, (andihwopi hunobva ku vandhu akadi, zve, andihwopi hwo mundhu, asi ndiye Jesu Kristu, na Mwari Baba uwo wakamumusa kwo vakafa), no hama jese jineni, kuzviara zvo Garatiya: Nyasha kwomuri, no kunyarara zvinobva kuna Mwari Baba, nokuna Mambo wedu Jesu Kristu, uwo wakajipira ngondava yo zvishaishi zvedu, kuti atiregerere kubva ku nyika ino yakashata, kudari ngokuda kwa Mwari Baba wedu, kwaari ngakuvepo uthende kunoti mbhera narini. Ameni! Ndinoshama kuti mwakakasira kudari kubva kwaari uwo wakamudanija ngo nyasha ja Kristu, kuenda kuna rimweni vhangeri; iro richipi vhangeri rimweni akadi, kwega variyo vamweni vanomukhanganisa, vanoda kupaukisa vhangeri ra Kristu. Asi pikija tiri itisu, pikija iri ngirosi inobva mugore, ikachumaira kwomuri vhangeri rakasiyana kuna iro ro takachumaira kwomuri, ngaitukwe. Kudari ngo zvo takavereketa ngo pamberi, ndinovereketazve kudaro wari, kuti: Kudari aripo mundhu unochumaira kwomuri vhangeri rakasiyana na iro romwakaashira, ngaatukwe. Ngokuti wari ndinopshaka kudiwa ngo vandhu here, nokuti Mwari? Nokuti ndinopshaka kudakarisa vandhu kani? Kudari ndayiva ndechindodakajisa vandhu, ngokudaro andingaiti muranda wa Kristu. Ngokuti ndinozivisa kwomuri, hama, ngo ndava yo vhangeri rakachumaihwa ndini, kuti richayiva ro vandhu. Ngokuti andizivi kuriashira, nokuti kurijijiswa, kubva ku mundhu, asi rakaviya kwendiri ngo kupangijihwa ndi Jesu Kristu. Ngokuti mwakazwa ngo ndaramo yangu yo nguva yakapinda, mumaitiro ochiJudha, kuti ngo njira inopinda kushata, ndakatambuja chiara cha Mwari, ndikachiparaja. Neni ndakapinda vazhinji vondanga yangu mukudira kwo vaJudha, pakati po vandhu vo jinja rangu, ndechivapinda kukuru mukungwarira maponero omajibaba angu. Asi apo kwakamudakajisa Mwari, uwo wakandiparajanisa kubva mu ndani ya mayi wangu, wakandidanija ngo nyasha jake. Kuti apangijire kwendiri Mwana wake, ndimuchumaire pakati po vomajinja; paripo andizivi kubvunjisa nokuno nyama no ngazi. Zve, andizivi kukwira Jerusarema kuna avo vayiva vapostori kutangira inini: Asi ndakaenda Arabhiya; ndohwirirazve Dhamaseku. Kwakati ngosure kwo makore matatu ndakakwira Jerusarema kwoovonana na Khefasi, ndakagara naye mazuva ari gumi na mashanu. Asi andizivi kuvona vamweni vo vapostori, kwega Jakobe hama ya Mambo. Zvino ngo ndava yo zviro zvo ndinotara kwomuri ringiranyi, mukuvona kwa Mwari, andinyepi. Sure kwo izvi ndakaviya ku nyika yo Siriya noyo Kirikiya. Ndisikazivi kuzivika ngo hope kuna zviara zvo Judhia zvayiva kuna Kristu. Asi kwega vakazwa kuti: “Uwo waititambuja ngo pamberi, wari unochumaira ukwo kutenda kwaakaparajanisa ngo pamberi.” Navo vakakuja Mwari ndini. Ndizvo ngosure kwo mukuvo wo makore ari gumi na marongomuna ndakahwirirazve Jerusarema, pamwepo na Bharnabha, ndikatoravo Titosi. Neni ndakakwireyo ngo kuvoniswa; ndakavapangijira vhangeri rendinochumaira pakati po majinja, asi ndakaripangijira kuna vakuru vari vega, kuitira kuti ndisagogoma, nokuti ndayiva ndakagogoma pasina shwiro. Zve, na Titosi vayiva neni, ari mu Giriki, aazivi kuvangijihwa kuti achekwe. Asi ndakaita kudaro ngo ndava jo hama jo kunyepa ijo jakanghwiniswa tichikazivi, vachinghwinemwo ngo kufishika kuti vadongorire kusununguka kwedu kwo tinakwo kuna Kristu Jesu kuti vatinghwinise mu uhloko. Kwavari atizivi kuvatendera kuti vatinyise no nguva imwe hayo; kuti gwinyiso ro vhangeri rigare nemwi. Asi kubva kuna avo vayiva no mbiri yokuti vari vakuru (pikija vari vakadini, azvina ndava kwendiri; Mwari aasani undhu hwo mundhu) avo, ndinoti, vayiva vano mbirikira avazivi kuengejera chiro kwendiri. Asi paugaro pazvo, apo vavona kuti inini ndakapuwa vhangeri kuna vasikazivi kuchekwa, kudari ngo zvaakapuwavo Pedru vhangeri kuna vakachekwa. (Ngokuti uwo wakashanda kuna Pedru kuti aite zvo upostori kuna vakachekwa, wakashandavo kwendiri kuti ndiite zvo upostori kuna vo majinja). Naapo vakavona nyasha jakapuwa kwendiri, Jakobe na Khefasi na Johani, avo vaizwi vari majiro vakatibata inini na Bharnabha ngo nyasha jo kumuho ngo ukama, kuti isisu tiende kuno vo majinja, navo vaende kuno vakachekwa. Kwega vaida kuti tirangarije ngo varombo; icho chayiva cho ndayivangirira kuyita inini. Asi apo Pedru aguma Antiyoki, ndakamukanija pamberi po hope yake, ngokuti vayiva uno ndava. Ngokuti ngopamberi vasati vaguma vakatikuti vechibva kuna Jakobe, iye, wakaha pamwepo no vo majinja, asi apo avo vaguma, wakareya wakabvepo pachake, echivatya vayiva vo vakachekwa. No vamweni vo vajudha vakajiitisa kudaro pamwepo naye; kuti na Bharnabha wakapaukiswavo ngo kujiitisa kwavo. Asi apo ndavona kuti avazivi kufamba ngo kuteveja, gwinyiso rovhangeri, ndakati kuna Khefasi pamberi pavo vese: Kudari iwewe uri mu Judha, unogara kudari ngovari vo majinja, usikaiti kudari ngo zvo vanoyita vajudha, unovavangijirenyi vari vo majinja kuti vagare kudari ngo zvovanoita vajudha. Isisu tiri vajudha ngo chibarihwe, tisiri vashaishi vo majinja. Asi techivona kuti mundhu aapembejwi ngo mishando yo mipango, asi kwega ngo kugonda kuna Kristu Jesu, itisu nesu takatenda kuna Jesu Kristu kuti tipembejwe ngo kugonda kuna Kristu, andikwopi ngo kuyita mishando yo mipango ngokuti ngokuita mishando yo mipango akuna mundhu ungazopembejwa. Asi apo taipshaka kupembejwa kuna Kristu, nesuvo pachedu takavoneka tiri vashaishi, ngokudaro Kristu uri mushandi wo kushaisha here? Haiwa. Ngokuti kudari ndechizovakazve izvo zvo ndakapwanya, ndinojivonisa kuti ndiri mupauki. Ngokuti inini ngo mipango ndakafa, kuna mipango, kuti ndipone kuna Mwari. Ndakakohomehwa pamwepo na Kristu; asi ndinopona; asi andinipi ndichapona, asi ndi Kristu unopona mukati mwangu, no ndaramo yo ndinopona wari, ngo kwo muviri, ndinopona ngo kugonda kuri kuna Mwana wa Mwari, uwo wakandida, wakajipira ngo ndava yangu. Andirerusi nyasha ja Mwari: Ngokuti kudari kururama kwechizovapo ngo mipango, ngokudaro Kristu wakafa pasina shwiro. Imwimwi Vagaratiya mapenji! Ndiyani wakamuroya? Imwimwi pamberi po majiso enyu Jesu Kristu wakapangijihwa pambhene ari wakakohomehwa? Ichi chega chondinoda kuzwa ndimwi, mwakaashira Mweya ngo mishando yo mipango here? Nokuti ngokuzwa ngo kugonda? Muri mapenji akadari here? Mwakatanga ndi Mweya, wari mwogumisira ngo zvo nyama here? Mwakatambujikira zviro zvakawanda kudaro Kusina shwiro kani? Kudari ngo gwinyiso kuri Kusina shwiro. Uwo unomupa Mweya, achishanda mishamiso pakati penyu, anozviita ngo mishando yo mipango here, nokuti ngo kuzwa kwo kugonda? Kudari ndi Abrahama wakagonda Mwari, nakwo kwakaverengehwa kwaari kuti kuri kururama. Zvino munovona kuti avo vanokugonda ndivona vari vana va Abrahama. No matahwa echivona ngo pamberi kuti Mwari unozopembeja vo majinja ngo kugonda, akachumaira vhangeri kare kuna Abrahama echiti: “Ndiwe majinja ese anozodakajiswa.” Ndizvo avo vari vo kugonda vanodakajiswa pamwepo na Abrahama uwo vayiva unogondeka. Ngokuti vese avo vanogonda kuna mishando yo mipango vari pasi pechituko: “Ngokuti kwakatahwa, vakatukwa vese vasikangwariri zvese zvakatahwa mu tshamba yo mipango kuti vazviite.” Zvino kuri pambhene kuti apana mundhu unopembejwa ngo mipango pamberi pa Mwari; ngokuti, “Vakarurama vanozopona ngo kugonda.” No mipango ajiripi jo kugonda; asi, i ye unozojiita unozopona ndijo. Kristu wakatiripira kubva kwo kutukwa kwo mipango, iye waitwa wakatukwa ngo ndava jedu: Ngokuti kwakatahwa, “wakatukwa mundhu wese unopaikwa pa muti.” Kuti rukomborero hwa Abrahama uviye panyezuru po vo majinja ndiye Kristu Jesu; kuti tiashire chigondiso cho Mweya ngo kugonda. Hama, ndinovereketa kudari ngo maitiro wo vandhu: Akuna mundhu ungaita chitenderano cho vandhu kuti chiite chisina shwiro, kuchibvisa pikija kuchiengejera. Zvino zvigondiso zvakaitwa kuna Abrahama nokuno mubarihwana wake, azvinangi: “No kumibarihwana”, kuno yakawanda, asi kuno umwe, no kumubarihwana wako, uri Kristu. Chondinovereketa ngaichi: Mupango wakaviya mazana marongomuna no makumi matatu (430) o makore, ngosure achingaiti kuti chiite chisina shwiro chitenderano chayinga chakaemeswa ndi Mwari ngo pamberi, kuti chigondiso cha Mwari chikonehwe. Ngokuti kudari ndhaka yechipuwa ngo kungwarira mupango, aichipi yo chigondiso, asi Mwari wakaitatija kuno Abrahama ngo chigondiso. Mipango ngo yenyi? Iyo jakanyengejehwa ngondava yo uposi, mbhera mubarihwana ugume, uwo wakaitihwa chigondiso; nacho chakaemeswa kunangwa ngo ngirosi ngo muiyanisi. Zvino muiyanisi aanangi umwe basi; asi Mwari ndiumwe. Ndizvo mipango yinorwisana kani no zvigondiso zva Mwari? Kusazodaro: Ngokuti kudari wayinga wakaitika kuti kungavapo mupango uno simba ro kuponesa, ngokudaro ngo gwinyiso kururama kwaizovapo ngo mipango. Asi matahwa akaphiningijira zvese pasi po kushaisha, kuti chigondiso icho chiri ngo kugonda kuna Jesu Kristu chipuwe kwavari vanotenda. Asi kugonda kusati kwaguma, tayiva pasi po mipango, takasungwa, mbhera kutenda kupangijihwe. Ndizvo mipango yakaita mujijisi wedu wo nguveyo kutiviisa kuna Kristu, kuti tipembejwe ngo kugonda. Asi zvino apo kugonda kwaguma, atichiri pasi po mujijisiwo; ngokuti muna Jesu imwimwi mwese muri vana va Mwari ngo kugonda. Ngokuti avo vese pakati penyu vakabhapatiswa kuna Kristu, mwakamusimira Kristu. Akuchina muJudha, nokuti mugiriki, akuchina hloko nokuti wakasununguka, akuchina mwanarume nokuti mwanakaji: Ngokuti imwimwi mwese muri umwe kuna Kristu Jesu. Nokudari muri va Kristu, ndizvo muri vo mubarihwana wa Abrahama, muri vanogara ndhaka kudari ngo chigondiso. Asi ndinoti kuti mukuvo wese waachiri ndumure, uwo unogara ndhaka, aana chaanoparajana ndicho kuna hloko, pikija ari mambo wazvo zvese; asi ari pasi po vangwariri no vareri mbhera igume nguva yakaemeswa ndi baba. Ngokudaro naisisuvo, apo tichiri ndumure, tainga takasungwa ngo zviito zvokutanga kwo nyika. Asi apo kwaguma kuzarisika kwo nguva, Mwari wakatitumira Mwana wake wakabahwa ngo mujimayi, wakabahwa ari pasi po mipango, kuti aripire avo vayiva pasi po mipango, kuti tiashire urehwa hwokuita vana. Ngokuti muri vana, Mwari wakatumira Mweya wo Mwana wake mukati mwo mwoyo yedu, wechidanijira kuti, “Abha, Baba.” Ndizvo iwewe auchaiti hloko, asi uri mwana, kudari uri mwana, unogara ndhaka ngokuda kwa Mwari. Asi ngonguva iyo musati mwaziva Mwari, mwayiva varanda vo izvo zvo chibarihwe zvayinga zvisiri mwari. Asi zvino mwamuziva Mwari, kukuru kuzivika ndi Mwari, mwahwirira ngenyi sure kuna izvo zviito zvokutanga zvisina simba, zvo urombo, zvo munoda kusungwazve ndizvo? Munongwarira mazuva, no mweji, no nguva, no makore. Ndinomutyira, kuti ngo njira nokuti yakadini ndakashanda pasina shwiro pakati penyu. Ndinomupota, hama, itanyi vakadari ndini, ngokuti inini ndakadari ndimwi, amuzivi kundishaishira; asi munoziva kuti kwayiva kuhwajihwa kwo muviri, kuti ndakachumaira vhangeri kwomuri pakutanga. Pikija ukwo kwayiva chiejo kwomuri, amuzivi kundishora, nokuti kundiramba; asi mwakandiashira kudari ndiri ngirosi ya Mwari, kudari ndi Kristu Jesu. Kuri kwapi kudakara kwenyu? Ngokuti ndinoita chapupu kwomuri kuti kudari zvaibvira, inga mwakabvita majiso enyu mukaapa kwendiri. Ndizvo ndaita mukorore wenyu here ngokuti ndinovereketa gwinyiso kwomuri? Vanomuputaputira kumupshaka ngo njira isikazivi kunaka; asi vanoda kumuphiningijira kunja, kuti imwimwi muvaputaputire. Asi zvakanaka kuputaputihwa ngo njira yakanaka ngo nguva jese, haiwa kwega apo ndinemwi. Vana vangu vadoko, vondinotambujikira mbhera Kristu abahwe mukati mwenyu, ndingada kuti ndivepo nemwi zvino, kuti ndisanduje izwi rangu; ngokuti ndinokangaijwa ndimwi. Ndibvunjenyi, imwimwi munoda kutongwa ngo mupango, amuzvizwi here zvounonanga? Ngokuti kwakatahwa, kuti, Abrahama vayiva no vana vaviri, umwe wakabahwa ngo murandakaji, no umweni wakabahwa ngo mukaji wakasununguka. Asi mwana wo murandakaji wakabahwa ngo kwo nyama; asi mwana wo mukaji wakasununguka wakabahwa ngo kwo chigondiso. Izvi zvina chijijo cho muezaniso: Ngokuti ava vakaji vaviri vari muezaniso wo zvitenderano zviviri; chimwe chazvo chechibva kudundhu ro Sinai, chechibereka vana vo uranda, icho chiri muezaniso wa Hagari. Zvino uwu Hagari ari dundhu ro Sinai mu Arabhiya, unoezaniswa no Jerusarema rindoripo ngokuti uri mukusungwa pamwepo no vana vake. Asi Jerusarema iro ro mugore riri rakasununguka, ndiro riri mayi wedu. Ngokuti kwakatahwa, kuti: “Dakara iwewe ngomwa usikabari: Pururija, udanijire, iwewe usikazivi kuhwajihwa ngo kubara; ngokuti vanopinda kuwanda vana vo mukaji wakasiiwa, kuno uwo ano mwamuna.” Zvino isisu, hama, tiri vana vo chigondiso kudari ndi Isaka. Asi kudari ngozvakaitika ngo uwo mukuvo, iye wakabahwa ngo kwo nyama wakatambuja uwo wakabahwa ngo kwo Mweya, zvakandodaro nawari. Asi matahwa anoti kudini? Anoti, “Mbirimbija uwo mukaji wo uranda no mwana wake”; ngokuti mwana wo murandakaji aatongozogari ndhaka pamwepo no mwana wo mukaji wakasununguka. Ndizvo hama, isisu atiri vana vo uwo ari murandakaji, asi tiri vo uwo wakasununguka. Ndizvo imanyi ngo kugwinya mukusununguka kwaakatisunungura ndikwo Kristu, muchazosungwazve kanga yo uhloko. Izwanyi, inini Pauri ndinoti kwomuri, kudari mwechiashira kuchekwa, Kristu aabeseri chiro kwomuri. Inini, ndinoita uchapupu ku mundhu wese, unoashira kuchekwa, kuti iye unodikana kungwarira mipango yese. Muri vakaparajana na Kristu, imwimwi munoda kupembejwa ngo mipango: Muri vawa kubva kunyasha. Ngokuti isisu ngo Mweya wo kugonda tinogarira gonda ro kururama. Ngokuti kuna Kristu Jesu zvese kuchekwa no kurega kuchekwa azvibeseri chiro; asi kugonda ukwo kunoshanda ngo rudo. Imwimwi mwaitonasa kugogoma; ndiyani wakamuphinga kuti musapurukira kuna gwinyiso? Ukwu kuongwa akubvi akadi kuno uwo wakamudanija. Zvimbijo zvidodoko zvinovirisa upfu wese. Ndinogonda kuna Mambo, kuti amuzovi no murangarijo umweni. Asi uwo unomukangaija unozojitwarira kutongwa kwake, pikija ndiyani. Asi inini, hama, kudari ndichichumaira kuchekwa, ndichatambujihwenyi? Kuti zvakadaro chikhuguriso cho muchinjiko chabviswa. Ndingada kuti avo vanomukhangaija vangajicheka. Ngokuti imwimwi, hama, mwakadanijwa kuti muite vakasununguka; kwega musashandisa kusununguka kwenyu kutendera kupa kuyita zvo nyama, asi ngo rudo shandirananyi umwe kuno umweni. Ngokuti mipango yese inozajiswa ngo izwi rimwe, rinoti: Unozomuda muvakihwana wako kudari ngo kujida kwako iwewe. Asi kudari mwechirumana no kuhana ngo chenyu, ngwaranyi kuti musazopejana. Asi ndinoti: Fambanyi ngo Mweya, nemwi amuzoiti kuemura kwo nyama. Ngokuti nyama inoemura kurwisana no Mweya, no Mweya unorwisana no nyama; ngokuti izvi zvinovengana chimwe no chimweni; kuti amungaiti izvo zvomunoda. Asi kudari mwechikweviwa ngo Mweya, amuri pasi po mipango. Zvino mishando yo nyama inovoneka pambhene, ndiyo iyi: Kuomba, kusikasukiki, kuemura, kudira muezaniso, uroi, kunyenya, hasha, chishatihwa, ushungu, kujida, kuparajana, kujijisa zvakasiyana, thima, kurejera, kushadaya, kuhisa no zvakadaro: Ndinomupanga kudari ngo zvo ndakamupanga ngo pamberi, kuti avo vanoyita zvakadaro avazogari ndhaka yo Umambo hwa Mwari. Asi michero yo Mweya iri: Rudo, kudakara, kunyarara, kusengerera, nyasha, kunaka, kugondeka, kupfava, kujibata; akuna mupango inorwisana no zvakadari. Naavo vari va Kristu vakakohomera nyama pamwepo no kudisisa kuemura kwayo. Kudari techipona ndi Mweya, ngatifambezve ndi Mweya. Tisajikuja, nokuti kutshenekerana, nokuti kuitirana thima. Hamadoni, kuti mundhu abatwa ngo chishaishi, imwimwi vo Mweya, mumusijirenyi wakadaro ngo mweya wakapfava, wechijingwarira kuti newevo usazoejwa. Twarirananyi mutwaro, ngokudaro muzarise mupango wa Kristu. Ngokuti kudari mundhu achirangarija kuti uri nani, apo asiri usina shwiro, iye unojichengeja pachake. Asi mundhu wese ngaaeje mushando wake pachake naapo unozojivonera kuti ungajikuja ngenyi, usikakujiri umweni. Ngokuti mundhu wese unozojitwarira mutwaro wake. Asi uwo unojijiswa izwi ngaakovanisire kwaari anomujijisa zviro zvese zvakanaka. Musachengejehwa; Mwari aatongoitihwi jee: Ngokuti pikija ichinyi chaanokusha mundhu, ndicho chaanozokotorazve. Ngokuti uwo unojikushira nyama yake, unozokotora kuvora kwo nyama; asi uwo unojikushira Mweya; unozokotora ku Mweya kupona kusikaperi. Tisaremba kuyita zvakanaka, ngokuti ngo nguva kwayo tinozokotora, kudari tikarega kuremba. Ndizvo kudari ngo zvo tinayo nguva, ngatishande izvo zviri zvakanaka kuna vandhu vese, kakurutu kuna avo vari vo mbhuri yo kutenda. Munovona kukura kwo tshamba yo ndakatara kwomuri ngo nyara yangu ndega. Avo vese vanoda kuvoneka vari vakanaka munyama, vanomuvangijira kuti muchekwe; kwega kuti musazotambujwa ngo ndava yo muchinjiko wa Kristu. Ngokuti avo pachavo vanochekwa, avangwariri mupango; asi vano chidisiso chokuti muchekwe kuti vazvikuje ngonyama yenyu. Asi kusaitika kuti inini ndijikuje, kwega ngo muchinjiko wa Mambo wedu Jesu Kristu, ndiwo nyika yakakohomehwa kwendiri, neni ndakakohomehwa kuno nyika. Ngokuti kuchekwa akuna mutengo, nokuti kurega kuchekwa, asi kuyita chisikwa chipsha. Kunyarara no nyasha ngazvive panyezuru pavo vese vanofamba ngouwu murau, no panyezuru po Israeri ra Mwari. Kubvira wari mundhu achazonditambuja; ngokuti ndinotwara pa muviri wangu mbanga ja Jesu. Nyasha ja Mambo wedu Jesu Kristu ngajive no mweya yenyu, hama. Ameni! Pauri, mupostori wa Kristu Jesu ngokuda kwa Mwari, kwavari vakacheneswa vari mu Efesu, avo vanogondeka kuna Kristu Jesu: Nyasha kwomuri no kunyarara zvinobva kuna Mwari Baba wedu, na Mambo Jesu Kristu. Ngaakujwe Mwari Baba wa Mambo wedu Jesu Kristu, uwo wakatidakajisa ngo zvipfumiso zvese zvo Mweya mundau jo mu gore kuna Kristu. Kudari ngo zvaakatisanangura kwaari nyika isati yaemeswa, kuti tiite vakacheneswa, tisina ndava pamberi pake mu rudo. Wakatisana kare kuti tiite kurehwa, kuyita vana vake ndiye Jesu Kristu, kudari ngo kunaka kwokuda kwake. Kuti kukujwe uthende hwo nyasha jake hwaakatipa ngo Unodikana; kwaari tinakwo kuripihwa kwedu ngo ngazi yake, kuregerehwa uposi wedu, kudari ngo uwandu hwo nyasha jake. Ijo jaakawanja kwetiri muungwaru hwake no kuziva, ngo kutizivisa chakafishika chokuda kwake, kudari ngo kunaka kwokuda kwake kwaakaemesa ndiye; kuti kuitike nguva yo kuzarisika kwo mukuvo, kuti aunganije zviro zvese kuna Kristu, zvo mugore, no zvo mu nyika, kwaari. Kwaarizve takaitwa ndhaka, takasanwa kare kudari ngo kuronga kwo uwo unoshanda zviro zvese kudari ngo kupanga kwokuda kwake; kuti tiite kukuja kwo uthende hwake, isisu takatanga kutenda kuna Kristu. Kwaarizve imwimwi, apo mwakazwa izwi ro gwinyiso, riri vhangeri ro kuponeswa kwenyu; kwaari apo mwakatendavo, mwakadihwa chinamiro cho Mweya Wakachena, wo mwakagondiswa. Uwo uri chibatiro cho ndhaka yedu, mbhera kugume kuripihwa kwo ndhaka ya Mwari ambhwine, kuyita kukujwa kwo uthende hwake. Ngo ndava iyi, ininivo, ngosure kwokuzwa kwangu kutenda kwenyu kwo munakwo, kuna Mambo Jesu, no rudo hwenyu kuna vakacheneswa vese, anditongoregeri kubonga ngo ndava yenyu, ndichimucherecheja mumikumbiro yangu, kuti Mwari wa Mambo wedu Jesu Kristu, Baba vouthende, amupe mweya wo ungwaru no wo kubewurihwa mukumuziva; muna majiso omwoyo yenyu avhenekehwa, kuti imwimwi muzive vetero ro gonda ro kudanijwa kwake, no ro upfumi hwo uthende hwo ndhaka yake kwavari vakacheneswa, no ro ukuru hwo simba rake kwetiri tinotenda kudari ngo kushanda kwo simba ro kugwinya kwake, raakashanda ndiye Kristu, apo amumusa kwo vakafa, wakamugajika ngo kumuho kwake mundau jo mu gore. Panyezuru po kutonga kwese, no pokupanga kwese no po simba rese, no po umambo hwese, no panyezuru po mazina ese anodujwa, haiwa omunyika muno mwega, asi no iyozve inoviya. Uwo wakapfavisa zvese pasi potshoka jake, wakamupa kuti aite musoro panyezuru pozvese ku chiara, icho chiri muviri wake, kuzara kwo uwo unozarisa zvese ndizvo zvese. Imwimwizve apo mwayiva vakafa muuposi no mu zvishaishi, mwakamuswa ndiye. Muizvo zvomwakafamba pakati pazvo kare kudari ngo maitiro wo iyi nyika, kudari ngo njira yo muzvare wo simba ro mweya, uwo mweya unoshanda zvino mukati mwo vana vasikapurukiri; votaigara tese pakati pavo kare, tiri mukuemura kwo nyama yedu, techiita kuda kwo nyama no kwo mupinimijo, ngo chibarihwe taiva vana vo ushungu, kudari ngo vamweni. Asi Mwari, uno kukungurira kwakawanda, ngo rudo hwake hwakakura, hwaakatida ndiwo, pikija apo tainga takafa muuposi hwedu, wakatiraramisa pamwepo na Kristu mwakaponeswa ngo nyasha, iye wakatimusa pamwepo naye, wakayita kuti tigare pamwepo naye mundau jo mu gore, kuna Kristu Jesu, kuti ngo nguva jinoviya avonise kuwanda kukuru kwo nyasha jake ngokukova kwake kwetiri ndi Kristu Jesu. Ngokuti mwakaponeswa ngo nyasha ngo kugonda; ngokuti izvi azvibvi kwomuri, asi kuri chipo cha Mwari. Azviitiki ngo mishando, kuti kusazovapo no mundhu ungajikuja. Ngokuti isisu tiri mushando wake, takasikihwa kuna Kristu Jesu, kuti tiite mishando yakanaka, yaakatinasirira kare Mwari kuti tifambe mukati mwayo. Ndizvo rangariranyi kuti imwimwi kare mwayinga vo majinja ngo kwenyama; munodanwa kuti; vasikazivi kuchekwa, ndivo vanodanwa, vakachekwa, munyama, kunoshandwa ngo nyara; kuti imwimwi, ngo uwo mukuvo mwayinga mwakaparajana na Kristu, musikaiyani no jinja ro Israeri, muri vo nyikanja kuzvitenderano zvo chigondiso, musina no gonda, musina Mwari mu nyika. Asi imwimwi kare mwayinga ndhambo, zvino kuna Kristu Jesu mwakwedejwa phedo ngo ngazi ya Kristu. Ngokuti ndiye uri kunyarara kwedu, uwo wakayita kuti avo vaviri vayite umwe, wakaphwanya biravira ro pakati raiparajanisa, waparaja ngo muviri wake kunyenyana kunoti, mutemo wo mupango wakanasirihwa; kuti ajisikire mundhu umwe mupsha paugaro pavo vaviri, aite kunyarara ngokudaro; kuti aiyanise vese kuna Mwari, vayite muviri umwe ngo muchinjiko, auraye ukorore ndiwo. Wakaviya, wakachumaira kunyarara kwomuri imwimwi mwayinga ndhambo, no kwavari vayinga phedo; ngokuti ndiye isisu tese tinokukwedejwa kuna Baba ngo Mweya umwe. Ndizvo zvino amuchiri vo nyikanja no vaeni, asi muri vo jinja rimwe no vakacheneswa, muri vo mbhuri ya Mwari, mwakavakwa panyezuru po tsikiro ro vapostori no ro vaprofeti, Jesu Kristu wambhwine uri buwe guru ro pa khona; kwaari yese nyumba inonasa kusonganiswa pamwepo, inokura kuyita themperi rakachena kuna Mambo; kwaari imwimwizve munovakwa pamwepo kuyita ugaro hwa Mwari ndi Mweya. Ngo iyi ndava inini Pauri, musungwa wa Kristu Jesu ngo ndava yenyu, imwimwi vo majinja, kudari mwakazwa ngokukura kwo nyasha ja Mwari jakapuwa kwendiri ngo ndava yenyu, kuti kuziviswa kwo zvakafishika kuvoniswe kwendiri ngo kupangijihwa, kudari ngo zvo ndakatara ngo mazwi mashomani, ndizvo kuti muchiajija, mungazwisisa kuziva kwangu ngo chakafishika cha Kristu; icho kundanga jimweni achizivi kuzivika kuvana vo vandhu, kudari ngo zvo chakapangijihwa kuvapostori vake vakacheneswa no vaprofeti ngo Mweya. Zvokuti, vo majinja, vari vanogara ndhaka pamwepo nesu, navo vari vo ndhengo jo muviri pamwepo nesu, zve, vanoashira chigondiso chiri kuna Kristu Jesu ngo vhangeri pamwepo nesu. Rondakaitwa mushandi waro, kudari ngo chipuwo cho nyasha ja Mwari chondakapuwa ngo kushanda kwo simba rake. Kwendiri, uwo uri mudoko kuna mudoko wavo vese vakacheneswa jakapuwa iji nyasha, kuti ndichumaire kune vo majinja upfumi husikakoneki kuzwika hwa Kristu; no kupangijira vandhu vese kuti ichinyi chiri utungamiriri hwo chakafishika chainga chakafishwa nguva jese kuna Mwari uwo wakasika zviro zvese. Kuti zvino kuzivikanwe kuvatongi no vano simba mundau jo mu gore ngo chiara, uhwo ungwaru hwakakura hwa Mwari. Kudari ngo kuvereketa kwake, kwo mbhera narini, ukwo kwakanasirihwa kuna Kristu Jesu Mambo wedu. Kwaari tinokushinga, tingakwedera ngo gonda ro kutenda kwedu kwaari. Ndizvo ndinomukumbira kuti muchadopera simba ngo ndava yo matambujiko angu ngo ndava yenyu, ari uthende hwenyu. Ngo iyi ndava ndinogwadama ngo makokobvi angu kuna Baba, kwaari kwakabva mbhuri jese jo mu gore no jo mu nyika, kuti iye amupe, kudari ngouwandu hwo uthende hwake, kuti mugwinyiswe ngo simba ndi Mweya wake mundhu uri ngo mukati; kuti Kristu agare mumwoyo mwenyu ngo kugonda; kuti imwimwi muve no miji jakagwinya murudo, muwane simba ro kuzwisisa, pamwepo no vakacheneswa vese, ukwo upambhi, urebu, ukwiri, no ujiki no kuziva rudo rwa Kristu, unopinda kuziva kwese, kuti muzariswe ngokuzara kwese kwa Mwari. Zvino kwaari uno simba ro kuyita kukuru kupinda zvese zvotinokumbira, no zvotinopinimija, kudari ngo simba rinoshanda mukati mwedu. Kwaari ngakuve no uthende mu chiara ndi Kristu Jesu kuno ndanga jese kunoti mbhera narini. Ameni! Ndizvo inini, musungwa wa Mambo, ndinomupota kuti mufambe ngo zvinosisira kudanijwa kwo mwakadanijwa ndikwo. Ngo kujininipisa kwese no kupfava, na ngo kusengerera, mwechisengerera umwe no umweni ngo rudo; mwechivangirira kungwarira kuiyana kwo Mweya ngo chisungo cho kunyarara. Uripo muviri umwe, no Mweya umwe, kudari ngo zvo mwakadanijwa mukugonda kumwe kwo kudanijwa kwenyu; Mambo umwe, gonda rimwe, rubhapatiso rumwe, Mwari umwe, vari Baba wedu tese, vari panyezuru pavo vese, zvese zvakavapo ndiye, naye uri mukati mwenyu mwese. Asi kwetiri tese nyasha jakapuwa kudari ngo kuwanda kwo zvipo zva Kristu. Ndizvo unoti: “Apo akwira mu gore wakatora vakabatwa, akapa zvipo ku vandhu.” Zvino, kuti; iye wakakwira, zvinorevenyi kwega kuti wakabzukazve kundau jiri pasi mu nyika? Uwo wakabzuka ndiyezve wakakwira ngo panyezuru mu makore ese, kuti azarise zviro zvese. Ndiye wakapa vamweni kuti vayite vapostori; no vamweni kuyita vaprofeti, no vamweni kuyita vavhangeri, no vamweni kuyita vahavisi no vajijisi, kuti vakacheneswa vaperere, ku mushando wo kushandira, kwo kuvaka muviri wa Kristu; mbhera tigume pakutenda kumwe, kuziva Mwana wa Mwari, kuyita vandhu vakaperera, kuezana no ukuru hwakaperera hwa Kristu; kuti tichagara tiri vana vadoko, techizungunyiswa ngo kujijisa kwese kwakaparajana, ngo mazano ovandhu, no urimbwi, kuti vapaukise ngo kuchengeja; asi techivereketa gwinyiso ngo rudo, tikure kwaari ngo zviro zvese, uwo uri soro, ndi Kristu, kwaari muviri wese wechirunganijwa no kubatanijwa kudari ngo zvinosisira ngo izvo zvinopuwa ngo ndhengo jese, kudari ngo mushando wakaemesehwa ndhengo imwe ngaimwe, zvinoita kuti muviri ukure kuti ujivake murudo. Ndizvo ndinovereketa izvi, no kupupura kuna Mambo, kuti muchafambazve kudari ngo vo majinja, mu mipinimijo yavo isina shwiro, vasikanasi kuzwisisa, vari vo nyikanja mukupona kwa Mwari ngo ndava yo kutama kuziva kwavo, na ngo ndava yo kupata kwo mwoyo yavo; avo vechiita vasikazwi vakajipira mukuemura, vechishanda zvese zvina svina no upombo. Asi imwimwi amuzivi kujija zvakadaro kuna Kristu; kudari zvakadaro kuti mwakamuzwa mukajijiswa ndiye, kudari ngo gwinyiso riri kuna Jesu, rokuti murashe mundhu wo kare, ukwo kunoti kupona kwenyu kwo kare, uwo unovoreswa ngo kuemura kwo kuchengeja; zve, kuti mumusijihwe mu mweya wo mupinimijo yenyu, kusimira mundhu mupsha, uwo wakasikwa ndi Mwari mukunaka no mukucheneswa kwo gwinyiso. Ndizvo mwechiregera kunyepa, vereketanyi gwinyiso mundhu wese kuno muvakihwana wake, ngokuti tiri ndhengo umwe kuno umweni. Tsenekanyi, musikashaishi; musatendera kuti zuva ribire mwakatseneka. Zve, musapa ndau kuna Dhiabhorosi. Uwo wakaba ngaaregere kuba; asi paugaro po izvo ngaashande, echishanda zvakanaka ngo nyara jake, kuti awane zvokupa kwaari unotama. Musatendera kuti kuvereketa kwakashata kubude mu miromo yenyu, asi ukwo kwakanaka kunovaka kudari ngo zvinosisira, kuti kupe nyasha kwavari vanokuzwa. Zve, musachamwisa Mweya Wakachena wa Mwari, womwakadihwa chinamiro ndiwo mbhera kuguma kuzuva ro kuripihwa. Kushatihwa kwese, no ushungu, no kutseneka, no bope, no kutuka, no khururu rese, ngazvibviswe kwomuri. Muitirane nyasha umwe kuno umweni, muve no mwoyo yakapfava, mwechiregererana umwe no umweni kudari ndi Mwarizve wakamuregerera ndiye Kristu. Ndizvo itanyi vatevejeri va Mwari, kudari ngo vana vanodikana; mufambe ngo rudo, kudarizve ndi Kristu wakamuda, wakajipira ngo ndava yedu, kuyita mudiro no mubairo kuna Mwari, zviite gwema rakanaka. Asi upombo, no zvinosvipisa zvese, no kuemura, zvisazovereketwa ndizvo pakati penyu, kudari ngo zvinosisira vakacheneswa. Nokuti svina, nokuti kuvereketa zvo upenji, nokuti zvinobaya mwoyo zvisikasisiri, asi paugaro po izvo, ngakuitwe kubonga. Ngokuti munonasa kuziva izvi: Kuti akuna nyaupombo nokuti wakasvipiswa, nokuti unoemura uri mudiri wo muezaniso, unozoashira ndhaka mu Umambo hwa Kristu na Mwari. Musachengejehwa ngo mundhu ngo mazwi asina shwiro, ngokuti ngo ndava yo izvi hushungu hwa Mwari hunoviya panyezuru po vana vasikapurukiri. Ndizvo musavhengana navo; ngokuti imwimwi kare mwayiva chidima, asi zvino muri kujeka kuna Mambo; fambanyi kudari ngo vana vo kujeka, (ngokuti michero yo kujeka iri kunaka kwese no kururama no gwinyiso), mwechieja kuziva zvinonasa kudakajisa Mambo. Musikaiyani no mishando yo chidima isina michero, asi paugaro po izvo kuti muimbirimbije. Ngokuti zvinopsheruja no kuvereketa ngo izvo zvinoitwa ndivo mukufishika. Asi zvese apo zvinombirimbijwa zvinovoneka ngo kujeka, ngokuti zviro zvese zvinovoniswa zviri kujeka. Ndizvo iye unoti: Mukai iwewe unovata, umuke kwo vakafa, na Kristu unozokubvenekera. Ndizvo nasanyi kungwara mukufamba kwenyu, musikadari ngo mapenji, asi kudari ngo vakangwara, mwechingwarira mukuvo, ngokuti mazuva ari akashata. Ndizvo musaita mapenji, asi mwechiziva zviri kuda kwa Mambo. Musarejera ngo vhini, iro rinopara kusikajibata, asi mwechizariswa ndi Mweya; mwechivereketa umwe kuno umweni ngo nduyo no ngoma, ngo kuemba kwo Mweya, mwechiemba ngo kutetemba ngo mwoyo yenyu kuna Mambo. Mwechibonga kuna Mwari Baba ngo zviro zvese ngo nguva jese ngo zina ra Mambo wedu Jesu Kristu. Mwechipfavirana umwe no umweni mukutya Kristu. Vakaji, pfairanyi vamuna venyu, kudari ngo zvomunoita kuna Mambo. Ngokuti mwamuna uri musoro wo mukaji, kudari ndi Kristu uri musoro wo chiara, ari muponesi wo muviri. Asi kudari ngo chiara chinomupfavira Kristu, ngokudaro vakaji ngavapfavire vamuna vavo ngo zviro zvese. Vamuna idanyi vakaji venyu, kudarivo ndi Kristu wakachida chiara wakajipira ngo ndava yacho; kuti achichenese, ayinga achisuka ngo kusamba kwo kumwa ngo izwi, kuti ajiviisire chiara kwaari chiri chiara chino uthende, chisina ndava nokuti kuonyana, nokuti chiro chimweni chakadaro; asi kuti chiite chakacheneswa chisina chishaishi. Ngokudaro kunodikana kuti vamuna vade vakaji vavo kudari ngo zvovanoda muviri yavo, uwo unoda mukaji wake unojida pachake. Ngokuti apana mundhu unonyenya nyama yake; asi unoikorondha no kuingwarira kudari ngo zvaanoitazve Kristu kuna chiara; ngokuti isisu tiri ndhengo jo muviri wake. Ngo iyi ndava mundhu unozosia Baba wake na mayi wake unozobatana no mukaji wake; navo vaviri vanozoita nyama imwe. Ichi chiri chakafishika chikuru; asi ndinovereketa ngo ndava ya Kristu no chiara. Asi umwe ngaumwe wenyu ngaade mukaji wake kudari ngo zvaanojida pachake; no mukaji ngaangwarire kuti atye mwamuna wake. Vana, purukiranyi vabari venyu ngo zviri kuda kwa Mambo, ngokuti izvi zvakanaka. Reremeja Baba wako na mayi wako, uwu uri mupango wokutanga uno chigondiso, kuti zvinake kwouri, zve, kuti upone mukuvo wakareba mu nyika. Imwimwi majibaba, musatsenekesa vana venyu; asi muvarere mukupangira no mukupanga kwa Mambo. Varanda, purukiranyi avo vari majimambo enyu ngo kwenyama, ngokutya na ngo kuhuta ngo mwoyo wakarurama, kudari inga munoitira Kristu, musikashandi ngo kuvoneka ngo majiso, kudari ngo vanodakajisa vandhu; asi kudari ngo varanda va Kristu, mwechiita kuda kwa Mwari kwo mumwoyo, mwechishanda ngokuda kudari inga munoitira Mambo, kusiri ku vandhu. Mwechiziva kuti pikija ichinyi chakanaka chaanoyita mundhu, unozochiashirazve kuna Mambo, pikija ari muranda nokuti wakasununguka. Nemwivo majimambo, itanyi zvakadaro kwavari, murege kuvatyisijira; mwechiziva kuti Mambo wavo no wenyuzve uri mu gore, kwaari akuna mutsananguro ku vandhu. Pakugumisira, itanyi vakagwinya kuna Mambo, no kugwinya kwo simba rake. Simiranyi ndhumbi jese jo kurwa ndijo ja Mwari kuti mukone kuyima kurwa no mazano aDhiabhorosi. Ngokuti atirwi no nyama no ngazi, asi tinojipana no umambo, no vano simba, naavo vanotonga nyika yo chidima chino, no mweya yakashata yo mundau jo mu gore. Ndizvo toranyi ndhumbi jese jokurwa ja Mwari, kuti mukone kurwisa ngo zuva rakashata no kugara mwakayima apo mwapeja zvese. Ndizvo imanyi, mwakasimira gwinyiso muzviunu zvenyu, mwadira chihlangu cho paditi, chiri kururama, mwakasimira mutshoka jenyu kunasirihwa kwo vhangeri ro kunyarara; panyezuru po izvi zvese toranyi chihlangu cho kugonda, cho munozokona kujima ndicho miseve yese yo muriro yo uwo wakashata. Toranyizve chigqoko cho ruponeso, no shoti yo Mweya riri izwi ra Mwari. Ngo kukumbira kwese no kupota, mwechikumbira ngo nguva jese mu mweya, mwechingwarira kuyita kudaro ngo kuvangirira kwese no kukumbirira vakacheneswa vese, no kukumbira ngo ndava yangu kuti ndipuwe ukuru hwo kuvereketa ngo kushinga, kuti ndizivise chakafishika cho vhangeri, iro ngo ndava yaro ndiri samukuru wo kusungwa; kuti ndiverekete ngo kushinga ndiro, kudari ngo zvinosisira kuti ndiverekete. Asi kuti muzive magariro angu, no zvendinoita, Tukiko munukuna unodikana mutungamiriri unogondeka kuna Mambo, unozomuzivisa zvese, ndakamutumira kwomuri ndava iyi, kuti muzive kugara kwedu, zve, kuti iye aembezere mwoyo yenyu. Kunyarara ngakuve no hamadoni no rudo pamwepo no kugonda, zvinobva kuna Mwari Baba na Mambo Jesu Kristu. Nyasha ngajive kwavari vese vanomuda Mambo wedu Jesu Kristu ngo kusingaperi. Pauri na Timoti, varanda va Jesu Kristu, kwavari vese vakacheneswa vari kuna Kristu Jesu vari mu Firipi pamwepo no vavonisi no vashandi: Nyasha ngajive kwomuri no kunyarara zvinobva kuna Mwari Baba wedu na Mambo Jesu Kristu. Ndinobonga Mwari wangu mikuvo yese yondinokarakaja ndimwi, ngo nguva jese mukukumbira kwangu kwese ndimwi mwese, ndinokumbira ngo kudakara, ngo ndava yo kuiyana kwenyu mukufambisa vhangeri kubvira kuzuva rokutanga mbhera zvino. Ndechigonda ichi: Kuti iye wakatanga mushando wakanaka mukati mwenyu unozoupeja mbhera rigume zuva ra Jesu Kristu. Kudari ngo zvinosisira kuti ndive no murangarijo wakadaro ndimwi mwese, ngokuti ndinemwi mu mwoyo mwangu ngokuti mukusungwa kwangu, no kujirwira no kugwinyisa vhangeri, imwimwi mwese mwakakovana neni mu nyasha. Ngokuti Mwari uri chapupu changu, ngo njira yo ndinomusuwira mwese ndiyo kakurutu ngo nyasha huru ja Jesu Kristu. Neni ndinokumbira ichi: Kuti rudo rwenyu ruvangirire kuwanda no kuwanjiswa mukuziva no kuzwisisa kwese; kwokuti mueje muzive zviri zvakapinda kunaka; kuti muite vakacheneswa, vasina ndava mbhera rigume zuva ra Kristu. Mwechizariswa ngo michero yo kururama, iyo iripo ndiye Jesu Kristu, mukukuja no kuirikija Mwari. Asi ndinoda kuti muzive, hama, kuti izvo zvakaitika kwendiri zvakashanda kufambisa vhangeri; ndizvo zvisungo zvangu ngo ndava ya Kristu zvakavoneka kwavari vese vari mu nyumba ya mambo, no kuno vamweni vese; no hama zhinji jiri kuna Mambo, jechigwinyiswa ngo zvisungo zvangu, jinopinda kushinga kuvereketa izwi ra Mwari jisikatyi. Ngo gwinyiso vamweni vanochumaira Kristu ngo thima no hasha; no vamwenizve ngo mwoyo unoda. Asi vamweni vanoyita kudaro ngo rudo, vechiziva kuti ndakaemeswa kurwira vhangeri; asi vamweni vanochumaira Kristu ngo hasha, vasikaiti ngo gwinyiso, vechipinimija kututsira kutambujika kwendiri muzvisungo zvangu. Ndizvo chinyi? Kwega kuti ngo njira jese, pikija ngo kujiitisa, nokuti ngo gwinyiso, Kristu unochumaihwa; neni ndinodakara ndizvo, eya, ndinozodakara. Ngokuti ndinoziva kuti izvi zvinozokunukuka kuyita ruponeso rwangu, ngo kukumbira kwenyu na ngo kubesera kwo Mweya wa Jesu Kristu. Kudari ngo kugwinya kwo kugarira no kwo kugonda kwangu, kuti andizopsheruki ngo chiro na chimwe, asi kuti ngo kushinga kwese, kudari ngo nguva jese, kuti na zvino Kristu akuriswe mu muviri wangu pikija mukurarama nokuti mukufa. Ngokuti kwendiri kurarama kuri Kristu, no kufa kuri kuviihwa. Asi kudari ndechiva no muviri, uwu ndiwo muchero wo mushando wangu, no chondinozotsanangura andichizivi. Asi ndinomanikijwa pakati po izvi zviviri, ndinoemurira kuenda koogara na Kristu; ngokuti ndizvo zvakapinda kunaka. Asi kugara mumuviri kunopinda kusisira ngo ndava yenyu. Ndechigonda ichi, ndinoziva kuti ndinozogara, ndechivangirira kuva nemwi mwese, mukuenda mberi no kudakara mukugonda; kuti kukujwa kwenyu kuwande kuna Jesu Kristu ndini ngokuvapo kwanguzve nemwi. Kwega kuti mufambe kudari ngo zvinosisira vhangeri ra Kristu; kuti pikija ndechiviya kumuvona, nokuti ndisipo, ndingazwa ngo ndava yokugara kwenyu kuti munoyima mwakagwinya ngo mweya umwewo, ngo mwoyo umwe mwechirwira ukwo kutenda kwo vhangeri; musikatyiswi ngo chiro na chimwe ngo avo vanorwisana nemwi, ukwo kuri chivoniso chiri pambhene kwavari cho kurashwa, asi kwomuri kuri chivoniso cho ruponeso rwenyu, no urwo runobva kuna Mwari. Ngokuti kwakatendehwa kwomuri ngo ndava ya Kristu, andikwo kwega kwo kumutenda, asi kuti mutambujikevo ngo ndava yake, mwechiva no kuambana kwomakavona kwendiri, na zvino munozwa kuti kuri kwendiri. Ndizvo kudari kuripo kunyarariswa kuna Kristu, kudari kuripo kuembezehwa kwo rudo, kudari kuripo kuiyana kwo Mweya, kudari uripo rudo no kukungurira. Zarisanyi kudakara kwangu, kuti muve no mupinimijo wakadari ngo wangu no rudo hwakatojana, no chisungo chimwe, no mupinimijo umwe. Musikayiti chiro ngo hasha, nokuti ngo kujitundhumaja, asi ngo kupfava kwo mupinimijo, umwe ngaumwe ngaaverenge kuti vamweni vanomupinda ngo kunaka. Umwe ngaumwe ngaarege kuringira zviro zvake, asi ngaaringire zvo vamweni. Uwu mupinimijo ngauve mukati mwenyu uwo wayiva mukati mwa Kristu Jesu: Iye wayiva mumuemo wa Mwari, aazivi kupinimija kuti chiri chiro cho kukara kuezana na Mwari, asi wakajiita usina mbiri, echijitorera muemo wo muranda, wakayita unomuemo wo mundhu; naapo uno muemo wo mundhu, wakajipfavisa, wakayita unopurutana mbhera kufa, eya no kufa kwo pa muchinjiko. Ndizvo Mwari wakamukuja kukurutu, akamupa zina riri panyezuru po mazina ese; kuti ngo zina ra Jesu makokobvi ese amugwadamire, ovari mu gore, no vari mu nyika, no vari pasi po nyika; zve, kuti ndimi jese jitende kuti Jesu Kristu ndiye Mambo, kuti Mwari Baba akujwe. Ndizvo vanodikana vangu, kudari ngo zvomwakapurutana ngo nguva jese andipopi pega pondiri, asi zvino kakurutu apo ndisipo, shandisanyi ruponeso rwenyu mukutya no kuhuta. Ngokuti ndiye Mwari unoshanda mukati mwenyu, zvese kuda no kuyita, kudari ngokuda kwake. Itanyi zvese pasina kun'un'uta nokuti kuyita hasha; kuti muite vasina ndava, vasikashaishi, muri vana va Mwari musina chomunoitihwa ndava ndicho pakati po mubarihwana wakashongoroka no vakapaukiswa, pakati pavo muvoneke muri vanojeka kudari ngo zvivheneko mu nyika, mwechibatisisa izwi ro kupona; kuti ndive nacho cho kuganza ndicho ngo zuva ra Kristu, kuti andizivi kugogoma pasina nokuti kushanda pasina shwiro. Asi kudarizve ndechiduruhwa kuyita mudiro no mumushando wo kugonda kwenyu, ndinodakara ndechidakara nemwi mwese. Ngokudarozve dakaranyi imwimwi, mudakare neni. Asi ndinogonda kuna Mambo Jesu kukasira kutumira Timoti kwomuri, kuti inini ndiembezehwevo, apo ndaziva kugara kwenyu. Ngokuti andina mundhu umweni unomupinimijo wakadari ndiye, unozokarakaja ndimwi ngokugara kwenyu. Ngokuti vese vanopshaka zvavo, zvisiri zva Jesu Kristu, asi imwimwi munoziva kunaka kwake, kuti kudari ngo mwana unoshandira baba, ngokudaro iye wakashanda neni no mukufambisa vhangeri. Ndizvo ndinogonda kuti ndinozomutuma ngo kukasira apo ndazovona zvooitika kwendiri. Asi ndinogonda kuna Mambo kuti nenivo ndinozokasira kuviyeyo. Asi ndakapinimija kuti kunosisira kuti nditumire Epafrodhitu kwomuri, munukuna wangu, no unoshanda pamwepo neni uri socha pamwepo neni, naye uri ndhumwa yenyu, no unoshandira kutama kwangu. Ngokuti wakamusuwira imwimwi mwese, naye wakatambujika kakurutu ngokuti mwakazwa kuti waihwara. Ngo gwinyiso iye waihwara ari phedo po kufa. Asi Mwari wakamuitira nyasha; haiwa kwaari kwega asi no kwondirivo, kuti ndisava no kutambujika panyezuru po kutambujika. Ndizvo ndakakasira kutuma kwomuri, kwokuti, mwechizomuvonazve mudakare, kuti neni ndisazonyanya kusururiswa. Ndizvo muashirenyi muna Mambo ngo kudakara kwese; mureremeje wakadaro: Ngokuti ngo ndava yo mushando wa Kristu wakava phedo po kufa, echipira kupona kwake mungozi, kuti azarise izvo zvaisisira zvo mushando wenyu kwendiri. Pakugumisira, hama jangu, dakaranyi kuna Mambo. Kutara kudaro kwomuri akunesi kwendiri, asi kwomuri kuri kungwaririka. Ngwariranyi imbhwa, ngwariranyi vashandi vo zvakashata, ngwariranyi vanochekwa! Ngokuti isisu tiri vakachekwa, tiri vanodira Mwari ndi Mweya, no kuganza ndi Kristu Jesu, tisikagondi nyama. Pikija ininivo ndinazvo zvondingagonda mu nyama; kudari aripo mundhu unokarakaja kuti ungagonda nyama, inini ndingamupinda: Ndakachekwa ngo zuva ro chisere, ndiri wo mubarihwana wo Israeri, ndiri wo jinja ra Benjamini, ndiri muHebheru wo vaHebheru; ngo mipango ndiri mufarisi; ngo ndava yo kutsamwirira ndaitambuja chiara; ngo ndava yo kururama kwo mipango inga ndisina ndava. Asi izvo zvayiva kuviihwa kwendiri, ndakazviverenga kuti zviri zvisina shwiro ngo ndava ya Kristu. Eya, ngo gwinyiso ndinozviverenga zvese kuti zviri zvisina shwiro ngo ndava yo kunaka kukuru kwo kumuziva Kristu Jesu, Mambo wangu. Uwo ngo ndava yake ndakatenda kurashikihwa ngo zviro zvese, neni ndinozviverenga kuti zviri svina, kuti ndiviyihwe ndi Kristu, ndivoneke kwaari ndisina kururama kuri kwangu kuri kwo kungwarira mipango, asi ukwo kuri kwo kugonda kuna Kristu, kururama kuri kwa Mwari ngo kugonda; kuti ndimuzive iye, no simba ro kumuka kwake no kuiyana naye mukutambujika kwake, ndechitojaniswa naye mukufa kwake; kuti pikija zvakadini ndikwanise kumuka kwo vakafa. Andikwopi kuti ndatokwanisa, nokuti kuyita wakaperera zvino; asi ndinovangirira kuenda mberi kuti ndingabata icho chaakandibatira Kristu Jesu. Hama, pachangu andijiverengi kuti ndabata; asi ndinoita chiro chimwe; ndichikanganwa zviro zvosure, no kufambira izvo zviri mberi, ndinogwinyisira kuenda ku magumisiro, kuvona chipuwo cho kudanijwa kwo mu denga kwa Mwari kuri kuna Kristu Jesu. Ndizvo isisu tese tiri vakaperera ngative no mupinimijo wakadaro; no kudari muno mupinimijo umweni nokuti ngo chapi chiro, no ichozve Mwari unozochipangijira kwomuri. Asi kwega ngatibatirire kune izvo zvotakakwanisa kuwana. Hama, itanyi vanondiejerera, mwese muringire avo vanofamba kudari ndisu tiri chivonero chenyu. Ngokuti vazhinji vanofamba, kudari ngo zvo ndakamubvunja ndivo kazhinji, na zvino ndinomubvunja ngo kuchema, ivo vari vakorore vo muchinjiko wa Kristu; avo magumisiro avo ari kurashwa, chimwari chavo indani, no kuganza kwavo kuri kwo izvo zvinopsheruja, vanopinimija ngo zvo mu nyika. Asi nyika yedu iri mu gore; kubveyozve tinogarira kuviya kwo Muponesi, Mambo Jesu Kristu, uwo unozosanduja muviri wo upasi hwedu, kuti uite unotojaniswa no muviri wo uthende hwake, kudari ngo kushanda ukwo, kwaano simba nakwo ro kupfavisa zvese kwaari. Ndizvo, hama jangu, jinodikana no jinosuwira, muri kudakara kwangu no junguja rangu, ngokudaro imanyi mwakagwinya kuna Mambo, vanodikana vangu. Ndinopota Uodiya, ndinopota Suntuka, kuti vave no mupinimijo umwewo kuna Mambo. Eya ndinokumbiravo, iwewe mushandi wo gwinyiso neni mukanga, besera ao majimayi, vashandi pamwepo neni muvhangeri, na Krementi naye, no vamweni vari vadoni vangu mukushanda, ivo mazina avo ari mubhuku ro kupona. Dakaranyi kuna Mambo ngo nguva jese; zve, ndinoti, dakaranyi. Kupfava kwenyu ngakuzivikanwe ku vandhu vese. Mambo waaphedo. Musan'un'utira chiro; asi ngo zviro zvese ngo kukumbira, na ngo kupota pamwepo no kubonga, mikumbiro yenyu ngaizivikanwe kuna Mwari. No kunyarara kwa Mwari, kunopinda kuzwisisa kwese, kunozongwarira mwoyo yenyu no mipinimijo yenyu kuna Kristu Jesu. Pakugumisira, hama, izvo zviri zvo gwinyiso, izvo zvinoreremejeka, izvo zviro zvakarurama, izvo zviri zvakachena, izvo zvinodikana, no izvo zvine mbiri yakanaka; kudari kuripo kunaka, kudari kuripo kukujwa, pinimijanyi ngo izvi zviro. Izvo zvomwakajija no kuashira, no kuzwa, no kuvona, kwendiri, itanyi izvozvo; na Mwari wo kunyarara unozova nemwi. Asi ndakadakara kakurutu kuna Mambo, kuti zvino pakupejisira mwakamusisira kupinimija ndini; pikija ngo gwinyiso mwaipinimija, asi mwakatama mukuvo. Andikwopi kuti ndinovereketa ngo ndava yo kutama; ngokuti ndakajija kukwaniswa pikija ngouri ugaro hwendinahwo. Ndinoziva kuva muurombo, nokuva mupfumizve; kuzviro zvese no pakati pazvo zvese ndakajija zvakafishika zvese kugutiswa no kuva no njara, zvese no kupfuma no urombo. Ndingagwinya kuyita zvese ndiye Kristu unondigwinyisa. Asi mwakaita zvakanaka kuti mwakazwirana neni mukutambujika kwangu; nemwi munozivazve imwimwi vaFiripi, kuti mukutanga kwo vhangeri, apo ndabva Makedhoniya, apana chiara chakazwirana neni ngo ndava yo kupa, no yo kuashira, asi imwimwi mwega. Pikija ndiri mu Tesaronika, kamwe no kwo chipirizve mwakatuma kundibesera mukutama kwangu. Andikwopi kuti ndinopshaka chipo; asi ndinopshaka michero yo munozopfumiswa ndiyo. Asi ndave no zviro zvese, ndapfumiswa; ndakwaniswa, ndaashira kubva kuna Epafrodhitu izvo zvakabva kwomuri, zviri gwema rakanaka zviri mudiro unoashirika unonasa kudakaja Mwari. Asi Mwari wangu unozomuzarisa ndizvo zvese zvomunotama, kudari ngo uwandu hwo upfumi hwake muuthende ndiye Kristu Jesu. Zvino kuna Mwari Baba wedu ngakuve no uthende kunoti mbhera narini. Ameni. Tambisanyi vakacheneswa vese vari kuna Kristu Jesu. Hama jineni jinomutambisa. Vese vakacheneswa vanomutambisa, kakurutu avo vembhuri ya Khesari. Nyasha ja Mambo Jesu Kristu ngajive no mweya yenyu. Pauri mupostori wa Kristu Jesu ngokuda kwa Mwari, na Timoti munukuna wedu, kwavari vakacheneswa no hama jakagondeka kuna Kristu vari mu Korose: Nyasha kwomuri no kunyarara zvinobva kuna Mwari Baba wedu. Tinobonga kuna Mwari Baba wa Mambo wedu Jesu Kristu, techimukumbirira ngo nguva jese, ngokuti takazwa ngo kugonda kwenyu kuna Kristu Jesu, no rudo rwomunarwo kwavari vese vakacheneswa, ngo ndava yo gonda iro rakagajikihwa imwimwi mu gore, ro mwakazwa ndiro karetu ngo izwi ro gwinyiso ro vhangeri, iro rakaguma kwomuri kudari ngo zvoriri mu nyika yese, rechibereka michero yakawanda, kudari ngo zvorinoitazve kwomuri, kubvira kuiro zuva ro mwakazwa no kuziva nyasha ja Mwari ngo gwinyiso; kudari ngo zvomwakajijazve kuna Epafrasi muranda pamwepo nesu, unodikana, uri mushandi unogondeka wa Kristu ngo ndava yenyu, uwozve wakatizivisa ngo rudo rwenyu mu mweya. Ngo iyi ndava nesuvo, kubvira kuzuva iro rotakazwa, atizivi kuregera kupota no kumukumbirira, kuti muzariswe ngo kuziva ngokuda kwake ngo ungwaru hwese no kuzwisisa kwese ngo Mweya, kuti mufambe kudari ngo zvinosisira kuna Mambo mumudakajise ndizvo zvese, mwechibereka michero mumishando yese yakanaka, mwechikura mukumuziva Mwari; mwechigwinyiswa ngo simba rake, kudari ngokukura kwo simba ro uthende hwake, mbhera muve no kusengerera no kutsamwirira kwese ngo kudakara; mwechibonga kuna Baba uwo wakatiita vanosisira kukovanisihwa ndhaka yo vakacheneswa mukujeka; uwo wakatinunura kubva ku simba ro chidima, wakatidira mu umambo hwo Mwana wake unodikana. Kwaari tinakwo kuripirwa ngo ngazi yake, no kuregerehwa zvishaishi zvedu; uwo uri mutojaniso wa Mwari usikavoneki, uri dangwe ro zvakasikwa zvese; ngokuti zviro zvese zvakasikwa ndiye, izvo zviri mu gore, no zviri mu nyika, zvinovoneka, no zvisikavoneki, pikija madendemaro, nokuti umambo, nokuti makota, nokuti vatongi, zvese zvakasikwa ndiye, nazvo zvakasikihwa iye; iye unotangira zvese, no zvese zviripo ndiye. Uri musoro wo muviri, kunoti, chiara; uri maambo, no dangwe ro kumuka kwo vakafa; kuti iye aite mukuru wo zviro zvese. Ngokuti zvakadakaja Baba kuti kuzara kwese kugare kwaari; kubudikija ndiye aiyanisira zvese kwaari, ayinga aiyanisa ngo ngazi yo muchinjiko wake, pikija zviro zviri mu nyika, nokuti zviro zviri mu gore. Nemwivo karetu mwayiva vo nyikanja no vakorore mukupinimija kwenyu mumishando yenyu yakashata, asi zvino iye wakamuiyanisa ngo muviri wake wo nyama ngo kufa, kuti amutatije muri vakacheneswa no vasina ndava, musikashoreki pamberi, pake, kudari mwechindogara mukutenda mwakajimikwa no kugwinyiswa, musikatsukunuswi kubva mukugonda kwo vhangeri ro mwakazwa rakachumaihwa kune zvisikwa zvese pasi po mu denga; iro rondakaitwa mushandiri waro, inini Pauri. Zvino ndinodakara mukutambujika kwangu ngo ndava yenyu, ndechizajisa mu nyama yangu icho chakasarira cho matambujiko a Kristu mumuviri wangu ngo ndava yo muviri wake kunoti chiara. Icho chondakaitwa mushandiri kudari ngo utungamiriri hwakapuwa kwendiri ndi Mwari ngo ndava yenyu, kuzarisa izwi ra Mwari, ndicho chiri chakafishika, chakafukijwa kubvira pakutanga kumibarihwana yese; asi zvino chapangijirwa kune vakacheneswa vake, kwavari Mwari wakada kuti avazivise icho chiri upfumi hwo uthende hwo chakafishika pakati po vo majinja, chiri Kristu mukati mwenyu uri gonda ro uthende; uwo wotinochumaira ndiye, techipanga mundhu wese, no kujijisa mundhu wese muungwaru hwese, kuti tivatatije vandhu vese vari vakaperera kuna Kristu; kune izvi zvondinoshandavo, ndechirwa kudari ngo kushanda kwake ukwo kushanda ngo simba mukati mwangu. Ngokuti ndinoda kuti muzive kuti kukura kwakaitawani kwo kutambujika kwendinakwo ngo ndava yenyu na ngo ndava yaavo vari mu Raodhikiya, na ngo aavo vese vasati vatongovona hope yangu ngo kwo muviri; kuti mwoyo yavo iembezehwe, vechibatana pamwepo murudo no muupfumi hwese hwo kugonda hwakaperera hwo kuzwisisa, kuti vazive chakafishika cha Mwari, chiri Kristu, kwaari kwakafishwa upfumi hwese hwo ungwaru no hwo kuziva. Ndinonanga ichi, kuti musazochengejehwa ngo mundhu ngo kuongwa kwo kuvereketa. Ngokuti pikija ndisipo ngo muviri, asi ndinemwi mumweya, ndechidakara, ndechiringira kuzwana kwenyu, no kugwinya kwo kugonda kwenyu kuna Kristu. Ndizvo kudari ngo zvomwakaashira Kristu Jesu Mambo, fambanyi kudaro mukati mwake. Muri vakajimikwa no kuvakwa mukati mwake, mwechigwinyiswa mukugonda kwenyu, kudari ngo zvo mwakajijiswa, mwechiwanjwa mukubonga. Ngwariranyi kuti asazovapo mundhu unomushaishira ngo urimbwi hwake, no kuchengeja ngo zvisina shwiro, no kutevera zvirovejeso zvo vandhu, kudari ngo kujijisa kwo nyika asikateveri zva Kristu. Ngokuti kuzara kwese kwo Umwari kunogara kwaari mumuviri. Kwaari imwimwi muri vakaperera, uwo uri musoro panyezuru po umambo hwese, no panyezuru po vane simba; kwaarizve imwimwi mwakachekwa ngo kuchekwa kusiri kwo nyara, ngo kubviswa kwo muviri wo nyama, mukuchekwa ukwo kuri kwa Kristu; mwakavigwa pamwepo naye murubhapatiso, wo mwakamuswazve pamwepo naye ngo kugonda kwo kushanda kwa Mwari uwo wakamumusa kwo vakafa. Nemwi apo mwayiva vakafa muzvishaishi zvenyu, no kusikachekwi kwo nyama yenyu uwo wakamumusa pamwepo naye echitiregerera zvishaishi zvedu zvese, atsukutija chisungo chakatahwa cho mipango, icho chakatiitira ndava chinopesana nesu, naye wakachibvisa mu njira akachikohomera pa muchinjiko. Naapo ayinga abvisa vatongi no vano simba, akavabudisa pambhene, echivanyisa ndiye. Ndizvo musatendera mundhu kuti amutonge ngo ndava yo zvokuha, nokuti zvokumwa, nokuti ngo ndava yo mishongano yo kuha nokuti yo kugara kwo mweji, nokuti yo masabatha: Izvo zviri bvuri ro zvinoviya; asi muviri ngo wa Kristu. Musatendera mundhu kuti amurajikije ngo chipuwo chenyu ngo kujipfavisa ngamaune no kudira ngirosi, echibatisisa kune izvo zvaakavona, echijikuja kusina shwiro ngo mupinimijo wake wo nyama. Asikabatiriri musoro, kweriri muviri wese unopakurihwa no kugwinyiswa ngo ndhengo no mijira, unokura ngo kukuriswa ndi Mwari. Kudari mwakafa na Kristu kubva kuzvijijiso zvo nyika, munojipfavisa ngenyi ngokungwarira zviemeso, kudari ngo vachapona ngo zvo mu nyika, (izvo zvinoti musabata, nokuti kuravira, nokuti kupshasa; izvi zvese zvinopera ngokushandiswa) kudari ngo mipango no zvijijiso zvo vandhu? Izvo zviro ngo gwinyiso zvinovoneka inga zvino ungwaru mukudira kwokuda, no kujipfavisa, na ngo kuregejera muviri; asi azvina simba ro kunyisa kuda kwo nyama. Ndizvo kudari mwakamuswa mukufa pamwepo na Kristu pshakanyi izvo zviri panyezuru, apo pana Kristu akagara ngo kumuho kwa Mwari. Emesanyi mupinimijo ngo izvo zviri panyezuru, musikapinimiji ngo izvo zviri munyika. Ngokuti imwimwi mwakafa, no kurarama kwenyu kwakafishwa pamwepo na Kristu kuna Mwari. Apo Kristu, uwo uri kurarama kwedu oovoneka, munozovonekavo pamwepo naye muuthende. Ndizvo urayanyi zviemuriro zvenyu zvo nyika: Kuomba, kusikasukiki, kuemura kwo muviri, kudisisa zvakashata no kuemura pfuma, ukwo kuri kudira miezaniso. Ngo ndava yo izvi zviro ushungu hwa Mwari unogumira vana vokusikapurutani; Kwozviri imwimwivo mwakafamba mukati mwazvo karetu apo muchagara mukati mwazvo. Asi zvino rashanyivo zvese izvi; kutseneka, ushungu, kuvenga, kutuka, no kuvereketa zvinopsheruja ngo miromo yenyu. Musanyeperana, kwechivoneka kuti mwakarasha mundhu wokare no zviito zvake, nemwi mwakasimira mundhu mupsha uwo unotsandujwa mukuziva kuti aezane no mutojaniso wo uwo wakamusika. Apo apachinazve mugiriki, nokuti mujudha wakachekwa, nokuti usikazivi kuchekwa, kuti wo mu nyikanja, nokuti musitiya, hloko, nokuti wakasununguka, asi Kristu uri zvese, naye uri mukati mwavo vese. Ndizvo simiranyi, kudari ngo zvomuri vakatsananguhwa ndi Mwari, no vakacheneswa no vanodikana, muno mwoyo wo kuzwira, no kukungurira, no kuzvininipisa, no kupfava, no kusengerera; mwechisengerera umwe no umweni, mwechiregererana, kuti aripo mundhu une ndava kuno umweni, nokudari ngo zvaakamuregerera Mambo imwimwi, itanyi kudaro nemwivo. Kupinda izvi zvese simiranyi rudo, ruri chisungo cho kuperera. Tenderanyi kuti kunyarara kwa Kristu kutonge mu mwoyo yenyu; ukwo kwo mwakadanijihwazve ndiko mumuviri umwe; mwechibonga. Izwi ra Kristu ngarigare mukati mwenyu ngo kuwanjiswa muungwaru hwese; mwechijijisana no kupangana umwe no umweni, ngo nduyo, no ngoma, no kuemba kwo Mweya, mwechiemba mune nyasha mumwoyo yenyu kuna Mwari. Pikija chinyi cho munoyita ngo izwi nokuti ngo mushando, itanyi zvese ngo zina ra Mambo Jesu, mwechibonga kuna Mwari Baba ndiye. Vakaji, pfaviranyi kuvarume venyu, kudari ngo zvinosisira vari kuna Mambo. Varume, idanyi vakaji venyu, musaita ushungu kwavari. Vana, purutananyi vabari venyu, ngo zviro zvese, ngokuti ichi chinodakaja Mambo. Majibaba musatsenekesa vana venyu, kuti vasazopera simba. Varanda, purutananyi ngo zviro zvese kuna avo vari majimambo enyu ngo kwenyama; haiwa kushanda ngo kurindwa, kunonga vanodakajisa vandhu, asi mune chidisiso chimwe cho mwoyo mwechitya Mambo. Pikija chinyi chomunoyita, shandanyi ngo mwoyo, kunonga munoshandira kuna Mambo, haiwa vandhu; mwechiziva kuti munozoashira musharo wo ndhaka kubva kuna Mambo; ngokuti munoshandira Mambo Kristu. Ngokuti iye unoita zvakashata unozoashirazve zvakashata zvaakaita; akuna kutsanangura vandhu. Majimambo itiranyi varanda venyu izvo zvakanaka no zvinoezana; mwechiziva kuti imwimwivo muna Mambo mu gore. Vangiriranyi mukukumbira, mwechirinda murimwo ngo kubonga; pamwepo no izvi mwechitikumbiriravo kuti Mwari atibewurire musuvo wo izwi, kuti tiverekete chakafishika cha Kristu, chondiri muzvisungo ngo ndava yacho; kuti ndichipangijire kudari ngo zvinosisira kuti ndiverekete. Fambanyi muungwaru kwavari vari kunja mwechitenga mukuvo. Kuvereketa kwenyu ngakuve no nyasha nguva jese, kwechirungwa ngo munyu, kuti muzive njira inosisira kupingurana ndiyo umwe kwo umweni. Tukiko unomuzivisa zvese zvangu, uwo uri munukuna unodikana no mushandi unogondeka, uri muranda pamwepo neni kuna Mambo. Wondakatumira kwomuri ngo iyi ndava, kuti muzive ngokugara kwedu, zve, kuti iye aembezere mwoyo yenyu; pamwepo na Onesimo uwo uri munukuna unogondeka no unodikana, uri umwe wenyu. Avo vanozomuzivisa zvese zvinoitwa kuno. Aristaku musungwa pamwepo neni unomutambisa, na Marku muzukuru wa Bharnabha mwakaashira kupangwa ngo ndava yake; kudari echiguma kwomuriyo mumuashire. Na Jesu unozwi Justu, uri waavo vakachekwa; Avo ndivo vega vashandi pamwepo neni mu uMambo hwa Mwari, navo vakandiembezera. Epafrasi, umwe wenyu, muranda wa Kristu Jesu, unomutambisa, nguva jese echimutambujikira mukukumbira kwake, kuti muime mwakaperera mwechiziva ngo gwinyiso icho chiri kuda kwa Mwari. Ngokuti ndinoita chapupu ndiye kuti unomushandira kakurutu, naavozve vari mu Raodhikiya no vari Hirapori. Ruka, murapi unodikana, na Dhemasi vanomutambisa. Tambisanyi hama jiri mu Raodhikiya, na Nyumufani, no chiara chiri mu nyumba yake. Naapo iyi tshamba ikajijwa pakati penyu, itanyizve kuti ijijwe muchiara cho vaRoadhekiya; kuti neimwivo mujije tshamba inobva Roadhekiya. Bvunjanyi kudaro kuna Akipo, kuti, ngwarira upejise mushando wo wakaashira kubva kuna Mambo. Uku ndikwo kutambisa kwangu, inini Pauri ngo nyara yangu yambhwine. Cherechejanyi zvisungo zvangu. Nyasha ngajigare nemwi. Pauri, na Sirivhana, na Timoti, ku chiara cho vaTesaronika chiri kuna Mwari Baba no kuna Mambo Jesu Kristu. Nyasha no kunyarara ngazvive nemwi. Tinobonga kuna Mwari ngo nguva jese ndimwi mwese, techimucherecheja mumikumbiro yedu, tinogara techicherecheja mushando wenyu wo kugonda, no mukushanda kwenyu murudo, no kusengerera kwo kugonda kuna Mambo wedu Jesu Kristu, pamberi pa Mwari Baba wedu. Techiziva, hama, munodiwa ndi Mwari kutshanangura kwenyu, ngokuti vhangeri redu arizivi kuviya kwomuri ngo izwi rega, asi ngo simbavo, no mu Mweya Wakachena, na ngo kugwinyiswa kukurutu; kudari ngo zvomunoziva kuti tainga tiri vandhu vakadini pakati penyu. Nemwi mwakaita vaejereri vedu, no va Mambozve, mwechiashira izwi mukutambujika kukurutu, ngo kudakara kwo Mweya Wakachena; ngokudaro mwakaita chivonero kwavari vese vanotenda vari mu Makedhoniya no mu Akaya. Ngokuti kubvira kwomuri izwi ra Mambo rakaparajika, haiwa mu Makedhoniya no mu Akaya mwega, asi kundau jese kugonda kwenyu kuna Mwari kwakazwika; kwokuti akusisiri kuti isisu tiverekete chiro. Ngokuti avo pachavo vanozivisa ndisu ngo kuaashihwa kwo takaita kwomuri; na ngo njira yo mwakatenderuka ndiyo kuna Mwari kubva kumiezaniso yo kudira, kushandira Mwari unopona, uno gwinyiso, no kugarira Mwana wake echibva mu gore, waakamusa kwo vakafa, ndi Jesu uwo unotinunura muushungu hunoviya. Ngokuti imwimwi pachenyu hama, munoziva ngo ndava yo kuviya kwedu kwomuri, kuti akuzivi kuvoneka kuri kusina shwiro; asi pikija takatambujika pakutanga, no kuitihwa zvinopsheruja, kudari ngo zvomunoziva, tiri mu Firipi, takashinga kuna Mwari wedu kuvereketa kwomuri vhangeri ra Mwari ngo kutambujika kukurutu. Ngokuti kupota kwedu akuri kwo kupaukisa akadi, nokuti kwo kusikasukika nokuti kwo kuchengeja; asi kudari ngo zvotakatendehwa ndi Mwari kuti tigondwe ngo vhangeri, ngokudaro tinovereketa andikwopi kudakajisa vandhu, asi Mwari uwo unoeja mwoyo yedu. Ngokuti atizivi kuvoneka pikija ngouri mukuvo techinanga mazwi ourimbwi, kudari ngo zvomunoziva, nokuti zano ro kuemura pfuma, Mwari uri chapupu chedu; tisikapshaki kuirikijwa ngo vandhu, pikija kunobva kwomuri, nokuti kunobva kuvamweni, apo taikona kuyita mutwaro kwomuri, tiri vapostori va Kristu. Asi taiva takapfava pakati penyu, kudari ngo zvaanoita mureri apo echirera vana vake. Ngokudaro, techimudisisa, taida kukovera kwomuri haiwa vhangeri ra Mwari rega, asi no kupona kwedu kwambwine, ngokuti imwimwi mwaidikana kakurutu kwetiri. Ngokuti munocherecheja hama, kushanda kwedu no kuhwajihwa, techishanda usiku no masikati kuti tisazoita mutwaro kuno umwe wenyu, takachumaira kwomuri vhangeri ra Mwari. Imwimwi na Mwari muri zvapupu, ngo kucheneswa no kurungama, no kusikana ndava kwakaitawani kwetakaita kwomuri, imwimwi munotenda. Kudari ngo zvomunoziva njira yotakaita kuno umwe ngaumwe wenyu, kudari ndi baba vanoyita kuno vana vavo, techimupanga, no kumushingisa, no kupupura, kuti mufambe kudari ngo zvinosisira kuna Mwari, uwo wakamudanija kuumambo hwake hwambwine no uthende. Ngo iyi ndava tinobonga Mwari tisikaregeri, kuti, apo mwaashira kwetiri, iri shoko ra Mwari, mwakariaashira kunonga risiri izwi ro vandhu, asi, kudari ngo zvoriri gwinyiso, izwi ra Mwari, rinoshandazve mukati mwenyu, imwimwi munotenda. Ngokuti imwimwi, hama, mwakaita vaejereri vo zviara zva Mwari zvo mu Judhiya zviri kuna Kristu Jesu; ngokuti mwakatambujwavo ngo zviro zvakatojana ngo vandhu vo nyika yenyu, kudari ngo zvovakatambujwa avo ngo vajudha; avo vakayita zvese, kuuraya Mambo Jesu no vaprofeti, no kutimbirimbija, vasikadakajisi Mwari, vari vanopshapshana no vandhu vese; vechitirambija kuvereketa kune vomajinja kuti vangaponeswa; kuti vazarise mupimo wo kushaisha kwavo ngo nguva jese. Asi ushungu hunonyanyisisa hwakavagumira. Asi isisu, hama, techiparajaniswa nemwi kwenguva doko, mukuvonana kwo muviri, haiwa kwo mwoyo, takatsamwirira kuvona hope yenyu ngo kumusuwira kakurutu. Ngokuti taida kuviya kwomuri, inini Pauri kamwe no kwochipiri; na Sathani wakatiphingaija, ngokuti chinyi chiri gonda redu, nokuti kudakara kwedu, nokuti junguja ro kuganza? Andimwipi here, pamberi pa Mambo wedu Jesu ngo kuviya kwake? Ngokuti imwimwi muri uthende hwedu no kudakara kwedu. Ndizvo apo takakorera kushingirira, takapinimija kuti kwakanaka kuti tisiiwe sure tiri tega mu Atena; takatuma Timoti, munukuna wedu no mushandi wa Mwari muvhangeri ra Kristu, kuti amugwinyise, no kumuembezera mukutenda kwenyu; kwokuti asazovapo mundhu unozungunyiswa ngo kutambujika uku; ngokuti imwimwi pachenyu munoziva kuti takaemesehwa izvozvo. Ngokuti ngo gwinyiso, apo tichinemwi, takamubvunja pakutanga kuti tinozotambujika; kudari ngo zvakaitika, nemwi munozviziva. Ngo iyi ndava ininivo apo ndakakorera kushingirira, ndakatumira kuti ndizive kutenda kwenyu, kuti pamweni mueji inga wamueja, no mushando wedu ungaita usina shwiro. Asi apo Timoti apetuka zvino kwetiri kubva kwomuri, akativiisira masoko anodakaja okutenda kwenyu no rudo rwenyu, nokuti unonasa kuticherecheja ngo nguva jese, mwechisuwira kutivona, kudari tisuvo tasuwira kumuvona; ngo iyi ndava, hama, takaembezehwa ndimwi mukutama kwedu kwese, no kutambujika ngo ndava yo kutenda kwenyu. Ngokuti zvino tinopona kudari imwimwi mwechiyima mwakagwinya kuna Mambo. Ngokuti tingaita mabongerenyi kuna Mwari ndimwi, ngo ndava yo kudakara kwese kwetinodakara ndikwo ngo ndava yenyu pamberi pa Mwari wedu, techikumbira kakurutu usiku no masikati kuti tivone hope jenyu, no kuzajisa ichi chinosisira mukutenda kwenyu? Zvino Mwari wedu Baba wambwine, na Mambo wedu Jesu ngaatitatije njira yedu kwomuri. Na Mambo ngaaite kuti muwande no kuwanjiswa murudo umwe kuno umweni, nokune vandhu vese, kudari zvotinoitavo isisu kwomuri. Kuti iye agwinyise mwoyo yenyu isina ndava mukucheneswa pamberi pa Mwari wedu Baba, ngo nguva yo kuviya kwa Mambo wedu Jesu pamwepo no vakacheneswa vake vese. Ndizvo pakugumisira, hama, tinomukumbira no kumupota ndiye Mambo Jesu kuti kudari ngo zvomwakaashira kwetiri njira inosisira yo kufamba ndiyo no kumudakaja Mwari, kudari ngo zvomunofamba, kuti muwanjise kudaro. Ngokuti munoziva kupanga kwotakamupanga ndiye Mambo Jesu. Ngokuti uku kuri kuda kwa Mwari, kucheneswa kwenyu, kuti muregere kuomba; kuti mundhu wese kwomuri azive kujibatira ndiro yake mukucheneswa no mukureremejeka, andikwopi mukuemura kwo kushata, kudari ngo vomajinja vasikamuzivi Mwari; kuti mundhu asazopauka no kushaishira hama yake ngo iyi ndava; ngokuti Mambo uri muhwirijiri wo izvi zvese, kudari ngo zvotakamupanga ngo pamberi no kupupura kudaro. Ngokuti Mwari aazivi kutidanijira kune zvisikazivi kusukika, asi kune zvakacheneswa. Ndizvo iye unoramba, aarambi mundhu akadi, asi unoramba Mwari, uwo unopa kwetiri Mweya wake Wakachena. Asi ngo ndava yo kuva no rudo kuhama akusisiri kuti mundhu amutarire; ngokuti imwimwi mwambhwine mwakajijiswa ndi Mwari kuti mudane; ngokuti ngo gwinyiso munoita kudaro kune hama jese jiri mu Makedhoniya. Asi tinomupanga, hama kuti muwanjwe no kuwanjisisa; zve, kuti mueje kuva no chidisiso cho kunyarara, no kubatika ngo mishando yenyu yega, no kushanda ngo nyara jenyu kudari ngo zvotakamupanga; kuti mufambe ngo njira inosisira kwavari vari kunja, musina chomunotama. Asi atidi kuti muite vasikazivi, hama, ngo ndava yo avo vakavata; kuti musazosururika kudari ngo vamweni vasina kugonda. Ngokuti kudari techitenda kuti Jesu wakafa no kumukazve, ngokudaro avo vakavata kuna Jesu, Mwari unozovaviisa pamwepo naye. Ngokuti tinonanga ichi kwomuri ngo izwi ra Mambo, kuti isisu tichazwa, tasara mbhera kuviya kwa Mambo, atitongozotangiri avo vakavata. Ngokuti Mambo ambhwine unozobzuka kubva mu gore, ngo kudanijira na ngo izwi ro ngirosi huru, na ngo kurijwa kwo mbhayapaya ya Mwari; no vakafa vari kuna Kristu vanozotanga kumuka; naapo isisu tichazwa tasara, tinozotorwa pamwepo navo mu makore, koosongana na Mambo mu mweya; ngokudaro tinozogara na Mambo mbhera narini. Ndizvo embezerananyi ngo mazwi aya. Asi ngo ndava yo mikuvo no nguva, hama, akusisiri kuti mutarihwe ndizvo. Ngokuti imwimwi mwambhwine munonasa kuziva kuti zuva ra Mambo rinoguma kudari ngo mbavha inoguma usiku. Apo vanozoti, kuripo kunyarara no kungwaririka, ngo iyo nguva kuparajwa kunozokasira kunozovagumira, kudari ngo kuhwajiwa kunogumira mujimayi wosununguka; apana unozopokonyoka. Asi imwimwi, hama, amuri mu chidima akadi, kuti iro zuva rimugumire kudari ngo mbavha. Ngokuti imwimwi mwese muri vana vo kujeka, no vo masikati; atiri vo usiku akadi, nokuti vo chidima. Ndizvo tisavata, kudari ngo zvovanoita vamweni asi ngatirinde, tingware. Ngokuti avo vanovata, vanovata usiku naavo vanoraja, vanoraja usiku. Asi isisu tiri vo masikati ngatingware, techisimira chihlangu cho paditi cho kugonda, no rudo; nokuyita chigqoko, gonda ro ruponeso. Ngokuti Mwari aazivi kutiemesera ushungu, asi kuti tiwane kuponeswa ndiye Mambo wedu Jesu Kristu. Uwo wakafa ngo ndava yedu kuti pikija tichazwa nokuti tavata tinozopona pamwepo naye. Ndizvo embezerananyi, muvakane, kudarizve ngo zvomunoita. Asi tinomukumbira, hama, kuti muvareremeje avo vanoshanda pakati penyu, vari panyezuru penyu kuna Mambo, vanomupanga; no kuvareremeja kakurutu murudo ngo ndava yo mushando wavo. Itanyi vanoiyana pakati penyu. Tinomupota hama, panganyi avo vano nungo, tsungisanyi avo vano mwoyo inodemera, gwinyisanyi avo vakarembejeka, sengereranyi kuna vese. Ngwariranyi kuti asazovapo unohwirijira zvakashata ku mundhu ngo ndava yo zvakashata; asi ngo nguva jese tevereranyi izvo zvakanaka, umwe kwo umweni, no kuna vese. Dakaranyi ngo nguva jese. Kumbiranyi musikaregi. Ngo zviro zvese bonganyi; ngokuti ichi chiri kuda kwa Mwari kuna Kristu Jesu ndimwi, musajima Mweya. Musashoora zvakaprofetwa. Ejanyi zviro zvese; batisisanyi izvo zvakanaka. Taraukiranyi miyemo yo zvese zvakashata. Na Mwari wo kunyarara wambwine ngaamuchenese aembho; no mweya yenyu no mwoyo no muviri ngazvingwarihwe aembho, zvisina ndava, ngo kuviya kwa Mambo wedu Jesu Kristu. Unogondeka uwo unomudanija, unozozviitazve. Hama, tikumbirirenyi. Chingamijanyi vese vatendi ngo muromo ngo kucheneswa. Ndinomupikisa ndi Mambo kuti iyi tshamba ijijwe ku vatendi vese. Nyasha ja Mambo wedu Jesu Kristu ngajive nemwi. Pauri, na Sirivhana, na Timoti, ku chiara cho vaTesaronika chiri kuna Mwari Baba wedu na Mambo Jesu Kristu; nyasha ngajive nemwi no kunyarara zvinobva kuna Mwari Baba na Mambo Jesu Kristu. Kunodikana kuti tibonge kuna Mwari ngo nguva jese ndimwi, hama, kudari ngo zvotinosisira, ngokuti kutenda kwenyu kunokura kakurutu, no rudo rwenyu umwe kuno umweni runowanjwa; ngokudaro isisu pachedu tinoganza ndimwi muzviara zva Mwari ngo ndava yo kusengerera kwenyu, no kugonda kwenyu mukutambujika kwese no mumatambujiko omunoshingirira: Izvo zviri chipangijiro cho kurungama kwo kutonga kwa Mwari; kuti muverengwe muri vanosisira Umambo hwa Mwari, hwo munotambujikiravo: Kudari chiri chiro chakarurama kuna Mwari kuti ahwirijire kutambujika kwavari vanomutambuja; no kwomuri munotambujika, zororanyi pamwepo nesu, mukupangijihwa kwa Mambo wedu Jesu echibva mu gore pamwepo no ngirosi jake jine simba, mu murazvu wo muriro unobwaka, echihwirijira kwavari vasikamuzivi Mwari, no kwavari vasikapurutani vhangeri ra Mambo wedu Jesu: Avo vanozoripa ngo kutambujika kusikaperi, no kubviswa kuhope ya Mambo, no kubva kuuthende hwo simba rake. Apo oviya kooirikijwa ngo vakacheneswa vake, no kushamisa vese vanotenda, ngo iro zuva, ngokuti uchapupu hwedu kwomuri hwakatendwa. Ngo iyi ndava isisu tinomukumbirira nguva jese, kuti Mwari wedu amuite vanosisira mukudanijwa kwenyu, no kuzarisa ngo simba kudisisa kwese kwo kunaka, no mushando wo kugonda; kuti zina ra Mambo wedu Jesu riirikijwe kwomuri, nemwi muirikijwe kwaari, kudari ngo kuwanda kwo nyasha ja Mwari wedu na Mambo Jesu Kristu. Zvino tinomupota, hama, ngo ndava yo kuviya kwa Mambo wedu Jesu Kristu, no kuunganijwa kwedu kwaari, kuti musazokasira kukunukujwa mu mipinimijo yenyu, no kutambujwa pikija ngo mweya, nokuti ngo izwi, nokuti ngo tshamba, inonga inobva kwetiri, kudari zuva ra Mambo raguma; musazochengejehwa ngo mundhu pikija ngoiri njira; ngokuti zuva iro arizogumi kusati kwavapo kuhwirira sure, no mundhu wo kushaisha apangijihwe, uwo uri mwana wo kurashwa, uwo unorwisa no kujitundhumaja panyezuru pazvo zvese zvinozwi zva Mwari, no panyezuru po zvinodirwa; ndizvo unogara muthemperi ra Mwari, echijiitisa kuti uri Mwari. Amucherecheji here kuti apo ndichiripo nemwi ndakamubvunja izvi zviro? Na zvino munoziva icho chinomurambisa, kuti uwo apangijihwe ngo mukuvo wake. Ngokuti chakafishika chisikateveji mipango choshanda na zvino, kwega uripo unorambisa zvino, mbhera azobviswa pakati; naapo wakashata unozopangijihwa, aye unouraiwa ndi Mambo Jesu ngo kufurija kwo muromo wake, no kumuparaja ngo kupangijihwa kwo kuviya kwake, uwo kuviya kwake kwakadari ngo kushanda kwa Sathani ngo simba rese, no zvivoniso no mishamiso yo manyepo, na ngo kuchengeja kwese kwo kusikarurami kwavari vanorashika; ngokuti avazivi kuashira rudo rwo gwinyiso, kuti vaponeswe. Ngo iyi ndava Mwari unovatumira kushanda kunopaukisa, kuti vatende manyepo, kuti vese vasikatendi gwinyiso vatongwe, asi vaidakajwa mune zvisikazivi kururama. Asi kunodikana kuti tibonge Mwari ngo nguva jese ngo ndava yenyu, hama jinodikana kuna Mambo, kuti Mwari wakamutsanangura kubvira pakutanga kuti muponeswe mukucheneswa kwo mweya no kugonda gwinyiso. Kweriri wakamudanija ngo vhangeri redu, kuti muashire uthende hwa Mambo wedu Jesu Kristu. Ndizvo hama, imanyi mwakagwinya, mubate mipango yo mwakajijiswa, pikija ngo izwi, nokuti ngo tshamba yedu. Zvino Mambo wedu Jesu Kristu pachake, na Mwari Baba wedu uwo wakatida, akatipa kuembezehwa kusikaperi no gonda rakanaka ngo nyasha, ngaaembezere mwoyo yenyu no kugwinyisa kumishando yese no kumazwi ese akanaka. Pakugumisira, hama, tikumbirirenyi kuti izwi ra Mambo riparajihwe no kukuriswa, kudari ngo zvorinoitazve kwomuri; zve kuti tinunurihwe kubva ku vandhu vasikazivi kururama no vakashata; ngokuti andivopi vese vanokugonda. Asi Mambo unogondeka; unozomugwinyisa, no kumungwarira kubva kuno uwo wakashata. Nesu tine gonda kuna Mambo ndimwi, kuti munoita, munozoyitazve zvotinomupanga. Mambo ngaatungamirire mwoyo yenyu kuno rudo rwa Mwari, no kuno kusengerera kwa Kristu. Zvino tinomupanga, hama, ngo zina ra Mambo wedu Jesu Kristu, kuti mupauke kubva kuno hama yese ine nungo, isikafambi kudari ngo mipango yo mwakaashira kwetiri. Ngokuti imwimwi pachenyu munoziva njira yo kutitevejera ndiyo isisu, ngokuti atizivi kuyita nungo pakati penyu; zve, atizivi kuha chimanda cho mundhu nokuti ngouri tisikazivi kuchitenga, asi takashanda techitambujika usiku no masikati kuti tisazoita mutwaro kuno umwe wenyu; haiwa kwokuti atina simba, asi kujiita chivonero, kuti imwimwi mutitevejere. Ngokuti apo tichinemwi takamupanga, kuti, kudari aripo mundhu usikadi kushanda, asazohazve. Ngokuti tinozwa kuti vamweni vanofamba pakati penyu vano nungo, vasikashandi, asi vari vanokangaija vamweni. Zvino avo vakadaro tinovapanga no kuvapota ndi Mambo Jesu Kristu, kuti vashande ngo kunyarara, vahe chimanda chiri chavo. Asi imwimwi, hama, musazoremba kuyita zvakanaka. No kudari aripo mundhu usikapurutani izwi redu ngo iyi tshamba, muringisisenyi mundhuwo, kuti musazwana naye, kuti iye apsheruke. Musazomuverenga kuti ibandu, asi mumupange kudari ngo hama. Zvino Mambo wo kunyarara wambwine ngaamupe kunyarara ngo nguva jese, na ngo njira jese. Mambo ngaave nemwi mwese. Kutambisa kwangu inini Pauri ngo nyara yangu, ukwo kuri chivoniso kutshamba jese; ndizvo ndinotara kudaro. Nyasha ja Mambo wedu Jesu Kristu ngajive nemwi mwese. Ameni! Pauri, mupostori wa Kristu Jesu ngo kuemesa kwa Mwari Muponesi wedu, na Jesu Kristu, gonda redu, kuna Timoti, mwana wangu wo gwinyiso mukugonda; nyasha, no kukungurihwa, no kunyarara, ngazvive newe zvinova kuna Mwari Baba, na Kristu Jesu Mambo wedu. Kudari ngo zvondakakupota kuti ugare Efesu, apo ndaiyenda Makedhoniya, kuti upange vamweni vakatikuti kuti vasajijisa kujijisa kumweni, nokuti kupurutanazve kungano no kuverenguja kusikaperi kwo majibaba mukuru, izvo zvinoamba hasha, paugaro po kuvakiwa ndi Mwari mukugonda. Asi kuzarisika kwo mupango kuri rudo runobva mu mwoyo wakacheneswa, runobva mu mipinimijo isina ndava, no kugonda kusikajiitisi. Kubva kuno izvi vamweni vechipauka, vakapaukira kuenda mukuvereketa kusina shwiro; vechidisisa kuyita vajijisi vo mipango, vasikazivi chovanonanga nokuti chovanonasa kugwinyisisa. Asi tinoziva kuti mipango yakanaka, kudari mundhu echizoishandisa ngo njira kwayo, echiziva ichi, kuti mipango aizivi kuitihwa mundhu wakarurama, asi yakaitihwa vasikateveji mipango no vasikapangwi, no vasikamudi Mwari no vashaishi, inoitihwa vasikazivi kucheneswa no vatuki, vanouraya majibaba no vanouraya majimayi, no vanouraya vandhu, vanoomba, no vanoyita upombo, no vanoba vandhu, vanonyepa, no vanopika manyepo, nokuti kudari chiripo chimweni chinopesana no zvijijiso zvakarurama; kudari ngo vhangeri ro uthende hwa Mwari unomuchena, rondakapuwa ngo kugondwa. Ndinobonga uwo wakandipa simba, ndi Jesu Kristu Mambo wedu, ngokuti wakandiverenga kuyita wakagondeka, akandiemesa kumushando wake; pikija ngo pamberi ndayiva mutuki, no mutambuji, no unoshaishira; asi zvakanyadaro ndakakungurihwa, ngokuti ndakazviita ngo kusikaziva mukusikatendi; no nyasha ja Mambo wedu jakawanjwa kakurutu pamwepo no kugonda no rudo ruri kuna Kristu Jesu. Rinogondeka iri izwi, rinosisira kuashihwa: Rokuti Kristu Jesu wakaviya mu nyika kuponesa vashaishi, inini ndiri mukuru wavo. Asi ngo iyi ndava ndakaitihwa nyasha, kuti Jesu Kristu apangijire kusengerera kwake kwese kwendiri, ndiri mukuru wo vashaishi, kuyita chivonero kwavari vanomutenda, kuti vawane kupona kusikaperi. Zvino kuna Mambo usikaperi, usikavori, usikavoneki, uri Mwari ega, ngakuve kwaari uthende no kureremejwa mbhera narini. Ameni! Uku kupanga ndinopa kwouri, mwana wangu Timoti, kudari ngo zvakaprofetwa ngo ndava yako karetu, kuti uambane kuambana kwakanaka, wechibatisisa kugonda no mwoyo wakanaka; vamweni vakakurasha, vakapwanyikihwa ngo ngarava yo kugonda kwavo, pakati pavo vakadaro payiva na Humeniyo na Arixandreu, vendakapa kuna Sathani, kuti vajijiswe kusikatuki. Ndizvo, pakutanga pazvo zvese, ndinomutetezera kuti kupota, no mikumbiro, no kukumbirira, no kubonga, zviitihwe vandhu vese; ngo ndava yo majimambo naavo vese vari kundau jo kureremejwa; kuti tipone mukuiyana no kunyarara mukudira Mwari no kugondeka. Ngokuti izvi zvakanaka no zvinoashirika mukuvona kwa Mwari Muponesi wedu; uwo unoda kuti vandhu vese vaponeswe, vagume pakuziva gwinyiso. Ngokuti uripo Mwari umwe, no muiyanisi umwe pakati pa Mwari no vandhu, mundhu uwo ndi Jesu Kristu, uwo wakajipira kuyita muripiri wavo vese; kupupuhwe ngo nguva kwayo. Ukwo kwendakaemesehwa kuyita muchumairi no mupostori (ndinovereketa gwinyiso, andinyepi) no mujijisi wo vo majinja mukugonda na ngo gwinyiso. Ndizvo ndinoda kuti vanarume vakumbire kundau jese, vechimiruja nyara jakacheneswa, kusina ushungu no hasha. Ngokudarozve kuti vanakaji vajinemese ngo zvokufuka zvakasisira, ngo kureremejeka na ngo kunyararisa; haiwa ngo bvuji rakarukwa, no mukore nokuti usanga, nokuti ngo zvokusimira zvinodhura; asi, ngavajinemese ngo izvo zvinosisira vanakaji vanodira Mwari, ngo mishando yakanaka. Mwanakaji ngaajije mukunyarara ngokujipfavisa kwese. Asi anditenderi kuti mwanakaji ajijise, nokuti kutonga mwamuna, asi kuti anyarare. Ngokuti Adhamu wakatanga kusikwa, sure kwazvo, Evha; na Adhamu aazivi kuchengejwa, asi mwanakaji, wachengejwa, wakapinda mukupauka; asi unozoponeswa mukubereka vana, kudari echivangirira mukugonda no rudo no kucheneswa pamwepo no kunyararisa. Izwi iri rinogondeka: Rokuti, kudari mundhu echipshaka mushando wo utungamiriri ukuru, unoemurira mushando wakanaka. Ndizvo kunosisira kuti mutungamiriri ayite usina ndava, ari mwamuna wo mukaji umwe, echijibata, wakangwara mumupinimijo, unoreremejeka, unoashira vapfumba, unoziva kujijisa; usiri chiraja, usikaambani; asi wakapfava, usikaiti hasha, usikadisisi mare; unonasa kutonga muzi wake, uno vana vake vanomupurutana ngokureremeja kwese; (asi kudari mundhu asikakoni kutonga muzi wake, ungazoita mangwaririrenyi chiara cha Mwari?) Asaita uchaamba kutenda, kuti, asajikuja no kuwa mukurashwa kwa dhiyabhorosi. Zve kunodikana kuti ayite wo vanopupura zvakanaka ndiye avo vari kunja kuti asazowa mukushohwa no muravo wa Dhiabhorosi. Ngokudaro vashandi vanosisira kuti vayite vanoreremejeka, vasina mazwi maviri, vasikanyanyi kumwa vhini, vasikakariri mare ine svina; vechibata chakafishika cho kugonda ngo mupinimijo usina ndava. Avo navo ngavatange kuejwa; ngosure vozoita vashandi, kuti vasikashoreki. Vanakaji ngokudaro ngavayite vanoreremejeka, vasikarevi, vanojibata, vanogondeka ngo zviro zvese. Vashandi ngavayite vano mukaji umwe vechinasa kutonga vana vavo no muzi yavo. Ngokuti avo vakanasa kuyita vashandi vanopuwa zina rakareremejeka, no kuchunga kukurutu mukugonda kuri kuna Kristu Jesu. Ndinotara izvi kwouri, ndechigonda kuviya kwouri ngokukasira; asi kuti ndechinonoka mukuvo wakareba, ndinoda kuti muzive kufamba kunosisira kuitwa ngo vandhu mu nyumba ya Mwari, iyo iri chiara cha Mwari unopona no sika no njiki jo gwinyiso. Kunotendehwa kuti chakafishika cho uMwari chikuru; iye wakapangijihwa mu muviri, echipembejwa mu mweya, wakavoneka ngo ngirosi, wakachumaihwa pakati po vo majinja, wakatendwa mu nyika, akaashihwa mu gore mu uthende. Asi Mweya unonanga pambhene kuti ngo mikuvo yo kupejisira vamweni vanozopauka kubva mukugonda, vechipurukira kumweya inopaukisa, no zvijijiso zvo mabzoka. Ngo kujiitisa kwo vanovereketa mazwi omanyepo, vakapiswa mu mwoyo yavo, kudari ngo zvinoitwa ngo simbi inopisa. Vechirambisa kurovora, no kurega zvokuha, zvaakasika Mwari kuti zviashihwe ngo kutenda ngaavo vanotenda no kuziva gwinyiso. Ngokuti zvisikwa zvese zva Mwari zvakanaka, apana chinosisira kuregehwa, kudari chechiashihwa ngo kutenda: Ngokuti chinocheneswa ngo izwi ra Mwari na ngo kukumbira. Kudari wechicherechejisa hama izvi, unozoyita mushandi wakanaka wa Kristu Jesu, wechikojwa ngo mazwi okugonda, no wo chijijiso chakanaka cho wakatevera mbhera zvino. Asi ramba ngano jinopsheruja, no jo harahwa. Asi ujirovejese kudira Mwari. Ngokuti kurovejera mumuviri kunobesera padoko; asi kudira Mwari kunobesera kuzviro zvese, muchigondiso cho kupona kwa zvino, no kunozoviya. Rinogondeka izwi iri rinosisira kuashihwa kakurutu. Ngokuti ngo iyi ndava tinotambujikira no kuhwajihwa, ngokuti gonda redu rakaemeswa kuna Mwari unopona, uri Muponesi wo vandhu vese, kakurutu wo avo vanotenda. Panga no kujijisa izvi. Usatendera mundhu kuti ashore upsha hwako; asi ita chivonero kwo vanotenda, ngo izwi, na ngo kupona kwako, na ngo rudo, ngo kugonda, na ngo kusukika. Gara wechijija, no kupanga, no kujijisa mbhera ndiviye. Usaregejera chipuwo icho chiri mukati mwako, cho wakapuwa ngo kuprofeta, ngo kudihwa kwo nyara jo vakuru. Shingirira kune izvi; ujipire kakurutu kwozviri; kuti kubudirira kwako kuvoneke kwavari vese. Ujingwarire, iwewe no kujijisa kwako. Vangirira kuyita izvi; ngokuti ngokuyita izvi unozojiponesa iwewe na avo vanokuzwa. Usapangira musharuka ngo hasha, asi mupote kudari ndi baba; no majaha mapsha kudari ngo hama; no majimbiya kudari ngo majimayi no vanakaji vapsha kudari ngo hanzvaji, mukusukika kwese. Reremeja shirikaji ijo jiri shirikaji ngo gwinyiso. Asi kudari shirikaji ine vana nokuti vazukuru, ngavatange kupangijira kureremeja kune vo mbhuri yavo, no kupetuja zvakanaka kuvabari vavo; ngokuti ichi chinoashirika mukuvona kwa Mwari. Zvino iye uri shirikaji ngo gwinyiso, ari ega echigonda kuna Mwari, unovangirira kupota no kukumbira usiku no masikati. Asi uwo unojipira kwo zvinodakaja, wakafa achapona. Panga izvi zviro, kuti vayite vasikashoreki. Asi kudari aripo usikangwariri vake, kakurutu avo vo muzi wake, iye wakaramba kutenda, unopinda kushata kuno uwo usikatendi. Usatendera kuti shirikaji itahwe zina isati yapeja makore ari makumi matandhatu; iri mukaji wo mwamuna umwe. Ine mbiri yakanaka yo mishando yakanaka; kudari yakarera vana, kudari yakaashira vapfumba, kudari yakasuka tshoka jo vakacheneswa, kudari yakabesera vanotambujika, kudari yakagwinya kubatirira kumishando yese yakanaka. Asi ramba shirikaji ipsha; ngokuti apo vapshapshana na Kristu, vanozorovohwa; vano ndava ngokuti vakaramba kutenda kwavo kwo kutanga. Zve, vanojija kuyita nungo, vechipepesheka mu nyumba jese; asi vasikateveri kuyita nungo jega, asi kuyita chirevo, no kusikaregi zvo vamweni, vechivereketa zvisikasisiri. Ndizvo ndinodisisa kuti shirikaji ipsha jirovohwe, jibereke vana jingwarire mizi yajo, jisikapi bandu ndau yo kutuka ndiyo. Ngokuti vamwe vatopauka kutevera Sathani. Kudari aripo mutendi une shirikaji ngaajibetsere, kuti chiara chisazoremehwa; kuti chibetsere avo vari shirikaji ngo gwinyiso. Vakuru vanonasa kutungamirira ngavaverengwe kuti vanosisira kureremejwa kwakahwirijihwa, kakurutu avo vanoshanda mushando wo izwi no wo kujijisa. Ngokuti matahwa anoti: “Usazofungira muromo wo n'ombe inopura mbewu.” Zve: “Mushandi unosisira musharo wake.” Usatenda kuashira ndava inopomehwa kuno mundhu kumukuru, kwega apo kwechinangwa ngo zvapupu zviviri nokuti zvitatu. Avo vanoshaisha, uvarambije pamberi po vese, kuti vamweni navo vatye. Ndinokupanga mukuvona kwa Mwari, no kwa Kristu Jesu, no ngirosi jakatsananguhwa, kuti ungwarire izvi usikatsananguri, usikaiti chiro ngo mutsananguro. Usakasira kudira nyara panyezuru pomundhu, usaashijana no vandhu vamweni zvishaishi zvavo: Jingwarire kuti ugare wakasukika. Usamwazve kumwa yega, asi shandisa vhini shomanani ngo ndava yo ndani yako, no yo kuhwara kwako kuzhinji. Zvishaishi zvo vandhu vamweni zviri pambhene, zvinoenda mberi mukutongwa; no vamweni vandhu zvinovatevera ngosure. Ngokudaro iriyo mishando yakanaka iri pambhene; no iyo isikazivi kudaro ayingafishiki. Vese varanda vari pasi po kanga ngavaverenge kuti majimambo avo anosisira kureremejwa kwese, kuti zina ra Mwari no zvijijiso zvisazotukwa. Naavo vano majimambo anotenda vasazoashora, ngokuti ari hama; asi pandauyo vanosisira kuashandira, ngokuti avo vanoashira kudetsehwa vari vatendi no vanodikana. Jijisa no kupanga izvi. Kudari aripo mundhu unojijisa zvijijiso zvakaparajana, asikatendi mazwi ogwinyiso, a Mambo Jesu Kristu, no zvijijiso zvinozwana no kujijisa kwa Mwari, uwo unojikuja, asikazivi chiro, asi unodisisa mubvunjo no hasha jo mazwi, kwo zviri kunobva ndurumwa no hasha, no kutuka, no mipinimijo yakashata, no kukanijana pakati po vandhu vano mipinimijo yakashaishwa, vakarashikihwa ngo gwinyiso, vechikarakaja kuti kudira Mwari iri njira yo kuviyihwa. Asi kudira Mwari pamwepo no kudakara kuri kuviyihwa kukurutu. Ngokuti atizivi kuviya no chiro mu nyika muno, atingatori chiro kuendazve nacho; asi kudari tine zvokuha no zvokufuka, kunosisira kuti tidakare ndizvo. Asi avo vanodisisa kuyita maguruja vanozowa mukuejwa, no mumuravo no mukuemura kuzhinji kwo upenji kunoremaja, zvinondondomeja vandhu mukufa no mukurashwa. Ngokuti kudisisa mare ndiyo miji yo mbewu jese jo kushata; ngokuti vamweni vechiida, vakapaukiswa kubva mukugonda, vakajibaya ngo matambujiko mazhinji. Asi iwewe, mundhu wa Mwari, tiza izvi; utevere kururama, kudira Mwari, kugonda, rudo, kusengerera, kupfava. Ambana kuambana kwakanaka kwo kugonda, batisisa kupona kusikaperi kwo wakadanijihwa, wakatenda kutenda kwakanaka mukuvona kwo zvapupu zvizhinji. Ndinokupanga mukuvona kwa Mwari, uwo unoraramisa zviro zvese, no mwa Kristu Jesu, uwo wakapupura kutenda kwakanaka pamberi pa Pontio Piratu; kuti ungwarire mipango, usina vara, usikashoreki, mbhera kuvoneka kwa Mambo wedu Jesu Kristu. Kwaachazovonisa ngo nguva kwayo, uwo ega Unesimba no muchena, Mambo wo majimambo, no mutongi wo vatongi; uwo ega usikatongofi, unogara mukujeka kusikagumihwi; usikazivi kuvoneka ngo mundhu, aangavonekizve; kwaari ngakuvepo kureremejwa no simba, zvisikaperi, Ameni! Panga avo vari vapfumi mu nyika muno kuti vasajikuja, nokuti kugonda upfumi husikagari, asi kuna Mwari, uwo unotipa kakurutu zvese kuti tidakare ndizvo; kuti vayite zvakanaka, vayite vapfumi kumishando yakanaka, kuti vadakarire kupa vamweni, no kukovana; vechijiunganijira ugaro hwakanaka hwo nguva inoviya, kuti vabatisise kupona ukwo kwo gwinyiso. Iwewe Timoti, ngwarira icho chakagondiswa kwouri, wechifuratira kuvereketa kusina shwiro, no kuramba kuziva zviri zvokunyepa; ukwo kwakatendehwa ngo vamweni, vakapauka kubva mukugonda, nyasha ngajive newe. Pauri, mupostori wa Kristu Jesu ngokuda kwa Mwari, kudari ngo chigondiso chokupona chiri kuna Kristu Jesu, kuna Timoti, mwana wangu unodikana: Nyasha, no kukungurihwa, no kunyarara zvinobva kuna Mwari Baba na Kristu Jesu Mambo wedu ngazvive newe. Ndinobonga Mwari, wo ndinoshandira kubvira kune majibaba angu ngo mwoyo usina ndava, kuti usiku no masikati ndinogara ndechikucherecheja mumikumbiro yangu, ndechisuwira kukuvona, ndechicherecheja masoji ako, kuti ndizariswe ngo kudakara; ndechicherechejiswa ngo kugonda kwo gwinyiso kuri mukati mwako; ukwo kwayiva pakutanga kuna mbiya wako Roisi; no kuna mayi wako Unike kwo ndinoziva kuti kuri kwourizve. Ngo iyi ndava ndinokucherechejisa kuti umusijire chipuwo cha Mwari chiri mukati mwako ngo kudihwa kwo nyara jangu panyezuru pako. Ngokuti Mwari aazivi kutipa mweya wo kutya, asi wo simba, no wo rudo, no wo kujibata. Ndizvo usapsheruka kuyita chapupu cha Mambo wedu, nokuti ndini mubhanditi wake; asi gwinyira matambujiko ngo ndava yo vhangeri kudari ngo simba ra Mwari. Uwo wakatiponesa, no kutidanija ngo kudanijwa kwakachena, kusikazivi kudari ngo mishando yedu, asi kudari ngo kuemesa kwake pachake no nyasha, jakapuwa kwetiri ndi Kristu Jesu nguva jisati javapo. Asi zvino zvakapangijihwa ngo kuvoneka kwo Muponesi wedu Kristu Jesu, uwo wakanyisa kufa, wakazisa kupona no kusikavori mukujeka ngo vhangeri, rendakaemeswa kuyita muchumairi, no mupostori, no mujijisi kweriri; ngo iyi ndava ndinotambujwavo ngo izvi, asi andipsheruki ngokuti ndinomuziva wendakatenda, ndinogonda kuti uno simba rokungwarira chondakapa kwaari mbhera kuzuva iro. Batisisa chivonero cho mazwi akagwinyisiswa owakazwa kwendiri mukugonda no murudo ruri kuna Kristu Jesu. Icho chakanaka chakagondwa kwouri ngwarira ndiye Mweya Wakachena unogara mukati mwedu. Unoziva ichi: Kuti vese vari mu Aziya vakandisiya; pakati pavo ndi Fugero na Herimogenese. Mambo ngaakungurire kune vo mbhuri ya Onesiforo: Ngokuti wakandigwinyisa kazhinji, aazivi kupsheruka ngo ketani jangu; asi apo wayiva mu Roma, wakandipshaka kakurutu, naye wakandiwana. Mambo ngaaite kuti awane kukungurihwa kuna Mambo ngo iro zuva; newe unonasa kuziva kuwanda kwo izvo zvaakandishandira mu Efesu. Ndizvo zvino, mwana wangu, ita wakagwinya munyasha jiri kuna Kristu Jesu. No izvo zvowakazwa kwendiri pamberi po zvapupu zvizhinji, upe iwewe kuvanarume vakagondeka, vanozokonavo kujijisa vamweni. Sengerera kumatambujiko kudari ngo socha rakanaka ra Kristu Jesu. Apana socha mumushando rinojikhodamisa ku mishando yo kupona uku; kuti rimudakajise uwo wakaritara kuti riite socha. No kudarizve mundhu echitsamwirira mumuphikizano, aapuwi junguja kuti asikazivi kuteverera mipango. Murimi unoshanda ndiye unosisira kuyita wokutanga kuashira michero. Pinimija chondinonanga; ngokuti Mambo unozokupa kuzwisisa kuzviro zvese. Cherecheja Jesu Kristu wo ruji rwa Dhavhidha, wakamuka kwo vakafa kudari ngo vhangeri rangu; kweriri ndinosengerera matambujiko mbhera mukusungwa, kudari ngo mushandi wo zvakashata; asi izwi ra Mwari arizivi kusungwa. Ndizvo ndinochungirira zvese ngo ndava yo vakatsananguhwa, kuti vawanevo ruponeso ruri kuna Kristu Jesu pamwepo no uthende husikaperi. Rinogondeka izwi iri; ngokuti kudari takafa pamwepo naye, tinozoraramazve naye; kudari techichungirira tinozotongazve naye; kudari techimuramba, iye unozotirambavo; kudari isisu tisikagondeki, iye unogara echigondeka; ngokuti aakoni kujiramba. Vacherechejise izvi, wechivapanga mukuvona kwa Mambo, kuti vasaita hasha ngo mazwi asikabetseri chiro, asi anopaukisa avo vanozwa. Gwinya kujipira uri unotendeka kuna Mwari, mushandi usikatami kupsheruka, unoruramisa kubata izwi ro gwinyiso. Asi tiza kuvereketa kusina shwiro, ngokuti ivo vanozovangirira mukusikateveri Mwari, no izwi ravo rinozonyeketeka kudari ngo bandwa, pakati pavo ndi Hemeniyo na Firetu; vanarume avo vakapauka kubva mu gwinyiso, vechiti kuti kumuka kwo vakafa kwakatopinda nazvino vanowisira pasi kugonda kwo vamweni. Pikija zvakadaro jiro rakagwinya ra Mwari rinondoima, rine chinamiro ichi chokuti: Mambo unoziva vari vake, zve, mundhu wese unodanija zina ra Mambo ngaabve kwo izvo zvisikazivi kururama. Zvino mu nyumba huru amuna ndiro jega jo mukore no jo sirivha, asizve no jo miti no jo dongo; no jimweni jinoreremejeka, no jimweni jisikareremejeki. Ndizvo, kudari mundhu echizojisuka kubva kuno zvakadaro, unozoyita mujiyo unoreremejeka no wakacheneswa unosisira kushandiswa ngo mune wawo, wakanasirihwa kuyita mishando yese yakanaka. Asi tiza kubva mukuemura kwo vapsha, utevere kururama, kugonda, rudo, kunyarara, pamwepo navo vanokumbira kuna Mambo ngo mwoyo wakasukika. Asi ramba mibvunjo yo upenji no isina kuziva, wechiziva kuti inopara hasha. No muranda wa Mambo akusisiri kuti aite hasha, asi aite wakapfava kwavari vese, unoziva kujijisa, echisengerera, ngokupfava echijijisa avo vanoramba; kuti dangani Mwari ungavapa kutenderuka kuti vazive gwinyiso, zve, kuti vajipokonyose kubva ku muravo wa Dhiabhorosi, wo vayinga vakabatwa ndiwo kuti vayite kuda kwake. Asi ziva ichi: Kuti kumazuva okugumisira nguva jo kutambujika jinozoviya. Ngokuti vandhu vanozojida, vechidisisa upfumi, vechiganza, vechijikuja, vechituka, vasikapurutani vabari, vasikabongi, vasikacheneswi, vasina rudo kuhama, vasikaiyaniswi, vanoreva, vasikajibati, vanotyisa, vanoshora vakanaka, vari vachengejeri, vanomutikizizi, vanojiringaringa, vanopinda kuda mutambo kuno kumuda Mwari; vano chiyimo chokudira, asi vechiramba simba rakwo. Ubve kwavari. Ngokuti vakadari ndivo vanodisisa kunghwina mu nyumba vechichakata vanakaji vari mapenji, vakaremehwa ngo zvishaishi, vechikweviwa ngo kuemura kwakaparajana. Vanogara vechijija, vasikatongogumi mukuziva gwinyiso. Kudari ndi Jani na Jambere vakarwisana na Mosi, ngokudaro avo navo vanorwisana no gwinyiso; vari vandhu vakashaishihwa mu mipinimijo, avana kuzwisisa mukugonda. Asi avazopindi kuenda mberi; ngokuti upenji hwavo hunozova pambhene ku vandhu vese, kudari ngo hwaavozve hwakaita kudaro. Asi iwewe wakatevera kujijisa kwangu, kufamba kwangu, kudisisa, kugonda, kugwinyisira, rudo no kusengerera, kuteverehwa no matambujiko; izvo zvakandigumira mu Antiyoki, no mu Ikoniyo, no mu Ristriya; kutambujika ukwo kwo ndakashingirira, kwozviri zvese Mambo wakandinunurira. Eya navo vese vanoda kufamba ngo kururama kuna Kristu Jesu vanozotambujika. Asi vandhu vakashata no vanochengeja vanozovangirira kupinda kushata, vechichengeja no kuchengejehwa. Asi iwewe gara mu izvo zvowakajija no kugwinyiswa ndizvo, wechiziva uwo wowakajijiswa ndiye. Zve kubvira paudoko hwako, wakaziva Matahwa Akachena ano simba rokuyita kuti ungware kuruponeso kubudikija ngo kugonda kuri kuna Kristu Jesu. Matahwa ese akafemehwa ndi Mwari, anobeserazve kujijisa, kurambija, no kutova, no kupangijira kuri mukururama. Kuti mundhu wa Mwari aite wakaperera, anazvo zvese zvokuyita mishando yese yakanaka. Ndinokupanga mukuvona kwa Mwari, no kwa Kristu Jesu, uwo unozotonga vachazwa no vakafa, mukuvoneka kwake no umambo hwake; chumaira izwi; ugwinyisire ngo nguva kwayo, no isiri nguva kwayo; rambisa, uthuse, upange, ngo kusengerera kwese no kujijisa. Ngokuti inozovapo nguva yo vasikazoshingiriri zvijijiso; asi vano njeve jinovava, vanozojiunganijira vajijisi kudari ngo kuemura kwavo; vanozoreesa njeve javo kubva kugwinyiso, vechienda kungano. Asi iwewe, wechirinda ngo zviro zvese, gwinya kumatambujiko, ita mushando wo muvhangeri, pejisa mushando wako. Ngokuti zvino ndotoduruhwa kuitwa mudiro, no mukuvo wokuenda kwangu waguma. Ndakaambana kuambana kwakanaka, ndakapeja mujaho wangu, ndakangwarira kugonda; kubvira zvino ragajikihwa inini junguja ro kururama, raanozondipa Mambo, mutongi wakarurama, ngo iro zuva; aazondipi ndega, asi no kwavari vese vakada kuvoneka kwake. Gwinya kuviya kwendiri ngokukasira. Ngokuti Dhemasi wakandisiya ngokuda iyi nyika, wakaenda Tesaronika; Kresiki wakaenda Garatiya, Titosi wakaenda Dharamatiya. Ndi Ruka ega uchineni. Tora Marku, uviye naye; ngokuti unondibesa kukurutu kwondiri mumushando. Asi ndakatuma Tukiko ku Efesu. Jazi rondakasiya Trowa na Karpo, uya naro woviya no tshamba kakurutu maphepha omatovo. Arixandreu mupfuri wo matusi wakandishaishira kakurutu, Mambo unozomuhwirijira kudari ngo mishando yake: Newe unosisira kungwara ndiye ngokuti wakakanija kakurutu mazwi edu. Pakujirwira kwangu kwo kutanga apana wakandiimirira, asi vese vakandisiya. Isaita ndava kwavari. Asi Mambo wakandiimirira, akandigwinyisa; kuti masoko ateketeswe aembho ndini nokuti majinja ese azwe; neni ndakanunurihwa kubva kwo muromo wo mbhondoro. Mambo unozondinunurira kubva kumishando yese yakashata, unozondiponesa mbhera ndive mu umambo hwake hwo mu denga: Kwaari ngakuve no uthende mbhera narini. Ameni! Tambisa Prisika na Akwira no mbhuri ya Onesiforo. Erastu wakasara Korinte, asi ndakasiya Trofimu Miretu echihwara. Kasira kuti uviye chipepo chisati chaguma. Yubhuru unokutambisa, na Pude, na Rinu, na Kraudhiya no vatendi vese. Mambo ngaave no mweya wako. Nyasha ngajive newe. Pauri, muranda wa Mwari, no mupostori wa Jesu Kristu, kudari ngo kugonda kwo vakatsananguhwa va Mwari, no kuziva gwinyiso riri ro uMwari, mugonda ro kupona kusikaperi, kwaakagondisa Mwari, uwo usikakoni kunyepa, nguva jisati jaavepo; asi ngo nguva yake wakavonisa izwi rake mukuteketeswa, kwo ndakagondwa ndikwo kudari ngo mupango wa Mwari Muponesi wedu; kuna Titosi, mwana wangu wo gwinyiso, ngo kugonda kwotinakwo tese: Nyasha, kukungurihwa no kunyarara ngazvive kwomuri zvinobva kuna Mwari Baba no kuna Kristu Jesu Muponesi wedu. Ngo iyi ndava ndakakusiya Krete, kuti urongeje izvo zvakasara kuitwa, nokuti uemese vakuru ku madhoropa ese, kudari ngo zvondakakupanga; kudari aripo mundhu usikashoreki, uno mukaji umwe, ano vana vanotenda, vasikaitihwi ndava yo kusikajibata, nokuti vasikapurutani. Ngokuti kunosisira kuti muvonisi aite usikashoreki, kudari ngozvaari mutungamiriri wo nyumba ya Mwari; usina mutikizizi, usikakasiri kucheneka, usikadi vhini, usikarovi, usikadisisi pfuma ina svina; asi unoashira vapfumba, unoiyana no vandhu vakanaka, wakangwara, wakarurama, wakacheneswa, unojibata; echibatisisa izwi rinogondeka kudari ngo zvaakajijiswa, kuti awane simba rokuyita zvese kupanga zvijijiso zvo gwinyiso no kuvanyisa vanoyita hasha. Ngokuti varipo vazhinji vasikapangwi, vanovereketa zvisina shwiro, vanochengeja, kakurutu avo vari vo kuchekwa, avo kunosisira kuti miromo yavo inyarajwe; vari vanarume vanoparaja aembho mbhuri yese, vechijijisa zvisikasisiri, ngo ndava yokuda pfuma ina svina. Umwe wavo wayiva muprofeti wo kwavo, wakati vaKrete vari vanyepi nguva jese, no zvikara zvakashata, vanokara vano nungo. Chapupu ichi chino gwinyiso. Ngo iyi ndava varambije kakurutu kuti vagwinyisire mukugonda, vasikapurutani kungano jo vajudha, no mipango yo vandhu vanofuratira gwinyiso. Kune vakasukika zvese zvakasukika; asi kwavari vakasvipiswa vasikatendi apana chakasukika; asi vese mipinimijo yavo no mwoyo yavo, zvakasvipiswa. Vanopupura kuti vanomuziva Mwari; asi ngo mishando yavo vanomuramba, vechiita vanonyangaja no vasikapurutani, no vasikadetseri chiro kumishando yese yakanaka. Asi iwewe, vereketa zvinosisira zvijijiso zvine gwinyiso. Kuti harahwa jijibate, jechireremejeka, jakangwara, jinogwinyisira mukugonda, no murudo no mukusengerera. No harahwa jo kaji ngokudaro jifambe kudari ngo zvinosisira vakacheneswa, jisikarevi, jisikadi vhini rakawanda, jiite vajijisi vo zvakanaka; kuti jijijise vanakaji vapsha kuda vamuna vavo, no kuda vana vavo, kuti vayite vakangwara, vakasukika, vanongwarira mizi yavo, vano nyasha, vanopfavira vamuna vavo, kuti izwi ra Mwari risazotukwa. Majaha ngokudaro panga kuti aite akangwara. Ngo zviro zvese wechijipangijira uri chivonero cho mishando yakanaka; muzvijijiso zvako wechipangijira kusikavori, no kureremejeka, uno kuvereketa kwakarurama, kusikashoreki, kuti uwo unokanija apsheruke, asava no chiro chakashata chaangavereketa ndisu. Panga varanda kuti vapfavire majimambo avo, no kunasa kuadakajisa ngo zviro zvese, vasikakaniji; vasikabi, asi vechipangijira kugondeka kwese kwakanaka; kuti vanemese zvijijiso zva Mwari Muponesi wedu ngo zviro zvese. Ngokuti nyasha ja Mwari jakavoneka, jinozisa ruponeso ku vandhu vese, jechitijijisa techiramba zvakashata no kuemura zvo mu nyika tipone ngo kungwara no kururama na ngo kutevera Mwari mu nyika muno; techigarira iro gonda rinomuchena, no kuvoneka kwo uthende hwa Mwari wedu mukuru no Muponesi Jesu Kristu; uwo wakajipira ngo ndava yedu kuti atiripire kubva mukushata kwese, nokuti ajichenesere vandhu vayite vake vambhwine, vanotsamwirira kuyita mishando yakanaka. Vereketai izvi, no kuzvipanga no kurambisa ngo simba rese. Usatendera mundhu kuti akushore. Vacherechejise kuti vapfavire kuvatongi no kune vano simba, kuti vapurutane, kuti vanasirihwe kuyita mishando yese yakanaka, kuti vasavereketa zvakashata ngo mundhu, kuti vasaita hasha, vayite vakapfava, vechipangijira kupfava ku vandhu vese. Ngokuti isisuvo ngo pamberi tayiva no upenji, tisikapurutani, techichengejehwa, techishandira kuemura no zvidakajiso zvo nyama zvakaparajana, tine khururu, no ndurumwa, techinyenya, no kunyenyana. Asi apo nyasha ja Mwari Muponesi wedu no rudo rwake ku vandhu zvavoneka, haiwa ngo mishando yakarurama yotakaita isisu, asi kudari ngo uwandu hwo nyasha jake wakatiponesa, ngo kushambijwa kwo kubahwa kupsha, no kumusijihwa ndi Mweya Wakachena, uwo wakadururihwa panyezuru pedu ngo kuwanjisa, ndiye Jesu Kristu Muponesi wedu. Kuti isisu techipembejwa ngo nyasha jake, tiite vanogara ndhaka kudari ngo gonda ro kupona kusikaperi. Iri izwi rinogondeka, ngo ndava yo izvi ndinoda kuti ugwinyisise kuzvinanga, kuti avo vakatenda Mwari vangwarire kuyita mishando yakanaka, izvi zviri zvakanaka zvinobesera ku vandhu. Asi tiza mibvunjo yo upenji no kuverenguja kwo majibaba mukuru; no hasha, no kukanijana ngo ndava yo mipango; ngokuti izvo azvibetseri, azvina shwiro. Mundhu unojijisa zvinopshapshana no gwinyiso, ngosure kwo kumupangira kamwe no kwo chipiri, murambe; wechiziva kuti wakadaro wakapauka, unoshaisha, unojirasha. Apo ndootuma Atema, nokuti Tukiko kwouri, gwinya kuviya kwendiri Nikopori; ngokuti ndakajiemesera kugara apo nguva yo chipepo. Ita zvese zvounokona kubesera Zenani gweta, na Aporo, muhwendo hwavo, kuti kusazovapo chinotamika kwavari. No vandhu veduzve ngavajije kuyita mishando yakanaka kuti vavone zvinosisira, nokuti vasazoita vasina michero. Vese vendinavo vanokutambisa. Tambisa avo vanotida mukugonda. Nyasha ngajive nemwi mwese. Pauri, musungwa wa Kristu Jesu, na Timoti munukuna wedu kuna Firimoni mudikani no unoshanda pamwepo nesu, no kuna Apfiya hanzvaji yedu, na Akipo uri socha pamwepo nesu, no ku chiara chiri mu nyumba yako. Nyasha no kunyarara ngazvive kwouri zvinobva kuna Mwari Baba wedu, no kuna Mambo Jesu Kristu. Ndinobonga Mwari wangu ngo nguva jese, ndechikucherecheja mumikumbiro yangu, ndechizwa ngo rudo rwako no kugonda kwounakwo kuna Mambo Jesu, no kwavari vese vakacheneswa. Kuti kukovera kwo kugonda kwako kushande mukuziva zvese zvakanaka zviri mukati mwedu kuna Kristu. Ngokuti ndinodakara kakurutu no kuembezehwa murudo rwako, ngokuti mwoyo yo vakacheneswa yakagwinyiswa ndiwe, hama. Ndizvo pikija ndino kushinga kwese kuna Kristu kuti ndikupange icho chinosisira, asi ngo ndava yo rudo ndinokupota, inini Pauri musharuka, nazvino ndiri musungwazve wa Kristu Jesu; ndinopota kwouri ngo ndava yo mwana wangu Onesimo, wondakabara mukusungwa kwangu, uwokaretu inga asikabetseri kwouri, asi zvino unobesera iwewe na inini. Ndinomutumira kwouri iye wambwine, ukwo kunoti, uri mwoyo wangu aembho. Wendaida kuti agare neni, kuti andishandire pandau pako mukusungwa ngo ndava yo vhangeri. Asi ndayinga ndisikadi kuyita chiro ngo kunja kwo kutendera kwako; kuti kunaka kwako kusazoita kwo kuvangijihwa, asi ngokuda kwako. Ngokuti pamweni wakaparajaniswa newe nguva doko, kuti ungava naye mbhera narini. Aasiri inga hloko, asi unopinda hloko, ari munukuna unodikana, kakurutu kwendiri, asi kunozopinda kwakaitawani kudaro kwouri, mumuviri no kuna Mambozve. Ndizvo kudari wechindiverenga kuti ndiri shamwari yako, muashire kudari ndini. Asi kudari iye akakushaishira chiro, nokuti ano gava kwouri, tarai icho mumagava angu; inini Pauri ndinotara ichi ngo nyara yangu: Ndinozoaripira. Kuti ndisazoti kwouri iwewe pachako uri gava kwendiri. Eya hama, nditendere kuti ndidakajwe ndiwe kuna Mambo; gwinyisa mwoyo wangu kuna Kristu. Ndechigonda kupurutana kwako ndinotara kwouri, ndechiziva kuti unozoyita no zvimweni kupinda zvondananga. Asizve ndinasirire ugaro; ngokuti ndinogonda kuti ngo mikumbiro yenyu ndinozopihwa kwomuri. Epafrasi, musungwa pamwepo neni kuna Kristu Jesu unokutambisa; ngokudaro na Marku, na Aristaku, na Dhemasi na Ruka vashandi pamwepo neni. Nyasha ja Mambo wedu Jesu Kristu ngajive no mweya yenyu. Mwari, uwo wakavereketa ku majibaba ngo mikuvo yokare, ngo vaprofeti, nguva jakaparajana, na ngo njira jakaparajana, wakavereketa kwetiri mukupera kwo mazuva ano ngo Mwana wake, waakaemesa kugara ndhaka yo zviro zvese, ndiyezve wakayita nyika; iye uri kun'anikira kwo uthende hwake, no wakatojana aembho naye, no kutonga zviro zvese ngo simba ro izwi rake, kwakati apeja kuchenesa zvishaishi, wakagara pasi ngo kumuho kwo Ukuru hwo mugore. Waitwa wakapinda kunaka kuno ngirosi, ngokuti wakagara ndhaka yo zina rakapinda kunaka kuno rajo. Ngokuti ngoyapi ngirosi yaakabvunja nokuti ngouri mukuvo echiti: “Iwewe uri Mwana wangu nyamasi ndakubara? Zve, ndinozoita Baba kwaari, naye unozoita Mwana kwendiri?” Zve, naapo echizisa dangwe mu nyika, unoti: “Ngirosi jese ja Mwari ngajimudire.” Na ngo ndava yo ngirosi, unoti: “Uwu unoyita ngirosi jake jiite mweya, no vashandiri vake kuti vayite murazvu wo muriro.” Asi ngo ndava yo Mwana unoti: “Dendemaro rako, A Mwari, rinogara mbhera narini, no ndonga yo kururama ndiyo ndonga yo umambo hwako. Iwewe wakada kururama, wakanyenya kushata; ndizvo Mwari, Mwari wako wakakuzoja ngo mafuta okudakara kupinda shamwari jako.” Zve: “Iwewe, Mambo, pakutanga wakarajika jiro ro nyika, no matenga ari mishando yo nyara jako. Izvo zvichapera; asi iwewe unogara uripo: Nazvo zvese zvichasakara kudari ngo chokufuka; nokudari ngo jira unozozvipeta, kudari ngo cho kufuka, nazvo zvinozotshandujwa. Asi iwewe unondogara wakadaro, no makore ako aatongozoperi.” Asi ngoyapi yo ngirosi yaakavereketa ndiyo nokuti ngouri mukuvo, echiti: “Gara iwewe ngo kumuho kwangu mbhera ndiite mapandu ako chitambarariro cho tsoka jako?” Ngirosi jese andiyopi mweya inoshandira here, inotumwa kushandira avo vanozogara ndhaka yo ruponeso? Ndizvo kunosisira kuti tipinde kungwarira zvo takazwa, kuti tirege kupauka kubva kwo zviri. Ngokuti kudari izwi iro rakavereketwa ngo ngirosi rakavoniswa, kuti rakagwinya, no kupauka kwese no kusikapurutana zvakaengejehwa ngo kuhwirijihwa kwakasisira. Isisu tingaita mapokonyokerenyi kudari techiregejera ruponeso rukuru rwakadari? Urwo rwakatanga kuvereketwa ndiye Mambo, rukagwinyisiswa kwetiri ndivo vakazwa. Mwari wakapupuravo pamwepo navo, ndizvo zvese, zvivoniso no mishamiso, mushando yakawanda yo simba, na ngo zvipuwo zvo Mweya Wakachena kudari ngokuda kwake. Ngokuti aazivi kuipfavisira kungirosi nyika inoviya, yotinovereketa ndiyo. Asi umwe wakapupura pandau imweni, echiti: “Mundhu uri chinyi kuti ukarakaje ndiye? Nokuti mwana wo mundhu kuti umufambire?” Wakamuita ngo mukuvo mudoko ari pasi kuno ngirosi. Wakamupfeka junguja ro uthende no kureremejwa, ukamuemesa panyezeru po mishando yo nyara jako. Wakapfavisa zvese pasi po tsoka jake. Ngokuti pakudira pasi pake zviro zvese, aazivi kusiya chiro chisikazivi kudihwa pasi pake. Asi zvino atisati tavona kuti zvese zvakadihwa pasi pake. Asi tinomuvona Jesu wakaitwa kwo nguva doko ari pasi kuno ngirosi, ngo ndava yo kutambujika kwo kufa, akapfekeswa junguja ro uthende no kureremejwa, kuti ngo nyasha ja Mwari iye aravire kufa ngo ndava yo mundhu wese. Ngokuti kwakamusisira, iye wakaitira zviro zvese, nokuti ndiye zvese zviripo, mukuzisa vana vazhinji muuthende, apererise mukutambujika uwo uri mutungamiri wo ruponeso rwavo. Ngokuti uwo unochenesa naavo vakacheneswa vari umwe: Ngo iyi ndava, aapsheruki kuvadanija kuti hama, echiti: “Ndinozopangijira zina rako kuvanukuna vangu, ndinozoemba kukuja pakati po chiara.” Zve ndinozogonda kwaari. Zve vona inini, no vana avo vaakandipa Mwari. Ndizvo kwechivoneka kuti vana vakakovanisihwa ngazi no nyama, iye pachake ngokudaro wakakovana navo pano zvakadaro; kuti ngo kufa ungamuita usina shwiro uwo wayiva no simba rokufa, kunoti, Dhiabhorosi. Kuti anunure vese vayiva varanda mukupona kwavo kwese ngokutya kufa. Ngokuti ngo gwinyiso aazivi kuviya kwoobesera ngirosi, asi kubesera mibarihwana ya Abrahama. Ndizvo zvakamusisira kuti aezaniswe no vanukuna vake ngo zviro zvese, kuti aite mupristi mukuru ano nyasha no unogondeka ngo zviro zva Mwari, kuti aripire zvishaishi zvo vandhu. Ngokuti iye ega wakatambujika echiejwa, uno simba rokubesera avo vanoejwa. Ndizvo hama jakacheneswa, jinoashiravo kudanijwa kwo mugore, pinimijanyi ngo Mupostori no Mupristi Mukuru wo kutenda kwedu, ndiye Jesu. Uwo waigondeka kwaari wakamuemesa, kudarizve ndi Mosi waigondeka mu nyumba yake yese. Ngokuti iye wakaverengwa unosisira kureremejwa kupinda Mosi, ngokuti uwo wakavaka nyumba unopinda kureremejwa kuno nyumba pachayo. Ngokuti nyumba jese jinovakiwa ngo mundhu; asi uwo wakavaka zvese ndi Mwari. Na Mosi ngo gwinyiso waigondeka mu nyumba ya Mwari yese kudari ngo muranda, kuyita chapupu cho izvo zvaaizovereketa sureni. Asi Kristu waigondeka kudari ngo mwana panyezuru po nyumba yake; nesu tiri nyumba yake kudari techibatisisa mbhera pakugumisira kushinga kwedu no gonda rotinokuja ngo ndava yaro. Ndizvo kudari ngo zvounovereketa Mweya Wakachena: “Nyamasi kuti mwechizwa izwi rake, musakonjisa mwoyo yenyu kudari ngo nguva yo kumukira, kudari ngo apo pazuva ro kuejwa mu bani, paakandieja majibaba enyu echindinesa, akavona mishando yangu makore ari makumi marongomuna. Ndizvo ndakanyangajwa kuno ruji urwu, ndikati: Vanogara vechipauka mumwoyo yavo, asi avasati vaziva njira jangu; kudari ngo zvo ndakapika mukunyangajwa kwangu, kuti avazonghwini mukuzorora kwangu.” Ngwaranyi hama kuti musazova no mwoyo wakashata usikatendi mukati mwo umwe wenyu ngo kuhwirira sure kubva kuna Mwari unopona. Asi pangananyi mazuva ngo mazuva, kuchadanijwa kuti: Nyamasi; kuti asazovapo umwe wenyu unokonjiswa ngo kuchengeja kwo kushaisha. Ngokuti isisu takaitwa vaashiri va Kristu, kudari techibatisisa kuamba kwo kugonda kwedu mbhera pakugumisira: Apo kuchanangwa kuti: Nyamasi kudari mwechizwa izwi rake, musakonjisa mwoyo yenyu, kudari ngo nguva yo kumukira. Ngokuti ndiyani avo vakazwa, vakamukira? Andivopi vese here vakabudiswa Egipite ndi Mosi? Ndiyanizve vaakachenekera makore ari makumi marongomuna? Andivopi avo vakashaisha here, miviri yavo vakafira mu bani? Wakapikazve kunani kuti avazonghwini mukuzorora kwake, asi kwavari vayiva vasikamupurutani? Nesu tinovona kuti avasaikona kunghwinemwo ngo ndava yo kusama kutenda. Ndizvo, kudari ngo zvechiripo chigondiso cho kunghwina mukuzorora kwake, ngatingware kuti kusazovapo umwe wenyu ungavoneka echikorera kugumira kwechiri. Ngokuti ngo gwinyiso tayiva no vhangeri rakachumaihwa kwetiri, kudari ndivo: Asi izwi rokuzwa arizivi kubesera, ngokuti arizivi kusonganiswa pamwepo no kugonda kuna avo vakarizwa. Ngokuti isisu takatenda tinonghwina mukuzorora ukwo, kudari ngo zvaakavereketa, echiti: Kudari ngo zvondakapika muushungu hwangu, avazonghwini mukuzorora kwangu, pikija mushando yayinga yakapejwa kubvira mukuemeswa kwo nyika. Ngokuti iye wakavereketa kudari kundau imweni ngo ndava yo zuva ro chinomwe, kuti Mwari wakazorora ngo zuva ro chinomwe kubva kumishando yake yese; no kundau inozve, avazonghwini mukuzorora kwangu. Ndizvo kwechivoneka kuti kwasarira kuti vamweni vanghwinemwo, naavo kwavari kwakachumaihwa masoko akanaka kare vakakorera kunghwinemwo ngo kusikapurutana. Unoemesazve, zuva rakatikuti, echinanga ndi Dhavhidha kuti: “Nyamasi”, ngosure kwo mukuvo wakareba kudari, kudari ngo zvakavereketwa kare: “Nyamasi kudari mwechizwa izwi rake, musakonjisa mwoyo yenyu.” Ngokuti kudari Joshua ayinga avapa kuzorora, iye asaizovereketa sureni ngo zuva rimweni. Ndizvo kuchavapo kuzorora kwo sabatha ro vandhu va Mwari. Ngokuti iye wakanghwina mukuzorora kwake wakazororavo kumishando yake, kudari ngo zvaakaita Mwari kuno yake. Ndizvo ngativangirire kunghwina mukuzorora ukwo, kuti kusazovapo mundhu unozowa kutevera icho chivonero cho kusikapurutani. Ngokuti izwi ra Mwari rinopona, rinoshanda, rinopinja kupinda shoti ino upanga huviri. Inobaya mbhera kuparajane mwoyo no mweya, zvese ndhengo no mwongo, no kuzwisisa zvinotendwa no zvinorangarihwa mumwoyo. Apana chisikwa chisiri pambhene mukuvona kwake: Asi zviro zvese zviri pambhene no kubewurihwa kumajiso ake uwo wotinodavira kwaari. Ndizvo techiva no mupristi mukuru, wakapinda mumatenga, uri Jesu Mwana wa Mwari, ngatibatisise kutenda kwedu. Ngokuti atina mupristi mukuru akadi asikakoni kutizwira urombo pakurembejeka kwedu; asi tina uwo wakaejwa ngo njira jese kudari ndisu, asina zvishaishi. Ndizvo, ngatikwedere ngo kushinga kudendemaro ro nyasha, kuti tiashire nyasha no kuwana nyasha jo kubetsera ngo mukuvo wo kutama. Ngokuti mupristi wese mukuru, wakatshananguhwa kubva pakati po vandhu, unoemesehwa vandhu kuyita zviro zva Mwari, kuti apire zvese zvipo no midiro ngo ndava yo zvishaishi: Uwo ungakona kuzwira urombo kuna vasikazivi, no vanopauka, ngokuti iye pachake wakatendenejwavo ngo kurembaremba. Ngo iyi ndava, unosisira kuti apire midiro ngo ndava yo zvishaishi zvake, kudari ngo zvaanopira ngo ndava yo vandhu. Akuna mundhu unojitorera ukwo kureremejwa, asi uwo unodanijwa ndi Mwari, kudari ndi Aroni. Ngokudaro Kristu naye aazivi kujikuja ngokuita mupristi mukuru, asi uwo wakavereketa kwaari, kuti: “Iwewe uri Mwana wangu, Nyamasi ndakubara.” Kudari ngo zvaakanangazve kundau imweni, kuti: “Iwewe uri mupristi mbhera narini ngo kutevera ruji rwa Merekizedheki.” Uwo ngo mazuva okupona kwake munyama wakakumbira mikumbiro no kupota ngo kuchema kakurutu na ngo masoji kwaari wayiva no simba ro kumuponesa kubva mukufa, naye wakazwika ngo ndava yo kumutya Mwari. Pikija wayiva Mwana, asi wakajija kupurutana ngo izvo zvaakatambujika ndizvo; naapo ayinga aperera, wakayita muambi wo kuponeswa kusikaperi kwavari vese vanomupurutana, adujwa ndi Mwari kuti uri mupristi ngo kutevera ruji rwa Merekizedheki. Wetino zvakawanda zvo kunanga ndiye, no zvinonesa kuzvidurujira, ngokuti kwechivoneka kuti muri vandhu vasikakoni kuzwisisa. Kwechivoneka kuti mwaisisira kuyita vajijisi, zvino munodazve kuti umweni amujijise imwimwi kuamba kwo zvijijiso zvo kutanga zvo mazwi a Mwari; mwatoita vanosisira mukaka, haiwa kuha kwakagwinya. Ngokuti mundhu wese unomwa mukaka aazwisisi izwi rokururama; ngokuti uchiri mwana mudoko. Asi kuha kwakagwinya ngo kwo vakuru, vakarovejera kuzwisisa zvakanaka no zvakashata. Ndizvo ngatichiregere kuvereketa ngo zvijijiso zvokuamba zva Kristu, ngatichitsamwirire kuenda mberi kuyita vakaperera; tisikarajikizve jiro ro kutenderuka kubva kumishando yakafa, no yo kugonda kuna Mwari, no kuchijijiso chokubhapatiswa, no kudihwa nyara, no kwo kumuka kwo vakafa, no kwo kutongwa kwo mbhera narini. No izvi tinozozviita kudari Mwari echitendera. Ngokuti ngo ndava yo avo vakambojekiswa no kuravira chipuwo cho mugore, vechiitwa vanoashira Mweya Wakachena, vakaravira izwi rakanaka ra Mwari, no masimba onguva inoviya, kudari vechihwirira sure, akungaitiki kuvatenderujazve; kwechivoneka kuti vanokohomerazve Mwana wa Mwari vechimupsheruja pambhene. Ngokuti nyika inomwirira mvura inona kazhinji panyezuru payo, kudari yechibereka mirivo inosisira avo voyakarimihwa, inoashira chidakajiso chinobva kuna Mwari. Asi kudari yechibereka minzwa no marukato, inorashwa no kutukwa; magumisiro ayo ari okupiswa. Asi vanodikana, tinoongwa kuti imwimwi munozova no zvakapinda kunaka, no izvo zvinozwirana no ruponeso, pikija tinovereketa kudaro. Ngokuti Mwari aasiri usikazivi kururama akadi kuti akanganwe mushando wenyu, no rudo rwo mwakapangijira kuna zina rake, ngo izvo kuti mwakashandira vakacheneswa, kudari munondovashandira nazvino. Nesu tinodisisa kuti umwe naumwe wenyu apangijire kutsamwirira kwakadaro kuno kugonda kwakazarisika mbhera mukugumisira. Zve kuti musava no nungo, asi kuti muejerere ngo kugonda no kusengerera avo vanogara ndhaka yo zvigondiso. Ngokuti Mwari apo aita chigondiso kuna Abrahama, wakapika ngokwake ngokuti inga pasina uri mukuru wokuti apike ndiye. Echiti: “Ngo gwinyiso ngokudakajisa, na ngo kuwanja ndinozokuwanjisa.” Ngokudaro echishingirira wakaashira chigondiso. Ngokuti vandhu vanopika ngo mukuru: No mbhiko inopeja hasha jese kuti igwinye. Ngo izvi Mwari, echida kupangijira aembho kuno vanogara ndhaka, yo chigondiso, kuti icho chaakapanga achingatshandujwi, wakachigwinyisa ngo mbhiko. Kuti ngo zviviri zvisina kutshandujwa, ndizvo akungaitiki kuti Mwari anyepe, tiwane kushinga kwakagwinya, isisu takatiza kubatisisa kugonda rakadihwa pamberi pedu; iro retinaro kuyita nanga yo mweya, gonda rine gwinyiso rakagwinya rinonghwina kwo icho chiri mukati mwo jira; apo mutungamiri wakanghwinemwo ngo ndava yedu ndi Jesu, ayinga amboita mupristi mukuru mbhera narini ngokuti uri wo ruji rwa Merekizedheki. Ngokuti uwu Merekizedheki, mambo wo Saremi, mupristi wa Mwari uri panyezuru po zvese, wakashongana na Abrahama, echipetuka kubva kwoouraya majimambo, wakamudakajisa, kwaarizve Abrahama wakapa chimwe chogumi chazvo zvese; unozwi kutanga mukukumuchwa, Mambo wo kururama sure kwo ukuzve unozvi Mambo wo Saremi, kunanga kuti, Mambo wo kunyarara; asina baba, asina mayi, asina mubarihwana, asina kutanga kwo mazuva nokuti magumo endaramo, asi wakaitwa kudari ndi Mwana wa Mwari, iye unogara ari mupristi nguva jese. Zvino pinimijanyi ngo kukura kwo uwu mundhu, uwo wakapuwa ndi Abrahama, baba mukuru chimwe chogumi cho izvo zvaakachakata zvaipindisisa kunaka. Ngo gwinyiso avo vo mbhuri ya Revhi vanoashira mushando wo upristi, vano mupango wokuti vatore chogumi ku vandhu kudari ngo mupango, unoti ku hama javo, pikija vakabva mu chiunu cha Abrahama. Asi uwu mubarihwana wake usikazivi kuverengwa ruji rwake kwavari, wakatora chogumi kuna Abrahama, akamudakajisa wayiva no zvigondiso. Asi akuna kukanija kuti mudoko unokomborehwa ngo uwo uri mukuru. No pano, vandhu vanofa vanoashira chimwe chogumi; asi kwakapupuhwa ndiye kuti unorarama. Ngokudaro, Revhiwo unoashira chogumi, akapavo chogumi Abrahama. Ngokuti iye wayinga achiri mu chiunu cha baba wake, pakushongana kwa Merekizedheki naye. Zvino kudari kwayivapo kuperera ngo upristi wa Revhi (ngokuti pasi pahwo vandhu vakaashira mipango) kwachaisisira ngenyi kuti kuvepo umweni mupristi ngo kutevera upristi hwa Merekizedheki, asiri hwo ruji rwa Aroni? Ngokuti upristi hwechitshandujwa kwaisisira kuti mipango itshandujwevo. Ngokuti iye wo zvinovereketwa ndiye izvi uri wo jinja rimweni, kubvira kweriri akuna mundhu wakamboshanda paaltari. Ngokuti zviri pambhene kuti Mambo wedu wakabva kujinja ra Judha; ngo iri jinja Mosi aazivi kuvereketa chiro ngo ndava yo vapristi. Nakwo kunonasa kuyita pambhene, kudari kwechimiruka mupristi umweni ngo kutevera muemo wa Merekizedheki. Uwo usikazivi kuitwa kudari ngo mutemo wo mupango wo nyama, asi wakaitwa ngo simba ro kupona kusikaperi. Ngokuti iye unopupurihwa kuti: “Iwewe uri mupristi wo mbhera narini wo ruji rwa Merekizedheki.” Ngokuti mupango wokutanga unoregehwa ngo ndava yo kutama simba nokuita usina shwiro, (ngokuti mupango auzivi kuyita chiro nachimwe kuti chiperere) no kuzisa pandau yawo gonda rakapinda kunaka, ndiro tinokwedera kuna Mwari. Kwechivoneka kuti uwo aazivi kuyita mupristi pasina mbhiko. (Ngokuti ivo ngo gwinyiso vakaitwa vapristi ngo kunja pasina mbhiko; asi iye ngo kupika kwake wakati kwaari: “Mambo wakapika aazokunukuki, Iwewe uri mupristi mbhera narini”); kudari ngo kuwanda kwakadaro Jesu wakaitwa chibatiso cho chitenderano chakapinda kunaka. Ngo gwinyiso ivo vayiva vapristi vazhinji, ngokuti vanorambiswa kuvangirira ngo ndava yo kufa. Asi uwo, ngokuti unogara mbhera narini, uno upristi hwake usikapindujwi. Ndizvozve, uno simba ro kuponesa aembho avo vanokhwedera kuna Mwari ndiye, kwechivoneka kuti unorarama mbhera narini kuti avakumbirire. Ngokuti mupristi wakadari ndiye wotaitama, wakachena usina kuchengeja, usina chinosvipisa, wakaparajana no vashaishi, wakaitwa ari wakapinda kukura kuno matenga; uwo usikatami kupira midiro zuva ngo zuva kutanga ngo ndava yo zvishaishi zvake, na ngo sure ngo ndava yo zvishaishi zvo vandhu, kudari ngo zvo vakayita avo vapristi vakuru: Ngokuti wakayita ichi kamwe kwega, apo ajipira pachake. Ngo mipango vandhu vakarembejeka vakaemeswa kuyita vapristi vakuru; asi izwi ro mbhiko, rayivapo ngo sure kwo kupihwa kwo mipango, rakaemesa Mwana wakaperera mbhera narini. Zvino ndava huru yo izvi zvo tinovereketa ndizvo nga iyi, kuti tino mupristi mukuru wakadaro, wakagara pasi ngo kumuho kwo dendemaro, ro Ukuru wo matenga. Ari mushandi wo zvakachena no wo tende ro gwinyiso, raakavaka Mambo, haiwa mundhu. Ngokuti mupristi wese mukuru unoemesehwa kupira zvese zvipo no midiro. Ndizvo kunosisira kuti uwu mupristi naye anachovo cho kupira. Zvino kudari ayiva mu nyika, aasaizoita mupristi, kwechivoneka kuti varipo avo vanopira zvipo kudari ngo zvinonanga mipango; avo vanoshandira izvo zviri muezaniso no bvute ro izvo zvomugore, kudari ndi Mosi wakapangwa ndi Mwari apo woda kuyita tende; ngokuti unoti. “Ngwara kuti uite zvese kudari ngo chivonero cho ndakakupangijira pa dundhu.” Asi zvino iye wakaashira mushando wakapindisisa kunaka, ngo uwandu wakadarozve uri muiyanisi wo chitenderano chakapinda kunaka, chakaemeswa panyezuru po zvigondiso zvakapinda kunaka. Ngokuti kudari chitenderano chokutanga chainga chakaperera, akusaizopshakwa ndau yochipiri. Asi unovaitira ndava, echiti: Vona, mazuva anoviya, unonanga Mambo, okuti ndinozoita chitenderano chipsha no nyumba ya Israeri no ya Judha; haiwa chakadari ngo icho chondakaita no majibaba avo ngo zuva rondakavatora ngo nyara kuvatungamirira kubuda mu nyika yo Egipite; ngokuti avazivi kugara muchitenderano changu, neni andizivi kupinimija ndizvo, unonanga Mambo. Ngokuti ichi ndicho chitenderano chendinozoita no vonyumba ya Israeri ngosure kwo mazuva ao, unonanga Mambo; Ndinozodira mipango yangu mu mipinimijo yavo, ndinozoitara mumwoyo yavozve; neni ndinozoita Mwari wavo, navo vanozoita vandhu vangu. Mundhu wese aazojijisi shamwari yake, no mundhu wese hama yake, echiti: Zivai Mambo. Ngokuti vese vanozondiziva, kubvira kumudoko mbhera kumukuru wavo. Ngokuti ndinozoitira nyasha zvinonyangaja zvavo, no zvishaishi zvavo andichazozvicherecheji. Ngo kunanga kuti: Chitenderano chipsha, ngokudaro wakachiita chokutanga chisharuka. Asi icho chakaita chisharuka, no kusakara, chaa phedo pokurova. Zvino no chitenderano chokutanga chayiva no mitemo yo kudira Mwari, no ndau yacho yakachena iri yo nyika ino. Ngokuti rayivapo tende rakanasirihwa, ndau yaro yokutanga yayiva no chigajikiro cho chibani, no tafura, no zvimanda zvinopangijihwa yaidanijwa kuti, Ndau Yakachena. Na ngosure kwo chichitiro chochipiri, yayiva ndau yo tende inodanijwa kuti, Yakapindisisa Kuchena. Rino ndiro yo mukore yo kupisira mutombo unonuhira no bhokisi ro chitenderano rakasetwa ngo mukore, mukati mwaro mwayiva no hari yo mukore ino mana, no ndonga ya Aroni yakatumbuka maruva, no mapuwe akatahwa chitenderano; no panyezuru paro payiva no makerubhi outhende echifukigira chigaro cho nyasha; zvetisingavereketi ndizvo zvino chimwe nga chimwe. Zvino izvi zvechinasirihwa kudaro, vapristi vaigara vechinghwina kundau yokutanga yo tende vechiita mishando ya Mwari: Asi kundau yochipiri yo tende kwainghwina mupristi mukuru ari ega, kamwe ngo gore, asikanghwini asina ngazi, yaakapira ngo ndava yake, na ngo ndava yo zvishaishi zvo vandhu. Mweya Wakachena wechivonisa ichi, kuti njira yo kunghwina mundau yakachenesesa inga isati yapangijihwa, ngo mukuvo tende rokutanga richakaima. Ichi chiri muezaniso wo mukuvo wo nguva inoviya; yovanopira ndiyo zvese zvipo no midiro, zvisikakoni kuyita kuti mwoyo wo unodira uperere. Ngokuti zvayiva zviemeso zvega zvo nyama zvokuha no zvokumwa, no kuchenesa kwakaparajana, zvakaemeswa mbhera kuguma kumukuvo wo kutshandujwa. Ngokuti Kristu aviya, ari mupristi mukuru wo zviro zvakanaka zvichaviya, wakanghwina ngo mutende rakapinda kukura, no kuperera, risikazivi kuitwa ngo nyara, kunoti, andiropi rokusikwa uku, zve, aanganghwini ngo ngazi yo mbuji no yo makonyana, asi ngo ngazi yake, wakanghwinemwo kamwe kwega mundau yakachenesesa, akatiwanira kuripihwa kusikaperi. Ngokuti kudari ngazi yo mbuji noyo mikono, no marota otshiru zvechifafazwa kwavari vakasvipiswa, zvechivachenesa kuti nyama isukike: Ngazi ya Kristu inozopinda kwakaitawani, iye ngo mweya wo mbhera narini wakajipira ari usina ndava kuna Mwari, kuchenesa mwoyo yedu kubva kumishando yakafa, kuti tishandire Mwari unopona. Ngo iyi ndava, iye uri muiyanisi wo chitenderano chipsha, kuti kufa zvo kwakaviya kuvaponesa kuzvishaishi zvavo vayiva pasi po chitenderano chokutanga, kuti avo vaidanijwa vangaashira chigondiso cho ndhaka isikaperi. Ngokuti apo pano tshamba yo kukovanisa ndhaka, kunosisira kuti kuvapo pakutanga kufa kwo uwo wakaitara. Ngokuti tshamba yo kukovanisa ndhaka ino simba apo mundhu uwo afa: Ngokuti ingatongoita ino simba here apo uwo wakatara achapona? Ndizvo no chitenderano chokutanga achizivi kugwinyiswa pasina ngazi. Ngokuti apo mipango yese yayinga yavereketwa ndi Mosi ku vandhu vese kudari ngo mipango, iye wakatora ngazi yo makonyana no yo mbuji, pamwepo no kumwa no hombore yo mamviri akapshuka, no hisopi, wakafafazira tshamba no vandhu vese, echiti: “Iyi iri ngazi yo chitenderano chomwakapangihwa ndi Mwari.” Zve, wakafafazira tende no ndiro jese jo mushando ngokudaro ngo ngazi. Ndingananga kuti inga zviro zvese pasi po mupango zvinocheneswa ngo ngazi, na ngo kunja po kuparaja ngazi akuna kuregerehwa. Ndizvo kwaisisira kuti zvivonero zvo izvo zviri mugore zvisukwe ngo izvi; asi zviro zvo mugore pachazvo zvinocheneswa ngo midiro yo kupinda kunaka kuno izvi. Ngokuti Kristu aazivi kunghwina kundau yakachenesesa, yakaitwa ngo nyara, yakadari ngo chivonero cho gwinyiso; asi wakanghwina mugore pacharo, kuti zvino avoneke pamberi po hope ya Mwari ngo ndava yedu: Zve, akusisiri kuti ajipire kuyita mudiro kazhinji, kudari ngo zvaainghwina mupristi mukuru kundau yakachenesesa gore ngo gore ano ngazi isiri yake akadi, kuti zvakadaro kwaisisira kuti atambujike kazhinji kubvira mukuemeswa kwo nyika; asi zvino pakugumisira kwo nguva iye wakapangijihwa kamwe kuti abvise zvishaishi ngo kujipira kuyita mudiro. Ngokuti kudari ngo zvo kwakaemesehwa ku vandhu kufa kamwe no sure kwakwo kutongwa; ngokudaro Kristu wakapihwa kamwe kuti atware zvishaishi zvo vazhinji; unozovoneka ngo kwo chipiri asikatwari zvishaishi kwavari vanomugarira, kuvaponesa. Ngokuti mipango ino mumvuri wega wo zviro zvakanaka zvinoviya, andizvopi zviri muemo wazvo, aingatongoiti kuti vaperere avo vanokwedera ngo midiro imweyo inopihwa gore ngo gore. Kudari zvayinga zvakadaro aisaizoregerwa kupihwa here, ngokuti vadiri, apo vayinga vambosukwa kamwe, avachaizova no mupinimijo yo kushaisha? Asi kumudiro iyo kuripo kucherechejwa kwo zvishaishi gore ngo gore. Ngokuti akungaitiki kuti ngazi yo mikono no yo mbuji ibvise zvishaishi. Ndizvo apo aviya mu nyika wakati: “Mibairo no zvipo iwewe auzivi kuzvida, asi wakandinasirira muviri.” Iwewe audakariri mibairo yo kupisa no mibairo yo zvishaishi: Ndizvo ndakati: “Vona, ndaviya (mubhuku rakapetwa kwakatahwa kudaro ndini) kuti ndiite kuda kwako, A Mwari.” Zvaakananga pakutanga kuti: “Mibairo no zvipo no mbewu jese jo midiro no mibairo yo zvishaishi auzivi kuzvida, zve, audakari ndizvo”, (izvo zvinopihwa ngo kutevera mipango). Sure kwouku wakati: “Vona, ndaviya kuti ndiite kuda kwako.” Unobvisa icho chokutanga kuti agwinyisise chochipiri. Ngo ukwo kuda takacheneswa ngo kupihwa kwo muviri wa Jesu Kristu kamwe kwega. No mupristi wese ngo gwinyiso unoyima zuva ngo zuva echindoshanda, echipira kazhinji midiro inotojana, isikatongokoni kubvisa zvishaishi. Asi iye apo ayinga apira mudiro umwe wo mbhera narini ngo ndava yo zvishaishi, wakagara ngo kumuho kwa Mwari; kubvira ngo uwo mukuvo echiringira kumbhera vakorore vake vaitwe chitambarariro cho tsoka jake. Ngokuti ngo kupira mudiro umwe iye wakavaita vakaperera mbhera narini avo vakacheneswa. No Mweya Wakachena unoyita uchapupu kwetiri, ngokuti ngo sure iye wakati: “Ichi ndicho chitenderano chendinozoita navo ngo sure kwo mazuva ao, Mambo unonanga: Ndinozodira mipango yangu mu mwoyo yavo, ndizoitara mu mipinimijo yavo, no zvishaishi zvavo no zvinyangajo zvavo andichazozvicherecheji.” Zvino apo pano kuregerehwa kwo izvi, akuzovapo mudiro umweni ngo ndava yo kushaisha. Ndizvo hama, techiva no kushinga kwokunghwina kundau yakachena ngo ngazi ya Jesu, ngo njira ipsha no inopona, yaakatibewurira, kubudikija ngo jira ro chichitiro, ndikwo kunoti ngo nyama yake; techiva naye mupristi mukuru panyezuru po nyumba ya Mwari, ngatikwedere tino mwoyo uno gwinyiso, mukugonda kwakazarisika, tino mwoyo yedu yakafafazwa kubva kumikarakajo yakashata, no miviri yedu yakashambijwa ngo kumwa yakadora. Ngatibatisise kutenda kwo gonda redu, tesikazungunyiswi; ngokuti unogondeka uwo wakagondisa. Zve, ngatikarakajane kumusirana rudo no kuyita mishando yakanaka; tisikaregi kuungana pamwepo kudari ngo muitiro wo vamweni, asi techipangana; kakurutu aembho apo munotovona kuti zuva rinokwedera. Ngokuti kudari techizoshaisha ngo kuda kwedu, ngo sure kwo kuashira kuzwisisa gwinyiso, akuchinazve mibairo ngo ndava yo zvishaishi. Asi kwasara kugarira ngokutya kutongwa, no muriro uno ushungu unozopeja mapandu. Mundhu uwo wakashora mutemo wa Mosi unofa, asikaitihwi nyasha, kwega ngo izwi ro zvapupu zviviri nokuti zvitatu: Unozosisira kupangihwa kwakaitawani kupindisisa kukura, uwo wakatshikatshika pasi potsoka Mwana wa Mwari, akaverenga ngazi yo chitenderano, yaakacheneswa ndiyo kuti iri chiro chisina shwiro, akaita ngo kushora Mweya wo nyasha? Ngokuti tinomuziva uwo wakananga kuti: “Kuhwirijira ngo kwangu, inini ndinozohwirijira. Zve, Mambo unotonga vandhu vake.” Chiri chiro chinotyisa kuwira munyara ja Mwari unopona. Asi cherechejanyi kumazuva okutanga, ao ngo sure kwo kujekiswa kwenyu, mwakashingirira kurwisana kakurutu kwo kutambujika; pamweni mwakaringihwa ngo ushungu no kupsherujwa no kutambujwa; pamwenizve mwakakovanisirana naavo vakaitihwa zvakadaro. Ngokuti mwakazwira urombo avo vayiva vakasungwa, mwakadakara mukushaishihwa kwo ndhumbi jenyu, mwechiziva kuti imwimwi pachenyu muno ndhaka yakapinda kunaka no inogara. Ndizvo musarasha kushinga kwenyu, ukwo kuno musharo mukurutu. Ngokuti munosisira kuva no kusengerera, apo mwaita kuda kwa Mwari, mungaashira chigondiso. “Ngokuti kwasara mukuvo mudoko, uwo unoviya, unozoviya, aanonoki. Asi wakarurama wangu unozorarama ngokugonda; nokudari echihwirira sure, mwoyo wangu auzovi no kudakara kwaari.” Asi isisu atiripi vo avo vanohwirira sure kuenda mukurashwa, asi tiri vo avo vanokugonda kwo kuponeswa kwo mweya. Zvino kugonda kuri kutenda aembho izvo zvinogarihwa, chivoniso cho zviro zvisikavoneki. Ngokuti ngo ndava yakwo vo karetu vakapupurihwa zvakanaka. Ngo kugonda tinozwisisa kuti nyika jakasikwa ngo izwi ra Mwari, kuti izvo zvinovoneka azvizivi kuitwa ngo izvo zviripo. Ngo kugonda Abhera wakapa kuna Mwari mudiro wakapinda kunaka kuno wa Keni, ndikwo kwakapupurihwa kwaari kuti wayiva wakarurama, Mwari echipupura ngo ndava yo zvipo zvake: Ndikwo iye atori wakafa, uchandovereketa. Ngo kugonda Enoki wakatohwa kuti asavona kufa; naye aazivi kuvoneka, ngokuti Mwari ayinga amutora; ngokuti inga asati atohwa kwakapupuhwa ndiye kuti wakanasa kudakaja Mwari: Asi pasina kugonda azvingaitiki kumudakaja, ngokuti uwo unoviya kuna Mwari, kunosisira kuti atende kuti uriyo, zve, kuti uri mupi wo avo vanomupshaka. Ngo kugonda Noa, echipangwa ndi Mwari ngo ndava yo izvo zvayinga zvisati zvavoneka, echimutya Mwari, wakanasirira ngarava kuti vo nyumba yake vaponeswe; ndikwo wakaitira ndava nyika, wakayita unogara ndhaka yo kururama kuri ngo kugonda. Ngo kugonda Abrahama, apo adanijwa, wakapurutana ngo kubuda kuenda kundau yaaizoashira kuyita ndhaka; naye wakabuda kuenda, asikazivi paaiyenda. Ngo kugonda wakayita chigarandimo mu nyika yaakagondiswa, kudari ngouri mu nyika isiri yake, echigara mumatende, pamwepo na Isaka na Jakobe, vagari vo ndhaka naye yo chigondiso chimwecho. Ngokuti wairingira dhoropa rine majiro, Mwari uri muvaki no muiti waro. Ngo kugonda Sara pachake wakaashira simba rokuva no mimba apo aamusharuka, ngokuti wakamuverenga ari unogondeka uwo wakagondisa: Ndizvozve vakabahwa kubva kuno umwe, naye wakayita unonga wafa, vakawanda kudari ngo uwandu hwo ndhondo yo mugore, no kuwanda kudari ngo uwandu hwo musanga uri mumbhiripiri mwo jombe, usikaverengeki. Ava vese vakafa mukugonda, vasikazivi kuashira zvigondiso, asi vakazvivona, vakazvichingamija zviri ndhambo, vechitenda kuti vari vapara no vafambi mu nyika. Ngokuti avo vanonanga zvakadaro vanovonisa kuti vanopshaka nyika yavo aembho. Ngo gwinyiso kudari vaikarakaja nyika yo vakabuda kwo iri, vaizova no mukuvo wo kuhwirireyo. Asi zvino vanodisisa nyika yakapinda kunaka, ukwo kunoti, yo mugore: Ndizvo Mwari aana nyowa ndivo kudanijwa kuti uri Mwari wavo, ngokuti wakavanasirira dhoropa. Ngo kugonda Abrahama, echiejwa, wakapira Isaka kuyita mudiro: Eya, uwo wakaashira ngo kudakara zvigondiso, akapira mwana wake wakabahwa ari ega. Ndiyezve kwakanangwa, kuti: “Kuna Isaka ruji rwako runozoverengehwa.” Echiverenga kuti Mwari uno simba rokumumusa, eya kubva kwo vakafa; apozve wakamuashira mumuezaniso. Ngo kugonda Isaka wakadakajisa Jakobe na Isau, ngo zviro zvaizoitika ngo pamberi. Ngo kugonda Jakobe, apo woda kufa, wakadakajisa umwe ngaumwe wo vana va Josefa; wakadira, echitseyama panyezuru po mudondoro wake. Ngo kugonda Josefa apo magumisiro ake okwedera, wakananga ngo ndava yo kubuda kwo vana va Israeri; wakapanga ngo ndava yo magodo ake. Ngo kugonda Mosi, apo abahwa wakafishwa mweji mutatu ngo vabari vake, ngokuti vakavona kuti wayiva mwana wakanaka, navo avazivi kutya mupango wa mambo. Ngo kugonda Mosi, apo akura, wakaramba kuzwi uri mwana wo mwana wo kaji wa Faro: Paugaro po icho wakatsanangura kuitihwa zvakashata pamwepo no vandhu va Mwari, kuno kudakara mukuvo mudoko muzvidakajiso zvo kushaisha. Echiverenga kuti kupsherujwa kwa Kristu kuri upfumi hwakapinda kukura kuno upfumi hwo Egipite: Ngokuti wairingira mberi musharo. Ngo kugonda wakasiya Egipite, asikatyi ushungu hwa mambo: Ngokuti wakashingirira kudari ngo waimuvona usikavoneki. Ngo kugonda wakangwarira Phasika, no kufafaza ngazi, kuti muurayi wo matangwe asazovapshasa. Ngo kugonda vakaambuka Jombe Rakapshuka, kudari ngo panyika yakaoma: vaEgipite vechieja izvozvo, vakandondomera. Ngo kugonda mapiravira o Jeriko akawa pasi, sure kwokutenderehwa kwao mazuva manomwe. Ngo kugonda Rahabhi chipfebi aazivi kufa pamwepo naavo vayiva vasikapurutani, apo ayinga aashira vadongoreri ngo kunyarara. Chinyi chimweni chendingazonanga? Ngokuti mukuvo unozondiperera kudari ndechinanga ndi Gidhiyoni, na Bharaki, na Samusoni, na Jafeti; ndi Dhavhidha, na Samueri no vaprofeti. Avo ngo kugonda vakapfavisa umambo, vakashanda zvakarurama, vakawana zvigondiso, vakakonya miromo yo mbhondoro, vakajima simba ro muriro, vakapokonyoka kubva kushoti jaipinja, pandau yo kurembaremba vakagwinyiswa, vakayita vano simba guru mukurwa, vakagogomera hondo jo majinja. Vanakaji vakapuwa vakafa vavo vamuswa. No vamweni vakahwajiswa, vasikazivi kutenda kuashira kununurihwa; kuti vaashire kumuka kwakapinda kunaka: No vamweni vakaejwa ngo kuitihwa jee, na ngo kurohwa, eya, panyezuru po izvi vakasungwa no kunghwiniswa muguniya: Vakafuhwa ngo mapuwe, vakachekwa ngo saho, vakaejwa, vakaurawa ngo shoti, vakafamba vechisimira matovo omabvuta no ombuji; vechitama, vechitambujwa, vechiyitihwa zvakashata; (avo nyika aizivi kuvasisira), vechipepesheka mushango no mumatundhu, no mumapako, no mumarindi onyika. Naava vese vayinga vakapupurihwa ndivo ngo kugonda kwavo, avazivi kuashira chigondiso. Mwari inga akatinasirira chiro chakapinda, kunaka, kuti ngo kunja kwedu ivo vasazoita vakaperera. Ndizvo kwechivoneka kuti isisu takatendenejwa ngo mbungano huru yakadaro yo vanopupura, ngatirashe zvese zvinorema, no kushaisha kunotibatirira, ngatigogome ngo kusengerera mujaho wakaemeswa uri pamberi pedu, techiringira kuna Jesu, muambi no mupeji wo kugonda kwedu, uwo ngo ndava yo kudakara kwakadihwa pamberi pake, wakashingirira muchinjiko, asikanyowejeki ndiwo, wakagara pasi ngo kumuho kwo dendemaro ra Mwari. Ngokuti pinimijanyi ndiye, wakashingirira kurwisa kwakadaro kwo vashaishi vanomukira, kuti musazoremba, mwechidemera mumweya yenyu. Ngokuti imwimwi amusati mwarwa mbhera kudondha ngazi mukuambana no kushaisha. Nemwi mwakakanganwa kupotwa kunonyengerehwa kwomuri kudari ngo kuvana: “Mwana wangu usashora kupangira kwa mambo, nokuti kupera simba apo wechirambiswa ndiye; ngokuti uwo waanoda Mambo unomupangira, no kurova mwana wese waanoashira.” Shingiriranyi kupangihwa; Mwari unomubata kudari ngo vana; ngokuti uri kwapi mwana usikapangihwi ndi baba wake? Asi kuti musikapangihwi, kudari ndivo vese, zvakadaro muri mubvandabahwa, amuri vanepi. Zve, tayiva no majibaba edu ngo kwonyama aitipangira, nesu takaareremeja: Kunozopinda kwakaitawani kupfavira Baba wo mweya kuti tipone? Ngokuti ngo gwinyiso avo vakatipangira mazuva mashomani, kudari ngo zvezvaivoneka zvakanaka kwavari; asi iye unotipangira kuti tibetsehwe, kuti tiashirevo kuchena kwake. Kwese kupangihwa akuchadakaji zvinopano, asi kunochemeja: Asi ngo sure kunobereka michero yo kunyarara, eya, michero yo kururama kwavari vakurovejera. Ndizvo musanyi nyara jakarembaremba, gwinyisanyi makokobvi asina simba; munasirire njira jakarurama jo tsoka jenyu, kuti icho chiri chirema chisazopaukiswa, asi paugaro po ukwo kuti chiponeswe. Ejanyi kugarisana ngo kunyarara no vandhu vese, nokuita vakacheneswa, ngo kunja kwakwo apana mundhu ungazomuvona Mambo. Mwechingwarira kuti kusazovapo mundhu unotamikihwa ngo nyasha ja Mwari; kuti usazoapo miji unovava unomera, kumutambuja, no vazhinji vasvipiswe ndiwo; kuti kusazovapo muombi nokuti mupsheruji kudari ndi Isau, uwo wakatengesa ndhaka yo utangwe hwake kupuwa sima imwe yo chokuha. Ngokuti munoziva kuti ngo sure apo akadisisa kuti agare ndhaka yo chidakajiso, wakarambwa (ngokuti aazivi kuwana nguva yo kutenderuka), pikija akanyaipshakisisa ngo kuchema. Ngokuti imwimwi amuzivi kuviya kudundhu ringapshaswa, iro raibwaka ngo muriro, no gore rakasvipa, no chidima, no mubvumo, no kurijwa kwo mbhayapaya, no maungira omazwi; iro izwi, avo vakarizwa vakapota kuti no izwi rimweni risachazovereketwa kwavari. Ngokuti avazivi kukona kushingirira izvo zvakapangwa, kudari pikija nyama yaipshasa dundhu, yaizofuhwa ngo mapuwe. No icho chakavoneka chechityisa, kuti Mosi wakati: “Ndinotya kukurutu no kuhuta.” Asi imwimwi mwakaviya kudundhu ro Zioni, no kudhoropa ra Mwari unopona, Jerusarema ro mugore, no kuhondo jisikaverengeki jo ngirosi, no kumushongano mukuru, no kuchiara cho matangwe ao akatahwa mugore, nokuna Mwari Mutongi wavo vese, no kumweya yo vandhu vakarurama vakaitwa vakaperera, nokuna Jesu, muiyanisi wechitenderano chipsha, no kungazi yo kufafaza, inovereketa zvakapinda kunaka kuno ya Abhera. Ngwariranyi kuti musazoramba uwo unovereketa, ngokuti kudari vasikazivi kupokonyoka avo vakaramba, uwo wakavereketa mu nyika muno, kakurutu isisu atizopokonyoki, kuti techibva kwaari unovereketa ari mugore. Uwo izwi rake ngo nguva iyo rakazungunyisa nyika. Asi zvino wakagondisa, echiti: “Kamwezve ndinozozungunyisa haiwa nyika yega, asi no denga naro.” No izwi iri, rokuti: “Kamwezve.” Rinonanga kubviswa kwo izvo zvinozungunyika kunanga izvo zvakaitwa, kuti izvo zvisikazungunyiswi zvisare. Ndizvo tinoashira umambo husikazungunyiswi, ngative no nyasha, jetingakona kushanda ndijo kuna Mwari, techimudakaja, ngo kureremeja na ngo kutya: Ngokuti Mwari wedu uri muriro unopisa. Rudo pakati po vatendi ngarugare. Musakanganwa kupangijira rudo ku vafambi. Ngokuti ngokuita kudaro vamweni vakaashira ngirosi vasikazivi. Cherechejanyi vakasungwa inga mwakasungwa pamwepo navo; naavo vanoitihwa zvakashata, kudari ndimwivo mumuviri yenyu. Muchadho ngaureremejwe ku vandhu vese, no mubhedhi wao uri usikazivi kusvipiswa: Asi zvipfebi no vaombi, Mwari unozovatonga. Kupona kwenyu ngakuite kusikadisisi mare; itanyi vanokwaniswa ngo izvo zvomunazvo: Ngokuti iye pachake wakati: “Anditongokuregeri, nokuti kukusiya.” Ndizvo ngo kushinga tinoti: “Jehovha uri mubeseri wangu; andizotyi; mundhu ungazoitenyi kwendiri?” Cherechejanyi avo vaimutungamirira, vakavereketa kwomuri izwi ra Mwari; mwechipinimija ngo magumisiro okupona kwavo, muejerere kugonda kwavo. Jesu Kristu unogara akadaro zuro na nyamasi, eya, no mbhera narini. Musapaukiswa ngo zvijijiso zvakaparajana no zvisikazivikanwi. Ngokuti kwakanaka kuti mwoyo igwinyiswe ngo nyasha, haiwa ngo zvokuha, zvo vasikazivi kudetsehwa ndizvo avo vakafamba kwo zviri. Tino altari isisu ro vasikatendehwi kuha kweriri avo vanoyita mushando wo tende. Ngokuti miviri yo mbhuka jina ngazi inoziswa kundau yakachena ngo mupristi mukuru kuyita mudiro wo kushaisha, inopiswa kunja kwo muchacha. Ngokudaro Jesu naye, kuti achenese vandhu ngo ngazi yake, wakatambujika kunja kwo musuvo. Ndizvo ngatibude kuenda kwavari kunja kwo muchacha, techitwara kupsherujwa kwake. Ngokuti mu nyika muno atina dhoropa rinogara, asi tinopshaka rinoviya. Ndizvo ndiye ngatipire mudiro wo kukuja kuna Mwari nguva jese, kunoti, kupa michero yo miromo yedu inopupurira zina rake. Asi musakanganwa kuyita zvakanaka, no kukovana. Ngokuti Mwari unonasa kudakajwa ngo midiro yakadaro. Purutananyi vatungamiriri venyu, muvapfavire. Ngokuti ivo vanorinda ngo ndava yo mweya yenyu, kunonga vanobvunjiswa ngo ndava yenyu; kuti vayite ngo kudakara, haiwa ngo kusururika; ngokuti icho chingazomuremaja. Tikumbirirenyi: Ngokuti tinoziva kuti tino mwoyo isina ndava, tinoemurira kugara takagondeka ngo zviro zvese. Neni ndinomupota kuti muite izvi kakurutu aembho, kuti ndihwirijwe kwomuri ngo kukasira. Zvino Mwari wo kunyarara, uwo wakamuvisazve kubva kwo vakafa muhushi mukuru wo mabvuta, Mambo wedu Jesu Kristu, ngo ngazi yo chitenderano chisikaperi, ngaamuchenese kuzviro zvese zvakanaka, kuti muite kuda kwake, echishanda kwetiri icho chinonasa kumudakaja, ndiye Jesu Kristu; kwaari ngakuve no uthende mbhera narini. Ameni! Asi ndinomupota, hama, sengereranyi izwi ro kupanga. Ngokuti ndakatara kwomuri ngo mazwi mashomani. Zivanyi kuti munukuna wedu Timoti wakasununguhwa kubva muguniya; kudari iye echikasira kuviya, ndinozoviya pamwepo naye apo ndoviya kwoomuvona. Tambisanyi vese vatungamiriri venyu, no vakacheneswa vese. Avo vo Itariya vanomutambisa. Nyasha ngajive nemwi mwese. Ameni! Jakobe, muranda wa Mwari no wa Mambo wedu Jesu Kristu, kuno majinja ari gumi na maviri evakaparajika: Ndinomuchungamija. Hama jangu, verenganyi kuti kuri kudakara kukuru, apo mwogumihwa ngo zviejo zvizhinji; mwechiziva kuti kuejwa kwo kugonda kwenyu kunobara kusengerera. Asi kusengerera ngakuve no mushando wakwo wakaperera kuti muite vakaperera mururame, musikatami chiro. Asi kudari aripo umwe wenyu unotama kungwara, ngaakumbire kuna Mwari, unopa kuna vandhu vese ngo kuwanjisa, asikakaraiji; kunozopuwa kwaari. Asi ngaakumbire ngo kugonda, asina chaanogononda. Ngokuti uwo unogononda wakadari ngo vimbi ro jombe rinotindhwa ngo dutu no kukandihwa. Uwo mundhu achagarira kuti unozoashira chiro kuna Mambo, mundhu unomipinimijo miviri unotsanduka-tsanduka mu njira jake jese. Asi hama iri pasi ngaidakare ngo kukujwa kwayo; asi guruja ngaridakare ngo kupfaviswa kwaro. Ngokuti rinozopinda kudari ngo ruva ro mushango. Ngokuti zuva rinobuda pamwepo no dutu, zvinoomesa mwenje; no ruva rawo rinowa pasi, no unaku hwaro hunopera: Ngokudarozve guruja rinozongarangara mu njira jaro. Unomuchena mundhuwo unoshingirira mukuejwa. Ngokuti apo aejwa, unozoashira junguja ro kupona, rakagondiswa kwavari vanomuda. Mundhu apo aejwa usananga kuti ndinoejwa ndi Mwari: Ngokuti Mwari aaejwi ngo zvakashata, zve, aaeji mundhu pikija wakadini. Asi mundhu wese unoejwa apo ookweviwa ngo kuemura kwake, no kunyengerehwa. Ndizvo apo kuemura kwamita, kunobara kushaisha no kushaisha apo kwakura, kunobara rufu. Musachengejehwa, hama jangu jinodikana. Zvipuwo zvese zvakanaka, no zvipo zvese zvakaperera zvinobva mugore, zvechibzuka kubva kuna Baba wo kujeka, kwaari akuna kutsanduka, nokuti bvuri ro kukunukuka. Ngokuda kwake iye wakatibara ngo izwi ro gwinyiso, kuti, tiite inga tiri michero yokutanga yo zvakasikwa zvake. Munoziva izvi hama jangu, jinodikana, asi mundhu wese ngaakasire kuzwa, anonoke kuvereketa, anonoke kuyita ushungu. Ngokuti ushungu hwo mundhu aushandi kururama kwa Mwari. Ndizvo mwechirasha svina yese no kushata kwakawanda, muashire ngo kupfava izwi rakasimwa, rino simba ro kuponesa mweya yenyu. Asi itanyi vaiti vo izwi, musiri vanozwa kwega, mwechijichengeja. Kudari mundhu ari muzwi wo izwi, asiri muiti waro, uri wakadari ngo mundhu unoringira hope yake yechibarihwe muchibuko. Ngokuti unojivona, orooenda, paripo unokanganwa chiemo chaanacho kuti chakaitawani. Asi iye unoringira mumupango wakaperera wo kusununguka, achindovangirira kudaro, asikaiti unozwa achikanganwa, asi muiti wo mushando, mundhu uwu unozodakajiswa muzviito zvake. Kudari aripo mundhu unorangarija kuti ari unodira, kuti asikabati rurimi rwake, asi unochengejera mwoyo wake, kudira kwo mundhuwo akuna shwiro. Kutenda kwakachena no kusikazivi kusvipiswa pamberi pa Mwari wedu na Baba ndikwo uku, kufambira vasina baba no shirikaji mukutambujika kwavo, no kujingwarira kuti asasvipiswa ngo zvonyika. Hama jangu, kugonda kuna Mambo wedu Jesu Kristu, Mambo wo uthende, kusazova no mutsananguro ku vandhu. Ngokuti kudari kwechinghwina mu nyumba yenyu yo kudira mundhu uno ndandazi yo mukore, akasimira zvakanaka, echinghwinavo mundhu murombo uno zvokusimira zvino svina; nemwi munoreremeja uwo unosimira nguvo jakanaka, mwechiti: “Gara pano pandau yakanaka!” Mwechiti kumurombo: “Ima apo, nokuti gara pasi pachitambarariro cho tsoka jangu.” Ngokuita kudaro amuiti vatsananguri here no vatongi vo mipinimijo yakashata? Purukiranyi hama jangu jinodikana, Mwari aazivi kutsanangura here varombo ngo zvo munyika kuti vayite maguruja okugonda, no vanogara ndhaka yo umambo uhwo hwaakagondisa kwavari vanomuda? Asi imwimwi mwakashora murombo. Maguruja aamutambuji here, echimukweva kuenda pazvigaro zvo kutongwa? Aatuki here zina rinoreremejeka ro munodanijwa ndiro? Asi kudari mwechizarisa mupango wo umambo kudari ngo zvakatahwa kuti: “Unozomuda muvakihwana wako kudari ngo kujida kwako iwewe.” Munonasa. Asi kudari mwechiita vanomutsananguro ku vandhu, munoshaisha, mwechipuwa ndava ngo mupango kuti muri vapauki. Ngokuti pikija ndiyani unozongwarira mipango yese, asi echikhugunya ngo chiro chimwe, iye unoyita uno ndava yazvo zvese. Ngokuti uwo wakati: “Usazoomba.” Wakatizve: “Usazouraya.” Zvino kudari usikaombi, asi wechiuraya, wakayita mupauki kumipango. Mwechivereketa no kuyita kudari ngo vanotongwa ngo mupango wo kusununguka. Ngokuti kutonga akuzovi no nyasha kwaari usikazivi kupangijira nyasha: Nyasha jinojiganzisa pamberi po kutonga. Kunobeserenyi, hama jangu, kudari mundhu echinanga kuti uno kugonda, asi asina mishando? Kugonda ukwo kungamuponesa here? Kudari hama nokuti hanzvaji ari mutitinini, echitama zvokuha zvo zuva ngo zuva, no umwe wenyu echiti kwaari: “Endai mukunyarara, mwechiita vanojiihwa, no kugutiswa; asi musikavapi zvinotamika kumuviri; kunobeserenyi?” Ngokudaro kugonda, kudari kusina mishando kwakafa, kuri kwega. Asi mundhu unozoti: “Iwewe uno kugonda, inini ndino mishando; ndipangijire kugonda kwako kusina mishando yako, neni ndinozokupangijira kugonda kwangu ngo mishando yangu.” Unotenda iwewe kuti Mwari ndiumwe; unonasa: Mabzoka anotendavo, no kuhuta. Asi iwewe benji unoda kuziva here, kuti kugonda kusina mishando kuri kusina shwiro? Abrahama baba wedu, aazivi kupembejwa here ngo mishando, ngo kupira Isaka mwana wake kuyita mudiro paaltari? Unovona kuti kugonda kwakashanda pamwepo no mishando yake, no kugonda kwake kwakapereriswa ngo mishando; no matahwa akazarisika anoti: “Abrahama wakagonda Mwari, nakwo kwakaverengehwa kwaari kuti kuri kururama; naye wakadanijwa kuti uri shamwari ya Mwari.” Munovona kuti mundhu unopembejwa ngo mishando, andikwopi ngo kugonda kwega. Ngokudaro Rahabhi chipfebi aazivi kupembejwa here ngo mishando, ngo kuashira vatumwa, no kuvatizisa ngo njira imweni? Ngokuti kudari ngo muviri usina mweya wakafa, ngokudaro kugonda kusina mishando kwakafavo. Hama jangu musayita vajijisi vazhinji, mwechiziva kuti tinozoashira kutongwa kwakapinda kurema. Ngokuti ngo zviro zvakawanda isisu tese tinokhugunya. Kudari aripo usikakhugunyi ngo izwi, ndiye uri mundhu wakaperera, uno simbazve ro kubata muviri wese nawo. Zvino kudari techidira mikhayo yo mahachi mumiromo yao, kuti atipurutane, tinotenderuja muviri wao wese. Vonanyizve ngarava, pikija jakakurisa kudini, jinotindhwa ngo dutu rino simba, kani jinotenderujwa ngo chikombe apo paanoda muhluzi kuti aende. Ngokudarozve rurimi ruri ndhengo dodoko, asi rinoganza zvakakura, vonanyi kukura kwakaita gwasha rinobaswa ngo muriro wakadodoka. No rurimi ruri muriro, rwakadari ngo nyika yakazara ngo kushata pakati po ndhengo jedu, runosvipisa muviri wese, rinopisa njira yese yo kupona. Narwo rinobasihwa ngo muriro wo Gehena. Ngokuti mbewu jese jo zvikara no jo shiri, no jo zvinogwezva, no zviri mujombe, zvinopeteka, nazvo zvakapetwa ngo vandhu. Asi rurimi apana mundhu ungarupeta, ruri chiro chakashata chisikazorori, chakazara ngo mbanda inouraya. Ndirwo tinobonga Mambo Baba, ndirwozve tinotuka vandhu, vakasikwa ngo mutojaniso wa Mwari. Kunobuda kumuromo umwe kubonga no kutuka. Hama jangu, akusisiri kuti izvi zviitike kudaro. Mwimbo unobudisa ngo mushowera umwewo here kumwa yakanaka no inovava? Hama jangu, mukuyu ungabereka here maorivhe, nokuti muvhini ungabereka here makuyu? Zve, kumwa inojumunya ayingakoni kubudisa inonaka. Ndiyani wakangwara pakati penyu no unoziva? Ngaavonise ngo kupona kwake kwakanaka mishando yake mukupfava kwo ungwaru. Asi kudari muno ndurumwa inovava no hasha mumwoyo mwenyu, musaganza, musanyepera gwinyiso. Ungwaru hwakadaro andihwopi hunobva mugore, asi ngo hwo mu nyika, hwo mumuviri, ngo hwo mabzoka. Ngokuti apo pano ndurumwa no hasha, paripozve kukangaijwa no zviito zvese zvakashata. Asi ungwaru uhwo unobva mugore kutanga huri hwakachena, zve, unonyararisa, hwakapfava, hunoreruka kupotwa, hwakazara ngo nyasha no michero yakanaka, husina mukheto, husina kujiitisa. No michero yo kururama inokushwa mukunyarara ngaavo vanoyita kunyarara. Kunobva kwapi kuambana no hasha pakati penyu? Azvibvi here kuzvidisiso zvenyu zvinorwisana mundhengo jenyu? Munoemura chiro nemwi musina; ndizvo munouraya. Nokuva no ndurumwa, musikakoni kuzviashira. Munoambana no kurwa musina; ngokuti amukumbiri. Munokumbira musikaashiri, ngokuti munoshaisha kukumbira, kuti muzviparaje muzvidisiso zvenyu. Imwimwi vaombi, amuzivi here kuti ukama hwo mu nyika huri ukorore na Mwari? Ndizvo pikija ndiyani unoda kuyita ukama no nyika, unojiita bandu kuna Mwari. Munopinimija here kuti matahwa anovereketa zvisina shwiro kuti: “Mweya unogara mukati mwedu unoshuwira here ndurumwa?” Asi iye unopa nyasha jakapinda kuwanda. Ndizvo unoti, Mwari unorwisana no vanojikurisa, asi unoitira nyasha kuno vakapfava. Ndizvo pfaviranyi Mwari asi irwanyi na Dhiabhorosi, naye unozomutiza. Khwederanyi kuna Mwari, naye unozokhwedera kwomuri. Shambanyi nyara jenyu, imwimwi vashaishi; muchenese mwoyo yenyu imwimwi muno mipinimijo muviri. Tambujikanyi, murije mbhere, no kuchema: Kuseka kwenyu ngakutsanduke kuyita kurija mbhere, no kudakara kwenyu kuyita kusururika. Jipfavisenyi mukuvona kwa Mambo, naye unozomukurisa. Musarevana, hama. Iye unoreva hama nokuti kutonga hama yake, unovereketa kurwisana no mipango, naye unotonga mipango: Asi kudari wechitonga mipango auri muiti wo mipango akadi, asi mutongi wo mipango. Umwe ega uri mupi wo mipango no mutongi, ndiye uwo uno simba ro kuponesa no kuuraya: Asi uriyani iwewe unotonga muvakihwana wako? Viyanyi zvino, imwimwi munoti: “Nyamasi nokuti mangwana tinozoenda kudhoropa rakatikuti, tipeje gore tiriyo, no kutengesa, tiwane zvo kuviihwa ndizvo”: Apo musikazivi zvinozoitika mangwana. Kupona kwenyu kuri chinyi? Ngokuti muri mbhute, inovoneka mukuvo mudodoko, na ngo sure inongarangaka. Ngokuti kwaidikana kuti munange, kuti: “Kudari Mambo echizotenda, tinozorarama, no kuyita ichi naicho.” Asi zvino munojiganzisa mukujikuja kwenyu: Kwese kujiganzisa kwakadaro kwakashata. Ndizvo kwaari unoziva kuyita zvakanaka, asikazviiti, kwaari kuri kushaisha. Viyanyi zvino imwimwi maguruja, mucheme, no kurija mbhere ngo matambujiko anozoviya panyezuru penyu. Upfumi hwenyu hwakavora, no zvokufuka zvenyu zvahiwa ngo honye. Mukore yenyu no sirivha yenyu zvaano furuju; no furuju yazvo inozoita chapupu cho kumuitira ndava, nayo inozoha nyama yenyu kudari ngo muriro. Mwakaunganijira upfumi hwenyu mu mazuva okugumisira. Vonanyi musharo wo vashandi avo vakacheka minda yenyu, wakapunyihwa ndimwi ngo kuchengejera, unodanijira: No kudanijira kwaavo vakacheka kwakazwika munjeve ja Mambo wo Hondo. Mwakararama mukushadaya, mwakayita zvidakajiso zvenyu; mwakakonja mwoyo yenyu ngo zuva ro kuuraya. Mwakamurasha no kumuuraya uwo wakarurama; naye aazivi kurwa nemwi. Ndizvo, sengereranyi hama mbhera kuviya kwa Mambo. Vonanyi murimi unogarira michero ino mutengo mukuru yo nyika, echiisengerera, mbhera iyashire mvura yo kuamba no yo kugumisira. Nemwi itanyi vanosengerera kudaro; gwinyisanyi mwoyo yenyu: Ngokuti kuviya kwa Mambo kwaaphedo. Hama, musan'un'utirana, umwe kuno umweni, kuti musazotongwa; ringiranyi mutongi unoyima pamusuvo. Hama, mukutambujika no kusengerera ashiranyi kuyita chivonero vaprofeti vakavereketa ngo zina ra Mambo. Vonanyi, tinoti vanomuchena vakashingirira. Mwakazwa ngo kusengerera kwa Jobe, mwakavona kupejisira kwa Mambo, kuti Mambo wakazara ngo kukungurira no nyasha. Asi kupinda zvese, hama jangu, musazopika ngo mugore, pikija ngo nyika, nokuti ngo kupika kumweni: Asi itanyi kuti eya wenyu aite, eya, no haiwa wenyu aite, haiwa; kuti musapinda mukutongwa. Uripo here pakati penyu unotambujika, ngaakumbire. Uripo here pakati penyu unodakara? Ngaaimbe nduyo. Uripo here pakati penyu unohwara? Ngaadanije vakuru vo chiara; ngavamukumbirire, vechimuzoja ngo mafuta ngo zina ra Mambo: No mukumbiro wo kugonda unozoponesa unohwara, na Mambo unozomumusa; nokudari akaita zvishaishi, zvinozoregerehwa kwaari. Ndizvo tendanyi zvishaishi zvenyu umwe kuno umweni, mukumbirirane, kuti mutambiswe. Kupota kwo mundhu wakarurama kuno simba guru mukushanda kwakwo. Erija wayiva mundhu ngo chibarihwe wayinga akadari ndisu, naye wakakumbira kakurutu kuti isazona, akuzivi kuna makore matatu no mweji mitandhatu. Wakakumbirazve, no denga rakanisa mvura, no nyika yakabereka michero yayo. Hama jangu, kudari uripo pakati penyu unopauka kubva kugwinyiso, no umwe echimutenderuja, ngaazive, kuti iye unotenderuja mushaishi kubva mukupauka kwo njira yake, unozoponesa mweya kubva mukufa, unozofukija zvishaishi zvakawanda. Pedru mupostori wa Jesu Kristu, kwavari vakatsananguhwa vari zvigarandimo, vakaparajika mu Pontu, no Garatiya, no Kapadhokiya, no Aziya, no Bhituniya, kudari ngo kuziva ngo pamberi kwa Mwari Baba, mukucheneswa kwo Mweya, kuti vapurutane, no kufafazihwa ngo ngazi ya Jesu Kristu: Nyasha kwomuri no kunyarara ngazviwanjwe. Ngaakuriswe Mwari baba wa Mambo wedu Jesu Kristu, uwo ngo kukungurira kwake kukuru wakatibarazve kuti tive no gonda rinopona ngo kumuka kwa Jesu Kristu kwo vakafa, kuti tive no ndhaka isikavori, isikasvipiswi, isikangarangari, yakangwaririhwa imwimwi mugore. Imwimwi munongwarihwa ngo simba ra Mwari ngo kugonda kuti muve no ruponeso rwakanasirihwa kuti ruzopangijihwa ngo mukuvo wo kugumisira. Urwo rwo munodakara kakurutu ndirwo, pikija zvino mukuvo mudoko, kudari kwechisisira, mwatambujwa ngo zviejo zvizhinji, kuti kuejwa kwo kugonda kwenyu, kuno mutengo mukuru kupinda mukore unopera pikija kwechiejwa ngo muriro, kungavoneka kwechiita kukuja no uthende no kureremeja ngo nguva yo kuvoneka kwa Jesu Kristu. Uwo womunoda musikazivi kumuvona, kwaari pikija zvino amumuvoni, asi munomutenda, munodakara ngo kudakara kusikabviri kuti kuvereketwe kwakazara ngo uthende. Mwechiashira magumisiro okugonda kwenyu, ari ruponeso rwo mweya yenyu. Ngo ndava yo urwo ruponeso vaprofeti vakapshaka no kupshakisisa, vakaprofeta ngo nyasha jaiviya kwomuri. Vechipshaka kuti nguva ngoyapi nokuti yakadini, yaakatatija kweiri Mweya wa Kristu wayiva mukati mwavo, apo wakapupura ngo pamberi ngo matambujiko a Kristu, no uthende hwaizoatevera. Kwavari kwakapangijihwa kuti avasaijishandira, asi vaitishandira isisu ngo izvi, zvakateketeswa kwomuri ndivo vakachumaira vhangeri kwomuri ndi Mweya Wakachena wakatumwa kubva mugore: Izvo zviri ngirosi jinoda kuzvizwisisa. Ndizvo sunganyi zviunu zvo mipinimijo yenyu, itanyi vakangwara muemese aembho gonda renyu kunyasha jinoziswa kwomuri pakuvoneka kwa Kristu Jesu; kudari ngo vana vanopurutana, musikajitojanisi no kuemura kwenyu kwo kutanga ngo nguva yo kusikazivi kwenyu. Asi kudari ngo uwo wakamudanija uri wakachena ngokudaro imwimwivo itanyi vakacheneswa mukupona kwenyu kwese; ngokuti kwakatahwa: “Munozoita vakacheneswa; ngokuti inini ndiri wakachena.” No kudari munomudanija kuti uri Baba, uwo usikakheti vandhu unotonga kudari ngo mushando wo mundhu umwe ngaumwe, ponanyi mukuvo wo uchigarandimo hwenyu mukutya. Mwechiziva kuti amuzivi kuripirwa ngo zviro zvinovora, kudari ngo sirivha no mukore, kubva kunjira isina shwiro yo kupona kwenyu yo mwakasiihwa ngo majibaba enyu; asi mwakaripirwa ngo ngazi ya Kristu ino mutengo mukuru, kudari ngo yo bvuta risina kuremara, nokuti vara. Uwo ngo gwinyiso wakazivika nyika isati yaemeswa, asi wakapangijihwa ngo ndava yenyu mukugumisira kwo nguva, imwimwi munotenda ndiye kuna Mwari, uwo wakamumusa kwo vakafa, akamupa uthende; kuti kutenda kwenyu no gonda renyu zvivapo kuna Mwari. Kwechivoneka kuti mwakacheneswa mweya yenyu mukupurutana gwinyiso ngo mumwoyo mukuva no rudo rusikajiitisi kuhama, idananyi ngo mwoyo wakasukika kakurutu. Muri vakabahwazve, haiwa ngo mbewu inovora, asi ngo isikavori ngo izwi ra Mwari, unopona aripo mbhera narini. Ngokuti nyama yese yakadari ngo mwenje, no uthende hwayo hwese hwakadari ngo ruva ro mwenje. Mwenje unozeketera, no ruva rinowa pasi; asi izwi ra Mwari rinondogara mbhera narini. No iri ndiro izwi ro vhangeri rakachumaihwa kwomuri. Ndizvo mwechirasha kwese kushata no kuchengeja kwese, no kujiitisa, no ndurumwa, no kuvereketa kwese kwakashata. Kudari ngo chiya jichaamba kuberekwa disisanyi mukaka wo Mweya usina kuchengeja, kuti mukure ndiwo, muponeswe. Kudari mwakaravira kuti Mambo uno nyasha. Mwechiviya kwaari ari buwe rinopona, ngo gwinyiso rakarambwa ngo vandhu, asi rakasanwa ndi Mwari rino mutengo mukuru, imwimwi muri mapuwe anopona, mwakavakiwa kuyita nyumba yo Mweya, kuyita upristi hwakachena kupira midiro yo Mweya, inoashirika kuna Mwari ndiye Jesu Kristu. Ngokuti arimwo matahwa anoti: “Vona, ndinorajika mu Zioni buwe guru ro pakhona, rakasanwa, rino mutengo mukuru. No uwo unotenda kwaari aazopsherujwi.” Ndizvo kwomuri imwimwi munotenda, unoreremejeka. Asi kwavari vasikatendi, buwe rakarambwa ngo vavaki ndiro rakaita buwe ro pakhona; zve, ibuwe ro kukhugunyisa, no buwe ro kutsenekesa; avo vanokhugunwa ngo izwi, avapurutani. Kwovarizve vakakuemesehwa. Asi imwimwi muri jinja rakasanwa, muri vo upristi hwo umambo, jinja rakachena muri vandhu vakajivonera, kuti mupangijire kunaka kwo uwo wakamudanija kubva muchidima, kuti munghwine mukujeka kwake kunoshamisa. Imwimwi ngo mukuvo wakapinda mwayiva musiri jinja, asi zvino muri vandhu va Mwari: Avo vayinga vasikazivi kuwana nyasha, asi zvino mwawana nyasha. Vanodikana, ndinomupota, kudari ngo zvomuri zvigarandimo no vafambi, kuti murege kuyita kuemura kwo nyama kunorwa no mweya. Muve no kupona kwenyu kunosisira pakati po vomajinja; kuti kune izvo zvo vanomureva ndizvo, inga muri vakashata, ngo mishando yenyu yakanaka yo vanovona, vangakuja Mwari ngo zuva ro kufambihwa. Pfaviranyi mipango yese yo vandhu ngo ndava ya Mambo. Pikija ngo ya mambo, uri mukuru; nokuti kuvatongi, vakatumwa ndiye kuhwirijira vanoyita zvakashata no kuvakuja vanoyita zvakanaka. Ngokuti ndikwo kuda kwa Mwari, kuti ngokuita zvakanaka munganyaraja kusikaziva kwo vandhu vano upenji. Kudari ngo vandhu vakasununguka, musikashandisi kusununguka, kwenyu kuyita bhachi ro kuyita zvakashata, asi muite varanda va Mwari. Reremejanyi vandhu vese, idanyi hama jese, mutyenyi Mwari, reremejanyi mambo. Varanda pfaviranyi majimambo enyu ngokutya kwese; andikwopi kwavari vega vakanaka no vakapfava, asi kwavarizve vasikazivi kururama. Ngokuti ichi chinoashirika, kuti mundhu ngo ndava yokuti ano mwoyo wakanaka, usina ndava kuna Mwari, ashingirire matambujiko, echitambujika pasina no ndava. Ngokuti mungakujwa ngo njirenyi, kudari mwechishaisha no kuchaiwa ngo ndava yakwo, munokusengerera? Asi apo mwechinasa, kudari mwechitambujika ngo ndava yakwo, mwechisengerera, ichi chinoashirika kuna Mwari. Ngokuti mwakadanijihwa kuno izvi. Ngokuti Kristu wakatambujikiravo imwimwi, akamusiira chivonero cho kutevera muzvitsiko zvake: Uwo usikazivi kushaisha, zve kuchengeja akuzivi kuvoneka mumuromo wake. Uwo apo atukwa, aazivi kutukavo; apo atambujwa, aazivi kutyisijira; asi wakajipira kwaari uwo unotonga ngo kururamisa. Uwo wakatwara zvishaishi zvedu pachake mumuviri wake panyezuru po muti, kuti isisu, tinofa mukushaisha, tipone mukururama; uwo ngo mavonje aakarohwa ndiwo mwakaponeswa, ngokuti mwayinga mwakarashika kudari ngo bvuta; asi zvino mwahwirira ku Muhavisi no Muvonisi wo mweya yenyu. Ngokudaro, imwimwi vakaji, pfaviranyi vamuna venyu, kuti kudari varipo vasikapurutani izwi, vangaongwa ngo njira yo vanopona ndiyo vakaji vavo, ngo kunja kwo izwi. Vechivona kupona kwenyu kwakachena pamwepo no kutya. Avo kunemeswa kwavo kusazoita kunemeswa kwo kunja, kwo kuruka bvuji no kusimira zvinemeso zvo mukore, nokuti zvokusimira zvakanakisisa; asi ngakuitwe kwo mundhu wakafishika wo mumwoyo, ngo zvinemeso zvisikavori zvo mweya wakapfava wakanyarara, ukwo kuno mutengo mukuru mukuvona kwa Mwari. Ngokuti ngo kudarovo karetu vakaji vakacheneswa, avo vakagonda kuna Mwari vakajinemesa, vechipfavira vamuna vavo: Kudari ndi Sara wakapurutana kuna Abrahama, echimudanija kuti mambo: Mwaavana vake zvino, kuti mwechiita zvakanaka, musikatyiswi pikija ngo chiri chiro chinokaruja. Ngokudaro, imwimwi vamuna, garanyi no vakaji venyu kudari ngo kuziva, mwechireremeja vakaji kudari ngo uri chijiyo chakarembaremba, kudarizve ngo vanogara ndhaka imweyo yo nyasha jo kupona; kuti mikumbiro yenyu isazophingaijwa. Pakupejisira itanyi vanomupinimijo umwewo mwese, vanozwirana, idananyi kudari ngo hama, muno mwoyo ino nyasha, muno mipinimijo yakapfava. Musikahwirijiri zvakashata ngo zvakashata, nokuti kutuka ngo kutukwa; asi paugaro po izvo, mudakajise; ngokuti mwakadanijwa kuno izvo kuti mugare ndhaka yo chidakajiso, ngokuti, iye unozoda kupona, no kuvona mazuva akanaka, ngaarambije rurimi rwake kuno zvakashata, no muromo wake kuti usazovereketa kuchengeja. Ngaafuratire zvakashata, aite zvakanaka; ngaapshake kunyarara akutevere. Ngokuti majiso a Jehovha anoringira vakarurama, no njeve jake jinopurutana kukumbira kwavo; asi hope ya Jehova inorwa navo vanoyita zvakashata. Ndianizve ungazomuita zvakashata kudari mwechitsamwirira kuno izvo zvakanaka? Asi kudari mwechitambujika ngo ndava yo kururama, munomuchena: Musatyazve kutyisa kwavo, zve, musakakaseka; asi chenesanyi Kristu mumwoyo yenyu aite Mambo: Mugare mwakanasirihwa kupingura mundhu wese unomubvunjisa ngo ndava yo gonda riri mukati mwenyu, asi mukuita ngo kupfava no kutya. Muno mwoyo isina ndava; kuti kuno izvo zvo vanomureva ndizvo, vangapsherujwa avo vanotuka njira yenyu yakanaka yo kupona kuna Kristu. Ngokuti kwakapinda kunaka, kudari kuri kuda kwa Mwari, kuti mutambujike ngo ndava yo kuyita zvakanaka, kuno kuti mutambujike ngo kuyita zvakashata. Ngokuti Kristu wakatambujikavo kamwe ngo ndava yo zvishaishi, ari wakarurama ngo ndava yo vasikazivi kururama kuti ativiise kuna Mwari; wakaurawa munyama, asi wakararamiswa mu mweya; mwourizve wakaenda, akachumaira kumweya yayiva muguniya, iyo ngo pamberi yayinga isikapurutani, apo Mwari ngo kusengerera wakavagarira ngo mazuva a Noa, apo ngarava yayinga ichanasirihwa, mukati mwayo vashomani, kunoti, vandhu vasere, vakaponeswa kubva ku kumwa. No uwo muezaniso wo rubhapatiso, unomuponesa, andirwo runobvisa svina yo nyama, asi ruri mupinguro wo mwoyo isina ndava kuna Mwari, ngo kumuka kwa Jesu Kristu kwo vakafa. Uwo uri ngo kumuho kwa Mwari, wakaenda mugore; ngirosi no vatongi no vano simba vanomupfavira. Ndizvo ngokuti Kristu wakatambujika mu nyama, pfekanyi mupinimijo wakatojana; ngokuti mundhu wakatambujika munyama wakarega kushaisha; kuti musachapona mu nyama kuyita kuemura kwo vandhu, asi kuti mupone kuyita kuda kwa Mwari. Ngokuti mwakapeja mukuvo wakareba mwechiita kuda kwo vo majinja kufamba mukushata, no kuemura, no kuraja ngo vhini, no kuhisa, no kuomba, no kudira muezaniso kunonyangaja. Muizvi vanopinimija kuti zvinoshamisa kuti amufambisani navo mukuita zvakashata zvinotojana, vachimureva. Avo vanozojipingurira kwaari uwo wakanasirira kutonga vanopona no vakafa Ngokuti ngo iyi ndava vhangeri rakachumaihwa kuno vakafa navo, kuti vatongwe kudari ngo vandhu vachapona mu nyama, asi kuti vararame mu mweya kudari ndi Mwari. Asi kupera kwo zviro zvese kwaaphedo; ndizvo itanyi vakangwara, murinde mukukumbira. Kupinda izvo zvese muve no rudo rukuru pakati penyu; ngokuti rudo runofukijira zvishaishi zvakawanda; mwechiashirana umwe no umweni ngo kusikan'un'uti. Mundhu wese kudari ngo zvaakaashira chipuwo ngaachikovanisire pakati penyu, kudari ngo zvomuri vangwariri vakanaka vo zvipuwo zvakawanda zva Mwari; kudari aripo mundhu unovereketa ngaaverekete zvakadari ngaari mazwi a Mwari; kudari aripo unoshandira, ngaashandire kudari ngo simba raanopuwa ndi Mwari, kuti ngo zviro zvese Mwari ungairikijwa ndiye Jesu Kristu, iye uno uthende no kutonga kunoti mbhera narini. Ameni! Vanodikana, musapinimija kuti kunoshamisa kuejwa kwakakura kuri pakati penyu, kunonga kuri chiro chinoshamisa chakaitika kwomuri; asi dakaranyi, kudari ngo zvo munoaashira kutambujwa kwa Kristu pamwepo naye, kuti uthende hwake hwoopangijihwa, imwimwivo mungazodakara ngo kudakara kukuru. Kudari mwechipsherujwa ngo ndava yo zina ra Kristu, munomuchena, ngokuti mweya wo uthende no wa Mwari unogara panyezuru penyu; asi kusazovapo mundhu pakati penyu unotambujika ngo ndava yo kuva muurayi, nokuti mbavha, nokuti muiti wo zvakashata, nokuti usikaregi zvo vamweni; asi kuti mundhu echitambujika ngo kuyita mukristu, asapsheruka, asi ngaakuje Mwari ngo iri zina. Ngokuti nguva yaguma yokuti kutongwa kutange kunyumba ya Mwari; no kudari kwechitanga kwetiri, kunozoita kwakaitawani kugumisira kwo vasikapurutani vhangeri ra Mwari? Nokudari vakarurama vechiponeswa ngo kunesehwa, vasikadiri Mwari no vashaishi vanozova kwapi? Ndizvo avo vanotambujika ngokuda kwa Mwari, ngavapire mweya yavo, mukuita zvakanaka kuno Musiki unogondeka. Ndizvo ndinopota vakuru vari pakati penyu, nenivo ndiri mukuru pamwepo nemwi, no chapupu chematambujiko a Kristu; no unoashiravo uthende hunozopangijihwa; havisanyi mushambi wa Mwari uri pakati penyu, haiwa ngo kuvangirijwa, asi ngo kuda, kudari ngo kuda kwa Mwari, zve kusiri kuti muviihwe ngo mare ino svina, asi ngo mupinimijo unoda. Musikaiti kunonga muri vatongi panyezuru po zvakakovanisihwa kwomuri, asi mwechiita zvivonero kumushambi. Naapo Muhavisi mukuru unozopangijihwa, munozoashira junguja ro uthende risikazoperi. Ngo kudaro imwimwi vadoko pfaviranyi vakuru. Eya, imwimwi mwese jisimijenyi ngo kupfava, mu kushandirana umwe no umweni: “Ngokuti Mwari unorwisana no vanojikuja, asi unopa nyasha kuno vakapfava.” Ndizvo jipfavisenyi pasi po nyara ino simba ya Mwari, kuti amutundhumaje ngo mukuvo unosisira; Mwechikandira kwese kuneseka kwenyu panyezuru pake, ngokuti unomungwarira. Ngwaranyi, murinde; ngokuti bandu renyu Sathani, rinofambafamba kudari ngo mbhondoro inorira, rechipshaka avo voringaha; murwe naye mwakagwinya mukugonda, mwechiziva kuti matambujiko akatojana anogumira hama jenyu jiri mu nyika. Zvino Mwari wo nyasha jese, uwo wakamudanija ku uthende hwake husikaperi huri kuna Kristu, mwambotambujika mukuvo mudoko, iye pachake unozomupererisa, no kumujimika, no kumugwinyisa, no kumuvangisa. Kwaari ngakuve no simba mbhera narini. Ameni. Ndakatara kwomuri ngo kufupisa ndi Sirivhana hama yedu, inogondeka kudari ngo zvo ndinopinimija, ndechipota, no kupupura kuti iji ndijo nyasha ja Mwari ngo gwinyiso; imanyi mwakagwinya kwejiri. Chiara chiri mu Bhabhurona chakatsananguhwa pamwepo nemwi, chinomutambisa; ngokudaro na Marku mwana wangu. Chingamijananyi ngo muromo umwe no umweni ngo rudo. Kunyarara ngakuve kwomuri mwese muri kuna Kristu. Simoni Pedru, muranda no mupostori wa Jesu Kristu, kwavari vakakovehwa kugonda kuno mutengo mukuru pamwepo nesu, kwakadari ngo kwedu mukururama kwa Mwari wedu no Muponesi Jesu Kristu. Nyasha kwomuri no kunyarara ngazviwanjwe mukumuziva Mwari na Jesu Mambo wedu. Kudari ngo zvaakapa kwetiri ngo simba rake ro uMwari, zviro zvese zvinosisira mukupona uku, no zvo kudira ndizvo uMwari, ngo kuziva kwo uwo wakatidanija ngo uthende hwake no kunaka, ngo izvo wakatipa zvigondiso zvake zvakakura no zvino mutengo mukuru; kuti ngo izvi mungayita vanosisira chiemo cho uMwari, mwapokonyoka kubva mukuvora kwo kuemura kuri mu nyika. Eya, ngo iyi ndava, imwimwi ngo kwenyu engejeranyi kutsamwirira kwese, mukutenda kwenyu engejeranyi kunaka, mukunaka engejeranyi kuziva. Mukuziva engejeranyi kujibata, mukujibata engejeranyi kusengerera no mukusengerera engejeranyi kudira Mwari, no mukudira Mwari engejeranyi kuda hama, no mukuda hama engejeranyi rudo. Ngokuti kudari izvi zviri zvenyu, zvechiwanjwa, zvinoita kuti musayita nungo, nokuti muite vasina michero mukuziva Mambo wedu Jesu Kristu. Ngokuti iye unotama izvi uri bofu, uri wakabvubvumara, wakakanganwa kusukwa kwo zvishaishi zvake zvo kare. Ndizvo hama, tsamwiriranyi zvikuru kuyita kuti kudanijwa kwenyu no kutsananguhwa kwenyu zvigwinyiswe, ngokuti kudari mwechiita izvi amutongozokhugunyi. Ngokuti ngokuita kudaro, kunozopuwa kwomuri kukurutu kunghwina mu umambo usikaperi hwa Mambo wedu no Muponesi Jesu Kristu. Ndizvo ndinozogara ndechimucherechejisa ngo izvi, pikija mwechizviziva, nokuti mwakajimikwa mu gwinyiso iro romunaro. Neni ndinopinimija kuti zvakanaka, ngo nguva jese jo ndiri mutende iri, kumumusa ngo kumucherechejisa; ndechiziva kuti kubviswa kwo tende rangu kunokasira kuviya, kudari ngo zvaakavonisa kwendiri Mambo wedu Jesu Kristu. Eya ndinozotsamwirira, kuti nguva jese ngo sure kwo kufa kwangu mungazokona kucherecheja izvi. Ngokuti atizivi kutevera ngano jakaizwa ngo urimbwi, apo takazivisa kwomuri simba no kuviya kwa Mambo Jesu Kristu, asi tayiva zvapupu zvo majiso zvo ukuru hwake. Ngokuti wakaashira kureremejwa no uthende zvakabva kuna Mwari Baba, apo izwi rakadaro rakaviya kwaari rechibva ku uthende hwakanakisisa, rechiti: “Uwu uri Mwana wangu unodikana, wendinonasa kudakara ndiye:” Nesu pachedu takarizwa izwi rechibva mugore, apo tinaye pa dundhu rakachena. Nesu tino izwi rakaprofetwa rakapinda kugwinya; kweriri munonasa kuripurutana iro riri ruvhenu runojeka mundau ino chidima, mbhera zuva rieje, no ndhondo masase ibude mumwoyo yenyu, mwechiziva ichi: Kutanga, kuti akuna kuprofeta mumatahwa kunodurujihwa ngo mundhu. Ngokuti akuna kuprofeta kwakambovapo ngokuda kwo mundhu, asi vandhu vakavereketa zvinobva kuna Mwari, vechindondundwa ndi Mweya Wakachena. Asi kwayivapo vaprofeti vokunyepa pakati po vandhu, kudari ngo zvo vanozovapo vajijisi vokunyepa pakati penyuzve, vanozonghwinisa ngo kufishika zvijijiso zvo kurashwa, vechiramba Mambo pachake wakavatenga, vechijizisira panyezuru pavo kurashwa kunokasira. No vazhinji vanozotevera njira javo jakashata; ngo ndava yavo njira yo gwinyiso inozoshohwa. Mukuemura vanozomutengesa ngo mazwi okujiitisa; avo kutongwa kwavo kubvira karetu akunonoki, no kurashwa kwavo akuvati. Ngokuti kudari Mwari asikazivi kukungurira ngirosi jakashaisha, asi wakajikandira murindi rakapindisisa kujika, kuti jingwaririhwe kutongwa muzvisungo zvo chidima. Asikazivi kukungurira nyika yo kare, asi wakangwarira Noa, muchumairi wo kururama, pamwepo no vamweni vanomwe, apo azisa ndambi panyezuru po nyika yo vasikadiri Mwari; naye echipinduja madhoropa o Sodhoma no Gomora kuyita marota wakaarasha ngo kuaparaja, akaaita chivonero kwavari vanozopona vasikadiri Mwari; akanunurira Roti wakarurama, wakatambujika kakurutu ngo kupona mukuemura kwo vakashata, (ngokuti mundhu uwo wakarurama echigara pakati pavo, mukuvona no kuzwa, wakatambujika mumweya wake wakarurama zuva ngo zuva, ngo zviito zvavo zvisikazivi kururama). Mambo unoziva njira yo kununurira vanodira Mwari mukuejwa, no kungwarira vasikazivi kururama pasi po nyatwa mbhera rigume zuva ro kutongwa; asi kakurutu avo vanofamba ngo zvo nyama mukuemura kunosvipisa, vechishora kutongwa. Vari vano mutizinini, vanoyita kuda kwavo, avatyi kutuka vakuru. Apo ngirosi pikija jinopinda ngo ukuru no simba, ajiviisi kutonga kwo kuvatuka pamberi pa Mambo. Asi ava, vechituka ngo ndava jo vasikazivi, vakadari ngo zvinyama zvisina mipinimijo, vanopera mukuvora kwavo. Vanozoashira musharo wo kuyita zvakashata; avo vanokuita kudakara masikati, vari mavara no mavonje, vechidakara ngo kuchengeja kwavo apo vechiha nemwi. Vano majiso akazara ngo kuomba, vasikakoni kuregera kushaisha, vechionga mweya isikazivi kugwinya, vano mwoyo wakarovejera mukuemura, vari vana vokutukwa; vechisiya njira yakanaka, vakapauka, vechitevera njira ya Bharami mwana wa Bheori, uwo wakada musharo wo kuyita zvakashata; asi wakatakwa ngo ndava yo kupauka kwake, mbongoro iri mbeveve yakavereketa ngo izwi ro mundhu, ikarambija kupenga kwo muprofeti. Ava vari zvinyuka zvisina kumwa, no mbhute inotindhwa ngo muvumo, avo vanongwaririhwa kusvipa kwo chidima. Ngokuti vechivereketa mazwi makuru okujikuja asina shwiro, vanonyengerera mukuemura kwo nyama, ngo kuvereketa kwavo vatopokonyoka kwavari vanogara mukupauka. Vechivagondisa kusununguka apo avo pachavo vari varanda vo kuvora; ngokuti uwo waanonyiswa ndiye mundhu, ndiezve waanozoziswa ndiye muuhloko. Ngokuti apo vapokonyoka kubva kuizvo zvinosvipisa zvo nyika ngo kuziva ndi Mambo no Muponesi Jesu Kristu, vechikopfamiswazve kwo zviri no kunyiswa, chiemo chavo cho kugumisira chinoyita chakapinda kushata kuno chokutanga. Ngokuti kwayinga kwakapinda kunaka kwavari kuti vasaziva njira yo kururama, kuno kupetuka sure kubva kumupango wakachena uwo wakapuwa kwavari. Kwakaitika kwavari kudari mazwi akangwara ano gwinyiso: “Imbhwa yahwirirazve kumarucho ayo, no nguruve yakasukwa yakahwirirazve kooburukuta mumatope.” Vanodikana, zvino iyi iri tshamba yochipiri yo ndinotara kwomuri; ndijo jese ndinomusira mipinimijo yenyu ino gwinyiso ngo kumucherechejisa; kuti mucherecheje mazwi akavereketwa kare ngo vaprofeti vakacheneswa, no mupango wa Mambo no Muponesi wedu ngo vapostori venyu: Mwechiziva ichi pakutanga, kuti, ngo mazuva okugumisira vanoyita jee vanozoviya no jee, vechifamba ngo kuemura kwavo. Vechiti, chigondiso cho kuviya kwake chiri kwapi? Ngokuti kubvira ku nguva yo vakavata majibaba, zvese zviro zvakandogara kudari ngo mugariro wazvo kubvira mukutanga kwo kusikwa. Ngokuti ngo kujiitisa vanokanganwa ichi, kuti, ngo izwi ra Mwari kare matenga ayivapo, no nyika ngokudaro, yechibudiswa mukumwa iri pakati po kumwa: Ndiyo nyika iyo yayivapo yechidumaijwa ngo kumwa, yakaparajwa: Asi matenga aavapo zvino, no nyika ngo izwi rakatojana zvakangwarihwa muriro, zvechingwaririhwa kuno zuva ro kutonga no ro kuurawa kwo vandhu vasikadiri Mwari. Asi, vanodikana, musakanganwa chiro chimwe ichi, kuti zuva rimwe kuna Mambo rakadari ngo chiuru (1.000) cho makore, no chiuru (1.000) cho makore chakadari ngo zuva rimwe. Mambo aanonoki kudari ngo chigondiso chake, kudari ngo njira yo vanoti vamweni kuti kuri kunonoka, asi unosengerera kwomuri, asikadi kuti naumwe arashwe, asi kuti vese vatenderuke. Asi zuva ra Mambo rinozoguma kudari ngo mbavha; ngo iro matenga anozopinda ngo kutindhira kukuru, no zvo mugore zvinozonyunguruka ngo kupisa, no nyika no mishando iri mukati mwayo zvinozopiswa. Kwechivoneka kuti izvi zvese zvinozonyunguruka kudaro, kunodikana kuti muite vandhu vakaitawani mukupona kwese kwakachena no mukudira Mwari; mwechigarira no kudisisisa kuviya kwo zuva ra Mwari, ngo ndava yaro matenga echibwaka anozonyunguruka, no zvo mugore zvinozonyunguruka ngo kupiswa ngo muriro? Asi kudari ngo chaakagondisa, tinogarira matenga mapsha no nyika ipsha, umwo munogara kururama. Ndizvo, vanodikana, kwechivoneka kuti munogarira zvakadaro, tsamwiriranyi kuti muvoneke ndiye muri mukunyarara, musina vara no ndava mukuvona kwake. Muverenge kuti kusengerera kwa Mambo wedu kuri ruponeso; kudari ngo zvo yakamutarira hama yedu inodikana Pauri, ngo ungwaru hwakapuwa kwaari: Kudari ngo zvaakananga mutshamba jake jese, echivereketa mwejiri ngo izvi, mwejiri munozvizhinji zvinonesa kuzwisisa, izvo, vasikazivi no vasina simba vanozvikunukuja, kudari ngo zvo vanoitazve kuno matahwa amweni, kuyita kuraswa kwavo. Ndizvo imwimwi vanodikana, mwechiziva izvi kutanga, ngwaranyi kuti murege kutohwa ngo kupauka kwo vakashata, muwe kubva mukuima kwenyu. Asi kuranyi mu nyasha, no kuziva kwa Mambo wedu no Muponesi Jesu Kristu. Kwaari ngakuve no uthende zvino no mbhera narini. Ameni. Icho chayivapo kubvira pakutanga, chetakazwa, chetakavona ngo majiso edu, chetakaringira no nyara jedu jakabata, chiri izwi rokupona. (No kupona ukwo kwakapangijihwa, nesu takakuvona, tinoita chapupu, no kuteketesa kwomuri ukwo kupona kwo mbhera narini, kwayiva na Baba, kukapangijihwa kwetiri); icho cho takavona no cho takazwa tinochiteketesa kwomuri, kuti imwimwivo muiyane nesu; eya, no kuiyana kwedu kuri kuna Baba, no Mwana wake Jesu Kristu. Nesu tinotara izvi kwomuri kuti kudakara kwedu kuzarisike. Iri ndiro soko retakazwa kwaari no kuteketesa kwomuri, kuti Mwari uri kujeka, no kwaari akuna chidima no padodoko. Kudari techinanga kuti tinoiyana naye, asi techifamba muchidima tinonyepa, tisikaiti gwinyiso. Asi kudari techifamba mukujeka kudari ndiye uri mukujeka, tinoiyana umwe no umweni, no ngazi ya Jesu Mwana wake inotisuka kushaisha kwese. Kudari techinanga kuti atina zvishaishi, tinojichengeja pachedu, no gwinyiso amuna mukati mwedu. Kudari techitenda zvishaishi zvedu iye unogondeka no kururama unotiregerera zvishaishi zvedu, no kutisuka kusikarurami kwese. Kudari techinanga kuti atizivi kushaisha, tinomuita munyepi, no izwi rake amuna mukati mwedu. Vana vangu vadodoko, ndinotarira kwomuri izvi zviro kuti musashaisha; kudari aripo mundhu unoshaisha tina muimiriri kuna Baba, Jesu Kristu wakarurama. No uwu ndiye muripiri wo zvishaishi zvedu, haiwa wo zvedu zvega, asi no wo nyika yese nayo. Ngo ichi tinoziva kuti tinomuziva, kudari techingwarira mipango yake. Iye unoti: Ndinomuziva, asikangwariri mipango yake, uri munyepi, no gwinyiso amuna akadi mukati mwake, asi pikija ndiyani unongwarira izwi rake, ngo gwinyiso rudo rwa Mwari rwakaperera mukati mwake; ngo ichi tinoziva kuti tiri mukati mwake. Iye unoti unogara mukati mwake kunodikana kuti afambevo kudari ngo zvaakafamba. Vanodikana, anditari mupango mupsha kwomuri, asi ndinotara mupango wokaretu, wo mwayiva nawo kubvira pakutanga. Uwo mupango wokaretu ndiwo uri izwi romakazwa. Zve, mupango mupsha ndinoutara kwomuri, uri wo gwinyiso mukati mwake, no mukati mwenyu. Ngokuti chidima chapinda, no kujeka kwo gwinyiso kunojeka nazvino. Iye unoti kuti uri mukujeka, echinyenya hama yake, uchiri muchidima mbhera nazvino. Iye unoida hama yake, unogara mu kujeka, amuna chikhugunyiso mukati mwake. Asi uwo unonyenya hama yake uri muchidima, unofamba muchidima asikazivi paanoenda, ngokuti chidima chakafukija majiso ake. Ndinotarira kwomuri, vana vadoko, ngokuti zvishaishi zvenyu zvakaregerehwa ngo ndava yo zina rake. Ndinomutarira majibaba ngokuti munoziva uwo wayivapo kubvira pokutanga. Ndinomutarira majaha, ngokuti mwakamunyisa uwo wakashata. Ndinomutarira vana vadoko, ngokuti munovaziva Baba. Ndamutarira majibaba, ngokuti mwamuziva uwo wayivapo kubvira pokutanga. Ndamutarira majaha ngokuti mune simba, no izwi ra Mwari rinogara mukati mwenyu, nemwi mwakanyisa uwo wakashata. Musada nyika nokuti zviro zviri mukati mwo nyika. Kudari aripo unoda nyika, rudo rwa Baba amuna mukati mwake. Ngokuti zvese zviri mu nyika, kuemura kwo nyama, no kuemura kwo majiso, no kujikuja kwo kupona, azviri zva Baba akadi, asi zviri zvo nyika. No nyika inopinda, no kuemura kwayo: Asi iye unoyita kuda kwa Mwari unondogara mbhera narini. Vana vadoko, iri nguva yo kugumisira, no kudari ngo zvo mwakazwa kuti bandu ra Kristu rinoviya, na zvino aavapo mapandu akawanda a Kristu, ngo izvi tinoziva kuti iri nguva yo kugumisira. Vakabva kwetiri, asi avasayiva vedu akadi; ngokuti kudari vayiva vedu, vangadari vayigara nesu, asi vakabva, kwetiri kuti kupangijihwe kuti vese avasayiva vedu akadi. Nemwi munokuzojwa kunobva kuno Uwo Wakachena, munoziva zvese. Andizivi kutara kwomuri ngokuti amuzivi gwinyiso, asi ngokuti munoriziva, ngokutizve akuna nyepo rinobva mu gwinyiso. Ndiyani uri munyepi, asi iye unokanija kuti Jesu andiyepi Kristu? Uwu ndiye uri bandu ra Kristu, unokanija Baba no Mwana. Pikija ndiyani unoramba Mwana, aanazve Baba; iye unotenda Mwana unaezve Baba. Asi icho cho mwakazwa kubvira pakutanga ngachigare nemwi. Kudari icho chemwakazwa kubvira pakutanga chechigara mukati mwenyu, imwimwizve munozogara mukati mwo Mwana, no mukati mwa Baba. No ichi ndicho chigondiso chaakatigondisa, chiri kupona kusikaperi. Ndinotara ichi kwomuri ngo ndava yo avo vanomupaukisa. Asi kuzojwa kwo mwakaashira kwaari kunogara mukati mwenyu, amutami kuti mundhu amujijise; asi kudari ngo kuzoja kwake kunomujijisa ngo zviro zvese, kuri gwinyiso, akuri kunyepa akadi, kudari ngo zvo mwakajijiswa, munogara mukati mwake. Zvino, vana vadoko, garanyi mukati mwake, kuti apo iye echizopangijihwa, isisu tingava no kushinga, tisikapsheruki pamberi pake mukuviya kwake. Kudari mwechiziva kuti iye wakarurama, munozivazve kuti vese vanoyita zvakarurama vakabahwa ndiye. Vonanyi kukura kwo rudo rwaakatipa Baba kuti tidanijwe kuti tiri vana va Mwari, nesu tiri vakadaro. Ngo iyi ndava nyika aitizivi, ngokuti aizivi kumuziva. Vanodikana, zvino tiri vana va Mwari, akusati kwavoniswa kuti tinozova vakadini. Asi tinoziva kuti apo iye opangijihwa tinozodari ndiye, ngokuti tinozomuvona kudari ngo zvaari ndizvo. Mundhu wese uno iri gonda mukati mwake unojichenesa, kudari ndiye wakachena. Mundhu wese unoyita zvishaishi unogura mipango, ngokuti chishaishi chiri kugura mipango. Nemwi munoziva kuti iye wakapangijihwa kuti abvise zvishaishi zvedu no mukati mwake amuna kushaisha. Mundhu wese unogara mukati mwake aashaishi, uwo unoshaisha aazivi kumuvona, nokuti kumuziva. Vana vadoko, musatendera mundhu kuti amupaukise. Iye unoyita zvakarurama uri wakarurama kudari ndiye uri wakarurama. Iye unoyita kushaisha uri wa Dhiabhorosi, ngokuti Dhiabhorosi unondoshaisha kubvira pakutanga. Ngo iyi ndava, Mwana wa Mwari wakapangijihwa kuti aparaje mishando ya Dhiabhorosi. Mundhu wese wakabahwa ndi Mwari aashaishi, ngokuti mbewu yake inogara mukati mwake, aangashaishi ngokuti wakabahwa ndi Mwari. Ngo ichi vana va Mwari, no va Dhiabhorosi vanovoneka. Mundhu wese usikaiti zvakarurama aari wa Mwari akadi, no uwozve usikadi hama yake. Ngokuti iri ndiro soko ro mwakazwa kubvira pakutanga, rokuti tidane. Tisikadari ndi Kheni, uwo wayiva wakashata, akauraya munukuna wake. Wakamuurairenyi? Ngokuti mishando yake yayinga yakashata, no yo munukuna wake yayinga yakarurama. Musashama, hama kuti nyika yechimunyenya. Tinoziva kuti takabva mukufa kuenda mukupona, ngokuti tino rudo ku hama. Iye usina rudo unogara mukufa. Mundhu wese unonyenya hama yake uri muurayi, nemwi munoziva kuti akuna muurayi uno kupona kusikaperi kunogara mukati mwake. Ngo ichi tinoziva rudo, ngokuti iye ngo ndava yedu wakadira pasi kupona kwake: Nesu kunodikana kuti tidire pasi kupona kwedu ngo ndava yo hama. Asi uwo uno upfumi hwo mu nyika, naye echivona hama yake iri mukutama, echikonyera nyasha jake kwaari, rudo rwa Mwari rungaita magarirenyi mukati mwake? Vana vadoko, tisada ngo izwi, nokuti ngo rurimi, asi ngo zviito na ngo gwinyiso. Ngo ichi tinoziva kuti tiri vo gwinyiso, zve, nokuti tinozogwinyisa mwoyo yedu pamberi pake, kudari mwoyo yedu yechitiitira ndava, Mwari uri mukuru kuno mwoyo yedu, naye unoziva zviro zvese. Vanodikana kudari mwoyo yedu isikatiitiri ndava, tinokushinga kuna Mwari. Pikija chinyi chetinokumbira kwaari tinochiashira, ngokuti tinongwarira mipango yake, nokuita izvo zvinomudakajisa mukuvona kwake. No ichi chiri mupango wake, kuti titende zina ro Mwana wake Jesu Kristu, nokuva no rudo umwe kuno umweni kudari ngo zvaakatipanga. No uwo unongwarira mipango yake unogara mukati mwake, nayezve mukati mwake. Ngo ichi tinoziva kuti iye unogara mukati mwedu, ngo Mweya uwo waakatipa. Vanodikana, musatenda mweya yese, asi ejanyi mweya muvone kuti iri ya Mwari here, ngokuti vaprofeti vazhinji vokunyepa vakabuda kuenda mu nyika. Ngo ichi munoziva mweya wa Mwari: Mweya wese unotenda kuti Jesu Kristu wakaviya mu nyama, ngo wa Mwari, no mweya wese usikatendi Jesu, auri wa Mwari akadi; no uwo ndiwo mweya wo bandu ra Kristu, wo mwakazwa kuti unoviya nazvino waamunyika. Imwimwi muri va Mwari, vana vadoko, mwakavanyisa, ngokuti uri mukati mwenyu wakakura kupinda uri mu nyika. Ivo ngo vonyika. Ndizvo vanovereketa ngo zvo nyika, no nyika inovazwa. Isisu tiri va Mwari; uwo unomuziva Mwari, unotizwa, no uwo usiri wa Mwari aatizwi; ngo ichi tinoziva mweya wo gwinyiso no mweya wo manyepo. Vanodikana, ngatidane ngokuti rudo runobva kuna Mwari, no mundhu wese uno rudo, wakabahwa ndi Mwari unomuziva Mwari. Uwo usina rudo aamuzivi Mwari, ngokuti Mwari uri rudo. Rudo rwa Mwari rwakapangijihwa kwetiri ngo ichi; kuti Mwari wakatuma Mwana wake mu nyika wakabahwa ari ega kuti tiponeswe ndiye. Rudo ruri mune ichi, andikwopi kuti isisu takamuda Mwari, asi kuti iye wakatida isisu, akatuma Mwana wake kuti aite muripiri wo zvishaishi zvedu. Vanodikana, kudari Mwari wakatida kudaro, kunodikana kuti isisu tidane. Akuna mundhu wakambovona Mwari pikija ngouri mukuvo: Kudari techidana, Mwari unogara mukati mwedu no rudo rwake runoita rwakaperera mukati mwedu. Ngo ichi tinoziva kuti tinogara mukati mwake, naye unogara mukati mwedu, ngokuti wakatipa Mweya wake. Nesu takavona, tinopupurazve kuti Baba vakatuma Mwana kuti aite muponesi wo nyika. Pikija ndiyani unotenda kuti Jesu uri Mwana wa Mwari, Mwari unogara mukati mwake, naye unogara mukati mwa Mwari. Nesu tinoziva, takatenda rudo rwaanarwo Mwari kwetiri. Mwari uri rudo, no uwo unogara murudo unogara mukati mwa Mwari, na Mwari unogara mukati mwake. Ngo ichi rudo runoita rwakaperera kwetiri, kuti tive no kushinga ngo zuva ro kutongwa, ngokuti kudari ngo zvaari ndizvo iye, nesu takadarovo mu nyika muno. Amuna kutya murudo, asi rudo rwakaperera runogogomera kutya, ngo kuti kutya kuna maharura, asi uwo unotya aazivi kuperera murudo. Tino rudo ngokuti iye wakatanga kuva no rudo kwetiri. Kudari aripo mundhu unoti: Ndinomuda Mwari, naye echinyenya hama yake, uri munyepi; ngokuti uwo usina rudo kuna hama yake yaanovona, aangavi no rudo kuna Mwari waasikazivi kumbovona! No uwu ndiwo mupango wotinawo kubva kwaari, kuti uwo unomuda Mwari, ngaavezve no rudo kuno hama yake. Mundhu wese unotenda kuti Jesu uri Kristu, wakabahwa ndi Mwari, no mundhu wese unoda wakabara, unodazve mwana wakabahwa ndiye. Ngo ichi tinoziva kuti tinoda vana va Mwari: apo techida Mwari no kungwarira mipango yake. Ngokuti urwu ndirwo rudo rwa Mwari: Kuti tingwarire mipango yake; no mipango yake airemi. Ngokuti mundhu wese wakabahwa ndi Mwari unonyisa nyika; no uku ndikwo kunyisa kwakanyisa nyika, kuri kugonda kwedu. Ndiyani uwo unonyisa nyika kwega uwo unotenda kuti Jesu uri Mwana wa Mwari? Uwu ndiye wakaviya ngo kumwa no ngazi, ndi Jesu Kristu, aazivi kuviya ngo kumwa yega, asi ngo kumwa na ngo ngazi. Mweya ndiwo unopupura, ngokuti Mweya uri gwinyiso. Ngokuti varipo vatatu vanopupura. Ndi Mweya, no kumwa, no ngazi, naavo vatatu vanotenderana chiro chimwe. Kudari techiashira uchapupu hwo vandhu, chapupu cha Mwari chakapinda kukura, ngokuti ichi ndicho chapupu cha Mwari chaakapupura ndicho ngo ndava yo Mwana wake. Iye unotenda Mwana wa Mwari uno uchapupu mukati mwake. Iye usikatendi Mwana wa Mwari unomuita munyepi, ngokuti aazivi kutenda uchapupu hwakapupuhwa ndi Mwari ngo ndava yo Mwana wake. No uwu ndihwo uchapupu: Kuti Mwari wakapa kwetiri kupona kusikaperi, no ukwo kupona kuri ku Mwana wake. Iye uno Mwana uno kupona; no uwo usina Mwana wa Mwari, aana kupona. Izvi zviro ndazvitarira kwomuri kuti muzive kuti munakwo kupona kusikaperi, imwimwi munotenda zina ro Mwana wa Mwari. Ndikwo kushinga kwo tinakwo kwaari, kuti techikumbira chiro pikija ngochiri ngo kuda kwake, iye unotizwa. Nokudari techiziva kuti unotizwa, ngo icho chetinokumbira, tinoziva kuti taanacho chetakakumbira kwaari. Kudari mundhu echivona hama yake echiita chishaishi chisiri cho kufa, iye unozokumbira, na Mwari unozomupa kupona, kunopuwa vasikaiti chishaishi cho kufa. Chiripo chishaishi cho kufa, ngo ichi andinangi kuti akumbire ngo ndava yacho. Kwese kusikarurami kuri kushaisha, kuripozve kushaisha kusiri kwo kufa. Tinoziva kuti mundhu wese wakabahwa ndi Mwari aashaishi, ngokuti wakabahwa ndi Mwari unongwarihwa ndiye, no uwo wakashata aamupshasi. Tinoziva kuti tiri va Mwari, no nyika yese inogara pasi po simba ro uwo wakashata. Nesu tinoziva kuti Mwana wa Mwari wakaviya, akatipa kuzwisisa kuti tizive uwo uno gwinyiso. Nesu tiri mukati mwo uwo uri gwinyiso, mukati mwo Mwana wake Jesu Kristu. Uwu ndiye Mwari wo gwinyiso, no kupona kusikaperi. Vana vadoko, jingwarirenyi kubva kumiezaniso yo kudira. Musharuka kuna mayi vakatsananguhwa no vana vavo, vondinoda ngo gwinyiso, andinipi ndega, asi navo vese vanoziva gwinyiso. Ngo ndava yo gwinyiso rinogara mukati mwedu, naro rinozova nesu mbhera narini. Nyasha no kukungurihwa, no kunyarara ngazvive nesu, zvechibva kuna Mwari Baba na Jesu Kristu Mwana wa Baba, mu gwinyiso no murudo. Ndinodakara kakurutu ngokuti ndakavona vamweni vo vana vako vechifamba mukati mwo gwinyiso, kudari ngo zvetakaashira mupango kuna Baba. Nazvino ndinomupota, mayi haiwa kuti ndinotara kwomuri mupango mupsha, asi wo tayiva nawo kubvira pokutanga kuti tidane. No urwo ndirwo rudo; Kuti tifambe kudari ngo mipango yake, uwo ndiwo mupango, kudari ngo zvo mwakazwa kubvira pakutanga, kuti mufambe mukati mwawo. Ngokuti vachengeji vazhinji vakabuda kuenda mu nyika, vasikatendi kuti Jesu Kristu wakaviya munyama. Uwu ndiye muchengeji no bandu ra Kristu. Jingwarirenyi kuti musazorashikihwa ngo zvo takashanda, asi kuti muashire musharo wakaperera. Mundhu wese unopinda vamweni asikagari muzvijijiso zva Kristu, aana Mwari. Uwo unogara muzvijijiso unavo vese, Baba no Mwana. Kudari aripo mundhu echiviya kwomuri, asikazisi uku kujijisa, musazomuashira mu nyumba jenyu, zve, musazomuchungamija. Ngokuti uwo unomuchungamija unofambisana no mishando yake yakashata. Pikija ndinozvizhinji zvo kutara kwomuri andidi kuzvitara paphepa ngoinki, asi ndino gonda kuti ndichaviya kwomuri, no kuvereketa techipingurana ngo muromo, kuti kudakara kwedu kuzarisike. Vana vo hanzvaji yako yakatsananguhwa vanokutambisa. Musharuka kuna Gaiyo unodikana wo ndinoda ngo gwinyiso. Unodikana, ndinokukumbira kuti ngo zviro zvese ubudirire ugwinye, kudari ngo zvo unobudirira mweya wako. Ngokuti ndakadakara kukurutu, apo hama jakaviya jechipupura ngo gwinyiso rako, kudari ngo zvo unofamba mugwinyiso. Andina kudakara kunopinda kukura kuno uku, kuzwa ngo kufamba kwo vana vangu mugwinyiso. Unodikana unoyita mushando unogondeka, ngo izvo zvo unoitira hama no vapfumba; avo vakapupura ngo rudo rwako pamberi po chiara: Uchanasa kuti wechivaperekeja mumuhambo wavo ngo njira inosisira Mwari; ngokuti ngo ndava yo iro zina, vakabuda kuenda, vasikatori chiro kubva kuno vo majinja. Ndizvo tinosisira kuashira vakadaro, kuti tiite vashandi pamwepo navo mugwinyiso. Ndakatarira zvakatikuti kuchiara, asi Dhiotrafesi, uwo unoda kuyita mukuru pakati pavo, aatiashiri. Ndizvo, kudari ndechiviyeyo, ndinocherecheja mishando yake yaanoita, echitireva ngo mazwi akashata; asikakwaniswi ngo ukwo, zve, iye pachake aashiri hama, naavo vanoda kuvaashira, unovarambija, no kuvambirimbija muchiara. Vanodikana, musaejerera icho chakashata, asi icho chakanaka. Iye unoyita zvakanaka ngo wa Mwari; asi uwo unoyita zvakashata aazivi kumuvona Mwari. Dhemetriyo unopupurihwa ngo vandhu vese, na ngo gwinyiso pacharo naro; eya, nesu tinopupuravo, newe unoziva kuti uchapupu hwedu huno gwinyiso. Ndina zvizhinji zvo kutara, asi andidi kuti ndizvitare kwomuri ngeinki no peni: Asi ndinogonda kuti ndinokasira kukuvona, nesu tinozovereketa kupingurana ngo muromo. Kunyarara ngakuve kwouri. Shamwari jedu jinokutambisa. Chungamija shamwari imwe ngaimwe ngo zina rayo. Judha, muranda wa Jesu Kristu, no hama ya Jakobe, kwavari vakadanijwa, vanodikana kuna Mwari Baba, vanongwaririhwa Jesu Kristu. Kukungurihwa, no kunyarara no rudo ngazviwanjwe kwomuri. Vanodikana, apo ndechidisisa zvikuru kutara kwomuri ngo ruponeso ruri kwetiri tese, ndakavangirijwa kutara kwomuri, ndechimupota kuti murwire kakurutu kutenda kwakapuwa kamwe kuna vakacheneswa. Ngokuti varipo vandhu vakatikuti, vakanghwina ngo kufishika, ndivo vakaemesehwa kare kuti vavone uku kurashwa, vari vandhu vasikadi Mwari, vechiphinduja nyasha ja Mwari wedu kuyita kuemura, vechiramba uwo ari mutungamiriri ega, na Mambo wedu Jesu Kristu. Zvino ndinoda kumurangarijisa, pikija munondozviziva zvese izvi, ngonjira yo vakauraya ndiyo Mambo avo vandhu vasikazivi kutenda, sure kwo kuvaponesa kubva ku nyika yo Egipite. No ngirosi ijo jisikazivi kugara mundau yajo yo kutonga, asi jakasiya ugaro hwajo hwaijisisira, iye wakajingwarira jakasungwa ngo magaragajero asikaperi pasi po chidima mbhera rigume zuva guru rokutongwa. Kudari ngo Sodhoma no Gomora, no madhoropa aiyatendeneja, ao achijipira mukuomba, kwakadari ngaao, echienda mukuita zvakashata no nyama imweni, anoemeswa kuyita chivonero, achitambujika ngo kurohwa ngo muriro usikajimi. Ngokudaro vandhu ava mukurota hope javo, vanosvipisa muviri yavo no kuramba majimambo, no kushora uthende wo kudenga. Asi Mikaeri, ngirosi huru apo yairwa na Dhiabhorosi, yechikanija ngo ndava yo muviri wa Mosi, isikazivi kuchunga kumuitira kutukwa kwo kutonga, asi yakati: “Mambo ngaakukamise!” Asi ava vandhu vanotuka ngo izvo zvo vasikazivi no zvo vanoziva ngo chibarihwe chavo, navo vanoshaishihwa ngo izvo zvo vasikazwisisi kudari ngo nyama jisina mupinimijo. Khombo kwavari! Ngokuti vakafamba ngo njira ya Kheni, vakajirasa mukupauka kwa Barami kuti vawane kuviihwa, vakafa mukati mwo hasha ja Kora. Ava ndio mapuwe vakafishika mukuha kwenyu kwo rudo, apo vechiha nemwi, vahavisi vanojigutisa vachikatyi; makore asina kumwa, anotutwa ngo bepo, vari miti yo chipepo isina muchero, yakafa kaviri, yakabvitwa no miji; vari mavimbi ojombe akanyangajwa, echibudisa mafuro okupsheruka kwao, ndhondo jinopepesheka, vakangwaririhwa kusvipa kwo chidima mbhera narini. Enoki wo chinomwe kubva kuna Adhamu wakaprofeta ndivo, echiti: “Vonanyi, Mambo wakaviya no vakacheneswa vake vakawandisisa”, kuti atonge vese, no kunyisa vese vasikadiri Mwari ngo mushando yavo yese yo vakayita ngo kutama kudira Mwari, no kunyisa zvese zvinorema zvakavereketwa ngo vashaishi vasikadiri Mwari. Ava vari van'un'uti no vasikatendi vachifamba kudari ngo kuemura kwavo, no miromo yavo inovereketa mazwi makuru okujikuja, vechisana vandhu kuti vawane kupfumiswa. Asi imwimwi, vanodikana, rangariranyi mazwi akavereketwa ngo vapostori va Mambo wedu Jesu Kristu. Vakati kwomuri kuti: “Ngo mukuvo wo kugumisira kunozovepo vaiti vo jee, vechifamba kudari ngo kuemura kwavo kwo kusikadiri Mwari.” Ava ndivo vanoparajana no vamweni, vari vo nyama vasina Mweya. Asi imwimwi, vanodikana, mwechijivaka panyezuru po kugonda kwenyu kwakachenesesa, mwechikumbira mu Mweya Wakachena, jingwarirenyi murudo rwa Mwari, mwechirindira kukungurira kwa Mambo wedu Jesu Kristu, muwane kupona kusikaperi. Muitire nyasha vamweni vari mukugononda; no vamweni mwechivaponesa, mwechivabvuka kubva mumuriro; no vamweni muchivaitira nyasha ngo kutya, mwechinyenya no zvo kufuka zvakasvipiswa zvina mavara onyama. Zvino kwaari unosimba rokumungwarira kubva mukupsherujwa, no kumuemesa pamberi po uthende hwake musina ndava, ngo kudakara kwakakura, kuna Mwari ari ega Muponesi wedu, ndiye Jesu Kristu Mambo wedu, ngakuve no uthende, no umambo, no kutonga no simba, nguva isati yaavepo, nazvino, no mbhera narini. Ameni. Chakapangijihwa cha Jesu Kristu, chaakapuwa ndi Mwari, kuti apangijire kuvaranda vake izvo zvinosisira kuitika ngo kukasira, naye wakatuma, akazvipangijira ngo ngirosi yake kumuranda wake Johani, uwu wakapupurira izwi ra Mwari no uchapupu hwa Jesu Kristu, hwo zvese zvaakavona. Unomuchena uwo unojija, naavo vanozwa mazwi okuprofeta uku, no kungwarira zvakatahwa mukati mwao; ngokuti nguva yaaphedo. Johani kuzviara zvinomwe zviri mu Aziya: Nyasha ngajive kwomuri no kunyarara, zvinobva kuna uwo uripo, wayivapo, no unoviya; nokubva kumweya minomwe iri pamberi po dendemaro rake; nokubva kuna Jesu Kristu uri chapupu chakagondeka, ari dangwe ro kumuka kwo vakafa, no mutongi wo majimambo onyika. Kwaari wakatida, akatisunungura kuzvishaishi zvedu ngo ngazi yake, akatiita vo umambo, no vapristi kuna Mwari Baba wake, kwaari ngakuve no uthende no kutonga mbhera narini. Ameni. Vonanyi unoviya no makore, no majiso ese anozomuvona, naavozve vakamubaya no majinja ese onyika anozochumba ngo ndava yake. Eya, Ameni. Ndiri Arifa na Omega, unonanga Jehovha Mwari, kudaro, Unosimbarese, pakutanga, zvino, no kunguva inoviya. Inini Johani, hama yenyu no shamwari yenyu mukutambujika no mu umambo, no kusengerera kuna Jesu, ndiri pa chirundu chinozwi Patimosi, ngo ndava yo izwi ra Mwari, no yo uchapupu hwa Jesu. Ndayinga ndiri mu Mweya ngo zuva ra Mambo, ndakazwa sure kwangu izwi guru rinonga kurira kwo mbhayapaya, rechiti: “Icho chounovona, tara mutshamba, uitumire muzviara zvinomwe: Ku Efesu, ku Semerina, ku Perigamu, ku Tiyatira, ku Saridesi, ku Firadhefiya, no ku Raodhikiya.” Neni ndakakunukuka kuti ndivone izwi rakavereketwa kwendiri. Naapo ndakunukuka, ndakavona zvigajikiro zvo zvibani zvinomwe zvo mukore; no pakati po zvigajikiro zvo zvibani ndakavona umwe wakadari ngo Mwana wo Mundhu, akasimira chokufuka chakaguma kutshoka, no diti rake rakasungwa ngo bhande ro mukore. No musoro wake no bvuji rake zvakachena kudari ngo mabviri obvuta, zvakachena kudari ngo chando, no majiso ake akadari ngo murazvu wo muriro. No tshoka jake jakadari ngo thusi rinon'anikira, apo rapiswa muchoto; no izwi rake raidari ngo chaungu cho kumwa yakawanda. No munyara yake yo kumuho wayinga akabata ndhondo nomwe, no shoti inopinja ino upanga huviri yakabuda kumuromo wake, no hope yake yain'anikira kudari ngo zuva rinojeka ngo simba raro. Naapo ndamuvona, ndakawa pa tshoka jake inga uwo wafa. Naye wakadira nyara yake yo kumuho panyezuru pangu, echiti: “Usatya; ndiri Muambi no Mugumisiri, ndiri iye unopona, inga ndafa vonayi ndinopona mbhera narini, neni ndino zvavhi zvo kufa no wo Haidhesi. Ndizvo tara zviro zvo wavona, no zviripo, no zvinozoitika sure kwa izvi, no chakafishika cho ndhondo nomwe jowavona munyara yangu yo kumuho, no zvigajikiro zvo zvibani zvinomwe zvo mukore. Ndhondo nomwe, ingirosi jo zviara zvinomwe, no zvigajikiro zvo zvibani zvinomwe zviri zviara zvinomwe.” “Tarira ku ngirosi yo chiara chiri mu Efesu, wechiti: Unonanga izvi uwo wakabata ndhondo nomwe munyara yake yo kumuho, unofamba pakati po zvigajikiro zvo zvibani zvinomwe zvo mukore: Ndinoziva mishando yako no kutambujika kwako, no kusengerera kwako nokuti autenderi vandhu vakashata, newe wakavaeja vanojidanija kuti vapostori, asi andivopi, wakavavona kuti vanyepi. Newe unosengerera wechitsamwirira ngo ndava yo zina rangu, auzivi kuremba. Asi ndinokushora ngo ichi kuti wakasiya rudo rwako rwo kutanga. Ndizvo cherecheja apo powakawa, utenderuke, uite mishando yokutanga kuti usikaiti kudaro, ndinozoviya kwouri ndibvise chigajikiro cho chibani chako pandau pacho, kuti usikatenderuki. Asi ichi unacho, chokuti unonyenya mishando ya vaNikorao, yondinonyenyavo. Iye uno njeve ngaazwe chinovereketwa ndi Mweya kuzviara. Kwaari unonyisa ndinozomutendera kuti ahe kumuti wo kupona uri mu Paradhasi ra Mwari.” “Tarira kungirosi yo chiara chiri mu Semerina wechiti: Unonanga izvi uwo wo kutanga no wo kugumisira, wayiva wakafa, nazvino unopona. Ndinoziva dambujiko rako no urombo hwako, asi uri guruja, zve, ndinoziva kutuka kwavo vanoti vari vajudha, asi andivopi, asi vari vo nyumba yo kudira ya Sathani. Usatya izvo zvo unozotambujika ndizvo, vonai, Dhiabhorosi woda kunghwinisa vamweni venyu muguniya, kuti muejwe; nemwi munozova no dambujiko mazuva ari gumi. Ita unogondeka mbhera mukufa, neni ndinozokupa junguja ro kupona. Iye uno njeve ngaazwe zvinovereketwa ngo Mweya kuzviara. Iye unonyisa aazoremajwi ngo kufa kwo chipiri.” Tarira ngirosi iri muchiara cho Perigamu: Unonanga izvi uno shoti inopinja ino upanga huviri. Ndinoziva pounogara, ndipo pano dendemaro ra Sathani; newe unobatisisa zina rangu, ausati waramba kutenda kwangu, eya, nokuti kumazuva a Antipasi chapupu changu chakagondeka, wakaurawa pakati penyu, ndipo paanogara Sathani. Asi ndinokushora ngo zviro zvishomani, ngokuti unavo vamweni vanobata zvijijiso zva Bharami, uwo wakajijisa Bharaki kudira chikhugunyiso pamberi po vana vaIsraeri, nokuha zvinobaihwa muezaniso yo kudira no kuomba. Ngokudarozve unavo vamweni vanobatisisa zvijijiso zvo vaNikorao, ndizvo tenderuka, usikaiti kudaro ndinozoviya kwouri ngo kukasira, ndiambane navo ngo shoti yo muromo wangu. Iye uno njeve ngaazwe zvinovereketwa ndi Mweya kuzviara. Kwaari unonyisa ndinozomupa mana yakafishika ndinozomupazve buwe rakachena, no panyezuru po buwe pakatahwa zina ibza, risikaziviki ngo umweni kwega ngo uwo unoriashira. Tarira ngirosi yo chiara chiri mu Tiyatira: Unonanga izvi Mwana wa Mwari, uno majiso akadari ngo murazvu wo muriro, no tshoka jake jakadari ngo thusi rinon'anikira. Ndinoziva mishando yako no rudo rwako no kugonda kwako no kushandira kwako, no kusengerera kwako, nokuti mishando yako yokugumisira inopinda yokutanga. Asi ndinokushora ngo ichi, kuti unotendera mwanakaji Jezabheri, uwo unoti uri muprofeti, naye unojijisa no kupaukisa varanda vangu kuti vaombe nokuha zvakabaihwa miezaniso yo kudira. Neni ndakamupa nguva yokuti atenderuke, asi inga asikadi kutenderuka kubva mukuomba kwake. Vona, ndinozomukandira mumubede, naavo vanoomba naye mu dambujiko guru, kuti vasikatenderuki kumishando yavo. Neni ndinozouraya vana vake ngo rufu. No zviara zvese zvinozoziva kuti inini ndiriye unopshakisisa mipinimijo no mwoyo, neni ndinozomupa umwe ngaumwe kudari ngo mushando yenyu. Asi ndinoti kwomuri, imwimwi mwakasara mu Tiyatira, kwavari vasina uku kujijiswa, vasikazivi kuziva kujika kwa Sathani, ndinoti kwomuri: Andizomuthikisi mutwaro umweni. Asi icho chomunacho batisisanyi mbhera ndiviye. No uwo unonyisa, no unongwarira mishando yangu pakugumisira, kwaari ndinozopa simba panyezuru po majinja: Naye unozotonga ngo ndonga yo simbi, kudari ngo zvijuvi zvo muumbi zvinophwanywa kuyita zviviya; kudari ngo zvo ndakaashira kuna Baba wangu. Neni ndinomupa ndhondo inozwi masase. Iye uno njeve ngaazwe chinovereketwa ndi Mweya kuzviara. “Tarira ngirosi yo chiara chiri mu Saradhesi: Unonanga izvi uwo uno Mweya minomwe ya Mwari, no ndhondo nomwe; ndinoziva mishando yako kuti uno zina rokuti unopona, asi wakafa. Rinda, no kugwinyisa izvo zvasara, zvoda kufa, ngokuti andivoni kuti mishando yako yakaperera pamberi pa Mwari wangu. Ndizvo cherecheja maashirire nokupa kwo wakayita, uzvingwarire no kutenderuka. Ndizvo kuti usikarindi, ndinozoviya kudari ngo mbavha, newe auzozivi nguva yo ndinozoviya ndiyo kwouri. Asi uno mazina mashomani mu Saradhesi, oavo vasikazivi kusvipisa zvokusimira zvavo, navo vanozofamba neni vakasimira zvakachena, ngokuti vanosisira. Iye unonyisa unozosimijwa kudaro ngo zvo kusimira zvakachena, neni andizojimi zina rake mutshamba yo kupona, ndinozotenda zina rake pamberi pa Baba wangu no pamberi po ngirosi jake. Iye uno njeve ngaazwe zvinovereketwa ngo Mweya kuzviara.” Tarira ngirosi yo chiara chiri mu Firadhefiya: Unonanga izvi wakachena, uno gwinyiso, uno mugogo wa Dhavhidha, uwo unobewura akunazve unozokonya, naye akonya akunazve unobewura. Ndinoziva mishando yako, vona ndakadira pamberi pako ruvhi rwakabewuhwa, akuna mundhu angarukonya, uno simba doko, wakangwarira izwi rangu auzivi kuramba zina rangu. Vonayi, ndinokupa vamweni vo nyumba yo kudira ya Sathani, vanozwi vajudha, asivopi, asi vanonyepa: Vona ndinozoita kuti vaviye no kudira pamberi po tsoka jako, no kuziva kuti ndakakuda. Ngokuti wakangwarira izwi rangu ro kusengerera neni ndinozokungwarira ngo mukuvo wo kutambujika unoviya panyezuru po nyika yese, kueja avo vanogara mu nyika. Ndinokasira kuviya: Batisisa chounacho kuti asazovapo mundhu unozokutorera junguja rako. Uwo unonyisa ndinozomuita njiki muthemperi ra Mwari wangu, aasazobudimwo: Neni ndinozotara panyezeru pake zina ra Mwari wangu, no zina ro dhoropa ra Mwari wangu, riri Jerusarema ibza rinojaka kubva mugore, kubva kuna Mwari wangu, no zina rangu ibza. Iye uno njeve ngaazwe chinovereketwa ndi Mweya kuzviara. “Tarira ngirosi yo chiara chiri mu Raodhikiya: Unonanga izvi uwo uri Ameni, uri chapupu chakagondeka chino gwinyiso, muambi wo zvakasikwa zva Mwari: Ndinoziva mishando yako kuti autondhori nokuti kupisa. Ndinoda kuti utondhore nokuti upise. Ndizvo ngokuti unojiya usikapisi nokuti kutondhora, ndinozokurucha mumuromo wangu, ngokuti unoti: Ndiri guruja, ndakapfuma, anditami chiro, usikazivi kuti uri tsereketwa, no unotambujika uri murombo no uri bofu no mutitinini. Ndinokupanga kuti utenge kwendiri mukore wakanyunguruswa ngo muriro kuti uite guruja, no zvokufuka zvakachena kuti ujisimije, kuti kupsheruka kwo utitinini hwako usazovoneka. No mutombo wokuzoja majiso, kuti uvone. Avo vese vondinoda, ndinovathusa no kuvapangira; ndizvo vangirira utenderuke. Vonayi, ndinoima paruvhi no kuguguja; kudari uripo mundhu unorizwa izwi rangu no kubewura musuvo, ndinozonghwina kwaari, ndihe naye, naye ahe neni. Iye unonyisa ndinozomuita kuti agare neni padendemaro rangu, kudari ndini ndakanyisavo, ndatogara na Baba wangu padendemaro ravo. Iye uno njeve ngaazwe zvinovereketwa ndi Mweya kuzviara.” Ngosure kwo izvi ndakaringira, ndikavona, ruvhi rwakabewuhwa mugore, no izwi ro kutanga rondakazwa rakadari ngo kurira kwo mbhayapaya rechivereketa neni, rechiti: “Kwira pano, neni ndinozokupangijira izvo zvinosisira kuitika sure kwo izvi.” Paripo ndayiva mumweya: Vona, rayivapo dendemaro rakagajikwa mugore, ngo panyezuru paro paigara umwe. No uwo waigarapo kuringirika kwake inga kwakadari ngo buwe ro jasipa no ro sadiyo, kwayivapozve utawahumbe hwechitendeneja dendemaro, kuringirika kwaho inga kwakadari ngo buwe ro simaragadiyo. No kutendeneja dendemaro, kwayivapo madendemaro ari makumi maviri na marongomuna, no panyezuru po madendemaro paigara vakuru vari makumi maviri na varongomuna, vakasimira zvakachena, no majunguja omukore ayiva mumusoro mwavo. Kwakabudazve kudendemaro mbheni no mazwi no kutindhira; kwayivapo zvivheneko zvinomwe zvo muriro zvechibwaka pamberi po dendemaro, izvo zviri mweya minomwe ya Mwari; no pamberi po dendemaro pano jombe rakadari ngo buwe ro girazi, no pakati po dendemaro no kuritendeneja kwayivapo zvisikwa zvirongomuna zvaipona, zvakazara ngo majiso pamberi no sure. No chisikwa chokutanga chayinga chakadari ngo mbhondoro, no chisikwa chochipiri chayinga chakadari ngo konyana ro n'ombe, no chisikwa cho chitatu chayinga chino hope yakadari ngo yo mundhu, no chisikwa cho chirongomuna chayinga chakadari ngo goji rinomburuka. No zvisikwa zvirongomuna zvaipona zvese, chimwe ngachimwe chazvo chayiva no mapapiro matandhatu, zvakazara majiso kutenderera kunja no mukati, nazvo azvizivi kuzorora masikati no usiku, zvechiti: “Wakachena, Wakachena, Wakachena, Mambo Mwari Unosimbarese, waindovapo, no uripo, no unozoviya.” Naapo zvisikwa zvinopona zvinopa kukuja no kureremeja no kubonga kwaari unogara padendemaro, unopona mbhera narini. Vakuru vari makumi maviri na varongomuna vanozowa pasi pamberi po uwo unogara padendemaro, no kumudira uwo unopona mbhera narini, navo vanozokandira majunguja avo pamberi po dendemaro, vechiti: “Unosisira, iwewe Mambo wedu na Mwari wedu, kuashira kukujwa no kureremejwa no simba. Wakasika zviro zvese, na ngo kuda kwako zvakavapo, zvakasikwa.” Zvino ndakavona munyara yo kumuho yo uwo wakagara pa dendemaro, bhuku rakatahwa pakati no kunja, rakanamihwa ngo zvinamiro zvinomwe. Ndakavona ngirosi ino simba yechidanijira ngo izwi guru, yechiti: “Ndiyani unosisira kubewura bhuku, no kusunungura zvinamiro zvaro?” Inga kusina mundhu mugore nokuti pa nyezuru po nyika, nokuti ngo pasi po nyika, waikona kubewura bhuku nokuti kuriringira. Apo ndakachema kukurutu ngokuti inga kusina mundhu wakavoneka wakasisira kubewura bhuku nokuti kuriringira. No umwe wo vakuru wakati kwendiri: Usachema: Vona, Mbhondoro yo ruji rwa Judha, miji hwa Dhavhidha hwakanyisa kuti abewura bhuku, no zvinamiro zvinomwe zvaro. Zvino ndakavona pakati po dendemaro no po zvisikwa zvirongomuna zvinopona, no po vakuru, rayinga rakayima Bvuta rinonga rakaurawa, rayinga rino nyanga nomwe, no majiso manomwe, izvo zviri mweya minomwe ya Mwari, yakatumwa mu nyika mwese. Bvuta rakwedera, rikatora bhuku kubva ku nyara yo kumuho yo uwo wayigara padendemaro. Naapo rayinga ratora bhuku, zvisikwa zvirongomuna zvinopona, no vakuru vari makumi maviri no varongomuna vakawa pasi pamberi po Bvuta, umwe ngaumwe wavo uno chidyangari no mukheyo yo mukore, yakazara ngo mutombo ino gwema, iri mikumbiro yo vakacheneswa. Navo vakayimba nduyo ipsha vechiti: “Unosisira iwewe kutora bhuku no kubewura zvinamiro zvaro, ngokuti iwewe wakaurawa, ukatitengera kuna Mwari ngo ngazi yako, kubva ku majinja ese, no ndimi jese, no vandhu vese, no ku marusinga ese. Newe wakavaita majimambo no vapristi kuna Mwari wedu; navo vanotonga pa nyezuru po nyika.” Zvino ndakavona, ndikazwa izwi ro ngirosi jakawanda jayinga jakatendeneja dendemaro, no zvisikwa zvinopona, no vakuru, no uwandu hwajo hwayiva zviuru no zviuru zvo zviuru. Jechiti ngo izwi guru: “Rakasisira Bvuta rakaurawa kuashira simba, no upfumi, no ungwaru, no kugwinya, no kureremejwa, no uthende, no kuirikijwa.” No zviro zvese zvakasikwa zviri mugore, no zviri mu nyika, no zviri pasi po nyika, no zviri mujombe, nazvo zvese zviri mukati mwazvo, ndakazvizwa zvechiti; kwaari unogara padendemaro, no ku Bvuta, ngakuve no kukujwa, no kureremejwa, no uthende, no kutonga, mbhera narini. No zvisikwa zvirongomuna zvinopona, zvakati [Ameni]! No vakuru vakawa pasi, vakadira. Zvino ndakavona, Bvuta rayinga rabewura chimwe cho zvinamiro zvinomwe, ndakazwa chimwe cho zvisikwa zvinopona chechiti ngo izwi rinonga ro mutindhiro: “Viya!” Ndakaringira, rayivapo hachi rakachena no uwo wakarigada wayiva no uta; wakapuwa junguja: Naye wakabuda echinyisa, no kunyisa. Naapo ayinga abewura chinamiro chochipiri, ndakazwa chisikwa chochipiri chinopona, chechiti: “Viya!” No hachi rimweni rakapshuka rakabuda; naye wakarigada wakapuwa simba ro kubvisa kunyarara mu nyika, nokuti vaurayane, wakapuwazve shoti huru. Naapo yabewura chinamiro chochitatu, ndakazwa chisikwa chochitatu chinopona, chechiti: “Viya!” Ndakaringira ndikavona, hachi rakasvipa, no uwo wakarigada wayiva no chipimo munyara yake. Ndakazwa rinonga izwi pakati po zvisikwa zvirongomuna zvinopona, rechiti: “Chipimo cho koroni chinotengwa ngo dhenariyo, no zvipimo zvitatu zvo bare zvinotengwa ngo dhenariyo, usashaishira mafuta no vhini.” Naapo abewura chinamiro cho chirongomuna, ndakazwa izwi ro chisikwa cho chirongomuna chinopona, rechiti: “Viya!” Ndakaringira ndikavona, hachi rakacheneruka no uwo wakarigada wakapuwa zina rokuti, Kufa, no Haidhesi rakamutevera. Wakapuwazve simba panyezuru pavo vari murupande ro chirongomuna ro nyika kuti auraye ngo shoti, na ngo njara, na ngo ndhenda, na ngo zvikara zvo mu nyika. Naapo abewura chinamiro cho chishanu, ndakavona ngo pasi po altari mwoyo yo avo vakaurawa ngo ndava yo izwi ra Mwari, na ngo ndava yo uchapupu hwo vakapupura ndihwo. Vakadanijira ngo izwi guru, vechiti: “Mukuvo wakaitawani kureba, A Tenzi, iwewe wakachena no uno gwinyiso, wo usikatongi no kuhwirijira mu ngazi yedu kuna avo vanogara mu nyika?” Vakapuwa umwe ngaumwe, nguvo jakachena: Kwakanangwa kwavari kuti vazorore mukuvo mudoko, mbhera kuitike kuurawa kwo varanda pamwepo navo, no hama javo, vanozourawa kudari ndivo. Neni ndakavona apo abewura chinamiro cho chitandhatu, kwakavapo kuzungunyuka kukurutu kwo nyika, no zuva rakasvipiswa kudari ngo jira ro mavhiri, no mweji wese wakaitwa inga ngazi; no ndhondo jo mugore jakawira pa nyika, kudari ngo mukuyu unowisa makuyu awo asikazivi kuibva, apo wazungunyiswa ngo dutu guru. Denga rakabviswa kudari ngo tshamba apo yechipetwa, no matundhu ese no zvirundu zvakabviswa pandau yazvo. No majimambo onyika, no vazvare, no nduna huru, no maguruja, no vakagwinya, no muranda wese, no wakasununguka wese, vakafindara mu mapako, no mu mapuwe omatundhu, Navo vakati kumitundhu no kumapuwe: “Tiwirenyi, mutifishe kubva kuhope yo uwo unogara padendemaro, no kubva kwo ushungu hwo Bvuta: Ngokuti raguma zuva guru ro ushungu hwavo, ndiyani uno simba ro kuima?” Ngosure kwo ichi ndakavona ngirosi murongomuna jakayima kumativi marongomuna onyika, jakabata madutu marongomuna onyika, kuti dutu risazofurija mu nyika, nokuti mu jombe, nokuti panyezuru po miti yese. Apo ndakavona ngirosi imweni, yechikwira kubva kumabvazuva, ino chinamiro cha Mwari unopona, nayo yakadanijira ngo izwi guru kuno ijo ngirosi murongomuna, jakapuwa kushaishira nyika no jombe, yechiti: “Musashaishira nyika nokuti jombe, nokuti muti naumwe, mbhera tadira chinamiro pa huma jo varanda va Mwari wedu.” Ndakazwa uwandu hwo avo vakanamihwa, vayiva zana no makumi marongomuna na marongomuna ozviuru (144.000), vakanamihwa chinamiro kubva kujinja rimwe ngarimwe ro vana vo Israeri. Kujinja ra Judha vakanamihwa chinamiro vari gumi na zviviri zvo zviuru (12.000), kujinja ra Rubheni gumi na zviviri zvo zviuru (12.000), kujinja ra Gadhi gumi na zviviri zvo zviuru (12.000), kujinja ra Asheri gumi na zviviri zvo zviuru (12.000), kujinja ra Naftari gumi na zviviri zvo zviuru (12.000), kujinja ra Manasa gumi na zviviri zvo zviuru (12.000), Kujinja ra Simioni gumi na zviviri zvo zviuru (12.000), kujinja ra Revi gumi na zviviri zvo zviuru (12.000), kujinja ra Isakari gumi na zviviri zvo zviuru (12.000). Kujinja ra Zabhurona gumi na zviviri zvo zviuru (12.000) kujinja ra Josefa gumi na zviviri zvo zviuru (12.000), kujinja ra Benjamini rakanamihwa chinamiro kuna vari gumi na zviviri zvo zviuru (12.000). Ngosure kwo izvi ndakaringira ndikavona, mbungano huru isikakoni kuverengwa ngo mundhu, inobva kumajinja ese, no marusinga ese no vo vandhu vese, no vo ndimi jese, vakayima pamberi po dendemaro no pamberi po Bvuta, vakasimira nguvo jakachena vano matavi omichindu munyara javo; vakadanijira ngo izwi guru, vechiti: “Ruponeso ruri kuna Mwari wedu unogara padendemaro, nokuna Bvuta.” Ngirosi jese jayima jechitendeneja dendemaro, no kutendeneja vakuru no zvisikwa zvirongomuna zvinopona; jakawa pasi pamberi po dendemaro ngo hope jajo, jakadira Mwari, jechiti: “Ameni, kukujwa no uthende, no ungwaru, no kubonga, no kureremejwa, no simba, no kugwinya, ngazvive kuna Mwari wedu, mbhera narini. Ameni!” No umwe wo vakuru wakabvunjisa, echiti: Kwendiri: “Ndiyani ava vakasimira nguvo jakachena vanobva kwapi?” Ndakati kwaari: “Mambo wangu, ndiwe unoziva.” Naye wakati kwendiri: “Ava ndivo vanobuda kubva kudambujiko guru, navo vakasuka nguvo javo, vakajichenesa mungazi yo Bvuta.” Ngo iyi ndava vari pamberi po dendemaro ra Mwari, vanomushandira masikati no usiku muthemperi rake. No uwo unogara padendemaro unozovangwarira mutende rake. Avachazozwi njara, nokuti nyota; zve, zuva arichazovapisi, nokuti kupisa kumweni: Ngokuti Bvuta riri pakati po dendemaro rinozovahavisa, no kuvatungamirira kuenda navo kuzvinyuka zvokumwa yo kupona. Na Mwari unozopukuta misoji yese kubva kumajiso avo. Bvuta rabewura chinamiro cho chinomwe, kwakavapo kunyarara mugore unonga mukuvo unoda kuyita bindikati ro nguva. Neni ndakavona ngirosi nomwe jakayima pamberi pa Mwari, jakapuwa mbhayapaya nomwe. No ngirosi imweni yakaviya ikayima phedo po altari ino chimujiyo cho mukore cho kupisira mutombo uno gwema, yakapuwa mutombo wakawanda wo kupisa uno gwema, kuti yiudire panyezuru po altari ro mukore rayiva pamberi po dendemaro, pamwepo no mikumbiro yo vakacheneswa. No usi wo mutombo wo kupisa uno gwema wakakwira pamwepo no mukumbiro yo vakacheneswa pamberi pa Mwari wechibuda munyara yo ngirosi. No ngirosi yakatora chimujiyo cho kupisira mitombo, nayo yakachizaja ngo muriro wo pa altari, ikaukandira panyezuru po nyika, kwakavapo kutindhira, no mazwi, no mbheni, no kuzungunyika kwo nyika. No ngirosi nomwe jayiva no mbhayapaya nomwe, jakanasirira kuti jirije. Yokutanga yakarija, kwakavapo matarara, no muriro, zvakavhenganijwa no ngazi, nazvo zvakakandihwa panyezuru po nyika. No rupande rwo chitatu rwo nyika rakapiswa, rupande rwo chitatu rwo nyika rakapiswa no mwenje wese muvishi wakapiswa. No ngirosi yochipiri yakarija, no chakadari ngo dundhu guru chinobwaka ngo muriro chakakandihwa mu jombe no rupande rwo chitatu ro jombe rakaita ngazi, no rupande rwo chitatu rwo zvisikwa zvo mujombe zvinopona zvakafa, no rupande rwo chitatu ro ngarava rakaphwanywa. No ngirosi yo chitatu yakarija, ndhodho huru yakawa kubva mugore, yechibwaka kudari ngo chibani, yakawira panyezuru porupande rwo chitatu ro murambo, no panyezuru pozvinyuka zvokumwa, no zina ro ndhondo rakazwi, Chinovava; no rupande rwo chitatu ro kumwa yakavaviswa; no vandhu vazhinji vakafa ngo kumwa iyo ngokuti yakavaviswa. No ngirosi yo chirongomuna yakarija, no rupande rwo chitatu ro zuva rakarohwa, no rupande rwo chitatu rwo mweji, no rupande rwo chitatu rwo ndhondo; kuti rupande rwo chitatu razvo risvipiswe, no masikati asazojeka rupande raro rwo chitatu, no usiku ngokudaro. Neni ndakaringira ndikazwa goji rechimburuka pakati po mugore, rechiti ngo izwi guru: “Ihehe, ihehe, ihehe kwavari vanogara panyezuru po nyika ngo ndava yo mazwi amweni o mbhayapaya jo ngirosi ndhatu jichazorija.” Ngirosi yo chinoshanu yakarija, neni ndakavona ndhondo yakabva mugore ikawa pa nyika, yakapuwa mugogo wo rindi rakajikisisa. Nayo yakabewura rindi rakajikisisa, no usi wakakwira kubva murindi umwo, wakadari ngo usi wo choto chakakura. No zuva, no mweya zvakasvipiswa ngo ndava yo usi wo rindi iro. No ndongwe jakabuda mu usi, kuviya panyezuru po nyika, jakapuwa simba rakadari ngo ro zvinyavada zvo mu nyika. Jakabvunjwa kuti jisazoshaishira mwenje wo nyika, nokuti chiro chimweni chakasvipirikira, nokuti muti, asi vega vandhu vasina chinamiro cha Mwari pa huma javo. Ajizivi kupuwa simba ro kuvauraya, asi kuti jivahwajise mweji mushanu: No kuhwajisa kwajo inga kwakadari ngo kuhwajisa kwo chinyavada apo charuma mundhu. Ngaao mazuva vandhu vanozopshaka kufa, vasikakuwani; no kudisisa kuti vafe, no kufa kunozotiza kubva kwavari. No miyemo yo ndongwe ijo yayiva yakadari ngo yo mahachi, akanasirihwa kurwa, no panyezuru po musoro yajo panonga payiva no majunguja akadari ngo omukore. No hope jajo inga jakadari ngo jo vandhu. Jayiva no bvuji rakadari ngo bvuji ro vanakaji, no mazino ajo inga akadari ngo ombhondoro. Jayiva no chivhikiro cho diti chakadari ngo simbi; no kutindhira kwo mapapiro ajo inga kwakadari ngo kwo ngoro jo kurwa, no kwo mahachi akawanda echigogoma kuenda ku imbi. Jayiva no mwishe yakadari ngo yo zvinyavada, no chisomo; no kumwishe yajo kwayiva no simba ro kuremaja vandhu mweji mushanu. Jayiva na mambo wajo, yayiva ngirosi yo rindi rakajikisisa, zina rayo ngo chihebheru ndi Abhadhoni, ngo chigiriki ina zina rokuti, Aporiyoni. Dambujiko ro kutanga rakapinda; vona, kuchaviya matambujiko maviri ngo sure kwo izvi. No ngirosi yo chitandhatu yakarija mbhayapaya, neni ndakazwa izwi rechibva pa nyanga jo altari ro mukore riri pamberi pa Mwari, rechiti kuna ngirosi yo chitandhatu, yayiva no mbhayapaya: “Sunungura ngirosi murongomuna, jakasungwa pamurambo mukuru wo Ufrate.” No ngirosi murongomuna jakasununguhwa, jakanasirihwa nguva no zuva no mweji no gore kuti jiuraye rupande ro chitatu ro vandhu. No uwandu wo hondo jo vanogadha mahachi hwayiva omazana maviri wo zviuru zvo zviuru (200.000.000). Ndakazwa uwandu hwavo. Ngokudaro ndakavona mahachi muchivoniso naavo vakaagada, vano zvivhikiro zvo diti, zvo muriro no hwo hiyasinto no hwo sorufa. No musoro jo mahachi inga jakadari ngo mbhondoro, no mumiromo jao mwakabuda muriro pamwepo no usi no sorufa. Ngo nyatwa iji ndhatu rupande ro chitatu ro vandhu rakaurawa, ngo muriro no usi no sorufa, izvo zvakabuda kumiromo yao. Ngokuti simba ro mahachi rayiva mu miromo yao no kumwishe yao, ngokuti mwishe yao yayinga yakadari ngo nyoka yayiva no musoro; ndiwo airemaja. No vamweni vandhu, vasikazivi kuurawa ngo nyatwa iji, avazivi kutenderuka kubva mumishando yo nyara javo, kuti vasazodira mabzoka, no muezaniso yo kudira, yo mukore no yo sirivha, no yo thusi no yo mapuwe no yo miti; iyo isikakoni kuvona, nokuti kuzwa, nokuti kufamba; zve, avazivi kutenderuka kubva mukuuraya kwavo, nokuti mukuroya kwavo, nokuti mukuomba kwavo, nokuti mukuba kwavo. Neni ndakavona ngirosi imweni yakagwinya yechibzuka kubva mudenga, yakafuka gore; no utawahumbe hwayiva panyezuru po musoro wayo, no hope yayo yayinga yakadari ngo zuva, no tshoka jayo jayiva jakadari ngo mirazvu yo muriro; inga yakabata munyara yayo chibhuku chakabeuka. Yakatsika tshoka yayo yo kumuho panyezuru po jombe, no yo kuboshwe panyezuru po nyika. Yakadanijira ngo izwi guru, kudari ngo kurira kwo mbhondoro; naapo yadanijira, kutindhira kunomwe kwakatindhira. Naapo kutindhira kunomwe kwayinga kwatindhira, ndayinga ndooda kutara, ndakazwa izwi rechibva mugore, rechiti: “Konya izvo zvakavereketwa ngo kutindhira kunomwe, usazvitara.” No ngirosi yo ndakavona yakayima panyezuru po jombe no po nyika, yakamusa nyara yayo yo kumuho mugore, ikapika ndiye unopona mbhera narini, uwo wakasika denga no izvo zvirimwo, no nyika no izvo zvirimwo, no jombe no izvo zvirimwo kuti kusachazovapo mukuvo wo kunonoka. Asi Ngo mazuva o izwi ro ngirosi yo chinomwe, apo yayinga yoda kurija, ngo uwo mukuvo chakafishika cha Mwari chinozopera kudari ngo zvaakananga kuvaranda vake vaprofeti. No izwi ro ndakazwa rechibva mugore, rakavereketazve neni, rechiti: “Endai utore chibhuku chakabeuka chiri munyara yo ngirosi yakayima panyezuru po jombe no panyezuru po nyika.” Ndakaenda kuno ngirosi iyo, ndikati kweiri: “Ndipe chibhuku. Nayo yakati kwendiri, chitore, uchihe; kunozoita kuti ndani yako ivave, asi mumuromo wako chinozotapira kudari ngo uchi.” Ndakatora chibhuku munyara yo ngirosi, ndakachiha mumuromo wangu chaitapira kudari ngo uchi; naapo ndakaha, ndani yangu yakavava. Jakati kwendiri, Kunosisira kuti uprofetezve ngo ndava yo vandhu vazhinji, no majinja, no ndimi no majimambo. Ndakapuwa njanga yakadari ngo mudondoro, kukazwi: “Muka, uende, upime kukura kwo themperi ra Mwari, no altari, naavo vanodiremwo.” Asi ruvanje ruri kunja kwo themperi ruregere, usaripima; ngokuti uhwo hwakapuwa kuno vo majinja: Navo vanozotsikatsika pasi ngo tshoka javo dhoropa rakachena mweji iri makumi marongomuna na miviri. Ndinozopa simba kuzvapupu zvangu zviviri, kuti zviprofete mazuva ari chiuru no mazana maviri, no makumi matandhatu, (1.260) zvakasimira machira omasaku. Ava vari miti muviri yo maorivhe, no zvigajikiro zviviri zvo zvibani zvinoyima pamberi pa Mambo wo nyika. Kuti aripo mundhu unoda kuvaremaja, muriro unobuda kumuromo yavo wechiuraya mapandu avo; kuti aripo mundhu unoda kuvaremaja, ngo iyi njira kunosisira kuti aurawe. Ava vano simba ro kukonya denga, kuti isazona mvura ngo mazuva okuprofeta kwavo, navo vano simba panyezuru po kumwa kuitsanduja kuti iite ngazi, no kurova nyika ngo matambujiko ese, ngo nguva jese jo vanoda. Naapo vapeja uchapupu hwavo, chikara chinokwira kubva murindi rakajikisisa chinozoambana navo, no kuvanyisa, no kuvauraya. No miviri yavo yakafa inozorashwa mugwanja ro dhoropa guru, rinozwi ngo kuezanisira kuti, Sodhoma no Egipite, paakakohomehwavo Mambo wavo. Navo vanobva ku vandhu, no marusinga, no ndimi, no majinja, vanozoringira miviri yavo yakafa, mazuva matatu no bindikati vasikatenderi kuti miviri yavo yakafa ivigwe mu maiba. Naavo vanogara mu nyika vanodakara ndivo, no kupembera; vanozotumirana zvipo umwe kwo umweni; ngokuti ava vaprofeti vaviri vakatambuja ava vanogara mu nyika. Ngosure kwo mazuva matatu no bindikati, mweya wo kurarama unobva kuna Mwari wakanghwina mukati mwavo, vakayima ngo tshoka javo; nokutya kukurutu kwakagumira avo vakavavona. Vakazwa izwi guru rechibva mugore, rechiti kwavari: Kwiranyi kuno. Vakakwira mudenga vari mugore; no mapandu avo akavaringira; ngo iyo nguva kwayivapo kuzungunyika kukuru kwo nyika, no rupande rwo gumi rodhoropa rakawa vakaurawa vandhu vari zviuru zvinomwe (7.000) mukuzungunyika kwo nyika; no vamweni vakatya, vakairikija Mwari wo mugore. Dambujiko ro chipiri rapinda, vona, dambujiko rechitatu rinokasira kuviya. No ngirosi yo chinomwe yakarija mbhayapaya; kwakazwika izwi guru mugore rechiti: “Umambo hwo nyika hwayita hwa Mambo wedu, no hwa Kristu wake, naye unozotonga mbhera narini.” No vakuru vari makumi maviri na varongomuna, vanogara pamberi pa Mwari, panyezuru pomadendemaro avo, vakawa ngo hope javo, vakadira Mwari, vechiti: “Tinokubonga, A Mambo Mwari, Unosimbarese, uwo uripo, no wayivapo, ngokuti wakajitorera simba rako guru, ukatonga.” No majinja akatseneka, no ushungu hwako hwakaviya, no mukuvo wo vakafa kuti vatongwe, no mukuvo wo kupa musharo kuno varanda vako vaprofeti, no kuvakacheneswa, no kwavari vanotya zina rako, vadoko no vakuru, no kuuraya avo vonoparaja nyika. Themperi ra Mwari rakabewuhwa mugore; mwakavoneka muthemperi rake bhokisi ro chitenderano chake; kwakavapo mbheni, no mazwi, no kutindhira, no kuzungunyika kwo nyika, no matarara makurutu. No chivoniso chikuru chakaoneka mugore; mwanakaji akasimira zuva, no mweji uri pasi po tsoka jake, no panyezuru po musoro wake payiva no junguja ro ndhondo jiri gumi na mbiri. Wayiva no mimba, wakachema, echihwajihwa ngo kubereka, no kuhwajihwa ngo kusununguka. No chivoniso chimweni chakavoneka mugore, vona; dragoni guru rakapshuka rino musoro minomwe no nyanga jiri gumi, no panyezuru pomusoro yaro no majunguja manomwe. No mwishe waro unokweva rupande rwo chitatu rwo ndhondo jo mugore, rikajikandira panyika; no dragoni rakayima pamberi po mwanakaji wayinga woda kubereka, kuti rihe mwana wake aberekwa. Naye wakabereka mwana, mwana wo rume, unozotonga majinja ese ngo ndonga yo simbi: No mwana wakakwijwa kuna Mwari, no kudendemaro rake. No mwanakaji wakatizira mu bani, apo payiva no ndau yakanasirihwa ndi Mwari, kuti vamurere apo mazuva ari chiuru chimwe no mazana maviri no makumi matandhatu (1.260). Kwakavapo kurwa mugore: Mikaeri pamwepo no ngirosi jake jechirwa no dragoni; no dragoni naro rakarwa pamwepo no ngirosi jaro. Jakanyiswa, no ndau yajo aizivi kuchazovapo mugore. No dragoni guru rakakandihwa pasi, iyo nyoka sharuka, inozozwi ndi Dhiabhorosi, na Sathani, muchengeji wo nyika yese; iye wakakandihwa pasi mu nyika, no ngirosi jake jakarashwa pasi pamwepo naye. Neni ndakazwa izwi guru rechibva mugore, rechiti: “Zvino rwaguma ruponeso, no simba, no umambo, zva Mwari wedu no simba ra Kristu wake: Ngokuti mupumbhi wo hama jedu wakandihwa pasi, uwo unovaitira ndava pa mberi pa Mwari wedu masikati no usiku.” Navo vakamunyisa ngo ngazi yo Bvuta, na ngo izwi ro uchapupu hwavo; navo avazivi kuda kupona kwavo mbhera mukufa. Ndizvo dakaranyi imwimwi matenga, nemwi munogara mukati mwao. Ihehe ku nyika no kujombe; ngokuti Dhiabhorosi wakajaka kwomuri, ano ushungu hukurutu, ngokuti unoziva kuti nguva yake yaafupi. Naapo dragoni rayinga ravona kuti rakakandihwa pasi, rakatambuja uwo mwanakaji wakabereka mwana wo rume. Mwanakaji uwo wakapuwa mapapiro maviri ogoji guru, kuti amburuke kuenda mu bani kundau yake, paanorehwa mukuvo no mikuvo, no bindikati ro mukuvo kubva mu hope yo nyoka. No nyoka yakabudisa kumwa mumuromo wayo kudari ngo murambo, sure kwo mwanakaji kuti atohwe ngo murambo. No nyika yakabetsera mwanakaji, ikabewura muromo wayo, no kumija murambo, uwo wakabudiswa ngo dragoni mumuromo waro. No dragoni rakachenekera mwanakaji, rakaenda, rikaambana no vamweni vana vake vanongwarira mipango ya Mwari, vechibata uchapupu hwa Jesu: No dragoni rakayima panyezuru po musanga wo jombe. Ndakayima panyezuru po musanga wo jombe. Ndakavona chikara chechibuda mujombe, chino nyanga jiri gumi, no musoro munomwe, no panyezuru ponyanga yacho payiva no majunguja ari gumi, no panyezuru po musoro yacho payiva no mazina okutuka Mwari. No chikara chendakavona inga chakadari ngo khamba, no tshoka jacho jayiva jakadari ngo beya, no muromo wacho wayinga wakadari ngo wo mbhondoro; no dragoni rakachipa simba raro, no dendemaro raro, no kupanga kukuru. Ndakavona umwe wo musoro wacho, kudari inga wakarohwa mbhera ufe; no vonje rokufa kwacho rakapora: No nyika yakashamiswa ngo ndava yo chikara, navo vakadira dragoni ngokuti ndiro rakapa chikara simba raro; vakadira chikara, vechiti: Ndiyani ungaezaniswa no chikara? Ndiyanizve uno simba ro kurwa nacho? Chakapuwa muromo wo kuvereketa zvakakura no kutuka; chakapuwazve simba rokuti chiite mishando yacho mweji iri makumi marongomuna na miviri. Nacho chakabewura muromo wacho kutuka Mwari, no kutuka zina rake, no tende rake, navo vanogara mugore. Chakapuwazve kuambana no vakacheneswa, no kuvanyisa, chakapuwazve simba panyezuru po marusinga ese, no vandhu, no ndimi, no majinja, vese vanogara panyezuru po nyika vanozochidira, vano mazina asikazivi kutahwa mubhuku ro kupona ro Bvuta rakaurawa kubvira mukuemeswa kwo nyika. Kuti aripo uno njeve ngaazwe. Kuti aripo unoda kukwevera mundhu mukusungwa, iye unozoendavo mukusungwa. Kuti aripo unouraya ngo shoti, iye unozourawavo ngo shoti. Pano ndipo panokusengerera no kugonda kwo vakacheneswa. Ndakavona chikara chimweni chechikwira kubuda mu nyika; chayiva no nyanga mbiri jakadari ngo jo bvuta, chakavereketa kudari ngo dragoni. Chinoshandisa simba ro chikara chokutanga mukuvona kwacho, chinoyita kuti nyika navo vanogaremwo vadire chikara chokutanga, chayiva no vonje ro kufa rakapora. Chinoyita mivoniso mikuru, kuti murirozve ubzuke panyezuru po nyika wechibva mugore mukuvona kwo vandhu. Nacho chinochengejera avo vanogara mu nyika, ngo ndava yo mishamiso yakapuwa kwechiri kuti chiite pamberi po chikara; chechinanga kwavari vanogara mu nyika kuti vayite muezaniso wo chikara, chakabaiwa ngo shoti chikapona. Chakapuwa simba ro kupa mweya kumuezaniso wo chikara kuti muezaniso wechikara uite zvese, kuvereketa, no kuyita kuti vese vasikadiri muezaniso wo chikara vaurawe. Chinoyita kuti vese vadoko no vakuru, no vapfumi, no varombo, no vakasununguka, no varanda, vapuwe chivoniso ku nyara yavo yo kumuho, nokuti pa huma javo; zve kuti mundhu mumwe asazokona kutenga nokuti kutengesa kwega uwo uno chivoniso, kunoti zina rechikara, nokuti chiverengo cho zina racho. Pano ndipo pano ungwaru. Iye unozwisisa ngaaverenge chiverengo cho chikara; ngokuti chiri chiverengo cho mundhu: No chiverengo chake chiri mazana matandhatu no makumi matandhatu na matandhatu (666). Neni ndakaringira, ndikavona Bvuta rakayima pa dundhu ro Zioni, rinavo vari zana no makumi marongomuna na marongomuna wo zviuru (144.000), vano zina rake, no zina ra Baba wake rakatahwa pa huma javo. Ndakazwa izwi rakabva mugore rinonga chaungu cho kumwa zhinji, no izwizve ro kutindhira kukurutu: No izwi rendakazwa rayinga rakadari ngo ro variji, vechirija zvidyangari zvavo. Navo vanoimba inonga nduyo ipsha pamberi po dendemaro no pamberi po zvisikwa zvirongomuna zvinopona, no pamberi po vakuru. Apana mundhu waikona kujija nduyo iyo kwega avo vari zana no makumi marongomuna no marongomuna wo zviuru (144.000), vakatengwa mu nyika. Ava ndivo vasikazivi kujisvipisa ngo vanakaji, ngokuti vakadari ngo mbhandwe. Ndivo vanotevera Bvuta kwese kwo rinoenda. Vakatengwa pakati po vandhu kuti vayite mitanguro kuna Mwari no ku Bvuta. No mumiromo yavo amuzivi kuvoneka kunyepa. Avana ndava pamberi po dendemaro ra Mwari. Neni ndakavona ngirosi imweni yechimburuka pakati po denga, ino vhangeri ro mbhera narini, kuchumayira kwavari vanogara mu nyika, no ku majinja ese, no marusinga ese, no kundimi jese, no ku vandhu vese. Yechiti ngo izwi guru: “Mutyenyi Mwari, mumukuje, ngokuti mukuvo wo kutonga kwake waguma; mumudire uwo wakayita denga, no nyika, no jombe, no zvinyuka zvo kumwa.” No imweni ngirosi yochipiri yakatevera, yechiti: “Rawa, rawa, Bhabhurona guru, rakaita kuti majinja ese amwe vhini ro ushungu hwo kuomba kwaro.” No ngirosi yechitatu yakajitevera, yechiti ngo izwi guru: “Kuti aripo mundhu unodira chikara no muezaniso wacho, no kuashira chivoniso pa huma yake, nokuti pa nyara yake, iye unozomwa vhini ro ushungu hwa Mwari, rinonasirihwa risikazivi kuvhenganijwa mutsani yo ushungu hwake; naye unozotambujwa ngo muriro no sorufa pamberi po ngirosi jakachena no pamberi po Bvuta.” No usi wo kutambujwa kwavo unozopwititika mbhera narini, navo avana kuzorora masikati no usiku vanodira chikara no muezaniso wacho, no uwo unoashira chivoniso cho zina racho. Pano ndipo pano kusengerera kwo vakacheneswa, vanongwarira mipango no kugonda kuna Jesu. Ndakazwa izwi rechibva mugore, rechiti: “Tara: Vanomuchena vakafa, vanofira kuna Mambo, kubvira zvinopano.” Eya unonanga Mweya, kuti: “Vazorore kubva kumishando yavo, ngokuti mishando yavo inovatevera.” Ndakaringira, ndikavona gore rakachena no panyezuru po gore ndakavona umwe wakadari ngo Mwana wo Mundhu, echigara apo, ano junguja ro mukore pa musoro wake, no munyara mwake ano sikeyo inopinja. No ngirosi imweni yakabuda, muthemperi yechidanijira ngo izwi guru kwaari wakagara panyezuru po gore, yechiti: “Tuma sikeyo yako, ucheke, ngokuti mukuvo wo kucheka waguma; ngokuti zvokukotora zvo nyika zvayibva.” No uwo wakagara panyezuru po gore wakakandira sikeyo yake no nyika, yakakotohwa. No ngirosi imweni yakabuda muthemperi riri mugore, nayo yayiva no sikeyo inopinja. No imweni ngirosi yakabuda kubva paaltari, ino simba panyezuru po muriro; yakadanijira ngo izwi guru kuno iyo ina sikeyo inopinja, yechiti: “Tuma sikeyo yako inopinja, uunganije zvikore zvo mivhini yo nyika; ngokuti mavhini ayo aibva aembho.” Ngirosi yakakandira sikeyo yayo mu nyika, ikaunganija mavhini onyika, ikaakandira muchisviniro cho vhini, cho ushungu hwa Mwari. No chisviniro cho vhini chakatsikwatsikwa kunja kwo dhoropa, kwakabuda ngazi kubva muchisviniro cho vhini, ikagumira kumatomu omahachi, no kureba kwayo kwayita makiromitha mazana matatu (300). Ndakavona chivoniso chimweni mugore, chikuru chinoshamisa, ngirosi nomwe jino mumatambujiko manomwe, ayiva okugumisira, ngokuti ngaaya hunozoperera ushungu hwa Mwari. Ndakavona kudari ngo jombe ro girazi, rakavhenganijwa no muriro; navo vakanyisa chikara no muezaniso wacho no chiverengo cho zina racho, vaiyima phedo po jombe ro girazi, vano zvidyangari zva Mwari. Vaiyimba nduyo ya Mosi, muranda wa Mwari, nduyo yo Bvuta, vechiti: “A Mambo Mwari, Unosimbarese, mishando yenyu mikuru, no inoshamisa; no njira jenyu jiri jakarurama, jino gwinyiso, iwewe Mambo wo majinja. Ndiyani usikazokutyi, no kukuja zina rako? A Mambo, ngokuti iwewe wega wakachena; ngokuti zviito zvako zvakarurama zvakapangijihwa.” Ngosure kwo izvi ndakavona themperi ro tende ro uchapupu hwakabewuhwa mugore. No ngirosi nomwe ijo jayiva no matambujiko manomwe jakabuda mu themperi, jakasimira machira akachena, anon'anikira, jakasunga pamaditi ajo ngo mabhande omukore. No chimwe cho zvisikwa zvirongomuna zvinopona chakapa ngirosi nomwe mikheyo minomwe yo mukore yakazara ngo ushungu hwa Mwari, unopona mbhera narini. No themperi rakazara ngo usi wayibva muuthende hwa Mwari no musimba rake, akuna waikona kunghwina muthemperi mbhera matambujiko manomwe o ngirosi nomwe ayinga apera. Neni ndakazwa izwi guru rechibva muthemperi rechiti, kuno ngirosi nomwe: “Endanyi mwodururira mikheyo minomwe yo ushungu hwa Mwari mu nyika.” No yokutanga yakaenda, ikadurura mukheyo wayo mu nyika; kwakavapo mavonje akashata naanohwaja panyezuru po vandhu vayiva no chivoniso chechikara, vakadira muezaniso wacho. No yochipiri yakadururira mukheyo mujombe; rakaita ngazi inonga yo mundhu wakafa; no zviro zvese zvayiva mujombe zvakafa. No yochitatu yakadururira mukheyo wayo mumurambo no zvinyuka zvo kumwa, nazvo zvakaita ngazi. Ndakazwa ngirosi yo mukumwa, yechiti: “Wakarurama, iwewe uripo no waindovapo, iwewe Wakachena, ngokuti wakatonga kudaro. Ngokuti vakaparaja ngazi yo vakacheneswa no yo vaprofeti, wakavapa ngazi kuti vamwe; ngokuti vanosisihwa ndizvo.” Ndakazwa izwi rechibva paaltari rechiti: “Eya, A Mwari Unosimbarese, zvitongero zvako zvino gwinyiso no kururama.” No yo chirongomuna yakadururira mukheyo wayo panyezuru po zuva; rakapuwa simba ro kupisa vandhu ngo muriro. No vandhu vakapiswa ngo kupisa kukurutu: Vakatuka zina ra Mwari uno simba panyezuru po aya matambujiko. Avazivi kutenderuka kuti vamukuje. No yochishanu yakadururira mukheyo wayo panyezuru po dendemaro rechikara; no umambo hwacho hwakasvipiswa, vakachenga marurimi avo ngo ndava yo kuhwajihwa kwavo. Vakatuka Mwari wo mugore ngo ndava yo kuhwajihwa kwavo, no mavonje avo; avazivi kutenderuka kubva kumishando yavo. No yochitandhatu yakadururira mukheyo wayo panyezuru po murambo mukuru, Ufrati: No kumwa yawo yakapwa, kuti njira inasirihwe yo majimambo aibva kumabvazuva Ndakavona mweya mitatu yakasvipiswa yakadari ngo machehe, yechibuda mumiromo wo dragoni no wo chikara, no wo muprofeti wo kunyepa. Ngokuti ndiyo mweya yo mabzoka inoita mivoniso, inobuda kuenda kumajimambo onyika jese, kuaunganija pamwepo kuenda ku imbi yo zuva guru ra Mwari Unosimbarese. Vonayi, ndinoviya kudari ngo mbavha, unomuchena unorinda no kungwarira zvo kusimira zvake, kuti asazofamba ari mitu, no vandhu vavone kupsheruka kwake. Nayo yakavaunganija pamwepo kundau inozwi ngo chihebheru, Hamagedhoni. No yochinomwe yakadururira mukheyo wayo mumweya; kwakabuda izwi guru muthemperi, rechibva kudendemaro, rechiti, zvapera. Kwakavapo kurazva kwo mbheni, no mazwi no kutindhira, kwakavapozve kuzungunyika kukurutu kwo nyika, kusikazivi kumbovapozve kwakadaro kubvira pakusikwa kwo vandhu panyika, no kuzungunyika kwakakura kwo nyika kwakadari. No dhoropa guru rakaguhwa kuyita marupande matatu, no madhoropa ovomajinja akawa: No Bhabhurona guru rakacherechejwa pamberi pa Mwari, kuti ripuwe tsani yo vhini rokutyisa kwo ushungu hwake. No zvirundu zvese zvakatiza, no matundhu aazivi kuvonekazve. No matarara makuru akabva mugore akawira panyezuru po vandhu no kurema kwao inga kwakadari ngo tarenta, no vandhu vakatuka Mwari ngo ndava yo dambujiko ro matarara; ngokuti dambujiko rao inga rakakura kakurutu. Yakaviya imwe yo ngirosi nomwe jayiva no mikheyo minomwe, ikavereketa neni, yechiti: “Viya pano, ndinozokupangijira kutongwa kwo hure huru inogara pakumwa zhinji.” Yovakaomba nayo majimambo onyika, no vanogara mu nyika vakarejera ngo vhini ro kuomba kwayo. Nayo yakanditora kuenda neni mubani mu mweya, ndakavona mwanakaji wakagara panyezuru po chikara chakapshuka, chakazara ngo mazina okutuka, china musoro minomwe no nyanga jiri gumi. No mwanakaji wakasimira zvakapshukuruka no zvakapshuka, no kunemeswa ngo mukore no mapuwe ano mutengo mukuru, no usanga, munyara mwake mwayiva no shani yo mukore yakazara ngo zvinonyangaja, zvina svina yo kuhura kwake. No pa huma pake pakatahwa zina, rokuti: CHAKAFISHIKA, BHABHURONA GURU, MAI WO MAHURE NO ZVINONYANGAJA ZVO NYIKA. Neni ndakavona mwanakaji arejera ngo ngazi yo vakacheneswa, yo zvapupu zva Jesu. Naapo ndakamuvona, ndakashama ngo kushamiswa kukurutu. No ngirosi yakati kwendiri: Washamiswa ngenyi? Ndinozokubvunja chakafishika cho mwanakaji, no chochikara, chinomutwara, chino musoro munomwe no nyanga jiri gumi. Chikara chowavona chayivapo, apachina, choda kukwira kubva murindi rakajikisisa, no kuenda mukurashwa. Naavo vanogara mu nyika, mazina avo asikazivi kutahwa mutshamba yo kupona kubvira mukusikwa kwo nyika, vanozoshamiswa apo voovona chikara chayivapo, kuti achisipo, nokuti chichazoviya. Ndipo pano kupinimija kuno ungwaru, musoro minomwe iri matundhu manomwe, anogahwa ngo mwanakaji: Aripo majimambo manomwe; mashanu akawa, no umwe uchiripo, no umwe uchaviya; naapo aviya kunosisira kuti agare mukuvo mudoko. No chikara chayivapo, nazvino achisipo, chiri cho chisere, chimwe cho zvinomwe; chinoenda mukurashwa. No nyanga jiri gumi jo wavona, jiri majimambo ari gumi asati aashira umambo; asi anoashira simba kudari ngo majimambo pamwepo no chikara nguva imwe. Ao anomupinimijo umwe, anopa simba rao no kutonga kwao kuchikara. Anoambana no Bvuta, no Bvuta rinozoanyisa, ngokuti uri Mambo wo majimambo no Mutongi wo vatongi, naavo vanaye vanodanijwa, no kutsananguhwa, no kugondeka. Nayo yakati kwendiri: Kumwa yo wavona, apo panogara hure, ndivo vandhu, no zviunga, no majinja, no ndimi. No nyanga jiri gumi jo wavona, no chikara, zvinozonyenya hure, zvinozomuparaja, kuti ave mitu, zvinozoha nyama yake, zvimupise ngo muriro. Ngokuti Mwari wakadira izvi mumwoyo yavo kuyita kuda kwake, nokuva no mupinimijo umwe, nokupa umambo hwazvo kuno chikara, kumbhera mazwi a Mwari aitike. No mwanakaji wo wavona uri dhoropa guru iro rinotonga panyezuru pomajimambo onyika. Ngosure kwo izvi ndakavona ngirosi imweni yechibzuka kubva mugore, ino simba guru, no nyika yakajekiswa ngo uthende hwayo. Yakadanijira ngo izwi rino simba, yechiti: “Rawa, rawa, Bhabhurona guru, raaugaro hwo mabzoka, no ndau yo mweya yese ino svina, no yo shiri jese jino svina, no zvinonyenyiwa.” Ngokuti majinja ese akamwa vhini ro ushungu wo kuhura kwake, no majimambo onyika akaomba naye, no vatengesi vo nyika vakapfuma ngo simba ro uwandu hwo fuma yake. Ndakazwa izwi rimweni, rechibva mugore, rechiti: “Budanyi kwaari, vandhu vangu kuti musaiyana naye mukushaisha kwake, zve, kuti musazoashira matambujiko ake.” Ngokuti zvishaishi zvake zvaguma no mugore, na Mwari wakacherecheja kushata kwake. Mupei musharo kudari ngo zvaakamupa imwimwi, muhwirijire kaviri kwakapetwa kudari ngo mushando yake mushani iyo yaakazaja, mumuzajire kaviri. Kudari ngo uwandu kwaakajikuja ndihwo no kupona mukujidakajisa, ngokudaro mupirenyi dambujiko no kurija mbhere, ngokuti unoti mumwoyo mwake: “Ndinogara ndiri hosi, andiri shirikaji akadi, andizovoni mbhere.” Ndizvo matambujiko ake anozomugumira ngo zuva rimwe, kufa, no kurija mbhere, no njara, unozopiswa aembho ngo muriro; ngokuti Mambo Mwari, unomutonga, uno simba. No majimambo onyika, akaomba naye, no kupona echijidakajisa pamwepo naye, unozochema no kumurijira mbhere, apo echizoringira usi wo kupsha kwake. Echiyima ari kuretu ngokutya kutambujika kwake, echiti: “Ihehe, Ihehe, dhoropa guru Bhabhurona, dhoropa rakagwinya! Ngokuti ngo nguva imwe kutongwa kwako kwakugumira.” No vatengesi vo nyika vanomuchemera no kumurijira mbhere, ngokuti apana mundhu uchazotenga mijiyo yavo; mujiyo yavo, mukore no sirivha, no mapuwe ano mutengo mukuru, no usanga, no machira akanaka orukangaza, no akapshukuruka, no osirivha, no akapshuka; no mbewu jese jo miti yo mishizha, no mbewu jese jo mijiyo yo nyanga jo njou, no mbewu jese jo mijiyo zvakaitwa ngo miti ino mutengo mukuru, no zvithusi, no zvo utare, no mapuwe akachena. No sinamoni, no muamomona, no mutombo wo kupisa uno gwema, no mafuta okuzora, no maka no vhini, no mafuta, no upfu wakacheta, no koroni, no n'ombe, no mabvuta; no mujiyo jo mahachi, no jo ngoro, no jo hloko, no jo mweya yo vandhu. No michero yaiemurihwa ngo mweya wako yakabva kwouri, no zviro zvese zvainakisisa, no zvain'anikira zvakabva kwouri, no vandhu avachazozvivonizve. Vatengesi vo izvi vakayita maguruja ndiye, vanozoyima ndhambo ngokutya dambujiko rake, vechichema no kurija mbhere. Vechiti: Ihehe, ihehe, dhoropa guru raipfeka machira akanaka orukangaza naakapshukuruka, no akapshuka, rakanemeswa ngo mukore no mapuwe ano mutengo mukuru no usanga! Ngokuti ngo nguva imwe upfumi hwakakura kudaro hwaparajwa. No nduna jese jo ngarava, navo vese vaihluza kuenda nokuti ngo kwapi, no vahluzi, navo vese vairarama ngo kushanda mujombe, vakayima vari ndhambo, vakadanijira vechiringira usi wo kupsha kwake vechiti: Ngo rapi dhoropa ringaezaniswa no iri dhoropa guru? Navo vakakandira bukuta panyezuru pomusoro yavo, vakadanijira vechichema no kurija mbhere, vechiti: Ihehe, ihehe, dhoropa guru mwovakaita maguruja vese vayiva no ngarava javo mujombe ngo zvinokosha zvake! Ngokuti ngo mukuvo mudoko wakaparajwa. Dakaranyi ngo ndava yake, iwewe denga, nemwi vakacheneswa, nemwi vapostori, nemwi vaprofeti; ngokuti Mwari wakamutongera kutonga kwenyu. No ngirosi ino simba yakamiruja buwe ro gwiyo rakakura, ikarikandira mujombe, yechiti: “Ngokuwa kwakakura kudaro Bhabhurona, dhoropa guru, rinozokandihwa pasi, arichazovoneki no padodoko.” No izwi ro variji vo zvidyangari, no ro vaembi, no ro vanorija minanzi, no revariji vo mbhayapaya, arichazozwiki mukati mwako, mbewu jo mishando, pikija ngouri ajichazovapo no padodoko mukati mwako; no izwi ro kukwiya arichazozwiki no padodoko mukati mwako; no kujeka kwo chibani akuchazojeki mukati mwako; no izwi ro mukwambo no ro murovohwa arichazozwiki mukati mwako, ngokuti vatengesi vako vayiva vazvare vo nyika, ngokuti majinja ese akachengejehwa ngo kuroya kwavo. No mukati mwake mwakavoneka ngazi yo vaprofeti no yo vakacheneswa, no yo avo vese vayinga vakaurawa mu nyika. Ngosure kwo izvi ndakazwa izwi guru, kudari ngo ro vandhu vazhinji mugore, rechiti: “Haleluya; ruponeso, no uthende, no simba, ngo zva Mwari wedu, ngokuti zvitongero zvake zvino gwinyiso, zvakarurama; ngokuti iye wakatonga hure huru yakashaishira nyika ngo kuhura kwayo, naye wakahwirijira ngazi yo varanda vake munyara mwake.” Ngo kwo chipiri vanoti: “Haleluya!”, no usi wake unopwititika mbhera narini. No vakuru vari makumi maviri no varongomuna, no zvisikwa zvirongomuna zvinopona, vakawa pasi, vakadira Mwari unogara padendemaro, vechiti, “Ameni; Haleluya!” No izwi rakabuda mudendemaro, rechiti: Kujanyi Mwari wedu, imwimwi mwese varanda vake, nemwi munomutya, vadoko no vakuru. Naapo ndakazwa kunonga izwi ro chiunga chakakura chinonga bope ro kumwa yakawanda, rinonga izwi ro mutindhiro uno simba, rechiti: “Haleluya!” Ngokuti Mambo Mwari wedu, Unosimbarese unotonga. Ngatidakare no kupfara kukurutu, ngatimupe mbiri, ngokuti muchadho wo Bvuta waguma no mukaji waro wakajinasirira. Wakatendehwa kuti ajisimije ngo machira akanaka, orukangaza, anojeka no akachena; ngokuti machira akanaka orukangaza ndizvo zviyito zvakarurama zvo vakacheneswa. Nayo yakati kwendiri: Tara, vanomuchena vakakokwa kuha kwo madeikoni kwo muchadho wo Bvuta. Nayo yakati kwendiri: “Aya mazwi ndiwo ogwinyiso a Mwari.” Ndakawa pasi potsoka jayo kudira. Yakati kwendiri: “Ngwara kuti usaita kudaro; ngokuti ndiri muranda pamwepo newe, no hama jako, jinobata uchapupu hwa Jesu: Dira Mwari. Uchapupu hwa Jesu uri mweya wo kuprofeta.” Ndakavona denga rakabewuka; vona, hachi rakachena, no uwo waigada waizwi Unogondeka, Uno Gwinyiso; naye mukururama unotonga no kuambana. No majiso ake ari murazvu wo muriro, no panyezuru po musoro wake pana majunguja akawanda. Wayiva no zina rakatahwa, risikazivikanwi ngo vandhu, asi iye ega. Naye wakasimira nguvo yakafafazwa ngo ngazi. No zina rake rinozwi: Izwi ra Mwari. No hondo jiri mugore jakamutevera jechigada mahachi akachena jakasimira machira akanaka orukangaza akachena no kusukika. No shoti inopinja inobuda mumuromo wake, kuti arove ndiyo majinja: Naye unozoatonga ngo ndonga yo utare, inotsikatsika chikamuriro cho vhini ro kutyisa kwo ushungu hwa Mwari Unesimbarese. Naye uno zina rakatahwa panyezuru po nguvo yake, no po mutezo yake, kuti: MAMBO WO MAJIMAMBO NO MUTONGI WO VATONGI. Ndakavona ngirosi yechiyima pazuva; yakadanijira ngo izwi guru, yechiti kune shiri jese jinomburuka mugore. Viyanyi muungane padhiri guru ra Mwari; kuti muhe nyama yo majimambo, no nyama yo nduna, no yo vandhu vano simba, no yo mahachi, no yo avo vanoagadha, no nyama yo vandhu vese, vakasununguka no vakasungwa, no yo vadoko no vakuru. Ndakavona chikara, no majimambo onyika, no hondo jao, jakaungana pamwepo kuti jiambane no uwo wakagadha hachi, no hondo yakezve. No chikara chakabatwa, no muprofeti wo kunyepa uwo wakashanda zvivoniso mukuvona kwacho, zvaakachengejera ndizvo avo vayinga vaashira chivoniso cho chikara, naavo vakadira muezaniso wacho: Ava vaviri vakakandihwa vapenye mugandwa ro muriro raibwaka ngo sorufa: No vamweni vakaurawa ngo shoti yo uwo waigadha hachi, ngo shoti yakabuda mumiromo wake; no shiri jese jakaguta ngo nyama yavo. Neni ndakavona ngirosi yechibzuka kubva mugore, ino mugogo wo rindi rakajikisisa no garagajero guru munyara yayo. Yakabata dragoni, nyoka yokare, iri Dhiabhorosi, na Dhiaborosi, ikamusunga chiuru (1.000) cho makore. Yakamukandira murindi rakajikisisa, ikarikonya, ikadira chinamiro panyezuru pake, kuti asazochengejerazve majinja, kumbhera chiuru cho makore (1.000) apera. Ngosure kwo izvi kunosisira kuti ambosununguhwa mukuvo mudoko. Ndakavona madendemaro, naavo vakagara panyezuru pao, no kutonga kwakapuwa kwavari; ndakavona mwoyo yo avo vakaguhwa musoro ngo ndava yo uchapupu hwa Jesu, na ngo ndava yo izwi ra Mwari, naavozve vasikazivi kudira chikara, nokuti muezaniso wacho, vasikazivi kuashira chivoniso pa huma javo no panyara pavo; navo vakararama, vechitonga na Kristu kupeja chiuru (1.000) cho makore. Vamweni vakafa avazivi kurarama mbhera makore ari chiuru (1.000) apera. Ukwu ndikwo kumuka kwo kutanga. Unodakajiswa no kucheneswa uno chikovaniswa mukumuka kwo kutanga. Panyezuru po ava kufa kwo chipiri akuna simba; asi vanozoita vapristi va Mwari no va Kristu, vanozotonga naye chiuru (1.000) cho makore. Naapo chiuru (1.000) cho makore chapera, Sathani unozosununguhwa kubva muguniya rake. Unozoenda kwoochengejera majinja ari kumarupande marongomuna onyika, ari Gogi na Magogi, kuaunganijira kurwa: Uwandu wavo hwakadari ngo musanga wo jombe. Vakakwira po kupambhama kwo nyika, vakatendeneja muchacha wo vakacheneswa, no dhoropa rinodikana: Kwakabzuka muriro wechibva mugore, ukavapeja. Na Dhiabhorosi uwo wakavachengejera, wakakandihwa mugandwa ro muriro no sorufa, muno chikara no muprofeti wo kunyepa; navo vanozotambujwa masikati no usiku mbhera narini. Ndakavona dendemaro guru rakachena, no uwo wakagara panyezuru paro, uwo nyika no denga zvakamutiza, azvivi kuzovonekazve no ndau yazvo. Ndakavona vakafa vakuru no vadoko, vakayima pamberi po dendemaro, no mabhuku akabewuhwa; no rimweni bhuku rakabewuhwa, riri bhuku ro kupona; no vakafa vakatongwa ngo izvo zvakatahwa mumabhuku, kudari ngo mishando yavo. No jombe rakabudisa vakafa vayiva mukati mwaro, no rufu no Haidhesi zvakabudisa vakafa vayiva mukati mwazvo, navo vakatongwa umwe ngaumwe kudari ngo mushando yake. No rufu no Haidhesi zvakakandihwa mugandwa ro muriro. Ukwu ndikwo kufa kwo chipiri, gandhwa ro muriro. Kuti mundhu wakawanika asikazivi kutahwa mubhuku ro kupona, wakakandihwa mugandwa ro muriro. Neni ndakavona denga ibza no nyika ipsha. Ngokuti denga rokutanga no nyika yokutanga zvakapinda, jombe inga kusina. Ndakavona dhoropa rakachena, Jerusarema ibza rechibzuka mugore, rechibva kuna Mwari, rakanasirihwa kudari ngo murovohwa wakanemesehwa mwamuna wake. Ndakazwa izwi guru rechibva kudendemaro, rechiti: “Vona, tende ra Mwari riri pakati po vandhu naye unozogara navo, navo vanozoita vandhu vake, na Mwari pachake unozova navo, echiita Mwari wavo.” Naye unozopukuta musoji yese kumajiso avo, no kufa akuchazovapo, nokuti chiriro, nokuti kuchema, zve, akuchazovapo kuhwajihwa, ngokuti zviro zvokutanga zvapinda. No uwo wakagara padendemaro wakati: “Vonanyi ndinoita zviro zvese kuti zviite zvipsha.” Naye wakati: Tara, ngokuti aya mazwi anogondeka, ano gwinyiso. Naye wakati kwendiri: “Zvaitika, ndiri Arifa na Omega, wokutanga no wokugumisira.” Ndinozopa kwaari unozwa nyota kumwa yo mwimbo yo kupona ngo nyasha. Iye unonyisa unozogara ndhaka yo zviro zvese, ndinozoita Mwari wake, naye unozoita mwana wangu. Asi vanotya, no vasikatendi, no vanonyangaja, no vaurayi, no vanoomba, no varoyi no vadiri vo muezaniso, navo vese vanyepi vanozova no chikovaniswa chavo mugandwa rinobwaka ngo muriro no sorufa, ndiko kufa kwochipiri. Yakaviya imwe yo ngirosi nomwe yo ijo jayiva no mikheyo minomwe ino matambujiko manomwe okugumisira; yakavereketa neni, yechiti: “Viya pano, ndinozokupangijira murovohwa, mukaji wo Bvuta.” Yakanditora mu Mweya kuenda ku dundhu guru rakareba, ikandipangijira dhoropa rakachena Jerusarema, rechibzuka mugore rechibva kuna Mwari. Rino uthende hwa Mwari: Kujeka kwaro kwayinga kwakadari ngo buwe rino mutengo mukuru aembho, rinonga buwe ro jasipa, rakaera kudari ngo rinokhazikira. Rino biravira guru rakareba; rino misuvo iri gumi na muviri, no pa musuvo pano ngirosi jiri gumi na mbiri; no mazina akatahwa panyezuru pajo, ari mazina ovana vari gumi na vaviri va Israeri. Kumabvazuva kwayivapo misuvo mitatu; na ngo kanjikazi kwayivapo misuvo mitatu; na ngo kakusi kwayivapo misuvo mitatu na ngo kumavirira kwayivapo misuvo mitatu. No kubiravira ro dhoropa rayiva no majiro ari gumi na maviri, no pa nyezuru pao payiva no mazina ari gumi na maviri ovapostori vari gumi na vaviri vo Bvuta. Iyo yakavereketa neni yayiva no njanga yo mukore, kupima dhoropa, no misuvo yaro, no biravira raro. No dhoropa rayiva no makhona marongomuna akaezana, no kureba kwaro kwakandodari ngo kupambhama kwaro: Yakapima dhoropa ngo njanga, rayiva masitadiyo zviuru gumi na zviviri (12.000): Kureba kwaro, no kupambhama, no ukwiri hwaro, hwayiva hwakaezana. Nayo yakapima mapiravira aro, rayiva makumbiti ari zana no makumi marongomuna na marongomuna (144), kudari ngo kupima kwo mundhu, kunoti, kwo ngirosi. No mapiravira aro akavakiwa ngo jasipa, dhoropa rayiva ro mukore wakaera, wakadari ngo girazi rakaera. Majiro omapiravira wo dhoropa akanemeswa ngo mbewu jese jo mapuwe ano mutengo mukuru. Jiro rokutanga rayiva ro jasipa; no rochipiri rayiva sapifiro; rochitatu rayiva ro karikedhoni; no rochirongomuna rayiva ro simaragidho, rochishanu rayiva ro saradonuki; no rochitandhatu rayiva ro saradhiyo; no ro chinomwe rayiva ro krusoriti; no ro chisere rayiva ro bheruri, no rochipfumbamwe rayiva ro topazi; ro chigumi rayiva ro krusoprasi rochigumi na rimwe hwakinte; no rochigumi na maviri rayiva ro ametusito. No misuvo iri gumi na muviri yayiva yo usanga iri gumi na muviri; umwe ngaumwe wo misuvo wayiva wo usanga umwe: No gwanja ro dhoropa rayiva ro mukore wakaera, unonga girazi rakaera. Neni andizivi kuvona themperi mukati mwaro, ngokuti Mambo Mwari Unosimbarese, no Bvuta vari themperi yaro. No dhoropa aritami zuva, nokuti mweji kurijekisa, ngokuti uthende hwa Mwari wakarijekisa, no Bvuta riri chibani charo. No majinja anozofamba ngo kujeka kwaro: No majimambo onyika anozozisa uthende hwao mukati mwaro. No misuvo yaro aizokonyiwi masikati, ngokuti ahuzovapo usiku: Navo vanozozisa uthende no kureremejwa kwo majinja mukati mwaro. Asi akuna nachimwe chakasvipiswa chinozonghwinemwo nokuti uwo unoyita chinonyangaja no manyepo: Asi avo vega vakatahwa mubhuku ro kupona ro Bvuta. Apo yakandipangijira murambo wakaera wo kumwa yo kupona, wakaera kudari ngo girazi, wechibuda mudendemaro ra Mwari no ro Bvuta. Pakati po gwanja raro, no kumarutivi ese omurambo, kwayivapo muti wo kupona, wo chibereka mbewu jiri gumi na mbiri jo michero, wechibereka michero yawo mweji yese: No masakani omuti ayiva okurapa majinja. Akusazovapozve chinonyangaja: No dendemaro ra Mwari no ro Bvuta anozovapo mukati mwaro, no varanda vake vanozomushandira; vanozovona hope yake, no zina rake rinovapo pa huma javo. Akuchazovapo usiku; navo avazotami kujeka kwo chibani, nokuti kujeka kwo zuva, ngokuti Mambo Mwari unozovapa kujeka: Vanozotonga mbhera narini. Nayo yakati kwendiri: Aya mazwi anogondeka, ano gwinyiso na Mambo Mwari wo mweya yo vaprofeti wakatuma ngirosi yake kuti ipangijire varanda vake zvinosisira kuti zvikasire kuitika: “Vona, ndinokasira kuviya, Unomuchena uwo unongwarira mazwi okuprofeta kwo iri bhuku.” Inini Johani ndakazwa ndikavona izvi. Naapo ndazwa no kuvona, ndakawa pasi kudira pamberi po tshoka jo ngirosi yakandipangijira izvi. Nayo yakati kwendiri: “Ngwara kuti usaita kudaro: Ndiri muranda pamwepo newe, no wo hama jako vaprofeti, no wo avo vanongwarira mazwi okuprofeta kwo bhuku iri; dira Mwari.” Yakatizve kwendiri: “Usakonya mazwi okuprofeta kwo bhuku iri; ngokuti mukuvo waaphedo. Iye usikazivi kururama ngaagare asikazivi kururama; no uwo uno svina ngaagare ano svina; no uwo wakarurama ngaagare wakarurama; no uwo wakacheneswa ngaagare wakacheneswa. Vona, ndinokasira kuviya, no musharo wangu uneni, kuti ndipe mundhu wese kudari ngo mushando wake. Ndiri Arifa na Omega, wokutanga no wokugumisira, muambi no mupejisiri. Vanomuchena avo vanosuka nguvo javo, kuti vakone kuviya kumuti wo kupona, no kunghwina ngo pamisuvo mu dhoropa. Ngokuti ngo kunja kuno imbhwa, no vanoroya, no vanoomba, no vaurayi, no vadira muezaniso, navo vese vanodira no kuyita kunyepa. Inini Jesu ndakatuma ngirosi yangu kupupura izvi kwomuri mu zviara. Ndiri miji, no ruji rwa Dhavhidha, ndhondo inojeka masase.” No Mweya no murovohwa vanoti: “Viya!” No uwo unozwa ngaati: “Viya!” Naye unozwa nyota, ngaaviye: Uwo unoda ngaatore kumwa yo kupona ngo nyasha. Ngokuti ndinopupura ku mundhu wese unozwa mazwi okuprofeta kwo bhuku iri. Kuti uripo mundhu unozonyengejera kuzviro izvi, Mwari unozonyengejera kwaari matambujiko akatahwa mubhuku iri: Nokuti aripo mundhu unozopungura mazwi obhuku ro kuprofeta uku, Mwari unozobvisa chikovehwa chake kumuti wo kupona, no kudhoropa rakachena, izvo zvakatahwa mubhuku iri. Iye unopupura izvi unoti: “Eya ndinokasira kuviya.” Ameni, viya Mambo Jesu. Nyasha ja Mambo Jesu ngajive nemwi mwese.